བོད་ཡིག

e-texts based on the ACIP/ALL Input

@##/ /rgya gar skad du/ bi na ya sU tra TI ka /bod skad du/ 'dul ba'i mdo'i rgya cher 'grel pa/ bam po dang po/ dkon mchog gsum la phyag 'tshal lo/ /'dul ba rgya mtsho'i gting dang pha rol brnyes gyur cing / /dri ma med rgyu mtha' dag rdzogs pa'i dgongs ldan pa/ /'jig rten 'dren pa ma lus mchog la phyag 'tshal te/ / 'dul ba'i mdo yi de nyid rnam par dbye bar bya/ /nges par 'byung ba'i tshul khrims kyi dbang du byas te/ zhes bya ba mdo dang po 'dis ni/ 'dul ba'i mdo'i 'grel pa dang / brjod par bya ba dang / dgos pa dang / dgos pa'i yang dgos pa rnams brjod de/ 'di ltar rtog pa sngon du gtong ba dag ni 'brel pa med pa dang / brjod par bya ba med pa dang / dgos pa med pa'i tshig kyang khas mi len na/ bstan bcos la sogs pa gzhan lta smos kyang ci dgos te/ de bas na 'dul ba'i mdo 'di la brjod par bya ba med par dogs pa bsal ba'i phyir brjod par bya ba bsnyad do/ /'bras bu med par dogs pa bzlog pa'i phyir dgos pa brjod do/ /thabs med par dogs pa spang ba'i phyir 'brel pa bshad do/ /'dod pa'i don grub par bya ba'i phyir dgos pa'i yang dgos pa bstan to/ /de ltar na 'dis bzhi po bstan te/ kha cig ni mngon sum du'o/ /kha cig ni brgyud pas so/ /de la 'dir brjod par bya ba ni/ chos 'di pa dag gi tshul khrims te/ tshul khrims ni tshul khrims so/ /de lta bas na tshul khrims zhes bya ba'i sgra smos pa/ brjod par bya ba bsnyad pa yin no/ /'dir dgos pa ni bcom ldan 'das kyis gsungs pa'i tshul khrims bstan pa ste/ de yang mdo 'dis rjod par byed do/ /de lta bas na mdo 'di ni thabs yin la/ tshul khrims bstan pa ni thabs las byung ba yin no/ /thabs dang thabs las byung ba'i mtshan nyid ni 'brel ba yin no/ /'brel pa ni shugs kyis smos te/ 'di ltar tshul khrims rtogs par bya ba'i phyir mdo rtsom pa na don gyis mdo ni thabs nyid yin par smos pa'i phyir ro/ /thabs med par 'jug pa mi srid pas de'i phyir 'brel pa ni don gyis bstan pa yin no/ /de ltar na 'dir tshig gi don 'di 'byung ste/ 'dir tshul khrims ni brjod par bya ba yin la/ tshul khrims bstan pa ni dgos pa yin te/ 'dul ba'i mdo 'dis tshul khrims ston par byed pas na/ 'dul ba'i mdo ni dgos pa de'i thabs yin no/ /de ltar na 'dul ba'i mdo dang dgos pa gnyis ni thabs dang thabs las byung ba'i mtshan nyid kyis 'brel pa yin te/ rgyu dang 'bras bu'i mtshan nyid ces bya ba'i tha tshig go/ /de lta bas na tshul khrims yongs su shes par bya ba'i don du mdo 'di brtsams so zhes bya bar gnas so/ / brgyal la la zhig tshul khrims yongs su shes pa des ci bya ste/ de ni bya rog gi so brtag pa dang 'dra bar gang yang dgos pa med do zhes rgol na/ de'i phyir dgos pa'i yang dgos pa brjod par bya ste/ de yang nges par 'byung ba zhes smos pas bstan to/ /nges par 'byung ba ni mya ngan las 'das pa ste/ bcom ldan 'das kyi bstan pa la tshul khrims 'di ni nges par 'byung ba'i phyir bstan pa yin pas/ de'i phyir tshul khrims yongs su dag pas mya ngan las 'das pa yang dag par 'thob par 'gyur ro/ /'o na ye shes kyis nyon mongs pa rnams 'joms pa yin na/ ji ltar tshul khrims kyis de yang dag par 'thob par 'gyur zhe na/ bden mod kyi 'on kyang tshul khrims la brten nas ye shes kyis nyon mongs pa rnams spong bar 'gyur te/ de'i phyir mdo sde las kyang tshul khrims la gnas tshul khrims la brten nas 'phags pa'i bden pa bzhi po dag yang dag pa ji lta ba bzhin du mthong bar 'gyur ro zhes gsungs so/ /'dir dgos pa ni tshul khrims bstan pa'o zhes smras na/ 'o na rnam par 'byed pa la sogs pa'i gzhung gis tshul khrims de bstan zin pas/ de'i phyir mdo 'di brtsam par mi bya ba kho na'o zhe na/ de ni de lta ma yin te/ 'di ltar gzhung gzhan gyis de bstan mod kyi/ 'on kyang gzhung rgyas pa nyan pas 'jigs pa rnams kyi don dang / rnam par 'byed pa la sogs pa de dag nyid yang dag par bstan par bya ba gzhan dag gis phyir log par rnam par 'chad pa bsal ba'i don du slob dpon gyis brtsams so/ /de lta bas na brjod par bya ba dang / dgos pa'i yang dgos pa ni tshul khrims dang nges par 'byung ba'i sgra gnyis kyis go rims bzhin du mngon sum du bstan la/ 'brel pa dang dgos pa ni shugs kyis bstan te/ tshul khrims bstan pa'i don du mdo brtsam pa'i phyir ro/ /dbang du bya ste zhes bya ba'i sgra ni nges par 'byung ba'i tshul khrims kyi dbang du bya ba nyid kyi bar ston te/ de ni re zhig spyi'i don yin no/ /yan lag gi don yang brjod par bya ste/ nges par 'byung ba'i tshul khrims zhes bya ba ni/ nges par 'byung ba'i phyir tshul khrims ni nges par 'byung ba'i tshul khrims so/ /'byung ba zhes bya ba'i sgra 'di ni don mang po zhig la yang mthong ste/ 'di lta ste/ rkang gis 'gro ba la grong du byung ba dang / grong khyer du 'byung ba zhes bya ba lta bu'o/ /bzhon pa'i don la yang mthong ste/ 'di lta ste dper na/ glang po ches 'byung ba dang / rtas 'byung ba zhes bya ba lta bu'o/ /lam la yang 'byung ba zhes bya ste/ de nas 'byung ba'i phyir ro/ /thob par bya ba la yang 'byung ba zhes bya ste/ 'byung ba ni theb par bya ba'o zhes zer ba'i phyir ro/ / de dag las 'dir ni 'byung ba'i sgra thob par bya ba kho nar bzung ste/ nges par zhes bya ba'i sgra smos pa'i phyir ro/ /nges par 'byung ba ni nges par 'byung ba ste/ phyir mi ldog pa thob par bya ba phung po'i lhag ma med pa'i mya ngan las 'das pa thob pa zhes bya ba'i tha tshig go/ /ci'i phyir zag pa med pa'i lam mi gzung zhe na/ gtso bo ma yin pa'i phyir ro/ /lam ni gtso bo ma yin te/ phung po'i lhag ma med pa'i mya ngan las 'das pa'i don du yin pa'i phyir ro/ /gtso bo dang gtso bo ma yin pa gnyis ni/ gtso bo la 'bras bur yid ches so zhes zer ba'i phyir ro/ /mya ngan las 'das pa ni don dam par gtso bo yin te/ dge ba dang rtag pa'i phyir ro/ /de lta bas na phung po'i lhag ma med pa'i mya ngan las 'das pa yang dag par thob pa'i gnas skabs gang yin pa de ni/ nges par 'byung ba'i sgrar brjod de/ 'di ltar de gcig pu phyir mi ldog pa kho na yin gyi/ mu stegs byed kyis kun nas brtags pa gzhan ni ma yin pa'i phyir ro/ /tshul khrims zhes bya ba ni/ spong ba bdun zhes bya ba'i tshul khrims 'khor dang bcas pa ste/ gang nas 'dul ba'i mdo 'di btus pa'i 'dul ba mtha' dag bshad pa'o/ /'dir 'dul ba zhes bya ba yang rnam par 'byed pa la sogs pa dag yin par blta ste/ des bya ba dang bya ba ma yin pa nye bar ston pas slob ma rnams 'dul zhing rjes su ston par byed pas 'dul ba'o/ /dbang du bya ste zhes bya ba'i sgra ni dbang du bya ba'i don to/ /'di ltar a tha zhes bya ba'i sgra ni bkra shis pa la sogs pa dag la yang 'byung mod kyi/ dbang du bya ba ste zhes bya ba'i sgras bye brag tu nges par gzhag ste/ 'di ni dbang du bya ba'i don yin gyi gzhan gyi don ma yin no zhes bya ba'i tha tshig go/ /'di ltar a tha zhes bya ba'i sgra ni bkra shis pa'i don du yang mthong ste/ 'di lta ste dper na/ bkra shis pa 'di las yun ring du 'tsho ba dang mthun pa'i brjod le'u rnam par bshad par bya'o zhes bya ba lta bu'o/ /kha cig tu tshig gi phrad kyi don du yang sbyor te/ de nas bcom ldan 'das yongs su mya ngan las 'das pa'i dus kyi tshe de nyid na zhes bya ba lta bu'o/ /kha cig tu de ma thag pa'i don te/ 'di lta ste dper na/ des de ma thag tu som nyi thams cad rnam par bcad nas zhes bya ba la sogs pa lta bu'o/ /kha cig tu ni dbang du bya ba'i don te/ 'di lta ste dper na sgra'i rjes su bstan pa'i dbang du bya'o zhes bya ba lta bu'o/ /'dir yang a tha zhes bya ba'i sgra slob dpon gyis dbang du bya ba'i don kho nar sbyar te/ rang gi bshad pa las de ltar rnam par bshad pa'i phyir ro/ /dbang du bya ste zhes bya ba ni dbang du bya ba ste/ mdo re re la yang nges par 'byung ba'i tshul khrims zhes bya ste/ nye bar gnas zhes bya ba'i tha tshig go/ /de ltar na 'dir tshig gi don 'di 'byung ste/ dge 'dun thams cad 'dus pa na zhes bya ba la sogs pa'i mdo de brjod nas/ de ma thag tu nges par 'byung ba'i tshul khrims zhes bya ba 'di dang sbyar bar byas te/ tshul khrims 'di ni phung po'i lhag ma med pa'i mya ngan las 'das pa 'thob par 'gyur ba yin pa'i phyir ro/ /de bzhin du rab tu 'byung ba dang / rdzogs par bsnyen pa de'i phyir dge slong 'ga' zhig la mkhan po nyid du gnas pa la'o zhes bya ba de brjod nas nges par 'byung ba'i tshul khrims zhes bya ba 'di yang brjod par bya ba dang / mi rung ba dang / mthun rkyen la rung ba dang 'gal ba ni rung ba ma yin par bsdu'o/ /phyi ma dang mthun la snga ma dang 'gal ba ni rung bar ro zhes bya ba'i bar de dag brjod nas/ nges par 'byung ba'i tshul khrims zhes bya ba 'di dang sbyar bar bya'o/ /'di skad bstan te/ mdo'i tshig yongs su rdzogs kyi bar du nges par 'byung ba'i tshul khrims zhes bya ba 'di'i dbang du byas par rig par bya'o/ /de ltar na mdo 'di'i spyi'i don 'di 'byung ste/ nges par 'byung ba'i tshul khrims zhes bya ba'i sgra ni mdo re re la yang nye bar gnas te/ 'dul ba'i mdo mtha' dag gi dgos pa dang brjod par bya ba dang / 'brel pa dang / dgos pa'i yang dgos pa bstan pa'i phyir ro/ /dbang du byas te zhes bya ba'i sgra ni nges par 'byung ba'i tshul khrims kyi dbang du bya ba ste/ bya ba zhes bya bar ston to/ /de ltar re zhig mdo dang pos tshul khrims kyi phung po mtha' dag phung po'i lhag ma med pa'i mya ngan las 'das pa 'thob pa'i don nyid yin par bcom ldan 'das kyis gsungs pa bstan nas/ da ni dang por rab tu 'byung ba'i gzhi brjod par bya ste/ bslab pa'i gzhi rnam par gzhag pa mtha' dag ni rab tu byung ba rnams kho na'i yin par gsungs kyi khyim pa rnams kyi ma yin pa'i phyir ro/ /spong ba bdun zhes bya ba so sor thar pa'i sdom pa yang de dag kho na'i yin no/ /'dul ba gzhi las kyang dang por rab tu 'byung ba'i gzhi bstan pas 'dir yang de kho na bzhin du ston to/ /de yang sngon gyi cho ga dang da ltar gyi cho ga'i dbye ba rnam pa gnyis te/ re zhig sngon gyi cho ga je bshad par bya ste/ dang por bstan pa'i phyir dang / brjod par bya ba nyung ba'i phyir ro/ /da ltar gyi cho ga bas sngar bstan pa dang / mkhan po dang slob dpon gyis gnang ba bas sngar bshad pas na/ de'i phyir sngon gyi cho ga zhes bya ste/ de gnyis med par yang sngon rab tu 'byung ba dang / rdzogs par bsnyen pa'i cho ga 'byung bas de'i phyir sngon gyi dus na rab tu 'byung ba dang rdzogs par bsnyen pa cig car mgo mnyam du rdzogs par 'gyur te/ mdo mdzad pas kyang don de nyid yang dag par bzung nas/ dge 'dun thams cad 'dus pa na cha lugs 'di bzhin byas/ rgan rims la phyag 'tshal te/ thal mo sbyar tsog tsog por 'dug cing gsol ba btab par gyur pa gsum dang / gsol ba dang bzhi'i las kyis cig car rab tu 'byung ba dang / rdzogs par bsnyen pa nye bar bsgrubs par gyur pa lta bu ni sngon gyi cho ga'o zhes bya ba smras so/ /dge 'dun thams cad ces bya ba'i tshig ni dkyil 'khor ba phyogs gcig gi dge 'dun 'dus pa dgag pa'i don to/ /'di skad bstan te/ mtshams de na dge slong ji snyed gnas pa de dag thams cad las kyi gnas der lhags pa yin pas/ de'i phyir dge 'dun thams cad ces bya'o/ /'dus pa na zhes bya ba ni tshogs pa na'o/ /cha lugs 'di bzhin byas zhes bya ba ni rab tu byung ba dang rdzogs par bsnyen par 'dod pa des cha lugs 'di bzhin byas pa de/ cha lugs 'di bzhin byas pa de ni rab tu dbyung ba dang rdzogs par bsnyen par 'dod pa yin no/ /cha lugs zhes bya ba ni/ rab tu 'byung ba'i rtags so/ /'di bzhin byas zhes bya ba ni/ rdzogs par byas pa ste/ rab tu 'byung ba dang rdzogs par bsnyen par 'dod pas zhes bya ba'i tha tshig go/ /gang gi tshe skra dang kha spu dag bregs shing chos gos gsum bgos par gyur pa de'i tshe na cha lugs 'di bzhin byas zhes bya'o/ /cha lugs 'di bzhin byas pa'i gang zag de dge 'dun du gyur pa'i dge slong dag gis rab tu 'byung ba dang rdzogs par bsnyen pa nye bar bsgrubs par gyur pa zhes bya ba byed pa'i tshig de dang 'dir sbyar ro/ /rgan rims la zhes bya ba ni dge 'dun la rabs gnyis te/ gzhon rims dang rgan rims yod pas/ dge slong rgan pa rnams kyi rabs ni rgan rims te der phyag 'tshal te zhes bya ba'i tha tshig go/ /phyag 'tshal te zhes bya ba ni/ yan lag lngas phyag 'tshal te zhes bya ba'i tha tshig go/ /su la zhe na rgan rims la zhes bya bar sbyar ro/ /thal mo sbyar zhes bya ba ni/ de la thal mo sbyar ba'i tshul dang ldan pa ste/ thal mo sbyar ba de nye bar bsgrubs par gyur zhes bya ba de dang 'dir sbyar ro/ /tsog tsog por 'dug cing zhes bya ba la/ tsog pur 'dug pa ni tsog tsog por 'dug pa ste/ de stan la mi 'dug go/ /thams cad du yang rgan rims la zhes bya bar sbyar ro/ /gsol ba btab par gyur pa zhes bya ba la/ gsol ba nyid gsol ba btab pa'o/ /gsol ba btab pa gang la yod pa de gsol ba btab par gyur pa ste/ gsol ba btab par gyur pa'i gang zag de nye bar bsgrubs par gyur zhes bya bar sbyar ro/ /ci zhig gsol ba btab par gyur zhe na/ smras pa/ rab tu 'byung ba dang rdzogs par bsnyen par ro/ /ji ltar zhe na/ gsum dang zhes bya ste/ gal te rab tu 'byung ba dang rdzogs par bsnyen par bya ba'i phyir lan gsum gsol bar byed na de'i tshe na de gsol ba btab par gyur pa yin no/ /'dir gsol ba ni/ dge 'dun btsun pa rnams gsan du gsol/ bdag ming 'di zhes bgyi ba dge 'dun las rab tu 'byung ba dang rdzogs par bsnyen pa dge slong gi dngos po gsol na/ thugs brtse ba can dge 'dun btsun pa rnams kyis thugs brtse ba'i slad du bdag rab tu 'byung du gsol/ rdzogs par bsnyen par mdzad du gsol/ zhes bya ba yin te/ sngags 'dis lan gsum gsol ba btab par gyur pa zhes bya ba'i tha tshig go/ /gsol ba dang bzhi'i las kyis zhes bya ba ni/ las gang la gsol ba dang bzhi yod pa de gsol ba dang bzhi'i las so/ /'di skad bstan te/ las gang la las brjod pa gsum dang gsol ba dang bzhi'i las byed pa de ni gsol ba dang bzhi'i las yin no/ /brjod pa zhes bya ba ni tshig tu brjod pa'i don te/ zlos zhes bya ba'i tha tshig go/ /cig car rab tu 'byung ba dang rdzogs par bsnyen pa zhes bya ba la/ cig car zhes bya ba'i sgra ni 'dir dus gcig tu zhes bya ba'i tha tshig yin no/ /'di skad bstan te/ dus mnyam du cig car dus gcig kho nar de gnyis ka nye bar bsgrubs par gyur pa ste/ dge 'dun du gyur pa'i dge slong dag gis rdzogs par byas par gyur pa yin gyi rim gyis ni ma yin no/ /cig car zhes bya ba'i sgra 'dir dus gcig la bya'o zhes bya ba de ci las rig par bya zhe na/ sngags kyi tshig las te 'di ltar sngags las/ dge 'dun btsun pa rnams gsan du gsol/ ming 'di zhes bgyi ba 'di dge 'dun las legs par gsungs pa'i chos 'dul ba la rab tu 'byung ba dang rdzogs par bsnyen pa dge slong gi dngos po gsol te/ de'i slad du dge 'dun gyi ming 'di zhes bgyi ba rab tu 'byung ba dang rdzogs par bsnyen par mdzad na tshe dang ldan pa gang dag ming 'di zhes bgyi ba rab tu 'byung ba dang rdzogs par bsnyen par mdzad par bzod pa de dag ni cang ma gsung shig / gang dag mi bzod pa de dag ni gsungs shig /dge 'dun gyis bzod cing gnang nas/ dge 'dun gyis ming 'di zhes bgyi ba rab tu phyung rdzogs par bsnyen par mdzad pa lags te/ 'di ltar cang mi gsung bas de de bzhin du 'dzin to zhes 'don pa'i phyir ro/ /sngags 'di la rab tu phyung rdzogs par bsnyen par mdzad lags te zhes/ de gnyis smos pa gang yin pa de 'dir khungs yin par rig par bya'o/ /lta bu ni sngon gyi cho ga'o zhes bya ba la/ lta bu ni zhes bya ba'i sgra ni rnam pa'i tshig yin te sngon gyi cho ga'i rnam pa ni de lta bur rig par bya'i/ rnam pa gzhan ma yin no zhes bya ba'i tha tshig go/ /sngon gyi cho ga zhes bya ba ni/ da ltar gyi cho ga bas sngar cho ga rigs la rnam pa gzhan de lta bu 'byung ngo zhes bya ba'i tha tshig go/ /'dir la la dag 'di skad ces gal te sngon gyi cho gas rab tu 'byung ba dang rdzogs par bsnyen par 'gyur ba'i rgyu'i dngos po 'grub par 'gyur na ni da ltar gyi cho gas ci bya/ gal te da ltar gyi cho ga kho nas rgyu'i dngos po 'grub par 'gyur na yang sngon gyi cho gas ci bya ste/ gcig kho nas byas pa'i phyir ro zhe na/ de la nyes pa med de gnyi ga yang rgyu'i dngos po 'grub par 'gyur ba yin mod kyi/ 'on kyang 'dul ba'i sems can gyi bye brag las cho ga gnyis rnam par gzhag ste/ 'di ltar dang po mngon par rdzogs par byang chub pa'i dus kyi tshe na ni sems can rgyud rnam par dag pa sha stag 'byung bas 'dul ba'i rim pa la mi ltos shing / mkhan po dang slob dpon la sogs pa la ma ltos par yang tshegs chung ngu kho nas bcom ldan 'das kyi bka' rdzogs par byed pa dang / de dag bsod nams byas pa yin pas nad med pa dang / ji ste de dag la nad cig byung du zin na yang de dag gi nad g.yog la sogs pa rnyed par 'gyur ro/ /da ltar ni de lta bu'i rgyud rnam par dag pa dag med pas des na da ltar gyi cho ga rnam par gzhag go/ /de ltar na 'dir spyi'i don 'di 'byung ste/ sangs rgyas bcom ldan 'das d ang po mngon par rdzogs par byang chub pa'i dus na dge 'dun du gyur pa'i dge slong rnams kyis sngar bstan pa'i cho gas rab tu 'byung ba dang rdzogs par bsnyen par 'dod pa la sngar bstan pa'i bye brag gis bye brag tu byas shing cig car rab tu 'byung ba dang rdzogs par bsnyen par byed de/ sngags kyi tshig gcig gis zhes bya ba'i tha tshig go/ /sngon gyi cho ga dgos pa dang bcas pa rnam par bshad zin to/ /de ltar sngon gyi cho ga dgos pa dang bcas par bstan nas/ da ni da ltar gyi cho ga bshad par bya ste/ rab tu 'byung ba dang rdzogs par bsnyen pa de'i phyir dge slong 'ga' zhig la mkhan po nyid du gnas pa la'o zhes bya ba ni/ gnas pa la rab tu 'byung ba dang rdzogs par bsnyen pa dag yod kyi/ mi gnas pa la med do zhes bya bar sbyar ro/ /ci zhig gi phyir gnas pa la zhe na/ rab tu 'byung ba dang rdzogs par bsnyen pa de'i phyir zhes bya ba smras te/ de'i phyir zhes bya bar sbyar ro/ /gang gi phyir rab tu 'byung bar 'dod pa'am rdzogs par bsnyen par 'dod pa de rab tu 'byung ba'am rdzogs par bsnyen pa 'thob par bya'o zhes de'i phyir dge slong 'ga' zhig la gnas pa yin te/ de'i phyir ro zhes bya ba'i tha tshig go/ /su la gnas pa la zhe na/ dge slong 'ga' zhig la zhes bya ba smras te/ ming ma bstan pa la'o/ /des 'di skad ston te/ gang kho na la gnas te rab tu 'byung ba de kho na la gnas te/ rdzogs par bsnyen par nges pa ma yin gyi/ 'di ltar 'dod pas 'jug par rig par bya ste/ de'i phyir 'ga' zhig la zhes bya ba'i tshig smos so/ /rnam pa gang gis gnas pa la zhe na de'i phyir mkhan po nyid du zhes bya ba smras te/ mkhan po'i dngos po ni mkhan po nyid de/ mkhan po nyid de nyid du zhes bya ba'i tha tshig go/ /gnas pa la'o zhes bya ba ni rab tu 'byung bar 'dod pa'am/ rdzogs par bsnyen par 'dod pa ni gnas pa zhes bya ste/ de'i rab tu 'byung ba dang rdzogs par bsnyen pa dag ni gzhan la rag las pa'i phyir dang / de'i rab tu 'byung ba dang rdzogs par bsnyen pa mkhan po dang 'brel pa'i phyir ro/ /'di skad bstan te/ da ltar gyi cho ga la rab tu 'byung ba dang rdzogs par bsnyen par 'dod pas/ rab tu 'byung ba dang rdzogs par bsnyen pa de'i phyir dge slong 'ga' zhig la mkhan po nyid du gnas na de la rab tu 'byung ba dang rdzogs par bsnyen pa dag yod kyi/ ji ltar sngon gyi cho ga la dge slong 'ga' la yang mi gnas pa la yang yod pa lta bu ni ma yin no zhes bya ba'i tha tshig go/ /rab tu 'byung ba smos pas dge tshul gyi sdom pa yang gnas pa la yong par bstan pa yin te/ dge tshul gyi sdom pa yang rab tu 'byung ba la gnas pa'i phyir ro/ /de lta mod kyi rab tu 'byung ba ni mkhan po kho na las 'gyur la/ dge tshul gyi sdom pa ni gzhan las thob pa kho na yin no/ /mkhan por 'gyur bas rab tu 'byung bar 'dod pa cho ga gang gis yongs su gzung bar bya ba'i cho ga de bstan pa'i phyir/ dang po'i mkhan po nyid kyis bar chad dris nas yongs su dag pa la skabs dbye'o zhes bya ba smras te/ gnas kyis rab tu 'byung bar 'dod pa de la bar chad yod dam med ces dris nas/ gal te de la bar chad kyi chos de dag med na de'i tshe yongs su dag pa yin pas rab tu 'byung bar 'dod pas yongs su dag pa de la kho bos khyod rab tu 'byung ngo zhes skabs dbye'o zhes bya bar sbyar ro/ /sus skabs dbye zhe na/ dang po'i mkhan po nyid kyis zhes bya ba smras te/ dge tshul gyi mkhan po nyid kyis zhes bya ba'i tha tshig go/ /dge tshul gyi mkhan po nyid ni gzhan gyi mkhan po nyid pas dang po yin pa'i phyir ro/ /'dir bar chad ces bya ba ni/ ma bsad pa la sogs pa yin par 'dod de/ rab tu 'byung ba la bar du gcod par byed pa'i phyir ro/ /dris nas yongs su dag pa la skabs dbye'o zhes bya bas ni/ 'di skad bstan te/ gal te rab tu 'byung bar 'dod pa zhig 'ong zhing rab tu 'byung bar gsol na/ de'i tshe dge slong des de la bar chad rnams dri bar bya ste/ gal te bar chad de dag med na de'i 'og tu yongs su dag pa de la dang po'i mkhan po nyid kyi skabs dbye'o/ /de skad du gzhung las kyang 'ga' zhig gi gan du rab tu 'byung bar 'dod pa 'ongs na des de la bar chad kyi chos rnams dris nas gzung bar bya'o zhes gsungs so/ /sdom pa rnams sbyin pa'i go rims bstan pa'i phyir/ dge bsnyen nyid dang / dge tshul nyid dang / dge slong nyid dag gis snga mar rdzogs par ma bsnyen pa la phyi ma mi bya'o zhes bya ba smras te/ dge bsnyen nyid dang / dge tshul nyid dang / dge slong nyid de dag gi tshig snga ma snga ma gang dang gang yin pa der rdzogs par ma bsnyen pa zhes bya ba yang dag par thob pa'i gang zag la tshig phyi ma phyi ma mi bya'o zhes ston to/ /'di skad bstan te/ ji srid du dge bsnyen gyi sdom pa sbyin par mi byed pa de srid du dge tshul gyi sdom pa sbyin par mi bya la/ de bzhin du ji srid du dge tshul gyi sdom pa sbyin par mi byed pa de srid du rdzogs par bsnyen par mi bya'o zhes bstan to/ /de ni rnam par gzhag pa bstan pa yin gyi 'byung ba'i rgyu bstan pa ni ma yin te/ 'di ltar dge bsnyen gyi sdom pa med par yang dge tshul gyi sdom pa yang dag par len na rung ba nyid yin la/ de bzhin du dge tshul gyi sdom pa med par yang dge slong gi sdom pa yang dag par len na rung ba nyid yin pa'i phyir ro/ /de lta na go rims 'dis ni sdom pa thams cad kyi yang dag par blang bar bstan pa yin te/ 'di ltar btsun pa khyim pa rab tu byung ba zhig rdzogs par bsnyen par bgyid na/ rdzogs par bsnyen zhes bgyi'am/ rdzogs par ma bsnyen zhes bgyi/ nye ba 'khor rdzogs par bsnyen zhes bya'o zhes gsungs pa'i phyir ro/ /de la 'dir gal te dge bsnyen dang dge tshul gyi sdom pa ma skyes pa la dge slong gi sdom pa mi 'byung bar 'gyur na/ gtsug lag de don med par 'gyur ro/ /dge bsnyen gyi sdom pa med par yang dge tshul gyi sdom pa skye ba'i khungs kyang de nyid yin te/ de lta bas na mdo 'di ni rnam par gzhag pa bstan pa tsam yin no/ /sngar dkon mchog gsum la skyabs su 'gro bar bya zhing phyis sdom pa yang dag par blang bar bya'o zhes bstan pa'i phyir/ skyabs su 'gro bar khas blang ba'i tshig rtsom pa dang / dge bsnyen nyid dang dge tshul nyid du khas blang ba'i tshig bya'o zhes bya ba smras te/ skyabs zhes bya ba ni 'dir thar pa dang / lam thob par bya ba'i rten du gyur pa ni dkon mchog gsum zhes bya ba'i dngos po'o/ /skyabs su 'gro ba zhes bya ba ni/ skyabs de la skyabs su 'gro ba ste/ skyabs su 'jug pa'o/ /skyabs su 'gro ba de khas blang ba zhes bya ba ni/ khas len pa'o/ /tshig ces bya ba ni/ skyabs su 'gro bar khas blang ba de sgrub par byed pa ste/ rkang gnyis rnams kyi mchog /sangs rgyas la skyabs su mchi'o/ /zhes bya ba la sogs pa'o/ /rtsom pa zhes bya ba ni/ skyabs su 'gro bar khas blang ba'i tshig de nyid dge bsnyen nyid dang dge tshul nyid du khas blang ba'i tshig gang yin pa'i rtsom pa yin te/ dge bsnyen nyid dang dge tshul nyid du khas blang ba'i tshig gi rtsom pa skyabs su 'gro bar khas blang ba'i tshig de bya'o/ /dge bsnyen nyid dang dge tshul nyid ces bya ba ni/ dge bsnyen gyi dngos po dang dge tshul gyi dngos po ste/ de gnyis khas blang ba de'i tshig de yang bya'o/ /'di skad bstan te/ gang la la zhig dge bsnyen dang dge tshul dang sdom pa len par 'dod pa des dang por je dkon mchog gsum la skyabs su 'gro bar khas blang bar bya'o/ /de'i 'og tu dge bsnyen nyid dang / dge tshul nyid du khas blang ba'i tshig bya'o/ /de ltar gzhung 'di snang ste/ btsun pa dgongs su gsol/ bdag ming 'di zhes bgyi ba dus 'di nas bzung ste/ ji srid 'tsho'i bar du rkang gnyis rnams kyi mchog sangs rgyas la skyabs su mchi'o/ /'dod chags dang bral ba rnams kyi mchog chos la skyabs su mchi'o/ /tshogs rnams kyi mchog dge 'dun la skyabs su mchi'o/ / bdag ji srid 'tsho'i bar du dge bsnyen du btsun pas gzung du gsol zhes bya ba'i tshig 'di lan gsum du brjod par bya ba dang / dge tshul nyid du khas blang ba'i dus na yang de bzhin du/ btsun pa dgongs su gsol/ bdag ming 'di zhes bgyi ba dus 'di nas bzung ste/ ji srid 'tsho'i bar du rkang gnyis rnams kyi mchog sangs rgyas la skyabs su mchi'o/ /'dod chags dang bral ba rnams kyi mchog chos la skyabs su mchi'o/ /tshogs rnams kyi mchog dge 'dun la skyabs su mchi'o/ /bdag ji srid 'tsho'i bar du dge tshul du btsun pas gzung du gsol zhes brjod nas/ rnam grangs tha ma la bdag ji srid 'tsho'i bar du dge tshul du slob dpon gyis gzung du gsol zhes brjod par bya'o/ /de la kha cig na re skyabs su 'gro ba nyi tshe lan gsum brjod nas/ de'i 'og tu bdag ji srid 'tsho'i bar du dge bsnyen du slob dpon gyis gzung du gsol zhes bya ba dang / bdag ji srid 'tsho'i bar du dge tshul du slob dpon gyis gzung du gsol zhes bya ba brjod par bya'o zhes kyang zer te/ de ni 'khrul pa yin par rig par bya'o/ /mya ngan las 'das pa'i bsam pa brtan po med par sdom pa mi skye bas skyabs su 'gro bas mya ngan las 'das pa bsam pa brtan po sgrub par byed de/ ji ltar zhe na/ rkang gnyis rnams kyi mchog sangs rgyas la skyabs su mchi'o zhes bya ba 'dis ni lam nye bar ston par mdzad pa la yang dag par rten par byed/ 'dod chags dang bral ba rnams kyi mchog chos la skyabs su mchi'o zhes bya ba 'dis ni chos kyi mchog mya ngan las 'das pa la yang dag par rten par byed/ tshogs rnams kyi mchog dge 'dun la skyabs su mchi'o zhes bya ba 'dis ni mya ngan las 'das pa'i grong khyer du 'gro ba'i zla grogs la yang dag par rten par byed pa'i phyir te/ mya ngan las 'das pa'i bsam pa brtan po med par ni su yang skyabs su 'gro ba 'grub par mi byed do/ /rdzogs par bsnyen pa'i dus na ni rdzogs par bsnyen zhes bya ba'i sgra kho na las mya ngan las 'das pa'i bsam pa brtan po rtogs par bya ste/ 'di ltar rdzogs par bsnyen pa zhes bya ba la rdzogs pa zhes bya ba ni gnod pa thams cad dang bral ba'i dngos po la bya ste/ mya ngan las 'das pa yang de lta bu'i rang bzhin yin no/ /bsnyan pa zhes bya ba'i sgra ni nye ba'i tshig yin te de'i phyir bsam pa thams cad kyis mya ngan las 'das pa dang nye bar gyur pa ni rdzogs par bsnyen pa yin no/ /de bas na mya ngan las 'das pa'i bsam pa kho nas sdom pa skye'i gzhan gyis ma yin no/ /yang dag par len pas bya ba 'di dag thams cad bya ste/ de yang gzhan gyis brjod pa na len pas bzlas par bya'o/ de ni bslab pa yin par rig par bya'o/ /byin pa blang ba ni ma yin te/ sdom pa ni rang gi sems la rag las pa'i phyir ro/ /gzhan yang sbyin par byed pa las len pas sdom pa gang dang gang gnod pa'i sdom pa de dang de rgyun chad pa'i skyon du yang 'gyur te/ dge bsnyen dang dge tshul dang dge slong gi sdom pa dag ni re rer zad pa'i phyir ro/ /gal te de la byin par gyur na rang gi rgyud las rgyun chad par 'gyur ba zhig na/ de ltar yang ma yin te/ de lta bas na byin pa blang ba ni ma yin no/ /de ltar dge bsnyen nyid dang dge tshul nyid du khas len du bcug nas de'i 'og tu ci bya zhe na/ de'i 'og tu bslab pa brjod pa khas blang ba'i tshul gyis bya'o zhes bya ba smras te/ de'i 'og tu zhes bya ba ni/ dge bsnyen nyid dang dge tshul nyid du khas blang ba'i tshig brjod ma thag pa de'i 'og tu'o/ /bslab pa brjod pa zhes bya ba ni/ bslab pa'i brjod pa ni bslab pa brjod pa ste/ dge bsnyen rnams kyi ni lnga'o/ /dge tshul rnams kyi ni bcu'o/ /'di skad bstan te/ bdag ji srid 'tsho'i bar du dge bsnyen du slob dpon gyis gzung du gsol/ bdag ji srid 'tsho'i bar du dge tshul du slob dpon gyis gzung du gsol/ zhes bya ba'i tshig de'i 'og tu de gnyis nyid la bslab pa'i gzhi gang dag yin pa de dag brjod par bstan par bya'o/ /ji ltar de ji bya ba'i tshul gyis 'di dang 'di spong ngo zhes sam/ 'on te dgag pa'i tshul gyis 'di dang 'di mi bya'o zhes she na de'i phyir/ khas blang ba'i tshul gyis bya'o zhes bya ba smras te/ bya ba'i tshul gyis so/ /ji ltar 'phags pa dgra bcom pa de dag gis ji srid 'tsho'i bar du zhes bya ba la sogs pa'i rtsom pas/ dge bsnyen la ni srog gcod pa spangs te srog gcod pa las slar ldog par bgyi'o zhes bya ba nas de bzhin du 'bru'i chang dang bcos pa'i chang myos par 'gyur ba bag med pa'i gnas las slar ldog par bgyi'o zhes bya ba'i bar gyis lnga po dag brjod par bya'o/ /de bzhin du dge tshul la ni srog gcod pa la sogs pa nas/ gser dngul len pa las slar ldog par bgyi'o zhes bya ba'i bar gyis bcu po dag go/ /gang gis dge bsnyen nyid du nye bar bsgrub par bya zhing dge bsnyen nyid kyi 'og tu yang gang gis dge tshul nyid du nye bar bsgrub par bya zhe na de'i phyir/ rang gi dge bsnyen nyid du nye bar bsgrubs nas dge 'dun la zhu ba'i dge slong la gtad par bya'o zhes bya ba smras te/ rang gis zhes bya ba ni/ mkhan pos te rab tu 'byung ba ni mkhan po kho na'i dbang du bya ba'i phyir ro/ /de nyid kyis kyang dang po kho nar kho bos khyod rab tu dbyung ngo zhes skabs phye bas/ de'i phyir mkhan po rang gis rab tu 'byung bar 'dod pa de/ dge bsnyen nyid du nye bar bsgrubs pa dge bsnyen gyi sdom pa byin nas de'i 'og tu dge slong la gtad par bya'o/ /ji lta bu zhig la zhe na/ zhu ba la ste/ go bar byed pa la'o/ /su la zhu ba la zhe na/ dge 'dun la ste dge slong gi dge 'dun la zhu ba la'o/ /'di skad bstan te/ ji dang po kho nar mkhan pos rab tu 'byung bar 'dod pa la dge bsnyen gyi sdom pa sbyin par bya'o/ /de'i 'og tu gang gis de zhu bar byed pa'i dge slong la gtad par bya ste/ 'di dge 'dun la zhus shig ces bya ba'i tshig gis bkri zhes bya ba'i tha tshig go/ /de ltar gzhung las kyang de'i 'og tu gang gis de zhu bar byed pa'i dge slong la gtad par bya'o zhes 'byung ngo / /'dir zhu bas ci zhig bya zhe na/ zhu bas kyang ci yongs su dag gam zhes dris la dag na zhu bar bya'o zhes bya ba smras te/ ci yongs su dag gam zhes bya ba ni ci bar chad kyi chos rnams yongs su dag gam zhes bya ba'o/ /de skad du gtod par byed pa rab tu 'byung bar 'dod pa de'i mkhan po la dris la dag na rab tu 'byung bar 'dod pa de dge 'dun la/ dge 'dun btsun pa rnams gsan du gsol/ ming 'di zhes bgyi ba 'di mkhan po ming 'di zhes bgyi ba las rab tu 'byung bar 'tshal te/ khyim pa gos dkar po can zhes bya ba la sogs pa'i sngags kyi tshig gis zhu bar bya'o/ /'di skad bstan te/ dge slong zhu ba des rab tu 'byung bar 'dod pa'i mkhan po la/ ci rab tu 'byung bar 'dod pa 'di bar chad kyi chos rnams yongs su dag gam zhes dri bar bya zhing / gal te mkhan po 'di skad du yongs su dag go zhes zer na/ de yongs su dag pa kho na yin pas dge slong zhu bas de'i tshe rab tu 'byung bar 'dod pa yongs su dag pa dge 'dun la zhu bar bya'o zhes bstan to/ /dge 'dun ji ltar gnas pa la zhu bar bya zhe na/ thams cad 'dus pa la yang rung / gnas khang so so na 'khod pa la yang rung ngo zhes bya ba smras te/ thams cad 'dus pa la zhes bya ba ni/ dge 'dun thams cad 'dus pa la ste/ thams cad 'dus pa des gnas pa'i dge 'dun la'o/ /gnas khang so so zhes bya ba ni gnas khang so so na gnas pas 'khod pa la'o/ /gnyis kar yang rung zhes bya ba'i sgra ni/ rnam pa gnyis kar yang bstan pa'i tha tshig ste/ rnam pa 'dis zhur yang rung la/ rnam pa 'dis zhu bar yang rung ba'o/ /'di skad bstan te/ gang gi tshe dge 'dun thams cad phyogs gcig tu 'dus par gyur pa de'i tshe zhur yang rung / yang na gang gi tshe dge 'dun du gyur pa'i dge slong dag rang rang gi gnas khang na gnas pa'i tshe/ gnas khang so sor song ste/ de dag gi mdun du zhur yang rung ngo zhes bstan to/ /gtsug lag khang khyim so so na 'khod pa la zhes 'byung ba'i tshig gang yin pa de ni gnas khang so so na 'khod pa la zhes bya ba'i tshig 'di nyid yin no/ /gang dag gi mdun du zhu bar bya ba de dag gi cho ga gang yin pa de bstan pa'i phyir ro/ /thams cad kyis gal te yongs su dag na'o zhes brjod par bya'o zhes bya ba smra ba ste/ thams cad kyis zhes bya ba ni/ dge 'dun du gyur pa'i dge slong ma lus pa thams cad kyis so/ /gal te yongs su dag na'o zhes bya ba ni/ gal te rab tu 'byung bar 'dod pa de bar chad kyi chos rnams yongs su dag par gyur na de'i tshe rab tu 'byung bar bya'o zhes bya ba'o/ /brjod par bya'o zhes bya ba ni/ smra bar bya'o zhes bya ba'i tha tshig go/ /zhus pa'i 'og tu rab tu 'byung bar 'dod pas mkhan por gsol bar bya'o zhes bya bas ni/ 'di skad bstan te/ zhus ma thag kho nar rab tu 'byung bar 'dod pas mkhan por gsol ba'i sngags slob dpon dgongs su gsol/ bdag ming 'di zhes bgyi ba slob dpon la mkhan por gsol gyis slob dpon bdag gi mkhan po mdzad du gsol/ slob dpon mkhan pos rab tu 'byung bar bgyi'o zhes bya ba la sogs pas/ mkhan por gsol ba bya ste/ bcol bar bya'o/ /mkhan pos kyang rab tu 'byung bar 'dod pa'i gtsug phud ma gtogs pa skra dang kha spu breg par bya'o zhes bya ba ni/ mkhan pos rab tu 'byung bar 'dod pa'i gtsug phud ma gtogs pa gtsug phud gzhag ste/ skra dang kha spu dag breg par bya bkyer bar bya ba'o/ /'di skad bstan te/ mkhan pos rab tu 'byung bar 'dod pa'i gtsug phud ni dri ba'i phyir gzhag par bya/ skra dang kha spu dag ni breg par bya'o/ /gal te mkhan pos bskos pa'i 'dreg mkhan gyi skra dang kha spu dag 'dreg par byed na de lta na yang nyes pa med do/ /gtsug phud ma gtogs pa zhes bya ba ni/ skra dang kha spu breg pa gang la gtsug phud med pa de ni/ gtsug phud ma gtogs pa skra dang kha spu breg pa ste/ gtsug phud gzhag ste/ skra dang kha spu breg par bya'o zhes bya ba'i tha tshig go/ /gtsug phud bzhag pa'i dgos pa ni rab tu 'byung bar 'dod pa 'di rab tu 'byung bar nges pa yin nam ma yin zhes dri bas yongs su shes par bya ba'i phyir ro/ / de'i gtsug phud gang gi tshe breg par bya zhe na/ gtsug phud breg go zhes dris nas ster na de'o zhes bya ba smras te/ rab tu 'byung bar 'dod pa de la ci gtsug phud breg gam zhes de skad dri bar bya zhing / gal te dris pas de rab tu 'byung bar 'dod pas breg tu ster na de'i tshe/ ster ba yin pas gtsug phud de breg par bya'o/ /rab tu 'byung bar 'dod pa de ltar skra dang kha spu breg pas khrus bya'o zhes bya ba ni/ dus dang mthun pa'i chus bkru bar bya'o zhes bya ba'i tha tshig go/ /khrus byas pa'i 'og tu mkhan pos gos ngur smrig dag sbyin par bya'o zhes bya ba ni/ khrus byas pa'i 'og tu mkhan pos rab tu 'byung bar 'dod pa de la rab tu 'byung ba'i tshul dang mthun pa'i tshon gyis kha bsgyur ba'i gos dag sbyin par bya'o/ /rab tu 'byung bar 'dod pa des kyang rkang pa gnyis la gtugs te blang bar bya'o zhes bya ba ni/ phyag 'tshal te gos de dag blang bar bya'o/ /de'i 'og tu mkhan pos bskon par bya'o zhes bya ba ni/ mkhan po rang gis rab tu 'byung bar 'dod pa de la gos de dag bskon par bya dgab par bya'o zhes bya ba'i tha tshig go/ /bskon pa na mkhan pos rab tu 'byung bar 'dod pa de'i mtshan ma tshor bar brtag go zhes bya ba ni/ za ma dang / ma ning dang mtshan med dang mtshan gnyis pa'i skyon yongs su spangs pa'i phyir ro/ /ma tshor bar zhes bya ba ni/ ci nas kyang rab tu 'byung bar 'dod pa des bdag gi mtshan mkhan pos mthong ngo snyam du mi shes pa de ltar brtag par bya'i/ sgren mor phyung ste ni mi yin no/ /rab tu byung ba'i dus kho nar mtshan brtag par nges pa ni ma yin te/ 'di ltar gang tshun chad kho bos khyod rab tu dbyung ngo zhes mkhan po nyid du khas blangs pa de tshun chad nas bskon pa na zhes smras pa'i bar dag gzung ngo / /mkhan po rang kho nas nges par bya ba yang ma yin te/ gal te dge slong yid ches pas las de byas pa de las mkhan pos thos par gyur na yang las de mkhan po nyid kyis byas pa yin par khong du chud par bya'o/ /skyabs su 'gro ba rtsom pas rab tu 'byung ba nye bar bsgrub par bya'o zhes bya ba ni/ de ltar rab tu 'byung bar 'dod pa za ma la sogs pa'i skyon dang bral bar shes nas/ de'i 'og tu rab tu 'byung ba nye bar bsgrub par bya thob par bya'o/ /ji ltar nye bar bsgrub par bya zhe na/ skyabs su 'gro ba rtsom pas te/ rab tu 'byung ba nye bar bsgrub pa de'i dang po rtsom pa de ni skyabs su 'gro ba rtsom pa'o/ /'di skad bstan te/ dang por skyabs su 'gro ba sbyin par bya zhing phyis rab tu 'byung ba yang dag par len du gzhug ste/ mkhan pos 'di ltar sbyin par bya ste/ mkhan po dgongs su gsol/ bdag ming 'di zhes bgyi ba dus 'di nas gzung ste/ ji srid 'tsho'i bar du rkang gnyis rnams kyi mchog sangs rgyas la skyabs su mchi'o/ /'dod chags dang bral ba rnams kyi mchog chos la skyabs su mchi'o/ /tshogs rnams kyi mchog dge 'dun la skyabs su mchi'o/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa shAkya seng ge shAkya'i rgyal po shAkya'i gtso bo de rab tu byung ba'i rjes su rab tu 'byung ste/ khyim pa'i rtags spong ngo / /rab tu byung ba'i rtags yang dag par len to zhes bya ba'i sngags kyis sbyin par bya'o/ /'dir rab tu 'byung ba'i rtags zhes bya ba ni skra bregs pa la sogs pa dge slong gi cha lugs la bya'o/ /rnam pa gzhan nye bar bstan pa'i phyir/ gsol ba'i 'og tu'ang rung ngo zhes bya ba smras te/ rab tu 'byung ba nye bar bsgrub pa zhes bya bar sbyar ro/ / rung ngo zhes bya ba'i sgra ni lugs tha dad par rtog pa'i don to/ /'dul ba 'dzin pa kha cig 'di la tha dad par rtog pa ste/ mkhan por gsol ba'i mod kho na la skra dang kha spu ma bregs par rab tu dbyung bar bya ste/ 'di ltar dper na dge tshul nyid rab tu byung ba kho na la byed pa de bzhin du skra dang kha spu breg pa dang / ngur smrig sbyin pa dang bskon pa yang rab tu 'byung ba kho na'i tshul yin pas/ de'i phyir mkhan por gsol ba'i mdo kho na la rab tu dbyung bar bya zhing phyis skra dang kha spu breg pa la sogs pa bya'o zhes zer ro/ /dge tshul nyid du nye bar sgrub par byed pa'i dge slong la gtad par bya'o zhes bya ba ni/ mkhan pos rab tu phyung ba'i gang zag de'o/ /dge tshul nyid du nye bar sgrub par byed pa zhes bya ba ni/ gang gis de la dge tshul gyi sdom pa sbyin par byed pa ste/ dge tshul nyid du nye bar bsgrub pa'i ngang tshul gang la yod pa de ni dge tshul nyid du nye bar sgrub par byed pa'o/ /dge slong la zhes bya ba ni/ gsol ba dang bzhi'i las kyis rdzogs par bsnyen pa'i dge slong de la'o/ /gtad par bya'o zhes bya ba ni/ sbyin par bya'o zhes bya ba'i tha tshig go/ /de'i ngang tshul can gyi rkyen gyi gzhis de ston te/ gal te dge slong de dge tshul gyi sdom pa sbyin par nus pa yin na'o/ /ci yongs su dag gam zhes dris nas dag na nye bar bsgrub par bya'o zhes bya ba ni/ dge tshul nye bar sgrub par byed pas 'di bya ba'o/ /ci yongs su dag gam zhes bya ba ni/ ci 'di la bar chad kyi chos rnams med dam zhes bya ba'i tha tshig go/ /dris nas zhes bya ba ni/ gtod par byed pa'i dge slong de la dris nas so/ / gal te de 'di skad ces 'di ni dag go zhes zer na de'i tshe gang zag de dag pa yin pas dge tshul nyid du nye bar bsgrub par bya'i/ ma dag na ni mi bya'o/ /de ni slob dpon yin no zhes bya ba ni/ dge tshul nyid du nye bar sgrub par byed pa'i dge slong de ni dge tshul de'i slob dpon yin te/ dper na rab tu 'byung ba nye bar sgrub par byed pa'i dge slong mkhan po yin pa dang 'dra'o/ /gsang ste ston pa dang las byed pa dang gnas sbyin pa dang klog pa yang ngo zhes bya ba la/ gsang ste ston par byed pas na gsang ste ston pa'o/ /rdzogs par bsnyen pa'i tshe na gsol ba dang bzhi'i las byed pas na las byed pa'o/ /gnas sbyin par byed pas na gnas sbyin pa'o/ /klog tu 'jug pas na klog pa ste gsang ste ston pa dang las byed pa dang gnas sbyin pa dang klog pa yang de dag nyid do/ /yang ngo zhes bya ba'i sgra ni/ gong du mdo las smos pa'i slob dpon zhes bya ba'i sgra dang sbyar bar bya ba'i don te/ de 'ba' zhig slob dpon ma yin gyi/ 'di dag kyang slob dpon yin no zhes bya ba'i tha tshig go/ /slob dpon lnga smras na da gnas skabs gang la slob dpon nyid dag tu 'gyur bar brjod par bya zhe na de'i phyir ro/ /don grub na gyur pa nyid do zhes bya ba smras te/ don grub na zhes bya ba ni/ don gang gis slob dpon nyid du 'gyur ba'i don de yongs su mthar thug par gyur na ste/ don dgos pa de grub pa yongs su rdzogs na'o/ /gyur pa nyid do zhes bya ba ni/ slob dpon nyid du gyur pa nyid do/ /ji ltar gang la la zhig dge tshul gyi sdom pa sbyin par byed pa de dge tshul gyi sdom pa skyes pa de nyid dang / cig car du dge tshul gyi slob dpon du yang gyur par rig par bya ba de bzhin du/ gsang ste ston pa'i dgos pa yongs su rdzogs na/ gsang ste ston pa'i slob dpon nyid du gyur pa yin no/ /de bzhin du las byed pa dge slong gi sdom pa sbyin par byed pa de skad cig gang la dge slong gi sdom pa skye ba de nyid dang / cig car du las byed pa'i slob dpon nyid du gyur par rig par bya'o/ /gnas sbyin pa'i slob dpon nyid ni skya rengs shar ba'i dus na slob dpon nyid du 'gyur ba yin no/ /klog pa'i slob dpon ni mtshan nyid tha dad par brjod par bya ste/ tshigs su bcad pa gcig lan gsum bklags pa la sogs pas so/ /ci mkhan po nyid kyang don grub na gyur pa yin nam zhe na ma yin te/ ji ltar zhe na/ mkhan por gsol ba khas blangs pa na der gyur to zhes bya ba smras te/ gang gi tshe mkhan por gsol ba de'i tshe na khas blangs pa dam bcas pa gsum pa la'o/ /gang zhig khas blangs pa na zhe na/ de'i phyir mkhan por zhes bya ba smras so/ /der gyur to zhes bya ba ni/ mkhan po nyid der gyur pa ste yin par gyur to zhes bya ba'i tha tshig go/ /ji srid du dge tshul du mi byed pa'am ji srid du rdzogs par bsnyen par mi byed kyi bar du mi 'gyur ba ma yin gyi/ mkhan por khas blangs pa'i dus kho na'o/ /dge tshul nyid du nye bar bsgrub pa la sogs pa'i don grub na slob dpon nyid la sogs par gyur pa nyid do zhes smras na/ gang gi don du grub pa yin zhe na/ de'i phyir brjod pa/ tha ma gang yin pa'i cha gsum pa la grub pa nyid do zhes bya ba smras te/ brjod pa zhes bya ba ni/ dge tshul nyid du nye bar sgrub pa la sogs pa'i don rjod par byed pas brjod pa ste/ tshig gang la don de yang dang yang du rjod par byed zlos par byed pa de ni 'dir brjod pa zhes bya'o/ /brjod pa de la dge tshul nyid du nye bar sgrub pa la sogs pa'i don grub pa nyid de/ de'i dbang gis na slob dpon nyid la sogs pa dag grub pa yin no/ /brjod pa gsum yod pa las brjod pa gang gi brjod pa'i cha gang la zhe na/ de'i phyir tha ma gang yin pa'i cha gsum pa la zhes bya ba smras te/ tha ma phyi ma'i brjod pa gang yin pa brjod pa tha ma gang yin pa de'i cha gsum pa gang yin pa'i cha gsum pa de la dge tshul nyid du nye bar sgrub pa la sogs pa'i don grub pa nyid du rig par bya'o/ /'di skad bstan te/ brjod pa kho na la don de yongs su rdzogs par gyur na 'on kyang brjod pa gang la dang / brjod pa'i cha gang la mi shes pas de'i phyir brjod pa tha ma gang yin pa'i cha gsum pa gang yin pa de la zhes de skad bya'o/ /sngar bstan pa'i don dpes bstan pa'i phyir/ dper na gzhan brjod pa'i dus na dge tshul nyid bzhin no zhes bya ba smras te/ gzhan zhes bya ba'i sgra ni/ 'dir dge slong gang dge tshul nyid du nye bar sgrub par byed pa de la bya'o/ /brjod pa'i dus na zhes bya ba ni/ nye bar sgrub par byed pa gzhan de brjod pa'i dus gang yin pa na ste/ dge tshul gyi sdom pa sbyin pa'i dus na'o/ /dus de na dge tshul nyid du grub cing / dge tshul du byed pa'i tha tshig ste/ dge tshul gyi sdom pa zhes bya ba de grub pa nyid du rig par bya ba bzhin no/ /dus de yang gang yin par shes par bya zhe na/ bdag ji srid 'tsho'i bar du dge tshul du zhes bya ba'i 'og tu slob dpon gyis zhes bya ba'i sgra brjod pa'i gong du zhes bya ba'i tha tshig go/ /de lta bas na de'i 'og tu slob dpon gyis gzung du gsol zhes brjod par bya'i/ btsun pas gzung du gsol zhes brjod par mi bya'o/ /ci mkhan po nyid du grub pa'i don kyang de kho na bzhin du khong du chud par bya 'am zhe na/ 'dir tha ma la mkhan po'i don to zhes bya ba smras te/ grub pa nyid do zhes bya bar sbyar ro/ /'dir zhes bya ba ni/ gzhan brjod pa'i dus na'o/ /tha ma la zhes bya ba ni/ rnam grangs tha ma gang yin pa la ste/ des na khas blangs pa'i bdag nyid kyi mkhan po'i don du grub pa nyid de/ de'i tshe 'di skad ces mkhan po mkhan pos rab tu 'byung ba dang / rdzogs par bsnyen par bgyi'o zhes brjod par bya'i/ btsun pa mkhan pos she'am/ slob dpon mkhan pos zhes mi bya'o/ / thams cad du yang gsum pa'i don gyi mtshams kho nas khong du chud par bya'i yi ge'i tshad las ni ma yin no/ /'di ltar dge tshul gyi sdom pa ma sbyin pa'i dus na don gyi mtshams gnyis te/ skyabs su 'gro ba dang / dge tshul nyid du khas blang pa yin mod kyi/ 'on kyang cha gsum du bya bar nus te/ skyabs su 'gro ba ni cha gcig go/ /bdag ji srid 'tsho'i bar du dge tshul du zhes bya ba ni cha gnyis pa'o/ /slob dpon gyis gsol zhes bya ba ni cha gsum pa'o/ /brjod pa tha ma yongs su ma rdzogs mod kyi/ 'on kyang cha gsum pa'i don las ma lus par grub pa nyid de/ bya ba phal cher byas pa'i phyir ro/ /las thams cad la yang cho ga 'di bzhin blta bar bya'o/ /gnas sbyin pa dang klog pa gnyis kyi don grub pa nyid ni gzhan du bstan pa'i phyir/ gnas sbyin pa ni zhag gcig gnas nyid kyi phyir nye bar gnas pa mthar thug na'o zhes bya ba la sogs pa smras te/ gnas sbyin pa dang klog pa'i slob dpon nyid gnyis kyi rgyu'i don grub pa nyid ni brjod pa gsum pa'i cha gsum pa la ma yin mod kyi 'on kyang gnas sbyin pa ni gang gi tshe mthar thug pa mthar phyin cing yongs su rdzogs par gyur pa de'i tshe na'o/ /zhag gcig ces bya ba ni/ nyin mtshan gcig go/ /gnas nyid kyi phyir nye bar gnas pa zhes bya ba ni/ gnas sbyin pa'i slob dpon la gnas nyid kyis gnas su 'dzin pa nyid kyi phyir nye bar gnas pa'o/ /mthar thug na'o zhes bya ba ni/ gnas sbyin pa de'i mthar thug pa'o/ /'di skad bstan te/ gang gi tshe gnas sbyin pa'i slob dpon dang mtshams gcig tu gnas su 'dzin pas nyin zhag gcig lhan cig gnas par byed na de'i tshe gnas sbyin pa'i mthar thug pa nyid yin te/ de ltar gzhung las kyang gnas sbyin pa'i slob dpon gang zhe na/ gang gi drung du zhag gcig tsam gnas pas bsten pa yang yin no zhes gsungs so/ /klog pa ni tshigs su bcad pa gcig lan gsum bzlas na'o zhes bya ba ni/ klog pa'i bsam pas gang las tshigs su bcad pa gcig lan gsum bzlas na de'i klog pa'i mthar thug pa yin no/ /'di skad bstan te/ gang las tshigs su bcad pa gcig lan gsum bklags na de ni klog pa'i slob dpon yin par blta bar bya ste/ klog pa'i mthar thug pa yang de yin par rig par bya'o/ /gtsug lag las klog pa'i slob dpon gang zhe na/ gang las tshig bzhi pa'i tshigs su bcad pa tsam bzung ba'o zhes bya ba'i tshig de lta bu snang ba la/ bzung ba zhes bya ba'i sgra ni 'di ltar rnam par bshad par bya ste/ klog pa'i slob dpon gyis smras pa zlos par byed pas rjes su zlos pa ni bzung ba ma yin no/ /slob dpon gyis ji skad mdor bris pa'i tshig 'di ni bcom brlag pa'i gzhung las 'byung ngo / /tshigs su bcad pa gcig lan gsum bzlas na klog pa'i mthar thug pa yin par smras na/ de lta na gyi na lan gsum bzlas pa yang slob dpon nyid du thal bar 'gyur ro zhe na/ klog pa'i bsam pa med pas brjod pa ni klog pa nyid ma yin no zhes bya ba ste/ gal te klog pa'i bsam pa med pas lan stong rjod par byed du zin kyang de klog pa ma yin pa kho na ste/ dper na kha ton tsam zlos pa bzhin no/ / de'i phyir klog pa'i bsam pa med pas brjod pa slob dpon nyid du mi 'gyur ro/ /kha ton la sogs pa ni goms par bya ba'i bsam pa yin pa'i phyir dang / klog pa ni ma bzung ba 'dzin pa'i tshul yin pa'i phyir ro/ /de lta bas na kha ton la sogs pa ni klog pa nyid kyang med na slob dpon nyid du 'gyur ba lta yod re skan/ slob dpon dang mkhan po dag tu 'gyur ba smras nas/ gang gi tshe gyur pa na de gnyis kyi ming nas ji ltar brjod par bya zhe na/ de gnyis la gzhan du nye bar mi brjod do zhes bya ba smras te/ slob dpon dang mkhan po de gnyis la slob dpon dang mkhan po'i sgra ma gtogs pa rnams gzhan du nye bar mi brjod do/ /nye bar brjod pa'i tshig ni nye bar brjod pa ste/ nye bar zhes bya ba'i sgra ni khad nye ba'i tshig yin pa'i phyir ro/ /de bas na slob dpon dang mkhan po gnyis kyi ming tshe dang ldan pa dang btsun pa dang gnas brtan zhes bya ba'i sgra gzhan du brjod par mi bya ste/ 'di ltar slob dpon la yang slob dpon kho na zhes brjod par bya/ mkhan po la yang mkhan po kho nar ro/ /de gnyis la nye ba'i tshig dang bral bar yang rnam pa thams cad du gzung bar mi bya'o/ /rgan pa la yang nye ba'i tshig dang bral bar ming mi gzung ste/ gzhi de nyid kyi phyir ro/ /gzhan la mi bya'o zhes bya ba ni/ slob dpon mkhan po gnyis las gzhan pa'i gang zag slob dpon dang mkhan po ma yin pa la slob dpon dang mkhan po'i sgra dag tu nye bar brjod par mi bya'o/ /mkhan po la mkhan po'i sgrar nye bar brjod par bya'o zhes bstan na/ de ltar na slob dpon bzhin du mkhan po la yang mkhan po'i sgra 'ba' zhig gis nye bar brjod pa 'thob po zhe na de'i phyir/ don gyi slad du mtshan nas smos te zhes bya ba dang bcas par ma smras par mkhan po'i ming mi gzung ngo zhes bya ba smras te/ mkhan po'i ming bzung ba na/ don gyi slad du mtshan nas smos te zhes bya ba'i tshig de dang bcas par ma smras par mkhan po zhes bya ba'i sgra nye bar brjod pa nyi tshes mkhan po'i ming mi gzung ngo / /'di skad bstan te/ don gyi slad du zhes bya ba dgos pa'i dbang du mkhan po'i mtshan nas zhes bya ba mkhan po'i ming nas smos te zhes bya ba brjod de/ tshig de dang bcas pa zhes bya ba tshig de'i mjug thogs su mkhan po'i sgra nye bar brjod pas mkhan po'i ming nye bar brjod de gzung bar bya'i/ don gyi slad du mtshan nas smos te zhes bya ba'i tshig ma smras par mkhan po zhes bya ba'i sgra tsam nye bar brjod pas mkhan po'i ming mi gzung ngo / /bcas par zhes bya ba smos pa ni/ bar du chad pa spang ba'i don te/ tshig snga ma dang 'brel bar mkhan po'i ming gzung bar bya ba'i bar du chad nas ni ma yin no zhes bya ba'i tha tshig go/ /dge tshul nyid du nye bar bsgrub pa'i cho ga'o zhes bya ba ni/ dge tshul nyid thob par bya ba'i cho ga'o zhes bya ba'i tha tshig go/ /dge tshul nyid du cho ga rnam par bshad nas/ da ni rdzogs par bsnyen pa'i cho ga brjod par bya ste/ dge 'dun las rdzogs par bsnyen par bya'o zhes bya ba ni/ dge 'dun kho na las rdzogs par bsnyen par 'gyur gyi/ ji ltar rab tu 'byung ba dang dge tshul nyid gang zag kho na las 'gyur ba ltar gang zag las ni ma yin no/ /thabs gang gis dge 'dun las rdzogs par bsnyen par 'gyur zhe na/ mkhan po nyid du phyogs par gyur pas las byed pa dang gsang ste ston pa'i dge slong la gsol ba gdab par bya'o zhes bya ba smras te/ mkhan po nyid du phyogs par gyur pa zhes bya ba ni/ rdzogs par bsnyen pa'i mkhan po nyid du nye bar gnas pa sta gon du gyur pa'i dge slong ste/ de nyid kyis las byed pa la gsol ba gdab pa bcol bar bya zhing / gsang ste ston pa'i dge slong la yang gsol ba gdab par bya'o zhes bya bar sbyar ro/ /dge slong zhes smos pa ni/ gsang ste ston pa'i khyad par du bya ba'i phyir te/ las byed pa ni las yongs su brjod pas dge slong nyid yin par grub pa'i phyir ro/ /gsol ba gdab pa'i 'og tu ci zhig bya zhe na/ mkhan por gsol ba bya'o zhes bya ba smras te/ rdzogs par bsnyen par 'dod pas dge 'dun gyi dbus de nyid du mkhan por gsol ba bya'o/ /mkhan por gsol ba'i 'og tu mkhan pos ci zhig bya zhe na/ de rang gis de la chos gos gsum byin gyis brlab par bya'o zhes bya ba smras te/ de zhes bya ba ni/ mkhan po la snyegs te/ 'das ma thag tu bstan pa'i phyir ro/ /'o na rang gis zhes bya ba smos mi dgos te/ des de la chos gos gsum byin gyis brlab par bya'o zhes bya ba 'di nyid kyang don rtogs pa'i phyir rang gis zhes bya ba smos ci dgos she na/ de ni de lta ma yin te/ rang gis zhes smos pa ni bcol ba'i cho ga spang ba'i phyir te/ 'di ltar dper na skra breg pa dang mtshan brtag pa la sogs pa dag gzhan gyis byed na yang nyes pa med pa lta bu cho ga ma nges pa ni bcol ba'i cho ga zhes bya'o/ /'dir ni chos gos byin gyis brlab pa mkhan po nyid kyis rang gis bya ba yin gyi gzhan byed du mi gzhug pa de'i don du rang gis zhes bya ba'i sgra nye bar brjod pa byas so/ /de la zhes bya ba ni/ rdzogs par bsnyen par bya ba la'o/ /de ltar na 'dir mdo'i don 'di 'byung ste/ mkhan po de rang gis rdzogs par bsnyen par bya ba de la chos gos gsum dras shing drubs zin pa de yod cing bdog pa'am/ med cing mi bdog na gzhan la rgyu yang byin gyis brlab par bya'o/ /byin gyis brlabs pa'i 'og tu bskon par bya ste/ chos gos byin gyis brlab pa ni cha lugs kyi don du yin pa'i phyir ro/ /lhung bzed kyang mi chung ngam mi che'am mi skya'am zhes dge 'dun la bstan nas so zhes bya ba la/ lhung bzed kyang dge 'dun la bstan nas zhes bya ba'i kyang zhes bya ba ni/ de rang kho nas de yang byin gyis brlab par bya'o zhes bya ba'o/ /dge 'dun la lhung bzed bstan pa ci'i phyir bya zhe na/ de'i phyir mi chung ngam zhes bya ba la sogs pa ste/ byin gyis brlab tu rung ba'i lhung bzed gsum las mi chung ngam zhes bya ba mi dman nam zhes bya ba'i tha tshig go/ /mi che'am zhes bya ba ni/ tshad gsum po dag las bong tshod ma lhag gam zhes bya ba'o/ /mi skya'am zhes bya ba ni/ lhung bzed dkar por ma gyur tam zhes bya'o/ /lhung bzed nag po zhes gsungs pa gang yin pa de ni skya ba la sogs par thal ba yongs su spang ba'i phyir nye bar bstan pa yin te/ chung ba nyid la sogs pa'i skyon dang ldan pa la ni byin gyis brlab pa mi 'chags pa'i phyir ro/ /lhung bzed bstan pa'i 'og tu dge slong de dag gis ji skad brjod par bya zhe na/ thams cad kyis de lta bu nyid ma yin te/ lhung bzed bzang ngo zhes brjod par bya ba smras te/ thams cad kyis zhes bya ba smos pa ni/ dge slong 'dus pa rnams ma lus pa bstan pa'i phyir ro/ /de lta bu nyid ces bya ba ni/ de lta bu'i dngos po ste chung ba nyid la sogs pa'i skyon dang ldan pa nyid ces bya ba'i tha tshig go/ /de lta bu nyid ma yin te zhes bya ba ni/ de lta bu'i dngos po ma yin pa ste/ chung ba nyid la sogs pa'i skyon dang bral ba nyid do/ /de ltar na 'dir mdo'i don 'di 'byung ste/ gal te lhung bzed de chung ba nyid la sogs pa'i skyon dang bral ba yin zhing / tshad dang ldan pa dang legs par kha bsgyur ba la sogs pa'i yon tan dang ldan pa yin na/ de'i tshe dge slong thams cad kyis lhung bzed bzang ngo zhes bya ba lhung bzed mdzes so zhes brjod par bya'o/ /lhung bzed bstan pa'i 'og tu ci zhig bya zhe na/ bkar nas las byed pas gsang ste ston pa gang yin zhes bya bas smrar bcug ste/ spro ba byas nas dge 'dun la gsol ba bya'o zhes bya ba smras te/ bkar nas zhes bya ba ni/ rdzogs par bsnyen par bya ba de dkyil 'khor ba'i gnas nas phyir phyung nas te/ thag ji srid du dgar bar bya zhe na/ gsang ste ston pa'i phyir las gang byed pa de mi thos pa de srid du'o/ /de'i 'og tu las byed pas su yin zhes bya ba la sogs pa'i las bya'o/ /de yang las kyi cho ga las khong du chud par bya ste/ de las kyang de thos pa'i nyen kor nas bkar te mthong ba'i nyen kor du thal mo sbyor du bcug nas/ tshogs la mngon par phyogs par gzhag par bya'o zhes 'byung ngo / /de'i 'og tu las byed pas smra bar bya'o/ /gang yin zhes bya ba de ni/ sngags kyi tshig gi yi ge dang po blangs pa yin te/ mkhan po ming 'di zhes bya bas ni ming 'di zhes bya ba'i gsang ste ston par gsol ba gdab pa gang yin zhes bya ba'i sngags des gsang ste ston pa btsal bar bya'o/ /de'i 'og tu gsang ste ston pas bdag ming 'di zhes bya ba'o zhes brjod par bya'o/ / de ltar las byed pas gsang ste ston pa de smrar bcug pa'i tshig gi lan 'debs su bcug ste de'i 'og tu las byed pas gsang ste ston pa de nyid spro bar bya ba'i phyir/ spro bar byas nas zhes bya ba smras te/ gsang ste ston pa de nyid do/ /ming 'di zhes bya ba khyod mkhan po ming 'di zhes bya bas ming 'di zhes bya ba la gsang ste ston par spro'am zhes bya ba'i sngags kyis so/ /cho ga bshad pa 'di ni thams cad du yang dus dang por bya ba yin no/ /de dang de ltar byas nas de'i 'og tu las byed pas gsang ste ston pa de dge 'dun la gsol ba bya'o zhes bya ba go bar bya'o zhes bya ba'i tha tshig go/ /de ltar na 'dir mdo'i don 'di 'byung ste/ rdzogs par bsnyen par 'dod pa tha dad par gnas pa las bkar nas/ ming 'di zhes bya bas ming 'di zhes bya ba'i gsang ste ston par gsol ba btab pa gang yin zhes dus sngar bya ba byas nas/ de'i 'og tu dge 'dun la gsang ste ston pa gsol ba bya'o zhes bya ba'i tha tshig go/ / dge 'dun la gsol ba'i 'og tu gsang ste ston pas rdzogs par bsnyen par 'dod pa lkog tu rjes su ston par bya ste/ de'i phyir khyod nyon cig ces bya bas lkog tu rjes su bstan par bya'o zhes bya ba smras te/ de ni gsang ste ston pas bya ba yin gyi gzhan gyis ni ma yin no/ /de ci'i phyir zhe na/ 'di ltar lkog tu rjes su bstan pa ni de'i las yin pa'i phyir ro/ /khyod nyon cig ces bya bas zhes bya ba'i tshig dang pos ni sngags mtha' dag len par byed de/ tshe dang ldan pa khyod nyon cig /'di ni khyod kyi bden pa'i dus 'di ni byung ba'i dus te zhes bya ba la sogs pa'o/ /rjes su bstan pa'i 'og tu gsang ste ston pas rdzogs par bsnyen par 'dod pa la brjod par bya ba ma bos kyi bar du ma 'ong bar sdod cig ces smras nas rjes su bstan na zhes bya bas dge 'dun la yongs su dag pas te ci mchi zhig gam zhes bya bas 'ong bar zhu bar bya'o zhes bya ba ni/ ma bos kyi bar du zhes bya ba ma sbran gyi bar du khyod re zhig dge 'dun gyi nang du ma 'ong bar sdod cig ces rdzogs par bsnyen par 'dod pa de la smras nas zhes bya ba bsgo nas gsang ste ston pas rgan rims la 'di skad du rjes su bstan na zhes bya ba brjod par bya ste/ de yang sngags kyi tshig blangs pa yin te/ de'i phyir zhes bya bas zhes bya ba'i sgra nye bar brjod par bya ste/ sngags kyi tshig de nyid kyi phyogs gcig smos pa'i tha tshig go/ /dge 'dun la rdzogs par bsnyen par 'dod pa'i yongs su dag pa go bar byas te zhes bya ba gang gis zhe na/ dge 'dun btsun pa rnams gsan du gsol/ bdag gis mkhan po ming 'di zhes bgyi bas ming 'di zhes bgyi ba la bar chad kyi chos rnams gsang ste rjes su bstan na de bar chad kyi chos rnams yongs su dag go zhes kho na nyid mchi na zhes bya ba la sogs pa'i sngags kyis so/ /de ltar na 'dir mdo'i don 'di 'byung ste/ gsang ste ston pas rdzogs par bsnyen par 'dod pa la rjes su bstan pa'i 'og tu ma bos ma sbran gyi bar du tha dad par gnas pa'i nang du ma 'ong bar phyogs 'di nyid du re zhig sdod cig ces brjod par bya'o/ /de nas dge 'dun la rdzogs par bsnyen par 'dod pa'i yongs su dag pa go bar bya ste/ bdag gis mkhan po ming 'di zhes bgyi bas ming 'di zhes bgyi ba la bar chad kyi chos rnams gsang ste rjes su bstan na zhes bya ba la sogs pa'i sngags kyis so/ /yongs su dag pa go bar byas nas kyang ci mchi zhig gam zhes bya bas 'ong ba zhu bar bya'o zhes bya ba ni/ ci mchi zhig gam zhes bya ba'i zhu ba 'dis/ rdzogs par bsnyen par bya ba de'i 'ong ba dge 'dun la zhu bar bya'o/ /gsang ste ston pa'i las rdzogs so// //bam po gnyis pa/ 'ong ba zhus pa'i 'og tu dge 'dun thams cad kyis gal te yongs su dag na'o zhes brjod par bya'o zhes bya ba la/ thams cad kyis zhes bya ba ni/ lan med pa ma yin par bstan pa'i phyir ro/ /gal te yongs su dag na'o zhes bya ba ni/ gal te rdzogs par bsnyen par bya ba de bar chad kyi chos rnams yongs su dag na'o zhes bya ba'i sgra ni brjod ma thag pa de nyid la snyegs pa'i don te/ de kho na skad brjod par bya'i lhag pa ma yin no zhes bya ba'i tha tshig go/ /brjod par bya'o zhes bya ba ni/ smra bar bya zhes bya ba'i don to/ /gang gi tshe dge 'dun gyis gnang ste/ rdzogs par bsnyen par 'dod pa dge 'dun gyi nang du zhugs pa de nyid las byed pa ci zhig bya zhe na/ las byed pas rdzogs par bsnyen par gsol du gzhug go zhes bya ba smras te/ las byed pas rdzogs par 'dod pa rdzogs par bsnyen par bya ba'i phyir/ gsol du gzhug go zhes bya ba gsol ba byed du gzhug go zhes bya ba'i tha tshig go/ /gsol ba'i 'og tu dge 'dun la go bar bya ste/ de'i phyir dge 'dun la gsol nas bar chad dri bar bya'o zhes bya ba smras te/ dge 'dun la gsol nas zhes bya ba/ bar chad dri ba'i phyir dge 'dun la gsol ba byas go bar byas nas so/ /ji ltar bar chad dri bar bya zhe na/ tshe dang ldan pa khyod nyon cig /'di ni khyod kyi bden pa'i dus 'di ni byung ba'i dus de zhes bya ba la sogs pa'i sngags kyis so/ /bar chad dris pa'i 'og tu rdzogs par bsnyen pa nye bar bsgrub par bya'o zhes bya ba ni/ las byed pas rdzogs par bsnyen par 'dod pa de gsol ba dang bzhi'i las kyis rdzogs par bsnyen pa nye bar bsgrub par bya'o zhes bya ba yang dag par thob par bya'o/ /rab tu gnas par bya'o zhes bya ba'i tha tshig go/ /rdzogs par bsnyen pa nye bar bsgrub pa'i 'og tu de ma thag tu grib tshod rig par bya'o zhes bya ba ni/ gang gi tshe rdzogs par bsnyen par gyur pa de ma thag tu dge slong gang yang rung bas grib ma gzhal bar bya zhing / grib ma de'i tshod rdzogs par bsnyen pa'i gang zag da ltar grib ma 'di tsam du gyur to zhes rig par bya'o zhes bya ba go bar bya'o/ /gzhal ba de yang ci zhig gis bya zhe na/ de ni thur ma sor bzhi pas bzang ngo zhes bya ba smras te/ grib ma gzhal ba de ni thur ma sor bzhi'i tshad tsam gyis gzhal na bzang ngo zhes bya ba sla'o zhes bya bar rig par bya'o/ /rkang pa la sogs pas ni bul bar 'gyur gyi thur mas ni myur te/ de'i phyir de nyid kyis gzhal na bzang gi gzhan gyis ni mi bzang ngo / /ming ma grags pa gzhan gyi tha snyad bstan pa'i phyir/ de ni skyes bu nyid ces tha snyad du bya'o zhes bya ba smras te/ bzang ngo zhes bya bar 'gyur ro/ /thur ma de'i tha snyad ni skyes bu nyid ces brjod par bya ste/ de la thur mas gzhal ba'i grib ma de ji tsam du gyur pa de tsam la grib ma skyes bu'i tshad ces brjod par bya'o/ /grib ma 'ba' zhig rig par bya ba ma yin gyi gzhan yang nyin mtshan gyi cha snga dro la sogs pa dang zhes bya ba la/ nyin mtshan zhes bya ba ni/ nyin par dang mtshan mo'o/ /de'i cha ni snga dro dang gung dang phyi 'bred dang / thun dang po zhes bya ba la sogs pa ste de yang rig par bya'o/ /sogs pa zhes bya ba'i sgras ni/ gung la sogs pa de dag nyid du bzung ngo / /dus tshod kyang ngo zhes bya ba la/ dus tshod ces bya ba ni/ dus kyi bye brag yin par rig par bya'o/ /kyang ngo zhes bya ba ni rig par bya'o zhes bya bar sbyar ro/ /'o na dus tshod de dag du yod ce na/ de dag ni lnga'o zhes bya ba smras te/ 'di ltar mdo gong ma la dus tshod ces bya ba'i sgra tha ma gcig gi tshig tu sbyar mod kyi/ 'dir rnam par dbye ba yongs su sbyar te/ tha ma mang po'i tshig tu sbyar bar bya'o/ /dus tshod de dag ni lnga'o zhes bya bar rig par bya'o zhes bya ba'i tha tshig go/ /de dag kyang gang zhe na/ dgun gyi dus dang / dpyid kyi dus dang / dbyar gyi dus dang / dbyar thung ngu'i dus dang / dbyar ring po'i dus so zhes bya ba smras te/ dgun gyi dngos po ni dgun gyi dus so/ /dpyid kyi dngos po ni dpyid kyi dus so/ /dbyar gyi dngos po ni dbyar gyi dus so/ /dus thung ngur gnas pa'i phyir shi ba dang 'dra bas thung ngu yang de yin la dbyar kyang de yin pa de ni dbyar thung ngu'i dus so/ /dus ring po'i phyir ring po yang de yin la dbyar kyang de yin pa ni dbyar ring po'i dus so/ /de dag gi tshad brjod par bya ba'i phyir/ dang po gnyis ni zla ba bzhi bzhi'o zhes bya ba smras te/ mdo bstan pa'i dang por bstan pa'i phyir dang po gnyis te/ dgun gyi dus dang dpyid kyi dus zhes bya ba'i tha tshig go/ /zla ba bzhi bzhi'i dngos po ni/ zla ba bzhi bzhi'o/ /'og ma'i zla ba gcig go zhes bya ba ni de gnyis 'og tu bstan pa'i phyir/ 'og ma zhes bya ba'i sgra ni/ dbyar gyi dus la bya ste/ de ni zla ba gcig tu rig par bya'o/ /de'i 'og ma ni nyin zhag gcig go zhes bya ba ni/ mdo snga ma las 'og ma zhes bya ba'i sgra'i rjes su 'jug ste/ dbyar gyi dus de'i 'og ma ni dbyar thung ngu'i dus yin par rig par bya'o/ /de ni nyin zhag gcig ste/ dbyar zla tha chungs tshes bcu drug ces bya ba'i tha tshig go/ /tha ma ni des zla ba gsum du mchog pa'o zhes bya ba ni dus tha ma dbyar ring po'i dus zhes bya ba ni dbyar thung ngu'i dus zhes bya ba'i nyin zhag gcig pu nyid des zla ba gsum du ma chog pa'o/ /tha ma'i dngos po yin pa'i phyir tha ma'o/ /dus tshod brjod pa'i 'og tu gnas rnams brjod par bya'o zhes bya ba ni/ rdzogs par bsnyen pa'i 'og tu las byed pas rdzogs par bsnyen pa de la gnas rnams brjod par bya'o/ /de dag kyang gang zhe na/ smras pa/ phyag dar khrod la sogs pa'o/ /de dag kyang bzhi ste/ phyag dar khrod dang / bsod snyoms dang / shing drung dang / bkus te bor ba zhes bya ba gnas bzhi po dag go/ /phyag dar bzhin du bor ba'i phyir phyag dar 'dra ba'i gos ni phyag dar khrod do/ /yang na phyag dar dag gi nang na 'dug pa'i gos phyag dar du bsags pa zhes bya ba'i tha tshig go/ /lhung bzed la sogs pa'i nang du zas bcug cing blugs pa ni bsod snyoms so/ /shing ljon pa'i drung ni shing drung ngo / /tshags kyis btsags pa ni bkus te bor ba'o/ /yang na de bkus pa yang yin la bor ba yang yin pa ni bkus te bor ba'o/ /bzhi po de dag ni tshangs par spyod pa'i gnas yin par khong du chud par bya'o/ /ltung bar 'gyur ba'i chos rnams dang zhes bya ba ni/ las byed pas brjod par bya'o zhes bya bar sbyar ro/ /dge slong gi dngos po'i ltung ba dang rjes su mthun pa'i phyir ltung bar 'gyur te/ de dag kyang mi tshangs par spyod pa la sogs pa bzhi 'og nas 'byung ba dag go/ /dge sbyong byed pa'i chos rnams kyang ngo zhes bya ba yang brjod par bya'o zhes bya bar sbyar te/ gshe yang slar mi gshe bar bya ba dang / khros kyang slar mi khro bar bya ba dang / brdegs kyang slar mi brdeg par bya ba dang / mtshang brus kyang slar mtshang mi 'bru bar bya ba dag go/ /de ltar de dag ni gzhan la gnod pa med pa'i phyir dge sbyong du byed pas na dge sbyong byed pa dag ste/ 'di ltar/ rab tu byung ba gzhan la gnod pa dang / /gzhan la 'tshe ba dge sbyong ma yin no/ /zhes gsungs pa'i phyir ro/ /de'i 'og tu ci zhig bya zhe na/ mchog tu 'dod par bya ba yang dag pa nyid kyis rdzogs pa nyid brjod nas tshul khrims kyis mnyam par gyur pa nyid bsgrub pa la nges par sbyar bar bya'o zhes bya ba smras te/ mchog tu 'dod par bya ba zhes bya ba ni rab tu 'dod par bya ba 'dod par gyur pa'i dngos po ste/ khyod sngon bdag legs par gsungs pa'i chos 'dul ba la rab tu 'byung ba dang rdzogs par bsnyen pa dge slong gi dngos po thob kyang ji ma rung snyam du smon pa gang yin pa de zhes bya ba ni mchog tu 'dod par bya ba'i dngos po'o/ /yang dag pa nyid kyis zhes bya ba la/ yang dag pa'i dngos po ni yang dag pa nyid/ yang dag pa nyid nges te/ da khyod mkhan por 'os pa dang / slob dpon 'os pa nyid dang / dge 'dun mthun pa dang / gsol ba dang bzhi'i las mi g.yo ba gzhag par mi 'os pas zhes bya bas so/ /rdzogs pa nyid ces bya ba ni/ mchog tu 'dod par bya ba'i dngos po de rdzogs pa nyid gang yin pa yongs su rdzogs pa dang yongs su rgyas pa ste/ rab tu byung zhing rdzogs par bsnyen to zhes bya ba'o/ /brjod nas zhes bya ba ni/ brda sprad nas sam go bar byas nas so/ /nas zhes bya ba dang sbyar ba ni bya ba gzhan la ltos pa'i phyir ro/ /yang dag pa nyid kyis rdzogs pa nyid de brjod nas ci zhig bya zhe na/ tshul khrims kyis mnyam par gyur pa nyid ces bya ba la sogs pa ste/ tshul khrims kyi rgyu mtshan gyis mnyam pa'i rang bzhin nyid gang yin pa de ni tshul khrims kyis mnyam par gyur pa nyid do/ /de bsgrub pa ni nan tan du bya ba ste/ de de la nges par sbyar bar bya'o zhes bya ba ste/ rdzogs par bsnyen nas lo brgya lon pa'i dge slong gis bslab pa gang la bslab par bya ba de la de ring rdzogs par bsnyen pas kyang bslab po/ /de ring rdzogs par bsnyen pa'i dge slong gis bslab pa gang la bslab par bya ba de la rdzogs par bsnyen nas lo brgya lon pas kyang bslab po zhes bya ba la sogs pa'i tshig dag gis so/ /de ltar na 'dir tshig gi don 'di byung ste/ 'dod par gyur pa'i don rdzogs par bsnyen pa nyid yang dag pa'i tshogs yongs su rdzogs pa nyid brjod nas/ de'i 'og tu tshul khrims kyis mnyam pa'i rang bzhin nyid bsgrub pa la nges par sbyar bar bya'o/ /tshul dang 'brel pa'i gzugs brnyan dang zhes bya ba ni/ nges par sbyar bar bya'o zhes bya bar sbyar ro/ /tshul dang zhes bya ba ni/ 'jig rten gyi tha snyad dang ngo / /'brel pa zhes bya ba ni/ yod pa ste tshul dang 'brel pa pha ma lta bur 'brel pa zhes bya ba'i tha tshig go/ /de'i gzugs brnyan zhes bya ba ni/ 'dra bar byed pa gzugs brnyan lta bur 'dra bar bsgrub pa ste/ deng phyin chad khyod kyis mkhan po la pha'i 'du shes nye bar gzhag par bya'o/ /mkhan pos kyang khyod la bu'i 'du shes nye bar gzhag par bya'o zhes bya ba la sogs pa'o/ /de ni na ba la sogs pa'i gnas skabs dag na re ba dang bcas pa nyid du bya ba yin no/ /dul bar gnas pa nyid dang zhes bya ba yang nges par sbyar bar bya'o zhes bya bar sbyar ro/ /dul ba ni nye bar zhi ba ste mi rgod pa'o/ /de la dul bar gnas pa ni gnas pa'o/ /de'i dngos po ni dul ba'i gnas nyid do/ /de la nges par sbyar bar bya ba ste/ deng phyin chad khyod kyis tshangs pa mtshungs par spyod pa rnams dang / gnas brtan rnams dang / bar ma rnams dang / gsar bu rnams la gus pa dang bcas pa dang / zhes dang bcas pa dang / 'jigs pa dang bcas pa'i dbang du 'gyur bar gnas par bya'o zhes bya bas so/ /dgos pa rjes su bsgrub pa la yang ngo zhes bya ba la yang nges par sbyar bar bya'o zhes bya bar sbyar te/ dgos pa'i bklags pa dang / kha ton dang tshul bzhin yid la bya ba la sogs pa'o/ /de rjes su bsgrub pa la nges par sbyar bar bya ba ste/ deng phyin chad khyod kyis lung mnod par bya/ bklag par bya kha ton bya'o zhes bya ba la sogs pa'i gzhung gis so/ /de'i 'og tu ma brjod pa yang dag par blangs pa yongs su shes pa'i bsgrub par gyur pa nyid kyang brjod par bya'o zhes bya ba ni/ bsgrub par gyur pa nyid kyang brjod par bya'o zhes bya ba bar sbyar ro/ /gang gis bsgrub par gyur pa nyid ce na/ ma brjod pa yang dag par blangs pa yongs su shes pa'i 'o/ /ma brjod pa zhes bya ba ni go bar ma byas pa ma smras pa'o/ /yang dag par blangs pa zhes bya ba ni/ blangs te dge 'dun lhag ma la sogs pa bslab pa'i gzhi rnams so/ /de ni ma brjod pa yang yin la yang dag par blangs pa yang yin pas ma brjod pa yang dag par blangs pa'o/ /de'i yongs su shes pa ni ma brjod pa yang dag par blangs pa yongs su shes pa de'i 'o/ /de'i bsgrub par 'gyur ba nyid bsgrub par bya ba nyid 'byung bar 'gyur ba ste/ de dag brjod par bya go bar bya ba'i tha tshig ste/ 'di dag ni kho bos khyod la bslab pa'i gzhi che long che long tsam zhig brjod par zad de/ gzhan dag ni zla ba phyed phyed cing so sor thar pa'i mdo gdon pa'i tshe thos par 'gyur ro/ /gzhan dag kyang slob dpon dang / mkhan po dang / mkhan po gcig pa dang / slob dpon gcig pa dang / gtam 'dres pa dang / phebs par smra ba dang / smos 'drin dang / 'grogs bshes rnams kyang rgya cher ston par 'gyur ro zhes bya bas so/ /'di skad bstan te/ da ltar kho bos ltung bar 'gyur ba tsam zhig brjod par zad de/ bslab pa'i gzhi lhag ma ma brjod pa yang dag par blangs pa de dag ni/ mkhan po la sogs pa las bsgrub par 'gyur ro zhes bstan to/ /gus pa la yang nges par sbyar bar bya'o zhes bya ba ni/ rdzogs par bsnyen pa de gus par byed pa de nyid la nges par sbyar bar bya ste/ shes rab mchog gi bstan pa la/ /khyod ni rdzogs par bsnyen par 'gyur/ /dal dang 'byor pa rnyed dka' bas/ /'di dag ji lta bzhin du bsgrubs/ /mdzes par rab tu dbyung ba dang / /yongs su dag pa rdzogs bsnyen par/ /rdzogs sangs rgyas kyis rab mkhyen te/ /bden pa'i mtshan gyis bka' stsal to/ /zhes bya ba'i tshigs su bcad pa gnyis kyis so/ /bsgrub par bya ba thabs brjod pa dang bcas pa la yang ngo zhes bya ba yang / nges par sbyar bar bya'o zhes bya bar sbyar ro/ /bsgrub par bya ba la nges par sbyar bar bya'o/ /ji ltar na thabs brjod pa dang bcas pa la'o/ /de ni bya ba'i khyad par te/ nges par sbyar bar bya ba la khyad par du bya ba'o/ /don gang gi phyir rab tu byung ba dang rdzogs par bsnyen pa'i don dge sbyong gi tshul zhes bya ba thabs brjod pa dang bcas pa la nges par sbyar bar bya'o/ /thabs kyi brjod pa ni thabs brjod pa ste/ thabs brjod pa dang bcas par 'jug pa ni thabs brjod pa dang bcas pa'o/ /don de bsgrub par bya ba la thabs gang zhe na/ bag yod pa ste/ de'i phyir 'dul ba las kyang tshe dang ldan pa khyod rdzogs par bsnyen zin gyi bag yod par sgrubs shig ces gsungs so/ /dang por phyag lan gsum byas nas zhes bya ba la sogs pa ni 'dir ma smos te/ las kyi gzhir 'og nas 'byung ba'i phyir ro/ /rdzogs par bsnyen pa'i cho ga'o// // gnas pas gnas la ma zhus par bya ba mi bya'o zhes bya ba la/ gnas pas zhes bya ba ni/ slob ma dang nye gnas kyis so/ /gnas la zhes bya ba ni/ slob dpon dang mkhan po la'o/ /ma zhus par zhes bya ba ni/ ma dris pa'o/ /bya ba zhes bya ba ni/ lhung bzed dang chos gos kha bsgyur ba la sogs pa ste/ de mi bya'o/ /'di skad bstan te/ gnas pa dag gis gnas la ma zhus par bya ba gang yang mi bya'o/ /de ni nye bar sbyar ba yin gyi/ dmigs kyis bsal ba brtsam par bya ste/ bshang ba dang gci ba dang so shing dor ba dang nyen 'khor dang bcas pa'i gtsug lag khang du mchod rten la phyag bya ba ni ma gtogs so zhes bya ba ni/ bcom ldan 'das kyis bya ba thams cad slob dpon dang mkhan po lam zhus par mi bya ste/ chu dang so shing dang bshang ba dang gci ba dang / mtshams kyi nang du mchod rten la phyag bya ba ma gtogs so zhes gsungs so/ /nyen 'khor dang bcas pa'i gtsug lag khang zhes bya ba ni/ nyen 'khor dang bcas par gnas pa ste/ gtsug lag khang de na mchod rten gang yod pa de la phyag bya ba ni ma zhus par yang bya'o/ /gtsug lag khang na 'dru ba dang 'tshed pa dang za ba la sogs pa'i bya bas khyab pa'i bgrod sa gang yod pa de ni gtsug lag khang de'i nyen 'khor yin par rig par bya ste/ de na mchod rten gang yod pa de la phyag bya ba ni ma gtogs so zhes bya ba'i tha tshig go/ /gtsug lag khang nas 'dom bzhi bcu rtsa dgu'i mtha' tshun chad du 'gro ba yang ngo zhes bya ba yang ma gtogs so zhes bya bar sbyar te/ gtsug lag khang nas 'gro ba zhes smras pa la/ gtsug lag khang ni rnam pa gnyis su rig par bya ste/ ra bas bskor ba dang ra bas ma bskor ba'o/ /de la gal te gtsug lag khang ra bas bskor ba nas 'gro na ni de'i tshe ra ba'i phyi rol nas brtsams te/ 'dom bzhi bcu rtsa dgu'i mtha' tshun chad du 'gro bar bya'o/ /ra bas ma bskor ba nas 'gro na ni gtsug lag khang gi rtsig drung nas bgrang bar bya'o/ /'dom bzhi bcu rtsa dgu zhes bya ba ni lnga bcur 'dom gang gis mchog pa ste/ gtsug lag khang gi mtha' nas 'dom bzhi bcu rtsa dgu'i mtha' tshun chad du phyi rol du 'gro ba ni ma zhus par yang rung ngo / /tshun chad du zhes bya ba ni de tshun chad ces bya bar sbyar ro/ /de yang bcag par bya ba'i phyir bstan pa yin gyi/ mchod rten la phyag bya ba'i phyir ni ma zhus par 'gro bar mi bya'o/ /gal te bcag pa'i bsam pa kho nas 'gro ba ni/ lam khar mchod rten la phyag 'tshal bar byed na ni de'i tshe nyes par mi 'gyur ro zhes bya ba'i tha tshig go/ /bya ba yang rnam pa gnyis te/ gang sbyor ba chen pos rtsom pa ni 'di lta ste/ chos gos dang lhung bzed kyi las la sogs pa ste/ de ni ma zhus par mi bya'o/ /gang sbyor ba chung ngus de'i mod kho na la bya ba ni 'di lta ste gtam 'dre ba dang / phebs par smra ba dang / phan tshun kun dga' bar bya ba dang / lan gdab pa dang 'ongs pa legs so zhes brjod pa la sogs pa dang / lag pa chur smyugs pas rkang lag dag la byug pa dang / gos la rdul chags pa sprugs pa dang / de lta bu la sogs pa ste/ de ni ma zhus par yang bya ste/ de dag zhus na bzhad gad kyi gzhir 'gyur ba'i phyir ro/ /dge slong tshul khrims 'chal ba'i yul la ni de dag thams cad kyang zhu bar bya ba yin te/ slob dpon dang mkhan po dang / dge slong nad pa la ni ma gtogs so/ /da ni gnas pa'i tshul khrims brjod par bya ste/ lhung bzed dang chos gos kyi las dang nad g.yog dang 'gyod pa bsal ba dang / sdig pa can gyi lta ba'i rnam pa spangs pa la/ e ma'o bdag gis bya'o zhe'am byed du gzhug go zhes brtson pa shas chen po bsgrub par bya'o zhes bya ba la/ lhung bzed kyi las ni bsreg pa dang / glan pa la sogs pa'o/ /chos gos kyi las ni drub pa dang / kha bsgyur ba la sogs pa'o/ /de la e ma'o bdag gis zhes bya bas ni/ 'dod pa'i tshul gyis sgrub par byed pa ston to/ /bya'o zhes bya ba ni bdag nyid kyis so/ /byed du gzhug go zhes bya ba ni gzhan no/ /de ltar brtson pa shas chen po bsgrub par bya ba ni/ 'bad pa chen po rab tu bsgrub par bya ba ni/ nan tan bya'o zhes bya ba'i tha tshig go/ /nad g.yog la sogs pa thams cad la yang de nyid sbyar bar bya'o/ /nad g.yog ces bya ba ni/ 'phrod pa dang sman sbyin pa la sogs pa'o/ /'gyod pa bsal ba zhes bya ba la/ 'gyod pa zhes bya ba ni yid la gcags pa ste/ nyes byas la sogs pa'i ltung ba lhag par spyad pa'i phyir yid la gcags pa skyes pa gang yin pa de bsal ba bshags pa la sogs pa'o/ /de la yang e ma'o bdag gis bya'o zhe 'am byed du gzhug go zhes brtson pa shas chen po bsgrub par bya'o zhes bya bar sbyar ro/ /sdig pa can gyi lta ba'i rnam pa spang ba la zhes bya ba ni/ bcom ldan 'das kyis bar du gcod pa'i chos su gsungs pa gang dag yin pa de dag ni bar du gcod par mi 'gyur ro zhes bya ba dang / de lta bu la sogs pa lta ba'i rnam pa yongs su spang ba la/ e ma'o bdag gis bya'o zhe'am/ byed du gzhug go zhes brtson pa shas chen por bsgrub par bya ste/ gnas pas gnas pa la de dag thams cad bya'o/ /ci de 'ba' zhig gam zhe na ma yin te/ de'i phyir nan tur byed par 'dod pa'i dge 'dun la e ma'o dge 'dun gyis 'di la nan tur gyi las 'di lta bu mi bya'o zhes kyang ngo zhes bya ba smras te/ mdo snga ma las brtson pa shas chen po bsgrub par bya'o zhes smos pa dang / 'og nas dbyung bar bya'o zhes bya ba'i bar de dag 'dir thams cad du sbyar bar rig par bya'o/ /nan tur byed par 'dod pa'i dge 'dun la zhes bya ba ni/ gang gi tshe dge 'dun gnas la nan tur gyi las gnas nas dbyung ba la sogs pa'i las byed par 'dod pa de'i tshe gnas pas/ e ma'o dge 'dun gyis gnas 'di la nan tur gyi las 'di lta bu mi bya'o zhes brtson pa shas chen por bsgrub par bya'o/ /dang por re zhig mi bya ba'i phyir gnas pas 'bad par bya na/ gal te byas par gyur na de'i tshe ji ltar bya zhe na de'i phyir byas na bzod par bya'o zhes bya ba smras te/ nan tur gyi las byas par gyur na/ de'i tshe gnas pas e ma'o gnas 'di la dge 'dun gyis gang byas pa de bzod par bya'o zhes brtson pa shas chen po bsgrub par byas te/ gtang bar bya'o zhes bya ba'i tha tshig go/ /spo ba dang gzhi nas spo ba dang mgu bar bya ba dang gzhi nas mgu bar bya ba dang dbyung bar 'dod pa gnas la e ma'o dge 'dun gyis spo ba la sogs pa gzhi sbyin par bya zhing dbyung bar bya'o zhes brtson pa shas chen po bsgrub par yang bya'o/ /de la spo ba zhes bya ba ni/ dge 'dun lhag ma'i ltung ba byung ba la bcabs pa'i rgyus chad pa'i las kyi bye brag tu gzhug pa'o/ /gzhi nas spo ba zhes bya ba ni/ spo ba byed bzhin pa las yang bar du dge 'dun lhag ma byed pa la spo ba yang gzhi nas byed du gzhug pa'o/ /mgu bar bya ba zhes bya ba ni/ spo ba spyad zin pa las dbyung ba'i rgyur zhag drug chad pa'i las kyi bye brag byed du gzhug pa'o/ /gzhi nas mgu bar bya ba zhes bya ba ni/ mgu ba spyod pa'i bar skabs su yang dge 'dun lhag ma byed pa la/ de'i gzhi nas yang mgu ba byed du gzhug pa'o/ /gnas gang la spo ba la sogs pa'i don dgos pa yod pa de ni/ spo ba la sogs pa 'dod pa'i gnas yin pas gnas de spo ba la sogs pa 'dod na gnas pas e ma'o dge 'dun gyis gnas 'di la spo ba la sogs pa bzhi sbyin par bya'o zhes brtson pa shas chen po bsgrub par bya'o/ /dbyung bar 'dod pa la yang de bzhin du sbyar te/ dbyung ba zhes bya ba ni ltung ba las bslang ba'o/ /gnas gang la don dgos pa de nyid yod pa de ni dbyung bar 'dod pa yin pas gnas de dbyung bar 'dod na gnas pas e ma'o dge 'dun gyis gnas 'di 'byung bar bya'o zhes brtson pa shas chen po bsgrub par bya'o/ /gnas pa'i tshul khrims bstan nas/ da ni gnas kyi tshul khrims brjod par bya ste/ des kyang de la de byas te zhu ba ni ma gtogs so zhes bya ba ni/ des kyang zhes bya ba ni/ gnas de mkhan po la sogs pas kyang ngo / /de la zhes bya ba ni/ gnas pa la ste slob ma dang nye gnas dag la'o/ /de zhes bya ba ni/ lhung bzed dang chos gos la sogs pa'i las de ste/ mkhan po la sogs pas kyang gong du bstan ma thag pa de slob ma la sogs pa'i don du bsgrub par bya'o/ /ci thams cad dam zhe na/ zhu ba ni ma gtogs so zhes bya ba smras te/ zhu ba ni dri ba'o/ / gnas kyis bya ba'i phyir zhu ba ni mi dgos so zhes bya ba'i tha tshig go/ /gnas pas gnas la ma zhus par bya ba mi bya'o zhes bya ba bstan pa de'i zhar la 'di yang brjod par bya ste/ bsnyen par rdzogs nas ji srid lon pas mkhan po nyid la sogs pa bya zhe na/ de'i phyir rdzogs par bsnyen nas lo bcu ma lon par mkhan po nyid dang gnas nyid dang mi gnas par 'dug par mi bya'o zhes bya ba smras te/ gang lo bcu ma lon pa de ni lo bcu ma lon pa'o/ /gang gis she na/ rdzogs par bsnyen pas zhes bya ba smras te/ dge slong gi dngos pos so/ /des 'di gsum mi bya ste/ mkhan po nyid dang gnas nyid dang mi gnas par 'dug pa nyid mi bya'o/ /'di skad bstan te/ dge slong gis ji srid du lo bcu ma lon pa de srid du dge slong des slob ma gzung bar mi bya/ gnas sbyin par mi bya rang yang mi gnas par 'dug par mi bya'o zhes bya ba'i tha tshig go/ /ci lo bcu lon pa thams cad kyis de gsum bya ba yin nam zhe na/ de'i phyir/ 'og nas 'byung ba dag las lhan cig sbyar ba gang dang yang mi ldan pas ni ma yin no zhes bya ba smras te/ rdzogs par bsnyen nas lo bcu lon du zin kyang gal te 'og nas 'byung ba yan lag lnga dang ldan pa'i lhan cig sbyar ba gang dag yin pa'i lhan cig sbyar ba de dag las lhan cig sbyar ba gang yang rung ba'i lhan cig sbyar ba gcig dang yang ldan pa dang 'byor pa dang mthun pa ma yin na/ lo bcu lon pa des kyang rab tu 'byung bar mi bya rdzogs par bsnyen par mi bya gnas sbyin par mi bya zhing / de rang yang mi gnas par 'dug par mi bya'o/ /gang lhan cig sbyar ba gcig dang ldan zhing lo bcu lon pa yang yin na/ des ni mkhan po nyid gnas nyid dang / mi gnas par 'dug par yang bya'o zhes bya ba'i tha tshig go/ /de la lo bcu lon pa nyid 'di ni lnga pa dang po'i yan lag lnga pa yin par rig par bya ste/ 'dul ba la gnas pa'i don nyid kyang bstan pa yin no/ /de lnga pa lhag ma rnams kyi ni yul yin par ston te/ gang la lo bcu lon pa nyid dang 'dul ba la gnas pa'i don nyid gnyis po de dag yod pa des ni mkhan po nyid la sogs pa gsum po dag bya ste/ 'di ltar de ni mkhan po nyid la sogs pa dag gi gtso bo'i rgyu yin pa'i phyir ro/ /slob pa nyid la sogs pa'i yan lag lhag ma ni bye brag tu gyur pa nyid yin te/ de med kyang mkhan po nyid la sogs pa'i rgyur rung bas/ de'i phyir lo bcu lon pa nyid dang / 'dul bal gnas pa'i don nyid ni bzla bar bya ba ma yin pa'i yan lag yin no/ /don 'di bstan pa'i phyir dang po lo bcu lon pa nyid smos so/ /lhan cig sbyar ba gang dang yang mi ldan pas ni ma yin no zhes smras pas/ de'i phyir lhan cig sbyar ba de dag brjod par bya dgos pas/ de'i phyir nad g.yog dang / 'gyod pa bsal ba dang / sdig pa can gyi lta ba'i rnam pa spong ba dang / gnas mngon par mi dga' ba dor ba dag la byed dam byed du 'jug nus pa'o zhes bya ba smras te/ slob ma dang nye gnas na ba la nad g.yog byed dam nad g.yog byed du gzhug pa de la mthu yod pa dang / de bzhin du de dag la 'gyod pa skyes pa sel tam sel du 'jug nus pa dang / de bzhin du sdig pa can gyi lta ba'i rnam pa skyes pa spang ba la/ rang gis byed nus sam gzhan byed du 'jug par nus pa dang / de bzhin du slob ma dang nye gnas/ gnas gang la mngon par mi dga' ba'i gnas mngon par mi dga' ba de dor zhing mngon par dga' ba'i gnas su rnam par gzhag pa bdag nyid kyis byed nus sam/ gzhan byed du 'jug pa dang lo bcu lon pa'o/ /nad g.yog ces bya ba 'dis ni snying rje dang ldan pa nyid dang / sdug bsngal la ji mi snyam pa nyid bstan te/ gang la de gnyis yod pa des ni nad g.yog byed nus so/ /'gyod pa bsal ba zhes bya ba ni/ bya ba 'dis ji bdag ltung ba dang bcas par gyur tam/ 'on te ma yin zhes 'gyod par gyur pa de bsal ba ste/ de byed dam byed du 'jug nus pa yin no/ /yan lag 'dis ni 'dul ba la gnas pa'i don nyid bstan te/ 'di ltar gang la la zhig gis ltung ba dang ltung ba ma yin pa mngon par shes shing / de la bslang ba yang mngon par shes pa des ni de dag gi 'gyod pa sel bar nus pa kho na yin pa'i phyir ro/ /sdig pa can gyi lta ba'i rnam pa zhes bya ba la sogs pas ni/ chos mngon pa la mkhas pa nyid bstan to/ /gnas mngon par mi dga' ba zhes bya ba la sogs pas ni bsam pa shes pa nyid bstan to/ /'di ltar 'dir byed du gzhug pa zhes bya ba smos mod kyi/ 'on kyang gang la yan lag bzhi po dag rang gis byed pa'i mthu med na gzhan byed du gzhug pa'i mthu yod du zin kyang / des gsum po de dag mi bya ste/ de lta ma yin du zin na 'dul ba la gnas pa'i don nyid ces bya ba'i yan lag bzla bar bya ba ma yin pa de yang bzlas par 'gyur ro/ /gal te de lta na byed du gzhug pa zhes bya ba smos pa ci'i phyir zhe na/ 'dul ba la ltos pa'i phyir te/ la la gdul ba ni la las nus kyi thams cad kyis thams cad nus pa ni ma yin pas/ de'i phyir 'dis ni lnga pa gcig bstan pa yin no/ /'di man chad ni 'og nas 'byung ba'i lhan cig sbyar ba ma tshang ba rnams tshang bar bya ba'i phyir/ mdo bstan pa'i dbang du byas te/ slob pa nyid yan chad lnga pa ma yin pa la tshul khrims dang ldan pa nyid dang mang du thos pa nyid sbyar ro zhes smras te/ 'og nas slob pa nyid ces 'byung ba yan chad lnga pa tshang bar ma bstan pa gang yin pa de ni tshul khrims dang ldan pa nyid dang mang du thos pa nyid ces bya ba gnyis kyis bsnan te/ lnga pa tshang bar rig par bya'o/ /'dir dad pa dang tshul khrims la sogs pa lnga pa gnyis ni tshang ba yin gyi/ lhag ma ni ma tshang ba yin no/ /lnga pa ma yin pa la zhes bya ba ni/ lnga rnams kyi tshogs ni lnga pa'o/ /lnga pa med pa ni lnga pa ma yin pa ste/ lnga pa ma yin pa de la'o/ /'di skad bstan te/ lhan cig sbyar ba gang la yan lag lnga po dag tshang bar med pa de ni lnga pa ma yin pa'o/ /tshul khrims dang ldan pa nyid dang mang du thos pa nyid sbyar ro zhes bya ba la/ gang la tshul khrims yod pa de ni tshul khrims dang ldan pa'o/ /de'i dngos po ni tshul khrims dang ldan pa nyid de/ 'di la tshul khrims 'chal ba'i skabs med pa'i phyir des na 'di ni dge ba'o zhes bya bar shes pa de ni tshul khrims dang ldan pa nyid yin par rig par bya'o/ /de bzhin du mang du thos pa'i dngos po ni mang du thos pa nyid de/ bstan bcos mang po shes pa nyid do/ /tshul khrims dang ldan pa nyid dang mang du thos pa nyid de gnyis dang / lhan cig 'jug pa ni tshul khrims dang ldan pa nyid dang mang du thos pa nyid dang sbyar ba'i lnga pa yin no/ /lnga pa gang la sde snod mngon par shes pa nyid yod pa der ni mang du thos pa nyid gzhan gyi bstan bcos kyi yul can yin no/ /gang du sde snod mngon par shes pa ma bsdus pa der ni mang du thos pa nyid rang gi grub pa'i mtha'i yul can yin par rig par bya'o/ /sde snod mngon par shes pa nyid do zhes bya ba ni mdo sde dang 'dul ba dang chos mngon pa mngon par shes pa nyid de/ 'di gsum la tshul khrims dang ldan pa nyid dang / mang du thos pa nyid kyis bsnan na lnga pa yin no/ /'dul ba las mdo sde la sogs pa 'dzin pa dang / mkhas pa dang / rig pa dang / gsal ba zhes bya ba bzhi po 'di dag smos pa gang yin pa de ni sde snod mngon par shes pa nyid ces smos pa 'di nyid kyis bsdus par rig par bya'o/ /tshig de dag gi rnam par dbye ba ni 'di yin te/ mdo sde la sogs pa bzung ba mi brjed pa ni 'dzin pa'o/ /sde snod gsum phan tshun 'brel pas 'dres par gnas pa la so sor gnas par nus pa ni mkhas pa'o/ /mngon sum dang rjes su dpag pa'i tshad ma gnyis dang lung gis mdo sde la sogs pa sbyor ba ni rigs pa'o/ /lung dang rigs pa gnyis kyis mdo sde la sogs pa sbyar te/ gzhan la go bar byed nus pa gang yin pa de ni gsal ba'o/ /de lta bas na sde snod mngon par shes pa nyid ces bya ba'i mdo 'dis ni lnga pa bzhi bstan la/ snga mas ni lnga pa gcig ste/ lnga pa lnga'o/ /de dag 'dzin du 'jug nus pa nyid do zhes bya ba ni/ sde snod de dag don gyi bdag nyid kyis gzhan 'dzin du gzhug cing go bar byed nus pa nyid ni lnga pa drug pa yin no/ /de ni sde snod mngon par shes pa nyid de kho na'i bye brag gzhan yin te/ de lta ma yin du zin na gal te de rang gis mngon par mi shes par ji ltar don gyi bdag nyid kyis gzhan 'dzin du 'jug par nus pa dang / 'dul ba la gnas pa'i don nyid kyang shin tu bzlas par 'gyur ro/ /de lta bas na sde snod mngon par shes pa'i gang zag nyid kyi gzhan la go bar byed nus pa gang yin pa de ni de'i brjod pa yin par rig par bya'o/ /lnga pa drug pa'o/ /lhag pa'i tshul khrims dang sems dang shes rab la slob pa nyid do zhes bya ba la/ tshul khrims dang sems dang shes rab ni tshul khrims dang sems dang shes rab po/ /lhag pa zhes bya ba'i sgra ni/ tshul khrims dang sems dang shes rab kyi phyir ro/ /slob pa zhes bya ba ni/ slob par byed pa'o/ /slob par byed pa'i dngos po ni slob pa nyid de la slob pa nyid do/ /de ltar na 'dir tshig gi don 'di 'byung ste/ lhag pa'i tshul khrims kyi bslab pa dang / lhag pa'i sems dang / lhag pa'i shes rab kyi bslab pa la slob pa nyid ces bya ba'i tha tshig go/ /lhag pa'i tshul khrims zhes smos pas ni/ 'dul bar ma gtogs pa'i bslab pa'i gzhi thams cad bzung ba yin no/ /lhag pa'i sems zhes smos pas ni/ bsam gtan bzhi po dag bzung ste/ de dag ni sems 'dul bar byed pa yin pa'i phyir ro/ /lhag pa'i shes rab smos pas ni zag pa med pa'i lam bzung ngo / /lnga pa bdun pa'o/ /slob tu 'jug kyang nus pa nyid do zhes bya ba la/ kyang zhes bya ba'i sgra ni/ lhag pa'i tshul khrims la sogs pa nye bar bsdu ba'i don yin gyi/ tha dad par rtogs pa'i don ni ma yin te/ de ltar ma yin du zin na lnga pa rang dbang can kho nar 'gyur ro/ /de ltar yang mi 'gyur te mi srid pa'i phyir ro/ /de lta bas na 'di ni snga ma de nyid kyi bye brag yin par rig par bya ste/ 'di ltar rang nyid lhag pa'i tshul khrims la sogs pa la ma bslabs par gzhan slob du 'dzud nus pa ni 'ga' yang med pa'i phyir te/ bdag nyid ma dul bar gzhan dul bar byed pa ni/ gnas med skabs med do zhes gsungs pa'i phyir ro/ /nus pa'i dngos po ni nus pa nyid de gzhan lhag pa'i tshul khrims la sogs pa la slob tu 'jug nus pa nyid do/ /lnga pa brgyad pa'o/ /lhag pa'i spyod pa dang 'dul ba dang so sor thar pa la yang de bzhin no zhes bya ba la/ lhag pa'i spyod pa zhes bya ba ni/ 'dul ba las 'gro ba dang 'ong ba la sogs pa yin par gsungs te/ rtag tu lhag par spyad pa yin pa'i phyir ro/ /'dul ba zhes bya ba ni/ so sor thar pa'i bslab pa rnam par bshad par gyur pa/ rnam par 'byed pa dang phran tshegs dang gzhi la sogs pa'o/ /so sor thar pa'i zhes bya ba ni/ so sor thar par gtogs pa'i bslab pa'i gzhi rnams so/ /de bzhin no zhes bya ba 'dis ni/ sngar bstan pa'i lugs ston te/ ji ltar lhag pa'i tshul khrims dang / sems dang shes rab la slob pa nyid dang / slob tu 'jug kyang nus pa nyid la lnga pa gnyis yod pa de bzhin du/ 'dir yang lhag pa'i spyod pa dang / 'dul ba dang so sor thar pa la slob pa nyid dang / slob tu 'jug kyang nus pa nyid la lnga pa gnyis yod par rig par bya'o/ /de'i phyir sngar bstan pa dang bcas pa la lnga pa bcur rig par bya'o/ /lnga pa bcu pa'o/ /dad pa dang tshul khrims dang thos pa dang gtong ba dang / shes rab phun sum tshogs pa nyid do zhes bya ba la/ dad pa zhes bya ba ni/ dkon mchog gsum la sogs pa dag la sems dang ba'i mtshan nyid do/ /tshul khrims zhes bya ba 'di/ rang bzhin dang bcas pa'i kha na ma tho ba dang bcas pa spong ba'i mtshan nyid do/ /thos pa zhes bya ba smos pas ni/ 'dir 'dul ba bzung ba yin te/ 'dul ba la gnas pa'i don nyid shin tu bzla bar bya ba ma yin pa'i phyir ro/ /gtong ba zhes bya ba ni/ ma chags pa'i ngo bo nyid do/ /shes rab ces bya ba ni/ chos rab tu rnam par 'byed pa'o/ /phun sum tshogs pa zhes bya ba ni/ dad pa la sogs pa phun tshogs pa'o/ /nyid ces bya ba ni/ phun sum tshogs pa de'i dngos po ni/ phun sum tshogs pa nyid de ldan pa nyid ces bya ba'i tha tshig go/ /lnga pa bcu gcig pa'o/ / tshul khrims dang ting nge 'dzin dang shes rab dang rnam par grol ba dang de shes pa dang mthong ba rnams kyis kyang ngo zhes bya ba ni/ phun sum tshogs pa nyid ces bya bar sbyar te/ 'di yang tshul khrims phun sum tshogs pa zhes smos pas ni 'dul ba mngon par shes pa nyid ston to/ /rnam par grol ba zhes bya ba ni/ 'dir mi slob pa'i rnam par grol ba la bya'o/ /de shes pa dang mthong ba zhes bya ba la/ de zhes bya ba'i sgra ni/ gong du bstan ma thag pa'i phyir rnam par grol ba la snyegs te/ de'i phyir 'di ni rnam par grol ba shes pa dang mthong ba zhes bya ba'i tha tshig go/ / rnam par grol ba zhes pa ni zad pa dang mi skye ba shes pa zhes bya ba'o/ /de la mthong ba ni mi slob pa'i lta ba ste/ de'i phyir rnam par grol ba shes pa dang mthong ba yin no/ /lnga pa bcu gnyis pa'o/ /brtson 'grus brtsams pa nyid dang shes rab dang ldan pa nyid dang yang sbyar ro zhes bya ba la/ yang zhes bya ba'i sgra ni/ 'dir slob pa nyid yan chad lnga pa ma yin pa la/ tshul khrims dang ldan pa nyid dang / mang du thos pa nyid sbyar ro zhes bya ba'i rjes su 'jug pa yin no/ /de ltar na 'dir tshig gi don 'di 'byung ste/ 'di man chad slob pa nyid ces bya ba'i don yan chad la/ lnga pa cig car bstan pa ma yin pa de la/ brtson 'grus brtsams pa nyid dang shes rab dang ldan pa nyid ces bya ba gnyis dang / tshul khrims dang ldan pa nyid dang / mang du thos pa nyid ces bya ba gnyis sbyar te bstan par rig par bya ste/ mdo gsum po dag la de ltar sbyar bar bya ba'o/ /dran pa dang ldan pa nyid dang nang du yang dag gzhag pa nyid dang mnyam par gzhag pa nyid do zhes bya ba gsum po de dag ni re re yang sngar bstan pa bzhi dang sbyar bar bya ste/ des na lnga pa gsum du 'gyur te/ 'dir bsdus pa'i don ni de yin no/ /de ltar na tshul khrims dang ldan pa nyid dang / mang du thos pa nyid dang / brtson 'grus brtsams pa nyid dang shes rab dang ldan pa nyid dang / dran pa dang ldan pa nyid dang / lnga pa lnga pa gcig ste/ lnga pa bcu gsum pa'o/ /yang bzhi po de dag nyid brjod nas/ nang du yang dag gzhag pa nyid dang lnga pa lnga pa gcig ste/ nang du yang dag gzhag pa nyid ces bya ba ni/ rab tu dben par gyur pa nyid ces bya ba'i tha tshig go/ /lnga pa bcu bzhi pa'o/ /yang skabs de'i bzhi po de dag nyid brjod nas/ mnyam par gzhag pa nyid dang lnga pa lnga pa gcig ste/ mnyam par gzhag pa nyid ces bya ba ni mi rgod pa zhes bya ba'i tha tshig go/ /thams cad du yang mang du thos pa nyid ces smos pas ni 'dul ba la gnas pa'i don nyid ston to/ /lnga pa bco lnga pa'o/ /slob pa nyid do zhes bya ba la/ zag pa med pa'i lam gyis nyon mongs pa spang ba'i phyir slob pa'i ngang tshul can yin pa'i phyir/ slob pa zhes bya'o/ /nyid ces bya ba ni slob pa'i dngos po ni slob pa nyid de/ slob pa zhes bya ba'i sgra ni rgyur 'jug pa yin pas slob pa nyid ces bya'o/ /yan lag gi don nyid brjod par bya ste/ slob pa'i tshul khrims kyi phung po dang / ting nge 'dzin dang / shes rab dang / rnam par grol ba dang / rnam par grol ba'i shes pa dang / mthong ba'i phung po dang ldan pa yin no/ /slob pa'i rnam par grol ba shes pa dang / mthong ba zhes bya ba ni bslab par bya ba mos par bya ba'i rnam par grol bar 'gyur na/ shes pa dang mthong ba 'byung ba ste/ slob pa'i chos shes pa la sogs pa ni shes pa'o/ /chos shes pa'i bzod pa la sogs pa shes rab ni mthong ba ste/ de'i phyir rnam par grol ba shes pa dang mthong ba zhes bya'o/ /lnga pa bcu drug pa'o/ /mi slob pa nyid do zhes bya ba la/ nyon mongs pa spang ba'i phyir mi slob pas mi slob pa ste/ dgra bcom pa'o/ /nyid ces bya ba ni/ mi slob pa'i dngos po ni mi slob pa nyid do/ /'dis kyang dgra bcom pa'i rgyud la yod pa'i tshul khrims la sogs pa yan lag lnga po de dag nyid bsdus pa yin no/ /'o na lnga pa gnyis po 'di dag gis 'dul ba la gnas pa'i don nyid ma bstan na/ shin tu bzla bar bya ba ma yin pa'i yan lag ji ltar bzla bar rung / 'di ltar 'dul ba yongs su shes pa med par yang slob pa dang mi slob pa nyid ni srid pa kho na yin la/ zag pa med pa'i tshul khrims kyi yul la 'di bya ba'o/ /'di ni bya ba ma yin no zhes yongs su shes pa gang yin pa de ni/ mngon par rtogs pa las byung ba kho na te/ 'phags pa'i lam gyi sa yin gyi/ ltung ba rnam par gzhag pa la ni so sor thar pa la sogs pa yongs su shes pa dgos pa'i phyir ro/ /de la nyes pa med de lo bcu lon pa nyid ces smos pa'i phyir te/ 'di ltar de gnyis ni 'phags pa yin pas lo bcu bo de dag la 'dul ba gdon mi za bar 'bad par bya ba yin pa'i phyir ro/ /bcom ldan 'das kyis lo bcu lon pa nyid ces gsungs pa ni/ rang dbang yod par bstan pa yin pas/ gal te de gnyis la 'dul ba la gnas pa'i don nyid med par gyur na/ de gnyis ji ltar rang dbang can du 'gyur/ lnga pa bcu bdun pa'o/ /'byung ba dang bcas pa dang / rjes su bcas pa dang / bkag pa dang gnang ba mngon par shes pa nyid do zhes bya ba la/ 'byung ba zhes bya ba ni/ bslab pa'i gzhi rnams gang las 'byung bar gyur pa'i 'byung ba de'i gleng gzhi dang / rgyu mtshan dang byed rgyu gang yin pa ste/ de ni 'byung ba zhes bya ba'i sgras brjod do/ /bcas pa zhes bya ba ni/ bslab pa'i gzhi rnams rnam par gzhag pa'o/ /nyes pa sbom po ni dge slong 'di snyed cig gi mdun du bshags par bya'o zhes bya ba la sogs pa yang bcas pa zhes smos pas gzung bar rig par bya'o/ /rjes su bcas pa zhes bya ba ni/ sngar gnang ba'i gzhi la bkag pa dang / sngar bkag pa la gnang ba gang yin pa ni rjes su bcas pa ste/ dper na mchil lham gnyis gnang ba mdzad pa la yang de gnyis kyi bye brag dgag pa mdzad de/ sgra krog krog mi zer ba dang / sgra tug tug mi zer bar bya'o zhes bya ba la sogs pa lta bu ni/ gnang ba la yang bkag pa'o/ /bkag pa la yang gnang ba ni dper na dus ma yin pa'i zas sngar bkag pa nang pa la gnang ba lta bu ste/ de ni bkag pa la yang gnang ba'o/ /bkag pa zhes bya ba ni/ srog la bab kyang gzhi 'di rnam pa thams cad du mi bya'o zhes bya ba ste/ dper na nga la ston par smra ba rnams kyis tha na rtswa'i mchog mas kyang chang mi blud mi btung ngo zhes gsungs pa dang / srog gcod pa la sogs pa rang bzhin gyis kha na ma tho ba dang bcas pa mi bya'o zhes gsungs pa lta bu'o/ /gnang ba zhes bya ba ni/ ci dgar spyad pa'i yul la bya ba gang yang rung ba zhig mi byed dam byed na ltung ba zhes bya ba'i nyes pa med pa ste/ dper na phas kyi rgol ba tshar gcod pa'i phyir phyi rol gyi bstan bcos bklag pa ngas rjes su gnang ngo zhes gsungs pa lta bu'o/ /lnga pa 'di dang 'og nas ltung ba zhes bya ba la sogs pa'i lnga pas ni/ 'dul ba 'ba' zhig mngon par shes pa nyid bstan to/ /lnga pa bco brgyad pa'o/ /bar du gcod pa dang bar du gcod pa ma yin pa mngon par shes pa nyid dang / smra ba po nyid dang rjes su ston pa nyid ces bya ba ni/ bar du gcod pa nyid dang bar du gcod pa ma yin pa ni bar du gcod pa dang / bar du gcod pa ma yin pa ste/ de gnyi ga mngon par shes pa gnyis dang / smra ba po nyid dang / rjes su ston pa nyid ni smra ba po nyid dang rjes su ston pa nyid yin no zhes bya bar tshig sbyar bar bya'o/ /de la bar du gcod pa zhes bya ba ni/ 'dul ba las srog gcod pa la sogs pa bya ba ma yin pa gang yin pa ste/ de ni bar du gcod par nus pa'i phyir bar du gcod pa'o/ /bar du gcod pa ma yin pa zhes bya ba ni/ bya ba gang yin pa ste de ni bar du gcod pa ma yin no/ /bar du gcod pa dang bar du gcod pa ma yin pa mngon par shes pa nyid ces bya ba yan lag gnyis po 'dis ni 'dul ba la gnas pa'i don nyid bstan to/ /smra ba po nyid ces bya ba la/ smra bar byed pa ni smra ba po'o/ /smra ba po'i dngos po ni smra ba po nyid de/ yan lag gnyis po de dag nyid gzhan dag la ston pa'am/ go bar bya ba la mkhas par gyur cing nus pa gang yin pa de ni smra ba po nyid ces bya ba'o/ /rjes su ston pa nyid ces bya ba ni/ slob ma la sogs pa dag bya ba ma yin pa dag las legs par 'jog pa dang / rjes su mthun pa dang / rnam par bzlog pa dang / rjes su mthun par smra ba nyid dang / bya ba dag la rjes su bsgrub pa la 'jug pa dang rjes su mthun par smra ba nyid de/ 'dis slob ma rnams rjes su ston par byed pa'i phyir ro/ /de nyid kyi phyir 'dul ba las kyang smra ba po dang / rjes su ston pa zhes gsungs so/ /de la bar du gcod pa dang bar du gcod pa ma yin pa mngon par shes pa nyid ni yan lag gnyis yin/ gsum pa ni bar du gcod pa dang bar du gcod pa ma yin pa smra ba po nyid yin/ bzhi pa ni rjes su ston pa nyid yin na/ de lnga bar ji ltar sbyar bar bya zhe na/ de'i phyir gnas dang re zhig gnas 'char gzhug nus pa nyid dang sbyar ro zhes bya ba smras te/ bar du gcod pa mngon par shes pa nyid la sogs pa yan lag snga ma gzhi gnas 'char gzhug nus pa nyid dang sbyar ba la lnga pa gcig ste/ lnga pa bcu dgu pa'o/ /de bzhin du yan lag bzhi po de dag nyid re zhig gnas 'char gzhug nus pa nyid dang sbyar ba la lnga pa gcig ste/ lnga pa nyi shu pa yin par sbyar ro/ /de la gnas dang re zhig gi gnas zhes bya ba la/ dang zhes bya ba'i sgra ni/ gnas dang re zhig gnas nyid rang dbang yod par bstan pa'i phyir ro/ /'di skad bstan te/ gnas dang re zhig gnas zhes bya ba'i yan lag gnyis po lnga pa gcig tu rnam par bzhag par mi bya'i/ mdo snga mar bstan ma thag pa'i yan lag bzhi dang so sor sbyar te/ lnga pa gnyis su bya'o zhes bya ba'i tha tshig go/ /'char gzhug ces bya ba ni/ sbyin du gzhug pa'o/ /'char nus pa nyid ces bya ba ni/ 'char gzhug nus pa nyid de 'char gzhug nus pa nyid ni phod pa nyid do/ /ci zhig 'char gzhug nus pa nyid ce na gnas dang re zhig gi gnas so/ /de ltar na 'dir tshig gi don 'di 'byung ste/ gal te mkhan po gzhan du 'gro na gnas 'char gzhug nus pa dang / re zhig pa'i bsam pas gzhan du 'gro'am/ de nyid na spo ba la sogs pa dgos pa'i dbang gis 'dug pa na gnas pa re zhig gi gnas 'char gzhug nus pa ste/ yan lag 'di gnyis yan lag snga ma bzhi dang sbyar na lnga pa gnyis su 'gyur ro/ /lnga pa nyi shu pa'o/ /ltung ba dang ltung ba ma yin pa dang yang ba dang lci ba nyid mngon par shes pa nyid dang so sor thar pa dang rgyas pa thon pa nyid do zhes bya ba la ltung ba dang ltung ba ma yin pa ni/ ltung ba dang ltung ba ma yin pa'o/ /yang ba dang lci ba de gnyis kyi dngos po ni yang ba dang lci ba nyid do/ /ltung ba la sogs pa mngon par shes pa nyid ni ltung ba la sogs pa'i mngon par shes pa nyid do/ /so sor thar pa dang rgyas par thon pa nyid ni so sor thar pa dang rgyas pa thon pa nyid do zhes bya ba thams cad la yang gcig gi tshig tu bya'o/ /de la ltung ba ma yin pa mngon par shes pa nyid ni slob ma la sogs pa bya ba dang bya ba ma yin pa la sbyar ba la dgos so/ /yang ba dang lci ba nyid mngon par shes pa nyid ni nyes pa spom po bshags pa la dgos te/ 'di ltar nyes pa sbom po kha cig ni mtshams kyi nang du dge 'dun thams cad tshogs pa la bshags par bya ba yin/ kha cig ni mtshams kyi phyi rol du/ kha cig ni bdun la/ kha cig ni lnga la/ kha cig ni bzhi la bshags par bya ba yin pa'i phyir ro/ /so sor thar pa dang rgyas pa thon pa nyid kyis ni 'dul ba la gnas pa'i don nyid bstan to/ / rgyas pa zhes smos pas ni 'dul ba mtha' dag bsdus par rig par bya ste/ 'dul ba mtha' dag ni so sor thar pa rgyas par gyur pa yin pa'i phyir ro/ /'dir so sor thar pa dang rgyas pa thon pa nyid ni tshig las rig par bya'o/ /don las ni ltung ba dang ltung ba ma yin pa la sogs pa nyid kyis grub pa'i phyir ro/ /'di ltar 'dul ba las kyang ltung ba shes pa dang / ltung ba ma yin pa shes pa dang / yang ba shes pa dang / lci ba shes pa dang / so sor thar pa'i mdo 'don pa dang rgyas pa bklags pa dang thon pa ste/ bklags pa zhes smos pas ni/ 'dir slob dpon dang mkhan po la sogs pa las bklag pa'i bsam pas bzung ba nyid ston to/ /thon pa zhes smos pas ni/ kha ton du rnam par gzhag pa nyid ston to/ /lnga pa nyi shu rtsa gcig pa'o/ /gtsug lag khang gang na dge slong lo bcu lon pa'am/ de bas lhag pa lnga pa gang dang yang mi ldan pa sha stag 'khod la gtsug lag khang de na rgan pa lnga pa dang / ldan pa med na des ji ltar bsgrub par bya zhe na/ rgan pa med na gzhon pa la gnas bca' bar bya'o zhes bya ba smras te/ gal te rgan pa lnga pa gang yang rung ba cig dang yang mi ldan par gyur na/ de'i cho ga ni de yin no/ /'dir lung yang 'di yin te/ btsun pa dge slong rdzogs par bsnyen nas lo drug cu lags la des so sor thar pa'i mdo gdon pa dang / rgyas pa bklags pa thon pa ma lags na des kyang gzhan la gnas pas mchis par bgyi'am/ nye ba 'khor des kyang gzhan la gnas pas 'dug par bya'o zhes gsungs pa yin no/ /'dir lo drug cu lon pa nyid kyang mtshon pa tsam du zad kyi/ lo brgyad cu lon pas kyang gzhan la gnas pas 'dug par bya'o/ /dge slong rgan pa lnga pa dang ldan pa med na dge slong gzhon pa lnga pa dang ldan pa la gnas par bya'o/ /ci nye gnas kyi tshul khrims thams cad bya'am zhe na/ 'dud pa 'ba' zhig ma gtogs so zhes bya ba smras te/ rgan pas gnas gzhon pa la btud de phyag 'tshal ba 'ba' zhig ma gtogs pa gnas pa'i tshul khrims de las gzhan pa dag la rjes su gnas par bya'o zhes bya ba'i tha tshig go/ /dge slong gnas na gnas pa'i ji ltar rjes su gnas pa bstan na/ lam du zhugs pas kyang ci de dag nyid la rjes su gnas par bya'am zhe na/ ma yin te de'i phyir/ lo lnga lon zhing lhan cig sbyar ba tha ma dang ldan na gnas ma bcas par ljongs rgyur 'gro bar bya'o zhes bya ba smras te/ gal te lo lnga yang lon la lhan cig sbyar ba tha ma dang yang ldan na gnas ma bcas par yang 'gro zhing rgyu bar bya'o/ /lhan cig sbyar ba tha ma zhes bya ba ni/ ltung ba dang ltung ba ma yin pa dang / yang ba dang lci ba nyid mngon par shes pa nyid dang / so sor thar pa dang rgyas pa thon pa nyid de/ lhan cig sbyar ba thams cad kyi mjug tu bstan pa'i phyir tha ma'o/ /ji 'dir lo lnga lon pa nyid gtso bo yin nam 'on te lhan cig sbyar ba tha ma dang ldan pa nyid gtso bo yin zhe na/ 'dir gnyi ga yang gtso bo yin te/ gal te lhan cig sbyar ba tha ma dang ldan na yang lo lnga ma lon na des kyang 'gro bar mi bya la/ ci ste lo lnga lon yang lhan cig sbyar ba tha ma dang mi ldan pa de lta na yang 'gro bar mi bya ste/ de'i phyir gzhan du na gsum rig pa yin yang mi bya'o zhes bya ba smras te/ gal te lo lnga ma yin nam lo lnga lon yang lhan cig sbyar ba tha ma dang mi ldan na/ rig pa gsum po sngon gyi gnas dang / 'chi 'pho dang skye ba dang zag pa zad pa zhes bya ba dag dang ldan du zin kyang / de lta na des gnas ma bcas par ljongs rgyu zhing 'gro bar mi bya'o/ /'di ltar btsun pa gsum rig pa dri ma gsum spangs la de lo lnga ma lags shing chos lnga dang mi ldan na des kyang mi gnas par ljongs rgyu zhing mchi bar mi bgyi'am/ nye ba 'khor mi bya'o zhes gsungs pa'i phyir ro/ /de lta bas na 'dir gsum rig pa yang ma gnang ba bzhin du gzhan la yang de kho na bzhin no/ /gnas kyi skabs so/ /bar chad dris nas yongs su dag pa la skabs dbye'o zhes gang smras pa de'i phyir 'di man chad rnams ni rnam pa gnyis te/ rab tu 'byung ba'i phyir nye bar 'ongs pa la mu stegs can ma yin nam zhes dri bar bya zhing rdzogs par bsnyen par byed pa dag gis kyang ngo zhes bya bas ni/ mu stegs can rab tu dbyung ba dang rdzogs par bsnyen par mi bya'o/ /bar chad kyi chos rnams ni rnam pa gnyis te/ kha cig ni sdom pa skye ba la bar chad byed pa ste/ 'di lta ste ma gsod pa la sogs pa'o/ /kha cig ni mdzes pa nyid la bar du gcod pa ste/ 'di lta ste lag rdum la sogs pa'o/ /gzhan yang bar chad kyi chos rnams ni rnam pa gnyis te/ kha cig ni lta ba'i rnam pa ste/ 'di lta ste mu stegs can ma yin nam zhes bstan pa la sogs pa'o/ /kha cig ni bya bas te/ 'di lta ste/ rgyal pos bkrabs pa ma yin nam zhes bya ba la sogs pa'o/ /de dag thams cad go rims bzhin du bstan te/ mu stegs can ma yin nam zhes bya ba ni/ rab tu 'byung ba'i phyir nye bar 'ongs pa'i gang zag la mkhan pos khyod mu stegs can ma yin nam zhes dri bar bya zhing rdzogs par bsnyen par byed pa dag gis kyang dri bar bya'o zhes bya bar sbyar ro/ /'o na gsang ste ston pa kho nas 'dri zhing las byed pas kyang yin na/ ji ltar rdzogs par bsnyen par byed pa dag gis kyang zhes mang po'i tshig tu bya/ dri bar bya zhing zhes gcig gis tshig smos pa las ji ltar rdzogs par bsnyen par byed pa dag gis kyang dri bar bya'o zhes mjug mang po'i tshig tu rung zhe na/ nyes pa med de lkog tu gsang ste ston pas dri bar byed pa de ni rdzogs par bsnyen par byed pa dag gis byas pa kho na yin par rig par bya ste/ ji ltar rdzogs par bsnyen par byed pa dag kho nas gsang ste ston pa 'dri ba'i don du bskos pa yin pas des byas pa ni de dag la nye bar gdags pa'i phyir ro/ /dri bar bya zhing zhes bya ba 'di yang don gyi dbang gis rnam par dbye ba bsgyur te/ ngag gis kyang dri bar bya'o zhes bya bar rung ngo / /gal te dris pa na de dag mu stegs can no zhes zer na de'i tshe ji ltar bya zhe na/ de'i phyir shAkya dang me pa ral pa can ma gtogs pa sems mgu bar ma gyur pa'i mu stegs can rab tu dbyung ba dang rdzogs par bsnyen par mi bya'o zhes bya ba smras te/ gang la sems mgu bar ma gyur/ yid ches par ma gyur/ dad par ma gyur pa yod pa ni sems ma gyur pa'i mu stegs can te/ sems mgu bar ma gyur pa'i mu stegs can ni rab tu dbyung ba dang rdzogs par bsnyen par mi bya'o/ /ci mu stegs can thams cad dam zhe na/ de'i phyir shAkya dang me pa ral pa can ma gtogs pa zhes bya ba smras te/ shAkya dang me pa ral pa can ni ma gtogs so/ /me pa zhes bya ba ni me la dad pas me pa ste/ de med pa'i rigs dang dad pa yongs su spyod par zhugs pa dang / mngon par brtson par gyur pas na de skad ces bya'o/ /'o na mkhan po gcig kho nar zad pas gcig gi tshig tu bya ba'i rigs na/ rab tu dbyung ba dang zhes bya ba mang po'i tshig tu byas pa ji ltar zhe na/ nyes pa med de rab tu byung ba la ni zhu bar byed pa la sogs pa mang po dag kyang gtogs pas mang po'i phyir mang po'i tshig tu byas so/ /shAkya dang me pa ral pa can gnyis kyi rab tu 'byung bar rjes su bsgrub pa gang yin pa de ni de gnyis kyi bden pa kho na yin gyi sgyus ma yin pas de'i phyir bcom ldan 'das kyis kyang dge slong dag nga ni nye du rnams la nye ngu'i yongs su spang ba sbyin par byed do zhes gsungs so/ /'di ltar ming dang ming can sbyar na don sla bar 'gyur bas/ 'di yang bstan bcos la ming dang ming can du sbyar ba sdeb par 'dod nas/ bkol ba de ni mu stegs can dang shAkya la sogs pa'i mjug gi mu stegs can bkol ba la'i zhes bya ba smras te/ bkol ba zhes bya ba ni ming ngo / /de ni zhes bya ba ni ming can te/ mdo sngar bstan ma thag pa gnyis la mu stegs can zhes bya ba rnam pa gnyis bkol ba'i lhag ma'o/ /mdo snga ma la ma yin nam zhes bya ba'i gong na mu stegs can zhes bya ba'i sgra 'dug pa bkol ba'i lhag ma dang / mdo gnyis pa la shAkya dang me pa ral pa can ma gtogs pa sems mgu bar ma gyur pa'i mu stegs can zhes bya ba'i sgra de dag bkol ba'i lhag ma ni bkol ba zhes bya ba'i ming can yin par rig par bya'o/ /de ltar na 'dir tshig gi don 'di byung ste/ gong du bkol ba zhes bya ba'i sgra yod pa der rab tu 'byung ba'i phyir nye bar 'ongs pa la che ge mo zhig ma yin nam zhes dri bar bya zhing / rdzogs par bsnyen par byed pa dag gis kyang dri bar bya ste/ gal te dris pa na de dag che ge mo de yin no zhes zer na/ rab tu 'byung ba dang rdzogs par bsnyen par mi bya'o zhes bya ba de brjod par bya ba'i skabs yin par shes par bya'o/ /da ni yan lag gi don brjod par bya ste/ mu stegs can dang zhes bya ba ni/ mdo snga ma la ma yin nam zhes bya ba'i gong na mu stegs can zhes bya ba'i sgra 'dug pa dang sbyar ro/ /shAkya la sogs pa'i mjug gi mu stegs can zhes bya ba ni/ mdo gnyis pa la shAkya dang me pa ral pa can ma gtogs pa sems mgu bar ma gyur pa'i mu stegs can zhes bya ba'i sgra 'dug pa dang sbyar ro/ /shAkya la sogs pa'i zhes bya ba ni tshig gang la sogs pa zhes bya ba yod pa de ni shAkya la sogs pa'i'o/ /mjug gi mu stegs can zhes bya ba ni/ mu stegs can zhes bya ba'i sgra 'di tshig gang gi mjug na yod pa'i tshig de'i mjug na mu stegs can yod pa'o/ /de ltar na tshig de ni shAkya la sogs pa yang yin la/ mjug na mu stegs can yod pa yang yin pas/ shAkya la sogs pa'i mjug gi mu stegs can yod pa yin no/ /yang mdo snga ma las mu stegs can zhes smos pa'i sgra dang cig car gcig gi tshig tu yang bsdu bar bya ste/ mu stegs can dang zhes bya ba yang tshig de yin la shAkya la sogs pa'i mjug gi mu stegs can zhes bya ba yang de yin pas na/ mu stegs can dang shAkya la sogs pa'i mjug gi mu stegs can te/ de bkol ba'i lhag ma ni ming can yin par rig par bya'o/ /'di ltar ming ni gzhan gyi don gyi phyogs dag la ming can go bar byed pa yin pas de'i phyir rab tu 'byung ba'i gzhi 'dir yang bkol ba bran zhes bya ba la sogs pas bkol ba'i phyogs shes par bya'o/ /phran tshegs la ni bkol ba rgyal pos bkrabs pa zhes bya ba la sogs pas bkol ba'i phyogs shes par bya'o/ / //bam po gsum pa/ /sems mgu bar ma gyur pa'i mu stegs can rab tu dbyung ba dang rdzogs par bsnyen par mi bya'o zhes smras na/ de ci tsam gyis na sems mgu bar gyur par rig par bya zhe na/ de'i phyir dkon mchog rnams kyi bsngags pa dang / mu stegs can rnams kyi bsngags pa ma yin pa yang dag par brjod pa na mi g.yo ba nyid ni sems mgu bar gyur pa nyid do zhes bya ba smras te/ dkon mchog rnams kyi zhes bya ba ni/ gsum po sangs rgyas dang chos dang dge 'dun rnams kyi'o/ /bsngags pa yang dag par brjod pa na zhes bya ba ni yon tan yang dag pa ji lta ba bzhin du brjod pa na'o/ /mu stegs can rnams kyi bsngags pa ma yin pa yang dag par brjod pa na zhes bya ba ni/ skyon yang dag pa ji lta ba bzhin du brjod pa na'o/ /mi g.yo ba nyid ces bya ba ni g.yo bar mi 'gyur bas mi g.yo ba ste/ mi g.yo ba'i dngos po ni mu stegs can rnams kyi mi g.yo ba nyid do/ /sems mgu bar gyur pa nyid ces bya ba yang / mu stegs can de dag nyid kyi'o/ /mu stegs can sems mgu bar gyur pa nyid la ji ltar nan tan bya zhe na/ de'i phyir de'i don du de dang mi ldan pa de dge bsnyen nyid du byas pa'i mtha' can de la dge 'dun gyi las kyis gnas pa byin la zla ba bzhir gnas par bya'o zhes bya ba smras te/ de'i don du zhes bya ba ni/ bstan ma thag pa sems mgu bar gyur pa nyid kyi don du'o/ /de dang mi ldan pa zhes bya ba la/ de zhes bya ba'i sgras ni sems mgu bar ma gyur pa nyid gzung ngo / / gang la de yod pa de ni de dang ldan pa'o/ /de dang ldan pa ma yin pa ni de dang mi ldan pa ste sems mgu bar ma gyur pa nyid ldan pa de dang mi ldan pa'o/ /de zhes bya ba ni/ mu stegs can yin no/ /dge bsnyen nyid du byas pa'i mtha' can zhes bya ba la/ dge bsnyen gyi dngos po ni dge bsnyen nyid do/ /de ni cho ga de'i mtha' yin pas dge bsnyen nyid du byas pa'i mtha' ste/ de la dge bsnyen du byas pa'i mtha'i cho ga yod pas na/ dge bsnyen nyid du byas pa'i mtha' can no/ /de la zhes bya ba ni/ dge bsnyen nyid du byas pa'i mtha' can gyi mu stegs can la'o/ /dge 'dun gyis las kyi gnas pa byin la zla ba bzhir gnas par bya'o zhes bya ba ni/ dge 'dun gyis gnas pa byin la zla ba bzhir gnas par bya'o/ /ji ltar gnas pa byin la zhe na/ las kyis te gsol ba dang bzhi'i las kyis so/ /gsol ba dang bzhi'i las ni/ dge 'dun btsun pa rnams gsan du gsol/ mu stegs can ming 'di zhes bgyi ba las rab tu 'byung bar 'tshal te/ mu stegs can ming 'di zhes bgyi ba 'di/ zla ba bzhi'i bar du mkhan pos sbyar ba'i gos kyis gnas par dge 'dun la gsol na/ gal te dge 'dun gyis dus la bab cing bzod na/ dge 'dun gyis gnang bar mdzod cig dang / dge 'dun gyis mu stegs can ming 'di zhes bgyi ba la zla ba bzhi'i bar du mkhan pos sbyar ba'i gos kyis gnas pa stsal to zhes bya ba la sogs pas so/ /zla ba bzhi po dag la zan dang gos gang nas sbyin par bya zhe na/ de'i phyir de'i zan dge 'dun las so zhes bya ba smras te/ mu stegs can gnas pa byin pa de'i zan ni dge 'dun gyi las sbyin par bya'o/ / gos gang nas she na/ de'i phyir gos ni mkhan po las so zhes bya ba smras te/ gos ni mkhan pos sbyin par bya'o/ /zan dang gos 'byor nas des ci zhig bya zhe na/ de'i phyir las su bsko bar byed pa po nyid do zhes bya ba smras te/ mu stegs can rab tu 'byung bar 'dod pa de'o/ /dge tshul dag pas kyang gzhon pa'i phyir gzhon pa thams cad kyi las su bsko ba gang yin pa de des bya'o/ /gang gi phyir bar chad rnam pa gnyis po re zhig pa dang gtan du ba zhes gsungs pa la/ re zhig pa bstan pa'i phyir/ rab tu 'byung ba'i phyir nye bar 'ongs pa la lo bco lnga lon nam zhes dri bar bya'o zhes bya ba smras te/ rab tu 'byung bar 'dod pa rab tu 'byung ba'i phyir 'ongs pa la mkhan pos ci khyod lo bco lnga lon nam zhes dri bar bya'o/ /gal te lo bco lnga ma lon na de'i phyir ji ltar bya zhe na/ de'i phyir ma lon pa bya rog skrod mi nus pa dang nus pa lo bdun ma lon pa rab tu 'byung bar mi bya'o zhes bya ba smras te/ rab tu 'byung bar 'dod pa lo bco lnga ma lon pa bya rog skrod mi nus pa rab tu 'byung bar mi bya'o/ /bya rog skrod nus kyang lo bdun ma lon na rab tu dbyung bar mi bya'o/ /gal te lo bco lnga'am lo bdun lon la bya rog skrod kyang nus na de ni rab tu dbyung bar bya'o/ /'o na rab tu dbyung ba ni mkhan po'i las yin na/ de dag gis rab tu dbyung bar bya'o zhes mang po'i tshig tu ji ltar rung zhe na/ rab tu dbyung ba la ni mang po rnams kyi bya ba yod pas thams cad bsdu ba'i phyir mang po'i tshig tu rung ste/ zhu bar byed pas kyang 'di yongs su ma dag go zhes bya bar shes na zhu bar mi bya la/ dge 'dun gyis kyang gnang bar mi bya/ dge tshul nyid du nye bar bsgrub pas kyang dge tshul nyid du nye bar bsgrub par mi bya ba'i phyir ro/ /ci dper na gnas gcig gis gnas pa rdzogs par bsnyen pa mang po dag 'jog par byed pa de bzhin du/ des dge tshul mang po dag kyang gzhag par bya'am/ zhe na/ de'i phyir dge tshul gcig las lhag pa nye bar gzhag bar mi bya'o zhes bya ba smras te/ dge tshul gcig las lhag pa dge tshul gnyis pa la sogs pa nye bar gzhag par mi bya'o/ /ji ltar dge tshul gnyis pa la sogs pa nye bar gzhag pa bkag pa ltar/ ci rab tu dbyung ba yang gnyis pa la sogs pa mi bya'am zhe na/ de'i phyir gal te so sor rab tu 'byung mi 'dod na rab tu phyung la rgan pa rdzogs par bsnyen par bya'o zhes bya ba smras te/ rab tu 'byung bar 'dod pa gnyis shig bdag can gnyis cig car lhan cig rab tu 'byung bar bya'o zhes de ltar nges par byas te/ rab tu 'byung ba'i phyir 'ongs pa de gnyis gal te so sor tha dad par rab tu 'byung bar mi 'dod na/ de'i tshe gnyis ka rab tu 'byung bar bya zhing gnyis ka rab tu 'byung na dge tshul nas rgan pa shos rdzogs par bsnyen par bya'o/ /gal te rgan du zin kyang lo nyi shu ma lon na de'i tshe ji ltar bya zhe na/ de'i phyir gal te lo ma lon na gzhan la re zhig gnas pa'i don du gtad par bya'o zhes bya ba smras te/ dge tshul gang yang rung ba de rgan du zin kyang / gal te lo nyi shu ma lon par gyur na/ de'i tshe de gnyis las gcig dge slong gzhan la re zhig gi gnas kyi don du gtad par bya'o/ /ci ste gang la re zhig gi gnas kyi don du gtad pa de'i yin pa kho nar 'gyur ram zhe na/ de'i phyir de la de dbrog par mi bya'o zhes bya ba smras te/ dge slong de la dge tshul de mkhan po las dbrog par mi bya'o/ /rdzogs par bsnyen par bya ba'i dus na gang gis rdzogs par bsnyen par bya zhe na/ de'i phyir gang gis gtad pa nyid kyis de rdzogs par bsnyen par bya'o zhes bya ba smras te/ gal te mi ster na de'i tshe ji ltar bya zhe na/ de'i phyir mi ster ba re zhig gi gnas las mthus bkug ste 'o zhes bya ba smras te/ mi ster ba las mthus bkug ste rdzogs par bsnyen par bya'o zhes bya bar sbyar ro/ /bkol ba bran no zhes bya bas ni/ bkol ba zhes bya ba'i ming ming can la nye bar 'jog par byed de/ ma yin nam zhes bya ba la sogs pa bran zhes bya bar sbyar ba can la'o/ /bran zhes bya ba'i sgra ming can dang lhan cig ji ltar sbyar bar bya zhe na/ 'dir bran ma yin nam zhes bya ba'i sgra ni dang po'i mtha' can yin la/ mi bya'o zhes bya ba ni 'dir gnyis pa'i mtha' yin no/ /de ltar na 'dir tshig gi don 'di 'byung ste/ rab tu 'byung ba'i phyir nye bar 'ongs pa la bran ma yin nam zhes dri bar bya zhing / rdzogs par bsnyen par byed pa dag gis kyang dri bar bya ste/ bran rab tu 'byung ba dang rdzogs par bsnyen par mi bya'o/ /'di ltar bran zhes bya ba'i sgra gcig tu zad mod kyi/ 'on kyang don gyi dbang gis rnam par dbye ba bsgyur te/ gnas gnyi gar sbyar bar bya'o/ /yin nam gtang la/ khyod la la la'i bu lon mang yang rung nyung yang rung cung zad chags pa zhes bya'o zhes bya ba la/ yin nam gtang la zhes bya ba ni/ yin nam zhes bya ba bkol pa'o/ /mdo 'di la bkol ba'i ming gis yin nam zhes pa'i sgra bkol ba'i ming can nye bar 'jog par byed de/ yin nam zhes bya ba'i gnas su khyod la zhes bya bar nye bar sbyar bar bya'o/ /de ltar na 'dir mdo'i don 'di 'byung ste/ rab tu 'byung ba'i phyir nye bar 'ongs pa la khyod la la la'i bu lon mang yang rung nyung yang rung cung zad chags pa med dam zhes dri bar bya zhing / rdzogs par bsnyen par byed pa dag gis kyang dri bar bya ste/ bu lon can rab tu dbyung bar mi bya rdzogs par bsnyen par mi bya'o/ /bu lon zhes bya ba ni gzhal bar bya ba yin pas de'i phyir 'dir bkol ba bu lon can dang sbyar bar shes par bya'o/ /bu lon can thams cad rab tu dbyung bar mi bya ba yang ma yin te/ gang 'di skad du rab tu byung ngam/ rdzogs par bsnyen nas phyis bu lon 'jal nus so zhes dam 'cha' bar byed pa de ni rab tu dbyung bar bya'o/ /bye brag 'di ni sngags las snang ste/ sngags 'di skad du 'byung ste/ khyod la la la'i bu lon mang yang rung nyung yang rung cung zad chags pa med dam/ rab tu byung nas 'jal nus sam zhes 'byung bas/ 'jal nus sam zhes bya ba'i tshig gis de de ltar gyur na rab tu dbyung bar bya'o/ /rab tu dbyung bar 'dod pa pha ma gson zhing de gnyis kyis mi gnang ba yul thag mi ring ba ni/ zhag bdun bsrel bar bya'o zhes bya ba la/ rab tu 'byung bar 'dod pa pha ma gson zhing zhes bya ba ni/ rab tu dbyung bar 'dod pa gang gi pha ma gnyis gson pa de ni rab tu 'byung bar 'dod pa pha ma gson pa yin no/ /de gnyis kyis ma gnang ba zhes bya ba ni/ pha ma de gnyis kyis gal te rab tu 'byung ba'i phyir gnang bar ma gyur pa'o/ /yul thag mi ring ba zhes bya ba ni/ gang la yul thag ring po med pa de ni yul thag mi ring ba yin no/ /rab tu 'byung bar 'dod pa de lta bu de ni zhag bdun bsrel bar bya ste/ 'ongs ma thag tu rab tu dbyung bar mi bya'o zhes bya ba'i tha tshig go/ /de gnyis kyis zhes bya ba gnyis kyi tshig tu byas pa'i phyir pha ma gson zhing zhes bya ba 'dir yang pha ma gnyi ga gzung bar bya'o/ /gal te gcig gson na yang de'i tshe de kho na bzhin du bsgrub par bya'o/ /yul thag mi ring ba can gyi dbang du byas te smras nas/ da ni yul thag ring po can gyi dbang du byas te/ de yul thag ring na yang dge 'dun la ma zhus par rab tu dbyung bar mi bya'o zhes bya ba la/ de zhes bya ba ni rab tu dbyung bar 'dod pa pha ma gson zhing de gnyis kyis ma gnang ba'o/ /yul thag ring na yang dge 'dun la ma zhus par rab tu dbyung bar mi bya'o zhes bya ba la/ yang zhes bya ba'i sgra ni/ zhag bdun bsrel du zin kyang dge 'dun la ma zhus pa rab tu dbyung bar mi bya'o zhes bya bar sbyar ro/ /bzlog pa ni rab tu dbyung bar bya'o/ /de ltar pha ma gson pa la dri ba'i gzhung ni btsun pa gang gi pha ma gnyis dus las 'das par gyur tam/ dud 'gro'i skye gnas su gtogs par gyur pa de'i skra breg pa dge 'dun thams cad la zhu bar bgyi'am/ nye ba 'khor mi bya'o zhes gsungs pa'o/ /'o na yul thag nye ba yang ma zhus par rab tu dbyung bar mi bya na/ yul thag ring ba smos pa ci'i phyir bya zhe na/ dogs pa bsal ba'i phyir te/ 'di ltar khyim pa mo zhig gis bu rab tu phyung ba mthong nas/ khyod shAkya'i bu'i rkun ma rnams kyi nang du ci'i phyir rab tu byung tshur shog 'dong zhes smras te/ des de bzung nas khyim du khrid cing dge slong rnams la rkun ma zhes bya ba'i tshig gis skur pa btab pas/ la la yul thag nye ba la ni nyes dmigs de lta bu yod kyi/ yul thag ring ba la ni nyes pa med do snyam du de ltar dogs par gyur pas yul thag ring ba smos so/ /de nyid kyi phyir kha cig yang zhes bya ba'i sgra gzhan du rnam par 'chad de/ yang zhes bya ba'i sgras ni yul thag ring ba yang zhu bar bya/ yul thag nye ba yang zhu bar bya'o zhes bya bar rnam par 'chad do/ / rab tu 'byung bar 'dod pa zhag bdun bsrel bar bya'o zhes smras na/ zan sus sbyin par bya ba ma bstan pas de'i phyir rab tu 'byung bar 'dod pa'i zan ni dge 'dun gyis byin na rung ngo zhes bya ba smras te/ rung ngo zhes smos pas ni/ dge 'dun gyi gnang spabs ston te/ gal te gcig la ma zhus na yang de'i tshe sbyin par mi bya'o zhes bya ba'i tha tshig go/ /bkol ba pha mas gnang ngam mjug nas yul thag ring ba ni ma gtogs so zhes bya ba ni/ med dam zhes bya ba'i sgra de'i gnas su pha mas gnang ngam zhes bya ba'i sgra brjod par bya'o/ /bkol ba zhes bya ba'i sgra 'dis bsgrub par bya ba'i ming can gyi mjug tha mar yul thag ring ba ni ma gtogs so zhes bya ba'i sgra 'di lhag par brjod par bya'o/ /de ltar na tshig gi don 'di 'byung ste/ rab tu 'byung ba'i phyir nye bar 'ongs pa la pha mas gnang ngam zhes dri bar bya zhing rdzogs par bsnyen par byed pa dag gis kyang dri bar bya ste/ pha mas ma gnang ba rab tu dbyung ba dang rdzogs par bsnyen par mi bya'o/ /yul thag ring ba ni ma gtogs so/ /nye bar 'ongs pa la nad pa ma yin nam zhes dri bar bya'o zhes bya ba ni/ rab tu 'byung bar 'dod pa rab tu 'byung ba'i phyir nye bar 'ongs pa la dge tshul gyi mkhan pos nad pa ma yin nam zhes dri bar bya'o/ /de yang rab tu 'byung ba'i skabs nas gnang ngo / /khyod la nad gang yang rung ba med dam zhes bya bar yang rung ngo zhes bya ba la/ rung ngo zhes bya ba'i sgra ni/ tshig tha dad par rtogs pa'i don te gnyis po dag las gang yang rung ba brjod par bya'o/ /rdzogs par bsnyen par byed pa dag gis bye brag tu'o zhes bya ba ni/ 'di ltar rab tu 'byung ba'i dus na nad pa ma yin nam zhes bya ba la sogs pa spyir dri bar byed mod kyi/ 'on kyang bsnyen par rdzogs pa'i dus su mi rnams kyi lus la lus kyi nad rnam pa 'di lta bu 'di dag 'byung ba 'di lta ste/ mdze dang / 'bras dang zhes bya ba la sogs pas bye brag tu dri bar bya'o zhes bya ba gcig gi tshig gi mtha'i sgra 'di mang po'i tshig tu bsgyur te/ de dag gis dri bar bya'o zhes bya bar sbyar bar bya ste/ rdzogs par bsnyen par byed pa dag gis zhes bya ba mang po'i tshig gi mtha' yin pa'i phyir ro/ /nad pa rab tu dbyung ba dang rdzogs par bsnyen par mi bya'o zhes bya ba ni/ zhu bar byed pa dang / rdzogs par bsnyen par byed pa la sogs pa mang po'i phyir rab tu 'byung ba dang rdzogs par bsnyen par mi bya'o zhes mang po'i tshig ni 'dir thams cad kyi bye brag bstan pa'i phyir ro/ /gang gi phyir bkol ba nad pa zhes bya ba 'di ltar bstan sla bar ma byas par 'di ltar mdo bzhir byas pa ni/ gal te bkol ba nad pa zhes bya ba de ltar byas na de'i tshe rdzogs par bsnyen par byed pa dag gis bye brag tu'o zhes bya ba de 'dus par mi 'gyur la/ khyod la nad gang yang rung ba med dam zhes bya ba'i tshig tha dad par rtog pa yang ma byas par 'gyur ba'i phyir ro/ /bkol ba chad pa yan chad do zhes bya ba ni/ dbang du bya ba 'dis rgyu las bzlog pa'i chad pa khas mi len pa dag rab tu dbyung ba dang rdzogs par bsnyen par mi bya'o zhes bya ba yan chad kyi mdo bstan pa thams cad bkol ba zhes bya ba'i sgra 'di'i dbang du bya'o/ /des na sprul pa la sogs pa dag bkol ba dang sbyar bar rig par bya'o/ /'di la skye ba'i chos nyid med par yang 'dra'o zhes bya ba la/ 'di la zhes bya ba ni/ 'og nas 'byung ba sprul pa la sogs pa la'o/ /skye ba'i chos nyid med par zhes bya ba ni/ sdom pa skye ba'i chos nyid med par ro/ /yang zhes bya ba'i sgra ni/ kun bsdu ba'i dbang du bya ba'i don to/ /'dra'o zhes bya ba'i sgra ni/ spyi la snyegs pa'i don to/ /de ltar na mdo 'dis kyang chad pa yan chad kun bsdu ba dang / spyi la snyegs pa'i dbang du byed do/ /de ltar na skye ba'i chos nyid med pa ji ltar bya zhe na/ de'i phyir de lta bu rtags can ni bsnyil bar bya'o zhes bya ba smras te/ de lta bu zhes bya ba ni/ skye ba'i chos nyid med pa'o/ /rtags can zhes bya ba ni/ rab tu byung ba dang dge tshul dang rdzogs par bsnyen pa yang dag pa'i 'o/ /'di yang dbang du bya ba'i mdo bstan ma thag pa'i lhag mar gyur pa yin pa'i phyir/ chad pa yan chad thams cad kyis dbang du bya'o/ /da ni bkol ba dang sbyar ba dang skye ba'i chos nyid med pa dang sbyar ba rnam par bshad par bya ste/ sprul pa'o zhes bya ba 'dir yang bkol ba la sogs pa'i dbang du bya ba thams cad sbyar bar bya'o/ /de ltar na 'dir tshig gi don 'di 'byung ste/ rab tu 'byung ba'i phyir nye bar 'ongs pa la sprul pa ma yin nam zhes dri bar bya zhing rdzogs par bsnyen par byed pa dag gis kyang dri bar bya ste/ sprul pa rab tu 'byung ba dang rdzogs par bsnyen par mi bya'o/ /'di la skye ba'i chos nyid med par yang 'dra'o/ /de lta bu rtags can ni bsnyil bar bya'o/ /de bzhin du ma ning la sogs pa gzhan dag la yang sbyar bar bya'o/ /ma ning ngo zhes bya ba ni/ rab tu 'byung ba'i phyir nye bar 'ongs pa la ma ning ma yin nam zhes dri bar bya zhing rdzogs par bsnyen par byed pa dag gis kyang dri bar bya ste/ ma ning rab tu dbyung ba dang rdzogs par bsnyen par mi bya'o zhes bya ba la sogs pa thams cad brjod par bya'o/ /ma ning gi dbye ba bstan pa'i phyir/ de ni rnam pa lnga'o zhes bya ba smras te/ ma ning ni rnam pa lnga nyid do zhes bya ba'i tha tshig go/ /rnam pa lnga bstan pa'i phyir/ skyes nas dang / zla ba phyed pa dang / 'khyud nas ldang ba dang / phrag dog can dang / nyams pa dang / zhes bya ba smras te/ de la skyes nas zhes bya ba ni/ skyes pa'i tshe nyid nas pho'i dbang po yod pa'i phyir bud med nyid kyang ma yin la mo'i dbang po yod pa'i phyir pho nyid kyang ma yin pa gang 'jig rten na mtshan gnyis pa zhes bya ba gang yin pa ste/ de ni skyes nas ma ning du gyur par rig par bya'o/ /zla ba phyed pa zhes bya ba ni/ zhag bco lnga ni bud med kyi 'dod chags kyis gnod par 'gyur la/ zhag bco lnga ni skyes pa'i 'dod chags kyis gnod par 'gyur ba gang yin pa ste/ de ni ma ning zla ba phyed pa'o/ /'khyud nas ldang ba zhes bya ba ni/ de 'khyud pa yang yin la ldang ba yang yin pas 'khyud nas ldang ba'i ma ning ste/ gang skyes pa gzhan gyis brtsal bas na dbang po las su yang rung ba ldang bar 'gyur ba/ dbang po las su rung ba ldang ba zhes bya ba'i tha tshig ste/ de ni 'khyud nas ldang ba'i ma ning ngo / /gzhan dag ni bud med la sogs pas brtsal ba na zhes kyang zer ro/ /phrag dog can zhes bya ba ni/ gang la gzhan gyis brtsal ba'i bud med la sogs pa mthong ba de'i tshe kho na phrag dog gis dbang po las su rung bar 'gyur la gzhan gyi tshe na ma yin pa ste/ de ni ma ning phrag dog can no/ /nyams pa zhes bya ba ni/ gang gi pho'i dbang po bcad pa la sogs pas nyams par gyur pa ste/ de ni nyams pa'i ma ning ngo / /ci ma ning thams cad bsnyil bar bya ba yin nam zhe na/ de'i phyir 'di las tha ma ni nyes pa bsten nas bsnyil ba'o zhes bya ba smras te/ tha mar bstan pa'i phyir tha ma ste/ nyams pa'i ma ning ngo / /de ni gal te ma ning gi nyes pa skyes pa gzhan gyis brtsal ba'i 'dod pa la sogs pa bsten na de'i tshe dge slong gi dngos po'i snod ma yin par gyur pas de ni bsnyil ba'o zhes bya bar rig par bya'o/ /ji srid du ma ning gi nyes pa bsten par mi byed pa de srid du bsnyil ba ma yin no zhes bya ba'i tha tshig go/ /rku thabs su gnas pa'o zhes bya ba ni/ rab tu 'byung ba'i phyir nye bar 'ongs pa la rku thabs su gnas pa ma yin nam zhes dri bar bya zhing zhes bya ba la sogs pa'o/ /rku thabs su gnas pa'i mtshan nyid brjod nas/ rdzogs par bsnyen pa'i cho ga ma byas pa nyid dam ma chags pa nyid du shes la/ lan gnyis su dge 'dun dang lhan cig las nyams su myong bar gyur pa nyid ni de nyid yin no zhes bya ba smras te/ de'i rdzogs par bsnyen pa'i cho ga gsol ba la sogs pa gang yin pa'i cho ga de ma byas pa nyid du shes pa/ bdag rdzogs par bsnyen par 'gyur ba'i cho ga gang yin pa de yongs su rdzogs par ma byas so zhes bya ba de ltar shes pa'am/ yang na de'i rdzogs par bsnyen pa ma chags pa nyid du shes pa 'di ltar cho ga yongs su rdzogs par byas mod kyi/ 'on kyang mkhan po tshul khrims 'chal ba la sogs pa'i nyes pas bdag gis rdzogs par bsnyen par ma chags pa nyid du de ltar shes pa/ des de ltar shes bzhin du lan gnyis su dge 'dun dang lhan cig gso sbyong la sogs pa'i las nyams su myong bar gyur cing / de ltar shes pa'i dge slong de dge 'dun dang lhan cig gso sbyong la sogs pa'i las nyams su myong bar gyur pa nyid na/ rku thabs su gnas pa nyid de nyid yin no/ /nyams su myong bar gyur pa'i dngos po ni nyams su myong bar gyur pa nyid do/ /'o na 'dul ba las/ nye ba 'khor gang tshun chad lan gnyis sam gsum gso sbyong gi las dag nyams su myong bar gyur pa de tsam gyis na rku thabs su gnas pa yin no zhes gsungs na/ gsum zhes bya ba de ci'i phyir mdor ma bris she na/ 'di ltar lan gnyis su las nyams su myong bar gyur pa nyid kyi tshe kho na rku thabs su gnas pa yin pas gsum zhes smos pa ni rgyun bstan pa'i phyir ro/ /lung yang yod de/ gtam gyi gzhi las gzhi gang gis rku thabs su gnas pa rab tu dbyung bar mi bgyi/ rdzogs par bsnyen par mi bgyi ba'i gzhi de nyid kyis rab tu dbyung bar bgyi ba dang / rdzogs par bsnyen par bgyi ba mchis sam/ bka' stsal pa yod do zhes gsungs pa yin no/ /gang gis lan gnyis sam gsum gso sbyong gi las dag nyams su myong bar 'gyur ba de ni rab tu dbyung bar mi bya rdzogs par bsnyen par mi bya'i/ gang gis lan cig gso sbyong nyams su myong bar gyur ba de ni rab tu dbyung bar bya/ rdzogs par bsnyen par bya'o/ /gal te lan gsum las nyams su myong bar gyur pa'i tshe kho na rku thabs su gnas pa yin par gyur na de'i tshe gtam gyi gzhi las lan cig ces smos par mi mdzad cing lan gnyis zhes smos pa mdzad par 'gyur ro/ /ci'i phyir 'dir las zhes spyir smos la gso sbyong ni ma smos she na/ gtsug lag las gso sbyong zhes smos pa ni mtshon pa'i phyir yin te/ dge 'dun dang 'brel pa'i las thams cad kyang mtshon par byed do/ /de ltar ni ma tshang ba rdzogs par bsnyen par byed pa'i ltung byed zhus pa las kyang / gang gsol ba dang bzhi'i las kyis rdzogs par ma bsnyen par dge 'dun gyi las gso sbyong ngam dgag dbye'am/ gang zag bcu gnyis bsko ba dag nyams su myong bar gyur pa de yang de tsam gyis na rku thabs su gnas pa yin no zhes gsungs so/ /las zhes smos pas ni mtshon pa kho na'i phyir yin te/ rdzogs par ma bsnyen pas bya ba ma yin pa dge 'dun la rag las pa dper na rab tu dbyung ba zhu ba la sogs pa gang yin pa de nyams su myong bar gyur na yang rku thabs su gnas pa nyid yin no/ /la la ni 'di skad ces las nyams su myong bas rku thabs su gnas pa nyid yin gyi/ 'phral gyi bya ba nyams su myong bas ni ma yin no zhes zer ro/ /mu stegs can zhugs pa'o zhes bya ba ni/ rab tu 'byung ba'i phyir nye bar 'ongs pa la mu stegs can zhugs pa ma yin nam zhes dri bar bya zhing zhes bya ba la sogs pa dag brjod par bya'o/ /mu stegs can zhugs pa'i rang gi ngo bo yongs su shes par bya ba'i phyir/ rab tu dbyung ba 'di yang dag par blangs pa lta ba de dang ldan pa chos gos 'di bor te/ rgyal mtshan des de skya rengs shar na de nyid yin no zhes bya ba smras te/ rab tu byung ba 'di yang dag par blangs pa zhes bya ba ni/ des rab tu byung ba 'di yang dag par blangs pa ste de'o/ /lta ba de dang ldan pa zhes bya ba ni/ mu stegs can de dag gi lta ba de la yod pas lta ba de dang ldan pa ste de'o/ /chos gos 'di bor te zhes bya ba ni/ de bzhin gshegs pa'i dge slong gi cha lugs 'di bor te'o/ /rgyal mtshan des zhes bya ba ni/ mu stegs can gyi rgyal mtshan gyis so/ /der zhes bya ba ni/ mu stegs can gyi 'dug gnas su'o/ /skya rengs shar na zhes bya ba ni/ skya rengs dang po shar na'o/ /de nyid yin no zhes bya ba ni/ mu stegs can zhugs pa nyid yin no/ /de ltar na 'dir tshig gi don 'di 'byung ste/ gang la la zhig de bzhin gshegs pas gsungs pa'i rab tu 'byung ba yang dag par blangs nas/ mu stegs can gyi lta ba dang ldan zhing chos gos 'di bor te/ mu stegs can gyi rtags blangs nas/ mu stegs can gyi rtags des mu stegs can gyi 'dug gnas der skya rengs dang po 'char bar byed na/ skya rengs dang po 'char ba'i skad cig de nyid la mu stegs can zhugs pa yin par rig par bya'o/ /mu stegs can zhugs pa rnam pa gzhan yang srid par bstan pa'i phyir/ de ma byas pa yang rku thabs dang 'dra'o zhes bya ba smras te/ de ma byas pa zhes bya ba ni/ mu stegs can gyi lta ba dang ldan pa gang gis mdo bstan ma thag pa'i dngos po de ma byas pa ste/ de ma byas pa'i gang zag de'o/ /mdo snga mar bstan pa de bzhin gshegs pa'i dge slong gi cha lugs bor te/ mu stegs can gyi rtags 'dod pa bgos nas mu stegs can gyi 'dug gnas su skya rengs shar ba de ma byas pa'o/ /yang zhes bya ba ni/ de ma byas su zin kyang mu stegs can zhugs pa nyid yin par 'gyur ba'o/ /ji ltar zhe na/ rku thabs dang 'dra ste/ bstan ma thag par ji ltar lan gnyis su dge 'dun dang lhan cig las nyams su myong bar 'gyur ba nyid na/ rku thabs su gnas pa nyid yin pa de bzhin du/ mu stegs can gyi lta ba dang ldan pa des ma byas su zin kyang / lan gnyis su dge 'dun dang lhan cig las nyams su myong bar gyur pa nyid na/ mu stegs can zhugs pa nyid yin no/ /ma bsad pa dang zhes bya ba ni/ ma la bsad pa'am ma'i bsad pa ni ma bsad pa ste/ rab tu dbyung ba'i phyir nye bar 'ongs pa la ma bsad pa ma yin nam zhes dri bar bya zhing zhes bya ba la sogs pa dag brjod par bya'o/ /pha bsad pa dang / dag bcom pa bsad pa dang / dge 'dun gyi dbyen byas pa dang zhes bya ba dag kyang de kho na bzhin no/ /de bzhin gshegs pa la ngan sems kyis khrag phyung ba dang / zhes bya ba la/ bsad pa'i bsam pa'i ngan sems kyis khrag phyung ba ni/ ngan sems kyis khrag phyung ba ste/ rab tu 'byung ba'i phyir nye bar 'ongs pa la de bzhin gshegs pa la ngan sems kyis khrag phyung ba ma yin nam zhes dri bar bya zhing zhes bya ba la sogs pa dag brjod par bya'o/ /dge slong ma sun phyung ba dang zhes bya ba yang / rab tu 'byung ba'i phyir nye bar 'ongs pa la dge slong ma sun phyung ba ma yin nam zhes dri bar bya zhing zhes bya ba la sogs pa dag brjod par bya ste/ 'di'i mtshan nyid ni 'og nas ston to/ /pham par gyur pa bzhi las ltung ba gang yang rung ba zhig byung ba ma yin nam zhes so zhes bya ba yang / rab tu 'byung ba'i phyir nye bar 'ongs pa la khyod pham par gyur pa bzhi las ltung ba gang yang rung ba byung ba zhig ma yin nam zhes dri bar bya zhing zhes bya ba la sogs pa dag brjod par bya'o/ /gang yang rung ba zhig ces smos pas ni/ gcig gis kyang skye ba'i chos nyid med pa yin no zhes bya bar ston to/ /da ni skye ba'i chos can gyis rab tu dbyung bar mi 'os pa dag gi mtshan nyid bstan par bya ba'i phyir/ rgyu las bzlog pa'i chad pa khas mi len pa dag rab tu dbyung ba dang rdzogs par bsnyen par mi bya'o zhes bya ba smras te/ chad pa khas mi len pa khas len par mi byed mi bsgrub pa dag rab tu dbyung ba dang rdzogs par bsnyen par mi bya'o zhes bya bar sbyar ro/ /ci zhig khas mi len zhe na/ rgyu las bzlog pa zhes bya ba ste/ rgyu gang gis 'thab krol byed pa nyid la sogs pas bsdigs pa la sogs pa'i chad pa'i las byas par gyur pa'i rgyu de las bzlog pa 'thab krol mi byed pa nyid la sogs pa khas mi len pa dag rab tu dbyung bar mi bya rdzogs par bsnyen par mi bya'o zhes mdo'i don bstan pa yin no/ /gal te dge slong chad pas bcad pa zhig bslab pa phul nas yang rdzogs par bsnyen pa gsol na/ ci rdzogs par bsnyen nas yang bzod pa gsol bar bya dgos sam zhe na/ rdzogs par bsnyen na bzod pa gsol zin pa yin no zhes bya ba smras te/ bzod pa ma gsol ba zhig rdzogs par bsnyen na yang bzod pa gsol mi dgos te/ rdzogs par bsnyen pa nyid bzod pa gsol ba yin pa'i phyir ro/ /bzod pa zhes bya ba ni/ bzod pa bya ba'o/ /btsun pa dge slong dag bsdigs pa'i las bgyis nas re zhig rdzogs par bsnyen par bgyid na/ rdzogs par bsnyen zhes bgyi'am rdzogs par ma bsnyen zhes bgyi/ nye ba 'khor rdzogs par bsnyen zhes bya ste/ rdzogs par bsnyen par byed pa dag la ni 'gal tshabs can du 'gyur la/ bzod pa ni gsol zin pa zhes bya'o zhes gleng gzhi dag las gsungs so/ /gal te rdzogs par bsnyen pa na rgyu las bzlog pa khas mi len na de'i tshe ji ltar bya zhe na/ gal te rdzogs par bsnyen nas khas mi len pa ni tshogs pa yod na yang chad pas bcad do zhes bya ba smras te/ gal te rdzogs par bsnyen nas phyis 'thab krol mi byed pa nyid la sogs pa khas mi len pa de ni/ gal te tshogs pa yod na yang chad pa'i las byed du gzhug go zhes bya ba'i tha tshig go/ /chad pa'i las byed du bcug na gal te 'di skad ces ltung ba ma mthong ngo zhes zer na de la ji ltar 'gyur zhe na/ de'i phyir gal te ma mthong ngo zhes brdzun zer na ltung byed do zhes bya ba smras te/ gal te brdzun du 'di skad ces ltung ba ma mthong ngo zhes zer na/ de'i tshe de la ltung byed kyi ltung bar 'gyur ro/ /skye ba'i chos lhag ma bkag pa rnams kyang bstan pa'i phyir/ lag rdum dag dang rkang rdum dang / /lag sor zlum por 'jas pa dang / /mchu med lus la rma mtshan can/ /rgan ches pa dang gzhon ches dang / /theng po smad 'chal zhar ba dang / /lag sor rdum rgur mi'u thung dang / /lba ba lkugs pa 'on pa dang / /rten 'phye dang ni rkang 'bam dang / /bud med kyis dub khur gyis dub/ /mi gang lam gyis dub rnams dang / /ya za ma lug gta' gam dang / /de lta bu yi mi rnams ni/ /drang srong chen pos dgag par mdzad/ /mdzes pa rab tu dbyung ba dang / /yongs su dag pa rdzogs bsnyen par/ /rdzogs sangs rgyas kyis rab mkhyen te/ /bden pa'i mtshan gyis bka' stsal to/ /zhes bya ba smras te/ gang dag gi lag pa'i mkhrig ma man chad chad pa de dag ni/ lag rdum dag go/ /gang dag gi rkang pa long bu man chad chad pa de dag ni/ rkang rdum dag go/ /gang dag gi lag pa'i sor mo sbrul gyi gdengs ka 'dra ba dag ni/ lag sor zlum por 'jas pa dag go/ /gang dag gi mchu gnyis med pa dag ni mchu med dag go/ /gang dag gi lus la rma mtshan dag yod pa de dag ni lus rma mtshan can dag ste/ snag tsha la sogs pas lag pa la sogs pa bris pa ni/ lus rma mtshan can yin te/ khab la sogs pas gtsags shing khyi rjes la sogs pa'i mngon mtshan dag gis mtshan btab pa'i phyir ro/ /lcag la sogs pas gzhus pa'i rma mtshan yang yin no/ /rgas pas sbyor mi bzod pa dag ni rgan ches pa dag go/ /lo bco lnga ma lon pa bya rog skrod mi nus pa dag dang bya rog skrod nus pa la lo bdun ma lon pa dag ni gzhon ches pa dag go/ /gang rkang pa 'theng zhing leg leg por 'gro ba ni thang po'o/ /brla'i phyogs rlung bya rgod 'gros kyis kun du nyams par gyur pa ni smad 'chal lo/ /mig ya gcig pa ni zhar ba'o/ /gang gi mkhrig ma'i phyogs na mtshan ma tsam gyi lag pa yod cing cung zad kyang byed mi nus pa ni lag sor rdum po'o/ /brang dang sgal tshigs zhom pa ni sgur po'o/ /ha cang lus thung bar grags pa ni mi'u thung ngo / /gang gi lkog ma la lba ba yod pa de ni lba ba can no/ /smra mi nus pa ni lkugs pa'o/ /don dang bcas pa'i sgra thos par mi 'gyur ba ni 'on pa'o/ /gang lag pa gnyis lag rten la brten nas gzugs bzhis 'phye ba ni rten 'phye'o/ /ming gnyis pa ni grum po zhes kyang bya'o/ /gang gi rkang pa la nad kyi rigs rkang 'bam yod pa de ni rkang 'bam mo/ /bud med dag shas cher bsten pas mthu dang gzi brjid zad cing lus mi bde ba bud med kyis dub pa dag go/ /de bzhin du mi bzod pa'i khur thogs pa'i phyir khur gyis dub pa dag go/ /lam du 'gro ba drags pa'i phyir lam gyis dub pa rnams so/ /ya za ma lug ces bya ba ni/ gang dag la ji ltar zos pa ma zhu bar thur du 'byung ba'o/ /gzhan dag ni 'di skad ces zer te/ gang gi rkang pa lcags sgrog gis nyams pa lcags sgrog las bkrol yang bcings pa bzhin du 'gro ba ni sgrog bkrol zhes bya'o zhes zer ro/ /de la dang po ni kha zas la sogs pa thur du 'dzag pa de ni ya za ma lug go/ /phyogs phyi ma la ni lcags sgrog gis bcings pa las bkrol pas sgrog bkrol zhes bya'o/ /yang na bkrol yang lcags sgrog tu bcug pa bzhin du rkang pa khris khris por 'gro ba'i phyir sgrog bkrol zhes bya'o/ /gta' gam pa zhes bya ba ni/ gang dag lang tsho la ma bab pa kho nar nad la sogs pas de ltar nyams par gyur cing / te por rgas pas nyams pa bzhin du bya ba cung zad kyang byed mi nus pa ste/ byung ba nyid nas de dag gi lang tsho nyams par gyur ces bya ba'i tha tshig go/ /de lta bu'i zhes bya ba ni/ rnam pa de lta bu'o/ /mi rnams ni zhes bya ba ni/ lag rdum la sogs pa'i mi rnams so/ /drang srong chen pos zhes bya ba ni/ de ni drang srong yang yin la chen po yang yin pas drang srong chen pos te des so/ /dgag pa mdzad ces bya ba ni/ rab tu dbyung ba dang rdzogs par bsnyen pa'i phyir bkag pa'o/ /mdzes pa rab tu dbyung ba dang zhes bya ba 'dis ni/ rigs dang lus la skyon chags pa nyid sel bar byed do/ /yongs su dag pa rdzogs par bsnyen pa zhes bya ba 'dis ni/ ma bsad pa la sogs pa bar chad nyid dag sel bar byed do/ /rdzogs sangs rgyas kyis zhes bya ba ni/ yang dag par rdzogs pa'i sangs rgyas yin pa'i phyir te des so/ /rab mkhyen te zhes bya ba ni/ dngos po thams cad mngon par mkhyen pa'i phyir ro/ /bden pa'i mtshan gyis zhes bya ba ni/ gang gi ming bden pa de ni bden pa'i mtshan te/ rdzogs sangs rgyas kyis zhes bya ba des so/ /bka' stsal te zhes bya ba ni gsungs pa'o/ /bsdu bar bya ba'i skabs te/ rab tu 'byung ba'i gzhi rdzogs so// //da ni rab tu 'byung ba'i gzhi'i skabs phran tshegs la sogs pa las gsungs pa bsdu bar bya ste/ bkol ba rgyal pos bkrabs pa'o/ /zhes bya ba ni/ rgyal pos bkrabs pa bkol ba dang sbyar ba yin no/ /rgyal pos bkrabs pa la spyir rab tu dbyung ba bkag par gyur pa la da ni bye brag tu bya ba'i phyir/ rgyal pos ma gnang ba yul thag mi ring ba'o zhes bya ba smras te/ de ltar na 'dir tshig gi don 'di 'byung ste/ rab tu byung ba'i phyir nye bar 'ongs pa la rgyal pos bkrabs pa ma yin nam zhes dri bar bya zhing rdzogs par bsnyen par byed pa dag gis kyang dri bar bya ste/ rgyal pos bkrabs pa rgyal pos ma gnang ba yul thag mi ring ba rab tu dbyung ba dang rdzogs par bsnyen par mi bya'o/ /yul gang na rgyal po gang gi tshig mngon sum mam/ brgyud pas 'da' bar bya ba ma yin pa de ni 'dir yul thag mi ring ba'o/ /bkol ba chom rkun par grags pa'o zhes bya ba la/ bkol ba zhes bya ba ni dbang du byed pa nyid yin pa'i phyir mdo snga ma las bkol ba zhes smos pa'i rjes su 'jug par 'gyur ba yin mod kyi/ yang bkol ba zhes smos pa ni rgyal pos ma gnang ba yul thag mi ring ba bya ba de las bkar ba'i don te/ rab tu 'byung ba'i phyir nye bar 'ongs pa la chom rkun par grags pa ma yin nam zhes dri bar bya zhing rdzogs par bsnyen par byed pa dag gis kyang dri bar bya ste/ chom rkun par grags pa rab tu dbyung ba dang rdzogs par bsnyen par mi bya'o zhes brjod par bya'o/ /chom rkun par rab tu shes pa ni grags pa ste/ gang rab tu shes par gyur pa nyid de kho na der grags pa nyid yin gyi gzhan du na ma yin no/ /lham mkhan dang gdol pa dang g.yung po dang de lta bu rab tu dbyung bar mi bya'o zhes bya ba la/ lham mkhan zhes bya ba ni ko lpags mkhan no/ /gdol pa zhes bya ba ni rigs ngan no/ /g.yung po zhes bya ba ni kla klo'o/ /de lta bu zhes bya ba ni zan bza' bar mi bya ba ste/ de dag ni rab tu dbyung ba'i phyir yang bkag pa nyid yin pas dge tshul nyid la sogs pa dag gi phyir ches shin tu bkag pa yin par rig par bya'o/ /sngar bstan pa'i lus la skyon chags pa las gzhan pa'i lus la skyon chags pa dag kyang bstan par 'dod nas/ lag rdum la sogs pa ni mtshon pa yin no zhes bya ba smras te/ rab tu 'byung ba'i gzhir/ lag rdum dag dang rkang rdum dang / /zhes bya ba la sogs pa smos pa de ni mtshon pa yin gyi/ skra ser la sogs pa dag kyang rig par bya ste/ yongs su bgrang ba ni ma yin no/ /mtshon pas 'phangs pa bstan pa'i phyir/ /skra ser dang ni skra ser skya/ /de bzhin skra ni ljang gu kha/ /mi rnams skra ni dkar ba dang / /glang chen spu 'dra skra med dang / /mgo 'bar 'bur can glang po che/ /ha cang sbom dang lus glebs 'dra/ /bong bu phag gi mgo lta bu/ /mgo gnyis pa dang mgo'u chung dang / /glang chen rna 'dra rta rna 'dra/ /ba lang rna 'dra spre'u rna 'dra/ /bong bu'i rna 'dra phag rna 'dra/ /rna gcig pa dang rna med dang / /mig dmar ha cang mig che dang / /mig chung mig ni ha cang ser/ /shel mig mig chu bur lta bu/ /mig gcig pa dang mig med dang / /glang chen sna 'dra rta sna 'dra/ /ba lang sna 'dra spre'u sna 'dra/ /bong bu'i sna 'dra phag sna 'dra/ /sna sbubs gcig dang sna med dang / /glang chen kos 'dra rta kos 'dra/ /ba lang kos 'dra spre'u kos 'dra/ /bong bu'i kos 'dra phag kos 'dra/ /kos smyung dang ni kos med dang / /glang chen so 'dra rta so 'dra/ /ba lang so 'dra spre'u so 'dra/ /bong bu'i so 'dra phag so 'dra/ /so gcig pa dang so med dang / /mgul ring ches dang mjing nub dang / /phrag mig dang ni ches sgur dang / /pho mtshan chad dang rlig rlugs dang / /rlig gcig pa dang rlig med dang / /ha cang ring dang ha cang thung / /skem po ma 'os ngal skyen dang / /sha mdog kha dog rnam bzhi dang / / de bzhin gyol po lus nyams pa'o/ /zhes bya ba smras so/ /gang dag gi skra ngo bo nyid kyis yung gis kha bsgyur ba lta bu de dag ni skra ser dag yin no/ /gang dag gi skra seng ge'i lta bu de dag ni/ skra ser skya dag yin no/ /gang dag gi skra ngo bo nyid kyis rams kyis kha bsgyur ba lta bu de dag ni skra ljang gu kha dag yin no/ /gang dag gi skra skyes pa kho na nas dkar ba de dag ni/ /skra dkar ba dag yin te/ mgo skyar gyur pa ni ma gtogs so/ /gang dag gi skra glang po che'i lta bu de dag ni glang chen skra 'dra ste/ skra glang po che'i spu 'dra ba dag yin no/ /gang dag gi mgo bo zangs ma'i bum pa ltar 'jam zhing skra med pa de dag ni skra med pa dag yin no/ /gang dag gi mgo bo la sul gsum mam bzhi yod la de dag gi 'bar 'bur du mngon pa de dag ni mgo 'bar 'bur can dag yin no/ /gang dag gi mgo lus la ltos nas tshad ha cang che bar mngon pa de ni glang po che yin no/ /gang dag gi lus ha cang yang sbom pas las su mi rung ba de dag ni ha cang sbom pa dag yin no/ /gang dag gi lus 'bras kyi srugs glebs pa 'dra bar leb leb por 'dug pa de dag ni lus glebs 'dra ba dag yin te/ dper na 'bras thug po che'i srugs gtun bu dag gis glebs pa leb leb por gyur cing rngams srab mor gyur ba de dag ni glebs pa zhes bya ste/ de dag gi lus sam mgo yang de dang 'dra ba'i tha tshig go/ /gang dag gi mgo bong bu dang phag gi mgo 'dra ba de dag ni bong bu phag gi mgo lta bu ste/ mgo bong bu'i lta bu dang mgo phag gi lta bu dag yin no/ /gang dag la mgo gnyis yod pa de dag ni mgo gnyis pa dag yin no/ /gang dag la phral ba yan chad mtshog ma med pa de dag ni mgo'u chung dag yin par shes par bya'o/ /kha cig ni mgrin pa yan chad med de brang la kha sna la sogs pa yod pa'i phyir ro zhes kyang zer ro/ /gang dag gi rna ba glang po che'i 'dra ba de dag ni glang chen rna 'dra ste/ rna ba glang po che'i lta bu dag yin no/ /gang dag gi rna ba rta'i 'dra ba de dag ni rta rna 'dra ste rna ba rta'i lta bu dag yin no/ /gang dag gi rna ba ba lang dang spre'u 'dra ba de dag ni ba lang rna 'dra spre'u rna 'dra ste/ rna ba ba lang gi lta bu dang rna ba spre'u'i lta bu dag yin no/ /gang dag gi rna ba bong bu dang phag gi 'dra ba de dag ni bong bu'i rna 'dra phag rna 'dra ste/ rna ba bong bu'i lta bu dang rna ba phag gi lta bu dag yin no/ /gang dag la rna ba ya gcig yod pa de dag ni rna ba gcig pa dag yin no/ /gang dag la rna ba med pa de dag ni rna med dag yin no/ /gang dag gi mig tsan dan dmar po ltar dmar ba de dag ni mig dmar ba dag yin no/ /gang dag gi mig tshad las ha cang 'das te rkyen du mi 'bab pa de dag ni ha cang mig che ba dag yin no/ /gang dag gi mig ha cang chung zhing zlum pa de dag ni mig chung dag yin no/ /kha cig ni gang gi mig lpags shin tu dmar la rdzi ma med par gyur pa de dag ni mig mi sdug pas mig chung zhes bya'o zhes zer ro/ /gang dag gi mig la kha dog dmar po dang ser po 'dren mar yod pa de dag ni mig ha cang ser ba dag yin no/ /gang dag gi mig mching bu ltar 'tsher ba de dag ni shel mig dag yin no/ /gang dag gi mig chu'i chu bur ltar phyi rol du rlo ba de dag ni mig chu bur lta bu dag yin no/ /gang dag gi mig skyes pa nyid nas ya gcig las med pa de dag ni mig gcig pa dag yin te/ de'i phyir de zhar ba la sogs pa las logs shig tu rnam par gzhag go/ /gang dag la mig med pa de dag ni mig med pa dag yin no/ /gang dag gi sna glang po che la sogs pa'i 'dra ba de dag ni glang chen sna 'dra zhes bya ba la sogs pa ste/ sna glang po che'i lta bu dang / sna rta'i lta bu dang / sna ba lang gi lta bu dang / sna spre'u'i lta bu dang / sna bong bu'i lta bu dang / sna phag gi lta bu dag yin no/ /gang dag la sna'i bu ga gcig yod pa de dag ni sna sbubs gcig pa dag yin no/ /gang dag la sna med pa de dag ni sna med dag yin no/ /gang dag gi kosko glang po che'i 'dra ba de dag ni glang chen kos 'dra ste/ kosko glang po che'i lta bu dag yin no/ /de bzhin du gang dag gi kosko rta la sogs pa'i 'dra ba de dag ni rta kos 'dra zhes bya ba la sogs pas rig par bya ste/ kosko rta'i lta bu dang / kosko ba lang gi lta bu dang / kosko spre'u'i lta bu dang / kosko bong bu'i lta bu dang / kosko phag gi lta bu dag yin no/ /gang dag la kosko g.yas pa'am/ g.yon pa gcig kho na yod pa de dag ni kos smyung dag yin no/ /gang dag la kosko med pa de dag ni kosko med pa dag yin no/ gang dag gi so glang po che'i 'dra ba de dag ni glang chen so 'dra ste/ so glang po che'i lta bu dag yin no/ /de bzhin du gang dag gi so rta la sogs pa'i 'dra ba de dag ni rta so 'dra zhes bya ba la sogs pas rig par bya ste/ so rta'i lta bu dang / so ba glang gi lta bu dang / so spre'u'i lta bu dang / so bong bu'i lta bu dang / so phag gi lta bu dag yin no/ /gang dag la so gcig yod pa de dag ni so gcig pa dag yin no/ /gang dag la so med pa de dag ni so med dag yin no/ /gang dag gi mgul pa ha cang ring ches pa de dag ni mgul ring ches pa dag yin no/ /gang dag la mgul med cing mgo thal gong la 'byar ba de dag ni mjing nub dag go/ /gang dag gi mgo mdun du gug pa'i phyir mig phrag pa dang mnyam pa de dag ni phrag mig dag yin no/ /yang na gang dag la phrag pa'i phyogs kho na na mig yod pa de dag ni phrag mig dag yin no/ /mi sdug rab tu sgur ba dag ni ches sgur ba dag yin no/ /gang dag gi pho mtshan chad pa de dag ni pho mtshan chad pa dag yin te/ skyes pa'i gcib 'byung ba ni pho mtshan zhes bya'o/ /gang dag gi rlig pa rlung gis rlugs par gyur pa de dag ni rlig rlugs dag yin no/ /gang dag la rlig pa'i 'bras bu ya gcig yod pa de dag ni rlig gcig dag yin no/ /gang dag la rlig pa med pa de dag ni rlig med dag yin no/ /tshad las ha cang 'das pa dag ni ha cang ring ba dag yin no/ /ha cang 'bol bu thung dag ni ha cang thung ba dag yin no/ /lus skem pa dag ni skem po dag yin no/ /gang dag brtsal ba chung ngus kyang dbugs brdzangs pa la sogs pa'i skyon 'byung bar 'gyur ba de dag ni ma 'ongs par ngal skyen pa zhes bya'o/ /ngal ba ni chad pa'i rnam grangs yin pa'i phyir las cung zad kyang mi bzod ces bya ba'i tha tshig go/ /sha mdog kha dog rnam bzhi dang / /zhes bya ba ni/ sha mdog sngo ches pa dang / sha mdog ser ches pa dang / sha mdog dkar ches pa dang dmar ba dag ste/ smad par bya ba'i sha mdog de dag dgag pa yin gyi/ lha rnams kyi gzugs mdzes pa lta bu dag ni ma gtogs so/ /gyol po zhes bya ba ni rkang yon dag go/ /yang na rkang pa sa la 'chal zhing 'gro ba dag go/ /gang dag gi rkang pa gnyis ha cang gdangs te 'gro ba de dag ni lus nyams pa dag yin no/ /yang na gang gi rkang pa gnyis gcig gi steng du gcig 'dor zhing 'gro ba de dag ni lus nyams pa dag yin no/ /rnam pa de lta bu dag gi dgag pa de yang rab tu gzung bar bya'o zhes bya ba ni/ lag rdum la sogs pa'i dgag pa 'ba' zhig rab tu gzung bar bya ba ma yin gyi/ 'di ltar skra ser ba la sogs pa rnam pa de lta bu dag gi dgag pa de yang rab tu bsgrims te gzung bar bya'o zhes bya ba'i tha tshig go/ /de ltar re zhig rnam pa de lta bu dag rab tu dbyung bar mi bya rdzogs par bsnyen par mi bya'o zhes bstan nas/ da ni rab tu byung zhing rdzogs par bsnyen na yang bsdu bar mi bya'o zhes bstan pa'i phyir/ rigs dang lus la skyon chags pa rab tu dbyung ba ni nye bar gzhag par mi bya'o zhes bya ba smras te/ rigs la skyon chags pa ni lham mkhan la sogs pa zan bza' bar mi bya ba dag go/ /lus la skyon chags pa ni rnam pa gnyis te/ dbyibs las dang / kha dog las so/ /de la dbyibs las skyon chags pa ni lag rdum la sogs pa'o/ /kha dog las skyon chags pa ni lus rma mtshan can la sogs pa'o/ /de dag ni 'dir gnas sbyin pa 'ba' zhig bkag pa ma yin gyi/ 'di ltar gnas khang la sogs pa dag tu skabs dbye ba dang rjes su 'brang ba'i 'khor nyid dang phyi bzhin 'brang ba'i dge sbyong du bsgrubs pa la sogs pa yang bkag pa yin no/ /de ltar na gzhung las kyang gsungs te/ dge slong gis sun 'byin pa'i 'khor nye bar gzhag par mi bya ste/ nye bar 'jog par gyur na 'gal tshabs can du 'gyur ro zhes gsungs nas/ ji tsam gyis na 'khor sun 'byin pa'i 'khor yin par brjod par bya zhe na/ rigs las dang kha dog dang dbyibs las te/ ji ltar rigs las she na/ lham mkhan dang gdol ba dang g.yung po'i rigs las so/ /ji ltar kha dog dang dbyibs las she na/ skra ser la sogs pa zhes 'dir smras pa dag las so/ /ji mang po dag tshig gcig gis cig car rdzogs par bsnyen par byar rung ngam zhe na/ de'i phyir du ma mkhan po gcig pa gsum man chad tshig gcig gis rdzogs par bsnyen par byar rung ngo zhes bya ba smras te/ du ma zhes bya ba ni/ rdzogs par bsnyen par bya ba'o/ /khyad par ji lta bu can zhig ce na/ mkhan po gcig pa zhes bya ba ste/ rdzogs par bsnyen par bya ba du ma mkhan po gcig pa ni du ma mkhan po gcig pa ste de'o/ /du ma zhes bya ba de la ji tsam gyis du mar brjod par bya zhe na/ gsum man chad ces bya ba smras te/ gsum man chad cig car rdzogs par bsnyen par byar rung gi de las lhag pa ni mi rung ngo zhes bya ba'i tha tshig go/ /lung las kyang / tshogs kyis tshogs kyi las dag mi bya'o/ /zhes gsungs la/ nye ba 'khor gyis zhus pa las kyang / btsun pa dus gcig skad cig gcig la las byed pa gcig gis gsol ba gcig gi las gnyis bgyi ba dang bgyis par brjod pa dang / dge 'dun yang des 'gal tshabs can du mi 'gyur ba mchis sam/ nye ba 'khor yod de gal te las byed pa'i dge slong gis mkhan po rnams dang rdzogs par bsnyen par 'dod pa rnams kyi ming yongs su brjod nus shing gsol ba nyams par mi 'gyur la las kyang byed na'o zhes bya ba la sogs pa gsungs so/ /mkhan po gcig pa nyid ni gleng gzhi las ston te/ dge tshul sbyin byed dang skyong ba de gnyis phan tshun sems rjes su srung bas so sor rdzogs par ma bsnyen par skad cig gcig kho na la mkhan po gcig gis cig car rdzogs par bsnyen par gyur pa'o/ /tshig gcig gis zhes bya ba ni/ gsol ba dang bzhi'i las gcig gis so/ /dus mnyam pa rnams ni gcig la gcig phyag mi bya'o zhes bya ba la/ gang dag dus mnyam pa de dag ni dus mnyam pa rnams te/ de dag ni gcig la gcig btud de phyag bya ba mi dgos par rig par bya'o/ /'di skad bstan te/ dus gcig tu rdzogs par bsnyen pa'i dge slong rnams kyis gcig la gcig btud de phyag mi bya'o zhes bya ba'i tha tshig go/ /dus mnyam pa rnams kyi rnyed pa dang / las su bsko ba dag la gang dang po yin zhe na/ de'i phyir sngar 'ongs pa dang po yin no zhes bya ba smras te/ rab tu byung ba dus mnyam pa rnams kyi rnyed pa dang las sbyin par bsko ba'i gnas su sngar 'ongs pa zhes bya ba thog mar phyin pa'i gang zag dang po thu bo nyid du 'gyur te/ /de lta bas na gang rnyed pa'i gnas su dang por 'ongs pa des ni/ rnyed pa dang por blang bar bya la las su bsko ba ni phyis bya ste/ de ni dang por 'ongs pa'i phyir thu bo nyid yin no/ /de ltar ni bcom ldan 'das kyis kyang ji ltar 'ongs pas rnyed pa blang bar bya'o zhes gsungs te/ gang dang gang 'ongs pa ni ji ltar 'ongs pa'o/ /ji ltar 'ongs par gyur pa der 'ongs pa ni ji ltar 'ongs pa ste/ ji ltar 'ongs pa des rnyed pa blang bar bya'o/ /des phyis las su bsko ba bya ba de yang shugs kyis 'thob pa yin te/ de'i tshe thu bo yin pa'i phyir ro/ /phyis 'ongs pas ni las su bsko ba dang por bya ste de'i tshe gsar pa yin pa'i phyir ro/ /de la phyis 'ongs pas las su bsko ba sngar bya'o zhes 'byung ba'i phyir ro/ /dgon pa bas skra sor gnyis las lhag par mi gzhag go zhes bya ba ni/ dge slong dgon pa bas skra sor gnyis kyi tshad las lhag par mi gzhag go zhes bya ba'i tha tshig go/ /skra smos pas kha spu yang smos par gyur pa'i phyir logs shig tu ma brjod do/ /grong mtha' bas ni de'i 'og ma nyid las mi gzhag go zhes bya ba la 'og ma'i dngos po ni 'og ma nyid de sor gnyis de'i 'og ma nyid de/ sor phyed dang gnyis nyid do/ /de lta bas na sor phyed dang gnyis kyi tshad las lhag par ji tsam du sor gnyis kyi tshad du gyur pa de tsam du mi gzhag go/ /'di skad bstan te/ dge slong grong mtha' pas skra ji tsam du sor gnyis kyi tshad du ma phyin pa de tsam kho nar breg par bya'o/ /'dir de ltar ni gzhung las kyang dge slong dgon pa bas skra sor gnyis su gzhag par bya la/ grong mtha' bas ni de'i 'og ma'o zhes gsungs so/ /rab tu 'byung ba'i dus na skra breg pa smras pa de'i sgo nas 'dir skra breg pa'i cho ga thams cad bstan te/ skra ba lang gi spu 'dra bar mi breg go zhes bya ba la/ ba lang gi spu zhes bya ba ni ba lang gi spu dag go/ /ba lang gi spu dag dang 'dra ba ni ba lang gi spu 'dra bar de de ltar ro/ /ji ltar chan pas skra ba lang gi spu dag dang 'dra bar 'dreg pa de ltar breg par mi bya'o/ /de ni thams cad du yang bkag pa yin na de'i dmigs kyis bsal ba bstan pa'i phyir/ rma'i than kor ni ma gtogs so zhes bya ba smras te/ rma'i than kor ni chan pas breg par bya'o zhes bya ba'i tha tshig go/ /skra 'jog pa las gtsug pud 'jog pa ni phyogs gcig tu gyur pa yin pa'i phyir de 'jog pa la nyes pa med do snyam du dogs pa la/ gtsug pud byed du mi gzhug go zhes bya ba smras te/ gtsug pud mi bya'o zhes bya ba'i tha tshig go/ / //bam po bzhi pa/ skra breg pa las na spu breg pa yang nyes pa med do snyam du dogs pa bsal ba'i phyir ro/ /mdoms kyi spu 'dreg tu mi gzhug go zhes bya ba smras te/ mdo snga ma las byed du mi gzhug go zhes bya ba'i rjes su sbyar ro/ /de ltar na 'dir tshig gi don 'di 'byung ste/ mdoms gsang ba'i gnas te spu 'dreg tu mi gzhug go/ /re zhig mdoms kyi spu breg pa spyir bkag nas/ da ni dmigs kyis bsal bar bya ste/ rma'i ched du gzhan gyis mi 'tsho na mkhas pa gnas brtan gnas brtan dag la dri ste 'dreg tu gzhug go zhes bya ba ni/ rma'i phyir ni spu 'dreg tu gzhug pa'o/ /gzhan gyis mi 'tsho na zhes bya ba ni/ gal te bska ba la sogs pa'i thabs gzhan gyis rma mi 'tsho na'o/ /de ltar na bcom ldan 'das kyis kyang bska ba lngas bkru bar bya zhing phyis gal te ma sos na mdo sde dang 'dul ba dang ma mo 'dzin pa dag la dris te/ mdoms kyi spu 'dreg tu gzhug go zhes gsungs te/ de ni 'dir gzhung yin no/ /de'i phyir mkhas pa zhes gsungs pa ni tshig gzhan bstan pa'i phyir ro/ /byin pa'i spu breg pa yang de'i phyir ma yin par byed du mi gzhug go/ /zhes bya ba yang 'dreg tu mi gzhug go zhes bya ba'i rjes su sbyar te/ byin pa'i spu breg pa yang 'dreg tu ma gzhug go zhes bya ba'i tha tshig go/ /ji rnam pa thams cad du 'dreg tu mi gzhug gam zhe na/ de'i phyir ma yin par zhes bya ba smras te/ rma'i phyir ma yin par 'dreg tu mi gzhug gi rma'i phyir ni 'dreg tu gzhug pa kho na yin no/ /byin pa'i spu breg pa bkag pas lus gzhan gyi spu ni breg tu rung ngo snyam du dogs pa la lus gzhan du yang mi bya'o zhes bya ba smras te/ mdoms dang byin pa gnyis las gzhan pa'i lus ni mgrin pa man chad kyi lus 'og ma la bya ste/ de la yang rma'i phyir ma yin par spu breg par mi bya'o/ /'dir ma mo'i gzhung las skra dang kha spu ma gtogs pa de las gzhan pa'i yan lag dang nying lag dag gi spu breg par mi bya'o/ /gang 'dreg na nyes byas kyi ltung bar 'gyur ro zhes gsungs so/ /sna'i spu breg pa la ni rnam grangs kyi tshig yod de/ 'di ltar bcom ldan 'das kyis dge slong gis dge slong dag gi sna'i spu phyed btogs pa dag la rgan rims kyis smang tsher blang bar mi bya'o/ /dge slong gis dge slong dag gi sna'i spu phyed btogs pa dag la rgan rims kyis smang tsher len par byed na 'gal tshabs can du 'gyur ro zhes gsungs so/ /gal te sna'i spu dag rnam pa thams cad du btogs par mi bya ba yin na/ ci'i phyir phyed btogs pa'i smad tsher len pa nyes byas su bstan te/ rigs pa 'dis ni sngon gzhung dngos su yang yod par gyur pa las de nub par gyur par shes so/ /da ni sen mo breg pa'i cho ga bstan te/ sen mo spu gri'i so lta bu'am/ ste'u'i kha lta bur breg par bya'o zhes bya ba ni/ sen mo spu gri'i so lta bur mtha' dma' zhing dbus mtho bar breg par bya ba'am/ ste'u'i kha 'dra bar dbus dang mtha' mnyam par breg par bya'o/ /de dag spyil bar mi bya'o zhes bya ba ni/ sen mo de dag rgyags pa bskyed pa'i spyil bar mi bya'o/ /sen mo sbyang ba yang rnam pa thams cad du bkag par gyur to snyam pa la/ dri ma bsal ba'i phyir brud par bya'o zhes bya ba smras te/ dri ma bsal bar bya ba'i phyir brud cing bzhar bar bya ste/ brud pa ji tsam gyis dri ma sel bar gyur pa de tsam bya'o/ /chos gos gyon bzhin du skra dang kha spu breg par mi bya'o zhes bya ba la/ 'dir gos thams cad chos gos kyi sgrar brjod pa yin mod kyi/ 'dir bla gos gzung bar bya'i/ mthang gos ni ma yin no/ /gal te mthang gos kyang bkag na ni/ gcer bu kho nal breg par 'gyur bas de'i phyir 'di ni bla gos thams cad bkag pa yin no/ /skra breg pa gang gis bya zhe na/ skra bzed bcang bar bya'o zhes bya ba smras te/ skra bzed pa'i gos bcang bar bya ste/ des skra dag bzed par bya ba'i phyir ro/ /de yang bgo ba'i don yin gyi gding ba'i don ni ma yin te/ med na rdul gzan gyis so zhes brjod pa'i phyir ro/ / med na rdul gzan gyis so zhes bya ba ni/ skra bzed kyi gos med na rdul gzan gyon pas skra dang kha spu breg par bya'o/ /bting bar yang mi bya'o zhes bya ba ni/ skra dang kha spu breg par mi bya ba'o/ /'dir gzhung ni gleng gzhi dag las dge slong gis bting bar 'dug nas skra breg par mi bya ste/ gnas khang dang khyams dang sgo khang du skra 'dreg tu 'jug na yang nyes byas de nyid du 'gyur ro zhes bya ba dang / bcom ldan 'das kyis bka' stsal pa/ gang du dge 'dun phyag dar phyags pa der skra 'dreg tu gzhug par mi bya ste/ 'dreg tu gzhug na 'gal tshabs can du 'gyur ro zhes bya ba dang / de bzhin du dge slong gang dag rgas 'khogs nyam chung ba dag dang nad pa sbyor mi bzod pa de dag gis ni khyams sam gzhan du skra 'dreg tu gzhug par bya zhing / bde bar gnas pa dag gis kyang nyi ma tsha ba'am/ char 'bab pa gang du phyi rol du 'gror med na khyams sam gzhan der skra breg par bya'o zhes gsungs pa yin no/ /gang du dge 'dun phyag dar phyags par yang mi bya'o zhes bya ba ni/ phyogs gang du dge 'dun phyag dar phyags pa'i phyogs der skra 'dreg tu gzhug par mi bya ste/ gtsug lag khang gi phyogs gang du dge 'dun phyag dar nyal nyil la sogs pa phyags pa der zhes bya ba'i tha tshig go/ /rgan po dang nad pa dang rlung dang nyi ma dang char pa dag la khyams la sogs par 'dreg tu gzhug par bya'o zhes bya ba la/ khyams la sogs par zhes bya ba'i sogs pa'i sgras ni gnas khang dang sgo khang la sogs pa dag bsdu'o/ /'di skad bstan te/ rgan po sbyor mi bzod pa dang / nad pa mi nus pas ni khyams la sogs par skra 'dreg tu gzhug par bya'o/ /rlung dang nyi ma dang char ba dag la ni thams cad kyis so/ /phyogs de byi dor bya'o zhes bya ba ni skra bregs pa'i phyogs der byi dor bya ba ste/ sbyang bar bya'o zhes bya ba'i tha tshig go/ /sbyang ba zhes bya ba ni skra med pa nyid dang chus btab pa las byung ba'i sa 'bus pa la sogs pa bsal ba yin no/ /skra bregs pa rnams gang du dor bar bya zhe na/ de'i phyir skra ni phyag dar khrod du dor ro zhes bya ba smras te/ skra dag ni phyag dar gyis gang ba'i phyogs su dor ro/ /sen mo gcad pa yang de bzhin no zhes bya ba ni/ skra breg pa'i cho ga bstan pa gang yin pa'i cho ga de nyid kyis sen mo bcad par yang rig par bya'o/ /de 'dod chags dang bral ba ma yin na dge slong mas zhal ta ma byas par skyes pas skra mi breg go zhes bya ba la/ de zhes bya ba ni dge slong ma'o/ /dge slong mas zhal ta ma byas par zhes bya ba ni dge slong ma gzhan gyis ma bsrungs par skyes pas skra mi breg go zhes bya bar sbyar ro/ /ci thams cad dam zhe na/ ma yin te de'i phyir 'dod chags dang bral ba ma yin na zhes bya ba smras so/ /'dod chags dang bral ba ni breg ste/ 'dir gzhung ni gal te 'dod chags dang bral ba zhig yin na ltung ba med do zhes gsungs pa yin no/ /kun du chags par gyur na zhal ta byed pa mos rjes su bstan par bya'o zhes bya ba ni/ gal te skyes pa'i yul de'i 'dod chags skye na dge slong ma kun du chags par gyur pa de la dge slong ma zhal ta byed pa mos rjes su bstan par bya ste yang dag par rjes su bstan par bya'o/ /ji ltar zhe na dran pa nye bar zhog cig / ji rnag gi lus 'di la snying po yod dam zhes so zhes bya bas ni/ dran pa nye bar zhog cig ces bya ba ni/ dran pa mngon du gyis shig ces pa'o/ /ji rnag gi lus 'di la zhes bya ba ni/ 'jig pa'i bdag nyid kyi lus la'o/ /snying po yod dam zhes bya ba ni kun du 'dod chags pa'i dngos po yod dam zhes bya ba'i tha tshig go/ /'dreg mkhan la ni ma dang sring mo dang bu mo'i 'du shes nye bar zhog cig ces so zhes bya ba ni gal te 'dreg mkhan dge slong ma'i yul la 'dod chags skye bar gyur na de'i tshe 'dreg mkhan kun du chags par gyur pa de la ni zhal ta byed pa mos rjes su bstan par bya ste/ ji ltar zhe na/ ma la sogs pa'i 'du shes nye bar zhog shig ces bya bas so/ /dge slong ma rnams kyis skra breg pa'i bye brag smras na/ da ni spyi'i cho ga bstan pa'i phyir de byas nas khrus bya'o zhes bya ba smras te/ de zhes bya ba ni/ skra dang kha spu bregs pa'o/ /byas nas zhes bya ba ni zin nas te/ khrus bya'o zhes bya bar sbyar ro/ /yang na yan lag lnga'i khrus kyang bya'o zhes bya ba yang ngo zhes bya bar sbyar ro/ /yang na zhes bya ba'i sgra ni cho ga gzhan bstan pa'i don te/ 'dir gzhung ni dge slong gis skra bzed bcang bar bya zhing khrus kyang bya ste/ tha na rkang lag dag kyang bkru bar bya'o zhes gsungs pa yin no/ /sgren mor khrus mi bya'o zhes bya ba ni/ gcer bu kho nar khrus mi bya ba ste/ 'di ltar 'khor gsum g.yogs pa nyid na sgren mo ma yin pa nyid yod mod kyi/ 'on kyang 'dir ni mdoms kyi spu dang yan lag gi rnam pa dag g.yogs pa nyid na g.yogs pa nyid yin par rig par bya'o/ /dge slong mas skyes pa'i chu ngogs su mi bya'o zhes bya ba ni/ dge slong mas skyes pa khrus byed pa'i chu ngogs su khrus mi bya ba'o/ /bud med kyi chu ngogs su yang phye mas mi bya'o zhes bya ba ni khrus zhes bya bar sbyar ro/ /dge slong mas skyes pa'i chu ngogs su khrus bya ba ni thams cad kyis thams cad du dgag pa mdzad do/ /bud med kyi chu ngogs su ni phye ma la sogs pas khrus bya ba dgag pa mdzad kyi khrus nyi tse ni ma bkag go/ /'dir gzhung ni dge slong mas bud med kyi chu ngogs su phye mas khrus mi bya'o zhes gsungs pa yin no/ /mon sran sde'u la sogs pa'i phye ma dris bsgos pa rung ngo zhes bya ba ni dge slong dang dge slong ma gnyi ga la mon sran sde'u la sogs pa'i phye ma rung ngo / /bye brag ci lta bu can zhig ce na/ dris bsgos pa ste/ gla rtsi la sogs pas bsgos pa zhes bya ba'i tha tshig go/ /de ni blang bar bya'o zhes bya ba ni/ dris bsgos pa'i phye ma de bdag gir byar rung ba'o/ /nad pas ni sman gyis bsgos pa yang ngo zhes bya ba ni nad pas ni phye ma sman gyis bsgos pa yang blang du rung ba'o/ /dge slong mas bud med la phye mas mi gtor ro zhes bya ba ni/ dge slong mas khrus kyi tshe'am dus gzhan gyi tshe yang bud med la phye mas mi gtor ba'o/ /sgren mor khrus mi bya'o zhes smras pas de'i phyir sgren mo nyid bsal ba'i zhar la/ sham thabs kyi tha ma nyid kyi mdun dang rgyab kyi mtha' ma mdud par skas la mi 'dzeg go zhes bya ba smos te/ dge slong gang gis sham thabs kyi gos kyi tha ma nyid kyi mdun dang rgyab kyi mtha' ma mtha'i cha ma mdud pa de ni sham thabs kyi mtha' gnyi ga mdun dang rgyab kyi mtha' ma mdud pa'i dge slong yin te/ des skas la mi 'dzeg go/ /ma mtha'i dngos po ni tha ma nyid do/ /ma mdud par zhes bya ba ni ma bcings par ro/ /skas zhes smos pa ni dpe ste/ shing la sogs pa la 'dzeg pa la yang de kho na bzhin du bsgrub par bya'o/ /tshig 'di ni mdoms mthong ba yongs su spang ba'i phyir ro/ /gzhan gyi dus su de ltar mi bya'o zhes bya ba la/ gzhan gyi dus su zhes bya ba ni/ skas la sogs pa la 'dzeg pa las gzhan pa'i dus su'o/ /de ltar zhes bya ba ni/ sham thabs kyi tha ma nyid kyi mdun dang rgyab kyi mtha' mdud pa'o/ /mi bya'o zhes bya ba ni/ bya mi dgos so zhes bya ba'i tha tshig go/ /'di skad bstan te/ skas las babs ma thag tu mdud pa bkrol bar bya'o/ /kha'i nang yang mdoms kyi phyogs dang mthun pa'i phyir der gtogs pa'i cho ga bstan pa'i phyir/ kha ma bkab par gdangs par mi bya'o zhes bya ba smras te/ kha ma bkab par zhes bya ba ni ma g.yogs par ro/ /glal ba la sogs pa'i rgyus gos la sogs pas kha ma bkab par gdangs pa ni 'byed pa ste/ de mi bya'o/ /'dir ni gzhung dge slong glal bas kha lag pas dgab par bya'o zhes gsungs pa yin no/ /sgren mor khrus mi bya'o zhes bya bas 'dir sgren mo'i khrus bkag pa'i phyir ro/ /khrus ras bcang bar bya'o zhes bya ba 'di brjod de byed pa'i tshig dang por bstan pa'i phyir rang dgar spyad pa yin par rig par bya'o/ /nyi rim la ni srog chags dag kun du 'chags so zhes bya ba la chags so zhes brjod par bya la/ kun du zhes smos pa ni 'grel ba byed pa na re/ gzhung mdzes pa bsgrub pa'i phyir zhes zer ro/ /kho bo ni yi ge lhag pa yod pa'i phyir/ don kyang lhag pa yod par shes par bya zhes smras te/ des na byed rgyu bstan pa med kyang byed rgyu bstan par khong du chud par bya'o/ /de ltar na 'dir tshig gi don 'di ltar shes par bya ste/ gang gi phyir gos nyi rim la srog chags dag chags par 'gyur ba de'i phyir/ srog chags dang bcas pa'i chu la khrus nyi rim la sogs pas khrus mi bya'o zhes bya ba'i tha tshig go/ /chos gos gsum pas kyang ngo zhes bya ba yang khrus ras bcang bar bya'o zhes bya bar sbyar ro/ /kyang ngo zhes bya ba'i sgras ni/ gzhan gyis kyang ngo zhes bya bar sbyar ro/ /'dir gzhung ni/ bcom ldan 'das kyis bka' stsal ba/ dge slong chos gos gsum pas kyang khrus ras bcang bar bya'o zhes gsungs pa yin no/ /gal te khrus ras mi 'byor na de'i tshe ji ltar bsgrub par bya zhe na/ de'i phyir med na mdun dang rgyab nas lo ma dag gis glan la dben pa'i phyogs su khrus bya'o zhes bya ba smras te/ khrus ras med na mdun dang rgyab nas lo ma dag gis glan la khrus bya'o/ /dben pa'i phyogs su zhes bya ba ni/ skye bo med pa'i phyogs su'o/ /gang la la zhig la khrus ras med na dge slong des cho ga des khrus bya'o/ /'dir gzhung ni gzhan dag la khrus ras kyi rnyed pa med nas/ bcom ldan 'das kyis bka' stsal pa/ de dag gi mdun dang rgyab nas lo ma dag gis glan la khrus bya'o zhes gsungs pa yin no/ /srog chags dang bcas pa'i chu la khrus ras nyi rim gyis khrus mi bya zhing chig rkyang gis khrus bya na de la yang srog chags med pa nyid du bsgrub pa'i phyir/ srog chags chags na bshal bas med par 'gyur ro zhes bya ba smras te/ khrus ras chig rkyang la srog chags chags na chus bshal bas med par 'gyur zhing bral bar 'gyur ro/ /lhan pa can yang nyi rim nyid yin no/ /gtsug lag khang du khrus kyi phyogs brjod par 'dod na sa de gtsug lag khang du ni stor khung du'o zhes bya ba smras te/ de zhes bya ba ni khrus so/ /gal te gtsug lag khang du byed na stor khung gi phyogs kho nar bya'i gzhan du ni ma yin no/ /khrus kyi zhar la gtsug chu yang dbo bar bya'o zhes bya ba 'di brjod de/ lhung bzed bkrus pa dang / chos gos bkrus pa la sogs pa'i chu dag dbo bar bya'o/ /yang zhes bya ba ni stor khung nyid du dbo bar rig par bya'o/ /khrus la sogs pa'i don nyid du gnas gzhan bya ba'i phyir khrus khang bya'o zhes bya ba smras te/ khrus kyi ched du khang pa bya'o/ /der so phag gi gcal dgram mo zhes bya ba ni khrus khang der so phag so btang ba las byas pa'i gcal dgram par bya'o/ /stor khung gdod do zhes bya ba ni/ gang nas chu'i phyi rol du 'dzag pa de'i srang gdod par bya ste/ chu phyi rol du 'gro bar bya ba'i phyir/ bu gu gdod par bya ba'o/ /ljan ljin bsal bar bya'o zhes bya ba la/ ljan ljin zhes bya ba ni rdzab ste/ de bsal bar bya ba ni bzhar bar bya ba'o/ /'dir gzhung ni bcom ldan 'das kyis bka' stsal pa/ stor khung gdod par bya'o/ / ljan ljin yod nas/ bcom ldan 'das kyis bka' stsal pa/ dus dus su bsal bar bya'o zhes gsungs pa yin no/ /de ltar bcom ldan 'das kyis stor khung kho nar khrus bya'o zhes gsungs pas de bsdu ba'i phyir/ stor khung du khrus byed na mi 'byung ngo zhes bya ba smras te/ khrus ni bkru ba'o/ /stor khung der khrus byed na rdzab mi 'byung ngo / /so phag gi dum bus brud pa yang khrus kyi yan lag yin pas de'i phyir khrus kyi zhar la/ so phag gi dum bus brud pas rkang pa gnyis las gzhan pa'i lus la brud par mi bya'o zhes bya ba 'di brjod de/ so phag gi dum bus zhes bya ba ni/ so phag so btang ba la sogs pa'i dum bus so/ /so phag gi dum bu des brus pas zhes bya ba ni sbyang ba ste/ des lus la brud par mi bya'o zhes bya ba'i tha tshig go/ /'dir gzhung ni dge slong gis so phag gi dum bus lus la brud par mi bya'o zhes gsungs pa yin te/ rkang pa gnyis las gzhan pa de gnyis ma gtogs pa'i lus la brud par mi bya'o zhes bya ba'i tha tshig go/ /de ni rnon po dang bzhar spyad gnyis kyi dpe yin no zhes bya ba la/ de ni zhes bya ba ni so phag gi dum bu'o/ /dpe yin no zhes bya ba ni nye bar mtshon pa yin par rig par bya'o/ /gang gis she na rnon po dang bzhar spyad gnyis kyis te/ rnon po zhes bya ba ni gri la sogs pa'o/ /bzhar spyad ces bya ba ni rgya mtsho'i dbu ba la sogs pa ste/ de ni gnyis kyi dpe yin no/ /'dir gzhung ni bcom ldan 'das kyis so phag gi dum bus lus la brud par mi bya'o zhes bka' stsal pa dang / dge slong dag nya phyis 'drud par byed nas/ bcom ldan 'das kyis bka' stsal pa/ nya phyis mi rtsub pas bya'o zhes gsungs pa yin no/ /gal te nya phyis mi rtsub pas lus la 'drud par byed na de ji ltar sbyar bar bya zhe na/ de'i phyir nya phyis ni mes sbyang ngo zhes bya ba smras te/ nya phyis sbyang ba ni mes dros tsam gyi bya ba yin par rig par bya'o/ /dge slong rnams kyis ni rnam pa 'gas brud par bya'o/ /dge slong ma rnams kyis ni rnam pa gang gis kyang mi bya'o zhes bstan pa'i phyir dge slong mas ni gang du yang khu tshur dag dang gos dril ba dag yan cad gang gis kyang brud par mi bya'o zhes bya ba smras te/ dge slong mas ni brud par mi bya ste/ gang du yang zhes bya ba ni lus kyi phyogs so/ /gang gis kyang zhes bya ba ni dngos pos te/ khu tshur dag yan chad dang gos dril ba dag yan chad kyis kyang brud par mi bya na/ nya phyis la sogs pa gzhan dag gis lta smos kyang ci dgos/ khrus kyi zhar la gos gyon pa nyams pa yongs su spang ba'i phyir/ gsher 'gyur gyi chu dang ma bral bas chos gos dag bgo bar mi bya'o zhes bya ba smras te/ khrus byas pa'i rjes la chu'i thigs pa'i lhag ma mang po lus la chags par 'gyur zhing / chu'i thigs pa de dag gis chos gos dag gsher bar 'gyur ba de dag ni gsher 'gyur gyi chu zhes bya ba'i sgras brjod do/ /dge slong gang gsher 'gyur gyi chu dang ma bral ba de ni gsher 'gyur gyi chu dang ma bral ba ste/ des ji srid du chu'i thigs pa de dag ma skams kyi bar du chos gos dag bgo bar mi bya'o/ /gang dus de srid du sdod par mi 'dod pa de'i phyir lus phyis bcad par bya'o zhes bya ba brjod de/ lus phyi ba'o/ /lus phyis med na ji ltar bya zhe na/ de'i phyir med na yud tsam zhig tsog pur 'dug la khrus ras kyis phyi bar bya'o zhes bya ba smras te/ med na zhes bya ba ni lus phyi ba'o/ /yud tsam zhig ces bya ba ni/ ji ltar khrus ras kyis lus phyis te/ chos gos dag gyon na nyams par mi 'gyur ba de ltar 'gyur ba'i dus ji srid pa'i dus de ni yud tsam zhig ces bya'o/ /tsog pur 'dug la zhes bya ba ni/ lus la chu'i thigs pa myur du 'brul ba'i phyir ro/ /khrus ras kyis phyi bar bya'o zhes bya ba ni/ phyis khrus ras kyis lus phyi bar bya'o zhes bya ba'i tha tshig go/ /khrus kyi zhar la bsro gang bsten par bya'o zhes bya ba 'di brjod de/ bsro gang nyams su myong bar bya'o/ /'di man chad ni bsro gang gi cho ga brjod de/ bsro gang gi khang pa bya ba ni gram sa che bar bzang ngo zhes bya ba la/ bsro gang gi khang pa zhes bya ba ni/ bsro gang gi ched kyi khang pa'o/ /de bya ba ni brtsig pa'o/ /gram sa che bar zhes bya ba ni/ gram gseg che ba ste/ gram gseg shas che ba'i phyogs su'o/ /bzang ngo zhes bya ba ni/ gram gseg ni brlan med pa'i phyir ro/ /bsro gang gi khang pa der gang bya ba de nye bar bstan pa'i phyir/ dkyil du skar khung phyi rub la nang yangs pa rgya mtsho'i rnam pa lta bu gdod do zhes bya ba smras te/ skar khung gdod par bya'o/ /phyogs gang du zhe na/ bsro gang gi khang par gtogs pa'i rtsig pa'i dkyil du'o/ /dma' bar yang mi gdod de/ du ba sangs dka' ba'i phyir ro/ /mtho bar yang mi gdod de/ mun par 'gyur ba'i phyir ro/ /de khyad par ji lta bu zhig ce na/ phyi rub la nang yangs pa rgya mtsho'i rnam pa lta bu zhes bya ba smras te/ de'i phyi rol gyi kha zhum la nang