བོད་ཡིག

e-texts based on the ACIP/ALL Input

@##/ /rgya gar skad du/ bi na ya kA ri kA/ bod skad du/ 'dul ba tshig le'ur byas pa/ bam po dang po/ thams cad mkhyen pa la phyag 'tshal lo/ /'phags pa nyan thos dang rang sangs rgyas thams cad la phyag 'tshal lo/ /gang gis nyid kyi dbu yang rin chen 'od 'phro lta bu dang / /rab rgyas pad+ma gser mdog dang 'dra'i btsun mo rnams kyang byin/ /ma lus don gnyer rab dgar mdzad nas byang chub mchog brnyes pa/ /chos 'dul zhi ba'i don du ston mdzad de la phyag 'tshal lo/ /gang thob ngan 'gro'i 'jigs pa rnams las nges par sgrol 'gyur zhing / /srid pa'i 'ching ba mtha' dag bcad nas mya ngan 'das gyur pa/ /'khor ba'i rgya mtsho gting mtha' med pa kun las sgrol ba yi/ /gzings gyur gcig pu bde gshegs kyis bstan chos de la yang 'dud/ /gang yang yon tan kun ldan yon gnas dam par gang gyur pas/ /cung zad phul yang 'bras bu rgya chen shin tu 'phel 'gyur ba/ /bdag nyid kun gyis phyag 'os bde bar gshegs pas rab tu bsngags/ /gang zag brgyad mchog legs spyod kyis brgyan 'phags tshogs rnams la'ang 'dud/ /gang gis 'dul ba bstan pa dang / /gang gi gang zhig 'dul ba thob/ /ma dul spangs nas 'dul dbang gyur/ /'dul ba la ni yang dag gnas/ /chos dang 'phags pa'i tshogs bcas kyi/ /ston pa de la phyag 'tshal nas/ / gdul bya rnams ni gdul ba'i phyir/ /'dul ba las brtsams cung zad brjod/ /le lo can dang blo dman dag /gzhung mangs rnams kyis 'jigs pa ni/ /legs gsungs 'dul ba'i rgya mtsho la/ /yon tan ldan yang 'dod mi byed/ /de phyir de dag gzhug don du/ /skyo med 'gro ba'i che ba yi/ /tshig ler byas pa'i them skas kyis/ /rtag tu mu stegs ston byed bzhin/ /rab bsngags nor gyis phun tshogs shing / /lha yi khang bzangs dam par skye/ /ting nge 'dzin dang nges 'byung 'thob/ /tshul khrims 'di ni 'bras bu che/ /de la 'dir ni rnam kun du/ /'dul ba min pas dag pa med/ /ji ltar chu med 'dag chal gyis/ /mnyes kyang dri ma mi 'dag bzhin/ /ji ltar zla ba med pa yi/ / mtshan mo dag ni mdzes ma yin/ /de bzhin tshul khrims mi gnas pa'i/ /rab byung rgyal ba'i bstan mi mdzes/ /de phyir snyom las spangs nas ni/ /bya dang bya min shes nus phyir/ /tshul khrims kyis ni brgyan 'dod pas/ /'dul la 'bad pas gnas par bya/ /gang phyir 'dul ba shes gyur cing / /gus par byed pa'i dge slong ni/ /rang nyid yid ches gnas gyur pas/ /gdams ngag rjes bstan ston pa yin/ /de yang 'khor rnam bzhi po yis/ /shin tu gus bcas mdun bdar zhing / /'das dang ma byon da ltar gyi/ /sangs rgyas rnams kyi gces mdzod 'dzin/ /skyes chen rnams la phan phyir yang / /dam pa'i chos la legs gnas brtson/ /'di yi rang gi tshul khrims kyi/ /phung po legs bsrungs nyams pa med/ /gzhan gang 'gyod pa dang bcas pa/ /thams cad de yi rjes su 'brang / /don rnams rnam par nges pa yang / /phul phyin mkhas pa thob pa yin/ /chos rig chos dang bcas pa yis/ /pha rol rgol ba pham par byed/ /gtsug lag khang du'ang gzhan mi 'gran/ /dge 'dun dbus na 'jigs pa med/ /de phyir phyogs kyi sgron ma ste/ /'od gsal rab tu snang bar byed/ / gang du 'dul ba mkhas gnas pa/ /de ru nga ni snying las chung / /de ltar dpag med rnam pa yis/ /thub pas 'dul ba'i phan yon gsungs/ /de bas gus pa dang bcas pas/ /chos 'dul gzung phyir brtson par bya/ /lo bcu yang dag rdzogs pa yi/ /dge slong kun sdom bdag nyid can/ /gsal zhing kun spyod rig pa yis/ /rab byung dang ni bsnyen rdzogs bya/ /so sor thar dang rnam 'byed don/ /mkhas shing dge bas sbyin bya ste/ /gzhan la rjes su ston pa yi/ /mthu ldan zhu gnas bca' ba'i 'os/ /ston pa'i gsung ni ma 'khrugs pa'i/ /byis pas mdo tsam bklags pa yis/ /gsal bar shes pa ma yin pas/ /rnam par phye ste rtogs par bya/ /so sor thar dang rnam 'byed ni/ /gang 'dir shin tu mi mkhas lo/ /drug cu lon yang byis pa ste/ /de ni gzhan la brten pas gnas/ /slob dpon de las rgan yang ni/ /gzhon nus ji bzhin nges brten te/ /gsar bu yin phyir phyag mi bya/ /gzhan ni thams cad byis pas bzhin/ /pham pa byung dang bu lon chags/ /nad pa rab tu dbyung mi bya/ /bran dang rgyal pos bkrabs par grags/ /chom rkun rgyal mtshan 'chang ba min/ /smad pa'i rigs dang yan lag med/ /sgul gyol lag sor sbrul 'dra dang / /smad 'khyal lag rdum 'theng po dang / /sna leb dang ni sna rings min/ /gzhon ches pa dang rgan ches dang / /ha cang bong ring ha cang thung / /yan lag mi min rnam pa can/ /ha cang mgul rings mjing nub min/ / bud med lam dang khur gyis dub/ /mgo ring mgo thung mgo chung dang / /so ni shin tu phyir gyed dang / /mig yon dang ni lta stangs 'jigs/ /dmar dang ser dang sngo ches dang / /chu bur rnam pa lta bu'i mig /rab tu byung ba bkag pa ste/ /sprul pa la sogs de bzhin no/ /spang bar bya ba mdor bsdu na/ /mdog dang dbyibs la skyon chags dang / /ma rungs rigs te rnam pa gsum/ /'khor gyur kun nas smod pa'o/ /mdog skyon dmar skya la sogs te/ /dbyibs skyon bzhin ngan la sogs yin/ /bong bu la sogs rna dang mgo/ /skra dang rna ba med nyid spang / / glang po rta dang spri sna 'dra/ /sna med pa dang mig gcig dang / /mig med ba lang la sogs kyi/ /so 'dra gang yang so med pa'o/ /rigs ni gshed ma smyig ma mkhan/ /g.yung po la sogs rnam par spang / /shing rta mkhan la sogs pa dang / /bstan bcos las ni gang bkag pa/ /de bzhin gsal shing mkhan sogs dang / /chang 'tshong la sogs gang yin pa/ /rang bzhin dman gyur de dag la/ /rnam pa kun du bslab mi sbyin/ /de dag dge rgyun med min zhing / /thar pa'ang mi 'dod ma yin mod/ /gcig tu bstan la skye bo yis/ /thos na skyon du lta phyir bkag /bsam dang rjes kyi bsam shes shing / /mngon shes ting 'dzin thob pa ni/ /mthu yis 'jig rten tshim byed phyir/ /rab tu 'byin na nyes pa med/ /ji skad bstan skyon rnams bral zhing / /dge ba don du gnyer rnams la/ /bar chad mtha' dag dris nas ni/ /mgo nas rkang pa'i bar du brtag /zhag brgyad la sogs bzung nas kyang / /ji srid bar du legs par brtag /gang zhig sngon du yongs brtags nas/ /nyi ma gcig kyang gzhag mi bya/ /thog mar skyabs gsum byin nas ni/ /bslab gzhi lnga po dag kyang ngo / /dkar po'i gos ni 'dzin bzhin la/ /tshogs kyi nang du mkhyen par gsol/ /dge 'dun rtse gcig rjes gnang tshe/ /rab byung cho ga sngon 'gro bas/ /slob dpon rnam par mkhas pa yis/ /yan lag bcu yi sdom 'dzin gzhug /de ltar dge tshul byas ma thag /'di ni khyim pa thams cad kyis/ /phyag byed smon par 'gyur ba ste/ /gang phyir khyim gyi 'ching grol phyir/ /tshul ngan rab rib mun bsal te/ /ngur smrig gos ni 'dzin pa yis/ /nyi ma shar ltar lhang nger ni/ /phul phyin de ni shin tu mdzes/ /sum cu rtsa gsum yongs 'du'i shing / /sa brtol lo 'dab rnying pa bzhin/ /sdig pa kun las ldog don du/ /'di yi bsnyen rdzogs de bzhin no/ /yul dbus su ni dge slong rnams/ /bcu las nyung du mi rung ste/ /mtha' 'khob tu ni bsnyen rdzogs phyir/ /lnga la sogs pas 'dod pa yin/ /li khar na tshang tshing nags/ /li khar shing 'phel shar phyogs nyid/ /u shi ra zhes brjod pa yi/ /ri bo mun pa can ni byang / / ka ba nye ba'i ka ba yi/ /grong khyer nub na gnas pa yin/ /grong khyer 'dam bu can gyi grong / /chu klung 'dam bu can ni lho/ /'di dag gi ni bar rnams la/ /yul dbus su ni shes bya ste/ /phyi rol mtha' 'khob ces byar ni/ /mtha' yas mkhyen pas gsungs pa yin/ /tshul khrims phun sum tshogs pa yi/ /dge slong gis bsnyen rdzogs gsungs kyi/ /dung gi sgra dang khong rul dang / /'bras kyi nang gi srin bus min/ /gal te bzhi ni las brjod mkhas/ /tshul khrims ldan par gyur na ni/ /bsnyen rdzogs ma smad gyur pa ste/ /lha yis kyang ni phyag byar 'os/ /dge 'dun tshang dang mtshams phyir min/ /las mkhan tshul khrims ldan pa dang / /las dag pa dang bar chad med/ /bsnyen par rdzogs pa'i rgyu yin no/ /gang phyir bsnyen par rdzogs pa ni/ /gzhan yang bye brag smra bas brjod/ /ji ltar gnas pa mkhyen pas na/ /'dren pa rang rgyal rang byung gi'o/ / 'phags pa kauN+Di n+ya sogs/ /lnga sde rnams ni nges pa las/ /gang zhig slob ma bzang sde rnams/ /thams cad skyabs su 'gro bas thob/ /pho nya yis ni mchod sbyin ma/ /tshur shog dge slong zhes byas kyang / /ston par khas blangs pa las ni/ /dge slong 'od srungs bdag nyid che/ /dri bas mnyes pa nyid kyis ni/ /slob ma legs sbyin de bzhin no/ /dbus dang mtha' 'khob pa dag la/ /bsnyen rdzogs yang dag bstan pa ni/ /bcu dang lnga yi tshogs kyis sam/ /de bas lhag pas kyang ni rung / /de bzhin 'khor tshogs bcas pa yi/ /gau ta ma lci chos kyis/ /de las gzhan ni ci rigs par/ /las ni sngon 'gro bya ba ste/ /bsnyen par rdzogs la sngar gyi ni/ /nyes par grags pa med pa yin/ /dgun dus dang ni so ga nyid/ /dbyar dang thung ngu de bzhin du/ /ring po'i ming can du yang shes/ /'di dag dus ni rnam pa lnga/ /lhung bzed snam sbyar grib tshod dang / /de bzhin dbyar ni tshul 'jug dag /rtag tu bdag gi dran byas te/ /gzhan du de la nyes byas 'gyur/ /dge slong rnams las 'di bsnyen rdzogs/ /de la zla phyed gdams ngag gsol/ /dge slong bcas gnas dbyar gnas nas/ /tshogs gnyis dang ni dgag dbye bya/ /tshul 'chal dge slong min par ni/ /mi gleng khro ba nyid kyang ngo / /lci ba'i chos las 'das pa ni/ /zla phyed tshogs gnyis mgu byas te/ /bsnyen par rdzogs pa gsar bu las/ /dge slong ma yi phyag bya'o/ /lci ba'i chos brgyad 'di dag ni/ /dge slong ma la gsungs pa yin/ /bud med skyes pa'i rnam pa dang / /skyes pa bud med rnam pa dang / /mkhan po gtan med nyid dang ni/ /mkhan po khyim pa'i rtags sogs nyid/ /gang yang skal ldan rkun po dang / /yan lag bcad sogs khong chud dang / /de yang bsnyen par rdzogs 'gyur mod/ /dge slong 'gal tshabs can du 'gyur/ /mi 'dod bsnyen par rdzogs mi bya/ /gang gi lo ni mi shes na/ /de yi mtshan ni brtag bya ste/ /des ni na tshod mngon gsal 'gyur/ /gang 'di nyi shu ma rdzogs pa'i/ /lo yis dge slong byas na ni/ /zla shol mngal gyi zla rnams kyis/ /mkhas pa yi ni dgang bar bya/ /gal te de lta na yang 'di/ /lo ni nyi shu ma tshang na/ /dge tshul nyid du gnas 'gyur te/ /de ni bsnyen par rdzogs min nyid/ /lo ni gcig gam gnyis dag na/ /gal te dran pa rnyed gyur na/ /'di yi lo ni tshang ba yis/ /bsnyen par rdzogs pa nyid yin no/ /'on pas kyang ni go gyur na/ /las brjod pa ni ma thos kyang / /'di la bsnyen rdzogs yod pa ste/ /tshul khrims ldan la nyes pa med/ /bsnyen par rdzogs par byas nas de/ /gal te mtshan ni gyur pa na/ /'di ni bsnyen rdzogs kho na ste/ /dge slong ma yi 'khor nang bzhag /mkhan po mtshan ni gyur pa na/ /gal te gsol ba thos na ni/ /bsnyen par rdzogs pa kho na ste/ /las byed pa la'ang nyes pa med/ /las byed pa ni mtshan gyur na/ /gal te las brjod thos na 'dir/ /mkhan po la ni nyes byas te/ /las byed rnams la skyon yod min/ /las byed nam mkha' la gnas te/ /sa la 'dug la byed gyur na/ /bsnyen par rdzogs pa rgyang ring ste/ /tshul khrims 'chal pas mtho ris bzhin/ /ji ltar mi yi bdag po yi/ /gzhon nu rigs rgyud 'phel phyir bsrung / /de bzhin ston pa'i bstan pa dag /'phel phyir dge tshul rnams kyang bsrung / /shing sdong mtho la dge tshul ni/ /bla ma'i bka' yis 'dzegs pa las/ /shing chag nas ni lhung ba'i tshe/ /de la 'di dag gsungs pa yin/ /gang phyir 'di ni rab byung ba/ /bstan la thugs rje'i bdag nyid kyis/ /bya rog skrod nus gyur lta na/ /lo bdun pa yang rjes su gnang / /rab byung dang ni bsnyen rdzogs la/ /lhung bzed can min mi drang ste/ /bsod snyoms rgyu ba rnams la ni/ /de tshe snod don gnyer bas 'thob/ /gnas brtan nye dgas gang gi tshe/ /dge tshul bru bas nyen pa na/ /lhung bzed med par lhung bzed don/ /gzhan song ston mo'i bar du thob/ /blangs nas kyang ni lhung bzed sogs/ /blo bzangs kyis ni sbyin par bya/ /rab byung bsnyen rdzogs dag kyang rung / /bram ze bzhin du slar mi 'gro/ /bsnyen par ma rdzogs gong du ni/ /nges par gnas rnams mi brjod de/ /thos nas 'di ni bya dka' zhes/ /bram ze slar yang khyim du song / /dge slong rnams kyi las gcig gis/ /bzhi ni bsnyen par rdzogs mi bya/ /tshogs dag la ni tshogs gnyis kyis/ /las ni gang du'ang cung zad med/ /gnyis sam gsum po dag kyang rung / /dus gcig la ni bsnyen rdzogs na/ /na tshod bye brag yod gyur kyang / /rgan po med cing gsar bu med/ /phan tshun phyag kyang yod min te/ /rnyed pa gral rims bzhin du'o/ /skul byed dbang gis de dag la/ /las bcol ba ni rim pas so/ /mtshams med lnga ni byas pa dang / /rku thabs gnas dang sprul pa dang / /mu stegs can zhugs 'on dang lkugs/ /'khrugs dang de bzhin phas pham byung / /dge slong ma ni sun phyung dang / /ma ning la sogs gnas mi bya/ /tshwa sgo'i zhing ltar de dag la/ /tshul khrims sa bon skye ba med/ /de bzhin gzhan yang bag med long / /bsdigs pa la sogs las rnams kyis/ /smad do blang bar bya ba ni/ /sems ni dul bar gyur na yin/ /mdo sde 'dul ba mngon pa rnams/ /mkhas shing grags dang ldan pa dang / /bsod nams chen po la sogs ni/ /bskrad cing bkar bar 'os pa min/ /gang phyir 'di dag mu stegs kyi/ /ri dgas skrag byed seng ge'i bu/ /'di dag khyim par gyur na yang / /ston pa'i blo yis rab dad bskyed/ /'di dag rnams kyis gtsug lag khang / /mdzes byed khyu mchog sgra sgrogs shing / /de bas 'di dag smad na ni/ / rang gi bstan pa smad pa yin/ /kun nas nyon mongs skyes na de/ /ma rungs gdon gyis rnam rmongs pas/ /bya min byed pa kho na ste/ /'jig rten pas ni smod par 'gyur/ /'thab krol can dang khyim sun 'byin/ /gsum pa tshul khrims 'chal ba ste/ /las ni byed pa na yang 'di/ / gal te 'gyur ba rten byed na/ /'bad pas gaN+Di brdung byas nas/ /dge 'dun gyis ni bskrad par bya/ /ka ba la ni 'jus kyang bcad/ /sgo skyes la 'jus de bzhin no/ /yang na dge 'dun thams cad kyis/ /slar yang gso ba'i 'du byed bya/ /gang yang dge 'dun de dag las/ /dpung byed yan lag 'byin bya ste/ /min na de 'dra'i dge slong gi /rtags sun 'byin pa bzhag mi rung / /nan tan gyis ni bskrad bya ste/ /'thab dang rtsod pa med par bya/ /de yi gnas pa cir 'gyur na/ /ro dang 'dra ba kho nar gsungs/ /dge slong shes skyon dri ma can/ /dge slong tshogs kyis chad byin la/ /dge slong mas ni gus bstan phyir/ /sngon du ldang gi phyag mi bya/ /dge bsnyen gsong por smra mi bya/ /khyim pas bsod snyoms sbyin bya ste/ /'phags pa'i tshogs ni mnyes pa na/ /bya ba thams cad sngon bzhin no/ /'khyud chags phrag dog nad dang skyes/ / zla phyed ces bya ma ning lnga/ /'di dag re re'i mtshan nyid ni/ /rtogs pa'i don du brjod par bya/ /gang la gzhan gyis mnan pa na/ /'khrig phyir sems la 'dod chags ni/ /rnam rgyas de ni blo ldan gyis/ /'khyud dang ma ning shes par bya/ /gzhan gyi mtshan ni mthong ba las/ / rang la 'dod skye phrag dog grags/ /mtshon nam nad kyis rtags nyams pa/ /de ni nad kyi ma ning brjod/ /gang skyes nyid nas mtshan ma ni/ /gnyis ka med pa skyes nas yin/ /zla phyed bud med zla phyed ni/ /skyes gyur zla phyed ma ning brjod/ /'dir ni sogs kyi sgra med kyang / /zla sogs ma ning grub pa yin/ /gang zhig grong gi chos dag gi /nus med de ni za ma ste/ /mtshan ma gnyis ka dod pa ni/ /mtshan gnyis par ni 'dod pa yin/ /mu stegs log ltas bsgos pa yi/ /yid can de ni mu stegs 'dod/ /mu stegs chos kyi longs spyod gang / /de ni mu stegs can zhugs pa'o/ /dge tshul gang yang brdzun pa yis/ /rang gi rtags ni bzung nas kyang / /dge slong nyid du rab shes byed/ /de ni rku thabs gnas par 'dod/ /phyogs las gzhan gyi phyogs dag ni/ /tha dad tshogs la yang dag brten/ /gang zhig tshogs kyis chad pa byin/ /de ni tha dad gnas par 'dod/ /phas pham dag la log par lta/ /dge slong ma sogs sun 'byin dang / /bden dang dkon mchog gsum gyi ni/ /sngags min sgrogs pa'i dge tshul nyid/ /skyon can bcu po 'di dag ni/ /chad pa'i las kyis bkar bar bya/ /phyung nas slar yang mi gzhug ste/ / ji bzhin bshags na skal ba bzhin/ /dge slong pham pa ma byung na/ /cho ga bzhin du bslab phul nas/ /song na'ang skal ldan slar yang ni/ /bsnyen rdzogs dga' ston chen po bya/ /sdom gtong rang bzhin gnas pa yi/ /brda phrad mi yi drung dag tu/ /bdag gis gang bzung bslab pa ni/ / gtong ngo zhes sogs tshig rnams 'bul/ /bsnyen par rdzogs pa'i rjes thogs la/ /phas pham rnams ni brjod par bya/ /rtogs ldan blo ni de dag las/ /'da' bar byed pa ma yin no/ /mi 'chab pa yi sems kyis ni/ /gal te byung na gcig la'ang mthol/ / chung ngu la'ang 'jig pa'i phyir/ /de la phas pham mi 'byung ngo / /brtul zhugs can gyis bla ma pas/ /sngar nyid mal nas langs nas ni/ /so shing bcas nas de 'og tu/ /ston pa la ni phyag bya'o/ /de nas rab gus bskyed pa yis/ /bla ma la ni phyag bya ste/ /de ni de la gdams ngag sogs/ /cho ga bzhin du phan 'dogs yin/ /de la khams bde sogs dris nas/ /rab tu 'bad pas de yi ni/ /gnas khang chag chag yang dag gdab/ /nyer spyod sa yang sbyang bar bya/ /ston pa la ni maN+Dal dang / /mchod rten la yang bskor ba bya/ /brtul zhugs rgan la phyag byas nas/ /de yi nus pa ji bzhin du/ /bsam gtan klog pa'i las dag gis/ /lus la snying po blang bar bya/ /ngur smrig gyon tsam gyis chog pa'i/ /bsam pa nam yang mi bya'o/ /so shing dus dang mthun pa'i chu/ /'dug stan la sogs bstabs par bya/ /sman dang rnyed dka' zhim pa'i zas/ /'bras bu sogs kyang de bzhin no/ /lhung bzed la sogs bkru ba yis/ /gus pas bla ma'i nye gnas bya/ /bla ma rnam par mdzangs pas kyang / /thams cad du ni tshod rig bya/ /tshul khrims 'chal la zhe sdang dang / /phyag kyang nam yang mi bya ste/ /de dang longs spyod kyang ma yin/ /'di ni ro bsregs mgal dum bzhin/ /khyim pa sdom la gnas kyang ni/ /dge tshul gyi ni phyag mi bya/ /'dod can khyim gyi chos rnams la/ /dge slong gis lta smos ci dgos/ /de bzhin khyim pa sdom ldan yang / /sdom brtson kun gyis phyag mi rung / /kun nas ma bsdams de dag la/ /phyag len dbang ni yod ma yin/ /srid pa tha ma pa la ni/ /rigs pas rnam dpyad mi 'thad de/ /mi brtan 'khor bar 'khor bzhin pa'i/ /sems can rnams la snga ma bzhin/ /gzhan yang phyag bya min mang ste/ / spo dang bskrad pa la sogs pa'o/ /dge slong gis rtags phyag bya ba/ /sangs rgyas dang ni sdom pas rgan/ /mi slob pa ni bdag por spyod/ /slob pa byin pa spyod pa ste/ /bsam gtan klog dang ldan pa ni/ /rjes gnang spyod pas nyes pa med/ /lhag ma le los bcom pa yi/ /bdag nyid rnams ni bu lon spyod/ /khrims 'chal rnams ni nang du yang / /gtsug lag khang sogs nyer spyod bkag /bshang khang dang ni nye ba ru/ /sna tshogs gtam ni mi bya ste/ /klog dang kha ton la sogs dang / /tshon gyi las kyang khyad par du'o/ /bshang khang dang ni gci ba'i gnas/ /tha dad du ni bya bar gsungs/ /chu 'dor tshe na gci khang du/ /sgra brda byas nas 'jug par bya/ /de yi khang par gros sogs min/ /dal bu dal bus sgra med par/ /rlung dang bshang ba gci ba rnams/ /dor byas nan gyis mi bsdam mo/ /sngon du 'jam po gang rung gis/ /'og gi sgo ni phyis nas kyang / /de nas lan gnyis lan gsum du/ /sa yis dag par bkru bar bya/ /lag pa g.yon par 'jam pa yi/ /sa yi phung po bdun bya ste/ /gnyis kar yang ni bdun po nyid/ /so sor tha dad du ni bzhag /thog mar shA ri'i bu la 'di/ /bslab bcas gzhan du nyes byas 'gyur/ /de nas lag pa'ang 'bad pa yis/ /chu mang pos ni rab tu bkru/ /lag ngar byin pa phyis nas ni/ /slar yang lag pa dag ni bkru/ /lag gdong rkang pa dag dang ni/ /phyi rol dag byar gsungs pa yin/ /dri yi byug pa spangs pa yi/ /gtsang sbra sems ni sbyang ba yin/ /'di 'dra'i byug mchog yod pa la/ /stong phrag sa yis ci zhig bya/ /rdzogs sangs rgyas kyis nang gi ni/ /gtsang sbra don dam dag pa nyid/ /lus dang ngag dang yid dag gis/ /sdig pa spong bar gsungs pa yin/ /so shing byed dang bshang ba dang / /gci ba 'dor dang chu 'thung dang / /mtshams nang rten la phyag 'tshal ba/ /bla ma dag la zhu mi dgos/ /gang du skabs dang mthun pa yi/ /ra ba rtsig pa rta babs nas/ /'dom ni bzhi bcu rtsa dgu'i bar/ /nang gi mtshams su shes par bya/ /sdom pa lhag ma med gcod dang / /dge 'dun lhag mas de ldang dang / /de bzhin gang zag lhag ma can/ /ltung ba rnam pa gsum du grags/ /dang por phas pham gsungs pa ni/ /bzhi yin shin tu lci ba'i phyir/ /'di dag gang rung byung na ni/ /dge slong rnam par nyams pa yin/ /ston ka'i chu bzhin dri med par/ / ston pa'i bstan pa bcu gnyis lor/ /ltung ba med par legs gnas te/ /nyon mongs spong bar byed pa yin/ /de nas bzang sbyin bu yi phyir/ /chung ma la ni 'khrig pa spyad/ /dge slong dgon pa pa yis kyang / /spra mo la zhugs kun mkhyen gyis/ /'di skad smad pa mdzad de khyed/ / 'dod chags la sogs zhi bya'i phyir/ /nga yis chos rnams bstan pa la/ /'di ltar sdig pa'i las la chags/ /de nas phan yon bcu gzigs shing / /slob ma rnams la phan bzhed pas/ /bslab pa'i gzhi ni bca' ba dag /thugs rje'i bdag nyid can gyis mdzad/ /mchil ma gci dang bshang ba yi/ /lam du chags can zhugs na ni/ /gso byar mi rung bdug pa yi/ /phas pham sbrul gyis dge slong zin/ /kha shun so dang pags pa las/ /nor bu 'das na phas pham ste/ /phyi rol char ni ci rigs par/ /sbom po'am dge 'dun lhag ma'o/ /gang phyir stobs kyis mnan nas kyang / /brtul zhugs can gyis grong chos kyi/ /bde bsten de yang phas pham gsungs/ /nyams pa dang ni rma yi sgor/ /rab zhugs sbom por shes par bya/ /mi shes byis pa chung ngu gang / /bsten mi bzod la spyad pa yang / /cung zad zin dang shas cher zin/ /skrangs dang rul te nyams pa'o/ /gang zhig gnyi ga rnal du gnas/ /skyon med de ni ma nyams pa'o/ /thams cad du ni rma yi sgo/ /gsum po nyams pa la yang ni/ /gang zhig de la zhugs pa na/ /sbom po yin no mthar thug min/ /nang du ma chud pa dang ni/ /las su mi rung bas kyang ni/ / 'khrig pa spyod par byed pa la/ /sbom po nyid du grags pa yin/ /mo mtshan mtshams dang ma 'byor dang / /'jigs pas bud med 'dor bzhin dang / /yang na ngo tsha yis kyang 'dor/ /mi 'dor gyur kyang nyams pa dang / /gang yang byis pa 'dod pa yi/ /longs spyod mi shes mi rung la/ /de ltar bstan na thams cad du/ /sbom po'i kha na ma tho bcas/ /chung ngu 'bring sogs dbye ba yis/ /'dus byas thams cad tha dad de/ /de yi ltung ba nges pa yi/ /dbye ba grub par the tshom med/ /bu ga gzhan dang lus kyi ni/ /bu ga bral nas de dag tu/ /lus skyes 'jug par byed na yang / /sdom brtson la ni sbom por brjod/ /byis pa chung la zhugs pa yi/ /dge slong pham par yong mi brtag /nu ma mchu dang sha mtshams bzhin/ /nyes spyod rgyas par mi 'gyur dman/ /mche ba rno mangs gdug pa yi/ /sbrul gyi khar ni chud pa bla/ /lus bde bstan pa'i rma la ni/ /lus skyes 'jug pa ji ltar rung / /sbrul gdug gis ni reg gyur kyang / /skye ba gcig nyid 'chi 'gyur gyi/ /khrims 'chal skye ba brgyud na ni/ /stong phrag sdug bsngal mi bzad 'thob/ /lci dang shin tu lci ba nyid/ /yang dang shin tu yang ba ste/ /phas pham pas ni bslang ba yi/ /sbom po rnam pa bzhi yin no/ /skrag par mi byed lci ba ste/ /gzhan gyis de la 'bad pa yis/ /bzlog kyang mi nyan rab lcir shes/ /gzhan la khrel yod yang ba ste/ /rang nyid ngo tshas shin tu yang / /bsam pa'i dbye bas 'gyur ba yin/ /de bzhin dge 'dun lhag ma yis/ /kun bslang sbom po rnam pa bzhi/ /dge slong nyid dang de ma nyams/ /ma nyams pa yi lam dag tu/ /bcug reg ro ni myong ba dang / /gang phyir sems ni rang bzhin gnas/ /rang gi khang pa brtsig pa'i phyir/ /rgyal po ma skyes dgra yi shing / /dge slong nor can gyis brkus te/ /de brten 'di dag kun bslang bcas/ /ma 'khrul gnas nas sbo byed cing / /gzhan nor brku sems mthu yis sam/ /'jab bu yis kyang de la mthar/ /mi las ma sha lnga tshang brkus/ /ma sha ma ga d+hA pa ste/ /de las lhag pa mkhas pas shes/ /dngos po bskyod pas sbom po ste/ /sbyor ba la ni nyes byas so/ /sa gzhi 'jam zhing mnyam pa la/ /bskyod kyang mthar ni mi 'gyur te/ /sa phyogs grum gas la sogs pa/ /mthon dman can la rab tu bskyed/ /zhe sdang gi ni rgya la sogs/ /chud son byed pa sbom po yin/ /sems can rnams ni dgrol don du/ /bsod nams 'dod pas bshags bya'o/ /gang gi yul ni de yi dus/ /gang gi tshad kyi 'gron bu ni/ /de yi bzhi cha brkus pa gang / /dge slong la ni pham par 'gyur/ /sa gzhi rtsod bcas rnam pa gnyis/ /rigs dang rgyal po'i rigs kyis te/ /gnyi ga la yang dge slong ni/ /rgyal na ltung ba sbom por brjod/ /khyim pas gal te sbyor btang na/ /gnyis kar yang ni phas pham nyid/ /phas pham me yis bsregs pa yi/ /shing tshig lta bur sdom brtson 'gyur/ /nor bu mu tig la sogs nor/ /sngags kyis bkug nas rku ba na/ /mthong ba tsam gyis de las 'dir/ /ltung ba'i mthar ni 'gyur ba yin/ /bdag gi lo tog phun tshogs bya/ /gzhan la min zhes sred pa yis/ /rang sar chu ni 'dren byed cing / /tshan gyis 'jig par byed kyang rung / /rang gi lo tog phun tshogs shing / /gzhan gyi lo tog nyams pa na/ / lo tog rin ni shes byas nas/ /sbom po'am phas pham ci rigs brtag /sdig pa kun las ldog phyir dang / /sems can rnams la phan gdags phyir/ /nam yang gzhan gyi 'tsho ba ni/ /dge slong gis ni dbrog mi bya/ /rkun pos slob ma phrogs pa'am/ /gser sogs stobs kyis mi bslang ste/ /gzhung lugs ji bzhin ma bsgrubs na/ /ma rungs ltung ba dag dang bcas/ /chos bshad pa 'am phyed rin nam/ /rin ni tshang ba yis kyang rung / /blang bya rkun ma rgyal po la/ /phul na ltung ba sbom por 'gyur/ /slob ma nyid phyir mthun btsal nas/ /dge tshul dge slong gis phrogs na/ / 'khor dbye ba yi kun bslang phyir/ /sbom po'i blo can sbom pos reg /dge slong gis ni sho gam sogs/ /rang ngam gzhan gyi lag gis phrogs/ /dngos po brtag par bya ba ste/ /ltung ba nges par bsten par 'gyur/ /rgyal po la sogs dbang ba yi/ /chu 'gram grub tsas las byung ba/ / ma byin lam gang nas song na/ /rang ngam gzhan gyi lag nyid kyis/ /de ni de yi phrogs 'dra ste/ /ltung ba rnam par dpyad pa na/ /ma sha lnga yi rin gyis ni/ /mthar 'gyur gzhan du ma yin no/ /sangs rgyas chos dang 'phags tshogs sam/ /pha phyir gang zhig bsams pa yi/ /bsngags pa de la brjod pas sam/ /phyi nas brtul zhugs can gyis bgyir/ /mang po ri ba'i dngos po gcig /rung ba'i chos gos khyer ba bzhin/ /des ni sba bar mi bya ste/ /nges par ltung ba med par 'dod/ /gzhan yang sho gam la 'da' bar/ /kha tshar bcad pa la sogs sam/ /chu yis bsnyugs nas kyang ni rung / /thugs rje'i bdag nyid can gyis gnang / /gang gis chos gos la sogs pa/ /'dod pas dang du len pa ni/ /'gyod pas btang yang de la ni/ /ltung ba sbom por shes par bya/ /ri la 'dzeg gam gru brgal tshe/ /phan tshun so sor go byas nas/ / lhung bzed la sogs snod bskur te/ /bag yod rtag tu dran pa yis/ /'di ni bzung ngam btang ngo zhes/ /smras thos gal te brlag gyur na/ /de rin nges par sbyin pa la/ /'dir ni rnam dpyad mi dgos so/ /ci te ma bos zan za na/ /dge slong la ni nyes byas te/ /'di ni sde ldan lhag ma la'ang / /nyes byas nyid du rab tu grags/ /rgyal pos byin dang rkun pos byin/ /las byed dag gis ma dris byin/ /gzhan dang 'brel par 'du shes na/ /sbyin po de las mi blang ngo / /gzhan dang 'brel pa pham pa yin/ /ster bar rnam par shes na ni/ /'dod pa mi mthun mi blang ste/ /mi shes na ni nges pa med/ /sbyin bdag nges par rnam dpyad nas/ /de phyir gtso bo ma yin na/ /de las blang bar mi rigs te/ /de ni sbyin por mi 'dod do/ /gal te dge 'dun sogs kyi nor/ /rang gi gnyen nam gzhan gyis kyang / /ster na nor med nad pa yis/ /slar yang bsab par 'dod pas blang / /gal te shi na nyes med de/ /gson na gang yang rung ba ni/ /blangs nas kyang ni ci nus kyis/ /de yi dkor ni bsab par bya/ /ba lang la sogs longs spyod mchog /grong la sogs par longs spyod pa/ /'di dag dge 'dun la ni gnang / /gang zag la ni bkag pa yin/ /longs spyod zhing dang grang dang rta/ /ba lang ma he ra lug rnams/ /'dul bar longs spyod mchog nyid du/ /de nyid rig pas gsungs pa yin/ /dngos po rnam pa lnga po ni/ /shes rab can gyis mi bcang zhing / /mi gtsang mi bgo thams cad du/ /de bzhin khas kyang mi blang ngo / /skyed mos tshal dang gtsug lag khang / /de yi dngos dang mal stan rnams/ /tshul ldan rnams kyis sbyin bdag gi/ /bsod nams spel phyir bsrung bar bya/ /lha khang skyed tshal kun dga' ra/ /gtsug lag khang ni gcig tu 'dod/ /de dag dngos po gnas khang yin/ /mal stan dag ni grags par zad/ /gtsug lag khang steng gnas pa yi/ /bsgo ba gang du gsal bar thos/ /bka' bsgo ba ni byed pa yis/ /de la nges par 'jug par bya/ /las kyi bya ba byed pa'i tshe/ /zas dang gos kyi rjes su bzung / /nad pa la ni rjes su gnang / /las ni mi nus pa la yang / /brdeg dang 'tshog dang skyo ba dag /'phags pa'i chos dang 'gal ba yin/ /bsad dang bcing dang nyon mongs byed/ /'phags pas de phyir rnam par spang / /ci rigs mchog gis gsungs pa dang / / rigs kyi chos ldan gyis bstan pa'i/ /yul chos ldan pa'i chad pa ni/ /dge 'dun gyis ni dang du blang / /rgyal po la sogs yongs btang ba'i/ /rang skal bsod nams gyis rnyed na/ /yongs su longs spyod nyes med de/ /de dag sngar bstan bzhin du gnas/ /'dren pas dngos po thams cad kyis/ /tha snyad rang gis ma gsungs te/ /dge slong ma 'am dge tshul dag /nges pa'i zhal ta ba yis blta/ /ston pa'i chos las 'das nas ni/ /srid ldan gang zhig chad pas gcod/ /de ni bslab pa nyams pa ste/ /ma rig sgrib g.yogs gyis bskyed pa'o/ / yang dag lta dang gzhan thob kyi/ /log lta can dang tshul khrims med/ /de la rab tu byin na ni/ /dad pas byin pa'i 'bras bu med/ /gang yang 'tsho ba'i tshad tsam zhig /khengs las lhag dang brtul zhugs can/ /ston mo dag las len byed na/ /des ni rnam par nyams par byas/ / ji tsam gang gis chog gyur pa/ /de tsam ston mo las ni blang / /lhag ma kham gcig len byed kyang / /bsams bzhin yin na nyams pa nyid/ /pha ma'am nad pa la sogs la/ /sbyin par byed pa bkag pa med/ /sbyin bdag dag gis ma spags par/ /nam yang gzhan la sbyin mi bya/ /gang du 'chag pa la sogs tshe/ /gri khab la sogs rnyed gyur na/ /gtsug lag khang skyong dag la gtad/ /lung bzhin de yis go bar bya/ /dge 'dun dbus su zhag gsum bar/ /de yis de dag bsten par bya/ /su yang ngo len med na ni/ /ci bde bar ni tshogs la dbul/ / dgos pa'i tshe na las rnams bya/ /bsod nams bsags pas las bya yi/ /rnyed pa'i don du dge slong gis/ /las ni nam yang mi bya'o/ /yid ches gyur la rang gi blos/ /ji srid du ni nges pa yis/ /'jog pa la ni nyes med de/ /dbang po gzhan ni bzhag nas so/ /gang phyir dman dang 'bring dang mchog / grogs po gsum ni rnam dpyad nas/ /yid ches brtan po nyid la bca'i/ /nges par sems mi brtan la min/ /shin tu mchog la mchog nyid de/ /'bring la 'bring po tha ma la/ /tha ma nyid de dman la chung / /yid ches rnam pa gsum du 'dod/ /nad pa la ni dris nas sman/ /phan pa'i ched du sbyin bya ste/ /rang gi yid ches kyis kyang rung / /til snod dge slong ma bzhin min/ /mi dang gzhan nor rku sems kyis/ /sbyor ba gcig la tshang na ni/ /mdor na bslab pa nyams pa ste/ /phas pham pa yi rgyu yin no/ /dge slong mi gtsang yid byung gang / /ri dwags dbyug thogs zhes pas bsad/ /bsod nams thob dang lhung bzed sogs/ /'dod pa de bsten bkag pa yin/ /yang dag bsam pa ma 'khrul pas/ /rang ngam gzhan gyis pha rol bsad/ /mi la 'chi ba'i bsngags pa dag /brjod grub des kyang mthar 'gyur ro/ /de 'chi'i thabs ni tshig gis sam/ /sbyor ba rnams kyis mngon bsngags shing / /sems ni rjes su yi rang na/ /sbom po'o me yis nags bsreg dang / /mi yi yan lag gcod pa dang / /de yi sha ni za yang ngo / /nad pa la ni nad g.yog dag /phan phyir byis pa legs par bsgo/ /mkhas pa'am gnas brtan dag la yang / /sman ni yongs su dris nas su/ /nad pa dag la phan blos sbyin/ /gzhan du 'gal tshabs can du 'gyur/ /gang gi nad la ci 'dra ba'i/ /yo byad nad pa dag la ga /brtags pa za ba la sogs kyang / /rjes su brtse bas nyes pa med/ /dge 'dun kun gyi nad pa ni/ /blta phyir brtson byar bka' stsal te/ /thams cad du ni rim pa bzhin/ /'dug nas kyang ni blta bya ste/ /nad pa'i nad g.yog dag gis kyang / /'bad pas 'dug pa'i don du ni/ /gus pas rtag tu stan rnams ni/ /nges par nye bar bstab par bya/ /gal te nad pa nus med pas/ /skyo bar gyur pa de lta na/ /de la 'dir ni re mos kyis/ /yang dag bsgo bar brtag pa nyid/ /nad pa'i mdun du gang zhig gis/ /thos sam tshor bar de yi sems/ /'chi ba'i 'dun pa skye 'gyur ba/ /de 'dra'i chos bshad mi bya'o/ / kye ma khyod kyis sbyin pa byin/ /tshul khrims kyang ni ma nyams bsrungs/ /dkon mchog gsum la gus byas te/ /mya ngan 'das pa mdun na gnas/ /khyod ni lus dang bral ma thag /lha yi khang bzangs thag mi ring / /srog dang bral na myur du ni/ /mya ngan 'das pa lag na gnas/ /de skad gang smra'i dge slong ni/ /mi zad ltung ba dag dang bcas/ /de bas khyod ni nang bral nas/ /yun ring chos spyod 'tsho bar shog /chos spyod ji srid gson na ni/ /de srid bsod nams tshogs chen po/ /rdzogs par 'gyur zhes brjod par bya/ /nad kyis gdungs la sman dag dang / /mkhas pas gdams ngag sbyin bya zhes/ /gnas dang gnas min mkhyen pas gsungs/ /skra can 'tshong na sbom po yin/ /lhung bzed sogs chags gzhan dag la/ /gdol pa bzhin du brtse med par/ /gang zhig 'dod sems skyed byed pa/ /de la nyes byas nyid du rig / bzhad gad rgod bag ched du yang / /ga ga tshil ni mi bya ste/ /sngon ni gzhon nu bcu bdun sdes/ /dge slong g.ya' bsgags shi bas bcas/ /mchod rten la sogs las byed pas/ /khyim pa med tshe lci ba'i khur/ /mi khyer mi gzhug shing mkhan ni/ /shing bteg shi ba la rten bkag / so phag gas po la sogs pa/ /brda ma sprad par sbyin mi bya/ /nyi ma zad par dge slong gis/ /gla mi bzhin du las mi bya/ /las kyi zhal ta blo ldan gyis/ /de dag la ni go byas nas/ /de rnams las du ba spang ba'i phyir/ /khye sus bza' btung gis tshem bya/ / gtsug lag khang ni bsrung ba'i phyir/ /brtson par yang ni rjes su gnang / /sems can dag la ltos med par/ /ma bsams dbyug sogs mi 'phang ngo / /khru bcu'i nang rol spyod yul du/ /rdo ba la sogs dor bar rung / /bslab pa rjes dran pa skyed pa yis/ /nang gi bdag nyid nyams mi 'gyur/ /gtsug lag khang gi las byed la/ /mtshan mo chos sgrogs gnas dag tu/ /sgo sogs bsdams par byas sam zhes/ /gnas brtan gyis ni dri bar bya/ /gtsug lag khang 'joms bzlog pa'i phyir/ /gang la bcing ba brtag bya bar/ /bcing ba sngar ni brjod pa yis/ /gtsug lag khang ni bsrung bar bya/ /'khrul gtan steng gzer 'og 'jug dang / /sgo lcags lde mig kyog po dang / /gtsug lag khang gnas de dag la/ /zhal ta ba yis ci rigs sbyin/ /gcig dang gnyis dang gsum sogs kyis/ /tha dad bcing ba gzhug byas te/ / thams cad gzhug par 'os na yang / /rtog pa po yis thams cad gzhug /ston pa'i bstan la gus pa yi/ /dge slong lus dub thang chad dag /lam du dge slong rnams kyis ni/ /pha bzhin bsgrub par mi bya'o/ /sngon byung pha rgan dal 'gro la/ /dus yol gyur pa'i 'jigs pa yis/ / bu yis phul bas lam du de/ /dub nas 'chi ba'i dus byas so/ /mu ge'i dus shig dge slong rnams/ /mi srid bla ma'i yon tan rnams/ /phan tshun bsgrags te go byas rgyus/ /'tsho ba byas tshe bkag pa mdzad/ /khyad par gyur pa'i rtogs pa rnams/ /ma thob par ni thob bo zhes/ / mngon pa'i nga rgyal med smra na/ /sdom brtson mtha' yi ltung ba 'thob/ /mi chos bla ma'i yon tan 'dir/ /bsam gtan rnams dang gzugs med sogs/ /mthong zad phul phyin mya ngan 'das/ /'phags pa'i lam gyi thob smra'/ /mkhas pas khyad par rtogs pa'i don/ /gang gsungs 'bras bu bzhi po dang / /sdug bsngal la sogs yul shes pa/ /bden pa bzhi po mthong zhes dang / /bsam gtan zhes brjod bzhi po yi/ /de la reg pas gnas pa dang / /sdug bsngal la sogs bdag gis shes/ /lha la sogs pa bdag gis mthong / /lha klu gnod sbyin dri za sogs/ /mthong ngo bdag gis gtam yang byas/ /de dag kyang ni bdag la smra/ /zhes smra dge slong mthar 'gyur ro/ /lha yi skad ni bdag gis thos/ /de ni mtshan mo bdag drung 'ongs/ /de bzhin gnod sbyin sogs kyang ste/ /rang bzhin gyis ni pham par 'dod/ /de dag kun la shes bya ba/ /sbom po sha za mthong sogs te/ /'di na gang zhig lha sogs dag /mthong ba yod ces smra na yang / /rnam rnags mi rtag 'du shes sogs/ /'bras bu mngon shes rab ston na/ /mi 'dod na yang mtha' yi ni/ /mtshon chas mgo bcad thob par 'gyur/ /gang zhig 'di na dge slong gang / /rdul khrod sha za mthong ba yod/ /bdag ces smra bar mi byed kyang / /de skad brjod na nyes byas so/ /ltung ba 'chab dang reg pa dang / /lus bkan bag med phyogs byed nyid/ /de bzhin dge slong phas pham bzhis/ /dge slong ma yi rtsa ba 'jig /rgyal dang pham dang de bzhin du/ /char 'bab mtshan ni 'gyur ba sogs/ /dgongs su gsol zhes brjod bya ste/ /gzhan du 'gal tshabs can du 'gyur/ /dge slong ser skyas 'od srungs kyi/ /bstan la ngag rtsub brdzun smras pas/ /chu srin bco brgyad gdong skyes bcas/ /nyon mongs dgra pham khas blangs nas/ /nyon mongs dag gis pham byas na/ /de phyir phas pham gyur pa ste/ /khrims dral zhes ni nges par brjod/ /phas pham pa yi chos dag tu/ /gang gsungs ma lus brjod nas ni/ /rim pa ji bzhin dge 'dun gyi/ /lhag ma rnams ni brjod par bya/ /rma sgo gsum ni ma gtogs par/ /shes lus rang bzhin yan lag gis/ /bsams bzhin khu ba 'byin pa ni/ /dge 'dun gyi ni lhag mas reg /sla dang ska ba nyid dang dmar/ /ser po dang ni sngon po ste/ /khu ba rnam pa lngar bstan pa/ phyi ma 'khor los sgyur rgyal gyis/ /de yi bu ni sngon po ste/ /de yi 'og tu ser po yin/ /dmar po de yi blon po ste/ /ska ba dbang po smin pa nyid/ /bud med kyis dub dbang po dag /ma smin pa yi sla bar shes/ /thams cad du yang dge 'dun gyis/ /dag bya lhag ma'i ltung ba nyid/ /shes bzhin rtsig khung bum pa yi/ /sbubs sogs du ba 'byin ba ni/ /sbom po yis ni bcom pa ste/ /pha bong sbom pos snad pa bzhin/ /brtsams te khu ba ma phyin nam/ /chags pas dbang po 'jal byed dam/ /gar bsgyur mkha' la bskyed pas sam/ /mnye bshud kyis ni phyung na yang / /rdzi ldog chu rgyun bzlog phyogs su/ /gtod pa la yang de bzhin 'dod/ /rdzi phyogs rgyun phyogs mthun gtod pas/ /nyes byas 'gyur bar gsungs pa yin/ /chu bsti ba ni mthong sogs la/ /chags pa'i sems dang ldan yang ngo / /chags pas don nyams rtsa ba ste/ /de bas rtag tu spang bar bya/ /dze ta'i shing sogs reg pas sam/ /brla sogs dag la bshud pa la/ /der ni khu ba byung yang ste/ /rmi lam na ni nyes med cha'o/ /dge slong tshogs la chos lhag par/ /rgyas par yang dag bshad pa rnams/ /dge tshul la ni thams cad du/ / nyes byas nges par shes par bya/ /mtha' las byung ba'i nyon mongs ngan/ /kun slong nges par bshags bya ste/ /sbom po lci ba tshogs pa la/ /yang ba'i ming can bzhir brjod do/ /dge 'dun lhag ma las byung ba'i/ /lci ba lnga la yang ba bzhis/ /dge 'dun lhag ma tshogs la ste/ /lhag ma gang zag gcig la'ang rung / /sngar ni ltung ba byung ba yis/ /ltung ba mthun snang la mi 'dod/ /dri mas dri ma rnam dag pa/ /gang du yang ni rung ma yin/ /gang la dge 'dun lhag mas gos/ /ji srid nges par 'chab byed pa/ /de srid de ni dag bya'i phyir/ /spo ba dag la nges par bzhag / dge 'dun lhag ma gang byung ba/ /ji srid de ni rjes bzung min/ /de srid de la spo ba yi/ /cho ga yongs su dag phyir bya/ /mtshan mo dang ni sems sbyor las/ /'chab pa yang ni rnam pa gnyis/ /shin tu mi rung 'dir sems pas/ /sems kyi ming du shes par bya/ /'dir ni spo ba la gnas te/ /gal te nyon mongs kyis pham pas/ /rmongs pas slar yang ltung spyod na/ /slar yang dngos gzhi'i spo ba ni/ /gzhan dag kyang ni sbyin bya ste/ /'dul ba legs shes gang dag gis/ /lan gsum bar du de la sbyin/ /snying rje'i zhing ni de 'dra la/ / nyon mongs dbang gis 'jug shes pas/ /ngo tsha'i khur ni chen po yis/ /brgya lam zhig na 'dud par 'gyur/ /de lta na yang mi dge las/ /gal te mi ldog pa nyid na/ /de ni mdo bzhin dor bya ste/ /ji srid skyo bar gyur gyi bar/ /yid ni yang dag skyo gyur cing / /phyir bcos don du gnyer ba na/ /tshogs kyis dbyung bar 'dod pa yis/ /mgu ba spyod pa de la sbyin/ /mgu ba'i chu yis rnam bkrus nas/ /dri ma lhag ma dag bya'i phyir/ /gang du dge slong nyi shu yis/ /de ni nges par dbyung bar bya/ /de la dge 'dun gtso bo ste/ /bsam pa mkhyen pa'i dge 'dun yin/ /dge 'dun gyis ni rjes gnang na/ /las kyi bya ba byed par rung / /dge 'dun nang du de yi las/ /bya phyir de yi rigs pa yis/ /tshogs las ldang ngo de yi phyir/ /dge 'dun lhag ma zhes byar brjod/ /gal te byin rlabs mgu bas kyang / /gnas pa'i tshe na shi gyur na/ / dbyung ba ma byas na yang ni/ /nges par mtho ris dag tu skye/ /rang gi las kyis co dris pas/ /ngan 'gro dag tu mi skye mod/ /'on kyang snying rje'i bdag can gyis/ /btang snyoms mi bya rjes su bzung / /gang zhig ming ni grags chen dang / /mdo sde la sogs mang du thos/ /de dag gcig gi mdun du yang / /bshags pas dag par nges par rung / /bsam pa yang ni che ba dang / /de bzhin ngo tshas bcabs pa yang / /de yi spo bar yongs brtags byed/ /de yi sgo nas cho ga bzhin/ /de ni mthol ba lan gsum yin/ /nad kyis chad pa nyid dang ni/ /gos kyis dkris dang nyams pa'i sgor/ /byed na ltung ba che spangs nas/ /sbom po'i ltung bas 'joms par 'gyur/ /rkang pa nas ni spyi bo'i bar/ /chags bcas bud med yan lag la/ /gos kyis ma chod reg na ltung / /chod pa la reg sbom po nyid/ /shing rta gru sogs la 'jug dang / / 'phul ba dang ni 'then pa dang / /bar bcas bar med pa la ni/ /reg pa bdag byed sngar bzhin des/ /bud med kyis tshur dge slong la/ /reg cing chags sems bdag byed na/ /'dir yang sngar bzhin thams cad du/ /'dren pa la sogs byed kyang ngo / /'khrig pa'i bsam pas 'di dag la/ /gnyen po stobs chung byed na ni/ /de la phas pham kyis bslang ba'i/ /sbom po yi ni rtsang bar 'gyur/ /'di dag bud med bsten bzod de/ /gzhan du sbom po'i ming can yin/ /skyes pa'am ma ning la sogs sam/ /dud 'gro mo la nyes byas yin/ /dge slong gang zhig bud med la/ /rtse phyir yang ni smad tshig smra/ /dge slong gzugs brnyan nyid yin te/ /de yang dge 'dun lhag ma yin/ /'ga' zhig rma yi sgo gsum po/ /legs par 'dod la shin tu 'jam/ /yang na de dag legs par ni/ /ma dod dga' ba mi skyed gnas/ /'di dang 'di ni khyod la sbyin/ /gang khyod khyo ni nor ldan te/ /gang 'dir khyod dang lhan cig tu/ /bde myong de ni rnyed pa che/ /de la sogs pa'i 'khrig tshig dag /gang brjod dag 'dun lhag ma'o/ /'khrig dngos sgra ni mi brjod na/ /sbom po yi ni ltung bar gsungs/ /bud med ngo tsha las 'das tshig / tshul smra'ang de la ci rigs nyid/ /gang zhig 'khrig pa'i tshig gyur pa/ /de ni smra bar mi bya'o/ /smyos pa dang ni sems 'khrugs dang / /smra mi shes dang las dang po/ /tshor bas gzir la brjod ngan gyi/ /ltung ba dag ni mi 'byung ngo // //bam po gnyis pa/ rang nyid bsngags pa'i bye brag dag /'khrig pa don gnyer bud med kyi/ /mdun du rang nyid kyis bsngags na/ /lhag ma'o dge 'dun gyi zad byed/ /longs spyod 'di yis nyer gnas na/ /mchog dang phul sogs nges bstan pa/ /sring mo bsnyen bkur mchog tshig smra/ /gsol ba la sogs las kyis ni/ /tshul khrims ldan par gang bshad pa/ /tshul khrims phung por yang dag ldan/ /dge ba'i chos can nyid kyis na/ /ting 'dzin phung por yang dag ldan/ /tshangs par spyod pa nges brjod pas/ /shes rab phung por yang dag ldan/ /'khrig pa'i tshig ces bya ba 'dir/ /gnyis kyis gnyis sprad sbyor ba yin/ /'di dag nang nas tshig gcig kyang / /sdom brtson chags pa'i sems kyis ni/ /brda sprad bud med la smra na/ /ltung ba yin la dpyad mi dgos/ /'khrig pa gsal bar byed pa'i tshig /gal te bud med kyang ni smra/ / gang 'dir tshangs par spyod rnams la/ /'khrig pa longs spyod mchog ces dang / /khyed lta'i tshul khrims ldan pa ni/ /rtag tu dge ba'i chos can de/ /yon gnas khyad par 'phags pa dag /rtsod pa'i dus na rnyed par dka'/ /de la sogs brjod dge slong gang / /dga' bas dang du len byed cing / /len gyi tshig kyang smra byed na/ /dge 'dun lhag mar gsungs pa yin/ /da lta bu dang 'khrig spyad na/ /bud med rnams kyang 'bras bu che/ /'khrig pas dngos ni mi brjod kyang / /gang de sbom po'i ming can no/ /de bzhin 'khrig pa'i chos kyis ni/ /dge slong zhes sogs snga ma bzhin/ /da lta bu zhes mi brjod na/ /'di yang sbom po nyid du gsungs/ /bud med kyis kyang de bzhin du/ /'khrig pa'i tshig dngos dor gnas kyang / /khyed lta bu zhes mi brjod na/ /de bzhin gnyi ga sbom po yin/ /bsten mi shes la 'khrig tshig dngos/ /brjod na sbom po las ni dman/ /de lta bu zhes bya ba'i sgra/ /med pa la yang nyes byas 'dod/ /thams cad du yang sdom brtson ni/ /chags can la ni ltung bar 'gyur/ /'dir ni chags can zhes gsungs gang / /sems ni chags pa dang 'brel nyid/ /gang bsten bzod la ltung ba ste/ /bsten mi bzod la sbom po yin/ /skyes pa ma ning la sogs dang / /dud 'gro mo la nyes byas nyid/ /rang ngam gzhan byed 'jug kyang rung / /bud med skyes pa phrad na ni/ /dge 'dun lhag ma'i ral gri yis/ /rang gi mgo ni gcod par byed/ /chu tshigs byin sogs mdor bsdu na/ /chung ma rnam pa bdun du brjod/ /mdza' na mo bcu de dag gi /mtshan nyid yang dag bshad par bya/ /chu yis rab tu byin pa yi/ /don la de ming rab tu btags/ /bud med gang zhig nor gyis nyos/ /rin chas nyos zhes de la rig /rgyal po'i rgyal mtshan dang ni mgos/ / phrogs pa btsan phrogs zhes su brjod/ /ngas khyod nye gnas bya'o zhes/ /zer ba dang sam 'dus pa yin/ /zas dang gos kyi rgyu mtshan gyis/ /zhugs pa gos zas kyis 'tsho yin/ /gang khyod nor dang nga yi nor/ /de yi mnyam srog 'tsho bya zhes/ /de skad brjod nas zhugs pa gang / / kha dum pa zhes bya ba'o/ /skad cig tsam zhig rtag tu min/ /de la thang 'ga' 'phrad ces bya/ /rnam pa bdun po 'di dag ni/ /slar yang so so'i dbye bar 'dod/ /'thabs pa'i mdo dang 'thabs pa'i 'og /dum pa bcad pa rnam pa gsum/ /rde'u gsum ni gtor ba dang / /chung ma ma yin par ni bsgrags/ /cho ga rab tu gtang ba dang / /de bzhin dril bu bsgrags pa'o/ /dang po rnam pa gsum po la/ /bye ba nye bar sdum byed na/ /gcig gnyis gsum la rim pa bzhin/ /nyes byas sogs par 'gyur ba yin/ /bzhi pa dang ni lnga pa gnyis/ /drug ste gsum la sbom po yin/ / bdun pa bsdums byas brtul zhugs can/ /dge 'dun gyi ni lhag ma thob/ /'di ru mdza' mor 'dod pa ni/ /khyo ni shi'am gzhan song tshe/ /ma yi 'bad pas bsrungs pa ni/ /ma yis bsrungs zhes brjod pa yin/ /de bzhin pha dang gyos sgyug dang / /pha dang ma yi rang rig skyes/ /des bsrungs de ni slar yang ni/ /nye dus bsrungs zhes brjod pa yin/ /pha dang khyo ni med pa na/ /ming pos yongs su bsrungs pa'am/ /phu mo nu mo yis kyang bsrungs/ /spun zlas bsrungs zhes brjod pa yin/ /bram ze mo 'am rje rigs mos/ /bsrungs pa rigs kyis bsrungs pa yin/ /bad sa la'am ko sa la'i/ /rgyud kyis bsrungs pa rus chags bsrungs/ /chos spyod brtul zhugs can dag gi /'khrug med mar ni shes bya ste/ /rnam pa bcu po 'di dag ni/ /mdza' na mo zhes shes par bya/ /gang 'dir mdza' na mor gsungs dang / /bzhi pa la sogs chung ma rnams/ /thams cad du ni sdum byed pa/ /dge 'dun lhag mar nges par bstan/ /khye'u 'am ni bu mo 'di/ /ci yi phyir na khyim mi byed/ /de skad la sogs smra ba yi/ /dge slong gis ni nyes byas 'thob/ /rang gi don du khang pa ni/ /gsol ba la sogs las kyi ni/ /ched sogs yon tan ldan par bya/ /gzhan du dge 'dun lhag mar 'gyur/ /gang du nyam nga med spyod pa/ /spyod lam rnam bzhi rung ba ni/ /'dug dang 'chag dang nyal bar grags/ /bzhi pa langs pa nyid yin no/ /chur ni bde bar gshegs pa yi/ /mtho ni bcu dang gnyis yin no/ /zheng du de nyid bdun yin te/ /de dag de yi tshad du gsungs/ /bde bar gshegs pa'i mtho yi tshad/ /gang gsungs mkhas pas shes par bya/ /'bring tshad mi yi khru dag ni/ /phyed dang gnyis ni yod pa yin/ /'bring tshad skyes bu yi ni khru/ /bco brgyad chur ni yod pa yin/ /zheng du phyed dang bcu gcig ni/ / khang pa'i tshad du gsungs pa yin/ /sbrul dang sdig pa tre bu ka /tre la ta sogs kyis mi rung / /rtsod bcas lam dang shing drung dang / /lha rten rgyal po'i pho brang mtha'/ /chu dang g.yang sa khron pa'i drung / /brtsam du rung ba ma yin no/ /skyon ni 'di dag med pa ru/ /rigs pa yi ni khang pa bya/ /bka' yis ma gnang ba dag dang / /gzhi mi rung dang brtsam mi rung / /ma brtan rtsod pa dang bcas su/ /byed na dge slong sbom ltung thob/ /skyon kun gyis ni rab smad par/ /dge 'dun lhag mar gyur pa ste/ /skyon rnams kun dang bral ba yi/ /sa gzhir rjes su bsngags pa nyid/ /las dang po dang de bzhin smyos/ /'khrugs dang nad kyis gdungs pa yis/ /byed kyang 'di las 'byung ba yi/ /ltung ba yod pa ma yin no/ /gtsug lag khang ni bdag bcas la'ang / /tshad dang cho ga 'di nyid de/ /chen po nyid kyi tshad du ni/ /nor gyis 'dir ni shes par bya/ /gzhi med pa'am bag tsam gyis/ /sdom brtson nyams par 'dod phyir ni/ /phas pham pa yis smad na ni/ /gnyis ka dge 'dun lhag mar shes/ /gang zhig cung zad bden par smra/ /'di ni bag tsam yang dag grags/ /rgyu mtshan med pa gzhi med yin/ /bag tsam nyid rab bstan pa ni/ /rab dang blo ldan dge slong ma/ /ut+pal mdog can zhes bya byung / /rdzing bu rab zhi zhes pa'i 'gram/ /gyad nor can yong nye bar 'ongs/ /de dang ha cang mi ring bar/ /sa las skyes dang mdza' bo gnas/ /der ni chu 'thungs 'ongs pa yi/ /ri dwags ri dwags mo spyod mthong / /de mthong sa las skyes kyis ni/ /mdza' bos mdza' bshes la dris pa/ /mi tshangs spyod dang dge slong dang / /dge slong ma yang mthong ngam ci/ /de yis mthong ngo zhes smras te/ /bag tsam 'di tsam las byung bas/ /gyad nor bdag gis brlag bya zhes/ /de yis khros nas smras par zad/ /de la sogs pas kun bslang ba'i/ /bag tsam gyis ni bye brag dag /yid gcugs dman pa dag gis ni/ /dran par bya phyir gsungs pa yin/ /bzhams te bsgo sogs cho ga yis/ /lan gsum bar du bzlog na yang / /mi nyan dge 'dun mthun 'byed na/ /dge 'dun gyi ni lhag ma thob/ /gsol ba ma gtogs bzlog pa'i tshig /bzhams te bsgo ba zhes bya ste/ /tshe ldan khyod 'dir mchog gcig la/ /'di ma byed ces rgyas par ni/ /gzhams te bsgo bas mi gtong na/ /las kyis de la bka' bsgo bya/ /de nas gsol dang bzhi las te/ /byis gang de yi grogs byed pa/ /mchog gcig bsam pa gcig pa las/ /dbye ba rnam pa gnyis su gnas/ /tha dad dbye ba yang ni 'dir/ /rnam pa bcu bzhi dag tu bzhed/ /chos la chos ma yin brjod dang / /chos min la yang chos su brjod/ /'dul ba dang ni 'dul min nyid/ /bzhi po de la sogs pa brjod/ /'di la dbang byed mkhas pa yis/ /'gyed pa dang ni mi gdams dang / /ltung ba dang ni bya ba ste/ /rnam pa bzhir ni shes par bya/ /sna tshogs rtsod dang tshogs pa med/ /dge 'dun bsam pa tha dad pa'i/ /rkyen la sogs pas 'byung ba ste/ /rtsod pa yi ni dbang byas brjod/ /kun nas nyon mongs pas ltung ba/ /phan tshun du ni mi gdams pa/ /de ni rtsod pa las byung ba/ /mi gdams pa zhes bya bar grags/ /lus dang ngag yid kyis phye ba/ /de ltar tha dad gcig dang ni/ /rnam pa gnyis dang rnam pa gsum/ /ltung ba phyogs tsam brjod pa yin/ /khyim gcig dge slong bud med dang / /gal te mi shes lhan cig nyal/ /nub gsum bsnyen par ma rdzogs dang / /gnas gcig 'di ni lus kyi'o/ /bud med dag la rkang pa ni/ /lnga'am drug gis chos ston na/ /ma bsams par ni lhag pa'i tshig /smras pa la ni ngag gir brjod/ / gso sbyong dus tshe dris na yang / /skyon yong smra bar mi byed na/ /de la yid kyi ltung ba ni/ /nyes byas nyid du mkhas pas rtogs/ /lus dang yid gnyis 'brel pa ni/ /yang dag bsams nas srog gcod dang / /ma byin len dang chang 'thung sogs/ /brten pa nyid la'ang 'dod pa yin/ /yang dag bsams nas lnga dang ni/ /drug tsam smras pa lhag par brjod/ /ngag dang yid las gyur pa de/ /brdzun smra sogs la'ang 'dod pa yin/ /brdeg ces kun nas bsams nas ni/ /brjod de lus can la brdeg na/ /'di ni lus dang ngag yid kyi/ /bya ba rnam pa gsum pa can/ /dge slong la ni mi dge bas/ /ltung bar 'gyur gyi sems dag na/ /mchod rten sku la skyes pa yi/ /rtswa sngon gcod par byed bzhin du/ /ji ltar dge ba'i sems kyis ni/ /ston pa la ni mchod 'dod pas/ /me tog phreng ba spel ba'i phyir/ / 'thog pa de la de tsam min/ /ma bsams thub pa'i bslab pa'am/ /dge 'dun nang khrims dral gyur na/ /lung ma bstan par gsungs pa ste/ /ltung med dge ba nam yang min/ /yang dag bsams nas 'das na ni/ /mi dge ba nyid kho nar 'gyur/ /'di ni rjes su ma gnang yang / /skabs 'ongs zhar la brjod pa yin/ /de ltar rnam pa du ma yi/ /ltung ba so so'i sgo nas 'dir/ /rtsod pa'i dbang du byas pa yi/ /ltung ba 'di ni mkhas pas gsungs/ /gsol ba la sogs las 'di dag /rung ba min zhes smra ba rnams/ /rtsod pa dang ni 'thab mo yang / / bya ba'i yang ni rgyu ru 'dod/ /dge 'dun 'byed par gang brtson pa'i/ /blo chung gis ni nyes byas thob/ /bzhams te bsgos kyang mi gtong na/ /nyes byas nyid du rnam par gzhag /dang po nyid du gsol ba'i las/ /brjod tshe mi gtong sbom po nyid/ /brjod pa gnyis la'ang de yin te/ /mthar ni dge 'dun lhag ma nyid/ /snga ma'i brjod pa gnyis la ni/ /sbom po'o de rjes de la ni/ /gsum pa dge 'dun lhag ma ste/ /de ltar 'di ni legs par brtag /gang yang de rjes 'brang ba yi/ /dge slong sdig to can rnams kyang / /bzhams te bsgo sogs cho ga yi/ /sngar bzhin 'di dag kun la'ang 'gyur/ /khyim sun 'byin pa yis ni gzhan/ /sun 'byin pa ni rnam gnyis gsungs/ /gcig ni 'grogs pas yin te gzhan/ /gnyis pa yang ni longs spyod kyis/ /'grogs pa bud med lhan cig tu/ /rtse 'jo 'phyar g.yeng la sogs bsten/ /longs spyod me tog 'bras bu dang / /bza' btung la sogs lhan cig byed/ /mig rna yid sogs shes pa yi/ /mthong ba la sogs rnam gsum 'dod/ /bzhams bsgo la sogs rim byas kyang / /mi gtong sngar bzhin nyes sogs lta/ /bka' blo mi bde bas kyang ni/ /dge 'dun lhag ma'i ltung bar bstan/ /bka' blo mi bde phan rnams la/ /brjod rung ma yin tshig smra'o/ /phas pham la sogs gang zhig bslab/ /de ni bslab pa'i gzhi zhes bya/ /nyar bstan 'dul bar gang gsungs pa/ /'di la chos ldan dge slong rnams/ /gang zhig ston pa'i bka' la gtogs/ /chos mthun rnams kyis nges par bsgo/ /bzhams te bsgo ba la sogs la/ /mi gtong sngar bzhin nyes bya sogs/ /bcu gsum 'di dag dge 'dun las/ /ldang phyir dge 'dun lhag ma'o/ /phyi ma bzhi ni gsum gyis te/ /snga ma dgu ni cig car du/ /mtshon pa tsam du sbyar ba yis/ /dge 'dun lhag mar nges par bstan/ /ma nges pa yi chos gnyis ni/ /'dul ba las gsungs rab tu brjod/ /dge slong 'char kas sbed ma dang / /lhan cig nyer gnas reg pa las/ /mgon pos dge 'dun tshogs dbus su/ /ma nges dang po'i chos bcas mdzad/ /dben gnas dge slong gcig pu zhig / bud med gcig dang 'dug byed na/ /'dod bsten rung ngam mi rung yang / /ma nges gnyis po'i chos su brjod/ /gang du gzhan med 'di dben te/ /skyabs yod kyis kyang rnam pa ni/ /rtsig pa rib ma mun pa dang / /yol ba thibs po zhes bya lnga/ /gnas su 'gro dang 'dug pa'am/ /nyal ba la sogs gang byas kyang / /dad pa can gyis tshig gis ni/ /dge slong de ni ldang bar 'os/ /yang na de dag 'gro la sogs/ /cung zad tsam yang ma gtogs na/ /de yi ngo bo shes bya'i phyir/ /gsol ba'i cho ga sngon 'gros byin/ /rab tu byung dang bsnyen rdzogs dang / /de yis gzhan la nam yang ni/ /gnas bca' ba yang mi sbyin te/ /gzhan dang lhan cig 'chag pa'ang min/ /'dug stan la sogs gcig mi bya/ /de la chang 'di ma shi'i bar/ /btung ba yongs su ma chod phyir/ /'di dag ma nges chos zhes brjod/ /de ltar ma nges chos gsungs nas/ /de las ji ltar ldang ba dang / /gang zag lhag ma mang po yi/ /mdun du rab gnas mchog gis so/ /zhag bcu 'das par dge slong gis/ /chos gos ma brtags 'chang na ni/ /spang ba'i ltung byed sa rdul gyis/ /mgo bo g.yogs par byed pa yin/ /chos gos drubs dang tshon bsgyur ba/ /chos gos zin par gyur pa na/ /chos gos 'dzin par khas len pa/ /'dir ni blo yis khas blang ngo / /mu bzhi can la 'dir brtag pa/ /sra brkyang dbyung ba byas nas ni/ /chos gos ma zin par ni min/ /de la sogs pas rnam par gzhag / bal gos sha na nyi 'og dang / /ras gos dang ni zar ma dang / /ko tam pa dang du gu la/ /chos gos rgyu ni rnam pa bdun/ /spang bar 'os pa mi spong dang / /ltung ba bshags par mi byed na/ /gal te phran tshegs de 'dra yang / /nub gcig bral bar mi byed pa/ /rigs tshigs gsum po 'di las ni/ /gcig ma tshang bar ma yin te/ /'di dag ma lus byas na ni/ /ltung ba med par gsungs pa yin/ /gang yang lhung bzed dra ba sogs/ /nye bar bsags nas der yang ni/ /de tshe gzhan skyel bshags mi byed/ /spang bya'i ltung ba nyid du 'gyur/ /gang 'dir zad byed ltung ba ni/ /nges par spangs nas bshags bya ste/ /gang phyir gang gis ngan song du/ /ltung phyir ltung ba'i ming du btags/ /chos gos gsum gyi gnas bya ste/ /phyi rol 'di dag med par min/ /gzhan du dge slong nyes byas 'gyur/ /dge 'dun gyis gnas ma gtogs so/ /gnas gcig gnyis dang mang po yis/ /grong ni 'obs kyis bskor ba dang / /rtsig pa rib ma'i khongs su chud/ /nyer spyod gcig dang tha dad pa'o/ /nyer spyod spong ba skyed mos tshal/ /lha yi gnas la sogs pa'o/ /'di la thun mong gcig nyid de/ /tha dad sna tshogs nyer spyod nyid/ /rgyun srang gcig ni btod pa dag /gnas gcig pa zhes brjod bya ste/ /gdol pa ri khrod pa la sogs/ /rigs gcig pa yi gnas bzhin no/ /rigs gnyis gang du bram ze dang / /gdol ba gnas pa gnas gnyis brjod/ /sna tshogs rgyun srang btod pa la/ /mang po bar ni rab tu grags/ /nyer spyod nang gi ma lus dang / /de yi phyi rol 'dom gang yin/ /khyim bya 'phur chags tsam dag gam/ /gang du 'thag 'tshed la sogs tshad/ /rigs dang tshong khang tshong 'dus dang / /khang thog g.yul sa mu stegs gnas/ /gru dang shing ljon shing rta dang / /kun dga' ra gcig sna tshogs spyod/ /spun rnams ma phye ba dang ni/ /skyes bu gcig gi yang ni rung / /ji ltar rigs par gsungs nyid kyis/ /de yi nyer spyod gcig pa yin/ /'di yi nyer spyod snga ma ltar/ /nyer spyod sna tshogs pa yang ni/ /gang du 'di dag gi ni sgo/ / tha dad pa'am thun mong brjod/ /mang po yang ni rigs bzhin du/ /tshong khang la sogs 'dod pa yin/ /nyer spyod tshul ni ma lus pa/ /gcig dang sna tshogs dag tu dbye/ /nyer spyod gcig dang sna tshogs su/ /mu stegs lta bas phye ba ste/ /gang du phyi rol spyod pa yis/ /gnas pa g.yang gzhi can la sogs/ /'khor los spyod pa la sogs khyim/ /thun mong sngags kyi khyim kun te/ /gang du phyi rol rnga zlum dang / /gling bu la sogs 'grems pa'o/ /phan tshun yal ga ma bral na/ /shing sdong kun spyod gcig yin te/ /phyi rol nye 'khor phyed grib bam/ /gang du thigs pas slebs pa'o/ /gang du nyer spyod gcig pa der/ /chos gos gsum ni nyer bzhag nas/ /gzhan du dge slong nyal gyur kyang / /ltung ba bskyed par 'gyur ma yin/ /lha rten dag la sogs pa yi/ /thun mong sgo drug dag tu gos/ /sbas nas gzhan du 'dug na yang / / zad byed ltung bar ldan ma yin/ /'dom ni bzhi bcu rtsa dgu'i bar/ /chos gos gsum dang bzhi gcig tu/ /nyer spyod dag tu song ba na/ /'dug 'greng 'bral ba ma yin no/ /chos gos yang dag yod na yang / /gzhan dag bsgrub par 'dod pa yis/ /byin gyis ma brlabs ma brtags par/ /zla ba las lhag gzhan mi bya/ /smin drug nas ni khra yi bar/ /dus kyi gos ni rnam par spyad/ /de las gang lhag dus min te/ /nye du sogs la yid brtan bya/ /dur khrod pa dang mi shes dang / /shes pa nyid kyis chos gos dang / /song dang song ba ma yin dang / / phyag dar khrod ni lnga pa yin/ /dur khrod pa ni dur khrod spyod/ /sbyin po mi shes shes pa nyid/ /song ba ro yi gos la sogs/ /phyag dar khrod ni bor ba'o/ /rdul gyis sbags dang dgon pa dang / /srang bor me yis tshig pa dang / /mi gtsang gis gos phyag dar khrod/ /rnam pa lngar ni shes par bya/ /me yis tshig dang chu la bor/ /de bzhin pha mas byin pa nyid/ /byi ba'i so yis 'chos pa dang / /de bzhin be'us zos pa'o/ /gsar pa dang ni longs spyod bzod/ /chos gos rnam pa gnyis su 'dod/ /de yi cho ga ji skad bshad/ /de bzhin 'dir ni mngon par brjod/ /gsar pa'i gos la 'di bya ste/ /thog mar snam sbyar nyis rim drub/ /de bzhin du ni gding ba ste/ /chos gos gzhan la nam yang min/ /zla ba bzhi sogs longs spyad pa'i/ /gos de sdom brtson gyis rtogs na/ /snam sbyar la ni bzhi rim ste/ gzhan dag la ni nyis rim bya/ /de las lhag pa mi sbyar te/ /rim pa de la sbyar bya yang / /bzo 'phror gyur te bzhag pa ni/ /zhag bcu'i bar du rung ba yin/ /snam sbyar rnams kyi tshal bu ni/ /snral zhi bya'o dgu tshogs dgu/ /snam phran nyi shu rtsa lnga'i bar/ /de dag dbye ba nges par bstan/ /glegs bu phyed dang gsum