བོད་ཡིག

e-texts based on the ACIP/ALL Input

@#/ /rgya gar skad du/ tring sha ta kA tikA byA khyAn/ bod skad du/ tshig le'ur byas pa sum brgya ba'i rnam par bshad pa/ byang chub sems dpa' 'jam dpal gzhon nur gyur pa la phyag 'tshal lo/ /bde gshegs bslab pa tshad med yon tan dpag tu med ldan pa dag blangs nas skyong byed cing / /bstan bcos rnam pa sna tshogs pa la mngon par sbyor bas blo gros ngan pa rab spangs pa/ /sgra rnams nyes pa ma lus bsal zhing dga' ba'i tshig mchog legs par sbyar ba don mchog dang / /mdo sde chos mngon bstan bcos rigs mang 'dul bas thams cad yod smra rtsa bar gyur pa rgyal gyur cig / 'gro gzhan ma lus pa yi don mdzad nas/ /thams cad mkhyen pa'i grub mchog brnyes gyur pa'i/ /bde gshegs de la spyi bos phyag 'tshal lo/ /dge tshul tshig le'ur byas pa rnam dbye bya/ /ji ste tshig le'ur byas bshad gzhag mdzad kyang / / de ni dge tshul dag la mchog min pas/ /don 'di rnam par dpyad nas bdag gis ni/ /slob ma la phan rgyas bshad byas pa yin/ /de la gzhi thams cad yod par smra ba'i slob dpon gyis mngon par 'dod pa'i rgyu mtshan bcom ldan 'das la phyag 'tshal ba sngon du 'gro ba can gyi spyod pa yang dag par bsdu bar bzhed nas/ dpal 'byor gnas dang zhes bya ba la sogs pas tshig le'ur byas pa brtsams pa yin te/ de la nges par 'byung ba'i tshul khrims bshad par bya zhes bya ba'i bshad pa 'di sbyar bar bya'o/ /de la 'gro bas byung ba ste byung ba zhes bya ba dngos po sgrub par byed pa gzung gi 'dis 'gro bar byed pas na zhes bya bar ni ma yin te/ byung ba ni 'dir thob pa la bya'i 'gro bar byed pa la ni ma yin no/ /ci'i phyir zhe na/ lam dang 'gro bar byed pa de dag ni gtso bo ma yin pa nyid kyi phyir ro/ /lhag ma ma lus par byung ba ni nges par 'byung ba ste/ yang phyir mi ldog pa dang khams gsum pa las shin tu 'das pa'i mtshan nyid yin pas zhes bya ba'i bar du'o/ /de bas na 'dis ni phung po lhag ma med pa'i mya ngan las 'das pa'i dbyings yang dag par thob par bstan pa yin no/ /de'i don nam de'i rgyu mtshan nam de thob par byed pa'i tshul khrims ni nges 'byung tshul te/ phung po lhag ma med pa'i mya ngan las 'das pa'i dbyings thob par byed pa zhes bya ba'i bar du ste/ /de ni don bshad pa yin no/ /bsdu ba nyid ni nges par 'byung ba 'am/ nges par 'byung ba'i tshul khrims ni nges par 'byung ba'i tshul te/ tshul khrims des bya ba de ni de'i don kho na yin pa'i phyir ro/ /tshul khrims kyang 'dir dge sbyong gi bslab pa'i gzhi la bya'o/ /ci zhig byas nas bshad par bya zhe na/ sangs rgyas la ni mgos gtugs zhes bya ba smos te/ /dngos po ma lus pa thugs su chud pa'i phyir sangs rgyas sam mi shes pa'i gnyid las sad pa'i phyir sangs rgyas te/ /skyes bu gnyid sad pa bzhin no/ /de bas na sangs rgyas bcom ldan 'das de la phyag btsal nas so/ /cis she na/ mgos zhes smos te spyi bos so/ /'di skad du de bzhin gshegs pa la yan lag gi mchog mgo bos mngon par gtugs te nges par 'byung ba'i tshul khrims bshad par bya'o zhes bstan pa yin no/ /khyad par ji lta bu dang ldan pa'i nges par 'byung ba'i tshul khrims zhe na dpal 'byor gnas dang zhes bya ba smos te dpal gyi 'byor pa ni dpal 'byor te/ 'byor ba ni phun sum tshogs pa ston par byed pa yin no/ /de'i gzhi dang rten dang rgyu dang gnas yin pas sa dang 'dra bar gnas yin no zhes bya ba de'i phyir de bshad par bya'o zhes bya bar sbyar ro/ /'dis ni 'dir tshangs pa la sogs pa mngon par mtho ba'i mtshan nyid kyi chos kyi rgyu yin no zhes bstan par 'gyur ro/ /tshul khrims kyis de dag thob pa yin no zhes byas nas yang tshul khrims de khyad par du byed do/ /tshul khrims gang gis phung po lnga'i bdag nyid kyi sdug bsngal spangs shing bsal te bor ba de ni sdug bsngal spong 'gyur ro/ /phung po lnga yang 'dir gzugs kyi phung po dang / /tshor ba'i phung po dang / 'du shes kyi phung po dang / 'du byed kyi phung po dang / rnam par shes pa'i phung po zhes bya'o/ /de dag nyid sdug bsngal yin te/ sdug bsngal gsum nyid dang 'brel ba'i phyir ro/ /ci 'dis ni phung po lhag ma med pa'i mya ngan las 'das pa'i rgyu yin no zhes bshad pa yin no/ /tshul khrims de khyad par ci lta bu zhe na/ 'jig tshogs lta ba zhes bya ba smos te/ 'jig par byed/ nyams par byed/ zad par byed pas na 'jig pa'o/ /tshogs ni phung po yin no/ /'jig pa yang de yin la tshogs kyang de yin pas 'jig tshogs te/ don gcig gi sgo nas khyad par du byed pa zhes bya ba'i bsdu ba yin no/ /'jig tshogs su lta ba ni 'jig tshogs lta ba'o/ /lta ba ni phyogs te shes rab kyi khyad par yin/ /ji ltar yang spyi nyid kyi sgo nas de skad du bshad pa de lta na yang bdag dang bdag gi rnam par rab tu 'jug pa'i shes rab kho na 'jig tshogs su lta bar bshad pa yin te/ bka' las kyang gsungs pa'i phyir ro/ /gdon ni sha za la sogs pa ste gdon dang 'dra bas gdon te/ gso dka' ba nyid yin pa'i phyir ro/ /'jig tshogs la lta ba yang de yin la gdon yang de yin pas na 'jig tshogs lta la zhen pa'i gdon no/ /rtsa ba ni rgyu la bya ste 'jig tshogs lta la zhen pa'i gdon yang yin la rtsa ba yang yin pa'i phyir 'khor ba'i 'jig tshogs lta la zhen pa'i gdon gyi rtsa ba'o/ /de bas na tshul khrims de ni de 'joms par byed pa'i phyir 'jig tshogs lta la zhen pa'i gdon gyi rtsa ba 'joms pa'o/ /'dis kyang 'di skad du tshul khrims de ni phung po lhag ma dang bcas pa'i mya ngan las 'das pa'i dbyings kyi rgyu yin no zhes bstan pa yin te/ gang gi phyir 'jig tshogs su lta ba las nyon mongs pa rab tu skye ba de'i phyir de spangs pas nyon mongs pa thams cad spang bar 'gyur ro/ /yang na de spangs ma thag tu gzhan 'dod chags la sogs pa 'ga' zhig ni dus mnyam du 'ga' zhig ni rim gyis phyis spong bar 'gyur ba de bas na gdon mi za bar mya ngan las 'das pa'i rgyu yin no/ /gang gi phyir bdag med par bstan pas ni thob pa yin na dge sbyong gi tshul khrims kyis ji ltar thar pa thob par 'gyur zhe na/ de la nyes pa med de/ gang gi phyir tshul khrims la gnas nas thos pa dang bsam pa dang ldan pa bsgom pa la rab tu sbyor ba de las rim gyis ye shes skye bar 'gyur ba'i phyir brgyud pas mya ngan las 'das pa gnyis kyi rgyur 'gyur te/ phung po'i bdud las rgyal ba dang / gnyis pas nyon mongs pa'i bdud las rgyal ba bstan pa yin no/ /gzhan yang me tog mda' 'joms zhes bya ba la sogs pas nges par 'byung ba'i tshul khrims khyad par du byed de/ /me tog dang 'dra ba'i mda' gang la yod pa de ni me tog mda' can te 'dod pa'i lha yin la/ de bcom pa ni pham pa yin no/ /de'i rgyu nyid yin pa'i phyir tshul khrims de ni me tog mda' 'joms so/ /gang gi phyir de la gnas nas lha'i bu'i bdud kyi yul yongs su spangs pa'i phyir de pham par byed par 'gyur te/ 'dis kyang lha'i bu'i bdud las rgyal ba'i rgyu nyid yin par bstan to/ /yang na khyad par de dag bcom ldan 'das nyid kyi yin gyi nges par 'byung ba'i tshul khrims kyi ni ma yin te/ de la sangs rgyas la ni mgos gtugs nas/ nges par 'byung ba'i tshul khrims bshad par bya'o zhes bya bar sbyar ro/ /khyad par ji lta bu dang ldan pa'i sangs rgyas bcom ldan 'das she na/ dpal 'byor gnas dang zhes bya ba smos te/ dpal gyis 'byor ba ni dpal 'byor yin la/ de yang rnam pa gnyis te/ bsod nams kyi tshogs kyi mtshan nyid dang / ye shes kyi tshogs kyi mtshan nyid do/ /de'i gnas ni gzhi ste/ sangs rgyas bcom ldan 'das bsod nams dang ye shes kyi tshogs dang yang dag par ldan pa nyid kyi phyir ro/ yang na bcom ldan 'das ni 'jig rten pa dang 'jig rten las 'das pa'i dpal 'byor ba'i gnas te/ 'byung ba'i gnas yin no/ /gang gi phyir bcom ldan 'das bsod nams kyi zhing bla na med pa la brtsams nas sbyin pa dang mchod pa la sogs pas de dag thob par 'gyur ba de nyid kyi phyir bcom ldan 'das rkang gnyis kyi mchog bsod nams kyi zhing zhes bya'o/ /gzhan yang sdug bsngal spong 'gyur zhes bya bas khyad par du byed de/ bcom ldan 'das gang gis 'khor ba'i sdug bsngal spangs shing bsal ba de ni sdug bsngal spong 'gyur te/ gang gi phyir bcom ldan 'das ni bsod nams kyi tshogs dang ldan pa nyid kyi phyir sku'i bde ba mnga' la/ ye shes kyi tshogs dang yang dag par ldan pa nyid kyi phyir thugs kyi bde ba mnga' ba de'i phyir sdug bsngal spangs par gyur pa yin no/ /yang na bcom ldan 'das gang gis phung po lnga'i bdag nyid kyi sdug bsngal spangs pa de ni sdug bsngal spong 'gyur ro/ /'dis kyang phung po lhag ma med pa'i mya ngan las 'das pa'i dbyings thob par bstan pas bcom ldan 'das la bstod par 'gyur la/ snga mas ni bsod nams dang ye shes kyi tshogs dang yang dag par ldan pa'i sgo nas bstod pa yin no/ /gzhan yang 'jig tshogs lta la zhes bya ba la sogs pas bcom ldan 'das khyad par du byed de/ sems can rnams kyi 'jig tshogs su lta ba'i gdon gyi rtsa ba 'joms par mdzad pa'i phyir 'jig tshogs lta la zhen pa'i gdon gyi rtsa ba 'joms pa ste/ bdag nyid kyi 'jig tshogs su lta ba spangs pa med par 'jig rten gyis mi nus pa'i phyir shugs kyis bcom ldan 'das ni 'jig tshogs su lta ba spangs par bstan par 'gyur ro zhes de dag ma lus pa ni tshig gcig po 'dis bshad pa yin no/ /gzhan yang me tog mda' 'joms zhes bya bas khyad par du byed de/ lha'i bu gang la me tog gi mda' yod pa de 'joms pa'i rgyu nyid yin pa'i phyir na/ bcom ldan 'das ni me tog mnga' 'joms te/ bcom ldan 'das kyis lha'i bu'i bdud 'khor du ma can byams pas pham par mdzad pa'i phyir ro/ /lhag ma ni snga ma bzhin no/ /da ni gang zhig srog gcod ces bya ba la sogs pas bshad ma thag pa'i nges par 'byung ba'i tshul khrims kyi rang gi ngo bo 'chad par byed de/ ldog par byed pas na ldog pa ste so sor ldog pa zhes bya ba'i bar du'o/ /so sor 'jug pas na nges par 'byung ba'i tshul khrims te srog gcod pa la sogs pa las ldog pa gang yin pa de ni tshul khrims yin no zhes bya bar sbyar ro/ /da ni gang dag las ldog pa de bshad par bya ste/ srog ces bya ba ni 'tsho ba'i mtshan nyid can gyi chos yin la/ de gang la yod pa de ni srog chags so/ /de gcod pa ni 'gog par byed pa yin te/ rten nyams par byed pa de ni srog gcod pa yin pas de las so/ /gzhan gyi nor ni gzhan gyi gter te gzhan gyi rdzas zhes bya'o/ /de 'phrog par byed pas na 'phrog pa ste de las so/ /tshangs pa'i sgra ni mya ngan las 'das pa yin la/ de'i ched du spyod pa ni tshangs par spyod pa ste bsdu ba ni nges par 'byung ba'i tshul khrims dang 'dra'o/ /tshangs par spyod pa ma yin pa ni mi tshangs par spyod pa ste/ de las bzlog pa'o/ /ji ltar yang srog gcod pa la sogs pa spyir gzung bar bya ba yin pa de lta na yang grags pas 'khrig pa'i chos kho na la gzung bar bya'i gzhan la ni ma yin no/ /de nyid kyi phyir bcom ldan 'das kyis so sor thar pa las mi tshangs par spyod pa zhes gsungs pa de bas na de las so/ /brdzun ma yin pa ni bden pa yin la bden pa ma yin pa ni brdzun pa ste de las so/ /bcos chang ni myos par byed pa'i khyad par yin te/ de dang por byas pa'i sbyar ba'i chang la sogs pa gang yin pa de ni bcos chang la sogs pa ste de las so/ /gang dang por byas pa'i glu la sogs pa gang yin pa de ni gar sogs so/ /phreng ba dang por byas pa'i kha dog 'chang ba la sogs pa gang yin pa de ni phreng sogs so/ /chen po yang de nyid yin la mthon po yang de nyid yin pas na che mtho'o/ /che mtho yar yin la mal stan yang yin pas na mal stan che mtho'o/ /mal stan gyi sgra ni khyad par gyi gzhi yin la che mtho'i sgra ni khyad par yin te/ khyad par gyi gzhi de yang spyir mal stan dang chen po dang / mthon po la yang 'jug pa de bas na khyad par dang khyad par gyi gzhi gzhi gcig pa yin no/ /de'i phyir yang mal stan chen po dang / mal stan mthon po zhes bya ba'i don du 'gyur ro/ /dus ma yin pa'i zas ni phyi dro'i zas so/ /de la 'di ltar gar la sogs pa dang / phreng ba la sogs pa dang / mal stan che mtho dang / phyi dro'i zas zhes gang du bya ste zlas dbye ba'i don la tshogs pa gtso bor gyur pa la gcig bzhin du 'gyur ba dang ma ning gi rtags su 'gyur ro/ /dngul las byung bas na dngul ni rin po che gzhan gyis nye bar mtshon pa yin no/ / de bas na bslab pa'i gzhi bcu po de dag las ldog pa gang yin pa de ni nges par 'byung ba'i tshul khrims yin no zhes bya ba'i don 'dir 'gyur ro/ /da ni/ de ni dge tshul brtul zhugs chu lon brtsigs/ /zhes bya ba la sogs pas ldog pa'i khyad par du byed de/ dge tshul gyi brtul zhugs ni dge tshul gyi brtul zhugs so/ /de gang zhe na khyim pa'i rtags yongs su spong ba sngon du 'gro ba can gyi rab tu byung ba'i rtags yang dag par len pa'o/ /chu lon brtsigs pa dang 'dra bas na de'i chu lon brtsigs pa'o/ /de gang zhe na ldog pa yin te/ ji ltar chu la mi 'gro bar bya ba'i phyir chu lon brtsigs pa de ltar brtul zhugs rjes su bsrung bar bya ba'i phyir sdom pa yin no/ /de khyad par ji lta bu dang ldan zhe na/ smras pa/ mthar byed pa ni srog gtong ba'i mtshan nyid kyi 'chi ba yin pa'i phyir mthar byed pa'o/ /de'i 'chi ba ni so so'i khyad par yin no/ /de dbyung bar bya ba'i ched kyi thabs ni dbyung ba'i thabs te/ de nyid ldog pa yin te/ 'dis kyang 'chi bdag gi bdud pham par byed pa'i thabs su 'gyur ba yin no zhes bstan par 'gyur ro/ /gang gi phyir sdom pa la gnas na rim gyis thar pa thob pas 'chi bdag gi bdud pham par 'gyur ro/ /gzhan yang rdzogs pa'i byang chub ces bya ba la sogs pas de nyid khyad par du byed pa yin te/ rdzogs pa'i byang chub ni yang dag par rdzogs pa'i byang chub ste/ de nyid dpal yin la de mnod pa ste/ thob pa'i phyir dbang bskur ba dang / dbang gtod par byed ces bya ba'i bar du'o/ /gang gi phyir dge tshul la sdom pa sbyin pas sangs rgyas nyid kyi ched du dbang bskur ba yin no/ /byang chub rnam pa gsum gyi phyir dbang bskur ba ma yin nam/ de ci ltar na rdzogs pa'i byang chub dpal zhes bya ba la sogs pa smos she na/ de la nyes pa med de/ gang gi phyir gtso bo'i rgyu nyid du bstan pas byang chub gzhan dag gi rgyu nyid du yang bshad par 'gyur ro/ /de lta bur gyur pa'i ldog pa de ci'i phyir bcom ldan 'das ston par mdzad ce na/ nyon mongs dgra'i g.yul las zhes bya ba la sogs pa smos te/ nyon mongs pa ni 'dod chags la sogs pa'o/ /dgra ni dgra bo ste/ de nyon mongs pa'i dgra'o/ /de'i g.yul ni g.yul 'gyed pa ste de las rgyal bar byed pa yin no/ /de'i phyir bcom ldan 'das kyis nyon mongs pa'i dgra'i g.yul las rgyal bar byed par bstan pa yin no zhes bya ba ni tshig gi lhag ma'o/ /gang gi phyir sdom pa la gnas na rim gyis nyon mongs pa spar bar 'gyur ba'i phyir nyon mongs pa'i dgra'i g.yul las rgyal byed de/ 'dis ni sdom pa'i dgos pa bstan pa yin no/ /da ni nges par 'byung ba'i tshul khrims bshad par bzhed nas dang por spyir btang ba/ 'du shes gtso la ji bzhin don gyur na/ /zhes bya ba la sogs pas ston par byed do/ /bslab pa'i gzhi ni rnam pa gnyis te/ 'du shes gtso bor gyur pa dang / dngos po gtso bor gyur pa'o/ /de la dngos po gtso bor gyur pa gang yin pa de ni dngos po gtso bor gyur pa ste/ dngos po'i sgras nan tan du bya ba la sogs pa yod pa tsam la bya ste/ dper na mi tshangs par spyod pa lta bu'o/ /gang gi phyir 'du shes ma gtogs pa de dngos po tsam la kun du spyod pa yin pa'i phyir ro/ /cig shos kyang bslab pa'i gzhi gang dag 'du shes gtso bor gyur pa de ni 'du shes gtso bor gyur pa ste/ de yang srog gcod pa la sogs pa yin no/ /bslab pa'i gzhi de dag las 'das na cir 'gyur zhe na/ ji bzhin don 'gyur na zhes bya ba la sogs pa smos pa yin te/ 'du shes ji lta ba bzhin du don de bzhin du yod par gyur pa'i phyir/ ji bzhin don 'gyur te de'i dngos po ni don ji lta ba bzhin du gyur pa nyid do/ /de'i phyir 'du shes ji lta ba bzhin du gyur na nyes pa rdzogs par 'gyur ro/ /nyes pa'i sgras nyes byas rjod par byed de/ dper na srog chags dang bcas pa'i chu la srog chags dang bcas par 'du shes pas srog chags bsad par gyur na nyes byas sbom por 'gyur ba lta bu'o/ /ji bzhin don min chung bar 'gyur/ /zhes bya ba ni nyes pa chung ba ste/ / dman par 'gyur ro/ /gang gi tshe zhe na smras pa/ don ji lta ba bzhin ma yin pa ni ji bzhin min te/ 'du shes las don gzhan du gyur pa'o/ /de'i dngos po ni don ji lta ba bzhin ma yin pa nyid do/ /don ji lta ba bzhin ma yin pa nyid de la chung bar 'gyur ro/ /dper na srog chags med pa la srog chags dang bcas par 'du shes pas de nye bar longs spyod pa la sogs pa byas na nyes byas kyi ltung ba chung bar 'gyur ba lta bu'o/ /des ni nges par nyes par 'gyur ba bstan pa yin no/ /da ni/ yid gnyis dang ni 'du shes 'dra bar gzhag /ces bya bas yid gnyis kyi nyes pa ston par byed pa yin te/ yid gnyis ni the tshom du gyur pa'o/ /'du shes par byed pas na 'du shes te de dang 'dra bar gzhag pa ni nyes par rnam par gzhag pa'o/ /de la 'dir srog chags dang bcas pa'i tshul nges pas de nye bar spyod pa la sogs pa byas pa las nyes par 'gyur ba de bzhin du yid gnyis la yang 'gyur ro/ /'di ltar srog chags med pa'i chu la nges pas nyes pa chung ngur 'gyur ba ji lta ba de bzhin du yid gnyis la yang 'gyur ro zhes bya ba'i tha tshig go/ /da ni bslab pa'i gzhi thams cad kyi phyogs su gtogs pa'i spyi'i yid kyi nyes par 'gyur ba bshad par bya ste/ blangs pa ni yang dag par bzung ba'o/ /de dag gang zhe na/ srog gcod pa la sogs pa bslab pa'i gzhi bcu po dag yin no/ /gang gi phyir de dag ni des rab tu byung ba'i dus su blangs pa dag go/ /de dag gi phyogs su gtogs pa ni de dang cha 'dra ba yin te 'brum bu ma smin pa la sogs pa'i rang bzhin de las byung ba'i nyes pa 'das pa'i mtshan nyid de ni blangs par gtogs pa yin no/ /gang gi gang phyogs dang mthun pa yin pa de ni de nyid du ston par 'gyur ro/ /de bas na de dag yid kyi nyes par 'gyur ba yin pas yid kyir 'gyur ba ste/ sems kho nas phyir bslang bar bya ba gang yin pa de nyid kyi nyes par 'gyur ba yin no zhes bya ba'i don to/ /'di man chad bslab pa'i gzhi 'chad pa yin te/ de la nyes pa yang rnam pa gsum ste mthar 'gyur ba dang / nyes byas dang / yid kyir 'gyur ba'o/ /de la mthar 'gyur ba ni gang gis rnam pa thams cad du rab tu byung ba las nyams par byed cing slar yang gso ba'i skal ba med par 'gyur ba'o/ /nyes byas ni bshags pas 'dag par 'gyur ba'o/ /yid kyir 'gyur ba ni bstan pa yin no/ /de la mthar 'gyur ba ni mi gzhan zhes bya ba la sogs pas 'chad par byed de/ gang gis zhes bya bas ni dge tshul gyi skabs nyid yin pa'i phyir de dang sbyar ro/ /de bas na 'di ltar dge tshul gang gis mi gzhan la brgyab ste shi bar gyur na brlag par 'gyur ro zhes bshad pa yin no/ /brlag pa ni nyams par gyur pa ste/ rtsa ba'i nyes byas 'thob par 'gyur ro zhes bya ba'i don to/ /mi zhes smos pa ni dud 'gro la sogs pa rnam par bcad pa'i phyir ro/ /gzhan zhes smos pa ni bdag nyid rnam par gcad pa'i phyir ro/ /ci ji ltar yang rung bas sam zhe na/ 'du shes zhes bya ba smos pa yin te mi nyid du 'du shes pa ni mir 'du shes pa ste/ de kho nas yin gyi gzhan du ma yin no zhes bya ba'i tha tshig go/ /de 'dir smras pa/ gang gi tshe mi dud 'gro'i gzugs su rnam par gnas pa la dud 'gro'i 'du shes kyis bsad par gyur na nyes pa chung ngur 'gyur te mir 'du shes pa med pa'i phyir ro/ /de bzhin du dud 'gro mi'i gzugs su rnam par gnas pa la mir 'du shes pas bsad par gyur na yang nyes pa chung ba kho nar 'gyur te/ dngos su mi ma yin pa'i phyir ro/ /de nyid kyi phyir slob dpon yon tan 'od kyis don de nyid gzigs nas rgyud gzhan gyi rnam pa bsten pa bsad na zhes bshad pa mdzad pa yin no/ /de 'dir gzhan du gyur pas rang gi rgyud ma yin pa ma yin no zhes bya bas rang gi rgyud ma yin pa ma yin pa nyid ces bya ba rjes su 'jug par 'gyur bas rgyu gcig la gzhan pa'i rgyud ni rgyud gzhan yin la/ de'i rnam pa ni gzugs yin no/ /de bstan pa ni nyams su myong ba ste rang gi rgyud ma yin pa nyid yin no zhes bshad pa yin no/ / des cir 'gyur zhe na/ rang gi rgyud kho na yin te/ gang zhig rgyud gang gi yin pa'i rgyud de nyid yin no zhes bya ba'i don to/ /gang du zhe na/ bsad na zhes smos pa yin te/ srog gcod pa la'o/ /de bas na mi las cig shos kyi gzugs su rnam par gnas pa de la der 'du shes pas sam gzhan du 'du shes pas bsad par gyur na rtsa bar 'gyur la dud 'gro mi'i gzugs su gnas pa de la der 'du shes pa'am/ gzhan du 'du shes pas bsad par gyur na chung bar 'gyur ro/ /gal te de lta yin na de la ji ltar 'du shes gtso cher byad pa zhes bya zhe na/ sbyor ba'i nyes pa 'du shes kyi dbang gis rnam par gzhag pa yin pas 'du shes bslab pa'i gzhir brjod pa de nyid kyi phyir/ slob dpon gyis 'du shes sbyor ba'i yan lag yin no zhes mdor mdzad do/ /sbyor ba'i gnas skabs la 'du shes yan lag yin te/ 'du shes kyi dbang gis sbyor ba'i nyes byas su 'gyur ba de lta na 'du shes gtso cher byed pa bslab pa'i gzhir bshad pa yin no/ /gzhan dag nyes pa de spang ba'i phyir mi gzhan yin pa'am/ mer mer po la sogs pa zhes tshig le'ur byas pa rnam pa gzhan du 'don par byed do/ /'dir yang mi smos pa kho nas mer mer po la sogs pa gzung ba ma yin nam/ de yang smos pa don med do zhe na/ ma yin te mi smos pas ni skyes pa dang bud med dang ma ning dang mngal du zhugs pa skye mched drug dod pa gzung ba yin la/ mer mer po smos pas skye mched drug ma dod pa yin no/ /de nyid kyi phyir bcom ldan 'das kyis so sor thar pa las mi 'am mir chags pa zhes gsungs te/ mir chags pa'i sgras mer mer po la sogs pa bstan to/ /dge tshul khyad par ji lta bu zhe na/ tha mal pa dang zhes bya ba la sogs pa smos pa yin te/ tha mal pa ni rang bzhin du gnas pa ste/ smyos pa dang sems 'khrugs pa dang / tshor bas gzir bar ma gyur pa'o/ /gzhan yang de nyid khyad par du byed de/ sdom pa'i ngo bo'i bslab pa dang bcas pa'i phyir bslab bcas te gang gis gzhan rig pa'i skyes pa la bdag la bslab pa mi dgos so zhes bya ba la sogs pas bslab pa phul ba yin no/ /bsam pa ji lta bus she na/ gsod sems zhes bya ba smos te/ gsod sems ni srog gcod pa'i bsam pa ste brdeg pa'i bsam pas ni ma yin pa de'i phyir nges so/ /ci 'khrul pas kyang 'gyur ram zhe na smras pa/ 'khrul pa ni de kho na ma yin pa la de kho na nyid du rtogs pa ste/ de dang bral ba yin te dper na lhas byin gsad par bya'o snyam pas mchod sbyin ma bsams pa 'khrul pa'i dbang gis bsad par gyur na rtsa ba nyid du mi 'gyur ba lta bu'o/ /ci de tsam gyis bslab pa med par 'gyur ram zhe na/ brgyab ste mi shi na zhes bya ba smos pa yin te/ rgyu des de'i tshe 'am gzhan gyi tshe shi bar gyur na zhes bya ba'i tha tshig go/ /shi na zhes bshad pa 'dir yang bshad ma thag pa'i mi zhes bya ba khong du chud mod kyi/ de lta na yang mi smos pa gsal por bya ba'i phyir ro/ /ci rmi lam du yang 'gyur ram zhe na/ rmi lam ma gtogs pa zhes bya ba smos pa yin te/ rmi lam ma gtogs pa ni rmi lam spangs pa ste gzhan du'o/ /de ltar yang rmi lam gyis 'khrul pa langs nas gzhan bsad par gyur pa de yang dgag pa'i phyir smras pa yin te/ bdag nyid kyis rmi lam nyid kyi nang du gzhan bsad par gyur pa mthong yang mthar 'gyur ba'i nyes byas med pa yin no/ /tha mal pa zhes smos pas de yang khong du chud pa ma yin nam de ci'i phyir gzung zhe na/ 'dir smras pa/ 'ga' zhig gi rmi lam gyis bslad pa'i lus dang ngag gi kun du spyod pa la 'jig rten smos pa zhes mi smra ste/ de'i phyir logs shig tu smos pa yin no/ /da ni/ sngags sogs thabs rnams kyis kyang bsad gyur tam/ /zhes bya ba la sogs pas gzhan thabs kyis gsod par byed na mthar 'gyur ba ston te/ gsang sngags dang por byas pa'i thabs gang yin pa de ni sngags sogs thabs so/ /sogs pa smos pas 'jigs pa dang bcas pa'i phyogs su gtong ba la sogs pa bsdu'o/ /de bas na dge tshul gang de dag gis kyang mi gzhan bsad par gyur na de la yang tha ma ste/ rtsa ba'i nyes byas thob par 'gyur ro zhes bya ba'i don to/ /thabs rnams zhes mang po'i tshig tu byas pa ni thabs mang ba nyid kyi phyir ro/ /kyang gi sgra ni rang gi lag 'ba' zhig kho na ma yin no zhes bsdu ba'i don to/ /yang gi sgra gnyis pa ni sngar rang gi lag gis bsad na rtsa bar 'gyur ro zhes bya ba 'ba' zhig ma yin gyi/ gzhan gsod par sbyor ba la rjes su yi rang ba 'di yang 'gyur ro/ /gsod pa ste srog gcod pa la sbyor ba gang yin pa de la ngag gam lus kyi g.yo 'gul la sogs pas rjes su yi rang ba ste/ rjes su yi rang ba des gzhan gsod par 'gyur na de yang mthar 'gyur te/ dper na phan tshun gsod par byed pa la khyod kyi rtsom pa ni dge'o zhes ngag gis rjes su yi rang ba dang / lus kyis mtshon cha bstabs pa dang / tha na se gol brdabs pa lta bu'o/ /gal te yid kyis kyang gsod par sbyor ba legs so snyam pas rjes su yi rang bar byas na yid kyi nyes byas su 'gyur ba yin no/ /ci dge tshul gzhan gyi gzugs su gnas nas gsod par byed na de la yang rtsa bar 'gyur bar 'di la nges pa med do zhes bstan pa'i phyir/ de ltar sems can gsad phyir byol song rgyud/ /ces bya ba la sogs pa smos pa yin te/ sdom can gyi dngos po ni sdom can nyid de/ der 'du shes pa yin la ci ste zhes bya ba ni gal te'i don to/ /sdom can ni dge tshul yin no/ /gal te bdag ni dge tshul yin no zhes sdom can nyid du 'du shes par gyur pa de'i tshe rtsa ba'i nyes par 'gyur ro/ /de ltar zhes bya ba ni ji ltar gong du mi'i gzugs su gnas pas gsod par byed na rtsa bar 'gyur ba de bzhin du 'di la yang 'gyur ba'o/ /nyid ni rnam pa gzhan du mi 'gyur ro zhes nges par gzung ba'o/ /rtsa ba ni dngos gzhi'i mtshan nyid de srog gcod pa rjes su sgrub par byed pa zhes bya ba'i dbang du byas nas rtsa ba'i ltung ba zhes bya'o/ /gang gi tshe zhe na/ sems can gsod phyir zhes bya ba smos pa yin te/ sems can gsod pa la ste sems can srog dang 'bral bar byed pa'i dus su'o/ /ji ste sdom can nyid du 'du shes pa med na zhes bya bar sbyar ro/ /sdom can du 'du shes pa med na de'i tshe nyes pa chung ngu bshags par bya ba zhes bya ba'i nyes byas dang ldan pa ste/ 'phel bar 'gyur ro/ /'di skad du des nyes pa dang bcas par 'gyur ro zhes bstan pa yin no/ /ci zhig byas nas she na/ smras pa/ yo bar 'gro bas na byol song ngo / /de'i 'gro ba ni byol song rgyud do/ /de'i rjes su mthun pa ni rnam pa 'dra ba'o/ /de'i bdag nyid ji lta bu zhe na/ gzugs bsgyur ba ste byas pa'o/ /gang gis she na bdag gis zhes smos pa yin no/ /'di skad du byol song gi gzugs su gnas pa nyid la bdag nyid rab tu byung ba'i gzugs su dran pas gzhan gsod par byed na de'i tshe rtsa bar 'gyur la/ med na chung ba nyid do zhes bstan par 'gyur ro/ /da ni rmi lam zhes bya ba la sog pas yan lag ma tshang ba las nyes par mi 'gyur ba ston par byed de rmi lam gyi don ni sngar bshad pa yin no/ /de la gal te rmi lam du bsad par gyur na nyes pa med de nyes par mi 'gyur ro/ /de bzhin du bslab pa med par gyur pa gang yin pa de ni bslab pa med de bslab pa btang ba zhes bya ba'i tha tshig go/ /des kyang gzhan bsad par gyur na nyes pa med do/ /de bzhin du gsod pa'i bsam pa ni srog gcod pa'i bsam pa ste/ de gang la yod pa de ni gsod sems so/ /gsod pa'i bsam pa med pa ni gsod pa'i sems med pa ste/ de 'am smyos pas gal te gzhan bsad par gyur na nyes pa med do/ /smyos pa smos pas sems 'khrugs pa dang tshor bas gzir ba yang gzung ba yin no/ /gang gi phyir smos pa zhes bya bas rang bzhin du gnas pa ma yin pa bstan pa yin te/ de yang gnas skabs gzhan yin pa'i phyir ro/ /ci bzhi po de dag la cir yang mi 'gyur ram zhe na/ smras pa/ de dag rjes su brten na bsdam par bya ba'i kha na ma tho bar 'gyur gyi gzhan ni med do zhes bya ba'i don to/ /de dag la srog gcod par gtogs pa'i kha na ma tho ba ni med kyi/ 'on kyang sems kyi 'gyod pa bsal ba'i phyir de skad du bstan pa yin no/ /de bas na 'di skad du bzhi po de dag las yan lag gang yang rung ba ma tshang na yang nyes par ni mi 'gyur ba kho na'o zhes bstan to/ /yan lag lhag ma ma tshang na cir 'gyur zhe na/ gsod pa'i yan lag ma tshang zhes bya ba la sogs pa smos pa yin te/ bshad ma thag pa ma gtogs pa gzhan gsod pa'i yan lag lhag ma de dag gi gang yang rung ba ma tshang ba ni bral ba ste/ nyes pa chung ngur 'gyur ro/ /'di ltar gong du mi gzhan yin la zhes bya ba 'dis yan lag brgyad du bstan pa de dag gi nang nas rang bzhin du gnas pa dang / rmi lam ma yin pa dang / bslab pa bcas pa dang / gsod sems zhes bya ba yan lag bzhi po las gang yang rung ba ni ma tshang la lhag ma bdun po dag yod na nyes byas su 'gyur la/ cig shos ming dang / gzhan dang 'khrul pa med pa dang / shi ba zhes smos pa de dag las gang yang rung ba gcig ma tshang na gzhan bdun po yod na nyes pa chung ngur 'gyur ro zhes bya ba'i don to/ /da ni/ 'khrul pa med cing gsod pa'i sems yod pas/ /rigs gzhan gsad par gyur na nyes byas 'gyur/ /ma brtags pa yi chu yi bum pa yang / /zhes bya ba la sogs pas rigs gzhan bsad pa la nyes par 'gyur ba ston par byed de/ mi'i 'gro ba las gzhan pa'i rigs gang yin pa de ni rigs gzhan te/ de bsad par gyur na nyes byas kyi nyes par 'gyur ro zhes bya ba'i don to/ /ci 'khrul pas sam zhe na/ 'khrul pa med pas zhes bya ba smos pa yin te/ 'khrul pa ni sngar bshad pa yin te de dang bral ba'o/ /ci rdeg pa'i bsam pas kyang 'gyur ram zhe na/ smras pa srog chags gsad pa'i sems yod pas/ /zhes bya bas 'di'i rang gi ngo bo bshad pa yin no/ /de la mi gzhan yin la zhes bya ba la sogs pas mthar 'gyur ba'i nyes byas kyi yan lag brgyad bstan pa de las mi zhes bya ba'i yan lag gcig ma gtogs pa gzhan nyid dang / rmi lam ma yin pa nyid dang / bslab pa dang bcas pa nyid dang / 'khrul pa med pa nyid dang / gsod sems dang / gsad pa zhes bya ba'i yan lag bdun du 'gyur ro/ /de la rigs gzhan zhes bya ba ni gzhan nyid yin la 'khrul pa med pa zhes bya ba ni 'khrul pa med pa nyid do/ /gsod sems ni rang gi ngo bo nyid kyis bstan pa yin te/ gsum po de dag ni yan lag ltag ma bzhi po nye bar mtshon par byed pa yin no/ /na'i sgra ni gang gi phyir gyi don yin te/ gang gi phyir gsod pa'i yan lag med pa de'i phyir ma brtags pa ste/ mngon sum du ma byas pa'i chu'i bum pa brnya ba dag la byin na nyes pa med pa ste/ nyes byas nyid du mi 'gyur ro zhes bya ba'i tha tshig go/ /yang gi sgra ni brtags pa'i chu'i bum pa byin pa la nyes pa med par ma zad kyi 'on kyang ma brtags pa la yang ngo zhes bstan pa'i phyir ro/ /gsod pa'i yan lag yod na ni 'gyur ba kho na yin no/ /da ni/ srog chags bcas pa'i chu la sogs pa 'thungs sam zhes bya ba la sogs pas de nyid kyi spros pa ston pa yin te/ srog chags dang bcas par 'jug pa'i phyir srog chags dang bcas pa'o/ /de gang zhe na chu'o/ /de la sogs pa gang yin pa de ni chu la sogs pa yin no/ /sogs pa smos pas phyi dang nang gi longs spyad par bya ba la sogs pa ste/ rang skyur la sogs pa dang shing la sogs pa bsdu'o/ /de dang de dge tshul gyi longs spyod pa gang yin pa de la srog chags re re'i nyes par 'gyur ro zhes bya bar sbyar ro/ /'thungs pa zhes bya ba ni phyi dang nang du longs spyod pas so/ /bor bar gyur pa ni bor ba'o/ /gang du zhe na chu dron la sogs pa zhes smos pa yin te/ /chu dron la sogs pa gang yin pa de ni chu dron la sogs pa ste/ sogs pa'i sgras sa dang tshwa chu la sogs pa gzung ngo / /de las cir 'gyur zhe na/ srog chags re re zhes bya ba smos pa yin te/ srog chags re re'i nyes par 'gyur ba ste nyes byas su 'gyur ro zhes bya ba'i tha tshig go/ /ci ltar mi snang ba bsad pas kyang 'gyur ram zhe na/ skye bo bltar snang zhes bya ba smos te/ bltar snang ba ni mthong ba'i yul du gyur ba'i skye bo ste srog chags bsad pas 'gyur ro/ /nyes pa'i khyad par ji lta bu zhe na/ smras pa/ lci ba ste shin tu lci bar 'gyur ro zhes bya ba'i don to/ /'di skad du ji tsam du mig gis grangs yongs su chod pa'i skye bo bsad pa'i grangs chod pa de tsam gyis bshags par bya ba'i nyes byas lci bar 'gyur ro zhes bstan pa yin no/ /da ni/ chu mi g.yo zhing rnyog pa med la brtag /nad med tha mal pa yi mig gnyis kyis/ /bum pa gang ba la ni brtag par bya/ /zhes bya ba la sogs pas chu'i nang na yod pa'i srog chags gnod pa las bsrung ba'i don gyi thabs brjod par bya ste/ chu gang la g.yo ba dang 'gul bskyod med pa de ni chu mi g.yo ba'o/ /khyad par ji lta bu zhe na/ rnyog pa med pa zhes bya ba ni dgag pa'i bsdu ba yin no/ /de bas na de ltar gyur pa la brtags pa ste so sor brtag par bya'o/ /gang gis she na/ nad med tha mal pa'i mig ces bya ba smos pa yin te/ tha mal pa yang yin la mig kyang yin pas na tha mal pa'i mig go/ /nyid ni de'i phyir tha mal pa'i mig de'i nyid kyis yin gyi lha'i ni ma yin no zhes nges par gzung ba'o/ /gzhan yang khyad par ji lta bu zhe na/ 'di nad med pa'i phyir nad med pa'o/ /des na 'di skad du rab rib la sogs pas nyams par ma gyur pa tha mal pa'i mig gis chu brtag par bya'o zhes bstan par 'gyur ro/ /'dir chu brtag pa'i snod la ni nyes pa med de/ thams cad du snod gang la ji tsam du chus nges par gyur pa de 'dir ma bstan du zin kyang shugs kyis khong du chud par bya'o/ /gang gi tshe bum pa la rtog par byed pa de'i tshe bum pa gang ba kho na la brtag par bya ba ste/ so sor brtag par bya ba yin gyi ma gang ba la ni ma yin no/ /bum pa smos pa ni chu zangs la sogs pa yongs su gzung ba'i phyir ro/ /ni'i sgra ni nges par gzung ba'o/ /gang gi tshe 'dam gyi mtshan nyid kyi rdul dang bcas par gyur pa ni ldan pa ste/ chu rdul can du 'gyur ba'o/ /de'i tshe ji ltar bya zhe na/ ka ta ka zhes bya ba smos te/ ka ta ka dag gis dang bar bya ba ni rnyog pa med par bya ba ste/ chu dang bar bya'o zhes bya ba'i don to/ /gzhan du na srog chags rnams mthong bar mi 'gyur ro/ /ka ta ka'i sgras ka ta ka'i 'bras bu brjod pa yin no/ /mang po'i tshig tu byas pa ni lan tshwa dang zan gyi ri lu dag yongs su gzung ba'i phyir ro/ /dus ji srid du chu brtag par bya ba yin zhe na/ ji srid yid kyis yang dag par zhes bya ba la sogs pa smos pa yin te/ yid de sems kyi dag pa ni rnam par dag pa'o/ /dag pa yang srog chags med do zhes bya bar nges pa yin no/ /ji srid ces bya ba ni dus ji srid du sems de dag par 'gyur ba dus de srid du 'dir chu brtag par bya'o/ /'dis dus ring por rtog par byed pa thob pa de'i tshe mi ring bar brtag par bya'o zhes bstan pa yin no/ /gzhan yang thung ba thob par 'gyur bas de yang mi thung ste/ /shin tu myur ba ma yin pa zhes bya ba las gsal ba yin te/ ba lang drug gis drangs pa yi/ /shing rta ji srid ldog gyur pa'am/ /yang na glang po drug cu pa/ /dus de chu la nges pa yin/ /dus de tsam du bdag nyid kyis mi nus na gzhan gyis brtag par bya ba yin gyi/ rang nyid kyis yun ring por ni bya ba ma yin no/ /brtags zin pa'i chu la yang rtog par byed pa mi rigs so zhes bstan par bya ba'i phyir bla'o gces bya ba smos pa yin te/ chu brtags pa'i dus phyis so/ /yang dang yang du zhes bya ba ni ji ltar ring ba'am thung bar brtag par mi bya ba de ltar ma nges pa'i chu nyid la yang dang yang du gdong gzhan gyis lta ba la sogs pas brtag par mi bya'o/ /ji skad du ji ltar ring ba dang thung ba la sogs pa'i bye brag gis chu brtag par bya ba ma yin pa de ltar bla 'og tu yang dang yang du mi bya'o zhes bstan pa yin no/ /dang gi sgra ni bla 'og dang yang dang yang du zhes bya ba'i sgra sdud pa yin no/ /ci srog chags thams cad kyis kyang srog chags dang bcas pa nyid du 'gyur ram zhe na/ glo bur ba zhes smos pa yin te/ grog mo la sogs pa chu las skyes pa ma yin yang chu nang du ltung bar 'gyur ba'i sbrang bu mchu rings la sogs pa chu tshags med par tha dad par bsal nus pa yin te/ de ltar gyur pa des na skye bo dang bcas par 'jug pa zhes bya ba ni srog chags dang bcas pa yin la/ de'i dngos po ni srog chags dang bcas pa nyid de glo bur ba des chu srog chags dang bcas pa nyid du mi 'gyur te/ de yang lag pas bsal nas yongs su longs spyad par bya'o/ /de ltar bla 'og ces bya bas rnam pa thams cad du dgag pa thob pas/ da ni/ de lan cig brtags nas zhes bya ba la sogs pas ston par byed de/ lteng ka snod kyi chu lan cig ste 'or gcig brtags shing mngon sum du byas pa spyad par rung ste/ /yongs su longs spyad par rung ba'o zhes bya ba'i tha tshig go/ /ci the tshom gyis sam zhe na/ the tshom med par zhes bya bar smos pa yin te the tshom dang mi ldan pa gang yin pa de ni the tshom med pa ste/ bar chad med par the tshom spangs pa'i sems kyis so zhes bya ba ni lhag ma'o/ /dus ji srid kyi bar du zhe na/ nyi ma shar bar du zhes smos pa yin te/ nyi ma ste nyin zhag gzhan gyi nyi ma 'char bar de srid du zhes bya ba'i don to/ / de las 'og tu ni ma yin te shar nas kyang yang brtag par bya'o zhes bya ba ni/ dgag pa snga ma'i khyad par yin no/ /lteng ka zhes bya ba mang po'i tshig ni rdzing bu la sogs pa yongs su bsdu ba'i phyir ro/ /'dir dang ni phyis pa yin par rig par bya'o/ /ci gzhan dag kyang zhe na/ snod chen zhes bya ba smos pa yin te/ snod chen la sogs pa'i chu brtag par bya ba de la phyogs bzhi kun du nye 'khor gyi cha 'dom gang khor yug ste/ nye 'khor ni gnas par byed sten par byed pa zhes bya ba'i dbang du byas pa'o/ /'dom gang zhes bya ba ni khru bzhi yin no/ /da ni longs spyad du rung ba ston par byed pa yin te/ khron pa dang por byas pa'i chu'i rten gang yin pa de ni khron pa la sogs pa ste/ de'i dag pa ni brtags pas srog chags med pa nyid de/ des na khron pa dag sogs so/ /gru gsum yang de yin la bzang po yang yin pa gru gsum bzang po ste/ gang srog chags phra mo yang 'dzin par byed pa yin no/ /de dang por byas pa'i chu tshags gzhan gang yin pa de ni gru gsum bzang po la sogs pa'o/ /dge slong zhes bya ba 'di yang dge slong ste bslab pa 'dod pa'i phyir yid chas pa'i yul yin no/ /dge slong smos pa ni rab tu byung ba rnams kyi nye bar mtshon pa yin no/ /dge 'dun zhes bya ba 'di yang dge 'dun te rnam pa thams cad du ma btsags shing ma brtags pa'i chu longs spyod par mi mdzad pa'i phyir te/ bslab pa la gus par byed pa nyid du mtshon par byed pa yin no/ /dang po gcig ni sdud par byed pa yin la gnyis pa ni tshig gi kha bskang ba'i phyir ro/ /ji ltar de dag kha na ma tho ba med pa de bzhin du yid ches pa yang yin te/ srog chags med par lhag par yid ches pa'i phyir yid ches pa ste bkod ma'o/ /de nyid 'dul ba las bkod mas rung ba zhes gsungs pa yin no/ /nyin zhag gis rung ba yang yid ches pa kho na yin te/ de ni lan cig brtags pas nyi ma shar bar du zhes bya bas bsdus pa yin no/ /nyes pa byung ba'i skabs mi 'byed pas na rung ba zhes bya ste/ longs spyad du rung ba'i chu lnga po de dag kyang chu spyad du rung ba la sogs par bdag gir byas pa der 'gyur gyi 'di la 'gyod par bya ba ni ma yin no/ /rnam pa gzhan du na chu yongs su longs spyad par bya ba ma yin par 'gyur ro/ /yang gi sgra ni lnga po dag mtshungs pa nyid du bstan pa'i phyir ro/ /lnga po de dag las chu tshags la sogs pa gcig med la gzhan dag kyang med pa'i phyir chu tshags kyis bya ba ci yang med do snyam du dogs pa la smras pa/ 'di ltar yang 'di la chu tshags dang mi ldan pa'i phyir chu tshags med pa ste/ de ltar gyur pas gnas pa'i skal ba med do zhes bya ba'i bar du'o/ /dang ni nges par gzung ba'i phyir ro/ /gang de la rung ba'i chu yod kyang chu tshags nye bar 'jag par mi byed na de la nyes byas kyi nyes par 'gyur bar bstan pas gang yang chu tshags yod du zin kyang bor nas 'gro na cir 'gyur zhe na/ gang zhig ril ba gru gsum dbyangs tshags dang zhes bya ba la sogs pa smos pa yin te/ dge tshul gang zhig chu tshags med par 'gro ba ste/ rgyu bar gyur na dge tshul de la yid kyi nyes byas nyid du 'gyur gyi/ gzhan bshags par bya ba'i nyes byas su mi 'gyur ro/ /nyid ni nges par gzung ba'i don to/ /kun nas yongs su chu 'tshag par byed pas na chu tshags te/ spyi'i tshig yin no/ /da ni chu tshags kyi dbye ba bstan par bya ste/ ril ba dang / gru gsum dang / dpyangs tshags zhes bya ba ni bsdu ba'o/ /ril ba'i sgras ni zlum po skyibs can kha gnyis pa de brjod pa yin gyi 'di yang spyi blugs bzhin du nye bar spyod pa ni ma yin no/ /gru gsum zhes bya ba ni chu tshags gru gsum yod pa'o/ / dbyangs tshags zhes grags pa'i ming gang la yod pa de ni dbyangs tshags te/ chu tshags yu ba can de'i ming yin no/ /chos zhes bya ba'i ming gang la yod pa de ni chos zhes bya ba ste/ ril ba zhabs tshags can yin no/ /grol bar byed pa'i ras zhes bya ba ni ras kyi dum bu zur bzhi pa de'i lhag pa'i tshig go/ /dang gi sgra ni de lta bur gyur pa gzhan dang gzhan dag kyang med par 'gro na yid kyi nyes byas su 'gyur ro zhes bstan pa'i phyir ro/ /gal te der song na rnyed par yang 'gyur na 'gro bar bya'am zhe na/ song yang grol bar byed pa'i ras sogs yod/ /de tshe chu tshags med na rgyang grags dag / lnga nyid song bla zhes bya ba smos pa yin te/ de gang du 'gro bar 'gyur ba der song ba na bshad ma thag pa'i grol bar byed pa'i ras la sogs pa yod pa ste rnyed par 'gyur na zhes bya ba'i don to/ /de'i tshe chu tshags med pa ni chu tshags med par gyur pa ste song ba dang 'gro bar bya'o zhes bya ba'i bar du'o/ /chu tshags yod par gyur pa 'ba' zhig ni ma yin no zhes bya ba ni yang gi sgra'i don yin no/ /ring thung ji tsam du zhe na/ de rgyang grags lngar 'gro bar bya'o/ /nyid kyi sgra ni de las 'das par ni ma yin no zhes nges par gzung ba'i don to/ /gal te der song na rnyed par mi 'gyur ba de lta na yang 'gro bar bya 'am zhe na/ ji ste med na ni/ phyir 'ong 'dod na dpag tshad phyed du song / /zhes bya ba smos pa yin te/ gal te der song la chu tshags sam chu kha na ma tho ba med pa rnyed par mi 'gyur ba de'i tshe rkyen de lta bu zhig yod na 'phral kho na la ldog pa'i bsam pas dpag tshad phyed du 'gro bar bya'o/ /de ltar na ni'i sgra snga ma las khyad par du byed pa'i don to/ /ci yid brtan pa'i tshig gis kyang 'gro bar bya'am zhe na/ yid brtan tshig gis lam du zhugs na ni/ /zhes bya ba la sogs pa smos pa yin te/ yid brtan rab tu byung ba'i tshig gis gal te 'di skad du khyod nyid shog shig dang chu longs spyod pa'i dus su kho bos chu tshags sbyin par bya'o zhes smras pa'o/ /de dag gi tshig gis ring du song yang zhes bya ba'i rgyang grags lnga 'am gnyis 'ba' zhig tu ma zad kyi chu tshags med par 'gro ba la yang nyes pa med pa yin te/ ring du song ba la nam yang nyes par mi 'gyur ro zhes bya ba'i don to/ /yid brtan pa zhes bya ba ni lam du chu tshags sbyin par khas blangs pa la slu bar mi byed pa gang yin pa de la bya'o/ /chu tshags med par klung gi 'gram nas mar 'gro ba na brtags pa'i chu longs spyod pa la nyes par 'gyur ro snyam du dogs pa la/ klung gi 'gram nas mar ni zhes bya ba la sogs pa smos pa yin te/ dge tshul chu tshags med par yang klung gi 'gram nas mar 'gro ba na'o/ /mig gis bltas pas dag pa ste so sor brtags shing dag par byas pa'o/ /bltas pas dag pa yang de yin la chu yang yin pas na zhes bya ba ni khyad par gyi bsdu ba'o/ / de ltar gyur ba'i chu 'thungs pa la nyes pa med pa ste nyes byas su mi 'gyur ro zhes bya ba'i don to/ /yang gi sgra ni sngar chu tshags med par 'gro ba la nyes par bshad pa yin pas/ klung gi 'gram nas mar 'gro bar byed pa na chu tshags med kyang brtags nas longs spyod pa gang la yang nyes pa med do zhes bya ba bstan pa'i phyir ro/ /de la ci 'jug ngogs re re brtag par bya 'am zhe na/ rgyun bzhin 'gro la zhes bya ba la sogs pa smos pa yin te/ de la zhes bya ba ni klung la'o/ /rgyang grags dang rgyang grags ni rgyang grags re re'o/ /brtag pa ni brtag par bya ba ste mthar thug par so sor brtag par bya'o zhes bya ba'i don to/ /khyad par ji lta bur zhe na/ rgyun bzhin 'gro la zhes smos pa yin te/ rgyun gyis 'bab par byed pas na rgyun bzhin 'gro ba ste chu bo dang myur 'bab ces bya ba'i bar du'o/ /chu 'di dba' klong 'khrug pa ni chu gzhan te chu rab tu 'bab pa'o/ /'dres pa med pa ni ma 'dres pa ste dgag pa'i bsdu ba'o/ /chu'i dba' rlabs gzhan dang 'dres par ma gyur ces bya ba'i tha tshig go/ /klung gang la chu gzhan dang ma 'dres pa yod pa de ni chu gzhan ma 'dres pa ste don gzhan mang po pa zhes bya ba'i bsdu ba'o/ /gzhan yang rgyun bzhin 'bab pa yang yin la chu gzhan dang ma 'dres pa yang yin pas zhes bya ba ni don gcig gi sgo nas khyad par gyi bsdu ba'o/ /de ltar gyur pa'i klung de la lan cig brtags nas rgyang grags kyi bar du longs spyad par bya ste/ 'di la 'gyod par mi bya zhing de bzhin du gzhan dag tu yang rgyang grags zhes bya ba'i bar du'o/ / de bas na gzhan dag tu ji ltar khong du chud par bya zhe na/ gzhan dag tu ni zhes bya ba smos pa yin te/ gzhan dag tu zhes bya ba ni chu myur du 'bab pa las gzhan pa ste/ klung dal gyis 'bab pa dang myur du 'bab kyang chu rlabs gzhan dag dang gal te 'dres par gyur pa de la ni chu 'gram re re nyid du brtag par bya'o/ /nyid ni nges par gzung ba'o/ /tu'i sgra ni yang gi don te ji ltar gong du nyes pa med pa de bzhin du 'dir yang zhes sdud par byed pa'o/ /'di gang gi tshul yin zhe na/ chu tshags med par zhes bya ba smos pa yin te/ chu tshags dang 'gro ba'i ngang tshul can 'di yin pas na chu tshags yod par 'gro ba'o/ /chu tshags yod pas 'gro ba ma yin pa ni chu tshags med par 'gro ba ste/ dgag pa'i bsdu ba yin no/ /de'i tshul 'di ni de'i rim pa'o/ /dge tshul chu tshags yod pa 'am med pa gang yin pa de 'gram nas 'gro ba na chu btsags pa 'am brtags pas longs spyod pa la 'dod pas 'jug par bya'o/ /snga ma la yang chu tshags med pa'i phyir rnam pa thams cad du chu longs spyad par mi bya'o snyam du 'ba' zhig gi dogs pa bsal ba'i don du 'dir rgyun gyi dbang du byas nas de skad du bstan pa yin gyi rgyun las bzlog phyogs kho na las ni de skad du brjod pa ma yin te/ chu tshags med par 'gro ba 'di la yang 'jug dogs re re nyid kyi tshul yin no/ /srog chags dang bcas pa'i chu la khrus rung ngam/ 'on te ma yin zhes bstan pa'i phyir smras pa/ spu dang bcas par 'jug pas na khrus ras spu can te spus khebs pa'i gos la sogs pa'o/ /de bas na srog chags te skye bo de dang bcas pas 'jug pa'i srog chags dang bcas pa'i chu de la khrus kyi cho ga ste/ khrus kyi bya ba bkag pa yin no/ /khrus ras nyis rim gang yin pa de ni nyis rim ste de yang bkag pa yin no/ /dang gi sgra ni sdud pa'i don to/ /rim pa gcig ni ma bkag par shugs kyis shes par 'gyur ro/ /de yang gal te khrus ras spu can dang nyis rim gyis khrus byed na shi bar gyur cig snyam pa las srog chags shi bar gyur na yongs su rdzogs pa'i nyes byas kyi nyes par 'gyur la/ shi bar ma gyur na nyes pa chung ngur 'gyur ro zhes rig par bya'o/ /yang gang du srog chags lhag par mang ba'i chu de la ji ltar bya zhe na/ gang na srog chags zhes bya ba la sogs pa smos pa yin te/ gang na ste chu gang la srog chags te skye bo lhag par yod pa'o/ /gang las she na/ chu las so/ /kyang zhes bya ba ni rim pa gzhan ston pa yin te 'dir rim pa gcig kho nas kyang khrus mi bya'o/ /kho na ni khrus mi bya bar nges par gzung ba yin no/ /kyang gi sgra ni rim pa gnyis 'ba' zhig tu ma zad kyi rim pa gcig gis kyang zhes bya ba'i don to/ /yang gi sgra snga ma ni chu bas kyang zhes srog chags lhag par mang ba nyid du bstan pa'i phyir ro/ /dus ma yin pa'i zas kyi phyogs su gtogs pa yin kyang chu'i skabs 'dir cung zhig bstan pa'i phyir rdzing bu'i chu khyad par ji lta bu zhe na/ rdzing bu'i chu ni zas sogs 'dres gyur pa/ /btsags nas kha zas med par gyur de dang / /gang tshe khyim pa'i bsti sa'i chu dag kyang / /dag gyur phyi dro dogs pa med par btung / /zhes bya ba smos pa yin te/ zas la sogs pa'i zang zing gang la yod pa de ni zas la sogs pa ste/ des 'dres par gyur pa ni bcas par gyur pa yin no/ /btsags pa ni yongs su btsags pa ste 'di zang zing dang mi ldan pa'i phyir chu kha zas med par gyur pa yin pas rung ba ma yin no zhes dogs par mi bya'o/ / bsti sa'i chu yang zang zing dang nges par 'dres pa srid pas de la ji ltar bsgrub par bya zhe na/ khyim pa'i bsti sa zhes bya ba smos pa yin te/ khyim gang la yod pa de ni khyim pa'o/ /khyim pa smos pa ni nye bar mtshon pa'o/ /bsti sa ni chu'i gnas yin no/ /gang gi tshe chu dag par gyur pa ste/ gal te brtags pas dag par gyur pa'i chu de dang de yang zang zing med pa yin gyi gong du smos pa 'ba' zhig ni ma yin no/ /dang gi sgra ni sdud pa'i don to/ /yang gi sgra ni de dang de yang yin pas chu gong ma 'ba' zhig ma yin gyi/ 'di yang dus dang dus ma yin par btung bar bya'o zhes bstan pa'i phyir ro/ /ci btung bar bya'am zhes dogs pa la dogs pa med par zhes smos pa yin te dogs pa'am rtog pa med pa gang yin pa de ni dogs pa med pa ste dogs pa dor la btung bar bya'o zhes bya ba'i don te/ chu gzhan med pa'i tshul yin no/ /da ni ji ltar chu nyam nga ba med par bcags par bya ba de ston par byed de/ shing gsum tshogs pa ni shing gsum mo/ /de la gru gsum gyi grwa'i srad bu btags nas chu btsag par bya'o/ /shin tu zhes bya ba ni 'dis khyad par du nyam nga ba med par chu btsags pa'i phyir nus pa'o/ /de'i phyir shin tu'i sgra ni 'di la 'bad par bya'o zhes bstan pa'i phyir ro/ /gang gi tshe chu tshags srab par gyur pa nyid kyi phyir dang / phra ba nyid kyi phyir srog chags mi 'dzin pa de'i tshe ji ltar bya zhe na/ chu tshags zhes bya ba smos pa yin no/ /khyad par ji lta bu la zhe na/ srab pa ste/ rnying par gyur pa la gdab par bya'o/ /ci zhig gdab par bya zhe na/ lci ba zhes smos pa yin te/ legs par bskams pa yang de yin la lci ba yang de yin pas lci ba skam po gtsang ma ste/ ba lci skam po gtsang ma zhes bya ba'i don to/ /lci ba skam po gtsang ma btags pa'i phye mas gdab par bya'o zhes bya bar sbyar te mthug por bya zhes bya ba'i don du rtogs par bya'o/ /ni'i sgra ni srab pa la gdab par bya'i cig shos la ni ma yin no zhes khyad par du byed pa'i don to/ /shin tu mthug pa nyid kyi phyir chu 'dzag tu mi btub pa de la ji ltar bya zhe na/ yang dang yang du zhes smos pa yin te/ yang dang yang du gdab par bya ba de brdeg par bya'o/ /phye ma des sam rang bzhin gyis mthug par gyur pa nyid la zhes shugs kyis khong du chud par 'gyur ro/ /cis bya ba yin zhe na/ 'od ma'i tshal pas zhes bya ba smos pa yin te/ 'od ma bkas pa'i tshal pas so/ /ci'i phyir zhe na/ chu 'dzag bya phyir zhes smos pa yin te/ chu 'dzag pa'i phyir dang chu 'byung ba'i phyir zhes bya ba'i bar du'o/ /dang ni shing leb kyis kyang gdab par bya'i/ 'od ma'i tshal ba 'ba' zhig gis ni ma yin zhes ma bstan pa sdud pa'i don to/ /da ni gru gsum du chud pa'i srog chags bsrung bar bya ba'i phyir/ srog chags bsrung phyir zhes bya ba la sogs pa smos pa yin te/ snod de sa'i snod dam zangs ma'i snod gzhag par bya'i/ lcags kyi snod ni ma yin te/ chus de nyams par 'gyur ba'i phyir ro/ /gang du gzhag par bya zhe na/ smras pa/ 'og ni zhabs su zhes bya ba'i don to/ /gru gsum gyis zhes bya bar shugs kyis rtogs par 'gyur ro/ /khyad par ji lta bu dang ldan pa zhe na/ lcags kyi lu gu rgyud ces bya ba smos pa yin te lcags kyi lu gu rgyud ni lcags kyi lu gu rgyud de/ de dang por byas pa gang yin pa de btags pa'o/ /ci'i phyir zhe na/ srog chags bsrung phyir zhes smos pa yin te/ chu'i nang du chung ba'i srog chags bsrung ba'i phyir ro/ /rnam pa gzhan du na chu thams cad byung ba dang srog chags dag 'chi bar 'gyur ro/ /zangs ma las byas pa la ni lcags kyi lu gu rgyud gdags par bya zhing sa las byas pa la ni srad bu gdags par bya'o zhes gsungs pa ma yin nam/ de ci'i phyir spyir bstan zhe na/ dgos pa gtso bor gyur pa nyid kyi phyir rdzas zhes khyad par du ma bstan te/ khyad par gyi tshig ni yod pa'i dbang du byas pa yin no/ /gang du lteng ka la sogs pa yod pa de ni lteng ka la sogs par gnod pa spang ba'i phyir srog chags dang bcas pa'i chu dor bar bya ba yin na phyogs gang du khron pa la sogs pa'i chu rnyed par dka' ba der ji ltar bya zhe na/ srog chags de dag gnod pa spang ba'i phyir zhes bya ba la sogs pa smos pa yin te/ srog chags te skye bo dang bcas par 'jug pa'i phyir srog chags yod pa'i chu yin te khron par gtang bar bya zhing dor bar bya'o/ /gang gis she na grol bar byed pa zhes bya ba smos pa yin te/ grol bar byed pa'i don gyis snod ni grol bar byed pa'i snod yin te des so/ /de ltar steng gi cha dang 'og gi cha srad bus gzung du rung ba de ltar snod de bya'o/ /khyad par ji lta bus she na/ gang gi kha dang zhabs la srad bu gnyis btags pa des te/ kha ni steng gi cha yin la zhabs ni 'og gi cha yin no/ /de ci'i phyir zhe na/ srog chags de dag gnod pa spang ba'i phyir zhes smos pa yin te/ srog chags de dag ste chu'i khongs su gtogs pa'i srog chags dag go/ /gnod pa ste nyon mongs pa spang bar bya ba'i phyir dang / dor bar bya ba'i phyir ro/ /gang gi mthus she na/ snying rje'i mthus zhes smos pa yin te/ snying rje ni sems can gyi sdug bsngal spong bar 'dod pa nyid yin la de'i mthu ni de'i ngor zhes bya ba'i don to/ /chu'i skabs su gzhan dang gzhan dag kyang cung zhig brjod par bya ste/ spyi blugs bzlog pa ni kha sbub pa'o/ /gang la zhe na kha la zhes smras pa yin te/ kha la spyi blugs bzlog nas chu btung bar mi bya'o/ /'phags pa zhes bya ba ni dge tshul yin te 'phags pa 'dod chags dang bral ba'i chos srog gcod pa la sogs pa las ldog pa'i mtshan nyid kyi rjes su 'jug pa'i phyir 'phags pa zhes bya'o/ /gang du btung bar mi bya zhe na/ 'jig rten zhes smos pa yin te/ 'jig rten gyi mngon sum ste mdun du'o/ /ci rnam pa thams cad du btung bar mi bya'am zhe na/ lo ma la sogs pa zhes bya ba la sogs pa smos pa yin te/ lo ma la sogs pa gang yin pa de ni lo ma la sogs pa ste/ de mi rnyed cing med na kha la spyi blugs bzlog pas 'thung na dge tshul la nyes pa med de nyes byas su mi 'gyur ba nyid do zhes bya ba'i don to/ /gang du zhe na dben pa zhes smos pa yin te/ dben par song ba ni dben par zhugs pa ste/ skye bo med pa'i phyogs la dben pa zhes bya'o/ /ci'i phyir zhe na/ skom pa'i phyir ni zhes bya ba smos pa yin no/ /phyir ni de'i ngor ro/ /gang gi zhe na skom pa ni skom pas gdungs par gyur pa'o/ /'ba' zhig ni skom pas zhes gsum pa'i mtha' can du 'don pa de la yang skom pa byed pa por gyur pas gang gi ngor byas pa de'i phyir zhes bya ba de'i don 'dir 'gyur ro/ /da ni chu snod gyi cho ga brjod par bya ste/ dus kyi dus phyi ma ni phyis kyi don to/ /mi zad pa'i bsdu ba yin la/ de'i 'og tu dus kyi dus phyi ma ni dus dus su zhes bya ba drug pa'i bsdu ba'o/ /de'i phyir dus dang dus su zhes zlos pa'i don du khong du chud par bya'o/ /ci zhig bya ba yin zhe na/ bum pa zhes smos pa yin te bum pa ni chu'i snod yin la skam pa ni skem par byed pa ste/ tshad pa la zhes bya ba ni lhag ma'o/ /de bskams par gyur pa dang bkru bar bya ba yin no/ /gang gis she na/ khrud shing ni zhes bya ba la sogs pa yin