logs yangs par bya'o/ /rgya mtsho'i rnam pa lta bu ni gang gi dbyibs rgya mtsho'i rnam pa 'dra ba ni de nyid yin te/ des ni skar khung de byin gyis yangs par ston to/ /der skar khung dra ba can dang sgo glegs dang / 'khor gtan dang /gnam gzer dang / phred gtan dang bcas par gzhug go zhes bya ba ni/ skar khung der skar khung dra ba can dang sgo glegs dang / 'khor gtan dang / gnam gzer dang / phred gtan de dag gzhug ste rnam par gzhag par bya'o/ /skar khung dra ba can zhes bya ba ni/ skar khung lan kan can no/ /sgo glegs zhes bya ba ni/spang leb ces bya ba'i shing ste/ des skar khung bcad par byed pa'o/ /'khor gtan zhes bya ba ni/ de sgo glegs bcad pa'i thabs su gyur pa yin te/ sgo glegs kyi dkyil gyi phyogs su shing gi gtan bu khru gang gi tshad tsam btags shing / sgo skyes la de'i gzungs gdod do/ /gtan bu de 'khor lo bzhin du bskor nas gzungs der gzhug par bya ste/ des na 'khor gtan zhes bya'o/ /gnam gzer zhes bya ba ni/ sgo'i ya phubs las btags pa'i gzer bu la sogs pa'o/ /phred gtan zhes bya ba ni/ rtsig pa'i sbubs kyi khong du gzhug pa'i shing ring po la bya'o/ /dbyug gu skam kha yang nye bar gzhag go zhes bya ba la/ dbyug gu ra'i rkang pa 'dra ba ni dbyug gu skam kha ste/ de yang der nye bar gzhag go/ /yang zhes bya ba ni/ der zhes bya ba 'dren par byed do/ /'di ltar dbyug gu skam kha der skar khung du phred gtan 'dzud pa dang 'byin par byed do/ /sgor sgo glegs dang sgo gtan dang yang mig dang lag gzungs legs par bya'o zhes bya ba ni/ bsro gang gi khang pa'i sgor sgo glegs la sogs pa legs par bya ba'o/ /sgo gtan zhes bya ba ni/ sgo glegs gcad pa'i thabs su gyur pa'o/ / yang mig ces bya ba ni/ sgo glegs kyi phyi rol gyi ngos kyi yang mig go/ /lag gzungs zhes bya ba ni/ sgo glegs nang du 'dren pa lcags las byas pa'o/ /chu dron gzhag pa'i phyir nang gi phyogs su bzhag stegs bya'o zhes bya ba ni/ chu dron mo gzhag pa'i phyir bsro gang gi khang pa'i nang gi phyogs su bzhag stegs kyi stegs bu de bya'o/ /me 'bud pa'i gnas kyi sar so phag gi gcal bya'o zhes pa la/ me bud pa zhes bya ba ni/ me sbar ba'o/ /de'i gnas gang yin pa de'i sa der so phag dag gi gcal gzhug par bya'o/ /mi 'chi bar bya ba'i phyir sba bar bya'o zhes bya ba ni/ me mi 'chi bar bya ba'i phyir zhes bya ba mi nyams par bya ba'i phyir ro/ /sba bar bya'o zhes bya ba zlum por bya ba ste/ bcer bar bya'o zhes bya ba'i tha tshig go/ /de'i ched du lcags kyi thal phyags bcang bar bya'o zhes bya ba ni/ me sba ba de'i ched du lcags kyi thal phyags bcang bar bya'o/ /lcags las byas pa ni lcags kyi ste/ lcags kyi nal ze bcang bar bya'o zhes bya ba'i tha tshig go/ /me 'bar ba na mi rmya bar bya ba'i phyir 'jug pa bsdad par bya'o zhes bya ba ni/ bsro gang gi khang par me sbar te 'bar na mi rmya bar bya ba mi 'khrugs par bya ba'i phyir nang du 'jug pa re zhig bsdad par bya'o/ /bog pa mi 'byung bar bya ba'i phyir/ phye dang yungs mar du bsres pa dag mer blugs so zhes bya ba la/ bog pa zhes bya ba ni mes brgyal ba ste/ de mi 'byung bar bya ba'i phyir phye dang yungs mar yungs kar gyi mar du bsres pa sbyar ba dag mer blugs par bya'o/ /dri mi zhim pa nyid bsal ba'i phyir bdug spos blugs so zhes bya ba la/ dri mi zhim pa'i dngos po ni dri mi zhim pa nyid de/ phye dang yungs mar bsres pa dag blugs pa las gyur pa'i dri mi zhim pa nyid de/ bsal ba zhes bya ba de dang dbral ba'i phyir bdug spos blugs par bya'o/ /mchi ma 'dzag na nas kyi bag zan gyis gcod do zhes bya ba la/ mchi ma 'dzag na zhes bya ba ni/ mig chu 'dzag na'o/ /nas kyi bag phye zhes bya ba ni/ nas btags pa'i ming ngo / /de'i zan gyis mig chu gcad par bya ste/ mi 'dzag par bya ba'i thabs zhes bya ba'i tha tshig go/ /skyu ru ra'i phye ma sbrus pa'i chad bus kyang ngo zhes bya ba la/ kyang ngo zhes bya bas ni de bcad do zhes bya bar sbyar ro/ /der rtswa bam gyi stan gding ngo zhes bya ba ni/ bsro gang der rtsa bam rtswa chun gshibs pa'i stan gding bar bya ste/ sla ba'i phyir ro/ /sa gzhir skye ba nyid kyis sam spangs pas gsher ba'i rtswa gsher ba dag dgram mo zhes bya ba ni/ bsro gang gi khang pa'i sa gzhi gang yin par rtswa dag dgram par bya ste/ khyad par ji lta bu can zhig ce na/ gsher ba dag go/ /de dag cis gsher zhe na/ skye ba nyid kyis sam zhes bya ba skye bas grub pa ni/ skye bas gsher ba ste des so/ /spangs pas zhes bya ba ni chus btab pas gsher ba ste/ de yang rung ngo / /g.yan pa phrug pa'i ched du lcags kyi phrug spyad bya'o zhes bya ba ni/ g.yan pa phrug pa'i rgyur lcags las byas pa'i gzar chung bya ba'o/ /rdzas kyi blas lung mi gnas tha gus btags te dben par gzhag go zhes bya ba ni/ rdzas kyi blas phrug spyad de'i lung mig gi nang nas tha gus btags pa'i rgyus phyogs dben par gzhag ste/ spyang du gzhug go zhes bya ba'i tha tshig go/ /de la dri ma med pa nyid du bsgrub pa'i phyir mes rung bar bya'o zhes bya ba ni/ g.yan pa phrug pa'i ched du sbyar ba'i phrug spyad de la dri ma med pa nyid du bsgrub pa dag par bya ba'i phyir mes rung bar bya ba mes brtag par bya'o zhes bya ba'i tha tshig go/ /der khrus mi bya'o zhes bya ba ni/ bsro gang der dge slong dag gis khrus mi bya ba'o/ /de'i ched du khrus khang bya'o zhes bya ba ni/ khrus bya ba de'i ched du khrus khang bya'o zhes bya ba'i tha tshig go/ /khrus chu ldugs pa'i chos gos dag mi nyams par bya ba'i phyir so phag gis bsgron pa'i khrus dong bya'o zhes bya ba la/ khrus kyi chu ldugs par byed pa'i gos dag ni khrus chu ldugs pa'i chos gos dag go/ /de dag mi nyams mi gsher bar bya ba'i phyir so phag gis bsgron pa'i khrus dong bya'o/ /'di skad bstan te/ dge slong khrus dong du zhugs pas ni khrus bya la/ dge slong kha na sdod pas ni chu blugs par bya ste/ de ltar na chos gos dag nyams par mi 'gyur ro/ /de la stor khung gdod do zhes bya ba la/ de la zhes bya ba ni khrus dong la ste/ khrus dong de la stor khung gdod par bya'o/ /chu ha cang tsha na phyi ma rnams la sbran par bya'o zhes bya ba ni khrus chu ha cang tsha ste/ brnags mi bzod na rab tu byung ba phyi ma rnams la sbran par bya ba ste/ gal te chu ha cang tsha ches te khrus byar mi bzod na/ dge slong phyi ma rnams la chu te por tsha'o zhes sbran par bya ba'o/ /der grang mos bsre'o zhes bya ba ni/ chu tsha ba der chu grang mos bsre ba 'dres par bya ba ste/ chu tsha ba'i nang du chu grang mos bslad par bya ba'o/ /chag chag gi chu la sogs par yang ngo zhes bya ba la/ chag chag gi chu gang la bkru bshal dang / zhal zhal la sogs pa'i sogs pa yod pa de ni chag chag gi chu la sogs pa ste/ chag chag gi chu la sogs pa der zhes bya ba chag chag gi chu la sogs pa'i phyir/ yang chu tsha ba der chu grang mos bsre bar bya'o zhes bya ba'i tha tshig go/ /khrus gang der yang thal ba dang ba lang gi lci ba dang so shing gis bkang ba'i gyo mo dag gzhag par bya'o zhes bya ba la/ thal ba dang ba lang gi lci ba dang so shing ni thal ba dang ba lang gi lci ba dang so shing dag go/ /de dag gis so sor bkang ba'i gyo mo dag gzhag par bya ste/ khrus khang der thal ba la sogs pas bkang ba'i gyo mo dag gzhag par bya'o zhes bya ba'i tha tshig go/ /gal te nyams dmas par gyur na khe'u sus bya'o zhes bya ba ni/ gal te bsro gang du zhugs pas lus kyi nyams dmas pa nyid du gyur na de'i tshe khe'u sus bza' bar bya'o/ /bsro gang du 'jug pa'i dus na dge slong rnams cha lugs dang bral ba'i phyir/ kun du rgyu la sogs pa gzhan dag shan bsre bas bsro gang du 'jug pa'i skabs srid pa'i phyir/ der ngo mi shes pa zhig shan bsre bas nye bar gnas par gyur na/ der gtogs pas nges par shes par bya ba'i phyir/ dri bar bya zhing de'i ched du mi 'jug par bya ba'i phyir/ dge slong sgo ba bsko'o zhes bya ba smras te/ der zhes bya ba ni bsro khang du'o/ /ngo mi shes pa zhig ces bya ba ni ma nges pa zhig go/ /shan bsre bas zhes bya ba ni/ kho bo khyed cag las gang yang rung ba zhig yin no zhes gseb tu 'jug pas so/ /nye bar gnas par gyur na zhes bya ba ni/ kun du rgyu la sogs pa sta gon du gnas par gyur na'o/ /der gtogs pas zhes bya ba ni/ bsro gang na rnam par gnas pa'i dge slong gis te/ des dri bar bya'o/ /ci zhig gi phyir zhe na/ ji 'di chos 'di pa'i dge slong zhig gam/ 'on te kun du rgyu la sogs pa zhig yin zhes de ltar shes par bya ba nges par bya ba'i phyir dri bar bya'o/ /'di skad bstan te/ gal te bsro gang du mu stegs can 'ga' zhig kho bo khyed cag las gang yang rung ba zhig yin no zhes shan bsre zhing 'jug na/ de'i tshe dge slong bsro gang du zhugs pas khyod su zhig ces bya ba la sogs pas nges par bya ba'i phyir dri bar bya'o/ /zhugs pa'i thabs kyi cho ga bstan nas/ ma zhugs pa'i thabs kyi cho ga brjod par bya ba'i phyir/ de'i ched du zhes bya ba la sogs pa smras te/ sgo ba bsko'o zhes bya bar sbyar ro/ /de'i ched du zhes bya ba ni/ ngo mi shes pa shan bsre bas nye bar gnas par gyur pa de nges par shes par bya ba'i phyir dri bar bya ba dang / mi 'jug par bya ba'i phyir ro/ /'di skad bstan te/ bsro gang du sgo ba gzhag par bya zhing / gal te mu stegs can 'ga' zhig 'ong zhing 'jug par 'dod na de'i tshe sgo bas nges par shes par bya ba'i phyir dang / 'di ni bdag cag las gang yang rung ba ma yin pas mi gzhug pa'i phyir de la khyod su zhig ces dri bar bya'o/ /sgo ba ji lta bu zhig ce na/ dge slong zhes bya ba smras te/ bsko'o zhes bya bar sbyar ro/ /dge slong smos pa ni rab tu byung ba'i mtshon pa yin par rig par bya'o/ /sgo ba'i dgos pa gzhan bstan pa'i phyir/ der ma dad pa 'jug tu mi gzhug go zhes bya ba smras te/ bsro gang der khyim pa ma dad pa ni shan bsre bas nye bar gnas par gyur pa ma yin du zin kyang 'jug tu mi gzhug go/ /'o na sus byi dor gyi las bya zhe na/ de'i phyir byi dor gyi las ni lhan cig gnas pa dang nye gnas dag gis bya'o zhes bya ba smras te/ bsro gang der bsku mnye la sogs pa byi dor gyi las gang ci yang rung ba de dag thams cad lhan cig gnas pa dang nye gnas pa dag gis bya'o/ /lugs gzhan las ni gzhon rabs dag gis shes so zhes bya ba ni/ slob dpon gyi lugs gzhan las ni bsro gang der byi dor gyi las gzhon rabs dag gis bya'o zhes 'byung ste/ tshig gzhan mthong ba'i phyir ro/ /byi dor gyi las kyi ngo bo nyid bstan pa'i phyir sbar ba dang zangs dang 'bru mar dang so shing dang ba lang gi lci ba dang sa dang phye ma dang chu la sogs pa nye bar gzhag pa dang / shing brtags pa dang / dril phyi dang snum gyis bsku ba dang / bkru ba dang / phyags pa dang / phyag dar dor ba la sogs pa'o zhes bya ba smras te/ sbar ba dang / zangs dang / 'bru mar dang / so shing dang ba lang gi lci ba dang / sa dang phye ma dang chu dang / de dag la sogs pa gzhan dag gang yin pa de dag ni de dag la sogs pa ste/ de dag nye bar gzhag pa de dang shing brtags pa dang dril phyi dang / snum gyis bsku ba dang / bkru ba dang / phyags pa dang / phyag dar dor ba dang / de dag la sogs pa gzhan gang dag yin pa de dag ni de dag la sogs pa ste/ de lta bu'i khyad par can gyi byi dor gyi las bya ba'o/ /sbar ba zhes bya ba ni/ shing la sogs pa las me sbar ba'o/ /de dag gi ni gcig gis gcig la'o zhes bya ba ni/ lhan cig gnas pa la sogs pa de dag gis bsku mnye la sogs pa'i byi dor gyi las ni gcig gis gcig la bya'o/ /mdo snga ma'i sogs pa'i sgra gnyis kyis gang bsdus pa de bstan pa'i phyir/ khri'u dang nya phyis dag kyang gtsang sbra nyid byas nas gnas ji lta bar gzhag go zhes bya ba smras te/ khri'u dang nya phyis de gnyis kyang gtsang sbra nyid dag pa nyid du byas nas gnas ji lta bar zhes bya ba gang gis gnas gang yin pa de'i der gzhag pa dgod pa rig par bya'o/ /de yang mtshon pa yin te/ 'di ltar ma mo las bsro gang de na khri'u 'am/ khrus ras sam/ gzhan yang bsro gang gi snod spyad gang yod pa de yang gtsang sbra legs par byas te/ gnas ji lta bar nye bar dgod par bya'o zhes gsungs pa yang bsdu bar bya'o/ /mtshungs pa'i phyir gzhan la yang 'dra bar bstan pa'i phyir/ snod spyad thams cad la cho ga de bzhin no zhes bya ba smras te/ snod spyad bum pa dang ras la sogs pa thams cad la gtsang sbra legs par bya ste/ gnas ji lta bar nye bar dgod par bya'o zhes bya ba'i cho ga de bzhin du rig par bya'o/ /bsro gang gi cho ga 'di'i zhar la sbyar bar bya ba gzhan yang bstan pa'i phyir/ yo byad thams cad legs par sba ba dang byi dor bya'o zhes bya ba smras te/ yo byad spyad thams cad dben par bzhag pa la sogs pas legs par sba bar bya'o/ /bskam pa dang bkru ba la sogs pa byi dor bya'o/ /zhar la byung ba smras nas/ da ni bsro gang du 'jug pa la sogs pa'i cho ga nyid brjod par bya ste/ der sgra bskyungs te 'jug par bya'o zhes bya ba ni bsro gang der sgra bskyungs te 'jug par bya ba'o/ /mdzes par ro zhes bya ba ni/ 'o bze bar 'jug par bya ba ste/ de mthong na dang ba skye bar ro/ /mdzes pa nyid bstan pa'i phyir/ legs par bsdams pa dang / spyod lam mdzes pa dang / shes bzhin du'o zhes bya ba smras te/ legs par bsdams pa zhes bya ba ni/ lus dang ngag ma g.yengs par ro/ /spyod lam mdzes pa zhes bya ba ni/ spyod pa'o bze bar ro/ /shes bzhin du'o zhes bya ba ni/ sems nye bar zhi bar ro/ /mdun du 'dug ste/ me mi 'de'o zhes bya ba gzhan me 'de ba'i mdun du 'dug ste me mi 'de ba'o/ /'di skad bstan te/ gzhan me 'de ba rang gi lus kyis bsgribs te/ me 'de'o/ /'du 'dzi'i gtam spang ngo zhes bya ba ni/ der zhes bya bar sbyar te/ der sgra bskyungs te 'jug par bya'o zhes bya ba der ro/ /'du 'dzi'i gtam zhes bya ba ni/ rgyal po dang rkun po la sogs pa'i gtam ste/ bsro gang der spang ngo zhes bya ba'i tha tshig go/ /'o na ji ltar gnas par bya zhe na/ de'i phyir 'phags pa'i mi smra ba nyid la dmigs pas so zhes bya ba smras te/ 'phags pa rnams kyi mi smra ba nyid la dmigs par bya'o/ /'di skad bstan te/ 'phags pa rnams mi smra ba nyid gang gis bzhugs pa'i mi smra ba nyid de kho nas/ bsro gang du gnas par bya'o zhes bya ba'i tha tshig go/ /de yang tshul bzhin yid la byed pa mngon du bya ba'i dngos po yin par rig par bya'o/ /mjug tu rgyud chags gsum pa gdon to zhes bya ba ni/ bya ba thams cad yongs su rdzogs pa'i dus kyi mjug tu rgyud chags gsum pa gdon par bya ba'o/ /gos gcig pas byi dor gyi las mi bya'o zhes bya ba la/ gang gi lus la gos gcig gyon pa de ni gos gcig pa ste/ des byi dor gyi las mi bya'o/ /byi dor gyi las thams cad la yin gyi/ lus su gtogs pa 'ba' zhig la ni ma yin pa dang / gnas thams cad du yin gyi bsro gang 'ba' zhig tu ni ma yin no/ /lus kyi de ma dad pa byed du mi gzhug go zhes bya ba ni/ lus kyi byi dor gyi las de ma dad par byed du mi gzhug pa'o/ /khur khyer du gzhug pa la sogs pa ni mi dgag ste/ de yang yul thams cad du yin gyi/ bsro gang 'ba' zhig tu ni ma yin no/ /der ma dad pa 'jug pa bkag pas 'dir ma dad pa'i sgra yang dang yang du grag pa de'i mtshan nyid gang yin zhe na/ de'i phyir/ 'di dang gong ma la yang brtan pa ni dad pa can du 'dod do zhes bya ba smras te/ byi dor gyi las kyi cho ga 'di dang gong ma la yang mi brtan pa ni re zhig pa yin la/ brtan pa ni dus yun ring ba mi g.yo ba ste/ dad pa can yin no/ /'dod do zhes bya ba ni/ de ltar bsams pa ste/ 'dir ma dad pa der mi gzhug go/ /'di skad bstan te/ gang gi dad pa mi g.yo ba cung zad tsam gyis kyang / mi 'khrul pa de 'dir dad pa can du gzung bar bya'o/ /kha cig sdig pa byed pa ngo tsha med pa thar pa'i lam yongs su gtang ba tshul khrims 'chal kyang mkhas par mngon pa'i nga rgyal dang ldan zhing rgan pa'i mngon pa'i nga rgyal dang ldan pa de dag tshul khrims dang ldan pa dag las bsnyen bkur bdag gir byed pa de dag dgag pa'i phyir/ seng ge lta bus wa lta bu la bsnyen bkur mi bya'o zhes bya ba smras te/ seng ge lta bu zhes bya ba ni/ tshul khrims dang ldan pa ste/ ri dwags phra mo lta bu'i nyon mongs pa dag gis mi thub pa'i phyir ro/ /wa lta bu zhes bya ba ni/ tshul khrims 'chal pa ste khyi lta bu'i nyon mongs pa dag gis pham par byas pa'i phyir te/ de la snga mas bsnyen bkur mi bya'o/ /de ni thams cad du gtogs pa yin no/ /thams cad la bkag par thal ba la/ la la la bya ba brtsam pa'i phyir slob dpon dang mkhan po ni mchog tu tshul khrims 'chal pa la yang bsnyen bkur bya'o zhes bya ba smras te/ mchog tu tshul khrims 'chal pa zhes bya ba ni/ pham par gyur pa thams cad kyi ltung ba byung ba'am/ ltung ba sde lnga char gyi ltung ba byung ba'o/ /slob dpon dang mkhan po ni gal te mchog tu tshul khrims 'chal bar gyur kyang slob ma dang nye gnas tshul khrims dang ldan pas/ bsnyen bkur bya ste/ g.yog bya'o zhes bya ba'i tha tshig go/ /de gnyis ni bstan pa la 'jug pa'i sgor gyur pa yin pa'i phyir dang / sdom pa skye ba dang / legs par bsrung ba dang / chos khong du chud pa'i rgyu yin pa'i yang phyir ro/ /pha ma dang nad pa dag ni khyim pa yin na yang ngo zhes bya ba ni/ pha ma dang nad pa de dag ni khyim pa yin na yang bsnyen bkur bya ba ste/ g.yog bya'o zhes bya ba'i tha tshig go/ /yang ngo zhes bya ba'i sgra las ni rab tu byung ba yin na lta smos kyang ci dgos zhes bya ba'i tha tshig go/ /pha ma ni phan 'dogs pa'i zhing yin pa'i phyir dang / nad pa ni snying rje'i zhing yin pa'i phyir te/ dkon mchog gsum pas kyang bsnyen bkur bya'o zhes gsungs pa'i phyir ro/ /khrus kyi zhar la legs par sbyar ba'i khrus kyis bkru'o zhes bya ba 'di brjod de/ legs par sbyar ba'i khrus kyis ni nad dang nad pa ma yin pa yang bkru'o zhes gsungs te/ mdo 'di ni thams cad du gtogs pa yin pa'i phyir ro/ /de'i rang gi ngo bo bstan pa'i phyir rlung 'dren pa'i rtsa ba dang sdong bu dang / lo ma dang / me tog dang / 'bras bu bskol bas khrus bya ba ni de'i ming yin no zhes bya ba smras te/ rtsa ba dang / sdong bu dang / lo ma dang / me tog dang / 'bras bu rlung 'dren pa dag ste/ rtsa ba la sogs pa rlung 'dren pa de dag bskol ba des khrus bya ba ni/ de'i ming yin te/ legs par sbyar ba'i khrus zhes bya'o/ / ci de 'ba' zhig kho nas bkru'am zhe na de'i phyir/ bsku mnye byas te mi rtsub pa nyid kyi phyir ro zhes bya ba smras te/ 'bru mar la sogs pas bsku mnye byas nas phyis bkru bar bya ste/ ci'i phyir zhe na/ mi rtsub pa nyid kyi phyir ro/ /mi rtsub pa nyid dang ji ltar dbral bar bya zhe na/ de'i phyir de dang dbral ba'i phyir khrus chal gyis so zhes bya ba smras te/ mi rtsub pa nyid kyi phyir bsku mnye byas pa de dang dbral ba'i phyir sran chung gi phye la sogs pa khrus chal gyis lus bskus te khrus bya'o zhes bya ba'i tha tshig go/ /gal te khrus chal gyis lus bskus na'o na de nyid rtsub pa nyid du mi 'gyur ram zhe na/ de'i phyir snga ma'i ched du chu'i bum pa phyi mar snum thigs pa gnyis sam gsum blugs so zhes bya ba smras te/ snga ma mi rtsub pa nyid kyi phyir du phyis ldugs pa'i chu'i bum pa phyi mar snum thigs pa gnyis sam gsum dag blugs so zhes bstan to/ /ma brtags pa nyid ma yin par bstan pa'i phyir/ lcags kyi gzhong rings su khrus bya'o zhes bya ba smras te/ lcags kyi gzhong rings zhes bya ba ni gru chung ngu'i rnam pa 'dra ba yin te/ der khrus bya'o/ /khrus bzhin du thams cad kyis bcang bar thal bar mi 'gyur bar bya ba'i phyir/ de ni nad pas bcang bar bya ba zhes bya ba 'di brjod de/ lcags kyi gzhong rings de ni nad pa 'ba' zhig gis bcang bar bya'i gzhan gyis ni ma yin no/ /de'i steng du kha gab gzhug go zhes bya ba ni/ lcags kyi gzhong rings de'i steng du kha gab gzhug ste/ chu dron mo yun ring du gnas par bya ba'i phyir ro/ /de gnya' bar sngas nang tshangs can gzhug go zhes bya ba ni/ lcags kyi gzhong rings der gnya' ba'i phyogs su sngas nang tshangs can gzhug go zhes bya ba'i tha tshig ste/ des yun ring du gnas pas gnya' ba na bar mi 'gyur ro/ /khrus byas nas phyis rkang pa gnyis bkru bar bya ste/ de'i phyir gar bab bab tu rkang pa mi bkru'o zhes bya ba smras te/ khyams la sogs pa gar bab bab tu rkang pa gnyis mi bkru'o zhes bya ba'i tha tshig ste/ de ni gtsug lag khang gi dbang du byas pa yin no/ /'o na gang du zhe na/ de'i phyir de'i gnas ni wa khar ro zhes bya ba smras te/ rkang pa bkru bde'i gnas ni wa kha yin par rig par bya'o/ /'dir gzhung ni bcom ldan 'das kyis bka' stsal pa/ rkang pa wa khar bkru'o zhes gsungs pa yin no/ /rkang khrus kyi gzhi bya'o zhes bya ba la/ bya'o zhes bya ba'i byed pa'i tshig dang por sbyar ba ni 'dod pas spyod pa yin par bstan pa'i phyir ro/ /rkang khrus kyi gzhi zhes bya ba ni/ rkang pa bkru ba'i gnas zhes bya'o/ /de ni thams cad kyi thun mong yin te/ dge 'dun gyi phyogs su bya ba'i cho ga yin pa'i phyir ro/ /phyogs gang du zhe na/ de'i phyir gtsug lag khang gi steng gi shar lho mtshams su'o zhes bya ba smos te/ gtsug lag khang gi steng zhes bya ba ni khang thog go/ /gtsug lag khang gi sgo la brten nas shar dang lho'i phyogs kyi bar grwa'i mtshams su byed du gzhug go zhes bya ba'i tha tshig go/ /rnam pa ji lta bu zhe na/ de'i phyir rus sbal gyi rnam pa 'dra ba rtsub par ro zhes bya ba smras te/ gang gi rnam par ru sbal gyi rgyab 'dra ba de ni ru sbal gyi rnam pa 'dra ba ste de ltar ro/ /rtsub par ro zhes bya ba ni rud rud por te/ de ltar byed du gzhug go zhes bya bar sbyar ro/ /bde ba la reg par gnas par bya ba'i phyir/ chol zangs sa las byas pa gzhag par bya'o zhes bya ba smras te/ chol zangs zhes bya ba ni rkang lag bkru ba'i snod do/ /ci las byas pa zhe na/ de'i phyir sa las byas pa zhes bya ba smras te/ gzhag par bya'o zhes bya ba'i tha tshig go/ /'dir gzhung ni gser dang dngul dang bai DUR+Ya dang / shel las byas pa'i chol zangs dag bzhag par mi bya'i sa las byas pa gzhag par bya'o zhes gsungs pa yin no/ /rgya cher 'grel pa byed pa la la 'di skad ces sa las byas pa zhes gnyis pa smos pa las na/ zangs las byas pa la sogs pa yang bkag par shes so zhes zer te/ de lta yin na shing la sogs pa yang bkag par thal bar 'gyur ro/ /sa las byas pa zhes gnyis pa smos pa las ni de ltar mi 'gyur te/ sa las byas pa kho na'o zhes dmigs kyis bsal ba dang bcas par byas pa'i rigs so/ /gser la sogs pa ni bkag par grub pa yin no/ /de lta bas na gtso bo gser la sogs pa bkag pa'i tshig gis ni zangs las byas pa la sogs pa ni bya bar shes pa yin no/ /dbyibs ji ltar zhe na/ de'i phyir/ zhabs glang po che'i rmig mthil 'dra ba snying po can no zhes bya ba smras te/ chol zangs gang gi zhabs glang po che'i rmig mthil 'dra ba de ni/ zhabs glang po che'i rmig mthil 'dra ba'o/ /de ltar byed du gzhug go zhes bya bar sbyar te/ mi ldeg par gnas par bya ba'i phyir ro/ /zhabs zhes bya ba ni 'og gi mthil lo/ /snying po can zhes bya ba ni/ chol zangs gang la snying po yod pa de ni snying po can te/ dbyibs de lta bu dang ldan pa de byed du gzhug go zhes bya bar sbyar ro/ /snying po can zhes smras na/ de phyogs gang na yod pa'i snying po dang ldan pa mi shes pas de'i phyir/ dbus na yod pa ka dam pa'i me tog 'dra la rtsub pa dang ngo zhes bya ba smras te/ de dbus kyi phyogs na yod pa'i snying po dang ldan par byed du gzhug go zhes bya ba'i tha tshig go/ /rnam pa ci 'dra zhe na/ de'i phyir/ ka dam pa'i me tog 'dra la zhes bya ba la sogs pa smras te/ shing gdam pa'i me tog ltar dbyibs lcog lcog por 'dug la/ rtsub pa rud rud pa dang ldan pa'i chol zangs bcang bar bya'o zhes bya bar sbyar ro/ /ji ltar gzhag par bya zhe na/ de'i phyir bkrus nas kha bub tu gzhag go zhes bya ba smras te/ chol zangs khas bub tu gzhag go/ /ji ltar byas nas she na/ bkrus nas te chu gzhan gyis bkru'i rkang pa bkrus pa'i chus ni ma yin no/ /'dir gzhung ni rkang pa gnyis bkrus nas rkang pa bkrus pa'i chu gtsug lag khang gi phyi rol lam wa khar 'bor bcug ste/ yang 'khrur bcug nas so zhes gsungs pa yin no/ /gang du gzhag par bya zhe na/ de'i phyir dge 'dun gyi ni khang thog du'o zhes bya ba smras te/ dge 'dun gyi chol zangs ni khang thog khang pa'i steng du gzhag go/ /gang zag gi ni gnas khang du sgo glegs kyi phag tu'o zhes bya ba smras te/ gnas khang der sgo glegs kyi phag tu'o zhes bya ba ni/ gang zag gi chol zangs ni sgo glegs dang rtsig pa'i bar der gzhag par bya'o/ /gtsug lag khang gi phyogs gang du lhung bzed kyi byi dor la sogs pa byas pa der chus byug go zhes bya ba ni/ gtsug lag khang gi phyogs gang du lhung bzad kyi byi dor la sogs pa byed pa'i phyogs de chus byug go/ /sogs pa zhes bya ba'i sgras ni/ tshon gyi las la sogs pa bsdus te/ de'i phyogs chus byug go/ /yang na bsku'o zhes bya ba la bsku ba rnam pa ji lta bur bya zhe na/ de'i phyir/ mdud rtse'i rnam pa lta bu'am rdza rnga'i rnam pa lta bur ro zhes bya ba smras te/ dbyibs de 'dra bar bsku ba'o/ /bsku ba bstan na ji zhig gis bsku zhe na/ de'i phyir ba lang gi lci ba'am 'jim pas so zhes bya ba smras so/ /thams cad du yang rnam pa de ltar nges par 'gyur ram zhe na/ de'i phyir dkon mchog gi don nyid du bsku ba la ni rnam pa nges pa med do zhes bya ba smras te/ dkon mchog gi don nyid du bsku ba gang yin pa'i bsku ba de la ni dbyibs nges pa med do/ /dkon mchog dag gi ched du bsku ba gang yin pa de ni dkon mchog gi don to/ /de'i dngos po ni dkon mchog gi don nyid de/ dkon mchog gi don nyid du bsku ba de la ni dbyibs nges pa med do/ /rab tu byung ba'i gzhi'i zhar la/ lhung bzed med pa rab tu dbyung ba dang rdzogs par bsnyen pa mi bya'o zhes bya ba smras te/ lhung bzed med par dge tshul gyi mkhan po dang slob dpon dang / zhu ba'i dge slong dag gis rab tu dbyung bar mi bya ste/ de lta bas na mkhan po la sogs pa de dag bsdu ba'i phyir mang po'i tshig tu bya'o/ /rdzogs par bsnyen par mi bya'o zhes bya ba ni/ dge 'dun du 'gyur ba'i dge slong dag gis so/ /chung ngu dang chen po dang skyabs kyang mi bya'o zhes bya ba ni/ lhung bzed chung ngu dang chen po dang skyabs rab tu dbyung ba dang rdzogs par bsnyen par mi bya ba'o/ /chung ngu dang chen pos mi bya'o zhes bya ba la sogs pa smras pas/ de'i phyir lhung bzed byin gyis brlab tu rung ba gsum gyi tshad nges par shes par bya ba'i phyir/ kha'i cha'i mtha' kho na nas mthe bo'i lto gang gis lhag par 'bras thug po che ma ga d+hA'i bre'u cung gang btsos pa sran tshod dang bcas tshod ma dang bcas pa lhag pa nas do'i bar de shong ba de ni rigs pa yin no zhes bya ba smras te/ lhung bzed kyi smad kyi cha lhag mar 'bras thug po che bre'u chung gang btsos pa shong zhing chud pa'i lhung bzed gang yin pa de ni rigs pa yin no zhes bya bar sbyar ro/ /gang gi lhag mar zhe na/ kha'i cha'i mtha' kho na nas zhes bya ba smras te/ de ni kha yang yin la/ cha yang yin pas kha'i cha'o/ /kha'i cha'i mtha' ni mchu ste/ mu zhes bya ba yin no/ /kha'i cha'i mtha' de kho na ni kha'i cha'i mtha' kho na'o/ /kha'i cha'i mtha' kho na de nas tshad ji tsam gyis zhe na/ de'i phyir mthe bo'i lto gang gi zhes bya ba smras te/ mthe bo'i lto ni mthe bo'i lto ste/ mthe bo'i tshigs kyi phyogs gcig nas brtsams te/ tshigs kyi phyogs gcig gi bar ni mthe bo'i lto zhes bya'o/ /gang gi kha'i cha'i mtha' kho na nas mthe bo'i lto'i tshad de nyid yod pa de ni mthe bo'i lto gang ngo / /kha'i cha'i mtha' kho na nas mthe bo'i lto gang bzhag pa de'i lhag ma smad kyi cha gang yin pa'i smad kyi lhag ma der shong ba'i lhung bzed gang yin pa'o/ /ci zhig shong zhe na/ de'i phyir 'bras thug po che ma gad+hA'i bre'u chung gang btsos pa zhes bya ba smras te/ 'bras thug po che ma gad+h+rA'i bre'u chung gang btsos pa ni 'bras thug po che ma ga d+hA'i bre'u chung gang btsos pa ste/ de shong ba'o/ /ci de 'ba' zhig gam zhe na/ ma yin te/ de'i phyir/ sran tshod dang bcas tshod ma dang bcas pa zhes bya ba smras te/ 'di ltar tshod ma dag mang ba yin mod kyi/ 'on kyang tshod ma ji tsam gyis 'bras chan sbags nus pa de'i tshad kho na'i tshod ma 'dir gzung gi/ lhag pa ni ma yin te/ de ni lhung bzed chung ngu'i tshad yin no/ /'brid dang chen po'i tshad ji tsam zhe na/ de'i phyir lhag pa nas do'i bar de shong zhes bya ba smras te/ 'bras thug po che ma ga d+h+wa'i bye'u chung gang btsos pa las lhag pa nas bre'u chung dor ma chog pa'i bar sran tshod dang bcas tshod ma dang bcas pa shong zhing de chud pa ni lhung bzed 'bring po'i tshad yin no/ /'bras thug po che ma ga d+hA'i bre'u chung do btsos pa sran tshod dang bcas tshod ma dang bcas pa bza' ba dang rjes su mthun pa de shong zhing chud pa'i lhung bzed gang yin pa de ni lhung bzed chen po'i tshad yin no/ /lhung bzed gsum po de ni rigs pa yin te/ rigs pa las ma 'das pa ni rigs pa ste byin gyis brlab tu rung ba zhes bya ba'i tha tshig go/ /'dir ma ga d+hA'i bre'u chung zhes bya ba'i sgras ni/ 'bras thug po che skam po yul dbus kyi srang bcu drug brjod par rig par bya'o/ /dge slong rnams kyi lhung bzed kyi tshad bstan nas dge slong ma rnams kyi brjod pa'i phyir/ dge slong mas dge slong gi chung ngu las lhag pa mi bcang ngo zhes bya ba smras te/ dge slong mas dge slong rnams kyi lhung bzed chung ngu gang yin pa de las lhag pa'i lhung bzed mi bcang ngo / /'di skad bstan te/ dge slong rnams kyi lhung bzed chung ngu gang yin pa de ni dge slong ma rnams kyi chen po yin te/ de las lhag pa bcang bar mi bya'o/ /de dag gi lhung bzed chung ngu ni 'bras thug po che btsos pa sran tshod dang bcas tshod ma dang bcas pa 'grangs pa tsam shong ba yin no/ /'bring ni de gnyis kyi bar gyi mtshams yin par don gyis khong du chud par bya'o/ / //bam po lnga pa/ lhung bzed kyi gzhi brjod par 'dod nas/ des de'i gzhir zha nye'i dbyar 'dab gzhag par bya'o zhes bya ba smras te/ des zhes bya ba ni dge slong mas so/ /de'i zhes bya ba ni lhung bzed kyi'o/ /gzhir zhes bya ba ni sa'i phyogs gang du lhung bzed bzhag pa'i 'og gzhi gang yin pa de ni gzhi'o/ /der zha nye'i dbyar 'dab gzhag par bya ste/ der zha nye'i dbyar 'dab gzhag go zhes bya ba'i tha tshig go/ /de'i rnam pa ci 'dra zhe na/ de'i phyir/ byang chub dang pa Ta'i lo ma'am lag mthil gyi lta bur ro zhes bya ba smras te/ byang chub kyi shing dang shing pa Ta'i lo ma gang yin pa de'i dbyibs lta bur ro zhes bya ba'i tha tshig go/ /yang na lag mthil gyi dbyibs ci 'dra ba de lta bu der gzhug go zhes bya bar sbyar ro/ /tshad shes par bya ba'i phyir/ tshad las kyang ngo zhes bya ba smras te/ kyang ngo zhes bya ba ni/ mdo snga ma drang ba'i don to/ /de ltar na 'di tshig gi don 'di 'byung ste/ byang chub kyi shing dang / shing pa Ta'i lo ma tshad gang yin pa dang / lag mthil gyi tshad gang yin pa de'i tshad tsam du zha nye'i dbyar 'dab kyi tshad kyang rig par bya'o/ /brnyan pos kyang de nyid dang bcas pa yin no zhes bya ba ni/ lhung bzed brnyan pos kyang de nyid dang bcas pa yin te/ lhung bzed nyid dang bcas pa yin no zhes bya ba'i tha tshig go/ /dbyar dag kyang brnyan pos lhung bzed dang bcas pa nyid yin na/ mtshungs pas 'dra bar bstan pa'i phyir/ /lnga po dag de bzhin no zhes bya ba smras te/ lnga po yang zhes bya ba ni/ chos gos gsum dang stan dang chu tshags so/ /ji ltar lhung bzed brnyan pos de nyid dang bcas pa yin pa bzhin du lnga po yang de bzhin no zhes bya ba'i tha tshig go/ /'dir gzhung ni de lta bas na yo byad drug po brnyas pa dag gis kyang rab tu dbyung bar bya'o zhes gsungs pa yin no/ /dbyar dag lhung bzed med du mi rung ngo zhes bya ba la/ gang la lhung bzed med pa de ni lhung bzed med pa ste/ dbyar dag lhung bzed med du mi rung ngo zhes bya ba'i tha tshig go/ /ljongs rgyu zhing 'gro bar mi bya'o zhes bya ba ni/ lhung bzed med par ljongs rgyu zhing 'gro bar mi bya'o/ /'jigs pa dang bcas pa nyid du lhung bzed chung ngus 'gro bar bya'o zhes bya ba la 'jigs pa dang bcas par 'gro ba ni 'jigs pa dang bcas pa'i lam mo/ /de'i dngos po ni 'jigs pa dang bcas pa nyid do/ /'jigs pa dang bcas pa nyid du gyur na/ lhung bzed chung ngu thogs te 'gro bar bya'o/ /'dir gzhung ni bcom ldan 'das kyis bka' stsal pa/ dge slong gis lhung bzed med par ljongs rgyu zhing 'gro bar mi bya'o/ /ma byin par len pa dag gis bcom nas/ bcom ldan 'das kyis bka' stsal pa/ lhung bzed chung ngu bskur bar bya zhing / lhung bzed gzhag par bya ba'o/ /dbyar dag lhung bzed nye bar bzhag par bya'o zhes gsungs pa yin no/ /med na rab tu dbyung bar bya'o zhes bya ba ni/ lhung bzed med na'o/ /'di skad bstan te/ lhung bzed med na rab tu dbyung bar bya'o/ /rdzogs par bsnyen par mi bya'o/ /'greng bzhin du lhung bzed dbyung ba dang gzhug pa dang bskam par mi bya'o zhes bya ba ni/ 'greng bzhin du lhung bzed kyi snod nas lhung bzed dbyung bar mi bya der gzhug par yang mi bya zhing / 'greng bzhin du lhung bzed bskam par yang mi bya ba ste/ de ni lhung bzed ltung ba spang ba'i phyir ro/ /ran par spyad par bya'o zhes bya ba la/ ran par zhes bya ba ni/ 'os par te des lhung bzed spyad par bya'o/ / ran par spyad pa bstan pa'i phyir/ gzhan gyis spang ba der mi blugs so zhes bya ba smras te/ snod la sogs pa gzhan gyis spang bar dor ba'i chus lhung bzed der mi blugs so/ /des phyag dar mi dor ro zhes bya ba ni/ lhung bzed des phyag dar mi dor ro/ /ngan pa yang mi dor ro zhes bya ba ni/ lhung bzed kyis mi dor ro zhes bya bar sbyar ro/ /shing tog la sogs pa zos pa'i lhag ma shun pa la sogs pa ni ngan pa zhes bya'o/ /lag pa dang kha'i chu mi blugs so zhes bya ba ni/ lag pa bsnyal ba'i chu dang kha bkru ba'i chu lhung bzed du mi blugs pa ste/ de dag thams cad ni ma gus par spyod pa spang ba'i phyir ro/ /dge tshul bag med pa'i chos can byi dor byed du mi gzhug go zhes bya ba la/ gang la bag med pa'i chos yod pa de ni bag med pa'i chos can te/ dge tshul de lhung bzed byi dor byed du mi gzhug go/ /de ni 'chag pa la sogs pa spang ba'i phyir ro/ /bye ma can dang lci bas mi bya'o zhes bya ba la/ bye ma dang lhan cig 'dres pa ni bye ma can no/ /lci ba ni ba lang gi lci ba ste/ des lhung bzed byi dor mi bya'o/ /de ni 'chas pa la sogs pa'i skyon spang ba'i phyir ro/ /ha cang gsher bzhin du phyir mi gzhug go zhes bya ba ni/ chu'i lhag ma yod bzhin du lhung bzed snod la sogs par phyir mi gzhug mi sba ste/ de ni btsa' 'chags par 'gyur ba'i skyon spang ba'i phyir ro/ /ha cang bskam par mi bya'o zhes bya ba ni/ lhung bzed ha cang rung bar 'gyur ba de ltar mi bya ba ste/ de ni rtsub pa nyid kyi skyon spang ba'i phyir ro/ /rdo'i steng du mi gzhag go zhes bya ba ni/ re zhig kyang mi gzhag go zhes bya ba'i tha tshig go/ /mi gtsang ba'i phyogs su mi gzhag go zhes bya ba ni/ lhung bzed ni shin tu rung ba yin pa'i phyir ro/ /gar bab bab tu ma yin no zhes bya ba ni/ phyogs zhes bya ba dang mi gzhag go zhes bya bar sbyor ro/ /de ltar na 'dir tshig gi don 'di 'byung ste/ khyams la sogs pa ma bshams pa'i phyogs gang yin pa der lhung bzed re zhig kyang mi gzhag go/ /der mi gzhag go zhes bya ba ni/ gar bab bab der lhung bzed mi gzhag go/ /'di ni gtan du gzhag pa'i phyir dgag pa yin gyi/ re zhig kho na ni ma yin no/ /lhung bzed dus thams cad du gzhag pa'i gnas bstan pa'i phyir/ de'i ched du ngos khung bya'o zhes bya ba smras te/ de'i ched du zhes bya ba ni/ lhung bzed gzhag pa'i ched du ste/ ngos khung bya'o/ /khung bu ba lang gi mig gi dbyibs 'dra ba ni/ ngos khung zhes bya'o/ /ngos khung ji ltar bya zhe na/ de'i phyir/ gtsug lag khang dang khang khyim dag rtsig pa'i tshe bya'i rtsig pa brko bas ni ma yin no zhes bya ba smras te/ gtsug lag khang dang khang khyim dag byed pa'i tshe na ngos khung bya'o/ /brko bas ni ma yin no zhes bya ba ni/ gtsug lag khang byas zin pa'i rtsig pa brko ba'i thabs kyis ni ma yin te de ni grong 'dab pa rnams kyi cho ga bstan pa yin no/ /da ni dgon pa pa rnams kyi ched du bstan pa'i phyir/ dgon pa pa rnams kyis skon bu kha sbyar bya'o zhes bya ba smras te/ dge slong dgon pa pa rnams kyis lhung bzed gzhag pa'i skon bu kha sbyar bya'o/ /de ci las bya zhe na/ de'i phyir lcug ma'am srad bu las bas pa'o zhes bya ba smras te/ lcug ma las bsgyur ba'am/ srad bu las bsgyur ba ste/ srad bu las byas pa'o zhes bya ba'i tha tshig go/ /bsgyur ba ni byas pa yin par ston pa'i phyir ro/ /lci ba dang sas byugs pa'o zhes bya ba ni/ byugs pa'i skon bu kha sbyar bya'o/ /ci zhig gis byugs she na/ lci ba dang sas zhes bya ba ste/ ba lang gi lci ba dang sar bsres pa ste des byugs pa'o/ /kha gab rnam pa de lta bu dang bcas pa'o zhes bya ba la/ kha gab de rnam pa de lta bu yin pa ni/ kha gab rnam pa de lta bu ste/ rnam pa de lta bu zhes bya ba ni/ lcug ma las byas pa'am/ srad bu la ma byas pa lci ba dang sar bsres pas byugs pa'o/ /kha gab rnam pa de lta bu dang ldan pa ni/ kha gab rnam pa de lta bu dang bcas pa ste/ skon bu kha gab rnam pa de lta bu dang bcas pa de bya'o/ /de ni gzar thag gis shing las dpyangs na bzang ngo zhes bya ba ni/ skon bu kha sbyar de ni shing ljon pa'i shing las dpyangs na bzang ste rigs so/ /ci zhig gis she na/ gzar thag gis te/ thag pas zhes bya ba'i tha tshig go/ /de'i phyir skon bu kha sbyar la mkha' 'phreng zhes kyang bya'o/ /sa la mi gzhag go zhes bya ba ni/ skon bu kha sbyar sa la gzhag par mi bya'o/ /tshig de ni sril za ba la sogs pa'i skyon spang ba'i phyir ro/ /de gzhan du mi bskur ro zhes bya ba ni/ skon bu kha sbyar de yul gzhan du mi bskur ro/ /de ni khur khyer ba la sogs pa'i skyon spang ba'i phyir ro/ /'o na gar bcug ste bskur bar bya zhe na de'i phyir/ snod du bcug ste bskur bar bya'o zhes bya ba smras te/ lhung bzed snod du bcug ste yul gzhan du bskur bar bya'o/ /lag pas mi bskur ro zhes bya ba ni/ lhung bzed bskur ba'o/ /'o na cis bskur zhe na/ de'i phyir de bskur ba ni lung thag btags te mchan khung gis so zhes bya ba smras te/ lhung bzed de bskur ba'o/ /lung btags te zhes bya ba ni/ lhung bzed snod kyi lung btags te zhes bya ba'i tha tshig go/ /lus kyi yan lag gang gis bskur zhe na/ de'i phyir mchan khung gis so zhes bya ba smras te/ mchan 'og tu bcangs te bskur ro/ /lhung bzed kyi snod kyi zhar la lhung bzed dang sman dang bar bur dag snod tha dad par gzhug go zhes bya ba 'di brjod de/ lhung bzed dang sman dang / bar bur dag ni de dag nyid do/ /de ltar na lhung bzed la sogs pa de dag snod gsum po dag tu so sor gzhug par bya'i/ thams cad gcig tu ni mi gzhug go/ /skud ma dang khab ral dang ldan pa la sogs pa dag ni/ bar bur gyi sgras brjod do/ /de dag bcang bar bya'o zhes bya ba ni lhung bzed la sogs pa'i snod dag go/ /de dag la dpyang ba'i lung thag mnyam par gdags par mi bya'o zhes bya ba la/ lung thag gang dag gi dpyang ba mtho dman mnyam par gyur pa de dag ni dpyang pa'i lung thag mnyam pa'o/ /de bas na snod gsum po de dag la dpyang ba'i lung thag mnyam pa de dag gdags pa gzhag par mi bya mi sbyar ro/ /'di skad bstan te/ snod de dag la dpyang ba'i lung thag srid mnyam par mi bya'o zhes bya ba'i tha tshig go/ /de ltar yang gleng gzhi ni 'phags pa 'di ci/ rdza rnga'am zhes bya ba yin no/ /sdug bsngal mi 'dod pas ni zheng chung ngu dag kyang ngo zhes bya ba la/ kyang ngo zhes bya ba las ni snod de dag la lung thag btags pa zheng chung ngu dag kyang mi bya'o zhes bya bar sbyar ro/ /ci'i phyir zhe na/ de'i phyir sdug bsngal mi 'dod pas ni zhes bya ba smras te/ gang sdug bsngal 'dod par mi byed pa'i gang zag de ni sdug bsngal mi 'dod pa ste/ des de dag kyang mi bya'o/ /zhum par mi 'gyur bar bya ba'i phyir dbus su phying bus sbyar bar bya'o zhes bya ba ni/ lung thag de dag zhum par mi 'gyur bar bya ba'i phyir phying bus sbyar bar bya'o zhes bstan pa yin no/ /phyogs gang du phying bus sbyar bar bya zhe na/ de'i phyir/ dbus su zhes bya ba smras te/ gang gi dbus su zhe na/ lung thag gi zhes bya ba bar skabs las shes par 'gyur te/ phying bu stug pos sbyar bar bya'o/ /de gnas par bya ba'i phyir mdo mdor bya rog rkang bya'o zhes bya ba ni/ phying bu de gnas pa mi 'gyur bar bya ba'i phyir mdo mdor skabs skabs su bya rog rkang gi gzungs gdab par bya ste/ bya rog rkang gi dbyibs 'dra bar drub bo zhes bya ba'i tha tshig go/ /lhung bzed yongs su bskyang ba'i bye brag bstan nas/ da ni gus pa bskyed pa'i phyir spyir brjod par bya ste/ lhung bzed mig bzhin du bskyang bar bya'o zhes bya ba ni ji ltar mig gnod pa thams cad las bskyab par bya ba ltar dge slong gis lhung bzed kyang de bzhin du bskyab par bya'o/ /shin tu gus pa bskyed pa'i phyir mig dpe nyid du gzhag go/ / snam sbyar pags pa 'dra bar ro zhes bya ba ni/ ji ltar pags pa rlung dang nyi ma dang char pa la sogs pa dag las bskyab par bya ba ltar/ dge slong gis snam sbyar yang de bzhin du bskyab par bya ba'o/ /chos gos lhag ma yang ngo zhes bya ba ni/ pags pa dang 'dra bar bskyab par bya'o zhes bya bar sbyar ro/ /dran par spyad pa'i zhar la chos gos la sogs pa de dag yongs su bskyab par bstan to/ /gal te lhung bzed la sogs pa dag longs spyod na dengs par gyur na/ de'i tshe de ji ltar bya zhe na/ de'i phyir bcos legs bya ba yal bar mi dor ro zhes bya ba smras te/ lhung bzed kyi bcos legs ni glan pa dang bsreg pa dang / snum gyis bsku ba dang / byi dor bya ba la sogs pa'o/ /chos gos kyi bcos legs ni/ bkru ba dang / drub pa dang / kha bsgyur ba la sogs pa'o/ /de dag bya ba yal bar mi dor te/ der lhur blang bar bya'o zhes bya ba'i tha tshig go/ / bcos legs bya ba smras na/ de ji zhig dang ji ltar dang gang du bya ba de mi shes pas/ de'i phyir 'di man chad de dag brjod par bya ste/ lhung bzed glan pa la nan tan du bya'o zhes bya ba ni/ dge slong gis lhung bzed glan pa la nan tan bya ste/ las su bya'o zhes bya ba'i tha tshig go/ /lag bzo'i tha snyad bsal ba'i phyir/ dben pa'i phyogs su'o zhes bya ba smras te/ de la mgar spyad dag dgos pa gang zag gis bsrel ba tshul dang mthun pa ma yin par bstan pa'i phyir/ dge 'dun gyis mgar spyad dag bsrel bar bya'o zhes bya ba smras te/ dge 'dun gyi mgar spyad dag bsrel bar bya'i gang zag gis ni ma yin no/ / lhung bzed glan pa la nan tan bya'o zhes smras na/ gang la jis glan pa de brjod par bya ste/ re zhig dgag pa bstan pa'i phyir/ bu gu'i lhan pa bu ram dang rgya skyegs kyi tshigs ma dang / spra tshil dang ro nye dang tshon mo steng de dag mi bzang ngo zhes bya ba smras te/ mi bzang ba ni cha ma yin no/ /'di skad bstan te/ bu gu'i lhan par bu ram dang rgya skyegs kyi tshigs ma dang / spra tshil dang ro nye dang tshon mo steng dag mi rung ste/ mi sra ba'i phyir ro/ /'o na gang bzang zhe na/ de'i phyir lhan rings dang tham phran dang lhan pa chu srin gyi so lta bu dag bzang ngo zhes bya ba smras te/ bzang ba ni cha ma yin pa'o/ /'di skad bstan te/ bu gu'i lhan par bu ram dang / rgya skyegs kyi tshigs ma dang / spra tshil dang ro nye dang tshon mo'o/ /bu gu'i lhan par lhan rings la sogs pa dag rung ste/ sra ba'i phyir ro/ /lhung bzed kyi lhan pa lcags las byas pa'i ring po ni lhan rings zhes bya'o/ /bu gu dgag pa'i lcags gzer mgo leb ni tham phran zhes bya'o/ /lcags kyi lhan pa de nyid gru bzhi'am zlum po'am zur gsum du byas pa ni lhan pa yin no/ /de nyid kyi mtha' thams cad sog le'i so lta bu dang ldan pa ni chu srin gyi so lta bu yin no/ /phye mas kyang ngo zhes bya ba ni/ lcags kyi'am rdo'i lta bu'o zhes bya ba dang sbyar te/ lcags kyi'am rdo'i phye mas glan na bzang ngo / /'og ma dang sbyar ba'i don du rnam par dbye ba yin no/ /'bru mar dang bdar ba spra tshil 'dra ba la thug par gyur pas so zhes bya ba ni/ phye mas glan pa 'ba' zhig la yin gyi lhan rings la sogs pa la ni ma yin no/ /'bru mar dang phye ma lhan cig bdar ba ni 'bru mar bdar ba'o/ /ji srid du bdar ba zhe na/ de'i phyir spra tshil 'dra ba la thug par gyur pas so zhes bya ba smras te/ phye ma de spra tshil 'dra ba la thug par gyur pa'i bar du bdar bas so/ /rdzas ci zhig gis bdar bar bya zhe na/ de'i phyir lcags sam ku ru bin das so zhes bya ba smras te/ ku ru bin da zhes bya ba ni rdo'i bye brag go/ /'di skad bstan te/ 'bru mar dang phye mar bsres nas lcags sam rdo ku ru bin das ji srid du spra tshil 'dra bar gyur pa de srid du bdar bar bya'o zhes bya ba'i tha tshig go/ /dro ba la glan no zhes bya ba ni/ lhung bzed dro ba la phye ma bdar bas glan pa'o/ /gro bas g.yogs te 'jim pas bskus la ci ran tsam du bsro'o zhes bya ba ni/ lhung bzed dron po la phye ma bdar ba des glan pa'i steng du gro bas g.yogs te bkab nas de'i steng du 'jim pas bskus la ci ran tsam du bsro bar bya ba'o/ /'di skad bstan te/ gang gi tshe lhung bzed la phye ma btags pa des glan pa de'i tshe gro bas g.yogs par bya zhing / gro ba'i steng du 'jim pas bsku bar byas la/ de'i 'og tu lhung bzed ci ran tsam du bsro bar bya'o zhes bya ba'i tha tshig go/ /'bru mar gyis bdar ro zhes bya ba ni/ lhung bzed la lhan pa glan pa 'bru mar gyis sbyangs la rdo 'jam po la sogs pas bdar bar bya'o zhes bstan pa yin no/ /lcags kyi lhan pa bstan nas/ sa las byas pa'i lhan pa ji ltar bya zhe na/ de'i phyir sa las byas pa'i ni bu ram dang 'jim pas so zhes bya ba smras te/ sa las byas pa'i lhung bzed la ni bu ram dang 'jim pa bsres pas glan par shes par bya'o/ / glan pa de yang snga ma bzhin du bya ste/ 'bru mar dang bdar ba spra tshil 'dra ba la thug par gyur pas dro ba la glan nas gro bas g.yogs te/ 'jim pas bskus la ci ran tsam du bsro nas 'bru mar gyis bdar ro zhes sngar bstan pa de dag thams cad 'dir yang sbyar bar bya'o/ / glan pa bstan nas/ bsreg pa brjod par bya ba'i phyir/ spyod pa nyid yin na zla ba drug gi 'og tu bsreg pa nyid yin no zhes bya ba smras te/ lhung bzed spyod pa nyid yin na/ zla ba drug gi 'og tu bsreg pa nyid yin te/ bsreg par 'os pa nyid yin no/ /'di skad bstan te/ gal te nyin gcig bzhin du lhung bzed des zas kyi bya ba byed na de'i tshe lhung bzed de zla ba drug gi mthar bsreg par 'os par 'gyur bas de'i dus su bsreg par bya'o zhes bya ba'i tha tshig go/ /sa las byas pa'i lhung bzed kyi bsrag pa'i dus bstan pa'i phyir/ gal te sa las byas pa yin na zla ba phyed na'o zhes bya ba smras te/ gal te sa las byas pa'i lhung bzed nar mar spyod pa nyid yin na/ de ni zla ba phyed kyi mthar bsreg par 'os pa nyid du 'gyur bas de'i dus su bsreg par bya'o/ /gal te lhung bzed kyang bsreg par 'os par gyur la dbyar kyang nye bar gnas par gyur na de'i tshe ji ltar longs spyad par bya zhe na/ de'i phyir gal te dbyar byung na de bya ba'i bar du bsku ba dang rtsub khrus nyid kyis legs par bcos pa nyid bya'o zhes bya ba smras te/ gal te dbyar gyi dus byung bar gyur na/ de'i tshe lhung bzed de spyod pa'i thabs ni 'di yin te/ bsod snyoms kyis blang ba dang bza' ba 'dzin pa gang yin pa de ni lhung bzed kyi bya ba yin no/ /de yang nyin gcig bzhin 'byung bas du ma yod de du ma de'i bar ni bsod snyoms 'dzin pas stong pa'i dus te/ de yang zan zos pa'i 'og tu phan chad phyi de nyin par bsod snyoms la 'gro ba'i mdun tshun chad kyi bar ro/ /der bsod snyoms bza' ba la sogs pa byas nas 'bru mar la sogs pas bsku ba byas te/ gzhag par bya'o/ /yang phyi de nyin par bsod snyoms la 'gro ba'i tshe lci skam la sogs pas rtsub khrus bya'o/ /de'i 'og tu yang zas kyi bya ba byas nas phyi de nyin par bsod snyoms la 'gro ba'i dus kyi bya ba'i bar du 'bru mar la sogs pas bskus te gzhag par bya'o/ /bsku ba dang rtsub khrus nyid ni bsku ba dang / rtsub khrus nyid de/ bsku ba dang rtsub khrus de nyid kyis lhung bzed de'i bya ba'i bar du legs par bcos pa nyid bya'o zhes bya bar sbyar ro/ /de bsreg par bya'o zhes bya ba ni/ lhung bzed de'o/ /lhung bzed bsreg par bya ba'i bsreg pa'i thabs bstan pa'i phyir/ de'i ched du rdza bo bsrel bar bya'o zhes bya ba smras te/ lhung bzed bsreg pa de'i ched du rdza bo bya'o/ /de ji lta bu zhig ce na/ de'i phyir de nyid du grub pa'am dbyib mo yang rung ngo zhes bya ba smras te/ de nyid du grub pa zhes bya ba la/ rdza bo de'i dngos po ni de nyid do/ /de nyid kho nar gyur pa ni de nyid du grub pa ste/ gang rdza bo'i gzugs nyid du grub pa'o/ /ci de kho nas bya ba yin nam zhe na/ ma yin te de'i phyir dbyib mo yang rung ngo zhes bya ba smras te/ bsrel bar bya'o zhes bya bar sbyar ro/ /dbyib mo'i bdag nyid kyi rdza bo bya ba'i thabs su rung ba bstan pa'i phyir/ thal bas bkang ste rdza gzong gis brkos na bzang ngo zhes bya ba smras te/ dbyib mo thal bas 'gengs su bcug ste/ bkang nas de'i 'og tu rdza gzong lcags phur zhes bya bas dbyib mo la gcags na bzang ste/ rung bar 'gyur ro zhes bya ba'i tha tshig go/ /rdza gzong de ga las btsal zhe na/ de'i phyir de bcang bar bya'o zhes bya ba smras te/ rdza gzong de'o/ /rdza bos ji ltar bya zhe na/ de'i phyir des du ba mi 'chor bar dgab po zhes bya ba smras te/ rdza bo des lhung bzed dgab par bya'o/ /ji ltar dgab ce na/ de'i phyir du ba mi 'chor bar zhes bya ba smras te/ de la du ba phyir 'byung zhing 'gro ba ni du ba 'chor ba'o/ /du ba phyir mi 'byung zhing mi 'gro ba ni du ba mi 'chor ba ste/ dgab pa gang la du ba mi 'chor ba yod pa'i dgab pa de ni du ba mi 'chor ba'o/ /'di skad bstan te/ ci ltar byas na du ba mi 'chor ba de lta bu dgab par bya'o zhes bya ba'i tha tshig go/ /rdza bos dgab po zhes bstan na/ ci rdza bo nyid kyi phyi rol byugs pas sam 'on te ma byugs pas she na/ de'i phyir/ phub ma dang 'jim par sbyar bas phyi rol byugs pas so zhes bya ba smras te/ dgab pa gang gi phyi rol phub ma dang 'jim pa bsres pas byugs pa de ni phub ma dang 'jim par sbyar bas phyi rol byugs pa ste/ des dgab par bya'o/ /nang ci zhig gis bsku bar bya zhe na/ de'i phyir 'bru mar gyi tshigs ma'am lci bas nang byugs pas so zhes bya ba smras te/ de'i nang 'bru mar gyi tshigs ma'am ba lang gi lci bas byugs pa ni nang byugs pa ste/ rdza bo nang byugs pa des dgab par bya'o/ /ci nang dang phyi rol gyi skyang nyul ma bskams pas sam zhe na/ ma yin te de'i phyir/ bskams par gyur pas so zhes bya ba smras te/ bskams zin pas so zhes bya ba'i tha tshig go/ /sa gzhi ji 'dra bar gzhi ci bting ba'i steng du lhung bzed ji ltar gzhag pa la rdza bos dgab par bya zhe na/ de'i phyir sa gzhi byi dor byas par phub ma bting zhing du ba 'tsher par byed pa 'bru mar gyi tshigs ma la sogs pa'i rdzas bkram pa'i steng du kha bub tu gzhag pa la'o zhes bya ba smras te/ sa gzhi byi dor byas par zhes bya ba la/ byi dor byas pa zhes bya ba ni/ sa gzhi gang du brko ba dang zhal zhal dang brtags pa la sogs pa byas pa de ni sa gzhi byi dor byas pa ste der ro/ /phub ma bting zhing zhes bya ba la/ gang du phub ma bting ba de ni phub ma bting ba ste der ro/ /du ba 'tsher ba zhes bya ba ni/ de du ba yang yin la 'tsher ba yang yin pas du ba 'tsher ba'o/ /de byed pa zhes bya ba ni/ du ba 'tsher bar byed pa'o/ /de dag kyang gang zhe na/ de'i phyir 'bru mar gyi tshigs ma la sogs pa'i rdzas zhes bya ba smras te/ 'bru mar gyi tshigs ma la sogs pa nyid rdzas so/ /de dag ni du ba 'tsher bar byed pa yang yin la 'bru mar gyi tshigs ma la sogs pa'i rdzas kyang yin no/ /gang du de dag bkram pa de ni du ba 'tsher bar byed pa 'bru mar gyi tshigs ma la sogs pa'i rdzas bkram pa yin no/ /rnam pa de lta bu'i sa gzhi'i steng du lhung bzed gzhag pa bkod pa la rdza bo nges dgab par bya'o/ /rnam pa ji ltar gzhag pa'i lhung bzed la zhe na/ de'i phyir kha bub tu zhes bya ba smras te/ kha thur du bstan ces bya ba'i tha tshig go/ /'di skad bstan te/ je dang po kho nar bsko ba la sogs pas sa gzhi byi dor bya'o/ /de'i 'og tu phub ma dag gding bar bya'o/ /de'i 'og tu du ba 'tsher bar byed pa'i rdzas dag dgram par bya ste/ rnam pa de lta bu'i sa gzhir lhung bzed kha bub tu gzhag par bya zhing / sngar bstan pa'i rdza bos dgab par bya'o zhes bya ba'i tha tshig go/ /de'i 'og tu ci zhig bya zhe na/ de'i phyir/ lci ba dag dang sog mas bcer te me sbar te zhes bya ba smras te/ ba lang gi lci ba dag dang sog mas rdza bo g.yogs par bya zhing g.yogs nas de'i mod la lci ba la sogs pa'i me sbar bar bya ste/ me btang ngo zhes bya ba'i tha tshig go/ /te por grangs nas dbyung ngo zhes bya ba ni/ lhung bzed dbyung ba ste/ lhung bzed te por grangs par shes nas bsreg pa'i gnas nas dbyung bar bya'o zhes bya ba'i tha tshig go/ /lhung bzed bsreg pa rgyun chags su lan du tsam bya zhe na/ de'i phyir kha dog rdzogs pa phun sum tshogs par 'gyur gyi bar du bzlas par bya'o zhes bya ba smras te/ de kha dog kyang yin la rdzogs pa yang yin pas kha dog rdzogs pa ste/ kha dog yongs su rdzogs pa'o/ /de'i phun sum tshogs pa ni grub pa ste/ kha dog rdzogs pa phun sum tshogs par gyur pa'o/ /kha dog rdzogs pa phun sum tshogs par gyur gyi bar du bzlas par bya ste/ yang dang yang du bsreg par bya ba'o/ /'di skad bstan te/ ji srid du lhung bzed kyi kha dog yongs su rdzogs par gyur gyi bar du de srid du yang dang yang du bzlas shing bsreg par bya'o/ /ji ltar yang dang yang du bzlas par bya zhe na/ de'i phyir/ byi dor byas shing byi dor byas shing gzhug par bya'o zhes bya ba smras te/ bsreg pa bsreg pa na byi dor byas shing byi dor byas shing bsreg pa'i gnas su gzhug par bya'o zhes bya ba'i tha tshig go/ /srog chags rnams la snying brtse bas nyen kor phyag dar dang chag chag bya'o zhes bya ba ni/ srog chags rnams la rjes su snying brtse bas bsreg pa'i gnas kyi nyen kor phyag dar phyag par bya ba dang / nyen kor nyid du chus chag chag gdab par bya ba'o/ /lhung bzed med par rab tu dbyung ba dang / rdzogs par bsnyen par mi bya'o zhes bya ba de'i zhar la 'ongs pa lhung bzed kyi cho ga 'khor dang bcas pa bstan nas/ rab tu 'byung ba'i gzhi dang 'brel ba phran tshegs la sogs pa las 'byung ba gzhan brjod par bya ste/ lo tshigs mi shes na mtshan gyi nyen kor du spu skyes pa rdzogs par bsnyen par khas blang bar bya'o zhes bya ba ni/ spu skyes pa ni lo tshigs yongs su shes pa'i rgyu mtshan yin pas rdzogs par bsnyen par khas blang bar bya'o/ / phyogs gang du zhe na/ de'i phyir mtshan gyi nyen kor du zhes bya ba smras te/ mtshan gyi then kor du'o/ /su'i zhe na rdzogs par bsnyen par 'dod pa'i ste/ lo tshigs gang yin pa de mi shes na'o/ /'di skad bstan te/ gal te rdzogs par bsnyen par 'dod pa lo nyi shu lon pa nyid du mi shes na de'i tshe/ mtshan gyi then kor du spu skyes pa rdzogs par bsnyen par bya ba'i rgyu mtshan yin pas rdzogs par bsnyen par bya ste/ gal te mtshan gyi nyen kor du spu dag skyes par gyur na/ rdzogs par bsnyen par 'dod pa de rdzogs par bsnyen par bya'o zhes bya ba'i tha tshig go/ /mtshan gyi nyen kor du spu skyes pa de ji ltar shes par bya zhe na/ de'i phyir/ de ni sgyu thabs kyis brtag par bya'o zhes bya ba smras te/ mtshan gyi nyen kor du spu skyes pa de ni sgyu thabs kyis brtag par bya ste/ spu skyes pa sgyu thabs kyis brtag par bya'o zhes bya ba'i tha tshig go/ /sgyu thabs ji lta bus she na/ de'i phyir zung nga dang gos kyi gdang mthon po la 'dug pa'i dngos po dbab pa la sogs pas so zhes bya ba smras te/ zung nga dang gos kyi gdang mthon po la 'dug pa'i chos gos la sogs pa'i dngos po gang yin pa'i dngos po de dbab pa dang / dgab pa la sogs pa'i sgyu thabs kyis mtshan gyi sbu brtag par bya ba'o/ / rdzogs par bsnyen par 'dod pa shing la 'dzeg tu mi gzhug go zhes bya ba ni/ rdzogs par bsnyen par 'dod pa'i gang zag shing la 'dzeg tu mi gzhug pa'o/ /mtshams kyi phyi rol du mi gtong ngo zhes bya ba ni/ rdzogs par bsnyen par 'dod pa'i gang zag mtshams kyi phyi rol du mi gtong ba'o/ /mdo de gnyis ni bar chad yongs su spangs pa'i phyir ro/ /rdzogs par bsnyen par bya ba'i gnas su khrid pa ltar snang ba'i nyen kor ni 'dir mtshams kyi nang ngo / /de las gzhan pa ni mtshams kyi phyi rol lo/ /de ltar snang ba'i nyen kor du bkar te/ tshogs la mngon du phyogs par thal mo sbyar te gzhag par bya'o zhes bya ba ni/ dge 'dun du gyur pa'i dge slong gis ltar snang ba'i nyan kor du gzhag go zhes bya bar sbyar ro/ /su zhe na de'i phyir de zhes bya ba smras te/ rdzogs par bsnyen par 'dod pa'o/ /gang gi tshe zhe na/ bkar ba zhes bya ba gsang ste ston pa bsko ba'i las mi thos par bya ba'i phyir bkar ba na/ de dge 'dun gyi nang nas logs shig tu gzhag par bya'o/ /ji ltar gzhag par bya zhe na/ de'i phyir tshogs la mngon du phyogs par thal mo sbyar te gzhag par bya'o zhes bya ba smras te/ rdzogs par bsnyen par 'dod pa gang dge 'dun gyi tshogs la mngon du phyogs pa de ni tshogs la mngon du phyogs pa dang / gang gis thal mo sbyar ba de ni thal mo sbyar ba ste/ rdzogs par bsnyen par 'dod pa de de ltar gzhag par bya ste/ dge 'dun gyi nang nas ma bkar bar de mi bya'o zhes bya ba'i tha tshig go/ /khyim pa la gnas brjod par mi bya'o zhes bya ba ni/ khyim pa de la gnas rnams brjod par mi bya ba ste/ de ni rab tu 'byung ba'i bar chad yongs su spang ba'i phyir ro/ /'dir gzhung ni ji srid du rab tu byung bar ma gyur gyi bar du khyim pa la gnas rnams brjod par mi bya'o zhes gsungs pa yin no/ /rdzogs par bsnyen ma thag pa la mi brjod par mi bya'o zhes bya ba ni/ rdzogs par bsnyen pa'i mod la gnas rnams mi brjod par mi bya'o zhes bya ba'i tha tshig ste/ thams cad du yang rdzogs par bsnyen pa'i mod la sems mthun par 'gyur bas de rjes su gnang ngo / /'dir gzhung ni bram ze'i khye'u zhig rab tu byung rdzogs par bsnyen pa la mkhan pos 'phyi ba zhig na bsod snyoms la song shig ces bsgo ba dang / des bsgo ba na bdag slong mo la rgyu bas skyo ste rab tu byung na yang bsod snyoms bya'am zhes bslab pa phul nas mnyam par gyur pa nas/ bcom ldan 'das kyis bka' stsal pa/ rdzogs par bsnyen ma thag tu gnas gzhi brjod par bya'o zhes bya ba'i bar du gsungs pa yin no/ /gang na gnas med pa der gso sbyong la bsdad pa dang gnas par khas blang bar mi bya'o zhes bya ba na/ gtsug lag khang gang na gnas med pa'i gtsug lag khang der/ gso sbyong ma 'ongs pa bsdad par mi bya zhing / dbyar gnas par khas blangs pa ma 'ongs par gnas par khas blang bar mi bya'o/ /gal te gnas par khas blangs nas phyis gnas med par gyur na/ de'i tshe ji ltar bya zhe na/ de'i phyir gnas par khas blangs pa snga ma rjes su bsrung bar mi bya'o zhes bya ba smras te/ gnas med na gnas par khas blangs pa snga ma rjes su bsrung bar mi bya'o/ / 'di skad bstan te/ dge slong dbyar gnas par khas blangs pa snga mas gnas par khas blangs pa gal te dbyar zla 'bring po mar gyi ngo dang / dbyar zla tha chungs yar gyi ngo la gnas med par gyur na/ de'i tshe gnas par khas blangs pa snga ma dral te gzhan du 'gro bar bya zhing / gang na gnas yod pa'i dbyar gnas par khas blangs pa phyi ma shos der gnas par khas blang bar bya'o/ /gal te gnas par khas blangs pa phyi ma shos na yang gnas med na de'i tshe ji ltar bya zhe na/ de'i phyir phyi ma la yang zla gnyis las lhag pa'o zhes bya ba smras te/ yang zhes bya ba'i sgra las gnas med na rjes su mi bsrung ngo zhes bya bar 'gyur ro/ /de ltar ni 'dir tshig gi don 'di 'byung ste/ dbyar gnas par khas blangs pa phyi ma shos na yang gnas med na/ zla ba gnyis las lhag par khas blangs pa gzhan rjes su bsrung bar mi bya ste/ zla ba gnyis ni gnas med pa des kyang gnas par bya zhing ston zla 'bring po'i tshes bcu drug la babs na/ gzhan du 'gro bar bya'o zhes bya ba'i tha tshig go/ /gal te gtsug lag khang gzhan nas der gnas 'ong bar 'gyur ba zhig btsal bar bya na/ ji ltar btsal bar bya zhe na/ de'i phyir gnas dang las dang bsnyen bkur gyi sta gon gyis de btsal bar bya'o zhes bya ba smras te/ de la gnas kyi sta gon zhes bya ba ni gnas khang gi sta gon no/ /des rnyed pa'i sta gon yang bstan pa yin te/ gnas khang gang du yon bdag gis rnyed pa lhag par sbyor ba'o/ /de zhes bya ba ni gnas so/ /btsal bar bya'o zhes bya ba ni dge 'dun du gyur pa'i dge slong gnas bca' bar 'os pa dag gis so/ /dge slong gnas ma bcas pa dag gis zla ba gnyis su la zhu bar bya zhe na/ de'i phyir/ med na gzhon nu'i nang nas ches rgan pa la zhu bar bya'o zhes bya ba smras te/ gnas gzhan med na gzhon nu rnams kyi nang na ches rgan pa la zhu bar bya'o/ /'dir gzhung ni de lta mod kyi de dag las ches rgan pa gang yin pa de la zhu bar bya zhing de'i 'og tu dgag dbye gzhan du 'gro bar bya'o zhes gsungs pa yin te/ dngos su na ches rgan pas ni ma zhus par yang bya ba bya'o zhes rjes su gnang ba yin no/ /yod na yang re zhig gi gnas nyid kyis so zhes bya ba ni/ gzhon rabs kyi nang na ches rgan pa la re zhig gi gnas nyid kyis zhu bar bya'o/ /'dir gzhung ni 'di ni khyod dang mkhan po gcig pa yin gyis khyod kyis 'di la zhu bar bya'o zhes gsungs pa yin no/ /bya ba zhu ba'i zhar la ma zhus par de lta bu la bdag gis sam des kyang bsnyen bkur gyi las mi bya'o zhes bya ba 'di brjod de/ gnas mal zhus par tshul khrims ral ba 'chal pa'i tshul khrims can de lta bu la bdag gis kyang rkang pa mnye ba la sogs pa'i bsnyen bkur gyi las mi bya la/ de lta bu des kyang mi bya ste/ de lta bu des bdag la bsnyen bkur gyi las mi bya zhing bsnyen bkur byed du mi gzhug go zhes bya ba'i tha tshig go/ /mi gnas par 'dug par mi bya'o zhes spyir btang ba de'i dmigs kyis bsal ba bstan pa'i phyir/ gnas par 'os pa yongs su tshol ba la zhugs pa ni med na mi gnas par 'dug pa la nyes pa med do zhes bya ba smras te/ nyes par mi 'gyur ba ni nyes pa med pa'o/ /gang gi tshe na gnas med na'o/ /su la zhe na/ de'i phyir gnas par 'os pa la'o/ /khyad par ji lta bu can zhig ce na de'i phyir/ yongs su tshol ba la zhugs pa zhes bya ba smras te/ gang yongs su tshol ba la zhugs pa de ni yongs su tshol ba la zhugs pa ste/ gnas par 'os pa yongs su tshol ba la zhugs pa de ni gnas med na mi gnas par 'dug pa la nyes pa med par rig par bya'o/ /de dus ji srid du mi gnas par 'dug pa la nyes pa med ce na de'i phyir zhag lnga'i mthar thug pa'i bar du'o zhes bya ba smras te/ zhag lnga'i mthar thug pa ni zhag lnga'i mthar thug pa'o/ /zhag lnga'i mthar thug pa'i bar du mi gnas par 'dug pa la nyes pa med do/ /rnyed pa yod na 'os pa nyid do zhes bya ba ni/ rnyed pa nye bar gnas pa yod na/ gnas par 'os pa yongs su tshol ba la zhugs pa de rnyed pa sbyin par 'os pa nyid yin no/ /de ltar 'dir gzhung ni gleng gzhi dag las mi gnas pa la yun ji srid du rnyed pa bsal bar bgyi/ nye ba 'khor zhag lnga tshun chad do zhes gsungs pa yin no/ /de yang sbyor ba mi gtong ba la'o/ /gnyug mar gnas pa'i gnas kyi cho ga bstan nas/ glor bur du 'ongs pa'i gnas kyi cho ga smra bar 'dod nas/ glo bur du 'ongs pas ni ngal bsos nas nyi ma gnyis pa'am gsum pa la gnas bca' bar bya'o zhes bya ba smras te/ ngal bsos nas zhes bya ba ni/ nyi ma dang po la bstis nas so/ /glo bur du 'ongs pa des nyi ma dang po la ngal bsos nas de'i 'og tu nyi ma gnyis pa'am gsum pa la gnas la gnas bca' bar bya'o/ /nyi ma gcig ni ched du mi bya'o zhes bya ba ni/ glo bur du 'ongs pas nyi ma gcig ni 'dug par bya'i ched du gnas bca' bar mi bya'o zhes bya bar sbyar ro/ /gnas pa nye bar mi gnas na gzhan la zhu bar bya'o zhes bya ba ni/ gnas pas dge slong gzhan la zhu bar bya'o/ /gang gi tshe zhe na/ nye bar mi gnas na ste/ spyod yul du ma gyur pa nyid na'o/ /su zhig ce na/ gnas pa'o/ /'o na gnas zhes brjod par bya ba yin na/ ji ltar gnas pa zhes brjod par bya zhe na/ nyes pa med de gnas par bya ba'i las la gnas pa zhes bya ba'i tshig tu bya'i/ gnas par byed pa'i byed pa po la mi bya ba'i phyir te/ gang gnas par 'os pa de la gnas par byed cing gnas par byed len par byed pas/ des na gnas pa zhes bya ba ni gnas nyid yin par gzung ngo / /de ltar na 'dir don 'di 'byung ste/ gnas med na dge slong gzhan la zhu bar bya'o zhes bya ba'i tha tshig go/ /gnas la ma zhus par bya ba mi bya'o zhes bya ba la sogs pa de'i nye bar sbyar ba'i dmigs kyis bsal ba bstan pa'i phyir/ las su bskos par song ba na de gzhan byung na ma zhus kyang nyes pa med do zhes bya ba la/ las su bskos par song ba na zhes bya ba ni/ de'i phyir song ba na zhes bya bar sbyar te/ gnas pa las su bskos pa'i phyir song ba na'o/ /de gzhan byung na zhes bya ba ni/ las su bya ba gzhan byung na ste/ gzhan de bsgrub pa'i phyir ma zhus kyang nyes pa med par rig par bya'o/ /rnam par 'byed pa'i gnas mal gyi gzhi las gal te der song ba rnams la las su bya ba gzhan byung na de dag gis yang 'ongs te zhu bar mi bya bar las su bya ba de nyid bya ste/ de dag ni zhu ba snga ma nyid de'i zhu ba yang yin no zhes gsungs so/ /gnas bca' bar bya'o zhes smras na/ ci gang yang rung ba la'am zhe na/ de'i phyir gang yang rung ba la mi bya'o zhes bya ba smras te/ gnas bca' ba'o/ /'o na gang la zhe na/ de'i phyir dri ba la sogs pas tshul khrims dang shes pa dang 'khor la phan 'dogs pa nyid nges par shes par byas nas de gzung bar bya'o zhes bya ba smras te/ dri ba la sogs pas zhes bya ba la sogs pa'i sgras ni lus kyi las la sogs pa'i kun tu spyod pa dag kyang bsdu'o/ /de dag gis gnas sbyin pa'i gang zag gi tshul khrims dang shes pa dang 'khor la phan 'dogs pa nyid de dag thams cad nges par shes par byas nas gnas de gzung bar bya'o/ /ji ltar zhe na/ de'i phyir sdom pa bzhin no zhes bya ba smras te/ dper na dge bsnyen gyi sdom pa la sogs pa sngags sngon du btang ba'i cho gas lan gsum bzlas te/ len pa de bzhin du 'di yang de bzhin no/ /'di ltar sdom pa bzhin no zhes smras na/ sdom pa ni thal mo sbyar bas blang bar bya ba yin gyi/ 'dir cho ga gzhan gyis yin par bstan pa'i phyir/ lag pa gnyis kyis rkang mthil gnyis la bcangs nas so zhes bya ba smras te/ gnas pas lag pa gnyis kyis gnas kyi rkang mthil gnyis la bcangs te gzung nas gnas su gzung bar bya'o/ /gnas kyis kyang thams cad la gnas sbyin par mi bya ste/ 'di ltar yongs su brtags nas sbyin no zhes bya ba ni/ gnas pa yongs su brtags nas gnas sbyin par bya ba'o/ /'di ltar yongs su brtag par bya ste/ ci 'di mya ngan las 'das pa'i bsam pa can dang / bslab pa dag la gus pa yin nam zhes yongs su brtags nas so/ /gnas dang gnas pa gnyis ji ltar phan tshun gnas par bya zhe na/ de'i phyir bu dang pha'i 'du shes dag bskyed par bya'o zhes bya ba smras te/ bu dang pha gnyis ni bu dang pha'o/ /de gnyis kyi 'du shes dag ni bu dang pha'i 'du shes dag ste/ de dag bskyed par bya'o/ /'di skad bstan te/ gnas kyis ni gnas pa la bu'i 'du shes bskyed par bya la/ gnas pas ni gnas la pha'i 'du shes bskyed par bya'o zhes bya ba'i tha tshig go/ /ci lhan cig gnas pas mkhan po la gnas bca' dgos sam zhe na/ de'i phyir/ mkhan po de nyid gnas pa de nyid yin no zhes bya ba smras te/ de'i dngos po ni de nyid de de zhes bya ba'i sgra ni mkhan po la snyegs so/ /'di skad bstan te/ mkhan po la gnas na mkhan po de nyid gnas pa nyid yin no/ /mkhan po yin pa'i phyir gnas nyid yin par brjod par bya ba ji ltar gnas pa nyid du brjod ce na/ nyes pa med de 'dir gnas pa nyid ces bya ba ni gnas par bya ba'i las la gnas pa zhes bya ba'i rkyen gyis bstan pa yin gyi/ gnas par byed pa'i byed pa po ni ma yin no/ /de la gnas par bya bas gnas pa ste/ des na gnas pa zhes bya ba'i sgras gnas pa bstan pa yin no/ /de'i dngos po ni gnas pa nyid de/ dngos po'i rkyen gyis mkhan po yin par byed pa bstan to/ /gang gi phyir mkhan po de nyid gnas nyid yin pa de'i phyir de la de mi bca'o/ /de'i phyir mkhan po'i yul de la gnas de mi bca'o/ /'di skad bstan te/ gang gi phyir lhan cig gnas pa'i mkhan po nyid gnas nyid kho na yin pas/ de'i phyir slob mas de la gnas bca' mi dgos so/ /gnas bcas pa gang gis 'jig par 'gyur zhe na/ de'i phyir gnyi ga las mi ltos pa nyid byung ba ni gnas bcas pa 'jig pa'i rgyu yin no zhes bya ba smras te/ gnyi ga las zhes bya ba ni/ gnas dang gnas pa gnyi ga las te/ mi ltos pa nyid cig car ram snga phyir byung na de ni gnas bcas pa blangs pa'i 'jig pa'i rgyu yin no/ /'di skad bstan te/ gal te gnas dang gnas pa gnyis dus gcig tu mi ltos pa nyid du gyur tam/ 'on te snga phyir dang por gnas mi ltos pa nyid du gyur la phyis gnas pa mi ltos pa nyid du gyur na/ de'i tshe na gnas zhig par rig par bya'i/ gcig mi ltos pa nyid du gyur pas ni gnas 'jig par mi 'gyur ro/ /gnas du ma tshogs par gyur na/ gang la gnas par bya zhe na/ de'i phyir mkhan po ma yin pa dag tshogs na 'dod pas 'jug par bya'o zhes bya ba smras te/ gnas mkhan po de ni mkhan po'o/ /gnas mkhan po de las gzhan pa'i gnas ni/ mkhan po ma yin pa'o/ /mkhan po ma yin pa'i gnas de dag 'dus shing tshogs na ste/ tshogs par gyur pa ni tshogs pa ste/ gnas dag tshogs na'o/ /de'i dus na gnas pa 'dod pas gnas su 'jug par bya'o/ /'di skad bstan te/ gnas mang po dag tshogs par gyur pa na gnas kyi gang 'dod pa des gnas par bya'o zhes bya ba'i tha tshig go/ /de dang na de nyid kyis so zhes bya ba la/ de dang na zhes bya ba ni/ mkhan por gtogs pa'i gnas de dang tshogs na'o/ /de nyid kyis so zhes bya ba ni/ mkhan po de nyid kyis te/ mkhan po yin pa'i gnas de nyid kyis slob ma gnas par bya ba'o/ /'di skad bstan te/ gal te mkhan po dang slob dpon mang po zhig gtsug lag khang du lhan cig lhags par gyur la/ gnas pa yang de nyid du 'dus par gyur na/ gnas pas mkhan po nyid du gtogs pa'i gnas de nyid kyis gnas par bya'i/ gzhan gyis mi bya'o/ /de ni gnas pas gnas la ji ltar bya ba de ston te/ mkhan po mthong ma thag tu stan las ldang bar bya'o zhes bya ba ni/ mkhan po langs pa mthong na mthong ma thag kho nar stan las ldang bar bya ste/ ldang bar bya'o zhes bya ba'i tha tshig go/ /mkhan po mthong ma thag tu zhes bya ba smos pa 'di ni dpe tsam ste/ gnas gzhan dag mthong na yang de bzhin du stan las ldang bar bya'o/ / gtsug lag khang de na 'dug na gnas pas nyin par lan gsum 'gro bar bya'o zhes bya ba ni/ gtsug lag khang gang na gnas 'dug pa'i gtsug lag khang de na gal te gnas pa yang 'dug par gyur na/ de'i tshe gnas pas gnas de'i drung du nyin mo lan gsum 'gro bar bya ba'o/ /gal te dgon pa na 'dug la rgyang grags tsam na nyin re lan re'o zhes bya ba ni/ gal te gnas dgon pa na 'dug la dgon pa de yang rgyang grags gcig na yod na/ gnas pas nyin re lan re 'ongs nas gnas de'i drung du 'gro bar bya'o/ /rgyang grags lnga yod na zhag lnga'am drug cing ngo zhes bya ba ni/ gal te dgon pa ste rgyang grags lnga yod pa zhig yin na/ de'i tshe gnas pas gnas kyi drung du zhag lnga'am drug cing 'ongs nas 'gro bar bya'o/ /dpag tshad phyed dang gsum dag ni gso sbyang gi tshe'o zhes bya ba ni/ gal te dgon pa de dpag tshad phyed dang gsum dag yod la de na gnas 'dug na de'i tshe gnas pas gso sbyong gi nyin mo zla ba phyed phyed cing 'ongs nas 'gro bar bya'o/ /da ni gnas kyis gnas pa la ji ltar gnas par bya ba ston te/ gnas pa chad pas gcad par 'os pa chad pas mi gcad par mi bya'o zhes bya ba ni/ gnas pa chad pas gcad par 'os pa chad pa'i las byed du gzhug par 'os pa gnas kyis chad pas mi gcad par mi bya ba'o/ /chad pa du yod ce na/ de'i phyir chad pa ni lnga'o zhes bya ba smras te/ de dag gang zhe na/ de'i phyir/ gtam 'dre bar mi bya ba dang / gdams ngag mi sbyin pa dang / bsnyen bkur dang chos dang zang zing dag gis longs spyod du mi gzhug pa dang / dge ba'i phyogs brtsams pa rgyun bcad pa dang / gnas dgag par bya ba'o zhes bya ba smras te/ gtam mi bya ba ni gtam 'dre bar mi bya ba ste/ de dang lhan cig tshig smra bar mi bya ba'o/ /gdams ngag mi sbyin pa ni/ mi sdug pa la sogs pa bsgom pa'i gdams ngag sbyin par mi bya ba'o/ /bsnyen bkur dang chos dang zang zing dag gis longs spyod du mi gzhug pa ni de dag gis longs spyod pa mi sbyin pa ste/ bgo bsha' ma byas pa'i bgo bsha' mi bya'o zhes bya ba'i tha tshig go/ /dge ba'i phyogs brtsams pa rgyun bcad pa ni/ de bar du bcad par bya ba'o/ /gnas dgag par bya ba ni rnam par mnan par bya ba'o/ /chad pa rnams gang la 'os she na/ de'i phyir ma dad pa dang / le lo can dang bka' blo mi bde ba dang / ma gus pa dang sdig pa'i grogs byed pa la de dag 'os pa nyid do zhes bya ba smras te/ ma dad pa zhes bya ba ni/ gang la dad pa med pa de ni ma dad pa ste/ de la chad pa de dag 'os pa nyid do/ /chad pas gcad par 'os pa ni de dag 'os pa ste/ de dag 'os pa'i dngos po ni de dag 'os pa nyid do/ /ma dad pa 'ba' zhig la ma yin gyi gzhan yang le lo can la sogs pa dag la yang 'os pa yin te/ smad pa la gnas par byed pa ni/ le lo can te/ de yang chad pas gcad par 'os pa nyid yin no/ /tshig mi bzod pa ni bka' blo mi bde ba ste de yang ngo / /gus par mi byed pa ni/ ma gus pa ste de yang ngo / /gang sdig pa'i grogs yin pa de ni sdig pa'i grogs byed pa ste/ de yang chad pas gcad par 'os pa nyid yin no/ /gal te gzhan zhig gis de len par byed na/ gzhan de la ci 'gyur zhe na/ de'i phyir chad pas bcad pa gzhan gyis len par byed pa la nyes pa sbom par 'gyur ro zhes bya ba smras te/ chad pas bcad pa gnas las gzhan pa'i len pa pos len par byed na/ de la dge 'dun gyi dbyen gyis dge 'dun lhag mar 'gyur ba'i nyes pa sbom por 'gyur bar rig par bya'o/ /de ltar byas kyang gal te de bzod pa gsol ba'i phyir/ gus par mi byed na/ de'i tshe ji ltar bya zhe na/ de'i phyir/ gus par mi byed na drang por bya ba'i phyir dge slong shes nyen can bsko bar bya'o zhes bya ba smras te/ gnas pa gus par mi byed na de drang por rnal du dbab par bya ba'i phyir dge slong gzhan bsko bar bya'o/ /khyad par ji lta bu can zhig ce na/ de'i phyir shes nyen can zhes bya ba smras so/ /'di skad bstan te/ gnas kyis gnas pa de drang por rnal du dbab pa'i phyir dge slong shes nyen can bska zhing des gnas pa ma gus pa de bzod pa gsol du gzhug pa'i phyir drang por rnal du dbab par bya'o/ /rgyu btang ba bzod pa gsol bar byed pa la bzod par bya'o zhes bya ba la/ gang gis ma dad pa nyid la sogs pa'i rgyu btang ba de ni rgyu btang ba ste/ de la gnas kyis bzod par bya ste dga' bar bya'o/ /'o na ci rgyu btang ba tsam kho nar zad la bzod pa gsol bar mi byed pa la yang bzod par bya'am zhe na ma yin te/ de'i phyir bzod pa gsol bar byed pa la zhes bya ba smras so/ /'di skad bstan te/ gal te gnas pas rgyu yang btang la gnas la bzod pa gsol bar yang byed na de'i tshe gnas kyis bzod par bya'o/ de bzhin pa la ni ma yin no/ /mi 'os pa chad pas gcad par mi bya'o zhes bya ba la/ mi 'os pa ni dad pa la sogs pa'i yon tan dang ldan pa chad pas gcad par mi 'os pa ste/ de chad pas gcad par mi bya'o/ / dad pa la sogs pa'i yon tan dang ldan pa chad pas gcad par mi bya'o zhes bya ba'i tha tshig go/ //bam po drug pa/ 'os pa la mi bzod par mi bya'o zhes bya ba ni/ rgyu btang ba bzod par bya bar 'os pa la mi bzod par mi bya ba ste/ bzod par bya ba kho na'o/ /mdo de gnyis ni tshul ma yin pa spang ba'i phyir ro/ /mi 'os pa la bzod par mi bya'o zhes bya ba ni/ rgyu ma btang ba bzod par bya bar mi 'os pa la bzod par mi bya ba ste/ de ni ha cang mang du yod pa spang ba'i phyir ro/ /gal te drang por byar ma nus na de'i tshe gnas kyis ji ltar bsgrub par bya zhe na/ de'i phyir mi byed pa nyid yin na gnas khang nas bskrad par bya'o zhes bya ba smras te/ byed pa'i dngos po ni byed pa nyid do/ /mi byed pa nyid ni drang po'i dngos po mi byed pa nyid yin te/ gal te rnam pa thams cad du drang por byar mi nus na/ de'i tshe de gnas khang nas bskrad par bya ste/ de gnas khang nas dbyung bar bya'o zhes bya ba'i tha tshig go/ /ci yo byad med par bskrad par bya'am zhe na ma yin te de'i phyir/ dge tshul la ni chu tshags dang ril ba spyi blugs dang mthang gos dang bcas pa'i blo gos kyang byin te'o zhes bya ba smras te/ chu tshags dang ril ba spyi blugs ni/ chu tshags dang ril ba spyi blugs te de gnyis byin te'o/ /mthang gos dang bla gos phrugs su bcas pa ni/ mthang gos dang bcas pa'i bla gos so/ /kyang zhes bya ba ni/ de yang byin te zhes bya bar sbyar te/ gnas kyis dge tshul la ni de dag byin te/ bskrad par bya'o/ / gal te rdzogs par bsnyen par 'dod pa zhig yin na yo byad lnga'o zhes bya ba ni/ gal te rdzogs par bsnyen par 'dod pa zhig yin na de'i tshe yo byad lnga byin te bskrad par bya ste/ chos gos gsum dang stan dang lhung bzed do/ /chu tshags kyang sbyin par bya ba yin te/ 'dir ma smos pa ni mdo snga mar smos pas de ni ma smos kyang grub pa yin no/ /des na yo byad drug po dag sbyin par bya'o zhes bya bar grub pa yin no/ /rdzogs par bsnyen pa la yang ngo zhes bya ba yang yo byad drug po dag byin te/ gnas khang nas bskrad par bya'o zhes bya bar sbyar ro/ /de ltar bskrad pa na gal te dang por gyur na ci de rnam pa thams cad du blang bar mi bya'am zhe na/ de'i phyir seng ge ltar gya tshom mi bya'o zhes bya ba smras te/ ji ltar seng ge zas gang spangs pa de nam yang phyir mi len pa de ltar gya tshom mi bya ste/ gal te drang por gyur na yang phyir blang bar bya'o zhes bya ba'i tha tshig go/ /gnod par 'gyur ba'i khrims su bya ba mi bca'o zhes bya ba la/ gang gnod par 'gyur ba'i ngang tshul can gyi khrims su bya ba de ni/ gnod par bya ba'i khrims su bya ba ste de mi bca'o/ /dge 'dun du gyur pa'i dge slong dag gis khrims su bya ba gang gis dge slong dag la gnod par 'gyur la/ ma byas na yang nyes pa 'ga' yang med pa de lta bu'i khrims su bya ba mi bya'o zhes bya ba'i tha tshig go/ /kha'i gnas pa nyid ni ma bkrus pa nyid yin no zhes bya ba smras te/ kha'i mtshan mo nyal nyal bas gnas pa nyid gang yin pa de nyid ma bkrus pa nyid yin te/ zang zing dang bcas pa nyid yin par rig par bya'o/ /de bas na ji srid du so shing la sogs pas kha ma sbyangs kyi bar du re zhig phyag dang bza' ba la sogs pa mi bya'o/ /'dir gzhung ni/ dge slong gis so shing ma bor bar bsod snyoms bza' bar mi bya'o/ /zos na 'gal tshabs can du 'gyur ro zhes bya ba gsungs pa dang / phyag gi gzhung ni/ ldang byed 'di la lhan cig gnas pa dang / nye gnas kyis nang par sngar langs te sham thabs zlum por bgos nas so shing bor te mtshams kyi nang gi mchod rten la phyag 'tshal nas zhes bya ba la sogs pa gsungs pa yin te/ de'i phyir mdo 'di smos so/ /so shing dben par dor ro zhes bya ba ni kha sbyang ba'i phyir ro/ /ji ltar dor bar bya zhe na/ de'i phyir dben par zhes bya ba smras te/ lkog tu'o zhes bya ba'i tha tshig go/ /dben pa'i skabs kyis bshang gci bya ba yang ngo zhes bya ba smras te/ bshang ba dang gci ba ni bshang gci ste/ de gnyis kyi bya ba yang ngo / /de yang ci ltar bya zhe na/ dben par bya ste/ bya ba'i bye brag yin pa'i phyir ma ning gi rtags su byas so/ /de gnyis kyi gnas bstan pa'i phyir longs spyad du rung ba'i shing ngam rtsig pa'i drung du mi dor ro zhes bya ba smras te/ longs spyad par 'os pa ni longs spyad du rung ba ste/ de'i shing ngam rtsig pa'i drung du nye bar so shing dor ba dang bshang gci dor bar mi bya'o/ /'dir gang du skye bo phal po che rtag tu gnas pa de ni longs spyad du rung ba zhes bya'o/ /so shing gi tshad shes par bya ba'i phyir/ de'i tshad ni sor bcu gnyis man chad sor brgyad yan chad do zhes bya ba smras te/ so shing de'i srid kyi tshad ni sor bcu gnyis man chad ces bya ba la/ bcu gnyis po dag gi tshogs ni bcu gnyis so/ /gang gi zhe na sor dag gi ste/ de bas na sor dag gi bcu gnyis kyi tshogs man chad do/ /sor brgyad yan chad ces bya ba 'dir yang brgyad po dag gi tshogs ni brgyad do/ /yan chad ces bya ba ni/ mtshams de yan chad yin par shes par bya'o/ /de ltar na 'dir tshig gi don 'di 'byung ste/ so shing gi srid ni sor bcu gnyis man chad sor brgyad yan chad do/ /nye bar sbyar ba de'i 'ga' zhig dmigs kyis bsal ba bstan pa'i phyir/ bad kan mang ba'i ni med na sor bzhi las lhag pa yan chad do zhes bya ba ni/ gang zag bad kan mang pa'i so shing ni tshad sngar bstan pa lta bu nyid med na sor bzhi po dag gi tshogs ni sor bzhi ste/ de las lhag pa'i tshad yan chad rung ngo / /sor bzhi las lhag pa yan chad ces bya ba ni/ sor phyed dang lnga yan chad yin par rig par bya ste/ gang zag bad kan mang ba'i so shing gi srid kyi tshad ni sor bzhi yan chad rung bar rig par bya'o/ /'di skad bstan te/ gal te dge slong bad kan mang po zhig yin la des so shing gi tshad sngar bstan pa'i mthar thug pa nyid ma rnyed na sor phyed dang lnga yan chad gang rnyed pa yang dor bar bya'i gzhan gyis ni ma yin no zhes bstan to/ /'dir gzhung ni bar ni dbus te/ 'di ltar bad kan mang po gang yin pa de dag gis so shing sor bzhi pa ma gtogs pa yang dor bar bya'o zhes gsungs pa yin no/ /gnas khang du so shing dor ba la mi rigs par dogs pa bsal ba'i phyir/ gnas khang du chol zangs kyi nang du so shing dor bar mi rigs pa med do zhes bya ba smras te/ gnas khang du chol zangs kyi nang du so shing dor ba ni tshul dang mi mthun pa med do/ /so shing dben par dor ro zhes smas pa la wa kha yang dben pa nyid yin par bstan pa'i phyir ro/ /de la wa kha yang mi dben par mi 'gyur ro zhes bya ba smras te/ so shing dor ba de la wa khar byed na yang mi dben par mi 'gyur te/ dben pa nyid yin no/ /'di skad bstan te/ wa khar so shing dor bar byed pa na/ dben pa gang yin pa de nyid kyang dben pa nyid yin par rig par bya'o zhes bya ba'i tha tshig go/ /wa kha'i nyen khor yang de nyid kyi khongs su gtogs pa yin par bstan pa'i phyir/ de'i khru gang khor yug tu rnam pa de lta bur byar rung ba nyid do zhes bya ba smras te/ der zhes bya ba ni wa khar ro/ /wa kha der khru gang khor yug tu so shing dor ba dang rkang pa bkru ba la sogs pa rnam pa de lta bu byar rung ste/ de nyid kyi khongs su gtogs pa sa de na longs spyad du rung gi khru gang gi khor yug las lhag par ni so shing dor ba la sogs pa mi bya'o/ /so shing dor ba dang 'brel pas de'i rjes la lce bzhar bar bya'o zhes bya ba smras te/ de'i zhes bya ba ni so shing dor ba'i'o/ /rjes la zhes bya ba ni/ de ma thag tu ste/ lce bzhar bar bya'o/ /ci zhig gis bzhar bar bya zhe na/ de'i phyir lce bzhar nye bar gzhag par bya'o zhes bya ba smras te/ lce bzhar bcang bar bya'o zhes bya ba'i tha tshig go/ /ci las byas pa zhe na/ de'i phyir khab kyi rdzas dag las so zhes bya ba smras te/ rdzas gang dag las khab byed par gan dang zangs dang khar ba dang lcags dag las bya'o zhes bya ba'i tha tshig go/ /lce bzhar med pa dag gi phyir don 'di la so shing gi tshal pa rung ngo zhes bya ba smras te/ don 'di la zhes bya ba ni/ lce bzhar ba'i don la'o/ /so shing gi tshal pa yang rung ngo zhes bya ba'i tha tshig go/ /rung pa nyid du bya ba'i phyir/ de mi rno bar bya ba'i phyir gcig gis gcig brud par bya'o zhes bya ba smras te/ de zhes bya ba ni so shing gi tshal pa'o/ /mi rno bar bya ba'i phyir zhes bya ba ni/ ha cang zur rnon po bcag pa'i phyir te/ de'i phyir gcig gis gcig brud par bya'o/ /so la sogs pa'i sdug bsngal nyid spang ba'i phyir/ mi rno bas so dang lce dang rna ba brud bzhar bya'o zhes bya ba smras te/ dngos po rnon pos so la sogs pa mi brud mi bzhar ro/ /mi rno bas kyang dal gyis ma yin pas mi bya'o zhes bya ba ni/ so la sogs pa dal bus khad kyis brud pa dang bzhar bar bya'o zhes bya ba'i tha tshig go/ /ji ltar dal bus she na de'i phyir/ de dag gis sha la mi gnod par ro zhes bya ba smras te/ so'i rnyil la sogs pa mi snang par ro/ /so shing dor ba'i zhar la so dang lce gnyis kyi brud bzhar gyi phyogs kha'i dri mas gos pa ma bkrus sam sas ma bskus par mi dor ro zhes bya ba 'di smras te/ so dang lce gnyis kyi brud bzhar ni so shing ste/ de'i phyogs dbus kyis lce bzhar ba dang rtse mo sos bcas pa'i phyogs de kha'i dri mas gos shing spags pa'i so shing de ma bkrus par mi dor ro zhes bya bar sbyar ro/ /sas ma bskus par zhes bya ba ni/ chu med na sas bsku bar bya ba ste/ so shing zhes bya ba'i brud bzhar gyi so shing de'i phyogs gang gis so dang lce brud cing bzhar ba'i phyogs de sas ma bskus par mi dor ba'o/ /sgra ma byas par mi dor ro zhes bya ba ni/ se gol la sogs pa'i sgra ma byas par so shing dang tshal pa dor bar mi bya ba'o/ /de ni dpe yin no zhes bya ba la/ de ni zhes bya ba ni/ so dang lce gnyis kyi brud bzhar sgra ma byas par mi dor ba de'o/ /gang gi dpe zhe na/ sgra ma byas par mi dor ba gzhan gyi'o/ /'di skad bstan te/ dor bar bya ba'i bdag nyid kyis dngos po gzhan gang yin pa yang sgra ma byas par mi dor ro zhes bya ba'i tha tshig go/ /dpes gang mtshon pa de ston to/ /bshang ba dang gci ba dang / mchil ma dang / snabs dang / skyugs pa dang / rlugs pa dang / gzhan dag kyang ngo zhes bya ba smras te/ skyugs pa dang rlugs pa zhes bya ba smos pa ni/ mchil ma dang bshang ba gnyis las gzhan yin te/ mchil ma ma yin la skyugs pa yin pa ni/ 'di lta ste dper na sna'i bshal sman lta bu'o/ /rlugs pa yin la bshang ba ma yin pa ni 'di lta ste dper na/ 'khru ba can gyis ji ltar zos pa de bzhin du zur du rlugs pa lta bu'o/ /gzhan dag kyang ngo zhes bya ba'i tshig ni bshang ba la sogs pa las gzhan pa dor bar bya ba thams cad bsdu ba'i don to/ /so shing dor ba dang 'dra ba'i dngos po gzhan yang yod par bstan pa'i phyir/ de las byi dor 'byung ba bzhin du 'dag rdzas dang lci bas kyang ngo zhes bya ba smras te/ so shing dor ba de las so la sogs pa'i byi dor 'byung ba bzhin du 'dag rdzas dang lci bas kyang byi dor 'byung bar 'gyur ro zhes bya bar sbyar ro/ /'dir gzhung ni so shing ma rnyed na/ 'dag rdzas dang ba lang gi lci ba las kyang kha sbyang bar bya'o zhes gsungs pa yin no/ /lus kyi kyang bsgrubs ma thag tu mchod rten la phyag bya'o zhes bya ba ni/ lus kyi bya ba bsgrub pa so shing bor ba'i 'og tu mchod rten la phyag bya ba'o/ /gnas pas sgrub pa'i dbang du bya ste zhes bya ba la/ a tha zhes bya ba'i sgra ni dbang du bya ba'i don yin gyi de ma thag gi don ni ma yin te/ mdo 'og ma kho na las de ma thag tu zhes bya ba'i tshig 'byung ba'i phyir ro/ /'di man chad ni gnas pas sgrub pa'i dbang du byas te/ gnas pas bya ba ston to zhes bya ba'i tha tshig go/ /da ni gnas pas sgrub pa ston te/ de nas de ma thag tu sngar song ste phyag bya'o zhes bya ba la/ de nas zhes bya ba ni/ lus kyi bya ba bsgrubs nas mchod rten la phyag byas nas so/ /de ma thag tu gnas pas gnas kyi drung du sngar song ste phyag bya'o zhes bya ba'i tha tshig go/ /bsnyun gsol lo zhes bya ba ni/ gnas pas gnas la'o/ /'dag rdzas dang so shing dbul lo zhes bya ba ni/ gnas de la gnas pa des 'dag rdzas dang so shing dag dbul zhing bstabs par bya'o/ /chu la sogs pa ni ma bstan yang grub pa'i phyir ma smos so/ /tshang mang blta ste brjod par bya'o zhes bya ba ni/ gnas pas g.yos kyi khang pa bltas brtags te gnas la brjod par bya'o/ /'di skad bstan te/ tshang mang der bza' ba dang btung ba gang dag sta gon bya bar 'dod na gnas pas gnas la brjod par bya'o zhes bya ba'i tha tshig go/ /dga' ba stobs pa nyid du yid la bya'o zhes bya ba ni/ tshang mang bltas te brjod pa na dngos po gang la gnas dga' zhing 'dod pa ston par byed pa de ni/ dga' ba ste/ dga' ba de bstabs pa nyid du yid la bya ba ni/ bdag gis de zas kyi dus su bstabs par bya'o zhes yid la bya ba'o/ /'di skad bstan te/ gnas bza' ba dang btung ba'i dngos po 'ba' zhig la dga' ba ston par byed na de'i tshe gnas pas 'di ltar sems bskyed par bya ste/ bza' ba dang btung ba la sogs pa de dag 'di la bstabs par bya'o snyam du yid la bya'o zhes bya ba'i tha tshig go/ /lhung bzed bkru bar bya'o zhes bya ba ni/ gnas kyi lhung bzed gnas pas bkru bar bya'o/ /gal te bsod snyoms pa zhig na gsil byed kyang ngo zhes bya ba ni/ /gal te gnas bsod snyoms pa zhig yin na de'i tshe gsil byed kyang byi dor bya ste/ sgra si li li byed pas gsil byed de/ khar gsil gyi ming cig shos yin no/ /gal te dgos pa yod na chu tshags kyang ngo zhes bya ba ni/ gal te der chu tshags dgos pa yod na de'i tshe de yang byi dor bya ba'o/ /de'i dgos pa ni 'di yin par shes par bya ste/ gal te gnas skyed mos tshal la sogs par zan za bar byed na der chu btsag par bya ba'o/ /gal te de yang yin na zhu bar bya'o zhes bya ba ni/ gal te gnas pa de yang bsod snyoms pa yin na de'i gnas pas gnas la zhu bar bya ste/ ci lags thabs cig tu bsod snyoms la 'jug par bgyi'am 'on te so sor zhes de skad zhu bar bya'o/ /gal te bzod cing 'dod na de nyid dang lhan cig tu 'jug par bya'o zhes bya ba ni/ gal te bsod snyoms la 'jug pa la gnas gnas pa dang lhan cig 'jug par bzod cing 'grogs par 'dod na de'i tshe gnas de nyid dang lhan cig 'jug par bya ba'o/ /lhan cig 'jug pa na gnas pas gang bsgrub par bya ba de ston te/ nyam nga ba la sogs par mdun du 'gro bar bya'o zhes bya ba ni/ glang po che la sogs pa dang phrad pa'am/ g.yang sa dang 'dam rdzab la sogs pa dang nye bar gyur pa na gnas pa mdun du 'gro bar bya ba'o/ /bsod pa de la bdar bar bya'o zhes bya ba ni/ gal te gnas pas bsod snyoms bsod pa bzang po zhig rnyed na/ 'di la phul cig ces gnas de la bdar bar bya'o/ /gal te ma 'grogs na 'ongs nas bstan par bya'o zhes bya ba ni/ gal te gnas dang gnas pa gnyis ma 'grogs par bsod snyoms la zhugs na de'i tshe gnas pas bsod snyoms las phyir 'ongs nas gnas la bsod snyoms bstan par bya'o/ /ches mchog tu gyur pa dbul bar bya ba'o zhes bya ba ni/ gnas pas bza' ba dang bca' ba ches mchog tu gyur pa bzang po gnas la 'di bzhes shig ces dbul zhing bstabs par bya ba'o/ /des thams cad la tshod rig par bya'o zhes bya ba ni/ /gnas des bsod pa bstabs pa 'ba' zhig la ma yin gyi/ thams cad la tshod rig par bya zhing / tshod rig par bya ste/ gang gis gnas pa la gnod par mi 'gyur ba de ltar bya ba'o/ /chu snod dgang bar bya'o zhes bya ba la/ chu snod ril ba spyi blugs la sogs pa ste/ de dag dgang ba ni chu snod dgang bar bya ba'o/ /dus brjod par bya'o zhes bya ba ni/ gdugs tshong bab po zhes zas kyi dus brjod par bya ba'o/ /zan zos nas lhung bzed la sogs pa bkru bar bya'o zhes bya ba ni/ gnas kyis zan zos nas gnas pas lhung bzed la sogs pa bkru bar bya ba'o/ /sogs pa'i sgras ni/ lhung bzed chung ngu la sogs pa dag bsdu'o/ /de dag gzhag par bya'o zhes bya ba ni/ lhung bzed la sogs pa bkrus pa de dag rang rang gi gnas su gzhag par bya ba'o/ /mchod rten la phyag 'tshal ba na 'dag rdzas dang chu la sogs pa dbul lo zhes bya ba ni/ gnas mchod rten gyi byi dor byed pa na/ gnas pas 'dag rdzas dang chu la sogs pa dbul bar bya ste/ 'dag rdzas dang chu dang phyag ma la sogs pa dag dbul bar bya'o zhes bya ba'i tha tshig go/ /rkang pa bkru bar gtogs pa la nan tan bya'o zhes bya ba ni/ gnas kyi rkang pa bkru ba der gtogs pa bsku mnye dang dril phyis la sogs pa bya ba gang yin pa de la gnas pas nan tan bya ba'o/ /mal dang stan bsham par bya'o zhes bya ba ni/ /gnas pas gnas kyi mal dang stan bsham par bya ba'o/ /sham thabs kyi gzan dbul bar bya'o zhes bya ba ni/ sham thabs kyi gzan nub mo'i gos dbul zhing bskon par bya ba'o/ /sham thabs blang bar bya'o zhes bya ba ni/ gnas kyi sham thabs sham thabs kyi gzan gyis brjes nas gnas pas blang zhing gzhag par bya ba'o/ /rkang pa'i chu dang rten dang chol zangs dbul bar bya'o zhes bya ba la/ rkang pa'i zhes bya ba'i sgra ni/ chu dang rten gnyi ga dang so sor sbyar bar bya ste/ rkang pa'i chu la sogs pa dbul bar bya ba ni/ rkang pa bkru ba'i chu dang rkang rten dang chol zangs dbul bar bya'o zhes bya ba'i tha tshig go/ /mchil lham gnyis phyi'o zhes bya ba ni/ gnas kyi mchil lham gnyis phyi bar bya ba ste/ gnas pas phyir gzhug go zhes bya ba'i tha tshig go/ /sgrub par byed pa nyid du ma bskos pa phyag ma thogs pa mthong na las chung bar bya'o zhes bya ba la/ sgrub par byed pa nyid du ma bskos par zhes bya ba la/ smos pa ni bskos na rang kho na'i las yin pa'i phyir ma bskos par zhes bya ba smos te/ phyag dar la sogs pa sgrub par byed pa nyid du ma bskos pa'i gnas so/ /gang gis phyag ma thogs par gyur pa de ni phyag ma thogs pa ste/ ma bskos par phyag ma thogs pa'i gnas de mthong na las chung bar bya ste/ bdag gis blang ba la sogs pas gnas de las chung ngur bya'o zhes bya ba'i tha tshig go/ /gos 'tshem pa nyid du ma bskos par khab thogs pa yang ngo zhes bya ba la/ gos 'tshem pa nyid du ma bskos par zhes bya ba yang gal te bskos na rang kho na'i las yin pa'i phyir/ ma bskos par zhes bya ba smos so/ /gang gis khab thogs par gyur pa de ni khab thogs pa ste gnas so/ /yang ngo zhes bya ba ni/ mthong na las chung ngur bya'o zhes bya bar sbyar ro/ /'di skad bstan te/ gal te gnas de gos 'tshem pa nyid du ma bskos na de'i tshe gnas pas gnas khab thogs pa mthong na/ las chung ngur bya'o zhes bya ba'i tha tshig go/ /rung bar bya ba dang sngo chung ngur brnga ba dang / me tog dang 'bras bu btog pa dang / so shing nye bar bsgrub pa la sogs pa yang dge tshul bsko'o zhes bya ba la/ rung bar bya ba ni shing tog la sogs pa'o/ /sngo chung ngur brnga ba ni mchod rten la sogs pa dag la'o/ /me tog btog pa dang / 'bras bu btog pa dang / so shing nye bar bsgrub pa 'bul ba dang / de dag la sogs pa gang yin pa de ni de dag la sogs pa'o/ /rung bar bya ba la sogs pa de dag gnas kyi ched du dge tshul bsko zhing byed du gzhug pa gnas pas lhag par bya bar rig par bya'o/ /de'i phyir yang zhes bya ba'i sgras gnas pas bya ba sngar bstan pa thams cad dang gnas 'ba' zhig la bya bar yang ma zad kyi dge 'dun la yang de dag thams cad dge tshul bsko zhing byed du gzhug par ston to/ / sgo glegs la brdab pas nang na gnas pa la go bar bya'o zhes bya ba ni/ phyi rol na gnas pa'i dge slong nang du 'ong bar 'dod pas sgo glegs sgo mo la lag pa la sogs pas brdab pas dge slong gnas khang gi nang na 'dug pa nang na gnas pa la go bar bya ba'o/ /cho ga 'di ni gnas pa 'ba' zhig gi yul la ma yin gyi thams cad kyi dbang du bya ba yin par rig par bya'o/ /de ni dal bus dang yun mi ring bar bya'o zhes bya ba la/ sgo glegs la brdab pa de ni dal bus bya ste/ de ni sgra yid du mi 'ong ba spang ba'i phyir ro/ /yun mi ring bar bya ba ni/ yun ring por sgo glegs la brdab par mi bya'o zhes bya ba'i tha tshig go/ /de drag tu mi dbul lo zhes bya ba la/ de zhes bya ba ni/ sgo glegs so/ /drag tu mi dbul lo zhes bya ba ni drag tu phul te mi dbye'o zhes bya ba'i tha tshig go/ /dal bus shes bzhin du 'jug pa dang 'byung ba dang / sgo skyes la mi drud par bya'o zhes bya ba la/ dal bus zhes bya ba ni/ ha cang mi mgyogs par ro/ /shes bzhin du zhes bya ba ni/ sems rnam par ma g.yengs pa ste/ 'di ltar dran pa mngon du gyur par ro/ /'jug pa zhes bya ba ni gnas khang la sogs par ro/ /'byung ba zhes bya ba ni/ phyi rol du de kho na bzhin no/ /sgo skyes la mi drud par bya ba ni/ ci nas kyang de gnyis la mi 'jar ba de ltar bya ba'o/ /de ni chos gos ma rung bar 'gyur ba dgag pa lhur bya ba'i phyir ro/ /de la bkur sti bya'o zhes bya ba ni/ gnas de la bkur sti bya ba'o/ /sgo glegs la brdab pa la sogs pa'i mdos gnas pa'i dbang du bya ba rgyun chad pas de'i phyir de la zhes bya ba smos te/ gnas de la zhes bsnyags pa'i phyir ro/ /bzhar bar bya'o zhes bya ba ni/ gnas pas gnas de la bzhar bar bya ste/ thag mi ring bar 'dug par bya'o zhes bya ba'i tha tshig go/ /de dang zhe 'gras pa la mi bzhar ro zhes bya ba ni/ gnas dang lhan cig zhe 'gras pa'i gang zag la gnas pas mi bzhar ba'o/ /de la khrel yod par bya'o zhes bya ba la/ de la zhes bya ba ni gnas la'o/ /'di skad bstan te/ gnas pas gnas la ngo tsha shes pa dang bcas pas gnas par bya'o zhes bya ba'i tha tshig go/ /de'i bya ba la grims par bya ba dang zhes bya ba ni/ gnas de'i las su bya ba la gnas pas grims par bya ste/ le lo mi bya'o zhes bya ba'i tha tshig go/ /gus par bya ste bya ba dang zhes bya ba ni/ gnas kyi bya ba chos gos la sogs pa'i las la gnas pas gus par bya ste bya ba'o/ /mdzes pas 'jug par bya ba'o zhes bya ba ni/ gnas kyi bya ba la gnas pas 'gro ba dang ldog pa la sogs pa mdzes pa'o/ /bzebs 'jug pa bya ba brtsam par bya ba'o/ /ngo tsha dang ldan pa dang gus pa dang bcas pa dang zhes bya ba la gnas pa gang la ngo tsha shes pa yod pa de ni ngo tsha dang ldan pa ste/ gnas kyi bya ba la ngo tsha shes pa dang bcas par bya ba'o/ /gus pa dang bcas pa zhes bya ba ni/ de'i bya ba la gus pa dang bcas par bya ba'o/ /'di ltar ngo tsha dang ldan pa'i bye brag ni gus pa dang bcas pa yin mod kyi yul la 'jug pa tha dad pas so sor bstan te/ ngo tsha dang ldan pa ni bag rkyong ba zhum par byed pa yin la/ gus pa dang bcas pa ni de'i dbang gis dam pa ma yin pa'i las la mi 'jug pa'o/ /rjes dang bcas pa zhes bya ba ni/ gang gi dbang gis na bdag la dbang ba'i bla ma mthong na de dang bcas par 'jug pa ste/ de ni rjes dang bcas pa yin no/ /sems dma' ba dang zhes bya ba ni/ de'i bya ba la nga rgyal dang rgyags pa gzhom par bya ba'o/ /shes bzhin gyis rang gi don mi nyams par bya'o zhes bya ba ni/ shes bzhin gyis rang gi don bsam gtan dang klag pa la sogs pa mi nyams mi 'chor bar bya ba'o/ /'di skad bstan te/ gnas pas ci nas kyang rang gi don mi nyams pa de ltar bya ba thams cad la shes bzhin gyis 'jug par bya'o zhes bya ba'i tha tshig go/ /dge ba gang yin zhes tshol ba can du bya'o zhes bya ba la/ gang la dge ba gang yin zhes tshol bar byed pa'i ngang tshul yod pa de ni dge ba gang yin zhes tshol ba can te/ gnas pas gnas dang 'brel ba'i bya ba dang / gzhan yang gnas bca' ba dang zhu ba dang 'khor sbyin pa la sogs pa'i las la ci 'di las dge bar 'gyur ram 'on te 'di las mi 'gyur zhes de ltar dge ba tshol ba can du bya'i/ 'jig rten gyi spyod pa la gdu bar bya ba ni ma yin no/ /nyes byed la 'jug na bzlog par bya'o zhes bya ba la/ nyes byed ces bya ba ni/ bslab pa g.yel ba la sogs pa'o/ /de la 'jug na zhes bya ba ni gnas de byed na'o/ /bzlog par bya'o zhes bya ba ni/ gnas pas so/ /dge ba mi 'phel na de byed pa gzhan la gtad par gsol bar bya'o zhes bya ba ni/ gal te gnas de la gnas pa'i dge ba bsam gtan dang klag pa la sogs pa 'phral gyi bya ba la sogs pas mi 'phel zhing 'phel bar mi 'gyur na/ dge ba 'phel bar byed pa de byed pa'i gnas gzhan la gnas pa bdag nyid gtad par gnas la gsol ba bya ste/ bdag gnas de ltar de la gtad par gsol zhes gsol ba bya ba'o/ /gsol nas gnas kyis ji ltar bya zhe na de ltar de'i phyir/ des kyang de dri ba la sogs pas gnas kyi 'os nges par shes par byas nas gtad par bya'o zhes bya ba smras te/ gnas des kyang gnas pa de gnas kyi 'os dge slong la gtad par bya'o/ /ci ma brtags par ram zhe na/ de'i phyir/ nges par shes par byas nas zhes bya ba smras te/ dri ba la sogs pas gnas kyi 'os de'i tshul khrims dang spyod pa la sogs pa nges par shes par byas nas gnas kyi 'os su rung na de la gtad par bya'i thams cad la ni gtad par mi bya'o/ /'di ni gnas kyis gnas pa la bya ba gzhan yin te/ sdig pa'i grogs po las bzlog par bya'o zhes bya ba la/ sdig pa'i grogs po las zhes bya ba ni/ tshul khrims 'chal pa la sogs pa las so/ /bzlog par bya'o zhes bya ba ni/ gnas pa bzlog par bya ba ste/ dgag par bya'o zhes bya ba'i tha tshig go/ /dge ba la sbyar bar bya'o zhes bya ba ni/ gnas kyis gnas pa de bsam gtan dang klag pa la sogs pa'i dge ba la sbyar bar bya ba'o/ /de nye bar bsgrub par bya'o zhes bya ba ni gnas kyis gnas pa de la chos dang zang zing dag gis dge ba de nye bar bsgrub par bya ba'o/ /ltung ba las bslang ba dang / rjes su mthun pa'i 'tsho ba'i yo byad bsgrub pa la brtson par bya'o zhes bya ba ni/ gnas kyis gnas pa dge 'dun lhag ma la sogs pa'i ltung ba las bslang ba'i rgyu la brtson par bya ba dang / rjes su mthun pa'i rkyen du 'bab pa kha na ma tho ba med pa'i 'tsho ba'i yo byad 'tsho ba'i 'tshog chas lhung bzed dang chos gos la sogs pa dag bsgrub pa 'byor bar bya ba la brtson par bya ba dang / gnas pas kyang gnas la de gnyis bsgrub pa la brtson par bya ba'o zhes bya ba'i tha tshig go/ /gnas dang gnas pa'i bya ba'i zhar la nad g.yog brtag pa'i phyir/ lhan cig gnas pa dang nye gnas dang / mkhan po dang slob dpon dang / mkhan po gcig pa dang / slob dpon gcig pa dang / gtam 'dres pa dang / phebs par smra ba dang smos 'drin dang 'grogs bshes kyis nad g.yog bya'o zhes bya ba smras te/ mdo'i don ni lhan cig gnas pa la sogs pas nad g.yog dag bya'o zhes bya ba'i tha tshig go/ /gtam 'dres pa zhes bya ba ni/ gcugs pa'i gtam la sogs pa dag gis dga' bar spyod pas dga' ba nyid nye bar sgrub par byed pa'o/ /phebs par smra ba zhes bya ba ni/ gang du lhan cig tu bag 'beb par gyur cing kun du smra bar byed pa'o/ /smos 'drin zhes bya ba ni/ gang dang lhan cig tu gnas gcig na 'dug pa dang / lam gcig tu 'gro ba la sogs pas 'dris par byed/ ngo shes par byed pa'o/ /'grogs bshes zhes bya ba ni/ gang gis gang mthong ngam thos ma thag kho nar rjes su mthun pa med kyang dga' ba yod pa'o/ /da ni lhan cig gnas pa la sogs pa dag gi nad g.yog bya ba'i rim pa bstan pa'i phyir/ byed pa dang po med na 'og mas so zhes bya ba smras te/ nad g.yog byed pa gang yin pa ni/ nad g.yog byed pa'o/ /mdo gong mar lhan cig gnas pa dang nye gnas la sogs pa gang dag bstan pa de dag gi dang po ni/ lhan cig gnas pa gang yin pa ste/ nad g.yog byed pa dang po lhan cig gnas pa de med na lhan cig gnas pa de'i 'og ma nye gnas la sogs pas nad pa de'i nad g.yog dang bsnyen bkur bya ba'o/ /'di skad bstan te/ gal te nad pa de la lhan cig gnas pa med na de'i tshe nye gnas kyis nad g.yog bya'o/ /byed pa de yang med na mkhan pos so/ /byed pa de yang med na slob dpon gyis so/ /byed pa de yang med na mkhan po gcig pas so/ /byed pa de yang med na slob dpon gcig pas so/ /byed pa de yang med na gtam 'dres pas te/ de la sogs pa rim bzhin du sbyar bar bya'o/ /slob dpon thams cad las klog pa'i slob dpon ring ba'i phyir ro/ /de 'dir ma bzung ngo snyam du dogs pa'i phyir 'dir klog pa'i slob dpon yang bzung ba nyid yin no zhes bya ba smras te/ nad g.yog bya ba'i skabs 'dir slob dpon smos pas klog pa'i slob dpon yang bzung ba nyid yin par rig par bya'o/ /des na nad g.yog byed pa mkhan po med na gnas sbyin pa'i slob dpon gyis nad g.yog bya'o/ /de med na las byed pas so/ /de med na gsang ste ston pas so/ /de med na dge tshul nyid du nye bar sgrub par byed pas so/ /de med na tha mar klog pa'i slob dpon gyis bya'o/ /'o na gang gi tshe lhan cig gnas pa la sogs pa dag cig car na bar gyur pa de'i tshe nad g.yog gis ji ltar bsgrub par bya zhe na de'i phyir/ cig car mi nus na gnas pa gang dang 'jug pa'i 'o zhes bya ba smras te/ lhan cig gi dngos po ni cig car te nad pa rnams cig car nad kyis btab na'o/ /nad g.yog gis kyang nad g.yog byed par mi nus na nad g.yog gis gnas pa'i nad g.yog bya'o/ /'dir yang gnas pa zhes bya ba'i sgras ni gnas kyi tshig yin par rig par bya ste/ gnas par bya ba'i las la gnas pa zhes bya ba'i tshig tu byas pa'i phyir ro/ /gal te gnas mang po dag cig car na bar gyur na/ gnas gang gis nad g.yog bya zhe na/ de'i phyir/ gang dang 'jug pa'i 'o zhes bya ba smras te/ gang la zhu zhing bya ba byed pa'i gnas de'i nad g.yog bya'o/ /'di skad bstan te/ nad g.yog bya dgos pa mang po cig car na bar gyur la nad g.yog des kyang nad g.yog bya dgos pa thams cad kyi nad g.yog byed mi nus na de'i tshe gnas kyi nad g.yog bya'o/ /gal te gnas kyang mang zhig yod na de'i tshe gang la zhu zhing bya ba byed pa de kho na'i nad g.yog bya'o/ /gal te de'i skabs su nad g.yog bya dgos pa gzhan zhig bcal thag par gyur la gnas de'i srog gi bar chad du 'gyur ba'i 'jigs pa med na de'i tshe/ bcal thag par gyur pa de'i nad g.yog bya'o/ /mdo zhes bya ba ni don mdor smos pas mdo yin pa'i phyir des na 'di yang smos pa nyid yin par rig par bya ste/ gal te las byed pa dang gsang ste ston pa dang dge tshul nyid du nye bar sgrub par byed pa dang klog pa dang lhan cig gnas pa dang / nye gnas dang / mkhan po gcig pa dang / slob dpon gcig pa dang / gtam 'dres pa dang / phebs par smra ba dang / smos 'drin dang / 'grogs bshes dag cig car na bar gyur la/ thams cad kyi nad g.yog byed mi nus na yang de'i tshe rim pa bstan pa sngar smras pa bzhin du nad g.yog bya ste/ ji dang por slob dpon gyi nad g.yog bya'o/ /de med na lhan cig gnas pa'i'o/ /de med na nye gnas kyi'o/ /de med na mkhan po gcig pa la sogs pa rim bzhin du 'grogs bshes kyi mthar thug pa'i bar dag gi nad g.yog bya bar rig par bya'o/ /gzhan la yang nad g.yog gi cho ga 'dra bar bstan pa'i phyir/ 'dir de'i rtags brtsams pa yang rab tu byung ba dang 'dra'o zhes bya ba smras te/ 'dir zhes bya ba ni/ nad g.yog bya ba la'o/ /gang gis rab tu byung ba'i rtags brtsams pa de ni de'i rtags brtsams pa ste/ gal te rab tu 'byung ba'i phyir/ skra breg pa la sogs pa'i rtags tsam gyis bdag nyid bcos par gyur pa de ni/ rab tu byung ba dang 'dra bar blta bar bya ste/ ji ltar rab tu byung ba'i nad g.yog bstan pa bzhin du de'i rtags brtsams pa'i nad g.yog kyang de kho na bzhin du bya'o/ /tshangs pa mtshungs par spyod pa na na yal bar mi dor ro zhes bya ba ni/ tshangs pa mtshungs par spyod pa gang la la zhig na bar gyur na de dge 'dun du dge slong dag gis yal bar mi dor ba ste/ tshangs pa mtshungs par spyod pa zhes smos pa ni nges pa kho nar bya ba bstan pa'i phyir ro/ /ji ltar yal bar mi dor ba de bstan pa'i phyir/ de la nad g.yog med na mthar thug pa man chad las bsko bar bya'o zhes bya ba ni/ nad pa de la nad g.yog med na de dge 'dun du gyur pa'i dge slong dag gis nad g.yog bsko'o/ /gang man chad las bsko bar bya zhe na/ de'i phyir mthar thug pa man chad las zhes bya ba smras te/ mthar thug pa man chad las zhes bya ba ni/ gal te nad g.yog gcig gis nad pa'i bya ba thams cad sgrub par mi nus na de'i tshe gnyis pa bsko'o/ /gal te de gnyis kyis kyang byar mi nus na/ de'i tshe gsum pa la sogs pa nas dge 'dun gyi mthar thug pa man chad las bsko bar bya'o/ /'dir gzhung ni/ thams cad med na dge 'dun gyis nad pa'i gnas skabs yongs su shes par bya ste/ nad g.yog gcig gam gnyis sam rab tu mang po bsko bar bya zhing / cher na dge 'dun thams cad kyis nad g.yog bya'o zhes gsungs pa yin no/ /sman brtag par bya ba'i phyir/ dge 'dun las byung ba'i sman ni nad pa 'ba' zhig gis spyad du rung ngo zhes bya ba smras te/ sman ni spyad du rung ngo / /gang las byung ba zhe na/ dge 'dun las byung ba'o/ /sus she na nad pa 'ba' zhig gis te/ nad g.yog la sogs pas spyad du mi rung ngo / /'dir gzhung ni khyim bdag sgre bo'i rdzas las sman gang yin pa de dge 'dun gyi sman khang du gzhag par bya zhing / dge slong nad pa dag gis longs spyad par bya'o zhes gsungs pa yin te/ de skad gsungs pa de mdo 'dis bsdus pa yin no/ /med pa nyid yin na de nad g.yog gis tshol du gzhug go zhes bya ba ni/ dge 'dun gyi sman dang nad pa rang gi sman med pa nyid yin na de'i tshe sman de nad g.yog gis yon bdag gzhan tshol du gzhug go zhes bya ba'i tha tshig go/ /ma 'byor na dge 'dun gyis sbyin par bya'o zhes bya ba ni/ gal te nad g.yog gis yon bdag gzhan 'tshol du bcug kyang sman de ma 'byor na de'i tshe dge 'dun gyi dkor las zong sbyin par bya'o/ /'dir sman smos pa ni mtshon pa ste/ dngos po gang gis nad pa'i nad zhi bar 'gyur bas brel bar gyur pa'i dngos po rang la yang mi bdog tshol du bcug na yang ma rnyed la/ dge 'dun gyi la ni yod na dge 'dun du gyur pa'i dge slong dag gis de thams cad sbyin par bya'o/ /med na sangs rgyas kyi las sku la gsol ba man chad kyang ngo zhes bya ba ni/ dge 'dun gyi med na sangs rgyas kyi las sbyin par bya'o/ /sku la gsol ba man chad kyang ngo zhes bya ba ni/ sku gzugs dang mchod rten la rgyan la sogs pa btags pa gang yin pa de dag gi bar yang sbyin par bya na/ sangs rgyas kyi 'am dge 'dun gyi dkor gzhan lta las smos kyang ci dgos zhes bya ba'i tha tshig go/ /'di skad bstan te/ gal te nad pa'i nad la phan pa rang gi rdzas la med na de'i tshe dge 'dun gyi las thams cad sbyin par bya'o/ /de yang med na sangs rgyas kyi las thams cad sbyin par bya ste/ 'di la 'gyod par mi bya'o zhes bstan to/ /de'i phyir dge 'dun gyi las btung ba dang gdugs gdags pa la sogs pa'i mchod pa bya'o zhes bya ba ni/ nad pa de'i phyir gal te rang dang de'i 'khor gyis kyang byed mi nus na dge 'dun du gyur pa'i dge slong dag gis dge 'dun gyi dkor las dkon mchog gsum la btung ba dang gdugs gdags pa la sogs pa'i mchod pa bya ba'o/ /de'i phyir ma 'byor na zhes smos pa dang sbyar te/ rang gi rdzas med na dge 'dun gyi dkor las mchod ston la sogs pa bya ba'o/ /med na sangs rgyas kyi las so zhes bya ba ni/ dge 'dun gyi dkor med na sangs rgyas kyi dkor las thams cad bya ba'o/ /de gnyis kyis blangs pa des ma shi la 'byor pa yod na bsab pa nyid du bya'o zhes bya ba ni/ dge 'dun dang sangs rgyas de gnyis kyi dkor blangs pa bsab pa nyid du bya'o/ /sus she na de'i phyir des zhes bya ba smras te/ sngon na bar gyur pa des so/ /gang gi tshe zhe na/ de'i phyir ma shi la zhes bya ba smras te/ gal te ma shi na de'i tshe na'o/ /ci zhig gis bsab ce na/ de'i phyir 'byor pa yod na zhes bya ba smas te/ 'byor pa med na ma bsabs kyang nyes pa med de/ bsam pa dag pa'i phyir dang zhing chen po'i gnas skabs su spyad pa'i phyir ro/ /nad g.yog gi tshul khrims bstan pa'i phyir/ nad g.yog gis de la bsnyen bkur mi bya bar mi bya'o zhes bya ba smras te/ nad g.yog gis nad pa de la bsnyen bkur mi bya bar mi bya'i bsnyen bkur bya ba ste/ nad g.yog legs par bya'o zhes bya ba'i tha tshig go/ /de'i tshig don dang ldan pa dang chos dang ldan pa bcag par mi bya'o zhes bya ba ni/ nad pa de'i tshig gi don dang ldan pa zhes bya ba 'tsho ba la phan pa dang 'brel pa dang / chos dang ldan pa zhes bya ba bsod nams la phan pa dang 'brel pa bcag par mi bya ste/ nad g.yog gis 'da' bar mi bya'o/ /lhag par chags pa'i dngos po 'gugs na dgag par mi bya'o zhes bya ba la/ lhag par chags pa'i dngos po zhes bya ba ni/ zhen pa'i dngos po lhung bzed la sogs pa dag go/ /'gugs nas zhes bya ba ni/ nad g.yog la kho bo'i dngos po de khyer te shog shig ces len du 'chol na'o/ / dgag par mi bya'o zhes bya ba ni/ blangs te bstan par bya ba'o/ /'di skad bstan te/ gal te nad pas nad g.yog la lhung bzed la sogs pa'i dngos po de 'on cig ces 'gugs shing len du 'chol na/ de'i tshe nad g.yog gis mi dgag par sbyin par bya'o zhes bya ba'i tha tshig go/ /mi gdam par mi bya'o zhes bya ba ni/ nad g.yog gis nad pa de la gdams ngag mi sbyin par mi bya ba'o/ /de nad pas bzla bar shin tu mi bya'o zhes bya ba ni/ nad g.yog gis gdams ngag byin pa de nad pas bzla bar shin tu mi bya ba ste/ 'da' bar mi bya'o zhes bya ba'i tha tshig go/ /des de 'chir dogs na dge 'dun gyi mal stan las bslangs te/ gang zag gi la gzhag par bya'o zhes bya ba ni/ nad g.yog des nad pa de 'chir dogs na dge 'dun gyi mal stan las bslangs te/ gang zag gi mal stan la gzhag par bya ba'o/ /ji ltar zhe na de'i phyir/ bsku mnye dang khrus sngar bya ba nyid kyi sgyu thabs kyis so zhes bya ba la/ gzhag pa gang la bsku mnye dang khrus sngar bya ba yod pa de ni/ bsku mnye dang khrus sngar bya ba'o/ /de'i dngos po ni bsku mnye dang khrus sngar bya ba nyid de/ bsku mnye dang khrus sngar bya ba dang ldan pa'i gzhag pa nyid kyi sgyu thabs des gzhag par bya ba'o/ /bsku mnye dang khrus smos pa ni mtshon pa ste/ sgyu thabs gzhan dag gis kyang gzhag par bya'o/ /'dir 'chir dogs pa'i gnas skabs ji ltar yongs su brtag par bya zhe na/ de'i phyir de'i gnas skabs kyi yongs su brtags pa la 'bad pa dang ldan par bya'o zhes bya ba smras te/ 'chi ba de'i gnas skabs kyi yongs su brtag pa la 'bad pa dang ldan par bya ste/ gang gi lus kyi gnas skabs la 'chi ltas la sogs pa 'chi bar dogs pa yod pa yongs su brtag pa la 'bad pa dang ldan par bya'o/ /'dir 'bad pa ni yang dang yang du nad pa la brtag par bya ba'o/ /des sme bar byas pa shi ba'i gos de dag bkru ba na des bya ba nyid yin no zhes bya ba ni/ nad pa des sme bar byas nas shi ba'i gos de dag bkru ba ni nad g.yog des bya ba nyid yin no zhes bya bar sbyar ro/ /gang dag gi bkru zhe na/ de'i phyir/ des sme bar byas pa zhes bya ba smras te/ nad pa des gos gang dag sme bar byas pa de dag ni des sme bar byas pa ste/ de dag gi'o/ /shi ba'i gos de dag ces bya ba ni/ nad g.yog des nad pa gang gi g.yog byas pa'i nad pa shi ba de'i gos de dag ni shi ba'i gos de dag ces bya'o/ /de dag gi bkru ba ni nad g.yog des bya ba nyid yin no zhes bya ba la/ nad g.yog des bya ba ni des bya ba'o/ /de'i dngos po ni des bya ba nyid de bkru ba zhes bya bar sbyar ro/ /gnas dang gnas pa'i dbang du bya ba'i phyir dge 'dun gyi gnas brtan yang dge 'dun thams cad kyi gnas lta bu yin pas/ de'i phyir 'dir de bkar te brjod par bya'o/ /dge 'dun 'dus pa na de'i gnas brtan mdun du 'gro bar bya'o zhes bya ba'o/ /dge 'dun 'dus pa tshogs pa ni de'i gnas brtan zhes bya ba dge 'dun gyi gnas brtan mdun du 'gro bar bya ba'o/ /'di skad bstan te/ dge 'dun thams cad 'tshogs pa na dge 'dun gyi gnas brtan sna la 'gro bar bya'o zhes bya ba'i tha tshig go/ /'gro ba'i tshe thogs na bsdad par bya'o zhes bya ba ni/ dge 'dun gzhig tu 'gro ba'i tshe dge slong dag thogs na dge 'dun gyi gnas brtan gyis bsdad par bya ste/ thogs par bya'o zhes bya ba'i tha tshig go/ /de dag gis de yang ngo zhes bya ba ni/ dge slong de dag gis dge 'dun gyi gnas brtan de thogs na bsdad par bya ba'o/ /yang ngo zhes bya ba'i sgra ni/ gnas brtan 'ba' zhig la ma yin gyi/ dge slong dag la yang bsdad par bya ba'o/ /ma byung ba la mi ring bar song ste'o zhes bya ba ni/ gal te gnas brtan gnas khang la sogs pa nas ma byung na gnas brtan ma byung ba de la dge slong dag gis mi ring bar song ste bsdad par bya ba'o/ /grong gi nyen kor du yang ngo zhes bya ba la/ nyen kor zhes bya ba'i sgra ni/ nye ba'i tshig yin te/ gnas brtan grong gi nyen kor du thogs pa la yang dge slong dag gis bsdad par bya ba'o/ /gal te 'jug pa na phyi bzhin 'ong na yang ngo zhes bya ba ni/ gal te dge slong dag grong du 'jug par 'dod pa na gnas brtan phyi bzhin 'ong ba snang na de dag gis gnas brtan de 'ong ba mthong nas bsdad par bya ba'o/ /gal te sbron pa 'ongs na yang de la gnas brtan 'ongs kyi bar du sdod cig ces bsgo bar bya'o zhes bya ba ni/ dge slong rnams de ltar sdod pa na gal te grong nas sbron pa spyan 'dren 'ongs na yang de'i tshe sbron pa de la dge slong rnams kyis 'di skad ces gnas brtan 'ongs kyi bar du re zhig sdod cig ces bsgo bar bya smra bar bya'o/ /zas kyi phyir son pa nyid na lag chu drangs pa'i tshe gal te dus yod na yang ngo zhes bya ba ni/ dge slong rnams zas bza' ba'am btung ba'i phyir grong du zhugs te/ son pa nyid na gang gi tshe lag pa bsnyal b a'i phyir lag chu drangs pa de'i tshe lag chu drangs pa de na gal te dge slong rnams kyis gnas brtan bsdad pa'i dus yod de de gdugs tshod kyis thub pa lta na yang ngo zhes bya ba'i sgra las de'i tshe zhal ta pa la 'di skad ces gnas brtan 'ongs kyi bar du cung sdod cig ces bsgo bar bya'i zhes bya ba 'di 'byung bar sbyar ro/ /med na gral der de'i stan gzhag par bya'o zhes bya ba ni/ gdugs tshod la bab ste/ bsdad pa'i dus med na bkad sa'i gral gyi gong der gnas brtan de'i stan gzhag par bya'o/ /bsdad pa'i skabs smras nas/ da ni gnas brtan de'i tshul khrims nyid brjod par bya ste/ 'dug pa dang phyi rol du yang so sor brtag par bya'o zhes bya ba ni/ gnas brtan gyis dge slong rnams khyim gyi nang du 'dug pa dang sdod sa phan chad phyi rol thams cad du yang 'di dag la kha cig gis legs par ma bgos pa dang legs par ma sbyangs par ma gyur tam zhes so sor brtag par bya ba'o/ /so sor brtags na ji ltar bya zhe na/ de'i phyir legs par ma bgos pa nyid dam legs par ma sbyangs pa nyid yin na mdzes par bya ba'i phyir de gnyis la brda bya'o zhes bya ba smras te/ legs par ma bgos pa nyid ces bya ba ni stod kyi chos gos so/ /legs par ma sbyangs pa nyid ces bya ba ni/ smad kyi sham thabs so/ / mdzes par bya ba'i phyir zhes bya ba ni sdu gur bya ba'i phyir ro/ /de gnyis la zhes bya ba ni/ legs par ma bgos pa nyid dang / legs par ma sbyangs pa nyid de gnyis la'o/ /brda bya'o zhes bya ba ni/ legs par ma bgos pa nyid dang legs par ma sbyangs pa nyid kyi dge slong de gnyis la lag brda la sogs pa bya ba'o/ /gal te brda byas kyang ma go na de'i tshe ji ltar bya zhe na/ de'i phyir ma go na drung na mo byed du gzhug go zhes bya ba smras te/ ma go na zhes bya ba ni/ ma tshor na ste/ gal te legs par ma sbyangs pa'i dge slong de la dge 'dun gyi gnas brtan gyis brda byas pa na/ ma go na de'i tshe legs par ma bgos pa la sogs pa'i dge slong de'i drung na mo'i dge slong gang yin pa de brda byed du gzhug go zhes bya ba ni/ ma gyur na rang gis so zhes bya ba ni/ gal te drung na mo'i dge slong gis brda bstan pas kyang mdzes par ma gyur na dge 'dun gyi gnas brtan rang gis mdzes par bya'o/ /gsar bu de dag la kun du smra bar mi bya'o zhes bya ba ni/ gsar bu gang dag yin pa de dag la dge 'dun gyi gnas brtan des kun du smra bar mi bya ste/ de dag dang lhan cig tu 'du 'dzi'i gtam mi bya'o zhes bya ba'i tha tshig go/ /gtsug lag khang dang dgon pa der de dag gi tshul khrims kyi tshul khrims de 'dzin du gzhug par bya zhing nges par sbyar bar yang ngo zhes bya ba ni/ gtsug lag khang dang dgon pa'i gnas der gsar bu de dag gi tshul khrims 'jug pa gnas pa'i tshul khrims gtsug lag khang dang dgon pa'i tshul khrims kun spyod pa la sogs pa de 'dzin du gzhug par bya ba gsar bu rnams la go bar bya zhing nges par sbyar ba yang ngo zhes bya ba las tshul khrims de zhes bya bar sbyar ro/ /'di skad bstan te/ tshul khrims de 'dzin du gzhug pa 'ba' zhig tu ma zad kyi dge 'dun gyi gnas brtan gyis gsar bu rnams tshul khrims de la nan tan bya ba la nges par sbyar bar yang bya ba'o/ /glo bur du 'ongs pas na so sor brtags nas gnas mal gyi phyir gnyug mar gnas pa rnams la brjod par bya'o zhes bya ba ni/ gang dag glo bur du lhags pa de dag gi nang nas dge 'dun gyi gnas brtan gang yin pa'i gnas brtan glo bur du 'ongs pa des rang dang lhan cig tu glo bur du lhags pa rnams la so sor brtags pa bgrangs nas gnas mal thob par bya ba'i phyir dge slong gnyug mar gnas pa rnams la brjod par bya ba'o/ /'gro bar chas pas ni phyogs dang 'dron pa dang gnas dang gnas mal dang / grogs na na mi dor ba nyid brtags nas 'phags par bya'o zhes bya ba ni/ dge slong 'gro bar chas pa rnams kyi nang na 'gro bar chas pa'i gnas brtan gang yin pa gnas brtan 'gro bar chas pa des ni phyogs la sogs pa brtags nas 'phags par bya'o zhes bya bar sbyar ro/ /'gro bar chas pa'i gnas brtan des phyogs gang du 'dron pa gang dang lam gang nas 'gro bar bya ba dang / gnas dgon pa la sogs pa 'dod pa gang yin pa dang / der son pa rnams kyi gnas mal gang yin pa de dag thams cad khong du chud par byas brtags nas grogs kyang brtags te/ na bar gyur na gang gis kyang 'ga' yang mi 'dor ba nyid brtags nas de ltar yid la byas te ji ltar bsams pa'i gnas der son par bya ba'i phyir/ 'phags par bya'i gzhan du na mi 'phags so zhes bya ba ste/ 'dir mdo'i don ni de yin no/ /ring por ma son par thams cad kyi tha mar la la'i cung zad ma lus sam zhes 'phral du dran par bya'o zhes bya ba ni/ 'gro bar chas pa'i dge 'dun gyi gnas brtan des 'gro bar chas pa'i dge slong de dag la 'phral du dran par bya'o zhes bya bar sbyar ro/ /ji ltar zhe na/ ring por ma son par zhes bya ba la sogs pa smras te/ gnas de nas thag ring por ma song bar zhes bya ba'i tha tshig go/ /thams cad kyi tha mar zhes bya ba ni/ gzhi nas cha ba la sogs pa'i bya ba thams cad zin te/ gnas nas spags pa'i 'og tu'o/ /la la'i zhes bya ba ni/ dge slong la la'i'o/ /cung zad ces bya ba ni dngos po'o/ /ma lus sam zhes bya ba ni/ ma brjed dam zhes bya ba'o/ /'phral du dran par bya'o zhes bya ba ni mod la rma bas so/ /gsar bu rnams mi rgod pa nyid dang ma khengs pa nyid la dgod par bya'o zhes bya ba la rgod pa ni nye bar ma zhi ba'o/ /khengs pa ni gyang gying che ba ste/ 'gro bar chas pa'i gnas brtan gyis gsar bu rnams de las bzlog par bya zhing / nye bar zhi ba dang / rgyags pa dang / nga rgyal nges par bcom pa nyid la dgod par bya'o/ /khyim phyir nye ba na thams cad kyis thams cad kyang ngo zhes bya ba la/ khyim phyir nye ba na zhes bya ba ni/ grong du son pa na'o/ /thams cad kyis zhes bya ba ni/ 'gro bar chas pa'i gnas brtan 'ba' zhig ma yin gyi gnas brtan gzhan thams cad kyis kyang ngo / /thams cad ces bya ba ni/ gsar bu rnams 'ba' zhig ma yin gyi/ rgan pa gzhan thams cad kyang ngo / /kyang ngo zhes bya ba las ni/ mi rgod pa nyid dang ma khengs pa nyid la dgod par bya'o zhes bya bar sbyar ro/ /kun shes par bya'o zhes bya ba ni/ 'gro bar chas pa'i dge 'dun gyi gnas brtan gyis rang gi 'khor ming la sogs pa'i mtshan mas kun shes par bya ba ste/ 'di ni bdag gi 'khor du gtogs pa'i gang zag go/ /de yang bdag gis bsrung bar bya ba'o zhes bya ba'i don du'o/ /spyod pa dang spyod lam bstan pa dang lung mnod pa la sogs pa dang / zas kyi rnyed pa dang / nad pa la bgo bsha' bya ba la sogs pa'i bya ba bsgrubs pas phan gdags par bya'o zhes bya ba la/ spyod pa zhes bya ba ni/ bsod snyoms la sogs pa'i spyod yul lo/ /spyod lam zhes bya ba ni/ 'chag pa la sogs pa'i spyod lam mo/ /bstan pa zhes bya ba ni/ de gnyis bstan pa ste/ 'di ni spyod yul lo/ /'di ni spyod yul ma yin no/ /'di ltar 'gro bar bya'o/ /'di ltar 'gro bar mi bya'o zhes bya ba la sogs pa bstan pa'o/ /lung mnod pa la sogs pa zhes bya ba la/ sogs pa zhes bya ba'i sgras ni kha ton la sogs pa dag bsdu'o/ /zas kyi rnyed pa zhes bya ba ni/ bza' ba dang btung ba la sogs pa'o/ /nad pa la bgo bsha' bya ba la sogs pa zhes bya ba la/ nad pa la bgo bsha' bya ba ni sman dang nad g.yog la sogs pa'o/ /sogs pa zhes bya ba'i sgras ni/ chos gos la sogs pa zang zing gi bgo bsha' dag bsdu'o zhes bya ba ni/ spyod pa dang spyod lam bstan pa dang / lung mnod pa la sogs pa dang / zas kyi rnyed pa dang / nad pa la bgo bsha' bya ba la sogs pa de dag nyid bya ba'o/ /de dag bsgrubs pas zhes bya ba ni nan tan bya bas so/ /phan gdags par bya'o zhes bya ba ni/ dge 'dun gyi gnas brtan gyis de dag gi gsar bu rnams la phan gdags par bya'o/ /dbyar gnas par khas blangs pas gtsug lag khang gi byi dor mi byed pa la gros btab ste/ byi dor byed du gzhug cing byi dor byed pa la ni spro bar bya'o zhes bya ba ni/ dbyar gnas par khas blangs pa'i gnas brtan gyis gtsug lag khang gi byi dor byed du gzhug go zhes bya bar sbyar ro/ /gtsug lag khang gi byi dor mi byed pa la gros btab ste/ byi dor byed du gzhug ces bya ba 'di skad bstan te/ gal te dge slong rang dgar dbyar gnas par khas blangs pa dag gtsug lag khang gi byi dor mi byed na de'i tshe dge 'dun gyi gnas brtan gyis ci nas kyang gtsug lag khang gi byi dor byed par 'gyur ba de ltar gros btab spro bar byas te/ byi dor byed du gzhug pa'o/ /gang gi tshe rang gi ngang kho nas byi dor byed na de'i tshe ji ltar bya zhe na/ de'i phyir byi dor byed pa la ni spro bar bya'o zhes bya ba smras te/ bya ba de ni tshul dang mthun pa yin no zhes gzengs bstod pas spro bar bya ba'o/ /thams cad kyis 'khor du gtogs pa gtam 'dod pa dag la rjes su mthun pa'i chos nye bar bsgrub pas phan gdags par bya'o zhes bya ba ni/ gnas brtan thams cad kyis dge slong 'khor du gtogs pa la chos kyis phan gdags par bya'o zhes bya bar sbyar ro/ /thams cad kyis zhes bya ba ni/ gnas brtan thams cad kyis te/ dbyar gnas pa'i gnas brtan 'ba' zhig gis bya bar ma zad pa'o/ /gang gi tshe zhe na/ 'khor du gtogs pa gtam 'dod pa dag gi tshe ste/ gal te dge slong de dag mdo sde dang 'dul ba la sogs pa'i chos kyi gtam 'dod cing gsol ba'i tshe'o/ /de'i tshe de dag la dge 'dun gyi gnas brtan thams cad kyis gang la gang 'os pa'i rjes su mthun pa'i chos nye bar bsgrub pa des phan gdags par bya ba'o// //bam po bdun pa/ mi smra ba nyid la dga' ba dag btang snyoms su gzhag go zhes bya ba la mi smra ba'i dngos po ni/ mi smra ba nyid do/ /gang dag de la dga' ba'i dge slong dag ci dgar btang snyoms su gzhag go/ /'dir mi smra ba nyid ces bya ba yang 'phags pa'i mi smra ba nyid tshul bzhin yid la byed pa zhes bya ba nyid yin par 'dod kyi/ gyi na kha rog ste 'dug pa la ni mi bya'o/ /khyim pa de nye bar 'ongs pa'i 'tshal ma sbyor du gzhug go zhes bya ba ni/ gal te gtsug lag khang du khyim pa 'ongs na khyim pa nye bar 'ongs pa'i zan sbyor du gzhug go/ /dge 'dun gyi gnas brtan gyis dge slong dag la go bar bya ste/ zan sbyor du bcug pa na gal te dge slong dag sta gon mi byed dam khyim pa de dag zan mi 'dod na de'i tshe mi byed dam mi 'dod na de dag la chos dang ldan pa'i gtam byas nas bdag cag la 'di yod do zhes brjod par bya'o zhes bya ba ni/ dge slong dag zan gyi sta gon mi byed dam khyim pa dag zan bza' bar mi 'dod na khyim pa de dag la dge 'dun gyi gnas brtan gyis chos dang ldan pa sbyin pa la sogs pa'i gtam bya'o/ /de dag byas nas dge 'dun gyi gnas brtan gyis de dag yang dag par dga' bar bya ba'i phyir/ bdag cag dge slong rnams la chos kyi sbyin pa 'di yod do zhes de dag la brjod par bya ba'o/ /de dag dang ldan pa thams cad kyis 'khor la so sor brtag par bya'o zhes bya ba ni 'khor de dang ldan pa'i dge slong thams cad kyis kyang rang rang gi 'khor la so sor brtag par bya'i dge 'dun gyi gnas brtan 'ba' zhig gis bya bar ma zad do zhes bya ba'i tha tshig go/ /don med par spyod pa tshar gcod do zhes bya ba la/ gang mi dgos pa byed pa de ni don med par spyod pa ste/ ci nas kyang don med pas dus yol bar byed par mi 'gyur ba de ltar tshar gcad par bya ba'o/ /de la 'gro ba la sogs pa de ji lta ba bzhin bya'o zhes bya ba la/ de la zhes bya ba ni/ 'khor la'o/ /'gro ba la sogs pa zhes bya ba la/ sogs pa zhes bya ba'i sgras ni/ 'di ltar 'gro bar bya/ 'di ltar 'dug par bya/ 'di ltar nyal bar bya ba la sogs pa'i rnam pa de lta bu dag gi don du 'khor ji lta ba bzhin bya ba bsdu'o/ /de zhes bya ba'i sgra ni 'khor la snyegs so/ /ji lta ba bzhin zhes bya ba ni/ 'khor dang mthun par bya'o/ /'di skad bstan te/ 'khor dang ldan pa'i dge slong gis 'gro ba la sogs pa rang gi 'khor dang mthun par bya ste/ 'khor dang ldan pa des rang gi 'khor rnams kyi 'gro ba la sogs pa 'khor ji lta ba bzhin bsgrub par bya'o zhes bya ba'i tha tshig go/ /gtam sna tshogs dang 'gal ba med par bya'o zhes bya ba la/ gtam sna tshogs zhes bya ba ni/ rnam par 'phros pa'i gtam mo/ /gtam 'gal ba zhes bya ba ni/ chos 'dul ba dang 'gal ba'o/ /'khor dang ldan pa gang la gtam sna tshogs dang gtam 'gal ba med pa de ni gtam sna tshogs dang 'gal ba med pa ste/ 'khor dang ldan pa des 'khor de la khyad par de lta bu dang ldan par bya'o zhes bya ba'i tha tshig go/ /gnas dang gnas pa'i skabs yin pa'i phyir de'i zhar la/ phyi bzhin 'brang ba'i dge sbyong mdun du 'gro bar mi bya'o zhes bya ba 'di smras te/ phyi bzhin 'brang ba'i dge sbyong gnas kyi mdun du 'gro bar mi bya'o/ /'dug par mi bya'o zhes bya ba ni/ gong du 'dug pa dang 'greng bar mi bya ba'o/ /smras na smra bar bya zhing bsgrub par bya'o zhes bya ba la/ smras na smra bar bya zhes bya ba ni/ dge slong bla mas smras shing brjod na/ phyi bzhin 'brang ba'i dge sbyong gis smra bar bya ba ste/ bla mas ma smras kyi bar du 'og mas cung zad kyang smra bar mi bya ba'o/ /bsgrub par bya'o zhes bya ba ni/ yang na dge sbyong bla mas gang smras pa de phyi bzhin 'brang ba'i dge sbyong gis cang mi smra ba kho nar bsgrub par bya ba'o/ /gtam gyi bar chad mi bya'o zhes bya ba la/ gtam gyi bar chad ces bya ba ni/ gtam zer ba'i bar du gcod pa'o/ /dge sbyong bla mas gtam zer ba na phyi bzhin 'brang ba'i dge sbyong gis gtam gyi bar chad mi bya'o/ /chos ma yin pa smra ba na bzlog par bya'o zhes bya ba ni/ dge sbyong bla ma chos ma yin pa mi rigs pa smra ba na phyi bzhin 'brang ba'i dge slong gis bzlog par bya dgag par bya'o/ /chos kyis rjes su yi rang bar bya'o zhes bya ba ni/ dge slong bla ma la sogs pa chos smra ba na phyi bzhin 'brang ba'i dge sbyong la sogs pas rjes su yi rang bar bya ste/ legs so zhes bya ba sbyin no zhes bya ba'i tha tshig go/ /chos dang ldan pa'i rnyed pa byung na blang bar bya'o zhes bya ba ni/ dge sbyong bla ma'i chos dang ldan pa'i rnyed pa zhig byung na phyi bzhin 'brang ba'i dge sbyong gis blang bar bya ste/ dge sbyong bla ma rang gis blang ba ni tshul ma yin pa'i phyir ro/ /de ni phyi bzhin 'brang ba'i dge sbyong gi tshul khrims yin no/ /'di man chad ni rab tu byung ba'i gzhi'i zhar la phran tshegs la sogs pa'i skabs nas 'byung ba shes par bya ste/ de la je re zhig khyim du 'gro ba'i tshul khrims brjod par bya ste/ khyim du mi rgod pa dang ma khengs pa dang mi gnas par bya'o zhes bya ba ni/ dge sbyong khyim du 'gro bas khyim du mi rgod par bya ba dang / ma khengs pa ni gyang gying med par bya ba dang / mi gnas pa zhes bya ba ni/ dge sbyong khyim du 'gro bas khyim du mi gnas par byas te/ khyim nas phyir 'gro 'dod par bya zhing der yun ring du gnas pa'i sems med par bya ba'o/ /mig smad pa dang khyim pa rnams la chos dang ldan pa'i gtam bya'o zhes bya ba la/ gang gis mig smad pa de ni mig smad pa ste/ yul rnams las mig phyir blan pa zhes bya ba'i tha tshig go/ /g.yeng bag tu lta ba nyid ni tshul ma yin pa'i phyir ro/ /chos dang ldan pa'i gtam bya'o zhes bya ba ni/ khyim du son pa na khyim pa rnams la chos dang ldan pa'i gtam bya'o zhes bya ba'i tha tshig go/ / ci dang ci lta bu bya zhe na/ de'i phyir sbyin pa dang dul ba dang yang dag par sdom pa dang / tshangs par spyod pa la gnas pa dang / gso sbyong dang skyabs su 'gro ba dang / bslab pa'i gzhi bzung bdag la de dag nges par sbyar bar bya'o zhes bya ba smras te/ dge slong khyim du 'gro bas khyim pa de dag sbyin pa la sogs pa dag la nges par sbyar bar bya'o zhes bya bar sbyar ro/ /de la sbyin pa zhes bya ba ni gang gis sbyin par byed pa dang sbyin par bya pa'o/ /dul ba zhes bya ba ni/ dbang po rnams la dbang byed pa'o/ /yang dag par sdom pa zhes bya ba ni/ lus dang ngag gi yang dag par sdom pa'o/ /tshangs par spyod pa la gnas pa zhes bya ba ni/ rab tu byung ba'i tshul khrims dang khyim pa nyid la yang ji srid 'tsho'i bar du grong pa'i chos las phyir ldog pa'o/ /ltung ba'i sgor gyur pa'i 'jug pa thams cad la dran pas bsgrub par bya'o zhes bya ba ni/ 'jug pa thams cad la dran pas bsgrub par bya'o zhes bya bar sbyar ro/ /khyad par ji lta bu can zhig ce na/ ltung ba'i sgor gyur pa la ste/ bya ba brtsam pa gang las ltung ba 'byung bar 'gyur ba yod pa ltung ba 'byung ba'i sgor gyur pa de la'o/ /khyim du 'jug pa dang bsod snyoms blang ba la sogs pa dang 'gro ba dang 'jug pa dang / lhung bzed bzed pa la sogs pa'i 'jug pa thams cad la dran pas bsgrub par bya ste/ dge slong dran pa mngon du gyur pas bya ba de dag la 'jug par bya'o zhes bya ba'i don to/ /'di skad bstan te/ gal te dge slong bya ba rtsom par 'dod pas bya ba brtsam pa gang las ltung ba 'byung ba yod pa'i ltung ba'i yul de la dge slong des ci nas kyang ltung ba 'ga' yang mi 'byung ba de ltar dang po nyid nas dran pa nye bar gzhag par bya ba yin gyi/ don kyi rang gi ngo bo nyid nges par bzung ba'i phyir dran pas bsgrub par bya ba ni ma yin no/ /rjes su 'gro ba bslabs pas mi bya bar mi bya'o zhes bya ba ni/ bsgrub par zhes bya bar sbyar ro/ /rjes su 'gro bas ni rjes su 'gro ba ste/ rjes su 'brang ba'o/ /gang la rjes su 'brang ba des gal te bslabs par gyur na de ni des bslabs pa yin pas rjes su 'gro ba des de'i rjes su bstan pa las mi 'da' bar bsgrub par bya ba de mi bya ba'o/ /'di skad bstan te/ gang zag gang gang zag gang gi rjes su 'brang zhing gal te des de slob tu 'jug par byed na/ rjes su 'brang ba des de'i bslab pa khas blang bar bya'o zhes bya ba'i tha tshig go/ /'ongs pa la 'ongs pa legs so zhes sngar snyan par brjod par bya'o zhes bya ba ni/ gal te khyim pa'am rab tu byung ba 'ga' zhig gtsug lag khang du 'ongs na 'ongs pa de la dge slong gis 'ongs pa legs so zhes brjod par bya zhing / 'ongs pa gang yin pa des brjod pa bas sngar bsnyen par brjod par bya ba'o/ /bzhin gyi mdangs gsal bar bya'o zhes bya ba ni/ bzhin rab tu dang bar bya zhing ngom zum mi bya ba'o/ /'dzum par sngar bya'o zhes bya ba ni/ 'ongs pa de la dge slong des 'dzum pa yid tsam dgod par sngar bya ba'o/ /khro gnyer med par bya'o zhes bya ba ni/ gang la 'ongs pa na khro gnyer med pa de ni khro gnyer med pa ste de ltar bya ba ba'o/ /gal te khyim pa zhig na de la chos dang ldan pa'i gtam bya'o zhes bya ba ni/ gal te khyim pa zhig gtsug lag khang du 'ongs na khyim pa de la dge slong gis chos dang ldan pa'i gtam bya ba'o/ /grong mtha' bas ni der mi 'ong na kun dga' bar 'gyur bar ci nus pas bzlug par bya'o zhes bya ba ni/ dge slong grong mtha' pa gtsug lag khang na gnas pas ni gtsug lag khang der khyim pa mi 'ong na de'i tshe kun dga' bar 'gyur ba zas dang skom la sogs pa ci nus pas nus pa dang mi 'gal bar nus pa'i mthu dang mthun par bzlug par bya ba srul bar bya'o zhes bya ba'i tha tshig go/ /chu dang stan bstabs par bya'o zhes bya ba ni/ dgon pa pas kyang 'ongs pa la chu dang stan tsam yang bstabs par bya'o zhes bya ba'o/ /phyag dar dang mal dang stan bshams pa dang / chu gzhag pa dang brim pa dang zan drang ba ni gsar bus bya'o zhes bya ba ni/ phyag dar la sogs pa gsar bus bya'o zhes bya bar sbyar ro/ /gnas khang la sogs pa'i phyag dar yang gsar bus bya'o/ /dge 'dun gyi brang du mal stan bshams pa yang gsar bu de nyid kyis bya'o/ /chu gzhag pa yang de nyid kyis bya'o/ /shing thog la sogs pa brim pa dang / lhung bzed la sogs par zan drang ba yang gsar bus bya ste/ dge slong rnams gang dang gang du son pa de dang der de ltar bya ba yin no/ /g.yog 'khor gyi bya ba mi mthun pa gal te rang dang gzhan la gnod par mi 'gyur ba ni ci bder gzhag go zhes bya ba ni/ de btang snyoms su gzhag par bya'o zhes bya bar sbyar ro/ /g.yog 'khor gyi bya ba mi mthun pa zhes bya ba ni/ g.yog 'khor gyi rnam par gzhag pa tshul dang mthun pa ma yin pa rkyen du mi 'bab pa ste/ lha drag po'i rten gzugs pa la sogs pa'o/ /gal te rang dang gzhan la gnod par mi 'gyur ba zhes bya ba ni/ bya ba des dge slong bdag nyid la yang gnod pa'i rgyur mi 'gyur la/ yul mi gzhan dag la yang gnod pa'i rgyur mi 'gyur ba'o/ /ci bder gzhag go zhes bya ba ni btang snyoms su gzhag par bya ba'o/ /gal te de ltar na nus kyang de dag rgyun bcad la chos dang ldan par bskyed nas des gros gdab par bya'o zhes bya ba ni/ gal te ji ste bya ba de khas blangs pa lta na bdag dang gzhan la gnod pa de ltar 'gyur zhing / bdag dang gzhan la gnod pa lta na nus su zin kyang g.yog 'khor gyi bya ba mi mthun pa de dag gis bya ba rgyun bcad la/ g.yog 'khor gyi bya ba chos dang ldan pa gtsug lag khang du phreng ba dgod pa dang lo lnga'i dus ston la sogs pa gzhan dag bya ba'i sems bskyed nas bya ba de nyid des g.yog 'khor la gros gdab par bya ba'o/ /yang na bskyed nas zhes bya ba ni/ rnam par bzhag nas so/ /des zhes bya ba ni/ chos dang ldan pa'i bya ba des so/ /gros gdab par bya'o zhes bya ba ni/ khyed kyis da phyin chad chos dang ldan pa'i bya ba de bya'o zhes khong du chud par bya ba'o/ /de'i gzhi las g.yog 'khor mi dga' zhing 'pho ba lta na phyir bsdu bar bya'o zhes bya ba ni/ gal te chos dang ldan pa'i bya ba la rnam par gzhag pa de'i gzhi las g.yog 'khor gyi sems mi dga' zhing yid mi bde bar gyur tam/ gtsug lag khang gi gnas de nas grong gzhan du 'pho zhing skya ba lta na/ g.yog 'khor de ci nas kyang mi dga' ba dang 'pho ba de gnyis su yang mi 'gyur la bya ba mi mthun pa de yang rgyun gcod par 'gyur ba de ltar sbyin pa dang snyan par smra ba la sogs pas phyir bsdu bar bya ba'o/ /mi nus pa nyid yin na gzhan du 'gro bar bya'o zhes bya ba ni/ g.yog 'khor gyi bya ba mi mthun pa de rgyun gcod par mi nus pa nyid yin na bdag nyid gnas gzhan du 'gro bar bya ba'o/ /de'i rkyen gyis rtsod cing smra bar mi bya'o zhes bya ba ni/ dge slong des gtsug lag khang gzhan du 'gro bar bya'i bya ba mi mthun pa rgyun gcad pa dang / chos dang ldan pa'i bya ba la rnam par gzhag pa de'i rkyen gyis g.yog 'khor mi dga' zhing 'pho ba phyir bsdus kyang mi btub na yang rgyu des g.yog 'khor dang lhan cig rtsod cing 'thab pa'i tshig smra bar mi bya ba'o/ /gal te dge 'dun gyi kun dga' ra bar rkun po la sogs pas gnod par byed na de'i tshe ji ltar bya zhe na/ de'i phyir dge 'dun gyi kun dga' ra bar gnod pa byed na ci nas kyang de nyid 'dzin du gzhug pa'i phyir 'dzin pa btang ba de ltar bya'o zhes bya ba ni/ dge 'dun gyi kun dga' ra ba gtsug lag khang du rkun po la sogs pas gnod pa byed pas nyes pa byed na/ g.yog 'khor gyis ci nas kyang de nyid 'dzin du gzhug pa mngon sum du zin pas ci nas kyang cung zad kyang smra mi nus par 'gyur bar bya ba'i phyir 'dzin pa btang bde ltar thabs bya'o zhes bya ba'i tha tshig go/ /ji ste de nyid 'dzin du gzhug pa'i phyir 'dzin pa mi 'gro na yang je sgo nyid du yus rtsod pa btang la/ yus su 'gyur bar bsgrub pa btang ba'i phyir/ mi 'gro na bab col du su la yang mi brjod par gzhon nu dang mdza' bshes dang zhang blon dang bkrabs pa dang / zhabs 'bring gnyug ma dag la skad sbyar te/ gra dag par thul 'og tu gzhug par bya'o zhes bya ba smras te/ gal te g.yog 'khor su yang thabs gang gis kyang 'dzin du mi 'gro na de'i tshe gnod pa byed par 'dzin pa'i g.yog 'khor mi 'gro yang gra dag par thul 'og tu gzhug par bya'o zhes bya bar sbyar ro/ /ji ltar zhe na/ bab col du su la yang mi brjod par zhes bya ba la sogs pa smras te/ bab col du zhes bya ba ni/ so sor ma brtags par ro/ /su la yang zhes bya ba ni/ g.yog 'khor la sogs pa su yang ngo / /mi brjod par zhes bya ba ni/ mi smra bar ro/ /'di skad bstan te/ ci nas kyang g.yog 'khor gzhan gyis mi thos par bdag 'ba' zhig gis bya'o zhes de ltar gsang chen bya zhing / bab col du g.yog 'khor su la yang brjod par mi bya'o zhes bstan pa yin no/ /gzhon nu zhes bya ba ni/ rgyal tshab tu dbang bskur ba'o/ /mdza' bshes zhes bya ba ni/ rgyal po'i'o/ /zhang blon zhes bya ba ni blon po'o/ /bkrabs pa zhes bya ba ni/ rgyal po'i gdung la gtogs pa sdig pa'i chos bsal ba mchod pa'o/ /zhabs 'bring gnyug ma zhes bya ba ni/ nyin mtshan gyi thun thams cad du rgyal po'i zhabs 'bring byed pa'o/ /yang na rgyal po'i zhabs kyis 'tsho ba'i gnang chen no/ /de dag la skad sbyar te zhes bya ba ni/ gzhon nu la sogs pa de dag la gzhi de go bar byas te'o/ /gra dag par zhes bya ba ni/ gra gang du skye bo yongs la mi rigs pa'i chad pas mi gcod pa'i gra de ni gra dag pa ste der ro/ /thul 'og tu gzhug par bya'o zhes bya ba ni/ pham par bya'o zhes bya ba'i tha tshig go/ /rab tu byung ba'i gzhi'i skabs las dge slong gi skabs smras zin to// // da ni dge slong ma'i skabs brjod par bya ste/ de la skyes pa'i rab tu 'byung ba dang rdzogs par bsnyen pa'i cho ga bstan pa gang yin pa de nyid bud med kyi yin par yang khas blang ngo / /bye brag tu ni 'di brjod par bya ste/ dge slong gi gnas su dge slong ma'o zhes bya ba ni/ dge slong rab tu 'byung ba dang rdzogs par bsnyen par byed pa'i skabs gang du dge slong zhes smos pa der dge slong ma zhes brjod par bya ste/ dper na dge slong 'ga' zhig la mkhan po nyid du gnas pa la'o zhes bya ba der/ dge slong ma 'ga' zhig la mkhan po nyid du gnas pa la'o zhes bya ba lta bu dang / de bzhin du rang gi dge bsnyen nyid du nye bar bsgrubs nas dge 'dun la zhu ba'i dge slong la gtad par bya'o zhes bya ba de yang / dge slong ma dge 'dun la zhu ba'i dge slong ma la gtad par bya'o zhes bya ba lta bur shes par bya ste/ gzhan dag la yang de bzhin du sbyar bar bya'o/ /ci dge slong gi gnas thams cad du dge slong ma zhes brjod par bya ba'am/ 'on te kha cig tu zhe na/ de'i phyir rab tu 'byung ba thams cad kyi'o zhes bya ba smras te/ rab tu 'byung ba'i yul la re zhig mkhan po la sogs pa dge slong thams cad kyi gnas su dge slong ma zhes brjod par rig par bya ba'o/ /rdzogs par bsnyen pa la yang ji ltar shes par bya zhe na/ de'i phyir rdzogs par bsnyen pa la ni de gsol ba la sogs pa'i las byed pa las gzhan pa'i 'o zhes bya ba smras te/ rdzogs par bsnyen pa ni dge slong zhes bya ba'i gnas thams cad du dge slong ma zhes brjod par bya ste/ 'di ltar de gsol ba la sogs pa'i las byed pa zhes bya ba rdzogs par bsnyen pa gsol ba la sogs pa'i las byed pa'i dge slong smos pa gang yin pa'i dge slong las byed pa de ma gtogs pa de las gzhan pa'i gnas su dper na/ gsang ste ston pa dang / mkhan po la sogs pa dge slong zhes smos pa der dge slong ma zhes brjod par bya'o/ /rdzogs par bsnyen pa gsol ba'i snga rol phan chad du dge slong ma'i dge 'dun gyi dbus su tshangs par spyod pa la nye bar gnas pa'i sdom pa sbyin pa la sogs pa ni/ dge slong ma las byed pa 'ba' zhig gis bya'o/ /ci dge slong ma rdzogs par bsnyen par bya ba las byed pa ma gtogs pa dge slong gi gnas su dge slong ma brjod par bya ba'i bye brag de kho nar zad dam gzhan yang yod ce na/ yod de de'i phyir 'dir dge 'dun gyis bsnun par bya'o zhes bya ba smras te/ rdzogs par bsnyen pa gsol ba la sogs pa'i skabs 'dir dge slong gi dge 'dun gyis bsnan par bya'o zhes bya bar rig par bya'o/ /'di skad bstan te/ gnyi ga'i dge 'dun 'dus pa la las byed pa'i dge slong gis gsol ba la sogs pa'i las bya'o zhes bya ba'i tha tshig go/ /bye brag gzhan yang bstan pa'i phyir/ bar chad dri ba dge slong mas bsgribs pa la bya'o zhes bya ba smras te/ bar chad dri ba'i tshe lan gdab pa'i tshig gang yin pa de dag dge slong ma gzhan cig mdun du bzhag pas lan gdab cing de'i tshig gi rjes su de nyid zlos su gzhug go/ /dge slong ma rdzogs par bsnyen par bya ba la/ dge 'dun gyi dbus su bar chad dri ba lan gnyis bya dgos te/ gcig ni tshangs par spyod pa la nye bar gnas pa'i sdom pa sbyin pa'i dus na dge slong ma'i dge 'dun 'ba' zhig gi dbus su las byed pa'i dge slong mas dri ba'o/ /gnyis pa ni rdzogs par bsnyen par bya ba'i dus na/ gnyi ga'i dge 'dun gyi dbus su las byed pa'i dge slong gis dri ste/ de gnyi gar yang cho ga de bzhin bya'o/ /sngar gsang ste ston pa'i dge slong mas lkog tu dri ba'i dus na ni de ltar bya mi dgos so/ /bud med la ni dge slong ma zhes bya ba'i tshig gzhan yod do zhes bya ba ni/ bud med la ni dge tshul ma nyid dang dge slong ma nyid las dge slob ma zhes bya ba'i tshig gzhan gsum pa 'di yod par rig par bya'o/ /gnas pa kho na la'o zhes bya ba ni/ dge slob ma nyid kyi tshig de yang dge slong ma 'ga' zhig la mkhan po nyid du gnas pa kho na la yod pa'o/ /'di skad bstan te/ ji ltar dge tshul ma nyid dang dge slong ma nyid kyi tshig mkhan mo dang bcas pa la yod par 'gyur ba bzhin du 'di yang de bzhin te/ de'i phyir dge slong ma 'ba' zhig la mkhan mo nyid du gnas pa la dge slob ma nyid yod par 'gyur bar rig par bya'o/ /dge slob ma nyid kyi tshig gzhan de gnas skabs gang du sbyin par bya zhing de dus ji srid spyad par bya dgos she na/ de'i phyir dge tshul ma nyid dang dge slob ma nyid kyi bar skabs su spyod pa'i dus 'di lo gnyis so zhes bya ba smras te/ dge slob ma nyid kyi tshig gzhan de ni dge tshul ma nyid dang dge slong ma nyid kyi bar skabs su sbyin no/ /de spyad pa'i dus ni lo gnyis so/ /lo gnyis las lhag na yang / de phyin chad brtul zhugs de nyams par yang mi 'gyur la/ de phyin chad mi bsrung bar bya ba yang ma yin no/ /'on kyang dus nges par mdzad pas/ dus de srid du nges pa kho nar bsrung bar bya ba nyid yin te/ de srid du de yongs su rdzogs par ma gyur gyi bar du rdzogs par bsnyen par mi bya'o zhes bya ba'i tha tshig go/ / de gnyis kyi bar skabs su dge slong ma nyid kyis tshig gzhan de sbyin par bya'o zhes smras na/ de gnyis kyi bar skabs la yang dus su gyur pa ring zhig yod pas dus gang gi tshe na/ dge slob ma nyid kyi sdom pa skye zhe na/ de'i phyir rdzogs par bsnyen pa'i dus kyi dang por des ma lon pa'i dang po la skye'o zhes bya ba smras te/ rdzogs par bsnyen pa'i dus ni/ rdzogs par bsnyen pa'i dus te de'i dang po rtsom pa ni/ rdzogs par bsnyen pa'i dus kyi dang po'o/ /de yang 'di lta ste/ gzhon nu ma'i ni lo nyi shu lon pa nyid do/ /khyim so bzung ba'i lo bcu gnyis lon pa nyid do/ /de ma lon pa zhes bya ba ni/ dge slob ma lo gnyis spyad pa'i dus des rdzogs par bsnyen pa'i dus kyi dang por ma lon pa ste/ 'di lta ste/ gzhon nu ma'i lo bco brgyad lon pa nyid do/ /khyim so bzung ba ni lo bcu lon pa nyid do/ /lo gnyis kyi dus des rdzogs par bsnyen pa'i dus kyi dang por ma lon pa ni/ rdzogs par bsnyen pa'i dus kyi dang por des ma lon pa'o/ /rdzogs par bsnyen pa'i dus kyi dang por des ma lon pa'i dus de'i yang dang po ni/ rdzogs par bsnyen pa'i dus kyi dang por des ma lon pa'i dang po ste/ des ni dge slob ma nyid dang po skye ba'i dus yin par rig par bya'o/ /de la dang por zhes bya ba'i sgra snga mas ni/ gzhon nu ma'i lo nyi shu lon pa la sogs pa bzung ngo / /khyim so bzung ba'i ni lo bcu gnyis lon pa la sogs pa bzung ngo / /dang po la zhes bya ba'i sgra gnyis pas ni/ gzhon nu ma'i ni lo bco brgyad lon pa la sogs pa nyid bzung ngo / /khyim so bzung ba'i ni lo bcu lon pa la sogs pa nyid bzung ngo / /mdor bsdus na 'di skad bstan te/ rdzogs par bsnyen pa'i dus kyi mdun du lo gnyis dge slong ma nyid bya'o zhes bya ba'i tha tshig go/ /'dir gzhung ni/ dge slong ma'i rnam par 'byed pa las khyim so bzung ba gang yin pa ni lo bcu lon na'o/ /gzhon nu mar gyur pa ni lo bco brgyad lon pa ste/ de gnyis la lo gnyis su dge slob ma'i sdom pa sbyin par bya'o zhes gsungs pa yin no/ /rdzogs par bsnyen pa'i dus lo nyi shu lon pa la sogs pa yin par khas blangs pa la bud med rdzogs par bsnyen par bya ba'i bye brag bstan pa'i phyir/ khyim so bzung ba rdzogs par bsnyen par bya ba'i lo rnams kyi dang po ni bcu gnyis nyid do zhes bya ba smras te/ bud med khyim so bzung ba bag mar btang ba yin na/ de'i rdzogs par bsnyen par bya ba'i dus de'i lo rnams kyi dang po ni lo bcu gnyis lon pa nyid do/ /'di skad bstan te/ bud med khyim so bzung ba ni lo bcu gnyis lon pa yan lag rdzogs par bsnyen par bya'o/ /lo bcu gnyis ma lon pa man chang ni khyim so bzung du zin kyang rdzogs par mi bya'o/ /de ji ltar skyes she na/ de'i phyir/ sbyin pa las skye'o zhes bya ba smras te/ dge slob ma nyid do/ /sus sbyin pa las she na/ de'i phyir dge slong ma'i dge 'dun gyis so zhes bya ba smras so/ /ji ltar sbyin par bya zhe na/ de'i phyir sbyin pa ni bslab pa'i sdom pa zhes bya ba smras te/ bslab pa'i sdom pa zhes bya ba'i tha tshig dang ldan pa 'dis sbyin par bya'o/ /dge slob ma nyid ces bya ba 'dis ni ma yin no/ /de ltar na 'dul ba las kyang 'di skad 'byung ste/ dge tshul ma ming 'di zhes bgyi bas dge slong ma'i dge 'dun las lo gnyis su chos drug dang rjes su mthun pa'i chos drug la bslab pa'i sdom pa gsol na zhes bya ba la sogs pa'i sngags las 'byung ba yin no/ /dge slong ma'i bslab pa rnams yang dag par blang ba'i phyir sdom pa ni bslab pa'i sdom pa zhes bya'o/ /de'i 'og tu bslab pa brjod par bya'o zhes bya ba ni/ bslab pa'i sdom pa byin pa de'i 'og tu las byed pa mos bslab pa brjod par bya ba'o/ /dge slob ma'i bslab pa ni chos drug dang rjes su mthun pa'i chos drug ste/ de la chos drug ni/ gcig pu lam du 'gro mi bya/ /chu bo'i pha rol rkyal mi bya/ /skyes pa la ni reg mi bya/ /skyes pa dang ni 'dug mi bya/ /smyan du 'gyur ba mi bya zhing / /kha na ma tho bcab mi bya/ /zhes bya ba dag go/ /rjes su mthun pa'i chos drug ni/ /gser la gzung bar mi bya zhing / /mdoms kyi spu ni breg mi bya/ /sa ni brko bar mi bya ste/ /rtswa sngon dag kyang gcad mi bya/ /byin len ma byas bza' mi bya/ /sogs 'jog byas pa bza' mi bya/ /zhes bya ba dag go/ /ci dge slob ma nyid spyad pa'i 'og kho nar de bsnyen bar rdzogs par bya'am zhe na de'i phyir/ tshangs par spyod pa la nye bar gnas pa'i sdom pa ma thob par bsnyen par rdzogs par mi 'gyur ro zhes bya ba smras te/ tshangs pa zhes bya ba'i sgra ni mya ngan las 'das pa la bya'o/ /de'i don du spyod pa ni tshangs par spyod pa ste bsnyen par rdzogs pa'o/ /de la nye bar gnas pa ni nye bar skyed par byed pa la nye bar gnas par bya ba'i phyir/ sdom pa ni tshangs par spyod pa la nye bar gnas pa'i sdom pa ste/ lus la bsnyen par rdzogs pa skye ba'i skal ba can du 'gyur bar nges pa ni tshangs par spyod pa la nye bar gnas pa'i sdom pa'o/ /gang gis de ma thob pa de ni tshangs par spyod pa la nye bar gnas pa'i sdom pa ma thob pa ste/ bsnyen par rdzogs par 'dod pa gang gis de ni ma thob pa de la ni bsnyen par rdzogs par mi 'gyur ro/ /gang gi tshe de sbyin par bya zhe na de'i phyir/ /gsang ste ston pa'i 'og tu dge 'dun gyis de sbyin par bya'o zhes bya ba smras te/ bsnyen par rdzogs pa'i ched du gsang ste ston pa'i 'og tu tshangs par spyod pa la nye bar gnas pa'i sdom pa de sbyin par bya'o/ /sus she na/ de'i phyir dge 'dun gyis zhes bya ba smras te/ skabs yin pa'i phyir/ dge slong ma'i dge 'dun gyis sbyin par shes par bya'o/ /ci zhig byas nas sbyin par bya zhe na/ de'i phyir bar chad dris nas so/ /dge slong ma las byed pas dge 'dun ma'i dbus su de la bar chad kyi chos rnams dris nas tshangs par spyod pa la nye bar gnas pa'i sdom pa sbyin par bya'o/ /de ltar na bud med rnams la bar chad dri ba lan gsum du 'gyur te/ dang por gcig ni dge slong ma gsang ste ston pas bkar te dri ba'o/ /de'i 'og tu gnyis pa ni dge slong ma las byed pas dge slong ma'i dge 'dun 'ba' zhig gi dbus su tshangs par spyod pa la nye bar gnas pa'i sdom pa sbyin pa'i snga rol kho nar dri ba'i tha mar gsum pa ni dge slong las byed pas gnyi ga'i dge 'dun gyi dbus su bsnyen par rdzogs par gsol ba'i 'og tu dri ba'o/ /gsol ba byas nas so zhes bya ba ni/ tshangs par spyod pa la nye bar gnas pa'i sdom pa yang gsol nas sbyin par bya'o/ ma gsol bar ni mi sbyin pa'o/ /bsnyen par rdzogs pa la chos gos dag ni lnga nyid do zhes bya ba ni/ dge slong ma bsnyen par rdzogs pa'i chos gos dag rnam par gzhag pa ni chos gos lnga nyid de/ chos gos gsum ni thun mong yin no/ /shing nga dpung bcad dang rngul gzan lhag par rig par bya'o/ /gnas rnams la shing drung nyid ma gtogs so zhes bya ba ni/ gnas rnams brjod pa la shing drung ma gtogs pa nyid de/ gnas rnams la shing drung nyid ma gtogs pa gnas gzhan gsum de la brjod par bya'o/ /ltung bar 'gyur ba rnams la brgyad nyid do zhes bya ba ni ltung bar 'gyur ba rnams brjod pa la/ dge slong ma'i ltung bar 'gyur ba rnams ni brgyad nyid du shes par bya ba ste/ reg pa dang ni lus bkan dang / /'chab pa dang ni bzlog pa'o/ /zhes bya ba bzhi po de dag lhag pa yin no/ /lci ba'i chos rnams brjod par bya'o zhes bya ba ni/ lci ba'i chos brgyad po dag brjod par bya ba ste/ de dag ni dge slong mas dge slong rnams las bsnyen par rdzogs pa gsol bar bya ba dang / zla ba phyed phyed cing gdams ngag stsal bar bya ba dang / dge slong med pa'i gnas gang du yang des dbyar gnas par khas mi blang ba dang / dge slong la tshul khrims nyams pa la sogs pa gleng bar mi bya ba dang / dge slong mas dge slong la ji ltar yang spyo bar mi bya ba dang / dge slong gsar bu la yang dge slong mas phyag bya ba dang / gnyi ga'i dge 'dun las mgu bar bya ba dang / gnyi ga'i dge 'dun la dgag dbye bya ba ste/ de dag ni lci ba'i chos brgyad do/ /dus gang du lci ba'i chos rnams brjod par bya zhe na de'i phyir/ ltung bar 'gyur ba dang / dge sbyong byed pa'i bar skabs su'o zhes bya ba smras te/ ltung bar 'gyur ba rnams dang por brjod par bya'o/ /de'i 'og tu lci ba'i chos rnams so/ /de'i 'og tu dge sbyong byed pa'i chos rnams brjod par bya ba'o/ /bkol ba drug po dag go zhes bya ba ni/ sngon rab tu byung ba zhes bya ba nyid gtogs pa de yan chad kyi mdo drug po dag bkol ba zhes bya ba dbang du bya ba'i ming 'di'i dbang du bya ste/ /ming dang ming can bsdeb par bya'o/ /de ltar na mdo drug po de dag kun la tshig gi don 'di nye bar gnas par rig par bya ste/ rab tu 'byung ba dang bsnyen par rdzogs pa'i phyir nye bar 'ongs pa la drug po de dag ma yin nam zhes dri bar bya zhing bsnyen par rdzogs par byed pa dag gis kyang dri bar bya ste/ drug po de dag rab tu 'byung ba dang bsnyen par rdzogs par mi bya'o zhes bya bar sbyar ro/ /de la skye ba'i chos nyid med par yang 'dra'o zhes bya ba 'di yang 'dir mdo drug po dag gi dbang du bya ba'o/ /rnam pa de lta bu'i rtags can ni bsnyil bar bya'o zhes bya ba de yang 'dir ma smos su zin kyang / thams cad kyi dbang du bya ba yin gyi/ skyes pa 'ba' zhig gi dbang du bya ba ma yin pas ma smos kyang de bzhin yod par shes par bya ste/ rnam pa de lta bu zhes smos pa'i phyir ro/ /dbang du bya ba'i yul du gyur pa mdo drug po dag bstan pa'i phyir mtshan gnyis pa'o zhes bya ba smras te/ gang la mtshan gnyis yod pa'o/ /gle 'dams pa'o zhes bya ba ni/ mo mtshan dang bshang ba'i sgo gnyis lhan cig gcig tu gyur pa gang la yod pa de ni gle 'dams pa'o/ /rtag tu zla mtshan zag pa'o zhes bya ba ni/ gang gi mo'i dbang po nas rtag tu khrag 'dzag pa de ni de yin par rig par bya'o/ /zla mtshan mi zag pa'o zhes bya ba ni/ gang gi mngal na gnas pa nyal ba'i gnas zla mtshan gyi khrag med pa de ni zla mtshan med pa yin no/ /mtshan ma tsam yod pa'o zhes bya ba la ci zhig gi mtshan ma tsam yod pa zhe na de'i phyir/ mtshan ma tsam du gyur pa'i mtshan yod pa de ni de zhes bya'o zhes bya ba smras te/ gang la mtshan ma tsam du gyur pa'i mo mtshan yod pa de ni mtshan ma tsam yod pa de zhes bya ste/ ming de skad gdags so/ /sngon rab tu byung ba'o zhes bya ba ni/ gang sngon rab tu byung ba las phyis bslab pa phul bar gyur pa de ni sngon rab tu byung ba'o/ /de ltar na 'dir tshig gi don 'di 'byung ste/ rab tu 'byung ba dang bsnyen par rdzogs pa'i phyir nye bar 'ongs pa la mtshan gnyis pa zhes bya ba nas sngon rab tu byung ba zhes bya ba'i bar gyi mdo drug po de ma yin nam zhes dri bar bya zhing bsnyen par rdzogs par byed pa dag gis kyang dri bar bya ste/ mtshan gnyis pa zhes bya ba nas sngon rab tu byung ba zhes bya ba'i bar gyi drug po de rab tu dbyung ba dang / bsnyen par rdzogs par mi bya'o/ /de la ni skyes pa'i chos nyid med par yang 'dra'o/ /rnam pa de lta bu'i rtags can ni bsnyil bar bya'o zhes bya bar sbyar ro/ /rab tu 'byung ba'i gzhi phran tshegs la sogs pa'i skabs so// //zhu ba'i skabs brjod par bya ba'i phyir/ mi ma yin pa'i 'gro ba pa dang byang gi sgra mi snyan pa gnyis ni sdom pa'i zhing nyid ma yin no zhes bya ba ni/ mi'i 'gro ba las gzhan pa/ lha la sogs pa'i 'gro bar skyes pa de dag ni mi ma yin pa'i 'gro ba ba'o/ /mi'i 'gro ba pa nyid yin du zin kyang / byang gi sgra mi snyan pa dang / de gnyis ni sdom pa'i zhing nyid ma yin te/ de gnyis la sdom pa mi skye'o zhes bya ba'i tha tshig go/ /mtshan lan gsum gyur pa yang ma yin no zhes bya ba ni/ gang gi mtshan lan gsum gyur na mtshan gyur pa lan grangs gsum pa de la yang sdom pa'i zhing nyid med de/ sdom pa mi skye ba'o zhes bya ba'i tha tshig go/ /mtshan lan gsum gyur pa ni ma ning gi rigs yin pa'i phyir ro/ /dang po gnyis pa ni mi nyams so zhes bya ba ni sdom pa ste/ mtshan gyur pa dang po dang gnyis pa la ni sdom pa nyams pa med do/ /len pa nyid na yang skye'o zhes bya ba ni/ sdom pa len pa nyid na sdom pa yang dag par len pa nyid de de'i tshe mtshan gyur na yang sdom pa skye ba nyid yin no/ /'dir gzhung ni bsnyen par rdzogs par 'tshal ba'i mtshan gyur na bsnyen par rdzogs pa zhes bgyi'am/ bsnyen par ma rdzogs pa zhes bgyi/ bka' stsal pa/ bsnyen par rdzogs pa zhes bya ste/ dge slong mas ni dge slong rnams las bsnyen par rdzogs pa dge slong ma'i dngos po btsal bar bya ba yin pa'i phyir ro zhes gsungs pa yin no/ /'dir pho'i mtshan gyur pa ni dpe tsam du zad do/ /de dang ldan pa ltar mkhan po med pa nyid la yang ngo zhes bya ba la/ dge tshul la sogs pa'i sdom pa gang la mkhan po de yod pa de ni de dang ldan pa ste/ mkhan po de dang ldan pa de'i sdom pa skye ba kho na ltar mkhan po med pa nyid la yang sdom pa skye ba yin te/ yang dag par len par byed pa gang la mkhan po med pa de ni mkhan po med pa'o/ /de'i dngos po ni de nyid de de la yang sdom pa skye'o/ /'di skad bstan te/ mkhan po med na yang sdom pa skye ba nyid do zhes bya ba'i tha tshig go/ /de bsnyen par ma rdzogs pa nyid na yang ngo zhes bya ba ni/ mkhan po de bsnyen par ma rdzogs pa nyid yin na yang mkhan po dang ldan pa'i sdom pa skye ba nyid du 'gyur ro/ /de dge slong nyid ma yin par shes na ni mi skye'o zhes bya ba ni/ yang dag par len par byed pas mkhan po de bsnyen par ma rdzogs pa nyid dam nyams pa nyid yin pas/ dge slong nyid ma yin par shes na ni mkhan po dang ldan pa'i sdom pa mi skye ba kho na'o/ /'dir gzhung ni bsnyen par rdzogs par 'tshal ba mkhan po rku thabs su gnas pas bsnyen par rdzogs par bgyid na/ bsnyen par rdzogs zhes bgyi'am bsnyen par ma rdzogs zhes bgyi/ bka' stsal pa/ gal te bdag gi mkhan po rku thabs su gnas pa yin no zhes shes na ni bsnyen par ma rdzogs zhes bya'o/ /gal te mi shes na ni bsnyen par rdzogs zhes bya'o/ / sngon ltung ba byung bas kyang de bzhin no zhes gsungs pa la sogs pa yin no/ /de phyir spong ba la yang mi skye'o zhes bya ba ni/ bsnyen par rdzogs par 'dod pa de de'i tshe mkhan po de phyir dbul zhing phyir spong bar byed na de la sdom pa mi skye'o/ /'dir gzhung ni bsnyen par rdzogs par bgyid pa na mkhan po slar spong bar bgyid na bsnyen par rdzogs zhes bgyi'am/ bsnyen par ma rdzogs zhes bgyi/ bka' stsal pa/ bsnyen par ma rdzogs zhes bya'o zhes gsungs pa yin no/ /de gnyis kyi ming ma brjod na yang mi skye'o zhes bya ba la/ de gnyis kyi zhes bya ba ni/ bsnyen par rdzogs par 'dod pa dang mkhan po gnyis kyi'o/ /ming ma brjod na zhes bya ba ni yang dag par len par byed pas bdag ming 'di zhes bgyi ba don gyi slad du mtshan nas smos te/ mkhan po mtshan 'di zhes bgyi bas zhes rang dang mkhan po'i ming ma brjod pa'am las byed pas ming 'di zhes bgyi ba ni/ mkhan po ming 'di zhes bgyi bas zhes des de gnyis kyi ming ma brjod na'o/ /de gnyis kyi ming de gnyis ma brjod na yang yang dag par len par byed pa de la sdom pa mi skye'o/ /dge 'dun gyi na yang de'i skye gnas kyi mi skye'o zhes bya ba ni/ yang dag par len par byed pa'am las byed pa gnyis las gang yang rung bas dge 'dun zhes bya ba'i dge 'dun gyi mtshan mi brjod na yang de'i skye gnas kyi zhes bya ba dge 'dun gyi skye gnas las skye ba dge slong ma nyid la sogs pa'i sdom pa mi skye'o/ 'dir gzhung ni yang dag par len par byed pa'i phyir ni gang zag gsum ni bsnyen par ma rdzogs pa yin te/ bdag nyid ming mi brjod pa dang / mkhan po'i ming mi brjod pa dang / bsnyen par rdzogs pa mi shes pa'o zhes gsungs pa'o/ /las byed pa'i phyir ni gzhung 'di yin te/ mkhan po dang bsnyen par rdzogs par 'tshal ba dang / dge 'dun dang gsum gyi ming brjod par mi bgyid na/ bsnyen par rdzogs zhes bgyi'am/ bsnyen par ma rdzogs zhes bgyi/ bka' stsal pa/ bsnyen par ma rdzogs pa zhes bya'o zhes gsungs pa yin no/ /khyim pa dang mu stegs can gyi rgyal mtshan can la yang mi skye'o zhes bya ba la/ rgyal mtshan zhes bya ba'i khyim pa dang mu stegs can gnyi ga so sor sbyar te/ khyim pa'i rgyal mtshan can dang / mu stegs can gyi rgyal mtshan can zhes bya ba ni/ gang la khyim pa'i rgyal mtshan gyi rgyal mtshan yod pa dang / gang la mu stegs can gyi rgyal mtshan gyi rgyal mtshan yod pa ste/ rgyal mtshan gyi sgra re re ni dbri bar bya'o/ /rgyal mtshan zhes bya ba ni cha lugs la bya ste/ khyim pa dang mu stegs can gyi cha lugs gnyis thogs pa dag la yang sdom pa mi skye'o/ /sgren mo dang 'khrugs pa dang mtshan dug ma dag la mi skye'o zhes bya ba la/ sgren mo zhes bya ba yang dag par blang ba sngon du btang ba'i sgren mo nyid ni mu stegs can gyi rgyal mtshan nyid kyis bsdus pas na/ 'dir ni sgren mo zhes bya bas don gzhan bzung ste/ sgren mo shin tu ngo tsha dang bral ba'i phyir de la sdom pa mi skye'o// 'khrugs par zhes bya bas ni/ de la brtan pa nyid med pas de la yang mi skye'o/ /mtshan dug ma zhes bya ba ni/ bud med gang dang nyal po'i sbyor ba byas na skyes pa 'chi bar 'gyur ba ni yin par rig par bya'o/ /'dir mtshan dug ma'i gzhung ni btsun pa re zhig mtshan dug ma zhig bsnyen par rdzogs par bgyid na/ bsnyen par rdzogs zhes bgyi'am/ bsnyen par ma rdzogs zhes bgyi/ bka' stsal pa/ bsnyen par ma rdzogs zhes bya ste/ bsnyen par rdzogs par byed pa dag kyang 'gal tshabs can du 'gyur ro zhes gsungs pa yin no/ /rgyu las bzlog pa khas mi len pa gnas nas phyung ba la yang mi skye'o zhes bya ba ni/ ltung ba ma mthong ba la sogs pa'i rgyu gang gis gnas nas dbyung ba'i las byas pa rgyu de las bzlog pa ltung ba mthong ba la sogs pa de khas mi len pa la yang sdom pa mi skye'o/ /'dir gnas nas byung ba smos pa ni dpe tsam du zad kyi/ chad pa'i las byed du bcug pa rgyu las bzlog pa khas mi len pa thams cad la yang de bzhin du rig par bya'o/ /tshig snga ma med pa nyid la ni nyes byas tsam du zad do zhes bya ba ni/ gang la dge bsnyen nyid la sogs pa'i tshig snga ma med pa de ni tshig snga ma med pa ste/ de'i dngos po ni de nyid do/ /de med pa de la ni dge tshul nyid la sogs pa'i tshig gzhan dag khas len du bcug na yang las byed pa dag la nyes byas tsam du zad kyi de la ni sdom pa skye'o/ /'di skad bstan te/ dge bsnyen nyid med par dge tshul nyid khas len pa dang / dge tshul med par dge slong nyid khas len par byed na/ nyes byas tsam du 'gyur gyi sdom pa mi skye bar mi 'gyur ro/ /'dir gzhung ni btsun pa khyim pa rab tu ma byung ba zhig bsnyen par rdzogs par bgyid na/ bsnyen par rdzogs zhes bgyi'am/ bsnyen par ma rdzogs zhes bgyi/ bka' stsal pa/ nye ba 'khor bsnyen par rdzogs zhes bya ste/ bsnyen par rdzogs par byed pa dag la ni nyes byas kyi ltung bar 'gyur ro zhes gsungs pa yin no/ /mkhan por ma gsol ba la yang ngo zhes bya ba ni/ mkhan por gsol ba ma byas par bsnyen par rdzogs par byed na yang sdom pa skye bar 'gyur ba kho na yin pa'o/ /bar chad ma dris par yang ngo zhes bya ba ni/ bar chad ma dris par bsnyen par rdzogs par byed na yang sdom pa skye bar 'gyur ba kho na yin pa'o/ /de med par khas len pa la sbyin na yang ngo zhes bya ba ni/ bar chad kyi chos de med bzhin du yang dag par len par byed pas bdag la bar chad kyi chos yod do zhes khas len par byed na de ltar na yang de la sdom pa sbyin na yang sdom pa skye bar 'gyur ba kho na yin pa ste/ nyes byas tsam ni gnas pa kho na yin no/ /'dir gzhung ni gleng gzhi dag las btsun pa re zhig bar chad kyi chos rnams dang mi ldan par bdag bar chad kyi chos rnams dang mi ldan no zhes mchi ba zhig bsnyen par rdzogs par bgyid na/ bsnyen par rdzogs zhes bgyi'am/ bsnyen par ma rdzogs zhes bgyi/ bka' stsal pa/ nye ba 'khor bsnyen par rdzogs pa zhes bya ste/ bsnyen par rdzogs par byed pa dag la ni 'gal tshabs can du 'gyur ro zhes gsungs pa yin no/ /'dir bar chad ni sdom pa'i bgegs yin par rig par bya'o/ /skyes pa 'dra ba'i bud med nyid dang / bud med 'dra ba'i skyes pa nyid mtshan gyi rnam pa gzhan ma yin pa la yang ngo zhes bya ba ni/ gal te bud med skyes pa'i rnam pa 'dra ba nyid dang / skyes pa bud med kyi rnam pa 'dra ba nyid de lta bu mtshan rnam pa gzhan ma yin par rig par bya ste/ des na sdom pa ni skye ba kho na yin pa'o/ / mtshan rnam pa gzhan ma yin pa'i phyir mi dgag pa yin par thal bar 'gyur ba bsal ba'i phyir/ de ni lag rdum la sogs pas 'phangs pa nyid yin no zhes bya ba 'di smras te/ skyes pa 'dra ba'i bud med nyid dang / bud med 'dra ba'i skyes pa nyid de ni sngar bstan pa'i lag rdum la sogs pas 'phangs pa nyid yin te/ 'di ltar/ de lta bu yi mi rnams ni/ /drang srong chen pos dgag par mdzad/ /ces bya ba la de lta bu zhes smos pas der 'di yang gzung bar shes par bya'o/ /'di skad bstan te/ ji ltar lag rdum la sogs pa dag rab tu 'byung bar mi bya ba de bzhin du/ skyes pa 'dra ba'i bud med nyid dang / bud med 'dra ba'i skyes pa nyid kyang rab tu 'byung bar mi bya ste/ rab tu 'byin na 'gal tshabs can du 'gyur ro/ /'phangs pa gzhan yang bstan pa'i phyir/ sdig sdig lta bu'i mtshan nyid can dang / gling gzhan nas skyes pa tshul byad mi 'dra ba nyid kyang ngo zhes bya ba smras te/ sdig sdig lta bu'i mtshan nyid can dang / gling gzhan nas skyes pa tshul byad mi 'dra ba de gnyis kyang lag rdum la sogs pas 'phangs pa nyid yin par shes par bya'o/ /sdig sdig lta bu'i mtshan nyid can gyi gzhung ni btsun pa sdig sdog lta bu'i mtshan nyid can bsnyen par rdzogs par bgyid na/ bsnyen par rdzogs zhes bgyi'am/ bsnyen par ma rdzogs zhes bgyi/ bka' stsal pa/ nye ba 'khor bsnyen par rdzogs zhes bya ste/ dge slong bsnyen par rdzogs par byed pa dag la ni nyes byas kyi ltung bar 'gyur ro zhes gsungs pa yin no/ / gling gzhan nas skyes pa'i gzhung yang btsun pa 'dzam bu'i gling pa'i dge slong dag gis shar gyi lus 'phags po zhig bsnyen par rdzogs par bgyid na/ bsnyen par rdzogs zhes bgyi 'am/ bsnyen par ma rdzogs zhes bgyi/ bka' stsal ba/ nye ba 'khor bsnyen par rdzogs zhes bya ste/ bsnyen par rdzogs par byed pa dag la ni 'gal tshabs can du 'gyur ro zhes bya ba dang / de bzhin du rgyas par 'khor lo bzhin du sbyar ba gsungs pa yin no/ /'o na gling gzhan nas skyes pa zhes smos pa nyid kyis tshul byad mi 'dra ba nyid kyang grub pa yin na/ ci'i phyir tshul byad mi 'dra ba smos she na/ de'i phyir bye brag tu bya ba'i phyir te/ tshul byad mi 'dra ba zhes smos pas gtso chen po shes par bya ba'i phyir ro/ /des na gling gcig nas skyes pa rnams la yang gdong khyi'i lta bu dang / rna gyon la sogs pa dag bkag pa yin par rig par bya la/ gling gzhan nas skyes pa rnams la yang tshul byad 'dra ba dag ni bsgrub par bya bar bstan te/ ji ltar gling gzhan pa dag yin yang gling phran dag nas skyes pa rnams ma bkag pa bzhin no/ /'dir tshul byad mi 'dra ba zhes bya ba ni/ kha sna la sogs pa'i rnam pa tha dad pa yin par shes par bya'o/ /gzhan yang 'phangs pa ma bstan pa dag gi bsdu ba bstan pa'i phyir/ sen mo gcig pa dang / lag pa 'jas te ltebs pa dang / gzhogs phyed 'jas pa dang / mgo smyung dang / skra sgra sgre can dang / sgur po dang / dgye po dang / dgye dgur gyur pa dang / sor mo drug pa dang / 'byar ba dang / mid pa dang / mig rdzi ma nang du 'jug pa dang / ne'u le'i lta bu dang / 'ug pa'i lta bu dang / phyin ci log pa dang / bar 'dzings pa dang / glo ba dang / sle bo dang / zlum po dang / mig po che dang / mdzer can dang / shu can dang / 'brum can dang / rna ba ser ba dang / dkar ba dang / dmar ba dang / sbubs can dang / khyi rngo g.ya' ba dang / 'phungs pa dang / che ba dang / rlig pa'i nang du mtshan nub pa dang / glen pa dang / lce med pa dang / rka lag gcig pa dang / med pa dang / skra sngon dang / mgo glang po che'i lta bu dang / rta'i lta bu dang / khyi'i lta bu dang / ba glang gi lta bu dang / lug gi lta bu dang / ri dwags kyi lta bu dang / nya'i lta bu dang / sbrul gyi lta bu dang / ring ba dang / mang ba dang / mgul ta la lta bu dang / skrangs pa dang / spyod lam gyis dub pa de dag las mi na ba rnams so/ /gzhan dag ni na bas so zhes bya ba smras te/ sen mo gcig pa la sogs pa mdo dag las bshad pa de dag las gang dag min pa sen mo gcig pa dang / mgo smyung ba dang / skra sgra sgre can la sogs pa de dag ni/ lag rdum la sogs pa de dag gis 'phangs pa nyid de/ de dang rigs mthun pa'i phyir ro/ /gang dag na ba lag pa 'jas te ltebs pa dang / gzhogs phyed 'jas pa dang / sgur po dang / dgye bo dang / dgye dgur gyur pa la sogs pa de dag ni nad pa nyid yin pa'i phyir/ nad pa ma yin nam zhes bya ba des 'phangs pa nyid yin te/ de ltar na 'dir spyi'i don ni de yin no/ /yan lag gi don 'di bshad par bya ste/ sen mo gcig pa zhes bya ba ni/ gang la sen mo gcig kho na yod pa ste/ de ni sen mo gcig pa'o/ /lag pa 'jas te ltebs pa zhes bya ba ni/ gang lus kyi yan lag spring yig rgyas btab pa 'dra ba de ni lag pa 'jas te ltebs pa ste/ 'di ltar de'i lag pa dang dpung mgo gnyis phrag pa'i phyogs spring yig blta ba ste rgyas btab pa'i dbyibs 'dra bar 'byar cing 'dug pas de'i phyir/ lag pa 'jas te ltebs pa zhes bya'o/ /gzhogs byed 'jas pa zhes bya ba ni/ gang gi gzhogs phyed bskams pa'o/ /mgo smyung zhes bya ba ni/ gang gi mgo pho mtshan gyi dbyibs 'dra ba'o/ /skra sgra sgre can zhes bya ba ni/ gang gi skra smyon thabs mkhan gyi ltar sgra sgrer 'dug pa'o/ /sgur po dang / dgye bo dang / dgye dgur gyur pa zhes bya ba ni/ dgye dgu'i sgra sum char la so sor khyad par yod de/ rgyab sgur ba dang / mdun dgye ba dang / rgyab dang mdun gnyi gar dgye dgur du gyur pa ste/ rim bzhin no/ /de dag ni gong du/ lag sor rdum sgur mi'u thung dang / / zhes smras pa'i sgur po zhes bya ba de'i rab tu dbye ba bstan pa'i phyir ro/ /sor mo drug pa dang / 'byar ba dang / med pa zhes pa ni/ sor mo zhes bya ba'i sgra so sor sbyar te/ sor mo drug pa dang / sor mo 'byar ba dang / sor mo med pa'o/ /mig gi rdzi ma nang du 'jug pa dang / ne'u le'u lta bu dang / 'ug pa'i lta bu dang / phyin ci log dang / bar 'dzings pa dang / glo ba dang / sle bo dang / zlum po zhes bya ba yang mig ces bya ba'i sgra so sor sbyar te/ mig gi rdzi ma nang du 'jug pa dang / mig ne'u le'u lta bu dang / mig 'ug pa'i lta bu dang / mig phyin ci log pa dang / mig bar 'dzings pa dang / mig glo ba dang / mig sle bo dang / mig zlum po'i tshig de dag gi rab tu dbye ba bya ste/ mig rdzi ma nang du 'jug pa zhes bya ba ni/ gang gi mig gi nang gi pags pa'i rim pa la rdzi ma yod pa'o/ /mig ne'u le'i lta bu zhes bya ba ni/ gang gi mig ne'u le'i mig lta bu'o/ /mig 'ug pa'i lta bu zhes bya ba ni/ gang gi mig 'ug pa'i mig lta bu'o/ /yang na mig ser skya la zlum pa'i phyir srin po'i mig 'dra ba'o/ /mig phyin ci log ces bya ba ni/ gang gi mig gi grwa logs kyi zur gang yin pa de ni sna logs na 'dug la/ sna logs kyi zur gang yin pa de ni grwa logs na 'dug pa'o/ /mig par 'dzings pa zhes bya ba ni/ gang gi sna gong gtan med la/ mig g.yas g.yon 'brel ba'o/ /mig glo ba zhes bya ba ni/ gang gi mig dra ba bzhin du ha cang 'phyang ba'o/ /mig sle bo zhes bya ba ni/ gang gi mig gi rdzi ma'i spu med pa'i phyir/ rdzi ma skye ba'i mtha' dper na khrag 'dzag pa'i sha ltar dmar ba'o/ /mig zlum po zhes bya ba ni/ gang gi mig gi 'bras bu ug shud kyi ri mo ltar zlum pa ste/ mig gi snying po'i ltag na snying po gnyis pa yod pa zhes bya ba'i tha tshig go/ /mig po che dang mdzer can dang / shu can dang / 'brum can zhes bya ba yang mig ces bye ba'i sgra so sor sbyar te/ mig po che dang / mig mdzer can dang / mig shu can dang / mig 'brum can no/ /de la mig po che zhes bya ba ni/ gang gi mig ha cang che ba'o/ /mig mdzer can zhes bya ba ni/ gang gi mig gi dbus su mig gi dgrar gyur pa mdzer bu yod pa'o/ / mig shu can zhes bya ba ni/ gang gi mig la shu ba yod pa'o/ /mig 'brum can zhes bya ba ni/ gang gi mig la 'brum bu yod pa'o/ /rna ba ser ba dang / dkar ba dang / dmar ba dang / rna ba sbubs can no zhes bya ba yang / rna ba zhes bya ba'i sgra so sor sbyar te/ rna ba ser ba dang / rna ba dkar ba dang / rna ba dmar ba dang / rna ba sbubs can no/ /de la gong ma gsum ni rna ba'i mdog ha cang ser ches pa dang / ha cang dkar ches pa dang / ha cang dmar ches pa'o/ /rna ba sbubs can zhes bya ba ni/ gang gi rna ba 'khris te sbubs can bzhin du 'dug pa'o/ /khyi rngo g.ya' ba dang / 'phungs pa dang / che ba zhes bya ba yang khyi rngo zhes bya ba'i sgra so sor sbyar te/ khyi rdo g.ya' ba dang / khyi rngo 'phungs pa dang / khyi rngo che ba'o/ /de la khyi rngo g.ya' ba zhes bya ba ni/ gang la khyi rngo dang bcas pa'i g.ya' ba yod pa'o/ /khyi rngo 'phungs pa zhes bya ba ni/ gang la khyi rngo 'phungs pa dang bcas pa yod pa'o/ /khyi rngo che ba zhes bya ba ni gang la khyi rngo chen po yod pa'o/ /rlig pa'i nang du mtshan nub pa zhes bya ba ni/ gang gi rlig pa gnyis kyis pho mtshan yog pa'o/ /glen pa zhes bya ba'i sgras ni bsnyen par rdzogs par mi [(]shas [,]shes [)]pa yin pa de'i phyir 'di smos so/ / lce med pa zhes bya ba ni/ gang la lce gtan med pa'o/ /sngar lkugs pa zhes smos pa ni lce yod du zin kyang smra mi nus pa ste/ de'i phyir tshig de gnyis ni yul tha dad pa yin no/ /rka lag gcig pa dang med pa zhes bya ba la 'dir gcig pa zhes bya ba ni rkang pa gcig pa dang lag pa gcig pa'o/ / med pa zhes bya ba ni/ dgag pa'i don te/ rkang pa med pa dang lag pa med pa'o/ /de yang gang la dang po skyes pa nyid nas rang bzhin gyis rkang pa gnyis med pa dang / lag pa gnyis med pa de 'dir gzung gi/ gzhan du na lag rdum dang rkang rdum zhes smos zin pa'i phyir ro/ /skra sngon zhes bya ba ni/ yung gi kha dog las gzhan pa'i sngon po'i kha dog la bya ste/ de'i phyir snga ma dag las gzhan pa 'dir skra sngon zhes smos so/ /mgo glang po che'i lta bu dang / rta'i lta bu dang / khyi'i lta bu dang / ba glang gi lta bu dang / lug gi lta bu dang / ri dwags kyi lta bu dang / nya'i lta bu dang / sbrul gyi lta bu dang / ring ba dang / mang ba zhes bya ba yang mgo'i sgra so sor sbyar te/ mgo glang po che'i lta bu dang / mgo rta'i lta bu dang / mgo khyi'i lta bu dang / mgo ba glang gi lta bu dang / mgo lug gi lta bu dang / mgo ri dwags kyi lta bu dang / mgo nya'i lta bu dang / mgo sbrul gyi lta bu dang / mgo ring ba dang mgo mang ba'o/ /mgul ta la lta bu zhes bya ba ni/ gang gi mgul pa la shing ta la'i gnyer ma'i rnam pa lta bu dag gi ri mo dang ldan pa'o/ /skrangs pas dub pa zhes bya ba ni/ gang skrangs pa'i sdug bsngal bas gnod par gyur pa'o/ /spyod lam gyis dub pa zhes bya ba ni/ spyod lam 'greng ba dang 'chag pa'i brtul bas gnod par gyur pa'o/ /de dag las zhes bya ba ni/ sen mo gcig pa la sogs pa mdo las bshad pa de dag las so/ /mi na ba rnams zhes bya ba ni/ gang dag mi na ba sen mo gcig pa dang / mgo smyung dang / skra sgra sgre can la sogs pa de dag ste/ de dag ni lag rdum la sogs pa dag gis 'phangs so/ /gzhan dag ni zhes bya ba ni/ gang dag na ba lag pa 'jas te ltebs pa dang / gzhogs phyed 'jas pa dang / sgur po dang / dgye bo dang / dgye dgur gyur pa la sogs pa de dag go/ /na bas so zhes bya ba ni/ nad pa ma yin nam zhes bya ba ste/ gzhan de dag ni nad pa nyid yin pa'i phyir/ nad pa ma yin nam zhes bya ba des 'phangs pa nyid yin no zhes bya ba'i tha tshig go/ /rkun pos ni phung krol ba'o zhes bya ba ni/ 'phangs pa nyid do zhes bya bar sbyar ro/ /de gnyis ni sdig pa la 'jug par ni 'dra'o/ /de gnyis la bye brag kyang yod de/ 'di ltar rkun po ni ma byin par len par byed pa'o/ /phung khrol ba ni snying rje med pa'o/ /de ltar spyi dang bye brag yod pas na rkun pos phung khrol ba 'phangs pa nyid yin no/ /rgyal po pha ma'i bsam pa can nyid kyis gnang ba ni pha ma dang 'dra'o zhes bya ba ni/ rgyal po pha ma dang 'dra ba'i bsam pa can nyid kyis rab tu 'byung bar gnang ba ni pha mas gnang ba dang 'dra bas rab tu dbyung du rung ba'o/ /'di skad bstan te/ rab tu 'byung bar 'dod pa de la gal te rgyal po pha ma dang 'dra ba'i bsam pa nyid yod na de rgyal pos rab tu 'byung bar gnang ba pha mas gnang ba dang 'dra bar rig par bya'o/ /de'i phyir rgyal pos gnang ba rab tu 'byin na nyes pa med do/ /yongs su 'dzin par byed pa gnyis kyang gnang ba dang bsrel ba dang zhu ba dag la pha ma nyid dang 'dra'o zhes bya ba la/ yongs su 'dzin par byed pa gnyis zhes bya ba ni/ ji ltar pha ma gnyis kyis bu de yongs su 'dzin pa bzhin du gang dag gis bu de yongs su 'dzin par byed pa gnyis so/ /de gnyis kyis bu de gsos pas na/ de gnyis kyang bu de'i pha ma nyid dang 'dra'o/ /gnas skabs gang dag la zhe na/ rab tu 'byung ba'i phyir gnang ba dang rab tu 'byung bar 'dod pa yul thag mi ring ba ni zhag bdun bsrel bar bya'o zhes bya ba ni/ bsrel ba dang de yul thag ring na yang dge 'dun la ma zhus par rab tu dbyung bar mi bya'o zhes bya ba'i zhu ba la ste/ gnas gsum po de dag la de gnyis bskyed pa'i pha ma ma yin du zin kyang pha ma nyid dang 'dra'o/ /'dir gzhung ni btsun pa bu brnyan ma zhig re zhig bsnyen par rdzogs par bgyid na su la bzod pa gsol bar bgyi/ bka' stsal pa/ bu nyid dang 'dra bar gang gis khas blangs pa de la'o/ /bu mo brnyan ma yang bu mo nyid dang 'dra bar gang gis khas blangs pa de la'o zhes gsungs pa yin no/ /mi ma yin pa'i 'gro ba pa gnyis ni ma yin no zhes bya ba ni/ pha dang ma mi ma yin pa'i 'gro bar gtogs pa gnyis ni gnang ba dang bsrel ba dang zhu ba dag la pha ma nyid dang 'dra ba ma yin pa'o/ /'dir gzhung ni btsun pa gang gi pha ma gnyis dus la bab bam dud 'gro'i skye gnas su gtogs pa lags na/ de'i skra breg pa dge 'dun thams cad la zhu bar bgyi'am/ nye ba 'khor mi bya'o zhes gsungs pa yin no/ /de gnyis las mtshams med par mi 'gyur ro zhes bya ba ni/ pha ma dud 'gro'i skye gnas su gtogs pa de gnyis bsad pa las mtshams med pa 'byung bar mi 'gyur ba'o/ /de ni skyed par byed pa gnyis las te/ mtshan gyur pa gnyis kyang ngo zhes bya ba la/ de ni zhes bya ba ni mtshams med pa 'byung ba'o/ /skyed par byed pa gnyis las te zhes bya ba ni/ pha ma mi'i 'gro bar gtogs pa gnyis bsad pa las mtshams med pa 'byung bar 'gyur ba'o/ /mtshan gyur pa gnyis las kyang ngo zhes bya ba ni/ pha ma mi'i 'gro bar gtogs pa de gnyis mtshan gyur te/ gal te ma skyes pa nyid du gyur tam/ pha bud med nyid du gyur na yang de gnyis bsad pa las mtshams med pa 'byung bar 'gyur ba kho na yin pa'o/ /ma bsad pa la sogs de byas pa nyid gtso bo'o zhes bya ba ni/ ma bsad pa la sogs pa dag rab tu 'byung ba'i phyir bkag pa gang yin pa de byas pa nyid de mtshams med pa de byas pa nyid do/ /mtshams med pa de las ma bsad pa la sogs pa gtso bo yin te/ gtso cher bya'i/ ma bsad pa nyi tshe na gtso bo ma yin na/ /de'i phyir mtshams med pa byed pa rab tu dbyung bar mi bya ba yin gyi/ ma bsad pa nyi tshe ni rab tu dbyung bar yang bya ste/ ji ltar pha ma dud 'gro'i skye gnas su gtogs pa gsod par byed na yang / 'on kyang de rab tu dbyung du rung ba lta bu'o/ / //bam po brgyad pa/ skyes pas dge slong ma la ci zhig byas na dge slong ma sun phyung bar 'gyur zhing / bud med kyis kyang dge slong la ci zhig byas na dge slong sun phyung bar 'gyur/ de ci'i phyir de gnyis bstan ce na/ de'i phyir/ pham par 'gyur ba ma byung ba nyid la mi tshangs par spyad pas nyams su myong ba dag sun phyung ba nyid de yin no zhes bya ba smras te/ mi tshangs par spyad pas dge slong dang dge slong ma sun phyung ba byas na/ dge slong sun phyung ba nyid dang / dge slong ma sun phyung ba nyid yin par 'gyur bar rig par bya'o/ /don 'di nyid ni lung gis go bar byed de/ 'dir gzhung ni btsun pa ci tsam gyis na dge slong ma sun phyung ba zhes bgyi/ nye ba 'khor gang gis mi tshangs par spyad pas dge slong ma sun phyung bar gyur na'o zhes gsungs pa yin no/ /'di ltar dge slong ma zhes smos pa ni mtshon pa ste/ dge slong sun phyung ba'i mtshan nyid kyang de kho na bzhin du shes par bya'o/ /'o na mi tshangs par spyad pas zhes smos na ci lung du ma bstan pa la sogs pa'i sems gang yang rung bas nyams su ma myong ba dag la yang sun phyung ba nyid 'byung bar 'gyur ram zhe na/ ma yin te 'o na ji lta bu dag la zhe na de'i phyir/ nyams su myong ba dag ces bya ba smras te/ mi tshangs par spyad pa de nyams su myong ba sun phyung ba nyid yin gyi/ gzhan du ma yin no/ /'o na sun phyung ba ni gcig yin pa'i phyir gcig gi tshig tu 'gyur ba yin na/ ji ltar gnyis kyi tshig tu byas she na nyes pa med de/ sun phyung ba gnyis srid pa'i phyir te/ 'di ltar bgrod pa yang sun phyung bar 'gyur la/ 'gro ba yang sun phyung bar 'gyur ba srid pa'i phyir ro/ /'di ltar sun dbyung ba dang sun 'byin pa gnyi gas dus gcig tu nyams su myong ba yan lag nyid du mi 'dod kyi/ sun 'byin pa kho nas nyams su myong ba yan lag nyid yin no/ /des na 'dir zlas nyams su myong ba khas mi blang ste/ 'di ltar gzhan gyi nyes pas gzhan la mi gos pa'i phyir ro/ /de lta ma yin du zin na gang gi tshe la las 'dod chags dang bral ba mo zhig sun 'byin par byed na de yang sun phyung ba nyid du mi 'gyur te/ zlas nyams su myong ba med pa'i phyir ro/ /de'i phyir sun phyung ba gnyis kyi tshig tu byas pa bstan pa'i phyir/ gang gi tshe dge slong gis dge slong ma la rtsol zhing / ji ltar dge slong gis nyams su myong ba ltar gal te dge slong mas kyang nyams su myong bar gyur na/ de'i tshe gnyi ga yang sun phyung ba nyid yin te/ dge slong ni dge slong ma sun phyung ba yin la/ dge slong mas yang dge slong sun phyung ba yin no/ /de bzhin du dge slong mas dge slong la rtsol zhing gnyi gas nyams su myong bar gyur na yang gnyi ga sun phyung ba nyid yin no/ /gang yang rung bas nyams su myong bar gyur na ni gang yang rung ba de nyid sun phyung ba yin no/ /de bzhin du dge slong gis dge slong la rtsol zhing gnyi gas nyams su myong bar gyur na/ gnyi ga dge slong sun phyung ba nyid yin no/ /gal te gcig gis nyams su myong bar gyur na ni/ de nyid dge slong sun phyung ba nyid yin no/ /ci pham par 'gyur ba 'byung ba'i yul la mi tshangs par spyad pas kyang sun phyung ba nyid du 'gyur ram zhe na ma yin te/ de'i phyir pham par 'gyur ba ma byung ba nyid la zhes bya ba smras te/ sun dbyung bar bya ba'o/ /'dir gzhung ni btsun pa re zhig gang zag brgyad kyis dge slong ma gcig la dngos po brgyad po re res sun 'byin par bgyid na/ dge slong ma de sun phyung ba zhes bgyi'am/ nye ba 'khor sun phyung ba zhes bya'o/ /gang zag de dag las du zhig dge slong ma sun phyung ba zhes bgyi/ bka' stsal pa/ nye ba 'khor 'ga' yang ma yin no zhes gsungs pa yin no/ /de ni reg pa dang lus bkan pa gnyis kyis dang po kho nar pham par 'gyur bas/ des na 'dir sun phyung ba nyid du rnam par ma bzhag par snang ngo / /'o na dge slong ma sun phyung ba ji ltar rnam par gzhag par bya zhe na/ nom pa dang nyug pa nyams su ma myong pa'i dge slong ma la mi tshangs par spyad na'o/ /yang na skyes pa'i lus la ma reg pa'i dge slong ma la mi tshangs par spyad na/ gang zag de dge slong ma sun phyung ba yin no/ /sngon rab tu byung ba la skyes pa'i chos nyid med par bstan pa gnas skabs kyi bye brag la dmigs kyis bsal ba bstan pa'i phyir/ bud med bslab pa