pa gsum/ /gsum ni glegs bu phyed dang bzhi/ /tha ma gsum gsum glegs bu ni/ /phyed dang lnga par bya ba yin/ /sde tshan gsum po 'di dag gis/ /snam sbyar zhes byar gsungs pa ste/ /de dag tshad ni nges bstan pa/ /dang po khru ni lnga dang gsum/ /tha ma phyed dang gsum dang lnga/ /de gnyis bar ni bar ma yin/ /de bzhin bla gos nyid nga ste/ /lnga dang gsum par gsungs pa yin/ /gnyis lnga gnyis ni bzhi pa dang / /lnga pa yang ni mthang gos yin/ /gal te de dag ma 'byor na/ /rjes bzung don du 'khor gsum khebs/ /spyir na rang bzhin tshad rnams la/ /khru yi tshad du gzhag pa yin/ /shin tu ring dang thung ba la/ /lus kyi tshad du 'dod pa yin/ /dang po tha ma dag dang dbus/ /tshal bu'i sgo ni gsum du brjod/ /de yi sor ni bzhi dang gnyis/ /de yi bar ma rim pa bzhin/ /khru yi tshad las chung ba la/ /byin rlabs yid brtan mi dgos so/ /spu can la yang de bzhin te/ /de gyon grong du 'jug mi bya/ /dge 'dun lhan cig zan mi za/ /mchod rten la yang phyag mi bya/ /'di ni sbyin bdag gi'o zhes/ /yongs su brtags nas bcad par bya/ /ma dras chos gos gyon nas ni/ /grong du 'jug par mi bya ste/ /'jug na nges par dge slong dag /nyes byas 'gyur te med ma gtogs/ /mi mthun byed dang 'khrug long can/ /mu cor smra dang gtum po dang / /'gro bar 'dod dang 'gro ba la/ /mkhas pas yid brtan phyir mi gzhag /gal te yid ches dge slong zhig / chu yi pha rol gnas na yang / /de phyir de la chos gos kyi/ /yid brtan bya bar gsungs pa yin/ /gzhan der gnas pa'i dge slong dag /shi bar shes na chos gos ni/ /slar yang dge slong gzhan zhig gi /ming gi yid brtan bya ba yin/ /chos gos yid brtan bya ba 'dir/ /mi rtag la min mngon sum min/ /de bzhin dge tshul rnams la yang / /chos gos yid brtan bya ba min/ /gang dag gzhan gyis gtad nas ni/ /chos gos byin gyis brlab pa na/ /da shi na yang dge slong nges/ /dge 'dun la ni dbul bar bya/ /chos gos gang brtags de yi mthar/ /snag tsha la sogs thig le bya/ /bye brag bdag gi mtshan ma yang / /khyad par rtogs par bya ba nyid/ /bar ma las ni yo byad drug /de nyid nad g.yog la phyin nas/ /shi ba'i yo byad lhag ma ni/ /dge 'dun bsod nams 'grub phyir bgo/ /chos gos dras pa gsum dang ni/ /rdul gzan sham thabs gnyis gnyis te/ /g.yan pa dgab dang gding ba dang / /ras chen dang ni skra bzed dang / /gdong dang lag pa phyi ba ste/ /'di dag bcu gsum dbye bar 'dod/ /chos gos lhag sogs yo byad rnams/ /'tsho ba'i yo byad bcu gsum po/ /dge slong chos gos rnams la ni/ /'chang ba'i tshul ni 'di yin te/ /nges par byin gyis brlab pa dang / /de las gzhan pa yid brtan bya/ /rngul gzan mthang gos med par ni/ /chos gos chen po longs mi spyod/ /gang phyir longs spyod shes pa yis/ /phal ba yang ni bgo bar bya/ /kha bsgyur 'os pa kha bsgyur zhing / /drub par 'os pa drub pa dang / /byin rlabs 'os pa byin gyis brlab/ /brtag par 'os pa yid brtan bya/ /sngon po btsag dang ngur smrig rtsi/ /'di dag rung ba'i tshon gsum ste/ /tshon chen dag gi chos gos ni/ /kha bsgyur byed pa bkag pa yin/ /rgya skyegs le brgan rtsi dang btsod/ /rma shing rtsi dang mthing shing mtshal/ /sin+du ra dang gur gum ste/ /'di dag tshon chen brgyad du 'dod/ /seng ba phrug dang phying ba dang / /la ba shin tu mthug po dag /'di dag chos gos 'dod pa yis/ /dra bar bya ba ma yin no/ /spu can rnam par spangs nas ni/ /brtul zhugs can gyi nang shun bya/ /gding ba la ni dra mi dgos/ /rtag tu 'bral ba yang ni med/ /snam sbyar nges par dras te bcad/ /gzhan dag ma nges gang gi phyir/ /'dod chung rang gi chos gos kyi/ /las kyis skyo ba skyed phyir ro/ /lnga pa sham thabs gyon nas ni/ /bya ba mtha' dag byed par rung / /bla gos sa phyogs gtsang mar ni/ /las yongs byed na bkag pa med/ /snam sbyar dge slong 'dus pa dang / /zas dang mchod rten phyag byed dang / /grong sogs 'jug la bgo bya yi/ /gzhan dag tu ni bkag pa yin/ /la ba phrug dang phying ba dang / /rnga mo'i la ba dag dang ni/ /chos gos nyis rim gyon pa ni/ /mi gtsang phyogs su bkag pa yin/ /ma g.yogs gnas mal mi rung phyir/ /gzhan med bla gos bzhi bltab tu/ /byas te bting nas dran ldan pas/ /ldang ba yang zhing nyal bar bya/ /gzhan du chos gos ma khyer bar/ /gnas na gzhan gyi dkar po'am/ /dras pa ma yin na yang rung / /byin gyis brlab par bya ba nyid/ /zas la nad pa ma gtogs par/ /gos gcig pa ni bkag pa yin/ /sdom brtson bgo ba med par ni/ /khrus byed bkag go med na rung / /mang pos blangs na la ba sogs/ /gcig rnyed pa ni kun gyis spyad/ /rjes su gnang ba ma gtogs par/ /gcig pus bdag gir mi bya'o/ /kha ma bsgyur bar nyin mo ni/ /phyi rol ngur smrig nges par g.yogs/ /dge 'dun gos ni dran bzhin du/ /gnyis ka nas g.yogs spyad par bya/ /la ba'i spu ni phyir bstan nas/ /gyon te bcag par mi bya'o/ /srin sogs 'jigs pas 'dug pa dang / /nyal ba rjes su gnang ba nyid/ /dge 'dun rnams la be'u phrug re/ /rjes su gnang ngo gang zag la'ang / /bar sig la ba dge 'dun la/ /la ba gzhan ni gang zag la'ang / /rjes gnang kun kyang la ba ste/ /'on kyang par sig yul nas byung / /de ni par sig la ba'o/ /smad g.yogs bsdams pa'i don du ni/ /ska rags kyang ni rung ba yin/ /lteb ma dang ni shur bu nyid/ /gsum pa shur bu phre'u nyid/ /rang gi bzang po gang gyur pa/ /thams cad dge 'dun nyid phyir spyad/ /gding g.yogs dag ni med par yang / / nam yang mal stan longs mi spyad/ /dag par bya phyir sham thabs ni/ /btso blag mkhan la 'khrur mi gzhug /brtse ldan rang ngam gzhan gyis kyang / /snod kyi nang du dal bus bkru/ /btso blag mkhan gyis brtse med par/ /gos dag drag tu sprugs brdabs na/ /tshags sran zad par byed pa'i phyir/ /bstan bcos las ni rab tu bkag /tshul ldan ji srid legs par ni/ /chos gos la sogs longs spyod pa/ /de srid rgyun mi 'chad par ni/ /sbyin bdag rnams kyi bsod nams 'phel/ /bsrung ba'i don du skra bzed ni/ /zheng du khru ni phyed dang gnyis/ /srid du khru ni gsum yin te/ /lhag pa brtag par mi bya'o/ /gal te chos gos 'tsher bag can/ /gzhan las dge slong gis rnyed na/ /'tsher bag chu yis nyams byas nas/ /yongs su spyad do gzhan du min/ /'tsher bag dang bcas 'jam po yi/ /chos gos bcang bar mi bya ste/ /'chang bar byed na de dag la/ /nges par 'gal tshabs can du 'gyur/ /mdzes mas chos gos 'tsher bag can/ /mdzes dga' la ni nan gyis byin/ /de la kun nas chags skyes pas/ /de phyir bstan bcos che las bkag /gang des yongs su longs spyad par/ /bzod pa'i gos gzhan yod min na/ / rngul gyis 'jigs pas snam sbyar la/ /rngul gzan bltabs nas bcang bya ste/ /zheng du mtho gang srid du khru/ /phyed dang do las lhag mi bya/ /snam sbyar yongs su srung byed pa/ /btsag yug rnams kyis kha bsgyur bya/ /khyad par du yang bla gos kyi/ /tha ma yongs su zegs pa na/ / smyung tshems la sogs yang dag sgrub/ /khab kyi las kyang rjes su gnang / /phyag dar khrod la dga' ches pas/ /bsams nas dral bar mi bya ste/ /nam yang chos gos don du yang / /rma med ro las mi blang ngo / /srin bu sogs kyis rma gtod kyang / /rang gnas zhag bdun bzhag nas ni/ /dur khrod pa yi dge slong gis/ /bkrus te kha bsgyur bcang bar bya/ /dge 'dun gyi ni mal cha dang / /stan ni de la bkag pa yin/ /dge slong khyim du mi 'jug ste/ /sgo drung bsod snyoms blang bar bya/ /stan sogs 'dug par 'bod pa na/ /dur khrod pa zhes go byas nas/ /gnang phyir khyim du zhugs nas ni/ /stan la 'dug pa la sogs bya/ /mchod rten dag la phyag byed tshe/ /'dom gang nang du dor byas te/ /nya dang sha sogs mi bza' zhing / /der ni gnas khang brtsig mi bya/ /kha ma bsgyur dang kha tshar can/ /be'u ras sogs dge 'dun rung / /tshon can rgyal byed tshal phul bas/ /des na be'u ras sogs bkag /spang bar bya ba'i dngos gang rung / /de ni dge 'dun la min te/ /gang gzhan phyis ni ster ba yi/ /gzhung lugs shes pa dag la spang / /mi shes bzhin du chags bcas gang / / spangs nas zlog par mi byed cing / /legs bsgo byas kyang mi ster na/ /de la stobs kyis dbog par bya/ /'char ka'i khu ba'i thigs pa gang / /gos la babs mthong sbed ma yi/ /chags khyer bu yi rgyur gyur pas/ /de yis kun bslang 'di rab bcas/ /dge slong gang zhig nye du min/ /dge slong ma la gos 'khru dang / /'tshed dang 'chag par byed pa ni/ /nges par ltung ba dang ni ldan/ /'khru ba la sogs byed 'jug na/ /gcig gis kyang ni nye bar 'joms/ /the tshom za na nye du la'ang / /nyes byas dri mar yongs su bsgrags/ /pha dang ma dang ma yi pha/ /nye bar bzung ste bdun brgyud ni/ /mkhyen chen gyis ni nye dur gsungs/ /de las gzhan ni gnyen mi nyid/ /tshos khu dngas ma la sogs pa/ /re re la yang 'og gzhi gding / /bslab pa'i gzhi ni nyams byed pas/ /dge slong la ni ltung bar 'gyur/ /dge slong gang zhig nye du min/ /dge slong ma las bsams bzhin du/ /chos gos gang rung len byed na/ /de yi bslab gzhi nyams par byas/ /'di la slar sbyin dbrog mi bya/ /brje ba la ni nyes pa med/ /ji ste brje na mnyam pos sam/ /dge slong ma yi 'dod pa bzhin/ /rgya chen nor ldan dge slong mas/ /gal te 'bul na nyes pa med/ /de bzhin legs gsungs bsnyen rdzogs byed/ /bor rlag gyur dang dbus yang ngo / /dge slong chos gos gsum yod pas/ /nye du ma yin khyim bdag dang / /de yi bdag mo las kyang rung / /chos gos nam yang mi blang ngo / / kun du skyes pa khyim bdag ste/ /de yi bdag mor bud med brjod/ /bor rlag byung sogs slong ba ni/ /'di la nyes pa med par brjod/ /dbul po la ni bslangs pa yis/ /kha tshar la sogs thob pa dang / /gar mkhan la sogs pa yi gos/ / bzang po la yang nyes pa med/ /chos gos phrogs pa la sogs kyis/ /mang po rnyed par gyur na yang / /dran pas stod g.yogs smad g.yogs las/ /lhag par blang bar mi bya'o/ /khru ni bcu gnyis stod g.yogs gos/ /smad g.yogs yang ni bdun dang gnyis/ re zhig 'di ni 'jig rten pa'i/ /stod g.yogs smad g.yogs zhes su gsungs/ /khru ni lnga gsum snam sbyar te/ /nyis rim stong g.yogs dag kyang ngo / /khru ni lnga dang gnyis po dag /re zhig bstan pa'i smad g.yogs so/ /bslangs nas dngos po lhag pa dag /gal te ga shed nas ni rnyed/ /de ni go byas bzlog byas te/ /rjes su gnang na blang bar bya/ /khyim bdag mo 'am khyim bdag gis/ /gos kyi rin ni spags na der/ /dge slong rnam par rtog bzhin du/ /slong na de ni ltung dang bcas/ /sngar bzhin nye du min zhes bya/ /chos gos rnam pa bdun po dag / yongs su spyad par bzod pa yis/ /gos de rung ba zhes bya'o/ /rin spags pa zhes bya ba ni/ /gser la sogs pa ma smos shing / /mgron du ma bos zhes pa ste/ /brtag btung dran par brjod pa'o/ /lnga dang bcu pa'i rin dag gis/ /nyos la byin zhes rjod byed cing / / sngon po sogs kyi kha dog ste/ /khru yi tshad kyis khru nyid do/ /rin la sogs pa gsum dag gis/ /slong ba'i tshe na nyes byas te/ /thob na spang ba'i ltung bar 'gyur/ /ma bslangs na ni ma yin no/ /chos gos phrogs pa la sogs pas/ /gang yang rung ba blang bya ste/ /dge slong rtags kyis lus la 'dir/ /ma g.yogs nam yang mdzes ma yin/ /so sor dpag pa la yang ni/ /thams cad sngar bzhin kho na ste/ /ji ltar byas pas ltung ba dang / /ltung ba med pa yang ni grags/ /bdag cag mi rung gnas brjod nas/ /pho nya las ni rin mi blang / /legs sbyin chos gos bdag cag rung / /zhal ta pho nya de la brjod/ /de yis gang tshe chos gos rin/ /zhal ta byed la gtad pa na/ /dge slong chos gos don gnyer des/ /lan drug bar du dran par bya/ /der ni mngon par grub na ni/ /der ni blang bar rung ba nyid/ / de las lhag par brtson byed na/ /ltung ba'i tshang tshing nang du ltung / /'di la lan drug bskul nas ni/ /rang nyid 'ongs nas ster byed na/ /dge slong gis ni 'di skad brjod/ /bdag gis 'di spangs dgos pa med/ /de lta na yang gal te de/ /shin tu phyag sogs sngon 'gro bas/ /ster na dge slong len pa la/ /ltung ba med par gsungs pa yin/ /bud med dang ni rgyal srid la/ /dbang bskur gyur tam bram ze'am/ /rgyal po'i gnang chen pa la gtogs/ /blon po'am dmag dpon la sogs 'dod/ /'dug sa tshong khang chu gnas dang / /'bod gnas dang ni khyim gnas so/ / tshong khang gang du nyo tshong byed/ /chu gnas chu snod sbed pa'i sa/ /'bod gnas 'breg mkhan dag dang ni/ /rdza mkhan la sogs ming can gyi'o/ /khyim gnas khyim du rab brjod pa/ /'di dag 'bod gnas bzhir gsungs so/ /tshur spyon legs par byon nam khyod/ /gdan 'di la yang bzhugs nas ni/ /phyag zhabs legs par bkra ba dang / /bza' dang btung ba dgyes bzhin gsol/ /lan drug bskul ba'i sgo der yang / /ma thogs par ni rjod byed na/ /ltung med thogs nas rjod byed pa/ /ltung bar 'gyur ba kho na'o/ /gal te pho nya mi ma yin/ /sbyin bdag dang ni gnyis pa'ang / /sdom brtson nyer byas gsum gyi ni/ /dbyug pa rnams kyis mgo bo 'joms/ /sbyin bdag mi yin pho nya dang / /zhal ta ba ni mi min na/ /nyes byas gnyis so zhal ta tsam/ /mi ma yin na nyes byas gcig /gang du sbyin bdag pho nya dang / /zhal ta pa yang mi yin na/ / de ni nges par ltung byed bskyed/ /khrims ldan ngan song gsum du 'phen/ /dge slong gang zhig phan byed pas/ /dge slong gang la chos gos bskur/ /de nyid la ni yid brtan pas/ /yongs su spyod pa nyes pa med/ /gang der shi na chos gos ni/ /gsal por de yi 'gyur ba yin/ /ma thob pa las spang ba dag / gnyis ka la yang med pa ste/ /snga mas yongs su btang ba dang / /gzhan gyis bdag gir de ma byas/ /de la zhag bcu 'das na yang / /gnyi ga la yang ltung ba med/ /gang yang dge slong srin bal gyis/ /gsar pa'i stan dag byed na ni/ /de la ltung ba'o de yang gnyis/ /g.yogs pa dang ni blings pa'o/ /byin par gyur dang de bzhin du/ /longs spyad pa la nyes med do/ /sbyin bdag bsod nams 'dod pa'i phyir/ /dge slong gis ni blang bar bya/ /lug bal nag po 'ba' zhig gis/ /gsar pa'i stan ni mi bya ste/ /de tshol ba yi sdug bsngal gyis/ /klog dang kha don nyams par byed/ /dkar nag dang ni 'khob bal gyi/ /cha gnyis cha gcig bsres nas ni/ /blings pa nges par byed na ni/ /stan des ltung ba med pa yin/ /nag po rang bzhin gyis gnag nyid/ /mgrin pa rgyab dang glo gnyis dkar/ /spyi bo lto dang tshe'u 'gab/ /'khob bal dkar nag zhes su brjod/ /dkar nag 'khob pa la dkar po ni/ /srang phyed tsam gyis nyung ba zhig /byas nas gsar pa rtsom byed na/ /de la ltung bar the tshom med/ /de las gzhan pa ma rnyed na/ /nag pos kyang ni bya ba yin/ /gzhan las rab tu thob pa ni/ /ci bde bar yang yongs su spyod/ /lo drug bar du nan tan gyis/ /byas pa'i stan de bcang bar bya/ /lo drug tshu rol de byas ltung / /nyes med tshogs kyis gnang ba yin/ /lo gcig la yang gnyis pa dag /gal te dge slong rtsom byed na/ /rtsom la nyes byas gcig yin te/ / yongs su rdzogs la dngos gzhir gzhag /de bzhin gnyis gsum bzhi dang lngar/ /brtsams pa la yang nyes byas 'thob/ /lo drug bar du zhugs gyur nas/ /rtsom pa la ni nyes pa med/ /gding ba gsar pa byed pa na/ /rnying pa la yang nges par mtha'/ / kha dog ngan par byed 'dod pas/ /bde bar gshegs pa'i mtho gang glan/ /gal te mtho gang tshad de las/ /bsams bzhin cung zad tsam spyod kyang / /de skabs ltung ba'i dbyug pa yis/ /mgo bo gcog par byed pa yin/ /gal te shin tu zegs pa'am/ /spyad mi bzod cing dengs pa na/ /de tsam nyid dam chung ba gang / /glon pa la ni nyes pa med/ /sdom brtson rang gis bal dag ni/ /dpag tshad gsum las lhag mi 'khur/ /nyung du zhwa la sogs pa'i phyir/ /mngon par khyer yang nyes pa med/ /grong las rgyang grags phyed du yang / /sdom brtson khur na nyes byas te/ /grong khyer nas ni grong khyer du/ /rgyang grags gcig khur ltung ba yin/ /dge slong gang zhig dge slong ma/ /nye du min la bal dag ni/ /rmel ba la sogs byed 'jug na/ /de yang bslab las nyams ldan 'gyur/ /rmel ba la sogs re res kyang / /mtha' dag gis kyang kun nas bskyed/ /sdom brtson ltung ba dang bcas na/ /nyes byed bzhin du 'og tu 'gro/ /bcom ldan brtse bas dge slong dag /sa le sbram len bkag pa yin/ /chos gos lam rgyags nad pa yi/ /sman gyi rgyur ni ma gtogs so/ /gser dngul mu tig nor bu dang / / mu sal gar b+ha g.yas su 'khyil/ /dmar dang shang ka she la dang / /byi ru la sogs reg na ltung / /thub pa'i dge slong don nyung dang / /bya ba nyung ba mdzes pa ste/ /mang pos dben pa dang ni dga'/ /nyung du tsam zhig bcad bar bya/ /sdom brtson gang zhig nor ldan pas/ /skyed kyi don du gtong byed na/ /skyed thob ltung ba'i rdo rje yis/ /bdag nyid 'joms par byed pa yin/ /sbyor ba dang ni rab sbyor dang / /bsgrub dang brje ba de bzhin de/ /byed pa mi byed zhes bya dang / /mngon mtshan can gyi rnam pa bzhi/ /shing rta la sogs snod 'grems shing / /yul phyogs zong ni 'dri byed pa/ /grags po dag ni 'tshol byed pa/ /'di dag sbyor bar 'dod pa yin/ /rab sbyor bdun sde la sogs pa'i/ /skyed phyir nor ni gtong byed pas/ /dbang po gro ga snag tsha dang / /smyu gu tshol ba dag la 'dod/ /'dod pas rnyed la chags pa yi/ /nyis 'gyur la sogs spel ba'i phyir/ / gro ga la sogs sgrub byed pa/ /de ni bsgrub par gsungs pa yin/ /nor bu mu tig byi ru sogs/ /rdzas rnams yongs su brje ba na/ /snag tsha gro ga la sogs tshol/ /de ni brje bar yongs su grags/ /skyed ma thob kyi bar du 'dir/ /nyes byas dri mar yongs su grags/ /gang tshe skyed thob de nyid tshe/ /gsal por ltung ba nyid du grags/ /byed pa mngon mtshan can la sogs/ /gtong bar brjod do mi byed pa/ /slar yang gser sogs mi gtong ba'o/ /cho ga 'di yang sngar bzhin te/ /dkon mchog gsum gyi ched du ni/ /rnyed pa 'dod pas sbyor ba dag /'jig rten spyod pas gzhan min brtag / rigs ldan zhal ta la rung ste/ /rgyal po dang ni rgyal po'i 'khor/ /sbyin bdag rnams kyi drung du ni/ /nam yang sbyor ba mi bya'o/ /'di dag rnams las rnyed med dam/ /'on te dka' bas rnyed kyang rung / /khyer nas mi ster gta' mi blang / /khyer yang ster nus de lta min/ /nyo byed shes rab can med na/ /gang nyo 'dod pa'i dge slong gis/ /rdzas rnams rjes su brtags nas ni/ /nges par lan gsum bar du brjod/ /rnyed pa'i don du mi btsong zhing / /nam yang nyo na ltung ba nyid/ /dgos pa rjes 'brel dor byas pas/ / nyo tshong la ni nyes med de/ /sangs rgyas chos dang dge 'dun phyir/ /'jig rten chos lugs rjes 'brang ba'i/ /zhal ta pa yis nyo tshong bya/ /gzhan du gzhan gyi ma yin no/ /mchod phyir gus pas rtag tu ni/ /gtsug lag khang du tshong byed na/ /de la skyed dang bcas sbyin te/ /sbyin bdag dad pa skyed phyir ro/ /so ba til dang mud ga sogs/ /srog chags dang bcas ma brtags pa/ /bsil grib kyi ni sa phyogs su/ /de ni rab tu bkram ste bzhag /de lta na yang de nas de/ /gal te bral bar ma gyur na/ /de tshe slar yang gnas khang du/ /bzhag nas sgo ni rtag tu bsdams/ /zhag bcu las 'das lhung bzed ni/ /brtul zhugs can gyis bcang mi bya/ /lcags dang sa las byas rang bzhin/ /lhung bzed rnam pa gnyis su brjod/ /tshad ldan chung ngam chen po ni/ /bsnyen par rdzogs pa'i don phyir yang / / mang po yin na yang ni rung / /'chang ba la ni smad pa med/ /lhan pa gcig gnyis gsum dang bzhis/ /lhung bzed gzhan dag bslang mi rung / /dge ba'i sems kyis bag yod par/ /rin gyis nyos la nyes pa med/ /sdom brtson mi brtan ldan pas ni/ /lhung bzed bug rdol glan mi bya/ /rgya skyegs tshig ma tshon mo steng / /sbra tshil bu ram sas ma yin/ /brtan po lhan rings gang brjod dang / /bye ma yang na lhan pa nyid/ /tham phran dang ni lhan thabs nyid/ /de bzhin chu srin so yang ngo / /chos kyis yongs su brje ba la/ /nyes pa med do gzhan du slar/ /slong ba'i tshe na nyes byas te/ /thob pa na ni spang bar 'gyur/ /grub na dge bas lhung bzed de/ /dge 'dun la ni brim par bya/ /de yang lhung bzed tha ma ni/ /de yi lung bzhin du ni bcong / /bre chung do zan tshod mar bcas/ /blugs nas bzhag pa de la ni/ /lag pas bkan tshe mi reg pa/ /de ni chen po'i tshad du brjod/ /bre chung gang zan tshod mar bcas/ /shong ba chung ngur rab tu grags/ /'di dag gnyis kyi bar dag ni/ /'bring por brjod de lhung bzed gsum/ /gang zhig lhung bzed gas dang rdol/ /de ni gus pas glan par bya/ /de byed pa yang tshog chas kyang / /dge 'dun gnas khang gzhag par bya/ /'gro na lhung bzed bcas yin te/ /gal te lhung bzed med nyid dam/ /gzhan du rkun pos 'jigs pa'am/ /slar log 'dod pa yin na rung / /thags mkhan nye du ma yin la/ /gla rngan med par 'thag 'jug na/ / ltung bcas ltung ba med pa ni/ /nye du yin nam gla byin na'o/ /nges par dge slong ched du ni/ /khyim bdag chos gos 'thag 'jug na/ /de yis der song thags mkhan la/ /snyan tshig bsngags te grub na ltung / /zheng che thar tshags bzang sogs don/ /bsod snyoms kyis ni 'dod mi bskyed/ /de ltar byed na sdom brtson la/ /thob pa'i tshe na spang bar 'gyur/ /zheng che ba ni tshad chen te/ /mnyen 'gyur 'jam po zhes bya'o/ /thar gyis zhag pa 'jur mdud med/ /tshags thar bzang ba dam pa yin/ /bsod snyoms kyang ni 'dir shes bya/ /bza' sogs lha yi rigs las byung / /ston mo lha yi rigs dag ni/ /de yi rgyags su rnam par shes/ /chos gos dge slong la byin nas/ /gzhan du khro dang chags pa yis/ /de phrogs na ni nyes byas te/ /phan par 'dod pas nyes med do/ /lus kyi rab g.yo lus kyis ni/ /byed pa'o ngag gi g.yo ba yang / /brjod pa yis ni 'phrog byed na/ /gnyis sam gcig gis kyang ni rung / /ji srid chos gos gra yang ni/ /lus dang bral bar ma gyur pa/ /de srid nyes byas tsam yin te/ /bral na spang ba'i ltung ba yin/ /dbyar ni dbyar gyi rnyed pa nyid/ /rab tu 'gyed par byed na ni/ /nyes byas 'di ni 'das nas sam/ /de ma yin la ma yin no/ /dbyar gang bdag gir byed mi 'dod/ /chos gos sbed pa med par ni/ /chos gos gtad pa las byung ba'am/ /dbyig la sogs pa rung ba yin/ /'chi phyir dang ni 'chi bas gtad/ /nad pas nad pa nyid phyir ro/ /'gro bar chas pas gang byin pa/ /'di dag gtad pa las byung lnga/ /mtha' yi zhag bcu'i nang du ni/ /bgos kyang rung ba nyid yin te/ /sbyin pa'i dus las 'das par ni/ /nam yang bcangs na dngos gzhi'o/ /chos gos byin pa'i dus gang ni/ /mkhas pas yang dag bstan pa 'dir/ /dgag dbye bya ba'i nang rol du/ /zhag bcu'o de las lhag pa min/ /'dir bdag rang gi lag nyid kyis/ /rab tu dbul zhes sbyin bdag la/ /gal te 'jog par byed na ni/ /nam yang dge slong skyon yod min/ /dgag dbye'i dus kyi rnyed pa gang / /thams cad dbyar gnas gang de dbang / /gang zhig dbyar gnas ma bcas pa'am/ /gang dang lhan cig dgag dbye byas/ /'jigs bcas dgon par gnas pa yis/ /chos gos gsum po dag las ni/ /gcig ni khyim du bzhag bya ste/ /bag yod dge ba 'dod pas so/ /dgos pa'i ched du gzhan du ni/ /zhag drug 'das kyang nyes med de/ /der yang mtshams gcig chos gos kyis/ /bdun pa'i skya rengs shar na ltung / /dbyar gyi nang du zla shol thob/ /dbyar gnas phyi mar rab tu grags/ /'jigs bcas zhes brjod gang du 'dir/ /nges par rkun po'i 'jigs bcas 'dod/ /seng ge stag sogs 'jigs pa ni/ /dogs bcas 'dod par shes par bya/ /sha sbrang la sogs 'jigs pa dag /'jigs pa tha dad yin par gsungs/ /so ga'i zla ba lhag ma la/ /khrus don lus rab sba ba'i phyir/ /dbyar gos ras chen ming can gyi/ /chos gos brtul zhugs can gyis btsal/ /'di ni dbyar zla gsum dag las/ /zla phyed bar du bcang bya ste/ /snga bar tshol lam lhag par ni/ /'chang ba la yang ltung bar 'dod/ /dgag dbye'i dus kyi gos bzang ba/ /sra brkyang gding ba'i don du ni/ /tshogs la gsol ba sngon 'gro bas/ /las byed pa la yang dag bsgo/ /tshogs kyis yang dag gnang nas ni/ /'phags pa'i tshogs kyis gus byed la/ /gsol ba rkyang pa nyid kyis gtang / /de yis ji ltar rigs par ni/ /kha bsgyur la sogs byas nas ni/ /song nas tshogs kyi dbus su zhu/ /de nas cho ga bzhin du 'dir/ / gding bya sra brkyang bting ba yi/ /dge slong rnams la phan yon mang / /phan bzhed ston pas yang dag gsungs/ /zhag bcu zla ba nges pa dang / /ma brtags par ni 'chang ba dang / /snam sbyar med par grong sogs 'jug /yang yang za ba nyid dang ni/ /'dus shing za ba nyes pa med/ / bsgo ba ma byas par yang 'gro/ /smin drug dang ni khra yi bar/ /sra brkyang gding ba dus su gsungs/ /mgu ba spyad dang mgu ba byas/ /spo ba dang ni de las langs/ /dbyar ma rdzogs dang dbyar bral dang / /dbyar ni phyi mar gnas de bzhin/ /lkog tu gyur pa'i dge tshul dang / /bslab pa spyod par byed pa ste/ /'di dag la ni phan yon med/ /rnyed pa kho na ma bkag go/ /lta dang tshul khrims dri ma can/ /gang zhig dge 'dun gyis rab spangs/ /chos ma yin pa'i phyogs lhung dang / /de bzhin gzhan du dbyar gnas te/ /lnga po 'di la rnyed pa dang / /phan yon yang ni med par gsungs/ /'dir ni bzang dang mkhas kun la/ /yon tan dang ni rnyed pa yod/ /dge 'dun la bsngos rnyed pa gang / /brtul zhugs can dag dbang byed na/ /spong ba'i ltung byed lcags tshan gyis/ /sdug bsngal nyams su myong bar 'gyur/ /rnyed pa gos dang dbyig la sogs/ /bza' ba la sogs zang zing yang / /gnyis ka'ang bsngos par bsgyur ba ni/ /rab tu bkag pa gsungs pa yin/ /tshogs kyi gzhan la gzhan gyi der/ /rnyed pa phan tshun sgyur byed na/ /nyes byas dang ni yang dag ldan/ /dngos gzhi ru ni mi brtag go/ /dge 'dun mthun pa nyid kyi ni/ /dge 'dun gzhan la bsngos pa yi/ /rnyed pa bdag gir slong byed na/ /thob pa'i tshe na spong bar 'gyur/ /gang zag sku gzugs mchod rten dang / /dud 'gro rtswa dang nam mkha' la/ /bzhag sogs sa la ka ba ste/ /khang bzangs sogs la nyes byas yin// // bam po gsum pa/ dang por byin len byas nas ni/ /mar sogs dge slong byin gyis brlabs/ /rang gis blangs nas spyad bya ste/ /zhag bdun de las lhag par min/ /sdom brtson de don la mkhas pa/ /spang bar 'os pa spangs nas ni/ /de nas ltung de las ldang phyir/ /nub kyis chod nas bshags pa bya/ /mkhas pas bskul ba byas nas ni/ /gnyis pa la ni blang bar bya/ /ji ltar gsungs pa'i brtag pa dag /mi byed pa las ltung bar 'gyur/ /ltung ba bcos pa'i don du ni/ /bdag gi don du chos gos sogs/ /cung zad tsam yang de dag gis/ /gzhan las blang bar mi bya'o/ /ltung 'di spang bar ma byas na/ /gzhan du grol bar 'gyur ba min/ /spang bar yang ni shes bya la/ /chos gos la sogs spang bar brjod/ /spang ba'i ltung byed sum cu po/ /bslab bya dang bcas bshad nas ni/ /de rjes ltung byed 'ba' zhig pa/ /dgu bcu rab tu gsal bar bya/ /rgyal po'i khab tu bcom ldan 'das/ /blta 'dod khyim pa mang rnams kyis/ /bcom ldan 'das nyid gang na zhes/ /sgra gcan 'dzin la dris pa dang / /gzhan na bcom ldan bzhugs bzhin du/ /gzhan du nye bar bstan las bcas/ /de phyir mdo las gsungs pa gang / /ston pas tshigs bcad gnyis 'di gsungs/ /chos gcig las 'das gang yin pa/ /lus can brdzun du smra ba ste/ /'jig rten pha rol spangs pa yin/ /'di yis sdig pa mi bya med/ /lcags gong me lce 'bar ba dag /zos par gyur pa mchog yin gyi/ /tshul 'chal yang dag mi sdom pas/ /yul 'khor bsod snyoms za ba min/ /bslab pa'i gzhi ni bsgrub pa'i phyir/ /nges par brdzun tshig bkag pa ste/ /lag brgyud smra ba'i khyu mchog nas/ /brtsams te brdzun du smra rnams la/ /shes bzhin du ni brdzun smra ba'i/ /dge slong la ni ltung byed brjod/ /brdzun tshig rnam pa dgu yin te/ /rnam pa gnyis kyi bar du brjod/ /sdom brtson dag la drungs 'byin chos/ /phas pham la sogs rnam pa lnga/ /tshul khrims lta ba cho ga dang / /'tsho ba yi ni smra ba dgu/ /mthong sogs rnam pa gsum yin te/ /de dag gis ni smra ba la/ /brdzun tshig rnam pa brgyad ces 'dod/ /tshul khrims lta spyod cho ga 'tsho/ /mthong dang thos dang dogs pa yis/ /sdom brtson brdzun du smra ba la/ /gang yang rnam pa bdun nyid brjod/ /smra 'gyur de bzhin smra ba dang / /smras pa zhes bya tshig gsum dang / /mthong ba la sogs tshig gsum ste/ /brdzun du smra ba drug tu brjod/ /de ltar re re dor ba yis/ /tshig gis 'dir ni shes bya ba/ /brdzun tshig rab tu shes pa la/ /brjod nas go ba rnam pa gnyis/ /slar yang phas pham la sogs lngas/ /phas pham 'gyur bar shes bya ste/ /phas pham gnas su gang brjod pa'i/ /sngar smras mtha' ni phas pham nyid/ /gzhan la nam yang mi bzhed do/ /dge 'dun lhag mar 'gyur ba ni/ /bag tsam gyis sam rtsa bas skur/ /chos la chos min la sogs nges/ /gang zhig dge 'dun dbus smra na/ /de la sbom por 'gyur ba yi/ /brdzun tshig ces ni rnam par gzhag /gso sbyong dus kyi las dag la/ /'di la dag gam zhes brjod tshe/ /kha rog nyes pa sbed byed na/ /nyes byas dri mar 'gyur bar brjod/ /de ltar de dag gang bstan pa/ /brdzun gyi tshig ni rnam pa bzhis/ /de las gzhan pa ltung byed du/ /'gyur ba'i brdzun tshig ces byar bstan/ /ma mthong sogs la mthong sogs dang / /mthong sogs la'ang de las bzlog /shes bzhin du ni smra byed na/ /don rig pa na ltung byed 'dod/ /dud 'gro la yang rwa chag sogs/ /skyon nas tshig tu smras pa na/ /sems zhum las byed mi brtson na/ /shes ldan mi rnams smos ci dgos/ /de phyir sems can thams cad la/ /phan bzhed bcom ldan 'das kyis bkag /mi rnams la ni skyon brjod pas/ /dge slong la ni ltung byed yin/ /skyon brjod bsam pa'i dge slong gis/ /khyod ni bram ze rab byung zhes/ /bram ze la ni rigs dris na/ /de la nyes byas ltung bar 'gyur/ /de 'dra'i sems kyis rgyal rigs la'ang / /smra byed nyes byas kho na ste/ /de bzhin rje rigs dmangs dag la/ /smra byed sdom brtson ltung byed yin/ /thags mkhan lha rten lha mkhan dang / /shing mkhan tshem bu smyig ma mkhan/ /de la sogs pa'i rigs rnams kyis/ /yongs su smra na ltung byed brjod/ /rdza mkhan dang ni mgar ba dang / /bran dang ko lpags mkhan dang ni/ /bya shor nya ba rngon pa dang / /gtum po sogs brjod nyams par 'gyur/ /khyod ni bram ze yin te de'i/ /rigs kyi bya ba gtsang sbra sogs/ /bslab bya khyod la dge slong gis/ /ci bya zhe na'ang nyes byas nyid/ /khyod ni rgyal rigs khyod kyi las/ /mtshon cha'i rigs pa mdung dang ni/ /mda' sogs slobs shig ces smra na/ /gang yin de la nyes byas so/ /de bzhin rje rigs dmangs rigs kyi/ /las la nges par sbyar yang ngo / /thags mkhan smyig ma mkhan sogs la/ /ltung byed kyi ni ltung bar brjod/ / mchod sbyin dang ni gdol ba sogs/ /khyod kyis rang las byos shig ces/ /smra yang mi mkhas de dag la/ /snga ma bzhin du nyes byas yin/ /'thang po zhar ba lag rdum dang / /sgur po mi thung long dang 'on//zhes smra na yang ltung byed kyi/ /me yi nang du sreg pa 'thob/ /khyod ni mdze can khrag nad skyug / nyam chung g.yan pa 'og grol