te/ khrud shing gtsang ma ste 'od ma'i tshal pa'am lcug ma la sogs pa'i rtse mo'i cha 'jam por byas shing gtsang mar gyur pas zhes bya ba'i don to/ /gtsang ma yang zang zing med pa nyid dang / rnyog pa'i dri ma dang mi gtsang ba spangs pa nyid du rig par bya'o/ /bum pa la sogs pa de dag gi khongs su gtogs pa'i dri ma bsal bar bya ba'i phyir spyi'i tshig tu bstan pa yin no/ /lo ma la sogs zhes bya bas gzhan rung ba byas pa'i snod khyad par du bya ba ston par byed de/ lo ma dang por byas pa'i gos la sogs pa'i kha gang gang yin pa de ni lo ma la sogs pa ste de dgab pa'o/ /kha lo ma la sogs pas dgab pa de khyad par du byed pa ni kha la legs par dgab par bya'o zhes bya ba'i don to/ /kha de gang gi zhe na/ rung bar byas pa zhes bya ba smos pa yin te/ rung ba de zang zing med pa'i chu'i snod ni rung bar byas pa'i snod yin pa de'i phyir ro/ /ci de dag skad cig gam zhe na/ rtag par zhes bya ba smos te/ rtag pa ste dus dang dus thams cad du'o/ /'di skad du rung bar byas pa'i snod dag gi khar rdul 'jug pa yongs su spang bar bya ba'i phyir lo ma la sogs pas legs par dgab par bya'o zhes bstan par 'gyur ro/ /gang gi tshe rung ba'i chu 'tshag par byed pa ni lag pa bkrus su zin kyang 'jam pa nyid du gyur pa de'i tshe yang nyes pa med do zhes bstan pa'i phyir sems kyis gnyis sam gsum du zhes bya ba la sogs pa smos pa yin te/ lan gnyis lan gsum du byas pa ni gnyis sam gsum mo/ /de gang zhe na/ bkrus pa ste lag pa rab tu bkrus par gyur pa na zhes bya ba ni lhag ma'o/ /ci g.yos sam zhe na/ sems kyis zhes bya ba smos pa yin te sems ni bsam pa ste/ yang dag pa'i dngos po gzung ba de bas na lag pa 'jam zhing snum du zin kyang dag pa nyid du 'gyur ro/ /dag pa nyid kyi dngos po ni dag pa nyid de rab tu bkrus pa nyid ces bya ba'i bar du'o/ /'di skad du g.yo spangs pa'i sems kyis lag pa lan gnyis lan gsum du bkrus na 'jam du zin kyang 'jam pa nyid la nyes pa med do zhes bstan pa yin no/ /kyang gi sgra ni 'jam du zin kyang nyes pa med do zhes khyad par du bstan pa'i phyir ro/ /gal te chu rnyog pa can du gyur pa de'i tshe ji ltar bya zhe na/ bzhin gyi gzugs brnyan zhes bya ba la sogs pa smos pa yin te/ rnyog pa ste rdul can gyi chu legs par btsags par bya'o/ /ji lta ji ltar yang rung bas sam zhe na/ legs pa ste 'bad pas so/ /ji srid cig gi bar du zhe na/ ji srid bzhin gyi [(]gzug [,]gzugs [)]brnyan snang bar gyur pa de srid legs par 'bad pas yongs su btsags par bya'o zhes bya ba'i don to/ /bzhin gyi gzugs brnyan 'byung ba ni dang ba nyid mtshon par byed pa yin no/ /'di skad du ka ta ka'i 'bras bu la sogs pa'i sbyor bas ji srid chu dang ba nyid du 'gyur ba de srid du rnyog pa'i chu yongs su btsags par bya'o zhes bstan par 'gyur ro/ /dge tshul la byin len ma byas pa la nyes pa med pa nyid ma yin nam ci'i phyir de skad bstan zhe na/ slob dpon dang mkhan po'i dbang du byas nas gsungs pa'i phyir nyes pa med do/ /chu'i skabs su gzhan dag kyang cung zhig brjod par bya ste/ khron pa dang por byas pa'i lteng ka la sogs pa gang yin pa de ni khron pa la sogs pa'o/ /de dag las chu blangs pa ni bum pa la sogs pa dag gis len par byed pa na tshigs bcad bklag par bya'o/ /ci'i phyir zhe na/ khron pa la sogs byas dang zhes bya ba la sogs pa smos pa yin te sbyin pa rnam par sbyong ba'i phyir ro/ /lung zhes ma bstan du zin kyang dper na zan za ba na sbyin pa rnam par sbyang ba'i don du lung gi tshigs su bcad pa 'don pa de ltar 'di la yang khong du chud par bya'o/ /gang dag gi don du zhe na/ khron pa la sogs zhes bya ba smos pa yin te/ thog ma khron pa la sogs pa byed pa yin pas/ khron pa la sogs byas pa ste/ khron pa la sogs pa'i byed pa po dang byed du 'jud pa nyid yin no/ chu de'i lha ni chu lha nyid do/ /khron pa la sogs pa byas pa dang chu de'i lha nyid ces brjod la khron pa la sogs pa byas la de dang / chu lha de nyid kyi don gyi phyir ro/ / ci chu len pa'i tshe de ltar bklag par bya'am zhe na/ 'thungs sam bkrus kyang zhes bya ba smos pa yin te 'thungs pa ni chu 'thung ba'o/ /khrus ni lus brlan par byed pa'o/ /'thung ba dang khrus ni 'thungs sam bkrus pa ste/ zlas dbye ba'i bsdu ba yin no/ /de dag ni rkang pa 'khrud pa la sogs pa chu nye bar longs spyod pa'i nye bar mtshon pa yin pas de la ji ltar chu len pa la tshigs bcad klog pa de bzhin du/ 'thungs sam khrus byed pa'i skabs 'dir yang tshigs su bcad pa gdon par bya'o/ /kyang gi sgra ni gong ma 'ba' zhig la yang ma yin no zhes bya ba'i don to/ /gang gi tshe dge 'dun nam gang zag gi 'bru srog chags dang bcas par gyur pa de'i tshe bya ba ni bal sran la sogs zhes bya ba smos pa yin te/ bal sran dang por byas pa'i 'bras la sogs pa'i 'bru gang yin pa de ni/ bal sran la sogs te bal sran la sogs pa de yang yin la 'bru yang yin pas bal sran la sogs 'bru ste/ gal te srog chags dang ldan zhing srog chags dang bcas par gyur pa de'i tshe 'bru de gzhag cing brub par bya ba yin no/ /gang du zhe na/ bde zhing bsil ba zhes smos pa yin te/ bde ba yang de nyid yin la bsil ba yang yin pas bde zhing bsil ba'i gnas te/ gang bde bar gyur pa dang bsil bar gyur pa'i sa'i phyogs gnod pa med pa dag tu'o/ /de ltar byas kyang bral bar ma gyur pa de'i tshe ji ltar bya zhe na/ 'on kyang srog chags bral bar ma gyur na/ /zhes smos pa yin te/ 'on kyang gi sgra ni shin tu de ltar byas kyang zhes bya ba yin pas de bas na gal te 'bru la sogs pa srog chags te skye bo dang bral bar ma gyur cing bye bar ma gyur pa'i phyir yang slar gnas su brubs te gzhag cing gzhug par bya'i/ de yongs su longs spyad pa'am btsong bar bya ba ma yin no/ /gos la chags pa'i srog chags kyi gnod pa yongs su spang bar bya ba'i phyir/ shig rnams zhes bya ba la sogs pa smos pa yin te/ ra nga ni ras ma ste gos kyi dum bur shig rnams dal gyis btus te gzhag par bya'o/ /ji ltar bya zhe na/ rtsig pa la sogs zhes smos pa yin te/ rtsig pa dang por byas pa'i ka ba la sogs pa gang yin pa de ni rtsig pa la sogs pa'o/ /de'i bu ga ni bug pa dag yin pas de dag tu gzhug cing gzhag par bya'o/ /kyang gi sgra ni chu'i khongs su gtogs pa'i srog chags dag gi gnod pa spang bar bya ba'i phyir grol bar bya ba'i snod kyis gtang bar bya ba 'ba' zhig tu ma zad kyi/ 'di dag kyang ji ltar gnod par mi 'gyur ba de ltar dal gyis gzung zhing gzhag par bya'o zhes sdud pa'i don yin no/ /shig 'ba' zhig tu ma zad kyi mad ku ta yang gzhag par bya'o zhes sdud par byed pa'i don yin la/ de bzhin zhes bya ba ni dal gyis btus nas gzhag par bya'o/ /gang du zhe na/ rtswar bcas zhes smos pa yin te/ rtswa sngon dang bcas par 'jug pa'i phyir rtswar bcas te dor ro/ /khyad par ji lta bu can zhe na bsil ba yang de nyid yin la sa'i phyogs kyang de nyid yin pas na bsil ba'i sa phyogs te/ de ltar gyur pa'i sa phyogs der mad ku ta gzhag par bya'i tshad pa la sogs pa dag tu ni ma yin no/ /rtswar bcas zhes smos pa ni tshad pas gdungs pa la sogs pa gnod pa byed pa rnam par bcad pa'i phyir yin gyi/ rtswa sngon dang bcas pa kho na zhes nges par gzung ba'i phyir ni ma yin no/ /rtswa ni rtswa sngon po la bya'o/ /ji ltar shig la sogs pa de dag dor bar bya ba de bzhin du gzhan sbrul la sogs pa gang yin pas gtum sogs zhes smos pa yin te/ sbrul thog mar byas pa'i sdig pa la sogs pa gang yin pa de dag ni sbrul la sogs so/ /de khyad par ji lta bu zhe na/ gnod byed ces smos pa yin te/ gnod pa de sdug bsngal bar byed pa'i phyir gnod byed yin la/ de dag gi rang gi yul zhes bya ba yang gang dang gang gi rang gi spyod yul ma yin pa ste dper na sbrul gyi ni grog mkhar lta bu'o/ /der so sor bskyal bar bya ste grol bar bya bar rigs pa yin no/ /sbyin pa gang gis she na bzung bas so/ /da ni sngar bshad pa rjes su bstan par bya ba nyes pa dang bcas pa brjod par bya ba'i phyir/ tha ma 'di ni zhes bya ba smos pa yin te/ 'di tha ma yin pa'i phyir tha ma ste mi gzhan yin la gang gis mir 'du shes zhes bya ba la sogs pas tha mar gyur pa'i nyes pa bstan pa yin la/ de yang nyes byas te 'khrul pa med cing gsod pa'i sems yod pa zhes bya ba la sogs pa dang bcas te bshad pa yin te bshad pa ni rnam par bshad pa'o/ /da ni zhes bya ba ni phyis kyang srog gcod pa ste srog chags gsod par byed pa'i phyogs su gtogs pa bshad par bya ba ste/ yid kyi nyes byas su 'gyur ro zhes bstan par bya'o zhes bya ba'i don to/ /ji ltar zhes bya ba ni nye bar ston pa'i don to/ /phyogs su gtogs pa de dag gang zhe na/ nad pa zhes bya ba la sogs pa smos pa yin te/ nad pa ni nad kyis nyon mongs par gyur pa yin te de dag la'o/ /dug dang mtshon ni dug dang mtshon yin te/ de sbyin pa dang / de bzhin du btung ba la sogs pa mi 'phrod pa gang yin pa de ni btung ba la sogs pa mi mthun pa'o/ /mthun pa ni phan zhing 'phrod pa yin la/ mi mthun pa ni mi 'phrod pa ste/ de sbyin par byed pa ni yang dag par sbyin pa zhes bya'o/ /gal te nad pa tshor bas gzir ba zhig dug gam mtshon slong ba de'i tshe bsam pa dang sems dag pas de phyin na kha na ma tho ba med do zhes shes par bya zhing / bzlog pas ni rtsa ba'i nyes pa dang ldan par 'gyur te de bzhin du gzhan dag la yang sbyar bar bya'o/ /nad pa la sman ji ltar sbyin par bya zhe na/ rgan dang zhes bya ba la sogs pa smos pa yin te/ rgan po ni rnam pa gnyis te/ na sos dang / bslab pas so/ /khyad par ji lta bu zhe na/ mkhas pa ste nad rab tu zhi bar byed pa la'o/ /na'i sgra ni de lta bur gyur pa de la dris pa nyid kyis zhes nges par gzung ba'i don yin no/ /sman pa dang zhes bya ba'i dang ni rim pa gzhan sdud pa'i don yin par blta bar bya'o/ /nad pa nad kyis nyon mongs par gyur pa la sman rjes su sbyin par bya'i/ de lta de lta bu nyid kyis ni ma yin no/ /de'i nad g.yog glen las zhes bya ba la ji ltar zhes bya ba rjes su 'jug ste/ ji ltar nad pa la la dug la sogs pa sbyin par bya ba ma yin pa de bzhin du glen pa ste rmongs par gyur pa phan pa dang mi phan pa mi shes pa dag yin no/ /de lta bur gyur pa'i nad g.yog bsnyen bkur bar mi bsko ste/ gang gi phyir 'dis bya ba dang bya ba ma yin pa shes pa ma yin no/ /ci rnam pa thams cad du bsko bar mi bya'am zhe na/ med na zhes smos pa yin te yod pa ni mkhas pa yod par gyur pa'o/ /yod pa ma yin pa ni de med pa dang mi snang na zhes bya ba'i bar du'o/ /de med na nad g.yog glen pa nyid la 'di ni bya ba yin 'di ni bya ba ma yin zhes legs par bsgo zhing bslabs nas bsgo bar bya'i shes pa yod pa ni ma yin no/ /nad pa la ni de lta'i chos ma brjod ces bya ba ni chos ma yin yang chos kyi sgras brjod cing rang gi mtshan nyid 'dzin pa'i phyir gang gis chos brjod pas de'i sems 'chi ba'i phyir te/ 'chi ba'i don du sems skye ba ni 'chi ba'i phyir nges par gyur ces bya ba'i don to/ /de lta bur gyur pa'i chos nad pa'i mdun du mi brjod pa ste smra bar bya ba ma yin no/ /'di ltar nad pa tshul khrims dang ldan pa'am/ tshul khrims 'chal ba la yang ji srid 'tsho zhing gnas par gyur pa de srid lus can sdug bsngal bar 'gyur zhing 'chi ba ni mtho ris la sogs pa bde ba dang bsod nams mang zhing sdig pa med par 'gyur ro zhes bya ba la sogs pa nad pa la rim pa ji lta ba bzhin du chos bstan par mi bya'o zhes bya ba'i don to/ /yang ji ltar brjod par bya zhe na/ ring du 'tsho zhing zhes bya ba la sogs pa smos pa yin te/ nad pa de la brjod cing bstan par bya'o zhes bya ba'i bar du'o/ /ji ltar brjod par bya zhe na/ ring du 'tsho zhing ring du gnas pa zhes ring ba'i sgra dang sbyar bar bya ba yin te/ yun ring du srog 'dzin pa zhes bya ba'i tha tshig go/ /don du na de nyid rnam grangs yin no/ /de lta bur gyur pa'i dge ba'i tshig gi rnam pa de la brjod par bya'i rnam pa gzhan du ni ma yin no zhes nges par gzung ba'i don du rnam grangs kyi tshig brjod pa yin gyi/ rnam pa gzhan du na rnam grangs kyi tshig don med par 'gyur ro/ /gzhan yang ji ltar brjod par bya zhe na/ bder gyur ces bya ba smos pa yin te/ bde bar gyur pa ni bde ba dang ldan par gyur pa'o/ /khyad par ji lta bu zhe na nad ni gzengs mtho ba zad par byed pa'o/ /de'i phyir nad kyi 'jigs pa nad kyi 'jigs pa ste/ 'jigs shing sngangs par byed pa zhes bya ba yin pa de'i phyir de'i de las rnam par grol ba'o/ /mngon par mtho ba dang nges par legs pa'i rgyu ni bsod nams yin te chos zhes brjod la de yang dang yang du spyod pa'i phyir chos spyod pa'o/ /ji srid ring du ste dus ring por 'tsho bar gyur pa de srid du 'phel bar 'gyur ro/ /de gang zhe na/ dge ba'i rgyun zhes smos pa yin te/ dge ba ste bsod nams kyi rgyun ni dge ba'i rgyun yin pa de bas na ji srid dge ba de 'phel bar 'gyur ba de'i phyir nad pa la khyed ring du 'tsho zhing zhes bya ba la sogs pa brjod par bya ba yin no/ /bskyod pa ste gzhan du gzhag par gyur na bdag 'chi bar 'gyur ro zhes de skad du gal te nad pa zer ba ste/ ji ste rjod par byed na nad g.yog gam gzhan dag gis kyang mi bya zhing mi bsgrub bo/ de bzhin du lhung bzed dang por byas pa'i chos gos la sogs pa gang yin pa de ni lhung bzed la sogs pa'o/ /de'i phyir ni rgyu dang rgyu mtshan zhes bya ba'i bar du'o/ /lhung bzed la sogs phyir yang ste/ de'i don du yang mi bya'o/ /yang gi sgra ni de lta zhog gi gzhan yang zhes bya ba'i don to/ /ji ltar mi bya zhe na/ gdol ba bzhin du zhes bya ba smos pa yin te/ gdol pa ni rigs ngan yin la de'i bsam pa ltar byed pa ni gdol ba bzhin du'o/ /khyad par ji lta bu zhe na/ gang gi phyir brtse ba ste/ snying rje med pa'i bsam pa can de ni brtse ba med do/ /chags pa ni sred pa ste de dang ldan pa'i sems ni chags sems yin no/ /brtse ba med pa yang de yin la chags sems kyang yin/ brtse med chags sems te de lta bur gyur pa'i sems kyis mi bya'o zhes bya ba'i bar du'o/ /de bzhin du rtsod pa ste ca co skyed par byed pa'i dngos po gang dag yin pa de dag ni rtsod pa'i dngos po dag ste/ rtsod pa'i rgyu nga rgyal la sogs pa de dag gang gi tshe mi gtong ba ni mi 'dor ba yin te/ de lta na yang phyogs su gtogs pa nyid du 'gyur ro/ /de bzhin du nan gyis te stobs kyis 'dug par 'gyur ro/ /gang la zhe na/ gzhan gyi khri dang khri'u ste gzhan dag gi khri dang khri'u la'o/ /de bzhin du gzhan la brten pa zhes bya ba ni dge slong dang dge tshul dang khyim pa dag la'o/ /gzas kyang rung zhes bya ba ni brdeg pa'i phyir lag pa'am dbyig pa 'degs par byed ces bya ba'i tha tshig go/ /snga ma ni lag pa la sogs pas mngon par bsdigs pa yin la 'dir ni gzas pa yin pa'i phyir khyad par yod do/ /de bzhin du gzhan la bsdigs par gyur tam zhes bya bar sbyar ro/ /bsdigs pa ni zhum par byed pa yin te/ lung las ji ltar rab tu byung ba gzhan dgun gyi dus su gnas khang las bskrad cing de grang bas gzir ba dang / gzhan yang so ga'i dus su de gnas khang du bcug cing de sgo bcad nas tsha bas gdungs par gyur pa zhes 'byung ba yin no/ /sngangs par byed pa la sogs pa gang yin pa de ni sngangs par byed pa la sogs pa ste/ sngangs par byed pa ni gzhan la 'jigs pa skyed pa'i phyir mun par gnas nas skad bsgyur ba la sogs pa yin par rig par bya'o/ /sogs pa'i sgras kyang de lta bu'i rigs can gzhan dag kyang bsdu ba'i phyir ro/ /sdom pa yod pa'i phyir sdom can de gshe zhing khros pa'i sgo nas dka' thub can te zas dang bral bar byas pa ni smyung ba byas zhes bya ba'i tha tshig go/ /khros pas zhes bya ba'i tshig ni nad pa la phan sems kyis byas na nyes par mi 'gyur ro zhes bstan pa'i phyir ro/ /dang ni sngar bstan pa'i de bzhin zhes bya ba'i sgra rjes su 'dren par byed pa'i don yin te/ gzhan khros pas smyung ba byed du bcug pa nyes byas su 'gyur ba 'ba' zhig ma yin gyi 'on kyang gzhan la khros pa'i sgo nas rang nyid kyis kyang smyung ba byas na yid kyi nyes byas su 'gyur bar reg par bya'o/ /sdom can zhes bya ba 'dir yang rjes su 'brang ba yin pas na sdom can myur du 'gro ba na lam gyis ngal bar gyur pa'i ske ba la sogs pa las lag pas gzung zhing gal te phul bar gyur na yid kyi nyes byas su 'gyur ro/ /rgyal ni rgyal po yin la/ rkun po ni rdzas 'phrog par byed pa'am srog 'phrog par byed pa dag yin no/ /'bul ba ni gtod par byed pa'o/ /dang ni de ltar byams zhes rnam par rtog pa'i don to/ /ngan par byas pas 'gyod pa ste phyi rol gyi dngos po yin la/ 'di ni de la dmigs pa sems las byung ba'i chos yin pas na 'gyod pa zhes bya ba'i sgras brjod pa yin no/ /rnam pa'i sgra ni rang bzhin gyi tshig yin te/ dper na log par lta ba'i rnam pa zhes bya ba la log pa'i lta ba'i rang bzhin zhes rtog par 'gyur ba lta bu'o/ /de bzhin du gzhan dag la yang ched du ste/ blo sngon du song bas gzhan la 'gyod pa'i rnam pa ste 'gyod pa'i rang bzhin de bskyod na yid kyi nyes byas su 'gyur ro zhes bya ba ni tshig gi lhag ma yin no/ /dper na khyod rab tu byung ba ma yin khyod kyi mkhan po tshul khrims 'chal ba dag yin no zhes bya ba lta bu yin no/ /btsir ba ste gzhan sdug bsngal skyed par byed ces bya ba ni lhag ma'o/ /dper na 'ga' zhag sgo glegs sam gzhan dag tu btsir ba lta bu'o/ /ga ga tshil ni g.ya' dgag pa ste de la sogs pa gang yin pa'o/ /sogs pa'i sgras gzhan dgod pa'i rgyu mtshan dang srog rgud par byed pa'i rgyu mtshan du gyur pa dag kyang bsdus pa yin no/ /btsir ba dang ga ga tshil ni btsir dang ga ga tshil sogs skyed pa zhes bya bar sbyar ro/ /de bzhin du nags me ni me gtong bar byed pa yin te/ 'dir srog chags mang ba'i blo tsam yod pa yin gyi/ gsad pa'i bsam pas ni ma yin no/ /ji ltar yang gsod sems kyis mi 'chi bar gyur cig snyam du ni mtha'i nyes byas su 'gyur la/ 'on te dud 'gro 'chi bar gyur cig snyam na ni nyes byas kyi nyes par 'gyur zhing / spyir gtse bar bya'o snyam pa'i bsam pas yin na ni nyes byas kyi nyes par 'gyur ro/ /de'i phyir gsod pa'i bsam pa ma gtogs pa spyir sems can yod do snyam du shes pas gtse ba'i bsam pas nags me gtong na yid kyi nyes byas su 'gyur ro zhes shes par bya'o/ /ma smin pa yang de yin la 'brum bu yang yin pas na 'brum bu ma smin pa ste/ nad yongs su spang ba'i phyir rtol bar byed pa yin no/ /'di skad du/ yongs su ma smin pa'i srin bu rtol bar byed ces bstan par 'gyur ro/ /da ni de bzhin zhes bya ba rjes su 'dren par byed pa'i don te/ ma smin pa brtol na nad du 'gyur zhes bya ba'i dbang du byas nas yid kyi nyes par rig par bya'o/ /'di la khyad par med pa'i phyir bdag dang gzhan gyis shes par bya'o/ / yan lag ste lus gcod par byed pa'i phyir khros pas bdag gam gzhan gyi sor mo la sogs pa gcod par byed ces bya ba ni tshig gi lhag ma'o/ /yang na 'bigs pa ste yan lag ces bya ba dang sbyar bar bya'o/ /yang na zhes bya ba ni phyogs gzhan ston pa'i don te/ yan lag gcod par byed dam yang na 'bigs par byed pa ste/ de ltar na'ang yid kyi nyes par 'gyur ro zhes bstan par 'gyur ro/ /de dag srog gcod pa'i phyogs su gtogs pa yin no zhes bya ba ni lhag ma yin te/ de ni ji ltar nad pa dug dang mtshon sbyin dang / /zhes bya ba la sogs pa thams cad la brjod par bya'o/ /de tsam zhig phyogs dang mthun pa yin par ma zad kyi sngar bstan pa dag kyang yin no zhes bya ba ni kyang gi sgra'i don to/ /de ltar bshad ma thag pa'i rnam pas bslab pa'i gzhir srog gcod pa'i rjes su 'gro zhing rjes su byed pa'i phyir srog gcod pa'i rjes su mthun pa dag yin no/ /de dag gi phyogs tsam ste cha tsam zhig bstan pa yin zhes bya ba ni lhag ma'o/ /phyogs tsam zhes bya ba smos pas de tsam zhig ni ma yin gyi gzhan dag kyang yod do zhes ston par byed pa yin no/ /dge tshul gyi bslab pa las bslab pa'i gzhi dang po'o// // da ni rku sems dang ni 'dod pa de nyid dang / /zhes bya ba la sogs pas ma byin par len pa'i bslab pa'i gzhi'i tshig le'ur byas pa rnam par bshad par bya ste/ dge tshul gang nor te rdzas rku bar byed pa de bsnyil bar rigs pa yin te dge tshul nyid ma yin pa'i phyir ro/ /khyad par ji lta bu zhe na/ ma byin zhes bya ba smos pa yin te/ ma byin pa ni byin pa ma yin pa ste rdzas de gang gi yin pa des ma byin pa zhes bya ba'i tha tshig go/ /khyad par gzhan yang rin thang yongs su tshang ba gang yin pa de ni rin thang tshang ba ste gos la sogs pa'o/ /nor de gang gi yin zhe na smras pa gzhan yang de yin la mi yang de yin pa'i phyir mi gzhan te/ de'i nor yin no zhes bya ba'i don to/ /de'i khyad par ji lta bu zhig ce na/ mi yis bdag gir byas zhes bya ba smos pa yin te/ mi yis bdag gir byas pa kho na bdag gir byas pa ste/ bdag gi yin no zhes dbang du byas pa yin no zhes bya ba'i don to/ /gzhan yang de nyid khyad par du byed pa ni gang kho na rku ba nyid du 'dod pa ni bsams pa ste/ de nyid gal te rku bar byed na 'gyur gyi gzhan ni ma yin no zhes bya ba'i don to/ /de la khyad par ji lta bu zhe na/ dur khrod pa dang zhes bya ba la sogs pa smos pa yin te/ dur khrod na yod pa'i phyir dur khrod pa ste gos la sogs pa'o/ /dbang ba ni thob par nges pa la bya la/ dbang ba ma yin pa ni mi dbang ba ste thob par nges pa ma yin no zhes bya ba'i don to/ /mi dbang ba yang de nyid yin la bsod snyoms kyang yin pas mi dbang bsod snyoms te/ g.yos su byas pa'i zas zhes bya ba'i don to/ /'di ni khyad par gyi bsdu ba'o/ /'dir dur khrod pa dang mi dbang bsod snyoms zhes bya ba ni zlas dbye ba'i bsdu ba yin no/ /de'i phyir gang dur khrod pa dang mi dbang ba'i bsod snyoms dag las gzhan pa'i rdzas dag go/ /dge tshul khyad par ji lta bus rkus par gyur zhe na/ mi yir 'du shes dang zhes bya ba smos pa yin te/ mi rang gi rdzas zhes 'du shes pa gang la yod pa de ni mi yir 'du shes pas so/ /ci bsam pa gang yang rung bas sam zhe na/ smras pa/ rku ba ni rku 'phrog ste de'i bsam pa ni rku sems so/ /sems pa ni mngon par bsams pa yin te des so/ /ci sbyor ba du ma dag gis sam zhe na/ sbyor ba gcig pa dang zhes bya ba smos pa yin te/ gcig kyang de yin la sbyor ba yang yin pa'i phyir sbyor ba gcig pa yin pa de'i phyir des so/ /gang gi don du zhe na/ bdag gi phyir zhes smos pa yin te/ bdag gi sgra ni rang nyid rjod par byed pa yin la phyir gyi sgras dgos pa brjod pa de'i phyir yang bdag gi phyir te/ bdag nyid kyi dgos pa zhes bya ba'i don 'dir 'gyur ro/ /bsdu ba yang 'di ltar bya ba yin te/ bdag dang rang nyid kyi phyir te/ dngos po gang la yod pa de ni bdag gi phyir gzhan gyi nor rku bar byed pa yin gyi/ gzhan gyi phyir ni ma yin no/ /de bzhin gyi sgra ni yan lag re re la yang sbyar bar bya ba yin pa de bas na ji ltar mi gzhan nor dang zhes bya ba 'di yan lag yin pa de bzhin du ji skad du bshad pa thams cad kyang yan lag kho na yin no zhes bya ba'i don 'dir 'gyur ro/ /ci yan lag de tsam kho na dag gis bsnyil bar bya ba yin nam zhe na/ smras pa/ gnas dang dus ni gnas dang dus te/ rdzas de rku ba'i gnas dang dus dag yin la/ de'i rin thang ni gnas dang dus de'i rin thang ste/ de'i dbang gis bsnyil bar bya ba yin gyi/ gnas dang dus gzhan gyi rin thang gi dbang gis ni ma yin no/ /ci rdzas thams cad brkus pas bsnyil bar bya ba yin nam zhe na/ dad pas rgyal ba'i ring bsrel brkus de min/ /zhes bya ba smos pa yin te/ gal te dad pa med par rgyal ba ste bcom ldan 'das kyi ring bsrel de rku bar byed na de'i tshe bsnyil bar bya ba yin no zhes bya ba'i don to/ /yi ge'i bsdu ba bstan nas da ni yan lag gi dgos pa dpyad par bya ste/ gang gi phyir mi gzhan nor dang zhes bya ba la sogs pa'i yan lag yod par gyur na mtha'i nyes par 'gyur ro zhes brjod par bya ba yin na/ ma byin pa zhes ci'i phyir smos she na/ ma yin te gang gi phyir ma byin la mi gzhan nor zhes bya ba la sogs pa'i yan lag gzhan ma lus par yod pa de'i tshe mtha'i nyes par 'gyur bar 'dod kyi/ gal te de las gzhan pa rku sems la sogs pa yod na yang ma byin par len pa nyid med pa'i phyir gzhan gyi rdzas ma yin la/ 'on kyang rang gi rdzas yin pa de'i phyir mtha'i nyes par ni mi 'gyur gyi 'on kyang nyes byas nyid du 'gyur ro/ /de lta na yang brjod par bya ba ma yin te/ gang gi phyir mi gzhan nor dang zhes bya ba smos pa'i shugs kyis ma byin pa zhes khong du chud par 'gyur ba ma yin nam zhe na/ 'di la nyes pa med de gang gi tshe mi gzhan gyi nor yin par gyur la des kyang byin par gyur pa na nyes pa med pa de'i phyir de rnam par bcad pa'i phyir smos pa yin no/ /byin pa brkus par ji ltar 'gyur zhe na/ byin pa yin no zhes de ltar mi shes pa yin te/ de ltar khong du chud par bya'o/ /gang gi phyir gzhan gyi rdzas brkus na nyes par 'gyur ba yin no rin thang tshang ba zhes smos pa ci'i phyir zhe na/ gang gi phyir de ma gtogs pa gzhan gyis ma byin pa tsam yin na ni tshang ba'am ma tshang ba brkus pas mtha' zhes bya ba'i tha mar 'gyur na de ltar yang mi 'dod/ 'on kyang rin thang tshang bar gyur na yin gyi ma tshang na ni nyes byas kyi nyes par 'gyur ba de'i phyir ji skad du bshad pa legs pa yin no/ /tshang ba zhes bya ba ni rku ba'i yul dang dus kyi tha snyad du byed pa'i na na ka'i bzhi cha rjod par byed pa yin no/ /ran thang smos pa ci'i phyir zhe na/ gos la sogs pa yongs su bsdu ba'i phyir te/ rnam pa gzhan du na na ka'i bzhi cha brkus pa kho na la nyes par 'gyur ro/ /rin thang tshang ba zhes bya ba gos la sogs pa yin par brjod pa ma yin nam na na ka'i bzhi cha'i rin thang smos pa de ci'i phyir zhe na/ smras pa rin thang kho na'i dbang du byas nas gos la sogs pa brkus pa la nyes par rnam par gzhag pa de bas na rin thang gtso bo yin no/ /de bas na ma smos su zin kyang de legs pa kho nar smos par 'gyur ro/ /gzhan zhes smos pa ci'i phyir zhe na/ gang gi phyir de ma yin pa'i mi'i nor brkus pas rtsa bar 'gyur ro zhes brjod pa na bdag nyid kyang mi zhes bya ba yin pas bdag nyid kyi brkus na yang 'gyur te/ de ltar na'ang mi 'dod de 'on kyang mi gzhan zhes bya ba smos pas bdag gi brkus na chung bar 'gyur ro/ /ji ltar na bdag gi brkus par 'gyur zhe na/ bdag gi ma yin no zhes 'khrul pa'i dbang gis so/ /'dod pa de nyid ces smos pa 'dis kyang gzhan gyis brku ba nyid du 'dod pa yin gyi/ bdag nyid kyi la 'dod pa ni ma yin pa ma yin nam/ 'on kyang gzhan gyi 'dod pa de'i phyir yang de nyid kho nas rtogs par 'gyur ba'i phyir 'dis ci bya zhe na/ bden te 'on kyang de rdzas spyad pa'i dbang du byas pa yin la/ 'di ni bdag po spyad spyod pa yin pa'i phyir nyes pa med do/ /yang na gzhan dag gis gnas khang du sbas te bzhag pa 'di ni bdag gi yin no zhes shes su zin kyang 'ga' zhig gis kyang mthong bar ma gyur cig snyam pas rku bar byed pa yod cing bsam pa ngan pa srid pa'i phyir ro/ /mi zhes smos pa ci'i phyir zhe na/ dud 'gro la sogs pa rnam par bcad pa'i phyir te/ de'i brkus pas chung bar 'gyur ro/ /mi smos pas mi'i rigs bsdus pa yin pa de'i phyir bud med dang skyes pa dang / ma ning dag gzung ngo / /de bzhin du mi zhes smos pa gzhan dag tu yang ngo / /gang las mi gzhan zhes bya ba 'di nyid kyis rtogs pa yin te gang gi phyir gang gi yin pa de ni de'i yin pa des nges par bdag gir byas pa yin na/ mi yis bdag gir byas pa zhes bya ba ci'i phyir zhe na/ ma yin te mi gzhan gyi nor yin par gyur kyang mis bdag gir ma byas pa la 'gal ba ci yod/ gal te mi gzhan gyi nor de ji ltar bdag gir ma byas pa yin zhe na/ ji ltar sa'am gzhan dag tu rdzas te gang gis sbas pa de yang ci las dus las 'das par gyur la/ bdag gi pha la sogs pas sbas pa yin no/ /de'i bus shes par ma gyur kyang de ni de nyid kyi yin te de'i bu yin pa'i phyir la 'di ni bdag gi yin no zhes des bdag gir byas pa ni ma yin te mi shes pa nyid kyi phyir ro/ /de rtsa ba chad par gyur nas de'i bdag po rgyal po yin du zin kyang de bdag gir ma byas pa yin te de lta bur gyur ba 'dis rnam par gcod par byed pa yin no/ /mang po'i tshig ni gzhan dang gzhan dag gis kyang bdag gir byas pa zhes bstan pa'i phyir ro/ /'dod pa de nyid ces bya ba ci'i phyir zhe na/ gang gi phyir gzhan brku bar bya'o snyam pa las cig shos brkus par gyur na chung bar 'gyur la/ de nyid brkus par gyur na rtsa bar 'gyur ro zhes rab tu bstan pa'i phyir ro/ /dper na dkar po brku bar bya'o snyam pa'am/ 'di che ge mo zhig gi yin no zhes ma bsams par 'khrul pa'i dbang gis brkus par gyur tam/ sbyor ba tsam bya'o snyam du shes pas gal te len par mi byed na chung bar 'gyur la/ de lta ma yin na 'dod pa de nyid ces bya ba'i dbang du byas nas 'di nyid rtsa bar 'gyur ba lta bu'o/ /de nyid kyi phyir slob dpon yon tan 'od kyis ma bsams pa ma yin pa la ltung bar 'gyur ro zhes gsungs pa yin no/ /de la dur khrod pa dang mi dbang bsod snyoms gzhan zhes bya bas ni dur khrod pa la sogs pa rnam par bcad pa yin no/ /ci 'di ni phyis rnam par dpyad par bya'o/ /mi yir 'du shes zhes bya ba ci'i phyir zhe na/ gang gi phyir mi gzhan gyi nor yin la mis kyang bdag gir byas pa zhes bya ba la sogs pa'i yan lag yod par gyur na 'di ni mi'i yin gyi dud 'gro la sogs pa'i ni ma yin te/ 'on kyang 'ga' zhig gis bdag gir ma byas pa ma yin pa'i phyir 'du shes gang yin pa de med na mthar ni mi 'gyur gyi 'di ltar nyes byas su 'gyur ro zhes bstan par bya ba'i phyir mi yir 'du shes zhes brjod pa yin no/ /gzhan gyi rdzas rku bar byed pa gang yin pa de la rku sems nyid yod pa kho na yin na ci'i phyir 'di smos she na/ 'di la gdon mi za bar rku sems nyid yod pa nyid du 'gyur ro zhes nges pa ni med de/ gang gi phyir 'ga' zhig tu bdag nyid kyi bsam pas 'di ni bdag gi yin no zhes pa'am/ 'ga' zhig tu dus de srid cig las phyir yang bzlog par bya'o snyam pa'am/ 'ga' zhig tu bdag gi grogs bshes zhes bya ba la sogs pas yang brtan pa med par yang rku sems yod pa'i phyir 'di smos pa yin no zhes shes par bya'o/ /sbyor ba gcig pa yi zhes ci'i phyir brjod de gang gi phyir sbyor ba du mas ma sbyor ba gcig gis na na ga'i bzhi cha brkus par gyur na dngos gzhir byed pa kho na brkus pa nyid yin no zhe na/ bden te 'on kyang sbyor ba du mas rku bar byed na sbyor ba du ma'i nyes byas su 'gyur gyi dngos gzhi ni ma yin la gang gi tshe sbyor ba gcig gis rin thang tshang ba brkus pa de'i tshe 'gyur ro zhes bstan par bya ba'i phyir 'di brjod pa yin no/ /bdag gi phyir zhes pa ci'i phyir zhe na/ gang gi phyir rku bar byed pa gang yin pa de la nges pa kho nar rang gi don yin par 'di la nges pa med de/ gang gi phyir gzhan gyi don nam chud gzan pa'i phyir rku bar byed pa srid pa yin pas de'i phyir gzhan gyi don du rku bar byed na nyes byas su 'gyur la/ chud gzan pa yang phrogs te/ chud gzan pa ni chung ngur 'gyur zhes 'chad par 'gyur ba de bas na bdag gi phyir zhes smos pa yin no/ /gnas dang dus de'i rin thang dbang gis bskrad/ /ces bya ba ci'i phyir zhe na/ gnas gzhan la sogs pa rnam par bcad pa'i phyir te/ gnas gang dang dus gang la brkus pa'i gnas dang dus de'i rin thang gang yin pa de'i dbang gis nyes par 'gyur gyi/ dus gzhan la sogs pa'i dbang gis ni ma yin no/ /de la 'dir rang gi gnas dang dus de'i rin thang gis dngos gzhir 'gyur la/ ci ste ma yin na chung bar 'gyur ro zhes khong du chud par bya'o/ /dad pas rgyal ba'i ring bsrel brkus de min/ /zhes ci'i phyir smos she na/ dad pa ma yin par 'tsho ba'i don du bcom ldan 'das kyi ring bsrel brkus na dngos gzhir 'gyur ro zhes bstan par bya ba'i phyir ro/ /de la brku ba la ni zhes bya ba la sogs pas yan lag ma lus pas ni dngos gzhir 'gyur zhing / yan lag ma tshang bas na nyes par 'gyur ba dang mi 'gyur ba ston par byed/ de la rku sems kyi dngos po ni rku sems nyid de'i rgyu'i gtso bo yin no/ /gang la zhe na smras pa/ gzhan gyi rdzas rku zhing 'phrog pa la zhes bya ba lhag ma'o/ /gang gi phyir de ltar gyur pa de'i phyir gcig po de nyid dang bral ba ste/ med na dngos gzhi'am sbyor ba'i nyes pa nyid du mi 'gyur ro/ /kho na'i sgra ni gzhan du ma yin no zhes gzhan rnam par bcad pa'i don to/ /'di skad du yan lag lhag ma thams cad yod kyang gcig po 'di nyid med na nyes pa med do zhes bstan par 'gyur ro/ /gal te sbyor ba'i gnas skabs na rang gi bsam pa la sogs pas 'jug pa'i phyir rku sems med na dngos gzhi'i gnas skabs su ni rang gi bsam pa la sogs pa ldog pa de bas na dngos gzhir 'gyur la bzlog pas ni sbyor ba'i nyes par 'gyur gyi de dngos gzhi ni ma yin no zhes rig par bya'o/ /rku sems las gzhan pa lhag ma de dag ni yan lag lhag ma ste lhag ma yang de yin la yan lag kyang yin pas zhes bya ba ni khyad par gyi bsdu ba'o/ /de dag dang mi ldan pa dang med pa dang mi snang ba zhes bya ba don gcig pa yin pa de'i yan lag lhag ma dang mi ldan pa ni med pa nyid yin te nyes byas chung ngur 'gyur ro zhes bya ba ni lhag ma'o/ /'di skad du yan lag lhag ma dag las gzhan 'ga' zhig ni med kyang rku sems yod na ni chung bar 'gyur ro zhes bstan par 'gyur ro/ /ni'i sgra ni gong ma las khyad par du byed pa'i don to/ /rku sems dang bral ba 'ba' zhig gis nyes pa med pa ma yin gyi/ 'on kyang gzhan dag la yang 'gyur te gang gi phyir rang bzhin du gnas pa rmi lam ma yin pa bslab pa dang bcas pa zhes bya ba de dag rjes su 'jug pa'i phyir rmi lam la sogs zhes smos pa yin te/ rmi lam dang por byas pa gang yin pa de ni rmi lam la sogs pa ste/ sogs pa'i sgras bshad ma thag pa sdud par byed do/ /de la rmi lam la sogs pa la nyes pa nyid yod pa ma yin te/ nyes byas su mi 'gyur ro zhes bya ba'i bar du'o/ /'dir ji ltar rku sems med na yan lag lhag ma thams cad yod kyang nyes par mi 'gyur ba de ltar rmi lam la sogs pa 'di la yang gang yang rung ba re re med na gzhan yod kyang nyes par mi 'gyur ro zhes khong du chud par bya'o/ /ni'i sgra ni rmi lam la sogs pa nam yang nyes pa yod pa ma yin pa zhes nges par gzung ba'o/ /da ni dang po sems bskyed pa la bsdam par bya zhes bya ba la sogs pas/ bslab pa'i gzhi thams cad kyi gnas skabs gang la kha na ma tho ba cir 'gyur ba de brjod par bya ste/ dang po zhes bya ba ni 'das pa thams cad kyi sbyor ba thams cad la rab tu 'jug pa'i sems gang yin pa de skyed pa ste 'di dang 'di bya'o zhes nges pa'i mtshan nyid can gyi yid kyi rnam par rtog pa skye ba yin no/ /de la de lta bur gyur pa'i sems bskyed pa ni yid kho nas bsdam par bya zhing phyir gso bar rigs pa'i phyir bsdam par bya ba ste yid kyi kha na ma tho bar 'gyur ro/ /gang zhig rku ba la sogs pa'i don gyi sbyor ba brku bar bya ba'i rdzas 'dren par byed pa la sogs pa'i phyir sngar ldang ba dang 'gro ba la sogs pa'i mtshan nyid bya ba ni sbyor ba yin pa de'i phyir sbyor ba la ni nyes byas kho na ste bshags par bya ba nyid du shes shing khong du chud par bya'o/ /nyid ni gzhan du ma yin no zhes nges par gzung ba'i don to/ /sbyor ba'i dus phyis zhes bya ba ni rjes su sbyor ba ste/ sbyor ba'i sbyor ba yin la de la yang nyes byas nyid du 'gyur gyi sbyor ba 'ba' zhig la ni ma yin no/ /yang gi sgra ni gang zhig rku ba'i don gyi sbyor ba brku bar bya ba'i rdzas 'dren pa la sogs pa'i rang bzhin de la yang nyes byas su 'gyur ro zhes bya ba'i don to/ /dang gi sgra ni bshad zin pa'i sgra sdud pa yin la nyid ni snga ma dang 'dra'o/ /'dir zhes bya ba ni srog gcod pa la sogs pa kun la'o/ /rtsa ba nyid ni srog gcod pa rjes su sgrub par byad pa yin la/ gzhan yang brku bar bya ba'i rdzas gnas nas skrod par byed pa'i mtshan nyid kyi rtsa bar gyur pa'i phyir rtsa ba nyid kyi nyes par 'gyur te/ dang po'i bzhi po sdom pa 'jig par byed pa dang / gzhan bshags par bya ba'i dngos gzhi nyid du 'gyur ro zhes bya ba'i don to/ /dper na 'ga' zhig gis spyod lam bzhi po dag las gang yang rung bas 'dug ste/ rku ba'i phyir rnam par rtog par byed pa de las yid kyir 'gyur la/ de'i 'og tu 'jug par byed cing ji srid nom par mi byed nyug par mi byed kyi bar du nyes byas su 'gyur ro/ /de'i 'og tu yang gnas nas gnas su sbed par byed pa de la yang nyes byas su 'gyur la/ gnas nas bskyed pa na rtsa bar 'gyur te/ de bzhin du gzhan dag la yang blta bar bya'o/ /ji ltar yang / yan lag lhag ma mi ldan chung bar 'gyur/ /zhes spyir nyes pa chung ngur 'gyur ba bstan pa de ltar yang phrogs te chud gzan pa ni zhes bya ba la sogs pas dngos gzhi'i yan lag ma tshang ba'i spros pa ston par byed de/ 'di yir ma gyur cig bdag gir yang ma gyur cig snyam pa'i blo ni chud gzon pa ste phrogs te chud gzon pa ni chung ba nyid du 'gyur te/ bshags par bya ba kho na'i nyes par 'gyur ro/ /nyid ni gzhan du ma yin no zhes nges par gzung ba'i don to/ /rgya ni gang gis chu las nya 'don par byed pa ste/ de la sogs pa de lta bu'i rigs can gang yin pa de ni rgya la sogs pa'o/ /'khrul 'khor ni ri dwags la sogs pa gsad pa'i phyir shing gi sbyor ba dag yin no/ /'khrul 'khor rgya la sogs pa dang bcas par 'jug pa'i phyir 'khrul 'khor bcas pa'i rgya la sogs pa ste/ de chud gzan pa ni nyes byas chung ba nyid du 'gyur ro/ /dang ni sdud par byed pa'i don yin no/ /'di la chud gzan pa'i bsam pa nyid yod pa'i phyir rku sems kyang med la bdag gi phyir yang ma yin no/ /mi dbang bsod snyoms yongs su blangs gyur na/ /zhes bya ba ni yongs su blangs pa zhes bya ba ni 'phrog par byed pa ste/ de la yang nyes byas kho nar 'gyur ro/ /nyid ni nges par gzung ba'i phyir ro/ /kyang gi sgra ni g.yos su byas pa'i zas rin thang tshang du zin kyang chung ba kho na yin no zhes khyad par du bya ba'i don te/ rgyu gang gis she na/ 'jig rten tha snyad tshul gyis zhes bya ba smos pa yin te/ 'jig rten pa'i tha snyad kyi tshul ni 'jig rten tha snyad tshul yin pa de bas na des so/ /gang gi phyir g.yos su byas pa'i zas la na na ka ji lta ba de bzhin du 'jig rten pa la 'dzin pa med pa de'i phyir mchog gam khyad par can ma yin pas 'jig rten pa 'di la rku ba'i blo skye bar mi 'gyur ro/ /de bas na mis bdag gir byas pa dang rin thang tshang ba med pa'i phyir mi yis bdag gir byas pa zhes bya ba 'di la med pas nyes pa chung bar 'gyur ro/ / mi dbang zhes bya ba'i don ni sngar bshad pa yin te/ de bas na don 'di ni dbang ba ma yin pa'i bsod snyoms te 'jig rten pa'i brnyas pa'i yul yin pa'i phyir snying brtse ba'i blo ni mi skye ba de bas na nyes pa chung bar 'gyur ro zhes bya ba'i don to/ /gang gi tshe 'ga' zhig gis dus de srid cig gos la sogs pa byin pa ltos pa med par longs spyad na cir 'gyur ba bstan par bya ba'i phyir/ gzhan gos gtan du byin ltar spyod pa dang zhes bya ba smos pa yin te/ gos dag gtan du byin pa'i tshul gang yin pa ste de lta bu des so/ /gzhan dag gos yongs su longs spyod pa ni de la zhen pa yin te/ gzhan dag gi gos longs spyad na nyes byas su 'gyur ro/ /dang ni rim pa gzhan sdud par byed pa yin te/ 'di skad du dus de srid cig rnyed pa la rnam pa thams cad du rnyed pa yongs su longs spyad pa ltar 'gyod pa med cing ltos pa med par spyod par byed na nyes byas su 'gyur ro zhes bstan par 'gyur ro/ /mi rigs par spyod pas snying po len par byed pa yin gyi/ ci zhig kyang brkus pa ni med pa'i phyir rku sems dang rku ba'i yan lag gzhan dag kyang med la bsam pa ni ngan par gyur ba yin no/ /sman dang sngags ni sman dang sngags te de dag gis kyang gos la sogs pa sbyin du 'jug na nyes byas su 'gyur ro/ /kyang gi sgra ni sdud par byed pa yin te/ dper na sngags kyi sbyor ba dang gzhan mgu bar bya ba'i thabs su gyur pa me tog la sogs pa byin pas sbyin du 'jug na nyes byas su 'gyur ba lta bu'o/ /sbyin pa po de la bdag nyid 'dod pas sbyin pa la 'jug pa ni med kyi/ 'on kyang 'di ltar sngags la sogs pa'i dbang ngam stobs kyi rnam pas 'jug pa yin pa'i phyir rku sems nyid ni med de/ 'di ltar log pa'i 'tsho ba ni yin pa de'i phyir ma byin par len par gtogs pa'i nyes par mi 'gyur ro/ /'dod pa ni mngon par bsams pa ste de rku ba ni 'dod pa rku ba'o/ /de'i phyir mang po'i nang du rnam par 'byed par byed cing tha dad par byed na nyes byas su 'gyur ro/ /'dod pa brku bar bya'o snyam pas mang po'i nang nas rnam par 'byed par byed kyi/ gnas nas skyod par mi byed na yang nyes byas yin gyi/ dngos gzhir ni mi 'gyur te/ gang gi tshe 'dod pa gnas las skyod par byed pa de'i tshe dngos gzhir 'gyur bar rig par bya'o/ /gzhan gyi don ni gzhan don te de'i don du'o/ /don gyi sgra ni dgos pa'i tshig yin no/ /len cing blangs la 'gyed pa ste rnam par 'god na nyes byas su 'gyur ro/ /dang ni sdud par byed pa yin no/ /dper na gzhan gyis khyed cag gis 'di dang che ge mo la mchod ston la sogs pa 'di dang 'di gyis shig ces gzhan gyi lag tu byin pa dang de dag gis de yang blangs nas 'god par byed na nyes byas su 'gyur ro zhes bya ba'i don to/ /'di ji ltar na nyes byas su 'gyur te/ gang gi phyir mi gzhan gyi nor yang yin la rku sems kyang yod pa'i phyir dngos gzhir 'gyur ro zhe na/ smras pa/ mi yis bdag gir byas pa zhes bya ba'i bdag gir byas pa nyid 'di la med do/ /gang gi phyir che ge mo la mchod ston la sogs pa gyis shig ces de gang la bstabs pa des bdag la mchod ston gyi phyir byin pa yin no zhes 'di mi shes la/ gang gis byin pa des kyang yongs su spangs pa de'i phyir 'gas kyang bdag gir ma byas pa yin no/ /de ltar na yang dngos su bdag po dang bcas pa kho na yin yang bdag pos mi shes pa'i sgo nas bdag po dang bcas pa ma yin pa'i phyir nyes byas su 'gyur bar rig par bya'o/ /'ged pa smos pa ni mang po'i dbang du byas pa yin pa de'i phyir gcig gis blangs su zin kyang nyes byas su 'gyur ro/ /phyogs bzhi gang la yod pa de ni phyogs bzhi pa'o/ /de dag gi tshogs ni phyogs bzhi pa'i tshogs te/ phyogs bzhi pa'i tshogs de'i 'phags pa'i tshogs ni 'phags pa'i dge 'dun gyi dkor ro/ /phyogs bzhi'i don du brkus na chung ba ste/ nyes byas chung ngur 'gyur ro zhes bya ba'i don to/ /dper na gzhan phyogs bzhi pa'i dge 'dun gyi tshogs kyi dkor gzhan phyogs bzhi pa'i don du gnas gzhan du skyod par byed na bshags par bya ba'i nyes byas su 'gyur ba lta bu'o/ /'dir gnas gzhan du skyod pa tsam yin gyi bdag po'i dbye ba ni ma yin pa de'i phyir bsam pa'i nyes pa'i dbang gis nyes byas su rnam par gzhag pa yin no/ /nor gcig pa'i spun 'dra ba'i dge 'dun la zhes bya ba'i dbang du byas na gnas gang du bdag po tha dad par gyur pa de dag tu ni cig shos las gzhan du skyod par byed na/ rku ba po yang der 'dus pa'i phyir dngos gzhi kho nar 'gyur ro/ /'on te ma yin na chung ba yang yin te bdag gi phyir zhes bya ba'i yan lag med pa'i phyir ro/ /gang / dur khrod pa dang mi dbang bsod snyoms gzhan/ /zhes bya ba de sngar phyis rnam par dpyad par bya'o zhes bstan pa de las mi dbang bsod snyoms zhes bya ba la sogs pas gcig gi rnam par dpyad zin la dur khrod gnas kyi zhes bya ba la sogs pas gnyis pa rnam par dpyad par bya ste/ de la dur khrod ni kun nas sreg par byed pa yin te/ de'i gnas yin pa de'i phyir dur khrod gnas kyi'o/ /khyad par ji lta bu zhe na/ mi'i yongs su 'dzin pa dang bcas par 'jug pa'i phyir 'dzin bcas te/ 'dzin pa dang bcas pa de las so/ /gos la sogs pa gang yin pa de ni gos la sogs pa'o/ /de brkus par gyur na ji ltar gong du chung bar 'gyur ba de bzhin du 'dir yang chung bar 'gyur ro zhes bya ba'i tha tshig go/ /da ni 'di rnam par dpyad par bya ste/ de la gal te dur khrod pa'i dngos po mi yis bdag gir byas shing rin thang tshang bar gyur la/ yan lag gzhan dag kyang yod na nyes pa yongs su rdzogs pa kho na'o/ /'on kyang med na 'di 'ba' zhig tu ma zad kyi gzhan dag la yang chung ba kho nar 'gyur ro/ /dur khrod gnas kyi yongs su 'dzin bcas las/ /zhes bya ba'i khyad par ci'i phyir zhe na/ smras pa/ dur khrod kyi gnas ni rnam pa gnyis te/ 'dzin pa dang bcas pa dang 'dzin pa med pa'o/ /de la 'dzin pa dang bcas pa yang rnam pa gnyis te/ lus kyis las su byas pa dang nyos pa'o/ /de la lus kyis las su byas pa ni 'dir gang 'byung ba de bdag gi yin te/ bdag gi lus kyis khyed kyi las bsgrub par bgyi'o zhes rgyal po'i thad las bdag gir byas par gyur pa'o/ /nyos pa yang 'dir rab tu grags pa kho na yin te/ 'dir nor khas blangs pa ji ltar bsgrubs pa la sogs pa'i 'jigs pas 'bad rtsol gyis srung bar byed pa de'i phyir yang 'di la bdag gir byas pa shin tu che ba ltar snga ma la ni ma yin te/ gang gi phyir lus kyis las su byas pa de la ni lus kyi g.yo 'gul tsam las cung zhig kyang sbyin par mi byed pa de'i phyir bdag gir byas pa'i shas shin tu chung ba yin pa de bas de'i dbang du byas nas 'dzin bcas zhes smos pa yin no/ /cig shos las ni mtshan nyid ji lta ba dang bsam pa ji lta ba bzhin du nyes par 'gyur bar rig par bya'o/ /de ltar na rku sems zhes bya ba la sogs pas rku bar byed na dngos gzhi yan lag tshang ba dang ma tshang ba las dngos gzhi'i nyes pa dang nyes pa chung ngur 'gyur bar bshad pa yin no/ /da ni gang gis gnas skabs gang dang gang la rku ba de brjod par bya ba de nyid kyi phyir/ /da ni rku ba'i dbye ba brjod par bya/ /zhes smos pa yin te da ni zhes bya ba ni da ltar ro/ /rku bar byed pa ni rku ba ste de'i dbye ba 'chad par 'gyur ba'i rnam pas brjod par bya ba ni ji ste 'dus par brtsad pas zhes bya ba la sogs pas bstan par bya'o/ /sa ni sa yin te zhing la sogs pa de'i sa'o/ /tshig rnam pa du ma rnam pa sna tshogs pa ni brtsad pa yin te/ des rku ba ni rku bar byed pa'o/ /de la brkus par gyur pa ji tsam na brkus par 'gyur zhe na/ gang gi tshe khyim pas sbyor btang zhes smos pa yin te/ btang ba ni yongs su spangs shing gang gis sa la brten pa'i tha snyad kyi sbyor ba de btang ste/ sa'i bdag po khyim pa des gang gi tshe sbyor ba btang bar gyur pa de'i tshe brkus par 'gyur ba yin no zhes bya ba'i bar du'o/ /khyim pa smos pa ni nye bar mtshon pa yin te/ gzhan dag la yang sa la brten pa'i tha snyad du bya ba yod pa'i phyir ro/ /de gang du zhe na/ ci ste 'dus par zhes bya ba smos te/ ci ste bram ze la sogs pa'i 'dus par de rtsod par gyur pa de'i tshe 'di brkus pa yin no/ /gzhan dag tu ji ltar 'gyur zhe na/ gal te blar ni rgyal ba nyid na brkus/ /zhes smos te/ bla ni rgyal po yin te gal te rtsod pa smra ba des rgyal bar gyur pa de'i tshe de rgyal ba nyid na brkus par 'gyur ro/ /nyid ni sbyor ba ma yin no zhes nges par gzung ba'i don to/ /gang gi phyir der gtan la phab par yang tha snyad kyi sgo nas rnam pa gzhan du byed par mi nus pa yin te/ gang las bcom ldan 'das kyis dge slong dag rgyal po ni thams cad la dbang byed pa yin pa'i phyir bla yin no zhes gsungs pas/ bram ze'i 'dus par rgyal ba ni sbyor ba kho na yin no/ /sa dang khang khyim dag rtsig pa la sogs pas yongs su bskor ba ji tsam na brkus par 'gyur zhe na/ bskor ba'i dbang gis zhes smos te/ bskor ba ni rtsig pa la sogs pas kun nas bskor cing yongs su bskor ba ste/ kun nas bsgribs pa de'i dbang gis rku bar byed pa na sa phyogs gang du mtshams su byas pa der mtshams kyi snar gang gi tshe 'byor bar gyur pa de'i tshe brkus pa yin te/ de tsam na rku ba yongs su rdzogs par gyur to zhes bya ba'i don to/ /rnam pa mang pos mi rku bar byed de/ de dag gi nang nas ji ltar brdas brku bar 'gyur zhe na/ brda'i tshul gyis zhes bya ba la sogs pa smos te/ mi rku ba ni mi rku ba na'o/ /mi zhes bya ba ni rigs gzung ba yin pa de'i phyir skyes pa dang bud med dang ma ning dag gzung ngo / /de la mi rku bar byed pa na gang gi dbang gis nyes par 'gyur zhe na/ brda grub dbang gis zhes smos te/ brda grub pa ni brda grub pa ste de'i dbang gis so/ /de'i phyir brda grub pa'i dbang gis nyes byas su 'gyur ro zhes bya bar sbyar ro/ /rnam pa gang gis rku ba yin zhe na/ brda'i tshul gyis zhes bya ba smos pa yin te/ brda yang de yin la tshul yang de yin pas na brda'i tshul gyis so/ /tshul ni sbyor ba la bya ste brda'i rang bzhin gyis sbyor ba zhes bya ba'i don yin pa de bas na des rku ba ni rnam pa de lta bus brkus par 'gyur zhes bya ba'i tha tshig go/ /bcom ldan 'das kyis mi rku ba ni gsum ste gsum gang zhe na/ yul phyogs dang brda dang mtshan ma zhes gsungs pa ma yin nam/ brda'i tshul gyis zhes bya ba ni de ci'i phyir smos she na/ smras pa de la yul phyogs ni lha rten yin la/ brda ni snga dro la sogs pa'o/ /mtshan ma ni sgra dang kha spu la sogs pa bregs nas ring po ma lon pa dag yin no/ /de la yul phyogs la sogs pa gsum po dag la don sna tshogs pa yod du zin kyang snga dro la sogs pa'i khyad par nye bar mtshon par dka' ba yin pa'i phyir kun la brda'i sgra'i spyis bstan pa yin no/ /yang na brda smos pa ni yul phyogs dang mtshan ma gnyis kyi nye bar mtshon par byed pa yin no/ /ji ltar na yul phyogs kyis brkus par 'gyur zhe na/ dge tshul rku ba'i bsam pa can gyis mi la 'di skad du yul gzhan du song shig dang der 'di dang 'di sbyin par bya'o zhe'am/ 'di dang 'di gyis shig ce'am/ rig pa lhan cig bslab par bya'o zhes smras pa na/ des kyang de ltar dge'o/ /yu bu gang du mjal bar bgyi zhes smras la/ der phyin par gyur na bdag gi dbang du 'gyur ro snyam pa'i bsam pas/ rku ba pos lha rten la sogs pa che ge mo zhig tu'o zhes smra bar byed de/ des kyang der phyin par gyur na brkus par rdzogs par brjod par bya'o/ /ji ltar na mtshan mas she na/ snga ma bzhin thams cad brjod par bya'o/ /de la khyad par ni ji tsam na mjal bar bgyi/ dge tshul gyis smras pa/ bdag gis skra dang kha spu la sogs pa bregs nas ring po ma lon pa mthong bar gyur pa de'i tshe khyod kho bo'i thad du shog shig ces bya ba de lta bu ni mtshan ma dag gis yin no/ /ji ltar na brdas yin zhe na/ snga ma bzhin du 'dir yang thams cad brjod nas khyad par 'di ltar brjod par bya ste ji tsam na kho bo khyod kyi thad du 'ong bar bya zhes dge tshul la dris pa na/ nyi ma phyed sgang la sogs pa dag tu'o zhes smras pa dang / des kyang der phyin par gyur pa na brkus par brjod par bya ste/ de lta bu ni brda yis yin no/ /gzhan yang rnam pa gzhan stobs kyis 'dren par byed pa dang / bteg pa dang / sngags dang sman gyis rmongs par byas pa dang / bcings pa thar par byas pa dang / 'jigs pa'i rgyu mtshan bstan pas bkri ba dang / sngags kyis 'dren par byed pa zhes bya ba la sogs pas de lta bu dag ni nges par dpyad nas mtshan nyid ji lta ba bzhin du 'dir brkus par shes par bya'o/ /ji ltar dud 'gro bcings pa brkus par 'gyur zhe na/ byol song rgyud ces bya ba la sogs pa smos te/ byol song gi rgyud thag pa la sogs pas shing la sogs pa la bcings pa'o/ /rku ba ni rku bar byed pa'i dus su'o/ /bcings pa kho nar bcings pa tsam ste de bkral ba ni bcings pa tsam bkrol ma thag tu'o/ /de brkus par 'dod pa ni brkus par dgongs pa'o/ /tsam smos pa ni brku bar bya ba gzhan la mi ltos pa nyid du ston par byed pa yin te/ gang gi phyir de ni 'dir gnas nas bskyod pa yin pas so/ /ji ltar na khyu las bkar ba la sogs pas brkus pa yin zhe na/ bkar tam zhes bya ba la sogs pa smos te/ bkar ba ni dud 'gro khyu las tha dad par byas nas khyer ba'o/ /btags pa ni khyu dang lhan cig 'gro ba shing gi rtsa ba la sogs pa la btags pa'o/ /bkar ba dang btags pa ni bkar ba dang btags pa ste/ de bas na dud 'gro'i rgyud cig khyu las bkar tam/ btags par gyur pas so/ /snang bar gyur pa ni snang ba ste/ mthong ba nyid du gyur ces bya ba'i don to/ /snang ba ma yin pa ni mi snang ba ste de las bzlog pa'o/ /der gyur pa'i phyir de'i bdag po 'am srung zhing skyong ba la mi snang bar gyur pa na'o/ /de la mchog tu gtod pa gzhan 'ga' zhig las brkus par ni 'brel pa med la ji srid khyu las mi snang ba nyid du gyur na zhes bya ba ni rung ba tsam nyid gzung ba yin te/ ci ste gcig pu zhig na gnas gang las bskyod pa de las zhes bya bar shes par bya zhing de tsam du gyur pa la rku ba'i blo gnas pa yin no/ /gal te bla ma'i gos sogs bskur ba na/ /zhes bya ba la sogs pas lam du 'gro ba'i rku brjod par byed de/ bla ma de slob dpon dang mkhan po'i gos la sogs pa bskur ba na'o/ /gom pa myur ba sngon du mgyogs par 'gro bas so/ /yang na gom pa bsnur ba ni gom pa phyir bsnur ba ste rgyab phyogs su 'gro bas so/ /mthong ba'i phyir snang ba ste mthong ba ma yin pa ni mi snang ba'o/ /de'i dngos po ni mi snang ba nyid yin pa de'i phyir gang gi tshe re lde la sogs pa ste/ sab mo la sogs pa'i phag tu mi snang bar gyur pa de'i tshe rtsa bar 'gyur ro/ /bla ma smos pa ni nye bar mtshon pa yin te/ gzhan dag la de lta bu srid pa'i phyir ro/ /'di 'ba' zhig ma yin gyi mngon sum du rku ba ni mngon sum rku ba ste de la yang ngo / /de dang 'dra ba ste snga ma bzhin du rtsa bar 'gyur te/ 'di la yang ji srid de snang bar gyur pa de srid du gnyi ga'i brkus pa'i blo mi 'byung ba yin no/ /ji ltar gru brkus par 'gyur ba mtsho'am thang ngam zhes bya ba la sogs pa ston par byed de rtsa ba zhes bya ba rjes su 'jug pas ji ltar byol song gi rgyud mi snang bar gyur pa na brkus pa yin pa de bzhin du gru yang mi snang bar gyur pa na brkus pa yin no/ /'di gang du brkus par 'gyur zhe na/ smras pa/ yangs pa yang de yin pas yangs pa'i chu ste mtsho'o/ /dper na rgya mtsho'i chu'am gzhan dag lta bu'o/ /de la mtsho 'ba' zhig ma yin gyi 'dir thang yang yin te thang ni sa skam dag yin no/ /de la yang bteg pas sam chu bo'i rgyun la 'dren par byed na gru mi snang bar gyur pa na brkus pa yin no/ /klung la sogs pa gang yin pa de ni klung sogs so/ /mtha' ste pha rol gyi ngogs gang yin pa snang ba ni klung sogs mtha' snang ba'o/ /mtha' snang ba ma yin pa ni klung sogs mtha' mi snang ba'o/ /de la klung la sogs pa dang chu bo la sogs pa'i thad kar rku ba na ngogs cig shos la sogs pa'i rgal sa'i ngogs su khyer ba ni de bzhin du mi snang bar gyur pa kho na ni brkus par 'gyur ro/ /gang gi tshe pha rol snang bar gyur pa de la ji ltar 'gyur zhe na snang na zhes bya ba smos te klung la sogs pa'i pha rol gyi ngogs snang ba la ni tshu rol nas bshad ma thag pa'i pha rol tu phyin na de'i tshe brkus par rig par bya'o/ /klung gi sgras ni chu bo rjod par byed pa la sogs pa'i sgras ni lteng ka la sogs pa gzung ngo / /ni'i sgra ni snga ma las khyad par du byed pa'i don to/ /gang gi tshe rgyun las bzlog phyogs su rku bar byed pa de'i tshe ji ltar 'gyur zhe na/ rgyun las zhes smos te/ rgyun las bzlog pa ni bzlog pa dang mi mthun pa yin pa'i phyir mi mthun pa dang / 'bab phyogs ma yin pa zhes bya ba'i don to/ /ni'i sgra ni snga ma las khyad par byed pa'i don yin no/ /de la rgyun gyi bzlog phyogs su khrid par gyur na gru brkus par 'gyur ro/ /ji ltar brkus par 'gyur zhe na/ gru tshugs 'das na zhes bya ba smos te/ gru tshugs las shin tu 'das pa'i phyir gru tshugs 'das pa ste/ de las so/ /gang gi gru tshugs las 'das par gyur pa zhe na/ rgal ba'i sa'o/ /'di skad du pha rol du bkri ba'i phyir ji srid gyen phyogs su khrid par byed pa'i ngogs de gru tshugs zhes bstan par 'gyur ro/ /rgyun bzlog phyogs su khrid par gyur na de las 'das par gyur na brkus par 'gyur ro zhes bya ba de ni de'i gnas yin no/ /zhes bya ba'i dbang du