phul nas skyes pa nyid du gyur pa na rab tu dbyung ba dang bsnyen par rdzogs par rung ba nyid do zhes bya ba smras te/ bud med bslab pa phul nas nyams par gyur pa mtshan gyur nas skyes pa nyid du gyur pa ni rab tu dbyung ba dang bsnyen par rdzogs par byar rung ba nyid yin no/ /'di skad bstan te/ gal te dge slong ma bslab pa 'bul bar byed cing de'i 'og tu mtshan gyur nas/ pho'i dbang po byung zhing mo'i dbang po 'gags par gyur na de'i tshe de rab tu dbyung bar bya bsnyen par rdzogs par bya'o/ /pham par 'gyur ba'i tshig la spyir skye ba'i chos nyid med par bstan pa gnas skabs gzhan la bye brag gi gnas skabs bstan pa'i phyir/ pham par 'gyur ba thun mong ma yin pa lhag par spyad pa can yang ngo zhes bya ba smras te/ dge slong ma reg pa dang lus bkan pa dang / kha na ma tho ba 'chab pa dang / zlog par byed pa'i pham par 'gyur ba dge slong dang thun mong ma yin pa lhag par spyad pa de'i 'og tu bslab pa phul ba'i bud med nyams pa lhag par spyad pa can de skyes pa nyid du gyur na/ yang rab tu dbyung ba dang bsnyen par rdzogs par byar rung ngo / /bud med bsnyen par rdzogs par bya ba la gnyug mar gnas pa rnams yan lag nyid do zhes bya ba ni/ 'dir bud med bsnyen par rdzogs par bya ba la dge 'dun gyis bsnan no zhes gang smras pa de la dge slong gnyug mar gnas pa rnams yan lag nyid yin gyi/ glo bur du lhags pa rnams dang 'gro bar chas pa rnams yan lag nyid ma yin no zhes bya ba'i tha tshig go/ /'dir gzhung ni gso sbyong gi gzhi las btsun pa bcom ldan 'das kyis/ dge slong ma rnams kyis dge slong rnams las dge slong ma'i dngos po btsal bar bya'o/ zhes gsungs pa la/ dge slong de dag gang dag lags/ nye ba 'khor gnyug mar gnas pa dang ring du gnas pa dag go zhes gsungs pa yin no/ /skye ba'i tshe nyid na phul lam/ nyams na mi skye'o zhes bya ba la/ skye bzhin pas skye ba'i tshe ste 'byung ba'i tshe'o/ /skye ba'i tshe de'i dngos po ni skye ba'i tshe nyid de/ skye ba'i tshe nyid dang 'byung ba'i tshe nyid do/ /sdom pa len pa'i tshe na sdom pa de skye ba'i tshe nyid gang yin pa'i skye ba'i tshe nyid de'i phul ba yongs su btang zhing phyir phul lam mtshan gnyis skyes pa la sogs pa'i skyon gyis nyams na/ de'i sdom pa de mi skye ste/ skye bar mi 'gyur ro zhes bya ba'i tha tshig go/ /'dir gzhung ni sil bu dag las nye ba 'khor re zhig /bsnyen par rdzogs nas khyim pa nyid yin no snyam du so sor shes na yang bsnyen par rdzogs pa ma yin zhes bya ba ni/ bsnyen par rdzogs par byed pa'i tshe na lta smos kyang ci dgos 'dir skye ba la mngon du gyur pa ni skye ba'i tshe nyid ma yin par rig par bya ste/ de la skye ba'i tshe nyid gang gis kyang bgegs bya bar mi nus pas/ 'di ltar skad cig ma du mas chod pa la skye ba'i tshe nyid ces bya'o zhes gsungs pa yin no/ /rab tu 'byung ba'i gzhi zhu ba phal che ba'i skabs so// //bslab pa 'bul ba'i cho ga'i mtshan nyid smras pa/ rang bzhin nyams pas byas pa nyid ni phul ba nyid ma yin no zhes bya ba la/ rang bzhin nyams pas zhes bya ba ni gang gi tha mal pa'i blo'i rang bzhin nyams pa ste/ smyos pa la sogs pas so/ /byas pa nyid ces bya ba na bslab pa dbul ba byas pa ste/ de'i dngos po ni byas pa nyid do/ /rang bzhin nyams pas 'bul ba byas pa nyid ni rang bzhin nyams pas byas pa nyid de de ni phul ba nyid ma yin no/ /'di skad bstan te/ gal te rang bzhin nyams pa smyos pa la sogs pas bslab pa phul na phul du zin kyang bslab pa phul bar mi 'gyur ro/ /de la ma yin no zhes bya ba ni/ nyan pa po rang bzhin nyams pa de la bslab pa 'bul bar byed na yang bslab pa 'bul ba'i bslab pa de phul ba ma yin pa'o/ /lkugs pa la ma yin no zhes bya ba ni/ nyan pa po lkugs pa de la phul na yang de 'bul ba ma yin pa'o/ /gang rnam pa thams cad du smra mi nus pa de ni 'dir lkugs par 'dod do/ /mi ma yin pa'i 'gro ba la ma yin no zhes bya ba ni/ lha dang klu dang gnod sbyin dang sha za la sogs pa la phul ba gang yin pa de yang phul ba ma yin pa nyid do/ /ma go ba nyid la ma yin no zhes bya ba ni/ nyan pa po gang gi mdun du 'bul bar byed pa des de'i tshig dang brda ma go ba nyid de khong du ma chud pa nyid la phul na yang phul ba ma yin pa'o/ /glen pa dang / 'on pa dang / snyoms par zhugs pa dang / mtha' 'khob pa la dbus kyis phul ba zhes bya ba de dag kyang bsdus te/ de dag la yang ma go ba nyid kyi rgyud snang ngo / / dben par ma yin no zhes bya ba ni dben par dben pa'i 'du shes kyis sam/ dben pa ma yin pa'i 'du shes kyis dbul ba nyid byas na yang de phul ba nyid ma yin pa ste/ 'di ltar dben pa der gang dben pa'i 'du shes kyis sam mi dben pa'i 'du shes kyis 'bul bar zhugs pa'i mi dben pa yang lkugs pa'i yul la zhugs pa bzhin du gyur te/ skye bo thams cad la grags pa'i 'du shes med pa'i phyir ro/ /dben par 'du shes pas ma yin no zhes bya ba ni/ mi dben par dben pa'i 'du shes kyis sam/ rnam pa thams cad du dben pa'i 'du shes kyis dbul ba byas na yang phul ba nyid ma yin pa'o/ /rang bzhin nyams pa la sogs pa thams cad la yang 'di ltar bdag la tha snyad la gnas pa'i blo med pa'i phyir te/ des na de dag la phul ba yang phul bar mi 'gyur ro/ /ji ltar phul bar ma 'gyur ba bstan nas/ da ni bslab pa 'bul bar byed pa'i tshig dag brjod par bya ste/ bslab pa'am/ sangs rgyas sam/ chos sam/ dge 'dun nam/ mdo sde'am/ 'dul ba'am/ ma mo'am/ slob dpon nam/ mkhan po 'bul lo/ /bdag khyim pa'am/ dge tshul lam/ za ma'am/ ma ning ngam/ dge slong ma sun phyung ba'am/ rku thabs su gnas pa'am/ tha dad du gnas pa'am/ gnas par mi bya ba'am/ mu stegs can nam/ mu stegs can zhugs pa'am/ ma bsad pa'am/ pha bsad pa'am/ dgra bcom pa bsad pa'am/ dge 'dun gyi dbyen byas pa'am/ de bzhin gshegs pa la ngan sems kyis khrag phyung bar gzung du gsol/ bdag tshangs pa mtshungs par spyod pa khyed cag dang lhan cig gnas pa'am/ longs spyod pas chog go zhes bya ba lta bu ni 'bul ba'i tshig dag yin no zhes bya ba la/ lta bu ni zhes bya ba'i sgra ni rnam pa nyid bstan pa'i phyir te/ 'bul ba'i tshig dag ni rnam pa de lta bu dag dang / cho ga de lta bu dag dang / rang bzhin de lta bu dag yin no zhes bya'o/ /de ltar na bslab pa 'bul ba ni tshig tu smras pa de kho na las bslab pa phul bar 'gyur bar ma zad kyi/ tshig tu ma smras par gtong ba'i mtshan nyid ma byas kyang phul bar 'gyur te/ des na lus kyi rnam par rig byed las kyang phul bar 'gyur la/ ngag gi rnam par rig byed las kyang phul bar 'gyur ro/ /'bul lo zhes bya ba'i sgra ni bslab pa'am zhes bya ba man chad mkhan po zhes pa'i bar gyi sgra rnams dang so sor sbyar ro/ /de bzhin du bdag ces bya ba'i sgra yang khyim pa'am zhes bya ba man chad de bzhin gshegs pa la ngan sems kyis khrag phyung bar zhes bya ba'i bar gyi sgra rnams dang so sor sbyar ro/ /lhag ma gzhan gyis byed pa'i tshig ni dngos su bstan pa yin no/ /dbul ba'i cho ga'o// //dbul ba'i cho ga bshad nas/ da ni rnam par 'byed par gtogs pa'i ltung ba rnams kyi mtshan nyid bshad par bya ste/ gang byas na mi tshangs par spyod pa'i pham par 'gyur na zhe na de'i phyir/ bcug reg nyams su myong bar byas na'o zhes bya ba smras te/ bcug ces bya ba'i sgra 'di bye brag tu bsgrub pa ni rnam pa gnyis su bya ste/ des 'dzud par byed pas bcug pa ste/ byed pa po bsgrub pa dang / der gzhug par bya bas bcug pa ste/ gnas bsgrub pa ni bcug pa'i sgra yin no/ /de la gnas bsgrub pa'i phyogs la brten nas ni bcug ces bya ba'i sgras kha dang bshang ba'i lam dang mo'i dbang po brjod de/ kha dang bshang ba'i lam dang mo'i dbang po der yan lag gi rnam par gzhag par bya ba yin pas/ kha dang bshang ba'i lam dang mo'i dbang por ni bcug pa zhes bya'o/ /kha dang bshang ba'i lam dang mo'i dbang por bcug pa de'i reg pa ni yan lag gi rnam pa der bcug pas byed pa gang yin pa'o/ /reg pa de'i nyams su myong bar byas pa ni nyams su myong bar 'gyur ba gang yin pa'o/ /de nyams su myong bar gyur na de'i tshe sten par byed pa'i dge slong de pham par 'gyur te/ de ltar re zhig gnas bsgrub pa'i sgo nas sten par byed pa'i dge slong gi pham par 'gyur ba rnam par gzhag pa byas pa yin no/ /bcug pa'i sgras byed pa po'i bsgrub pa'i phyogs la brten nas ni bsten par bya ba dge slong dang dge slong ma rnams kyi kha dang bshang ba'i lam dang mo'i dbang por pho'i dbang po 'dzud par byed pas bcug pa la pham par 'gyur bar rnam par 'jog par byed do/ /pho'i dbang po bcug pa de'i reg pa ni bsten par bya ba kha dang bshang ba'i lam dang mo'i dbang po dang ldan pa'i phyogs der reg pa'o/ /reg pa de'i nyams su myong bar byas pa ni nyams su myong bar 'gyur ba gang yin pa'o/ /de nyams su myong bar gyur na de'i tshe bsten par bya ba'i dge slong dang dge slong ma de pham par 'gyur te/ de ni byed pa po bsgrub pa'i sgo nas bsten par bya ba'i dge slong dang dge slong ma'i pham par 'gyur ba rnam par gzhag pa byas pa yin no/ /de ltar mdo'i bye brag tu bsgrub pa rnam pa gnyis po de dag ni lan gnyis su bzlas pas 'thob po/ /gzhan rgyal bar byed du bcug pa ni gzhan rgyal ba'o/ /de la yod pa'i nyes pa ni pham pa'o/ /de byed par 'gyur ba'i phyir pham par 'gyur ba ste ltung ba'o/ /mdo snga mar bcug pa zhes bya ba'i sgra smos pa la/ bcug pa yang gnyis la ltos te byed pa por gyur pa 'jud par byed pa dang / gnas su gyur pa gzhug par bya ba'i yul lo/ /de la re zhig byed pa por gyur pa 'dzud par byed pa bstan pa'i phyir/ zag byed do zhes bya ba smras te/ pho'i bcug na ni ltung ba yin no/ /gang du zhe na/ gnas su gyur pa gzhug par bya ba'i yul bstan pa'i phyir/ der ro zhes bya ba smras te/ mo'i zag byed du pho'i zag byed bcug pa'i reg pa nyams su myong bar byas na yul gyi ltung bar gzhag go/ /mo'i zag byed ji ltar de'i pho'i zag byed bcug pa'i reg pa nyams su myong bar byas na ltung bar 'gyur zhe na de'i phyir/ ma nyams par ro zhes bya ba smras te/ gzhung las mi'i bud med gson pa ma nyams pa la'o zhes gsungs pa yin no/ /'di ltar bye brag ma bstan mod kyi 'on kyang 'dir mo'i dbang po kho na'i ma nyams pa nyid dngos po de'i bye brag kho na gzung ngo / /yul gzhan bstan pa'i phyir/ kha'am bshang ba'i lam du'o zhes bya ba smras te/ bye brag ma bstan pa'i phyir/ 'dir thams cad du yang rang gi dang gzhan gyi dang / mi'i dang dud 'gro'i skye gnas la sogs pa'i rgyud du gtogs pa'i dang / mo'i dang pho'i dang ma ning gi zhes spyir gang yang rung ba gzung ngo / /de dag thams cad kyi bye brag gi don yang ma nyams pa zhes bya bar sbyar ro/ / gal te ma nyams pa dag ni pham par 'gyur na/ nyams pa dag la cir 'gyur zhe na/ de'i phyir nyams pa dag la ni sbom por ro zhes bya ba smras te/ kha dang bshang ba'i lam dang mo'i dbang po nyams pa dag tu bcug pa la ni kha na ma tho ba sbom por 'gyur te/ de nyams su myong ba yongs su rdzogs par mi myong ba'i phyir ro/ /pho'i dbang po yang gal te nyams par gyur na de la yang sbom po nyid do/ /mi rung ba nyid la ni na smad do zhes bya ba ni/ bgrod par bya ba pho dang mo dang ma ning mi rung ba nyid la zhes bya ba la 'khrig pa spyad du mi rung ba/ spyad mi bzod pa nyid la bgrod par byed pa pho'i dbang pos rtsol bar byed pa ni ltung ba na smad cing dbri ba nyid du bya'o zhes bya ba'i tha tshig go/ /de ltar na 'dir tshig gi don ni 'byung ste/ bgrod par bya ba rung ba nyid gang la bgrod par byed pas bcug reg nyams su myong bar byed pa ni pham par 'gyur ro/ /bgrod par bya ba mi rung ba nyid gang la bgrod par byed pas stsal na ni sbom po'o/ /gang la pham par 'gyur ba'i bgrod par bya ba rung ba nyid de la bgrod par byed pas reg cing lus la reg pa la sogs pa byed na ni sbom po'o/ /gang la pham par 'gyur ba'i bgrod par bya ba mi rung ba nyid de la bgrod par byed pas reg cing lus la reg pa la sogs pa byas na ni nyes byas so/ /gang la sbom por 'gyur ba'i bgrod par bya ba rung ba nyid de la bgrod par byed pas reg cing lus la reg pa la sogs pa byas na ni sbom po'o/ /gang la sbom por 'gyur ba'i bgrod par bya ba mi rung ba nyid de la bgrod par byed pas reg cing lus la reg pa la sogs pa byas na ni nyes byas so/ /bgrod par bya ba rung ba nyid la khri las ldang ba la sogs pa sbyor ba'i sbyor ba byas na ni nyes byas so/ /bgrod par bya ba mi rung ba nyid la khri las ldang ba la sogs pa sbyor ba'i sbyor ba byas na ni nyes byas phra mor 'gyur te/ de ltar na 'dir na smad pa'i don 'di de yin no/ /mi ma yin pa'i 'gro ba nyid dang / skyes pa nyid dang / ma ning nyid dang / ro nyid dang / sten par byed pa dang / bsten par bya ba dang / sten par bya ba g.yogs ma can nyid dag la ni na smad pa med do zhes bya ba ni/ de dag la na smad pa med de/ thams cad pham par 'gyur ro zhes bya bar sbyar ro/ /de la bgrod par bya ba mi ma yin pa'i 'gro ba nyid pho dang mo la sogs pa dag la bcug reg nyams su myong bar byas na ltung ba na smad pa med do/ /de bzhin du bgrod par bya ba skyes pa nyid skyes pa'i dngos po pho nyid dang bgrod par bya ba ma ning nyid dang / bgrod par bya ba ro nyid dang / sten par byed pa pho'i dbang po dang / bsten par bya ba kha dang bshad pa'i lam dang / mo'i dbang po rnams g.yogs ma can nyid du byas pa reg pa nyams su myong ba la mi gnod par bar chad srab mos g.yogs pa nyid dag la bcug reg nyams su myong bar byas pa la ni/ ltung ba na smad pa med de/ na smad par mi bya ba ni na smad pa med pa yin no/ /bsten par bya ba dag la yang ma tshor ba dang / rang bzhin nyams pa'i gnas skabs dang mi 'dod bzhin bcug pa nyid na'o zhes bya ba yang na smad pa med do zhes bya bar sbyar ro/ /ma tshor ba zhes bya ba ni/ bgrod par bya ba bud med la sogs pa de gnyid log pa dang / myos pa la sogs pa'i gnas skabs su gyur pa de'i tshe zag byed la sogs par bgrod par byed pa'i zag byed bcug pa nyid na/ 'di ltar bgrod par bya bas ma tshor mod kyi/ 'on kyang na smad pa med pa kho na'o/ /bgrod par byed pa smos pa la sogs pas/ rang bzhin nyams pa'i gnas skabs su gyur pa la zag byed du zag byed bcug pa yang de bzhin no/ /mi 'dod bzhin du bcug pa nyid ces bya ba ni/ bgrod par bya ba mi dga' ba bzhin du nan gyis bcug na yang na smad pa med pa'o/ /rang gi bsten par bya bar ro zhes bya ba ni/ dge slong rang gi bstan par bya ba/ kha dang bshang ba'i lam du zag byed bcug na yang na smad pa med pa'o/ /sngar phyi rol du drud pa nyid la'o zhes bya ba la/ sngar phyi rol du drud cing nang du ldugs pa ni/ sngar phyi rol du drud cing nang du ldugs pa ste/ de'i dngos po ni de nyid do/ /der zag byed bcug na yang de la na smad pa med pa'o/ /nang du smyugs shing phyi rol du dbo bar bya'i/ nang du mi dbo'o snyam nas nang du mi dbo bar phyi rol nyid du'o zhes bya ba/ nang du mi dbo ba'i bsam pas zag byed la sogs par zag byed kyi bcug reg nyams su myong bar byas na yang de la na smad pa med do/ /mi tshangs par spyod pa'i zhar la de'i rgyu dag yongs su spang ba'i phyir/ ma bsrungs par nyin mo glos phab ste gnyid log par mi bya'o zhes bya ba smras te/ dge slong ma bsrungs par nyin mo glos phab ste gnyid log par mi bya'o/ /sbyor ba gang gis dge slong bsrungs pa zhes bya ba'i bsrungs pa de ci lta bu zhig ce na de'i phyir/ bsrungs pa ni gsum ste/ sgo bcad cing kun nas bskor ba na gnas pa nyid dang / dge slong gis kun nas bsrungs pa nyid dang / sham thabs kyi mtha' bcings pa nyid do zhes bya ba smras te/ gnas gang na sgo bcad pa de ni sgo bcad pa ste/ sgo bcad pa'i gnas kun nas bskor ba phyogs kun nas bskor ba'i gnas de na gnas pa ni sgo bcad cing kun nas bskor ba na gnas pa ste/ de'i dngos po ni de nyid do/ /kun nas bsrungs pa nyid sus she na/ dge slong gis te/ dge slong gis kun nas bsrungs pa nyid dang / bsrungs pa gsum pa ni/ sham thabs kyi mtha' mdud pa bor te bcings pa nyid do/ /mi tshangs par spyod pa'i pham par 'gyur ba rnam par 'byed pa'o zhes bya ba ni/ rnam par 'byed par gtogs pa mi tshangs par spyod pa'i pham par 'gyur ba'i skabs rdzogs so/ / //phran tshegs la sogs pa ni rnam par 'byed pa'i rab tu 'byed par 'gyur ba yin pa'i phyir/ da ni phran tshegs kyi skabs brjod par bya ste/ gang du bud med kyis brjod pa der 'gro bar mi bya'o zhes bya ba ni khyim la sogs pa gang du bud med kyis tshul ma yin pa'i bsam pas brjod pa der dge slong 'gro bar mi bya'o/ /gang du mi ma yin pas gnod pa'i phyir brtsal ba der gnas par mi bya'o zhes bya ba ni/ dgon pa la sogs pa gang du mi ma yin pas 'khrig pa bsten pa la sogs pa gnod pa'i phyir brtsal ba'i gnas der gnas par mi bya 'dug par mi bya'o/ /'dod chags shas che bas 'dzag snod bcang bar bya'o zhes bya ba ni/ dge slong gang 'dod chags shas che ba de ni 'dod chags shas che ba ste/ des khu ba 'dzag pa'i 'dzag snod rkyal bu bcang bar bya'o/ /'dir gzhung ni 'di ltar 'dod chags shas che ba la yang dang yang du khu ba 'dzag par 'gyur bas de'i phyir chos gos nyams par mi 'gyur bar bya ba'i phyir nyon mongs ba can ma yin pa'i sems kyis 'dzag snod bcang bar bya'o zhes gsungs pa yin no/ /'dzag snod la sbom por 'gyur ro zhes gsungs pa ni nyon mongs pa can gyi sems la'o/ /'dzag snod rdzas ci zhig las bya zhe na/ de'i phyir ra'am ri dwags sam byi ba'i pags pa las so zhes bya ba smras te/ 'dzag snod ni ra'am ri dwags sam byi ba'i pags pa las bya'o/ /des na byi la dang lug lpags la sogs pa las 'dzag snod byas na yang nyes pa med do/ /'dzag snod de yang byi dor bya dgos pas de'i phyir/ dri mi nga bar bya ba'i phyir bska bas bkru ba dang bskam par bya'o zhes bya ba smras te/ 'dzag snod dri ming bar bya ba'i phyir bska bas gdab cing byi dor bya ba dang / 'dzag snod dri nga ba med par bya ba nyid kyi phyir dus dus su bkru ba dang bskam par bya ba'o/ /'dzag snod bkru ba la sogs pa'i dus na ci zhig bcang bar bya zhe na de'i phyir/ de'i dus kyi ched du gzhan bya'o zhes bya ba smras te/ bkru ba dang bskam pa'i dus kyi ched du 'dzag snod gnyis pa gzhan bcang bar bya'o zhes bya ba'i tha tshig go/ /ha cang mang bas lngar bar gyur na phru blugs so zhes bya ba ni/ khu ba ha cang mang bas 'dzag snod lngar bar gyur cing gsher bar gyur na phru blugs par bya ste/ der rlod gzhug par bya'o/ /phru blugs so zhes smras pa/ phru ci 'dra bar blugs par bya zhe na de'i phyir/ bye ma'am sa'i 'o zhes bya ba smras so/ /ci dus thams cad du 'dzag snod thogs par bya'am zhe na de'i phyir/ zan za ba dang / mchod rten la phyag 'tshal ba'i tshe phog la bkrus te'o zhes bya ba smras te/ zan za ba dang / mchod rten la phyag 'tshal ba'i tshe 'dzag snod de dbang po las phog la de'i 'og tu dbang po bkrus te dus de gnyis su de med par bya'o/ /mi tshangs par spyod pa'i pham par 'gyur ba phran tshegs kyi skabs so zhes bya ba ni/ mi tshangs par spyod pa'i pham par 'gyur ba phran tshegs kyi skabs nas 'byung ba rdzogs so// //pham par 'gyur ba byed pa rma'i sgo gsum smras na/ gang gi phyogs su pho'i dbang po bcug pa nyid na pham par 'gyur ba de dag gi pham par byed pa'i dang por gyur pa'i phyogs ma bstan pas de'i phyir de dag gi dang por gyur pa'i phyogs bstan pa'i phyir/ kha'i dang po ni so phan chad do zhes bya ba la sogs pa smras te/ kha'i dang po ni so'i nang logs kyi ngos kyi so drung ste/ so drung de phan chad ni kha'i dang po'o/ /des 'di skad bstan te/ gal te pho'i dbang po so'i nang logs kyi ngos kyi so drung phan chad du cung zad cig bcug na yang de'i tshe pham par 'gyur bar rnam par gzhag go/ /bshang ba'i lam gyi ni bu gu'i sbubs kyi mtha' yan chad do zhes bya ba la/ bu gur gyur pa'i sbubs yin pas bu gu'i sbubs te/ 'jig rten na bshang ba'i sbubs zhes bya ba gang yin pa'o/ /bu gu'i sbubs de'i mtha' yan chad ni bshang ba'i lam gyi dang po'o/ /bu gu'i sbubs kyi mtha' de yan chad gang nas brtsams te zabs su ci bzod pa'i nang man chad du pho'i dbang po cung zad cig bcug na yang pham par 'gyur ro/ /zag byed kyi ni lpags rim yan chad do zhes bya ba na/ zag byed kyi dang po ni mdoms kyi phyogs na rma'i kha shun du gyur pa pags par gtogs pa'i lpags shun gnyi ga'i rim pa'i lpags rim yan chad sha'i rnam pa dang po'i mtshams la thug pa de ni zag byed kyi dang po'o/ /'di skad bstan te/ gal te pho'i dbang po lpags rim de yan chad du de tsam zhig bcug nas shar bgrangs pa'i phyogs dang rag par gyur na de pham par 'gyur ro/ /rma'i sgo rnams kyi dang po bstan nas/ zag byed rma'i sgo de dag tu ci tsam zhig bcug pa nyid na pham par 'gyur zhe na de'i phyir/ de'i nor bu bcug pa nyid de'i mtha'o zhes bya ba smras te/ de'i zhes bya ba ni zag byed kyi'o/ /de'i nor bu zhes bya ba mthe bo'i rnam par 'dra ba gang yin pa de rma'i sgo gsum po dag tu bcug pa nyid gang yin pas rma'i sgo dag gi dang por gyur pa'i phyogs dang phrad pa gang yin pa de ni de'i mtha' ste bcug pa nyid kyi mtha'o/ /nor bu ril gyis ma 'das mod kyi 'on kyang yan lag gi rtse mo'i thog ma'i phyogs thams cad kyis rma'i sgo rnams kyi dang por gyur pa'i phyogs su reg pa gang yin pa de ni bcug pa nyid kyi mthar thug pa yin par rig par bya'o/ /gang gis bcug pa'i reg pa nyams su myong bar byas pa zhes bya ba des bcug pa bstan par 'gyur ro/ /'dir gzhung ni so dag las nor bu 'da' bar byed pa dang / bu ga'i sbubs las nor bu 'da' bar byed pa dang / pags pa las nor bu 'da' par byed pa zhes gsungs pa yin no/ /rnam par 'byed pa'i mdo las rma'i sgo rnams kyi nyams pa nyid smras pa de'i mtshan nyid rnam par dbye ba brjod par bya ste/ phyogs kyi dang po cung zad zin pa nyid dang / zin pa nyid dang / skrangs pa nyid dang / rul ba nyid dang / myags pa nyid dang / srog chags kyis zos pa nyid lta bu ni nyams pa nyid do/ / zhes bya ba la phyogs kyi dang po zhes smos pas ni/ rma'i sgo'i phyogs kyi dang por gyur pa gang tshun chad kyis pham par 'gyur ba'i phyogs kyi dang po gzung gi/ lus su gtogs pa gzhan gyis ni ma yin no/ /cung zad zin pa nyid ces pa ni rma'i sgo rnams kyi dang por gyur pa'i phyogs bsnyan pa gang yin pa'i phyogs de sdig pa la sogs pa dag gis cung zad zin pa nyid do/ /zin pa nyid ces bya ba ni/ shas cher zin pa nyid do/ /skrangs pa nyid ces bya ba ni/ rlung la sogs pas skrangs rlor gyur pa nyid do/ /rul ba nyid ces bya ba ni/ mugs par gyur pa nyid do/ /myags pa nyid ces bya ba ni/ sha zag par gyur pa nyid do/ /srog chags dag gis zos pa nyid ces bya ba ni/ nang nyid nas de'i dri ma las skyes pa'i srog chags dag gis zos pa nyid do/ /'dir gzhung ni gang gi rma'i sgo dag cung zad zin pa nyid dam/ zin pa nyid dam/ rul ba nyid dam/ myags pa nyid dam zhes gsungs pa dang / gzhung gzhan las cung zad zin tam/ zin tam/ skrangs pa nyid dam/ rul pa nyid dam/ srog chags dag gis zin pa nyid dam zhes gsungs pa ste/ 'dir skrangs pa dang / srog chags dag gis zin pa ni de las bsdu ba byas pa yin no/ /lus nyams pa nyid yin yang rma'i sgo nyams par mi 'gyur ba bstan pa'i phyir/ bgrod par bya ba phyed bcas pa nyid la yang na smad pa med do zhes bya ba smras te/ bgrod par bya ba pho dang mo dang ma ning gi lus mtha' dag gi lte ba'i phyogs la sogs par phyed du bcad pa nyid la yang ltung ba na smad pa med do/ /pham pa kho nar 'gyur ro/ /rma'i sgo tsam bcad pa ni phyed du bcad pa nyid ma yin no/ /'di ltar rma'i sgo phyed du bcad pa ni nyams pa yin te/ de la ni sbom po kho nar 'gyur gyi/ pham par mi 'gyur ro/ /'dir gzhung ni/ btsun pa re zhig dge slong gis bud med lus phyed du bskum la/ rma'i sgo gsum po dag las rma'i sgo gang yang rung ba zhig ma nyams pa der mi tshangs par spyod pa bgyis na ltung ba cir 'gyur/ nye ba 'khor mthar 'gyur ro zhes gsungs pa de 'dir bsdus pa yin no/ /gzhung de las rma'i sgo nyams pa nyid ma bkab pas na lus nyid phyed du bcad pa nyid yin gyi rma'i sgo tsam gyis ni ma yin no/ /bsten par bya ba'i dbus bye ba'i mtshams sbyor bar mi mngon pa la yang ngo zhes bya ba ni/ bsten par bya ba ni/ pho dang mo dang ma ning gi kha dang bshang ba'i lam dang mo'i dbang por gyur pa'i dbus phyed tsam du gas pa la sogs pas bye ba'i mtshams yang phyir 'byor cing 'brel par gyur pas mi mngon pa la yang pham par 'gyur ba las na smad pa med pa'o/ /mngon pa la ni tshigs 'og mar ro zhes bya ba ni/ rma'i sgo'i mtshams 'byor bar rab tu shes pa la ni tshigs 'og mar 'gyur te/ ltung ba 'og ma nyid la gnas par 'gyur ba'o/ /de ltar na 'dir tshig gi don 'di 'byung ste/ mtshams 'byor bar mi mngon pa gang la bcug reg nyams su myong bar byas pa de ni pham par 'gyur ro/ /mtshams 'byor par mngon pa gang la bcug reg nyams su myong bar byas pa de la ni sbom po'o/ /mtshams 'byor par mi mngon pa gang la pham par 'gyur ba de'i sbyor ba de la ni sbom po'o/ /mtshams 'byor bar mngon pa gang la sbom por 'gyur ba de'i sbyor ba de la ni nyes byas so/ /mtshams 'byor bar mi mngon pa gang la pham par 'gyur ba de'i sbyor ba la sbom por 'gyur ba de'i sbyor ba la ni nyes byas so/ /mtshams 'byor bar mngon pa gang la sbom por 'gyur ba de'i sbyor ba la nyes byas su 'gyur ba de'i sbyor ba la ni/ nyes byas phra mor 'gyur ro/ /sbom po'i dbang du byas pa ni phag la sogs pa btsos pa spu med pa dag la'o zhes bya ba ni/ dbang du bya ba bstan pa'i phyir/ dang por sbom po'i dbang du byas pa ni zhes bya ba'i tshig smos te/ 'di man chad 'og nas mtha' nyid brjod pa'i g.yogs pa de ni bsgribs pa ste zhes 'byung ba'i mdo man chad ni sbom po zhes bya ba'i dbang du bya'o/ /phag la sogs pa zhes bya ba la sogs pa zhes bya ba'i sgras ni spre'u dang ba lang dang / ma he la sogs pa dag bsdu'o/ /btsos pa zhes bya ba ni me la sogs pa'o/ /spu med pa zhes bya ba ni/ phag la sogs pa gang la spu dag med par gyur pa de ni spu med pa'o/ /phag la sogs pa btsos pa spu med pa de dag la bcug reg nyams su myong bar byas pa ni sbom por 'gyur ba nyid do/ /'di skad bstan te/ gal te dge slong gis phag la sogs pa spu med pa de dag gi rma'i sgo dag tu sprod pa las 'khrig pa spyod par byed na de ni sbom por rig par bya ste/ rma'i sgo rnams nyams pa nyid yin pa'i phyir ro/ /sbyor bar gyur pa gzhan du spyod pa la ni sbom por mi 'gyur te/ sbom po'i dngos gzhi bskyed pa'i sbyor ba la ni nyes byas so/ /sbyor ba'i yang sbyor ba la ni nyes byas phra mor 'gyur ro/ /'dir btsos pa zhes bya ba ni nyams pa nyid kyi rgyu yin pas/ des na dud 'gro dang mi la sogs pa spu dang bcas pa'am/ spu med dag la ni sbom po kho na'i dbang du byas te/ rma'i dbang po btsos pa thams cad ni nyams pa nyid yin pa'i phyir ro/ /de'i phyir spu med pa zhes smos pa ni pags pa mi dang 'dra ba'i phyir pham pa'i kha na ma tho ba nyid du 'gyur ro snyam du dogs pa bsal ba'i phyir ro/ /shi ba nyid la rma'i sgo gsum char la yang spyir dngos gzhi'i kha na ma tho bar bstan pa la kha'i yul la bye brag smra bar 'dod nas/ mgo bcad pa'i khar ro zhes bya ba smras te/ mgo bcad pa'i khar byed na sbom po'i dbang du byas pa nyid yin gyi/ dngos gzhi'i dbang du byas pa nyid ni ma yin no/ /mgo bcad du zin kyang mo'i dbang po dang bshang ba'i lam ma nyams pa gnyis su byed pa ni dngos gzhi'i dbang du byas pa nyid yin no/ /kha dang bshang ba'i lam dang mo'i dbang po rnams kyi gnas skabs kyi bye brag bstan nas/ pho'i dbang po sbom po'i dbang du byas pa bstan pa'i phyir/ bsten par bya ba dang / sten par byed pa lus las tha dad par byas pa gnyis kyi'o zhes bya ba smras te/ bsten par bya ba dang / sten par byed pa zhes bya ba ni/ kha dang bshang ba'i lam dang mo'i dbang po dang pho'i dbang po zhes bya ba ci rigs par bsten par bya ba dang / stan par byed pa yin pa'o/ /lus las tha dad par byas pa gnyis kyi'o zhes bya ba ni/ gzhan gyis bsten par bya ba lus las tha dad par byas pa dag tu rang gis sten par byed pa lus las tha dad par ma byas pa dang / rang dang gzhan gyis sten par byed pa lus las tha dad par byas pa dag rang gis bsten par bya ba lus las tha dad par ma byas pa dag tu dang / gzhan gyis sten par byed pa lus las tha dad par byas pa rang gis bsten par bya ba lus las tha dad par ma byas pa dag tu cig car ram rim gyis phan tshun sbyor bar byed pa ni sbom po'i dbang du byas pa nyid yin pa'o/ /'di skad bstan te/ dge slong gis gzhan gyis bsten par bya ba kha dang bshang ba'i lam dang mo'i dbang po'i gzhi gcad pa la sogs pas lus las tha dad par byas pa dag tu rang gis sten par byed pa pho'i dbang po sbyor bar byed na yang sbom po'i dbang du byas pa nyid do/ /rang dang gzhan gyis sten par byed pa pho'i dbang po bcad pa la sogs pas lus las tha dad par byed pa dag rang gis bsten par bya ba kha dang bshang ba'i lam du sbyor bar byed na yang sbom po'i dbang du byas pa nyid do/ /dge slong mas gzhan gyis sten par byed pa pho'i dbang po bcad pa la sogs pas lus las tha dad par byas pa rang gis bsten par bya ba kha dang bshang ba'i lam dang mo'i dbang po dag tu sbyor bar byed na yang sbom po'i dbang du byas pa nyid do zhes bya ba'i tha tshig go/ /bsten par bya ba dang / sten par byed pa gnyig gzhan gyi lus las tha dad pa'am tha dad pa ma yin pa ni mdo 'og ma'i yul las ston to/ /gzhan pa gnyis kyang gzhan gyi gnyis dang gzhan du sbyor bar byed na'o zhes bya ba la/ gzhan pa gnyis kyang zhes bya ba'i kyang gi sgras ni sngar bsten par bya ba dang sten par byed pa lus las tha dad par byas pa gnyis kyi'o zhes bya ba smos pa de gnyis las gzhan pa lus las tha dad par ma byas pa gnyis dang / lus las tha dad par byas pa gnyis kyang snga ma bzhin du sbyar bar ston to/ /gzhan gyi gnyis dang zhes bya ba ni/ gzhan pho dang mo dang ma ning gis bsten par bya ba dang / sten par byed pa ci rigs par gnyis dang ngo / /gzhan du sbyor bar byed na'o zhes bya ba ni/ bsten par bya ba dang / sten par byed pa'i sbyor bar byed na sbom po'i dbang du byas pa nyid yin pa'o/ /gtsug lag las ci rigs par sbyar ba'i don ston te/ la la las ni bud med kyis bcad de 'jug na ltung ba cir 'gyur nyes pa sbom por 'gyur ro zhes gsungs so/ /gzhan las ni gzhan gyi yan lag gi rnam pa gzhan gyi zag byed du 'jug tu rtsol na ltung ba cir 'gyur nyes pa sbom por ro zhes gsungs so/ /gzhan gyi ni dge slong la las zag byed du zag byed rtsol la mtha'i ltung bar mi 'gyur bar mchis sam/ bka' stsal pa/ yod de bcad de 'dzud par byed pa'am/ bud med kyis bcad par 'dzud pa'o/ /ltung ba cir 'gyur nyes pa sbom por ro zhes gsungs so/ /gzhan las ni dge slong la las zag byed du zag byed rtsol la mtha'i ltung bar mi 'gyur ba mchis sam/ bka' stsal pa yod de/ bcad de 'dzud par byed pa'am/ bud med kyis bcad par 'dzud par byed pa'am/ gnyi ga bcad de 'dzud par byed pa'o/ / ltung ba cir 'gyur nyes pa sbom por ro zhes gsungs so/ /mdo gnyis las bshad pa de thams cad sbyar nas de'i rjes su 'brang bas kha dang bshang ba'i lam gnyis su 'dzud pa dag kyang sbom po'i dbang du byas pa kho nar snga ma bzhin du sbyar ro/ /gzhan pa'i bu ga lus las bcad pa la yang ngo zhes bya ba ni/ rma'i sgo gsum las gzhan pa'i bu ga mtshon gyis dral ba la sogs pa bcos ma dang mid pa la sogs pa lus byung ba nyid nas byung ba dang po nas dod pa lus las bcad pa dang ma bcad pa la yang sbom po'i dbang du byas pa yin pa'o/ /gzhung ni la las lus dral te yan lag gi rnam pa rtsol na ltung ba cir 'gyur nyes pa sbom por ro zhes gsungs pa dang / gzhan las mgo bcad de mtha' gnyis par rtsol na ltung ba cir 'gyur nyes pa sbom por ro zhes gsungs pa de dag bsdus pa yin no/ /bsten par bya ba ma ning mo sbubs med pa la yang ngo zhes bya ba la/ yang ngo zhes bya ba'i sgra ni bu ga lus las bcad pa la yang ngo zhes sngar smos pa'i rjes bsnyags pa'i phyir ro/ /sbubs zhes bya ba ni pho'i dbang po gzhug par bya ba'i skabs te/ bsten par bya ba ma ning mo gang la mo'i dbang po gzhug par bya ba'i skabs kyi tshad kyi sbubs de med pa de ni sbubs med pa ste/ pho'i dbang po shong ba'i sbubs med pa yin no/ /bsten par bya ba ma ning mo sbubs med pa de'i bsten par bya ba'i bdag nyid kyi bu ga de lus las bcad pa dang ma bcad pa la yang sbom po'i dbang du byas pa nyid do/ /'dir sbubs med pa zhes bya ba'i sgra las ni sbyar ba tsam las ltung bar 'gyur bar shes par bya'o/ /gzhung la las 'di skad ces gang la sbubs ma mchis pa ma ning mo las rtsol na ltung ba cir 'gyur nyes pa sbom por ro zhes gsungs pa de 'dir bsdus pa yin no/ /mchu gnyis la'o zhes bya ba ni/ mchu gnyis la sbyar ba tsam la yang sbom po'i dbang du byas pa nyid de/ so'i mtha' tshun chad 'ba' zhig tu ma zad pa'o/ /phyi rol gyi mtshams la thug par ro zhes bya ba la/ kha'i dang po ni so phan chad do zhes bstan pa tshun chad kha'i sgo'i mtshams phan chad kyi bar gang yin pa de ni phyi rol gyi mtshams zhes bya ste/ der thug par gyur na sbom po'i dbang du byas pa nyid do/ /'di skad bstan te/ mchu gnyis phan chad so tshun chad du 'dzud na nyes pa sbom po'i ltung bar 'gyur ro/ /'dir gzhung ni so'i phyi rol du nyams par byed na nyes pa sbom po'i ltung bar 'gyur ro zhes gsungs pa yin no/ /snod du'o zhes bya ba ni/ snod du 'dzud na sbom po'i dbang du byas pa nyid de/ snod ni gang las byas pa dang / de las byas pa bye brag med do/ /bltab pa dang mi reg par 'dzud pa gnyis so zhes bya ba la pho'i dbang po rked bltab tu byas te rma'i sgo dag tu 'dzud pa gang yin pa de yang sbom por dbang du byas pa nyid yin la yan lag gi rnam pa rma'i sgo dag gis mi reg par der 'jug pa de yang sbom po'i dbang du byas pa nyid yin te/ dge slong la ltung bar 'gyur ba bzhin du dge slong ma la yang 'gyur ro/ /gal te mi reg par 'dzud pa sbom po'i dbang du byas pa nyid yin na/ 'o na ji ltar ro nyid dang / sten par byed pa dang / bsten par bya ba g.yogs ma can nyid dag la ni na smad pa med do zhes bya ba der g.yogs mas par du chod pa lan smad pa med do zhes smras she na/ de'i phyir mtha' nyid brjod pa'i g.yogs pa de ni bsgribs pa ste/ des g.yogs pa la thams cad kyi thams cad du reg par mi 'gyur ba ma yin no zhes bya ba smras te/ mtha'i dngos po ni mtha' nyid de pham par 'gyur ba'o/ /de brjod pa ni mtha' nyid brjod pa'o/ /de'i g.yogs pa de ni bsgribs par 'dod de/ bsgribs pa des g.yogs pa'i bsgribs pa de la ni thams cad kyi thams cad du reg par mi 'gyur ba ma yin no/ /'di skad bstan te/ gal te bsten par bya ba dang / sten par byed pa zhes bya ba dbang po gnyis la sgribs pa rnam pa de lta bus g.yogs par gyur pa gang la bcug reg nyams su myong bar 'gyur ba de ni pham par 'gyur ba yin no/ /de lta na 'o na gang la reg par mi 'gyur ba de la ci zhig tu rnam par gzhag ce na de'i phyir/ gzhan gyis g.yogs pa nyid ni mi reg par 'dzud pas rnam par bshad pa yin no zhes bya ba smras te/ mdo snga mar bstan pa las gzhan pa'i bsgribs pa pags pa'am stug po 'jam po'i bsgribs pas g.yogs pa bsgribs pa nyid dag la thams cad kyi thams cad la reg par mi 'gyur ba de ni mi reg par 'dzud pas rnam par bshad pa yin te/ de la sbom por 'gyur ro zhes bya ba'i tha tshig go/ /pham par 'gyur ba dang po zhu ba'i skabs so zhes bya ba mi tshangs par spyod pa'i pham par 'gyur ba zhu ba'i skabs rdzogs so// // da ni mi tshangs par spyod pa'i skabs 'dul byed las 'byung ba dag brjod par bya ste/ dge slong gi dngos por mi shes na rang bzhin gyis nyams pa yin no zhes bya ba ni/ bdag dge slong ngo snyam du dge slong gi dngos por dge slong nyid du bdag nyid kyis mi shes mi rig pa gang yin pa de ni rang bzhin gyis nyams pa yin par shes par bya'o/ /de lta bur gyur pa'i tshe nyes pa gang byas kyang rung ste/ 'dir 'dul ba las rang bzhin nyams pa zhes bya ba'i sgra dang smyon pa la sogs pa'i sgra'i tha snyad snang ba de dag gi mtshan nyid 'di yin no/ /de ltar 'dir gzhung ni gal te dge slong gi dngos por shes na ni gzhi ji lta ba bzhin du ltung bar 'gyur ro/ /gal te dge slong gi dngos por mi shes pa smos pa la ni ltung bar mi 'gyur te/ sems 'khrugs pa dang tshor bas nyen pa yang de bzhin no zhes gsungs pa yin no/ /nyams pa dag la sbom por bstan pa de rnam par dbye ba'i phyir/ nyams pa nyid ni gnyis te nang dang phyi rol lo zhes bya ba smras te/ nyams pa nyid gnyis las 'dir nang gi rim par gtogs pa nyams pa nyid gtso bo yin pas de'i phyir nang gi rim pa nas brtsams te/ phyi rol nyams pa'i bar de ni 'dir phyi rol nyams pa nyid yin gyi/ phyi rol nyams pa 'ba' zhig ni nyams pa nyid ma yin no/ /bsten pa'i phyir gzhan la khas blangs pa na bslab pa 'khrugs pa nyid do zhes bya ba ni/ dge slong ma gang gis bdag la gzhan gyis bstan pa'i phyir brjod pa na de ltar rung ngo zhes gzhan la khas blangs pa na dge slob ma de'i bslab pa'i gzhi rnams 'khrugs pa nyid med par gyur to zhes bya ba'i tha tshig go/ /'dir dge slob ma'i bslab pa 'khrugs pa nyid yin gyi/ dge tshul ma'i bslab pa skyes pa la reg pa spong pa zhes bya ba ni 'khrugs pa ma yin te/ dgon pa sdig can gyis lhan cig sbyar ba'i gnas skabs na nyams su myong bar ma gyur pa'i phyir ro/ /gal te yang de'i tshe nyams su myong bar gyur na ni de'i tshe pham par 'gyur ba dang 'dra ba'i nyes byas su 'gyur te/ des na de'i lus la skye ba'i chos nyid med par 'gyur ro/ /de lta bas na khas blangs pa'i dus kho na de'i bslab pa 'khrugs pa nyid yin gyi/ brtsal ba'i dus na ni ma yin te/ mngon par mi dga' ba'i phyir ro/ /'dir gzhung ni dgon pa pa sdig pa can gyis dge slob ma la khyod bsnyen par ma rdzogs gyi/ mi tshangs par spyod kyang ltung bar mi 'gyur ro zhes co dris te/ des de bsten pa dang sten pa de las 'gyod pa skyes so/ /des de mi 'dod bzhin du brtsal ba dang / de bdag dge slob mar ma rung bar gyur tam snyam du 'gyod pa skyes so/ /bcom ldan 'das kyis bka' stsal pa/ /bslab pa 'khrugs te yang dbog par bya'o/ /nyes byas kyi ltung bar 'gyur ro/ /nyes byas de yang khas blangs pa'i dus kho nar byung ngo zhes gsungs pa yin no/ /de la de yang sbyin par bya ba nyid do zhes bya ba ni/ 'khrugs pa nyid de la dge slob ma'i bslab pa de yang sbyin par bya ba nyid do/ /bsten par khas blangs pa'i zhar la de ni dge slong gi sbom po'o zhes bya ba smras te/ de ni zhes bya ba ni bsten pa'i phyir gzhan la khas blangs pa'o/ /de ni dge slong gi kha na ma tho ba sbom po'o/ /'di man chad 'og nas mdo las bsten pa'i phyir gzhan la bsgo na zhes bya ba yan chad ni sbom po'i dbang du bya'o/ /'dir yang gzhung ni dgon pa pa sdig can gyis lor ma lon pa la khyod bsnyen par rdzogs nas ring por ma lon gyi/ mi tshangs par spyod kyang des ltung bar mi 'gyur ro zhes co dris te/ des de bsten pa dang / bsten pa de la 'gyod pa skyes so/ /des de mi 'dod bzhin du brtsal ba dang / de bdag pham par ma gyur tam snyam du 'gyod pa skyes so/ /bcom ldan 'das kyis bka' stsal pa/ pham pa'i ltung bar mi 'gyur te nyes pa sbom por 'gyur ro zhes gsungs pa yin no/ /'di yang khas blangs pa kho na las ltung bar 'gyur gyi/ brtsal ba'i dus na ni nyams su myong ba med pas ltung bar mi 'gyur ro/ /ma chud na yang ngo zhes bya ba ni/ sbom po'i zhes bya bar sbyar ro/ /chud par ma gyur pa ni ma chud pa'o/ /bsten par bya bar sten par byed pa ma shong ba ste/ der ma chud ces bya ba'i tha tshig go/ /chud par bya ba'i phyir rma med na yang ngo zhes bya ba ni/ zag byed zag byed du chud par bya'o snyam nas de'i ched du rma'i sgo sbal bar byed na yang sbom po'o/ /skrag pa dang ngo tsha bas kyang kun du 'dod chags ma skyes na'o zhes bya ba ni/ bsten par bya bar sten par byed pa 'dzud pa na skrag pa dang ngo tsha bar gyur na yang sbom po ste/ de ci'i phyir zhe na/ 'di ltar skrag pa dang ngo tsha ba la kun du 'dod chags mi skye bas/ des na nyams su myong ba med par bcug pa la sbom por 'gyur ro/ /yan lag gi rnam pa rdol ba'i phyir ro ma myong na'o zhes bya ba ni/ yan lag gi rnam pa glang shu la sogs pas rdol ba'i phyir bsten par bya bar sten par byed pa bcug pa na 'khrig pa las byung ba'i 'dod chags kyi ro nyams su ma myong na yang sbom po'o/ /las su mi rung ba bcug na'o zhes bya ba ni/ yan lag gi rnam pa las su mi rung ba bsten par bya bar bcug na yang sbom po'o/ /'dir yang 'khrig pa las byung ba'i 'dod chags kyi ro nyams su ma myong na ste/ nyams su myong ba ni las su rung ba la rag las pa'i phyir ro/ /lag pas lag par dang / rkang pas rkang par dang / tshigs kyis tshigs su kyang / mdoms kyis mdoms su lta bur mi rung na'o zhes bya ba ni/ 'dir lag pa la sogs pas lag pa bzung du mi chog pa ni mi rung ba zhes bya ba'o/ /de dag mi rung ba nyid kyis na bsten par bya ba yang mi rung ba nyid du mngon te/ lag pas bgrod par bya ba'i lag pa bzung du mi rung ba nyid dang / mdoms kyis mdoms su 'jug par mi rung ba nyid yin na zag byed du zag byed 'dzud par byed kyang sbom po kho na'o/ /bzung du mi rung ba nyid ni reg pa la sogs pa 'khrig pa'i mthar thug pa thams cad la yang ro yongs su rdzogs par mi myong ba yin no/ /ji ltar las su mi rung ba bcug na ro nyams su mi myong ba'i phyir zhes bya ba smras pa/ de kho na bzhin du 'dir yang rig par bya'o/ /sprad pa'i g.yo ba nyid tsam la'o zhes bya ba ni/ mthus brtsal ba na sten par byed pa bsten par bya ba dang / lhan cig sprad cing bcug pa las bgrod par bya ba'i 'khrig pa'i ro nyams su myong bar gal te g.yo ba tsam nyid ces bya ba cung zad 'gyur ba tsam gyis sems g.yo ba tsam nyid la yang sbom po'o/ /shing dang ba so dang rdo ba dang / gos las bu mo'i gzugs byas pa la brtsal ba na gal te dbang po tsam dod pa na'o zhes bya ba ni/ shing la sogs pa las bu mo'i gzugs byas pa la brtsal ba na/ gal te nang na gnas pa'i 'dre la sogs pas mo'i dbang po tsam dod cing skabs yod par byed la/ der zag byed bcug na yang sbom po ste/ shing la sogs pa smos pa ni mtshon pa ste/ gyo mo las byas pa la sogs pa thams cad la yang sbom po kho nar 'gyur ro/ /yan lag thams cad du reg pa bsten na dngos gzhi'o zhes bya ba ni/ shing la sogs pa las bu mo'i gzugs su byas pa na gal te nang na gnas pa'i 'dre la sogs pas yan lag thams cad du rtsol bar byed pa de la reg pa bsten na dngos gzhi'i kha na ma tho ba kho nar 'gyur te/ bgrad par rdzogs pa yin pa'i phyir ro/ /bsten pa'i don du rtsol bas yan lag gi rnam par rkang pa 'dzud na'o zhes bya ba ni/ spyod pa las byung ba bsten pa'i don du bud med la rtsol ba'i gang zag gis mo'i dbang po zhes bya ba'i yan lag gi rnam par rkang pa 'jud na sbom po'o/ /kha dang bshang ba'i lam dag tu yang thams cad du de bzhin no/ /bsten par bya ba'i yan lag gi rnam par de tsam la gzhol bas phyi rol du reg na'o zhes bya ba ni/ bsten par bya ba mo'i dbang po la sogs pa la yan lag gi rnam pa pho'i dbang pos de tsam la gzhol ba phyi rol la reg pa'i bsam pas phyi rol du reg na sbom po'o/ /'dir gzhung ni/ bud med sgren mo yol ba'i nang na sna chu ldugs pa de'i yan lag gi rnam pa dge slong gis yol ba'i rgyab nas mthong ngo / /des mthong nas kun du 'dod chags pas de'i yan lag gi rnam pa dang yan lag gi rnam pa sprad do/ /des 'gyod pa skyes pa nas bcom ldan 'das kyis bka' stsal pa/ nyes pa sbom por 'gyur ro zhes bya ba'i bar du gsungs pa yin no/ /bsten par bya ba'i phyir gzhan la bsgo na'o zhes bya ba ni 'khrig pa bsten pa'i phyir tshur shog / bdag cag gnyis mi tshangs par spyod do zhe'am/ song la mi tshangs par spyod cig ces gzhan la bsgo na sbom po'o/ /rang bzhin gyis las su rung ba nyid yin na na smad par bya ba med do zhes bya ba ni/ gang la rang bzhin gyis ngo bo nyid kho nas dus thams cad du dbang po las su rung ba nyid yin na de'i sten par byed pa bsten par bya bar bcug na na smad par bya ba med de dngos gzhi kho nar 'gyur ro zhes bya ba'i tha tshig go/ /mdun ma dang phyi ma gnyis gang du brtsams pa de las gzhan du gtugs pa la med do zhes bya ba ni/ mdun ma mo'i dbang po dang phyi ma bshang ba'i lam zhes bya ba'i bsten par bya ba de gnyis las khu ba dbyung ba'i ched du mdun ma'am phyi ma gang du brtsams pa de las de gnyis bsnor ba gzhan du khu ba ldugs pa la na smad par bya ba med par shes par bya'o/ /'dir gzhung ni btsun pa mdun na mor smyugs pa'i las byas shing phyi na mor blugs pa de la ni kho mo mi tshangs par spyad pa yin par mi 'dzin to zhes bya ba la des mdun na mor smyugs pa'i las byas shing phyi na mor blugs so zhes gsungs pa yin no/ /lam lhag ma rnams su brtsal bar bya'o snyam pa la yang med do zhes bya ba ni/ zag byed dang kha dang bshang ba'i lam rnams las gcig tu dang por mi tshangs par spyad pa brtsams la/ lam lhag ma rnams su brtsal bar bya'o snyam pa'i bsam pas bsten par bya bar sten par byed pa 'dzud pa la yang na smad par bya ba'i rgyu med do/ /bdag ni nyams pa'o snyam pa'i bsam pa can la yang med do zhes bya ba ni/ dge slong nyams pa med pa 'khrul pa 'ba' zhig gis bdag ni nyams pa'o/ /dge slong gi tshul zhig pa'o snyam pa'i bsam pa can gyis bcug pa la yang na smad par bya ba med do/ /nad pa dang bral bar bya ba'i don nyid la yang med do zhes bya ba la/ nad pa dang bral ba ni nad dang bral ba ste/ de'i don ni dgos pa'o/ /gang du bcug na nad de med par 'gyur ba ni de'i don te de'i dngos po ni de nyid do/ /nad dang bral bar bya ba'i don de nyid kyis bcug pa la yang na smad par bya ba med do/ /lam la gzhan nyid du 'du shes pa dang yid gnyis za ba la yang med do zhes bya ba ni/ mo'i dbang po la sogs pa lam la lam ma yin par nges pa kho nar gzhan nyid du 'du shes pa dang / gang lam la yid gnyis za ba ci 'di zag byed la sogs pa'i lam yin nam/ 'on te brla dang pus mo dang phrag pa dag gi par zhig yin snyam du yid gnyis za bar bcug na de gnyi ga la yang na smad par bya ba med do/ /lam ma yin pa la ni de gnyis sbom po'i dbang du byas pa nyid do zhes bya ba ni/ lam ma yin pa'i yul la gzhan nyid du 'du shes pa dang / yid gnyis za ba de gnyis ni sbom po'i dbang du byas pa nyid de/ lam ma yin pa la lam du 'du shes pa nyid dang / lam ma yin pa la yid gnyis za bas bcug pa la ni sbom po'o/ /'dir gzhung ni lam la lam du 'du shes pa ni pham par 'gyur ba'i ltung ba'o/ /lam la yid gnyis za ba la yang pham par 'gyur ba'i ltung ba'o/ /lam ma yin pa la lam du 'du shes pa ni nyes pa sbom por ro/ /lam ma yin pa la yid gnyis za ba dang / nyes pa sbom por 'gyur ro zhes gsungs pa yin no/ /rdos pa bud med kyi steng du sgyel ba la ni ltung ba med do zhes bya ba ni/ ba lang la sogs pas rdos pa'i dge slong bud med kyi steng du sgyel ba rgyu des reg cing gal te reg pa nyams su myong bar bya ba mi byed na de la ni ltung ba med do/ /nyam thag pas mgul nas mi 'dod bzhin du 'khyud pa la yang ngo zhes bya ba ni/ 'jigs pa dang skrag pas nyam thag pa'i bud med kyis dge slong gi mgul la sogs pa nas mi 'dod bzhin du 'khyud pa nyams su myong bar bya ba med na de la yang ltung ba med do/ /mchur mchus reg pa la yang ngo zhes bya ba ni/ bud med kyis dge slong gi mchur mi 'dod bzhin du mchus reg pa la nyams su myong bar bya ba med na de la yang ltung ba med do/ /khyi'i mdun du gci bar mi bya'o zhes bya ba ni/ khyi'i mdun du zag byed phyung ste gcin gci bar mi bya ste/ yan lag gi rnam pa zin pa spangs pa'i phyir ro/ /de ni 'dir sten par byed pa'i skabs las smras pa yin no/ /gang du srog gi bar chad du 'gyur ba'i dgon pa der gnas par mi bya'o zhes bya ba la/ srog dag gi bar du gcod pa ni srog gi bar chad de srog gi dbang po 'jig pa'o/ /dgon pa gang du srog gi bar chad 'byung ba 'ong bar 'gyur ba yod pa'i dgon pa der gnas par mi bya'o/ /de ni mi'am ci mo'i byung ba'i mtha' las gzhag pa yin no/ /'dir gzhung ni yang dge slong gis gang na nyes dmigs de lta bu yod pa'i dgon pa de lta bur lhag par gnas par mi bya'o zhes gsungs pa yin no/ /gang na yan lag gi rnam pa 'dzin pa'i 'jigs pa yod pa'i chu klung der sgren mor rgal bar mi bya'o zhes bya ba ni/ chu klung gang na yan lag gi rnam pa 'dzin pa'i 'jigs pa yod pa'i chu klung der dge slong gis sgren mor rgal bar mi bya'i/ der shes bzhin du gru rgal bar bya'o zhes bya ba ni/ chu klung der dge slong gis shes bzhin du gru rgal bar bya ste/ de ni bud med la reg pa spangs pa'i phyir shes bzhin du bya ba yin par rig par bya'o/ /ba lang gi nang du yang 'gro bar bya'o zhes bya ba ni/ dge slong gis ba lang gi nang du yang shes bzhin du 'gro bar bya'o/ /khron pa yang brtag par bya'o zhes bya ba ni/ dge slong gis khron pa yang shes bzhin du brtag par bya ste/ nges par brtag par bya ba'o/ /bsod snyoms la yang grong du rgyu bar bya ba'o zhes bya ba ni/ dge slong gis bsod snyoms la yang shes bzhin du grong du rgyu bar bya'o/ /gsum po dag la yang zhes bya ba'i sgra smos pa ni shes bzhin zhes bya ba'i rjes su snyegs pa'i phyir te/ shes bzhin thams cad du yang bud med la reg pa spang ba'i phyir ro/ / legs par so sor brtag par byas nas rab tu dbyung bar bya'o zhes bya ba ni/ rab tu 'byung bar 'dod pa legs par so sor brtag par byas nas rab tu dbyung bar bya ba ste/ 'di ltar rab tu dbyung ba'i gzhir don las bstan zin mod kyi 'on kyang 'dir brjod do/ / gal te bud med skyes pa gzhon nu 'dra bar rab tu phyung ste/ dge slong dag gi nang du gzhag na de'i tshe gnod pa chen por 'gyur ba dang / gus pa skyed pa'i phyir ro/ /'di ltar bslab pa thams cad la sbyor ba mi lhod par bya ba yin pas lhag par yang rab tu dbyung ba la bya dgos so/ /des na bslab pa thams cad la sbyor ba lhod na nyes byas su 'gyur ro/ /gcig pu bla gab med par glos mi dbab po zhes bya ba ni/ dge slong gis gcig pu bla gab med par glos dbab par mi bya ba ste/ dge slong gcig pu bla gab med par glos phab ste/ gnyid log pa de'i sham thabs phud pa na dge slong de bud med kyis brtsal bas de'i phyir 'dir gzhag go/ /dge slong mas gnas khang sgo ma bcad par snyoms par 'jug pa yang mi bya'o zhes bya ba la/ sgo ma bcad par zhes bya ba ni/ gnas khang sgo phye ba ste/ dge slong mas der snyoms par 'jug par mi bya'o/ /yang zhes bya ba ni/ grogs mo de yongs su zin kyang des glos dbab par yang mi bya bar ston to/ /pham par 'gyur ba dang po 'dul byed kyi skabs so zhes bya ba ni mi tshangs par spyod pa'i pham par 'gyur ba 'dul byed kyi skabs nas 'byung ba rdzogs so/ /mi tshangs par spyod pa'i pham par 'gyur ba rdzogs so zhes bya ba dngos gzhi dang po mi tshangs par spyod pa'i pham par 'gyur ba rdzogs so/ / //bam po dgu pa/ gang byas na ma byin par len pa'i pham par 'gyur zhe na/ de'i phyir rku'am rkur bcug pa dag zhes bya ba smras te/ rku'am zhes bya ba ni rang gis byed pa ste/ dge slong gis gang la rku ba'i phyir rang kho nas bya ba byed pa'o/ /rkur bcug pa zhes bya ba ni/ rang gis bcol zhing gzhan byed du bcug pa ste/ rang gis bcol nas gzhan gyis rdzas rku bar byed pa'o/ /rang gi lus 'ba' zhig tu yang ma zad de/ ji lta zhe na/ mngags pas kyang ngo zhes bya ba ste/ mngags pa rgyur gyur pas kyang rku ba ni gang la mngags pa rang gi lus kyis byed pa'o/ /rkur bcug pa ni gang la mngags pas bcol na gzhan la 'di skad ces song la rang gis rkus shig /song la rkur chug shig ces byed du bcug pa'o/ /bcol ba'i dbang gis de ltar rnam par gzhag ste/ mngags pa'i mngags pas brkus pa yang bye brag med de/ thams cad du pham par 'gyur ro/ /ci zhig rku'am rkur bcug pa dang mngags pas kyang kha na ma tho pa der 'gyur zhe na/ de'i phyir/ ma byin pa'o zhes bya ba smras te/ byin pa la yang rku sems kyis len pa srid pas de'i phyir ma byin par zhes bye brag tu byas so/ /'dir lung ni de la bud med dam skyes pa'am ma ning gang gis kyang ma byin pa zhes gsungs pa de yin no/ /tshad ji tsam zhe na/ de'i phyir/ ma sha ka lnga la sogs pa'o zhes bya ba smras te/ ma byin pa'i rdzas de ma sha ka lnga'i tshad tsam yin pa de ni ma sha ka lnga'o/ /sogs pa de gang la yod pa de ni de la sogs pa ste de'o/ /ma byin pa de la sogs pa rku'am rkur bcug pa dang mngags pas kyang kha na ma tho ba der 'gyur ro/ /sogs pa zhes smos pas ni drug dang bdun dang brgyad dang dgu dang bcu la sogs pa thams cad bsdu'o/ /'dir gzhung ni ma sha ka lnga'am ma sha ka lnga las lhag pas zhes gsungs pa yin no/ /sems ji lta bus she na de'i phyir rku sems kyis so zhes bya ba smras te/ rku ba'i blos rku'am rkur bcug pa dang / mngags pas kyang kha na ma tho ba der 'gyur ro/ /'di ltar yid gcugs pa'i sems la sogs pa dag gis ni ltung ba med do zhes 'og nas 'byung ngo / /ci mi ma yin pa'i rgyud kyis yongs su bzung ba'am zhe na/ ma yin te de'i phyir/ mi'i rgyud kyis yongs su bzung ba'o zhes bya ba smras te/ gang mi'i 'gro bar gtogs pa de ni mi'i rgyud de/ des yongs su bzung ba'o/ /mi'i rgyud kyis yongs su bzung ba de rku'am rkur bcug pa dang mngags pas kyang kha na ma tho ba der 'gyur ro/ /mi ma yin pa'i rgyud kyis yongs su bzung ba ni ma yin te/ 'gro ba gzhan gyi rgyud kyis yongs su bzung ba ni na smad do zhes gsungs pa'i phyir ro/ /gal te mi'i rgyud kyis yongs su bzung ba'i rdzas la 'gro ba gzhan gyi rgyud kyis yongs su bzung ba'i 'du shes kyis rku na ci kha na ma tho ba de nyid du 'gyur ram zhe na ma yin te/ de'i phyir der 'du shes pas so zhes bya ba smras te/ mi'i rgyud kyis yongs su bzung ba yin par 'du shes pas so zhes bya ba'i tha tshig go/ /gal te mi'i rku'o snyam du 'du shes par gyur na des pham pa yin no/ /'dir gzhung ni 'di lta ste/ dge slong gis 'di ltar yo byad lci ba 'di dag gzhan skyes pa'am bud med dam ma ning dag gis yongs su bzung bar 'du shes pa ste zhes bya ba la sogs pas gsungs pa yin no/ /de ltar na ma byin par len pa'i pham par 'gyur ba 'di ni yan lag lnga dang ldan pa yin te/ ma byin pa nyid dang / ma sha ka lnga la sogs pa nyid dang / rku sems nyid dang / mi'i rgyud kyis yongs su bzung ba nyid dang / der 'du shes pa nyid do/ /yan lag gang yang rung ba ma tshang ba la ni pham par 'gyur ba med de/ na smad pa kho nar 'gyur ro/ /mi'i rgyud kyis yongs su bzung ba zhes smras te/ gal te rlung la sogs pa gzhan gyis khyer ba de ci bdag po nyid dang bral ba yin nam 'on te ma yin zhe na de'i phyir/ khyer ba nyid na 'di bsam pas ma btang ba ni bdag po nyid dang ma bral ba nyid yin no zhes bya ba smras te/ rlung dang rkun po la sogs pa dag gis gos la sogs pa'i rdzas khyer ba nyid na bdag pos bdag gi bya ba'i bsam pas ma btang ba ni rdzas de las bdag po nyid dang ma bral ba nyid yin no/ /'di skad bstan te/ 'di ltar rkun po la sogs pas bdag po'i drung nas rdzas khyer du zin kyang ji srid du bdag pos bdag gi ba nyid kyi bsam pas ma btang ba de srid du rdzas kyi yul de la bdag po nyid dang ma bral ba yin no/ /'dir gzhung ni/ 'di ltar btso blag mkhan gyi gos dag bting ba rlung gis khyer zhing de dag dge slong rnams kyi 'chag sa dag gam ra ba dag gam/ sgo khang dag tu ltung ba la dge slong dag gis de la sbyor bas gnas nas gnas su sbed par byed pa'i bar du byed pa ni brkus par brjod par bya ste/ rin thang brtsi bar bya zhing dngos po tshang na pham par 'gyur la zhes gsungs pa dang / bcom ldan 'das kyis rkun po dag rgyal po'i pho brang du phul na srog gcod pa kun nas slong ba'i kha na ma tho bar gsungs kyi/ ma byin par len pa kun nas slong ba'i kha na ma tho bar ma gsungs te/ gal te bdag gir byed pa'i bsam pa btang zhing med na ni bdag po nyid dang bral bas de'i tshe ma byin par len pa kun nas slong ba yang brjod par 'gyur ro/ /mi'i rgyud kyis yongs su bzung ba zhes gsungs na bdag po dang bcas pa'i dud 'gro'i skye gnas su skyes pa'i rdzas brkus na ci zhig tu rnam par gzhag ce na de'i phyir/ tha snyad mi shes pa ni zhal ta byed pa bdag po nyid yin no zhes bya ba smras te/ tha snyad shes pa ni 'jig rten gyi tha snyad smra nus pa ste/ de'i rgyud du gtogs pa'i rdzas ni tha snyad shes pa'o/ /tha snyad mi shes pa ni 'jig rten gyi tha snyad smra mi nus pa ste/ de'i rgyud du gtogs pa'i rdzas ni tha snyad mi shes pa'o/ /rdzas de la ni zhal ta byed pa skyong bar byed pa bdag po nyid yin no/ /bya rnams kyi yin na yang de la bdag po nyid yod de/ rdzas ni de'i rgyud du gtogs pa yin pa'i phyir ro/ /gnyi ga bdag po nyid yin na ni 'du shes kyi dbang gis ltung ba rnam par gzhag go/ /de ltar 'dir gzhung ni gal te 'di snyam du mi las brku bar bya'i bya la rgyan ga la yod snyam du sems na ni rin thang brtsi bar bya zhing zhes bya ba la sogs pa gsungs pa yin no/ /ci dud 'gro'i zas dang skom rku pa la yang de nyid rnam par gzhag gam zhe na ma yin te/ de'i phyir/ bza' btung gi phyir byin pa la ni bsam pa dang 'brel pa med pa nyid yin no zhes bya ba smras te/ dud 'gro'i skyes gnas su skyes pa'i zas dang / skom la sogs pa bza' btung gi phyir byin pa gang yin pa de la ni zhal ta byed pa'i bsam pa dang 'brel pa med pa nyid yin par rig par bya'o/ /'di skad bstan te/ dud 'gro'i zas dang skom gyi phyir bza' ba dang btung ba gang sbyin par byed na der de la sbyin par byed pa 'di bdag gi'o snyam pa'i bsam pa dang / 'brel pa bzlog pas de nyid kyis nye bar sbyor bar byed de/ nye bar sbyar nas yang phyir blang ngo snyam pa med pas de'i phyir de la ni dud 'gro nyid bdag po nyid yin gyi/ zhal ta byed pa ni ma yin no/ /'dir lung ni dud 'gro'i skal ba chu'i rin thang brtsi bar bya zhing zhes gsungs pa de yin no/ /nags mes btang ba la sogs pa dag gis ri dwags la sogs pa gsod pa na de dag la bdag po nyid gang yin zhe na de'i phyir/ nags mes btang ba la sogs pa dag gis bzung ba'i phyir ri dwags dang bya dang sdig sbrul lings btab pa rnams la ni lings pa ma yin pa bdag po nyid ma yin no zhes bya ba smras te/ rngon pa la sogs pa lings bdag gis nags mes btang ba la sogs pa dag gi thabs kyis bzung ba'i phyir ri dwags la sogs pa lings btab pa bshor ba gang dag yin pa'i ri dwags la sogs pa lings btab pa de rnams ni lings pa kho na bdag po dbang ba nyid yin gyi/ lings pa ma yin pa bdag po dbang ba nyid ma yin no/ /de lta bas na lings pa ma yin pas gal te rku sems kyis len par byed na de las rkun por 'gyur ro/ /ri dwags la sogs pa smos pa ni dpe yin te/ phyugs dang mi lings btab pa bdag po dang bcas pa dang / bdag po med pa dag lings pa las brkus na rkun po nyid du 'gyur te/ bdag po gzhan yod du zin kyang 'di ltar de'i tshe na lings pa kho na nyid dbang ba nyid yin pa'i phyir ro/ /bdag po ma nges pa'i rdzas la ltung ba ji ltar rnam par gzhag ce na de'i phyir/ bye brag ma phyed pa la ni gzhi las rnam par gzhag go zhes bya ba smras te/ bye brag phyed pa ni yongs su bcad pa nges pa'o/ /bye brag ma phyed pa ni yongs su bcad pa ma nges pa ste/ 'di bdag po dang bcas pa zhig gam 'on te ma yin zhes bye brag ma phyed pa gter la sogs pa'i rdzas gang ci yang rung ba brkus pa la ni gzhi'i ngo bo nyid las ltung ba rnam par gzhag gi 'du shes la ni mi gzhag go/ /gal te bdag po dang bcas pa zhig na ni gzhi las yan lag tshang na pham par 'gyur ro/ /bdag po med pa zhig na ni sbom por rnam par gzhag go/ /rin thang brtsi bar bya'o zhes smras na/ gnas dang dus tha dad pas rdzas rnams kyi rin thang yang tha dad par snang na/ gang gi tshe rin thang rnam par gzhag par bya zhe na de'i phyir/ rin thang ni brkus pa'i gnas dang dus kyis so zhes bya ba smras te/ rnam par gzhag go zhes bya bar sbyar ro/ /rin thang ni brkus pa'i gnas gang yin pa dang / dus gang yin pa des rnam par gzhag go/ /'di skad bstan te/ yul gang du brkus pa dang / dus gang gi tshe brkus pa'i yul de nyid kyi dang dus de nyid kyi tshe'i rdzas de'i rin thang dang sbyar bar bya ste/ des ltung ba rnam par gzhag go/ /rku 'am rkur bcug pa dag gis so zhes smras na/ ma bsams pa brkus na ci zhig tu rnam par gzhag ce na de'i phyir/ ma bsams pa la ltung ba med do zhes bya ba smras te/ ma bsams pa'i dngos po 'khrul pas brkus pa gang yin pa de la ni ltung ba med do/ /de ltar yang nye ba 'khor gyis zhus pa las/ btsun pa re zhig dge slong gis rku sems kyis chos gos kyi gdang bu brkus bye pa der chos gos dag kyang zhar la mchis na ltung ba cir 'gyur/ chos gos kyi gdang bye bu'i rin thang brtsi bar bya'o zhes gsungs pa yin te/ chos gos dag gi rin thang brtsi ba ni ma gsungs te/ ma bsams pa'i phyir ro/ /rku sems kyis so zhes bya ba smras na/ sems gzhan gyis cir 'gyur zhe na de'i phyir/ rang dang brnya ba dang yid gcugs pa'i sems dag gis gzhan la go bar bya ste/ blangs na ltung ba med do zhes bya bar sbyar ro/ /rang gi sems dang brnya ba'i sems dang / yid gcugs pa'i sems ni rang dang brnya ba dang yid gcugs pa'i sems te/ rang gi sems la sogs pa de dag gis rku sems med par gzhan la go bar byas te blangs na ltung ba med do/ /la la 'di la rku sems med par zhes bya ba de smos mi dgos te/ rang gi rdzas la rku sems mi srid pa'i phyir ro zhes zer na/ de lta ma yin te/ rang gi rdzas la yang rku sems srid pa kho na ste/ gang gi tshe rang gi rdzas gzhan gyi lag tu 'doms shing phyis rku sems kyis ci nas kyang skyin pa 'jal du gzhug go snyam nas de las rku bar byed pa yod pas de'i phyir rku sems med pa zhes bye brag tu bya ba'o/ /de ltar yang dge slong gis rang gi lhung bzed dang chos gos kyang rku sems kyis len na nyes pa sbom por 'gyur bas/ dge slong gis rang dang brnya ba dang yid gcugs pa'i sems dag gis blang bar bya'o zhes gsungs pa yin no/ /ji skad du 'di bdag gis bskur ro zhes gzhan la go bar bya'o zhes gsungs na mdo byed pas/ gzhan la go bar byas te zhes ci'i phyir smras she na/ de ltar yang gzhung las gzhan la go bar bya'o zhes 'byung ba'i phyir ro/ /rku sems med pa gzhan gyis kyang ngo zhes bya ba ni/ rnam pa gsum po de dag ma gtogs pa rku sems med pa rnam pa gzhan gyis blangs pa yang nyes pa med pa'o/ /rnam pa gzhan gyis kyang ji ltar nyes pa med ce na/ nye ba 'khor gyis zhus pa las dge slong gis dge slong la 'di skad ces smras te/ khyod kyis dge slong che ge mo'i yo byad de dang de dag shes sam shes so/ /'o na song la de dag rkus shig de dag phrogs shig /de dag gnas gzhan nas gzhan du spos shig ces bsgo nas/ gal te de rku sems kyis de dag rku bar byed/ de dag 'phrog par byed/ de dag gnas nas gnas gzhan du spo bar byed na ni gnyi ga la 'dra bar ltung bar 'gyur ro/ /'on te de 'di snyam du 'di ni de'i 'o snyam na len pa po la ltung bar mi 'gyur gyi/ rkur 'jug pa po gang yin pa de ni gzhi ji lta ba bzhin du ltung bar 'gyur ro zhes gsungs pa yin no/ /snying rjes rdzu 'phrul gyis phrogs na'o zhes bya ba ni/ ltung ba med do zhes bya bar sbyar te/ snying rjes rgyu byas pa'i snying rje sngon du btang ba'i rdzu 'phrul gang yin pa'i rdzu 'phrul des phrog pa po las mi la sogs pa phrogs na ltung ba med do/ /'di ltar snying rje dang ldan pa'i sems kyis na nyes byas so zhes 'og nas 'byung mod kyi/ 'on kyang snying rje sngon du btang ba'i rdzu 'phrul gyi sems kyi rigs de 'dra ba de ni bsgoms pa las byung ba yin pas de la ni ltung bar 'gyur ba med do/ /dngos gzhi'i ltung ba bstan pa'i 'og tu sbyor ba'i ltung ba bstan pa'i phyir/ thams cad du sbyor ba la ni nyes byas so zhes bya ba smras te/ ltung ba thams cad la'ang sbyor ba gang yin pa de la ni nyes byas so/ /de ni spyir btang ba ste/ de'i dmigs kyis bsal ba bstan pa'i phyir/ sde tshan de la gal te dngos gzhi'i yin na sbom po'o zhes bya ba smras te/ pham par 'gyur ba'i sde tshan de la sbyor ba de gal te dngos gzhi'i yin na sbyor ba de la sbom po'o/ /ji ste sbyor ba'i sbyor ba yin na de la ni nyes byas kho na'o/ /de nyid dge 'dun lhag ma zhes bya ba'i sde tshan la yang 'dra bar bstan pa'i phyir/ 'og ma la yang de bzhin no zhes bya ba smras te/ pham par 'gyur ba'i sde tshan gang la sbyor ba de la dngos gzhi'i sbom po zhes gang gsungs pa de bzhin du 'og ma dge 'dun lhag ma zhes bya ba'i sde tshan la yang de bzhin du rig par bya ste/ gal te dngos gzhi'i sbyor ba yin na ni sbom po'o/ /sbyor ba'i sbyor ba yin na ni nyes byas so/ /ma sha ka lnga la sogs pa brkus sam rkur bcug pa dag gis pham par 'gyur bar bstan na/ ma chog pa'i brjod par bya ba bsten pa'i phyir ma tshog pa brkus na'o zhes bya ba smras te/ 'di man chad 'og nas snying rje dang ldan pa'i sems kyis na nyes byas so zhes 'byung ba'i mdo yan chad ni sbom po'o zhes bya ba'i dbang du bya'o/ /ma sha ka lngar ma chog pa brkus na yan lag gzhan thams cad yod kyang sbom por rig par bya ste/ 'di lta ste/ ma byin pa dang / rku sems kyis dang / mi'i rgyud kyis yongs su bzung ba dang / der 'du shes pas zhes bya ba yan lag de dag yod kyang ma sha ka ldar ma chog pa brkus sam/ rkur bcug pa dang / mngags pas kyang sbom po kho na'o/ /kha cig tu ni yan lag gsum mam gnyis ma tshang ba la nyes byas su 'dod de/ 'di lta ste/ mi ma yin pa'i rgyud kyis yongs su bzung ba la der 'du shes ba'am/ mi'i rgyud kyis yongs su bzung bar 'du shes pa dang / ma chog pa brkus pa ni nyes byas te/ yan lag rnams ma tshang ba'i phyir ro/ /de bzhin du bdag po gang yang rung bas yongs su ma bzung ba dang / ma chog pa dang / mi ma yin pa'i rgyud kyis yongs su bzung ba dang / der 'du shes med pa la yang nyes byas kho na'o/ /rku sems med na ni thams cad du ltung bar mi 'gyur ro/ /de'i phyir 'dir rku sems ni dngos gzhi'i yan lag yin la/ lhag ma rnams ni de'i bye brag yin no/ /mi'i rgyud kyis yongs su bzung ba zhes bya ba des ni bdag po dang bcas pa brkus nas pham par 'gyur ba bstan na/ bdag po med pa brkus na cir 'gyur zhe na de'i phyir/ bdag po med pa'i gter ro zhes bya ba smras te/ brkus na sbom po'o/ /gter de yang gal te bdag pos don ma rtogs pa yin pa'o/ /'di ltar dngos su na de la bdag po yod mod kyi 'on kyang des don ma rtogs skye par gyur pa ni bdag po med pa zhes bya'o/ /de ltar gzhung ni/ des nad g.yogs la smras pa/ khur ba sna gsum pa dang thug pa sta gon gyis shig dang / dge 'dun la yang dbul rang yang bza' btung bya'o zhes byas nas des de dag la zong phog go/ /de dag 'di snyam du bdag cag la khur ba sna gsum pa dang / thug pas ci bya/ 'di la pya khur ba sna gsum pa dang / thug pa zhig byin la zong bdag cag gis bgo bar bya'o snyam nas/ de dag gis de la khur ba sna gsum pa dang / thug pa zhig byin te zong bgos so/ /de dag 'gyod pa skyes nas bcom ldan 'das kyis bka' stsal pa/ pham par 'gyur ba'i ltung ba ni med de/ nyes pa sbom po'i ltung bar 'gyur ro zhes gsungs pa yin te/ gang dag la phul ba de dag la der bdag gir bya ba skyes par ma gyur pas pya de'i phyir pham par 'gyur ba'i rgyu med par snang ngo / /gter gang la bdag po'i don rtogs pa dang / don ma rtogs pa gnyi ga med pa de la ji ltar bsgrub ce na/ dper na byang gi sgra mi snyan pa rnams kyi rdzas brkus pa bzhin te/ gal te rku sems med na de'i tshe ltung ba med de/ bdag gi ba med pa'i phyir ro/ /ji ste rku sems skyed par byed na nyes pa sbom por 'gyur ro/ /gal te bdag pos don ma rtogs pa'i gter de nyid ma sha ka lnga la sogs pa las nyung ba la bdag po med par 'du shes pas sam/ bdag po dang bcas par 'du shes pas sam/ bdag po mis sam/ mi ma yin pas yongs su bzung bar 'du shes pas de brkus na nyes byas te/ sbom po'i dbang du byas pa'i yan lag dag pas nyung ba'i phyir ro/ /gzhan gyis brkus na dngos gzhir 'gyur la/ rang gi cir 'gyur zhe na de'i phyir/ rang gi'o zhes bya ba smras te/ rang gi rdzas ma sha ka lnga la sogs pa rku sems kyis der 'du shes pas rku 'am/ rkur bcug pa dang mngags pas kyang sbom por 'gyur ro/ /der 'du shes pa zhes bya ba'i tshig de skabs 'dir ni rang gir 'du shes pa zhes bya bar rig par bya'o/ /de ltar yang gzhung ni de'i phyir dge slong gis rang gi lhung bzed dang / chos gos kyang rku sems kyis blang bar mi bya'o/ /dge slong gis rang gi lhung bzed dang / chos gos rku sems kyis len na nyes pa sbom por 'gyur ro zhes gsungs pa yin no/ /rang gi la gzhan gyis yongs su bzung bar 'du shes pa la yang sbom po kho na ste/ rku sems shin tu lci ba'i phyir ro/ /de ltar yang gzhung ni dge slong dag mi pham pa mi gti mug can 'di ni rang gi chos gos rnyang rnying dag gis nyes pa sbom po'i ltung ba byung ngo zhes gsungs pa yin no/ /rang gi la gzhan gyis yongs su ma bzung bar 'du shes pa la yang sbom po kho na ste/ rang gir 'du shes pa dang yongs su ma bzung bar 'du shes pa ni lhan cig ltung ba 'dra ba'i phyir ro/ /de bzhin du yongs su ma bzung ba la yongs su ma bzung bar 'du shes pa'am/ yongs su bzung ba dang bcas par 'du shes pa yang sbom po kho na'o/ /'gro ba gzhan gyir ro zhes bya ba ni rang gi rdzas la 'gro ba gzhan gyir 'du shes na zhes bya bar sbyar te/ mi'i 'gro ba las gzhan pa'i 'gro ba gang yin pa de ni 'gro ba gzhan no/ /rang gi rdzas la 'gro ba gzhan gyis yongs su bzung bar 'du shes pas brkus na/ dngos gzhi'i yan lag yod du zin kyang sbom po ste/ der 'du shes pas so zhes bya ba'i tha tshig go/ /'dir gzhung ni de 'di snyam du gal te bya'i brku'i mi'i ni ma yin no snyam na zhes bya ba la sogs pa yin no/ /'gro ba gzhan gyi la mi'i 'gro ba par 'du shes pa na yang sbom po kho na'o/ /yongs su ma bzung bar 'du shes pa na yang sbom po kho na'o/ /bdag nyid kyir bdag gir bya bar brkus na pham par 'gyur bar bstan na/ bdag po dang dbral ba'i sems 'ba' zhig gis na cir 'gyur zhe na de'i phyir/ bdag gir ma byas pa sba ba dang / chud gzan pa dang / zin pa btang ba la sogs pas bral bar byed na yang ngo zhes bya ba smras te/ bdag gir ma byas par sba ba la sogs pas bdag po dang bral bar byed na yang sbom po'o zhes bya bar sbyar ro/ /sba ba zhes bya ba ni 'dir 'dam rdzab tu gzhug pa la sogs par bstan to/ /chud gzan pa zhes bya ba ni/ bsregs pa dang bcad pa dang dral ba la sogs pa'i bdag nyid do/ /zin pa btang ba zhes bya ba ni/ ri dgas dang nya la sogs pa rlubs dang dol la sogs pas zin pa dag de'i yang ma gyur cig /bdag gir yang ma gyur cig snyam nas/ gzhan gyi rngon rnyi du la sogs pas zin pa bdag gis thug thub tu btang ba ste/ de dag thams cad sbom por 'gyur ro/ /sogs pa zhes smos pas ni rnam pa gzhan yang bsdu ba'i phyir te/ des na bcing ba dang // dral ba dang / skrod pa dang gsod pa la sogs pa gang dag sogs pa'i sgras bsdus pa 'dir rku 'am rkur bcug pa dag dang / rku sems kyi yan lag de gnyis ni med kyang gal te mngags pa dang / ma byin pa dang / ma sha ka lnga la sogs pa dang / mi'i rgyud kyis yongs su bzung ba dang / der 'du shes pa'i yan lag gzhan thams cad yod cing yan lag de dag dang ldan na mngags pas kyang sbom po'o/ /sbom po'i dbang du byas pa'i yan lag dag las ches nyung na nyes byas so/ /ji ltar gang yang rung ba'i rgyud kyis yongs su bzung ba la gang yang rung bar 'du shes pas ma sha ka lnga la sogs pa las nyung ba bral bar byas na nyes byas yin pa de bzhin du mi'i rgyud kyis yongs su bzung ba la 'gro ba gzhan gyi rgyud kyis yongs su bzung bar 'du shes pas bral bar byas pa la sbom po'i dbang du byas pa las nyung bas kyang nyes byas so/ /de bzhin du mi ma yin pa'i rgyud kyis yongs su bzung ba la mi'i rgyud kyis yongs su bzung ba'am/ mi ma yin pa'i rgyud kyis yongs su bzung bar 'du shes pas bral bar byas kyang nyes byas kho na'o/ /ji ltar gzhan du rku sems kyis ltung bar byas pa bzhin du 'dir ni dbral ba'i 'du shes kyis ltung bar byas pa nyid do/ /yongs su ma bzung ba la yongs su bzung ba dang bcas pa'am/ yongs su ma bzung bar 'du shes pa la ni ltung ba med de/ dbral ba'i bsam pa med pa'i phyir ro/ /gnod pa byas pa'i sems kyis phral ba las sbom por smras na sems gzhan gyis phral ba la ji ltar 'gyur zhe na/ de'i phyir snying rje dang ldan pa'i sems kyis na nyes byas so zhes bya ba smras te/ bzung ba btang ba la sogs pa gzhan gyi don dang bral bar byed pa la snying rje'i sems kyis byed na ni gzhan gyis yongs su bzung ba dang bcas par 'du shes na yang nyes byas so/ /pham par 'gyur ba zhes bya ba'i dngos gzhi'i sbyor ba la sbom por smras na/ pham par 'gyur ba ma byas pa kho nar gal te bar skabs su phyir log par gyur na de la sbom por mi 'gyur bar dogs pa ldog pa'i phyir/ sngar byas na phyir bcos kyang ma byas pa nyid ma yin no zhes bya ba smras te/ khyim de na bud med ni mang skyes pa ni nyung ngo zhes sngar sbran pa la sogs pas byung ba'i mtha'i sbyor ba byas na/ 'di ltar phyis bcos pa rkun po rnams phyir bzlog pa'i phyir gnyen po byas su zin kyang de lta mod kyi/ rkun po de'i rtsom pa'i dang por gyur pa gang yin pa'i rtsom pa'i dang por gyur pa de ma byas pa nyid ma yin gyi byas pa nyid yin te/ sbom po kho nar 'gyur ro zhes bya ba'i tha tshig go/ /sbyor ba la ni sbom por smras la/ sbyor ba'i sbyor ba la ni nyes byas su smras na/ da ni de gnyis kyi yul gyi dbye ba bstan pa'i phyir/ nom pa'i snga rol ni sbyor ba'i sbyor ba nyid do zhes bya ba smras te/ brku bar bya ba'i rdzas la nom pa gang yin pa de'i snga rol du rang gi gnas nas khri las ldang dang / sham thabs la 'dzin pa la sogs pa'i bya ba gang yin pa'i bya ba de ni sbyor ba'i sbyor ba nyid de/ sbyor ba sbom po'i sbyor ba ni sbyor ba'i sbyor ba'o/ /de'i dngos po ni de nyid do/ /rim pa ni 'di yin te/ bsam pa'i dbye bas bya ba dbye'o/ /bya ba'i dbye bas ltung ba dbye'o zhes bya bas grub po/ /'dir gzhung ni ji srid du nom par mi byed nyug par mi byed pa de srid du nyes byas su 'gyur ro/ /nom par byed nyug par byed cing ji srid du gnas nas gnas su sbed par mi byed pa de srid du nyes pa sbom por 'gyur ro zhes gsungs pa yin no/ /'dir yang nom pa mang po dag la yang ji srid du rku ba'i bsam pa phyir ma log ba'i bar du ni sbom po gcig kho na'o/ /phyir bzlog pa'i bsam pa byung na ni yang phyis nom par byed pa na sbom po gzhan du 'gyur ro/ /sbyor ba thams cad la nyes byas zhes smras na/ ji ltar khri las ldang bar byed pa de la sogs pa'i sbyor ba dag la nyes byas gcig kho nar 'dod pa de bzhin du thams cad la yang yin nam zhe na de'i phyir/ phri ba'i gom pa re re la tha dad pa yin no zhes bya ba smras te/ dge slong lam du zhugs pa gang zhig gzhan gyi rgyud kyis yongs su bzung ba'i rdzas gom pa phri bas brku bar 'dod nas gom pa 'bri bar byed cing khad kyis khad kyis phyir nur na gom pa phri ba de'i phri ba'i gom pa re re la sbyor ba'i sbyor ba tha dad pa yin par shes par bya'o/ /'di skad bstan te/ gang nas mi snang bar 'gro ba'i rkang pa bteg pa'i rkang pa bteg pa de ni sbyor ba nyid yin no/ /rkang pa bteg pa snga ma gzhan dag la ni sbyor ba tha dad pa nyid yin no/ /des na mi snang bar 'gro ba'i phyir rkang pa bteg pa'i snga rol gyi rkang pa bteg pa gzhan re re la nyes byas re rer 'gyur ro/ /'dir gzhung ni 'di ltar mkhan po dang slob dpon lam gyi bgrod par zhugs pa de dag gis lhan cig gnas pa dang / nye gnas de dag gi lag tu chos gos dag gtad pa na de la de dag rku sems nye bar gnas par gyur cing de dag gom pa bsri bas 'gro zhing spyang 'brang du 'gro ba na ji srid mig sngar snang bar gyur pa de srid du nyes pa sbom por 'gyur ro/ /mig sngar snang bar ma gyur pa na brkus par brjod par bya ste/ rin thang brtsi bar bya zhing zhes bya ba la sogs pa gsungs pa yin no/ /bya ba gcig yin pa'i phyir ltung ba gcig tu 'gyur ro snyam du dogs pa bsal ba'i phyir/ de'i gzhi la ni sems can so so la'o zhes bya ba smras te/ tha dad par 'gyur ro zhes bya bar sbyar ro/ /de'i gzhi la ni zhes bya ba ni/ sems can gyi gzhi la ste/ sems can gyi gzhi la brkus pa dang / mtshon gyis btab pa dang // gzas pa dang / skur pa btab pa la sogs pa byed pa na/ sems can so so la dngos gzhi dang sbyor ba'i bdag nyid kyi ltung ba tha dad do/ /dper na dge slong gis gnas nas spo ba la sogs pa'i sbyor ba gcig gis bdag po mang po'i rdzas rku zhing ma sha ka lnga u0f37la sogs pa'i gzhi yang tshang bar gyur na sems can so so las pham par 'gyur zhing sbom po zhes bya ba'i sbyor ba ni gcig kho nar 'gyur ba lta bu'o/ /gang gi tshe sems can so so las gzhi ma tshang bar gyur na ni de'i tshe sems can so so las sbom po tha dad par 'gyur te/ dper na dge slong gis mda'i sbyor ba gcig gis mi mang bo dag la 'phangs na de'i tshe sems can so so las spom po tha dad par 'gyur la/ nyes byas ni gcig kho nar 'gyur ba lta bu'o/ /nom pa dang nyug pa sbom por smras na gru la thag pas btags pa de la reg pas thag pa dang phur ba la nom pa dang / nyug pa'i tshe sbom por dogs pa bsal ba'i phyir/ phur pa las bkrol ba ni gru la reg pa ma yin no zhes bya ba smras te/ ji ltar gru phur pa las dgrol bar byed pa na/ de la reg par mi 'gyur te/ des na thag pa la reg pa na sbyor ba'i sbyor ba nyid de/ nyes byas zhes bya ba'i tha tshig go/ /'dir gzhung ni dge slong gis rku sems kyis gru phur pa la btags pa skyod par byed na nyes su 'gyur ro zhes gsungs pa yin no/ /gnas nas gnas su sbed par byed na brkus ba zhes bya'o zhes spyir sbyor ba byas pa de'i dmigs kyis bsal bar bya bar 'dod nas/ de byas nas rku ba la ni khur brkus pas na'o zhes bya ba smras te/ de byas nas zhes bya ba ni/ khur du byas nas gzod rku'o snyam pa'o/ /de ltar rku ba la ni nam khur du drags te khur brkus pa na brkus pa kho na yin par rig par bya'i/ yan lag de dag bsdus pa'i tshe na ni brkus pa ma yin no/ /'di skad bstan te/ gang gi tshe rlung gis gos dag rnam par gtor bar gyur pa'am/ rdzas gzhan gtor bar gyur pa na dge slong gis de dag khur du drags te/ rku'o snyam pa'i bsam pa des de dag sdud par byed na/ 'di ltar ma sha ka lnga bul sogs pa'i rin thang gi tshad kyis gos la sogs pa dag khur drags pa'i snga rol du gnas nas spo bar byed kyang de ltar yang pham bar mi 'gyur te/ de'i tshe na de la bsdu'o snyam pa'i blo yod kyi/ rku'o snyam pa'i blo med pa'i phyir ro/ /'dir gzhung ni 'di ltar btso blag mkhan gyi gos dag bting ba rlung gis khyer zhing dge slong gis de la sbyor bas ji srid du nom par mi byed nyug par mi byed pa de srid du nyes byas su 'gyur ro/ /nom par byed nyug par byed gos dag sdud par byed bam por bsgre bar byed cing ji srid du gnas nas gnas su sbed par mi byed pa de srid du nyes pa sbom por 'gyur ro/ /gnas nas gnas su sbed par byed na brkus par brjod par bya ste/ rin thang brtsi bar bya zhing zhes bya ba la sogs pa gsungs pa yin no/ /bsdus nas ni phung po na'o zhes bya ba smras te/ btus nas zhes bya ba ni/ btus zin nas gzod rku'o snyam pa'o/ /de ltar rku ba la ni nam btus zin te spungs pa'i phung po brkus na brkus pa kho na yin par rig par bya'i/ yan lag de dag btus pa'i tshe na ni brkus pa ma yin no/ /'di skad bstan te/ gang gi tshe dge slong me tog dang 'bras bu dag 'thog par byed cing btogs nas gzod brku'o snyam pa'i bsam pa des rin thang ma sha ka lnga la sogs pa'i tshad cig btogs na yang de'i tshe nam phung por bcer ba kho na brkus na brkus pa yin gyi/ me tog la sogs pa btogs pa de ni brkus pa ma yin te/ 'di ltar de la btogs pa'i bsam pa yod par zad kyi/ rku ba'i bsam pa med pa'i phyir ro/ /'dir gzhung ni 'di ltar dge slong khri las ldang ba nas/ ji srid du nom par mi byed nyug par mi byed pa de srid du nyes byas su 'gyur ro/ /nom par byed nyug par byed me tog gi shing la 'dzeg par byed me tog 'thog par byed thu ba 'gengs par byed cing ji srid du gnas nas gnas su sbed par mi byed pa de srid du nyes pa sbom por 'gyur ro zhes bya ba la sogs pa gsungs pa yin no/ /gal te dge slong gis chu la sogs pa dag tu shing la sogs pa dag spyings te/ rku na gang gi tshe brkus par 'gyur zhe na/ de'i phyir/ spyings pa la ni gnas kyi steng nas rdzas kyi steng bying na'o zhes bya ba smras te/ brku ba'i rdzas kyi steng gnas kyi steng nas bying na spyings pa'i tshe brkus pa yin par sbyar ro/ /chu la sogs par spyings pa la ni/ brku bar bya ba'i rdzas kyi gnas ni chu la sogs pa gang yin pa'o/ /gnas de'i steng ni ya mtha'i cha'i steng rim mo/ /steng rim de nas 'das shing nub pa ni bying ba'o/ /gang bying zhe na de'i phyir rdzas kyi steng zhes bya ba smras te/ brku bar bya ba'i rdzas de'i ya bla'i cha'i steng rim de bying na'o/ /rdzas kyi steng de gnas kyi steng bying na rdzas de brkus par rig par bya ste / rdzas kyi steng zhes bya ba'i tshig gis ni rdzas kyi dngos po de'i mtha' dag nub par bstan pa yin gyi/ thur du lta ba'i ngos 'og ma'i chu nub pa tsam gyis ni ma yin par bstan to/ /'di skad bstan te/ brku bar bya ba'i rdzas shing la sogs pa gang yin pa de gal te gnas kyi rdzas chu la sogs par thams cad ril gyis nub par gyur na de'i tshe na brkus pa zhes bya'o zhes bya ba'i tha tshig go/ /'di la kha cig 'di skad rgol te/ gal te dge slong de'i bsam pa 'di snyam du ni re zhig spying bar bya'i phyis ni dbyung bar bya'o snyam pa yin na/ de la gnas kyi steng nas rdzas kyi steng du bying na brkus pa'o zhes bya ba 'di mi rung ste/ rku ba'i bsam pa de'i tshe na med pa'i phyir ro zhe na/ rgol ba de bsal ba'i phyir phyis dbyung ngo snyam pa'i blo gros gang yin pa de ni bskur ba'i 'o zhes bya ba smras te/ spying ba der phyis dbyung ngo snyam pa'i blo gros gang yin pa'i blo gros de ni bskur ba'i blo gros yin gyi gzod rku ba'i blo gros ni ma yin no/ /gang gi phyir phyis dbyung ngo snyam na yang 'on kyang de nyid na rku sems skyes pa yin gyi/ gzhan du na ci'i phyir spyings par byed de/ de'i phyir dge slong rku sems skyes pas rdzas spying ba la sogs pa byed par 'gyur ro/ /phyis dbyung ngo snyam pa'o zhes bya ba 'byin par byed ces bya ba'i skad kyi byings 'di yang bskur ba'i don yin gyi/ rku ba'i don ma yin no/ /de ltar yang gzhung ni dge slong gis zong spying ba'i khri las ldang bar byed/ chur 'jug par byed cing ji srid du nom par mi byed nyug par mi byed pa de srid du nyes byas su 'gyur ro zhes bya ba la sogs pa gsungs pa yin no/ /gal te de'i tshe na dge slong de la rku sems med par gyur na bcom ldan 'das kyis ci'i phyir ltung ba rnam par gzhag pa mdzad/ de bas na dang po spyings par byed pa na rku sems yod pas bying ba na brkus par 'gyur ro/ /bshal bas rku ba la ni 'dir brkus pa gang yin par shes par bya zhe na/ de'i phyir/ bshal ba la sogs pa ni ngos kyi gzhi'i mtshams las ngos cig shos 'das na'o zhes bya ba smras te/ gang nas 'das na zhe na de'i phyir mtshams las zhes bya ba smras so/ /gang nas 'das na brkus pa yin pa'i mtshams de gang gi zhe na/ de'i phyir/ ngos kyi gzhi'i zhes bya ba smras so/ /gang 'das she na de'i phyir ngos cig shos zhes bya ba smras te/ de ni re zhig sbyar ba yin no/ /da ni yan lag gi don bshad par bya ste/ brku bar bya ba'i rdzas kyi shar la sogs pa'i phyogs cha gang nas bshal ba 'dren par byed pa'i phyogs de nas shing la sogs pa'i ngos gang yin pa'i ngos de'i gzhi sa la sogs pa gang yin pas sa la sogs pa'i phyogs gyong grugs dang gas pa la sogs pa gang yin pa gyong grugs dang gas pa la sogs pa de las brku bar bya ba'i rdzas shing la sogs pa bshal ba 'dren par byed pa'i tshe 'das na brkus pa yin no/ /ci cha gang yang rung ba 'das na'am zhe na ma yin te/ de'i phyir ngos cig shos zhes bya ba smras te/ shing la sogs pa mdun du gyur pa'i ngos gang nas bshal ba de las gzhan pa'i ngos phyis mar gyur pa tha ma shos ni cig shos so/ /bshal ba na ngos cig shos de ngos kyi gzhi'i mtshams gyong grugs dang gas pa la sogs pa las 'das na brkus pa yin no/ /'di skad bstan te/ gal te dge slong bshal ba'i sbyor bas rdzas rku bar byed na sa la sogs pa'i phyogs gang du rdzas de bshal bar byed pa de na gal te gyong grugs dang gas pa la sogs pa'i mtshams yod na rdzas de mtshams de las thams cad bzlas na de'i tshe brkus pa zhes bya'o/ /gal te brku bar bya ba'i rdzas kyis sa la sogs pa'i gzhi gang yin pa de khyab la de na yang gyong grugs dang gas pa la sogs pa khongs su gtogs pa dag yod na ci khyab pa'i khongs su gtogs pa'i mtshams de las ngos cig shos de 'das na yang brkus pa yin nam/ 'on te ma yin zhe na de'i phyir khyab pa'i khongs su gtogs pa'i de dang ldan pa nyid ni ma yin no zhes bya ba smras te/ brku bar bya ba'i rdzas kyi gzhi zhes bya ba'i phyogs ci tsam khyab pa'i phyogs khyab pa de'i khongs su gtogs pa'i phyogs kyi cha shas gang yin pa'i khyab pa'i khongs su gtogs pa'i phyogs kyi cha shas kyi de dang ldan pa nyid mtshams dang ldan pa gyong grugs dang gas pa la sogs pa dang ldan pa nyid yin na/ khyab pa'i khongs su gtogs pa'i phyogs kyi cha shas kyi mtshams gyong grugs dang gas pa la sogs pa gang yin pa de las ngos cig shos 'das su zin kyang de'i tshe na brkus par mi 'gyur ro/ /de ci'i phyir zhe na/ 'di ltar khyab pa'i khongs su gtogs pa'i cha shas dang 'brel pa'i mtshams las 'das pas ni/ rdzas zad par brkus par mi 'grub ste/ 'di ltar gnas nas spos pa ni rdzas kyi phyi mtha'i dum bu de tsam 'das pa yin pa'i phyir ro/ /rdzas gcig tu 'brel pa la dum bur rkur yang mi rung ste/ de bas na brku bar bya ba'i rdzas shing la sogs pa des khyab pa'i phyogs gang yin pa de na gyong grugs dang gas pa la sogs pa'i mtshams yod cing de las shing la sogs pa'i phyed phyed 'das su zin kyang 'dir 'das pa'i brkus par mi 'gyur ro/ /de bas na khyab pa'i khongs su gtogs pa'i phyogs las phyi rol du gyur pa'i gyong grugs dang gas pa la sogs pa ni mtshams nyid du dgongs pa yin gyi/ de'i khongs su gtogs pa dag ni ma yin no zhes bya ba'i tha tshig go/ /de ltar yang dge slong gis yo byad lci ba shin tu thag ring por bshal te brkus kyang mtha'i ltung bar mi 'gyur bar mchis sam yod de/ 'di ltar dge slong gis yo byad lci ba'i ngos gcig kho na nas bzung ste shin tu thag ring por bshal kyang ngos cig shos gnas de nas ma 'das na nyes pa sbom por 'gyur ro zhes gsungs so/ /mdo snga mar mtshams las zhes smras na de'i mtshan nyid ma bstan pas de'i phyir/ de'i mtshan nyid ni gyong grugs dang gas pa dang bris pa dang kha dog gzhan dang bar mtshams dang bar chad dag go zhes bya ba smras te/ mtshams ni rnam pa gnyis te/ gsal bas gcad pa'i mtshan nyid ni 'di lta ste/ brkos pa dang rtsig pa dang chu klung dag gis bcad pa 'jig rten la grags pa dag go/ /cig shos ni rab tu mi mngon pas bcad pa 'jig rten la yang ngo bo nyid du ma grags pa ste/ de'i mtshan nyid bshad par bya'o/ /mtshams de'i mtshan nyid dam ngo bo nyid ni de'i mtshan nyid de gyong grugs dang gas pa la sogs pa'o/ /mtshams de'i mtshan nyid ni/ bcom ldan 'das kyis kyang gsungs te/ gal te sa gzhi de gyang gyong du gyur pa'am/ ser ga'am/ yi ger bris pa'am/ tshon sna tshogs bkram pa'am/ mtshams yod na phyogs tha dad pa dag tu brjod par bya'o zhes gsungs so/ /de la gyong grugs zhes bya ba ni gyang gyong zhes gsungs pas bsdus te/ sa gzhi 'dra bar gyong zhing grugs pa nyid ni gyong grugs zhes bya'o/ /gas pa zhes bya ba ni/ ser ga zhes gsungs pas bsdus te/ phyogs gcig tu ral ba ni gas pa zhes bya'o/ /bris pa zhes bya bas ni yi ger bris pa zhes gsungs pa bsdus te/ yig 'bru bris pa ni bris pa zhes bya'o/ /kha dog gzhan zhes bya bas ni tshon sna tshogs bkra ba zhes gsungs pa bsdus te/ tshon kha dog gcig las kha dog gzhan tha dad par gyur pa ni kha dog gzhan te/ de ni mtshams gzhan yin no/ /bar mtshams zhes bya bas ni mtshams zhes bya ba bsdus te/ des ni sgo glegs dang seg dang re lde la sogs pa bar mtshams yod pa dag bsdus so/ /bar chad ces bya bas ni zhing la sogs pa'i rnang sgal la sogs pa dag bsdus te/ 'di ltar rnang sgal gyi ngos gnyis na khongs su gtogs pa yin yang 'di ltar ngos de gnyis na gnas pa'i sa gzhi'i cha gnyis kyi bar du bcad pa nyid kyis dbus na gnas pa yin pa'i phyir mtshams su 'gyur ro/ /gal te brkos pa de kha da chad du gang ba ni phyogs gcig tu brjod par bya'o/ /gal te ma gang bar gyur te der dbyig gus bar du bcad dam/ seg gis bar du bcad dam/ re ldes bar du bcad pa gang yin pa de dag ni phyogs so sor brjod par bya ste/ de dag thams cad ni bar chad ces bya bas bsdus pa yin no/ /srog chags dag gi lus gcig pa'i phyir bar chad gcig yin par dogs pa bsal ba'i phyir/ srog chags la ni rtsib ma la sogs pa tha dad par brtag tu rung ba rnams bar chad nyid yin no zhes bya ba smras te/ srog chags la ni rtsib ma la sogs pa tha dad par so sor brtag tu rung bas de dag bar chad so sor tha dad par gnas pa nyid yin par rig par bya'o/ /sogs pa zhes bya ba ni/ so dang snas bar du bcad pa la sogs pa dag bsdus te/ des na rtsib ma zhig gcig gi phyogs nas rtsib ma tha dad bar brtag tu rung ba gzhan gyi bar du spos na brkus pa nyid du brjod par bya'o/ /sa la sogs pa rtswa la sogs pa dag gis g.yogs pa nyid la yang sa la sogs pa de gzhi'i dngos yin pa'i phyir gnas nyid yin gyi/ g.yogs ma ni ma yin no snyam du dogs pa bsal ba'i phyir gding ba bting ba nyid gnas nyid yin no zhes bya ba smras te/ sa la sogs pa'i gzhir rtswa la sogs pa'i gding ba bting ba nyid yod na/ rtswa la sogs pa'i gding ba bting ba de nyid de na gnas pa'i rdzas kyi phyir gnas nyid do/ /sa la sogs pa ni ma yin te/ de ni des bar du bcad pa'i phyir ro/ /skye ba ni gzhag pa dang 'dra'o zhes bya ba ni/ rtswa dang gel pa dang / rtsi dang nags la sogs ba byung ba'i skye ba ni dper na rdzas gzhag pa bskyod pa tsam kho nas brkus par brjod par bya ba dang 'dra bar skye ba yang gnas nas bskyod pa kho nas brkus pa zhes bya'i/ rtswa ba nas bton pa tsam gyis ni ma yin te/ 'di ltar ril gyis khyer na'o/ /'dir gzhung ni dge slong gis me tog gi shing ljon pa phyung ste/ /rku na ji srid du nom par mi byed pa'i bar du ni nyes byas su 'gyur ro/ /nom pa nas gnas nas spos pa'i bar gyis ni brkus pa zhes bya ste/ me tog gi shing gi rin thang brtsi bar bya'o zhes gsungs pa yin no/ /lag pa la sogs pa yan lag la gdu bu rgyan can la sogs pa bskon pa ni 'khrul pa'i phyir ji ltar brkus par rnam par gzhag par bya zhe na de'i phyir/ bskon pa ni phud na'o zhes bya ba smras te/ lag pa la sogs pa la bskon pa'i rdzas ni phud na brkus pa yin no/ /lag pa la sogs pa yan lag la bskon pa btags pa dang gyon zhing bgos pa ni yan lag de las phud pa phyung ba dang bkrol ba dang phral ba na de brkus pa yin par rig par bya'o/ /'dir gzhung ni de dag rgyan sna tshogs dag gis brgyan par gyur pa dge slong gis de'i sbyor bas khri las ldang ba nas gnas nas gnas gzhan du spos pa'i bar du byed na brkus zhes bya'o zhes bya ba la sogs ba gsungs pa yin no/ /'dir gnas nas gnas gzhan du spos pa zhes bya ba ni phud pa yin par shes par bya'i/ gzhan du na lag pa la sogs pa de nyid du rgyan bskon pa dpung mgo'i bar du 'khrul zhing yang phyir mkhrig ma'i bar du bskul du rung bar zad kyi dbud par mi nus pa dag ji ltar gnas nas sbos pa tsam gyis brkus par 'gyur te/ de bas na lag pa la sogs pa las phud pa na brkus par 'gyur ro/ /sho gam rang gi gnas na 'dug pa'i phyir de ji ltar brkus par 'gyur zhe na de'i phyir/ sho gam ni sa las 'das na'o zhes bya ba smras te/ brkus pa zhes bya bar sbyar ro/ /sho gam gyi gnas ni 'dir sa zhes bya ba'i sgras brjod de/ de las 'das na'o zhes bya ba ni/ sho gam gyis de las 'das pa ni de las 'das pa'o/ /sho gam gcod pa'i gnas ji tsam du zhugs na sho gam gzhal dgos pa nyid yin pa de ni sho gam gyi gnas yin par [(]shas [,]shes [)]par bya ste/ de nyid 'dir sho gam gyis zhes bya'o/ /de ltar na 'dir tshig gi don 'di 'byung ste/ sho gam gyi rdzas gzhal dgos pa'i sho gam gyi gnas su phyin la sho gam ma phul bar sho gam gyi gnas las 'das na sho gam brkus pa yin te/ 'di ltar sho gam gzhal dgos pa las 'das na yang der sho gam gyi tshad kho na brkus pa yin gyi gzhan ni ma yin no/ /sa de las 'das na zhes bya ba'i tshig gis ni 'dir gzhan nas gzhan du brgyud ba thams cad kyang bsdus bar rig par bya'o/ /'di ltar bzhon pa glang po che dang rta la sogs pa dang rang gi lus kyi rkang lag la sogs pa dang / mda' la sogs pa la btags te bskur ba'i thabs de dag gis sho gam gzhal dgos pa'i sa las 'das na yang sho gam gyi gnas de las 'das pa kho na yin no/ /'di ltar de sho gam gyi sar gtogs pa yin na gal te sho gam gyi gnas su sho gam gzhal dgos par phyin nas yang phyir log gam skabs su bzur te 'gro ba de la ni yul chos gang yin pa'i khrims dang sbyar bar bya ste/ 'di ltar yul de na gal te phyir log kyang gzhal dgos pa'i khrims su byas pa yod na ni 'das pa kho nar 'gyur ro/ /ji ste phyir log na gzhal mi dgos pa'i khrims su byas pa yod na ni 'das par mi 'gyur ro/ /mi ni 'gro ba dang 'ong ba la sogs pa dang ldan pa yin na de ji ltar brkus par 'gyur zhe na/ de'i phyir mi la gal te brdas na ni de grub na'o zhes bya ba smras te/ mi rku ba ni rnam pa mang du snang ste/ mi 'dod bzhin du bkri ba dang / gzhan pa dag gis rku ba dang / de bzhin du bsdigs pa la sogs pa dag gis rku ba dag ste/ de dag ni mdo 'dir ma bsams so/ /'dir ni gal te brdas ni zhes bya ba bsams te/ gal te brdas mi rku bar byed na brda de grub na brkus pa yin no/ /'di skad bstan te/ gal te brdas rku bar byed na gang gi tshe brda de grub pa de'i tshe na mi de brkus bar brjod par bya'o/ /'di ltar gzhung las mi rku ba rnam pa gsum po yul phyogs dang mtshan ma dang brdas rku ba gsum gsungs pa yang 'dir brda zhes smos pas gnyis kyang bsdus par rig par bya ste/ 'dir mi rku ba ni rang dgar phyi bzhin 'ong ba dang / khas len pa yin par dgongs pas de lta bus rku ba thams cad ni brda sngon du btang ba yin no/ /de la yul phyogs zhes bya ba ni 'dir tshogs la sogs pa'i yul yin par gsungs so/ /mtshan ma ni brtags te skra dang kha spu bregs nas ring po ma lon pa zhes bya ba la sogs pa'o/ /brda ni snga dro la sogs pa'o/ /mdo las ni brda zhes bya ba 'dan tshab sbyar ba yin par 'dod de/ gang gi tshe khyod kyis kho bos 'di dang 'di lta bur mthong ba de'i tshe khyod kho bo'i gan du shog shig ces bya ba lta bu ste/ gang gi tshe brda de grub pa de'i tshe mi de brkus par rig par bya'o/ /gal te gsang sngags kyis drang ba la sogs pa'i thabs gzhan dag gis mi rku par byed na ni gang gi tshe snang bar gyur pa de'i tshe na brkus pa yin par rig bar bya'o/ /gal te bya rku na de la ji ltar brkus par rnam par gzhag ce na/ de'i phyir/ gal te de ltar na bya spar ba na zhes bya ba smras te/ gal te de ltar na zhes bya ba ni/ gal te bya spar te rku bar byed na'o/ /de'i tshe na bya spar ba na brkus pa kho na yin no/ /'dir gzhung ni dge slong gis bya spar te rku bar byed na bya spar ba na bya'i rin thang brtsi bar bya'o zhes gsungs pa yin no/ /spar nas rku bar byed ces bya ba ni 'dir 'phur du bcug nas rku'o zhes bya ba'i tha tshig go/ /spar ba thams cad ni mtshams gzhan du 'gro ba ste/ 'phur ba ni nam mkha' la 'gro ba'i rang bzhin yin pa'i phyir ro/ /'dir bya smos pa ni dpe tsam ste/ rdzas thams cad kyang nam mkha'i mtshams gzhan du song na brkus pa yin te/ nam mkha' ni mtshams gzhan yin pa'i phyir ro/ /btags pa ji ltar brkus par rnam par gzhag ce na de'i phyir/ dud 'gro btags pa ni bkrol ba na'o zhes bya ba smras te/ dud 'gro btags pa rku ba ni bkrol ba na brkus pa yin no/ /'dis ni dge slong gis ri dgas rlubs su chud pa phyung na ri dgas kyi rin thang brtsi bar bya'o/ /dge slong gis nya dol la thogs pa phyung na nya'i rin thang brtsi bar bya'o zhes gsungs pa dag bsdus pa yin no/ /dud 'gro brtod pas sam khyu las bkar bas rku bar 'dod pa la ji ltar brkus par rnam par gzhag ce na/ de'i phyir/ brtod pa dang khyu las bkar ba ni mi snang bar gyur pa nyid na'o zhes bya ba smras te/ brtod pa zhes bya ba ni dud 'gro khyu'i nang na 'gro ba phur pa la sogs pa 'ga' zhig la btags pa'o/ /khyu las bkar ba zhes bya ba ni/ khyu'i gnas nas logs shig tu phye ste 'das pa'o/ /gal te dud 'gro brtod pas sam khyu las bkar bas rku bar 'dod na de la ji ltar brkus par 'gyur zhe na/ mi snang bar gyur pa nyid na brkus pa yin gyi gnas nas bskyod pa tsam gyis ni ma yin no/ /gal te bdag po dang rdzi bo phyi bzhin 'brang bar gyur na ni/ de'i tshe bdag po dang rdzi bo las mi snang bar gyur pa nyid na'o/ /gal te bdag po dang rdzi bo gshed na 'dug na ni de'i tshe de las mi snang bar gyur pa nyid na'o/ /gal te bdag po dang rdzi bo med na ni de'i tshe khyu las mi snang bar gyur pa nyid na brkus pa yin te/ de ni dud 'gro rang gi ngang gis 'gro ba brkus pa yin no/ /gang mthus bkri dgos sam sgra phyung ste brda dgos pa zhig na ni de mi snang bar gyur pa nyid du phyin kyang brkus pa ma yin te/ ji srid du bag tsha ba med pa'i yul du ma phyin tam dbang du byas par ma gyur gyi bar du brkus pa ma yin no/ /dud 'gro smos pa ni dpe tsam ste/ 'dir mi la sogs pa rnam pa de lta bu dag la yang de kho na nyid du bsgrub par bya'o/ /'dir gzhung ni/ mig lam du snang bar ma gyur na brkus zhes bya'o zhes bya ba gsungs pa yin no/ /gsang sngags dag gis gter la sogs pa la 'dren par byed na gang gi tshe brkus par 'gyur zhe na de'i phyir/ gsang sngags dag gis 'dren pa ni snang ba na'o zhes bya ba smras te/ gsang sngags dag gis gter la sogs pa 'dren pa na/ gter la sogs pa snang ba na brkus pa yin no/ /'di skad bsten te/ gal te gter la sogs pa rang gi gnas na gnas su zin kyang de'i kha bye ba la sogs pa snang bar gyur na de'i tshe brkus pa zhes bya'o/ /ji ste shin tu thag ring po nas drangs te/ rkang pa'i drung du 'ongs kyang ji srid du snang bar ma gyur na de yang brkus par mi 'gyur te/ grub pa'i blo med pa'i phyir ro/ /gal te rkun ma mang po zhig yod pa las gcig kho na zhig gis gal te mthong na yang de'i tshe thams cad kyis mthong ba kho na yin no/ /'di ltar gter la bstan pa kho na bzhin du rnam pa de lta bu rku ba gzhan dag la yang de kho na bzhin du bsgrub par bya'o/ /gom pa 'bri ba la sogs pas rku bar 'dod pa la gang gi tshe brkus par 'gyur zhe na de'i phyir/ phyi bzhin 'brang ba dang / sgrub par byed pa gnyis nur ba dang / 'byangs pa dang / 'byam pa dang / 'jug pa dang / 'dzegs pa dag gis snga ma ltar yin gyi de gnyis kyis blangs pa ni ma yin no zhes bya ba smras te/ snga ma ltar yin gyi zhes bya ba la snga ma zhes bya ba ni/ mdo snga ma las gsang sngags dag gis 'dren pa ni snang ba na'o zhes smos pa'i mdo de'i sngon du brtod pa dang / khyu las bkar ba gnyis ni mi snang bar gyur pa nyid na'o zhes smos pa'i mdo de sngar bstan pa'i phyir snga ma zhes bya ste/ snga ma de las mi snang bar gyur pa nyid na zhes smos pa de ltar mi snang ba nyid du gyur na 'dir yang brkus ba yin no zhes bya bar sbyar ro/ /de ltar na 'dir tshig gi don 'di 'byung ste/ mi snang bar gyur pa nyid na brkus pa yin no/ /gang dag mi snang bar gyur pa nyid na zhe na de'i phyir/ phyi bzhin 'brang ba dang / sgrub par byed pa gnyis zhes bya ba smras te/ phyi bzhin 'gro ba dang chos gos la sogs pa 'bul bar byed pa de gnyis so/ /thabs gang dag gis de gnyis mi snang bar gyur pa nyid na brkus pa yin zhe na de'i phyir/ nur ba dang 'byangs pa la sogs pas yin gyi de gnyis kyis blangs pa ni ma yin no zhes bya ba smras te/ phyi bzhin 'brang ba dang / sgrub par byed pa de gnyis blangs ba'i rdzas de mi snang bar gyur pa nyid na ni brkus pa ma yin te/ 'di ltar de'i tshe na de gnyis la rdzas de brkus pa'i bsam pa yod du zin kyang de'i tshe na gnas nas spo ba'i mtshams las ma 'das pa'i phyir ro/ /'di ltar dang po'i gom pa phyir bsnur ba'i dus kho na na rdzas mchan na 'dug pa de brkus par gyur te/ rdzas de mi snang ba nyid du gyur pa'i phyir ro zhe na/ de ltar mi bzhed de de bas na phyi bzhin 'brang ba dang / sgrub par byed pa gnyis mi snang bar gyur pa nyid brkus pa yin gyi/ de gnyis kyis blangs pa'i rdzas mi snang bar gyur pa nyid na ni brkus pa ma yin no/ /de gnyis mi snang ba nyid du gyur pa'i thabs kyi tshig de dag gi don bshad par bya ste/ nur ba zhes bya ba ni gom pa phyi phyir 'bri zhing phyi nur du 'gro ba'o/ /'byangs pa zhes bya ba ni phyir lus pa ste/ rdzas kyi bdag po'i mdun nas phyir nur te song ba'o/ /gsang sngags dang sman dag gis de nyid du mi snang ba'am/ gzugs gzhan du bsgyur ba la sogs pa yang 'dis bsdus par shes par bya'o/ /'byam pa zhes bya ba ni gnas btang ba ste/ 'di lta ste gshong nas thang la phyung ba dang / thang las gshong du 'bab pa dang / mngon par skabs yod pa nas thibs por 'jug pa dang / thibs po nas mngon par skabs yod par 'gro ba dang / gnas khang nas khyams su dang / khyams nas gnas khang du dang / yang tog nas yang tog gzhan du 'dzeg pa dang / yang tog nas yang tog gzhan du 'bab pa dang / khyams nas sgo khang du 'jug pa dang / sgo khang nas dang ra khyad khyud du 'gro ba la sogs pa ste/ de dag thams cad ni 'byam pa'i sgras bsdus pa yin no/ /'jug pa zhes bya ba ni gnas khang du'o/ /'dzeg pa zhes bya ba ni yang tog gzhan du 'dzeg pa'o/ /'di skad bstan te/ nur ba la sogs pa de dag gis phyi bzhin 'brang ba dang sgrub par byed pa gnyis mi snang bar gyur pa nyid na brkus pa yin par rig par bya'i/ de gnyis kyis blangs pa'i rdzas mi snang ba nyid du gyur na ni brkus pa ma yin no/ /'dir gzhung ni 'di ltar mkhan po dang slob dpon lam gyis bgrod par zhugs pa de dag gis lhan cig gnas pa dang / nye gnas dag gi lag tu chos gos dag gtad pa na de la de dag rku sems nye bar gnas par gyur cing de dag gom pa bsri bas 'gro zhing spyang 'brang du 'gro na gom pa re re la nyes byas su 'gyur ro/ /ji srid du mig sngar snang bar gyur pa de srid du nyes pa sbom por 'gyur ro/ /mig sngar snang bar ma gyur na brkus par brjod par bya ste/ rin thang brtsi bar bya'o/ /'di ltar lhan cig gnas pa dang / nye gnas dag gis rku sems kyis slob dpon dang mkhan po dag gi chos gos dag rku bar byed cing de dag gis de dag khyer te/ gshong nas thang la 'byung ba ni nyen kor du khyer pa yin yang de la de dag gis rku sems nye bar gnas so zhes bya ba la sogs pa gsungs pa yin no/ /gnas khang la sogs pa nas khyams la sogs par 'gro ba dang / de nas der 'gro ba dang / der 'jug pa na ji ltar brkus par 'gyur zhe na/ der rkun po mi snang bar gyur pa kho na na mthar thug par rig par bya ste/ de'i phyir nyes pa med do/ /gru ji ltar brkus par rnam par gzhag ce na de'i phyir/ gru ni skam sa dang yur po che dang chu bdal ba dag gis so zhes bya ba smras te/ skam sa dang yur po che dang chu bdal ba ni/ skam sa dang yur po che dang chu bdal ba dag go/ /de bas na de dag gis gru de rku ba'i bsam pas mi snang bar gyur pa nyid na brkus pa yin no/ de ni dpe ste shing dang snod la sogs pa thams cad la yang cho ga de bzhin no/ /chu klung chen po dag tu ji ltar brkus bar 'gyur zhe na de'i phyir/ rgyun phyogs kyis so zhes bya ba smras te/ rgyun 'bab pa'i phyogs dang mthun pa ni rgyun phyogs so/ /gru ni rnam pa gang gis rku yang rku sems kyis mi snang ba nyid du gyur pa na brkus pa kho na yin gyi/ gnas nas bskyod pa tsam gyis ni ma yin no/ /thad kar ni ji ltar brkus par 'gyur zhe na/ de'i phyir/ thad kar yang pha rol gyi 'gram du mi snang bar gyur na'o zhes bya ba smras te/ 'gram gang nas gru rku bar byed pa de nas pha rol gyi ngogs kyi 'gram ste/ thad kar rku ba'i bsam pas pha rol gyi 'gram der mi snang bar gyur na brkus pa yin no/ /ji ste pha rol gyi 'gram yang snang ba nyid yin na ji ltar brkus pa yin zhe na/ de'i phyir/ de las gzhan pa nyid la ni der phyin na'o zhes bya ba smras te/ de las gzhan pa nyid la ni zhes bya ba ni/ sngar mi snang bar gyur pa zhes smos pa las gzhan pa nyid de/ snang ba nyid la'o/ /der phyin nas zhes bya ba ni/ pha rol gyi 'gram na snang ba de'i 'gram pha rol der phyin na brkus pa yin no zhes bya ba'i tha tshig go/ /rgyun las bzlog ba'i phyogs la ji ltar brkus pa yin zhe na/ de'i phyir/ rgyun las bzlog pa la ni gru tshugs las 'das na'o zhes bya ba smras te/ rgyun las bzlog ste rku ba'i bsam pas ni gru tshugs las 'das na brkus pa yin no/ /phyogs gang nas gru phur ba la brtod cing 'dug pa na de'i tshe gru pas gru de pha rol du brku bar 'dod nas de nas khrid de ji srid du bsgul ba'i phyir chu la btang pa'i gnas su phyin pa de srid du khrid par byed pa'i phyogs de ni gru tshugs zhes bya ste/ de las 'das na brkus pa yin no/ /gzhan gyi zhing la sogs pa dag la chu gtong ngam/ 'gog pa de la ji ltar brkus par rig par bya zhe na/ de'i phyir/ gzhan gyi las kyi mtha' dag la chu gtong ngam 'gog pa la rang gi las kyi mtha' grub pa skyed ma gtogs pa de'i ched du der 'dun pas gzhan du gyur na'o zhes bya ba smras te/ grub pa na brkus pa yin no/ /gang grub pa zhe na de'i phyir/ rang gi las kyi mtha'o zhes bya ba smras so/ /gang gi zhe na de'i phyir/ chu gtong ngam 'gog pa zhes bya ba smos so/ /gang du zhe na/ de'i phyir gzhan gyi las kyi mtha' dag la zhes bya ba smras so/ /ci'i ched du zhe na de'i phyir de'i ched du zhes bya ba smras te/ rang gi las kyi mtha' grub pa'i ched du'o/ /grub pa khyad par ji lta bu can zhig ce na de'i phyir/ skyed ma gtogs pa zhes bya ba smras te/ skyed bkol ba ni skyed ma gtogs pa ste/ zhing gi yon tan la sogs pas rang gi las kyi mtha' grub pa gang yin pa de 'dir brtsi bar mi bya'o/ 'di ltar chu btang ba'am bgags pa las gyur pa'i grub pa gang yin pa 'dir brtsi bar bya'o/ /gal te gzhan gyi las kyi mtha' yang grub par gyur na de'i tshe der ci zhig brkus par 'gyur zhe na de'i phyir/ gzhan du gyur pa na'o zhes bya ba smras te/ grub pa las gzhan du gyur pa ni grub pa'i dgrar gyur pa ste/ phung bar gyur pa'o/ /bsam pa gang gis chu btang ba'am bgags pas rang gi las kyi mtha' grub pa dang / gzhan gyi las kyi mtha' phung bar byas na brkus pa yin zhe na de'i phyir/ der 'dun pas zhes bya ba smras te/ bdag gi ni grub par bya'o/ /gzhan gyi ni phung bar bya'o snyam pa'i bsam pas so/ /'di skad bstan te/ gal te dge slong gis rang gi las kyi mtha' grub par bya ba'i ched du gzhan gyi las kyi mtha' dag tu chu dkon pa'i dus su chu 'gog pa'am/ chu mod pa'i dus su chu gtong bar byed pa rang gi las kyi mtha' grub pa'i bsam pa dang / gzhan gyi las kyi mtha' phung par byed pa'i bsam pas byed la/ rgyu des rang gi las kyi mtha' grub cing gzhan gyi las kyi mtha' phung bar gyur na de'i tshe zhing gi yon tan las gyur ba'i skyed grub pa ma gtogs pa chu btang ba'am/ bgags pa las gyur pa'i rang gi las kyi mtha' grub pa gang yin pa dang / gzhan gyi las kyi mtha' phung bar byed pa gang yin pa de grub pa nyid brkus pa yin no// //bam po bcu pa/ gal te dge slong gis shas thob par bya ba'i phyir rkun po rnams la lam rgyus go bar byed na de'i tshe ji ltar brkus par rnam par gzhag ce na/ de'i phyir/ rkun po rnams la de'i ched du lam rgyus go bar byed pa la ni shas thob na'o zhes bya ba smras te/ rkun po rnams la zhes bya ba ni/ chom rkun pa rnams la'o/ /de'i ched du zhes bya ba ni/ shas thob par bya ba'i ched du'o/ /lam rgyus go bar byed pa la ni zhes bya ba la/ lam rgyus ni lam gyi rgyus te/ lam che ge mo nas der 'gro bar bya'o/ /de ltar 'jug par bya'o zhes bya ba la sogs pa'o/ /de go bar byed pa ni smra bar byed pa ste/ de ltar lam rgyus go bar byed pa la'o/ /shas thob na'o zhes bya ba ni/ rkun po rnams rkun shas thob na brkus pa yin pa'o/ /'di skad bstan te/ dge slong gis rkun shas thob par bya ba'i phyir rkun po rnams la grong la sogs par 'gro ba dang 'jug pa dang / 'byung ba la sogs pa'i rgyus go bar byed na de'i shas thob pa de'i tshe na ltung ba rnam par gzhag par bya'o zhes bya ba'i tha tshig go/ /gal te dge slong gis bskor bas sa gzhi la sogs pa rku bar byed na gang gi tshe brkus par rig par bya zhe na de'i phyir/ sa gzhi dang khang khyim dag yongs su bskor bas ni mtshams 'byor na'o zhes bya ba smras te/ rib ma dang rtsig pa la sogs pas yongs su bskor ba'i sa gzhi la sogs pa rku ba'i bsam pas yongs su bskor ba la ni rib ma la sogs pa'i pha thog tshu thog gi mtshams gang yin pa 'byor pa na brkus par rig par bya'o/ /shags kyis gzhan gyi nor 'phrog pa las brkus pa gang yin zhe na de'i phyir/ shags kyis gal te bla'i grwar ni rgyal na'o zhes bya ba smras te/ gal te shags kyis gzhan gyi rdzas dbrog par 'dod la shags de yang bla'i grwar bkye na ni rgyal ba na brkus pa yin no/ /gal te 'og gzur na pha rol po'i sbyor ba nyid btang na'o zhes bya ba smras te/ ji ste shags de'i 'og gzur bkye na ni shags zla pham par bya ba pha rol po'i sbyor ba nyid btang ba spro ba btang zhing yus btang ba na brkus pa yin no/ /'di skad bstan te/ gal te 'og gzur yul mi'i nang du shags 'gyed na gang gi tshe pha rol po nor bdag gis shags kyi sbyor ba thams cad kyis thams cad du btang ba de'i tshe na de brkus pa yin gyi/ rgyal bas ni brkus par mi 'gyur ro/ /'o na de lta na rgyal na cir 'gyur zhe na de'i phyir/ de ni sbyor ba nyid do zhes bya ba smras te/ 'og gzur shags ba kye ba'i rgyal ba pha rol pos sbyor ba nyid ma btang ba'i rgyal ba de ni pham par 'gyur ba'i dngos gzhi'i sbyor ba nyid de sbom por 'gyur ro/ /pha rol pos sbyor ba nyid btang na ni brkus pa nyid du 'gyur ro/ /'di skad bstan te/ gang la rku ba'i dngos po tshang ba de la ni 'og gzur shags rgyal na sbyor ba nyid de sbom por 'gyur ro/ /gang la rku ba'i dngos po ma tshang ba de la ni nyes byas su 'gyur ro/ /sho gam gyi sa las 'das na zhes bya ba smos pa der sho gam gyi brkus pa nyid ni bstan na/ de dang 'brel pa'i spros pa bsdu ba ni ma byas pas de'i phyir da ni sho gam gzhal dgos pa dang 'brel pa byung ba dang bcas pa ltung bar 'gyur ba'i tshig dang / ltung bar mi 'gyur ba'i tshig gang dag rnam par 'byed pa las gsungs pa de dag bsdu bar bya ste/ rku sems med pa la sho gam du gtogs pa'i nyes pa 'byung bar dogs par mi bya'o zhes bya ba la/ dge slong gang la rku sems med cing ma skyes pa de ni rku sems med pa ste/ dge slong gang rku sems med pa de la ni sho gam du gtogs pa sho gam gyi yul dang tha snyad kyi nyes pa rku ba zhes bya ba 'byung bar dogs par mi bya ste/ dogs pa med par bya'o/ /'di skad bstan te/ gal te dge slong sho gam mi gcad par gnang ba med la rku sems med pas bdag gi rdzas sho gam gzhal dgos pa mi gzhan gyi lag nas sho gam gyi gnas nas 'da' bar byed pa dang / dge slong sho gam mi gcad par gnang la rku sems med pas/ gal te gzhan gyi rdzas sho gam gzhal dgos pa bdag gis sho gam gyi gnas nas 'da' bar byed pa la ni de'i tshe na ma byin par len par gtogs pa'i nyes pa 'byung ba med de/ de ltar ni rnam par 'byed pa las 'di skad 'byung ste/ dge slong sho gam mi gcad par gnang ba ma thob pa dag gis bdag gi snod sho gam gzhal dgos pa sho gam gyi gnas nas ba zla ba'i phyir tshong pa'i lag tu gtad pa de la ltung bar mi 'gyur ba'i tshig gang yin pa dge slong dag dge slong de dag la ni ltung bar mi 'gyur ro zhes bya ba la sogs pa gsungs pa yin no/ /ltung bar mi 'gyur ba'i tshig ni 'di ltar shes te/ gal te dge slong rnams kyi bsam pa 'di snyam du tshong pa 'di dag ni sho gam sbyin pa la sogs pas sho gam pa rnams kyi sems len par byed pa yin no snyam na de lta na dge slong de la rku sems med pa'i rigs kyi gzhan du ni ma yin no/ /gang du dge slong sho gam mi gcad par gnang ba thob pas kyang gzhan gyi rdzas sho gam gyi gnas nas bzlas na ltung bar mi 'gyur ba'i tshig gang yin pa yang 'byung ste/ de la yang gal te dge slong des rang gi rdzas sho gam mi gcad par gnang gi/ gzhan gyi ni ma yin par bye brag mi shes na/ de'i tshe ltung bar mi 'gyur ba'i tshig tu rung gi/ gang gi tshe bye brag shes pa de'i tshe na ni nyes par 'gyur ba kho na yin no/ /de dag thams cad ni rku sems med pa zhes bya ba des bsdus pa yin par rig par bya ste/ mdo 'dis ni rnam par 'byed pa las ltung bar mi 'gyur ba'i tshig snang ba gang yin pa de'i dgongs pa rnam par bshad pa yin no/ /da ni sho gam gyi gnas nas sho gam gzhal dgos pa'i snod 'da' bar bya ba la gang gis sho gam gzhal bar bya ba de bstan pa'i phyir/ gang gis blangs ba nyid kyi snod las des sbyin par bya ba nyid yin no zhes bya ba smras te/ sus blangs pa ni gang gis blangs pa ste/ tshong ba gang gis dge slong las sho gam gzhal dgos pa'i snod sho gam gyi gnas nas bzla ba'i phyir blangs pa gang yin pa de ni gang gis blangs pa zhes bya'o/ /gang gis blangs pa'i dngos po ni gang gis blangs pa nyid de/ mnos pa nyid do/ /gang zhig ce na/ snod de nyid las len pa des sho gam sbyin par bya ba nyid yin no/ /'di skad bstan te/ tshong ba la sogs pa gang gis dge slong las sho gam gzhal dgos pa'i snod blangs pa de nyid kyis de la sho gam sbyin par bya zhing / dge slong gis kyang bsam pa 'di lta bus gzhan gyi lag tu snod gtad par bya ste/ 'dis rang gi sho gam sbyin par 'gyur ro snyam pas gtad par bya'o/ /de ltar na rnam par 'byed pa las ltung bar mi 'gyur ba'i tshig gnyis grags pa de rigs pa kho na yin te/ gcig ni dge slong gis tshong pa'i lag nas snod sho gam gyi gnas nas bzlas pa gang yin pa'o/ /gnyis pa ni ches rgan bas gsar bu'i lag nas bzlas pa gang yin no/ /mdo snga mas bcom ldan 'das kyis dge slong gi sho gam mi gcad par gnang ba thob pa dag gis tshong pa dbang ba'i rdzas sho gam gnas nas bzlas pa la ltung bar mi 'gyur bar gsungs pa gang yin pa de'i dgongs pa brjod nas/ da ni rnam par gzhag pa bstan pa'i phyir/ gnang ba la gzhan gyis bzlas na ma brkus pa ma yin no zhes bya ba smras te/ gnang ba la zhes bya ba ni/ sho gam mi gcad par gnang ba thob pa ste/ dbang po gang yang rung bas khyod kyis sho gam gzhal mi dgos so zhes gnang ngo / /gnang ba sho gam mi gcad par gnang ba thob pa'i gang zag gi yul du gyur pa de la tshong pa la sogs pa gzhan gyi rdzas sho gam gyi gnas nas bzlas na ma brkus pa ma yin te/ brkus pa kho na yin no/ /de ltar ni dge slong gis sar phyin pa'i sho gam bzla bar mi bya'o/ /dge slong gis sar phyin pa'i sho gam 'da' par byed na 'gal tshabs can du 'gyur ro zhes gsungs pa yin te/ de mdo 'dir bsdus pa yin no/ /'dir 'gal tshabs can zhes gsungs pa'i tshig kyang gzhi ji lta ba las byung ba yin gyi/ nyes byas nyid ni ma yin no/ /ma gnang bas gzhan gyis bzla bar mi bya'o zhes bya ba ni/ dge slong sho gam mi gcod par ma gnang bas tshong pa la sogs pa gzhan gyi sho gam gnang pa'am gsug byin pa la sogs pas mi gcad par byas pa dag gis dge slong rang gi rdzas sho gam gzhal dgos pa bzla bar mi bya'o/ /de ni tshong pa dag gis dge slong dag rdzas 'da' bar byed pa'i skabs bstan pa yin te/ dge slong gis sar phyin pa'i sho gam bzla bar mi bya'o/ /dge slong gis sar phyin pa'i sho gam 'da' bar byed na 'gal tshabs can du 'gyur ro zhes gsungs pa de'i don bsdu ba'i phyir mdo 'di byas so/ /de ni ma byin par len pa'i bslab pa'i gzhi dang 'brel pa ni ma yin te/ thabs des 'da' bar byed pa la nyes pa med pa'i phyir ro/ /'on kyang tshul ma yin pa'i phyir bkag ste/ 'di ltar 'jig rten na kha zer bar 'gyur ba'i phyir ro/ /de ni rkun ma'i thabs dang g.yo can nyid yin te/ dge sbyong 'di dag ni sgyu thabs 'dis rdzas 'da' bar byed pas thabs kyis rku'o zhes zer ba de'i phyir 'di dgag ba mdzad do/ /gzhan gyi rdzas kyang gzhan gyis bzla bar mi bya ste/ de ni snga ma'i rjes las rtogs par bya'o/ /rnam pa gzhan gyis kyang rkun ma'i thabs kyi nyes ba spang ba'i phyir/ ma tshor bar 'da' bar byed pa mi 'grub par bya ba'i phyir 'bad par mi bya'o zhes bya ba smras te/ dge slong gis ma tshor ma rig par rdzas 'da' bar byed pa ni ma tshor bar 'da' bar byed pa'o/ /de mi 'grub par bya ba'i phyir zhes bya ba ni de mi 'grub par bya ba'i phyir te/ ma tshor bar gzhan gyi rdzas bdag gi snod kyis 'da' bar byed pa de mi 'grub par bya ba de'i ched du'o/ /mi 'bad par mi bya'o zhes bya ba ni/ 'bad pa dang ldan par mi bya ste/ 'bad par bya ba'o/ /'di skad bstan te/ ded dpon la sogs pa gzhan gyis bdag gi rdzas blangs pa dang / bdag gi snod du gzhan gyi rdzas 'dzud pa de gnyis kyis ma tshor bar sho gam gyi gnas nas 'da' bar byed pa de mi 'grub par bya ba'i ched du mi 'bad par mi bya ste/ shes bzhin du 'bad pa lhur blang bar bya'o zhes bya ba'i tha tshig go/ /ji ltar 'bad par bya ba de bstan pa'i phyir srung ma dge slong du ma gzhag par bya'o zhes bya ba smras te/ srung ma gzhag par bya ba ji lta bu zhig ce na/ de'i phyir dge slong zhes bya ba smras te/ 'khrul pa med pa'i phyir ro/ /grangs du zhe na de'i phyir du ma zhes bya ba smras te/ gnyis yan chad nas brtsams te bsrung ba'i phyir ji snyed kyis 'grub pa de snyed gzhag go zhes bya ba'i tha tshig go/ /srung ma bsod snyoms la 'gro ba med pas de'i phyir de'i zan bskyal bar bya ba nyid do zhes bya ba smras te/ srung ma de'i zan ni de'i zan te/ de'i zan de dge slong dag gis bskyal bar bya ba nyid do/ /rigs pa'i phyir de skad brjod pa yin gyi/ bcom ldan 'das kyis 'ga' zhig tu bslab pa'i gzhi bcas pa ni ma yin no/ /srung mas ji ltar bsrung bar bya ba de bstan pa'i phyir/ des bzlog par bya'o zhes bya ba smras te/ dge slong srung ma des gal te tshong pa gang dag sho gam gzhal dgos pa'i snod der 'dzud par byed dam/ de nas 'byin par byed pa de dag bzlog par bya'o/ /bzlog tu zin kyang gal te ma bzlogs na de'i tshe ji ltar bya zhe na/ de'i phyir bcug pa nyid brjod par bya'o zhes bya ba smras te/ dge slong srung ma des tshong pa dag gis rdzas bcug pa nyid brjod par bya'o zhes smra bar bya'o/ /su dag la brjod par bya zhe na/ dge slong gang dag gis srung ma de gzhag pa de dag la brjod par bya ste/ de ni shugs kyis shes par bya'o/ /gal te srung ma med na de'i tshe ji ltar bya zhe na de'i phyir/ med na mtshan ma gdab po zhes bya ba smras te/ srung ma med na bsod snyoms la sogs pa 'gro ba'i dge slong gis bdag bsod snyoms la zhugs pa na sho gam gzhal dgos pa la las mi phyung mi bcug par bya ba'i phyir rang gi snod dag la mtshan ma gdab par bya'o/ /khyer te 'ongs pa la dri bar bya'o zhes bya ba ni/ gzhan gyi lhung bzed kyi snod la sogs pa gang yang rung ba sho gam gzhal dgos pa dag sho gam gyi gnas nas bzla ba'i phyir/ khyer te 'ongs pa la len pa pos de la 'di na sho gam gzhal dgos pa'i rdzas chung zad med dam zhes dri bar bya'o/ /gal te tshong pas gser la sogs pa dag dge slong gi gtur bur bcug na de'i tshe ji ltar bya zhe na/ de'i phyir/ gzhan gyis dor bar mi 'grub na reg pa nyid du bya'o zhes bya ba smras te/ gal te rang gis reg bar ma byas na rnam pa gzhan gyis gser la sogs pa dor ba dbyung ba mi 'grub na de'i tshe de dbyung ba'i ched du rang nyid kyis reg pa nyid du bya ste/ de la ni ltung byed 'ba' zhig tu 'gyur ba bag yangs su gnang ngo / /dkon mchog gsum la sogs pa dag la bsngos pa'i rdzas kyi cho ga gang yin pa de smra bar 'dod nas ma phul yang nges pa skyes na phul ba nyid yin no zhes bya ba smras te/ sho gam gyi gnas nas 'da' ba'i phyir rdzas gang blangs pa de dkon mchog gsum la sogs pa la lus dang ngag gis ma phul yang bdag gis 'di dkon mchog gsum la sogs pa la phul lo snyam du sems la nges pa skyes shing nges pa thob na rdzas de dkon mchog gsum la sogs pa la phul ba nyid yin par shes par bya'o/ /de bzlas na gzhan gyi rdzas bzlas pa'i cho ga de nyid 'dir rig par bya'o/ /de dag gis rdzas gnang bar bya ba'i phyir pha ma'i bsngags pa brjod do zhes bya ba la/ pha ma dag gi ched du bskur ba'i rdzas ni de dag gi rdzas te/ de dag gi rdzas de'i sho gam gnang bar bya ba ni gnang bar bya ba'i phyir ro/ /de'i phyir pha ma'i bsngags pa brjod par bya ste/ pha dang ma ni pha ma ste de gnyis kyi bsngags pa brjod pa mdo sde las gsungs pa khyim gang na pha ma la mchod pa byed pa'i khyim de'i slob dpon dang bcas pa nyid yin tshangs pa dang bcas pa nyid yin zhes bya ba la sogs pa dag brjod par bya'o zhes bya ba'i tha tshig go/ /dkon mchog rnams kyi yang ngo zhes bya ba ni yang ngo zhes bya ba'i sgra ni de dag gi rdzas gnang bar bya ba'i phyir bsngags pa brjod do zhes bya ba'i rjes su bsnyags pa'i phyir te/ sangs rgyas dang chos dang dge 'dun dkon mchog gsum po de dag gi rdzas gnang bar bya ba'i phyir dkon mchog gsum mnga' ba'i rdzas kyi sho gam gnang bar bya ba'i ched du dkon mchog rnams kyi bsngags pa yang brjod par bya'o zhes bya ba'i tha tshig go/ /dkon mchog gsum la sogs pa'i bsngags pa brjod kyang ma gnang na ma thogs par sbyin par bya'o zhes bstan pa'i phyir ro/ /don du gang yang rung ba'i dkor gang yang rung ba las skyin por blang ba'i chos su sbyin par bya'o zhes bya ba smras te/ sho gam sbyin pa mi thogs par sbyin par bya ba'i don du sangs rgyas la sogs pa dkon mchog gang yang rung ba'i dkor za 'ug la sogs pa dag sangs rgyas dang chos dang dge 'dun dkon mchog gang yang rung ba las skyin por blang ba'i chos su sho gam sbyin par bya pa la nyes pa med do/ /skyin po'i chos zhes bya ba ni/ des snga skyin du blangs pa yin pas skyin por blang ba'o/ /de nyid chos de ngo bo nyid 'dzin pa'i phyir ro/ /de'i phyir skyin por blang ba'i chos de skyin por blang ba'i chos des gang la snga skyin du blangs pa de la skyin pa bsab par bya'o zhes bya ba'i tha tshig go/ /sho gam gzhal ba la sogs pa'i kha mchur 'gyur ba bzlog pa'i phyir/ sho gam gzhal dgos pa dang bcas pa 'gro bar mi bya'o zhes bya ba smras te/ sho gam gzhal dgos par 'gyur pa dang bcas pa'i dge slong sho gam gzhal dgos pa dang bcas pa ste/ de lam du 'gro zhing 'jug par mi bya ba'o/ /'di skad bstan te/ dge slong sho gam gzhal dgos pa'i rdzas dang bcas pa lam du 'jug par mi bya'o/ /gang lam du 'dzud na de la nyes byas su 'gyur te/ 'dir lam rgyang grags kyi bdag nyid gcig tu song na de la rgyang grags re re zhing nyes byas kyi dngos gzhir gyur pa re rer ro/ /rgyang grags phyed phyed cing de'i sbyor bar gyur pa'i nyes byas phra mor 'gyur ro/ /tshig de ni phongs pa'i dus dag tu dmigs kyis bsal ba dang bcas pa yin te/ der dge 'dun gyi la sogs pa gser gyi mthar thug par yang bskur bar bya'o zhes gsungs pa'i phyir ro/ /sho gam gzhal dgos pa dang / sho gam gzhal mi dgos pa'i rdzas kyi bye brag bstan pa'i phyir/ de ma yin pa nyid ni ba lang gis lci ba btsir bas kyang kha bsgyur ba dang / kha tshar dang phun tshar bcad pa yang ngo zhes bya ba smras te/ de ma yin pa nyid ces bya ba ni/ sho gam gzhal dgos pa ma yin pa nyid do/ /gos kha bsgyur ba ni tha na ba lang gi lci ba btsir bas kyang kha bsgyur ba ni sho gam gzhal dgos pa ma yin pa nyid de/ gzhal mi dgos so/ /kha ma bsgyur ba yang kha tshar dang phun tshar bcad pa yang sho gam gzhal dgos pa ma yin pa nyid de gzhal mi dgos so/ /de la kha tshar bcad pa zhes bya ba ni/ ras dang snam bu la sogs pa btags zin pa'i chib logs kyi kha tshar bcad pa'o/ /phun tshar bcad pa zhes bya ba ni de dag dang po 'thag pa rtsom pa'i srog shing gi sbubs kyi phun tshar bcad pa'o/ / yang ngo zhes bya ba'i sgras ni de ma yin pa nyid ces bya bar sbyar te/ de ma yin pa ni de ma yin pa'o/ /de ma yin pa'i dngos po ni de ma yin pa nyid de/ sho gam gzhal dgos pa ma yin pa nyid ces bya ba'i tha tshig go/ /mdo de gnyis ni gnyi ga yang so sor sho gam gzhal dgos pa ma yin pa nyid kyi rgyu yin te/ kha bsgyur ba dang bcad pa'o/ /de gnyi ga yang mngon sum kho nar blta dgos pa bstan pa'i phyir/ ma mthong ba la blo de mi 'chags so zhes bya ba smras te/ dngos po ma mthong ba la de kha bsgyur tam 'on te ma bsgyur bar bcad dam 'on te ma bcad snyam pa'i blo de mi 'chags pas mi gnang ngo / /'dir gzhung ni rang gi mig gis blta bar bya'o/ /ma bltas na 'gal tshabs can du 'gyur ro zhes gsungs pa yin no/ /sho gam gyi skabs spros pa dang bcas pa de bshad zin to// //rnam par 'byed pa las gsungs pa 'ba' zhig cung zad brjod par bya ste/ gzhan gyi spyod pa brtol bar mi bya'o zhes bya ba la/ gzhan gyi spyod pa zhes bya ba ni/ gzhan gyi 'tsho ba'i thabs so/ /brtol bar mi bya'o zhes bya ba ni/ dge slong gis de bdag po la sogs pa gzhan la 'dam par mi bya'o/ /rang gi 'am gzhan gyi sho gam gzhal dgos pa'i rdzas rang ngam/ gzhan gyi sho gam gyi gnas nas 'da' bar byed pa gang yin pa de dgag pa mdzad pa'i phyir gzhan gyi spyod pa brtol bar byed pa 'di yang bkag par rig par bya'o/ /yid gcugs pas gzhan gyi rdzas blang ba rnam par gzhag pa'i rgyu bstan pa'i phyir/ yid gcugs pa ma yin pa la yid gcugs pa nyid du mi bya'o zhes bya ba smras te/ yid gcugs pa ma yin pa'i gang zag la lhung bzed dang chos gos la sogs pa blang bdag gis yid gcugs pa nyid du mi bya'o/ /tshig de ni gzhan gyi tshig gi skabs bzlog pa'i phyir ro/ /yid gcugs pa ma yin pa nyid kyi mtshan nyid brjod par 'dod nas de nyid ni 'og ma la gong ma'o zhes bya ba smras te/ de nyid ni zhes bya ba ni yid gcugs pa ma yin pa nyid na'o/ /'og ma la zhes bya ba ni yid gcugs pa tha ma la'o/ /gong ma'o zhes bya ba ni/ yid gcugs pa nyid chan po mi bya ba'o/ /'di skad bstan te/ mdza' bshes tha ma la yid gcugs pa 'bring dang chen po mi bya'o/ /'bring la ni chen po mi bya'o/ /yid gcugs par mi bya ba'i rnam par gzhag pa byas nas da ni yid gcugs par bya ba'i rnam par gzhag pa de'i rgyus bstan pa'i phyir de ni sdug pa dang yid du 'thad pa dang / bla ma dang bsgrub par 'os pa dang mchod par 'os pa dang / bstod par 'os pa dang / blangs na dga' ba'o zhes bya ba smras te/ sdug pa zhes bya ba ni 'dir 'grogs bshes la bya'o/ /yid du 'thad pa zhes bya ba ni smos 'drin no/ /bla ma zhes bya ba ni slob dpon dang mkhan po'o/ /bsgrub par 'os pa zhes bya ba ni/ gang gi tshul khrims dang thos pa dang / gtong ba la sogs pa'i yon tan rjes su dran zhing rjes su dran na/ de'i yon tan de dag rjes su sgrub par byed pa'o/ /mchod par 'os pa zhes bya ba ni/ gang sbyin pa dang bsnyen bkur la sogs pas mchod par bya'o/ /bstod par 'os pa zhes bya ba ni/ gang tshul khrims dang / thos pa dang / gtong ba la sogs pas bstod par bya ba'o/ /blangs na dga' ba'o zhes bya ba ni/ gang la bdag gis de'i lhung bzed dang chos gos la sogs pa dag blangs na de dga'o snyam du yid ches pa yod pa ste/ de ni yid gcugs par bya ba yin no/ de ltar sdug pa la sogs pa de dag thams cad ni yid gcugs par bya ba yin par rig par bya ste/ chung ngu dang 'bring dang chen po la sogs pa'i bye brag gis so/ /lag pod kyi las kyis las bya zhing bsod nams kyi blos kyang ste/ gla rngan gyis ni ma yin no zhes bya ba la/ lag pod kyi las kyis zhes bya ba ni/ btso blag gi las la sogs pas so/ /las zhes bya ba ni/ drub pa la sogs pa'i las te de bya'o/ /bsod nams kyi blos kyang ste zhes bya ba yang las bya'o zhes bya bar sbyar ro/ /gla rngan gyis ni ma yin no zhes bya ba ni rin gyis ma yin no zhes bya ba'i tha tshig go/ /yul gyi nges pa'i tshig ni 'drid pa ma yin no zhes bya ba la/ yul gyi nges ba'i tshig ces bya ba ni/ yul so so'i skad do/ /'drid pa ma yin no zhes bya ba ni/ bslu bar mi 'gyur ro zhes bya ba'i tha tshig go/ /de ltar yang rnam par 'byed pa las bcom ldan 'das kyis/ dge slong ma khyod kyis a ba swa tha zhes gang brjod pa ci'i tha tshig ces smras pa dang / gsol pa/ btsun pa 'jig rten na lhung ngo zhes bgyi ba gang lags pa'i tha tshig go/ /bcom ldan 'das kyis bka' stsal pa/ dge slong dag yul gyi nges pa'i tshig gis ni ltung bar mi 'gyur ro zhes gsungs pa yin no/ /rku ba'i shan bsal ba'i phyir/ lhung ba blangs na yun ring du mi bsrel lo zhes bya ba smras te/ lhung ba zhes bya ba ni/ chos gos la sogs pa phyi rol du ltung ba'o/ /blangs na zhes bya ba ni gzhan gyi chos gos la sogs pa phyi rol du ltung ba dge slong gis mi 'khyams par bya ba'i bsam pas re zhig blangs pa'o/ /yun ring du mi bsrel lo zhes bya ba la/ 'dir yun ring po zhes bya ba ni dus ji srid kyis na/ 'dis bcabs so snyam du gzhan dogs pa skye ba'i dus de srid ni yun ring ba nyid du rig par bya ste/ de srid du bsrel bar mi bya'o/ /bdag po gang yin pa mi shes na su la gtad pa nyid du bya zhen de'i phyir/ de dge skos la gtad pa nyid du bya'o zhes bya ba smras te/ chos gos la sogs pa ltung ba blangs pa de dge 'dun gyi dge skos la gtad pa nyid du bya'o/ /des ji ltar bya zhe na de'i phyir/ des rab tu byung ba'i yin par dogs na dge 'dun la bstan par bya'o zhes bya ba smras te/ dge skos des gal te mtshan ma 'ga' zhig las de rab tu byung ba'i yin par dogs pa skyes na de'i tshe rdzas de'i bdag po nges par shes par bya ba'i phyir/ dge 'dun la bstan par bya'o/ /gal te rdzas de'i bdag po ma byung na de'i tshe ji ltar bya zhe na de'i phyir/ bdag po ma byung na gzar thag la btags te gzhag go zhes bya ba smras te/ gal te bdag po 'ga' yang 'di bdag gi'o zhes bdag nyid nye bar ston par mi byed cing de'i bdag po ma byung na de'i tshe dge skos kyis rdzas de gzar thag ces bya ba thag pa'i breng la btags te gzhag go/ /de la chos gos la sogs pa bskam pa la sogs pa'i ched du gzar te 'jog pas gzar thag ces bya ste/ de yang thams cad kyis mngon sum du mthong bar bya ba'i phyir/ mngon pa'i gnas su ka ba la sogs pa la gdags par bya'o/ / rku'o zhes skur pa 'debs pa spang ba'i phyir/ nad pas ma gnang ba de la sman mi bslang ngo zhes bya ba smras te/ nad pas ma spring ba'i gang zag de la nad g.yog gam gzhan gyis sman mi bslang ngo / /ma byin par len pa'i pham par 'gyur ba'i rnam par 'byed pa'o zhes bya ba ma byin par len pa'i pham par 'gyur ba'i skabs rnam par 'byed pa las 'byung ba rdzogs so/ / //ma byin par len pa rnam par 'byed pa'i skabs bshad nas/ da ni phran tshegs kyi skabs brjod par bya ste/ yongs su gzung ba dang bcas pa gnang ba las gzhan pa'i thabs kyis bdag gir mi bya'o zhes bya ba ni/ chom rkun pa dag gis 'dron pa bcom pa dang / yongs su 'dzin pa dang bcas pa'i dur khrod dang / 'jig rten pa'i lha khang dang / srog shing gi dbang phyug dang / de lta bu la sogs pa yongs su bzung ba dang bcas pa'i rdzas gang yin pa de bdag pos gnang ba las gzhan pa'i thabs 'di phyag dar khrod do zhes bya ba dang / 'di ni ngas 'jig rten pa'i lha khang brtsigs pa las 'byor par gyur pa'i phyir nga'i yin no zhes bya ba la sogs pa'i thabs kyis bdag gir mi bya'o/ /bdag gir thob par mi bya'o/ / ci dge slong gis rdzas rkun po la sogs pas phrogs pa la rang gir 'du shes kyi nan khugs kyis kyang dgug par bya'am zhe na ma yin te de'i phyir/ bdag gir byas pa dgug par mi bya'o zhes bya ba smras te/ bdag gir byas pa zhes bya ba ni/ rkun po la sogs pa gzhan gyi rdzas gang yin pa rku 'phrog la sogs pas bdag gir bsgrubs pa ste/ de ni 'dir bdag gir byas pa zhes bya'o/ /sbyin pa la sogs pas thob pa gang yin pa de ni 'dir bdag gir byas pa ma yin te/ 'di ltar 'jig rten na rdzas mi bdog pa las/ rku 'phrog pa la sogs pas rang nyid kyir bsgrubs pa gang yin pa de ni bdag gir byas pa zhes grags pa yin te/ bdag gir byed pa tsam dang 'brel pa'i phyir ro/ /byin len la sogs pas thob pa gang yin pa de la ni sbyin pa la sogs pa la ltos pa yang yod pas/ des na 'dir rku 'phrog la sogs pas bdag gir byas pa gang yin pa de kho na bdag gir byas pa yin par shes par bya'o/ /dgug par mi bya'o zhes bya ba la/ dgug pa zhes bya ba ni rgyal po la gsol pa la sogs pa'i nan khugs kyis 'gugs pa la bya'i/ nyo ba la sogs pas 'gugs pa la ni mi bya ste/ 'di ltar nyo ba la sogs pa ni 'og nas gnang bar 'byung ba'i phyir ro/ /'dir ni rang gi 'du shes kyis 'gugs pa de dgag par mdzad kyi/ gzhan gyir 'du shes pas 'gugs pa ni sngar pham par 'gyur ba la sogs pa'i kha na ma tho bar bstan pa kho na yin no/ /de bas na rang gir 'du shes pas rang gi rdzas nan khugs kyis 'gugs par byed na nyes byas su 'gyur ro/ /de ltar yang dge slong gis gzhan gyis bdag gir byas pa dgug par mi bya ste/ de ni gang gis phrogs pa de'i yin pa'i phyir ro zhes gsungs pa yin no/ /gang gis phrogs pa des rdzas de bdag gir byas pa'i phyir de'i bdag gir 'gyur ro/ /rab tu byung bas de la mi 'dod bzhin du nan khugs kyis dbrog pa de ni rigs pa'i tshul ma yin te/ de bas na 'dir brkus par gtogs pa'i kha na ma tho ba yod pas bkag pa ni ma yin gyi/ 'di ltar rab tu byung ba'i tshul dang mthun pa ma yin bas dgag par mdzad do/ / gal te nan khugs kyis dgug par mi bya na/ de la ji ltar bsgrub par bya zhe na de'i phyir/ de ni chos bshad pas bslang bar bya'o zhes bya ba smras te/ rdzas phrogs pa de ni dge slong gis chos bshad pas bslang bar bya'o/ /rin phyed du nye bas kyang ngo zhes bya ba ni/ rin phyed du nye bas kyang blu bar bya'o/ /nye ba zhes bya ba ni khad nye ba'i tshig ste/ rin phyed du cung zad ma chog pa'am/ phyed pas cung zad lhag pas kyang blu'o zhes bya ba'i tha tshig go/ /lhung bzed dang chos gos ni rin chen pos blus kyang rung ngo zhes bya ba ni/ gal te des chos bshad pa'i thabs kyis kyang ma khugs na de'i tshe lhung bzed dang chos gos phrogs pa'i rdzas ni rin chen pos blus kyang rung ste/ de ni kha bsgyur ba'i las la sogs pa'i nyon mongs pa spang ba'i phyir ro/ /mi snyan pa 'byung bar 'gyur ba ni bor ba'o zhes skye bo phal po che'i mngon sum du ma bab par bskur bar mi bya'o zhes bya ba ni/ dngos po gang las 'di nyid kyis 'di bsad do/ /'di nyid kyis 'di brkus so zhes bya ba'i mi snyan pa mi mdzes pa 'byung bar 'gyur ba ni bden du bor ba nyid yin na yang 'di bor ba'o zhes bdag gis nges par bya ste/ skye bo phal po che su'i yang mngon sum du ma bab par dge slong gis bskur bar mi bya blang bar mi bya'o zhes bya ba'i tha tshig go/ /de ni ma dad pa spang ba'i phyir ro/ /skye bo phal po che'i mngon sum zhes smos pas ni nyes pa 'di mi 'byung ste/ de ltar drug sde dag gis rkun po rnams kyis phag gi mgo bcad de bor ba phyag dar khrod do zhes blangs pa dang / tshol ba'i mi rnams kyis de dag la 'phags pa dag ji ltar drang srong gi rgyal mtshan thogs shing bya ba 'di lta bu yang byed ces smras pa nas/ bcom ldan 'das kyis bka' stsal pa/ dge slong gis phyag dar khrod de lta bu skye bo phal po che'i mngon sum du ma bab par blang bar mi bya'o/ / len na 'gal tshabs can du 'gyur ro zhes bya ba'i bar du gsungs ba yin no/ /ro'i rdzas 'di ltar mi ma yin pas blangs par gyur na 'on kyang de'i ma yin no/ /snyam pa bzlog pa'i phyir ro/ /ro'i rdzas mi ma yin pas blangs pa nyid ni yongs su ma bzung ba nyid ma yin no zhes bya ba smras te/ ro'i rgyud du gtogs pa'i rdzas gang yin pa de gal te mi ma yin pas blangs par gyur na de yongs su ma bzung ba'o snyam du shes par mi bya ste/ de brkus na nyes pa sbom por 'gyur bar rig par bya'o/ /mi ma yin pas yongs su bzung ba'i rdzas gang yin pa de dur khrod de nyid du bskyal bar bya dgos na/ der ji ltar 'gro bar bya zhe na de'i phyir/ rab tu gtum pa de'i phyi bzhin du 'gro bar bya'o zhes bya ba smras te/ mi ma yin pa rab tu gtum pa 'khrugs pa de'i phyi bzhin du dge slong 'gro bar bya ste/ de ni gnod pa byed pa spang ba'i phyir ro/ /dur khrod der khyer nas rdzas de mi ma yin pa de'i steng du ji ltar g.yogs bar bya zhe na de'i phyir/ khas spub tu bsnyal ba la rkang pa'i mtha' nas brtsams te g.yogs par bya'o zhes bya ba smras te/ ro bsnyal ba la ro'i rdzas kyis g.yogs par bya'o zhes bya bar sbyar ro/ /ji ltar bsnyal ba la g.yogs par bya zhe na de'i phyir/ khas spub tu bsnyal ba la zhes bya ba smos te/ kha sa la bstan te ltos bsnyal ba la/ de'i steng nas des blangs pa'i la ba la sogs pas g.yogs par bya'o/ /ji ltar g.yogs par bya zhe na/ de'i phyir/ rkang pa'i mtha' nas brtsams te g.yogs par bya'o zhes bya ba smras te/ rkang pa'i mtha' nas brtsams te mgor thug gi bar du mas yar mthar gyis g.yogs par bya'i/ gzhan du ma yin te/ de yang gnod pa byed pa spang ba kho na'i phyir ro/ /ro ma smas pa la mi ma yin pa 'jug par 'gyur ba'i skabs yod pas de'i rdzas blangs pa las nyes dmigs de dag 'byung bar 'gyur ba bsal ba'i phyir/ ma smas pa las blang bar mi bya'o zhes bya ba smras te/ ro ma smas pa las rdzas blang bar mi bya'o/ /'o na ci ste de lta na rang gis smas par byas te 'am/ gzhan smas par byed du bcug ste/ de'i phyir rang gis smas pa dang smas par byed du gzhug par mi bya'o zhes bya ba smras te/ 'dir ro zhes bya ba mtha' gnyi gar sbyar te ro de rang gis kyang smas par mi bya'o/ /ro de gzhan yang smas par byed du gzhug par mi bya'o zhes bya ba'i tha tshig go/ /thams cad du so shing la sogs pa yang ma bstabs kyi bar du blang bar mi bya'o snyam du dogs pa bsal ba'i phyir/ bsti gnas nyid du so shing dang chu dang 'dag rdzas dang lci ba dang sa ci bder bya'o zhes bya ba smras te/ bsti gnas nyid du dge slong gis so shing la sogs pa ci bder bya'o zhes bya bar sbyar ro/ /'dir gzhung ni dge slong gang du bsti ba der rnam pa lnga po dag ci bder byas par brjod par bya ste/ so shing dang chu dang 'dag rdzas dang lci ba dang sa'o zhes gsungs pa yin no/ /gal te dge slong sngon chung ma la sogs pas mthus khrid pa na de'i tshe dge slong gzhan gyis ji ltar bsgrub par bya zhe na/ de'i phyir dge slong dang dge tshul mi 'dod bzhin du 'brel pas khrid pa na bzung bar bya'o zhes bya ba smras te/ mi 'dod bzhin du zhes bya ba mi dga' bzhin du'o/ /'brel pas zhes bya ba ni phu nu dang / bu sring dang chung ma la sogs pas so/ /de dag gis de ltar khrid pa na dge slong gis bzung bar bya'o zhes bya bar sbyar ro/ /de ltar yang gzhung ni de la lag pa gang shos na zhes dri'o/ /gal te sngon gyi chung mas bzung ba shos na'o zhes zer na mi btang ngo / /gal te khyod kyis bzung ba shos na'o/ /zhes zer na ni bsam pa las chung ma 'dod pa 'dras thong shig ces gsungs pa yin no/ /ma byin par len pa'i pham par 'gyur ba phran tshegs kyi skabs so zhes bya ba ma byin par len pa'i pham par 'gyur ba phran tshegs kyi skabs nas 'byung ba rdzogs so/ / //da ni zhu ba'i skabs brjod par bya ste/ ka ka ni bzhi la ma sha ka'o zhes bya ba la/ ka ka ni zhes bya ba ni/ bon ti ka zhes bya ste/ de yang 'gro na bu nyi shu'i rin thang gi ming yin no/ /ka ka ni bzhi la ni ma sha ka gcig ste/ 'gron bu brgyad cu'i rin thang gi ming yin no/ /mdo 'di ni 'og nas gang na de'i tshigs nyid nyi shu yin pa de la brten nas so zhes 'byung ba'i tshigs de'i rang gi ngo bo bstan pa'i phyir te/ de nas kyang tshigs zhes bya ba ni ma sha ka brjod do/ /tshigs zhes bya ba'i tshigs ni kAr ShA pa Na rang gi ngo bo shes par bya ba'i phyir ro/ /kAr ShA pa Na'i rang gi ngo bo shes pa ni de'i bzhi cha gcig brkus na pham par 'gyur ba nyid yin par bstan pa'i phyir ro/ /ma sha ka lnga la sogs pa zhes bya ba smras pas da ni gang la ma sha ka lnga kho na rku ba de ni des pham par 'gyur gyi/ gang bzhi rku ba de ni pham par mi 'gyur ro zhe na de'i phyir/ lnga nyid ni kAr ShA pa Na'i bzhi cha'i dpe yin no zhes bya ba smras te/ rnam par 'byed pa'i mdo las ma sha ka lnga la sogs pa zhes gsungs pa de ni kAr ShA pa Na'i bzhi cha'i dpe yin par rig par bya'o/ /de bas na ma sha ka lnga la sogs pa zhes bya ba'i tshig de ni kAr ShA pa Na'i bzhi cha'i gcig rku na zhes bya ba de'i mtha' yin no/ /lnga nyid ni kAr ShA pa Na'i bzhi cha'i dpe yin no zhes bya ba smras na gnas dang dus kyi dbye bas kAr ShA pa Na'i dbye ba yang mang du snang ste/ la lar ni ma sha ka bcu gnyis nyid la kAr ShA pa Na gcig/ la lar ni ma sha ka bcu drug nyid la kAr ShA pa Na gcig /la lar ni ma sha ka sum cu rtsa gnyis nyid la kAr ShA pa Na gcig yin pas de'i phyir/ 'dir gnas gang dang dus gang la brten te/ ma sha ka lnga nyid kAr ShA pa Na'i bzhi cha'i dpe yin zhe na de'i phyir/ gang na de'i tshigs nyid nyi shu yin pa de la brten nas so zhes bya ba smras te/ gnas dang dus gang na kAr ShA pa Na de'i tshigs nyid ma sha ka nyi shu yin pa de la brten nas ma sha ka nyid kAr ShA pa Na'i bzhi cha'i dpe yin no/ /'di skad bstan te/ rku ba'i gnas dang rku ba'i dus la brten nas ma sha ka lnga nyid kAr ShA pa Na'i bzhi cha'i dpe yin te/ de bas na kAr ShA pa Na'i bzhi cha gcig brkus pa ni pham par 'gyur ba'i rgyu'i gtso bor gyur pa yin gyi/ kAr ShA pa Na'i bzhi cha gcig la ma sha ka du yod pa'i grangs ni nges pa med par rig par bya'o zhes bya ba'i tha tshig go/ /de ltar yang gtam gyi gzhi'i skabs nas/ btsun pa ma sha ka gsum brkus na pham par 'gyur ba mchis sam/ bka' stsal pa/ yod de gang na ma sha ka bcu gnyis la kAr ShA pa Na gcig tu 'gyur ba'o/ /ma sha ka lnga las lhag pa brkus na pham par mi 'gyur ba mchis sam/ bka' stsal ba yod de/ gang na ma sha ka bzhi bcu la kAr ShA pa Na gcig tu gyur na'o zhes gsungs pa yin te/ /der ni ma sha ka bcu brkus pa na pham par 'gyur bar dgongs so/ /deng sang ni ma sha ka bzhi brkus na/ pham par 'gyur bar rig par bya ste/ kAr ShA pa Na gcig ni pa Na bcu drug gi tshad yin pa'i phyir ro/ /kAr ShA pa Na'i dbye ba gnas dang dus kyi dbye bas tha dad pa'i phyir de'i rin thang brtsi ba ji ltar bya zhe na de'i phyir/ rku ba'i gnas dang dus kyis de'i brtsi ba rnam par gzhag go zhes bya ba smras te/ rku ba'i gnas dang rku ba'i dus kyi rin thang brtsi ba gang yin pas kAr ShA pa Na de'i rin thang ma sha ka bcu gnyis la kAr ShA pa Na gcig gam/ ma sha ka bcu drug gam/ ma sha ka nyi shu'am/ ma sha ka bzhi bcu'am/ de la sogs pa'i rin thang brtsi ba des brtsis pa'i kAr ShA pa Na'i bzhi cha gcig brkus na pham par 'gyur bar shes par bya'i/ yul gzhan dang dus gzhan dang / gling gzhan gyi rin thang brtsi ba des yul dang dus dang gling gzhan du brtsi bar ni mi bya'o/ /ma sha ka lnga la sogs pa zhes smras na rdzas gang che ba nyid kyis/ ma sha ka lnga la sogs pa nyid kyis rin thang gdab par mi nus pa de la ni rin thang med do zhes te de brkus na de la pham par 'gyur ba med do snyam du sems pa de bzlog pa'i phyir/ che ba nyid kyis rin thang gdab par mi nus pa ni rab kyi mthar phyin pa nyid do zhes bya ba smras te/ rdo rje la sogs pa rin po che gang che ba nyid kyis rin thang gdab par mi nus pa de ni rab kyi mthar phyin pa nyid yin te rin thang mtha' yas pa nyid do/ /phul du gyur pa'i mthar thug pa ni rab kyi mthar phyin pa ste/ mchog tu bkrabs pa'i rab kyi mthar phyin par gyur pa nyid yin pa'i phyir ro/ /de ni 'dir ma sha ka lnga la sogs pa zhes smos pa'i sogs pas 'phangs pa drug nas grangs med pa'i mthar thug pa nyid yin par rig par bya'o/ /ha cang chung ba nyid kyis rin thang gdab par mi chog pa gang yin pa de ni dngos por gyur pa ma yin pa'i phyir brkus kyang ltung bar mi 'gyur ro snyam du dogs pa bsal ba'i phyir/ chung ba nyid kyis der mi chog pa nyid ni khongs su ma gtogs pa nyid ma yin no zhes bya ba smras te/ mdo 'di la chung ba nyid kyis rin thang gdab pa der mi chog pa nyid de de ni chung ba nyid kyis rin thang gdab par mi chog pa ste/ der zhes bya ba ni rin thang gdab par ro/ /mi chog pa nyid gang yin pa de brkus na khongs su ma gtogs pa nyid ma yin gyi/ khongs su gtogs pa kho na nyid yin te/ de la nyes pa sbom po'am nyes byas su 'gyur ro zhes bya ba'i tha tshig go/ /sangs rgyas kyi sku gdung ni btsong bar bya ba ma yin pa'i phyir de brkus na ltung ba ji ltar rnam par gzhag ce na de'i phyir/ de la sangs rgyas kyi sku gdung ni gzhal du med pa'i rin po che nyid yin no zhes bya ba smras te/ rin thang gdab par mi nus pa rku ba de la sangs rgyas kyi sku gdung ni gzhal du med pa'i rin po che nyid yin te/ rab kyi mthar phyin par gyur pa nyid yin par rig par bya'o/ /rin po che gang gzhal ba dang yongs su dpag pa dang / rin thang brtsi bar mi nus pa de ni gzhal du med pa'o/ /de ni gzhal du med pa yang yin la/ rin po che yang yin te/ de'i dngos po ni de nyid do/ /'di skad bstan te/ dper na gzhal du med pa'i rin po che mi'i rgyud kyis yongs su bzung ba zhig rku sems kyis rku na gal te yul de na gzhal du med pa'i rin po che de'i don gyis rin thang ji lta ba bzhin du rnam par gnas pa yin na ni de'i tshe pham par 'gyur ro/ /gal te de'i rin thang de bzhin rnam par gnas pa ma yin na ni rin thang ji lta ba las ltung ba rnam par gzhag pa de bzhin du/ sangs rgyas kyi sku gdung gi rnam par gzhag pa yang de bzhin no/ /rku sems gang yang rung bas rku ba thams cad du pham par 'gyur ba bsal ba'i phyir/ mchod pa'i don nyid du na nyes byas so zhes bya ba smras te/ mchod pa'i don mchod pa'i rgyur gang rku ba de ni mchod pa'i don to/ /de'i dngos po ni de nyid du'o/ /mchod pa'i don de nyid du rku na nyes byas so/ /'dir gzhung ni/ ji ste mchod pa'i don du 'di ni bdag gi ston pa'o/ /bdag gis 'di la bkur sti bya'o snyam du rku bar byed na nyes byas so zhes gsungs pa yin no/ /rku sems yod du zin kyang re zhig dpe bri bar rku ba ni nyes pa med par bstan pa'i phyir/ dpe bri ba la ni nyes pa med do zhes bya ba smras te/ gang la bltas nas gzhan du 'dri bar byed pa de ni dpe bri ba'o/ /de ni gzhan las brkus te blangs kyang nyes pa med pa nyid de/ ltung bar 'gyur ba'i byed pa po nyid ma yin no/ /gdub kor la sogs pa gang dag bshig ste/ rku bar byed pa de la gnas skabs gang du de'i rin thang brtsi bar bya zhe na de'i phyir/ bshig ste rku ba la ni de'i gnas skabs rku ba'i dngos po nyid yin no zhes bya ba smras te/ gser la sogs pa'i rgyan la sogs pa'i rdzas gang bshig ste rku ba la ni bshig pa'i gnas skabs rku ba'i dngos po nyid de rku ba'i gzhi nyid yin gyi/ ma bshig pa'i snga rol ni ma yin te/ de'i tshe na gzhig pa tsam gyi bsam par thad pa'i phyir ro/ /'di skad bstan te/ 'jig pa'i gnas skabs na ni sbyor ba'i ltung ba'o/ /bshig par gyur na ni dngos gzhi'i ltung bar 'gyur ro/ /'dir gzhung ni btsun pa dge slong gis mi rnams kyi rin po che'am rin po cher smos pa bshig ste rku na ltung ba cir 'gyur/ bka' stsal pa/ rin thang brtsi bar bya'o zhes gsungs pa yin no/ /'dir gzhung ni de'i dgongs pa ni de'i gnas skabs kyi rin thang brtsi bar bya'o zhes bya ba yin no/ /ji ltar gling gzhan dag na rdzas la yongs su 'dzin pa dang bcas pa nyid yin pa bzhin du byang gi sgra mi snyan na yang de bzhin nam zhe na ma yin te/ de'i phyir byang gi sgra mi snyan na ni yongs su 'dzin pa med pa nyid do zhes bya ba smras te/ byang gi sgra mi snyan gyi rdzas gang yin pa de ni yongs su 'dzin pa med pa nyid yin par blta bar bya'o/ /yongs su 'dzin pa med na de dag gi rdzas ji ltar brkus par rnam par gzhag ce na/ de'i phyir de ni rang gi dang 'dra'o zhes bya ba smras te/ yongs su 'dzin pa med pa'i rdzas de ni rang gi dang 'dra bar blta bar bya ste/ ji ltar rang gi rdzas rku sems kyis brkus na nyes pa sbom por 'gyur ba bzhin du 'di yang de bzhin no zhes bya ba'i tha tshig go/ /zhu ba'i skabs 'dis dngos po'i skabs dang / bdag po'i skabs dang / rjes su bsgrub pa'i skabs dang / mthar thug pa'i skabs zhes bya ba rnam pa bzhi bsdus pa de dag las de yan chad du dngos po'i skabs bshad zin to// //ka ka ni bzhi la ma sha ka'o zhes bya ba la sogs pas dngos po brtags nas/ da ni bdag po'i skabs brjod par bya ste/ bdag po ji lta bu bdag po nyid yin zhe na/ de'i phyir/ de'i dus ni bdag nyid yod pa bdag po nyid do zhes bya ba smras te/ rku ba de'i dus kyi tshe na srid pa'i ngo bo nyid du bdag nyid yod pa gang yin pa de ni de'i dus na bdag nyid yod pa'o/ /de'i dus ni bdag nyid yod pa gang yin pa de ni bdag po nyid do/ /'di skad bstan te/ rku ba'i dus na rdzas de'i bdag po lha nyid la sogs pa'i ngo bo nyid du bdag nyid yod pa gang yin pa de ni rdzas de'i bdag po nyid yin gyi/ 'das par gyur pa'am/ phyis 'byung ba gang yin pa de ni de'i bdag po nyid ma yin no zhes bya ba'i tha tshig go/ /'di lta ste dper na/ mis rang gi rdzas gter du bcug nas shi ba dang / de nyid du srung ma 'dre zhig skyes pa na/ gal te dge slong gis rdzas de brkus na 'dre las brkus par 'gyur gyi/ mi'i rgyud las ni ma yin pa bzhin te/ de bas na de brku ba'i dus na 'dre nyid rdzas de'i bdag po nyid yin pas na/ de'i phyir sbom por 'gyur gyi pham par ni mi 'gyur ro/ /des na 'di yang bsdus pa yin te/ mchod rten las brkus pa yang me'i rgyud kyis yongs su bzung ba med pa'i phyir/ dngos po tshang na nyes pa sbom por 'gyur ro/ / de ltar yang 'dir gzhung ni btsun pa dge slong gis re zhig mchod rten dang / mchod rten gyi 'khor sa nas rgyan brkus na ltung ba cir 'gyur/ bka' stsal pa/ nyes pa sbom por ro zhes gsungs pa yin no/ /bcom ldan 'das yongs su mya ngan las 'das pa'i dkor yang mi'i rgyud du gtogs pa yin pa'i phyir/ de brkus na pham par 'gyur bar dogs pa bsal ba'i phyir/ mya ngan las 'das pa ni lha nyid do zhes bya ba smras te/ phung po'i lhag ma med pa'i dbyings su yongs su mya ngan las 'das pa ni rnam par dag pa'i lha nyid du bzhed do/ /brnyan pa nges par byin pa nyid bzhin du nye bar spyod na sbyor ba bzhin no zhes bya ba ni/ la la zhig gis dgos pa 'ga' zhig gi phyir dge slong gi gos la sogs pa'i dngos po zhig spyad par brnyan par gyur pa na dge slong des dngos po dgos pa 'ga' zhig gi phyir spyad par brnyan pa de nges par byin pa nyid bzhin du nye bar spyod de/ dper na nges par byin pa gtan du thams cad kyi thams cad du byin pa'i dngos po bdag nyid dbang ba nyid kyis bsri ba med par nye bar spyod par byed pa de bzhin du/ dgos pa 'ga' zhig gi phyir spyad par brnyan pa'i dngos po de yang bsri ba med par nye bar spyod na sbyor ba bzhin te/ nyes pa sbom por 'gyur ro zhes bya ba'i tha tshig go/ /gzhan du rku sems med pas ni ltung bar mi 'gyur ro zhes kyang gsungs pa'i phyir/ 'dir ni rku sems kyis yin par shes par bya ste/ dngos po ma tshang ba la nyes pa sbom por ro zhes bya ba ni ma smos kyang grub pa yin no/ /de bas na 'dir ni dngos po tshang na sbom po'i dngos gzhir 'gyur bar rig par bya ste/ brnyan pa'i rtog pa'i dbang gi phyir dang / bzhin no zhes bya ba'i sgra smos pa'i phyir ro/ /'dir gzhung ni btsun pa dge slong gis khyim bdag gi gos brnyas pa brtags te rku na ltung ba cir 'gyur/ nyes pa sbom por 'gyur ro/ /ji ste khyim bdag 'di skad ces 'phags pa dag gis 'di khyod la brnyan no zhes zer nas dge slong gis nges par byin pa nyid bzhin du nye bar spyad na yang nyes pa sbom por 'gyur ro zhes gsungs pa yin no/ /de dag 'dir bsdus so/ / gsang sngags dang sman dag gis 'bul du bcug na yang ngo zhes bya ba ni rku sems kyis na sbyor ba bzhin no zhes bya ba'i rjes su sbyar bar bya'o/ /de ltar na 'dir tshig gi don 'di 'byung ste/ rku sems kyis gsang sngags dang sman gyi thabs kyis 'bul du bcug na sbyor ba bzhin te/ dngos gzhi'i dngos po tshang na nyes pa sbom por 'gyur ro zhes bya ba'i tha tshig go/ /de ni chad pas bcad pa'i rnam pa lta bu yin pas des na pham par ni mi 'gyur ro/ /'dir gzhung ni ji ste des gsang sngags dag gis sam/ me tog dang 'bras bu dag gis brtsal nas/ khyim bdag de 'di skad ces bdag gi 'di khyod la brnyan no zhes zer nas dge slong gis de nges par byin pa nyid kyi 'du shes kyis nye bar spyad na nyes pa sbom por 'gyur ro zhes gsungs pa yin no/ /dbang du byed pa'i sman du gyur pa'i me tog dang 'bras bu dag des bsdus pa yin gyi/ yongs su tshim par bya ba'i phyir byin pa gang yin pa de ni ma gtogs te/ de ni log pas 'tsho ba yin gyi/ ma byin par len par gtogs pa'i kha na ma tho ba ni med do/ /gzhan gyi don nyid du na dngos gzhi'i rnam pa'o zhes bya ba la gzhan dag gi don ni gzhan gyi don to/ /gzhan gyi don gyi dngos po ni gzhan gyi don nyid do/ /gzhan gyi don de nyid du zhes bya ba gzhan gyi ched nyid du rkun po bdag gis byas pa ma skyes pas gang rku bar byed na yang de la dngos gzhi'i rnam pa'o zhes bya ba dngos gzhi'i sbyor ba ste/ dngos gzhi'i kha na ma tho bar ma tshang ba nyes pa sbom po'i dngos gzhir gtogs so zhes bya ba'i tha tshig go/ /'dir gzhung ni btsun pa dge slong gis ma bsgo bar gzhan gyi don du rku na ltung ba cir 'gyur/ nyes pa sbom por 'gyur ro zhes gsungs pa yin no/ /rtog pas kyang ngo zhes bya ba ni/ rtog pas rku na yan lag lhag ma yod du zin kyang dngos gzhi'i rnam par 'gyur te/ gang la pham par 'gyur ba de la ni sbom po'o/ /gang la sbom por 'gyur ba de la nyes byas so zhes bya ba la sogs pa'o/ /rtog pa ni rnam pa gnyis te/ kha cig ni shags 'gyed pa'i dus na kha sad kyis gsod pa pha rol po'i tshig gi skabs med par bya ba'i phyir lan 'debs pa gang yin pa de rtog pa de lta bu la ni dngos gzhi nyid du 'gyur gyi/ dngos gzhi'i rnam par mi 'gyur ro/ /kha cig ni rtog par byed pa'i dus nyid na bsam pa'i dbang gis rang gi yin pa'i 'du shes skye ste/ 'on kyang de nyes pa'i rnam pa'i dogs pa dang 'brel pa yin pas des na de la ni dngos gzhi'i rnam par 'gyur gyi/ dngos gzhir ni mi 'gyur te/ 'di lta ste dper na/ 'di ni bdag gi yin no snyam pa'am/ yongs su bzung ba ma yin no snyam pa'am/ lha sbyin la sogs pa des bdag la byin no snyam pa'am/ de lta bu la sogs pa rtog pa ste/ rtog pa 'di ni gzhan gyis yongs su bzung ba la sogs pa'i 'du shes kyis nyes pa dang 'brel pa'i phyir des na dngos gzhi'i rnam pa yin no/ /mdo 'di'i yul 'di la 'du shes bzhin du yid gnyis ni med de/ gang yang rung ba'o snyam pa de lta bu'i yul yin pa'i phyir ro/ /'di ni kha na ma tho ba dang bcas pa yin no zhes nges par byas nas de lta na yang 'jug par byed de/ des na yul gzhan kho na yin no/ /gdams te bzang po brku bar 'dod pa la yang ngo zhes bya ba ni/ dngos gzhi'i rnam pa'o zhes bya bar sbyar te gdams shing gdams shing gang bzang ba de rku'o snyam pa de ltar 'dod pa la yang gang gdams pa la dngos gzhi'i rnam par 'gyur te/ de la yang kha na ma tho ba sbom por 'gyur ro/ /'dir ni skabs gzhan du rku ba'i phyir nom bar byed pa la sbom por bstan pa de las tha dad pa'i sbom po gzhan du 'gyur ro zhes bstan pa'i phyir mdo 'di bstan te/ 'di ltar gzhan du ni nom pa'i snga rol du khri las ldang ba la sogs pa'i tshe na nyes byas so/ /nom pa na nyes pa sbom po'o/ /gnas nas spags na pham par bstan gyi/ 'dir ni gdams te logs shig tu bkar kyang rung ste/ sbom po kho nar bzhed do/ /de bas na gdams pa na yang sbom po gcig go/ /gdams te rku ba'i ched du ni nom pa yang sbom po gzhan gnyis par 'gyur ro/ /rgyun la dor byed na gal te rgyal ba nyid du mi 'gyur ba'i tshe sbyor ba'o zhes bya ba ni/ rgyan la dor byed na gal te dor te rgyal ba nyid du ma gyur gyi bar du ni dor te sbyor bar 'gyur ro/ /de la de ni brkus pa yin no zhes bya ba ni/ rgyan de la dor gyis rgyal ba nyid du gyur pa de ni brkus pa yin par rig par bya'o/ /grangs la ni de'i'o zhes bya ba ni/ grangs rtsis las dor byas pa la ni sbyor ba de'i sbyor ba'o zhes bya bar rig par bya ste/ dngos gzhi'i sbyor ba ni ma yin no/ /'di skad bstan te/ grangs kyi skabs su dor byed pa ni nyes byas yin gyi spom por mi 'gyur ro/ /gzhan du yang sbyor ba'i sbyor ba nyid bstan pa'i phyir/ mtshan ma phyis pa dang bsnan pa gnyis dang gnas gzhan du gzhag pa yang de nyid do zhes bya ba smras te/ mtshan ma zhes bya ba ni/ shod thabs dang khram thabs la sogs pa'i gcig la sogs pa'i rtags kyi mtshan ma'o/ /de phyis pa zhes bya ba ni med par byas pa'o/ /bsnan pa zhes bya ba ni lhag par bsnan pa gang yin pa ste/ phyis pa dang bsnan pa de gnyis kyang dor byed pa nyid do/ /sbyor ba'i sbyor ba nyid de nyes byas so zhes bya ba'i tha tshig go/ /de gnyis 'ba' zhig de nyid yin par ma zad de/ 'di ltar mtshan ma de shod mig dang khram gyis la sogs pa'i gnas gang na 'dug pa'i gnas de nas gnas gzhan du ltag 'og bsnor zhing gzhag pa yang de nyid de dor byed pa nyid de/ mdo 'di ni gnas skabs thams cad kyi dbang du byas pa yin gyi/ rgyan dang grangs 'ba' zhig gi dbang du byas pa ni ma yin no/ /de bas na glegs bu la bris pa la sogs pa'i mtshan ma shod thabs dang khram thabs dang yig 'bru dang mdo ris la sogs pa phyis pa dang bsnan pa dang / gnas gzhan du spos pa yang nyes byas nyid do/ /de la grub pa na brkus pa yin no zhes bya ba la de la zhes bya ba la ni grangs la'o/ /grub pa na zhes bya ba ni nor thob pa na ste/ de'i tshe na brkus pa yin no/ /de ltar na 'dir grangs kyi skabs su dor byed pa ni sbyor ba'i sbyor ba nyid de nyes byas nyid do/ /thob par bya ba'i phyir de'i 'og tu rtsol ba'i sbyor ba nyid de sbom po'o/ /thabs gang yang rung bas thob pa'i tshe na ni brkus pa nyid yin no/ /gzhan du yang sbyor ba'i sbyor ba dang brkus pa de nyid 'dra bar sbyar ba'i phyir/ tshoms gzhan du bgrang ba la yang de dang 'dra'o zhes bya ba smras te/ tshoms cig shos kyi nang du yang bdag nyid bgrangs na yang rnyed pa'i phyir bdag nyid tshoms gzhan du bgrang ba yang de dang 'dra ste/ grangs kyi skabs su dor byed pa dang 'dra bar blta bar bya'o/ /'dir yang bgrang ba ni sbyor ba'i sbyor ba nyid de nyes byas nyid do/ /grub pa'i tshe ni brkus pa yin no/ /'dir gzhung ni btsun pa dge slong gis re zhig bdag nyid tshoms gnyi gar bgrang na ltung ba cir 'gyur/ nyes pa sbom por sbyor ba'i nyes byas so zhes gsungs pa yin no/ /snga ma nyid phyi ma dag la yang phyi ma nyid snga ma dag la bsnyon pa yang ngo zhes bya ba la yang ngo zhes bya ba'i sgra ni de dang 'dra'o zhes bya ba'i rjes su bsnyags pa'i phyir ro/ /tshoms snga ma shos kyi dngos po ni snga ma nyid do/ /tshoms snga ma nyid gang du des bdag nyid sngar bgrangs zin pa'i tshoms de bsnyon pa gang yin pa'o/ /gang dag la bsnyon zhe na de'i phyir/ phyi ma dag la zhes bya ba smras te/ sngar bgrangs pa'i tshoms las gzhan pa'i tshoms phyi ma gzhan dag la bsnyon zhes bya ba'i tha tshig go/ /tshoms phyi ma shos kyi dngos po ni phyi ma nyid de/ tshoms phyi ma nyid gang du des bdag nyid phyis kyang bgrangs par gyur pa'i tshoms de yang bsnyon pa gang yin pa ste/ gang dag la bsnyon zhe na de'i phyir/ snga ma dag la zhes bya ba smras te/ tshoms gang du des bdag nyid sngar bgrangs zin pa'i tshoms der gtogs pa'i gang zag dag la bsnyon pa'o/ /bsnyon pa de yang de dang 'dra ste/ grangs kyi skabs su dor byed pa dang 'dra bar blta bar bya'o/ /'dir yang bsnyon pa ni sbyor ba nyid de nyes byas so/ /grub pa'i tshe ni brkus pa nyid do/ /'dir gzhung ni btsun pa dge slong gis re zhig bdag nyid bgrang du stsal nas bsnyon na ltung ba cir 'gyur/ nyes pa sbom por sbyor ba'i nyes byas su'o zhes gsungs pa yin no/ /de'i rnyed pa tshoms gang las blang bar bya zhe na de'i phyir/ skal ba nyid na de dag gang du thams cad kyi dang por bgrangs pa der ro zhes bya ba smras te/ de'i skal ba nyid ni tshoms de dag gang du tshoms thams cad kyi dang por bgrangs pa der gtogs so/ /de tshoms gang du thams cad kyi dang por bgrangs pa der skal ba nyid dbang ste/ tshoms de las skal ba blangs pa la ni ltung ba med do/ /mi dbang ba dbang bar sgrogs pa yang ngo zhes bya ba la mi dbang ba zhes bya ba ni/ skal ba mi dbang ba'i gang zag ste/ de yang 'dir gtogs so zhes dbang bar sgrogs shing smra na/ de yang de dang 'dra ste grangs kyi skabs su dor byed pa dang 'dra bar blta bar bya'o/ / 'dir yang dbang bar sgrogs pa ni sbyor ba'i sbyor ba nyid de nyes byas so/ /grub pa'i tshe na ni brkus pa nyid do/ /'dir gzhung ni btsun pa dge slong gis re zhig rnyed pa glo bur ba mi dbang ba las bdag kyang dbang ngo zhes dbang bar sgrogs na ltung ba cir 'gyur/ nyes pa sbom por sbyor ba'i nyes byas su'o zhes gsungs pa yin no/ /ma bsgo bar slong ba yang ngo zhes bya ba yang grangs kyi skabs su dor byed pa dang 'dra bar blta bar bya ste/ 'dir yang ma bsgo bar slong ba ni sbyor ba'i sbyor ba nyid de nyes byas so/ /grub pa'i tshe na ni brkus pa nyid do/ /'dir gzhung ni btsun pa dge slong khyim bdag gi mdun du mchis pas re zhig de khyim bdag de'i nye du'i thad du mchis nas khyim bdag na re 'di skad ces dngos po che ge mo zhig dang mang ge mo zhig byin cig ces zer ro zhes bgyis na ltung ba cir 'gyur nyes pa sbom por sbyor ba'i nyes byas su'o zhes gsungs pa yin no/ / // bam po bcu gcig pa/ brnyas pa dang bskyis pa dang gtams pa rnams bsnyon pa ni sbyor ba'o zhes bya ba ni brnyas pa dang bskyis pa dang gtams pa rnams bsnyon pa ni sbyor ba ste sbom por rig par bya'i sbyor ba'i sbyor ba nyes byas ni ma yin te/ 'dir brnog cing mi sbyin par nges na ni brkus pa nyid yin par bzhed do/ /de la brnyas pa zhes bya ba ni brnyan po khugs pa'o/ /bskyis pa zhes bya ba ni skyin pa sbyin no zhes snga shugs su thob pa'o/ /gtams pa zhes bya ba ni gtad de gzhag pa'o/ /brnogs na brkus pa yin no zhes bya ba ni/ brnyas pa la sogs pas de dag gi tshe brnog cing mi sbyin par nges pa de'i tshe na brkus pa yin no/ /gang gi tshe brku'o ma 'on te btang snyam du yid gnyis za bar gyur pa de'i tshe na ni gnas nas spo bar byed cing dngos po tshang bar yin du zin kyang sbom por 'gyur gyi/ pham par ni mi 'gyur te/ rku bar nges pa med pa'i phyir ro/ /'dir gzhung ni btsun pa dge slong gis re zhig g.yar ba bsnyon na ltung ba cir 'gyur/ nyes pa sbom por ro/ /bskyis pa bsnyon na ltung ba cir 'gyur nyes pa sbom por ro/ /de gnyis lan 'ga' mthar gyur pa yang yod de/ gang gi tshe brnogs pa na'o/ /dge slong gi thad du gzhan gyis gtams te gzhag pa de len pa'i tshe bsnyon na ltung ba cir 'gyur/ nyes pa sbom por ro/ /lan 'ga' ni mthar 'gyur te gang gi tshe brnogs pa na'o zhes gsungs pa yin no/ /gtams pa ni rnam pa gnyis te/ bdag pos mi shes par zhal ta pa nyid kyis rang gis sbas pa dang / zhal ta ba'i mngon sum du bdag po nyid kyis rang gis sbas pa'o/ /de la bdag pos mi shes par zhal ta pa rang nyid kyis rang gis sbas pa ni gang gi tshe brnogs pa de'i tshe kho na brkus par 'gyur te/ de yang mdo snga mar gtams pa zhes smos pa nyid kyis bstan pa bzhin du brjod do/ /zhal ta ba'i mngon sum du bdag po nyid kyis rang gis sbas pa ni gnas gang du gzhag pa der brnogs pa tsam gyis brkus pa kho nar mi rung ste/ 'di ltar gal te gnas nas spo bar byed pa na brkus pa yin par bstan pa'i phyir/ gtams pa sbas pa la gal te spo ba dang lhan cig tu dang spos pa'i 'og tu dang / gal te sngar na ni sbyor ba gzhan nyid do zhes bya ba smras te/ zhal ta pa'i mngon sum du bdag po nyid kyis rang gi gnas gang du gtams pa sbas pa la ni gal te zhal ta pas gnas nas spo ba dang lhan cig tu brnog par byed na ni de'i tshe kha na ma tho ba yongs su rdzogs pa yin no/ /ci ste sngar gnas nas spo bar byed la/ spos pa'i 'og tu brnog par byed na ni de ltar brnogs pa'i tshe kho na ni brkus par 'gyur ro/ /gal te gnas nas spo ba'i snga rol du sngar brnog par byed na ni de'i tshe na brnogs pa de sbyor ba gzhan nyid yin te/ sbom po gzhan tha dad gcig yin par rig par bya'o/ /de bas na brnogs pa de ni bsnyon pa las sbyor ba tha dad pa gzhan yin par rig par bya'o/ /de'i phyir gal te sngar brnog par byed la phyis bsnyon na de lta na brnogs pa de bsnyon pas bar du chod pas sbyor ba nyid de brnogs pa ni dngos gzhi'i rnam pa sbom po yin pa'i phyir ro/ /de ltar na go rims 'di la ni sbyor ba gnyis te/ brnogs pa dang bsnyon pa'o/ /ji ste sngar bsnyon par byed la phyis brnog par byed na ni de'i tshe bsnyon pa de brnogs pas bar du chod pa'i phyir sbyor ba'i sbyor ba nyid de/ bsnyon pa ni rtog pa'i sbyor ba yin ba'i phyir ro/ /brnogs pa'i tshe na ni sbyor ba nyid de sbom po'o/ /gnas nas spags pa'i tshe na ni brkus pa nyid do/ /'dir gzhung ni dge slong gi thad du gzhan gyis gtams te gzhag pa de len pa'i tshe na bsnyon na nyes pa sbom por 'gyur ro/ / lan 'ga' ni mthar yang 'gyur te/ gang gi tshe brnog bar byed cing dngos po tshang na ni mthar 'gyur ro/ /gal te mtshang na nyes pa sbom por ro/ /sngar brnog par byed cing phyis gnas nas spo bar byed na/ brnog pa'i tshe nyid na nyes pa sbom por 'gyur ro/ /ji ste sngar gnas nas spo bar byed cing phyis brnog par byed na dngos po tshang na mthar 'gyur ro/ /dngos po mtshang na nyes pa sbom por 'gyur ro zhes gsungs pa yin no/ /sgyid pa gcod pa dang gsod pa zhes bya ba 'di gnyis sngar chud gzan pa zhes mdo las smos pa'i khongs su gtogs par bstan pa'i phyir sgyid pa gcod pa dang gsod pa ni chud gzan pa yin no zhes bya ba smras te/ ba lang la sogs pa dag gi pus mo lha nga'i bar gyi thong rgyud kyi chub ni sgyid pa zhes bya'o/ /ba lang la sogs pa srog dang bral bar byed pa ni gsod pa'o/ /dgra la sogs pa'i rkyen gyis rings drags pa byung ba na ba lang la sogs pa chad pa la sogs pas bda' ba la sogs par ma nus pa dag su la yang phan par ma gyur cig ces sgyid pa gcod pa dang gsod par byed pa ni chud gzan pa yin par rig par bya ste/ de yang sngar mdo las bdag gir ma byas par sbas pa dang chud gzan pa dang zin pa btang ba la sogs pas bral bar byed na yang ngo zhes smos pa'i chud gzan pa zhes bya ba de'i khongs su 'di gnyis kyang gtogs pa nyid du rig par bya'o/ /de'i phyir 'di gnyis ni dngos po tshang du zin na yang nyes pa sbom por 'gyur gyi pham par ni mi 'gyur par shes par bya'o/ /'dir sgyid pa gcod pa zhes smos pa ni dpe tsam ste/ rtsib ma gcod pa la sogs pa gnod pa byed pa gzhan dag kyang de bzhin du rig par bya'o/ /'dir gzhung ni ji ste phan par ma gyur cig ces gsod par byed na nyes pa sbom por 'gyur ro/ /ji ste phan par ma gyur cig ces sgyid pa gcod par byed na yang nyes pa sbom por 'gyur ro zhes gsungs pa yin no/ /mtshams kyi nam mkha' las sho gam 'dral na yang sbom po'i dbang du byas pa nyid do zhes bya ba la mtshams dang 'brel pa'i nam mkha' gang yin pa de ni mtshams kyi nam mkha'o/ /de nas sho gam 'dral ba ni sho gam gzhal dgos pa'i rdzas mtshams de nas nam mkha' las sho gam gyi gnas nas 'da' bar byed pa'o/ /de ltar byed na yang sbom po'i dbang du byas pa nyid do zhes bya ba la sbom por byed pas na sbom po'i dbang du byas pa'o/ /de'i dngos po ni de nyid do/ /'di skad bstan te/ gal te dge slong sho gam gyi mtshams su phyin pas sho gam gzhal dgos pa'i rdzas lus kyi brtsal ba mda' 'phang ba la sogs pas sam/ ngag gi brtsal ba gsang sngags kyi bzlas brjod la sogs pas sam/ yid kyi brtsal ba mngon par shes pa las byung ba ma gtogs pa'i rdzu 'phrul mngon par 'du bya ba la sogs pa dag gis sho gam gyi sa nas nam mkha' las 'da' bar byed na nyes pa sbom por 'gyur ro/ /sho gam la yang ma sha ka lnga la sogs pa'i dngos por ma tshang ba de nyes pa sbom po yin no/ /gang gi tshe dge slong nam mkha' kho na la rnam par gnas pas sho gam gyi sa'i phyi rol gyi mtshams nas nam mkha' la sho gam gzhal dgos pa'i rdzas sho gam gyi sa las 'da' bar byed pa de la ltung ba med do/ /kha cig 'di skad ces zer te dge slong sho gam gyi mtshams kyi phyi rol na 'dug pas sho gam gzhal dgos pa'i rdzas sngar bstan pa'i thabs kyis nam mkha' las sho gam gyi sa las 'da' bar byed na yang nyes pa sbom por 'gyur la/ sho gam gyi mtshams kyi nang nas gal te nam mkha' las 'da' bar byed na ni de'i tshe pham par 'gyur ro zhes te/ de ni de ltar mi bzhed de rgyal po dag ni sa la dbang ba yin gyi/ nam mkha' la ma yin pas gal te mtshams su phyin par ma gyur na de'i tshe gzhal ba nyid kyang mi 'byung na ltung bar 'gyur ba 'byung re skan/ rdzu 'phrul gyis khyer ba la ni nyes pa med pa nyid do zhes bya ba ni sho gam 'dral na yang zhes bya bar sbyar ro/ /dge slong sho gam gyi mtshams kyi nang du phyin pas bsgoms pa las byung ba'i rdzu 'phrul gyis sho gam gzhal dgos pa'i rdzas nam mkha' las sam gang yang rung bas sho gam gyi sa las 'das par byed na de la ni ltung pa med de/ de la rku sems med pa'i phyir ro/ /'dir gzhung ni btsun pa dge slong gis re zhig nam mkha' las sho gam 'da' bar bgyid na ltung ba cir 'gyur/ gal te rdzu 'phrul gyi sa 'da' bar byed na ni ltung ba med do/ /ji ste rnam pa gzhan dag gis na nyes pa sbom por gsungs pa yin no/ /mtshams gzhan du yang ngo zhes bya ba ni sho gam 'dral na yang nyes pa med pa nyid do zhes bya bar sbyar ro/ /mtshams gzhan du zhes bya ba ni/ sho gam gyi mtshams gang yin pa las gzhan pa'i mtshams su ste/ der sho gam 'dral na yang nyes pa med pa nyid de/ ltung ba med do zhes bya ba'i tha tshig go/ /bsgo na nyes byas so zhes bya ba ni/ sho gam 'dral ba zhes bya bar sbyar te/ gzhan la sho gam drol cig ces bsgo ba gang yin pa de ni nyes byas yin par rig par bya'o/ /'di skad bstan te/ dge slong sho gam gyi sar phyin pa yang rung ma phyin pa yang rung bas/ gzhan dag sa der 'gro ba las bzlog par bya ba'i phyir sho gam gyi sa de nas g.yas g.yon du 'gro ba'am phyir bzlog par bsgo na/ sgo bar byed pa'i dge slong de la nyes byas su 'gyur ro/ /lam gzhan ston pa yang ngo zhes bya ba yang sho gam dral ba'i zhes bya bar sbyar te/ sho gam dral ba'i lam gzhan ston pa gang yin pa de la yang nyes byas su 'gyur ro/ /'di skad bstan te/ dge slong sho gam gyi sar phyin kyang rung ba ma phyin kyang rung ba gang gzhan dag phyir ldog par bya ba'i phyir ram g.yas g.yon du 'gro bar bya ba'i phyir 'gro ba'i ched du lam gzhan ston par byed na/ lam gzhan ston par byed pa de la nyes byas su 'gyur ro zhes bya ba'i tha tshig go/ /thabs kyis brjod pa na phra mor ro zhes bya ba ni/ bsgo ba dang lam gzhan ston pa de gnyis ka dngos su mi byed par thabs kyis brjod pa gang yin pa de ni nyes byas phra mor 'gyur bar rig par bya'o/ /thabs kyis brjod pa zhes bya ba ni zur gyi sa smra ba ste d per na 'dron pa gang dag la sho gam gzhal dgos pa'i rdzas bdog pa de dag gi dbus su dge slong gis spyir 'di skad ces gang su dag mtshan mo nam phyed na sho gam gyi gnas nas 'da' bar byed pa de dag la ni sho gam gzhal dgos pa med do zhes zer zhing 'di lta 'di ltar gyis shig ces gsal bar dngos su mi smra ba lta bu ste/ de la nyes byas phra mor 'gyur ro zhes bya ba'i tha tshig go/ /lam gol ba ni lam 'dra'o zhes bya ba ni lam gol ba ni lam dang mtshungs par rig par bya'o/ /'di skad bstan te/ dge slong sho gam gyi sar phyin pas lam nas ma 'das par sho gam gzhal dgos pa'i rdzas 'da' bar byed na ji ltar lam drang po nas 'da' bar byed pa dang 'dra bar kha na ma tho ba rdzogs par 'gyur ro/ /kha dang tshem bu ni skungs gzhan dang 'dra'o zhes bya ba ni/ ji ltar sgro ba dang da gal la sogs pa'i skungs gzhan gyis sho gam gzhal dgos pa'i rdzas rku 'am 'da' bar byed na pham par 'gyur ba la sogs pa'i nyes par 'gyur ba de bzhin du kha dang tshem bu'i nang dang bar du bcug ste rku ba 'da' bar byed pa yang dngos po ji lta ba bzhin du nyes par 'gyur te/ gzhan du ma yin no zhes 'dra bar bstan pa'i phyir mdo 'di bshad do/ /gzhan dag 'di snyam du ji ltar lus dang tshem bu la sho gam med pa bzhin du lus dang tshem bu'i nang du bcug pa'i rdzas la yang de bzhin no snyam du sems pa bzlog pa'i phyir 'dra bar bstan pa 'di brjod do/ /rku sems dang bral na mtha'i mthar thug pa nyid ma yin no zhes bya ba la/ mtha'i zhes bya ba ni/ pham par 'gyur ba la sogs pa'i'o/ /mthar thug pa nyid ma yin no zhes bya ba ni/ yongs su rdzogs pa nyid ma yin no/ /gang gi tshe zhe na de'i phyir/ rku sems dang bral na zhes bya ba smras so/ /'di skad bstan te/ rdzas gang rku ba'i sbyor ba'i gnas skabs na rku sems mngon du gyur la/ dngos gzhi'i dus na ni rku sems med par gnas nas spo ba la sogs pa byed pa na de'i tshe sbyor ba'i ltung ba nyi tshe tsam ltung bar 'gyur gyi/ dngos gzhi'i ltung bar ni mi 'gyur ro/ /sbyor ba la med na de ma byas pa nyid ma yin no zhes bya ba la/ sbyor ba la zhes bya ba ni sbyor ba'i gnas skabs la'o/ /de med na zhes bya ba ni/ rku sems de med la dngos gzhi'i dus na ni rku sems de yod na'o/ /de ma byas pa nyid ma yin no zhes bya ba ni dngos gzhi'i de ma byas pa ma yin te/ 'di ltar byas pa kho na nyid min pa'o/ /'di skad bstan te/ gal te dge slong gis rku sems med par sbyor bar byed pa la/ phyis gnas nas spo ba la sogs pa'i dus na rku sems skyed par byed na de'i tshe sbyor ba'i ltung ba nyi tshe 'byung bar mi 'gyur gyi/ dngos gzhi'i ltung ba yongs su rdzogs par 'gyur ro/ /'dir mdo de gnyis kyi gzhung ni btsun pa dge slong gis chos gos kyi gdang las chos gos len pa'i snga rol du rku sems byung la/ slad kyis rang gi 'du shes kyis len par bgyid na ltung ba cir 'gyur/ sngar ni nyes pa sbom por ro/ /phyi ma la ni ltung ba med do/ /sngar rang gi 'du shes kyis len la slad kyis rku sems kyis rku na ltung ba cir 'gyur/ sngar ni ltung ba med do/ /phyis ni nyes pa sbom por 'gyur ro zhes gsungs pa yin te/ 'dir nyes pa sbom po zhes bya ba'i tshig ni rku sems kyi yul rang gir 'du shes pa yin pa'i phyir ro/ /spring yig la sogs pa ni na smad pa med do zhes bya ba ni/ lag yig la sogs pa gang la spring yig dang po na yod pa de ni spring yig la sogs pa ste/ spring yig la sogs pas rku ba de ltung ba na smad pa med do/ /'dir gzhung ni spring yig dag dang lag yig dag dang / lag rtsis kyis rku na rin thang brtsi bar bya'o zhes bya ba la sogs pa gsungs pa yin te/ rnam pa gang yang rung bas rku na yang na smad pa med do/ /rjes su bsgrub pa'i skabs smras nas/ da ni mthar thug pa'i skabs brjod par bya ste/ nan khugs dang dngan 'then yang ma brkus pa ma yin no zhes bya ba la/ nan khugs zhes bya ba ni mthus rku ba'o/ /dngan 'then zhes bya ba ni/ rdzas khyer ba mi ster ba'o/ /de gnyis kyang ma brkus pa ma yin te/ brkus pa kho na yin no/ /de ltar yang 'dir gzhung ni btsun pa rku ba rnam pa du mchis/ nye ba 'khor drug ste/ nan khugs kyis rku ba dang / sgyu thabs kyis rku ba dang / gtams pa rku ba dang / phyir bsab pa rku ba dang / dngan 'then gyis rku ba dang / chos rku ba'o/ /btsun pa bcom ldan 'das kyis rku ba drug po de dag bka' stsal na/ de dag las du zhig gis mtha'i ltung bar 'gyur/ nye ba 'khor chos rku ba ma gtogs pa gzhan thams cad kyis mtha'i ltung bar 'gyur ro zhes gsungs pa yin no/ /de la chos rku ba la nyes pa med de rku sems med pa'i phyir ro/ /'di ltar mdo sde la sogs pa'i chos 'dzin pa'i rang bzhin ni 'dir rku ba zhes bya ba ste/ de la ni rku sems kyi kun du spyod pa med do/ /sgyu thabs kyis rku ba ni rnam pa gnyis te/ chom rkun gyis len pa dang / dor byed pa'o/ /de la chom rkun gyis len pa ni rku ba nyid de yin pas dogs par bya ba med do/ /dor byed pa ni sngar rgyan la dor byed na gal te rgyal ba nyid du ma gyur pa'i tshe sbyor ba'o zhes smras pa rku ba nyid yin no/ /gtams pa rku ba ni sngar gtams pa rnams bsnyen pa ni sbyor ba'o zhes smras pa yin no/ /phyis bsab pa rku ba ni sngar brnyas pa dang / bskyis pa zhes smras pa yin no/ /nan khugs kyis rku ba ni dbang gis mnan cing len pa ste/ de'i phyir de brkus pa ma yin no snyam du dogs pa 'ga' yang yod la dngan 'then gyis rku ba yang de mi ster ba tsam du zad kyi brkus pa ma yin no snyam du dogs pa yod pas/ dogs pa de gnyis bsal ba'i phyir mdo 'di bstan par rig par bya'o/ /gnas dang bcas pa yang ma yin no zhes bya ba ni/ ma brkus pa zhes bya bar bstan te/ rdzas gang gnas dang bcas te brkus pa de yang ma brkus pa ma yin te brkus pa kho na yin pa'o/ /'dir gzhung ni btsun pa bcom ldan 'das kyis yo byad lcib gnas nas spo bar byed na mtha'i ltung bar 'gyur ro zhes bka' stsal na/ dge slong gis yo byad lcib gnas nas ma spos par brkus na mtha'i ltung bar 'gyur ba mchis sam/ yod de gnas gang na 'dug pa de gnas dang bcas te brkus na'o zhes gsungs pa yin no/ /ci bsad na brkus pa'i mthar thug pa yin nam mthar thug pa ma yin zhe na de'i phyir/ bsad pa nyid ni brkus pa ma yin no zhes bya ba smras te/ bsad pa de ni chud gsan pa nyid yin gyi/ brkus pa ni ma yin no/ /de bas na srog gcad pa ni brkus pa ma yin no/ /gal te skad cig de nyid la 'am phyis gnas nas spo bar byed na ni de'i tshe na brkus bar 'gyur ro/ /phyogs gcig gnas nas ma 'phags pa yang ma yin no zhes bya ba ni/ do shal dang se mo do la sogs pa'i rdzas rgyud gcig la brgyus ba rku bar byed de drangs pa na phyogs 'ga' zhig gnas nas ma 'phags na yang des na phyogs gcig gnas nas ma 'phags pas brkus pa nyid ma yin te/ phyogs thams cad gnas nas 'phags na brkus pa nyid yin pa'i phyir ro/ /lhung ba ni de las khyer na brkus pa yin no zhes bya ba ni/ lhung ba rku na lhung ba de las khyer na brkus pa yin gyi/ rtsa ba dag la sogs pa 'brel ba'i gnas nas spos pas brkus pa ni ma yin te/ 'di ltar 'og gi gzhi de nas sam gos la sogs pa gzhi nyid du gnas pa gang yin pa der lhung na brkus pa yin no/ /'di skad bstan te/ 'dod pa'i gnas su lhung ba na brkus pa yin no zhes bya ba'i tha tshig go/ /'dir gzhung ni btsun pa dge slong gis shing tog dag sbrugs te brkus na ltung ba cir 'gyur/ gal te sbyor ba gcig gis ma sha ka lnga la sogs par tshang na mthar 'gyur ro/ /ma tshang na nyes pa sbom por ro zhes gsungs so/ /'dzag pa dang 'brul bar byed pa'i bu gu nas ni byung na'o zhes bya ba la/ 'dzag par byed pa'i bu gu zhes bya ba ni tsa ra ra 'dzag par byed pa'i bu gu gang yin pa ste/ dper na/ 'bru mar dang sbrang rtsi la sogs pa 'dzag par byed pa'i 'brag gi bu gu lta bu'o/ /'brul par byed pa'i bu gu zhes bya ba ni phru lu lu 'brul bar byed pa'i bu gu gang yin pa ste/ dper na mon sran sde'u dang mon sran gre'u dang gro la sogs pa 'brul bar 'gyur ba'i bang ba dang / da gal gyi bu gu lta bu'o/ /'dzag par byed pa'i bu gu dang 'brul bar byed pa'i bu gu de nas khyer bar 'dod na ni 'brag dang bang ba la sogs pa'i bu gu de nas 'dzag pa dang 'brul ba'i chos can gyi rdzas byung zhing zags pa dang / 'brul bar gyur pa gang yin pa de ni brkus pa yin no/ / rgyun la ni skad cig ma'i tshogs du ma yod pa'i phyir skad cig ma re re la rin thang brtsi bar bya'am/ 'on te rgyun gcig pa'i phyir mjug tu rin thang brtsi bar bya zhe na de'i phyir/ 'dir tha ma de tshun chad rdzas gcig pa nyid yin no zhes bya ba smras te/ bu gu nas 'byin pa 'dir byung ba tha ma de tshun chad rdzas tshoms gcig pa nyid yin no/ /chu rku ba 'di ni rang gi las kyi mtha' grub par bya ba'i phyir ma yin mod kyi/ 'on kyang khrus dang btung ba la sogs pa'i phyir te/ des na chu'i yul tha dad pa'i phyir rin thang brtsi bar bya'o/ /der ni sA lu la sogs pa'i'o/ /'dir gzhung ni btsun pa dge slong gis 'bab chu bkum ste/ chab rku na ltung ba cir 'gyur/ chu'i phung po dang po nas bzung ste/ tha ma'i bar gyi chu'i rin thang brtsi bar bya ste/ dngos po tshang na ni mthar 'gyur ro/ /ma tshang na ni nyes pa sbom por ro/ /btsun pa dge slong gis bang ba brtol te 'bru rku na ltung ba cir 'gyur/ sbyor ba gcig gis rku ba tshun chad kyi rin thang brtsi bar bya'o zhes gsungs pa yin no/ /phung po las rku na lan re re zhing blangs pa tha dad do zhes bya ba ni/ phung po las rku na blangs pa la re re zhing tha dad de ltung ba'i dngos gzhi dag kyang tha dad pa nyid do zhes bya ba'i tha tshig go/ /'dir gzhung ni btsun pa dge slong gis 'bru'i phung po las bkum ste/ 'bru rku na ltung ba cir 'gyur/ rin thang brtsi bar bya ste gal te sbyor ba gcig gis dngos po tshang na ni mthar 'gyur ro/ /gal te ma tshang na ni nyes pa sbom por ro zhes gsungs pa yin no/ /dbral bar bya ba du ma nyid yin na de'i cha so so'o zhes bya ba ni/ brkus pa tha dad do zhes bya bar sbyar ro/ 'dir gang dag gi rdzas brku bar bya ba'i rdzas kyi bdag po de dag ni 'bral bar bya ba ste/ dbral bar bya ba de dag du ma nyid yin na dbral bar bya ba re re'i skal ba gang yin pa de'i cha de dag nyid brkus pa so so ste/ dngos gzhi dang sbyor ba'i bdag nyid tha dad do/ /de bas na gcig gi skal ba'i cha ji snyed brkus pa de snyed kyi ltung ba dag 'byung bar 'gyur ro/ /rkun po dag kyang ngo zhes bya ba yang du ma nyid yin na so so'i skal ba'i cha brkus pa tha dad do zhes bya bar sbyar ro/ /gang dag gzhan gyi rdzas rku bar byed pa de dag ni rkun po rnams zhes bya ste/ de dag du ma yod de du ma nyid yin na rkun po de dag so so'i bgo skal gyi cha gang yin pa'i cha re re brkus pa tha dad par rnam par gzhag go/ /'di skad bstan te/ rkun po du ma ji snyed pa de dag so so'i skal ba'i cha ji snyed pa re re'i rin thang gis de re re la so sor ltung bar 'gyur te/ de bzhin du rkun po gnyis pa'i cha gang yin pa de'i rin thang ji tsam pas de'i ltung ba rnam par gzhag pa la sogs pa lta bu'o/ /dbral bar bya ba yang du ma nyid yin la rkun po rnams kyang du ma nyid yin na ltung ba ci lta bu yin zhe na/ dbral bar bya ba gcig gi skal ba'i cha ji tsam pa de la rkun po du ma nyid kyis bgos pa na/ rkun po gcig gi skal ba'i cha ci thob pa de'i rin thang gis rkun po gcig gi ltung ba rnam par gzhag la de bzhin du dbral bar bya ba gnyis pa'i skal ba'i cha ji tsam pa de rkun po du ma nyid kyis bgos pa na/ rkun po gnyis pa'i skal ba'i cha ci thob pa de'i rin thang gis/ rkun po gnyis pa'i ltung ba rnam par gzhag pa la sogs pa lta bu'o/ /mdo 'di gnyis kyi gzhung ni btsun pa bcom ldan 'das kyis dge slong gis ma sha ka lnga la sogs pa brkus na mthar 'gyur ro zhes gsungs pa la dge slong shin tu mang po dag gis brkus na mthar mi 'gyur ba mchis sam yod de/ skye bo mang po la nyes pa sbom por 'gyur ro/ /de bzhin du skye bo mang po rnams dang lhan cig rku na yang nyes pa sbom por ro zhes gsungs pa yin no/ /'dir skye bo mang po zhes bya ba'i tshad ni gcig gi chas dngos po tshang bar mi 'gyur ba de snyed yin par rig par bya'o/ /'di la blo gros du ma nyid yin na thob na brkus pa yin no zhes bya ba ni/ rkun po du ma nyid yin pa 'di la rkun po rnams blo gros mi mthun pa/ blo gros du ma yin na bgo skal thob na brkus pa yin gyi gnas nas spags pa na brkus pa ni ma yin no/ /'di skad bstan te/ gal te rkun po du ma blo gros gcig tu ma byas par bsam pa sna tshogs kyis bya rog dang tA la'i tshul kho nas rdzas gcig la 'dus par gyur na der gnas nas spags pas brkus par mi 'gyur gyi/ skal ba thob na brkus par 'gyur te/ phan tshun mi mthun pas rnam par gnas pa yin pa'i phyir ro/ /'dir gzhung ni btsun pa mun khrod du chos gos gzhag pa la/ dge slong bzhis rku na ltung ba cir 'gyur/ bka' stsal pa/ nyes pa sbom por ro/ /lan 'ga' mthar yang 'gyur te/ gang gi tshe cha bzhir byed cing re re'i chas kyang dngos po tshang na mthar 'gyur ro/ /ma tshang na nyes pa sbom por ro zhes gsungs pa yin no/ /ma byin par len pa'i mthar thug pa'i skabs smras zin te/ de ltar dngos po dang / bdag po dang / rjes su sgrub pa dang / mthar thug pa'i skabs de dag gis ni ma byin par len pa'i skabs dag gi cho ga rnams rig par bya'o/ /ma byin par len pa'i pham par 'gyur ba zhu ba'i skabs so zhes bya ba ni/ ma byin par len pa'i pham par 'gyur ba zhu ba'i skabs nas 'byung ba bshad zin to// //zhu ba'i skabs bstan nas/ da ni 'dul byed kyi skabs brjod par bya ste/ blang ba'i snga rol du shi ba nyid du gyur na gzhag pa nyid do zhes bya ba ni/ skal ba blang ba gnod pa bzung ba snga rol 'god pa'i tshe na gal te dge slong de shi ba nyid du gyur na gang nas de'i skal ba dbang ba de nyid du gzhag pa yin gyi/ shi ba'i yo byad nyid ma yin par rig par bya'o/ /bzlog pa ni shi ba'i yo byad nyid do zhes bya ba ni/ gal te shi ba nyid pas sngar rdzas blangs zin na de ni shi ba'i yo byad nyid yin par rig par bya'o/ /dge 'dun ni phu nu dang 'dra bas de'i ched du rku ba ni bdag gir mi byed pa ma yin no zhes bya ba ni/ dper na phu nu po nor ma bgos pa rnams nor thams cad la spyir bdag gir bya ba'i blo 'byung ba de bzhin du dge slong rnams kyang dge 'dun gyi dkor so sor bgo bar bya ba ma yin pa la mi bgo bas bdag gir bya ba'i blo skye bas/ de'i phyir gang dge 'dun gyi ched du rku bar byed pa de bdag gir mi byed pa ma yin te/ de bas na gang zag gcig gis dge 'dun gyi ched du rku bar byed na gang zag gcig po de nyid pham par 'gyur te/ dngos po tshang ba'i phyir ro/ /dge 'dun gzhan la so sor nyes par 'gyur ba ni med de/ 