dang / /de la sogs brjod ngan tshig rnams/ /sdom brtson la ni ltung byed 'dod/ /khyod ni ma dag lhung bas bcom/ /gdug pa dang bcas 'gyod pa can/ /khyod ni khro bas sems bsregs pa/ /zhes smras sogs la'ang de nyid do/ / dge slong skyon brjod bsam pa yis/ /bong bu sogs kyis gshe byed cing / /rgya gad la sogs kun ldang bas/ /spyo na ltung byed kyis reg 'gyur/ /de ltar rigs dang bzo dang ni/ /las rnams dang ni rtags dang nad/ /ltung dang khro ba la sogs pa'i/ /tshig gis smra bar mi bya'o/ /the tshom bsal ba'i don du ni/ /sangs rgyas gdung ni gang yin pa/ /rgyal rigs las gang rab byung ba/ /zhes sogs smra la nyes pa med/ /dge slong phra ma smra na yang / /ltung ba 'di nyid yang dag ldan/ /phra ma pha rol dbye ba'i phyir/ /nyon mongs can gyi tshig yin te/ /dper na 'breg mkhan gyol po khyod/ /de skad su zhig smra zhe na/ /smras pa dga' byed kyis smra zhes/ /'di ni phyogs tsam bstan pa ste/ /'dir yang thams cad snga ma bzhin/ /rigs dang bzo sogs smras pa las/ /nyes byas la sogs shes bya ste/ /blo ldan gyis ni spang bar bya/ / dge 'dun mchog gcig pa yis ni/ /gang zhig mthun par gyur pa na/ /las la skyo sngogs byed pa des/ /zad byed ltung ba thob par 'gyur/ /mchog gcig bsam pa gcig pa yis/ /chos bzhin cho ga bzhin du ni/ /'gyed pa la sogs rnam bzhi yi/ /dbang byas bstan pa de dag gi / las la skyo sngogs zhes bya ba/ /'di la legs zhes brjod pa yi/ /rdzogs na the tshom gyis kyang ni/ /skyo sngogs byed na ltung bar bcas/ /byas sam 'on te ma byas zhes/ /the tshom gyis kyang skyo sngogs na/ /nyes byas 'gyur te de la ni/ /cig shos min zhes mkhas pas gsungs/ /gzhan dag gi ni dbang byas la/ /gzhan gyi dbang byas 'du shes sam/ /rdzogs la ma rdzogs zhes pa la/ /ltung ba'i tshul ni sngar bzhin no/ /gnyug mar gnas dang las byed dang / /'dun pa phul dang lta ba smra/ /glo bur ba ste 'di dag ni/ /gang zag lnga zhes yongs su grags/ /thog mtha' dbus su gang rig de/ /gnyug mar gnas pa zhes bya'o/ /las kyi dbang du byas pa las/ /gang zhig de byed de las byed/ /der ni gang zhig 'dun pa phul/ /de ni 'dun pa phul ba'o/ /lta ba smra ba zhes bya gang / /gang dag dge 'dun dbus su ni/ /zhu tshe bdag gis 'di ltar mthong / /'di ltar min zhes smra ba'o/ /thog mtha' dbus su mi shes pa/ /de ni glo bur 'ongs par 'dod/ /dang po rnam pa gsum po yis/ /las la rtsod na ltung byed de/ /dam pa'i las la rtsod pa la/ /tha ma gnyis kyis nyes byas so/ /tshig lnga'am drug las phar lhag par/ /rig pa'i skyes pa med par ni/ /bud med dag la chos ston na/ /ltung byed skyon du 'gyur ba yin/ /mtha' dag gzugs ni mi rtag cing / /de bzhin tshor dang 'du shes dang / /'du byed dang ni rnam par shes/ /mkhas pas tshig lngar nges rtogs bya/ /mig dang rna ba sna dang lce/ /lus dang yid kyang mi rtag ces/ /tshig drug brjod pa 'di yin par/ /mkhas pa rnams kyis gsungs pa yin/ /tshig lnga bstan par bya'o zhes/ /shes bzhin tshig drug rjod byed na/ /ltung ba'o de bzhin drug pa yang / /bdun pa rjes su ston na'o/ /'brel med smra ba nyes med de/ /shin tu smra ba myur yang ngo / /dris lan mkhan gyi bud med ni/ /rigs ldan la ston nyes pa med/ /bsnyen par ma rdzogs pa dang tshig /mnyam por chos brjod pa las ltung / /rjes su 'brang la nyes med de/ /'don dang kha ton sbyong ba la'ang / /gnas ngan len dang ldan pa'i tshig / tshogs kyis gnad med brjod mi bya/ /de yang phas pham pa dang ni/ /dge 'dun lhag ma'i gnas ngan len/ /yang dag bla mar gyur pa'i chos/ /bsnyen par ma rdzogs gang zag la/ /sdom brtson gang zhig smra byed na/ /'di la yang ni ltung byed 'gyur/ /'dir ni sgrib pa rnam pa lnga/ /mi rnams kyi ni chos su thos/ /de zad bla ma'i chos su 'dod/ /bsam gtan rnams ni bla ma'o/ /ma gnang bar ni dge 'dun gyi/ /gang zag dag la ster byed ces/ /byin nas rtsod pa rtsom na ni/ /sdom brtson de yang zad ltung 'gyur/ /zla ba phyed phyed gso sbyong dus/ /so sor thar pa 'don pa'i tshe/ /gang zhig khyad gsod de la yang / /zad byed ltung bar 'dod pa yin/ /phra zhing phra ba 'di dag 'dir/ /nyer bstan dgos pa ci zhig yod/ /gang dag nyon mongs dbang gis ni/ /bslab pa khyad gsod 'di skad smra/ /rtsis kyi phyir dang khyad gsod phyir/ /bsreg phyir yongs su gdung ba'i phyir/ /de bzhin rma 'gegs don du zhes/ /tshig 'dir re res zad pa ste/ /phran tshegs lung sogs las gsungs pa/ /ji srid 'dul ba dang 'brel bas/ /der ni dge slong khyad gsod na/ /de nyid ltung ba dang bcas 'gyur/ /dge slong rang ngam gzhan gyis kyang / /sa bon tshogs ni ma lus dang / /'byung po'i gnas ni 'jig byed na/ /gsal por ltung byed du ni 'dod/ /gang zhig rtsa ba'i ngo bor skye/ /de ni rtsa ba'i sa bon te/ /yungs dang sge'u gsher gla sgang sogs/ /sdong bu'i sa bon de yang ni/ /sa gang la ni legs btsugs pas/ /slar yang sdong bu skye ba ste/ /n+ya gro d+ha dang u dum bAr/ /a shod ka ra bI ra sogs/ /gang zhig bcad pa'i rtse mo yang / /'phel zhing skye bar 'gyur ba gang / /ka shi bur shing 'dam bu smyig/ /de dag thog dgu'i ming can yin/ /bkas pas skye ba bkas pa yin/ /sa bon ji lta bu zhe na/ /a dza ka dang sam bu dang / /dzam b+ha ri dang yan dzi ka /sa bon sa bon til mud ga /gang gzhan de 'dra'i sa bon yang / /'byung po'i sgra gcan sems can gyi/ /rigs kun la ni nges par brjod/ /'bu srin phye ma leb la sogs/ /de yi gnas ni shing sogs grags/ /de la der 'du shes pas sam/ /the tshom gyis kyang gcod na'o/ /de ltar sa bon rtswa sngon dag /de 'joms na ni ltung bar 'dod/ /sa bon gzhan la gzhan 'du shes/ /the tshom gyis kyang ltung bar 'dod/ /gtun du sa bon rnam pa lnga/ /blugs nas nyams par bya'o zhes/ /dge slong lhur len nyams na ni/ /ltung byed lnga nyid 'dod pa yin/ /ma nyams na ni de dag la/ /nyes byas kyang ni rnam pa lnga/ /mer 'jug na yang tshul de nyid/ /khu tshan la sogs par yang rung / /sems de lta bus rtswa sngon la/ /'chag par byed pa dag kyang ngo / /nyams na dge slong ltung byed de/ /ma nyams na ni nyes byas so/ /shing dang re lde la sogs pa/ /sngo sar la ni 'drud pa dang / /khu tshan thug pa la sogs pa/ /'bod pa la yang 'dod pa yin/ /sbyor ba gcig nyid kyis kyang 'dir/ /shing gcig gcod par byed pa na/ /de la nyes byas gcig dang ni/ /zad byed ltung byed gcig yin no/ /sbyor ba yang ni gnyis dag gis/ /sdom brtson shing sogs gcig gcod na/ /nyes byas gnyis dang ltung byed gcig /de ltar sbyor ba ji snyed pa/ /de snyed du ni nyes byas 'dod/ /rdzas kyi tshad kyi dbye ba yis/ /zad byed ltung byed tha dad 'dod/ /'dab sngon me tog 'bras bu dang / /kha 'bus pa dang rtsa ba nyid/ /sdong bu dang ni chu ba gcod/ /nya lcibs 'don yang ltung byed nyid/ /shun pa dang ni 'dab skya dang / /mtsho skyes dag ni rgyas pa nyid/ /gcod pa la ni nyes byas gsungs/ /'di dag mdor bsdus tshul yin no/ /so shing rtsa ba shun pa dang / /'dab ma me tog sogs 'dod na/ /bslang bya ri las chod dang shogs/ /zhes sogs tshig ni spangs nas so/ /sbrang tshad dang ni sha bal nyid/ /sha mo 'bu srin tshang de bzhin/ /bya tshang dang ni sbed sha dang / /pa rgya yang ni dbyung mi bya/ / rung bas gcod dang 'don pa la/ /thams cad du yang nyes spyod min/ /'di dag shes par gyis shig ces/ /brjod na 'di ni rung ba yin/ /gsar pa'i las la las byed kyis/ /shing gi lha la gsol btab cing / /gtor ma me tog la sogs pas/ /cho ga bzhin du mchod nas bya/ /rgyud chags gsum pa 'don byas nas/ /dam chos nyan pa sbyin byas ste/ /de la las lam bcu po ni/ /dge dang mi dge brjod par bya/ /dge bas 'bras bu bde ster te/ /cig shos kyis ni ngan song yin/ /ser sna'i skyon dang bcas dag la/ / sbyin pa'i yon tan legs brjod bya/ /gang zhig dga' tshal la sogs su/ /lha mo'i tshogs dang lha rnams kyis/ /rtsed 'jo yun rings bde myong ba/ /de ni sbyin pa'i 'bras bur gsungs/ /bkres dang skom sogs me dag gis/ /lus ring lce mgrin skams pa yi/ /skal ngan 'khor byed yi dwags gang / /mi yi gzugs 'dra sdug bsngal can/ /de ni thog med srid pa yi/ /bag chags kun khyab mthu ldan pas/ /mchog tu don med 'gyur ba ste/ /ser sna'i 'tshe ba yin par 'dod/ /khrag 'jag pa la sogs pa yis/ /zhag bdun rnam 'gyur mi ston na/ / tshul 'di legs par rig nas ni/ /shing chen gcod pa la sogs bya/ /dge slong la ni 'phya ba dang / /gzhogs 'phyas kyang ni rnam pa mang / /byed na'ang ltung ba sngar ji bzhin/ /'dir yang ltung ba kho nar brjod//'di dag 'phya ba nyid dbang byas/ /dge slong gzhogs 'phyas mkhan yang 'dir/ /gsol ba'i las ni sngon 'gro bas/ /dge 'dun gyis gang bskos pa yi/ /gus pas las ni nges ldan pa/ /de la dge slong gang zhig 'phya/ /khro sems ldan na ltung byed do/ /cig shos nyid ni nyes byas nyid/ /gtsug lag khang gtong zas dang ni/ /'o thug 'bras bu 'gyed pa dang / /phyi de nyin par yang ni rung / /phran tshegs dag ni 'drim pa dang / /snod spyad 'drub dang sra brkyang gi /chos gos dag ni sbed pa dang / /chos gos rnams ni 'gyed pa dang / /dbyar gyi ras chen sbed pa dang / /khang skyong de yi mngag gzhug dang / / de bzhin sder spyad zhal ta ba/ /rtsod pa 'gegs dang chu 'drim dang / /bya rog la sogs skrod pa dang / /mal stan 'dug stan stobs pa dang / /zas 'dun 'jig rten bzlog pa dang / /gsol dang gnyis kyi las gang yin/ /'di dag dge 'dun gyis ni bsko/ /gang phyir dang po bcu gnyis la/ /'phya dang gzhogs 'phyas gyis ltung 'gyur/ /gzhogs 'phyas brtse ba med pa'i tshig /'phya ba pha rol la smod pa'o/ /bsgo ba rna gzon ltung ba'o/ /bsgo ba zhes bya dri bar brjod/ /rna la gzon pa ngan song [(]kyis[,]gis[)]/ /nges pas lan gzhan smra ba'o/ /gzhan dris pa na gzhan du ni/ /gzhan gdung bya phyir smra yang yin/ /gzhan du gsang bya'i gang zag ni/ /dgra bos dris tshe 'di skad du/ /nam mkha' 'am sor mo bdag mthong gi /dam pa'i don du sems can min/ /zhes ni kha nas bslu tshig dag /brjod pa la ni bkag pa med/ /rna la gzon pa'i bsam pa yis/ /dris tshe sdom brtson mi smra 'dug /nyes byas kyis ni ngan song du/ /sdug bsngal mthar ni smra bar 'dod/ /dge 'dun mal stan khri'u sogs/ /bla gab med par bor nas kyang / /gzhan la ma bcol bar yang ni/ /'gro na zad byed ltung ba 'thob/ /brtul zhugs can ni 'gro ba na/ /ji srid khri'u la sogs pa'i/ /phyi yi mtshams ni ma 'das pa/ /de srid du ni nyes byas so/ /slar log tshe na ma nyams na/ /nyes byas dang ni ldan 'gyur te/ /ji ste phan tshun gyur na ni/ /de la zad byed ltung byed do/ /me dang rlung dang char pa yi/ /dbye bas phan tshun gsum du gsungs/ /rim pa gnyis par tshig na ni/ /me yi phan tshun zhes bya'o/ /rim pa gnyis dag bzlog na ni/ /rlung gi phan phun nyid ces bya/ /char pa zhes bya char chu yis/ /rim pa gnyis par phigs na yin/ /gtsug lag khang du zhugs pa na/ / me la sogs pa'i phan phun la/ /nyes byas la sogs rnam gzhan dag /snga ma bzhin du yang dag bshad/ /lam du rab zhugs de lta'i gzhi/ /gal te dran par gyur na de'i/ /mod la byis pa'i rang bzhin zhes/ /bdag nyid la ni yang dag smad/ /de yis ji srid dge slong gzhan/ /mthong nas nye bar song nas ni/ /gnas mal mal stan sba ba'i phyir/ /gus pa sngon 'gros gsol ba gdab/ /gal te de yis thos nas kyang / /de dag sba btul mi byed na/ /de yang ltung byed mda' yis ni/ /phog pa'i sdug bsngal nyams myong 'gyur/ /khyim pas mgron du bos pa'i tshe/ /'dug stan la sogs g.yar ba na/ /de tshul dag gam khyim pa yis/ /bkur bar bya yis rang gis min/ /gtsug lag khang du khyim pa dag /zan za'i tshe na rdzogs kyi bar/ /'dug stan sbyin bya de dag la/ /rang don ma nyams pa yis bsrung / / nad pa dang ni nad g.yogs dag /rgan por gyur dang tshul khrims 'chal/ /nad bcas bsnyen par ma rdzogs la/ /nam yang yid brtan mi bya'o/ /stan gcig la ni 'dug pa na/ /gsar bus de dag brtul bya zhing / /gnyi ga gsar bu yin na ni/ /stan gang phyi nas dong pas yin/ /dam pa'i chos nyan la sogs dus/ /gnas brtan mkhrang mi tshugs pa yis/ /gang du 'dug der 'dug stan ni/ /gzhag bya 'gyel ba nyid phyir yang / /de phyir mkhyen mchog bcom ldan gyi/ /bsnyen bkur cho ga thams cad ni/ /gnyi ga la yang phan 'dod pas/ / bla ma la brten bya bar gsungs/ /rings pa'i rkyen ni byung ba na/ /rtsig pa'i drung ngam shing drung du//bzhag pa la ni nyes med de/ /glo bur zas ni gcad mi bya/ /gang du song nas mi lta ba'i/ /ji srid chos gos nye 'khor ni/ /sngar gsungs de srid mal stan gyi'ang / /shin tu bde ba sgrub byed pa'i/ /rin chen chos ni ston pa na/ /ston pa'i bka' ni mchod byas pas/ /stan mtho mdzes la 'dug par bya/ /gru bzhi rab mnyam bde ba'i stan/ /rgyab rten rkang rten skas dang bcas/ /chun 'phyang bla res legs bkod pa'i/ /seng ge'i khri yang bcang bar bya/ /nor yod de tshe rjes gnang phyir/ /'dus byas mi rtag yid ches pas/ /rin chen kun gyis mdzes par ni/ /legs byas de la 'dug bya nyid/ /de ltar yid la byed pa dang / /sbyin bdag la yang phan pa'i phyir/ /sdom brtson rin chen sna tshogs kyis/ /mdzes pa'i khri la 'dug par bya/ /gnod sbyin gnas dang klu yi yul/ /lha min lha yul skyon med de/ /gang 'di de dag bsod nams las/ /legs grub phyir zhes thub pas gsungs/ /dge 'dun gtsug lag khang dag tu/ /sdom brtson rtswa sogs bting nas ni/ /ma bsdus ma bcol gyi nar yang / /rkyen med 'gro bar byed na ltung / /mal stan gyi ni rigs pa yis/ /rjes la bstan pa 'di la yang / /'dul ba'i cho ga la mkhas pas/ /nges par ltung ba nyid du bshad/ /gtsug lag khang du thob pa yang / /chu yi nang du dor nas sam/ /khyim gzhan du yang mi brtul lam/ /ci gar ma brtul nyes byas so/ /bsam gtan pa yi 'chag pa'i sa/ /khru ni bco brgyad dag tu bya/ /kha ton pa yi khru bcu gnyis/ /rtsub na par thang la sogs gding / /gzhan du nad bskyed 'gyur ba ste/ /sa gzhi dag tu gding bar bya/ /bag yod shes bzhin dang bcas bcag / zla ba phyed cing skyang nul bya/ /dge 'dun gtsug lag khang nas ni/ /sdang bas dge slong phyir skrod na/ /dge slong la ni ltung byed gsungs/ /de 'dra'i rkyen can ma gtogs so/ /gal te rang min dge slong gzhan/ /sdang bcas skrod du 'jug na yang / /de dag gnyi ga la yang ni/ /ltung byed kho nar gsungs pa yin/ /dge tshul la sogs rnams kyis kyang / /sdom brtson skrod du 'jug byed na/ /dge slong la ni ltung byed de/ /de dag la ni 'gal tshabs can/ /kha zas ngan dang bzang pos sam/ /grang dang dro sogs kyis kyang rung / / dge slong la ni tho 'tshams na/ /ltung byed kho nar 'gyur ba yin/ /bsnyen bkur ba dang khrus khang dang / /khang pa'i sgo mo nyid dang ni/ /gnas khang mdzod dang khang bzangs su/ /dge slong nyid la gtad nas ni/ /'dug stan gnas dang gnas mal la/ /dge slong snga nas gnas pa la/ /'tshe ba phyis gnon ltung byed yin/ /gtsug lag khang steng gnas su ni//spang leb sogs kyis phub pa la/ /'dug par bya ste khri khang dag /'byung ba la ni ltung byed 'dod/ /de bzhin legs par gnas bcas dang / /rtsa ba 'byung ba zhes bya gang / /gtsug lag khang gi steng gi thog / shin tu mkhrang pa ma yin la/ /mnan pas rtsa ba phyir 'byung ba'o/ /rkang rten byas pa nyid dang ni/ /bkan te bzhag nas 'dug pa la/ /'dir ni bkag pa yod min te/ /nyal ba la yang tshul 'di nyid/ /lcags kyi gzer bus bsdams pa dang / /rtsa ba brtan po dag la yang / /bal ba dza sogs bcings kyang rung / /phur bu lta bu bkag pa yin/ /srog chags bcas pa'i chu yis ni/ /rtswa shing sogs la 'debs byed dam/ /'debs su 'jug pa nyid kyang rung / /sdom brtson la ni ltung byed yin/ /srog chags bcas la der 'du shes/ /the tshom gyis kyang sdom can ltung / /med par 'du shes nyes med de/ /the tshom gyis kyang nyes byas nyid/ /bum pa dpyang thag bcas par ni/ /slong la ster byed nyes pa med/ /rnyog pa ka ta ka sogs kyis/ /dngas par byas te brtag par bya/ /rnyog pa nyid dngas byad bzhin gyi/ /gzugs brnyan gang du ltar yod tshang / /de ni 'bad pas btsags nas ni/ /shin tu dag pas chu btung ngo / /khron pa bkod mas rnam dag dang / /zhabs tshags can sogs dam po dang / /dge 'dun dge slong gis dag pa/ /rung ba'i chu lnga yang dag gzung / /ril tshags zhes bya'i rnam pa dang / /de bzhin grol bar byed pa'i ras/ /gru gsum pa dang zhabs tshags te/ /bum tshags gce'u can dang lnga/ /ji srid dag par nges pa'i bar/ /rtse gcig pa yi rgyun du ni/ /'bad pas chu rnams yongs brtag ste/ /'on kyang bla 'og yang yang min/ /ma ga d+hA pa'i smyug mas gang / /ba lang drug pa'i shing rta ni/ /yongs su 'khor ba'i dus gang gi/ /tshad der chu de yongs su brtag /snod kyi skyon la sogs pa yis/ /gal te the tshom 'gyod skyes na/ /de ni slar yang brtag bya ste/ /the tshom med par yongs su spyad/ /rgyang grags lnga yi bar dag tu/ /song nas phyin pa de na ni/ /grol byed ras la sogs pa yi/ /chu tshags yod pa yin na 'gro/ /slar log pa yi bsam pa yis/ /dpag tshad phyed 'gro nyes med de/ /don mthun la ni yid brtan pas/ /shin tu rgyang ring song yang ngo / / chu bo'i rgyun bzhin 'gro ba la/ /brtags pa'i chu 'thung nyes pa med/ /chu gzhan dang ni ma 'dres na/ /rgyang grags re rer brtag par bya/ /rgyun las bzlog phyogs 'gro ba yis/ /'jug ngogs re rer brtag par bya/ /chu gzhan dang ni 'dres pa la'ang / /sngar bstan tshul 'di nyid shes bya/ /khron pa la sogs chu blangs nas/ /chu de gang gi yin pa dang / /de yi lhag pa'i lha yi phyir/ /bde gshegs kyis gsungs tshigs bcad 'don/ /bum pa'i kha ni bzlog pa yis/ /nam yang chu btung mi bya ste/ /lo ma la sogs ma rnyed na/ /dben par 'thung la nyes pa med/ /ril tshags la sogs kha dag ni/ /'dab ma sogs kyis nges par dag ba/ /chu 'thungs de rjes bum pa sogs/ /ma bkab yal dor nyes byas yin/ /bum pa la sogs dri ma ni/ /rab tu 'bad pas bkru bar bya/ /bskam 'os dus na ji srid du/ /rung ba'i don du nye bar bskam/ /khyim pas khyim pa nyid la ste/ /dge tshul gyis ni mi rung ngo / /dge slong gis ni khyim pa dang / /dge tshul gzhan la rung ba yin/ /dge slong de yis rnam brtags pa/ /gang phyir khyim pa la yang rung / /dge slong yang dag gnas pas brtag /gzhan du bslab la g.yel bas min/ /khron pa rdzing bu la sogs pa'i/ /chu rnams zas sogs dri ma can/ /the tshom med par btsags nas ni/ /de yis rtog pa de med bya/ /khyim pa rnams kyis khron pa sogs/ /yongs su brtags pas dag pa yin/ /de yi gnas skabs shes nas ni/ /dus ma yin par yang ni rung / /ba lang lhas la sogs par ni/ /dge slong song tshe chu med dam/ /nyung na zho ga chu'am ni/ /'o ma sogs kyis rkang bkrur rung / /bshang ba chang dang gci ba yi/ /snod dag rnam par spang bar bya/ /mar khu la sogs pa yi snod/ /me dang chu yis yongs su spyad/ /nya dang rus sbal gyis bldags pa'i/ /gsher gyi dri ma spang ba'i phyir/ /rung ba'i chu ni skom pa la/ /dus ma yin par yang ni spyad/ /bud med dag la dge slong gis/ /chu sogs blud par 'dod pa na/ /rgyun gyis sbyin par mi bya ste/ /kun nas chags sems kyis kyang min/ /sgo leb ngos khung dag dang ni/ /smad du chu khung btod pa dang / /skar khung 'bab stegs bcas pa yi/ /gtsug lag khang chen bya ba yin/ /char dang rlung ni bzlog pa'i phyir/ /steng nas mnan par bya ba ni/ /rtswa bcas 'jim pa'i gong bu dag /gnyis sam gsum gyi bar du'o/ /de las lhag par gang 'jog pa/ /nges par ltung byed 'gyur ba yin/ /so phag rdo ba dag gis sam/ /thams cad shing byed nyes pa med/ /tshul khrims ldan dang thos pa 'dzin/ /gnas brtan rgyal tshabs lta bu dang / /phun tshogs tshig ldan lus kyis ni/ /dge slong ma ni sun ma phyung / /chos lnga 'di dang ldan pa la/ /dge 'dun gyis ni bskos pa dag /dge slong ma la 'doms pa ste/ /gzhan du ltung ba nyid yin no/ /mdo sde 'dul ba chos mngon dang / /'brel ba'i don ni rab ston pa/ /gdams pa yin par 'dren pa yis/ /rtsod pa med par gsungs pa yin/ / gnas brtan gyis ni bstan pa'i tshig /'phags pa'i tshogs kyis bzhed pa ni/ /slar yang gdams pa gzhan 'di ni/ /gnyis par yang ni gsungs pa yin/ /dge slong ma yi dge 'dun khyed/ /thams cad yongs su dag gam dri/ /khyed la rjes su ston pa ni/ /dge slong su yang spro ba med/ /ngan song gsum 'gro 'jigs byed pas/ /ji ltar bslabs pa mi 'khrugs pa/ /thub pa'i bstan la rtag tu ni/ bag yod sgrubs shig sring mo rnams/ /gdul bya'i 'gro la rjes brtse bas/ /'dul ba gang de rgyal srid brjod/ /de ltar 'di ni legs pa ste/ /dge slong rgyal po zhes bya'o/ /re shig gdams par 'dod pa ni/ /tshul ldan rnams kyis bskos pa yang / /nyi ma 'jig rten pa yi mig /ji srid ma nub bar du'o/ /nub la de ni 'du shes sam/ /the tshom gyis kyang gdams ngag dang / /rjes su ston na zad pa yis/ /ltung byed dang ni yang dag ldan/ /ma nub nub par 'du shes sam/ /the tshom gyis kyang nges par ni/ /nyes byas mda' yis phog pa yi/ /sdug bsngal chen po myong bar 'gyur/ /sgo 'am sgo dang nye bar yang / /gal te char ni 'bab gyur na/ /shin tu yun rings 'doms pa la/ /nub nas kyang ni ltung ba med/ /dge slong ma yi mkhas rnams kyi/ /bla ma ci nus bsnyen bkur bya/ /de yi spro dang bsod nams dag /spel phyir bla ma yis kyang spyad/ /phrag dog dri mas bsgos sems kyis/ /de la smod byed dge slong ni/ /ltung bas kun nas bslang ba yis/ /dmyal me sbor bar byed pa yin/ /yang na zang zing 'dod pa yi/ /sred pa kho na'i dbang gyur pas/ /gdams pa byed na bden par ni/ /smra byed nyes pa yod ma yin/ /nye du ma yin dge slong ma'i/ /chos gos byed na ltung byed do/ /'di la ster na'ang ltung byed du/ / rjes su bstan pa kho na'o/ /dge slong 'gron lam 'gro ba na/ /dge slong ma yi grogs byed bkag /chom rkun la sogs 'jigs bcas pa'i/ /lam du ltung bar mi 'dod do/ /dge slong rnams kyis dge slong ma'am/ /dge slong yang ni dge slong mas/ /lam du na na bskur bya ste/ /khur byed ye med gyur na'o/ /dge slong ma yis 'ongs pa yi/ /lam rgyags dge slong la ni rung / /dge slong gis 'ong de la yang / /rnam pa kun tu bkag pa med/ /dge slong dge slong ma dang ni/ /lhan cig rgyun dang bzlog phyogs su/ /grung 'jug pa ni bkag pa yin/ / 'jigs bcas thad 'gro nyes pa med/ /dben par bud med gcig dang ni/ /dge slong gcig pu lhan cig tu/ /'dug pas gnas par mi bya ste/ /khyad par dge slong ma dang 'greng / /dge slong gi ni zang zing zas/ /dge slong ma yi sbyor bcug pa/ /sngar ni mgron du gnyer ba yis/ / yongs su spyod la nyes pa med/ /sgrub pa dang ni thos pa yis/ /sbyor bcug pa ni rnam pa gnyis/ /sgrub pa rgyun du zhugs pa nas/ /ji srid dgra bcom gyur gyi bar/ /thos pa mdo sde 'dul ba dang / /ma mo 'dzin pa nyid kyang ste/ /de nyid bden pa yin na ni/ /yongs su spyad kyang nyes pa med/ /mi bden yon tan smra ba yis/ /rnyed pa sbyor bcug zos na ltung / /nad dang chos gos las dang lam/ /dus ma gtogs par sdom brtson ni/ /zas ni gzhan du 'dod pa yis/ /yang yang za na ltung byed yin/ /lan cig zos pas mi 'tsho ba/ /de ni nad pa zhes bya'o/ /yul bzhir gru gang tsam gyis kyang / /chos gos kyi ni dus su 'dod/ /gtsug lag khang ngam mchod rten la/ /tha na re lde tsam yang rung / /byug gam kun nas snyoms byed na/ /las byed dus su brjod pa yin/ /dpag tshad phyed du song nas ni/ /sdom brtson slar yang log pa na/ /de ni lam dus shes bya ste/ /yang yang za la nyes pa med/ /chos gos bcas par rjes gnang bas/ /chos gos med par khas mi blang / /phyi ma'i za ba 'ba' zhig la/ /dang du blangs na nyes byas yin/ /dang por gos ni med pa dang / /phyi ma'ang gos bcas yin grang na/ /gang phyir ston mo gnyi ga yang / /za ba la ni bkag pa med/ /dang po yang ni gos bcas la/ /phyi ma'ang gos can yin na ni/ /gnyi ga la yang ci 'dod du/ /za ba bkag pa yod ma yin/ /chos gos bor nas med gyur te/ /gos bcas dang du len pa la/ / kun tu gos ni mi rnyed phyir/ /kun mkhyen thugs rje can gyis gnang / /grong du 'gron du gnyer ba na/ /dge 'dun mtha' dag go byas nas/ /rgan po gtsug lag khang skyong gis/ /dus su gaN+DI brdungs byas na/ /dge slong rang gi sde pa dang / /glo bur lhag pa mthong ba la/ /'gro ba'i ched du bskul bya ste/ /gzhan du 'gal tshabs can du 'gyur/ /dge slong mu stegs 'dug gnas su/ /'dug nas der ni g.yos pa'i zas/ /zhag gcig las lhag zos na ni/ /nad pa las gzhan ltung bar 'gyur/ /nad pa min pas nyin zhag ni/ /gnyis par gnas na nyes byas yin/ /bza' ba zos na ltung byed de/ /gzhan nas der za na yang ngo / /spyir na rje bos gsungs pa ni/ /nye du 'brel pa kho na la/ /lan brgya bza' ba zos kyang ni/ /ltung ba'i dri ma yod ma yin/ /ci bder stobs pa ma yin par/ / dge slong phye dang khur ba yis/ /gang ba'i lhung bzed gnyis gsum las/ /lhag pa'i len na ltung byed yin/ /lhung bzed chen po gnyis dang ni/ /chung ngu gnyis dang chen po phyed/ /lhung bzed chung ngu gsum dang ni/ /'bring po gnyis su gang bstan pa/ /'bring po gnyis dang chung ngu gcig / chen po gcig dang chung ngu gcig /len la ltung ba yod min te/ /'bring po gsum du len pa la/ /nyes byas nges par thob pa yin/ /bstan bzhin lhung bzed gang ba las/ /gzhan len dge slong ltung byed yin/ /gzhan du lhung bzed gang bar ni/ /len par byed la nyes pa med/ /phan sems nye du'i khyim las gang / /len la nyes pa yod min te/ /de blangs lhan cig gnas pa yi/ /dge slong rnams la bgo bsha' bya/ /bza' ba spangs nas gang za ba/ /dge slong rnams la ma brtags yin/ /lhag por legs par ma byas pa/ /de la nges par ltung byed 'dod/ /bza' bar bya ba spangs nas 'dir/ /nam yang rjes su ma gnang ste/ /bza' ba spangs nas slar yang 'dir/ /bca' ba 'cha' ba nyid kyang ngo / /sna tshogs chan dang zan dang sha /phye dang khur ba bza' ba ste/ /rtsa ba sdong bu me tog 'bras/ /lo ma yang ni bca' ba lnga/ /gang du zang zing zhes byar brjod/ /bza' ba rnams su shes bya ste/ /de ster de yi rnam 'gyur dang / /spangs dang stan ni bor ba ste/ /gnas ni lnga po 'di dag la/ /dge slong spangs pa zhes byar brjod/ /gzhan du 'di dag min pa la/ /spangs pa yod pa ma yin no/ /re zhig tshig dang ldan pa yis/ / tshim par gyur pa'i mthar phyin te/ /de bzhin song shig brjod pa yis/ /spang bar gyur la nyes pa med/ /glo nas ma yin rgyab nas min/ /pang du ma yin nam mkhar min/ /dkyil 'khor dag gi steng du yang / /nam yang lhag por mi bya'o/ /'bad pas lag pa rab bkrus nas/ /kha zas de ni yongs su blang / /'dug sa mang por dge slong gis/ /gang zos de ni lhag por min/ /gus pas de yi mdun du ni/ /tsog pur 'dug nas 'di skad brjod/ /btsun pa dgongs shig bza' ba dag/ /lhag por byas pa bza' bar 'tshal/ /'di ni bdag gis phun tshogs pa'i/ / bza' ba la sogs rung ba ste/ /lhag por mdzad nas gsol cig ces/ /gus dang bcas pas brjod par bya/ /des kyang de la kham gnyis sam/ /kham gsum zos nas de la khyod/ /song shig ji ltar bde bar ni/ /'di dag rnams ni bza' bar gyis/ /de ni zos nas spangs pa dang / / gnas las ma langs pa yis ni/ /yon tan can gyi mdun 'dug nas/ /cho ga snga ma bzhin du bya/ /de yis ma zos pa na yang / /de la de ni bya ba ste/ /song la 'di ni ci bder zo/ /tshul 'di lhag por cho gar brjod/ /sdom brtson mgul bar btung bya ba/ /'o ma zho la sogs pa la/ /tshul 'di nges par brtag mi dgos/ /nas la sogs pa'i thug pa ni/ /thug pa sor rjes yod pa dang / /gang du steng ni sla bar gnas/ /gting na ska bar gnas mthong nas/ /ska de mdzub mos ldag byed la/ /spangs pa yod pa kho na ste/ /spangs pa der ni 'du shes pas/ /thos sam the tshom gyis kyang rung / /ltung byed dmyal ba'i lam rnams spyod/ /gang du ma spangs par yang ni/ /gang phyir spangs par 'du shes sam/ /the tshom kho na yis kyang rung / /nyes byas sdug bsngal ster byed yin/ /dge slong gang zhig rab spangs nas/ /lhag por ma byas dge slong gis/ /gang phyir ngan sems bsams pa yi/ /bza' ba stobs pa ltung byed do/ /lhung bzed rkang pa gnyis dag gis/ /mnan nas nam yang bza' mi bya/ /bder gnas yin na ltung 'gyur te/ /nad can dag la nyes pa med/ /mchil lham gyon nas bza' ba dag /mi rung dge slong nad ma gtogs/ /des kyang mchil lham steng du ni/ /rkang pa bzhag gi gzhan du min/ /'dren byed rgyab dang rgyang ring dang / /glo dang cho ga mi shes dang / /dge slong gis bskyod blang mi bya/ /lag pa ma bkan pas kyang min/ /'dren pa nye bar gnas pa dang / /mdun du 'dug dang cho ga shes/ /lag pa dag ni bkan pa yis/ /dge slong gis ni legs par blang / /lhung bzed byin gyis brlabs par ni/ /bza' ba gang zhig lhung gyur pa/ /the tshom med pa'i sems kyis ni/ /byin len byas yin bza' bar rung / /rdul ni me tog 'bras bu zan/ /ltung ba dang ni gos kyang rung / /gang zhig sog 'jog de las gzhan/ /rung ba dang ni mi rung gang / /brtags pa 'di dag dgu po ste/ /bcu po rdul gyi rdul yin no/ /gzugs ni gsal po ma yin pa/ /de dag la ni nyes pa med/ /sog 'jog byas pa de dang gang / /byin len ma byas pa yi zas/ /de yis gos sogs 'bags gyur na/ /bkru'o gzhan du nyes byas yin/ /lan tshwa la sogs brims nas ni/ /gsar dus blang bar mi bya ste/ /zas la mi mthun med par ni/ /ji bzhin dus su nges par bstan/ /gang zhig rgan po'i gong du za/ /nges pa'am the tshom gyis kyang ni/ /de la nyin zhag re re la/ /nyes byas nges par 'phel ba yin/ /brtags pas nges par gzhan phyir byin/ /de ni sred pas cung zad cig /byin len byas kyang de la de/ /de tshe spyad par rung ma yin/ /sbyin pa po yis ltos med par/ /gang gtad len pas thob pa ni/ /de ni byin len dag pa ste/ /zos pa na yang nyes pa med/ /nga la 'di las 'di byin zhes/ /'dren pa po la smra mi rung / /rigs pas thob par bza' bya yis/ /gzhan min nad pas nyes pa med/ /sdom brtson zos nas lhag ma yi/ /chang bu yang ni ci bder gzhag / bya rog sogs la dmigs pa yi/ /kun slong khyad par mi bya'o/ /glo bur lhags dang 'gro 'dod dang / /dge skos dang ni nad pa dang / /de yi nad g.yog nyid la yang / /bza' ba sngar ni sbyin par bya/ /gro bzhin skyes kyi dbang byas nas/ /btung ba dge 'dun la yang gnang / /de yi phyir na zhang dag ni/ /gzugs can snying pos phul bar bshad/ /'bras chan thug pa zan dron dang / /nya dang sha ni rung ba ste/ /'tsho ba srung phyir 'di dag ni/ /bza' bar bya ba'i sman du gsungs/ /rgun 'brum a shwad 'bra go dang / /ku shu chu shing rtsub 'gyur dang / /u dum wA ra rgya shug dag / btung bar rjes su bsngags pa yin/ /khyim pa dang ni dge tshul gyis/ /legs par mnye zhing yongs su btsags/ /'di dag btung ba thun tshod pa/ /skyur bo zho ga chu de bzhin/ /'bru mar bu ram