byas pa yin la rgal sa'i gru tshugs med na gdags pa'i tshad tsam gnas nyid yin pa de'i phyir de'i de las 'das na brkus pa yin/ ji ltar sngags la sogs pa'i sbyor bas rku bar byed ce na/ brku bya sngags kyis rku bar byed pa na/ /zhes bya ba la sogs pa smos te/ brku bar bya ba gter la sogs pa gzhan dag gi rdzas rang gi mig ste bdag nyid kyi mig gis mthong ba nyid na brku bya de brkus par 'gyur ro/ /nyid ni gnas gzhan du spos pa la sogs pa'i mtshan nyid can dag ni ma yin no zhes rnam par dpyod pa'i don to/ /sngags kyis zhes mang po'i tshig tu byas pa ni sman yongs su bsdu ba'i phyir ro/ /mthong ba smos pa ni de mthong bar gyur pa na grub pa'i blo gros kyi dbang du byas pa yin no/ /chu la sogs pa dag tu spyings pas rku ba la ji ltar 'gyur zhe na/ rdzas kyi steng phyogs zhes bya ba la sogs pa smos te/ chu la sogs par nub par gyur pa ni 'og tu spyings par gyur pa ste des brkus par 'gyur ro zhes bya bar dgongs so/ /brku bar bya ba'i rdzas kyi steng gi phyogs ni rdzas kyi steng phyogs te/ de chu la sogs pa gang du nub par gyur pa de'i gnas kyi steng phyogs las de 'das shing phyin par gyur na brkus par 'gyur ro/ /spyings pas rku bar byed pa na rdzas kyi steng gi cha chu la sogs pa gnas kyi steng gi char nub par gyur na brkus par 'gyur ro zhes bya ba'i don to/ /'di ltar rku ba po ni spyings nas phyis brku bar bya'o snyam pa ma yin nam zhe na/ bden te 'on kyang de ni brkus pa bskur ba'i blo yin par blta bar bya ste/ de nyid kyi phyir mdo mdzad pas phyis brku'o snyam pa'i blo gang yin pa de ni blang ba'i yin no zhes gsungs so/ /lus la btags pa'i rgyan rnams ji ltar brkus par 'gyur zhe na/ lus kyi rgyan rnams zhes bya ba la sogs pa smos te/ lus kyi yan lag yin la rgyan ni mdzes par byed pa'o/ /bkrol bar gyur pa ni lus kyi yan lag las tha dad par byas par gyur pa na brkus pa yin te/ de ni 'dir gnas nas bskyod pa yin no/ /gang gi phyir lus la btags pa'i rgyan gyis ni gnas lugs kyi phyogs gcig ma yin te/ gang gis btags pa'i phyogs las gzhan du bkrul bas kyang bcol ba'i rdzas 'dren par byed pa dang 'dra bar nyes byas su 'gyur ro/ /dper na lag ngar la btags pa'i gser gyi gdu bu dpung mgo la thug par bkrul na yang nyes par 'gyur na/ de lta ni ma yin pa de'i phyir ji skad du bshad pa brkus pa yin par khong du chud par bya'o/ /da ni sho gam zhes bya ba la sogs pas sho gam rku ba 'chad par byed de/ brkus par 'gyur zhes bya ba rjes su 'jug pa yin no/ /sa ni 'dir sho gam gyi sa yin par dgongs so/ /de'i skabs yin pa de'i phyir yul gang du sa'i cha ji srid cig tu phyin par gyur na sho gam gzhal dgos pa de nyid sho gam gyi sa yin pa de bas na sa de nyid las yin gyi nam mkha' las ni ma yin no/ /'das pa ni rgal ba yin te de las 'das na sho gam brkus par 'gyur ro/ /gang las 'das pa zhe na/ gnas nas zhes smos pa yin te/ gnas ni sho gam gyis zhes bya ba'i don to/ /sa nyid ces bya ba'i nyid ni sa gzhan las 'das pa la nyes pa med pa'i phyir de rnam par gcod par byed pa yin la/ sa la gnas pa'i sngags la sogs pa'i stobs dang / nam mkha' nas 'dren par byed pa de yang don dam par sa nyid las 'dren par byed pa yang ma yin te/ gang gi phyir rdzu 'phrul dang sngags dang sman gyi stobs kyis sho gam gyi sa dang rjes su 'brel pa med par 'dren par byed pa gang yin pa de yang rnam par gcod par byed pa yin no/ /sho gam zhes bya ba ni sho gam pa la sbyin par bya ba yin te/ sho gam du 'os pa'i rdzas gnod 'das par byed na sho gam 'das pa zhes bya ba'i nyes pa 'di nyid du 'gyur ro/ /sho gam du 'os pa'i rdzas khyad par ji lta bu zhe na/ 'jig rten gyis rnam par gzhag pa'i zong du gyur pa nyid yin gyi yongs su longs spyad par bya ba'i don gyi gos la sogs pa yang ma yin la/ gzhan la bsngos pa yang ma yin zhing gser yang ma yin te/ rnam par gzhag pa bstan pa las stobs kyis sho gam len par byed pa'i sho gam pa dag rkun por gyur pa nyid yin pa'i phyir sho gam dang bros par gyur pa la yang nyes pa med pa yin no/ /rkun po la lam la sogs pa ston par byed pa'i sgo nas grogs sgrub par byed pa na kha na ma tho bar 'gyur ro zhes ston par byed pa la/ rkun po ni rdzas 'phrog par byed pa yin no/ /grogs byed pa ni than grogs byed na'o/ /de gang gis she na/ sdom can te dge tshul gyis so/ /rnam pa gang gis she na/ lam sogs zhes bya ba smos te/ lam dang por byas pa'i khyim de na bud med kyi tshogs ni mang la skyes pa'i tshogs ni nyung zhing nye ba na nags thibs po med la mi srun pa med do zhes bya ba de lta bu la sogs pa gang dag yin pa de dag lam sogs yin te/ de dag nye bar ston pas bstan pa de ni lam sogs bstan pa ste/ than grogs sgrub par byed ces bya ba'i don to/ /skal ba ni so so'i thob skal dang cha yin la de 'dod pa na sred pa yin pa de bas na/ skal ba 'dod phyir te rgyu des dge tshul gyi brtul zhugs nyams par 'dod pa ste brtul zhugs nyams par 'gyur zhes bya ba'i don to/ /ci nye bar ston pa tsam kho nas 'gyur ram zhe na/ skal ba thob na zhes bya ba smos pa yin te/ skal ba thob par gyur na der 'gyur ro zhes bya ba'i tha tshig go/ /gang gi tshe dge slong dag nye du'am gzhan dag la gzhan gang gis chad pas gcod par byed par 'gyur ba de'i tshe yang nyes par 'gyur ro zhes gsungs pa de yang gang gi tshe 'gyur zhe na/ tshul min chad pas zhes bya ba la sogs pa smos pa yin te/ tshul ni nyes pa dang rjes su mthun pa bstan bcos las bstan pa gzung ngo / /de las rnam pa gzhan du smos pa ni tshul min bcad pa'o/ /tshul min chad pa des chad pa thob na rin thang ji lta ba dang bsam pa ji lta ba bzhin du nyes par 'gyur ro/ /ji lta yang bcom ldan 'das kyis dge slong dag zhing las ni kha na ma tho ba chen po bcas pa yin no zhes zhing gi las bkag pa mdzad pa de lta na yang zhing las tsam gyis mtha'i nyes par 'gyur ba ni ma yin mod kyi 'on kyang srog chags mang po dag 'chi bar 'gyur ba de bas kyang bcas pa ji lta ba bzhin du nyes par 'gyur ba de nyid kyi phyir/ bcom ldan 'das kyis kha na ma tho ba chen po dang bcas pa yin no zhes gsungs pa yin no/ /de lta na yang gal te byas pa las mtha'i nyes pa 'gyur ba ni bdag la legs shing zhes bya ba la sogs pas ji lta ba da ltar ston par byed pa yin te/ gzhan gyi zhing ni gzhan dag gi zhing la'o/ /gal te dge tshul gyis gzhan gyi zhing de la chu 'dren par byed pa dang gcod par byed pa ni chu 'dren gcod byed na ste 'di la rtsa ba nyid du 'gyur ro/ /'di la zhes bya ba ni 'dren par byed pa la sogs pa la'o/ /chu 'dren zhes bya ba ni gang gi tshe chu mang bar gyur pa de'i tshe bdag nyid kyi zhing las bor zhing gzhan gyi zhing la chu 'dren par byed pa yin la/ gcod pa ni chu'i tshogs nyung bar gyur pa na gzhan dag gi las zlog par byed pa yin te/ bcad pa tsam las bdag gi rnyed pa yang ma yin pa'i phyir bcad pa sngon du song ba'i bdag nyid kyi la 'dren par byed pa ste 'dir gcod par byed pa yin par gzung ngo / /bsam pa gang gis she na/ bdag la legs shing zhes bya ba smos te/ nas 'bru bdag la legs par gyur cig gzhan la nyes par gyur cig ces bya ba'i bsam pa 'dis byas na rtsa bar 'gyur ro zhes bya ba'i don to/ /ci de tsam zhig byas pas rtsa bar 'gyur ram zhe na/ ma yin te bdag gi 'bru rnyed par gyur pa ni bdag gi 'bru rnyed na ste bdag gi 'bru rnyed par gyur pa de la'o/ /gal te de yang rnyed la gzhan gyi 'bru nyams par gyur pa de'i tshe brkus pa yin no/ /'di skad du bdag gi 'bru legs par gyur cig gzhan gyi 'bru nyes par gyur cig ces bya ba'i bsam pas chu'i tshogs mang por gyur pa na bdag nyid kyi zhing las bcad nas gzhan gyi la 'dren par byed la/ bdag gi legs par gyur cig ces gzhan gyi zhing nyams par gyur na/ de la dngos po ji lta ba bzhin du nyes par 'gyur ro zhes bstan par 'gyur te/ gang du zhing 'dus byas pa'i khyad par gyi dbang las rnyed par 'gyur ba de brkus pa ma yin zhing / gang chu 'dren par byed pa la sogs pa las rnyed pa de 'dir gzhan dag las brkus pa yin no/ /rang gi las kyi mtha' 'dus byas pa'i khyad par gyi dbang dang / zhing gi yon tan las ni ma yin te dper na bdag gi zhing dang gzhan gyi zhing chu mnyam po'i sgo nas thams cad du gal te khal gnyis gnyis mnyam por grub pa yin la/ bdag nyid kyi zhing 'dus byas pa'i khyad par dang / chu bcus pa la sogs pa byas pa de las gzhan gyi las ni khal gcig 'byung la bdag nyid kyi las ni khal gsum 'byung bar gyur na de la gal te chu mnyam por bcus par gyur pa las gzhan gyis ni khal phyed dang gnyis yin la/ bdag gi khal phyed dang gsum byung ba las chu mnyam po ni phyed dang gnyis yin la/ gcig ni zhing 'dus byas pa'i khyad par las yin pa de'i phyir gzhan gyi khal phyed nyams par gyur pa de 'dir bsdus pa yin te/ de brkus pa yin gyi zhing 'dus byas pa'i dbang las byung ba cig shos ni ma yin no/ /de nyid kyi phyir/ bdag gi 'bru rnyed gzhan gyi 'bru nyams na/ /zhes bya ba ni pha rol po'i 'bru nyams par gyur pas bdag nyid kyi 'bru rnyed pa yin no zhes bya ba'i tha tshig go/ /de nyid kyi phyir slob dpon gyis rang gi las kyi mtha' grub pa de'i don du cig shos nyams par byas nas zhes bya ba la sogs pa mdor mdzad pa yin te/ de yang 'dir rang gi las kyi mtha' grub pa gang yin pa de brkus par 'gyur ro/ /khyad par ji lta bu zhe na/ nyams par byas pa ste las kyi mtha' 'dus byas pa'i rgyu las 'byung ba'i lhag mar gyur pa dang bral zhing nyams pa ni grub pa yin te/ nyams pa zhes bya ba'i don du 'gyur ro/ /nyams pa zhes bya ba'i grub pa khyad par du byed pa yin te/ de lta bur gyur pa'i grub pa brkus pa yin no/ /rgyun du gtogs pa'am zhing gi khongs su 'dus pa'i chu zhes khyad par med par khong du chud par bya'o/ /chu 'dren par byed pa'i sgo nas grub pa brkus pa yin gyi chu brkus pa ni ma yin te/ rnam pa gzhan du na bdag nyid kyi las kyi mtha' las chu 'dren par byed pa'am zlog par byed cing gzhan gyi las kyi mtha' la 'dren par byed na nyes pa med par 'gyur ro/ /rtsa ba nyid du 'gyur zhes bya ba'i tshig gis dngos po yongs su tshang na dngos gzhi nyid du 'gyur ro zhes rig par bya'o/ /bdag la legs zhes bya ba'i tshig ci'i phyir te/ gang gi phyir gzhan la nyes byas 'gyur zhes bya ba'i lan de tsam la/ bdag nyid kyi 'bru ltos pa dang bcas pa yin pas gzhan gyi nyams par gyur la/ dngos po yongs su tshang na yang dngos gzhir 'gyur ba yin no zhe na/ chud gzan par thal bar dgongs pa de'i phyir tshig 'di smos pa yin no/ /gzhan la nyes gyur ces bya ba ci'i phyir te/ gang gi phyir gzhan dag gi rdzas nyams par 'gyur ba'i 'tshe ba med par bdag gi legs par mi 'gyur ro zhe na/ chu gcod pa la sogs pa'i 'tshe ba tsam kho na las legs par brkus par 'gyur ro zhes 'jig rten gyis brkus par rnam par 'jog pa yin na ni 'jig rten pa yang bdag gi legs pa tsam gyi bsam pa'i dbang las rku ba rnam par 'jog par mi byed do/ /bdag gi 'bru rnyed ces bya ba ci'i phyir zhe na/ rang gi legs pa med par gzhan gyi 'bru nyams pa tsam kho na las brkus par mi 'gyur te gang gi phyir/ cung zhig kyang des brkus pa med pa'i phyir 'di smos pa yin no/ /gzhan gyi 'bru nyams pa zhes bya ba ci'i phyir zhe na/ gang gi phyir gzhan dag gi 'bru nyams pa med par rang nyid kyi grub pa tsam las gzhan gyi cung zhig kyang brkus pa med pa'i phyir 'di smos pa yin no/ /rdzas shig ces bya ba la sogs pas sa la rdzas bshal bas rku ba ston par byed de/ brku bar bya ba'i rdzas sa la bshal ba ni 'dren pa la bya'o/ /'dren par byed pa de las rku ba na ji ltar brkus par 'gyur zhe na/ rdzas shig ces bya ba la sogs pa smos pa yin te/ brku bar bya ba'i rdzas la ngos bzhi yod par 'gyur ba de la ngos kyi sna gang nas bshal ba de las rgyab phyogs su gyur pa'i ngos na ngos gzhan yin te ngos gzhan de'i rten du gyur pa'i sa gang yin pa de ni ngos gzhan sa yin pa de mtshams yin pas de skad ces bya'o/ /mtshams kyi sgras rib ma dang / gas pa dang / yi ge dang / tshig dang / chod pa dag bsdus pa yin no/ /'di skad du gang du yi ge bris pa la sogs pas rnam par bcad pa mtshams yin par rtogs par bya zhes bstan par 'gyur ro/ /de bas na gal te ngos gzhan cig shos de 'das pa ste rgal zhing song bar gyur na de'i tshe brkus par 'gyur ro/ /brku bar bya ba'i rdzas kyi ngos gcig ngos gzhan gyi rten du gyur pa'i sa'i mtshams las phog par gyur na bshal bas brkus pa yin no zhes bya ba'i don to/ /'dis ni mtshams gzhan du phyin na brkus pa yin no zhes bstan to/ /de nyid kyi phyir brku bar bya ba'i rdzas kyis khyab pa'i sa'i cha'i dbus su gyur pa'i phyogs la mtshams yod na mtshams gzhan du phyin pa med pa'i phyir zhes bya ba'i dbang du byas na rdzas kyi ngos gzhan sa'i mtshams zhes bya ba la sogs pa'i sgo nas brkus pa ma yin te/ gang gi phyir rdzas des mtshams gnyis khyab pa de'i phyir/ de las 'das shing mtshams gzhan du phyin na brkus par 'gyur ro/ /ji ltar na len par byed pas rku ba yin zhe na/ len par byed na sa las zhes bya ba smos te/ sa las bskyod pa ni sa las 'phags pa yin te/ sa las 'phags par gyur pa de nyid kho na len par byed pas brkus pa yin te/ de ni bteg ste rku ba zhes bya bar 'gyur ro/ /ni'i sgra ni kho na'i don to/ /'dir sa ni rdzas kyi rten spyi rnam par ston par byed pa yin te/ gos kyi gdang bu ma gtogs pa'i gnas las len par byed na 'phags par gyur pa kho na brkus par 'gyur ro zhes bya ba'i tha tshig go/ /brgyab pa'i sgo nas shing la sogs pa'i 'bras bu ltung bar byed pas rku ba rjod par byed de/ dbyug pa la sogs pa brgyab par gyur pa ni dbyug sogs brgyab pa ste/ dbyug pa bsnun pa de'i sgo nas 'bras bu rku ba na 'og tu ltung na brkus pa yin par bcom ldan 'das kyis gsungs kyi/ ltung bar gyur pa'i gnas nas bskyod pa la ni ma yin no/ /'og tu ltung na zhes bya ba ni gzhi nyid du rnam par ston par byed pa yin te/ sa'i bdag nyid kyi gnas sam gos kyi bdag nyid de la gang zhig ltung bar gyur pa ni 'og tu ltung ba yin par rig par bya'o/ /gang gi tshe grogs po mang po blo tha dad pas rku bar byed na de ji ltar brkus par 'gyur zhe na/ grogs po mang po 'dus pas zhes bya ba la sogs pa smos te/ mang po 'dus par gyur pas so/ /khyad par ji lta bu zhe na/ grogs por gyur pas so/ /phan tshun stobs kyis 'du shes shing gcig tu gyur pas gzhan gyi rdzas rku bar byed na de nam gyi tshe na brkus par 'gyur zhe na/ skal pa thob na zhes bya ba smos te/ skal ba ste bgo skal thob par gyur pa na brkus pa yin no/ /sngar ma yin zhes bya ba ni gnas nas spags pa ni ma yin no zhes bya ba'i don to/ /gang gi phyir gnas nas bskyod pa'i dus su 'ga' zhig gis kyang bdag gir byas pa med kyi gang gi phyir de dag blo tha dad par gyur pas rku bar byed pa yin la/ de dag gis kyang brkus nas spyir so so'i skal ba bdag gir bya'o zhes de ltar rnam par gzhag pa ma byas shing / gang gis brkus pa de'i de yin no zhes rnam par gzhag pa yang ma byas pa'i phyir spyir sngar tshig tu brjod pa med par rku bar byed pa yin par khong du chud par bya'o/ /spyir so so'i skal ba'i bsam pa yod pa yin na ni gnas nas bskyod pa kho na na brkus pa yin par rig par bya zhing / gang gis brkus pa de de yin no zhes rnam par gzhag pa yod na gzhan gyis phrogs par gyur na gzhan grogs por gyur pa de la nyes byas su 'gyur ro zhes bya ba'i tshul 'di yang khong du chud par bya'o/ /gang gi tshe skye bo mang po la yod pa'i rdzas rku bar byed pa de la ji ltar nyes par rnam par gzhag ce na/ skye bo mang po'i zhes bya ba la sogs pas rnam par 'chad par byed de/ skye bo mang po ni skye bo'i tshogs yin te/ skye bo mang po de'i nor ni skye bo mang po'i nor yin no/ /de brkus pa ni rku bar byed pa ste skye bo mang po'i nor brkus par gyur pa de la nyes pa ste ltung bar 'gyur ba'o/ /gang gi tshe zhe na/ gang tshe zhes bya ba la sogs pa smos pa yin te/ gang gi tshe tha snyad du byed pa'i na na ka'i bzhi cha gcig gi rin thang tshang bar gyur pa de'i tshe brkus par gyur pa yin no/ /ci spyir ram zhe na ma yin te/ 'on kyang nor gyi bdag po re re'i skal ba ni so so'i cha yin te/ re re'i skal ba de las 'gyur gyi rdzas spyir brkus pa tsam la ni ma yin te/ 'di skad du skye bo mang po'i nor te bdag po'i rdzas so so las rin thang tshang bar gyur na zhes bstan par 'gyur ro/ /da ni 'di rnam par dpyad par bya ste/ gang gi tshe skye bo mang po'i nor gyi nang nas nor gyi bdag po so so'i rdzas rin thang tshang bar gyur pa de'i tshe dngos gzhir 'gyur te/ de la gcig gi rdzas kyang rin thang tshang bar gyur na de bzhin du yang 'gyur ro/ /'dir gcig gi rdzas kyang rin thang tshang bar gyur na des kyang dngos gzhir 'gyur te gang gi phyir des nor gyi bdag po rin thang tshang bar gyur pa brkus pa de'i phyir/ gzhan gyi cha la ma tshang du zin kyang dngos gzhi'i kha na ma tho bar 'gyur ro zhes bshad pa yin no/ /gang gi tshe 'gro ba mang pos gzhan dag la yod pa rku bar byed na de ji ltar 'gyur zhe na/ gang gi tshe skye bo mang pos kyang gzhan gyi rku bar byed pa de'i tshe rang gi skal ba ste/ rang gi skal ba yang yin la rin yang de yin pas rang skal yin te/ bdag nyid kyi skal ba'i mtshan nyid can gyi so so'i cha dang na na ka'i bzhi cha gcig ces bya ba'i bar du'o/ /skye bo mang pos rku bar byed pa de'i tshe ste de'i dus su rang gi skal ba des nyes par rnam par gzhag par bya'o/ /'di skad du brku bar bya ba'i rdzas gang la gal te rku ba po re re la rin thang tshang bar gyur pa de'i tshe dngos gzhir 'gyur gyi spyir bsdus pa la ni ma yin no/ /gang gi tshe skye bo mang po'i rdzas skye bo mang pos rku bar byed pa de'i tshe yang rdzas kyi bdag po re re'i nor la rku ba po re re la rin thang tshang bar gyur na zhes bya ba de yang tshig 'di gnyis kyis rnam par bstan par rig par bya'o/ /gang gi tshe skye bo mang po la yod pa rku bar byed pa de'i tshe/ 'phags pa nyer sbas kyis gal te de la skye bo mang pos srung ma gzhag par gyur na de nyid las nyes par 'gyur gyi/ skye bo mang po las ni ma yin pa de'i phyir gal te srung ma gcig yod par gyur na yang gcig po de las na na ka'i bzhi cha gcig las kyang mtha'i nyes par 'gyur ro zhes gsungs pa yin no/ /nor gcig pa'i spun 'dra'i dge 'dun la zhes bya ba la sogs pas dge 'dun gyi don du rku ba'i nyes pa ston par byed de/ nor gcig pa'i spun gang yin pa de ni nor gcig pa ste/ nor gcig pa yang de yin la spun yang de yin pas na nor gcig pa'i spun te gter ma bgos pa zhes bya ba'i tha tshig go/ /de dang 'dra bar 'jug pa yin pa'i phyir nor gcig pa'i spun 'dra'i dge 'dun no/ /dper na spun nor ma bgos pa dag so sor bgo skal gyi bdag po nyid yin pa de bzhin du/ dge slong dag kyang dge 'dun gyi la so so nas bdag gir byed ces bya ba'i don to/ /gang gi phyir 'di ltar gcig gam gnyis mang pos dge 'dun gyi don du rku bar byed pa na nyes par 'gyur ba spyod pa'i tshe dge 'dun du gyur pa'i dge slong thams cad kyi yang skal bar 'gyur ram ma yin zhes brtag par mi bya zhing de ltar bsam par mi bya'o/ /nyid ni rim pa gzhan du sbyar bar bya'o/ /gang gi phyir gal te dge 'dun gyi don du de rku bar byed la de lta na yang rang gi don nyid ces bya ba'i dbang du byas nas dge 'dun la ci'i phyir nyes par rnam par ma bzhag ce na/ gang gi phyir sngar bshad pa'i rku sems dang ni zhes bya ba la sogs pa'i yan lag dag med pa de'i phyir rnam par ma bzhag pa yin no/ /bcom ldan 'das kyis zhing rkus pa nyes par 'gyur ba ni gal te dngos po tshang na mtha'i nyes par 'gyur la/ ma yin na nyes pa chung bar 'gyur ro zhes gsungs pa ma yin nam zhe na gal te de ltar de lta bu dag kyang dge 'dun gyi dbang du mdzad nas bka' de yang gsungs pa yin te/ zhing ni bgo min phyir ro/ /gang gi phyir zhing ni btsong ba'i phyir 'god par mi byed la zhing nyid kyang 'god par ma byed de/ bgo bar bya ba ma yin pa kho nar bcom ldan 'das kyis gsungs pa nyid kyi phyir ro/ /sdom can mang 'gyur phyir zhes khas blangs pa ston pa yin te/ bgo bsha' byas su zin kyang sdom can de bstan pa 'di la rab tu byung ba dag mang bar 'gyur ba'i rgyu'i phyir dge 'dun gyi dbang du byas nas nyes par 'gyur ba dpyad pa ni ma yin gyi/ 'on kyang rku ba kho na'i dbang du byas pa yin no zhes bya ba'i don to/ /gal te zhing btsong ba'i phyir ram zhing nyid 'god par byed pa de'i tshe nyes pa rnam par gzhag par bya ba yin na de yang dge 'dun du gyur pa'i dge slong thams cad la/ bcom ldan 'das kyis bkag par mdzad la/ de lta na yang ji ste 'god par byed na ni rin thang tshang bar mi 'gyur te/ rab tu byung ba mang ba nyid kyi phyir zhes bya ba'i bar du'o/ /gzhan du zhes bya ba ni ci de ltar bkag pa mdzad pas rku ba po la nyes par 'gyur gyi/ dge 'dun la ni ma yin no/ /de'i tshe yang gal te dngos po tshang na rtsa ba'i nyes par 'gyur la/ dngos po ma tshang na nyes pa chung bar 'gyur ro zhes rin thang brtag pa kho nar mi 'gyur te/ 'ga' zhig tu yang 'tshong bar mi byed pa nyid kyi phyir dang / thams cad la na na ka'i bzhi cha gcig tshang bar mi 'gyur ba'i phyir ro/ /de lta na ci'i phyir nyes pa chung bar 'gyur zhes bstan ce na/ bcom ldan 'das kyis lung las rin thang brtag pa gsungs pa de'i phyir de nyid kyi dbang du byas pa yin no/ /de ni mtshams kyi khongs su gtogs pa'i rnyed pa yin la/ de la yang 'ga' zhig gi tshe na ni nyung zhing / 'ga' zhig gi tshe na ni mang ba yin pas gang gi tshe nyung bar gyur pa de'i tshe rin thang tshang bar 'gyur ba ma yin no/ /sdom can mang 'gyur phyir zhes bya ba de ci'i phyir bstan zhe na/ de ni yin na 'on kyang bstan bcos mdzad pa'i dgongs pa 'di bcom ldan 'das kyis dngos po ni rnam pa gsum ste/ zas dang / snod spyad dang / gzhag par bya'o zhes gsungs so/ / de la bza' ba ni bza' ba'i don gyi 'bru la sogs pa yin te/ bza' bar bya ba yin pa'i phyir ro/ /snod spyad ni chos gos dang lhung bzed la sogs pa yin te/ bgo bar bya ba yin pa'i phyir ro/ /gzhag par bya ba ni zhing dang khang khyim dang / tshong khang la sogs pa yin te/ phyogs bzhi pa'i dge 'dun gyi don du gzhag par bya ba yin pa'i phyir ro/ /de la 'dir yang phyogs bzhi par zhugs pa'i dge 'dun mang ba nyid kyi phyir ro zhes bya bar shes par bya'o/ /'dir smras pa/ de lta na yang mtshams dang gnas tha dad pa'i zhing la sogs pa'i skal ba ji ltar rigs pa nyid yin zhe na/ mtshams nang na gnas pa kho na la rigs pa yin te/ de yang 'ga' zhig tu nyung bar gyur pas rin thang tshang bar gyur pa de'i phyir yang rnam par dpyad par bya ba yin na/ 'on kyang gzhan dag gzhan du dge 'dun la nyes par 'gyur ba zlog par byed la/ 'dul ba la las kyang 'di skad du dge slong gnyug mar gnas pa zhig gis dge 'dun gyi zhing rmor bcug pa la/ de dang ha cang thag mi ring ba zhig na khyim bdag gi zhing yod pa de yang rmor bcug pa dang / khyim bdag de yang 'ongs nas btsun pa ci'i phyir bdag gi zhing khyod kyis rmor bcug ces smas pa dang / zhing 'di ni khyod kyi ma yin gyi dge 'dun gyi yin no/ /des btsun pa mi ma yin pa'i che bzhi dag bstan par bya'o zhes smras nas/ khyim bdag des sngon sa mtshams kyi mu phur ba btsugs pa de brkos nas bstan pa dang / dge slong gis zhing rmo ba bor ro/ /khyim bdag de song ba dang des phur pa de nang du 'jugs su bcug nas zhing de rmor bcug pa na khyim bdag de yang 'ongs nas btsun pa khyod khar rtsang bdag gis pham par byas na ci da yang rmor 'jud dam zhes smras pa de yang 'gyod pa skyes pa dang / bcom ldan 'das kyis bka' stsal pa/ gal te dngos po tshang na mtha'i nyes byas su 'gyur la/ 'on te dngos po ma tshang na nyes byas chung bar 'gyur ro zhes 'byung ba yin no/ /de la 'di skad du gang gis brkus shing gang 'gyod pa skyes la rku ba'i sems gang la yod pa de nyid la nyes par rnam par gzhag par bya ste/ gnas skabs de ni dge 'dun gyi skabs ma yin pa nyid kyi phyir dang / rku sems la sogs pa med pa'i phyir ro zhes bya ba ni lan no/ /me tog la sogs pa btus pas rku ba ji ltar brkus par 'gyur zhe na/ gang zhig btus dang zhes bya ba la sogs pa smos te/ me tog la sogs pa gang zhig btus pa ni btus nas rku ba'o/ /gos la sogs par gang zhig bsdus pa ni brtul te rku ba'o/ /skyed shing yang rung ba ni gang zhig rku ba'o/ /rku ba de la me tog dang 'bras bu btus pa'i phung po dang tshogs bskyod pa kho na brkus pa yin te/ sa las spags par gyur ces bya ba'i don to/ /de bzhin du gos la sogs pa'i tshogs bsdus pa dang / skyed shing dag kyang ngo / /skyed shing zhes bya ba ni me tog la sogs pa'i shing dag nye bar mtshon par byed pa yin no/ /ji ltar yang zlog pa'i sbyor ba med pa de lta na yang btus shing btus shing zhes zlos pa'i don du blta bar bya'o/ /gzhan du btus dang brtul te zhes bya ba don med par 'gyur te/ spyir gnas nas spags pa rku ba nyid du bstan pa nyid kyi phyir ro/ /dang ni sdud par byed pa yin la nyid ni nges par gzung ba'o/ /me tog la sogs pa'i shing ni phyung nas brkus zhes rgyas pa las zhes bya ba ni de ltar gzhung rgyas pa las zhes bya ba'i don yin no/ / rgyas pa zhes bya ba ni rnam par 'byed pa la bya ba de'i phyir sngar phyung nas phyis rku bar byed ces bya ba'i don 'dir 'gyur ba ma yin nam/ de bas na phyung ba ni sbyor ba yin la gal te phyis rku bar byed na dngos po ji lta ba bzhin du nyes par 'gyur zhing ma yin na sbyor ba'i nyes byas tsam kho nar 'gyur ro zhes nges par byas pa yin na/ de ji ltar na skyed shing yang rung spags pa nyid na brkus zhes brjod ce na/ de la nyes pa yod pa ma yin te dus mtshungs pa nyid kyi phyir ro/ /ci de lta bu mthong ngam zhe na/ mthong ste kha gdangs nas ni zhes bya ba la sogs pa smos pa yin no/ /kha gdangs nas ni nyal ba ji bzhin no zhes bya ba ni ji lta ba bzhin du zhes bya ba'i don yin te/ sngar kha gdangs nas phyis gnyid log pa ni ma yin gyi 'on kyang dus mtshungs pa kho na la yin no/ /de bzhin du mig btsums nas dgod ces bya ba dang / rten cing 'brel par 'byung ba zhes bya ba de lta bu la sogs pa dus mtshungs pa kho na la yin pa de bas na shing phyung nas rku bar byed ces bya ba'i don 'dir 'gyur ro/ /ji ltar yang rab tu byung ba rgyan 'gyed pa mi gnang ba de lta na yang 'ga' zhig gal te spyod na nyes par 'gyur ba rgyan po dor byas zhes bya ba la sogs pas 'chad par byed pa yin te/ rgyan de rgyan 'gyed pa'i yul la log pa'i tha snyad du bya ba'i sgo nas gzhan la dor byas te rgyal bar gyur na/ dngos po ji lta ba bzhin du nyes par 'gyur te/ dper na u shud kyi rgyan gtong bar byed pa na rgyan gyi mig ji lta ba bzhin du sha ri ka spo bar bya ba yin la/ gzhan du gtong bar byed pa des gal te rgyal bar gyur na dngos po ji lta ba bzhin du nyes par 'gyur ro zhes bya ba'i tha tshig go/ /rgyan la sogs pa gang yin pa de ni rgyan po la sogs pa'o/ /de'i khongs su gtogs pa'i grangs te rtsis des pha rol po la dor byed pa ni rgyan po la sogs pa'i grangs la dor byed pa'o/ /dor byed pa zhes bya ba ni gzhan gyi nor 'phrog pa'i ched du log pa'i tha snyad byed pa yin te/ dper na gnyis dang gsum dang bzhi zhes bgrang bar bya ba la bdag nyid kyi bgrang ba'i tshe gnyis dang bzhi dang drug ces bgrang bar byed pa gang yin pa de ni dor byed pa zhes bya ba yin pa lta bu'o/ /de'i phyir des rku ba ni don grub ma thag pa la bya ba ste/ thob pa'am khas blangs pa'am gzhan du bsgrubs pa de kho nas brkus par 'gyur ro/ /de bzhin du mtshan ma ste gcig la sogs pa'i ang ga skyed pa ni bdag nyid kyi gcig gi don gyi ang ga bya ba yin pa la bcu la sogs pa'i don gyi ang ga byed cing thams cad kyi thams cad du med pa de skyed par byed pa'o/ /gzhan dag gi log par byed cing thams cad kyi thams cad du gzhan du dor ba na phyi ba'o/ /de'i phyir des mtshan ma de nyid gnas gzhan dang po la sogs par gzhag par bya ba gang yin pa gnyis pa la sogs par 'jog pa ni gzhan du bzhag pa la bya'o/ /bor ba ni gzhan dag gis log par byas pa'i sgo nas yin te/ de'i phyir de gnyis ni gnas gzhan du ni bzhag gam bor ba'o/ /sde pa gzhan du bgrang zhing bsnyon pa dang zhes bya ba ni gal te sbyin bdag gis sdom can rab tu mang ba nyid kyi phyir rtsod pa med par bya ba'i don du sde par byas nas sbyin pa sbyin par byed pa na/ ci de la dge tshul rku sems dang bcas pa nyid kyis bdag nyid sde pa gzhan la bgrang bar byed pa de'i tshe yang sbyin bdag gis ci khyod gzhan du bgrangs pa ma yin nam zhes dris pa na des kyang bdag der ma bgrangs so zhes snyon par byed pa de ltar na sde pa gzhan du bgrang zhing bsnyon pa'o/ /dang ni sdud par byed pa'i don yin gyi rnam par rtog pa'i don ni ma yin te/ de la mi srid pa'i phyir ro/ /rnam par rtog pa ni phyogs nyid la 'gyur na de 'di la med pas de bzhin du gzhan la yang blta bar bya'o/ /tshig mang po la ni sdeb sbyor nyams pa spang ba'i don to/ /de bzhin du tshul min zhes bya ba ni tshul ma yin pas thob par brjod cing ston pas na tshul min pas ni thob par brjod pa ste/ des rku ba yang grub ma thag kho na na brkus par 'gyur ro zhes bya bar thams cad la sbyar bar bya ste/ dper na dbyar gnas pa'i yon bdag gis yon sbyin par gyur pa na gzhan du tshul du zhugs pa'i dge tshul gyis kyang smras pa/ bdag kyang 'dir gnas pa yin gyi rnyed pa de bdag la yang byin cig ces smras nas der rnyed pa grub na dngos po ji lta ba dang bsam pa ji lta ba bzhin du nyes par 'gyur bar rig par bya ba lta bu'o/ /gzhan gyi kha brkus la sogs tshul gyis zhes bya ba ni gzhan te pha rol po'i kha brkus pa ni snyad btags pa yin pas na gzhan gyi kha brkus pa ste 'di ltar che ge mo zhig gis dngos po che ge mo byin cig ces zer ro zhes smra ba de ni gzhan gyi kha rku ba'o/ /de la sogs pa'i rnam pa de lta bu gang dag yin pa de dag ni gzhan gyi kha brkus la sogs so/ /gzhan gyi kha brkus la sogs kyang de yin la tshul yang yin pas gzhan gyi kha brkus la sogs tshul lo/ /tshul ni lugs yin pa de bas na des rku ba ni grub ma thag kho nar brkus par 'gyur ro zhes 'dod pa ste dgongs pa'o/ /dang ni snga ma dang 'di mtshungs par sdud par byed pa yin no/ /da ni ji ltar na bskyis pa brkus par 'gyur ba bskyis par gyur tam zhes bya ba la sogs pas ston par byed de/ bskyis pas bsgrubs pa ni bskyis par gyur pa ste/ bun du blangs par gyur ces bya ba'i tha tshig go/ /de ni 'dir don gyi ngor byas nas bskyis par gyur pa zhes bstan to/ /gzhan gyis bcol ba ni gtams pa zhes bya ste/ 'di nyid gzhag pa bya bar grags pa yin no/ /brnyas pa zhes bya ba ni dus de srid cig tu blangs pa yin pa de bas na de dag la bsnyon par gyur pa ni snyon par byed pa'o/ /de'i phyir des gtan la phab pa las nyes par gyur te/ thams cad kyi thams cad du gzhan gyi bsam pa rgyun bcad par gyur pa la gtan la bab na zhes bya ste/ dper na bdag gis nor de yongs su gtang bar bya'o/ /bdag gis kun nas nyon mongs pa 'dis dgos pa med do zhes bya ba lta bu'o/ /gtams pa yang rnam pa gnyis te grangs rgya chad par byas nas bcol ba'i mngon sum du gtad pa dang / snod du chud par byas nas rgyas btab pa'o/ /de la sngar smos pa ni gong du bstan pas da ni gnyis pa bzhag pa dang gtams par gyur pas zhes bya ba la sogs pas 'chad par byed de/ bzhag pa yang de yin la gtams pa yang yin pas bzhag pa dang gtams par gyur pa ste/ snod du bcug nas bcol bar gyur pa zhes bya ba'i tha tshig go/ /de rku ba ni gtan la phab pa kho na brkus pa yin no/ /de la bsam pa'i rgyud gcod pa mtshon par byed pa'i gtan la phab pa'i rku ba'i dbye ba rnam pa gsum du 'gyur ro/ /da ni dbye ba de yang spags pa dang mnyam par zhes bya ba la sogs pa ston par byed de/ spags pa ni gnas bskyod nas pa'o/ /spags pa dang mnyam pa ni dus mtshungs pa'o/ /des gtan la 'bebs pa ste gtan la 'bebs par byed pa kho nas nyes par 'gyur ro/ /sngar smos pa'i nyid 'dar yang rjes su drang bar bya'o/ /yang na ni spags pa'i 'og tu zhes bya ba la yang gi sgra ni phyogs gzhan ston par byed pa yin pa'i phyir yang na gnas las spags pa'i 'og tu gtan la phab par gyur na/ de la yang gtan la bab pa las nyes par 'gyur bar rig par bya'o sngar gtan la 'bebs pa sbyor ba yin zhes bya ba ni gnas nas spags pa'i gong du gtan la 'bebs pa ni sbyor ba yin te/ sbyor ba'i nyes byas su 'gyur ro zhes bya ba'i tha tshig go/ /de bzhin bsnyon na zhes bya ba ni khyod kyis ma gtams so zhes bya ba la sogs pas brdzun gyi mtshan nyid can gyi snyon par byed pa ste/ sbyor ba gzhan yin no zhes bya ba'i don to/ /'dir rtsa bar 'gyur zhes bya ba ni gnas nas spags pa brkus na dngos gzhir 'gyur ro zhes bya ba'i tha tshig go/ /de bas na 'dir sbyor ba ni gnyis su 'gyur te/ de la bdag nyid tha snyad du byed pas nor gyi bdag po la gtan la 'bebs par byed pa dang / gzhan gyis gnas nas skyod par byed pa dang / bzlog pa'i sgo nas yin te/ de ltar gzhan du yang sbyar bar bya'o/ /ji skad du bcom ldan 'das kyis 'dul ba gcig las 'phros pa las 'phags pa nye ba 'khor gyis btsun pa rku ba du mchis zhes zhus pa dang / nye ba 'khor drug go/ /drug po gang zhe na/ nan khugs kyis rku ba dang / sgyu thabs kyis rku ba dang / gtams pa rku ba dang / phyir bsab pa rku ba dang / dngan 'then gyis rku ba dang / chos rku ba'o/ /de dag gi nang nas du zhig gis ni nyes par 'gyur/ du zhig gis ni nyes par mi 'gyur zhe na/ yang drug pa chos rku ba gcig po ma gtogs so zhes gsungs pa yin no/ /de dag kyang 'dir nyes par 'gyur ba dang nyes par mi 'gyur ba bstan par bya ste/ de la chos rku ba ji ltar 'gyur zhe na/ yid brtan gzhan la go bar byas nas ni khyer yang nyes pa med ces bya ba 'dis bstan pa yin te/ de ni gzhan gyi dpe brkus nas dpe bshus pa nye bar mtshon pa yin no/ /de nyid slob dpon gyis dpe rku ba la nyes pa med ces gsungs so/ /sgyus rku ba ni rnam pa gnyis te/ chom pos dang / dor thabs kyis so/ /de la chom pos len pa ni/ rku sems dang ni 'dod pa de nyid dang / /zhes bya ba la sogs pas bstan to/ /dor thabs kyis rku ba ni rgyan po dor byas rgyal na zhes bya bas bstan to/ /gtams pa rku ba yang rnam pa gnyis te/ bgrangs nas gtams pa dang / rgyas btab nas gtams pa'o/ /bgrangs nas gtams pa rku ba dang / phyir bsab pa rku ba ni/ bskyis par gyur tam gtams dang brnyas pa las/ /zhes bya bas bstan to/ /rgyas btab nas gtams pa rku ba ni/ gzhag dang gtams par gyur ba rku ba ni/ /zhes bya ba la sogs pas bstan to/ /nan khugs kyis rku ba ni/ mngon sum phrogs pa'ang de dang 'dra/ /zhes bya ba 'dis bstan pa yin no/ /dngan 'then gyis rku ba ni sho gam 'joms pa yin te/ de ni sbyin par bya ba 'joms par byed pa nye bar mtshon par byed pa yin te/ slob dpon gyis nan khugs kyis 'joms pa rku ba yin no zhes gsungs pa yin no/ /sho gam 'joms pa de yang rnam pa gnyis te/ nan khugs dang / 'jab bu'o/ /de la nan khugs kyis 'joms pa ni mngon sum rku ba zhes bya bas bstan to/ /cig shos ni rku sems dang ni zhes bya ba la sogs pas bstan to/ /da ni 'dir/ de ltar rku dbyes rku ba rab phye ba/ /'di ni 'dul ba rgya mtsho dag las bsdus/ /zhes bya bas sngar bshad pa'i rku ba'i rab tu dbye ba'i nye bar bsdu ba 'chad par byed de de ltar gyi sgra ni de ltar gyi don te/ de ltar bshad ma thag pa'i rnam pas zhes bya ba'i don to/ /rku ba ni brku bar bya ba'i rdzas yin la dbye ba ni brku bar bya ba'i dbye ba yin pa de bas na des bsdus pa ste/ yang dag par bsdus pa yin no/ /bsdus pa de gang zhe na/ 'di ni zhes bya ba smos te/ bshad ma thag pa'i rku ba'i rab tu dbye ba yin te rku bar byed pas na rku ba ste/ gzhan gyi nor 'phrog pa zhes bya ba'i bar du'o/ /de la rku ba'i dbye ba ni nyes pa'i dbye ba yin no/ /dbye ba'i tshig las ji ltar na nyes byas kyi dbye ba 'thob par 'gyur zhe na/ smras pa/ nyes pa dbang du byas pa nyid yin pa'i phyir ro/ /'di skad du brku bar bya ba'i rdzas kyi khyad par gyi sgo nas dbye ba bsdus pa yin no zhes bstan par 'gyur te/ 'di ltar/ mi dbang bsod snyoms yongs su blangs gyur na/ /de ni 'jig rten tha snyad tshul gyis 'gyur/ /gzhan gas gtan du byin ltar spyod pa dang / /sman dang sngags kyis kyang ni sbyin du 'jug /ces bya ba la sogs pa blta bar bya'o/ /gang kho na las bsdus she na/ 'dul ba rgya mtsho las ni zhes bya ba smos te lus dang ngag gi 'khrul pa las sems rnam par sbyong bar byed cing khyad par du 'dis 'dul bar byed pas na 'dul ba ste/ de nyid rgya mtsho yin pas na rgya mtsho chen po'o/ /gang gi phyir rgya mtsho chen po shin tu zab pa dang / dpag par dka' ba de bzhin du 'dul ba yang yin pa'i phyir 'dul ba rgya mtsho zhes bstan to/ /de'i phyir de las bsdus pa ni bshad pa yin zhes bya ba'i tha tshig go/ /de skad du brjod pas 'di ni rang gi rnam par rtog pas sbyar ba ma yin no zhes ston par 'gyur ro/ /da ni rang gzhan bang chen zhes bya ba la sogs pas rang dang gzhan gyi bya ba'i rku ba la khyad par med par ston par byed do/ dge sbyong bdag nyid rku ba dang gzhan rkur bcug pa dang / bang chen gcig nas gcig tu brgyud pas rku bar byed pa gang yin pa de dag thams cad kyang dge sbyong kho nas brkus pa yin no/ /de la bdag nyid rku ba zhes bya ba ni gzhan gyi bya ba la ltos pa med par bdag nyid kho na rku bar byed ces bya ba'i don to/ /gzhan dag gis rku bar byed pa ni bdag nyid kyis byin gyis brlabs nas gzhan byed par gyur pa'i sgo nas rku bar byed pa yin no/ /bang chen dag gis gcig nas gcig tu brgyud pa ni bang chen gcig nas gcig ste/ bang chen rku ba pos mngags pa ni lung phog pa nyid yin pa'i phyir/ 'ga' zhig gam 'ga' zhig gi rdzas lkog tu gyur pa khyer la shog shig ces de la go bar byas pa yin la/ de las gzhan pa ni bang chen gcig nas gcig yin no/ /de la sogs pa gang dag yin pa de dag ni bang chen gcig nas gcig la sogs pa ste/ dang po'i bang chen dang dus phyis byung ba'i bang chen kun la blta bar bya'o/ /de'i phyir bang chen gcig nas gcig la sogs pa de dag gis kyang rku bar byed na/ gang des kyang brkus par 'gyur te bdag nyid 'ba' zhig gis ni ma yin gyi/ 'on kyang skyes bu gzhan byed par gyur pa dag gis kyang brkus pa yin no/ /lam gyi sgra ni bang chen gcig nas gcig la sogs pas kyang zhes bya bar kyang gi don du blta bar bya'o/ /da ni bang ba la sogs pa'i snod phug nas der bcug pa'i 'bru la sogs pa dang bum pa la sogs pa phug nas der chud pa 'ju ba'i rdzas brkus na ji ltar 'gyur zhe na/ gzhi nas rgyun gyis rku bar byed pa na/ /kun du 'brel ba'i rgyun ni gcig nyid yin/ /zhes bya ba smos te/ gzhi ni spyir 'bru'i snod dang 'ju ba'i rdzas kyi snod kyi spyi gzung ba yin no/ /de la dang por bug pa btod nas 'bru la sogs pa 'dzag par gyur pa ni gzhi nas rgyun 'byung ba yin no/ /de las rku ba ni rnam pa des rku ba na 'bru la sogs pa gang gcig tu gyur pa de brkus pa yin no/ /khyad par ji lta bu zhe na/ kun tu 'brel ba ste yang dag par 'brel ba'i 'bru la sogs pa'i rgyun gang yin pa de ni kun du 'brel ba'i rgyun no/ /de brkus pa yin te/ dper na bang ba la sogs pa phug nas 'bru la sogs pa rku ba na dang po 'byung ba nas brtsams te tha mar byung gi bar du rgyun mi 'chad par 'byung ba de la dngos po tshang na dngos gzhir 'gyur la ma yin na dngos po ji lta ba bzhin du 'gyur ro/ /yang na rgyun bcad pa de la rgyun 'chad pa re re la yang dngos po ma tshang na nyes byas chung ba kho na re rer 'gyur la 'on te gcig la yang dngos po tshang na dngos gzhi kho nar 'gyur bar rig par bya ba lta bu'o/ /da ni de ltar kha dog gcig pa gnas gcig ste zhes bya ba la sogs pas gnas gcig pa nyid bstan pa bstan pa'i sgo nas rku ba ston par byed de/ ji ltar gong du kun nas 'brel ba'i rgyun gcig nyid yin pa de ltar 'dir yang brku bar bya ba'i rdzas kyis non pa'i gnas gcig pa nyid yin pa de bas na 'das par gyur na nyes par 'gyur ro zhes bya bar sbyar bar bya'o/ /khyad par ji lta bu zhe na/ kha dog gcig pa ste sngon po la sogs pa de dag ni kha dog gcig pa'o/ /de khyad par ji lta bu zhe na/ ri mo ste rdo rgyus la sogs pa'i ri mo yin te/ de la sogs pa gang yin pa de ni bang rim la sogs pa'o/ /de med pa ni bral bar gyur pa'o/ /de la gzhan yang khyad par du byed pa ni mthon dman dang bral ba'i sa'i cha ste/ yan lag gang yin pa de gzhi mnyam pa'o/ /de'i phyir de la ji skad du bshad pa'i gnas gcig pa nyid gang yin pa de ni rdzas bzhag pa'i gnas yin te/ de las gzhan du bskyod par gyur na dngos po ji lta ba bzhin du nyes par 'gyur ro zhes bya ba'i tha tshig go/ /glang chen la sogs zhes bya la sogs pas srog chags kyi yan lag dag gnas nyid du rjod par byed de/ glang po dang por byas pa'i gzhan rta dang ma he la sogs pa yin pa de bas na de'i'o/ /khyad par ji lta bu zhe na/ mngon pa ste shes par gyur pa'i yan lag rtsib logs la sogs pa'i mtshan nyid gang yin pa de ni phyogs mngon par gyur pa'o/ /phyogs mthong bar ma gyur pas na phyogs ni mi mngon pa ste/ yan lag gsal por ma gyur pa'o/ /sha dang khrag dang pags pa rgyas par gyur pa'i phyir de yang gnas gcig pa nyid yin no/ /ni'i sgra ni yang gi don yin gyi/ glang chen la sogs kyang zhes bya ba snga ma las bye brag tu byed pa'i don ni ma yin no/ /gzhan du na glang po che la sogs pa'i phyogs mi mngon pa kha dog tha dad pa ri mo dang ldan pa'i gnas kyang gnas gcig pa nyid du 'gyur te/ ni'i sgra snga ma las khyad par du byed pa nyid yin pa'i phyir ro/ /de lta na bshad ma thag pa'i kha dog gcig pa tsam gyis kyang gnas gcig pa nyid du thob par 'gyur te/ de lta ni ma yin pa de'i phyir don snga ma kho na rigs pa yin no/ /dong gi nang gi 'bru gnas gcig pa nyid du ston par byed pa la/ de ltar zhes bya ba rjes su 'jug pa de bas na 'bru gnas gcig pa nyid yin no zhes bya ba'i don 'dir 'gyur ro/ /khyad par ji lta bu zhe na/ kha dog mtshungs pa ste rigs 'dra bar gyur pa'i 'bru'i yan lag gang yin pa de ni kha dog mtshungs cha can no/ /de khyad par ji lta bu zhe na/ dong gnas te dong ni bang ba'i khyad par yin te/ de na yod pa'i phyir dong na gnas pa yin no/ /de la 'dir yang de lta bur gyur pa yang zhes bya bar yang gi sgra blta bar bya'o/ /kha dog mtshungs cha can 'di dang sngar gyi phyogs ni mi mngon pa zhes bya ba ni nye bar mtshon par byed pa yin pa de bas na/ de ltar kha dog gcig pa gnas gcig ste/ /zhes bya ba la sogs pa gong du bshad pa thams cad kyi mtshan nyid yin par blta bar bya'o/ gal te de lta yin na de gnyis ci'i phyir brjod de/ de ltar kha dog gcig pa gnas gcig ste/ /zhes bya ba 'dis rtogs pa nyid kyi phyir ro/ /bden te de lta na yang kha cig dag glang po che la sogs pa'i srog chags la mthon dman yod kyang gcig nyid du 'khrul par 'gyur ba dang / dong na gnas pa'i 'bru rigs tha dad pa dang 'dras su zin kyang gnas gcig pa nyid yin no zhes 'dod pa de bsal bar bya ba'i phyir ro/ /de ltar zhes bya ba dang / yang gi sgra rjes su 'jug go/ /rtswa rnams kyis bkram pa ni rtswa rnams bkram pa'o/ /de la rtswa rnams bkram pa khyad par ji lta bu zhe na/ gshibs pa ste bar ma chad par 'dab 'byor pa'o/ /'dra ba ni kha dog mtshungs par gyur pa'o/ /de ltar rtswa rnams bkram pa yang gnas gcig pa nyid yin no/ /khyad par dag bstan nas spyi brjod par bya ba'i phyir gzhan dag la yang zhes bya ba la sogs pa smos te/ de ltar zhes bya ba dang yang gi sgra yang rjes su 'jug go/ /de ltar gzhan rdo brag la sogs pa la yang ci rigs par dpyad par bya ba ni rdo kha dog mtshungs pa dang / ri mo la sogs pa med pa nyid dang / mtho ba dang dma' ba la sogs pa dang bral ba nyid du dpyad par bya ste/ sa g.yos pa nyid kyi phyir de nyid gnas nyid yin gyi sa ni ma yin no/ /da ni gzhan dag gi rdzas sman la sogs pas rnam par nyams par byas nas rku ba gnas skabs ci tsam na brkus par 'gyur zhe na/ smras pa/ sman dang sngags la sogs pas nyams par byas nas rku bar byed pa ni nyams par byas pa rku bar byed pa na'o/ /nyams byas ngo bo ste/ rang bzhin gang yin pa de ni nyams byas ngo bo'o/ /de gang zhe na/ gser dang dngul ni gser dang dngul te/ de nyid brkus pa yin par 'dod cing brku bar bya ba nyid du dgongs pa yin no zhes bya ba'i bar du'o/ /nyams par ma byas pa'i gnas [(]sabs [,]babs [)]ni ma yin no/ /ni'i sgra ni snga ma las khyad par du byed pa'i don te/ ji ltar gong du/ rku sems dang ni 'dod pa nyid/ /ces bya ba la sogs pas rdzas nyams par ma byas pa gnas nas bskyod nas brkus pa de ltar nyams par byas pa rku bar byed pa la yang gnas skabs snga ma nyid brkus pa ma yin pas gal te nyams par byas pa'i gnas skabs la rin thang tshang bar gyur na de'i tshe dngos gzhir 'gyur la/ ma yin na chung bar 'gyur ro/ /nyams par byed pa ni sbyor ba'i nyes byas su rig par bya'o/ /lug la sogs pa la brgyab pas rku bar byed pa na/ bsad par gyur pas sam/ 'on te gnas nas bskyod pas brkus par 'gyur zhes/ smras pa/ lug la sogs pa dag bsad par gyur pa nyid kyis brkus par ni 'ga' zhig tu yang mi 'gyur gyi/ /'on kyang dus phyis gnas nas bskyod pa na brkus pa yin pas 'di ni rku ba nyid kyi sbyor ba yin no/ /gang la zhe na/ brku ba la'o/ /bshad par bya ba ni rnam par bstan cing brjod par bya'o zhes bya ba'i tha tshig go/ /'dir rku ba'i blos gsod par byed na ni gsod par sbyor ba yin la/ 'dir nyams par byed pa'i bsam pas yin na ni chud gzon pa'i bsam pa nyid yin pa'i phyir der gtogs pa'i kha na ma tho bar 'gyur ro zhes bya bar rig par bya'o/ /dang ni brku bya gcig dang zhes bya ba la sogs pas sngar bshad pa kho na ston par byed de brku bar bya ba ste dbrog par bya ba gcig nyid ni brku bya gcig dang gzhi ni brku bar bya ba'i rdzas kyi gnas yin te/ de'i rnam pa'i gcig nyid ni gzhi'i rnam pa gcig nyid yin no/ /ji ltar 'gyur ba de ltar bshad pa ni go rims ji lta ba bzhin du gzhi nas rgyun gyis rku bar byed pa na/ kun du 'brel ba'i rgyun ni gcig nyid yin/ de ltar kha dog gcig pa gnas gcig ste/ ri mo la sogs med cing gzhi mnyam pa'o/ /zhes bya ba la sogs pas so/ /dang ni thams cad du sdud par byed pa yin no/ /brku bar bya/ dbrog par bya ba de'i rang gi ngo bo yang ji ltar 'gyur ba de yang de ltar/ gser dang dngul gyi rnam pa nyams byas rku byed na/ /zhes bya ba la sogs pas bstan to/ /'dis ni 'di skad du zhus pa las rnam pa bzhir bkod de/ bdag po dpyad pa dang / rdzas dpyad pa dang / gnas dpyad pa dang / rku ba'i sbyor ba dpyad pa'o/ /de la rdzas dpyad pa ni/ gser dngul rnam pa nyams byas rku byed na/ /zhes bya ba la sogs pa dang / gnas dpyad pa ni de ltar kha dog gcig pa gnas gcig pa ste/ zhes bya ba la sogs pa dang / rku ba'i sbyor ba dpyad pa ni gzhi nas rgyun gyis rku bar byed pa na zhes bya ba la sogs pa dang bdag po dpyad pa ni 'chad par 'gyur bas bsdus pa yin pas ci bdag nyid kyis rang gi 'dod pas byas pa ma yin no zhes bya bar 'gyur ro/ /da ni nor gyi bdag po mi'am ri dwags zhes bya ba la sogs pas bdag po'i rnam pa ston par byed de/ rgyun la sogs pa'i nor brku bar bya ba'i bdag po dbang ba ni nor bdag ste/ ri dwags la sogs pa dang de'i bdag po dag yin no/ /de dag ma nges pa ni gtan la ma phab pa ste ci nor gyi bdag po mi'am 'on te ri dwags zhes the tshom du gyur na dngos po'i dbang gis rnam par gzhag par rig par bya'o/ /de la 'di ltar dngos po'i dbang gis rnam par gzhag pa ni gal te de don dam par mi'i yin na de'i tshe de'i khongs su gtogs pa'i kha na ma tho bar 'gyur la/ yang na byol song gi yin na de'i rgyud du gtogs pa'i kha na ma tho bar 'gyur te/ yid gnyis dang ni 'du shes 'dra bar gzhag /ces bya ba'i tshig gi phyir ro/ /gos dang snod sogs zhes bya ba la sogs pas gzhan gyis khyer ba'i yo byad bdag gir byas pa nyes pa cir 'gyur ba 'dir brjod par bya ste gos dang de'i snod ni gos dang snod yin la/ de dang por byas pa'i lhung bzed la sogs pa gang yin pa de ni gos dang snod sogs te/ de khyer ba na'o/ /gang gis she na/ rkun pos zhes bya ba smos pa yin te/ bshad ma thag pa'i gos dang snod la sogs pa de la bdag gi med pa yin no/ /gang la zhe na/ dge tshul gang la bdag gir byed pa'i mtshan nyid kyi bsam pa med pa de ni re ba med pa ste/ de la zhes bya ba'i don to/ /de las cir 'gyur zhe na/ de las zhes smos te ltos pa med pa'i rgyu de'i phyir rkun po de las nan gyis te/ stobs kyi rnam pas len par byed na mtha' ma'i dngos po'i mtha'i nyes par 'gyur ro/ /nan gyi tshig smos pa'i phyir chos bshad pa'am rin gyis len par byed pa la nyes pa med par shes par bya'o/ /de 'dir dpyad par bya ste nan gyis khyer na zhes smos pa gang yin pa 'di/ de ni bdag gi yin zhes bdag nyid kyi bsam pas yin nam/ yang na gzhan gyi yin pa'i bsam pas yin zhe na/ gal te de la rang nyid kyi bsam pas yin na ni gzhan gyi bsam pa ma gtogs par bdag nyid kyi bsam pas nan gyis len pa la ji ltar mthar 'gyur te/ bdag nyid kyi bsam pas len pa la ltung ba med do zhes gsungs pa'i phyir ro/ /ji ste yang 'di ltar bdag gi bsam pas yongs su btang ba de lta na yang len pa'i dus su 'di ni bdag gi yin par shes pa yin no zhes sems pa de lta na yang / gzhan dag gi bsam pa med par ji ltar na tha mar 'gyur/ de bas na bdag gi bsam pa ma gtogs par gzhan gyi bsam pas len na mthar 'gyur ro zhes khyad par du brjod par bya'o/ /bsam pa ste bdag gir byed pa'i sems kyis ma btang yongs su ma spangs par de'i nan gyis len na yang nyes pa med pa yin no/ /rang gi bsam pas zhes brjod par bya zhing 'di la yang rtsa ba'i dngos gzhi'i nyes pa'i mtshan nyid kyi nyes byas med do zhes bstan par bya'o/ /nyes byas su ni 'gyur te de bzhin du bdag gir byas pa la med pa ma yin no zhes gsungs pa'i phyir ro/ /slob ma gzhan gyis dbang byas pa/ /zhes bya ba la sogs pas sngags dang sman la sogs pas slob ma gzhan gyis dbang byas pa las nyes par 'gyur ba ston par byed de/ gzhan gyis stobs la sogs pa dbang du byas pa'o/ /de gang zhe na/ slob ma zhes smos pa yin no/ /de bas na de la bdag gi ste/ mkhan po la bdag gir bya ba med pa yin no/ /gang du zhe na/ 'dir zhes smos pa yin te/ 'di ni rku ba'i tha snyad du bya ba'i rgyu ston par byed de/ gang gi phyir mkhan po la bdag gi med do zhes smos pa'i phyir rku ba'i shugs kyis de la nyes par 'gyur ro zhes bya bar khong du chud par bya'o/ /ji ltar yang rang nyid bros par gyur pa de'i tshe ji ltar 'gyur zhe na/ bdag nyid ces bya ba smos te/ bdag nyid rku ba ni bdag nyid rku ba ste/ de nam yang yod pa ma yin pa de'i dbang gis nyes par mi 'gyur ro/ /zhes bya ba'i don to/ /dge tshul la slob ma med pa nyid ma yin nam/ de ji ltar na bdag gi min zhes brjod pas nyes par 'gyur zhe na/ bden te 'on kyang lung gi rjes su 'brangs nas de ltar mdor byas pa yin no/ /lung las kyang slob ma smos pa ni gnas brtan gyi dbang du byas pa yin pa de'i phyir dge tshul la mkhan po gcig pa dang slob par byed pa la sogs pa yod pa yin te/ de dag rku bar byed na nyes par 'gyur bar rig par bya'o/ /nyes pa de yang bsam pa'i dbang las rnam par gzhag par bya ba yin te/ gal te 'di ltar de dag gi thad las bdag gis bsnyen bkur la sogs pa bdag gir bya'o snyam pa'i bsam pa byung na ni de'i dbang las mthar 'gyur la/ yang na de dag rab tu byung ba'i bar chad du ma gyur cig snyam pa ni gzhan gyi don nyid yin pa'i phyir nyes par mi 'gyur te/ mgon med zas sbyin gyi chung ma la sogs pa thar bar byas pa dang 'dra ba'i phyir ro/ /de lta na ni bcom ldan 'das kyis ci'i phyir mthar 'gyur bar gsungs she na/ bsam pa'i dbang las yin te bsam pa'i dbang de yang bshad ma thag pa kho na yin no/ /byol song nor ni zhes bya ba la sogs pas byol song gis yongs su bzung ba'i rgyan la sogs pa brkus na ji ltar nyes par 'gyur ba ston par byed pa la/ byol song gi bdag po ni byol song bdag po ste/ byol song bdag po ni skyes bu yin no/ /byol song gi nor de'i bdag po ni byol song gi nor gyi bdag po yang de yin te/ gang gi phyir bu dang 'dra bar rgyan la sogs par gdags pa nyid yin pa'i phyir ro/ /skyong ba'i blo rnam par gnas pa dang ltos pa dang bcas pa yin pa de'i phyir byol song gi bdag po gang yin pa de ni byol song gi nor gyi yang bdag po yin no/ /ni'i sgra ni gang gi phyir gyi don to/ /yang ni sdud par byed pa'o/ /rnyed phyir zhes bya ba la sogs pa bshad par 'gyur ba de dag thams cad kyang rgyu'i tshogs kho nas nyes par 'gyur ba shugs kyis bstan pa yin te/ gang gi phyir nor de'i bdag po gnyi ga yin na de las gal te 'di dag tshul gyis bya'i rgyan brku bar bya'o snyam pa'i bsam pas ni nyes pa chung bar 'gyur la/ yang na mi'i brku bar bya'o snyam pas ni don ji lta ba bzhin du 'gyur ro/ /shin tu chags pa'i dmigs kyis bsal ba ni zas shig ces bya ba smos te/ bza' bar bya ba yin pas na zas de bza' bar bya'o/ /de la zas byin par gyur na byol song nyid bdag po ste/ gtso bor gyur pa nyid yin te/ gzhan la ltos pa med pa'i phyir dang byin par gyur pa nyid kyi phyir ro/ /de bas na de'i dbang las nyes par 'gyur gyi bdag po ma yin no snyam pa'i 'du shes ni 'khrul pa nyid yin pa'i phyir chung bar 'gyur ro/ / rnyed phyir zhes bya ba la sogs pas rngon pas ri dwags la sogs pa gtses par gyur pa'i bdag po nyid bstan pa'i sgo nas nyes pa nyid du 'gyur ba ston par byed de/ me dang por byas pa'i 'tshe bar byed pa'i thabs gang dag yin pa de dag ni me la sogs pa'o/ /de'i phyir de dag gis gtses par gyur pa ni 'das par gyur pa na'o/ /ri dwags dang por byas pa'i phag la sogs pa gang dag yin pa de dag ni ri dwags la sogs pa ste/ de'i bdag po ni gtso bo la bya'o/ /'tshe byed ni me la sogs pa gang gis ri dwags la sogs pa dag la 'tshe bar byed pa ste de la brjod do/ /ci'i phyir 'tshe bar byed ce na/ rnyed phyir zhes smos te/ rnyed pa'i phyir te bzung ba'i phyir yin gyi rtsed mo'i phyir ni ma yin pa de'i phyir rngon pa bdag nyid ri dwags la sogs pa'i bdag po nyid yin pas dngos po ji lta ba bzhin dang / 'du shes ji lta ba bzhin du nyes par 'gyur ro/ /bcom ldan 'das kyis 'dul ba las ri dwags kho na gsungs kyi gzhan ni ma yin nam/ 'dir ci'i phyir sogs pa smos she na/ rgyas pa las ni ri dwags zhes bya ba la sogs pa smos pa yin te/ gang gi phyir 'di ltar 'dul ba rgyas pa las ri dwags gsungs pa de ni sa 'dzin gyi don yin pa de'i phyir yang rta dang phag la sogs pa gzhan dag la yang sbyar bar bya'o/ /de ni zhes bya ba ni gzhan gyi nor brkus pa la yin gyi ri dwags 'ba' zhig la ma yin pa de bas na sogs pa smos pa yin no/ /rngon pas gtses par gyur pa'i ri dwags shig ces bya ba la sogs pas 'di'i dmigs kyis bsal ba byed pa yin te/ rngon pas gtses par gyur pa'i ri dwags kyang srung bar byed pa yin no/ /de la zhes bya ba la ni ri dwags la'o/ /khyad par ji lta bu zhe na/ skyabs su 'ongs par gyur pa ni skyabs su 'ongs pa'o/ /skyabs kyi sgra ni gtsug lag khang la bya ste/ skyabs kyi steng du 'dzegs nas zhes gsungs pa'i phyir ro/ /yang na skyabs su 'ongs pa'i sgra ni skyabs kyi don yin te/ de ltar ni 'jig rten pa dag 'di skad du bdag la skyabs su 'ongs zhes smra ba yin no/ /der 'ongs pa ni phyin par gyur pa'o/ /khyad par ji lta bu zhe na/ bros nas 'ongs pa ni bros te 'ongs