'dir cha ma bgos pas tha snyad du mi bya'o/ /'dir gzhung ni dge slong gnyug mar gnas pa dge 'dun zhing rmed du 'jug pa des nyen kor na khyim bdag gi zhing 'dug pa yang rmed du bcug pa dang / khyim bdag 'ongs te smras pa/ btsun pa ci'i phyir bdag gi zhing 'di rmed du bcug /smras pa/ 'di khyod kyi ma yin gyi/ dge 'dun gyi zhing yin no/ /smras pa/ btsun pa kho bos mi ma yin pa'i che bzhi bstan par bya'o zhes bya ba nas/ bcom ldan 'das kyis bka' stsal pa/ gal te dngos po tshang na pham par 'gyur ro zhes bya ba'i bar du gsungs pa yin no/ /bdag po tha dad pa ma yin pa ni rang gi dang 'dra'o zhes bya ba ni/ /gnas gang du sbyin bdag gis zangs la sogs pa'i rdzas byin par gyur la gal te dge slong gis rku sems kyis rdzas de dag gnas nas gnas gzhan du spo bar byed cing gnas de gnyis na sde pa tha dad pa la sogs pas bdag po tha dad pa med na/ de'i tshe brkus pa de rang gi dang 'dra bar rig par bya ste/ ji ltar rang gi rdzas rku sems kyis blangs na sbom por 'gyur ba bzhin du/ 'dir yang de bzhin no zhes bya ba'i tha tshig go/ /gal te dge slong de gnas gang nas dge 'dun gyi rdzas len par byed pa de la bdag po nyid ma yin la/ dge slong de gnas gang du dge 'dun gyi don du sbyin par byed pa de na bdag po nyid yin na ni/ de'i tshe dngos po tshang na pham par 'gyur ro/ /gal te ma tshang na ni sbom por 'gyur te/ de yang bdag po tha dad pa las 'gyur ro/ /'dir gzhung ni dge slong gnyug mar gnas pas phyogs bzhi'i dge 'dun gyi dkor rku sems kyis gnas nas gnas gzhan du spos pa dang / de 'gyod pa skyes nas bcom ldan 'das kyis bka' stsal pa/ pham par ni mi 'gyur ro/ /nyes pa sbom por 'gyur ro zhes gsungs pa yin no/ /phyir log gam mi blang bar nges pa ni lhag ma rnams kyis brkus pa ni de'i yan lag nyid ma yin no zhes bya ba ni/ gang gi tshe rkun po mang po'i tshogs rku ba'i ched du zhugs pa na gal te dge slong de de'i nang nas phyir log ste/ lam gzhan du 'gro 'am yang na der 'gror zin kyang gal te mi blang bar nges pa ma byin par blang bar mi bya'o zhes nges par byed na der rkun po lhag ma rnams kyis brkus pa ni dge slong de phyir ldog gam mi blang bar nges pa na rku ba de'i yan lag nyid mi yin te/ rkun po rnams dang lhan cig bya ba med pa'i phyir ro/ /dang po zhugs pa'i dus na sbyor ba'i sbyor ba zhes bya ba'i nyes byas su rig par bya'o/ / cha bdag gir bya bar 'dod pa ni mi blang ba'i bsam pa ma yin no zhes bya ba ni ma byin par ni mi blang ngo / /bgo skal gyi cha ni bdag gir bya'o/ /cha bdag gir bya bar 'dod pa de lta bu'i bdag gir bya bar 'dod pa gang yin pas de'i grogs su 'gro ba'i dge slong de'i bsam pa de ni mi blang ba'i bsam pa ma yin te/ 'di ltar blang ba'i bsam pa kho na yin no/ /'di skad bstan te/ gal te cha len cing dngos po yang tshang na pham pa kho nar 'gyur ro/ /der gtogs pa'i las rjes su sgrub pa ni de'i ma yin no zhes bya ba ni/ /rkun po bya ba der gtogs pa'i las la srung ba la sogs pa dag rjes su sgrub pa ni rku ba de'i rjes su sgrub pa ma yin pa ma yin te yin pa kho na'o/ /lhan cig gnas pa nyid dang nye gnas nyid kyang brkus par mi 'gyur ba'i rgyu ma yin no zhes bya ba ni/ lhan cig gnas pa nyid dang nye gnas nyid brkus pa yang brkus pa'i nyes par mi 'gyur ba'i rgyu ma yin te/ 'dir brkus pa kho nar 'gyur ba'o/ /'di skad bstan te/ gal te rkun po rnams kyis la la'i lhan cig gnas pa nyid dang / nye gnas nyid brkus te bdag gir byas shing dbang ba'i dngos po bsgrubs par gyur pa las phyis mkhan po'am slob dpon des lhan cig gnas pa dang / nye gnas de dbang du byas shing rkun po dag las rku thabs sam nan khugs kyis phyir 'phrog par byed na de'i tshe lhan cig gnas pa nyid dang nye gnas nyid kyang brkus par 'gyur ba'i rgyu yin no/ /yongs su bskor ba la mtshams nyid gtso bo'o zhes bya ba ni/ sngar yongs su bskor bas rku ba las mtshams 'byor na brkus pa'o zhes gang smras pa la/ 'dir ni yongs su bskor ba zhes bya ba smos pa mtshams gtso bor rig par bya'o/ /rib mas bcad pa la sogs pa'i yongs su bskor ba la ni mi bya'o/ /mtshams na gnas pa spos pa yang 'dis ma bsdus pa ma yin no zhes bya ba ni/ gang gi phyir yongs su bskor ba la mtshams gtso bo nyid yin pa de'i phyir/ zla dang bdag gis sa mtshams su sa brkos te/ phur ba btab pa la sogs pa mtshams gnas pa spos pa de yang yongs su bskor ba zhes bya ba 'dis ma bsdus pa ma yin te/ 'di ltar bsdus pa kho na'o/ /'di skad bstan te/ mtshams gnas pa spos pa yang 'dir yongs su bskor ba rku ba'i rku ba nyid kyis bsdus par shes par bya'o/ /mngon sum du blangs pa yang mi snang ba nyid na brkus pa yin no zhes bya ba la/ mngon sum zhes bya ba ni/ mngon du gyur pa ste/ mig la sogs pa'i dbang po dag la gang gi tshe snang bar gyur pa ni mngon sum nyid ces bya'o/ /des blangs pa ni khyer ba ste/ de ni mngon sum du blangs pa ste/ mngon sum du brkus zhes bya bar bsam pa'o/ 'dir ni rdzas de nyid bdag po'i mig snga nas mi snang ba nyid na brkus pa yin gyi phyi bzhin 'brang ba dang / sgrub par byed pa gnyis mi snang bar 'gyur ba 'ba' zhig na brkus par 'gyur ba ni ma yin no/ /'dir gzhung ni dge slong gis be'u ras 'tshong ba bag med par 'gyur ba las be'u ras brkus te/ des de khyer te 'gro ba na be'u ras 'tshong ba des mthong nas des dge slong de la smras pa/ be'u ras ma dbrog shig /dge slong gis smras pa/ bstan la khyer te 'ong bar bya'o/ /de 'gyod pa skyes nas/ bcom ldan 'das kyis bka' stsal pa/ pham pa'i ltung bar ni mi 'gyur ro/ /nyes pa sbom por 'gyur ro zhes gsungs pa yin no/ /mi mthus brkus pa ni dbang du byas pa nyid na'o zhes bya ba ni/ mi mthus bzung ste brkus pa ni nam bag phebs shing dbang du byas pa nyid na brkus pa yin no/ /'dir mi zhes smos pa'i sgra 'di ni rigs la bsnyegs pas de na skyes pa 'ba' zhig tu ma zad kyi/ bud med la sogs pa mthus brkus pa yang nyes pa 'dra'o/ /dbang du byas pa nyid ces bya ba ni rjes su mthun par gyur pa'i gnas skabs la bya'o/ /de bdag nyid ni ma yin no zhes bya ba ni/ dge slong bdag nyid rkun po gzhan dag gis brkus pa na dge slong gis 'jigs pa la sogs pas bdag nyid dbang du byas te/ rku thabs kyis thar par byas pa de la ni brkus pa med par shes par bya'o/ / 'dir gzhung ni bdag nyid la brkus pa med do zhes gsungs pa yin no/ /gang bsams pa de dang 'brel pas ma bsams pa blangs pa ni brkus pa ma yin no zhes bya ba ni/ gang rku ba la gang bsams pa'i dngos po rku bar 'dod pa de dang / 'brel pa zhes bya ba ma bsams pa'i dngos po dang 'brel pas ma bsams pa'i dngos po rku bar mi 'dod pa blangs pa ni de brkus pa ma yin par rig par bya'o/ /'dir gzhung ni dge slong gis ras sbyar ma ma byin par blangs nas des de brkus te bar phye ba dang / de'i bar nas dar rin thang chen po byung nas de 'gyod pa skyes pa dang / bcom ldan 'das kyis bka' stsal pa/ ras sbyar ma'i rin thang brtsi bar bya'o zhes gsungs pa yin no/ /'dir dar rin thang chen po ni rku bar ma bsams pas de las ltung bar mi 'gyur ro/ /sbom po ni gang gis gang len pa de de'i rnam par gzhag pa la gzhan gyir rku ba'o zhes bya ba la/ sbom po ni zhes bya ba'i tshig de dang por smos pa ni dbang du bya ba nyid bstan pa'i phyir ro/ /gang zag gang gis dngos po gang len pa'i dngos po de gang zag de yir gyur cig /ces rkun po rnams kyis rnam par gzhag pa'i khrims su byas pa la dge slong gis gzhan gyir rku ba zhes bya ba gzhan gyi ched du rku ba na de lta na sbom po'o/ /'di skad bstan te/ gal te rkun po mang po dag sngar bstan pa'i rnam par gzhag pas gzhan gyi rdzas rku ba na dge slong yang der 'gro zhing gzhan gyi grogs kyi ched du yin gyi/ bdag gi ched du ni ma yin par gzhan gyi ched du rdzas rku bar byed cing bdag nyid kyis bdag gir bya ba'i bsam pas ni ma yin la/ de'i tshe sbom po ste/ 'di ni sngar gzhan gyi don nyid du yang dngos gzhi'i rnam pa'o zhes smos pa de'i spros pa'i yul bstan pa'i phyir ro/ /yongs su 'dzin pa dang bcas pa'i dur khrod nas len pa'o zhes bya ba ni/ yongs su 'dzin pa dang bcas pa'i dur khrod nas rku sems kyis gos la sogs pa rku na sbom por 'gyur ba'o/ /dur khrod kyis yongs su 'dzin pa dang bcas pa ni rnam pa gnyis te/ bdag nyid kyis bdag gir byas pa dur khrod 'di thams cad bdag gi'o zhes bdag pos bdag gir byas pa gang yin pa de brkus na ni pham par 'gyur ro/ /gzhan yang bsad pa'i gshed ma la sogs pas 'thob pa nyid kyis bdag gir byas pa gang yin pa de brkus na sbom por 'gyur ro/ /'di ltar dur khrod kyi rdzas de dag la bdag po ni med mod kyi/ 'on kyang bkren pa la sogs pas 'di bdag gis 'thob po snyam du de la bdag gir bya ba'i blo skye ba de gal te dge slong gis rku sems kyis len na de'i tshe sbom por 'gyur ro/ /rtsa ba'i ldum zhing dang sdong bu dang lo ma dang me tog dang 'bras bu'i kun dga' ra ba la sogs pa gsang sngags dag gis skams par byed pa'o zhes bya ba'i rtsa ba la phug la sogs pa'i ldum zhing dang sdong bu la sogs pa'i kun dga' ra ba gsang sngags dag gis skams par byed na sbom por 'gyur ba'o/ / sngar yang sbed pa dang chud gson pa zhes smos pa'i chud gson pa zhes bya bas chud gzon pa bstan mod kyi/ 'on kyang 'dir gsang sngags dag gis chud gzon pas chud gzon pa de bstan pa'i phyir yang rnam pa gzhan bstan pa yin no/ /chas kyis brngod pas rta bkri ba dang zhon te 'di brku bar bya'o snyam nas lus 'gyur ba'o zhes bya ba ni dge slong gis rtswa la sogs pa'i chas kyis brngod pas rta 'di bkri zhing brku bar bya'o snyam nas de ltar rnam pa des rta 'di brku bar bya'o snyam du sems shing myur du gom pa 'dor ba la sogs pa'i lus 'gyur bar byed na sbom po'o/ / de bzhin du zhon te rta 'di brku bar bya'o snyam nas de ltar sems shing lus g.yo ba la sogs pas lus 'gyur ba yang sbom por 'gyur ba'o/ /gru yang ngo zhes bya ba yang dge slong gis gru 'dir zhugs te 'di brku bar bya'o snyam du sems shing lus 'gyur bar byed na sbom por 'gyur ba'o/ /'di las 'di ltar bya'o snyam pa yang ngo zhes bya ba ni/ sngar 'di zhes smos pa'i tshig gi gnas su 'dir 'di las zhes bya ba'i tshig bcug pa'o/ /de ltar na 'dir tshig gi don 'di 'byung ste/ rta 'di las sam gru 'di las 'di ltar rku'o snyam nas lus 'gyur ba yang sbom po'o/ /'dir gzhung ni dge slong gru rin po ches bkang ba rgal bar byed pa des 'di las 'di ltar brku bar bya'o snyam nas der lus 'gyur ba byas nas/ de 'gyod pa skyes nas/ bcom ldan 'das kyis bka' stsal pa/ pham par ni mi 'gyur te/ nyes pa sbom por 'gyur ro zhes gsungs pa yin no/ /tshig de ni 'thob par nges pa'i mngon par spro bas lus 'gyur bar byed pa'o/ /pha ma dang phu nu dang bu sring dang mkhan po dang slob dpon dang mchod rten dang dge 'dun la sogs pa la bsngos pa sho gam gzhal dgos pa bzlas pa'o zhes bya ba ni/ pha ma la sogs pa de dag la bdag gi dar la sogs pa sho gam gzhal dgos pa 'di dbul lo zhes bsngos pa'i brnag pa bskyed nas sho gam gyi gnas nas sho gam gzhal dgos pa'i sho gam ma byin par 'da' bar byed na sbom por 'gyur ba ste/ 'di yang sngar gzhan gyi don nyid du yang dngos gzhi'i rnam pa'o zhes smos pa de'i spros pa'i yul bstan pa'i phyir ro/ /brnyas pa dang bskyis pa dag mi sbyin par sems pa'o zhes bya ba ni/ brnyas pa'i yul dang bskyis pa'i yul la gal te dge slong gis phyir mi sbyin no snyam du sems par byed cing brnyas pa dang bskyis pa'i dngos po 'di mi sbyin no snyam du de gnyis brnogs pa'i sems bskyed na sbom por 'gyur ba'o/ /brnyas pa dang bskyis pa brnogs pa dang bsnyon pa gnyis kyang sbom po yin te/ mi sbyin par sems pa 'ba' zhig tu ma zad do/ /gzhan gyi don du byin pa 'god pa yang ngo zhes bya ba ni/ yon bdag gis dge 'dun la chos ston la sogs pa'i don du rdzas dge slong dag gi lag tu sbyin pa gal te dge slong de dag gis rdzas de dge 'dun gyi mchod ston la sogs par ma spyad par dge 'dun la bcabs te bgos na de'i tshe dge slong de dag la sbom por 'gyur te/ dge 'dun gyis ma tshor bas de la bdag gir bya ba'i sems ma skyes pa'i phyir de la sbom por gzhag go/ /yongs su ma bzung ba la yongs su bzung bar 'du shes pa'o zhes bya ba ni/ dngos po gang sus kyang yongs su ma bzung ba la/ gal te dge slong gis gzhan gyis yongs su bzung bar 'du shes pas rku na de'i tshe nyes pa sbom por 'gyur ba'o/ /yan lag gcig ma tshang ba'i phyir sbom po ste/ 'di ltar mi'i rgyud kyis yongs su bzung ba nyid ces bya ba'i yan lag de 'di la med pa'i phyir ro/ /zan dron dang 'bras chan dang phye dang nya sha dang sha dang khur ba la sogs pa'i bsod snyoms gzhi med pa nod pa'o zhes bya ba ni/ zan dron la sogs pa'i bsod snyoms gzhi med pa mi dbang ba nod na sbom por 'gyur ba'o/ /gzhi med pa zhes bya ba ni mi dbang ba'o/ /'dir gzhung ni dge slong gis bsod snyoms 'bras chan gzhi med pa blangs nas de 'gyod pa skyes pa dang / bcom ldan 'das kyis bka' stsal pa/ pham par mi 'gyur te nyes pa sbom por 'gyur ro zhes gsungs pa yin no/ /bsod snyoms 'bras chan la ji lta ba bzhin du/ bsod snyoms phye la sogs pa la yang de bzhin du rig par bya'o/ /gzhan gyis blangs par mi shes pa ni gzhi med pa nyid ma yin no zhes bya ba la gzhan gyi blangs par mi shes pa na rang gi don tam gzhan gyi don gyis bsod snyoms la sogs pa mi dbang ba len na bsod snyoms de gzhi med pa ma yin no/ /'di skad bstan te/ gang du dge slong gi skal ba dge slong gzhan gyis blangs la des kyang mi shes nas/ gal te yang rang gi don du len na de gzhi med pa nyid ma yin no/ /de bzhin du gzhan gyi skal ba dge slong gzhan gyis blangs pa la yang de nyid kyi skal ba gzhan gyis len na de la yang nyes pa med do/ /ma bcol bas ma yin no zhes bya ba ni/ gal te dge slong gis bdag la dge slong 'gas kyang skal ba mnod pa'i phyir kho bo'i skal ba khyod kyis long shig ces ma bcol la 'on kyang ma bcol ba'i dge slong des bdag por gyur pa'i dge slong de'i mi dbang ba'i skal ba mnos na bdag por gyur pa de la ni gzhi nyid med pa ma yin te/ rang gis ma blangs pa'i phyir dang / gzhan la yang ma bcol ba'i phyir ro/ /gzhan dag ni mdo 'di'i don 'di skad gzhan du brjod de/ ma bcol bar dge slong gis gzhan gyi don du mi dbang ba gang yin pa de la dbang ba'i blos blangs na de la gzhi med pa nyid ma yin par shes par bya'o zhes zer ro/ /de ltar yang gzhung snang ste/ ko sa la'i ljongs dag na dge 'dun gyi zan 'god pa na dge slong gnyug mar gnas pa zhig grong gzhan du song nas de'i smos 'drin gyi dge slong des de'i zan mnos nas de 'ongs pa na khyod kyi zan kho bos mnos so zhes brjod pa dang / dge slong des smras pa/ khyod kyis ci'i phyir kho bo'i zan ma bcol bar mnos/ dge slong de 'gyod pa skyes pa dang / bcom ldan 'das kyis bka' stsal pa/ nyes pa med de 'on kyang ma bcol bar blang bar mi bya'o zhes gsungs pa yin no/ /mgron du ma bos par zan za na nyes byas so zhes bya ba ni/ dge slong mgron du ma bos par sbyin bdag gi zan za na nyes byas so/ /mgron du ma bos pa'i rnyed pa ni rnam pa gnyis te/ brgya la bdag pos shes te 'di bdag gis mgron du ni ma bos mod kyi/ 'on kyang sbyin no snyam pa dang mi shes par sbyin par byed pa ste/ 'di ltar phyogs de gnyi ga la nyes byas nyid de/ de yang rabs kyi tshul ma yin pa'i phyir ro/ /ma byin pa ma yin pa'i phyir dang / rku sems nyid med pa'i phyir pham par yang mi 'gyur la sbom por yang mi 'gyur ro/ /'di la kha cig pham par 'gyur ba smras te/ de dag gis ni legs par ma brtags so/ /de ltar yang gzhung 'di yin te/ dge slong gis mgron du ma bos par zan zos nas 'gyod pa skyes pa dang / bcom ldan 'das kyis bka' stsal pa/ pham par mi 'gyur te nyes byas su 'gyur ro zhes gsungs pa yin no/ /'di la ni gdon mi za bar rku sems med pa kho nar khas blang bar bya ste/ sbyin pa po rang kho nas sbyin par byed pas de la rku sems gang las 'byung / gal te yon zong la sogs pa thob tu zin kyang nyes byas kho na ste/ dam pa'i spyod pa ma yin pa'i phyir ro/ /rku ba'i ched du 'gro ba yang ngo zhes bya ba ni/ rkun po bya ba'i phyir 'gro ba yang nyes byas su 'gyur ro zhes bya ba'i tha tshig go/ / 'o na mdo 'di brtsam par bya mi dgos te/ sbyor ba'i sbyor ba nyid do zhes bya bas 'di rtogs pa'i phyir ro zhe na/ bden mod 'on kyang mdo 'og ma'i yul bstan pa'i phyir 'di brtsams te/ gal te mdo 'di ma byas su zin na de'i tshe mdo 'og ma nyid gang las tha dad pa nyid ma yin pa mi shes par 'gyur ro/ /de las gros byed pa tha dad pa nyid ma yin no zhes bya ba ni/ rku ba'i ched du 'gro ba zhes bya ba de las gros byed pa zhes bya ba 'di tha dad pa nyid ma yin te/ de nyid kyi khongs su gtogs pa'i phyir ro/ /'di skad bstan te/ 'gro ba'i sngon rol du gros byed pa gang yin pa ci der 'dong ngam 'on te mi 'dong zhes ngag gi las byed pa dang / lag pa rkyong ba dang / mgo bsgyur ba la sogs pa thams cad de'i khongs su gtogs pas de la nyes byas tha dad par mi 'gyur te/ 'di ltar gros byed pa nas brtsams te/ nom par byed pa'i snga rol tshun chad la nyes byas gcig kho nar rig par bya'o/ /kun du bzung ba ma yin nam zhes legs par so sor brtag par bya ste blang bar bya'o zhes bya ba ni/ phyag dar khrod la sogs pa dag ci nas kyang kun du bzung ba ma yin nam zhes 'di gzhan dag gis yongs su bzung ba ma yin nam zhes bya ba de ltar legs par so sor brtag par bya ste/ sus kyang yongs su bzung ba ma yin par bsam pa brtan par gyur na blang bar bya'o/ /de ltar byas na rang yang 'gyod pa mi skye la/ gzhan gyi tshig gi skabs kyang med par 'gyur ro/ /lus bsnyal bar mi bya'o zhes bya ba la/ lus bsgyel cing bsnyal ba ni lus bsnyal ba ste/ rnam par 'khrugs par gyur pas lus bsnyal bar mi bya'o/ /'di ni dge slong gis zhing rmed pa'i mdun du bdag nyid 'gyel te nyal ba dang / bcom ldan 'das kyis dge slong gis lus bsgyur ba'i rnam pa de lta bu mi bya'o zhes gsungs pa gang yin pa de bsdus pa yin no/ /tshang gzhig par mi bya'o zhes bya ba ni bye'u dang phug ron la sogs pa'i tshang gnas pa dge slong gis gzhig par mi bya'o/ /sgo nga med pa gang dag yin pa de dag gzhig par bya'o zhes gsungs pa ni dge slong gi gnas su'o/ /mdo 'di ni dmigs kyis bsal ba dang bcas pa yin te/ des na 'di skad bstan te/ dge slong dag gi gnas ma gtogs pa gzhan du sgo nga med pa'i tshang gzhig par mi bya'o/ /mi gnas pa der chos gos kyi cha mi blang ngo zhes bya ba ni/ dge slong gtsug lag khang du dbyar ma gnas pa'i gtsug lag khang der dbyar gyi rnyed pa'i chos gos kyi cha mi blang ba'o/ /'di skad bstan te/ dge slong gang du ma gnas pa'i gtsug lag khang de nas chos gos kyi rnyed pa mi blang ngo zhes bya ba'i tha tshig go/ /'dir gzhung ni dge slong gis dbyar gzhan du gnas la gzhan du dbyar gyi so so'i cha blang bar mi bya'o zhes gsungs pa yin no/ /'dir dbyar gyi zhes smos pa ni mtshon pa ste/ gzhan du yang rnyed pa mi dbang ba blang ba dgag pa de bzhin no/ /chom rkun pa las sbyin bdag gi sems kyis lan pa la nyes pa med do zhes bya ba la/ chom rkun pa zhes bya ba ni/ rku 'phrog byed pa ste/ chom rkun pa rkun po la sogs pa de las byin pa blang ba gang yin pa de la 'di ni sbyin bdag go snyam pa'i sems kyis len na de la nyes pa med de/ rdzas 'di'i bdag po ni 'di nyid yin no zhes bya ba'i dbang du byas pa'i phyir ro/ /'ong ba rku thabs can gyi chom rkun par ma grags pa las blang bar mi bya'o zhes bya ba la/ de 'ong ba rku thabs can yang yin la chom rkun pa yang yin pas/ 'ong ba rku thabs can gyi chom rkun pa'o/ /'ong ba rku thabs can gyi chom rkun pa de ni chom rkun par ma grags pa de las chos gos la sogs pa rnyed pa dang lhung bzed kyang blang bar mi bya'o zhes bya bar sbyar ro/ /chom rkun par ma grags pa'i chom rkun pa ni 'ong ba rku thabs can gyi chom rkun pa yin par shes par bya ste/ 'di ltar chom rkun par ma grags pa de las chos gos la sogs pa'i rdzas 'ong ba 'byung ba ni gang nas kyang 'ong ba mi shes te/ 'ong ba de rku thabs can du gyur pa'i phyir te/ mi tshor ba'i rang bzhin can yin pa'i phyir ro zhes bya ba'i tha tshig go/ /chom rkun pa gud la 'ong ba rku thabs can mkhyud bu yod pa de ni 'ong ba rku thabs can te/ 'ong ba rku thabs can de yang chom rkun pa yin no/ /'di ltar 'dul byed dag la bcom ldan 'das kyis 'ong ba rku thabs can gyi chom rkun pa las chos gos blang bar mi bya'o zhes gsungs pa'i tshig de nyid rnam par bshad par mi bya ba'i phyir 'dir mdo byed pas ma grags pa zhes bya ba smos te/ de bas na zlos pa'i nyes par yang mi 'gyur ro/ /de ltar na 'dir tshig gi don 'di 'byung ste/ 'ong ba rku thabs can gyi chom rkun pa las chos gos la sogs pa blang bar mi bya bar gang las chos gos la sogs pa 'ong ba ni 'jig rten na grags par gyur pa de las blang bar bya ste/ grags par gyur pa las chos gos la sogs pa 'ong ba ni 'jig rten na grags pa yin gyi/ gzhan gyi ni ma yin no/ /de las blangs pa mtshon gyis bcad pa dang / kha dog ngan par byas te bcang par bya'o zhes bya ba ni/ grags pa de las chos gos la sogs pa gang blangs pa gri la sogs pa'i mtshon gyis kha tshar dang phun tshar btogs pa la sogs pa gcad pa dang / kha bsgyur ba la sogs pas kha dog ngan par bya ba de byas te bsrel zhing bcang bar bya'o zhes bya ba'i tha tshig go/ /de ltar byas kyang slong na sbyin no zhes bya ba ni mtshon gyis gcad pa dang / kha dog ngan par byas pa de ltar byas kyang sngon bdag po gzhan zhig na re 'di bdag gi rdzas sngon gyi chom rkun par grags pas khyer pa yin pas bdag la byin cig ces slong na dge slong gis sbyin no/ /'di skad bstan te/ de gang las phrogs pa'i bdag po de gal te 'di bdag gi yin no zhes slong na de de la sbyin par bya'o zhes bya ba'i tha tshig go/ /gnad la bsgre bar bya'o zhes bya ba la 'dir gnad la bsgre bar zhes bya ba ni yon po dang gya gyu'i rnam pas gnod par bya ba la bya ste/ de su la yang mi bya'o zhes bya ba'i tha tshig go/ /tshe dang ldan pa spong byed kyis bzod par bya ba'i phyir khyim pa rnams kyis 'phags pa kun dga' bo la khye'u dang bu mo ngu ba dag sdud du bcug ste/ gnod par byed pa gang yin pa lta bu ste/ de thams cad du sbyar bar bya ba yin par snang bas thams cad kyi dbang du byas so/ /ma byin par len pa la yang 'di sbyar ba yod de/ gnad la bsgre bas gtong ba dang sbyin du 'jug pa na brkus par 'gyur ba'o/ /gsang sngags dag gis gtong ba la nyes pa med do zhes bya ba ni/ rdzu 'phrul dang 'dra ba'i yid rnam par dag pas/ gzhan gyis phrogs pa'i rdzas gtong bar byed pa la ni nyes par mi 'gyur ro/ /byi bas khyer ba bdag pos blangs pa la yang ngo zhes bya ba ni/ dge slong len pa po gang yin pa de'i rdzas byi bas khyer ba phyir blangs pa la yang nyes pa med de/ 'di bdag gi yin no snyam pa'i bsam pa des len pa la nyes pa med do/ /dge slong gzhan gyi rdzas la de'i rdzas su na yang ngo zhes bya ba ni/ dge slong gzhan gyi rdzas byi bas khyer bar gyur pa'i rdzas de dge slong gzhan gyis dge slong gzhan gyi rdzas yin gyi/ bdag gi rdzas ni ma yin no zhes de'i rdzas su len par byed pa de la yang nyes pa med de rku sems med pa'i phyir ro/ /rngon pa dag gis mngon par gtses par gyur pa'i ri dgas gnas khang du zhugs pa blangs pa la yang ngo zhes bya ba ni/ gal te rngon pa dag ri dgas la 'tshe bar byed cing ri dgas de yang gnas khang du 'jug na rngon pa de dag gis mngon par gtses pa'i ri dgas gnas khang du zhugs pa bzung zhing blangs pa la nyes pa med de/ yongs su bskyab pa'i bsam pas bzung ba'i phyir ro/ /khyad par de lta bu can gyi ri dgas de shi na ji ltar bya zhe na de'i phyir/ de shi na de dag la sbyin par bya ba nyid do zhes bya ba smras te/ de dag gis gtses pa'i ri dgas der yang zhugs nas shi na shi ba de de dag la sbyin par bya ba nyid do/ /de dag rang gis blang ba nyid du mi bya'o/ /gzhan dag la yang sbyin par mi bya ba nyid do/ /ma byin par len pa'i pham par 'gyur ba 'dul byed kyi skabs dag go zhes bya ba 'dul byed kyi skabs rdzogs so/ /ma byin par len pa'i pham par 'gyur ba rdzogs so zhes bya ba de bshad zin to// // ma byin par len pa'i pham par 'gyur ba smras nas/ da ni gsod pa'i pham par 'gyur ba brjod par bya ste/ de'i phyir nad pa la 'chi ba'i sems pa dang rjes su mthun pa'i nye bar bsgrub pa nye bar bsgrub par mi bya'o zhes bya ba smras te/ 'chi ba'i phyir sems pa ni/ 'chi ba'i sems pa'o/ /de dang rjes su mthun pa ni mthun pa'o/ /de'i nye bar bsgrub pa ni tshogs pa'i bye brag gang yin pa'o/ /de nye bar bsgrub par mi bya ba ni nad pa la de bstabs par mi bya ba'o/ /nad pa smos pa ni mtshon pa ste/ mi na ba la yang nye bar bsgrub par mi bya'o/ / 'di skad bstan te/ nye bar bsgrub pa gang gis nad pa 'chi ba'i bsam pa skye bar 'gyur ba'i nye bar bsgrub par gyur pa/ khyod du gzos par gyur pa ni bla'i/ 'di lta bu'i mi 'phrod pa za bar byed pa ni de lta ma yin no zhes bya ba la sogs pa de nye bar bsgrub par mi bya ste/ 'di ni bsam pa'i nyes pa med pa'i nyes byas su rnam par gzhag pa yin no/ /bsam pa'i nyes pa kye ma 'di shi bar gyur cig snyam na ni de'i tshe sbom por rnam par gzhag go/ /mi shes pa la 'chi ba'i dgra bo ma smras par/ de'i nad g.yog tu mi bzhag go zhes bya ba ni/ nad g.yog mi shes pa glen pa mi shes pa la nad pa 'chi ba'i dgra bo mi 'chi bar bya ba'i thabs 'di skad brjod par bya ba khyod kyis 'di 'chi ba la dgra bos gnas par bya ste/ gal te rang nyid 'chi bar 'dod na khyod kyis yal bar dor bar mi bya'o/ /grogs kyang ma byed cig ces ma smras par nad pa de'i drung du nad g.yog tu mi gzhag go zhes bya ba'i tha tshig go/ /gnas yod na mi gzhag go zhes bya ba ni/ gal te gnas gzhan yod de ji ste nad g.yog mdzangs pa gzhag pa'i skabs yod na ni de'i tshe mi shes pa la go bar byas su zin kyang gzhag par mi bya ste/ mdzangs pa yod pa'i phyir ro/ /'chi ba'i 'tshog chas mi gzhag go zhes bya ba ni/ 'chi ba'i 'tshog chas mtshon cha la sogs pa nad g.yog gis nad pa'i drung du mi gzhag go/ /'chi ba'i phyir rjes su sgrub pa las nad g.yog gis bzlog par bya'o zhes bya ba ni/ nad pa de 'chi ba'i phyir rjes su bsgrub pa dug za ba dang thag pas 'ching ba dang / mtshon 'byin pa la sogs pa las nad g.yog gis bzlog par bya'o/ /rdzas kyi phyir gzhan shi bar 'dod par mi bya'o zhes bya ba ni lhung bzed dang chos gos la sogs pa'i rdzas thob par bya ba'i phyir sems can gzhan 'chi bar mngon par dga' bar mi bya'o/ /bya ba ma yin pa byed pa la sems kyis rjes su yi rang bar mi bya'o zhes bya ba ni/ bya ba ma yin pa mngal na gnas pa rlugs par bya ba la sogs pa'i byed pa ni bya ba ma yin pa ste bya ba ma yin pa byed pa de la sems kyis rjes su yi rang bar mi bya'o/ /lus dang ngag gi 'jug pa'i sngon du 'gro ba ni sems yin pa'i phyir de bkag pas lus dang ngag kyang bkag par grub pa yin no/ /de ltar na 'dir tshig gi don 'di 'byung ste/ rab tu byung bas bya ba ma yin pa mngal na gnas pa rlugs par bya ba la sogs pa gang yin pa'i dngos po de dag gzhan gyis da ltar dang 'das pa dang ma 'ongs pa'i rjes su bsgrub pa la sogs pa la yi rang ba sems kyis zhes bya ba ni mtshon pa tsam ste/ lus dang ngag gis yi rang ba de yang dge slong gis mi bya'o zhes bya ba'i tha tshig go/ /gzhung kha cig las tshe dang ldan pa nye sde'i dbang du mdzad de gsungs pa nye sde khyod kyis mngal na gnas pa rlugs par byas pa bden nam/ btsun pa mad lags te/ 'di ltar bdag gis rjes su yi rang bar ni bgyis so/ /bka' stsal pa/ dge slong dag dge slong nye sde la ltung ba med de/ dge slong gis mngal na gnas pa rlugs par mi bya'o/ /dge slong gis mngal na gnas pa rlugs par byed na 'gal tshabs can du 'gyur ro zhes gsungs te/ gzhan yang rab tu byung bas bya ba ma yin pa ci yang rung ba thams cad bsdus te/ spyir mdo 'di byas so/ /skabs 'byung ba smras nas/ de ni gsod pa'i pham par 'gyur ba brjod par bya ste/ gang byas nas gsod pa'i pham par 'gyur zhe na de'i phyir/ srog gcad na'o zhes bya ba smras te/ srog gi skad cig ma 'ongs pa rnams gcad pa ni skye ba 'gags pa'i bya ba gsod pa zhes bya ba de byas na pham par 'gyur ro zhes bya ba'i tha tshig go/ /bsam pa ji lta bus she na de'i phyir de ltar bsams pas so zhes bya ba smras te/ srog gcad par bsams pa'i sems kyis zhes bya ba'i tha tshig ste/ gzhan gyis kyang srid pa'i phyir ro/ /gang gi srog gcad zhe na de'i phyir/ mir gyur pa'i'o zhes bya ba smras te/ 'dir yang pham par 'gyur ba'i rgyud kyis mtshan ma bstan te/ bud med dang skyes pa dang / ma ning dang mtshan med pa dang / mtshan gnyis pa dang / mngal nas skyes pa dang / mngal nas ma skyes pa dang / gzhon nu dang / rgan po nyid la sogs pa'i bye brag gi rgyud 'ga' ma byas par spyir bzung ngo / /gzhan du 'du shes pas sam zhe na ma yin te/ de'i phyir de ltar 'du shes pas so zhes bya ba smras te/ ma nor bar ro/ /de ltar na 'dir tshig gi don 'di 'byung ste/ ma nor bar 'du shes pas srog gcod pa'i sems kyis mir gyur pa srog gcad pa byas na pham par 'gyur ro/ /dug dang mtshon dang gsang sngags la sogs pa'i sbyor ba dag gis srog gcod pa srid pas de'i phyir 'di brjod par bya ste/ rnam pa gang gis she na de'i phyir gang yang rung bas so zhes bya ba smras te/ rnam pa gang yang rung bas so/ /de nyid kyi spros pa bstan pa'i phyir/ bye brag med pa ni lus dang de dang 'brel pa dang / 'phangs pa dang / gzhan dang bsgo ba rnams so zhes bya ba smras te/ bye brag med pa zhes bya ba ni/ 'di man chad 'og gi mdo las gzhi des gzhan gyi tshe shi na 'o zhes bya ba ni byung ba yan chad kyi dbang du bya ba yin te/ lus zhes bya ba la sogs pa srog gcod pa'i sbyor ba 'di dag ni gsod pa la bye brag med de khyad par med do zhes bya ba'i tha tshig go/ /lus zhes bya ba ni lus nyid do/ /de dang 'brel pa zhes bya ba ni/ lus dang 'brel pa dbyig pa la sogs pa'o/ /'phangs pa zhes bya ba ni rnam pa gnyis te/ lus des bong ba la sogs pa 'phangs pa dang / de dang 'brel pas gzhus mda' la sogs pa 'phangs pa'o/ /gzhan zhes bya ba ni/ gsad par bya ba gsad pa'i phyir bsgos pa gzhan gang yin pa'o/ /bsgo ba zhes bya ba ni/ gsad par bya ba de nyid la rang gis gyis shig ces bsgo ba'o/ /dug dang phye ma dang / dong dang shing dang rang bzhin nyams pa gtong ba dang / brang du 'debs pa dang / 'khrul 'khor dang sgyu thabs dang ro langs rjes su sbyor ba rnams so zhes bya ba la/ dug gi sbyor ba ni/ dug dang bcas pa'i kha zas la sogs pa sbyin pa'o/ /phye ma'i sbyor ba ni dug gi phye mas btab pa'i gos la sogs pa bskon pa'o/ /dong gi sbyor ba ni rlubs rko ba la sogs pa'o/ /shing gi sbyor ba ni sdong po bsgyel ba la sogs pa'o/ /rang bzhin nyams pa gtong ba'i sbyor ba ni myos par byas te/ dgon par gtong ba la sogs pa'o/ /brang du 'debs pa'i sbyor ba ni/ 'jim pa'i gzugs la sogs pa ral gri thogs pas brang du 'debs pa ste/ brang du mtshon gyis 'debs pa'i phyir ro/ /'khrul 'khor gyi sbyor ba ni sa mda' la sogs pa 'dzugs pa'o/ /sgyu thabs kyi sbyor ba ni mig bkab ste g.yang sar gtong ba la sogs pa'o/ /ro langs kyi sbyor ba ni ro langs spyod pa la sogs pa'o/ /ro langs phyed kyang de nyid kyis bsdus par rig par bya'o/ /des na logs shig tu ma byas so/ /rjes su sbyor ba ni chol pa la sogs pa ste/ de dag kyang 'chi ba la bye brag 'ga' yang med do/ /g.yang du gtong ba'o zhes bya ba bye brag med do zhes bya bar sbyar ro/ /gang las she na gad pa la sogs pa las zhes bya bar don gyis shes par bya'o/ /me dang chur 'dzud pa'o zhes bya ba yang me dang chur 'phul ba yang bye brag med pa'o/ /grang ba dang tsha bar 'dogs pa'o zhes bya ba yang lhags khrod dang tshad khungs su srog gcod pa'i phyir 'dogs par byed pa yang bye brag med pa'o/ /pho nyar gtong ba la sogs pa'o zhes bya ba yang gang du 'chi bar 'gyur ba srid pa der pho nya dang mngags pa nyid du gtong ba'o/ /sogs pa zhes bya ba'i sgras ni der song na 'di dang 'di lta bu rnyed par 'gyur ro zhe'am/ pha ma mthong bar 'gyur ro zhes 'drid pas/ gtong ba la sogs pa bsdus te de dag la sogs pa gsad pa'i thabs rnams la bye brag med do/ / de rjes su bsgrub pa chung ngu nyid kyang ngo zhes bya ba ni/ gsad pa'i rjes su sgrub pa chung ngu la yang bye brag med pa ste/ de rjes su sgrub pa chung ngu nyid ni rkang pa'i mthe bo dang rgya shug gi tshi gu dang shing bal la sogs pa bsnun pa lta bu dag go/ /'di ltar de dag ni sngar gang yang rung bas so zhes bya ba des bsdus pa yin mod kyi 'on kyang de nyid gsal bar bstan pa'i phyir tshig 'di smos so/ /gsad par bya ba ni skyes pa dang bud med dang ma ning nyid do zhes bya ba ni/ gsad par bya ba'i sems can ni skyes pa nyid dang / bud med nyid dang ma ning nyid la bye brag med pa ste/ gnas de dag smos pa ni spros pa'i don bstan pa yin no/ /gzhi des gzhan gyi tshe shi na'o zhes bya ba la/ gzhi des zhes bya ba ni/ sbyor ba snga ma'i gzhi des so/ /gzhan gyi tshe shi na'o zhes bya ba ni de'i tshe na shi ba dang / gzhan gyi tshe na shi ba la bye brag 'ga' yang med pa ste/ 'dir gzhung ni des de'i tshe ma yin yang des 'on kyang des de'i 'og tu'o zhes gsungs pa yin no// //bam po bcu gnyis pa/ 'dun pa bzlog pa'i 'og tu ni rgyu nyid ma yin no zhes bya ba ni/ shi na zhes bya bar sbyar ro/ /sngar dge slong gis mir gyur pa zhig 'chi ba'i rigs par gros btab nas de'i 'og tu 'chi ba las 'dun pa bzlog ste/ mi 'chi bar bzlog pa'i 'og tu phyis dus gzhan na mi de dge slong gis gros snga ma de bzung ste/ shi na sbyor ba snga ma de rgyu nyid ma yin no/ /'di skad bstan te/ gal te dge slong gis sngar mi gzhan 'chi bar gros btab pa'i 'og tu mi de 'jigs pa dang bcas pa la sogs pa'i gnas dag nas 'dun pa zlog par byed pa na de'i tshe pha rol po khas mi len cing phyis rang dgar bdag nyid gsod par byed na dge slong de'i sbyor ba snga ma de'i rgyu nyid ma yin te/ pham par mi 'gyur ro/ /sbyor ba snga ma las ni sbom por 'gyur ro/ /dku mnyes pas ma dang mngal na gnas pa gnyis las ma bsams pa shos na sbom po'o zhes bya ba ni/ dku mnyes pa'i rgyus ma dang mngal na gnas pa gnyis las gang yang rung ba ma bsams pa shi na de'i tshe sbom por sbyar ro/ /dku mnyes pas zhes bya ba ni/ dku mnyes pa'i rgyus so/ /ma dang mngal na gnas pa zhes bya ba ni/ ma dang mngal na gnas pa gnyis te/ de gnyis las gang yang rung ba'o/ /ma bsams pa zhes bya ba ni/ ched du ma bsams pa'o/ /ma bsams pa shos de shi na de'i tshe sbom po'o/ /'di skad bstan te/ mngal na gnas pa dang bcas pa'i dku mnyes pas gal te ma dang mngal na gnas pa gnyis las ma bsams pa shos shi na sbom po ste/ gnod pa bya bar nges pa yod pa'i phyir ro/ /bsams pa shos shi na pham par 'gyur ro/ /gzhi de las gsod pa la 'jug pa dang len na'o zhes bya ba ni/ sbom po'o zhes bya bar sbyar ro/ /gzhi de las zhes bya ba ni dang du len pa'i gzhi de las so/ /gsod pa la 'jug pa zhes bya ba ni dang du blangs pa'i gzhi des na gsod par byed na gsod pa la 'jug pa'o/ /'jug pa'i gzhi de dang du len na spom po'o/ /'dir gzhung ni gzhan las tshe dang ldan pa nye sde'i dbang du mdzad de/ nye sde khyod kyis mngal na gnas pa rlugs par byas sam/ btsun pa bdag gis mngal na gnas pa rlugs par ni ma bgyis te/ 'on kyang bdag gis dang du blangs so/ /bcom ldan 'das kyis bka' stsal pa/ dge slong gis gnas de lta bu dang du blang bar mi bya'o/ /dang du len par byed na 'gal tshabs can du 'gyur ro zhes gsungs pa yin no/ /rnam pa de lta bu dang du len pa'i rnam pa de la 'jug pa na lus 'gyur ba yang gdon mi za bar skye la/ ngag gi 'gyur ba kho bo ni 'gog par yang mi byed la/ skul bar yang mi byed de khyod nyid shes so zhes bya ba yang 'byung bas de'i phyir sbom por gzhag go/ /khyod kyi ming gis 'chi ba'i yo byad sbyin no zhes zer ba yang ngo zhes bya ba yang dang du len par byed na sbom po'o zhes bya bar sbyar ro/ /gzhan zhig dge slong la 'di skad ces khyod kyi ming gis gsad par bya ba'i mi la dug sbyar ma la sogs pa 'chi ba'i yo byad sbyin no zhes rnam pa de lta bu'i tshig zer ba de dge slong des dang du len par byed na yang sbom po'o zhes bya ba'i tha tshig go/ /'dir gzhung ni dge slong ma'i rnam par 'byed pa las/ khyod kyi ming gis phye ma sbyin no zhes zer ba dge slong mas dang du blangs pa nas/ bcom ldan 'das kyis bka' stsal pa/ dge slong ma khyod kyis mngal na gnas pa rlugs par byas pa bden nam/ btsun pa bdag gis mngal na gnas pa rlugs par ma bgyis te/ 'on kyang bdag gis dang du blangs so/ /bcom ldan 'das kyis dge slong ma rnams la bka' stsal pa/ dge slong mas rnam pa de lta bu dang du blang bar mi bya'o/ /dang du len par byed na nyes pa sbom po'i ltung ba 'phel bar 'gyur ro zhes bya ba'i bar du gsungs pa yin te/ de mdo 'dir byas pa yin no/ /dang du len pa'i mtshan nyid ni mdo snga ma la bstan pa yin no/ /cang mi smra bas dang du len na yang sbom po kho na'o/ /gzhan dud 'gro ma yin pa dang sprul pa bsad pa yang ngo zhes bya ba la yang ngo zhes bya ba'i sgra ni sbom po'o zhes bya ba'i rjes bsnyags pa'i phyir ro/ /mir gyur pa'i las gzhan pa'i 'gro ba bsad na sbom po'o/ /ci dud 'gro'i 'gro ba pa bsad na yang sbom po'am zhe na ma yin te de'i phyir/ dud 'gro ma yin pa zhes bya ba smras te/ dud 'gro'i 'gro ba pa ma gtogs te/ de las ni ltung byed du gsungs pa'i phyir ro/ /sprul pa bsad pa yang sbom po kho na'o/ /sprul pa yang rnam pa gnyis su bzhed de/ srog chags su gyur pa dang / srog chags ma yin pa'o/ /de la 'dir ni srog chags su gyur pa'i sprul pa gzung gi srog chags ma yin pa ni mi gzung ste/ de la srog gcad pa med pa'i phyir ro/ /'dir yang srog gcod pa'i rgyu las ltung ba rnam par gzhag par byed de/ gzhi'i rnam pa la ltos pa'i phyir ro/ /'dir gzhung ni tshe dang ldan pa dag mi ma yin pa ni shin tu chen po bsad kyang sbom por zad do zhes gsungs pa yin no/ /sprul pa'i phyi nas gzhung ni gtam gyi gzhi las 'gro ba thams cad du ma gtogs pa gang yin pa'o zhes gsungs pa yin no/ /'o na de lta na dgra bcom pa yin par 'gyur ro zhe na ma yin te/ de'i phyir na mya ngan las 'das pa yang ma yin no zhes gsungs so/ /'o na de lta na phyir mi 'ong ba bar ma dor yongs su mya ngan las 'da' ba srid pa bar ma la gnas pa yin no zhe na ma yin te/ de'i phyir rgyal ba'i bstan pa la mi 'jug pa'o zhes gsungs so/ /'o na de lta na phung po'i lhag ma med pa'i mya ngan las 'das pa'i dbyings su zhugs pa yin par thal par 'gyur ro zhe na ma yin te/ de'i phyir yongs su mya ngan las 'das pa ma yin no zhes gsungs so/ /'o na de gang yin zhe na/ bcom ldan 'das kyis bka' stsal pa/ sprul pa ste sems can du bgrang ba ma yin pa'i phyir sprul pa la yang de dag thams cad yod do/ /de srog bcad na ltung ba cir 'gyur zhe na nyes pa sbom po ste/ de la yang sems can du bgrang ba'i bsam pa yod na ni nyes pa sbom po kho nar 'gyur ro/ /gzhan las ni ro langs kyi bsam pas sprul pa gsod par byed na zhes gsungs so/ /'dir ni sprul pa zhes smos pa dud 'gro ma gtogs pa thams cad yin par rig par bya'o/ /'di la ltung ba rnam par gzhag pa ni 'di ltar rig par bya ste/ sems can du bgrang ba ma yin pa'i sprul pa la mir 'du shes pas gsod par byed pa la ni sbom po ste/ mir 'du shes pas zhugs pa'i phyir ro/ /dngos gzhi la ni ltung ba med de gang gi yang srog gcad pa med pa'i phyir ro/ /mi ma yin par 'du shes pas gsod par byed pa la ni sbyor ba la nyes byas te/ lha la sogs par 'du shes pas zhugs pa'i phyir ro/ /dngos gzhi la ni ltung ba med de snga ma bzhin no/ /dud 'gro'i 'gro ba pa'i sprul pa la mir 'du shes pas gsod par byed pa la ni sbom po ste/ mir 'du shes pas zhugs pa'i phyir ro/ /dngos gzhi la ni ltung byed de dud 'gro'i 'gro ba pa bsad pa'i phyir ro/ /dud 'gro'i 'gro ba par 'du shes pas gsod pa la sbyor ba la ni nyes byas so/ /dngos gzhi la ltung byed do/ /lha la sogs par 'du shes pas gsod par byed pa la yang sbyor ba la nyes byas so/ /dngos gzhi la ltung byed do/ /lha'i 'gro ba pa'i sprul pa la mir 'du shes pas gsod par byed pa la ni sbyor ba la sbom po'o/ /dngos gzhi la yang sbom po'o/ /bsdus pa'i bsam pas zhugs na bsdus pa de'i srog gcad pa byas pa kho na'o/ /lhar 'du shes pas gsod pa la ni sbyor ba la nyes byas so/ /dngos gzhi la sbom po'o/ /mi ma yin pa gzhan du 'du shes pas gsod par byed pa la yang sbyor ba la nyes byas so/ /dngos gzhi la sbom po'o/ /de bzhin du yi dags kyi 'gro ba pa dang / sems can dmyal ba'i 'gro ba pa'i sprul pa la mir 'du shes pas gsod par byed pa la ni sbyor ba la sbom po'o/ /dngos gzhi la yang sbom po kho na'o/ /rang rang du 'du shes pas gsod par byed pa la ni sbyor ba la nyes byas so/ /dngos gzhi la sbom po'o/ /mi ma yin pa gzhan du 'du shes pas gsod par byed pa yang sbyor ba la nyes byas so/ /dngos gzhi la sbom po'o/ /dri bar bya ba la ma smras par nad pa la sman sbyin par mi bya'o zhes bya ba ni dri bar 'os pas dri bar bya ba ste/ sman pa la sogs pa'o/ /dge slong mi mkhas pas de la ma smras ma dris par nad pa la gya tshom du sman sbyin par mi bya'o/ /gso ba la mkhas pas tshangs pa mtshungs par spyod pa'i nad g.yog bya'o zhes gsungs pas de'i phyir 'di ni mi mkhas pa'i yul la bkag pa yin no/ /'dir su la dri bar bsams she na de'i phyir/ 'dir sman pa dang de rab tu byung ba dang bkol ba rnams la dri bar bya ba nyid do zhes bya ba smras te/ nad pa la sman sbyin par bya ba dri ba'i skabs 'dir sman pa zhes bya ba ni sman dpyad kyi bstan bcos shes pa dang / sbyor ba shes pa'o/ /de rab tu byung ba zhes bya ba ni sman pa rab tu byung ba'o/ /de zhes bya ba'i sgra bkol ba zhes bya ba dang yang sbyar bar bya ste/ des bkol ba zhes bya ba sman pas bkol ba sman pa dang lhan cig spyod spyod pa'i sman g.yog bya ba la mkhas pa ste/ de rnams la dri bar bya ba nyid de/ dge slong mi mkhas pas de dag la dris la nad pa la sman sbyin par bya'o zhes bya ba'i tha tshig go/ /nad kyis kyang ngo zhes bya ba ni/ bkol ba zhes bya bar sbyar te/ nad kyis bkol bar gyur pa dag la yang dri bar bya ba nyid do/ /dge slong rgan rabs rgan rabs shes rab can rnams la yang ngo zhes bya ba ni/ dge slong gnas brtan la sogs pa ni rgan rabs rgan rabs so/ /de dag ni gal te na shes rab can yin te dus yun ring po 'das pa nas 'phrad pa dang mi 'phrod pa yongs su bskyed pa'i phyir te/ de dag la yang yongs su dri bar bya'o zhes bya bar sbyar ro/ /snga ma med na phyi ma la'o zhes bya ba ni dri bar bya'o zhes bya bar sbyar ro/ /snga ma med na zhes bya ba ni sman pa med na'o/ /phyi ma la'o zhes bya ba ni/ de rab tu byung ba la dri bar bya ba'o/ /de bzhin du de rab tu byung ba med na des bkol ba la'o/ /de med na nad kyis bkol ba la'o/ /de med na dge slong rgan rabs rgan rabs shes rab can rnams la dri bar bya'o zhes bya bar sbyar ro/ /phan par 'dod pa nyid kyis 'chi ba'i phyir sman ma yin pa byin pa la ni na smad pa med do zhes bya ba ni/ myur du shi na sdug bsngal med do snyam pa de lta bu'i phan par 'dod pa nyid kyis dge slong gis nad pa 'chi ba'i phyir sman ma yin pa dug la sogs pa byin te shi ba la ni na smad pa med par blta bar bya ste/ gsad pa'i sems yod pa'i phyir ro/ /phan pa'i bsam pas dug la sogs pas gsad pa de la nyes pa med do snyam du dogs pa bsal ba'i phyir tshig 'di smos te/ chom rkun pa dag gi lag pa la sogs pa bcad de tshor bas gnod par gyur pa dag la 'chi bar bya ba'i phyir dge slong mas 'gyur byed kyi lan tshwa byin pa las mdo 'di byas so/ /khur 'degs par mi nus pa grogs nyid mi bya'o zhes bya ba la khur 'degs par mi nus pa ni khur mi theg pa ste/ gang du bdag dang gzhan dag la gnod par 'gyur ba de la grogs mi bya'o/ /ci ste gtan du bkag pa yin nam zhe na/ dmigs kyis bsal ba bstan pa'i phyir/ gal te de lta bu'i rkyen gyis na khyim pa dag rub pa nyid la cig car gdeg par skad sbyar te bya'o zhes bya ba smras te bya'o zhes bya ba byed pa'i tshig dang por smos pa na 'di yang ci dgar bstan pa yin no/ /gal te de lta bu'i rkyen gyis na zhes bya ba ni/ gal te me shor ba la sogs pa'i rkyen tam 'degs pa'i las su bskos par gyur na'o/ /khyim bdag rub pa nyid la zhes bya ba ni/ khur 'degs par mi nus pa de la khyim pa dag mdo mdo nas 'dzin cing rub pa nyid la ste/ khur 'degs pa'i phyir lag rub tu rub pa nyid bya'i gyi na 'dus shing 'dug pa tsam gyis rub pa la ni ma yin no/ /cig char 'degs par skad sbyar te zhes bya ba ni/ de ltar rub pa nyid de la da cig car theg ces khyim pa de dag la bsgo bar bya zhing skad sbyar nas bdag kyang log ste gdeg par bya'o/ /'di skad bstan te/ gal te rkyen de lta bu byung bar gyur la/ khyim bdag kyang mdo mdo mdor rub par gyur cing cig car gdeg par skad sbyar kyang de'i tshe de dag gis khur de gdeg par mi nus na dge slong gis rang dgar gdeg pa'i grogs bya'o zhes bya ba'i tha tshig go/ /bzhag pa la yang cig car nyid du skad sbyar ro zhes bya ba ni/ khur 'degs dka' ba de gzhag pa'i tshe na yang cig car bzhag pa nyid du thams cad la bsgo bar bya ba'o/ /so phag mi 'phang ngo zhes bya ba ni/ lag nas lag tu sbyin par bya'o zhes bya ba'i tha tshig go/ /de ni lag gis las dag byed pa la bstan pa yin no/ /rkyen de lta bu yul la rigs par yin pas/ des na de yul thams cad la bkag pa yin no/ /bye ba dang gas pa ma brjod par de nyid sbyin par mi bya'o zhes bya ba la so phag gi steng gi ngos sam 'og gi ngos 'gog pa ni bye ba'o/ / ser ka byung ba ni gas pa'o/ /de dag ma brjod par zhes bya ba ni ma sbran par ro/ /de nyid ces bya ba ni/ bye ba nyid dang gas pa nyid do/ /de nyid len pa po la ma brjod par sbyin par mi bya ba ste/ dbul bar mi bya'o zhes bya ba'i tha tshig go/ /tshig de ni len pa po la gnod par 'gyur ba spang ba'i phyir ro/ /rkun po spa bkong ba'i phyir tsham rngam bya'o zhes bya ba yang byed pa'i tshig dang por smos pas ci dgar bya ba yin no/ /rkun po spa bkong ba'i phyir zhes bya ba ni/ chom rkun pa bsdigs pa'i phyir ro/ /tsham rngam zhes bya ba ni/ gnod pa med pa'i bsam pas lus dang ngag gnyis kyis 'jigs pa ston pa'o/ /'di skad bstan te/ dge slong gis chom rkun pa dag 'bros par bya ba'i phyir lus kyi tsham rngam phug trig dang / ngag gi ag tsham cher bya'o zhes bya ba'i tha tshig go/ /tsham rngam bstan pa'i phyir/ gaN+DI la sogs pa mi phog par 'phang ngo zhes bya ba smras te/ gaN+DI la sogs pa chom rkun pa rnams la 'phangs pa'o/ /ci nas kyang gaN+DI la sogs pas chom rkun pa rnams la reg par mi 'gyur ba de ltar 'phang bar bya ste/ ci nas kyang gnod par mi 'gyur bar zhes bya ba'i tha tshig go/ /sogs pa zhes bya ba'i sgras ni lus kyi thig ring bya ba dang / ngag gis khab phreng 'on cig /gzar thag 'on cig /sil byed 'on cig ces bya ba la sogs pa bsdu'o/ /rdzi phyogs nas rdul gyi bum pa dang thal ba'i gyo mo yang ngo zhes bya ba la yang ngo zhes bya ba'i sgra las 'phang ngo zhes bya bar sbyar ro/ /rdzi phyogs nas zhes bya ba'i tshig ni rdul dang thal bas phog par bya ba'i phyir 'di brtsams pa yin gyi/ gzhan du na mdo snga ma la sogs pa smos pas bsdus zin pas brtsams pa 'di don med par 'gyur ro/ /rdul gyis bkang ba'i bum pa ni/ rdul gyi bum pa'o/ /de bzhin du thal bas bkang ba'i gyo mo ni thal ba'i gyo mo ste bar gyi tshig mi mngon par bsdu bar bya ste/ dper na mar gyi bum pa bzhin no/ /'di dag ni mtshon pa'i phyir te/ rdul 'byung ba'i rdzas gzhan dag kyang de bzhin no/ /'ur rdo bcang bar bya'o zhes bya ba yang rkun po spa bkong ba'i phyir zhes bya bar sbyar ro/ /bcang bar bya'o zhes smos pa las na bong ba la sogs pa bcug ste ma phog par 'phang ngo zhes bya ba ni/ ma bstan par yang bya bar shes par bya'o/ /dge slong ngal ba mi dbul lo zhes bya ba ni tshig gnyis smos pa'i phyir dge slong ma yin pa phul ba dang / ngal ba ma yin pa phul ba yang nyes byas phra mor rig par bya'o/ /de'i grogs bya'o zhes bya ba ni dge slong ngal ba de'i grogs bya ba'o/ / 'dir dge slong zhes smos pa ni mtshon pa ste/ chos 'di pa thams cad kyi'o/ /grogs ji lta bu zhe na/ de'i phyir ngal sor gzhug go zhes bya ba smras te/ de zhes bya bar sbyar ro/ /snod spyad blang bar bya'o zhes bya ba ni/ dge slong ngal ba de las snod spyad lus la khyer ba dag la blang bar bya'o/ /gal te lhan cig tu gnas su phyin par mi nus la/ zan dang skom gyi dus su ma yin na ni/ lhung bzed bkru ba dang byug ris gzhag pa dang byin len dang brtag par bya'o zhes bya ba ni/ gal te dge slong ngal ba de grogs dang lhan cig tu gnas su phyin par myur du 'gro mi nus la zan dang skom gyi dus su gnas su phyin par 'ong mi nus pa ni ma yin te/ 'ong nus pa yin na de'i tshe grogs kyis gtsug lag khang du myur ba kho nar song ste/ de'i lhung bzed bkru bar bya/ byug ris gzhag pa bkad sar chus byugs te/ re'u chung bri bar bya/ zas kyi byin len bya/ 'ongs sam ma 'ongs pa brtag par bya'o/ /gal te dus su na khyer te bsu bar bya'o zhes bya ba ni/ ji ste dge slong ngal ba de zan dang skom gyi dus su yang gnas su phyin par 'ong mi nus na/ de'i phyir grogs des de'i zan dang skom khyer te de bsu bar bya'o/ /'dir phyi dro yin na ni skom khyer te bsu bar rig par bya'o/ /gsod pa'i pham par 'gyur ba rnam par 'byed pa zhes bya ba gsod pa'i pham par 'gyur ba rnam par 'byed pa'i skabs nas 'byung ba rdzogs so// // da ni gsod pa'i pham par 'gyur ba phran tshegs kyi skabs nas 'byung ba bsdu ba'i phyir/ mi'i 'gro ba pa'i lag pa gcod na sbom po'o zhes bya ba smras te/ 'di la kha cig 'di skad ces gsad pa'i bsam pas lag pa gcod na de sbom po'o zhes zer te/ de ni mi rigs par smra ba yin te/ gzhan nas pham par 'gyur ba'i sbyor ba la sbom por gsungs pa'i phyir ro/ /de bas na lag pa gcad pa tsam gyi bsam pas lag pa gcod na de la sbom por gzhag go/ /nags mes gtong ba na'o zhes bya ba yang sbom po'o zhes bya bar sbyar ro/ / nags dgon pa zhes bya ba'i phyogs ni nags zhes bya ste/ der me gtong na sbom po'o/ /de la yang phyogs gsum du bzhed de/ srog chags yod par bzhed pa'i phyogs dang / dogs pa'i phyogs dang / med pa'i phyogs so/ /de la srog chags yod par shes pa'i phyogs ni rnam pa gnyis te/ mang ba dang nyung ba'i bye brag dag gis so/ /de la srog chags gsod par ma bsams kyang spyir srog chags mang po yod pa'i blos me gtong na sbom po ste/ 'di ltar srog chags kyi yul thams cad la de la gsod pa'i bsam pa med mod kyi/ 'on kyang dgos pa gzhan la ltos pas nags sreg par byed pa des srog chags la ma ltos pas de'i phyir srog chags du ma'i yul la mi ltos par spyod pa'i phyir ro/ /srog chags nyung ngu yod pa'i blos me gtong ba ni nyes byas su 'gyur te/ 'di ni ltung ba gzhan yin te/ mi la sogs pa gsad pa'i bsam pa med pa'i phyir ro/ /gang gi tshe srog chags gsad pa'i bsam pa yod na ni de'i tshe na ltung ba'i dngos gzhi rnams mtshan nyid ji lta ba bzhin du 'byung ste/ mir gyur pa bsad na ni pham par ro/ /dud 'gro bsad na ni ltung byed do/ /'gro ba gzhan du gtogs pa bsad na ni sbom po'o/ /dogs pa'i phyogs la yang de bzhin du mtshan nyid ji lta ba bzhin las ltung ba rnam par gzhag par rig par bya'o/ /med pa'i phyogs la ni ltung ba med do/ /skra can 'tshong na'o zhes bya ba yang sbom po'o zhes bya bar sbyar ro/ /mi'i 'gro ba pa 'tshong na sbom po'o zhes bya ba'i tha tshig go/ /'dir gzhung ni nye dgas sha za'i bu gcig bzung ste/ bro gar mkhan la btsangs pa nas/ bcom ldan 'das kyis bka' stsal pa/ dge slong gis skra can btsong bar mi bya'o/ /byed na nyes pa sbom por 'gyur ro zhes bya ba la sogs pa'i bar du gsungs pa yin no/ /gang gis brkus pa de bla'i grar 'bul na'o zhes bya ba yang sbom po'o zhes bya bar sbyar ro/ /gang gis brkus pa zhes bya ba ni chom rkun pa la sogs pa'o/ /chom rkun pa la sogs pa de'i bla'i grar 'bul na'o/ /gal te bsad pa'i bsam pa de la yod na ni de grub pa na mtshan nyid ji lta ba bzhin du kha na ma tho bar 'gyur ro/ /gsod pa'i pham par 'gyur ba phran tshegs kyi skabs so zhes bya ba gsod pa'i pham par 'gyur ba phran tshegs kyi skabs nas 'byung ba rdzogs so// // da ni gsod pa'i pham par 'gyur ba zhu ba'i skabs nas 'byung ba bsdu ba'i phyir/ ston pas bsgo na'o zhes bya ba smras te/ gal te dge slong gis gsad par bya ba ston par byed de/ gsad pa'i bsam pas 'dir 'gro'o/ /der song ngo zhes zer na des na dge slong gis gsod par byed pa la gsad par bya ba gsad pa'i phyir bsgo ba byas pa yin te/ de gsod par bsams pas bsad du zin kyang / des bstan pas des bsad par gyur pa pham pa zhes bya ba'i kha na ma tho bar 'gyur ro zhes bya ba'i tha tshig ste/ ston pa ni bsgo ba'i rang bzhin yin pa'i phyir ro/ /ma dang mngal na gnas pa gnyis ni dpe'o zhes bya ba ni/ gang gi tshe gsad par bya ba mang po'i rjes su gsod par byed pa 'brang ba de dag gi nang na gsad par bya ba gang la gsod pa'i sems nye bar gnas par gyur pa de bstan pa'i phyir ma bsams pa gzhan thams cad kyang ston par byed cing de dag kyang bsad par gyur na sbom po'o/ /bsams pa bsad na pham par 'gyur te/ sbom po de ni sngar dku mnyes pas ma dang mngal na gnas pa gnyis las ma bsams pa shos na sbom po'o zhes bya ba smras pa des 'dra ba bstan pas na ma dang mngal na gnas pa gnyis ni 'di'i dpe yin par rig par bya'o/ /bdag nyid gsod na sbom po'o zhes bya ba ni/ bsad pa'i phyir rjes su sgrub pa las 'dir ltung ba rnam par gzhag gi bsad pa las ni ma yin te tshe rabs gzhan du las kyi lam skye ba med do zhes grub pa'i mtha' las gsungs pa'i phyir ro/ /de bas na 'dir sbyor ba las ltung bar rig par bya'o/ /sems gyur pa med par ma legs pa byas na nyes byed do zhes bya ba ni/ gsod pa'i bsams pa ma bzhag pa sems gyur pa med par ma legs pa byas pa lus dang ngag gi las ma legs pa gang yin pa dper na gsad par bya ba ston pa de ni nyes byed de/ legs par bya ba ma yin par rig par bya'o/ /nyes byed yin pa'i phyir 'dir nyes byas yin par rig par bya ste/ shes bzhin ma yin par zhugs pa'i phyir ro/ / ched du ma bsams par grub pa ni byed pa po nyid ma yin no zhes bya ba ni/ bsad pa la sogs par ched du ma bsams par grub pa gang yin pa'i grub pa de ni ltung ba'i byed pa bo nyid ma yin pa ste/ dper na bzhad gad kyi bsam pas mtshon 'phangs pas shi ba'i gsod par gtogs pa grub pa de ni byed pa po nyid ma yin te/ de la ni mtshon 'phangs pa las ltung ba kho na yod kyi/ shi ba las ni ma yin no/ /'dir gzhung ni btsun pa dge slong gis bzhad gad du gzhan la mtshon 'phangs pas rkyen des de dus bgyis na ltung ba cir 'gyur nyes byas so zhes gsungs pa yin no/ /tshe rabs gzhan du las skye ba med do zhes bya ba ni/ 'ga' zhig la bsad pa la sogs pa'i sbyor ba byas nas/ gsad par bya ba shi ba'i mdun rol du sngar gsod par byed pa shi'am snyam du shi na srog gcad pa la sogs pa kha na ma tho ba'i dngos gzhir mi 'gyur te/ tshe rabs gzhan du las skye ba mi srid pa'i phyir ro/ /sngar ram mnyam du shi na las kyi lam gyi dngos gzhi med de/ lus gzhan skyes pa'i phyir ro zhes grub pa'i mtha' las gsungs pa'i phyir ro/ /gsod pa'i pham par 'gyur ba zhu ba'i skabs so zhes bya ba gsod pa'i pham par 'gyur ba zhu ba'i skabs nas 'byung ba rdzogs so// //gsod pa'i pham par 'gyur ba'i 'dul byed kyi skabs nas 'byung ba bstan pa'i phyir/ sbom po ni kho bo 'chi bar 'ong ngo zhes de skad zer ba la yid mi ches shing / de bzhin nyid du sgrub par byed na'o zhes bya ba smras te/ sbom po ni zhes bya ba'i tshig dang por smos pa ni dbang du bya ba bstan pa'i phyir te/ 'di man chad nas 'og nas nad pa la bab col du mtshon dang thag pa sbyin par mi bya'o zhes 'byung ba yan chad ni sbom po zhes bya ba 'di'i dbang du byas pa yin no/ /gal te nad pa na re bdag la khrus dang bskyod pa la sogs pa cung zad byed na gdon mi za bar kho bo 'chi bar 'ong ngo zhes de skad zer ba la yid mi ches shing yid ches par mi byed par khrus dang bskyod pa la sogs pa de bzhin nyid du sgrub par byed cing rjes su sgrub par byed na sbom po'o/ /nad pa shi bla'o zhes g.yog mi byed na'o bya ba ni nad pa 'di myur du shi bla'o zhes de'i don du nad g.yog mi byed na sbom po'o/ /mid par bya ba mi 'phrod pa sbyin na'o zhes bya ba ni sman la sogs pa mid par bya ba mi 'phrod pa mi mthun pa sbyin par byed cing gal te mid par bya ba de yang mi 'phrod pa nyid du shes na de'i tshe sbom po'o/ /'bras yongs su ma smin pa brtol na'o zhes bya ba ni/ 'bras yongs su ma smin pa brtol bar byed cing 'dral bar byed na sbom po ste/ thams cad du yang khro ba nyid la gnas pa kho na yin pa'i phyir ro/ /dong du 'dzud pa dang / sgo glegs kyis btsir ba la sogs pas snyon rmongs par byed na'o zhes bya ba ni/ dong du gzhug pa dang sgo glegs kyis bcir ba la sogs pas nyon mongs shing gnod pa byed pa dang / rnam pa gzhan gyis kyang nyon mongs par byed na sbom po'o/ /de ni bsad pa'i sbyor ba'i rnam pa yin pas de'i phyir 'dir sbom por rnam par gzhag go/ /'dir de dag gi gzhung ni 'dul byed dag las dge slong nad pa stan la 'dug par gyur pa la de'i nad g.yog gis smras pa/ tshe dang ldan pa longs shig /des smras pa/ kho bo shi bar 'ong gis ma bslang shig /de yang tshe dang ldan pa longs shig ces smras nas de langs pa dang / dus la bab po/ dge slong de 'gyod pa skyes nas/ bcom ldan 'das kyis bka' stsal pa/ pham pa'i ltung bar ni mi 'gyur te/ nyes pa sbom por 'gyur ro zhes bya ba'i bar dang / dge slong na bas yun ring du gnod par 'gyur ba de'i nad g.yog dag skyo nas de dag gis khyod kyi nad g.yog mi byed do/ / myur du 'chi bar yang 'gyur ro zhes smras nas de dag gis de'i nad g.yog ma byas pa dang / dus la bab na nyes pa sbom por 'gyur ro zhes bya ba'i bar dang / dge slong nad pa de'i zas 'phrod pa ma rnyed nas/ de'i nad g.yog gis zas mi 'phrod pa rnyed nas tshe dang ldan pa re zhig 'di rnyed kyis zo shig / de zos nas dus la bab pa nas nyes pa sbom por 'gyur ro zhes bya ba'i bar dang / dge slong gis 'bras yongs su ma smin pa brtol nas de yang dus la bab pa nas nyes pa sbom por 'gyur ro zhes bya ba ba'i bar dang / dge slong de dag gis 'di skad mi smra na song la dong du chug shig ces smras nas de dag gis dong du bcug ste/ dus la bab pa nas nyes pa sbom por 'gyur ro zhes bya ba'i bar dang / de dag gis smras pa/ de skad mi smra na song la 'di sgo glegs kyis tshir cig / de dag gis sgo glegs kyis btsir ba dang / dus la bab pa nas nyes pa sbom por 'gyur ro zhes bya ba'i bar du gsungs pa yin te/ 'dir gsad par bya ba shi na yang pham pa'i ltung bar mi 'gyur ro zhes gsungs pa'i tshig las ni smra ba po de la bsad pa'i bsam pa ma byung bar nyon mongs pa 'ba' zhig gi bsam pas de skad smras pas de'i phyir ni khro ba nyid lhag par sbyar ba'i skabs yin pas sbom po gzhan yin par rig par bya'o/ /g.yang sa nas mchong ba dang 'ching ba la sogs pa 'chi ba'i don du sgrub pa yang ngo zhes bya ba la/ yang ngo zhes bya ba'i rjes bsnyags pa 'di ni snga ma'i rjes bsnyags pa ni ma yin gyi/ sbom po zhes bya ba de tsam gyi rjes su 'jug pa yin no/ /g.yang sa nas mchong ba dang 'ching ba la sogs pa dang / gzhan yang 'chi ba'i don du 'chi ba'i rgyur sgrub par byed na yang sbom po'o/ /'dir yang bsad pa'i bsam pas gzhan g.yang sa nas mchong du 'jug pa dang / bcing ba la sogs pa la ni shi na ni pham par 'gyur la ma shi na ni sbyor ba yin pas/ sbom por 'gyur ba yin pas na de'i phyir 'dir g.yang sa nas mchong ba dang / 'ching ba la sogs pa smos pa 'di ni bdag nyid dang 'brel pa yin te de yang sngar bdag nyid gsod na sbom po'o zhes smos pas de'i mtshan nyid 'dir bstan pa yin pas de'i phyir ma shi na sbom po'o zhes bya bar shes par bya'o/ /'dir gzhung ni 'dul byed dag las dge slong nad kyis sgur bor gyur pa 'di snyam du bdag gson na cir rung gis song la bdag nyid g.yang sa nas mchong ngo snyam nas des bdag nyid g.yang sa nas mchongs pa dang / drang por gyur nas de 'gyod pa skyes nas/ bcom ldan 'das kyis bka' stsal pa/ nyes pa sbom por 'gyur ro zhes bya ba'i bar du gsungs pa yin no/ /nad pa la bab chol du mtshon dang thag pa sbyin par mi bya'o zhes bya ba la/ sngar 'chi ba'i 'tshog chas mi gzhag go zhes smos pa der ni nad g.yog gi dgag pa bstan pa yin gyi/ 'dir ni nad g.yog ma yin pa la dgag pa yin par rig par bya'o/ /bab chol du zhes bya ba ni brtag pa ma byas par sbyin par mi bya'o/ /don gzhan gyi phyir ni bsam mi dgos par sbyin par bya'o/ /thag pa la sogs pa smos pa ni dpe ste/ khab la sogs pa yang bkag par shes par bya'o/ /zhal ta pa shes bzhin du bya'o zhes bya ba la/ zhal ta ba zhes bya ba ni/ lag gi las byed pa'i zhal ta byed pa la sogs pa ste/ de shes bzhin du bya'o/ /gsang sngags kyis thal lcag bya ba yang ngo zhes bya ba yang shes bzhin kho nar bya'o zhes bya bar sbyar ro/ /gdon gyis zin pa thar par bya ba'i phyir gsang sngags sngon du 'gro bas gdong du thal lcag gis bsnun pa'o/ /thogs pa bsal ba'i phyir bsnun pa yang ngo zhes bya ba la/ thogs pa zhes bya ba ni mid pa la sogs pa lus la lus las don gzhan du gyur pa kham la sogs pa chags pa gang ci yang rung ba la bya'o/ /de bsal ba'i phyir khu tshur la sogs pa bsnun par bya ba gang yin pa de yang shes bzhin du bya'o/ /der gyur pa legs par so sor brtag par bya ste dril bar bya'o zhes bya ba ni/ shes bzhin du gyur pa shes bzhin kho na la gnas pas/ ci nas kyang mi la sogs pa gang la yang gnod par mi 'gyur ba de ltar legs par so sor brtag par bya ste/ rdo ba dang shing la sogs pa dag dril bar bya'o/ /'di ltar rdo ba dang shing la sogs pa dag 'dir ma smos mod kyi/ 'on kyang shugs kyis 'thob ste/ shugs kyis ji ltar 'thob ce na legs par so sor brtag par bya ste/ dril bar bya'o zhes bya ba smos pa las na dril bar bya ba rdo ba la sogs pa yod na tshig 'di'i don dang bcas par 'gyur ro/ /phyogs nyung ngus gdeg pa lci ba la 'bad par mi bya'o zhes bya ba ni/ dge slong 'bad pa byed pa'i tshoms kyi phyogs nyung ngu dang ldan pa gang yin pas/ gdeg pa lci ba gdeg par bya ba la 'bad par mi bya'o zhes bya ba'i tha tshig go/ /'di skad bstan te/ tshoms gang gi phyogs su dge slong gtogs pa'i tshoms de gal te nyung bar gyur na de'i tshe dge slong des der grogs kyi dngos po mi bya'o/ /spyi'u tshugs su 'gro bar mi bya'o zhes bya ba ni/ spyi'u tshugs mkhan ltar ram stobs la goms pa'i gyad thabs mkhan bzhin du zhes bya ba'i tha tshig go/ /gzhan yang ji ltar khyi 'tshod pa dag gar byed pa'i dus na lag pa gnyis sa la btsugs la rkang pa gnyis gnam du bsgreng ste/ spyi'u tshugs su 'gro ba de ltar 'gro bar mi bya ba'o/ /ma bslabs pas bslab pa la sbyar bar mi bya'o zhes bya ba ni/ dge slong ma bslabs pas gzhan gyi phyir bslab pa la sbyar bar mi bya'o/ /mtshon gyi las la sogs pas gzhan la gnod par nus pa'i phyir mi mkhas pas bslab pa la sbyar bar mi bya'o/ /mtshon 'phangs pa la bsgo bar mi bya'o zhes bya ba ni mda' 'phangs pa la sogs pa mtshon 'phangs pa la mda' lta zhe 'am 'phongs shig dang lta'o zhes bya ba de lta bu la sogs pa bsgo ba dang smra bar mi bya'o zhes bya ba'i tha tshig go/ /nad pa mi nus pa la lam du mi bkri'o zhes bya ba ni/ nad pa lam du 'gro mi nus pa lam du bkri bar mi bya'o/ /'di ni lam gyi ngal bas 'di'i srog 'chad pa la sogs pa gnod par gyur na mi rung ngo zhes de'i phyir dgag pa mdzad do/ /gsod pa'i pham par 'gyur ba 'dul byed dag go zhes bya ba gsod pa'i pham par 'gyur ba 'dul byed kyi skabs nas 'byung ba rdzogs so/ /gsod pa'i pham par 'gyur ba rdzogs so zhes bya ba gsod pa'i pham par 'gyur ba bshad zin to/ / //gsod pa'i pham par 'gyur ba smras nas/ da ni smra ba zhes bya ba'i pham par 'gyur ba bzhi pa brjod par bya ste/ gang byas na smra ba'i pham par 'gyur zhe na/ de'i phyir 'du shes bsgyur te bdag nyid mi'i chos bla ma dang ldan pa nyid du smra na'o zhes bya ba smras te/ smra ba po des brjod par bya ba'i don la bden par gyur pa'i 'du shes gang yin pa de bsgyur cing sbas te brdzun pa'i don gyi 'du shes gzhan gyis bkab nas/ bdag nyid mi'i chos bla ma dang ldan pa nyid du ldan pa nyid de smras shing brjod na/ smra ba zhes bya ba'i pham par 'gyur ro/ /da ni bdag nyid mi'i chos bla ma dang ldan pa nyid du smra ba nyid bstan pa'i phyir/ mthong ngo bdag gis mthong ngo / /sgra thos so bdag gis thos so/ /'gro'o/ / bdag gi drung du 'ong ngo / /lhan cig gtam 'dre'o/ /phebs par smra'o/ /so sor kun dga'o/ /bdag dang rtag tu yang lhan cig gnas par byed do zhes smras pa nyid do zhes bya ba smras te/ mthong ngo bdag mthong ngo zhes bya ba de la sogs pa smra ba gang yin pa de nyid de/ bdag nyid mi'i chos bla ma dang ldan pa nyid du smras pa nyid yin par blta bar bya'o/ /de ltar 'du shes bsgyur te smras na pham par 'gyur ro/ /bdag dang lhan cig gtam 'dre'o zhes bya ba la sogs pa'i tshig rnams dang sbyar du mi rung bas de'i phyir skyes bu dang por bsgyur bar bya ste/ gtam 'dre bar byed/ phebs par smra bar byed/ phan tshun kun dga' bar byed/ rtag tu yang lhan cig gnas par byed do zhes de ltar sbyar bar yang shes par bya'o/ /ci mthong ngo bdag mthong ngo zhes bya ba de tsam gyi tshig kho na las pham par 'gyur ram/ 'on te zla cung zad cig la ltos nas yin/ de lta na yang zla gang yang rung ba zhig yin nam 'on te khyad par can zhig yin zhe na de'i phyir/ lha dang klu dang gnod sbyin dang dri za dang mi 'am ci dang lto 'phye chen po dang yi dags dang sha za dang grul bum dang lus srul po'i zla nyid do zhes bya ba smras te/ je lha la sogs pa re rer phye la/ de nas zla nyid du sbyar bar bya'o/ /gang gi phyir lha la sogs pa de dag ni lha'i mig can mi'i chos bla ma dang ldan pa rnams kyis mthong ba de'i phyir de dag mthong ba la sogs pa'i sgo nas zla nyid yod pas/ bdag nyid mi'i chos bla ma dang ldan pa nyid du bstan pa yin no/ /de bas na lha mthong ngo / /lhas bdag mthong ngo zhes bya ba la sogs pa'i tshig gis na bdag nyid mi'i chos bla ma dang ldan pa nyid bstan to/ /rtag pa'i dngos po ni rtag pa nyid de/ rgyun du lhan cig gnas gcig na rtag tu yang lhan cig gnas so zhes bya ba'i tha tshig go/ /sbom po'i dbang du byas pa nyid ni dur khrod kyi sha za'o zhes bya ba ni/ zla nyid ces bya bar sbyar te/ mthong ngo zhes bya ba la sogs pa bdag nyid mi'i chos bla ma dang ldan pa nyid du smra ba dag la/ zla dur khrod kyi sha za ba nyid la ni sbom po'i dbang du byas pa nyid de/ sbom por byed pas sbom po'i dbang du byas pa ste/ de'i dngos po ni de nyid do/ /lha la sogs pa mthong ba ni mi'i chos bla ma'i 'bras bu yin pa'i phyir/ de'i sgo nas de bstan pa byas nas/ da ni rang bzhin bstan par bya ba'i phyir/ mi rtag pa la sogs pa'i 'du shes dang / bsam gtan rnams dang / tshad med pa rnams dang / gzugs med pa rnams dang / 'bras bu rnams dang / mngon par shes pa la sogs pa ni chos bla ma'o zhes bya ba smras te/ mi rtag pa la sogs pa'i 'du shes zhes bya ba ni/ mi rtag pa'i 'du shes la sogs pa'i 'du shes bcu dang / mi sdug pa'i 'du shes la sogs pa'i 'du shes bcu ste/ mi rtag pa'i 'du shes dang / mi rtag pa la sdug bsngal ba'i 'du shes dang / sdug bsngal ba la bdag med pa'i 'du shes dang / zas la mi mthun pa'i 'du shes dang / 'jig rten thams cad la mngon par mi dga' ba'i 'du shes dang / nyes dmigs kyi 'du shes dang / spong ba'i 'du shes dang / 'dod chags dang bral ba'i 'du shes dang / 'gog pa'i 'du shes dang / 'chi ba'i 'du shes dang / mi sdug pa'i 'du shes dang / rnam par bsngos pa'i 'du shes dang / rnam par rnags pa'i 'du shes dang / rnam par bam pa'i 'du shes dang / rnam par 'bus gzhigs pa'i 'du shes dang / rnam par zos pa'i 'du shes dang / rnam par dmar ba'i 'du shes dang / rnam par 'thor ba'i 'du shes dang / rus gong gi 'du shes dang / stong pa nyid du so sor rtogs pa'i 'du shes so/ /sogs pa zhes bya ba'i sgra dang po 'dis ni mdo sde las gsungs pa'i 'du shes de dag bsdu'o/ /bsam gtan rnams zhes bya ba ni dang po la sogs pa dag go/ /tshad med pa rnams zhes bya ba ni/ byams pa la sogs pa dag go/ /gzugs med pa rnams zhes bya ba ni/ nam mkha' mtha' yas skye mched la sogs pa dag go/ /'bras bu rnams zhes bya ba ni/ rgyun du zhugs pa'i 'bras bu la sogs pa bzhi'o/ /mngon par shes pa zhes bya ba ni rdzu 'phrul gyi yul la sogs pa drug go/ /sogs pa zhes bya ba'i sgra 'og ma 'dis ni zag pa dang bcas pa dang zag pa med pa'i yon tan lhag ma rnams gzung bar bya ste/ de dag thams cad ni mi'i chos bla ma zhes bya ba brjod pa yin no/ /sbom po'i dbang du byas pa ni zhi gnas kyi rgyu mtshan rang gi mtshan nyid 'dzin pa nyon mongs pa rnam par gnon pa'o zhes bya ba la/ zhi gnas zhes bya ba ni ting nge 'dzin to/ /de yang rnam pa gnyis te/ mos pa yid la byed pa zhes bya ba ni tshad med pa la sogs pa'o/ /de kho na nyid yid la byed pa zhes bya ba ni mi rtag pa'i 'du shes la sogs pa'o/ /ting nge 'dzin te rnam pa gnyi ga yang bsgoms pa las byung ba mi lcogs pa med pas bsdus pa yin par rig par bya ste/ de ma thob par 'du shes bsgyur te smras na ni pham par 'gyur bar rnam par gzhag go/ /'dir de'i rgyu mtshan ma thob par 'du shes bsgyur te smra ba ni sbom po'i dbang du byas pa rnam par gzhag ste/ de'i rgyu mtshan zhes bya ba ni/ rang gi mtshan nyid 'dzin pa ste/ 'dod pa na spyod pa'i thos pa dang / bsams pa las byung ba'i shes pa'o/ /de yang rnam pa gnyis te/ nyon mongs pa rnam par gnon pa dang / rnam par gnon pa ma yin pa'o/ /de la 'dir ni nyon mongs pa rnam par gnon pa bzung ste/ de bas na zhi gnas kyi rgyu mtshan rang gi mtshan nyid 'dzin pa 'dod pa na spyod pa'i thos pa dang / bsams pa las byung ba'i shes pa mi sdug pa la sogs pa la dmigs pas nyon mongs pa rnam par gnon pa de ma thob par bdag nyid de dang ldan pa nyid du 'du shes bsgyur te ston na sbom po'o/ /de dang ldan pa'i chos can nyid du smra ba na de dang ldan pa nyid ma smras pa nyid yin no zhes bya ba la/ de dang ldan pa'i chos can nyid du smra ba zhes bya ba ni/ gang la mi'i chos bla ma de yod pa de ni de dang ldan pa'o/ /mi'i chos bla ma dang ldan pa de dang ldan pa rgyun du zhugs pa la sogs pa de'i chos stan khra bo bkra ba la sogs pa thob pa'i chos de de la yod pa ni de dang ldan pa'i chos can no/ /de'i dngos po ni de dang ldan pa'i chos can nyid do/ /de nyid du smra ba gang yin pa de ni de dang ldan pa'i chos can nyid du smra ba ste/ de dang ldan pa'i chos can nyid du smra ba ni de dang ldan pa nyid ma smras pa ma yin te/ mi'i chos bla ma dang mi ldan pa nyid du ma smras pa ma yin te smras pa kho na'o/ /'di skad bstan te/ dge slong gang rgyun du zhugs pa la sogs pa'i chos su grags pa mi ma yin pa la sogs pas mi 'tsho ba la sogs pa gang yin pa'i chos de dang bdag nyid ldan par ston na/ dge slong des bdag nyid mi'i chos bla ma dang mi ldan par bstan pa ma yin gyi/ 'di ltar bstan pa kho na yin no/ /de ltar gzhung ni dge slong rab tu mang po dag grong med pa'i dgon pa'i gnas shig na gnas shing de na de dag la mi ma yin pa dag gis 'tshe ba na/ de na dge slong gang rgyun du zhugs pa nas dgra bcom pa'i yin pa de na mi ma yin pa dag gis 'tshe bar mi byed nas/ dge slong gis 'du shes bsgyur cing bzod pa dang / 'dod pa dang blo gros dang rtog pa dang lta ba bsgyur te/ 'di skad ces bdag kyang grong med pa'i dgon pa'i gnas te/ de na bdag la mi ma yin pa rnams 'tshe bar mi byed do zhes zer na pham par 'gyur ro zhes bya ba dang / de bzhin du 'di ltar dge slong rab tu mang po dag khyim rnams su mgron du bos te za bar byed cing de na de dag la stan khra bo nye bar bkra ba dag bshams shing de na dge slong gang rgyun du zhugs pa nas dgra bcom pa'i bar yin pa de la de na stan khra bo nye bar bkra ba dag shom par byed nas/ dge slong gis 'du shes bsgyur cing bzod pa dang / 'dod pa dang / blo gros dang / rtog pa dang / lta ba bsgyur te/ 'di skad ces bdag kyang khyim der mgron du bos shing zos te/ de na bdag la yang stan khra bo nye bar bkra ba dag shom par byed do zhes zer na pham par 'gyur ro zhes gsungs pa yin te/ de bas na dge slong gang rgyun du zhugs pa la sogs pa'i chos gang yin par grags pa de dang bdag nyid sbyor bar byed pa de ni pham par 'gyur ro/ /de yod do zhes rang gi bsam pa gzhan la sbyor zhing ston pa nyid do zhes bya ba ni/ dge slong gang gis lha dag mthong ba dang / lha rnams kyis kyang de mthong ba la sogs pa'i dge slong de yod do zhes gang gi tshe rang gis bsam par byas la de yod do zhes gzhan la sbyor zhing 'dogs par byed na sbom po kho nar 'gyur te/ bdag nyid kyi bsam pa gzhan la ston pa'i phyir ro/ /'di skad bstan te/ dge slong gang gzhan la bstan pa'i sbyor bas bdag nyid mi'i chos bla ma dang ldan par ston par 'dod cing 'di skad ces dge slong gang gis lha dag mthong ba de yod do zhes kyang zer la/ rnam pa de lta bu gzhan la ston cing sbyor bar byed na rang nyid dang sbyar ba'i bsam pa yod mod kyi/ 'on kyang gzhan la bstan pa'i phyir sbom por 'gyur ro/ /gal te de yod do zhes gzhan la ston par byed pa la/ bdag nyid la yang nye bar sbyor bar byed na ci de la yang gzhan la ston pa nyid lta bur 'gyur ram snyam du dogs pa bsal ba'i phyir/ nye bar sbyor ba ni ma yin no zhes bya ba smras te/ rang la zhes bya bar sbyar ro/ /gal te gzhan la bstan pas bdag nyid la nye bar sbyor zhing 'dogs par byed na gzhan la ston pa nyid ma yin no/ /'di skad bstan te/ gal te dge slong sngar ni dge slong gang lha dag mthong ba de yod do zhes gzhan la ston par byed la/ de'i 'og tu ni 'di skad ces de ni nga nyid do zhes bdag nyid la sbyor bar byed na de'i tshe gzhan la bstan pa nyid ma yin gyi/ 'di ltar bdag nyid la bstan pa nyid de/ de'i phyir pham pa kho nar 'gyur ro/ /de ltar yang 'dir gzhung ni 'di skad ces nga nyid do zhes mi smra na zhes bya ba yin no/ /ma bsams par bstan par mi bya'o zhes bya ba ni/ ma bsams ma brtags legs par so sor brtag par ma byas par 'das pa dang ma 'ongs pa la sogs pa'i yul bstan par mi bya'o zhes bya ba'i tha tshig ste/ ci nas kyang phyis 'jig rten dag yid mi ches par mi 'gyur ba de ltar bsam par bya'o/ /smra ba'i pham par 'gyur ba rnam par 'byed pa'o zhes bya ba mi'i chos bla ma smra ba'i pham par 'gyur ba rnam par 'byed pa'i skabs nas 'byung ba rdzogs so/ / //rnam par 'byed pa las gsungs pa bsdus nas phran tshegs kyi skabs ni med pas de'i phyir zhu ba'i skabs brjod par bya ste/ bla ma thob pa yongs su nyams pa go bar byed pa ni ma brjod pa ma yin no zhes bya ba ni/ mi'i chos bla ma thob pa yongs su nyams pa gang yin pa'i thob pa yongs su nyams pa de go bar byed pa gang yin pa de yang de ma brjod pa ma yin te/ mi'i chos bla ma brjod pa ma yin gyi/ 'di ltar brjod pa kho na'o/ /'di skad bstan te/ bdag ni dge sbyong gi 'bras bu bzhi las nyams pa'o zhes bya ba la sogs pas thob pa las yongs su nyams pa brjod pa gang yin pa de yang mi'i chos bla ma ma brjod pa ma yin te/ brjod pa kho na yin pas gal te brdzun na ni pham par 'gyur ro zhes bya ba'i tha tshig go/ /gal te ma thob pa las nyams par go bar byed de/ ji ste yon tan khyad par can yod par yid ches par 'dod pas byed na de'i tshe/ gzhogs smos kyi skabs kyi sbom por 'gyur ro/ /'on te bsam pa drang pos na ni de la nyes pa med pa nyid do/ / bla ma brjod pa'i 'dun pas ming mthun pa'i don brjod na sbom po'o zhes bya ba ni mi'i chos bla ma brjod pa'i 'dun pa bsam pas de dang ming mthun pa brjod pa sbom po ste/ de dang ming 'dra ba ni ming mthun pa ste/ ming mtshungs pa'o/ /ming mthun pa des ming mthun pa'i don brjod pa ni ming mthun pa'i don brjod pa'o/ /ming mthun pa brjod pa de la mi'i chos bla ma brjod par bya ba'i bsam pas ni sbom po ste/ dper na bdag ni slob pa ste/ so sor thar pa'i sdom pa la sogs pa la lo ma gcad pa la sogs pa la slob pa nyid las bsams te/ bdag ni slob pa'o zhes bya ba'i tshig brjod na sbom po'o/ /bdag ni mi slob pa ste/ so sor thar pa'i mdo la sogs pa la don byas shing bslabs zin pa nyid dam/ mi sbyor ba nyid las bsams nas bdag ni mi slob pa'o zhes brjod pa la sogs pa thams cad la sbom por sbyar ro/ /'di skad bstan te/ mi'i chos bla ma dang mi mthun pa'i ming gis mi'i chos bla ma brjod par 'dod pas brjod pa gzhan gyis kyang thos na sbom po'o/ /nor na yang ngo zhes bya ba ni/ brjod pa zhes bya bar sbyar te rgyun du zhugs pa'i 'bras bu la sogs pa mi bden pa mi'i chos bla ma brjod par bya'o snyam pa las nor te lan cig phyir 'ong ba'i 'bras bu la sogs pa gong ma gong ma dag brjod na yang sbom por 'gyur ro zhes bya ba'i tha tshig go/ /gzhogs smos kyang ngo zhes bya ba yang sbom po'o zhes bya bar sbyar te/ sgyur cing smra bas mi'i chos bla ma gzhogs smos byed na sbom po'o/ /'di lta ste dper na e ma'o khyod kho bo ci 'dra ba de de 'dra bar 'gyur ro/ /kho bo dang khyod dang 'u bu cag 'di ltar rgyun du zhugs pa dang lan cig phyir 'ong ba dang / phyir mi 'ong ba dang dgra bcom par 'gyur ro/ /kho bo ni rgyun du zhugs pa dang dgra bcom pa'i bar yang yin no zhes de skad du zer zhes bya ba la sogs pa mthar 'gyur ba'i bla ma gzhogs smos byed la gzhan gyis thos na sbom por 'gyur ro zhes bya ba'i tha tshig go/ /yang dag pa phyi ma nyid la de mi 'byung ba ma yin no zhes bya ba la yang dag pa zhes bya ba ni bden pa'o/ /phyi ma zhes bya ba ni tha ma'o/ /gang la gzhogs smos kyi tshig phyi ma bden pa yod pa de na yang dag pa'i phyi ma ste/ kho bo ni rgyun du zhugs pa yang ma yin dgra bcom pa'i bar yang ma yin no zhes bya'o/ / de'i dngos po ni de nyid do yang dag pa phyi ma nyid do/ /la zhes bya ba ni yang dag pa'i phyi ma nyid do ste/ de la gzhogs smos de mi 'byung ba ma yin te 'byung ba nyid do/ /'di skad bstan te/ sngar mi'i chos bla ma yang dag pa ma yin pa smos la phyis ni tshig yang dag pa la zhugs na/ bden pa'i don phyi ma la zhugs pa de la mi'i chos bla ma yang gzhogs smos byas pa'i tshig snga ma de gzhogs smos ma byas pa nyid ma yin gyi/ gzhogs smos byas pa kho na ste/ 'di ltar byas pa la ma byas pa med pa'i phyir ro/ /'di skad bstan te/ gal te dge slong gis sngar mi'i chos bla ma gzhogs smos bya ba'i tshig brjod la phyis ni bden par brjod na de lta na yang gzhogs smos kyi tshig snga ma de gzhogs smos nyid du mi 'gyur ba ma yin te 'gyur ba kho na'o/ /'dir gzhung ni btsun pa dge slong 'di skad ces khyim slong mo ster ba'i khyim che ge mo dge slong gang gi yin pa'i dge slong de ni rgyun du zhugs pa'am/ dgra bcom pa'i bar yin no/ /khyim slong mo ster ba'i khyim de su'i yin/ des smras pa/ kho bo'i yin te/ kho bo ni rgyun du zhugs pa yang ma yin/ dgra bcom pa'i bar yang ma yin no zhes mchi na ltung ba cir 'gyur/ bka' stsal pa/ nyes pa sbom por ro zhes gsungs pa yin no/ /smra ba'i pham par 'gyur ba zhu ba'i skabs so zhes bya ba mi'i chos bla ma smra ba'i pham par 'gyur ba zhu ba'i skabs nas 'byung ba rdzogs so// //da ni smra ba'i pham par 'gyur ba 'dul byed kyi skabs nas gsungs pa bsdu ba'i phyir/ sbom po ni btsun pa ni dgra bcom pa chos gos la sogs pa mchog 'os pa/ bram ze sdig pa'i chos bsal la/ btsun pa'i dbang po drug po dag ni shin tu dul ba/ sbas pa/ bsrungs pa/ bsgoms pa dag yin no zhes zer ba cang mi smra bas dang du len par byed na 'o zhes bya ba smras te/ btsun pa ni dgra bcom pa'o zhes zer ba la/ dge slong gis cang mi smra bas dang du len par byed na sbom po'o/ /de bzhin du kye btsun pa ni chos gos la sogs pa mchog 'os pa'o zhes zer ba la dge slong gis cang mi smra bas dang du len par byed na yang sbom po'o/ / de bzhin du btsun pa ni bram ze sdig pa'i chos bsal ba'o zhes zer ba la/ dge slong gis cang mi smra bas dang du len par byed na yang sbom po'o/ /sdig pa'i chos bsal ba zhes bya ba ni sdig pa'i chos dang bral ba zhes bya ba'i tha tshig go/ /dbang po drug po dag ni mig la sogs pa dag go/ /shin tu dul ba zhes bya ba ni/ mi sdug pa la sogs pa bsgoms pas so/ /shin tu sbas pa zhes bya ba ni zag pa med pa'i lam bskyed pas so/ /shin tu bsrungs pa zhes bya ba ni/ dran pa dang shes bzhin dag gis so/ /shin tu bsgoms pa zhes bya ba ni nyon mongs pa med pa la sogs pa mngon du gyur pas so/ /dang du len pa yang rnam pa gnyis te/ tshig gis dang du len pa dang / cang mi smra bas dang du len pa'o/ /de la tshig gis dang du len pa ni pham par 'gyur ro/ /cang mi smra bas dang du len pa ni sbom por ro/ /de'i phyir 'dir gzhung ni cang mi smra bas zhes bya ba smos te/ dang du len pa tsam gyis sbom po kho nar 'gyur ba yang ma yin te/ 'o na ci lta zhe na/ gzhan gyis de'i don go na des sbom por 'gyur ro/ /ma go na ni nyes byas so/ /btsun pa gal te dgra bcom pa yin na bdag gi bsod snyoms long shig / khyim du zhugs shig /stan la 'dug shig /lag chu zed cig /bza' ba dang / sran tshod dang bca' ba long la zo shig /rjes su yi rang bar byos shig /byung shig ces pa la de bzhin du sgrub na'o zhes bya ba ni/ mdo snga ma las zer ba la zhes bya ba'i rjes dang sbyar te/ btsun pa gal te dgra bcom pa yin na bdag gi bsod snyoms long shig /ces zer ba la de bzhin du sgrub pa bsod snyoms len par byed na sbom po'o/ /mngon sum du tshig gis go bar byed pa med pas yan lag ma tshang ba'i phyir des na sbom po ste/ pham par mi 'gyur ro/ /de bzhin du khyim du zhugs shig /ces zer ba la 'dug pa dang / stan la 'dug cig ces zer ba la stan la 'dug pa dang / lag chu zed cig ces zer ba la lag chu zed pa dang / bza' ba dang sran tshod dang / bca' ba long la zo shig ces zer ba la len pa dang / za bar byed pa ste/ long la zhes bya ba ni byin len gyis shig ces pa'o/ /zo shig ces bya ba ni bza' ba dang sran tshod dang bca' ba zhes bya ba'i tshig gsum char dang sbyar bar bya'o/ /de bzhin du rjes su yi rang bar byos shig ces zer ba la rjes su yi rang bar byed pa dang / byung shig ces zer ba la byung na sbom po'o zhes bya bar sbyar ro/ /rjes su yi rang ba yang rnam pa gnyis te/ sems kyis dang tshig gis so/ /de la sems kyis rjes su yi rang na ni sbom po'o/ /tshig gis na ni pham par 'gyur ro/ /'di skad bstan te/ gal te btsun pa dgra bcom pa yin na rjes su yi rang bar byos shig /ces zer ba la cang mi smra bas rjes su yi rang bar byas na ni sbom po ste/ smra ba'i mtshan nyid kyi yan lag med pa'i phyir ro/ /smra ba'i pham par 'gyur ba 'dul byed dag go zhes bya ba 'dul byed kyi skabs bshad zin to/ /smra ba'i pham par 'gyur ba rdzogs so zhes bya ba mi'i chos bla ma smra ba zhes bya ba'i pham par 'gyur ba bzhi pa rdzogs so// //pham par 'gyur ba rnams bstan nas/ da ni khu ba 'byin pa la sogs pa dge 'dun lhag ma brjod par bya ste/ khu ba 'byin pa la sogs pa ni rmi lam na yang srid pas de'i phyir/ rmi lam na ni med pa dang 'dra'o zhes bya ba smras te/ dngos po med pa dang 'dra bar 'gyur bas de'i phyir med pa dang 'dra'o/ /'di ltar rmi lam rdzas su yod pa yin yang de lta mod kyi/ 'jig rten gyi tha snyad las shin tu 'das pa yin pa'i phyir rmi lam ni med pa dang 'dra ba nyid yin no/ /de'i 'bras bu ni ma byas pa nyid do zhes bya ba ni rmi lam gyi 'bras bu lus dang ngag rnam par 'gyur ba dang / khu ba 'byin pa la sogs pa ni ma byas pa nyid du rig par bya'o/ /rmi lam ni rnam pa gnyis su 'dod de/ kha cig ni gnyid dang ldan pa'i sems rmi lam gyi sgrar brjod par 'dod do/ /kha cig ni sems de'i yul bud med la sogs pa gang yin pa rmi lam gyi sgrar brjod par 'dod de/ sems de dang bud med la sogs pa yul des gnyid log pa'i gnas skabs na khu ba 'byin pa la sogs pa gang byas pa de ni ma byas par rig par bya'o/ /da ni khu ba 'byin pa'i dge 'dun lhag ma'i mtshan nyid brjod par bya ste/ gang byas na khu ba 'byin pa'i dge 'dun lhag ma zhes bya ba'i kha na ma tho bar 'gyur zhe na de'i phyir/ phyung ba na'o zhes bya ba smras te/ khu ba phyung na dge 'dun lhag mar 'gyur ro/ /ltung ba gang gi lhag mar dge 'dun gyis gso bar bya ba de ni dge 'dun lhag ma ste/ de la dge 'dun gyis gso bar bya'o zhes bya ba'i tha tshig go/ /sems ji lta bus she na de'i phyir/ der 'dun pas so zhes bya ba smras te/ 'byin par 'dun pas yin gyi rgyug pa la sogs pa'i sems kyis ni ma yin no/ /rdzas gzhan la yang 'byung ba srid pas gang phyung zhe na de'i phyir/ rang gi khu ba'o zhes bya ba smras te/ rang gi khu ba yin gyi gzhan gyi ni ma yin no/ /khu ba phyung ba ni mang du yod de 'di lta ste/ gnas nas 'byung ba dang / sbubs su 'ongs pa las 'byung ba dang / dbang po'i mtha' nas 'byung ba'o/ /de'i phyir 'byung ba de dag las phyung ba gang la dge 'dun lhag mar 'gyur zhe na de'i phyir/ dang po la'o zhes bya ba smras te/ gnas nas 'byung ba ni dang po ste/ phyung ba de la'o zhes bya ba'i tha tshig go/ /lus 'di la khu ba'i gnas su gyur pa logs shig na 'khris pa lta bu med do/ /'on kyang de ni shing ma zho bzhin lus thog dag las 'byung ste/ dper na bu ram shing las khu ba dang 'bru las 'bru mar bzhin no/ /dang po las 'byung ba'i mtshan nyid brjod pa ni 'di yin te/ de myong ba'i gnas skabs de na 'dod chags shas che rab tu 'gyur ba dang / bde ba nyams su myong ba chen po skye ba dang / snying 'dar ba la sogs pa lus 'gyur ba 'byung ba yin no/ /mdo byed pas de ga las she na nye ba 'khor gyis zhus pa las te/ btsun pa ji tsam gyis ni khu ba phyung bar brjod par bgyi/ gang nas sbubs su 'ongs par gyur na'o zhes gsungs pa las so/ /rnam par 'byed pa'i tshig las kyang phyung ba zhes bya ba'i mdo'i tshig 'di ni de ma thag tu phyung ba'o zhes rnam par 'byed pa las gsungs te/ sbubs su 'ongs pa las phyung na ni nyes pa sbom po'o zhes gsungs pa'i phyir ro/ /'byin par 'dun pa ni rnam pa mang du snang ste/ la la ni bde ba'i phyir/ la la ni rig sngags kyi phyir/ la la ni sa bon gyi phyir/ la la ni sman gyi phyir/ la la ni brtag pa'i phyir 'byin te/ de la sogs pa'i rnam pa snang ba'i phyir/ ci thams cad kha na ma tho ba 'dra'am/ 'on te bye brag yod ce na/ de'i phyir bde ba dang / rig sngags dang / sa bon dang / sman dang / brtag pa'i phyir de dag la bye brag med do zhes bya ba smras te/ phyir zhes bya ba'i sgra re re dang sbyar bar bya ste/ bde ba dang / rig sngags dang / sa bon dang / sman dang / brtag pa zhes bya ba re rer dbye ba byas la de nas bde ba'i phyir dang / rig sngags kyi phyir zhes bya ba la sogs par sbyar ro/ /de dag gi phyir khu ba 'byin pa la ni ltung ba la bye brag med de/ thams cad dge 'dun lhag mar 'gyur ba'i phyir ro/ /rnam pa gang gis 'byin pa zhe na de'i phyir/ reg pas so zhes bya ba smas te/ tshul bzhin ma yin pa yid la byed pa la sogs pa tsam gyis ni ma yin no/ /phrad pa tsam gyis kyang reg par srid pa'i phyir/ reg pa ji lta bus she na/ de'i phyir brtsal bas so zhes bya ba smras te/ bya bas drud pa la sogs pa yin gyi/ phrad pa tsam gyis ni ma yin no/ /de ltar yang rnam par 'byed pa las rtsol na zhes gsungs ba la 'dul byed dag las kyang dge slong yan lag gi rnam pa bzung ba la mi gtsang ba byung ba dang / bcom ldan 'das kyis bka' stsal ba/ nyes pa sbom por 'gyur ro zhes gsungs so// //bam po bcu gsum pa/ gang la reg pas she na de'i phyir/ yan lag gi rnam pa la 'o zhes bya ba smras te/ pho'i dbang po la'o/ /brla'i phyogs la sogs pa gzhan gyi phyogs la ni ma yin te/ de la reg pa las 'byung ba srid pa'i phyir ro/ /gang gis reg pas she na/ de'i phyir phyi rol gyis kyang ngo zhes bya ba smras te/ nang gi rang dang gzhan gyi lag pa 'ba' zhig gis ni ma yin no/ /phyi rol yang rnam pa gnyis te/ sems can du bgrang ba shi ba'i lus dang sems can du bgrang ba yang ma yin pa gos la sogs pa'o/ /de'i phyir phyi rol du gyur pa sems can du bgrang ba ma yin pa bsal ba'i phyir/ sems can du bgrang bas so zhes bya ba smras te/ lag pa la sogs pa gcad pas so/ /phyi rol du gyur pa sems can du bgrang ba la yang sems can gyi rnam pa ma yin pa yang srid pas bye brag tu bya ba'i phyir/ de'i rnam par gnas pa'o zhes bya ba smras te/ rang gi rnam pa gang yin pa der gnas pas so/ /'di skad bstan te/ yan lag gang yang rung bar rang gi rnam pa las ma nyams pas reg pas phyung na yang dge 'dun lhag mar 'gyur gyi/ lag pa kho nas reg pa phyung bar ma zad do/ /lus kyi rnam pa las nyams pas phyung na ni sbom po ste/ sha'i dum bus ni sbom po'o zhes gsungs pa'i phyir ro/ /brtsal bas so zhes bye brag ma bstan pas 'di ltar rnam pa gang yang rung ba'i rnam pa'i brtsal bas reg pas so zhes bya bar shes pas bcangs pas brtsal ba'i rang bzhin 'ba' zhig tu ma zad de/ 'di ltar de nyid kyi don bstan pa'i phyir ril gyis bcangs pa dang / dam du bcing ba gnyis med par yang ngo zhes bya ba smras te/ ril gyis bcang ba zhes bya ba ni kun bzung ba'o/ /dam du bcang ba zhes bya ba ni/ de ltar bcangs pa la dam du 'dzin pa'o/ /de gnyis med par brtsal bas reg pas phyung na yang dge 'dun lhag ma'o/ /'di skad bstan te/ 'di ltar dge slong gis yan lag gi rnam pa ril gyis 'chang bar mi byed/ dam du bcang bar mi byed du zin kyang phyogs gcig bcangs shing phyogs gcig bsdams pas phyung na yang dge 'dun lhag ma'o/ /da ni bde ba nyams su myong ba shas chen po med kyang dge 'dun lhag mar 'gyur ba kho nar bstan pa'i phyir/ bye brag nges par myong ba dang / byung la thug pa dang / ngad las pa'i bde ba nyams su myong ba dag kyang ngo zhes bya ba smras te/ kyang ngo zhes bya ba'i sgras ni med par yang ngo zhes bya bar sbyar te/ bye brag nges par myong ba'i bde ba nyams su myong ba dang / byung la thug pa'i bde ba nyams su myong ba dang / ngad las pa'i bde ba nyams su myong ba dag med par yang brtsal bas reg pas phyung na dge 'dun lhag mar 'gyur gyi/ ril gyis bcang ba dang dam du bcang ba gnyis med par yang ngo zhes bya ba 'ba' zhig tu ma zad do/ /de la bye brag nges par myong ba'i bde ba nyams su myong ba med par yang zhes bya ba la bye brag las nges par 'gyur ba'i longs spyad pa mngon du gyur pa myong ba ni/ bye brag nges par myong ba ste/ bud med dang skyes pa kun du sprad pa'i gnas skabs so/ /de na bde ba gang yod pa de ni de'i bde ba'o/ /de nyams su myong ba ni ro myong ba ste/ de med par yang ngo / /'di skad bstan te/ dang por mi tshangs par spyod pa la kun du rtog pa skyes nas tshul bzhin ma yin pa yid la b yed pas zil gyis non par gyur pa na lus kyi dbang po ril gyis mnams pas 'dod chags dang ldan pa'i lus kyi rnam par shes pa skyed par byed pa'i reg pa'i bye brag skye bar 'gyur ba de'i gnas skabs na bde ba gang nyams su myong zhing bde ba des nye bar 'tsho ba de ni bye brag nges par myong ba'i bde ba zhes bya ste/ de med par yang brtsal bas reg par phyung na dge 'dun lhag ma'o/ /byung la thug pa'i bde ba nyams su myong ba med par yang zhes bya ba la lus kyi dbang po las khu ba 'don la thug pa ni byung la thug pa zhes bya ba ste/ khu ba 'byung ka'i gnas skabs so/ /de na bde ba gang yod pa de ni de'i bde ba'o/ /de nyams su myong ba ni ro myong ba ste/ de med par yang ngo / /'di skad bstan te/ lus kyi dbang po las khu ba 'byung ka'i gnas skabs na de la gzhol bas bde ba gang nyams su myong zhing bde bas nye bar 'tsho ba de ni byung la thug pa'i bde ba nyams su myong ba zhes bya ste/ de med par brtsal te reg pas phyung na dge 'dun lhag ma'o/ /ngad las pa'i bde ba nyams su myong ba med par yang zhes bya ba la/ gdung ba dang bral bar gyur pa ni ngad las pa zhes bya ba ste/ 'dod chags kyi gdung ba dang bral ba'i gnas skabs so/ /de ni bde ba gang yod pa de ni de'i bde ba'o/ /de nyams su myong ba ni ro myong ba ste/ de med par yang ngo / /'di skad bstan te/ khu ba phyung nas de'i mod la 'dod chags kyi gdung ba dang bral ba'i gnas skabs na de la gzhol bas bde ba gang nyams su myong zhing bde bas nye bar 'tsho ba de ni ngad las pa'i bde ba nyams su myong ba zhes bya ste/ de med par brtsal bas reg pas phyung na dge 'dun lhag ma'o/ /de ltar na gang la khu ba phyung ba tsam kho na'i nye bar 'tsho ba yod pa de la/ de dag med kyang dge 'dun lhag mar 'gyur ro zhes bya ba'i tha tshig go/ /'dir gzhung ni dge slong gis bye brag nges par myong ba'i bde ba nyams su myong zhing khu ba 'byin na dge 'dun lhag mar 'gyur ro/ /de bzhin du byung la thug pa'i bde ba nyams su myong zhing khu ba 'byin na dge 'dun lhag mar 'gyur ro/ /gal te dge slong gis bye brag nges par nyams su myong ba'i bde ba nyams su myong zhing 'og ma gnyis med par khu ba 'byin na yang dge 'dun lhag ma'i ltung ba kho nar 'gyur ro/ /de bzhin du byung la thug pa'i bde ba nyams su myong zhing dang po dang tha ma gnyis med par khu ba 'byin na yang dge 'dun lhag ma'i ltung ba kho nar 'gyur ro zhes gsungs pa yin no/ /don 'di la khungs ni de yin par rig par bya'o/ /de ltar khu ba 'byin pa'i skabs 'di la yan lag bcu ste/ phyung ba dang / der 'dun pa dang / rang gi khu ba dang / dad pa dang / reg pa dang / brtsal ba dang / yan lag gi rnam pa dang / phyi rol gyis dang / sems can du bgrang bas dang / de'i rnam par gnas pas te/ yan lag bcu po de dag las gang yang rung ba zhig ma tshang na ni nyes pa sbom po zhes bya ba'i ltung bar 'gyur te/ dge 'dun lhag mar mi 'gyur ro/ /sbubs su ma 'ongs pa'o zhes bya ba ni/ phyung na dge 'dun lhag ma'o/ /sbubs su 'ongs pa byung ba'i sbom po'o zhes 'byung ngo / /khu ba 'byung ba'i gnas nas ma 'phos pa ni sbubs su ma 'ongs pa zhes bya'o/ /dang po 'phos pa ni sbubs su 'ongs pa zhes bya'o/ /shugs kyi gnas skabs su btang na rdzogs par ma byas pa nyid do zhes bya ba ni/ shugs kyi gnas skabs su btang na rdzogs par ma byas pa nyid do zhes bya bar sbyar ro/ /de ma thag tu 'pho bar 'gyur ba ni shugs zhes bya ste/ de'i gnas skabs su lus kyi brtsal ba btang na khu ba 'byin pa rdzogs par ma byas pa nyid do/ /'di skad bstan te/ shugs kyi gnas skabs zhes bya ba dus nye bar 'byung ba'i gnas skabs su brtsal ba btang na sbyor ba snga ma'i dbang gis khu ba phyung ba gang yin pa'i byung ba de ni ma byas pa nyid de/ de la nyes pa sbom po kho nar 'gyur ro zhes bya ba'i tha tshig go/ /'dir gzhung ni/ shugs btang ste khu ba phyung na nyes pa sbom por 'gyur ro zhes gsungs pa yin no/ /btang ba zhes bya ba 'dir yid kyis btang ba yang yod pa yin mod kyi/ 'on kyang gsal bar bya ba'i phyir lus kyi brtsal ba btang na zhes bya bas rnam par bshad do/ /gar byed pa dang rab tu gar byed pa gnyis la ni na smad pa nyid do zhes bya ba ni/ gar byed pa dang rab tu gar byed pa gnyis la khu ba phyung ba ni dge 'dun lhag ma las na smad pa nyid de sbom po'o/ /de la ni phyung ba dang / der 'dun pa dang / rang gi khu ba dang / dang po zhes bya ba'i yan lag de dag yod do/ /'di skad bstan te/ dge slong gis dbyung ba'i bsam pas gar byed pa dang / rab tu gar byed pas khu ba 'byin par byed na nyes pa sbom por 'gyur ro/ /nam mkha' la rked pa bskyod pa'o zhes bya ba ni/ nam mkha' la rked pa bskyod pas khu ba 'byin par byed na na smad pa nyid de/ de la yang phyung ba dang / der 'dun pa dang / rang gi khu ba dang / dang po zhes bya ba'i yan lag de dag thams cad yod de/ de ltar na 'dir tshig gi don 'di 'byung ste/ dge slong gis dbyung ba dang / der 'dun pas nam mkha' la rked pas 'khyud cing 'khu ba 'byin na nyes pa sbom por 'gyur ro/ /phyogs gzhan du reg pa'o zhes bya ba ni/ yan lag gi rnam pa las gzhan pa dag tu reg pa ni phyogs gzhan du reg pa ste/ de yang sngar bstan pa'i rigs pa nyid kyis na smad pa nyid de/ sbom po'o zhes bya ba'i tha tshig go/ /'dir gzhung ni dge slong gis kun du mnyed pa'i bde ba nyams su myong bar byed cing khu ba 'byin na nyes pa sbom por 'gyur ro zhes gsungs pa yin te/ 'dir yan lag gi rnam pa las gzhan pa'i phyogs su kun du mnyed par dgongs pa yin no/ /rgyun las bzlog pa'i phyogs su gtod pa'o zhes bya ba ni yan lag gi rnam pa 'bab chu 'i rgyun las bzlog pa'i phyogs su gtad de khu ba 'byin na na smad pa nyid do/ /rdzi phyogs ma yin par yang ngo zhes bya ba yang der gtad de khu ba 'byin na na smad pa nyid do/ /rnam pa de nyid kyis khu ba 'byin na nyes pa sbom po'o/ /mngon par nges par myong ba'i bde ba nyams su myong ba bsgrub pa'o zhes bya ba la bye brag nges par myong ba ni/ mngon par nges par myong ba 'o de las byung ba'i bde ba ni bye brag nges par myong ba'i bde ba'o/ /de nyams su myong ba zhes bya ba ni ro myong ba'o/ /de sgrub pa zhes bya ba ni nan tan byed pa ste/ de yang na smad pa nyid do/ / dge slong gis yid kyis de'i bdag nyid khas len pas ji tsam du mi tshangs par spyod pa'i bde ba la rnam par rtog pa de tsam du khu ba 'byin na nyes pa sbom por 'gyur ro/ /'dir gzhung ni bye brag nges par myong ba'i bde ba nyams su myong bar byed cing khu ba 'byin na nyes pa sbom por 'gyur ro zhes gsungs pa yin no/ /'dir yang phyung ba dang / der 'dun pa dang / rang gi khu ba dang / dang po zhes bya ba'i yan lag de dag thams cad yod do/ /bye brag nges par myong ba'i bde ba zhes bya ba ni dpe tsam ste/ byung la thug pa'i bde ba dang / ngad las pa'i bde ba nyams su myong ba sgrub pas dge slong gis yid kyis de'i bdag nyid khas len pas ji tsam du byung la thug pa'i bde ba dang / ngad las pa'i bde ba la rnam par rtog pa de tsam du khu ba 'byin na nyes pa sbom por 'gyur ro/ /de la bye brag nges par myong ba'i bde ba zhes bya ba ni bud med dang / skyes pa kun du sprad pa'i gnas skabs kyi bde ba gang yod pa'o/ /byung la thug pa'i bde ba zhes bya ba ni khu ba 'byung ba'i gnas skabs na bde ba gang skye ba'o/ /ngad las pa'i bde ba zhes bya ba ni 'dod chags kyi gdung ba dang bral ba'i gnas skabs na bde ba gang 'byung ba'o/ /sbubs su 'ongs pa'o zhes bya ba ni/ sbubs su 'ongs ba'i khu ba 'byin na sbom po'o/ /khu ba 'byung ba'i gnas nas 'phos ma thag pa ni sbubs su 'ongs pa zhes bya'o/ /chags pa'i sems dang ldan pa nyid na gzhal ba'i ched nyid kyis reg pa ni sbyor ba ma yin pa ma yin no zhes bya ba la/ gang la chags pa'i sems yod pa de ni chags pa'i sems dang ldan pa'o/ /de'i dngos po ni de nyid de chags pa'i sems dang ldan pa nyid de na'o/ /gzhal ba'i ched kyi dngos po ni gzhal ba'i ched nyid de/ des yan lag gi rnam pa la reg pa gang yin pa de ni sbyor ba ma yin pa ma yin te/ sbyor ba kho na yin te/ nyes pa sbom po'o zhes bya ba'i tha tshig go/ /'dir yan lag gi rnam pa zhes smos pa ni shugs kyis 'thob pa'i phyir logs shig tu smos par bya mi dgos te/ gzhal ba'i gzhi de yin pa'i phyir ro/ /'dir gzhung ni dge slong gis kun du chags pa'i sems kyis rang gi yan lag gi rnam par 'jal bar byed na nyes pa sbom por 'gyur ro zhes gsungs pa yin no/ /'dir reg pa gtso bo yin pas des na mdo las reg pa ni zhes smos kyi/ 'jal ba ni zhes ma smos so/ /lta na nyes byas so zhes bya ba ni/ chags pa'i sems dang ldan pa nyid na yan lag gi rnam pa la'o/ /rgyun dang rdzi phyogs kyis gtong ba yang ngo zhes bya ba la/ phyogs su zhes bya ba'i sgra rgyun phyogs dang rdzi phyogs zhes bya ba gnyis kar sbyar bar bya ste/ /rgyun phyogs dang rdzi phyogs su chags pa'i sems dang ldan pa nyid na yan lag gi rnam pa gtod na nyes byas so/ /yang ngo zhes bya ba'i sgra ni nyes byas zhes bya ba'i sgra'i rjes bsnyag pa'i phyir ro/ /brla dang gos dang gzhan gyis reg pa dang g.yan pa phrug pa dag gis bab col du don ma yin par zhugs pa la ni ltung ba med do zhes bya ba la/ brla dang gos dang gzhan te de dag gis reg pa ni brla dang gos dang gzhan gyis reg pa'o/ /de dag ni reg pa rnams dang / g.yan pa phrug pa dag ni brla dang gos dang / gzhan gyis reg pa dang g.yan pa phrug pa dag go/ /de dag gis bab col du zhes bya ba ni ched du ma bsams blo sngon du ma btang bar ro/ /de'i don ma yin par zhugs pa zhes bya ba ni dbyung ba'i don ma yin par zhugs pa ste/ de la khu ba byung ba la ni ltung ba med do/ / de la dge slong rgyug pa dang rgod bag dang / mchongs pa la sogs pa tsam gyi bya ba la zhugs pa la ni brla dang gos kyis reg pas so/ /bsro khang la sogs pa'i las nyams su myong bar bya ba'i phyir gzhan dang lhan cig reg pa la ni gzhan gyis reg pas so/ /shu ba dang khyi rdo dang 'brum bu la sogs pa'i sdug bsngal gyi gnyen po'i phyir ni g.yan pa phrug pa ste/ de dag gis bab col du shugs drag por byung ba la ni ltung ba med do/ /reg bya ma yin pa nyams su myong ba'o zhes bya ba ni/ reg bya'i yul ma gtogs pa gzugs dang / sgra dang dri dang ro zhes bya ba mig dang / rna ba dang / sna dang lces nyams su myong ba na de'i don ma yin par zhugs pa la bab col du byung ba la yang nyes pa med do/ /'dir gzhung ni chags par 'gyur ba'i gzugs dag mthong bas khu ba byung ba la ni ltung ba med do zhes gsungs pa yin no/ /dran pas de la yang ngo zhes bya ba ni reg bya dang reg bya ma yin pa'i yul lnga po nyams su myong bas de'i don ma yin par bab col du byung ba la ltung ba med do zhes bya ba de ni nye bar gnas pa las byung ba'i rnam par gzhag pa yin gyi/ gang gi tshe chags par 'gyur ba'i gzugs blta'o snyam zhing / de'i don ma yin par zhugs pa la bab col du byung ba ni nyes byas su rig par bya'o/ /de ltar yang bcom ldan 'das kyis deng phyin chad mig gis mig la brten te bud med la blta bar mi bya'o zhes gsungs pa yin no/ /'byin pa'i dge 'dun lhag ma rnam par 'byed pa'o zhes bya ba khu ba 'byin pa'i dge 'dun lhag ma rnam par 'byed pa'i skabs nas 'byung ba rdzogs so/ / //da ni khu ba 'byin ba'i dge 'dun lhag ma la zhu ba'i skabs nas 'byung ba bsdu ba'i phyir/ 'pho bar 'gyur ba dang 'phos ma thag pa ni shugs dang sbubs su 'ongs pa'o zhes bya ba smras te/ 'pho bar 'gyur ba dang 'pho ba ni 'pho bar 'gyur ba dang 'phos pa'o/ /shugs dang sbubs su 'ongs pa ni shugs dang sbubs su 'ongs pa ste/ go rims bzhin du sbyar bar rig par bya'o/ /shugs kyi gnas skabs su btang na rdzogs par ma byas pa nyid do zhes smos pa gang yin pas ni shugs bstan te/ de ma thag tu skad cig ma gnyis pa la rang gi khu ba 'byung ba'i gnas nas 'pho bar 'gyur ba'i khu ba yin par rig par bya'o/ /de'i phyir 'dir gzhung ni shugs zhes bya ba yin te/ 'byung ba la mngon par phyogs pas 'phangs pa zhes bya ba'i tha tshig go/ /sbubs su 'ongs pa zhes bya ba ni rang gi gnas nas 'phos ma thag pa zhes gang gsungs pa de yin par rig par bya ste/ skad cig mas bar du mchod pa zhes bya ba'i tha tshig go/ /brtsams pa tsam na sbyor ba nyid ma yin no zhes bya ba ni/ 'byung ba'i ched du brtsams pa tsam byas nas btang na sbyor ba nyid ma yin te/ 'di ltar sbyor ba nyid kho na'o/ /shugs kyi gnas skabs su btang na rdzogs par ma byas pa nyid do zhes bya ba des ni 'pho bar 'gyur ba'i gnas skabs la sbom por bstan to/ /mdo 'di ni 'pho bar 'gyur ba'i gnas skabs de'i snga rol du nyes byas so snyam pa'i blo gros de bsal ba'i phyir byas pa yin te/ de ltar yang brtsams nas gtong na ltung ba cir 'gyur/ nyes par sbom por 'gyur ro zhes gsungs pa yin no/ /sbyor ba med par phyung ba la ro myong ba ni de dang ldan pa nyid do zhes bya ba la/ sbyor ba med par zhes bya ba ni sbyor ba med pa gnyid ma log pa'i brtsal ba med pa ste/ gnyid log pa'i gnas skabs su phyung ba gang yin pa dang / bab col du byung ba gang yin pa'i phyung ba de gnyis la ro myong ba skyed par byed pa de dag ni sbyor ba de dang ldan pa nyid do zhes bya ba'i tha tshig go/ /nyal ba'i brtsal ba la de skad ces bya ste/ 'dir gzhung ni gal te ro myong par byed na nyes pa sbom por 'gyur ro zhes gsungs pa yin no/ /nyal ba'i brtsal ba zhes bya ba ni gnyid log pa'i gnas skabs na'o byed pa dang 'khyud pa la sogs rmis pa la bya'o/ /nyal ba'i brtsal ba nyid la khu ba byung ba las sad pa'i gnas skabs na ro myong bar byed pa la nyes pa 'dir rig par bya'o/ /yan lag gi rnam pa cung zad mnyed pa dang / yongs su mnyed pa dang 'tshir ba'o zhes bya ba la phyogs gcig cung zad mnyed pa ni cung zad mnyed pa ste/ cung zad ces bya ba'i sgra ni cung zhig gi don la zhugs pa yin pa'i phyir ro/ /thams cad mnyed pa ni yongs su mnyed pa ste/ phyogs thams cad nas bsdoms pas so/ /'dir gzhung ni dge slong gis yan lag gi rnam pa cung zad mnyed pa bdag gir byed na nyes pa sbom por 'gyur ro/ /yongs su mnyed pa bdag gir byed na nyes pa sbom por 'gyur ro/ /mngon par 'tshir ba bdag gir byed na nyes pa sbom por 'gyur ro zhes gsungs pa yin no/ /de las su rung ba la nom pa'o zhes bya ba ni/ yan lag gi rnam pa de las su rung ba la nom pa ni sbom po'o/ /'dir gzhung ni yan lag gi rnam pa las su rung ba la nom na nyes pa sbom por 'gyur ro zhes gsungs pa yin no/ /nom pa'o zhes bya ba ni yan lag gi rnam pa sems can du bgrang ba lag pa la sogs pas nom par byed pa la nyes pa 'di rnam par gzhag go/ /sems can du bgrang ba ma yin pas ni nyes byas so/ /sman gyis 'byin na'o zhes bya ba yang sbom po'o zhes bya bar sbyar ro/ /dge slong gis dbyung ba'i phyir sman zos la gal te 'byung ba'i dus na de'i 'gyur ba 'byung na de'i tshe kha na ma tho ba der 'gyur ro/ /gal te de'i 'gyur ba mi 'byung na nyes pa med de lci bar gyur pa'i phyir ro/ /gzhan gyi las kyang ngo zhes bya ba ni/ yan lag gi rnam pa las 'byin na nyes pa sbom po'o/ /'gyur ba yod kyang rung med kyang rung sbom po ste/ shin tu smad par bya ba nyid yin pa'i phyir ro/ /'byin pa'i dge 'dun lhag ma zhu ba'i skabs so zhes bya ba khu ba 'byin pa'i dge 'dun lhag ma zhu ba'i skabs nas 'byung ba rdzogs so// //da ni khu ba 'byin pa 'dul byed kyi skabs nas 'byung ba brjod par bya ste/ rnam par bsngos pa la sogs pa dang / rnam par zhigs pa dang / keng rus dag dang / mgo dang / rna ba dang / sna dag dang / mgul pa dang / rtsib logs dang / rgyab dang / brang dang / gnyer ma dag dang / skra'i gseb dang / lag pa dang / phrag pa dang / dpung pa dag dang / dpung pa'i bar dang / rked pa dang / brla dang / rkang pa dang / sgyid pa dag dang / sgyid pa'i bar du 'byin na dngos gzhi'o zhes bya ba smras te/ 'di ni phyi rol sems can du bgrang ba dang / de'i rnam par gnas pa zhes smos pa de dag gi spros pa yin no/ /rnam par bsngos pa la sogs pa zhes bya ba la sogs pa'i sgra ni rnam par rnags pa dang / rnam par bam pa dang / rnam par 'bus gzhigs pa dang / rnam par zos pa dang / rnam par dmar ba rnams bsdu'o/ /rnam par zhigs pa zhes smos pas ni/ rnam par 'thor ba dag bsdu ste/ glan pa dag bog pa dang / yan lag dag bral ba ni/ rnam par zhigs pa zhes bya'o/ /de ltar na 'dir tshig gi don 'di 'byung ste/ rnam par bsngos pa la sogs pa'i yul la reg par gyur pa na byung ba ni dngos gzhir 'gyur ro/ /sbom po ni la ba dang / phying ba dang / dre'u rngog dang / sngas nang tshangs can dang / khri dang khri'u dang / stan nang tshangs can dang / khri'i gseb dang / bum pa dang / bum bu dang / bum pa'i bar dang / bya ma bum dang / chol zangs dang / rdo ba dang / skyang nul dang / skyang nul gyi bar dang / sgo gtan dang sha'i dum bu dag go zhes bya ba ni/ 'di man chad 'og nas 'dzag snod la 'drud pa las ni ltung ba med do zhes 'byung ba yan chad ni thams cad sbom po'i dbang du byas pa yin no/ /la ba la sogs par 'byin na sbom po'o/ / sbyor ba tsam las phyung na nyes byas so/ /rma 'tshir na'o zhes bya ba la rang gi yan lag gi rnam pa'i bu ga gang yin pa de ni 'dir rma zhes bya ste/ de 'tshir na sbom po'o/ /gzhan gyi rma de 'tshir ba ni nyes byas so/ /gzhan gyi yan lag gi rnam pa las 'byin na sbom po'o zhes bya ba smras pas 'dir nyes byas su shes te/ 'di ni de'i sbyor ba yin pa'i phyir ro/ /rtsom pa na bud med du byas pa 'tshir na'o zhes bya ba la bud med nyid du des byas pa na bud med du byas pa ste/ mo'i dbang po zhes bya ba'i tha tshig go/ /bud med du byas pa de 'tshir na sbom po'o/ /gang gi tshe zhe na de'i phyir rtsom pa na ste/ mo'i dbang po der lhag par spyod pa rtsom pa'i tshe na lag pa la sogs pas de 'tshir ba la bya'i/ lhag par spyad pa la zhugs zin nas 'tshir ba la ni mi bya ste/ de'i rtsom pa gcig tu gyur pa'i phyir ltung ba gcig nyid kyis lhag par spyad pa nyid bsdus pa yin no/ /der mthe bo 'dzud pa'o zhes bya ba ni bud med du byas pa der ro/ /sbom po de gnyis ni mi tshangs par spyod pa'i yan lag tu gyur pa yin par rig par bya ste/ mthe bo 'dzud pa ni mi tshangs par spyod pa'i gzugs brnyan yin pa'i phyir ro/ /'byin par gtogs pa'i sbom po ni ma yin no/ /mthe bo 'dzud pa zhes bya ba ni dpe tsam ste/ gzhug par bya ba ba so'i reng bu la sogs pa'i rdzas gzhan dag kyang de bzhin no/ /mo'i dbang po ni dpe tsam ste/ pham par 'gyur par byed pa'i sgo gzhan kha dang bshang ba'i lam du yang de bzhin du mthe bo la sogs pa 'dzud na sbom po'o/ /nye bar 'gro ba la shor ba'o zhes bya ba ni/ mi tshangs par spyod pa'i don du nye bar 'gro ba dang / dbyung ba'i don du nye bar 'gro ba na khu ba shor na sbom po ste/ mi tshangs par spyod pa'i don du nye bar 'gro ba na khu ba shor ba ni mi tshangs par spyod par gtogs pa'i sbom pa'o/ /'chag pa la sogs pa'i don du 'gro ba na shor ba la ni ltung ba med do/ /gnas nas gnas su 'pho ba la yang ngo zhes bya ba ni dbyung ba'i don du gnas nas gnas su 'pho ba la khu ba byung na sbom pa'o/ /'dir gzhung ni 'dul byed dag las dge slong gnas nas gnas su 'pho ba na de la khu ba byung nas dge slong de 'gyod pa skyes pa dang / bcom ldan 'das kyis bka' stsal pa/ dge 'dun lhag ma'i ltung bar mi 'gyur te/ nyes pa sbom por ro zhes gsungs pa yin no/ /tshul bzhin ma yin pa yid la byed pa las so zhes bya ba la/ skye gnas 'jig par byed pas tshul bzhin te/ ngan song du 'gro ba 'joms par byed ces bya ba'i tha tshig go/ /tshul bzhin ma yin pa ni tshul bzhin ma yin te/ dbyung ba'i don du skra dang / sen mo dang so dang rked pa dang / brla dang nu ma la sogs pa dag yid la byed pa las khu ba byung na sbom po'o/ /'dir gzhung ni 'dul byed dag las dge slong gis tshul bzhin ma yin pa yid la byed pas khu ba byung nas de 'gyod pa skyes pa dang / bcom ldan 'das kyis bka' stsal pa/ dge 'dun lhag ma'i ltung bar mi 'gyur te/ nyes pa sbom por ro zhes gsungs pa yin no/ /bye brag nges par myong ba'i bde ba nyams su myong ba la rtog pa las 'dir yid la byed pa 'di ni gzhan yin par rig par bya ste/ der ltung ba smras zin pa'i phyir ro/ /yan lag gi rnam pa 'dzin pa las so zhes bya ba ni/ dbyung ba dang der 'dun pas yan lag gi rnam pa lag pas bzung ba las khu ba byung na sbom po'o/ /lag pa'i reg pa la sogs pas brtsal ba med par yan lag gi rnam pa 'gul ba las byung ba gang yin pa de la ni nyes byas so/ /nad kyi gnyen po la sogs pa'i ched du yan lag gi rnam pa bzung ba las byung ba la nyes pa med de/ bab col du zhes bya ba la sogs pa'i rigs pa rnam par gnas pa'i phyir ro/ /'dzag snod la 'drud pa las ni ltung ba med do zhes bya ba ni/ 'dod chags shas che ba rnams kyis 'dzag snod bcang bar bya'o zhes smos pas dbyung ba'i phyir zhugs pa ma yin pa'i dge slong gis bab col du 'dzag snod kyis drud pa las khu ba byung na nyes pa med do/ /sngon gyi chung mas 'khyud pa las kyang ngo zhes bya ba ni/ de'i phyir zhugs pa ma yin pa la sngon gyi chung mas 'khyud pa las bab col du byung ba la yang ltung ba med de/ ma dang sring dang bu mos yun mi ring bar bzung ba la nyes pa med pa 'ba' zhig tu ma zad de 'di la yang nyes pa med do/ /rkang pa dang byin pa dang dpung pa dang mthe bo la sogs pa nas bud med kyis bzung ba la yang ngo zhes bya ba ni/ de'i ched du zhugs pa ma yin pa la bud med kyis rkang pa la sogs pa nas bzung ba las bab col du khu ba byung ba la ltung ba med pa ste/ yang ngo zhes bya ba'i sgra ni ltung ba med do zhes bya ba'i rjes bsnyag pa'i phyir ro/ /'byin pa'i dge 'dun lhag ma 'dul byed dag go zhes bya ba khu ba 'byin pa'i dge 'dun lhag ma 'dul byed kyi skabs nas 'byung ba dag bshad zin to/ /'byin pa'i dge 'dun lhag ma rdzogs so zhes bya ba khu ba 'byin pa'i dge 'dun lhag ma rdzogs so// // da ni reg pa'i dge 'dun lhag ma'i mtshan nyid brjod par bya ste/ de'i phyir ltung ba 'di'i yul du gyur pa'i byed pa po gang yin pa de bstan pa'i phyir/ 'di la byed pa po nyid ni bud med do zhes bya ba smras te/ reg pa'i bslab pa'i gzhi 'di la reg pa'i dge 'dun lhag ma'i ltung ba 'di'i byed pa po nyid ni bud med de/ bud med de med na ltung ba 'di 'byung bar mi 'gyur ro zhes bya ba'i tha tshig go/ /da ni gang dang gang la byed pa po nyid bud med yin pa de thams cad bstan pa'i phyir/ dben pa na 'dug pa dang 'greng ba gnyis kyi'o zhes bya ba smras te/ dben pa na bud med dang 'dug pa gang yin pa dang / 'greng ba gang yin pa'i ltung ba de gnyis [(]gyi [,]kyi[)]byed pa po nyid kyang bud med do/ /de ltar yang dge slong gang bud med kyi yul dang lhan cig gcig pu gcig dang dben pa skyabs yod pa na stan la 'dug na ltung byed do/ /de bzhin du yang dge slong gang dge slong ma dang lhan cig gcig pu gcig dang dben pa skyabs yod pa na 'greng na ltung byed do zhes bya ba gsungs so/ /nyal po byed par shom pa nyid la yang ngo zhes bya ba la yang ngo zhes bya ba'i sgra ni 'dug pa dang 'greng ba gnyis la byed pa po nyid bud med do zhes bya ba'i rjes bsnyag pa'i phyir ro/ /'di skad bstan te/ nyal po byed par shom pa'i khyim na 'dug pa dang / nyal po byed par shom pa'i khyim na 'greng ba'i ltung byed de/ gnyis la yang byed pa po nyid bud med do/ /de ltar yang dge slong gang shes bzhin du nyal po byed par shom pa'i khyim du phyis gnon byas te stan la 'dug na ltung byed do/ /de bzhin du yang dge slong gang shes bzhin du nyal po byed par shom pa'i khyim du dben pa skyabs yod par 'greng na ltung byed do zhes gsungs so/ /lhan cig tu nyal ba la'o zhes bya ba ni bud med dang lhan cig gnas gcig na nyal ba gang yin pa'i ltung byed do/ /ltung byed de la yang byed pa po nyid bud med do/ /de ltar yang dge slong gang bud med kyi yul dang lhan cig gnas gcig tu nyal na/ ltung byed do zhes gsungs so/ /rig pa'i skyes pa med pa'i bud med dang lhan cig lam du 'gro ba'o zhes bya ba la/ bud med gang la reg pa'i skyes pa med pa de ni reg pa'i skyes pa med pa'i bud med de dang lhan cig 'grogs te lam du 'gro na lam du cha ba'i ltung byed la yang byed pa po nyid bud med do/ /de ltar yang dge slong gang skyes pa med par bud med dang lhan cig 'gron lam du 'gro na tha na grong bar du yang rung ste/ ltung byed do zhes gsungs te/ 'di ltar bcom ldan 'das kyis so sor thar pa'i mdo las rig pa zhes bya ba smos pa ma mdzad mod kyi/ 'on kyang tshig drug gam lnga las lhag par chos 'chad pa'i bslab pa'i gzhi'i rjes su 'brang bas mdo 'dir rig pa zhes bya ba smos so/ /'og ma gnyis la'o zhes bya ba ni/ lus kyis reg pa'i dge 'dun lhag ma'i 'og kho nar bstan pa'i bslab pa'i gzhi'i 'og ma gnyis po 'khrig pa dang ldan pa smra ba dang / bsnyen bkur bsngags pa'i dge 'dun lhag ma gnyis po de dag la yang byed pa po nyid bud med do/ /khyim pa mo la ston pa la'o zhes bya ba ni/ khyim pa mo la tshig drug gam lnga las lhag par chos 'chad pa'i ltung byed la yang byed pa po nyid bud med do/ /phyi rol pa rab tu byung ba mo la ni nyes byas nyid do/ /ci khyim pa mo la ston pa'i gnas skabs thams cad kyi byed pa po nyid bud med yin nam zhe na ma yin te/ de'i phyir skyes pa med par ro zhes bya ba smras te/ skyes pa med par khyim pa mo la ston pa'i ltung byed kyis byed pa po nyid bud med do/ /skyes pa ji lta bu zhig med par zhe na de'i phyir rig pa'o zhes bya ba smras te/ 'khrig pa dang ldan pa'i brjod pa dang spyod pa dag mngon par shes pa nyid ni rig pa nyid du shes par bya'o/ /yod kyang mi rung ba la'o zhes bya ba ni/ rig pa'i skyes pa yod kyang bud med mi rung ba la chos ston pa ni ltung byed kyi byed pa po yin pa'o/ /bud med mi rung ba zhes bya ba ni sbyar ma'i spyod pa gang dag yin pa de dag nye bar ston par byed pa ste/ khyim pa mo mi rung ba de la chos ston pa ni rig pa'i skyes pa yod du zin kyang ltung byed du 'gyur ba'i byed pa po nyid do/ / ci de dngos gzhi'i ltung ba'i yang byed pa po nyid yin nam zhe na ma yin te/ de'i phyir de ni nyes byas kyi'o zhes bya ba smras te/ rig pa'i skyes pa yod kyang bud med mi rung ba la ston pa gang yin pa byed pa po nyid du bstan pa de ni nyes byas kyi byed pa po nyid yin gyi/ ltung byed kyi dngos gzhi'i byed pa po nyid ni ma yin no/ /'dir gzhung ni zhu ba las bud med mi rung ba la skyes pa rung ba dang lhan cig chos ston na nyes byas so zhes gsungs pa yin no/ /gling gzhan nas skyes pa dang 'gyur ba bsten pa gnyis ni mchog pa nyid do zhes bya ba ni/ byang gi sgra mi snyan la sogs pa'i gling gzhan nas skyes pa'i rig pa'i skyes pa gang yin pa dang / rang gi gling nas skyes kyang skyes pa gang lus dang ngag gis bud med kyi skabs sam/ skyes pa'i skabs su 'khrig pa dang ldan pa'i 'gyur ba bsten pa ste/ dper na/ smyon thabs mkhan nam/ ma ning lta bu de gnyis ni ston pa'i skabs 'dir rig par mchog pa nyid do/ / 'di skad bstan te/ gling gzhan nas skyes pa'i skyes pa yod dam/ 'gyur ba bsten pa'i skyes pa yod kyang bud med khyim pa mo rung ba la chos ston na nyes byas te/ de gnyis ni rig pa nyid du mchog pa nyid yin pa'i phyir ro/ /bud med mi rung ba de gnyis yod pa de ni nyes byas ches lci bar 'gyur ro zhes bya ba'i tha tshig go/ /'dir gzhung ni zhu ba las btsun pa dge slong gis re zhig 'dzam bu gling pa'i bud med la byang sgra mi snyan pa dang lhan cig chos ston na ltung ba cir 'gyur nyes byas so/ /de bzhin du gling gzhan pa dang lhan cig chos ston pa la yang nyes byas so zhes gsungs pa yin no/ /bcom ldan 'das kyis reg pa'i skyes pa med par bud med la chos bstan par mi bya'o zhes gang gsungs pa de la rig pa'i skyes pa ji lta bu zhig dang lhan cig tu bud med la chos bstan par bya zhe na rung ba gang yin pa'o/ /rung ba ji lta bu zhe na/ smras pa/ khyim pa yang rung rab tu byung ba yang rung ste/ 'gyur ba sten par mi byed pa gang yin pa'o/ /de'i ni brda phrad pa nyid do zhes bya ba ni/ rig pa nyid kyi don de nyid kyi yan lag ni brda phrad pa nyid de/ dper na skyon nas smra ba'i ltung byed dag la nyan pa po yang yod la go bar bya ba'i don yang yod cing brda phrad na skyon nas smra ba'i don la sogs pa'i grub pa kho nar 'gyur gyi/ ma grub na ni phyed nyid yin pa de bzhin du rig pa'i skyes pa yod pa 'di la yang brda phrad na'o/ /'dir gzhung ni dge slong gis bud med khyim pa mo la kla klo'i skad du chos ston la rig pa'i skyes pa des brda ma phrad na nyes byas su 'gyur ro/ /de bzhin du gnyid log pa dang / myos pa dang / bag med par 'gyur ba dang / snyoms par zhugs pa dang / glen pa dang / 'on par gyur pa'i rig pa'i skyes pa yod pas/ dge slong gis bud med khyim pa mo la chos ston par byed la rig pa'i skyes pa de la brda phrad pa med par gyur na nyes byas kho na'i kha na ma tho bar 'gyur ro/ /rnam pa de lta bu nyid la ni mtshan cig shos don med do zhes bya ba la/ rnam pa de lta bu zhes bya ba ni/ mtshan gnyis pa bud med kyi mtshan shas che ba'am/ skyes pa'i mtshan shas che ba'i rnam pa de lta bu'o/ /rnam pa de lta bu'i dngos po ni rnam pa de lta bu nyid de/ rnam pa de lta bu nyid la ni bud med kyi mtshan shas che na ni bud med kyi mtshan las gzhan pa'i skyes pa'i mtshan cig shos don med de/ bud med nyid la gnod pa'i phyir cung zad kyang mi byed de/ 'bras bu med pa yin la de bzhin du skyes pa'i mtshan shas che na ni skyes pa'i mtshan las gzhan pa ni bud med kyi mtshan cig shos don med de/ skyes pa nyid la gnod pa'i phyir cung zad kyang mi byed de/ 'bras bu med pa yin no/ /'di skad bstan te/ gal te mtshan gnyis pa bud med kyi dbang du gyur na ni de'i tshe dge slong la bud med kyi skabs kyi kha na ma tho ba yongs su rdzogs par ro/ /ji ste skyes pa'i dbang du gyur na ni de'i tshe dge slong la skyes pa'i skabs kyi kha na ma tho ba yongs su rdzogs par 'gyur ro/ /'dir gzhung ni mtshan gnyis pa la reg na gal te bud med kyi dbang du gyur pa yin na ni/ des na dge 'dun lhag ma'i ltung bar 'gyur ro/ /de skyes pa'i dbang du gyur pa yin na ni des na nyes pa sbom po'i ltung bar 'gyur ro zhes gsungs pa yin no/ /'dir phyed nyid byed pa po yin no zhes bya ba ni mtshan cig shos mo'i mtshan ni skabs 'dir rig pa'i skyes pa nyid kyi skyes pa'i phyed nyid byed pa yin te/ rig pa'i skyes pa mtshan gnyis pa dang lhan cig tu bud med dang lam du 'gro ba dang / bud med la chos ston pa ni nyes byas su 'gyur ro zhes bya ba'i tha tshig go/ /byed pa po nyid bud med do zhes smras na ci thams cad kyi'am 'on te bye brag 'ga' zhig yong ce na/ de'i phyir 'og ma gsum la legs par smras pa dang nyes par smras pa dag gi don kun shes pa dang / gzhan la 'khrig pa bsten par bya ba'i mthu yod pa de nyid yin na dngos gzhi'o zhes bya ba smras te/ gal te bud med bslab pa'i gzhi 'og ma gsum la ni legs par smras pa dang / nyes par smras pa dag gi don kun shes par bya ba la mthu yod pa nyid yin na/ de gsum gyi dngos gzhi'i byed pa po nyid yin no/ /gzhan la ni 'khrig pa bsten par bya ba'i mthu yod pa nyid yin na de dag gi dngos gzhi'i byed pa po nyid yin no/ zhes bya bar sbyar ro/ /de la bslab pa'i gzhi 'og ma gsum gang zhe na/ de'i phyir 'og ma gsum la zhes bya ba smras te/ lus kyis reg pa'i dge 'dun lhag ma zhes bya ba'i bslab pa'i gzhi'i mjug thogs su 'byung ba'i bslab pa'i gzhi gnyis po gang yin pa 'khrig pa dang ldan pa smra ba dang / bsnyen bkur bsngags pa zhes bya ba dang / tshig lnga'am drug las lhag par chos 'chad pa zhes bya ba ltung byed 'ba' zhig tu 'gyur ba'i bslab pa'i gzhi gang yin pa dang / de gsum ni 'og ma gnyi ga la'o/ /khyim pa mo la ston pa la'o zhes de skad 'byung ba'i phyir skabs 'di kho nar 'don pa'i rim pas tha ma yin pa'i phyir 'og ma ste/ de man chad bud med byed pa po nyid du 'gyur ba'i bslab pa'i gzhi'i mdo gzhan nye bar ma bkod pas des na 'og ma zhes bya'o/ /gal te bud med kyi bslab pa'i gzhi 'og ma de gsum la ni legs par smras pa dang nyes par smras pa dag gi don gang yin pa'i don de kun shes par bya ba'i mthu yod pa nyid yin na/ de'i tshe bud med de de gsum gyi byed pa po nyid yin no/ /'di skad bstan te/ bslab pa'i gzhi gsum po de dag gi sgra dang don yongs su shes par bya ba'i phyir mthu yod par 'gyur na de'i tshe bud med de bslab pa'i gzhi de gsum gyi dngos gzhi'i ltung ba'i byed pa po nyid yin no zhes bya ba'i tha tshig go/ /gzhan gang zhe na/ de'i phyir gzhan la zhes bya ba smras te/ sngar smras pa gsum las gzhan pa 'dir dben pa na 'dug pa dang / dben pa na 'greng ba dang / nyal po byed par shom pa'i khyim na 'dug pa dang / nyal po byed par shom pa'i khyim na 'greng ba dang / bud med dang lhan cig nyal ba dang / skyes pa med par bud med dang lam du 'gro ba zhes bya ba'i ltung byed 'ba' zhig tu 'gyur ba'i bslab pa'i gzhi rnams te/ de dag la ni gal te bud med de 'khrig pa bsten par bya ba'i mthu yod pa nyid yin na/ bud med de ltung byed de dag gi dngos gzhi'i byed pa po nyid yin no/ /gzhan du na 'og ma'i 'o zhes bya ba la gzhan du na zhes bya ba ni/ dben pa na 'dug pa dang / 'greng ba la sogs pa 'di la thams cad du ji skad bstan pa'i don bzhin byed pa'i mthu yod pa ma yin na'o/ / 'og ma'i 'o zhes bya ba ni tshig 'og ma'i byed pa po nyid bud med yin pa ste/ mthu yod pa'i bud med la lus kyis reg pa la dge 'dun lhag ma gang yin pa de la mthu med na nyes pa sbom po'o/ /mthu yod par bar du bcad pa nyid la nyes pa sbom po gang yin pa de la mthu med na nyes byas so/ /mthu yod pa dang lhan cig khyim gcig na nyal ba la sogs pa ltung byed gang yin pa de la mthu med na nyes byas su 'gyur ba'o/ /ma ning mo dang ma ning pho dang sprul pa mo la yang de bzhin no zhes bya ba la/ ma ning mo zhes bya ba ni/ gang la mo'i dbang po yang med/ pho'i dbang po yang med la nu ma yod pa la sogs pas bud med kyi rnam pa la cung zad brten pa ste/ de ni ma ning mo zhes bya'o/ /ma ning pho zhes bya ba ni/ gang la pho'i dbang po yang med/ mo'i dbang po yang med la kha spu la sogs pas skyes pa'i rnam pa la cung zad brten pa ste/ de ni ma ning pho zhes bya'o/ /sprul pa mo zhes bya ba ni/ sems can du bgrang ba kho na gsang sngags dang sman la sogs pas bsgyur ba'o/ /ma ning mo la sogs pa de dag la bud med nyid med pas mthu med pa nyid du nye bar gdags pa'i phyir de bzhin no zhes bya ba smras te/ mthu med pa dang 'dra'o zhes bya ba'i tha tshig go/ /gsum po 'di la skyes pa'o zhes bya ba la/ gsum po 'di la zhes bya ba ni lus kyis reg pa dang / 'khrig pa dang ldan par smra ba dang / bsnyen bkur bsngags pa dag la'o/ /skyes pa'o zhes bya ba ni/ skyes pa yang mthu med pa dang 'dra ba kho na'o/ /gal te de dag gi bde ba nyams su myong bar bya ba'i 'dun pa kun du 'dod chags dang ldan pas kyang ngo zhes bya ba la/ kyang ngo zhes bya ba'i sgra ni 'dir gsum po 'di la zhes bya ba'i rjes bsnyag pa'i phyir ro/ /de dag gi bde ba nyams su myong bar bya ba'i 'dun pa zhes bya ba la/ de dag gi zhes bya ba'i sgra ni lus kyis reg pa dang / 'khrig pa dang ldan par smra ba dang / bsnyen bkur bsngags pa zhes bya ba'i dge 'dun lhag ma gsum la bsnyegs so/ /de dag gi yul la bde ba gang yod pa'i bde ba de nyams su myong ba phrad par bya ba'i phyir 'dun pa gang yin pa de ni de dag gi bde ba nyams su myong bar bya ba'i 'dun pa ste/ des so zhes bya bar sbyar ro/ /kun tu 'dod chags dang ldan pas zhes bya ba ni 'dun pa de'i bye brag yin no/ /bye brag de yang so sor thar pa'i mdo las gsungs pa'i tshig bsdu ba'i phyir te/ so sor thar pa'i mdo las dral cing gyur pa'i sems kyis 'byung ba'i phyir ro/ /de la dral ba nyid ni kun nas dkris pa nyid do/ /gyur pa nyid ni bud med de la rtog pa nyid do/ /kun nas dkris pa nyid ces bya ba 'dod chags mngon du gyur pa nyid dral ba nyid ces gsungs pa gang yin pa dang / yun ring po nas chags par gyur pa'i sred pa'i rjes su zhugs pa nyid dang / rjes su 'brel ba nyid gyur pa nyid ces gsungs pa gang yin pa'i bye brag gi tshig gnyis gsungs pa des bye brag can du gyur pa'i 'dod chags gang yin pa de ni 'dir kun tu 'dod chags pa zhes bya ba'i sgrar brjod pa yin par rig par bya'o/ /de ltar na 'dir tshig gi don 'di 'byung ste/ /bye brag bstan pa des bye brag can du gyur pa'i 'dod chags de dang ldan pa gang yin pa de ni de dag gi bde ba nyams su myong bar bya ba'i 'dun pa zhes bya ste/ 'dun pa des dge slong gis 'og nas 'byung ba'i mtshan nyid dang ldan pa'i lus la reg pa dang / 'khrig pa dang ldan pa smra ba dang / bsnyen bkur bsngags pa gang yin pa byas na de'i tshe dge 'dun lhag mar 'gyur ro zhes bya ba'i tha tshig go/ /'khrig pa dang ldan pa smra ba dang / bsnyen bkur bsngags pa la sogs pa dang / thun mong gi mtshan nyid bstan nas da ni lus kyis reg pa'i dge 'dun lhag ma 'ba' zhig gi skabs brjod par bya ste/ de'i phyir lus kyis reg pa bdag gir byed na'o zhes bya ba smras te/ bud med kyi lus la reg pa ni lus kyis reg pa'o/ /de la bdag gir byed pa ni sngar bstan pa'i kun du 'dod chags pa dang ldan pa'i 'dun pas ro myong bar byed na'o/ /'dir lan bu ni de dang ldan pa nyid do zhes bya ba la/ 'dir zhes bya ba ni/ lus kyis reg pa'i dge 'dun lhag ma'i skabs 'dir yin gyi/ bud med kyi mtshan ma'i kha na ma tho ba dben pa na 'dug pa la sogs pa gzhan la ni ma yin no/ /lan bu zhes bya ba ni skra bsdus pa'o/ /de ni de dang ldan pa nyid do zhes bya ba ni/ lan bu de ni lus dang ldan pa nyid de/ de la reg na dngos gzhi'o/ /skra dag la lus kyi dbang po med pa'i phyir/ lus kyi mtshan nyid med pas de la reg pa la dge 'dun lhag mar mi 'gyur ro snyam du dogs pa bsal ba'i phyir mdo 'di bstan te/ de la 'dod chags lhag par skye ba'i phyir ro/ /de dang 'brel ba'i gos la yang ngo zhes bya ba ni/ lan bu dang 'brel ba'i skud pa la sogs pa lan bu'i yan lag tu gyur pa la reg na yang dngos gzhi'i kha na ma tho ba'o/ /cod pan dang / kha chu la sogs pa la reg pa ni dper na sen mo dag dang 'dra bar sbom po'o/ /nom pa dang nyug pa dang sprod pa dang 'dzin pa dang / 'dren pa dang / yongs su 'dren pa dang / 'og nas 'khyud pa dang / steng nas 'khyud pa dang / dam du sbyor ba rnams la ni bye brag med pa nyid do zhes bya ba la nom pa la sogs pa ni ltung ba la bye brag med pa nyid de/ ji ltar reg na yang dngos gzhi nyid yin gyi/ reg pa'i bye brag las ltung ba'i bye brag tu 'gyur ba ni ma yin no/ /de la nom pa zhes bya ba ni dang por lan cig lus la sbyor ba nyid do/ /nyug pa zhes bya ba ni/ /yang dang yang du lus la sbyor ba'o/ /sprod pa zhes bya ba ni/ mthang sbyar ba'i bsam pas rang gi lus bud med kyi lus dang bar du ma bcad par sprod pa'o/ /'dzin pa zhes bya ba ni lag pa la sogs pa 'chang ba'o/ /'dren pa zhes bya ba ni/ yul thag ring po nas lag pa la sogs pa nas bzung ste 'dren pa'o/ /yongs su 'dren pa zhes bya ba ni/ yul dang thag nye ba nas khor yug tu bskor ba'o/ /'og nas 'khyud pa zhes bya ba ni/ 'og na 'dug pa lus kyi steng du 'jog cing 'khyud par byed pa ste/ steng du bzhag nas mthang sbyor bar byed ces bya ba'i tha tshig go/ /steng nas 'khyud pa zhes bya ba ni/ lus kyi steng de nas kyang phab ste/ 'og tu 'jug cing 'khyud par byed de/ 'og tu bcug nas mthang sbyor bar byed ces bya ba'i tha tshig go/ /dam du sbyor ba zhes bya ba ni mthang dam du sbyor ba la sogs pa'o/ /bsten par bya bas byas pa nyid kyang ngo zhes bya ba yang bye brag med do zhes bya bar sbyar te/ 'dir bsten par bya ba zhes bya ba ni/ bud med dang / skyes pa dang / ma ning la sogs pa dag yin par rig par bya'o/ /bsten par bya ba des nom pa dang nyug pa la sogs pa'i reg pa byas pa nyid gang yin pa de la yang 'dir bdag gir bya ba dang bcas pas ro myong bar byed na bye brag med pa nyid do/ /'di skad bstan te/ dper na dge slong kun du 'dod chags pa'i sems kyis bud med la sogs pa'i lus la nom pa dang / nyug pa la sogs pa gang yin pa de ltung bar 'gyur ba de bzhin du gal te bud med la sogs pas dge slong gi lus la nom pa dang / nyug pa la sogs pa byed pa la gal te dge slong kun du 'dod chags pa'i sems kyis de la bdag gir bya ba byed na de yang ltung bar 'gyur te na smad pa med do/ /bsten par bya bas byas pa'i nom pa dang / nyug pa la sogs pa la yang kun du 'dod chags pa'i sems kyis bdag gir byed na ltung ba la bye brag med do/ /bsten par bya ba zhes smos pa ni bud med dang skyes pa dang / ma ning la sogs pa spyir bsdu ba'i phyir ro/ /kun du 'dod chags pa'i sems med par snying brtse ba la sogs pa'i sems gzhan gyis reg pa la ni nyes pa med do/ /gos kyis bar du chod pa la ni 'og mar ro zhes bya ba ni/ gos kyis bar du chod cing bar chad yod na/ bud med la sogs pa'i lus la reg pa ni tshig 'og mar 'gyur bar rig par bya ste/ gang la dngos gzhir 'gyur ba de la ni sbom po'o/ /gang la sbom por 'gyur ba de la ni nyes byas so zhes bya ba'i tha tshig go/ /lus kyis reg pa tshor ba la yang ltung ba la bye brag med do/ /thams cad du lus kyis reg pa med pa'i phyir ro/ /bar du chod pa zhes bya ba'i sgra ni bar chad kyis chod pa'i tshig yin no/ /nyes byas kyi na smad pa ni gzhan nyid ma yin no zhes bya ba ni/ ji ltar pham par 'gyur ba la sogs pa gzhan la ltung ba na smad par gsungs pa la sbom po la sogs pa ltung ba gzhan du rnam par gzhag pa ltar nyes byas la ni med de/ 'di ltar nyes byas la na smad na yang nyes byas yin pa'i phyir/ gzhan nyid ma yin te nyes byas nyid de nyes byas phra mo zhes bya ba'i tha tshig go/ /dge slong ma la reg par mi bya'o zhes bya ba ni/ bsam pa'i nyes pa med du zin kyang reg par mi bya'o/ /bud med la yang mi bya'o zhes bya ba yang reg par zhes bya bar sbyar ro/ /'dir yang bsam pa'i nyes pa med du zin kyang bkag par rig par bya ste/ 'dir gnyi ga la reg na nyes byas so/ /'di ltar dge slong ma ni bud med kyi rigs las ma 'das mod kyi/ 'on kyang dge 'dun gyi khongs su gtogs pa'i phyir bsam pa'i nyes pa med na de la reg pa la nyes pa med do snyam du dogs pa bsal ba'i phyir tshig logs shig tu smos so/ /chur nyam thag pa bsgral ba'i phyir ni reg par bya'o zhes bya ba ni/ bud med la reg par mi bya'o zhes bya ba spyir sbyar ba'i dmigs kyis bsal ba bstan pa'i phyir mdo 'di bstan to/ /'o na 'og nas kyang snying brtse bas sdug bsngal las thar bar bya ba la ltung ba med do zhes 'byung bas des kyang dmigs kyis bsal ba mi byed dam zhe na/ bden mod kyi 'on kyang 'og kho na nas ma dang bu mo dang sring mo'i 'du shes nye bar gzhag ste/ lag pa'am skra dag las so zhes 'byung ba de dag gi yul bstan pa'i phyir 'dir yang brtsam mo/ /tshur zhes bya ba ni chu'i nang du'o/ /nyam thag pa zhes bya ba ni sdug bsngal thob par 'gyur ba ste/ de lta bu'i bud med bsgral ba'i phyir ni reg par bya'o zhes bya ba'i tha tshig go/ /ji ltar reg par bya zhe na/ de'i phyir ma dang sring mo dang bu mo'i 'du shes nye bar gzhag ste/ lag pa'am skra dag las so zhes bya ba smras te/ ma la sogs pa'i 'du shes nye bar gzhag ste/ lag pa'am skra dag las reg par bya'o zhes bya ba'i tha tshig go/ /dran pa rnyed par bya ba'i phyir bye ma bdal ba'i steng du khas sbub tu gzhag go zhes bya ba ni bud med bsgral ba'i phyir dang / dran pa rnyed par bya ba'i phyir bye ma bdal ba'i steng du khas sbub tu gzhag ste/ de'i tshe na chu zhugs pa 'dzag par 'gyur zhing de zags na dran pa thob par 'gyur ro/ /khri'u bzhin du bsrung bar bya'o zhes bya ba ni/ ji ltar khyim pa rnams la bstabs pa'i khri'u dag gis bsrung ba bstan pa de'i phyogs gcig tu 'dug ste/ rang gi las kyang byed sems kyang gtod de/ kha don byed pa'am yid la byed pa bskyed cing phyogs gcig tu 'dug ste srung bar byed pa de bzhin du bud med chu las bsgral ba de yang bsrung bar bya'o/ /ba lang rdzi'am phyugs rdzi dag la gtad de zan la 'gro bar bya'o zhes bya ba ni/ gal te dge slong de zan la 'gro na de'i tshe/ dang por bud med de ba lang rdzi la sogs pa dag la gtad de phyis 'gro bar bya'o/ /gal te re zhig gtod par byed na ni de'i tshe dge slong des yang de nyid du 'gro bar bya'o/ /grong la sogs par bkri ba'i phyir 'bad par bya ste/ gal te grong la sogs par bkrir mi nus na de'i tshe gal te bdag nyid dang bud med de stag la sogs pa'i 'jigs pa dag las yongs su bsrung bar nus na mtshan mo yang de nyid du gnas par bya'o/ /'tsho ba'am 'on te ma yin zhes yang dang yang du brtag par bya'o zhes bya ba ni/ dge slong des don med pa spang ba'i phyir bud med de la 'di 'tsho ba'am 'on te ma yin zhes yang dang yang du brtag par bya'o/ /sems dag pas snying brtse bas bud med 'khyud pa la nyes pa med do zhes bya ba ni/ dge slong sems dag pa dge legs kyi sems dang ldan pas snying brtse bas bud med la gal te 'di bdag gis 'khyud pa btang na srog gi bar chad du 'gyur ro snyam pas/ 'khyud pa la nyes pa med do/ / yang na bud med sems dag pas bu la sogs pa'i 'du shes kyis bdag la zung shig ces zer ba la 'khyud pa la nyes pa med do/ /de'i cho ga ni de yin gyi gzhan du ni ma yin no/ /de ltar yang sman gyi gzhi dag las/ bcom ldan 'das kyis ka tsang ka la la 'khyud pa gnang ngo zhes 'byung ba ste/ de mdo 'dir bsdus pa yin no/ /lus kyis reg pa'i dge 'dun lhag ma rnam par 'byed pa'o zhes bya ba lus kyis reg pa'i dge 'dun lhag ma rnam par 'byed pa'i skabs nas 'byung ba rdzogs so// //da ni lus kyis reg pa'i dge 'dun lhag ma zhu ba'i skabs nas 'byung ba brjod par bya ste/ 'jam pa dang dro ba dang snyi ba'i bsam pa nyid ni sbom po'o zhes bya ba ni/ 'jam pa'i bsam pa nyid dang / dro ba'i bsam pa nyid dang / snyi ba'i bsam pa nyid kyis dge slong gis bud med la reg par byed cing 'khrig pa dang ldan pa'i ro myong ba'i bsam pas ma yin na sbom po'o/ /'di skad bstan te/ 'jam pa la sogs pa'i bsam pa nyid kyis bud med la reg pa sbom por 'gyur ro/ /'dir gzhung ni btsun pa dge slong gis re zhig 'jam pa'i bsam pa dang / dro ba'i bsam pa dang / snyi ba'i bsam pas lus la reg par bgyid na ltung ba cir 'gyur/ nyes pa sbom po'o zhes gsungs pa yin no/ /skabs 'dir zhu ba dang / 'dul byed dag las kun du 'dod chags pa med par bud med dag gi lus la reg pa rnam pa lnga gsungs te/ de ni khyad par can gyi spyod pa dang / khyad par can gyi spyod pa dang 'dra ba dang / rgod bag gis reg pa kho nar bya ba dang / reg pa'i bye brag nyams su myong bar 'dod pa dang / mi 'dod par skye bo mang po rdos pa'i dus dag tu dbang med par reg pa gang yin pa dag go/ /de la re zhig khyad par can gyi spyod pa ni rnam pa gsum ste/ snying brtse ba dang / nye du bshes pa mthong ba dang / sngon kun dga' ba nyams su myong ba'o/ / khyad par can gyi spyod pa dang 'dra ba ni gnas ma yin par 'jug pa ste/ sgyel ba rang nyid ldang nus pa slong bar byed pa'o/ /lnga po de dag las reg pa'i bye brag nyams su myong bar 'dod pas/ reg pa gang yin pa de la 'jam pa dang / dro ba dang / snyi ba'i bsam pa nyid na sbom po'o zhes bya ba'i rnam pa 'di bstan to/ /lhag ma rnams ni ltung ba dang ltung ba med par bstan pa'i phyir brjod do/ /snying brtse bas sdug bsngal las thar bar bya ba la ni ltung ba med do zhes bya ba ni/ khyad par can gyi spyod pa snying brtse bas reg pa ste/ me dang chu dang g.yangs la sogs pa'i sdug bsngal las thar bar bya ba'i phyir snying brtse bas bud med la reg pa de la ni ltung ba med de/ khyad par can gyi spyod pa yin pa'i phyir dang / nyon mongs pa can gyi sems med pa'i phyir de la ltung ba med do/ /ma dang bu mo dang sring mo dag la de dag tu 'du shes pa'o zhes bya ba ni/ khyad par can gyi spyod pa nye du bshes pa mthong bas reg pa ste/ ma la sogs pa dag la ma la sogs pa de dag tu 'du shes pas ma la sogs pa dag la reg pa la ltung ba med do/ /'di skad bstan te/ dge slong gis ma la sogs pa'i yul la ma la sogs par 'du shes pas reg pa la ltung ba med do/ 'di yang khyad par can gyi spyod pa kho na yin pas de'i phyir ltung ba med do/ /sngon spyad pa nyid la ni kun dga' bar bya'o zhes bya ba ni/ 'dir yang khyad par can gyi spyod pa yin pa'i phyir nyes pa med de/ kun dga' bar bya ba ni kun du chags pa med pa'i yid kyis gcugs par ston pa ste/ de'i ched du reg pa la ltung ba med do/ /lus kyis reg pa zhu ba'i skabs so zhes bya ba la lus kyis reg pa'i dge 'dun lhag ma zhu ba'i skabs nas 'byung ba rdzogs so// //da ni lus kyis reg par bya ba'i dge 'dun lhag ma 'dul byed kyi skabs nas 'byung ba brjod par bya ste/ de'i phyir zas dang sa dang bong ba la sogs pa mo'i dbang por 'dzud na sbom po'o zhes bya ba smras te/ zas la sogs pa mo'i dbang por 'dzud na sbom po'o/ /'di skad bstan te/ gal te dge slong gis phye la sogs pa'i zas dang sa rdul dang / bong ba la sogs pa mo'i dbang por 'thor na nyes pa sbom por 'gyur ro/ /rkang pa dang phrag pa la sogs pas bud med la 'phul na nyes byas so zhes bya ba ni/ rkang pa dang phrag pa dang gzhan yang rtsib logs la sogs pas bud med la 'phul na nyes byas so/ /'dir gzhung ni dge slong gis rkang pa la sogs pas bud med bsgul na nyes byas su 'gyur ro zhes gsungs pa yin no/ /de'i stan la yang ngo zhes bya ba ni/ bud med de'i stan khri'u la sogs pa bud med dang bcas pa'am/ bud med med pa la yang rkang pa la sogs pas 'phul na nyes byas so/ /'dir gzhung ni dge slong gis bud med dang bcas pa'am/ bud med med pa'i stan bsgul na nyes byas so zhes gsungs pa yin no/ /de ltar na mdo de gnyis kyis ni rgod bag gis reg pa kho nar bya bas reg pa bstan to/ /da ni khyad par can gyi spyod pa dang 'dra bar brjod par bya ste/ 'dred par sgyel ba'i bud med slong ba'o zhes bya ba ni/ rdzab la sogs pa las gyur pa'i 'dred pa nyam nga bar sgyel ba'i bud med rang nyid ldang nus pa slong na nyes byas so/ /bud med kyis de gsum byed pa la ni ltung ba med do zhes bya ba ni/ bud med kyis rkang pa dang phrag pa la sogs pas 'phul ba dang / dge slong gi stan la 'phul ba dang / 'dred par sgyel ba slong ba de gsum dge slong la byed pa la ni ltung ba med de/ 'dir gzhung ni bud med kyis dge slong la rkang pa dang phrag pa la sogs pas mi 'dod bzhin du 'phul ba de la ni nyes pa med do zhes gsungs pa yin no/ /bzung ba la yang ngo zhes bya ba ni/ dge slong mi 'dod bzhin du bud med kyis bzung ba la ltung ba med do/ /mas 'khyud pa la yang ngo zhes bya ba yang dge slong mi 'dod bzhin du mas 'khyud pa tsam la ro myong ba med na ltung ba med do/ /pang par bu mo 'dug pa la yang ngo zhes bya ba yang ltung ba med do zhes bya bar sbyar ro/ /bud med 'khrul pa steng du 'gyel ba la yang ngo zhes bya ba ni/ bud med rab tu 'khrul pa dge slong gi steng du sgyel ba la yang ltung ba med pa'o/ /mdo de ni mi 'dod par skye bo mang po rdos pa'i dus dag tu dbang med par reg pa dang sbyar ro/ /lus kyis reg pa 'dul byed dag go zhes bya ba lus kyis reg pa'i dge 'dun lhag ma 'dul byed kyi skabs nas 'byung ba rdzogs so/ /lus kyis reg pa'i dge 'dun lhag ma'o zhes bya ba de rdzogs so// // 'khrig pa dang ldan pa smra ba'i dge 'dun lhag ma brjod par 'dod nas/ 'khrig pas smras na'o zhes bya ba smras te/ sngar bud med legs par smras pa dang / nyes par smras pa dag gi don kun shes par bya ba'i mthu yod pa la de'i bde ba nyams su myong bar bya ba'i 'dun pa kun du 'dod chags dang ldan pas zhes smos pa 'dir de bzhin sbyar ro/ /'khrig pa zhes bya ba ni/ gnyis kyis gnyis sprod pa skyes pa dang bud med gnyis kyi kun du sbyor ba las byung ba'o/ /de smras na 'khrig pa dang ldan pa smra ba'i dge 'dun lhag ma'o/ /de ltar na 'dir tshig gi don 'di 'byung ste/ dge slong smra ba pos bud med legs par smras pa dang / nyes par smras pa dag gi don kun shes par bya ba'i mthu yod pa la de'i bde ba nyams su myong bar bya ba'i 'dun pa kun du 'dod chags pa dang ldan pas 'khrig pa dang ldan pa smras na dge 'dun lhag mar 'gyur ro/ /sgra ji lta bus de smras she na/ de'i phyir rgya la sogs pa'i don gyis zhes bya ba smras te/ rgya la sogs pa zhes bya ba ni/ rgyo ba 'khrig pa zhes bya ba ni sgra gang la rang bzhin ngo bo nyid gzhi rgya zhes bya ba dang / rna ru zhes bya ba dag yod pa ste de ni rgya la sogs pa'o/ /rgya la sogs pa de'i don de gnyis kyis gnyis sprod pa zhes bya ba'i chos te/ de ni rgya la sogs pa'i don to/ /rgya la sogs pa'i don gyi don gzhan nyal bo zhes bya ba la sogs pa'i sgra gang yin pa de yang rgya la sogs pa'i don yin no/ /'dir don ces bya ba'i sgra cig shos dbri bar rig par bya ste/ rgya la sogs pa don rgya la sogs pa grags pas de dang / rgya la sogs pa dang 'dra bar don gsal bar brjod pa'i sgras smras na kha na ma tho ba der 'gyur ro/ /'khrig pa'i don go bar byed pa'i sgra ni rnam pa gnyis te/ dngos dang nye bar 'dogs pa'o/ /de la dngos la ni 'di rnam par gzhag go/ /nye bar 'dogs pa la ni gal te rgya la sogs pa'i don yul dang dus der chags pa yin pa de smras na ni dngos gzhi nyid du 'gyur ro/ /gal te ma chags pa dper na phrad pa dang nyal ba zhes bya ba la sogs pa brjod pa ni sbom po'o/ /'di ltar bud med de sgren mo zhig yin pa'i phyir nye bar 'dogs pa'i tshig de brda phrad par gyur du zin kyang rgya la sogs pa'i don chags pa med pa'i phyir dngos gzhir mi 'gyur ro/ /de ltar yang bcom ldan 'das kyis kho bo dang lhan cig phrad par gyis shig ces bya ba de la sbom por gsungs pa yin te/ rgya la sogs pa'i don dag la dngos su zhugs pa med pa'i phyir te/ pha dang bu phrad pa zhes bya ba'i sgra bzhin no/ /bdag nyid kyi bsam pas ni rgyo ba dang 'khrig pa dang nyal po dang lhag par spyod pa zhes bya ba la sogs pa bdag dang sbyar ba med par spyir brjod du zin kyang dngos gzhir 'gyur ro/ /'di skad bstan te/ gal te dge slong gis bdag nyid kyi bsam pas spyir bud med kyi yul la rgya la sogs pa'i don byed pa'i tshig med par rjod par byed cing bud med des kyang de thos la/ de'i don kyang brda phrad par gyur na de'i tshe de la kha na ma tho ba yongs su rdzogs par 'gyur ro/ /gal te gzhan gyi bsam pas na ni sbom por ro// //bam po bcu bzhi pa/ rgya la sogs pa'i don brjod pa dag la yi ge dang tshig mang du grags na yi ge dang tshig gang la kha na ma tho ba der 'gyur ba go bar bya ba'i phyir/ gang la go bar bya ba de nyid de brda phrad pa na mtha'o zhes bya ba smras te/ smra ba pos smras pa'i don nyan pa po'i rgyud la brda phrad pa tsam ni brda phrad pa'o/ /smra ba po'i kha de nas rkan dang mchu la sogs pa'i bya ba'i sbyor bas sgra 'byung ba'i yi ge la sogs pa gang la smras pa'i don nyan pa pos go bar bya ba nyid 'byung ba de brda phrad pa na mtha' ste/ yongs su rdzogs shing mthar thug go zhes bya ba'i tha tshig go/ /'di skad bstan te/ gal te yi ge dang po brjod pa'i dus na nyan pa pos don de brda phrad na de nyid dngos gzhi'i kha na ma tho ba'o/ /phyis gang cung zad brjod par bya ba'i ltung ba de thams cad ni nyid kyi khongs su gtogs te rtsol ba'i rtsom pa gcig tu gyur pa'i phyir ro/ /de dang 'brel pa'i don smras pa ni sbyor ba ma yin pa ma yin no zhes bya ba la de zhes bya ba'i sgra ni dngos gzhi'i dbang du byas pa rgya zhes bya ba dang rna ru zhes bya ba'i tshig la bsnyegs so/ /de dang 'brel pa'i don zhes bya ba la 'brel pa zhes bya ba ni dngos gzhi'i don gyi tshig dang 'brel pa ste/ dngos gzhi'i don gyi tshig dang sbyar ba 'khrig pa smra ba dang ldan pa'o/ /de'i don ni rma'i sgo la sogs pa gang yin pa'o/ /de smras pa ni 'di lta ste dper na/ sru khyod kyi rma'i sgo gsum po dag legs par 'dod pa dang / legs par gnas pa dang / legs par gyur pa yin mod ces smras pa lta bu ste/ don de smras pa gang yin pa'o/ /de smras pa ni sbyor ba ma yin pa ma yin te/ 'di ltar sbyor ba nyid do/ /'di skad bstan te/ dge slong gis dngos gzhi'i dbang du byas pa brgya zhes bya ba dang / rna ru zhes bya ba la sogs pa'i tshig byed par dngos gzhi'i don dang 'brel pa'i tshig rjod par byed na tshig de ni sbyor ba nyid de sbom po zhes bya ba'i tha tshig go/ /'di ltar dngos gzhi'i dbang du byas pa'i tshig rjod par mi byed na/ ci'i phyir tshig de sbyor bar gyur pa yin snyam du dogs pa bsal ba'i phyir mdo 'di byas so/ /rgya zhes bya ba dang / rna ru zhes bya ba la sogs pa'i sgra brjod pa la ni de ni dngos gzhi dang 'brel ba'i don 'di 'byung ba'i sbyor ba nyid de dag yod par the tshom med do/ /bsngags pa dang bsngags pa ma yin pa dang / gsol ba dang / nye bar gsol ba dang / 'dri ba dang / yongs su 'dri ba dang / brjod pa dang / smon pa dang / gshe ba dang / phyir smra ba sgrub pa dag la ni bye brag med pa nyid do zhes bya ba ni/ bsngags pa la sogs pa'i ngo bo nyid sbyor bar gyur pa 'khrig pa smra ba sgrub pa 'khrig pa smra bar 'gyur ba 'di dag ni dngos gzhi'i dbang du byas pa'i sbyor ba nyid yin par bye brag 'ga' yang med de/ sgrub pa de dag sngar brjod nas phyis 'khrig pa smra bar byed pa thams cad la ni dge 'dun lhag ma yongs su rdzogs par 'gyur ro/ /de la bsngags pa zhes bya ba ni/ sru'i rma'i sgo gsum po dag ni legs par 'dod pa/ legs par gnas pa/ legs par gyur pa dag go zhes bstod pa'o/ /bsngags pa ma yin pa zhes bya ba ni de las bzlog pas smod pa'o/ /gsol ba zhes bya ba ni/ sru tshur shog de dang de bya'o zhes brjod cing rgya zhes bya ba dang / rna ru zhes bya ba gnyis kyi rang bzhin bye brag tu bsgrub pa gang yin pa de ni dngos su mi brjod pa'o/ /nye bar gsol ba zhes bya ba de ni bud med dang skyes pa de dang de byed pa gang yin pa de dang de ni dga' ba dang yid du 'ong ba yin gyis/ sru bdag cag kyang de dang de byas na dga' ba dang yid du 'ong bar 'gyur ro zhes dga' ba nye bar bsgrub pas 'dun pa skyed pa ste/ de ni nye bar gsol ba'o/ /'dri ba zhes bya ba ni/ sru skyes pa gang bud med gang la de dang de byed pa de ni de'i dga' ba dang yid du 'ong bar 'gyur na/ kho bos kyang sru la de dang de bya na/ sru kho bo la dga' ba dang yid du 'ong bar 'gyur ram zhes 'dri'o/ /yongs su 'dri ba zhes bya ba ni/ sru rma'i sgo gsum po dag legs par dod pa dang / legs par gnas pa dang / legs par gyur pa bden nam zhes yongs su 'dri ba'o/ /rjod pa zhes bya ba ni/ sru kho bo ni khyod la dga' ba dang yid du 'ong ba bden na khyod de la ji lta zhes brjod pa'o/ /smon pa zhes bya ba ni/ sru nam zhig na kho bo khyod dang lhan cig de dang de ltar byed cig gu zhes smon pa'o/ /gshe ba zhes bya ba ni/ khyod la bong bu dag de ltar byed par gyur cig / khyod kyi der mgal dum dag chug cig ces bya ba la sogs pa brjod pa ste/ de ni gshe ba'o/ /phyir smra ba zhes bya ba ni/ bud med kyis bsngags pa dang bsngags pa ma yin pa gang yin pa dang / gshe ba la sogs pa dag dge slong la byed pa na de la dge slong gis phyir rnam pa de dag nyid kyis lan 'debs pa'o/ /de ltar na de dag thams cad ni gang gi tshe rgya zhes bya ba dang / rna ru zhes bya ba med par brjod par byed pa de'i tshe na ni sbom po'o/ /de dag thams cad kyang dpe tsam ste/ gzhan yang rgya zhes bya ba dang / rna ru zhes bya ba la sogs pa lta bu gang yang rung ba'i sgras de'i bde ba nyams su myong bar bya ba'i 'dun pa kun du 'dod chags pa dang ldan pas rjod par byed na ni dngos gzhir 'gyur ba kho na ste/ 'khrig pa smra ba de la yod pa'i phyir ro/ /don gzhan la bsam pas ljongs kyi nges pa'i tshig gi dbang gis na ltung ba med do zhes bya ba ni/ don gzhan la bsam pas ljongs kyi nges pa'i tshig gi dbang gis don gzhan smras pa la ltung ba med pa ste/ dper na yul dbus na ni chu snod kyi bye brag cig la kun di ka zhes zer la/ yul ko sa la zhes bya ba na ni mo'i dbang po la kun di ka zhes zer te/ de la gal te yul dbus nas skyes pa'i dge slong zhig yul ko sa lar song ste chu snod kyi bsam pas bud med kyi yul la kun di ka brnya'o zhes de skad du sbyor bar byed na/ yul de na gnas ngan len gyi tshig yin du zin kyang de la ltung ba med pa lta bu ste/ bsam pa dag pa'i phyir nyes pa med do/ /ming gi cha nyid 'dra ba la yang ngo zhes bya ba yang nyes pa med par sbyar ro/ /ming gi cha nyid 'dra ba ni ming gi cha shas 'dra bas 'khrig pa las byung ba smras pa gang yin pa ste/ dper na rgya gar skad du nas la ni ya ba zhes bya ba 'khrig pa la ni ya b+ha zhes bya ba de la nas kyi ming ya ba zhes bya ba brjod pa'i bsam pas drag tu brjod pa'i dbang gis ya ba zhes bya ba'i gnas su ya b+ha zhes brjod pa la nyes pa med pa dang / bod skad la yang rgyongs zhes bya ba dang / rgyob ces bya ba dang rgyu'o zhes bya ba'i bsam pas don de dag nyid brjod par 'dod pa las zur chag pa'i dbang gis rgyos zhes bya ba dang / rgyo ba zhes bya ba dang / rgyo bo zhes bya bar brjod pa la nyes pa med pa lta bu ste/ de la ni de smra bar mi 'dod pa'i don zur chag pa'i dbang gis smras pa'i phyir ming gi cha mthun par smras kyang nyes pa med do/ /mdo snga ma la ni smra bar 'dod pa'i sgra nyid brjod kyang don gzhan la sems pa dang / yul gyi skad tha dad pas nyes pa med do/ /'khrig pa dang ldan pa smra ba'i dge 'dun lhag ma rnam par 'byed pa'o zhes bya ba la 'khrig pa dang ldan pa smra ba'i dge 'dun lhag ma rnam par 'byed pa'i skabs nas 'byung ba rdzogs so// //da ni 'khrig pa las byung ba dang ldan pa smra ba'i dge 'dun lhag ma'i zhu ba'i skabs nas 'byung ba bsdu ba'i phyir/ mdzes pa yin no/ /sdig pa can yin no/ /rma'i sgo mdzes pa'am sdig pa can yin no/ /bgo bsha' gyis shig /kho bo la bgo bsha' gyis shig /kho bo dang lhan cig nyol cig /phrad par gyis shig ces smras na nyes pa sbom po'o zhes bya ba smras te/ smra na sbom po'o zhes bya ba mdzes pa yin no zhes bya ba la sogs pa thams cad dang so sor sbyar ro/ /mdzes pa yin no zhes bya ba ni/ khyod ni mdzes pa sdug gu yin no zhes smra zhing brjod na sbom po'o/ /sdig pa can yin no zhes bya ba ni khyod ni sdig pa can sdig pa dang ldan pa yin no zhes smra na sbom po'o/ /rma'i sgo mdzes pa'am sdig pa can yin no zhes bya ba ni/ khyod kyi rma'i sgo gsum po dag mdzes pa yin no zhes smra 'am/ khyod kyi rma'i sgo gsum po dag sdig pa can yin no zhes smra na sbom po'o/ /de bzhin du lhag ma thams cad la yang sbyar ro/ /rnam pa thams cad du bud med kyi yul la gnas ngan len gyi sems kyis gnas ngan len gyi tshig smra na tha na rgod bag tsam gyis smras na yang thams cad du sbom por rig par bya'o/ /'khrig pa las byung ba dang ldan pa nyid smra ba'i dge 'dun lhag ma zhu ba'i skabs so zhes bya ba de zhu ba'i skabs nas 'byung ba rdzogs so/ / //da ni 'khrig pa dang ldan pa smra ba'i dge 'dun lhag ma 'dul byed kyi skabs nas 'byung ba bsdu ba'i phyir/ de bzhin du rdzu 'phrul gyi rnam par 'phrul pa'i chos can la smra na'o zhes bya ba la/ de bzhin du zhes bya ba'i sgra ni sbom po'o zhes sngar bstan pa'i rjes bsnyag pa'i phyir ro/ /rdzu 'phrul zhes bya ba ni nam mkha' la 'gro ba la sogs pa'o/ /rdzu 'phrul gyi rnam par 'phrul pa ni rdzu 'phrul gyi rnam par 'phrul pa'o/ /chos de gang la yod pa de ni rdzu 'phrul gyi rnam par 'phrul pa'i chos can te/ rnam pa de lta bu'i chos can gyi bud med de la rgya la sogs pa'i don gyis smras na sbom po'o/ /de bzhin du zhes bya ba des sbom po'o zhes bya ba'i rjes bsnyag pa'i phyir/ thams cad kyi dbang du bya bar rig par bya ste/ de'i phyir des dbang du bya ba'i yul gzhan yang bstan pa'i phyir/ sru kho bo la nas byin cig /sru khyod la ci mthong ba de byin cig / sru khyod kyi mdun na mo gang yin pa de byin cig /sru khyod kyi yid du 'ong ba gang yin pa de byin cig /khyod ci la dga' ba byin cig ces bdag la smras pa khyod ci la dga' zhes zer ba la sru khyod la kho bo dga'o zhes bya ba dang / sru kho bo la chu dang / bca' ba dang / thug pa dang bza' ba byin cig/ / khyod nyid de dag yin na zhes smras pa dag la'o zhes bya ba smras te/ nas zhes bya ba'i sgra ya ba zhes bya ba dang / 'khrig pa las byung ba'i sgra ya b+ha zhes bya ba ni cha shas mthun pa'i sgo nas 'khrig pa dang ldan pa smra ba yin pas sbom por sbyar ro/ /sru khyod la ci mthong ba zhes bya ba la sogs pa thams cad kyang nye bar 'dogs pa'i sgo nas 'khrig pa dang ldan pa smra ba yin pas sbom por sbyar ro/ /khyod ci la yang dga' ba byin cig ces bdag la smras pa zhes bya ba la sogs pa'i da ni bshad pa rnam pa gnyis su byed de/ dge slong la las bud med la khyod ci la dga' ba byin cig ces smras pa dang / bud med des smras pa khyod kyis bdag la smras pa de khyod la 'dri bar bya ste/ khyod ci la dga' zhes bud med de de skad zer ba la dge slong gis sru khyod la kho bo dga'o zhes bya ba dang gcig ni bud med kyis smras pa/ btsun pa khyod ci la dga' ba byin cig ces bdag la khyim thab kyis de skad ces smras pa de btsun pas gsungs shig dang / bdag gis de gsol lo zhes bud med de dge slong la khyod ci la dga' zhes zer ba la dge slong des sru khyod la kho bo dga'o zhes bya ba smras te/ de'i bde ba nyams su myong bar bya ba'i 'dun pa kun du 'dod chags pa dang ldan pas de skad smras na sbom po'o/ /de'i rnam par bshad pa ni lung gis go bar byed de/ 'dir gzhung ni dge slong khyim gzhan gyi khyim du nye bar 'gro ba na khyim bdag gi chung ma la 'di skad ces dge slong de ci la dga' ba byin cig ces smras nas byung ba dang / dge slong des snga dro chos gos dang sham thabs bgos lhung bzed thogs te khyim der zhugs pa na bud med des smras pa/ btsun pa khyim bdag na re dge slong de ci la dga' ba byin cig ces mchi na/ 'phags pa khyod ci la dgyes/ dge slong gis smras pa/ sru khyod la kho bo dga'o/ /bud med des shes nas des smras pa/ 'phags pa bsham par bgyi'o/ /de nas dge slong de bdag la dge 'dun lhag ma'i ltung ba ma byung ngam snyam du 'gyod pa skyes pa nas/ bcom ldan 'das kyis bka' stsal pa/ dge 'dun lhag ma'i ltung bar mi 'gyur te/ sbom por 'gyur ro zhes bya ba'i bar du gsungs pa yin no/ /sru kho bo la chu dang bca' ba dang thug pa dang bza' ba byin cig ces bya ba la kho bo la zhes bya ba dang / byin cig ces bya ba'i sgra 'di chu la sogs pa bzhi char la sbyar ro/ /de bzhin du khyod nyid de dag yin no zhes bya ba yang khyod nyid chu la sogs pa bzhi char yin no zhes bya bar sbyar ro/ /de ltar na 'dir tshig gi don 'di 'byung ste/ sru kho bo la chu byin cig /sru nyid chu yin no/ /de bzhin du sru kho bo la bza' ba'i bar du byin cig /sru nyid bza' ba yin no zhes bya ba'i bar du'o zhes bya ba smras pa dag la'o zhes bya ba ni/ rnam pa snga ma lta bu de dag dang / bzhi po de dag smras pa dag la nyes pa sbom por 'gyur ba'o/ /khyod la bong bu dag de byed par gyur cig ces bya ba ni/ bud med khyod la bong reng dag 'khrig pa byed par gyur cig ces smras na yang sbom po'o/ /sru skyes bu 'phyon ma pa dag la bsod snyoms spyod dam zhe na yang ngo zhes bya ba ni/ sru khyod skyes bu 'phyon ma pa'i jo sgeg can de dag snang ba na 'khrig pa'i bsam pa bskyed de/ bsod snyoms spyod mod ces smras na sbom po'o/ /'dir bsod snyoms zhes bya ba smos pa ni gleng gzhi'i dbang gis bstan pa yin no/ /'dir gzhung ni dge slong ma nang bar sngar langs te khrus byas mig tu mig sman gyis byugs/ mgo bskus nas ngur smrig sar ba bgos te/ mnyan yod du bsod snyoms la zhugs pa na/ dge slong zhig kyang bsod snyoms la song nas des de mthong ba dang / 'di skad ces sru khyod skyes bu 'phyon ma ba dag la bsod snyoms spyod dam zhes smras nas/ dge slong de 'gyod pa skyes pa dang / bcom ldan 'das kyis bka' stsal pa/ nyes pa sbom por 'gyur ro zhes gsungs pa yin no/ /der mgal dum dag chug cig ces na yang ngo zhes bya ba la/ der zhes bya ba ni mo'i dbang por ro/ /mgal dum zhes bya ba ni shing phyed tshig pa'o/ /de mo'i dbang po der chug cig ces smras na yang sbom po'o/ /rang bzhin gyis gnas ngan len brjod pas gnas ngan len smras pa yang ngo zhes bya ba ni/ gal te dge slong rang bzhin gyi ngo bo nyid kyis gnas ngan len brjod pa la goms pa zhig yin na dge slong gnas ngan len brjod pa des gnas ngan len brjod pa rgya la sogs pa go bar bya ba'i tshig smras na yang sbom po'o/ /'di skad bstan te/ gal te dge slong tshe rabs gzhan nas goms pa'i dbang gis rgya la sogs pa'i don gyi sgra dag gis bud med la smra bar byed na de lta na yang sbom po kho nar 'gyur te/ kun du 'dod chags pa med pa'i phyir ro/ /gal te 'dod chags dang ldan pa'i sems kyis smra na ni de'i tshe dngos gzhir 'gyur ro/ /'khrig pa dang ldan pa smra ba 'dul byed dag go zhes bya ba 'dul byed kyi skabs nas 'byung ba rdzogs so/ /'khrig pa dang ldan pa smra ba'i dge 'dun lhag ma'o zhes bya ba de bshad zin to// //bsnyen bkur bsngags pa'i dge 'dun lhag ma brjod par 'dod nas/ bdag nyid dang 'khrig pa kun du spyod pa bsngags na'o zhes bya ba smras te/ bud med legs par smras pa dang nyes par smras pa dag gi don kun shes par bya ba'i mthu yod pa la de'i bde ba nyams su myong bar bya ba'i 'dun pa kun du 'dod chags pa dang ldan pas de bsngags na'o zhes bya bar de thams cad 'dir sbyar ro/ /de ltar na 'dir tshig gi don 'di 'byung ste/ bud med don kun shes pa'i mthu yod pa'i yul la de'i bde ba nyams su myong bar bya ba'i 'dun pa kun du 'dod chags pa dang ldan pas bdag nyid dang 'khrig pa kun du spyod pa nye bar bsnyen bkur log par sgrub pa de'i bsngags pa de ni mchog go zhes bya ba la sogs pas mdzes pa nyid du brjod na/ de ltar gyur pa na kha na ma tho ba de nyid rnam par gzhag go/ /gal te rgya la sogs pa'i don gyi sgras 'khrig pa sgrub par byed na ni/ de'i tshe rgya la sogs pa'i don gyi sgras 'khrig pa dang ldan pa smra ba'i dge 'dun lhag mar yang 'gyur ro/ /gal te bsnyen bkur nyi tshe bsngags pa byed na ni de'i tshe bsnyen bkur bsngags pa'i dge 'dun lhag ma 'ba' zhig tu 'gyur ro/ /des bsngags pa la rjes su yi rang ba'i don gyi tshig ni de dang 'dra'o zhes bya ba la/ des zhes bya ba'i sgra ni 'dir bud med gang bsten zla nyid du gnas pa de la bsnyegs te bud med des so/ /bud med des bsngags pa ni des bsngags pa ste/ bsnyen bkur bsngags pa byas pa'o/ /des bsngags pa de la rjes su yi rang ba ni des bsngags pa la dge slong de rjes su yi rang ba ste/ de nyid don to/ /de'i tshig ni dgos pa de'i tshig ste/ de ni des bsngags pa la rjes su yi rang ba'i don gyi tshig go/ /dper na 'phags pa khyod lta bu'i dge slong tshul khrims dang ldan pa la bsnyen bkur byas pa gang yin pa de ni mchog go zhes bya ba la sogs pa bsngags pa dge slong gis sru de de bzhin no zhes rjes su yi rang ba'i don gyi tshig gang yin pa de ni bdag nyid kyis bsngags pa dang 'dra'o/ /'di skad bstan te/ gal te bud med kyis dge slong la 'di skad ces 'phags pa khyod lta bu'i dge slong tshul khrims dang ldan pa yon tan dang ldan pa la chos 'dis bsnyen bkur byas na bsgrub pa 'di ni mchog yin no zhes zer ba la dge slong gis kyang 'di skad ces sru de de bzhin no zhes smras te/ rjes su yi rang na de ni dngos gzhi'i kha na ma tho ba nyid du 'gyur ro/ /de nyid phyir bzlas na'o zhes bya ba ni/ khyod lta bu'i dge slong tshul khrims dang ldan pa la 'khrig pa'i chos kyis bsnyen bkur byas par gyur na/ de ni bsnyen bkur rnams kyi mchog go zhes bud med kyis de skad du smras pa'i tshig de dge slong gis phyir zlog par byed de/ sru kho bo lta bu'i dge slong tshul khrims dang ldan pa 'khrig pa'i chos kyis bsnyen bkur byas par gyur na de ni bsnyen bkur rnams kyi mchog go zhes dge slong des phyir bzlas pa byas na de nyid bsngags pa yin par rig par bya ste/ dngos gzhi nyid du 'gyur ro zhes bya ba'i tha tshig go/ /'dis ni de lta de ltar rjes su smra ba zhes bya ba'i gang gsungs pa bsdus pa yin no/ /de dang 'khrig pa dang nye bar mi sbyor na sbyor ba nyid do zhes bya ba ni ltung ba 'byin pa po de dang nye bar ma sbyar na de rang gi ming ma brjod par bsngags pa na sbyor ba nyid de dper na 'di lta ste/ dge slong la 'khrig pas bsnyen bkur byas par gyur na ni bsnyen bkur rnams kyi mchog go zhes zer ba lta bu'o/ /'khrig pa dang nye bar ma sbyar ba yang sbyor ba nyid de/ dper na 'di lta ste kho bo lta bu'i dge slong la bsnyen bkur byas par gyur na de ni bsnyen bkur rnams kyi mchog go zhes zer ba lta bu ste/ de gnyi ga sbom po'o/ /gnyi ga dang na ni de'i 'o zhes bya ba ni snga ma de gnyi ga dang nye bar ma sbyar ma smos par brjod na ni sbyor ba de'i sbyor ba nyid de nyes byas so/ /dper na 'di lta ste/ dge slong la bsnyen bkur byas par gyur na de ni bsnyen bkur rnams kyi mchog go zhes zer ba lta bu ste/ kho bo lta bu zhes bya ba dang / 'khrig pa zhes bya ba de gnyi ga dang nye bar ma sbyar bas sbyor ba de'i sbyor ba ste nyes byas so/ /bsnyen bkur bsngags pa'i dge 'dun lhag ma'o zhes bya ba de rnam par 'byed pa las 'byung ba rdzogs te/ 'di la zhu ba dang 'dul byed las 'byung ba ni med do// //smyan byed pa'i dge 'dun lhag ma brjod par 'dod nas/ phrad na'o zhes bya ba smras te/ gnyis kyis gnyis phrad na'o zhes bya ba'i tha tshig go/ /phrad pa med par phrin phar bskyal tshur bskyal ba tsam kho na las ni kha na ma tho bar mi 'gyur ro/ /de ltar yang zhu ba'i skabs nas btsun pa dge slong mas gzhan brtul zhugs la gnas pa tshangs par spyod pa mo dag gis smyan bgyis na ltung ba cir 'gyur/ nyes pa sbom por ro/ /de bzhin du btsun pa za ma'i smyan bgyis na ltung ba cir 'gyur/ nyes pa sbom por ro zhes gsungs pa yin te/ de ni 'dir phrad pa med pas sbom por gsungs pa yin pas de'i phyir phrad pa yod na kha na ma tho ba der 'gyur ro/ /su dang phrad na zhe na/ de'i phyir gzhan dang ngo zhes bya ba smras te/ bdag nyid dang smyan byed pa ma yin gyi/ mi'i 'gro ba bsten par byed pa po'i dbang po dang ldan pa gzhan dang ngo / /sur phrad ce na de'i phyir gzhan du'o zhes bya ba smras te/ bdag nyid du phrad pa ma yin gyi/ gang zag gzhan du phrad na'o/ /khyad par ji lta bu can zhig tu phrad ce na/ mi'i 'gro ba pa'i bud med la sogs pa bsten par bya ba'i rma'i sgo dang ldan par ro/ /rgyu gang gis gzhan dang gzhan du phrad na ltung ba 'dir 'gyur zhe na/ de'i phyir de'i don du mi mthun pa mthun par bsgrub pa'i phyir sprad par bya ba las spring ba mnos pas gzhan de la go bar byas shing des smras pa snga ma la brjod na'o zhes bya ba smras te/ 'dir bsdus pa'i don ni ltung ba 'byin pa pos mdo las smos pa'i rnam pa 'dis rjes su bsgrubs pas sprad par bya ba gnyi ga phrad na ltung ba 'di 'byung bar 'gyur ba'o/ /yan lag gi don bshad par bya ste/ de'i don du zhes bya ba ni phrad pa'i don du'o/ /mi mthun pa mthun par bsgrub pa'i phyir zhes bya ba la mi mthun pa zhes bya ba ni/ sprad par bya ba de gnyis mi mthun pa gcugs par ma gyur phan tshun bag phebs par ma gyur pa'o/ /mthun par zhes bya ba ni mi mthun pa de gnyis mthun par bya ba gcugs pa dang bag phebs par bya ba'o/ /de bsgrub pa'i phyir zhes bya ba ni grub par bya ba'i phyir ro/ /'dir mthun par zhes bya ba yang yid gcugs pa'i dngos po nyid du bya ba yin gyi/ gnyis kyis gnyis sprad par ni ma yin te/ de yang ji ltar na 'grub par 'gyur zhes de'i don du mthun par byed pa yin no/ /spyad par bya ba las zhes bya ba las zhes bya ba ni gang dang gang du sprad par bya ba ste/ de las so/ /spring ba mnos pas zhes bya ba ni/ ltung ba 'byin pa po'i dge slong gang gis spring ba mnos pa ste/ spring ba mnos pa phrin blangs pa'i dge slong nges so/ /gang las spring ba mnos she na/ de'i phyir sprad par bya ba las zhes smos pa yin te/ de las so/ /spring ba mnos pa de su la go bar byas na zhe na de'i phyir gzhan de la go bar byas shing zhes bya ba smras te/ sprad par bya ba ni gnyis yod pa'i phyir sprad par bya ba gang la go bar byas she na/ de'i phyir gzhan zhes bya ba la ste/ gang las spring ba mnos pa de las gzhan pa de la'o/ /de yang gang zhe na/ de'i phyir de la zhes bya ba ste/ sprad par bya ba gang las spring ba mnos pa de las gzhan pa sprad par bya ba gang la go bar bya ba de la'o/ /go bar byas shing zhes bya ba ni spring ba mnos pa'i dge slong des spring ba de gzhan de la go bar byas shing brda sprad pa'o/ /sprad par bya ba las spring ba mnos pas gzhan de las go bar byas pa tsam kho nas der 'gyur ram zhe na ma yin te/ de'i phyir des smras pa/ snga ma la brjod na'o zhes bya ba smras te/ des smras pa zhes bya ba ni sprad par bya ba gang la spring ba go bar bya ba'i sprad par bya ba gzhan des spring ba'i lan gang smras pa de ni des smras pa'o/ /des smras pa'i spring ba'i lan de su la brjod na zhe na/ de'i phyir snga ma la zhes bya ba smras te/ sprad par bya ba snga ma la ste/ dang po gang las spring ba mnos pa de la'o zhes bya ba'i tha tshig go/ /snga ma de la gzhan des smras pa de ji ltar byas na zhe na de'i phyir brjod na zhes bya ba smras te/ des smras pa dge slong spring ba mnos pa des sprad par bya ba snga ma la brjod cing bzlas te go bar byas na 'o zhes bya ba'i tha tshig go/ /'di skad bstan te/ sprad par bya ba'i don du mthun pa gang yin pa de bsgrub pa'i phyir sprad par bya ba snga ma shos las spring ba mnos pas phrin blangs pa des sprad par bya ba gzhan de la bskyal la sprad par bya ba gzhan de las spring ba'i lan mnos pa gang yin pa de yang sprad par bya ba snga ma shos nyid la bskyal te de ltar dge slong smyan byed pas gal te phrin mnos pa dang / phar bskyal ba dang phyir bskyal ba de dag rjes su sgrub par byed la sprad par bya ba de gnyis kyang phrad par gnyis kyis gnyis sprad par gyur na de'i tshe dge 'dun lhag ma 'dir 'gyur gyi/ gzhan gyis ni ma yin no zhes bya ba'i tha tshig go/ /'jug pa bar ma'i phyang yar thos pa nyid na de byas pa nyid do zhes bya ba la 'jug pa bar ma zhes bya ba ni/ 'jug pa de bar mar gtogs pas 'jug pa bar ma ste/ gzhan gyi phrin lan gang yin pa'o/ /de ji ltar phar ma zhe na mnos pa dang phrin tshur bskyal ba gnyis kyi bar gyi dngos po yin pas bar ma ste/ sprad par bya ba gzhan gyi phrin lan lus kyi rnam par rig byed dam/ ngag gi rnam par rig byed dam/ cang mi smra bas 'jug pa gang yin pa de ni 'dir 'jug pa bar ma yin par rig par bya'o/ /'jug pa bar ma de'i phyang yar thos pa nyid na zhes bya ba ni dang po spring bar byed pa'i sprad par bya ba des 'jug pa bar ma de smyan byed pa'i dge slong nyid ma yin pa gzhan gang yang rung ba mngags pa las sam/ sprad par bya ba gzhan nyid las mngon sum du'am/ gzhan las mig gi rnam par shes pas sam/ rna ba'i rnam pas shes pas sam/ yid kyi rnam par shes pas rnam par rig pa'i sgo nas phyang yar thos pa nyid na'o/ /de byas pa nyid do zhes bya ba ni/ sngar bstan ma thag pa'i mdo las snga ma la brjod na'o zhes bya ba de byas pa nyid de mthar thug pa nyid do zhes bya ba'i tha tshig go/ /'di skad bstan te/ gal te dge slong gis sprad par bya ba snga ma shos las spring ba nod cing / sprad par bya ba gzhan sprad par bya ba gzhan la spring ba de go bar byed na sprad par bya ba gzhan de'i phrin lan sprad par bya ba snga ma shos kyis smyan byed pa'i dge slong de nyid ma yin pa gzhan gang yang rung ba las thos par gyur la sprad par bya ba de nyid kyang gzhi de kho na las phrad cing gnyis kyis gnyis sprad par gyur na/ dge slong dang po phrin mnos pa dang phrin phar bskyal ba tsam de kho nas dge 'dun lhag mar 'gyur na/ gal te phrin tshur skyel bar byed na lta smos kyang ci dgos/ de ltar yang rnam par 'byed pa'i gzhung 'di yin te/ dge slong gcig khyim pa gcig dang khyim pa mo gcig dang 'gron lam du 'gro ba na/ de na gal te khyim pa de dge slong de la 'di skad ces 'phags pa khyod khyim pa mo 'di la 'di skad ces khyod khyim pa 'di'i chung ma'am mdza' na mo'am/ smos 'grin gyis shig ces smra nus sam zhes zer ram/ yang na khyim pa mo de dge slong de la 'di skad ces 'phags pa khyod khyim pa 'di la 'di skad ces khyod khyim pa mo 'di'i khyo'am/ mdza' na mo'am smos 'grin gyis shig ces smra nus sam zhes zer ba la/ dge slong des spring ba rnam pa de lta bu de mnos te/ phrin phar skyel bar byed dam/ phrin tshur skyel bar byed na/ dge 'dun lhag mar 'gyur ro zhes gsungs pa yin no/ /'dir phrin mnos te phar bskyal ba na bar gyi 'jug pa sprad pa gzhan de gnyis las sprad pa snga ma shos kyis thos pas na/ phrin tshur ma bskyal yang snga ma la brjod pa nyid yin la/ phrin tshur bskyal na yang de nyid yin pas gang byas kyang dge 'dun lhag mar 'gyur ro/ /gsum po de dag gi bya ba tha dad pa nyid do zhes bya ba na/ 'dir rjes su bsgrub par bya ba'i tshig gsum po gang dag sngar bstan pa nod pa dang / go bar byed pa dang / brjod pa zhes bya ba'i tshig gsum po de dag gi bya ba nyid ces bya ba rjes su bsgrub par bya ba nyid de/ sbyor ba tha dad pa nyid yin no/ /'dir gzhung ni dge slong gnyis kyis rang gis spring ba mnos nas de na gcig 'di skad ces kho ngo ni phrin phar ni skyel lo/ /tshur ni mi skyel lo zhes zer na/ de gnyis las phrin phar yang skyel bar byed/ tshur yang skyel bar byed pa de la ni dge 'dun lhag mar 'gyur ro/ /gang phrin phar skyel bar ni byed la tshur skyel bar ni mi byed pa de la ni nyes pa sbom po gnyis su 'gyur ro/ /dge slong gnyis kyis rang gis spring ba mnos nas gcig 'di skad ces kho bo ni phrin phar yang mi skyel lo/ /tshur yang mi skyel lo zhes zer na de gnyis las phrin phar yang skyel bar byed de/ tshur yang skyel bar byed pa de la ni dge 'dun lhag mar 'gyur ro/ /gang phrin phar yang skyel bar mi byed tshur yang skyel bar mi byed pa de la ni nyes pa sbom po gcig tu 'gyur ro zhes gsungs pa yin te/ de ltar nod pa la sogs pa re re dag la phyi ma med na yang tshig snga ma la nyes pa sbom por gsungs pa gang yin pa de dag 'dir bsdus pa yin no/ /mi nyid la mtha'i byed pa po nyid ma yin yang sbyor ba nyid ma yin pa ma yin no zhes bya ba la/ mi nyid la zhes bya ba ni mi'i 'gro ba pa nyid la sprad par bya ba gnyis po mngal na gnas pa dang / za ma dang / khyo shug sngar mthun par gyur pa bar du mi mthun par gyur pa bar du mi mthun par gyur pa'i yul la spring ba nod pa dang / phrin phar skyel ba dang / phrin tshur skyel bar byed pa dag la'o/ /mtha'i byed pa po nyid ma yin yang zhes bya ba ni mngal na gnas pa dang / za ma la phrad pa med pa'i phyir dang / khyo shug sngar mthun par gyur pa/ bar du mi mthun par gyur pa la/ mi mthun pa mthun par bsgrubs pa med pa'i phyir mtha' zhes bya ba dngos gzhi'i kha na ma tho ba'i byed pa po nyid ma yin pa'o/ /sbyor ba po nyid ma yin no zhes bya ba ni/ nod pa dang phrin phar skyel ba dang / phrin tshur skyel ba'i tshig gsum po de dag rjes su sgrub par byed pa sbyor ba nyid ma yin pa ma yin te/ 'di ltar sbyor ba kho na yin te/ sbom po'o zhes bya ba'i tha tshig go/ /'dir gzhung ni nye ba 'khor gyis zhus pa las/ btsun pa dge slong gis re zhig mngal na gnas pa dag gi smyan bgyis na ltung ba cir 'gyur/ nyes pa sbom por ro/ /btsun pa dge long gis re zhig za ma dag gi spyan bgyis na ltung ba cir 'gyur/ nyes pa sbom por ro zhes gsungs pa dang / rnam par 'byed pa las dge slong gis chung ma snga ma gsum po chu tshigs kyis byin pa dang / rin chas nyos pa dang / btsan phrogs su thob pa 'thab pa'i mod la dang / 'thab pa'i 'og tu dang / dum pa gcad pa dang / rde'u gsum po gtor ba dang / cho ga btang ba dang / chung ma ma yin par bsgrags pa dang / dril ma bsgrags pa de dag gi sdums byed cing mthun par sbyor na nyes byas gsum dang / nyes pa sbom po gnyis su 'gyur ro zhes gsungs pa yin te/ de la nye ba 'khor gyis zhus pa las mngal na gnas pa dang / za ma'i smyan byas na nyes pa sbom por gsungs pa dang / rnam par 'byed pa las rde'u gsum gtor ba dang / cho ga btang ba gnyis kyis nyes pa sbom por gsungs pa gang yin pa de dag gis 'dir lung gi don khong du chud par bya'o/ /'di ltar lung de gnyis la yang phrad pa med pa'i phyir dang / mi mthun pa mthun par bsgrubs pa med pa'i phyir mtha'i byed pa po nyid ma yin te/ sbyor ba nyid yin no/ /'bras bu gcig pa nyid kyi phyir byed pa po so so la bya ba rdzogs par med pa ma yin no zhes bya ba la/ 'bras bu gcig pa nyid kyi phyir zhes bya ba ni gcig pa'i dngos po ni gcig pa nyid de/ 'bras bu gcig pa nyid ni 'bras bu gcig pa nyid do/ /'di ltar sprad par bya ba'i rgyud du gtogs pa'i phrad pa zhes bya ba'i 'bras bu tha mi dad par gcig pa nyid du grub pa ni 'bras bu gcig pa nyid do/ /de ltar 'bras bu gcig pa nyid kyi phyir/ byed pa po so so la bya ba rdzogs par med pa ma yin te/ dngos gzhi'i bya ba rdzogs par med pa ma yin no zhes bya ba'i tha tshig go/ /'di ltar byed pa po re re re re la bya ba rdzogs par bya ba yod pa nyid yin pas re re la ltung ba re rer 'gyur te/ des na de dag thams cad so so la bya ba yod pa'i phyir ro/ /'di skad bstan te/ gal te dge slong mang po dge 'dun du gyur pas kyang dus gcig tu sprad pa'i bya ba'i yul gcig la spring ba mnod pa dang / phrin phar bskyal ba dang / phrin tshur bskyal ba dag gi bya ba byed la/ 'di ltar sprad par bya ba de gnyis kyi phrad pa zhes bya ba'i 'bras bu gcig pa nyid kyang byung bar gyur na/ de lta na byed pa po de dag gi rgyud la bya ba tha dad par 'gyur bas bya ba tha dad pa de las de na dge slong byed pa po ji snyed yod pa de dag so so'i rgyud la nyes byas dang / sbom po dang / dge 'dun lhag ma zhes bya ba'i ltung ba yang tha dad par 'gyur te/ 'di ltar gang zag so so'i rang gi bya ba rdzogs pa'i dbang gis ltung ba rnams 'byung ba'i phyir ro/ /'dir mngags pa ni rang nyid dang 'dra'o zhes bya ba ni/ smyan byed pa'i skabs 'dir mngags pas smyan byas pa ni rang nyid dang 'dra ste/ bdag nyid kyis byas pa dang 'dra'o/ /ji ltar gnas ngan len smra ba la sogs pa lta bu ni ma yin te/ der ni mngags pas byas pa gang yin pa de rang gis byas pa dang 'dra ba nyid yin no/ /smyan byed pa 'dir ni mngags pa dang mngags pas mngags pas kyang byas pa gang yin pa de rang gis byas pa dang 'dra bar rig par bya'o/ / de'i phyir sprad par bya ba nyid kyis de la spring ba gang yin pa de mngags pa las spring ba dang / sprad par bya ba la brjod par bya ba gang yin pa mngags pa las brjod pa mngags pas byas pa gang yin pa de ni ltung ba 'byin pa po kho nas byas pa yin te/ 'dir de dag gi rnam par gzhag pa de yin no/ /mngags pas mngags pa la yang de bzhin du sbyar ro/ /de gnyis kyi bdag po dag ni sprad par bya ba nyid dang 'dra'o zhes bya ba ni/ sprad par bya ba khye'u dang bu mo de gnyis kyi bdag po dbang byed pa pha ma la sogs pa gang dag yin pa de dag ni sprad par bya ba nyid dang 'dra ste/ 'di ltar pha ni bsgo ba dang / bzlog pa la bdag po nyid yin la ma ni sbyin pa dang dbrog pa la bdag po nyid yin pa'am/ yang yul chos bzhin du yang sbyar bar bya'o/ /'di skad bstan te/ gal te dge slong gis sprad par bya ba gnyis kyi bdag po pha ma la sogs pa dag las spring ba nod pa dang / phrin phar skyel ba dang / phrin tshur skyel ba byed cing gzhi de kho na las sprad par bya ba khye'u dang bu mo de gnyis phrad par gyur na kha na ma tho ba'i dngos gzhi nyid du 'gyur te/ ji ltar sprad par bya ba gnyis las mngon sum du spring ba nod pa dang / phrin phar skyel ba dang / phrin tshur skyel ba la dngos gzhi'i kha na ma tho bar bstan pa bzhin no/ /gzhan la byas pa nyid ni nyes byas so zhes bya ba ni/ de gnyis kyi bdag po ma yin pa de gnyis dang 'brel ba'am/ de gnyis dang 'brel ba ma yin pa gzhan la spring ba mnos pa dang / phrin phar skyel ba dang / phrin tshul skyel ba byas pa nyid ni nyes byas te/ de dag sprad par bya ba'i yul la bdag po ma yin pa'i phyir ro/ /spring yig dang lag yig dang yul phyogs dang / brda dang mtshan ma rnams ni tshig nyid dang 'dra'o zhes bya ba ni/ spring yig dang lag yig la sogs pa ni tshig nyid dang 'dra ste tshig gi ngo bo nyid dang 'dra bar rig par bya'o/ /ji ltar tshig gis spring bas don grub na ltung bar 'gyur ba bzhin du spring yig la sogs pa yang de dang 'dra'o/ /'dir don grub pa dgos pas spring yig la sogs pas kyang don de 'grub par 'gyur ba'i phyir tshig nyid dang 'dra'o zhes bstan to/ /spring yig dang lag yig ni go sla bas ma bshad do/ /yul phyogs zhes bya ba ni skyed mos tshal la sogs pa'i sa phyogs so/ /brda zhes bya ba ni dngos po ma yin pa'i mtshan ma ste/ dper na snga dro la sogs pa dus kyi bye brag go/ /mtshan ma zhes bya ba ni/ gang mthong na brdar bya ba'i don go bar 'gyur ba ste/ dper na skra dang kha spu bregs nas ring po ma lon pa'am gos dmar ser gyon pa nyid na'o zhes bya ba lta bu'o/ /'dir gzhung ni rgyu gsum gyis spring ba'i phrin tshur skyel la phar mi skyel te/ gsum gang zhe na/ yul phyogs dang brda dang mtshan mas so zhes gsungs pa yin no/ /smad 'tshong ma ni skyes pa thams cad dang mthun zhes grags pas/ gal te dge slong gis de'i yul la spring ba nod pa dang / phrin phar bskyal ba dang / phrin tshur bskyal ba la sogs pa dag byed na/ de ltar na yang dge 'dun lhag mar mi 'gyur te/ dang po nyid nas thams cad dang mthun par gyur pa'i phyir ro snyam pa'i blo gros de bsal ba'i phyir/ smad 'tshong ma ni mi mthun pa nyid do zhes bya ba smras te/ chung ma drug po chu tshigs kyis byin pa dang / rin chas nyos pa dang / btsan phrogs su thob pa dang / dang sam du 'dus pa dang / gos zas kyis 'tshos pa dang / kha dum pa rnams la yang mi mthun pa nyid srid la/ thang 'ga' phrad pa yang de bzhin no/ /de'i phyir smad 'tshong ma ni thang 'ga' phrad pa zhes bya ste/ yun thung ngur mthun pa'i phyir yun thung bas mtshan gcig tsam la sogs pa'i mtha' yin pa'i phyir sngon dang phyis mi mthun pa nyid du 'gyur ba'i phyir ro/ /de bas na bud med mi mthun par gyur pa gzhan dag la spring ba mnos pa dang / phrin phar bskyal ba dang / phrin 'tshur bskyal ba dag byed pa la dngos gzhi la sogs pa'i kha na ma tho bar 'gyur ba bzhin du smad 'tshong ma la yang de bzhin te/ de lta bas na smad 'tshong ma'i phyir mdo brtsam pa don dang bcas pa kho na yin no/ /bdag po nyid ma yin pas bzhi pa man chad zhugs pa nyid do zhes bya ba ni/ bdag po nyid ma yin pas sprad par bya ba dang / lan gsum pa man chad sprad pa yang mi mthun pa nyid yin pas dge slong gis de sprad na dngos gzhir 'gyur ro zhes bya bar sbyar ro/ /ji lta bu'i dngos por zhugs pa nyid ce na/ de'i phyir/ bdag po nyid ma yin pas zhes bya ba smras te/ bdag gir khas blangs pa med pas bdag po dang bcas pa med pas so/ /bzhi ba man chad ces bya ba ni/ lan bzhi pa'i 'og ma ste/ lan gsum pa man chad do/ /zhugs pa nyid do zhes bya ba ni/ sprad par bya ba dang sprad par bya ba gzhan du lhan cig sprad pa nyid de/ de yang mi mthun pa nyid yin par rig par bya'o/ /'di skad bstan te/ mdza' gcugs pa tsam gyis bshes pa'i dbang gis gla med par smad 'tshong ma'am/ bud med gzhan dang lhan cig lan gsum phrad pa zhes bya ba 'jug par byed du zin kyang / de mi mthun pa nyid yin pas/ gal te dge slong gis de la spring ba nod pa dang / phrin phar bskyal ba dang / phrin tshur bskyal ba byed na dngos gzhi la sogs pa'i kha na ma tho bar 'gyur ro/ /des ni rnam par 'byed pa las mdza' na mo la spring ba nod pa zhes 'byung ba de bsdus pa yin no/ /nye ba 'khor gyis zhus pa las dge slong gis lan grangs gnyis las lhag pa la spring ba mnos te/ phrin phar skyel tshur skyel bgyid na ltung ba cir 'gyur/ dge 'dun lhag mar ro/ /dge slong gis lan grangs mang po las lhag pa la spring ba mnos te/ phrin phar skyel tshur skyel bgyid na ltung ba cir 'gyur/ nyes pa sbom por ro zhes gsungs pa yang bsdus pa yin no/ /'dir lan grangs zhes bya ba la lan ces bya ba ni res la bya'o/ /lan gyi don de'i yang dang yang du goms pa ni lan grangs zhes bya'o/ /bud med gang lan grangs gnyis phrad pa'i res la grub pa de ni lan grangs gnyis zhes bya'o/ /gang dang lan grangs mang du phrad pa'i res grub pa de ni lan grangs mang bo zhes bya'o/ /lan grangs gnyis pa las lhag pa ni gsum pa ste/ de la yang dge 'dun lhag mar gsungs so/ /lan grangs gsum pa las lhag pa ni bzhi pa ste/ de la ni sbom por gsungs te/ de bas na bzhi pa man chad ces bya ba smos so/ /'thab pa nyid na nyams pa nyid do zhes bya ba ni/ mthun pa nyid ces bya bar sbyar ro/ / sprad par bya ba gnyis 'thab pa nyid na mthun pa nyid nyams pa nyid yin no/ /'thab pa zhes bya ba ni 'dir rtsub mo smras pa dang phyir yang rtsub mo smras pa yin par rig par bya'o/ /'thab pa gang la mdza' gcugs nyams par gyur pa dang / ma 'thab tu zin kyang gal te phra ma la sogs pa mdza' gcugs nyams par gyur pa de la ni mthun pa nyid nyams pa yin no/ /'dir gzhung ni dge slong gis chung ma tha ma bzhi po dang sam du 'dus pa dang gos zas kyis 'chos pa dang / kha dum pa dang / thang 'ga' phrad pa zhes bya ba 'thab pa'i mod dang / 'thab pa'i 'og tu sdums byed cing mthun par byed na dge 'dug lhag mar 'gyur ro zhes gsungs pa yin no/ /'thab pa'i mod ces bya ba'i sgras ni 'thab mo'i gnas skabs ston to/ /'thab pa'i 'og tu zhes bya ba'i sgras ni 'das pa'i gnas skabs ston te/ skad cig ma dang po 'das pa la yang 'thab pa zhes bya ba'i sgrar 'gyur ro/ /de'i dmigs kyis bsal ba byas te/ gal te de dbang ba chung ma ma yin par bsgrags pa nyid kyang ngo zhes bya ba yang mthun pa nyid nyams pa nyid do zhes bya bar sbyar te/ bud med gang dang skyes pa gang du mthun par gyur la gal te bud med de yang skyes pa de dbang ba yin te/ rin chas nyos pa la sogs pas skyes pa la rag las pa yin pa la gang gi tshe lam po che la sogs par 'di kho bo'i chung ma ma yin no/ /kho bo yang 'di'i khyim thab ma yin no zhes chung ma ma yin par bsgrags pa nyid kyang de'i tshe na mthun pa nyid nyams pa yin te/ 'thab pa tsam 'ba' zhig gis de nyams par ma zad do/ /de bzhin du gal te lha khang la sogs par dril