sbrang rtsi dang / /mar dag zhag bdun par ni gsungs/ /sha khar bye ma ka ra dag / 'di dag chu la gdus pa ste/ /gzhan yang ji srid 'tsho ba'i sman/ /rtsa ba sdong bu sogs sbyar ba/ /tshul bzhin du ni byin brlabs te/ /yongs su spyad par rung ba yin/ /rtsa ba gla sgang sge'u gsher sogs/ /sdong bur yongs su grags pa ni/ /tsan+dan thang shing sle tres dang / / spur dang pad+ma dkar la sogs/ /'dab bdun pa to la sogs ni/ /lo ma'o de dag me tog kyang / /'bras bu na le sham dang ni/ /skyu ru a ru ba ru sogs/ /shing kun spra tshil rgya skyegs dang / /de bzhin thang chu dag kyang ste/ /til tshigs la sogs 'gyur byed lnga/ /de bzhin du yang tsha lnga'o/ /a mra a mra'i nang shun dang / /'dab bdun pa dang shi ri sha'i/ /shun pa dag gi sman rnams ni/ /ji srid 'tsho ba zhes bya'o/ /gang gzhan de 'dra'i rigs dag ni/ /bza' ba'i don du bcang min pa/ /zos kyang bkres pa mi sel phyir/ /'di dag ji srid 'tsho ba'i sman/ /rgun 'dru ma bal se'u 'bra go dang / /a mra la sogs 'bras bu ste/ /ut+pal la sogs rtsa ba dag /mkhas pas dus su rung bar gsungs/ /dus su rung sogs 'di dag ni/ /phan tshun 'dres par gyur pa na/ /snga ma snga ma'i dbang byas nas/ /yongs su spyad la nyes pa med/ /nya dang rus sbal phag pa dang / /nya sgong chu srin byis pa gsod/ /dom dang ri bong phag rgod dred/ /tshil zhag byin len byas spyod rung / /sha rjen za ba dag la 'dir/ /dri zhim rdzas kyi phye mar bcas/ /sman pa'i ngag gis nad sos gnang / /de las phar ni ma yin no/ sha ni bza' bar ma yin pa/ /mi dang lto 'phye glang po sogs/ /'drim na dge slong mkhas rnams kyis/ /'di ni gang gi sha zhes dri/ /mchod rten nye 'khor bla gab med/ /sgo dang bang rim chu yi gnas/ /khyams dang gnas khang dag tu ni/ / bza' sogs 'tshed pa rnam par spangs/ /sems bsdus la sogs cho ga yis//rung ba'i gnas ni rnam pa lnga/ /'dren pas gtsug lag khang du ni/ /zas gnas dge 'dun don du gsungs/ /gtsug lag khang gi thig brkyang nas/ /so phag nye bar 'jog pa na/ /lag gi gla ni mkhas pa yis/ /phan 'dod sems bskyed bya ba nyid/ /tshogs kyi rung ba'i gnas su ni/ /sa phyogs 'di ni byin gyis brlabs/ /ngag tu yang ni lan gsum brjod/ /de ltar sems bskyed sngon 'gro bas/ /gtsug lag khang phyed zin pa la/ /lag blas dge 'dun mdun 'dug nas/ / 'di la sems rab sdus shig ces/ /lan gsum bar du brjod par bya/ /'di nyid zas kyi gnas nyid du/ /mdzes pa'i dngos por byin gyis brlabs/ /de ltar byed la sems bsdus pa'i/ /mtha' las byung bar mkhas pas gsungs/ /gtsug lag khang chen mang po dag / sna tshogs sgo ni tha dad na/ /gcig tu legs par bya ba ste/ /kun nas ba lang lhas bzhin no/ /gtsug lag khang rnying nyams gyur cing / /dge slong rnams kyis bor ba na/ /'phral byung gyur la tshig gi mthar/ /gang de byin gyis brlab par brjod/ /gzhan yang 'dod don gcig pa dang / /las brjod pa ni sngon 'gro bas/ /dge 'dun mthun pas las dag gi/ /cho ga zhes bya rdzogs la'o/ /de ltar zas kyi gnas gang dag /sdom brtson gyis ni ma byas na/ /gang zhig btsos pa'i zas dang ni/ /zhag lon pa yang rung ma yin/ /sen mo ne tso me mtshon sogs/ / rnyings dang dbug dang brtol ba dang / /bcad dang gshegs pa'i ming can gyi/ /sa bon bcas pa'ang rung ba yin/ /rgan po'i mdun du 'dren pa yi/ /sam pras ta zhes brjod bya ste/ /de sgra bza' dang btung ba rnams/ /shin tu dag par bya phyir yin/ /gnas brtan gyis kyang bden par ni/ /snyoms par brims zhes brjod par bya/ /shes bzhin ldan pas bza' bya zhing / /zos nas kyang ni yon bshad bya/ /yon bshad la ni 'dug pa na/ /dge slong gang gis bzar mi rung / /de ma thos la nyes med de/ /gzhan der ci bder bza' bar bya/ /tshigs bcad dang po brjod pa na/ /nye bar gtad de bsdad nas kyang / /tshigs bcad mthar yang nyen byed na/ /de za ba la bkag pa med/ /dge 'dun gyi ni rgan po'am/ /nus ldan gzhan gyis kyang ni brjod/ /sbyin bdag rnams kyi 'dod pa dang / /bsam pa ji bzhin chos bstan to/ /chos ni 'chad pa po la yang / /nye gnas g.yog 'khor don du ni/ /dge slong rnams ni sbyin bya ste/ /gcig pu grong du mdzes ma yin/ /dga' ston dus tshe sku gzugs ni/ /rgan po'i gong du rtag tu bzhag /ston pa dang ni dge 'dun bcas/ /'jig rten gsum snang khyab bdag yin/ /mtshan mo sgron me med par ni/ /chos nyan pa dang bshad mi bya/ /dbyar gyi dus su rtag tu ni/ /'od khang mig brgya pa yis dgab/ /khyim nas khyim du dge slong rnams/ /dgos pas mgron du bos pa na/ /khang bzangs gzhan du nam yang ni/ /de nas de dag 'gro mi bya/ /'phags pa'i dge 'dun tshul bzhin du/ /ci bder bza' ba zos nas ni/ /sbyin bdag gis ni gnang ba dang / /'gro bar byed la nyes pa med/ /sha dang nya sogs 'jig rten na/ /dam pa'i skye bos ma smad gang / /lhung bzed 'ongs pa de bza' ste/ /de 'dras ltung bar mi 'gyur ro/ /gang zhig ched du byas pa'i sha / mthong ngam thos sam dogs pa ni/ /nam yang bza' bar bya min par/ /'gro kun phan par bzhed pas gsungs/ /ro la brkam pas gsod byed pa/ /snying rje med pa'i bsam pa spang / /gang zhig srog gnas ched du ni/ /sha za ba la nyes pa med/ /stag gis mche bas bzung ba ni/ / mthong ngam thos pa nyid na yang / /de ni bza' bar mi bya ste/ /de yis nam yang mi gtong phyir/ /sgog skya la sogs sman rnams ni/ /nad pa dag la rjes gnang ste/ /gang phyir tshe srog dge ba yi/ /chos rnams kyi ni snod yin phyir/ /gang du dge slong rnams kyi dri/ /ma dad pa yis mi snom na/ /de la nyes sbyor rnams kyis kyang / /gnas kyi bya ba'i rgyur shes bya/ /bya ba rdzogs pa'i mthar yang ni/ /lus ni rnam par dag bya ste/ /dri ma lhag ma med pa na/ /slar yang gtsug lag khang 'jug bya/ /nub mo bdun dang nub mo gsum/ /de bzhin nub gcig rim bzhin du/ /sgog skya dang ni breg tsong dang / /ke'u yang ni dag par gsungs/ /bsod snyoms dag la 'jug pa na/ /khang bzangs sgo mang rgyu bya ste/ /zas la sogs pa'i mtshan ma ni/ /sgor yang phyir ldog 'dod pas bzhag /sgra ldan khar gsil khyer bya ste/ / de yis sbyin bdag go bar bya/ /khyi dang ba lang la sogs bsdigs/ /rnam yang brdeg par mi bya'o/ /rtsa ba 'bras bu bza' bya dag /dal gyis dal gyis dum bur bya/ /mnyes sam dum bur bsil nas ni/ /grong du dge slong dul bas bza'/ /mgron du bos tshe gos med par/ / 'chol pa'i gral gyis zas mi bza'/ /dus ma yin pa'i zan dag kyang / /sman pa la dris gnang na rung / /mu ge'i dus na mgron gnyer ba/ /shin tu mang yang dang du blang / /sbyin bdag gis ni gnang ba na/ /bgo bsha' yis ni yongs su spyad/ /gtso bor mgron du bos pa yis/ / phyed zos kyang ni sbyin bya ste/ /tshangs par spyod la rab mkhas des/ /nyam nga ba dag yongs su bskyang / /thub pa'i bstan pa dang phrad srog/ /nyi ma gcig kyang rnyed dka' bas/ /yun rings 'tsho bar 'dod pa gang / /de dag gis kyang yongs su spyad/ /gal te lhung bzed 'phan can du/ / khu tshigs dag ni mthong ba na/ /dngos po gang gis de bsal nas/ /lan gsum bar du bkrus te spyad/ /zos nas kha yi dri ma ni/ /sa dang lci ba sogs kyis sbyang / /chu khyor gsum mam lhag pas kyang / /bkru bshal yongs su dag par bya/ /dge slong min pas reg gam zhes/ /blta bya the tshom med na bza'/ /gzhan du reg par gyur lta na/ /slar yang byin len ltos pa yin/ /lam du song tshe lam rgyags dag /khur khyer su yang med pa na/ /brje ba yi ni 'du shes kyis/ /rang nyid kyis ni khur bar bya/ /brje ba gzhan dag med pa na/ /nyi ma dang po zan bcad bya/ /gnyis pa la ni spar gang tsam/ /bza' yi de las lhag pa min/ /nyi ma gsum par spar ba gnyis/ /de las phar ni ci bder bya/ /rang nyid 'bad pas bsgrubs nas kyang / /srog bsrung 'dod pas bza' bar bya/ /sa brkos nas ni rtsa ba'am/ /shing la 'dzegs nas 'bras bu blang / /dge slong 'chi la thug pa yis/ /bkres pa bsal ba'i don phyir spyad/ /bcas pa'i kha na ma tho 'dir/ /gnas skabs rkyen dbang gis rjes gnang / /rang bzhin kha na ma tho 'dir/ /tshul ldan srog la thug kyang min/ /'dod na nye du dang lhan cig / legs blos bzar rung kho na ste/ /gal te lam 'jigs snod med na/ /dge tshul dang yang rung ba nyid/ /dge sbyong za ba'i dus kyi tshe/ /lhung bzed lag pa g.yon pas bzung / /kham gcod la sogs byed pa'i dus/ /lag ni rtag tu dran pas bsrung / /gang du bag med khwa dag gis/ /zas la rig par gyur pa na/ /mchu reg nye 'khor dor nas ni/ /bza' ba de la brtag mi dgos/ /mar dang 'bru mar bu ram sogs/ /gzhan yang dge 'dun gyi ni rdzas/ /khyer nas dran pa brjed pa yis/ /gang lus de ni dor mi rung / /tshogs sam gang zag gis kyang rung / /rung ba de ni yongs su blang / /las kyi dus la bab pa na/ /legs par zos nas las 'jug bya/ /bu ram 'bras phye 'dres gyur na/ /gtsang ma'i chu yis yongs sbyangs nas/ /dus min par yang spyod pa la/ /zas kyi nyes pa yod ma yin/ /thun tshod rung ba la sogs sman/ /dus su rung dang 'dres pa na/ /dus ma yin par mi spyad cing / /reg nas byin len ma byas min/ /thun tshod rung ba'ang de las gzhan/ /zhag bdun pa dang 'dres na ni/ /thun tshod las gzhan sdom brtson gyis/ /spyad min byin len ma byas min/ /zhag bdun pa yang ji srid du/ /'tsho bar dmigs dang 'dres na yang / /zhag bdun par ni spyad bya ste/ /lhag par ma yin byin len bya// //bam po bzhi pa/ dge slong gcig gis bu ram gang / /rang gis spyod phyir byin brlabs te/ /phan tshun yid gcugs gyur pa yi/ / lnga po rnams la rjes su gnang / /nad pa nyid dang zan chang dang / /dge skos dang ni lag gi bla/ /lam du zhugs pa 'di lnga las/ /gzhan dag la ni rung ma yin/ /zang zing phra mo 'dres pa yis/ /bu ram chu shing mnyes nas ni/ /btsags nas sdom brtson btung ba ni/ /dus min par yang rung ba'o/ /rnyed dka'i 'bras bu me tog sogs/ /yid 'phrog bza' bar bya ba gang / /rnyed na spang bar byas kyang ni/ /'dod na bza' bar gnang ba yin/ /bsod snyoms yang dag thob pa'i tshe/ /bsod snyoms pa yi spyod yul du/ / khyim gzhan gnas te za ba ni/ /sbyin bdag bsod nams spel phyir rung / /slar yang za bar 'dod lta na/ /spyod yul dag nas 'ongs nas ni/ /bza' bya mu ge'i dus dag tu/ /sngar blangs bsam pas rung ba yin/ /khyim du zos pa'i lhag ma dag /gal te sbyin bdag gis bkur na/ /sngar blangs pa yi bsam pa yis/ /nyam nga ba na de yang ngo / /gtsug lag khang gnas kun tu yang / /dus gsum kun tu gtor ma sbyin/ /dus dang dus min za ba nyid/ /gnod sbyin zas phyir 'dod rnams sbyin/ /bu dang bcas pa'i 'phrog ma la'ang / / gtsug lag khang ni bsrung phyir dang / /bstan pa yang ni phun tshogs phyir/ /bde gshegs kyis ni gtor ma gsungs/ /na sogs dus ni ma gtogs par/ /'dus shing za na ltung byed do/ /dge 'dun la ni gang cung zad/ /byin blangs de la ltung ba med/ /glo bur gnyug ma'i bza' ba gang / /de yang 'dus shing bza' bar 'dod/ /na dang las dang lam gyi dus/ /sngar ni rab tu bsnyen pa nyid/ /gru dang gru chen zhugs la sogs/ /dpag tshad phyed lam song nas ni/ /log nas gal te za byed na/ /dge slong ltung ba yod ma yin/ /gal te sbyin bdag mang po yis/ /dge slong rnams la so sor gnang / /sbyin bdag dag ni nus pa'i ngor/ /sbyin pa'i dus ni lnga po'o/ /mu stegs dge sbyong gis zhus nas/ /sbyin bdag de yis gal te 'dren/ /de dag dad pa khyad par du/ /spel phyir bza' bar bya ba nyid/ /mtshams nang der 'du shes pa'am/ /the tshom gyis kyang ltung byed yin/ /gsum po la ni nyes med do/ /so sor ma 'dus 'dug la sogs/ /so sor nges pas thob pa dang / /gtsug lag khang du tha dad za/ /sbyin bdag rnams kyis 'dod pa'i ngor/ /bkag pa yod pa ma yin no/ /nyi ma phyed kyi dus nas phar/ /phyi ma'i skya rengs ma shar bar/ /dge slong bza' ba za byed na/ /ltung byed 'khor los rnam par 'joms/ /bza' ba la sogs dge slong gis/ /sog 'jog byas pa zos na ltung / /snga phyi gnyis su spyod pa yis/ /de ni rnam pa gnyis su gsungs/ /sngar spyod byin len byas pa ni/ /phyi dro spyod pa bkag pa yin/ /phyi dro byin len byas pa ni/ /thun tshod 'das pa rung ma yin/ /chos gos lde mig kyog po dang / /lhung bzed lhung bzed dman pa la'ang / /lag pa 'bags pas mi reg ste/ /tshul de'ang rkyen dbang ma gtogs so/ /sdom brtson gang zhig bza' ba sogs/ /byin len ma byas za byed na/ /de yang bslab pa zad byed de/ /chu dang so shing ma gtogs so/ /gang zhig ma tshos tshos pa 'dra/ /bsod snyoms pa yis rnyed pa na/ /sra ba nyid ni sum cha bangs/ /chos la byin len byas pa rung / /nya dang sha dang 'bras bu sogs/ /kha dog yongs su gyur pa na/ /ba 'o la sogs lan gsum khol/ /byin len bya bar rung ba nyid/ /reg nas byin len mi bya ste/ /nyam nga'i dus na bkag pa med/ /'dab ma can dang so shing dag /'o ma can ni yongs su spang / /dge slong rnams la sbyin bdag gis/ /bza' ba gal te bor na ni/ /sgra mi snyan pa'i dbang byas nas/ /dus yol nas ni bza' bar bya/ /mgul du mid pa ma yin na/ /'di la byin len mi bya zhing / /ji srid 'tsho bar bsgrubs pa ni/ /byin rlabs ma byas mi bcang ngo / /tshang ni sog par mi nus pa/ /sbrang ma'am ti tam ka la sogs/ /de ni dor nas spyad bya ste/ /byi ba sogs kyis nges par 'jig /lag pa gnyis ni lag pa dang / /de dang 'brel la des byin dang / /lag pa de dang 'brel pa yis/ /de dang 'brel pa dag tu yang / /byin len bya'o mi bde na/ /rgyang ring na yang rung ba nyid/ / 'di la cang shes glang po dang / /spre'u yis kyang byin len rung / /mar dang 'o ma nyid dang zho/ /sha dang nya sogs bdag nyid kyi/ /don du dge slong der gnas pas/ /blang bar bya ba min pa ste/ /nad pas ston mo'i dus su ni/ /slong bar byed la ltung ba med/ / mi na ba yis slong ba na/ /nyes byas zos na ltung byed yin/ /bsod snyoms dag la rgyu ba na/ /kha rog 'dug ste spyod yul du/ /ci byin zhes ni 'dri ba la/ /ji ltar 'dod pa blang bar bya/ /srog chags bcas pa'i chu rnams la/ /phyi rol khrus la sogs spyod dang / /nang du 'thung bar brjod pa yis/ /longs spyod nam yang bkag pa yin/ /'dir ni ltung byed ltung ba yi/ /rnam pa gzhan ni yongs btsags pa'o/ /rtswa sogs dag la 'debs pa rnams/ /gang 'dir slar yang ma bris so/ /longs spyod bcas pa'i khyim gang zhig /skyabs bcas par ni 'dug pa dang / / 'greng ba gnas skabs dge slong ni/ /rkyen dbang las gzhan ltung ba yin/ /gang du skyes pa bud med bcas/ /chags ldan 'dod pa spyod gyur pa/ /bud med skyes pa longs spyod pas/ /de ni longs spyod ces byar bstan/ /mu stegs rnams la rang nyid kyi/ /lag gis bza' sogs mi sbyin te/ /lta las slar ldog don du ni/ /dum bur byas te rjes su gnang / /snod ni sa la bzhag pa la/ /snying rje ldan pas sbyin bya ste/ /de ni rjes su gzung phyir yin/ /nam yang gus phyir ma yin no/ /'thab tu bcas pa'i dmag tshogs la/ /nam yang lta phyir mi 'gro ste/ / de lta bu yi rkyen dag gis/ /gyur pa las ni bkag pa med/ /gal te dgos pas song yang de/ /nub gnyis las ni phar mi gnas/ /yun rings dus su nang du ni/ /gnas na'ang gang zhig 'jigs pas sam/ /rgyal po 'am ni blon po sogs/ /mdza' bshes tshig gis kyang rung ste/ /gnas pa na yang cho ga ni/ /rta dang glang sogs ched mi lta/ /dmag tshogs rnams kyi bkod pa dang / /dpung dang rgyal mtshan mchog gi yang / /rgyal po dang ni blon po yis/ /bshams pa dkrug par mi bya'o/ /de la dpung mchog gang du dpung / /de yi bkod pa spras la bya/ /gang du gnas pa'i rgyal mtshan mchog /de ni rgyal mtshan mchog ces bya/ /khros pa'i sems kyis dge slong la/ /sdom brtson rdeg par byed mi rung / /'dren pas bla ma'i dbang byas nas/ /brdeg par gzas pa'ang de bzhin bkag /'dir ni sor mo gcig gis kyang / /rdeg par byed na zad par 'dod/ /mgo bo khu tshur rkang dang lag /rdo dbyug bong ba sogs brdeg ltung / /phyags ma la sogs kyis brdeg na/ /de yi nyag ma ji snyed pa/ /de snyed lus la reg pa'i grangs/ /sdom brtson dag la ltung byed gsungs/ /de bzhin sran ljang drug sogs kyis/ /brdeg na'ang ltung byed kho nar brjod/ /de ni lus la ma phog par/ /'phangs pa yang ni nyes byas nyid/ /ma rungs gdul phyir ltung med de/ /gzhan par sngags grub mthu ldan gyi/ /dge slong dag gis brdeg pa dang / /gzas pa'ang ltung bar mi 'gyur ro/ / dge slong rnams kyis gnas ngan len/ /shes nas 'chab pa yang bkag ste/ /'jigs pas ma gtogs 'jigs gyur na/ /gnas ngan len ni bcab bya nyid/ /phas pham pa nyid gtsor byas nas/ /ji snyed btung bar brjod pa dag /de snyed bslab pa'i gzhi 'di la/ / mkhas pas gnas ngan len ces gsungs/ /nad pa ma yin dge slong la/ /nyon mongs bcas pa'i sems kyis der/ /nam yang zan gcad mi bya'o/ /ji ste byed na zad byed ltung / /dus ma gtogs par me dag gis/ /nye bar spor byed smad par gsungs/ /me gsod pa dang bsro ba dag / nyam nga'i dus na nyes pa med/ /skra sen spu dang ngar snabs dang / /mchil ma lud pa 'jug pa dang / /me lce me mar mur la reg /nyes byas 'gyur ro dus ma gtogs/ /dkon mchog gsum dang pha ma dang / /tshangs par mtshungs spyod bla ma dang / /chos kyi don du nyes med de/ /reg pa'i dus su brjod pa yin/ /'dun pa dbul zhes smras nas ni/ /dge 'dun las ni nye ba na/ /sdom brtson slar yang mi dbul na/ /de ni ltung bas 'joms pa yin/ /bsnyen par ma rdzogs gang zag dang / /nub gnyis lhan cig nyal rung ste/ /de las phar ni nub gsum sogs/ /ma yin gal te nyal na ltung / /thams cad g.yo zhing thams cad bskor/ /gnas khang bskor zhing g.yogs pa bzhin/ /phal cher g.yogs shing kun nas bskor/ /ngos bzhi pa yi khyams bzhin brtag /thams cad g.yogs shing phal cher bskor/ /ngos gsum pa yi khyams bzhin te/ /phal cher g.yogs pa'i khang pa dang / /khang bzangs bzhin te rim bzhin no/ /de ltar khyim ni bzhi po ru/ /sdom brtson lhan cig nyal byed na/ /nyi ma gsum pa'i skya rengs 'od/ /'char tshe gsal por ltung ba yin/ /sngo dang ser dang dmar po ste/ /skya rengs rnam pa gsum du 'dod/ /sngon po nyid tshe'ang ltung 'gyur na/ /gzhan dag tshe na smos ci dgos/ /gang du sgra don so sor go /khyams dang khang bzangs la sogs par/ /de 'dra der yang sdom brtson ni/ / nyal du rung ba ma yin no/ /gnang ba dang bcas gnas su ni/ /nad pa dag la rjes gnang ste/ /de yi nad g.yog dag kyang ngo / /de las gzhan gyis nam yang min/ /stobs chung mi na ba la ni/ /nyin mo nyal ba bkag pa yin/ /bsam gtan klog dang ldan pa la/ / yud tsam rjes su gnang ba yin/ /gnyis sam gsum po dag gis kyang / /khri gcig la ni nyal mi bya/ /rgya chen yin na gos sogs kyis/ /bar chad nyal ba rjes su gnang / /mun khung dag tu sa la mgo /gtugs nas bla mar phyag mi bya/ /der ni tshig gi bya ba'am/ / yid kyis nges par phyag bya'o/ /dge tshul dang ni lhan cig tu/ /lam du nyal tshe gnyid mi log /mi nus ldang blos skyil krung dag /bcings te cung zad gnyid log rung / /ma nus pa na nyes pa med/ /thams cad du ni 'bad pa yis/ /dge tshul dag ni bskyang bar bya/ / sangs rgyas ljon shing myu gu ste/ /de ni dgra bcom sgo nga yin/ /dge slong blo gros dman gang dang / /dge tshul gang yang 'di skad chos/ /'dod pas bar du gcod bstan mod/ /bar du gcod pa min ston na/ /de 'dir lan gsum par bzlog ste/ /'on kyang lta de mi gtong na/ / 'di las lhag sdig yod min pas/ /de yang rgyang ring spang bar bya/ /nyams pa de dang smra ba dang / /nam yang yang dag smra mi bya/ /gnas dang longs spyod la sogs kyang / /mi bya gal te byed na ltung / /yang dag smra ba kha ton yin/ /smra ba klog pa yin par 'dod/ /gnas sa 'dug sa gcig tu ste/ /longs spyod chos dang zang zing ngo / /lta ba bzlog pa'i ched du 'am/ /nye du'am nad pa yin na ni/ /smra la sogs pa rjes su gnang / /longs spyod nam yang ma yin no/ /chos gos gsar pa rnyed pa na/ /kha dog ngan par byas te bcad/ /de yang dkar po gsar par dgongs/ /kha dog ngan pa rnam pa gsum/ /rang bzhin dang ni bcos ma yin/ /sngon po dang ni btsag tu grags/ /me tog 'bras bu 'dab ma dang / /shun pa'i khu ba ngur smrig 'dod/ /mdog bzangs gzhan ni ma yin no/ /drag po sbrul gyi gdug pa yi/ /dug la rtag tu reg bla yi/ /rin po che la reg pa dang / /rin chen smos pa de lta min/ /nor bu mu tig byi ru sogs/ /rin chen de ru smos pa yang / /g.yul 'gyed yan lag mtshon sogs dang / /rol mo'i yan lag rnga zlum sogs/ /gtsug lag khang dang skyed mos tshal/ /thams cad nang gir brjod pa yin/ /nang ma yin par slar yang ni/ /phyi rol nye 'khor yin par gsungs/ /phug pa'i nor bu mu tig sogs/ /reg pa la ni ltung byed de/ /ma phug pa la reg pa dang / /mching bu dag la nyes byas nyid/ /pi wang gling bu rnga zlum sogs/ /mtshon cha mda' dang gzhu sogs kyang / /yan lag tshang dang ma tshang la/ /reg pa ltung byed nyes byas yin/ /gzhan 'dir go cha la sogs la/ /dge slong reg na nyes byas yin/ /mnga' dang gzhu sogs chas pa yi/ /mtshon cha la reg smos ci dgos/ /sku gdung dang bcas mchod rten dang / /sku gzugs la reg ltung byed de/ /sku gdung med la gang reg pa/ /de la nyes byas mda' yis reg /gar dang rol mo glu sogs dag /mig dang rna ba'i yul du bkag /'thab mo bre mo'i gtam sogs kyis/ /nyes zhi mi byed 'ba' zhig zad/ /gar dang glu sogs chags pa yis/ /gang zhig mchod rten phyag byed na/ /der 'gro gom pa re rer yang / /nyes byas phung po re re sogs/ /de phyir srid pa zad 'dod pa'i/ /dge slong rnams kyis gzugs sdug dang / /sgra snyan la sogs chags pa yi/ /sems su nam yang mi bya'o/ /sa le sbram sogs smos pa gang / /skyed tshal gang du rnyed pa na/ /rtswa sogs dag gis bkab nas ni/ /zhag brgyad bar du bsrung bar bya/ /su dag don gnyer byung na de'i/ /mtshan ma dris nas bstan par bya/ /med na dge 'dun nang nyid du/ /zla ba drug tu brtag phyir bzhag / gzhan gyi kha dog mtshan ma dang / /khyad par rtags kyis mtshon la sbyin/ /min na dge 'dun longs spyod phyir/ /de ni brtan pa'i dngos por bya/ /gal te gdod dbang byas nas kyang / /de thob blo chung slong byed na/ /de la de nor rin gyis sam/ /sbyin bya skyed ni nam yang min/ /sdom brtson zla phyed nang rol du/ /dus ma gtogs par khrus byed bkag /na dang las dang lam dang rlung / /char dang de dag tshogs skyon med/ /na ba'i dus ni gang du de/ /khrus byas sos par gyur na'o/ /las lam dus ni sngar bshad bzhin/ /rlung du grags pa'i dus bstan pa/ /gang du chos gos sne'u ni/ /rlung gis zlog par byed pa'o/ /lus la char thigs gnyis phog pa/ /char pa'i dus su grags pa yin/ /rlung dang char pa 'dres pa ni/ /de dag tshogs pa'i dus zhes bstan/ /gzhan yang tsha ba'i dus zhes pa/ / zla ba phyed dang gsum pa'o/ /chos gos ma lus bzhag nas khrus/ /byed 'dod lte bar ma sleb byas/ /nyes byas lte ba nub par ni/ /khrus byed de ni nyes par zad/ /chu bo pha rol rgal ba dang / /rgyal ba sogs la 'debs byed rung / /'ga' zhig tu yang chu klung dag /zab mo brgal la nyes pa med/ /dge slong grur zhugs pha rol du/ /chu bo dag la 'gro ba'am/ /gzhan du rgya mtsho la yang rung / /bshang gci sogs byed bkag pa med/ /'jug ngogs gang du bud med dam/ /rgyal po 'am ni de yi dmag /skyes bu g.yon can khrus byed pa/ /de ni rgyang rings spang bar bya/ /'og tu gting ring byi zul lam/ /yang na steng du nya brgal lam/ /chu la rkyal ba la sogs kyang / /rtsed mo'i don du mi bya'o/ /gal te rkyal ni slob pa'am/ /nad dang bral bar 'dod pa yis/ /shin tu dben pa'i gnas su ni/ /rkyal la sogs pa kun du spyad/ /shes bzhin rang ngam gzhan gyis kyang / /sdom brtson dud 'gro'i skye gnas gang / /gsod na ltung byed me lce yis/ /reg pa'i sdug bsngal nyams myong 'gyur/ /shes bzhin nyon mongs sems kyis ni/ /tshangs spyod dang ni bcas rnams la/ /'gyod pa skyed byed nges bkag ste/ /byed na ltung byed gzhan du min/ /khyod lo nyi shu ma lon na/ /khyod kyi bsnyen rdzogs gang na ste/ /mkhan po'ang tshul khrims 'chal pa yin/ /de ni mtshams kyi phyi rol yin/ /'gyod pa skyed pa'i don du ni/ /de la sogs pa smra byed na/ /de la ltung byed bden pa yi/ /skyon 'gyur brjod na nyes pa med/ /blo chung sor mo gcig gis kyang / /dge slong rtse phyir g.ya' sgog na/ /ltung byed sme ba nag po dag /ston pa la ni nyes pa med/ /dga' g.yengs chu la rtsed mo dag /byed na thad ltung 'gyur ba yin/ /de yang pha rol tshu rol du/ /phar brgal tshur brgal byed sogs so/ /ma bsrungs bud med lhan cig tu/ /gal te nang ngam phyi rol du/ /dge slong nyal du mi rung ste/ /sgo bcings pa la nyes pa med/ /'dir ni legs dang nyes smras don/ /gang zhig so sor rtogs dang ldan/ /mi mo de ni bud med ces/ / shes rab ldan pas yang dag gsungs/ /thams cad g.yog dang yongs bskor zhes/ /bya ba 'di yang snga ma bzhin/ /nyal bar brjod pa gang yin pa/ /glos ni sa la phab pa'o/ /sdom brtson gnyid kyis non dus su/ /reg pa'i rlung gis sbar ba yi/ /ltung byed me ni gang yin pa/ / kun nas sreg par byed pa yin/ /gnas khang sogs su bud med dag /gang na yod pa'i skas sogs brtul/ /srung byed bzhag nas dge slong ni/ /nyal ba la ni smad pa med/ /khyad par nyin mo nyal ba yi/ /cho ga yang ni 'di yin te/ /mdud pa bor nas rjes su gnang / /gzhan du nyes byas 'gyur ba yin/ /dge slong rang ngam gzhan gyis kyang / /dge slong sngangs par byed pa bkag /sems can kun la mi 'jigs mdzad/ /bla ma sangs rgyas la dmigs nas/ /sha za gnod sbyin la sogs pa'i/ /sdig can gzugs ni bzung nas kyang / /de yi gzugs sgra dri rnams kyis/ /sngangs par byed la zad byed ltung / /gya nom lha dang dri za dang / /bram ze la sogs 'jigs pa yis/ /bzung nas khyod ni bsad ces brjod/ /gal te brda phrad nyes byas yin/ /phan par 'dod pas mi bzad pa'i/ /sdug bsngal ltung ba'i 'jigs skyed phyir/ /dmyal ba yi dwags dud 'gro'i gzugs/ /gal te 'jigs ston nyes pa med/ /dge slong gzhan gyi lhung bzed sogs/ /yo byad dngos po nam du yang / /bzhad gad kyi ni dbang byas nas/ /dge slong gis ni sbed pa bkag /dge slong chos gos byin pa la/ /gdeng med par ni longs spyod na/ /ltung byed gal te mdza' bo 'am/ /mchod 'os bla mas nyes pa med/ /sdom brtson dge 'dun lhag ma yis/ /dag pa'i dge slong skur 'debs na/ /ltung byed nyid du nges bstan te/ /phyi ma rnams kyis nyes byas so/ /lam du skyes pa med par ni/ /bud med dang ni mi 'grogs te/ /'grogs na de yi spyi bor ni/ /ltung byed gnam lcags 'bab par 'gyur/ /grong der sdom brtson nam son dus/ /nges par ltung byed nyid 'gyur te/ /grong gi lam phyed phyin pa na/ /nyes byas tsam du brjod pa yin/ /rang nyid snga phyi byas nas ni/ /lam mi shes pa bstan par bya/ /nyam nga'i lam du bud med dag /khrid na ltung bar mi 'gyur ro/ /gang zhig rkun ma'i grogs dang 'grogs/ /de la'ang ltung byed kyis reg 'gyur/ /'di la yang ni nyes med da/ /gal te sngar bzhin song na'o/ /tshangs pa'i sho gam la sogs pas/ /'phrog par byed de rkun mar 'dod/ /grong dang lam la sogs pa dag /gang 'joms drag po smos ci dgos/ /lo ni nyi shu ma lon 'di/ /gang phyir bkres skom la sogs gnod/ /mi bzod mi brtan lus blo'i phyir/ /bsnyen par rdzogs par mi byar brjod/ /ma tshang lo la der shes bzhin/ /gang zhig smra yang bsnyen rdzogs na/ /rdzogs byed de dag zad par ldan/ /the tshom gyis kyang ltung bar brjod/ /gang zhig ma tshang tshang ba'i blos/ /lo ni tshang bar smra ba la/ /rdzogs byas ltung ba yod ma yin/ /tshang la tshang bar 'du shes gang / /tshang la nyid smra dag kyang ste/ /the tshom gyis kyang smra ba la/ /de la ltung ba med pa nyid/ /de ltar 'dir ni phyogs tsam zhig /mdor bsdus nas ni bstan pa yin/ /brtul zhugs dang bcas blo ldan rnams/ /shin tu nges dang bcas par bya/ /dge slong gis ni shes bzhin du/ /sa mi brko'o brkor mi gzhug /so phag 'ba' zhig pa dag dang / /kun nas bye ma yin nyes med/ /skyed byed skyed byed ma yin pa'i/ /sa ni rnam pa gnyis su grags/ /char 'bab rjes su gyur pa la/ /zla ba drug gis skye ba ste/ /skyed byed la ni 'dir nges yin/ /sa mang bye ma nyung na ltung / /nyes byas 'gyur ro bye ma dang / /gseg ma dang ni rdo ba dag /lhag par bcas la mi skye'i phyir/ /ltung byed dang ni nyes byas su/ /'dul ba'i de nyid rig pas bshad/ /sa gzhi dang ni rtsig ngos la/ /phur pa brdeg na ltung byed yin/ /de nyid 'don dang gnon pa'am/ /'dam bskyod pa la nyes byas so/ /rtsig pa'ang de bzhin zhal zhal lam/ /chu dogs rtib na zad ltung 'gyur/ /chad pa 'am ni gas pa la'ang / /rko bar byed na nyes byas 'dod/ /chu 'gram 'dam ni bskyod pa la/ /'gro bar 'dod pas nyes pa med/ /rtsis kyi don du ri mo yang / /sa'am rtsig ngos 'dri ba dang / /skyed mos tshal sogs rgyu ba na/ /'jigs min dus su rung ba nyid/ /dbyar gyi zla ba bzhi las ni/ /mgron du bos pa khas mi blang / /yang yang rtag tu ba dang dus/ /so sor mgron du bos ma gtogs/ /rtag tu mgron bos gang yin pa/ /gang du rtag pa nyid du 'bod/ /so sor mgron du bos pa ni/ /so so tha dad nyid la brjod/ /dus ni ji srid 'dod pa des/ /yang yang zhes brjod yang yang dang / /mgron bos 'di dag ma gtogs pa/ /gsal por ltung byed nyid du brjod/ /gya nom pa la bos bzhin du/ /sdom brtson dman pa slong ba na/ /slong ba'i tshe na nyes byas te/ /de longs spyod na'ang nyes byas so/ /dman pa la ni bos pa na/ /bzang po slong ba dus ji srid/ /nyes byas longs spyod pa la ni/ /zad byed ltung bar brjod pa yin/ /'o ma la bos sha dang zho/ /yang na 'o ma la ni mar/ /slong ba'i tshe na nyes byas te/ /zos na nad pa ma gtogs ltung / /dad ldan yo byad phun tshogs shing / /sbyin phyir gtong la 'jigs med pa/ /de ni yun rings bsod nams phyir/ /dang du len pa bkag pa med/ /gang tshe bslab pa 'di la khyod/ /bslab par bya zhes dge slong gis/ /rab bskul de tshe lan du gang / /de la byis pa sogs brjod smod/ /blo chung de ni ltung byed kyi/ /dbyug pas phog nas nges par 'gyel/ /'jigs ltung 'bar ba'i sgo nas ni/ /dmyal ba'i me yis g.yengs par gyur/ /byis pa zhes bya ngan sems can/ /rmongs pa mdo sogs mi mkhas pa/ /mi gsal 'dul ba'i tshig la ste/ /mi mkhas de yi don la'o/ /byis pa rmongs sogs tshig las ni/ /re re yis kyang bzlog pa na/ /dmyal ba'i mer ni 'jug byed pa'i/ /ltung byed kyis ni dge slong ltung / /de yis de tshig bzung nas ni/ /mkhas pa dag la dri bar bya/ /mkhas pa'i tshig gis bya ba ste/ /long ba rnams kyis tshad ma de/ /yang na brdzun pa nyid du ni/ /byis pa la sogs tshig gis kyang / /mkhas pa min yang bsgo ba na/ /bden don smra na nyes pa med/ /phan tshun mi mthun dge slong gang / /glags skabs tshol zhing co 'dri na/ /bya rog nyan rnas 'dug na ni/ /de yang ltung byed yang dag gnas/ /gnas khang la sogs bsam gtan dag /byed tshe sgra brda ma byas par/ / zhugs