pa'o/ /bros pa smos pa ni 'tshe bar byed pa nyid yin par rab tu bstan pa'i phyir yin gyi/ rang rgyud la ni ma yin no/ /gal te shi bar gyur na ji ltar bya zhe na/ shi na de ni zhes bya ba la sogs pa smos pa yin te/ ri dwags shi bar gyur na de ni slar sbyin par bya'o/ /gang la zhe na/ de la zhes smos pa yin no/ /nyid ni rngon pa kho na la bya'i gzhan dag la ni ma yin zhes nges par gzung ba dang rim pa gzhan du bstan pa'i don to/ /de dag med par gyur na ni bor bar bya'o/ /dge tshul pha la sogs pas khrid par gyur pa de la ci gzung bar bya'am 'on te mi bya zhe na/ de'i phyir smras pa/ gang dge tshul la sogs pa'i sdom can mthus khrid par gyur pa na'o/ /gang dag gis she na/ skye bo rtsa lag ces smos te rtsa lag tu gyur pa'o/ /skye bo ni skye bo rtsa lag ste pha la sogs pa yin pa de bas na des so/ /de la ji ltar bya zhe na/ de ni zhes bya ba la sogs pa smos te/ bstan ma thag pa'i sdom can 'bad pas gzung bar bya'i/ shin tu 'gal bar mi bya'o zhes bya ba'i don to/ /'di ci'i phyir snyam du dogs pa la/ pha la sogs pas yongs su bzung ba bzung na ma byin par len pa'i phyogs su gtogs pa nyid yin pa'i phyir bya ba ma yin te/ 'di ltar bdag gir byas pa gtang bar mi bya'o snyam du 'ba' zhig dogs par gyur pa la zhes bshad pa de bas na bsam pa de nyid kyi sgo nas gzung bar bya ba 'di bslab pa'i gzhi 'dir bstan pa yin no/ /de la 'gro 'dod par 'gyur ba de'i tshe ji ltar bya zhe na/ ji ste skye bo rtsa lag ces bya ba la sogs pa smos te/ sdom can gang gi sems te bsam pa shes so/ /khyad par ji lta bu zhe na/ skye bo rtsa lag dang rjes su mthun par gyur par ro/ /de dag gang gi sgo nas shes par bya zhe na/ smras pa rtags te tshig la sogs pa las so/ /des dge tshul de gzung bar mi bya'i 'on kyang gtang bar bya'o/ /ji ltar 'dul ba las nye dus lag pa gcig nas bzung ba na rab tu byung bas gnyis pa las gzung bar bya zhing / de la des 'di skad du lag pa gang na zhes dri bar bya'o/ /gal te nye du dag gis zhes smra bar byed na gzung bar bya'o/ /'on te khyed cag dag gis zhes smra bar byed na/ kye ma'o 'gro 'dod pa'o zhes bya ba'i dbang du byas na gzung bar mi bya'o zhes 'byung ba yin no/ /dbyar gnas pa'i rgyu mtshan las rnyed pa'i rnyed pa gang dbang bar 'gyur zhe na/ dbyar gnas zhes bya ba la sogs pa smos pa yin te/ dbyar gnas par gyur pa ni dbyar gnas te de dbang zhing bdag por 'gyur ro/ /khyad par ji lta bu zhe na/ yun ring bar yang zhes bya ba ni bya ba khyad par du byed pa yin te/ mang du zhes bya bar 'jug go yang gi sgra ni 'di skad du/ ma lus par gnas pa 'ba' zhig ma yin gyi 'on kyang yun ring bar dbyar gnas par gyur pa yang zhes bya ba'i don du bstan par 'gyur ro/ /'dir zla ba phyed dang gnyis las lhag pa dang bcas par gnas par gyur pa de ni yun ring bar ni dbyar gnas pa zhes bya ba yin te/ rab tu byung ba de shi bar gyur na yang dbang bar 'gyur gyi yul gzhan du song bar gyur pa 'ba' zhig ni ma yin no zhes bya ba'i tha tshig go/ /de dbang ba'i rnyed pa gang yin zhe na/ dbyar gnas zhes bya ba smos te/ dbyar gnas pa ni 'dug par gyur pa ste/ dbyar gnas shing 'dug par gyur pa'i phyir dbyar gnas pa'i byed rgyu dang rgyu mtshan de'i sgo nas rnyed pa'i rnam pa 'byung ba ni rnyed pa kho na rnyed pa'i rnam pa nyid yin pa de la de skad ces bya ste/ de la de lta bur gyur pa'i rnyed pa'i bdag por 'gyur ro zhes bya ba'i tha tshig go/ /dkon mchog gsum gyi ched dang chos nyid la phul ba'i rnyed pa gang la rigs pa yin zhe na/ smras pa sangs rgyas la phul ba yin pa de ni bcom ldan 'das kyi gtsang khang dang mchod rten la sogs pa la nye bar sbyar bar bya ba yin la/ dge 'dun la phul ba ni bgo bar bya ba yin no/ /chos la phul ba ni mi shes pas ji ltar bya zhe na/ chos kyi rnyed pa zhes bya ba la sogs pa smos pa yin no/ /chos kyi rnyed pa gang dag dbang bar 'gyur zhe na dam chos zhes bya ba la sogs pa smos te/ dam pa'i chos kyi mtshan nyid kyi tshigs bcad ni dam chos tshigs bshad do/ /tshigs bshad ni bka' la bya ste/ sman pa nye bar mtshon par byed pa yin gyi khyad par can ma yin pa de'i phyir yang de tsam de yang rab tu byung ba gang gis klags par gyur pa de dag kho na la dbang ba ste/ bdag por 'gyur ro zhes bya ba'i tha tshig go/ /yang gi sgra ni mdo sde la sogs pa klags pa de dag 'ba' zhig dbang bar 'gyur ba ma yin no zhes bya ba'i don to/ /ni'i sgra ni de kho na zhes bya bar nges par gzung ba yin no/ /'dir chos 'di gang yin zhes rnam par dpyad par bya'o zhe na/ 'dir smras pa chos ni rnam pa gnyis te/ bstan pa'i chos dang / don dam pa'i chos so/ /de la bstan pa'i chos ni mdo'i sde dang / dbyangs kyis bsnyad pa dang / lung du bstan pa zhes bya ba la sogs pa bka' yan lag bcu gnyis so/ /don dam pa'i chos ni mya ngan las 'das pa'o/ / de la bstan pa'i chos kyi ched du phul ba'i rnyed pa ni 'dir bgo bar bya ba yin la/ mya ngan las 'das pa'i chos kyi ched du phul ba ni sangs rgyas la phul ba dang 'dra bar bgo bar bya ba ma yin te/ mya ngan las 'das pa de ni de'i rang bzhin yin pa'i phyir ro/ /de la ji ltar de dag bgo bar shes par bya zhe na/ smras pa gang gi tshe sbyin pa po bdag nyid kyis rnam par phye nas 'bul bar byed pa de'i tshe rab tu sbyin par bya zhing / rnam par ma phye ba yin na ni sbyin pa po des chos gang dag gi ched du phul ba yin zhes dri bar bya'o/ /de la yang gal te bstan pa'i chos 'bri ba'i ched du'o zhes zer na/ de de kho na bzhin du bya'i bgo bar mi bya'o/ /ji ltar yon bdag gis rnyed pa nges par rnam par gzhag pa bzhin du zhes gsungs pa'i phyir ro/ /gtsug lag khang du mar dbyar gnas par 'gyur ba gang yin pa de la gtsug lag khang kun gyi rung ngam zhe na/ gtsug lag khang du mar zhes bya ba la sogs pa smos te/ gtsug lag khang du ma ni gtsug lag khang mang po ste/ de dag khas blangs shing dam bcas pa byas pa na'o/ /gtsug lag khang gcig kho na las rnyed pa zhes bya ba dbyar gyi rnyed pa ste/ de len du dbang ba ma yin no/ /dang ni nges par gzung ba'o/ /kyang gi sgras gcig tu gnas par khas blangs pa gcig nas rnyed pa dbang ba 'ba' zhig tu ma zad kyi 'on kyang gtsug lag khang du ma dag la yang zhes sdud par byed pa'o/ /'on te thams cad nas len par 'dod par 'gyur ba de'i tshe yang / kun du zhes bya ba la sogs pa smos pa yin no/ /gal te gtsug lag khang thams cad nas rnyed pa len pa'i bsam pa yod par 'gyur ba de'i tshe ji ltar khas blang bar bya zhe na/ gtsug lag khang kun rnyed pa zhes bya ba smos te/ gtsug lag khang thams cad kyi rnyed pa ni gtsug lag khang kun rnyed pa ste/ gtsug lag khang thams cad kyi rnyed pa gcig tu bsdus pa de las so/ / gcig kyang yin la skal ba yang yin pas skal ba gcig go/ /skal ba gcig kho na ni skal ba gcig tsam ste/ dge tshul des de tsam zhig blang bar bya ba yin no/ /de la skal ba gcig tsam zhes bya ba ni de gang du khas blangs pa'i gtsug lag khang de dag tu gang bshad par gyur pa'i dge tshul gyi skal ba ste/ rnyed pa gcig po de gtsug lag khang de dag gis grangs las char byas pa gang yin pa de ni 'dir skal ba gcig yin te de tsam zhig des blang bar bya'o zhes bya ba'i don to/ /don 'di nyid slob dpon yon tan 'od kyis 'dir khas blangs pa dag la bdag nyid kyi grangs las cha nyid do zhes gsungs so/ /'dir yang don ni 'di yin te khas blangs pa des sngags kyis gtsug lag khang dag tu khas blangs pa'i gtsug lag khang rang gi grangs de las cha ste skal ba sbyin par bya ba gang yin pa de ni bdag nyid kyi grangs kyi cha'o/ /de'i dngos po ni bdag nyid kyi grangs kyi cha nyid do/ /gtsug lag khang gi grangs las rnyed pa ste/ skal bar byas nas gtsug lag khang tha dad pa'i dge slong dag gis sbyin par bya'i lhag par ni ma yin no zhes bya ba'i tha tshig go/ /'jig rten pa'i yang tshul 'di nyid yin no/ /ji ltar dge slong dbyar gnas la sogs pa'i rnyed pa thob pa de bzhin du/ dge tshul dag yin nam 'on te rnam pa gzhan du yin zhe na/ dge slong gcig gi nges dang mtshungs pa las/ /zhes bya ba la sogs pa smos te/ dge slong gcig gi nges pa ste rnyed pa las cha gnyis blang bar bya'o zhes bya ba ni rgyas pa las byung ba yin te/ dbyar gyi rgyu mtshan nam gzhan dag las dge slong gcig gi rnyed pa'i nges pa gang yin pa de las dge tshul gyi cha gnyis blang bar bya'o/ /ni zhes bya ba ni gang gi phyir gyi don yin la de zhes bya ba ni de skad du zhes bya ba'i don yin pas gang gi phyir de skad du rgyas pa las gsungs pa'i phyir dang / rnyed pa len pa dpyad pa las kyang zhes bya ba la ltos par bya ste/ dge slong gcig gi skal ba'i tshad kyi rnyed pa cha gsum du gang byas pa las dge tshul gyi cha gnyis blang bar bya'o zhes 'dul ba rnyed par dpyad pa las gsungs pa yin no zhes bya ba'i don to/ /bsnyen par rdzogs par 'dod pa la yang de kho na bzhin du yin nam ma yin zhe na 'di ltar bsnyen par rdzogs par 'dod pa la ni rnyed pa mnyam po yin zhing zas la sogs pa de dang shi ba'i gos kyang yin te/ bsnyen par rdzogs par 'dod pa gang yin pa de ni bsnyen par rdzogs par 'dod pa ste rnyed pa mnyam po kho na dbang bar 'gyur ro/ /ni'i sgra ni gang gi phyir gyi don yin te/ gang gi phyir dge slong gi dngos po thob par 'dod pa yin pa de'i phyir mnyam po dbang bar 'gyur ro/ /'di zas la sogs pa la yang yin nam sngar bshad pa'i cha gnyis dag yin zhe na/ zas la sogs pa zhes bya ba la sogs pa smos te/ zas dang por byas pa'i bza' ba la sogs pa gang yin pa de ni zas la sogs pa ste/ de la de ni bshad ma thag pa'i tshad mnyam po'i mtshan nyid kho na yin par blta bar bya'o/ /yang gi sgra ni 'di 'ba' zhig la ma yin gyi rab tu byung ba shi ba'i gos la sogs pa gang yin pa de ni shi ba'i rdzas yin te de la mnyam po kho nar 'gyur ro zhes sdud par byed pa yin no/ /don 'di nyid ni slob dpon yon tan 'od kyis dge tshul dang dge tshul ma dag ni cha gnyis pa dang gsum pa dag go/ /zas la ni mnyam po nyid do/ /dge slong ma dang bsnyen par rdzogs par 'dod pa dag kyang ngo / /shi ba'i gos ni thams cad la 'os pa nyid do zhes gsungs pa yin no/ / 'dri ba'i don 'di ni dge tshul dang dge tshul ma dag la ni cha gsum pa dor ba'i rnyed pa sbyin par bya zhing zas ni mnyam por sbyin par bya'o/ /bsnyen par rdzogs par 'dod pa de dag dang / sngar bstan pa'i dge slob ma bsnyen par rdzogs par 'dod pa ma yin du zin kyang mnyam po yin zhing / shi ba'i yo byad kyang dge slong ji lta ba de bzhin du dge tshul la yang zhes bya ba'i don te/ bsnyen par rdzogs par 'dod pa dag chos gos med pa'i phyir dang / bsnyen par rdzogs pa'i yan lag ma tshang ba'i phyir zhes pa dag yin no zhes bya bar rig par bya'o/ /gang gi tshe gcig gam gnyis sam gsum dag gtsug lag khang na gnas par byed na de gtsug lag khang nyid kyi rnyed pa de dag bdag po nyid yin nam/ 'on te ma yin snyam du dogs pa la 'dod pa de bsal bar bya ba'i phyir/ gtsug lag khang na gcig pu su gnas pa zhes bya ba la sogs pa smos te/ gtsug lag khang gang du dge tshul gcig cig kyang gnas par byed na'o/ /kyang gi sgras mang po dag kyang yin te/ gtsug lag khang de'i rnyed pa de nyid bdag po yin gyi dge 'dun ni ma yin no/ /dge 'dun gyi gtsug lag khang du byung ba'i rnyed pa ni dge 'dun kho na dbang ba yin gyi gang zag ni ma yin no zhes rnam par rtog pa bsal ba'i phyir brjod pa yin no/ /gnas pa zhes bya ba ni thams cad du yin gyi dbyar kho na ni ma yin no/ /rnyed pa zhes bya ba ni dbyar gyi'am gzhan dag gi ste de ltar ni gtsug lag khang 'ga' zhig tu dge tshul gyi mkhan po'am/ gnas kyi slob dpon shi bar gyur pa'am/ yul gzhan du song ba'am babs par gyur pas gcig pu zhig 'dir gnas par gyur pa na/ dbyar gyi dus sam gzhan gyi tshe der yang yon bdag gis yon bstabs par gyur pa de nyid kyi yin gyi gzhan gyi ma yin pas bgo bar mi bya'o/ /de'i rnyed pa la de nyid bdag po yin pas gal te dbyar gyi rnyed pa byung na de kho na bzhin du bdag gir bya zhing / gzhan du rnyed pa byung na sngags kyis byin gyis brlabs nas bdag gir bya'o/ /gal te byin gyis ma brlabs par bdag gir byed na nyes byas kyi nyes par 'gyur te/ phyis 'ongs pa gang yin pa de dag thams cad kyang skal ba mnyam por 'gyur bas de dag dang lhan cig bgo bar bya'o/ /rnam pa gzhan du na dngos po ji lta ba dang bsam pa ji lta ba bzhin du nyes par 'gyur ro/ /de la sngags ni 'di yin te gnas 'di na bdag gcig pu gnas par bgyis pa na dge 'dun gyi gos kyi rnyed pa byung ba 'di yang dge 'dun gyis bgo bar bya zhing / dge 'dun gyis bsten du rung ba bdag gis rnyed la bdag gis gos 'di bdag gir bya'o zhes bya ba nas bdag gir bgyi bar byin gyis brlab po zhes bya ba'i bar du ste/ gal te de ltar byed na byin gyis brlabs pa yin par brjod par bya zhing gzhan dag 'ongs pa rnams la sbyin par mi bya'o/ /'on te de ltar mi byed na byin gyis brlabs pa ma yin pas des bdag gir mi bya'o/ /bdag gir byed na nyes byas kyi nyes par 'gyur ro/ /shi ba'i yo byad ji ltar bgo bar bya ba yin zhe na/ /sdom can shi na bkur sti byas nas ni/ /zhes bya ba la sogs pa smos pa yin te/ /sdom can rab tu byung ba shi na de la bkur sti byas nas te de ltar byas nas shi ba de'i gos la sogs pa bgo bar bya'i gzhan du ni ma yin no zhes bya ba'i don to/ /bkur sti ni rol mo'i sgra dang lus bsregs te/ chos mnyan pa sbyin pa dang / rgyun chags gsum pa 'don pa dang / gnas kyi mchod rten la phyag bya ba yin par rig par bya'o/ /shi ba'i yo byad lhung bzed la sogs pa drug po gang dbang bar 'gyur zhe na/ nad pa de'i nad g.yog gang yin pa zhes bya ba la sogs pa smos pa yin te/ sdom can nad pa'i bsnyen bkur bar gyur pa gang yin pa de ni nad g.yog yin no/ /de gang zhe na/ sdom can zhes bya ba smos te/ de lhung bzed la sogs pa drug po dbang ba ni bdag po yin te/ de'i thob skal yin zhes bya ba ni tshig gi don yin no/ /lhung bzed la sogs pa drug po zhes bya ba ni lhung bzed dang / chos gos gsum dang gding ba dang chu tshags dag yin par rig par bya'o/ /gal te nad g.yog mang po dag yod par gyur pa de'i tshe ji ltar khong du chud par bya zhe na/ gang tshe nad g.yog mang du yod na yang / /zhes bya ba la sogs pa smos te/ gang gi tshe bsnyen bkur byed pa mang ba nyid yod par gyur pa de'i tshe yang bshad ma thag pa'i drug po de nyid de/ lhung bzed la sogs pa drug po dag nad g.yog de dag spyir dbang bar 'gyur ro/ /nyid ni gzhan ni ma yin no zhes nges par gzung ba'i don to/ /dang ni rim pa gzhan te/ yang gi sgra'i don yin pas na drug po de yang rab dang 'bring dang tha ma dag las sbyin par bya'i gcig gi rang bzhin kho na las ni ma yin no/ /gang gi tshe nad pa'i nad g.yog gzhan du song bar gyur la/ nad pa yang dus las 'das par 'gyur ba na de'i tshe ji ltar bya zhe na/ nad pa'i don du gzhan du song ba'i tshe zhes bya ba la sogs pa smos te/ nad pa dag gi ched ni nad pa'i don te nad pa'i dgos pa de nyid kyi phyir gzhan du song na yang lhung bzed la sogs pa drug po dag dbang ngo / /ni'i sgra ni nad g.yog bdag nyid kyi don du na ma yin no zhes rnam par bcad pa'i phyir ro/ /gang gi tshe zhe na/ sdom can nad pa shi na zhes bya ba smos te/ nad pa yang de yin la sdom can yang yin pas na sdom can nad pa ste sdom can nad pa de shi na'o/ /gal te dge 'dun gyis lhung bzed la sogs pa de bgos par gyur na de'i tshe yang sbyin par bya ba yin nam zhe na/ ji ste bgos par gyur kyang sdom can gyis/ /myur du bsdus te nad g.yog sbyin par bya/ /zhes bya ba smos te/ gal te gang gi tshe sdom can rab tu byung bas lhung bzed la sogs pa drug po dgos par gyur pa ste char bshig par gyur pa de'i tshe yang sdom can rab tu byung bas myur du bsdus nas nad g.yog la sbyin par bya'o/ /ji ste zhes bya ba'i sgra ni gal te de'i don yin te/ bdag gir mi bya'o zhes bya ba'i don to/ /gal te nad g.yog mtshan tha dad par gyur pa'am khyim pa dag byed pa de'i tshe ji ltar bya zhe na/ ji ste bud med mtshan ldan nad g.yog byed pa 'am/ khyim pa zhig na zhes bya ba smos te/ bud med kyi mtshan ni bud med mtshan te/ de'i mtshan ni mtshan dang ldan pa gang yin pa de ni de'i mtshan ldan te/ mtshan gyi sgra gcig phyi ba yin no/ /ji ste de lta bur gyur pa de nad g.yog byed pa'am yang na khyim pa nad g.yog byed par gyur na zhes bya bar sbyar ro/ /drug po zhes bya ba ni lhung bzed la sogs pa drug po dag go/ /de mi dbang zhes bya ba ni shi ba'i yo byad dag go/ /ji ste zhes bya ba ni gal te'i don yin no/ /'am zhes bya ba ni yang na zhes bya ba'i don yin te/ mtshan mthun pa kho na la rigs pa yin no zhes bya ba'i tha tshig ste/ gang du yang mtshan mi mthun pa'i nad g.yog dag kho na med pa ma yin pa de'i tshe 'di nges pa ma yin no zhes rtogs par bya'o/ /gang gi tshe bu lon blangs bzhin du rab tu byung ba shi bar gyur pa de'i tshe gang las sbyin par bya zhe na/ ji ste sdom can bu lon chags bzhin shi/ /zhes bya ba la sogs pa smos te/ gal te sdom can rab tu byung ba bu lon chags bzhin du shi bar gyur pa de'i tshe shi ba de'i yo byad de de'i snod spyad shi ba'i yo byad dag las bu lon bsab par bya zhes bya bar sbyar ro/ /gal te yod na bsabs pa'i lhag ma bgo bar bya'o/ /de'i yo byad rnams kyis zhes bya ba 'dis ni 'di skad du nor gyi bdag po gang yin pa de ni nor med kyang bdag po yin pa'i phyir de'i bu lon dge 'dun gyi ma yin no zhes bstan par 'gyur ba de bas na yod na de'i kho na las bsab par bya zhing de'i rdzas med na nyes pa med do zhes bya ba'i don te/ de la las sar byed pas las sar gyi don du bu lon blangs par gyur pa de'i tshe yang dge 'dun don du las sar byed pas blangs zhes bya ba la sogs pa smos te/ las sar byed pas zhes bya ba ni dge 'dun gyi las sar byed pas so/ /dge 'dun don du zhes bya ba ni dge 'dun gyi las sar rgyu mtshan gyis bu lon blangs pas so/ / dge 'dun las kyang gzhal zhes bya ba ni dge 'dun gyis rab tu sbyin par bya zhes bya ba'i don to/ /dge 'dun las zhes spyir bstan pas ji ltar sbyin par bya zhe na/ dpang rgya bltas te zhes bya ba la sogs pa smos te/ rgya bltas shing dpyad nas tshad de kho na tsam de sbyin par bya'o zhes bya ba'i don to/ /shi ba'i rdzas kyi bdag po nyid gang yin zhe na/ gsol byas dang po tha ma gang yod pa/ /zhes bya ba la sogs pa smos te/ gsol ba byas par gyur pa'am/ yang na dang po dang tha ma byas par gyur pa na gtsug lag khang de'i mtshams su chud pa'i rab tu byung ba gang yod pa ste/ srid par gyur pa de dag nyid shi ba de'i gos la sogs pa'i dbang po yin gyi/ dus phyis 'ongs par gyur pa ni ma yin no/ /dang ni nges par gzung ba'o/ /gsol ba ni sngags kyi khyad par yin no/ /dang po tha ma zhes bya ba la/ dang po dge 'dun gyi gnas brtan no/ /tha ma ste gang 'og na med cing tha mar gyur pa de ni dge 'dun gyi gzhon rabs so/ /'di ltar shi ba'i yo byad dag las a ru ra la sogs pa cung zhig blangs nas kyang dge 'dun gyi rgan po dang gzhon nu la sbyin par bya ba'am gsol bar bya'o/ /de ni 'di ltar ma bgos kyang bgos pa bzhin du blta bar bya ba yin pas na/ gang dag gis phyis 'ongs pa de dag la sbyin par mi bya'i de'i tshe de dag kho nas bgo bar bya'o/ /bshad ma thag pa'i sgo nas bgo bar mi nus pa 'on te 'god par byed na thams cad dbang ba yin no zhes bya ba'i dbang du byas nas dngos po ji lta ba dang bsam pa bzhin du nyes par 'gyur ro/ / 'dis ni gsol ba la sogs pa byas pa'i dus phyis 'ongs pa rnam par gcod pa yin gyi/ dus snga mar 'ongs pa ni ma yin no/ /gang gi tshe sdom can nad pa'am gzhan dag bdag ji srid 'tsho ba de srid bdag nyid kyi yin la/ bdag shi bar gyur na 'di che ge mo zhig la byin cig ces zer ba ji ltar rtogs par bya zhe na/ bdag shi ba'i 'og tu byin zhes bsngos pa ni zhes bya ba la sogs pa smos pa ste/ bdag shi ste bdag zhig par gyur pa'i 'og tu'o/ /'di byin zhes bya ba ni sbyin par bsngos nas ji ste de shi bar gyur pa de'i tshe sdom can dag gis byin pa'i rdzas de ni bgo bar bya ste/ bgo bsha' dag bya'i de de la sbyin par mi bya'o zhes bya ba'i don to/ /ci'i phyir zhe na/ sdom can bu la sogs pa'i bsam dang bral/ /re bcas sbyin pa sbyin par mi 'gyur ro/ /zhes bya ba smos te/ bu la sogs pa'i bsam pa ni sred pa de lta bu la sogs pa'i bsam pas bdag shi bar gyur na 'di bu la sogs pa dag gir 'gyur ro zhes bya ba'i sred pa gang yin pa de dang bral ba ste med pa'i phyir ro/ /sdom can gang dag ltos pa dang bcas pa'i sbyin pa dag ji srid 'tsho'i bar du ni bdag nyid kyi yin la/ shi bar gyur na che ge mo dag gi'o zhes bya ba de ni sbyin pa kho na ma yin te/ gang gi phyir khyim pa kho na'i sbyin pa yin gyi/ rab tu byung ba dag gi ni ma yin pa'i phyir ro/ /bcom ldan 'das kyis kyang khyim pa ni ltos pa dang bcas pas dus 'das par 'gyur gyi/ rab tu byung ba dag ni ltos pa med pa yin no zhes gsungs pa yin no/ /nad pas che ge mo 'di la byin cig ces zer ba na gal te bya ba gzhan gyis brel ba byung ba dang / brjed cing g.yengs par gyur nas ma byin na de la ji ltar bsgrub par bya zhe na/ nad pas sbyin par bya bar bskul ba las/ /zhes bya ba smos te/ 'di la 'di byin par bskul bar gyur pa las/ gal te brel ba byung ba ste bya ba gzhan nye bar lhags pa de'i phyir nad g.yog gam gzhan gang gis kyang ma byin na'o/ /nad pa de yang shi bar gyur pa de'i tshe ji ltar bya zhe na/ shi yang de yi tshig dang mthun par ni/ /sdom can gyis ni zhes bya ba la sogs pa smos te/ shi yang de yi tshig dang mthun par ni/ /zhes bya ba ni nad pa'i tshig dang rjes su mthun par ro/ /de'i nor gyi phung po ni de'i rdzas kyi phung po ste/ bgo bar mi bya ba dang ltos pa dang bcas pa sbyin pa ma yin zhes bya ba'i dbang du byas nas rdzas kyi phung po'i thad de las sdom can rab tu byung ba dag gis sbyin par bya ba yin no/ /'ga' zhig gis dge 'dun gyi don du sbyin pa byin pa na sdom can rab tu mang ba nyid kyi phyir so sor sbyin par mi nus pas bcu la sogs pa'i sde tshan gyis 'god par byed pa na de las 'ga' zhig shi bar gyur na de'i skal ba su dbang bar 'gyur zhe na/ rang gi sde tshan rdzas ni 'ged pa na zhes bya ba la sogs pa smos te/ sde tshan gang du shi ba de nyid ni rang gi sde tshan te de'i rdzas 'ged cing bgo bsha' byed pa na rang gi sde tshan gyi sdom can rab tu byung ba shi bar gyur na'o/ /khyad par ji lta bu zhe na/ 'dis skal ba ste/ cha shas ma blangs shing ma mnos pa'i phyir skal ba ma blangs so/ /shi zhes bya ba ni shi bar gyur pa kho na shi ba zhes bstan pa yin gyi phyis shi bar 'gyur ba zhes bya ba ni ma yin no/ /gzhan du na sdom can shi bar gyur pa de'i la ji ltar gzhan dag bdag po nyid du 'gyur/ de'i tshe 'di sde tshan gang du shi bar gyur pa'i sde tshan de nyid de'i skal ba de dbang ngo zhes bya ba ni shi ba'i skal ba ste/ thob skal gang yin pa de ni bdag nyid kyi sde tshan de dbang bar 'gyur ro zhes bya ba'i don to/ /nyid ni gzhan rnam par bcad pa'i don to/ /gang gi tshe skal ba thob nas kyang shi bar gyur pa de'i tshe su dbang bar 'gyur zhe na/ skal ba thob na shi ba'i skal ba nyid ces bya ba smos te/ gal te skal ba ste cha shas thob nas shi ba de'i tshe shi bar gyur pas shi ba'i skal ba nyid yin no/ /nyid ni shi ba'i yo byad kho na yin gyi sde tshan gyi ma yin no zhes nges par gzung ba'i don to/ /ni'i sgra ni gong ma las khyad par du byed pa'i don yin te/ gang gi phyir shi ba'i yo byad yin pa de'i phyir dge 'dun ma lus pa dbang ba yin no zhes bstan par rig par bya'o/ /de la skal ba phyis 'byung ba len pa las snga ma kho nar shi bar gyur na ni sde tshan de nyid kyir 'gyur la/ skal ba thob nas shi na ni shi ba'i yo byad nyid yin pa'i phyir dge 'dun ma lus pa dbang bar 'gyur ro zhes bya ba 'di ni bsdus pa'i don yin no/ / gang gi rtsa ba'i bgo bsha' las kyang snga ma kho nar sde tshan gyi nang du shi bar gyur na de dang lhan cig skal ba len pa'i sde tshan du ma byas pa yin la/ 'on kyang skal ba blangs par gyur pa de lta na yang de nyid du bsdu bar bya ba yin pa'i phyir de yang 'di nyid kyis bstan par rig par bya'o/ gzhan gyis gzhan la gos la sogs pa bskur ba na gang bdag po nyid yin zhe na/ gos la sogs pa gzhan du bskur ba ni zhes bya ba la sogs pa smos pa ste/ gzhan du zhes bya ba ni sdom can gzhan gyi rgyu mtshan du'o/ /gos la sogs pa'i rdzas gang yin pa de ni gos la sogs pa'o/ /gos la sogs pa yang da yin la bskur ba yang yin pas na gos la sogs pa bskur ba na'o/ /de bzhin du zhes bya ba ni gtsug lag khang gzhan dang grong gzhan dag tu zhes shes par bya ste/ gang rab tu byung ba de la bskur ba ni zhes bya bar sbyar bar bya'o/ /gos la sogs pa gang la bskur ba de nyid kyis yin te/ de'i 'di yin pas na de nyid kyi'o zhes bya bas ni nges par gzung ba dang rim pa gzhan du bstan pa'o/ /ni'i sgra ni dngos po bskur ba'i rim pa ni 'di yin no zhes snga ma las khyad par du byed pa'i don to/ /'on te mi 'dod na gang bdag po nyid yin zhe na/ gal te bskur ba na gang la bskur ba de ma 'dod na zhes bya bar sbyar ro/ /gos la sogs pa bskur ba gang yin pa de ni bskur ba po de nyid dbang ba ste bdag po yin no zhes bya ba'i tha tshig go/ /'on te de yang ji ste mi 'dod pa ste bdag gis de la btang ba yin no zhes de ltar gos la sogs pa dag mi 'dod kyang gos la sogs pa 'di nyid bskur ba po nyid dbang ba nyid du 'gyur ro zhes bya bar sbyar bar bya'o/ /nyid ni snga ma dang 'dra'o/ /de la 'di ni bskur ba yang dag par sbyin pa ma spangs par shi bar gyur pa de'i tshe de'i yin no zhes shi ba'i yo byad du byin gyis brlab par bya'o/ /'on te bskur ba po shi bar gyur na de'i yin no zhes byin gyis brlab par mi bya'o/ /byin gyis rlob par byed na byin gyis ma brlabs par 'gyur la yang dag par byin pa spangs na ni phyin ci log ma yin te don dam par de nyid kho na'i yin pa'i phyir ro zhes bya ba bsdus pa'i don yin no/ /yid gcugs pas longs spyod pa la yang tshul 'di nyid yin no/ / shi ba'i yo byad gang dbang ba yin zhe na/ 'dra ba yod na shi ba'i gos rnams ni zhes bya ba la sogs pa smos te/ shi ba'i gos rnams ni shi ba'i gos dag ste de dag dbang ba min/ dbang ba ni bdag por gyur pa yin la/ dbang ba ma yin pa ni dbang ba ma yin pa'o/ /de'i dngos ni dbang ba ma yin pa nyid do/ /gang zhe na tha dad gyur pa'i mtshan ni zhes bya ba smos te/ 'dis mtshon par byed pas na mtshan te skyes pa dang bud med dag gi dbang po'o/ /des tha dad par gyur pa'i mtshan ni tha dad par gyur pa'i mtshan te mtshan tha dad par gyur pa zhes bya ba'i don to/ /de gang gi tshe na/ 'dra ba yod na zhes bya ba smos te/ 'dra ba ni 'dra ba yin la yod pa ni srid par gyur pa ste/ shugs kyis de nyid bdag po nyid yin par khong du chud par bya'o/ /de bzhin du bkar ba yang bdag po nyid ma yin no/ /gang gi tshe zhe na/ smras pa sdom can gzhan ma bkar ba mngon sum du yod nam bkar ba'i shi ba'i yo byad 'ba' zhig tsam ni ma yin no/ /bkar ba ni chad pa'i las kyi bye brag yin la/ de gang gis thob pa de'i nor te rdzas ni bkar ba'i don yin la de'i yang bdag po ni bkar ba ma yin no zhes bya bar sbyar ro/ /yang gi sgra ni gnyi ga la sbyar bar bya'o/ /rang bzhin du gnas pa mtshan 'dra ba med na ni bdag po nyid du 'gyur ba yin te/ gzhan du na 'dra ba yod na zhes bya ba la sogs pa smos pa don med par 'gyur ro/ /gtsug lag khang gnyis kyi bar te dbus mar sdom can shi ba de'i rdzas gang dbang ba yin zhe na/ gtsug lag khang gnyis mtshams kyi bar du shi/ /zhes bya ba la sogs pa smos te/ gtsug lag khang gi mtshams ni gtsug lag khang gi mtshams te/ de'i gnyis ni mtshams gnyis zhes bya ba'i tha tshig go/ /gtsug lag khang gnyis kyi mtshams de'i bar der shi zhing rlag par gyur pa ni gtsug lag khang gnyis kyi bar du de shi bar gyur pa'o/ /shi ba de'i lus ni de'i lus te de dang 'brel pa'i ras la sogs pa'i rdzas ni ras la sogs pa yang de yin la rdzas kyang yin pas ras sogs rdzas so/ /de gang dbang zhe na/ gang du de bzhag pa ste mtshams gang du ras la sogs pa'i snod spyad de nyid lhung bar 'gyur ba mtshams de pa dbang bar 'gyur ro/ /ni'i sgra ni ras la sogs pa kho na gang du gzhag pa yin gyi mgo bo'am yan lag gzhan dag ni ma yin no zhes nges par gzung ba dang rim pa gzhan du bstan pa'o/ /mtshams gnyi gar bzhag pa gang gir 'gyur zhe na/ ji ste gnyi ga ste mtshams gnyi ga na gnas pa de dag dbang bar 'gyur te/ 'di skad du mtshams gcig ras la sogs pa des khyab par gyur na de'i khongs su 'dus pa dag dbang bar 'gyur la/ mtshams gnyi ga khyab par gyur na ni de gnyi ga dag dbang bar 'gyur ro/ /don 'di ni gang gi mtshams na shi ba'i gos la sogs pa zhes bya ba la sogs pa bshad par gyur pas rtogs par 'gyur mod gyi/ de lta na yang gsal ba'i don du yin par rig par bya'o/ /khyim gyi nang du bzhag pa'i gos de yang gang yin par 'gyur zhe na/ shi ba'i gos sogs khyim gyi nang bzhag pa/ /zhes bya ba la sogs pa smos te/ khyim gyi nang du bzhag par gyur pa'i phyir khyim gyi nang du bzhag pa'o/ /khyim gyi nang der bzhag pa'i shi ba'i gos dag ni khyim pa rab tu byung ba gang la dad pa ste mngon par dad nas de la phul ba de dbang bar 'gyur ro/ /khyim pa de zhes bya ba ni gang gi khyim gyi nang du lhung bzed la sogs pa bzhag par gyur pa de la de skad ces bya'o/ /gang la byin pa de yang chos gos la sogs pa med par gyur pa zhes bya bar ma bstan du zin kyang grub pa yin par rig par bya'o/ /yod par gyur na ni blangs nas gzhan dag la sbyin par bya ste/ lhag pa ni mi mkho ba'i yo byad nyid yin pa'i phyir ro/ /rab tu byung ba gzhan du shi bar gyur cing de'i yo byad gzhan na yod pa de gang gis byin gyis brlab par bya ba yin zhe na/ gang gi mtshams na she pa'i gos la sogs/ /zhes bya ba la sogs pa smos te/ rab tu byung ba gang dag gi mtshams su shi ba'i gos la sogs pa gzhag par gyur pa zhes bya ba'i tshig gi lhag ma'o/ /sogs pa'i sgra ni yo byad ma lus pa 'phen par byed pa'o/ /de dag kho nas byin gyis brlabs nas dbang ba yin te/ byin gyis brlabs nas dbang ba nyid ni sngags kyis byin gyis brlabs nas bdag gir byas pa yin no/ /'di ltar byin gyis brlab par bya ste/ dge 'dun btsun pa rnams gsan du gsol zhes bya ba nas gnas 'di nyid du ming che ge mo zhes bya ba dus las 'das par gyur na gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis sdom can che ge mo shi ba'i yo byad bgo bar bya ba chos gos dang chos gos kyi snod snang ba dang mi snang ba byin gyis brlab par bgyi'o zhes bya ba'i bar du'o/ /gtsug lag khang 'ga' zhig tu rab tu byung ba shi bar gyur pa de las der ram gzhan du de'i dngos po gang gi lag tu bzhag pa de yang gtsug lag khang gzhan du song bar gyur pa de la ji ltar bya ba yin zhe na/ gnas gzhan dag tu bzhag pa'i gos rnams kyang zhes bya ba smos te/ ji ltar gong du gnas gzhan du bzhag pa byin gyis brlabs pa de bzhin du gnas gzhan du bzhag pa'i gos yod pa la yang gos de dag byin gyis brlab par bya'o zhes bya ba ni tshig gi lhag ma yin no/ /gtsug lag khang gcig gi mtshams las mtshams gzhan te der bzhag pa dag gi sgo nas byin gyis brlab par bya zhe na/ dngos dang 'dra bar byin gyis brlab par bya zhes bya ba smos te/ lkog tu gyur ba yin yang dngos dang 'dra ba'i dbang gis byin gyis brlabs na byin gyis brlabs pa yin no zhes bya ba'i don 'dir bstan par 'gyur ro/ /de ltar yang mdo mdzad pas 'dir shi ba'i gnas nyid rgyu ma yin no zhes gsungs te de la 'di'i don ni dngos dang 'dra ba de ni shi ba'i rdzas kyi dngos dang 'dra ba ste/ de gang du song ba der gnas pa dag gis dngos dang 'dra ba'i mdun du gnas gzhan na yod pa'i rdzas byin gyis brlab par bya ba'am/ yang na mtshams gang na yod pa'i rdzas de 'ba' zhig la der gnas pa dag gis byin gyis brlab par bya zhing bdag gir bya'o/ /gang du rab tu byung ba gyur pa de'i khongs su gtogs pa dag gis ni ma yin no/ /gang gi phyir 'dir shi ba'i gnas nyid ni rgyu ma yin pa de nyid kyi phyir bgo'o/ /bzhag par gyur pa yang rgyu ma yin no/ /dngos dang 'dra bas zhes bstan pa'i dngos dang 'dra ba de gang yin zhe na/ gang la rdzas rnams bzhag par gyur pa'i zhes bya ba la sogs pa smos te/ shi ba de'i rdzas ni de'i rdzas so/ /bzhag par gyur pa zhes bya ba ni mi gang la shi ba'i rdzas de bzhag par gyur pa de ni dngos dang 'dra ba zhes brjod pa ste/ dngos dang 'dra ba zhes brjod pa'i mi gang la yod pa zhes bya ba'i dbang du byas nas/ ni'i sgra ni gang gi phyir gyi don te gang gi phyir de'i de ni rdzas kyi gzhir gyur pa nyid yin pa'i phyir dang / shi ba'i brjed mar gyur pa yin pa de'i phyir de dngos dang 'dra ba zhes bya'o/ /'di ltar dngos dang 'dra ba byin gyis brlab par bya ste/ dge 'dun btsun pa rnams gsan du gsol zhes bya ba nas 'dir dge slong ngam dge tshul che ge mo dus las 'das par gyur la/ de gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong ngam dge tshul che ge mo'i dngos dang 'dra ba'i dge slong ngam dge tshul che ge mo la shi ba'i yo byad bgo bar bya ba chos gos sam chos gos kyi snod snang ba'am mi snang ba gang yin pa byin gyis brlab par bya'o zhes bya ba'i bar du'o/ /'ga' zhig la lhung bzed la sogs pa gtod par byed pa'i dus gtad par gyur nas gang smra ba ni bag yod par bya ba'i don du de skad du brjod pa yin te/ lag nas lag tu snod la sogs pa gtod par byed pa ni des snod la sogs pa 'di khyod kyis zin tam/ ji kho bos ni btang ngo zhes len pa po des shes par byas nas snod la sogs pa de byin par bya'o/ /gang gi tshe zhe na/ gru dang por byas pa'i gzhan gang yin pa de ni gru sogs so/ /de la 'dzeg par ste 'dzeg pa'i dus de'i tshe'o/ /de skad ces bya ba'i sgras ni de skad ces bya ba dang / rim pa gzhan gyi don yin te snga ma bzhin du blta bar bya'o/ /gal te gtod par byed pa des de skad du smras pa na/ len pa po des kyang khas blangs nas snod la sogs pa de chu la sogs par lhung ba'i sgo nas bor bar gyur na de'i tshe snod la sogs pa len pa po de la de'i rin dbab par bya ba yin no/ /ji lta zhe na/ dogs pa med par te gang gi phyir des smras pa des khas blangs par gyur pa de'i phyir rin phab pa la nyes pa yod pa ma yin no zhes bya ba de tsam zhig bstan gyi/ 'on kyang 'di bslab pa'i gzhi yin no zhes khong du chud par bya ba ma yin no/ /gzhan gyi rnyed pa blang bar khas blangs nas rnyed pa de ma blangs na de yang dbab par bya ba yin no zhes 'di nyid kyis bstan par rig par bya'o/ /dam pa ma yin pa las gos la sogs pa len par byed la dbang med pa de dag las ni gos la sogs pa zhes bya ba la sogs pas 'gog par byed de/ sbyin pa'i yul la dbang med par gyur pa bsrung ba'i bya ba kho na byed cing sbyin pa'i phyir ma yin pa de la de skad ces bya'o/ /dbang med pa de las te gos la sogs pa sbyin pa'i phyir gtso bo ma yin pa nyid la gos la sogs pa de blang bar mi bya'o/ /gos dang por byas pa'i gser la sogs pa gang yin pa de ni gos la sogs pa'o/ /rgyu ci'i phyir zhe na/ de ni sbyin bdag min zhes bya ba smos pa yin no/ /ni'i sgra ni gang gi phyir gyi don te/ gang gi phyir sbyin pa'i phyir gtso bor gyur pa ma yin pa de'i phyir sbyin bdag kho na ma yin pa de dbang med par gyur pa kho na yin pa'i phyir ro zhes bya ba ni tshig gi lhag ma yin no/ /sbyin bdag gi sgras rdzas kyi bdag po brjod pa yin te/ tshig 'dis ni gang gi tshe stobs par byed pa de'i tshe blang bar bya ba yin no zhes khong du chud par bya'o/ /gang yang las byed par 'gyur ba sbyin pa dang len par nus pa gang yin pa de la sogs pa ji ltar blang bar bya zhe na/ phongs par gyur na nad pas las byed la zhes bya ba smos te/ gal te sman la sogs pa'i thabs med pa de'i tshe blang bar bya'o zhes bya ba'i don to/ /bdag nyid kyi yin pas na bdag gi 'di yin no zhes bya bar gang gis yongs su gzung ba de ni las byed pa yin par shes par bya'o/ /'di gang gis blang bar bya ba yin zhe na/ nad pas zhes smos te nad pa de bzhin du gnas pa ma yin pas so/ /de yang rang bzhin du gnas par gyur nas slar sbyin par bya'o/ /sbyin par 'dod pa ni slar sbyin par ni 'dod pa ste/ de nyid kyis blang bar bya'o zhes bya bar sbyar bar bya'o/ /ni'i sgra ni snga ma las khyad par du byed pa dang rim pa tha dad pa'i don to/ /yang gi sgra ni rang gi don yin la nyid ni nges par gzung ba'i don yin no/ /nad pas de bzhin gshegs pa'i dkor las sman la sogs pa bya'o zhes bstan pa'i phyir sman zong nor dang bral bar gyur pa la/ de bzhin gshegs pa'i yang dkor gyis bsdud ces bya ba la sogs pa smos te/ 'di de bzhin gshegs pa'i yin pas na de bzhin gshegs pa'i ste rgyan la sogs pa yin la/ des kyang sman gyi bya ba dag bya'o/ /gang gis she na sman zong nor dang zhes bya ba smos te/ nor dang bral ba ni nor dang bral bar gyur pa ste/ nor med pa zhes bya ba ni bar du yin pas na nor dang mi ldan pa'i sdom can des so/ /yang gi sgra ni 'di skad du dang po bdag nyid kyi las so/ /de med na yang dag par blangs nas so/ /de yang med na de bzhin gshegs pa'i gser la sogs pa'i dbyig las so/ /de yang med na de bzhin gshegs pa'i rgyan gyis bsdud par bya'o zhes bstan pa yin no/ /sman zong 'ba' zhig la ma yin gyi de'i ched du bcom ldan 'das la mchod pa dang / bsnyen bkur ba la yang bstud par bya'o zhes bya bar yang blta bar bya'o/ /rang bzhin du gnas par gyur pas bya ba ni sos par gyur nas zhes bya ba la sogs pa smos te/ sos pa'i dngos po ni sos pa nyid de der gyur pa na de bzhin gshegs pa'i dkor blangs pa de slar yang bsab par bya'o/ /ni'i sgra ni snga ma las khyad par du byed pa'i don yin no/ /nor dang bral ba'i nad pas blangs pa sos par gyur nas bsab par bya'o zhes bya ba ni nor yod pa la 'di nges pa yin no/ /nor med gyur na de la nyes pa med/ /ces bya ba ni sdom can la'o/ /yod pa ma yin pa ni med pa ste tha na bslang ba'i sgo nas kyang zhes bya ba'i tha tshig ste/ pha'i nor la rigs pas bu dbang ba yin no zhes bya ba'i dbang du byas pa yin no/ /bcom ldan 'das kyis dge 'dun gyi don du yul dang zhing yongs su blang bar bya'o zhes gsungs pas de la dge 'dun gyi yul du nyes pa las byung ba'i rgyal po'i skal ba blang du rung ngam 'on te ma yin snyam du dogs pa la/ nyes bcu la sogs chos kun smra ba ni/ /zhes bya ba la sogs pa smos te/ nyes pa yang de nyid yin la bcu yang yin pas na nyes bcu'o/ /de la sogs pa gang dag yin pa de dag ni nyes bcu la sogs te/ gang dag byung ba de dag yod na/ rgyal pos gnang na rgyal po'i skal ba ni/ blang bar bya ba ste zhes bya bar sbyar ro/ /rgyal po'i skal ba ni rgyal po'i skal ba ste/ rgyal pos nyes pa las thob cing byin pa'o/ /rgyal pos rjes su gnang ba ni rgyal pos gnang ba ste/ dge 'dun gyi zhes bya bas 'gro ba dang bral ba'i yo byad du zhes bya ba'i don to/ /rgyal pos gnang ba dang rgyal po'i skal ba dag ni zhes bya ba ni khyad par gyi bsdu ba yin no/ /de blang ba dag kyang khyad par du byed de chos dang ldan pas smras pa de bas na de zhes bya ba ni tshig gi lhag ma'o/ /'dir chos dang ldan pa ni chos bstan bcos smra ba po ste drang srong yid la sogs pa dag yin par rig par bya'o/ /chos kyi gzhir gnas pa ma yin pa de dag ni snga nas chos ma yin pa smra bar 'gyur ba'i phyir ro/ /blang bar bya ste zhes bya ba ni gzhan gyi skabs ma yin pa'i phyir dge 'dun gyi bya ba la 'jug pa'i dge tshul gyis zhes bya bar shugs kyis 'ongs pa yin no/ /de la nyes bcu ni rna ba gcod pa dang / gzhan gyi chung ma nyed pa la sogs pa yin par gzung ste/ 'jig rten gyi grags pa dag las shes par bya'o/ /de la rtsod pa'i dus su dge bsnyen dag rab tu sbyar bar bya ba yin pas na/ /brtsad 'grub par ni brtsad pa nyid/ /brtsad pas grub pa de'i phyir ro/ /rdzas de ci'i phyir blta bar mi bya zhe na/ sdom can te rab tu byung ba lta bar ston pa bcom ldan 'das kyis bka' ma gnang ba nyid kyi phyir ro/ /ni'i sgra ni nges par gzung ba yin te kho na'i don to/ /gang gi phyir sdom can rtsod pa lta bur byed pa tshul ma yin pa de'i phyir dge bsnyen nges par sbyar bar bya'o/ /de la yang dag par 'byung ba chos dang ldan pa'i rgyal po'i skal ba rgyal pos gnang ba sa gzhi dang 'dra bar bsam pa dag pas ma byin par len pa'i nyes pa spangs pas len par byed pa la nyes pa med do zhes de lta bu'i rnam pa'i tshig tu 'di rnam par gnas pa yin no/ /khab ral la sogs zhes bya ba la sogs pas dge 'dun gyi sa gzhi la dngos po ltung ba mthong ba ji ltar bya ba de ston par byed de khab dang por byas pa'i rab tu byung ba'i yo byad gzhan gang yin pa de ni khab ral la sogs pa'o/ /khab la sogs pa yang de yin la rdzas spyad kyang de yin pas khab ral la sogs te/ dge 'dun gyi'am mchod rten gyi sa gzhir ltung ba mthong bar gyur na/ dge tshul gyis khang skyong dag la bshad ma thag pa de gtad par bya'o/ /ni'i sgra ni khyad par du byed pa'i don te/ lhung ba de bdag po las yongs su lhung bar gyur ba mthong bar gyur pas so/ /khang skyong gis kyang khab ral la sogs pa de blangs nas 'di gang gi yin zhes bsgrags nas tshogs te dge 'dun la khab ral la sogs pa de dbul bar bya'o/ /gang la bsgrags nas she na/ tshogs kyi nang du zhes bya ba smos te/ tshogs kyi nang dang re re la zhes bya ba 'dir yang blta bar bya'o/ /ci de lta de lta nyid du dbul bar bya'am zhe na/ ji ste bdag po med na zhes bya ba smos te/ gal te bdag po 'ba' zhig gis shes pa med par gyur pa de'i tshe dbul bar 'gyur ro zhes bya bar sbyar ro/ /ci zhig byas nas she na/ de'i 'ong ba bsdad nas zhes bya ba smos te/ khab ral la sogs pa de'i bdag po 'ong ba ni de'i 'ong ba ste de la bsdad nas so/ /dus ji srid cig tu zhe na/ nyi ma gsum du zhes bya ba smos te nyi ma gsum du ni nyi ma gsum dag tu'o/ /yang gi sgra ni gang gis mthong ba des dge skos la gtad par bya zhing des kyang 'di gang gi yin zhes bsgrag par bya'o/ /dang gong ma ni sdud par byed pa yin la/ gnyis pa ni tshig gi kha bskang ba ste bsgrag pa dang nyi ma gsum du bsdad par bya zhes sdud pa yin no/ /dngul la sogs pa mthong bar gyur pa gang yin pa de brjod par bya ste/ dngul dang por byas pa'i gser la sogs pa gang yin pa de ni dngul la sogs so/ /de ltung ba mthong na yang ji ltar bya zhe na/ mdzod du bcug ces bya ba smos te/ mdzod du bcug pa ni dge 'dun gyi bang mdzod du gzhag par bya'o zhes bya ba'i tha tshig go/ /dus ji srid cig tu zhe na/ zla ba drug tu zhes bya ba smos te/ zla ba dag gi drug ni zla ba drug tu'o/ /ni'i sgra ni khab ral sogs pa la khyad par du byed pa'i don to/ /ci zhig byas nas she na/ zhag brgyad bar du zhes bya ba la sogs pa smos te/ nor gyi bdag po'i 'ong ba zhag brgyad kyi bar du bsdad nas te zhag brgyad kyi 'og tu mdzod du gzhug par bya'o zhes bya ba'i tha tshig go/ /dang ni mthong nas zhes bya ba sdud par byed pa'o/ /dus der ma 'ongs na zla ba drug po 'di'i 'og tu rdzas de snod du bsdu bar bya'o zhes bya ba ni tshig gi lhag ma'o/ /ni'i sgra ni nges par gzung ba dang / rim pa gzhan gyi don yin te snod smos pa ni yun ring por gnas pa'i rdzas spyad nye bar mtshon pa yin pa de bas na yun ring por gnas pa gang yin pa de'i yo byad snod tsam ni ma yin no zhes nges par gzung ba'i don to/ /dge 'dun gyis gzhi la 'di nges pa yin gyi sangs rgyas kyi ni rgyan du byas nas bcom ldan 'das la mchod par bya'o zhes shugs kyis blta bar bya'o/ /de nas ji ste 'ongs nas slong na yang / 'on kyang sbyin par bya ste skyed ni med ces bya ba la de nas te zla ba drug gi 'og tu snod du byas pa'i dus phyis de gal te 'ga' zhig nas 'ongs nas kyang slong bar byed pa de lta na yang sbyin par bya'o zhes bya ba ni ji ltar yang rdzas de snod du byas par gyur pa de lta na yang sbyin par bya'o zhes bya ba'i tha tshig go/ /gal te khyod kyis dus 'di srid du longs spyad pa yin no zhes skyed slong bar byed na ci sbyin par bya'am zhe na/ skyed ni med ces bya ba smos pa yin no/ /ni ni skyed sbyin par mi bya ba kho na'o zhes nges par gzung ba'o/ /las sar byed pas spyad du mi rung zhing / /rnyed de de yis gnang na blang bar bya/ /zhes bya ba la/ dge 'dun gyi las sar pa la mkho ba'i shing bdag gir byas pa ma yin pa/ gal te las sar pa la mkho ba ma yin pa dag las sar byed pa las rnyed par gyur pa de'i tshe las sar byed pa des gnang na spyad du mi rung ba'i shing de blang bar bya'i/ de lta de ltar ni ma yin no zhes bya ba'i tha tshig go/ /de ltar bdag po tha dad ces bya ba 'dis ni sngar bshad pa'i mdor bsdu ba ston par byed pa yin te/ mi 'am ri dwags zhes bya ba la sogs pas de ltar bshad ma thag pa'i rnam pas bdag po'i dbye ba ste nor gyi bdag po'i dbye ba brjod pa yin no zhes bya ba ni tshig gi lhag ma'o/ /de nas nyes byas kyi zhes bya ba la de la zhes bya ba ni dbang du byed pa'i don te/ 'di man chad nas yid brtan gzhan la zhes bya ba de'i gong ma'i bar ni nyes byas kyis rab tu dbye ba yin te/ 'di nas ji ltar zhes bya ba la sogs pas brjod pa yin no/ /ji ltar zhes bya ba'i sgra ni nye bar ston pa'i don te/ nyes byas de gang zhe na/ ma bos par ni zhes bya ba la sogs pa smos te/ ma bos pa ni mgron du ma bos pa zhes bya ba'i don te/ de la'am des zan zos pa ni ma bor bar ni zan zos pa ste/ nyes byas kyi nyes par 'gyur ro zhes bya ba ni tshig gi lhag ma'o/ /zan ni rnam pa gnyis te mgron du bos pa dang ma bos pa'o/ /de la mgron du bos pa la ni nyes par mi 'gyur ba kho na'o zhes shes par 'gyur na/ ma bos pa la ji ltar nyes par 'gyur zhe na/ bza' ba de'i dbye ba yang rnam pa gnyis te de nyid la ngan ngon tsam dang / khyad par du byed pa'o/ /de la khyad par du byed pa ni/ mi dbang bsod snyoms yongs blangs gyur/ /zhes bya ba la sogs pas nyes byas ches lci bar gyur to/ /gang de nyid du zan zos pa de la yang rnam pa gnyis te/ yon bdag gis ngas spyan ma drangs pa yin no zhes shes par 'gyur ba der bza' ba'i don du 'gro bar byed pa la sogs pa la ni nyes byas su mi 'gyur te/ bza' ba la nyes pa med par rjes su gnang ba nyid yin pa'i phyir ro/ /mi shes pa la ni nyes byas su 'gyur ba'i dbang du byas nas de skad du smras pa yin par rig par bya'o/ /rgya sogs zin pas gzir ba de dag las/ /rgya dang por byas pa'i 'khrul 'khor la sogs pa gzhan gang yin pa de ni rgya sogs te/ des zin pa ni rgya la sogs pas zin cing rnam par bcings par gyur pa de nyid sdug bsngal yin pa des gzir bar gyur pa'o/ /gang zhe na/ bsod nams sems kyis srog chags thar byas na/ /zhes bya ba smos te/ srog 'dzin par byed pa gang yin pa de ni srog chags te/ de lta bur gyur pa'i srog chags de dag bsod nams kyi bsam pas rgya la sogs pa las thar par byas na nyes byas su 'gyur ro zhes bya ba ni tshig gi lhag ma ste/ bsod nams kyi sems kyis zhes bya ba'i don du rig par bya'o/ /dad pas rgyal ba'i ring bsrel brkus te min/ /zhes bya ba sngar bstan pas de la dad pas brkus na nyes byas su 'gyur bar ston te/ de la bcom ldan 'das la mos pa ni de la mos pa ste/ des de nyid la mchod pa'i phyir te/ dgos pas rku bar byed pa gang yin pa de ni de la mos pas mchod pa'i phyir ro/ /de'i dngos po ni de la mos pas mchod pa'i phyir nyid yin pa de'i phyir des brkus na nyes byas kyi nyes par 'gyur ro/ /dang ni snga ma 'ba' zhig la ma yin gyi 'di la yang nyes byas su 'gyur ro zhes sdud par byed pa yin no/ /sangs rgyas kyi ring bsril de khyad par ji lta bu zhe na/ rin thang med pa'i zhes bya ba la sogs pa smos te/ gang la rin thang gi tshad med pa de ni rin thang med pa ste/ sangs rgyas kyi ring bsrel gang yin pa de ni rin thang med pa'o/ /de la yang zhes bya ba'i yang gi sgras 'di skad du de la sangs rgyas kyi ring bsrel la 'di ni 'di ri'o zhes bya bas rin thang med pa yin no zhes bstan par 'gyur ro/ /de ltar yang mdo mdzad pas/ dkon mchog ni mtshungs pa med pa'o/ /'dir sangs rgyas kyi ring bsrel yang zhes bstan te/ 'di ltar sangs rgyas la yang mchod pa'i bsam pas rku bar byed na nyes byas kho nar 'gyur gyi/ dngos gzhir ni mi 'gyur ro/ /de ltar yang zhes bya ba la sogs pa ji ltar sngar nyes byas su 'gyur ba dag yin pa de ltar 'di dag kyang nyes byas su 'gyur ro zhes bstan pa'i phyir de ltar gyi sgra yin la/ yang ni sdud par byed pa yin no/ /ni ni 'khrul 'khor gyi khyad par te ri dwags la sogs pa gsad pa'i phyir byas pa yin no/ /'dis rnam par bshig pas na rnam par bshig pa ste/ rgya la sogs pa dag yin par rtogs par bya'o/ /rnyi dang rnam par bshig pa dag ni rnyi dang rnam par bshig pa ste/ de dang por byas pa'i sems can gsod par byed pa'i rgyu gzhan gang yin pa de ma rung bar byas na nyes byas su 'gyur ro/ /gang gi dbang gis she na/ snying rje'i dbang gis zhes bya ba smos te/ snying rje de sems can rnams la brtse ba de'i dbang ni de la rag las pa de'i phyir snying rje'i dbang des rnyi la sogs pa ma rung bar byas pa de lta bu de dag gis nyes byas su 'gyur te/ snying rje'i dbang gis zhes bya ba'i don to/ /phug ron dang por byas pa'i bye'u la sogs pa gang yin pa de ni phug ron la sogs pa'o/ /de'i khyim gang yin pa de 'joms pa gang yin pa de dang por byas pa'i mes bsregs pa la sogs pa gang yin pa de ni tshang 'jig par byed pa la sogs pas nyes byas su 'gyur ro zhes bya ba ni tshig gi lhag ma'o/ / de dag las kyang nyes med brjod par bya/ /zhes bya ba ni nyes byas su brjod pa de dag las 'og tu nyes pa med pa yang brjod par bya zhing bstan par bya'o zhes bya ba'i don to/ /nyes byas su 'gyur ba 'ba' zhig ni ma yin gyi nyes par mi 'gyur ba yang zhes bya ba ni kyang gi don yin no/ /yid brtan tshig gzhan shes par byas nas ni/ /zhes bya ba la sogs pas nyes par mi 'gyur ba ston par byed de/ dge tshul gang la ma byin par len pa'i nyes pa med pa de ni nyes pa yod pa ma yin no zhes bya ba'i tha tshig go/ /ci zhig byas nas she na/ khyer na zhes smos te/ gzhan dag gis ma byin par khyer na zhes bya ba ni tshig gi lhag ma'o/ /bsam pa'i khyad par ji lta bu zhe na/ yid dge bas ni zhes bya ba smos te yid ge ba nyid kyis te rku sems dang bral ba nyid kyis so/ /ci zhig byas nas she na/ yid gtan tshigs gzhan shes par byas nas ni zhes bya ba smos te yid brtan byas pa yin gyi de tsam zhig ni ma yin te/ 'on kyang gzhan brtul zhugs can la bdag gis che ge mo 'di'i bkyer ro zhes yid brtan la shes par byas nas khyer na nyes pa dang ldan pa ma yin no zhes bya ba'i don te/ gzhan la shes par byas pa ni rtsod pa ngan pa'i skabs med par bya ba dang yid brtan pa dbang du bya ba nyid kyi phyir ro/ /yid brtan pa'i yul rab la sogs pa'i dbye bas rnam pa gsum du 'gyur ba de bzhin du yid brtan pa rnam pa gsum du 'gyur ro zhes bstan pa'i phyir grogs po rab dang 'bring dang tha ma rnams zhes bya ba smos te/ rab ni grogs po mchog tu gyur pa de rdzas mang po khyer kyang sems rnam pa gzhan du mi 'gyur ba yin la/ 'bring ni gang ras dang ras phran tsam khyer ba dang / tha ma ni gang so dag par byed pa'i so shing la sogs pa khyer na sems gzhan du 'gyur ba med pa yin par rig par bya'o/ /rab dang 'bring dang tha ma ni rab dang 'bring dang tha ma rnams te/ de dag kho na grogs po yin no/ /de'i dngos po ni grogs po rab dang 'bring dang tha ma nyid do/ /de la yid brtan go rims dag kyang bya/ /zhes bya ba ni yid brtan pa'i dngos po ni yid brtan pa nyid de de'i go rims dag kyang rim pa bzhin du bya ba ste/ bsgrub par bya'o/ /kyang gi sgra ni yul gyi dbye ba 'ba' zhig ma yin gyi yid brtan pa'i dbye ba yang yod do zhes bstan pa'i phyir ro/ /chung ngu la ni chung ngu dang 'bring la ni 'bring dang / chung ngu yang ste rab la thams cad nyid ces bya bas rim pa gang gis yid brtan par bya ba de brjod par bya ste/ chung ngu ni grogs po tha ma ste yid brtan pa chung ngu bya'i cig shos dag ni ma yin no/ /'bring ni grogs po 'bring yin te yid brtan pa 'bring dang chung ngu dag kyang bya ba yin la ni'i sgra ni snga ma las khyad par du byed pa'i don to/ /dang ni sdud par byed pa'o/ /rab tu byed pa las sngar bstan pa ni rab ste grogs po mchog de las ji skad du bshad pa'i yul gyi nyes pa thams cad nyid yid brtan par bya ba yin no/ /nyid kyis ni 'di skad du rab bzod pa gang yin pa des cig shos kyang bzod par 'gyur ba de'i phyir thams cad byas pa la nyes pa yod pa ma yin no zhes bstan par 'gyur ro/ /slob ma la sogs ra lug nor gyi rgyud/ /ces bya ba la sogs pa la slob ma dang por byas pa'i lung phog pa la sogs gzhan gang yin pa de ni slob ma la sogs so/ /sogs pa'i sgras gzhan rag las pa dag kyang gzung ba yin te/ slob ma la sogs rkun pos khyer ba btang na dge tshul la nyes par mi 'gyur ro/ /rnam par bshad pa nyan pa la sogs pa'i sgo nas lhan cig gnas pa la slob ma'i sgrar bstan gyi rnam pa gzhan du dge tshul slob ma yod pa ni ma yin no/ /yang gi sgra ni de 'ba' zhig ma yin gyi ra lug kho na nor gyi rgyud yin pa de yang rkun mas khyer ba thar bar byas pa la nyes par mi 'gyur ro zhes sdud pa dang rim pa gzhan yin no/ /ji lta zhe na/ snying rje'i dbang gis rdzu 'phrul bstan nas ni/ /zhes bya ba smos te/ dgra bcom pa srung dbang gi bu la sogs pa gang yin pa de ni srung dbang bu la sogs pa ste/ sogs pa'i sgras 'phags pa maud gal gyi bu gzung ngo / /rjes su mthun pa'i dngos po ni dbang yin te snying rje'i rjes su mthun pa yin pa de'i phyir snying rje'i dbang yin te snying rje'i dbang de'i phyir de srung dbang bu la sogs pas ji ltar rdzu 'phrul bstan nas thar par byas pa la nyes pa med pa de bas na de bzhin du dge tshul gyis rdzu 'phrul bstan nas btang ba la nyes pa med pa yin no zhes bya ba'i tha tshig go/ /de ltar ni 'dul ba las/ 'phags pa srung dbang gi bus tsha bo gnyis rkun pos khyer ba btang ba dang / de bzhin du 'phags pa mod gal gyi bus mgon med zas sbyin gyi bu thar par byas pa dang / de bzhin du 'phags pa srung dbang gi bus lha 'bangs kyi nor rkun pos khyer ba thar par byas so zhes gtam rgyud thos pa yin no/ /gong du phug ron la sogs pa'i tshang bshig pa la sogs pa las nyes byas su 'gyur bar bstan pa ste/ gtsug lag khang gi khyams na gang tshe tshang / /zhes bya ba la sogs pas dmigs kyis bsal ba byas pa yin te/ gtsug lag khang gi khyams gang yin pa de ni tshang ste phug ron la sogs pa zhes bya ba'i gnas bcas par gyur pa de sdom can dge tshul gyis dbang bar bya'o/ /gang gi tshe zhe na de dag na gang gi tshe sgo nga yod pa ma yin pa ni sgo nga med pa ste/ de'i tshe dbyung bar bya'i sgo nga dang bcas par gyur pa ni ma yin no/ /tshig de las gang du phug ron la sogs zhes bya ba der ni gtsug lag khang las gzhan du sgo nga dang bcas pa dang sgo nga med par byung na nyes par 'gyur bar rtogs par bya'o/ /bcom ldan 'das kyis ba'i rgya dbyung bar bya'o zhes gsungs pa ma yin nam/ de ji ltar spyir tshang zhes bya bar brjod ce na/ de'i phyir ba'i rgya yang rung ste dper bzhag tsam zhes bya ba smos te bdag gi rgya ni ba'i rgya ste gnas de dag ni dpe tsam yin te dpe ni dper bya ba ste/ de tsam nyid ni dpe tsam yin gyi dngos su ni ma yin no/ /'di skad du de dag ni nye bar mtshon