bsgrags pa byas na yang de'i tshe mthun pa nyid yin no/ /'thab pa nyid gyi mod la dang 'og tu dang dum pa bcad pa nyid dang / rde'u gsum gtor ba nyid dang / cho ga btang ba nyid dang chung ma ma yin par bsgrags pa nyid dang / dril bsgrags pa nyid dag ni srog dang ldan pa nyid dag bzhin no zhes bya ba la gang dag la srog yod pa de dag ni srog dang ldan pa ste/ de'i dngos po ni de nyid do/ /srog chags dag dang 'dra bar 'gyur ba ni/ srog dang ldan pa nyid dag bzhin no/ /de la ji ltar sprad p ar bya ba srog dang ldan pa nyid ji snyed sprad par 'dod pa de dag la smyan byed na ltung ba yang de snyed du 'gyur ba de bzhin du 'thab pa nyid kyi mod la sogs pa'i tshigs bdun po 'di dag las ji snyed byung ba de dag la gal te dge slong gis smyan byed na tshigs so so de snyed kyi ltung ba dag de la 'byung bar 'gyur ro/ /de la 'thab pa nyid kyi mod la zhes bya ba ni 'thab mo nyid kyi rtsom pa yongs su ma rdzogs bar te/ de ltar 'thab pa nyid na zhes bya ba'i tha tshig go/ /'og tu zhes bya ba ni 'thab mo mthar phyin pa nyid na'o/ /dum pa bcad pa nyid ces bya ba ni dum pa zhes bya ba shing gi rnam pa yod de/ sprad par bya ba de gnyis kyis shing de rked du gcod par byed cing / 'di skad ces ji ltar shing dum 'di gnyis phan tshun 'byor ba med pa de bzhin du yu bu cag gnyis kyang de bzhin no zhes smras pa ni dum pa bcad pa nyid do/ /kha cig ni 'di skad ces rtswa'i rigs ti lin ti la ka zhes bya ba yod de/ de gnyis kyis de dum par bcad nas de skad zer ba ni dum pa bcad pa zhes bya'o zhes kyang zer ro/ /rde'u gsum gtor ba nyid ces bya ba ni/ de gnyis kyis rde'u gsum phyogs dang phyogs mtshams su 'phangs nas/ 'di skad ces ji ltar rde'u 'di gsum phan tshun phrad pa med pa bzhin du/ yu bu cag gnyis kyang de bzhin no zhes zer ba'o/ /gzhan dag ni 'di skad ces rde'u mang po'i bsnun pa nyid kyis brdegs pa ni rde'u gsum gtor ba nyid do zhes kyang zer ro/ /cho ga btang ba nyid ces bya ba ni/ khyim gyi las sam khyim thab kyi rkang pa bkru ba la sogs pa 'phral gyi bya ba ni cho ga ste/ de btang ba'o/ /chung ma ma yin par bsgrags pa nyid ces bya ba ni/ de gnyis kyis khyo shug ma yin par bsgrags pa nyid do/ /dril bsgrags pa nyid ces bya ba ni/ bdag po btang ba'i phyir lha khang la sogs par dril bsgrags pa'o/ /de'i dang po gsum pa ni nyes byas kyi dbang du byas pa nyid do zhes bya ba ni/ sngar bstan pa'i chung ma de dbang ba de'i dang po gsum po 'thad pa nyid kyi mod la dang / 'og tu dang / dum pa bcad pa dag la smyan byed pa ni nyes byas kyi dbang du byas pa nyid do/ /'dir mdo de gnyis kyi gzhung ni 'di yin te/ dge slong gis chung ma dang po gsum po chu tshigs kyis byin pa dang / rin chas nyos pa dang / btsan phrogs su thob pa 'thab pa'i mod la yin la/ 'thab pa'i 'og tu ma yin pa dang / dum pa ma bcad pa dang / rde'u gsum ma gtor ba dang / cho ga ma btang ba dang / chung ma ma yin par ma bsgrags pa dang / dril ma bsgrags pa dag gi sdums byed cing mthun par gyur na nyes byas gcig tu 'gyur ro/ /dge slong gis chung ma dang po gsum po 'thab pa'i mod la dang / 'thab pa'i 'og tu yin la dum pa ma bcad pa dang / dril ma bsgrags pa'i bar dag gi sdums byed cing mthun par gyur na nyes byas gnyis su 'gyur ro dge slong gis chung ma snga ma gsum po 'thab pa'i mod la dang / 'thab pa'i 'og tu dang / dum pa bcad pa yin la/ rde'u gsum ma gtor ba dang / dril ma bsgrags pa'i bar dag gi sdums byed cing / mthun par gyur na nyes byas gsum du 'gyur ro/ /dge slong gis chung ma snga ma gsum po 'thab pa'i mod la dang / 'thab pa'i 'og tu dang / dum pa bcad pa dang / rde'u gsum gtor ba yin la/ cho ga ma btang ba dang / dril ma bsgrags pa'i bar dag gi sdums byed cing mthun par gyur na nyes byas gsum dang sbom po gcig tu 'gyur ro/ /dge slong gis chung ma snga ma gsum po 'thab pa'i mod la dang / 'thab pa'i 'og tu dang / dum pa bcad pa dang / rde'u gsum gtor ba dang / cho ga btang ba yin la/ chung ma ma yin par ma bsgrags pa dang / dril ma bsgrags pa dag gi sdums byed cing mthun par gyur na nyes byas gsum dang / sbom po gnyis su 'gyur ro/ /dge slong gis chung ma snga ma gsum po 'thab pa'i mod la dang / 'thab pa'i 'og tu dang / dum pa bcad pa dang / rde'u gsum gtor ba dang / cho ga btang ba dang / chung ma ma yin par bsgrags pa yin la/ dril ma bsgrags pa dag gi sdums byed cing mthun par gyur na nyes byas gsum dang / /sbom po gsum dang / dge 'dun lhag ma gcig tu 'gyur ro/ /dge slong gis chung ma snga ma gsum po dril bsgrags pa'i bar dag gi sdums byed cing mthun par gyur na nyes byas gsum dang sbom po bzhi dang dge 'dun lhag ma gnyis su 'gyur ro zhes gsungs pa yin te/ de ltar na 'dir chung ma dang bo gsum po dag gi yul la tshigs bdun yod pa las/ tshigs gsum ni nyes byas byed pa yin/ tshigs gnyis ni sbom po byed pa yin/ tshigs drug pa dang bdun pa zhes bya ba gnyis ni dge 'dun lhag ma byed pa yin no/ /ci'i phyir 'di'am 'di mi sprad pa/ gyos po'i gan du mi 'gro mi bkri zhes zer ba dag kyang ngo zhes bya ba la kyang ngo zhes bya ba'i sgra ni nyes byas kyi dbang du byas pa nyid do zhes bya ba'i rjes bsnyags pa'i phyir ro/ /ci'i phyir zhes bya ba'i sgra ni thams cad dang sbyar bar bya ba yin no/ /'di'am zhes bya ba'i gnas su skyes pa'i yul la sbyar ba yin no/ /'di zhes bya ba'i gnas su ni bud med kyi yul la sbyar ba yin par blta bar bya'o/ /mi sprad ces bya ba'i sgra ni gnyi ga dang sbyar bar bya ba yin te/ khyim mi dbub/ gnas mi btsal zhes bya ba'i tha tshig go/ /gyos po'i gan du zhes bya ba'i sgra yang gnyi ga dang sbyar te/ skyes pa'i pha dang bud med kyi pha'i gan du'o/ /mi 'gro zhes bya ba ni skyes pa nyid do/ /mi bkri zhes bya ba ni/ bud med do/ /de ltar na 'dir tshig gi don 'di 'byung ste/ ci'i phyir khye'u 'di mi sprad khyim mi dbub/ ci'i phyir bu mo 'di mi sprad gnas mi btsal/ ci'i phyir khye'u 'di gyos po'i gan du mi 'gro bag ma mi len/ ci'i phyir bu mo 'di gyos po'i gan du mi bkri bag mar mi btang zhes rnam pa de lta bu dag smra ba ni nyes byas kyi dbang du byas pa yin no/ /smyan byed pa'i dge 'dun lhag ma rnam par 'byed pa'o zhes bya ba de rnam par 'byed pa'i skabs nas 'byung ba'o/ /smyan byed pa'i dge 'dun lhag ma zhu ba'i skabs nas 'byung ba brjod par bya ste/ de'i phyir/ mngal na gnas pa dang / med pa dang / nges pa dang / mi bsten pa dang / nyos pa dang / mthun pa dang / bdag gi smyan byed pa ni sbom po'o zhes bya ba smras te/ mngag pa 'gro ba'i las spring ba nod pa dang / phrin phar skyel tshur skyel ba ni smyan byed pa ste/ mngal na gnas pa la sogs pa dang / smyan byed pa zhes bya ba'i sgra 'di so sor sbyar bar bya ste/ mngal na gnas pa dag gi smyan byed pa zhes bya ba la sogs par sbyar ro/ /mngal na gnas pa dang / med pa dang / nges pa dang / mi bsten pa dang / nyos pa dang / mthun pa dang / bdag ni de dag nyid yin te/ de dag gi smyan byed na sbom por 'gyur ro/ /de la mngal na gnas pa zhes bya ba ni/ ltor zhugs pa'i sems can de/ de dag gi smyan byed na sbom por 'gyur ro/ /'dir gzhung ni mngal na gnas pa dag gi smyan byed na ltung ba cir 'gyur/ nyes pa sbom por ro zhes gsungs pa yin no/ /med pa zhes bya ba ni/ 'byung bar 'gyur ba nyid du 'dod la/ da dung mngal du ni ma zhugs pa ste/ 'di ltar de'i tshe na sprad par bya ba med mod kyi/ 'on kyang phyis 'byung bar 'gyur ba'i bdag po dag la smyan byed pa las kha na ma tho bar rnam par gzhag go/ /'dir gzhung ni khyim bdag bu med pa rnams kyi smyan bgyid na ltung ba cir 'gyur/ nyes pa sbom por ro zhes gsungs pa yin no/ /nges pa zhes bya ba ni/ brtul zhugs la gnas pa sbyor ba spangs pa ste/ de dag gi smyan byed na sbom po'o/ /'dir gzhung ni dge slong ma la smyan bgyid na ltung ba cir 'gyur/ nyes pa sbom por ro zhes gsungs pa yin te/ brtul zhugs la gnas pa gzhan thams cad la yang de bzhin du shes par bya'o/ /mi bsten pa zhes bya ba ni dbang po med pa ste/ de dag gi smyan byed pa yang sbom po'o/ /'dir gzhung ni za ma dang ma ning pho dang ma ning mo dag gi smyan bgyid na ltung ba cir 'gyur/ nyes pa sbom por ro zhes gsungs pa yin no/ /nyos pa zhes bya ba ni rin gyis thob pa ste/ de dag gi smyan byed pa yang sbom po'o/ /'dir gzhung ni bud med nyos pa la smyan bgyid na ltung ba cir 'gyur/ nyes pa sbom por ro zhes gsungs pa yin te/ mthun pa zhes bya ba ni gcugs par gyur pa ste/ de dag gi smyan byed na yang sbom po'o/ /'dir gzhung ni dge slong gis lan grangs mang po las lhag par spring ba mnos te/ phrin phar skyel tshur skyel bgyid na ltung ba cir 'gyur/ nyes pa sbom por ro zhes gsungs pa yin no/ /bdag gi smyan byed pa zhes bya ba ni/ bdag nyid kyi phyir bdag nyid smyan byed pa ste/ de yang sbom po'o/ / 'dir gzhung ni bdag nyid kyi smyan bgyid na ltung ba cir 'gyur/ nyes pa sbom por ro zhes gsungs pa yin te/ 'di la ni phar bskyal ba 'ba' zhig yod kyi mnod pa dang tshur bskyal ba ni med do/ /skad sbyar ba nyid ston na'o zhes bya ba la/ skad sbyar ba nyid ces bya ba ni khas blangs pa mthun par gyur pa ste/ de dang sprad par bya ba'i phyir ltung ba 'byin pa pos de ga ge mo zhig na 'dug go zhes ston par byed mtshon par byed na de la sbom por 'gyur ro/ /'dir gzhung ni skyes pas bud med dang lhan cig brda bgyis nas de dge slong la 'di skad ces 'phags pa bud med cig mthong ngam zhes mchi ba la/ des 'di skad ces rtsig pa 'di'i drung na 'dug go zhes bgyid na ltung ba cir 'gyur/ nyes pa sbom por 'gyur ro zhes gsungs pa yin no/ /'thab krol gyis 'phrog tu 'jud na'o zhes bya ba ni/ khyod kyis der 'thab krol gyis khrag khrug nyid gyis shig dang / kho bos de dbrog par bya'o zhes de skad zer ba'i spring ba dge slong gis mnos te 'thab krol gyis 'phrog tu 'jud na nyes pa sbom por 'gyur ba'o/ /'dir gzhung ni 'thab krol gyis 'phrog tu stsal na ltung ba cir 'gyur/ nyes pa sbom po'o zhes gsungs pa yin no/ /chung ma'am bud med che ge mo zhig nyos shig ces zer na'o zhes bya ba ni/ gzhung kha cig las chung ma 'di nyos shig ces mchi na ltung ba cir 'gyur nyes pa sbom por ro zhes gsungs pa dang / gzhung kha cig las bud med che ge mo zhig nyos shig ces mchi na ltung ba cir 'gyur nyes pa sbom po'o zhes gsungs pa de bsdus pa yin no/ /bud med ces zer na nyes byas so zhes bya ba ni/ nyos shig ces bya bar sbyar te/ 'dir gzhung ni btsun pa dge slong gis 'di skad ces bud med nyos shig ces bgyis na ltung ba cir 'gyur/ nyes byas so zhes gsungs pa yin no/ /'dir ni spyir bud med ces bya ba tsam smras pa la nyes byas so/ /mdo snga ma 'di zhes bye brag tu bya ba la brten nas smras pas der ni sbom por rnam par gzhag go/ /rnyed mod ces bya ba yang ngo zhes bya ba'i sgra ni smras na nyes byas so zhes bya ba'i rjes bsnyags pa'i phyir ro/ /'dir gzhung ni btsun pa re zhig skyes pas bud med dang lhan cig brda bgyis pa na dge slong da re mchis nas 'di skad ces rnyed mod ces mchi na ltung ba cir 'gyur/ nyes pa sbom por 'gyur ro zhes gsungs pa yin no/ /'di ltar gtsug lag las nyes pa sbom por ro zhes tshig kha cig las 'byung mod kyi/ de ni lung gi yi ger nor ba 'dra ste/ nyes byas su rigs par snang nas/ slob dpon gyis nyes byas so zhes mdor byas so/ /smyan byed pa zhu ba'i skabs so zhes bya ba de zhu ba'i skabs nas 'byung ba rdzogs so// //'dul byed las gsungs pa bsdu ba'i phyir/ byin pa las dor byas pa sprad pas ni sbom po'o zhes bya ba smras te/ sngar byin zin pa nyid la phyis dor byed de/ bu mo 'di ngas ma byin no zhes 'da' bar byed pa de sprad cing yang sbyin du bcug nas phrad na sbom po'o/ /'dir gzhung ni 'phags pa khyod bu mo che ge mo la 'di skad ces khyod pha ma dag gis ma btsas pa nyid nas kho bo la byin na/ kho bo las kyi tshogs pas longs spyod dag las yongs su nyams pa gang yin pa de kho bo la yang longs spyod 'byung bar 'gyur na kho bo ma btang zhig ces smra nus sam/ des nus so zhes smras nas des song ste/ smras pa dang / de pha ma'i thad nas bros te de'i drung du song nas de gnyis phrad par gyur pa na dge slong de 'gyod pa skyes pa dang / bcom ldan 'das kyis bka' stsal pa/ dge 'dun lhag ma'i ltung bar mi 'gyur te/ nyes pa sbom por 'gyur ro zhes gsungs pa yin no/ /chos kyi phung po sngon du btang ste bos pas so zhes bya ba ni/ dge 'dun mchod ston gsol pa la sogs pa chos kyi phung bo bsod nams kyi rgyu mtshan gyi phyir/ bud med kyis skyes pa la mngag pa'i tshig gis gzhan bos nas des de phrad na sbom po'o/ /'dir gzhung ni 'phags pa khyim bdag che ge mo la 'di skad ces tshur shog shig ces smra nus sam/ des smras pa/ gal te khyod dge 'dun la mchod ston byed pa lta na nus te der de bod do/ /des de la rgyu byin pa dang / dge slong des mchod ston bshams nas khyim bdag de la 'bod pa btang ba dang / de gnyis phrad par gyur nas dge slong de 'gyod pa skyes pa dang / bcom ldan 'das kyis bka' stsal pa/ nyes pa sbom por 'gyur ro zhes gsungs pa yin no/ /don gzhan dang ldan pas kyang ngo zhes bya ba la kyang ngo zhes bya ba'i sgras ni bos na zhes bya ba'i rjes bsnyags pa'i phyir te/ chos kyi phung po las gzhan pa'i don ni don gzhan no/ /don dang ldan pa ni don gzhan dang ldan pa ste/ 'di ni khyod kyi khyim mo/ /'di ni khyod kyi mi ste/ don thams cad la bskyang bar bya dgos so zhes bya ba la sogs pa rgyur byas nas bos te phrad na sbom po'o/ /'dir gzhung ni 'phags pa sna chen po la gtogs pa che ge mo la 'di skad ces 'di ni khyod kyi khyim mo/ /'di ni khyod kyi mi ste/ don thams cad la bskyang bar bya dgos kyis tshur shog shig ces smra nus sam/ des nus so zhes smras nas song ste smras pa dang / de gnyis phrad par gyur nas dge slong de 'gyod pa skyes pa dang / bcom ldan 'das kyis bka' stsal pa/ nyes pa sbom por 'gyur ro zhes gsungs pa yin no/ /gzhan zhes bya bas skyon chags pa med par sems can la bsnun pa yang ma 'phangs pa nyid ma yin no zhes bya ba ni/ gzhung las ka ba la bsnun pas bsnun par mi bya'o/ /gzhan la yang mi bya'o zhes gsungs pa'i skabs der gzhan la zhes bya ba'i tshig byas pa gang yin pa'i gzhan zhes bya ba'i tshig des skyon chags pa med par zhes bya ba zhe sdang bar gyur pa med par sems can mi la sogs pa la khu tshur la sogs pas bsnun pa yang ma 'phangs pa nyid ma yin te/ 'phangs pa kho na'o/ /'di skad bstan te/ ji ltar shing la sogs pa la bsnun pas bsnun pa las nyes byas su 'gyur ba bzhin du skyon chags pa med pa'i sems kyis sems can la bsnun pas snun par byed pa las kyang nyes byas su 'gyur te/ de yang gzhan la yang mi bya'o zhes bya ba'i tshig des 'phangs pa nyid du shes par bya'o/ /'dir gzhung ni khyim bdag gis bud med la smras pa/ kho bo la skabs phye shig /des smras pa/ kho mo mi khom mo/ /smras pa khyod dus gang gi tshe khom par 'gyur ba kho bos ji ltar shes par bya/ smras pa kho mo'i khyim na dge slong khyim du nye bar 'gro ba yod de/ des khyod kyi rgyab tu khu tshur snun par byed pa na'o/ /de nas dge slong khyim der zhugs pa na de la bud med des smras pa/ 'phags pa khyim bdag che ge mo'i rgyab tu khu tshur bsnun nus sam/ des nus so zhes smras te/ de song nas khyim bdag de'i rgyab tu khu tshur bsnun pa dang / des smras pa btsun pa legs so legs so don grub po/ /des smras pa/ 'di ci zhig yin/ smras pa/ brda'o/ /dge slong de 'gyod pa skyes pa dang / bcom ldan 'das kyis bka' stsal pa/ dge 'dun lhag ma'i ltung bar mi 'gyur te/ nyes byas su 'gyur ro zhes gsungs pa yin no/ /smyan byed pa 'dul byed dag go zhes bya ba de 'dul byed kyi skabs nas 'byung ba rdzogs so/ /smyan byed pa'i dge 'dun lhag ma'o zhes bya ba de bshad zin to// //khang pa'i dge 'dun lhag ma brjod par 'dod nas/ spyod lam bzhi'i snod ma yin pa nyid la ni nyes pa med do zhes bya ba smras te/ spyod lam bzhi po 'greng ba dang / 'dug pa dang / nyal ba dang / 'chag pa zhes bya ba'i snod ma yin pa zhes bya ba bzhir mi rung ba'i gnas te/ gnas de lta bu byed du bcug pa la ni nyes pa med de nyes pa'i gzhi med do/ /nyes pa yod pa ma yin pa ni nyes pa med pa ste/ 'di skad bstan te/ gnas gang du spyod lam rnam bzhi byar mi nus pa byed du bcug pa la ni ltung ba cir yang mi 'gyur te/ gnas gang du lus ma btud par 'greng bar mi nus pa'i gnas de ni 'greng ba'i snod ma yin no/ /de bzhin du gang du rgyar skyil mo krung bcas te 'dug par mi nus pa de ni 'dug pa'i snod ma yin no/ /gang du nyal bas mi'i rkang pa brkyang ba la sogs pa byar mi nus pa de ni nyal ba'i snod ma yin no/ /gnas gang du gom pa tha mal pa gsum dor ba'i skabs med pa de ni 'chag pa'i snod ma yin pa nyid de/ phar 'gro ba dang tshur 'gro ba ni 'chag pa zhes bya'o/ /'dir khang pa dang gtsug lag khang gi dge 'dun lhag ma gnyis kyi yan lag ni 'di dag yin te/ gal te sa gzhi'i bdag nyid kyi dang / shing dang rin la sogs pa yo byad gzhan dag las btsal ba dang / yan lag bzhi po rung ba nyid dang / rtsod pa med pa nyid dang / brtsam du mi rung ba nyid dang / bstan pa nyid sgrub par mi byed pa dang / tshad las lhag par byed na mthar ni dge 'dun lhag mar 'gyur ro/ /sngar ni sbom por 'gyur ro/ /yan lag de dag ma tshad ba nyid la ni mthar ni sbom por 'gyur la/ sngar ni nyes byas su 'gyur te/ 'di lta ste dper na/ sa gzhi la sogs pa thams cad gzhan nas btsal ba yin la/ tshad las kyang lhag par byed cing rung ba nyid la sogs pa'i yan lag las kha cig ni sgrub par byed/ kha cig ni sgrub par mi byed na/ mthar ni sbom por 'gyur la sngar ni nyes byas so/ /de bzhin dus gzhi la sogs pa btsal ba yin la/ tshad las lhag par mi byed na rung ba nyid la sogs pa'i yan lag bzhi po dag sgrub par byed kyang rung sgrub par mi byed kyang rung ste/ mthar ni sbom por 'gyur la sngar ni nyes byas so/ /tshad las lhag par byed cing yan lag bzhi po thams cad sgrub par mi byed kyang sa gzhi la sogs pa tshol bar mi byed na yang mthar ni sbom por 'gyur ba la sngar ni nyes byas so/ /sa gzhi la sogs pa tshol bar mi byed cing / tshad las lhag par yang mi byed la/ yan lag bzhi po thams cad ni sgrub par mi byed pa 'di la ni 'grel pa byed pa ni mthar yang nyes byas su 'gyur la sngar yang nyes byas so zhes zer ro/ /gzhan dag ni mthar sbom po kho nar smra'o/ /de bzhin du sa gzhi la sogs pa tshol bar mi byed la/ tshad las lhag par yang mi byed cing / rung ba nyid la sogs pa'i yan lag cung zhig sgrub par mi byed pa la yang 'grel ba byed pa'i blos ni mthar yang nyes byas su 'gyur la/ sngar yang nyes byas su 'dod do/ /gzhan dag ni 'dir yang mthar sbom por 'gyur ro/ /'dir gzhung ni dge slong gis khang ba byed du 'jud cing mi rung bar byed du 'jug na nyes pa sbom por 'gyur ro/ /rtsod pa dang bcas pa byed du 'jud na nyes pa sbom por 'gyur ro/ /brtsam du mi rung ba byed du 'jud na nyes pa sbom por 'gyur ro/ /ma bstan par byed du 'jud na nyes pa sbom por 'gyur ro/ /tshad las 'das par byed du 'jud na nyes pa sbom por 'gyur ro/ /thams cad las 'das par byed du 'jud na dge 'dun lhag mar 'gyur ro zhes gsungs pa yin no/ /rnam par 'byed pa'i gzhung 'dir thams cad du brtsal ba nyid ces bya ba'i yan lag lhag par yod de/ des na sbom por gsungs so/ /gang la btsal ba nyid ces bya ba'i yan lag med la/ tshad las lhag pa nyid kyang ma yin la/ mi rung ba nyid la sogs pa'i yan lag nyi tshe yod pa de la ni nyes byas so/ / //bam po bco lnga pa/ bskos pa nyid dang ma bskos pa nyid dag ni gtso bo nyid ma yin no zhes bya ba la/ bskos pa nyid ces bya ba ni gzhan gyis byed du 'jud pa nyid do/ /ma bskos pa nyid ces bya ba ni rang gis byed pa nyid do/ /de gnyis ni gtso bo nyid ma yin te/ ltung ba las gtso cher gzhag pa nyid ma yin no/ /'di skad bstan te/ dge slong bskos pa'i dbang gis khang ba'am gtsug lag khang byed du 'jud pa la yang rang dgar byed du 'jud pa'i ltung ba'i rnam pa gang yin pa'i rnam pa nyid du 'gyur ro/ /bskos pa na rang nyid dang 'dra'o zhes bya ba ni bskos pas byas pa ni sko bar byed pa rang nyid kyis byas pa dang 'dra'o/ /'di skad bstan te/ ji ltar bdag nyid kyis khang pa dang gtsug lag khang dag log pa nyid du sgrub par byed pa la kha na ma tho bar 'gyur ba de bzhin du bskos pas log pa nyid du sgrub par byed na yang sko bar byed pa nyid la kha na ma tho bar 'gyur ro/ /mdo snga mas ni bskos pa'i ltung ba rnam par gzhag pa byas so/ /'dis ni sko bar byed pa'i ltung ba rnam par gzhag pa byas so/ /de'i phyir bskos pas gang byed pa de ni sko bar byed pa nyid kyis byas par 'gyur ro/ /bskos pas ni rang nyid dang 'dra'o zhes smras na/ gal te sko bar byed pas ji skad bsgo ba bzhin du bskos pas de bzhin du mi byed na ci bskos pa de sgo bar byed pa rang nyid dang 'dra'am snyam du dogs pa'i phyir/ ji skad bsgo ba bzhin du mi byed pa la lus dang ngag gis nod na'o zhes bya ba smras te/ sgo bar byed pa'i tshig las 'das te/ gzhan du byed pa ni ji skad bsgo ba bzhin mi byed pa'o/ /ji skad bsgo ba bzhin mi byed pa bskos pa rang gis byas pa'am/ gzhan gyis byed du bcug pa de la/ gal te sko bar byed pas lus kyis so phag sbyin pa la sogs pa dang / ngag gis legs par byas so zhes bya ba la sogs pas ji skad bsgo ba bzhin mi byed pa de nod pa dang du len par byed khas len par byed na de'i tshe bskos pas byed pa de sgo bar byed pa rang nyid kyis byed pa dang 'dra bar rig par bya'o/ /'dir gzhung ni gal te de la 'di skad ces legs par byas so/ /shin tu byas so/ /ngas khyod la 'di ltar bsgo'o zhes zer zhing / de de la shing ngam rtswa'am sa 'jim dag 'bul bar byed de/ gang mi rung ba byed du 'jud na gnyi ga la yang gzhi ji lta ba bzhin du ltung bar 'gyur ro zhes gsungs pa yin no/ /byas pa ni gcig nyid do zhes bya ba la/ byas pa ni zhes bya ba ni/ gnas rjes su bsgrub bye pa'i phyir las kyi bya ba byas pa'o/ /de ni dus yun ring thung du mas bar du chod du zin kyang ltung ba rnam par gzhag pa la/ gcig pa nyid do/ /'di skad bstan te/ dus kyis bar du chod pa lo la sogs pa'i tshad dag gis gnas shing yang rtsom par byed du zin na yang de lta mod kyi rtsom pa de dag thams cad ni gcig pa nyid de/ ltung ba gcig byed pa yin no zhes bya ba'i tha tshig go/ /mi ltos pas btang ba ni gzhan yin te/ mi ltos pas bar du ye btang ba las phyis yang bsam pa gzhan gyis rtsom pa la ni ltung ba tha dad do/ /'phro zin par byed na nyes pa sbom por 'gyur ro ma zin par rang bzhin gzhan gyis rjes su sgrub pa la ni nyes byas so zhes gsungs pa'i phyir ro/ /rjes su sgrub pa gcig kho na yin du zin kyang / dper na 'thab pa'i mod la dang / 'thab pa'i 'og tu sdums byed pa la sogs pa'i tshigs dag la ltung ba tha dad par byas pa bzhin du/ ci 'dir yang rung ba nyid ma yin pa la sogs pa'i yan lag dag la ltung ba tha dad par bya'am snyam du dogs pa bsal ba'i phyir/ yan lag rnams ni byed pa po tha dad pa nyid ma yin no zhes bya ba smras te/ rung ba nyid ma yin pa la sogs pa yan lag rnams ni ltung ba'i phyir byed pa po tha dad pa nyid ma yin no/ /'di skad bstan te/ rung ba nyid ma yin pa la sogs pa yan lag ji snyed yod pa de snyed kyi ltung ba dag 'dir 'byung ba ma yin te/ 'o na ji lta zhe na/ ltung ba gcig kho nar zad de/ yan lag rnams ni ltung ba'i byed pa po tha dad pa nyid ma yin pa'i phyir ro/ /gang la khang pa'i dge 'dun lhag mar 'gyur zhe na de'i phyir/ btsal ba la'o/ /des rjes su gnang ba la'o/ /rnam pa de lta bus so/ /gzhi ma dag pa la'o/ /ma bstan pa la'o/ /gnas byed du bcug na'o/ /mthar ro zhes bya ba dag smras te/ btsal ba la'o zhes bya ba ni gzhi ste/ gzhi zhes bya ba'i sgras ni sa gzhi brjod de/ gal te gzhi de chos 'di la rab tu byung ba las kyang btsal na'o/ /sus btsal zhe na/ de ni 'dir skabs yin pas ltung ba 'byin pa pos zhes bya bar shes par bya'o/ /des rjes su gnang ba la'o zhes bya ba ni/ dge slong gang gis sa gzhi btsal bar gyur pa des gal te rjes su gnang ba'i gzhi la'o/ /rnam pa de lta bus so zhes bya ba ni sgrub par byed pa ste/ gnas rjes su bsgrub par bya ba'i yo byad shing dang so phag dang mi glas dang / gla rngan la sogs pas so/ /ji ltar na sgrub par byed pa de rnam pa de lta bu zhes bya ba'i sgrar brjod ce na gang gi phyir ji ltar ltung ba 'byin pa po'am/ ltung ba 'byin pa pos rjes su gnang bas/ gzhi'i rnam pa gang zhig btsal ba'i rnam pa des gzhi ma dag pa dang / ma bstan par gnas byed du bcug pa de ltar gal te sgrub par byed pa shing dang so phag dang mi glas dang / gla rngan la sogs pa 'di yang ltung ba 'byin pa po'am/ ltung ba 'byin pa pos rjes su gnang ba'i slong ba pos btsal ba yin pas de'i phyir ji ltar sa gzhi btsal ba bzhin du sgrub par byed pa 'di yang btsal ba yin pas de'i phyir btsal bar mtshungs pa'i phyir sgrub par byed pa la yang rnam pa de lta bu zhes bya ba'i sgrar brjod de/ sgrub par byed pa rnam pa de lta bus gnas byed du bcug na ste/ btsal bas zhes bya ba'i tha tshig go/ /btsal ba nyid 'di la lung 'di dag kyang snang ste/ nye ba 'khor gyis zhus pa las/ la las 'di skad ces ci tsam gyis na rang gis btsal ba'i khang pa zhes bgyi/ gang las gnyis yongs su 'grub par 'gyur ba ste/ yo byad dang sa gzhi'o zhes gsungs pa dang / de nyid las gzhung 'di skad du gang zag gi gzhir byed du 'jud na nyes pa sbom por 'gyur ro zhes gsungs pa'o/ /so sor thar pa'i mdo las kyang rang gis btsal ba zhes gsungs so/ /gzhi ma dag pa la'o zhes bya ba ni mi rung ba nyid dang / rtsod pa dang bcas pa nyid dang / brtsam du mi rung ba nyid ni ma dag pa'o zhes 'og nas 'byung ngo / /ma bstan pa la'o zhes bya ba ni/ dge 'dun las bstan pa thob pa nyid ni bstan pa nyid do zhes bstan pa nyid kyang 'og nas 'byung ste/ de las bzlog pa ni ma bstan pa nyid do/ /gnas byed du bcug na'o zhes bya ba ni/ khang ba byed du bcug na'o/ /mthar ro zhes bya ba ni/ zin na ste/ gnas kyi ngo bo ni thog bkab cing sgom gtogs pa kun nas bskor ba nyid do/ /de zin pa'i skad cig ma la ni dge 'dun lhag mar 'gyur ro/ /sngar ni sbom por ro/ /'di skad bstan te/ gal te gzhi de ltung ba 'byin pa pos btsal ba'am/ de nyid kyis btsal ba'i phyir rjes su gnang ba yin la/ sgrub par byed pa yang btsal ba de nyid du rjes su gnang ba yin zhing / gzhi ma dag pa rung ba nyid ma yin pa la sogs par sgrub par byed pa/ shing dang so phag dang / mi glas dang / gla rngan btsal bas gnas byed du bcug na zin pa'i skad cig ma la dngos gzhi'i ltung bar 'gyur ro/ /sngar ni sbom por ro/ /gang la gtsug lag khang gi dge 'dun lhag mar 'gyur zhe na/ de'i phyir/ 'og ma la yang de dag nyid de ma btsal ba nyid do zhes bya ba smras te/ khang ba'i skabs su spyod lam bzhi'i snod ma yin pa nyid la ni nyes pa med do zhes bya ba la sogs pa gang dag bstan pa de dag nyid thams cad gtsug lag khang gi bslab pa'i gzhi 'og ma la yang blta bar bya ste der ni ma btsal ba nyid de btsal ba nyid ma gtogs so/ /btsal ba nyid ma gtogs na 'dir tshig gi don 'di 'byung ste/ gnas pa bdag nyid kyis sam/ rjes su gnang ba'i sa gzhir sgrub par byed pa rang gi'am rjes su gnang bas gzhi ma dag par bstan pa'i gtsug lag khang byed du bcug na gtsug lag khang zin pa'i mthar dge 'dun lhag mar 'gyur ro/ /sngar ni sbom por ro/ /gtsug lag las ni gleng gzhi'i dbang gis bdag po dang bcas pa zhes bya ba smos par zad kyi/ de yan lag ni ma yin te/ bdag po med pa nyid la yang sa gzhi nyo ba la sogs pa srid pa'i phyir ro/ /dge 'dun gyis gzhir byed du 'jud na yang de bzhin no/ /khang ba'i dge 'dun lhag ma la yan lag gzhan gnyis brjod par bya ste/ gcig gi don du'o zhes bya ba ni/ gang zag gcig gi don du 'jud na dge 'dun lhag mar 'gyur gyi/ gnyis dang mang po dag gi don du na sbom por 'gyur ro/ /'dir gzhung ni nye ba 'khor gyis zhus pa'i gzhung kha cig las gnyis kyi spyi la byed du 'jud na nyes pa sbom por 'gyur ro zhes 'byung ngo / /zhu ba las gnyis zhes smos pa ni nye bar mtshon pa ste/ mang po'i don du byed du 'jud na yang sbom po kho na'o/ /de bas na bdag nyid gcig pu'am dge slong gzhan gcig gam khyim pa gcig gi don du byed du bcug na dge 'dun lhag ma ste/ gcig gi don du'o zhes bya ba gcig gi sgra bye brag tu ma byas pa'i phyir ro/ / ci nas byed du bcug pa thams cad las der 'gyur ram zhe na ma yin te/ de'i phyir/ tshad las lhag pa'o zhes bya ba smras te/ tshad las 'das pa'i gnas las te/ tshad gang bstan pa de las lhag pa byed du 'jud na'o/ /gzhi ma dag pa la'o zhes smras na 'dir ma dag pa gang yin zhe na/ de'i phyir mi rung ba nyid dang / rtsod pa dang bcas pa nyid dang / brtsam du mi rung ba nyid ni ma dag pa'o zhes bya ba smras te/ mi rung ba nyid dang / rtsod pa dang bcas pa nyid dang / brtsam du mi rung ba nyid ces bya ba de gsum ni ma dag pa'i sgrar brjod do/ /de gsum gyi rang bzhin ji lta bu zhe na/ de'i phyir skye ba po phra mo'i gnas dang ldan pa nyid dang / rgyal po dang / lha'i gnas dang / mu stegs can gyi 'dug gnas la brten pa nyid dang / shing ljon pa gcad par bya ba ma yin pa nyid dang / phyi rol 'dom gang gi mtha'i nyen 'khor gyi nang rol na chu klung ngam/ ngam grog gam/ khron pa dang / 'dom pa nyid ni go rims bzhin du de dag yin no zhes bya ba smras te/ de la skye ba po phra mo gnas dang ldan pa nyid dang 'dom pa nyid ni mi rung ba nyid do/ /skye ba po phro mo'i gnas dang ldan pa nyid ces bya ba ni sbrul dang sdig pa la sogs pa'i gnas dang ldan pa nyid de/ de dang 'don pa nyid ni mi rung ba nyid do/ /'dir gzhung ni gal te de na sbrul gyi gnas sam/ sdig pa'i gnas sam/ sbrang bu tre ma bu ka dang / trai la ta'i gnas yod pa ma yin no zhes gsungs pa yin no/ /de dag ni dpe tsam ste grog sbur la sogs pa skye ba po phra mo thams cad kyang gzung ngo / /rgyal po dang lha'i gnas dang / mu stegs can gyi 'dug gnas la brten pa nyid dang / shing ljon pa gcad par bya ba ma yin pa nyid dang / 'dom pa ni rtsod pa dang bcas pa nyid yin te/ rgyal po'i gnas dang / 'jig rten pa'i lha'i gnas dang / mu stegs can gyi 'dug gnas la brten pa nyid ces bya ba ni de dag dang nye bar gyur pa nyid de/ de ni skye bo phal po che dag dang / glang po che dang / rta dang rnga mo la sogs pa dag dang / de dag gi sgra dag gis gnod par 'gyur ba'i skyon yod pa nyid yin no/ /shing ljon pa gcad par bya ba ma yin pa nyid ces bya ba ni der zhes bya bar tshig rnam par sbyar te/ de ni skye bo phal pho che la mkho ba yin pa'i phyir/ 'jig rten dag las kha mchu 'byung bas des na rtsod pa dang bcas pa yin no/ /phyi rol 'dom gang gi mtha'i nyen kor gyi nang rol na chu klung ngam/ ngam grog gam khron pa dang 'dom pa nyid ces bya ba ni brtsam du mi rung ba nyid yin te/ gnas kyi phyi rol nas 'dom gang gi mtha'i nyen kor gyi nang rol na chu klung yang rung / ngam grog kyang rung / khron pa yang rung ste/ de dag gcig dang 'dom na yang gnas tshe thung bar 'gyur bas brtsam du mi rung ba'i skyon can yin no/ /de la phyi rol ces bya ba ni gnas kyi ra ba'i phyi rol nas so/ /'dom gang zhes bya ba ni khru bzhi'o/ /'dom gang gi mtha' zhes bya ba ni 'dom gang gi mtshams so/ /de'i nyen kor zhes bya ba ni de dang nye ba nyid de/ de'i nyen kor te 'dom gang gi mtha' dang nye ba pha mtha'i cha'o/ /de'i nang rol ces bya ba ni pha mtha'i cha de nas tshu rol te/ 'dom gang gi nang nyid do/ /nang rol de'i dbus sam mtha'i phyogs gang yang rung ba de na chu klung la sogs pa gang yang rung ba cig dang 'dom par gyur na yang der de yun thung du gnas par 'gyur bas brtsam du mi rung ba nyid do/ /phyogs thams cad du kho ra khor yug kun du chu klung la sogs pa thams cad dang 'dom pa kho na la ni mi bsnyegs so/ /'dir gzhung ni 'dom gang gi mtha'i nyen kor brtag par bya ste/ gal te gzhi chu klung la brten tam ngam grog la brten pa yin na brtsam du mi rung ba'i phyir bstan par mi bya'o zhes gsungs pa yin no/ /gang las 'das na gnas tshad las lhag par 'gyur ba'i tshad de gang yin zhe na/ de'i phyir tshad dang ldan pa'i khru phyed dang do ni bde bar gshegs pa'i mtho gang ste nang rol nas de bcu gnyis dang bdun gyi tshad do zhes bya ba smras te/ rdul phra rab la sogs pa'i rim pas bsgres pa'i sor nyi shu rtsa bzhi la ni tshad dang ldan pa'i khru gang ngo / /khru de'i phyed dang do ni bde bar gshegs pa'i mtho gang ngo / /khang pa de'i nang rol nas chur sor nyi shu rtsa bzhi'i tshad las khru gang du brtsis pa'i khru de'i phyed dang do la bde bar gshegs pa'i mtho gang gi tshad yin pa'i bde bar gshegs pa'i mtho de bcu gnyis dang zheng du bde bar gshegs pa'i mtho de bdun ni 'dir khang pa de'i tshad yin par blta'o/ /de las bzlog pa ni ma bstan pa nyid do zhes smras na bstan pa nyid de gang zhe na/ de'i phyir dge 'dun las bstan pa thob pa bstan pa nyid do zhes bya ba smras te/ gzhi gang la bstan pa thob pa de ni bstan pa thob pa ste/ de'i dngos po ni de nyid do/ /gang las thob ce na de'i phyir/ dge 'dun las zhes bya ba smras te/ dge 'dun las bstan pa thob pa'i gzhi de ni bstan pa nyid do/ /'di skad bstan te/ khang pa'i sa gzhi'i gzhi de'i gnang ba'i las ni/ dge 'dun btsun pa rnams gsan du gsol/ dge slong lag gi bla ming 'di zhes bgyi ba 'di khang pa'i gzhi rung ba rtsod pa ma mchis pa brtsam du rung ba zhig btsal te/ dge slong lag gi bla ming 'di zhes bgyi ba 'di dge 'dun las khang pa'i gzhi rung ba rtsod pa ma mchis pa brtsam du rung ba bstan pa gsol na/ gal te dge 'dun gyis dus la bab cing bzod na dge 'dun gyis gnang bar mdzod cig dang / dge 'dun gyis dge slong lag gi bla ming 'di zhes bgyi ba la/ khang pa'i gzhi rung ba rtsod pa ma mchis pa brtsam du rung ba bstan pa stsol to zhes bya ba la sogs pa gsol ba dang gnyis kyi las dang / gtsug lag khang gi gzhi la yang de bzhin du sbyar ba'i gsol ba dang / gnyis kyi las kyi tshig gang yin pa de ni de'i bstan pa yin te/ gzhi gang la bstan pa rnam pa de nyid gang las thob pa de ni 'dir bstan pa yin par dgongs so/ / ma dag pa gsol bar mi bya'o zhes bya ba ni/ gzhi mi rung ba nyid la sogs pa dang ldan pa ma dag pa dge 'dun las bstan pa gsol bar mi bya'o/ /rang dag rtog tu 'dong bar bya'o/ /yang na dge slong bskos pa dag go zhes bya ba ni/ dge slong des dge 'dun du gyur pa'i dge slong gang dag la gzhi bstan pa gsol ba'i dge slong de dag rang dag gzhi 'di'i dag pa nyid rtog tu 'dong bar bya'o/ /yang na dge slong bskos pa dag rtog tu gtang bar bya'i gzhan ni ma yin no/ /stan la yang de bzhin no zhes bya ba ni/ gal te dge slong lo drug tshun chad du stan bya ba'i phyir/ dge 'dun las gnang ba gsol bar byed na/ stan de la yang rnyings pa nyid brtag pa'i phyir gang dag la gsol ba'i dge slong de dag rang nyid rtog tu 'dong bar bya'o/ /yang na dge slong bskos pa dag rtog tu gtang bar bya'i gzhan ni ma yin no/ /byas pa rnyed pa dang / byas pa la longs spyod pa dag la ni ltung ba med do zhes bya ba ni/ gnas gzhan gyis byas zin pa rnyed pa dang / gzhan gyis byas zin pa la longs spyod pa dag la ni ltung ba med do/ /rnying pa 'chos pa la yang ngo zhes bya ba la yang ngo zhes bya ba'i sgras ni ltung ba med do zhes bya ba'i rjes snyegs par byed do/ /gnas rnying pa 'chos shing byi dor byed pa la ni ltung ba med do/ /rnying pa 'chos pa zhes bya ba ni dpe ste/ sar pa 'chos shing byi dor byed pa la yang ltung ba med pa kho na'o/ /khang pa'i dge 'dun lhag ma rnam par 'byed pa'o zhes bya ba de rnam par 'byed pa'i skabs nas 'byung ba rdzogs so// //gang byas na gtsug lag khang gi dge 'dun lhag mar 'gyur zhe na/ 'dir sngar 'og ma la yang de dag nyid de ma btsal ba'o zhes smos pa'i rnam pa nyid khas blangs nas bye brag brjod par bya ste/ tshogs kyi don du'o zhes bya ba ni/ 'dir khyim pa yan chad rab tu byung ba dang / rab tu ma byung ba la yang rung ste/ gang zag bzhi yan chad la tshogs zhes bya bar dgongs so/ /rnam par 'byed pa las tshogs kyi phyir zhes bya ba ni de bzhin gshegs pa'i nyan thos kyi dge 'dun no zhes gsungs pa de ni gleng gzhi'i dbang gis te/ dpe tsam du zad pas 'di la nyes pa med do/ /gtsug lag khang la ni tshad nges par med do/ /gtsug lag khang gi dge 'dun lhag ma rnam par 'byed pa'i zhes bya ba de rnam par 'byed pa'i skabs nas 'byung ba rdzogs so// //dge 'dun lhag ma de gnyi ga'i skabs zhu ba las gsungs pa ni 'dra bas/ skabs gcig kho nas bsdu ba'i phyir/ rtsom pa ni sbyor ba nyid do zhes bya ba smras te/ gnas rtsom pa ni sbyor ba nyid de/ sbom po'i dbang du byas pa'o zhes bya ba'i tha tshig go/ /de yang gang la mthar dngos gzhir 'gyur ba de la ni sbyor ba la sbom po'o/ /gang la mthar sbom por 'gyur ba de la ni sbyor ba la nyes byas so/ /'dir gzhung ni brtsams nas bdag nyid gsod par byed na nyes pa sbom por 'gyur ro zhes gsungs pa yin no/ /ma g.yogs pa byed du 'jud pa'i mthar yang de dang 'dra'o zhes bya ba de khang pa'am gtsug lag khang steng ma g.yogs pa zhig byed du gzhug go snyam pa'i bsam pas zhugs pa'i dge slong gi gnas de'i mtha' gang yin pa de yang de dang 'dra ste/ sbyor ba dang 'dra bar blta bar bya ste/ sbom po'o zhes bya ba'i tha tshig go/ /'dir gzhung ni ma g.yogs pa zhig byed du 'jud na nyes pa sbom por 'gyur ro zhes gsungs pa yin no/ /sngar ni nyes byas so/ /du ma'i don du'o zhes bya ba ni khang pa mi rung ba nyid la sogs pa'i yan lag thams cad las 'das pa du ma'i don du byed du bcug pa'i mtha' gang yin pa de yang sbyor ba dang 'dra bar blta bar bya'o/ /'dir gzhung ni gnyis kyi spyi la byed du 'jud na nyes pa sbom por 'gyur ro zhes gsungs pa yin no/ / ma bskos par ro zhes bya ba la/ ma bskos pa zhes bya ba ni tshol ba po'am gnas pa pos rjes su ma gnang bar byed du 'jud pa ste/ de'i mtha' gang yin pa de yang sbyor ba dang 'dra bar blta bar bya'o/ /dngos po tshang na yang pham par mi 'gyur te/ gzhi de gang dbang ba de nyid kyi phyir gtsug lag khang rtsig tu 'jud pa'i phyir ro/ /dngos gzhir yang mi 'gyur te/ btsal ba'i yan lag med pa'i phyir ro/ /de bas na rjes su gnang ba la yang yan lag thams cad chad na dngos gzhi'o/ /rjes su ma gnang ba la ni sbom po'o/ /'dir gzhung ni yi ge kha cig las ma bskos par byed du 'jud na nyes pa sbom por 'gyur ro zhes gsungs pa yin no/ /gang zag gis so zhes bya ba ni gis so zhes bstan pa'i phyir sngar rnam pa de lta bus so zhes bya bas sgrub par byed pa bstan pa'i bye brag yin par shes par bya'o/ /de'i phyir gang zag gi sgrub par byed pas byed du 'jud na de dang 'dra ste/ sbyor ba dang 'dra bar rig par bya ste btsal pa nyid med pa'i phyir ro/ /'dir gzhung ni gang zag gi gzhis byed du 'jud na nyes pa sbom por 'gyur ro zhes gsungs pa yin no/ /zhu ba'i skabs 'di thams cad khang pa dang gtsug lag khang gi bslab pa'i gzhi gnyi ga'i dbang du byas par rig par bya ste/ gang zag gis so zhes bya ba 'di 'ba' zhig ma gtogs te/ gtsug lag khang gi bslab pa'i gzhi la btsal ba zhes bya ba'i yan lag rnam par ma bzhag pa'i phyir ro/ /'phro zin par byed na yang ngo zhes bya ba la/ yang ngo zhes bya ba'i sgra ni byed du 'jud na mtha' de dang 'dra'o zhes bya ba'i rjes bsnyags pa'i phyir ro/ /'dir gzhung ni 'phro zin par byed na nyes pa sbom por 'gyur ro zhes gsungs pa yin no/ /gsol ba'i 'og tu ma grub na nyes byas so zhes bya ba ni/ bdag po las gzhi btsal ba gsol ba dang / dge 'dun las rung ba bstan pa gsol ba'i 'og tu gnas te por ma grub pa na nyes byas te/ gzhi yang btsal zin la gsol ba dang las brjod pa yang byas pa'i 'og tu gnas byed du bcug pa'i dus na te por ma grub pa gang yin pa de las nyes byas su shes par bya'o/ /mi 'dod pa'i bsam pas ma grub pa la 'di rnam par gzhag gi bar chad kyi dbang gis ma grub pa la ni ma yin no/ /'dir gzhung ni btsun pa re zhig gzhi btsal nas mi bgyid na ltung ba cir 'gyur nyes byas su'o/ /khang pa bstan pa gsol nas bgyid du mi gsol na ltung ba cir 'gyur nyes byas su'o zhes gsungs pa yin no/ /khang pa dang gtsug lag khang gi dge 'dun lhag ma zhu ba'i skabs so zhes bya ba de gnyis zhu ba'i skabs nas 'byung ba rdzogs so/ /khang pa dang gtsug lag khang gi dge 'dun lhag ma gnyis so zhes bya ba de gnyis bshad zin to// //gzhi med par skur pa 'debs pa'i dge 'dun lhag ma brjod par 'dod nas/ pham par 'gyur ba lhag par spyod pas dge slong nyams pa la yang ngo zhes bya ba smras te/ mi tshangs par spyod pa la sogs pa pham par 'gyur ba lhag mar spyod pa kun du spyod pas skur pa 'debs pa la ni pham par 'gyur ba lhag par spyod pa ste/ pham par 'gyur ba lhag par spyod pa des skur pa 'debs na dge 'dun lhag ma'o/ /su la lhag par spyod pa des skur pa 'debs na zhe na/ de'i phyir dge slong la zhes bya ba smras te/ dge tshul la sogs pa la ma yin no/ /nyams pa la yang ngo zhes bya ba ni/ tshul khrims dang ldan pa 'ba' zhig la ma yin gyi/ nyams pa la skur pa btab na yang ngo / /bsnyen par rdzogs pa dang bcas pa ma nyams pa'i dge slong dang / dge slong ma nyid kyis dmigs kyis bsal ba bstan pa'i phyir nyams pa yang ngo zhes bya ba smras so/ /'di skad bstan te/ dge slong nyams pa la yang pham par 'gyur bas skur pa 'debs na dge 'dun lhag mar 'gyur ro/ /ma dag pa la skur pa 'debs pa'i gzhung ni 'di yin te/ gang zag ma dag pa la skur pa 'debs par byed na ltung pa gzhi bcu gcig dang / ltung ba med pa'i gzhi drug ste/ ltung ba'i gzhi bcu gcig las ji lta zhe na/ des ma mthong ba dang / ma thos pa dang / mi dogs pa dang / 'du shes bsgyur ba dang bcas na ji snyed brjod do cog la dge 'dun lhag ma'o/ /zhu ba las kyang btsun pa dge slong rang 'di skad ces bdag gis mi tshangs par spyod pa 'khrig pa'i chos bstan to zhes mchi ba de la dge slong gis gzhi ma mchis par rku ba'am/ 'gums pa'am/ smra bas skur pa 'debs na ltung ba cir 'gyur/ dge 'dun lhag mar ro zhes gsungs pa yin no/ /spyir bstan pa'i mdo las rang gi phyogs dang mthun pa ni mtshan dang khas len pas bzung ngo zhes 'byung ba de'i dmigs kyis bsal ba bstan pa'i phyir/ phyogs las rang nyid ni 'dir yan lag ma yin no zhes bya ba smras te/ mtshan gyi dbang dang lta ba khas len pa'i dbang gis phyogs las rang nyid du gsungs pa gang yin pa dge slong rnams dang / dge slong rnams su dge slong ma rnams dang dge slong ma rnams su khas len pa rnams dang / khas len pa rnams su khas mi len pa rnams dang / khas mi len pa rnams su phyogs las rang nyid do zhes bya ba de ni skur ba 'debs pa'i skabs 'dir khas mi blang ngo / /'o na ji ltar zhe na/ mtshan mi mthun pa la skur pa 'debs pa dang / lta ba mi mthun pa la skur pa 'debs pa yang dge 'dun lhag ma'o zhes bya ba'i tha tshig go/ /'dir gzhung ni zhu ba las dge slong gis dge slong ma la gzhi med par pham par 'gyur ba'i chos kyis skur pa 'debs na dge 'dun lhag ma'o/ /de bzhin du dge slong mas dge slong la gzhi med pa'i pham par 'gyur ba'i chos kyis skur pa 'debs na dge 'dun lhag ma'o zhes gsungs pa'o/ /de bzhin du khas len pa la khas mi len pa dang / khas mi len pa la khas len pas gzhi med pa'i pham par 'gyur ba'i chos kyis skur pa 'debs pa yang dge 'dun lhag ma ste/ nyams pa la skur pa 'debs pa la yang kha na ma tho ba yongs su rdzogs par 'gyur ro zhes gsungs pa las na khas len pa dang / khas mi len pa gnyis la skur pa 'debs pa lta ba la shin tu kha na ma tho ba yongs su rdzogs par 'gyur te/ pham par ma gyur pa'i phyir ro/ /mtshan mi mthun pa la yang nyams pa dang 'dra ba'i kha na ma tho ba kho nar 'gyur ro/ /ci yang dag pas sam 'on te yang dag pa ma yin pas she na de'i phyir/ brdzun du smra bas so zhes bya ba smras te/ yang dag pa ma yin pas skur pa 'debs na dge 'dun lhag mar 'gyur gyi/ yang dag pas ni ma yin pa ste/ mthong ba dang / thos pa dang / dogs pa'i gzhi rnams med par yang dag pa ma yin par brjod na'o/ /ci skur pa gdab par bya ba nyid nye bar gyur pa kho na la'am zhe na ma yin te/ de'i phyir gang yang rung ba la go bar byas na'o zhes bya ba smras te/ mi'i 'gro ba pa gang yang rung ba la go bar byas brda phrad par byas na yang dge 'dun lhag mar 'gyur gyi/ glengs pa 'ba' zhig gis der 'gyur bar ma zad do zhes bya ba'i tha tshig go/ /ci bsam pa gang yang rung bas mi gang yang rung ba la go bar byas na 'am zhe na/ ma yin te/ de'i phyir nyams pas 'dun pas so zhes bya ba smras te/ nyams par bya ba bskyed pa'i bsam pas yin gyi/ khros par gyur pa'am/ rgod bag gam/ byung rgyal gyis ni ma yin te/ 'di ltar ltung bas nyams par bya ba'i bsam pas brdzun gyis pha rol po la glengs sam gzhan la go bar bya ba'i phyir brda sprod par byed pa na der 'gyur ro/ /de la ltung ba rnam par gzhag pa ni 'di yin te/ pham par 'gyur bas skur na ni dge 'dun lhag ma'o/ /dge 'dun lhag mas skur na ltung byed do/ /ltung ba gzhan gyis skur na nyes byas so/ /nyes byas kyis skur na nyes byas phra mor 'gyur ro/ / the tshom dang bcas pas skur na yid gnyis ni 'du shes dang 'dra'o/ /de ni gzhi gzhan ma yin no zhes bya ba la/ de ni zhes bya ba'i sgra ni mthong ba dang / thos pa dang / dogs pa'i gzhi la bsnyegs so/ /gzhi gzhan ma yin no zhes bya ba ni/ gang la mthong ba de ni thos pa ma yin/ dogs pa yang ma yin la/ gang thos pa de mthong ba ma yin dogs pa yang ma yin zhing / gang dogs pa de mthong ba yang ma yin thos pa yang ma yin par shes par bya'o/ /'di skad bstan te/ gzhi gzhan yod du zin kyang gzhi gang gis gleng ba'i gzhi de gal te med na dge 'dun lhag ma kho nar 'gyur ro/ /'dir gzhung ni thos pa la yid ches nas bdag gis mthong ngo zhes zer ba dang / thos pa la yid ma ches par bdag gis mthong ngo zhes zer ba dang / thos pa la dogs pa na bdag gis mthong ngo zhes zer ba dang / thos pa na mi dogs pa na bdag gis mthong ngo zhes zer ba dang / dogs pa la dogs pa na bdag gis mthong ngo zhes zer ba na/ brjod do cog dge 'dun lhag ma'o zhes gsungs pa yin no/ /brjed pa ni yod pa nyid ma yin no zhes bya ba ni mi dran pa ni yod pa nyid ma yin te/ mi dran pa'i dngos po brjed pa ni yang dag pa ma yin pa smras pa yin no/ /'dir gzhung ni des mthong la de yang brjed bzhin du 'du shes bsgyur ba dang bcas pas bdag gis mthong ngo zhes zer ba dang / des thos la de yang brjed bzhin du 'du shes bsgyur ba dang bcas pa bdag gis thos so zhes zer ba dang / de dogs la de yang brjed bzhin du 'du shes bsgyur ba dang bcas pas bdag dogs so zhes zer na brjod do cog dge 'dun lhag ma'o zhes gsungs pa yin no/ /ci'i phyir na gang dngos su de bzhin yin yang gzhi gzhan la gzhi nyid ces mi bya zhing brjed pa yang yod pa nyid ma yin snyam du dogs pa bsal ba'i phyir/ don gyi de nyid ni mi brdzun par smra ba nyid kyi rgyu ma yin no zhes bya ba smras te/ don gyi de nyid ni mi brdzun par smra ba bden par smra ba'i rgyu ma yin gyi/ 'di ltar 'du shes ni rgyu yin no/ /'di skad bstan te/ gal te dge slong 'du shes sgyur bar byed na don gyi de nyid yod du zin kyang de brdzun du smra ba nyid yin pas dge 'dun lhag ma kho nar 'gyur ro/ /ji ste 'du shes sgyur bar mi byed na ni don gyi de nyid med du zin kyang de bden par smra ba nyid yin pas dge 'dun lhag mar mi 'gyur te/ brdzun pa dang bden pa gnyis ni 'du shes dang 'brel pa yin gyi/ don gyi de nyid dang 'brel pa ma yin pa'i phyir ro/ /de ni gzhi gzhan ma yin no zhes bya ba dang / brjed pa ni yod pa nyid ma yin no zhes bya ba'i mdo de gnyis ni nyams pa'i yul la ma dag pa la skur pa 'debs pa la dge 'dun lhag mar 'gyur ba'i khungs yin la/ khungs de gnyis sgrub par byed pa ni don gyi de nyid ni mi brdzun par smra ba nyid kyi rgyu ma yin no zhes bya ba'i mdo yin no/ /khros 'khrugs pas skur pa 'debs na zhes bya ba ni gleng gzhi'i dbang kho nas der gsungs pa yin gyi yan lag ni ma yin te/ 'dir skur pa 'debs pa'i bsam pa yan lag yin no/ /gzhi med pa'i dge 'dun lhag ma rnam par 'byed pa'o zhes bya ba de rnam par 'byed pa'i skabs nas 'byung ba rdzogs so/ / //gzhan gyi cha dang mthun pa'i dge 'dun lhag ma brjod par bya ste/ gzhan la brten pa ni gzhan gyi cha'o/ /de dang rjes su mthun pa ni gzhan gyi cha dang mthun pa'o/ /gzhi med par skur pa 'debs pa don gsal bar go bar byed pa las rnam pa gzhan pa'i skur pa 'debs pa don mi gsal bas go bar byed pa'i tshig dge 'dun lhag ma byed pa ni gzhan gyi cha dang mthun pa zhes bya ste/ bag tsam zhes kyang bya'o/ /da ni dge 'dun lhag ma sngar bstan pa'i skabs su pham par 'gyur ba lhag par spyod pas dge slong nyams pa la yang ngo zhes bya ba la sogs pa'i rnam pa bstan pa thams cad 'dir khas blangs nas brdzun du smra bas so zhes bya ba smos pa de'i bye brag 'ga' zhig 'dir brjod par bya ste/ brjod par bya ba gzhan la gnas pa'i tshig gis brdzun na'o zhes bya ba la/ brjod par bya ba gzhan zhes bya ba ni/ gang zag 'dis pham par 'gyur ba lhag par spyad pa byas so zhes bya ba'i brjod par bya ba don gsal ba de las gzhan pa'i brjod par bya ba don mi gsal ba'o/ /de la gnas pa'i tshig ces bya ba ni gnas de la gnas pa'i tshig gang yin pa de ni brjod par bya ba gzhan la gnas pa'i tshig go/ /brjod par bya ba gzhan la gnas pa'i tshig des dge slong nyams pa la yang brdzun gyis pham par 'gyur bas skur pa 'debs sam/ gang yang rung ba la go bar byed na dge 'dun lhag mar 'gyur ro zhes 'dir mdo'i don ni de yin no/ /'dir dpe ni dper na kho bo cag gis tshe dang ldan pa gyad bu nor mthong ngo / /dge slong ma at+pa la'i mdog mthong ngo / /mi tshangs par spyod pa 'khrig pa'i chos bsten pa mthong ngo zhes sgra de gsum gcig la gcig ma sbyar bar kho bo cag gis mthong ngo mthong ngo zhes zer ba lta bu ste/ de dang 'dir lhan cig de byas so zhes byed pa po dang bya bar sbyar ba smra bar 'dod pa'i don go bar byed pa'i tshig ma brjod pa'i phyir 'dis pham par 'gyur ba'i chos lhag par spyod do zhes bya ba'i don gsal ba de las gzhan pa mi tshangs par spyod pa bsten pa mthong ngo zhes cha dang bag tsam smra bar byed de/ brjod par bya ba gzhan gyi don de la mi tshangs par spyod pa bsten pa mthong ngo zhes bya ba'i tshig de gnas te/ brjod par bya ba gzhan la gnas pa'i tshig des dge slong nyams pa la yang pham par 'gyur ba lhag par spyod do zhes gang yang rung ba la go bar byas na dge 'dun lhag mar 'gyur ro zhes bya ba'i tha tshig go/ /brjod par bya ba gzhan la gnas pa'i tshig yang dag pa yang srid pas de bsal ba'i phyir/ brdzun na'o zhes bya ba smos so/ /gzhan gyi cha dang mthun pa'i dge 'dun lhag ma rnam par 'byed pa'o zhes bya ba de rnam par 'byed pa'i skabs nas 'byung ba rdzogs so/ / //da ni gzhi med pa dang bag tsam smra ba zhu ba'i skabs nas 'byung ba bsdu ba'i phyir/ mi bsten pas skur pa 'debs na sbom po'o zhes bya ba smras te/ dge slong ma la pho'i dbang po med pa'i bsten par byed pas skur pa 'debs na sbom po ste/ dper na ma ning pho lta bu'o/ /dge slong la mo'i dbang po med pa'i bsten par bya bas skur pa 'debs na yang sbom po ste/ dper na ma ning mo lta bu'o/ /de gnyis kyang kha dang bshang ba'i lam gyi dbang du byas pa ni ma yin no/ /kha dang bshang ba'i lam gyis skur pa 'debs na ni dge 'dun lhag mar 'gyur ro/ /ming ma smos pa yang ngo zhes bya ba ni/ nyams par bya ba'i ming ma smos par skur pa 'debs pa yang sbom po'o/ /'dir gzhung ni dge 'dun gyi dbus su nges pa med par 'di skad ces mi tshangs par spyod pa byas so/ /ma sha ka lnga las lhag par brkus so/ /mi srog dang phral lo/ /mi'i chos bla ma la yang dag pa ma yin pa smras so zhes zer zhing che ge mos so zhes mi zer na nyes pa sbom por 'gyur ro zhes gsungs pa yin no/ /de bzhin gshegs pa la ngan sems kyis khrag phyung ba dang / dge 'dun gyi dbyen byas pa'o zhes bya ba ni mtshams med pa 'di gnyis ni sbom po'o/ /de la ngan sems kyis khrag phyung bar gtogs pa'i nyes pa sbom po ni mi gsod pa'i pham par 'gyur ba'i phyogs dang mthun pa yin par shes par bya ste/ gsod pa'i bsam pas zhugs pa yin pa'i phyir ro/ /dge 'dun gyi dbyen du gtogs pa gang yin pa de ni dge 'dun dbye bar brtul ba mi spong ba'i phyogs dang mthun pa yin gyi/ skur pa 'debs pa'i phyogs dang mthun pa ni ma yin te/ der gtogs pa'i bya ba med pa'i phyir ro/ /de gnyis kyis skur pa 'debs na nyes byas so/ /bsams te smras so zhes bya ba la sogs pas gzhogs smos byed na nyes byas so zhes bya ba ni/ bsams te smras so zhes rnam pa de lta bus gzhogs smos byed na nyes byas so/ /'dir sogs pa zhes bya ba'i sgra ni rnam pa gzhan gyi don bstan pa'i phyir ro/ /zhu ba las dge slong stan las langs te bdag gis bsams te smras so zhes zer zhing skye bo thams cad las nyes byas su 'gyur ro zhes bye ba lta bu'o/ /bag tsam la'ang rnam pa de dag shes par bya ste/ bdag gis dge slong ma che ge mo zhes bya ba ma ning pho dang mi tshangs par sbyor ba 'khrig pa'i chos bsten pa mthong ngo zhes bya ba la sogs pa'o/ /gzhi med pa dang bag tsam gyi zhu ba'o zhes bya ba de gnyis zhu ba'i skabs nas 'byung ba rdzogs so// //da ni dge 'dun gyi dbyen byed pa'i dge 'dun lhag ma brjod par 'dod nas de'i zhar la 'di brjod do/ /gzhan gyi 'khor kha 'dren na sbom po'o zhes bya ba ni/ gzhan gyi 'khor ni gzhan gyi 'khor te/ de kha 'dren pa ni bdag nyid kyi phyogs su kha 'dren zhing gzhog pa ste/ de ni sbom po'o/ /'di man chad ni bzlog pa'i tshul gyis zhes bya ba la sogs pas dge 'dun gyi dbyen byed pa la sogs pa'i dge 'dun lhag ma bsgo ba las 'byung ba bzhi po dag gi thun mong gi rnam pa brjod par bya ste/ bzlog pa'i tshul gyis mi gtong bar rjes su sgrub pa'i rang bzhin ni rjes su mthun no zhes bya ba ni/ dge 'dun gyi dbyen byed pa dang / de'i rjes su phyogs pa dang / khyim sun 'byin pa dang / bka' blo mi bde ba dag bzlog pa'i tshul gyis bzlog pa ni mi gtong mi spong bar de rjes su sgrub pa bya ba rtsom par mi byed cing mi gtong bar rjes su sgrub pa'i bdag nyid de'i rang bzhin rnam pa lus dang ngag gi rnam par rig byed du gyur pa gang yin pa'am cang mi smra ba'i gnas skabs su gyur pa gang yin pa'am/ gnyi gar gyur pa gang yin pa ste/ bzlog pa'i tshul gyis mi gtong bar rjes su sgrub pa'i rang bzhin de ni gsol ba zhes bya ba ngag gi rnam par rig byed kyi mtshan nyid kyis rjes su mthun te/ rjes su 'gro ba dang 'dra ba dang mtshungs par rig par bya'o/ /'di skad bstan te/ gang gi phyir dge 'dun lhag ma bzhi po de dag bzlog pa dang / 'brel pa yin pa de'i phyir bzlog pa ji snyed byed pa ltung ba yang de snyed du 'gyur ro/ /de'i phyir mi gtong bar rjes su sgrub pa'i rang bzhin de ni bzlog pa'i tshul gyis rjes su mthun pa yin te/ bzlog pa gcig la mi gtong bar rjes su sgrub pa'i rang bzhin yang gcig kho na'o/ /bzlog pa sbyor bar gyur pa la ni ltung ba yang sbyor bar gyur pa nyid do/ /mthar thug par gyur pa la ni dge 'dun lhag ma zhes bya ba'i mthar thug par gyur pa nyid do/ /gsol ba ni bzlog pa dang 'dra ba nyid do zhes bya ba ni/ bzlog par bya ba nyid la ni dge 'dun la gsol ba go bar bya ba gang yin pa de ni dngos su bzlog pa nyid ma yin gyi/ bzlog pa'i thabs gang yin pas de'i phyir 'dra ba nyid du ston par byed de/ ji ltar las brjod pa dag mi gtong bar rjes su sgrub pa'i ltung ba'i byed pa po nyid yin pa bzhin du gsol ba yang de dang 'dra'o/ /bzlog pa dang 'dra bar gyur pas na bzlog pa dang 'dra'o/ /de'i dngos po ni de nyid do/ /de'i phyir 'dir sbyor bar gyur pa la yang ltung bar 'gyur ba kho na yin no/ /gsol ba'i tshig ni ltung ba'i byed pa po nyid yin no zhes smras pa la tshig de yang cha shas du ma yod na/ ci cha shas ji snyed yod pa de snyed kho na'i ltung bar 'gyur ram snyam du dogs pa bsal ba'i phyir/ tshig gi skad cig ma gcig pa nyid do zhes bya ba smras te/ tshig gang la skad cig ma gcig la ltung ba 'byung bar 'gyur ba'i skad cig ma de'i khongs su tshig mtha' dag 'dus so/ /des na shin tu rgyun ring du zin na yang tshig gcig tu zad de/ ltung ba yang gcig kho na 'byung ba yin gyi/ cha shas re re la yang ma yin/ rtsa ba re re la yang ma yin no/ /skad cig ma gang la tshe dang ldan pa lha sbyin khyod dge 'dun dbye bar byed pa'i dngos po 'di lta bu thong shig ces bya ba la sogs pa brjod pa ni tshig phal cher byas pa nyid yin pas de ni 'dir dngos gzhi'i dus yin te/ gsol pa dang / las brjod pa'i dus de gnyis ni ltung ba'i byed pa po nyid yin gyi/ dus phyi ma gzhan ni rtsom pa gcig tu gyur pa'i phyir/ de'i khongs su gtogs pa nyid do/ /'dir gzhung ni gsol ba byed pa na gzhi de gtong na de lta na legs/ gal te mi gtong na las brjod pa byas pa na nyes pa sbom por 'gyur ro zhes gsungs pa yin no/ /bzlas pa rnams kyang gcig tu dogs pa bsal ba'i phyir ro/ /bzlas pa ni tha dad pa nyid do zhes bya ba smras te/ las brjod pa rnams kyi bzlas pa gang dag yin pa de dag ni tha dad pa nyid de/ yang dang yang du bzlas pa rtsom pa'i phyir ro/ /de ltar na las brjod pa lan re re la ltung ba re rer 'gyur ro/ /'dir gzhung ni las brjod pa dang po ma rdzogs par gzhi der gtong na de lta na legs/ gal te mi gtong na rdzogs par brjod pa na nyes pa sbom por 'gyur ro/ /de bzhin du las brjod pa gnyis pa dang gsum pa ma rdzogs par gzhi de gtong na de lta na legs/ gal te mi gtong na las brjod pa gnyis pa rdzogs par brjod na nyes pa sbom por 'gyur ro/ /las brjod pa gsum pa rdzogs par brjod na dge 'dun lhag mar 'gyur ro zhes gsungs pa yin no/ /mjug sdud pa ni ma yin no zhes bya ba ni/ dge 'dun gyis bzod cing gnang nas/ dge 'dun gyis lha sbyin la gsol ba dang bzhi'i las kyis bsgo ba mdzad lags te/ 'di ltar cang mi gsung bas de de bzhin du 'dzin to zhes bya ba lta bu mjug sdud pa'i tshig de ni tha dad pa nyid ma yin te/ 'di ltar mjug sdud pa ni 'dir las byed pa go bar byed pa tsam yin pa'i phyir ro/ /de yang bzlas pa tha ma'i nang du gtogs par rigs so/ /'jug pa ni sbyor ba nyid do zhes bya ba ni/ dge 'dun gyi dbyen bya ba la sogs pa'i 'jug pa ni sbyor ba nyid de sbom po yin no/ /'jug pa zhes bya ba'i gnas skabs kyi bye brag ma bstan pas na bzhoms te bsgo ba dang / gsol ba bya ba la sogs pa dag gi 'og dang snga rol yang yin par rig par bya'o/ /bzhams te bsgo ba zhes bya ba ni/ 'dir dge 'dun du ma gyur pa'i dge slong tshangs pa mtshungs par spyod pas gcugs pas phan tshun zlog par byed pa yin par rig par bya'o/ /'jug pa nyid ni mi gtong ba'i bdag nyid kyi 'jug pa bas shas chung ba yin no/ /des na 'di skad bstan te/ tha ma ma gtogs pa'i mi gtong ba ni sbyor ba nyid do/ /tha ma la ni dngos gzhi'o/ /de lta na dge slong bskrad pa la sogs pa'i las ma byas par 'dun pas 'gro zhes zer ba la yang sbyor ba nyid du thal bar 'gyur la/ gleng ba dang dran par ma byas par ngag mi nyan pa yang sbyor ba nyid du thal bar 'gyur ba de bsal ba'i phyir/ bskrad pa dang gleng ba dang dran par ma byas pa ni de'o zhes bya ba smras te/ sbyor ba nyid de'i'o zhes bya bar sbyar ro/ /dge slong bskrad pa ma byas par 'dun pas 'gro'o zhes bya ba la sogs pa zer ba dang / gleng ba dang dran par ma byas pas ngag mi nyan par byed pa ni sbyor ba nyid de'i sbyor ba nyid de nyes byas so/ 'di skad bstan te/ dge slong khyim sun 'byin pa la ji srid du bskrad pa'i las mi byed par 'dun pas 'gro'o zhes bya ba la sogs pa zer ba ni sbyor ba'i sbyor ba nyid do/ /de bzhin du dge slong bka' blo mi bde ba la ji srid du gleng ba dang dran par mi byed par ngag mi nyan pa nyid du byed pa ni sbyor ba'i sbyor ba nyid de/ sbyor ba sbom po'i sbyor ba nyid ni nyes byas so zhes bya ba'i tha tshig go/ /'dir gzhung ni zhu ba las bskrad pa'i las ma bgyis par dge 'dun la 'dun pas mchi'o zhes mchi ba dang / 'jigs pas mchi'o zhes bgyi ba'i bar du mchi na ltung ba cir 'gyur/ nyes byas su 'gyur ro/ /bsgo bar bgyi'am 'on te bsgo bar mi bgyi/ bka' stsal pa/ bsgo bar mi bya'o/ /bsgo ba 'chags sam/ mi 'chags bka' stsal pa/ mi 'chags so/ /gleng ba ma bgyis dran par ma bgyis par bdag nyid ngag mi nyan pa nyid du 'jig par bgyid na ltung ba cir 'gyur/ nyes byas su 'gyur ro/ /bsgo bar bgyi'am 'on te bsgo bar mi bgyi/ bka' stsal pa/ bsgo bar mi bya'o/ /bsgo ba 'chags sam mi 'chags/ bka' stsal pa/ mi 'chags so zhes gsungs pa yin no/ /gnas skabs 'di la ni mngon par zhen pa nyid dang / sdig pa'i bsam pa shas chung ba'i phyir ro/ /des na nyes byas su gsungs so/ /dran par byas pa'i gnas skabs na ni/ bdag nyid kyi kha na ma tho ba dran du zin kyang yongs su mi gtong bas mngon par zhen pa ches dam pa nyid dang / sdig pa'i bsam pa yang ches lci ba nyid yin par shes pas de'i tshe na ni sbom por gsungs so/ /gleng ba ni phyogs gcig tu gyur pa gleng ba yin no/ /dran par byed pa ni yongs su rdzogs par dran par byed pa ste/ tshig 'di gnyis kyis ni gleng ba yongs su rdzogs par bstan pa byas pa yin no/ /de la ni bsgo bar mi bya ba nyid do zhes bya ba ni/ bskrad pa'i las ma byas pa dang / gleng ba dang dran par ma byas pa'i dge slong de la bsgo bar mi bya ba nyid do/ /bsgo ba zhes bya ba bye brag tu ma byas pas las kyis bsgo ba 'ba' zhig tu ma zad kyi/ bzhams te bsgo ba yang mi bya bar shes par bya'o/ /de dag la bzhams pa dang las kyis mi bsgo bar mi bya'o zhes bya ba ni/ dge 'dun gyi dbyen byed pa dang / de'i rjes su phyogs pa dang / khyim sun 'byin pa dang / bka' blo mi bde ba'i bslab pa'i gzhi'i yul du gyur pa de dag la bzhams te bsgo ba dang las kyis bsgo bas mi bsgo bar mi bya ste gdon mi za bar bsgo bar bya'o/ /de ltar yang dge slong dag khyed kyis bzhams pa dang / gsol ba dang / bzhi'i las kyis bsgo bar gyis shig ces gsungs pa yin no/ /bsgo ba las gyur pa'i dge 'dun lhag ma bzhi po 'di dag gnas skabs gang las 'byung bar 'gyur zhe na de'i phyir/ de'i mtha' la ni mi gtong na'o zhes bya ba smras te/ de'i zhes bya ba ni/ bstan ma thag pa'i mdo las/ las kyis zhes smos pa de'i'o/ /de'i mtha' ni las kyis bsgo ba'i mtha' ste de la'o/ /de yang las brjod pa gsum pa'i mtha' la'o/ /de la brtul ba mi gtong na de la bsgo ba las 'gyur ba'i dge 'dun lhag ma bzhi po de dag 'byung ngo zhes bya ba'i tha tshig go/ /de ltar re zhig bsgo ba las 'gyur ba'i dge 'dun lhag ma bzhi po de dag gi mtshan nyid thun mong ba bstan nas/ da ni de dag nyid kyi bye brag go rims bzhin du brjod par bya'o/ /don gang mi gtong na dge 'dun gyi dbyen byed pa'i dge 'dun lhag mar 'gyur zhe na/ de'i phyir rtul bar byed pa nyid do zhes bya ba smras so/ /gang la rtul bar byed pa'i ngang tshul yod pa de ni rtul bar byed pa'o/ /yang na pha rol gnon par byed pas rtul bar byed pa'o/ /de'i dngos po ni de nyid de/ de mi gtong na'o/ /yul gang la rtul bar byed pa nyid ce na/ de'i phyir dbyen la'o zhes bya ba smras te/ dbyen byed pa'i yul la'o/ /gang gi dbyen byed pa la zhe na/ de'i phyir dge 'dun gyi'o zhes bya ba smras te/ 'di skad bstan te/ dge 'dun gyi dbyen bya ba'i yul la rang gi brtul bas brjod pa gsum pa'i mthar mi gtong na dge 'dun dbyen byed pa'i dge 'dun lhag mar 'gyur ro/ /dge 'dun gyi dbyen byed pa'i dge 'dun lhag ma'o zhes bya ba de rdzogs so// //da ni de'i rjes su phyogs pa'i dge 'dun lhag ma brjod par bya ste/ gang zhig mi gtong na de'i rjes su phyogs pa'i dge 'dun lhag mar 'gyur zhe na/ de'i phyir de'i grogs nyid rjes su sgrub par byed pa'o zhes bya ba smras te/ de'i zhes bya ba'i sgra ni dge 'dun gyi dbyen zhes bya ba la bsnyegs so/ /grogs zhes bya ba ni dge 'dun gyi dbyen byed pa'i yul la grogs byed pa'o/ /grogs kyi dngos po ni de'i grogs nyid do/ /de'i grogs kyi dngos po de rjes su sgrub par byed pa ni nan tan byed pa nyid de/ de mi gtong na de'i rjes su phyogs pa'i dge 'dun lhag mar 'gyur ro/ /rjes su phyogs pa'i dge 'dun lhag ma'o zhes bya ba de rdzogs so/ / //thun mong gi rnam pa sngar bstan pa thams cad khas blangs nas gang zhig mi gtong na khyim sun 'byin pa'i dge 'dun lhag mar 'gyur zhe na/ de'i phyir rang skrod par byed pa'i dge 'dun la log pa'i bsam pas de de la de ltar zhugs so zhes brdzun du smra ba nyid do zhes bya ba smras te/ ltung ba 'byin pa po rang bskrad pa gang yin pa'i skrod par byed pa'i dge 'dun gang yin pa'i dge 'dun rang skrod par byed pa yul du gyur pa de la log pa'i bsam pa log pa'i sems 'dun pa dang / zhe sdang dang gti mug dang 'jigs pa'i dbang nyid gang yin pas dge 'dun de bskrad pa'i las gang yin pa de las de ltar zhugs par gyur to zhes lce de nyid du brdzun du smra ba nyid mi gtong na'o/ /'di skad bstan te/ gal te khyim sun 'byin par byed pa'i dge slong rang skrod par byed pa'i byed pa po gang yin pa'i dge 'dun yul du gyur pa la brdzun du smra ba nyid kyis dge 'dun 'dis log pa nyid du 'dun pa dang / zhe sdang dang / gti mug dang / 'jigs pa zhes bya bas bdag bskrad pa'i las byas so zhes zer zhing brdzun du smra ba rnam pa de lta bu nyid de mthar mi gtong na de la bskrad pa'i dge 'dun lhag mar 'gyur ro/ /khyim sun 'byin pa'i dge 'dun lhag ma'o zhes bya ba de rdzogs so/ / //gang zhig mi gtong na bka' blo mi bde ba'i dge 'dun lhag mar 'gyur zhe na/ de'i phyir dge slong gis lhag pa'i tshul khrims kyis glengs pa nyid na/ bdag nyid kyi de la dge slong dag gis brjod par mi bya ba nyid du byed pa'o zhes bya ba smras te/ dge slong gis ltung ba 'byin pa po la lhag pa'i tshul khrims kyi dbang du byas pa ste/ glengs pa nyid na 'di skad ces bdag la dge slong gang gis kyang tshul khrims 'ga' la yang gleng bar mi bya'o zhes zer zhing de ltar bdag nyid kyi rgyud du gtogs pa'i tshul khrims de la dge slong thams cad dag gis brjod par mi bya ba nyid du byed pa'i byed pa de mthar mi gtong na bka' blo mi bde ba'i dge 'dun lhag mar 'gyur ro/ /dge slong dag gis zhes smras na/ dge slong gang dag gis she na/ phyogs bcu na gnas pa de bzhin gshegs pa'i dge slong dag ste/ de dag gis bdag nyid la brjod par mi bya bar byed pa'o/ /lhag pa'i tshul khrims zhes bya bas ni 'dir 'dul ba'i rnam pa thams cad bstan pa yin no/ /de lta bu yongs su rdzogs par gyur na bka' blo mi bde bar 'gyur gyi/ gzhan gyis ni ma yin no/ /dge slong dmigs kyis bsal ba dag gcig gis brjod par mi bya bar byed pas ni der mi 'gyur te/ dge slong ji snyed kha cig gi rgyud du gtogs pa dag gis brjod par mi bya bar byed pa'i tshig gis ni nyes byas su 'gyur bar rig par bya'o/ /bslab pa'i gzhi dmigs kyis bsal ba kha cig gis bdag la brjod par mi bya bar byed na yang nyes byas kho na'o/ /bka' blo mi bde ba'i dge 'dun lhag ma'o zhes bya ba de rdzogs so/ /dge 'dun lhag ma rnams rdzogs so zhes bya ba dge 'dun lhag ma bcu gsum bshad zin to// //spang ba'i ltung byed rnams brjod par 'dod nas/ dang po kho nar 'chang ba dang / 'bral ba la sogs pa'i bslab pa'i gzhi rnams kyi thun mong gi mtshan nyid rnam par gzhag pa bstan pa'i phyir/ nyin mtshan gyi dang po ma yin pa la tha ma ma yin pa med pa nyid do zhes bya ba smras te/ mdo 'di dang 'og ma gnyis kyang thun mong gi mtshan nyid kho na yin no/ /nyin mtshan gang la nyin mtshan gyi dang po med pa de ni nyin mtshan gyi dang po ma yin pa ste/ mtha'i skad cig ma'o/ /mtha'i skad cig ma zhes bya ba'i nyin mtshan de la skad cig ma gcig ma gtogs pa tha ma ma yin pa thun tshod bcu zhes bya ba'i nyin mtshan med pa nyid do/ /'di skad bstan te/ zhag bcu 'das pa dang / zla ba gcig 'das pa dang / zhag drug 'das pa dang / zhag bdun 'das pa la yang nyin mtshan dang po'i mthar gyur pa'i skad cig ma gang yin pa de kho na la nyin mtshan zhes bya ba'i ming 'thob pas spang ba la yang de nyid yan lag tu gyur pa yin par rig par bya'o/ /skad cig ma lhag ma thun bcu'i khongs su gtogs pa rnams ni spang ba rnam par gzhag pa'i yan lag nyid ma yin no/ /'dir lung ni 'chang ba'i bslab pa'i gzhi las dge slong gis tshes la chos gos rnyed dam/ tshes la lhung bzed rnyed na zhes gsungs pas/ tshes de'i dang po thun tshod nges par ma smos par tshes bcu gcig gi nyin par skya rengs shar na spang ba'i ltung byed du 'gyur ro zhes gsungs pa yin no/ /gal te mtha'i skad cig ma ma gtogs pa'i skad cig ma lhag ma rnams kyang yan lag nyid yin par gyur na ni de'i tshe na 'di skad ces tshes kyi snga dro nas tshes bcu gcig gi snga dros so zhe 'am/ de bzhin du tshes kyi gung tshigs sam/ phyi dro nas tshes bcu gcig gi gung tshigs sam/ phyi dro la spang ba'i ltung byed du 'gyur ro zhes gsungs par 'gyur ba zhig na de skad ma gsungs te/ de bas na nyin mtshan dang po'i thun tshod kyi tshigs ni nges pa med de/ nyin mtshan dang po de nyid kyi mtha'i skad cig ma gcig la nyin mtshan zhes bya ba'i ming 'thob bo/ /des na mtha'i skad cig ma de nyid ma gtogs pa de'i lhag ma thun bcu po dag gi skad cig ma gzhan ni 'dir spang ba'i yan lag nyid ma yin gyi/ mtha'i skad cig ma gcig po de nyin mtshan dang po gcig tu brtsis te/ de tshun chad nas nyin zhag brtsi zhing zhag bcu'am/ zla ba gcig gam/ zhag drug gam/ zhag bdun 'das na spang bar 'gyur ba ci rigs par sbyar bar rig par bya'o/ /gnas pa la ni sbyor ba'i snod nyid do zhes bya ba ni/ gnas pa la zhes bya ba gnas pa dang 'brel pa'i bslab pa'i gzhi la ni mtha'i skad cig ma gcig gi lhag ma snga ma rnams sbyor ba'i snod nyid de/ nyes byas su 'gyur ro zhes bya bar sbyar ro/ /'di lta ste bsnyen par ma rdzogs pa dang / lhan cig gnas pa dang / bsnyen par rdzogs na yang lta ba mi gtong ba dang / lhan cig gnas pa dang / dge tshul bsnyil ba dang / mtshan mi mthun pa dang / gnas gcig na lhan cig nyal ba dang / mar me dang bcas par nyal ba dang / dmag gi nang na gnas pa la mtha'i skad cig ma ma yin pa'i dus rnams kyang med pa nyid ma yin te/ sbyor ba'i snod nyid yin pa'i phyir ro/ /'di skad bstan te/ bsnyen par ma rdzogs pa dang lhan cig nyal ba la sogs pa'i bslab pa'i gzhi rnams dang / dmag gi nang na gnas pa'i bslab pa'i gzhi la mtha'i skad cig ma ma gtogs pa'i nyin mtshan gyi dus kyi cha yang sbyor ba'i snod nyid yin te/ nyes byas nyid yin pas nyes pa med pa ma yin no/ zhes bya ba'i tha tshig go/ /dmag gi nang na gnas pa ma gtogs pa gnas pa'i bslab pa'i gzhi gzhan dag la ni mtshan mor gtogs pa'i dus kho na sbyor ba'i snod nyid yin gyi/ nyin par gnas pa ni ma yin no/ /de dag gis de mtshan mo gsum pa la 'dron pa dag gi phyi rol du dgar bar bya'o zhes gsungs pa las mtshan mo zhes smos pa'i phyir ro/ /dmag gi nang na gnas pa la ni nyin par gnas na yang sbyor ba'i snod nyid kyi rgyu'i dngos por 'gyur te/ der gnas pa tsam nyid nyes par 'gyur ba yin pa'i phyir ro/ /nyin mtshan gyi dang po smra bar 'dod nas/ de'i dang po ni skya rengs dang po de'i 'o zhes bya ba smras te/ nyin mtshan de'i dang po ni/ skya rengs dang po dang / skya rengs bar ma dang / skya rengs tha ma dag las skya rengs dang po de'i skad cig ma dang por gyur pa gang yin pa de'o/ /mtshan nyid 'di ni chos gos dang 'bral ba la sogs pa dag la dgos te nyi ma bcu gcig gi skya rengs shar na'o zhes gsungs pa'i phyir ro/ /mtshan nyid 'di'i dmigs kyis bsal ba bstan pa'i phyir/ las la ni 'das na nyi ma shar ba'i 'o zhes bya ba smras te/ gso sbyong dang dgag dbye la sogs pa tshes grangs kyi bye brag dang 'brel pa'i las dag la ni dus 'das shing yol bar gyur na/ nyi ma shar ba'i skad cig ma de'i dang por gyur pa gang yin pa de nyin mtshan gyi dang po yin no/ /'di skad bstan te/ tshes zhes bya ba'i skya rengs shar du zin kyang ji srid du nyi ma shar bar ma gyur na de'i tshe gso sbyong la sogs pa'i las bya'o/ /'dir gzhung ni zhu ba las btsun pa re zhig dge slong dag gis skya rengs shar ba na bdag cag gis gso sbyong ma byas so snyam du dran pa slar rnyed par gyur nas de dag de'i tshe na gso sbyong bgyid cing so sor thar pa 'don par bgyid na dge 'dun gyis gso sbyong bgyis pa dang / so sor thar pa bton pa zhes bgyi'am/ nye ba 'khor dge 'dun dag gis gso sbyong byas pa dang / so sor thar pa bton zhes bya'o zhes gsungs pa yin no/ /spang ba la ni 'du shes las gtso cher rang gi nyid do zhes bya ba ni spang ba'i dngos po la ni 'du shes las gtso cher rang gi nyid yin gyi/ gzhan gyi dngos po las ni ma yin no/ /ma byin par len pa dang / shi ba'i yo byad gnyis ni dngos po las gtso cher rang gi nyid yin gyi/ 'du shes las ni ma yin no/ /'dir gzhung ni ko lpags kyi gzhi las dge slong gis dge slong la chos gos dag bskur zhing 'di nas btang pa der ma phyin pa dag la ni gang la yang spang bar mi 'gyur ro zhes gsungs pa yin no/ /'di skad bstan te/ 'di ltar chos gos la sogs pa bskur ba de thag ring po na gnas pa'i dge slong de dbang bar byas su zin kyang dngos po de la dge slong de rang gi nyid yin pa'i 'du shes med pas des na spang bar mi 'gyur ro/ /gal te brkus pa'i dngos po de nyid la las bskur na yang gang la bskur ba de las brkus par mi 'gyur gyi/ gang gis bskur ba de las brkus pa yin no/ /de bzhin du gal te dge slong yang dag par byin pa'i 'du shes can gyis bskur ba'i dngos po de ma thob pa de kho nar shi'am/ skur bar byed pa dang gnyi ga shi bar gyur na de lta na yang dngos po de skur bar byed pa'i shi ba'i yo byad kho na yin par rig par bya'o/ /yang dag par byin pa ni ma yin te/ de la ni dngos po las rnam par gzhag gi/ 'du shes la ni ma yin no/ /de ltar na 'du shes yod pa nyid la ni dngos gzhir 'gyur la/ 'du shes med pa nyid la ni ltung bar mi 'gyur ro/ /de las kyang rang gi ma yin pa la rang gir 'du shes pa ni nyes byas so/ /rang gi la yid gnyis za ba ni spang bar 'gyur te/ don ji lta ba nyid la ni dngos gzhi'o/ /don ji lta ba nyid ma yin pa la ni dngos gzhi ma yin no zhes gsungs pa'i phyir ro/ /rang gi ma yin pa la yid gnyis za ba la ni nyes byas te/ yid gnyis ni 'du shes dang 'dra'o zhes gsungs pa'i phyir ro/ /de ni bsngos pa nyid na bral ba nyid do zhes bya ba ni/ spang bar 'gyur ba rang gi nyid gang yin pa de ni sems kyis yongs su btang ste/ bsngos pa nyid na byin gyis ma brlabs sam rnam par ma brtags su zin kyang rang gi nyid dang bral ba nyid de/ rang gi nyid ma yin no/ /'di skad bstan te/ dge slong gis chos gos la sogs pa dag dge 'dun la'am gang zag la'am gzhan la sngo bar byed na/ gang la sngo bar byed pa des de shes kyang rung mi shes kyang rung / de'i gan du bskur yang rung ma bskur yang rung ste/ rang gi nyid dang bral ba'i phyir byin gyis ma brlabs sam rnam par ma brtags kyang spang bar bya bar mi 'gyur ro/ /'dir gzhung ni ko lpags kyi gzhi las gang gis gos bskur ba de la spang ba 'byung bar mi 'gyur ro zhes gsungs pa gang yin pa de nyid yin no/ /shi ba'i yo byad la ni dngos po las rnam par gzhag gi/ 'du shes las ni ma yin te/ de ltar yang 'dir gzhung ni dge slong gis dge slong la chos gos dag bskur ba gang gis bskur ba des kyang spangs par gyur/ gang la bskur ba des kyang spangs par gyur na de la de dag gang la bskur ba de la byin gyis rlob par byed na ni byin gyis ma brlabs pa yin no/ /gang gis bskur ba de la byin gyis rlob par byed na ni byin gyis brlabs pa yin te/ legs par byin gyis brlabs pa yin no zhes gsungs pa yin no/ /de lta bas na rdzas de gang gis bsgrubs pa de nyid kyi shi ba'i yo byad du rnam par gzhag gi/ gang la bsngos pa de'i ni ma yin no/ /rab tu byung ba'i don du nges par byas pa yang de nyid do zhes bya ba ni/ rab tu 'byung ba'i rgyur nges par byas/ rnam par gzhag pa nges par bsngos pa yang de nyid de bsngos pa nyid yin pa'o/ /'dir gzhung ni rab tu 'byung ba'i don du srel bar byed na ltung ba med do zhes gsungs pa yin no/ /de yang 'di ltar lhung bzed la gsungs mod kyi/ 'on kyang chos gos la sogs pa dag la yang rung bas spyir bstan to/ /chos gos las kyang rnam par brtags na'o zhes bya ba la/ kyang zhes bya bas ni rnam par brtags pa'i bsngo ba byas na chos gos las kyang rang gi nyid dang 'bral bar ston to/ / rnam par brtags pa zhes bya ba ni/ tshe dang ldan pa dgongs su gsol/ /bdag ming 'di zhes bgyi ba'i gos lhag pa rnam par ma brtags pa rnam par brtag par 'os pa 'di mkhan po'i lags par rnam par brtag par bgyi'o/ /mkhan po la yid brtan te bcang bar bgyi'o/ / rkyen ji lta ba bzhin du bgyi'o zhes bya ba'i sngags kyis lan gsum rnam par brtags pa yin par rig par bya'o/ /mkhan po las gzhan pa zhig la rnam par brtags na yang che ge mo zhes bya bar ming brjod par bya'o// //bam po bcu drug pa/ 'di la rjes su zhugs pa nyid kyang nyams pa yin no zhes bya ba ni/ rang gi nyid ces bya ba'i ltung ba 'di la bsngos pa nyid dang rnam par brtags pa nyid kyi thabs kyis ni rang gi nyid kyi rjes su zhugs pa nyid ces bya ba rgyun 'brel pa nyid kyang nyams pa yin par rig par bya'i/ rang gi nyid 'ba' zhig nyams par ma zad do/ /'di skad bstan te/ gal te dge slong gis tshes la chos gos rnyed la/ tshes lnga'i nyin par chos gos de rnam par rtog par byed dam sngo bar byed na/ phyis de'i nyin mo nyid la chos gos gzhan zhig rnyed kyang / snga ma'i shan des shan 'dres par mi 'gyur te/ rjes su zhugs pa nyid nyams pa'i phyir ro/ /rang bzhin las nyams pa yang ngo zhes bya ba la/ yang ngo zhes bya ba'i sgra ni rjes su zhugs pa nyid nyams pa nyid de zhes bya ba'i rjes bsnyegs pa'i phyir ro/ /rang bzhin las zhes bya ba ni/ /ngo bo nyid las so/ /nyams na zhes bya ba ni sems rnam par 'khrugs na ste/ de'i tshe na yang rang gi nyid kyi rjes su zhugs pa nyid nyams par rig par bya'o/ /'di skad bstan te/ dge slong rang nyid sems rnam par 'khrugs pa la sogs pas rang bzhin tha mal pa'i ngo bo nyid las nyams par gyur na yang / de'i tshe yang rang gi nyid kyi rjes su mthun pa'i rgyun 'brel ba nyams pa yin pas sngar rang bzhin las ma nyams pa'i rjes su mthun pa'i shan des phyis rang gi sems phyir rnyed pa'i gnas skabs kyi rang gi nyid la shan 'dres par mi 'gyur ro/ /'dir gzhung ni nye ba 'khor gyis zhus pa las/ btsun pa dge slong gis chos gos rnyed nas dgung lnga lags na/ sems rnam par 'khrugs par gyur na/ de'i dgung bcu po slad ma gang tshun chad nas bgrang bar bgyi/ nye ba 'khor gang tshun chad nas rang gi sems phyir rnyed pa nas so zhes gsungs pa yin no/ /zhag lnga po snga ma dag mi bgrang ba las na/ rjes su zhugs pa'i rgyun 'brel pa nyams par mngon te/ sems rnam par 'khrugs pa'i phyir ro/ /de yod na dngos po de lta bu gzhan la yang 'byung ba nyid do zhes bya ba ni/ rjes su zhugs pa nyid de/ yod cing med pa ma yin na phyis rnyed pa'i dngos po de lta bu gzhan la yang 'byung ba nyid do/ /dngos po de lta bu zhes bya ba khyad par ji lta bu can zhig ce na/ dngos po gang la rjes su mthun pa nyid de yod pa de lta bu'i dngos po la ste/ 'di lta ste chos gos zhag bcu par gtogs pa'i ni zhag bcu pa las 'byung ba nyid do/ /zla ba gcig par gtogs pa'i ni zla ba gcig pa la'o/ /lhung bzed du gtogs pa'i ni lhung bzed la'o/ /sman zhag bdun par gtogs pa'i ni sman zhag bdun pa la 'byung ba 'di lta bu'o/ /'di skad bstan te/ chos gos sngar rnyed pa la rang gi nyid kyi rjes su zhugs pa nyid de yod na/ chos gos phyis rnyed pa la yang rang gi nyid kyi rjes su zhugs pa nyid 'byung ba nyid du rig par bya'o/ /de bas na chos gos sngar rnyed pa de nyid dang / lhan cig tu phyis rnyed pa'i chos gos de yang zhag bcu'i nang rol de nyid du byin gyis brlab par bya ba'am spang bar bya ba yin gyi/ chos gos phyis rnyed pa de'i zhag bcur bgrang ba logs shig tu ni mi bya ste/ chos gos sngar rnyed pa de nyid kyi shan des/ phyis rnyed pa de yang shan 'dres par 'gyur bar byas pa'i phyir ro/ /'dir gzhung ni dge slong gis tshes la chos gos shig rnyed la des tshes gnyis la chos gos gzhan zhig kyang rnyed par gyur na/ dge slong des zhag bcu po de nyid kyi nang rol du snga ma shos byin gyis brlab par bya zhing / phyi ma shos gzhan la gtang bar bya ba'am/ rnam par brtag par bya ba'am/ gzhan la sbyin par bya'o/ /gtong bar mi byed dam/ rnam par rtog par mi byed dam/ gzhan la sbyin par mi byed na zhag bcu gcig pa'i skya rengs shar na yang spang ba'i ltung byed do zhes gsungs pa yin no/ /zhag bdun pa'i bye brag bstan pa'i phyir/ zhag bdun pa la ni rigs mthun pa la'o zhes bya ba smras te/ zhag bdun pa la ni zhes bya ba ni mar dang 'bru mar la sogs pa'i rdzas zhag bdun pa nyid du byin gyis brlabs pa la'o/ /rigs mthun pa la'o zhes bya ba ni/ phyis rnyed pa'i rdzas kyi rigs mthun pa rang bzhin 'dra ba la/ rang gi nyid kyi rjes su zhugs pa nyid de 'byung ba nyid du shes par bya'i/ dngos po de lta bu thams cad la 'byung ba ni ma yin pa ste/ 'di lta ste rang nyid kyi rjes su zhugs pa nyid mar du gtogs pa ni mar phyis rnyed pa la 'byung ba nyid yin gyi/ 'bru mar la sogs pa dag la mi 'byung ba dang / de bzhin du rang gi nyid kyi rjes su zhugs pa nyid 'bru mar phyis rnyed pa la 'byung ba nyid yin gyi/ mar la sogs pa dag la mi 'byung ba lta bu'o/ / 'dir gzhung ni rnam par 'byed pa las/ dge slong gis tshes la mar rnyed la des tshes gnyis la gzhan zhig kyang rnyed par gyur na/ dge slong des snga ma shos bza' bar bya zhing / phyi ma shos gtong bar bya ba'am/ rnam par brtag par bya ba'am/ gzhan la sbyin par bya'o/ /gtong bar mi byed dam rnam par rtog par mi byed dam/ gzhan la sbyin par mi byed na zhag brgyad pa'i skya rengs shar na spang ba'i ltung byed do zhes gsungs pa yin no/ /ltung ba de yod na yo byad tsam bdag gir byas pa la spang ba nyid do zhes bya ba ni/ 'byung ngo zhes bya bar sbyar ro/ /ltung ba de yod na zhes bya ba ni/ spang pa'i ltung byed de yod na'o/ /yo byad tsam bdag gir byas pa la zhes bya ba ni/ phyis rigs mthun pa'am/ rigs mi mthun pa'i yo byad tsam bdag gir byas pa la'o/ /spang ba nyid do zhes bya ba ni/ spang bar bya dgos pa nyid 'byung gi ltung ba ni mi 'byung ba'o/ /'di skad bstan te/ dge slong gang la spang ba'i ltung byed yod pa'i dge slong des/ gal te phyis rigs mthun pa'am/ rigs mi mthun pa'i yo byad tsam rnyed na/ de'i tshe bshags pa'i dus na/ dge slong des de yang spang bar bya'o/ /de'i phyir ltung ba ni bshags par bya mi dgos te/ de'i gzhi las ltung ba ma byung ba'i phyir ro/ /'dir gzhung ni dge slong gis chos gos spang ba ma spangs shing bral bar ma byas la ltung ba de yang ma bshags par gzhan zhig rnyed na de yang spang ba yin te/ snga ma'i shugs kyis so zhes bya ba la sogs pa gsungs pa yin no/ /chung ba nyid kyi dum bu de ni mi 'gyur ro zhes bya ba ni/ khru gang khor yug las chung ba nyid kyi dum bu de ni spang ba nyid du mi 'gyur ro/ /'di skad bstan te/ spang bar bya ba'i dngos po dam dum du gyur na/ bshags pa'i dus na spang bar bya mi dgos te/ khru gang khor yug pas chung ba'i phyir dang chung ba ni spang bar 'os pa ma yin pa'i phyir ro/ /'dir gzhung ni nye ba 'khor gyis zhus pa las/ btsun pa dge slong gi chos gos spang ba tshig gam/ srog chags dag dang sril dag gis 'tshal bar gyur nas/ de la dam dum gang dag mchis pa dag spang bar bgyi'am/ nye ba 'khor mi bya ste/ ltung byed 'ba' zhig bshags par bya'o zhes gsungs pa de 'dir bsdus pa yin no/ /dge 'dun gyi yang ngo zhes bya ba ni/ dge 'dun mnga' ba'i rdzas ris su ma bcad pa yang spang bar mi bya ba nyid do/ /dge 'dun mnga' ba'i dngos po ni rnam pa gnyis te/ dge 'dun mnga' ba gang zag gi bdag nyid du ris su bcad pa dang / dge 'dun mnga' ba ris su ma bcad pa'o/ /de la dge 'dun mnga' ba gang zag gi bdag nyid du ris su bcad pa'i dngos po la ni 'chang ba dang / 'bral ba dang / 'jog pa'i rgyus spang ba'i ltung byed dag 'byung ste/ de la thams cad gang zag gi dang 'dra bar bdag gir bya ba 'byung ba'i phyir ro/ /dge 'dun mnga' ba'i ris su ma bcad pa la ni/ gang zag gzhan gyi dang 'dra bar bdag gir bya ba mi 'byung bas de la ni sngar bstan pa thams cad mi 'byung ngo / /gal te dge 'dun mnga' ba ris su ma bcad pa'i chos gos gang zag 'ga' zhig gis byin gyis rlob par byed cing / chos gos de dang 'bral bar byed na de'i tshe ltung byed 'ba' zhig bshags par bya'i/ chos gos de spang bar ni mi bya'o/ /'dir gzhung ni nye ba 'khor gyis zhus pa las/ btsun pa dge slong gis dge 'dun gyi chos gos byin gyis brlabs nas/ mtshams kyi slad rol du dbral bar bgyid na/ chos gos dang bral zhes bgyi'am/ ma bral zhes bgyi/ bka' stsal pa/ chos gos dang bral zhes bya'o/ /chos gos de spang bar bgyi 'am/ nye ba 'khor mi bya ste/ ltung byed 'ba' zhig bshags par bya'o zhes gsungs pa yin te/ de'i ma yin pa'i phyir te/ de la dbral bar bya ba mi dgos so/ /'di la med pa de nyid gtso bo'o zhes bya ba ni/ spang bar bya ba 'di la dngos po de gang zag de la mi bdog pa ni med pa de'o/ /de'i dngos po ni med pa de nyid do/ /de nyid spang ba de nyid la/ gtso bo yin gyi/ spang bar bya ba'i rdzas ni gtso bo ma yin no/ /de bas na tshig pa la sogs pas/ nyams pa'i chos gos la ni ltung byed 'ba' zhig bshags par bya'o/ /'dir gzhung ni zhu ba las/ btsun pa dge slong gis chos gos spang ba nyams par gyur na/ ltung byed bshags par bgyi'am/ nye ba 'khor ltung byed 'ba' zhig bshags par bya'o zhes gsungs pa yin no/ /'di gsum ni sra brkyang bting ba la mi 'byung ngo zhes bya ba ni/ 'og kho na nas 'byung ba 'chang ba dang 'bral ba dang / 'jog pa zhes bya ba'i spang ba'i ltung byed 'di gsum ni/ dge slong sra brkyang bting ba la mi 'byung ngo / /gang gis sra brkyang bting ba la de'i sra brkyang bting ba ste de la'o/ /spang ba'i ltung byed rnams kyi thun mong gi mtshan nyid bshad zin to// //da ni so so'i skabs brjod par bya ste/ de la re zhig 'chang ba'i spang ba'i ltung byed kyi mtshan nyid brjod par 'dod nas yod na'o zhes bya ba smras te/ bdog na'o/ /su'i yod ce na/ de'i phyir rang gi nyid do zhes bya ba smras te/ bdag nyid kyi nyid do/ /rang gi nyid thams cad kyang yan lag nyid ma yin te/ 'o na gang zhe na de'i phyir zhag bcur rjes su zhugs pa nyid do zhes bya ba smras te/ gal te dngos po de zhag bcur byin gyis ma brlabs sam/ rnam par ma brtags par rang gi nyid kyi rjes su zhugs pa nyid yin no/ /dus gang gi tshe spang bar 'gyur zhe na/ de'i phyir gzhan gyis/ nyi ma'i dang po la'o zhes bya ba smras te/ sngar zhag bcur rjes su zhugs pa nyid ces smras ma thag pa gang yin pa de las gzhan pa'i nyi ma'i dang po skya rengs 'char ba'i skad cig ma dang po la spang bar 'gyur ro/ /'di skad bstan te/ zhag bcur rgyun ma chad par rjes su zhugs pa nyid du bdag gir byas pa yod na zhag bcu gcig pa'i skya rengs dang po 'char ba'i tshe na/ 'chang ba'i spang ba'i ltung byed du 'gyur ro/ /yul gang la rang gi nyid yod na spang ba'i ltung byed du 'gyur zhe na de'i phyir gos la'o zhes bya ba smras te/ gos la ste/ lhung bzed dang sman la ma yin no zhes bya ba'i tha tshig go/ /gos thams cad la yang ma yin te/ 'di ltar 'khor gsum khebs pa'i mtha'i tshad la'o zhes bya ba la/ 'khor gsum zhes bya ba ni/ lte ba'i dkyil 'khor dang / pus mo'i lha nga'i tshigs gnyis so/ /'khor gsum po de dag chub par khebs pa'i mthar gyur pa'i khyon gyi tshad gos gang la yod pa gos rnam pa de lta bu rang gi nyid du bdog pa de la spang ba 'byung ngo / /gos rnam pa de lta bu la'ang thams cad du ma yin te/ 'di ltar byin gyis brlabs pa dang ma 'brel ba la'o zhes bya ba ni/ rnam par brtag pa la sogs pa'i byin gyis ma brlabs pa'i gos la'o/ /de 'ba' zhig la yang ma yin te/ gzhan yang 'brel kyang rjes su zhugs pa dang / bcas pa la'o zhes bya ba la/ 'brel kyang zhes bya ba ni/ byin gyis brlabs pa dang 'brel kyang ngo / /rjes su zhugs pa dang bcas te zhes bya ba ni/ rang gi nyid kyi rjes su zhugs pa dang bcas pa'o/ /de la yang spang ba 'byung ngo / /'di skad bstan te/ gal te gos de byin gyis brlabs pa dang / 'brel pa yin du zin kyang rang gi nyid kyi rjes su zhugs pa dang bcas pa yin na gos de la yang spang ba 'byung ba kho nar 'gyur ro/ /rang gi nyid kyi rjes su zhugs pa dang bcas pa'i chos gos ni rnam pa gnyis te/ rang nyid las byung ba dang gzhan las byung ba'o/ /de la 'dir ni gzhan las byung ba'i gos rang gi nyid kyi rjes su zhugs pa dang bcas pa gang yin pa'i gos de la ni byin gyis brlabs pa dang 'brel kyang spang bar 'gyur bar bstan to/ /da ni byin gyis brlabs pa dang 'brel ba'i gos rang gi nyid kyi rjes su zhugs pa dang bcas pa de'i yul bye brag can bstan pa'i phyir/ 'di la gzhan yod na byin gyis ma brlabs pa de'i shan tshun chad nas so zhes bya ba smras te/ 'di la zhes bya ba ni/ gzhan gyi shan las byung ba'i gos phyis rnyed pa byin gyis brlabs pa dang 'brel pa rang gi nyid kyi rjes su zhugs pa dang bcas pa 'di la'o/ /gzhan yod na zhes bya ba ni/ gzhan las byung ba'i gos phyis rnyed pa byin gyis brlabs pa dang 'brel ba rang gi nyid rjes su zhugs pa de las gzhan pa'i gos sngar rnyed pa byin gyis ma brlabs par rang gi nyid kyi rjes su zhugs pa dang bcas pa yod na'o/ /byin gyis ma brlabs pa de'i zhes bya ba ni/ sngar rnyed pa byin gyis ma brlabs par rang gi nyid kyi rjes su zhugs pa dang bcas pa de'o/ /shan tshun chad nas so zhes bya ba ni/ sngar rnyed pa byin gyis ma brlabs pa rang gi nyid kyi rjes su zhugs pa de'i shan tshun chad nas te/ de tshun chad nas brtsams te/ gzhan las byung ba'i gos phyis rnyed pa byin gyis brlabs pa dang 'brel pa rang gi nyid kyi rjes su zhugs pa dang bcas pa de la yang / snga ma shos kyi zhag bcur bgrang ba 'das na spang ba nyid 'byung bar 'gyur ba'o/ /'di skad bstan te/ gzhan las byung ba'i gos phyis rnyed pa byin gyis brlabs pa dang 'brel ba rang gi nyid kyi rjes su zhugs pa dang bcas pa de la/ de las gzhan pa'i gos sngar rnyed pa byin gyis ma brlabs pa rang gi nyid kyi rjes su zhugs pa dang bcas pa zhig yod na/ de byin gyis ma brlabs pa'i shan zhag tu yod pa tshun chad nas bgrangs te zhag bcu 'das pa'i spang ba la thug pa na/ de'i shugs kyis gzhan las byung ba'i gos phyis rnyed pa byin gyis brlabs pa dang 'brel ba rang gi nyid kyi rjes su zhugs pa de yang 'chang ba'i spang ba kho nar 'gyur ro/ /'dir gzhan las byung ba'i gos phyis rnyed pa byin gyis brlabs pa dang 'brel ba rang gi nyid kyi rjes su zhugs pa dang bcas pa de la/ snga ma shos kyi shan gyis ltung ba 'di rnam par gzhag gi/ phyi ma shos de bdag nyid las byung ba yin na ni de la ltung ba 'di med do/ /de ltar na 'dir tshig gi don 'di 'byung ste/ gal te dge slong gis nyin mtshan du rim gyis chos gos gnyis shig bdag gir byed la/ chos gos snga ma shos byin gyis rlob par byed la phyi ma shos ni byin gyis rlob par mi byed na/ de la ni chos gos phyi ma shos bdag gir byas pa'i nyin mtshan tshun chad nas zhag bcu 'das na/ 'chang ba'i spang bar 'gyur gyi/ chos gos snga ma shos byin gyis brlabs pa'i nyin mtshan tshun chad nas ni ma yin te/ byin gyis brlabs pas na de'i rang gi nyid dang bral ba'i phyir de spang bar mi 'gyur ro/ /gang phyi ma shos byin gyis rlob par byed la/ snga ma shos mi byed na ni de la chos gos snga ma shos bdag gir byas pa'i nyin mtshan tshun chad nas zhag bcu 'das na/ chos gos snga ma dang phyi ma gnyis ka spang bar 'gyur te/ rang nyid kyi rgyud du gtogs pa snga ma shos shan 'dres par gyur pa'i phyir de'i shan gyis phyi ma shos kyang shan 'dres par 'gyur ro/ /gang gis nyin gcig kho nar dus gcig tu chos gos gnyis bdag gir byed la/ chos gos gcig ni byin gyis rlob par byed la/ cig shos ni mi byed na/ de la ni chos gos de gnyi ga zhag bcu 'das na spang ba kho nar 'gyur te/ gnyi ga yang nyin gcig kho nar bdag gir byas pa'i phyir ro/ /snga ma'i shan gyis dbang gis ni phyi ma yang shan 'dres par 'gyur gyi/ phyi ma'i shan gyi dbang gis ni snga ma shan 'dres par mi 'gyur bar shes par bya'o/ / 'dir gzhung ni nye ba 'khor gyis zhus pa las/ btsun pa dge slong gi chos gos de nyid zhag bcu 'das pa yang lags la/ de nyid zhag gcig bral ba yang lags pa ma mchis sam/ nye ba 'khor yod de 'di lta ste dge slong gi chos gos rgyun ma chad par rgyun 'byung bzhin pa las/ zhag bcu pa la chos gos shig rnyed la de byin gyis brlabs nas mtshams kyi phyi rol du chos gos de med par skya rengs 'char bar byed na de lta na chos gos de ni de nyid zhag bcu 'das pa yang yin la/ de nyid zhag gcig bral ba yang yin no zhes gsungs pa yin no/ /gzhung de ni mdo gnyis po 'brel kyang rjes su zhugs pa dang bcas pa la'o zhes bya ba dang / 'di la gzhan yod na byin gyis ma brlabs pa de'i shan tshun chad nas so zhes bya ba de dag gi khungs yin te/ de la mdo snga ma shos kyi khungs ni lung las chos gos rgyun ma chad par rgyun 'byung bzhin pa las zhes bya ba dang / des chos gos de byin gyis brlabs nas zhes gsungs pa yin no/ /mdo phyi ma shos kyi khungs ni lung las zhag bcu pa la chos gos shig rnyed la zhes bya ba dang / de lta na chos gos de ni de nyid zhag bcu 'das pa yang yin la/ de nyid zhag gcig bral ba yang yin no zhes gsungs pa yin no/ /'chang ba'i spang ba'o zhes bya ba 'chang ba'i spang ba'i ltung byed rdzogs so/ / //da ni 'bral ba'i spang ba brjod par 'dod nas 'bral ba'i zhar la 'ongs pa 'di smras te/ gding ba dang bral ba la ni nyes pa med do zhes bya ba ni/ gding ba byin gyis brlabs pa dang bral ba gang yin pa de la ni nyes pa med par rig par bya'o/ /ci dus thams cad du'am zhe na de'i phyir/ gal te deng nyid phyir ldog cing gnas par bya'o snyam pa med na/ gding ba bzhag ste 'gro bar mi bya'o zhes bya ba smras te/ gal te deng nyid phyir ldog cing / 'dir gnas par bya'o snyam pa'i bsam pa med na/ gding ba bzhag ste grong gzhan du 'gro bar mi bya'o/ /gal te bsam pa des song ba na bar chad kyi dbang gis phyir ldog par mi nus na de'i tshe ji ltar bya snyam du dogs pa la/ de ltar bsams te song nas dus ma 'byor na de brnyas te der gnas par bya'o zhes bya ba smras te/ de nyid phyir ldog par bya'o snyam pa de ltar bsams te/ gding ba med par gang du song ba de nas phyir ldog pa'i dus ma 'byor na gding ba de brnyas te/ de nyid du gnas par bya'o/ /gal te gding ba brnyas pa na ma rnyed na de'i tshe ji ltar bya zhe na/ de'i phyir ma rnyed na bla gos bzhi bltab tu byas pa'i steng du yang yun ring du mi nyal bar ro zhes bya ba smras te/ gding ba brnyar ma rnyed na bla gos bzhi bltab tu byas pa'i steng du nyal bar bya'o/ /ci mtshan thog thag du'am zhe na ma yin te/ yun ring du mi nyal bar ro zhes bya ba smras te/ dge slong des yun ring du mi nyal bar mtshan mo 'da' bar bya'o/ /'dir gzhung ni phran tshegs las/ de lta bas na dge slong gis gding ba med par 'gro bar mi bya'o/ /dge slong kha cig deng nyid phyir ldog go snyam pas gding ba med par grong gzhan du song ba dang / de dag la gang gis nam sros par gyur pa de lta bu'i bya ba byung nas/ de dag bslab pa 'dod pas mtshan mo yang phyir 'ong bar byed pa na/ de dag seng ge la sogs pa'i bgrod par gyur to/ /de lta bu'i skabs de dge slong dag gis bcom ldan 'das la gsol ba dang / bcom ldan 'das kyis bka' stsal pa/ gal te de ltar bsams te dong ba dag der nam sros par gyur na de nyid du gnas par bya ste/ de ltar tshangs pa mtshungs par spyod pa dag las gding ba brnyas te nyal bar bya'o/ /gal te rnyed na de lta na legs/ gal te ma rnyed na bla gos bzhi bltab tu byas te/ bting la yun thung ngu ni nyal/ yun ring du ni mi nyal bar mtshan mo 'da' bar bya'o zhes gsungs pa yin no/ /de la lung de las 'di ltar de nyid du gnas par bya ste zhes gsungs pas/ de'i phyir gding ba dang bral ba la ni nyes pa med do zhes bya ba'i mdo de byas so/ /snam sbyar bzhag par mi 'os pa'i gnas su dbyar gyi ras chen yang gzhag par mi bya'o zhes bya ba la/ snam sbyar gyi bzhag pa ni/ snam sbyar bzhag pa ste/ snam sbyar bzhag par mi 'os par bzhag tu mi rung ba'i gnas der dbyar gyi gos ras chen yang gzhag par mi bya'o/ /gnas gang na dge slong med pa dang sgo glegs med pa gnyi ga 'dom pa der gzhag par mi bya'o zhes bya ba'i tha tshig go/ /gang yang rung ba zhig med par bzhag na nyes byas phra mor 'gyur ro/ / char 'bab na mi bzhag go zhes bya ba ni/ char 'bab na dbyar gyi gos ras chen mi bzhag ste/ de ni de bskyab pa yin pa'i phyir ro/ /chu klung gis chod par 'gro ba la yang mi bzhag go zhes bya ba ni/ gal te bgrod par bya ba'i gnas su chu klung gis chod cing bar du btsal ba yin na de'i tshe yang dbyar gyi gos ras chen gzhag par mi bya'o/ /gal te chu klung la zam pa brtan po yod pa ni ma gtogs so/ /de gnyis dogs par yang mi bzhag go zhes bya ba ni/ char 'bab pa dang chu klung gis chod pa de gnyis yod par dogs pa'i gnas su 'gro na yang / dbyar gyi gos ras chen mi bzhag par bskur ro/ /dge slong dang bcas pa nyid dang sgo glegs dang bcas pa nyid du bcas pa'i gnas dang / char 'bab pa dang char 'bab par dogs pa dang / bgrod par bya ba chu klung gis chod pa nyid lta bu med na/ gnang ba ma byin pa dang / sra brkyang ma bting bas snam sbyar med par gar yang 'gro bar mi bya'o zhes bya ba la/ dge slong dang bcas pa nyid dang / sgo glegs dang bcas pa nyid du bcas pa'i gnas med na zhes bya ba dang / char pa 'bab pa dang char pa 'bab par dogs pa med na zhes bya ba dang / bgrod par bya ba chu klung gis chod pa nyid lta bu med na zhes bya bar sbyar te/ rkyen de lta bu med na/ snam sbyar med par gar yang 'gro bar mi bya'o/ /rkyen de lta bu yod na yang snam sbyar dang mi 'bral ba'i gnang ba ma thob pa dang / sra brkyang ma bting bas snam sbyar med par gar yang 'gro bar mi bya'o/ /de la dge slong dang bcas pa nyid dang / sgo glegs dang bcas pa nyid du bcas pa'i gnas zhes bya bar sbyar te/ de med pa zhes bya ba ni dge slong dang bcas pa nyid dang / sgo glegs dang bcas pa nyid gnyi ga dus gcig tu med na'o/ /char pa 'bab pa dang / char pa 'bab par dogs pa med par zhes bya ba yang / de gnyi ga med na'o/ /bgrod par bya ba chu klung gis chod pa lta bu med na'o zhes bya ba ni/ bgrod par bya ba'i yul dang 'brel pa ni/ bar du chu klung gis chod pa lta bu med na'o/ /gang gis mi 'bral ba'i gnang ba ma thob pa de ni gnang ba ma byin pa'o/ /gang gis sra brkyang ma bting ba de ni sra brkyang ma bting ba ste/ de lta bu'i dge slong gis snam sbyar med par gnas gzhan gar yang 'gro bar mi bya'o/ /dge slong dang bcas pa nyid la sogs pa de dag yod na ni/ sman sbyar de med par 'gro ba la nyes pa med do/ /dge slong dang bcas pa nyid dang / sgo glegs dang bcas pa nyid gnyis las gang yang rung ba cig med na ni nyes byas phra mor 'gyur ro/ /char pa 'bab pa dang char pa 'bab par dogs pa la sogs pa de ni nyes byas so/ /dge slong dang bcas pa nyid dang / sgo glegs dang bcas pa nyid med na/ 'on kyang de lta na bsnyen par ma rdzogs pa'i lag tu snam sbyar gtams pa la yang rung bar snang ngo / /gal te dge slong char 'bab pa la sogs pa'i rkyen gyis snam sbyar med par grong gzhan du 'gro zhing nyi ma de nyid la phyir 'ong bar mi nus na de'i tshe des ji ltar bya zhe na/ de'i phyir gnas su phyin par mi 'gyur na chos gos kyi phyung ste/ gzhan la byin gyis brlabs pa ni cho ga'i rnam pa'o zhes bya ba smras te/ chos gos kyi gnas der phyin par mi 'gyur na/ chos gos byin gyis brlabs pa gnas gzhan na 'dug pa'i byin gyis brlabs pa phyung ste/ khyim pa yan chad kyi gos sam/ gzhan las brnyas pa la yang byin gyis brlab par bya'o/ /de ni cho ga'i rnam pa ste/ thabs so zhes bya ba'i tha tshig go/ /snam sbyar lci ba nyid yin na/ rgan pa dang nad pa dag la mi 'bral ba'i gnang ba sbyin no zhes bya ba ni/ mi 'bral ba'i gnang ba sbyin par bya'o/ /nam gyi tshe zhe na/ snam sbyar lci ba nyid na'o/ /su la zhe na/ rgan po dang nad pa dag la ste/ rgas pa dang nad pa dag la'o zhes bya ba'i tha tshig go/ /'bral ba'i spang ba'i ltung byed kyi byed pa po nyid gang yin zhe na/ de'i phyir byin gyis brlabs pa dang gnang ba ma thob pa ni byed pa po nyid do zhes bya ba smras te/ chos gos byin gyis brlabs pa dang gang zag mi 'bral ba'i gnang ba ma thob pa ni 'bral ba'i spang ba'i ltung byed kyi byed pa po nyid yin no/ /ci gnas skabs thams cad la gang zag de byed pa po nyid yin nam zhe na ma yin te de'i phyir/ de'i gnas nye 'khor dang bcas pa nas gzhan na gnas pa la skya rengs shar na'o zhes bya ba smras te/ chos gos byin gyis brlabs pa de'i gnas gang yin pa nye 'khor dang bcas par gyur pa ni/ nye 'khor dang bcas pa ste/ gnas nye 'khor dang bcas pa de nas gnas gzhan na gnas pa'i dge slong la'o/ /ci dus thams cad du'am zhe na ma yin te/ 'di ltar skya rengs shar na'o zhes bya ba smras te/ skya rengs dang po 'char ka'i skad cig ma dang po la'o zhes bya ba'i tha tshig go/ /de'i gnas nye 'khor dang bcas pa nas zhes smras pa ni/ 'dir non pa tsam la gnas su mi bzhed de de'i phyir/ 'di man chad gnas de'i mtshan nyid bstan par bya ste/ mtshams byas pa la ni mtshams gnas kyi mtha'o zhes bya ba ni/ gtsug lag khang gang la mtshams byas pa de ni mtshams byas pa'i gtsug lag khang de la ni/ mtshams gnas kyi mtha' ste/ pa mtha' dang mu thug ces bya ba'i tha tshig go/ /mtshams bcad pa 'ba' zhig mtshams yin par ma zad de/ 'di ltar rtsig pa dang / rib ma dang / 'obs kyis bskor ba la sogs pa dag kyang mtshams nyid yin no/ /ji ltar bdag po gcig nyid ma yin pa'i bar gyi mtshams rnams tha dad pa nyid yin pa de bzhin du bdag po gcig nyid kyi bar gyi mtshams rnams ni tha dad pa nyid du mi 'gyur bas de'i phyir/ bdag po gcig nyid ma yin pa'i bar gyi mtshams rnams ni tha dad pa nyid do zhes bya ba smras te/ bdag po gcig gi dngos po ni gcig nyid do/ /gcig nyid ma yin pa ni gcig nyid ma yin pa ste/ 'di ltar gnyis nyid dam mang po nyid do/ /bdag po yongs su 'dzin pa gcig nyid ma yin pa mang po nyid kyi bar gyi mtshams rnams ni tha dad pa nyid do/ /phyi sgo la sogs pa thun mong ba dag ni tha dad pa nyid ma yin no/ /'di skad bstan te/ gang na bdag po mang po dag cha so sor khyim tha dad pas/ gnas pa de na ni khang khyim gyi sgo dang ra ba la sogs pa'i bar mtshams rnams tha dad pa nyid do/ /khyim pa la sogs pa'i gnas gang na bdag po mang po don gcig pa dag cha so so ma yin par khyim gcig pa'i tshul gyis gnas pa de na ni/ khang khyim gyi sgo dang ra ba la sogs pa'i bar mtshams rnams tha dad pa nyid ma yin te spun la sogs pa thams cad la khyim gyi rje dpon nyid yin pa'i phyir ro/ / de ni mdo brtsams pa 'di'i 'bras bu bstan par bya ste/ bdag po mang po dag nyid kyi bar gyi mtshams rnams ni tha dad pa nyid do/ /de dag gi gnas thun mong ba phyi sgo la sogs pa dag ni tha dad pa nyid ma yin te/ 'di lta ste dper na/ nye 'khor tha dad pa'i khyim la sgo thun mong pa ni tha dad pa nyid ma yin pa lta bu'o/ /de ltar yang rnam par 'byed pa las/ khyim nye 'khor tha dad pa gang zhe na/ mi tha dad pa dag gi khyim gang yin pa'am/ spun sgo bye ba dag gi'o/ /de'i nye 'khor gang zhe na/ so so tha dad pa'o/ /ci zhig thun mong zhe na sgo'o/ /de bzhin du g.yul gyi tshoms nye 'khor tha dad pa gang zhe na/ 'di lta ste/ mi tha dad pa dag gi g.yul gyi tshoms gang yin pa'am/ spun sgo bye ba dag gi'o/ /de'i nye 'khor gang zhe na so so tha dad pa'o/ /ci zhig thun mong zhe na sgo'o/ /de bzhin du mu stegs can gyi khyim la yang lha'i gnas thun mong yin no/ /de bzhin du tshong rdal la ni bzhag stegs thun mong yin te/ tshong rdal zhes bya ba ni/ gang du tshong pa dag zong 'tshong bar byed pa'i gnas so/ /bzhag stegs zhes bya ba ni/ tshong byed pa'i dus na shing la sogs pa'i gzhi'i bye brag gang du zong dang rin dag 'jog par byed pa ste/ de ni rim gyis thams cad la dgos pa yin pas thun mong yin no/ /de bzhin du tshong khang la ni 'dug stegs thun mong yin te/ tshong khang zhes bya ba ni zong dgram pa la sogs pa'i gnas so/ /'dug stegs zhes bya ba ni/ stegs bu gang la tshong pa 'dug ste/ a ru ra la sogs pa 'tshong bar byed pa'o/ /de bzhin du dgra khang la ni ya gad thun mong yin no/ /de bzhin du g.yul la ni dkyil thun mong yin te/ g.yul zhes bya ba ni lo tog bcag pa'i gzhi'o/ /dkyil zhes bya ba ni/ rten gnas te/ gang du gtor ma 'bul ba la sogs pa byed pa'am/ gang du 'bru spung par byed pa'i gnas so/ /de bzhin du rol mo mkhan gyi khyim la ni rol mo'i cha byad bzhag pa'i gnas thun mong yin no/ /de bzhin du shing rta la ni kha lo pa'i gnas thun mong yin te/ kha lo ba'i gnas zhes bya ba ni kha lo ba gang du 'dug pas/ glang la sogs pa shing rta dang ldan pa dag ded pa'o/ /de bzhin du gru la ni gru gdong thun mong yin te/ gru gdong zhes bya ba ni/ gru pa gang du 'dug nas gru skyod par byed pa'o/ /de bzhin du kun dga' ra ba la ni khron pa thun mong yin no zhes gsungs pa yin te/ thams cad la yang de dag la mkho bar 'gyur ba ni thun mong zhes bya'o/ /mdo 'di la dgag pa'i bsdu bar ni mi 'gyur te/ des ni mdo 'og ma'i rjes su yang sbyar ro/ /nor las dang lta ba las dad pa tha dad pa ma yin pa'i yang ngo zhes bya ba la/ nor las ni 'di lta ste dper na spun rnams kyi lta bu'o/ /lta ba las ni 'di lta ste dper na mu stegs rnams kyi lta bu'o/ /de gnyis kyi sgo nas dad pa tha dad pa ma yin pa'i bdag po rnams kyi gnas kyi bar mtshams kyang tha dad pa nyid ma yin no/ /dad pa tha dad pa'i ni tha dad pa nyid do/ /de lta bas na dge slong gis spun nor dag la dad pa tha dad pa'i khyim dag tu chos gos bzhag ste/ rang nyid sgo khang du skya rengs 'char bar byed na/ chos gos dang 'bral bar mi 'gyur ro/ /de bzhin du sgo khang du chos gos bzhag ste/ rang nyid spun rnams kyi khyim dag tu skya rengs 'char bar byed na yang nyes pa med do/ /yang na mdo snga ma shos de 'di ltar yang bshad de/ bdag po gcig nyid kyi bar gyi mtshams rnams ni tha dad pa nyid ma yin no zhes bya bar yang mdo'i tshig rnam par sbyar bar bya ste/ bdag po gcig nyid kyi bar gyi mtshams khang khyim la sogs pa rnams kyang tha dad pa nyid ma yin no/ /sgo khang la sogs pa dag lta smos kyang ci dgos te/ tha dad pa nyid ma yin no/ /bdag po gcig nyid ma yin pa'i bar gyi mtshams rnams ni tha dad pa nyid ma yin la/ sgo khang la sogs pa dag ni tha dad pa nyid ma yin te/ thams cad kyi thun mong ma yin pa'i phyir ro/ /yal ga dang yal ga phra mo dag ma reg pa ni gnas tha dad pa nyid do zhes bya ba ni/ yal ga dang yal ga phra mo de dag ma reg phan tshun ma phrad pa ni gnas tha dad pa nyid do/ /reg pa ni gnas gcig pa nyid do/ /de lta bas na dge slong gis shing ljon pa gcig kho na'i yal ga ma reg pa gzhan la chos gos 'jog cing yal ga ma reg pa gzhan du skya rengs 'char bar byed na/ yang chos gos dang 'bral bar 'gyur la/ reg pa la ni mi 'gyur ro/ /rtsa ba ni thun mong ngo zhes bya ba ni/ yal ga de dag gi rtsa ba ni thun mong ba ste/ gang phan chad nas yal ga dag gyes pa de ni de dag gi rtsa ba'o/ /de lta bas na/ dge slong gis rtsa ba la chos gos 'jog cing / yal ga gang yang rung bar skya rengs 'char bar byed pa la ni nyes pa med do/ /de bzhin du yal ga gang yang rung bar chos gos 'jog cing rtsa bar skya rengs 'char bar byed na yang nyes pa med do/ /rtsa ba'i rtsa ba la sogs pa yang ngo zhes bya ba ni/ rtsa ba'i rtsa ba la sogs pa yang yal ga dang yal ga phra mo thams cad kyi thun mong yin te/ de ni re zhig spyi'i don to/ /yan lag gi don ni rtsa ba zhes bya ba ni/ shing ljon pa'i steng gi thams cad kyi phyogs gang nas yal ga du ma gyes par gyur pa de'i mdo kho na'i 'og na yal ga med pa'i shing ljon pa sdong po'i phyogs la bya ste/ de ni rtsa ba'o/ /rtsa ba'i rtsa ba zhes bya ba ni/ steng gi thams cad kyi rtsa bar gyur pa'i shing ljon pa'i phyogs de nas yal ga med pa'i 'og gi cha las yal ga gcig tu gyur tam/ yal ga du mar gyur pa'i yal ga ji snyed gyes pa de'i mdo kho na'i 'og na yal ga med pa'i phyogs kyi cha yod pa la bya ste/ de ni rtsa ba'i rtsa ba'o/ /sogs pa zhes smos pas ni/ de man chad nas sa gzhi la thug pa yan chad kyi bar bzung ste/ sogs pa'i sgras bsdus pa shing ljon pa dang 'brel pa'i sa gzhi yan chad nas/ rtsa ba'i rtsa ba la thug pa man chad kyi bar de ni/ rtsa ba'i rtsa ba dang / rtsa ba dang 'brel ba'i yal ga dang / yal ga phra mo thams cad kyi thun mong yin no/ /rtsa ba'i rtsa ba ni/ rang dang rtsa ba dang 'brel pa'i yal ga dang / yal ga phra mo thams cad kyi thun mong yin no/ /rtsa ba ni de nyid dang 'brel ba'i yal ga dang / yal ga phra mo rnams nyi tshe'e thun mong yin no/ /de dag gi yal ga dang yal ga phra mo ma reg pa rnams ni phan tshun tha dad pa yin no/ /'dir gzhung ni 'di lta ste/ shing ljon pa yal ga dang / lo ma ma reg pa de'i nyen kor gang lags/ so so tha dad pa'o/ /ji zhig thun mong lags/ rtsa ba'o zhes gsungs pa de 'dir gzhung yin no/ /yal ga dang lo ma reg pa'i shing ljon pa rnams ni gnas gcig pa nyid do zhes bya ba la/ shing ljon pa gang dag gi yal ga dang lo ma reg pa de dag ni/ yal ga dang lo ma reg pa'i shing ljon pa rnams te/ shing ljon pa de dag ni gnas gcig pa nyid do/ /me tog dang 'bras bu dag ni de'i khongs su gtogs pa'i phyir tshig logs shig tu ma byas so/ /de'i cha 'og mar dpyangs pa ni steng g.yogs dang 'dra'o zhes bya ba ni/ steng g.yogs zhes bya ba bla gab kyi rim pa'i cha 'og ma bla gab kyi rim pa'i khongs su gtogs pa de bzhin du shing ljon pa de'i cha 'og ma gang yin pa'i cha 'og ma de ni gnas de'i khongs su gtogs pa yin no/ /'di skad bstan te/ dge slong gis shing ljon pa'i steng gi cha 'og mar chos gos dbyangs te bzhag pa de nyid kyis gzhir skya rengs 'char bar byed na/ de'i chos gos dang 'bral bar mi 'gyur ro/ gru dang shing rta dag gi yang ngo zhes bya ba ni/ gru dang shing rta dag gi cha 'og ma yang steng g.yogs dang 'dra bar khongs su gtogs par shes par bya'o/ /nam mkha' ni mtshams su gtogs pa ma yin no/ /de lta bas na gru dang shing rtas sa'i cha gang non pa'i sa'i cha de dang 'brel pa dang / 'og gi cha dang 'brel pa dang / ngos dang 'brel pa dang / 'khor lo dang rtsibs thag dang / phur pa la sogs pa dang 'brel pa'i rdzas ni mdo 'di gnyis kyi gnas nyid yin par byas par rig par bya'o/ /mtshams med pa la ni yan lag gis khyab pa mtha'o zhes bya ba la gnas gang mtshams med pa de ni mtshams med pa ste/ dgon pa la sogs pa'i gnas mtshams med pa de la ni rka lag la sogs pa'i yan lag gis khyab pa gang yin pa'i yan lag gis khyab pa'i mtha' de gnas de'i mtha' yin par rig par bya'o/ /'dir lung ni lam du zhugs pa la lus dang 'brel pa'i phyogs nas brtsams te/ 'dom bzhi bcu rtsa dgu tshun chad nye 'khor yin par gsungs pa gang yin pa dang / mtshams gzhan pa la lus kyis non pa nyi tshe gnas nyid yin par gsungs pa gang yin pa de yin no/ /'dir mtshams zhes bya ba'i sgra ni/ khang khyim la sogs pa dag la bya ste/ de med pa ni mtshams med pa'i gnas yin no/ /gnas bstan nas/ da ni gnas de'i nye 'khor brjod par bya ste/ de yang rnam pa gnyis te/ brtsam du rung ba nyid kyis nye 'khor yin pa ni/ brtsam du rung ba nyid kyis gnas kyi khongs su gtogs pa zhes bya ba ste/ 'di ltar gang la la zhig 'ga' zhig tu gnas byed pa na de la de'i kho ra khor yug brtsam du rung ba'i skabs yod par bya ba'i bsam pa gdon mi za bar 'byung ba'i phyir ro/ /gnyis pa nye bar spyod pa nyid kyis nye 'khor yin pa ni nye bar spyod pa nyid kyis gnas dang nye bar gyur pa ste/ 'di ltar gnas de ni nye bar spyod pa nyid dang yang gdon mi za bar 'brel pa'i phyir ro/ /de la re zhig nye 'khor snga ma shos bstan pa'i phyir/ nye 'khor ni kho ra khor yug tu 'dom re re'o zhes bya ba smras te/ kho ra khor yug tu zhes bya ba ni/ steng dang 'og dang phyogs kyi mtshams thams cad nas phyi rol gyi nye 'khor du'o/ /'dom re re'o zhes bya ba ni/ thams cad du 'dom re rer 'dra bar gyur pa'o/ /grong gi bye brag gsum gyi gzhi las ni nye 'khor gyi bye brag ris su chad pa dang bsgrub pa zhes bya ba dag yod de de dag bstan pa'i phyir rtsig pas bskor ba'i grong la ni/ ji tsam du ba lang drug dang ldan pa'i shing rta smyig ma can gyi 'am/ bya gag sbar nas 'dug pa'i lam gyis khyab pa'o zhes bya ba smras te/ rtsig pas zhes bya bar bas bskor ba'i zhes bya ba dkris pa'i grong la ni zhes bya ba yul du gyur pa lan ji tsam du lam gyis khyab pa de tshun chad de nye 'khor ro/ /gang gi lam gyis khyab pa zhe na de'i phyir/ ba lang drug dang ldan pa'i shing rta smyig ma can gyi'am zhes bya ba smras te/ ba lang drug gis drang dgos pa'i shing rta smyig mas bkang ba gcig gi lam gyis khyab pa'am yang na bya gag sbar nas 'dug pa'i lam gyis khyab pa ste/ bya gag 'phur du bcug nas gang du sa la 'bab pa'i bar gyi lam gyis khyab pa ste/ rtsig pas bskor ba'i grong la ni 'di 'am snga ma gang yang rung ba nye 'khor yin no/ /rib mas bskor ba la ni ra lug gi rdul gyi 'am/ mi rang bzhin gyis ngo tsha dang ldan pa'i bshang ba'i lam gyis so zhes bya ba ni/ rib mas bskor ba'i grong la ni ji tsam du ra lug dag rib ma'i drung nas 'dong ba na/ rdul 'thon pa'i rdul gyi lam des khyab pa la'am/ yang na mi rang bzhin gyis zhes bya ba ngo bo nyid kyis ngo tsha dang ldan pa'i zhes bya ba/ ngo tsha shes pa'i bshang ba'i lam gyis phyogs ci tsam du khyab pa de tshun chad de/ rib mas bskor ba'i grong la ni 'di'am snga ma gang yang rung ba nye 'khor yin no/ /'obs kyis bskor ba la ni/ skas gdang bu bcu gnyis pa'am/ phyag dar bor ba'i bong ba rags pa'i lam gyis so zhes bya ba ni/ 'obs kyis bskor ba'i grong la ni skas gdang bu bcu gnyis pa'i srid kyi tshad kyi phyogs ji tsam du slebs pa'i lam gyis khyab pa'am/ yang na phyag dar bor ba'i yan lag tu gyur pa'i bong ba rags pa rang gi shugs kyis 'dril bas lam ji srid du phyin pa'i lam gyis khyab pa de tshun chad de/ 'obs kyis bskor ba'i grong la ni/ 'di 'am snga ma gang yang rung ba nye 'khor yin no/ /grong gi bye brag gsum gyi gzhi las nye 'khor gyi bye brag de las/ rtsig pas bskor ba'i grong gi nye 'khor rnam gnyis dang / 'obs kyis bskor ba'i grong gi nye 'khor dang po shos ni ris su chad pa'i nye 'khor yin no/ /rib mas bskor ba'i grong gi nye 'khor rnam gnyis dang / 'obs kyis bskor ba'i grong gi nye 'khor 'og ma shos ni/ bsgrub pa'i nye 'khor yin te/ de dag ni brtsam du rung ba nyid kyis gnas kyi khongs su gtogs pa zhes bya ba'i nye 'khor ro/ /da ni nye bar spyod pa nyid kyis gnas dang nye bar gyur pa'i nye 'khor brjod par bya ste/ gnas de'i 'phral gyi bya ba dang / 'gro ba dang / 'dug pa dang / rdul dag gis der gtogs pa khyab pa'o zhes bya ba ni/ gnas gang du nye 'khor rnam par 'jog pa'i gnas de'i 'phral gyi bya ba dang / 'gro ba dang / 'dug pa dang / rdul gang dag yin pa'i gnas de'i 'phral gyi bya ba dang / 'gro ba dang / 'dug pa dang / rdul de dag gis der gtogs pa zhes bya ba gnas de'i phyogs ji tsam yod pa khyab pa zhes bya ba chub par gyur pa ste/ de ni nye bar spyod pa nyid kyis gnas dang nye bar gyur pa'i nye 'khor yin par rig par bya'o/ /mdo 'di ni lung las/ khyim la sogs pa gang na/ de dag 'du bar byed pa dang / rngo bar byed pa dang / 'thag par byed pa dang / khye'u sus byed pa la sogs pa ni nye 'khor ro zhes gsungs pa gang yin pa de bsdu ba'i phyir byas so/ /mtshams med pa'i lam du tha dad pa ma yin par 'gro ba'i mi la ni 'dom bzhi bcu rtsa dgu'o zhes bya ba la/ lam gang na mtshams med pa de ni mtshams med pa'i lam ste/ mtshams med pa'i lam der ro/ /tha dad pa ma yin par 'gro ba'i mi zhes bya ba ni/ dge slong ltung ba 'byin pa po la ltos nas/ lam tha dad pa ma yin par 'gro ba'i mi dge slong gi chos gos khyer ba ste/ de la ni 'dom bzhi bcu rtsa dgu tshun chad nye 'khor yin no/ /'di skad bstan te/ ltung ba 'byin pa po lam gang du 'gro ba'i lam de nyid du chos gos khyer ba'i mi yang gal te 'gro na/ de ni 'dir tha dad pa ma yin par 'gro ba'i mi yin te/ mtshams med pa dgon pa la sogs pa'i lam du tha dad pa ma yin par 'gro ba'i mi de dang 'gro ba la ni 'dom bzhi bcu rtsa dgu tshun chad nye 'khor yin no/ /mtshams byas pa'i lam du ni mtshams nyid rnam par gzhag tu rung ngo / /zheng du lam gcig tu gtogs pa nyid ji ltar rig par bya zhe na/ zheng ji tsam tshun chad du 'gro ba na/ skye bo dag gis lam gcig tu gtogs pa nyid du shes pa de tsam tshun chad ni 'dir zheng las lam gcig tu gtogs pa nyid yin no/ /'dir mi zhes smos pa ni mtshon pa tsam du zad do/ /sngar phyir chos gos thal ba dang / /lus pa thams cad la tshigs de tshun chad nye 'khor yin no/ /gang gi phyir nye 'khor ni/ kho ra khor yug tu 'dom re re'o zhes bya ba'i mdo de'i dmigs kyis bsal ba'i rnam pa de dag yin pa de'i phyir/ 'dir lus kyis non pa'i phyogs nyid nas brtsams te/ 'dom bzhi bcu rtsa dgur gzhal bar rig par bya'i/ 'dom gang gi mtha' nas ni ma yin no/ /mtshams gzhan ni ma yin no zhes bya ba la/ gzhan gyi mtshams ni mtshams gzhan te/ mtshams gzhan de ni drung na 'dug kyang nye 'khor ma yin te/ mtshams rnam par gzhag pa ni rang dbang tha dad pa'i phyir ro/ /dbus nas rgyang grags kyi mtha' phan chad na ni tha dad pa nyid do zhes bya ba ni/ phyogs thams cad du shing ljon pa'i yal ga dang / lo ma la sogs pa 'brel pa dang / grong khyer gyi steng la sogs pa 'brel pa dang / thag pas 'brel pa la sogs pas khyab pa'i gnas su ni dbus nas brtsams te/ phyogs thams cad du rgyang grags gcig gi nang tshun chad ni nye 'khor yin gyi/ rgyang grags gcig gi mtha' phan chad ni gnas dang nye 'khor tha dad pa nyid do/ /'di skad bstan te/ dge slong gis dbus nas ltos te/ rgyang grags gcig gi mtha'i phyi rol du chos gos 'jog cing rang dbus kyi gnas su skya rengs 'char bar byed na/ 'di ltar dpag tshad tsam du shing ljon pa'i yal ga dang / lo ma dang 'brel ba nyid la sogs pa yod du zin kyang / dge slong de chos gos dang 'bral ba kho nar 'gyur ro/ /lung gi gzhung bstan pa'i phyir nags zhes bya ba ni/ shing ljon pa'i gnas so/ /de la ji srid du yal ga dang / lo ma dang / me tog dang / 'dab ma dang / 'bras bu dag phan tshun 'brel par gyur ba der dge slong gis rgyang grags kho ra khor yug gar dga' bar chos gos bzhag ste/ der gar dgar bar skya rengs 'char bar bya'o zhes ma mo las gsungs pa de mdo 'dir bsdus pa yin te/ grong khyer thog 'brel pa la sogs pa gzhan du yang rung ba'i phyir spyir rnam par gzhag go/ /'bral ba'i spang ba rnam par 'byed pa'o zhes bya ba de rnam par 'byed pa'i skabs rdzogs so// //'bral ba'i spang ba zhu ba'i skabs nas 'byung ba bsdu ba'i phyir/ dam dum du gyur pa la byin gyis brlabs pa med par mi 'gyur ro zhes bya ba smras te/ chos gos la sogs pa dam dum du gyur pa la byin gyis brlabs pa med par mi 'gyur te/ 'di ltar byin gyis brlabs pa ni rang gi nyid la brten pa yin pas/ dam dum du gyur pa de las/ rang gi nyid dang 'bral bar mi 'gyur ba'i phyir ro/ /spang ba la ma chags pa ma yin no zhes bya ba ni/ chos gos la sogs pa spang ba la byin gyis brlabs pa mi 'chags pa ma yin te/ 'chags pa kho na'o/ /gzhung kha cig las dge slong gis chos gos de nyid dgung bcu 'das pa yang lags la/ de nyid du dgung gcig 'bral ba yang lags pa mchis sam/ bka' stsal pa/ yod de chos gos zhag bcu 'das pa yin la/ dge slong gis kyang de byin gyis brlabs te/ mtshams kyi phyi rol du skya rengs 'char bar byed pa'o zhes gsungs pa de bsdus pa yin no/ /dge 'dun gyi la yang ngo zhes bya ba ni/ chos gos la sogs pa la byin gyis brlab pa mi 'chags pa ma yin no/ /de las 'bral bar 'gyur ro zhes bya ba ni/ dge 'dun gyis byin gyis brlabs pa de las 'bral bar 'gyur ba kho na ste/ 'bral ba'i rgyu ni byin gyis brlabs pa yin gyi/ rang gi nyid ni ma yin pa'i phyir ro/ /gzhan gnas pas gzhan gyi gnas mi nyams so zhes bya ba ni/ lta ba mi mthun pa dang / mtshan mi mthun pa gzhan gnas pas de'i rgyus dge slong gzhan gyi gnas gang yin pa de mi nyams te/ yongs su btang bar mi 'gyur ro zhes bya ba'i tha tshig go/ /'di skad bstan te/ yon bdag cig gis chos 'di pa dang / phyi rol pa'i rab tu byung ba'i spyi la bsngos pa'i gnas thun mong de na dge slong gnas pa las/ gal te dge slong gi gnas der mu stegs can nam dge tshul la sogs pa yang gnas par byed na de lta na yang gnas de nyid dge slong des snga na gnas pas sam/ ris su bcad pa'i bar chad kyis bcad pa la sogs pas bdag gir bsgrubs zin pas ji srid du dge slong de gnas de la 'jog pa dang / 'jug pa dang / 'byung ba la sogs pa'i dbang yod pa de srid du gnas de mi nyams te bral bar mi 'gyur ro/ /de bzhin du gnas de na gal te mu stegs can nam dge tshul la sogs pa gnas par gyur pa las/ dge slong yang gnas par byed na yang mi dbang ba ma yin par shes par bya'o/ /'dir gzhung 'di yi ge kha cig las dge slong gis mu stegs can gyi gnas su chos gos bzhag ste/ dge 'dun gyi gnas nye 'khor gcig par gnas par bgyid na/ ltung bar mi 'gyur ba mchis sam/ bka' stsal pa yod de/ mu stegs can dang lhan cig tu bskos par gyur par ro zhes gsungs pa yin no/ /shing ljon pa la yang de dang 'dra'o/ /'dir bskos pa zhes bya ba ni gnas gcig la gnyis dbang bar byas pa yin par rig par bya'o/ /gal te de la gcig kho na dbang ba yin gyi/ cig shos mi dbang na ni de'i tshe/ gnas tha dad pa kho na yin no/ /chos gzhan pa dang 'di pa dag ni lta ba las zhes bya bas ma 'phangs pa ma yin no zhes bya ba ni/ chos gzhan pa dang chos 'di pa ni chos gzhan pa dang 'di pa dag ste de gnyis ni sngar mdo las lta ba las zhes smos pa des ma 'phangs pa ma yin te/ 'di ltar 'phangs pa kho na yin no/ 'di skad bstan te/ sngar mdo las nor las dang / lta ba las dad pa tha dad pa ma yin pa'i yang ngo zhes smos pa der bdag po nor las dang lta ba las dad pa tha dad pa ma yin pa rnams kyi gnas ni tha dad pa nyid ma yin la/ nor las dang lta ba las dad pa tha dad pa rnams kyi gnas ni tha dad pa nyid do zhes bstan pa'i mdo de'i lta ba las dad pa tha dad pa rnams kyi gnas tha dad pa nyid do zhes bya ba'i tshig des chos gzhan pa mu stegs can la sogs pa dang / chos 'di pas de bzhin gshegs pa'i nyan thos dag ma 'phangs pa nyid ma yin te/ 'di ltar 'phangs pa nyid yin no/ /de ltar na dge slong gis chos gzhan pa'i gnas su chos gos 'jog la/ chos 'di pa'i gnas su skya rengs 'char bar byed na de'i tshe de chos gos dang 'bral ba kho nar 'gyur ro/ /thun mong ma yin pa dag gis sgo gang yang ma yin no zhes bya ba ni/ mdo snga mas bstan pa'i thun mong ba dag gis zhes bya ba de dag gis sgo gang yang ma bsdus pa ma yin te/ bsdus pa kho na'o/ /'di skad bstan te/ sngar mdo las bdag po gcig pa nyid ma yin pa'i bar gyi mtshams rnams ni tha dad pa nyid do zhes smos pa der gnas rnams ni tha dad pa nyid do/ /sgo la sogs pa gang dag yin pa de dag ni thun mong ngo zhes bstan pa des sgo gang dang / sgo dang 'brel pa'i gnas thun mong ba nyid ma 'phangs pa ma yin te/ 'phangs pa kho nar shes par bya'o/ /des na mtshams tha dad pa'i khyim du chos gos gzhag ste/ sgo gang du skya rengs 'char bar byed na ltung ba med do/ /mdo de gnyis kyi gzhung ni 'di yin te/ dge 'dun gyi gnas dang / mu stegs can gyi gnas nye 'khor gcig par gnas par byed na/ sgo gang du gnas pa la ltung ba med do zhes gsungs pa yin no/ /nor las zhes bya bas pha dang bu dag las kyang ma yin no zhes bya ba ni/ sngar mdo las nor las dang lta ba las dad pa tha dad pa ma yin pa'i yang ngo zhes smos pa der bdag po nor las dang / lta ba las dad pa tha dad pa ma yin pa rnams kyi gnas ni tha dad pa nyid ma yin la nor las dang / lta ba las dad pa tha dad pa rnams kyi gnas ni tha dad pa nyid do zhes bstan pa'i mdo de'i nor las dad pa tha dad pa rnams kyi gnas tha dad pa nyid do zhes bya ba'i tshig des pha dang bu dag kyang ma 'phangs pa ma yin te/ 'di ltar 'phangs pa kho na'o/ /de ltar na dge slong gis nor tha dad pa'i bu'i khyim du chos gos bzhag ste/ pha'i khyim du skya rengs 'char bar byed na de chos gos dang 'bral ba kho nar 'gyur ro/ /spangs pa nyid kyang de dang 'dra'o zhes bya ba ni/ pha dang bu dag nor gyis tha dad pa nyid kyis ni tha dad pa nyid du bstan la/ tha dad pa ma yin pa nyid kyis ni tha dad pa ma yin par bstan pa de nyid kyis lhung bzed khas phub pas sam/ khrims su bya bas spangs pa nyid kyang de dang 'dra bar rig par bya'o/ /de ltar na nor tha dad pa'i pha spangs te/ bu las bsod snyoms la sogs pa len par byed na ltung bar mi 'gyur la/ nor tha dad pa'i bu spangs te pha las bsod snyoms la sogs pa len par byed na yang ltung ba med par rig par bya'o/ /nyal po byed par shom pa nyid kyang ngo zhes bya ba yang nor gyis tha dad pa nyid kyis tha dad pa nyid du bstan la/ tha dad pa ma yin pa nyid kyis ni tha dad pa ma yin par bstan pa de nyid kyis nyal po byed par shom pa nyid kyi khyim yang de dang 'dra bar rig par bya'o/ /'di skad bstan te/ khyams sam/ dag ra 'am/ khang khyim mam/ pho brang gcig na gnas mal du ma yod la/ gnas mal de dag na skyes pa dang bud med dag nyal po byed pa la dge slong gis phyis gnon byas nas 'dug gam/ skyabs yod pa na 'greng bar byed na gal te skyes pa de dag nor tha dad pa nyid ma yin par gyur na ni nor tha dad pa nyid ma yin pa'i gnas mal de dag na 'dug pa'am 'greng bar byed pa'i dge slong la ltung ba gcig kho nar 'gyur ro/ /'on te skyes pa de dag nor tha dad pa nyid yin par gyur na ni nor tha dad pa nyid yin pa'i gnas mal de dag na 'dug pa'am 'greng bar byed pa'i dge slong la nyal po shom par byed pa'i khyim na 'dug pa'am 'greng ba las byung ba'i ltung byed kyang nyal po byed pa'i gra du yod pa de re re las re re 'byung bar 'gyur ro/ /'dir gzhung ni phran tshegs kyi zhu ba lhung bzed khas dbub pa las khyim bdag la khyim zhig yod la de la bu rab tu mang po dag bdog cing / de yang nor tha dad pa'i khyim ma yin la/ khyim bdag rnams kyang lhan cig gnas pa yin na/ khyim gcig yin par brjod par bya ste/ phyis gnon ma byas shing ma 'dug pa yang ma yin la/ skyabs med pa yang ma yin te/ phyis gnon dang / 'dug pa gcig dang / skyabs yod pa na 'greng ba yang gcig kho nar 'gyur ro/ /gal te de nor tha dad pa'i khyim yin la/ khyim bdag rnams kyang lhan cig gnas pa ma yin na ni khyim tha dad par brjod par bya ste/ bu de dag ji snyed pa dag dang 'brel pa ji snyed yod pa dag dang / mna' ma ji snyed de dag na 'khod pa thams cad las phyis gnon byas shing 'dug pa'am/ skyabs yod pa na 'greng ba thams cad la phyis gnon dang / 'dug pa dang skyabs yod pa na 'greng ba'i ltung byed re rer 'gyur ro zhes gsungs pa yin no/ / khyim bdag rnams kyang lhan cig gnas pa yin la zhes bya bas ni khyim gcig tu gyur pa nyid bstan to/ /grong la de yod pa de ni gtsug lag khang gi nye 'khor nyid ma yin no zhes bya ba ni/ grong la nye 'khor yod pa zhes bya ba bdog pa ni gtsug lag khang gi nye 'khor nyid ma yin no/ /'di skad bstan te/ 'di ltar grong dang gtsug lag khang gnyi ga'i nye 'khor 'brel pa nyid yin du zin kyang grong gi nye 'khor gang yin pa de gtsug lag khang gi nyen kor nyid ma yin no/ /'dir gzhung ni zhu ba las btsun pa re zhig grong dang gtsug lag khang gi nye 'khor 'brel par gyur na chos gos dang mi 'bral ba ji ltar 'tshal bar bgyi/ nye ba 'khor grong gi nye 'khor ma gtogs pa lhag ma las chos gos dang mi 'bral bar shes par bya ste/ /dper na grong gi nye 'khor du mtshams gcod par byed na yang mtshams su mi 'gyur la/ mtshams su gyur zin pa'i nang du grong gi nye 'khor zhig phyis byung na yang de'i tshe mtshams su ma gtogs par khol du dbyung bar bya ste/ khyim pa mi bgrungs pa dag lhag par gnas pa nyid yin pas tha dad par gyur pa'i phyir ro/ /de bzhin du grong gi nye 'khor yang gtsug lag khang gi nye 'khor du mi 'gyur ro zhes gsungs pa yin no/ /'bral ba'i spang ba zhu ba'i skabs so zhes bya ba de zhu ba'i skabs nas 'byung ba rdzogs so/ /'bral ba'i spang ba'o zhes bya ba zhag gcig gis 'bral ba'i spang ba'i ltung byed bshad zin to// //bam po bcu bdun pa/ zla ba gcig gis spang ba brjod par 'dod nas/ kha bskang ba la re ba med na chung ba khru gang yan chad kyang chog pa dang 'dra'o zhes bya ba smras te/ mdo snga ma dag las gos zhes smos pa'i rjes dang sbyar ro/ /gos 'khor gsum khebs pa'i tshad du chog pa bas chung ba khru gang yan chad kyang 'khor gsum khebs pa'i tshad du chog pa dang 'dra bar blta bar bya'o zhes ston to/ /gang gi tshe zhe na/ de'i phyir kha bskang ba la re ba med na zhes bya ba smras te/ 'khor gsum khebs pa'i tshad du chog par re ba med na ste/ gal te spyir thams cad kyi thams cad du chos gos rnyed par re ba rgyun chad na'o/ /de'i tshe na/ chung ba khru gang yan chad kyang chog pa dang 'dra ste/ ji ltar 'chang ba'i bslab pa'i gzhir 'khor gsum khebs pa'i tshad du chog pa zhag bcu 'das na spang bar bsdus pa de bzhin du chung ba khru gang yan chad pa 'di yang de nyid du 'dus par rig par bya ste/ de'i tshe na chung ba khru gang yan chad pa 'di yang 'khor gsum khebs pa'i tshad du chog pa de dang 'dra bar zhag bcu po de nyid kyi nang rol du gtang bar bya ba'am/ byin gyis brlab pa'am/ gzhan la sbyin par bya ba'o/ /chung ba de 'khor gsum khebs pa'i tshad du chog pa bas chung ba'o zhes bya ba smras na ci tsam du chung ba yin zhe na de'i phyir khru gang yan chad ces bya ba smras te/ khru gang yan chad kyi gos te/ khru gang gi tshad yan chad yin gyi/ de bas chung ba gru gang ba ni ma yin no/ /'dir gzhung ni de chos gos de la re ba thams cad kyi thams cad du rgyun chad par gyur na/ dge slong des chos gos de zhag bcu pa de nyid kyi nang rol du gtang bar bya'o zhes gsungs pa yin no/ /'di skad bstan te/ kha bskang ba'i bsam pa med na ni chung ba gru gang yan chad pa de zhag bcu na thug par bcang bar bya'o/ /kha bskang ba'i bsam pa yod na ni zla ba gcig la thug par gzhag par bya'o zhes bya ba de 'dir rnam par gzhag go/ / byin gyis brlab par bya ba yod pa nyid na yang ngo zhes bya ba ni/ byin gyis brlab tu rung ba'i chos gos gsum yod pa nyid yin na yang chung ba khru gang yan chad pa de chog pa dang 'dra bar blta bar bya'o/ /'dir gzhung ni mdo'i tshig las chung na kha bskang bar bya'o zhes gsungs pa dang / de'i rnam par 'byed pa ni 'di yin te/ snam sbyar gyi'am/ bla gos kyi'am/ mthang gos kyi'am zhes gsungs pa yin no/ /phran tshegs kyi zhu ba'i skabs kyi nang nas kyang gzhung 'di yin te/ zla ba gcig gi mthar chog pa'i chos gos ni 'di yin te/ gang la chos gos gsum tshang bar yod na des de gzhag par mi bya'o/ /ji ste 'jog na spang ba'i ltung byed do zhes gsungs pa yin no/ /gang la 'jog pa'i spang ba 'byung zhe na de'i phyir/ gzhan du na de ni zhag sum cu 'das na'o zhes bya ba smras te/ gzhan du na zhes bya ba ni mdo sngar bstan ma thag pa'i gnyis po las gzhan pa ste/ kha bskang ba la re ba yod pa dang / byin gyis brlab par bya ba med pa nyid na'o/ /de ni zhes bya ba ni chung ba khru gang yan chad pa'o/ /zhag sum cu 'das na'o zhes bya ba ni zhag sum cu rtsa gcig gi skya rengs dang po shar na'o zhes bya ba'i tha tshig go/ /'dir gzhung ni dge slong gis tshes la chos gos sngon po rnyed la byed du mi 'jug ces bya ba la sogs pa dang / zhu ba las kyang / bcom ldan 'das kyis dge slong des zla ba gcig gi mthar thug par chos gos gzhag par bya'o/ /chos gos ji lta bu zhig ce na/ 'khor gsum mi khebs pa gang yin pa'o zhes gsungs pa gang yin pa'o/ /kha dog la sogs pa las rigs mi mthun pa ni chog pa nyid ma yin no zhes bya ba ni/ kha dog la sogs pa las rigs mi mthun pa rnyed pa ni kha tshang ba nyid ma yin no/ /'dir rigs mi mthun pa nyid kyis kha bskang bar re ba gang yin pa'i re ba de nyid kyis kyang bzhag tu mi rung ngo / /'di skad bstan te/ kha dog la sogs pa las rigs mi mthun pa 'grub pa nyid du re ba gang yin pas ni zhag sum cur bzhag tu mi rung ste/ rigs gzhan la re ba ma yin pa'i phyir ro/ /de bzhin du 'di ltar spyir kha bskang ba la re bas gos khru gang pa zhig 'jog par byed la/ phyis rigs mi mthun pa rnyed cing sngar bzhag pa dang bsdongs na 'khor gsum khebs pa'i tshad yin du zin kyang de rnyed pas de zhag bcu'i mthar thug par mi rung ste/ rigs mi mthun pa ni ma rnyed pa dang 'dra ba'i phyir ro/ /'dir gzhung ni 'di ltar gang gi tshe de dang 'dra bar rnyed par gyur na'o zhes gsungs pa yin no/ /sogs pa zhes bya ba'i sgras rigs mi mthun pas tha dad pa bal gos dang ras gos la sogs pa lta bu thams cad bsdu'o/ /kha dog ces bya ba'i sgras ni 'dir sngon po dang / ser po dang / dmar po dang / de dag gi bye brag las byas pa dag kyang bsdu'o/ /de'i dmigs kyis bsal ba bstan pa'i phyir/ dkar po nyid ni kha dog thams cad pa nyid do zhes bya ba smras te/ dkar po'i dngos po ni dkar po nyid do/ /de ni kha dog kyang yin la thams cad pa yang yin pas/ kha dog thams cad pa ste/ de'i dngos po ni kha dog thams cad pa nyid do/ /gos dkar po nyid de la ni kha dog thams cad yod par blta bar bya ste/ dkar po ni kha dog thams cad du bsgyur du rung ba'i phyir ro/ /'di skad bstan te/ kha sogs kyi gos sngon po la sogs pa bzhag pa la kha bskang ba'i chos gos dkar po rnyed pa gang yin pa de ni rigs mi mthun pa ma yin par shes par bya ste/ dkar po ni sngon po la sogs par bsgyur du rung ba'i phyir ro/ /de bzhin du gos dkar po bzhag pa la sngon po rnyed pa gang yin pa de yang rigs mi mthun pa ma yin te/ bzhag pa de sngon po la sogs pa'i kha dog tu bsgyur du rung ba'i phyir ro/ /'dir lung ni ji ltar gos sngon po'am/ ser po'am/ dmar po'am/ mthug po'am/ srab mo rnyed pa zhes bya ba der sngon po la sogs pa'i nang du dkar po ma smos pa yin par rig par bya'o/ /gal te gos kyi kha sogs zla ba gcig tu bzhag pa las bar du kha bskang ba 'khor gsum khebs pa'i tshad cig rnyed par gyur na/ ci 'on kyang zla ba gcig gi bar du gzhag par bya'am snyam du dogs pa bsal ba'i phyir/ de rnyed na zhag bcu pa de'i dang po la bag la glon pa nyid do zhes bya ba smras te/ de zhes bya ba ni kha sogs kyi gos bzhag pa gang yin pa de dang rigs mthun pa kha bskang ba'i gos de'o/ /rnyed na zhes bya ba ni grub cing thob na'o/ /de rnyed na rnyed pa'i dus de'i tshe na/ zhag bcu pa de'i dang po la bag la glon pa nyid yin te/ zhag bcu pa de'i dang po zhes bya ba ni/ kha sogs kyi gos bzhag pa dang 'brel ba'i dus kyi zhag bcu pa dang po'am gnyis pa'am/ gsum pa gang yin pa'i zhag bcu pa'i skabs de'i dang po zhes bya ba nyi ma dang po gang yin pa de la'o/ /bag la glon pa nyid do zhes bya ba ni/ zhag bcu pa de'i dang po de la kha bskang ba'i gos phyis rnyed pa de gang / kha sogs kyi gos sngar bzhag pa de gnyis so so na 'dug kyang bla ste/ de de'i bag la glon pa nyid yin no/ /de yang gal te de'i tshe na bag la glon pa nyid na 'khor gsum khebs pa'i tshad du chog pa nyid yin na ni de'i tshe zhag bcu 'das pa de nyid la byin gyis brlab par bya'o/ /gal te byin gyis ma brlabs na zhag bcu 'das na spang ba'i ltung byed du 'gyur ro/ /ji ste de gnyis bsdongs kyang 'khor gsum khebs pa'i tshad du ma chog pa nyid yin na ni/ de'i tshe na phyis rnyed pa de yang sngar bzhag pa dang 'dra bar zla ba gcig pa'i khongs su gtogs pa yin par shes par bya ste/ sngar bzhag pa de'i shan gyi dbang gis phyi ma de snga ma'i bag la glon pa nyid yin pa'i phyir ro/ /phyi ma de la yang zla ba gcig pa de nyid rnam par gzhag par rig par bya'o/ /'dir gzhung ni dge slong des zhag bcu pa de nyid kyi nang rol du zhes gsungs pa yin no/ /zla ba gcig pa'i spang ba 'di la zhag bcu pa dang po dang gnyis pa dang gsum pa dag ni shan gyi phyir phan tshun ltos pa ni med do/ /de ltar na yang gal te dge slong gis kha sogs kyi gos khru gang gi tshad cig bzhag nas zhag bcu gcig pa la kha bskang ba rnyed do/ /cho ga na ni zhag bcu gnyis pa de nyid kyi nang rol du byin gyis brlab par bya ba'am/ gtang bar bya'o/ /gal te byin gyis rlob par mi byed par gtong bar mi byed na zhag nyi shu gcig la spang ba'i ltung byed du 'gyur ba yin no/ /de lta ma yin te gal te zhag bcu pa dang po'i shan gyi shugs kyis phyi ma de la yang shan rnam par gzhag par gyur na ni de'i tshe nyi ma de nyid la gos de byin gyis brlab par bya ba'am/ gtang bar bya dgos par 'gyur zhing byin gyis mi rlob bam gtong bar mi byed na zhag bcu gnyis pa la spang pa'i ltung byed du 'gyur ba zhig na/ de ltar ni mi bzhed de/ de ltar yang 'dir zhag bcu pa nyid ma yin te/ 'di ltar dge slong des zhag bcu dgu tshun chad du chos gos sngon po rnyed na chos gos de zhag nyi shu po de nyid kyi nang rol du byin gyis brlab par bya ba'am/ gtang bar bya ba'am/ gzhan la sbyin par bya'o/ /byin gyis mi rlob bam/ mi gtong ngam/ gzhan la mi sbyin na zhag nyi shu gcig gi skya rengs shar na spang pa'i ltung byed du 'gyur ba yin no/ / gang gi phyir 'dir rang gi zhag bcu pa la ltos te/ rnam par gzhag par mdzad pa de'i phyir zhag bcu pa dang po'i shan la ltos te 'dir rnam par gzhag par mi bya'o/ /'di man chad ni gos ji lta bu la dang / tshad ji tsam du byin gyis brlab pa 'chags par 'gyur ba dang / de las bzlog pa la spang bar 'gyur ba de brjod par bya ste/ sar pa las snam sbyar gyi mtha' ni nyi rim mo zhes bya ba ni/ gal te sar ba las snam sbyar byed na snam sbyar de'i rim pa'i tshad kyi mtha' ni nyi rim ste/ de la rim pa lhag pa gzhan mi bya'o zhes bya ba'i tha tshig go/ /sar pa zhes bya ba ni gang dus tshigs gcig rangs par ma spyad pa de ni sar pa zhes bya'o/ /gding ba'i yang ngo zhes bya ba yang sar pa las byed na de'i rim pa'i tshad kyi mtha'i nyi rim mo/ /bla gos dang mthang gos gnyis ni chig rkyang ngo zhes bya ba ni/ bla gos dang mthang gos gal te sar pa las byed na de gnyis kyi rim pa'i tshad kyi mtha' ni chig rkyang ngo / /'dir gzhung ni gal te dge slong des bcag pa dang / kha bsgyur ba dang / btsem par nus na dge slong des gos de las snam sbyar dang gding ba ni nyi rim du bya'o/ /bla gos dang mthang gos ni chig rkyang du bya'o zhes gsungs pa yin no/ /dus tshigs su spyad pa las ni nyis 'gyur du'o zhes bya ba ni/ mdo snga ma dag las nyi rim dang chig rkyang zhes smos pa de dag las ltos te/ gal te gos dus gcig tu spyad pa las de dag byed na nyis 'gyur du bya ba'o/ /'di skad bstan te/ snam sbyar dang gding ba gnyis ni bzhi rim du bya'o/ /bla gos mthang gos gnyis ni nyi rim du bya'o zhes bya ba'i tha tshig go/ /dus tshigs su spyad pa'i gos ni bgo zas chung ba yin te/ dus tshigs gsum po dag las dus tshigs gang yang rung ba'i dus tshigs su spyad pa gang yin pa'o zhes gsungs pa'i phyir ro/ /phyag dar khrod las byas pa dag la ni nges pa med do zhes bya ba ni/ phyag dar khrod las byas pa'i chos gos dag la ni rim pa dag nges pa med do/ /'dir gzhung ni phyag dar khrod la ni ji tsam 'dod par bya'o zhes gsungs pa yin no/ /rnying pa nyid dang dengs pa nyid la ni ci dgos pa lhag par sbyar ro zhes bya ba ni/ phyag dar khrod ma yin pa la yang lhan pa dag lhag par sbyar bar bya'o/ /gang gi tshe zhe na/ de'i phyir rnying pa nyid dang dengs pa nyid la zhes bya ba smras te/ chos gos so/ /rnying pa nyid ces bya ba ni rang zad pa'o/ /dengs pa nyid ces bya ba ni sgo skyes kyis bshud pa la sogs pas bsrabs par gyur pa'o/ /ci dgos pa zhes bya ba ni/ ji tsam dgos pa ste/ ji tsam spyad par bya dgos pa zhes bya ba'i tha tshig go/ /lhag par zhes bya ba ni/ rim pa'i mtha' sngar bstan pa las so/ /sbyar ro zhes bya ba ni lhan pa dag go/ /mdo 'di ni ma mo las gsungs pa bsdus pa yin no/ /lhag par sbyar ba nyid du mi bya'o zhes bya ba ni/ snam sbyar la sogs pa phyag dar khrod las byas pa ma yin pa ma rnying ma dengs pa la rim pa sngar bstan pa las lhag par mi sbyar ba ste/ sbyor na sbyar ba nyid na thams cad nyes byas so/ /spang bar 'gyur ba nyid kyang yin no zhes bya ba ni/ lhag par sbyar ba'i rim pa de dag bcu 'das na spang ba'i ltung byed du 'gyur ro/ /'di skad bstan te/ de la rim pa lhag par sbyar ba gang yin pa de spang bar 'gyur gyi/ rim pa ji skad bstan pa dag ni spang bar mi 'gyur ro/ /rigs pa can byi dor byas nas 'di nyid du sbyar bar bya'o/ /snyam pa'i sems ma bskyed par dbog par mi bya ba'o zhes bya ba la/ rim pa snga ma sbyar zin pa ni byin gyis brlab pa'i 'os yin pas rigs pa dang ldan pa yin pa'i phyir/ rigs pa can zhes bya ba ste/ rim pa rigs pa can de srid du bcag pa la sogs pa'i byi dor byas nas chos gos kyi 'di nyid du phyir sbyar bar bya'o snyam pa'i rnam pa de lta bu'i sems ma skyes pa de srid du dbog par mi bya'o/ /'di skad bstan te/ gal te dge slong chos gos las rim pa gzhan byi dor bya ba'i ched du dbog par 'dod pas ji srid du bcag pa la sogs pa'i byi dor byas nas phyir 'di nyid du sbyar ro snyam pa'i sems ma bskyed kyi bar du dbog par mi bya'o/ /dbog par byed na 'gal tshabs can du 'gyur ro/ /gang yang rung bas phog pa ma sbyar ba'i snga rol du spang bar 'gyur ba nyid do zhes bya ba la/ gang yang rung bas zhes bya ba ni/ ji ltar yang rung ba ste/ sngar bstan ma thag pa'i rnam pa de lta bu'i sems sam sems kyi rnam pa gzhan gyis so/ /de lta bu'i sems kyis sbyar ma gzhan phog pa ni phyir de nyid du ma sbyar ba'i snga rol du zhag bcu 'das na spang ba'i ltung byed du 'gyur ba nyid yin no/ /sbyar na ni gcig pa nyid du gyur pa yin pas nyes pa med do/ /sbyar ba rnam par gzhag pa dang 'brel ba yin pas 'di brjod par bya ste/ snam sbyar gyi snam phran dag ni dgu yan chad nyi shu rtsa lnga man chad de zung ma gtogs so zhes bya ba ni/ chos gos snam sbyar gyi snam phran gyi grangs ni dgu yan chad nas nyi shu rtsa lnga man chad gang yang rung ba yin par rig par bya'o/ /zung ma gtogs so zhes bya ba ni grangs zung rnams ma gtogs pa ste/ 'di lta ste/ bcu dang bcu gnyis dang bcu bzhi dang bcu drug dang / bco brgyad dang / nyi shu dang nyi shu gnyis dang nyi shu bzhi dag ma gtogs pa'o/ /de las lhag pa dag gis snam sbyar mi bya'am zhe na de'i phyir/ de yan chad ni tshem bu'o zhes bya ba smras te/ snam sbyar nyi shu rtsa lnga po de yan chad las lhag pa dag gis snam bu sbyar ba ni tshem bu ste/ de bas na snam sbyar la ni de las lhag par mi bya'o/ /snam phran de dag la glegs bu dang glegs bu phyed ji ltar rnam par gzhag ce na de'i phyir/ dang po gsum la ni de dag gi glegs bu phyed dang gsum pa nyid do zhes bya ba la ni/ dang po gsum la ni zhes bya ba ni snam sbyar gsum pa dang po la ste/ snam phran dgu pa dang / bcu gcig dang / bcu gsum pa'i snam sbyar dag la'o/ /de dag gi zhes bya ba ni/ snam phran dgu dang / bcu gcig dang / bcu gsum de dag gi'o/ /de dag gi ni glegs bu phyed dang gsum pa nyid do/ /snam phran gang la glegs bu phyed dang gsum yod pa de ni glegs bu phyed dang gsum pa'o/ /de'i dngos po ni glegs bu phyed dang gsum pa nyid do/ /'dir snam phran zhes bya ba'i sgras ni tshal bu la bya'i/ glegs bu dang glegs bu phyed la ni mi bya'o/ /gnyis pa la ni glegs bu phyed dang bzhi pa nyid do zhes bya ba la/ gnyis pa la ni zhes bya ba ni/ snam sbyar gsum pa gnyis pa la ste/ snam phran bco lnga pa dang / bcu bdun pa dang / bcu dgu pa'i snam sbyar dag la'o/ /snam phran de dag ni glegs bu phyed dang bzhi pa nyid do/ /gsum pa la ni glegs bu phyed dang lnga pa nyid do zhes bya ba la/ gsum pa la ni zhes bya ba ni/ snam sbyar gsum pa la ste/ snam phran nyi shu gcig pa dang / nyi shu gsum pa dang / nyi shu lnga pa'i snam sbyar dag la'o/ /snam phran de dag ni glegs bu phyed dang lnga pa nyid do/ /snam phran gang dag glegs bu phyed dang lnga yod pa de dag ni glegs bu phyed dang lnga pa'o/ /de dag gi dngos po ni de nyid do/ /bla gos ni snam phran bdun dang / glegs bu phyed dang gsum pa'o/ /mthang gos ni snam phran lnga dang glegs bu phyed dang gnyis pa'o/ /de gnyis ni chos gos byin gyis brlab pa'i sngags las shes par bya'o/ /bcom ldan 'das kyis bla gos dang mthang gos gnyis kyi snam phran gyi tshad ni snam sbyar gyi tshad ltar gang du yang bka' ma stsal to/ /snam sbyar ni nges par dras te bya ba yin no/ /bla gos dang mthang gos gnyis ni dras te bya bar ma nges te/ ci dgar spyad pa yin pas gang dras te byed par 'dod pa yang de bzhin du byar rung la/ ma dras par byed par 'dod na yang de bzhin du rung ngo / /de ltar yang ma mo las nye ba 'khor gyis zhus pa las/ bcom ldan 'das kyis snam sbyar ni nges par dras te bya'o/ /bla gos dang mthang gos ni nges pa med do zhes gsungs so/ /'dul ba'i tshig le'ur byas pa byed pas kyang / snam sbyar nges par dras te bcang / /gzhan dag ma nges gang gi phyir/ / 'dod chung rang gi chos gos kyis/ /las kyi sdug bsngal 'gyur phyir ro/ /zhes smras so/ /de dag gi tshad ji tsam zhe na de'i phyir/ byin gyis brlab tu rung ba chen po dag ni rang gi khru gsum dang lnga dag go zhes bya ba smras te/ snam sbyar dang bla gos dang mthang gos byin gyis brlab tu rung ba chen po dag ni tshad gcig ste zheng du khru gsum chur khru lnga'o/ /chos gos gsum po byin gyis brlab tu rung ba gang dag gi zheng du rang gi khru gsum/ chur rang gi khru lnga'i tshad ji skad bstan pa de las lhag par byed na spang bar 'gyur ba nyid do/ /de bzhin du rim pa du ma bya'o snyam pa'i bsam pas rim pa rigs pa can du dgongs pa ji snyed pa de las lhag par byed na yang spang bar 'gyur ba nyid do/ /rim pa du ma bya'o snyam pa'i bsam pa med de/ rim pa gcig bya'o snyam pa las de las lhag par byed na yang spang bar 'gyur ba nyid do/ /dras te bya'o snyam pa'i bsam pa yod pas chos gos dras pa gsum gyi tshad las lhag par byed na spang bar 'gyur ba nyid med do/ /dras te bya'o snyam pa'i bsam pa med pas ma dras pa kho na bya'o snyam pa las/ ma dras pa'i tshad gang yin pa las lhag par byed na yang spang bar 'gyur ba nyid do/ /gos la ji tsam du snam phran gyi bsam pas 'jug pa de srid du nyes par 'gyur ba nyid med do/ /gang gi tshe na spyir gos tsam zhig bdag gir byed pa na chos gos chung ngu bya'o snyam pa las chos gos chen po 'am/ 'bring byas te 'jog par byed pa la yang nyes pa med de/ 'di ltar chos gos bya'o snyam du chos gos la gnas pa na chos gos thams cad kyi tshad de la yang gnas pa nyid du rig par bya ba'i phyir ro/ /zheng ngam chur gang yang rung ba lhag na bcad de spro'o snyam du sems pa la yang nyes pa med do/ /chung ngu dag ni gnyi ga las khru phyed phyed phri ba'o zhes bya ba ni/ chos gos snam sbyar dang bla gos dang mthang gos chung ngu dag gi tshad ni sngar chen po dag gi zheng du khru gsum zhes bya ba dang / chur khru lnga zhes bya ba'i tshad de gnyi ga las khru phyed phyed phri ba yin par rig par bya'o/ /'bring rnams kyi tshad ni bar ma'o zhes bya ba ni/ chos gos snam sbyar dang / bla gos dang / mthang gos 'bring rnams kyi tshad ni chen po rnams kyi khru gsum dang lnga gang yin pa dang / chung ngu rnams kyi khru phyed dang gsum dang / phyed dang lnga gang yin pa de'i bar ma'i tshigs gang yang rung ba yin par rig par bya'o/ /mthang gos kyi tshad kyi rnam pa gzhan bstan pa'i phyir/ mthang gos ni de dang lnga yang yin la de dang bzhi yang yin no zhes bya ba smras te/ mthang gos kyi tshad ni zheng du khru do dang chur khru lnga yang yin la/ zheng du khru do dang chur khru bzhi yang yin no zhes bya bar sbyar ro/ /'khor gsum khebs pa nyid yan chad kyang ngo zhes bya ba yang mthang gos kyi tshad kyi rnam pa gzhan te/ zheng du khru do chur khru bzhi pa man chad nas 'khor gsum khebs pa nyid yan chad kyi bar gang yang rung ba yin par rig par bya'o/ /zheng du khru do dang chur khru lnga pa dang / zheng du khru do dang chur khru bzhi pa nyi tsher ma zad do/ /khru'i don ni lus kyi cha bdun las gnyis so zhes bya ba ni khru zhes sngar smos pa'i khru tshad ston te/ lus cha mnyam pa bdun du rnam par phye ba gang dag yin pa de dag las cha gnyis pa ni khru'i tshad kyi don yin gyi/ lus la gru mo nas gung mo'i rtse mo'i bar yod pa de'i tshad ni ma yin no/ /de bas na tshad kyi rnam pa de nyid kyis khrur byas pa'i khru tshad kyis chos gos rnams kyi tshad rig par bya'o/ /tshad kyi rnam pa de yang yul thams cad la ni mi dgos te/ 'di ltar gang zag gi lus la ltos nas lag pa'i tshad thung ba'am/ lag pa'i tshad ring ba de'i ched du 'di gsungs pa yin gyi/ gang zag gang lus kyi rkyen dang lag pa'i tshad du 'tsham pa dag la ni rang rang gi khru nyid 'dir yang tshad ma yin no/ /mi yog na ral ga dpung chad bya'o zhes bya ba ni/ gang gi lus che ches pas mthang gos kyi tshad de tsam gyis lus mi khebs na de'i tshe/ mi yog ces bya ba ni mi khebs pa yin pas lus dang 'tsham pa'i ral ga dpung chad byas te khebs par yog par bya'o/ /zla bas spang ba rnam par 'byed pa'o zhes bya ba 'jog pa'i spang ba'i ltung ba rnam par 'byed pa'i skabs nas 'byung ba rdzogs so// //zla bas spang ba zhu ba'i skabs nas 'byung ba bsdu ba'i phyir de bas dman pa ni chung ba dang 'dra ste nyes byas su 'gyur ba nyid do zhes bya ba smras te/ de bas zhes bya ba la/ de zhes bya ba'i sgra ni chung ba la snyegs te/ khru gang gi tshad do/ /de bas dman pa ni zhes bya ba ni chung ba de bas kyang dman pa ste/ khru gang gi tshad las chung ba'o/ /chung ba dang 'dra ba ste zhes bya ba chung ba zhes bya ba'i sgra 'di ni khru gang gi tshad nyid la bya ste/ snga ma khru gang gi tshad pas dman pa ste/ de khru gang gi tshad 'di dang 'dra bar 'gyur ba ni 'dra ba ste/ de bas dman pa de yang chung ba zla ba gcig 'das na spang bar 'gyur ba dang 'dra bar zla ba gcig 'das na nyes byas su 'gyur ba nyid do/ /'di skad bstan te/ ji ltar kha sogs kyi gos chung ngu khru gang gi tshad gzhag pa la kha bskang ba'i gos la re ba yang yod cing byin gyis brlab par bya ba med du zin na yang zla ba gcig 'das na spang bar 'gyur ba de bzhin du de bas chung ba khru gang gi tshad pas chung ba de yang gzhag na kha bskang ba'i gos la re ba yod cing byin gyis brlab par bya ba med du zin kyang / zla ba gcig 'das na nyes byas su 'gyur ro/ /ji ltar kha sogs kyi gos chung ngu khru gang gi tshad gzhag pa la kha bskang ba'i gos la re ba med cing byin gyis brlab par bya ba med du zin na yang zhag bcu 'das na spang bar 'gyur ba de bzhin du de bas chung ba khru gang gi tshad pas chung ba de yang bzhag na/ zhag bcu 'das na nyes byas su 'gyur ro/ /de'i dmigs kyis bsal ba bstan pa'i phyir/ 'khor gyi phyed ma khebs na ni re ba med pa nyid do zhes bya ba ni/ 'khor gsum gyi tshad sngar bstan pa de las 'khor gyi mchu dang zheng gi phyed tshun chad mi khebs pa'i gos kha bskang ba la re ba med pa nyid ni zhag bcus spang ba'i phyogs su gtogs pa yin gyi/ zla ba gcig par gtogs pa ni ma yin no/ /'di skad bstan te/ gos gang gis 'khor gsum gyi phyed mi khebs pa de la kha bskang ba la re ba yang gtan med pa de ni zhag bcus spang ba'i phyogs su gtogs pa yin gyi/ zla bas spang bar gtogs pa nyid ni ma yin no/ /de bas na de ni rang gi zhag bcu pa 'dis na nyes byas su 'gyur ba nyid yin gyi/ zla ba 'das pas nyes byas su 'gyur ba ni ma yin no/ /rung ba ma yin pa yang ngo zhes bya ba ni/ kha bskang ba la re ba med pa nyid yin no/ /'dir gzhung ni gos ji lta bu zhig gzhag par bgyi/ rung ba gang yin pa'o/ /rung ba ji lta bu lags/ bcom ldan 'das kyis ma bkag pa gang yin pa'o zhes gsungs pa yin no/ /gdong phyis dang chu tshags dang / stan 'jam dang dre'u rngog la sogs pa'i yo byad kyi gos byin gyis ma brlabs pa dag go zhes bya ba ni/ gdong phyis la sogs pa yo byad du gyur pa'i gos gdong phyis la sogs pa nyid du byin gyis ma brlabs pa de dag kyang kha bskang ba la re ba med pa nyid yin te/ zhag bcus spang ba kho na nyid do zhes bya ba'i tha tshig go/ /'di skad bstan te/ yo byad du gyur pa'i gos gdong phyis la sogs pa gang dag gdong phyis la sogs par byin gyis brlabs pas byin gyis ma brlabs pa de dag ni zla bas spang ba'i phyir re ba med par gyur pa yin par rig par bya ste/ zhag bcu 'das na spang bar 'gyur ba nyid yin pa'i phyir ro/ /de dag ni de ltar gdong phyis la sogs pa nyid du bya bar 'os pa nyid yin gyi/ gzhag par 'os pa ni ma yin no/ /gang dag gdong phyis la sogs par 'dir gzhung ni yi ge kha cig las yo byad kyi gos byin gyis ma brlabs pa ni zhag bcu 'das na spang bar 'gyur ro/ /gdong phyis dang chu tshags dang stan 'jam dang / dre'u rngog byin gyis brlabs pa dag la ni ltung ba med do zhes gsungs pa yin no/ /yo byad kyi gos gang dag gdong phyis la sogs pa nyid du ma byas pa de dag ni zla ba gzhag par 'os pa dang / de las 'das na yang spang bar 'gyur ba nyid yin no/ /zla bas spang ba zhu ba'o zhes bya ba 'jog pa'i spang ba'i ltung byed zhu ba'i skabs nas 'byung ba rdzogs so/ /zla bas spang ba'o zhes bya ba 'jog pa'i spang ba'i ltung byed bshad zin to// //'khrur 'jug pa'i spang ba brjod pa'i skabs dang bcas pa brjod par 'dod nas/ sbrum ma dben par gzhag go zhes bya ba smras te/ sbrum ma zhes bya ba ni/ mngal na bu yod pa ste/ rab tu byung ba mngal na bu yod pa de dben pa'i phyogs su gzhag par rig par bya'o/ /gzhan du 'dug na de la nyes byas su 'gyur ro/ /der dge slong ma rnams kyis yal bar mi dor ro zhes bya ba ni/ mdo snga mar bstan pa'i gnas dben pa'i rnam pa de lta bu'i gnas der gal te dge slong ma de mi sgrub na dge slong ma gzhan rnams kyis yal bar mi dor ro zhes bya ba'i tha tshig go/ /de la zan sbyin par bya'o zhes bya ba ni dge slong ma sbrum ma de la dge slong ma gzhan dag gis zan sbyin par bya'o/ /ltung ba'o gnas 'byung ba dag gi yan lag ni nye du dang nye du ma yin pa dag yin pas de'i phyir nye du'i mtshan nyid brjod par 'dod nas/ pha ma dag nas bdun pa tshun chad las gang yang rung ba snga ma gcig las skyes pa yang nye du yin no zhes bya ba smras te/ pha ma dag ces bya ba ni pha dang ma ni pha ma dag go/ /de bas na pha ma dag nas bdun pa tshun chad ces bya ba ni pha'i phrugs bdun pa tshun chad dang ma'i phrugs bdun pa tshun chad ces bya ba'i tha tshig go/ /mdo las pha ma zhes smos pa'i sgra ni pha'i rgyud ma'i yan lag dang bcas pa dang / de bzhin du ma'i rgyud pha'i yan lag dang bcas par zhes bya bar sbyar ro/ /de ltar na pha'i pha dang de'i yang pha dang / de lta bu la sogs pa ni pha'i rgyud do/ /pha de'i ma gang yin pa dang / ma de'i yang ma dang / de lta bu la sogs pa ni pha'i rgyud ma'i yan lag dang bcas pa'o/ /de bzhin du ma'i ma dang / ma de'i yang ma dang / de lta bu la sogs pa ni ma'i rgyud do/ /ma de'i pha gang yin pa dang / pha de'i yang pha dang / de lta bu la sogs pa ni ma'i rgyud pha'i yan lag dang bcas pa yin par rig par bya'o/ / de ltar byas na pha'i rgyud kyang ma'i yan lag dang bcas pa yin pa'i phyir phrugs su gyur pa yin la/ de bzhin du ma'i rgyud kyang pha'i yan lag dang bcas pa yin pa'i phyir phrugs su gyur pa yin no/ /pha ma dag nas bdun pa tshun chad las pha'i rgyud ma'i yan lag dang bcas pa phrugs su gyur pa dag gam ma'i rgyud pha'i yan lag dang bcas pa phrugs su gyur pa dag las/ gang yang rung ba pha'i rgyud ma'i yan lag dang bcas pa'am/ ma'i rgyud pha'i yan lag dang bcas pa snga ma gcig las skyes pa ste/ snga ma'i pha'i rgyud las skyes pa'am/ snga ma ma'i yan lag las skyes pa'am/ snga ma ma'i rgyud las skyes pa'am/ snga ma pha'i yan lag las skyes pa de ni nye du zhes bya'o/ /yang zhes bya ba'i sgras ni gnyis po las snga nas skyes pa 'ba' zhig nye du yin par ma zad pa'o/ /'di skad bstan te/ 'dir nye du zhes bya ba ni snga ma'am phyi ma pha'i rgyud ma'i yan lag dang bcas pa'am/ ma'i rgyud pha'i yan lag dang bcas pa'am/ gnyi ga'i rigs grangs bdun pa tshun chad du skyes pa de yin no/ /ji skad smras pa las gzhan pa ni nye du ma yin no/ /'khrur 'jug pa'i spang ba'i byed pa po nyid gang yin zhe na/ de'i phyir 'du shes gtso cher byed pa po nyid yin no zhes smras te/ don med na yang 'du shes ni gtso cher byed pa po nyid yin no/ /de ni dngos gzhi la yang tshig 'og mar gyur pa'i byed pa po nyid yin la sbyor ba la yang byed pa po nyid do zhes bya ba'i tha tshig go/ /'dir yang thabs sla bas tha snyad du bya ba'i phyir ming dang ming can du sbyar ba bsdebs pa'i phyir/ de ni shes gtso bo zhes bya ba smras te/ de ni zhes bya ba ni ming can te/ 'du shes gtso cher byed pa po nyid yin no/ /'du shes gtso bo'o zhes bya ba ni ming ste/ 'du shes gtso cher byed pa po nyid yin pa de'i ming ngo / /de ltar na 'dir tshig gi don 'di 'byung ste/ 'di man chad kyi mdo gang dang gang la 'du shes gtso zhes bya ba'i ming smos pa de dang der ming de'i rang gi ming can du 'du shes gtso cher byed pa po nyid yin no zhes bya ba ston par shes par bya'o/ /don gang la 'du shes gtso cher byed pa po nyid yin zhe na/ de'i phyir dge slong ma nyid dang de'i nye du ma yin pa nyid dag la'o zhes bya ba smras te/ dge slong ma de nye du ma yin pa nyid gang yin pa nyid la 'du shes gtso cher byed pa po nyid yin no zhes bya ba'i tha tshig go/ /gzhan la yang 'dra bar bstan pa'i phyir/ 'og ma la yang ngo zhes bya ba smras te/ 'khrur 'jug pa'i bslab pa'i gzhi 'di nyid kyi 'og ma len pa zhes bya ba'i bslab pa'i gzhi gang yin pa de la yang dge slong ma nyid dang / de nye du ma yin pa nyid dag la 'du shes gtso cher byed pa po nyid yin no zhes bya bar 'dra bar bstan pa'o/ /ci zhig byas na 'khrur 'jug pa'i spang bar 'gyur zhe na/ de'i phyir byin gyis brlabs pa rang gi rnying pa 'khrur 'jug par 'os pa chos gos dang gding ba dag las 'ga' zhig bsgo bas 'khrur bcug gam/ 'tshed du bcug gam/ 'chag tu bcug pa dag na'o zhes bya ba smras te/ byin gyis brlabs pa rang gi rnying pa 'khrur gzhug par 'os pa chos gos dang gding ba dag las 'ga' zhig bsgo bas 'khrur bcug pa dang / 'tshed du bcug pa dang / 'chag tu bcug pa dag byas na spang ba'i ltung bar 'gyur ro zhes bya bar sbyar ro/ /byin gyis brlabs pa zhes smos pa ni/ byin gyis ma brlabs pa 'khrur bcug pa la sogs pa byas na nyes byas su bstan pa'i phyir ro/ /rang gi zhes smos pa ni gzhan gyis bsal ba'i phyir ro/ /rnying pa zhes smos pa ni sar ba dgag pa'i phyir ro/ /'khrur gzhug par 'os pa chos gos dang gding ba zhes smos pa ni/ de dag las bzlog pa thams cad la nyes byas kyi ltung bar bstan pa'i phyir ro/ /byin gyis brlabs pa rang gi rnying pa ji srid du spyad kyang rung ba 'khrur gzhug pa la sogs par 'os pa rdzab la sogs pas gos pa chos gos dang gding ba dag las gcig 'ga' snam sbyar la sogs pa dge slong ma nye du ma yin pa la 'khrur bcug pa dang / 'tshed du bcug pa dang / 'chag tu bcug pa dag byas na 'khrur bcug pa'i spang bar 'gyur ro/ /'di skad bstan te/ gal te dge slong gis byin gyis brlabs pa rang gi rnying pa 'khrur gzhug par 'os pa chos gos dang gding ba dag las 'ga' zhig dge slong ma nye du ma yin pa'i lag tu bsgo bar 'khrur bcug pa dang / 'tshed du bcug pa dang / 'chag tu bcug pa dag byas na spang ba'i lhung byed du 'gyur ro/ /'dir gzhung ni btsun pa re zhig dge slong gis chos gos spangs pa 'khrur stsol na ltung ba cir 'gyur/ gal te ma spangs pa 'khrur bcug na ni spang bar 'gyur ro/ /'on te spangs pa 'khrur bcug na ni nyes byas su 'gyur ro zhes gsungs pa de ni byin gyis brlabs pa zhes smos pa'i gzhung yin no/ /btsun pa re zhig dge slong gis gzhan dbang ba'i chos gos 'khrur stsol na ltung ba cir 'gyur/ nyes byas su 'gyur ro zhes gsungs pa de ni rang gi zhes smos pa'i gzhung yin no/ /rnying pa zhes bya ba ni dus tshigs gsum po dag las dus tshigs gang yang rung bar spyad pa gang yin pa'o zhes gsungs pa de ni rnying pa zhes smos pa'i gzhung yin no/ /de yang mtshon pa yin par rig par bya ste/ gal te ji srid spyad kyang rung mi gtsang ba la sogs pas gos pas 'khrur gzhug par 'os pa ni dus tshigs su ma spyad na yang spang bar 'gyur ba skyed pa kho na'o/ /'dir gzhung ni btsun pa dge slong chos gos rung bas grong du zhugs shing de'i tshe chos gos de yang lus las ma phud par de spang bar 'gyur bas dbyung bar 'gyur ba mchis sam/ nye ba 'khor yod de/ 'di lta ste/ khyim gyi nang du zhugs pa'i chos gos mi gtsang ba la sogs pas gos par gyur ba de dge slong ma nye du ma yin pa la 'khrur bcug na spang ba'i ltung byed du 'gyur ro zhes gsungs pa yin no/ /btsun pa re zhig dge slong gis dge 'dun gyi chos gos 'khrur stsol na ltung ba cir 'gyur/ gal te gang zag gis spyad pas dri ma can du gyur pa yin na ni nyes byas su 'gyur ro zhes gsungs pa de ni 'khrur gzhug par 'os pa'i gzhung yin no/ /chos gos zhes bya ba ni bdun po dag las gang yang rung ba'o zhes gsungs pa de ni chos gos zhes smos pa ni gzhung yin no/ /'khrur 'jug pa dang / 'tshed du 'jug pa dang / 'chag tu 'jug pa zhes gsungs pa de ni 'khrur bcug pa la sogs pa smos pa'i gzhung yin no/ /btsun pa re zhig dge slong gis dge slong ma nye du ma yin pa la mngags pas chos gos 'khrur stsol na ltung ba cir 'gyur/ nyes byas su 'gyur ro zhes gsungs pa de ni bsgo bas zhes bya ba dang / dge slong ma nye du ma yin pa zhes smos pa'i gzhung yin no/ /phyogs la byas pa yang las byas pa nyid do zhes bya ba ni/ chos gos kyi phyogs gcig la 'khrur 'jug pa la sogs pa'am/ bya ba'i phyogs gcig byas pa ni ltung ba byed pa'i las byas pa nyid yin par rig par bya'o/ /'dir gzhung ni btsun pa dge slong chos gos rung bas grong du zhugs shing de'i chos gos de yang lus las ma phud par de spang bar 'gyur bas dbyung bar 'gyur ba mchis sam zhes sngar bstan pa de ni chos gos kyi phyogs gcig gi gzhung yin no/ /tha na chur smyug par byed dam/ tshon du smyug par byed dam/ tha na thal mo rdeb par byed na yang ngo zhes gsungs pa ni bya ba'i phyogs gcig gi gzhung yin no/ /byas pa nyid na byed du bcug pa nyid yin no zhes bya ba ni/ bskos pa'i dge slong ma zhes bya ba'i gang zag mos gang gi tshe 'khrur bcug pa la sogs pa'i las de byas shing mthar thug par gyur na yang de'i tshe 'khrur bcug pa la sogs pa'i las de byas pa nyid yin par rig par bya'o/ / bskos pa tsam kho nas ni ma yin no/ /'bras bu'i mtha' man chad gcig pa nyid do zhes bya ba ni/ ji srid du des 'khrur bcug pa la sogs pa bsams pa'i 'bras bu grub par ma gyur gyi bar du 'khrur 'jug pa la sogs pa'i las de gcig pa nyid yin par rig par bya'o/ /bar skabs su chad pa dag tha dad pa nyid ma yin te/ de ni thams cad kyi dbang du bya ba nyid yin par rig par bya'o/ /rigs mthun pa'i las la ni gcig pa nyid du yang rung na/ rigs mi mthun pa'i las 'khrur 'jug pa dang / 'tshed du 'jug pa dang / 'chag tu 'jug pa zhes bya ba dag ji ltar gcig pa nyid du rung snyam du dogs pa bsal ba'i phyir/ tshigs su gyur pa nyid la 'bras bu rnams gcig pa nyid do zhes bya ba smras te/ tshigs su gyur pa nyid la zhes bya ba ni/ bar du chad par gyur pa nyid dang rigs mi mthun par gyur pa nyid la yang 'bras bu rnams gcig pa nyid de/ khru ba nyid dang / 'tshed pa nyid dang / 'chag pa nyid ces bya ba'i 'bras bu rnams gcig pa nyid yin par rig par bya'o/ /de dag tha dad pa'i dbang gis las tha dad pa yang ma yin no/ /'dir gzhung ni gang du 'khrur 'jug pa dang / 'tshed du 'jug pa dang / 'chag tu 'jug par byed na spang ba'i ltung byed do zhes gsungs pa yin te/ de ltar 'khrur 'jug pa la sogs pa nas rnam pa gsum char rdzogs pa na ltung byed gcig tu gsungs pa gang yin pa de 'dir khung yin no/ /'du shes gtso bo nyid la ni don ji lta ba nyid la ni dngos gzhi'o/ /don ji lta ba nyid ma yin pa la ni dngos gzhi dang nye ba'o zhes bya ba ni/ 'du shes gtso che ba nyid ni/ 'du shes gtso bo nyid de de la ni bstan bcos gang dang gang du 'du shes gtso cher bstan pa de dang der/ don ji lta ba nyid la ni dngos gzhi ste zhes bya ba la/ don ji lta ji lta ba ni don ji lta ba'o/ /de'i dngos po ni de nyid de de la ni dngos gzhi ste spang ba nyid du 'gyur ba'o/ /'di skad bstan te/ gal te 'du shes ji lta ba bzhin du don kyang gal te de lta bu nyid yin te/ dge slong ma nye du ma yin pa nyid du 'du shes shing dge slong ma nyid kyang nye du ma yin pa nyid yin na dngos gzhi ste/ spang ba nyid du 'gyur ro/ /don ji lta ba nyid ma yin pa la ni dngos gzhi dang nye du'o zhes bya ba ni/ 'du shes kyang gzhan te/ dge slong ma nye du yin no snyam la don kyang gzhan te/ dge slong ma nyid nye du ma yin pa nyid yin na/ de'i tshe dngos gzhi dang nye ba'i ltung bar 'gyur te/ nye ba'i tshigs 'og mar gyur ba'i ltung bar 'gyur ro/ /'di lta ste dper na/ srog chags dang bcas pa'i chu la srog chags dang bcas par 'du shes pas spyad na ni ltung byed du 'gyur la/ srog chags med pa la srog chags dang bcas par 'du shes na ni nyes byas su 'gyur ba lta bu'o/ /yid gnyis ni 'du shes dang 'dra'o zhes bya ba ni/ yid gnyis ni ltung ba la 'du shes dang 'dra bar 'gyur bar rig par bya'o/ /don de la yid gnyis za ba la yang ji ltar 'du shes ltung bar 'gyur ba de bzhin du ltung ba de nyid du 'gyur ro/ /'di lta ste dper na/ srog chags dang bcas pa'i chu la yid gnyis za ba'i 'du shes kyis spyad na ni ltung byed du 'gyur la/ srog chags med pa la yid gnyis kyi 'du shes kyis spyad na ni nyes byas su 'gyur ro/ /'dir rnam par 'byed pa las skabs su gsungs pa gang yin pa de yang bsdu ba'i phyir/ dge 'dun gyi khrims su bya ba bsrung bar bya'o zhes bya ba smras te/ dge 'dun gyi khrims su bya ba gang byas pa de gang zag gis kyang bsrung bar bya'o/ /glo bur du 'ongs pas kyang de las mi 'gal ba nyid du bya'o zhes bya ba ni/ gang zag glo bur du 'ongs pas kyang dge 'dun na gnyug mar gnas pas khrims su bya ba bsrung bar bya ba de las mi 'gal ba nyid du bsrung bar bya ste/ ji ltar gnyug mar gnas pa dag gis bsrung bar bya ba de bzhin du glo bur du 'ongs pas kyang bsrung bar bya'o/ /yod dam med pa nyid dang / ji lta bu yongs su shes par bya ba'i phyir des de dri bar bya'o zhes bya ba ni/ khrims su bya ba yod pa dang med pa ni yod dam med pa'o/ /de'i dngos po ni yod dam med pa nyid do/ /khrims su bya ba de yod dam med pa dang yod par gyur na ji lta bu'i rang bzhin yod pa yang yongs su shes par bya ba'i phyir/ glo bur du 'ongs pa des khrims su bya ba yod pa dang med pa dang / ji lta bu yod pa de gnyug mar gnas pa dag la dri bar bya'o/ /'di skad bstan te/ tshogs 'di na dge 'dun gyi khrims su bya ba 'ga' zhig yod dam/ 'on te med/ yod na ji lta bu zhig ces de yongs su shes par bya ba'i phyir glo bur du 'ongs pa des de dri bar bya'o/ /gang gi tshe zhe na/ de'i phyir ha cang yun mi ring bar ro zhes bya ba smras te/ ha cang yun ring po 'da' bar ma byas pa ste/ de ha cang yun ring du ngal bso ba ma byas par ha cang yun ring du gnas pa bas snga rol du zhes bya ba'i tha tshig go/ /'di skad bstan te/ 'jug pa dang / 'jug pa'i gnas btsal ba dang / rdzas gzhag pa dang / re zhig bsdad pa de dag thams cad je dang por bya'o/ /de'i 'og tu khrims su bya ba dri bar bya'o/ /dge 'dun gyi khrims su bya ba bsrung bar bya'o zhes bya ba de'i dmigs kyis bsal ba bstan pa'i phyir/ sangs rgyas kyis gsungs pa dge 'dun las g.yo ba med do zhes bya ba smras te/ sangs rgyas kyis gsungs pa/ bcom ldan 'das kyi bka' dge 'dun las 'brel ba'i khrims kyi rnam pa rgyur gyur pas g.yo ba med de/ g.yo ba zhes bya ba ni 'da' ba zhes bya ba'i tha tshig go/ /'di skad bstan te/ dge 'dun gyi khrims su bya ba'i dbang gis bcom ldan 'das kyi bka' las 'da' bar mi bya'o/ /de ltar yang bcom ldan 'das kyis nye sde la ngas dge slong dgon pa pa la dgon pa pa'i yongs su spang ba sbyin par bya ste/ dge slong dgon pa pa la de bzhin gshegs pa la bsnyen bkur bya ba dang bltar 'gro ba'i dus ma yin pa med do zhes gsungs pa'i bcom ldan 'das kyi bka'i dbang gis tshe dang ldan pa nye sdes dge 'dun gyi khrims su bya ba dral kyang ltung ba mi 'byung ba ste/ 'di ltar tshe dang ldan pa nye sdes dang por khrims su bya ba dral la phyis bcom ldan 'das kyis bag yangs su mdzad du zin kyang de lta mod kyi nye sdes byas pa gang yin pa de dag thams cad bcom ldan 'das kyis dang po nyid nas dgongs par gyur zin to/ /lhung bzed dang chos gos dang dra ba dang phor bu dang ska rags lhag par 'bul ba na dge 'dun gyis nye bar gzhag pa'i don du blang bar bya'o zhes bya ba ni/ gang zag gang yang rung bas rkyen 'ga' zhig gi dbang gis chos gos la sogs pa lhag pa 'bul ba na/ dge 'dun dang gang zag gis kyang dge 'dun gyi ched du blang bar bya ste/ nye bar gzhag pa'i don du zhes bya ba ni gzhag pa'i ched du zhes bya ba'i tha tshig go/ /de ltar nye bar gzhag pa ni de dag med pa dag gis ci dgar bkur ro zhes bya ba ni/ lhung bzed la sogs pa de dag med pa'i rab tu byung ba dag gis ci bder blang bar bya ba'o/ /'khrur 'jug pa'i spang ba rnam par 'byed pa'o zhes bya ba de rnam par 'byed pa'i skabs nas 'byung ba rdzogs so// // 'khrur 'jug pa'i spang ba zhu ba'i skabs nas 'byung ba bsdu ba'i phyir/ bshang ba dang / gci ba dang / ljan ljin dang 'dam rdzab la sogs pas ma rung bar gyur pa 'khrur 'jug pa yang na smad pa med do zhes bya ba smras te/ bshang ba la sogs pas ma rung bar gyur pa 'khrur 'jug pa la ltung ba na smad pa med do/ /'di skad bstan te/ cung zad tsam gyis bkru bar 'os pa nyid la yang ltung ba chung ba med pa nyid do/ /dre'u rngog dang khyim pa'i gos dang sngas nang tshangs can dang rung bar byas pa dang spangs pa dang dge 'dun gyi rnams la ni nyes byas so zhes bya ba ni/ nye du ma yin pa'i dge slong ma la dre'u rngog la sogs pa dag 'khru ba la sogs pa byed du 'jug na nyes byas so/ /'khrur 'jug pa'i spang ba zhu ba'i skabs so zhes bya ba de zhu ba'i skabs nas 'byung ba rdzogs so/ /'khrur 'jug pa'i spang ba'o zhes bya ba de bshad zin to// //len pa'i spang ba smra bar 'dod nas zhar las 'ongs pa bstan pa'i phyir/ dge slong mas gos rin po che brje ba'i phyir blang bar bya'o zhes bya ba smras te/ dge slong mas gos rin po che brje ba'i phyir blang bar bya'i/ longs spyad pa'i phyir ni ma yin no/ /dge slong ma dang lhan cig brje bar bya'o zhes bya ba ni/ dge slong gis dge slong ma dang lhan cig gos la sogs pa brje bar bya'o zhes bya ba'i tha tshig go/ /rdzas ji lta bus she na/ de'i phyir mnyam pas so zhes bya ba smras te/ rin gyi phyir mnyam pas so/ /yang na de dga' ba nyid kyis so zhes bya ba ni/ dge slong ma gang dang lhan cig de brje bar byed pa'i dge slong ma de dga' bar 'gyur bas zhes bya ba'i tha tshig go/ /ci zhig byas na len pa'i spang ba'i ltung byed du 'gyur zhe na/ de'i phyir len na'o zhes bya ba smras te/ nye du ma yin pa'i dge slong ma la der 'du shes pa'am yid gnyis za ba zhes sngar bstan pa las len na'o/ /ji ltar len zhe na/ de'i phyir rnam par rig byed kyis so zhes bya ba smras te/ cang mi smra bas dang du len pas kyang ma yin la/ tshig las gzhan pa'i rnam par rig byed kyis kyang ma yin no/ /ci zhig len na zhe na/ de'i phyir gos so zhes bya ba smras te/ lhung bzed dang sman la sogs pa dag ma yin no/ /rnam pa de dag thams cad kyi dmigs kyis bsal ba bstan pa'i phyir/ dge 'dun la gos 'bul ba dang legs par smra ba la ltung ba med do zhes bya ba smras te/ dge 'dun la gos 'bul ba dang / legs par smra ba la 'bul ba la ltung ba med do/ / bsnyen par rdzogs par byed pa dang / bor rlag byung ba dag la'o zhes bya ba ni/ dge slong bsnyen par rdzogs par byed pa dang / bor rlag byung ba dag gis nye du ma yin pa'i dge slong ma las len pa la yang ltung ba med do/ /'di skad bstan te/ dge slong bsnyen par rdzogs par byed pa dang / bor rlag byung ba dag gis nye du ma yin pa'i dge slong ma las chos gos la sogs pa len par byed na de dag la lhung ba med do/ /dad rdzas brjod de mdun du bzhag nas mi ltos par song ba la'o zhes bya ba ni/ dge slong ma gang zhig chos gos 'bul bar byed pa na/ gal te dge slong gis dge slong ma de la mi len to zhes phyir spong bar byed la dge slong ma des kyang dad rdzas brjod de/ bdag la rdzas 'di lta dag mchis kyis 'phags pas rjes su thugs brtse ba'i slad du bzhes shig /ces rdzas de mdun du bzhag nas mi ltos par song ba na de'i tshe blangs na ltung ba med do/ /dad rdzas zhes bya ba ni kha cig na re bdag nyid kyi dad pa grags pa la bya ste/ de brjod cing rab tu bstan pa la bya'o zhes zer ro/ /kha cig na re rdzas ni nor rdzas te/ bdag nyid kyi dad pa dang nor rdzas brjod pa yin no zhes kyang zer ro/ /len pa'i spang ba rnam par 'byed pa'o zhes bya ba de rnam par 'byed pa'i skabs nas 'byung ba rdzogs so/ / //zhu ba'i skabs brjod par 'dod nas/ lag tu 'ongs pa nyid thob pa nyid do zhes bya ba smras te/ lag tu 'ongs pa ni don la grub pa'i blo skye bas de'i tshe na don de thob pa nyid yin par rig par bya'o/ /blta ba'i nye 'khor du gyur pa ni de'i dang po'o zhes bya ba ni/ blta ba'i nye 'khor du phyin pa ni lag tu 'ongs pa nyid de'i dang po rtsom pa ste/ de tshun chad rdzas de lag tu 'ongs pa yin no/ /'dir gzhung ni gos kyi gzhi'i zhu ba las ji tsam gyis na gos thob pa lags/ gang tshun chad de'i lag tu 'ongs par gyur pa'am/ blta ba'i nye 'khor du gyur pa yin no zhes gsungs pa yin no/ /nye bar ma gyur pa nod pa ni sbyor ba nyid do zhes bya ba ni/ nye du ma yin pa'i dge slong ma las gos nye bar ma gyur pa nod pa len na/ nod pa de ni sbyor ba nyid de nyes byas so zhes bya ba'i tha tshig go/ /'dir gzhung ni kha cig las grong che ge mo zhig na gos mchis kyis/ de tshe dang ldan pa la gsol lo zhes zer ba nod na nyes byas su 'gyur ro zhes gsungs pa yin no/ /rgya che ba dang tha snyad kyi dbang ma yin pa nyid la ni gos sbyin pa la sogs pa gtso bo yin no zhes bya ba la/ rgya che ba zhes bya ba ni yangs pa'o/ /tha snyad kyi dbang ma yin pa nyid ces bya ba ni nyo tshong dang bral ba nyid de/ de gnyis ka tshogs pa na gos sbyin pa la sogs pa gtso bo yin te/ gtso bo yin no zhes bya ba'i tha tshig go/ /gal te dge slong ma rgya che ba yang yin la/ nyo tshong dang bral ba yang yin pas dge slong la gos sbyin par byed la/ dge slong des kyang len par byed na dge slong de la ltung bar mi 'gyur ro/ /de ltar yang gzhung ni 'di yin te/ sngar bzhag par gyur nas smras pa/ rjes su gnang bar bgyi yis 'phags pas longs spyad du gsol/ bdag la bsod nams su 'gyur ro zhes zer na ltung ba med do zhes gsungs pa'o/ /yang na phyir bsab mi 'chel bar 'bul gyis longs spyad du gsol zhe 'am/ gos cha mi mthun pa 'am/ brje'o zhes zer ba blangs par gyur pa las/ phyis tshe dang ldan pa rin stsal mi 'tshal lo zhes zer ba la/ ltung ba med do zhes gsungs pa gang yin pa de mdo 'dis bsdus pa yin no/ /re zhig gi sems kyis ni ltung ba med do zhes bya ba ni/ nye du ma yin pa'i dge slong ma las re zhig gi sems kyis chos gos la sogs pa len pa la ltung ba med pa ste/ yid gcugs pas gos la sogs pa re zhig gi tshul gyis len pa la ltung ba med do zhes gsungs pa'i phyir ro/ /rin sbyin pa brjed pa la'o zhes bya ba ni/ rin gyis blangs nas rin sbyin pa brjed na/ 'di ltar dge slong ma las blangs par gyur du zin kyang de lta mod kyi nyes pa med do/ /'dir gzhung ni bcom ldan 'das kyis tshe dang ldan pa rin stsal mi 'tshal lo zhes zer ba la ltung ba med do zhes gsungs pa sngar bstan ma thag pa nyid yin te/ de ltar gang gis mi dran pa la nyes pa med pa'o/ /len pa'i spang ba zhu ba'o zhes bya ba de zhu ba'i skabs nas 'byung ba rdzogs so/ /len pa'i spang ba'o zhes bya ba de bshad zin to/ / //slong ba'i spang ba 'di la ltung ba byed pa gang zhe na/ de'i phyir mi'i 'gro ba par gtogs pa khyim par gyur pa srog dang ldan pa nye du ma yin pa ni ltung ba'i byed pa po yin no zhes bya ba smras te/ mi'i 'gro ba par gtogs pa zhes bya ba ni mi'i rgyud du skyes pa'o khyim par gyur pa zhes bya ba ni rab tu byung ba ni ma yin pa'o/ /srog dang ldan pa zhes bya ba ni/ srog dang bral ba ni ma yin pa'o/ /nye du ma yin pa zhes bya ba ni/ nye du'i mtshan nyid dang bral ba'o/ /ltung ba'i byed pa zhes bya ba ni/ ltung ba byed pas na ltung ba'i byed pa'o/ /don sla bas 'dra bar bstan pa'i phyir/ 'og ma gsum la yang ngo zhes bya ba smras te/ 'og kho na nas 'byung ba'i bslab pa'i gzhi 'og ma gsum la yang de nyid du ltung ba'i byed pa'o/ /'dir dge slong ji lta bu la de ltung ba'i byed pa yin zhe na/ de'i phyir gos phrogs pa dang rlag pa dang / tshig pa dang rlung gis khyer ba dang chus khyer bar ma gyur pa la'o zhes bya ba smras te/ gos phrogs par ma gyur pa dang / rlag par ma gyur pa la sogs pa la'o/ /ci zhig lhag par spyad na ltung ba ji lta bur 'gyur zhe na/ de'i phyir bslangs na nyes byas kyi'o zhes bya ba smras te/ bslangs pa na nyes byas kyi byed pa por 'gyur ro/ /thob na dngos gzhi'o zhes bya ba ni/ bslangs pa'i rgyu de las thob par gyur na dngos gzhi'i spang ba'i ltung byed ces bya ba'i byed pa por 'gyur ro/ /ci zhig thob ce na de'i phyir chos gos so zhes bya ba smras te/ tshad ci tsam zhig ce na/ de'i phyir mi chung ba nyid do zhes bya ba smras te/ chos gos rang gi tshad dang ldan pa zhes bya ba'i tha tshig go/ /ci lta bu zhig ce na/ de'i phyir rin thang dang kha dog dang khru tshad las rnam pa gang bslangs ba'o zhes bya ba smras te/ rin thang ngam kha dog gam khru tshad las rnam pa gang bslangs pa'i rnam pa de lta bu nyid thob na dngos gzhi'i byed pa po nyid yin no/ /'dir yang gtsug lag las kha dog can zhes bya ba'i sgra ni sngon po la sogs pa'i kha dog nyid la snyegs so/ /des na rin thang ngam/ kha dog gam/ khru tshad ji lta bu bslangs pa de lta bu nyid thob na ltung bar 'gyur gyi/ gzhan gyis ni ma yin no zhes bya ba'i tha tshig go/ /'o na gzhan thob na cir 'gyur zhe na/ de'i phyir gzhan la ni ltung ba med do zhes bya ba smras te/ rin thang gzhan nam kha dog gzhan nam/ khru tshad gzhan thob pa la ni ltung ba med do/ /'dir kha dog gi gzhung ni dge slong gis chos gos sngon po slong bar byed cing / sngon po nyid thob na de la slong ba la nyes byas su 'gyur la/ thob pa ni spang ba'i ltung byed du 'gyur ro/ /gzhan la ni ltung ba med do zhes gsungs pa yin no/ /rin thang gi gzhung ni dge slong ma'i rnam par 'byed pa las/ dge slong mas chos gos kAr ShA pa Na lngar ri ba zhig slong bar byed cing / kAr ShA pa Na lnga ri ba de nyid thob na/ de la slong ba na nyes byas so/ /thob pa na spang ba'i ltung byed do/ /de las gzhan la ni ltung ba med do zhes gsungs pa yin no/ /tshad kyi gzhung yang dge slong gis chos gos khru lnga pa slong bar byed cing des gos khru lnga pa nyid thob na/ de la slong ba na nyes byas so/ /thob pa na spang ba'i ltung byed do/ /gzhan la ni ltung ba med do zhes gsungs pa yin no/ /'dir gzhan la ltung ba med do zhes bya ba ni tha dad par gyur pa nyid la yin par rig par bya'i/ rgyu gcig la lhag par thob pa la ltung ba med pa ma yin no/ /kha dog la sogs pa'i dbye ba ma byas par spyir bslangs pa na gang yang rung ba zhig thob na yang spang ba'i ltung byed do/ /ras ma dang kha tshar dag slong na'o zhes bya ba ni/ ras ma dang kha tshar dag slong ba la ltung ba med do/ /kha tshar bslangs pa las ras ma thob pa la yang ltung ba med do/ /ras ma bslangs na ras yug chen dang / ras yug phran dag thob po snyam nas bslangs shing thob na yang ltung ba med par rig par bya'o/ /rgyu dang spun la ni na smad pa nyid do zhes bya ba ni/ rgyu ci tsam dang spun ji tsam gyis chos gos tshad dang ldan pa langs par 'gyur ba de ci tsam gyi rgyu dang spun dag slong zhing thob na nyes byas so/ /'dis ni zhu ba las nye du ma yin pa las chos gos mi chog pa nyid slong na nyes byas so/ /rgyu slong na yang nyes byas so/ /spun slong na yang nyes byas so zhes gsungs pa de dag bsdus pa yin no/ /de'i rang bzhin ni de dang 'dra'o zhes bya ba ni rgyu spun gyi skud pa'i rang bzhin ni rgyu spun gyi skud pa dang 'dra ba ste/ rgyu spun gyi skud pa'i rang bzhin zhes bya ba ni ba la dang ras bal la sogs pa'o/ /'dis ni 'thag pa'i zhu ba las btsun pa re zhig dge slong ras bal slong bar bgyid na ltung ba cir 'gyur/ nyes byas so zhes gsungs pa de bsdus pa yin no/ /slong ba'i spang ba'o zhes bya ba de rnam par 'byed pa dang zhu ba'i skabs cig car bshad zin to// //bam po bco brgyad pa/ slong bar rigs pa'i spang ba bsdu ba'i phyir/ byin gyis brlab par bya ba thams cad med na slong bar rigs pa nyid do zhes bya ba smras te/ dge slong gang la chos gos gsum la sogs pa byin gyis brlab par bya ba thams cad med na/ byin gyis brlab par bya ba de thams cad bslang bar rigs pa nyid do/ /'di skad bstan te/ bcom ldan 'das kyis chos gos bcu gsum po gang dag gsungs pa 'di lta ste/ snam sbyar dang / bla gos dang / mthang gos dang / gding ba dang / rngul gzan dang / rngul gzan gyi gzan dang / sham thabs dang / sham thabs kyi gzan dang / lus phyis dang / skra bzed dang / g.yan pa dgab pa dang / dbyar gyi ras chen dang / yo byad kyi gos so/ /bcu gsum po de dag las kha cig las ni dbyar gyi ras chen mi smos par khrus ras zhes 'byung ste/ de dag gi nang nas gang dang gang med pa de dang de nyid slong bar rigs pa nyid yin no/ /mdor na gang la dge sbyong gi yo byad ces bya ba'i dngos po gang gis brel ba yod pa de nyid du ma yin pa las slong bar byed na de la nyes pa med do/ /'di la ltung ba'i byed pa po nyid gang zhe na/ de'i phyir de ni ltung ba'i byed pa po nyid do zhes bya ba smras te/ de ni zhes bya ba ni sngar bstan ma thag pa'i dge slong slong bar rigs pa ste/ de 'dir ltung ba'i byed pa po nyid yin gyi/ chos gos ni ma yin te/ mi srid pa'i phyir ro/ /ji ltar na dge slong slong bar rigs pa yin zhe na/ nye du ma yin pa las chos gos slong bar rigs pa'i phyir ro/ /de yang gang zhe na/ chos gos phrogs pa la sogs pa'o/ /slong bar mi rigs pa slong bar byed na ni slong ba'i spang bar gtogs pa'i ltung ba'o/ /slong bar rigs pa slong bar byed na ni de las lhag pa len na len pa'i spang bar gtogs pa'i ltung bar 'gyur ro/ /de'i mdor bsdus pa rnam par dbye ba yin no/ /de gang las 'byung zhe na/ so sor thar pa'i mdo las chos gos chus khyer na nye du ma yin pa'i khyim bdag gam khyim bdag gi chung ma'i gan du song ste/ chos gos bslang bar bya'o/ /de la gal te bram ze dang khyim bdag dad pa can dag gis chos gos rab tu mang po dag gis stobs par byed par gyur na/ dge slong des 'dod na chos gos de las stod g.yogs smad g.yogs dang bcas pa man chad blang bar bya'o/ /de las lhag pa len na spang ba'i ltung byed do zhes slong bar rigs pas bslangs te thob pa na ltung byed do zhes rnam par gzhag pa'i phyir ro/ /zung bslang bar bya ba nyid do zhes 'og nas 'byung ba de'i rang bzhin bstan par bya ste/ khyim pa'i stod g.yogs che tshad ni ras yug chen khru bcu gnyis pa'o/ /smad g.yogs ni ras yug phran bdun pa dang do pa'o zhes bya ba ni/ khyim pa'i stod g.yogs dang smad g.yogs che tshad ni 'di yin par rig par bya ste/ 'di lta ste/ khyim pa'i stod g.yogs che tshad rab kyi mthar phyin pa ni/ ras yug chen khru bcu gnyis pa ste/ ras yug chen gang la srid du khru bcu gnyis kyi tshad yod pa de ni khru bcu gnyis pa'o/ /ras yug chen de lta bu de ni khyim pa'i stod g.yogs de gos chen po'i tshad yin no/ /'dir de'i rkyen nyid kyis zheng du ni shugs kyis na khru gsum pa yin par shes par bya'o/ /khyim pa'i smad g.yogs che tshad rab kyi mthar phyin pa ni ras yug phran srid du khru bdun pa dang zheng du khru do pa ste/ ras yug phran de lta bu ni khyim pa'i smad g.yogs te/ 'dir yang che tshad ces bya bar sbyar ro/ /dge slong gi che tshad ni snam sbyar dang / sham thabs kyi rim pa ji skad bstan pa'o zhes bya ba ni che tshad ces bya bar sbyar ro/ /snam sbyar dang sham thabs ni/ snam sbyar dang sham thabs so/ /rim pa ji skad bstan pa'o zhes bya ba ni/ rim pa gnyis pa la sogs pa ste/ de ni chos gos che tshad yin par rig par bya'o/ /'di skad bstan te/ dge slong gi stod g.yogs che tshad ni snam sbyar gyi rim