pas sgra don gtso bo ni/ /ma thos sgra nyan nyes byas 'gyur/ /de ltar khang bzangs skas dang sgo/ /lam du 'jug tshe tshul ldan la/ /ltung byed sngar bshad ji bzhin te/ /zhi bar bya phyir nyes pa med/ /gsol ba'i las la sogs pa yi/ /chos ni gtan la 'bebs pa'i gtam/ /byed tshe gzhan la ma smras par/ /sdom brtson de bor 'gro mi bya/ /las kyi gegs su ma gyur tam/ /zhes bsams rab tu bsgo bar bya/ /de ltar mi byed dge slong ni/ /myur du ltung byed rgya mtshor ltung / /ma gus pa la ltung byed de/ /dge 'dun dang ni gang zag gnyis/ /dge 'dun la ni ltung byed brjod/ /gang zag dag la nyes byas so/ /dge 'dun nang na dge skos kyi/ /tshig ni rab tu bzlog pa yang / /ltung byed bla ma'i dge 'dun dang / /rgan po gang zag gzhan la min/ /don med pa yi tshig la ni/ /rigs pas shad kyis sbyang ba yis/ /zlog byed smra ba po la 'dir/ /ltung ba med par gsungs pa yin/ /'bru 'am bcos pa'i chang dag ni/ /ku sha'i rtse mo tsam yang spang / /'di dag 'thung ngam ster na yang / /gnyis ka bag med khang chen yin/ / kha yi nad la mkhur phug tu/ /bsrel ba tsam la nyes pa med/ /sman pa'i ngag gis 'thung bar ni/ /srog la bab kyang 'dod mi bya/ /phabs dang 'bras phye zan gyi tshogs/ /rnam 'gyur bye brag las skyes pa/ /'jig rten btung ba'i khyad par gang / /de ni 'bru yi chang zhes bya/ / sdong bu me tog 'bras rnams kyi/ /khu ba rnams ni yongs gyur pa/ /bcos pa'i chang du nges bstan te/ /sbrang rtsi rgun sogs las byung ba'o/ /gang tshe ma red nyams pa yis/ /myos byed nus pa zad pa na/ /chang gi rgyu mtshan spangs pa'i phyir/ /'thungs kyang de tshe nyes pa med/ /su lu ka dang zho ga chu/ /sug ta skyur po btsags nas ni/ /chu bsres btung ba'i don du ni/ /dus min par yang bkag pa med/ /'bru chang skyur por gang gyur pa/ /su lu kar ni yongs su grags/ /bcos chang skyur por gang gyur pa/ /sug ta zhes byar brjod pa'o/ / ko tra ba sogs bkag pa'i phyir/ /'bru chang bcos pa'i chang zhes smos/ /ma red nyams la chang gi ni/ /dngos po bzlog phyir myos 'gyur smos/ /chang gi mdog dang de bzhin dri/ /ro dang myong ba dag gis kyang / /gal te myos zad chang gi ni/ /dngos med nyes byas gzhir 'dod do/ / de ltar kha dog la sogs pa/ /gsum gnyis gcig 'thung myos nus zad/ /gsum gnyis de bzhin gcig pu la/ /myos pa'i nus med nyes byas rnams/ /rtsa ba sdong bu me tog 'bras/ /'dab ma yang ni myos byed dang / /phabs dang zan chang bsres pa dag /zos na 'gal tshabs can du 'gyur/ / sdom brtson grogs yod ma smras par/ /sdom gnas dus min grong 'jug na/ /de 'dra'i rkyen la nyes pa med/ /gzhan du zad pa thob par 'gyur/ /nyi ma phyed kyi mtshams gnas par/ /phyi ma'i skya rengs ma shar bar/ /dus ma yin zhes 'dod pa ste/ /dus dang dus min mkhas pas so/ /dge slong dus min 'jug byed cing / /dus min dus su 'du shes dang / /the tshom gyis kyang rnam par 'joms/ /dus la dus min 'du shes dang / /the tshom za na nyes byas yin/ /khyim pas khyim du dge slong rnams/ /gang phyir mgron du bos pa na/ / nam yang khyim gzhan dag tu ni/ /de ni de ltar 'gro mi bya/ /'phags pa'i tshogs la ci bder ni/ /bden pas gdugs tshod gsol smras nas/ /khyim bdag gis kyang gnang na der/ /song ba la yang nyes pa med/ /gang zhig rgyal po'i sgo gtan nam/ /de yi nye 'khor nyid dang yang / /skya rengs tha ma ma shar 'das/ /bder gnas de yang sdig byed yin/ /grong khyer rgyal po'i pho brang dang / /gsum pa btsun mo'i 'khor dag gi /sgo gtan de dang nye ba na/ /nye 'khor zhes ni brjod pa yin/ /dge slong nam ni ma langs par/ /ma langs pa yi 'du shes kyis/ /grong khyer sgo gtan 'das pa la/ /sdom brtson nyes byas bskyed par 'gyur/ /mi yi bdag po'i sgo 'am ni/ /btsun mo'i 'khor du 'das pa la/ /ma langs de ru 'du shes sam/ /the tshom gyis kyang zad lhung reg /cig shos dag tu 'du shes pas/ / thams cad la ni nyes byas so/ /rin chen ma bsdus zhes bya ni/ /sba brtul ma byas pa la brjod/ /zla ba phyed phyed yang dang yang / /so sor thar pa thos nas kyang / /'di dag mdor ni gtogs pa dang / /chos su rang byung gis bstan pa/ /ji bzhin rnam gzhag de byas dag /ma lus bdag gis da gdod shes/ /de ltar go byed tshul 'chos can/ /sdom brtson de ni ltung byed 'dod/ /rus pa ba so rwa yi ni/ /rang bzhin khab ral gang zhig byed/ /blo ngan de 'dir ltung byed kyi/ /chu srin kha ru ltung 'dod yin/ /de yis khab ral bcag nas ni/ /ltung ba de ni bshags bya ste/ /rigs pa'i khab ral byed de la/ /bya ba'i cho ga 'di yin te/ /snu gu dang ni chang ba yi/ /rnam pa de dang 'tsham pa'i tshad/ /khab dang gri gu yang dag ldan/ /de las gzhan du nam yang min/ /khab kyang zangs ma 'khar ba dang / /ra gan lcags dang rnam pa bzhi/ /gri gu lcags nyid kho nar gsungs/ /de la rab 'bring tha mar 'dod/ /rab tshad sor ni brgyad shes te/ /tha ma yang ni sor bzhi yin/ /bya gag gshog pa'i rnam pa ni/ /gri gu'i dbyibs su bya ba yin/ /gang tshe grong gzhan 'gro ba na/ /dge slong rings par gyur kyang der/ /khab kyi bslab bya bsrung ba'i phyir/ /gcig tsam nges par khyer bar bya/ /dge 'dun khri dang khri'u sogs/ /byed na bder gshegs sor gyis ni/ /rkang pa la ni sor brgyad bya/ /lhag par dge slong mi bya'o/ /bde bar gshegs pa'i sor brgyad la/ /khru gang tshad du 'dod pa yin/ /de las lhag pa dge slong gis/ /bcad nas ltung ba so sor bshags/ /tho mtshams don du dge slong gis/ /dge 'dun mal stan la sogs la/ /shing bal la sogs bdal mi bya/ /bdal na de zad ltung bar 'gyur/ /ra bal lug bal ka sha dang / /shal ma la yi bal yang ste/ /dngos po de ni bsdus nas su/ /ltung bshags par bya ba yin/ /steng du 'grems par byed pa gang / /de 'dir bdal bar shes par bya/ /gang dang 'brel pas dge slong gi/ /gos dag mdzes par mi 'gyur ba'o/ /srid du bde bar gshegs pa yi/ /mtho gsum de las lhag par min/ /zheng du phyed dang gnyis yod de/ /brtul zhugs can gyis gdeng ba bya/ /lhag pa bcad nas ltung ba ni/ /gang la bshags par byed pa na/ /tshul ldan des kyang khyod kyi 'di/ /bcad dam zhes ni dri bar bya/ /'di nyid dbang byas bzhi dang gnyis/ /chu dang zheng du bsngags pa ste/ /dge slong g.yan pa dgab pa ni/ /de las lhag na ltung byed de/ /dbyar gos ras chen zhes bya ba/ /srid du drug yin shes par bya/ /rgyar ni phyed dang gsum yin te/ /gang phyir ston pa'i mtho yi'o/ /bde bar gshegs pa'i chos gos kyi/ /tshad du chos gos mi bya ste/ /mnyam pa 'am ni lhag par yang / /de la mtho ni bcu dang drug /bslab pa nyams byed byis pa gang / /mi zad ngan song gsum dag tu/ /des ltung 'jigs brgya bskyed pas na/ /de phyir ltung byed ces bya'o/ /ltung byed yang dag bshad nas kyang / /de yi rjes thogs brjod par bya/ /rang gi mtshan nyid dbye ba yis/ /so sor bshags pa rnam pa bzhi/ /sdom brtson rang gi spyod yul du/ /nye du ma yin dge slong ma/ /de las bsod snyoms blangs nas ni/ /zos na so sor bshags pa yin/ /khyim gang dag tu dge slong rnams/ /gsol tshe dge slong ma gang zhig /'di la mar sbyin 'di dag la/ /zas sogs byin zhes gal te smra/ /dge slong rnams ni zan za'i bar/ /sring mo ma smra zhes ni bzlog /de las gcig kyang mi smra na/ /kun la so sor bshags pa yin/ /nang dang bar dang phyi gnas ni/ /sum char gdugs tshod gsol rnams te/ /dge 'dun gyis ni gnas brten nam/ /yang na gsar bu kun gyis brjod/ /dge slong rnams ni gsol gyi bar/ /'di ni ma smra 'dug ces so/ /dge slong ma la ma bzlog gam/ /zhes ni phyi rol gnas pas dri/ /bar nas bra ba rnams kyis ni/ /ma dris zos na ltung ba yin/ /phyi rol ba la nyes byas te/ /gal te gcig kyang mi smra na/ /dge 'dun gnas brtan la sogs pa/ /kun la so sor bshags pa yin/ /de yang ltung byed ji bzhin du/ /sdom brtson gcig gi mdun du bshags/ /dge slong ma yi dbyar khang du/ /bsko sham byed la bkag pa med/ /de ni de yi rang rdzas te/ /khang bzangs rgya chen 'gar yang ngo / /dge 'dun mthun pas slob pa yi/ /khyim gang bslab pa'i sdom can gyis/ /dge slong bru bas nyen na yang / /mgron du ma bos zan mi bza'/ /mar dang zho dang 'o ma dang / /sbrang rtsi bu ram btung ba dang / /nya sha sha dang sha skam dang / mar dang bcas pa bkag pa yin/ /lo ma me tog 'bras bu sogs/ /dang du len pa 'gal ba med/ /dam pa'i chos ni ston pa na/ /mal stan spyod pa la yang ngo / /sdom brtson khyim gzhan zos nas ni/ /bza' lhag khyim du byis pa la/ /dum bur bgos te sbyin bya ste/ /tshul ldan la ni de dag dga'/ /gang zhig 'jigs dang bcas pa yi/ /dgon pa'i gtsug lag khang gnas pa'i/ /dge slong phyi rol 'ongs nas ni/ /bza' ba len pa bkag pa yin/ /de thob der ram gzhan du 'am/ /gtsug lag khang du mi za yang / /nags nyul nas ni ma gtogs te/ /dge slong la ni ltung bar 'gyur/ /de ltar byas na ci rigs par/ /kun dga' ra bar sdom brtson mdun/ /bdag la mi rigs smad pa'i gnas/ /byung ngo zhes ni so sor bshags/ /de ltar so sor bshags rnam bzhi/ /gang du ji bzhin bshad nas ni/ /da ni gang zhig bslab pa'i chos/ /mang po'i skabs son bstan par bya/ /sham thabs steng gi gos gyon pa/ /de ni shin tu zlum por bgo /ha cang rtsengs pa ma yin dang / /ha cang 'jol ba ma yin brjod/ /glang po'i sna ltar ma yin dang / /ta la'i lo ma ltar mi 'dod/ /sbrul mgo'i gdengs ka lta bu dang / /sbrul gyi mgo bo nyid ltar min/ /brtul zhugs ldan pas sham thabs ni/ /'bru yi phur ma ltar mi bgo /stod g.yogs stobs kyi lha bzhin du/ /bgo bar yang ni mi bya'o/ /shin tu bsdams dang legs par bgo /gnya' shing gang tsam lta ba dang / /lta ba mi yengs pa yi ni/ /brtul zhugs can gyis grong 'jug bya/ /mgo bo g.yogs dang brdzes pa yis/ /grong du 'jug par mi bya'o/ /mi gzar ba dang gnya' gong gzed/ /cog pu de bzhin dkur mi brten/ /sdom brtson mchong sogs mi bya zhing / / lag pa mi sbrel phrag mi sprad/ /lus dang lag pa mgo bo dag /bsgyur zhing kyogs pas grong mi 'jug /ma brtags pa dang ma bsgo dang / /lus kun gyi ni ljid mi dbab/ /rkang pa yis ni rkang pa dang / /long bus long bu bsnol mi bya/ /rkang pa mi rkyong mi dgug cing / /mi gdang byin pa bsnol mi bya/ /brla yang phan tshun bsnol mi bya/ /khyim du mnyam gzhag min mi 'dug /lhung bzed la lta mthar chags dang / /tshod ma mnyam dang byur bu yis/ /yongs su blang bar mi bya zhing / /zas steng lhung bzed mi gzhag go/ /bza' ba nye bar mi stobs par/ /lhung bzed sngar bzed mi bya'o/ /slar yang 'dod pas tshod ma dang / /zan ni phan tshun dgab mi bya/ /ro la chags pas mi bza' zhing / /shin tu mang po ma yin no/ /zas la ma gus brnyas bcas dang / /kham ni che min chung ma yin/ /kham ni ma bzas bar du ni/ /kha gdang mi bya 'gram mi bskyod/ /dge slong kha bkang smra mi bya/ /zas la sgra ni gsal ches min/ /tsug tsug zhes kyang mi bya ste/ /phu phu la sogs kun mi bya/ /dge slong zas la 'phyas mi gdags/ /tha dad phye nas mi bza' ba'o/ /'gram pa zas kyis mi dgang zhing / / kham ni 'phro yis gcad mi bya/ /nam yang zas ni za ba'i tshe/ /lce brkyang ba yis ma yin no/ /lag pa dag ni mi ldag cing / /lhung bzed kyang ni byog mi bya/ /lag pa sbrug par mi bya ste/ /lhung bzed bskyoms par mi bya'o/ /mchod rten rnam par byas nas ni/ /bcom ste bza' bar mi bya'o/ /drung na 'dug pa'i lhung bzed la/ /smad pa'i don du mi lta'o/ /lag pa zas dang bcas pa yis/ /chu snod dag la gzung mi bya/ /zas dang bcas pa'i chu yis ni/ /drung na gnas la gtor mi bya/ /zas bcas chu dang zas lhag ni/ /lhung bzed kyis ni dor mi bya/ / khyim pas rjes su gnang ba na/ /khyim gzhan du ni nyes pa med/ /gad kha dang ni g.yang kha dang / /dkan ngos lhung bzed mi bzhag cing / /langs nas bkru bar mi bya'o/ /'bab chu drag tu 'bab pa yi/ /rgyun las bzlog nas lhung bzed kyis/ /chu ni blang bar mi bya'o/ /lhung bzed kun tu mi rnyed phyir/ /'dug la 'greng bas chos bshad min/ /nyal ba la ni 'dug pas min/ /'dug stan dma' mos mthon po dang / /phyi bzhin 'ongs pas chos mi bstan/ /de bzhin lam min 'dug nas kyang / /lam nas 'gro ba la yang min/ /mgo la zhwa 'am cod pan thogs/ /phreng ba'am gtsug tor can la min/ /glang chen rta dang khyogs la zhon/ /mchil lham gyon pa dag dang ni/ /gdugs 'dzin pa dang dbyug thogs dang / /mgo bo g.yogs pa la sogs pas/ /gnas pa la ni mi rung ste/ /dge slong dag gis chos bshad pa/ /nad pa la ni 'gal ba med/ /sdom brtson rkyen med langs nas ni/ /bshang gci dor ba'i bya ba dag /mi bya lus ni bder gnas pas/ /byas nas 'gal tshabs can du 'gyur/ /gang yang sdom ldan der gnas pas/ /chu 'am rtswa sngon dag la yang / /bshang gci dang ni skyugs pa dang / / mchil ma ngar snabs mi dor ro/ /ci ste 'dor byed de la 'dir/ /nyes byas bskyed par the tshom med/ /de 'dra'i rkyen dag byung na ni/ /sdom brtson ltung ba yod ma yin/ /rkyen ma gtogs par mi gang las/ /lhag par shing la 'dzeg mi bya/ /kun mkhyen yab kyis bstan pa yi/ /spyod pas rtag tu gnas pa ste/ /'greng dang nyal dang 'dug pa dang / /'chag pa la yang de bzhin te/ /gang phyir bdag ni mtha' yas yon tan 'byung gnas kyi/ /yab gcig bde gshegs sras yin des bstan spyod yul ni/ /chos kun rang bzhin de sems zhi byed rtogs par yang / / 'dod pas bdag nyid phyi rol g.yo ba bzlog par bya/ /de ltar de dag thams cad du/ /ji skad gsungs pa'i bslab pa spyad/ /'di ni bslab par bya ba'i chos/ /mang po mdor bsdus bstan pa yin/ /de rjes bdun gyi dbang byas nas/ /zhi byed bstan pa de 'dir brjod/ /rtsod pa 'khrug long rtag tu brjod/ /zhi byed de yi rjes kyi chos/ /thams cad gang zag khyad par las/ /zhi byed de ni rnam pa bdun/ /gang zhig lus ngag bsdams pa yis/ /gzu bo yang dag spro bya ste/ /dge 'dun mtha' dag dbus su de/ /tshul bzhin legs par 'grang bar bya/ /'dun dang zhe sdang gti mug 'jigs/ /rnam spang yang dag rtsod pa dag /byed 'dod de la sbed pa dang / /sped pa yang ni shes pa'o/ /gzu bo rtsod pa mngon sum dang / /gang zag de yang mngon sum brjod/ /tshul bzhin de chos mngon sum dang / /ston pa yi ni bka' bzhin te/ /mngon sum du ni zhi byed 'di/ /mngon sum 'dul bar brjod de gcig /blo dman rnams kyis dran pa'i phyir/ /'di ni phyogs tsam bstan pa yin/ /gang yang dgu 'am bcu yis sam/ /lnga 'am de las lhag pas kyang / /gang mang gis ni rtsod pa dag /zhi byed de ni gang mang brjod/ /gal te gzu bo gang mang dang / /gang la mdo sde 'dul ba yi/ /bstan bcos shes pa'i gnas brtan nam/ /gzhan gyis kyang rtsod ma zhi na/ /tshogs la dbul lo tshogs kyis kyang / /chos lnga ldan pas yang dag bsko/ /sngar bzhin 'dir yang tshul shing brim/ / gang des tshul shing bya ba ni/ /chos dang chos min ston byed gnyis/ /chos kyi tshul shing mchod 'os te/ /drang po dri zhim reg na bde/ /cig shos de las bzlog pa ste/ /yon po dri ngan reg bya rtsub/ /chos kyi lag pa g.yas su bcang / /cig shos steng nas bkag ste'o/ /dge 'dun yang ni 'dug pa na/ /nan tan ldan pas lan gsum par/ /chos kyi tshul shing dang po ste/ /gnas brtan smos nas rab tu brim/ /gal te 'dir ni chos kyi brda/ /dge ba rnams ni mang gyur na/ /tshul shing de yis chos kyi don/ /rtsod pa de yis go bar bya/ /de la skyor byed dge slong la/ /sngar bshad pa yis ltung bar 'gyur/ /slar yang cig shos de lta na'ang / /de ni zhi bar brjod par bya/ /chos min las skyor dge slong la/ /de lta na yang nyes byas te/ /gang mang zhes ni grags pa yi/ /'dul ba 'di ni dpa' bos gsungs/ /'di ni rtsod dang 'khrug long las/ /brtsams pa'i 'dul ba gnyis par grags/ /gsum pa mi gdams rtsod zhi byed/ /'dul ba rig pa rnams kyis gsungs/ /mngon sum 'dul dang de bzhin du/ /dran pa ma smyos pa yis 'dul/ /mngon sum 'dul ba snga ma bzhin/ / snga ma ji lta de ltar brjod/ /dran 'dul shes par bya ba ni/ /gyad bu nor la sogs pa'i tshig /dge slong ma ni mdza' mos sngon/ /ston pa la zhus ji bzhin te/ /tshul 'dis dge slong khyed cag gis/ /gyad bu nor la dran 'dul sbyin/ /'di ltar yang ni sbyin bya ste/ /des ni rgan pa'i mtha' logs brjod/ /gson cig dge 'dun btsun pa rnams/ /bdag la tshul min sogs kyis bskur/ /de ni tshogs la dran pa yis/ /'dul ba bdag la gnang zhes gsol/ /de ltar lan gsum brjod rjes la/ /dge slong gcig gis gsol byas nas/ /chos dang ldan zhing cho ga bzhin/ /dran pas 'dul ba de la sbyin/ /ma smyos 'dul ba gsungs pa ni/ /bye skyes bzhin du de tshe dag /sems 'khrugs pa'am smyos pa'am/ /blo ni tshor bas gzir ba ste/ /des na sdom brtson rnams kyis bdag /dman phyir yang dang yang du bskul/ / ma myos 'dul ba dge 'dun la/ /gsan du gsol zhes lan gsum brjod/ /ma myos 'dul ba 'di la yang / /gsol ba sngon brjod las kyis sbyin/ /de ltar tshul des rtsod zhi ba/ /ma myos pa yi 'dul bas so/ /ltung phyir rtsod pa dag la yang / /'dul ba bzhi yis myur du zhi/ /yang dag khas blangs mngon sum dang / /rtswa bkram de nyid tshul la ni/ /ltung bar bcas pa glengs pa'am/ /ma glengs na yang dge slong gis/ /dge slong mdun na tsog pu yis/ /'dug ste thal sbyar phyag byas nas/ /brjod de dgongs shig khyod kyi mdun/ / ltung ba bshags brjod des kyang der/ /mthong ngam zhes dri mthong lan smra/ /phyin ci ma log de yi tshig /phyin chad ltung la dga' min dri/ /dga' bar mi byed ces tshig brjod/ /thabs yin zhes kyang nges brjod de/ /khas blangs rtsod de zhi ba'o/ /phas pham la sogs tshogs mchog la/ /khas blangs 'dul ba gsol ba na/ /de ltar rtsod de zhi don du/ /khas blangs nyid du mkhas pas brjod/ /'di ltar yangs pa can du sngon/ /dge slong nag pos chos gos dag /khyer song dge slong yangs can rnams/ /mnyan yod 'ongs pa las gyur te/ /mngon sum rtsod pas 'gro ba la/ /mngon sum 'dul ba yang dag bstan/ /mngon sum 'dul ba'i de nyid 'di/ /slar yang rab bshad bzlas pas so/ /phan tshun rtsod pas 'grel pa la/ /rtswa bkram lta bur rab tu gsungs/ /gnas brtan gzhan zhig song na'ang der/ /'di ltar yang dag rjes bstan bya/ /khyed cag rtsod la mngon dga' zhing / /slar ldog byed pa'ang dka' bar gnas/ /khyod 'dir legs pa rnyed min te/ /'di 'dra dge slong yin nam ci/ /gzhan yang khyed dang bdag cag la/ /nges par ltung ba gang byung ba/ /sbom po'am mthar thug spangs nas ni/ /de ni nyer zhi spro bas gnas/ /de la des smras mi nyan pa'ang / /min na de tshe rang bzhin gnas/ /cig shos kyi ni phyogs la yang / /de ni sngar bzhin brjod par bya/ /de yang gal te ma zhi ba'i/ /sems ldan de tshig nyan min na/ / rtsod de nye bar zhi ba ni/ /rtswa bkram tshul gang nyid kyis so/ /ltung ba khas blangs pa la yang / /slar yang log par shes pa yis/ /tshogs nang de slar khas mi len/ /dge slong me bzhi ji bzhin du/ /'dir yang de yi ngo bo nyid/ /tshol bas de 'dul dge slong la/ /sbyin zhes gzhan la phan byed pa'i/ /'gro ba rnams kyi rtsa lag gsungs/ /des kyang de ltar rgan pa yi/ /mthar ni kun la gsol bar bya/ /de la de bzhin tshogs kyis kyang / /cho ga thams cad snga ma bzhin/ /bya phyir rtsod la dge slong gi/ /tshogs kyis kun gyi zhi ba thob/ /mi mthun byed min kha cig la/ /zhi byed de 'dir shes par bya/ /'di ni so sor thar pa yi/ /mdo don mdor bsdus tsam zhig ste/ /gzhi la sogs par gang gsungs pa/ /de yang ci nus brjod par bya/ /rigs ngan reg 'os ma yin dang / /chang 'tshong khyim dang rgyal po'i khab/ / smad 'tshong khyim du brjod pa ste/ /lnga po dge slong spyod yul min/ /grangs can la sogs brdzun pa yi/ /bstan bcos rgyun du bden pa'i blos/ /klog par byed na de dag la/ /bsod snyoms dug tu 'gyur ba yin/ /mi bzad ngan song nad kyi sman/ /bder gshegs bstan bcos shes nas ni/ /sun dbyung ched du gzhan dag gi /bstan bcos kyang ni blta bar bya/ /gang phyir kun mkhyen dag pa'i bka'/ /sbrang rtsi'i tshogs chen yod bzhin du/ /su zhig mu stegs kyis bstan pa'i/ /nim pa tsha ba'i ro myong byed/ /khri'u rkang pa ri mo can/ /mu stegs rgyal mtshan nyid kyang ste/ /snod kyang ha cang mang ba dang / /sna tshogs bkra ba spang bar bya/ /skyob pas na dang rgan po la/ /bzhon pa thams cad rjes gnang mdzad/ /chad pa'i las kyi dus dag la/ /gsang ba'i gnas ni bkri ba yang / /khur gyi rim pas 'gro ba dang / / dbyig pa dang ni dra ba sogs/ /bsam gtan klog dang ldan rnams la/ /bcas pa gus pas sngon 'gro bya/ /mig sman mchu yi byi dor dang / /de bzhin chos gos dri zhim dgod/ /sen mo 'chos dang mgo bo'i khrus/ /gdugs dang mchil lham khra bo bkag /lo ma 'am ni smyig ma nyid/ /'di nyid sdom brtson dag gis gdugs/ /rtag tu grong gi dbus su ni/ /de yi yu ba bsgreng mi bya/ /yu ba gdugs kyi tshad nyid de/ /nam yang de las ring du min/ /kha gdang tshe ni nam du yang / /rang gi lag la sogs pas dgab/ /sdom brtson so yi rus pa ni/ /bstan te bgad par mi bya'o/ /sgra dbyangs chung dus ston pa yi/ /yon tan brjod bya dam chos kyi/ /dbyangs ni mngon par mi shes na/ /dben par slob pa bkag pa med/ /ston pa'i dam chos mdzes phyir te/ /nyon mongs bcas pa'i sems kyis min/ /dge slong dge slong ma la sogs/ /rnam pa lnga la ston pa yis/ /dbyar gnas pa dang dbyar gyi mthar/ /dgag dbye bya bar rjes su gnang / /bslab pa mtha' dag blangs pa gang / /dge slong dge slong mar shes te/ /bcu yi gnas la dge tshul nyid/ /dge tshul ma yang de bzhin no/ /gcig pu lam du mi 'gro zhing / /chu bo'i pha rol rkyal mi bya/ /skyes pa la ni mi reg cing / /de dang lhan cig 'dug mi bya/ /kha na ma tho mi bcab cing / /smyan du 'gyur ba mi bya ste/ /'di dag dge slong ma rnams kyi/ /chos drug ces ni yongs su bsgrags/ /sa le sbram ni len pa dang / / gsang ba'i gnas kyi spu 'dreg dang / /sa rnams brko bar byed pa dang / /rtswa sngon la sogs gcod pa dang / /byin len ma byas zas len dang / /gsog 'jog byas pa za ba las/ /ldog pa zhes bya de bzhin gzhan/ /rjes mthun chos ni drug tu 'dod/ /gsung rab las ni gsungs pa yi/ /dge chos bcu gnyis ldan pa yis/ /'jig rten mgon po'i bstan pa la/ /dge slob ma yi ming can yin/ /dge 'dun dag gi rgan rabs kyis/ /'bad pas tshes grangs dran par bya/ /gtsug lag khang skyong dag gis kyang / /nyin re tshogs kyi thad du brjod/ /dus rnams yang dag 'pho ba na/ /zla phyed gsum gsum rjes la chad/ /lo la zhag res ma tshang ba'i/ /zla ba drug tu bstan pa yin/ /lo dang zla ba zla shol dag /rgyal po'i bka' yis kyang ni bsngags/ /bka' btsan grags ldan shes rab can/ /dpung ldan de yi rjes 'brang bya/ /snod dang lag pa legs bkrus nas/ /brtul zhugs can gyis byug ris bya/ /ci nas nyi ma'i dkyil 'khor dang / /mchod rten lta bur mi bya'o/ /sdom brtson lam du 'gro ba'i tshe/ /gang du lha yi gzugs dag mthong / /de bzhin gshegs pa'i tshigs bcad ni/ /gus pas se gol gtogs te brjod/ /de dag phan dang gnod pa can/ /rgyal bas nyes byas dag tu bcas/ /des na bslab pa rjes bsrung bas/ /rtag tu dran par bya ba yin/ /lha yi gzugs ni bya ba ste/ /de yi mchod pa rang nyid kyis/ /bslab pa yang dag thob pa'am/ /sdom gnas dge slong gzhan gyis so/ /dgos grub ched du gzugs de la/ /gtor ma me tog la sogs sbyin/ /lha rnams rang gi gnas su ni/ /mi mthun pa dag mi ston phyir/ /'dus pa chen po'i mdo zhes par/ /lha rnams kyis ni rjes bsngags pas/ /sangs rgyas 'khor du gtogs pa la/ /ci nas gnod pa mi byed gsungs/ /mgon pos sems can thams cad la/ /kun du byams pa rab bsngags te/ /gang la sa bon de yod na/ /sred pa las byung sdug bsngal med/ /gang zhig lha ni gang dag la/ /gus pas mchod byed de la 'dir/ /'jig rten gnas pa gang yin du/ /srid pa'i longs spyod 'dod thob byed/ /gang zhig sangs rgyas skyabs song nas/ /rnam pa gzhan gyis gzhan bsten na/ /gsal por sems ni g.yo ba can/ /de brten 'bras bu ga la yod/ /yul 'khor dag gi bsod snyoms kyang / /'bar ba'i me mdag lta bur spyod/ /ngur smrig cha lugs tsam gyis ni/ /dge slong rtags sun 'byin pa yin/ /blo ngan dran pa'i don du ni/ /'dul ba la sogs bri bya ste/ /rang ming bdag gi ba dag ni/ /dgag phyir sbyin pa'i chos zhes bri/ /ma dad pa'am dad chung dag / tshul khrims can gyi bsro khang dang / /lus kyi dril phyi bsku mnye yi/ /las dag la ni rab tu bkag /khrims ldan gyis ni khrims 'chal la/ /bsnyen bkur phyag sogs mi bya'o/ /'di ni nye gnas skal med do/ /'di nyid bstan pa'i tsher ma yin/ / mkhan po dang ni slob dpon dang / /pha ma de bzhin nad pa dag /tshul khrims nyams kyang bsnyen bkur bya/ /de la med na nye gnas kyang / /bsod snyoms dngos po phyed dag kyang / /sdom ldan rnams kyis pha ma bgo /de dag dka' ba byed pa'o/ /rtag tu phan 'dogs kyang yin phyir/ /yongs su spyad bya 'di dag ni/ /sus kyang kun du bzlog mi bya/ /rkang pa'i mthil gyi bsku mnye dang / /khrus dang dril phyi sogs kyang ngo / /gal te de la g.yan pa'i nad/ /byung na long bu man chad du/ /'drud dang skud dang rkang pa dag /bkri ba la sogs pa yang ngo / / mchod phyir thogs pa'i se ral kha/ /rkang gdub dag kyang mi gdags te/ /rims la sogs pa zhi bya'i phyir/ /skud pa dpung pa g.yon par rung / /de ni nad dang bral ba na/ /rtsig pa la sogs khung bur gzhug /nges par sman pa'i man ngag gis/ /tsan+dan la sogs byug par bya/ /ma dad rigs can skye bo dang / /ci nas dad spong mi 'gyur bar/ /tsan+dan la sogs byugs nas ni/ /dben par 'dug gis phyi rol min/ /gal te kha cig nan tan gyis/ /dris byug bsod nams 'dod pa na/ /rtsig ngos maN+Dal byas nas ni/ /de yis mthong ba gsal phyir mnam/ /nam yang dri ni rkang par min/ /gal te dad pa can dag gis/ /khas blangs rjes thogs de yi tshe/ /chu mang po yis bkru bar bya/ /me tog mdzes shing dri zhim dag /rnyed de snom par 'dod pa na/ /mig gi ched du rnam bsams nas/ /bsnam gyis 'dod chags blos ma yin/ /gang su la yang mtshon cha dag / ma dad sems kyis sbyin mi bya/ /sman rnams sba phyir lcags dag las/ /byas pa'i sgo lcags bcang bar bya/ /zangs lcags ra gan sa dang ni/ /shing ngam zha nye rdo las byas/ /rgya dag thub pas gang zag dang / /tshogs la yang ni rjes su gnang / / gang zag la ni thod pa dang / /yan lag drug gi rus pas mtshan/ /dge 'dun dag la kun rdzob pa'i/ /chos kyi 'khor los rnam par mdzes/ /gsal mthong rung ba mi bcang ste/ /lhan cig spyod pa'i tshul ngan bkag /sbyin bdag dad pa spel ba'i phyir/ /bcos pa nyid do tshogs kyi yang / /me long ngam ni chu sogs la/ /rang gi bzhin ni blta mi bya/ /lus kyi na tshod mtshan ma'am/ /rma dag lta phyir nyes pa med/ /rang gi lus skyes mi dgug cing / /rdo la sogs pas mi gzhom mo/ /'dod chags me ni 'phel ba na/ /mi sdug chu yis zhi bar bya/ /glang chen rmig rjes lta bu yi/ /sa yi rang bzhin rkang khrus snod/ /'od ma ta la'i lo ma yi/ /bsil yab kyang ni rnam pa gnyis/ /lo ma yal 'dab ras ma dag /sha na tha na bal gyi ste/ /sbrang ma la sogs zlog byed pa/ /rnam pa lnga ni rab tu gnang / / shing ngam skas la 'dzeg pa na/ /sham thabs mtha' sna bcing bar bya/ /lci ba'i khur ni dge slong gis/ /phal pa bzhin du bskur mi bya/ /so mangs sogs kyi yan lag mchog /bshad par bya ba ma yin no/ /mgo skyes lag pa dag gis kyang / /gyen du brdze bar mi bya'o/ / skra la rdul gyis gos pa na/ /lag pa'am ni gos kyis kyang / /mgo bo yongs su sbrug phyi ba/ /brtul zhugs ldan la nyes pa med/ /skad gsang ha cang che chung gis/ /thub pa'i bka' ni mi brjod de/ /brjod bya dang ni mi 'gal bar/ /yul skad dus dang rjes mthun bya/ /gtsug lag khang gi steng ngos kyi/ /byang dang nub kyi phyogs cha ru/ /bshang gci bya ba'i khang pa dag /bya ba yin te phal cher ro/ /gtsug lag khang gi nang gi ngos/ /lho dang shar gyi mtshams su ni/ /chu yi snod du nus ji bzhin/ /chu don gnyer ba rnams la sbyin/ /dge slong dam ni khyim pa yang / /rgan po sbrid pa byung ba la/ /tshe ring gyur cig ces brjod de/ /de dag tshe ring 'dod phyir ro/ /gsar bu la ni rgan po yis/ /a rog gya zhes brjod bya ste/ /gsar bu yis kyang rgan po la/ /lus kyis phyag ni bya ba yin/ /phyag mi bya dang mi blang dus/ /brtul ldan zas la 'khod pa dang / /'og gi lam ni mi gtsang dang / /gos gcig gis ni 'dug pa dang / /ma mid na yang gang zhig gis/ /kha ni zas kyis bkang pa la/ /phyag mi bya zhing des kyang ni/ /gzhan la phyag ni mi bya'o/ /gzhan yang phyag bya'i yul min yang / /sbom gu spyod pa la sogs yin/ /sangs rgyas dang ni sdom pas rgan/ /rtag tu dge slong phyag bya gnyis/ /bstan la dam par bya ba yi/ /dge slong phyag ni rnam pa gnyis/ /gcig ni dkyil 'khor lnga pa ste/ /gzhan gyi sgyid pa nas 'khyud yin/ /skra yi rang bzhin srad bu yis/ /lag 'gro gzung bar mi bya ste/ /zhi bas rang bzhin mi 'gro na/ /de ni bskrad pa'i sbyor ba bya// //bam po lnga pa/ /tha gu shin tu 'jam po yis/ /mgul par bcings te legs par dor/ /g.yang sa ma yin sa phyogs ni/ /'gro ba 'tshe ba med par ro/ /de bzhin gzhan la gnod med par/ /byi ba la sogs skye 'gro rnams/ /dal gyis bag yod rab bzung nas/ /'bad pas ci bder dor bar bya/ /bslab pa rjes bsrungs brtse ldan gyis/ /shig rnams dal gyis bzung nas ni/ /bsdus nas rtsig pa la sogs pa'i/ /bu gar snying rje can gyis gzhug / rtswa sngon stug po'i sa phyogs su/ /rtsa shig dag kyang dor bar bya/ /lhag ma gzhan yang ma snad par/ /rang gi spyod yul dag tu dor/ /che ba phul chad chung ngu phyed/ /'bring po de dag bar ma ste/ /'bru mar snod du nyer bstan pa/ /rnam gsum de las gang 'dod cing / / lam 'gro chos kyi gtam nyid dam/ /mi smra ba yis 'gro bar bya/ /ngal bso'i tshe na tshigs bcad 'don/ /mtshan mo'i gnas tshe rgyud gsum pa'o/ /khru ni brgya dang lnga bcu brgyad/ /che dang chung dang bar ma ste/ /rnam gsum bas mthar shes bya zhing / /gang la ji ltar rigs pas kyang / /chu rab che ba'i sa phyogs sam/ /chu yis khyab par yang ni rung / /rjes mthun nyid kyis khyer bya'am/ /mi khyer ba ni go rims bzhin/ /gal te sdom brtson dge slong ma/ /rnams la 'dul ba ston pa na/ /yol bas bar du gcad bya ste/ /gzhan du 'gal tshabs can du 'gyur/ /gal te rkun mas bor nas ni/ /yongs su ma bzung rnyed lta na/ /skye bos go byas khyer ba la/ /nam yang 'gal ba yod ma yin/ /kun dga' ra ba byed 'dod pas/ /gal te dge slong ljon shing btsugs/ /de yis lo lnga'i bar dag tu/ /gnas de mngon par blta bar bya/ /dge slong gis ni lhung bzed sogs/ /rtsod dang mna' ni dor mi rigs/ /khyim pa rnams ni sho be can/ /tshul ldan cho long ji ltar rung / /gang du sdom brtson bud med dam/ /des kyang sdom ldan mthong ba yis/ /chags skyes gyur na des de yis/ / spyod yul de ni myur du spang / /dge slong ma ni nyer 'ongs