pa tsam yin no zhes bstan par 'gyur ro/ /ba'i sgras ba mo brjod pa yin no/ /de ni ma byin phyogs gtogs brjod par bya/ /zhes bya ba la phyogs su gyur pa ni phyogs su gtogs pa'o/ /ma byin pa'i phyogs su gtogs pa ni ma byin phyogs te/ ma byin par len pa dang cha 'dra ba bsten pa gang yin pa de la de skad ces bya'o/ /da ni da ltar ston pa'o/ /ni'i sgra ni gong du nyes par 'gyur ba bstan nas/ da ni ma byin par len pa'i phyogs su gtogs pa brjod par bya ba yin no zhes khyad par du bstan pa'i don to/ /phan dang mal sten la sogs byin pa las zhes bya ba la sogs pas de ston par byed pa yin te/ gal te gang gis 'ga' zhig la phan dang mal stan la sogs pa byin nas/ 'gyod pa kho na me yin pas na 'gyod pa'i me ste/ phyi nas 'gyod pas gdungs par gyur pa de 'bar zhing rab tu mched par gyur pa de'i tshe des/ de la 'gyod pa'i me ni rab tu 'bar 'gyur ba/ /ma lus par ni zhi bar bya zhing bsal bar bya'o/ /zhes bya ba'i bar du'o/ /gang dag gis she na de la slar dngul skyogs chus zhes bya ba smos te/ chus yongs su bkang ba'i skyogs ni skyogs chu ste slar gtad pa'i skyogs chu des zhes bya ba'i tha tshig go/ /rgyu mtshan ci'i phyir zhe na/ bsdam bya dgrol ba'i phyir zhes bya ba smos te/ bsdam par bya ba ste bsdam par bya ba'i nyes pa dgrol ba'i rgyu mtshan de'i phyir zhes bya ba ni tshig gi don yin no/ /phan gyi sgras gos brjod pa yin la mal stan zhes bya ba ni mal dang stan de la de skad ces bya'o/ /de dang por byas pa'i snod la sogs pa gang yin pa de dag ni de la sogs pa yin no/ /gnang ba med par gzhan gos spyod pa dang zhes bya ba la/ gzhan gang yin pa de'i gos des ma gnang bar de'i gos yongs su longs spyod pa ste/ gzhan gyi gos yongs su longs spyod na nyes byas su 'gyur ro/ /yid brtan pa med pa dang rku sems med pa ji lta ji ltar yang rung bar gtsor longs spyod par byed pa de kho na la gong du nyes pa med par bstan la/ 'og tu ni ches lci ba nyid yin pa'i phyir nyes par 'gyur bar rig par bya'o/ /khyim la ma bstabs stan la 'dug pa zhes bya ba la/ ste khang khyim gyi nang du sdom can zhugs nas bdag po'am gzhan gyi khyim gyi khongs su 'dus pa dag gis ma bstabs ma gnang bar stan la 'dug pa ni ma bstabs stan la 'dug pa ste nyes byas su 'gyur ro/ /rab tu zhugs pa dang stan ni 'dir mal gyi nye bar mtshon pa yin te/ de ltar ni khyim du zhugs nas ji srid de'i khongs su gtogs pa'am 'ga' zhig gis stan nam khri'u gnang ba ma bstabs pa de srid du 'dug par mi bya'o zhes bya ba'i tha tshig go/ /de nas sdom can gos sogs byin nas ni/ /khros dang ldan pa'i sems kyis phrogs pa dang / /zhes bya ba la/ de nas brtul zhugs can la gos la sogs pa byin pa'i dus phyis te dus gzhan gyi dge tshul gyis phrogs na nyes byas su 'gyur ro/ /de la de nas kyi sgra ni tshig nye bar bkod pa yin la sogs pa smos pa ni snod la sogs pa gzung ba yin no/ /gang gis she na/ khros dang ldan pa'i sems kyis zhes bya ba smos te/ khro ba gang la yod pa de ni khros dang ldan pa'i sems te/ des phrogs par gyur na zhes bya ba'i tha tshig go/ /khros pa smos pa ni phan par 'dod pas yul gzhan du 'gro ba'i bar chad bya ba'i phyir nyes pa med do zhes bya ba'i don to/ /de bzhin du snod la sogs pa la chags pa ni snod sogs chags pa ste/ snod la sogs pa la sred par gyur pa'i dge tshul gang yin pa de ni de'i nan ni nan te/ des slong ba ni shin tu ltos pa dang bcas par snod la sogs pa bslangs pa zhes bya ba'i bar du'o/ /sogs pa'i sgras ni gos la sogs pa gzung ste/ 'di skad du yo byad med pa'i dbang gis zhes bya ba dgos pa tsam gyi ched du nan ma yin par slong ba la sogs pa 'jug par bya'i bzang po la chags pa ma yin no zhes bya bar bstan par 'gyur ro/ /rtsed mor lhung bzed la sogs sbed pa dang / /zhes bya ba rtsed mo'i phyir lhung bzed la sogs pa sbed par byed pa las nyes byas su 'gyur ro zhes bya bar sbyar ro/ /rtsed mo smos pa ni yul gzhan du 'gro ba dgag pa'i don la ni nyes pa med do/ /zhes shes par byed pa yin no zhes bya ba'i don to/ /dang ni nyes byas sdud par byed pa'o/ /khros pas sdom can gtsug lag khang skrod sogs/ /khros nas te/ khros pa'i sgo nas sdom can gtsug lag khang las skrod cing bskyod pa dang 'byin par byed pa'o/ /sogs pa'i sgras ni rnam par 'tshe ba gzhan yang gzung ba yin te/ dper na grang ba'i dus su gnas khang las phyung nas skabs med pa'i lhags pas gdungs par byed pa dang / dro ba'i tshe 'og khang du bcug nas sgo glegs bcad de tshad pas gdungs par byed pa la sogs pa lta bu'o/ /gtsug lag khang smos pa ni gnas khang gi nye bar mtshon pa'o/ / khros pa smos pa ni de la'am dge 'dun la nyes dmigs bstan pa la nyes pa med do/ /zhes bstan pa'i phyir ro/ /de bzhin du/ rkun pos dben par bor ba khyer ba dang / /zhes bya ba la rkun pos gos la sogs pa brkus nas bor ba khyer zhing len par byed na'o/ /gang du zhe na/ dben par zhes bya ba smos te skye bos dben pa zhes bya ba ni skye bo med pa dang skye bo mi snang ba zhes bya ba'i don te/ de lta bur gyur pa'i sa phyags su'o/ /dben pa smos pas ni 'di skad du phyag dar khrod kyi tshul du skye bo mang po nye bar 'dus par bsam pa dag pas len par byed pa de la 'di nyid kyis brkus so snyam pa'i yang dag pa ma yin pa mi srid la 'gas kyang dben pa dag tu bsam pa dag pas blangs pa yin du zin kyang dus gzhan dag tu mthong nas 'di nyid kyis brkus so snyam pa'i yang dag pa ma yin pa srid do zhes ston par 'gyur ro/ /sdom can snga nas gnas pa nan gyis ni/ /nyal lam 'dug par yongs su rtog pa dang / /zhes bya ba la nan gyis te stobs kyi rnam pas phyis non byas na'o/ /dge 'dun gyi gnas sam gzhan du snga na gnas pa ste/ sngar 'khod cing thog mar rnam par gnas par gyur pa nyid la zhes bya ba'i bar du'o/ /phyis 'ongs nas mal stan la nyal ba dang 'dug par yongs su rtog pa ste bsgrubs na nyes byas su 'gyur ro/ /snga na gnas pa smos pa ni gnas dang po nyid nas non pa nyid kyi phyir de dag la nyes par mi 'gyur ro zhes bstan pa'i phyir ro/ /rnyed pa gzhan du yongs su bsngos pa dang / /zhes bya ba la/ rang ngam gzhan gyi rnyed pa gzhan la bsngos pa yin par shes bzhin du de las gzhan du yongs su bsngos na nyes byas su 'gyur te/ da ni ma byin phyogs gtogs brjod par bya/ /zhes bya ba nas brtsams te/ sngar bshad pa de dag thams cad ni nyes byas dag yin no/ /gzhan gyi nor gyi phyogs su gtogs pa bstan zhes bya ba la gzhan gyi nor ni gzhan gyi nor te/ gzhan gyi rdzas yin la/ de'i phyogs su gtogs pa ni 'dra ba yin te/ de'i cha'i rjes su byed pa yin pas na de bstan to/ /'di skad du ma byin par len pa dang cha dang 'dra ba de dag ni nyes byas kyi nyes par 'gyur ro zhes ston par 'gyur ro/ /bstan pa'i tshig gis kyang de lta bu'i rigs dag la blta bar bya'o/ /dge tshul gyi tshig le'ur byas pa las bslab pa'i gzhi gnyis pa'o/ / //yan lag cha kun bzung bar bzod pa yi/ /zhes bya ba la sogs pas bslab pa'i gzhi tshig le'ur byas pa gsum pa 'chad pa yin te/ ji ltar yan lag gi cha thams cad bzung bar bzod pa la nad med cing las su rung ba'i nor bu 'das par gyur pa na dge tshul 'jigs pa med cing ngo tsha med pas reg pa'i bde ba nyams su myong bar gyur na de ma rungs pa ste dngos gzhi'i nyes byas kyi nyes par 'gyur ro/ /de lta bu de ni bsdus pa'i don yin no/ /de la/ yan lag cha kun bzung bar bzod pa yi/ /zhes bya ba la yan lag dang cha ni yan lag cha'o/ /thams cad kyang de yin la yan lag cha yang yin pas na yan lag cha kun no/ /yan lag ni lus yin te de yang brten par bya ba dang / rten par byed pa dag gis zhes bya bas lus las yan lag nyid tha dad par byas pa dag yin no/ /lus kyi sgras lus brjod pa yin pas de la bsten par bya ba dang / sten par byed pa bud med dang skyes pa'i dbang po tha dad par byas pa ji ltar srid par bcug pa'i reg pa bdag gir byas na chung bar bstan pa ni de ltar mgo bcad pa'i khar zhes bya bas mgo bo bcad pa'i kha gang yin pa de la ni nyes pa chung bar 'gyur ba'i dbang du byas nas bshad pa yin la/ lus la yan lag nyid du byas pa ma yin pa ma gtogs par ni tshig de dag rigs pa'i tshul du mi 'gyur ba de bas na 'di la yang yan lag nyid du rig par bya'o/ /lus de yang ma lus pa'am ma lus pa ma yin pa kun kyang yan lag nyid yin te/ de ltar ni lus phyed bcad pa la yang kha na ma tho ba rdzogs pa kho na yin te/ bgrod par bya ba phyed bcad pa nyid la yang na smad pa med do zhes 'byung ba yin no/ /bgrod par bya ba'i sgras ni skyes pa dang / bud med dang / ma ning dag brjod pa yin no/ /phyed ni lus kyi phyed yin la de bcad pa nyid ni 'dir bud med kyi dbang po'o/ /pags pa dang / kha shun dang / khar bcug pa ni reg pa bdag gir byas pa la na smad pa ni med de 'on kyang dngos gzhi kho nar 'gyur ro/ /cha'i sgras ni cha shas brjod pa yin te lag pa dang rkang pa dang mdoms dang tshigs dag yin no/ /nyams pa med cing spyad du rung ba'i lam zhes bya ba la sogs pas mtshan 'chad pa nyid yin pa'i phyir/ yan lag cha kun gzung ba gnyis kyis gnyis snyoms par 'jug par bzod cing rung ba gang la yod pa de ni yan lag cha kun bzung bar bzod pa ste/ 'dis ni bud med shin tu stobs dang ldan pa nyid du ston to/ /de ltar ni 'dul ba mdo las lag pas lag par dang / rkang pas rkang par dang / tshigs kyis tshigs su dang / mdoms kyis mdoms su bskyod par mi rung na'o zhes 'byung ba yin no/ /lag pas lag pa nas/ rkang pas rkang par bskyod pa mi rung ba nyid la ni chung bar 'gyur gyi 'on kyang skyod par byed pa la ni ma yin no/ /bskyod pa ni g.yo 'gul te rgyu yin no/ /lag pa zhes bya ba ni dpung pa'i rtsa ba nas brtsams pa lag pa'i ming yin no/ /rkang pa zhes bya ba ni brla nas rkang mthil la thug pa'o/ /mdoms zhes bya ba ni mtshan yan chad nas lte ba man chad yin no/ /tshigs zhes bya ba ni mtshan gyi phyogs kyi gong yan chad kyi ming yin no/ /de la de lta bur gyur pa 'di la yang 'ga' zhig tu spyad du rung ba'i lam ma yin par 'gyur ba yang yod de/ /dper na ma ning lta bu'o/ / de ltar yang 'dul ba mdo las/ bsten par bya ba ma ning sbubs med pa la yang 'byung ba yin no/ /bsten par bya ba bud med kyi dbang po'i sbubs med pa khyad par ji lta bu zhig ce na/ skyes pa'i dbang po bcug pa'i skabs med pa la nyes byas chung bar 'gyur ba'i dbang du byas nas bkrol ba yin no/ /don de ni spyad du rung ba'i lam zhes bya ba smos pa yin te/ spyad pa'i sgras ni 'khrig pa'i chos brjod pa yin pas de la rung ba'i lam ni spyad du rung ba'i lam yin no/ /de ni de ltar yang 'dul ba mdo las/ spyad du mi rung ba zhes 'byung ba yin te/ bgrod par bya ba yin pas rung ba yin la/ rung ba med pa ni mi rung ba ste/ shin tu yang 'khrig pa bsten pa'i mtshan nyid kyi spyad du mi rung ba'o/ /spyad du rung ba de yang khyad par ji lta bu zhe na/ nyams pa med cing zhes bya ba smos te/ nyams pa med pa dang zhig par ma gyur pa zhes bya ba'i bar du'o/ /de ltar ni 'dul ba mdo las phyogs kyi dang po cung zad zin pa nyid dang / skrangs pa nyid dang / rul ba nyid dang / myags pa nyid dang / srog chags dag gis zos pa nyid lta bu ni nyams pa med do zhes 'byung ba yin te/ de la phyi dang nang nyams par gyur pa ni nyams pa nyid du 'dod kyi phyogs gcig ni ma yin no/ /phyogs kyi dang por zhes bya ba ni mtshan thams cad ma yin no zhes bya ba'i don to/ /pags pa ni bud med kyi dbang po'i lpags rim mo/ /kha shun ni bshang ba'i sbubs so/ /so zhes bya ba ni so'i rim pa dag ste/ pags pa dang kha shun dang so ni pags pa kha shun so dag go/ /de las 'das pa zhes bya ba ni pha rol du zhes bya ba'i tha tshig go/ /de nyid kyi phyir mdo mdzad pas kha'i dang po ni so phan chad do/ /bshad pa'i lam ni bu gu'i sbubs kyi mtha' yan chad do/ /zag byed kyi ni lpags rim yan chad do zhes gsungs pa yin no/ /nad med las su rung ba'i zhes bya ba la nad yod pa ma yin pas na nad med pa ste/ skyes pa'i mtshan yin no/ /de ltar yang 'dul ba mdo las yan lag gi rnam pa rdol ba'i phyir ma myong na'o zhes 'byung ba yin te/ yan lag las skyes rdol ba'i phyir/ /'dod pa'i 'dod chags ma skyes shing nyams pa de nyid kyi rgyus kyang nyes pa chung bar 'gyur ro/ /las su rung ba ni legs par las su rung ba ste/ de lta bu de tsam gyi 'dod pa'i 'dod chags myong bar 'gyur gyi gzhan du ni ma yin no/ /de ltar na 'dul ba mdo las/ las su mi rung ba bcug na'o zhes 'byung ba yin no/ /nad med pa dang las su rung ba zhes bya ba'i 'og tu nor bu'i sgras lhan cig khyad par gyi bsdu ba'am/ drug pa'i bsdu ba bya'o/ /de'i phyir de lta bur gyur pa'i nor bu ma lus par 'das pa yin gyi phyogs gcig tsam ni ma yin no zhes bya bar rtogs par bya ba yin no/ /de ltar ni 'dul ba mdo las/ de'i nor bu bcug pa nyid ni de'i mtha'o zhes 'byung ba yin te/ zag byed de'i nor bu bcug pa nyid ni bcug pa'i mtha' thug pa yin la/ bcug par gyur pa bdag gir byas pa de tsam gyis kyang gang gi phyir bcug pa'i reg pa bdag gir byas pa nyes par 'dod do zhes bya ba'i dbang du byas na dngos gzhir 'gyur ro zhes bya ba'i tha tshig go/ /reg pa'i bde ba zhes bya ba la reg pa ni rnam pa gnyis te/ gsum 'dus pa'i mtshan nyid dang reg bya'i mtshan nyid do/ /de la gsum ni yul dang / dbang po dang / shes pa dag yin te/ de dag 'dus pa na bde ba la sogs pa'i mtshan nyid can gyi las skyed par byed pa'i shugs kyis so/ /gnyis pa ni phyi rol gyi 'jam pa nyid la sogs pa yin te snga ma ni reg pas na reg pa zhes bya ba dngos po bsgrubs pa yin la/ phyi ma ni reg par bya ba yin pas na reg pa ste/ las sgrub pa yin no/ /de gnyi ga'i mtshan nyid la reg par gyur pa na reg pa'am des bskyed pa'i bde ba dag ni reg pa'i bde ba'o/ /reg pa de yang gnyis te sems can du bgrang ba dang / de gtso bo ma yin pa nyid kyi phyir gang yang sems can du bgrang ba ma yin pa'o/ /gal te yan lag thams cad sems can du bgrang ba bzhin du 'jam pa'i mtshan nyid kyi reg pa ster bar byed na de yang reg par mtshungs pa nyid kyi phyir dngos gzhir 'gyur la/ 'on te mtshan tsam dod pa yin na ni kha na ma tho ba chung bar 'gyur ro/ /de ltar ni 'dul ba mdo las/ shing dang ba so dang / rdo ba dang gos las bu mo'i gzugs su byas pa la bstsal ba na gal te dbang po ci dod pa las chung bar 'gyur la yan lag thams cad la reg pa ster na dngos gzhi'o zhes 'byung ba yin no/ /myong 'gyur zhes bya ba ni lus kyi rnam par shes pa'i dus phyis 'byung ba yid kyi rnam par shes pas so/ /de ltar yang 'dul ba mdo las phrad pa'i g.yo ba nyid tsam la'o zhes 'byung ba yin te/ g.yo ba nyid ni lus kyi rnam par shes pa tsam cung zhig 'gyur ba yin la de'i dus phyis 'byung ba'i rnam par rtog pa yid kyi rnam par shes pas nyams su myong bar gyur na zhes bya ba'i tha tshig go/ /'jigs med ngo tsha med na zhes bya ba ni 'jigs shing skrag pa dang / ngo tsha gang la med pa zhes bya ba'i dbang du byas nas so/ /de lta bur gyur pa yang 'dir skrag pa dang ngo tsha dag gzung bar bya ba gang gis 'dod pa'i 'dod chags ma skyes pa'o/ /de ltar ni 'dul ba mdo las skrag pa dang ngo tsha bas kun du 'dod chags ma skyes na'o zhes 'byung ba yin te/ gang gi phyir skrag pa dang ngo tsha bas kun du 'dod chags pas te/ 'dod pa'i 'dod chags ma skyes pa de'i phyir chung bar 'gyur ro zhes bya ba'i tha tshig go/ /ci yan lag de tsam gyis 'gyur ram gzhan dag kyang yod ce na/ tha mal rmi lam ma yin bslab bcas rnams/ /'dir sbyar de bzhin 'og ma dag tu yang / /zhes bya ba smos te/ rang bzhin du gnas pa dang / rmi lam ma yin pa dang / bslab pa dang bcas pa zhes bya ba sngar bshad pa'i bslab pa'i gzhi gang yin pa de dag ni mi tshangs par spyod pa nyid la sbyar bar bya zhing / de bzhin du bslab pa'i gzhi 'og ma thams cad la yang sbyar bar bya ba kho na'o zhes bya bar sbyar bar bya'o/ /de dag kyang bshad zin pa yin te/ de las kyang tha mal pa zhes bya ba de lta bu la sogs pa sngar bshad pa'i yan lag gsum po srid pa ste/ yod na dngos gzhir 'gyur la/ 'on te rang bzhin du gnas pa la sogs pa gsum po dag las gang yang rung ba dag kyang med na nyes pa med cing / gzhan dag las gang yang rung ba med na chung bar 'gyur bar rig par bya'o/ /da ni bdag gi sgor yang gzhan gyi yan lag dang zhes bya ba la sogs pas sngar bshad pa'i yan lag nyid gsal por byas pa'i phyir spros pa ston par byed de/ gang gi phyir/ pags pa kha shun so las phar 'das na/ /zhes bya ba ni skyes pa dang bud med dang ma ning dang / bdag nyid kyi kha dang bshang ba'i lam spyi'i dbang du byas nas bstan pa yin pa'am/ yang na bud med kyi lam gsum kho na'i dbang du byas nas de skad du bstan pa yin pa'i phyir 'dir ma thob pa sgrub par byed pa yin no/ /bdag gi sgor yang zhes bya ba ni bdag nyid kyi yang kha dang bshang ba'i lam gyi mtshan nyid can gyi sgor ro/ /yang gi sgra ni skyes pa dang bud med dang ma ning 'ba' zhig ni ma yin gyi bdag nyid kyi mtshan du bcug pa bdag gir byed na mtha'i nyes par 'gyur te/ bdag nyid kyi la yang zhes bstan pa'i phyir ro/ /skyes bu gzhan gyi yan lag gi sbubs te/ skyes bu'i mtshan du bcug pa bdag gir byed pa ni reg pa'i bde ba dag yin te/ des rdo rjes gnod 'dra'i rtsa ba thob par 'gyur ro zhes sbyar bar bya'o/ /yang na bdag nyid kyis bcug pa bdag gir byed pa'am/ 'on te bdag gi yan lag gi sbubs kha dang bshang ba'i lam du bcug pa'i reg pa'i bde ba bdag gir byas na des kyang rdo rjes gnod 'dra'i rtsa ba thob par 'gyur ro/ / de bzhin du nan te stobs kyi rnam pa la sogs pa gang yin pa ni nan la sogs pa ste/ nan la sogs pa de dang ldan zhing 'brel pas skyes pa dang bud med gnon par gyur na de las kyang rdo rjes gnod 'dra'i rtsa ba thob par 'gyur ro/ /gang gi tshe phyis reg pa'i bde ba bdag gir byed pa yin gyi/ sngar bcug pa'i dus na bdag gir byas pa ma yin te/ stobs kyi rnam pas bcug pa nyid yin pa'i phyir ro/ /gal te phyis reg pa'i bde ba bdag gir byed pa yin pa de lta na yang rtsa bar 'gyur ro zhes bya ba'i don to/ /yang gi sgra ni rang bzhin du gnas pa 'ba' zhig ma yin no/ /rnam pa kun du zhes bya ba ni rnam pa thams cad du rang gi sgor ram gzhan gyi sgor ram/ rang dang gzhan gyi sbubs su nan gyi rnam pas bcug pa bdag gir byed na yang dngos gzhir 'gyur gyi/ 'di la khyad par ni cung zad kyang yod pa ma yin no zhes bya ba'i tha tshig go/ /ni'i sgra ni gang gi phyir gyi don yin te/ gang gi phyir bshad ma thag pa'i rnam pas kun du reg pa'i bde ba bdag gir byed pa rgyu de'i phyir rdo rjes gnod 'dra'i rtsa ba thob par 'gyur ro/ /rdo rje'i sgras rdo rje bstan pa yin la/ rtsa ba kho na rdo rje yin pa des gnod pa ni rtsa ba'i rdo rjes gnod pa ste/ dge tshul gyis thob par 'gyur ro zhes bya bar sbyar ro/ /sogs pa'i sgras ni 'dir gnyid log pa dang smyos pa dang / tshor bas gzir ba yongs su bzung ba'i phyir/ gnas skabs der bcug la sad pa'i gnas su bdag gir byed na rtsa bar 'gyur ro zhes bya ba'i don to/ /dang ni bud med la sogs pa'i sgo dang / 'gro ba dang / rgyud tha dad pas tha dad pa dag la khyad par yod pa ni ma yin no zhes bstan par bya ba'i phyir/ bud med la sogs rgyud rigs tha dad sgo/ /zhes bya ba la sogs pa smos te/ bud med dang por byas pa'i skyes pa dang / ma ning gang yin pa de ni bud med la sogs te bud med la sogs de'i sgo gsum po dag dang rgyud dang rigs las rtsa ba'i nyes pa la brten pa'i khyad par nyid ni med pa yin te/ bye brag nyid yod pa ma yin no zhes bya ba'i tha tshig go/ /tha dad pa'i sgra ni so sor sbyar bar bya ba yin no/ /rgyud ces bya ba ni rgyud lnga la bya ste de la ji ltar srid par sbyar bar bya ba yin pas na dge slong dag dmyal ba dang lhan cig ni 'gal ba yod pa yin la/ lha dang ni srid pa kho na yin no/ /srin po dag dang lhan cig ni 'gal ba yin la yi dwags dang yang srid pa kho na yin te/ de dag ni mthong ba'i spyod yul du gyur pa nyid yin pa'i phyir ro/ /dud 'gro dag dang yang srid pa yin te 'jug pa nyid kyi phyir ro/ /rigs tha dad pa na bram ze la sogs pa'i dbye ba dag gis so/ /rgyud dang rags ni rgyud rigs te de dag gi tha dad pa de'i phyir zhes bya ba'i tha tshig go/ /nyid ni gang gi phyir mi'i rgyud dag kho na la rtsa ba'i nyes par 'gyur gyi gzhan la ni yongs su rdzogs pa'i ro myang ba med pa'i phyir dang / /de bzhin du bram ze'i rigs dag dang bram ze'i rigs dag kho na las yin gyi/ rigs cig shos las ni ma yin no zhes bya bar khyad par yod pa ma yin pa kho na'o zhes nges par gzung ba'i don yin pa de'i phyir thams cad du rtsa ba'i nyes par 'gyur ro zhes bya ba ni tshig gi lhag ma'o/ /de bzhin du/ shi dang ma shi nyid la'ang khyad par med/ /ces bya ba la 'di ltar shi ba dang ma shi ba ni shi dang ma shi ba'o/ /de'i dngos po ni shi dang ma shi ba nyid de skyes pa dang bud med dang ma ning shi ba dang ma shi ba nyid de yang nyes pa bsten pa la khyad par yod pa ma yin no zhes pa'i don to/ /phyed du bcad kyang slar ni sbyar ba'i rma/ /zhes bya ba la sogs pa la lus phyed du bcad pa'i rma gsum po dag tu yang nor bu bcug pa'i reg pa bdag gir byas na rtsa bar 'gyur zhes bya ba ni tshig gi lhag ma'o/ / de bzhin du lus sgang tshal du bkas par gyur pa slar sbyar ba la yang / khyad par ji lta bu zhe na 'di'i mtshams mi mngon pa'i phyir mtshams mi mngon pa'o/ /bu ga bud med kyi mtshan de la yang rtsa bar 'gyur ro zhes bya bar sbyar ro/ /bud med kyi lus phyed du bkas pa'i mtshams mi mngon pa'i lam dang mtshan du bdag nyid kyi zag byed bcug pa bdag gir byed na rtsa bar 'gyur ro zhes bya ba'i tha tshig go/ /yang gi sgra ni 'dir snga ma dang shi ba nyid dang / ma shi ba nyid dang / ma bkas pa nyid dang / bkas pa nyid slar sbyar ba zhes bya ba sdud par byed pa yin no/ /mngon par gyur na ji ltar bya zhe na/ mtshams slar sbyar kyang mngon par gyur pa dang / /zhes bya ba smos te/ bkas par gyur pa'i mtshams slar sbyar ba yang mngon par gyur pa'i zag byed kyi lam du zag byed bcug pa'i reg pa'i bde ba dge tshul gyis bdag gir byas na nyes byas chung bar 'gyur ro/ /de'i phyir de nyid dge tshul gyis bshags par bya ba yin no zhes bya ba ni thams cad du tshig gi lhag ma yin no/ /de bzhin du/ spu med phag la sogs pa'i rma/ /zhes bya ba la phag la sogs pa'i gang yin pa de ni phag la sogs pa ste/ rigs rjod par byed pa yin gyi gsal ba brjod pa ni ma yin no/ /sogs pa'i sgras ni spre'u la sogs pa gzung ngo / /de khyad par ji lta bu zhe na/ spu med par gyur pa gang yin pa de ni spu med pa'o/ /spu med pa yang yin la bcos pa yang yin pas zhes bya ba ni khyad par gyi bsdu ba'o/ /bcos pa zhes bya ba ni bsregs pa ste/ de lta bur gyur pa spu med pa bcos pa'i phag la sogs pa de'i rmar skyes pa'i dbang po bcug na zhes bya ba snga ma bzhin du thams cad brjod par bya'o/ /de ltar mgo ni bcad par gyur pa'i kha/ /zhes bya ba la bcad pa yang yin la mgo yang yin pas mgo ni bcad pa ste/ de'i kha la bcug na zhes thams cad snga ma bzhin no/ /dang ni kun la nyes par mtshungs par ston pa'i sgo nas sdud par byed pa yin no/ /dang gnyis pa ni bshad pa sdud par byed pa yin te/ dper na rma bcos ma de la yang ji lta ba bzhin du 'gyur ro zhes bya ba lta bu'o/ /ni ni gang gi phyir bstan ma thag pa ni chung ba nyid de bshags par bya ba'i nyes byas su 'gyur ro/ /bcos pa ni nyams pa nyid yin pa'i phyir nyes pa chung ba nyid du grub pa la yang brjod pa ni mi'i 'jam pa'i bya ba tsam yod pas rtsa ba'i nyes par 'gyur ro zhes 'dir dogs pa zlog pa'i phyir ro/ /de bzhin du gos kyis dkris pa dang bltab par gyur pa dang zhes bya ba la/ gos kyis dkris pa ni gos kyis dkris pa ste/ skyes pa'i dbang po'am bud med kyi dbang po'am de gnyi ga gos kyis dkris pa dang / de bzhin du mtshan nyis bltab tu byas pa dang / sgo la ma reg pa ste/ bud med kyi dbang po'i mtshan nyid la skyes pa'i dbang po gang gi sgo la ma reg pa de ni de la bcug pa na nyes pa chung bar 'dod de/ bcom ldan 'das bzhed pa yin no/ /de bzhin du bud med la sogs pa'i sgor skyes pa'i dbang po ma bcug par bsten par bya ba'i phyi rol la kun nas reg pa tsam la chung bar bzhed do zhes bya ba'i tha tshig go/ /gang gi phyir gos kyis dkris pa'i skyes pa dang bud med kyi dbang po gang yin pa phan tshun reg pa med pa yin no zhes bya ba dang / de bzhin du mtshan nyis bltab tu byas pa'i nor bu la bud med kyi dbang pos reg pa med pa dang / sgo la ma reg pa ni skyes pa'i dbang po la reg pa'i bde ba nyams su myong ba med pa'i phyir de la nyes byas chung bar 'gyur ro/ /'dir sgo la ma reg pa nyid ni lam yangs pa nyid kyi phyir ro zhes bya bar rtogs par bya'o/ /gos kyis dkris pa la sogs pa gong ma gsum po dag la reg pa'i bde ba nyams su myong ba rtsa bar gyur pa'i yan lag med pa'i phyir nyes pa chung bar 'gyur ba ni 'og tu bcug pa'i mtshan nyid can gyi rtsa ba'i yan lag med pa'i phyir ro/ /'dul ba las bar dang bcas shing bar chad med pa dang / bar chad med cing bar dang bcas pa dang / bar dang bcas shing bar chad dang bcas pa zhes bya ba 'dis rtsa ba'i nyes par gsungs pa ma yin nam gos kyis dkris pa de ji ltar na nyes pa chung bar brjod ce na/ gos te stug par gyur na zhes bya ba smos te/ gos stug po mang pos dkris pa nyid la reg pa'i bde ba nyams su myong ba med pa'i phyir chung bar 'dod pa ste/ bcom ldan 'das nyes byas chung bar bzhed pa yin no/ /bcom ldan 'das kyis/ bud med kyi dbang pos skyes pa'i dbang po la ma reg par bcug pa la nyes pa chung bar gsungs pa'i shugs kyis/ dkris pa la yang nyes pa chung bar bstan pa yin gyi 'on kyang grags pa'i tshig yod pa ni ma yin no zhes bya ba'i tha tshig go/ /srab mos rtsa bar 'gyur te 'gal ba med/ /ces bya ba la/ gos srab mos dkris pa nyid la ni rtsa bar 'gyur te zhes bya ba dang 'di la 'gal ba med ces bya ba ni sngar bshad pa'i nyes pa yin no/ /ni'i sgra ni gong ma las khyad par du byed pa yin te/ gang gi phyir snga ma la ni reg pa'i bde ba nyams su myong ba med la 'di la ni yod pa'i yang phyir ro zhes bya ba'i tha tshig go/ /da ni gnas skabs 'di la nyes pa 'dir 'gyur ro zhes bstan pa'i phyir sems skyed yid kyir 'gyur te zhes bya ba la sogs pa smos pa yin te/ tshul ma yin pa'i yid la byed pa dang mtshungs par ldan pa nges pa'i mtshan nyid can gyi 'di dang 'di bya'o zhes skyed pa de ni dang por skyed pa yin te sbyor bar 'gyur ro/ /yid la byed pa'i blo de yang bsdam par bya ba'i kha na ma tho ba yin gyi bshags par bya ba ni ma yin no zhes bya ba'i don to/ /gang tshun chad du zhe na/ so la sogs pa reg par 'gyur bar du/ /zhes bya ba smos te/ so dang por byas pa'i gzhan gang yin pa de ni so la sogs pa'o/ /sogs pa'i sgras bshang ba'i lam dang / zag byed kyi lam bsdu ba yin te/ de la kun nas reg pas na reg pa ste de'i bar du zhes bya ba'i tha tshig go/ /so la sogs pa'i mtshams 'das rtsa bar 'gyur/ /zhes bya ba la sogs pa'i mtshams ni kha la sogs pa'i mtshams te tshigs yin pa de bas na/ so la sogs pa'i mtshams 'das shing khar bcug na rtsa bar 'gyur ro zhes bya ba'i tha tshig go/ /du'i sgra ni khyad par du byed pa dang gong ma las rim pa gzhan gyi don yin no/ /ni'i sgra ni gang gi phyir gyi don te gang gi phyir so la sogs pa ni kha la sogs pa'i dang po yin pa de'i phyir de las shin tu 'das par gyur na rtsa bar 'gyur ro zhes bya ba'i tha tshig go/ /'di skad du dge tshul 'dod pa'i 'dod chags la yongs su gnas pas 'di dang 'di bya'o zhes skyed par byed pa de la dang por so la sogs pa la reg pa las nyes byas su 'gyur la/ phar 'das pa las ni rtsa bar 'gyur ro zhes bstan par 'gyur ro/ /ji ltar srog gcod pa la sogs pa 'du shes gtso cher byed pa nyid yin pa de bzhin du ci 'di la yin nam zhe na/ 'khrig pa la ni 'du shes gtso bo med/ /ces bya ba smos te/ bslab pa'i gzhi gang la 'du shes gtso bo ste gtso cher byed pa de ni 'du shes gtso bo'o/ /de'i dngos po ni 'du shes gtso bo nyid do/ /'khrig pa ste 'khrig pa'i bslab pa'i gzhi la gang la de yod pa ma yin no/ /bshad ma thag pa'i lam gsum po la lam du 'du shes pas lam gang yang rung bar bcug na mtha'i nyes par 'gyur la/ de bzhin du gzhan du shes pas bud med gzhan dang lhan cig gam lam la lam ma yin par 'du shes pas rtsa bar 'gyur la/ lam ma yin pa la lam du 'du shes pas chung bar 'gyur ro zhes khong du chud par bya'o/ /de ni yid kyi nyes par 'gyur ba mi tshangs spyod dang zhes bya ba la sogs pas 'chad par byed de/ mi tshangs par spyod pa dang 'dra ba ni cha 'dra ba ste/ mi tshangs par spyod pa'i cha'i rjes su byed pa zhes bya ba'i don te/ de'i tshul ni rang bzhin te/ de ni mi tshangs par spyod pa'i tshul dang 'dra bar gsungs pa yin no/ /de gang zhe na/ ji ltar ched du khu ba phyung ba dang zhes bya ba la sogs pa smos te/ ched du ste blo sngon du song bas bdag nyid kyi khya ba phyung na'o/ /ji ltar zhes bya ba'i sgra ni yid kyir 'gyur ba dag nye bar ston pa'i don to/ /ched du zhes bya ba smos pa ni rmi lam la sogs pa'i gnas skabs la nyes pa med par bstan pa'i phyir ro/ / chags pas 'khyud par byed dang steg pas zhes bya ba la chags pa'i sgo nas bud med la 'khyud par byed pa ste/ /yongs su 'khyud pas yid kyi nyes par 'gyur ro zhes bshad par 'gyur te thams cad la sbyar bar bya'o/ /de bzhin du chags pa'i sgo nas steg pa ni lus dang ngag gi rnam par 'gyur ba'i mtshan nyid can gyi g.yo 'gul yin te dper na 'khrig pa'i rgyu mtshan nye bar ston par byed pa dag lta bu'o/ /de bzhin du 'khrig pa'i tshig rnams smra bar byed pa ste/ bud med kyi mdun du 'ga' zhig 'di ltar gnyis kyis gnyis snyoms par 'jug pa'i mtshan nyid can gyi 'khrig pa'i tshig sgra dag smra bar byed pa ni smra ba ste/ dper na rgya rna ru la sogs pa'i sgra yin te/ de dag smra bar byed ces bya ba'i don yin no/ /de bzhin du/ zas bcas khyim du rgod pas ltad mo'i phyir/ /zhes bya ba la/ rgod pas te brtag pas lta zhing rtog pa yin pas na rgod pas lta ba'o/ /de'i dngos po ni rgod pas ltad mo nyid kyi phyir 'dug par gyur ba nyid do/ /gang du zhe na/ zas bcas khyim du zhes bya ba smos te/ bza' bar bya ba yin pas na zas te/ skyes pa dang bud med kyi yin te gang gi phyir bud med skyes pas longs spyod par bya ba yin la/ skyes pa yang bud med kyis longs spyad par bya ba yin no zhes bya ba'i dbang du byas nas so/ /skyes pa longs spyad par bya ba bud med kyi yul dang bcas pas 'jug pa'i phyir zas bcas te khyer ba der ro/ /gang du skyes pa dang bud med gnyis gnyis kyis snyoms par 'jug par 'gyur ba der ro zhes bya ba'i don to/ /yang na smyan byed dang zhes bya ba la/ smyan gyi chos dag ni smyan byed pa yin te/ dper na skyes pa 'khrig pa'i bsam pa can gyi tshig blangs nas bud med la'am/ bud med kyi tshig blangs nas skyes pa la smra bar byed cing gnyi ga dag la yang phrin lan go bar byas pa des phrad par gyur na yid kyi kha na ma tho bar 'gyur ro zhes bya ba'i tha tshig go/ /de bzhin du dus ma yin par grong du 'phyan pa dang zhes bya ba la/ dus ma yin pa ste nyi ma gung la dus gzhan du 'phyan pa ni dus ma yin par 'phyan zhing 'gro ba'o/ /gang du zhe na/ grong du zhes bya ba smos te/ grong ste khyim gyi nang du bstan pa 'di la rab tu byung ba gzhan la ma bsgo bar zhes bya ba ni tshig gi lhag ma'o/ /de la bsgo ba ni grong ngam khyim nang du mchi'o zhes bya ba yin par khong du chud par bya'o/ /de bzhin du/ mig zur rgod dang zur steg byed pa dang / /zhes bya ba de la/ zur mig ni mig zur gyis lta bar byed pa yin la/ rgod pa ni chags pas lus sems rnam par g.yo ba yin no/ /steg pa ni de nyid kyis sems dang ngag gi rnam par 'gyur ba'o/ /gong du chags pa la sogs pa'i rnam pas zhes 'grig pa'i rgyu mtshan bstan pa gang yin pa de ni 'dir yang rgyu mtshan du gyur pa ni ma yin mod kyi/ chags pa tha mal pas bslad par gyur pa des lus ngag g.yo bar byed ces bya ba ni lhag ma'o/ /bshad ma thag pa'i de dag thams cad ni yid kyir 'gyur ro zhes bya bar rig par bya'o/ /gong du nyes pa gsal po byas pa nyid dang / dgag pa nye bar bstan pa dang / cig car bstan pa'i sgo nas nyes par 'gyur ba bshad pa yin la/ da ni/ yang dang yang du bud med ngor mi lta/ /zhes bya ba la sogs pas bya ba 'gog pa'i sgo nas nyes par 'gyur ba ston te/ yang dang yang ste phyi phyir bud med kyi ngo gdong la dge tshul gyis mi brtag go zhes bya ba'i tha tshig go/ /yang dang yang du zhes smos pa ni dgos pa'i dbang gis bud med kyi yul la lhag par lta bar byed pa na lan cig lta ba la nyes pa med do zhes bstan pa'i phyir te/ de la yang 'dod chags med pa'i sems kyis zhes bya bar rig par bya'o/ /de ltar yang btsun pa bcom ldan 'das nyid yongs su mya ngan las 'das nas bdag gis bud med kyi yul la ji ltar bsgrub par bgyi/ kun dga' bo mi lta bas so zhes 'byung ba yin te/ yang dang yang bltas pa las rgyu mtshan 'dzin par 'gyur la de las chags pa yongs su bsten par 'gyur ro/ /de las log par bsgrub pa'i phyir bud med kyi yul la lta ba ni rab tu 'byung ba'i bar du gcod pa yin no/ /ngor zhes smos pa ni shas cher gdong ni chags pa gsal por byed pa yin gyi/ de mthong ba na chags pa 'jug par 'gyur ba'i phyir yan lag gzhan mthong ba la ni nyes pa med do zhes bstan pa'i phyir ni ma yin te/ de la yang nyes dmigs mtshungs pa nyid kyi phyir ro/ /reg pa'i dug la nam yang reg mi bya/ /zhes bya ba ni reg pa gang kho na dug yin pa de ni reg pa'i dug yin te/ bud med de la dge tshul sems dag pa'am ma dag pas kyang reg par mi bya ste/ gang gi phyir bud med kyi yul la reg pa'am bud med kyi yul gyis reg pa ni chags pa dang rjes su mthun pa yin la de las kyang yongs su bsten par 'gyur ro zhes bya ba la sogs pa snga ma bzhin no/ /de nyid kyi phyir 'di skad du bcom ldan 'das kyis bud med kyi yul ni reg pa'i dug yin no zhes gsungs te/ ji ltar reg pa'i dug la reg na srog dang bral bar 'gyur ba de bzhin du bud med kyi yul la sngar bshad pa'i rim pa'i tshul gyis reg par byed na sdom pa'i bar du gcod par 'gyur ro/ /dang ni bud med kyi ngor blta bar mi bya reg par yang mi bya'o zhes sdud par byed pa yin no/ /chud zos pa rjes su gzung ba'i phyir reg pa la nyes pa med par bstan pa'i phyir ro/ /ji ste chu dang mes 'chi de yi tshe/ / zhes bya ba la sogs pa smos te/ chu dang me ni chu dang me yin/ de bas na me dang chu des ji ste bud med 'chi ba de'i tshe ni dge tshul gyis reg par bya'o/ /ci zhig byas nas she na sa'i 'du shes gzhag ste zhes bya ba smos te/ chu'am mes 'chi bar gyur pa de ni/ 'di ni sa yin te sa dang mtshungs pa 'di la chags pa skyed pa mi rigs so snyam pa'i 'du shes bzhag la snying rje'i dbang gis lag pa'am skra la bzung nas chu dang ma las drang bar bya'o zhes bya ba'i tha tshig go/ /ni'i sgra ni snga ma las kyang khyad par du bya ba'i don to/ /ji ste bud med sdom can mthong chags 'gyur/ /de la sdom can de ni ring mi gnas/ /zhes bya ba las phyogs gang du gnas na sdom can mthong nas bud med chags par 'gyur ba der ram/ bud med mthong nas dge tshul chags par 'gyur ba der yun ring po dus ring por gnas par mi bya'o/ /nyes dmigs yongs su spang ba'i phyir de dag ni 'gro ba nye bar mtshon par byed pa yin no/ /rdo la sogs pas yan lag brdung mi bya/ /zhes bya ba la chags pa'i mes gdungs par gyur pa'i dge tshul gyis yan lag sbu bu ste/ skyes pa'i dbang po rdo la sogs pas brdung bar mi bya zhing brdeg par mi bya'o zhes bya ba'i tha tshig go/ /sogs pa'i sgras ni tho ba la sogs pa yongs su bsdu'o/ /'o na 'dod chags kyi me ji ltar zhi bar bya zhe na/ 'dod chags me ni mi sdug chus zhi byed/ /ces bya ba smos te/ 'dod chags kho na me yin pas na 'dod chags me ste/ yongs su sreg par byed pa nyid kyi phyir ro/ /mi sdug chus zhi byed ces bya ba de la mi sdug pa kho na chu yin pa de bas na mi sdug chus so/ /mi sdug pa zhes bya ba ni mi gtsang ba'i sgom pa ste de lta bur gyur pa'i chus 'dod chags kyi me zhi bar 'gyur gyi gzhan gyis ni ma yin no/ /nyid ni nges par gzung ba'o/ /bud med gyen du gdong bltas 'thung ba la/ /rang gi rgyun mi 'chad par chu mi blud/ /ces bya ba la bar mi 'chad pa'i rgyun chu gang la yod pa de ni rgyun mi 'chad pa'i chu ste/ de ni gyen du gdong bltas nas 'thung ba la blud par mi bya'o/ /su la zhe na bud med la zhes smos pa yin no/ /rang gi sgra ni gzhan gyis sbyor ba la nyes pa med do zhes bstan par bya ba'i phyir ro/ /gang gi phyir rgyun mi 'chad par btung bar bya ba byin pa las bud med kyi yul gyen du gdong lta bas 'thung ba na mig dang mig gi gzugs phrad par 'gyur la/ de las rgyu mtshan 'dzin pa la sogs pa snga ma dang 'dra ba de'i phyir rang gi snyim pa bkang bas chu sbyin par bya'i rgyun mi 'chad pas ni ma yin no zhes bya ba'i tha tshig go/ /khur ba byin ltar 'gyur bas zas la sogs/ /rang gi lag gis mi sbyin gos med la/ zhes bya ba la/ gos med ni nam mkha'i gos can te/ de dag la zas la sogs pa rang gi lag gis te bdag nyid kyi lag pa nas sbyin par mi bya'o zhes bya ba'i don to/ /gzhan yang bdag nyid kyi mngon sum du sbyin du mi gzhug go/ /ci'i phyir zhe na/ khur ba byin ltar 'gyur bas zhes bya ba smos te/ khur ba dag sbyin pa ni khur ba byin pa bzhin te/ khur ba byin pa ltar ma gyur cig pa'o/ /'di skad du bstan par 'gyur te/ ji ltar 'phags pa kun dga' bos khur ba byin pa na skur ba btab pa'i nyes pa ltar 'dir ma gyur cig ces bya ba'i tha tshig go/ /de ltar ni 'dul ba las 'phags pa kun dga' bos khur ba blangs nas dge 'dun zas kyi phyir 'khod pa la 'brim pa'i tshe/ gcer bu ma slong mo mdun du gnyer ba dag la khur ba byin pa na de la gcig ni gzhon la gnyis pa ni rgan pas der bya rog dang ta la'i tshul du gzhon nu ma'i lag par khur ba gnyis byin la rgan mo'i lag par gcig byin pas rgan mo des gzhon nu ma la/ kun dga' bo khyod don du gnyer bar byed do zhes smras so zhes 'byung ba yin no/ /bud med kyi yul la ji ltar chos bshad par bya zhe na/ gdong du 'bru tshugs su ni lta ba dang / /chags med mig gis bud med chos shod cig /ces bya ba la sogs pa smos te/ bud med la dge tshul gyis bshad cing bstan par bya'o/ / bshad pa de khyad par ji lta bu zhe na/ smras pa bud med kyi yul la mig chags pa med cing thogs pa med pa'i phyir chags med mig ste/ des bshad par bya'i gzhan du ma yin no/ /gdong du 'bru tshugs su ni lta ba dang / /zhes bya ba la 'bru tshugs kyang de yin la lta ba yang yin pas na 'bru tshugs su lta ba de bas na des bud med kyi yul gyi gdong la blta bas chos bshad par mi bya'o/ /gal te de la yang chos ston par byed na/ der rig pa'i skyes pa yod pa 'gyur na sngar bshad pa'i tshul du ji srid 'dod par bshad par bya ba'am/ yang na tshig lnga 'am drug dag gi chos bshad par bya ba yin te/ dper na sangs rgyas rjes su dran pa dang / gzugs kyi phung po nas tshor ba'i phung po'i bar du zhes bya ba yin gyi gzhan du na log par sbyar ba'i zhi ba'i las kyi bdag nyid kyis srog 'joms par 'gyur ba lta bu'o/ /de bzhin du/ nyal dang 'dug dang 'gro sogs bud med spang / /zhes bya ba la/ dge tshul gyis bud med dang lhan cig gcig pu chags pas dben par nyal ba dang 'dug pa dang yul gzhan du 'gro ba spang bar bya'o/ /sogs pa'i sgras ni bsod snyoms la 'jug pa dang / gzhan dben par 'dug pa yang spang bar bya ba yin no/ /de la 'dir chos bstan pa la sogs pa la nyes pa yod pa ma yin pa ni/ ji ste skyes pa yod na nyes pa med/ /ces bya ba smos te nyal ba las gzhan du ji skad du bshad pa'i rig pa'i skyes pa legs par bshad pa la sogs pa yongs su go ba dang 'dzin nus pa yod na'o/ /nyal ba la ni khyo dang bu dang ming po la sogs pa gang las 'jigs pa dang ngo tsha bar 'gyur ba gzung bar bya'o/ /dge tshul gyi tshig le'ur byas pa las mi tshangs par spyod pa las slar ldog pa'i gzhi gsum pa'o/ / //da ni/ bla ma de brjod blo yis mi chos las/ bla ma zhes bya ba la yod do zhes/ /nga rgyal ma gtogs mi la brdzun du smras/ /gzhan gyis go bar gyur na bskrad par bya/ /zhes bya ba la sogs pas bzhi pa 'chad par byed la/ mi'i chos las bla mar gyur pa bdag la yod ces gzhan rig pa'i mi la de brjod pa'i sems kyis brdzun du smras nas gzhan gyis go bar gyur na dngos gzhi'i nyes par 'gyur te/ mngon pa'i nga rgyal ni ma gtogs so zhes bya ba ni bsdus pa'i don yin no/ /yan lag gi don brjod par bya ba la mi'i chos ni mi chos te de yang rnam pa gnyis te/ bla mar gyur pa dang / bla mar gyur pa ma yin pa'o/ /de la sgrib pa lnga la sogs pa ni mi chos bla ma ma yin pa yin te/ dman pa nyid yin pa'i phyir ro/ /mi'i chos las bla mar gyur pa bsam gtan la sogs pa ni bla ma gyur pa nyid yin te/ sgrib pa lnga la sogs pa la ltos na khyad par du 'phags pa kho na yin pa'i phyir ro/ /mi chos nyid ni mi dag gis thob par bya ba nyid yin pa'i phyir ro/ /bla ma zhes bya ba ni bla ma zhes bya ba'i ming gang la yod pa zhes bya ba'i dbang du byas nas gang de lta bur gyur pa'i chos de ni bla ma zhes bya ba yin te/ dge tshul gyis smras na de bskrad par bya zhing bsnyil bar bya ste/ 'og tu ltung ba nyid kyi phyir ro zhes bya ba ni tshig gi lhag ma'o/ /de nyid ces bya ba ni nges par bzung ba yin par blta bar bya'o/ /de'i phyir gzhan brjod pa'i bsam pas gzhan brjod na chung bar 'gyur ro/ /su la smras pas she na/ mi la zhes bya ba smos te mi zhes bya ba ni mi'i rigs gzung ba yin no/ /ji skad smras pas she na/ nga la yod ces bya ba smos pa yin no/ /de ni rnam pa gzhan mtshon par byed pa yin te dper na ngas thob po ngas shes so zhes bya ba la sogs pa'i tshig lta bu'o/ /bsam pa gang gis she na/ bla ma de brjod blo yis zhes bya ba smos te/ bla ma'i brjod pa ni bla ma brjod pa ste/ /de'i blo dang bsam pa ni bla ma brjod blo yin te/ de'i phyir des so/ /'di skad du mi'i chos las bla mar gyur pa smra ba'i bsam pas zhes bstan par 'gyur ro/ /de la 'ga' zhig tu mi'i chos las bla mar gyur pa rtogs pa med par sngar rtogs pa'i bsam pas bdag gis mi'i chos las bla mar gyur pa rtogs so zhes bya ba de lta bu gsal bar byas pa'i phyir/ /nga rgyal ma gtogs zhes bya ba smos pa yin te mngon pa'i nga rgyal dag med par zhes bya ba'i tha tshig go/ /mngon pa'i nga rgyal ni nyes pa med do/ brdzun zhes bya ba ni 'du shes med pa'i phyir ro/ /gang gi tshe bskrad par bya ba yin zhe na/ gzhan gyis go bar gyur pa ni gzhan gyis rtogs par gyur pa na'o/ /gzhan zhes bya ba ni bshad ma thag pa'i mi'i rgyud yul nyid du gang mtshon par bya ba'am/ gzhan gyis de rtogs par 'gyur na zhes bya ba'i tha tshig go/ /gzhan la brjod pa'i bsam pas mi gzhan la smras pa na chung bar 'gyur zhing bzlog pa dang / de bzhin du yid gnyis kyang chung bar 'gyur ro/ /go bar gyur na zhes smos pa ni gnyid log pa dang / ra ro ba dang / sems 'khrugs pa dang / skad mi go ba yongs su spang ba'i phyir ro/ /ni'i sgra ni gang gi phyir gyi don yin te/ gang gi phyir gzhan gyis go bar gyur na sdom pa 'jig par 'gyur ba de'i phyir bskrad par bya ba yin te/ gong du bstan pa las bzlog pa ni thams cad du nyes pa chung bar 'gyur ro zhes shugs kyis brjod par 'gyur ro/ /mi'i chos las bla mar gyur pa de yang gang yin zhe na/ bsam gtan sogs dang mngon shes 'bras bur bcas/ /zhes bya ba la sogs pa smos te/ bsam gtan dang por byas pa gang yin pa de ni bsam gtan la sogs pa'o/ /sogs pa'i sgras ni gzugs med pa'i snyoms par 'jug pa gzung zhing gzhan yang de lta bur gyur pa skye mched kyi mtshan nyid can byams pa la sogs pa'i ting nge 'dzin bsdu'o/ /bsam gtan ni gzugs na spyod pa'i sems kyi bye brag yin la/ gzugs med pa'i snyoms par 'jug pa ni gzugs med pa'i snyoms par 'jug pa'i sems kyi bye brag yin no/ /mngon par shes pa ni mngon par shes pa lnga 'am/ mngon par shes pa drug dag yin no/ /de la mngon par shes pa lnga ni lha'i mig dang / rna ba dang / sngon gyi gnas rjes su dran pa dang / gzhan gyi sems shes pa dang / rdzu 'phrul gyi rkang pa'o/ /zag pa zad pa shes pa'i mngon par shes pas bsres pa dag ni drug par 'gyur ro/ /'bras bu ni bzhi ste/ rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba dang / dgra bcom pa'i 'bras bu'o/ /'bras bu dang bcas par 'jug pas na 'bras bur bcas pa'o/ /yon tan ni yon tan du byed goms par byed pas na yon tan te/ dran pa nye bar gzhag pa bzhi nas brtsams nas 'phags pa'i lam yan lag brgyad ces bya ba'i bar du ste/ de dag ni 'bras bur bcas pa'i yon tan dag yin no/ /bslab pa'i tshig 'dir mi'i chos las bla mar gyur pa bstan pa yin no/ /da ni bsam gtan dang po la sogs pa 'ba' zhig ma yin gyi/ 'on kyang de dag kyang yin no zhes sdud par byed pa'o/ /bla mar gyur pa bshad pa de ltar de tsam spyir bstan nas da ni/ brjod par bya ba rnam pa mang po dag / da ni bshad par bya yis nyan par gyis/ /da ni da ltar te mi'i chos bla mar gyur pa 'di brjod bya gzhan la smra bar bya ba de bshad par bya yis mnyan par te rna gtod par gyis shig pa'o/ /khyad par ji lta bu zhe na/ rnam pa mang po zhes bya ba la/ brjod par bya ba rnam pa mang po'o/ /dang ni yang gi don te bshad par bya ba rab tu bstan par bya ba bla mar gyur pa de mang por gyur pa 'ba' zhig tu ma zad kyi 'on kyang 'chad par byed pa yang rnam pa mang po nyid yin no/ /rnam pa mang po de yang kha cig tu ni 'bras bu'i sgo nas/ kha cig tu ni dngos su/ kha cig tu ni de'i chos brjod pa'i sgo nas/ kha cig tu ni nyams pa'i sgo nas/ kha cig tu ni gzhan la snyad 'dogs pa'i sgo nas/ kha cig tu ni don 'dra ba brjod pa'i sgo nas/ kha cig tu ni zur gyis glengs pa'i sgo nas/ kha cig tu ni phyi ma yang dag pa'i sgo nas/ kha cig tu ni mi smra bas dang du len pa'i sgo nas zhes bya ba rnam pa mang pos bshes par bya yis mnyan par gyis zhes bya ba'i tha tshig go/ /de dag kyang / lha la sogs mthong lha min la sogs bdag /ces bya ba la sogs pas go rims bzhin du rjod par byed pa la/ lha la sogs pa gang yin pa de ni lha la sogs pa ste/ mthong ngo zhes bya bar sbyar ro/ /lha'i mig gis zhes bya ba ni tshig gi lhag ma'o/ /sogs pa'i sgras ni klu dang gnod sbyin la sogs pa gzung ngo / /'chi ba med pas na 'chi med de lha dag yin no/ /de dag la sogs pa gang yin pa de ni lha la sogs te/ de dag bdag la lta zhing zhes bya bar sbyor ro/ /bdag nyid kyis mngon sum du gyur pa'i mthong ba khas blangs nas de skad du smra ba yin no zhes bya bar shes par bya'o/ /dang ni 'gro ba la sogs pa phan tshun du 'phel ba nyid yin par rig par bya'o/ /de dag ni 'bras bu nye bar ston pa'i sgo nas smra ba yin no/ /sdug bsngal la sogs shes pa dang / /zhes bya ba la/ sdug bsngal ni sdug bsngal gyi bden pa yin te/ de'i dngos po ni sdug bsngal nyid do/ /de la sogs pa gang yin pa de ni sdug bsngal la sogs pa'o/ /sogs pa'i sgras ni bden pa gzhan dag sdud par byed pa yin no/ /'dis ni bla mar gyur pa'i chos dngos su rab tu ston par byed pa'o/ /dang ni bsam gtan la sogs pa yongs su sdud pa yin te/ bdag gi bsam gtan khong du chud do zhes bya ba la sogs pa lta bu'o/ /de lta na dang ni gnyi gar sbyar bar bya'o/ /zag pa zad pa'i nges pa'i khyad par dang / /zhes bya ba la sogs pas de'i chos nyid brjod pas lung ston par byed pa yin te/ 'dod chags la sogs pa'i zag pa zad pa gang dag yin pa de dag ni zag pa zad pa ste/ 'dod chags dang bral ba'o/ /de dag gi nges pa ni so sor nges pa'i khyad par te gzhan dag la yang zhes bya ba'i dbang du byas nas/ stan bkra la sogs pa'i mtshan nyid kyi bye brag dag yin pa de'i phyir de dang bdag nyid kho na yang dag par ldan par smra bar byed pa'o/ /nyid ni bdag nyid kyis gzhan ldan par smras na nyes pa chung bar 'gyur ro zhes bstan pa'i phyir ro/ /da ni de'i dper byed pa/ gang du stan bkra la sogs dgra bcom thob/ /ces bya ba la sogs pas ston par byed de/ bkra ba ste sna tshogs pa'i stan la sogs pa gang yin pa de dag ni stan bkra la sogs pa yin pa de'i phyir de khyim gyi nang du thob pa'o/ /ci thams cad kyis sam 'on te dgra bcom pas she na/ dgra bcom zhes bya ba smos pa yin no/ /de ltar 'dod chags dang bral ba la nges pa nyid yin par bstan pa'i 'og tu/ de ni bdag gis thob ste gzhan gyis min/ /zhes bya ba smra ba'o/ /de skad du bstan pa na gzhan gyis 'di yang dgra bcom pa dag yin no zhes bya bar rtogs par 'gyur ro/ /dang ni bdag nyid 'dod chags dang bral ba dang mtshungs par sdud pa yin no/ /de nyid du ni zhes bya ba ni khyim gang du dgra bcom pas thob pa gzhan gyis min te/ gzhan nyid kyis ma yin no zhes bya ba'i don to/ /nyams pa'i dbang du byas nas/ dge sbyong lam las yongs su bdag nyams zhes bya ba la sogs pa smos te/ yongs su ste kun nas 'phags pa'i lam la sogs pa las nyams shing yongs su nyams par gyur ces bya ba ni lhag ma'o/ /de yang rnam pa gnyis te 'phags pa'i lam thob pa dang ma thob pa'o/ /gang gi phyir 'phags pa'i lam ma thob pa la yang nyams pa zhes brjod pa de'i phyir khyad par du bya ba'i khyad par thob pa las nyams par gyur to zhes dge tshul smra na zhes bya bar sbyar ro/ /gzhan las khyad par du bya ba yin pas na khyad par te/ 'phags pa'i lam yin pa de'i phyir gal te thob pa las nyams so zhes smra bar byed pa de'i tshe bshad ma thag pa'i nyes par 'gyur ro zhes bya ba'i tha tshig go/ /da ni de nyid dper byed pa/ dge sbyong lam las yongs su bdag nyams zhes bya bas ston par byed pa yin te/ dge sbyong gi dngos po ni dge sbyong nyid de 'phags pa'i lam yin te/ gang gi phyir bstan bcos las/ dge sbyong nyid ni dri ma med pa'i lam yin no zhes rab tu grags pa yin no/ /dge sbyong yang de yin la 'phags pa'i lam yang yin pas na zhes bya ba ni khyad par gyi bsdu ba'o/ /de las bdag nyams so zhes dge tshul bdag nyid smra ba yin no/ /ma thob pa las nyams pa'i bsam pas ni nyes pa chung bar bshad par 'gyur ro/ /dge sbyong gi lam ni mi'i chos gzhan gyis nye bar mtshon par byed pa'o/ /de las cir 'gyur zhe na/ bla ma'i tshig rnams de dang ldan pa'i phyir/ /zhes bya ba smos te/ de lta bu'i bla ma'i tshig brjod pa dang ldan zhing 'brel par brjod pa'i ngag 'di la zhes bya ba'i don yin pa de bas na tshig dang rab tu ldan pa'i phyir ro/ /bcom nas dmyal bar 'gro zhes bya ba ni rtsa ba'i nyes byas kyis rnam par bcom zhing bshig nas dmyal bar 'gro zhes bya ba'i tha tshig go/ /mi ma yin pa thams cad la rim pa 'di yin nam zhe na/ phyag dar khrod ces bya ba la sogs pa smos te phyag dar khrod kyi 'dre ni 'dre kha 'bar ma yin la/ de dag dang so sor 'brel pa dag la nyes pa chung ba ste/ bshags par bya ba'i nyes byas su 'gyur ro zhes bya ba'i don to/ /lha la sogs pa'i dngos gzhi'i yan lag gi skabs su phyag dar khrod kyi 'dre'i tshig yod pa de'i phyir/ phyag dar khrod kyi 'dre mthong ngo zhes bya ba la sogs pa smras na chung bar 'gyur ro zhes bya ba ni tshig gi lhag ma'o/ /dang ni de bzhin du rang gi mtshan nyid 'dzin pa'i rgyu mtshan yang chung bar 'gyur ro zhes sdud par byed pa yin no/ /rang gi mtshan nyid 'dzin par byed pas na rang gi mtshan nyid 'dzin pa ste shes pa'i khyad par bsam gtan gyi dngos gzhi 'dzin par byed pa dang / chags pa kun nas 'dzin par byed pa'o/ /gang gi phyir shes pa'i dngos po de nyid la rang gi mtshan nyid so sor snang ba de'i rgyu mtshan dang byed rgyu bgrod par bya ba yongs su ma rdzogs pa'i gnas skabs kyi mtshan nyid yin la de yang de la cung zhig mi gsal bar snang ba smra bar byed na de la yang nyes pa chung bar 'gyur ro zhes bya ba'i don yin pa'am yang na rang gi mtshan nyid 'dzin pa yang yin la rgyu mtshan yang yin pas na zhes bya ba ni khyad par gyi bsdu ba yin no/ /gang gi phyir de la yang rang gi mtshan nyid so sor snang ba mi gsal ba'i rgyu mtshan bgrod par bya ba yongs su ma rdzogs pa la sogs pa zhes bya ba sdug bsngal la sogs pa shes pa dang zhes smos pa'i dngos gzhi'i yan lag gi gnas su 'di blta bar bya ba yin no/ /de bas na 'di bdag la yod do zhes lung ston par byed na nyes byas kyi nyes par 'gyur bar rig par bya'o/ /gzhan la snyad 'dogs pa'i dbang du byas nas/ sdom can gang dag lha sgra thos yod ces/ /ji bzhin gzhan la snyad 'dogs smra byed pa/ /zhes bya ba la sogs pa smos te/ pha rol po gzhan la snyad 'dogs pa ni gzhan la snyad 'dogs pa ste/ gzhan gyi ming gis zhes bya ba'i don yin pa de'i phyir gzhan la snyad 'dogs pas smra bar byed na yang ngo / /yang gi sgra ni snga ma la ji lta ba de bzhin du 'di la yang 'gyur ro zhes sdud par byed pa'o/ /de'i dper byed pa/ sdom can gang dag lha sgra thos yod ces/ /zhes bya bas ston par byed pa yin te/ gnas skabs 'ga' zhig tu bdag nyid la bsams nas/ sdom can gang dag lha dag gi sgra thos pa yod do zhes bya ba'i tshig de las de ni nges par 'di nyid yin no zhes gzhan sems par 'gyur te/ 'dir de nyid chung ba'o/ /ci'i phyir chung bar 'gyur zhe na/ smras pa/ bdag ces bya ba de dang bral ba de ni chung bar 'gyur zhes bya bar sbyar bar bya'o/ /de ni chung zhes bya ba la de yang de yin la chung ba yang yin pas na zhes bya ba'i dbang du byas nas so/ /de yang bshad ma thag pa'i nyes byas chung bar 'gyur bar shes par bya'o/ /gzhan la snyad 'dogs pas smra ba yang de bzhin du 'gyur ro zhes bya bar spyi'i tshig tu bstan pas 'dis de dag gi dper byed pa yin te/ 'di skad du bdag la bsams nas gzhan gyi ming gis spyir mi'i chos bla ma smra bar byed na nyes pa chung bar 'gyur te/ bshad ma thag pa'i bdag gi sgra ma brjod pa'i phyir ro zhes bya ba lta bu'o/ /gang gi tshe bdag ces bya ba yang brjod par gyur ba de'i tshe ji ltar 'gyur zhe na/ bdag gi sgra dang ldan na rtsa bar 'gyur/ /zhes bya ba smos te/ gzhan la snyad 'dogs pas go bar byas pa'i phyir de ni bdag nyid yin no zhes bdag nyid sgrub par byed pa dang ldan zhing 'byor ba'i tshig gang yin pa de la de skad ces bya'o/ /de bas na tshig des smras na rtsa bar 'gyur ro/ / ni ni snga ma las khyad par du byed pa'i don to/ /de bzhin du gzhan la snyad 'dogs pa gzhan la yang blta bar bya'o/ /don 'dra ba brjod pa bstan pa'i phyir ji ltar mtshungs par 'gyur ba'i sgra brjod pa zhes bya ba la sogs pa smos te/ mtshungs pa yang de yin la sgra yang yin pas na mtshungs par gyur pa'i sgra dag ste/ gang dag sgra mtshungs la don tha dad pa ni dper na 'bras bu'i sgra dge sbyong gi 'bras bu dang / a mra'i 'bras bu la gang 'jug pa'i phyir ro/ /de bzhin du gzhan dag la yang blta bar bya'o/ /yang na mtshungs pa de 'dra ba'i sgra don gang la yod pa de ni mtshungs par gyur pa'i sgra dang ldan pa'o/ / de'i phyir de dang bdag nyid yang dag par ldan par smra bar byed pa las zhes bya bar sbyar te/ gong du mtshungs pa'i sgras mi'i chos bla ma dang ldan pa nyid du brjod pa'i phyir ro/ /dang ni ji ltar zhes bya ba gong du ji lta ba de bzhin du 'dir yang zhes sdud par byed pa yin no/ /bslab la gnas nas bdag ni bslab ce 'am/ /zhes bya ba la sogs pas dpe ston par byed de/ bslab pa ni spyod pa ste tshul khrims la gnas pa zhes bya ba'i bar du'o/ /de la bsam pa ni sems pa'o/ /de la bslab pa la bsams nas zhes