pa ji skad bstan pa'o/ /smad g.yogs che tshad ni sham thabs kyi rim pa ji skad bstan pa'o/ /chos gos ji snyed bslang bar bya ba nyid yin zhe na/ de'i phyir zung bslang bar bya ba nyid do zhes bya ba smras te/ stod g.yogs smad g.yogs su bcas pa bzung 'di bslang bar bya ba nyid yin te/ lhag na tha dad par gyur kyang rung tha dad par gyur pa ma yin pa yang rung ste/ ltung ba'i byed pa po nyid yin no/ /khyim pa dang dge slong gi zung 'di gnyis las gang bslang bar bya ba nyid yin zhe na/ de'i phyir gang yang rung ba'o zhes bya ba smras te/ khyim pa'i stod g.yogs smad g.yogs dang bcas pa'am/ dge slong gi stod g.yogs smad g.yogs dang bcas pa'o/ / tshad de las lhag pa ni bslang bar bya ba nyid ma yin pa'o zhes bya ba ni/ sngar bstan pa'i tshad de las lhag pa ni bslang bar bya ba nyid ma yin pa'o/ /de nyid bstan pa'i phyir snga ma thob na kha bskang ba yang ngo zhes bya ba smras te/ bslang bar bya ba nyid ma yin pa'i rjes bsnyags pa'i phyir yang ngo zhes bya ba'i sgra smos so/ /snga ma thob na zhes bya ba la snga ma zhes bya ba ni khyim pa'i stod g.yogs smad g.yogs dang bcas pa sngar smos pa ste/ dge slong gi stod g.yogs smad g.yogs dang bcas pa bas go rims sngar bstan pa'i phyir ro/ /thob na zhes bya ba ni khyim pa'i stod g.yogs smad g.yogs dang bcas pa snga ma'i tshad pas chung ba zhig thob na'o/ /kha bskang ba zhes bya ba ni de'i kha bskang ba yang bslang bar mi bya ba'o/ /tshad ci tsam gyis chung ba thob na de'i kha bskang ba bslang bar mi bya zhe na/ ras yug chen khru bcu gnyis pa dang / ras yug phran bdun pa dang do ba man chad ras yug chen khru phyed dang gsum pa dang phyed dang lnga pa'i bar dang / ras yug phran 'khor gsum khebs pa'i tshad kyi bar ni chung ba'i mtha' yin par rig par bya'o/ /de bas ches chung ba zhig thob na ni de'i kha bskang ba bslang bar bya ste/ ches chung ba la ni byin gyis brlab tu mi rung ba'i phyir ro/ / ras yug chen khru phyed dang gsum pa dang phyed dang lnga pa dang ras yug phran 'khor gsum khebs pa'i tshad ni 'dod la zhes bya ba'i sgra med par byin gyis brlab tu rung ste/ ma dras pa yin pa'i phyir ro/ /de ltar yang slob dpon yon tan 'od kyis rang gi rnam par bshad pa las smos so/ /chos gos ma dras pa 'chang bar 'dod pa gang yin pa de nyid khyim pa'i stod g.yogs smad g.yogs dang bcas pa 'dod pa yin te/ 'grel pa byed pas kyang de kho na skad bshad do/ /gal te chos gos ma dras pa byas zin par mi 'gyur na ni de bcad par 'dod pa nyid kyang bskyed par mi bya ste/ 'dod na zhes bya bar sems pa'i phyir ro/ /de'i kha bskang ba yang ci'i phyir bslang bar mi bya ste/ de'i phyir de bsam mo/ /gal te khyim pa'i stod g.yogs smad g.yogs dang bcas pa las lhag pa zhig thob na ni de'i tshe/ lhag par sbyin par bya ba nyid ma yin no/ /gal te dge slong gis stod g.yogs smad g.yogs dang bcas pa slong bar byed pa na tshad las ches lhag pa zhig thob na de'i tshe ji ltar bya zhe na/ de'i phyir phyi ma thob na lhag pa sbyin par bya ba nyid do zhes bya ba smras te/ dge slong gi stod g.yogs smad g.yogs dang bcas pa ni 'dir khyim pa'i stod g.yogs smad g.yogs dang bcas pa bas phyis bstan pa'i phyir/ phyi ma zhes bya ba'i sgrar brjod de/ dge slong gi stod g.yogs smad g.yogs dang bcas pa phyis ma thob na gal te lhag par thob na yang lhag pa sbyin pa dag la sbyin par bya ba nyid de/ don yongs su rdzogs pa las de lhag pa'i phyir ro/ /bsam pa'i dbang gis kyang yongs su rdzogs pa nyid yin te/ chig rkyang dang dras pa la sogs pa'i bsam pas so/ /slong bar mi rigs pa'i dge slong gis bdag ni slong bar rigs pa yin no snyam du rtog pa 'dis slong ba la zhugs na bya ba gang la ltung ba ji lta bur 'gyur zhe na/ de'i phyir bslang bar bya ba ma yin pa bslangs na nyes byas so zhes bya ba smras te/ bslang bar bya ba ma yin pa bslang bar mi 'os pa'i gos rnga bal la sogs pa bslangs na sbyor ba las gyur pa'i nyes byas so/ /thob na dngos gzhi'o zhes bya ba ni rung ba ma yin pa'i phyir te/ dngos gzhi ni nyes byas lci ba yin no/ /'di skad bstan te/ dngos po gang dang gang gi chos dang ldan pa'i dgos pa yod pa de dang des brel ba yod na dge slong des sangs rgyas mchod pa la sogs pa'i dgos pas dngos po de shin tu mang po yin na yang bslang bar bya'o/ /brel ba med na rtswa tsam yang bdag gir mi bya na/ gos la sogs pa lta phar zhog ste/ de ni nyes byas snga mar gtogs so/ /sbyin par bya ba mi sbyin na yang ngo zhes bya ba la dngos gzhi'o zhes bya ba'i rjes bsnyags pa'i phyir yang ngo zhes bya ba'i sgra smos so/ /lhag pa sbyin par bya ba nyid do zhes smos pa ma sbyin na dngos gzhi ste spang ba'i ltung byed du 'gyur ro zhes bya ba'i tha tshig go/ /de lta bas na bslab pa'i gzhi 'di la lhag pa 'di nyid ma byin na dngos gzhi yin par khong du chud par bya'o/ /slong bar rigs pa'i spang ba'o zhes bya ba de bshad zin to// //spags pa slong ba'i spang ba ni slong ba'i spang ba'i rab tu dbye bar gyur pa yin pas de'i phyir slong ba'i spang ba'i skabs su mi'i 'gro ba par gtogs pa khyim par gyur pa srog dang ldan pa nye du ma yin pa ni ltung ba'i byed pa yin no zhes bya ba la sogs pa smos pa'i rnam pa khas blangs nas de'i bye brag brjod par bya ste/ de'i phyir spags pa ma phul bar shes pa ni ma spags pa dang 'dra'o zhes bya ba smras te/ ma phul ba zhes bya ba ni sbyin bdag gis ltung ba 'byin pa'i gang zag la 'di la chos gos spags pa gang yin pa de sbyin no zhes chos gos kyis mgron du ma gnyer ba'o/ /shes pa zhes bya ba ni dge slong des gang yang rung ba zhig gis shes pa'o/ /chos gos spags pa de ni slong ba'i phyir/ ma spags pa dang 'dra bar shes par bya'o/ /'di skad bstan te/ ji ltar chos gos ma spags pa mi'i 'gro ba par gtogs pa khyim par gyur pa srog dang ldan pa nye du ma yin pa las slong ba na nyes byas su 'gyur la thob na dngos gzhir 'gyur ba kho na bzhin du spags pa yang de dang 'dra'o zhes bya ba'i tha tshig go/ / spags pa'am spags pa mi shes par gyur pa ni slong ba'i spang ba'i yul yin la/ spags pa zhes pa ni 'di'i yul yin no/ /don de nyid bstan pa'i phyir de nyid gzhan yin no zhes bya ba smras te/ de nyid ces bya ba ni chos gos spags pa ltung ba la phyin pa'i gang zag gis mi shes pa'o/ /gzhan yin no zhes bya ba ni ma spags pa nyid yin pa'o/ /'di skad bstan te/ 'di ni slong ba'i spang ba'i gzhi nyid kyi khongs su gtogs par rig par bya'o/ /gal te spags pa mi shes pa slong bar byed na ni slong ba'i spang ba'i khongs su gtogs pa'i nyes byas yin par rig par bya'o/ /shes na ni thob na de'i tshe spags pa slong ba'i spang ba'i khongs su gtogs pa'i dngos gzhi yin par rig par bya'o/ /spags pa slong ba'i spang ba'o zhes bya ba de bshad zin to// //'di ltar so so nas spags pa slong ba 'di ni spags pa slong ba'i spang ba'i rnam pa yin mod kyi/ 'on kyang sbyin par byed pa'i sbungs kyi bye brag las ltung ba tha dad par rnam par gzhag par bya ste/ 'di ltar tshe dang ldan pa nye dgas khyim bdag dang khyim bdag gi chung ma la so so nas ras yug chen yang dag par sbyin du gzhug par byas pa'i phyir ro/ /spags pa slong bar 'dra mod kyi 'on kyang bye brag brjod par bya ste/ sbyin par byed pa sbungs che ba yang ngo zhes bya ba ni spags pa ma phul bar shes pa ni ma spags pa dang 'dra'o zhes bya ba dang de nyid gzhan yin no zhes bya ba de dag thams cad kyi rjes su sbyar ro/ /sbyin par byed pa sbungs che ba zhes bya ba ni tsham tshom med pa'o/ /yang ngo zhes bya ba'i sgras ni sngar bstan pa'i rnam pas so so ba'i spang ba rnam par 'jog par byed do/ /de ltar na 'dir tshig gi don 'di 'byung ste/ sbyin par byed pa sbungs che ba mi'i 'gro bar gtogs pa khyim par gyur pa srog dang ldan pa nye du ma yin pas chos gos spags pa gang zag la ma phul bar shes pa slong bar byed na ni nyes byas so/ /thob na ni so so nas spags pa slong ba'i spang ba'i ltung byed do/ /spags par mi shes pa slong bar byed na ni slong ba'i spang bar 'gyur ro/ /sbyor ba gcig pa'i phyir thob na gcig nyid do zhes bya ba ni/ sbyor ba gcig pa ni sbyor ba gcig pa ste/ sbyor ba gcig pa'i phyir thob na rdzas du ma nyid yin du zin kyang gcig pa nyid yin no/ /'di skad bstan te/ gal te sbyor ba gcig gis chos gos so so ba zhig thob na de lta na yang ltung ba gcig kho nar 'gyur ro/ /de ltar gyur na len pa dang slong ba dang slong bar rigs pa dang spags pa slong ba dang so so nas spags pa slong ba'i spang ba dag la sbyor ba gcig gis gos du ma thob pa de dag la ltung ba gcig kho nar 'gyur ro/ /dge slong ma 'am nye du ma yin pa la gos du ma sbyin pa dang lhung bzed dang dbyar gyi ras chen thob pa la yang sbyor ba gcig nyid yin na 'bras bu du ma nyid yin du zin kyang ltung ba gcig kho nar 'gyur ro/ /so so nas spags pa slong ba'i spang ba'o zhes bya ba de bshad zin to// //ci zhig byas na bskul ba'i spang bar 'gyur zhe na/ de'i phyir bskul ba rung ba ma yin pa chos gos kyi rin spangs nas yongs su dri ba sngon du btang zhing bstan te bsgo zhing smras pa byung ba'i mtha' rjes su brjod pa sngar byas pa'i zhal ta byed pa la bskul bar gyur na'o zhes bya ba smras te/ bskul ba zhes bya ba ni yon bdag gis so/ /rung ba ma yin pa zhes bya ba ni gser la sogs pa dbyig go/ /chos gos kyi rin zhes bya ba ni/ gser la sogs pa gang gis chos gos nyo bar byed pa'o/ /spangs nas zhes bya ba ni/ tshe dang ldan pa pho nya dge slong dag ni gos kyi rin dag len du mi rung ste/ bdag cag gos su rung ba dus su rnyed na ni len to zhes bya bas spangs nas so/ /yongs su dri ba sngon du btang zhing zhes bya ba ni/ gal te pho nya de dge slong de la 'di skad ces 'phags pa rnams kyi zhal ta bgyid pa 'phags pa rnams kyi zhal ta nyams su len pa gang lags pa 'ga' mchis sam zhes 'dri bar byed pa ste/ zhal ta byed pa'i yul gang la yongs su dri ba sngar byas pa gang yin pa de ni yongs su dri ba sngon du btang ba ste/ yongs su dri ba sngon du btang ba'i zhal ta byed pa de la bskul bar gyur na'o zhes bya bar sbyar ro/ /khyad par ci lta bu zhig la zhe na/ de'i phyir bstan te zhes bya ba smras te/ spong bar byed pa'i dge slong gi pho nya 'di ni dge slong rnams kyi zhal ta byed pa ste/ 'di ni dge slong rnams kyi zhal ta nyams su len pa'o zhes kun dga' ra ba'am dge bsnyen zhal ta byed pa la bstan par bya'o zhes bya bas bstan cing smras pa yin par shugs kyis khong du chud par bya'o/ /bsgo zhing zhes bya ba ni/ de nas pho nya des gos kyi rin de dag khyer nas zhal ta byed pa ga la ba der 'gro bar bya zhing phyin nas zhal ta byed pa de la 'di skad ces tshe dang ldan pa zhal ta byed pa shes par gyis shig / khyod kyi gos kyi rin 'di dag gis gos 'di dang 'di lta bu can zhig nyos la dge slong ming 'di zhes bya ba 'ongs pa dang de la gos rung ba dus su bskon cig ces bya bas gal te pho nyas zhal ta byed pa de la bsgo ba ste/ bsgo ba'i zhal ta byed pa de la bskul bar gyur na'o zhes bya bar sbyar ro/ /smras pa zhes bya ba ni/ de nas pho nya des zhal ta byed pa de la shin tu legs par yang dag par bsgo zhing yang dag par bstan nas dge slong de ga la ba der 'gro bar bya zhing phyin nas zhes bya ba la sogs pas gal te pho nya des dge slong de la smras pa dang sbyar ro/ /ji skad smras she na/ de'i phyir byung ba'i mtha' rjes su brjod pa sngar byas pa zhes bya ba smras te/ dge slong de la 'di skad ces 'phags pas zhal ta bgyid pa bstan pa gang lags pa de la bdag gis yang dag par bstan par bgyi lags kyis de'i gan du bzhud cig dang des khyod la gos rung ba dus su bskon par 'gyur ro zhes bya ba smras so/ /de lta bu'i khyad par can gyi zhal ta byed pa la bskul bar gyur na'o zhes bya bar sbyar ro/ /bskul bar gyur na'o zhes bya ba ni/ dge slong gis zhal ta byed pa la bskul bar gyur na ste/ dge slong gos 'dod pas zhal ta byed pa'i gan du song la/ tshe dang ldan pa zhal ta byed pa bdag gos 'dod do/ /tshe dang ldan pa zhal ta byed pa bdag gos 'dod do zhes lan gnyis lan gsum du bskul bar bya zhes bya ba la sogs pas so/ /gal te skul bar byed pas bskur bar bya ba la bskul ba na des kyang brda ma phrad na de bskul ba nyid ma yin par bstan pa'i phyir/ 'gro ba ma nus pa nyid na bskul ba nyid ma yin no zhes bya ba smras te/ 'gro ba zhes bya ba ni go bar bya na khong du chud par bya ba yul du gyur pa'o/ /ma nus pa'i dngos po ni ma nus pa nyid de 'gro ba de go bar byed ma nus pa nyid na bskul bar bya ba bskul ba nyid ma yin no/ /'di skad bstan te/ brtad par smras pa 'am/ gnyid log pa'am/ ra ro ba 'am/ brel ba nyid dam/ 'on pa nyid dam/ nad kyis btab pa'am/ gzhan gyi dbang du gyur pa la sogs pa'i rkyen dag gis gal te legs par brda phrad par ma nus na de'i tshe bskul ba nyid ma yin no/ /'gro ba ma go bas bskul ba nyid ma yin pa 'ba' zhig tu ma zad kyi/ de dang 'brel ba'i tshig dang don dang brda dang bya ba gzhan gang yin pa thams cad kyi 'gro ba ma nus na yang de ma byas pa kho na yin no/ /bcom ldan 'das kyis bskul ba'i sgo drug po gang dag gsungs pa de dag kyang bgros na bskul ba dag yin gyi/ ma bgros na ni ma yin te/ 'di lta ste mngon par smra ba dang / legs par sbyor ba dang / zan skom dag gi dbang du byas nas re re la yang gnyis gnyis te drug tu 'gyur ro/ /de la mngon par smra ba ni khyod 'ongs sam zhes zer ba la/ de'i phyir ro zhes zer ba dang / legs par 'ongs sam zhes zer ba la de'i phyir ro zhes zer ba'o/ /legs par sbyor ba ni stan 'di la 'dug shig ces zer ba la/ de'i phyir ro zhes zer ba dang / rkang pa khrus shig ces zer ba la de'i phyir ro zhes zer ba la/ zan skom gyi dbang du byas pa ni/ zan zo shig ces zer ba la de'i phyir ro zhes zer ba dang / skom 'thung shig ces zer ba la de'i phyir ro zhes zer ba'o/ /de dag thams cad kyang so sor dbye bar bya ste sbyor ba gcig gis byas na ni drug po thams cad kyang bskul ba'i sgo gcig kho nar 'gyur bas de'i phyir so sor dbye bar bya'o/ /ma grub na lan gnyis su yang ngo zhes bya ba ni/ bskul ba dang po des gos thog mar ma grub na lan gnyis su yang bskul bar bya'o/ /lan gsum du yang ngo zhes bya ba ni lan gnyis su bskul ba des kyang ma grub na lan gsum du yang bskul bar bya ba'o/ /de'i 'og tu lan gsum gyi bar du phyogs su bsdad par bya'o zhes bya ba ni/ lan gsum bskul bas gos kyi rnyed pa ma grub na de'i 'og tu dge slong des lan gsum gyi bar du nor sbyin pa'i zhal ta byed pa de gnas gang na 'dug pa'i phyogs su mtshan ma'i dngos po tsam gyis cang mi smra bar bsdad par bya'o/ /'o na rnam par 'byed pa las lan bzhi 'am lan lnga 'am drug gi bar du cang mi smra bar phyogs su bsdad par bya'o zhes gsungs la/ 'dir ji ltar lan gsum gyi bar du phyogs su bsdad par bya zhes bshad ce na/ rnam par 'byed pa las ni bskul ba gcig gam gnyis sam gsum dang bcas pa'i grangs kyis grangs de skad gsungs kyi/ phyogs su bsdad pa 'ba' zhig tu de skad gsungs pa ni ma yin no/ /'dir ni gnas grags pa gang na kun nas sdod pa de yin par rig par bya'o/ /ma grub na sbyin par byed pa la bsgrag par bya'o zhes bya ba ni/ ji skad bstan pa'i rnam pa de dag gis gos kyi rnyed pa ma grub cing re ba med par gyur na sbyin par byed pa'i sbyin bdag la zhal ta byed pas bdag la ci yang ma byin gyis khyod nyid shes par gyis shig ces bsgrag par bya ba'o/ /de ltar spangs par gyur zin pa na 'bul bar byed na spangs pa smras te sbyin par byed pa'i sems bsdu bar rjes su bsgrub pa khas len pa las blang bar bya'o zhes bya ba la/ de ltar zhes bya ba ni/ sngar bstan pa'i rim pa ltar ro/ /spangs par gyur zhes bya ba ni btang bar gyur pa'o/ /zin pa na zhes bya ba ni/ de ltar spangs par gyur pa'i mthar thug par gyur zin pa na'o/ /'bul bar byed na zhes bya ba ni/ zhal ta byed pas de'i 'og tu phyis dge slong de la gos 'bul bar byed na ste/ 'bul bar byed na de las dge slong gis gos blang bar bya'o zhes bya bar sbyar ro/ /khyad par ji lta bu can zhig las she na/ de'i phyir spangs pa smras te zhes bya ba smras te/ dge slong des zhal ta byed pa la kho bos sbyin bdag la zhal ta byed pas bdag la ci yang ma byin gyis/ khyod nyid shes par gyis shig ces bsgrags zin to zhes smras pa ste/ de skad gang la smras pa'i zhal ta byed pa de las so/ /gzhan yang sbyin par byed pa'i sems bsdu bar rjes su bsgrub pa khas len pa la ste/ sbyin par byed pa'i sems ni sbyin bdag gi sems so/ /de bsdu bar rjes su bsgrub pa khas len pa ni zhal ta byed pa gang gis sbyin par byed pa'i sems bsdu bar rjes su bsgrub pa dge slong la khas len pa ste/ de las dge slong des gos de blang bar bya'o/ /'di skad bstan te/ dge slong gis sngar ji skad bstan pa'i rnam pa de dag gis zhal ta byed pa las gos kyi rnyed pa ma grub cing re ba med par gyur nas sbyin par byed pa'i sbyin bdag la zhal ta byed pas bdag la ci yang ma byin gyis khyod nyid shes par gyis shig ces bsgrags shing spangs par gyur zin pa'i 'og tu phyis zhal ta byed pas dge slong la gos 'bul bar byed na/ de'i tshe dge slong des zhal ta byed pa la 'di skad ces kho bos sbyin bdag la zhal ta byed pas bdag la ci yang ma byin gyis khyod nyid shes par gyis shig ces gos spangs pa smras zin to zhes rjes su bsgrag par bya'o/ /de ltar gos spangs pa shes par byas kyang gal te zhal ta byed pa de 'di skad ces 'phags pas bdag la gos 'di long shig dang / bdag gis sbyin bdag gi sems bsdu bar bya'o zhes khas len par byed na/ de'i tshe dge slong des zhal ta byed pa de las gos de blang bar bya'o/ /ji ltar bskul ba la sogs pa'i bya ba bstan nas/ da ni len pa'i sngon rol du ci zhig rjes su sgrub par byed na bskul ba'i spang bar 'gyur ba bstan pa'i phyir/ bskul ba dang sdud pa lhag gam khas ma blangs na'o zhes bya ba smras te/ bskul ba lhag pa zhes bya ba ni lan gsum las lhag par bskul na'o/ /bsdad pa lhag pa zhes bya ba yang de bzhin du lan gsum las lhag par phyogs su bsdad na'o/ /khas ma blangs na'o zhes bya ba ni spangs par gyur pa na sbyin par byed pa'i sems bsdu bar rjes su bsgrub pa khas ma blangs na'o/ /bskul ba'i sgo drug po gang dag gsungs pa de dag las gsum ni tshig gi bdag nyid do/ /gsum ni phyogs su sdod pa'i bdag nyid de de dag la go rims ni med do/ /gal te sngar phyogs na sdod par byed la phyis skul bar byed na de lta na yang nyes pa med do/ /de bzhin du gal te bskul ba gnyis byed cing sdod pa bzhi byed na yang de lta na yang nyes pa med de/ sdod pa'i gnas skabs dman pa'i phyir ro/ /de las bzlog pa ni mi bya'o/ /len pa'i sngon rol gyi char gyur pa'i rjes su bsgrub pa bstan nas/ da ni dus su gtogs pa'i rjes su bsgrub pa brjod par bya ste/ ci zhig byas na spang bar 'gyur zhe na/ de'i phyir blangs na'o zhes bya ba smras te/ gos zhes bya ba'i tha tshig go/ /sbyin par byed pa dang pho nya dang / zhal ta byed pa dag ci lta bu zhig yin zhe na/ de'i phyir gsum char mi nyid dang khyim pa nyid yin na'o zhes bya ba smras te/ sbyin par byed pa dang pho nya dang / zhal ta byed pa zhes bya ba gsum char mi nyid dang khyim pa nyid yin na'o/ /'di skad bstan te/ gal te sbyin par byed pa dang pho nya dang / zhal ta byed pa dag mi'i 'gro bar gtogs pa dang / khyim pa yang yin la/ sngar bstan pa'i 'gal ba byed pa thams cad kyang yod cing / zhal ta byed pa las gos kyang blangs par gyur na spang ba zhes bya ba'i kha na ma tho ba yongs su rdzogs par 'gyur ro/ /gzhan du na ni 'gal na yang nyes byas su 'gyur ro/ /'dir gzhung ni mi ma yin pas sbyin par byed cing mi ma yin pa'i pho nya dang mi ma yin pas rung bar byed na nyes byas su 'gyur ro/ /mi ma yin pas sbyin par byed cing mi ma yin pa'i pho nya dang mis rung bar byed na yang nyes byas su 'gyur ro/ /mi ma yin pas sbyin par byed cing mi'i pho nya dang mi ma yin pas rung bar byed na yang nyes byas su 'gyur ro/ /mis sbyin par byed cing mi ma yin pa'i pho nya dang mi ma yin pas rung bar byed na yang nyes byas su 'gyur ro/ /mis sbyin par byed cing mi'i pho nya dang mi ma yin pas rung bar byed na yang nyes byas su 'gyur ro/ /mis sbyin par byed cing mi ma yin pa'i pho nya dang mis rung bar byed na yang nyes byas su 'gyur ro/ /mi ma yin pas sbyin par byed cing mi'i pho nya dang mis rung bar byed na yang nyes byas su 'gyur ro/ /mis sbyin par byed cing mi'i pho nya dang mis rung bar byed na ni spang ba'i ltung byed du 'gyur te/ bsdu ba'i tshigs su bcad pa ni/ mi ma yin pa gsum gcig dang / / gnyis pa gsum du byas pa yin/ /mi yis gnyis pa gsum dag dang / /gsum gcig de dag mu brgyad do/ /zhes bya ba gsungs pa yin no/ /ma smras na nyes byas so zhes bya ba ni/ gal te pho nyas byung ba'i mtha' rjes su brjod pa sngar byas pa ma smras par dge slong gis zhal ta byed pa la skul bar byed na de las nyes byas su 'gyur ro/ /ma spangs pa la'o zhes bya ba ni/ rung ba ma yin pa dbyig la sogs pa chos gos kyi rin dge slong des pho nya de la 'di skad ces tshe dang ldan pa pho nya dge slong dag ni gos kyi rin dag len du mi rung ste zhes bya ba la sogs pa'i tshig gis ma spangs par len na nyes byas so/ /bskul ba byas pa dang / phyogs su bsdad pa byas pas spang ba byas pa na zhal ta byed pas gos sbyin par byed pa na kho bos 'di yongs su spangs kyis song la sbyin bdag nyid la phyir byin cig ces de skad du spong bar mi byed par len na yang nyes byas kho na'o/ /'dir kha cig 'di skad ces zer te/ gos kyi rin gser la sogs pa rung bar ma byas pa dag ni rigs pa 'di nyid kyis nye bar sbyar bar bya'o/ /gos kyi rin gser la sogs pa rung bar byas pa dag ni blangs kyang nyes pa med de de skad du yang bcom ldan 'das kyis bka' stsal pa/ blang bar bya zhing blangs nas kyang sbyin bdag de nyid la yid brtan te bcang bar bya'o zhes gsungs pa yin no zhes zer ro/ /kho bo ni 'di skad zer te/ gal te sbyin bdag gis gos kyi rin gyi bsam pas sbyin par byed cing / dge slong la yang gos kyi dgos pa yod na de'i tshe gos kyi rin sngar bstan pa'i rim pa 'di nyid kyis nye bar sbyar bar bya'o/ /ji ste spyi'i bsam pas sbyin par byed cing / dge slong la yang sangs rgyas mchod pa la sogs pa dang dge 'dun mchod ston gsol ba la sogs pa dag la dgos pa yod na bcom ldan 'das kyis gsungs pa'i rung ba byas nas bdag gir bya'o/ /ma dris par ston na yang ngo zhes bya ba ni/ dge slong la pho nyas ma dris par zhal ta byed pa ston na nyes byas so/ /'di skad bstan te/ pho nya des dge slong de la 'di skad ces 'phags pa rnams kyi zhal ta bgyid pa 'phags pa rnams kyi zhal ta nyams su len pa gang lags pa 'ga' zhig mchis sam zhes ma dris pa kho nar dge slong gis pho nya la zhal ta byed pa ston par byed na de la yang nyes byas kho nar 'gyur ba'o/ /re ba med pa nyid na ma sbran na yang ngo zhes bya ba ni/ zhal ta byed pa'i lag nas gos 'thob pa'i phyir re ba med pa nyid na sbyin par byed pa la ma sbran na yang nyes byas su 'gyur ba'o/ /bskul ba'i spang ba'o zhes bya ba de bshad zin to// //srin bal gyi stan gyi spang ba brjod par 'dod nas/ stan bcang bar bya'o zhes bya ba smras te/ stan ni rnam pa gnyis te/ nang tshangs can dang blings pa'o/ /de gnyis kyi ming gi rnam grangs ni ras bal can dang dbyam po zhes kyang bya'o/ /spyir stan zhes smos pa 'dis gnyi ga yang bzung ba nyid yin no/ /nang tshangs can zhes bya ba'i tshig gis phyi shun gyi rdzas kyang stan nyid kyi khongs su gtogs pa nyid yin te/ de'i phyir stan de nyid phyi shun gyi rdzas 'chad pa la ni spang ba nyid du mi 'gyur ro/ /gding ba ni stan ma yin te/ 'di ltar gding ba ni gos kyi ngo bo nyid yin te/ chig rkyang dang sbyar ma zhes bya ba la sogs par brjod pa'i phyir ro/ /stan ni nang tshangs can dang blings pa'i ngo bo nyid yin no/ /dgos pa tha dad pa'i yang phyir te stan ni grang ba'i gnyen po yin te/ 'di ltar 'brog phyogs dag tu grang bas gnod par gyur pa dag gi dbang du mdzad nas stan rjes su gnang ba yin la/ gding ba ni mal stan g.yogs pa'i phyir dang / kun du bsrung ba'i phyir gnang ba yin te/ de lta bas na gding ba las stan tha dad pa yin par rig par bya'o/ /rnam par 'byed pa las kyang gding ba ni so sor gding ba zhes rgya cher gsungs so/ /mdo sde las kyang gding ba phrag pas blangs nas zhes 'byung ste/ lam du 'gro bas dbyam po 'am ras bal can phrag pas blangs nas khyer ba ni tshul ma yin pas de'i phyir gding ba dang stan ni tha dad do/ /stan gyi tshad ni gding ba dang 'dra bar rig par bya ste/ 'khor gsum khebs pa'i mthar thug pa'i tshad de tsam gyis na ltung ba'i dngos gzhir 'gyur ba yin no/ /de bas chung na ni nyes byas su 'gyur ro/ /stan gyi tshad ni bcom ldan 'das nyid kyis gsungs pa yin te/ btsun pa stan gyi tshad gang lags/ nye ba 'khor gsum ste/ stan chen po dang / 'bring dang chung ngu'o/ /de la chen po ni khru phyed dang lnga'o/ /chung ngu ni khru phyed dang gsum mo/ /'bring ni de gnyis kyi bar ro/ /zheng gi tshad ni gding ba'i tshad dang mnyam mo/ /ci zhig byas na srin bal gyi spang bar 'gyur zhe na/ de'i phyir srin bal gyi byas sam byed du bcug na'o zhes bya ba smras te/ srin bal gyi zhes bya ba ni/ srin bal gyi stan nang tshangs can nam blings pa'o/ /byas sam zhes bya ba ni rang gis so/ /byed du bcug na'o zhes bya ba ni/ gzhan la bcol ba ste/ des na srin bal gyi spang bar 'gyur ro/ /byas pa dang byed du bcug pa gnyis kyi grub pa bstan pa'i phyir/ stan la ni bkram pa nyid byed pa mthar thug pa'i dang po yin no zhes bya ba smras te/ stan byed pa la der dgos pa'i srin bal gyi mtha' dag bkram pa nyid gang yin pa de ni byed pa mthar thug pa dang po yin par rig par bya'o/ /byed pa zhes bya ba ni stan byed pa'o/ /byed pa mthar thug pa zhes bya ba ni zin pa ste/ byed pa mthar thug pa byas zin pa de'i dang po ni bkram pa nyid ces bya ba srin bal gyi bal bting ba nyid yin par rig par bya'o/ /'di skad bstan te/ de tsam byas na dngos gzhir 'gyur ro/ /de phyin chad gang byed pa de ni de'i khongs su 'dus pa yin te/ rtsom pa gcig tu gyur pa'i phyir ro/ /'dir gzhung ni zhu ba kha cig las ji tsam gyis na ltung ba rdzogs par 'gyur/ gang tshun chad bkram par gyur na'o zhes gsungs pa yin no/ /byas zin pa rnyed pa dang yongs su longs spyod pa dang mngon par 'du byed pa dag la ni ltung ba med do zhes bya ba ni/ byas zin pa rnyed pa dang / gzhan gyis byas zin pa la yongs su longs spyod pa dang / rnying pa'i byi dor mngon par 'du byed pa dag la ni ltung ba med de/ 'di ltar bdag gir byed pa dang / yongs su longs spyod pa la ni nyes pa med kyi rtsom pa dang rjes su bsgrub pa gnyis la nyes par 'gyur bar bzhed pa'i phyir ro/ /srin bal gyi spang ba rnam par 'byed pa'o zhes bya ba de rnam par 'byed pa las 'byung ba bshad zin to// // zhu ba'i skabs nas 'byung ba bsdu ba'i phyir/ nyung ngu dang bsres pa nyid na na smad pa nyid do zhes bya ba smras te/ srin pa la dang bal dkar po'am/ sha na'i ras bal lam/ gso bal la sogs pa'i rdzas nyung ngu dang bsres te stan byed pa nyid na na smad pa nyid de/ kha na ma tho ba na smad pa nyid de nyes byas su 'gyur ro zhes bya ba'i tha tshig go/ /de ni stan thams cad kyi dbang du byas pa yin no/ /rdzas nyams pa nyid la yang ngo zhes bya ba la/ yang ngo zhes bya ba'i sgras ni na smad pa nyid do zhes bya ba'i rjes snyegs par byed do/ /rdzas nyams pa nyid ces bya ba ni/ srin bal nyams pa nyid de rdzas de las stan byed dam de dang bsres te byed na yang na smad pa nyid de nyes byas nyid do/ /bal la sogs pa la yang de bzhin du shes par bya ste/ ltung ba rnam par gzhag pa 'dra ba'i phyir ro/ /cha mnyam par bsres pa nyid la ni kha na ma tho ba rdzogs par 'gyur te/ 'di lta ste/ srin bal gyi bal dang bal nag po cha mnyam par bsres te stan byed na spang ba kho nar 'gyur ro/ /srin bal gyi spang ba zhu ba'o zhes bya ba de zhu ba'i skabs nas 'byung ba rdzogs so/ /srin bal gyi spang ba'o zhes bya ba de bshad zin to// //bal nag po 'ba' zhig gi spang ba brjod par bya ste/ srin bal gyi spang ba'i rnam pa sngar bstan ma thag pa khas blangs nas/ srin bal zhes bya ba de'i gnas su bal nag po 'ba' zhig pa'i ming gzhan brjod par bya ste/ de'i phyir lug gi bal nag po 'ba' zhig dag go zhes bya ba smras so/ /'di skad bstan te/ lug gi bal nag po 'ba' zhig dag las stan byas sam byed du bcug na spang bar 'gyur ro/ /ci zhig gis bal nag por gyur pa yin/ rang bzhin gyis sam/ kha bsgyur bas sam/ gnyi gas she na/ de'i phyir rang bzhin gyis so zhes bya ba smras te/ gzhan gyis ma yin no/ /sngon po dang 'dam kha dang kham pa dag kyang de nyid do zhes bya ba ni sngon po la sogs pa dag kyang de nyid de/ bal nag po 'ba' zhig nyid dang 'dra bar rig par bya'o zhes bya ba'i tha tshig go/ /bal nag po 'ba' zhig gi spang ba'o zhes bya ba de bshad zin to// //da ni cha gnyis bsre ba'i spang ba brjod par bya ste/ bal nag po bas dkar po dang 'khob bal dag dman pas de'i phyir dman pa nyid dam/ dman pa dang bsres pa nyid ces bya ba'i rnam pas dkar po dang 'khob bal dman pa dang bal nag po'i rdzas bsres pa de las stan byed na nyes byas su thal bar 'gyur ba bsal ba'i phyir/ cha gnyis bsre ba'i spang ba bca' ba mdzad do/ /gang gi tshe sha na'i ras bal dang / gso bal la sogs pa'i rdzas dman pa dag dang / bal nag por sre bar byed na ni de'i tshe bal nag po 'ba' zhig gi spang bar gtogs pa'i nyes byas su 'gyur ro/ /gang gi tshe dkar po dang 'khob bal gyi rdzas tshad pas nyung ba dag dang sre bar byed na ni de'i tshe cha gnyis bsre ba'i spang bar 'gyur ro/ /'dir yang sngar bstan pa'i cho ga khas blangs nas tshad kyi bye brag 'ba' zhig brjod par bya ste/ de dag phyed pas lhag pa nyid na'o zhes bya ba ni/ lug gi bal nag po de dag phyed kyi cha bas lhag pa nyid na cha gnyis bsre ba'i spang bar 'gyur ro gang gi tshe dkar po dang 'khob bal dag ni lhag par gyur la/ lug gi bal nag po dag ni nyung ba'am/ mnyam par gyur na ni de'i tshe ltung ba med do/ /phyed dkar po dang 'khob bal dag las cha mnyam pa nyid du'o zhes bya ba ni/ bal nag po ni dkar po dang 'khob bal dag ni so so'i cha bas lhag par bya ste/ spyir phyed kyi cha ni nag po las bya'o/ /phyed ni dkar po dang 'khob bal las cha mnyam pa nyid du bya'o/ /'di skad bstan te/ spyi'i tshoms las phyed ni lug gi bal nag po las bya'o/ /bzhi cha gcig ni dkar po las bya'o/ / bzhi cha gcig ni 'khob bal las bya'o/ /gang gi tshe 'khob bal bas dkar po lhag par byed na ni de'i tshe nyes byas so/ /ci ste dkar po bas 'khob bal lhag par byed na ni de'i tshe ltung ba med de mod pa dang rin chung ba'i phyir ro/ /yul gang na bal dkar po rin che zhing shin tu dkon la srin bal gyi bal ni rin chung zhing shin tu mod pa der ni srin bal gyi gnas su bal dkar por rig par bya'o/ /nag po la yang de bzhin du sbyar bar bya'o/ /de ltar na srin bal la ni ltung ba med la/ bal la ni ltung bar 'gyur ba dang / bal nag po 'ba' zhig la ni ltung ba med la/ dkar po la ni ltung bar 'gyur ro/ /lug gi bal dkar po ni gang yin/ 'khob bal ni gang yin zhe na/ de'i phyir glo dang rgyab dang gnya' ba nas skyes pa ni snga ma'o zhes bya ba smras te/ glo dang rgyab dang gnya' ba ni de dag nyid de/ glo dang rgyab dang gnya' ba nas skyes pa ni bal snga ma ste/ dkar po yin par rig par bya'o/ /mgo dang rkang pa dang lto nas skyes pa ni phyi ma'o zhes bya ba ni/ 'khob bal lo zhes bya ba'i tha tshig go/ /cha gnyis bsre ba'i spang ba'o zhes bya ba de bshad zin to// //lo drug tu bcang ba'i spang ba brjod par 'dod nas/ ma dag pa gsol bar mi bya'o/ /rang dag rtog tu 'dong bar bya'o/ /yang na dge slong bskos pa dag go/ /stan la yang de bzhin no zhes sngar khang pa'i dge 'dun lhag ma rnam par 'byed pa'i skabs su 'dra bar bstan pa dag 'dir yang dran par bya ste/ stan brtag par bya ba la rtog par byed pa'i dge slong dag gis gang bya ba de brjod par bya ste/ chu dang zheng gnyi gar lhag pa nyid yin na gcad par bya'o zhes bya ba ni/ chu dang zheng ni chu dang zheng ste/ chu dang zheng gnyi gar de lhag pa nyid yin te/ tshad las 'das pa nyid yin na dge slong de dag gis gcad par bya'o/ /thung ba nyid dang dog pa nyid dag ni bskyed par bya'o zhes bya ba ni/ thung ba nyid dang dog pa nyid ni thung ba nyid dang dog pa nyid de de gnyis ni bskyed par bya'o/ /'di skad bstan te/ gal te chu zheng gnyi gar lhag pa nyid yin na ni de'i tshe gcad par bya'o/ /gal te thung ba nyid dang / dog pa nyid yin na ni de'i tshe bskyed par bya ste/ mdo snga ma gnyi ga'i bsdus pa'i don ni de yin no/ /ral na btsem par bya'o zhes bya ba ni/ stan ral na drub pa la sogs pas btsem par bya'o/ /'di skad bstan te/ gal te ral bar gyur na de'i tshe drub pas btsem par bya'o/ /bug rdol du gyur tam sha zad pa dag ni sbyar bar bya'o zhes bya ba ni/ bug rdol du gyur pa dang / sha zad pa ni bug rdol du gyur pa dang sha zad pa ste/ de gnyis la ni sbyar bas glan par bya'o/ /gal te bug rdol du gyur te bar skabs bar skabs su bug rdo la byung bar gyur tam sha zad par gyur te/ srab mor gyur na de'i tshe stan bug rdol du gyur tam sha zad par gyur na de la sbyar ba zhes bya ba rim gcig gis glan par bya'o zhes bya ba'i tha tshig go/ /bcos dka' ba nyid yin na sbyin no zhes bya ba la/ bcos dka' ba nyid ces bya ba ni/ dka' bas phyir bcos par mi nus pa ste/ de'i dngos po ni de nyid do/ /bcos dka' ba nyid de la ni gnang ba sbyin no/ /'di skad bstan te/ gal te sngar bstan pa'i bcos pa'i thabs kyis phyir bcos par mi nus pa yin na de'i tshe stan gzhan bya ba'i phyir gnang ba sbyin par bya'o/ /'di ltar lag gi bla'i phyir gsungs pa ni gleng gzhi'i dbang gi phyir yin gyi gzhan la yang nye bar sbyar du rung ba'i phyir spyir mdor bris so/ /ci zhig byas na lo drug tu bcad pa'i spang bar 'gyur zhe na/ de'i phyir gnang ba ma thob pa gzhan yod pa'am rang dgar btang bas lo drug ma lon par stan byas pa nyid na'o zhes bya ba smras te/ dge slong gang gis stan bya ba'i phyir dge 'dun las gnang ba ma thob pa de ni gnang ba ma thob pa ste des so/ /gzhan yod pa'am zhes bya ba ni/ stan gzhan yod pa'o/ /rang dgar btang bas zhes bya ba ni/ rang gi mos pas yongs su btang ba'o/ /lo drug ma lon par zhes bya ba ni/ gang gis stan gzhan byas nas sam rang dgar btang nas lo drug ma lon pa ste/ de'i tshe'o/ /stan byas pa nyid na'o zhes bya ba ni/ de'i tshe stan zin par byas pa nyid na spang ba'i ltung byed du 'gyur ba'o/ /'di skad bstan te/ gal te dge slong la rang gi stan yod dam/ 'on te rang dgar de yongs su gtong bar byed cing lo drug kyang ma lon la dge 'dun las gnang ba yang ma thob pa'i bar du stan gzhan byed na spang ba'i ltung byed du 'gyur ro zhes bya ba'i tha tshig go/ /blings pa'i stan gyi ltung ba'i dbang du byas pa yin par blta bar bya'o/ /brtsams pa nyid na rtsom na zin pa dang 'dra'o zhes bya ba la/ brtsams pa nyid na zhes bya ba ni/ stan dang po brtsams pa nyid na'o/ /rtsom na zhes bya ba ni/ brtsams pa de nyid dang lhan cig tu'am/ phyis stan gzhan rtsom na'o/ /zin pa dang 'dra'o zhes bya ba ni/ snga ma shos byas zin nas cig shos rtsom pa dang 'dra ste nyes byas su 'gyur ro/ /'di skad bstan te/ gal te dge slong gis stan rtsom par byed cing brtsams pa de nyid dang lhan cig tu'am phyis stan gnyis pa rtsom par byed na ji ltar snga ma shos zin nas gzhan rtsom pa na nyes byas su 'gyur ba de bzhin du stan brtsams nas lhan cig tu'am phyis gnyis pa yang nyes byas kho nar 'gyur ro/ /mthar thug na sbyor ba'i ltung bar mi 'gyur ba nyid ma yin no zhes bya ba ni/ stan phyis brtsams pa shos sngar mthar thug ste zin par gyur na yang sbyor ba'i ltung bar mi 'gyur ba nyid ma yin te/ sbyor ba'i ltung ba nyes byas su 'gyur ba kho na yin no/ /'di skad bstan te/ gal te dge slong gis sngar stan gcig rtsom par byed cing phyis gnyis pa rtsom par byed la phyis brtsams pa shos sngar zin par byed na de'i tshe dngos gzhi'i ltung bar mi 'gyur te de'i tshe na gnyis pa zin pa med pa'i phyir ro/ /phyi ma shos rtsom pa'i dus nyid na sbyor ba'i ltung ba nyes byas nyid du ni 'gyur ro/ /'di ltar gang kho na las sbyor ba'i ltung bar 'gyur ba de kho na las dngos gzhi'i ltung bar 'gyur ba de ltar ni rig par mi bya ste/ stan gnyis pa zin pa'i gnas skabs la dngos gzhi'i ltung bar 'gyur ba'i phyir ro/ /rab tu byung ba gzhan gyi ni tha dad pa nyid do zhes bya ba ni/ sngon dang phyis rab tu byung ba gnyis ni tha dad pa nyid de/ rgyun tha dad pa nyid do zhes bya ba'i tha tshig go/ /'di skad bstan te/ dge slong gis rab tu byung ba snga ma'i tshe stan rtsom par byed dam/ zin par byed cing de nas rab tu byung ba phyi ma'i tshe stan gzhan rtsom mam byed na/ dus yongs su rdzogs pa'i sngon rol yin du zin kyang / de lta mod kyi nyes pa med de rab tu byung ba gzhan ni tha dad pa yin pa'i phyir ro/ /khyim pa'i gnas skabs bzhin te/ ji ltar khyim pas stan rtsom mam byed kyang rung ste/ phyis rab tu 'byung zhing stan gzhan rtsom pa'am byed na de la ltung bar mi 'gyur ba bzhin du 'dir yang de dang 'dra'o/ /'dir gzhung ni zhu ba kha cig las dge slong gis lo drug gi mdun rol du stan bgyid cing / ltung bar yang mi 'gyur ba 'ga' mchis sam/ yod de lo drug gi mdun rol du babs shing de yang bsnyen par rdzogs nas stan gzhan byed pa la ltung ba med pa yin no/ /stan brtsams te babs pa yang de bzhin no zhes gsungs pa yin no/ /lo drug tu bcang ba'i spang ba'o zhes bya ba de bshad zin to// //bam po bcu dgu pa/ ci zhig byas na mtho gang gi spang bar 'gyur zhe na/ de'i phyir gding ba rnying pa las bde bar gshegs pa'i mtho gang gis ma glan pa'i gding ba gsar pa spyod na'o zhes bya ba smras te/ gding ba gsar pa gang la gding ba rnying pa las bde bar gshegs pa'i mtho gang gis ma glan pa de ni gding ba rnying pa las bde bar gshegs pa'i mtho gang gis ma glan pa ste/ khyad par de lta bu can gyi gding ba gsar pa so sor gding ba spyod na spyod pa'i spang ba'i ltung byed du 'gyur ro/ /sar pa zhes bya ba ni gsar du byas pas sar pa dang / gsar du rnyed pas sar pa ste/ de las 'dir ni gsar du byas pas sar pa bzung ngo / /de'i phyir gal te gding ba gsar du byas pa zhig ga las rnyed kyang rung ste/ dge slong des de la yang rang gi gding ba rnying pa las bde bar gshegs pa'i mtho gang gis glan par bya'o/ /ci gding ba rnying pa med na yang bde bar gshegs pa'i mtho gang gis ma glan pa'i gding ba gsar pa spyod pa la ltung ba 'di rnam par gzhag gam zhe na ma yin te de'i phyir/ gal te yod na'o zhes bya ba smras te/ gal te gding ba rnying pa yod na des de ltar bya'o/ /ci gal te ril gyis yod na yang de'i phyir ltung ba 'dir 'gyur ram zhe na/ de'i phyir de tsam na yang ngo zhes bya ba smras te/ gal te bde bar gshegs pa'i mtho gang tsam zhig yod na yang zhes bya ba'i tha tshig go/ /ci gal te sra ba de tsam zhig yod na'am zhe na/ de'i phyir bcos par nus na yang ngo zhes bya ba smras te/ gal te bcos par nus na ste/ gal te bcos su rung ba yin na zhes bya ba'i tha tshig go/ /mthud cing sbyar du rung bas kyang ngo zhes bya ba ni/ dam dum mthud cing sbyar du rung na des kyang zhes bya ba'i tha tshig ste/ de lta bu med na ltung bar mi 'gyur ro zhes bya ba'i tha tshig go/ /mtho gang gi spang ba'o zhes bya ba de bshad zin to// //ci zhig byas na bal thogs pa'i spang bar 'gyur zhe na/ de'i phyir khyer ba med na dpag tshad gsum las 'das par lug gi bal khyer na'o yod na yang ngo zhes bya ba smras te/ khyer ba med na dpag tshad gsum las 'das par lug gi bal khyer na rgyang grags kyi mthar phyin na spang ba'o/ /rgyang grags phyed du phyin na nyes byas so/ /khyer ba yod bzhin du bdag nyid kyis khyer na ni rtsom pa'i dus kho na ni nyes byas gzhan gcig go/ /rgyang grags phyed du phyin na nyes byas gzhan gcig go/ /rgyang grags kyi mthar phyin na spang ba'i ltung byed du 'gyur ro/ /'gro ba ni gnyis su gsungs te ltung ba dang bcas pa dang / ltung ba med pa'o/ /de la ltung ba dang bcas pa ni bal thogs pa dang dge slong ma dang lhan cig lam du 'gro ba dang / dge slong ma dang lhan cig grur 'jug pa dang / skyes pa med par bud med dang lam du 'gro ba dang / rkun ma dang lhan cig lam du 'gro ba'o/ /ltung ba med pa ni yang yang za ba dang / 'dus shing za ba dang khrus byed pa'o/ /de la ltung ba med pa ni dpag tshad phyed phyed do zhes 'og nas 'byung ngo / /ltung ba dang bcas pa bstan pa'i phyir/ lam du 'gro ba ni rgyang grags kyi bdag nyid do zhes bya ba smras te/ lam du 'gro ba ni lam du zhugs te 'gro ba'o/ /'gro ba de ni rgyang grags kyi bdag nyid de rgyang grags kyi mthar phyin na ltung bar 'gyur ro zhes bya ba'i tha tshig go/ /'di skad bstan te/ bal thogs pa la sogs pa lam du 'gro ba'i rgyu las kha na ma tho bar 'gyur ba dag la ni rgyang grags kyi tshad tsam du song na dngos gzhir 'gyur ro/ /phyed du na sbyor ba'o zhes bya ba ni/ rgyang grags kyi phyed kyi bdag nyid du son na sbyor bar 'gyur te/ de tsam du son na sbyor ba yongs su rdzogs pa nyid yin no/ /'dir gzhung ni rgyang grags phyed du son na nyes byas su 'gyur ro/ /rgyang grags su son na spang ba'i ltung byed do zhes gsungs pa yin no/ /rdzu 'phrul las gzhan pas nam mkha' la 'gro na nyes byas so zhes bya ba la/ rdzu 'phrul las gzhan pas zhes bya ba ni/ rdzu 'phrul las gzhan pa gsang sngags la sogs pa thabs gzhan gyis te/ des nam mkha' la 'gro na nyes byas so/ /rdzu 'phrul gyis 'gro na ltung ba med do/ /sprul pas kyang ngo zhes bya ba la/ kyang ngo zhes bya ba'i sgra ni nyes byas so zhes bya ba'i rjes bsnyags pa'i phyir ro/ /sprul pa yang rdzu 'phrul gyis byas pa yin pas des 'gro na yang nyes pa med do snyam pa bsal ba'i phyir nyes byas so zhes bya ba smras te/ de ni lus kyi rnam par rig byed kyi dbang du byas pa yin pa'i phyir ro/ /'dir gzhung ni zhu ba las btsun pa re zhig dge slong gis nam mkha' las bal 'tshal na ltung ba cir 'gyur/ rdzu 'phrul gyis khyer na ni ltung ba med do/ /rnam pa gzhan gyi khyer na ni nyes byas so/ /btsun pa re zhig dge slong gis sprul pa rung ba bgyis pas 'tshal na ltung ba cir 'gyur/ nyes byas su 'gyur ro zhes gsungs pa yin no/ /zhwa dang lham sgrog gu can dang / stod kor nang tshangs can dang / rgya cang dang / lcag po dang / shur bu phre'u la sogs pa'i don du de tsam dag la ni nyes pa med do zhes bya ba ni/ zhwa la sogs pa'i tshad ldang ba tsam zhwa la sogs pa'i ched du khyer ba la ni ltung ba med do zhes bya ba'i tha tshig go/ /rgyang grags dang dpag tshad kyi tshad rdul phra rab la sogs pa las bsgyur te bsgre ba bstan pa'i phyir/ rdul phra rab dang / rdul phra mo dang / chu dang / lcags dang / ri bong dang / lug dang / glang dang / nyi zer gyi rdul dang / sro ma dang / shig dang / nas dang / sor rnams ni snga ma drug la phyi ma'o zhes bya ba smras te/ rdul phra rab dang / rdul phra mo dang / chu dang lcags dang ri bong dang / lug dang glang dang nyi zer ni de dag nyid de so sor phye nas phyis rdul zhes bya ba'i sgra dang sbyar te drug la phyi ma gcig go zhes bya bar sbyar ro/ /rdul zhes bya ba'i sgra ni chu la sogs pa man chad dang so sor sbyar bar bya ste/ chu rdul dang / lcags rdul dang / ri bong rdul dang / lug rdul dang / glang rdul dang / nyi zer gyi rdul zhes bya bar sbyar ro/ /de bzhin du sro ma dang shig dang nas dang sor yang de dag nyid yin te/ rdul phra rab la sogs pa sor gyi mthar thug pa de rnams ni snga ma drug la phyi ma gcig tu bsgyur cing bsgre'o/ /'di skad bstan te/ rdul phra rab drug la rdul phra mo gcig go/ /rdul phra mo drug la chu rdul gcig go/ /chu rdul drug la lcags rdul gcig go/ /lcags rdul drug la ri bong rdul gcig go/ /ri bong rdul drug la lug rdul gcig go/ /lug rdul drug la glang rdul gcig go/ /glang rdul drug la nyi zer gyi rdul gcig go/ /nyi zer gyi rdul drug la sro ma gcig go/ /sro ma drug la shig gcig go/ /shig drug la nas gcig go/ /nas drug la sor gcig go/ /sor bzhi drug la khru gang ngo / /khru phyed dang bzhi la mi'i srid do/ /khru bzhi la gzhu'o/ /de lnga brgya la rgyang grags so zhes bya ba la/ sor bzhi drug la khru gang ngo zhes bya ba ni sor bzhi phrag drug la khru gang ste/ sor nyi shu rtsa bzhi la khru gang du brtsi'o zhes bya ba'i tha tshig go/ /khru phyed dang bzhi la mi'i srid do zhes bya ba ni/ mi gang la srid du khru phyed dang bzhi yod pa de dag ni khru phyed dang bzhi pa ste/ de ni khru phyed dang bzhi la mi'i srid ces bya'o/ /khru bzhi la gzhu'o zhes bya ba ni/ gzhu gang la khru bzhi'i tshad yod pa de ni khru bzhi pa'i gzhu'o/ /de lnga brgya la rgyang grags so zhes bya ba ni/ gzhu de lnga brgya la rgyang grags gcig ces bya'o/ /rgyang grags brgyad la ni dpag tshad gcig go/ /nas 'bru drug glos gshibs pa la sor gcig tu rig par bya ste/ 'dir gzhung ni nas drug la sor mo'i tshigs gcig go zhes gsungs pa yin no/ /dgon pas 'dul ba la tha snyad btags pa'i phyir 'dir de'i tshad kyang bstan pa'i phyir/ dgon pa'i dang po ni de'i mtha'o zhes bya ba smras te/ dgon pa'i dang po ni rgyang grags de'i mtha' yin par rig par bya'o/ /de phan chad ni dgon pa yin par ma smras kyang grub po/ /lus kyis khur mi bskur ro zhes bya ba la/ lus kyi khur zhes bya ba ni/ phrag rdang gi khur la bya ste/ phrag rdang gis khur bskur bar mi bya'o/ /glo dang rgyab dang rked pa dang mgo bo dag gis mi bskur ro zhes bya ba ni/ glo la sogs pas khur gang yang bskur bar mi bya'o/ /'dir thun mong ma yin pa nyid du dogs par mi bya'o zhes bya ba ni/ khur bskur ba'i skabs 'dir dge slong dang dge slong ma'i bslab pa'i gzhi thun mong ma yin pa nyid du dogs par mi bya ste/ 'di ltar thun mong nyid yin par shes par bya'o/ /'di skad bstan te/ dge slong dag 'ba' zhig gis lus kyi khur la sogs pa bskur bar mi bya bar ma zad kyi dge slong ma rnams kyis kyang bskur bar mi bya'o/ /khur phyed las lhag par bskur bar mi bya'o zhes bya ba ni/ mi'i khur gyi phyed gang yin pa de las lhag pa'i khur dge slong gis bskur bar mi bya'o/ /'dir gzhung ni mi'i khur gcig gang yin pa de dge slong gnyis kyis khur bar bya'o zhes gsungs pa yin no/ /bal thogs pa'i spang ba'o zhes bya ba de bshad zin to// //bal rmel du 'jug pa'i spang ba brjod par bya ste/ de ni sngar 'khrur 'jug pa'i spang ba'i skabs su byin gyis brlabs pa rang gi rnying pa 'khrur gzhug par 'os pa chos gos dang gding ba dag las 'ga' zhig bsgo bas 'khrur bcug gam/ 'tshed du bcug gam/ 'chag tu bcug pa nyid na'o zhes smos pa nyid dang rnam pa 'dra ba kho nar rig par bya ste/ 'dir bye brag 'ga' tsam yod pa gang yin pa de brjod par bya ste/ chos gos rnying pa'i gnas su lug gi bal dag go zhes bya ba ni/ sngar 'khrur 'jug pa'i spang ba'i skabs su byin gyis brlabs pa rang gi rnying pa 'khrur gzhug par 'os pa chos gos dang gding ba dag las 'ga' zhig ces smos pa'i gnas su 'dir lug gi bal dag ces bya bar gzung bar bya'o/ /'chag pa rmel ba'o zhes bya ba ni/ 'khrur 'jug pa'i spang ba'i skabs su 'chag pa zhes smos pa'i gnas su 'dir rmel ba zhes brjod par bya ste/ 'khrur bcug pa'i spang ba'i skabs su 'khrur 'jug gam/ 'tshed du 'jug gam/ 'chag tu bcug pa dag na'o zhes smos pa de 'dir ni 'khrur bcug gam/ 'tshed du bcug gam/ rmel du bcug pa dag na'o zhes brjod par bya'o/ /bal rmel du 'jug pa'i spang ba'o zhes bya ba de bshad zin to// //ci zhig byas na gser dngul la reg pa'i spang bar 'gyur zhe na/ de'i phyir rin po che bdag gir byas na'o zhes bya ba smras te/ pad+ma rA ga la sogs pa bdag gir byas shing dang du len na spang ba'i ltung byed do/ /'dir gzhung ni zhu ba kha cig las rkang pa'i drung na mo'i ro myong ngam/ /'thob pa'i gnas na sa le sbram gyi rdzas 'dug pa bdag gir byed na spang bar 'gyur ro zhes gsungs pa yin no/ /gnas skabs gang la bdag gir byed pa yongs su rdzogs par 'gyur zhe na/ de'i phyir lcogs pa nyid na de rdzogs so zhes bya ba smras te/ bdag gir bya ba'i dngos po rin po che la sogs pa lcogs pa nyid du 'gyur te/ thob par nus pa nyid dang lag tu 'ong bar nus pa nyid na bdag gir bya ba de yongs su rdzogs pa yin no/ /de bas pha zad na ni phyed nyid do zhes bya ba ni/ lcogs pa nyid kyi gnas skabs pas pha zad na 'dug na ni bdag gir bya ba'i phyed nyid de nyes byas su 'gyur ro zhes bya ba'i tha tshig go/ /'di skad bstan te/ bdag gir bya ba'i dngos po rin po che la sogs pa lag tu thob par rung ba nyid yin la de la bdag gir byed na ni dngos gzhi'o/ /mi rung ba nyid la bdag gir byed na ni nyes byas so/ /de yang thob pa'i gnas zhes bya ba las rig par bya ste/ thob pa'i gnas nas sa le sbram gyi rdzas 'dug pa bdag gir byed na zhes gsungs pa'i phyir ro/ /ci 'dir bdag gir byed pa zhes bya ba gcig pu rjes su sgrub na spang ba 'dir 'gyur ram zhe na/ de'i phyir rang gi rung bar ma byas pa yang ngo zhes bya ba smras te/ rung ba ma byas pa zhes bya ba ni/ dngos po gang la 'og nas 'byung ba'i rung bar byas pa zhes bya ba de ma byas pa de ni rung bar ma byas pa ste/ rin po che la sogs pa'i dngos po rung bar ma byas pa de la 'og nas 'byung ba'i reg pa dang / reg tu bcug na zhes bya bar sbyar ro/ /de bas na rin po che la sogs pa rung bar ma byas pa ni ltung ba'i byed pa po nyid yin no/ /'og nas 'byung ba'i cho gas rung bar byas pa ni bzung yang nyes pa med do/ /'di ltar gzhan gyi rin po che la reg pa ltung byed 'ba' zhig tu bstan pas lhag ma rang gi ni spang ba'i cho gar mdzad pa yin te/ gzhan gyi la spang ba med pa'i phyir ro/ /'di ltar so sor thar pa'i mdo las rang gi zhes ma smos mod kyi 'on kyang shugs kyis na de yin par mngon no/ /de ltar yang gzhung ni yang dge slong rang gi rin po che'am/ rin po cher smos pa rang gi lag gis len tam len du bcug na zhes bya ba la sogs pa gsungs pa yin no/ /ci zhig byas na ltung bar 'gyur zhe na/ de'i phyir reg gam reg tu bcug na'o zhes bya ba smras te/ reg gam zhes bya ba ni rang gi lus kyis so/ /reg tu bcug na'o zhes bya ba ni gzhan no/ /tshig gis kyang byed la spring yig la sogs pas kyang byed na de dag las 'dir reg pa gang yin par rig par bya zhe na/ de'i phyir gang yang rung bas so zhes bya ba smras te/ rnam pa gang yang rung bas 'di nas long la 'dir chug cig ces bya ba lta bu dmigs kyis ma smras par phyogs gcig par reg na yang spang bar 'gyur ro/ /snyad gdags su rung ba'i zangs ma la ni nyes byas so zhes bya ba ni/ dong tse dang pa Na la sogs pa'i ming du byas shing mtshan byas pa'i zangs ma gang yin pa de ni snyad gdags su rung ba zhes bya ste/ de la rang gis reg gam/ gzhan reg tu bcug na nyes byas so/ /gzhan la ni ltung ba med do zhes bya ba ni/ snyad gdags su rung ba'i zangs ma mtshan byas pa las gzhan pa'i zangs ma la'o zhes bya ba'i tha tshig go/ /zha nye dang khro chu dang ro nye dang lcags dag la yang ngo zhes bya ba ni/ zha nye la sogs pa ni rin po che ma yin pa'i phyir zhes bya ba'i tha tshig ste/ de dag la reg gam reg tu bcug na ltung ba med do/ /dge tshul gnyis kyis kyang ngo zhes bya ba ni/ dge tshul dang dge tshul ma gnyis kyis rin po che la reg gam reg tu bcug na ltung ba med do/ /rang gi rung ba ma byas pa yang ngo zhes smras na rung ba gang ma yin pa'i rung ba de ci 'dra ba zhig ce na/ de'i phyir sbyin bdag bdag po nyid du mos su gzhug pa dang / zhal ta byed pa bdag po nyid du khas lan du gzhug pa dang / byin gyis brlabs pa zhes bya ba ni rung ba dag yin no zhes bya ba smras te/ dge slong dag de lta bas na chos gos kyi rin dag rnyed pa na blang bar bya zhing blangs nas kyang sbyin bdag de nyid la yid brtan te bcang bar bya bar ngas rjes su gnang ngo zhes gsungs pa de ni rung ba dang po yin no/ /de bzhin du dge slong rnams kyis ji srid 'tsho'i bar du rung ba ma yin pa'i dngos po gang cung zad ji snyed pa de thams cad sbyin bdag spro bar bya zhing de'i ming gis bcang bar bya'o zhes gsungs pa de ni rung ba gnyis pa yin no/ /rung ba gsum pa ni byin gyis brlabs pa zhes bya ba yin par rig par bya'o/ /de ltar yang dge slong bram ze'i bu mos zhus pa'i mdo las dge slong rnams kyis chos gos kyi rin gang rnyed par gyur la sbyin bdag med par gyur nas dge slong dag 'gyod par gyur te/ mi len pa'i skabs de dge slong dag gis bcom ldan 'das la gsol ba dang / bcom ldan 'das kyis bka' stsal pa/ blang bar bya zhing blangs nas kyang dge slong gi mdun du 'greng ste 'di skad ces/ tshe dang ldan pa dgongs su gsol/ bdag dge slong ming 'di zhes bya bas dngos po rung ba ma lags pa 'di rnyed de/ bdag dge slong ming 'di zhes bgyi bas dngos po rung ba ma lags pa 'di byin gyis brlab bo/ /dngos po rung ba ma lags pa 'dis dngos po rung ba bsgrub par bgyi'o zhes de skad lan gnyis lan gsum du brjod par bya zhing 'gyod par yang mi bya'o zhes gsungs pa yin no/ /de lta bas na dngos po rung ba ma yin pa rung bar byas pa la reg gam reg tu bcug na yang ltung ba med do/ /de la bdag nyid kyis bdag gir yang mi bya ste/ de'i phyir sbyin bdag la yid brtan te bcang bar bya'o zhes gsungs so/ / gang la bdag nyid kyis bdag gir byed pa yod pa de la ni rang gis kyang reg par mi bya la/ gzhan yang reg tu gzhug par mi bya ste/ de la rung bar bya ba gsum char mi 'chags pa'i phyir ro/ /'di ltar bdag gir byed pa dang 'brel ba'i phyir rung ba nyid byed pa'i phyir te/ de ltar na byin gyis brlab pa'i sngags nyid las kyang 'di skad ces/ bdag gis dngos po rung ba ma lags pa 'dis rung ba bsgrub par bgyi'o zhes gsungs pa'i phyir ro/ /dngos po rung ba la bdag gir bya'i mi rung ba la ni ma yin no/ /rung ba brjod pa'i phyir reg na ltung bar yang mi 'gyur ro/ /bcom ldan 'das kyis gzhan gyi rdzas la ni rung ba rnam pa gsum ma bstan te/ des na de la reg gam reg tu bcug na ltung byed 'ba' zhig tu 'gyur ro/ /de ltar na 'dir tshig gi don 'di 'byung ste/ gal te bdag nyid kyis bdag gir bya ba spang ba'i phyir rung ba gsum las rung ba gang yang rung bas rung bar byed na de'i tshe dngos po rung ba ma yin pa la dgos pa'i dbang gis reg gam reg tu bcug na ltung bar mi 'gyur ro/ /ji ste rung ba gsum yang byed bzhin du rdzas de la bdag nyid kyis bdag gir byed pa dang rjes su 'brel na ni/ de lta na yang thams cad du ltung bar 'gyur ba kho na yin no/ /chos dang ldan pa'i don bdog pa'i rkyen las gzhan pa la mi 'chags so zhes bya ba la/ chos dang ldan pa zhes bya ba ni/ chos las mi 'bral ba ste/ rang gi lhung bzed dang chos gos dang sman la sogs pa yo byad dag go/ /de ni chos dang ldan pa yang yin la don yang yin pas chos dang ldan pa'i don to/ /de ni chos dang ldan pa'i don kyang yin la/ mi bdog pa yang yin pas chos dang ldan pa'i don mi bdog pa'o/ /de'i rkyen zhes bya ba ni/ de bsgrub pa'i rdzas gang yin pa ste/ rdzas ci tsam gyis chos dang ldan pa'i don te 'grub par 'gyur ba'o/ /rdzas de la ni rung ba de dag 'chags so/ /rkyen de las gzhan pa la zhes bya ba ni chos dang ldan pa'i don bdog go/ /de'i rkyen du mi dgos pa'i rdzas gzhan la ste/ de la ni byin gyis brlab pa de dag mi 'chags so/ /de'i phyir chos dang ldan pa'i don mi bdog pa'i rkyen las gzhan pa la mi 'chags so zhes smras so/ /'di skad bstan te/ gal te chos dang ldan pa'i don bdog pa kho na yin nam/ yang na chos dang ldan pa'i don lhung bzed dang chos gos la sogs pa de dag gi rkyen du gyur pa'i rdzas gang yin pa de yang bdog la/ chos kyi don gyi rkyen ma yin par byin gyis rlob par byed na de'i tshe rung ba de dag mi 'chags so/ /de lta bas na chos dang ldan pa zhes bya ba'i rkyen las gzhan pa la gal te rung ba gsum byed du zin kyang dge slong des de la reg gam reg tu bcug na spang ba'i ltung byed du 'gyur ro/ /rkyen zhes smos pa'i lung ni 'di yin par rig par bya ste/ chos gos kyi rin dag rnyed pa na sbyin bdag la yid brtan te bcang bar bya'o zhes gsungs pa yin no/ /chos gos la sogs pa'i ched du sems par byed pa ni chos gos la sogs pa'i rin te/ de dag gis chos gos la sogs pa sems par byed/ sgrub par byed ces bya ba'i tha tshig go/ /bdag po ring ba nyid yin na yang nyams pa med do zhes bya ba ni/ bdag po sbyin bdag gam zhal ta byed pa ring ba nyid yin te yul thag ring ba nyid du song zhing yul gyis bskal pa nyid yin na yang rung ba dag la nyes pa med do/ /bdag nyid kyi don du bza' ba byed du gzhug tu rung ngo zhes bya ba ni/ bdag nyid kyi don du zhes bya ba bdag nyid kyi phyir zan sbyor du gzhug tu rung ngo / /'di skad bstan te/ gal te dge slong gis rang la mkho ba'i phyir lus 'tsho bar bya ba'i don du zong des bza' btung sbyor du bcug na yang de lto 'dun che bar mi 'gyur te/ 'di ltar rigs pa yin no/ /phran tshegs dag las kyang de nyid dang por byas nas las byas pa'o zhes bya ba'i bar du gsungs pa dag 'dir btus so/ /lam brgyags ni rin po che man chad las so zhes 'go nas 'byung ba 'ba' zhig phran tshegs su ma gtogs te/ gzhung de ni rnam par 'byed pa dag las snang ba'i phyir ro/ /de byed pa la dbul ba'i phyir kAr ShA pa Na blang bar yang ngo zhes bya ba la/ de byed pa la zhes bya ba ni bza' ba byed pa la ste byen po la sogs pa'i gang zag la'o/ /dbul ba'i phyir zhes bya ba ni/ bza' ba byed du gzhug pa'i don du rin du dbul ba'i phyir ro/ /de'i phyir kAr ShA pa Na blang ba yang rung ngo / /de'i phyir kAr ShA pa Na blang ba la sogs pa yang rung ba med par ni blang bar mi bya'o/ /de ltar yang yon bdag la yid brtan te kAr ShA pa Na blangs nas ci 'dod par longs spyad par bya'o zhes gsungs pa yin no/ /sbyin bdag la yid brtan te zhes bya ba'i tshig las thams cad du yang rung ba byas te blang bar bya ba yin no/ /rung ba med par bdag nyid la sogs pa'i dgos pa'i dbang kho nas ni blang bar mi bya'o/ /lam brgyags ni rin po che man chad las so zhes bya ba ni/ lam brgyags ni rin po che man chad rin po che'i mthar thug pa las bskur du rung ngo zhes bya ba'i tha tshig go/ /'dir gzhung ni dge slong dag gis lam brgyags ji lta bu mi shes nas/ bcom ldan 'das kyis bka' stsal pa/ dge slong gi lam brgyags ni bza' ba lnga dang bza' bar smos pa lnga dang rin po cher smos pa lnga'o/ /bza' ba lnga gang zhe na/ 'bras chan dang zan dron dang sha dang nya sha dang snum khur ro/ /bza' bar smos pa gang zhe na/ ci tshe dang khre rgod dang rgya sran dang bra rgod dang khre'o/ /rin po che lnga gang zhe na/ gser dang dngul dang / bai DUr+ya dang / shel dang / mu tig go/ /rin po cher smos pa lnga gang zhe na/ zha nye dang / zangs dang / ro nye dang / khro chu dang lcags so zhes gsungs pa yin no/ /me'i don du me shel nye bar gzhag par bya'o zhes bya ba ni/ dge slong gis me'i don du rin po che me shel bcang bar bya ste/ 'di yang chos dang ldan pa'i dgos pa yin no/ /de ma sbas par gzhag par mi bya'o zhes bya ba ni me shel de ma sbas ma bsrungs par gzhag par mi bya ba'o/ /ma byin par len pa la bstan par mi bya'o zhes bya ba ni/ me shel de rkun po la bstan par mi bya'o/ /de'i 'bras bu phyung nas de la sbyin par bya'o zhes bya ba ni/ me shel de'i 'bras bu me zhes bya ba de phyung nas rkun po de la me sbyin par bya'o/ /chu'i don du chu shel yang ngo zhes bya ba ni/ dge slong gis chu'i don du chu shel yang nye bar gzhag par bya ba ste/ yang ngo zhes bya ba'i sgra ni nye bar gzhag par bya'o zhes bya ba'i rjes bsnyags pa'i phyir ro/ /bsrung ba'i cho ga 'di 'dra'o zhes bya ba ni/ bsrung ba'i cho ga sba ba'i rnam pa ni de ma sbas par gzhag par mi bya'o zhes bya ba la sogs pa me shel sba ba'i cho ga sngar bstan pa dang 'dra bar rig par bya'o/ /yo byad rjes su gnang bar rin po che bdag gir bya ba'i shan bsre bar mi bya ba nyid do zhes bya ba ni/ rgya la sogs pa'i 'tshog chas ni yo byad de/ de ni rjes su gnang ba yin no/ /de rjes su gnang ba'i khongs su rin po che bdag gir bya ba'i shan bsre ba gzhug par mi bya ba nyid do/ /'di skad bstan te/ 'di ltar bcom ldan 'das kyis rgya la sogs pa'i yo byad 'chang bar rjes su gnang mod kyi/ 'on kyang dge slong gis rin po che las byas pa'i rgya la sogs pa bdag gir mi bya'o/ /rgya la sogs pa rjes su gnang ba'i rdzas ni nges par gsungs pas ni de'i phyir mdo 'di byas so/ /de ltar yang phran tshegs dag las bcom ldan 'das kyis bka' stsal pa/ de lta bas na dge slong dag gis rgya bcang ba dang / dge slong dag gis khab dang sman phor dang / phul ba'i btung phor bcang bar rjes su gnang ngo / /dge slong gis gser dang / dngul dang / be+e DUr+ya dang / shel las byas pa'i rgya bcang bar mi bya'o zhes bya ba la sogs pa gsungs pa yin no/ /gleng gzhi dag las kyang bcom ldan 'das kyis dud pa'i sman gce'u bcang bar bya'o zhes gsungs pa dang / zhus pa ji lta bu zhig bcang bar bgyi/ bka' stsal pa/ nye ba 'khor rin po che las byas pa ma gtogs so/ /snar blugs pa'i spyad dang / phul ba'i btung phor dang / khab dang khab ral dang / mig sman gyi gab tshe dang / sman phor dang / rkang rten dang / khre'u dang / sman gyi nal ze bcang bar bya'o/ /lcags kyi gar bu la lu gu rgyud gdags par bya'o zhes gsungs pa thams cad la yang ji lta bu zhig bcang bar bgyi zhes bya ba nas/ ji lta bu zhig gdags par bgyi zhes bya ba'i bar du zhus pa dang / nye ba 'khor rin po che las byas pa ma gtogs so zhes bka' stsal pa de lta bu'i tshig yod do/ /ra gan dang zangs dang 'khar ba dang shing gi lhung bzed bdag gir mi bya'o zhes bya ba ni/ lhung bzed ces bya ba'i sgra ra gan la sogs pa so so dang sbyar te/ ra gan gyi lhung bzed bdag gir mi bya'o zhes bya ba la sogs par sbyar ro/ /de dag bdag gir byas pa'am gzhan yang rung ste/ gal te yongs su spyad dgos par gyur na sman phor gyis yongs su spyad pas so zhes bya ba la/ de dag bdag gir byas pa'am zhes bya ba ni/ ra gan la sogs pa'i lhung bzed de dag bsnyen par rdzogs pa'i gnas skabs kyi sngon rol bsnyen par ma rdzogs pa'i tshe bdag gir byas pa'o/ /gzhan yang rung ste zhes bya ba ni/ bdag gir ma byas pa gzhan dang 'brel ba dag go/ /gal te yongs su spyad dgos par gyur na zhes bya ba ni/ de lta bu'i rkyen cig byung bar gyur na'o/ /sman phor gyis yongs su spyad pas so zhes bya ba ni/ de lta bu'i rkyen byung na ra gan la sogs pa'i lhung bzed bdag gir byas pa dang ma byas pa de dag sman phor du bsngos te/ de dag gis bza' ba dang btung ba dag kyang yongs su longs spyad par bya'i/ ra gan la sogs pa'i lhung bzed thams cad kyis thams cad du spang bar bya ba ni ma yin no/ /byin gyis ma brlabs pa'i lhung bzed dang 'dra bar bsod snyoms la sogs pa la bskur bar ni mi bya'o/ /mdo snga ma shos kyi lung ni 'di yin te/ nye bar ma bzhag pa dag ni nye bar gzhag par mi bya'o zhes gsungs pa'o/ /mdo phyi ma shos kyi lung ni 'di yin te/ nye bar gzhag pa dag ni sman phor gyis yongs su spyad pas yongs su longs spyod par bya'o zhes gsungs pa yin no/ /lhung bzed kyi zhar la 'di brjod de/ byin gyis brlab tu rung ba ni gnyis te/ lcags las byas pa dang sa las byas pa'o zhes bya ba ni/ lhung bzed byin gyis brlab tu rung ba ni rnam pa gnyis kho na ste/ lcags las byas pa dang / sa las byas pa'o/ /rin po che bdag gir byas na'o zhes 'di ltar bstan pa'i rin po che gang yin pa bstan par 'dod nas/ nor bu dang / mu tig dang / bai DUr+ya dang / man shel dkar po dang / byi ru dang / dngul dang / gser dang / rdo'i snying po dang / spug dang / dmar po dang / g.yas su 'khyil ba la sogs pa ni rin po che'o zhes bya ba smras te/ nor bu zhes smos pas ni chu shel dang / me shel dang / shel dag 'phangs so/ /nor bur gyur pa'i khab long yang 'phangs te/ rdo bar gyur pa'i khab long ni rin po che dag ma yin te/ de la rin po che nyid med pa'i phyir ro/ /dngul zhes bya ba ni dngul skya'o/ /gser zhes bya ba ni sa le sbram mo/ /so sor thar pa'i mdo las de gnyis 'ba' zhig smos te/ yang dge slong gang rang gi lag gis gser dang dngul len tam len du 'jug na zhes gsungs pa gang yin pa de ni dpe tsam yin par rig par bya ste/ rnam par 'byed pa gzhan las nor bu la sogs pa dag len tam len du bcug na yang spang ba'i ltung byed do zhes gsungs pa'i phyir ro/ /de ltar yang nor bu dang / mu tig dang / bai DUr+ya la sogs pa len na spang ba'i ltung byed do zhes gsungs so/ /rin po che ma yin pa zangs ma la sogs pa las snyad gdags su rung ba'i mngon mtshan can dag len pa ni nyes byas su rig par bya'o/ /sogs pa zhes smos pas ni/ sangs rgyas kyi sku gdung la sogs pa dag bsdu'o/ /snyad gdags su mi rung ba la ni na smad pa nyid do zhes bya ba la/ snyad gdags su mi rung ba zhes bya ba ni/ nyo tshong byar mi rung ba ste/ nor bu la sogs pa'i don snyad gdags su mi rung ba nyo tshong byar mi rung ba de len tam/ len du bcug na de gnyi ga la ltung ba na smad pa nyid de/ nyes byas so zhes bya ba'i tha tshig go/ /'di skad bstan te/ gal te nor bu la sogs pa'i dngos po 'ga' zhig gis me la sogs pa nyams par byas par gyur nas de nyo tshong byar mi nus pa gang yin pa de len tam/ len du bcug na nyes byas so/ /dper na pad+ma rA ga la sogs pa rin po che nyid du ma gyur pa dang 'dra'o/ /de nyid bslab pa'i gzhi 'og ma mngon mtshan can gyis spyod pa zhes bya ba la yang 'dra bar bstan par bya ba'i phyir/ 'og ma la yang ngo zhes bya ba smras te/ de la yang snyad gdags su mi rung ba la ni na smad do zhes bya ba'i tha tshig go/ /snyad gdags su mi rung ba zhes bya ba de ji lta bu zhig yin par rig par bya zhe na/ de'i phyir de ni gas pa dang / chag pa dang / dum bu dang / tshig pa dang / sngon ma spyad pa dang / ma byas pa dang / mtshan dang mi ldan pa dang / bcos pa'o zhes bya ba smras te/ de ni zhes bya ba ni/ snyad gdags su mi rung ba'o/ /gas pa zhes bya ba ni/ ser ga byung ba ste/ 'byar kyang rung ma 'byar kyang rung ba'o/ /chag pa zhes bya ba ni bu ga byung ba'o/ /dum bu zhes bya ba ni phyogs gcig med pa'o/ /tshig pa zhes bya ba ni/ rin po che de me dang phrad pas rin po che ma yin pa nyid du gyur te/ nyo tshong byar mi rung bar gyur pa gang yin par shes par bya'o/ /pa Na ni mngon mtshan can lhag ma yod pa tsam du nyams pa yin gyi/ thams cad kyi thams cad du thal bar gyur pa ni ma yin te/ de len pa la nyes pa med pa'i phyir ro/ /sngon ma spyad pa zhes bya ba ni/ sngon nyo tshong byas pa tsam yang mi dran pa'i mngon mtshan gang yin pa ste/ mngon mtshan can gang la nyo tshong byas pa'i dus kyang 'jig rten na mi grag pa'o/ /ma byas pa zhes bya ba ni/ mngon mtshan can gang la mtshan du ma byas pa nyid do/ /mtshan dang mi ldan pa zhes bya ba ni/ drud pa la sogs pa'i nyes pas mtshan dang bral bar gyur pa'o/ /bcos pa zhes bya ba ni/ sa dang rtswa dang rdo ba la sogs pa dag las nor bu dang / dong tse dang / mngon mtshan can dang / rgyan dang / 'gron bu la sogs pa'i rnam par gzhag pa byas pa'o/ /'dir gzhung ni rnam par 'byed pa las dge slong gis gser gyi phreng ba la reg na spang ba'i ltung byed do/ /dge slong gis sog ma'i phreng ba la reg na nyes byas so zhes gsungs pa yin no/ /gser dang dngul la reg pa'i spang ba'o zhes bya ba de bshad zin to// //da ni mngon mtshan can gyis spyod pa'i spang ba brjod par bya ste/ gang la ltung ba 'di 'byung bar 'gyur zhe na/ de'i phyir rnyed pa 'dod pa la ltung ba 'byung ngo zhes bya ba smras te/ khe spogs 'dod pa nyid kyis rnyed pa bsgrub cing 'dod pa dang bsdu ba gang yin pa de ni rnyed pa 'dod pa ste/ rnyed pa 'dod pa'i ltung ba 'byin pa po de la ltung ba 'di rnam par gzhag go/ /de'i phyir 'dir ni skyed phyin na rnyed pa yin gyi thob pa tsam gyis ma yin no/ /'di skad bstan te/ skyed 'dod pas skyed phyin pa la mngon mtshan can gyis spyod pa'i spang ba 'di 'byung ngo / /gal te bdag nyid kyi don du rnyed pa 'dod pa nyid yin na ni sbyor ba la nyes byas su 'gyur ro/ /gzhan gyi don du na ni dngos gzhi'i gnas la nyes byas su 'gyur la/ sbyor ba la nyes byas phra mor 'gyur ro zhes bya ba'i tha tshig go/ /dngos gzhi'i ltung ba ji ltar 'byung zhe na/ de'i phyir pha rol po khyim pa nyid dang / nye du ma yin pa nyid yin na dngos gzhi'o zhes bya ba smras te/ pha rol po gang dang lhan cig tu mngon mtshan can gyis spyod pa 'di byed pa de gal te khyim pa nyid dang nye du ma yin na/ pha rol po khyim pa nyid dang / nye du ma yin pa nyid kyi yul las de'i tshe dngos gzhi'i ltung bar 'gyur ro/ /'dir gzhung ni zhu ba las nye du dang lhan cig spyod na nyes byas so/ /des nye du ma yin pa rnams dang spyod na dngos gzhi'o zhes gsungs pa yin no/ /mngon mtshan can gyis spyod pa gang la dngos gzhi'i ltung bar 'gyur zhe na/ de'i phyir skyed phyin na'o zhes bya ba smras te/ gang gi tshe skyed phyin pa de'i tshe na dngos gzhi'i ltung bar 'gyur ro/ /skyed med na ni sbyor ba tsam du zad do/ /'dir gzhung ni skyed phyin na dngos gzhi'i ltung bar 'gyur ro zhes gsungs pa yin no/ /bshags pa'i dus na yang skyed nyid spang bar 'os pa nyid yin gyi/ rtsa bar gyur pa'i rdzas ni ma yin no/ /gal te rtsa ba bas sngon nam phyis skyed thob pa de la 'di rnam par gzhag go/ /gang gi tshe skyed dang rtsa ba gnyis dus gcig tu byung na de'i tshe cha gang la ltung ba 'byin pa po'i gang zag skyed du gyur pa nyid du lhag par chags pa skye ba de'i tshe de nyid spang bar bya ba yin no/ /'dir gzhung ni ji srid du rnyed pa bdag gir mi byed pa de srid du nyes byas so/ /rnyed pa bdag gir byed na ni spang ba'i ltung byed du 'gyur ro zhes gsungs pa yin no/ /da ni mtshan nyid 'dra bar bya ba bstan pa'i phyir/ 'og ma la yang ngo zhes bya ba smras te/ 'di'i 'og mar gyur pa'i bslab pa'i gzhi nyo tshong byed pa zhes bya ba la sogs pa la yang rnyed pa 'dod pa kho na la ltung ba 'byung bar blta bar bya'o/ /de la yang pha rol po khyim pa nyid dang / nye du ma yin pa nyid dang / skyed phyin na dngos gzhi'i ltung bar 'gyur la/ de nyid spang bar 'os pa nyid yin no/ /skyed phyin na'o zhes smras na/ skyed phyin pa ni tshong pa la sogs pa las kyang 'byung la/ khe spogs 'dod pa nyid las kyang 'byung na/ de'i phyir mngon mtshan can gyis spyod pa'i spang ba 'di la skyed ga las phyin na/ dngos gzhi'i ltung bar 'gyur zhe na/ de'i phyir pa Na'am/ rin po ches spyod pa las so zhes bya ba smras te/ pa Na dang rin po che dag gis rnyed pa'i don du skyed bkye zhing spyod pa gang yin pa de las skyed gang phyin pa de la mngon mtshan can gyis spyod pa'i spang bar 'gyur ro/ /gal te dge slong gis mngon mtshan can gyis spyod pa'i phyir rin po che la sogs pa la reg gam reg tu 'jug na de lta na ni/ reg gam reg tu 'jug pa las byung ba'i spang ba'i ltung byed snga mas bsdus pa yin par rig par bya'i/ 'dir gtogs pa ni ma yin no/ /dge slong gang gis nyo tshong byas nas skyed par byed pa dang / gang gis nyo tshong ma byas par sngar thob pa la sogs pa dag skyed par byed pa de gnyi ga la yang rnyed pa grub na dngos gzhi'i kha na ma tho bar 'gyur ro/ /gal te rnyed pa ma grub na ni de'i tshe sbyor ba zhes bya ba'i nyes byas su 'gyur te/ 'di la nyo tshong ni yan lag ma yin pa'i phyir ro/ /de lta bas na nyo tshong ma byas par snga ma bskyed pa tsam kho na las rnyed pa grub na yang der gtogs pa'i kha na ma tho bar 'gyur ro/ /sbyor ba la ni gcig pa nyid do zhes bya ba ni/ skyed grub pa bas mdun rol du dge slong gis rnyed pa bsgrub pa'i phyir btsal ba gang chud zad byed na btsal ba de thams cad ni gcig pa nyid do/ /de ltar yang 'dir gzhung ni ji srid du rnyed pa sgrub par mi byed kyi bar du ni nyes byas so/ /rnyed pa grub na ni spang ba'i ltung byed du 'gyur ro zhes gsungs pa yin no/ /kun dga' ra ba pa'am/ dge bsnyen dag yod na bsko bas dkon mchog gi don du bskyed par bya'o zhes bya ba ni/ kun dga' ra ba pa'am/ dge bsnyen dag yod na de gnyis bsko bas dkon mchog gsum gyi ched du pa Na dang / rin po che la sogs pa dag bskyed pa'i ched du skyed dgye bar bya'o/ / 'di skad bstan te/ gtsug lag khang gang na gtsug lag khang dang 'brel ba'i mi kun dga' ra ba pa'am/ dge bsnyen dag yod na der dge slong dag gis 'di lta ste/ dkon mchog gsum gyi don du rin po che la sogs pa de dag nyid bskyed pa'i ched du de gnyis bsko zhing skyed dgye bar bya'o/ / 'dir gzhung ni ma mo las 'di lta ste/ yangs pa can gyi tshong pa rnams kyis/ bcom ldan 'das kyi mchod rten yang byed du bcug /gtsang khang byur bu yang byed du bcug nas/ dge slong rnams la mchod rten dang gtsang khang byur bu de dag zhig ral du mi 'gyur ba'i yo byad rjes su gtad pa na dge slong dag 'gyod cing len par mi byed nas/ skabs de dge slong dag gis bcom ldan 'das la gsol ba dang / bcom ldan 'das kyis bka' stsal ba/ kun dga' ra ba'am/ dge bsnyen dag gis mchod rten zhig ral du mi 'gyur ba'i yo byad blang bar bya zhing blangs nas kyang bskyed par bya ste/ de las rnyed pa ji tsam 'byung ba des mchod rten la mchod par bya bar ngas rjes su gnang ngo zhes gsungs pa yin no/ /gta' nyi rir blang bar bya'o zhes bya ba ni/ sangs rgyas la sogs pa'i dkor chud mi za bar bya ba'i phyir gta' nyi rir blangs nas de bskyed du gtang bar bya'o/ / ji ltar bskyed du gtang bar bya zhe na/ de'i phyir dpang po dang lo dang zla ba dang nyi ma dang dge 'dun gyi gnas brtan dang / dge skos dang / len pa po dang / rdzas dang skyed rnams dpang rgyar bris nas so zhes bya ba smras te/ dpang po dang / lo dang zla ba la sogs pa skyed kyi mthar thug pa dag dpang rgyar bris nas phyis rdzas de sbyin par bya'o/ /rgyus shes pas de gzhan la yang khong du chud par bya'o zhes bya ba la/ rgyus shes pa zhes bya ba ni/ dge slong gang gis gta' dang bu lon la sogs pa'i 'byung ba'i mtha' de shes shing rdzas de tsam zhig gang zag len pa po che ge mo zhig la gtad de des dus che ge mo zhig na skyed 'di tsam zhig dang bcas te 'bul bar shes pa ste/ de ni rgyus shes pa zhes bya ste des so/ /de zhes bya ba ni gta' dang bu lon bda' ba'i rgyus de'o/ /gzhan la yang zhes bya ba ni/ gang gis byung ba'i mtha' de'i rgyus mi shes pa'i dge slong gzhan dag la yang ngo / /khong du chud par bya'o zhes bya ba ni/ dge slong rgyus shes pa des byung ba'i mtha' de dge slong rgyus mi shes pa gzhan dag la skabs su bab pa na thams cad bsnyad cing khong du chud par bya ba'o/ /'dir gzhung ni dge slong gnyug mar gnas pa dag gis dge slong glo bur du lhags pa dag la gang zag che ge mo zhig las zla ba re re zhing 'di tsam zhig mnod do zhes brjod par bya'o zhes gsungs pa yin no/ /mngon mtshan can gyis spyod pa'i spang ba'o zhes bya ba de bshad zin to// //da ni nyo tshong byed pa'i spang ba brjod par bya ste/ sngar bstan ma thag pa'i bslab pa'i gzhir skyed phyin na dngos gzhi'o zhes smras na gang gis yin pa ma bstan pas/ de'i phyir gzhan gyis so zhes bya ba smras te/ spyod pa zhes bya bar sbyar ro/ /pa Na dang rin po che dag las gzhan pa gzhal bar bya ba la sogs pa'i spyod pa dag las skyed phyin na ltung ba 'dir 'gyur ro/ /yang na gzhan gyis so zhes bya ba ni bskyed pa'i khe spogs 'dod pa las gzhan pa nyo tshong gi spyod pa las skyed phyin na ltung ba 'dir 'gyur ba'o/ /de lta bas na spang ba 'di gsum gyi yul la bye brag ni 'di yin par rig par bya ste/ dang po ni rin po che la sogs pa la rig pa las so/ /gnyis pa ni khe spogs 'dod pa nyid kyis pa Na dang rin po che la sogs pa spyod pa las so/ /gsum pa ni gang yang rung bas rnyed pa 'dod cing nyo tshong la sogs pas spyod pa las skyed phyin na'o/ /dge 'dun gyi bshos kyi phyir dge 'dun gyi 'bras rin gyis nyo ba la sbyin par bya'o zhes bya ba ni/ dge 'dun gyi bshos kyi phyir zhes bya ba dge 'dun gyi 'tsho ba'i phyir/ dge 'dun gyi 'bras ma drus pa rin gyis nyo 'dod pa'i gang zag la sbyin par bya ste/ nyor phyin yang de la nyo tshong gi nyes pa med do/ /'bras zhes smos pa ni mtshon pa tsam ste/ til dang mon sran sde'u la sogs pa 'bru thams cad dang ras bal la sogs pa rdzas thams cad la yang de bzhin du rig par bya'o/ /gal te de nyid kyi na theb dang bcas par ro zhes bya ba ni/ dge 'dun mnga' ba'i 'bras la sogs pa las gal te de nyid kyi dge 'dun gyi bshos kyi phyir nyo bar byed na de la theb dang bcas par bskyed de/ sbyin par bya'i rin thang bsnyams te sbyin par mi bya'o/ /zad na dge 'dun gyis nyo bar bya'o zhes bya ba ni/ dge 'dun gyi 'bras la sogs pa zad na/ dge 'dun gyis kyang 'bras la sogs pa gzhan las nyo bar bya ba'o/ /sar pa yang ngo zhes bya ba ni dge 'dun gyis 'bras la sogs pa 'bru sar ba yang nyo bar bya'o// // bam po nyi shu pa/ gal te srog chags med na rnying pa btsong bar bya'o zhes bya ba ni/ 'bras la sogs pa rnying pa dag la gal te srog chags med na rnying pa de btsongs nas sar pa nyo bar bya'o/ /rin thang mi gdab bo zhes bya ba ni/ rdzas 'di'i rin thang 'di tsam mo zhes de rang gis gdab par mi bya'o zhes bya ba'i tha tshig go/ /khyim pa'i nyo tshong dag tu lag gzhug par mi bya'o zhes bya ba ni/ khyim pa'i nyo tshong byed pa dag gi nang du dge slong gis lag gzhug par mi bya ste/ dge slong des de dag tu gtogs 'dod dang bar tshangs mi bya ba'o/ /rang gi chos gos la sogs pa dag ji ltar nyo bar bya zhe na/ de'i phyir khyim pa nyor gzhug go zhes bya ba smras te/ chos gos la sogs pa dag khyim pa nyor gzhug par bya'o/ /gal te khyim pa med na de'i tshe sus nyo bar bya zhe na/ de'i phyir med na lan gsum gyi bar du tshig brjod par bya'o zhes bya ba smras te/ gal te khyim pa med na de'i tshe dge slong des rang gi rdzas de'i rin thang nges par gcad par bya zhing lan gsum gyi bar du dri ba'i tshig brjod par bya ste/ rin 'di tsam gyis byin cig ces lan gsum brjod par bya'o zhes bya ba'i tha tshig go/ /zong la rtsig pa ni gzhan gyi don du yang mi bya ste/ dkon mchog gsum ni ma gtogs so zhes bya ba la/ zong zhes bya ba ni/ ka ka ni dang ba rA ta ka la sogs pa'o/ /rtseg pa zhes bya ba ni/ nyo bar byed pa'i tshe na cung zad cung zad bskyed pa dang 'tshong bar byed pa'i tshe na cung zad cung zad 'bri bar byed pa ste/ de ni zong la rtseg pa byed pa yin par grags so/ /de'i phyir de ni gzhan gyi don du yang mi bya na rang gi don du lta smos kyang ci dgos/ de ltar na spyir btang ba byas nas/ dmigs kyis bsal ba bstan pa'i phyir/ dkon mchog gsum ni ma gtogs so zhes bya ba smras te/ dkon mchog gsum gyi don du ni zong la brtseg par bya'o zhes bya ba'i tha tshig go/ /gta' gzhug par mi bya'o zhes bya ba la/ gta' zhes bya ba ni/ gal te de kho na lta bu ma yin na ngas kAr ShA pa Na lnga sbyin par bya'o zhes yal zug 'khras pa ma thub ste yal ba na zhwa la sogs pa'i rdzas de'i gtar 'jog pa ste/ de lta bu'i gta' gzhug par mi bya'o/ /'dir gzhung ni drug sde dag yal zug 'khra zhing lhung bzed la sogs pa gtar 'jud nas/ bcom ldan 'das kyis bka' stsal pa/ dge slong gi yal zug 'khra zhing gta' gzhug par mi bya'o/ /dge slong yal zug 'khra zhing gta' 'jud na 'gal tshabs can du 'gyur ro zhes gsungs pa yin no/ / dge 'dun gyi sbyin par bya'o zhes smras na/ de la ji ltar sbyin par bya/ sus rjes su sbyin par bya zhe na/ de'i phyir dge 'dun gyis rdzas de spogs pa la dge 'dun gyi las byed pa las gtad do zhes bya ba smras te/ dge 'dun gyis dbyig la sogs pa'i rdzas de nyo ba la sogs pa'i spyod pas dge 'dun gyi rnyed pa bsgrub par bya'o zhes spogs byed cing 'bad pa'i dge slong spogs pa la gtad par bya'o/ /ci dge 'dun gyis rang gi dbyig la sogs pa spogs pa la gtad par bya'am zhe na ma yin te/ de'i phyir dge 'dun gyi las byed pa la gtad do zhes bya ba smras te/ dge 'dun gyi las byed pa zhes bya ba dam gzhag pa la sogs pa las so/ /'di skad bstan te/ dge 'dun mnga' bdag tu gyur pas dge 'dun gyi las byed pa la dge slong spogs pa 'di la dbyig la sogs pa phog shig ces bka' stsal bar bya zhing / dam gzhag pa la sogs pa des dge slong spogs pa de la dbyig la sogs pa gtad par bya ste/ dge slong spogs pa des chos bzhin tshul bzhin du dge 'dun gyi rnyed pa bsgrub par bya'o/ /'di man chad ni dge slong spogs pa de'i bya ba brjod par bya'o/ /rgan rabs rgan rabs dag la ma zhus par dge 'dun gyi don du brtson par mi bya'o zhes bya ba ni/ dge slong spogs pa des dge slong rgan rabs rgan rabs dag la ma zhus par dge 'dun gyi don du brtson par mi bya ba'o/ /de'i tshig yi ge bri ba'i dam gzhag la nan tan bya'o zhes bya ba ni/ dge slong spogs pa des dbyig la sogs pa mnos pa dang / bsab pa de'i tshig yi ge bri ba'i dam gzhag la nan tan bya ba'o/ /'di skad bstan te/ gang gi tshe dge slong spogs pa des dge 'dun gyi las byed pa las dbyig la sogs pa mnos pa de'i tshe de ma thag kho nar tshig yi ger bri bar bya ste/ dus che ge mo zhig gi tshe dge 'dun dang dge 'dun gyi las byed pa che ge mo dang / zhal ta byed pa che ge mos bdag la rdzas 'di tsam zhig gtad pa las bdag gis dus che ge mo'i tshe rdzas des dngos po 'di lta bu zhig rin thang 'di tsam gyis nyos nas yang dus che ge mo'i tshe dngos po de nyid rin thang 'di tsam zhig tu btsongs te/ de las skyed 'di tsam zhig byung nas/ de yang de'i tshe dge 'dun gyi las mang che ge mo zhig tu spyad do zhes bya ba la sogs pa'i tshig yi ger bri ba'i dam gzhag la dge slong des nan tan bya'o/ /de dag thams cad ni gzhan gyi phyar ka'i skabs bsal ba'i phyir dang / bdag nyid kyis dran par bya ba'i phyir dang / 'gyod pa mi bskyed par bya ba'i phyir ro/ /nyo tshong byed pa'i spang ba'o zhes bya ba de bshad zin to// //da ni lhung bzed 'chang ba'i spang ba brjod par bya ste/ de'i phyir lhung bzed kyi'o zhes bya ba smras te/ byin gyis ma brlabs pa'i 'o zhes bya bar sbyar ro/ /sngar 'chang ba'i spang ba'i skabs su zhag bcur gos 'chang bar gtogs pa'i rnam pa bstan pa gang yin pa de nyid 'dir yang sbyar bar bya ste/ sngar gos la'o zhes bya ba smos pa'i gnas su 'dir lhung bzed kyi'o zhes bya ba gzhug par bya'o/ /rnam par dbye ba tha dad du zin kyang don la tha dad pa 'ga' yang mi 'byung ste/ 'di ltar 'dir ni yul dang yul can gyi 'brel pas lhung bzed kyi'o zhes smos par rig par bya'o/ /dper na sngar gos la'o zhes smos pa yul du gyur pa la rang gi nyid do zhes bya ba gang yin pa de yod na'o zhes bya ba dang 'dra bar lhung bzed kyi'o zhes bya ba yul du gyur pa la yang rang gi nyid do zhes bya ba gang yin pa de yod na'o zhes bya ba dang 'brel bas na de'i phyir don 'dra ba nyid yin no/ /de ltar na 'dir tshig gi don 'di 'byung ste/ lhung bzed byin gyis ma brlabs pa dang / byin gyis brlabs pa yod na'o zhes bya ba dang / rang gi nyid do zhes bya ba dang / zhag bcur rjes su zhugs pa nyid do zhes bya ba dang / gzhan gyi nyi ma'i dang po la'o zhes bya ba dang / 'di la gzhan yod na byin gyis ma brlabs pa de'i shan tshun chad nas so zhes bya bar sbyar te/ tshig de dag ni sngar gos 'chang ba'i spang ba'i skabs su bshad zin to// // rab tu byung ba la ltos pa'i don nyid du nges par byas pa ni spangs pa nyid yin no zhes bya ba ni/ rab tu byung ba la ltos pa'i don nyid du lhung bzed bsngos shing nges par byas pa ste/ gal te dge tshul phyis 'byung bar 'gyur ba de la sbyin par bya'o zhes rab tu 'byung ba la ltos pa'i don nyid du lhung bzed bsngos shing nges par byas pa gang yin pa de ni spangs pa nyid yin pas de 'chang yang spang bar mi 'gyur ro zhes bya ba'i tha tshig go/ /skya ba dang dkar ba dang che ba rnams ni rung ba nyid ma yin no zhes bya ba ni/ lhung bzed skya ba dang / dkar ba dang che ba rnams ni rung ba nyid ma yin te/ rung ba nyid ma yin pa'i phyir byin gyis brlab par bya ba ma yin pas de 'chang na nyes byas so/ /ma tshos pa yang chung ngu nyid yin no zhes bya ba la/ rung ba nyid ma yin no zhes bya ba'i rjes bsnyags pa'i phyir/ yang zhes bya ba'i sgra smos so/ /ji ltar lhung bzed chung ngus lhung bzed kyi bya ba byed mi nus pa de bzhin du lhung bzed ma tshos pa yang don de dang 'dra bas chung ngu nyid ces smos te/ lhung bzed nag por gyur kyang ma tshos na chung ngu nyid kyang rung ba ma yin pa nyid yin par rig par bya'o zhes bya ba'i tha tshig go/ /'dir mdo de gnyis kyi gzhung ni zhu ba las lhung bzed ma tshos pa 'chang na nyes byas so/ /de bzhin du lhung bzed skya bo dang / lhung bzed dkar po dang / lhung bzed chen po 'chang na nyes byas so zhes gsungs so/ /'di ltar rnam par 'byed pa las lhung bzed chung ngu 'chang ba la lhung ba med do zhes bya ba la sogs pa gsungs pa de ni sman phor du yongs su spyad pa'i bsam pas 'chang na de la lhung ba med par gsungs pa yin gyi/ 'dir ni lhung bzed 'chang ba'i gnas skabs dang / lhung bzed med pa'i gnas skabs su de dag lhung bzed kyi don du 'chang ba nyid na nyes byas su gsungs pa yin no/ /lhung bzed chung ngu gcig la ni nyes pa med do zhes bya ba ni/ lhung bzed chung ngu gcig lhag par 'chang ba la ni nyes pa med pa nyid du rig par bya ste/ 'jigs pa dang bcas pa nyid du lhung bzed chung ngus ljongs rgyur 'gro bar bya'o zhes gsungs pa'i phyir te/ gal te 'cha' bar mi bya na lhung bzed chung ngus ji ltar 'gro bar bya zhes bsams pa yin no/ /lhung bzed 'chang ba'i spang ba'o zhes bya ba de bshad zin to// //da ni lhung bzed lhag pa tshol ba'i spang ba brjod par bya ste/ tshol ba de yang chags pa'i dbang las 'byung bas de'i phyir spyir 'di brjod par bya ste/ ha cang chags par mi bya'o zhes bya ba ni/ dge slong gis dngos po thams cad la ha cang chags par mi bya ba ste/ chags pa'i phyir 'dir gzhung ni gnas mal gyi gzhir nye dga'i skabs su gsungs pa yin no/ /yo byad la ha cang lhag par chags par mi bya'o zhes bya ba ni lhung bzed la sogs pa yo byad la dge slong gis ha cang lhag par chags pa zhes bya ba ni ha cang zhen par mi bya ba ste/ 'dir zhen par mi bya'o zhes bya ba'i tha tshig go/ /gang la zhen pa de bcang bar mi bya'o zhes bya ba la/ zhen pa zhes bya ba ni/ lhag par chags pa ste/ lhung bzed la sogs pa'i dngos po gang la lhag par chags pa 'byung ba de bcang bar mi bya ste/ yongs su spang bar bya'o zhes bya ba'i tha tshig go/ /mdo de gnyis ni gos kyi gzhi las 'byung ste/ 'dir gzhung ni de lta bas na dge slong gis yo byad la ha cang lhag par chags pa bskyed par mi bya'o/ /dngos po gang la ha cang lhag par chags pa 'byung ba de yongs su spang bar bya ste/ yongs su mi spong na 'gal tshabs can du 'gyur ro zhes gsungs pa yin no/ /lhung bzed kyang med na bslang bar bya'o zhes bya ba ni/ slong ba dgag pa'o gnas 'byung ba bzlog pa'i phyir tshig 'di byas te/ lhung bzed la sogs pa'i dngos po med na lhung bzed kyang bslang bar bya'o/ /kyang zhes bya ba'i sgras ni chos gos la sogs pa yang med na bslang bar bya ba bsdu'o/ /dngos po gang yod na lhung bzed tshol ba las 'byung ba'i kha na ma tho bar 'gyur zhe na/ de'i phyir de yod pa nyid na'o zhes bya ba smras te/ tshol bar byed pa de la lhung bzed de yod pa nyid de bdog pa nyid yin na ltung ba 'di 'byung ngo / /ji lta bu zhig yod pa nyid na/ de'i phyir lhan pa bzhi man chad nas de dag rung zhing yongs su spyad bzod pa'o zhes bya ba smras te/ lhan pa bzhi man chad nas de dag rung zhing zhes bya ba ni/ lhan pa bzhi man chad nas glan zin pa nas de dag glan du rung ba ste/ lhung bzed skyon med pa tshun chad lhan pa bzhi man chad nas glan pa dang / lhan pa bzhi glan du rung ba'i bar gyi lhung bzed gang yin pa de yongs su longs spyad par bzod pa'i lhung bzed kyang yin pa de yod pa nyid na lhung bzed gzhan tshol bar byed na/ de las byung ba'i kha na ma tho bar 'gyur ro/ /de ltar na 'dir tshig gi don 'di 'byung ste/ lhung bzed skyon med pa yongs su longs spyad par bzod pas snyi ba nyid la sogs pa'i skyon dang bral ba gang yin pa de dang lhan pa gcig gam/ gnyis sam/ gsum mam/ bzhis glan zin pa gang dag yin pa dang / lhan pa gcig gam/ gnyis sam/ gsum mam/ bzhis glan du rung zhing byed du gzhug nus pa gang dag yin pa de dag gi nang nas lhung bzed yongs su longs spyad par bzod pa gang yang rung ba zhig yod cing bdog bzhin du lhung bzed gzhan tshol bar byed na/ de la de las byung ba kha na ma tho bar 'gyur ro/ /da ni 'di brjod par bya ste/ lhung bzed de yod pa nyid na ci zhig ltag par spyad na kha na tho ba ci 'dra bar 'gyur zhe na/ de'i phyir khyim pa nye du ma yin pa las bslang bas yongs su btsal na'o zhes bya ba smras te/ khyim pa nye du ma yin pa las bslangs te yongs su btsal na zhes bya ba'i tha tshig go/ /'di skad bstan te/ gang las lhung bzed yongs su tshol bar byed pa de gal te khyim pa yang yin la nye du ma yin pa yang ma yin zhing / de las ngag gi rnam par rig byed kyis bslang bas lhung bzed btsal te thob na de las byung ba'i kha na ma tho bar 'gyur ro/ /de nyid bslab pa'i gzhi gzhan la yang 'dra bar bstan pa'i phyir/ de gnyis ni 'og ma gnyis la yang ngo zhes bya ba smras te/ 'di'i 'og ma bslab pa'i gzhi gnyis po gang dag yin pa de dag la yang nye du ma yin pa dang / khyim pa nyid ces bya ba 'di gnyis rig par bya'o zhes bya ba'i tha tshig go/ /'og ma gnyis la yang ngo zhes spyir bstan pa de'i bye brag spyir bstan pa'i phyir/ tha ga pa dang sbyin pa dang gzhan dag la'o zhes bya ba smras te/ tha ga pa dang / sbyin pa dang / gzhan ni tha ga pa dang / sbyin pa dang / gzhan dag ste/ de dag nye du ma yin pa dang khyim pa dag la'o/ /'di ltar gtsug lag las gzhan gyis kyang ngo zhes gsungs mod kyi/ 'on kyang gzhan zhes bya ba'i sgras de gzung bar rig par bya ste/ de ltar yang de las rin med par tshol bas pho nya la sogs pa gzhan la 'thag tu bcug na zhes gsungs pa de'i don gzhan zhes smos pas bsdus par rig par bya'o/ /'di skad bstan te/ tha ga pa 'thag pa dang / sbyin par byed pa khyim bdag la sogs pa las gzhan pa'i pho nya la sogs pa nye du ma yin pa nyid dang / khyim pa nyid yin na ltung ba 'og ma gnyis su 'gyur ro zhes bya ba'i tha tshig go/ /nye du ma yin pa ltar nye du las ni skyed dang lhung bzed gnyis ma gtogs pa la nyes pa med do zhes bya ba la/ nye du ma yin pa ltar zhes bya ba de ni nye du ma yin pa'i yul la ltung ba rnam par gzhag pa ste/ nye du ma yin pa la bsod pa slong ba la sogs pa'i kha na ma tho ba gang yin pa de nye du las slong bar byed na kha na ma tho ba'i nyes par mi 'gyur bar shes par bya ste/ don ni de yin no/ /nye du las ni skyed dang lhung bzed gnyis ma gtogs pa la nyes pa med do zhes bya ba ni/ nye du las kyang skyed kyi bslab pa'i gzhi la spogs 'dod pa nyid kyis 'di lta ste/ mngon mtshan can gyi spyod pa dang / nyo tshong dag gi spyod pa dag las rnyed pa grub pa dang / lhung bzed tshol ba'i bslab pa'i gzhi la lhung bzed lhag par gyur pa'i nyes pa ni 'byung bar 'gyur ba nyid yin no/ /de las gzhan pa thams cad la ni ji ltar nye du ma yin pa las nyes par 'gyur ba ltar nye du las nyes pa med par shes par bya'o/ /de gnyis kyang na smad pa nyid yin gyi/ dngos gzhi'i ltung bar ni mi 'gyur ro/ /'dir gzhung ni rnam par 'byed pa las tha ga pa nye dus chos gos 'thag na nye du yin na ltung ba med do zhes gsungs pa gang yin pa dang / gcer bu pa la bza' ba la sogs pa sbyin na nye du yin na ltung ba med do zhes gsungs pa gang yin pa dang / zhu ba las kyang nye du las zas bsod pa blangs te rang za ba dang / gcer bu pa la sbyin zhing sdig pa can gyi lta ba'i rnam pa las dbral bar 'dod pas sbyin par byed na ltung ba med do/ /nye du yin na yang de bzhin no zhes gang gsungs pa de yin no/ /zhar las byung ba bstan nas khyim pa nye du ma yin pa las bslang bas yongs su btsal na'o zhes gang smras pa'i ltung ba de'i skabs su gtogs pa bstan pa'i phyir 'di brjod par bya ste/ nyes byas so zhes bya ba ni lhung bzed tshol ba tsam las nyes byas su 'gyur ba'o/ / de las grub na dngos gzhi'o zhes bya ba ni/ khyim pa nye du ma yin pa de las bslang bas lhung bzed btsal te lhung bzed thob na dngos gzhi'i kha na ma tho bar 'gyur ba'o/ /med pa nyid las yod pa'i blo can la ni na smad do zhes bya ba la/ med pa nyid la zhes bya ba ni/ lhung bzed snga ma byin gyis brlab tu rung ba shos med pa nyid la ste/ chag pa'am stor ba la sogs pa'i nyes pas med par gyur pa la'o/ /yod pa'i blo can la ni zhes bya ba ni/ yod pa'i blo dang bcas pa la ste/ bdag la lhung bzed gzhan yod do snyam pa'i blo gang la yod pa la'o/ /na smad do zhes bya ba ni/ de ltar dge slong gang lhung bzed snga ma shos byin gyis brlab tu rung ba shos med bzhin du bdag la lhung bzed gzhan yod do snyam pa'i blo yod cing de'i tshe/ gal te lhung bzed gzhan tshol bar byed na de la ni dngos gzhi'i ltung ba na smad par shes par bya ste/ nyes byas su 'gyur ro zhes bya ba'i tha tshig go/ /lhung bzed btsal ba rnyed pa'i dus na snga ma shos dge slong de la med pa'i phyir lhung bzed lhag pa nyid du mi 'gyur ro/ /'dir gzhung ni dge slong gis lhung bzed mchis bzhin du lhung bzed gzhan blangs par gyur la ltung bar yang mi 'gyur ba 'ga' mchis sam/ bka' stsal pa/ yod de gal te blangs pa dang / snga phyi med par lhung bzed chag par gyur na ltung ba med do zhes gsungs pa yin no/ /'dir spang ba med pa las dgongs nas ltung ba med do zhes gsungs pa yin pas/ de'i phyir sbyor ba las byung ba'i nyes byas ni dang po nyid nas byas pa yin no/ /dngos gzhi'i dus na ni lhung bzed snga ma chud zos pa nyid kyi phyir nyes byas kho nar zad do/ /gal te tshol ba'i dus na yang lhung bzed de chud zos par gyur zin na ni/ de'i tshe na sbyor ba'i ltung ba yang na smad pa kho nar 'gyur ro/ /rang gi yo byad dag gis so zhes bya ba ni/ lhung bzed yod du zin na yang gal te rang gi rin du gyur pa'i yo byad dag gis lhung bzed gzhan tshol lam nyo bar byed na de lta na yang ltung ba na smad par rig par bya ste/ bslang bas btsal ba dang thob pa ma yin pa'i phyir ro/ /de dag yod pa nyid na yang ngo zhes bya ba ni/ rang gi yo byad dag ces bya bar sbyar te/ lhung bzed kyi rin du gyur pa rang gi yo byad dag yod cing bdog pa nyid na lhung bzed med kyang gal te lhung bzed rang gi yo byad dag gis nyo bar mi byed par 'di ltar lhung bzed de slong bar byed na de la yang ltung ba na smad par rig par bya ste/ slong ba'i tshe na ni sbyor ba zhes bya ba'i nyes byas phra mor 'gyur la/ thob na ni dngos gzhi zhes bya ba'i nyes byas kho nar 'gyur ro/ /chos gos la sogs pa dag la yang rigs pa 'di nyid rig par bya'o/ /bzang po 'dod pas brje na'o zhes bya ba la/ lhung bzed bzang po 'dod pa ni lhung bzed bzang po 'dod pa ste/ e ma'o lhung bzed bzang po mdzes pa bdag gi lhung bzed du gyur cig snyam du de ltar zhugs pa'i 'dod pa gang yin pa de ni bzang po 'dod pa yin no/ /bzang po 'dod pa des brje ba'i don du lhung bzed btsal zhing de sngon du btang ste/ rje bar byed na ltung ba na smad par shes par bya'o/ /'o na brje ba las len na ltung ba med do zhes bya ba der ltung ba med par ma gsungs sam zhe na/ bden mod kyi 'on kyang bzang po 'dod pa med par brje ba'i dbang du byas te gsungs pa yin no/ /'dir ltung ba rnam par gzhag pa ni 'di yin te/ khyim pa nye du ma yin pa las bslangs te thob na ni dngos gzhi'o/ /ma bslangs par rin la sogs pas btsal na nye du yin yang rung nye du ma yin yang rung khyim pa'am rab tu byung ba las thob na ni nyes byas so/ /bdag po med pa'i lhung bzed btsal ba las grub pa gang yin pa de la yang nyes byas so/ /bzang po 'dod pas snga ma brjes nas grub pa gang yin pa de la yang nyes byas so/ /sbyor ba thams cad la yang nyes byas so/ /bzang po 'dod pa nyid med par lhung bzed brje bas lhung bzed grub na ni ltung ba med do/ /gang dag lhung bzed tshol ba las byung ba'i ltung ba thams cad bzang po 'dod pa nyid yan lag tu rnam par 'jog par byed pa'i bzang po 'dod pa nyid de la ni/ khyim pa nye du ma yin pa nyid las lhung bzed lhag pa grub pa'i dngos gzhi la ni spang bar 'gyur ro/ /sbyor ba la ni nyes byas so/ /yan lag gang yang rung ba ma tshang ba la ni dngos gzhi la nyes byas so/ /sbyor ba la ni nyes byas phra mo'o/ / yan lag tu ma tshang ba la ni dngos gzhi la nyes byas phra mo'o/ /sbyor ba la ni shin tu phra mo'o/ /gal te lhung bzed de nyid zhag bcu 'das par gyur na ni de la spang ba gzhan cig kyang 'byung bar 'gyur te/ bshags pa'i dus na yang ltung ba spang ba gnyis bshags par bya dgos so/ /da ni spang ba bshags pa'i sbyor ba gzhan dag las 'di'i bshags pa'i sbyor ba'i bye brag bstan pa'i phyir/ 'di ni dge 'dun la spang ba'o zhes bya ba smras te/ lhung bzed lhag pa 'di ni zhes bya bar sbyar ro/ /chos gos la sogs pa spang ba'i rdzas gzhan ni gang zag la spang bar bya ste/ 'di ltar lhung bzed 'brel ba med par ni dge 'dun kho na las 'thob kyi/ gang zag las ma yin pas de'i phyir 'di ni dge 'dun kho na la spang bar bstan to/ /ci lhung bzed thams cad dge 'dun la spang bar bya ba yin nam zhe na/ ma yin te de'i phyir du ma nyid yin na mchog tu 'dod pa gcig go zhes bya ba smras te/ lhung bzed lhag pa du ma nyid yin na de dag gi nang nas lhung bzed mchog tu 'dod pa zhes bya ba mchog tu gdams pa gcig dge 'dun la spang bar bya ba'o/ /'o na lhung bzed lhag ma gzhan ji ltar bya zhe na/ de'i phyir gzhan ni thams cad kyi thams cad du spang bar bya ba nyid yin no zhes bya ba smras te/ lhung bzed gzhan ni thams cad kyi thams cad kho nar spang bar bya ba nyid yin gyi/ yang phyir blang bar bya ba ni ma yin no/ /'o na su la spang bar bya ba nyid yin zhe na/ de'i phyir rab tu byung ba 'di pa la'o zhes bya ba smras te/ rab tu byung ba 'di gang la yod pa de ni rab tu byung ba 'di pa ste de la'o/ /dge tshul la sogs pa gang zag thams cad la spang bar bya ba nyid yin no zhes bya ba'i tha tshig go/ /'dir gzhung ni lhung bzed lhag ma rnams ni dge slong rnams la go bar bya'o zhes gsungs pa yin no/ /dge slong zhes smos pa ni mtshon pa tsam du zad de/ chos 'di la rab tu byung ba thams cad kyang spyir bsdu'o/ /lhung bzed lhag po tshol ba las byung ba'i ltung ba 'byin pa po'i dge slong de la lhung bzed gang sbyin par bya zhe na/ de'i phyir de la tha chad sbyin par bya'o zhes bya ba smras te/ dge slong thams cad kyi lhung bzed gang dag yin pa de dag gi nang na lhung bzed tha chad gang yin pa thams cad kyi nang na ngan bsnyigs de ltung ba 'byin pa po de la sbyin par bya'i/ spangs pa de dag nyi tshe'i nang na tha chad 'ba' zhig ni ma yin no/ /tha chad ces bya ba ni dge 'dun thams cad kyi lhung bzed dag las tha chad gang yin pa ste/ de nyid dge slong ltung ba 'byin pa po de la sbyin par bya ba nyid yin no/ /thabs gang gis dge 'dun la tha chad de bsnyig par bya zhe na/ de'i phyir brim pas bsnyig par bya'o zhes bya ba smras te/ spang ba'i lhung bzed de brim pas dge 'dun las lhung bzed tha chad de bsnyig par bya ba'o/ /byed pa po ci lta bus brim pas dge 'dun las lhung bzed tha chad de bsnyig par bya zhe na/ de'i phyir bskos pas so zhes bya ba smras te/ gsol ba dang gnyis kyi las kyis bskos pa'i dge slong gis so/ /dge slong bskos pa des lhung bzed bsnyigs pa'i phyir 'drim pa na de'i kun du spyad pa dag bstan pa'i phyir/ des sang de byed par 'gyur ba na tshogs pa'i dus su dge 'dun la 'jal bar bya'o zhes bya ba smras te/ bskos pa'i dge slong des sang zhes bya ba phyi de nyin par 'drim par de byed par 'gyur ba na des dgongs ka tshun chad dge 'dun nam tshogs pa'i dus su zhes bya ba gang gi tshe dge 'dun du gyur pa'i dge slong dag mchod pa la sogs pa la gnas gcig tu tshogs par gyur pa'i dus su dge slong rnams la 'jal bar bya'o/ /ji skad 'jal bar bya zhe na/ de'i phyir tshe dang ldan pa dag bdag sang lhung bzed 'brel pa med par 'drim par 'gyur gyi/ khyed cag rang rang gi lhung bzed dag thogs la dge 'dun gyi nang du gshegs par mdzod cig ces so zhes bya ba smras te/ lhung bzed 'brel ba med pa zhes bya ba ni dge 'dun las thob pa'i lhung bzed tha chad kyi ming yin par rig par bya'o/ /de yang un na ha na zhes bya ba ni 'brel pa med pa zhes bya ba ste/ 'di ltar na ha zhes bya ba ni ha na ban d+ha zhes bya ste/ 'brel ba yin no zhes skad kyi dbyings las 'byung ba'i phyir ro/ /un zhes bya ba ni ud ga ta zhes bya ste/ med pa'i don yin pas lhung bzed de 'brel ba med pa'am/ 'brel pa dang bral ba yin pas na de'i phyir de'i ming 'brel pa med pa zhes bya'o/ /de yang dge slong rnams kyi lhung bzed kyi yul la 'brel ba ni 'di gnyis kho nar zad de/ byin gyis brlabs pas bdag nyid kyis spyad pa dang / yongs su spang ba'i dus na yang rang dbang nyid du bstan par bya ba yin no/ lhung bzed rnam pa de lta bu 'brel ba med pa 'brel pa las 'das pa 'brel ba dang bral ba de ni byin gyis brlab pa'i 'brel pa med pa'i phyir dang / yongs su spang ba'i 'brel pa med pa'i phyir 'brel pa med pa zhes bya ste/ de ni lhung bzed kyang yin la 'brel ba med pa yang yin pas na lhung bzed 'brel pa med pa zhes bya'o/ /de ni bran gnam khol du phyung ba dang 'dra ste/ gnam khol du phyung ba yin pa'i phyir bran gyi las su yang mi bsko la bran yin pa'i phyir yongs su gtang bar yang mi nus mod kyi/ 'on kyang de la bza' ba dang btung ba la sogs pa sbyin par bya dgos pa de bzhin du lhung bzed 'di yang byin gyis brlab par bya ba yang ma yin la/ yongs su spang bar bya ba yang ma yin mod kyi/ 'on kyang de la kha bsgyur ba dang / bsreg pa dang / byi dor la sogs pa lhung bzed kyi nan tan yang bya dgos pas de'i phyir lhung bzed de ni bran gnam khol du phyung ba dang 'dra bas 'brel ba med pa zhes bya'o/ /'khod pa'i don du nan tan bya'o zhes bya ba ni/ bskos pa'i dge slong des dge slong rnams 'khod pa'i don du stan gding ba la sogs pa dag gi nan tan bya ba'o/ /bsngags pa brtsam zhing dbul bar bya'o zhes bya ba ni/ lhung bzed kyi'o zhes bya bar sbyar ro/ /bsngags pa zhes bya ba ni yon tan bsngags pa'o/ /brtsam zhing zhes bya ba ni bsngags pa brtsam pa ste/ lhung bzed dbul ba gang la bsngags pa brtsam pa yod pa de ni/ bsngags pa brtsam zhing dbul ba ste/ dge slong bskos pa des dge slong rgan rims la lhung bzed 'bul ba'i tshe lhung bzed de'i bsngags pa brtsam zhing dbul bar bya'o/ /'di skad bstan te/ dge slong bskos pa des lhung bzed kyi yon tan bsngags pa dang por byas te/ dge slong rnams kyi mdun du bzung zhing dbul bar bya'o/ / bsngags pa rnam pa ji lta bu zhig brjod pas she na/ de'i phyir gnas brtan lhung bzed 'di ni shin tu gsal ba dbyibs legs pa longs spyad par bzod pa lags kyis/ gal te bzhed na snoms shig ces so zhes bya ba smras te/ gnas brtan zhes bya ba ni/ dge slong rgan rims rnams la bod pa'i tshig go/ /lhung bzed 'di ni shin tu gsal ba zhes bya ba ni/ mdog la nag nog med cing shin tu mdzes pa yin no zhes bya ba'i tha tshig go/ /dbyibs lags pa zhes bya ba ni tshad dang ldan pa'o/ /longs spyad par bzod pa zhes bya ba ni/ bu gu dang chag grum la sogs pa'i skyon med pa'i phyir ro/ /gal te bzhed na zhes bya ba ni/ gal te len par 'dod na'o zhes bya ba'i tha tshig go/ /snoms shig ces bya ba ni/ khyer cig ces bya ba'i tha tshig go/ /ci lhung bzed thams cad la de skad brjod par bya 'am zhe na/ de'i phyir yon tan ji lta ba bzhin du'o zhes bya ba smras te/ lhung bzed gang la yon tan gang dang gang dag yod pa de dang de dag la brjod par bya ste/ shin tu gsal ba zhes bya ba la sogs pa smos pa ni mtshon pa'i phyir ro/ /'dod na blang bar bya'o zhes bya ba ni/ dge slong rnams kyis kyang gal te 'dod na lhung bzed de blang bar bya'i/ mi 'dod na ni mi blang ngo zhes bya ba'i tha tshig go/ /bar du chod pas blangs pa bslang bar mi bya'o zhes bya ba ni/ dge 'dun gyi gnas brtan la sogs pa ches rgan pas kyang dge slong bskos pa des bdag nyid la bstabs pa'i tshe ma blangs nas/ dge slong gcig gis bar du chod pa'i 'og ma dge slong gsum pas lhung bzed de blangs pa na kho bo 'dod do zhes bslang bar mi bya'o/ /de ltar yang 'dir gzhung ni gal te gnas brtan gsum pas lhung bzed blangs pa na dge 'dun gyi gnas brtan slong bar byed na brjod pa dang po la sbyin par mi bya'o/ /brjod pa gnyis pa la yang sbyin par mi bya'o/ /brjod pa gsum pa la ni sbyin par bya ba ste/ dge 'dun gyi gnas brtan gyis ni 'dul ba dang 'gal ba'i nyes byas bshags par bya'o zhes gsungs pa yin no/ /du mas bar du chod pa nyid la ni shin tu yang bslang bar mi bya ba nyid yin par rig par bya'o/ /slong ba yod na ni tshig gnyis la ni mi sbyin zhing 'og ma la ni ma yin no zhes bya ba ni/ bar du chod pas blangs pa na gong ma slong ba yod na tshig dang po dang gnyis pa gnyis la ni lhung bzed de mi sbyin no/ /'og ma la ni ma yin no zhes bya ba ni tshig gsum pa la lhung bzed de 'drim par byed pa'i dge slong gis sbyin par mi bya ba ma yin no zhes bya ba'i tha tshig go/ /ltung ba byung ba la spang bar mi bya ba nyid dang / byin gyis brlab par mi bya ba nyid dag go bar bya'o zhes bya ba ni dge slong ltung ba byung ba la lhung bzed 'brel pa med pa de spang bar mi bya ba nyid dang / byin gyi brlab par mi bya ba nyid dag go bar bya'o/ /'di skad bstan te/ gang gi tshe lhung bzed bsnyigs nas ltung ba byung ba'i dge slong de la sbyin par byed pa na de'i tshe dge slong bskos pa des de la 'og ma 'di gnyis go bar bya ste/ lhung bzed 'di khyod kyis byin gyis brlab par yang mi bya la yongs su spang bar yang mi bya ste/ lhung bzed 'di ni byin gyis brlab pas bdag nyid kyis spyad pa dang 'brel ba dang yongs su spang ba'i dus na rang dbang nyid du bstan pa'i 'brel ba med pa yin pas khyod kyis deng phyin chad nas nam ma chag gi bar du chong shig ces kyang bsgo bar bya'o/ /nye bar spyod pa la ma chag gi bar du dal bu dal bus spyod cig ces so zhes bya ba ni/ lhung bzed de nye bar spyod pa ltung ba 'byung ba'i dge slong la dge slong bskos pa des 'di skad ces lhung bzed 'brel pa med pa 'di ma chag gi bar du dal bu dal bus spyod cig ces kyang bsgo bar bya ste/ khad kyis dal bu dal bus spyad par bya'o zhes bya ba'i tha tshig go/ /'dir gzhung ni nam chag pa'i mthar thug gi bar du'o zhes gsungs pa yin no/ /des gnyi gas kun du spyad par bya'o zhes bya ba ni/ lhung ba byung ba'i dge slong des lhung bzed byin gyis brlabs pa dang / lhung bzed 'brel pa med pa gnyi gas kun du spyad par bya ba'o/ /de la yo byad ches bzang po nges par sbyar bar bya'o zhes bya ba ni/ lhung bzed 'brel ba med pa de la lhung bzed kyi snod dang / kha g.yogs la sogs yo byad ches bzang po ches mdzes pa nges par sbyar bar bya'o/ /'di skad bstan te/ lhung bzed 'brel ba med pa de la lhung bzed kyi snod la sogs pa yo byad ches bzang po shos nges par sbyar bar bya zhing lhung bzed byin gyis brlabs pa la ni ma yin no/ /spyad pa na ches yang ba'o zhes bya ba ni bsod snyoms blang ba la sogs pa spyad pa na phye la sogs pa'i don ches yang ba lhung bzed 'brel pa med pa der nges par sbyar bar bya/ blugs par bya zhing ches lci ba lhung bzed byin gyis brlabs pa shos su nges par sbyar bar bya blugs par bya'o/ /'di skad bstan te/ bya ba la nges par sbyar ba'i dus zas la sogs pa nye bar gnas par gyur pa na lhung bzed 'brel pa med pas/ las ches yang ba zhes bya zhing cig shos kyis las ches lci ba bya'o/ /zas kyi bya ba nyid la ni mi bya ba kho na'o zhes bya ba ni zas bza' ba'i bya ba bsgrub pa nyid la ni lhung bzed 'brel pa med pas/ nges par sbyar bar mi bya ba kho na ste/ de'i nang nas zas bza' bar mi bya'o zhes bya ba'i tha tshig go/ /'di skad bstan te/ lhung bzed 'brel pa med par zas bza' bar mi bya'o/ /byi dor yang dang por bya'o zhes bya ba ni kha zas 'bags pa'i dril phyi la sogs pa'i byi dor yang dang por lhung bzed 'brel ba med pa la nges par sbyar bar bya zhing phyis byin gyis brlabs pa shos la bya ba'o/ /lhung bzed tshol ba'i spang ba'o zhes bya ba de bshad zin to/ / //ji zhig lhag par spyad na 'thag tu 'jug pa'i spang bar 'gyur zhe na/ de'i phyir rin med par bsko bas sam gzhan gyis kyang 'thag tu 'jug na'o zhes bya ba smras te/ khyim pa nye du ma yin pa zhes sngar bstan pa de gnyis kyi rjes su sbyar ro/ /de ltar na 'dir tshig gi don 'di 'byung ste/ tha ga ba khyim pa nye du ma yin pa la rin med par ngag gi bsgo bas sam pho nya la sogs pa gzhan gyis kyang 'thag tu bcug na dngos gzhi'i ltung bar 'gyur ro/ /'di ltar so so thar pa'i mdo las rang gis bslangs pa'i dog pa zhes gsungs mod kyis/ 'dir ni rang gis bslangs pa nyid khas blang bar mi bya ste/ der gsungs pa ni gleng gzhi'i dbang gis so/ /gzhan las kyang dge slong gis nye du las dog pa bslangs nas tha ga pa nye du ma yin pa la 'thag tu bcug na slong ba de la ni ltung ba med la/ tha ga pa nye du ma yin pa la 'thag tu 'jug pa ni spang ba'i ltung byed du 'gyur ro zhes gsungs pas de'i phyir 'dir dog pa slong ba ni spang ba'i ltung byed kyi dngos gzhi'i rgyur 'gyur ba ma yin gyi/ 'di ltar 'thag tu 'jug pa ni de'i rgyu yin no/ /'thag tu 'jug pa de yang lan 'ga' tha ga pa khyim pa nye du ma yin pas 'grub pa yang yod/ lan 'ga' nye du dang nye du ma yin pa gnyi gas cig char 'grub pa yang yod/ lan 'ga' khyim pa dang rab tu byung ba gnyi gas cig car 'grub pa yang yod pas 'di ltar de dag thams cad dngos gzhi'i ltung bar 'gyur ba bsgrub pa'i phyir/ gzhan nyid dang bcas pa la ni de ma byas pa nyid ma yin no zhes bya ba smras te/ 'di ltar nye du dang nye du ma yin pa gzhan nyid bcas pa la 'thag tu bcug na de lta na yang 'thag tu bcug pa de tha ga pa nye du ma yin pa des ma byas pa nyid ma yin te/ 'di ltar byas pa kho na yin no zhes bya ba'i tha tshig go/ /de lta bas na nye du dang nye du ma yin pa gnyi ga la 'thag tu bcug na yang nye du'i phyir na ltung ba med mod kyi/ nye du ma yin pa'i dbang gis nye du ma yin pa spang ba'i ltung byed du 'gyur ro/ /bdag nyid dang nye du ma yin par bcas pas 'thag na yang de dang 'dra ste/ bdag nyid kyis 'thag pas nyes byas su gsungs pa gang yin pa de ni bzo mi bya ba'i spyir gsungs pa yin te/ 'dir gzhung ni bzo rjes su bsgrub par mi bya'o zhes gsungs pa yin te/ de ni spang ba dang 'brel pa ni ma yin no/ /de bzhin du rin byin pa dang ma byin pa gnyi ga la 'thag tu bcug na yang rin byin pa'i phyir ni ltung ba med kyi/ rin ma byin pa'i dbang gis spang ba'i ltung byed du 'gyur te/ gzhan nyid dang bcas pas byas pa nyid yin du zin kyang der 'gyur ro/ /'thag tu 'jug pa'i spang ba'o zhes bya ba de bshad zin to// //da ni 'thag pa bskyed pa'i spang ba brjod par bya ste/ de la yang yan lag gang dag byed pa por 'gyur ba de dag bstan pa'i phyir/ de'i phyir btag par bya ba bsam pa las byung ba nyid do zhes bya ba smras te/ de'i phyir zhes bya ba ni ltung ba 'byin par byed pa'i dge slong de'i phyir ro/ /btag par bya ba zhes bya ba ni gos so/ /bsam pa zhes bya ba ni gos 'di de la sbyin no snyam pa'i bsam pa ste/ gos gang gi dgos pa'i rgyu mtshan gyi phyir sems pa'o/ /bsam pa de las byung ba zhes bya ba ni gos de nyid yin no/ /ltung ba 'byin par byed pa'i dge slong de'i phyir bsam pa las byung ba ni de'i bsam pa las byung ba'o/ /de'i dngos po ni de'i phyir bsam pa las byung ba nyid de/ dge slong de'i phyir sbyin bdag gi bsam pa las byung ba'i gos nyid do/ /'di skad bstan te/ gal te btag par bya ba'i gos de ltung ba 'byin par byed pa'i phyir sbyin bdag gis bsam pa yin la/ de 'thag pa bskyed pa de ni 'thag pa bskyed pa'i spang ba'i yan lag tu gyur pa'i byed pa po yin no zhes bya ba'i tha tshig go/ /kho lag che ba nyid dam 'bras bzang ba nyid la tha ga pa nges par sbyar ba'o zhes bya ba yang / 'thag pa bskyed pa'i spang ba'i yan lag tu gyur pa'i byed pa po yin par sbyar ro/ /kho lag che ba zhes bya ba ni zheng che ba dang khrun ring ba ste/ de'i dngos po ni de nyid do/ /de la ltung ba 'byin par byed pas gal te kho lag che ba nyid la tha ga pa nges par sbyor bar byed pa'o/ /'bras bzang ba nyid ces bya ba ni/ thar gyis zhag pa dang / thag ran bzang ba nyid la sogs pa ste/ de la tha ga pa nges par sbyar bar byas pa'o/ /de ltar yang kho lag che ba dang / 'bras bzang ba'i skabs nas/ tshe dang ldan pa tha ga pa gos 'di zheng che ba dang / khrun ring ba dang / thar gyis zhag pa dang / thag ran bzang bar legs par gyis shig ces gsungs pa yin no/ /thag ran bzang ba zhes bya ba ni phyir zug snyoms pa dang / shas bzang ba dang / sang seng med pa zhes gsungs pas rnam par bshad par sbyar ro/ /gal te sbyin bdag gi zad na'o zhes bya ba ni/ de ltar tha ga pa nges par sbyar ba na gal te sbyin bdag gi dog pa la sogs pa zad par gyur na ste/ 'thag pa bskyed pas rin skye la/ de skyes pas sbyin bdag gi zad par gyur par rig par bya ste/ des na dngos gzhi'i ltung bar 'gyur ro/ /rngan pa ma byin na yang ngo zhes bya ba ni/ ltung ba 'byin par byed pas tha ga pa la rngan pa ma byin na'o/ /'di skad bstan te/ gang gi tshe ltung ba 'byin pa pos shin tu bzang por bsgrub par bya'o zhes tha ga pa nges par sbyar bar byas nas des de'i thar gyis zhag par bya ba la sogs pa lag byad kyi las skyes par ni gyur la rngan pa ni ma byin na de'i tshe na dngos gzhir 'gyur ba'o/ /de ltar yang tshe dang ldan pa tha ga pa 'di ltar kho bos gla rngan 'di lta ste/ bza' ba'am bca' ba tsam mam bza' rgyu cung zad cig sbyin no zhes smras nas zhes gsungs pa yin no/ /yang ngo zhes bya ba smos pa ni/ sbyin par byed pa'i dog pa la sogs pa zad pa dang / tha ga pa rngan pa ma byin pa gnyi ga yang so sor ltung ba'i byed pa po'i gtso bo yin par shes par bya ba'i phyir ro/ /des na de gnyi ga yang rung ba gcig yod pa na yang 'dir dngos gzhir 'gyur ba kho na yin no/ /rngan pa khas blangs kyang rung ma blangs kyang rung ste/ bcol bas kho lag che ba nyid dang 'bras bzang ba nyid grub na 'dir dngos gzhi'i kha na ma tho bar 'gyur ba kho na yin no/ / khas blangs pa ma byin na ni ma byin par len pa las byung ba'i kha na ma tho bar yang 'gyur ba nyid do// //bam po nyi shu rtsa gcig pa/ sbyin par byed pas de'i don du rjes su ma gnang ba lta bu ni byed pa po dag yin no zhes bya ba ni/ sbyin par byed pas dge slong gang la kho lag che ba dang 'bras bzang ba zhes sngar bstan pa de'i don du rjes su ma gnang zhing khas ma blangs pa gang yin pa de ni sbyin par byed pas de'i don du rjes su ma gnang ba yin te/ khyod nyid ci dga' bar gos byed du chug cig ces de ltar sbyin par byed pas dge slong gang la rjes su gnang bar ma byas pa zhes bya ba'i tha tshig go/ /yang na sbyin par byed pas gal te gos gang la gos 'di rnam pa thams cad du mdzes par bya'o zhes don de rjes su ma gnang zhing khas ma blangs pa ste/ de'i tshe na gos kyi don de rjes su ma gnang ba yin no/ /sus she na sbyin par byed pas te/ sbyin bdag gis so/ / 'dir gal te khas blangs pa len par mi byed na tha ga pa yang sbyin bdag yin no/ /'di skad bstan te/ gal te sbyin bdag gis don de rjes su ma gnang ba yin no/ /yan lag de yang ltung ba'i byed pa po yin no/ /de ltar yang 'tshol ba'i mdun rol du sngar rjes su ma gnang na zhes gsungs pa yin no/ /gal te rang gi dad pas mgron du gnyer ba ma yin na zhes bya ba'i tha tshig go/ /yan lag de dag ni ltung ba'i byed pa po yin no/ /gnas skabs gang la yan lag de dag kha na ma tho ba de 'di'i byed pa po dag yin zhe na/ de'i phyir grub pa na dngos gzhi'o zhes bya ba smras te/ gos grub pa'i gnas skabs na yan lag de dag dngos gzhi'i kha na ma tho ba'i byed pa po dag yin no/ /'di skad bstan te/ gos grub na dngos gzhi'i kha na ma tho bar 'gyur ro/ /mdun rol du de'i phyir bsam pa las byung ba rjes su bsgrub pa tha dad pa ni nyes byas kyi'o zhes bya ba ni/ gos grub pa'i mdun rol du sbyor ba'i gnas skabs na dge slong de'i phyir bsam pa las byung ba'i rjes su bsgrub pa tha dad pa bsod snyoms la sogs pa la 'gro ba dang bcas pa la sogs pa tshol zhing der khyer ba ni thams cad sbyor ba gcig pa'i phyir nyes byas kyi byed pa po yin no/ /'di skad bstan te/ gos grub pa'i mdun rol du gos bsgrub pa'i don du rtsom pa gcig tu gyur pa'i rjes su bsgrub pa gang ci byed kyang rung ste/ sbyor ba gcig tu gyur ba'i rjes su bsgrub pa thams cad la yan lag de dag thams cad nyes byas gcig gi byed pa po dag yin gyi/ khri las ldang ba la sogs pa dag so so tha dad pa ni ma yin no/ /de ltar 'dir gzhung ni dge slong gis gos kyi don du ci tsam cung zad lag pa dag 'khru bar byed pa dang / lhung bzed 'khru bar byed pa dang / 'gro ba dang / 'ong ba dang / bsod snyoms thob nas tha ga pa la sbyin par byed na thams cad nyes byas su 'gyur ro/ /gos grub na ni spang ba'i ltung byed du 'gyur ro zhes gsungs pa yin no/ /ci tsam cung zad ces bya ba dang / thams cad ces bya ba'i tshig ni rtsom pa gcig tu gyur pa'i bya ba rnams la yang dang yang du rjes su bsgrub cing rnam par gnas pa la bya'i/ lag pa 'khru ba la sogs pa dag tha dad par gyur pa ni ma yin no/ /ma bsgo bar nye bar 'gro ba ni de nyid do zhes bya ba ni/ nyes byas nyid do zhes bya bar sbyar te/ ma bsgo bar zhes bya ba sbyin bdag gis dge slong la ma smras ma bsgo bar sbyin bdag gi drung du nye bar 'gro ba gang yin pa'i nye bar 'gro ba de ni nyes byas nyid yin no/ /'di skad bstan te/ gal te sbyin bdag gis dge slong de la khyod kyi phyir gos 'thag tu gzhug gis/ dus dus su bzhung la gos 'thag pa gzigs shig ces ma bsgo bar 'on kyang dge slong de ches mdzes par bsgrub pa'i bsam pas nye bar 'gro zhing cung zad kyang mi smra mod kyi/ 'on kyang nyes byas su 'gyur ro/ /'dir gzhung ni zhu ba las dge slong gi phyir khyim pas gos 'thag tu bcug nas dge slong de yang nye bar 'gro na tha dad par mi byed kyang nyes byas su 'gyur ro zhes gsungs pa yin no/ /tha dad par mi byed ces bya ba'i tha tshig de ni 'di ltar dgrol bar shes par bya ste/ kye ma bdag gi phyir gos 'thag pa der bdag song nas gos de shin tu mdzes par gyur na ci ma rung snyam pa de lta bu'i bsam pas der 'gro mod kyi/ 'on kyang gos la tha dad par dbye ba'i phyir dang / sna tshogs pa nyid kyi phyir dang / shin tu mdzes pa nyid kyi phyir 'tshol bar mi byed na yang nyes byas su 'gyur ba ste/ de yang sbyor ba las byung ba'i nyes byas yin no/ /'thag pa bskyed pa'i spang ba'o zhes bya ba de bshad zin to// //'phrog pa'i spang ba la yan lag gang dag byed pa po dag yin zhe na/ de'i phyir dbral bar bya ba dge slong nyid do zhes bya ba smras te/ dbral bar bya ba gang las gos 'phrog par bya ba de dge slong nyid yin na yan lag yin no/ /'di skad bstan te/ gang las gos 'phrog par bya ba de gal te dge slong yin te/ gal te gsol ba dang bzhi'i las kyis bsnyen par rdzogs pa yin na zhes bya ba'i tha tshig go/ /ci bdag nyid kyi kho na phrogs na kha na ma tho 'di nyid du 'gyur ram/ 'on te gzhan gyi zhe na/ de'i phyir dbrog par bya ba rang gi nyid ma yin no zhes bya ba smras te/ dbrog par bya ba'i gos rang gi nyid ma yin na ltung ba'i yan lag yin no/ /'di skad bstan te/ gos gang yang rung ba dbrog par bya ba de gal te gzhan gyis byin pa yin nam rang gis ltos pa med pa'i sems kyis byin pa yin la/ de phrogs na kha na ma tho ba 'dir 'gyur ro/ /'o na gtsug lag las rang gis byin pa kho na yan lag tu gsungs te/ yang dge slong gang gis dge slong la gos byin nas zhes gsungs so zhe na/ bden mod kyi/ 'on kyang gleng gzhi'i dbang gis de skad gsungs te/ 'di ltar rang gis byin pa phrogs na nyes par 'gyur ba las na/ gzhan gyis byin pa phrogs na lta ches nyes par 'gyur bar shes par bya'o/ /de ltar yang dge slong gang dge slong la gos byin nas de'i 'og tu khros 'khrugs rngams par gyur te/ yi ma rangs nas 'phrog gam 'phrog tu bcug cing / ji tsam du gos kyi grwa lus las bral bar byed na spang ba'i ltung byed do zhes gsungs pa yin no/ /kha na ma tho ba 'di rku sems med pa yin gyi/ rku sems yod na ni ma byin par len par gtogs pa'i kha na ma tho bar yang 'gyur ro/ /de gos nyid yin na'o zhes bya ba ni/ dbrog par bya ba de gos nyid yin na ltung ba'i yan lag tu 'gyur ba'o/ /'di skad bstan te/ gal te dbrog par bya ba'i dngos po de gos nyid yin na ltung ba'i yan lag tu 'gyur ro/ /'dir gos zhes smos pa ni mtshon pa ste/ dge slong gi yo byad gzhan yang phrogs na dngos gzhi'i kha na ma tho bar 'gyur ro/ /de'i 'am des bskos pa'i lus dang ngag bsdus pa'am/ tha dad pa dag gis dbrog pa'i don du zhugs pa lta bu ni byed pa po dag yin no zhes bya ba la/ de'i zhes bya ba ni ltung ba 'byin par byed pa'i 'o/ /des bskos pa'i zhes bya ba ni ltung ba 'byin par byed pa des bskos pa'i'o/ /lus dang ngag bsdus pa zhes bya ba ni/ lus dang ngag gnyi ga bsdus pas dbrog pa'i don du zhugs pa'o/ /tha dad pa dag gis zhes bya ba ni/ lus kyang tha dad par zhugs la/ ngag kyang tha dad par zhugs pa ste/ 'on kyang ltung ba ni gcig tu 'gyur ro/ /lta bu ni byed pa po dag yin no zhes bya ba ni/ yan lag de lta bu dag ni byed pa po dag yin no/ /'di skad bstan te/ gal te ltung ba 'byin par byed pa'i lus dang ngag dag gis cig car dbrog pa'i phyir bya ba byed dam rim gyis byed du bcug kyang rung ste/ ltung ba gcig kho nar 'gyur ro/ /gzhan la bcol bas kyang de dang 'dra'o/ /gang gi phyir rang gis byas pa dang / gzhan byed du bcug pa la bye brag med pa de'i phyir rang gi lus dang ngag bsdus pas byas sam/ gzhan byed du bcug na yang yan lag nyid yin te/ de'i phyir yan lag de dag ni byed pa po dag yin no/ /gnas skabs gang la yan lag de dag kha na ma tho ba gang gi byed pa po dag yin zhe na/ de'i phyir lus las tha dad pa'i dngos por gyur pa mthar thug pa na mtha'i 'o zhes bya ba smras te/ 'dir dbral bar bya ba'i dge slong gang yin pa de'i lus las chos gos la sogs pa rang gi nyid ma yin pa tha dad pa'i dngos por gyur pa zhes bya ba tha dad par byas par gyur pa'i mthar thug pa na zhes bya ba mthar thug par gyur pa'i dus na mtha'i zhes bya ba ni dngos gzhi'i kha na ma tho ba'i byed pa po dag yin no/ /'di skad bstan te/ gal te dge slong gis dge slong las gzhan gyis byin pa'i gos rang ngam/ gzhan gyi lus dang ngag dag gis cig car ram rim gyis kyang rung ste/ 'phrog par byed cing lus las tha dad pa'i dngos por gyur pa'i mthar thug pa'i dus na dngos gzhi'i kha na ma tho bar 'gyur ro/ /sbyor ba la ni nyes byas kyi'o zhes bya ba ni/ yan lag de dag sbyor ba'i gnas skabs la ni nyes byas kyi byed pa po dag yin no zhes bya ba'i tha tshig go/ /de ni phyir sbyin par bya ba nyid do zhes bya ba ni/ gos phrogs pa de ni bdag po de la phyir sbyin bar bya ba nyid yin pa'o/ /de skad bstan te/ phrogs pa'i gos gang yin pa de yongs su longs spyad par mi bya'o/ /ji ste yongs su spyad par gyur na yang de'i lhag ma yod pa gang yin pa de la phyir sbyin par bya ste/ ji srid du mi sbyin pa de srid du ltung ba bshags su mi rung ngo / /de ltar yang 'dir gzhung ni dge slong des gos de'i lhag ma yod pa phyir sbyin par bya zhes gsungs pa yin no/ /'di la rang gi don nyid ni yan lag ma yin no zhes bya ba ni/ gzhan la 'phrog pa 'di la rang gi don nyid ni yan lag ma yin te/ byed rgyu ma yin pa'o/ /'di skad bstan te/ gos 'phrog pa 'di la dge slong gis rang gi don nyid du ltung ba'i byed rgyu ma yin te/ des na gzhan gyi don gyi phyir tshig gis kyang 'phrog na dngos gzhi'i kha na ma tho bar 'gyur ro/ / bsnyen par ma rdzogs pa la ni skrod pa dang 'dra'o zhes bya ba ni/ dper na gtsug lag khang nas dge slong ma la sogs pa dge slong ngam/ dge slong ma 'am/ dge slob ma la sogs pas skrod par byed pa nyes byas su gsungs pa dang / de bzhin du dge slong dang dge slong ma dag dge slob ma la sogs pas skrod par byed pa yang nyes byas su gsungs pa dang 'dra bar 'phrog pa'i bslab pa'i gzhi 'di la yang bsnyen par ma rdzogs pa la ni nyes byas su rnam par gzhag par rig par bya'o/ /de ltar yang 'dir gzhung ni dge tshul la sogs pa'i 'phrog pa nyid la gzhung ni dge slob ma dang dge tshul dang dge tshul mas ni nyes byas kyi ltung bar 'gyur ro/ /khyim pa dang khyim pa mos ni bsod nams ma yin pa mang du 'phel bar 'gyur ro zhes gsungs pa yin no/ /'phrog pa ni rnam pa gsum ste/ rang gi nyid sel bar 'gyur ba dang / blo gros ngan pas byas pa dang / rigs pa'i don gyi dbang gis byas pa'o/ /de la rang gi nyid sel bar gyur pa kho na 'phrog pa'i ltung ba'i byed pa po yin par bstan pa'i phyir/ rang gi nyid sel bar gyur pa'i 'phrog pa 'dir bsdus pa yin no zhes bya ba smras te/ rang gi nyid kyi sel ba 'dir rang gi nyid sel ba'o/ / der gyur pa ni de'i ngo bo nyid du gyur pa'i 'phrog pa ste/ de bslab pa'i gzhi 'dir bsdus pa yin par rig par bya'i/ gzhan ma yin no/ /'di skad bstan te/ 'phrog pa rnam pa gsum las rang gi nyid sel bar gyur pa zhes bya ba'i 'phrog pa gcig pu kho na las kha na ma tho ba 'dir 'gyur la/ sbyor ba la ni nyes byas so/ /'dir gzhung ni dge slong khyod la gos mi sbyin gyi phyir byin cig ces gsungs pa yin no/ /'phrog pa lhag ma gnyis po dag gi ngo bo nyid bstan pa ste/ de la re zhig blo gros ngan pas byas pa'i 'phrog pa'i ngo bo nyid bstan pa'i phyir/ blo gros ngan pas byas pa ni rjes su 'phrog pa nyid yin no zhes bya ba smras te/ blo gros ngan pa zhes bya ba ni/ blo gros bzang po ma yin pa blo gros mi mdzes pa ste/ des byas pa'i 'phrog pa ni 'di lta ste/ yi chad par gyur cig /co dris par gyur cig /gnod par gyur cig /mthu bstan par gyur cig /ces de lta bus dbrog par byas nas phyir sbyin par bya'o zhes bya ba la sogs pa lta bu ste/ blo gros ngan pa des dbrog par byed pa gang yin pa de ni rjes su 'phrog pa nyid yin te/ dngos gzhi'i kha na ma tho ba'i rjes su mthun pa nyid kyi nyes byas yin no zhes bya ba'i tha tshig go/ /'di skad bstan te/ gal te rgod pa'i bsam pas dus cung zad tsam zhig sems gdung bar bya'o snyam nas chos gos la sogs pa 'phrog par byed na 'phrog pa de yongs su rdzogs pa ma yin pa'i nyes byas su 'gyur la/ sbyor ba la ni nyes byas phra mor 'gyur ro/ /rigs pa'i don gyi dbang gis byas pa'i 'phrog pa la ni nyes pa med par bstan pa'i phyir/ gnod pa dang mi phan par byed pa la 'jug pa'i bgegs bya ba'i phyir ni ltung ba med do zhes bya ba smras te/ gnod pa byed pa'i phyir gnod pa byed pa ste/ gnod pa ni tshe 'di'i lus la gnod par 'gyur ba'o/ /mi phan pa byed pa'i phyir mi phan pa byed pa ste/ mi phan pa ni 'jig rten pha rol du 'bras bu mi 'dod pa 'byin pa'i sems kun nas nyon mongs pa'o/ /de ltar gnod pa byed pa dang / mi phan pa byed pa la 'jug pa gang yin pa'i 'jug pa de'i bgegs bya ba'i phyir zhes bya ba bar chad bya ba'i phyir chos gos la sogs pa 'phrog pa la ni ltung ba med do/ / 'di skad bstan te/ rkun po dang / chu klung dang / stag gi 'jigs pa la sogs pa gnod pa byed pa'i nang du 'jug pa dang / sdig pa dang sten cing 'bras bu mi 'dod pa 'byin pa la sogs pa mi phan pa byed pa la 'jug pa'i bgegs bya zhing bar chad bya ba'i phyir chos gos la sogs pa 'phrog par byed na de la ni ltung ba med do/ /de ltar yang gzhung ni don gzhan dang 'dul ba'i yo byad kyi phyir ni ltung ba med de/ ji ltar don gzhan gyis she na/ 'di lta ste slob dpon dang mkhan po'i lhan cig gnas pa dang / nye gnas dag 'jigs pa dang bcas pa'i phyogs su dus ma yin pa dang / chu klung gi kha'am yur bo che'i khar 'gro ba de dag la slob dpon dang mkhan pos chom rkun dang g.yon can dag gis gos 'phrog par gyur na mi rung ngo snyam pas 'phrog gam 'phrog tu 'jug pa lta bu yin no/ /ji ltar 'dul ba'i yo byad kyis she na/ 'di lta ste dge slong rnams kyis lhan cig gnas pa dang / nye gnas dag sdig pa'i grogs po dang / sdig pa'i zla bo dang / sdig pa'i bsten grogs dang / lhan cig sdig pa bsten cing lam du 'gro bar gyur na de dag la mkhan po dang slob dpon gyis 'di dag sdig pa'i grogs po dang / sdig pa'i zla bo dang / sdig pa'i bsten grogs la bsnyen par gyur na mi rung ngo snyam pas gos dag 'phrog gam 'phrog tu 'jug pa lta bu'o zhes gsungs pa yin no/ /'phrog pa'i spang ba'o zhes bya ba de bshad zin to// //'di ltar so sor thar pa dang rnam par 'byed pa las 'phrog pa'i spang ba'i 'og tu brtad pa las byung ba'i spang ba 'byung mod kyi/ zhu ba las 'phrog pa'i spang ba'i 'og tu zhag bdun na 'bral ba'i spang ba 'byung bas zhu ba'i gzhung khas blangs te/ go rims kyi gnas ma yin par zhag bdun na 'bral ba'i spang ba nyid nye bar gzhag nas dus gzhan gyi rgyu las byung ba'i ltung ba dag skabs gcig tu rnam par gzhag pa'i phyir/ dgon pa ba'i chos gos gcig la ni 'jigs pa dang bcas pa nyid yin na grong yang rang gi gnas dang 'dra'o zhes bya ba smras te/ dge slong dgon pa ba'i chos gos gcig la ni zhes bya ba ni/ chos gos gsum las gang yang rung ba cig gi phyir ro/ /'jigs pa dang bcas pa nyid yin na zhes bya ba ni/ dge slong dgon pa pa'i rang gi gnas dgon pa de rkun po la sogs pa dag gi 'jigs pa dang bcas pa nyid yin na'o/ /grong yang zhes bya ba dgon pa de'i spyod yul du gyur pa'i grong gang yin pa yang ngo / /rang gi gnas dang 'dra'o zhes bya ba ni/ dge slong dgon pa pa rang gi gnas dgon pa ba dang 'dra bar shes par bya ba'o/ /'di skad bstan te/ ji ltar dge slong dgon pa ba'i rang gi gnas na 'dug pa'i chos gos las 'bral ba'i nyes pa 'byung bar mi 'gyur ba de bzhin du rgyal po dang rkun po la sogs pa'i dbang gis 'jigs pa dang bcas pa nyid yin na/ chos gos gcig dgon pa'i spyod yul du gyur pa'i grong du bzhag ste/ chos gos gcig po de dang gnas tha dad pa yin du zin kyang / zhag drug tshun chad du 'bral ba'i nyes par mi 'gyur ro/ /'dir gzhung ni chos gos gsum las chos gos gang yang rung ba cig khyim gzhan du gzhag par bya'o zhes gsungs pa yin no/ /'di ltar der ni dbyar phyi ma zhes smos te/ dbyar phyi mar gyur pa zhes gsungs mod kyi/ 'dir ni de khas mi blang ste/ ltung ba bstan pa las de la mi brten pa'i phyir te/ dge slong dgon pa ba des zhag drug gi mtha' tshun chad du chos gos de dang mtshams kyi phyi rol du 'bral bar bya'o/ /de las 'das par bral na spang ba'i ltung byed do zhes gsungs pa'i phyir ro/ /gleng gzhi'i dbang gis ni so sor thar pa'i mdo la sogs pa dbyar phyi ma zhes smos pa mdzad do/ /'bral ba'i dus kyi mtshams brjod par 'dod nas des don gyi dbang gis grong gzhan na 'dug pa de las zhag drug tshun chad du 'bral bar bya'o zhes bya ba smras te/ des zhes bya ba ni dge slong dgon pa bas so/ /don gyi dbang gis zhes bya ba ni/ chos dang ldan pa'i dgos pa'i dbang gis so/ /grong gzhan na 'dug pa de las zhes bya ba ni/ chos gos gcig dgon pa'i spyod yul du gyur pa'i grong gzhan du gzhag cing 'dug pa de las so/ /gal te spyod yul du gyur pa'i grong yang 'jigs pa dang bcas par gyur na/ de'i tshe grong gzhan du yang gzhag par bya'o zhes bsdu ba'i phyir grong gzhan zhes smos so/ /gnas dgon pa de na chos gos 'chang ba de'i nyen kor 'dom gang la sogs pa gang yin pa de las phyi rol du skya rengs shar ba ni 'dir 'bral ba yin par rig par bya'o/ /dus ji srid cig tu dgos pa'i dbang gis 'bral du gnang zhe na/ de'i phyir zhag drug tshun chad du zhes bya ba smras te/ zhag drug pa'i mthar thug cing zhag bdun pa'i skya rengs ma shar ba tshun chad du'o/ /'bral bar bya'o zhes bya ba ni chos gos kyi gnas mtshams dag las gzhan du yang ste/ mtshams kyi phyi rol du zhes bya ba'i tha tshig go/ /'di skad bstan te/ dge slong dgon pa pas chos dang ldan pa'i dgos pa'i dbang gis na chos gos grong gzhan na 'dug pa'am/ rang gi gnas na 'dug pa de las zhag drug tshun chad du gzhan du 'bral bar bya'i/ de las lhag par ni mi bya'o/ /lhag pa la ni bag yangs med do zhes bya ba ni/ zhag drug pa las lhag pa zhag bdun pa la ni 'bral bar gnang ba'i bag yangs med de ltung bar 'gyur ba'o/ /'di skad bstan te/ zhag bdun pa'i skya rengs shar na ni 'bral ba zhes bya ba'i ltung ba 'byung ngo zhes bya ba'i tha tshig go/ /bar chad kyi dbang gis ma 'ongs pa la nyes pa med do zhes bya ba ni/ dgon pa ba gzhan du song ba rkun po la sogs pa bar chad kyi dbang gis zhag drug las lhag par phyir ma 'ongs shing zhag bdun pa la sogs par thal ba la ni nyes pa med pa'o/ /'di skad bstan te/ gal te dge slong dgon pa pa mtshams kyi phyi rol du song ba rkun po la sogs pa gnod pa byed pa'i 'jigs pas zhag drug las lhag par phyir ma 'khor na de lta na yang 'bral bar mi 'gyur bar bag yangs su gnang ngo / /'dir gzhung ni btsun pa dge slong dgon pa bas grong gzhan du chos gos bzhag ste/ bgyi ba 'ga' zhig gi slad du mtshams kyi rol du mchi zhing / de nyid du slar log par bgyi'o snyam pa las gal te de la bar chad 'ga' zhig byung nas slar mchi bar rngo ma thogs na chos gos de dang bral zhes bgyi'am/ nye ba 'khor mi bya'o zhes gsungs pa yin no/ /kha cig 'di ltar rnam par rtog ste/ gal te dge slong gis bdag gis zhag drug phyi rol du 'gro bar bya'o snyam du brnag pa sngon du byas te/ 'gro zhing zhag drug pa las 'das pa la ni 'bral ba'i nyes pa 'di med pa yin gyi/ gal te de ltar brnag pa ma byas par nyin gcig gam mtshan gcig 'gro bar brnags te song ba las zhag drug 'das pa de la ni nyes pa kho nar 'gyur ro snyam du rtog pa dag yod pas de bstsal ba'i phyir/ 'dir zhag drug tu 'gro ba ha cang thal ba nyid la ni brnag pa yan lag ma yin no zhes bya ba smras te/ bslab pa'i gzhi 'dir brnag pa ni yan lag ma yin te/ 'di ltar zhag drug tu 'gro ba'i dus de las ha cang thal bar bya'o snyam pa'i brnag pa de ni nyes par 'gyur ba'i yan lag ma yin te/ brnag pa med par ji ltar song yang rung ste/ nyin mtshan gcig tu brnags te song ba las zhag drug las 'das par gyur la nyid pa yang nyes pa med do/ /zhag bdun na 'bral ba'i spang ba'o zhes bya ba de bshad zin to// //da ni dbyar gyi ras chen gyi spang ba brjod par 'dod nas/ bdag nyid gnas par khas blangs pa'i nyin mo'i zla ba snga ma'i dang po tshun chad nas dbyar gyi ras chen btsal bar bya'o zhes bya ba smras te/ dbyar gyi ras chen 'di tshol ba'i dge slong gis bdag nyid gnas par khas blangs pa'i nyin mo zhes bya ba ni/ dge slong de bdag nyid dbyar gnas par khas blangs pa'i nyi ma gang yin pa de'i nyin mo ste/ dbyar gnas par khas blangs pa snga ma'i nyin mo ni dbyar zla 'bring po'i tshes bcu drug go/ /dbyar gnas par khas blangs pa phyi ma'i nyin mo ni dbyar zla tha chungs tshes bcu drug go/ /de ni bdag nyid gnas par khas blangs pa'i nyin mo ste/ de'i zla ba snga ma ni dbyar zla ra ba nya nas dbyar zla 'bring po nya'i bar ram/ dbyar zla 'bring po'i nya nas dbyar zla tha chungs nya'i bar ro/ /de ni bdag nyid gnas par khas blangs pa'i nyin mo'i zla ba snga ma ste/ de'i nyi ma'i dang po ni dbyar zla ra ba tshes bcu drug gam dbyar zla 'bring po tshes bcu drug go/ /tshun chad nas zhes bya ba ni/ nyi ma dang po de gnyis dang por byas nas de tshun chad nas so/ /dbyar gyi ras chen btsal bar bya'o zhes bya ba ni/ dge slong gis dbyar gyi gos ras chen btsal bar bya'o zhes bya ba'i tha tshig go/ /'di skad bstan te/ gal te dge slong dbyar gyi gos ras chen tshol bar byed na gang gi tshe dbyar snga mar gnas par khas len na ni de'i tshe dbyar zla ra ba tshes bcu drug nas brtsams nas dge slong des ji srid dbyar gyi gos ras chen 'chang bar gnang ba'i dus kyi mtha' tshun chad kyi bar du dbyar gyi ras chen btsal bar bya'o/ / gal te gang gi tshe dbyar phyi mar gnas par khas len na ni de'i tshe dbyar zla 'bring po tshes bcu drug nas brtsams nas dge slong des ji srid du dbyar gyi gos ras chen 'chang bar gnang ba'i dus kyi mtha' tshun chad du dbyar gyi ras chen btsal bar bya ste/ mdo 'dis ni dbyar gyi ras chen dang po btsal ba'i dus bstan to/ / //da ni bcang ba'i dus brjod par 'dod nas/ bdag nyid kyi dbyar gyi 'og gi zla ba phyed kyi mtha'i bar du bcang bar bya'o zhes bya ba smras te/ dge slong de'i dbyar gnas par khas blangs pa'i dbang gis bdag nyid kyi dbyar snga ma'am phyi ma rnam par gzhag pa gang yin pa de'i 'og mar gyur pa dus phyis 'byung ba'i zla ba phyed gang yin pa de ni bdag nyid kyi dbyar gyi 'og gi zla ba phyed yin no/ /de'i mtha' ni mthar thug par gyur ba ste/ dus de srid kyi bar du dbyar gyi gos ras chen bcang bar bya'o/ /'di skad bstan te/ gal te dge slong des dbyar gnas par khas blangs pa snga mar khas len par 'dod na ni/ de'i tshe dbyar zla ra ba tshes bcu drug nas brtsams nas ston zla tha chungs tshes kyi bar du zla ba phyed dang lngar dbyar gyi gos ras chen de bcang ba'i dus yin no/ /gal te dge slong des dbyar gnas par khas blangs pa phyi mar khas len par 'dod na ni/ de'i tshe dbyar zla 'bring po'i tshes bcu drug nas brtsams nas dgun zla ra ba tshes kyi bar du zla ba phyed dang lngar dbyar gyi gos ras chen de bcang ba'i dus yin te/ de las thal bar 'chang du ni mi gnang ngo / /de lta bas na 'dir ston zla tha chungs tshes gcig gam/ dgun zla ra ba tshes gcig gi skya rengs dang po shar na spang ba'i ltung byed du 'gyur ro/ /de ltar yang 'dir gzhung ni btsun pa re zhig dge slong gis dbyar gyi ras chen rung ba ma lags pa dgun zla phyed dang lnga las 'das par 'chang na ltung ba cir 'gyur/ nye ba 'khor nyes byas su 'gyur ro zhes gsungs pa yin no/ /gang la dbyar gyi ras chen gyi spang bar 'gyur zhe na/ de'i phyir sngon dang phyi ma gnyis las de ma yin pa'i dus gnyis ni byed pa po nyid do zhes bya ba smras te/ btsal ba'i dus bstan pa bas sngon rol gyi dus gang yin pa dang / bcang ba'i dus bstan pa bas phyi ma'i dus gang yin pa'i dus snga ma dang phyi ma de gnyis ni 'dir ltung ba'i byed pa po nyid yin no/ /'di skad bstan te/ dbyar zla ra ba nya nas dbyar zla 'bring po nya'i bar zhes bya ba'i zla bas sngon rol gyi dus gang yin pa dang / ston zla 'bring po nya nas ston zla tha chungs tshes zhes bya ba'i bar gyi zla ba phyed kyi 'og ma'i dus de gnyis ni ltung ba'i byed pa po nyid yin no/ /yul gang la de gnyis byed pa po nyid yin zhe na/ de'i phyir re zhig 'chang ba la ni gzhan du 'chang ba la'o zhes bya ba smras te/ 'chang ba'i dus sngar bstan pa las gzhan pa'i dus su 'chang na dngos gzhi'i kha na ma tho ba'i byed pa po nyid yin no/ /sngar btsal ba la ni nyes byas kyi'o zhes bya ba ni btsal ba'i dus sngar bstan pa bas sngon rol gyi dus gang yin pa'i dus der btsal na btsal ba tsam la sbyor ba zhes bya ba nyes byas kyi byed pa po nyid yin no/ /dngos gzhi'i kha na ma tho ba'i yul gang la byed pa po nyid yin zhe na/ de'i phyir grub na mtha'i 'o zhes bya ba smras te/ btsal ba'i dus bstan pa bas sngon rol gyi dus su dbyar gyi ras chen de grub na sngon rol gyi dus de mtha'i zhes bya ba dngos gzhi'i kha na ma tho ba'i byed pa po nyid yin no/ /dus snga zhig tu gang tshol ba rtsom par byed cing rigs pa'i dus su thob par byed pa gang yin pa de ni/ sbyor ba'i kha na ma tho ba nyid du 'gyur ba yin gyi dngos gzhi'i kha na ma tho bar 'gyur ba ni ma yin no/ /rnyang rnying la ni na smad pa nyid do zhes bya ba ni/ dbyar gyi gos ras chen rnyang rnying du gyur cing dengs pa zhig btsal ba'i dus ma yin par btsal ba dang thob nas dus las yol bar 'chang bar byed pa la ni na smad pa nyid de nyes byas su 'gyur ro zhes bya ba'i tha tshig go/ /'dir gzhung ni zhu ba las dbyar gyi gos ras chen rnyang rnying du gyur pa zhig zla ba phyed dang lnga las lhag par 'chang na nyes byas so/ /de bzhin du dbyar gyi gos ras chen bug rdol du gyur pa ha cang tshogs te tshol bar byed na yang nyes byas so zhes gsungs pa yin no/ /dbyar gnas par khas blang ba dang 'brel ba'i bya ba dag ni mang du snang na ci bya ba gang dag dbyar gnas par khas blang ba snga ma dang 'brel ba de dag nyid dbyar gnas par khas blang ba phyi ma dang 'brel ba dag kyang yin nam zhe na/ de'i phyir de'i rjes su 'gro ba ni khas blang ba ji lta ba bzhin no zhes bya ba smras te/ de'i rjes su 'gro ba zhes bya ba ni/ khas blang ba'i rjes su 'gro ba khas blang ba dang 'brel ba khas blang ba la brten nas bya ba gang 'byung bar 'gyur ba'o/ /khas blang ba ji lta ba bzhin no zhes bya ba ni/ de thams cad khas blang ba'i rjes su mthun pa yin par rig par bya'o/ /'di skad bstan te/ gal te dge slong dbyar gnas par khas blang ba snga mar khas len par byed na ni dge slong des dbyar gnas par khas blang ba snga ma dang 'brel ba'i bya ba gang dag yin pa de dag thams cad de nyid du bya'o/ /'on te dge slong dbyar gnas par khas blang ba phyi mar khas len par byed na ni/ dge slong des dbyar gnas par khas blang ba phyi ma dang 'brel ba'i bya ba gang dag yin pa de dag thams cad de nyid du bya ste/ 'di lta ste/ mtha'i zhag bcu la brtad pa las byung ba'i gos blang ngo zhes gsungs pa ni bdag nyid kyi dbyar gyi mtha'i zhag bcu gang yin pa la bya ste/ ston zla 'bring po'i tshes lnga nas nya'i bar gyi zhag bcu 'am/ ston zla tha chungs tshes lnga nas nya'i bar gyi zhag bcu la bya ba lta bu'o/ /de ltar na gnas par bya ba'i dbyar gyi tshad las ltos nas dbyar gyi ras chen btsal ba dang bcang ba khong du chud par bya'o/ / de bzhin du dgag dbye yang ston zla 'bring po nya'am/ ston zla tha chungs nya la bya ba lta bu yin no/ /sra brkyang gding ba ni dbyar gnas par khas blang ba snga ma shos dang 'brel ba kho na yin no/ /dbyar gyi ras chen gyi spang ba'o zhes bya ba de bshad zin to// //brtad pa las byung ba'i spang ba la don gang zhig byed pa po nyid yin zhe na/ de'i phyir dbyar gyi rnyed pa ni byed pa po nyid do zhes bya ba smras te/ dbyar gnas pa'i phyir rnyed pa gang yin pa de ni 'dir dbyar gyi rnyed pa zhes bya ste/ de ni ltung ba'i byed pa po nyid yin gyi/ 'phral gyi mchod ston la sogs pa'i phyir rnyed pa gzhan ni ma yin no/ /'di skad bstan te/ dbyar gnas pa'i phyir byung ba'i rnyed pa gang yin pa de 'dir ltung ba'i byed pa po nyid yin gyi/ rnyed pa gzhan ni ma yin no/ /ji zhig rjes su bsgrub na de ltung ba'i byed pa po nyid yin zhe na/ de'i phyir dbyar gyi nang logs su bdag gir byed na'o zhes bya ba smras te/ dbyar gnas par bya ba'i zla ba gsum po dag gi nang rol du dbyar gyi rnyed pa bdag gir byed na'o/ /'di skad bstan te/ gal te dge slong gis dbyar gnas pa'i phyir byung ba'i rnyed pa dbyar gyi nang logs su bdag gir byed na de'i tshe spang ba'i ltung byed du 'gyur ro/ /spyir btang ba byas nas dmigs kyis bsal bar bya bar 'dod nas/ brtad pa'i dbang gis mtha'i zhag bcu la rnyed pa ni ma gtogs so zhes bya ba smras te/ brtad pa'i dbang gis zhes bya ba ni/ glo bur gyi don gyi dbang gis so/ /mtha'i zhag bcu la zhes bya ba ni/ dbyar gnas par bya ba'i zla ba gsum po dag gi mtha'i zhag bcu po las te/ ston zla 'bring po tshes lnga nas nya'i bar ram/ ston zla tha chungs tshes lnga nas nya'i bar gyi zhag bcu la'o/ /rnyed pa ni zhes bya ba ni dbyar gnas pa'i phyir byung ba'i rnyed pa'o/ /ma gtogs so zhes bya ba ni/ bdag gis byas kyang nyes pa med pa'o/ /'di skad bstan te/ gal te dge slong rnams kyis dge slong dag gi rnyed pa'i bar chad kyi dbang gis sam/ yon bdag gi bsod nams kyi bar chad kyi dbang gis mtha'i zhag bcu la dbyar gnas pa'i phyir byung ba'i rnyed pa bdag gir byed na yang de'i tshe kha na ma tho bar mi 'gyur ro/ / brtad pa las byung ba'i gos lnga po nad pa la sbyin pa dang / nad pa'i phyir sbyin pa dang / 'chi ba la sbyin pa dang / shi ba'i phyir sbyin pa dang / 'gro bar chas pa la sbyin pa zhes gsungs pa gang yin pa de ni dpe tsam du zad de/ rgyal po dang / chom rkun dang / rigs rgyud dang / chu la sogs pas khyer du dogs pa dang / mchod gnas bgo skal la gtogs pa 'chi ra dogs pa la sogs pa dag kyang yongs su bsdu ba'i phyir gsungs pa yin no/ /de bgos na yang ngo zhes bya ba ni brtad pa las byung ba'i rnyed pa de dbyar gyi nang logs su bgos na yang ltung ba'i byed pa po nyid yin pa'o/ / 'di skad bstan te/ gal te brtad pa las byung ba'i rnyed pa bdag gir byas pa de dbyar gyi nang logs su 'god par byed na de lta na yang spang ba'i ltung byed du 'gyur ro/ /de lta bas na dbyar gyi nang gi rnyed pa dbyar gyi nang logs su bdag gir byed pa 'ba' zhig ltung ba'i byed pa po nyid yin par ma zad kyi bdag gir byed pa 'di yang yin no/ /'dir gzhung ni blang bar bya'o/ /blangs nas gos sbyin pa'i dus kyi bar du bcang bar bya'o zhes gsungs pa yin no/ /brtad pa las byung ba'i rnyed pa bdag gir byas kyang bgo bar mi bya ste/ 'god na spang ba'i ltung byed du 'gyur ro/ /dbyar gyi nang logs su byung ba'i rnyed pa bdag gir byed na yang spang ba'i ltung byed du 'gyur la/ 'god na yang spang ba'i ltung byed du 'gyur ro/ /gtsug lag khang gang dag na chos gos kyi zong nges par gyur ba yod pa ni ji srid du ma thob pa de srid du de la bdag gir bya ba mi 'byung la thob na ni bdag gir byas pa yin no/ /ma bgos na yang ngo zhes bya ba ni/ de zhes bya ba'i rjes su sbyar ro/ /brtad pa las byung ba'i rnyed pa dbyar dag la byung ba de gos sbyin pa'i dus su ma bgos par de las 'das par bcang na yang ltung ba'i byed pa po nyid yin no/ /'di skad bstan te/ ltung ba'i byed pa po rnam pa gsum po dbyar gyi nang logs su bdag gir byed pa dang / 'god pa dang mi 'god pa zhes gsungs pa rnam pa gsum po de dag thams cad ni bdag gir byed pa dang / 'god pa dang / mi 'god pa zhes bya ba'i dngos gzhi'i byed pa po nyid yin gyi/ sbyor ba'i ni ma yin no/ /'dir gzhung ni dge slong gis dbyar gyi nang tshun chad du dbyar gyi rnyed pa 'god par byed dam gos sbyin pa'i dus las 'das par 'chad par byed na thams cad du spang ba'i ltung byed du 'gyur ro zhes gsungs pa yin no/ /ma bgos na yang ngo zhes spyir gtang ba smras pa de'i dmigs kyis bsal ba smra bar 'dod nas/ sbyin pa dag gi tshig gis dbang med na'o zhes bya ba smras te/ gal te sbyin bdag 'di skad ces re zhig khyed cag gis ma bgo shig bdag mchis nas rang gi lag nas dbul lo zhes zer na de'i dbang gis ma bgos na yang nyes pa med do/ /sbyin bdag gi tshig med par ma bgos na ni nyes pa kho nar 'gyur ro/ /dus gang gi tshe ma bgos na zhe na/ de'i phyir dgag dbye'i nyin mo'i phyi de nyin par de sbed pa ma bskos pa rnams la'o zhes bya ba smras te/ dgag dbye'i nyin mo zhes bya ba ni/ dbyar gnas par khas blangs pa snga ma'i ston zla 'bring po nya'o/ /dbyar gnas par khas blangs pa phyi ma ni ston zla tha chungs nya'o/ /de'i phyi de nyin par zhes bya ba ni/ ston zla 'bring po'i tshes bcu drug gam/ ston zla tha chungs tshes bcu drug ste/ dus der dbyar gyi rnyed pa ma bgos na spang ba'i ltung byed du 'gyur ro/ /su dag la zhe na/ de'i phyir de sbed pa ma bskos pa rnams la'o zhes bya ba smras te/ gang dag gis de sbed pa'i dge slong ma bskos pa de dag ni de sbed pa ma bskos pa rnams te/ de dag la'o/ /'di skad bstan te/ dge slong gang dag gis gos sbed pa'i dge slong ma bskos pa de dag gis dgag dbye'i nyin mo'i phyi de nyin par gal te dbyar gyi rnyed pa 'god par mi byed na de'i tshe de dag la spang ba'i ltung byed du 'gyur ro/ /de ltar yang 'dir gzhung ni so sor thar ba'i mdo las gos sbyin pa'i dus kyi bar du bcang bar bya'o/ /de las 'das par 'chang na spang ba'i ltung byed do zhes gsungs pa yin no/ /de bzhin du de'i rnam par 'byed pa las kyang dge slong gis gos sbyin pa'i dus dang skabs ma yin pa gang yin zhe na/ sra brkyang ma bting ba'i gnas na ni ston zla tha chungs nya tshun chad do/ /sra brkyang bting ba'i gnas na ni ston zla tha chungs nya phan chad nas dpyid zla 'bring po nya'i bar te/ de ni dge slong gi chos gos sbyin pa'i dus ma yin la lhag ma rnams ni dus yin no zhes gsungs pa yin no/ /dbyar gnas par khas blangs pa phyi ma shos nges par byas na ni ston zla tha chungs nya tshun chad do zhes gsungs pa yin no/ /dbyar gnas par khas blangs pa snga ma la ni ston zla 'bring po nya tshun chad dus ma yin no/ /'di skad bstan te/ sra brkyang ma bting ba'i gnas na ni ji srid du sra brkyang 'ding bar mi byed kyi bar du ston zla 'bring po tshes bcu drug kho na gos sbyin pa'i dus yin no/ /de ni mi bsko bar mi bya'o zhes bya ba ni/ gos sbed pa'i dge slong de mi bsko bar mi bya ste/ bsko ba kho nar bya ba'o/ /'di skad bstan te/ gos brtad pa las byung ba dang / dus su byung ba dang / gzhan yang rung ste/ de dag spa ba'i phyir dge slong bsko bar bya'o/ /'di ltar rnam par 'byed pa las 'phrog pa'i spang ba'i 'og tu brtad pa las byung ba'i spang ba 'byung mod kyi/ 'on kyang zhu ba las gsungs pa'i gzhung khas blangs nas rim pa 'di ltar bstan te/ dbyar gyi ras chen dang brtad pa las byung ba gnyis kyis bcang ba spyir 'dra ba la brten par byas so/ /brtad pa las byung ba'i spang ba'o zhes bya ba de bshad zin to// //da ni bsngos pa las bsgyur ba'i spang ba brjod par bya ste/ ci zhig byas na bsngos pa las bsgyur ba'i spang bar 'gyur zhe na/ de'i phyir gzhan gyis gang zag gzhan nam dge 'dun la bsngos pa'i gos shes bzhin du bdag nyid la bsgyur te thob na'o zhes bya ba smras te/ gzhan gyis zhes bya ba ni yon bdag gis so/ /gang zag gzhan nam zhes bya ba ni gang zag gzhan la ltos pa'i gos so/ /gzhan zhes dmigs kyis smos pa ni ltung ba 'byin par byed pa las gzhan pa'i gang zag la bsngos pa yin gyi ltung ba 'byin par byed pa la ni ma yin no zhes bstan pa'i phyir ro/ /dge 'dun la zhes bya ba ni/ dge 'dun spyi la bsngos pa'i gos so/ /bsngos pa'i zhes bya ba ni yid kyis phul ba'i 'o/ /gos zhes bya ba ni gos kyi rnyed pa yin gyi/ zas kyi rnyed pa ni ma yin te/ de ltar yang 'dir gzhung ni rnam par 'byed pa las gos kyi rnyed pa yin par dgongs so zhes gsungs pa yin no/ /shes bzhin du zhes bya ba ni/ gal te dge slong gis 'di ltar gos 'di sbyin bdag 'dis gang zag gzhan nam dge 'dun la bsngos shing yid kyis phul bar shes bzhin du'o bdag nyid la bsgyur te zhes bya ba ni/ ltung ba 'byin par byed pas de ltar shes bzhin du gos de bdag nyid kyi yul la bsgyur du bcug ste'o/ / thob na'o zhes bya ba ni ji skad smos pa'i rnam pa de dag gis gos de thob na dngos gzhi'i kha na ma tho bar 'gyur ba'o/ /'di ltar so sor thar pa'i mdo las yang dge slong gang dge 'dun la bsngos pa'i rnyed pa shes bzhin du gang zag bdag la bsngor 'jug na spang ba'i ltung byed do zhes dge 'dun gyi 'ba' zhig smos mod kyi/ 'on kyang ltung ba bstan pa las gang zag kyang smos pa'i phyir/ 'dir gang zag gzhan nam zhes gang zag kyang smos te/ dge slong gis gang zag gcig la bsngos pa'i rnyed pa gang zag bdag nyid la sgyur bar byed na sgyur bar byed pa de la nyes byas su 'gyur la/ thob na spang ba'i ltung byed du 'gyur ro/ /de ltar 'dir tshig gi don 'di 'byung ste/ gal te yon bdag gzhan 'ga' zhig gis dge 'dun gyi phyir ram/ gang zag gzhan gyi phyir gos shig de la sbyin no zhes bsngos pa las dge slong gis kyang de ltar shes bzhin du 'on kyang bdag nyid la sgyur bar byed na sgyur bar byed pa de la nyes byas su 'gyur la thob na ni spang ba'i ltung byed du 'gyur ro/ /gal te thob na dngos gzhir 'gyur na bsgyur ba la kha na ma tho ba cir 'gyur zhe na/ de'i phyir bsgyur ba la ni nyes byas so zhes bya ba smras te/ zas kyi rnyed pa las gzhan pa gos kyi rnyed pa la ni/ bsgyur ba la sbyor bar 'gyur ba'i nyes byas so/ /zas kyi rnyed pa la ni sbyor ba la yang nyes byas la dngos gzhi la yang nyes byas so/ /'dir nye du ma yin pa nyid ni yan lag ma yin te/ 'di ltar zhu ba las btsun pa bcom ldan 'das kyis nye du ma lags pa las gos len na spang ba'i ltung byed du 'gyur ro zhes gsungs na/ dge slong gis ma las gos len par bgyid cing de yang spang ba'i ltung byed du 'gyur ba mchis sam/ yod de gal te des dge 'dun gyi phyir nye bar gzhag pa yin la/ de dge slong gis bdag nyid la sgyur bar byed na'o zhes gsungs pa yin no/ /ji ltar 'dir nye du ma yin pa nyid yan lag ma yin pa bzhin du tshig nyid kyang de dang 'dra'o/ /gal te 'bral bar bya ba dge slong yin na/ de ni yan lag nyid yin no/ /'dir gzhan la yang ngo zhes bya ba la/ 'dir zhes bya ba ni/ bsngos pa las bsgyur ba'i skabs 'dir ro/ /gzhan la yang ngo zhes bya ba ni/ gang zag gzhan la bsngos pa gang zag gzhan la sgyur bar byed na yang nyes byas su 'gyur ba ste/ yang ngo zhes bya ba'i sgra ni nyes byas so zhes bya ba'i rjes bsnyegs pa'i phyir ro/ /de'i 'bras bu la yang ngo zhes bya ba la/ bsgyur ba'i 'bras bu thob pa ste/ thob pa zhes bya ba dngos gzhir 'gyur ba de la yang nyes byas kho na'o/ /'di skad bstan te/ bdag nyid las gzhan pa la sgyur bar byed na dngos gzhi la yang nyes byas yin la/ sbyor ba la yang nyes byas so/ /gzhan la yang ngo zhes bya ba la/ gos kyi rnyed pa sngar bstan pa las gzhan pa ni zas kyi rnyed pa ste/ zas kyi rnyed pa de yang gzhan la sgyur bar byed na sbyor ba dang dngos gzhi gnyi ga la nyes byas kho nar 'gyur ba ste/ dper na mu to ba cig la bsngos pa'i zas mu to ba gzhan la sgyur bar byed na nyes byas su 'gyur ba lta bu'o/ /dbral ba dang sbyar ba gnyi ga sems can du bgrang ba nyid ma yin pa la yang ngo zhes bya ba la/ dbral ba zhes bya ba ni/ rnyed pa gang las bsngos pa las dbrog par bya ba'o/ /sbyar ba zhes bya ba ni/ gang la sbyin par bya ba'o/ /dbral ba dang sbyar ba de gnyi ga sems can du bgrang ba nyid ma yin pa zhes bya ba ni/ 'dir gnas khang la sogs pa dag go de gnyis gcig la bsngos pa gcig la sgyur bar byed pa la yang nyes byas so/ /'di skad bstan te/ gnas khang gzhan la bsngos pa'i rnyed pa dge slong gi khri la sogs pa gzhan la sgyur bar byed na sbyor ba dang dngos gzhi gnyi ga la nyes byas su 'gyur ro/ /phyogs gcig nyid la yang ngo zhes bya ba ni/ dbral ba dang sbyar ba gnyis kyi phyogs gcig nyid la yang nyes byas kho nar 'gyur ba'o/ /'di skad bstan te/ 'di lta ste dper na/ them skas kyi rim pa thams cad them skas gcig gi sgrar 'gyur mod kyi/ 'on kyang them skas gcig gi phyogs su gyur pa'i them skas kyi rim pa gcig la yon bdag gis bsngos pa dge slong gis them skas kyi rim pa gzhan du sgyur bar byed na gnas skabs gnyi ga la yang nyes byas su 'gyur ba lta bu'o/ /lhag ma za ba dud 'gro la sogs pa btsal te ma rnyed pa la ni ltung ba med do zhes bya ba ni/ lhag ma za ba dud 'gro la sogs pa gang la bsngos pa de btsal te/ ma rnyed na gzhan la bsgyur na yang ltung ba med pa'o/ /'di skad bstan te/ lhag ma za ba dud 'gro la sogs pa gang la bsngos pa de btsal te/ ma rnyed na de las gzhan pa las bsgyur na yang ltung ba med do/ /bde bar gshegs pa'i sku gzugs gzhan la ni g.yar por sbyin du rung ngo zhes bya ba ni/ bde bar gshegs pa sangs rgyas bcom ldan 'das kyi sku gzugs sku'i gzugs brnyan gzhan gyi rgyan la sogs pa sku gzugs gzhan la g.yar por re zhig g.yar po'i tshul gyis sbyin du rung ba'o/ /'di skad bstan te/ bcom ldan 'das kyi sku gzugs gzhan mnga' ba'i rgyan la sogs pa dag gal te sku gzugs gzhan la mchod pa'i phyir g.yar por sbyin par byed na de la nyes pa med do/ /bsngos pa mi sbyin na nyes byas so zhes bya ba ni/ che ge mo zhig la sbyin no zhes bsngos pa de de'i 'og tu de la sbyin par mi byed na nyes byas su 'gyur ba'o// // bam po nyi shu rtsa gnyis pa/ mtshams kyi phyi rol du song ste/ dge 'dun gyis byin gyis rlob par byed na'o zhes bya ba ni/ mtshams kyi phyi rol du song ste/ dge 'dun gyis shi ba'i yo byad la sogs pa'i rnyed pa byin gyis rlob par byed na nyes byas so/ /'di skad bstan te/ dge 'dun gyi rnyed par bsngos pa dge slong gis mtshams kyi phyi rol du song ste/ byin gyis rlob par byed na nyes byas su 'gyur ro/ /ma tshogs pa dag gis 'god na'o zhes bya ba ni/ dge slong ji snyed cig gis de las skal ba mnod par bya ba de dag tshogs par ma gyur par rnyed pa 'god par byed na/ de'i tshe ma tshogs par 'god pa'i dge slong rnams la nyes byas su 'gyur ro/ /byin gyis ma brlabs par yang ngo zhes bya ba ni/ shi ba'i yo byad la sogs pa'i rnyed pa byin gyis ma brlabs par de 'god na yang nyes byas so/ /kun dbang ba'i rnyed pa dge 'dun las gcig gam gnyis sam gsum gyis len na'o zhes bya ba la/ kun dbang ba'i rnyed pa zhes bya ba ni/ dbyar gyi rnyed pa la sogs pa spyir dbang ba ste/ de dge 'dun las dge slong gcig gam gnyis sam gsum gyis len na nyes byas so/ /'di skad bstan te/ gal te dge 'dun spyir mnga' ba'i rnyed pa gang zag gcig gis len tam/ gnyis sam gsum gyis len par byed na len pa po de dag la nyes byas su 'gyur te/ gzhan yang dbang ba nyid yin pa'i phyir ro/ /gal te rnyed pa de len pa po de dag kyang dbang ba nyid yin na ci'i phyir nyes byas su 'gyur zhe na/ de'i phyir de la gzhan dag gi shas nyid ma bral lo zhes bya ba smras te/ gang dag gis rnyed pa blangs pa de las gzhan pa'i dge slong dag kyang rnyed pa de la spyir dbang ba yin pas de dag gi shas nyid ma bral bar de na yod pa'i phyir ro/ /'di skad bstan te/ 'di ltar rnyed pa blang ba 'di la gzhan dag gi shas nyid bral ba med pas de'i phyir rnyed pa len pa de dag la nyes byas su 'gyur ro/ /rku sems med pa la 'di rnam par gzhag pa yin gyi rku sems yod pa la kha na ma tho ba cir 'gyur zhe na/ de'i phyir rku sems kyis na brkus pa nyid yin no zhes bya ba smras te/ rku sems kyis sgyur bar byed na thams cad brkus pa nyid yin te/ gzhi ji lta bu las brkus pa'i kha na ma tho ba nyid du 'gyur bar shes par bya'o/ /'dir gzhung ni dge slong bram ze'i bu mos zhus pa las dge slong gang yang rung ba gcig pu zhig gnas na 'dug pa der mi dag gis dge 'dun gyi gos bgo bsha' bya ba mngon sum du gyur pa'i dge 'dun la gse bar bya ba zhig sbyin par byed na/ dge slong des gos de blang ba na 'di ltar gnas 'di na bdag gcig pu gnas te/ dge 'dun gyi gos bgo bsha' bya ba mngon sum du gyur pa'i dge 'dun la gse bar bya ba 'di byung na/ bdag gis gos gse bar bya ba 'di byi dor bya'o/ /sba brtul bya'o/ /byin gyis brlab par bya'o/ /gos byi dor byas pa sba brtul byas pa byin gyis brlabs pa 'di ni bdag gi yin no zhes sems bskyed par bya tshig tu brjod par bya'o/ /gal te de ltar mi byed na dge slong des gos de gcig pus bdag gir mi bya'o/ /bdag gir byas na nyes byas te/ de dag las dge slong gzhan yang spyir dbang ba yin no/ /dge 'dun la bsngos pa'i rnyed pa gcig gis mtshams kyi phyi rol du song ste bdag gir byed na nyes byas su 'gyur ro/ /'on te de dag rku sems kyis rku zhing bdag gir byed na ni 'gal tshabs can du 'gyur ro/ / gnyis dang rab tu mang po dag kyang de bzhin no zhes gsungs pa yin te/ rab tu mang po zhes smos pa ni gsum yan chad ces bya ba'i tha tshig go/ /gtsug lag khang du gnas par mi byed pa'i tshe der dbang ba'i rdzas gtsug lag khang gzhan du gzhag par bye zhing bsngo bar mi bya'o zhes gsungs pa de'i zhar la 'di brjod par bya ste/ gya tshom du gtsug lag khang dor bar mi bya'o zhes bya ba ni/ pha rol gyi dmag tshogs dang chom rkun la sogs pa'i gnod pa med par gya tshom du ma brtags par gtsug lag khang stong par dor bar mi bya'o/ /rjes su chags pa dang bcas pa der srung mar gzhag go zhes bya ba ni/ dge slong gang gtsug lag khang de la rjes su chags pa shas chen po yod pa'i rjes su chags pa dang bcas pa de gtsug lag khang bsrung ba'i ched du der srung ma gzhag par bya'o/ /ma lhags na lo bcu 'da' bar bya'o zhes bya ba ni/ dge 'dun ma lhags shing ma byon na dge slong gtsug lag khang der bzhag pa des gtsug lag khang de nyid du lo bcu 'da' bar bya ba'o/ /ji ltar 'da' bar bya zhe na/ de'i phyir lnga ni bsod snyoms kyis so zhes bya ba smras te/ dge slong des gtsug lag khang der lo lnga ni bsod snyoms kyis 'da' bar bya'o/ /der dus su sbyin bdag ma byung na lo gzhan lnga ni nye 'khor gyi gtsug lag khang dang lhan cig tu'o zhes bya ba ni/ gtsug lag khang der lo lnga po dag 'das pa'i dus su gal te sbyin bdag btson ra la sogs pa dag nas byung bar ma gyur na/ de'i tshe lo gzhan lnga po dag ni nye 'khor gyi gtsug lag khang dang 'tsho ba lhan cig thun mong du bya bas 'da' bar bya ba'o/ /'dir gzhung ni kha cig las lnga ni bsod nams kyis so/ /lnga ni nye 'khor gyi gtsug lag khang la brten pas te/ de ltar na lo bcur 'gyur ro zhes gsungs pa yin no/ /gso sbyong tha dad pa dang rnyed pa thun mong ba'i las bya'o zhes bya ba ni/ gtsug lag khang de dang nye 'khor gyi gtsug lag khang der rnyed pa ni thun mong la/ gso sbyong ni tha dad pa'i las bya ba ste/ dge 'dun btsun pa rnams gsan du gsol/ gtsug lag khang 'di'i gtsug lag khang gi bdag po bcom mam bcings sam gum mam spyugs na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis gtsug lag khang 'di dang pha bi lo lngar rnyed pa ni thun mong la gso sbyong ni tha dad pa mdzad do/ /'di ni gsol ba'o/ /dge 'dun btsun pa rnams gsan du gsol/ gtsug lag khang 'di'i gtsug lag khang gi bdag po bcom mam bcings sam gum mam/ spyugs te de'i slad du dge 'dun gyis gtsug lag khang 'di dang pha bi lo lngar rnyed pa ni thun mong la gso sbyong ni tha dad du mdzad kyi/ tshe dang ldan pa gang dag gtsug lag khang 'di dang pha bi lo lngar rnyed pa ni thun mong la gso sbyong ni tha dad du mdzad par bzod pa de dag ni cang ma gsung shig / gang dag mi bzod pa de ni gsungs shig /dge 'dun gyis bzod cing gnang nas dge 'dun gyis gtsug lag khang 'di dang pha bi lo lngar rnyed pa ni thun mong la/ gso sbyong ni tha dad du mdzad pa mdzad lags te/ 'di ltar cang mi gsung bas de de bzhin du 'dzin to zhes bya ba'i gsol ba dang gnyis kyi las kyis so/ /gal te srung ma yang 'gro na de'i tshe des ji zhig bya zhe na/ de'i phyir 'gro na dngos po rnams nye 'khor gyi gtsug lag khang dag tu gdams par bya'o zhes bya ba smras te/ dge slong gang la gtsug lag khang gtad pa'i dge slong de yang gal te gtsug lag khang de nas 'gro bar 'dod na de 'gro ba'i dus kyi tshe/ gtsug lag khang de'i mal stan dang snod la sogs pa dngos po rnams nye 'khor gyi gtsug lag khang dag tu gdams par bya ba'o/ /gnyug mar gnas na sbyin par bya'o zhes bya ba ni/ gtsug lag khang bor ba der dge slong dag lhags te/ gnyug mar gnas na nye 'khor gyi gtsug lag khang gzhan na gnas pa'i dge slong de dag gis mal stan dang snod la sogs pa'i dngos po de dag gtsug lag khang de nyid du phyir sbyin par bya ba'o/ /gnas gzhan gyi rdzas gzhan du mi sbyin no zhes bya ba ni/ dge 'dun du 'gyur ba'i dge slong de dag gis kyang gnas gzhan gyi rdzas mal stan dang snod la sogs pa dag gnas gzhan du mi sbyin pa'o/ /'di ni mdo 'og ma rnams kyi yul bstan par bya ba'i phyir/ 'og gi mdo las rnyed pa rnam par gzhag pa ni ji ltar nges par byas pa yin no zhes 'byung ba de rjes su bzlas pa yin no/ /mi ster na de dag gis sbyin par bya ba nyid yin no zhes bya ba ni/ gtsug lag khang gzhan du gdams pa'i rdzas de dag gtsug lag khang de'i nye 'khor na mi snang zhing phyir mi ster na dge slong gang dag gis rdzas de dag dang po gnas gzhan der gzhag pa'i dge slong de dag gis rma zhing phyir sbyin par bya ba nyid yin no/ /'di skad bstan te/ gal te gtsug lag khang gzhan na gnas pa'i dge slong la sogs pas rdzas gtams pa de dag brnogs shing phyir mi ster na de'i tshe dang po 'doms pa'i dge slong rnams kyis khungs su rma zhing phyir dgug par bya'o/ /'o na gang gi tshe gtsug lag khang gi bdag po de nyid kyis rang gis byas pa'i gtsug lag khang de nas rdzas dag gtsug lag khang gzhan du sbyin par byed na/ de'i tshe dge slong rnams kyis ji ltar bya zhe na/ de'i phyir khyim bdag de nyid yin yang nges pa la gzhig pa med do zhes bya ba smras te/ gtsug lag khang gi bdag po'i khyim bdag de gnas gzhan gyi sbyin bdag de nyid yin yang sngar byas pa'i nges pa la gzhig pa med do/ /'di skad bstan te/ 'di ltar khyim bdag de nyid gnas gzhan gyi sbyin bdag tu gyur cing des dngos po de dag gnas gzhan du phul zin kyang de lta mod kyi/ sngar rdzas de dag gtsug lag khang gang du phul zin pa de nyid du spyad par bya ba yin te/ dang po nyid nas gnas snga ma shos de nyid du byin zin pa'i phyir ro/ /mi ster na mthus gzung bar bya'o zhes bya ba ni/ khyim bdag des rdzas de dag sngar phul ba'i gtsug lag khang der mi ster na/ gtsug lag khang de na gnas pa'i dge slong rnams kyis mthus gzung bar bya'o/ /gal te rdzas de mi snang na ni de'i tshe mdo snga ma las mi ster na de dag gis sbyin par bya ba nyid yin no zhes smos pa'i rnam pa de lta bu'i yul yin no/ /'on te snang na ni mi ster na mthus gzung bar bya'o zhes bya ba'i mdo 'di nyid kyi yul yin no/ /g.yar po nyid du ni sbyin par bya'o zhes bya ba ni/ gnas gzhan gyi rdzas gnas gzhan du g.yar po nyid du ni sbyin par bya'o/ /mchod rten gzhan la bsngos pa'i rnyed pa ma grub pa la ni nyes pa med de/ byang chub chen po dang chos kyi 'khor lo dang / cho 'phrul chen po dang lha las babs pa rnams kyi de dag las gzhan pa la ni ma gtogs so zhes bya ba ni/ mchod rten gzhan gang la bsngos pa'i rnyed pa mchod rten de la dbul bar ma grub cing der khyer yang mi nus na mchod rten gzhan la bsgyur ba la ni nyes pa med do/ /ha cang thal bar 'gyur ba'i dmigs kyis bsal ba bstan pa'i phyir/ byang chub chen po dang chos kyi 'khor lo dang cho 'phrul chen po dang lha las babs pa rnams kyi rgyud du mnga' ba'i rnyed pa mchod rten chen po bzhi po de dag las gzhan pa'i mchod rten gzhan la sgyur bar byed pa ni ma gtogs so/ /de ni nyes par 'gyur ba kho na yin no/ /mchod rten chen po bzhi po de dag gi nang nas gcig la bsngos pa'i rnyed pa gzhan gsum po gang yang rung ba la bsgyur ba la ni nyes pa med do/ / 'di skad bstan te/ mchod rten chen po bzhi po de dag las gzhan pa'i mchod rten la bsngos pa'i dngos po gang yin pa ni gal te der bskur ba mi 'grub na dngos po de nyid mchod rten gzhan la bsgyur zhing spyad bar bya'o/ /mchod rten chen po bzhi po de dag la bsngos pa'i dngos po gang yin pa de ni/ de dag las gzhan pa'i mchod rten dag las bsgyur zhing spyad par mi bya ste/ gang la bsngos pa de nyid la dbul bar bya ba'am/ gal te gang la bsngos pa de nyid la dbul bar ma grub na bzhi po de dag nyid las gang nye bar gyur pa gcig la gzhan gsum la bsngos pa yang bsgyur cing spyad du rung ngo / /bsngos pa las bsgyur ba'i spang ba'o zhes bya ba de bshad zin to/ / //da ni sog 'jog gi spang ba smra bar 'dod nas de'i zhar la 'di brjod par bya ste/ zhag bdun par byin gyis brlabs pa'i nyi ma 'das so cog dge slong la brjod par bya'o zhes bya ba ni/ zhag bdun par byin gyis brlabs pa 'bru mar la sogs pa rdzas kyi nyi ma 'das shing thal lo cog dge slong la 'di skad ces deng phan chad du nyi ma dang po 'das te deng ni nyi ma gnyis pa lags so zhes bya ba la sogs pa brjod par bya ba'o/ /ji zhig byas na sog 'jog gi spang bar 'gyur zhe na/ de'i phyir bza' ba'i phyir 'chang na'o zhes bya ba smras te/ zhag bdun pa'i rdzas zhes bya bar sbyar ro/ /'chang ba la ltung ba 'di rnam par gzhag pa yin gyi/ za ba la ni ma yin te/ 'di ltar sog 'jog byas pa'i zas za ba la ltung ba 'ba' zhig tu 'gyur ba'i phyir ro/ /de ltar yang 'dir gzhung ni/ so sor thar pa'i mdo las/ yang dge slong gang bza' ba dang bca' ba sog 'jog byas pa 'chos sam zos na ltung byed do zhes gsungs pa yin no/ /zos zin pa'i don la spang bar bya ba med pas des na zos pa ni 'di'i yul ma yin no/ /'o na so sor thar pa'i mdo las/ de las 'das par yongs su longs spyad par byed na spang ba'i ltung byed do zhes gsungs so zhe na/ bden mod kyi 'on kyang 'chang ba de nye bar mtshon pa'i don du der za na zhes bya ba'i sgra smos pa yin te/ 'chang ba med par za ba mi srid pa'i phyir ro/ /ltung ba bstan par yang 'chang ba'i rgyu las kha na ma tho bar gsungs kyi za ba'i rgyu las ni ma yin te/ dge slong gis tshes la sman zhig rnyed cing des tshes gnyis la yang gzhan zhig rnyed na dge slong des nyi ma bdun po de nyid kyi nang du sman snga ma shos yongs su longs spyad par bya zhing phyi ma shos gtang bar bya ba'am/ gzhan la sbyin par bya'o/ /yang na phyi ma shos yongs su longs spyad par bya zhing snga ma shos gtang bar bya ba'am/ gzhan la sbyin par bya ba'o/ /yongs su spyod par mi byed dam gtong bar mi byed dam gzhan la sbyin par mi byed na/ nyi ma brgyad pa'i skya rengs shar na spang ba'i ltung byed do zhes gsungs pa'i phyir ro/ /ji zhig 'chang na zhe na/ de'i phyir de'o zhes bya ba smras te/ zhag bdun par byin gyis brlabs pa de'o/ /byin gyis ma brlabs pa ni zhag bdun las 'das par 'chang du zin kyang nyes pa med de/ rung ba'i phyir gser la sogs pa dang 'dra'o/ /nam gyi tshe spang bar 'gyur zhe na/ de'i phyir skya rengs brgyad pa shar na'o zhes bya ba smras te/ zhag bdun par byin gyis brlabs pa'i rdzas skya rengs brgyad pa shar bar 'chang na spang ba'i ltung byed du 'gyur ro/ /zhag bdun par byin gyis brlabs pa'i rdzas bza' ba'i phyir 'chang ba las kha na ma tho ba 'dir 'gyur ba 'ba' zhig tu yang ma zad de/ 'di ltar byin len ma byas pa dang / rung ba ma yin pa mi sha la sogs pa dang / rung ba ma yin pa dang 'dres pa dang / brtag pa gzhan dang 'dres pa 'chang ba la yang kha na ma tho ba 'dir 'gyur te/ 'di lta ste/ dper na dus su rung ba'i rdzas dang 'dres pa'i thun tshod du rung ba bzar mi rung bar gtogs pa'i nyi ma phyed yol phan chad du bza' ba'i phyir 'chang na 'dir gtogs pa'i kha na ma tho bar 'gyur ba lta bu dang / de bzhin du nang du btsos pa nyid la sogs pa'i skyon gyis rung ba ma yin pa nyid du gyur pa bza' ba'i 'chang ba dang / de bzhin du dus su rung ba dang / thun tshod du rung ba dang / 'tsho ba'i bar du bcang ba mi rung ba nyid du gyur pa dag bza' ba'i phyir 'chang ba la yang bye brag 'ga' yang med de/ de lta bas na 'dir zhag bdun pa zhes smos pa ni dpe tsam du zad par rig par bya'o/ /'o na 'dir ltung ba rnam par gzhag pa gang zhe na/ de'i phyir bza' bar bya ba rung ba ma yin pa nyin mtshan 'das pa ni 'dir zos pa dang 'dra bar rnam par gzhag go zhes bya ba smras te/ bza' bar bya ba rung ba ma yin pa nyin mtshan 'das pa ni zos pa dang 'dra'o zhes bya ba ni/ zos na kha na ma tho ba ci 'dra ba de bzhin du 'chang ba la yang de dang 'dra ba ste/ gal te zos na ltung byed du 'gyur ba ni 'chang na yang spang bar 'gyur ba dang / 'on te zos na nyes byas su 'gyur ba ni 'chang na yang nyes byas su 'gyur ba'o/ /'di skad bstan te/ dus su rung ba dang thun tshod du rung ba dang zhag bdun pa dang / 'tsho ba'i bar du bcang ba la sogs pa sog 'jog byas pa de dag thams cad ni ji ltar zos na ltung byed du 'gyur ba de bzhin du 'chang na yang spang ba'i ltung byed du 'gyur te/ nyin mtshan 'das pa ni spang ba'i ltung byed dang ltung byed 'ba' zhig dang 'dra ba'i phyir ro/ /nang du zhag lon pa dang / nang du btsos pa dang / byin len ma byas pa la sogs pa ni ji ltar zos na nyes byas su 'gyur ba bzhin du 'chang na yang nyes byas kho nar 'gyur ro zhes bya ba'i tha tshig go/ /de don gang gi phyir brtags pa de'i phyir ni ltung ba med do zhes bya ba la/ de zhes bya ba ni/ zhag bdun pa'i 'bru mar la sogs pa'o/ /don gang gi phyir zhes bya ba ni/ rkang pa bsku ba la sogs pa'i dgos pa'i phyir ro/ /brtag pa zhes bya ba ni/ rung bar byas pa de nyid de/ de'i phyir 'chang ba la ni ltung ba med do/ /blos yongs su ma bcad par 'chang ba la yang kha na ma tho ba 'dra ste/ bye brag ni spyi'i khongs su gtogs pa'i phyir/ bza' ba'i phyir yang de'i khongs su gtogs pa yin no/ /de lta bas na bag med pa dang dran pa nyams pas 'chang ba ni bza' ba'i phyir yid kyis ma bsdus pa'i phyir kha na ma tho ba 'dra'o/ /snar blugs pa dang bsku mnye bya ba dag ni sog 'jog byas kyang rung ngo zhes bya ba ni/ snar blugs pa dang lus kyi bsku mnye bya ba'i 'bru mar la sogs pa dag ni sog 'jog byar rung ba'o/ /sog 'jog gi spang ba'o zhes bya ba de bshad zin to/ /spang ba rnams rdzogs so zhes bya ba spang ba'i ltung byed sum cu po dag bshad zin to// //spang ba'i ltung byed rnams kyi 'og tu ltung byed 'ba' zhig tu 'gyur ba rnams brjod par bya ste/ spang bar bya ba'i dngos po med pa'i phyir des na 'ba' zhig ces bya ba'i ming 'thob ste/ de dag ni grangs dgu bcur chad pa yin no/ /so sor thar pa'i mdo las brdzun du smra ba'i ltung byed dang po kho nar gsungs pa la 'dul ba las brdzun du smra ba ni rnam pa lnga gsungs te/ pham par 'gyur ba dang / dge 'dun lhag mar 'gyur ba dang / nyes pa sbom por 'gyur ba dang / nyes byas su 'gyur ba dang / ltung byed du 'gyur ba'o/ /de la pham par 'gyur ba dang / dge 'dun lhag mar 'gyur ba'i brdzun du smra ba gnyis kyi mtshan nyid ni de dag nyid kyi skabs su bshad zin to// // da ni gsum po dag gi mtshan nyid brjod par bya ste/ de la nyes pa sbom por 'gyur ba dang / nyes byas su 'gyur ba'i brdzun du smra ba gnyis kyi mtshan nyid ni brdzun du smra ba'i skabs yin pa'i phyir dang / brjod par bya ba nyung ba'i phyir 'dir dang por brjod par bya ste/ dge 'dun 'dus pa la shes bzhin du chos ma yin pa chos su dang chos chos ma yin par ston pa ni nyes pa sbom po'o zhes bya ba la/ dge 'dun 'dus pa la zhes bya ba ni/ dge 'dun gyi spyan sngar dge 'dun gyi dbyen gyi sbyor bas dbye bar rung gi gzhan du ma yin pas/ de'i phyir dge 'dun 'dus pa la dge 'dun dbye ba'i phyir/ chos ma yin pa chos su ston pa la sogs pa'i brdzun smras pa ni nyes pa sbom por 'gyur ba yin gyi/ gzhan du brdzun smras pa ni ltung byed 'ba' zhig tu 'gyur ba kho na yin no/ /shes bzhin du zhes bya ba ni/ chos dang chos ma yin pa gnyis kyi rang gi ngo bo shes bzhin du log par ston pas/ de'i phyir de ni nyes pa sbom po yin par gzhag go/ /chos ma yin pa zhes bya ba ni/ rigs pa ma yin pa bya ba ma yin pa'o/ /chos su ston pa zhes bya ba ni/ chos nyid dang bya ba nyid du ston pa'o/ /chos dang chos ma yin par ston pa zhes bya ba yang de las bzlog pa'i tshul gyis de bzhin du sbyar te/ de ni nyes pa sbom po'o/ /'di skad bstan te/ gang la la zhig dge 'dun gyi dbus su bcom ldan 'das kyis gsungs pa'i bya ba ma yin pa ni bya ba nyid du ston par byed/ bya ba ni bya ba ma yin pa nyid du ston par byed na/ de'i tshe de la nyes pa sbom po zhes bya ba'i ltung bar 'gyur ro/ /nyes byas su 'gyur ba'i brdzun du smra ba'i mtshan nyid brjod par 'dod nas/ gso sbyong la ci 'di la khyed yongs su dag gam zhes lan gsum gyi bar du dris pa las ma dag par shes bzhin du cang mi smra bas 'da' bar byed na nyes byas so zhes bya ba smras te/ gso sbyong la zhes bya ba ni/ dge 'dun gso sbyong mdzad pa'i nang du'o/ /ci zhes bya ba ni yongs su dri ba'o/ /'di la zhes bya ba ni/ gso sbyong la'o/ /khyed ces bya ba ni/ khyed cag go/ /yongs su dag gam zhes bya ba ni/ ltung ba ma byung ngam zhes bya ba'o/ /zhes zhes bya ba ni dri ba spyi la snyegs so/ /lan gsum gyi bar du dris pa las zhes bya ba ni/ lan gsum kho na dri bar bya dgos pa lan gsum pa rdzogs kyi bar du dris pa las so/ /'di skad bstan te/ dge 'dun gso sbyong la tshogs pa na so sor thar pa'i mdo gdon pas dge 'dun la lan gsum kho nar 'di skad ces ci 'di la khyed yongs su dag gam zhes dri bar bya ste/ bshags pa dang byin gyis brlabs pa gnyis kyis ltung ba ma bcabs pa sha stag tshogs pa yin nam zhes bya ba'i tha tshig go/ /so sor thar pa'i mdo gdon pas de skad dris pa na gang la la zhig ma dag par shes bzhin du cang mi smra bas bdag nyid yongs su dag par ston cing dri ba gsum pa'i dus 'da' bar byed na de la nyes byas kyi ltung ba 'di 'byung bar 'gyur te/ de ni nyes byas yongs su rdzogs pa yin gyi yid kyis ni ma yin te/ kha rnam par 'gyur ba la sogs pa'i rnam par rig byed de la yod pa'i phyir ro/ /da ni ltung byed du gyur pa'i brdzun du smra ba'i mtshan nyid smra bar 'dod nas/ de gnyis dang pham par 'gyur ba dang dge 'dun lhag mar gyur pa gnyis las gzhan pa'i brdzun du smra ba'o zhes bya ba smras te/ de gnyis dang zhes bya ba ni/ bstan ma thag pa'i nyes pa sbom por 'gyur ba dang / nyes byas su 'gyur ba'i brdzun du smra ba gnyis so/ /pham par 'gyur ba dang dge 'dun lhag mar gyur pa gnyis las zhes bya ba ni/ de gnyis sngar bstan pa las te/ brdzun du smra ba rnam pa bzhi po de dag las gzhan pa'i brdzun du smra ba 'du shes bsgyur ba ni/ ltung byed du gyur pa'i brdzun du smra ba zhes bya ste/ de las ltung ba 'dir 'gyur ro/ /'di skad bstan te/ brdzun du smra ba bstan ma thag pa gnyis dang / sngar bstan pa gnyis te/ rnam pa bzhi po de dag las gzhan pa'i brdzun du smra ba don shes pa'i yul la 'du shes gzhan du bsgyur ba las ltung byed 'di rnam par gzhag ste/ brdzun du smra ba ni 'du shes kyi dbang gis rnam par gzhag pa yin gyi/ dngos po'i dbang gis ni ma yin no/ /smra bar 'dod pa la 'du shes gzhan 'byung ba brdzun du smra ba yin pa de la ni the tshom med kyi smra ba'i tshe na 'du shes gzhan 'byung ba ni brdzun du smra bar mi 'gyur te/ dang po'i 'du shes nyid kyis kun nas bslang ba yin pa'i phyir ro snyam du dogs pa bsal ba'i phyir/ smra ba'i tshe nyid na yang 'du shes byung na de kun nas slong ba yin no zhes bya ba smras te/ smra bar byed pa de ni smra ba'i tshe ste/ smra ba'i tshe de'i don gang yin pa'i don de la 'du shes gzhan byung na brdzun du smra ba de kun nas slong ba yin no/ /'di skad bstan te/ tshig brjod pa'i gnas skabs na yang 'di lta bu'i 'du shes 'byung ste/ don gang smra ba de gzhan du rnam par gnas la bdag gis ni gzhan du smra bar bya'o snyam na de la yang brdzun du smra bar 'gyur ba kho na yin no/ /yang zhes bya ba'i sgra las ni dang po kho na rnam par dpyod pa'i gnas skabs na 'du shes gzhan du 'byung ba lta smos kyang ci dgos zhes bstan pa yin no/ /'dir gzhung ni/ brdzun du smra ba rnam pa gnyis gang zhe na/ shes bzhin du brdzun gyi tshig smra ba ni 'di snyam du brdzun gyi tshig smra'o snyam pa dang / de nas smras pa'i 'og tu 'di snyam du bdag gis brdzun gyi tshig smras so snyam pa ste/ de'i phyir brdzun du smra ba rnam pa gcig ni med do zhes gsungs pa yin no/ /lan 'ga' ni sbyor ba dang bcas pa'i dngos gzhi yin la/ lan 'ga' ni dngos gzhi mjug dang bcas pa yin no/ /brdzun du smra ba mjug nyi tshe la ni med de tshig thal zin pa'i phyir ro/ /mna' 'dor bar mi bya'o zhes bya ba ni/ phran tshegs dag las btus pa yin te/ drug sde dag sangs rgyas kyis mna' 'dor bar byed pa'i gleng gzhi las/ bcom ldan 'das kyis bka' stsal pa/ de lta bas na/ dge slong gis mna' 'dor bar mi bya'o zhes gsungs pa yin no/ /'di ltar mna' 'dor bar byed pa las ni 'di ltar bsgrags par 'gyur te/ kho bo don thams cad la bden pas zhugs pa ma yin te/ gang la mna' 'dor ba de la mna'i dbang gis kho bo bden par zhugs pa yin no zhes bsgrags pa'i skyon du 'gyur bas de'i phyir dge slong gis mna' 'dor bar mi bya'o/ /brdzun du smra ba'i ltung byed do zhes bya ba de bshad zin to// //skyon nas smra ba'i ltung byed smra bar 'dod nas dge slong gi'o zhes bya ba smras te/ mdo 'di dang 'og gi mdo las rung ba ma yin par bsam pa gang yang rung ba smras na'o zhes 'byung ba dang sbyar bar bya'o/ /'di skad bstan te/ rung ba ma yin par bsam pa gang yang rung ba smras na skyon nas smra ba'i ltung byed do/ /de nyid dge slong gi yul kho na la yin par rig par bya ste/ dge slong gis dge slong la smra na kha na ma tho ba 'dir 'gyur gyi/ dge tshul la sogs pa gzhan la ni ma yin te/ de la ni nyes byas su gsungs pa'i phyir ro/ /'og ma la yang ngo zhes bya ba ni/ bslab pa'i gzhi 'di'i 'og ma dge slong la phra ma byed pa zhes bya ba la yang dge slong kho na la smras na ste/ de la yang dge slong gi yul kho na la kha na ma tho bar 'gyur ba yin gyi/ dge tshul la sogs pa gzhan dag la ni nyes byas kho na'o/ /de lta bas na skyon nas smra ba dang / dge slong la phra ma byed pa zhes bya ba'i bslab pa'i gzhi gnyi ga yang dge slong gi yul kho na la rig par bya'o/ /phra ma la sogs pa med par tshig kyal pa 'ba' zhig smra ba la ni nyes byas kho na'o/ /sems yongs su dag pas kyang rung ba ma yin par bsam pa gang yang rung ba smra ba srid pas de las bye brag tu bya ba'i phyir/ skyon nyid brjod par 'dod pas so zhes bya ba smras te/ 'di'i skyon nyid brjod par bya'o snyam pa'i bsam pas dge slong gi skyon nas smras na kha na ma tho ba 'dir 'gyur ro/ /tshig ji lta bus she na/ de'i phyir 'jam pos kyang rung rtsub mos kyang rung ngo zhes bya ba smras te/ tshig 'jam pos kyang rung tshig rtsub mos kyang rung ste/ dge slong gi skyon nyid brjod par 'dod pas/ rung ba ma yin par bsam pas brjod na kha na ma tho ba 'dir 'gyur ro/ /gang gi phyir skyon nas smra ba dang bcas pa'i tshig rtsub po smras na/ dngos gzhir 'gyur ba de'i phyir tshig rtsub po smra ba yang bslab pa'i gzhi 'di nyid kyi khongs su 'dus pa yin no/ /rung ba ma yin par bsam pa gang yang rung bas smra na'o zhes bya ba ni/ rung ba ma yin par bsam pa zhes bya ba dman par bsam pa gang yang rung ba zhes bya ba lus kyi 'am sems kyi gang yang rung ba smras na/ skyon nas smra ba'i ltung byed du 'gyur te/ 'di lta ste dper na/ khyod ni mdze can no zhe 'am/ zhar ba'o zhes bya ba lta bu dang / khyod ni khro ba'o zhe 'am/ 'khrug pa can no zhes bya ba la sogs pa lta bu'o/ /mi dga' ba nyid du ma gyur na yang ngo zhes bya ba la/ mi dga' ba nyid ces bya ba ni/ khros pa dang / 'khrugs pa dang / yi chad pa dang / skyes pa dang / yul yul por gyur pa zhes bya ba dag dang don gcig go/ /ma gyur na zhes bya ba ni/ nyan pa po mi dga' ba nyid de dag tu ma gyur na'o/ /yang ngo zhes bya ba ni/ 'on kyang skyon nas smra ba'i kha na ma tho ba nyid du 'gyur ba'o/ /de ltar yang 'dir gzhung ni/ dge slong mi dga' ba nyid du gyur kyang rung ma gyur kyang rung zhes gsungs pa yin no/ /gzhan rgyal rigs nyid dang bram ze nyid la sogs pa ni nyes byas so zhes bya ba la/ gzhan zhes bya ba ni/ rung ba ma yin par bsam pa las gzhan pa ste/ dge slong la rgyal rigs nyid dang / bram ze nyid la sogs pa'i skyes bu'i tshig smras na nyes byas so/ /dge 'dun la sogs pa la smras na ni nyes byas phra mor 'gyur ro/ /skyon nas smra ba'i ltung byed do zhes bya ba de bshad zin to// //phra ma byed pa'i ltung byed smra bar 'dod nas/ phra ma byed 'dod pas che ge mo zhig zer ro zhes smras na'o zhes bya ba smras te/ phra ma byed 'dod pas zhes bya ba ni/ gzhan dbye ba'i bsam pa ste/ dge slong che ge mo zhig 'di skad ces zer ro zhes dge slong gzhan la smras na dngos gzhi'o/ /'dir skyon nyid kyang yan lag ma yin la/ rung ba ma yin par bsam pa nyid kyang yan lag ma yin te/ dbye ba'i bsam pa byed pa po nyid yin pa'i phyir ro/ /ci spyis sam zhe na/ de'i phyir gal te ming nas so zhes bya ba smras te/ dge slong ming 'di zhes bya ba 'di skad ces zer ro zhes gal te phyir smra ba de'i ming nas smos par byed na'o/ /de yang dge slong de nyid yin na'o zhes bya ba ni/ gang gi ming nas smos par byed pa de gal te dge slong nyid yin na'o/ /yang zhes bya ba'i sgras ni gang la bslab par bya ba de yang gal te dge slong nyid yin na'o zhes bya ba bsdu'o/ /'di skad bstan te/ dbye bar bya ba gnyi ga dge slong yin na kha na ma tho ba 'dir 'gyur ro/ /'byed par byed pa ni dge slong nyid yin par ma smos kyang grub ba kho na yin te/ dge slong kho na la ltung byed srid pa'i phyir ro/ /de ltar na gal te dbye bar bya ba gnyis dge slong nyid ma yin na ni de'i tshe 'byed par byed pa nyes byas so/ /gzhan du na nyes byas so zhes bya ba ni/ gal te sngar bstan pa'i mtshan nyid rnam par gzhag pa las yan lag gcig gis nyung bar gyur na yang nyes byas te/ dper na rgyal rigs sam bram ze 'am/ 'od srungs kyi rigs shig 'di skad zer ro zhes smras pa lta bu'o/ /phra ma byed pa'i ltung byed do zhes bya ba de bshad zin to// //skyo sngogs byed pa'i ltung byed smra bar 'dod nas/ 'du shes gtso bo zhes bya ba smras te/ 'du shes gtso cher byed pa po nyid do zhes bya bas ming dang ming can go bar byed do/ /ming gi yul bstan