na/ /bla ma lta bar 'dod gyur cing / /dam chos mnyan par shes pa na/ /'dir legs 'dug ces brjod bya ste/ /so phag shing stan phyed tshal lam/ /gor bu dag gam srab mo yis/ /stan rung gzhan dag dge slong gi/ /mdun du dge slong ma yis min/ /dge slong rnams kyi mal stan gyi/ /lhag ma dge slong ma la gnang / /dman pa 'am ni 'bring po ste/ /bzang po nam yang ma yin no/ /dge slong dge slong ma rnams kyang / /phan tshun ltung ba bshags pa rnams/ /phan tshun du ni rang gi skyon/ /gang phyir sgrogs par ma nus na/ /ltung ba'i the tshom tshul 'di la/ /dge slong mas ni go bya'i phyir/ /dri'o bla ma'i 'du shes kyis/ /dge slong la ni phyogs gzhan du'o/ /gang tshe dge slong ma gang zhes/ /dge slong gnas su 'jug tshe dri/ /nad dang bcas pa ma yin na/ /shog ces des kyang brjod par bya/ /mdo sde chos mngon 'dul ba dang / /rgyu skar dang ni nyin zhag shes/ /dgon pa'i phan yon 'dod pa rnams/ /grong nas rgyang grags gnas par bya/ /nags khrod dben par 'dug pa la/ /nges par chom rkun dga' skyed phyir/ /'bru mar la sogs nyer mkho'i snod/ / mkhas pas nye bar gzhag par bya/ /tshul ldan sngar ni bzo shes kyis/ /rang gi bzo cha spang bar bya/ /sngon ni sman pa 'breg mkhan na/ /'chang bar byed la bkag pa med/ /'phangs pa'i tshe yang dge slong gis/ /brtson la dga' ba dor mi bya/ /rab byung brtson 'grus ngo bo nyid/ / de spangs 'gal tshabs can du 'gyur/ /brtson 'grus can yang spyod bcas gang / /yang dag rjes su bstan par bya/ /de med de la lta ba dang / /dad dang sgom pa yod ma yin/ /man ngag dang ni bral ba'i sems/ /bsam gtan la ni sbyar mi bya/ /de sbyar 'khrul pa nyid gnas 'gyur/ /bsam gtan gang yin rnyed par dka'/ /gnas khang gos dang mal stan sogs/ /dri zhim spos kyis bdug pa dang / /me tog dri zhim bsam gtan dag /byed na'o 'di las gzhan du min/ /lag gi bla yis shing dag gi/ /mtshon gyi las la sogs pa yang / / shing drung la sogs mi mkho ba/ /de yis byin na nyes pa med/ /rab zhi kun spyod la mkhas pa/ /spyod yul gyur na 'bad pa yis/ /de ni lhan cig gnas par bzung / /ma brtags par ni ma yin no/ /gal te chu dang me nang sogs/ /bud med gang dag 'chi 'gyur na/ /dge slong snying rje ldan pa yis/ /de 'don byed la nyes pa med/ /gzugs brnyan rnams kyi bzo dag ni/ /shes pas gang de 'dod pa na/ /sdom can gyis ni bya ba ste/ /'jig rten sems ni bsrung phyir ro/ /mkhar gyi sgo dang de bzhin du/ /khang bzangs dang ni khang bzangs sgor/ /bud med rnams dang lhan cig tu/ /'dug dang gtam sogs mi bya'o/ /de phyir gzugs sogs rnam lnga yi/ /'dod yon rtag tu spangs nas kyang / /rgyun du dran pa nyer gzhag gi /rnal 'byor rnams ni yang dag bsgom/ /gang phyir lam 'di 'das pa yi/ /sangs rgyas phan bzhed kun gyi ste/ /sangs rgyas rang sangs rgyas rnams dang / /nyan thos rnams kyi sngon 'gro yin/ /bla ma legs par rnam brtags nas/ /gnas ni cho ga bzhin du bzung / /bla mas kyang ni yongs brtags pa'i/ /gnas pa yongs su gzung bar bya/ /phan tshun skyon dang bcas pa yis/ / nges par 'gal tshabs can du 'gyur/ /gang gi gnyi ga dag kyang ni/ /phan tshun 'di ltar yongs su brtag /khrims ldan nad g.yog byed pa dang / /chos dang zang zing ser sna med/ /dus su 'doms pa'i bla ma ni/ /bla ma'i yon tan yang dag ldan/ /gnas pa'i tshul ldan shes rab can/ /dul zhing bzod dang ldan pa dang / /bla ma la ni rtag tu gus/ /bsam gtan klog pa'i las dang ldan/ /phyag mi byed dang rang dbang can/ /mkhan po dang yang phrad pa las/ /rjes su bstan pa mi slob cing / /de bzhin mi mthun phyogs la brten/ / 'di dag la ni gzhan des kyang / /gnas kyi ltos pa med pa yin/ /'di ni ngan par shes byas te/ /slar yang gzhan ni yang dag gzung / /gnyi gas ltos pa spangs pa la/ /gnas ni 'jig par brjod pa yin/ /gcig gis kyang ni ltos bcas na/ /slar yang gzhan ni mi gzung ngo / /gang du dgos pas 'gro ba na/ /slar yang phyir 'ong 'dod pa yis/ /gnas de la ni go byas te/ /snga ma nyid las gzhan mi btsal/ /gnas med dag gi zhag lnga'i bar/ /tshogs kyi rnyed pa dbang ba yin/ /gang phyir gnas kyang de tsam las/ /lhag pa rung ba ma yin no/ /sdom brtson gyis ni dge slong dag /dge 'dun gtsug lag khang dag las/ /mi dbyung chad pas gcad bya ste/ /dge slong gnas khang lnga dag yin/ /gnas ni bzlog par bya ba dang / /klog dang gdams ngag longs spyod dang / /yang dag smra ba dgag pa ste/ /chad pa rnam pa lnga zhes brjod/ /ci ste chad pa bzod nyid na/ /de la rjes su gnang bar 'os/ /mi 'os pa na gnyi ga la/ /de byed na ni 'gal tshabs can/ /ma dad le lo can dag dang / /gdug sems can dang tshig ngan can/ /sdig pa'i grogs dang ma gus pa'i/ / bzod pa blang bar mi bya'o/ /mthang gos dang bcas bla gos bskon/ /chu tshags snod dang yang dag bcas/ /bla mas legs par yongs brtags te/ /dge tshul yang ni bskrad par bya/ /gzhon pa la 'os yo byad drug /dge tshul de la byin nas su/ /bla mas bskrad par bya ba ste/ /min na bzod pa bya bar 'os/ /nges par de ni gnas med par/ /zhag gcig kyang ni 'dug mi bya/ /gzhan du lo lnga lon gyur cing / /'dul ba'i don rig lam du'o/ /gtsug lag khang gzhan phyin na ni/ /de yi zhag lnga yis kyang ni/ /gnas kyi slob dpon btsal bya ste/ /de med par ni 'dug mi bya/ /yan lag dril dang mtshon sogs kyi/ /las ni cho ga ji bzhin du/ /bla ma rnams kyi bya ba ste/ /gnas pa rnams kyi chos nyid do/ /bla ma yon tan shes pas kyang / /rang gi bya ba shes bya ste/ /bla ma dang ni slob mas kyang / /rtag tu yongs su bsrung bya yin/ /klog pa yi ni slob dpon la'ang / /mkhas pas nye gnas bya ba ste/ /kun spyod khyad par 'phags pa kun/ /gnas kyi slob dpon dag la bya/ /klog pa med par mi gnas shing / /gnas med par yang ma yin te/ /de lta'ang gnas kyi slob dpon la/ / sems ni rtag tu zhen par bya/ /sde snod gsum shes nyon mongs zad/ /lo bcu lon pa ma yin na/ /ston pa'i bka' ni mdun byas nas/ /des kyang gnas ni gzung bar bya/ /zla ba phyed dang de phyed la/ /brtson pas nyin re lan gsum du/ /ring dang nye bar gnas pa yi/ /gnas ster ba la phyag bya'o/ /gang zhig dpag tshad phyed dang gsum/ /gnas pas zla ba phyed na ste/ /de phyed de phyed gnas pa yi/ /lan gsum der gnas nyid kyis so/ /gal te dbyar ni phyi ma la/ /bla ma dus las 'das gyur na/ /so so'i rten gyis phan tshun du/ /bltas te yang ni gnas par bya/ /dbyar ni gnas par gyur pa na/ /gal te rgan po ma rnyed na/ /gnas ni gnyis pa med pa'i phyir/ /der ni gso sbyong mi bya'o/ /sdig pa'i sman gyi gso sbyong ni/ /dgag dbye byas nas yang ni bya/ /gso sbyong dag pa'i ched du ste/ /dgag dbye'i las kyang de dag nyid/ /phan tshun gdams pa'i don du ni/ /dgag dbye rjes su gnang ba yin/ /gso sbyong zla phyed re re yi/ /sdig rnams yongs su dag phyir ro/ /glo bur lhags dang gnyug mar gnas/ /mnyam mam lhag pa yin na yang / /rjes su bzlas pa'i gso sbyong bya/ /kha ba so ga dbyar rnams kyi/ /zla ba gnyis dang bzhi yi ni/ /mar ngo la ni bcu bzhi pa'i/ /gso sbyong sdom brtson dag gis bya/ /sa ga dang ni chu stod dang / /de bzhin khrums smad smin drug dang / /rgyal dang dbo zhes bya ba nyid/ /drug po'i mar ngo bcu bzhir brjod/ /de bzhin de las gzhan dag ni/ /bco brgyad bco lnga bar ni 'dod/ /glo bur lhag pa mang gyur cing / /cig shos dag ni nyung ba na/ /glo bur lhag pa'i yon tan can/ /de dag 'dod pas gso sbyong bya/ /dge 'dun thams cad ltung bcas na/ /dge slong 'dul ba shes pa yis/ /dga' gcugs kyis legs go byas nas/ /rab tu 'bad pas rim pa bzhin/ /tshangs pa mtshungs spyod mngon sum du/ /ji bzhin yang dag mthol bshags bya/ /de la bltas nas gzhan dag kyang / /de bzhin mkhas pas byed du gzhug /mtshams kyi mtha' ma mnan nas sam/ /la lar yang ni dkyil 'khor pa/ /de bzhin las ni thams cad la/ /mtshams ni bcad par rung ba yin/ /dge 'dun tshogs pa med gyur na/ /gang zag gcig gi mdun nyid du/ /byin gyis brlab po de yang ni/ /med na rang gi sems kyis brjod/ /de ltar byin gyis brlabs pa ni/ /brtul zhugs can gyi lhung bzed dang / /chos gos 'gyur ro sems kyis kyang / /de bzhin mgron du bos pa yang / /gang gi 'khor ni 'dul ba yi/ /cho ga la ni mkhas yod na/ /de la gtad nas kyang ni gnas/ /byin gyis brlabs pa 'am ci 'dod pa/ /bslab la gus shing 'jigs bcas la/ /ltung ba brtag pa'ang de dang 'dra/ /dgag dbye de ltar shes bya ste/ /de yang lnga yi tshogs kyis so/ /mthun par bsams pa bzang po yis/ /dgag dbye bya ba kho na ste/ /dga' bas tshangs pa mtshungs spyod pa/ /gzhan la so sor gus pas so/ /nyin zhag bdun nam brgyad dang ni/ /bcu rnams kyis ni dgag dbye dag /byed pa na ni 'khon can rnams/ /rab tu 'bad pas sbyang bar bya/ /las kyi phyir ni dkyil 'khor pa/ /bya'o mtha' mtshams bkrol nas kyang / /mtshams gcig tu ni ma 'dres pas/ /tshogs kyi las ni bya bar brjod/ /nyi shu yang na bcu'am lnga/ /dge slong bzhi zhes bya ba rnams/ /tshogs kyi phrin las 'di lta ste/ /'di dag tshogs zhes bya bar grags/ /dge 'dun kha skong sangs rgyas kyis/ /bya ba'i las ni 'ga' yang med/ /sangs rgyas dkon mchog dge 'dun las/ /tha dad de yi las de'i min/ /nyi shu yis ni dbyung ba ste/ /bcu yi tshogs kyis bsnyen par rdzogs/ /lnga rnams kyis ni dgag dbye ste/ /bzhi po rnams kyis gso sbyong ngo / /brjod pa la sogs cho ga bzhin/ /las ni gang du byed pa de/ /gnas zhes bya bar brjod pa ste/ /bzlog pa la ni gnas mi brtag /chos smra ba ni dag nyid de/ /dge slong mi smra'i yid ma bkag / 'di ni mu stegs skye bo dag /blun po sgrub pa spang phyir ro/ /mthong dang thos dang dogs pa yis/ /dngos po kun gyi bya ba ste/ /dbyar gnas pa na brtul zhugs can/ /gnas gsum gyis ni dgag dbye bya/ /bar chad ma gtogs gang du yang / /dgag dbye ma byas mi 'gro ste/ /me sogs bar chad byung ba na/ /rgya mtsho yang ni brgal bar bya/ /glags tshol phung khrol chom rkun dang / /rgyal po me yi bla ma rnams/ /'di dag gus pas nyan na ni/ /'dul ba mi bshad mi bya'o/ /dad pa can ni nor med dang / /dad chung rnams la de yod pa/ /rab tu mnyan phyir 'bad pa la/ / bshad par bya'o ltung ba med/ /mdo sde la sogs mkhas pa rnams/ /gzhag par bya bar rab tu grags/ /de dag las la mi bsko ste/ /'di nyid de dag nyid kyi las/ /mdo sde chos mngon 'dul ba rnams/ /'dzin dang tshogs la klog pa dang / /nad pa tshogs kyi rgan po ste/ /drug po dag las mi byed pa'o/ /dge slong mdo sogs mkhas pa la/ /lam phyed 'ongs pa thos pa na/ /ji srid dpag tshad phyed dang gsum/ /ba dan bsgreng sogs sngon 'gro bas/ /gaN+DI brdungs te dge 'dun gyis/ /rang gi nus sbyar bsu bar bya/ /'ongs nas dga' bas rnyed pa yang / / der dbul tshogs kyis kyang ni thob/ /gnas khang 'dug stan mal stan rnams/ /de dag gus pas rtag tu dbul/ /nye gnas la yang las su bsko/ /mi dbab par ni rab tu bshad/ /bslab pa 'cha' ba bder gshegs te/ /skrod pa la ni dge 'dun dbang / /dge 'dun gyis ni khros pa yis/ /rab byung bslab pa mi bca'o/ /dge 'dun bsam pa tha dad pas/ /byas na yang ni ma byas yin/ /gnyis med gsungs pa'i bslab pa ni/ /sus kyang gzhan du bya mi nus/ /gro zhun zla ba'i tshes gcig nas/ /snga ma'i dbyar de gtso bo yin/ /de nyid khrums stod zla ba yi/ /tshes gcig nas ni phyi mar grags/ /zla gsum dbyar ni 'gro ba yi/ /spyod pa dge slong rnams kyis spang / /bya rnams kyis kyang rang gi gnas/ /dbyar gyi dus su mi spong ngo / /chu stod can gyi zla phyed nas/ /kun nas nye phyir 'bad pa yis/ /gtsug lag khang rnams sbyong ba'i las/ /byi dor la sogs bya ba yin/ /bco lnga la ni ma lus pa/ /'dus nas kyang ni gnas mal dag /de stobs pa ni legs brtags nas/ /spro bar byas te kun nas bsko/ /'dun dang zhe sdang 'jigs rmongs pa/ /skyon rnams ring du spangs nas ni/ /gang zhig bstabs dang ma bstabs pa/ /ma lus pa ni shes pa bzung / /de nas gtsug lag khang skyong gis/ /khrims su bya bar rab tu bsgrags/ /mkhas pa yis ni bde ba la/ /reg par gnas pa'i ched du bya/ /gang zhig spro ba gzhi med pa/ /bzhad gad rtsod pa ma yin no/ /gnas 'di dag tu brims pa yi/ /tshul shing dag ni long zhes so/ /gsol ba 'ba' zhig bya ba ste/ /de ring tshes ni bco lnga la/ /dbyar gnas pa yi ched du ni/ /tshogs kyi tshul shing blang du gsol/ /de nas rgan rims ji bzhin du/ /tshul shing brims pa'i rjes la ni/ /gnas khang la sogs ci rigs par/ /sbyin no gnas mal dag kyang ngo / /dbyar ni nye ba'i dus na yang / /dge slong gis ni 'bad pas brtag /gnas dang spyod yul nyid kyang ste/ /yon tan grub par 'dod pas so/ /gnas khang na ni mkhas pa yis/ / tshangs pa mtshungs par spyod pa dang / /yon tan can dang thos pa 'dzin/ /snying rje can yid der mngon nas/ /thog mar ltung ba mi 'byin cing / /byung ba slar yang 'chos byed pa/ /de la sogs pa'i rnam pa yis/ /gnas ni yongs su brtag par bya/ /sman dang bsod snyoms dag kyang ni/ /gang du snying las chung dus rnyed/ /smad 'tshong tshogs kyis gang ba dag /ma yin der ni spyod yul dag /steng g.yogs can gnas dge slong gi /mdun du dge slong tsog pur 'dug /'di la dbyar gnas thob bya'i phyir/ /ji lta de ltar nges par brjod/ /sbyin bdag dang ni nye gnas grong / /zhal ta ba dang nad g.yog smos/ /bdag ming 'di zhes bgyi ba yis/ /zla gsum dbyar gnas snga ma'am/ /phyi ma 'di la gnas bgyid de/ /ral dang grum pa bcos pa'i phyir/ /'di nyid bdag gi dbyar yin te/ /phyi rol dbyar gnas ma yin no/ /de ltar dbyar ni gnas pa dang / /de nas phyi rol gzhan du gnas/ /nyes byas tsha sgo can gyi chu/ /ngan song thur 'bab mi brgal lo/ /dge slong gcig gi mdun song la/ /zhag bdun yang dag byin gyis brlab/ /dgos pa'i ched du mdun du 'dir/ /mi 'dug kyang ni nyes pa med/ /kun dga' ra ba la sogs bzhi'i/ /gzhi ni nye bar dgod pa dang / /mchod rten mchod dang tshogs ston mo/ /chad pa'i las byin grogs nyid dang / /dge 'dun lhag ma dbyung ba ste/ /dge slong dgos pa 'di dag gis/ /zhag bdun byin gyis brlabs nas ni/ /the tshom med par 'gro bar bya/ /'di dag las kyang dge slong ma'i/ /bya ba slar yang lhag ma yin/ /lci ba'i chos nyid ldan pa yis/ /de las dbyung ba mngon 'dod pas/ /dge tshul las ni lhag pa yi/ /dge slong sdom pa 'dod pa dang / /chos dang rjes chos slob pa'i phyir/ /dge tshul ma las dge slong ma/ / lhag ma'i bslab pa la slob ste/ /bsnyen par rdzogs pa thob phyir du/ /tshangs spyod nyer gnas 'dzin phyir ro/ /dge slong ma yis byed pa dang / /yang na gsol ba la sogs las/ /gsang ste ston pa nyid dang ni/ /gang phyir mi 'dod ma yin na/ /gnyi ga'i tshogs la bsnyen rdzogs ni/ /khyim pa dag gi khyim song la/ /gal te yod na snga ma las/ /lhag par bu dang bu mo rnams/ /bag ma gtong len la sogs dang / /pha ma dkon mchog gsum dang ni/ /slob dpon la sogs dgos sgrub la/ /zhag bdun brlabs sam lhag par rung / /mtshan mo nyi shu sum cu'am/ /nyin zhag bzhi bcu yang ni rung / /tshogs la zhus nas 'gro bya ste/ /yul gyi dgos pa sgrub phyir ro/ /dgos pa khyad par 'phags pa ni/ /rnam par shes te zhus nas kyang / /gsol ba gcig ni sngon 'gro ba'i/ /brjod pa 'di la tshogs kyis sbyin/ /bsod snyoms kyis ni phongs pa'am/ /sman yang rnyed par dka' ba dang / /nye gnas 'ga' yang med pa na/ /dbyar ni dral yang nyes pa med/ /de bzhin mi rung sgrub pa yis/ /tshangs spyod nyams par byed pa ste/ /nye du ma yin bud med dam/ /rgyal pos mgron du gnyer na'o/ /de bzhin ma ning la sogs zhes/ /rang gi gnas su bud med 'ga'/ /chags skyes de ni bzlog dka' na/ /gnas gzhan yang dag bsten par bya/ /rgyal po rkun ma sbrul gdug dang / /mi dang me dang me min dang / /chu yi 'jigs pas dge slong dag /song ba na yang nyes pa med/ /gang du sdig pa'i blo can gyis/ / dge slong dge 'dun 'byed pa rtsom/ /de thos phrad pas 'jigs pa yis/ /gal te song yang nyes pa med/ /'jigs pa sna tshogs gzhan dag kyang / /'jam pos bzlog phyir 'gro bya ste/ /ma song 'gal tshabs can du 'gyur/ /des dbyar dral yang nyes pa med/ /gtsug lag khang 'dir 'gro zhes bya/ /dbyar gyi dngos po 'di'o zhes/ /brjod de dge slong go byas nas/ /ma song na ni nyes byas yin/ /zhag 'dun yang ni lhag par ni/ /byin gyis brlab po dge slong gang / /bar der 'ongs te song ba yang / /byin rlabs de nyid gzhan yod min/ /sngar gyi byin rlabs de nyid ni/ /rgyun mi 'chad par gnas pa la/ /de stong rgyu yi tshogs pa ni/ /de las gzhan du mi 'thob bo/ /mtshams bcings rab tu rnam mang las/ /mdor bsdus tshul ni rnam pa bzhi/ /'di yang mdor bsdus dbang byas nas/ /phyogs tsam bstan pa brjod par bya/ /dpag tshad phyed dang gsum pa'i mtshams/ /chen po de ni phyogs bzhi ru/ /ljon shing chu bo brag ri dang / /lam chen sogs kyis mtshon de bcad/ /dge 'dun thams cad tshogs pa na/ /dge slong gcig gis gsol ba bya/ /de bzhin brjod pa gcig las kyi/ /mtshams ni rab tu 'grub phyir yin/ /shar phyogs mtshams nas tshu rol du/ /gnas mal nyid kyi mthar thug par/ /grong dang de yi nye 'khor dag /spangs te mtshams ni bcing bar bya/ /chos gos dag dang mi 'bral phyir/ /slar yang gsol ba sngon 'gro ba'i/ /las nyid bya'o tshul ldan dag / bde la reg par gnas phyir ro/ /chos gos gsum po med par yang / /sdom brtson mtshams 'dir gnas rung ste/ /grong dang de yi nye 'khor dag /ma gtogs gzhan du ci bder ro/ /sngar gyi chen po mi mkho na/ /chung ngu yang ni bya ba ste/ /gsol dang bzhi yi las nyid kyis/ / chen po nye bar bkrol nas ni/ /chung ngu bcings nas snga ma bzhin/ /mtshan ma brtan po rnams kyis so/ /dkyil 'khor pa zhes grags pa der/ /tshogs kyi las ni bsgrub par bya/ /sngar bzhin chung ngu bcings nas kyang / /de nas chen po bcing bar bya/ /gzhan yang der ni go rims 'di/ /mtshams bcing ba la gnang ba yin/ /dge 'dun thams cad shi srid dam/ /yang na mtshan ni gzhan gyur ram/ /bslab pa phul lam mtshams nyid kyi/ /phyi rol skya rengs shar ba dang / /gsol ba sngon 'gro'i las kyis te/ /mtshams 'jig rgyu ni rnam lnga'o/ /ljon shing gcig gi phyed cha 'am/ /gnyis pa mtshams kyi phur pa ste/ /phur ba 'am ni shing gcig la/ /cha bzhir rnam par phye ba yis/ /bzhi char du yang thob pa ste/ /lnga pa nam yang ma yin no/ /'og tu yang ni dpag tshad dag /phyed dang gsum mo steng du yang / /ri yi steng gi shing rtse 'am/ /spyil po la sogs pa yi mthar/ /sbyin bdag rjes gzung don gyi phyir/ /ston pa nyid kyi sku gzugs la/ /sna tshogs rin chen 'od 'bar bas/ /mdzes pa'i rgyan spud rjes su gnang / /rna rgyan dang ni lag gdub dang / /rkang pa la sogs rgyan rnams ni/ /dgag go rmad byung 'di dag ni/ /nges par bud med rgyan yin na/ /skyes bu seng ge chen po ni/ /rtag tu rjes su 'dzin mdzad la/ /smad 'tshong gyon pa lta bu yi/ /bud med gos ni mi rigs so/ /tur+ya'i sgra yis 'dug khang du/ /ltad mo ba ni song ba'i tshe/ /sku gzugs dag la brgyan pa yi/ /mchod pa slar yang bsdu bar bya/ /skye bo mang po 'dus pa'i tshe/ /ca co'i sgra yis g.yengs pa na/ /dus tshod brda ni sprad pa'i phyir/ /rnga 'am dung sogs sbyar byas 'dod/ /bcu 'am brgya 'am stong phrag ni/ /mdun du byas te nye bar bsgo/ /rnyed pa brtul can ci 'dod dag /bltas te de skal rnam par brtag / bgos nas de ni shi gyur na/ /de slar dge 'dun thams cad kyi/ /ma bgos na yang de skal ni/ /gzhan des rnam par bgo bar bya/ /skal de sbyin bdag kho na'i ste/ /gang la de phul de yi yang / /thams cad du ni ma gnang ba/ /dge slong rnams la de mi 'os/ / dge slong rnams ni mgron bos shing / /dge slong ma yang mgron bos na/ /mchod ston tha ma der ni gang / /rnyed pa rgan pa'i mthar bzhag na/ /gnyi gas kyang ni go ba'am/ /yang na sbyin bdag 'dod pas so/ /zang zing skal ba mnyam por ni/ /kun du skyob pa la yang yin/ /dbyig rnams rnam par 'god 'dod na/ /dge slong ma las cha gnyis te/ /'di la bsnyen par rdzogs 'dod pa'i/ /dge tshul la yang ci rigs brjod/ /de las gzhan pa'i dge tshul ma/ /rnams la yang ni sum cha 'os/ /dge slong dge slong ma rnams ni/ /skal ba mnyam par bgo bya nyid/ /gang du dge slong mang gyur cing / /dge slong ma tshogs nyung na ni/ /de ni mnyam por mi bgo ste/ /rnyed pa re re'i grangs kyis so/ /'jig rten mgon pos 'jig rten gyi/ /yams kyi 'tshe ba zhi bya'i phyir/ /sangs rgyas sku gzugs grong sogs su/ /spyan drang bar ni gsungs pa yin/ /der ni chag chag byug pa dang / /srang gi bzhi mdor sa gzhi la/ /sna tshogs me tog bkod pa yis/ /rab tu mdzes par bya ba yin/ /tsan+dan a gar ga pur gyi/ /bdug spos kun nas dbul bar bya/ /phyogs kyi sgo nas dri zhim dag /dal zhing dal ba'i rlung gis bskyod/ /sgra chen pa Ta ha dag dang / /'khar rnga ting ting shag sogs sgra/ /rgyun du 'brug sgra lta bu yi/ /sgra yi tshogs rnams rjes su bsgrag /yang yang dal ba med par ni/ /nam mkha'i khams ni gang ba yi/ /grangs mang rol cha sna tshogs dang / /gsal por dga' ston chen po bya/ /rgyal mtshan rnams ni tshar du yang / /dngar ro de yang rnam pa lnga/ /mkha' lding seng ge chu srin dang / /khyu mchog glang po zhes bya nyid/ /rab byung chen po rnams kyis ni/ /khyim pa'i 'khor rnams la ni sbyar/ /kun mkhyen grong du gshegs pa na/ /de 'dra la sogs bsgrub par bya/ / de nas sangs rgyas mdun bdar te/ /mthong bar dga' ba'i sems pa yis/ /klu dang gnod sbyin la sogs pa'i/ /'jigs pa zad par sel ba yin/ /rnyed pa kun nas thob pa dag /tshogs kyi thad du btsong bar bya/ /dge 'dun gnas brtan blo ldan gyis/ /shes na rin thang gdab par bya/ /nges par nyo bar 'dod pa na/ /de la skyed par rung ba yin/ /rin ni thams cad ma gzhal bar/ /sdom brtson de longs spyad mi rung / /dkon mchog gsum la su dag gis/ /gus pas chung ma sogs phul na/ /de la rin ni mi gdab ste/ /sbyin bdag 'dod pas gtang bar bya/ mi khyod glu gar rol mo rnams/ /byos shig ces ni dge slong gis/ /khyim pa rnams la bsgo mi bya/ /'di ni tshul ldan las ma yin/ /'di la tshul ni ji bzhin du/ /mchod cha ston pa mchod pa ni/ /ji ltar mdzes pa de ltar ni/ /bzhin bzangs 'bad pas byos shig brjod/ /mchod pa'i phyir yang mchod rten la/ /phur bu la sogs mi gzugs te/ /dang po rtsom pa'i dus nyid du/ /gzugs rten byed la nyes pa med/ /mar me 'og tu dbul bya ste/ /brtul zhugs can gyis steng du min/ /dge tshul la sogs gzhan yod bzhin/ /mchod bya'i steng du 'dzeg mi bya/ /gzhan dag med na dri yi chus/ /sdom brtson rkang pa dag bkrus nas/ /gus pas ston pa'i 'du shes ni/ /yid la byed pas rang gis 'dzeg /dngos po gcig lhag brgya dang ni/ /gsum la sogs pa bya ba ste/ /gtsug lag khang gi glo dang 'bur/ /de yang lnga brtsegs dag tu brjod/ /kun du bdun brtsegs bya ba ste/ /de yi skar khung nang stegs can/ /dbus su ston pa'i khang chen te/ /sgo ni phyi sgo'i drang thad du'o/ /dge slong ma yi dbyar khang ni/ /sum brtsegs las ni lhag mi bya/ /gtsang khang skar khung nang stegs can/ /kun du lnga brtsegs bya ba yin/ /sku gzugs mchod rten bder gshegs kyi/ /bka' yang mngon par bri ba ste/ /rnyings sam brlag na dge slong gis/ /slar ni gso bar 'os pa yin/ /gang du gang zhig sngar byas der/ /'di nyid de ltar gzhag bya ste/ /snga ma'i gzugs las chung ngu min/ /lhag pa nyid du bya bar brjod/ /gtsug lag khang gi 'du byed ni/ /sbyin pa po yi 'dod ji bzhin/ /chen po dang ni chung du'ang rung / /mkhas pas yo byad dang sbyar bya/ /mchod rten sku gzugs grib ma dang / /maN+Dal yang ni 'gom mi bya/ /dgos pa'i ched du bde gshegs kyi/ /tshigs bcad sngon du byas te bgom/ /bsod snyoms dag la rgyu ba'i tshe/ /sangs rgyas la sogs brda yi tshig /sdom can la ni su dag 'dri/ /de la gsal por go bar bya/ /sangs rgyas zhes ni brjod pa'am/ /yang na rkang gnyis mchog ces brjod/ /sdug bsngal zad ces yang na gzhan/ /bdag gam chos lam gang de gsungs/ /de bzhin dge 'dun dag la yang / /brjod bya so so'i bdag nyid kyis/ /yon tan gang la de dag 'gyur/ /de ni de la brjod par bya/ /gcig pu mgron du bos pa la/ /dge slong ma rnams 'khod pa na/ /gang du dge slong zas kyi phyir/ /'dug pa'i stan ni dang por bzhag /dge tshul gyis ni gral yang rung / /de ru 'dug ste zos nas ni/ /gal te dge slong nus med na/ /dge slong ma yis yon bshad bya/ /grong rgyu ba la song nas ni/ /gar song de don zhal ta bas/ /len pa dge slong med pa na/ / rnyed pa de yi skal ba bzhag/gal te 'ongs na de yi'o/ /rnyed pa mtshams kyis bsgrub pa dang / /khrims su byas la brten pa dang / /ci 'dod dge slong dge 'dun rnams/ /sbyin bdag gis ni bsnyad pas so/ /mngon du ba dang dbyar dang gnas/ /so sor smos pa de bzhin te/ /brgyad po yang dag grags pa 'di/ /thob dang mi thob 'byed pas so/ /gdugs dang me tog rgyal mtshan sogs/ /bsnyen bkur dang bcas sdom brtson ro/ /dge slong rnams kyis yongs bskor nas/ /dur khrod du ni khyer bar bya/ /me chen rab tu 'bar ba yis/ /der ni yongs su brtags te sbyang / /gal te yod na mar dag dang / /tsan+dan la sogs byug par bya/ /srog chags dang bcas rma can ni/ /'bad pas sa ni brkos nas su/ /sbas te de la rtswa dang ni/ /lo 'dab sogs kyis dgab par bya/ /lus can rnams la srin bu'i rigs/ /brgyad khri bzhi stong yod pa rnams/ /lhan cig skye zhing 'jig pa'i phyir/ /ming can de dag tshig par 'gyur/ /mthang gos dang bcas bla gos kyis/ /sdom brtson ro ni g.yogs te dbyung / /lhung bzed chos gos gzhan la ni/ /btsongs te bgo bar 'os pa yin/ /de rjes mi rtag rnam pa'i tshul/ / ston byed chos nyan sbyin bya ste/ /'di dag skyo ba bskyed phyir dang / /mya ngan dag kyang bsal phyir ro/ /gang phyir 'dus byas thams cad ni/ /rkyen gyis gzhan du 'gyur ba ste/ /rtswa rtse rlung gis bskyod pa yi/ /zil ba bzhin du mi brtan no/ /gang zhig 'chi bdag khrel rgod kha/ / dgang dka' der ni mi 'jug pa/ /mtho ris yang dag sa stong du/ /skyes pa de la yod dam ci/ /ji ltar sa gzhi brtan pa la/ /sreg pa'i me byung kho na bzhin/ /rang bzhin skyes cig skyes pa 'dir/ /mi rnams 'chi ba de bzhin no/ /gzugs rigs long tsho thos pa dang / /tshul khrims la sogs rtag min te/ /rgyal po 'jig rten mgon gcig bu/ /gang gzhan 'dod chags bral ba yi/ /sdom brtson yang srid zad pa yang / /kun du gnas pa ma mthong na/ /gang gis ji skad ji ltar bzlog /tshe ni chu yi ri mo 'dra/ /de ltar mi rtag chos bstan nas/ /de yi dngos po'i yon yang bshad/ /rkang lag gdong pa rab bkrus nas/ /mchod rten bskor ba byas nas so/ /ji snyed 'dus byas de dag 'dir/ /mi rtag la sogs thub pa'i bka'/ /dran pa yang dag thob pa yis/ /gtsug lag khang du zhugs nas ni/ /lung bzhin skal ba mnyam por ni/ /shi ba'i yo byad sbyin bya ste/ /ro yi bsnyen bkur la sogs 'di/ /sras kyi gtso bo rnams la bcas/ /gaN+DI rgyud gsum mchod rten la/ /phyag byed tshe na gang zhig yod/ /tshul shing 'brim dang gsol ba la/ /gang yod de la 'os pa yin/ /gal te rdzas de 'god pa na/ /brel bas der kun ma tshogs na/ /rnam par 'gyed pas cha gnyis ni/ /rgan po gsar bu dag la sbyin/ /de ltar byas pas de yi nor/ /ma lus legs par bgos par 'gyur/ /gzhan dag kha cig glo bur du/ /lhags kyang de la skal ba med/ /'chi ba po yis 'dir bzhugs dag /'di snoms brda ni gal te sprad/ /de yis byams sems kyis bsdos na/ /de ni tshogs kyis thob pa yin/ /gal te byams sems ma yin pas/ /'tsho ba'i tshe na bsngos nas ni/ /gang zag gis ni blangs na yang / /de la nyes pa yod ma yin/ /khyim pa rnams ni ltos byas te/ /brtul zhugs 'dzin pa de lta min/ /de phyir gang la ltos yod pa'i/ /dge slong de la de mi rung / /gnyen la yongs su bsngos pa'i nor/ /'di ni tshe 'phos rjes la yang / /gos dang lhung bzed la sogs pa/ /de ni tshogs kyi thad du dbul/ /rnam par spyad de dbul ba des/ /cho ga bzhin du bgo bar bya/ /rin chen la sogs yod pa na/ /der ni bgor mi rung zhes brjod/ /dge slong shi ba'i yo byad ni/ /dge slong dbang bar 'os pa nyid/ /de dag med na dge slong ma/ /de yang sring mo yin phyir dbang / /dge slong ma ni shi ba'i nor/ /de la dge slong ma yin 'dod/ /de dag med na de la yang / /dge slong rnams ni bdag por 'dod/ /dge slong med par dge slong dag /khyim pa'i grong du shi ba na/ /de yi nor de der lus na/ /gang phyir gnyis kar 'dod na yang / /cig car nyid du slong byed phyir/ /gnyi ga la yang rung ba yin/ /gang gis gang la dmigs te byin/ /de ni ci bder de yir 'gyur/ /gtsug lag khang gi mtshams dag gi /bar du dge slong shi ba na/ /gang du mgo bo bstan pa de/ /chos gos la sogs dbang ba yin/ /bu lon blangs nas dge slong gang / /'chi bdag khar ni zhugs pa na/ /de ni 'phags pa'i dge 'dun gyis/ /de yi nor las sbyin par bya/ /dge 'dun don du zhal ta bas/ /bu lon blangs te shi ba na/ /de kun tshogs kyis sbyin par ni/ /lung gis shin tu nges pa yin/ /gzhan du bu lon zhal ta bas/ / nges par 'di ni blang bya ste/ /rgan po rgan po go byas nas/ /dbang po dang bcas yi ger bri/ /lhan cig gnas pa rnams kyis ni/ /ba dan gos dang mal stan sogs/ /'dod pa'i 'bras bu 'dod pa yis/ /tshogs la phul na nyes pa med/ /gal te 'gyod pa'i me lce yis/ /de dag sems ni bsregs pa na/ /slar yang bzlog pa'i chu yis ni/ /ma lus zhi bar bya ba nyid/ /'di la rang bzhin gnas pa dang / /gzhan dag gnas nas phyung ba shi/ /gcig gi yang ni yo byad rnams/ /rang bzhin gnas la rung ba yin/ /mdun du yongs su dag pa'i blos/ /rang bzhin gnas pa med gyur na/ /gnas nas phyung ba la yang ni/ /'di yis dbang thang bkag pa med/ /yi ger bri ba byas nas ni/ /gal te tshogs la phul ba na/ /shi nas de ni bgo bya ste/ /nor dang 'dra ba nyid las so/ /gtsug lag khang 'os der gyur pa/ /de ni de la mkho ba nyid/ /mtshon cha 'ching byed kun ma gtogs/ /rgyal po la 'os rgyal la byin/ /mtshon cha la ni khab la sogs/ /rjes mthun dngos po bya ba nyid/ /de bshig nas ni rtsa ba yi/ /mtshon cha gzhan du mi bya'o/ /mnyam par gzhag pas bde gshegs kyi/ /tshigs bcad gcig tsam bklags pa na/ /legs gsungs dam pa'i chos dag gi /rnyed pa de la mi 'os min/ /thub dbang dam chos rnam pa gnyis/ /lung dang gzhan yang rtogs pa'o/ /lung de 'dzin pa'i don gyis na/ /chos kyi rnyed pa 'os pa yin/ /khrims ldan sngar ni dbyar gnas par/ / khas blangs gal te shi ba'am/ /bslab pa phul lam gzhan gyur kyang / /dbyar gyi rnyed pa 'os pa yin/ /bde gshegs sras kyi lhun po'i tshad/ /sku gzugs mchod rten bya bar 'os/ /zur bzhi logs mnyam mdzes byas nas/ /bang rim la sogs gzhan rim bzhin/ /de yang gnyis gsum bzhi dang lnga/ /'bras bu'i rim pa gdugs kyi tshad/ /mchod rten byi bo yon