bya ba ni kun du spyod pa la sems pa'i sgo nas zhes bya ba'i don te bsams pa des so/ /bdag ni slob pa zhes bya ba smos te/ gang gi phyir tha ma'i 'phags pa ma gtogs pa slob pa bdun la bya ste/ spang bar bya ba ma lus pa spong ba la slob pa'i phyir ro/ /de la 'di ni bka' las rab tu grags pa'i tshul yin no/ /so so'i skye bo 'ga' zhig kyang so sor thar pa'i bslab pa la slob pa'i phyir zhes bya ba'i ngas pa'i tshig gi tshul gyis de yang slob par 'gyur ro/ /de'i phyir bsam pas smras na chung bar 'gyur ro zhes bya ba'i tha tshig go/ /yang na/ /lam la zhugs nas bdag ni lam gnas shes/ /bya ba la sogs pas kyang don 'dra ba nyid ston par byed de/ lam du zhugs nas 'phags pa'i lam la gnas pa nyid go bar byed pa'i bsam pas bdag ni lam la gnas pa yin no zhes smras pa de lta na yang nyes pa chung bar 'gyur ro zhes bya ba'i don to/ /lam zhes bya ba ni rnam pa gzhan ston par byed pa'o/ /sogs pa de dag de bzhin no zhes bya ba la de dag ni de lta bu'i don te de lta bu la sogs pa'i mtshungs pa'i sgra dag gis sgrub par byed pa dag ni sngar ji ltar chung bar 'gyur ba de bzhin du 'di la yang zhes bya ba'i don to/ /sogs pa'i skras ni mtshungs pa gzhan rgyun du zhugs pa la sogs pa dag kyang yin par rig par bya ste/ dper na rgyun la gnas nas bdag ni rgyun du zhugs pa yin no zhes bya ba lta bu'o/ /rgyun gyi sgra ni 'phags pa'i lam dang / chu bo'i rgyun la yang bya ba de'i phyir don mtshungs pa yin no/ /de bzhin du kun du spyod pa'i 'ching ba las grol ba la bsams nas bdag ni 'ching ba la sogs pa las grol bar gyur to zhes bya ba la/ gang gi phyir 'ching ba'i sgras 'dod chags la sogs pa brjod pa de 'dod chags kyi bcing ba dang / zhe sdang gi bcing ba zhes bya ba la sogs pas kun du spyod pa la sogs pa dang / 'gog pa zhas bya bar don mtshungs pa nyid kyi phyir ro/ /'ga' zhig snod la sogs pa cung zad med pa las bsams te cung zad spangs pa go bar bya ba'i phyir bdag la cung zhig kyang med do zhes bya ba smras te/ 'di la cung zad med pa'i sgras rdzas dang nyon mongs pa la bya ba yin te/ 'di gnyis med par don mtshungs pa'i phyir ro/ /so so'i skye bo dang dgra bcom pa la cung zad kyang med do zhes mtshungs pa'i sgra brjod par bya ba yin no zhes bya ba de lta bu la sogs pa dag tu blta bar bya'o/ /gang gi phyir slob pa la sogs pa'i sgras go bar byed pa bshad ma thag pa'i rnam pas bdag la gzhan gyis zag pa med pa'i chos dang ldan pa dang / slob pa la sogs pa yin par so sor shes par 'gyur ro snyam pa de la rang gi bsam pa'i dbang dang / gzhan gyis de bzhin rtogs pa dag las nyes par 'gyur ba dang / ma yin na ches chung bar 'gyur bar rig par bya'o/ /bsam pa dang gzhan yid ches pa thams cad la thams cad du brjod par bya ba yin no/ /e ma'o ji ltar bdag 'dra khyod gyur cig /'on tang phyir mi 'ong ba'i 'bras ldan 'gyur/ / da ltar de ltar 'phags pa bdag min zhes/ /zur gyis rjod par byed na chung ba nyid/ /ces bya bas zur gyis smra ba smos pa yin te/ zur gyis smos pa ni cha tsam smras pa yin pa de'i phyir zur gyis brjod cing smra ba las nyes pa chung bar 'gyur gyi dngos gzhir ni mi 'gyur ro zhes nyid ni nges par gzung ba yin no/ /de'i dper byed pa/ e ma'o ji ltar bdag 'dra khyod gyur cig /ces bya ba la sogs pas ston par byed pa yin te/ e ma'o ji ltar bdag ci 'dra ba ste bdag ji ltar de bzhin du khyod kyang de dang 'dra bar gyur cig pa'o/ /e ma ni 'dod pa bsngags pa'i smre sngags yin no/ /de skad du smras pa'i 'og tu/ 'on tang phyir mi 'ong ba'i 'bras ldan 'gyur/ /zhes bya ba la sogs pas bdag ji lta ba de bzhin du 'gyur ro zhes skad du smras par gyur na zhes bya ba ni drang bar bya'o/ /ni'i sgra ni gang gi phyir gyi don yin te/ gang gi phyir de lta bu nyid du gyur na cir 'gyur zhe na/ smras pa/ phyir mi 'ong ba'i 'bras bu dang ldan par 'gyur ro/ /da ltar te nga de skad du smras na gzhan yid ches par 'gyur ro/ /'on kyang phyir mi 'ong ba yin pas rang nyid kyang bdag dang mnyam pa nyid du kun du bstan pa'i phyir de las gzhan gyis bdag phyir mi 'ong ba la sogs pa'i 'bras bu dang ldan par so sor shes par 'gyur ro zhes rnam pa gzhan 'dis smra bar byed pa dag la chung bar 'gyur ro/ /gal te yang phyis 'di skad du/ da ltar 'phags pa bdag min zhes/ /zhes bya ba smras pa de lta na yang zur gyis smras pa kho nar 'gyur ro/ /de bzhin du/ bsam gtan snyoms zhugs deng ni bdag ma yin/ /zhes bya ba la sogs pa la gzhan yang 'di skad du bdag ni deng bsam gtan la snyoms par zhugs pa ma yin no zhes zur gyis smras na nyes pa chung bar 'gyur ro zhes bya bar sbyar ro/ /'on te zhes bya ba ni zur gyis smra ba'i rnam pa dag nye bar bstan pa'i phyir ro/ /ji ltar bsam g tan la snyoms par zhugs pa ma yin no zhes zur gyis ston pa de bzhin du khar rtsang ma yin zhes bya ba la sogs pa la khar rtsang zhes bya ba ni 'das ma thag pa'i nyin zhag la bya ste dbang du byed pa gtso bo yin pa'i phyir khar rtsang bsam gtan la snyoms par zhugs pa zhes bya ba ni 'das pa'i nyin zhag la snyoms par zhugs zhes bya ba'i tha tshig go/ /de bzhin du khar nyin phan chad min zhes bya ba la khar nyin zhes bya ba ni 'das ma thag pa'i nyi ma khar rtsang zhes bya ba la ltos pa phan chad de/ khar nyin phan chad du snyoms par zhugs pa ma yin no zhes bya ba de bu la sogs pa'i zur gyis smra ba ni nyes pa chung bar 'gyur ro zhes bya ba'i don to/ /gang gi phyir bdag deng bsam gtan la snyoms par zhugs pa ma yin no zhes smras pa na/ gzhan 'di snyam du 'di ni nges par bsam gtan thob pa yin te/ de nyid las su bya ba gzhan dag nye bar lhags pas snyoms par ma zhugs pa yin no zhes snga ma bzhin du bsam pa brjod par bya'o/ /phyi ma yang dag pa ni/ 'dod chags bral ba'i khyim 'di gang yin pa/ /zhes bya ba la sogs pas ston par byed de/ rab tu byung ba'i khyim de gang yin pa de ni 'dod chags dang bral ba'i yin no zhes bsgrubs nas phyis 'di skad du bdag gi de yin zhes smos pa yin no/ /nyid ni gzhan gyi ma yin zhes nges par gzung ba'o/ /de zhes bya ba ni bstan ma thag pa'i khyim 'dren par byed pa yin te/ gong du 'di zhes mngon sum du byas pa kho na las lkog tu gyur pa'i dbang du byas nas de zhes bya ba yin no/ /de skad du zur gyis smras par gyur pa'i 'og tu 'dod chags bdag ma bral zhes smras te/ 'dod chags la sogs pa'i mtshan nyid dang bral zhing dri ma med pa gang yin pa de ni 'dod chags dang bral ba ste de ni/ bdag yin 'dod chags bdag ma bral ba'o/ /dang ni bdag kho na ma yin no zhes nges par gzung ba'i don yin no/ /de skad ston pa'i phyi ma yang dag pa nyid yin du zin kyang zur gyis ston pa kho na yin te/ 'di ltar phyi ma yang dag pa las zur gyis smra ba ma byung ba ma yin no zhes bya ba'i tha tshig go/ /mi smra bar gyur pa ni/ btsun pa ci ste dgra bcom bdag bsod snyoms/ /zhes bya ba la sogs pas ston par byed de/ gal te khyod dgra bcom par gyur pa yin pa de'i tshe bdag gi bsod snyoms bzhes shig ces smras pa na cang mi smra bar gyur pas de kho na bzhin du khas blangs nas gal te bsod snyoms len par byed pa dang / de bzhin du 'di nyon mongs pa'i zag pa zad pa'i phyir zag pa zad pa ste/ zag pa zad par gyur tam zhes gzhan gyis dris par gyur pa na de kho na bzhin du cang gi smra ba'i rnam pas te mi smra bar gyur pas gang gi tshe khas blangs par gyur pa na'o/ /dang ni 'dir thams cad du nyes byas chung bar 'gyur ro zhes sdud par byed pa yin no 'di la yang snga ma bzhin du bsam pa las 'gyur ro/ /da ni/ de dag bla mar brjod pa'i blos brdzun smras/ /zhes bya bas sngar bshad pa'i mjug sdud pa yin te/ bla mar brjod cing smra ba de'i blo dang sems pa dag ni bla mar brjod pa'i blos so/ /de dag gi sgra ni de ltar gyi don yin pa de bas na de ltar bla mar brjod pa'i blos brdzun du smra ba yin par rig par bya'o/ /de dag ni nye bar mtshon par byed pa yin te/ mi'i chos bla mar gyur par bstan pa rnam pa gzhan thams cad la yang mtshan nyid ji lta ba bzhin du nyes par 'gyur bar shes par bya'o zhes bya ba'i don 'dir 'gyur ro/ /da ni/ gzhan pa'i brdzun du smra ba da nyon cig /ces bya ba la sogs pas ston par byed de/ da ni da ltar te mi'i chos bla mar gyur pa'i brdzun du smra ba las gzhan pa'i brdzun du smra ba brjod par bya yis nyon cig ces bya ba ni tshig gi lhag ma'o/ /ni'i sgra ni snga ma las khyad par du byed pa'i don to/ /'du shes gzhan pa'i tshig ni gang yin pas/ /zhes bya ba la sogs pas brdzun du smra ba gzhan 'chad par byed pa yin te/ don ji lta ba bzhin du 'du shes yod pa ma yin pa gang yin pa de dag ni 'du shes gzhan pa ste/ gzhan pa'i tshig gang dag yin pa de kho na la brdzun du 'gyur gyi cig shos las ni ma yin no zhes nyid ni nges par gzung ba'i phyir ro/ /de gang la yin zhe na/ sgra don shes pa zhes bya ba smras te/ sgra'i don ni sgra don te sgra'i tshig gi don gang yin pa de rnam par shes pa ni sgra don shes pa'o/ /'dis gnyid log pa dang smyos pa dang / skad mi shes pa dag bsal ba yin no/ /de la sgra'i don rnam par shes pa yul du gyur pa la tshig de brdzun du 'gyur ro/ /ci thams cad la 'gyur ram zhe na/ mi zhes smos te mi'i ni mi'i rigs dag la bya'i mi ma yin pa'i rigs dag ni ma yin te/ gang gi phyir 'jig rten gyi tha snyad kyi khongs su ma 'dus pa'i phyir ro/ /de ltar yang ming rtogs pa'i tha snyad nyid la zhes gsungs pa yin no/ /tshig 'di'i don gsal te/ bla mar brjod pa'i blos zhes bya ba 'di nyid kyis dngos gzhi'i yan lag dang bral ba ni nyes byas su 'gyur ba dang / gzhan pa'i brdzun du smra ba dag rab tu grub pa nyid kyi phyir ro/ /ci'i tshig kho na brdzun yin nam 'on te gzhan gyis kyang yin zhe na/ smras pa/ de la 'jig rten pa'i tshul ni 'di yin te tshig brdzun pa yin pa de lta na yang gal te yang 'di ltar tshig gis brjod par bya ba'i don ji lta bu lus kyis kyang go bar byed na lus kyis kyang yin te ngag 'ba' zhig gis ni ma yin no zhes bya ba'i tha tshig go/ /de'i tshe nyes byas kho na nyes pa chung ba ma yin pa ma yin la/ 'on kyang nyes byas kyi nyes pa chung ba yin te yongs su ma rdzogs pa zhes bya ba'i tha tshig go/ /ci'i phyir yongs su ma rdzogs pa yin/ gang las te gang gi phyir tshig tu brjod pa'i shugs las bya ba'i tha snyad 'di la med pa de'i phyir chung bar 'gyur ro/ /'dul ba las tha snyad kyi rtsa bar gyur pa ni gsum ste/ 'di mthong ba dang thos pa dang dogs pa zhes gsungs pa yin no/ /rang gis rtogs pa de ni mthong ba yin/ /zhes bya ba la sogs pas de dag gi rang bzhin 'chad par byed pa yin te/ gang kho na rang gi mngon sum mam rjes su dpag pas rtogs shing yang dag par yid ches par gyur pa de kho na la mthong ba zhes bya'o/ /rab tu byung ba 'am khyim pa yid ches pa mi slu bar byed pa gang kho na las thos pa thos pa yin no/ /kho na ni ngas par gzung ba dang rim pa gzhan gyi don to/ /gcig tu nges pa'i rtags go bar byed pa gzung ba ni mtshan ma nges par gzung ba yin la/ de las gzhan pa ni mtshan ma nges par ma bzung ba yin no/ /de la dogs pa zhes bya'o/ / gang du mtshan ma nges par ma bzung ba ni dper na thibs po la sogs pa las bud med kyi yul byung ba dang / de nyid de kho na las rab tu byung ba yang byung ba de dag mthong ba las ci 'dir 'di gnyis kyis byas par gyur to zhes dogs par 'gyur gyi nges pa ni med de tha snyad du bya ba ma mthong ba nyid kyi phyir mtshan ma nges par ma bzung ba nyid kyi phyir ro/ /de ltar bshad ma thag pa'i tha snyad kyi rtsa bar gyur pa gsum po 'di dag gis smras nas gzhan gyis go bar gyur pa la nyes pa med de 'di la nyes par mi 'gyur ro zhes bya ba'i tha tshig go/ /de la yang mthong ba la mthong ba dang / thos pa la thos pa dang / dogs pa la dogs so zhes smra bar bya'i gzhan du na nyes par 'gyur ro zhes rtogs par bya'o/ /pha rol pos dris pa la lan ji ltar sbyin par bya zhe na/ gzhan gyis gang dris de nyid brjod par bya/ /zhes pa smos te/ gzhan gyis gang kho na dris par gyur pa de kho na brjod par bya ste/ de dang rjes su mthun pa brjod par bya'o zhes bya ba'i don to/ /gzhan la gnod bya'i phyir ni gzhan du min/ /zhes bya ba la gzhan gyis dris pa yang gzhan du lung ston par byed na thams cad du nyes byas kyi nyes par 'gyur ro zhes bya ba'i tha tshig go/ /nyid ni nges par gzung ba dang rim pa gzhan nyid yin no/ / 'di'i dmigs kyis bsal ba ni/ /gsad bya bros na ji ltar gshed ma yis/ /zhes bya ba la sogs pa smos te/ gsad par bya ba ni rkun po'am gzhan 'ga' zhig rgyal pos gzung bar gyur pa'o/ /de bros par gyur pa la gal te gshed ma des 'phags pas 'ga' zhig bros par gyur pa ma gzigs sam zhes dris pa na/ 'dri ba de la ci 'di rjes su gzung ba'i blos tshol bar byed dam/ 'on te gsad pa'i blos zhes brtags nas gang gi tshe rjes su gzung ba'i blos zhes shes par gyur pa de'i tshe smras pa la nyes pa yod pa ma yin no/ /'on te gsad pa'i bsam pas yin no de'i lan de'i tshe de la ji skad brjod ces bya ba la sogs pas 'chad par byed pa yin te/ de'i tshe de'i dus su 'di skad brjod ces bya ba ni 'di nyid brjod par bya zhes bya ba'i don to/ /'di skad ces bya ba ni bshad par bya ba'i rnam pa la ltos pa yin la/ nyid ni don ji lta ba bzhin du lan brjod pa rnam par dpyod pa yin par blta bar bya'o/ /tu snga ma ni gong ma las khyad par du byed pa'i don to/ /tshur shog nam mkha' 'am ni sen mo mthong / /zhes bya ba la sogs pas gsad par bya ba mthong ba'i dris pa'i lan brjod par bya'o/ /tshur shog 'dug la ngal so shig ces byas pa dang / des brgya la kho mi 'dug gi dris pa mthong ngam zhes smra na de'i tshe nam mkha' la bltas nas nam mkha' mthong ngo / /sen mo la bltas nas sen mo mthong ngo zhes bya ba de la/ gzhan 'di snyam du bdag gir ma mthong ngo zhes bya ba 'dis brjod pa yin no zhes sems par 'gyur ro/ /gal te de tshig kun go ba yin na kho bos khyod la nam mkha' mthong ba dang / sen mo mthong ba dris pa ni ma yin gyi 'on kyang gsad par bya ba mthong ba yin no zhe na/ de'i tshe brjod par bya ba/ lus can rnams gyis de nyid ma mthong ngo / /zhes bya ba smos pa yin no/ /lus yod pa'i phyir na lus can te lus can rnams kyis de nyid bdag la bsams nas khyod kyi mi mthong ngo zhes byas pa na gzhan 'di la yang gsad par bya ba'i dbang du byas nas 'dis de skad du brjod pa yin no snyam du sems par 'gyur ro/ /de la sogs pa'i thabs ni de lta bu la sogs pa'i rnam pas gzhan dang gzhan gyi rjes su 'brangs nas smras na nyes pa yod pa ma yin par sngar bshad pa yin no zhes bya ba'i don to/ /don ci'i phyir zhe na/ gtses pa rnams ni yongs su bsrung phyir ro/ /zhes bya ba smos te/ gtses pa'i sems can rnams yongs su bsrung ba'i phyir yin gyi gzhan la gnod pa'i bsam pas ni ma yin no zhes bya ba'i don to/ /da ni/ brdzun du smra ba'i rnam pa'i dbye ba smras/ /zhes bya bas mjug sdud par byed pa yin te/ brdzun du smra ba'i rnam pa'i rab tu dbye ba ste rnam pa du ma gang yin pa de ni smras pa yin no/ /'dis ni 'di skad du/ dngos gzhi'i nyes pa dang / nyes byas kyi nyes pa'i dbye ba rnam pa du mar rab tu bstan to zhes bshad par 'gyur ro/ /de ma thag tu da ni da ltar ro/ /brdzun du smra ba ni brdzun du smras pa'o/ /brdzun du smra ba de'i phyogs su gtogs pa brjod par bya/ smra bar bya/ yid kyi nyes par bshad par bya'o zhes bya ba'i tha tshig go/ /ni'i sgra ni don 'di nyid khyad par du bstan pa'i phyir ro/ /de yang bya ba'i tshul dang bya ba ma yin pa'i tshul lo/ /de la bya ba'i tshul la mi byed pa dang / bya ba ma yin pa'i tshul la byed pa dag ni thams cad du yid kyir 'gyur ro/ /de da dris na chos bzhin du ni slar smros shig ces bya ba la sogs pas ston par byed pa yin te/ dngos po cung zhig 'ga' zhig gis dris par gyur pa na slar smra bar byed pa dang / lan gdab par bya'o zhes bya ba'i bar du'o/ /khyad par ji lta bu zhe na/ chos bzhin du zhes smos te/ chos bzhin ni/ chos kyi rjes su mthun pa'o/ /'on kyang mi smra bar 'dug pas ni ma yin no/ /ci'i phyir zhe na/ gtse ba'i phyir ni zhes bya ba smos pa yin no/ /gtse ba'i phyir 'gal ba'i lan gyi tshig ni gzhan gyis gang dris zhes bya ba la sogs pas sngar bkag pa kho na yin no/ /'dir ni gtse ba'i phyir cang mi smra bar gyur ba dgag pa'i phyir smra ba zhes bye brag tu byas pa yin no/ /dang ni 'gal ba'i tshig 'ba' zhig mi smra ba ma yin gyi 'on kyang mi smra ba kho nas kyang 'dul bar mi bya'o zhes sdud par byed pa yin no/ /de bzhin du mkhan po dang slob dpon dang rgyal po'i bka' mnyan par bya ba yin no/ /ci de lta de lta bus sam 'on te tshig de dag 'dul ba dang ldan pa yin nam 'on te ma yin zhes dpyad par bya/ /de ji ltar bya zhe na smras pa/ rigs pa yin na mnyan te 'dul ba dang rjes su mthun pa yin zhes bya ba'i tha tshig go/ /gal te dpyad pa na 'dul ba dang rjes su mthun pa ma yin pa dang 'dul ba dang 'gal bar gyur pa de'i tshe brda sprad pa ste/ lan gyi tshig mi rigs pa dang rung ba ma yin no zhes rab tu sbyin par bya'i cang mi smra ba'i bya ba dang / yang na 'gal ba'i tshig gi lan gdab par mi bya'o/ /de bzhin du dge 'dun gyi gnas brtan gyi bka' yang mnyan par bya'o/ /dge 'dun gyi gnas brtan smos pas dge 'dun yang bsdus pa yin la/ dge 'dun gyis bskos pa'i dge skos kyang yin te/ gal te sangs rgyas bcom ldan 'das mngon sum du gyur pa'i ni dpyad par mi bya ba yin la/ gal te lkog tu gyur pa nyid yin na ni bka' gzhan dag gis rnam par dpyad cing gal te mtshungs par gnang na nan tan du bya zhing / gal te gzhan du na smra ba po la snga ma bzhin du brda sprad par bya'o/ /de la bla ma zhes bya bas ni slob dpon gzung ba yin te/ mkhan po mngon sum du smos pa'i phyir ro/ /rgyal po ni 'gro ba'i dbang phyug la bya'o/ /dang ni sdud par byed pa yin no/ /de bzhin du/ skye bo rnams la 'dre skad skad ngan dang / /zhes bya ba la sogs pa la/ bdag ste rang nyid kyis bsdigs par mi bya zhing gzhan te pha rol pos kyang mi bya'o/ /rnam pa gang gis she na/ smras pa 'dre'i skad ni 'dre skad de 'dre'i skad de dang 'dra ba'i skad ngan ni skad kyi bye brag yin la de ni 'dre skad skad ngan yin te des so/ /dper na mun khung du zhugs nas gzhan 'jigs pa skyed pa'i don du 'dre skad dang 'dra ba'i sgra 'don par mi bya ba dang / gtsigs pa dang 'dra ba'i mche ba ni mche ba gtsigs pa ste/ rnam par 'gyur ba'i mche ba can zhes bya ba'i tha tshig go/ /gzugs mi sdug pa brjod cing smra ba dang sgrogs pas pha rol po la 'jigs pa bskyed pa'i don du de lta bur gyur pa'i 'dre'i gzugs nyid dang / khyod zos par 'gyur ro zhes bya ba'i sgra de dag ni 'dre skad skad ngan dang / mche ba gtsigs pa mi sdug brjod pa yis/ /zhes bya ba'i don yin no/ /ci rnam pa thams cad du nyes par 'gyur ram zhe na/ ci ste phan phyir byas na nyes pa med/ /ces bya ba smos te/ 'dre skad la sogs pa de dag brjod pa phan pa'i phyir byas na ni gal te 'di ltar gyur pa'i 'dre ni tha dad par gnas pa dang / le los gnod par gyur pa dag za bar byed pa yin no zhes yang dag par rig par bya ba'i don yin te/ 'bras bu la bsams nas thabs brjod pa la nyes pa yod pa ma yin no/ /'di 'jigs pa skyed pa'i tshul nyid yin pa'i phyir srog gcod pa'i phyogs su gtogs pa nyid yin te/ /tshig gi bdag nyid yin no zhes bya ba'i dbang du byas nas de 'dir bkod pa yin no/ /de bzhin du/ rgyal gzugs pa dang mna' dor mi smra bcas/ /de dag ma gnang zhes bya ba la rgyal la sogs pas 'dzugs pa ni rgyal gzugs pa ste/ rgyal la sogs pas nges pa yin no/ /dper na gal te 'di ltar gyur na bdag gi yin gyi de ston cig ces bya ba lta bu'o/ /mna' ni mna' 'dor bar byed pa'o/ /che ge mo'i zhabs la reg go zhes bya ba la sogs pa lta bu'o/ /mi smra ba ni smra ba las thams cad du ldog pa'am yi dam du byas pa'i tshul yin no/ /mi smra ba dang bcas pas 'jug pa ni mna' dor mi smra bcas pa ste/ de dag thams cad ma gnang ba yin no/ /gang gi phyir rab tu byung ba la de dag tshul ma yin te/ gang rgyal gzugs pa ni khyim pa'i chos kyi dbang du byas pa yin la/ rab tu byung ba bden pa yin pa de bas na mna' dor ba tshul dang mi mthun pa yin te/ sdom can dag brdzun smra ba ni mna' dor ba'i sgo nas bdag nyid bden par smra bar sgrub par byed do/ mi smra ba ni mu stegs kyi rgyal mtshan yin pa'i phyir spang bar bya ba yin no/ /lam du zhugs pa ni ji ltar bya ba yin zhe na/ mi smra ba'i dngos po ni mi smra ba nyid du bya'i/ bud med la sogs gtam ngan mi bya ste/ /bud med kyi yul gyi gtam mam zas la sogs pa'i gtam ni 'dod chags kyi rjes su mthun pa nyid yin pas mi bya zhing / skyo ba dang rjes su mthun pa yang bya ba ma yin pa de'i phyir gtam ngan gyi tshig byas pa yin no/ /sogs pa'i sgra ni de lta bu'i rigs can thams cad yongs su gzung ba'i phyir ro/ /yang gi sgra ni tshig gi kha bskang ba'o/ /gang lam la sogs pa 'ga' zhig tu ngal bso ba der/ gus pa ste mos pas sangs rgyas bcom ldan 'das kyi tshigs su bcad pa bklag par bya'o/ /rgyud gsum tshogs par gyur pa ni rgyud gsum pa ste/ de las spyan drang ba dang gshegs su gsol ba dang / bar du mdo 'don pa ni rgyud gsum pa med na des lung gi tshigs su bcad pa bklag par bya'o/ /gtsug lag khang du gnas par gyur na gtsug lag khang gi bdag po dang lha nyid kyi ched du tshigs su bcad pa gnyis bklag par bya ste/ 'di dag thams cad de'i rjes su 'brangs nas shes par bya'o/ /'on te lha gzhan gyi rten mthong bar gyur pa de'i tshe ji ltar bya ba yin zhe na/ se gol brdabs te der yang tshigs bcad klag /ces bya ba smos te/ de la lha stegs su zhugs pa na se gol brda byas nas btsam par bya zhing zhes bya ba la sogs pa'i tshigs su bcad pa bklag par bya'o/ /dang ni thams cad du mtshungs par sdud par byed pa yin la/ yang na zhes bya ba ni tshig nye bar dgod pa yin no/ /de la mdza' bo 'byed par byed pa spang bar bya'o/ /'dis ni 'di skad du phra ma mi bya'o zhes bstan par 'gyur ro/ /de bzhin du tshig rtsub mo spang bar bya ste/ tshig rtsub mo ni phan pa ma yin pa'i tshig yin no/ /de bzhin du skyon nas brjod par mi bya ste/ dper na khyod ni dmangs rigs las rab tu byung ba yin no zhes bya ba lta bu de dag ni spang bar bya ba yin no/ / dang ni spang bar bya ba'i sgra re re la sbyar bar bya ba'i don to/ /'dul ba las phra ma la sogs pa byas pas dge tshul dag la nyes byas su 'gyur bar gsungs pa ma yin nam/ de ji ltar na yid kyir 'gyur zhe na/ de'i phyir/ dbye ba'i 'dul ba las gsungs nyes byas gang / /zhes bya ba la sogs pa smos te/ 'dul ba las nyes pa'i dbye ba gang gsungs pa gang yin pa 'dir nyes byas kyi dbye bar byas pa de ni yid kyi nyes byas kyi dbang du byas nas nyes byas kyi nyes pa bstan pa yin gyi bshags par bya ba dag ni ma yin no zhes bya ba'i tha tshig go/ /de nyid kyi phyir gzhan nyid ni ma yin te nyes byas ni smad par bya ba yin no zhes bstan par 'gyur ro/ /dge tshul gyi tshig le'ur byas pa las brdzun du smra ba las slar ldog pa ste bslab pa'i gzhi bzhi pa'o// //'bras bu la sogs pa khu ba mnan pa ni zhes bya ba la sogs pas bslab pa'i gzhi lnga pa 'chad par byed de/ de la dang por myos par 'gyur ba'i rang gi ngo bo bstan par bya ste/ dgag pa'i yul nyid yin pa'i phyir ro/ /de la myos par byed pa ni rnam pa gnyis te/ 'bras bu'i chang dang / 'bru'i chang ngo / /de la 'bras bu'i chang bshad par bya ste/ /'bras bu dang por byas pa gang yin pa zhes bya ba ni 'bras bu la sogs pa ste/ de btsir ba'i khu ba mnan zhing yongs su sbyar ba ni 'bras bu'i chang yin no zhes myos byed shes pa dag smra'o/ /de'i dbye ba dag ston pa la/ rgun chang bu ram chang zhes bya ba ni rgun chang dang bu ram gyi chang dang de dang 'dra ba ni rgun chang bu ram chang 'dra ste/ rgun chang dang bu ram chang du byas pa ni chang yin la bu ram shing gi chang du byas pa yang ngo / /de dang 'dra ba ni na li ka ra la sogs pa dang / me tog gi chang dag yin no/ /de'i sgra ni phyis par rig par bya'o/ /de lta bur gyur pa'i bcos pa'i chang bstan nas 'bru'i chang gi rang gi ngo bo 'bru btags mnan las gyur pa zhes bya ba la sogs pa smos pa yin te/ ko tra ba la sogs pa'i 'bru btags pa dang gzhan dag kyang rung ba rtsa ba la sogs pa'i sman dang / mnan par gyur pa ni 'bru'i chang du 'gyur ro zhes bya ba'i don to/ /ni'i sgra ni gong ma las khyad par du bya ba dang / rim pa gzhan du'i don to/ /rnam pa de gnyi ga yang rtswa'i mchog ma ni rtswa mchog ste/ phra mo bsnyugs pa des kyang btung bar mi bya'o zhes bya ba'i tha tshig go/ /btung bar mi bya ba de khyad par ji lta bu zhe na/ myos 'gyur zhes smos te/ myos par 'gyur ba zhes bya ba'i tha tshig go/ /rtswa mchog tsam yang zhes bya ba'i tshig ni thal ches pa spang ba'i phyir te/ rdzas kyi nus pa yongs su shes par mi nus pa'i phyir ro/ /de la bcos pa'i chang dang sbyar ba'i chang myos par byed pa bag med pa'i gnas las slar ldog par bgyi'o zhes bya ba'i bcas pa ci'i phyir zhe na/ de'i dgos pa/ 'bru chang 'bras bu'i chang gnyis smos pa ni/ /zhes bya ba la sogs pa ston par byed de/ 'bru chang 'bras bu'i chang zhes bya ba ni de lta bu gnyis bstan zhing gnyis smos pa ni dngos po bstan pa'o/ /de ci'i phyir zhe na/ ko tra ba la sogs pa dgag phyir ro/ /zhes bya ba smos te/ 'bru'i chang dang 'bras bu'i chang smos pa ni ko tra ba la sogs pa dgag pa'i phyir te myos par byed pa'i ko tra ba la sogs pa gsal ba'i phyir dang / myos par byed pa'i 'bras bu gsal ba'i phyir ro zhes bya ba'i tha tshig go/ /ji ste 'di skad du rtsa ba'i nyes par mi 'gyur ba'i dbang du byas nas myos par byed pa de dag kyang longs spyod pa 'thob pa yin no/ /'bru'i chang dang 'bras bu'i chang smos pas ko tra ba la sogs pa gsal bar gyur pa yin te/ de'i phyir ko tra ba la sogs pas myos par byed pa longs spyod pa ni de'i phyogs su gtogs pa nyid yin pa'i phyir yid kyir 'gyur ba sus zlog par byed/ dang gi sgra ni sdud par byed pa'o/ /myos par 'gyur ba smos pa ci'i phyir zhe na/ ma red nyams phyir myos par 'gyur/ /zhes brjod ces bya ba smos pa yin te/ dgag pa'i phyir zhes bya bar sbyar ro/ /myos par 'gyur zhes smos pa ni myos 'gyur zhes brjod pa ste myos par 'gyur ba'i sgra nye bar gzung ba yin no/ /ma red pa dang nyams pa ni gang myos byed kyi dngos por ma red pa dang / myos byed kyi dngos po las nyams pa de la de skad ces bya'o/ /de'i dngos po de bzlog pa'i phyir der smras pa yin no zhes bya ba'i don to/ /de dag gang longs spyod pa de'i phyir 'chad par 'gyur ro/ /bag med pa'i tshig smos pa ci'i phyir zhe na/ ldog pa'i rgyur ni bag med pa zhes brjod ces bya ba smos te/ bag med pa'i gnas las slar ldog par bgyi zhes bya ba'i bag med pa'i tshig gang yin pa de ni ldog pa'i rgyu ste/ ldog pa'i byed pa'i rgyur nye bar bkod pa yin no zhes bya ba'i tha tshig go/ /gang gi phyir myos par byed pa'i ltung ba ni bag med pa'i gnas su gnas pa yin te/ 'di la bag med pa 'bras bu'i tshul du zhes bya bas gnas dang rgyu yin pa de'i phyir ldog pa 'bras bu yin no zhes bstan pa'i phyir ro/ /da ni/ gang gis myos shes myos 'gyur btung ba ni/ /zhes bya ba la sogs pas nyes byas ston par byed de/ myos par 'gyu ba yin no snyam du 'du shes pa ni myos 'gyur 'du shes te/ de gang la yod pa de ni myos shes yin no/ /btung bar bya ba yin pas na btung ba ste/ myos par 'gyur ba yang de yin pas na myos 'gyur btung ba'o/ /de dge tshul gang gis myos byed du 'du shes pas myos par 'gyur ba'i btung ba 'thungs na dge tshul de la nyes byas kho nar 'gyur ro/ / 'du shes smos pas ni 'di skad du bslab pa'i gzhi de ni 'du shes gtso cher byed pa yin no zhes bstan par 'gyur ro/ /ci thams cad du'am zhe na myos 'gyur zhes smos te/ gal te myos 'gyur te myos par 'gyur ba de la yongs su rdzogs pa'i nyes byas su 'gyur ro zhes bya ba'i don to/ /nyid ni nyes byas kyi nyes pa kho nar 'gyur gyi tha ma ni ma yin no zhes nges par gzung ba'o/ /myos par 'gyur ba'i ltung ba 'ba' zhig ma yin gyi/ 'on kyang snyigs ma za ba la yang nyes par 'gyur ro zhes ston par byed de/ snyigs ma dag za ba ni snyigs ma zos pa ste/ snyigs ma za ba de las nyes byas kyi gnod par 'gyur zhing sbang ma zos pa yang de bzhin du 'gyur ro zhes bya bar sbyar ro/ /bcos pa'i chang gi nur rtsi ni snyigs ma yin la sbyar ba'i chang gi nur rtsi ni sbang ma yin te/ de dag zos na yang ji ltar myos 'gyur 'thungs na yongs su rdzogs pa'i nyes byas su 'gyur ba de bzhin du nyes byas kyi rdo rje'i gnod par 'gyur ro zhes bya ba ni tshig gi lhag ma yin no/ /rdo rje'i gnod pa ni rdo rje'i gnod pa'o/ /nyes byas kho na'i rdo rje'i gnod pa ni nyes byas rdo rje'i gnod par 'gyur te rdo rjes gnod pa bzhin du nyes byas kyi nyes pa yang gdung bar byed pa nyid yin pa'i phyir ro/ / dang ni nyes byas su sdud par byed pa'o/ /da ni/ gal te phabs dang rtsa ba la sogs pa/ /myos skyed za ba chung ba nyid du 'gyur/ /zhes bya bas nyes byas chung ba ston par byed de/ gal te phabs kyi ril bu zos na dge tshul de la nyes byas chung bar 'gyur ro/ /ni'i sgra ni snga ma las khyad par du byed pa'i don te/ rtsa ba la sogs pa za na zhes bya ba la sogs par sbyar ro/ /khyad par ji lta bu zhe na/ myos skyed ces bya ba smos te/ gal te rtsa ba la sogs pa myos pa skyed par byed pa gang yin pa de ni de lta bur gyur pa zhes bya ba'i tha tshig go/ /de la phabs kyi rdog ni myos par 'gyur ba'i don gyi sa bon gang zhig sbyar ba yin no/ /gang dag la myos par 'gyur ba med pa de ci btung bar bya ba'am zhe na/ gang la myos 'gyur ro dang dri yod pa/ /myos 'gyur med kyang btung bar bya ba min/ /zhes bya ba smos te/ myos par 'gyur ba ni myos 'gyur te/ myos par 'gyur ba de nyid la med du zin kyang btung bar bya ba ma yin no/ /ci'i phyir btung bar mi bya zhe na/ smras pa/ gang la myos 'gyur dri dang ro yod pa ste/ myos par 'gyur ba'i dri dang ro rdzas gang dag la yod cing de lta bur gyur ba gang yin pa de ni myos par byed pa ma yin du zin kyang btung bar mi bya'o/ /kyang gi sgra ni myos par 'gyur ba 'ba' zhig ma yin gyi 'on kyang myos par 'gyur ba ma yin yang btung bar mi bya'o zhes bstan pa'i phyir ro/ /ni'i sgra ni gang gi phyir gyi don te gang gi phyir myos par 'gyur ba med kyang dri dang ro yod pa de'i phyir spang bar bya ba yin no zhes bstan pa dang rim pa gzhan du blta bar bya ba'i don yin no/ /'di la yang nyes pa chung bar bshad par bya'o/ /lus la bsku ba la sogs pa nad kyi gnyen po'i phyogs kyi don du nad pa kho nas bya'i gzhan dag gis ni ma yin no zhes bstan pa'i phyir dang / lus la bsku dang khur bar bcang ba ni/ /myos 'gyur nad pa ma gtogs ma byed cig / ces bya ba smos te/ chang gis lus la bsku ba dang khur bar bcang bar bya'o zhes sdud pa de'i phyir gzhan du nad kyi rgyu mtshan gyis kyang btung bar bya ba ma yin no zhes bshad par 'gyur ro/ /ci ste yang myos byed btung ba ni bcas pa'i kha na ma tho ba dang bcas pa de lta na yang nad kyi rgyu mtshan gyis lus la bsku ba dang / khur bar bcang ba ma gtogs pa gzhan gyi don du mi bya ste/ nad kyi gnyen po'i phyir btung bar bya ba yang ma yin pa de nyid kyi phyir/ myos 'gyur rtswa mchog tsam yang btung mi bya/ /zhes brjod pa yin no/ /bskol bar gyur tam zhes bya ba la sogs pas sngar bshad pa'i dmigs kyis bsal ba smras pa yin te/ bskol ba de myos par 'gyur ba bskol bar gyur pa gang gi tshe 'thungs par gyur pa de'i tshe nyes pa med pa yin no/ /nyid ni gang gi phyir bskol bas myos par 'gyur ba'i dngos po las nyams par gyur pa de'i phyir 'thungs pa la nyes pa med pa kho na yin zhes nges par gzung ba'o/ /de bzhin du de dang kha dog tsam 'dra bar gyur tam zhes bya ba la myos par 'gyur ba de dang kha dog tsam 'dra bar gyur pa yang 'thungs na nyes pa med do zhes bya bar sbyar ro/ /'am ni sdud par byed pa yin no/ /de bzhin du ma red gang yin zhes bya ba la sogs pa la gang yang ma red pa dang / nyams pa myos par 'gyur ba'i dngos po gang la yod pa de yang 'thungs pa la nyes pa med do zhes bya bar sbyar bar bya'o/ /'am gyi sgra ni kyang gi sgra'i don yin no/ /gang gi phyir zhe na/ gang gi phyir bslab pa'i gzhi 'di la myos par 'gyur ba'i rgyu spangs pa de'i phyir nyes pa med do zhes bya ba'i tha tshig go/ /da ni myos 'gyur phyogs su gtogs pa zhes bya ba la sogs pas yid kyi nyes byas 'chad par byed de/ 'di lta ste/ btsong dang / ri sgog dang / sgog skya ni myos 'gyur gyi phyogs su 'dod cing sems te/ ji ltar myos par 'gyur ba shin tu smad pa de bzhin du 'di yang zhes bstan par bya ba'i phyir ro/ /'di lta ste'i sgra ni yang gi sgra yin pas ni 'di skad du myos par 'gyur ba'i phyogs su gtogs pa yin pa 'ba' zhig tu ma zad kyi dus ma yin pa'i zas kyi phyogs su gtogs pa yang yin no zhes bstan par 'gyur ro/ /de ltar yang ni zhes bya ba nye bar dgod par bya ba yin te myos par 'gyur ba dang 'dra bar shin tu smad par bya ba nyid yin pa'i phyir ro zhes de ltar 'dul ba rnam par 'byed pa las rnam par dpyad pa yin no/ /de ltar yang bcom ldan 'das kyis nad pa la rjes su gnang ba yin gyi gzhan dag la ni nyes pa dag tu 'gyur te/ myos par byed pa dang 'dra bar dregs par byed pa'i rgyu nyid yin pa'i phyir ro/ /de dag mkhas pa'i lung gis nad pa la zhes bya ba la sogs pas de ston par byed de/ btsong la sogs pa de dag gnang ba ni bcom ldan 'das kyis bcas pa mdzad pa'o/ /mkhas pa'i lung ni sman pa'i lung las zhes bya ba'i tha tshig go/ /gang du zhe na/ ma dad mngon sum min zhes bya ba smras te/ mi ma dad pa'i mngon sum min to/ mthong ba'i phyogs su ma yin te de la smod pa srid pa'i phyir ro/ /de la longs spyod pa'i don du ji ltar bya zhe na/ gtsug lag khang gi phyi rol khyim byas la zhes bya ba la sogs pa smos te/ gtsug lag khang gi phyi rol du khyim byas pa la zhugs nas so/ /ci'i phyir zhe na/ phan par bya phyir zhes smos pa yin no/ /khyim khyad par ji lta bu zhe na/ dben par zhes bya ba smos te/ skabs dang mthongs bsgribs par gyur pa gang la yod pa de ni dben pa yin te der zhugs nas zhes bya ba'i don to/ /de la phan pa byed pa'i dus der yang dge 'dun gyi mal stan dag nad pa la nam yang / bcom ldan 'das kyis gnang ba yang med de/ dri ngan pas sme bar 'gyur ro zhes bya ba'i don du khong du chud par bya'o/ /ci tsam na gtsug lag khang du 'jug par bya ba yin zhe na/ dri nga bral bar gyur nas de'i 'og tu/ /zhes bya ba smos te/ dge tshul gang gi lus dri nga ba dang bral bar gyur pa na ste/ zhag bdun dag na dri nga ba yang lus dang bral bar gyur pa'i 'og tu gtsug lag khang du 'jug cing rab tu 'jug par bya'o/ /ci'i phyir zhe na/ rang gzhan gnas nas zhes bya ba smos pa yin no/ /ni'i sgra ni nges par gzung ba'o/ /dge tshul gyi tshig le'ur byas pa las myos par byed pa btung ba las slar ldog pa ste bslab pa'i gzhi lnga pa'o// //da ni/ gar dang glu dang brdung bar bya ba rnams/ /sdom can bdag dang gzhan gyis bya ba min/ /zhes bya ba la sogs pas bslab pa'i gzhi drug pa 'chad par byed pa yin te/ gar dang glu dang brdung bar bya ba dag sdom can bdag rang gis mi bya zhing gzhan gyis kyang bya ba ma yin no/ /gang cung zhig rgod pa'i bsam pas lus rab tu skyod par byed pa ni gar yin la/ gang cung zhig de nyid kyi bsam pas dbyangs len par byed pa ni glu yin no/ /brdung bar bya ba dag ni gang 'ga' zhig tu rdza rnga dang rnga bo che dag la tha na sor mo dag gis kyang rim gyis sam/ go rims ma yin pas rdung bar byed cing rab tu skyod par byed pa yin te/ rang gi brla la sogs pa la brdeg pa la sogs pas kyang zhes bya ba'i tha tshig go/ /bslab pa'i gzhi 'di ni 'du shes gtso bor gyur pa nyid yin pas gang gi phyir blo sngon du btang bas byas na blo sngon du song bas zhes bya ba'i dbang du byas nas nyes pa yod pa yin no/ /ci 'di rgyu gang gis mi bya ba yin zhe na/ 'di dag 'khor bar chags par byed pa'i rgyu zhes bya ba smos te/ 'khor ba la chags pa ni 'khor bar chags pa ste/ kun nas zhen pa zhes bya ba'i don to/ /gar la sogs pa byed pa 'di ni 'dir rgyu ste byed pa'i rgyu zhes bya ba'i don to/ /gang gi phyir gar la sogs pa la rab tu dga' ba ni skyo bar mi 'gyur ba de'i phyir mngon par dga' ba ni 'khor ba'i rgyu yin no/ /de lta bur gyur pa byas na cir 'gyur zhe na/ 'on kyang ji ste byas na nyes byas su 'gyur zhes bya ba smos te/ gar la sogs pa 'on kyang nyes byas su 'gyur ro/ /'di la nyes byas yod pa'i phyir nyes byas dang dge tshul ldan par 'gyur ro/ /'on kyang zhes bya ba ni gal te yang 'khor bar chags pa'i rgyu yin pa de lta na yang zhes bya ba'i tha tshig go/ /bcom ldan 'das la mchod pa'i don du ji ltar bsgrub par bya/ /de'i phyir yang mi bskul lam zhe na smras pa/ de la gzhan gyi don lta zhog /bcom ldan 'das la mchod pa bya ba'i don dang dgos pa 'dis zhes bya ba ni mchod pa'i phyir te/ de'i dngos po de la yang mchod pa'i rgyu mtshan du yang bskul bar mi bya'o/ /ji ltar mi bskul zhes/ brdung ba dang glu long zhes bya ba smos pa yin no zhes ni de ltar zhes bya ba'i don yin te/ 'di skad du de lta bur gyur pa'i dngos kyi tshig brjod par mi bya'o zhes bstan par 'gyur ro/ /de bzhin du gar la yang de skad du brjod par mi bya'o/ /'o na ji ltar bcom ldan 'das la mchod pa bya ba'i phyir bskul bar bya zhe na/ /lha dang lha min zhes bya ba la sogs pa smos te/ lha dang lha ma yin ni lha dang lha min dbang po ste/ des mchod pa'i zhabs kyi rdul sangs rgyas gang la mnga' ba de ni lha dang lha min dbang pos mchod pa'i zhabs rdul can te/ de la rang gi bzos mchod pa gyis zhes bya ba ni tshig gi lhag ma'o/ /'on kyang zhes bya ba ni ji ste yang zhes bya ba'i don yin no/ /glu'i dmigs kyis bsal ba ni/ chos rnams dbyangs su 'don la nyes pa med/ /ces bya ba la sogs pa la/ /chos mnyan pa sbyin pa'i glu la ni nyes pa yod pa ma yin no/ /ni'i sgra ni snga ma las khyad par du bya ba dang / rim pa gzhan du'i don to/ /ston pa'i yon tan brjod kyang de bzhin no/ /zhes bya ba la/ ji ltar snga ma la nyes pa yod pa ma yin pa de bzhin du ston pa bcom ldan 'das kyi yon tan brjod pa ste/ ston pas nye bar mchod pa la nyes pa yod pa ma yin no zhes bya ba'i tha tshig go/ /gang yang dbyangs mi shes pa yin na ji ltar bya zhe na/ dbyangs la mi mkhas dam pa'i chos kyi phyir/ /zhes bya ba la sogs pa smos te/ dbyangs mi shes pa ni dbyangs la mi mkhas pa'i dge tshul dben par zhugs te bslab par bya'o/ /ci'i rgyu mtshan gyis she na/ dam pa'i chos kyi phyir zhes smras pa yin no/ /ni'i sgra ni 'dir yang dbyangs la mi mkhas na zhes snga ma las khyad par du byed pa'i don to/ /nyid ni don gzhan rnam par gcod pa'o/ /dben par zhugs te zhes smos pa ni bag med pa rnam par spang ba'i phyir ro/ /bslab par bya zhes bya ba ni 'di bslab pa'i gzhi ni ma yin gyi/ gal te dam pa'i chos la bstod pas nye bar mchod pa'i phyir bslab pa la nyes pa yod pa ma yin no zhes bya ba de lta bu'i tshig de dag ni mchog tu zhes bya bar shes par bya'o/ /'dir gar la sogs pa bdag nyid byed pa dang / gzhan byed du bcug na yongs su rdzogs pa'i nyes byas su 'gyur la/ gal te mchod pa'i rgyu mtshan gyis byed na de'i tshe na smad do/ / da ni gar la sogs gtogs pa zhes bya ba la sogs pas yid kyir 'gyur ba 'chad par byed de/ chu'i rnga la sogs pa gang yin pa de ni chu'i rnga la sogs pa'o/ /gang de ni gar la sogs pa'i phyogs su gtogs pa yin pa de'i phyir yid kyir 'gyur te/ chu'i yul la rtse ba nyams su myong bar byed na/ zhes bya ba'i tha tshig go/ /sogs pa'i sgras ni rkyal la sogs pa bsdu'o/ /chu'i rnga ni chu la brdung ba yin no/ /de bzhin du chu la byi 'dzul byed pa ni 'og tu 'gro bar byed pa'o/ /de bzhin du ring du 'gro ba zhes bya ba ni chu'i nang du nub par gyur pa nyid kyis dud 'gro bzhin du 'gro bar byed pa'o/ / 'byung ba ni 'og tu 'jug pa las steng du 'byung bar byed pa'o/ /de bzhin du mchong ba dang rgyug pa ni mchong ba dang rgyug pa ste/ de la sogs pa gang yin pa de la de skad ces bya'o/ /mchong ba ni lteng ka la sogs pa'o/ /sogs pa smos pas ni rkang pa phyung zhing phyung zhing 'gro ba 'am/ bgrad par byas nas 'gro ba bsdu'o/ /de dag thams cad rtsed mo'i rgyu mtshan yin na bkag pa yin no/ /de dag nyes pa'i gnyen po'i phyir rlung la sogs pa la nyes par mi 'gyur ro zhes bstan pa'i phyir rtsed mo smos pa yin no/ /so snang gyur cing de bzhin sgra che ba/ /'phags pas rta gang dang ni gtam mi bya/ / zhes bya ba la/ so snang bar gyur ba ni gsal por gyur pas 'phags pa ste/ rab tu byung bas dgod par mi bya zhing gtam mi bya zhes bya bar sbyar ro/ /de bzhin gyi sgra ni de bzhin sgra che bar bshad ma thag pa de mi bya'o zhes bya bar sbyar bar bya ba'i phyir ro/ /dang ni sdud par byed pa yin no/ /sgra che ba smos pas cung zhig dgod pa la nyes pa med pa yin te/ de skad du yang bzhin gyi mdog gsal ba dang / 'dzum pa sngon du 'gro bas zhes bya ba la sogs pa 'byung ba yin pas kha shin tu gdangs par mi bya'o/ /gang gi tshe kha glal bar 'gyur ba de'i tshe ji ltar bya ba yin zhe na/ glal byung na ni lag pa'am chos gos kyi gra yang rung ste/ kha ni dgab par bya zhes bya ba smos te/ lag pa'am gos kyi mtha' ma dag gis kha legs par bkab ste glal bar bya'o/ /'on te 'ga' zhig tu gzhan gyi dbang gis mi nus pa de'i tshe na nyes pa med de/ dang ni ma bstan pa sdud par byed pa yin te/ dper na kha gdangs nas chu btung ba de lta bu'o/ /sngar bshad pa'i 'byung ba la sogs pa'i dmigs kyis bsal ba ni/ sman pa'i lung ngam yang na bslab pa'i phyir/ /zhes bya ba la sogs pa smos te/ nad pa la phan pa'i don du sman pa'i lung gis dben pa'i sa phyogs su 'byung ba la sogs pa byas na nyes pa med pa yin te/ sman pa'i lung kho nas rgyal ba la nyes pa yod pa ma yin no zhes brjod par bya'o/ /yang na bslab pa'i phyir te/ de lta na yang dben pa'i phyogs su rkyal pa la nyes pa med do/ /a tha'i sgra ni yang na zhes bya ba'i don yin no/ /gang du bud med sgrub byed khrus byed pa/ /mu de thag ring du ni spang bar bya/ /zhes bya ba la gang du bud med khrus byed pa dang / gang du sgrub par byed pa glang po la sogs pa khrus byed pa'am/ chu 'thung ba'i mu de thag ring ste/ ring ba nas ring por spang bar bya ba yin no/ /'dod chags skyed pa'i rgyu mtshan rab tu bcom par bya ba'i phyir dang / kun nas rtsod pa yongs su spang bar bya ba'i phyir zhes bya ba'i dgos pa yod par rig par bya'o/ /dge tshul gyi tshig le'ur byas pa las gar la sogs pa las slar ldog pa ste/ bslab pa'i gzhi drug pa'o// //da ni dri'i byug pa'am me tog phreng ba'ang rung zhes bya ba la sogs pas bslab pa'i gzhi bdun pa 'chad pa yin te/ tsan dan la sogs pa'i dris rjes su bskus pa de ni dri'i byug pa ste/ dge tshul gang gis bcangs na/ glen pa de ni nyes byas nyid kyis gtses par 'gyur zhes bya bar sbyar bar bya'o/ /de bzhin du me tog phreng ba ste/ brgyud ma de yang mgo bo'am ske la btags na de yang nyes byas nyid kyis gtses par 'gyur ro zhes bya bar sbyar ro/ /phreng ba ni me tog tsam gyi nye bar mtshon par byed pa yin no/ /de ltar lus la gur gum la sogs pa'i mdog gi kha dog gis bcangs pa de yang gtses par 'gyur ro zhes bya bar sbyar bar bya'o/ /gang la zhe na/ lus la zhes smos pa yin no/ /khyad par ji lta bu zhe na/ mi gtsang snod kyi zhes bya ba la mi gtsang ba ni gtsang ba ma yin pa ste/ de'i snod du gyur pa de la zhes bya ba'i don to/ /gtses pa ni rnam par gtses pa zhes bya ba'i don to/ /nyid ni nyes byas kyi nyes pas gtses pa kho na zhes rim pa gzhan dang nges par gzung ba yin no/ /'di skad du dge tshul nyes byas kyi nyes par 'gyur ro zhes bstan par 'gyur ro/ /de bzhin du/ dag byed dang ni chos gos bdug pa dang / /zhes bya ba la sogs pa la/ dag byed dang chos gos la spos kyis bdug pa dang / sen mo bdar bas 'chos pa dang / mig sman dang / mchu dmar por byed pa dang / de bzhin du long mo yan chad de gong du so phag gis bdar zhing dri ma med par sbyangs pa zhes bya ba la sogs pa de lta bu la sogs pa kun du spyod pa na nyes byas su 'gyur ro/ /ci thams cad du'am zhe na/ g.yan pa med par zhes smras te/ gal te g.yan pa yod pa de'i tshe nyes par mi 'gyur ro/ /dag byed ces bya ba ni rdzas dri bzang ba can gyis dag byed du byas pa mgo la bcangs pa'o/ /gzhan yang chos gos la dri bzang pos bdug par byed pa dang / sen mo 'chos pa zhes bya ba ni 'tsher bar byed pa'i bsam pas yin gyi dri ma bsal bar byed pa'i phyir ni ma yin no/ /gzhan yang mchu dmar por byed pa ni so rtsi za ba la sogs pas so/ /g.yan pa ni tshig rlung dang khrag la sogs pa'i nyes par mtshon par byed pa yin te/ long mo'i 'og man chad la ni nyes pa med do/ /nyes byas nyid ces bya ba nyid ni lhag ma yang ma yin la yid kyir 'gyur ba yang ma yin no zhes bshad pa'i phyir ro/ /bcas pa'i kha na ma tho ba nyid yin pa'i phyir dri'i byug pa nyes byas su 'gyur ba de lta na yang nad pa des dben par 'dug ste nad la phan pa'i phyir tsan dan la sogs pas bsku bar bya'o/ /ci'i phyir zhe na/ spras pa 'jig rten gyi ma dad pa ni 'jig rten ma dad par 'gyur ba ste/ de spang bar bya ba'i phyir ro/ /gang gi phyir de 'dra ba mthong bar 'gyur na ma dad pa ste/ dad pa ma yin pa skye bar 'gyur ba de'i phyir yongs su spang bar bya ba yin no/ /gang gi tshe chos ston pa la sogs pas nye bar 'khod pa na yon bdag gis dri byin na de ci ltar bya zhe na/ dad pa dag gis rkang pa dris bskus na zhes bya ba la sogs pa smos te/ dad pa dge bsnyen gyis rkang pa la dris bskus na sdom can gyis chos ston gyi dus phyis bkru bar bya'o/ /gang gi tshe zhe na/ smras pa yon bdag gis ma mthong bar ro/ /ni ni snga ma las khyad par du byed pa'i don yin no/ /de bzhin du dad pas phul ba'i me tog dri zhim po can 'phags pa ste rab tu byung bas bsnam par bya'o zhes bya bar sbyar ro/ /ci zhig byas nas she na/ mig la phan no zhes smos te/ me tog dri zhim po can thams cad mig la phan no zhes bya ba ni dbang du byas nas so/ /chags pa'i blo gros ni chags blo ste nyes byas chung bar 'gyur ro/ /da ni dri la sogs pa'i skabs dbye'o/ /zhes bya ba la sogs pa yid kyir 'gyur ba rjod par byed pa yin te/ dri la sogs pa'i phyogs su gtogs pa gang yin pa de dag gi skabs 'byed pa'o/ /da ni da ltar te nyes byas kyi de ma thag pa'i skabs su zhes bya ba'i don to/ /chu la sogs par gdong ni blta mi bya/ /zhes bya ba la sogs pas de ston pa yin te/ chags pa'i sems kyis chu la sogs pa dag la gdong blta bar mi bya'o/ /sogs pa'i sgras ni me long la sogs pa gzung ngo / /ci rnam pa thams cad du nyes par 'gyur ram zhe na/ sngon dang da ltar bdag lus cir 'gyur zhe'am/ /zhes bya ba la sogs pa smos te/ rang gi lus dang khog pa'i sngon dang da ltar gyi gnas skabs gang la rnam par dpyod pa'i bsam pa dang / skyo ba skyed pa'i phyir sngon bdag gi lus ngar la bab pa da ltar gyi gnas skabs ji 'dra snyam pas gdong la lta na nyes pa med do/ /ci ngo gdong du gtogs pa'i rma 'di drubs sam 'on te ma yin zhes rnam par brtag pa'i phyir blta ba la nyes pa med do/ /gang gi tshe zhe na/ nyes par mi 'gyur ro zhes smos pa yin no/ /gang gi gdong la sogs pa la lta ba la nyes par mi 'gyur te bsam pa'i dbang gis zhes bya ba'i tha tshig go/ /se ral kha dang mdzub ris tshud gsum dang / /rgyan rnams thams cad yongs su spang bar bya/ /zhes bya ba la se ral kha ni tshangs pa'i skud pa'o/ /mdzub ris ni dpral ba'i phyogs su thal ba'am/ gzhan 'ga' zhig gis mdzub ris byas pa'o/ /tshud gsum ni bkra shis pa'i phyir la gdar gyi phyogs su skud pa btags pa'o/ /se ral kha dang mdzub ris dang tshud gsum ni zhes brjod par bya'o/ /bshad ma thag pa de dag sor gdub la sogs pa'i rgyun gzhan dang gzhan thams cad kyang yongs su spang bar bya'o/ /nad sogs zhi phyir dpung pa g.yon pa la/ /sngags la sogs pa'i zhes bya ba la sogs pas de'i dmigs kyis bsal ba smras te/ nad la sogs pa zhi bar byed pa ni nad sogs zhi ba'o/ /sogs pa'i sgras ni mi ma yin pa la sogs pa yongs su bsdus pa yin no/ /de'i don ni nad sogs zhi phyir sngags la sogs pa'i skud pa sdom can gyis gdags par bya'o/ /sngags la sogs pa gang yin pa de ni sngags la sogs pa ste/ sogs pa'i sgras sman yongs su bsdu'o/ /de dang ldan pa'i skud pa ni sngags la sogs pa'i skud pa ste/ sdom can dge tshul gyis bcang bar bya'o zhes bya ba'i don to/ /gang du gdags par bya ba yin zhe na/ dpung pa g.yon par zhes smras te/ de yang dpung pa'i rtsa bar zhes bya bar rig par bya'o/ /ni'i sgra ni nad la sogs pa'i gnyen por gdags pa la nyes pa yod pa ma yin no zhes snga ma las khyad par du byed pa'i don to/ /kyang gi sgra ni gzhan rang bzhin gyis kha na ma tho ba nad kyi gnyen po'i don du gdags par bya ba ma yin pa 'ba' zhig tu ma zad kyi 'on kyang sngags la sogs pa'i skud pa dag kyang zhes sdud pa ma yin pa dang / rim pa gzhan yin no/ /nad la sogs pa sos par gyur na ji ltar bya zhe na/ nad sos nas ni skud pa bkrol nas kyang zhes bya ba la sogs pa smos te/ nad sos shing bral bar gyur nas skud pa de dpung pa las bkrol nas gzhag par bya'o/ /gang du zhe na/ bu ga gtsang ma'i phyogs su zhes bya ba smos te/ gtsang mar gyur pa'i bu ga'i cha ni bu ga gtsang ma'i phyogs te/ka ba la sogs pa'i zhes bya ba ni tshig gi lhag ma yin no/ /gtsang ba nyid kyang gnod pa med par gyur pa nyid yin pa'i phyir ro/ /sdom can gyis ni sna tshogs gdugs mi bcang / /grong du yu ba bsgreng ba gnang ba med/ /lo ma dang ni smyug ma gnyis kyi gdugs/ /yu ba'i tshad ni gdugs kyi tshad tsam yin/ /zhes bya ba la/ sdom can gyis gdugs bcang bar mi bya'o/ /khyad par ji lta bu zhe na/ sna tshogs zhes bya ba smos te/ rma bya'i gdugs lta bu'o/ /sna tshogs pa bkag pas khra bo ma yin pa bcangs pa la ni nyes pa med do/ /de'i tshe yang grong du gnang ba med pa ste bkag pa yin no/ /khyad par ji lta bu zhe na/ yu ba bsgreng ba ste yu ba gyen du bsgreng ba yin pa de'i phyir grong gi nang du gdugs logs su bsnyal nas 'gro bar bya'o/ /dang ni sna tshogs pa bkag pa 'ba' zhig tu ma zad kyi khra bo ma yin pa yang grong du bkag pa yin no/ /zhes sdud par byed pa'o/ /gdugs de yang rnam pa gnyis te zhes bstan pa'i phyir lo ma dang ni smyug ma gnyis kyi gdugs zhes bya ba smos te/ lo ma las byas pa ni lo ma'i yin te lo ma zhes bya ba ni shing lo rjod par byed pa yin te/ dper na ta la'i gdugs lta bu'o/ /smyug ma las byas pa ni smyug ma'i yin te/ rnam pa 'dis gdugs rnam pa gnyis su 'gyur ro/ /tshad pa las skyob par byed pas na de ni gdugs zhes bya'o/ /de lta bur gyur pa bshad cing gnang ba'i gdugs de'i tshad tsam zhes bya ba la gdugs kyi tshad du yu ba bshad pa yin te/ khog pa'i tshad kyi yu ba bya'o zhes bya ba'i tha tshig go/ /dang ni lo ma la sogs pa'i gdugs bshad pa dang / de'i tshad kyi yu ba bshad pa yin no zhes sdud par byed pa'o/ /dge tshul gyi tshig le'ur byas pa las dri la sogs pa las slar ldog pa ste bslab pa'i gzhi bdun pa'o// //da ni/ che zhing mtho ba'i mal stan nyal ba ni/ /zhes bya ba la sogs pas bslab pa'i gzhi brgyad pa 'chad pa yin te mal stan chen po la dge tshul nyal bar byed na gzir bar 'gyur ro/ /gang gis she na/ nyes byas bkra mi shis pas zhes bya ba smos te/ nyes byas kho na bkra mi shis pa yin pas nyes byas bkra mi shis pa ste/ shis pa ma yin pa de'i phyir des zhes bya ba'i don to/ /yang na mal stan mthon po la nyal ba ste de la yang nyal bar byed na gzir bar 'gyur ro zhes bya ba thams cad brjod par bya ba yin te/ de la nyal na nyes byas kyi nyes par 'gyur ro zhes bya ba'i tha tshig go/ /mal stan de gnyis kyi rang bzhin ci yin zhes bstan pa'i phyir/ khru gang tshad las 'das pa mtho ba yin/ /zhes bya ba la sogs pa smos te/ khru gang tshad las 'das pa zhes bya ba ni khru'i tshad las lhag par gyur pa'o/ /ni'i sgra ni gang gi phyir gyi don yin te/ gang gi phyir de lta bur gyur pa de ni mthon po yin pa de'i phyir 'di la nyal bar mi bya'o/ /rin chen la sogs rkang rgyan che ba yin/ /zhes bya ba la rin po che la sogs pas rkang pa rnam par spras pa'i phyir rin chen la sogs rkang rgyan te/ de lta bur gyur pa de ni mal stan chen po yin no/ /sogs pa'i sgras ni gser la sogs pa bsdu'o/ /ni'i sgra ni snga ma las khyad par du byed pa'i don to/ /mtho ba'i mal stan rin chen 'od spras pa/ /zhes bya ba la sogs pas dmigs kyis bsal ba smras pa yin te/ stan mthon po la 'dzegs nas chos bsgrags pa rab tu sbyin par bya'o/ /gang gi phyir bde bar gshegs pa'i chos sri zhu bya ba dang / mchod par bya ba yin pa'i phyir ro/ / khyad par ji lta bu zhe na/ rin chen 'od spras zhes bya ba smos te/ rin po che dag gi 'od ni rin chen 'od de 'od zer de dang 'dra bar 'bar ba'i gzi brjid bzang po dang ldan pa de lta bur gyur pa de la 'dzegs nas zhes bya ba'i tha tshig go/ /ci zhig mngon sum du byas nas she na/ 'dir ni 'du byed 'jig par bsams nas ni/ /zhes bya ba la sogs pa smos te/ 'du byed rnams 'jig cing nyams pa de ni 'du byed 'jig par bsam pa ste/ dmigs nas zhes bya ba'i don to/ /'dir ni zhes bya ba ni chos sgrogs pa'i dus su'o/ /de lta bur dmigs pas rin po che la sogs pas spras pa'i stan la 'dzegs nas chos bsgrags pa sbyin pa la nyes pa yod pa ma yin no/ /gnod sbyin gnas dang lha yi gnas dag dang / /klu yi gnas su rin chen 'bar ba rnams/ /khyim pas bstabs kyang sdom can mi dag par/ /bsgoms nas 'dug par gyur kyang nyes pa med/ /de bzhin du khyim gyi nang du khyim pas bstabs pa ste khyim gyi nang der khyim pas bstabs pa'i stan la chos bsgrags pa sbyin pa las dus gzhan gyi tshe yang 'dug par bya'o/ /khyad par ji lta bu zhe na/ rin po che de dag gi 'od zer 'bar ba des gsal bar byas pa la yang ngo / /'di skad du khyim pas khyim nang du rin po che la sogs pas spras pa'i stan bshams pa la rjes su gzung ba'i blos 'dug par bya'o zhes bstan par 'gyur ro/ /ji ltar bsams nas 'dug par bya zhe na/ mi rtag par bsgoms nas zhes bya ba smos te/ mi rtag par bsgoms pa ni mngon sum du byas pa yin te/ 'dus byas thams cad ni mi rtag pa'o zhes bsgoms pa 'dis de'i rgyu can sems rgod pa mngon par bcom nas yon bdag gi bsod nams spel bar bya ba'i phyir 'dug par bya'o/ /de bzhin du gnod sbyin gyi gnas te khyim pa de dang de bzhin du lha'i gnas te khyim du sdom can yid la byed pa des 'dug pa de la nyes pa yod pa ma yin no/ /klu'i gnas te khyim du bsam pa de nyid kyis 'dug pa de la nyes pa yod pa ma yin te/ gang gi phyir sa gzhi dang them skas rin po che'i rang bzhin ni de dag gi bsod nams las byung ba'i phyir ro/ /dang ni thams cad du sdud pa'o/ /ji ltar yang bslab pa'i gzhi 'di dngos po gtso bor gyur pa yin te/ rtog pa spangs pa tsam gyis gnas pa la sogs pa la nyes par 'gyur ba de lta na yang mi rtag pa'i yid la byed pa'i rnam pa med par 'dug na kha na ma tho ba chung bar 'gyur la/ yid la byed pa'i rnam pa des kyang yod pa ma yin par rig par bya'o/ /da ni/ mtho la sogs phyogs nyin par nyal ba dang / /zhes bya ba la sogs pas