pa'i phyir/ dge slong gnyis kyi rtsod pa nyid dge 'dun gyis legs par zhi bar bya ba nyid la'o zhes bya ba smras te/ dge slong gnyis 'thab pa'i phyir rtsod par gyur pa'i rtsod pa de nyid dge 'dun gyis legs par zhi bar byas pa nyid la ste/ yul rnam pa de lta bu la 'du shes pa ni yongs su shes pa gang yin pa ste/ 'du shes de ni gtso cher ltung ba 'di'i byed pa po yin no/ /'dir gzhung ni/ 'thab pa'i phyir rtsod pa la 'thab pa'i phyir rtsod par 'du shes na zhes gsungs pa yin no/ /'dir rgol ba dang phyir rgol ba gnyi ga dge slong nyid yin na skyo sngogs byed pa'i dngos gzhi'o/ /gcig gam gnyi ga dge slong ma la sogs pa nyid yin na ni nyes byas so/ /'dir gzhung ni zhu ba las btsun pa dge slong gis dge slong ma dang rtsod pa las skyo sngogs bgyid na ltung ba cir 'gyur/ nye ba 'khor nyes byas su 'gyur ro/ /dge slong ma dang / dge slong ma dang / dge tshul ma dang rtsod pa la yang de bzhin no zhes bya ba la sogs pa gsungs pa yin no/ /ji zhig byas na kha na ma tho ba 'dir 'gyur zhe na/ de'i phyir skyo sngogs so zhes bya ba smras te/ skyo sngogs byed pa zhes bya ba ni/ 'khrug long byed pa ste/ legs par byas pa nyid ma yin zhing chos kyis nye bar zhi bar byas pa nyid ma yin no zhes skyo sngogs byed pa'o/ /de'i phyir yang las kyi skyo sngogs byed na zhes gsungs te/ yang bya ba nyid kyis zhes bya ba'i tha tshig go/ /'du shes gtso cher byed pa po nyid do zhes bya ba smras na/ gang dag la 'du shes de kha na ma tho ba ji lta bu'i byed pa po nyid yin zhe na/ de'i phyir gnyug mar gnas pa dang las byed pa dang 'dun pa 'bul ba dag kho na la dngos gzhi'o zhes bya ba smras te/ 'du shes gang yin pa de dngos gzhi'i byed pa po nyid yin no zhes bya bar sbyar ro/ /gnyug mar gnas pa zhes bya ba ni/ gang gis rtsod pa de'i thog ma dang / dbus dang / tha ma dag shes pa'o/ /las byed pa zhes bya ba ni/ gang gis rtsod pa de nye bar zhi bar bya ba'i phyir las byas pa'o/ /dad pa 'bul ba zhes bya ba ni/ gang gis las de bya ba'i phyir dad pa phul bar gyur pa'o/ /de'i phyir btub par gyur nas phyis skyo sngogs byed na zhes gsungs te/ sngar rjes su gnang ba byin nas phyis skyo sngogs byed na zhes bya ba'i tha tshig go/ /lta ba smra ba dang glo bur du 'ongs pa dag la ni nyes byas kho na'o zhes bya ba ni/ lta ba smra ba dang / glo bur du 'ongs pa dag la 'du shes gang yin pa de ni nyes byas kho na'i byed pa po nyid yin te/ lta ba smra ba nyid yin pas rnal du ma phebs pa'i phyir dang / glo bur du 'ongs pa nyid yin pas rgyus mi shes pa'i phyir ro/ /rtsod pa gzhan nyid la rtsod pa gzhan du 'du shes pa ni de dang 'dra ba nyid yin no zhes bya ba ni/ 'thab pa'i phyir rtsod pa la ltung ba 'dir rtsod pa nyid du 'du shes pa la ni na smad pa med de de dang 'dra ba nyid do/ /de yang 'thab pa'i phyir rtsod pa nyid dang 'dra ba nyid de/ dngos gzhi'i kha na ma tho ba nyid du 'gyur ro zhes bya ba'i tha tshig go/ /'dir rtsod pa tsam nyid tshad ma yin gyi/ rtsod pa'i bye brag ni tshad ma ma yin no/ /las kyi 'bras bu la gnas pa la de ma yin pa nyid kyis kun du spyod pa la ni phyed nyid do zhes bya ba la/ las kyi 'bras bu zhes bya ba ni/ gsol ba la sogs pa'i rang bzhin gyi las kyi 'bras bur brjod pa bslab pa byin pa nyid la sogs pa gang yin pa'o/ /'bras bu de la gnas pa la zhes bya ba ni/ 'bras bu de thob cing 'bras bu de la rnam par gnas pa la'o/ /de ma yin pa nyid kyis zhes bya ba ni/ de la gnas pa ma yin pa nyid kyis so/ /kun du spyod pa zhes bya ba ni skyo sngogs byed pa'o/ /phyed nyid do zhes bya ba ni/ de la nyes byas nyid du 'gyur ba'o/ /'dir gzhung ni/ zhu ba las btsun pa dge slong gis bslab pa la 'di skad ces khyod bslab pa byin pa ma yin no/ / zhes bgyis na ltung ba cir 'gyur/ nye ba 'khor nyes byas su 'gyur ro zhes gsungs pa yin no/ /skyo sngogs byed pa'i ltung byed do zhes bya ba de bshad zin to// //ston pa'i ltung byed smra bar 'dod nas/ sngar de dang 'brel bar bstan pa dag ji dran par bya ste/ 'di la byed pa po nyid ni bud med do/ /khyim pa mo la ston pa la'o/ /skyes pa med par ro/ /rig pa'o zhes sngar bstan pa dag dran par byas nas 'dir lhag ma rnams brjod par bya ste/ gang la byed pa po nyid bud med yin zhe na/ de'i phyir ston pa la'o zhes bya ba smras so/ /ji zhig ston pa la zhe na/ de'i phyir chos so zhes bya ba smras te/ /de bzhin gshegs pas gsungs pa'i chos ston pa la yin gyi/ lam 'dri ba la sogs pa la lam rgyus la sogs pa ston pa la ni ma yin no/ /ston pa'i tshig bstan pa'i phyir/ tshig drug las lhag par ro zhes bya ba smras te/ ston pa la'o zhes bya bar sbyar ro/ /'di skad bstan te/ gal te tshig drug pa las lhag par chos ston na/ de'i tshe dngos gzhi'i kha na ma tho bar 'gyur ro/ /gang zag ji lta bu la zhe na/ de'i phyir lhag pa nyid dang shes pa la'o zhes bya ba smras te/ gal te tshig drug pa las lhag pa nyid du shes na de'i tshe/ shes pa de la kha na ma tho ba 'dir 'gyur ro/ /shes pa zhes smos pas ni/ 'du shes gtso cher byed pa po nyid do zhes bya ba ni/ rnam pa de nyid 'di la yang yod par ston to/ /'di skad bstan te/ tshig drug pa las lhag pa nyid kyang yin la/ lhag pa nyid du 'du shes pa yang yod na dngos gzhi'o/ /ma lhag pa nyid la lhag par 'du shes shing ston na nyes byas so/ /yid gnyis za na ni yid gnyis ni 'du shes dang 'dra'o zhes bya bas ltung ba rnam par gzhag par rig par bya'o/ /tshig lnga pa ni rtsom pa lnga pa las so zhes bya ba la/ ston pa gang la tshig lnga yod pa de ni tshig lnga pa'o/ /de rtsom pa ni brtsam pa ste/ tshig lnga pa las lhag par ston na dngos gzhi'o/ /tshig gcig pa la sogs pa gzhan thams cad kyi rtsom pa la ni tshig drug pa las lhag par ston na dngos gzhi'o/ /'dir tshig ces bya ba ni/ smra bar 'dod pa'i don gcig go bar byed pa'i tshig la bya ste/ dper na smra bar 'dod pa'i dbang gis gzugs mi rtag pa bye brag dang bcas pa ni tshig gcig ces bya ba lta bu'o/ /gzugs tsam rjes su bshad pa smra bar 'dod pa la phung po ni lnga ste/ gzugs dang tshor ba dang 'du shes dang / 'du byed dang rnam par shes pa'o zhes bya ba dag ni tha dad pa nyid do/ /mdor bstan pa la ni rgyas par bshad pa gtso bo yin pa'i phyir ro/ /mdor bstan pa de rgyas par bshad pa las tha mi dad de/ dper na phung po ni lnga ste zhes bya ba de rgyas par bshad pa las tha mi dad pa lta bu'o/ /mkhas pas gong nas gong du dris pa gtan la dbab pa byas pa dang / slob gnyer gsod pa dang / kha don zhu ba dang / dmigs kyis 'dri ba dang / dus khrims dbog pa dang / yon bshad pa dag ni ma yin no zhes bya ba ni/ tshig drug pa las lhag na zhes bya ba spyir gtang ba de dmigs kyis bsal ba yin te/ mkhas pas gong nas gong du dris pa gtan la dbab par byas pa ni lhag par ston pa'i byed pa po nyid ma yin no/ /de bzhin du slob gnyer gsod pa dang / kha ton zhu ba dang / dmigs kyis 'dri ba dang / dus khrims dbog pa dang / yon bshad pa dag kyang lhag par ston pa'i byed pa po nyid ma yin te/ de la ltung ba med do/ /kha ton zhu ba smos pas klog pa yang bsdus pa yin te/ btsun mo phreng ldan ma dang dbyar tshul ma gnyis kyi klog pa'i phyir 'phags pa shA ri'i bu dang / 'char ka gnyis kyis bcom ldan 'das la ci klag lags so zhes zhus pa dang / bcom ldan 'das kyis lhogs shig ces gsungs pa yin no/ /dus khrims dbog pa dang / yon bshad pa gnyis kyi gzhung ni/ zhu ba'i gzhung las yon bshad pa la ltung ba med do/ /bsnyen gnas yan lag brgyad dang ldan pa dbog pa la ltung ba med do zhes gsungs pa yin no/ /gnas gzhan du ni snga ma ma byas pa nyid do zhes bya ba ni/ khyams la sogs pa gnas gzhan du bstan pa byas pa ni snga ma gnas khang la sogs par byas pa dang / lhan cig ma byas pa nyid de/ de la ltung ba rnam par gzhag par mi bya'o/ /ston pa'i ltung byed do zhes bya ba de bshad zin to// //'don pa'i ltung byed smra bar 'dod nas rdzogs par ma bsnyen pa dang cig car ram mjug thogs su ston byed du gyur pa'i chos dang yi ge yang 'don na'o zhes bya ba smras te/ dge slong gis rdzogs par ma bsnyen pa dang / cig car zhes bya ba ni dus gcig tu'o/ /mjug thogs su zhes bya ba ni/ rdzogs par ma bsnyen pas bton pa'i mjug thogs su 'don pa'o/ /ston byed ces bya ba ni/ 'dir mdo sde la sogs pa lung yin par bsams te/ 'di ltar lung gi don nyan pa po'i rgyud dag la ston par byed pa gsal bar byed pas na de'i phyir lung ni ston byed ces bya'o/ /der gyur pa zhes bya ba ni der gtogs pa ste/ lung du gtogs pa zhes bya ba'i tha tshig go/ /chos dang yi ge yang 'don na'o zhes bya ba ni/ lung du gtogs pa drang srong gis gsungs pa'i chos dang / yi ge rdzogs par ma bsnyen pa dang / cir car ram mjug thogs su 'don na/ 'don pa'i ltung byed du 'gyur ro zhes bya ba'i tha tshig go/ /'o na chos zhes smos pa nyid kyis ston byed kyang thob pa yin na ston byed dang chos zhes bya ba'i tshig gnyi ga ci'i phyir smos she na/ 'di ltar mu stegs can gyi bstan bcos la yang ston byed ces bya ba'i tshig de yod pas de bsal ba'i phyir chos zhes bya ba smos te/'di ltar lung las btus pa'i tshig gzhan du sbyar ba yang chos zhes bya ba nyid yin te/ dper na chos thams cad bdag med do/ /'dus byas thams cad skad cig ma'o zhes bya ba la sogs pa lta bu dang / de bzhin du lung gi don las btus shing lung gi yi ge med pa ming dang tshig dang yi ge gzhan gyi bye brag dang ldan pa yang chos zhes bya ba nyid yin mod kyi de dag ni ston byed du 'gyur ba nyid ma yin te/ dper na slob dpon dpa' bos byas pa'i skyes pa'i rabs kyi rgyud la sogs pa dag lta bu'o/ /de'i phyir lung nyid du gnas pa'i lung nyid yin par bstan pa'i phyir tshig gnyi ga smos so/ /chos zhes bya ba ni sangs rgyas kyis gsungs pa'am/ de'i nyan thos kyis bshad pa ming dang tshig gi bdag nyid do/ /ming zhes bya ba ni/ sangs rgyas chos dge 'dun zhes bya ba la sogs pa lta bu'o/ /tshig ces bya ba ni/ dper na/ bsod nams dag gi rnam smin bde/ /zhes bya ba la sogs pa lta bu smra bar 'dod pa'i don shes par byed pa'o/ /yi ge yang zhes bya ba ni yig 'bru tsam yang ngo / /de ltar yang 'dir gzhung ni/ tshig ma nyam pas chos 'don na ltung byed du 'gyur ro/ /tshig snga bas chos 'don na ltung byed du 'gyur ro/ /yi ge mnyam pas chos 'don na ltung byed du 'gyur ro/ /yi ge snga bas tshig 'don na ltung byed du 'gyur ro zhes gsungs pa yin no/ /de lta bas na yi ge dang ming dang tshig las lhag pa'i tshig rjod par byed pa de yang 'di'i khongs su 'dus so/ /'don pa zhes bya ba ni/ klag pa'i phyir brjod pa yin par bsams te/ kha don zhu ba la sogs pa dag la ltung ba med do zhes gsungs pa'i phyir ro/ /mi 'dod bzhin du grub pa ni ma gtogs so zhes bya ba ni/ cig car 'don par mi 'dod bzhin du g.yam la grub pa ni ma gtogs so/ /'di skad bstan te/ gal te cig car 'don par mi 'dod bzhin du brtad par smra ba nyid yin pa'i phyir/ cig car brjod par gyur na de la ni ltung ba med do/ /de ltar yang 'dir gzhung ni/ ldab ldib can brtad par smra bar gyur na ltung ba med do zhes gsungs pa yin no/ /rjes su nyan du gzhug par bya ba 'don pa yang ngo zhes bya ba ni ma gtogs so zhes bya bar sbyar ro/ /rjes su nyan du gzhug par bya ba zhes bya ba ni/ 'don par byed pa'i dge slong gis gzhan gang rjes su nyan du gzhug par bya ba ste/ khyod kyis kho bo dang lhan cig tu cig car ram sngar brjod par mi bya'o zhes bsgo ba las gal te de ltar bya'o zhes zer bzhin du 'on kyang cig car 'don par byed na de lta na yang ltung ba med do/ /kha ton zhu ba dang slob gnyer gsod pa dang / dmigs kyis 'dri ba yang ngo zhes bya ba yang ma gtogs so zhes bya bar sbyar ro/ /kha ton zhu ba zhes bya ba ni/ sngar bton pa mi brjed par bya ba'i phyir sbyor ba'o/ /slob gnyer gsod pa zhes bya ba ni/ bton pa 'don du 'jug pa'i mdun du phyir zlos shing ston pa'o/ /dmigs kyis 'dri ba zhes bya ba ni/ skabs skabs su brjod pa'am the tshom za ba dran par bya ba'i phyir ram/ the tshom bcad pa'i phyir gzhan las gsal bar byed pa'o/ /ci'i phyir gnas skabs de dag la ltung bar mi 'gyur zhe na/ 'di ltar dang po len pa dang 'don pa'i dus na rang dbang du brjod pa gang yin pa ni 'don du 'jug pa de dang chos la yang ma gus pas bsam pa rgud par gnas pa yin pas de'i gnas skabs la ltung ba 'di rnam par gzhag ste/ lung dbog pa la mi ltos pa'i phyir ro/ /'dir gzhung ni zhu ba kha cig las dge slong gis dge slong ma dang tshig re re nas chos 'don na ltung ba cir 'gyur nyes byas so/ /dge slong mas dge slong dang yang de bzhin no zhes gsungs pa yin no/ /gal te dge slong gis rdzogs par ma bsnyen pa las lung nod par byed na/ rdzogs par ma bsnyen pa dang cig car ram mjug thogs su ston byed du gyur pa'i chos dang yi ge 'don na de la ni/ gnyi ga la yang nyes byas su 'gyur ro/ /'don pa'i ltung byed do zhes bya ba de bshad zin to// //bam po nyi shu rtsa gsum pa/ gnas ngan len brjod pa'i ltung byed smra bar 'dod nas dngos po kho nar de dang 'brel pa cung zhig brjod par bya ste/ dge slong dang dge slong ma sdig can dag khyim du so sor go bar byed pa bsko bar bya'o zhes bya ba ni/ dge 'dun du gyur pa'i dge slong gis khyim du so sor go bar byed pa bsko bar bya'o zhes bya bar sbyar ro/ /gang dag khyim du so sor go bar byed pa zhe na/ dge slong dang dge slong ma sdig can dag ste/ sdig can zhes bya ba ni tshul khrims 'chal ba'o/ /dge slong khyim du so sor go bar byed pas khyim rnams su song nas ji skad brjod par bya zhe na/ de'i phyir khyim pa rnams su so sor go bar byed pas tshe dang ldan pa dag khyod nyon cig /khyim rnams su khyim sun par byed pa dang / gnas rnams su gnas sun par byed pa 'di lta ste/ dper na 'bras sA lu'i zhing phun sum tshogs pa la ser ba 'khor lo mi bzad pa bab na 'di ltar 'bras sA lu de nyid shin te ma dang chud za ba dang / tshul ma yin pas ma rung bar 'gyur ba dang / bur ma shing gi zhing phun sum tshogs pa la nad kyi rigs dmar po zhes bya ba byung na 'di ltar bu ram shing de nyid shin te ma dang / chud za ba dang / tshul ma yin pas ma rung bar 'gyur ba lta bu dag yod kyi/ tshe dang ldan pa khyed cag dge slong 'di dang dge slong ma 'dis bstan pa'i tshod ma 'dzin cig /'di ltar dge slong 'di dang dge slong ma 'di ni yos tshig pa bzhin du chos 'dul ba 'di la skyer mi rung ba'i chos can yin gyis bcom ldan 'das dang dge slong gnas brtan gnas brtan rnams la ltos shig ces smra bar bya'o zhes bya ba smras te/ ser ba 'khor lo mi bzad pa zhes bya ba ni/ 'khor lo ltar mi bzad pa ste/ shin tu mthu cher 'bab cing 'bab pa bzod par dka' ba yin no/ / ser ba'i bye brag ni gnam lcags la sogs pa 'bab pa dang bcas pa de yang yin no/ /nad kyi rigs dmar po zhes bya ba ni/ ra ri dmar po'i rnam pa 'byung ba la bya'o/ /shin te ma zhes bya ba ni/ mthu chung bar byed pa'o/ /chud za ba zhes bya ba ni skam pa'o/ /tshul ma yin pas ma rung bar 'gyur ba zhes bya ba la tshul ma yin pas zhes bya ba ni/ rigs pa ma yin pa ste/ dus ma yin pa'o/ /ma rung bar 'gyur ba zhes bya ba ni/ chag grugs la sogs pa byed pa ste/ mi mkho bar byed ces bya ba'i tha tshig go/ /yos tshig pa bzhin du zhes bya ba ni/ gang gi tshe 'bras sA lu 'bras yos kyi gnas skabs su gyur pa de'i tshe na yos zhes bya'o/ /skyer mi rung ba'i chos can zhes bya ba ni/ myu gu bskyed pa'i mthu med pa'i phyir ro/ /mi spro na gsol ba bya'o zhes bya ba ni/ gal te dge slong khyim du so sor go bar byed pa'i khyim rnams su so sor go bar byed par mi spro na de'i tshe dge slong thams cad kyis dge slong dang dge slong ma 'di gnyis sdig can yin no zhes khyim du so sor go bar bya ba'i gsol ba bya'o/ /shes gtso bo zhes bya ba ni/ 'dir yang shes gtso bo zhes bya ba'i ming dang 'du shes gtso cher byed pa po nyid do zhes bya ba'i ming can du sbyor bar byed do/ /yul gang la zhe na/ de'i phyir nyan pa po mi shes pa nyid dang bsnyen par ma rdzogs pa nyid dag dang ldan pa'o zhes bya ba smras te/ nyan pa po mi shes pa nyid dang / bsnyen par ma rdzogs pa nyid dag dang ldan pa'i yul de la 'du shes gtso cher byed pa po nyid yin no/ /'di skad bstan te/ ltung ba 'byin par byed pa'i dge slong gang gis nyan pa po pham par 'gyur ba dang / dge 'dun lhag ma zhes bya ba'i ltung ba mi shes pa nyid dang / bsnyen par ma rdzogs pa nyid yin par shes na nyan pa po'i yul de gnyis la ltung ba 'byin par byed pa'i dge slong gi 'du shes gtso cher byed pa po nyid yin no/ /ci zhig rjes su sgrub na gnas ngan len brjod pa'i ltung byed du 'gyur zhe na/ de'i phyir smras na'o zhes bya ba smras te/ tshig tu smra na'o/ /brjod par bya ba ci zhig smras na zhe na/ de'i phyir pham par 'gyur ba dang dge 'dun lhag ma dag so sor yang rung / bsdus pa yang rung ngo zhes bya ba smras te/ gnas ngan len brjod par bya ba pham par 'gyur ba dang / dge 'dun lhag ma dag so so zhes bya ba tha dad pa dag kyang rung bsdus pa zhes bya ba bsdus pa'i rang bzhin yang rung ba'o/ /'o na gang gi tshe de gnyis bsdus pa dag smras pa de'i tshe ci ltung ba gcig tu 'gyur ram/ 'on te du mar 'gyur zhe na/ de'i phyir don du ma nyid la tshig tha dad pa med do zhes bya ba smras te/ don du ma nyid la tshig tha dad pa med pas de'i phyir tshig gcig la don du ma yod kyang don du ma brjod par 'dod pa la tshig tha dad par mi 'gyur bas ltung ba gcig tu 'gyur ro/ /'di skad bstan te/ tshig gcig yin pa'i phyir ltung ba bsdus pa de gnyis la ji ltar ltung byed gcig tu 'gyur zhe na/ 'di lta ste dper na/ dge slong gang la la zhig gis brdzun gyi tshig 'di skad ces 'dis dud 'gro'i skye gnas su gtogs pa'i srog chags lnga bsad do zhes smra na tshig gcig yin pa'i phyir brdzun du smra ba'i ltung byed gcig tu 'gyur ba bzhin no/ /'di gnyis las gzhan pa'i kha na ma tho ba brjod pa ni 'di'i rjes su 'brang ba nyes byas yin par rig par bya'o/ /rjod par byed pa ji lta bu la ltung ba 'di 'byung zhe na/ de'i phyir bsko ba byas pa la'o zhes bya ba smras te/ brjod pa'i phyir gang la dge 'dun gyis bsko ba ma byas pa de ni bsko ba ma byas pa ste/ rjod par byed pa bsko ba ma byas pa de la'o/ /ci gnas skabs thams cad la'am zhe na/ de'i phyir dge 'dun la ma gsol ba la'o zhes bya ba smras te/ gal te dge 'dun la ma gsol ba la ste/ gsol ba zhes bya ba go bar bya ba byas pa la'o/ /dge 'dun la brjod par bya ba'i phyir gsol ba la ni brjod kyang ltung ba med do/ /bden par smra ba la kha na ma tho ba 'dir 'gyur gyi/ brdzun du smras na ni ltung ba gzhan smras pa yang yin no/ /bsnyen par rdzogs pa'i gnas ngan len brjod par byas na kha na ma tho ba 'dir 'gyur gyi/ bsnyen par ma rdzogs pa'i ni na smad pa nyid do/ /gnas ngan len brjod pa'i ltung byed do zhes bya ba de bshad zin to// //mi'i chos bla ma brjod pa'i ltung byed smra bar 'dod nas de'i phyir bden pa nyid na'o zhes bya ba smras te/ smra ba'i pham par 'gyur ba'i rnam pa bstan pa gang yin pa de nyid 'dir yang sbyar bar bya'o/ /de ltar na 'dir tshig gi don 'di 'byung ste/ bdag nyid kyi yul la mi'i chos bla ma dang ldan par smras na gal te bden pa nyid yin na de'i tshe kha na ma tho ba 'dir 'gyur ro/ /de'i tshe 'du shes ma bsgyur bar bdag nyid mi'i chos bla ma yod pa dang ldan par smras na mi'i chos bla ma brjod pa'i ltung byed du 'gyur zhes bya ba'i tha tshig go/ /gang zag ci 'dra ba la brjod na zhe na/ de'i phyir bden pa ma mthong ba bsnyen par ma rdzogs pa la'o zhes bya ba smras te/ gang gis bden pa ma mthong ba de ni bden pa ma mthong ba ste/ bden pa ma mthong ba'i gang zag bsnyen par ma rdzogs pa de la brjod na'o/ /'dir gzhung ni zhu ba kha cig las bden pa mthong ba lta ba phun sum tshogs pa la brjod na ltung ba med do zhes gsungs pa yin no/ /khyim pa'i mdun du rdzu 'phrul rnam par bstan par mi bya'o zhes bya ba ni/ khyim pa'i mdun du rdzu 'phrul rnam par bstan par mi bya ba'o/ /'dul ba'i don nyid du na ni ltung ba med de/ steng rgyas 'od srungs la rdzu 'phrul rnam par bstan par bka' stsal ba'i byung ba'i mtha' dag las khong du chud par bya'o/ /dge slong mas ston pa'i spyan sngar mi bya'o zhes bya ba ni/ dge slong mas ston pa sangs rgyas bcom ldan 'das kyi spyan sngar rdzu 'phrul rnam par bstan par mi bya'o/ /rnam pa 'di gnyis ni phran tshegs dag las 'byung ngo / /mi'i chos bla ma brjod pa'i ltung byed do zhes bya ba de bshad zin to/ / //skur pa 'debs pa'i ltung byed smra bar 'dod nas/ je dang po kho nar 'dul ba thams cad la nye bar sbyar ba'i dgos pa brjod par bya ste/ gal te brtan pa nyid du dgos na gsol ba sngar btang ba'i don bya'o zhes bya ba ni/ gal te 'dul bar gtogs pa'i bya ba brtan pa nyid du dgos pa yod na de'i tshe gsol ba sngon du btang ba'i don gyi las bya'o/ /'di skad bstan te/ gal te gnas ma la stobs pa la sogs pa bsko bar brtan cing mi 'gyur ba nyid du 'dod na gsol ba sngon du gtang bar bya zhing gsol ba byas nas bsko bar bya'o/ /'dis ni mi g.yo bar 'gyur ro zhes gsungs pa de bsdus pa yin no/ /gang la skur pa 'debs pa'i ltung byed du 'gyur zhe na/ de'i phyir dad pa phul ba la'o zhes bya ba smras te/ gang gis blo mthun par byas pa de ni dad pa phul ba ste/ de la'o/ /'dir gzhung ni sngar mthun te rung bar byas nas zhes gsungs pa yin te/ de'i rnam par 'byed pa ni dad pa phul nas zhes gsungs pa yin no/ /ci zhig byas na skur pa 'debs pa'i ltung byed du 'gyur zhe na/ de'i phyir dge slong gi dge 'dun gyi zas kyi rnyed pa ma yin pa dge slong gis gang zag la log par bsngos pa yang dag pa ma yin pa'i don nyid gzhan la yang ming ma smos par brjod na yang ngo zhes bya ba smras te/ dge slong gi dge 'dun gyi zhes bya ba ni/ dge slong gi dge 'dun gyis mnga' ba'i rnyed pa'o/ /zas kyi rnyed pa ma yin pa zhes bya ba ni/ zas kyi rnyed pa las gzhan pa gos kyi rnyed pa'o/ /dge slong gis zhes bya ba ni/ gang la skur pa gdab par bya ba'i dge slong gis so/ /gang zag la zhes bya ba ni/ spyir bstan pa'i tshig yin pas mi'i 'gro bar gtogs pa rab tu byung ba'am khyim na gnas pa la'o/ /log par bsngos pa zhes bya ba ni/ mi rigs par bsngos pa'o/ /yang dag par ma yin pa'i don nyid ces bya ba ni/ de yang dag pa ma yin pa yang yin la/ don kyang yin pas yang dag pa ma yin pa'i don to/ /de'i dngos po ni de nyid de brdzun gyi don nyid ces bya ba'i tha tshig go/ /gzhan la yang zhes bya ba ni/ skur pa gdab par bya ba 'ba' zhig tu ma zad kyi/ nyan pa po gzhan la yang ngo / /ming ma smos par zhes bya ba ni/ ming nas smos pa 'ba' zhig gis ma yin gyi/ ming ma smos par yang ngo / /brjod na yang ngo zhes bya ba ni rnam pa de lta bu brjod na yang skur pa 'debs pa'i ltung byed du 'gyur ro zhes bya ba'i tha tshig go/ /zas kyi rnyed pa la ni nyes byas te/ rnam par 'byed pa las zas kyi rnyed pa ma smos pa'i phyir ro/ /'di ltar de nyid las rnyed pa zhes bya ba ni rnyed pa gnyis te/ gos kyi rnyed pa dang / zas kyi rnyed pa'o/ /don 'dir ni gos kyi rnyed pa yin par dgongs so zhes gsungs pas/ 'dir zas kyi rnyed pa ma yin pa zhes smos so/ /gang zag la zhes bya ba'i tshig ni gang zag la bdag gis bsngos so zhes bya ba'i tshig de bsal ba'i phyir te/ 'di ltar bshes ngor byas te zhes gsungs pa'i phyir ro/ /zhu ba las kyang bcom ldan 'das kyis yang dge slong gang 'di skad ces tshe dang ldan pa dag gis 'di ltar bshes ngor byas te/ dge 'dun gyi rnyed par bsngos pa gang zag la sngo bar byed do zhes zer na zhes gsungs te/ bshes ngor byas te zhes gsungs pa las ni bdag nyid ces bya ba'i tshig tu brjod par mi bya'o/ /so sor thar pa'i mdo las tshe dang ldan pa dag gis 'di ltar bshes ngor byas te/ 'di ltar dge 'dun gyi rnyed par bsngos pa bdag gis gang zag la bsngos so zhes de skad zer na ltung byed do zhes mang po'i tshig tu byas pa gang yin pa de ni gtso bo ma yin te/ 'di ltar gcig la brjod na yang ltung byed du 'gyur ba kho na yin no/ /dge slong mang po dag la mnyam du brjod na yang dge slong ji snyed la skur ba 'debs par byed pa de rnyed kyi ltung bar 'gyur ro/ /'di skad bstan te/ gal te dge slong gis dad pa byin nas dge slong la skur pa 'debs par byed de/ dge slong 'dis dge 'dun gyi rnyed par bsngos pa zas kyi rnyed pa ma gtogs pa'i rnyed pa gzhan mi rigs par 'di ltar bshes ngor byas te/ gang zag la bsngos so zhes de nyid dam gzhan gyi mdun du ming nas smos kyang rung ming nas ma smos kyang rung ste/ brdzun du de skad smras na de la skur pa 'debs pa'i ltung byed du 'gyur ro/ /gang zag la zhes smos pa las na dge 'dun gzhan la ni nyes byas so/ /dge 'dun gyi rnyed pa zhes smos pa las na gang zag gi rnyed pa gzhan la bsngos zhes brjod na yang nyes byas kho na'o/ /skur pa 'debs pa'i ltung byed do zhes bya ba de bshad zin to// //khyad du gsod pa'i ltung byed smra bar 'dod nas/ 'dul ba dang ldan pa nyid do zhes bya ba smras te/ so sor thar pa dang de rnam par 'byed pa la sogs par gtogs pa'i tshig gang yin pa'i tshig de la brnyas thabs su gyur pa brjod na khyad du gsod pa'i ltung byed du 'gyur ro/ /'dir brnyas thabs kyi bye brag las ltung ba'i bye brag tu shes par bya'i/ 'don pa'i bye brag las ni ma yin te/ 'di ltar brnyas thabs su gyur pa'i tshig ji snyed pa de snyed kho na'i ltung bar 'gyur bas/ de'i phyir tshig gi bye brag gzhan las ltung ba'i bye brag tu shes par bya'i/ 'don pa'i bye brag las ni ma yin no/ /'o na so sor thar pa'i mdo las yang dge slong gang zla ba phyed phyed cing so sor thar pa'i mdo 'don pa na bslab pa khyad du bsad nas zhes gsungs pa des 'dul ba mtha' dag tu gtogs pa'i bslab pa'i gzhi la brnyas thabs byed pa'i kha na ma tho ba 'di ji ltar rnam par gzhag par bya zhe na/ so sor thar pa'i mdo las gsungs pa ni 'dul ba lhag ma rnams kyi dpe tsam du zad de/ dge 'dun gyi 'dul ba dang ldan pa gang ci tsam brjod pa la brnyas thabs su byed na thams cad du ltung byed du 'gyur ro zhes gsungs pa'i phyir ro/ /mdo sde la ni nyes byas so zhes bya ba ni/ 'dul ba dang ldan pa dus ma yin pa'i zas dang / 'bru rlon pa len pa la sogs pa las gzhan pa mdo sder gtogs pa'i brjod pa gzhan la khyad du gsod na nyes byas so/ /chos mngon pa ni 'dul ba dang mdo sde dag las tha dad pa ma yin te/ 'di ltar dge slong gis sdom pa la sogs pa 'dul ba las gsungs pa yang der rnam par dpyod par byed pa la mdo sde'i don dang / mdo sde'i gdar lta bu dang / mdo sde rnam par 'chad pa yang chos mngon pa yin pa'i phyir ro/ /khyad du gsod pa'i ltung byed do zhes bya ba de bshad zin to// //sa bon dang skye ba 'jig pa'i ltung byed smra bar 'dod nas de bya ba'i tshul bstan pa'i phyir/ lag gi blas mchod rten dang dge 'dun gyi don du shing ljon pa gcad par bya'o zhes bya ba smras te/ dge slong gang las sar pa dag byed pa'i ngang tshul can de ni lag gi bla zhes bya'o/ /mchod rten gyi phyir zhes bya ba ni mchod rten gyi rgyur ro/ /mchod rten smos pas chos dkon mchog smos pa yin te/ mchod rten ni chos kyi sku yin pa'i phyir ro/ /dge 'dun gyi phyir zhes bya ba ni/ dge 'dun gyi yo byad kyi phyir ro/ /gcad pa'i phyir sta gon bya ba smra bar 'dod nas/ de'i mdun rol du nyi ma bdun nam brgyad nas de'i drung du dkyil 'khor dang dri dang me tog dang / bdug pa dang mar me dang gtor ma sbyin pa dang / rgyud chags gsum pa gdon pa dang / sbyin pa bshad par byas nas lha gang dag shing ljon pa 'di la gnas pa de dag gnas gzhan tshol cig /shing ljon pa 'dis mchod rten nam dge 'dun gyi bya ba byed par 'gyur ro zhes brjod nas smra ba pos shes par gyis shig ces so zhes bya ba smras te/ de'i mdun rol du zhes bya ba ni/ gcad pa de'i mdun rol du'o/ /nyi ma bdun nam brgyad nas zhes bya ba ni/ nyi ma bdun nam nyi ma brgyad kyi mdun rol nas so/ /de'i drung du zhes bya ba ni/ shing ljon pa de'i drung du'o/ /lag gi blas shing ljon pa'i lha'i phyir dkyil 'khor byas te/ dri la sogs pa sbyin pa nas sbyin pa bshad pa'i bar dag byas nas 'di skad brjod par bya ste/ lha gang dag shing ljon pa 'di la gnas pa de dag gnas gzhan tshol cig ces bya ba la sogs pa brjod nas so/ /mchod rten nam dge 'dun gyi zhes bya ba ni/ de gnyis kyi don gyi ched nyid du bya ba byed par 'gyur ro zhes brjod nas gcod du gzhug par bya ba'o/ /ji ltar gcod du gzhug par bya zhe na/ de'i phyir dge slong lag gi bla smra ba pos rang gi lag dar te mi gcad par khyim pa shing mkhan la sogs pa dag la shes par gyis shig ces zur gyis bsgo ste/ gcod du gzhug par bya'o/ /gal te me 'byung ba'am khrag 'dzag pa'am/ yan lag 'gul ba'am/ lo ma lhags pa la sogs pa rnam par 'gyur ba ston na des zhing la sbyin pa dang / ser sna dag gi bsngags pa dang bsngags pa ma yin pa brjod par bya'o zhes bya ba ni/ de ltar shing ljon pa de gcod du bcug pa na/ gal te me 'byung ba la sogs pa rnam par 'gyur ba ston na de'i tshe lag gi bla des zhes bya ba la sogs pa bya'o/ /zhing la zhes bya ba ni/ bsod nams kyi zhing mchod rten dang dge 'dun la'o/ /de la sbyin pa dang ser sna dag byed pa ni/ de dag nyid de sbyin pa'i bsngags pa dang / ser sna'i bsngags pa ma yin pa brjod par bya'o/ /'di skad bstan te/ sangs rgyas dang chos dang dge 'dun gyi bdag nyid kyi zhing la sbyin pa'i bsngags pa brjod par bya zhing / ser sna'i bsngags pa ma yin pa yang brjod par bya'o/ /mi gtong na gcad par mi bya'o zhes bya ba ni/ de ltar byas kyang me 'byung ba la sogs pa'i rnam par 'gyur ba mi gtong na shing ljon pa de gcad par mi bya ste/ shing ljon pa mi gcad do zhes bya ba'i tha tshig go/ /shes gtso bo zhes bya ba ni/ 'dir yang shes gtso bo'o zhes bya ba'i ming dang / 'du shes gtso cher byed pa po nyid do zhes bya ba'i ming can du sbyor bar byed do/ /gang la 'du shes byed pa po nyid yin zhe na/ de'i phyir ma nyams pa nyid la'o zhes bya ba smras te/ gal te ma nyams pa nyid kyi yul la yongs su shes pa yin na'o/ /gang gis ma nyams pa nyid la zhe na/ de'i phyir sa bon dang khye'u kha 'thon par rung bar ma byas pa dag gi'o zhes bya ba smras te/ me la sogs pa gang gis sa bon dang khye'u kha 'thon pa dag rung bar ma byas pa de ni sa bon dang khye'u kha 'thon pa rung bar ma byas pa dag go/ /sa bon dang khye'u kha 'thon pa rung bar ma byas pa dag ni sa bon dang khye'u kha 'thon pa rung ba ma byas pa ste de dag gi'o/ /'di skad bstan te/ sa bon dang khye'u kha 'thon pa rung bar ma byas pa dag gi ma nyams pa nyid shes na'o/ /khye'u kha 'thon pa zhes smos pa ni/ rtswa la sogs pa skye ba dag gzung ngo / /rung bar ma byas pa zhes smos pas ni sa bon rung bar ma byas pa ma nyams pa dag nyams par byas pa la ltung ba med par ston to/ /ci zhig rjes su sgrub na de la 'du shes gtso cher byed pa po nyid yin no zhe na/ de'i phyir tha na rtsa rgyun yan chad nyams par byas na'o zhes bya ba smras te/ 'dir mngon par khyab par bya ba'i phyir/ tha na zhes bya ba smras so/ /rtsa rgyun zhes bya ba ni/ rtsa ba dang 'brel ba'i rgyun phra mo'o/ /tha na de yan chad nyams par byas na'o/ /'di skad bstan te/ sa bon dang khye'u kha 'thon pa dag dngos nyams par byas pa 'ba' zhig tu ma zad kyi/ de dag gi rtsa rgyun yan chad nyams par byed na'o/ /'dir gzhung ni shing ljon pa'i rtsa rgyun 'thog par byed na nyes byas su 'gyur ro zhes gsungs pa yin no/ /ji ltar nyams par byed na zhe na/ de'i phyir ji ltar yang rung ngo zhes bya ba smras te/ rnam pa gang yang rung bas so/ /de nyid bstan pa'i phyir sprugs pas kyang ngo zhes bya ba smras te/ 'dir gzhung ni btsun pa dge slong gis shing tog dag sprug cing klog par bgyid na ltung ba cir 'gyur/ gal te shing tog smin pa dag yin na ni nyes byas so/ /ji ste ma yin pa dag yin na ni ltung byed do zhes gsungs pa yin no/ /rtswa dang 'dam rdzab dang sa rdul la sogs pa dag gis mnan nas kyang ngo zhes bya ba ni/ gal te nyams par byed na ltung byed do zhes bya bar sbyar ro/ /'dir gzhung ni btsun pa dge slong gis ran nam 'dam rdzab bam sa rdul dag gis shing ljon pa nyams par gyur cig / rnam par nyams par gyur cig ces gnon par bgyid na ltung ba cir 'gyur nyes byas so/ /btsun pa dge slong gis ran sngon pos rdul lam bye ma'am gzhan gang yang rung bas 'debs par bgyid na ltung ba cir 'gyur nyes byas so zhes gsungs pa yin no/ /'dir sbyor ba tsam la dgongs nas nyes byas su gsungs par zad kyi gal te nyams par byed na ni ltung byed kho nar 'gyur ro/ /'dir 'dam rdzab ces bya ba ni 'jim pa yin par rig par bya'o/ /khu tshan la sogs pas kyang ngo zhes bya ba la/ khu tshan zhes bya ba ni 'u sha la sogs pa'i khu ba tsha ba gtor ba'o/ /sogs pa zhes bya ba'i sgras 'chag pa dang / yal ga la sogs pa 'dren pa dang / dkyil 'khor dang skyang nul la sogs pa dag kyang bsdu'o/ /'dir gzhung ni btsun pa sngo'i phyogs su 'u sha tsha ba 'thor na zhes bya ba la sogs pa yin no/ /rlung dang nyi ma la 'jog pas kyang ngo zhes bya ba ni sa bon nyams par byed na ni ltung byed du 'gyur ro/ /gal te ma yin na ni sbyor ba tsam gyis nyes byas so/ /'dir gzhung ni dge slong ma'i rnam par 'byed pa las/ dge slong mas sa bon gyi rigs lnga po 'di dag nyams par gyur cig ces rlung dang nyi ma la 'jog par byed na/ gal te sa bon rnam par nyams na ni ltung byed do/ /rnam par ma nyams na ni nyes byas so zhes gsungs pa yin no/ /sa gzhi skam por yang ngo zhes bya ba ni/ 'jog pas kyang ngo zhes bya bar sbyar ro/ /'dir gzhung ni dge slong gis sa bon gyi rigs lnga po dag nyams par gyur cig ces sa gzhi skam por 'jog par byed na/ gal te sa bon rnam par nyams na ni ltung byed lngar 'gyur ro/ /gal te rnam par ma nyams na ni nyes byas lngar 'gyur ro zhes gsungs pa yin no/ /bsam pa ji lta bus she na/ de'i phyir der 'dun pas so zhes bya ba smras te/ nyams par 'dun pas so/ /ci rang kho nas sam zhe na/ de'i phyir rang ngam gzhan gyis kyang rung ngo zhes bya ba smras te/ rang gi lag gis sam/ gzhan gyi lag dag gis so zhes bya ba'i tha tshig go/ /gnas skabs gang la ltung ba ji lta bu dag 'byung zhe na/ de'i phyir nyams par gyur na/ dngos gzhi dag go zhes bya ba smras te/ nyams par gyur pa na dngos gzhi'i ltung ba dag 'byung ngo / /de'i sbyor ba la ni nyes byas dag go/ /gal te sbyor ba gcig gi dbang gis sa bon mang po dag nyams par byed na ci sbyor ba gcig gi dbang yin pas ltung ba'ang gcig kho nar 'gyur ram/ 'on te nyams par bya ba'i grangs kyi dbang gis ltung ba yang mang por 'gyur zhe na/ de'i phyir nyams par bya ba'i grangs dag gi'o zhes bya ba smras te/ nyams par bya ba'i grangs dag gis ltung ba'i grangs kyang rnam par gzhag go zhes bya ba sbyar te/ nyams par bya ba dag gi grangs ji snyed pa de snyed kyi ltung bar 'gyur ro zhes bya ba'i tha tshig go/ /nyams par bya ba dag gi grangs kyi ltung ba rnam par gzhag par bstan na ci lo ma dang yal ga dang 'dab ma las grangs rnam par gzhag par bya'am zhe na/ de'i phyir sdong bu las so zhes bya ba smras te/ shing ljon pa drung bar gyur pa'i sdong bu las bcad na yal ga dang yal ga phra mo dang 'dab ma la sogs pa du ma nyid yod du zin kyang de lta mod kyi ltung ba gcig kho nar 'gyur te/ shing ljon pa'i sdong bu gcig yin pa'i phyir ro/ /de bzhin du yal ga dag rang gi sdong bu las bcad pa la yal ga phra mo dang 'dab ma mang po nyid yod pa dang / yal ga phra mo dag rang gi sdong bu las bcad pa la 'dab ma mang po nyid yod pa dang / 'dab ma dag rang gi sdong bu las bcad pa la 'dab ma bdun pa ltar 'dab ma mang po nyid yod pa dang / e raN+Da'i 'dab ma ltar yal ga mang po nyid yod du zin kyang de lta mod kyi/ ltung byed gcig kho nar 'gyur ro/ /sdong bu zhes bya ba ni/ 'og ma'i cha'i dpe yin par rig par bya'o/ /de lta bas na 'dab ma'i yal ga gcad pa dang / lcug ma'i mgo lcogs bcad na yang ltung byed do/ /sdong bu'i ngos nas cung zad brtsegs pa dang / 'dab ma'i rim pa nas cung zad brtsegs pa ni sbyor ba'i nyes byas so/ /'dir gzhung ni/ dge slong gis shing ljon pa gcig sbyor ba gcig gis gcod na nyes byas gcig dang ltung byed gcig go/ /dge slong gis shing ljon pa gcig sbyor ba gnyis kyis gcod na nyes byas gnyis dang ltung byed gcig go zhes bya ba la sogs pa gsungs pa yin no/ /skye ba'i phyir mdo rnam par bshad nas mdo de nyid sa bon gyi phyir rnam par bshad par bya ste/ nyams par bya ba'i grangs dag gi'o zhes bya ba la/ sa bon gyi rigs ni rnam pa lnga ste/ 'di lta ste/ rtsa ba'i sa bon dang / sdong bu'i sa bon dang / tho gu'i sa bon dang / 'gas pa'i sa bon dang / sa bon gyi sa bon no/ /de la rtsa ba'i sa bon la sogs pa lnga po thams cad la gzugs ji snyed yod pa de dag thams cad 'dir sdong bu nyid kyi rnam par bshad par rig par bya ste/ de'i phyir sa bon du gyur pa'i gzugs gcig la sdong bu ji snyed yod pa de snyed kyi ltung ba'i dngos gzhir 'gyur ro/ /de lta bas na gang bu zhes bya ba'i sbubs gang dag na til dang sran ma la sogs pa'i 'bru ji snyed pa yod pa dang / yal ga'i tho gu gang dag ni go snyod dang ci tshe la sogs pa'i 'bru ji snyed yod pa de dag ni/ 'bru'i phyir gzugs tha dad pa yin gyi/ sbubs kyi phyir gzugs gcig pa yang ma yin la/ tho gu'i phyir gzugs gcig pa yang ma yin te/ de lta bas na sbubs dang tho gu dag la 'bru ji snyed rnam par gnas pa de dag ni sdong bu zhes bya ba'i tshig 'dis gcig pa nyid du gnas par mi 'gyur te/ 'di ltar sbubs de na 'bru'i rdzas ji snyed yod pa dang / tho gu dang snye ma la 'bru'i rdzas ji snyed yod pa de kho na snyed kyi dngos gzhi'i ltung bar 'gyur ro/ /sbyor ba la ni 'bru'i gzugs gcig la sbyor ba du brtsams pa de snyed kyi nyes byas su 'gyur ro/ /sbyor ba la ni nyes byas dag tu'o zhes bya ba ni/ sa bon dang skye ba'i rdzas gcig la sbyor ba du brtsams pa de snyed kyi nyes byas dag tu 'gyur ba'o/ /'di la bsnun pa re re las de tha dad pa yin gyi dngos po las ni ma yin no zhes bya ba smras te/ 'di la zhes bya ba ni bsnun pa'i spyod pa nyid kyis 'jug pa 'di la'o/ /bsnun pa re re la de tha dad pa yin gyi zhes bya ba ni/ sa bon dang skye ba nyams par bya ba dang / spyad par bya ba'i phyir gtun bu dang sta re la sogs pas bsnun pa re re la sbyor ba zhes bya ba'i nyes byas tha dad pa yin par shes par bya'o/ /dngos po la ni ma yin no zhes bya ba ni/ sa bon dang skye ba'i dngos po gcig yin pas sbyor ba gcig tu 'gyur ba ni ma yin te/ bsnun pa ji snyed pa de kho na snyed kyi sbyor ba dag tu 'gyur ro zhes bya ba'i tha tshig go/ /bton na bskyed par bya ba nyid yin du zin kyang mtha' nyid do zhes bya ba ni/ shing ljon pa la sogs pa rang gi gnas nas rtsa thon du bton pa la sogs pa'i rnam pas bton na bton pa de gnas gzhan du bskyed par bya ba nyid yin du zin kyang 'don pa'i sbyor ba'i grangs kyang sngar bstan pa bzhin la bton zin pa na/ dngos gzhi yang mtha' nyid de ltung byed nyid du 'gyur ro/ /'di skad bstan te/ gal te shing ljon pa la sogs pa rang gi gnas nas rtsa thon du 'don par gyur na 'di ltar skyer rung ba'i chos nyid yod du zin kyang de lta mod kyi rang gi gnas nas bton cing phyung ba de nyid bshig cing nyams par byas pa yin par rig par bya'o/ /de phyin chad gnas gzhan du rtsa ba ma zug gi bar du ni yal ga dang 'dab ma dang me tog la sogs pa btogs pa la nyes pa med do/ /nya lcibs dang nya tshang dag chu nas bton pa ni de nyid do zhes bya ba ni/ nya tshang ni chu'i rtsa nya lcibs 'dra ba zhig ste/ nya lcibs dang nya tshang dag chu nas bton pa ni de nyid de bton pa nyid do/ /'di skad bstan te/ nya lcibs dang / nya tshang dag chu nas bton par gyur na skyer rung ba'i chos nyid yin du zin kyang de dag bton pa na bcad pa nyid yin par rig par bya ste/ kha na ma tho ba yongs su rdzogs par 'gyur ro/ /tshi gu ma bcem par ril mid byed pa ni phyed do zhes bya ba ni/ rgya shug gi tshi gu dang / kham tshigs dang / star ga dang / 'bra go'i rus pa la sogs pa'i tshi gu so dag gis ma bcem ma dkrum par ril mid du gra rdeg byed pa ni sa bon nyams par bya ba'i bya ba byed pa yin pas de ni phyed de nyes byas so zhes bya ba'i tha tshig go/ /thams cad du yang ltung ba'i skabs nas phyed ces bya ba'i tshig smos pa ni nyes byas yin par go bar byed do/ /'dir gzhung ni btsun pa dge slong gis rgya shug gi tshi gu ma bcem par ril mid bgyid na ltung ba cir 'gyur/ nyes byas so zhes gsungs pa yin no/ /gal te 'di bcad par gyur na legs so zhes smras na bton pa'i 'o zhes bya ba ni/ dge slong gis gal te shing ljon pa 'di la la zhig gis bcad par gyur na legs so/ /stes so zhes bya ba smras na gzhogs kyis bcol ba de'i tshe na sngar bton pa zhes bya ba dngos gzhir bshad pa de'i phyed de sbyor ba'i nyes byas zhes bya ba'i tha tshig go/ /gzhi de las bcad par gyur na ni mtha'i dngos gzhi nyid du rig par bya'o/ /'dir gzhung ni zhu ba las btsun pa dge slong gis 'di skad ces 'dis shing ljon pa 'di bcad par gyur na legs so stes so zhes mchi zhing des de 'gums par bgyid na ltung ba cir 'gyur nyes byas so zhes gsungs pa yin no/ /rdzu 'phrul gyis ni ma byas pa nyid do zhes bya ba ni/ dge slong gis rdzu 'phrul gyis shing ljon pa 'di gcod par byed na ltung ba ma byas pa nyid do/ /'dir gzhung ni zhu ba las btsun pa dge slong gis rdzu 'phrul gyis shing ljon pa 'gums par mos par bgyid na ltung ba cir 'gyur/ nye ba 'khor ltung ba med do zhes gsungs pa yin no/ /sa bon la sa bon gzhan nyid du 'du shes pa ni de dang 'dra ba nyid do zhes bya ba ni/ sdong bu ni sdong bu'i sa bon la sogs pa la rtsa ba'i sa bon nyid du 'du shes pa ni de dang 'dra ba nyid do/ /sdong bu'i sa bon la sogs pa dang 'dra ba nyid de phyed nyid ma yin no/ /de bzhin du skye ba la sa bon du 'du shes pa yang skye ba dang 'dra ba nyid yin la/ sa bon la skye bar 'du shes pa yang sa bon dang 'dra ba nyid de phyed nyid ma yin te/ thams cad la sa bon la sogs pa nyams par bya ba yod pa'i phyir ro/ /dge slong sa bon la sogs pa nyams par bya ba'i 'du shes yod na bzlog pa'i bsam pas nyams bar byed du zin kyang dngos gzhi kho nar 'gyur ro/ /shun pa dang phri dang 'dab ma skya bo dang me tog kha bye ba dang 'bras bu smin pa rnams ni phyed shi ba nyid du rjes su tha snyad gdags so zhes bya ba ni/ shun pa dang phri dang 'dab ma skya bo dang / me tog kha bye ba dang 'bras bu smin pa zhes bya bar tshig rnam par sbyar te/ de rnams ni phyed shi ba nyid du 'jig rten na grags pa yin pas 'dir yang grags pa de'i rjes su phyed shi ba nyid ces bya bar tha snyad gdags te phyed shi ba nyid de dag bshig cing nyams par byas pa la ni nyes byas su 'gyur ro/ /de dag gi rtsa bar gyur pa rang bzhin las ma bye ba ni ma yin no zhes bya ba ni/ shun pa la sogs pa de dag gi rtsa bar gyur pa gang yin pa dngos kyi rang bzhin las gal te ma bye ba ma bral ba yin na de dag gi rtsa bar gyur pa rang bzhin las ma bye ma bral ba de ni phyed shi ba de nyid du rjes su tha snyad gdags pa ma yin te/ de dag phyogs de nas phye zhing phral na dngos gzhi kho nar 'gyur ro/ /'dir shun pa'i gzhung ni/ shun pa 'chu bar byed na snying po dang 'brel pa 'chu bar byed na ni ltung byed du 'gyur ro/ /snying po dang ma 'brel ba 'chu bar byed na ni nyes byas su 'gyur ro zhes gsungs pa yin te/ phri dang 'dab ma skya bo dang / me tog kha bye ba dang / 'bras bu smin pa rnams la yang 'di nyid rnam par gzhag go/ /de la me tog dang 'bras bu rnams kyi rtsa ba dag dang / chu ba ni de dag nyid dang lhan cig chos mtshungs pa nyid yin te/ smin pa rnams kyi ni smin pa nyid yin la/ ma smin pa rnams kyi ni ma smin pa nyid yin te/ de dag nyid kyi phyogs gcig tu gyur pa nyid yin par rig par bya'o/ /me tog gi chu ba ni me tog nyid kyi khongs su gtogs pa yin la/ rtsa ba dag ni de'i rtsa ba las rig par bya'o/ /'dir gzhung ni/ zhu ba las cig car 'byung ste/ chu ba gcod na nyes byas so/ / pha bong gi dreg pa las 'chu na nyes byas so zhes gsungs pa yin no/ /'dir chu ba zhes bya ba'i sgras ni ut+pa la la sogs pa kha bye ba'i chu ba dang 'dab ma'i chu ba bsdus par rig par bya'o/ /'dir pha bong gi dreg pa zhes bya ba ni rdo'i dreg pa yin par rig par bya'i sru sru ni ma yin no/ /sa bon gyi khams btab pa la rtsa ba ma skyes pa ni phyed skyes pa nyid du'o zhes bya ba ni/ sa bon gyi khams btab pa la da dung rtsa ba ma skyes pa lhag lhog tsam du rtsa bas su gyur pa ni phyed skyes pa nyid du rjes su tha snyad gdags te/ de la ni nyes byas so zhes bya ba'i tha tshig go/ /sa 'bus pa dang / sha mo dang / sha bal dang / snod dang gos la sogs pa'i rlam rnams ni byed skyes pa nyid du'o zhes bya ba ni/ rjes su tha snyad gdags so zhes bya bar sbyar ro/ /sa 'bus pa dang / sha mo dang / sha bal dang / snod kyi rlam dang / gos kyi rlam dang / sogs pa'i sgras khur ba la sogs pa'i rlam bsdus te/ de rnams ni phyed skyes pa nyid du rjes su tha snyad gdags te/ de dag bshig cing nyams par byas na nyes byas so/ /'u sha'i khu tshan la sogs pa dbo ba dang / 'chag pa dang / yal ga la sogs pa 'dres pa dang / dkyil 'khor dang / skyang nul dang / de dag gi bsam pa nyid la ni ltung ba med do zhes bya ba ni/ 'u sha'i khu tshan la sogs pa'i sngo'i steng du 'bo na dbo ba la sogs pa'i bsam pa nyid la ni ltung ba med do/ /de bzhin du 'chag pa la sogs pa dag la yang 'chag pa la sogs pa'i bsam pa nyid la ni ltung ba med do/ /sdo la sogs pa gzhig cing nyams par bya ba'i bsam pa med pa'i phyir ro/ /phongs pa'i tshe rtswa ku sha la sogs pas bcings pa des mi thar na bcad na yang ngo zhes bya ba ni/ rtswa ku sha la sogs pa bcad na yang ltung ba med do/ /gang gi tshe zhe na/ de'i phyir phongs pa'i tshe zhes bya ba smras te/ phongs pa'i dus kyi tshe'o/ /phongs pa bstan pa'i phyir/ rtswa ku sha la sogs pas bcings pa zhes bya ba smras te/ gal te dge slong rtswa ku sha la sogs pa des bcings pa'o/ /dge slong gang gis bcad na ltung ba med ce na/ de'i phyir des zhes bya ba smras te/ rtswa ku sha la sogs pas bdag nyid bcings pa'i dge slong des so/ /ci gnas skabs thams cad du ltung ba med dam zhe na/ ma yin te de'i phyir mi thar na zhes bya ba smras te/ gal te thabs gzhan gang gis kyang mi thar na'o/ /de ltar ji skad du bstan pa'i rnam pa de lta bus phongs pa'i tshe dge slong gis rtswa ku sha la sogs pa bcad na yang ltung ba med do/ /'di skad bstan te/ gal te chom rkun pa dag gis rtswa ku sha la sogs pa drung ma phyung ba dge slong bcings par gyur la/ thar pa'i thabs gzhan 'ga' yang med na/ dge slong bcings pa des rtswa ku sha la sogs pa bcad na yang ltung ba med do/ /gal te rtswa ku sha dag gis dge slong mang po dag bcings par gyur na ci de'i tshe thams cad kyis gcad par bya'am zhe na/ ma yin te de'i phyir du ma nyid yin na de las gzhan gcig gis so zhes bya ba smras te/ dge slong bcings pa du ma nyid yin na mi thar pa de las dge slong gcig gis gcad par bya zhing des gzhan yang dgrol bar bya'i/ thams cad kyis gcad par mi bya'o/ /sa bon gyi chos med pa ni nyes pa med pa nyid ma yin no zhes bya ba ni/ rung ba lnga po phyung ba dang / dkrum pa dang / bkas pa dang / gcad pa dang / sa bon gyi chos nyid med pa ni lnga pa yin te/ rung ba lnga po de bsdu ba'i phyir mdo 'di byas so/ /gang la sa bon gyi chos nyid med pa de ni nyams par byas kyang nyes par byed pa nyid ma yin te/ dper na ga gon la sogs pa sa bon du ma red pa nyid dag lta bu'o/ /mes reg pa dang mtshon dang sen mo dang ne tso dag gis rma phyung ba dang / rnying pa dang / phyur ba dang / dkrum pa dang / bkas pa dang / bcad pa lta bu dag ni rung ba'o zhes bya ba ni dgu po de dag ni rung ba ste/ mes reg pa zhes bya ba ni shing tog la sogs pa mes reg par byas pa'o/ /mtshon gyis rma phyung ba dang / sen mos rma phyung ba dang / ne tso dag gis rma phyung ba zhes bya ba ni/ shing tog la sogs pa de dag gis rma phyung ba gang yin pa'o/ /'dir mtshon la sogs pa smos pa ni mtshon pa tsam du zad de/ shing la sogs pas rma phyung ba gang yin pa yang rung ba kho na yin no/ /rnying pa zhes bya ba ni/ rgun skam la sogs pa dag go/ /phyung ba zhes bya ba ni/ drung nas phyung ba ste/ dper na la phug la sogs pa rtsa thon du phyung ba lta bu dag ste/ de ni brtag pa gzhan gyis rung bar bya ba la ltos mi dgos so/ /dkrum pa zhes bya ba ni brdungs pa ste/ mchig la sogs pas sran ma la sogs pa phyed tshal du dkrum pa lta bu'o/ /bkas pa zhes bya ba ni gas par gyur pa ste/ de yang bal po se'u la sogs pa lta bu rang gas pa nyid gang yin pa de ni rung ba nyid ma yin gyi/ gzhan dag gis byas pa ni rung ba nyid yin no/ /gcad pa zhes bya ba ni brngas pa ste/ dper na lcang ma la sogs pa'i yal ga bcad zin pa de la so shing la sogs pa bya ba la brtag pa gzhan gyis rung bar bya mi dgos pa lta bu'o/ /rung ba byed pa ni sa bon ma yin pa nyid du gyur gyi bar du ltos par bya mi dgos pa nyid do zhes bya ba ni/ brtag pas rung bar byed pa ni ji srid du sa bon ma yin pa nyid du gyur gyi bar de srid du de la bsdad par mi bya ba'o/ /'di skad bstan te/ mon sran sde'u la sogs pa dag me la sogs pa'i brtag pas rung bar bya'o zhes bstan pa ni/ ji srid du mon sran sde'u la sogs pa de dag sa bon ma yin pa nyid du gyur gyi bar de srid du brtag par mi bya ste/ 'di ltar dge slong gis brtag pa yin pa'i phyir me la sogs pas reg pa tsam kho nas brtags shing rung ba yin par rig par bya'o/ /'di la rlangs pa ni me ma yin pa nyid ma yin no zhes bya ba ni/ brtag pas rung bar bya ba 'di la rlangs pa ni me ma yin pa nyid ma yin te/ 'di ltar me nyid dang 'dra'o/ /'di skad bstan te/ brtag pas rung bar bya ba 'di la rlangs pas bdugs pa nyid kyang mes reg pa nyid dang 'dra ste/ 'di ltar me dang / rlangs pas reg na mon sran sde'u la sogs pa dag rung ba nyid du gyur pa yin no/ /'dir mdo de gnyis kyi gzhung ni dge slong dag sa bon gyi rigs mi tshos pa zhes bya ba yod pas de'i phyir rlangs pas brlan te bza' bar rjes su gnang gis 'di la 'gyod par mi bya'o zhes gsungs pa yin no/ /'bras bu dag mes rung bar bya ba la spyi'i tshoms ni gtso cher bya ba yang dag pa'i grangs nyid do zhes bya ba ni/ rgun 'bru la sogs pa'i 'bras bu dag me'i brtag pas rung bar bya ba la spyi'i tshoms spyi bungs su bcer ba ni gtso cher bya ba gtso bor bstan pa yin te/ de ni yang dag pa yin pa'i grangs nyid du 'gro bar rig par bya'o/ /'di ltar spyi la rung bar byas na/ de'i yan lag thams cad du rung ba nyid yin par yid la snang ba'i phyir ro/ /'dir gzhung ni 'di ltar dge slong dag 'bras bu rnams re re nas rung bar byed pas ring du thogs pa dang / bcom ldan 'das kyis bka' stsal ba/ phung por byas nas mes gnas gnyis sam gsum dag tu reg par byas na thams cad du rung ba nyid do zhes gsungs pa yin no/ /phyogs gcig nas ni spyi'i rung ba mi 'byung ngo zhes bya ba ni/ mes phyogs gcig nas reg pa la ni phung po thams cad kyi spyi'i brtag par byas pa zhes bya ba'i rung ba mi 'byung ngo / /'dis ni de lta bas na spyi ngos thams cad la mes phyogs gnyis sam gsum dag tu reg par bya'o zhes gsungs pa de bsdus pa yin no/ /dge slong gis rung ba dag byas pa nyid ni byas pa nyid yin no zhes bya ba ni/ dge slong gis brtags pas rung ba dag byas pa ni/ dge slong gis rung ba dag byas pa ste/ de'i dngos po ni de nyid do/ /de la ni mes rung bar byas pa ma gtogs pa gzhan gyis rung bar byas pa nyid yin no/ /'dir gzhung ni btsun pa re zhig dge slong gis zhugs kyis sam sen mos sam mtshon gyis sa bon gyi rigs lnga po dag rung bar bgyis pa zhes bgyi 'am nye ba 'khor rung bar byas pa zhes bya ste/ nye ba 'khor mes rung bar byas pa ma gtogs pa lhag ma rnams bzar rung ste/ bza' bar bya ba dag yin no/ /gang rung bar byed na sa bon gyi tshogs 'jig pa'i ltung byed du 'gyur ro zhes gsungs pa yin no/ /gang rung bar byed na zhes bya ba'i tshig gis ni 'dir rung bar byed pa ni 'byung po'i tshogs 'jig par byed pa yin par rig par bya'o/ /de lta ma yin du zin na sa bon gyi tshogs 'jig pa las ltung byed kyi tshig tu mi gsung bar nyes byas su gsungs pa'i rigs na de skad ma gsungs so/ /'dir nye ba 'khor mes rung bar byas pa ma gtogs pa zhes gsungs pa des ni mes rung bar bya'o/ /de lta ma yin te/ de'i phyir mdo de ni dge slong gis btsos pa'i dbang du byas nas/ de mi bza' ba nyid bstan pa yin par rig par bya'o/ /sa rung ba ma yin par yang ngo zhes bya ba ni/ rung ba'i khang pa ma yin pa'i sa rung ba ma yin par 'bru la sogs pa gzhag ste/ mes rung bar byas pa gang yin pa de yang rung bar byas pa nyid yin no/ /zhag bdun pa dang / 'tsho ba'i bar du bcang ba chu grang mos ma gtor bar bza' bar mi bya'o zhes bya ba ni/ de rung bar bya ba dang 'brel ba yin pas 'dir mdor bris te/ sman zhag bdun pa dang / 'tsho ba'i bar du bcang ba dag chu grang mos ma btab ma gtor bar bza' bar mi bya'o/ /rung bar bya ba ni gang gis dus su byas kyang rung ba nyid yin gyi/ bza' ba'i dus kho nar bya ba ni ma nges so/ /'dir gzhung ni btsun pa btung ba brgyad po tso tsa'i 'bras bu las byung ba dang / chu shing gi 'bras bu las byung ba dang / rgya shug las byung ba dang / 'bra go las byung ba dang / rtsub 'gyur las byung ba dang / rgun dang u dum bA ra las byung ba dang / n+ya gro d+ha las byung ba dang / khyab gnas las byung ba gang dag lags pa de dag rtsa ba'i khu ba'am/ sdong bu'i khu ba'am/ 'dab ma'i khu ba'am/ me tog gi khu ba dang bsres shing sbyar na 'tshal du rung ngam/ gal te mi skyur ba dang myos par mi 'gyur ba dang / mi bska ba dag yin na btung du rung ngo / /de las lhag pa chus btab pa dag ni zhag bdun pa'am/ 'tsho ba'i bar du bcang ba dag yin no zhes gsungs pa yin no/ /thun tshod du rung ba yang des ma gtor bar bya'o zhes bya ba ni/ thun tshod du rung ba'i rdzas gro 'ja' la sogs pa yang chu grang mo des ma gtor ma btab par btung bar mi bya'o/ /mar srub pa'i tshe dang 'bru mar 'tshir ba'i tshe na yang chu grang mos gdab dgos mod kyi/ 'on kyang de'i tshe na btab pa ni rung ma byas pa nyid ma yin te/ sbyor ba de ni ma grub pa'i gnas skabs yin pa'i phyir ro/ /mar dang 'bru mar dag ni grub pa la rung bar bya bar bzhed do/ /bu ram yang mes bskol ba na chu grang mos gdab par bya ba yin mod kyi/ de'i tshe chus btab pa des rung bar byas pa nyid du mi chud do/ /zhag bdun pa la ni mes rung bar bya ba mi srid de/ 'dir gzhung ni/ de nas spre'u de phyogs gcig tu song ste/ sbrang rtsi'i lhung bzed de chu grang mos gtor nas bcom ldan 'das la phul ba dang / bcom ldan 'das kyis de bzhes te rung bar byas pa'i phyir ro zhes gsungs pa yin no/ /de lta bas na thams cad du yang chu ni grang mo nyid yin par khas blang ngo / /sa bon dang skye ba 'jig pa'i ltung byed do zhes bya ba de bshad zin to// //'phya ba'i ltung byed smra bar 'dod nas/ gang zag bcu gnyis po dag byed pa po nyid yin no zhes bya ba smras te/ 'phya ba'i ltung byed 'di la gnas khang bsko ba la sogs pa gang zag bcu gnyis po dag byed pa po dag yin te/ de dag gi yul la 'phya na ltung byed 'byung ba'i phyir ro/ /gang zag bcu gnyis po dag gang zhe na/ gnas khang zas la bsko ba gnyis/ /thug pa bag chos 'brim pa gnyis/ /phran tshegs 'brim par byed pa dang / /snod spyad 'brub dang gos kyi gnyis/ /dbyar gyi ras chen sbed dang 'ged/ /mngag gzhug pa dang mdzes chos te/ /gang zag bcu dang gnyis po dag /ston pas yang dag bshad pa yin/ /zhes gsungs pa yin te/ de dag ni dge 'dun gyi las byed pa bsnyen par rdzogs pa'i dpe tsam du zad kyi/ 'dir shing tog 'brim pa la sogs pa dag kyang bsdu'o/ /ma bskos pa dag kyang ngo zhes bya ba yang byed pa po nyid yin no zhes bya bar sbyar ro/ /kyang ngo zhes bya ba'i sgras ni/ bskos pas dag kyang byed pa po nyid yin par bsdu'o/ /'di skad bstan te/ gal te dge 'dun gyi las byed pa'i dge slong bskos kyang rung ma bskos kyang rung ba ste/ de la 'phya'am gzhogs 'phyas byed na ltung byed do/ /sbyor ba dag bag yangs su byas pa yang ngo zhes bya ba yang byed pa po nyid yin no zhes bya bar sbyar ro/ /yang ngo zhes bya ba'i sgra ni sngar kyang ngo zhes smos pa'i rjes bsnyags pa'i phyir te/ sbyor ba dag bag yangs su ma byas pa yang byed pa po nyid yin par bsdu'o/ /'di skad bstan te/ dge 'dun gyis las kyi sbyor ba btang ba yang rung ste/ ma btang ba yang rung ste/ de la 'phya 'am gzhogs 'phyas byed na ltung byed do/ /'dir mdo de gnyis kyi gzhung ni mdo snga ma ni gang zag bcu gnyis su ma bskos pa sbyor ba ma btang ba dag la 'phya ba dang gzhogs 'phyas byed na ltung byed do zhes gsungs pa yin pa'i phyir ro/ /mdo 'og ma shos kyi ni bskos pa sbyor ba btang ba dag la 'phya ba dang / gzhogs 'phyas byed na ltung byed do zhes gsungs pa yin no/ /ci zhig rjes su sgrub na de dag byed pa po nyid yin zhe na/ de'i phyir bdag dang 'brel ba'i don gyis thos par 'phya 'ang rung zur gyis gzhogs 'phyas byed kyang rung ngo zhes bya ba smras te/ rung ngo zhes bya ba'i sgras kha gnyis su smos pa ni phyogs de gnyis gang byas kyang rung ngo zhes bstan pa'i phyir ro/ /bdag dang 'brel ba'i don gyis zhes bya ba ni/ bdag nyid kyi dgos pas 'phya 'am gzhogs 'phyas byed pa'o/ /'dir gzhung ni gzhan gyi don du 'phya 'am/ gzhogs 'phyas byed na nyes byas so zhes gsungs pa yin no/ /thos par zhes bya ba ni/ ci nas kyang dpyas bya ba'i dge slong gis mngon sum du thos par 'gyur ba de ltar 'phya 'am gzhogs 'phyas byed pa'o/ /'phya zhes bya ba ni/ ming nas 'byin cing thos par ngor 'phya ba'i rang bzhin go bar byed pa'o/ /zur gyis zhes bya ba ni/ gang la dpyas bya ba de'i ming nas mi 'byin par 'phya ba ste/ kha cig 'di ltar byed do zhes zer ba'o/ /gzhogs 'phyas zhes bya ba ni ming nas mi 'byin par gzhan la brjod pa'i tshul gyis thos par 'phya ba'i rang bzhin go bar byed pa'o/ /'phya ba dang gzhogs 'phyas byed pa de gnyis kyang gal te bskur bar gyur pa yin na/ de'i tshe kha na ma tho ba 'dir 'gyur gyi bden pa yin na ni mi 'gyur ro/ /bdag dang 'brel pa'i don gyis zhes bya ba dang / thos par zhes bya ba'i tshig ni 'phya ba dang / gzhogs 'phyas byed pa'i phyogs gnyi ga dang sbyar bar rig par bya'o/ /'dir gzhung ni mdza' bo dang sa las skyes gnyis tshe dang ldan pa nye dga' dang lhan cig 'du 'dzi'i gtam gyi phyir 'khod pa dang / tshe dang ldan pa gyad bu nor phyogs der 'ongs pa dang zhes gsungs pa yin no/ /bgrangs pa la ni dngos gzhi'o zhes bya ba la/ bgrangs pa zhes bya ba ni ltung ba 'byin par byed pa de dge 'dun gyis gsol ba'i las kyis 'phya ba dang / gzhogs 'phyas byed pa'i grangs su bgrangs pa ste/ gal te de ltar bgrangs kyang yang 'phya ba dang / gzhogs 'phyas byed na gang zag rnam pa de lta bu la gang zag bcu gnyis po de dag dngos gzhi'i kha na ma tho ba'i byed pa po nyid yin no/ /ma bgrangs pa la ni nyes byas kyi'o zhes bya ba'i tha tshig go/ /cung zad tsam yang dang du len par mi nus pa la ni brjod par mi bya'o zhes bya ba ni/ cung zad tsam yang dang du len par mi nus pa'i gang zag la bskul ba dang dran par bya ba la sogs pa mngon sum du brjod par mi bya ba'i tha tshig go/ /'di skad bstan te/ cung zad tsam yang dang du len par mi nus pa las bskul ba dang / dran pa bya ba la sogs pa mngon sum du cung zad kyang brjod par mi bya'o/ /ngor 'phya ba dang gzhogs 'phyas byed pa gnyis las gzhan pa'i brjod pa gang yin pa de 'dir bsdus pa yin no/ /zhe sdang bar gyur pa de rang gis las su bsko bar mi bya'o zhes bya ba ni/ cung zad tsam yang dang du len par mi nus pa'i gang zag gang yin pa de/ zhe sdang bar gyur cing mi dga' bar gyur na/ zhe sdang bar gyur pa de dge 'dun gyi las byed pa'i dge slong rang gis dge 'dun gyi las su bsko bar mi bya ste/ brgyud pas ni bsko bar bya'o/ /'phya ba'i ltung byed do zhes bya ba de bshad zin to// //bam po nyi shu rtsa bzhi pa/ bsgo ba rna la gzon pa'i ltung byed smra bar 'dod nas/ zhar la 'di brjod par bya ste/ gleng bar gtogs pa'i bsgo ba tshig gis rna la gzon pa dang / cang mi smra bas rna la gzon pa dang / gang zag bstan pa rnams la ngor 'phya ba dang zur gyis gzhogs 'phyas byed pa gsol bas mi bgrang bar mi bya'o zhes bya ba ni/ gleng bar gtogs pa'i bsgo ba tshig gis rna la gzon pa dang / cang mi smra bas rna la gzon pa dang / gang zag bstan pa rnams la ngor 'phya ba dang / zur gyis gzhogs 'phyas byed pa zhes bya bar tshig rnam par sbyar te/ de dag la gsol ba'i las kyis mi bgrang bar mi bya zhing bgrang bar bya'o zhes bya ba'i tha tshig go/ /gleng bar gtogs pa'i bsgo ba tshig gis rna la gzon pa zhes bya ba la sogs pa bzhi'i tshig gi don bshad pa brjod par bya ste/ gleng bar gtogs pa'i bsgo ba tshig gis rna la gzon pa zhes bya ba la/ gleng bar gtogs pa'i zhes bya ba ni gleng ba dang 'brel ba gling ba'i rnam pa'o/ /de'i bsgo ba zhes bya ba ni gleng bar gtogs pa bsgo ba'i tshig ste/ gleng ba pos dris pa'i tshig gang yin pa'o/ /bsgo ba de rna la gzon pa rnam pa gnyis te/ tshig gis rna la gzon pa dang / cang mi smra bas rna la gzon pa'o/ /de la tshig gis rna la gzon pa ni tshig mi mthun pas rna la gzon pa ste/ gleng ba pos gleng bar bya ba'i gang zag gis gleng bar gtogs pa'i bsgo ba rna la gzon pa'i tshig gang yin pa'o/ /cang mi smra bas rna la gzon pa ni/ cang mi smra bas rna la gzon pa zhes bya bas bstan to/ /gang zag bstan pa rnams la ngor 'phya ba zhes bya ba ni/ gang zag bcu gnyis sngar bstan pa rnams la ngor 'phya ba'o/ /zur gyis gzhogs 'phyas byed pa zhes bya ba ni/ gang zag bcu gnyis po de dag nyid la zur gyis gzhogs 'phyas byed pa'o/ /gsol bas mi bgrang bar mi bya'o zhes bya ba ni/ gang zag bzhi po de dag gsol ba sngon du btang ba'i las kyis bsgo ba tshig gis rna la gzon pa nyid dang / cang mi smra bas rna la gzon pa nyid dang / ngor 'phya ba nyid dang / zur gyis gzhogs 'phyas byed pa nyid du go rims bzhin du bgrang bar bya ste/ bgrang ba zhes bya ba ni/ nged kyis khyod kyi spyod pa dam pa ma yin pa 'di 'dra ba shes te/ khyod gang zag spyod pa dam pa ma yin pa dang ldan pa de lta bu dag gi nang du bcug go zhes khrel med pa rnam pa de lta bu nyid kyi grangs su de dag bgrang ba'o/ /ji zhig byas na bsgo ba rna la gzon pa'i ltung byed du 'gyur zhe na/ de'i phyir dge slong gis bsgo ba rna la gzon na'o zhes bya ba smras te/ dge slong rnams kyis bsgo ba de rna la gzon na'o/ /bsam pa ji lta bus she na/ de'i phyir der 'dun pas so zhes bya ba smras te/ rna la gzon par 'dun pas so/ /ji ltar zhe na/ de'i phyir gzhan brjod pas so zhes bya ba smras te/ dge slong gis bsgo ba ni/ dge slong gis dri ba las gzhan pa mi mthun pa log pa brjod pa gang yin pa des rna la gzon na'o/ /de ltar yang 'dir gzhung ni rnam par 'byed pa las dge slong gis ji tsam du gzhan 'dri ba la lan gzhan 'debs na thams cad du ltung byed du 'gyur ro zhes gsungs pa yin no/ /'dis log par smras so zhes go na kha na ma tho ba 'dir 'gyur te de ltar yang gzhung ni zhu ba las dbus pa'i tshig gis mtha' 'khob pa la 'am/ mtha' 'khob pa'i tshig gis dbus pa la gzhan dang gzhan du brjod na nyes byas so zhes gsungs pa yin no/ /cang mi smra bas na nyes byas so zhes bya ba ni/ cang mi smra bas dge slong gis bsgo ba rna la gzon na ni nyes byas so/ /mi dran no zhe na/ yang ngo zhes bya ba ni/ dge slong gis bsgo ba rna la gzon na nyes byas so/ /'dir gzhung ni zhu ba kha cig las mi dran no zhes zer na nyes byas so zhes gsungs pa yin no/ /gal te brjod par bya ba sdug bsngal bar 'gyur ba yin na med do zhes bya ba ni/ gal te brjod par bya ba smra bar bya ba'i gzhan la sdug bsngal bar 'gyur ba'i rgyu yin na gzhan brjod kyang ltung ba med do/ /de'i phyir gsad par bya ba mthong ngam zhes 'dri ba la re zhig me 'de shig /re zhig skom 'thung shig /re zhig ngal so shig nam mkha' mthong ngo / / sen mo mthong ngo / /don dam par na sems can nam gsad par bya ba ma mthong ngo zhes smras na ltung ba med do zhes bya ba 'dis ni brjod par bya ba sdug bsngal bar 'gyur ba ston to/ /gsad par bya ba mthong ba ni gsad par bya ba mthong ba ste/ de mthong ngam zhes 'dri ba'am zhes bya ba ni/ gal te gsad par bya ba'i gshed ma dag dge slong la 'di skad ces khyod kyis gsad par bya ba mthong ngam zhes 'dri ba'o/ /de la dge slong gis mthong bzhin du 'di skad ces/ re zhig me 'de shig ces bya ba la sogs pa gzhan brjod par bya'o/ /don dam par na sems can nam gsad par bya ba ma mthong ngo zhes bya ba ni/ mu stegs can gyis kun brtags pa'i sems can ma mthong ba ste/ bsam pa de ltar byas nas rnam pa de lta bu ma mthong ngo zhes smras na ltung ba med do/ /gang du che bzhi nyid bya dgos par 'gyur ba'i gnas der bsten par mi bya'o zhes bya ba ni/ phyogs gang du che bzhi nyid bya dgos par 'gyur ba zhal che dpang du gsol lo zhes zer bar 'gyur ba'am/ rna la 'dzin par 'gyur ba'i gnas der bsten par mi bya'o/ /de ltar yang 'dir gzhung ni de lta bas na dge slong 'thab mo'i nang du gnas par mi bya zhing che bzhi dbye bar mi bya ste/ thag ring po kho nar byol bar bya'o/ /dge slong 'thab mo'i nang du gnas sam che bzhi 'byed na 'gal tshabs can du 'gyur ro zhes gsungs pa yin no/ /gnod pa'i sgo ma bcad pas che bzhi dbye bar mi bya'o zhes bya ba ni/ gang gis chad pa la sogs pa gnod pa'i sgo ma bcad pa de ni gnod pa'i sgo ma bcad pa'i dge slong ste/ des che bzhi dbye bar mi bya'o/ /'di skad bstan te/ che bzhi phye ba las gzhan gsad pa dang bcing ba la sogs pa'i gnod pa 'byung du dogs pa gang yin pa'i gnod pa de'i sgo dang srang dang rgyur gyur pa sgo gang nas gnod pa de 'byung bar 'gyur ba'i sgo de gcad pa ma byas par che bzhi dbye bar mi bya'o/ /bsgo ba rna la gzon pa'i ltung byed do zhes bya ba de bshad zin to/ / //gnas mal gyi ltung byed smra bar 'dod nas/ khri dang khri'u dang / stan nang tshangs can dang / la ba dang / sngas dang / gor bu zhes bya ba ni gnas mal lo zhes bya ba smras te/ khri zhes bya ba ni mal khri la sogs pa'o/ /khri'u zhes bya ba ni rkang rten gyi khri'u la sogs pa'o/ /stan nang tshangs can zhes bya ba ni ras bal la sogs pas brdzangs pa'o/ /la ba zhes bya ba ni bal las byas pa'i gos spu dang bcas pa'o/ /sngas zhes bya ba ni sngas nang tshangs can la sogs pa'o/ /gor bu zhes bya ba ni stan zlum po la sogs pa'o/ /khri la sogs pa smos pa ni mtshon pa tsam du zad de/ dre'u rngog dang / dbyam po dang / be'u ras la sogs pa gnas mal gyi yan lag tu gtogs pa thams cad kyang bsdu ste/ de dag ni gnas mal lo/ /'dom bzhi bcu rtsa dgu tshun chad ni de'i nyen kor ro zhes bya ba ni/ gnas mal 'dug pa'i phyogs nas brtsams te/ 'dom bzhi bcu rtsa dgu tshun chad ni de'i gnas mal nyen kor yin no/ /bskor ba la ni sgo khang nas so zhes bya ba ni/ gtsug lag khang dang khang khyim rtsig pa la sogs pas bskor ba la ni sgo khang nas brtsams nas 'dom bzhi bcu rtsa dgu tshun chad de'i nyen kor yin no/ /'dir gzhung ni ma mo las dge slong phyi rol bla gab med par gnas mal bshams nas sgo khang gi phyi rol nas 'dom bzhi bcu rtsa dgu phan chad du 'gro bar mi bya'o/ /gal te 'gro na 'gal tshabs can du 'gyur ro zhes gsungs pa yin no/ /de las 'da' ba'i phyir brjed pas kyang 'gro ba dang nang du gnyid log pa dang snyoms par zhugs pa la sogs pas ni lkog tu gyur pa yin no zhes bya ba ni/ ltung pa'i rgyur gyur pa gnas mal de las 'da' ba'i phyir zhes bya ba yongs su btang ba'i phyir/ brjed pas kyang rung ma brjed par blo sngon du btang bas kyang rung ste/ gnas gzhan du 'phags shing 'gro ba gang yin pa dang / nang du zhes bya ba gnas mal gyi gnas de'i nang nyid du gnyid log pa dang / snyoms par zhugs pa la sogs pas ni lkog tu gyur pa yin no/ /kha na ma tho ba 'di'i rgyur gyur pa lkog tu gyur pa ni rnam pa gnyis te/ lkog tu gyur pa rnam pa gnyis dang / go rims bzhin du 'dir gzhung ni gal te lam khar bdag gis dge 'dun gyi gnas mal phyogs 'di lta bu zhig tu gzhag go snyam du dran zhing zhes bya ba nas ltung ba de yang chos bzhin du phyir bya'o zhes bya ba'i bar du gsungs pa dang / bla gab med par bting ngam 'ding du bcug pa las ma brtul lam brtul du ma bcug par gtsug lag khang du zhugs te/ gnyid log gam snyoms par zhugs na zhes gsungs pa yin no/ /spyi'i tshig kyang yod de bla gab med par gnas mal bzhag ste zhes bya ba nas gtsug lag khang du 'jug cing phan phun du gyur na ltung byed do zhes bya ba'i bar du gsungs pa yin no/ /sogs pa zhes bya ba'i sgras ni phan phun gzhan yang bsdu bar rig par bya'o/ / gnas skabs gang la kha na ma tho ba gang du 'gyur zhe na/ de'i phyir phan phun gyi mdun rol du ni sbyor ba'o zhes bya ba smras te/ gnas mal de phan phun du gyur pa'i mdun rol du phan phun du ma gyur pa'i gnas skabs su sbyor ba'i kha na ma tho bar 'gyur ro/ /phan phun du gyur pa dang 'das pa de la ni mtha'o zhes bya ba ni/ gnas mal phan phun du gyur pa dang / mtshams las 'das pa la ni mtha' ste/ dngos gzhi'i kha na ma tho bar 'gyur ro zhes bya ba'i tha tshig go/ /lkog tu gyur pa zhes bya ba'i 'gro ba dang / mtshams ma 'das su zin kyang gnas mal phan phun du gyur pa de lta na yang dngos gzhi'i kha na ma tho ba kho nar 'gyur te/ gnas mal gyi mtshams las 'das na phan phun du ma gyur kyang mtshams las 'das pa kho na dngos gzhi'i kha na ma tho ba kho nar 'gyur ro/ /mtshams las ma 'das kyang phan phun du gyur na yang dngos gzhi'i kha na ma tho bar 'gyur ro/ /mtshams las kyang 'das pa la phan phun du gyur na yang dngos gzhi kho na'o/ /mtshams kyi nang du zhugs la phan phun du ma gyur na ni nyes byas su 'gyur ro/ /brtul ba byas sam byed du bcug pa la de dag mi 'byung ngo zhes bya ba ni/ gnas mal brtul ba rang gis byas sam gzhan byed du bcug pa la ni sbyor ba dang mtha' de dag mi 'byung ngo / /bcol ba'i dge slong yod pa la yang mi 'byung ngo zhes bya ba ni/ gang gis bla gab med par gnas mal bting ngam 'ding du bcug pa'i mtshan nyid kyi phyir dge slong la bcol ba yod pa de ni bcol ba'i dge slong yod pa ste/ bcol ba'i dge slong yod pa'i dge slong de la yang sbyor ba dang mtha' de dag mi 'byung ngo / /nyam nga ba dang phrad pa la yang mi 'byung ngo zhes bya ba ni/ tshul khrims dang srog gi bar chad la sogs pa'i nyam nga ba dang phrad pa la yang sbyor ba dang mtha' de dag mi 'byung ngo / /spyod pa ni byed pa dang 'dra'o zhes bya ba ni/ gzhan gyi gnas mal bla gab med par bting ba la spyod pa gang yin pa de 'gro ba ni rang gis gding bar byed pa dang 'dra'o/ /'di skad bstan te/ ji ltar rang gis bla gab med par gnas mal bting ba bcol ba'i dge slong med par 'gro ba la kha na ma tho bar 'dir 'gyur ba de bzhin du gzhan gyis bting ba la longs spyod spyod pa/ bcol ba'i dge slong med par 'gro ba la yang kha na ma tho ba 'dir 'gyur te/ de lta bas na gzhan gyis byed du bcug pa la longs spyod pa yang rang gis byas pa dang / kha na ma tho ba 'dra'o/ /gnyi ga cig car spyod spyod pa la ni phyis langs par bya ba dang ldan pa yin no zhes bya ba ni/ gnas mal brtul ba'o zhes bya bar sbyar te/ dge slong gnyis khri la sogs pa gnas mal la cig car spyod spyod pa la ni gang phyis langs pa'i ngang tshul can de ni phyis langs pa ste/ dge slong gang phyis langs pa des gnas mal de brtul bar bya ba dang ldan pa yin no/ /'di skad bstan te/ gal te dge slong gnyis cig car gnas mal gcig la 'khod 'khod par gyur na/ gang phyis langs pa shos des gnas mal de bla gab med pa nas brtul bar bya ba yin no/ /gal te mnyam du na gzhon pas so zhes bya bas ni/ gal te gnyi ga mnyam du langs par gyur na gzhon pa shos kyis gnas mal brtul bar bya'o/ /mnyam pa nyid yin na gnyi gas so zhes bya ba ni/ lo grangs mnyam pa nyid yin na gnyi gas gnas mal brtul bar bya'o/ /'di skad bstan te/ gal te gnyi ga lo'i mgo mnyam pa nyid yin na/ gnyi ga kho nas gnas mal brtul bar bya'o/ /bcol te 'gro bar bya'o zhes bya ba smras na bcol ba'i yul gyi rang gi ngo bo nyid bstan pa'i phyir/ ngo tsha med pa dang nang dang bcas pa dang rgas pa dang na ba dang / bsnyen par ma rdzogs pa rnams la ni 'di bcol bar bya ba ma yin pa nyid do zhes bya ba smras te/ ngo tsha med pa zhes bya ba ni tshul khrims la g.yem pa yin par rig par bya'o/ /nang dang bcas pa zhes bya ba ni zhe 'gras pa'o/ /rgas pa zhes bya ba ni rgas pas nyam chung ba'o/ /na ba zhes bya ba ni/ sbyor mi bzod pa'o/ /bsnyen par ma rdzogs pa rnams zhes bya ba ni/ bsnyen par ma rdzogs pa thams cad do/ /'di zhes bya ba ni gnas mal lo/ /bcol bar bya ba ma yin pa nyid do zhes bya ba ni/ gnas mal brtul du gzhug par bya ba ma yin pa nyid do/ /'di skad bstan te/ ngo tsha med pa la sogs pa de dag la gnas mal brtul ba rnam pa thams cad du bcol bar mi bya ba nyid yin no/ /da ni bcol ba'i rang gi ngo bo bstan pa'i phyir/ gtsug lag khang 'di re zhe 'am ltos shig ce 'am/ gnas mal 'de re zhe 'am/ bsdus shig ce'am/ sgo lcags chugs shig ces bya ba lta bu ni bcol ba dag yin no zhes bya ba smras te/ bcol ba ni rnam pa lnga ste/ gtsug lag khang 'de re zhe'am/ gtsug lag khang 'di ltos shig ce'am/ gnas mal 'de re zhe 'am/ gnas mal bsdus shig ce 'am/ sgo lcags chugs shig ces bya ba dag go/ /lta bu zhes bya ba'i sgra ni rnam pa zhes bya ba'i don te/ bcol ba rnam pa lnga po de lta bu dag go/ /bcol ba dag yin no zhes bya ba ni/ bcol ba rnam pa lnga po de dag ni bcol ba dag yin te/ de dag gi nang nas gang yang rung ba cig bsgo na yang bcol ba nyid yin no/ /sngar phan phun zhes smos pa de'i rang gi ngo bo bstan pa'i phyir/ phan phun ni gsum ste rlung gis bzlog pa dang / char pas rim pa gzhan slebs pa dang / sril la sogs pas kyang ngo zhes bya ba smras te/ phan phun ni gsum ste/ rlung gis gnas mal bzlog pa dang / char pas gnas mal gyi rim pa gzhan la slebs pa dang / sril dang grog mkhar byed pa la sogs pas gnas mal gyi rim pa gzhan slebs pa ste/ rim pa gzhan slebs pa zhes bya ba'i rjes bsnyags pa'i phyir/ kyang ngo zhes bya ba'i sgra smos so/ /phan phun rnam pa de gsum las gang byung ba yang rung ste/ gnas mal phan phun du gyur ces bya'o/ /sbyor ba dang mtha' gnyis kyi ngo bo nyid bstan nas/ 'dir kha na ma tho ba ji lta bu dang gang gi byed pa po nyid yin zhe na/ de'i phyir de la dge 'dun gyi gnas mal nyid rang ngam bskos pas bla gab med par gzhag par byas pa lta bu ni byed pa po dag yin no zhes bya ba smras te/ de la zhes bya ba ni/ gnas mal bla gab med par 'jog pa la ste/ de la byed pa po ni dge 'dun gyi gnas mal nyid ces bya ba la sogs pa tshig lhag ma rnams yin par rig par bya'o/ /de la bla gab med par gzhag par bya ba ni/ dge 'dun gyi gnas mal nyid de/ de gang zag gi ma yin no/ /'jog par byed pa ni dge slong rang ngam/ rang gis bskos pa'i dge slong dag gis so/ /dge 'dun gyi gnas mal de rang ngam bskos pas ci zhig byas na kha na ma tho ba 'di'i byed pa po dag yin zhe na/ bla gab med par gzhag par byas pa na'o/ /yan lag de lta bu ni kha na ma tho ba 'di'i byed pa po dag yin no/ /gnas skabs gang la kha na ma tho ba ji lta bu'i byed pa po yin zhe na/ de'i phyir mthar thug na dngos gzhi'o zhes bya ba smras te/ phan phun du gyur pa'i mthar thug pa'i gnas skabs na dngos gzhi'i kha na ma tho ba'i byed pa po nyid yin no/ /sbyor ba la ni nyes byas kyi'o zhes bya ba ni/ sbyor ba'i gnas skabs na ni nyes byas kyi byed pa po nyid yin no/ /re zhig gi dus su gzhan 'dug pa'i bar du yang de'o zhes bya ba la/ re zhig gi dus su zhes bya ba ni/ dus yun cung zad cig go/ /gzhan zhes bya ba ni/ gang zag gzhan no/ /'dug pa'i zhes bya ba ni/ gnas mal de la 'dug pa'i'o/ /bar du zhes bya ba ni/ bar skabs der ro/ /yang zhes bya ba ni/ gnas mal de phan phun du gyur na yang ngo / /de'o zhes bya ba ni nyes byas so/ /'di skad bstan te/ gnas mal bla gab med par gzhag pa la dus yun cung zad cig gang zag gzhan 'dug pa'i bar skabs su gal te rlung la sogs pas phan phun du gyur na de lta na yang dang po 'jog pa'i dge slong de la nyes byas su 'gyur te/ ltung byed du ni mi 'gyur ro/ /'dir gzhung ni zhu ba las 'chag pa'i gnas mal mnos pa dge slong gis dus cung zad cig blangs nas/ dge slong gis bting ba de yang mi brtul lam/ brtul du mi 'jug na nyes byas so zhes gsungs pa yin no/ /gang zag yang ngo zhes bya ba yang nyes byas te/ gang zag gis gnas mal bla gab med par gzhag pa char pa la sogs pas phan phun du gyur na de ltar na yang nyes byas kho na'o/ /'dir gzhung ni zhu ba las gang zag gi gnas mal yin la/ de dge slong gis 'ding du bcug nas dge slong 'dug pa la ma bcol bar de nas 'gro na nyes byas so zhes gsungs pa yin no/ /de nyid bslab pa'i gzhi 'og ma bzhi la yang 'dra bar bstan pa'i phyir/ 'og ma bzhi la yang ngo zhes bya ba smras te/ bslab pa'i gzhi 'di'i 'og ma bslab pa'i gzhi bzhi po 'ding ba dang / skrod pa dang / phyis gnon 'byung ba dang / rtsa ba 'byung ba la 'dug pa zhes bya ba dag la yang gang zag gi gnas su ni nyes byas so/ /'dir gzhung ni zhu ba las gang zag gis gtsug lag khang du 'ding na nyes byas so/ /gang zag gi gnas mal nas skrod na nyes byas so/ /gang zag gi gtsug lag khang yin la/ der dge slong gis phyis gnon byas te/ gnas mal bca' na nyes byas so/ /gang zag gi gtsug lag khang gi steng gi nam mkha' la yang tog byas pa ljid kyis phab ste/ 'dug gam nyal na nyes byas so zhes gsungs pa yin no/ /reg par bya ba ma yin pa nyid la ni mi 'gyur ro zhes bya ba ni/ gser la sogs pa las byas pa'i khri la sogs pa dge slong gis reg par bya ba ma yin pa nyid ni bla gab med par bzhag ste/ ma brtul lam/ brtul du ma bcug par de nas song na nyes byas su yang mi 'gyur te/ de dag brling bas rlung la sogs pas phan phun du mi 'gyur ba'i phyir ro/ /'dir gzhung ni zhu ba las dge slong gis khri 'am khri'u bla gab ma mchis par bzhag ste/ ma brtul lam brtul du ma stsal bar de nas gzhan du mchis na ltung bar mi 'gyur ba 'ga' mchis sam/ yod de rin po che las byas pa yin na'o zhes gsungs pa yin no/ /bsdu bar bya ba bting ste bsod snyoms la zhugs pa na gal te rlung dang char pa 'ong na gtsug lag khang na 'khod pa rnams kyis bsdu bar bya'o zhes bya ba ni/ bsdu bar bya ba gnas mal te dge slong gis bla gab med par bting ste bsod snyoms la zhugs pa na de'i tshe gal te rlung dang char pa 'ong na dge slong gtsug lag khang na 'khod pa rnams kyis gnas mal de dag bsdu bar bya'o/ /'di skad bstan te/ gal te dge slong gis bla gab med par gnas mal 'jog cing rang yang bsod snyoms la 'gro ba la/ de'i tshe rlung dang char ba 'ong na gtsug lag khang na 'khod pa'i dge slong rnams kyis gnas mal de dag brtul bar bya'o/ /bsod snyoms la zhugs pa'i dge slong de nyid kyis kyang / rlung dang char pa mthong nas gus par byas te/ myur du phyir 'ong bar bya'o/ /de'i don nyid la nges pa med pa dang na smad pa ma yin no zhes bya ba ni/ bsod snyoms kyi don nyid du bsod snyoms kyi dgos pa'i dbang gis song ba la ni nyes pa med pa yang ma yin la/ na smad pa yang ma yin te/ 'di ltar kha na ma tho ba yongs su rdzogs par 'gyur ro/ /'dir gzhung ni brtul bar bya ba bting ste bsod snyoms la 'jug par mi bya'o/ /'jug na 'gal tshabs can du 'gyur ro zhes gsungs pa yin no/ /gal te brjed pas lam ring du 'das sam phyis dran pa rnyed na phyin chad 'di ltar mi bya'o zhes sems bskyed par bya zhing tshig tu yang brjod par yang bya'o zhes bya ba ni/ gal te brjed pas yul gzhan du 'gro zhing lam ring du 'das par gyur tam/ gnas su phyin nas bdag gis bla gab med par gnas mal bzhag par gyur to snyam du dran pa rnyed na phyin chad 'di ltar mi bya'o zhes bya ba yang dang yang du 'di ltar mi bya'o zhes sems bskyed par bya zhing tshig tu brjod par yang bya'o/ /gal te lam ring por ma phyin par dran pa rnyed na ni dge slong des phyir ldog par bya'o/ /gal te dge slong lam nas tshur 'ong ba zhig dang phrad par gyur na bsdu ba'i phyir de la bcol bar bya'o zhes bya ba ni/ gal te dge slong de phar 'gro ba na dge slong lam nas tshur 'ong ba zhig dang mngon sum du phrad par gyur na/ gnas mal brjed de bla gab med pa nas ma bsdus pa de bsdu ba'i phyir tshur 'ong ba de la bcol bar bya'o/ /khas blangs pas son pa nyid na de bya ba nyid do zhes bya ba ni/ tshur 'ong ba'i dge slong gang gis 'di skad ces kho bo der phyin nas bsdu bar bya'o zhes khas blangs pa des gnas mal gyi gnas su son pa nyid na gnas mal bsdu ba de bya ba nyid yin no/ /'dir gzhung ni dge slong des kyang dge slong de la khas blangs nas gus par byas te bsdu bar bya'o/ /gal te sdud par mi byed na 'gal tshabs can du 'gyur ro zhes gsungs pa yin no/ /lam nas tshur 'ongs pa zhes smos pa ni mtshon pa tsam du zad de/ gzhan la yang rung ba'i phyir ro/ /gnas nas 'phags par 'gyur ba na nyam nga ba dang phrad par mi 'gyur ba lta na gnas mal bsdu bar bya'o zhes bya ba ni/ dge slong gnas nas 'phags par 'gyur ba na nyam nga ba dang phrad pa tshul khrims dang srog la sogs pa'i bar chad du 'gyur ba med pa lta na/ gnas mal skyabs yod pa na 'dug kyang rung ngo / /bla gab med pa na 'dug kyang rung ste bsdu bar bya'o/ /'dir gzhung ni phran tshegs dag las dge slong gis gnas mal bsdus nas 'gro bar bya'o/ /mi sdud na 'gal tshabs can du 'gyur ro zhes gsungs pa yin no/ /nyam nga ba dang phrad par mi 'gyur ba lta na zhes smos pa ni/ gnas mal sdud par byed pa na 'phyis pa'i dbang gis gal te na srog gi bar chad la sogs pa 'byung bar 'gyur du dogs pa bsal ba'i phyir ro/ /gal te dri ma can du gyur na sprug par bya'o zhes bya ba ni/ 'gro bas gal te gnas mal sa rdul la sogs pas dri ma can du gyur na phyi rol rlung kha la sogs par sprug par bya'o/ /'dir gzhung ni ma mo las dge slong 'gro bar chas pa zhes bya ba nas gnas mal dri ma can du gyur na sprug par bya ba'i bar du gsungs pa yin no/ /de 'bul bar bya'o zhes bya ba ni/ dge slong 'gro bar chas pas dge 'dun nam gang zag gzhan gyi gnas mal bdag spyod spyod pa de gal te dus kyis thub cing nyam nga ba dang phrad par mi 'gyur ba lta na khungs su phyir dbul bar bya'o/ /yang na bcol bar bya'o zhes bya ba ni/ gal te dus kyis mi thub cing nyam nga ba dang phrad par 'gyur ba lta na gnas mal gzhan la bcol bar bya'o/ /su la zhe na/ de'i phyir dge slong la'o zhes bya ba smras so/ /de med na dge tshul la'o zhes bya ba ni/ dge slong med na dge tshul la de bcol bar bya'o/ /de yang med na khyim bdag la'o zhes bya ba dang dge tshul de yang med na khyim bdag de la bcol bar bya'o/ /thams cad med na phyogs bzhir rnam par bltas te lde mig sbas nas 'gro bar bya'o zhes bya ba ni/ bcol bar bya ba thams cad med na 'gro ba'i phyir phyogs bzhir bltas te/ lde mig kyog po la sogs pa gzhan gyis ma mthong bar sbas te 'gro bar bya'o/ / gal te lam khar dge slong mthong na phyogs de la brjod par bya'o zhes bya ba ni gal te lam khar bdag gis gnas der gtogs pa'i dge slong tshur 'ong ba mthong na phyogs gang du lde mig sbas pa'i phyogs de lam khar phrad pa'i dge slong de la brjod par bya'o/ /gal te 'ongs pa na khyim gzhan du mgron du bos shing sgo bcad par gyur na rtsig drung ngam shing ljon pa'i drung du stan bzhag ste 'jug par bya'o zhes bya ba ni/ gal te dge slong song ba de'i phyir 'ongs pa na dge slong rnams yon bdag gi khyim gzhan du mgron du bos shing gtsug lag khang gi sgo bcad par gyur na dge slong des gtsug lag khang gi nyen kor gyi rtsig drung ngam shing ljon pa'i drung du rang gi stan bzhag ste/ dge slong rnams gang mgron du bos pa'i khyim gzhan der zan gyi phyir 'jug par bya'o/ /rtsig drung ngam shing ljon pa'i drung zhes smos pa ni/ nyin mtshan bskyab pa'i dpe de tsam du zad de/ gar 'os pa'i phyogs gzhan du yang bzhag tu rung ngo / /de ltar yang 'dir gzhung ni zhu ba las rtsig drung ngam/ gang du nyi mas chud zos par mi 'gyur bar gzhag par bya'o zhes gsungs pa yin no/ /der stan dag g.yar por sbyin no zhes bya ba ni/ dge slong dag mgron du 'bod pa'i khyim gzhan der gtsug lag khang dang 'brel ba'i stan dag g.yar por sbyin no/ /rang gis bskur bar mi bya'o zhes bya ba ni/ dge slong dag rang gi khyim gzhan de nas stan de dag phyir bskur bar mi bya'o/ /de ni khyim pa dang dge tshul dag gi'o zhes bya ba ni/ stan bskur ba de ni khyim pa dang dge tshul dag gi las kho na yin no/ /'di skad bstan te/ khyim pa dang dge tshul dag gis gtsug lag khang du stan de dag bskur bar bya'o/ /med na bskyal ba'i phyir khyim pa la bcol te 'dong bar bya'o zhes bya ba ni/ khyim pa dang dge tshul dag med na stan dag bskyal ba'i phyir khyim bdag la bcol te/ dge slong rnams gtsug lag khang du 'dong bar bya'o zhes bya ba'i tha tshig go/ /'dir gzhung ni dge slong dag zan zos nas stan rang nyid kyi mchan khung nas blangs te/ 'gro ba na bram ze dang khyim bdag dag ci 'phags pa dag rol mo dag 'dong ngam zhes co 'dri bar byed nas/ bcom ldan 'das kyis bka' stsal pa/ rang gis stan bskur bar mi bya bar khyim pa dang / dge tshul dag gis bskur bar bya'o/ /gal te khyim pa dang dge tshul med na khyim bdag de nyid la bcol te 'dong bar bya'o zhes gsungs pa yin no/ /bdag cag gis bskyal lo zhes zer na bzhag ste 'dong bar bya'o zhes bya ba ni/ gal te khyim bdag dag 'di skad ces bdag cag gis bskyal bar bya'o zhes zer na dge slong rnams kyis stan dag bzhag ste 'dong bar bya'o/ /de dag gis ma bskyal na gnas par byed pa dag gis blang bar bya'o zhes bya ba ni/ khyim pa de dag gis bskyal bar khas blangs su zin kyang ma bskyal na gnas par byed pa nye gnas dag gis stan de dag blang bar bya'o/ /'di skad bstan te/ gal te khyim bdag gis stan de dag ma bskyal na gnas par byed pa dag gis blang bar bya'o/ /med na rang gis bya'o zhes bya ba ni/ gnas par byed pa dag kyang med na rang gis blang bar bya ste/ gnas brtan de dag dang dge slong rnams kyis rang gis blang bar bya'o zhes bya ba'i tha tshig go/ /thams cad kyis na gaN+DI brdung bar bya'o zhes bya ba ni/ gal te dge slong thams cad kyis blang bar bya dgos pa zhig yin na/ de'i tshe thams cad 'dus te len du 'dong ba'i phyir gaN+DI brdung bar bya'o/ /'di skad bstan te/ gal te dge slong thams cad kyis bri bkol med par stan de dag blang dgos na de'i tshe/ thams cad kyis stan blang ba'i phyir gaN+DI brdung bar bya'o/ /yon bdag gis gtsug lag khang du rang gi don du stan dag g.yar po byed na sbyin par bya'o zhes bya ba ni/ gal te yon bdag dag gtsug lag khang du lhags te/ gtsug lag khang du yon bdag dag rang gi don du dge 'dun gyi gdan cha dag g.yar po byed na dge 'dun gyis de dag la g.yar por sbyin par bya'o zhes bya ba'i tha tshig go/ /de dag bsrung ba'i phyir dge slong yang gzhag par bya'o zhes bya ba ni/ gtsug lag khang du yon bdag la g.yar ba'i gdan cha de dag bsrung ba'i phyir dge slong rnams kyis dge slong cig gzhag par bya'o/ /des phyogs gcig tu bsdad par bya'o zhes bya ba ni/ dge slong srung mar gzhag pa des khyim bdag bza' btung byed cing gtam zer ba'i nang du mi 'jug par pha zad tsam du phyogs gcig tu yangs kyis bsdad par bya'o/ /rang gi las bya'o zhes bya ba ni/ dge slong des rang gi las bsam gtan dang / kha don dang klog 'dri la sogs pa gang yin pa de dag kyang bya'o/ /sems gtad pa yang ngo zhes bya ba ni/ dge slong phyogs gcig na sdod pa des gdan cha de dag la sems gtad cing ye rig che bar bya ba'o/ /dong na bsdu bar bya'o zhes bya ba ni/ yon bdag dong na gdan cha de dag bsdu bar bya ba'o/ /ma rung ba dag byi dor bya'o zhes bya ba ni/ gdan cha khyim pas ma rung bar byas pa dag dge skos la sogs pas byi dor bya'o/ /chang gis na chu dag gis so zhes bya ba ni/ chang gi snyigs mas ma rung bar gyur na chu dag gis bkru zhing byi dor bya'o/ /snum gyis na chal gyis so zhes bya ba ni/ snum gyis ma rung bar gyur na 'dag pa'i chal gyis byi dor bya'o/ /mi gtsang bas na sa'am 'dag rdzas sam lcibs so zhes bya ba ni/ gdan cha dag mi gtsang bas ma rung bar gyur na sa 'am 'dag rdzas sam lci bas byi dor bya'o/ /gal te thags ma mi gtsang bar gyur pa 'dag rdzas kyis dag par ma gyur na de'i tshe ji ltar bya zhe na/ de'i phyir thags ma ma dag na gcad par bya'o zhes bya ba smras te/ 'breng bu la sogs pa las byas pa'i thags ma ma dag na gcad par bya'o/ /'dir gzhung ni gal te re zhig sbyang bar nus na de lta na legs/ gal te mi nus na 'breng bu bcad de dor bar bya zhing 'breng bu sar pa dag gis yang bslang bar bya'o zhes gsungs pa yin no/ /khyim pa 'dug 'dug pa'i stan ma bsdus pa mthong na bsdu bar bya ba nyid do zhes bya ba ni/ khyim pa 'dug 'dug pa zhes bya ba khyim pas stan du bting ba'i gdan cha ma bsdus pa mthong na gang sus mthong yang rung ste/ de nyid kyis bsdu bar bya ba nyid do/ /'di skad bstan te/ gdan cha gang dag la khyim pa dag 'khod 'khod pa'i gdan cha de dag gal te ma bsdus par gyur na dge slong gang gis de dag mthong ba de nyid kyis bsdu bar bya'o/ /gal te rgas pa dang na ba yin na dge skos kyis so zhes bya ba ni/ gal te mthong ba rgas pa'am na ba yin na dge skos kyis bsdu bar bya ba nyid yin no/ /des sbran par bya ba nyid do zhes bya ba ni rgan po'am/ nad pa des gdan cha ma bsdus pa mthong ba de dge skos la sbran par bya ba nyid yin no/ /thams cad kyis nad pa blta bar bya'o zhes bya ba ni/ mtshams der gtogs pa'i dge slong mi na ba thams cad kyis nad pa blta bar bya'o/ /'dug ste'o zhes bya ba ni/ 'dug ste nad par blta bar bya'o/ /'greng ste ni ma yin no/ /der stan thogs te 'gro bar mi bya'o zhes bya ba ni/ nad pa blta ba der rang gi stan thogs te 'gro bar mi bya'o/ /nad pa'i nad g.yog gis der stan dag bsham par bya'o zhes bya ba ni/ nad pa'i nad g.yog gis gang na nad pa 'dug pa der dge slong dag 'khod pa'i stan bsham par bya'o/ /mkhan po 'am slob dpon dge ba'i phyogs la 'gro na/ gal te gzhan gyi dge ba'i phyogs mi 'phel na phyi bzhin 'gro bar bya'o zhes bya ba ni/ mkhan po 'am slob dpon dge ba'i phyogs la 'gro na/ gal te slob ma dang nye gnas dag gis phyi bzhin 'gro ba ma gtogs par gzhan gyi dge ba'i phyogs mi 'phel ba lta na mkhan po'am slob dpon de'i phyi bzhin 'gro bar bya ba'o/ /de'i phyir rang gis stan bskur bar bya'o zhes bya ba ni mkhan po'am/ slob dpon de'i 'dug par bya ba'i phyir slob ma'am nye gnas dag gis rang gi stan bskur bar bya ba'o/ /'gro ba ma zhus par mi bskur ro zhes bya ba ni/ slob ma'am nye gnas des bdag nyid phyi bzhin 'gro ba ma zhus par stan mi bskur ba'o/ /'di skad bstan te/ bdag kyang slad bzhin mchi'o zhes ma zhus par mkhan po'am slob dpon gyi stan mi bskur ro/ /de rang nyid kyis bskur ro zhes bya ba ni/ stan slob ma la sogs pas phar khyer ba de slob dpon la sogs pa rang nyid kyis phyir bskur bar bya ba'o/ /bla gab med par chos nyan pa na rlung dang char pa byung na bsdu bar bya'o zhes bya ba ni/ bla gab med par chos nyan du bcug pa na rlung ngam char pa 'ong na gang gis stan gang yin pa de nyid kyis de gnas mal du bskur bar bya ba'o/ /rgan po rnams kyi lci ba nyid kyi phyir rang gis mi nus na gzhon nu rnams dang lhan cig brje bar bya'o zhes bya ba ni/ rgan po rnams kyi gnas mal lci ba nyid kyi phyir rang gis brtul mi nus na gzhon nu rnams dang / rgan po rnams phan tshun lci ba yang brjes te bskur bar bya'o/ /'di skad bstan te/ gzhon nu rnams kyi gnas mal gang yin pa de ni yang ba'i phyir rgan po rnams kyis bskur bar bya'o/ /rgan po rnams kyi ni lci ba'i phyir gzhon nu rnams kyis bskur bar bya'o zhes bya ba'i tha tshig go/ /mthun pa dang mthun par gzhag par bya'o zhes bya ba ni/ gnas mal mthun pa dang / mthun par lhan cig gzhag par bya'i/ mi mthun pa dang lhan cig gzhag par mi bya ba ste/ dper na gor bu yang gor bu dag dang / dbyam po yang dbyam mo dag dang / khri la sogs pa yang khri la sogs pa dag dang mthun mthun du bzhag pa lta bu'o/ /gtsug lag khang gzhan du gdan cha dang rdzas rnyed na bskur bar bya'o zhes bya ba ni/ gtsug lag khang gzhan du dge slong dag gdan cha dang / mchod pa'i rdzas dag rnyed na dge 'dun du gyur pa'i dge slong dag gis g.yar por bskur bar bya'o/ /gal te char 'bab pa dang char 'bab tu dogs pa med na'o zhes bya ba ni/ de'i tshe char 'bab pa dang de'i 'og tu char 'bab tu dogs pa med na bskur bar bya'o/ /gal te lam kar rlung dang char pa byung na shing ljon pa'am rtsig drung du bcer bar bya'o zhes bya ba ni/ gal te lam khar rlung ngam char pa byung na/ de'i tshe dge slong srung ba dag gis shing ljon pa'i drung ngam rtsig drung du gdan dang mchod pa'i rdzas de dag phung por bcer bar bya'o/ /rdzas ngan pa gcig gis g.yogs par bya'o zhes bya ba ni/ srung ba dag gis de dag rdzas thams cad kyi nang na rnying pa dag ngan pa gcig gis g.yogs par bya'o/ /gtsug lag khang du phyin nas rdzas rnams bskam par bya'o zhes bya ba ni/ gtsug lag khang du phyin nas rdzas gsher ba rnams bskam par bya ba'o/ /'dir gzhung ni khyim bdag cig la gtsug lag khang grong mtha' pa dang dgon pa pa gnyis yod nas dge slong dgon pa pa dag gis dge slong grong mtha' rnams las rdzas dang gnas mal dag brnyas pa dang de dag gis ma ster nas/ bcom ldan 'das kyis bka' stsal pa/ brnyan par bya'o/ /de dag gis bskur ba dang char 'bab pas rdzas kha dog sna tshogs dag ma rung bar gyur nas/ bcom ldan 'das kyis bka' stsal pa/ gal te char 'bab bam char 'bab tu dogs pa na bskur bar mi bya'o/ /gal te lam khar char 'bab na shing ljon pa'i drung du gzhag par bya'o/ /gtsug lag khang du son nas rdzas rnams bskam par bya'o zhes gsungs pa yin no/ /me shor tam chu byung na dge 'dun gyi yang gdon par bya'o zhes bya ba ni/ me shor tam chu byung na dang por gang zag gi rdzas gdon par bya zhing / phyis dge 'dun gyi yang gdon par bya ba'o/ /gang gi tshe zhe na/ de'i phyir rang gi lhung bzed dang chos gos thon zin na'o zhes bya ba smras te/ rang gi chos gos dang lhung bzed dag thon zin na de'i 'og tu dge 'dun gyi yang gdon par bya'o/ /je dang por rang gi lhung bzed dang / chos gos gdon par bya zhing de'i 'og tu dge 'dun gyi yang gdon par bya'o zhes bya ba'i tha tshig ste/ gang zag ni phongs par 'gyur gyi/ dge 'dun ni phongs par mi 'gyur ba'i phyir ro/ /bton zin pa bsrung ba'i phyir dge slong chen po mi nus pa gzhag par bya'o zhes bya ba ni/ me dang chu'i nang nas rdzas bton zin pa bsrung ba'i phyir dge slong chen po mi nus pa zhes bya ba gdon pa'i las kyi 'os su rung ba ma yin pa gzhag par bya ba'o/ /mi bzod pa nyid du 'jug par mi bya'o zhes bya ba ni/ me dang chu mi bzod pa khyad du bsad du mi rung ba'i nang du rdzas gdon pa'i ched du 'jug par mi bya'o/ /gnas mal gyi ltung byed do zhes bya ba de bshad zin to/ / //'ding ba'i ltung byed smra bar 'dod nas/ khyim gzhan du 'ding bar byas pa khyim bdag la dris te dor bar bya'o zhes bya ba smras te/ khyim pa'i khyim gzhan du rtswa dang lo ma la sogs pa'i gding ba rang gis byas sam/ gzhan 'ding du bcug pa 'gro khar khyim bdag la dris te dor bar bya'o/ /dgon par ni yang na glong bar bya'o zhes bya ba ni/ gal te dgon par gding ba byas par gyur na yang glong bar bya'o/ /yang na gnas de nas gzhan du dor bar bya ste/ yang na zhes bya ba'i sgra ni tha dad par brtag pa'i don to/ /de ni mgo 'am mjug bzlog pa byas pa nyid do zhes bya ba ni/ slong ba de ni rtswa la sogs pa'i mgo 'am mjug bzlog pa tsam byas pa nyid na byas pa nyid yin par rig par bya'o/ /'dir gzhung ni de dag ji srid du 'ding ba 'dor bar byed pa dang / chom rkun pa dag gis bcom mo/ /thams cad glong bar byed pa na de dag la nyes dmigs su gyur nas/ bcom ldan 'das kyis bka' stsal pa/ mgo 'am mjug bzlog pas glong bar bya ste/ 'gro bar bya'o zhes gsungs pa yin no/ /gos dag bskam pa'i phyir rtswa bting ba yang dor bar bya ba nyid do zhes bya ba ni/ gos dag bskam pa'i phyir gos dag bskam pa'i gcal du rtswa bting ba byas pa de yang dor bar bya ba ste/ de yang dor bar bya ba nyid do zhes bya ba'i tha tshig go/ /slong ba la dor bar khas len na sbyin no zhes bya ba ni/ rtswa dag bting ba gang zag 'ga' zhig gal te slong na de la sbyin par bya'o/ /khyad par ci lta bu can zhig la zhe na/ dor bar khas len pa ste/ gang gis rang gi dgos pa bsgrubs nas dor bar khas len pa de ni dor bar khas len pa ste/ de la'o/ /'chag sa dag tu rkang mthil gnyis la rtsub na rtswa dag gding bar bya'o zhes bya ba ni/ dge slong yun ring du 'chag pas dge ba'i phyogs rgya cher byed pa dag gis 'chag sa dag tu rkang mthil gnyis la rtsub na rtswa dag gding bar bya ba'o/ /'di skad bstan te/ gal te dge slong 'chag pa'i rkang mthil dag la rtsub na de'i tshe 'chag sa dag tu rtswa dag gding bar bya'o/ /de dag kyang dor bar bya ba nyid do zhes bya ba ni/ 'chag sar bting ba'i rtswa de dag kyang dor bar bya ba nyid do/ /gtong na dor bar bya ba ma yin pa nyid du ma gyur pa dor bar bya ba'o zhes bya ba la/ gtong na zhes bya ba ni/ 'chag sa btang ba'i dus la bab cing gud du 'gro ba'i dus la nye bar gnas par gyur na'o/ /dor bar bya ba zhes bya ba ni 'chag sar rtswa la sogs pa bkram pa'o/ /bya ba ma yin pa nyid du ma gyur pa zhes bya ba la bya ba ma yin pa nyid ces bya ba ni/ yang dgram du rung ba nyid ma yin pa ste/ rdog chags la sogs pas phye mar gyur pa'o/ /gal te de ltar gyur na ni de'i tshe sa rdul dang 'dra bar gnas pas/ de la brten nas srog chags dag mi skye ba'i phyir de ni dor bar bya mi dgos pas de'i phyir bya ba ma yin pa nyid du ma gyur pa zhes smos te/ de ltar sa rdul dang 'dra bar ma gyur cing dgram du rung ba nyid yin pa ste/ rtswa la sogs pa dngos po ma nyams par 'dug pa'o/ /de las ni srog chags dag skye ba'i phyir de ni dor bar bya'o zhes bya bar sbyar ro/ /gzhan gyi tshe na dus dus su so sor brtag pa dang bsgyur log bya'o zhes bya ba ni/ gtang ba'i dus las gzhan pa'i tshe mi gtong ba'i dus dag tu ni/ rtswa la sogs pa de dag la srog chags yod dam med pa dus dus su so sor brtag pa dang / srog chags mi skye bar bya ba'i phyir dus dus su bsgyur log bya'o/ /sa snum pa dang mngar ba ni nyin re zhing ngo zhes bya ba la yul gang na sa snum pa dang / mngar ba la gzhan pa yod pa de ni sa snum pa dang mngar ba ste/ yul der ni nyin re zhing lan re bsgyur log bya'o zhes bya bar sbyar te/ srin bal la sogs pa srog chags 'phel ba'i nyes pa spang ba'i phyir ro/ /gzhan du ni zla ba phyed phyed cing ngo zhes bya ba ni/ sa snum pa dang mngar ba las gzhan pa'i yul du ni zla ba phyed phyed cing lan re bsgyur log bya'o/ /'dir gzhung ni gal te sa phyogs snum pa dang mngar ba yin na bting ba nyin re zhing bsgyur log bya'o/ /'on te sa phyogs snum pa dang mngar ba ma yin na ni zla ba phyed phyed cing bsgyur log bya'o zhes gsungs pa yin no/ /'chag sa dag tu rtswa'i chun po dag thag pas bcings te shing ljon pa la dpyangs shing gzhag par bya'o zhes bya ba ni/ 'chag sa dag tu 'chag sar dgram pa'i theb tu rtswa'i chun po dag thag pas bcings te shing ljon pa la dpyangs shing gzhag par bya'o/ /lci ba gyo mor gzhag par bya'o zhes bya ba ni/ 'dag rdzas kyi rgyu lci ba bum pa la sogs pa 'chag pa'i gyo mo'i steng du gzhag par bya'o/ /gnas nas 'phags par 'gyur ba na zhes bya ba yan chad sngar thal ba'o zhes bya ba ni/ sngar mdo las gnas nas 'phags par 'gyur ba na nyam nga ba dang phrad par mi 'gyur ba lta na gnas mal bsdu bar bya'o zhes smos pa de yan chad du gnas mal gyi bslab pa'i gzhir gtogs pa bslab pa'i gzhi de dang 'brel ba gang ji snyed gong du smos pa de dag thams cad 'ding ba'i bslab pa'i gzhi 'dir ci 'os su sbyar bar rig par bya ste/ de las khri la sogs pa smos pa ni 'dir sbyar bar mi bya'i/ 'di ltar 'dom bzhi bcu rtsa dgu tshun chad ni de'i nyen kor ro zhes bya ba la sogs pa smos pa ni 'dir yang 'dra bar sbyar ro/ /ji ltar gnas mal gyi bslab pa'i gzhir dge slong 'khod pa la yang ma bcol na de dang 'dra ba'i rkyen ma gtogs te ltung byed do zhes gsungs pa'i ltung ba bstan pa'i gzhung rgya cher 'byung ba de dag 'ding ba'i bslab pa'i gzhi 'dir yang 'dra bar sbyar bar rig par bya'o/ /cig car spyod spyod pa ni 'dra ba nyid do zhes bya ba ni cig car spyod na thams cad kyis dor ba la sogs pa bya bar 'dra ba nyid yin no/ /ji ltar gnas mal gyi skabs su gnyi ga cig car spyod spyod pa la ni phyis langs pas bya ba dang ldan pa yin no zhes smos pa lta bu ma yin te/ 'ding ba ni so sor longs spyad pa'i yan lag yin pa'i phyir ro/ /de lta bas na 'di la ni cha gang la cha gang gis longs spyad pa de de nyid kyis dor bar bya'o zhes bya ba'i tha tshig go/ /dge 'dun gyi ma yin par ni gnas de'i bdag po rnams la 'dri bar bya ba nyid yin no zhes bya ba ni/ dge 'dun gyi gnas ma yin par 'ding ba dor ba ni/ gnas de'i bdag po rnams la dri bar bya zhing dor bar bya ba nyid yin no/ /rnams la zhes mang po'i tshig tu bstan pa ni bu dang chung ma la sogs pa dag kyang dri ba'i phyir ni gnas de'i bdag po dag yin par shes pa'i phyir ro/ /bslab pa'i gzhi 'di la yan lag gang dag ltung ba'i byed pa po nyid yin zhe na/ de'i phyir dge 'dun gyi gtsug lag khang nyid dang / rdo ba dang bye ma'i gzhi nyid la sogs pa'i bdag nyid ma yin pa nyid dang / de lta bu'i nyes dmigs yod pa nyid kyis gzhir rang dang bskos pas gding ba byas pa nyid lta bu ni byed pa po dag yin no zhes bya ba smras te/ dge 'dun gyi gtsug lag khang nyid ces bya ba la/ sa gzhi gang dge 'dun gyi gtsug lag khang yin pa de ni dge 'dun gyi gtsug lag khang ngo / /de'i dngos po ni de nyid de/ dge 'dun gyi gtsug lag khang nyid do/ /gal te gtsug lag khang de dge 'dun gyi yin na zhes bya ba'i tha tshig go/ /rdo ba dang bye ma'i gzhi nyid la sogs pa'i bdag nyid ma yin pa nyid ces bya ba la/ rdo ba zhes bya ba ni rdo thal rgyu la sogs pa'o/ /bye ma'i gzhi zhes bya ba ni bye ma mang ba'o/ /de'i dngos po ni de nyid do/ /sogs pa'i sgras ni rdo ba gzhan dag dang / rdo las gzhan pa sa ma yin pa yang bsdu'o/ /bdag nyid ma yin pa zhes bya ba ni sa gzhi gang rdo ba dang bye ma'i gzhi nyid la sogs pa'i bdag nyid med pa de ni de dag gi bdag nyid ma yin pa'o/ /de'i dngos po ni de nyid do/ /de lta bu'i nyes dmigs yod pa nyid kyi zhes bya ba la/ de lta bu'i nyes dmigs zhes bya ba ni/ sril la sogs pa srog chags skye ba'i nyes dmigs so/ /yod pa nyid kyi gzhi zhes bya ba ni/ sa gzhi gang na de lta bu'i nyes dmigs yod pa'o/ /de'i dngos po ni de nyid do/ /sa gzhir zhes bya ba ni/ gong du smos pa thams cad dang sbyar bar bya ste/ sa gzhi rnam pa de lta bur ro/ /sa gzhi rnam pa de lta bu gang yang rung bar rang gis rtswa dang lo ma la sogs pa'i gding ba bting ba byas pa nyid dang / rang gis bskos pas rtswa dang lo ma la sogs pa'i gding ba bting ba byas pa nyid lta bu ni kha na ma tho ba 'di'i byed pa po dag yin no/ /'di skad bstan te/ gal te sa gzhi de dge 'dun gyi gtsug lag khang nyid kyang yin la/ rdo ba dang bye ma'i gzhi nyid la sogs pa'i bdag nyid ma yin pa yang yin/ de lta bu'i nyes dmigs yod pa nyid kyang yin la/ sa gzhi der dge slong rang ngam rang gis bskos pas rtswa dang lo ma la sogs pa'i gding ba bting ba la ma bsdus sam/ sdud du ma bcug cing / dge slong 'khod pa la yang ma bcol bar de nas 'dom bzhi bcu rtsa dgu tshun chad du 'gro ba la sogs pa ji skad du sngar bstan pa thams cad 'dir yang sbyar bar bya ste/ yan lag de dag ni kha na ma tho ba 'di'i byed pa po dag yin no/ /gding ba'i ltung byed do zhes bya ba de bshad zin to// // bam po nyi shu rtsa lnga pa/ skrod pa'i ltung byed la byed pa po nyid gang zhe na de'i phyir/ dge slong nyid dang dge 'dun gyi gtsug lag khang nyid dag ni byed pa po nyid do zhes bya ba smras te/ gal te bskrad par bya ba yang dge slong nyid yin la/ gtsug lag khang gang nas bskrad par bya ba'i gtsug lag khang de yang gal te dge 'dun gyi gtsug lag khang nyid yin na de gnyis ni kha na ma tho ba 'di'i byed pa po dag yin no/ /ci bsam pa thams cad kyis de gnyis byed pa po nyid yin nam zhe na de'i phyir/ gal te de la gnod pa dang / dge 'dun 'khrug pa skye ba nye bar zhi bar mi 'gyur ba'i gnyen por 'dod pa ma yin na'o zhes bya ba smras te/ de la gnod pa dang dge 'dun 'khrug pa ni de la gnod pa dang / dge 'dun 'khrug pa gnyis so/ /de gnyis skye ba dang nye bar zhi bar mi 'gyur ba ni/ skye ba dang nye bar zhi bar mi 'gyur ba gnyis te/ gal te de'i gnyen por 'dod pa ma yin na de'i tshe yan lag sngar bstan pa gnyis byed pa po nyid yin no/ /'di skad bstan te/ bskrad par bya ba'i dge slong de la gnod pa srog gi bar chad la sogs pa skye bar dogs pa yod dam skyes pa nye bar zhi bar mi 'gyur bar dogs pa yod pa dang / de bzhin du dge 'dun 'khrug pa skye bar dogs pa yod dam/ skyes pa nye bar zhi bar mi 'gyur bar dogs pa yod na/ gal te de dag gi gnyen po'i bsam pas dge slong gis dge slong dge 'dun gyi gtsug lag khang nas skrod par byed na ni de'i tshe nyes pa med do/ /gal te de dag gi gnyen por 'dod pa ma yin na ni de'i tshe yan lag sngar bstan pa gnyis byed pa po nyid yin no/ /de gnyis gang la byed pa po nyid yin zhe na de'i phyir/ skrod pa la'o zhes bya ba smras te/ dge slong skrod pa la'o/ /sus she na de'i phyir gzhan gyis kyang ngo zhes bya ba smras te/ dge slong gzhan gyis kyang ngo / /kyang ngo zhes bya ba'i sgras ni/ gnyi ga yang dge slong nyid yin par ston pa'o/ /gzhan gyi rjes su 'jug pas kyang ngo zhes bya ba ni/ gzhan gyi dring 'jog pas dge slong gis dge slong gtsug lag khang nas skrod par byed na ltung byed do/ /'dir gzhung ni dge slong skrod par byed dam dge slong gis skrod par byed na gnyi ga la ltung byed do zhes gsungs pa yin no/ /dge slob ma dang dge tshul dang / dge tshul ma rnams kyi ni nyes byas kyi'o zhes bya ba ni/ dge slong gis dge slob ma dang / dge tshul dang / dge tshul ma ltung ba 'byin par byed pa rnams dge slong skrod du bcug na nyes byas kyi byed pa po nyid yin no/ /'dir gzhung ni rnam par 'byed pa las dge slong gis dge slob ma dang / dge tshul mas dge slong skrod par byed na ltung byed do/ /dge slong ma dang dge tshul dang dge tshul ma la ni nyes byas su 'gyur ro zhes gsungs pa yin no/ /de dag kyang ngo zhes bya ba ni bskrad par bya ba dge slob ma dang / dge tshul dang / dge tshul ma de dag skrod na yang nyes byas so/ /'dir gzhung ni dge slong gis dge tshul skrod na nyes byas so zhes gsungs pa yin no/ /bzhad gad kyis kyang ngo zhes bya ba ni/ skrod na nyes byas kyi byed pa po nyid yin no/ /khyim pa rnams la ni bsod nams ma yin pa mang ngo zhes bya ba ni/ skrod par byed pa'i khyim pa dag yin na de dag ni bsod nams ma yin pa mang po'i byed pa po nyid yin no/ /'dir gzhung ni dge slong gis khyim pa dang / khyim pa mos dge slong skrod du bcug na ltung byed do/ /khyim pa dang khyim pa mo la ni bsod nams ma yin pa mang du skye bar 'gyur ro zhes gsungs pa yin no/ /skrod pa'i ltung byed do zhes bya ba de bshad zin to// //phyis gnon gyi ltung byed smra bar 'dod nas/ shes gtso'o zhes bya ba smras te/ 'dir yang shes gtso zhes bya ba'i ming dang / 'du shes gtso cher byed pa po nyid do zhes bya ba'i ming can du sbyor bar byed do/ /gang la 'du shes gtso cher byed pa po nyid yin zhe na/ de'i phyir dge 'dun gyi gtsug lag khang gi gnas su dge slong zhugs pa nyid la'o zhes bya ba smras te/ de ni dge 'dun gyi yang yin la gtsug lag khang yang yin pas na/ dge 'dun gyi gtsug lag khang ngo / /de'i gnas ni khyams la sogs pa ste/ gnas der sngar 'ongs pa'i dge slong gi bzhugs pa nyid ces bya ba gnas par gyur zin pa nyid la ste/ de la ltung ba 'byin par byed pa'i 'du shes gnas 'di na dge slong gzhan gnas so snyam du shes pa gang yin pa de ni ltung ba'i byed pa po nyid yin no/ /de ltar yang 'dir gzhung ni so sor thar pa'i mdo las yang dge slong gang dge 'dun gyi gtsug lag khang na dge slong dag snga na 'khod par shes bzhin du phyis 'ongs nas phyis gnon byed na zhes bya ba la sogs pa gsungs pa yin no/ /'du shes rnam pa 'di lta bu de gang la byed pa po nyid yin zhe na de'i phyir/ na ba dang 'jigs pa'i dbang ma gtogs par phyis gnon byed pa la zhes bya ba smras te/ gzhan gnas pa'i gnas su gzhan de ma dad bzhin du 'dug pa la'o/ /ci dus thams cad du 'am zhe na de'i phyir/ na ba dang 'jigs pa'i dbang ma gtogs pa zhes bya ba smras so/ /'dir gzhung ni gal te na 'am 'jigs par gyur na ltung ba med do zhes gsungs pa yin no/ /de ni dpe ste/ tho 'tshams par 'dun pas dge slong la tho 'tshams pa dag kyang ngo zhes bya ba ni/ phyis gnon byed pa de ni dge slong la tho 'tshams pa dag gi dpe ste/ gzhan yang tho 'tshams par 'dun pas dge slong la tho 'tshams pa dag kyang bslab pa'i gzhi 'dir gtogs pa'i ltung byed yin no/ /'dir gzhung ni bar sdom las/ ngan dang gsod dang grang dro dang / /chol zangs dang ni bkru sman dang / / rnal 'byor mthun dang kha ton dang / /'jigs dang bcas dang 'jigs med do/ /zhes bya bas dge slong gis dge slong la ci tsam cung zad tho 'tshams par byed na thams cad ltung byed du 'gyur ro zhes gsungs pa yin no/ /bsgo ba rna la gzon pa la sogs pa dag la yang spyir tho 'tshams pa yod mod kyi/ 'on kyang gnas la sogs pa'i rnam pa'i bye brag yod pa'i phyir ltung byed tha dad pa nyid yin no/ /ltung byed du bstan pa'i tho 'tshams pa de dag las gzhan pa'i tho 'tshams pa ni thams cad nyes byas so/ /phyis gnon byed pa'i ltung byed do zhes bya ba de bshad zin to// //rtsa ba 'byung ba la 'jug pa'i ltung byed smra bar 'dod nas dge 'dun gyi gtsug lag khang gi steng gi thog nyid ni byed pa po'o zhes bya ba smras te/ dge 'dun gyi gtsug lag khang gi steng gi thog nyid ni ltung ba'i byed pa po yin no/ /'di skad bstan te/ gal te gtsug lag khang dge 'dun gyi yin la/ de yang steng gi thog yod na de ni ltung ba'i byed pa po yin no/ /ci rnam pa thams cad la sngar bstan pa de byed pa po yin nam zhe na ma yin te de'i phyir/ gal te byin gyis gzhol ba nyid dam spang leb nyid dam de dang 'dra bas g.yogs pa nyid ma yin no zhes bya ba smras te/ gal te steng gi thog byin gyis gzhol bar g.yogs pa ma yin pa dang spang leb kyis g.yogs pa ma yin pa dang / /spang leb dang 'dra bas g.yogs pa ma yin pa nyid yin na kha na ma tho ba 'di'i byed pa po nyid yin no/ /gal te byin gyis gzhol ba la sogs pa yin na de la ni ltung ba med do/ /de ltar yang 'dir gzhung ni byin gyis gzhol ba yin na ltung ba med do zhes gsungs pa yin no/ /'di ni 'dir mdor bstan pa yin te/ gang la rtsa ba 'gro ba'i skabs med pa de la ltung ba med do/ /byed pa po gzhan yang bstan pa'i phyir/ mnan par 'os pa'i rtsa ba phur bu lta bu nyid kyang ngo zhes bya ba smras te/ mnan par 'os pa zhes bya ba ni/ khri la sogs pa'o/ /de'i rtsa ba phur bu lta bu nyid kyang ltung ba'i byed pa po nyid yin no/ /'di skad bstan te/ gal te khri la sogs pa dag gi rtsa ba phur bu lta bu nyid yin na kha na ma tho ba 'di'i byed pa po nyid yin no/ /khri la sogs pa gang dag la phur bu lta bu'i rkang pa yod pa de dag ni phur bu lta bu'i rtsa ba can gyi khri dag ste/ phur bu bzhin du gzhug tu yang rung dbyung du yang rung bas/ de'i phyir rtsa ba 'byung ba zhes bya'o/ /ci khri la sogs pa phur bu lta bu'i rkang pa can dag dus thams cad du ltung ba'i byed pa po nyid yin nam zhe na de'i phyir/ bkan pa nyid dang / rkang rten bcug pa nyid ni ma gtogs so zhes bya ba smras te/ khri la sogs pa bkan pa nyid dang / rkang rten bcug pa nyid ni ma gtogs so/ /khri la sogs pa gang dag gan rkyal du bkan pa de dag ni bkan pa ste/ de dag gi dngos po ni de dag nyid do/ /khri la sogs pa gang dag gi rtsa ba la rkang rten bcug pa de dag ni rkang rten bcug pa ste/ de dag gi dngos po ni de dag nyid do/ /'di skad bstan te/ gal te khri la sogs pa dag gan rkyal du bkan par gyur tam/ rkang rten bcug par gyur na de'i tshe de dag la ltung ba'i byed pa po nyid med do/ /gang la thog nyid dang / rtsa ba phur bu lta bu nyid de/ de gnyis byed pa po nyid yin zhe na de'i phyir/ gnon pa la'o zhes bya ba smras te/ gnon par 'os pa khri la sogs pa zhes bya bar sbyar ro/ /'dir gzhung ni ljid kyis phab te 'dug gam nyal na ltung byed do zhes gsungs pa yin no/ /ci mi shes pa la yang de gnyis ltung ba'i byed pa po nyid yin nam zhe na de'i phyir/ shes gtso'o zhes bya ba smras te/ 'du shes gtso cher byed pa po nyid do zhes bya ba'i rnam pas so/ /'dir gzhung ni yang dge slong gang dge 'dun gyi gtsug lag khang gi steng gi nam mkha' la thog bor ba dang khri 'am khri'u rtsa ba 'byung ba la shes bzhin du zhes gsungs pa'i shes bzhin du zhes bya ba nyid yin no/ /rnam par 'byed pa las kyang rang nyid kyis rig par gyur pa 'am/ gzhan dag gis brjod pas so zhes gsungs so/ /rtsa ba 'byung ba la 'dug pa'i ltung byed do zhes bya ba de bshad zin to// //srog chags dang bcas pa la spyod pa'i ltung byed brjod par bya ste/ ltung byed 'di dang 'og nas srog chags dang bcas pa'i chu la spyod pa zhes bya ba'i ltung byed 'byung ba de gnyis ni so sor thar pa'i mdo las yang dge slong gang shes bzhin du srog chags dang bcas pa'i chus rtswa 'am lci ba'am sa la 'debs sam/ 'debs su 'jug na ltung byed do zhes bya ba dang / yang dge slong gang shes bzhin du srog chags dang bcas pa'i chu la spyod na ltung byed do zhes gsungs pas tshul dang 'dra bar snang ste/ rang spyod pa ma yin pa dang / rang spyod pa zhes bya ba'i yul gyi bye brag gis ni de gnyis ltung ba tha dad pa nyid yin par bstan pa'i phyir/ rang spyod pa'i don nyid de las gzhan la'o zhes bya ba smras te/ rang gi spyod pa ni rang spyod pa'o/ /gang la dgos pa de yod pa ni de'i don te/ de ni rang spyod pa'i don to/ /de'i dngos po ni de nyid do/ /rang spyod pa'i don nyid la ni 'og nas srog chags dang bcas pa'i chu la spyod pa zhes 'byung ba'i bslab pa'i gzhi de rnam par gzhag go /de las gzhan la'o zhes bya ba ni/ rang spyod pa'i don nyid ces bya ba de las gzhan pa ste/ rang spyod pa ma yin pa la'o/ /de la srog chags dang bcas pa la spyod pa zhes bya ba'i bslab pa'i gzhi 'di nyid rnam par gzhag go/ /lhag ma ni 'og ma kho na las khong du chud par bya'o/ /srog chags dang bcas pa la spyod pa'i ltung byed do zhes bya ba de bshad zin to/ / //gtsug lag khang gi ltung byed smra bar 'dod nas/ sgo cha gzhug par bya'o zhes bya ba smras te/ sgo cha zhes bya ba ni sgo skyes la sogs pa sgo dang 'brel pa'i yo byad do/ /de dag gzhug par bya'o zhes bya ba ni de dang por gzugs par bya'o zhes bya ba'i tha tshig go / 'dir sgo cha zhes smos pas sgo dang 'brel ba'i yo byad thams cad kyang ma bsdus te/ 'di ltar ya phubs la sogs pa lhag ma dag ni 'phral la gzhug par bya ba yin pa'i phyir/ 'dir gzhung ni sgo cha gong ma bcug na ni dngos gzhi'o/ /sgo cha gzhan ma bcug na ni nyes byas so zhes gsungs pa yin no/ /sgo glegs kyang ngo zhes bya ba la 'dir sgo glegs zhes bya ba ni sgo leb la bya ste/ de yang gzhug par bya'o/ /skar khung dag kyang gdod par bya'o zhes bya ba ni/ ngos kyi skar khung dag kyang gdod par bya ba'o/ /ltung ba 'di la byed pa po nyid gang zhe na/ de'i phyir/ gtsug lag khang ni byed pa po nyid do zhes bya ba smras so/ /tshad ji tsam zhe na de'i phyir/ spyod lam bzhi shong ba'o zhes bya ba smras te/ gtsug lag khang du spyod lam rnam bzhi byar rung zhing shong ba'o/ /ci gtsug lag khang tshad de tsam dang ldan pa thams cad byed pa po yin nam zhe na/ de'i phyir gal te thams cad rdo 'am so phag gam shing las byas pa ma yin na'o zhes bya ba smras te/ gal te thams cad ril gyis rdo las byas pa 'am/ so phag so btang ba las byas pa 'am/ shing las byas pa ma yin na byed pa po nyid yin no/ /de dag las byas pa na byed pa po nyid ma yin no/ /gtsug lag khang ni thams cad kyang byed pa po nyid yin te/ dge 'dun mnga' ba 'ba' zhig tu ma zad kyi/ gang zag dang khyim pa dbang ba yang byed pa po nyid yin no/ /char chu bskyab pa'i g.yogs pa yang ngo zhes bya ba ni/ gal te ma byas na byed pa po nyid yin no zhes bya bar sbyar te/ gal te char chu bskyab pa'i phyir lo ma la sogs pas 'phro ma g.yogs na'o/ /'dir gzhung ni zhu ba las btsun pa dge slong gis rtsig pa'i rim pa gnyis sam gsum dag las lhag par brtsig cing de la ltung byed du yang mi 'gyur ba mchis sam/ yod de rtsa dag gis g.yogs par byed na ltung ba med do/ / spang leb dag gis g.yogs par byed na ltung ba med do/ /shing leb dag gis g.yogs par byed na ltung ba med do zhes gsungs pa yin no/ /ci ltung ba 'byin par byed pa thams cad la gtsug lag khang 'di byed pa po nyid yin nam zhe na ma yin te/ de'i phyir yon bdag gis byas sam zin nas blta'o ma smras pa la'o zhes bya ba smras te/ gal te yon bdag gis 'di skad ces gtsug lag khang byas nas blta'o zhe'am zin nas blta'o zhes dge slong ma la smras na dge slong de la gtsug lag khang de byed pa po nyid yin no/ /gal te de skad smra na de la nyes par mi 'gyur ro/ /gang la de byed pa po nyid yin zhe na/ de'i phyir pha gu rim pa gsum las lhag par rtsig pa byas pa la'o zhes bya ba smras te/ pha gu rim pa gsum las lhag par rtsig pa byas pa la gtsug lag khang de byed pa po nyid yin no/ /'di skad bstan te/ nyin gcig la pha gu dag gis rim pa gsum brtsig par bya'i/ de las lhag par brtsig par mi bya'o zhes bya ba'i tha tshig go /ci bdag nyid kho nas sam zhe na de'i phyir/ gzhan gyis kyang ngo zhes bya ba smras te/ 'dir gzhung ni byed du bcug na zhes bya ba gsungs pa yin no/ /gang gi tshe brtsigs na zhe na/ de'i phyir/ nyi ma de la'o zhes bya ba smras te/ nyi ma gang la rim pa gsum rtsig pa'i nyi ma de nyid la gal te lhag par brtsigs na'o/ /nyi ma dang po la rim pa bzhi rtsig cing nyi ma gnyis pa la rim pa gnyis brtsegs na yang nyi ma dang po la lhag pa gang yin pa de nyi ma gnyis pa'i nyung ba'i khar brtsi bar mi 'gyur/ de bzhin du nyi ma gnyis pa la lhag par rtsig pa gang yin pa de yang nyi ma dang po'i rim pa nyung ba'i khar brtsi bar mi bya'o/ /gzhan la yang 'jim pa med pa las so zhes bya ba ni/ nyi ma gzhan la yang pha gu 'jim pa med pa gsum las lhag par rtsig pa byas na gtsug lag khang de/ ltung ba'i byed pa po nyid yin no/ /de lta bas na 'jim pa med pa yang rim par bgrang bar bya'o/ /chu khung dag ma btod pa rung ngo zhes bya ba ni/ chu khung dag ma btod pa la ni nyi ma gzhan la pha gu rim pa gsum las lhag par rim pa rtsig pa byas na gtsug lag khang de ltung ba'i byed pa po nyid yin no/ /'di skad bstan te/ gal te rang gi gnas su chu khung btod pa la ni pha gu rim pa las lhag par rtsig pa byas na yang nyes pa med la/ rang gi gnas su chu khung ma btod pa la ni pha gu rim pa gsum las lhag par rtsig pa byas na dngos gzhi'i kha na ma tho bar 'gyur te/ chu khung btod pa'i gnas yan chad nas rim pa gsum bgrang bar bya'o/ / brkos te rmang gang gi rtsig pa ma btsugs pa nyid kyang rung ngo zhes bya ba ni/ sa brkos te rmang gi rtsa ba gzugs par bya'o/ /brkos te rmang gi rtsa ba ma btsugs pa nyid yin na de la ni nyi ma gzhan la yang pha gu rim pa gsum las lhag par rtsig pa bdag nyid kyis byas sam/ gzhan byed du bcug na yang thams cad du dngos gzhi'i kha na ma tho bar 'gyur ro/ /gal te brkos te rmang gi rtsa ba btsugs pa nyid yin na de la ni nyi ma gzhan la pha gu rim pa gsum las lhag par brtsigs kyang nyes pa med do/ /sgo cha gong ma ma btsugs pa yang rung ngo zhes bya ba la/ sgo cha gong ma zhes bya ba ni/ ya phubs la sogs pa'i sgo cha ni sgo cha gong ma ste/ de ma btsugs pa la yang nyi ma gzhan la pha gu rim pa gsum las lhag par brtsigs na yang dngos gzhi'i kha na ma tho bar 'gyur ro/ /gal te sgo cha gong ma de btsugs pa yin na de la ni pha gu rim pa gsum las lhag par brtsigs kyang nyes pa med de/ sgo cha btsugs pa yan chad nas rim pa gsum bgrang bar bya ba yin no/ /mdo gong ma gsum char las rung ngo zhes bya ba'i sgra smos pa ni de dag gi rim pa rnams la ltung ba'i phyir so sor gtso bo yin par bstan pa'i phyir ro/ /dang po'i mdun rol ni nyes pa med de zhes bya ba ni/ pha gu rim pa gsum las lhag par rtsig pa byas na dngos gzhi'o zhes bstan pas na 'dir yang dngos gzhi'i rgyur gyur pa rim pa lhag par rtsig go snyam pa na/ lhag pa dang po rtsig pa'i mdun rol du rim pa gsum rtsig pa'i tshe na ni sbyor ba'i nyes byas su 'gyur te/ sbyor ba thams cad la nyes byas so zhes gsungs pa'i phyir ro/ /de ltar dngos gzhi'i mdun rol du ni sbyor ba yin pas de'i phyir nyes pa de kun la thal bar 'gyur ba bsal ba'i phyir mdo 'di brjod de/ ltung ba'i rgyur gyur pa lhag pa dang po rim pa bzhi pa'i mdun rol du nyi ma gzhan la rim pa snga ma dag brtsigs pa de la ni sbyor ba zhes bya ba'i nyes pa med do/ /'di ltar rim pa gsum brtsigs pa'i steng du nyi ma de nyid la rim pa bzhi pa rtsig pa'i phyir pha gu la sogs pa la 'dzin pa rtsom par byed pa de'i tshe na ni/ sbyor ba zhes bya ba'i nyes byas so/ /de brtsigs na ni dngos gzhir 'gyur ro zhes bya ba'i tha tshig go /gtsug lag khang gi ltung byed do zhes bya ba de bshad zin to/ / //ma bskos par ston pa'i ltung byed smra bar 'dod nas/ pham par 'gyur ba ma byung ba mdo sde dang 'dul ba dang ma mo 'dzin pa lo nyi shu las mi nyung ba grong khyer pa'i skad smra ba dge slong ma la lus nye bar gzhol ba nyid kyi phyir bcos pa byas pa dge slong ma'i ston par bsko'o zhes bya ba smras te/ dge slong pham par 'gyur ba ma byung ba zhes bya ba la sogs pa'i yon tan dang ldan pa dge slong ma'i ston par bsko'o zhes bya bar sbyar ro/ /pham par 'gyur ba ma byung ba zhes bya ba ni/ pham par 'gyur ba'i ltung ba ma byung ba ste/ pham par 'gyur ba ma byung ba ni pham par ma gyur pa zhes bya ba'i tha tshig go/ /mdo sde dang 'dul ba dang ma mo 'dzin pa zhes bya ba ni/ sde snod gsum don dang tshig gi sgo nas mngon par shes pa'o/ /lo nyi shu las mi nyung ba zhes bya ba ni/ gang la lo nyi shu las nyung ba nyid med pa de ni lo nyi shu las mi nyung ba ste/ de yang bsnyen par rdzogs pa nas brtsams te lo nyi shu lon pa'o/ /'dis ni gnas brtan rgyal tshabs lta bu zhes bya bar bsgrub pa yin no/ /grong khyer ba'i skad smra ba zhes bya ba ni/ smra mkhas te rigs pa dang grol bar smra ba zhes bya ba'i tha tshig go/ /de pho brang 'khor gyi skad dam mya ngan las 'das pa grong khyer dang 'dra bar 'gro ba dang / mthun pa'i skad smra ba yin pas na grong pa'i skad mi smra ba'i phyir rab tu ma zhi ba dang mthun par 'khrigs pa dang ldan pa'i tshig dag gis dge slong ma la tho 'tshams pa/ kye grags ldan ma zhes bya ba la sogs pa'i tshig mi brjod pa yin no/ / 'dir bod pa'i phyir kye zhes bya ba'i sgra smos pas ni/ 'khrig pa'i phyir bod pa dang 'dra ba ston to/ /dge slong ma la lus nye bar gzhol ba nyid phyir bcos pa byas pa'o zhes bya ba ni/ gang gis dge slong ma lus nye bar gzhol ba byas pas de ni dge slong ma la lus nye bar gzhol ba ste/ de'i dngos po ni de nyid do/ /dge slong ma la lus nye bar gzhol ba nyid gang yin pa de dag gis bshags pa la sogs pa des phyir bcos pa byas pa zhes bya ba de ni phyir bcos pa byas pa ste/ des ni dge slong ma dang lhan cig lus la lus kyis reg pa med par ston to/ /'dir gzhung ni sun phyung bar gyur na yang des ltung ba de yang chos bzhin du phyir byas pa zhes gsungs pa yin no/ /dge slong yon tan de lta bu dang ldan pa dge 'dun gyis dge slong ma'i ston par bsko'o zhes bya bar sbyar ro/ /nyi ma gang la bsko bar bya zhe na de'i phyir/ /gso sbyong bco lnga pa la'o zhes bya ba smras te/ de ni mthun pa'i gso sbyong la sogs pa bsal ba'i phyir ro/ /'dis gso sbyong bcu bzhi pa ni ma brtsal te/ gso sbyong bcu bzhi pa zhes bya ba ni zla ba de'i ngo la bar du zhag gcig chod pas/ 'jig rten gyi tha snyad kyi dbang du byas te/ tshe bcu bzhi zhes gdags par zad kyi dngos su na deng gso sbyong bcu bzhi pa zhes bya ba de nyid tshes bco lnga pa yin pa'i phyir ro/ /gso sbyong zhes smos pa 'dis ni dge 'dun gyis de'i nyin mo sngar gso sbyong bya zhing de'i 'og tu dge slong ma'i ston pa bsko bar bya ba'i don de ston par byed do/ /phyogs gang du bsko bar bya zhe na/ de'i phyir mtshams kyi nang du'o zhes bya ba smras so/ /gal te mdo sde la sogs pa 'dzin pa med na ji lta bu las bsko bar bya zhe na de'i phyir/ mdo sde la sogs pa 'dzin pa med na so sor thar pa thon pa'o zhes bya ba smras te/ gal te mdo sde la sogs pa 'dzin pa med na so sor thar pa'i mdo kha ton du bton pa dge slong ma'i ston par bsko bar bya'o/ /de yang na pham par 'gyur ba'am lci ba'i chos rnams ston par nus pa'o zhes bya ba ni/ so sor thar pa thon pa de yang med na dge slong ma'i pham par 'gyur ba brgyad dam/ lci ba'i chos rnams gang gis don dang tshig gi sgo nas ston nus pa'i ngang tshul can de bsko bar bya'o/ /de yang med na ji lta bu las bsko bar bya zhe na de'i phyir phyi ma ni sring mo dag ci khyed cag dge slong ma'i dge 'dun tshogs sam yongs su dag gam mthun nam kha na ma tho ba med dam/ khyed cag la dge 'dun gyis ma bskos pa'i gang zag 'ba' zhig sten par mi byed dam khyed cag la ston pa'i gang zag ni 'ga' zhig dge 'dun las 'ong ngo / / khyed cag la dge slong 'ga' zhig yang ston par mi spro'o/ /khyed cag gi gdams ngag dang rjes su bstan pa ni dge 'dun las so/ /sring mo dag gis bag yod par sgrubs shig ces bya ba de ston nus pa'o zhes bya ba smras te/ dge slong ma'i ston pa phyi ma ni de lta bu las bsko bar bya'o zhes bya bar sbyar ro/ /sring mo dag ces bya ba ni/ kye sring mo dag ces bod pa'o/ /ci zhes bya ba ni dri ba'i tshig go/ /khyed cag dge slong ma'i dge 'dun tshogs sam zhes bya ba ni/ khyed cag dge slong ma'i dge 'dun las gcig tu byed dam zhes bya ba'o/ /yongs su dag gam zhes bya ba ni/ pham par 'gyur ba ma byung ngam/ ltung ba gzhan dag kyang bshags pa dang byin gyis brlabs pa gnyis kyis phyir bcos pa byas sam zhes bya ba'o/ /mthun nam zhes bya ba ni/ phan tshun mthun nam zhes bya ba'o/ /kha na ma tho ba med dam zhes bya ba ni/ 'thab mo la sogs pa'i skyon dang bral lam zhes bya ba'o/ /khyed cag la dge 'dun gyis ma bskos pa'i gang zag 'ga' zhig ston par mi byed dam zhes bya ba ni/ khyed cag la dge slong gi dge 'dun gyis ma bskos pa'i gang zag 'ga' zhig thugs thub tu ston pa med grang zhes 'dri ba'o/ /khyed cag la ston pa'i gang zag ni 'ga' zhig dge 'dun las 'ong ngo zhes bya ba ni/ khyed cag la ston pa'i gang zag su la 'bab pa ni 'ga' zhig dge 'dun gyis bskos te 'ong gi /gzhan la mi 'ong ngo zhes spyir bsgo ba'o/ /khyed cag la dge slong 'ga' yang ston par mi spro'o zhes bya ba ni/ nga yang dge 'dun gyis gsol ba dang las kyis bskos te 'ongs par zad kyi/ rang dgar 'ongs pa ni ma yin pas gzhan su yang khyed cag la ston par spro ba med do zhes spa bkong ba'i tshig yin no/ /khyed cag gis gdams ngag dang rjes su bstan pa ni dge 'dun las so zhes bya ba ni/ kye sring mo dag khyed cag gis zla ba phyed phyed cing gso sbyong bya ba dang / dbyar gnas par khas blangs pa'i rjes la dgag dbye bya ba la sogs pa'i gdams ngag dang rjes su bstan pa ni dge slong gi dge 'dun las 'thob po zhes dmigs kyis bstan pa'o/ /sring mo dag gis bag yod par sgrubs shig ces bya ba ni/ sring mo dag gis bslab pa'i gzhi yang dag par blangs pa dag bag yod par sgrubs shig / 'di ni dge 'dun gyis khyed cag la gdams shing rjes su bstan pa yin no zhes ston pa snying brtse ba can gyis/ snying brtse ba'i phyir dge slong ma'i dge 'dun la gdams shing rjes su bstan pa'i tshig yin no zhes bya ba de ston nus pa'o zhes bya ba ni/ ji skad sngar bstan pa'i rnam pa ston nus pa'i dge slong gi dge 'dun gyis dge slong ma'i ston par bsko bar bya'o/ /'di skad bstan te pham par 'gyur ba ma byung ba nyid la sogs pa'i yon tan dang ldan pa yin la/ 'di ltar lci ba'i chos la sogs pa ston mi nus su zin kyang ji skad bstan ma thag pa de dag tsam yang ston nus pa yin na ni/ dge slong phyi ma 'di dge 'dun gyis dge slong ma'i ston par bsko bar bya'o/ /chos bla ma'i mthu dang ldan pa ni ma gtogs so zhes bya ba ni/ de chos kyang yin la/ bla ma yang yin pas na chos bla ma'o/ /de'i mthu ni nyon mongs pa spangs pa'o/ /yang na chos bla ma zhes bya ba ni mi'i chos bla ma ste/ nyon mongs pa med par gnas pa la sogs pa'o/ /de la gang yod pa de ni de'i mthu dang ldan pa'o/ /mthu de dang ldan pa'i dge slong ni ma gtogs te de ni dge 'dun gyis ma bskos par dge slong ma rnams la ston na yang nyes pa med do zhes bya ba'i tha tshig go/ /'dir gzhung ni so sor thar pa'i mdo las chos 'di lta bu dang ldan pa ma gtogs te zhes bya ba gsungs pa yin no/ /ci zhig rjes su bsgrubs na ma bskos par ston pa'i ltung byed du 'gyur zhe na de'i phyir/ bskos pa de dag las gcig dang yang mi ldan pa dang ma bskos pa dge slong ma la ston na'o zhes bya ba smras te/ dge slong gang dge 'dun gyis bskos kyang yan lag ji skad smos pa de dag las gcig dang yang mi ldan pa dang / dge slong gang dge 'dun gyis ma bskos par yan lag ji skad smos pa de dag dang ldan yang rung mi ldan yang rung ba de dge slong ma las ston na ma bskos par ston pa'i ltung byed du 'gyur ro/ /sngar bskos pa ni ma bskos pa nyid ma yin no zhes bya ba ni/ dge slong gang dge 'dun gyis dge slong ma'i ston par sngar bskos pa ni ma bskos pa nyid ma yin te/ 'di ltar bskos pa nyid yin pas lan cig bskos pas ji srid 'tsho'i bar du dge slong ma la bstan par bya'o/ /'dir gzhung ni btsun pa re zhig lan cig dge slong ma'i ston par sngar bskos pa gang lags pa de ci dus gzhan gyi tshe yang bsko bar bgyi'am/ 'on te ma bskos par bstan par bgyi/ nye ba 'khor des bskos pa de nyid kyis bstan par bya'o zhes gsungs pa yin no/ /'dir gzhung kha cig las kyang lan cig bskos pas ji srid 'tsho'i bar du bstan par bya'i/ yang yang bsko bar mi bya'o zhes gsungs so/ /chos bshad par gsol ba na yang rnam pa 'di yin pas gsungs te/ 'dir gzhung ni dge slong ma gsol bar chos smra ba la ltung bar yang mi 'gyur ba 'ga' mchis sam/ yod de sngar gsol zin pa'o zhes gsungs pa yin no/ /dge 'dun du ma langs shing 'os pa la gsol na nyes pa med do zhes bya ba ni/ gnas gang na dge 'dun du ma langs pa de na/ dge 'dun du ma langs shing de na dge slong gang dge slong ma'i ston par 'os pa pham par 'gyur ba ma byung ba la sogs pa'i yan lag dang ldan pa yod la/ /de dge slong ma'i ston par ma bskos par de la dge slong ma rnams kyis gsol ba nyid na khyad par de lta bu dang ldan pa'i dge slong de dge slong ma rnams la ston pa na nyes pa med do zhes bya ba'i tha tshig go/ /de dag la yang ngo zhes bya ba ni/ dge slong gang la dge slong ma rnams kyis gsol ba 'debs par byed pa'i dge slong ma gang dag yin pa de dag la yang ltung ba med pa'o/ /'dir gzhung ni zhu ba las gang na dge slong gcig gam gang na gnyis sam/ gang na gsum gnas la/ gal te ston pa'i 'os yin na nye bar song ba la gsol bar bya'o zhes gsungs pa yin te/ ston pa'i 'os su rung ba yin na zhes bya ba'i tha tshig go/ /ma bskos par ston pa'i ltung byed do zhes bya ba de bshad zin to// //nyi ma nub kyi bar du ston pa'i ltung byed smra bar 'dod nas/ shes gtso'o zhes bya ba smras te/ 'dir yang shes gtso zhes bya ba'i ming dang 'du shes gtso cher byed pa po nyid do zhes bya bar ming can du sbyor bar byed do/ /gang du 'du shes gtso cher byed pa po nyid yin zhe na de'i phyir/ nyi ma nub pa nyid la'o zhes bya ba smras te/ nyi ma nub pa'i dngos po ni nyi ma nub pa nyid do/ /de la der 'du shes na ste/ gal te nyi ma yang nub par gyur la dge slong gis kyang nyi ma nub par shes na/ de la 'du shes gtso cher byed pa po nyid yin no/ /ci zhig rjes su bsgrub na/ 'du shes gtso cher byed pa po nyid yin zhe na/ de'i phyir mtshan thog thag tu chos ston pa ma gtogs par dge slong ma la ston na'o zhes bya bar smras te/ dge slong ma la ston na ste/ mtshan thog thag tu chos ston pa ni ma gtogs so/ /'di skad bstan te/ mtshan thog thag chos ston pa ma gtogs par nyi ma nub pa'i dus kyi tshe na dge slong gis dge slong ma rnams la ston par byed na ltung byed do/ /ci gnas thams cad du'am zhe na de'i phyir/ de'i tshe gal te sgo phye zhing de lta bu'i gtsug lag khang gi mdun na dbyar khang 'dug pa ni ma yin par ro zhes bya ba smras te/ de'i tshe zhes bya ba ni ston pa'i dus kyi tshe'o/ /gal te sgo phye zhing zhes bya ba ni/ dge slong gi dge 'dun gyi gtsug lag khang ngo / /de lta bu'i gtsug lag khang gi mdun na zhes bya ba ni ston pa'i dus kyi tshe sgo phye ba'i gtsug lag khang de'i mdun na'o/ /dbyar khang 'dug pa zhes bya ba ni/ gal te de'i mdun na dge slong ma'i dbyar khang 'dug na ni/ de'i tshe myur du thags thogs med par rang gi gnas su 'jug tu yod pas der nyi ma nub kyi bar du ston kyang ltung bar mi 'gyur bas/ de'i phyir ma yin par ro zhes bya ba smras te/ ji skad bstan pa'i rnam pa de lta bu ma yin pa'i gnas su nyi ma nub kyi bar du ston na ltung byed do/ /'di ni mtshon pa tsam du zad de myur du thags thogs med par rang gi gnas su phyin par rung ba'i gnas gzhan du yang nyi ma nub kyi bar du ston pa la ltung ba med la/ de lta bu ma yin par nyi ma nub kyi bar ston na ltung byed do/ / 'dir gzhung ni zhu ba kha cig las dge slong gis gdugs bas pa'i dus kyi tshe'i bar du dge slong ma la ston par bgyid la/ ltung bar yang mi 'gyur ba 'ga' mchis sam/ bka' stsal pa/ yod de dge slong ma rnams kyi dbyar khang du ston nam grong mtha'i gtsug lag khang ngam khang khyim dag tu ston na ltung ba med do/ /gang gi ni rab tu ston pa ni ma gtogs so zhes gsungs pa yin no/ /nyi ma nub kyi bar du ston pa'i ltung byed do zhes bya ba de bshad zin to// //zas chung zad tsam gyi phyir ston pa'i ltung byed smra bar 'dod nas/ dge slong mas chos dri ba la mi 'jigs par bya ba'i phyir dge slong la zas dbul bar bya'o zhes bya ba smras te/ dge slong mas dge slong la zas dbul bar bya'o/ /ci zhig gi phyir zhe na/ mi 'jigs par bya ba'i phyir ro/ /yul gang la mi 'jigs par bya ba'i phyir zhe na/ chos dri ba la ste/ bdag gis chos zhu bar bya'o snyam pa la'o/ /rgya cang dang shur bu dang lcag pod dang shur bu phre'u yang ngo zhes bya ba la/ rgya cang la sogs pa ni ska rags kyi rnam pa ste/ dge slong mas rgya cang la sogs pa yang sbyin par dge slong la dbul bar bya'o/ /dge slong gis de dag blang bar bya'o zhes bya ba ni/ dge slong gis zas la sogs pa de dag dge slong ma dag las blang bar bya'o/ /ci zhig rjes su bsgrub na zas cung zad tsam gyi phyir ston pa'i ltung byed du 'gyur zhe na de'i phyir/ dge slong de ltar gyur pa ma yin pa la zas cung zad tsam gyi phyir dge slong ma la ston to zhes bya ba smras na'o zhes bya ba smras te/ dge slong ma la ston pa'i dge slong zas cung zad tsam gyi phyir ston pa ma yin pa la dge slong 'di zas cung zad tsam gyi phyir dge slong ma la ston to zhes de skad smra na zas cung zad tsam gyi phyir ston pa'i ltung byed du 'gyur ro/ /bden pa nyid la ni ltung ba med do/ /'dir gzhung ni zas cung zad tsam gyi phyir dge slong ma la ston pa bden na ltung ba med do zhes gsungs pa yin no/ / zas cung zad tsam gyi phyir ston pa'i ltung byed do zhes bya ba de bshad zin to// //gos byed pa'i ltung byed smra bar 'dod nas/ shes gtso'o zhes bya ba smras te/ 'dir yang shes gtso zhes bya ba'i ming dang 'du shes gtso cher byed pa po nyid do zhes bya ba'i ming can du sbyor bar byed do/ /gang la 'du shes gtso cher byed pa po nyid yin zhe na de'i phyir/ dge slong ma nye du ma yin pa nyid la'o zhes bya ba smras te/ gang gi gos bya ba'i dge slong ma de yang nye du ma yin pa nyid yin la/ gos byed pa'i dge slong gis kyang de nye du ma yin pa nyid du shes na de la 'du shes gtso cher byed pa po nyid yin no/ /ci zhig rjes su bsgrub na 'du shes gtso cher byed pa po nyid yin zhe na de'i phyir/ gos byed na'o zhes bya ba smras te/ mthar thug na dngos gzhi'o/ /mdun rol du ni sbyor ba'o/ /gos byed pa'i ltung byed do zhes bya ba de bshad zin to// //gos sbyin pa'i ltung byed brjod par bya ste/ shes gtso'o zhes bya ba dang / dge slong ma nye du ma yin pa nyid la'o zhes bya ba bslab pa'i gzhi snga ma las drangs te 'dir khas blangs te/ ci zhig rjes su bsgrub na 'du shes gtso cher byed pa po nyid yin zhe na de'i phyir/ gos byin na'o zhes bya ba smras te/ dge slong gis dge slong ma la'o/ /ji lta bu zhig byin zhe na de'i phyir gos dbul ba ma yin pa la'o zhes bya ba smras te/ dge slong gis dge slong ma'i dge 'dun la gos dbul ba ma gtogs pa ste/ ngo bshes par gyur pa la sogs pa gzhan la sbyin par gyur na zhes bya ba'i tha tshig go/ /ci dge 'dun la gos dbul ba ma gtogs pa gzhan thams cad la sbyin na ltung byed du 'gyur ram zhe na de'i phyir/ gal te bor rlag byung ba dang / legs par smra ba dang / bsnyen par rdzogs par byed pa dang / brje ba'i phyir ma yin pa la'o zhes bya ba smras te/ gal te dge slong ma bor rlag byung ba de la sbyin pa dang / legs par smra ba sbyin pa dang / bsnyen par rdzogs pa byed pa'i tshe sbyin pa dang / brje ba'i phyir sbyin pa'i don bzhi po de dag la byin pa gang yin pa de la ni ltung ba med do zhes bya ba'i tha tshig go/ /ma yin pa la'o zhes bya ba smos pa ni/ bzhi po de dag ma yin pa gzhan la byin na ltung byed do/ /gos byin pa'i ltung byed do zhes bya ba de bshad zin to// //dge slong ma dang lhan cig 'dron lam du 'jug pa'i ltung byed smra bar 'dod nas/ lam rgyags bskur bar bya'o zhes bya ba smras te/ dge slong dang 'dron lam du 'gro bas lam rgyags rin po che lnga'am/ rin po cher smos pa lnga 'am/ bza' ba lnga 'am/ bza' bar smos pa lnga las gang 'byor cing 'os par bskur bar bya'o/ /su dag gis bskur bar bya zhe na de'i phyir/ rtse rgod dang rtse rgod ma dang dge tshul dang dge tshul ma dag gis so zhes bya ba smras te/ de dag khyer du gzhug go/ /dge slong dang dge slong ma rnams gcig gi lam rgyags gcig gis bskur du rung ngo zhes bya ba ni/ dge slong dang dge slong ma de dag gis lam rgyags rang rang gi 'khor med na gcig gis gcig gi bskur du rung ste rigs pa nyid yin no/ /gcig gis gcig gi byin len yang ngo zhes bya ba ni dge slong dang dge slong ma rnams gcig gi byin len yang gcig gis byar rung ngo / tshangs pa mtshungs par spyod pa na ba lam du dor bar mi bya'o zhes bya ba ni/ dge slong lam du 'gro ba dag gis tshangs pa mtshungs par spyod pa na ba lam du dor bar mi bya'o/ /de bskur bar bya'o zhes bya ba ni/ nad pa de dge slong lam du 'gro ba dag gis bskur bar bya ba'o/ /dge slong ma la yang de bzhin no zhes bya ba ni/ dge slong ma rnams kyis kyang tshangs pa mtshungs par spyod pa na ba lam du dor bar mi bya ba dang / de bskur bar bya'o zhes bya ba'i tha tshig go/ /de la phan tshun grogs bya'o zhes bya ba ni/ nad pa bskur ba de la dge slong dang / dge slong ma rnams phan tshun gcig gi grogs gcig gis bya'o/ /ji ltar grogs bya zhe na de'i phyir logs nas bzung bas so zhes bya ba smras te/ gal te dge slong na bar gyur na/ dge slong mas mgo logs nas bzung bar bya zhing gal te dge slong ma na bar gyur na yang dge slong gis mgo logs nas bzung bar bya ste/ rkang pa logs nas ni rigs mthun pas gzung bar bya ba'o/ /grong du phyin pa nyid na song yang nyes pa med do zhes bya ba dge slong dang dge slong ma de dag gis nad pa khrid de grong du phyin pa nyid na nad pa bzhag ste/ gzhan du 'gro na de'i tshe nyes pa med pa'o/ /ci dus thams cad du 'gro ba la nyes pa med dam zhe na de'i phyir/ nad pa'i sman dang zas legs par sbyar te rang bzhin mthun pa'i nad g.yog gcig kyang bzhag nas so zhes bya ba smras te/ nad pa'i sman sbyar cing zan yang legs par bsgrubs nas rang bzhin mthun pa'i nad g.yog mtshan 'dra ba gcig kyang nye bar bzhag nas phyis de la 'gro bar bya'o/ /gang la dge slong ma dang lhan cig 'dron lam du 'jug pa'i ltung byed du 'gyur zhe na de'i phyir/ 'jigs pa dang bcas pa'i lam nyid du 'gron thabs gcig tu zhugs shing tha mi dad par 'gro ba nyid ma gtogs par dge slong ma gcig dang lam las 'da' zhing 'gro na'o zhes bya ba smras te/ chom rkun la sogs pa'i 'jigs pa dang bcas pa'i lam nyid du sngar ma 'thabs par dge slong dang dge slong mas 'dron thabs gcig tu zhugs shing lhan cig 'gro ba nyid ma gtogs par de las gzhan du 'gro ba nyid la 'dron thabs gcig nyid du dge slong gang dge slong ma gcig dang yang lam las 'das shing 'gro na ltung byed du 'gyur ro/ /'di skad bstan te/ gal te dge slong dge slong ma dang lhan cig sngar 'thams kyang rung ma 'thams kyang rung ste/ 'dron thabs gcig tu 'grogs te/ 'gro ba nyid kyis lam las 'da' bar 'gro na ltung byed du 'gyur ro/ /gal te lam yang 'jigs pa dang bcas pa nyid yin la/ de dag gis kyang 'dron thabs der sngar ma 'thams par 'dron thabs gcig tu 'dod cing 'grogs te lam du 'gro ba nyid la ni nyes pa med do/ /'dir dge slong ma'i don mthun dang lhan cig ces gsungs pa ni/ rigs tsam gtso che ba yin pas/ dge slong ma gcig gam gnyis sam mang po gang yang rung ba'o/ /'di ji srid du 'das na zhe na de'i phyir/ rgyang grags re rer ro zhes bya ba smras te/ rgyang grags re re zhing dngos gzhi re rer 'gyur te/ rgyang grags gcig 'das na dngos gzhi gcig /rgyang grags gnyis 'das na dngos gzhi gnyis/ rgyang grags gsum 'das na dngos gzhi gsum du gyur pa la sogs pa lta bu'o/ /de'i phyir re rer ni nyes byas so zhes bya ba ni/ rgyang grags kyi phyed re rer 'das na nyes byas te/ rgyang grags phyed phyed cing nyes byas re rer 'gyur ro zhes bya ba'i tha tshig go/ /'dir gzhung ni rgyang grags re rer ni dngos gzhi'o/ /rgyang grags phyed phyed du ni nyes byas so zhes gsungs pa yin no/ /dge slong ma dang lhan cig 'dron lam du 'jug pa'i ltung byed do zhes bya ba de bshad zin to/ / //ci zhig rjes su bsgrub na dge slong ma dang lhan cig grur 'dug pa'i ltung byed du 'gyur zhe na de'i phyir/ 'gram gnyis 'jigs pa dang bcas pa nyid ma gtogs par 'thams nas cig car gru gcig gis lam las 'da' zhing 'gro na'o zhes bya ba smras te/ bslab pa'i gzhi snga ma las dge slong ma gcig dang yang lam las 'da' zhing 'gro na'o zhes smos pa nyid 'dir yang sbyar bar bya'o/ /de ltar na 'dir tshig gi don 'di 'byung ste/ dge slong gang dge slong ma gcig dang yang lhan cig sngar 'thams kyang rung ma 'thams kyang rung ste/ cig car dus gcig tu gru gcig gis chu'i lam las 'da' zhing 'gro na/ rgyang grags re rer ni dngos gzhi'o/ /rgyang grags phyed phyed du ni nyes byas so/ /'gram gnyi ga bar chad brgyad po dag gi nang nas bar chad gcig gis bar chad dang bcas pa nyid yin na yang ma gtogs so/ /gal te 'gram gcig bar chad dang bcas pa nyid yin na dge slong dang dge slong ma rnams kyis bar chad med pa'i 'gram cig shos su gnas par bya'o/ /ci thams cad du 'am zhe na de'i phyir/ thad kar pha rol du 'gro ba ma gtogs so zhes bya ba smras te/ thad kar pha rol du 'gro ba ma gtogs par chu'i rgyun las bzlog phyogs sam rgyun phyogs su 'gro ba la kha na ma tho ba 'dir 'gyur ro/ /de'i phyir zhugs pa ni yo ba dang / gtib chad pa dang / dba' klong las bzur ba dang / ru skya dang / gdos pa chag pa dang / ru skya 'dzin pa'i dbang gis 'jug pa gzhan du song ba la ni nyes pa med do zhes bya ba ni/ thad kar pha rol du 'gro ba de'i phyir zhugs pa na yo ba dang / gtib chad pa dang / dba' klong las bzur ba'i dbang dang / ru skya dang gdos pa chag pa'i dbang dang / ru skya 'dzin pa'i dbang gi rkyen gyis rgyun las bzlog pa'i phyogs sam rgyun phyogs su 'jug pa gzhan du song ba la ni nyes pa med de zhes bya bar sbyar ro/ /yo ba zhes bya ba ni chu'i gzhung yo ba'o/ /gtib chad pa zhes bya ba ni/ chu klung gi 'gram gtib chad pa nyid do/ /dba' klong zhes bya ba ni/ chu srub chen po 'khyil zhing 'khrug pa'o/ /bzur ba zhes bya ba ni/ yo ba dang gtib chad pa dang dba' klong las bzur ba'o/ /ru skya zhes bya ba ni/ gru bskyed kyi skya ba chen po'o/ /gdos pa zhes bya ba ni srog shing ngo / /ru skya 'dzin pa zhes bya ba ni/ rlung yor thogs pa'o/ /'jug pa gzhan du song ba'o zhes bya ba ni rgyun las bzlog phyogs sam rgyun phyogs su song ba'o/ /dge slong ma dang lhan cig grur 'jug pa'i ltung byed do zhes bya ba de bshad zin to// //bam po nyi shu rtsa drug pa/ gcig pu 'dug pa'i ltung byed la yan lag gang dag byed pa po nyid dag yin zhe na/ de'i phyir bud med gcig pu nyid dang skye bo'i rgyun lugs med pa nyid kyis phyogs dben pa nyid dang skyabs dang bcas pa nyid dang / bar 'dom gang nyid ni byed pa po dag yin no zhes bya ba smras te/ bud med gcig pu nyid ces bya ba la gcig pu nyid ces bya ba'i sgra ni bud med kyi bye brag tu byas pa yin te/ dge slong ni gcig pu nyid yin par skabs nyid kyis khong du chud par bya'o/ /skye bo'i rgyun lugs med pa nyid kyis phyogs dben pa nyid ces bya ba ni/ skye bo mang po'i rgyun lugs med pa nyid kyis phyogs de dben pa nyid yin pa'o/ /skyabs dang bcas pa nyid ces bya ba ni/ rtsig pa la sogs pa dag gis phyogs de bskyabs pa ste/ 'dir gzhung ni rtsig pas bskyabs pa dang / rib mas bskyabs pa dang / yol bas bskyabs pa zhes gsungs pa yin no/ /de yang mtshon pa tsam du zad de/ /mun nag la sogs pa dag kyang bsdu'o/ /bar 'dom gang nyid ces bya ba ni/ de ni bud med dang bar 'dom gang tshun chad na 'dug na de dge slong la kha na ma tho ba 'dir 'gyur ro/ /gang la de dag byed pa po nyid yin zhe na de'i phyir/ 'dug pa la'o zhes bya ba smras te/ bud med kyi dbang du byas pa nyid yin mod kyi/ gnyi ga la yang rig par bya'o/ /'dug pa de'i ngo bo nyid ji lta bu zhe na/ de'i phyir/ de ni rkub tshos tsam bzhag pa'o zhes bya ba smras te/ 'dug pa zhes bya bar bsams so/ /gcig pur 'dug pa'i ltung byed do zhes bya ba de bshad zin to// //gcig pu 'greng ba'i ltung byed smra bar 'dod nas/ bstan ma thag pa'i bslab pa'i gzhir smos pa'i rnam pa dag khas blangs nas bye brag 'ga' zhig brjod par bya ste/ de'i phyir dge slong ma dang ngo zhes bya ba smras te/ sngar bud med ces smos pa'i gnas su 'dir dge slong ma zhes bya ba 'di gzhug go/ /bslab pa'i gzhi bstan ma thag pa la gang dang gang du bud med ces smos pa'i gnas de dang der 'dir dge slong ma zhes bye brag tu gzhug par rig par bya ste/ des na 'dir dge slong ma nyid byed pa po nyid yin gyi bud med ni ma yin no/ /de ltar na 'dir tshig gi don 'di 'byung ste/ dge slong ma gcig pu nyid dang skye bo'i rgyun lugs med pa nyid kyis phyogs dben pa nyid dang / skyabs dang bcas pa nyid dang / bar 'dom gang nyid ni byed pa po dag yin no/ /gang la de dag byed pa po dag yin zhe na/ de'i phyir 'greng ba la'o zhes bya ba smras te/ sngar 'dug pa la'o zhes bya ba'i gnas su 'dir 'greng ba la'o zhes bye brag tu smos te/ dge slong rnams dang dge slong ma dag go/ / gcig pu 'greng ba'i ltung byed do zhes bya ba de bshad zin to// //dge slong mas sbyor du bcug pa za ba'i ltung byed smra bar 'dod nas de'i phyir shes gtso'o zhes bya ba smras te/ 'dir yang shes gtso zhes bya ba'i ming dang / 'du shes gtso cher byed pa po nyid do zhes bya ba'i ming can du sbyor bar byed do/ /de ltar yang 'dir gzhung ni so sor thar pa'i mdo las yang dge slong gang shes bzhin du zhes gsungs pa yin no/ /de'i rnam par 'byed pa las kyang gal te dge slong gis gal te de shes la zos na zhes gsungs te/ gal te dge slong mas sbyor du bcug pa la dge slong mas sbyor du bcug par shes na zhes gsungs pa yin no/ /gang la 'du shes gtso cher byed pa po nyid yin zhe na/ de'i phyir dge slong mas sbyor du bcug pa nyid la'o zhes bya ba smras te/ sbyor du bcug pa'i dngos po ni sbyor du bcug pa'i dngos po nyid de/ dge slong mas sbyor du bcug pa nyid de la de ltar shes na yul de la 'du shes gtso cher byed pa po nyid yin no/ /'dir sbyor du bcug pa zhes bya ba ni/ byed du bcug pa ste/ de yang gal te tshig gis bcol zhing ngag gi rnam par rig byed kyis sbyor du bcug pa yin na ste/ spring yig la sogs pas ni nyes byas so zhes gsungs pa'i phyir ro/ /'dir gzhung ni zhu ba las spring yig dag dang lag yig dag dang lag rtsis dang mngags pa dang brgyud pa dang zur gyis bsod snyoms sbyor du bcug pa zos na nyes byas so zhes gsungs pa yin no/ /ji ltar sbyor du bcug pa nyid la zhe na de'i phyir/ yang dag pa ma yin pa'i yon tan dag gis so zhes bya ba smras te/ 'dir gzhung ni rgyun du zhugs pa dang / lan cig phyir 'ong ba dang / phyir mi 'ong ba dang / dgra bcom pa yin pa bden na ltung ba med do/ /mdo sde 'dzin pa dang / 'dul ba 'dzin pa dang / ma mo 'dzin pa dag yin pa bden na ltung ba med do zhes gsungs pa yin no/ /gang la sbyor du bcug pa nyid la zhe na de'i phyir/ mgron du ma bos pa la'o zhes bya ba smras te/ de ni mgron yang yin la ma bos pa yang yin pas mgron du ma bos pa ste de la'o/ /bos pa yang lhag na'o zhes bya ba ni/ mgron du bos pa la yang lhag par sbyor du bcug pa nyid la'o/ /'di skad bstan te/ gal te mgron du bos kyang lhag par sbyor du 'jug pa la'o/ /'dir gzhung ni 'di lta ste/ dge slong rab tu mang po dag khyim gzhan du mgron du bos par gyur pa na der dge slong ma 'ongs te dris pa/ khyed cag gis dge slong gang dag mgron du bos/ ming che ge mo dang che ge mo dag go/ /zan ji lta bu dag sbyin sum 'phel gyi zan dag go/ /mi rung ste dge slong de dag ni rgyun du zhugs pa yin pas de dag la rtsang phye dag sbyin par bya'o zhes bya ba la sogs pa gsungs pa yin no/ /de lta bas na mgron du bos su zin kyang sbyin bdag gis ma bsams pa bzhin du 'jug pa gang yin pa de yang bza' bar mi bya ste/ zos na ltung byed do/ /ci zhig sbyor du bcug pa nyid la zhe na de'i phyir/ bza' bar bya ba'o zhes bya ba smras te/ 'bras chan la sogs pa'o/ /yang dag pa ma yin pa'i yon tan dag gis so zhes smras na/ yang dag pa'i yon tan ji lta bu dag gis she na de'i phyir/ bsgrub pa phun sum tshogs pas so zhes bya ba smras te/ bsgrub pa phun sum tshogs pa rdzogs pa ni bsgrub pa phun sum tshogs pa ste des so/ / bsgrub pa zhes bya ba'i sgras ni tshul khrims nas brtsams te/ dgra bcom pa nyid kyi bar dag bzung ngo / /de thos pas kyang rung ngo zhes bya ba ni/ bsgrub pa phun sum tshogs pa'i thabs su gyur pa'i thos pa gang yin pa des sbyor du bcug na yang nyes pa med do/ /bro gar dang / glu gling dang mkhas pa la sogs pa gzhan dag gis sbyor du bcug pa ni 'di'i rjes su 'brang bas nyes byas su rig par bya'o/ /bsod snyoms sbyor du bcug pa ni gnyis te/ tshul khrims kyis sbyor du bcug pa dang / thos pas sbyor du bcug pa ste/ mdo snga ma gnyis dang go rims bzhin no/ /ci zhig rjes su bsgrub na bza' bar bya ba byed pa po nyid yin zhe na de'i phyir zos na'o zhes bya ba smras so/ /zos pa'i ngo bo nyid bstan pa'i phyir/ de ni mid na de'o zhes bya ba smras te/ zos pa de ni mid na dngos gzhir gyur pa'i zos pa de yin gyi khar bcug pa tsam kho nas ni ma yin no/ /gzhan gyi don du na smad par bya ba nyid do zhes bya ba ni/ gzhan gyi don du sbyor du bcug pa la ni na smad par bya ba nyid do/ /na smad par byed pa'i phyir na smad par bya ba ste/ de'i dngos po ni de nyid do/ /'di skad bstan te/ dge slong mas gzhan gyi don du sbyor du bcug pa dge slong gzhan gyis zos na nyes byas so/ /'dir gzhung ni zhu ba las gzhan gyi don du sbyor du bcug par shes bzhin du zos na nyes byas so/ /'di dge slong mas sbyor du bcug pa yin no zhes bya bar mi shes pa'i dge slong gis dge slong mas sbyor du bcug pa de zos pa la ni ltung ba med do zhes gsungs pa yin no/ /bsod snyoms la zhugs pa na byin cig ces zer ba yang ngo zhes bya ba ni/ dge slong bsod snyoms la zhugs pa na dge slong ma 'di skad ces dge slong 'di la bsod snyoms byin cig ces zer ba dge slong gis blangs te zos na yang nyes byas so/ /'dir gzhung ni zhu ba las btsun pa re zhig dge slong bsod snyoms la zhugs pa na de na dge slong ma zhig khyim bdag la 'di skad ces/ dge slong 'di la bsod snyoms byin cig ces mchi zhing dge slong des kyang de blangs te 'tshal na ltung ba cir 'gyur nyes byas su 'gyur ro zhes gsungs pa yin no/ /dge slong mas sbyor du bcug pa'i ltung byed do zhes bya ba de bshad zin to// //yang yang za ba'i ltung byed smra bar 'dod nas/ khyim gzhan du yang zan la bos pa dang du blang bar bya'o zhes bya ba smras te/ dge slong gis khyim gzhan du yang zan la mgron du bos pa dang du blang zhing bdag gir bya'o/ /yang zhes bya ba'i sgras ni gtsug lag khang 'ba' zhig tu ma zad kyi khyim gzhan du yang ngo zhes bya bar ston to/ /dus shes par bya ste 'jug par bya'i snga tshogs su mi bya'o zhes bya ba ni/ gal te khyim bdag gzhan du mgron du bos pa dang du blangs par gyur na der zan la sogs pa'i dus shes par bya ste 'jug par bya'i/ ha cang snga tshogs su 'gro bar mi bya'o/ /de'i phyir gaN+DI brdungs te rang rang gi 'khor de la blta bar bya'o zhes bya ba ni/ khyim gzhan du mgron du bos pa de'i phyir dus la bab par gaN+DI brdungs te gnas brtan gnas brtan rnams kyis rang gi 'khor gang dang gang yin pa dag la blta bar bya'o/ /glo bur du 'ongs pa la ni gnas brtan gyis so zhes bya ba ni/ dge slong glo bur du 'ongs pa rnams la ni dge 'dun gyi gnas brtan gyis blta bar bya'o/ /'dir gzhung ni dge slong 'khor dang spyod pa rnams kyis ni rang rang gi 'khor rnams la bltas te 'dong bar bya'o/ /dge slong gang la la glo bur du 'ongs pa de la ni dge 'dun gyi gnas brtan gyis blta bar bya'o zhes gsungs pa yin no/ /gya tshom du zan gcad par mi bya'o zhes bya ba ni/ nad la sogs pa'i rgyu med par khro ba la sogs pas sam/ le lo la sogs pas gya tshom du rang gi zan gcad par mi bya'o/ /skom gyi phyir gsol ba dag 'debs na bsdad par bya'o zhes bya ba ni/ gal te yon bdag gsol ba 'debs te/ 'dir dge slong dag gis skom btung bar bya'o zhes gsol ba dag 'debs par byed na/ dge slong dag gis khyim gzhan der ci ran cig bsdad par bya'o/ / yang yang za ba'i ltung byed la byed pa po gang yin zhe na de'i phyir/ cig car yang rung / phyis kyang rung ste/ gos kyi rnyed pa med pa'i mgron du bos pas gnyis pa rnyed pa'o zhes bya ba smras te/ nyi ma gcig la cig car yang rung phyis kyang rung ste/ gos kyi rnyed pa med pa'i mgron du bos pa gnyis pa rnyed pa ni kha na ma tho ba 'di'i byed pa po nyid yin no/ /cig car dang du blangs pa la ni nyes byas su 'gyur ro zhes 'og nas 'byung bas/ de'i phyir gang gi tshe mgron du bos pa gnyi ga dang du len par byed cing / bza' ba'i phyir snga phyi sems par mi byed pa de'i tshe ni gang gi bza' ba phyis 'grub par 'gyur ba de kho na las chos nyid kyi dbang gis nyes byas su 'gyur bar shes par bya'o/ /ji ste mgron du bos pa gcig la gos med pa nyid yin na de lta na ni gos med pa kho na las nyes byas su 'gyur te/ gos dang bcas pa dang / gos med pa dang / gos dang bcas shing gos kyi rin dang yang bcas pa dang / gos med cing gos kyi rin yang med pa zhes bya ba rnam pa bzhis ltung ba bstan pa mdzad do/ /de la gos dang bcas pa zhes bya ba ni gos dang bcas pa gzhan nas 'dir gos la bos pa ste/ mgron du bos pa gnyi ga yang gos dang bcas pa yin no zhes bya ba'i tha tshig go/ / gos med pa zhes bya ba ni gos dang bcas pa gzhan nas 'dir gos med pa la bos pa ste/ snga ma ni gos dang bcas pa yin la/ phyi ma ni gos med pa yin no zhes bya ba'i tha tshig go/ /gos dang bcas shing gos kyi rin dang yang bcas pa zhes bya ba ni/ gos kyang yod cing gos kyi rin yang yod pa'o/ /gos med cing gos kyi rin yang med pa zhes bya ba ni/ gos kyis kyang stong zhing gos kyi rin gyis kyang stong pa'o/ /de la gos kyi rin zhes bya ba ni/ gos kyi zong yin par shes par bya'o/ /ji zhig la mgron du bos pa rnyed na byed pa po nyid yin zhe na de'i phyir/ bza' bar bya ba la'o zhes bya ba smras so/ /bza' bar bya ba ji lta bu la zhe na/ lnga'i khongs su gtogs pa la'o zhes bya ba smras te/ 'bras chan dang / zan dron dang / 'de gu dang / sha dang / snum khur zhes bya ba lnga po de dag gi khongs su gtogs pa la ste/ lnga po de dag gi nang nas gang yang rung ba la zhes bya ba'i tha tshig go/ /mgron du bos pa snga ma las/ cig shos rnam pa ji lta bu rnyed na byed pa po nyid yin zhe na/ de'i phyir/ gal te gzhan yang de nyid yin na'o zhes bya ba smras te/ gal te mgron du bos pa gzhan cig shos kyang bza' bar bya ba de nyid kyi khongs su gtogs pa yin na/ de'i tshe de rnyed na byed pa po nyid yin la/ gal te de nyid ma yin na ltung ba med do/ /'dir gzhung ni zhu ba las btsun pa re zhig dge slong sngar bza' ba ma lags pa la g.yar drangs nas de slad kyis bza' ba la g.yar drangs te/ des de 'tshal na ltung ba cir 'gyur/ nye ba 'khor ltung ba med do/ /btsun pa re zhig dge slong bza' ba lnga po dag ma gtogs pa de las gzhan pa'i bza' ba dag la sngar g.yar drangs nas de slad kyis bza' ba lnga po dag la g.yar drangs te des de 'tshal na ltung ba cir 'gyur/ nye ba 'khor ltung ba med do zhes gsungs pa yin no/ /dge slong ji lta bu la de byed pa po nyid yin zhe na de'i phyir/ na ba ma yin pa dang las ma byas pa dang lam du ma song ba la'o zhes bya ba smras te/ na ba ma yin pa ni mi na ba'o/ /gang gis las ma byas pa de ni las ma byas pa'o/ /gang lam du ma song ba de ni lam du ma song ba ste/ de dag la de byed pa po nyid yin no/ /de lta bas na na ba la sogs par gnas pa'i dus dag la ni ltung ba med do/ /gnas ma yin pa'i dus dag la ni nyes byas te/ /gnas ma yin pa'i dus thams cad la ni nyes byas so zhes gsungs pa'i phyir ro/ /de dag rnyed pa gang la gang gis byed pa po yin zhe na de'i phyir/ dang du blangs na nyes byas kyi'o zhes bya ba smras te/ khas blangs pa'i dus na nyes byas kyi byed pa po yin no/ /'dir dang du blangs pa ni yid kyi yin pa'i phyir de ni bsdams par bya ba'i nyes byas so/ /khar za ba'i mdun rol du 'gro ba la sogs pas rjes su bsgrub pa ni bshags par bya ba'i nyes byas yin par rig par bya'o/ /zos na dngos gzhi'o zhes bya ba ni/ mgul du mid zin pa'i dus na dngos gzhi'i byed pa po yin no/ /gos kyi rnyed pa zhes smos na gos kyi tshad ji tsam la zhe na de'i phyir/ 'dir gos kyi mthar gyur pa ni khru gang gi khyon no zhes bya ba smras te/ gos la bos pa 'dir gos kyi tshad mthar gyur pa ni khru gang gi khyon yin par rig par bya'o/ /gal te gos khru gang gi khyon las chung ba'i gos dang bcas par bos pa de ni gos med pa nyid yin par rig par bya ste/ dngos gzhi'i kha na ma tho ba nyid kho nar 'gyur ro/ /gos sbyin par byed pa la sogs pa gzhan dag la ni khru gang gi khyon ni dngos gzhi'i byed pa po yin la de bas chung ba ni nyes byas byed pa po yin gyi/ 'dir ni de bas chung bas dngos gzhi'i byed pa po yin no/ /sngar na ba ma yin pa dang las ma byas pa dang / lam du ma song ba la'o zhes smos na lam gyi tshad ji tsam zhe na de'i phyir/ lam ni dpag tshad phyed do zhes bya ba smos te/ 'dir lam gyi mthar gyur pa ni dpag tshad phyed do/ /gzhan la yang ngo zhes bya ba ni/ yang yang za ba las gzhan pa 'dus shing za ba la sogs pa'i bslab pa'i gzhi dag la yang ste/ yang ngo zhes bya ba'i sgras ni bslab pa'i gzhi de dag la yang lam gyi mthar gyur pa ni dpag tshad phyed do zhes 'dis 'dra bar bstan pa yin no/ /'dir ram grur 'gro ba la yang ngo zhes bya ba la/ 'dir zhes bya ba ni skam la 'gro ba'i lam mo/ /grur 'gro zhes bya ba ni grur zhugs te 'gro ba'i lam ste/ de gnyis la yang mthar gyur pa'i tshad ni dpag tshad phyed yin par rig par bya'o/ /las kyi mtshan nyid gang zhe na/ de'i phyir/ las kyi phyag dar re lde tsam mam dkyil 'khor ba mal tsam yin no zhes bya ba smras te/ las kyi mthar gyur pa'i tshad ni gal te phyag dar re lde tsam byas pa 'am/ gal te byug pa mal tsam bas pa de yin par rig par bya'o/ /gzhan la yang ngo zhes bya ba 'dir yang sbyar bar bya ste/ des na 'dus shing za ba la sogs pa dag la yang las kyi mtshan nyid 'di yin par rig par bya'o/ /de yang dge 'dun gyi nyid dam mchod rten gyi nyid yin na'o zhes bya ba ni/ phyag dar la sogs pa'i las bstan pa gang yin pa de yang gal te dge 'dun gyi nyid yin nam/ gal te mchod rten gyi nyid yin na de'i tshe las dus so zhes bya ba yin no/ /na ba'i tshad gang zhe na de'i phyir/ na ba nyid kyi tshad ni mi nus pa'o zhes bya ba smras te/ na ba'i dngos po ni na ba nyid de de'i tshad ni mi nus pa nyid do/ /'di skad bstan te/ ji ltar na mgron du bos pa gcig gang yin pas 'tsho bar mi nus pa de lta bu'i na ba nyid du gyur pa yin na/ de'i tshe ji snyed pa khas blang bar bya'o/ /gzhan la yang ngo zhes bya ba 'dir yang sbyar bar bya ste/ des na de dag la yang 'di dang 'dra bar rig par bya'o/ /bshams pa ni mgron du bos pa nyid ma yin no zhes bya ba ni/ nyin gcig mi chad par bshams pa'i zan nar ma zos pa gang yin pa de ni dus ston la sogs pa'i nyi ma dag la lan 'ga' gang du bos pa de'i mgron du bos pa gzhan ma yin par rig par bya'o/ /'dir gzhung ni zhu ba las mngon par lhag pa zos na ltung ba med do zhes gsungs pa yin no/ /mngon par lhag pa zhes bya ba ni/ dge slong la bshams pa'i bsod snyoms kyi phud de/ de zos na ltung ba med do/ /dge slong gi phyir bshams pa la ni dge slong la bshams pa'o/ /kun tu lta ba yang ngo zhes bya ba ni/ mgron du bos pa nyid ma yin no zhes bya bar sbyar ro/ /'jig rten gyi tha snyad kyi dbang ngam shes pa'i dbang gis nye bar lta ba ni kun tu lta ba ste/ de la mgron du byas pa zos pa yang mgron du bos pa nyid ma yin no/ /'dir gzhung ni zhu ba las 'dir spyan gzigs tsam gsol la gdugs tshod gzhan du gsol cig ces zer ba la ltung ba med do zhes gsungs pa yin no/ /mgron du bos pa gzhan yong na zan snga ma la spong ba bsrung zhing 'jug par bya'o zhes bya ba ni/ gal te dge slong nyi ma gcig la sngar gos dang bcas pa yang rung / gos med pa yang rung ba zhig tu mgron du bos pa'i rjes la gos dang bcas pa'i mgron du bos pa gzhan zhig kyang byung na/ de'i tshe dge slong des mgron du bos pa snga ma la spong ba bsrung zhing 'jug par bya ste/ de'i rjes la phyi mar yang 'gro bar bya'o zhes bya bar sbyar ro/ /mgron du bos pa gzhan yod na zhes bya ba ni/ gos dang bcas pa'i mgron du bos pa phyi ma gzhan yod na'o/ /zan snga ma zhes bya ba ni/ sngar gos dang bcas pa yang rung gos med pa yang rung ba zhig tu mgron du bos pa'i zan snga ma la'o/ /spong ba bsrung zhing zhes bya ba la/ spong ba zhes bya ba ni/ 'grangs par zos nas deng bdag gis 'di las yang bza' bar mi bya'o zhes ltos pa med pa'i bsam pas zan gyi stan las ldang ba ste/ dge slong gi spong ba de bsrung zhing zan snga ma la 'jug par bya ste/ de'i rjes la phyi mar yang 'gro bar bya'o zhes bya ba'i tha tshig go/ /'di skad bstan te/ gal te dge slong gis kha gnyis su mgron du bos pa khas blangs par gyur na mgron du bos pa snga ma shos la ji nas kyang spong bar mi 'gyur ba de ltar spong ba bsrung zhing de'i rjes su mgron du bos pa cig shos dang bcas pa yin na der yang 'gro zhing bza' bar bya'o/ /gal te zan snga ma la spong ba ma bsrungs shing spangs par gyur na ni phyi mar song yang bza' bar mi bya'o/ /tho 'tshams par byas pa ni ma yin pa nyid do zhes bya ba ni/ mgron du bos pa zhes bya bar sbyar te/ tho 'tshams pa'i bsam pas mgron du bos pa ni mgron du bos pa ma yin pa nyid du rig par bya'o/ /'dir gzhung ni zhu ba las btsun pa re zhig dge slong la sngar tho 'tshams pa'i rtog pa tsam gyis g.yar drangs par gyur nas/ slad kyis tha mal pa'i gnas skabs su g.yar drangs pa gzhan rnyed cing de 'tshal na ltung ba cir 'gyur/ nye ba 'khor ltung ba med do zhes gsungs pa yin no/ /tho 'tshams pa'i rtog pa ni tho 'tshams par rtog pa ste/ gang la la gzhan tho 'tshams pa'i rtog pa de yod pa de ni tho 'tshams pa'i rtog pa can yin no/ /'di skad bstan te/ gal te tho 'tshams pa'i bsam pa can 'ga' zhig gis/ dge slong mgron du bos su zin kyang / dge slong des mgron du bos pa gzhan du song ste/ zan zos na de ltar na yang ltung ba med do/ /mi rung ba las bos pa yong ngo zhes bya ba ni/ bza' bar bya ba mi rung ba byin len ma byas pa dang / rmig gcig pa'i sha la sogs pa la mgron du bos pa yang mgron du bos pa ma yin pa nyid du rig par bya'o/ /de'i phyir ma yin par dge 'dun la yang ngo zhes bya ba ni/ dge slong gang la mgron du bos pa gzhan yod pa de'i phyir ma yin par dge 'dun spyir spyan drangs pa yang dge slong de'i mgron du bos pa cig shos nyid ma yin no/ /gal te de'i phyir dge 'dun spyir spyan drangs pa yin na ni/ de'i tshe dge slong de'i mgron du bos pa gzhan nyid yin no/ / 'dir khungs ni 'phags pa legs 'ongs kyi phyir chu srin phyis pa gsod kyi ri ba'i bram ze dang khyim bdag rnams kyis sangs rgyas la sogs pa'i dge slong gi dge 'dun spyan drangs pa na/ phyis 'phags pa legs 'ongs bram ze dang khyim bdag rnams kyis mgron du bos pas smras pa/ chu srin byis pa gsod kyi ri ba'i bram ze dang khyim bdag rnams kyis kho bo'i phyir/ sangs rgyas la sogs pa dge slong gi dge 'dun zhag bdun du ba shos la spyan drangs pas de'i tshe kho bos dang du ma blangs so zhes gsungs pa yin te/ de'i phyir mdo 'di byas so/ /gzhan du lnga po 'jog pa yang ngo zhes bya ba yang mgron du bos pa ma yin pa nyid do zhes bya bar sbyar te/ gzhan du zhes bya ba ni/ gang la bdag nyid zan za ba de las gzhan pa'i mgron du bos pa cig shos su'o/ /lnga po 'jog pa yang zhes bya ba ni lnga po dge slong dang dge slong ma dang / dge slob ma dang / dge tshul dang dge tshul ma dag 'jog pa yang mgron du bos pa ma yin pa nyid do/ /'di skad bstan te/ dge slong kha gnyis su mgron du bos pas mgron du bos pa'i gnas gcig tu ni bdag nyid za zhing mgron du bos pa'i gnas gzhan cig shos su dge slong la sogs pa lnga po 'jog na mgron du bos pas cig shos de mgron du bos pa ma yin pa nyid de ltung ba med do zhes bya ba'i tha tshig go/ /'dir gzhung ni sil bu dag las dge slong bca' ba dang bza' ba'i zan gnyis la mgron du bos pa gcig dge slong la rnam par rtog par byed na ltung ba med do/ /dge slong ma la rnam par rtog par byed na yang ltung ba med do/ /de bzhin du dge slob ma dang / dge tshul dang dge tshul ma la rnam par rtog par byed na yang ltung ba med do/ /de bzhin du sde pa lnga po thams cad la rnam par rtog par byed na yang ltung ba med do zhes gsungs pa yin no/ /de ni chos dang ldan pa nyid do zhes bya ba la/ de ni zhes bya ba ni/ mgron du bos pa gzhan cig shos su lnga po 'jog pa'o/ /chos dang ldan pa zhes bya ba ni/ chos dang mi 'bral ba'o/ /de'i dngos po ni de nyid do/ /de ni chos dang ldan pa nyid de rigs pa'i tshul nyid yin no zhes bya ba'i tha tshig go/ /gzhan blang ba la yang ngo zhes bya ba ni/ mgron du bos pa gzhan yod na 'jog par len pa yang chos dang ldan pa nyid do/ /mu ge byung na mgron du bos pa ji snyed byung ba dag bdag gir bya'o zhes bya ba ni/ mu ge byung na mgron du bos pa ji snyed byung ba de snyed bdag gir bya'o/ /'di skad bstan te/ /mu ge byung ba'i dus kyi tshe mgron du bos pa ji snyed byung ba de snyed bdag gir bya ste/ snga mar gzhag par yang ngo / /zos na yang ngo zhes bya ba ni/ mgron du bos pa ji snyed byung ba de snyed zos na yang ltung ba med do/ /sbyin du yang rung ngo zhes bya ba ni/ lnga po la'o zhes sngar bstan pa'i rjes su shes par bya'o/ /sbyin pa po mngon par mi dga' bar 'gyur ba lta na kham gnyis sam gsum zos pa'i 'og tu khyim bdag dge slong 'di bsod snyoms kyis phongs pa yin gyis rjes su yi rang bar gyis shig dang / 'di la sbyin par bya'o zhes mngon par dga' bar byas nas so zhes bya ba ni/ de ltar dge slong des rang gi bsod snyoms sbyin pa pos sbyar ba de lnga po dag la sbyin par byed pa na gal te sbyin pa po de lnga po dag la sbyin par mngon par mi dga' bar 'gyur ba lta na/ de'i tshe dge slong des rang gis kham gnyis sam gsum zos pa'i 'og tu sbyin pa po de la 'di skad ces khyim bdag dge slong 'di bsod snyoms kyis phongs pa yin gyis rjes su yi rang bar gyis shig dang / 'di la sbyin par bya'o zhes bya ba'i thabs kyis sbyin pa po mngon par dga' bar byas nas de'i 'og tu lnga po de dag la sbyin par bya'o/ /'di skad bstan te/ gal te bsod snyoms de lnga po dag la sbyin pa la sbyin pa po mngon par dga' bar mi 'gyur ba de ltar na/ de'i tshe dge slong des rang gis kham gnyis sam gsum bza' bar bya zhing de'i 'og tu 'di skad ces sbyin bdag dge slong 'di bsod snyoms kyis phongs pa yin gyis/ rjes su yi rang bar gyis shig dang 'di la sbyin par bya'o zhes mngon par dga' ba bskyed par bya zhing de'i 'og tu lnga po dag la sbyin par bya'o/ /yang yang za ba'i ltung byed do zhes bya ba de bshad zin to// //'dug gnas su za ba'i ltung byed la byed pa po gang yin zhe na de'i phyir/ chos 'di pa ma yin pa bdag po khyim pa dang bcas pa ya mtshan can thams cad ma yin pa'i 'dug gnas su zhes bya ba smras te/ chos 'di gang la yod pa de ni chos 'di pa'o/ /chos 'di pa de'i 'dug gnas gang yin pa de ni chos 'di pa'o/ /chos 'di pa'i ma yin pa ni chos 'di pa'i ma yin pa ste/ mu stegs can gyi 'dug gnas so/ /bdag po khyim pa dang bcas pa zhes bya ba ni/ bdag po khyim pa dang lhan cig 'jug pa gang yin pa de ni bdag po khyim pa dang bcas pa'i 'dug gnas so/ /ya mtshan can thams cad ma yin pa'i 'dug gnas so zhes bya ba la/ ya mtshan can zhes bya ba ni/ chos 'di pa dang gzhan mu stegs can gyi rab tu byung ba spyi'i ming ngo / /thams cad ma yin pa'i 'dug gnas zhes bya ba ni/ gal te thams cad kyi yin na ni chos 'di pa'i rab tu byung ba dag gi 'dug gnas kyang yin par 'gyur bas/ de'i phyir thams cad ma yin pa zhes smos te/ chos 'di zhu ba'i rab tu byung ba dag ma gtogs pa gzhan mu stegs can rab tu byung ba dag gi 'dug gnas so zhes bya ba'i tha tshig go/ /de lta bas na bcom ldan 'das kyi nyan thos ma gtogs pa rab tu byung ba gzhan dag gi phyir bshams pa bdag po khyim pa dang bcas pa'i 'dug gnas de ni ltung ba 'di'i byed pa po yin no/ /ltung ba 'byin par byed pa ji lta bu la de byed pa po yin zhe na de'i phyir/ mi na ba la'o zhes bya ba smras te/ gal te na ba ma yin na de la'o/ /na ba ni ji srid 'dod pa de srid du der nyal zhing zos na yang nyes pa med do/ /'dir gzhung ni so sor thar pa'i mdo las gal te dge slong mi na bas zhes gsungs pa yin no/ /sbyin bdag gis ma bstabs pa la'o zhes bya ba ni/ gal te sbyin bdag gis dge slong de la bstabs pa ma yin na de la'o/ /bstabs pa ni 'dug gnas byed pa po ma yin no/ /'phags pa shA ri'i bus sbyin bdag gis bstabs pa yang zhal gyis ma bzhes pa gang yin pa de ni/ de'i tshe na da dung bcom ldan 'das kyis rjes su gnang bar ma gyur pa'i phyir te/ gleng gzhi de kho na'i dbang gis de'i mod la bcom ldan 'das kyis sbyin bdag gis bstabs par 'dug par bya ba dang bza' bar bya ba rjes su gnang ba mdzad do/ /sbyin bdag ni de la dbang yod pa yin te/ nges par ma phul ba'i phyir ro/ /bslab pa'i gzhi 'di la ji zhig rjes su bsgrub na 'dug gnas de gang zag gang la kha na ma tho ba gang gi byed pa po nyid yin zhe na de'i phyir/ de'i zas ni zos pa la dngos gzhi'i 'o zhes bya ba smras te/ de'i zos na zhes bya ba ni/ nyi ma gnyis pa de'i bsod snyoms zos na'o/ /zos pa la zhes bya ba ni/ gang gis zos pa'i dge slong la'o/ /dngos gzhi'o zhes bya ba ni/ dngos gzhi ni kha na ma tho ba'i byed pa po nyid yin pa'o/ /gnas na zhag lon pa la nyes byas kyi'o zhes bya ba la/ gnas na zhes bya ba ni/ nyi ma gnyis su gnas na ste nyi ma gnyis pa la zan ma zos par gyi na gnas na'o/ /zhag lon pa la zhes bya ba ni/ der zhag gcig lon pa nyi ma gnyis pa'i bar du gnas pa'i dge slong la'o/ /nyes byas kyi'o zhes bya ba ni/ nyes byas kyi kha na ma tho ba'i byed pa po nyid yin pa'o/ /nyi ma dang po la ni gnas pa dang zos pa la ltung ba med do/ /nyi ma gnyis pa la gnas pa dang za ba'i dbang du mdzad nas 'di skad gsungs te/ der gnas shing der za na gnas pa de la ni nyes byas so/ /za ba la ni ltung byed du 'gyur ro zhes gsungs pa yin no/ /de nyi ma gnyis pa'i dbang du byas te gsungs pa/ ci mngon zhe na/ so sor thar pa'i mdo las 'dug gnas gcig tu zhag lon pa'i dge slong mi na bas bsod snyoms gcig bza' bar bya'o/ /de las lhag par za na ltung byed do zhes gsungs pa'i phyir ro/ /yan lag gcig ma tshang na yang 'dug gnas der de'i zos na zos pa la nyes byas kyi byed pa po nyid yin no/ /bdag po med pa yang ngo zhes bya ba ni chos 'di pa'i ma yin pa ya mtshan can thams cad ma yin pa'i 'dug gnas bdag po med pa yin na yang nyes byas kyi byed pa po yin no/ /'di la rab tu byung ba 'di pa ni mu stegs can dang 'dra ba nyid do zhes bya ba ni/ bslab pa'i gzhi 'di la rab tu byung ba 'di pa 'dug gnas kyi bdag po yin pa ni mu stegs can 'dug gnas kyi bdag po yin pa dang 'dra ba nyid do/ /de gnyis gang yang rung ba bdag po yin na yang / 'dug gnas de nyes byas kyi byed pa po nyid yin par rig par bya'o/ /'di skad bstan te/ ji ltar mu stegs can gyi rab tu byung ba bdag po yin pa'i 'dug gnas de nyes byas kyi byed pa po yin pa de bzhin du rab tu byung ba 'di pa bdag po yin la/ ya mtshan can thams cad ma yin pa'i 'dug gnas kyang nyes byas kyi byed pa po yin no/ /'dir gzhung ni dge slong rab tu byung bas 'dug gnas bgyid du stsal ba der dge slong gis dgung gcig las lhag par gnas shing bsod snyoms gcig las lhag par 'tshal na ltung ba cir 'gyur nyes byas so zhes gsungs pa yin no/ /nye dus kyang ngo zhes bya ba yang mu stegs can dang 'dra ba nyid do zhes bya bar sbyar te/ dge slong de'i nye dus byed du bcug pa'i 'dug gnas nye du bdag po yin la/ ya mtshan can thams cad kyi ma yin pa der zhag gcig las lhag par gnas shing bsod snyoms gcig las lhag par zos na nyes byas so/ /'dir gzhung ni bdag po nye dus bgyid du stsal ba lags na ltung ba cir 'gyur nyes byas so/ /btsun pa re zhig dge slong gis gzhan nas bsod snyoms blangs nas 'dug gnas su mchis te 'tshal na ltung ba ci 'gyur/ nyes byas so/ /btsun pa re zhig dge slong gis bza' bar bgyi ba ma gtogs pa de las gzhan pa'i bca' ba dang btung ba dang gzhib pa dang bldags pa dag 'tshal na ltung ba cir 'gyur nyes byas so zhes gsungs pa yin no/ /bza' bar bya ba zhes bya ba ni 'bras chan la sogs pa rnam pa lnga'o/ /'dug gnas su za ba'i ltung byed do zhes bya ba de bshad zin to/ / //lhung bzed do gsum tsam las lhag par len pa'i ltung byed smra bar 'dod nas/ stobs pa'i 'o zhes bya ba smras te/ khyim pa stobs pa'i bsod snyoms ltung ba 'di'i byed pa po yin no zhes bya bar sbyar ro/ /khyim pa'i bsod snyoms khyad par ji lta bu can zhig byed pa po yin zhe na/ de'i phyir stobs pa'i 'o zhes bya ba yin te/ gal te khyim pa de dge slong de la bsod snyoms kyis stobs par byed na khyim pa stobs par byed pa de'i bsod snyoms byed pa po yin no/ /ji ltar stobs pa'i zhe na de'i phyir/ yongs su ma dpags pa'o zhes bya ba smras te/ lhung bzed 'di snyed cig bzhes shig ces tshad yongs su ma bcad par stobs par byed pa'i ste/ gal te yongs su bcad de stobs na ni chos dang ldan pa'i dgos pa yod na lhung bzed brgya blangs kyang nyes pa med do/ /ci khyim pa stobs pa'i bsod snyoms yongs su ma dpags pa thams cad byed pa po yin nam zhe na de'i phyir/ ci bder ma byas pa'o zhes bya ba smras te/ gang gis ci bder ma byas pa de ni ci bder ma byas pa ste/ de byed pa po yin no/ /ci bder byas pa ni nyes pa med do/ /ci rab tu byung ba stobs pa'i bsod snyoms kyang byed pa po yin nam zhe na de'i phyir/ /khyim pa'i 'o zhes bya ba smras te/ khyim pa stobs pa'i bsod snyoms so/ /bsod snyoms ci tsam zhig byed pa po yin zhe na de'i phyir/ bre'u chung dag gi tshad ni 'bras thug po che ma ga d+hA'i bre'u chung phyed dang lnga btsos pa tshod ma ma gtogs pa las lhag pa'i bsod snyoms te/ grogs kyi skal ba dang yang bcas pa yin no zhes bya ba smras te/ 'bras thug po che skam yul ma ga d+hA'i bre'u chung phyed dang lnga btsos pa'i chan tshod ma ma gtogs pa las lhag pa'i bsod snyoms ni byed pa po'o zhes bya bar sbyar ro/ /bsod snyoms lhag pa de'i bre'u chung gang gi tshad ji tsam zhe na/ de'i phyir 'bras thug po che ma ga d+hA'i bre'u chung phyed dang lnga btsos pa zhes bya ba smras te/ 'bras thug po che skam yul ma ga d+hA'i bre'u chung phyed dang lnga btsos pa'i chan no/ /ma ga d+hA'i bre'u chung gang la ni 'bras thug po che drus pa skam yul ma ga d+ha pa'i srang bcu drug ste/ yul ma ga d+hA ba'i srang gcig la bod kyi srang gnyis yod de/ 'bras skam bre'u chung gang la bod kyi srang ni sum cu rtsa gnyis yod/ phul tshad du brtsis na ni bdun phul do dang khyor gang yod do/ /tshod ma ma gtogs pa zhes bya ba ni/ der tshod ma brtsi bar mi bya ste/ dge slong ji snyed yod kyang rung ste/ 'bras thug po che skam yul ma ga d+hA'i bre'u chung phyed dang lnga btsos pa'i chan tshod ma ma gtogs pa de las lhag pa'i bsod snyoms len na thams cad du ltung byed do/ /'dir gzhung ni dge slong ji tsam du bre'u chung phyed dang lnga las lhag pa'i bsod snyoms len na thams cad du ltung byed do zhes gsungs pa yin no/ /gal te dge slong de la grogs dag yod na grogs de dag re res kyang tshad de tsam re res blang bar bya'am zhe na ma yin te/ de'i phyir grogs kyi skal ba dang yang bcas pa yin no zhes bya ba smras te/ grogs ji snyed yod kyang rung ste/ de dag gi skal ba dang bcas par tshad de tsam zhig blang bar bya'i/ de las lhag par mi blang ngo / /'dir gzhung ni so sor thar pa las 'dod na dge slong de dag gis lhung bzed gang ba gnyis sam gsum blang bar bya'o/ /de las lhag par len na ltung byed do zhes gsungs pa yin no/ /bsod snyoms tshad ji skad bstan pa las lhag pa de gang gi tshe byed pa po yin zhe na/ de'i phyir zos pa na'o zhes bya ba smras te/ mgul du mid pa na'o ci zos so cog thams cad na 'am zhe na/ de'i phyir mnos pa'o zhes bya ba smras te/ de nas mnos te gzhan du khyer ba zhes bya ba'i tha tshig go/ /'dir gzhung ni zhu ba las de nyid du 'dug ste/ ji snyed zos kyang ltung ba med do zhes gsungs pa yin no/ /de la ni nyes byas kyi'o zhes bya ba ni/ mnos pa de la bsod snyoms lhag par nod na sbyor ba'i tshe ni nyes byas kyi byed pa po yin no/ /gzhan gyis mnos pa yang ngo zhes bya ba ni/ gzhan nod du bcug pa zos na yang nyes byas kyi byed pa po yin te/ 'dir gzhung ni zhu ba las 'dag gu dag dang / snum khur dag bstabs pa de la lhung bzed gnyis sam gsum las lhag par gzhan nod du bcug na nyes byas so zhes gsungs pa yin no/ /gzhan la ni ltung ba med do zhes bya ba ni zan mnos pa las gzhan pa ma mnos pa la ni ltung ba med pa'o/ /'dir gzhung ni de nyid du 'dug ste ji snyed zos kyang ltung ba med do zhes sngar bstan pa de nyid yin no/ /mdo 'di ni nyes byas su dogs pa bsal ba'i phyir byas so/ /las su ma byas pa yang ngo zhes bya ba ni/ 'bras la sogs pa rngo btag ma byas pa mnos te za ba la yang ltung ba med pa ste/ de la skabs 'di'i nyes pa med pa las dgongs pa yin gyi/ 'bru tsam pa len pa'i nyes byas gzhan ni yod do/ /blang bar bya ba gal te mang ba nyid na dge slong dag la bgo bsha' bya'o zhes bya ba la/ blang bar bya ba zhes bya ba ni/ blang bar 'os pa ste/ 'bras thug po che'am ma ga d+hA'i bre'u chung phyed dang lnga btsos pa de'i rkyen gyi tshod ma dang bcas pa'o/ /gal te mang ba nyid na zhes bya ba la/ mang ba'i dngos po ni mang ba nyid de blang bar bya ba de gal te rang bza' ba las lhag cing mang ba nyid yin na'o/ /dge slong dag la bgo bsha' bya'o zhes bya ba ni/ de ltar mang ba dag yin na de'i tshe dge slong dag la yang bgo bsha' bya ba'o/ /de lta bas na mang ba nyid ces smos pa ni rang bza' ba las lhag na gdon mi za bar bza' bar bya'o zhes bstan pa'i phyir ro/ gal te rang bza' ba las mi lhag na ni des gdon mi za bar dge slong dag la bgo bsha' bya ba ma yin no/ /de'i phyir so sor thar pa'i mdo las kyang lhung bzed gang ba gnyis sam gsum blangs nas phyi rol kun dga' ra bar 'dong la dge slong 'khod pa rnams la yang bgo bsha' bya/ bdag kyang bza' bar bya ste zhes gsungs pa yin te/ gal te blang bar bya ba de las lhag par yod na zhes bya ba'i tshig gi lhag ma yin no/ /lhung bzed do gsum tsam las lhag par len pa'i ltung byed do zhes bya ba de bshad zin to// //spangs nas za ba'i ltung byed smra bar 'dod nas/ ji tsam gyis chog pa bza' bar bya'o zhes bya ba smras te/ ji tsam gyis bkres pa'i sdug bsngal dang bral bar gyur pa de tsam bza' bar bya'o/ /zas brtsams pas ldang bar mi bya'o zhes bya ba ni/ dge slong zas bza' bar brtsams pas ji srid du chog par ma zos pa de srid du ldang bar mi bya ste/ stan spang bar mi bya'o zhes bya ba'i tha tshig go/ /gzhan du bza' bar bya ba gang yin pa de ni byin len byed pa yin gyi/ zas brtsams pa nyid ni ma yin te/ brtsams pa zhes smos pa'i phyir dang 'og nas kyang gnas btang ba zhes 'byung ba'i phyir ro/ /de lta bas na bza' ba'i phyir zhes bya ba ni ma smos kyang grub pas logs shig tu bya mi dgos so/ /da ni zas brtsams pa'i mtshan nyid bstan pa'i phyir/ tha na lan tshwa yan chad bza' bar bya ba gang yang rung ba cung zad cig blangs na rnam pa de nyid yin no zhes bya ba smras te/ tha na lan tshwa yan chad ces bya ba ni/ chung ngu na lan tshwa yan chad tsam yang zhes bya ba'i tha tshig go/ /bza' bar bya ba gang yang rung ba zhes bya ba ni/ bza' ba dang bca' ba'i zas gang yang rung ba'o/ /cung zad cig ces bya ba ni chung ngu zhig kyang ngo / /blangs na zhes bya ba ni byin len byas na'o/ /rnam pa de nyid yin no zhes bya ba ni/ zas brtsams pa de nyid yin te/ zas brtsams pa ni de nyid du bza' ba'i phyir byin len byas pa'o/ /'og nas shes gtso bo zhes bya ba ni 'dir yang shes gtso bo zhes bya ba'i ming dang 'du shes gtso cher byed pa po nyid do zhes bya ba'i ming can du sbyor bar byed do/ /gang la 'du shes gtso cher byed pa po nyid yin zhe na de'i phyir spangs pa nyid dang lhag por ma byas pa nyid la'o zhes 'byung ba de la spangs pa nyid ni gang yin/ lhag por ni gang yin par brjod par bya zhe na/ je spangs pa nyid bstan pa'i phyir/ spangs pa'i ni gnas btang ba'o zhes bya ba smras te/ phyogs gang du 'dug par gyur pa de btang ba ni spangs pa zhes bya'o/ /gang gis btang ba zhe na/ de'i phyir 'dug pa'i 'o zhes bya ba smras te/ dge slong gi'o/ /'dug pa ji lta bu zhig gis she na de'i phyir/ rtsa ba la sogs pa bca' bar bya ba la sogs pa'i zas brtsams pa'i'o zhes bya ba smras te/ gang gis rtsa ba la sogs pa bca' bar bya ba la sogs pa'i zas brtsams pa zhes bya ba'i tha tshig go/ /rtsa ba la sogs pa zhes bya ba la sogs pa snga ma'i sgras ni sdong bu dang 'dab ma dang me tog dang 'bras bu bca' bar gyur pa dag bsdu'o/ /bca' ba la sogs pa'i zhes bya ba la sogs pa 'og ma'i sgras ni 'bras chan dang / zan dron dang / sha dang snum khur dang 'dag gu bza' bar bya ba dag bsdu'o/ /ci cung zad kyang ma byas par btang na'am zhe na de'i phyir/ rtsa ba dang sdong bu dang 'dab ma dang me tog dang 'bras bu bca' bar bya ba dag dang / thug pa las gzhan pa bza' bar bya bar rung ba dang mi rung ba dang / ma 'dres pa'i byin len stobs pa 'thob pa'i phyogs na 'greng ba spangs pa byas nas so zhes bya ba smras te/ rtsa ba la sogs pa bca' bar bya ba dag las gzhan pa dang thug pa las kyang gzhan pa bza' bar bya ba rung ba/ mi rung ba dang ma 'dres pa'i byin len stobs pa'i 'drim mkhan de spangs te gnas btang na spangs pa nyid yin no/ /byin len stobs pa'i 'drim mkhan khyad par ji lta bu can zhig ce na de'i phyir/ 'thob pa'i phyogs na 'greng ba zhes bya ba smras te/ dge slong gis byin len bya ba'i phyir zas 'thob pa'i phyogs na 'greng ba de'o/ /'di skad bstan