tan can/ /so so'i skye bo rnams la 'os/ /'di yi mthar ni ston pa yi/ /gdugs kyi tshad la nges pa med/ /brgya lhag ri bar bye ba snyed/ /mchod rten yang ni bya bar 'os/ /dman pa bse ru'i spyod pa la/ /gdugs ni rim pa bcu gsum ste/ /de la char khab med pa dag /bya'o zhes ni thos pa yin/ /logs dag tu ni slob ma zung / /ston pa'i mchod rten dbus su ste/ /lhag ma rnams ni gral rim bzhin/ /de yi phyi rol 'phags min rnams/ /slob ma rnams ni phan tshun du/ /rab gus mnyan pas bsnyen bkur bya/ /dge 'dun gyis kyang cho ga bzhin/ /sman dag gis kyang nye bar bsdu/ /lhung bzed chu gtsang dri ma med/ /khrus phyir nad pa slong la sbyin/ /lhung bzed lan gsum bkrus nas kyang / /sangs rgyas tshigs bcad bzlas nas so/ /sman dag byin len byas nas ni/ /tshul ldan nad pa la ni sbyin/ /byin len stobs pa med na ni/ /rang nyid len pa la yang rung / /chos gos byin gyis brlabs pa dag /nad pa la ni mi bslang ste/ /yang na de yis phul yang ni/ /dge slong rnams kyis bgo mi bya/ / gang 'dir chags pas de len dang / /sbyin bdag de ltar bskul ba dang / /nges par 'gegs pa nyid la brtson/ /de dag gsum char skyon dang bcas/ /'phags min 'phags pa'i nad la yang / /nam yang le lo mi bya ste/ /'khrul 'khor la sogs sbyor ba dang / /sman pa dad pa chung bas min/ /sangs rgyas la mchod tshogs ston mo/ /nad pa gal te gso byed na/ /ngan zhing sman yang byin brlabs te/ /chos gos sogs kyis bya ba yin/ /de la nor med gyur lta na/ /gang yod gzhan las bslangs nas kyang / /nus pa ji bzhin bsgrub bya ste/ /de yis dad pa skyed phyir ro/ / tha na rdo gu me tog dang / /phye ma dang ni bum pa'i chu/ /bsten nas kyang ni mchod pa dag /de yis nye bar bstan bzhin bya/ /gang zhig don min nad kyis gzir/ /nor la yongs su chags pa na/ /'bad pas de ni blangs nas der/ /mchod dang brtul zhugs can ston bya/ /rang gi lhung bzed gos sogs kyang / /de la byin nas de yi tshe/ /nad g.yog gis ni bde gshegs sogs/ /mchod pa'i las la brtson par bya/ /khyad par du yang nor bdag la/ /chags pas gang du srog mi 'chad/ /ci 'dod de yi lhung bzed sogs/ /yon tan ldan pa gzhan la dbul/ /dge slong tshul khrims ldan yang sngon/ /lhung bzed la ni chags bzhin shi/ /rang gi lhung bzed nang du ni/ /gdug pa can gyi sbrul du skyes/ /sman dang sngags kyi sbyor ba yis/ /gzhang 'brum legs par gso bya ste/ /sman pa'i man ngag med par ni/ /sen mo sogs kyis gcad mi bya/ / gang la slob ma la sogs pa'i/ /nad g.yogs med cing sman med na/ /de la sman dag sbyin pa dang / /nad g.yog kyang ni tshogs kyis bya/ /mdze can gyis ni dge 'dun gyi/ /mal stan nyer spyod spang bya ste/ /rdzing bu ljon shing nye 'khor dang / /spang sa 'dug sa la sogs so/ /khang bzangs dang ni khyams kyi sgo/ /g.yos khang bshang gci'i khang par ni/ /mi 'dug dben par gnas bya ste/ /de ni tshogs kyis bskyang bar 'os/ /gtsug lag khang gi bdag por ni/ /shi 'am bcings sam ring song na/ /dka' bas kyang ni lo lnga'i bar/ /gtsug lag khang du legs gnas bya/ /lo lnga lon nas de drung ge /gtsug lag khang rten rnyed pa dag /blangs te de ru gnas bya ste/ /bsrung phyir gso sbyong tha dad do/ /de ltar lo ni bcur gnas kyang / /der ni 'dzin po med pa na/ /mal stan la sogs de byin nas/ /gtsug lag khang gzhan gnas par bya/ /'gro 'dod rnams kyis ci 'dod par/ /sgo bsdams rgyas btab 'gro bya ste/ /slar yang de ni 'jug pa na/ /de la 'dug gnas sbyin par bya/ /gtsug lag khang gzhan dbang ba'i dkor/ /dge slong gzhan du spyod pa bkag /dgos pa'i phyir du de mthun pas/ /yongs su spyod la nyes pa med/ / sbyin bdag rnams kyis mal stan dag /gtsug lag khang du phul ba gang / /mi 'dod kyang ni de lta bu/ /gzhan du dbul du gzhug mi bya/ /tshogs kyi gos ni gyon nas kyang / /dge slong rang gi las byed bkag /gos bkru ba dang tshon la sogs/ /de bzhin gzhan yang chen po gang / / char dang kha ba 'bab pa na/ /bla gab med par mi gzhag cing / /bshang gci yi ni sa dag tu/ /de gyon pa ni bkag pa yin/ /gnas mal gnas skyong ma gtad par/ /mtshan mo'i dus su 'gro mi bya// //bam po drug pa/ gtod pa na yang yul gcig la/ /go bar byas te bzhag par 'dod/ /tshogs kyi 'dug stan la sogs kyang / /rgan rims bzhin du sbyin bya ste/ /glo bur lhags pa'i ched du yang / /dngos po gang yang kun tu gzhag /gnas kyi dbye bas dgon par yang / /rgan rims sogs la ci 'dod par/ /sa dang shing gi phug la sogs/ / rim pa ji bzhin thob pa yin/ /dgon pa'i glo bur lhags pa la'ang / /dngos po'i skal ba gzhag bya ste/ /chos gos la sogs sbas nas ni/ /gnas bya gzhan du ltung bar 'gyur/ /gang du sa gzhi khru do yi/ /tshad tsam la yang mal dag gnang / /zhabs tshags can dang so shing sogs/ /pha gu dang ni sman gyi snod/ /kun nas 'jam por byugs te bya/ /gnas khang sogs su 'gro 'dod pas/ /sangs rgyas sras kyi 'dug gnas ni/ /gzhig nas 'gro bar mi bzhed do/ /gnas khang 'gyed pa la sogs dus/ /ma bsgo bar ni 'gro ba ni/ /slar yang rgan rims ji bzhin du/ /'dod kyang de la 'os ma yin/ /gsar bu rnams dang de mnyam par/ /gnas mal bza' ba 'bras bu dang / /me tog la sogs sbyin pa nyid/ /bstan pa 'di la chos nyid do/ /nad tshabs che la gnas khang gzhan/ /ji ltar 'dod bzhin sbyin bya ste/ /ji srid nad sos gyur gyi bar/ /khas len mi byed na yang sbyin/ /gtsug lag khang gi phyi rol du/ /gos stan mthong na nang gzhug cing / /rgan po na dang nyam chung gis/ /dge skos dag la go bar bya/ /dge 'dun mal stan yo byad dag /me yis tshig gam chus khyer na/ /bdag nyid kyis ni rjes bsrung ste/ /nges par bskyang ngo grogs med na/ /dang po gang zag rnams kyi ste/ /phyi nas tshogs kyi de nas chos/ /de nas bde bar gshegs pa ste/ /'di ni dbyung ba'i rim par 'dod/ /go skabs 'byed bcug nges brtags te/ /gang phyir thabs kyis bsgrub pa nyid/ /don gnyer de yis dge slong la/ /mdo 'am 'dul nyid dris te'o/ /'dug pa'i thad du nye bas sam/ /de yis 'gro bzhin du yang rung / /sdom brtson rang la blta ba yis/ /klog dang nye bar bstan pa sbyin/ /nye bar bstan pa 'dzin pas kyang / /bla ma sangs rgyas dang por gus/ /rtse gcig nyal bas spangs nas ni/ /nye bar bstan pa lan gsum bzung / /nye bar bstan pa ston pa po/ /'di yis sgra ni mi thos pa'i/ /phyogs der de la gtad nas ni/ /lan brgya'i bar du yang ni bzla/ /'don dang rjes su 'don sogs kyi/ /dbyangs kyis thub pa'i gsung mi bsgrag /yul skad dag dang rjes mthun pas/ /'don par byed la 'gal ba med/ / sdom brtson gang zhig khang bzangs kyi/ /ka ba ljon shing rtsig pa la'ang / /rab tu bteg na 'gal tshabs can/ /de yi phyir na de mi spyad/ /dpung rgyan dang ni gzhan min pa/ /so sor 'brang ma la sogs gdags/ /phan 'dod sngags ni bzla bya ste/ /gnod gyur gsang sngags ma yin no/ / lha gzhan phyag 'tshal mchod pa ni/ /gsang sngags phyir yang bkag pa yin/ /dkon mchog gsum la phyag byas nas/ /gzhan gyi gsang sngags brjod par bya/ /lhung bzed kha sbub byas pa la/ /stan dang ston mo bza' ba bkag /dam pa'i chos ni ston pa na/ /dad ldan rnams kyis 'dus byas bsten/ /sa gzhi gos kyis g.yogs pa la/ /'dus byas mi rtag 'du shes kyis/ /dge slong rnams kyis 'gro ba gnang / /sdom brtson chos gos gsum 'dzin la/ /khrus kyi ras bsrel rjes su gnang / /sa bon chos par dka' ba'i rigs/ /rlangs pas phog pa spyad du rung / /sgregs pa byung ba dor nas ni/ /gus pas kha nang bkru bar bya/ /sngon las bzlog dka' las grub pa'i/ /med pa gnyis yod ma gtogs so/ /mngon mtshan can dag 'chang ba ni/ /dge 'dun nyid la rjes su gnang / /bsod snyoms pa yi chos gos la/ /mdud pa bor ba la sogs min/ /thams cad kha dog gcig pa yi/ /gos rnams nye bar longs spyad min/ /me tog 'bras bu shing sogs drung / /gci sogs kun tu spyad pa spang / /steng du shing las bya ba ste/ /rdo yi skas ni ma yin no/ /rlung nad can gyis phyag mi bya/ /de la yang ni gzhan gyis min/ /lus gtsang byi dor byas nas ni/ /chos gos legs par bgo bar bya/ /de lus mnyed pa'i bsam pa yis/ /bsku mnye byas la nyes pa med/ /li sha'i me tog la sogs pa/ /rnyed na dben par 'dug nas ni/ /sbyin bdag rnams la phan 'dod cing / /lta byed tshim rgyas don du bsnam/ /chos gos 'jam phyis byas pa sngon/ /dga' bo la ni mdzes mas byin/ /skur 'debs gyur gsan thub dbang gis/ /dgag pa'i tshul 'di rab tu gsungs/ /brdungs nas 'jam por byas pa yi/ /chos gos bcang bar mi bya ste/ /de ni su zhig 'chang byed pa/ /nges par 'gal tshabs can du 'gyur/ /phag gi yan lag la sogs dang / /bu ram shing la sogs pa dag /chom rkun gyis ni bor ba gang / /skye bos mthong ba blang bar bya/ /rgyab dang mgo bo rked pa yis/ /khur po khur ba'i sdom brtson gang / /de yi 'gal tshabs sdug bsngal gyis/ /'jig rten pha rol gzir bar byed/ /srin bus la ba rin po che/ /zos pa la ni nim pa dang / /'dab ma bdun pa la sogs pa'i/ /lo ma'i phye mas bsgo bar gsungs/ /pha ni dbul po ma yin pas/ /bu la nor skal ster ba na/ /tshul khrims ldan pas blangs nas ni/ /dkon mchog gsum gyi dgos pa bya/ /mtshams gzhan gnas pas de yi tshe/ /'dun pa phul na nyes byas te/ /'bul du bcug kyang mi 'chags pas/ /nges par nyes byas las gzhan min/ /la ba la sogs bzang po gang / /tshogs kyi ci bder thob pa na/ /de ni btsongs te bgo bya yi/ /gshag cing gtub par mi bya'o/ /gnas mal rab tu ma brtags par/ /nyal ba la ni nyes byas 'gyur/ /rta dang khyim bya bar te ke /glang sogs 'thab tu gzhug mi bya/ /bde gshegs kyis ni gnyis po la/ /pus 'khyud rjes su gnang ba ste/ /lus ni nad kyis nyams pa dang / /gzhan yang rgan po de la'o/ /gnas nas 'gro bar 'dod pa yis/ /slar yang 'ong bar 'dod pa na/ /gnas mal kun nas sbyangs nas ni/ /legs par gtad de 'gro bar bya/ /gang la gtad pa de yis kyang / /de ni 'bad pas kun tu bsrung / /'ongs nas slar yang sbyin bya ste/ /rtags sam go bar byas te'o/ /gang sngon brang 'gro ma mthong nas/ /mnan pas dge slong bzung nas ni/ /gnyis ka yang ni shi bar gyur/ /des na 'di ni go byed yin/ /brtul zhugs can gyis zla phyed der/ /tshes brgyad dang ni bco lnga la/ /gnas mal legs par sbyang bar bya/ /ma sbyangs na ni bslab ni 'thob/ /gnas khang bzang po der bsgrubs pa/ /tshogs la nye bar mkho ba yang / /sngon du gang 'os thob pas sbyang / /rgan rims ji bzhin 'dir yod min/ /bya ba yongs su rdzogs pa na/ /snod spyad dang ni yo byad gos/ /sngon du blangs nas khyer bya ste/ /phal ba'i las kyis ma yin no/ /tshogs kyi gnas mal bzang po nyid/ /gang zag dbang la de mi 'dod/ /rgyab rten bcas pa'i stan dag ni/ /gnyis ka la yang rjes su gnang / /lo gsum khyad par zhugs pa dang / /lhan cig stan gcig la mi 'dug /dge slong bsnyen par ma rdzogs dang / /lhan cig stan la rung ma yin/ /mkhan po dang ni slob ma yang / /khyim pa'i khyim du rjes su gnang / /stan cig la 'dug der yang ni/ /gnyis pa cung zad med na'o/ /mal stan la sogs blangs nas ni/ /'jigs bcas gzhan du 'gro ba na/ /sdom brtson gyis der longs spyad nas/ / 'jigs bral tshe na gtad par bya/ /'di la 'jigs dang bral nas ni/ /sngar bzhin yang dag yongs su spyad/ /rdol dang ral dang zags pa dag /cho ga bzhin du bcos par bya/ /gang der gding ba la sogs pa/ /spyad mi bzod dag longs spyod phyir/ /de yis sa lcir legs bsres nas/ /rtsig pa'i khung bu la sogs byug /de ltar legs par sbyar na ni/ /sbyin 'bras bde ba'i don du 'gyur/ /sbyin bdag rnams kyi bsod nams rgyun/ /mi 'chad pa yi rgyu yin no/ /gtsug lag khang gzhan rnyed pa ni/ /spyad de gzhan du gnas pa na/ /de yis gong ngam du na yang / /thams cad rin tshad gzhal bar bya/ /dge 'dun dag gi gnas mal la/ /shes byed mtshan ma gdab par bya/ /che ge'i sbyin bya'i chos yin zhes/ /mdzes pa'i yi ge rnams kyis so/ /khri steng khri ni brtsegs pa la/ /dge slong 'dug par byed pa de/ /nyes byas dung gi sgra gcan gyis/ / bdas te de ni 'og tu ltung / /dge tshul gang zhig dad pa can/ /slob la rab gus blo ldan gyi/ /tshogs la go byas de dag gi /gnas mal la ni rung ba nyid/ /ko lpags las gyur mal stan dag /yul gyi dbus su bkag pa ste/ /khyim pa'i khyim du 'dug tsam rung / /der yang nyal ba gnang ma yin/ /gtsug lag khang gi sgo drung du/ /dom lpags nyid kyi rjes su gnang / /ko lpags kyi ni mal stan dag /mtha' 'khob tu ni nyes pa med/ /ngo mtshar nor bu mu tig sogs/ /rin chen mchog gis mdzes pa la/ /gser dang ba so la sogs rkang / /mal stan chen po zhes byar brjod/ /gang gi steng du brla 'dug nas/ /rkang brkyang sa la mi reg pa/ /mal stan khyad par 'di 'dra yang / /de ni mal stan mthon por 'dod/ /'di dag bsnyen gnas sdom par ni/ /khyim pa la yang rab bkag ste/ /de 'dir gnyis ka dge slong la/ / ci phyir dgag par mi 'os min/ /khri'u la ni gcig pur 'dug /gnyis ni shing khri brtan pa'o/ /brtan dang mi brtan shes byas nas/ /shing khri la ni gsum sogs kyang / /gaN+DI brdungs nas zhus te'am/ /tshul shing brim pa dag gis kyang / /rnyed pa 'ged byed de yi tshe/ / dge slong kun la go bar bya/ /shi sogs brda ni sprod byed pa'i/ /byi'o la sogs gaN+DI lnga/ /dge slong rnams kyis brdung ba ni/ /'gal med rjes su gnang ba yin/ /lan cig kun tu bteg pa yis/ /gang du rab tu brdung ba ni/ /de ni shi bar mtshon byed pa/ /byi'o nyid brjod dang po'o/ / gang du lan gnyis bteg pas brdung / /de ni gnyis pa las su shes/ /de nyid gcig gi lhag par ni/ /'du ba zhes byar mngon par brjod/ /nges med gnod byung gaN+DI ste/ /de yang 'jig rten go byed yin/ /sgra ldan khar gsil 'khrol ba ni/ /bsam gtan pa rnams go byed nyid/ / gtsug lag khang du glo bur gang / /'jug tshe phyi rol rkang gnyis bkru/ /sprug gam yang na phyi bya ste/ /chu 'am yang na lo mas so/ /nang zhugs nye bar phyin pa na/ /brtul zhugs can thad phyag bya ste/ /des kyang de la ci nus su/ /de dag la ni bya ba yin/ /dka' thub can gyis thog mar ni/ /dge 'dun dag gi nang khrims dri/ /de yis ston pa'i bka' bzhin du/ /yang dag rjes su bsrung bar bya/ /gtsug lag khang du dge slong la/ /gnod byed du ni mi 'gyur ba/ /yon tan 'phel du rung ba gang / /de 'dra dge slong rnams kyis bca'/ /shes bya ma lus de nyid ni/ / mkhyen pa'i de bzhin gshegs pa la/ /brtul zhugs can gyis tshe ldan dang / /rigs rus mtshan nas smos pa dang / /yul nas brjod par mi bya'o/ /rgan po dag la gsar bu yis/ /btsun pa zhes ni brjod bya ste/ /gsar bu la ni rgan pos kyang / /tshe ldan zhes brjod gzhan du min/ / rigs pa yis ni ci nus su/ /nyal nyil nges par bsal bar bya/ /tshes brgyad dang ni bcu bzhi la/ /gaN+DI brdung nas gnas pas so/ /bshang gci mchil ma ngar snabs dang / /khrag kyang nges par 'dor ba na/ /sgra bcas se gol gtogs bya ste/ /bslab pa zad par mi 'dod na'o/ /rtswa sngon dang ni chu dag la/ /dor bar bya ba ma yin no/ /sa gzhi gtsang ma'i phyogs dag dang / /gang du 'gal mthong der yang min/ /nyin mtshan bder gnas dge slong gis/ /tam po la ni mi bza' ste/ /dge slong rigs pa bstan pa yi/ /nad pa la ni nyes pa med/ / dus min zas la bkag pa yis/ /'bras bu gang yang mi bza' ste/ /mkhas pa rnams kyis chos 'dul las/ /gnang ba de spyad mdor bsdus yin/ /dga' bo'i mig sman thur ma sogs/ /thub pas ji skad mdor gsungs bzhin/ /de bzhin dge slong rnams kyis 'dir/ /bza' ba bag yod yongs su spyad/ /gtsug lag khang nang dge slong gis/ /skra dang kha spu breg mi bya/ /nad pas sa gzhi gtsang ma la/ /gos dag bting ste breg par bya/ /skra sogs 'breg par byed pa la/ /rgan rims ji bzhin rjes su gnang / /nyung du tsam zhig bregs na yang / /gsar bu'i 'phro ni mi gcad do/ /dang por mgo bo yang ni kha/ /de nas sna yi gtsang sbra dang / /de 'og rkang lag sen mo ste/ /las byed rim pa 'di dag go/ /skra ni chan pas mi breg ste/ /brtul zhugs can la gnang ba ni/ /'ga' zhig gnas su rma nye na/ /chad pas gcad du rung ba yin/ /nad pa la ni go byas nas/ /tshangs spyod rnam par mkhas pa yis/ /kun khyab phyogs su dran ldan pas/ /spu dag bregs sogs rung ba yin/ /zla 'dra 'bras bu'i rnam pa'am/ /de bzhin spu gri'i so lta bur/ /gcad do rtsi yis mi byug cing / /dag phyir yin te mdzes phyir min/ /dgon pa pa yis sor gnyis las/ /lhag par skra skye gzhag mi bya/ /grong gi mthar gnas brtul ldan gyis/ /sor gnyis yang ni mi rung smad/ /skra rnams bregs zin rjes thogs la/ /dag pa'i don du khrus bya'o/ /sdom brtson rkyen dbang ldan gyur na/ /yan lag lnga rnams bkru bar gnang / /dge 'dun spyi khang nyer gnas su/ /spu gri la sogs snod bcas bzhag /skra sogs las la mkhas na ni/ /dben par byed la bkag pa med/ /so shing byas shing kha bkrus nas/ /dam pa'i chos ni bshad bya ste/ /zas dus yang ni de nyid las/ /gzhan du 'os pa ma yin no/ /de yang rnam gsum ring shos ni/ /sor ni bcu gnyis shes par bya/ /brgyad ni chung ngu de yi dbus/ / bar ma zhes ni brjod pa yin/ /de dor nas kyang lce bzhar gyis/ /'bad de lce ni bzhar bar bya/ /khar ba zangs dang ra gan lcags/ /lce bzhar rnam pa bzhi yin no/ /grong gi tha mar gnas pa yis/ /de dag nyer bsgrub gzhan yang ni/ /med na legs par brud pa yi/ /shing tshal gyis kyang bzhar rung nyid/ /gal te shing tshal yang med na/ /kha dang lce yi dri ma ni/ /ji ltar sus kyang mi mthong bar/ /lci bar bcas pa'i chu yis sbyang / /sngon byung dug can sbrul shi bas/ /bram ze'i bur skyes gyur pa zhig /rab byung de yi lce yi dris/ /rnam sbyang nyes pa mang por gyur/ /dang por sbrang ma so shing gis/ /de yis rtsangs pa shi gyur te/ /de yis ne le de la gang / /reg pas mtha' dag shi bar gyur/ /de yi dri dor thams cad du/ /'gro ba rnams ni rim gyis shi/ /de yi phyir na bcom ldan 'das/ /thugs rje ldan pas bkag pa yin/ /tshul ldan rnams kyi so shing ni/ /bkrus nas yongs su dor bar bya/ /chu dag med na sa la yang / /brud de yongs su dor bar bya/ /gci ba dang ni bshad pa dang / /so shing bca' ba'i bya ba ste/ /rnam pa gsum po dge slong gis/ /sgrib g.yogs can gyi phyogs su bya/ /dge slong dag la rim gcig pa'i/ /mchil lham bcang ba rjes su gnang / /mchil lham rim pa mang po can/ /ma brtags par ni bcad mi bya/ /sgra can dang ni rin po che/ /bcad du rung ba ma yin no/ /tshul khrims lan pas longs spyod na/ /dge 'dun gyi la nyes pa med/ /lhags rlung can gyi sa phyogs sam/ /kha ba can du nyin mo yang / /rkang pa'i gnas skabs rig bya ste/ /yu ba can yang rjes su gnang / /stag dang seng ge dred dang rta/ /glang po'i pags pas bya ba min/ /gzhan dag kyang ni de dag gi /rgyus pa can ni rnam par spangs/ /gzhan yang sder mo can dang ni/ /mche ba can ni mi bcang ste/ /spyang khyi byi ba la sogs pa'i/ /pags pas byas pa'i mchil lham yang / /gtsug lag khang du thams cad du/ /shing gi mchil lham mi rung ste/ /bshang dang gci ba'i khang pa dang / /khyim pa'i grong du nyes pa med/ /'od ma mun dza la sogs pa'i/ /rang bzhin mchil lham mi bcang ste/ /rlung khrag nad kyis nyen pa yi/ /nad pa dag la bkag pa med/ /gru la sogs pa med pa na/ /glang po rta dang ma he dang / /khyu mchog rnga mo'i mjug ma la/ /'jus te brgal ba bkag pa med/ /tshogs la 'bad pas thams cad du/ /bsrung la rag las yod ma yin/ /rgyal po'i skal ba len pa dang / /zhing gi bya ba rjes su gnang / /gtsug lag khang du char sogs kyi/ /'jigs pa rnams kyis g.yengs pa na/ /tshogs kyi nags kyi lo tog ni/ /'bad pas rang gis bskur bar bya/ /dge 'dun gyi ni ba lang sogs/ /rab tu 'bad pas bsrung bar bya/ /khur khol shod cig sod cig ces/ /tshig ngan brjod par mi bya'o/ /dge tshul la sogs gang rnams kyis/ /lam du lam brgyags khur ba na/ /des don bskur bya chu la yang / /dge slong gis ni bsgral bar bya/ /dub pa na yang bskur bya zhing / /de ni de yis byin brlabs te/ /sems kyi 'gyod pa med pas ni/ /the gu la sogs sbyor bas so/ /rkun pos skrag gyur bor ba 'am/ /brgal dka'i chu la bo ba yang / /de ni legs blangs phyung nas kyang / /yongs su spyod la bkag pa med/ /bza' bca' rdzas sogs kyis gang ba'i/ /shing rta bgrod dka'i lam du'am/ /kha lo ba yi stan ma gtogs/ /'bad pas dge slong rnams kyis bkri/ /'di la 'di gnyis 'os yin pas/ /gru ni 'dam sogs zin pa na/ /gru gdong rnam par spangs nas ni/ /de ni dge slong rnams kyis bkri/ /rlung sogs med na tshon gyi las/ /bya'o nyi ma ngan par min/ /'di la gang du skyon 'byung ba'i/ /sa yi cha dang nyin gung min/ /mkhas pas phal cher rdul dang char/ /rlung dang nyi dus ma yin te/ /'di ni khang bzangs sogs don du/ /sa gzhi gtsang mar sbyangs nas so/ /dge slong rnams ni rtsod pa dag / byed na chos ldan lhan cig pas/ /ma gus byed pa de dag ni/ /yal bar mi dor dgag par bya/ /khrims 'chal gyur la khrims ldan gyis/ /tshul mnyam rnams la mang thos kyis/ /thos pa mnyam la spobs pa can/ /spobs pa mnyam la'ang phul byung gis/ /gang zhig dang por rtsod pa la/ /de yi tshig gis 'dul gyur ba/ /spobs can nyid la'ang gang lhag pa/ /de dag tshig gis 'dul ba yin/ /rab tu nges dang ldan pa yis/ /rtsod pa yongs su rtog pa pos/ /phan tshun nang khon bstan pa la/ /yang na btang snyoms gzhag par bya/ /mi mthun pas kyang lam dag tu/ /phrad na rgan la phyag bya ste/ /des kyang nad med gyur cig brjod/ /gzhan du gnyis ka ltung bar 'gyur/ /bsro khang khrus kyi gnas su ni/ /sgo drung srung ma gzhag bya ste/ /dge slong rnams ni khrus srod dag /byed pa ma dad bzlog phyir ro/ /sdom brtson sna tshogs tshon dag gis/ /ri me'i cho ga de dag gnang / /gang dag la ni rung ba'i las/ /sems can rnam pa ma gtogs so/ /gnas khang dag tu rus pa yi/ /tshogs bcas dur khrod chen po bri/ /gcer bu so gtsigs 'jigs pa yi/ /thod pa'i phrang ba rgyan du bya/ /rtsa ba'i sgor ni dbang phyug che/ /kun dga' bzhin gyi dkyil 'khor can/ /lag na be con thogs pa yi/ /gnod sbyin rnams kyi bdag po bri/ /cho 'phrul pad ma rgyas pa la/ /bder gshegs gzugs mang bzhugs pa dang / /srid pa'i 'khor lo'i bar dag tu/ /sgo khang logs ni gnyis su'o/ /gtsang khang sgor ni gnod sbyin rnams/ /me tog phreng thogs bri bya ste/ /gus pas bza' ba mang thogs ni/ /khyams kyi bkod pa'i sa dag tu'o/ /mdzod sgor gnod sbyin chen po ni/ /lag na rin chen myu gu'i ming / /kha nas rin chen mang skyug pa/ /gser gyi bum pa bzang thogs pa'o/ /kun nas 'du ba'i khang par ni/ /brtul ldan rgan zhing rgan pa rnams/ /chos dang mngon brjod 'chad pa ni/ /byed pa mngon par gnas pa bri/ /bsro khang me yi gnas su ni/ /mdo sde lha yi pho nya bri/ /nad pa'i sngas su sku gzugs ni/ /nad pa'i dbugs 'byin bla mar mdzad/ /sna tshogs rgyan gyis phun tshogs pa'i/ /klu mo chu yi gnas su ste/ /dur khrod 'jigs su rung ba ni/ /bshang dang gci ba'i khang par ro/ /khang bzangs dag gi ngos dag tu/ /thub pa'i sngon gyi skyes rabs bri/ /dper na thams cad sgrol dang ni/ /zla 'od bzod par smra la sogs/ /gtsug lag khang sogs 'dul ba la/ /'jig rten mngon par dad 'phel phyir/ /ri mo'i cho ga brjod pa 'di/ /thugs rje can gyis legs par gnang / /khyams dang khang bzangs rnams su ni/ /ched du me sbar mi bya ste/ /dgos pas de dang mthun par ni/ /mdag ma yongs su spyad par bzhed/ /sa gzhi yongs su sbyangs pa la/ /me ni btang bar mi bya ste/ /de phyir de ni sbar ba'i phyir/ /me ling rjes su gnang ba yin/ /sangs rgyas tshogs kyi rgan po dang / /rgyal po dang ni slob dpon dang / /de bzhin mkhan po nyid kyi bka'/ /gang zhig rigs na 'da' mi bya/ /dang po 'dir ni gang cung zad/ /gnang med bkag pa med pa ni/ / gang zhig rung dang mthun pa na/ /de ni the tshom med par spyad/ /mi rung ba dang nye lta na/ /sdom brtson rnams kyis de mi spyad/ /'di ni chos 'dul mdor bsdus pa/ /bstan bcos sgron ma lta bur gzhag /'dul ba 'am ni mdo sde yi/ /gleng gzhi gsal por ma dran na/ /bzhugs pa'i grong khyer rnams kyi ming / /gang 'dod don ni smos par bya/ /mnyan yod gnas bcas tsam pa ka / bA rA Na sI yangs pa can/ /rgyal po'i khab ces grags pa ste/ /'di dag grong khyer chen por shes/ /khyim bdag mgon med zas sbyin te/ /sa bdag mi dbang gsal rgyal brjod/ /bud med rnams la sa ga ste/ /brjed ngas dag ni smos par bya/ /grong khyer bA rA Na sI ste/ /sa bdag yang ni tshangs sbyin no/ /skyes pa'am de bzhin bud med la/ /bsnyen gnas ster na bsgrub bya ba/ /dang po'i sbyor ba gang yin la/ /klog pa dran pa mi gsal na/ /bslab pa'i gzhi ni mthar thug pa/ / 'di ni thub pas gsungs pa yin/ /thog mar bA rA Na sIr ni/ /chos kyi 'khor lo bskor ba na/ /lnga sde bzang la phan bzhed pas/ /mdo sde bcom ldan 'das kyis gsungs/ /gnyis pa'ang gang gi 'khor kun ni/ /gzugs la sogs pa phung por bcas/ /bdag 'dzin zhags pa gcig bu yis/ /'ching ba mtha' dag rnam grol mdzad/ /lnga sde bzang rnams nyid kyi phyir/ /gos dag legs bgos 'tsham dang mdzes/ /zlum po la sogs tha snyad kyis/ /bslab gzhi yang dag gsungs pa yin/ /ji ltar gnas ni gtsang ma'i lha/ /bag yod gos yongs gyon byed pa/ /de bzhin thub pas dge slong la/ /rlum por rab tu gsungs pa yin/ /thub pas rim pa 'di yis ni/ /bzang sbyin la sogs mtho ris dang / /thar pa 'dod pa de dag la/ /bslab pa'i gzhi yang bca' bar mdzad/ /so ga'i dus na mtha' med pa'i/ /rgya mtshor 'jug pa ji bzhin du/ /gang gis dang por 'dul ba la/ /tshul khrims dri ma sbyong mdzad pa/ /drug sde bdag nyid chen po rnams/ /ngo mtshar bcas pa'i spobs pa can/ /mtshon pa med kyang grub pa ste/ /bzang po de dag drang srong che/ /dga' bo nye dga' 'gro mgyogs dang / /'char ka 'dun pa nam so ste/ /mkhas pa dpa' po drug sder grags/ /sangs rgyas bstan pa bsrung bar mdzad/ /slar yang de dag shin tu bzang / /rab bsngags mun pa 'joms byed pa/ /mkhas pa rnams kyis gang ltar yang / /'dul ba las ni 'da' mi byed/ /sangs rgyas sras su gang gyur pa/ /de dag yon tan bsam mi khyab/ /gang 'dir nye bar bstan pa ni/ /rtogs par byed pa'i bshes gnyen mchog /yun rings bsags sdig mi shes pas/ /'gro ba gnyid kyis log pa 'di/ /gang gis dam chos bstan pa yi/ /lag pas bskul te sad mdzad pa'o/ /yun rings goms pas bskyed pa yi/ /thugs rjes thugs ni brlan pa ste/ /bdag nyid chen po'i mdzad pa ni/ /rnam bcu gdon mi za ba yin/ /gzhan dag byang chub lung bstan dang / /byang chub sems bskyed bstan pa dang / /sku tshe lnga cha 'dor ba dang / /mchog gnyis rab tu byung ba dang / / sangs rgyas gdul bya 'dul ba dang / /mtshams gcad pa ni bsgrub pa dang / /cho 'phrul rab tu bstan pa dang / /lha yi gnas su gshegs pa dang / /las kyi dbye ba bshad pa dang / /yab yum bden pa mthong ba la/ /ji srid ma bkod de srid par/ /mya ngan 'da' bar mi mdzad do/ /gang gis thub pa'i bstan pa 'di/ /'jig rten snang mdzad rin po che/ /rgya mtsho sgrol ba'i gru lta bu/ /sdud po rnams la phyag 'tshal lo/ /gang zhig mang du thos pa yis/ /skye ba'i lcags sgrog rnam grol ba/ /thos 'dzin mdo sde'i sde snod kyi/ /sdud po 'phags pa kun dga' la'ang / /gang gis ngan song sbrul gdug ni/ / 'dul ba'i legs bshad dri med pa'i/ /sngags kyis gso bar mdzad pa dang / /'phags pa nye ba 'khor la yang / /gang gis kun nas ma mo yi/ /sde snod rab tu bstan pa yis/ /sgron ma bzhin du gsal mdzad pa/ /blo ldan 'phags pa 'od srungs la'ang / /rgyal po'i khab tu sde snod gsum/ / 'dis legs thams cad bsdus pa yin/ /lhar bcas mi yi 'jig rten du/ /snang ba cher mdzad 'di yin no/ /gang du thos ldan 'di dag dang / /dgra bcom sdig pa ring spangs pa/ /lnga brgya po ni dam pa'i chos/ /yang dag bsdus pa'i dbang por grags/ /brgya byin thog mar byas pa yi/ / lha rnams dam chos gus pa yis/ /gang du 'dus pa chen pos ni/ /nam mkha'i ngos ni rgyan du byas/ /rgyal po'i khab kyi mthar yang ni/ /sa gzhi lha rnams me tog ni/ /lag nas kun tu 'thor ba yis/ /gang du de ni yun rings mdzes/ /gang tshe dam chos rin chen mchog /nub nyams 'dam du bying ba bzhin/ /lha dang mi rnams dogs 'jigs pa/ /bsdus pas slar yang yid sos mdzad/ /gang phyir thub pas dam pa'i chos 'di ni/ /skye dgu gso byed skyob pa'i dpung bral ba/ /sdug bsngal ma lus nyer zhi'i don bsgrub phyir/ /brtson pas 'khor bar yun rings spyod pa na/ /'od 'bar dbu ni mgul gos bcas pa dang / /rang gi sha dang rus dum khrag rgyun btang / /sras kyang zla tshes cha 'dra yid 'ong ba'i/ /btsun mo mchog sbyin dpag med gang don phyir/ /bder gshegs dpal brnyes zhi lam chos bstan 'di/ /ji srid ma nub bar du rnam kun nas/ /snyom las don med ltung ba rnam spangs te/ /zhi ba'i don du yang dag brtson par bya/ /bder bshegs bka' ni mi rnams tshig las khyad 'phags phyir/ /chos gang cung zad spros kyang snyan dngags mchog gyur te/ /bsam pa'i thabs kyis bsgrub 'bras kha na ma tho med/ /'di de las gzhan be+e sha kas kyang byas pa la/ /gang zhig ma tshang lhag gam yang na gzhan du byas/ /sngar bshad rnams las go rims 'chol bar bshad kyang rung / /de kun rang bzhin zhi ba'i bsam pas bzod par mdzod/ /nyam nga'i lam du long ba rdeg 'chos min nam ci/ /dge slong chos 'dul thig ler byas mdzes me tog phreng rgyud legs brgyus las/ /gang thob bsod nams dpal des 'khor ba'i lus can rnams dang lhan cig bdag /'dod pa'i 'dam las rnam par brgal nas dad sogs yon tan kun gyis brgyan/ /mya ngan 'das par tshe rabs gzhan du'ang bsnyen par rdzogs pa byed par shog / gang dag tshul khrims dri med gnas 'dod cing / /mya ngan 'das pa'i grong khyer 'jug 'dod pa/ /rtag tu tshig ler byas pa'i don 'di nyid/ /klog dang 'don dang sems pa nyid du shog /ji ltar 'jig rten rga nad 'chi ba'i gdung bas gdungs/ /ji srid dus na 'dod chags me yis dga' mgur bsreg / de ltar de srid sems rgyun dri ma ngan 'khrud pa'i/ /bder gshegs bka' ni gang gA'i chu bzhin gnas gyur cig /'phags pa gzhi thams cad yod par smra ba'i 'dul ba tshig le'ur byas pa/ me tog gi phreng rgyud ces bya ba/ /'dul ba 'dzin pa chen po 'phags pa dge 'dun 'bangs kyi slob ma/ dpal 'phags pa sa ga'i lhas mdzad pa rdzogs so// //bal po'i paN+Di ta dza yA ka ra dang / bod kyi lo tsA ba dge slong pradz+nyA kI rtis bsgyur cing zhus te gtan la phab pa'o// //rgya gar shar phyogs sa dan ga ra'i paN+Di ta ba na rad+na ma hA s+thi bI ra la gtugs te/ sgra'i don la mkhas pa rong ston shes bya kun rig gis/ 'gyur cung zad bcos te gtan la phab pa'o/ / @##/ /rgya gar skad du/ Ar+ya rU la sarba a sti ba di shra ma Ne ra kA ri kA/ bod skad du/ 'phags pa gzhi thams cad yod par smra ba'i dge tshul gyi tshig le'ur byas pa/

CLOSE WINDOW