yid kyi nyes par 'gyur ba 'chad pa yin te/ nyin par nyal na stan mthon po la sogs pa'i phyogs su gtogs par 'gyur ba yin no zhes bya ba'i don yin pa de'i phyir nyin par nyal ba yid kyi nyes par 'gyur ro zhes bya ba'i tha tshig go/ /de la gnyid kyis zil gyis mnan par gyur pa de'i tshe ji ltar bsgrub par bya ba yin zhe na/ gnyid kyi nad du gyur pa zhes bya ba smos te/ gal te gnyid kyis nad du gyur cing gcing bar gyur pa de dag la gnang ba ste/ bcom ldan 'das kyis nyin par nyal ba de rjes su gnang ba yin no zhes bya ba ni lhag ma'o/ /dus ci srid cig tu zhe na/ cung zad ces bya ba smos pa yin no/ /cung zad ces bya ba'i tshig ni dus ci tsam gyis gnyid sangs par gyur nas dge ba'i phyogs la sbyor bar bzod pa de tsam nye bar mtshon par byed pa yin par rtogs par bya'o/ /nad pa dang ni nad g.yog ma gtogs par/ /sdom can mar me snang la nyal ma gnang / /zhes bya ba la/ mar me'i snang ba la nyal ba ni mar me snang la nyal ba ste/ nyi ma dang zla ba'i snang ba las snang ba dang ldan pa'i phyogs gzhan de la sdom can ma gnang ba yin no zhes bya ba'i tha tshig go/ /ci thams cad dam zhe na/ smras pa/ nad pa ma gtogs pa dang nad pa de'i nad g.yog byed pa'i sdom can ma gtogs par sdom can gzhan dag ces bya ba'i don to/ /dang ni sdud par byed pa yin no/ /gding ba med par nyal ba rigs pa min/ /zhes bya ba la/ dge 'dun gyi mal stan la gding ba med cing gding ba dang bral bas nyal bar rigs pa ma yin pa de'i phyir/ dge 'dun gyi mal stan gding bas g.yogs nas yongs su longs spyad par bya ba yin no/ /longs spyod pa de la yang g.yogs ma med pa nyid la gding bas g.yogs pa nyid ni 'dug pa la bar du chod pa'i dgos pa nyid yin pa'i phyir ro/ /de yang 'dir khri dang khri'u las gzhan pa nyid la zhes rtogs par bya ste/ de nyams par 'gyur ba'i phyir ro/ /gzhan yang / mal stan ko lpags nam yang gnang ba med/ /ces bya ba la/ ko lpags kyi mal stan longs spyod pa nam yang gnang ba med pa kho na yin te/ ko lpags kyi mal stan yongs su longs spyod par byed na nyes byas kyi nyes par 'gyur ro zhes bya ba'i tha tshig go/ /ci rnam pa thams cad kyi thams cad du ma gnang ba yin nam zhe na/ smras pa/ khyim pa'i khyim du stan tsam nyi tshe gnang zhes bya ba la/ khyim pa'i khyim du stan nyi tshe tsam yongs su longs spyod par gnang ba yin no/ / ni'i sgra ni gzhan gtsug lag khang la sogs par ma yin no zhes khyad par du bstan pa'i phyir ro/ /tsam zhes smos pa ni mal stan rnam par bcad pa yin no/ /ci thams cad du tshul 'di yin nam zhe na/ rdo 'jog tu ni gnyi ga'ang gnang ba yin/ /zhes bya ba la/ rdo 'jog ces bya ba ni yul mtha' 'khob yin te/ de la mal dang stan gnyi ga yang gnang ba ste/ bcom ldan 'das kyis gnang ngo zhes bya ba ni lhag ma'o/ /rdo 'jog las gzhan 'ga' zhig tu yang ko lpags kyi mal stan longs spyod par gnang ba med pa de nyid kyi phyir slob dpon yon tan 'od kyis/ a mra pa ran+ta dag tu ko lpags mi bcang bar mi bya'o gsungs pa yin no/ /kha cig yul gyi dbus su mal stan ko lpags min/ /yul gyi mtha' 'khob tu ni gnyi ga'ang gnang / /zhes 'don pa de ni mi rigs par snang ste/ gang gi phyir bcom ldan 'das kyis dge slong dag la rdo 'jog kho na dag tu ko lpags kyi stan la sogs pa yongs su longs spyod pa dang / rtag tu khrus gnang ba de'i phyir gzhan du 'don pa mi rigs so zhes kho bo sems so/ /ba glang rta dang stag dang seng ge dang / /dom dang byi la'i pags pa rung ba min/ /zhes bya ba la/ ba glang ni glang po che yin la rta ni mgyogs 'gro ste de gnyis kyi pags pa mi rung ba yin pas 'di gnyis kyi pags pa'i lham bcang bar mi bya zhing rdo 'jog dag tu yang de dag las byas pa'i mal stan la longs spyad par mi bya'o zhes bya ba'i tha tshig go/ /ni'i sgra ni thams cad kyi thams cad du rung ba ma yin no zhes snga ma las bye brag tu bya ba'i don yin no/ /de bzhin du stag dang seng ge dang / dom dang dred dang byi la zhes bya ba la/ stag dang seng ge dang dom dang byi la dag ces sbyar ro/ /de dag gi pags pa rung ba ma yin pas zhes bya ba la sogs pa snga ma bzhin du thams cad la brjod par bya'o/ /bal ba dza dang gres ma rtswa sogs las/ /byas pa'i lham ni bcang bar bya ba min/ /zhes bya ba la bal ba dza ni rtswa'i bye brag la bya'o/ /gres ma ni rtswa mun dza la bya'o/ /rtswa ni smyug shun te zlas dbye ba'i bsdu ba bya'o/ /rtswa de dag las byas pa'i lham bcang bar bya ba ma yin no/ /yang gi sgras ni 'di skad du sdom can gyis rung ba ma yin pa'i pags pa 'ba' zhig ma yin pa shing las byas pa'i lham yang gnang ba med do zhes bshad par bya ba'i phyir ro zhes bstan par 'gyur ro/ /gang du zhe na gtsug lag khang steng gnas khang khyams rnams su zhes bya ba smos te/ gtsug lag khang gi steng ste steng gi bla gab med pa dang gnas khang dang khyams dag tu longs spyod par gnang ba med do/ / rtag tu zhes bya ba ni rnam pa thams cad du gnang ba med pas de 'ga' zhig tu yang zhes bya ba'i don to/ /ni'i sgra ni shing gi lham nam yang gtsug lag khang gi steng la sogs pa dag tu gnang ba med do zhes snga ma las bye brag tu bya ba'i phyir ro/ /ni'i dmigs kyis bsal ba ni/ gci ba dang bshang ba'i gnas phyogs dang zhes bya ba la sogs pa smos te/ gci ba dang bshang ba ni gci ba dang bshang ba'o/ /de gnyis kyi gnas ni gci ba dang bshang ba'i gnas so/ /de gnyis kyi phyogs ni nye 'khor dang nang yin te/ de dag tu shing gi lham de longs spyod pa la nyes pa med do/ /khyad par ji lta bu zhe na/ khyim gyi nang bcas ma bskus zhes bya ba smos te/ khyim gyi nang dang lhan cig 'jug pa'i phyir khyim gyi nang bcas su'o/ /khyad par ji lta bu zhe na/ ma bskus pa ste bskus pa las gzhan pa'i sa phyogs de la nyes pa med do zhes bya ba'i don yin te/ byi dor byas pa nyid la ni nyes par 'gyur ro zhes rig par bya'o/ /mdze can gyis ni dge 'dun khri la sogs/ /zhes bya ba la dge 'dun gyi khri la sogs pa spang bya ste/ yongs su longs spyod par mi bya'o zhes bya ba'i don to/ /sogs pa'i sgras ni chol zangs la sogs pa bsdu ba'i phyir ro/ /de bzhin dge 'dun la sogs zhes bya ba la/ dge 'dun 'du zhing tshogs par gyur pa ni dge 'dun 'du ba ste/ de la sogs pa gang yin pa de ni dge 'dun 'dul sogs pa'o/ /de bzhin gyi sgra ni ji ltar gong du spang bar bya zhes bstan pa de ltar 'dir yang spang bar bya'o zhes bshad pa'i phyir ro/ /sogs pa'i sgras ni dge 'dun yongs su longs spyod pa'i gnas yongs su bsdu ba'i phyir te/ dper na gci ba'i khang pa la sogs pa bsdu'o/ /dge 'dun gyis de ji ltar bya ba yin zhe na/ dge 'dun gyis kyang de ni dben bzhag nas/ /zhes bya ba la sogs pa smos te/ mdze can de ni dge 'dun gyis kyang yongs su bskyang bar bya'o/ /ji lta zhe na/ sman gyi sbyor bas zhes bya ba smos te/ sman gyi sbyor ba ni sman gyi sbyor ba ste/ sman gyi sbyor bas sman sbyin pa dang / nad g.yog sbyin pa des yongs su bskyang bar bya zhes bya ba'i don yin no/ /gang du bzhag nas she na/ dben zhes bya ba smos te/ skye bo nye bar 'tshogs pa las dben par gyur par gzhag cing bcug nas zhes bya ba'i tha tshig go/ /mdze can 'ba' zhig la ma yin gyi/ 'on kyang nad pa thams cad la sman dang / nad g.yog sbyin pas na yongs su bskyang bar bya ba yin pas na/ nad pa thams cad nad g.yog rnams kyis ni/ /'tsho ba shin tu dkon par bsams nas kyang / /rang bzhin sdig pa ma gtogs bsgribs nas kyang / /bcas pa'i kha na ma thos bskyang bar bya/ /zhes bya ba la/ rang bzhin gyi kha na ma tho ba ni rang bzhin gyi kha na ma tho ba dang bcas pa yin te/ srog gcod pa la sogs pa gang yin pa de ni yongs su spang bar bya ba nyid yin pa'i phyir/ bcas pa'i kha na ma tho bas kyang nad pa yongs su bskyang bar bya ba yin no/ /yang gi sgras ni 'di skad du/ nad g.yog la sogs pa sbyin pa la sogs pas bskyang ba de lta zhog gi/ bcas pa'i kha na ma tho bas kyang zhes bya bar bstan par 'gyur ro/ /bcas pa'i kha na ma tho ba ni bcas pa'i kha na ma tho ba dang bcas pa yin te/ de ni bcom ldan 'das kyis nyes dmigs bstan pa'i sgo nas bkag pa mdzad pa yin gyi/ srog gcod pa la sogs pa bzhin du kha na ma tho ba dang bcas pa nyid kyi phyir ni ma yin no/ /ci zhig byas nas she na/ 'tsho ba shin tu dkon par bsams zhes bya ba smos te/ gang gi phyir sdom la gnas pa'i 'tsho ba shin tu rnyed par dka' ba yin par bsams shing shes nas zhes bya ba'i don to/ /ni'i sgra ni gang gi phyir gyi don yin te/ gang gi phyir 'tsho ba shin tu rnyed par dka' ba de'i phyir nad pa bskyang bar bya ba yin no/ /dge tshul gyi tshig le'ur byas pa las mal stan che mtho las slar ldog pa ste bslab pa'i gzhi brgyad pa'o// // da ni bslab pa'i gzhi dgu pa 'chad pa yin te de la dang por dus bstan na gang brjod pa de kho nas dus ma yin pa yang shes par 'gyur ro zhes bya ba'i dbang du byas nas/ skya rengs sngon po la sogs bzung nas ni/ /rang gling nyi ma ma yol bar du dus/ /zhes bya ba la sogs pa la/ rang gi gling gi skya rengs sngon po la sogs pa gzung ba nas/ rang gi gling kho na'i nyi ma ma yol ba'i bar zhas ni dus ma yin pa'i zas kyi bslab pa'i gzhi'i skabs 'dir dus yin no zhes bya bar sbyar zhing de gnyi ga la rang gling zhes smos pa mngon par sbyar bar bya'o/ /de la skya rengs sngon po zhes bya ba nam mkha' la sngon por snang ba shar ba de dang por byas nas bdag nyid kyi gling gi nyi ma phyed sgang zhes bya ba de ni 'dir dus yin no zhes bya ba'i sgra ni bstan ma thag pa la bsnyegs pa'o/ /skya rengs ni rnam pa gsum ste skya rengs sngon po dang skya rengs ser po dang / skya rengs dmar po'o/ /de la thun tha ma la shar phyogs nas sngar bshad pa'i rnam pa 'char ba ni skya rengs sngon po zhes bya'o/ /de'i 'og tu skya rengs ser po shar na nam mkha' la ser po rnam par snang bar 'gyur ba de ni skya rengs ser po zhes bya'o/ /de'i 'og tu skya rengs dmar po shar na nam mkha' dmar po rnam par snang bar 'gyur ba de ni skya rengs dmar po zhes bya ste/ de ltar ni skar ma'i bstan bcos las/ skya rengs sngon po shar na ni/ /shar phyogs su ni sngor snang zhing / /skar ma'i gdong gi 'od nyams la/ /nam mkha' sngo skyar gyur pa yin/ /skya rengs ser po shar na ni/ /de las shar phyogs dmar skya zhing / /skar ma'i 'od ni chung bar 'gyur/ /nam mkha' ser skyar 'gyur ba yin/ /skya rengs dmar po shar na ni/ /skar ma'i 'od ni med gyur pas/ /mtshams nyid skya rengs dag tu shar/ /nyi ma 'char phyir mtshams kyang yin/ /zhes 'byung ba yin no/ /lhag ma 'di tsam lus pa'i dus su skya rengs sngon po 'char bar 'gyur ro zhes 'jig rten pa dag las de dag shes pa yin no zhes bya ba'i dbang du byas nas 'di la bcom ldan 'das kyis dus ma yin pa'i zas su ma gsungs so/ /de ltar yang mtshan gyi brgyad cha gcig lus pa na rgyal po'i thun tshod kyis rnga brdung bar bya'o zhes skar ma'i bstan bcos las rnam par gzhag pa de'i phyir 'dir yang tshul 'di nyid yin par rig par bya'o/ /rang gling smos pa ni gling gzhan rnam par bcad pa'i phyir ro/ /de ltar ni/ mtshan phyed nyi ma nub pa dang / /nyi ma phyed dang 'char dus gcig /ces 'byung ba yin te/ gang byang gi sgra mi snyan du mtshan phyed du gyur pa de'i tshe shar gyi lus 'phags su nyi ma nub la de nyid kyi nyi ma phyed na 'dzam bu'i gling dang / nub kyi ba glang spyod dag tu yang nyi ma shar bar 'gyur ro zhes bya ba de ltar dus gcig kho nar 'gyur ro/ /de bzhin du bzlog pa'i sgo nas thams cad la sbyar bar bya'o/ /de'i phyir rang gi gling gi dus kyi zhes bya ba'i dbang du byas nas/ gang zhig 'dzam bu'i gling du skyes pa de gling gzhan du 'gro na yang rang gi gling gi dus kyi dbang gis mtshan phyed dang nyi ma nub pa'i dus su yang bza' bar bya ste/ 'di la 'gyod par mi bya'o/ /gling gzhan na gnas pa'i yang tshul ni 'di nyid yin par khong du chud par bya'o/ /ji ste dus ma yin par sgregs pa byung na ji ltar bya ba yin zhe na/ ji ste sgregs pa byung na zhes bya ba la sogs pa smos te/ zos pa slon thabs su byung ba ni sgregs pa yin no/ /de gal te byung zhing 'ongs nas sgregs pa bor nas gus par byas te/ rung ba'i chus kha bshal bar bya zhing dus ma yin par dus ma yin pa'i zas kyi nyes par 'gyur ba yongs su spang bar bya ba'i phyir ro zhes bya ba ni tshig gi lhag ma yin no/ /dus su yang bkru ba ni zang zing gi dri ma yongs su spang ba'i phyir ro 'on kyang ma byas na ni dus ma yin pa'i zas kyi nyes par 'gyur ro/ /ji ste zhes bya ba ni gal te'i don yin no/ /sdom can gang zhig ba lang dang 'dra bar mid pa gnyis yod de/ gcig gis ni zas za bar byed la gnyis pas ni skyugs ldad 'byin par byed na de ji ltar bya ba yin zhe na/ mid pa gnyis yod na ni ci dgar mid ces bya ba smos te/ mid pa gnyis gang la yod pa de ni med pa gnyis yod pa ste ba lang dang 'dra bar de lta bur gyur pa des sgregs pa mid par bya'o zhes bya bar sbyar ro/ /ji ltar zhe na/ ci dgar zhes bya ba smos te ji ltar dga' ba ste 'dod pa ma bzlas pas zhes bya ba'i don to/ /'di skad du dus ma yin par mid pa gnyis yod pas kyang sgregs pa gcig bor la rung ba'i chus kha bkrus la phyis ji ltar 'dod par mid par bya'o zhes bya ba'i don yin no zhes bstan par 'gyur ro/ /ni'i sgra ni snga ma la bye brag tu bya ba'i don to/ /las kyi dbang gis ba glang bdag bzhin du/ /zhes bya ba ni ji ltar dgra bcom pa glang bdag la mid pa gnyis yod pas/ bcom ldan 'das kyis sgregs pa mid par gyis shig ces rjes su gnang ba mdzad pa de bzhin du gzhan de lta bur gyur pas kyang byas pa la nyes pa med do zhes bya ba'i tha tshig go/ /de ni/ sdom la gnas pa'i tshe ni nyin gcig kyang / /zhes bya ba la sogs pas dus ma yin pa'i zas dmigs kyis bsal ba yin te/ gang gi phyir bstan pa 'di la rab tu byung ba dag ni tshe ste srog ni nyin gcig ste nyi ma gcig tsam yang 'dod cing dgos pa yin gyi yun ring po 'ba' zhig ni ma yin no zhes bstan pa'i phyir ro zhes bya ba ni yang gi don to/ /gang la zhe na/ sdom la gnas pa zhes bya ba smos te/ sdom pa ni bstan pa 'di la rab tu byung ba'i bslab pa'i gzhi yin no/ /de la gnas pa'i phyir sdom la gnas pa zhes bya'o/ /gang gi phyir de ji srid 'tsho bar gyur pa de srid du bsod nams 'phel bar 'gyur ro zhes bya ba'i dbang du byas nas de lta bur gyur pa de la zhes brjod par bya'o/ /gang gi phyir de lta bur gyur pa de'i phyir nad pa la mkhas pa'i lung nyid bza' ba'i dus yin la lung 'bogs par byed pa'i phyir lung ste bza' ba'i dus su'o/ /mkhas pa zhes bya ba ni sman pa kho na la mi bya'i 'on kyang gzhan dag kyang yin te/ gang 'ga' zhig gis nad pa'i bza' ba'i dus shes par byas nas lung 'bogs par byed na de nyid mkhas pa yin la/ bdag nyid kyis kyang shes par byas nas 'di ni nga'i bza' ba'i dus yin no zhes lung ston par byed pa de nyid kyi phyir mkhas pa zhes smras pa yin no/ /'di skad du gang zhig gis nad pa la phan pa'i dus shes pa de nyid la sman pa zhes bya'o zhes bstan par 'gyur ro/ /dang ni tshig gi kha bskang ba'o/ /rab tu gnod gyur pa la dus min med/ /ces bya ba la/ rab tu gnod pa ni mu ge dang mi ngas kyi dgon pa yin te/ dus gang gi tshe chos ston mi rnyed pa de lta bur gyur pa thob cing rnyed pa de la ni rnam pa thams cad du/ dus ma yin pa yod pa ma yin pas de la gang gi tshe rnyed par gyur pa de'i tshe yongs su spyad par bya zhing mi ngas kyi dgon par yang dus ma yin par 'bras bu dang rtsa ba dag yongs su bza' bar bya ste/ 'di la 'gyod par mi bya'o/ /'di la yang sdom la gnas pa'i zhes bya ba la sogs pa sngar bstan pa'i rgyu brjod par bya ba yin no/ /'dul ba las nya dang sha bza' bar gsungs pa de khyad par ji lta bu bza' bar bya ba yin zhe na/ dam pas nya dang sha gnang gang yin pa/ /gnod dang brtse med ro la sogs chags dang / /yongs su btsal ba'i sems rnams spangs nas kyang / /lhung bzed 'ongs pa brtags te bza' bar bya/ /zhes bya ba smos te/ dam pa ste 'jig rten pa'i drang srong dag gis gnang ba'i bza' bar bya ba gang yin pa de brtags nas bza' bar bya'o zhes bya ba'i tha tshig go/ /lhung bzed 'ongs pa zhes bya ba'i tshig gis nya dang sha dag byed pa dang byed du bcug pa la bkag pa yin te/ gang gi phyir bdag nyid sgrub cing 'tshed pa dang gzhan byed du bcug pas nya dang sha dag bza' bar mi bya'i 'on kyang zas la bkad pa'am bsod snyoms la 'jug pa na lhung bzed du 'ongs par gyur pa cang mi smra ba'i sgo nas de lta bur gyur pa de yongs su zos pa la nyes pa yod pa ma yin no/ /ji ltar bza' bar bya ba yin zhe na/ gnod pa dang brtse med ces bya ba la sogs pa smos te/ gnod pa dang brtse ba med pa dang / ro la sogs pa la chags pa dang / yongs su btsal ba ste zlas dbye ba'i bsdu ba'o/ /gnod pa la sogs pa dang ldan pa yang de dag yin la/ sems kyang yin pas zhes bya ba'i bar gyi tshig phyi mar bya ste/ khyad par gyi bsdu ba yin no/ /de lta bur gyur pa des rnam par spangs nas kyang de bza' bar bya'i/ 'on kyang btsal bas ni ma yin no/ /de la gnod pa ni sems can la 'tshe ba'o/ /brtse ba med pa ni sems can gyi yul la snying rje dang bral bas snying brtse ba med pa'o/ /ro la sogs chags zhes bya ba ni dri dang ro la sogs pa la sred par gyur pa'o/ /yongs su btsal ba ni gang nas rnyed par 'gyur snyam pa'i sems kyis gang lus dang ngag gis yongs su btsal ba ste tshol bar byed pa yin no/ /lhung bzed 'ongs pa zhes bya ba smos pa nyid kyis bkag pa nyid yin pa'i phyir ro/ /ji ste yang bcom ldan 'das kyis ma gsungs pa de lta na yang bza' ba longs spyod pa'i cho ga gzhan la yang khong du chud par bya'o/ /de ltar ni zas la ni sman gyi 'du shes gzhag par bya zhing bdag nyid la ni nad pa'i 'du shes gzhag pas bza' bar bya'i/ gzhan du ni ma yin no zhes gsungs so/ /de nyid kyi phyir sha la sogs pa shin tu legs par bkag pa yin no/ /gang gi phyir bza' ba tsam gyi ro la chags pa yang cung zad ltogs pa bsal ba'i phyir/ bza' bar byed pa nyid yin pa de lta bu de yang bkag pa yin no/ /'on kyang ro la chags pas sha yongs su longs spyod pa yin pa de'i phyir yang 'dir phra ba bkag pas rags pa bkag pa shin tu legs par bya bar rig par bya'o/ /gang du nyes pa de dag med pa der ni zas dang 'dra bar bru ba tsha ba zlog pa nyid kyi phyir nyes pa med par shes par bya'o/ /de nyid kyi phyir/ nas chan 'bras chan khur ba nya dang sha /srog gnas phyir ni 'di dag bza' bar gsungs/ /zhes 'chad par 'gyur ro/ /dge tshul ba'i sman ni rnam pa gnyis te/ dus su rung ba dang / dus su rung ba ma yin pa'o/ /dus su rung ba de yang rnam pa gnyis te/ bza' bar bya ba dang bca' bar bya ba'o/ /de la/ nas chan 'bras chan khur ba nya dang sha /zhes bya ba la sogs pas bza' ba 'chad par byed pa yin te/ nas chan dang 'bras chan dang khur ba dang nya dang sha ni zhes bya ba ni zlas dbye ba'i bsdu ba'o/ /nas chan la sogs pa de dag ni rab tu byung ba'i srog gnas phyir te/ srog gnas pa'i don du bza' ba yin par bcom ldan 'das kyis gsungs so zhes bya ba ni tshig gi lhag ma yin no/ /de la nas chan ni til dang ma sha dang 'bras dag las grub pa'o/ / khur ba ni snum khur ro/ /lhag ma dag ni grags pa yin no/ /'di skad du bshad par bya ste/ bcom ldan 'das kyis rab tu byung ba dag gi srog gnas pa'i phyir sman gyi tshul du bza' bar bya'o zhes gsungs pa de nyid kyi phyir zas la sman zhes bya'o/ /sdong bu 'bras bu ut+pal la sogs rtsa/ /zhes bya ba la sogs pas bca' bar bya ba 'chad par byed pa yin te/ bu ram shing gi sdong bu ni bca' bar bya ba yin no/ /de bzhin du 'bras bu ni chu shing gi 'bras bu la sogs pa dang / ma sha'i gong bu la sogs pa'o/ /ut+pal la sogs rtsa zhes bya ba la/ ut+pal la sogs pa'i rtsa ba gang yin pa de ni bca' bar bya ba yin no/ /ut+pa la zhes bya bas ni ut+pa la sngon po dang ut+pal dmar po gzung ngo / /sogs pa'i sgras ni pad ma la sogs pa gzung ngo / /bca' ba ni rnam pa gnyis te dus su rung ba dang / dus su rung ba ma yin pa'o/ /de khyad par du bya ba'i don du de dag snga dro'i dus su bca' bar bya zhes bya ba smos so/ /bstan ma thag pa de dag ni snga dro'i dus su zhes bya ba la de dag ces bya ba'i sgra phyis pa yin par rig par bya'o/ /ni'i sgra ni dus ma yin pa las khyad par du byed pa'i don to/ /da ni/ dus kyi ma yin rung ba'i chus 'dres pa/ /zhes bya ba la sogs pas dus ma yin par rung ba rjod par byed de/ chu shing 'bras bu la sogs pa'i btung ba ni chu shing gi 'bras bu la sogs pa'i btung ba ste/ gang chu shing gi 'bras bu la sogs pa las byas par gyur pa'o/ /khyad par ji lta bu zhe na/ tshags btsags zhes bya ba smos te/ tshags las btsags pa ni tshags btsags te chu tshags las btsags par gyur pa zhes bya ba'i don to/ /gzhan yang khyad par du byed pa ni rung ba'i chus 'dres pa zhes bya ba smos te/ dus ma yin par rung ba gang yin pa de la rung ba'i chus 'dres shing gtong ba ste/ de lta bur gyur pa'i btung ba ni dus ma yin par rung ba yin par rig par bya'o/ /de la chags btsags zhes bya ba ni btung ba'i rdzas dus su rung ba nyid yin pa'i phyir/ tshags las btsags pa dus ma yin pa dag tu 'thungs na yang nyes pa med par shes par bya'o/ /sogs pa'i sgras ni rgun 'bru la sogs pa'i btung ba'i rdzas dag sdud pa yin no/ /de bzhin du/ dar ba dang ni dar bas dang ba ste/ /rnyog pa med pa zhes bya ba'i bar du'o/ /de lta bur gyur pa'i dar ba dang ba tshags las btsags pa rung ba'i chus 'dres pa de kho na bzhin/ dus ma yin par rung ba yin par rig par bya'o/ /de bzhin du 'das ma thag pa thams cad la shes par bya'o/ /de ltar/ rtsab mo zho ga chu dang bcos tsha dang / /zhes bya ba ni gcig bzhin du gyur pa'i zlas dbye ba'i bsdu ba'o/ /de lta bur gyur pa de dag ni dus ma yin par rung ba ma yin par rig par bya'o/ /zho ga chu zhes bya ba ni zho'i zho ga chu'o/ /de bzhin du/ bu ram shing khu de bzhin tshwa gang yin/ /zhes bya ba la/ de lta bur gyur pa tshags las btsags shing rung ba'i chus gtor ba snga ma ji lta ba de kho na bzhin du dus ma yin par rung ba ma yin no zhes bya ba'i don to/ /de la bcos pa'i tsha ni ji ltar bu ram shing gi khu ba la sogs pa kun du sbyar ba'i bcos pa'i chang nyams shing skyur por gyur pa gang yin pa de la de skad ces bya'o/ / gang zhig 'bru dang bcas pa'i ko tra ba la sogs pa las byas pa sbyar ba'i chang gi rdzas nyams shing skyur por gyur pa gang yin pa la 'bru tsha zhes bya'o/ /bu ram sbrang rtsi til mar mar sar dang / /khaN+Da zhag dang kha rar bcas pa nyid/ /ces bya ba la/ bu ram dang sbrang rtsi dang ti la mar dang mar sar dang khaN+Da dang kha rar bcas pa nyid dang / phag la sogs pa rung ba'i shar 'dod pa'i zhag ni/ bu ram sbrang rtsi til mar mar sar la sogs pa ste/ de dag thams cad ni btsags shing dang ba'i chus gtor ba de lta bur gyur pa dag dang / bu ram la sogs pa la rung ba'i chus gtor ba dag ni dus ma yin par rung ba yin no zhes bya bar rig par bya'o/ /bcas pa nyid ces bya ba ni kha ra dang bcas pa'i khaN+Da dus ma yin par rung ba yin te/ 'di skad du ji ltar khaN+Da dus ma yin par rung ba yin pa de bzhin du kha ra yang yin no zhes bstan par 'gyur ro/ /dang ni sdud pa'i don yin no/ /yung dang sge gsher gla sgang la sogs rtsa de bzhin no/ /zhes bya bar sbyar te/ rtsa ba yang de bzhin du dus ma yin par rung ba yin no/ /gang zhe na/ yung dang zhes bya ba la sogs pa smos te/ yung dang sge gsher dang gla sgang la sogs pa dang zhes bya ba ni gcig bzhin du gyur pa'i zas dbye ba'i don to/ / sogs pa'i sgras ni bong nga dkar po la sogs pa rtsa bar gyur pa dag gzung ngo / /de bzhin du sdong bu yang dus ma yin par rung ba yin par rig par bya'o/ /gang zhe na/ gu ru tsi dang tsan dan sogs sdong bu/ /zhes bya ba smos te/ gu ru tsi dang tsan dan dmar po la sogs pa dang zhes snga ma bzhin du bsdu bar bya'o/ /tsan dan ni tsan dan dmar po yin no/ /sogs pa'i sgras ni sreg shing la sogs pa sdong bu'i sman gyi rang bzhin du gyur pa bsdu ba yin no/ /de bzhin du bcom ldan 'das lo ma dus ma yin par rung ba bzhed cing dgongs so zhes bya ba ni tshig gi lhag ma yin no/ /gang yin zhe na/ nim pa pa to la sogs zhes bya ba smos pa yin no/ /sogs pa'i sgras ni ba sha ka la sogs pa bsdus pa yin no/ /de bzhin du me tog dag dus ma yin par rung ba yin par shes par bya'o/ /gang dag yin zhe na/ ba sha ka dang d+ha na ka la sogs pa zhes bya ba smos pa yin no/ /sogs pa'i sgra ni 'dir phyis pa yin par blta bar bya ste/ ko sha ta ki la sogs pa bsdu ba'i phyir ro/ /'bras bu dus ma yin par rung ba yin par rtogs par bya'o/ /a ru ba ru skyu ru na le sham/ /zhes bya ba la sogs pas de 'chad par byed de/ a ru ra dang / ba ru ra dang / skyu ru ra dang / na le sham dang / zhes snga ma bzhin du bsdu ba bya'o/ /ka ko la dang sug smel pi pi ling 'bras dang / /zhes bya ba la ka ko la dang / sug smel dang / pi pi ling ste/ de dag thams cad dus ma yin par rung ba yin par rig par bya'o/ /dang gcig ni sdud par byed pa yin la/ gnyis pa dang / yang gi sgra ni tshig gi kha bskang pa yin no/ /'gyur byed dus ma yin par rig par bya'o/ /gang zhe na/ til sogs thal ba dang ni lan tshwa lnga/ /zhes bya ba smos pa yin no/ /sogs pa'i sgras ni nas la sogs pa gzung ngo / /dus su rung ba ma yin pa'i lan tshwa ni lnga ste/ rgyam cha dang / kha ru tsha dang / rtsal ru tsha dang / lan tshwa dang / rgya mtsho'i tsha'o/ /thang chu dus su rung ba ma yin pa gang zhe na/ shing kun spra tshil sra rtsi rgya skyegs dag /ces bya ba smos te/ shing kun dang / spra tshil dang / sra rtsi dang / rgya skyegs zhes snga ma bzhin du bsdu bar bya'o/ /sra rtsi ni sa rdza ra sa yin no/ / spra tshil ni sbrang rtsi'i spra tshil lo/ /btung ba la sogs pa gang yin pa de thams cad ni gzhan rigs 'dra ba'i sman gang dag gi nye bar mtshon par byed pa yin pa de nyid kyi phyir/ bru ba bsal phyir bza' min gang yin pa/ /zhes bya ba la sogs pa smos pa yin te/ rnam pa thams cad du bru ba ste/ ltogs pa bsal ba'i gnyen po'i don du bza' bar bya ba ma yin pa'i rdzas gang yin pa de ni dus su rung ba ma yin pa'i sman du ma shi'i bar du gsungs pa bzhin bstan pa yin no/ /ni'i sgra ni gang gi phyir gyi don yin te/ gang gi phyir zas dang 'dra ba bru ba bsal ba'i phyir bza' bar bya ba ma yin gyi 'on kyang nad kyi phyir a ru ra la sogs pa dang 'dra bar dus su rung ba ma yin pa'i sman de ni sangs rgyas bcom ldan 'das kyis sam 'dul ba la mkhas pa dag gis ji srid 'tsho bar gsungs pa yin no/ /ma shi'i bar du zhes bya ba ni shi ba la thug pa'i bar du rung ba yin no zhes bya ba'i dbang du byas pa de nyid kyi phyir ji srid 'tsho ba zhes bya ba yin la/ ji srid 'tsho ba rung ba yin no zhes bya ba'i dbang du byas nas dus ma yin par yang bzar rung ba'i phyir dus su rung ba ma yin pa ma yin no/ /gang gi tshe dus su rung ba ma yin pa la dus su rung ba 'dres par gyur na de ji ltar longs spyod par bya ba yin zhe na/ dus min pa la dus rung gang 'dres pa/ /de dag dus kyi dbang du bza' bar bya/ /zhes bya ba smos te/ gang gi tshe dus su rung ba ma yin pa la dus su rung ba zas 'dres par 'gyur ba de ni dus su rung ba kho na'i dbang du bza' bar bya ba yin no zhes khong du chud par bya'o/ /'di skad du dus su rung ba dang 'dres pa gang yin pa de gal te dus su rung ba de dang tha dad par byed nus pa ni gang bu ram la sogs pa la 'bras la sogs pa zhugs par gyur pa bkrus nas zang zing med par byed par nus pa de'i tshe dus su rung ba ma yin par rig par bya'o zhes bstan par 'gyur ro/ /nyid ni nges par gzung ba'o/ /da ni dus min phyogs ni zhes bya ba la sogs pas dus ma yin pa'i zas kyi phyogs brjod pa yin no/ /dus ma yin pa'i zas kyi phyogs su gtogs pa ste/ zas kyi sgra phyis pa yin no/ /gang zhe na/ snod gcig bza' zhes bya ba smos te/ snod gcig la gnyis kas byin gyis brlabs nas snod gcig tu bza' bar byed pa ni snod gcig tu za ba yin te/ de dag ni dus min phyogs zhes bya ba yin no/ /ni'i sgra ni snga ma las khyad par du byed pa'i don to/ /gang gi tshe zhe na/ snod gzhan yod par gyur na 'jigs med phyogs su zhes bya ba smos te/ snod gzhan yod cing 'byor pa na'o/ /gang du zhe na/ 'jigs med phyogs su zhes bya ba smos te/ 'jigs pa yod pa ma yin pa gang yin pa de ni 'jigs med de/ 'jigs pa med pa'i sa phyogs der zhes bya ba'i tha tshig go/ /'di skad du 'jigs pa med pa'i sa phyogs su snod gzhan yod na yang gnyis pa dang lhan cig tu snod gcig tu za na nyes byas su 'gyur la/ 'jigs pa dang bcas pa'i sa phyogs su snod gzhan yod na gzhan dang lhan cig tu za na yang nyes par 'gyur zhing 'jigs pa dang bcas par snod gzhan med na nyes par mi 'gyur ro zhes bstan par 'gyur ro/ /'di'i dmigs kyis bsal ba yang / pha ma dang yang snod gcig bza' bar ni/ / dus kyis 'chu na dben par nyes med do/ /zhes bya ba smos te/ dben pa ni skye bos dben par gyur pa'i sa phyogs dang / steng khang 'og khang la sogs par pha ma dang lhan cig snod gcig tu za ba la nyes pa med pa kho na'o zhes bya ba'i don to/ /gang gis she na/ dus kyis 'chu na zhes bya ba smos pa yin no/ /ni'i sgra ni 'dir yang gzhan dang lhag par nyes par 'gyur la/ pha ma dang ni nyes pa med do zhes khyad par du bya ba'i phyir ro/ /da ni mdzes dga' la sogs mdor gsungs tshul du bza'/ /zhes bya ba la sogs pas ji ltar bza' bar bya ba de ltar ston par byed de/ mdzes dga' la sogs pa'i mdo las/ bcom ldan 'das kyis gsungs pa'i tshul te/ rigs pa des bza' ba dag bza' bar bya'o zhes bya ba'i tha tshig go/ /de ltar ni mdzes dga'i mdo las/ bcom ldan 'das kyis mdzes dga' dper na shing rta mkhan gyi skyes bus shing rta'i mig la mig sman skud par byed pa ni spras par bya ba'i phyir ma yin/ brgyan par bya ba'i phyir ma yin gyi zhes bya ba nas shing rta nyid khur 'degs pa'i phyir yin pa de lta de ltar rigs kyi bu zas za bar byed pa spras par bya ba'i phyir ma yin brgyan par bya ba'i phyir ma yin gyi/ 'on kyang ji srid lus gnas pa dang / 'dzin pa nyid kyi phyir ro zhes bya ba'i bar du gsungs so/ /de'i phyir ji srid lus gnas par 'gyur ba de tsam de'i bsam pas lus gnas par bya ba'i don du bza' bar bya'o/ /lhag par ni ma yin te/ dgos pa med pa'i phyir ro/ /dad pas byin pa lhag par zos pa las nyes pa byung ba'i phyir yang chung ba yin te/ dgos pa dang ldan pa ma yin pa'i phyir ro/ /sogs pa'i sgra ni 'dir mdo sde nye bar mtshon par byed pa'i don yin no/ /dang ni gus par bya ba dang bza' bar bya'o zhes rjes su drang ba'i don to/ /tshod dang ldan par bza' zhes bya ba 'di la yang dang ni rjes su 'brel bas bza' bar bya ba'i sgras 'dren pa yin no/ /de la ldan pa zhes bya ba ni bya ba khyad par du byed pa yin no/ /ji ltar bza' bar bya ba yin zhe na/ tshod dang ldan par zhes bya bar tshod dang ldan pa ni tshod dang ldan pa ste/ tshod rig pa'i 'du shes kyis bza' bar bya'o zhes bya ba'i tha tshig go/ /gus par byas te zhes smos pa de ni/ /kham che'am yang na chung bar rigs pa min/ /zhes bya ba la sogs pa kun nas 'chad par byed de kham chen po bza' ba'i phyir rigs pa ma yin zhing chung ba yang rigs pa ma yin pa de'i phyir kham par ma dag gis bza' bar bya ba yin no/ /kham dang bcas par 'jug pa yin pa'i phyir kham bcas te des nam yang smra ba ste/ brjod par mi bya'o zhes bya ba'i tha tshig go/ /smad dang btu bas bza' bar bya ba min/ /zhes bya ba la/ smad par byas nas bza' mi bya ste/ /dper na 'di ni bsod pa ma yin pa dang zhes bya ba lta bu'o/ /bza' ba khyim bya bzhin du btus nas bza' bar mi bya'o/ /mchod rten 'dra byas bcom ste zhes bya ba la mchod rten gyi rnam pa lta bur phung por byas nas bcom zhing bshig pas bza' bar mi bya'o zhes bya bar sbyar ro/ /de ltar gus par byas nas bza' bar rigs pa yin no/ /stag gis zos pa'i god kyi sha rnams dang / /bdag phyir bsad pa'i sha rnams bza' mi bya/ /zhes bya ba la/ stag gi lhag mar byas pa stag gis zos pa'i god kyi sha rnams za ba ni ma byin par len pa'i phyogs su gtogs pa yin te/ de dag ni zas kyi skabs yin pa'i phyir 'dir bstan par rig par bya'o/ /dus ma yin pa'i zas kyi phyogs su gtogs pa yin no zhes 'ga' zhig brjod pa gang yin pa de ni rigs pa ma yin te/ gang gi phyir bcom ldan 'das nyid kyis ri dwags kyi rgyal po seng ge ni ri dwags bsad nas sha'i mchog dang khrag gi mchog zos shing 'thungs nas ltos pa med par 'gro bar byed la de las gzhan pa'i gcan gzan phra mos ni sbas nas sha rul pa za bar byed pa yin pa de'i phyir/ stag la sogs pas bor ba bdag gir byas pa las phrogs par 'gyur ba yin pa'i phyir ma byin par len pa'i phyogs su gtogs pa yin no zhes bsgrubs pa yin no/ /bdag gi phyir bsad pa nyid kyang bza' bar mi bya'o zhes bya bar sbyar ro/ /ched du gsad pa dag ni bza' bar mi bya la/ gzhan pa dag ni sngar bshad pa'i cho gas bza' bar bya'o/ /dang ni sdud par byed pa yin la nyid ni nges par gzung ba'o/ /khwa yi mchu yis reg 'gyur kha zas rnams/ /mchu yi than kor bor te bza' bar bya/ /zhes bya ba la/ khwas zos pa'i lhag ma bza' bar bya'o/ /ci zhig byas nas she na/ de'i mchu'i than kor bor te zhes bya ba smos te/ mchus reg par gyur pa la mchu'i sgras brjod pa yin te/ de'i than kor dang bcas pa bor zhing dor la lhag ma gzhan bza' bar bya'o zhes bya ba'i tha tshig go/ /lhung bzed gzhi la rkang chas mnan bzhin min/ /zhes bya ba la lhung bzed kyi gzhi ste lhung bzed kyi rten du gyur pa la'o/ /gang gis mnan par mi bya zhe na rkang chas zhes bya ba smos te/ rkang pa'i cha ni rkang pa'i chas te sor mo la sogs pa des zhes bya ba'i don to/ /mnan pa'i tshig ni khyad par du reg pa la bya ba yin pa de'i phyir lhung bzed kyi gzhi la reg par mi bya'o zhes 'byung ba yin no/ /mchil lham gyon bzhin min zhes bya ba mchil lham la brten pa'i phyir mchil lham gon pa ste/ mchil lham la 'dzegs pas bza' bar mi bya'o zhes bya ba'i don to/ /gos gcig min zhes bya ba la/ gos gcig gang la yod pa de ni gos gcig pa ste/ gos dang bral bas bza' bar mi bya'o zhes bya ba'i tha tshig go/ /mchil lham gyon bzhin min zhes bya ba bkag pas lham kyang bkag pa de'i phyir nad pas ji ltar bza' bar bya zhe na/ sman pas bsgo na nad pas mchil lham gyi/ /steng du rkang bzhag ci bder bza' bar bya/ /zhes bya ba la nad pas sman pas ji skad du bsgo ba de bzhin du ji ltar bde zhing 'dod par bza' bar bya'o/ /'di skad du sman pa'i lung phog pa bzhin du ji ltar 'dod pa bzhin du bza' bar bya'o zhes bstan par 'gyur ro/ /mchil lham gyi steng du rkang pa gang gis bzhag pa de ni mchil lham gyi steng du rkang pa bzhag pa can brten pas bza' bar bya'o/ /ni'i sgra ni snga ma las khyad par du byed pa yin no/ /sbyin bdag gi ni 'brim par byed pa la/ /'di dang 'di las byin zhes brjod mi bya/ /zhes bya ba la/ zas la sogs pa la bkod nas bza' ba dang bca' ba 'brim pa na rdzas kyi rnam pa dang / zas kyi yul las 'di byin ces brjod par mi bya'o/ /de gang dag la brjod par mi bya zhe na/ sbyin bdag gam ni 'brim par byed pa la/ /zhes bya ba smos te/ zas de'i bdag po'am/ 'brim par byed pa'am/ 'brim par byed pa po la brjod par mi bya'o zhes bya bar sbyar ro/ /'am gyi sgra ni dgag pa sdud par byed pa yin no/ /'o na ji ltar bza' bar bya zhe na/ gral rims bab par 'phags pas bza' bar bya/ /zhes bya ba smos te/ gral rims su thob pas ni gral rims bab pa ste/ ji ltar byug ris la bab pa bzhin du 'phags pa ste rab tu byung bas bza' bar bya'i 'on kyang nye bar bsags pa las ji ltar 'dod pa bzhin du bslangs nas bza' bar mi bya'o/ /ji ltar nad pa la yang de dag bkag pa yin nam zhe na/ 'di la nad pa dag la dgag pa med/ /ces bya ba smos te/ rab tu byung ba nad pa de dag la dgag pa yod pa ma yin te/ de dag la ma bkag go zhes bya ba'i tha tshig go/ /'di skad du nad pas rang rjes su mthun pa bslangs nas bza' bar bya'o zhes bstan par 'gyur ro/ /zas kyi lhag ma las ni chang gcig gzhag /ces bya ba la/ zos pa'i lhag ma nyid ni zas zos pa'i lhag ma ste de las chang gcig gzhag par bya ba yin pa'i phyir lhag ma smos pa yin gyi/ gtso bor gyur pa ma yin pa de'i phyir/ chang gcig tsam ni zas shin tu chung bar gyur kyang gzhag par bya'o zhes bya ba'i don du shes par bya'o/ /chang gcig po de yang srog chags 'ga' zhig la yang bsngos nas gzhag par mi bya'i/ 'on kyang bye brag ma phye bar dud 'gro tsam la bsngos nas gzhag par bya'o/ /'dir bkag pa'i rgyu gang yin zhe na/ 'dir khwa dgag pa'i rgyu nyid yin zhes bya ba smos te/ bsngos nas bzhag pa de'i dgag pa'i rgyu ni khwa yin te/ de dang 'dra ba'i nyes dmigs su ma gyur cig ces bkag pa yin no/ / de ltar ni 'dul ba las rab tu byung ba dgon pa pas dud 'gro'i chang gcig po ce spyang la ni sbyin par byed la/ khwa la 'gog par byed pa na/ de khros par gyur nas zhes bya ba nas des chom rkun gyi sde dpon la/ sde dpon dge slong 'di la dong tse rab tu mong po dag yod do zhes smras pa dang / sde dpon de yang bya'i skad la mkhas par gyur pa zhig yin pas de song nas sdom can de bzung nas brdeg par brtsams so zhes bya ba la sogs pa'i bar du 'byung ba yin no/ /da ni 'dag chal dag dang rung bar byas pa'i chus zhes bya ba la sogs pas bza' ba'i bya ba byas nas khwa ji ltar bya ba de brjod pa yin te/ khwa 'di la kha zas med par gyur pa de ni kha zas med par gyur pa yin te/ zas kyi bya ba byas nas de lta bur gyur pa de bya'o zhes bya ba'i don to/ /gang gis bya zhe na/ 'dag chal dag dang rung bar byed pa'i chus/ /zhes bya ba smos te/ 'dag chal ni sa dang ba lci dag gcig tu sbyar bar gyur pa'o/ / tshig mang po pa ni so shing bsdu ba'i phyir ro/ /'di skad du zas kyi bya ba byas nas so shing dor ba'i 'og tu rung ba zang zing med pa'i chus bkru bar bya'o zhes bstan par 'gyur ro/ /dang ni sdud par byed pa yin te/ zas zos nas lung gi tshigs su bcad pa gdon par bya'o/ /de ni khron pa la sogs pa nas chu blangs na/ /khron pa la sogs byas dang chu lha'i phyir/ /zhes bya ba la sogs pas de grub pa yin pa'i phyir 'dir ma bstan to/ /dge tshul gyi tshig le'ur byas pa las dus ma yin pa'i zas las slar ldog pa ste bslab pa'i gzhi dgu pa'o// //da ni/ gser dang dngul gyi rnam pa len byed na/ /zhes bya ba la sogs pas bslab pa'i gzhi bcu pa rnam par 'chad par byed pa yin te/ gser dang dngul ni gser dang dngul lo/ /de'i rnam pa dag ni gser dngul rnam pa ste/ de len pa'i rgyu las dge tshul la nyes byas su 'gyur ro zhes bya ba'i tha tshig go/ /'di la nyes byas su 'gyur ba yod pas na nyes byas su 'gyur ba'o/ /rnam pa'i tshig gis ni rin po che thams cad bkag pa yin te/ rin po che'i rigs nyid yin pa'i phyir ro/ /de dag la reg pa la ni ma yin gyi 'on kyang yon bdag gi thad las len pa bkag pa yin pas na/ dge tshul dag reg pa la ni nyes pa yod pa ma yin no/ /gang las she na/ 'phags pa nye ba 'khor gyis zhus pa las/ bcom ldan 'das kyis gser dang dngul len pa ni dge tshul gyi bslab pa'i gzhi bcu pa yin no zhes gang gsungs pa dang / bcom ldan 'das kyis dge tshul rnams kyis de bskur bar bya'o zhes gsungs pa de ji lta bu lags/ bcom ldan 'das kyis bka' stsal pa/ nye ba 'khor ngas len pa la dgongs nas gsungs pa yin gyi bskur ba la ni ma yin no/ /de bas na len par byed pa bkag pa yin no/ /'di'i dmigs kyis bsal ba ni/ gos kyi phyir dang rgyags phyir dang / lus kyi phyir dang yang na sman gyi phyir/ /chos kyi phyir na nyes par 'gyur ba med/ /ces bya ba smos te/ gos la phan pas na gos kyi phyir dang / lam gyi rgyags kyi phyir dang / lus kyi phyir ni de'i zas kyi phyir dang / yang na sman gyi phyir zhes bya ba ni sman gyi phyir dang / chos kyi sbyin pa dang 'byor pa ni chos dang ldan pa yin te/ chos dang ldan pa de'i phyir len par byed na nyes par 'gyur ba med do zhes bya ba thams cad la sbyar ro/ /chos dang ldan pa ni dkon mchog gsum dang tshangs pa mtshungs par spyod pa la nye bar mkho ba yin par rig par bya'o/ /da ni bdag gi bya zhes bya ba la sogs pas yid kyir 'gyur ba 'chad par byed de/ gser dngul len pa'i rjes su mthun pa ste cha 'dra ba'i nyes par 'gyur ro/ /de gang zhe na/ 'di ltar yang / chos gos la sogs yod kyang gos sogs slong / /zhes bya ba la sogs pas ston par byed de/ chos gos la sogs pa yod par gyur na yang gos la sogs pa slong na yid kyir 'gyur ro zhes bya ba ni tshig gi lhag ma yin no/ /ni'i sgra ni gang gi phyir gyi don yin te/ gang gi phyir chos gos la sogs pa yod bzhin du de byed pa las yid kyir 'gyur ro/ /sogs pa'i sgras ni chos gos la sogs pa dang / rin gnyi ga gzung ba yin te/ 'di skad du chos gos dang / chos gos kyi rin dang / sman dang sman gyi rin yod bzhin du gos la sogs pa slong bar byed na zhes bstan par 'gyur ro zhes bya ba'i tha tshig go/ /khab ral rwa dang ba so rus pa las/ /bya ba ma yin zhes bya ba la/ rwa'i rang bzhin dang / ba so'i rang bzhin dang / rus pa'i rang bzhin zhes rang bzhin gyi sgra re re la sbyar bar bya ba yin no/ /rwa'i sgra ni srog chags kyi rwa la bya ste/ de lta bur gyur pa'i khab ral dge tshul gyis mi bya'o/ /de bzhin du gser gyis spras pa'ang min zhes bya ba la/ gser gyi sgra ni mdog bzangs la bya ste/ des spras pa bcang bar mi bya'o zhes bya bar sbyar ba'i phyir 'ang gi sgra smos pa yin no/ /gser ni rin po che gzhan gyi nye bar mtshon par byed pa'o/ /khe yi phyir na nyo dang tshong la sogs/ /bya ba ma yin zhes bya ba la/ rnyed pa'i bsam pas rnyed pa bdag la grub par gyur cig snyam pa'o/ /rin shin tu chung ngus gos la sogs pa len pa ni nyo ba'o/ / blangs nas kyang rin gyi bsam pa de nyid kyis star ba ni 'tshong ba'o/ /sogs pa'i sgra ni skyed la sogs pa sdud pa yin te/ de dag thams cad dge tshul gyis bya ba ma yin zhes bya ba ni tshig gi lhag ma yin no/ /'di'i dmigs kyis bsal ba ni/ dgos pa yod na nyes pa med/ /ces bya ba smos te/ dgos pa yod de srid par gyur na nyo tshong bya ba la nyes pa med de/ de la dgos pa dang ldan pa ste sman la sogs pa med na gos la sogs pa btsongs na nyes par mi 'gyur ro/ /ji ste nyo 'dod ces bya ba la/ dge tshul gyis gos nyo ba'i phyir ro/ /gal te nyo 'dod pa de'i tshe ji ltar bya zhe na/ khyim pa la yang bcol zhes bya ba smos te dge tshul gyis kyang nyos la gos la sogs pa kho bo la byin cig ces khyim pa la bcol nas nyo bar bya'i/ bdag nyid de rang gis kyang nyo bar mi bya'o/ /yang gi sgra ni sman la sogs pa med pa 'ba' zhig la ni ma yin no zhes bya ba dang nyid kyi sgra ni bdag nyid rnam par gcod pa yin no/ /ji ste bcol ba sgrin po med na zhes bya ba la sogs pa la/ gal te bcol ba sgrin po 'ga' med na de'i tshe dge tshul gyis tshig gsum gyi bar du brjod pa ste/ smras nas zhes bya ba'i tha tshig go/ /sgrin po ste tshong la mkhas pa'i khyim pa med na dge tshul gyis rin 'di tsam du byin cig ces tshig gsum brjod nas blang bar bya'o zhes bya ba'i don to/ /rgas pas 'khogs dang nad pa ma gtogs par/ /sdom can gzhan gyis bus 'khyud bcang mi bya/ /zhes bya ba la rgas pas 'khogs pa dang / nad pa de dag ma gtogs pa sdom can gzhan gyis pus 'khyud de rnal 'byor gyi tha gu bcang bar mi bya'o/ /'di dang gzhan dag tu nad pa'i tshad ni sbyor mi nus pa'i mtshan nyid can yin no/ /gzhan yang rnyed pa 'dod pa'am bsnyen bkur 'dod pas tshul 'chos dang / kha gsag dang / thob kyis 'jal ba dang / gzhogs slong sdom can bdag nyid kyis mi bya'o/ / de dag kyang byed na yid kyir 'gyur ro/ /de dag gi mtshan nyid rnyed phyir spyod lam tshul 'chos yin par bstan/ chags pas gzhan la smod pa thob kyis 'jal/ /gzhan la stod pa byed pa gzhogs slong yin/ /zhes bya bas 'chad par byed de/ bdag la rnyed pa grub par gyur cig snyam pas spyod lam 'chos pa dang / /gos tshags 'chos pa ni nges par tshul 'chos yin par bcom ldan 'das kyis bstan cing gsungs pa yin no/ /thob kyis 'jal ba ni chags pas gzhan la smod pa ste/ chags pa sred pas gzhan gyi mdun du gzhan la bkren pa 'di zhes bya ba la sogs pas smod pa ni thob kyis 'jal ba yin no/ /pha rol po lkog tu gyur pa nyid la rnyed pa grub pa'i phyir zhes bya ba'i don 'dis gzhogs slong ni pha rol po la stod pa byed pa zhes bya ba rnyed pa'i don du pha rol po gzhan gyi mdun du stod par byed pa ni gzhogs slong zhes bya ba yin te/ rnyed pa'i don nyid kyi phyir ston par byed cing rgyu mtshan bstan pa ni gzhogs slong zhes bya ba yin te/ rnyed pa'i don nyid kyi phyir ston par byed cing rgyu mtshan bstan pa ni gzhogs slong yin no/ /ni'i sgra ni snga ma las bye brag tu byed pa'i don to/ /nyung ngu byin la mang du 'dod pa yang / /zhes bya ba la bstan par bya ba la sogs pa nyung zad byin nas na mang du 'dod cing tshol ba dang slong ba yang gzhogs slong zhes bya ste/ rgyu mtshan des slong bar byed pa nyid kyi phyir ro/ /yang ni sdud par byed pa yin no/ /rnyed phyir gcam dang snyan par smra ba rnams/ /thams cad kha gsag yin par 'phags pas gsungs/ /zhes bya ba la/ rnyed phyir te dgos pas gcam pa dang snyan par smra ba rnams zhes bya ba 'di la de lta bur gyur pa de thams cad ni/ gang gcam pa dang snyan par smra ba zhes bya ba'i dbang du byas nas kha gsag yin no zhes 'phags pa ste sangs rgyas bcom ldan 'das kyis gsungs pa yin no/ /bstan ma thag pa'i tshul 'chos la sogs pa de dag dang 'dra ba thams cad dang / gzhan yang gang gi phyir log par rtsol bas 'tsho ba'i dper bya ba ste/ nye bar mtshon par byed pa de dag rtag tu spang bar bya'o/ /dge tshul gyi tshig le'ur byas pa las gser dngul len par byed pa las ldog pa ste/ bslab pa'i gzhi bcu pa'o// // rab tu byung ba'i dus su khyim pa'i rtags yongs su spong ngo zhes pa de'i phyir/ khyim pa'i cha lugs spang bar smras pas na/ /de dang 'gal phyogs yongs su spang bar bya/ /zhes bya ba la/ khyim na gnas pa'i rtags ni khyim pa'i rtags te/ /khyim pa'i cha lugs gang de spang bar bya ba gang yin pa de smras pa yin no/ /dper na khyim pa'i rtags ni yongs su spong ngo zhes smras pa'i rgyu'i phyir ro/ /de dang 'gal phyogs yongs su spang bar bya/ /zhes bya ba la khyim pa'i rtags spang ba dang 'gal ba ni khyim pa'i rtags yang len pa yin la/ de'i phyogs te de dang cha 'dra ba dang rjes su 'gro ba'i nyes par 'gyur ba yod pa de la de skad ces bya ste/ dge tshul gyis de yang yongs su spang bar bya'o/ /da ni/ khyim pa bzhin du gos rnams bgo mi bya/ /zhes bya ba la sogs pas de dag 'chad par byed pa yin te/ khyim pa dang 'dra bar gos bgo ba ste ji ltar khyim na gnas pa bzhin du gos bgo bar mi bya'o/ /'o na ji ltar bgo bar bya zhe na/ ji ltar gnas gtsang ma'i ris kyi lha'i bu gon pa bzhin du zhes lung las 'byung ba yin no/ /gal te ci'i phyir zhe na/ bla ma brgyud pa rgyun ma chad pa nyid kyi phyir ro zhes rtogs par bya'o/ /kha dog gcig dang kha tshar bcas dkar min/ /zhes bya ba la/ sham thabs dang bla gos thams cad sngon po 'og tu mi bgo zhing steng du yang bgo bar mi bya'o zhes bya ba ni tshig gi lhag ma'o/ /kha cig ni thams cad sngon po dang thams cad ser po zhes bya ba la sogs par brjod de cha lugs de dag la dad par mi 'gyur te/ de nyid kyi phyir slob dpon yon tan 'od kyis thams cad sngon po dang kha tshar dang bcas pa zhes mdor mdzad pa yin no/ /kha tshar dang bcas par 'jug pa'i phyir kha tshar dang bcas pa ste/ smad du mi bgo zhing steng du yang bgo bar mi bya'o/ /dang gi sgra ni dkar po dang sngon pos smad g.yogs mi bya zhing stod g.yogs kyang mi bya'o zhes sdud par byed pa yin pas de bas na dgag pa sdud pa yin no/ /'di'i dmigs kyis bsal ba ni/ phyi rol nas ni ngur smrig gos g.yogs nas/ /zhes bya ba la sogs pa smos te/ gal te gos dkar po gon pa de'i tshe gos ngur smrig gis phyi rol te steng nas g.yogs pa de lta bur gyur pa'i gos dkar po de bgo bar gnang ba yin no/ /dge 'dun gyi zhes bya ba 'di las yang rtogs par bya'o/ /de ltar dge 'dun khri dang khri'u dag dang ni/ /be'u ras la sogs gding bting spyad par rung / /zhes bya ba la/ khri dang khri'u dang be'u ras la sogs pa dang / gcig bzhin du gyur pa'i zlas dbye ba byas la/ de nas khyad par gyi bsdu ba bya'o/ /dge 'dun gyi sgras de lta bur gyur pa'i dge 'dun gyi khri la sogs pa de gding bas g.yogs nas spyad par rung ba yin no zhes bya bar sbyar ro/ /de ltar byas pa ma gtogs gzhan du bkag pa yin te/ nyams par 'gyur ba srid pa'i phyir ro/ /khri'u'i sgras ni gos dang blas pa'i stan gyi mchog sdud pa yin gyi shing gi khri'u ni ma yin te/ de la nyams par 'gyur ba med pa'i phyir stan de la 'dug pa na bar du gcod pa ma bsgrubs pa yin no/ /gos ni gang zag gi yang zhes bya bar rtogs par bya'o/ /sogs pa'i sgras ni stan sdud pa yin no/ /tshon dus gos dag btso bar bya zhe na/ tshon gsum gyis ni chos gos btso bar gnang / /zhes smos so/ /gang zhe na/ ngur smrig dang ni rams dang btsag rnams te/ /zhes bya ba smos te/ ngur smrig dang rams dang btsag ste/ gsum po de dag gis so/ /de la ngur smrig ni me tog dang lo ma dang 'bras bu dang shing shun dag bskol ba'o/ /rams ni tshos sngon po yin no/ /btsag ni sa rdul las gyur pa'i tshos dag la yang gzung ste/ tshos gsum po de dag bcom ldan 'das kyis gnang ba yin no zhes bya ba ni tshig gi lhag ma'o/ /dang ni sdud pa'o/ /ngur smrig la sogs pa gsum po gsungs pa'i phyir mtshal la sogs pa'i tshon gzhan dag bkag par grub pa las gsal bar bya ba'i phyir/ mtshal dang rgya skyegs yang na btsod rnams dang / /gur kum dang ni mthing shing li khri dang / /zhes bya ba la sogs pa smos te/ mtshal gyis chos gos btsor mi rung ngo zhes bya bar sbyar ro/ /rgya skyegs zhes bya ba ni rgya skyegs kyis kyang btsor mi rung ngo / /de bzhin du bshad par gyur pa dag la yang sbyar bar bya ba yin pas/ yang na btsod dang gur kum dang mthing shing yang mi rung ngo zhes bya bar sbyar bar bya'o/ /de ltar li khri dang rma shing dang le brgan zhes bya bar dbye ba'i bsdu ba byas nas rtsi dang khyad par gyi bsdu ba bya'o/ /brgyad po de dag tshon chen po yin pa ste/ tshon chen po yin pa'i rgyu'i phyir bkag pa yin no/ /gang gi phyir de dag rgod bag gi tshul du snang ba de'i phyir zhes bya ba'i tha tshig go/ /sen mo ji ltar gcad par bya zhe na/ sen mo ste'u spu gri'i so bzhin du/ /bcad par bya ste zhes bya ba smos te/ ste'u dang spu gri'i so ji lta ba de bzhin du gcad par bya ba yin no/ /de las gzhan du min zhes bya ba ni gang gi phyir bstan ma thag pa las gzhan pa rnam pa gzhan la sogs pa'i sna dang 'dra ba'i dbyibs gang la yod pa de ni de las gzhan pa'i dbyibs nyid de gcad par mi bya'o/ /dang gi sgra ni yang na zhes bya ba'i don yin no/ /dgon par gnas pas skra dang kha spu dag / sor gnyis nas ni 'das par gzhag mi bya/ /zhes bya ba la/ dgon par gnas pa'i phyir dgon par gnas pa ste/ dge tshul gyis so/ /sor gnyis ni sor gnyis kyi tshad las 'das pa'o/ /mgo bo las skyes pa'i phyir skra ste skra dang / kha spu de lta bur gyur pa de gzhag par mi bya'o/ /grong gnas de bas thung gi lhag par min/ /zhes bya ba ni grong na gnas pa'i phyir grong gnas te sor gnyis las thung ba gzhag gi sor gnyis las lhag par ni ma yin no/ /snga ma la ni 'breg mkhan rnyed dka' ba'i phyir dang / phyi ma la ni 'dir rnyed sla ba'i phyir ro zhes bya ba ni nges pa yin no/ /gzhan yang ba lang spu bzhin skra ni 'breg pa spang / /zhes bya ba la/ ba lang gi spu ni ba lang spu ste/ de dang 'dra ba'i tshad du skra 'breg pa ni ba lang gi spu bzhin du skra 'breg pa yang spang bar bya zhing dor bar bya'o/ /dge tshul gyis chags pas 'breg par bya ba ma yin no/ /gzhan yang byin pa mig dang mchan khung rked spu dang / /de bzhin smin ma breg pa ring du spang / byin pa dang / mig dang / mchan khung dang / rked spu breg pa la sogs pa gang yin pa de ni de la sogs pa'o/ /sogs pa'i sgras ni snying kha 'breg pa bsdu ba yin no/ /de dag spang bar bya ba yin pa bzhin du smin ma breg pa yang ring du spang bar bya'o/ /skra bregs nas ci zhig bya ba yin zhe na/ skra bregs 'og tu khrus kyang bya ba yin/ /yang na yan lag lnga tsam bkru bar bya'o/ /skra bregs pa'i 'og tu khrus bya'o/ /ni ni breg pa la ltos nas sdud par bed pa'o/ /yang na yan lag lnga tsam bkru bar bya'o/ /de la yan lag lnga ni mgo bo dang rkang pa gnyis dang lag pa gnyis yin no/ /yang na'i sgra ni lus kyi khrus bya ba'am/ yan lag tsam bkru bar bya zhes rnam par rtog pa'i don yin pa de'i phyir rkyen de tsam la ni bkru bar bya zhing gzhan gyi tshe ni khrus bya ba yin no snyam du bsam par mi bya'o/ / ci skra 'breg pa la rim pa yod dam zhe na/ kha spu skra gnyis snga phyir gar bder zad/ /ces bya ba smras te/ kha spu'am skra 'breg par bya ba la rnam pa thams cad du nges pa yod pa ni ma yin te/ 'on kyang gar bder te 'dod pas 'jug par bya'o zhes bya ba'i tha tshig go/ /de yi 'og tu sna yi spu yang btog ces bya ba la/ skra de bregs ma thag tu yang sna'i bu gu'i spu yang btog par bya ste/ de na yod pa'i spu btog par bya'o zhes bya ba'i tha tshig go/ /ci thams cad la nges pa 'di yin nam zhe na/ smras pa ma yin te 'on kyang / lag pa rkang pa'i sen mo rim bzhin bcad/ /ces bya bar sbyar ro/ /de ltar bstan ma thag pa'i rim pas bstan ma thag pa'i 'breg mkhan gyi las bya'o/ /dang ni sdud pa dang rim pa gzhan du'o/ /gzhan yang gos kyi mthar ni mdud pa bor bar bya'o/ /gang gi tshe zhe na/ skas la 'dzeg gam zhes bya ba la sogs pa smos te/ skas la 'dzeg pa'i dus dang / de bzhin du nyin par nyal ba'i tshe mdud pa bor bar bya'o zhes bya ba'i don to/ /nyin par nyal ba ni nye bar mtshon pa yin pa de bas na srung ma rab tu byung ba gzhag par bya zhing khang pa'i sgo gcad par bya'o/ /tshig de dag ni gsang ba dang 'gal ba'i yongs su spang ba'i don yin par rig par bya'o/ /sdom can gyis ni khur lci bskur mi bya/ /skyes bu tha mal pa'i khur tshad ni lci ba yin te/ de sdom can gyis bskur par mi bya'o/ yang yang phrag pa rked pa min/ /yang ba ni sngar smos pa'i phyed yin la rked pa ni rked pa nyid yin no/ /bskum dang phral dang g.yogs pa med bzhin dang / yang na tsog pur 'dug par bya ba min/ /zhes bya ba la/ rkang pa'i khri'i 'og tu sdud pa ni bskum pa yin la/ phral ba ste rkang pa rnam par phral ba dang / brkyang pa nyid kyis 'dug par bya ba nyid ma yin no/ /sham thabs kyi tha ma nang du bsdus nas 'dug par bya'i mdoms snang ba nyid kyis 'dug par yang mi bya ste/ 'on kyang de dag g.yogs nas 'dug par bya'o zhes bya ba'i tha tshig go/ /yang na tsog pur zhes bya ba la tsog pu kho nas kyang 'dug par bya ba ma yin no/ /sngar smos pa de dag thams cad la khyim gyi nang du zhes bye brag tu khong du chud par bya zhing gzhan dag tu yang de de dag gi rjes su 'brang bar bya ba yin pa'i phyir mang du spro ba ci dgos/ gtsug lag bshad pa'i spyod lam lta bur ni/ /bya ba yin te zhes bya ba ni 'dul ba'i gtsug lag de las gsungs pa'i spyod lam gang yin pa rung ba yin no snyam sems pas de bya ba yin te/ gang gi phyir bstan ma thag pa'i spyod lam rung ba 'di dag dper byas pa yin pa'i phyir gzhan dang lag pa mi sbrel zhes bya ba la sogs pa dag la yang khong du chud par bya'o zhes bya ba'i don to/ /dang ni sdud par byed pa'o/ /bslab pa'i gzhi bcu pa'i yid kyi nyes par 'gyur ba'i skabs dang / gzhan dag tu yang cho ga las 'das na yid kyir 'gyur bar shes par bya ste/ dper na phyir 'ong 'dod na dpag tshad phyed du song / /ji ste med na rgyang grags lngar ma 'gro/ /zhes bya ba la sogs pa dang / khyim pa'i cha lugs las ldog pa'i phyogs su gtogs pa la sogs pa bzhi po dag la thams cad du cho ga las 'das shing rab tu grags pa las spyod na yid kyir 'gyur ro/ /khyim pa'i cha lugs las slar ldog pa'i phyogs su gtogs pa ste bslab pa'i gzhi bcu gcig pa'o// //khyim pa'i rtags yongs su spong bar smras pa'i rjes thogs su rab tu byung ba'i rtags yang dag par len to zhes 'byung ba de'i phyir/ sdom can cha lugs khas blangs brjod pa las/ /zhes bya ba la sogs pas der gtogs pa dang 'gal ba'i phyogs brjod pa yin te/ sdom can gyi dngos po ni sdom can rab tu byung ba'o/ /de'i cha lugs ni rtags so/ /de khas blangs shing mngon par khas blangs pa de brjod cing smra ba las te rab tu byung ba'i rtags yang dag par len to zhes smras pa'i rgyu'i phyir ro/ /de dang 'gal ba'i phyogs ni spang bya ste/ /zhes bya ba la sdom can gyis cha lugs khas blangs pa de dang 'gal ba gang yin pa de ni gang dag gi phyogs dang cha 'dra ba dang / rjes su byed pa yin pa de bas na de dag las byung ba'i nyes pa de la de skad ces bya ste/ de dge tshul gyis spang bar bya'o/ /'di ltar mu stegs rgyal mtshan 'chang ba dang / /zhes bya ba la sogs pas de dag 'chad par byed de/ mu stegs te phyi rol pa'i rab tu byung ba'i rgyal mtshan te/ kha TI ga la sogs pa'i rtags de dag 'chang bar byed pa'o/ /ni'i sgra ni gang gi phyir gyi don yin te gang gi phyir de dag ni mu stegs kyi rgyal mtshan gyi tshul yin pa de'i phyir de dag 'chang bar byed pa spang bar bya ba yin te/ de bzhin du thams cad la brjod par bya'o/ /'di ltar gyi sgra ni nye bar ston pa'i don to/ /gcer bu'i dngos po ni gcer bu nyid do/ /de bzhin du mgo bo'i skra 'bal bar byed pas na skra 'bal ba ste/ nye bar btags pa nyid yin pa'i phyir ro/ /lag pa'i snod du gyur pa la za ba ni lag par za ba ste skra 'bal ba dang / lag par za ba dang zhes bya ba ni tshogs pa gtso bor gyur pa'i gcig bzhin pa'i bsdu ba'o/ /brag ste ri bo las mchong bar byed pa'o/ /brag ces smos pa ni chu ngogs la mchong ba la sogs pa dag gi nye bar mtshon pa yin no/ /nyi mar gdong blta ba ni nyi ma la mngon du phyogs pas 'dug nas lus gdung bar byed pa yin par rig par bya'o/ /de bzhin du/ me lnga bsten la sogs pa spang bar bya/ /zhes bya ba de la/ me lnga ni phyogs bzhi dag gi me dang / steng nas nyi ma'i me zhes bya ba ni mi lnga yin te/ de dag gi dbus su zhugs shing bsten pa de la de skad ces bya'o/ /sogs pa'i sgras ni me dang chur 'jug pa la sogs pa gzung ba yin te/ de dag spang bar bya'o/ /ni ni so so ba kun la sdud par byed pa'i don to/ /mchil ma la sogs se gol brdabs nas kyang / /zhes bya ba la/ mchil ma la sogs pa dag se gol gyi sgras brda byas nas 'og tu dor bar bya'i steng du ni ma yin te/ phyir ldog pa'i nyes pa spang bar bya ba'i phyir ro/ /sogs pa'i sgras ni gci ba la sogs pa bsdu'o/ /gang du dor bar bya ba yin zhe na/ gnang ba'i sa phyogs su ni zhes bya ba smos te/ gal te sa phyogs gnang bar gyur pa de ni gnang ba'i sa phyogs te/ der ni mchil ma la sogs pa dor bar bya ba yin no/ /gang du gnang bar gyur ba'i sa phyogs de ni gnang ba'i sa phyogs te/ de dag tu zhes bya ba'i tha tshig go/ /bshang ba dang ni gci ba'i nye 'khor du/ /sna tshogs gtam gyis yun ring gnas mi bya/ /zhes bya ba la bshang ba dang / gci ba'i khang pa'i nye 'khor dag tu sna tshogs pa'i gtam ste/ kun du brjod pa mang pos yun ring por gnas par mi bya'o/ /der gtogs pa'i dgos pa'i dbang gis dus de srid tsam du 'dug pa la ni nyes pa med do/ /gzhan yang bzlas dang btso blag la sogs der mi bya/ /zhes bya ba la/ smra ba dang / kun nas brjod pas 'dug par mi bya'o zhes bkag pas btso blag gi las la sogs pa la nyes pa med pa thob par gyur pas tshig 'di smos pa yin no/ /sogs pa'i sgras ni/ klog pa dang 'chad pa la sogs dag gzung ngo / / sgras brda byas nas brtags te 'jug par bya/ /zhes bya ba la/ bshang khang ngam gci ba'i khang pa der 'jug pa na se gol gyi sgra'i brdas 'ga' zhig yod dam med ces brtags nas 'jug par bya'i de lta de ltar ni ma yin no/ /dang ni sdud par byed pa'o/ /gal te yang bshang khang dang gci ba'i khang pa zhes bya ba'i tshul 'dis tha dad pa nyid thob mod kyi/ de lta na yang nges par mi 'gyur bas nges par bya ba'i don du/ bshang ba'i sa dang gci ba'i sa gnyis ni/ /so sor bya zhing zhes bya ba smos te/ bshang ba'i sa ste bshang ba'i khang pa dang gci ba'i sa yang so sor te tha dad par bya'i gzhan 'ba' zhig ni ma yin no/ /yang gi sgra ni der zhugs nas kyang bshang bar mi bya ste/ sba ba'i gnas nyid yin pa'i phyir ro zhes bya ba'i don du rtogs par bya'o/ /dang ni nye 'khor du 'dug par mi bya ba dang / der kun du smra bar mi bya'o zhes sdud pa dang / rim pa gzhan gyi don yin no/ /bshang dang gci ba drag tu 'byung 'gyur na/ /dal gyis gtang bar bya ste zhes bya ba la/ drag tu 'byung ba gang yin pa de ni bshang ba dang gci ba drag tu 'byung bar 'gyur na'o/ /de rim gyis dal bus gtang bar bya ste dum bur zhes bya ba'i tha tshig go/ /de bzhin du rlung nyid kyang rim gyis gtang bar bya ste sgra dang bcas pa'i rlung gi las mi bya'o zhes bya ba'i don to/ /gzhan yang 'byung ba dgag par nam yang 'dod ma yin/ /zhes bya ba la/ gci ba la sogs pa'i 'byung ba dgag pa ste/ zlog par nam yang bcom ldan 'das mi bzhed de/ 'byung ba de dgag par mi bya'o zhes bya ba'i don to/ /snga nas than kor 'jam pos phyis nas kyang / /zhes bya ba la sogs pas khrus kyi cho ga 'chad par byed pa yin te/ khrus byed pa'i snga rol kho nar than kor te bshang ba'i lam rdzas 'jam po 'ga' zhig gis phyis nas/ de'i 'og tu lag pa g.yon pas sa phung bdun blugs shing nye bar sbyar la/ chu mang po dag gis kyang than kor bkru bar bya'o/ /mang po'i sgra gnyi ga la yang sbyar bar bya ba yin no/ /de nas sa phung bdun gyis lag gnyis kyang / /zhes bya ba la/ de nas de lag pa g.yon pa ma bkrus pa'i dus phyis lag pa gnyi ga la yang sa phung bdun kho na blug par bya ba yin gyi/ lag pa g.yon pa 'ba' zhig lan bdun gyi bar du bkru bar ni ma zad de lag pa gnyi ga dag la yang bdun po dag kho nas zhes bya ba'i tha tshig go/ /sa de dag kyang so sor rim bzhin gzhag /ces bya ba la/ sngar bstan pa de'i rim pa bzhin du ste/ go rims bzhin du so sor tha dad par gzhag par bya'i/ phung por bya ba ni ma yin no zhes bya ba'i tha tshig go/ /kyang ni cho ga sdud par byed pa yin te/ 'di skad du sa sngon du song ba kho nas gtsang sbra byed pa yin pa'i phyir/ tha dad pas te so sor gzhag par bya ba yin no zhes bstan par 'gyur ro/ /chu mang pos kyang lag gnyis bkru bar bya/ /zhes bya ba la/ lag pa gnyis la sngar bshad pa'i tshad kyi sa phung bdun dang chu mang po dag gis kyang sngar bshad pa'i cho ga bzhin du bkru bar bya ba yin no/ /de nas 'bad pas lag ngar byin bcas byug /ces bya ba la sogs pa la/ de'i 'og tu lag ngar dang bcas pa 'byug pa'i phyir lag ngar byin bcas te/ de dag yongs su byug nas kyang / /lag pa gnyis bkru bar bya zhing de'i 'og tu spyi blugs dang / rkang pa gnyis kyang bkru bar bya'o zhes bya bar sbyar ro/ /dang ni sdud par byed pa'i don to/ /ci'i phyir bcom ldan 'das kyis tshad yongs su chad pa'i sa dag gis gtsang sbra bya ba gsungs she na/ sems kyi dag pa gtsang sbrar gsungs pa yin/ /zhes bya ba la sogs pa la/ dri dang chags pa mi gtsang ba gang yin pa dang bral ba tsam de kho na la 'jig rten kyi tha snyad kyi dbang du mdzad nas gtsang sbrar bcom ldan 'das kyis gsungs pa yin te/ gang gi phyir de tsam kho nas sems dag par 'gyur ba min no zhes bya ba ni tshig gi lhag ma'o/ /bcom ldan 'das kyis don dam pa'i gtsang sbra ji ltar gsungs she na/ lus sogs sdig pa rnam spangs gang yin pa/ /zhes bya ba la sogs pa smos te/ bcom ldan 'das kyis dngos su nang gi gtsang sbra kho na la gtsang sbra nyid du gsungs shing bka' stsal pa yin no/ /gtsang sbra de yang gang zhe na/ smras pa lus la sogs pa'i sdig pa ste srog gcod pa la sogs pa spangs pa gang yin pa de kho na gtsang sbrar gsungs pa yin no zhes bya bar sbyar ro/ /sogs pa'i sgras ni ngag dang yid kyi zhes bya ba sdud pa yin no/ /ci gang dang gang du gci ba la sogs pa bya ba yin zhe na/ gci dang bshang dang so shing bza' ba rnams/ /sdom can gyis ni dben pa'i phyogs su bya/ /zhes bya bas ston par byed pa yin te/ sdom can gyis dben pa'i sa phyogs kho nar gci ba gtang bar bya zhing / de bzhin du bshang ba dang so sbyang ba dag kyang dben pa'i sa phyogs kho nar bya ba yin no/ /dben pa zhes bya ba ni 'du 'dzi med pa zhes bya ba'i don yin no/ /ni'i sgra ni nges par gzung dang rim pa gzhan gyi don to/ /so shing ji ltar dor bar bya ba yin zhe na/ chu mang pos kyang bkrus nas dor bar bya/ /zhes bya ba la sogs pa smos te/ so shing chu dag gis bkrus nas dor bar bya ba yin no/ /chu med pa ji ltar bya zhe na/ ci ste chu med gyur na so shing ni/ /zhes bya ba la sogs pa smos te/ 'bad pas sa la brud par byas nas lce'i dri ma bsal te dor bar bya'o zhes bya ba'i tha tshig go/ /ci'i phyir zhe na/ lce yi dri mas gnod par gyur ta re/ /zhes bya ba smos te/ sngon rab tu byung bas so shing ma bkrus par bor ba de la sbrang bu babs par gyur nas so shing la chags pa'i mchil ma gzhibs par gyur pa na/ so'i dug gis dus las 'das par gyur pa la/ de las srog chags gzhan dag dang de las kyang srog chags gzhan yang zhes bya ba de lta bu la sogs pa de dag thams cad dus las 'das par gyur pa de bzhin du lce'i dri mas srog chags dag la 'di nyid du yang gnod par ma gyur cig ces bya ba'i don to/ /sdom can gzhan dag gi lhung bzed rnam pa du yin zhe na/ lhung bzed gnyis te zhes bya ba la sogs pa smos pa yin te/ sa las byas pa dang lcags las byas pa zhes bya ste gnyis dag yin gyi/ gzhan zangs ma la sogs pa las byas pa ni ma yin no zhes bya ba'i tha tshig go/ /mi che mi chung skya ma yin/ /zhes bya ba la/ chung ba ma yin pa dang / che ba ma yin pa dang / skya ba ma yin no zhes bya ba ni tshig gi lhag ma yin no/ /dang ni thams cad sdud par byed pa'i don to/ / lhung bzed skya ba ni lhung bzed dkar po'o/ /de la lhung bzed ni rnam pa gsum ste/ rab dang 'bring dang chung ngu'o/ /de la rab ni ma ga d+hA'i bre'u chung do sran tshod dang bcas tshod ma dang bcas pa shong ba yin la/ chung tshad ni bre'u chung gang tsam dang / 'bring tshad ni bar ma dag yin te/ de'i phyir rab tshad dang chung tshad las go rims bzhin du lhag pa dang chung ba gang yin pa bcang bar mi bya'o zhes bya ba'i tha tshig go/ /bsod snyoms la 'jug pa'i dus su 'khar gsil dkrol bar bya'o zhes bya ba ni tshig gi lhag ma yin par khong du chud par bya'o/ /de'i phyir gzhan du 'dod pas 'jug par bya ba yin no/ / khyad par ji lta bu zhe na/ go bar bya ba dang ni khyi skrod phyir/ /zhes bya ba la sogs pa smos pa yin no/ /ni'i sgra ni sgra dang ldan pa kho na las bcang bar bya'i gzhan ni ma yin no zhes nges par gzung ba'i phyir ro/ /gang gi phyir dge 'dun gyis ma gnang ba ma yin pa gzhan rnyed par gyur na zhes bya ba de'i dbang du byas pa yin no/ /rang bzhin de yang ci'i phyir zhe na/ smras pa/ bsod snyoms la 'jug pa na bud med kyi yul gos med pa dag go bar bya ba dang / khyi bskrad par bya ba'i phyir te/ legs par kun nas go bar byed pa dang / khyi skrod par byed pa'i phyir de skad ces bya'o/ /khyi ni dud 'gro gzhan dag gi nye bar mtshon par byed pa yin la/ dang ni sdud par byed pa'i don yin no/ /rab tu byung ba'i rtags khas blangs pa dang 'gal ba'i phyogs zhes bya ba ste/ bslab pa'i gzhi bcu gnyis pa'o// //rab tu 'byung ba'i dus su slob dpon dgongs su gsol zhe'am mkhan po dgongs su gsol zhes bya ba la sogs pas mkhan por gsol ba 'debs pa yang 'byung bas/ bla mar gsol ba btab dang 'gal phyogs ni/ /zhes bya ba la sogs pas 'chad par byed de/ bla ma'i sgra ni/ mkhan po la bya ste/ mkhan po la gsol ba 'debs pa de ni/ /slob dpon dgongs su gsol/ / slob dpon gyis bdag ming 'di zhes bgyi ba'i mkhan por gsol ba 'debs kyi/ slob dpon gyis bdag gi mkhan po mdzad du gsol zhes bya ba la sogs pa yin te/ de yongs su gtong zhing bshig pa de ni 'gal ba yin la/ de'i phyogs su gyur pa ni de las byung ba yin pas na/ bla mar gsol ba btab pa dang 'gal phyogs so/ /de lta bur gyur pa de yang gang zhe na/ rang gi bla ma la ni bste stang med/ /ces bya ba la sogs pa smos pa yin te/ rang gi bla ma ste bdag nyid kyi bla ma la gus pa med pa gang yin pa de nyid de'i phyogs su gtogs pa yin par rig par bya'o/ / grogs tshangs pa mtshungs par spyod pa gzhan dag la yang gus pa med pa nyid ni kha na ma tho ba'i rgyu yin pas de yang chung bar 'gyur bar khong du chud par bya'o/ /de'i phyir 'di skad du lung las gnas brtan rnams dang / bar ma rnams dang / gsar bu rnams la gus pa dang bcas pa dang / rje sa dang bcas pa dang / 'jigs pa'i dbang du 'gyur bas gnas par bya'o zhes bya ba la sogs pa 'byung ba yin no/ /mkhan po yang slob dpon thams cad kyi nye bar mtshon pa yin no/ /de dag la ji ltar bya ba yin zhe na/ pha la rab sdug bla mar byed pa ltar/ /bdag nyid 'dod pas bla ma la rjes gnas/ /zhes bya ba smos te/ pha la rab tu sdug pa ni gnyen pa ste/ pha la rab tu sdug pa dang bla mar byed pa ltar/ rang gi bla ma la yang rjes su gnas pa ste nye bar gnas par bya'o zhes bya ba'i don to/ /de gang gis she na/ bdag nyid 'dod pas zhes bya ba smos te/ sdom can bdag nyid 'dod pa gang yin pa de bdag nyid shes pas zhes bya ba'i tha tshig go/ /bla mar byed pa zhes bya ba ni yon tan la dmigs pa sngon du song bas lus dang ngag gi 'jug pa yang bag 'khums pas 'jug pa yin no/ /de skad du bdag nyid shes pa rnams kyis rang gi bla ma la sdug pa dang gus pas nye bar gnas par bya'o zhes bya ba'i don du bstan par 'gyur ro/ /da ni bya bar gtogs pa rjod par byed pa yin te/ bya ba thams cad dris nas bya ba yin gyi ma dris par ni ma yin te/ de dag kyang dris nas bya'o zhes bya ba'i tha tshig go/ /dang ni sdud par byed pa'i don to/ /de la ji tsam zhig ma gtogs pa yin zhe na/ bshang dang gci dang so shing bza' ba dang / /mtshams kyi nang du rgyal la phyag bya dang / /chu btung ba dang de dag ma gtogs par/ /zhes bya ba smos te/ gtsug lag khang rtsig pa la sogs pas yongs su bskor ba'i nang gi mtshams te/ rtsig pa la sogs pa'i mtshams der ro/ /rgyal ba la phyag bya ba ste/ mchod rten la phyag 'tshal ba dag ma gtogs so/ /chu btung ba dang por byas pa gang yin pa de ni chu btung ba la sogs pa ste de dag ma gtogs par gzhan dag mi bya'o zhes bya ba'i tha tshig go/ /dang ni 'dir yang snga ma dang 'dra'o/ /bla ma ma langs snga rol sngar langs te/ /zhes bya ba la sogs pas bla ma la slob ma dang / nye gnas kyi bya ba de ston par byed pa yin te/ bla ma ma langs snga rol te tho rangs langs nas so shing sngon du song ba'i khrus byas pa'i 'og tu bla ma la yang gdong bkru bar bya ba'i phyir chu la sogs pa nye bar bstabs la/ bde bar gshegs pa la gus pa dang bcas pas phyag bya'o/ /de'i 'og tu bla ma la gus par phyag byas nas sku la mnyam pa ste/ rang bzhin du gnas sam zhes gus par gyur pa des de la phyis khyed kyi sku dge 'am zhes bya ba la sogs pas dri bar bya'o/ /de nas ci zhig bya ba yin zhe na/ bgyi ba ci mchis lung mnod de'i 'og tu/ /zhes bya ba smos pa yin te/ bgyi ba ni bya ba dag yin te klog pa dang 'don pa la sogs pa de'i dngos po'i bya ba de'i lung mnod pa'o/ /de'i 'og tu ste/ mkhan po dgongs su gsol zhes bya ba dang bgyi ba bgyid do zhes bya ba'i rjes la'o/ /de yi gnas khang nye 'khor phyag dar bya/ /zhes bya ba la bla ma de'i gnas khang gi nye 'khor der dkyil 'khor la sogs pa byas nas stan bsham par bya'o zhes bya ba ni tshig gi lhag ma yin no/ /de nas rgyal ba la yang dkyil 'khor bya/ /zhes bya ba la sogs pa la/ de nas te dus phyis rgyal ba bcom ldan 'das la dkyil 'khor byas nas bcom ldan 'das la g.yas su bskor ba bya zhing mchod rten la phyag bya'o/ /snga dro'i dus su zhes bya bar rig par bya ste/ gang gi phyir tshogs pa'i dus la bab po zhes bya ba la sogs pas de'i tshe mchod rten la phyag bya ba 'byung ba yin no/ /ji ltar bya ba yin zhe na/ nye ba'i sdom can rgan la phyag byas rjes/ /dge bas lus las snying po blang bar bya/ /zhes bya ba smos te/ dad pas phyag 'tshal ba ni dad pas phyag byas pa'i rjes te/ dus phyis zhes bya ba'i don to/ /bcom ldan 'das dang bla ma la phyag 'tshal ba'i dus su thag nye ba'i rgan po gang yin pa de dag la yang phyag byas nas dge bas lus las snying po blang bya ste/ /gang gi phyir bcom ldan 'das kyis snying po ma yin pa'i lus las snying po blang bar bya'o zhes gsungs pa'i phyir ro/ /gzhan yang / bla ma bsnyen bkur byed pas bza' ba dang / /btung ba la sogs zhim po thams cad dbul/ /zhes bya ba la bsnyen bkur byas pas na bsnyen bkur byed pa ste/ des bdag nyid kyi'am dge 'dun gyi zas sam bsod snyoms la brgyus pa las zang zing gi rnyed pa gang byung ba de las btung ba la sogs pa zhim po bstabs nas phyis bdag nyid bza' bar bya'o/ /sogs pa'i sgras gos la sogs pa gzung ngo / / lus kyi bsnyen bkur 'ba' zhig ma yin gyi/ /zang zing gis kyang bya'o zhes bya ba ni yang gi sgra'i don yin no/ /ni'i sgra ni nges par gzung ba'o/ /gzhan yang phyag byed pa'i dus su yang sdom can mi mthun pa nye bar lhags na ji ltar rtogs par bya ba yin zhe na/ sdom can mi mthun pa zhig lam du lhags/ /'on kyang bskol bar mi bya phyag byos shig /ces bya ba la sogs pa smos te/ phyag bya bar gtogs pa ni rgan po phyag bya bar 'os pa ste/ de'i dngos po ni phyag bya bar gtogs pa nyid do/ /sdom can mi mthun pa ste lam dang nye ba'i nye 'khor du lhags shing phyin par gyur pa la des kyang ma bkol bar phyag byos shig ces bya ba'i don to/ /kyang gi sgra ni mthun par gyur pa lta zhog gi /mi mthun pa ste 'thab krol can gyis kyang de bkol bar mi bya'o zhes bya ba'i tha tshig go/ /sdom can mi mthun pa des kyang ji ltar bya zhe na/ des kyang nad med cig ces brjod par bya/ /zhes smos te/ sdom can mi mthun pas phyag bya bar 'os pa des kyang nad med par gyur cig ces brjod par bya'o/ /ci'i phyir zhe na/ 'jig rten gsum ston bka' dang mi 'gal phyir/ /zhes bya ba smos te/ 'jig rten gsum gyi ston pa bcom ldan 'das de'i bka' ste/ sdom can mi mthun pa zhig phyag bya bar 'os pa nye bar lhags pa la zhes bslab pa'i gzhi bca' ba mdzad pa'i phyir ro zhes bya ba'i don to/ /nyid ni nges par gzung ba dang rim pa gzhan gyi don yin no/ /kyang gi sgra ni cig shos kyis kyang nad med par gyur cig ces brjod par bya'o zhes sdud par byed pa'o/ /dang ni tshig gi kha bskang ba'o/ /sbrid pa byung ba la ji ltar bya ba yin zhe na/ rgan zhugs shin tu rgan la sbrid byung dang / /zhes bya ba la sogs pa smos te/ na tshod kyis shin tu rgan por gyur pa de yang rgan zhugs te rgan zhugs kyi rigs can blang ba dang / dor ba mi shis pa'i phyir ring du 'tsho bar 'dod pa de lta bur gyur pa de dag kyang sbrid pa byung na sos par gyur cig ces brjod par bya'o/ /de dag 'ba' zhig ma yin gyi/ /khyim pa sbrid pa byung ba la'ang zhes bya ba la/ khyim pa 'tsho bar 'dod pa thams cad la yang sos shig ces brjod par bya'o/ /gsar bu sbrid byung nad med shog ces brjod/ / ces bya ba la gsar bu ste gzhon rabs rgan zhugs kyi rigs las gzhan pa la sbrid pa byung na nad med par gyur cig ces brjod par bya'o/ /nyid ni mos zhes brjod pa rnam par gcod pa'i phyir ro/ /rgan po sbrid byung phyag 'tshal zhes kyang brjod/ /ces bya ba la rgan zhugs las gzhan pa'i rgan rabs sbrid pa byung na sbrid pa dang ldan pa la phyag 'tshal lo zhes brjod par bya ba'i yan lag lnga dang byin pa nas bzung ba'i rang bzhin can ni ma yin no/ /dang ni ma bstan pa sdud par byed pa'i don te/ des ni bdag nyid sbrid pa byung na nad med par gyur cig pa dang / phyag 'tshal bar byed pa'i rgan rabs dang gzhon rabs dag la go rims bzhin du phyag 'tshal ba dang nad med par gyur cig ces brjod par bya'o/ /mngon par bstod pas phyag bya ba la sogs pas phyag byas pa yang rnam pa mang po yod pas de dag gi nang nas gus pas phyag bya ba du yod ce na/ 'di la gus par phyag bya rnam gnyis te/ /yan lag lngas gtugs byin pa gzung ba'o/ /zhes bya ba smos te/ 'di la zhes bya ba ni bstan pa 'di la'o/ /rnam pa gnyis yod pa'i phyir gus par phyag bya ba rnam pa gnyis kho na'o/ /kho na'i sgra ni rnam pa gsum pa rnam par bcad pa'i phyir ro/ /ni'i sgra ni gang gi phyir gyi don te/ gang gi phyir yan lag lnga dang byin pa nas bzung ba'i rang bzhin can ni gus par phyag byas pa yin pa de'i phyir rnam pa gnyis yin no/ /de la lag pa gnyis dang / pus mo gnyis sa la phab nas yan lag gi mgo bos sa la gtugs pa ste/ yan lag lnga po de dag gis phyag byas pa ni 'dir yan lag lngas phyag byas pa yin la/ tshig sngon du song ba'i tsog pus 'dug ste phyag bya bar 'os pa'i byin pa la lag pa gnyis kyis gzung ba de lta bu'i rang bzhin can gus par phyag byas pa gnyis pa yin no zhes bya ba'i don to/ /mun par bla ma spyi bo sar gtugs pa'i phyag bya min te zhes bya ba la/ mun par bla ma la phyag mi bya'o/ /bla ma nye bar mtshon pa nyid yin pa'i phyir gzhan dag la yang phyag mi bya'o/ /ji lta zhe na smras pa/ sar te sa gzhi la spyi bo'i gtsug gis gtugs pa'o/ /'o na ji ltar phyag bya zhe na/ bstan pa'i phyir tshig gis phyag bya zhes bya ba smos te/ phyag bya'o zhes bya ba ni thal mo sbyar ba sngon du song ba'i tshig gis phyag bya ba yin no/ /tu ni nges par gzung ba'o/ /gzhan yang sdom can phyag bya bar 'os pa zas za ba de la phyag bya'am mi bya zhe na/ sdom can bza' ba cung zad za ba dang / /zhes bya ba la sdom can gzhan phyag bya bar 'os pa gang yin pa de bza' ba cung zad za zhing 'dug pa la/ des phyag mi bya'o zhes bya ba'i tha tshig go/ /dang ni sdud par byed pa'o/ /de bzhin du/ mi gtsang phyogs ni bkru ba ma byas dang / /gos gcig pa dang kha gdong ma bkrus pa/ /de la phyag mi bya zhing des kyang min/ /zhes bya ba la mi gtsang ba'i lam gyi phyogs ma bkrus ma sbyangs pa gang yin pa de ni/ mi gtsang phyogs ni bkru ba ma byas pa'o/ /mi gtsang ba'i lam gyi phyogs zhes bya ba ni gci ba dang bshang ba'i lam dag gzung ste/ de lta bur gyur pa de la phyag mi bya zhing des kyang mi bya'o/ / gos gcig gang la yod pa de ni gos gcig pa ste/ stod g.yogs med pa de la phyag mi bya zhing des kyang phyag mi bya'o/ /kha gdong ma bkrus pa la sogs zhes bya ba ni 'di'i kha gdong zang zing dang bcas par 'jug pa gang yin pa de la yang phyag mi bya zhing des kyang phyag mi bya'o/ /de ltar thams cad la sbyar bar bya'o/ /da ni/ zas la bkad dang zhes bya ba la sogs pas phyag bya ba ma yin pa 'ba' zhig 'chad par byed de/ zas ni chos ston te za 'dod pas bkad pa ste 'dug pa'o/ /chad pa spyod pa ste chad pa'i las spyod pa'i phyir de la de skad ces bya'o/ /khyim na gnas pas na'am/ yang na rab tu byung ba khyim nang na 'dug pas na de dag ni khyim gnas te/ de gnyi ga la yang grags pa dang nges pa'i tshig gi tshul gyis khyim na gnas pa yin par rtogs par bya'o/ /tshul khrims 'chal pa ni bdag nyid nyes pa byung bar gyur pa'o/ / lus sgren mo ni pus mo'i dkyil 'khor dang lte ba'i dkyil 'khor mthang gos sam bla gos dag gis ma g.yogs pa ste/ lus ma g.yogs pa nyid ni sgren mo nyid yin la lus sgren mo gang la yod pa de ni lus sgren mo rnams so/ /zas la bkad pa dang / chad pa spyod pa dang / khyim na gnas pa dang / tshul khrims 'chal pa dang / sgren mo dang zhes gcig la gcig sbyor ba'i bsdu ba bya'o/ /de dag la phyag mi bya'o/ /de dag 'ba' zhig la phyag mi bya bar ma zad kyi 'on kyang gzhan yang phyag bya ba ma yin pa la phyag mi bya ba yang med de/ gnyid log pa dang / snyoms par zhugs pa la sogs pa lta bu'o/ /phyag bya ba du yod ce na/ rtag par ni/ bde gshegs dang ni rgan gnyis phyag bya'o/ /zhes bya ba smos te/ bde bar gshegs pa bcom ldan 'das dang / rab tu byung ba sdom can rgan pa gnyis po de dag kho na nyid phyag bya ba yin gyi gzhan la bya ba ma yin no zhes bya ba'i don to/ /dang ni sdud par byed pa'o/ /sngags klog pa yis lha gzhan phyag mi bya/ /zhes bya ba ni dbang phyug chen po la sogs pa'i sngags klog pa'i lha gzhan la phyag mi bya'o/ /ci'i phyir zhe na/ gang phyir de dag sdom pas rgan pa min/ /zhes bya ba smos te/ gang gi phyir lha de dag ni sdom pas rgan pa ma yin pa de'i phyir ro zhes bya ba'i don yin no/ /'i'i sgra ni tshig gi kha bskang ba'o/ /'o na gzhan gyis byas pa'i sngags klog pas ji ltar brjod par bya zhe na/ gzhan gyis byas pa'i sngags klog dkon mchog gsum/ /zhes bya ba la sogs pa smos te/ dkon mchog gsum po kho na la dkon mchog gsum la phyag 'tshal lo zhes phyag 'tshal ba'i mchod pas mchod nas phyis gzhan gyis byas pa'i sngags kho na klog cing brjod par bya'o/ /'i'i sgra ni rim pa gzhan du nges par gzung ba'o/ /gang yang gzhan la phyag 'tshal bar byed pa des cir 'gyur zhe na/ skyabs 'os sangs rgyas skyabs su song ba las/ /zhes bya ba la sogs pa smos te/ rab tu byung ba gang zhig skyabs su 'os pa sangs rgyas la skyabs su song nas lha'i bye brag gzhan nyid la bsam pa ste/ sems kyis phyag 'tshal bar byed pa de lta bur gyur pa de ni grong ste/ ljongs kyi bsod snyoms 'bar ba za bar byed pa yin no/ /ci zhig byas nas she na/ shAkya'i rigs kyi rtags ni bslus gyur nas/ /zhes bya ba smos te/ shAkya'i rigs te bcom ldan 'das kyi rtags cha lugs bslus shing gtses par gyur ces bya ba'i don to/ /dang ni gang gi phyir cha lugs gzhan dang / bsam pa gzhan dang / bya ba gzhan dang / dkon mchog gsum las gzhan du zhes sdud par byed pa'o/ /mkhan por gsol ba btab pa dang 'gal ba'i phyogs te bslab pa'i gzhi bcu gsum pa'o// //da ni/ de nas sdom pa 'jig pa'i phyogs bshad de/ /zhes bya ba la sogs pas sdom pa mtha' dag 'jig pa'i phyogs dang mthun pa brjod pa yin no/ /de nas ni bstan ma thag pa'i 'og tu'o/ /sdom pa ste dge tshul gyi bslab pa'i gzhi mtha' dag 'jig cing yongs su btang la phul ba de'i phyogs su gtogs pa de'i dngos po de la de skad ces bya'o/ /de dag kyang gang zhe na/ dkon mchog gsum la gus pa med pa dang / /zhes bya ba la sogs pas de ston par byed pa yin te/ dkon mchog gsum la gus pa med pa ni brnyas par byed pa yin te/ des gsungs pa la nan tan du mi byed pa'i phyir zhes bya ba la sogs pa lta bu'o/ /chos 'dis ci zhig bya zhes bya ba la sogs pa ni chos la brnyas pa yin no/ /gnang ba byin pa med par de'i bka' las shin tu 'das so zhes bya ba la sogs pa ni brnyas pa yin pa'i phyir dge 'dun la ma gus pa yin no/ /de bzhin du de ltar gyi sgra thams cad du blta bar bya ste/ de ltar 'og tu/ nyi ma lnga las lhag par gnas med dang / /zhes bya ba la gnas shi'am bslab pa btang ngam yul gzhan du song ba na gnas tshol ba'i phyir zhugs na nyi ma lnga las lhag par gnas med par gnas pa de la kha na ma tho ba dang bcas pa ma yin par mi 'gyur ro/ /'am ni rnam par rtog pa'i don te/ tshol ba la 'jug pa nyid las ma rnyed par gyur na nyin zhag dang po nas brtsams te zhes bya ba dang / gnas med par yul gzhan du song na gnas su phyin pa na nyi ma gsum pa'i 'og tu gnas med par gnas pa yin no zhes bya ba de dag khong du chud par bya'o/ /'dir ji skad bshad pa'i nyin zhag las lhag par gnas med par 'dug pa 'ba' zhig la yid kyir 'gyur bar ma zad kyi/ 'di rnyed pa dang bza' ba yang mi dbang ngo / /skabs dbye ba dang gso sbyong las nyams rnams/ /zhes bya ba la dgag dbye dang gso sbyong de dag gi las te bya ba de nyams pa ni mi byed pa yin no/ /'di skad du dgag dbye dang / gso sbyong gi las dge tshul mi byed na yid kyir 'gyur ro zhes bstan par 'gyur ro/ /dge tshul la gso sbyong bya bar gsungs pa nyid kyi phyir nyes pa med do snyam du sems par 'gyur ba'i phyir/ ci ste cho ga mngon sum med kyang ni/ /zhes bya ba la sogs pa smos pa yin te/ ji ste mngon sum ste dngos su gso sbyong byed pa'i cho ga dge tshul dag gis gso sbyong bya'o zhes bya ba med pa de lta na yang dgag dbye bshad pa ste/ 'dul ba 'dir dge tshul dag gi dgag dbye bshad cing bstan pa'i phyir gso sbyong yod pa yin no/ /gang gi phyir bcom ldan 'das kyis dge slong rnams kyi dgag dbye byas nas dge tshul dag gi dgag dbye bya'o/ /zhes gsungs pa de'i phyir de dag gi gso sbyong yang yod pa yin no zhes khong du chud par bya ste/ 'di gnyis la don tha dad pa med pa'i phyir ji ltar na tshig gcig gis cig shos thob par rung snyam pa'i blos dogs pa la/ skabs dbye ba ni dag pa brjod pa'i don/ /zhes bya ba la sogs pa smos te/ dag pa ste nyes pa med pa de nyid kyi phyir brjod cing bstan pa'i don to/ /dgag dbye'i dgos pa gang yin pa de ni/ /zhes bya ba'i don te de ltar rig par bya'o/ /de gang zhe na/ de dang gso sbyong don ni tha dad med/ /ces bya ba smos te/ gso sbyong gi don te dgos pa de nyid dgag pa brjod pa'i mtshan nyid kyi rgyu yin pa'i phyir 'dir dgag dbye'i thad las gso sbyong gi don tha dad pa med de lhag pa med ces bya ba'i don to/ /de'i phyir gso sbyong gi dgos pa yang dag pa kho na yin pa'i phyir ma gsungs su zin kyang tshig cig shos kyis grub pa nyid yin no/ /de nyid kyi phyir dgag dbye byas nas yang gso sbyong bya ba ma yin te/ dgag pa nyid du grub pa'i phyir ro/ /'di'i sngags gang yin zhe na/ btsun pa dgongs shig /deng 'dir 'phags pa'i zhes bya ba la sogs pa smos te/ 'dir de lta bu'i sngags kyi mtshan nyid smra zhing brjod par bya ba yin no/ /btsun pa dgongs shig ces bya ba la sogs pas de 'chad par byed pa yin te/ kye btsun pa dgongs su gsol/ deng 'phags pa'i dge 'dun gyi gso sbyong bco lnga pa'am bcu bzhi pa lags la/ de ltar deng bdag dge tshul gyi yang gso sbyong bco lnga pa'am bcu bzhi pa lags te/ yang dag par dgag pa bdag nyid kyis brjod par bya'o zhes bya ba de lta bu ni sngags yin te/ de dag ni sngags kyi nye bar mtshon pa yin no/ /sngags dge slong gi mdun du 'di ltar brjod par bya ste/ btsun pa dgongs su gsol/ /deng dge 'dun gyi gso sbyong bco lnga pa'am/ bcu bzhi pa lags la/ bdag dge tshul ming 'di zhes bgyi ba'i gso sbyong yang bco lnga pa'am/ bcu bzhi pa lags te/ bdag dge tshul ming 'di zhes bgyi ba de'i bar chad kyi chos rnams yongs su dag go zhes bdag nyid smra'o zhes bya ba yin no/ /mchod rten nye 'khor ci nus phyags nas kyang / /zhes bya ba la sogs pas gso sbyong dgag dbye'i thog mar bya ba ston te/ gso sbyong la sogs pa'i dang po ste/ thog mar mchod rten gyi nye 'khor sku gdung gi nye 'khor dad pas ci nus phyags pa dang / skyang nul byas nas so/ /bdug pa me tog rnams kyis gtor bar bya/ /zhes bya ba la me tog rnams kyis gtor zhing gcal du bkram pa byas nas so/ /de ltar byas pa'i 'og tu bdag nyid kyis bdag nyid kyi rgyud la bsams shing bdag la nyes pa byung bar gyur tam zhes so sor rtog par 'dod pas rgyud la dpyad par bya'o de nas phyis sdom can gyi mdun du nyes pa de nyes byas so sor bshags par bya'o/ /so sor bshags par bya zhes bya ba 'dis 'di skad du thog mar bsgrags nas phyis spyir bdag gis ji skad du brjod pa zhes bshags par mi bya'i/ 'on kyang sngags kyis kyang nyes pa so sor brjod par bya ba yin no/ /rnam pa gzhan du na bshags pa ma byas par 'gyur te bsgrags pa nyid kyi phyir ro zhes bstan par 'gyur ro/ /nyes pa bshags pa dang gso sbyong byin gyis brlabs pa dang / dgag dbye dge tshul gyis dge slong gi mdun du zhes khong du chud par bya'o/ /da ni/ nyi ma lnga las lhag par gnas med dang / /zhes sngar bstan pa'i gnas de'i rang gi ngo bor bstan pa'i phyir/ tshul khrims ldan zhing 'dul la mkhas pa dang / /zhes bya ba la sogs pa smos te/ tshul khrims ni 'chal pa'i tshul khrims kyi skabs ma yin pa'i phyir srog gcod pa la sogs pa las slar ldog pa'i mtshan nyid 'dul ba las gsungs pa dang / gzhan dge bar spyod pa dang / drang po'i rang bzhin can dang / gnyen pa nyid dang / phan par 'dod pa nyid dang / phan pa spyod pa nyid ces bya ba de lta bu la sogs pa gang gis dge ba'i ngang tshul can yin no zhes 'jig rten pa dag sems te/ de dang ldan zhing yang dag par 'byor pa ni tshul khrims dang ldan pa zhes bya'o/ /gang gi phyir de lta bur gyur pa kho nas sems can sdud par nus kyi gzhan gyis ni ma yin te/ ldog pa'i rang bzhin nyid yin pa'i phyir ro/ /de nyid kyi phyir slob dpon yon tan 'od kyis tshul khrims dang ldan pa mang du thos pa dang sbyar ba zhes bstan pa yin no/ /'dul ba la mkhas pa ni ltung ba dang ltung ba ma yin pa'i rnam pa shes pa'i phyir mkhas pa'o/ /nad pa dag dang gnas pa dag la sman dang nad g.yog byed pa la sogs pas snying brtse ba ni nad pa la snying brtse ba'o/ /'khor dag dang zhes bya ba la 'khor ni slob ma dang nye gnas yin te/ de dag gal te tshul khrims dang / lta ba dang / spyod pa dang / 'tsho ba la sogs pas yongs su dag par 'gyur ba de lta bu des ni gnas kyi 'khor dag pa yin par 'gyur ro/ /chos dang zang zing phan 'dogs de mchog byed/ /ces bya ba la chos ni dam pa'i chos klog pa la sogs pa yin la/ zang zing ni lhung bzed dang chos gos la sogs pa yin pas na de gnyis kyis rjes su phan 'dogs pa ste yang dag par sbyin pa dag gis de dag la phan 'dogs pa la gzhol bas na/ chos dang zang zing phan 'dogs de mchog ces brjod do/ /dus su ston pa zhes bya ba gang zhig gang gdams pa'i dus dang / rjes su ston pa'i dus de ni de la dus su ston pa yin pa'i phyir de skad ces bya'o/ /dper na gdams par 'os pa'i nye gnas dag la dus te gnas skabs dben par rjes su bstan par bya ba yin gyi rnam pa gzhan du na skyon med pa la rgyab kyis phyogs pa skye bar 'gyur ba dang / pha rol po dang thag nye bar gyur pas ston par 'gyur te/ ngo tsha ba dang bral bar gyur pa'i phyir ro/ /de'i sgra ni de ltar na'i don yin te de ltar bshad ma thag pa'i yon tan dang ldan pa'i bla ma de ni sems can sdud pa la bsngags pa yin no/ /gang gi phyir de lta bu yin pa de'i phyir de lta bur gyur pa'i thad las gnas gzung bar bya'o/ /dang ni rim pa gzhan dang sdud pa'i don to/ /de ltar yang gnas gzung ba ni rkang pa gnyis la phyag bya zhing phyag byas nas byin pa gnyis dang / rkang pa gnyis kyi mthil bcangs nas 'di skad du/ btsun pa dgongs su gsol/ bdag dge tshul ming 'di zhes bgyi ba btsun pa la gnas par gsol na/ btsun pas bdag la gnas stsal du gsol/ bdag btsun pa'i tha na gnas par bgyi'o zhes brjod pa na gnas kyis thabs yin no zhes brjod par bya zhing / bdag nyid kyis legs so zhes brjod par bya'o/ /da ni/ slob dpon la ni dad cing tshul khrims gtsang / /zhes bya ba la sogs pas gnas pa'i mtshan nyid ston te/ slob dpon la dad pa ni slob dpon la dad pa ste/ 'di skad du slob dpon la mnyan pa dang gus pa dag gis sten par byed ces bstan par 'gyur ro/ /tshul khrims gtsang zhes bya ba ni tshul khrims yongs su dag pa gang la yod pa zhes bya ba'i dbang du mdzad nas bslab pa 'dod ces bya ba'i tha tshig go/ /bsam gtan dang ni klog la rtag tu brtson/ /zhes bya ba ni bsgom pa dang dam pa'i chos klog pa la rtag tu brtson pa ste le los gnod par ma gyur cig ces bya ba'i tha tshig go/ /klog pa smos pa ni mnyen pa la sogs pa'i nye bar mtshon par byed pa'o/ /dang ni sdud pa'i don to/ /sgrin zhing dul la des dang ldan pa ni/ /zhes bya ba la sgrin pa ni gnas 'cha' bar byed pa la le lo'i rnam pa dang mi ldan pa yin te/ gzhan klog pa la sogs la rtag tu brtson/ /zhes bya ba smras pa'i phyir ro/ /lus dang ngag gi bya ba la khyad par du 'dul zhing thul bas na/ de dul ba ste rgod pa spangs pa dang bral ba zhes bya ba'i bar du'o/ /des pa ste bzod pa dang ldan zhing 'byor ba de lta bur gyur pa'i sdom can gnas 'cha'i chos dang ldan par shes par bya'o/ /'di skad du de lta bur gyur pa'i gnas pa zhes bstan par 'gyur ro/ /dgag dbye bshad pas 'dir yang gso sbyong yod/ /ces sngar smos pas dbyar tshul du zhugs pa la dgag dbye yod pa'i phyir/ dbyar yang tshul du 'jug par bya ba ste/ /zhes bya bas de ston pa la/ dbyar te dbyar gyi dus su dbyar gnas par khas len par byed pa ni dbyar tshul du 'jug pa ste/ khas len pa dam bca' ba'i sngags kyis 'dir gnas par bgyi'o zhes tshul du 'jug pa dge tshul gyis rab tu bya ba yin no/ /de la dbyar tshul du 'jug pa zhes bya ba 'dir/ dbyar gyi sgras dbyar zla 'bring po'i dang po'i zhag gam de ma thag pa'i zla ba'i zhag la bya ste/ de la sogs pa dbyar gyi dus rnam par gzhag pa yin pa'i phyir ro/ /ji ltar khas blang bar bya zhe na/ grong la sogs pa'i ming brjod rim pa bzhin/ /zhes bya ba smos pa yin te/ grong dang / sbyin bdag dang / zhal ta ba dang / nad g.yog dag gi ming smos pa'i rim pa bzhin du tshul du 'jug par bya ba zhes bya ba'i tha tshig go/ /de la 'di ltar khas blang bar bya ste/ dbyar zla ra ba'i de ma thag pa dbyar zla 'bring po'i nyin zhag dang po'i mtshan mo dge slong gi mdun du/ btsun pa dgongs su gsol/ deng dge 'dun gyi dbyar nye bar bsgrub pa'i dbyar zla 'bring po'i tshes bcu drug lags la/ bdag dge tshul ming 'di zhes bgyi ba'i yang dbyar nye bar bsgrub pa'i dbyar zla 'bring po'i tshes bcu drug lags te/ bdag dge tshul ming 'di zhes bgyi ba gnas 'dir 'di lta ste gnas ral ba dang / 'drums pa bcos pa'i slad du sbyin bdag ming 'di zhes bgyi ba dang / zhal te ba che ge mo zhig ces bgyi ba dang / spyod yul gyi grong che ge mo zhes bgyi ba dang / nad g.yog che ge mo zhes bgyi bas dbyar snga ma zla ba gsum gnas par khas blang ngo / /bdag dbyar 'di na mchis shing bdag gi dbyar gyi gnas ni 'di lags so/ cig shos kyis thabs yin no/ /zhes brjod par bya zhing bdag nyid kyis legs so zhes brjod par bya ba yin te/ de lta bu'i sngags kyis khas blang bar bya'o/ /dbyar gyi nang du gzhan du 'gro dgos pa'i rkyen byung na ji ltar bya zhe na/ ji ste de ni gzhan du 'gro 'dod na/ /zhes bya ba la sogs pa smos te/ gal te dbyar tshul du zhugs pa'i gnas las de gzhan du 'gro bar byed pa de'i tshe dge slong mdun du nyi ma bdun sngags kyis byin gyis brlabs te 'gro ba la nyes pa yod pa ma yin no zhes bya ba'i tha tshig go/ /nyi ma bdun smos pa ni ches mchog tu bya ba yin te/ nyi ma gcig la yang byin gyis brlab pa 'dul ba las gsungs pa'i phyir ro/ /'di ltar byin gyis brlab par bya ste/ btsun pa dgongs su gsol/ bdag dge tshul ming 'di zhes bgyi ba nang mtshams dang bcas pa'i gnas 'dir dbyar snga ma zla ba gsum gnas par khas blangs pa las/ bdag ming 'di zhes bgyi ba chos dang ldan pa'i dge 'dun gyi bya ba zhig gi slad du dgung bdun mtshams kyi slad rol du mchi ba dang / de tshun chad kyis slar mchi bar btsun pa'i spyan sngar byin gyis brlab bo/ /bdag 'di na mchis shing bdag gi dbyar gyi gnas 'di lags so zhes brjod par bya'o/ /tshul khrims nyams pa ngal sor gzhug mi bya/ /zhes bya ba ni tshul khrims nyams shing zhig pa gang yin pa ni tshul khrims nyams pa ste/ mtha'i nyes pa byung ba gang yin pa de gal te shes pa'am dogs pa'am yid ches pa las thos pa de lta bur gyur pa de ngal sor gzhug par mi bya ste/ lus dub cing nyam chung bar gyur pa ngal so bar byed pa'o/ /de ni tha na so shing bstab pa tsam gyi bsnyen bkur du bya ba thams cad kyi nye bar mtshon par byed pa'o/ /de dang gnas dang longs spyod bya ba min/ /zhes bya ba ni tshul khrims 'chal pa de dang / lhan cig gnas gcig tu gnas pa tha na nub gcig dag kyang ngo / /longs spyod ni rnam pa gnyis te/ zang zing gi longs spyod dang / chos kyi longs spyod do/ /de la zang zing gi longs spyod ni gcig tu dga' bas gnas pa dang / bza' ba'am btung ba kun du longs spyod pa dang / de la byin pa'am de las len pa de dag thams cad yin par khong du chud par bya'o/ /chos kyi longs spyod ni de las dam pa'i chos kyi gdams ngag mnod pa dang 'dzin pa la sogs pa dang / gso sbyong la sogs pa nyams su myong ba yin te/ de nyid kyi phyir de lta bur gyur pa gang yin pa de dang lhan cig gnas pa dang longs spyad par mi bya'o zhes bya ba'i tha tshig go/ /shin tu thal bar 'gyur ba'i dmigs kyis bsal ba ni/ pha ma dang ni bla ma nad pa rnams/ /zhes bya ba la sogs pa smos te/ pha dang ma ni pha ma'o/ /de dag dang bla ma ste slob dpon dang / mkhan po dag dang nad pa rnams/ /zhes bya ba'i nad pa dag tshul khrims nyams pa ste/ tshul khrims dang bral bar gyur kyang bsnyen bkur bya ba yin te/ phan 'dogs pa'i zhing nyid yin pa'i phyir dang / snying rje'i zhing nyid yin pa'i phyir de dag ni tshul khrims rjes su brtag par bya ba ma yin no/ /yang na'i sgra ni ngag nye bar bkod pa yin la dang ni sdud pa'i don to/ /'thab krol byed pa dag ji ltar bya zhe na/ 'thab krol can dang khyim sun 'byin pa dang / /zhes bya ba la sogs pas ston te/ 'thab krol can te rtsod pa byed pa dag la/ gal te bzlog tu zin kyang rtsod pa mi gtong ba de'i tshe bskrad par bya ba yin no/ /khyim ste bram ze dang khyim bdag dag chang btung ba la sogs pa ma dad pa'i dngos po kun du spyod pas sun 'byin par byed/ ma dad par byed pa gang yin pa de yang bskrad par bya'o/ /de dag 'ba' zhig bskrad par bya bar ma zad kyi gsum pa yang bskrad par bya ba yin no/ /de gang zhe na/ 'dir tshul khrims nyams pa zhes bya ba smos te/ 'dir zhes bya ba ni chos 'dul ba 'dir ro/ /tshul khrims nyams shing tshul khrims 'chal par gyur pa de yang bskrad par bya'o/ /ci zhig byas nas she na/ gaN+DI brdungs nas zhes bya ba smos te/ gaN+DI brdungs shing dge 'dun gyi tshogs nas rnam par dpyad de bskrad par bya ba yin gyi de lta de ltar ni bskrad par bya ba ma yin no zhes bya ba ni tshig gi lhag ma'o/ / ji ltar byas nas bskrad par bya ba yin zhe na/ rul pa'i ro bzhin du ni zhes bya ba smos te/ ro dang rul pa zhes bya ba ni rul pa'i ro ste rnam pa de lta bur ro/ /de bzhin du ni rnam pa 'di ltar zhes rtog pa'i phyir te/ 'di ltar shi ba'i ro rul par gyur pa dang lhan cig gnas par mi nus te skyo bar byed pa nyid yin pa'i phyir ro/ /de bas na de bzhin du de dag kyang rul ba'i ro bzhin du bya'o/ /gaN+DI brdung ba ni dge 'dun bsdu ba'i don yin gyi/ bskrad pa'i phyir ni ma yin te/ de'i don du gaN+DI brdung ba ma gsungs pa'i phyir ro/ /ci 'thab rtsod byas nas sam zhe na/ 'thab rtsod med par zhes bya ba smos te/ rtsod pa ma byas pa kho nar te lus kyi 'thab rtsod la sogs pa de'i don du ma byas par zhes bya ba'i tha tshig go/ /bskrad par bya ba de dag gi rten du gyur pa de dag ji ltar bya zhe na/ mdo 'dzin gzhan yang rten gyur gang yin pa/ /zhes bya ba la sogs pa smos te/ mdo sde 'dzin pa dang de bzhin du gzhan yang 'dul ba 'dzin pa dang / ma mo 'dzin pa dang / mang du thos pa rten du gyur pa de dag kyang bskrad par bya'o/ /ji ltar zhe na/ cho ga bzhin du brtags te zhes bya ba smos te/ 'dul ba'i cho ga bzhin du dpyad nas zhes bya ba'i tha tshig go/ / dang ni sdud pa'i don to/ /gang gi tshe rten byed pa btang bar gyur pa de'i tshe rten byed pa grol bar gyur pa yin pas yang gzhag par bya'o/ /gal te ma bcug na de'i tshe gdon mi za bar nyes par 'gyur te/ 'di skad du gal te bzod pa bya bar 'os pa dang / rgyu mtshan btang ba dag 'jug tu ma bcug gam/ bzod pa ma byas pa de'i tshe gdon mi za bar bzod pa ma byas pa las nyes pa kho nar 'gyur ro zhes bstan par 'gyur ro/ /grangs can la sogs blo dman gang klog pa/ /de la kha zas tsam yang dug tu 'gyur/ /zhes bya ba la grangs can la sogs pa'i phyi rol gyi bstan bcos blo dman pa gang zhig klog par byed na dge tshul de la/ grong ngam dge 'dun gyi kha zas za ba dug nyid du 'gyur te de lta bu la mngon par sbyor ba de dag la gnang ba med do zhes bya ba'i tha tshig go/ /de ltar na phyi rol gyi bstan bcos rung ba ma yin pa 'don par byed pa de thams cad kyi thams cad du bkag pa yin no/ rung ba dag kyang ji ltar gdon par bya zhe na/ ston pa'i gzhung la nyin mtshan cha gnyis dag /goms bya gzhan gyis dang ba min pa bklag /ces bya ba la/ ston pa bcom ldan 'das kyi gzhung ste bka' gang yin pa de la nyin mtshan gyi cha gnyis mngon par sbyor bar bya zhing blo dman pa ma yin pa gzhan blo rnon po dag gis cha gsum pa la phyi rol gyi bstan bcos dam pa bklag par bya'o zhes bya ba ni tshig gi lhag ma'o/ /dam pa smos pa ni nyan pa la sogs pa nye bar mtshon pa yin no/ /bcom ldan 'das dang rgan rims la sogs pa'i mtshan ji ltar gzung bar bya ba yin zhe na/ yon tan sngar smos ston pa'i mtshan brjod bya/ /zhes bya ba la/ 'di ltar ston pa bcom ldan 'das shAkya thub pa gzhon nu don grub ces bya ba la sogs pas mtshan brjod cing smra bar bya'o/ /ji lta zhe na/ yon tan sngar smos zhes smos pa yin te/ yon tan smos pa ni yon tan dag brjod pa'o/ /de sngar te thog mar gyur pa gang yin pa zhes bya ba'i dbang du byas nas yon tan brjod pa ni/ dper na sangs rgyas bcom ldan 'das thams cad mkhyen pa zhes bya ba de lta bu la sogs pa'i yon tan brjod pa sngon du song ba can gyis bcom ldan 'das kyi mtshan brjod par bya'o zhes bya ba ni tshig gi lhag ma'o/ /de nyid kyi phyir de bzhin gshegs pa'i mtshan rigs kyi sgo nas brjod par mi bya'i/ 'on kyang yon tan brjod pa sngon du song ba can gyi zhes bya ba la sogs pa gsungs pa yin no/ / bla ma slob dpon ming tshig brjod mi bya/ /slob dpon gyi ming slob dpon gyi tshig ma smos par brjod par mi bya'o zhes bya ba'i tha tshig go/ /btud de don la sogs pa'i tshig ldan pas/ /mkhan por gyur pa'i ming nas brjod par bya/ /zhes bya ba ni don gyi slad du mtshan nas smos te zhes bya ba'i tshig dang bcas pas mkhan por gyur pa'i ming btud de gus pa dang bcas pas brjod par bya ste/ de dag sngon du song ba zhes bya ba'i tha tshig go/ /rgan la btsun pa'i nye ba'i tshig gis brjod/ /ces bya ba la rgan po la btsun pa ji ltar zhes bya ba'i nye ba'i tshig 'dis brjod par bya'o/ /'di skad du btsun pa'i nye ba'i tshig gi sngon du rgan po'i ming gzung bar bya'o zhes bstan par 'gyur ro/ /gzhon la tshe dang ldan pa'i nye tshig brjod/ /ces bya ba la gzhon pa ste gzhan dag la yang brjod par bya'o/ /ji lta zhe na/ tshe dang ldan pa'i nye tshig ces bya ba smos te/ tshe dang ldan pa zhes bya ba la sogs pa'i nye ba'i tshig gis gzhon pa dag la yang brjod par bya'o/ /'di skad du gzhon pa la yang tshe dang ldan pa'i sgra brjod la ming gzung bar bya'o zhes bya ba'i don to/ /de ltar na 'dul ba'i tha snyad 'dir ming gzung ba'i go rims can du rig par bya'o zhes bya ba ni tshig gi lhag ma'o/ /dge tshul gyi tshig le'ur byas pa las sdom pa thams cad 'jig pa'i phyogs zhes bya ba ste/ bslab pa'i gzhi bcu bzhi pa'o// //de ltar de dag rgyas par bstan nas mdor bsdus pa yang ston par byed de/ gnang dang mi gnang gang yin pa/ zhes bya ba la gnang ba ma yin pa ste/ rjes su gnang ba gang yin pa khyed rnams kyis kyang bkag cing mi bya'o zhes bya ba gang yin pa de lta bur gyur pa ni gzung bar bya ba'am spang bar bya ba ma yin no/ /ji lta zhe na/ de ni gsung dang mthun pa ste/ gsungs pa dang 'dra bar brtags nas so/ /'di skad du bcom ldan 'das kyis rjes su gnang ba ma yin pa dang bkag pa med pa gang yin pa rjes su gnang ba dang mthun pa sten pa de'i tshe gzung bar bya zhing gzhan du na mi bya'o zhes bstan par 'gyur ro zhes bya ba'i tha tshig go/ /de ni zhes bya ba'i sgra ni ngag nye bar bkod pa'o/ /dper na bcom ldan 'das kyis so rtsi za ba bcas pa yang ma mdzad bkag pa yang ma mdzad pa/ a ru ra la sogs pa ltar sman gyi blos nye bar longs spyod na nyes par mi 'gyur la/ 'on te rgyags pa'i bsam pas ni ma yin na ni dris byugs pa la sogs pa dang 'dra bar 'gyur ba'i rgyu nyid yin pa'i phyir nyes par 'gyur te/ de bzhin du gzhan dag la yang blta bar bya'o/ /de bzhin du 'di ni mar me dang 'dra ba ni mar me dang mthun pa ste/ bla ba dang dka' ba nas gsal bar byed pa'i phyir bde bar gshegs pa bcom ldan 'das kyis gsungs pa 'dul ba mdor bsdus pa zhes bya ba gzhan khyed kyi yin no/ /'dul ba mdor bsdus pa zhes bya ba ste bco lnga pa'o// //da ni/ dge tshul bslab pa bsdus las byung ba yi/ /zhes bya ba la sogs pa de las byung ba'i dge ba yongs su sngo bar byed de/ dge tshul ba rnams kyi bslab pa ni kun du spyod pa yin la de bsdus pa ni sdud pa'o/ /'di las byung bas na byung ba ste rgyu bstan pa yin no/ /dge tshul gyi bslab pa bsdus pa kho na las byung ba'i rgyus bsod nams skyes pa gang yin pa de dge tshul bslab pa bsdus las byung ba'i bsod nams gang skyes pa'o/ /rnam pa de lta bu'i bsod nams skyes pa gang yin pa des/ 'jig rten 'di dag yang dag par rdzogs pa'i byang chub dpal gnas te/ sangs rgyas kyi sar deng bar gyur cig /gang gis she na/ shAkya 'od kyis bstan pa'i lam nyid nas/ /zhes bya ba smos te/ shAkya'i rigs su 'khrungs pa nyid kyi phyir bcom 'das ni shAkya'o/ /de'i bka' ni rab tu gsal ba'i phyir 'od yin te/ bla ba dang dka' ba gsal bar byed pa nyid yin pa'i phyir ro/ /bka' 'od du gyur pa des kun nas bstan cing gsal bar mdzad pa'i lam de nas dong bar gyur cig ces bya bar sbyar ro/ /yang na shAkya 'od ces bya ba ni tshig le'ur byed pa mdzad pa'i slob dpon de nyid kyi mtshan yin pas na de kun nas bstan pa'i lam nas te/ tshig le'ur byed pa'i lam nas so/ /'di skad du 'jig rten rnams slob dpon shAkya 'od kyis bstan pa'i tshig le'ur byas pa'i lam nas yang dag par rdzogs pa'i byang chub kyi gnas su deng bar gyur cig ces bstan par 'gyur ro/ /da ni/ bde gshegs gsungs pa 'dul ba rgya mtsho las/ /zhes bya ba la sogs pas bdag nyid gzhan gyi dbang gis 'jug pa ston par byed de/ bde bar gshegs pas gsungs pa'i bslab pa nyid ni rin po che yin te/ bsod nams dang mi ldan pa rnams kyis rnyed dka' ba nyid yin pa'i phyir ro/ / khyad par ji lta bu zhe na/ 'bar ba ste 'od dang ldan pa dang mchog tu gyur pa zhes bya ba'i bar du'o/ /'dul ba kho na rgya mtsho yin te/ shin tu rgya che ba nyid dang / shin tu phra ba rnam par spyod pa'i phyir de ni gting dpag par dka' ba'i phyir ro/ /de las rin po che btus pa yin no/ /gang gis she na/ dbang po'i rdo rjes zhes bya ba smos te/ ji ltar dbang po'i rdo rjes rin po che phug nas rgyan du byed pa de bzhin du/ 'dul ba de las bslab pa'i tshig btus nas dbang po'i rdo rje'i sdeb sbyor gyis bslab pa rin po che phug nas phreng bar brgyus zhes bya ba'i tha tshig go/ /dbang po'i rdo rjes zhes bya ba'i tshig 'di ni phal che ba'i dbang du byas pa yin te/ nye ba'i dbang po'i rdo rje yang yod pa'i phyir ro/ /dper na/ 'di dag bdag po tha dad nyes byas rnams/ /zhes bya ba la sogs pa lta bu'o/ /yang na nye ba'i dbang po'i rdo rje la yang dbang po'i rdo rje'i sgra brjod pa yin te/ phyogs gcig chos mthun pa nyid kyi phyir nyes pa med do/ / gang gi lugs su phye ba yin zhe na/ gzhi kun yod par smra ba'i 'o/ /gang gi ngor phye zhe na/ shAkya'i grogs ngor nges par 'di phye ste/ /zhes bya ba smos te/ las dang 'bras bu la sogs pa thams cad yod do zhes smra ba gang dag yin pa de dag ni/ thams cad yod par smra ba yin te bcom ldan 'das kyis nyan thos kyi rtsa bar gyur ba yang de yin la/ thams cad yod par smra ba yang yin pas gzhi thams cad yod par smra ba yin no/ /de dag gi bslab pa nges par phye zhing bkod pa gang yin pa des dge tshul dag gi rgyan du bya ba'i phyir/ 'di phreng bar brgyus pa yin no zhes bya ba ni tshig gi lhag ma'o/ /gzhir gyur pa zhes bya ba gang las she na/ smras pa/ legs par sbyar ba'i skad kyi tha snyad du byed pa'i phyir ro/ /de ltar yang ya rabs dag ni legs par sbyar bas tha snyad du byed kyi/ tha mal pa'i skye bo ni ma yin no zhes zer ro/ /don de ni ya rabs su shes par bya ba'i phyir sgra'i mtshan nyid bstan pa yin la/ ya rabs kyang 'jig rten na gzhir gyur pa yin te/ de dag las 'jig rten gyi tha snyad 'byung ba yin pa'i phyir ro/ /gzhi thams cad yod par smra ba de dag kyang de dang 'dra ba yin te/ de las sde bar gzhan gyi tha snyad du bya ba 'don pa yin gyi/ gzhan dag las ni ma yin te/ tha mal pa dang / zur chag dang / 'bring du 'don pas brjod pa'i phyir dang / dus phyis byung ba nyid yin pa'i phyir ro/ /'di skad du yang bcom ldan 'das yongs su mya ngan las 'das nas ring po ma lon par dgra bcom pa lnga brgya/ rgyal po'i khab tu 'dug nas sde snod gsum bsdu ba mdzad la/ de'i 'og tu mya ngan las 'das nas lo brgya rtsa bcu lon pa na 'phags pa thams cad 'dod pa la sogs pa nas sgur po dang / zhing ldan la thug par dgra bcom pa bdun brgya yangs pa can du 'dus nas/ bsdu ba gnyis pa mdzad de hu lu hu lu ka'i rung ba la sogs pa bcu bsal ba yin te/ rgya cher ni phran tshegs las 'byung ngo / /de nas rgyal po d+harma a sho ka shi ba dang dgra bcom pa rnams kyis tha mal pa dang / zur bcag pa dang / bar mar 'don pa'i tshig la mngon par zhen pa'i gdul ba'i dbang gi phyir rim gyis gzhung gzhan dang gzhan du sbyar te/ rgya chen po'i skad du sbyar ba'i mdo sde la sogs pa lta bu sta/ bstan pa rnam pa bco brgyad du gyur pa yin no/ /shAkya'i grogs ngor zhes bya ba la/ shAkya ni bcom ldan 'das yin te/ shAkya'i rigs su 'khrungs pa'i phyir ro/ de'i grogs ni bshes gnyen te zag pa med pa'i lam yin te/ de'i stobs kyis sangs rgyas nyid kyi go 'phang thob pa'i phyir ro/ /de'i ngor zhes bya ba ni de thob par byed pa'i rgyu mtshan zhes bya ba'i tha tshig go/ /yang na shAkya ni bcom ldan 'das yin zhing de nyid 'gro ba'i dge ba'i bshes gnyen gang yin pa de dang 'dra bar grogs po yin te/ shAkya'i grogs pos 'gro ba'i ngor te/ de rnam par grol bar bya ba'i phyir ro zhes bya ba'i tha tshig go/ /yang na shAkya'i grogs po zhes bya ba ni dge slong gi ming yin la de'i ngor ni des gsol ba btab pa'i zhes bya ba'i tha tshig go/ /dge ba'i 'byung gnas gang gi blo 'jug pa/ de yi ngor ni bdag gis rnam bkrol ba/ /gang phyir gus pa med kyang gzhan ngor te/ /de'i phyir bdag stobs rtog pas 'jug pa min/ /bdag nyid slob dpon bdag gzhan don gyi bstan bcos mkhyen pa'i rin chen 'byung gnas bzheng gzhung dag /thos nas yon tan 'od kyis sbyar ba'i bstan bcos rnam par phye ba la ni brten nas kyang / /bdag nyid nus pa'i rnam par 'phrul pas slob ma la phan rnam par bshad pa byas pa las/ /bdag gi bsod nams bsags des 'gro ba yon tan gter mchog sangs rgyas go 'phang thob par shog /dge tshul gyi tshig le'ur byas pa sum brgya pa'i rnam par bshad pa/ slob ma la phan pa zhes bya ba/ slob dpon dul ba'i lhas mdzad pa rdzogs so// // rgya gar gyi mkhan po bud+d+ha shAn+ti dang / /lo tsA ba dge slong dge ba'i blo gros kyis bsgyur cing zhus te gtan la phab pa/ /'di la sh+lo ka stong phrag phyed dang bzhi yod do/ /

CLOSE WINDOW