te/ bza' bar bya ba rnam pa de lta bu 'drim par byed pa'i phyag tshang byin len stobs pa de spangs par byas nas zas brtsams pa'i 'dug pa'i gnas de nas dge slong gis gnas btang na spangs pa nyid yin no/ /rtsa ba la sogs pa btang bas ni spangs par mi 'gyur te sha kha ra la sogs pa yang de nyid kyi khongs su 'dus pa yin no/ /'dir gzhung ni zhu ba las btsun pa re zhig dge slong gis bza' ba lnga po dag ma gtogs pa de las gzhan pa'i dngos po dag spangs par gyur nas/ des slad kyi bza' ba lnga po dag 'tshal na ltung ba cir 'gyur/ ltung ba med do zhes gsungs pa yin no/ /bza' bar bya ba lnga ni 'dag gu dang sha dang 'bras chan dang zan dron dang snum khur dag ste/ bza' bar bya ba de dag las byin len spangs na zas thams cad spangs par 'gyur ro/ rtsa ba la sogs pa spangs pas ni bza' bar bya ba dag spangs par mi 'gyur ro/ /gsol cig ces bya ba yang de bzhin no zhes bya ba ni/ gsol cig ces smras na des kyang spangs pa yin par shes par bya'i/ sngar bstan pa 'ba' zhig spangs par ma zad do/ /gsol cig ces bya ba'i sgra 'di ni kha cig tu gzhan yul la bya ba'i yul gyis 'jug pa yang yin pas/ 'dis ni gzhan dag la byin cig ces bya bar ston to/ /gal te rang nyid mi len na'o na rang gi yul la bkag pa'i 'bras bur mi 'gyur ram zhe na/ 'drim pa gang yin pa de nyi tshe rang gi yul las phyir bkag par zad kyi/ zan thams cad bkag pa ni ma yin no/ /song shig ces bya ba yang ngo zhes bya ba ni/ sngar bstan pa 'ba' zhig gis spangs par ma zad kyi/ phyag tshang 'drim mkhan la mar song shig ces smras pa 'dis kyang spangs pa yin no/ /'tshal lags so zhes bya bas kyang ngo zhes bya ba la/ kyang ngo zhes bya ba'i sgra ni sngar yang ngo zhes bya ba'i rjes bsnyag pa'i phyir te/ sngar bstan pa 'ba' zhig gis spangs par ma zad kyi/ zos zin to zhes bya ba 'di smras pas kyang spangs pa yin no/ /re zhig ces bya ba'i sgra nye bar sbyar na ni ma yin no zhes bya ba ni/ gal te sngar smos pa thams cad la re zhig ces bya ba'i sgra nye bar sbyor bar byed de/ re zhig gsol cig ce 'am re zhig song cig ce 'am re zhig 'tshal lags zhes zer na ni de'i tshe de gsum smras pas spangs par mi 'gyur ro/ /chog go zhes bya ba yang ngo zhes bya ba ni/ de la yang re zhig ces bya ba'i sgra nye bar sbyar na spangs pa ma yin na gzhan dag la lta smos kyang ci dgos/ thug pa'i mtshan nyid smra bar 'dod nas/ kha gzar gyen du 'greng du mi btub pa nyid kyi thug pa dag gi thug pa nyid do zhes bya ba smras te/ gang du kha gzar btsugs na kha gzar gyen du 'greng du mi btub pa nyid kyi thug pa la sogs pa dag ni thug pa nyid yin no/ /'di skad bstan te/ gal te thug pa'i nang du kha gzar btsugs pa de gyen du 'greng du mi btub pa ni thug pa nyid yin no/ /sor mo lnga mi mngon pa ni skyo ma'o zhes bya ba ni/ skyo ma gang gi steng du sor mo lnga bzhag pa'i rjes mi mngon pa ste/ de ni sor mo mi mngon pa ste/ sor mo lnga mi mngon pa de ni skyo ma'i thug pa nyid yin no/ /byin len stobs pa zhes smos pa de'i rnam pa bstan pa'i phyir/ tho 'tshams pa ni byin len stobs pa nyid ma yin no zhes bya ba smras te/ tho 'tshams par byed pa ni byin len stobs pa nyid ma yin no/ /'di skad bstan te/ gal te 'ga' zhig tho 'tshams pa'i bsam pas dge slong la byin len stobs par byed la/ dge slong gis kyang de shes nas/ 'di skad ces kho bo la 'di mi dgos kyis song shig ces smras na/ de lta na yang spangs pa byas par mi 'gyur te/ de la byin len med pa'i phyir ro/ /'dir gzhung ni zhu ba las btsun pa re zhig dge slong sngar tho 'tshams pa'i rtog pa can gyis byin len stobs par gyur la/ des slad kyis tha mal pa'i gnas skabs su gzhan gyis byin len stobs pa de la 'tshal na ltung ba cir 'gyur/ nye ba 'khor ltung ba med do zhes gsungs pa yin no/ /tho 'tshams pa'i rtog pa can zhes bya ba ni/ 'di la tho 'tshams mo snyam pa'i rtog pa gang la yod pa'o/ /spangs pa'i mtshan nyid bstan zin to// //bam po nyi shu rtsa bdun pa/ spangs pa bstan nas/ da ni lhag por bya ba bstan par bya ste/ mtshams kyi phyi rol dang mi 'thob pa'i phyogs dang mdun ma yin pa na 'dug pa las lhag por bya ba mi 'byung ngo zhes bya ba ni/ mtshams kyi phyi rol na 'dug pa dang / mi 'thob pa'i phyogs na 'dug pa dang / mdun ma yin pa na 'dug pa'i gang zag rnam pa de lta bu las dge slong gis lhag por bya ba mi 'byung ngo / /lhag bor zhes bya ba ni lhag mar byas shing bor ba ste/ lhag por byed pa'i dge slong gis zos pa'i lhag ma bor ba ni lhag por zhes bya'o/ /lhag por byed pa'i dge slong gis lhag mar ma byas shing ma bor ba ni lhag por ma byas pa ste/ 'dir gzhung ni rnam par 'byed pa las/ lhag por ma byas par zhes bya ba ni/ lhag mar ma byas shing ma bor yongs su ma btang bar ro zhes gsungs pa yin no/ /de lta bas na snga ma las bzlog pa mtshams kyi nang dang 'thob pa'i phyogs dang / mdun na 'dug pa las dge slong gis lhag por bya ba 'byung ste/ de ni re zhig phyir btang ba'i mtshan nyid yin no/ /bya ba lag tu ma blangs pa la yang mi 'byung ngo zhes bya ba las ni/ lhag por bya ba'i dngos po gang yin pa de lag tu ma blangs pa la yang lhag bor bya ba mi 'byung ste/ thu bar bzhag pa la yang mi 'byung la byug ris su bzhag pa la yang mi 'byung ngo / /'dir gzhung ni dge slong des lag pa bsnyal te byin len byas la zhes gsungs pa yin no/ /nam mkha' la yang mi 'byung ngo zhes bya ba de ni mtshams kyi phyi rol zhes bya ba 'di'i khongs su gtogs pa nyid yin no/ /rung ba ma yin pa dang 'dres pa la ni mi bya ba nyid do zhes bya ba ni/ zas rung ba ma yin pa dang / 'dres pa la ni lhag por gyi dngos po mi bya ba nyid yin no/ /lhag por bya ba de sus bya ba nyid yin zhe na/ de'i phyir/ gnas ma btang bas bya ba nyid do zhes bya ba smras te/ dge slong gis zan za ba'i gnas ma btang ba de ni gnas ma btang ba ste/ des lhag por gyi dngos po de bya ba nyid yin no/ /ci chog par ma byas pa'i dge slong 'ba' zhig gis lhag por bya ba nyid yin nam zhe na de'i phyir/ mi bza' bar brtag pa byas pas kyang ngo zhes bya ba smras te/ mi za bar brtag pa byas pa zhes bya ba ni/ gang bdag gis deng 'di la zas gzhan mi bza'o zhes de ltar brtag pa byas pa ste/ des kyang lhag por bya ba nyid yin no/ /kyang ngo zhes bya ba'i sgras ni mi bza' bar brtag pa ma byas pas lta smos kyang ci dgos zhes bya bar ston to/ /ci ma gsol bas kyang bya'am zhe na/ de'i phyir/ gsol bas bya ba nyid yin no zhes bya ba smras te/ tshe dang ldan pa dgongs su gsol/ /bdag dge slong ming 'di zhes bgyi ba 'tshal ma 'tshal lags shing spangs te yongs su rdzogs shing mthar thug par bgyid pa las bca' ba dang bza' ba rnyed cing 'tshal bar 'tshal na/ lhag por bgyis te/ bdag la stsal du gsol zhes gang la gsol ba btab pa des/ lhag por bya ba nyid yin no/ /lhag por byed pas lhag por bya ba ji ltar bya zhe na/ de'i phyir/ khyod kyir gyur gyis bzhud cig ces bya ba'i tshig gis bya'o zhes bya ba smras te/ khyod kyir gyur gyis bzhud cig ces bya ba'i tshig brjod par bya ba'o/ /kha cig ni ci bder gsol cig ces kyang ngo zhes bya ba ni/ slob dpon kha cig na re ci bder gsol cig ces bya ba'i tshig brjod par bya'o zhes kyang zer te/ 'dir don gtso che ba yin gyis/ tshig ni nges pa med pas/ des na lhag por bya ba'i tshig ni mdo las smos pa 'di gnyis sam/ de dang mthun pa gzhan dag gis kyang byar rung ngo / /ji tshig tsam kho nas lhag por bya bar zad dam zhe na/ de'i phyir/ kham gnyis sam gsum zos nas so zhes bya ba smras te/ je dang por kham gnyis sam gsum zos te lhag mar byas shing de'i 'og tu sngar bshad pa'i tshig brjod pas dor bar bya ste/ de tsam gyis na lhag mar byas pa yang yin la/ bor ba yang yin pas lhag bor byas pa zhes bya'o/ /ci gang gis mi bza' bar brtag pa byas pas lhag por byed na des kyang kham gnyis sam gsum zos nas bya 'am zhe na/ de'i phyir bya ba btang bas ni bza' bar mi bya'o zhes bya ba smras te/ gang gis zas kyi bya ba spang ba de ni bya ba btang ba ste/ des ni bza' bar mi bya bar khyod kyir gyur gyis bzhud cig ces bya ba la sogs pa'i tshig gang yang rung bas lhag por bya'o/ /lhag por byas pa gzhan gyis bza' bar bya'o zhes bya ba ni/ lhag por byas pa'i zas dge slong gcig gis mnos pa de dge slong gzhan dag gis kyang bzar rung ngo / /'dir gzhung ni dge slong gcig la rung ba gang yin pa de gzhan la yang rung ngo zhes gsungs pa yin no/ /shes gtso bo zhes bya ba ni/ 'dir yang shes gtso zhes bya ba'i ming dang 'du shes gtso cher byed pa po nyid do zhes bya ba'i ming can du sbyor bar byed do/ /gang la 'du shes gtso cher byed pa po nyid yin zhe na/ de'i phyir/ spangs pa nyid dang lhag por ma byas pa nyid dag la'o zhes bya ba smras te/ bdag nyid kyis spangs pa nyid gang yin pa dang / bza' bar bya ba gzhan gyis lhag por ma byas pa nyid gang yin pa de la dge slong gis kyang de ltar shes par gyur na yul de la de'i 'du shes de gtso cher byed pa po nyid yin te/ gal te bdag nyid kyis kyang spangs pa nyid yin la bza' bar bya ba de yang lhag por ma byas pa nyid yin par shes na zhes bya ba'i tha tshig go/ ji zhig rjes su bsgrub na de byed pa po nyid yin zhe na/ de'i phyir zos na'o zhes bya ba smras te/ mgul du mid par gyur na'o/ /ji zhig zos na zhe na/ de'i phyir zas tsam mo zhes bya ba smras te/ bca' bar bya ba tsam yang zhes bya ba'i tha tshig go/ /zas tsam mo zhes bya ba smos pas sha kha ra la sogs pa dag la thar bar mi 'gyur te/ spyir btang ba dang dmigs kyis bsal ba'i tshul gyis dus ma yin par za ba la sogs pa bzhin no/ /'dir stan gcig pa'i zas dang por bcas pas de'i phyir de dag thams cad ni de'i rnam par nges pa yin par rig par bya'o/ /stan gcig pa'i sbyangs pa'i yon tan yang dag par blangs pa'i dge slong gis ni spangs pa nyid yin yang rung spangs pa nyid ma yin yang rung ste/ zos zin phan chad lhag por byas kyang rung / lhag por ma byas kyang rung ba'i bca' bar bya ba dang / bza' bar bya ba dag bza' bar mi bya ste/ zos na yi dam ral bar 'gyur ro/ / dam bcas pa'i skyon de ni dge slong phal pa dag las gzhan pa sbyangs pa'i yon tan can dag gi bye brag yin par rig par bya'o/ /stan gcig pa'i zas kyi ltung byed do zhes bya ba de bshad zin to// //spangs pa la stobs pa'i ltung byed smra bar 'dod nas/ stobs na'o zhes bya ba smras te/ 'dir yang shes gtso bo spangs pa nyid dang / lhag por ma byas pa nyid dag la'o zhes sngar bstan pa'i yan lag de dag khas blangs nas 'di skad brjod par bya ste/ zos shing spangs pa de la zas tsam stobs na kha na ma tho ba 'dir 'gyur ro/ /gang la stobs na zhe na/ de'i phyir/ dge slong la'o zhes bya ba smras te/ rung ba'i dngos po dge slong la stobs na'o/ /rung ba ma yin pa'i dngos po dge slong la stobs pa thams cad la ni nyes byas so/ /spangs pa la stobs pa'i ltung byed do zhes bya ba de bshad zin to// //'dus shing za ba'i ltung byed smra bar 'dod nas/ shes gtso bo zhes bya ba smras te/ 'dir yang shes gtso bo zhes bya ba'i ming dang 'du shes gtso cher byed pa po nyid do zhes bya ba'i ming can du sbyor bar byed do/ /gang la 'du shes gtso cher byed pa po nyid yin zhe na/ de'i phyir/ so sor nges pa'i zas kyi gnas can dag las gzhan pa'i dge slong dge 'dun du gyur pa mtshams kyi nang na gnas pa dag gis zan lhan cig ma yin pa nyid la'o zhes bya ba smras te/ gnas gang na zas tha dad pa nyid du nges pa de ni so sor nges pa'i zas so/ /dge slong gang dag la gnas de yod pa dag ni so sor nges pa'i zas kyi gnas can dag go/ /dge slong de dag las gzhan pa'i dge slong gi dge 'dun du gyur pa bzhi yan chad mtshams kyi nang na gnas pa dag gi zan lhan cig 'dus shing za ba lhan cig ma yin pa nyid kyi yul de la de ltar shes pa'i 'du shes gang yin pa de gtso cher byed pa po nyid yin no/ /tshogs dang dge 'dun logs shig tu 'dus shing zhes bya ba la sogs pa yang don 'di nyid yin par khong du chud par bya'o/ /ci dge slong gcig pu zhig gi zan lhan cig ma yin pa nyid la yang ltung ba 'dir 'gyur ram zhe na/ de'i phyir/ lhan cig pa'o zhes bya ba smras te/ gcig pu'i ma yin no/ /rnam pa gang dang lhan cig pa'i zhe na/ de'i phyir/ cig car za ba dang ngo zhes bya ba smras te/ dus gcig tu za ba dang lhan cig pa yin gyi rim gyis za ba dang lhan cig pa ni ma yin te/ mgo mnyam du za ba dang ngo zhes bya ba'i tha tshig go/ /su dang lhan cig pa'i zhe na/ de'i phyir/ gsum la sogs pa dang ngo zhes bya ba smras te/ gsum mam bzhi la sogs pa'i tshogs dang ngo / /'dir gzhung ni bzhi po dag las gcig zhal ta byed cing gsum za ba la ni ltung ba med do zhes gsungs pa yin no/ /gsum la sogs pa dang ngo zhes smras na ji bsnyen par rdzogs pa'am 'on te bsnyen par ma rdzogs pa'am/ gang gis gsum la sogs pa dang zhe na/ de'i phyir/ dge slong rnams kyi'o zhes bya ba smras te/ dge slong zhes smos pas bsnyen par rdzogs pa rnams kyi yin par shes par bya'o/ 'dir gzhung ni ltung ba bstan pa las gsum bsnyen par rdzogs pa yin la gcig bsnyen par ma rdzogs pa yin na ltung ba med do zhes gsungs pa yin no/ /ci dus la lhan cig bab pa thams cad la yang yin nam zhe na/ de'i phyir/ dge slong rnam pa ji lta bus gos med pa'i zas gnyis pa rnyed pa byed pa po nyid yin pa bzhin no zhes bya ba smras te/ ji ltar dge slong dus la ma bab pas gos med pa'i zas gnyis pa rnyed pa yang yang za ba'i byed pa po nyid yin pa de bzhin du 'dir yang dge slong mi na ba dang las ma byas pa dang lam du ma zhugs pa dang / grur ma zhugs pa dang / skam sa'i lam dang chu'i lam du dpag tshad phyed du ma song ba dag gis 'dus pa yin par rig par bya'o/ /dpag tshad phyed ces gsungs pa'i gzhung ni zhu ba las btsun pa re zhig dge slong gis dpag tshad phyed 'das par bgyis nas 'dus pa dang lhan cig 'tshal ma 'tshal na ltung ba cir 'gyur/ nye ba 'khor ltung ba med do zhes gsungs pa yin no/ /ci dbri bkol med par zan lhan cig ma yin pa nyid thams cad la'am zhe na/ de'i phyir/ dus ston chen po las gzhan pa la'o zhes bya ba smras te/ 'dir dus ston chen po zhes bya ba'i gzhung ni zan spags pa zhes gsungs pa yin no/ /zan spags pa zhes bya ba ni/ zan spags shing skyed mos tshal la sogs pa dag tu khyer ba tshoms so so tha dad par za ba ste/ dper na dong ka'i me tog brnga ba la sogs pa'i dus ston bzhin te/ de la ni ltung ba med do/ /de las gzhan pa la ni ltung bar 'gyur ro/ /zos na'o zhes 'og nas 'byung na ci dus la ma bab pa'i dge slong gis bza' bar bya ba gang yang rung ba thams cad byed pa po nyid yin nam zhe na/ de'i phyir rtags 'di med pa'i rab tu byung ba'i zas las gzhan pa'o zhes bya ba smras te/ rab tu byung ba gang la rtags 'di med pa de ni rtags 'di med pa'i rab tu byung ba ste/ phyi rol pa'i rab tu byung ba'o/ /de'i zas las gzhan pa zhes bya ba ni/ phyi rol pa'i rab tu byung ba'i zas ma gtogs pa gzhan dag gi zas te/ zas de dus la ma bab pa'i dge slong gis zos na byed pa po nyid yin no/ /'di skad bstan pa'i mdo de gsum gyi gzhung ni so sor thar pa'i mdo las 'dus shing za na dus ma gtogs te ltung byed do/ /de la dus ni 'di yin te/ na ba dus so/ /las dus so/ /lam dus so/ /grur zhugs pa dang / 'dus pa chen po dang / dge sbyong gi zas dus te de la de ni dus yin no zhes gsungs pa yin no/ /ji zhig rjes su bsgrub na de byed pa po nyid yin zhe na/ de'i phyir/ zas zos na'o zhes bya ba smras te/ mgul du mid na'o/ /der 'ong bar bya ba nyid du gnas pa mtshams kyi nang na 'khod pa dag gis 'ong ba nyid ma dris par za na 'da' ba'i phyed yin no zhes bya ba la/ der 'ong bar bya ba nyid du gnas pa zhes bya ba ni/ gzhi'i 'dug gnas dang khang khyim na gnas pa gang dag mtshams kyi nang na bkad sa 'dug pa der 'ong bar bya ba nyid du gnas pa'i dge slong de dag go/ /der 'ong bar bya ba nyid du gnas pa'i dge slong mtshams kyi nang na 'khod pa de dag gis 'ong ba nyid ma dris par za na 'da' ba'i phyed yin te nyes byas so zhes bya ba'i tha tshig go/ /dge slong der 'ong bar bya ba nyid du gnas pa ma yin pa dag gis 'ong ba nyid ma dris par za na ni ltung byed kho na ste mdo las gnas pa zhes smos pas gnas ma yin pa rnams kyi dmigs kyis bsal ba de ma byas pa'i phyir ro/ /'dir gzhung ni gzhi'i 'dug gnas kyi nyen kor na khang khyim dag yod la gzhi'i 'dug gnas su dge slong dag zan za na de dag gis khang khyim gyi 'dug gnas nas dge slong dag 'ongs sam zhes dri bar bya'o/ /ma dris par za na gzhi'i 'dug gnas pa dag la ni nyes byas su 'gyur la/ khang khyim gyi 'dug gnas pa dag la ni ltung byed do/ /dge slong dag khang khyim gyi 'dug gnas su zan za na de dag gis gzhi'i 'dug gnas nas dge slong dag 'ongs sam zhes dri bar bya'o/ /ma dris par za na khang khyim gyi 'dug gnas pa dag la ni nyes byas su 'gyur la/ gzhi'i 'dug gnas pa dag la ni ltung byed do zhes gsungs pa yin no/ /'di skad bstan te/ mtshams gcig gi nang na gzhi'i 'dug gnas logs shig na yod la gzhi'i 'dug gnas de'i phyi rol na khang khyim dag yod cing bkad sa lan 'ga' ni gzhi'i 'dug gnas su byed/ lan 'ga' ni khang khyim dag tu byed la/ de na gal te gzhi'i 'dug gnas su bkad sa byed na khang khyim na gnas pa'i dge slong dag kyang zan gyi phyir der 'ong bas/ de'i tshe gzhi'i 'dug gnas na gnas pa'i dge slong dag gis khang khyim na gnas pa'i dge slong dag 'ongs sam zhes dri bar bya'o/ /ma dris par za na nyes byas so/ /khang khyim na gnas pa'i dge slong der ma lhags pa dag gis kyang gzhi'i 'dug gnas na gnas pa'i dge slong dag 'ongs sam zhes dri bar bya'o/ ma dris par za na ltung byed du 'gyur ro/ /des na gal te khang khyim du bkad sa byed na gzhi'i 'dug gnas na gnas pa'i dge slong dag kyang zan gyi phyir der 'ong bas de'i tshe khang khyim na gnas pa'i dge slong dag gis gzhi'i 'dug gnas na gnas pa'i dge slong dag 'ongs sam zhes dri bar bya'o/ /ma dris par za na nyes byas so/ /gzhi'i 'dug gnas na gnas pa'i dge slong der ma lhags pa dag gis kyang khang khyim na gnas pa'i dge slong dag 'ongs sam zhes dri bar bya'o/ /ma dris par za na ltung byed du 'gyur ro/ /'dir mi 'dri ba ni zan lhan cig ma yin pa nyid kyi dpe tsam du zad kyi/ ltung ba'i rgyu ni zan lhan cig ma yin pa nyid kho na yin no/ /de lta bas na zan lhan cig nyid yin na ni ma dris par zos na yang nyes pa med do/ /de ltar na dge slong nges pa rnams la ni nyi ma gcig gi don la yang dge 'dun gyi bkad sa na smad pa nyid do/ /dge slong ma nges pa rnams la ni kha na ma tho ba yongs su rdzogs par 'gyur ro/ /da ni don gyis byung ba'i gzhi brjod par bya ste/ gnas nges pa gcig yin la de nyid na dge slong gang dag so so na zan za zhing de dag gis kyang 'dus shing za bar mngon sum du shes sam dogs pa dag yod na dge 'dun gyi khongs su gtogs pa'i dge slong de dag thams cad la nyes byas kho nar 'gyur te/ 'dus shing za ba btang snyoms su 'jog pa'i phyir ro/ /gang yang rung ba cung zad cig brims na yang zan gcig pa nyid yin no zhes bya ba ni/ bza' bar bya ba gang yang rung ba chung zad cig dge 'dun gyis zan logs shig na za ba la brims kyang rung / zan logs shig na za bas dge 'dun la brims kyang rung ste/ de'i tshe na zan gcig pa nyid yin zhing tha dad pa nyid ma yin te/ 'dus shing za ba'i ltung bar mi 'gyur ro zhes bya ba'i tha tshig go/ /'gro bar chas pa dang glo bur du 'ongs pa dang nad pa dang nad g.yog dang dge skos las gzhan pa thams cad kyis ma zos par g.yos mal dang spyi bungs las mnos te bza' bar mi bya'o zhes bya ba ni/ 'gro bar chas pa la sogs pa'i gang zag lnga po ma gtogs pa de las gzhan pa'i gang zag gis ji srid du dge slong thams cad kyis zan ma zos kyi bar du g.yos mal dang spyi bungs las rang gi skal ba mnos te bza' mi bya'o/ /gzhan pas zhes bya ba ni/ 'gro bar chas pa la sogs pa'i gang zag lnga po ma gtogs pa de las gzhan pa'i gang zag gis so/ / thams cad kyis ma zos par zhes bya ba ni/ ji srid du der gtogs pa'i dge slong thams cad kyis zan ma zos kyi bar du'o/ /g.yos mal zhes bya ba ni zan sbyor ba'i gnas te tshang mang la sogs pa'o/ /spyi bungs zhes bya ba ni/ dge 'dun gyi dbus kyi phyogs gang du 'bras chan la sogs pa'o/ /de ltar yang 'dir gzhung ni sman gyi gzhi las/ maud gal gyi bu lnga po 'di dag ni brtad pa las byung ba'i bsod snyoms yin te/ lnga gang zhe na/ glo bur du 'ongs pa dang / 'gro bar chas pa dang / nad pa dang / nad g.yogs dang / dge skos kyi zan dag go zhes gsungs pa yin no/ /phran tshegs dag las kyang bcom ldan 'das kyis dge slong brel ba dag gis khyim gzhan du bza' bar mi bya'o zhes gsungs so/ /dge slong kha cig na bar gyur nas de dag gi nad g.yog dag zan la dong ba 'phyi ba zhig na 'ongs pas/ de dag gi bya ba dag yongs su nyams par gyur pa'i skabs de dag dge slong dag gis bcom ldan 'das la gsol ba dang / bcom ldan 'das kyis bka' stsal pa/ de lta bas na gang zag lngas bsod snyoms mnos te bza' bar rjes su gnang ngo / /lnga gang zhe na/ glo bur du 'ongs pa dang / 'gro bar chas pa dang / nad pa dang / nad g.yog dang / las su bskos pa dag go zhes gsungs pa yin no/ /de lta bas na gang zag mgron du bos pas kyang rung / mgron du ma bos pas kyang rung ste/ dge slong gral du tshogs pa thams cad kyis zan bza' ba ma brtsams kyi bar du rang gi skal ba g.yos mal lam spyi bungs las mnos te bza' bar mi bya'o/ /dge slong gnyis sam gsum zhig mgron du bos na der yang g.yos mal dang spyi bungs nas mnos te bza' bar mi bya'o/ / gtsug lag khang na dge slong gcig pu zhig gnas na yang nges kyang bkad sa las gzhan du zan bza' bar mi bya ste/ zos na 'gal tshabs can du 'gyur ro/ /dge slong gcig pu zhig mgron du bos par gyur na des kyang sbyin bdag gis bskos pa ma gtogs par g.yos mal lam spyi bungs las mnos te bza' bar mi bya'o/ /tshangs pa mtshungs par spyod pa dge slong ngam/ dge slong ma thams cad kyis ma zos kyi bar du gang zag gi zan mnod par mi bya'o/ /mgron du bos par 'gro mi nus pa'i rkyen byung na yon bdag gis spags pa ma gtogs par tshus zan mnod par mi bya'o/ /'di ltar dge slong dang dge slong ma ni lhan cig bkad sa gcig tu zan bzar yang rung ngo / /de ni bcom ldan 'das kyis kyang rjes su gnang ste/ dge slong 'ga' 'ong yang srid pa de'i ched du gral gyi dang por stan cig bzhag ste/ dge slong ma rnams bkad par bya'o zhes gsungs pa yin no/ /'dus shing za ba'i ltung byed do zhes bya ba de bshad zin to// //dus ma yin par za ba'i ltung byed smra bar 'dod nas/ rang gi phyed yol nas skya rengs 'char ba'i bar ni dus ma yin no zhes bya ba smras te/ 'dzam bu'i gling la sogs pa gnas gang na dge slong gnas pa de las dgongs nas/ 'dir rang gi zhes bya ba smos par rig par bya'o/ /de bas na rang gi phyed yol phan chad nas phyi de nyin par gyi skya rengs 'char ba'i bar ni dus ma yin te/ gung tshigs kyi skad cig phan chad skya rengs shar ba'i mdun rol gyi bar de ni dus ma yin par rig par bya'o/ /'dir gzhung ni btsun pa re zhig dge slong gis dus ma lags par bca' bar bgyi ba dang / bza' bar bgyi ba 'tshal la ltung bar yang mi 'gyur ba mchis sam/ yod de 'dzam bu gling pa'i dus kyis gling gsum po dag tu zos na ltung bar mi 'gyur ba'o zhes bya ba la sogs pa gsungs pa yin no/ /de nyid la shes gtso bo zhes bya ba ni/ dus ma yin pa de nyid la 'du shes gtso cher byed pa po nyid yin no/ /ji zhig kun tu spyad na zhe na/ de'i phyir/ bca' bar bya ba dang bza' bar bya ba zos na'o zhes bya ba smras te/ dus ma yin par bca' bar bya ba 'am bza' bar bya ba zos na ltung byed du 'gyur ro zhes gsungs pa yin no/ /dus ma yin par za ba'i ltung byed do zhes bya ba de bshad zin to// //sog 'jog gi ltung byed smra bar 'dod nas/ je dang por sog 'jog gi mtshan nyid bstan par bya ste/ de'i phyir snga dro ba'i zas byin len byas pa phyi dro ba'i zas su dang de thun tshod las 'das pa lta bu ni sog 'jog byas pa yin no zhes bya ba smras te/ snga dro ba'i zas bca' bar bya ba dang / bza' bar bya ba'i zas kyi dus ni skya rengs shar nas brtsams nas gung tshigs kyi skad cig ma'i bar te/ dus der snga dro ba'i zas byin len byas pa byin len de nyid ma zhig par phyi dro ba'i zas kyi dus su gung tshigs las yol bar thal ba ni sog 'jog byas pa yin te/ byin len de zhig na ni sog 'jog byas par mi 'gyur ro/ /de zhes bya ba ni/ phyi dro ba'i zas te thun tshod du rung ba'i zas so/ /de yang byin len byas nas byin len de nyid ma zhig par thun tshod las 'das pa'i dus su thal na sog 'jog byas pa yin te/ de yang byin len de zhig na ni sog 'jog byas par mi 'gyur ro/ gtsug lag las thun tshod ces gsungs pa nyid thun tshod 'di yin par rig par bya'o/ /de nyid las shes gtso bo zhes bya ba ni/ bca' bar bya ba dang bza' bar bya ba za na zhes bya bar sbyar te/ de nyid la zhes bya ba ni/ sog 'jog byas pa de nyid la'o/ /shes gtso bo zhes bya ba ni/ 'dir yang shes gtso bo zhes bya ba'i ming dang 'du shes gtso cher byed pa po nyid do zhes bya ba'i ming can du sbyor bar byed do/ /bca' bar bya ba dang bza' bar bya ba yang sog 'jog byas pa yin la/ dge slong gis kyang de ltar shes na de la 'du shes gtso cher byed pa po nyid yin te/ de zos na ltung byed du 'gyur ro/ /lag nyar blangs pa mid par mi bya'o zhes bya ba la/ lag nyar blangs pa zhes bya ba ni/ byin len ma byas par dge slong rang gis blangs pa'i zas te/ de mid par mi bya'o zhes bya ba ni/ bza' bar mi bya'o zhes bya ba'i tha tshig go/ /mtshams kyi nang du btsos pa dang zhag lon par yang mi bya'o zhes bya ba ni/ mtshams kyi nang du btsos pa dang / mtshams kyi nang du zhag lon pa'i zas kyang mid par mi bya'o/ /mtshams kyi nang du zhes bya ba ni mtshams kyi nang rol zhes bya ba'i tha tshig go/ /btsos pa zhes bya ba ni bsregs pa dang btsos pa la sogs pa'i g.yos su byas pa'o/ / zhag lon pa zhes bya ba ni/ nyin zhag phyi ma'i skad cig mar gzhag pa zhes bya ba'i tha tshig go/ /'dir gzhung ni nang du btsos pa gang zhe na/ /kun dga' ra ba'i nang du blo mthun par ma byas shing rung ba ma yin pa'i sa gzhir btsos pa gang yin pa'o/ /nang du zhag lon pa gang zhe na/ kun dga' ra ba'i nang du blo mthun par ma byas shing rung ba ma yin pa'i sa gzhir zhag lon pa gang yin pa'o zhes gsungs pa yin te/ dge slong bsnyen par rdzogs pas bza' bar mi bya'o/ /'dir kun dga' ra ba zhes bya ba'i sgras ni gnas kyi gzhi brjod de/ btsos ma ma yin pa'i mtshams dang bcas pa bzung gi /gsol ba la sogs pa'i las kyis bcad pa'i mtshams nyi tshe bzung bar bya ba ni ma yin no/ /dge slong gis btsos pa yang ngo zhes bya ba yang / yang ngo zhes bya ba'i sgras mid par mi bya'o zhes bya bar sbyar te/ dge slong gis btsos pa ni mtshams kyi nang du yang rung / mtshams kyi phyi rol du yang rung ste/ dge slong bsnyen par rdzogs pas bza' bar mi bya'o/ /dge slong gis btsos pa de yang dge slong kho nas bza' bar bya ba ma yin gyi/ dge slong ma rnams kyis bza' bar mi bya ba ni ma yin no/ /dge slong mas btsos pa yang dge slong ma kho nas bza' bar bya ba ma yin gyi/ dge slong rnams kyis bza' bar mi bya ba ni ma yin no/ /sbyin bdag gis rung ba ma yin pa'i gzhir btsos pa'am zhag tu bzhag pa 'bul bar byed pa de la ni nyes pa med do/ /sbyin bdag gis mar dang 'bras la sogs pa phul la rang 'ongs nas brim mo zhes zer ba de la ni nyes pa kho nar 'gyur te/ dang po kho nar bdag gir byas par gyur pa'i phyir ro/ /dge slong gis grong dag tu dge slong gi don du dgos pa'i mdzod dang bang ba la sogs pa gang dag byed cing de dag gi nang du dge slong gis nyin mtshan du gnas pas gnas par byed na de ni dge slong gi gnas nyid yin par rig par bya'o/ /der gnas pa btang na ni dge slong gi gnas kyi gzhi nyid dang yang bral ba nyid yin no/ /bdag po dag gis gnas 'dir dge slong su yang gnas par mi bya'o/ /zhes gtsug lag khang gi phyogs kyi gnas 'ga' zhig tu dge slong mi 'jug par nges par byas pa de ni dge slong gi gnas nyid dang bral ba kho na yin no/ /de bzhin du gtsug lag khang stong par dge slong zhig ngal bso ba'i phyir zhag 'ga' tsam gnas 'cha' bar byed na yang de dge slong gi gnas nyid du gyur pa yin la/ dge slong de nas song na ni dge slong gi gnas nyid dang bral ba yin no/ /lag nyar blangs pa mid par mi bya'o zhes bya ba la sogs pa mdo gsum po de dag ni sog 'jog byed pa'i cha la brten pa yin pas na/ de'i phyir 'dir bsdus so/ /'dir rjen pa btsos pa gang yin pa ni de'o zhes bya ba la/ 'dir zhes bya ba ni/ mtshams kyi nang du btsos pa dang dge slong gis btsos pa'i skabs 'dir ro/ /der ni rjen par btsos pa gang yin pa ni mtshams kyi nang du btsos pa dang / dge slong gis btsos pa de yin par rig par bya'o/ /btsos pa ni byin len byas na yang btso bar bya ba nyid yin no zhes gsungs pa'i phyir ro/ /mi snyi ba rnams kyi ni sum cha bangs pa nyid kyi mdun rol du ni de nyid yin no zhes bya ba la/ mi snyi ba rnams kyi zhes bya ba ni/ til dang / 'bras dang / sha la sogs pa skam po rnams kyi'o/ /de dag gi rjen pa nyid ni sum cha bangs pa nyid kyi mdun rol du de nyid yin no/ rjen pa nyid yin no/ /'di skad bstan te/ til dang / 'bras dang / sha skam la sogs pa sra ba rnams kyi rjen pa nyid ces bya ba ni/ bshur ba la sogs pas sum cha bangs pa nyid ni mdun rol du yin te/ sum cha bangs pa nyid phyin chad ni rjen pa nyid ma yin no/ /rdzas snyi ba ni phye mar byas pa nyid yin na yang snyi ba nyid dang bral ba nyid ni ma yin no/ /rdzas sra ba yang phye mar byas pa nyid na sra ba nyid dang bral ba nyid ma yin te/ dper na gro la sogs pa ha cang zhib mor ma btags pa dag lta bu'o/ /snyi ba rnams kyi ni kha dog tu gyur pa'i 'o zhes bya ba ni/ rdzas snyi ba rnams kyi rjen pa nyid ni kha dog tu gyur pa'i mdun rol du de nyid yin te/ rjen pa nyid yin no/ /khu ba rnams kyi ni lan gnyis khol bar gyur pa nyid kyi'o zhes bya ba ni/ 'o ma la sogs pa'i rdzas khu ba rnams kyi rjen pa nyid ni lan gnyis khol bar gyur pa nyid kyi mdun rol nyid du de nyid yin te/ rjen pa nyid yin no/ /gong ma thams cad la yang mtshams de dag phyin chad ni tshos pa nyid yin par rig par bya'o/ /mes rung bar byas pa ni ma btsos pa nyid ma yin no zhes bya ba ni/ dgun la sogs pa mes rung bar byas pa ni ma btsos pa ma yin te/ btsos pa kho na yin no/ /de lta bas na mtshams kyi nang du mes rung bar mi bya'o/ /'dug pa'i 'grub pa nyid skye ba la rag las pa ni ma lon pa nyid ma yin no zhes bya ba ni/ 'dug pa gang gi 'grub pa nyid skye ba la rag las pa de ni nang du zhag ma lon pa nyid ma yin no zhes bya bar sbyar ro/ /'dug pa'i zhes bya ba ni/ shing tog la sogs pa rung ba'i sa na 'dug pa'i 'o/ /de'i grub pa nyid ces bya ba ni/ 'dug pa de rung ba'i sar 'grub pa nyid do/ /'grub pa nyid gang yin pa de skye ba la rag las pa zhes bya ba ni/ skye ba la ltos pa ste/ shing tog la sogs pa rung ba'i sar 'grub pa nyid gang yin pa de rang gi skye ba'i rgyun rtsa ba dang sdong bu la sogs pa rung ba ma yin pa'i sa na 'dug pa dang 'brel ba 'am/ rang gi skye ba'i rgyun rtsa ba dang sdong bu la sogs pa rung ba ma yin pa'i sa na 'dug pa de las mis ma brtsal bar rang brul ba skye ba'i rgyun dang 'brel ba rung ba'i sa na 'dug pa rnam pa de gnyi ga yang skye ba la rag las pa zhes bya'o/ /ma lon pa nyid ma yin no zhes bya ba ni/ de ltar shing tog la sogs pa rung ba ma yin pa'i sa na 'dug pa'i 'grub pa skye ba la rag las pa rnam pa gnyis po de ni skye ba'i rgyun rung ba ma yin pa'i sa nas byung ba'i dbang gis grub pa yin pas nang du zhag ma lon pa nyid ma yin te/ zhag lon pa kho na nyid yin no zhes bya ba'i tha tshig go/ /de ltar 'dug pa'i 'grub pa nyid skye ba la rag las pa gang yin pa de ni nang du zhag ma lon pa nyid ma yin te lon pa kho na nyid yin pas skye ba'i dbang gis na dngos po rung ba'i sa na 'dug pa de'i 'grub pa rung ba ma yin pa'i sa nas byung la/ skye ba'i rgyun dang ma bral ba dper na bal po se'u'i shing dang / ma du lung ga la sogs pa'i shing rung ba ma yin pa'i sa nas skyes pa'i 'bras bu yal ga dang 'brel ba rung ba'i sar 'phyang ba lta bu dang / dngos po rung ba'i sa na 'dug pa de'i 'grub pa rung ba ma yin pa'i sa nas byung la/ skye ba'i rgyun dang bral ba dper na shing ta la la sogs pa rung ba ma yin pa'i sa las skyes pa'i 'bras bu mis ma brtsal bar rang brul ba yal ga dang ma 'brel ba rung ba'i sa nas 'dug pa lta bu dag ni skye ba la rag las pa'i dbang gis na nang du zhag lon pa kho na yin no/ /sa bon mtshams kyi nang du zhag lon pa mtshams kyi phyi rol du btab pa las rtsa ba dang myu gu la sogs pa skyes pa gang yin pa de ni mtshams kyi nang du zhag lon pa nyid ma yin te/ skye ba gzhan yin pa'i phyir ro/ /mtshams kyi nang du skyes pa'i dngos po mtshams kyi phyi rol du 'phel bar gyur pa/ dper na ku sman la sogs pa lta bu dang / de bzhin du nang du zhag lon pa'i 'o ma gnas skabs gzhan du 'phos pa zhor gyur pa lta bu ni nang du zhag lon pa nyid yin no/ /mtshams kyi nang du zhag lon pa'i ba las 'o ma byung ba gang yin pa de yang nang du zhag lon pa kho na yin te/ 'o ma de mtshams kyi nang nas byung ba yin pa'i phyir ro/ / snod phyogs na 'dug na des kyang sa der btsos pa nyid yin no zhes bya ba ni/ btso bar bya ba'i rdzas kyi gzhir gyur pa snod rung ba ma yin pa'i phyogs na 'dug na rgyu des kyang btso bar bya ba'i rdzas de yang rung ba ma yin pa'i sa der btsos pa nyid yin par rig par bya'o/ /btso bar bya ba'i rdzas nyi tshe rung ba ma yin pa'i sar bzhag pa rung ba ma yin pa'i sar btsos par gyur pa 'ba' zhig tu ma zad kyi/ brgyud pa'i tshul gyis kyang rung ba ma yin pa'i sar btsos par gyur pa yod de/ dper na rung ba ma yin pa'i sar mdag ma dag gi steng du skyed po la sogs pa'am/ lcags sgyed rkang gsum pa la sogs pa btsugs pa'i steng du/ phru ba la sogs pa'i snod bzhag pa'i nang du sha la sogs pa btsos na/ /de yang rung ba ma yin pa'i sar btsos pa nyid yin par 'gyur ba lta bu'o/ /'tshod par byed pa de na 'dug pa nyid kyis ni mi 'gyur ro/ / zhes bya ba ni/ btso bar bya ba'i rdzas 'tshod par byed pa'i mi rung ba ma yin pa'i sa de na 'dug pa nyid kyis btso bar bya ba'i rdzas rung ba'i sar btsos pas ni rung ba ma yin pa'i sar btsos par mi 'gyur ro/ /'di skad bstan te/ gal te 'tshod par byed pa'i mi mtshams kyi nang rol na 'dug cing / btso bar bya ba'i rdzas mtshams kyi phyi rol lag pas slebs tsam du 'tshod par byed na btso bar bya ba'i rdzas de mtshams kyi nang du btsos par mi 'gyur ro/ /mi ni snod ma yin pa nyid ma yin no zhes bya ba ni/ me mdag ni snod dang 'dra ba nyid ma yin pa ma yin te/ snod dang 'dra ba nyid yin no/ /'di skad bstan te/ mtshams kyi nang na 'dug pa'i me mdag dag gi steng du bsreg par bya ba'i rdzas gang yin pa de bsregs pa ni mtshams kyi nang du btsos pa nyid yin no/ /me lce'i steng du bsregs pa ni ma yin te/ me lce ni nam mkha' dang 'dra ba nyid yin pa'i phyir ro/ /de las phyung ba dang byung ba dag ni de nyid ma yin no zhes bya ba ni/ mtshams kyi nang na 'dug pa'i me de las 'ga' zhig gis bong ba la sogs pa dag gis me phyir phyung ba dang rlung la sogs pa'i dbang gis me rang byung ba dag ni de nyid ma yin te/ sa de'i ngo bo nyid kyang ma yin la sa der gtogs pa nyid kyang ma yin no/ /nyen kor ni gnas nyid yin no zhes bya ba la/ gnas zhes bya ba ni/ der gnas par bya ba yin pas gnas te/ gnas de'i nyen kor ni gnas nyid yin no/ /nyen kor gyi lam ji srid tshun chad gnas nyid yin zhe na/ de'i phyir 'dom gang ngo zhes bya ba smras te/ phyi rol gyi rtsig pa la sogs pa'i ngos nas brtsams te 'dom gang tshud chad ni gnas de'i nyen kor yin pas de ni gnas nyid dang 'dra'o/ /gnas ni rnam pa gnyis te/ g.yogs pa dang ma g.yogs pa'o/ / de la re zhig ma g.yogs pa'i dbang du byas nas/ steng du nam mkha' la slebs pa man chad do zhes bya ba smras te/ gnas steng ma g.yogs pa la ni steng du nam mkha' la mgo bo rgyu ba dag gis slebs par nus pa man chad kyang gnas nyid yin no/ /g.yogs pa'i dbang du byas nas nang yang ngo zhes bya ba smras te/ gnas steng g.yogs pa la ni nang gi nam mkha' gang yin pa de yang gnas nyid yin no/ /steng gi yang tog gzhan yang de nyid yin no zhes bya ba ni/ /'og khang gi steng gi yang thog gi kha khyer gzhan yang 'og khang de kho na nyid yin te/ nam mkha'i dkyil ni steng gi yang tog thams cad la mngon sum du 'jug pa'i phyir ro/ /'di skad bstan te/ gal te dge slong rnams 'og khang na gnas par gyur na steng gi yang tog dag tu rung ba'i khang pa bsko bar mi bya ste/ mi 'chags pa'i phyir ro/ /'dir gzhung ni sil bu dag las btsun pa 'og khang gi rung ba'i khang pa lags ba de'i yang tog kyang rung ba'i khang pa lags sam/ nye ba 'khor yang tog kyang yin te/ ngos dag kyang de bzhin no zhes gsungs pa yin no/ /gzhan gnas pa nyid ni gzhan gyi gnas nyid ma yin no zhes bya ba ni/ bdag po rigs mi mthun pa gzhan gnas par gyur pa nyid yin na bdag po snga ma gzhan gyi gnas nyid ma yin te/ dper na dge slong gi gnas sam dge 'dun gyi gnas su khyim pa gnas par gyur na/ 'di ltar dge slong dag de nyid na gnas su zin kyang de dge slong gi gnas nyid ma yin pa lta bu'o/ /'dir gzhung ni zhu ba las btsun pa de nyid na dge slong dang bcas shing de nyid na khyim pa dang bcas na/ der dgung lags pa dang der bsgral ba 'tshal bar bgyi'am 'tshal bar mi bgyi/ nye ba 'khor bza' bar bya'o zhes gsungs pa yin no/ /gnas stong par byas pa zhig tu gal te dge slong re zhig gnas par gyur na de yang dge slong gi gnas nyid yin no/ /khyim pa'i rdzas ma ston na ni stong par byas pa nyid ma yin no/ /dge tshul rnams kyi gang zag gi gnas dang dge tshul gyi tshogs spyir dbang ba'i gnas de ni dge slong gi gnas nyid ma yin no/ /dge slong gi gnas sam dge slong gi dge 'dun gyi gnas na dge tshul tsam gnas su zin kyang de lta mod kyi/ de dge slong gi gnas nyid yin te/ dge tshul rnams ni dge slong gi 'khor yin pa'i phyir ro/ /lag nyar blangs pa dang nang du btsos pa dang / dge slong gis btsos pa de dag dus kyi phyir dgag pa mdzad par 'tsho ba'i bar du bcang ba dag ni ma bsdus pa nyid yin no zhes bya ba'i mdo 'di ni sman gyi phyir byas pa yin te/ lag nyar blangs pa dang / nang du btsos pa dang / dge slong gis btsos pa de dag dus kyi phyir dgag pa mdzad par zhes bya ba ni/ lag nyar blangs pa la sogs pa de dag mu ge byung ba la sogs pa'i dus kha cig tu ni bza' bar bya'o zhes gnang ba mdzad la/ mu ge byung ba ma yin pa la sogs pa'i dus kha cig tu ni de dag bza' bar mi bya'o zhes dgag pa mdzad pa der ro/ /der 'tsho ba'i bar du bcang ba dag ni ma bsdus pa nyid yin no zhes bya ba ni 'tsho ba'i bar du bcang ba de dag bza' ba'i phyir ni dus kyi bye brag med de/ de ni 'dir spyi'i don yin no/ /dus kyi phyir zhes bya ba ni/ gung tshigs tshun chad kyi snga dro dang / de phyin chad thun tshod kyi bar gyi dus de gnyis su lag nyar blangs pa la sogs pa byas na mu ge la sogs pa'i dus kyi tshe na/ dus de nyid du lag nyar blangs pa la sogs pa dag bza' bar bya'i/ dus gzhan du ma yin pa ste/ snga dro de la sman lag nyar blangs pa la sogs pa byas pa ni snga dro de nyid la bza' bar bya'i/ phyed yol phan chad bza' bar mi bya'o/ /de bzhin du phyi dro ba'i zas lag nyar blangs pa la sogs pa byas pa yang mu ge la sogs pa'i dus kyi tshe thun tshod kyi mtha' tshun chad du bza' bar bya'i thun tshod las yol ba phan chad du bza' bar mi bya ba'o/ /'tsho ba'i bar du bcang ba byin gyis brlabs pa rnams la ni cho ga 'di med de/ de dag la dus yongs su chad pa med pas dus thams cad du bza' bar bya ba yin no/ /'tsho ba'i bar du bcang ba byin gyis ma brlabs pa rnams ni dus kyi phyir bsdus pa yin no/ /'bags pa ni zas phyed nyid do zhes bya ba ni/ lhung bzed la sogs pa la zas la sogs pas 'bags pa gang yin pa de ni zas phyed nyid yin gyi/ zas rdzogs pa nyid ni ma yin te/ lhung bzed la sogs pa ni bza' ba ma yin pa'i phyir ro/ /'dir gzhung ni dge slong gis lhung bzed dang / lhung bzed chung ngu dang / kha gzar dang / tshwa khug dang / lhung bzed kyi snod dang / gos dang / man shel dang / khri dang / khri'u dang / phru ba dang / bum pa dang / ril ba dang / lde mig dang / lde mig kyog po gsog 'jog byas pas 'bags pa za na thams cad nyes byas su 'gyur ro zhes gsungs pa yin no/ /'dir za na zhes bya ba ni/ de dag la zas kyis 'bags pa de za na'o zhes bya ba'i tha tshig go/ /kha dri ma can gyis bza' ba dang btung ba dag kyang ngo zhes bya ba ni/ kha'i nang ma dag pas bza' ba dang / btung ba dag zos sam 'thungs na yang zas kyi phyed nyid do/ /kha bkrus te zos pa dang 'thungs pa la ni ltung ba med do/ /'dir gzhung ni dge slong gis kha ma bkrus par skom 'thungs na nyes byas so zhes gsungs pa yin no/ /'di skad bstan te/ kha dri ma can du gyur pas zos sam 'thungs na zas kyi phyed nyid de nyes byas so/ /ji tsam gyis na kha dog pa yin zhe na/ de'i phyir/ de'i phyi rol na lci ba'am sas kun nas drud de chus bshal na dag pa yin no zhes bya ba smras te/ kha de'i phyi rol mchu gnyis ni lci ba 'am sas kun nas drud de chus bshal zhing bkrus na dag pa yin no/ /nang ni chu mkhur ba do'am gsum gyis bshal na'o zhes bya ba ni/ kha'i nang ni chu mkhur ba do'am gsum gyis bshal te bor na dag pa yin no/ / //bam po nyi shu rtsa brgyad pa/ lhung bzed ji tsam gyis dag pa yin zhe na/ de'i phyir/ lhung bzed ni bsam pa thag pas lan gnyis sam gsum bkru bshal byas na sgra mi snyan kyang dag pa nyid yin no zhes bya ba smras te/ lhung bzed ni bsam pa thag pas gus par byas te/ lan gnyis sam gsum bsgyur log bya zhing bkru bshal byas na sgra mi snyan cing sgra sang sang por ma byung du zin kyang dag pa nyid yin no/ /'dir gzhung ni dge slong gcig gis lhung bzed bkrus te sor mos sgra 'byin par byed pa na sgra mi snyan nas de 'gyod pa skyes pa dang / bcom ldan 'das kyis bka' stsal pa/ bsam pa thag pas lan gnyis sam gsum bkru bshal bya zhing gal te sgra mi snyan na yang yongs su longs spyad pa kho nar bya ste/ 'di la 'gyod par mi bya'o zhes gsungs pa yin no/ /rtsi langs pa la ni nyes pa med do zhes bya ba ni/ lhung bzed dag par byas pa la kha dog gi dreg pa langs pa ni rtsi langs pa zhes bya ste/ de la ni nyes pa med do/ /'bags pa med par reg pa la yang ngo zhes bya ba ni/ lhung bzed bza' bar bya ba la reg kyang 'bags pa med na de la yang nyes pa med do/ /'dag rdzas sam lci ba'am sa gang yang rung bas lan gsum bkrus pa la snum pa nyid kyang ngo zhes bya ba ni/ lhung bzed 'dag rdzas sam lci bas sam sa dag las gang yang rung bas lan gsum bkrus pa la snum pa nyid yod pa la yang nyes pa med do/ /'dir gzhung ni zhu ba las btsun pa dge slong gis lhung bzed 'dag rdzas sam lci ba 'am dog sas lan gsum 'khru bar bgyid cing de yang snum zhing snum bag chags par gyur na yongs su longs spyad par bgyi 'am/ nye ba 'khor de bzhin no zhes gsungs pa yin te/ de ci'i phyir zhe na/ de ni tha snyad du bya ba'i phyir mi chog pa'i phyir ro/ /'dir 'dag rdzas la sogs pa smos pa ni dpe tsam du zad kyi/ gzhan dag kyang rung bar rig par bya'o/ /langs pa bsal bar bya ba nyid do zhes bya ba ni/ de ltar lhung bzed dag par byas pa la snum bag gam tshon rtsi'i bag skom la sogs pa dang phrad pas langs par gyur na bsal bar bya ba nyid yin no/ /'dir gzhung ni dge slong zhig la lhung bzed 'phan can zhig yod nas des der khu ba byin len byas pa na snum bag 'thon cing steng du zhag gi nya mig chags shing 'dug nas dge slong de 'gyod pa skyes pa dang / bcom ldan 'das kyis bka' stsal pa/ steng gi snum bsal te btung bar bya'o zhes gsungs pa yin no/ /'bags pa'i phyogs de nyi tshe bkru bar bya ba nyid do zhes bya ba ni/ lhung bzed kyi phyogs gang du zas la sogs pas 'bags par gyur na/ lhung bzed kyi phyogs gang du 'bags par gyur pa'i phyogs de nyi tshe bkru bar bya ba nyid yin gyi/ ril gyis bkru bar ni bya mi dgos so/ /'dir gzhung ni dge slong gi lhung bzed 'phan can zhig des 'khru bar byed pa na/ 'phan der 'bras chan gyi du ma bu song ba zhig mthong nas 'gyod pa skyes pa dang / bcom ldan 'das kyis bka' stsal pa/ shing bus brus te chus lan gnyis sam gsum bshal nas yongs su longs spyad par bya ste/ 'di la 'gyod par mi bya'o zhes gsungs pa yin no/ /bum pa la sogs pa snum bag can dag snum med par bya ba'i phyir chu'i rdzing bu zab mo'i nang du gzhug go zhes bya ba ni/ bum pa la sogs pa snum can dag snum med par bya ba'i phyir chu'i rdzing bu zab mo'i nang du dpyangs te gzhug par bya'o/ /dus ji srid kyi bar du gzhug par bya zhe na/ de'i phyir/ nya'am rus sbal lam sbal pa 'am chu srin byis pa gsod dam nya khri pa dag gis ma lus par ldogs kyi bar du bzhag go zhes bya ba smras te/ ji srid du nya la sogs pa dag gis snum bag ma lus par ldogs par gyur pa de srid kyi bar du gzhag par bya'o/ /bsregs pas kyang snum med pa nyid du 'gyur ro zhes bya ba ni/ bum pa la sogs pa snum can dag yang na mer bsregs pas kyang snum med pa nyid du 'gyur ro/ /de ltar ma lus par ldogs pa dang bsregs pa dag gis snum med par gyur pa'i bum pa la sogs pa dag ji ltar dag cing gtsang ba nyid du bya zhe na/ de'i phyir/ snum med par gyur pa ni/ bkru bas so zhes bya ba smras te/ bum pa la sogs pa snum med par gyur pa ni bkru bas dag cing gtsang ba nyid du 'gyur ro/ /gang gis bkru zhe na/ de'i phyir/ 'dag rdzas sam lci bas 'dag pa nyid do zhes bya ba smras te/ bum pa la sogs pa snum med par gyur pa ni/ 'dag rdzas la sogs pas bkrus na dag pa nyid du 'gyur ro/ /lan tshwa la sogs pa tshwa chu dang 'gyur byed kyi chu dang rnyog chur gyur pa ni phyed nyid do zhes bya ba ni/ lan tshwa dang 'gyur byed dang rnyog pa dag las/ lan tshwa tshwa chur gyur pa dang / 'gyur byed 'gyur byed kyi chu ra gyur pa dang / rnyog pa rnyog chur gyur pa gsog 'jog byas pa'am byin len ma byas par 'thung ba ni phyed nyid de nyes byas so zhes bya ba'i tha tshig go/ /de ni thams cad la dus ma yin par yang rung ba nyid do zhes bya ba ni/ lan tshwa la sogs pa tshwa chu la sogs par gyur pa de ni nad pa dang nad pa ma yin pa thams cad la dus ma yin par byin len byas na ma btsags par yang rung ba nyid de nyes pa med do zhes bya ba'i tha tshig go/ /lan tshwa dang / 'gyur byed rang gi bya ba mi byed pa dag la ni med pa nyid do zhes bya ba ni/ de gnyis lan tshwa'i bya ba mi byed pa dang / 'gyur byed kyi bya ba mi byed pa dag la ni phyed nyid kyang med pa nyid de de la ni nyes byas kyi ltung ba yang med do zhes bya ba'i tha tshig go/ /'dir mdo snga ma gsum la lan tshwa dang 'gyur byed ces smos pa ni lhan cig skyes pa yin par rig par bya'i/ nye bar bsgrubs pa ni ma yin no/ /nye bar bsgrubs pa ni rnam pa gnyis te/ 'byung khungs [(]gyi [,]kyi[)]dbang gis dang btab pa'i dbang gis so/ /de la 'byung khungs kyi dbang gis nye bar bsgrubs pa ni 'og nas 'byung khungs dag tu btab pa mi mngon pa ni yod pa'i grangs nyid ma yin no zhes bya bas bye brag tu ston par byed do/ /btab pa'i dbang gis nye bar bsgrubs pa de la ni mi mngon yang ltung byed rdzogs pa'i byed pa po nyid yin par rig par bya'o/ /lhan cig skyes pa ma yin pa la yang gnas skabs kyi bye brag gis lhan cig skyes pa nyid du 'gyur ba yod de/ dper na chu'i nang du lan tshwa 'am 'gyur byed btab pa nam zhu bar gyur gyi bar du dus cung zhig bsdad na ni lan tshwa la sogs pa'i bya ba mi byed pa de'i tshe na lhan cig skyes pa ma yin yang / lhan cig skyes pa nyid dang 'dra bar rig par bya'o/ /'dir phyed nyid kyi gzhung ni zhu ba las btsun pa re zhig dge slong gis chab dpon tshwa can du bgyis pa gsog 'jog bgyis te 'tshal na ltung ba cir 'gyur/ nyes byas so/ /btsun pa re zhig dge slong gis chab dpon tshwa can du bgyis pa byin len ma bgyis par 'tshal na ltung ba cir 'gyur/ nyes byas so/ btsun pa re zhig dge slong gis chab 'gyur byed can du bgyis pa byin len ma bgyis par 'tshal na ltung ba cir 'gyur/ nyes byas so/ /btsun pa re zhig dge slong gis chab rnyog pa can byin len ma bgyis par 'tshal na ltung ba cir 'gyur/ nyes byas so zhes gsungs pa yin no/ /tha ma la ni gzugs brnyan byung na'o zhes bya ba smras te/ tha ma la zhes bya ba ni/ chu rnyog pa can te zhu ba'i gzhung dang / mdo 'di nyid las chab rnyog pa can zhes bya ba'i tshig de thams cad kyi tha mar bstan pa'i phyir ro/ / chu rnyog pa can de la ni gang gi tshe bzhin gyi gzugs brnyan 'byung ba de'i tshe na rnyog pa med pa nyid yin par rig par bya'o/ /ka ta ka'i 'bras bus chu shin tu dngas par 'gyur ro zhes bya ba ni/ chu rnyog pa can ni ka ta ka'i 'bras bus shin tu dngas par 'gyur te/ chu rnyog pa can de'i nang du ka ta ka'i 'bras bu bcug na chu de shin tu dngas par 'gyur ro/ /'gyur byed kyis kyang ngo zhes bya ba ni/ 'gyur byed kyis kyang chu de shin tu dngas par 'gyur ro/ /zan gyis kyang ngo zhes bya ba ni/ zan gyis kyang chu de shin tu dngas par 'gyur ro/ /de mi 'jig par bya ba'i phyir snum gyis bsku'o zhes bya ba ni/ chu shin tu dngas par bya ba'i phyir gzhug par bya ba'i zan de mi 'jig par bya ba'i phyir snum gyis bsku bar bya'o/ /'byung khungs dag tu btab pa mi mngon pa ni yod pa'i grangs nyid ma yin no zhes bya ba ni/ 'byung khungs zhes bya ba 'byung ba'i gnas dag tu zas btab pa mi mngon pa ni yod pa'i grangs nyid ma yin te/ 'di ltar med pa'i grangs nyid kho na yin pas de la ni med pa'i tha snyad kho nar bya'o zhes bya ba'i tha tshig go/ /'dis ni gzhung las dus ston la dge slong mang po 'dus pa dag khron pa dag tu lhung bzed dag 'khru bar byed pa na/ kun dga' ra ba pa dang dge bsnyen dag gis de dag tu zhun mar dang 'bru mar dang zho dang sbrang rtsi'i bum pa dag 'khru bar byed pa'i steng du snum gyi nya mig chil chil po dag chags par gyur nas dge slong dag 'gyod pa skyes nas mi 'thung ba'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong dag gis 'bags pa des zas kyi bya ba byar mi rung gis/ bsal la btung bar bya ste/ 'di la 'gyod par mi bya'o zhes gsungs pa de bsdus pa yin no/ /de lta bas na chu dag gi nang du zan la sogs pa bcug pa mi mngon pa nyid ni 'byung khungs su btab pa nyid yin no/ /phyogs gcig tu 'dres par gyur na de nyi tshe ba bsal ba nyid yin no zhes bya ba ni/ zas kyi phyogs gcig tu rung ba ma yin nam byin len ma byas par 'dres par gyur na phyogs de nyi tshe bsal bar bya ba nyid yin gyi/ lhag ma gzhan ni bza' bar bya'o/ /kha'i mchus reg pa nyid la ni than kor yang ngo zhes bya ba ni/ zas kha'i mchus reg par gyur pa nyid la ni gang du reg pa'i phyogs de nyid dang de'i than kor yang bsal bar bya ba nyid yin no/ /mdo snga ma shos kyis ni lag nyar blangs pa la sogs pa'i nyes pa bsal to/ /phyi ma shos kyis ni btsog pa nyid kyi nyes pa bsal to/ /de dang 'brel ba'i rgyun gyis reg pa ni de la reg pa nyid ma yin no zhes bya ba ni/ ril ba la sogs pa dang 'brel ba'i 'o ma la sogs pa'i rgyun gyis lhung bzed la reg pa ni ril ba la sogs pa de la reg pa nyid kyang ma yin la ril ba la sogs pa dang 'brel ba'i 'o ma la sogs pa dag btsog pa nyid du gyur pa yang ma yin no/ /mdo 'di ni btsog pa nyid spang ba'i phyir byas so/ /nor ba dang brjed pas kyang ma yin no zhes bya ba ni/ nor bas bza' bar bya ba la sogs pa la reg pa dang brjed pas reg pa ni bza' bar bya ba la sogs pa la reg pa ma yin no/ /de gnyis kyis sbos pa gzhag pa'i phyir yang ma yin no zhes bya ba ni/ nor ba dang brjed pa de gnyis kyis bza' bar bya ba la sogs pa gnas nas spos pa phyir gzhag par bya ba'i don du reg pa yang reg pa nyid ma yin no/ /mdo 'di ni lag nyar blangs pa nyid spang ba'i phyir byas so/ /gnas kyi thag shin tu nye bar bskur ro zhes bya ba ni/ nor ba dang brjed pa dag gis bza' bar bya ba la sogs pa gnas nas spos pa de'i phyir gzhag bar bya ba'i don du bskur bar bya ba yang gnas gang du bar skabs kyi thag shin tu nye ba yod pa der bskur bar bya ste/ gnas kyi thag shin tu ring bar khyer na de la reg pa'i skyon du 'gyur ba'i phyir ro/ /g.yel bas lag nyar blangs pa nyid dang byin len blangs pa nyid ni ma yin no zhes bya ba la/ g.yel ba zhes bya ba ni/ sangs rgyas kyi 'dul ba la ma mos pa'am the tshom za bas bslab pa'i gzhi thams cad la g.yel ba yin gyi/ phan pa byung ba ni ma yin no/ /des lag nyar blangs pa yang lag nyar blangs pa nyid ma yin la/ des byin len byas pa yang byin len byas pa nyid ma yin no/ /byin len stobs par 'os pa dang 'brel ba ma bral ba'i blangs pa yang ma yin no zhes bya ba ni/ bza' bar bya ba gang la byin len stobs par 'os pa'i gang zag dang 'brel ba gang yin pa de dang ji srid du ma bral ba de srid kyi bar du bza' bar bya ba de'i blang bar bya ba yang lag nyar blangs pa nyid kyang ma yin la/ byin len byas pa nyid kyang ma yin no/ /'di skad bstan te/ byin len stobs pa'i gang zag gis bza' bar bya ba bzung ba gang yin pa de srid du des reg cing 'dzin gyi bar du de lag nyar blangs pa nyid kyang ma yin la/ byin len byas pa nyid kyang ma yin no/ /des bzung ba'i thag pa la sogs pa dang 'brel ba nyid ni 'brel ba nyid yin no zhes bya ba ni/ byin len stobs par 'os pa'i gang zag des thag pa la sogs pa gang bzung ba'i thag pa la sogs pa de dang zas su 'brel ba nyid yin na zas dang 'brel pa nyid yin no/ /sdom pas mnyam par lta ba tha mi dad pa dag gis gsog 'jog byas pa dang / byin len byas pa dang / lag nyar blangs pa dag ni gcig pa nyid yin no zhes bya ba ni/ sdom pas mnyam pa'i dge slong dag dang / dge slong ma dag dang / dge slong ma lta ba tha mi dad pa dag gis gsog 'jog byas pa dang / byin len byas pa dang / lag nyar blangs pa dag ni gcig pa nyid yin no/ /dge slong gcig gis gsog 'jog byas pa la sogs pa gang dag yin pa de dag dge slong gzhan thams cad kyi yang yin la/ de bzhin du dge slong ma gcig gis gsog 'jog byas pa la sogs pa gang dag yin pa de dag kyang dge slong ma gzhan thams cad kyi yin pa dang / dge slong ma gcig gis gsog 'jog byas pa la sogs pa gang dag yin pa de dag kyang dge slob ma gzhan thams cad kyi yin par de dag nang mtshungs so zhes bya ba'i tha tshig go/ /dge slong dang dge slong ma dang dge slob ma sdom pas mtshungs pa de dag kyang lta ba tha dad par gyur na ni gsog 'jog la sogs pa yang mi gcig par 'gyur bas de'i phyir 'dir lta ba tha mi dad pa dag gi zhes bya ba smos so/ /lta ba tha mi dad pa'i phyir 'dir gzhung ni zhu ba las btsun pa rjes su khas ma blangs par rjes su khas blangs pa'i byin len bgyis pa 'tshal bar bgyi'am/ nye ba 'khor mi bya'o/ / btsun pa rjes su khas blangs pas rjes su khas ma blangs pa'i byin len bgyis 'tshal bar bgyi'am/ nye ba 'khor mi bya'o zhes gsungs pa yin no/ /mchog dang mchog ma yin par ro zhes bya ba ni/ sdom pas zhes bya bar sbyar te/ mchog dang zhes bya ba ni/ sdom pa mchog dang ldan pa dang ngo / /mchog ma yin par ro zhes bya ba ni/ sdom pa mchog ma yin pa dang ldan par gcig nyid do/ /'di skad bstan te/ sdom pa mchog dang ldan pa'i dge slong ma dang bslab pa byin pa mo dang / sdom pa mchog ma yin pa dang ldan pa'i dge slob mar ni gso ga 'jog byas pa la sogs pa gcig pa nyid yin la/ sdom pa mchog ma yin pa dang ldan pa'i dge slob ma dang / /sdom pa mchog dang ldan pa'i dge slong ma dang / bslab pa byin pa mor ni gsog 'jog byas pa la sogs pa gcig pa nyid ma yin no/ /'dir gzhung ni dge slong ma dang bslab pa byin ba mos gsog 'jog byas pa ni dge slob ma'i gsog 'jog byas pa nyid yin la/ dge slob mas gsog 'jog byas pa ni de gnyis kyis gsog 'jog byas pa ma yin no zhes gsungs pa yin no/ /sdom pas mnyam pa dag gi ni gcig pa nyid yin no zhes smos pas skyes pa dang bud med dag gi yang gcig pa nyid du thal bar 'gyur ba bsal ba'i phyir/ skyes pa dang bud med dag ni phan tshun khyim pa dang 'dra'o zhes bya ba smras te/ dper na khyim pas lag nyar byas pa dang / byin len byas pa dang / gsog 'jog byas pa dge slong la sogs pa'i lag nyar blangs pa dang / byin len byas pa dang / gsog 'jog byas pa nyid ma yin pa de bzhin du/ dge slong mas byas pa yang dge slong dang bslab pa byin pa'i lag nyar blangs pa dang / byin len byas pa dang / gsog 'jog byas pa ma yin la/ dge slong gis byas pa yang dge slong ma dang / bslab pa byin pa mo dang / dge slob ma rnams kyis ma yin no/ /dge tshul dag gis de la reg pa nas sbed pa'i bar la nyes par 'gyur ba de bzhin no zhes bya ba la dge tshul dag ces bya ba ni/ dge tshul dang dge tshul ma dag go/ /de dag gi zhes bya ba ni/ dge tshul dang dge tshul ma dag dbang ba'i bza' bar byas pa la sogs pa'o/ /de la reg pa nas sbed pa'i bar la zhes bya ba ni/ dge slong gis reg pa nas sbed pa'i bdag nyid kyi reg pa'i bar la'o/ /nyes par 'gyur ba ni de bzhin no zhes bya ba ni/ dge slong la nyes par 'gyur ba yang dge tshul dag bzhin du rig par bya ste/ dper na dge slong dbang ba'i bza' bar bya ba la/ dge tshul dag gis reg pa lag nyar blangs pa la sogs pa'i nyes par mi 'gyur ba de bzhin du/ dge tshul dbang ba'i bza' bar bya ba la dge slong dag gis reg pa la yang lag nyar blangs pa la sogs pa'i nyes par mi 'gyur te/ dge tshul dbang ba gang yin pa de dge slong gis sbed par byed du zin kyang des dge slong nyid dang dge slong gzhan dag la rung ba ma yin pa nyid du mi 'gyur la/ dge tshul ma dbang ba gang yin ba de dge slong mas sbed par byed du zin kyang des dge slong ma de nyid dang dge slong ma gzhan dag la rung ba ma yin pa nyid du mi 'gyur ro zhes bya ba'i tha tshig go/ /ltos pa dang bcas pas byin pa na btang ba nyid ma yin no zhes bya ba ni/ lag nyar blangs pa la sogs pa'i rdzas de yang phyir blang ngo snyam pa'i 'dod pa dang bcas pa'i sems kyis phar byin pa ni btang ba nyid ma yin te bsam pa thag pa nas ma btang ba'i phyir ro/ /ltos pa med par btang ba la ltos pa dang bcas pa nyid ni phyed nyid do zhes bya ba ni/ lag nyar blangs pa la sogs pa'i rdzas ltos pa med par btang ba gang yin pa de la yang ltos pa dang bcas pa nyid yin na byin len byas te zos pa'i tshe phyed nyid de nyes byas so zhes bya ba'i tha tshig go/ /de'i phyir de blang bar mi bya'o zhes bya ba ni/ gang gi phyir lag nyar blangs pa la sogs pa'i rdzas ltos pa med pa'i sems kyis btang ba de yang ltos pa'i sems kyis phyir slong na nyes byas su 'gyur ba de'i phyir de bza' ba'i phyir bslang bar mi bya ste/ yang slong na gdon mi za bar ltos pa dang bcas pa nyid skye ba'i phyir ro/ /shes bzhin du mi blang ngo zhes bya ba ni/ gang gi phyir ltos pa med par btang ba de shes bzhin du phyir blangs na ltos pa dang bcas pa nyid du 'gyur la mi shes na mi 'gyur ba de'i phyir shes bzhin du mi blang ste/ mi shes pas blangs pa la ni nyes pa med do/ /rigs pa 'di nyid kyis na gsog 'jog byas pa dang / lag nyar blangs pa dang / nang du zhag lon pa dang / nang du btsos pa dang / dge slong gis btsos pa la sogs pa dag kyang bsam pa thag pa nas tshig bzhin byed pa gzhan la btang na rung ba ma yin pa nyid dang bral bar 'gyur te/ de'i phyir de zos na nyes pa 'ga' yang med do/ /'dir gzhung ni zhu ba las btsun pa re zhig dge slong gis kun dga' ra ba pa'am dge tshul la zas stsal ba de gnyis kyis de nyid la slar stsal na 'tshal bar bgyi'am/ gal te mngon par ma bsams na bza' bar bya'o/ /bslang bar bgyi'am/ nye ba 'khor mi bya'o zhes gsungs pa yin no/ /mngon par ma bsams na zhes bya ba ni 'thob bo snyam du yid kyis ma bsams na'o/ /gleng gzhi dag las kyang ltos pa dang bcas pa zos na'o zhes bya ba la sogs pa gsungs so/ /shas mnos pa de brub pa'i phyir reg pa ni rkyen de lta bu dag yod na rung ba ma yin pa nyid du mi 'gyur ro zhes bya ba ni/ zhing ba dag las 'bras la sogs pa'i thog shas thob pa de dag mnod pa'i phyir de la reg pa ni rung ba ma yin pa nyid du mi 'gyur ro/ /de bzhin du 'bras la sogs pa mnos pa dag bang ba la sogs pa dag tu brub pa'i phyir reg pa yang rung ba ma yin pa nyid du mi 'gyur ro/ /ci dus thams cad du 'am zhe na de'i phyir/ rkyen de lta bu dag yod na zhes bya ba smras te/ chud za ba'i rkyen dag nye bar gyur pa'am bsnyen par ma rdzogs pa dag med dam 'brub par byed pa gzhan dag med pa la sogs pa'i rkyen de lta bu dag yod na'o/ /shing rta la ni kha lo ba'i stan ma gtogs pa nyid do zhes bya ba ni/ 'di dag thams cad kyang rkyen de lta bu dag yod na zhes bya ba'i rjes su sbyar bar rig par bya'o/ /bza' bar bya ba bkal ba'i shing rta la reg par mi bya'o/ /gal te de la rkyen de lta bu dag yod par gyur na de'i tshe na kha lo ba'i stan 'ba' zhig ma gtogs pa nyid kyi shing rta la reg par bya'o/ /shing rta nyi tshe la reg pas ni shing rta'i nang na 'dug pa'i zas mi rung ba nyid du mi 'gyur ro/ /de gang ba la yang ngo zhes bya ba ni/ 'bras la sogs pas gang ba'i shing rta la yang mi reg tu mi rung ba'i phyir rkyen de lta bu dag yod na de'i tshe kha lo ba'i stan de ma gtogs pa nyid do/ /nad pa gzhan pa la yang ngo zhes bya ba ni/ zas kyis stong ba'i shing rtar nad pa bzhon zhing brgal ba la yang dge slong gis mi reg tu mi rung ba'i rkyen de lta bu dag yod na de'i tshe yang kha lo ba'i stan de ma gtogs pa nyid do/ /gru la ni ru skya'o zhes bya ba ni/ bza' bar bya ba bcug pa'i gru dang 'bras la sogs pas gang ba'i gru dang grur nad pa gzhug pa la yang dge slong gis mi reg tu mi rung ba'i rkyen de lta bu dag yod na de'i tshe gru de la ni ru skya ma gtogs pa nyid do/ /grur nad pa ma yin pa yang gzhug tu rung ste/ de la yang tshul de kho na bzhin no/ /de 'dzin pa'i stan yang ngo zhes bya ba ni/ bza' bar bya ba bcug pa'i gru dang 'bras la sogs pas gang ba'i gru dang grur nad pa dang mi na ba dag gzhug pa la yang dge slong gis mi reg tu mi rung ba'i rkyen de lta bu dag yod na de'i tshe gru de la ru skya 'dzin pa'i stan yang ma gtogs pa nyid do/ /kha lo ba'i stan dang ru skya 'dzin pa'i stan dag la dge slong gis brdos par gyur na de'i tshe shing rta dang gru sman par mi nus pas de'i phyir dge slong la rkyen de lta bu dag yod du zin kyang de dag la reg pa dgag pa mdzad do/ /dge 'dun gyi sman dag lud pa na bskyam pa dang dbyung ba dang gzar bu'i las dang dbog pa dag la yang ngo zhes bya ba ni/ dge 'dun gyi bza' ba la sogs pa sman dag dang gang zag gi yang rung ste/ de dag lud pa na bskyam pa la sogs pa'i phyir dge slong gis reg pa la yang mi rung ba nyid du mi 'gyur ro zhes bya bar sbyar ro/ /lud pa na zhes bya ba ni thab tu bskol ba'i tshe gyen du lud pa na'o/ /bskyam pa zhes bya ba ni/ bskyod pa'o/ /dbyung ba zhes bya ba ni gnas nas phyir dbyung ba'o/ /gzar bu'i las zhes bya ba ni/ gzar bus phyar ba la sogs pa'o/ /dbog pa zhes bya ba ni bskol pa'i gnas sgyed [(]po [,]pu [)]dag las shod du dbog pa'o/ /tshig de dag gis rdzas chud mi za ba'i phyir ro/ /ci bskyam pa de la dang po nyid nas reg par bya ba yin nam zhe na/ de'i phyir/ dang por shing dbri ba dang me bsad pa dang gos kyi thu ba la sogs pas rlung g.yab pa 'bad par bya'o zhes bya ba smras te/ dge 'dun gyi sman de bskyam pa na dang po kho nar lud pa zhi bar bya ba'i phyir/ shing dbri ba la sogs pa dag gis 'bad par bya'o zhes bya bar sbyar ro/ /'di skad bstan te/ lud pa zhi bar bya ba'i phyir dang po kho nar re zhig bud shing dbri bar bya/ /me gsad par bya/ gos kyi thu ba la sogs pas rlung g.yab par bya'o/ /'on kyang zhi bar ma gyur na de'i tshe gzod bskyam pa la sogs pas rig par bya'o/ /des na 'di ltar shes te/ dang por bud shing dbri ba la sogs pas zhi bar ma gyur na de'i 'og tu gzod bskyam pa la sogs pa bya ba yin no/ /chu klung rgal ba'i phyir ram khur tsa ba bsnyag pa'i phyir lag nyar blangs pa'i lam rgyags rung ste/ cho ga ma 'byor tam lam rgyags gzhan med na'o zhes bya ba ni/ dge slong chu klung rgal ba'i phyir ram/ lam rgyags khyer ba'i khur tsa ba bsnyag pa'i phyir ni lag nyar blangs pa'i lam rgyags bzar rung ngo / /gang gi tshe zhe na/ cho ga ma 'byor tam zhes bya ba smras te/ rung bar byed pa'i dge sbyong la sogs pas reg na lag nyar blangs pa nyid du mi 'gyur ba de lta bu'i cho ga ma 'byor na dge slong de nyid kyis chu klung rgal bar bya ba dang gnas gang na khur tsa ba 'dug pa der yang dge slong de nyid kyis bskur bar bya'o/ /lag rgyags gzhan med na zhes bya ba ni/ lam rgyags rung ba gzhan med na yang de'i tshe lam rgyags kyi don du lag nyar blangs pa bza' bar bya'o/ /khur tsa ba med na sbyin bdag spro bar bya'o zhes bya ba ni/ lam rgyags de khyer ba'i khur tsa ba gzhan med na sbyin bdag gis de bskur bar spro ba bskyed par bya'o/ /khyer ba med na rang gis so zhes bya ba ni/ sbyin bdag la bcol ba yang ma grub na de'i tshe dge slong rang gis lam rgyags bskur bar bya'o/ /de nyid las sbyin pas brje zhing blang ba bsgrub par bya'o zhes bya ba ni/ gzhan khyer du gzhug pa ma grub cing rang gis khyer bar gyur na rang gis khyer ba de nyid las gzhan la sbyin pas lam rgyags brje zhing blang ba bsgrub par bya'o/ /'di skad bstan te/ gal te rung ba gzhan ma grub na de'i tshe rang gis khyer ba'i lam rgyags de nyid las bsnyen par ma rdzogs pa la skal ba sbyin par bya zhing / de'i 'og tu bsnyen par ma rdzogs pa de'i skal ba de rang gi skal bas brje zhing bza' bar bya'o/ /de yang ma grub na de bza' bar bya ba nyid do zhes bya ba ni/ rang gis khyer ba de nyid las brje zhing blang ba de yang ma grub na rang gis khyer ba de yang bza' bar bya ba nyid yin no/ /byin len stobs pa med na byin len ma byas pa de 'am gzhan yang ngo zhes bya ba ni/ byin len stobs par byed pa'i mi gzhan med na de'i tshe byin len ma byas par rang gis khyer ba de'am gzhan khyer du bcug pa gzhan yang bza' bar bya ba nyid yin no/ /'di skad bstan te/ rang gis khyer ba'i lam rgyags de bza' bar bya ba nyid yin pa 'ba' zhig tu ma zad kyi/ de nyid dam gzhan byin len ma byas pa yang bza' bar bya ba nyid yin no/ / rang gis khyer ba dang byin len ma byas pa de gnyis dge slong gang bza' bar bya ba nyid yin zhe na/ de'i phyir/ zan gcad par byas pa'i'o zhes bya ba smras te/ dge slong gang gis sngar nyin gcig zan gcad pa de ni zan gcad par byas pa ste de'i'o/ /nyi ma gang la ji tsam bza' bar bya ba nyid yin zhe na/ de'i phyir nyi ma dang po la spar gang ngo zhes bya ba smras te/ sngar nyin gcig zan gcad par byas pa'i phyi de nyin par zan bza' ba'i dus la bab pa ni nyi ma dang po zhes bya ba ste/ de la ni spar gang bza' bar bya ba nyid yin no/ /sbar gang zhes bya ba ni lag pa khas spub pa'i sor mo sgu por bkram pa dag gis phye la sogs pa ji tsam bzung bar nus pa de ni spar gang zhes bya'o/ /gnyis pa la ni de'o zhes bya ba ni/ nyi ma gnyis pa la ni spar ba do bza' bar bya ba nyid yin no/ /gsum pa la ni ji tsam gyis chog pa'o zhes bya ba ni/ nyi ma gsum pa la ni ji tsam gyis chog par 'gyur pa de tsam bza' bar bya ba nyid yin no/ /shing tog rung bar ma byas pa dang byin len ma byas pa dang lag nyar blangs pa dag kyang dus ma yin par bza' bar bya ba nyid do zhes bya ba ni/ dge slong zan gcad pa byas pas dgun la sogs pa shing tog rung bar ma byas pa dang / / byin len ma byas pa dang / lag nyar blangs pa dag kyang dus ma yin par yang bza' bar bya ba nyid yin no/ /kyang zhes bya ba dang yang zhes bya ba kha gnyis su smos pa ni gnyi ga yang nyes pa med do zhes bsdu ba'i phyir ro/ /de dag thams cad kyang gzhan ma grub na zhes bya ba'i dbang du byas pa nyid yin no/ /de dag su'i bza' bar bya ba nyid yin zhe na de'i phyir zan med pa'i 'o zhes bya ba smras te/ dge slong zas med pa'i 'o/ /ci gnas skabs thams cad du 'am zhe na de'i phyir/ shin tu bkres pa nyid na'o zhes bya ba smras te/ shin tu bkres pa'i dngos po ni shin tu bkres pa nyid de dge slong de shin tu bkres pa nyid yin na bza' bar bya ba nyid yin te/ bkres pas shin tu srog la thug pa zhes bya ba'i tha tshig go/ /rtsa ba dag kyang ngo zhes bya ba yang / dge slong zan med pa shin tu bkres pa nyid na rtsa ba rung bar ma byas pa la sogs pa dag kyang dus ma yin par yang bza' bar bya ba nyid yin no/ /rang gis kyang btog pa nyid dang dbyung ba nyid dang bsgrub par bya ba nyid kyang ngo zhes bya ba la/ rang gis kyang zhes smos pa'i kyang gi sgras ni gzhan byed du gzhug pa yang bsdu'o/ /dge slong zan med pa shin tu bkres pa nyid ni rang gis kyang shing tog la sogs pa btog pa nyid dang / rtsa ba la sogs pa dbyung ba nyid dang / btso bar bya ba bsgrub par bya ba nyid kyang byar rung la gzhan byed du gzhug tu yang rung ngo / /byin len ma bstabs pa dang rung bar ma byas pa dang dus ma yin par bza' ba la sogs pa rung bar bya ba dag la rtsom pa 'dod pa ni byang gi sgra mi snyan na grags pa'i yid la byed pa bya'o zhes bya ba ni/ dge slong zan med pa shin tu bkres pa nyid na byin len ma bstabs pa dang / rung bar ma byas pa dang dus ma yin par za ba la sogs pa rung ba bya ba dag la rtsom pa'i mdun rol du rtsom pa 'dod pa'i tshe na dge slong des byang gi sgra mi snyan na grags pa'i yid la byed pa bya ste/ 'di ltar byang gi sgra mi snyan na gzhan dang 'brel ba'i tha snyad med cing sems can de dag kyang bye brag tu mi rtog pas rang gis blang ba la sogs pa'i tha snyad byed pa yin te/ bsam pa drang zhing dge ba yin pa'i phyir bdag gi zhe 'am gzhan gyi zhe 'am gzhan las blang bar bya ba de lta bu la sogs pa'i bye brag tu rtog pa de na med pa kho na yin pas dge slong des kyang de'i tshe byin len ma bstabs pa la sogs pa de dag thams cad la de lta bu'i bsam pas rang gis bya'o/ /lag bsnyal ba dang 'dab ma dag yod na skyogs kyis skom mi btung ngo zhes bya ba ni/ lag bsnyal ba dang 'dab ma dag yod na/ skyogs kyi nang nas skom btung bar mi bya ba'o/ /med na ma bsgribs par mi bya ba'o zhes bya ba ni/ lag bsnyal ba dang 'dab ma dag med na skyogs kyis skom btung ba ma bsgribs par btung bar mi bya'o/ /de chu dang bcas pa nyid yin na kha ma bcad pa nyid du mi gzhag go zhes bya ba ni/ skyogs de chu dang bcas pa nyid yin na kha ma bcad pa nyid du mi gzhag ste/ kha gab med par bcang bar mi bya'o/ /'dir chu dang bcas pa nyid ces smos pa ni mtshon pa tsam du zad de/ chu med na yang kha ma bcad pa nyid du mi gzhag go/ /de'i kha gab ni rnam pa gsum ste/ shing las byas pa dang / rdo las byas pa dang / sa las byas pa'o zhes bya ba ni/ skyogs de'i kha gab ni rnam pa 'di gsum las byar rung ba'o/ /skyogs gzhi shing las byas pa'am rdo las byas pa bcang bar bya'o zhes bya ba la/ gang du skyogs gzhag par bya ba de ni skyogs gzhi zhes bya ste/ de shing las byas pa'am rdo las byas pa bcang bar bya'o/ /'dab ma dag snod nyid du spyod pa na byin len ma byas pa nyid la nyes pa med do zhes bya ba ni/ 'dab ma dag sder nyid du spyod pa na byin len ma bstabs pa nyid la nyes pa med de/ 'dab ma byin len ma byas pa dag gi steng du zas la sogs pa'i bya ba byed na de'i tshe nyes pa med pa'o/ /'di la brngas pa dang ma brngas pa dag la ni khyad par med do zhes bya ba ni/ snod nyid du spyod pa 'di la 'dab ma dag shing ljon pa la sogs pa dag las brngas pa dang ma brngas pa dag ni byin len bstabs pa nyid kyi phyir khyad par med par rig par bya'o/ /gzhan med na ma brngas pa dag spyad do zhes bya ba ni/ 'dab ma brngas pa gzhan dang snod gzhan med na snod du bya ba'i phyir 'dab ma ma brngas pa dag spyad par bya zhing sder du bya'o/ /gzhan yod na ni shing ljon pa la sogs pa dag dang 'brel ba'i 'dab mas skom la sogs pa 'thung bar byed pa bzhad gad du 'gyur bas mi bya'o/ /gsog 'jog gi ltung byed do zhes bya ba de bshad zin to/ /byin len ma byas par za ba'i ltung byed smra bar 'dod nas/ gzhan dang byin len stobs pa med na sbyin bdag gis bsam pa thag pas btang ba rang gis blangs te bza' bar bya'o zhes bya ba smras te/ byin len ma bstabs par bza' ba thams cad la yang byang gi sgra mi snyan pa'i dus su byin gyis brlab par bya'o zhes thams cad du shes par bya'o/ /byin len byas zin pa'i zan gzhan med dam byin len stobs pa'i mi la sogs pa med na zas de sbyin bdag gis bsam pa thag pas btang ba yin na rang gis blangs te bza' bar bya'o/ /gang yang rung ba cig yod na ni nyes pa kho nar 'gyur ro/ /'dir gzhan med pa'i gzhung ni dge slong cig gis bsod snyoms blangs te gtsug lag khang du bzhag nas phyi rol du byung ba dang / khyim bdag cig gis kyang bsod snyoms shig khyer te 'ongs nas de nyid kyi steng du bzhag pa na bsod snyoms pa phyir 'ongs nas de'i steng du bsod snyoms gzhan bzhag pa mthong nas de 'gyod pa skyes te/ mi za ba'i skabs de dge slong dag gis bcom ldan 'das la gsol ba dang / bcom ldan 'das kyis bka' stsal pa/ gal te byin len stobs pa yod na ni/ byin len byas pa de bza' bar bya'o/ /ji ste med na ni phyis byin pa gang yin pa de bsal zhing snga ma shos bza' bar bya ste/ 'di la 'gyod par mi bya'o zhes gsungs pa yin no/ /byin len stobs pa med pa'i gzhung ni de nyid las tshong pa rab tu mang po dag gis sangs rgyas la sogs pa dge slong gi dge 'dun bshos la spyan drangs te/ de dag gis zas dag spyi bungs su bcer ba dang tshong khang dag tu me shor nas de dag me gsod pa'i phyir dong ba dang gdugs tshod kyang bab par gyur nas dge slong dag gis ji ltar bsgrub par bya ba mi shes pa dang / bcom ldan 'das kyis bka' sprul pa/ de dag gis bsam pa thag pas btang ba yin pas byang gi sgra mi snyan pa'i dus su byin gyis brlab cing bza' bar bya ste/ 'di la 'gyod par mi bya'o zhes gsungs pa yin no/ /byin len gyi mtshan nyid smra bar 'dod nas/ mngon sum du mtshams kyi nang du 'thob pa'i phyogs na gnas pa lag pa bkan pas lus sam de dang 'brel pas gyen du 'degs nus pa rdzogs par ma bsnyen pa mi ma yin pa las kyang sbyin par 'dod pas yan lag gis sam de dang 'brel ba'i byin pa mnos pa ni byin len no zhes bya ba smras te/ mngon sum du zhes bya ba ni drang thad nas blangs na byin len yin gyi glo 'am rgyab nas blangs pa ni byin len ma yin no/ /mtshams kyi nang du zhes bya ba ni/ mtshams kyi nang na gnas pa'i dge slong gis blangs na byin len yin gyi/ sgo 'phar la sogs pas bar du chod pa'i mtshams kyi phyi rol na gnas pas blangs pa ni ma yin no/ /'thob pa'i phyogs na gnas pa zhes bya ba ni/ phyogs gang du byin len 'thob pa'i phyogs de na gnas pa'i dge slong gis blangs na byin len yin gyi/ khang steng la sogs pa na 'dug pa las 'og na 'dug pa'i dge slong gis blangs pa ni ma yin no/ /lag pa bkan pas zhes bya ba ni/ gang gis lag pa gnyis bkan pa de ni lag pa bkan pa ste/ des blangs na byin len yin gyi gzhan gyis ni ma yin no/ /lus sam zhes bya ba ni lag pa la sogs par mnos pa'o/ /de dang 'brel bar zhes bya ba ni/ lag pa dang 'brel ba'i lhung bzed la sogs par mnos pa ste/ de gnyis su mnos pa ni byin len gyi gzhan du mnos pa ni ma yin no/ /gyen du 'degs nus pa las zhes bya ba ni/ gang gis sbyin par bya ba'i zas de gyen du 'degs nus pa ste/ de las mnos na byin len yin gyi de las gzhan pa las ni ma yin no/ /bsnyen par ma rdzogs pa las zhes bya ba ni bsnyen par ma rdzogs pa las mnos na byin len yin gyi/ dge slong las ni ma yin no/ /mi ma yin pa las kyang zhes bya ba ni/ glang po che cang shes la sogs pa dag las kyang mnos na byin len yin pa'o/ /'dir gzhung ni dge slong dgon pa pa rnams la dgon pa na gnas pa'i glang po che cang shes pa dang / rta cang shes dang / spre'u cang shes dag gis shing tog dag 'bul ba dge slong dag mi len pa dang / bcom ldan 'das kyis bka' stsal pa/ gang la gyen du 'degs pa yod pa de la byin len yang yod pas bza' bar bya ste/ 'di la 'gyod par mi bya'o zhes gsungs pa yin no/ /sbyin par 'dod pas zhes bya ba ni/ sbyin par 'dod pas byin pa mnos pa byin len yin gyi/ sbyin par mi 'dod pas ni ma yin te/ 'dir gzhung ni dbang med pa la sogs pas sbyin par byed pa ni ma yin no zhes gsungs pa yin no/ /yan lag gis sam zhes bya ba ni/ lag pas so/ /de dang 'brel bas byin pa zhes bya ba ni/ lag pa dang 'brel ba'i ril ba la sogs pa nas/ zas la sogs pa byin pa'o/ /dge slong rnam pa de lta bus byin len stobs pa rnam pa de lta bu las zas la sogs pa mnos pa ni byin len yin no// // bam po nyi shu dgu pa/ yul gyi mi smad par bya ba nyid yin na dkyil 'khor gyi steng du zhog shig ces bstan na yang ngo zhes bya ba ni/ gal te mi rnams rang gi yul na smad par bya ba nyid yin na/ de'i phyir yul gyi mi smad par bya ba nyid de la dkyil 'khor 'di'i steng du zhog shig ces de skad bstan na de yang byin len mnos pa yin gyi/ lus sam de dang 'brel par mnos pa 'ba' zhig tu ma zad do/ /lhung bzed dang de'i gzhi dag ni gcig pa nyid do zhes bya ba ni/ lhung bzed dang lhung bzed kyi gzhi dag ni 'dra ba nyid de/ lhung bzed du mnos pa dang de'i gzhir 'jog pa ni byin len byas pa nyid yin te gzhan du yang de bzhin no/ /spre'u rnams kyi spyod yul ni yal ga yin pas de nas de'i phyir mi 'thob pa'i sa nyid ma yin no zhes bya ba ni/ spre'u rnams kyi spyod yul ni yal ga dag yin pas yal ga de nas spre'u las byin len bstabs pa de'i phyir mi 'thob pa'i sa nyid ma yin te/ yal ga la gnas pa'i spre'u las byin len byar rung ba kho na yin no/ /shing tog dag man shel dang khri dang khri'u dang thu ba dang lhung bzed kyi gzhi dag gis byin len mnod du mi rung ba nyid ma yin no zhes bya ba ni/ shing tog dag man shel dang khri dang / khri'u dang thu ba dang lhung bzed kyi gzhi byed par gyur pa de dag gi byin len mnod du mi rung ba nyid ma yin te/ byin len mnod du rung ba nyid yin no/ /de dag gnas pa dag gis cang mi smra bas so sor brtag par bya'o zhes bya ba ni/ shing tog de dag gnas pa slob ma dang nye gnas dag gis cang mi smra bas so sor brtag par bya'o/ /snyoms par 'drim par byed pa mos par bya'o zhes bya ba ni/ gang snyoms par 'drim pa'i phyir 'jug pa de ni snyoms par 'drim par byed pa ste/ de mos par bya ba mos pa bskyed par bya'o/ /'dir gzhung ni de 'drim pa'i phyir khyim pa rnams shing tog dag mi snyoms par 'drim par byed nas/ bcom ldan 'das kyis bka' stsal pa/ dge tshul dag 'drim du gzhug par bya'o/ /dge tshul dag kyang mi snyoms par 'drim par byed nas/ bcom ldan 'das kyis bka' stsal pa/ dge slong dag gis lag pa dag bsnyal te byin len byas nas brim par bya'o zhes gsungs pa yin no/ /dge slong byin len byas pas brim pa nyid ni rung ba nyid yin no zhes bya ba ni/ dge slong zas byin len byas pas brim pa nyid ni rung ba nyid yin te/ tshul dang mi mthun pa nyid ma yin no/ /zhun mar dang / 'bru mar dang / sprang rtsi dang / bu ram gyi dbu ba'i bum pa dag 'drim na rtswa dang lo ma dag la sogs pa dag gis gos dag bskyab par bya'o zhes bya ba ni/ zhun mar dang / 'bru mar dang / sbrang rtsi dang / bu ram gyi dbu ba'i phru ba dag 'drim par byed pa'i dge slong gis rtswa dang 'dab ma la sogs pa dag gis gos dag bskyab par bya ste/ bar du gos ma rung bar mi 'gyur bar bya ba'i phyir g.yogs par bya'o/ /brim par bya ba gces pa dang bar ma dang tha ma dag so sor bya'o zhes bya ba ni/ brim par bya ba'i zas rgun la sogs pa gces pa dang / bar ma dang tha ma dag so sor brim par bya ste/ mi bsre bar brim par bya'o zhes bya ba'i tha tshig go/ /a mra zhim po rnams logs shig tu bsal te brim par bya'o zhes bya ba ni/ a mra zhim po mchog logs shig tu bsal te brim par bya ba ste/ mdo 'di ni mi snyoms pa nyid bsal ba'i phyir byas so/ /de yang mdo snga ma'i spros pa yin te/ 'di ltar a mra gces pa zhim po dag dang / bar ma dang tha ma dang 'bring dang mi zhim pa dag yod pa'i phyir ro/ /'drim par byed pa'i ni mkhan po 'am slob dpon gyis mnod par bya'o zhes bya ba ni/ 'drim par byed pa'i skal ba ni mkhan po 'am slob dpon gyis mnod par bya ba'o/ /mi 'thob pa thob na drung na 'dug pas so zhes bya ba ni/ mkhan po 'am slob dpon gyis 'drim par byed pa'i skal ba mnod pa na de gnyis rgan pa'i phyir 'drim par byed pas mi 'thob pa 'thob par mi rigs pa shin tu bsod pa dag 'thob pa lta na de ni mi 'thob pa thob pa yin pas mi 'thob pa thob na de mi rigs pas de'i tshe mkhan po dang slob dpon gyis mi mnod par 'drim par byed pa rang gi drung na 'dug pa'i grogs gang yin pa des mnod par bya'o/ /'dir gzhung ni bcom ldan 'das kyis bka' stsal pa/ de dag gi ni mkhan po dang slob dpon dag gis mnod par bya'o/ /de dag gis bsod pa dag 'thob nas/ bcom ldan 'das kyis bka' stsal pa/ de dag gi drung na 'dug pa dag gis mnod par bya'o zhes gsungs pa yin no/ /du ma nyid yin na stan las ma 'phags pas ji tsam len nus pa'o zhes bya ba ni/ 'drim par byed pa du ma nyid yin na drung na 'dug pa'i dge slong stan las ma 'phags pa gang yin pa des de dag gi skal ba ji tsam len nus pa de tsam mnod par bya zhing / gzhan ni gzhan dag gis mnod par bya'o/ /'dril ba ni rang gnas nas ma 'phags pas len nus pa 'di yin na byin len ma zhig go zhes bya ba ni/ byin len byas pa'i zas 'dril zhing gnas nas gud du song ba gang yin pa de ni rang stan las ma 'phags pas len nus pa nyid yin na byin len ma zhig pa yin la gzhan du na zhig pa kho na yin no/ /sbrang bu dang grog sbur la sogs pa dag gis reg pa yang ngo zhes bya ba ni/ sbrang bu dang grog sbur la sogs pa dag gis reg pas kyang byin len ma zhig go/ /sogs pa'i sgras ni byi phrug byung ma thag pa'i tshad pas kyang chung ba ni skye ba po phra mo dag bsdu'o/ /dge slong gis ma btang ba la gzhan gyis kyang ngo zhes bya ba ni/ dge slong gis 'dzin pa ma btang ba la mi la sogs pa gzhan gyis reg pas kyang byin len ma zhig pa yin no/ /'dir gzhung ni bcom ldan 'das kyis bka' stsal pa/ de nyid kyis byin len bya zhing de la yang bgo bsha' byas te bza' bar bya'o zhes gsungs pa yin no/ /byi bas ni zhig par byed do zhes bya ba ni/ byi bas reg pas ni byin len zhig par byed do/ /'dir gzhung ni de ltar sbrang bu dang grog sbur dang / byi ba'i bar dag byung nas/ bcom ldan 'das kyis bka' stsal pa/ byi mang la sogs pa'i byi ba dag gis reg pa ni byin len byas te bza' bar bya'o zhes gsungs pa yin no/ /byin len byas pa'i byin len stobs pa ni mi rigs pa nyid ma yin no zhes bya ba ni/ byin len bstabs zin pa la yang stobs par byed pa ni mi rigs pa nyid ma yin te/ rigs pa kho na yin no/ de ni 'di la gzhan dag gis reg par ma gyur tam snyam pa'i the tshom bsal ba'i phyir ro/ /shes gtso bo zhes bya ba ni/ 'dir yang shes gtso bo zhes bya ba'i ming dang 'du shes gtso cher byed pa po nyid do zhes bya ba'i ming can du sbyor bar byed do/ /gang la 'du shes gtso cher byed pa po nyid yin zhe na/ de'i phyir byin len ma bstabs pa nyid la'o zhes bya ba smras te/ byin len ma bstabs pa'i dngos po ni byin len ma bstabs pa nyid de de la'o/ /gal te 'di ltar zas 'di byin len ma bstabs pa yin no zhes bya bar shes na zhes bya ba'i tha tshig go/ /gang gis byin len ma bstabs pa nyid la zhe na/ de'i phyir/ chu dang so shing ma gtogs par bza' bar bya ba'i 'o zhes bya ba smras te/ chu dang so shing ma gtogs pa de las gzhan pa'i bza' bar bya ba'i byin len ma bstabs pa nyid du shes na'o/ /'dir chu dang so shing zhes smos pas ni dpe tsam du zad de kha sbyang ba'i 'dag rdzas dang lci ba dag kyang 'dis bsdus par rig par bya'o/ /de yang kha sbyang ba'i phyir de skad smras pa yin gyi/ mgul du mid pa'i phyir ni ma yin te/ mgul du mid pa la ni ltung byed kho nar 'gyur ro/ /khar ro zhes bya ba ni/ rna ba la sogs pa gzhan gyis ma yin no/ /ji zhig rjes su bsgrub na bza' bar bya ba byed pa po yin zhe na/ de'i phyir/ zos na'o zhes bya ba smras te/ bca' bar bya ba dang bza' bar bya ba la sogs pa'o/ /ci yul thams cad du 'am zhe na de'i phyir/ byang gi sgra mi snyan ma gtogs par ro zhes bya ba smras te/ byang gi sgra mi snyan gyi gling ma gtogs par ro/ /'dir gzhung ni zhu ba las kyang byang gi sgra mi snyan gyi gling na ni zas ma byin par kha'i sgo nas za bar byed de/ gal te byang gi sgra mi snyan pa'i dus su byin gyis rlob na ni ltung ba med do/ /ji ste byin gyis mi rlob na ni nyes byas so zhes gsungs pa yin no/ /nad pas bsnyen par rdzogs pa med na bsnyen par ma rdzogs pa las zan mnod par bya'o zhes bya ba ni/ nad pa'i khar zan mnod par bsnyen par rdzogs par med na/ bsnyen par ma rdzogs pa las kyang mnod par bya'o/ /mi na bas ni bsnyen par rdzogs pa yod du zin kyang mi sdug pa'i phyir 'di mi bya ba nyid do/ /bsnyen par ma rdzogs pas bza' bar bya'o zhes bya ba ni/ nad pa kho nas te nad pa bsnyen par ma rdzogs pas bsnyen par rdzogs pa dag gis bstabs pa bza' bar bya'o/ /byin len ma byas par za ba'i ltung byed do zhes bya ba de bshad zin to// //bsod pa slong ba'i ltung byed smra bar 'dod nas/ 'o ma dang / zho dang / mar dang / nya sha dang / sha skam lta bu ni zas bsod pa yin no zhes bya ba smras te/ 'o ma dang / zho dang / mar dang / nya sha dang / sha dang / sha skam lta bu ni zas bsod pa yin no/ /lta bu zhes bya ba'i sgras ni rnam pa zhes pa'i don te rnam pa de lta bu dag dang mar khu la sogs pa dag ni zas bsod pa yin no/ /de ni byed pa po'o zhes bya ba ni/ zas bsod pa de ni ltung ba nyid byed pa po yin no/ /sbyin par byed pa nye du ma yin pa khyim pa nyid kyang ngo zhes bya ba la/ nye du ma yin pa'i khyim pa ni/ nye du ma yin pa'i khyim pa ste/ de'i dngos po ni de nyid do/ /gal te sbyin par byed pa nye du ma yin pa khyim pa nyid yin na de yang ltung ba 'di'i byed pa po yin no/ nye du ma yin pa zhes smos pa la gzhung ni zhu ba las/ btsun pa dge slong gis bro ma 'tshal bar bdag nyid kyi slad du khyim dag nas zas bsod pa bslangs te 'cha' 'am 'tshal la de la ltung bar mi 'gyur ba mchis sam/ yod de nye du las bslangs te zos na ltung ba med do/ /gal te rtags 'di la sbyin bdag yin na de'i tshe yang ltung ba med do/ /gal te phyi rol pa'i rab tu byung ba sbyin bdag yin na ni nyes byas so zhes gsungs pa yin no/ /gang gi tshe de gnyis byed pa po nyid yin zhe na/ de'i phyir/ rang gis bslangs te zos na'o zhes bya ba smras te/ rang gis blangs shing zos na ste/ /gal te 'o ma la sogs pa dag gis bslangs te rang gis zos na zhes bya ba'i tha tshig go/ /za ba las gzhan pa slong ba tsam la kha na ma tho ba cir 'gyur zhe na de'i phyir/ mi na bas bslangs pa dang slong du bcug pa nyid de la ni nyes byas kyi'o zhes bya ba smras te/ mi na bas rang gis bslangs pa tsam la yang de gnyis nyes byas kho na'i byed pa po yin la/ mi na bar gzhan slong du bcug pa nyid yin na slong du bcug ste zos pa de la ni de gnyis nyes byas kyi byed pa po yin no/ /na ba la ni thams cad du ltung ba med do/ /'di skad bstan te/ mi na bar gang gi tshe rang slong ngam gzhan slong du bcug ste thob nas zas bsod pa za bar mi byed na de'i tshe nyes byas so/ /mi na bar gang gi tshe gzhan slong du bcug kyang za bar mi byed na ni de'i tshe sbyor ba las byung ba'i nyes byas phra mor 'gyur ro/ /na ba la ni thams cad du cir yang mi 'gyur ro/ /mi na ba thams cad la de gnyis kha na ma tho ba 'di'i byed pa po yin nam zhe na de'i phyir ci bder bstabs pa ma byas pa la'o zhes bya ba smras te/ gang las slong bar byed pa des dge slong gang la ci bde ba'i bdag nyid du bstabs pa ma byas pa de ni ci bder bstabs pa ma byas pa ste/ dge slong mi na ba de la de gnyis kha na ma tho ba 'di'i byed pa po dag yin no/ /'dir gzhung ni/ dge slong bsod snyoms la rgyu ba khyim dag tu nye bar phyin pa na bud med zas khyer te phyir byung bas dge slong cang mi smra bas sam/ phyir spong ba la bud med kyis 'phags pa 'o na ji slong zhes 'dri na bstabs pa yin par brjod par bya ste ci 'dod pa bslangs kyang ltung ba med do/ /sbyin bdag gis ci bder byas par gyur na yang ltung ba med do zhes gsungs pa yin no/ /de'i phyir ngan pa 'am bsod pa'am tha mal pa'am bzang po 'thob pa ni gal te bslangs na yang ngo zhes bya ba ni/ gang gi phyir 'dir bstabs pa kho na 'ba' zhig ltung ba las 'byin pa yin pa de'i phyir/ dge slong bstabs pa ma byas pa des ngan pa'am bsod pa'am tha mal pa'am/ bzang po 'thob pa mthong ba na gal te zas bsod pa'i yul la slong bar byed na/ de lta na yang zas bsod pa'i mtshan nyid dang nye du ma yin pa khyim pa'i mtshan nyid kyi yan lag de gnyis blangs na ni nyes byas kyi byed pa po yin la/ de sngon du btang ste zos na ni dngos gzhi'i byed pa po yin no/ /ngan pa zhes bya ba ni/ 'o ma la sogs pa las gzhan pa 'bru mar la sogs pa'o/ /bsod pa zhes bya ba ni/ 'o ma la sogs pa'o/ /tha mal pa zhes bya ba ni/ 'o ma de nyid ra la sogs pa'i yin pa'o/ /bzang po zhes bya ba ni/ 'o ma de nyid ba la sogs pa'i yin pa'o/ /yang na ngan pa zhes bya ba ni ra'i 'o ma'o/ /bsod pa zhes bya ba ni 'bras kyi 'o thug mar dang sha kha ra dang bsres pa'o/ /tha mal pa zhes bya ba ni ba'i 'o ma'o/ /bzang po zhes bya ba ni gong ma sreg la sogs pa'i sha bal po se'u 'i khu ba na le sham la sogs pa spod kyi bye brag dag dang sbyar ba'o/ /ngan pa 'di la ni phyed nyid do zhes bya ba ni/ zas bsod pa blangs te/ za ba la ltung ba rnam par gzhag pa byas pa gang yin pa de ngan pa rang gis blangs te za ba 'di la ni phyed nyid de sbyor ba la yang nyes byas yin la/ dngos gzhi la yang nyes byas yin no/ /gzhan slong du bcug pa zos na ni nyes byas phra mor 'gyur ro/ /'dir ltung ba ni/ dge slong gis 'o ma 'thob pa na zho slong bar byed na de slong ba la ni nyes byas la 'thungs na ni ltung byed do/ /dge slong gis bsod pa 'thob pa na ngan pa slong bar byed na de slong ba la yang nyes byas la zos pa la yang nyes byas so/ /ngan pa mi 'thob pa nyid na ni thams cad du nyes byas kyi byed pa po nyid yin no/ /ci bder bstabs pa'i mtshan nyid smra bar 'dod nas/ zas khyer te phyir byung bas cang mi smra ba'am phyir spang ba la 'o na ci slong zhes dris pa ni ci bder bstabs pa nyid yin no zhes bya ba smras te/ zas khyer te phyir byung ba'i sbyin pa pos dge slong cang mi smra ba'am/ kho bo la 'di mi dgos so zhes phyir spong ba la gal te de'i tshe 'di skad ces 'o na ci slang zhes dri bar gyur na de skad dris pa de ni ci bder bstabs pa yin no/ /bsod pa slong ba'i ltung byed do zhes bya ba de bshad zin to/ / //srog chags dang bcas pa'i chu la spyod pa'i ltung byed smra bar 'dod nas/ rang spyad pa'i don gnyis la 'jug pa dang 'jug tu 'dzud pa dag la'o zhes bya ba smras te/ rang nyid nye bar spyad pa ni rang spyad pa'o/ /de nyid don yin te de'i dngos po ni de nyid do/ / de la bdag nyid 'jug pa dang gzhan 'jug tu 'dzud pa dag gang yin pa de gnyis la'o/ /'di skad bstan te/ bdag nyid kyi don du srog chags dang bcas pa'i chu la sogs pa spyod pa la rang 'jug pa dang gzhan 'jug tu 'dzud par byed na rang spyod pa'i don nyid la rang 'jug pa dang / gzhan 'jug tu 'dzud par byed pa'i ltung byed de la 'du shes gtso cher byed pa po nyid yin no/ /gzhan spyad pa'i don nyid la 'jug pa dang gzhan 'jug tu 'dzud pa de gnyis ni sngar srog chags dang bcas pa la spyod pa'i ltung byed bstan pa de la 'du shes gtso cher byed pa po nyid yin no zhes bya bar sbyar ro/ /shes gtso'o zhes bya ba ni/ 'dir yang shes gtso zhes bya ba'i ming dang 'du shes gtso cher byed pa po nyid do zhes bya ba'i ming can du sbyor bar byed do/ /gang la 'du shes gtso cher byed pa po nyid yin zhe na/ de'i phyir srog chags dang bcas pa nyid la'o zhes bya ba smras te/ chu la sogs pa gang la srog chags dag dang lhan cig 'jug pa de ni srog chags dang bcas pa'o/ /de'i dngos po ni de nyid do/ /srog chags dang bcas pa nyid de la der 'du shes pa ni kha na ma tho ba 'di'i byed pa po nyid yin no/ /gal te chu la sogs pa yang srog chags dang bcas pa nyid yin la/ dge slong gis kyang de ltar shes bzhin du spyad na kha na ma tho ba 'dir 'gyur ro zhes bya ba'i tha tshig go/ /gang zhig srog chags dang bcas pa nyid la yin zhe na/ de'i phyir chu dang / zhun mar dang / 'bru mar dang / sbrang rtsi dang / bu ram gyi dbu ba dang / 'o ma dang / zho dang / mar dang / tshwa dang / 'bru'i tsha dang / zho ga chu dang / rtsab mo dang / shing tog dang / bca' bar bya ba la sogs par nye bar spyad par bya'o zhes bya ba smras te/ chu dang / zhun mar dang / 'bru mar dang / sbrang rtsi dang / bu ram gyi dbu ba dang / 'o ma dang / zho dang / mar dang / tshwa dang / 'bru'i tsha dang / zho ga chu dang / rtsab mo dang / shing tog dang / bca' bar bya ba la sogs pa nye bar sbyar bar bya ba srog chags dang bcas pa nyid la'o/ /nye bar sbyar bar bya ba de dag srog chags ji lta bu dag gis srog chags dang bcas pa nyid la yin zhe na/ de'i phyir snang ba dag gis so zhes bya ba smras te/ gang dag ltar nus pa de dag gi ni snang ba dag ste/ de'i phyir de dag gis srog chags dang bcas pa nyid la yin gyi/ mi snang ba dag gis srog chags dang bcas pa nyid la ni ma yin no/ /gang gi tshe srog chags dang bcas pa la spyod pa de kha na ma tho ba 'di'i byed pa po nyid yin zhe na/ de'i phyir shi na'o zhes bya ba smras te/ srog chags dag gi srog gi dbang po 'gag pa'i mtshan nyid kyi skad cig ma gnyis pa la'o/ /ci srog chags du ma shi na yang kha na ma tho ba gcig gi byed pa po nyid yin nam zhe na/ de'i phyir srog chags re re'i 'o zhes bya ba smras te/ dud 'gro'i skye gnas su skyes pa'i srog chags ji snyed sbyor ba'i de'i dbang gis srog bcad de dus byas na de snyed kho na'i ltung byed du 'gyur te/ dngos gzhi 'di ni nges pa yin no/ /sbyor ba ni rtsom pa'i dbang gis ma nges te/ rtsom pa gcig gis sngar mang po de dag shi bar gyur na yang sbyor ba'i kha na ma tho ba gcig kho na'i yin la/ ji ste srog chags ji snyed pa rtsom pa la yang de snyed kyis bsad na ni sbyor ba yang de snyed kho nar so sor 'gyur bas/ rtsom pa ji snyed pa de snyed kho na'i sbyor ba'i kha na ma tho bar 'gyur ro/ /spyod pa ni lus kyir nye bar spyod pa'o zhes bya ba ni/ lus kyir nye bar spyad pa yin te/ de ni spyod pa mtshan nyid kyi sgo nas bstan pa yin no/ /da ni spyod pa ngo bo nyid kyi sgo nas bstan pa'i phyir/ 'di lta ste/ khrus dang btung ba dang so shing dor ba dang lag pa dang rkang pa bkru ba'o zhes bya ba smras te/ 'di lta ste zhes bya ba ni nye bar bstan pa yin no/ /khrus dang btung ba dang so shing dor ba dang lag pa dang rkang pa bkru ba lus kyi nye bar spyad pa ni spyod pa'i ngo bo nyid yin no/ /lus kyi yo byad dag tu nye bar sbyar ba gang yin pa de ni lus kyi nye bar spyad pa kho na yin par shes par bya'o zhes bstan pa'i phyir/ yo byad dag tu nye bar spyad pa gang yin pa de ni lus kying yin no zhes bya ba smras te/ zas la sogs pa yo byad dag tu nye bar spyad pa gang yin pa de ni lus kyir nye bar spyad pa kho na yin par shes par bya'o/ /lus kyi yo byad de dag gang dag yin zhe na/ de'i phyir/ bza' bar bya ba dang lhung bzed dang / chos gos dang gnas dang so bkru ba dang me la sogs pa ni lus kyi yo byad dag yin no zhes bya ba smras te/ bza' bar bya ba zhes bya ba ni/ bza' ba dang btung ba la sogs pa'o/ /lhung bzed dang / chos gos dang gnas dang so bkru ba dang me la sogs pa zhes bya ba la sogs pa zhes bya ba'i sgras ni khri dang khri'u dang stan nang tshangs can dang la ba la sogs pa dag bsdus te/ de dag ni lus kyi yo byad dag yin par rig par bya'o/ /'o na lus kyi yo byad de dag tu nye bar sbyar ba gang yin par blta bar bya zhe na de'i phyir/ de dag tu ni sa dang / lci ba dang / tshon dang rtswa dang shing la sogs pa'o zhes bya ba smras te/ lus kyi yo byad de dag tu nye bar sbyar ba ni sa dang lci ba dang / tshon dang rtswa dang shing la sogs pa dag yin par rig par bya'o/ /lus kyi yo byad de dag tu nye bar sbyor ba de dag la chu la sogs pa ji ltar dgos she na/ de'i phyir de dag tu dgos pa ni 'di lta ste/ byi dor bya ba dang / bkru ba dang kha bsgyur ba dang / chag chag gdab pa dang phyag dar bya ba dang zhal zhal bya ba dang 'u sha dang / thang dang thug pa dag tu bya'o zhes bya ba smras te/ lus kyi yo byad dag tu nye bar sbyar bar de dag tu chu la sogs pa dgos pa'o/ /'di lta ste zhes bya ba ni/ nye bar bstan pa'i tshig go/ /byi dor bya ba dang / bkru ba dang / kha bsgyur ba zhes bya ba ni lhung bzed la sogs pa'o/ /chag chag gdab pa dang / phyag dar bya ba dang / zhal zhal bya ba zhes bya ba ni/ gnas gang la sogs pa'o/ / 'u sha dang thang dang thug pa dag tu zhes bya ba ni bza' ba dang btung ba dag tu'o/ /bya ba'o zhes bya ba ni/ gong ma thams cad dang sbyar bar bya'o/ /'og gi mdo las lta bu yang sbyor ba dag yin no zhes 'byung ba de ni 'dir yang sbyar bar bya'o/ /chu'i srol dgag pa dang bsal ba dag kyang ngo zhes bya ba ni/ chu'i srol zhes bya ba yur ba la sogs pa'i chu'i lam dgag pa dang bsal ba dag bya ba lta bu yang spyod pa dag yin no/ /shing dang g.yeng ba dag gzhug pa dang drang ba dang bshal ba dag kyang ngo zhes bya ba ni/ shing chu'i nang du gzhug pa dang chu'i nang nyid du drang ba dang / chu'i nang nas skam sar bshal ba dang / chu lon la sogs pa chur g.yeng ba dag chur gzhug pa dang / chu'i nang nyid du drang ba dang / chu'i nang nas skam sar bshal ba dag bya ba lta bu yang sbyor ba dag yin no/ /shing dang g.yeng ba zhes smos pa dpe tsam du zad de/ de lta bu mthun pa gzhan dag kyang bsdu'o/ /rim pa gcig pa las gzhan pa spu can la sogs pa bkru ba yang ngo zhes bya ba ni/ rim pa gcig pa las gzhan pa zhes bya ba'i tshig rkyang las gzhan pa spu can la sogs pa bkru ba dag bya ba lta bu yang sbyor ba dag yin no/ /sogs pa zhes bya ba'i sgras ni gos lhan pa can la sogs pa dag kyang bsdu'o/ /de yang srog chags kyi khams lhag par mang ba'i chur 'khru ba lta bu yang sbyor ba dag yin no zhes bya ba la/ de yang zhes bya ba ni/ gos rim pa gcig pa de yang ste/ srog chags kyi khams lhag par mang ba'i chur 'khru ba lta bu yang zhes bya ba rnam pa de lta bu yang sbyor ba dag yin no/ /'dir gzhung ni dge slong gi srog chags dang bcas pa'i chus chag chag 'debs sam/ phyag dar byed dam/ 'u sha dang thang dang thug pa dag byed na srog chags ji snyed 'chi ba de snyed kyi ltung byed du gyur la/ mi 'chi na ni nyes byas so/ /dge slong gis srog chags dang bcas pa'i chu'i yur ba 'gog gam sel bar byed na srog chags ji snyed 'chi ba de snyed kyi ltung byed du 'gyur la/ mi 'chi na ni nyes byas so/ /dge slong gis srog chags dang bcas pa'i chur shing 'dzud dam 'dren tam/ chu'i nang nas skam sar bshal lam g.yeng bag g.yeng bar byed dam 'dren tam/ chu'i nang nas skam sar bshal bar byed na/ srog chags ji snyed 'chi ba de snyed kyi ltung byed du 'gyur la/ mi 'chi na ni nyes byas so/ / dge slong gis chu srog chags dang bcas par gos spu can dang lhan pa can dag 'khru bar byed na srog chags ji snyed 'chi ba de snyed kyi ltung byed du 'gyur la mi 'chi na ni nyes byas so/ /bcom ldan 'das kyis bka' stsal pa/ dge slong gis spu can dang lhan pa can dag bkru bar mi bya ste/ 'khru na 'gal tshabs can du 'gyur ro/ /'di ltar rim pa gcig pa ni bkru bar bya'o/ /dge slong dag gis bkru ba gtan btang ba dang / bcom ldan 'das kyis bka' stsal pa/ gang na srog chags kyi khams mang la chu'i khams nyung ba der bkru bar mi bya'i/ gang na chu'i khams mang la srog chags kyi khams nyung ba der bkru bar bya'o/ /'dir 'gal tshabs can du 'gyur ro zhes gsungs pa ni ltung byed du 'gyur ro zhes bya bar dgongs par rig par bya ste/ srog chags dang bcas pa'i chu la spyod pa'i phyir ro/ /srog chags dang bcas pa'i chu la spyod pa rnam par 'byed pa'o zhes bya ba de rnam par 'byed pa'i skabs nas 'byung ba bshad zin to/ / //da ni srog chags dang bcas pa'i chu legs par btsags pa la sogs pa dang 'brel pa phran tshegs la sogs pa las gsungs pa brjod par bya ste/ dpyang tshags bcad par bya'o zhes bya ba ni/ chu btsags pa'i phyir shing bu gsum la dpyang ba'i tshags ni/ dpyang tshags zhes bya ste de bcang bar bya'o/ /dpyang tshags kyi rang gi ngo bo bstan pa'i phyir/ zed snod kyi steng gi nam mkha' la gzhag par bya zhing dgang ba dang / btsags par bya ba'i chu bzed par byed pa tshags gdags par bya ba'i lcags gzer dag btab pa'i shing bu gsum dang ldan pa ni de zhes bya'o zhes bya ba smras te/ shing bu gsum dang ldan pa ni de zhes bya'o zhes bya ba ni/ snol mar sbrel ba yin no/ /dpyang tshags zhes bya ba ni/ chu tshags gru gsum la sogs pa'i rdzas yin par rig par bya'o/ /khyad par ji lta bu can zhig ce na de'i phyir/ zed snod kyi zhes bya ba la sogs pa smras te/ de ni zed pa yang yin la/ /snod kyang yin pas na zed snod ces bya ste/ shing bu gsum po gang la bum pa la sogs pa yod pa de ni zed snod de/ zed snod de'i steng gi nam mkha' zhes bya ba ni/ shing bu gsum gyi nang du gtogs pa'i nam mkha' gang yin pa ste/ de ni zed snod kyi steng gi nam mkha'o/ /nam mkha' de la gzhag par bya zhing zhes bya ba ni nam mkha' de la gzhag par bya ba zed par byed cing 'dzin par byed pa chu tshags la sogs pa'o/ /gang gi zed par byed pa zhe na/ dgang ba dang btsags par bya ba'i chu'i ste/ dgang ba zhes bya ba ni chu tshags su blugs par bya ba ste/ de dang btsags par bya ba'i chu zhes bya ba ni yongs su btsags par bya ba'i chu ste/ de gnyis zed par byed pa gang yin pa de ni zed snod kyi steng gi nam mkha' la gzhag par bya zhing dgang ba dang btsags par bya ba'i chu zed par byed pa'o/ /zed par byed pa de nyid tshags yin te/ 'tshag par byed pa chu tshags gru gsum la sogs pa chu tshags yin te/ zed par byed pa de nyid tshags de ni zed snod kyi steng gi nam mkha' la gzhag par bya zhing dgang ba dang btsags par bya ba'i chu zed par byed pa tshags so/ /tshags de gdags pa zhes bya ba ni/ /shing bu gsum po de nyid la tshags de gdags pa ste/ de ni zed snod kyi steng gi nam mkha' la gzhag par bya zhing dgang ba dang btsags par bya ba'i chu zed par byed pa tshags gdags pa'o/ /gdags pa de nyid bya ba yin te/ lcags gzer gang dag la zed par byed pa tshags de gdags par bya dgos pa ste/ de ni zed snod kyi steng gi nam mkha' la gzhag par bya zhing dgang ba dang btsags par bya ba'i chu zed par byed pa tshags gdags par bya ba'i lcags gzer dag yin no/ /lcags gzer de dag shing bu gsum po gang la btab pa'i shing bu gsum po de ni zed snod kyi steng gi nam mkha' la gzhag par bya zhing dgang ba dang btsags par bya ba'i chu zed par byed pa tshags gdags par bya ba'i lcags gzer dag btab pa'i shing bu gsum ste/ dpyang tshags gang la shing bu gsum yod pa de ni shing bu gsum dang ldan pa yin no/ /de zhes bya'o zhes bya ba ni/ dpyang tshags zhes bya'o zhes bya ba'i tha tshig go/ /'di skad bstan te/ chu btsags pa'i phyir dpyang tshags bcang bar bya'o/ /de ji lta bu zhig ce na/ dpyang tshags gang la shing bu gsum snol mar sbrel zhing de la yang lcags gzer dag chu tshags gdags pa'i don du btab pa yin no/ /chu tshags khyad par ji lta bu can zhig ce na/ dgang bar bya ba dang btsags par bya ba'i chu zed par byed pa'o/ /de phyogs gang du gzhag par bya zhe na/ sa la gzhag pa'i snod bum pa la sogs pa chu tshags nas 'dzag pa'i chu zed par byed pa gang yin pa de'i steng gi nam mkha' de la shing bu gsum la btags te gzhag par bya'o/ /de ltar yang 'dir gzhung ni/ bcom ldan 'das kyis bka' stsal pa/ dpyang tshags bya zhing de'i yang thog tu lcags gzer gdab par bya'o/ /de la chu tshags gdags par bya zhing de'i 'og tu bum pa gzhag par bya'o/ /chu snod kyi bum pa dgang bar bya'o zhes gsungs pa yin no/ /'dir chu snod kyi bum pa dgang bar bya'o zhes gsungs pa'i don ni/ chu snod kyi chu tshags kyi nang du chus dgang bar bya zhing chu tshags des btsags pa'i chus zed snod kyi bum pa 'og ma gang bar 'gyur ba yin par rig par bya'o/ /chu gnas par bya ba'i phyir chu tshags su gcal gzhug par bya'o zhes bya ba ni/ chu gnas par bya ba'i phyir chu tshags de'i nang du gcal gzhug par bya ba ste/ tshig 'di ni dge slong gis spyad pa'i chu tshags zin pa'i 'og tu tshags kyi nang na gnas pa'i chu myur du zad na de na gnas pa'i srog chags rnams 'chi bar 'gyur ba de yongs su spangs pa'i phyir ro/ /gcal ji zhig gzhug par bya zhe na de'i phyir/ bye ma'am lci ba'o zhes bya ba smras te/ de gnyis gang yang rung ba gcal du gzhug go/ /yang na tshags rten snod do zhes bya ba ni/ chu gnas par bya ba'i phyir chu tshags la yang na tshags rten snod gzhug gi /de ji 'dra ba zhig ce na de'i phyir/ sa dang zangs ma las byas pa gang yang rung ngo zhes bya ba smras te/ gang yang rung ngo zhes bya ba ni sa las byas pa yang rung / zangs ma las byas pa yang rung ngo zhes bya ba'i tha tshig go/ /de ni shing bu gsum gyi thog ma la gdags so zhes bya ba ni/ tshags rten snod de ni shing bu gsum gyi thog ma la gdags pa'o/ /thabs gang gis she na de'i phyir/ bu gur lung byas te'o zhes bya ba smras te/ bu gu phug nas der lung btags te de shing bu gsum gyi thog ma la btags so/ /de ni ngos gnyis nas btags na yang 'dug tu btub po zhes bya ba ni/ bu gu du ma zhig dgos na yang tshags rten snod la bu gu du ma tsam gyis shing bu la gdags su rung ba de snyed kyi bu gu bya'o/ /phyi rol gyi ngos su tshags rten snod gzhag par bya'o zhes bya ba ni/ gal te chu tshags kyi nang rol du tshags rten snod gzhag par gyur na/ de'i tshe tshags rten snod kyi 'og tu song ba'i srog chags dag 'chi bar 'gyur srid pas nyes dmigs der mi 'gyur bar bya ba'i phyir mdo 'di byas so/ /de ji zhig gis gdags she na de'i phyir/ snga ma ni tha gus so/ /phyi ma ni lcags thag 'jam pos so zhes bya ba smras te/ snga ma las byas pa ni tha gus gdags so/ /phyi ma zangs las byas pa ni lcags thag 'jam pos gdags so zhes bya ba'i tha tshig go/ /de bcang bar bya'o zhes bya ba ni tshags rten snod de gang zag gis kyang bcang bar bya'o/ /chu mi 'dzag na shing leb kyis chu tshags la dal bu dal bus yang dang yang du brdab par bya'o zhes bya ba ni/ gal te chu tshags las chu mi 'dzag na de'i tshe shing leb kyis chu tshags la dal bu dal bus yang dang yang du brdab par bya'o/ /'di skad bstan te/ gal te chu tshags gru gsum la sogs pa thags bzang bas chu mi 'dzag na de la shing leb kyis chu tshags la dal bu dal bus yang dang yang du brdab par bya'o/ / bum tshags gce'u can ni tshegs chung ngo zhes bya ba ni/ bum tshags gce'u can ni tshegs chung zhing bya sla ba yin pas/ de la 'dod pa bskyed par bya ba'i tha tshig go/ /bum tshags gce'u can ni de nas chu'i sgra tig tig sgrog cing 'dzag pa'am yang na de'i nang du chu'i sgra sgrog cing 'gro ba dang 'bab pa dang 'dzag par 'gyur ba'i phyir sgra sgrog ces bya ba'o/ /de bcang bar bya'o zhes bya ba ni bum tshags gce'u can de gang zag gis kyang bcang bar bya ba'o/ /de ci las byas pa zhe na/ de'i phyir sa'am zangs ma las byas pa'o zhes bya ba smras te/ sa las byas pa yang rung zangs ma las byas pa yang rung ngo zhes bya ba'i tha tshig go/ /de'i dbyibs ci 'dra zhe na de'i phyir de ni bum pa'i dbyibs can nang pad+ma'i bu gu lta bu dang ldan pa 'og sbubs can yin no zhes bya ba smras te/ bum tshags gce'u can gang la bum pa lta bu'i dbyibs kyi rnam pa yod pa de ni bum pa'i dbyibs can zhes bya'o/ /bum tshags gce'u can gang gi nang na pad+ma'i bu gu lta bu'i bu gu dag yod pa de ni/ nang pad+ma'i bu gu lta bu dang ldan pa zhes bya ste/ pad+ma'i snying po'i nang na gnas pa'i bu gu dag lta bu'i bu gu dag 'di'i nang na yang yod pa yin no/ /'og sbubs can yin no zhes bya ba ni/ bu gu de dag gi ngos 'og ma rnams la gce'u lta bu'i sbubs dag yod pa yin te/ de'i nang gi bu gu rnams kyi 'og sbubs can dag tu bya ba'o/ /'dir gzhung ni bum pa'i dbyibs lta bur bya zhing de'i nang du pad+ma'i rnam pa lta bu'i bu gu dag gdod par bya'o/ / de dag bsdu ba'i phyir de dag gi steng du bu gu chen po gcig gdod par bya'o/ /de dag nyid bsdu ba'i phyir 'og sbubs can du bya'o zhes gsungs pa yin no/ /'dir steng du bu gu chen po gcig gdod par bya'o zhes gsungs pa ni bum pa'i kha nyid yin par blta bar bya'o/ /de dag tu ras mas 'dags pa nyid do zhes bya ba ni/ nang gi bu gu de dag tu chu 'dzag pa rnams ras mas btsags par bya ba nyid yin no/ /'di skad bstan te/ chu tshags pa'i bu gu dag gi steng du bum pa'i gcal thabs su chu tshags su rung ba'i rdzas kyi ras ma ji tsam gyis g.yogs pa de tsam gyis btsags shing srog chags med par bya'o/ /'dir gzhung ni de dag gi steng du ras mas g.yogs te chu btsags par bya'o zhes gsungs pa yin no/ /chu tshags nye bar gzhag par bya'o zhes bya ba ni/ chu la sogs pas kun nas 'dzag par byed pa'i phyir chu tshags zhes bya ba ste/ de gang zag gis kyang bya zhing nye bar gzhag go zhes bya ba'i tha tshig go/ /chu tshags gru gsum mam ril ba zhabs tshags can nam bsal tshags kyang ngo zhes bya ba ni/ chu tshags gru gsum mam ril ba zhabs tshags can nam bsal tshags nye bar gzhag par bya'o/ /chu tshags gru gsum smos pas ni ril tshags kyang bzung bar shes par bya'o/ /bsal tshags smos pas ni bum tshags gce'u can la dgos pa'i ras ma yang bzung ba nyid yin no/ /'am zhes bya ba'i sgra ni thams cad sogs pa spang ba'i phyir te/ gcig dgos pa 'grub pa'i phyir ro/ /'og gi mdo las de la de med par ljongs rgyu zhing 'gro bar mi bya'o zhes 'byung ba de'i dmigs kyis bsal ba bstan pa'i phyir/ bya ma bum dang ril ba dag gis chu rung ba bcus pa nyid dang yod pa nyid kyang de dang ldan pa nyid do zhes bya ba smras te/ bya ma bum dang ril ba dag gis chu rung ba bcus shing blangs pa nyid ni chu tshags de dang ldan pa nyid yin no/ /yod pa nyid kyang de dang ldan pa nyid do zhes bya ba ni/ lam ji tsam du chu rung ba yod pa nyid yin na de yang chu tshags de dang ldan pa nyid yin no/ /'di skad bstan te/ lam ji srid du chu rung ba bcur yod pa de srid du chu tshags dang ldan pa nyid yin gyi lhag par ni ma yin te/ de ni shugs kyis 'thob po/ /de med par ljongs rgyu zhing 'gro bar mi bya'o zhes bya ba ni/ chu tshags la sogs pa med par ljongs rgyu zhing 'gro bar mi bya ba'o/ /nang dang bcas pa dang lhan cig tu mi bya'o zhes bya ba ni/ dge slong zhe 'gras pa dang lhan cig ljongs rgyu zhing 'gro bar mi bya ba'o/ /gal te rkyen de lta bu yod na bzod pa gsol te'o zhes bya ba ni/ gal te de dang 'grogs te mi 'gro na tshul khrims dang srog la sogs pa'i bar chad byed pa de lta bu'i rkyen dag yod na gtsug lag khang de nyid du nang dang bcas pa'i dge slong de la bzod pa gsol nas sam bzod par byas te lhan cig ljongs rgyu zhing 'gro bar bya'o/ /bya ba byed pa na yod pa nyid ni yod pa nyid yin no zhes bya ba ni/ dgos pa bsgrub pa'i dus na gal te de sgrub par byed pa'i yo byad yod pa nyid yin na/ de'i tshe yo byad de yod pa nyid yin par rig par bya'o/ /sngar yang ma yin phyis kyang ma yin te/ 'di lta ste dper na chu btsags pa'i dus na chu tshags yod pa nyid ni yod pa nyid yin pa lta bu'o/ /gzhan gyis 'di ltar de sbyin no zhes khas blangs pa ni de dang ldan pa nyid yin no zhes bya ba ni/ gzhan gang gis 'di skad ces 'di ltar chu btsags pa'i dus der chu tshags sbyin no zhes khas blangs pa ni chu tshags de dang ldan pa nyid yin no/ /gal te khas ma blangs na ni dge slong gzhan dag la chu tshags yod du zin kyang dge slong de la chu tshags yod pa nyid ma yin no/ /ljongs rgyu ba'i tshe 'bral ba na sbyin par khas ma blangs na de la brten par mi bya'o zhes bya ba ni/ ljongs rgyu ba'i tshe 'bral zhing grong gzhan du 'gro bar 'gyur ba'i tshe chu tshags sbyin no zhes chu tshags dang ldan pa'i dge slong gis khas ma blangs na ljongs rgyu ba'i tshe chu tshags de la brten par mi bya ste/ 'bral ba'i mdun rol du ma bral ba'i tshe na re zhig sbyin par khas blangs pa ni phyis 'bral ba'i tshe na med pa'i phyogs dang mthun pa nyid yin pa'i phyir ro/ /phongs par mi 'gyur ba'i nyen kor du 'gro ba ni rgyu ba ma yin no zhes bya ba ni chus phongs par mi 'gyur ba'i nyen kor gyi phyogs su 'gro ba gang yin pa de ni ljongs rgyu ba ma yin par shes par bya ste/ der ni chu tshags med kyang nyes pa 'gar yang mi 'gyur ro zhes bya ba'i tha tshig go/ /de ni rgyang grags lnga nyid yin no zhes bya ba ni/ phongs par mi 'gyur ba'i nyen kor de ni rgyang grags lnga nyid yin no/ /'dir de dag gi gzhung ni gzhung kha cig las/ btsun pa chab tshags ma mchis par grong gzhan nam gtsug lag khang gzhan du mchir rung ngam/ rung ste gal te der song yang phongs par mi 'gyur na'o zhes bya ba dang / cig shos kyi ni btsun pa chab tshags ma mchis par shul du zhugs te mchir rung ngam/ rung ste gal te der song yang phongs par mi 'gyur ba'i rgyang grags lnga tshun chad do zhes gsungs pa yin no/ /mdo snga mas ni gzhung snga ma bsdus pa yin la mdo 'dis ni gzhung phyi ma shos bsdus pa yin no/ / //bam po sum cu pa/ sngar phongs par mi 'gyur ba'i nyen kor du 'gro ba ni rgyu ba ma yin no zhes spyir btang ba byas pa de'i dmigs kyis bsal ba bstan pa'i phyir/ gnas su bzhag ste song ba de dang ldan pa nyid ma yin pa de ni rang dga' byed pa ma yin pa ma yin no zhes bya ba smras te/ dge slong gnas su chu tshags bzhag ste gnas gzhan du song ba chu tshags de dang ldan pa nyid ma yin pa ni de'i tshe na rang dga' byed pa ma yin pa ma yin te/ rang dga' byed pa nyid yin no zhes bya ba'i tha tshig go/ / 'di skad bstan te/ gal te bdag der song na chu tshags yod par 'gyur ro zhes de ltar nges pa med na de'i tshe chu tshags med par des der 'gro bar mi bya'o/ /gcig gis dge 'dun man chad du ma de dang ldan pa nyid ma yin par mi 'gyur ro zhes bya ba ni/ chu tshags gcig yod na des dge 'dun man chad dge slong du ma dag chu tshags dang ldan pa nyid ma yin par mi 'gyur te/ ldan pa nyid du 'gyur ro/ /'di skad bstan te/ gal te dge 'dun du gyur pa'i dge slong du ma dag chu tshags gcig gis ljongs rgyu zhing 'dod na de'i tshe nyes pa med do/ /rgyun mgyogs pa la ni phongs par 'gyur ba nyid ma yin no zhes bya ba ni/ sngar de ni rgyang grags lnga nyid yin no zhes smos pa de la ni chu'i rgyun mgyogs pa la yang phongs par mi 'gyur ba nyid du rig par bya'i/ chu'i rgyun mgyogs pa de la rgyang grags lnga phan chad ni phongs par mi 'gyur ba nyid ma yin te/ 'di ltar phongs par 'gyur ba nyid yin no/ /'dir gzhung ni btsun pa chu klung 'bab pa la chab tshags ma mchis par mchir rung ngam/ nye ba 'khor rung ste rgyang grags lnga tshun chad du rung ngo zhes gsungs pa yin no/ /de rgyun phyogs su rjes su 'brel par 'gro bas na des rgyang grags kyi bar du 'jug tu rung ngo zhes bya ba la/ de la zhes bya ba ni/ chu'i rgyun mgyogs pa de la'o/ /rgyun phyogs su zhes bya ba ni/ chu'i rgyun phyogs su 'gro bas yin gyi/ rgyun las bzlog phyogs su 'gro bas ni ma yin no/ /rjes su 'brel par zhes bya ba ni/ chu'i rgyun song ma thag pa'i rjes su 'brel par phyi bzhin du 'gro bas yin gyi/ chu'i rgyun song ba'i 'og tu dus gzhan na phyi bzhin 'gro bas ni ma yin no/ /'gro bas ni zhes bya ba ni de ltar 'gro ba'i dge slong gis so/ /des zhes bya ba ni sngar rgyang grags kyi mgor chu brtag pa byas pa de nyid kyis so rgyang grags kyi bar du zhes bya ba ni sngar rgyang grags kyi mgor chu brtags pa'i gnas de man chad nas brtsams te rgyang grags gcig gi mthar thug gi bar du'o/ /'jug tu rung ngo zhes bya ba ni de ltar 'gro ba'i dge slong gis ni sngar rgyang grags kyi mgor chu brtag pa byas pa de nyid kyis rgyang grags gcig gi mthar thug gi bar du chu brtag mi dgos par 'dod dgur spyad cing 'jug tu rung ngo / /de man chad ni yang dge slong des chu brtag par bya dgos te/ snga ma bzhin du ci rigs par sbyar ro/ /spyir btang ba byas pa de'i dmigs kyis bsal ba bstan pa'i phyir/ gal te de chu gzhan dang 'dres par gyur na de yan chad du'o zhes bya ba smras te/ gal te chu'i rgyun mgyogs pa de rgyang grags gcig gi mthar thug pa'i nang yan chad du chu gzhan dang 'dres par gyur na gang du 'dres par gyur pa/ de yan chad du dge slong des sngar rgyang grags kyi mgor chu brtag pa byas pa de nyid kyis 'dod dgur spyad cing 'jug tu rung gi/ 'dres pa man chad la ni des yang brtag cing 'jug par bya'o zhes bya ba'i tha tshig go/ /brtags pa nas 'dom gang khor yug ni de nyid yin no zhes bya ba ni/ chu brtag pa'i gnas nas 'dom gang kho ra khor yug tshun chad ni brtag pa nyid yin no/ /'dir gzhung ni btsun pa chab kyi nyan kor gang lags/ nye ba 'khor 'dom gang ngo zhes gsungs pa yin no/ /mig gis dag pa nyid kyi chu ni dag pa yin no zhes bya ba ni/ chu gang gis dag pa yin zhe na/ mig gis dag pa nyid kyi chu ni dag pa nyid yin no/ /'di skad bstan te/ chu ni mig gis brtag par bya ste/ gal te de na srog chags mi snang na de'i tshe chu dag pa yin par rig par bya'o/ /mig gang gis she na de'i phyir/ tha mal pas so zhes bya ba smras te/ sha'i mig gis tha snyad gdags su rung bas so/ /'dir gzhung ni tshe dang ldan pa ma 'gags pas lha'i mig gis chu brtags pa na de'i tshe srid pa bar ma'i srog chags dag gis thams cad khyab par mthong nas/ bcom ldan 'das kyis bka' stsal pa/ lha'i mig ni tha snyad gdags su mi rung ste/ de bas na lha'i mig gis chu brtag par mi bya bar 'di ltar chu rung ba lnga sngar spyad par bya'o zhes gsungs pa yin no/ /mi g.yo ba nyid dang rnyog pa med pa la brtag par bya'o zhes bya ba ni/ brtag par bya ba'i chu mi g.yo mi 'gul ba nyid dang / rdul dang dal dul gyi rnyog pa med cing shin tu dngas pa la brtag par bya'o/ /bum pa gang ba nyid la'o zhes bya ba ni/ chu bum pa gang ba nyid la brtag par bya ba'o/ /de la bya ba las 'das par bgrang ba'i yun ring po nyid du mi bya'o zhes bya ba ni/ chu brtag pa de la de bya ba las 'das pa yin no zhes bya bar yun ring ba nyid kyi grangs su grags pa'i tha snyad kyi tshig gang yin par 'gyur ba de lta bu'i yun ring po nyid du brtag par mi bya'o/ /'di skad bstan te/ yun ring yang rung thung yang rung ste/ ji tsam gyis sems dag par gyur pa de tsam du brtag par bya'o/ /de ltar yang 'dir gzhung ni ha cang yun ring du brtag par mi bya bar 'di ltar ji srid kyis ba lang drug dang ldan pa'i shing rta smyig ma'i shar bas bkang ba la yangs kyis 'khor bar 'gyur ba de srid du brtag par bya'o/ /yang na ji srid kyis sems dag par gyur pa de srid du brtag par bya'o zhes gsungs pa yin no/ /de la sems dag par gyur pa zhes bya ba de la sems dag par gyur ces bya ba ni/ mig gis dag pa nyid ces bya ba de yin pas de'i phyir de las ring du mi bya ste/ des na 'dir sems dag pa zhes bya ba de logs shig tu ma bsdus so/ /rtse mo 'jam pos srog chags dag bstan sla'o zhes bya ba ni/ thur ma 'am rtswa la sogs pa'i rtse mo 'jam pos srog chags dag bstan par bya'o/ / 'di skad bstan te/ gal te la la chu'i srog chags la the tshom za 'am mi mthong na de'i tshe thur ma'am rtswa 'am shing bu 'jam po'i rtse mos bstan par bya'o/ /de dag 'chi bar 'gyur ba'i lam du mi dor ro zhes bya ba ni/ chu'i srog chags de dag dor ba'i lam gyi thag ji srid kyis 'chi bar 'gyur ba'i lam gyi thag de srid du dor bar mi bya ste/ mi 'phang ngo zhes bya ba'i tha tshig go/ /gzhan yang mi dor ro zhes bya ba ni/ chu'i srog chags dag las gzhan pa shig dang rtswa shig la sogs pa dag kyang 'chi bar 'gyur ba'i lam gyi thag de srid du mi dor ro/ /gal te mar me'i nang du srog chags ltung na de byed pas de g.yogs par bya'o zhes bya ba ni/ gal te mar me'i nang du srog chags dag ltung bar 'gyur na de'i tshe de byed pas zhes bya ba mar me snang bar byed pas mar me la mi sgrib pa'i 'od khang gis mar me de g.yogs par bya'o/ /mar me snang bar byed pa'i 'od khang de'i ngo bo nyid ji lta bu zhe na de'i phyir/ smyig tshal gyi gzeb dar dkar ram lhang tsher srab mos g.yogs pa ni de zhes bya'o zhes bya ba smras te/ smyig ma'i tshal pa'i gzeb dar dkar la sogs pas g.yogs pa'am/ lhang tsher rim par phye ba srab mos g.yogs pa ni de zhes bya ste/ 'od khang zhes bya'o zhes bya ba'i tha tshig go/ /mig brgya pa yang rung ngo / /'dir gzhung ni 'od khang gi gzeb dar dkar gyis g.yogs par bya'o/ /de mi rnyed na lhang tsher srab mos g.yogs par bya'o/ /de yang ma rnyed nas/ bcom ldan 'das kyis bka' stsal pa/ mig brgya pa bya'o zhes gsung pa yin no/ /mig brgya pa ji lta bu zhe na de'i phyir/ dang po nas byas pa'am bum pa la sogs pa'i snod bu gu can no zhes bya ba smras te/ dang po nas byas pa zhes bya ba ni/ de dang po 'byung ba nyid kyi tshe na rdza mkhan gyis byas pa ste/ sa las byas pa'i snod bum pa'i dbyibs 'dra ba/ tshags 'dra ba bu gu mang po btod nas so btang ba zhes bya ba'i tha tshig go/ /bum pa la sogs pa'i snod bu gu can zhes bya ba ni/ bum pa la sogs pa'i snod la phyis rang bzor snga ma dang 'dra bar bu gu mang po btod pa'o/ / de gnyis ka yang 'od khang mig brgya pa zhes bya ste/ brgya zhes smos pa ni bu gu mang ba nyid du bstan pa'i dpe tsam du zad kyi/ grangs brgya kho nar nges pa ni ma yin no/ /skra'i rnyis sbrul gzung bar mi bya'o zhes bya ba ni/ skra las byas pa'i rnyis sbrul bcing bar mi bya ba'o/ /'dir skra zhes smos pa'i sgra ni skra dang rnga ma dang rngog ma la sogs spyi la snyegs te de dag gi rnyi gang gis kyang sbrul gzung bar mi bya ba'o/ /cho ga 'di ni sbrul snad par 'gyur ba spang ba'i phyir ro/ /sbrul bsal ba ci ltar bya zhe na de'i phyir/ se gol gyi sgra phyung ste/ bzhin bzangs mig lam na ma 'dug shig ces brjod par bya'o zhes bya ba smras te/ sngar se gol gyi sgra phyung ste/ de'i 'og tu kye bzhin bzangs mig lam na ma 'dug par gang du mi rnams kyi spyod yul du mi 'gyur ba der 'dug shig ces de skad brjod par bya'o/ /de skad brjod kyang gal te mig lam na 'dug na de'i tshe ji ltar bya zhe na/ de'i phyir/ mi 'dug na dbyug gu skam khas dal bus rdza ma'am bum par bcug te kha bcad nas bu gu dag btod de bsal bar bya'o zhes bya ba smras te/ mig lam na mi snang ba'i phyogs na 'dug na dbyug gu skam kha ra rkang 'dra ba kha brag gis dal bus rdza ma 'am bum par bcug ste kha bcad nas rdza ma 'am bum pa de la rlung 'byung bar bya ba'i phyir ngos dag tu bu gu phra mo dag btod de gtsug lag khang nas thabs des sbrul de bsal bar bya'o/ /ma grub na lcag pod dam shur bu 'am shur bu phre'us sam tha gu ras mas dgris pa'i zhags mig gis mgul pa bcings te dor bar bya'o zhes bya ba ni/ gal te thabs snga ma des gtsug lag khang nas dbyung bar ma grub na de'i tshe lcag pod dam shur bu'am shur bu phre'us mgul bar bcings te dor ba'am/ yang na tha gu ras mas dkris pa'i zhags mig gis mgul pa bcings te dor bar bya'o/ /de dag ni gzhug pa la yang ngo zhes bya ba ni/ lcag pod la sogs pas bcing ba'i thabs de dag ni dor ba 'ba' zhig la bya bar ma zad kyi/ rdza ma'am bum par gzhug pa'i thabs sngar bstan pa de la yang 'di ltar bya ba yin no/ /tshang tshing gi nang du dor bar mi bya'o zhes bya ba ni/ sbrul de nags dang rtswa la sogs pa tshang tshing gi nang du dor bar mi bya ste/ de ni me gtong ba'i nyes pa spang ba'i phyir ro/ /de lta bas na sa sgre bo la khung la sogs pa yod par dor bar bya'i nags la sogs pa'i thibs po'i nang du dor bar mi bya'o/ /khung du zhugs kyi bar du bsdad par bya'o zhes bya ba ni/ khyer ba'i mi des sbrul de tshang du zhugs zhugs kyi bar du bsdad par bya'o/ /de ni 'ol ba la sogs pas khyer ba'i nyes pa spang ba'i phyir ro/ /shig rnams ni ras mar gzhug par bya'o zhes bya ba ni/ shig rnams ni ras ma dag gi nang du gzhug par bya'o/ /de ni gseb dag tu'o zhes bya ba ni/ ras ma de ni ka ba la sogs pa'i gseb dag tu gzhug par bya'o/ /'dir gzhung ni ras ma'i nang du dkris te ka ba'i gseb bam rtsig pa'i gseb dag tu gzhug par bya'o zhes gsungs pa yin no/ /rtswa shig rnams ni gsing mar ro zhes bya ba ni/ rtswa shig rnams ni rtswa sngon po'i phyogs su gzhag par bya'o/ /yang na phyogs bsil bar ro zhes bya ba ni/ de dag gi gnas gang du 'os pa der bzhag go/ /snga ma gzhug pa'i phyir bsal snod bcang bar bya'o zhes bya ba la/ snga ma zhes bya ba ni/ ltung byed 'di la chu'i srog chags rnams kyi skabs sngar mdzad pas snga ma ni chu'i srog chags rnams te/ de dag khron pa la sogs pa thag ring por phyir gzhug pa'i phyir gang zag gis kyang bsal snod bcang bar bya'o zhes 'dir bsal snod ces bya ba ni/ bum pa gang bzhin du gzhug cing stong par dbyung du rung ba gang yin pa de yin par dgongs so/ /de ltar na mgrin pa dang zhabs gnyi gar dpyang thag gnyis kyis btags shing gzhug par bya ba yin te/ chu'i nang du phyin pa na mgrin par btags pa'i dpyang thag glod par bya zhing zhabs nas btags pa'i dpyang thag drang bar bya ste/ des na de khas bub tu 'gyur ro/ /thabs de dag thams cad ni bsal snod ces bya ba'i tshig nyid las 'thob bo/ /yang na chu tshags de nyid kyis gzhug par bya'o zhes bya ba ni/ yang na chu tshags gang gis srog chags de dag btsags par gyur pa'i chu tshags de nyid kyis srog chags de dag khron pa la sogs pa'i nang du phyir gzhug par bya ste/ de la yang kha dang zhabs gnyi gar dpyang thag gnyis kyis gdags pa'i tshul ni snga ma bzhin no/ /chu tshags la srog chags chags pa bsal ba'i thabs ni bshal ba yin no zhes bya ba ni/ chu tshags la srog chags dag chags pa bsal zhing med par bya ba'i thabs ni chus bshal ba yin no/ / dri ma ni bkru ba'o zhes bya ba ni/ chu tshags la chags pa'i dri ma bsal ba'i thabs ni chus bkru ba'o/ /rul ba nyid du mi 'gyur ba'i ni skam pa'o zhes bya ba yang thabs zhes bya bar sbyar ro/ /rul pa'i dngos po ni rul ba nyid de chu tshags rul ba nyid du mi 'gyur bar bya ba'i thabs ni nyi ma la sogs pas skam pa'o/ /de gnyi ga la yang dam du btsir na phan pa nyid do zhes bya ba ni/ chu tshags kyi cho ga dri ma bsal ba dang rul pa nyid du mi 'gyur bar bya ba sngar bstan pa de gnyi ga la yang dam du btsir te chu gzags na phan pa nyid do/ /dge 'dun dang gang zag dang chu tshags dang chu tshad ma rnyed pa'i shes pas 'jug pa la kha na ma tho ba med do zhes bya ba la/ tshad ma rnyed pa'i shes pas 'jug pa la kha na ma tho ba med do zhes bya ba'i sgra ni/ dge 'dun la sogs pa bzhi dang so sor sbyar bar bya ste/ dge 'dun tshad ma rnyed pa'i shes pas 'jug pa la kha na ma tho ba med pa dang / gang zag tshad ma rnyed pa'i shes pas 'jug pa la kha na ma tho ba med pa dang / chu tshags tshad ma rnyed pa'i shes pas 'jug pa la kha na ma tho ba med pa dang / chu tshad ma rnyed pa'i shes pas 'jug pa la kha na ma tho ba med do zhes bya bar sbyar ro/ /de la dge 'dun tshad ma zhes bya ba ni dge 'dun 'di la srog chags dang bcas pa'i chus tha snyad byed pa med do zhes bya'o/ /gang zag tshad ma zhes bya ba ni/ gang zag 'di srog chags dang bcas pa'i chu mi spyod do zhes bya ba'o/ /chu tshags tshad ma zhes bya ba ni/ chu tshags 'dis btsags pa'i chu dus thams cad du dag pa yin no zhes bya'o/ /chu tshad ma zhes bya ba ni/ khron pa'i chu 'di la nam yang chu srog chags dang bcas par ma gyur to zhes bya ba'o/ /khyim pa yang gal te lan 'ga' yang srog chags dang bcas pa'i chus tha snyad mi byed pa yin na de yang 'dir gang zag tshad ma zhes bya ba nyid kyis sdus pa nyid yin no/ /'dir gzhung ni chu rung ba ni rnam pa lnga ste/ dge 'dun gyis rung ba dang / gang zag gis rung ba dang / chu tshags kyis rung ba dang / khron pas rung ba dang / gang nyin zhag cig tu rung ba'o zhes gsungs pa yin no/ /de la rung ba dang po bzhi ni mdo 'dis bsdus pa yin te/ go rims bzhin no/ /lnga pa nyin zhag gcig rung ba'i bsdu ba bstan pa'i phyir/ bcus pa dang khron pa dag ni nyi ma 'char ka tshun chad brtags pa nyid kyi rjes su 'jug go zhes bya ba smras te/ chu bcus pa dang khron pa ni nyi ma 'char ka tshun chad brtags pa'i rjes su 'jug pa yin no/ /'dir khron pa zhes bya ba ni chu dong yin par rig par bya'o/ /rkang khrus snod stong par mthong na dgang bar bya'o zhes bya ba la/ rkang khrus snod ces bya ba ni/ dge 'dun la dgos pa rkang pa la sogs pa bkru ba'i ril ba la bya ste/ rkang khrus snod de chus stong pa nyid du mthong na dgang bar bya'o/ /chu dang gzhan gyi snod kyang nye bar gzhag par bya'o zhes bya ba ni/ chu'i snod dang mar dang 'bru mar la sogs pa gzhan gyi snod kyang dge 'dun gyis bcang bar bya ba'o/ /dge 'dun gyi der gtogs pa ni snod spyad 'drub pa'i las yin no zhes bya ba ni/ dge 'dun gyi chu'i snod dang gzhan gyi snod de'i khongs su gtogs pa de dang 'brel ba'i snod spyad brub pa ni gang zag snod spyad 'drub par bskos pa'i las yin par rig par bya'o/ /'dir gzhung ni gnas mal gyi gzhi las yon bdag dag gtsug lag khang du lhags te de dag rdza mkhan gyis byas pa'i snod dag rnyed pa dang / bcom ldan 'das kyis skur cig ces bka' stsal to/ /de dag sus kyang ma bsdus pas de dag chud zos pa dang / bcom ldan 'das kyis bka' stsal pa/ dge slong snod spyad 'drub par bsko bar bya zhing des kyang 'ongs pa dag la sbyin par bya'o zhes gsungs pa yin no/ /'dir sbyin pa dang blang ba dag kyang ma 'dus pa ma yin no zhes bya ba ni/ snod spyad 'drub pa'i las bstan pa 'dir snod spyad sbyin pa dang blang ba dag kyang ma 'dus pa ma yin te/ 'dus pa kho na yin no/ /'di skad bstan te/ sbyin pa dang blang ba yang snod spyad 'drub pas bya ba yin no/ /khyim pa rnying pa brnyan pa nyid la de yod pa nyid na sbyin par bya'o zhes bya ba ni/ khyim pa dag dge 'dun la snod spyad rnying pa brnyan na dge slong snod spyad 'drub pas snod spyad rnying pa de yod pa nyid yin na g.yar por sbyin par bya'o/ /des gtsug lag khang du yon bdag rnams la sbyin par bya ba nyid kyang ma bstan pa ma yin no zhes bya ba ni/ mdo snga mar khyim pa rnying pa brnyan pa nyid la de yod pa nyid na sbyin par bya'o zhes bstan pa'i tshig des gtsug lag khang du yon bdag rnams 'ongs te/ snod spyad rnying pa brnyan pa dag la g.yar por sbyin par bya ba nyid kyang ma bstan pa ma yin te/ des ni sngar gzhung las yon bdag dag gtsug lag khang du lhags te de dag rdza mkhan gyis byas pa'i snod dag brnyan pa dang / bcom ldan 'das kyis skur cig ces bka' stsal to zhes gsungs pa de nyid bsdus pa yin no/ /dge slong la ni sar pa phyir blang ba med pa nyid du'o zhes bya ba ni/ dge slong gi dge 'dun la snod spyad dag brnyan tam slong na dge slong snod spyad 'drub pas snod spyad sar pa dag yod na snod spyad sar pa phyir blang ba med pa nyid du gtan sbyin par bya'o/ /'dir gzhung ni dge slong rnams la ni sar pa dag sbyin par bya'o/ /khyim pa rnams la ni rnying pa dag brnyan par bya'o zhes gsungs pa yin no/ /snod spyad kyi ched du mdzod khang bsko bar bya'o zhes bya ba ni/ snod spyad gzhag pa'i ched du mdzod khang bsko bar bya'o/ /sa dang zangs ma'i snod spyad dag so sor gzhag par bya'o zhes bya ba ni/ sa las byas pa'i snod spyad dang zangs ma las byas pa dag gal te mdzod khang gzhan med na mdzod khang gcig gi nang na yang so sor gzhag par bya'o/ /yang na gang du zangs ma las byas pa'i snod spyad gzhag pa'i mdzod gzhan cig sbyin par bya'o/ /de ni ma nges te mdzod khang med dam snod spyad nyung na mi sbyin no/ /chu nye bar gzhag par bya'o zhes bya ba ni/ dge 'dun gyi don du chu nye bar gzhag par bya'o/ /gnas gang du gzhag par bya zhe na de'i phyir/ gar bab bab tu mi gzhag go zhes bya ba smras so/ /'o na gar gzhag ce na de'i phyir/ de'i ched du chu khang bya'o zhes bya ba smras te/ chu gzhag pa de'i ched du chu khang bya'o/ /phyogs gang du bya zhe na de'i phyir/ gtsug lag khang gi nang gi lho nub kyi mtshams su'o zhes bya ba smras te/ gtsug lag khang gi nang gi lho dang nub kyi mtshams su bya ste/ der rtag tu grib ma 'bab pa'i phyir ro/ /gtsug lag khang gi sgo shar phyogs su lta ba la ltos te de skad gsungs so/ /gtsug lag khang gi sgo phyogs gzhan du lta ba la ni chab khung gi grwa ma gtogs par gtsug lag khang la ltos te lho dang nub kyi mtshams kho nar chu khang bya'o/ /skar khung gdod pa dang so phag gi gcal dgram pa dang chu khung gdod pa dang sgo gdod pa dang / sgo glegs dang yang mig gzhug par bya'o zhes bya ba ni/ chu khang de la skar khung gdod par bya ba dang / sa gzhir so phag gi gcal dgram par bya ba dang / gang nas chu phyir 'bab par 'gyur ba logs su chu khung gdod par bya ba dang / sgo gdod par bya ba dang / sgo der sgo glegs gzhug par bya ba dang / sgo glegs de la lag gzungs kyi yang mig gzhug par bya ba'o/ /chu tshags gzhag pa'i phyir gdang bu bya'o zhes bya ba smras te/ chu khang de'i nang du gdang bu gdags par bya'o/ /'dir gzhung ni der chu tshags rung ba dag gzhag par bya'o zhes gsungs pa yin no/ /shing gi khri'u dag la gzhag go zhes bya ba ni/ chu snod shing gi khri'u dag gi steng du gzhag par bya'o zhes bya ba'i tha tshig go/ /yang na so phag gi stegs bu'i steng du'o zhes bya ba ni/ yang na chu snod so phag gi stegs bu byas pa'i steng du gzhag go/ /de nyi tshe'i steng du gzhag tu yang mi rung ste/ de'i phyir gzhi de la'o zhes bya ba smras te/ so phag gi stegs bu'i steng du shing leb bam lcug kor la sogs pa dag gi steng du chu snod gzhag par bya'o/ /chu snod ni khrus chu'i ched kyi bar yan chad kyang gtsang sbra bya'o zhes bya ba ni/ chu snod ni dri ma med par gtsang sbra bya ste/ tha na phyi rol che chung du 'gro ba'i khrus chu'i ched kyi snod yan chad kyang dri ma med par gtsang sbra bya'o/ /de ni bdag nyid kyi 'ba' zhig tu ma zad kyi/ dge 'dun gyi dang gzhan gyi yang dri ma med par gtsang sbra bya'o/ /dri ma med par bya ba bstan nas da ni gtsang bar bya ba bstan pa'i phyir/ gtsang bar ro zhes bya ba smras te/ chu snod du rung ba dang khrus chu'i ched kyi snod yan chad kyang gtsang bar bya'o/ /de ltar yang gnas thams cad du gzhag pa bkag pa'i phyir dang sas byi dor bya'o zhes gsungs pa'i phyir ro/ /btung bar bya ba'i chu yang ngo zhes bya ba ni/ btung bar bya ba'i chu yang gtsang sbra dang gtsang bar bya'o/ /khrus chu yang de dang 'dra bar bya'o/ /de lag pa dang gos rung ba ma yin pa dag gis brim par mi bya'o zhes bya ba ni/ btung bar bya ba'i chu de lag pa dang gos rung ba ma yin pa reg pa dang 'bags pa dag gis brim par mi bya ba'o/ /de ltar yang 'dir gzhung ni chu ra'i tshul gang zhe na/ chu ra ni bcom ldan 'das kyis dge slong rnams la dge 'dun gyi dang gang zag gi chu snod dang chu'i kha gab rjes su gnang ba yin te/ de dag dge slong gis shin tu gtsang sbra dang gtsang bar spyad par byas shing bcang bar bya ste/ lag pa rung ba dag dang gos rung ba dag gis gzung bar bya brim par bya zhing bram ze dang khyim bdag 'ongs so cog la yang sbyin par bya'o/ /dge slong gis chu shin tu legs par brtag par byas te/ rnam par dngas pa rnyog pa med pa ma 'dres pa dag pa gtsang ba btung bar bya'o zhes gsungs pa yin no/ /chu snod rnams kyi nang dus dus su sbyang bar bya'o zhes bya ba ni/ chu snod rnams kyi nang dus dus su bkru bshal bya zhing sbyang bar bya'o/ /phyi rol sbyang ba ni sngar gtsang sbra bya'o zhes bstan pa nyid kyis khong du chud par bya'o/ /zab mo rnams kyis ni pu shel tsi'i khru da shing ngam 'dab ma'i chang bu'am/ ras ma shing bu'i rtse mo la btags pas so zhes bya ba ni/ chu snod zab mo rnams kyi nang lag pas zhabs mi sleb pa dag ni pu shel tsi'i khru da bya zhing shing bu'i rtse mo la btags pas sam/ 'dab ma'i chang bu zhes bya ba lo ma'am 'dab ma'i tshogs bsdus pa cang cang po khru da shing bu byas pa shing bu'i rtse mo la btags pas sam/ ras ma dril ba shing bu'i rtse mo la btags pas drud cing bkru bshal bya'o/ /de la zas kyi 'bram zer mi bsrung ba nyid du mi bya ba'o zhes bya ba ni/ pu shel tsi'i khru da shing la sogs pa de dag las zas kyi 'bram zer zhes bya ba zas kyi dum grugs kyis gos shing zang zing can du 'gyur ba de mi bsrung ba nyid du mi bya ste/ bsrung ba nyid du bya'o/ /'di skad bstan te/ zang zing med pa'i pu shel ci'i khrud shing la sogs pas sbyar bar bya'o/ /bskam par bya'o zhes bya ba ni/ chu snod bkru bshal byas pa rnams bskam par yang bya'o/ /de'i tshe brel bar mi 'gyur bar bya ba'i phyir cig car nyid du mi bya'o zhes bya ba ni/ bkru ba dang skam pa de dag byed pa de'i tshe snod spyad kyis brel bar gyur pa na mi rung bas brel bar mi 'gyur ba'i phyir cig car dus gcig nyid du mi bya bar mthar gyis bkru ba dang bskam par bya ste/ snod thams cad dus gcig tu bkru ba dang / bskam par mi bya'o zhes bya ba'i tha tshig go/ /chu dang 'brel ba'i las ni gnas pas bya ba yin no zhes bya ba ni/ chu dang 'brel pa'i las ji skad sngar bstan pa de dag dang gzhan dag kyang gnas pa slob ma dang nye gnas dag gis bya ba yin no/ /'dir gzhung ni bcom ldan 'das kyis chu blang bar bya'o zhes gsungs pa dang / dge slong dag gis sus blang bar bya ba mi shes nas/ bcom ldan 'das kyis bka' stsal pa/ gnas pa dag gis bya'o zhes gsungs pa yin no/ /chu gang gi 'khor du gtogs pa dang chu tshags la sogs pa'i ni chu dang 'brel pa'i las yin no/ /srog chags dang bcas pa'i chu dang 'brel ba phran tshegs la sogs pa'i skabs so zhes bya ba de rdzogs so/ / srog chags dang bcas pa'i chu la spyod pa'i ltung byed do zhes bya ba de bshad zin to// //nyal po byed par shom pa'i khyim na 'dug pa'i ltung byed smra bar 'dod nas/ shes gtso bo zhes bya ba smras te/ 'dir yang shes gtso zhes bya ba'i ming dang 'du shes gtso cher byed pa po nyid do zhes bya ba'i ming can du sbyor bar byed do/ /gang la 'du shes gtso cher byed pa po nyid yin zhe na de'i phyir/ zhugs pa'am phyogs pa la'o zhes smras te/ zhugs pa zhes bya ba ni/ 'khrig pa spyod pa la zhugs pa'o/ /phyogs pa zhes bya ba ni 'khrig pa'i phyir rtsom pa nyid do/ /de gnyis la de ltar shes na yul de la 'du shes gtso cher byed pa po nyid yin no/ /ji zhig la zhugs pa'am phyogs pa la zhe na de'i phyir/ 'khrig pa la'o zhes bya ba smras te/ gnyis kyis gnyis sprod pa la zhes bya ba'i tha tshig go/ /gang gi 'khrig pa la zhe na de'i phyir/ skyes pa dang bud med kyi'o zhes bya ba smras te/ skyes pa dang bud med kyi 'khrig pa la'o/ /skyes pa dang bud med ji ltar gyur pa zhig gis she na/ de'i phyir/ khyim pa nyid do zhes bya ba smras te/ gal te skyes pa dang bud med de gnyis khyim pa nyid yin na'o/ /gal te spyir zla gcig mu stegs can gyi dge sbyong la sogs pa khyim pa ma yin na de'i tshe nyes byas so/ /ji de gnyis gnas gang na 'dug kyang rung ngam zhe na/ de'i phyir/ gnas gzhan nyid na'o zhes bya ba smras te/ gnas de gal te dge slong de nyid kyi ma yin na ste gnas de skyes pa dang bud med de gnyis kyi gnyi ga'i 'am/ gang yang rung ba'i gnas yin na zhes bya ba'i tha tshig go/ /nyes pa 'di ni de gnyis la gnod par gyur pa las bzhag pa yin gyi/ dge slong gi rang gi gnas nyid du ni nyes pa 'dir mi 'gyur ro/ /gal te khyim pa'i gnas de khyim bdag gis dge slong la g.yar por byin zhing de na dge slong 'dug pa yin na ni de'i tshe ltung ba med do/ /gal te gnas de dge slong gi yin la/ dge slong gis khyim pa la g.yar por byin zhing dge slong der 'dug na ni de'i tshe kha na ma tho ba rdzogs par 'gyur ro/ /de bzhin du dgon pa la yang gal te dge slong snga ma gnas pa yin na ni de la ltung ba med do/ /khyim pa snga na gnas pa'i drung du dge slong phyis 'ongs te 'dug na ni kha na ma tho ba rdzogs par 'gyur ro/ /mu stegs can dang rab tu byung ba 'di gnyis gtsug lag khang gcig na gnas pa gang yin pa de yang gnas gzhan nyid yin par rig par bya'o/ /ji gnas gzhan tsam 'ba' zhig la 'di rnam par gzhag gam zhe na de'i phyir/ gzhan med pa nyid kyis sprad du rung ba nyid na'o zhes bya ba smras te/ gnas gzhan de na skyes pa dang bud med de gnyis kyi drung na mi gzhan med pa nyid kyis 'khrig pa spyad pa sprad du rung ba nyid yin na de'i tshe dge slong der 'dug na kha na ma tho ba 'dir 'gyur ro/ /'di skad bstan te/ gal te gnas de na dge slong de ma gtogs par mi gzhan med pa nyid kyis skyes pa dang bud med de gnyis 'khrig pa spyad du rung ba nyid yin la de'i tshe dge slong der 'dug na kha na tho ba 'dir 'gyur gyi/ mi gzhan yod na ni ltung ba med do/ /ji zhig rjes su sgrub na de byed pa po nyid yin zhe na/ de'i phyir/ mngon sum du brnag pas 'dug na'o zhes bya ba smras te/ ma bsgribs par mngon sum du brnag pas 'dug na'o/ /mngon sum du brnag pas zhes bya ba 'di ni so sor thar pa'i mdo las nan gyis then te stan la 'dug na ltung byed do zhes gsungs pa de bsdus pa yin no/ /nyal po byed par shom pa'i khyim na 'dug pa'i ltung byed do zhes bya ba de bshad zin to// //nyal po byed par shom pa'i khyim na 'greng ba'i ltung byed smra bar 'dod nas/ shes gtso bo zhes bya ba dang zhugs pa'am phyogs pa la'o zhes bya ba dang / 'khrig pa la'o zhes bya ba dang / skyes pa dang bud med kyi'o zhes bya ba dang / khyim pa nyid do zhes bya ba dang / gnas gzhan nyid na'o zhes bya ba dang / gzhan med pa nyid kyis spyad du rung ba nyid yin na'o zhes bslab pa'i gzhi snga mar bstan pa de dag thams cad 'dir yang khas blangs nas bye brag 'ga' zhig brjod par bya ste/ ji zhig rjes su bsgrub na 'dir de byed pa po nyid yin zhe na de'i phyi/ dben par brnag par 'greng na'o zhes bya ba smras te/ dben pa skyabs yod par brnag pas 'greng na dngos gzhi'i kha na ma tho bar 'gyur ro/ /bslab pa'i gzhi snga ma dang 'di gnyis la bye brag ni 'di yod de snga ma la ni mngon sum du brnag pas 'dug na'o/ /'di la ni dben par brnag pas 'greng na'o/ /des na snga ma la ni dben pa brnag pas 'dug na nyes byas su 'gyur la/ 'di la ni mngon sum du brnag pas 'greng na nyes byas su 'gyur ro/ /de'i phyir 'dir dben pa skyabs yod pa zhes bya ba bsdus so/ /snga ma dang 'di gnyi ga la 'gro ba dang nyal ba gnyis la ni nyes pa kho nar 'gyur ro/ /ci gnas thams cad na 'greng ba'i dge slong la'am zhe na de'i phyir/ skyabs yod par ro zhes bya ba smras te/ rtsig pa'am sab mo'am yol ba'am mun nag la sogs pa'i sgrib pa gang yin pa des bsgribs pa'i gnas skyabs yod par 'greng ba'i dge slong la'o/ /ci dgos pa gang yang rung bas bgreng na'am zhe na de'i phyir/ gal te 'jigs pa'i dbang gis ma yin na'o zhes bya ba smras ste/ gal te glang po che la sogs pa 'jigs pa'i dbang gis der 'greng bar gyur na de'i tshe nyes pa med do/ /'dir gzhung ni gal te 'jigs par gyur na ltung ba med do zhes gsungs pa yin no/ /mngon sum du brnag pas 'dug pa la yang 'jigs pa'i dbang gis na ltung ba med par sbyar ro/ /ci gnas der 'greng ba thams cad dngos gzhi'i byed pa po yin nam zhe na de'i phyir/ tshor bya dag dang tshor byed nyid kyis ma tshor na nyes byas kyi'o zhes bya ba smras te/ tshor bya dag ces bya ba'i sgras ni sprod par byed pa gnyis brjod do/ /tshor byed ces bya ba'i sgras ni ltung ba 'byin pa brjod do/ /de ltar na tshor bya gnyis dang tshor byed gcig ni tshor bya dag dang tshor byed de de dag gi dngos po ni de nyid do/ /de nyid kyis ma tshor na zhes bya ba ni/ tshor bya dag dang tshor byed nyid kyis ma tshor na ste/ gal te rtsig pa la sogs pa'i skyabs de dag yod pas de na tshor bya dag dang tshor byed nyid kyis sgra grags pa tsam yang ma tshor na de'i tshe de na 'greng ba ni nyes byas kyi byed pa po nyid yin no/ /'di skad bstan te/ phyogs de na 'greng ba'i ltung ba 'byin par byed pas kyang sprod par byed pa gnyis ma tshor la sprod par byed pa gnyis kyis kyang phyogs de na 'greng ba'i ltung ba 'byin par byed pa ma tshor na de'i tshe phyogs de na 'greng ba ni nyes byas kyi byed pa po nyid yin no/ /gnas gzhan la sems gtod pa yang ngo zhes bya ba yang nyes byas kyi byed pa po nyid do zhes bya bar sbyar te/ mngon sum du brnag pas 'dug pa dang dben par brnag pas 'greng ba'i dge slong gi lta ba dang nyan pa sprod par byed pa gnyis kyi gnas las gzhan pa'i gnas la sems gtod pa yang nyes byas kyi byed pa po nyid yin no/ /'di man chad ni ltung byed gnyi ga'i lhag par gyur pa'i gzhung brjod par bya ste/ 'o na bslab pa'i gzhi 'di gnyis la ji tsam gyis na gnas gcig pa nyid yin zhe na/ de'i phyir/ 'di la mthong ba'i spyod yul gyi mtha' tshun chad ni gnas kyi mtha' yin no zhes bya ba smras te/ bslab pa'i gzhi gnyis po 'di la mthong ba'i spyod yul gyi mtha' tshun chad ces bya ba mig gi spyod yul gyi mtha' tshun chad ni mtha' yin te/ de tshun chad gnas gcig tu gtogs so/ /mdzod ni khongs su gtogs pa nyid yin no zhes bya ba ni/ mdzod de ni khyams kyi bdag nyid kyi khang khyim dang lhan cig pa'i khongs su gtogs pa nyid yin te/ gnas gcig pa nyid yin no zhes bya ba'i tha tshig go/ /khyim gzhan ni tha dad pa nyid do zhes bya ba ni/ nyal po byed pa'i khyim de las gzhan pa'i khyim ni khyim gzhan zhes bya ste/ khyim gzhan de'i sgo'i byang stod khyams la sogs pas chod pa na 'dug pa'i dge slong gis nyal po byed pa'i khyim na 'khrig par byed pa gnyis zhugs pa'am phyogs pa mthong ba ni gal te bza' tha dad pa nyid yin na ni gnas kyang tha dad pa nyid yin no/ /gal te bza' gcig pa nyid yin na ni gnas kyang gcig pa nyid yin no/ /nyal po byed par shom pa'i khyim na 'greng ba'i ltung byed do zhes bya ba de bshad zin to// //gcer bu la sbyin pa'i ltung byed smra bar 'dod nas/ pho yang rung mo yang rung ba la'o zhes bya ba smras te/ 'og nas rtags 'di dang rab tu byung ba 'di med pa'i gcer bu'o zhes 'byung ba dang sbyar ro/ /spyir btang ba byas nas dmigs kyis bsal ba bstan pa'i phyir/ nye du dang rab tu byung ba la ltos pa dang nad pa ma gtogs so zhes bya ba smras te/ rtags 'di dang rab tu byung ba 'di med pa'i gcer bu nye du'am rab tu 'byung ba la ltos pa'am nad pa ni ma gtogs so/ /'dir gzhung ni zhu ba las btsun pa dge slong gis gcer bu la rang gi sug pa nas bza' ba dang bca' ba stsal ba la ltung bar yang mi 'gyur ba 'ga' mchis sam/ yod de nye du la sbyin pa dang rab tu 'byung ba la ltos pa dang nad pa la sbyin pa la ltung ba med do zhes gsungs pa yin no/ /de ji lta bur gyur pa zhig yin zhe na de'i phyir/ rtags 'di dang rab tu byung ba 'di med pa'i gcer bu'o zhes bya ba smras te/ gang la rtags 'di med pa de ni rtags 'di med pa'o/ /de bzhin du gang la rab tu 'byung ba 'di med pa de ni rab tu byung ba 'di med pa ste mu stegs can gyi rab tu byung ba'o/ /mu stegs can gyi rab tu byung ba de la byin na'o/ /de la gang du byin na zhe na de'i phyir/ lus sam lus dang 'brel bar ro zhes bya ba smras te/ gcer bu de'i lus lag pa la sogs par ram lus dang 'brel par lhung bzed la sogs par ro/ /dngos po ji zhig byin na zhe na de'i phyir/ bca' bar bya ba dang bza' bar bya ba dag go zhes bya ba smras so/ /ci rnam pa gang yang rung ba zhig gam zhe na/ de'i phyir/ rung ba dag go zhes bya ba smras te/ su la rung ba zhe na de'i phyir/ rang dang de la'o zhes bya ba smras te/ rang zhes bya ba ni ltung ba 'byin par byed pa rang la'o/ /de la zhes bya ba ni/ sbyin par bya ba gcer bu de la'o/ /'dir gzhung ni/ zhu ba las btsun pa re zhig dge slong gis gcer bu pa'am gcer bu ma la bca' bar bgyi ba dang / bza' bar bgyi ba rung ba ma lags pa stsol na ltung ba cir 'gyur/ nyes byas so/ /gal te de la rung ba ma lags pa de 'dra ba'i bca' bar bgyi ba dang / bza' bar bgyi ba stsol na ltung ba cir 'gyur/ nyes byas so zhes gsungs pa yin no/ /ci don gang yang rung ba'i phyir byin na'am zhe na de'i phyir/ sdig pa can gyi lta ba'i rnam pa dang dbral ba nyid kyi phyir ma gtogs so zhes bya ba smras te/ don de'i phyir sbyin pa ni ma gtogs so/ /'dir gzhung ni sdig pa can gyi lta ba'i rnam pa dang dbral bar 'dod pa la ni ltung ba med do zhes gsungs pa yin no/ /ji zhig rjes su sgrub na gcer bu la sbyin pa'i ltung byed du 'gyur zhe na de'i phyir/ rang gis sbyin na'o zhes bya ba smras te/ gal te rang gis sbyin par byed na'o/ /mi rung ba nyid dag ni nyes byas so zhes bya ba ni/ rang dang de la mi rung ba'i bca' ba dang bza' ba dag rang gis sbyin par byed na ni nyes byas so/ /sbyin du 'jug na yang ngo zhes bya ba ni/ bca' bar bya ba dang bza' bar bya ba'am gos la sogs pa sbyin par bya ba dag rang gis de la gzhan sbyin du 'jug na yang nyes byas so/ /'o na sbyin du 'jug pa de la ltung ba med do zhes ma gsungs sam zhe na bden mod kyi/ de ni dum bur byas nas sbyin par byed dam/ gzhan sbyin du 'jud pa yin gyi/ 'dir ni rang gis zhal ta byas te sbyin du 'jud na nyes byas su gsungs pa yin te/ de bas na bye brag bstan pa'i phyir/ rang gis zhal ta byas pa na'o zhes bya ba smras te/ rang gis de'i lus sam de dang 'brel bar sbyin du bcug na nyes byas so/ /bgo bsha' byed na yang ngo zhes bya ba ni/ lus sam de dang 'brel ba las gzhan pa'i phyogs su bca' ba dang bza' ba dag bgo bsha' bya ba'i tshul gyis 'jog na yang nyes byas so/ /zhan pa'i blos gdol pa bzhin du gzhan du 'jog na ni ltung ba med do/ /'dir gzhung ni zhu ba las gzhung gcig tu bgo bsha' byas te za na nyes byas so/ /de nyid dang lhan cig bgo bsha' byed na nyes byas phra mo'o/ /gal te na bar gyur na ltung ba med do zhes gsungs pa yin no/ /gcer bu la sbyin pa'i ltung byed do zhes bya ba de bshad zin to/ / //dmag la lta ba'i ltung byed smra bar 'dod nas ci zhig byas na dmag la lta ba'i ltung byed du 'gyur zhe na de'i phyir/ g.yul la mngon par dga' ba'i dmag la blta ba'i don nyid kyis so zhes bya ba smras te/ g.yul la mngon par dga' ba'i dmag ces bya ba ni/ g.yul sprad pa'i phyir chas pa'i dmag la'o/ /blta ba'i don nyid kyis zhes bya ba ni/ blta ba'i dgos pa nyid kyis zhugs pa'i dge slong la kha na ma tho ba 'dir 'gyur ro/ /dge slong bsod snyoms la sogs pa'i don du byung bas dmag la lta ba byed na yang ltung byed do/ /ci dmag la blta'o cog las she na de'i phyir/ rgyal po dang / btsun mo dang / gzhon nu dang / zhang blon dang / khrom gyi ru sna dang / grong rdal gyi mi dang / ljongs kyi mis bkug pa dang / bar chad byung ba'i dbang nyid ma gtogs so zhes bya ba smras te/ rgyal po dang / btsun mo dang / gzhon nu dang / zhang blon dang / khrom gyi ru sna dang / grong rdal gyi mi dang / ljongs kyi mi dag gi bkug tshig gis bkug pa ni ma gtogs so/ /tshul khrims sam srog gi bar chad la sogs pa gang yang rung ba 'ga' zhig nye bar gyur pa'i dbang gis der mi 'gror mi rung zhing dmag mthong ba yang ma gtogs so/ /'di skad bstan te/ gal te rgyal po la sogs pas khyod 'dir shog shig ces spring ba'am yang na tshul khrims dang srog la sogs pa'i bar chad nye bar gyur pa'i dbang gis dge slong dmag la lta bar byed na de'i tshe ltung ba med do/ /dge slong ci zhig rjes su bsgrub pa la ltung byed 'dir 'gyur zhe na/ de'i phyir/ 'phags pa'i nyen kor gyi mtha' las 'das te mthong na'o zhes bya ba smras te/ gnas gang nas 'phags pa'i gnas de'i nyen kor gang yin pa de'i mtha' de las 'das te/ mthong na mthong ba'i dge slong de la kha na ma tho ba 'dir 'gyur ro/ /chos gos kyi nyen kor sngar bstan pa gang yin pa de nyid 'dir yang nyen kor yin par rig par bya'o/ /dge slong glang po che'i tshogs lta ba'i phyir 'gro na ji srid du mig gis ma mthong gi bar du nyes byas so/ /mig gis mthong bar gyur na ni ltung byed do/ /'dir ni mthong ba tsam la dngos gzhir gsungs so/ /nyen kor gyi mtha' las ma 'das par dge slong gis bzhin bsgyur ba tsam gyis mthong ba la ni nyes byas su gsungs so/ /dmag la lta ba'i ltung byed do zhes bya ba de bshad zin to/ / //bam po sum cu gcig pa/ ji zhig rjes su sgrub na dmag gi nang na gnas pa'i ltung byed du 'gyur zhe na de'i phyir/ de dag med par der nyin mtshan gnyis las lhag par 'dug na'o zhes bya ba smras te/ rgyal po la sogs pas bkug pa dang 'jigs pa'i dbang de dag med par g.yul la mngon par dga' ba'i dmag der nyin mtshan gnyis las lhag par 'dug na kha na ma tho ba 'dir 'gyur ro/ /'dul ba las nyin mtshan gyi mtha'i skad cig la tha snyad du bya bar snang bas de'i phyir nyin mtshan gnyis kyi mtha'i skad cig ces bya ba nyin mtshan gsum pa'i skya rengs dang po shar na dngos gzhi'i kha na ma tho bar 'gyur la/ de'i mdun rol du ni sbyor ba'i kha na ma tho bar 'gyur ro/ /de phyin chad ni nyi ma re re zhing dngos gzhi'i kha na ma tho ba re rer 'gyur la/ mdun rol du ni sbyor ba'i kha na ma tho ba re rer 'gyur ro/ /dgos pa med na snga ma la yang ngo zhes bya ba ni/ rigs pa'i tshul gyis dgos pa med na nyin zhag gsum par 'dug pa'i snga ma nyin zhag gnyis su gnas pa'i mtha'i skad cig la yang nyi ma re re zhing dngos gzhi'i kha na ma tho ba re rer 'gyur la mdun rol du ni sbyor ba'i kha na ma tho ba re rer 'gyur ro/ /dgos pa med par 'dug pa la ni nyes byas kho nar 'gyur ba ni mthong ba la bkag pa las mngon no/ /de bas na dge ba'i rang bzhin du grags pa'i dgos pa med par dmag gi nang du 'gro ba nyams su myong bar mi bya'o/ /dmag gi nang na gnas pa'i ltung byed do zhes bya ba bshad zin to// //dpung gi yan lag nyams su myong ba'i ltung byed smra bar 'dod nas/ dpung gi yan lag rnams ni byed pa po nyid do zhes bya ba smras te/ g.yul la mngon par dga' ba'i dmag gi dpung gi yan lag glang po che dang rta dang shing rta dang rkang thang dag ni byed pa po nyid yin no/ /ci dge slong thams cad la de dag byed pa po nyid yin nam zhe na/ de'i phyir/ bar chad kyi dbang gis 'gro ba ma yin pa la'o zhes bya ba smras te/ bar chad kyi dbang gis 'gro ba ma yin pa la kha na ma tho ba 'dir 'gyur ro/ /bar chad yod na ni ltung ba med de bar chad brgyad po dag las bar chad gang yang rung ba nye bar gnas par gyur na nyes pa med do zhes gsungs pa'i phyir ro/ /de yang dpe tsam du zad kyi/ gnod pa nye bar zhi bar bya ba'i don du 'gro ba thams cad la yang nyes pa med do/ /bsdus pa dang so so dag go zhes bya ba ni/ dpung gi yan lag bsdus pa'am so so ba dag byed pa po nyid yin no zhes bya bar sbyar ro/ /bsdus pa zhes bya bas ni/ rgyal mtshan gyi mchog gam dpung gi mchog ces bya ba bsdus pa yin te/ 'dir dpung gi mchog ces bya ba ni/ dpung gi tshogs yan lag bzhi pa yin par rig par bya'o/ /so so zhes bya bas ni/ g.yul bkod cing bshams pa'i dmag la lta na zhes bya ba ni bsdus pa yin te/ bshams pa dang bkod pa zhes bya ba'i sgra ni rnam grangs kyi tshig yin pas don gcig par rig par bya ste/ 'di ltar g.yul bkod pa nyams su myong bar byas na zhes bstan pa de'i rnam par bshad pa bshams pa la lta ba nyams su myong bar byas na zhes bya ba yin pa'i phyir ro/ /g.yul bkod pa zhes bya ba ni bkod pa rnam pa bzhi ste/ 'bru'i kha lta bu dang shing rta'i dbyibs lta bu dang zla gam gyi rnam pa lta bu dang / nam mkha' lding gi 'dab ma lta bu'o/ /bshams pa yang rnam pa bzhi ste/ 'bru'i kha lta bu dang / shing rta'i dbyibs lta bu dang / zla gam gyi rnam pa lta bu dang / nam mkha' lding gi 'dab ma lta bu'o/ /de la 'bru'i kha lta bu zhes bya ba ni/ mdun du yang ru dngar rgyab tu yang ru dngar la dbus na rgyal po 'dug pa'o/ /shing rta'i dbyibs lta bu zhes bya ba ni/ mdun du yang ru dngar ba dang / glor yang ru dngar la rgyab na rgyal po 'dug pa'o/ /zla gam gyi rnam pa lta bu zhes bya ba ni/ mdun du yang ru dngar rgyab tu yang ru dngar la dbus na rgyal po 'dug pa'o/ /nam mkha' lding gi 'dab ma lta bu zhes bya ba ni/ glor ru dngar la mdun na rgyal po 'dug pa'o/ /dpung gi yan lag ji lta bu dag kha na ma tho ba'i rnam pa ji lta bu'i byed pa po yin zhe na/ de'i phyir/ sta gon byas pa rnams kyi dngos la dngos gzhi'o zhes bya ba smras te/ sta gon byas pa zhes bya ba ni/ glang po che la sogs pa go bskon pa dang / shing rta bshams pa dang rgyal mtshan bsgreng ba dang gzhu bdungs pa dang mda' mde'u can bstar ba dang ral gri phyung ba nyid la sogs pa yin par rig par bya'o/ /de rnams kyi dngos la zhes bya ba ni/ de rnams la reg pa dang bshams pa dkrugs pa la sogs pa dngos gzhi'i rgyur gyur pa'i dngos po la'o/ /dngos gzhi'o zhes bya ba ni/ dngos gzhi'i kha na ma tho ba'i byed pa po nyid yin no/ /sbyor ba de la ni nyes byas kyi'o zhes bya ba ni/ sbyor ba la nyes byas kyi byed pa po nyid yin no/ /glang po che la sogs pa sta gon ma byas pa de la ni dngos dang sbyor ba gnyi ga la yang nyes byas kho na'i byed pa po nyid yin no/ /sta gon byas pa rnams kyi dngos la dngos gzhi'o zhes bstan pa'i dngos la zhes bya ba de ji zhig yin par rig par bya zhe na/ de'i phyir reg pa dang / bshams pa dkrugs pa dang / lta ba'i phyir 'phags shing nyen kor gyi mtha' las 'das te mthong ba de lta bu ni dngos dag yin no zhes bya ba smras te/ glang po che la sogs pa sta gon byas pa rnams zhes bya bar sbyar ro/ /reg pa zhes bya ba ni/ glang po che la sogs pa sta gon byas pa rnams la reg pa ste dpung gi yan lag la reg pa ni rin po cher smos pa la reg pa'i ltung byed las yul gzhan yin par rig par bya'o/ /bshams pa dkrugs pa zhes bya ba ni/ glang po che la sogs pa gnas nas bskyod pa'o/ /blta ba'i phyir 'phags shing nyen kor gyi mtha' las 'das te mthong ba zhes bya ba ni/ dge slong gis dpung gi yan lag blta ba'i phyir gnas nas 'phags shing nyen kor gyi dpung gi mtha' las 'das te dpung gi tshogs yan lag dag mthong ba gang yin pa'o/ /lta bu ni dngos dag yin no zhes bya ba ni reg pa dang bshams pa dkrugs pa dang blta ba'i phyir 'phags shing nyen kor gyi mtha' las 'das te/ mthong ba zhes bya ba rnam pa gsum po de lta bu nyid ni dngos gzhi'i kha na ma tho ba'i rgyur gyur pa'i dngos dag yin no/ /'dir gzhung ni kha cig las dge slong gis glang po che go bskon pa'i bshams pa dkrugs na zhes gsungs pa dang kha cig glang po che'i tshogs lta ba'i phyir 'gro ba dang / dge slong gis glang po che go bskon pa la reg na zhes bya ba la sogs pa gsungs pa yin no/ /ma chas pa nyid la ni na smad pa nyid do zhes bya ba la ma chas pa nyid ces bya ba ni/ g.yul la mngon par dga' ba nyid ma yin pa dang sta gon ma byas pa nyid kyi dpung gi yan lag rnams so/ /na smad pa nyid do zhes bya ba ni/ dngos gzhi'i kha na ma tho ba las na smad pa nyid de nyes byas so zhes bya ba'i tha tshig go/ /dmag la lta ba dang dmag gi nang na gnas pa dang dpung gi yan lag nyams su myong ba zhes bya ba'i bslab pa'i gzhi gsum po dag la dmag g.yul gyi phyir ma chas pa nyid la ni dngos gzhi'i gnas su ni nyes byas la nyes byas kyi gnas su ni nyes byas phra mor 'gyur ro/ /glang po che dang rta dang bya gag dang bya la ba ka dang bya brta ka dang / skyes pa dang bud med 'thab pa la sogs pa bya ba dang byed du gzhug pa dang blta bar mi bya'o zhes bya ba ni/ glang po che 'thab pa mi bya byed du mi gzhug blta bar yang mi bya'o/ /de bzhin du rta dang bya gag dang / bya la ba ka dang / bya brta ka dang skyes pa dang bud med 'thab pa la sogs pa yang mi bya/ byed du mi gzhug blta bar yang mi bya'o/ /'dir dpung gi yan lag tu gyur pa'i glang po che la sogs pa ni mi gzung ngo / /dpung gi yan lag nyams su myong ba'i ltung byed do zhes bya ba de bshad zin to// //ji zhig byas na rdeg pa'i ltung byed du 'gyur zhe na de'i phyir/ rnyog pa can gyi sems nyid kyis dge slong pha rol la lus sam des 'phangs pa'am de dang 'brel pa dag gang yang rung ba tha na rkang pa'i mthe bong ngam yungs kar ram rtswa dag gis brdegs na'o zhes bya ba smras te/ sems gang la rnyog pa yod pa de ni rnyog pa can gyi sems so/ /de'i dngos po ni de nyid de des brdegs na'o zhes bya bar sbyar ro/ / su la brdegs na zhe na de'i phyir dge slong zhes bya ba smras so/ /ji dge slong bdag nyid la brdegs na 'am zhe na de'i phyir pha rol la zhes bya ba smras te/ bdag nyid ma yin pa gzhan la'o/ /ji zhig gis brdegs na zhe na de'i phyir/ lus sam des 'phangs pa'am de dang 'brel ba dag ces bya ba la sogs pa smras te/ lus kyis zhes bya ba ni lag pa la sogs pas so/ /lus kyis 'phangs pa zhes bya ba ni/ rdo la sogs pas so/ /lus dang 'brel ba zhes bya ba ni/ dbyug pa la sogs pas so/ /gdon mi za bar snang bar 'gyur bas brdeg pa las kha na ma tho ba 'dir 'gyur bar ma zad de 'di ltar gang yang rung ba zhes bya ba la sogs smras so/ /tha na rkang pa'i mthe bo'am/ yungs kar ram rtswa dag gis brdegs na'o zhes bya ba ni/ brdegs par bya ba'i spyad kyi mtha' bstan pa yin te/ de bas kyang ches chung ba'i dngos pos brdegs na yang ltung ba na smad pa med do/ /gzhan dag la yang ngo zhes bya ba ni/ /bslab pa'i gzhi 'og ma gzas pa dang / gnas ngan len 'chab pa dang zan gcod du 'jug pa zhes bya ba dag la yang dge slong pha rol la zhes bya ba 'di nyid sbyor bar bya'o/ /ci brdegs pa'i 'og tu gang gi tshe skrangs par gyur pa de'i tshe na dngos gzhir ram/ 'on te rdeg pa'i tshe 'di nyid na zhe na de'i phyir/ reg na'o zhes bya ba smras te/ lus la sogs pa la reg na reg ma thag pa'i skad cig de nyid la dngos gzhir 'gyur ro/ /ci brdeg spyad mang po nyid yin na yang ltung byed gcig tu 'gyur ram zhe na/ de'i phyir/ brdeg spyad re re la'o zhes bya ba smras te/ brdeg spyad re re la ltung byed re rer 'gyur te sor mo la sogs pa brdeg spyad ji snyed kyis dge slong la reg par 'gyur ba de snyed kyi ltung byed du 'gyur ro/ /ma phog na nyes byas so zhes bya ba ni/ sor mo la sogs pa brdeg spyad dag gis ma phog na brdeg spyad re re la nyes byas re re'o/ /brdeg par bya ba gzhan yin la gzhan la brdeg par mi bya'o zhes bya ba la/ brdeg par bya ba gzhan yin la zhes bya ba ni/ sems brdeg par bya ba yin pa la'o/ /gzhan la brdeg par mi bya'o zhes bya ba ni/ rang gi lus la rdeg par mi bya ba'o/ /tshig 'di ni sems rnyog pa can nyid kyis rang gi lus la rdeg pa dgag pa'i phyir byas so/ /'dir gzhung ni de lta bas na dge slong gis brdeg par bya ba gzhan yin la gzhan la brdeg par mi bya'o zhes bya ba gsungs pa yin no/ /ka ba la rdeg par mi bya'o zhes bya ba ni/ rnyog pa can gyi sems nyid kyis ka ba la brdeg par mi bya'o/ /rtsig pa dang / sa dang / shing ljon pa dang / gzhan la yang mi bya'o zhes bya ba ni/ rnyog pa can gyi sems nyid kyis rtsig pa dang sa dang shing ljon pa dang sgo glegs la sogs pa gzhan la brdeg par mi bya'o/ / shing tog brlag pa'i phyir brdeg pa gang yin pa de ni 'byung ba'i tshogs 'jig pa'i ltung byed kyi khongs su 'dus so/ /'di la bye brag ni 'di yin te/ dgos pa'i dbang gis shing gcog pa dang sa brdung ba la sogs pa la ni nyes pa med do/ /de ltar yang 'dir khungs ni sa ris dge 'dun gyis bsro gang gi shing gshegs pa dang zhes gsungs pa yin no/ /brdeg pa'i ltung byed do zhes bya ba de bshad zin to// //ji zhig byas na gzas pa'i ltung byed du 'gyur zhe na/ de'i phyir/ brdeg par gzas na'o zhes bya ba smras te/ 'dir yang rnyog pa can gyi sems nyid kyis dge slong pha rol la lus sam des 'phangs pa'am de dang 'brel ba dag gang yang rung ba tha na rkang pa'i mthe bo'am yungs kar ram rtswa dag gzas na'o zhes bya ba la sogs pa sngar bsten pa'i gzhung thams cad ci rigs par sbyar ro/ /de ltar na 'dir tshigs gi don 'di 'byung ste/ rnyog pa can gyi sems nyid kyis dge slong pha rol la lus la sogs pa dag gang yang rung ba tha na rkang pa'i mthe bo la sogs pa dag gis brdeg par gzas na kha na ma tho ba 'dir 'gyur ro/ /ji rdzas mang po nyid yin na yang kha na ma tho ba gcig tu 'gyur ram zhe na de'i phyir/ rdzas re re la'o zhes bya ba smras te/ sor mo la sogs pa'i rdzas ji snyed gzas pa de snyed kyi ltung byed du 'gyur ro/ /sbyor ba la ni de snyed kyi nyes byas su 'gyur ro/ /gzas pa'i ltung byed do zhes bya ba de bshad zin to// //ji zhig byas na gnas ngan len 'chab pa'i ltung byed du 'gyur zhe na de'i phyir/ pham par 'gyur ba dang dge 'dun lhag ma dag bcabs na'o zhes bya ba smras so/ /dge slong gzhan gyi pham par 'gyur ba dang / dge 'dun lhag ma'i gnas ngan len gyi nyes pa shes bzhin du 'chab na ltung byed do/ /ci bcabs pa rnam pa thams cad la'am zhe na/ de'i phyir bde ba la mi reg pa dang dge slong gi tshul dang tshangs par spyod pa'i bar chad dang dge 'dun 'khrug tu dogs pa'i dbang nyid ma gtogs par 'chab na'o zhes bya ba smras te/ dbang nyid ces bya ba'i sgra ni bde ba la mi reg pa la sogs pa thams cad sbyar bar bya'o/ /bar chad ces bya ba'i sgra ni dge sbyong gi tshul dang tshangs par spyod pa gnyis dang sbyar ro/ /de ltar na 'dir tshig gi don 'di 'byung ste/ bde ba la mi reg pa'i dbang nyid dang / dge sbyong gi tshul gyis bar chad kyi dbang nyid dang / tshangs par spyod pa'i bar chad kyi dbang nyid dang / dge 'dun 'khrug tu dogs pa'i dbang nyid ma gtogs par gzhan gyis pham par 'gyur ba dang / dge 'dun lhag ma dag 'chab na ltung byed do/ /dge slong gi tshul zhes bya ba ni 'di 'phags pa'i lam yin par rig par bya'o/ /bye brag gzhan yang bsnyen par rdzogs pa dang bcas pa dang mtshan mthun pa dang lta ba mthun pa dang mtshams kyi nang na 'dug pa yin la nyin mtshan gyi mtha'i bar du 'chab na dngos gzhi'o zhes bya ba la sogs par bye brag tu byas te de ni gang zag gi gzhi kho na dang bcas pa las shes par bya'o/ /dus gang gi tshe bcabs na zhe na de'i phyir/ nyin mtshan gyi mthar ro zhes bya ba smras te/ skya rengs 'char ka tshun chad ces bya ba'i tha tshig go/ /snga rol du ni nyes byas so zhes bya ba ni/ nyin mtshan gyi mtha'i snga rol du ni nyes byas so/ /ltung ba gzhan yang ngo zhes bya ba ni/ pham par 'gyur ba dang dge 'dun lhag ma dag las gzhan pa'i ltung byed bcabs na ni nyin mtshan gyi mthar yang nyes byas la snga rol du yang nyes byas so/ /gnas ngan len 'chab pa'i ltung byed do zhes bya ba de bshad zin to// //ji zhig byas na zan gcod du 'jug pa'i ltung byed du 'gyur zhe na de'i phyir/ nad kyi gnyen po'i don nyid ma gtogs par ched du bsams te/ sbyin pa po khyim pa'i zan gcod du bcug na'o zhes bya ba smras te/ zan gang gi sbyin pa po khyim pa yin na de ni sbyin pa po'i khyim pa'i zan te/ nad kyi gnyen po'i don nyid ma gtogs par dge slong gis ched du bsams te/ dge slong pha rol gyi sbyin pa po khyim pa'i zan gcod du bcug na ltung byed do/ /de yang tshig gis bsgo ste zan gcod du bcug na ltung byed do/ /spring yig dang lag yig dang lag rtsis dang mngags pa dang / brgyud pa dang zur gyis gcod du bcug na ni nyes byas so/ /'dir gzhung ni zhu ba kha cig las mu stegs can gyi khyim dag tu gcod du bcug na nyes byas so zhes gsungs pa yin no/ /zan gcod du 'jug pa'i ltung byed do zhes bya ba de bshad zin to// //me la reg pa'i ltung byed smra bar 'dod nas/ 'dir de dang 'dra ba la reg pa yang dgag pa'i phyir/ seng ge la reg par mi bya'o zhes bya ba smras te/ seng ge ni me dang 'dra bar bsnyen par dka' zhing bzod par dka' ba nyid yin pa'i phyir ro/ /dus byin gyis brlab pa sngar byas te/ me la reg par bya'o zhes gsungs pa de'i phyir dang por dus byin gyis brlab pa'i rnam pa bstan pa'i phyir ston pa dang chos dang dge 'dun dang tshangs pa mtshungs par spyod pa rnams kyi chos dang ldan pa'i bya ba'i don nyid dang lhung bzed dang tshon gyi las la brtag pa ni dus byin gyis brlab pa yin no zhes bya ba smras te/ ston pa dang chos dang dge 'dun dang tshangs pa mtshungs par spyod pa rnams kyi chos dang ldan pa'i bya ba mar me dang bdug spos gsol ba la sogs pa gang yin pa'i dgos pa de'i don yin te/ me la reg pa gang la chos dang ldan pa'i bya ba'i don de yod pa de ni chos dang ldan pa'i bya ba'i don can gyi me la reg pa yin no/ /de'i dngos po ni chos dang ldan pa'i bya ba'i don nyid yin te/ de la brtag pa nges par brtag pa gang yin pa dang lhung bzed dang tshon gyi las la brtag pa gang yin pa de dag nyid ni dus byin gyis brlabs pa yin te/ de yang 'di ltar bya'o zhes sems kyis mngon par 'du bya zhing blta ba yin no/ /'dir gzhung ni/ dus byin gyis brlab par bya'o zhes gsungs pa dang de dag gis gang gi don du byin gyis brlab pa mi shes nas bcom ldan 'das kyis bka' stsal pa/ ston pa'i bya ba dang ches dang dge 'dun dang mkhan po dang slob dpon dang tshangs pa mtshungs par spyod pa'i bya bas byin gyis brlab par bya'o zhes gsungs pa yin no/ /lhung bzed dang tshon gyi las zhes smos pas ni rang gi lhung bzed dang chos gos kyi las bstan to/ /lhung bzed kyi las bya'o zhe 'am tshon gyi las bya'o zhes yid kyis brtag pa gang yin pa de ni dus byin gyis brlab pa yin no/ /yun ring du byin gyis brlab par bya'o zhes bya ba ni/ dus shes par bya bar sbyar ro/ /'dir gzhung ni dge slong dag lhung bzed kyi las dang tshon gyi las dag byed pa na yang dang yang du brjed ngas pas de la reg nas de dag 'gyod pa skyes pa dang / bcom ldan 'das kyis bka' stsal pa/ dus yun ring du byin gyis brlab par bya'o zhes gsungs pa yin no/ /ji zhig byas na me'i tha snyad kyi ltung byed du 'gyur zhe na de'i phyir/ rtse ba nyid na'o zhes bya ba smras so/ /de rnam pa gang gis yin zhe na de'i phyir/ gzhan la gtong bas zla ba dang nyi ma dang mgal me'i 'khor lo la sogs pas so zhes bya ba smras so/ /byis pas shing bu mes sbar te/ gcig gi lag nas gcig gi lag tu gzhan la thong shig ces gzhan la gtong bar byed pa de'i rtsed mo gang la yod pa de ni gzhan la gtong ba'o/ /des zla ba lta bur byed pa dang / nyi ma lta bur byed pa dang mgal me'i 'khor lo la sogs pa byed pas rtse ba yin no/ /ji zhig gis rtse ba la zhe na de'i phyir mes so zhes bya ba smras so/ /ci rtse ba 'ba' zhig la ltung ba 'dir 'gyur ram zhe na de'i phyir/ dus byin gyis ma brlabs pa'i dge slong na ba'i dbang nyid du gnas pa ma yin pa la reg na'o zhes bya ba smras te/ gal te dge slong dus byin gyis ma brlabs pa na ba'i dbang nyid du gnas pa ma yin pa des me la reg na'o/ /ji ltar reg na zhe na de'i phyir/ rang ngam bsgo bas so zhes bya ba smras te/ rang gis reg gam gzhan la bsgo bas reg tu bcug na'o/ /ci rtse bas reg pa 'ba' zhig la ltung byed 'dir 'gyur ram zhe na de'i phyir/ sbar ba dang gsod pa dang reg pa dang ma reg pa'i bud shing bskul ba dang bcas pa 'dren pa dang mdag ma spung pa dang 'dru ba dag la'o zhes bya ba smras te/ dus byin gyis ma brlabs pa'i dge slong na ba'i dbang nyid du gnas pa ma yin pa rang ngam bsgo bas me sbar tam gsod dam mes reg pa'i bud shing bskul tam mes ma reg pa'i bud shing bskul tam me dang bcas pa'i bud shing 'dren tam/ bskul tam mdag ma spungs pa 'dru bar byed na thams cad ltung byed do zhes bya bar sbyar ro/ /de ltar na 'dir tshig gi don 'di 'byung ste/ dge slong dus byin gyis ma brlabs pa na ba'i dbang nyid du gnas pa ma yin pas rang ngam gzhan la bsgo bas me sbar na ltung byed do/ /de bzhin du me gsod dam mes reg pa'i bud shing bskul tam mes ma reg pa'i bud shing bskul tam me dang bcas shing 'brel pa'i bud shing phyir drangs sam mdag ma dag spungs sam brus na thams cad du ltung byed do/ /'dir gzhung ni dge slong me sbar bar byed na des dus byin gyis brlab par bya'o/ /byin gyis ma brlabs par sbar bar byed na ltung byed do/ /dge slong me gsod par byed na/ des dus byin gyis brlab par bya'o/ /byin gyis ma brlabs par gsod par byed na ltung byed do/ /de bzhin du mgal ba skul bar byed dam mgal ba 'dren par byed dam/ shing 'jug par byed na thams cad du ltung byed do zhes gsungs pa yin no/ /bskul ba ni bcos pa'o/ /skul du 'jud pa ni gzhan 'chos su bcug pa yin pas de'i phyir/ 'dir gzhan la bsgo bas zhes bya ba yang smos so/ /me ma mur ni phyed shi ba nyid do zhes bya ba ni/ me ma mur ni phyed shi ba nyid yin pas nyes byas byed pa nyid yin no zhes bya ba'i tha tshig go/ /'dir gzhung ni me ma mur la reg na nyes byas so zhes gsungs pa yin no/ /me lce dag kyang ngo zhes bya ba yang phyed shi ba nyid do zhes bya ba'i rjes snyag pa'i phyir kyang ngo zhes bya ba'i sgra smos so/ /'dir gzhung ni me lce la reg na nyes byas so zhes gsungs pa yin no/ /der bud shing 'jud pa dang 'byin pa ni me gzhan gyis nyes pa yin no zhes bya ba ni/ me ma mur dang me lce der bud shing 'jud pa dang 'byin pa ni me gzhan gyi nyes pa kho na yin gyi me ma mur dang me lce'i nyes pa ni ma yin no/ /de lta bas na me ma mur dang me lce dag tu bud shing 'jud na ltung byed kho nar 'gyur ro/ /skra dang kha spu dang rus pa dang sen mo dang mchil ma dang snabs dang skyugs pa dang rlugs pa dang mon sran sde'u dang mon sran gre'u dang til dang 'bru mar dang sbrang rtsi dang mar dag ni bud shing gi phyed nyid do zhes bya ba ni skra la sogs pa dag ni bud shing gi phyed nyid yin no/ /de dag bud shing gi phyed nyid yin pas na de dag mer bcug pa dang phyung ba na nyes byas so zhes bya ba'i tha tshig go/ /'dir gzhung ni dge slong gis me'i nang du skra dang spu dang rus pa dang sen mo dag 'jud na nyes byas so/ /de bzhin du me'i nang du mchil ma dang snabs dang skyugs pa dang rlugs pa dag 'jud na nyes byas so zhes gsungs pa dang / zhu ba las kyang btsun pa re zhig dge slong gis til lam mon sran sde'u 'am mon sran gre'u zhugs su stsol na ltung ba cir 'gyur/ nyes byas so/ /btsun pa re zhig dge slong gis mar dang 'bru mar dang sbrang rtsi zhugs su stsol na ltung ba cir 'gyur/ nyes byas so/ /de bzhin du rus pa dang mchil ma sreg na nyes byas so zhes gsungs pa yin no/ /de dag ni bsdus te smras so/ /de dag kyang dpe tsam du zad de ras bal dang bal la sogs pa yang bsdu'o/ /'bar ba'i chos can yang de dang 'dra'o/ /gzhan gyi bya ba gzhan la byin gyis brlab pa ni phyed byin gyis brlabs pa yin no zhes bya ba ni/ mkhan po la sogs pa gzhan gyi bya ba slob dpon la sogs pa'i gzhan la byin gyis rlob pa ni/ byin gyis brlabs pa'i phyed nyid de nyes byas so/ /'dir gzhung ni dge slong gis dus byin gyis ma brlabs pa mkhan po'i bya bas me la reg na nyes byas so zhes bya ba la sogs pa gsungs pa yin no/ /log par byin gyis rlob pa thams cad kyang nyes byas so/ /me la reg pa'i ltung byed do zhes bya ba de bshad zin to// //ji zhig byas na 'dun pa phyir bsgyur ba'i ltung byed du 'gyur zhe na de'i phyir/ dge slong gi don gyi ched kyi las byas pa la 'dun pa phul ba phyir sgyur ba'i phyir smras na'o zhes bya ba smras te/ las bya ba dge slong dang 'brel zhing dge slong dang ldan pa'i don dgos pa gang yin pa de ni dge slong gi don to/ /dge slong gi don de'i phyir las bya ba gang yin pa de ni dge slong gi don gyi ched do/ /dge slong gi don gyi ched de la gsol ba dang brjod pa dang dgag dbye dang bsgo ba'i bdag nyid kyi las gang bya ba de ni dge slong gi don gyi ched kyi las so/ /las de byas pa la zhes bya ba ni byas zin pa la'o/ /las de byas pa de la 'dun pa phul ba phyir bsgyur ba'i phyir smras pa ni dge slong la slar byin cig khyod la mi sbyin no zhes de skad zer zhing phyir 'phrog pa ste/ de byas na 'dun pa phyir bsgyur ba'i ltung byed du 'gyur ro zhes bya ba'i tha tshig go/ /'dun pa phyir bsgyur ba'i ltung byed do zhes bya ba de bshad zin to// //bsnyen par ma rdzogs pa dang lhan cig nyal ba'i ltung byed smra bar 'dod nas/ zla ba nyi ma ma gtogs pa'i snang ba dang bcas pa'i gnas kyi phyogs su nyal bar mi bya'o zhes bya ba smras te/ zla ba dang nyi ma dag ma gtogs pa'i snang ba bcas pa'i mar me dang rin po che dang sman la sogs pa'i rdzas gzhan gyi snang ba gnas gang na yod pa'i phyogs de ni zla ba dang nyi ma ma gtogs pa'i snang ba dang bcas pa'i gnas kyi phyogs te/ der nyal bar mi bya'o/ /'dir gnas zhes bya ba ni khang khyim la bya ste/ de'i mtshan nyid ni 'og nas brjod par bya'o/ /phyogs su zhes smos pas ni gnas kyi phyogs gang na snang ba med pa der nyal ba la ni nyes pa med do zhes bya bar bstan to/ /'di ni longs spyod can gyi yo lang spang ba'i phyir yin gyi blta ba'i phyir bkag pa ni ma yin no/ /nyal bar mi bya'o zhes bya ba ni gnyid log par mi bya'o/ /der nyal na mtshan mo'i mthar ni dngos gzhir gyur pa'i mdun rol du ni sbyor bar gyur pa'i nyes byas so/ /spyir btang ba byas nas dmigs kyis bsal ba bstan pa'i phyir/ nad pa dang nad g.yog gi dbang nyid ma gtogs so zhes bya ba smras te/ nad pa'i dbang nyid dang nad g.yog gi dbang nyid kyis der nyal ba ni ma gtogs so/ /'di la kha cig ni ltung byed ce'o zhes bya ba ni/ snang ba dang bcas pa'i gnas kyi phyogs su nyal ba 'di la 'dul ba 'dzin pa kha cig ni ltung byed du 'dod do/ /de ni mi rigs pa kho nar snang ste/ 'di ltar rnam par 'byed pa las dngos su bsnyen par ma rdzogs pa dang lhan cig nyal ba dgag pa mdzad pa'i phyir te/ de lta bas na dge slong gis snang ba dang bcas pa'i khyim du bsnyen par ma rdzogs pa dang lhan cig nyal bar mi bya'o/ /nyal na ltung byed do zhes gsungs te/ der snang ba zhes smos pa ni gleng gzhi'i dbang gis mdzad do/ /'di ltar de nyid kyi rnam par 'byed pa las phyis snang ba med par ltung byed bca' ba mdzad de nye dga' la dge tshul tsher ma dang chen po pa zhes bya ba gnyis yod de/ de de gnyis dang dus thams cad du lhan cig nyal bar byed nas/ nga'i nyan thos rnams kyis 'dul ba la bslab pa'i gzhi 'di ltar gdon par bya ste zhes bya ba'i bar du gsungs te/ yang dge slong gang zag bsnyen par ma rdzogs pa dang khyim gcig gi nang du nub gnyis las lhag par nyal na ltung byed do zhes gsungs pa'i phyir ro/ /snang ba dang bcas pa dang bsnyen par ma rdzogs par 'di gnyis ni rigs gcig pa nyid ma yin te/ shin tu tha dad pa'i phyir ro/ /nyal ba ma yin pa ni phyed nyid do zhes bya ba ni/ bsnyen par ma rdzogs pa dang lhan cig nyal ba dang lta bar gyur pa mi 'dor ba dang spangs pa'i rjes su phyogs pa dang / bsnyil ba dang bsdus pa dang / bud med dang lhan cig nyal ba zhes bya ba bslab pa'i gzhi thams cad la yang nyal ba ma yin pa zhes bya ba nyal ba las gzhan pa'i spyod lam gyis gnyid log pa ni phyed nyid de mtshan mo'i mtha' ni nyes byas la de'i mdun rol du ni nyes byas phra mo'o/ /de bzhin du snang ba la yang nyal ba las gzhan pa'i spyod lam gyis gnyid log na mtshan mo'i mthar ni nyes byas phra mo la de'i mdun rol du ni ches shin tu phra mo'o/ /de bzhin du gal te dge slong nyal bas gnyid log par gyur la bsnyen par ma rdzogs pa dang / bud med la sogs pa dag nyal ba las gzhan pa'i spyod lam gyis gnyid log par gyur na de la yang nyes byas kho na yin gyi ltung byed du mi 'gyur ro/ / de ltar yang bud med dang lhan cig nyal ba la ni dge slong yid brtan pa mi 'jog par glos 'bebs sam gnyid log par byed na zhes bya ba'i yan lag gnyis gsungs la bsnyen par ma rdzogs pa dang lhan cig nyal ba 'di la ni bsnyen par ma rdzogs pa'i gang zag dang khyim gcig gi nang du nub gnyis las lhag par nyal na zhes lhan cig gi sgra smos pa'i phyir ro/ /nyin mo tha dad pa nyid kyang ngo zhes bya ba ni/ nyin mo ni mtshan mo las ltung ba tha dad pa nyid yin te de yang phyed nyid do zhes bya ba'i rjes bsnyag pa'i phyir kyang ngo zhes bya ba'i sgra smos so/ /'di skad bstan te/ ji ltar mtshan mo bsnyen par ma rdzogs pa'i gang zag dang gnas gcig gi nang du nub gnyis las lhag par nyal ba ltung byed du bstan pa de bzhin du nyin mo yang bsnyen par ma rdzogs pa'i gang zag dang gnas gcig gi nang du nyi ma gnyis lhag par nyal ba yang nyes byas su 'gyur ro/ /'di ni snang ba dang bcas par nyal ba la nyi ma'i snang ba dmigs kyis bsal bar shes par bya ste/ 'di ltar mtshan mo nyi ma'i snang ba med pas so/ /gal te der nyal na yang nyes pa 'byung bar mi 'gyur na ci'i phyir nyi ma'i snang ba dmigs kyis bsal bar byed de de bas na nyin mo yang nyal bar byed na nyes pa yod pa kho na'o/ /snang ba dang bcas par nyal ba dang bsnyen par ma rdzogs pa dang / bud med dang lhan cig gnas gcig na nyal ba dag ni 'dra ba'i phyir ro/ /bsnyen par ma rdzogs pa dang lhan cig gnas gcig na nyal ba zhes 'og nas 'byung ba la re zhig gnas kyi mtshan nyid smra bar 'dod nas/ phal cher g.yogs pa dang bskor ba ni gnas kyi mtha' ma yin no zhes bya ba smras te/ steng phal cher g.yogs pa dang ngos phal cher bskor ba gang yin pa de ni gnas kyi mtha' yin no/ /'dir phal cher zhes bya ba ni sum cha gcig lus par rig par bya ste/ de yang thams cad pas dman pa'i gnas yin no/ /'di ltar gnas ni rnam pa bzhi ste thams cad g.yogs shing thams cad bskor ba 'di lta ste/ gnas khang ngam 'khor gyi khyams sam khang pa brtsegs pa dag lta bu dang / thams cad g.yogs shing phal cher bskor ba 'di lta ste/ sgo bcu pa dang sgo bcu gnyis pa dag lta bu dang / phal cher g.yogs shing thams cad bskor ba 'di lta ste/ khyams ngos bzhi pa lta bu dang / phal cher g.yogs shing phal cher bskor ba 'di lta ste/ khyams ngos gsum pa'am 'khor gyi khyams lta bu'o/ /khyams ngos bzhi pa zhes bya ba ni/ gang la ngos bzhi char dang 'brel ba'i steng g.yogs yod la/ dbus kyi mthongs khab med pa'o/ /khyams ngos gsum pa zhes bya ba ni/ gang la ngos gsum dang 'brel ba'i steng g.yogs yod la ngos gcig steng g.yogs dang dbus kyi mthongs khab med pa'o/ /'dir gnas kyi mtha' yin no zhes smos pa'i sgra ni gnas rnam pa bzhi po de dag bsdus pa'i phyir ro/ /de'i sgo'i ngos dang 'brel ba'i nyen kor gyi gnas su gyur pa ni de'i khongs su gtogs pa nyid yin no zhes bya ba la/ de'i sgo'i ngos dang 'brel pa yin zhes bya ba ni/ gnas gang gi nyen kor bsam par bya ba de'i sgo ngos gang yin pa'i sgo'i ngos de dag dang lhan cig 'brel ba yin gyi/ lam po che la sogs pas bar du chod pa ni ma yin no/ /gnas de'i sgo'i ngos dang 'brel ba'i nyen kor zhes bya ba ni/ gnas gang gi nyen kor bsam par bya ba de'i sgo'i ngos gang yin pa de dang lhan cig 'brel ba'i nyen kor gang yin pa ste/ de nyid gnas de'i khongs su gtogs pa nyid yin no zhes bya bar sbyar ro/ /gnas su gyur pa zhes bya ba ni/ de'i sgo'i ngos dang 'brel ba'i nyen kor de yang gal te gnas su gyur pa yin na/ gnas de'i khongs su gtogs pa nyid yin gyi/ bla gab med pa lta bu gnas su gyur pa ma yin pa ni de'i khongs su gtogs pa nyid ma yin no/ /gnas de'i sgo'i ngos dang 'brel ba'i nyen kor gnas su gyur pa rnam pa de lta bu de ni de'i khongs su gtogs pa nyid yin te/ gnas de'i khongs su gtogs pa nyid yin zhing gnas de dang lhan cig gcig tu gyur pa nyid yin no zhes bya ba'i tha tshig go/ /khyer gzhan bar du ma chod pa sgo de dang 'brel par yang ngo zhes bya ba ni/ khyer gzhan yin la khyer gzhan gyis bar du ma chod pa gnas su gyur pa sgo gzhan yod du zin kyang gnas de dang sgo 'brel ba yin na khyad par de lta bu can gyi khyer gzhan de yang de'i khongs su gtogs pa nyid yin te/ gnas de dang lhan cig gcig tu gyur pa nyid yin no/ /khyer gzhan gyis bar du chod pa ni de'i khongs su gtogs pa nyid yin no/ /nyen kor dang bcas pa'i gnas khang tsam gyi pha rol na tha dad par gyur cing gnas pa ni ma yin no zhes bya ba la/ nyen kor dang bcas pa zhes bya ba ni/ bar nyen kor 'dom gang tsam dang bcas pa'i mtha' nas so/ / gnas khang tsam gyi phyi rol na zhes bya ba ni/ spyod lam rnam bzhi shong ba'i gnas khang gi tshad tsam gyi pha rol gyi gnas kyi phyogs na'o/ /tha dad par gyur cing gnas pa ni zhes bya ba ni/ bsnyen par ma rdzogs pa dang tha dad par gyur cing gnas pa'o/ /ma yin no zhes bya ba ni de'i khongs su gtogs pa nyid ma yin te/ de dang lhan cig gnas gcig tu gyur pa nyid ma yin zhing gnas tha dad par gyur to zhes bya ba'i tha tshig go/ /'di skad bstan te/ gal te gnas chen po gcig steng g.yogs gcig gis bkab par gyur pa de'i nang gi grwa gnyis na bsnyen par rdzogs pa dang bsnyen par ma rdzogs pa dag tha dad par gyur cing gnas la de gnyis kyi bar nyen kor dang bcas pa'i gnas khang gi tshad tsam gyi khyon gyis bar du chod pa yin na/ de'i nang du nyal yang lhan cig nyal ba'i nyes par mi 'gyur bar shes par bya'o/ / 'dir khungs ni 'dron pa las phyi rol du dbyung bar mi bya bar 'di ltar 'dron pa dang kha gnyis su gcad do zhes gsungs pa yin no/ /dbye dgon par ni lhan cig nyal yang nyes par mi 'gyur ro/ /shing ljon pa'i drung dang rtsig pa'i bar dang tshang tshing gi drung dag ni phyed nyid do zhes bya ba ni/ shing ljon pa'i drung dang rtsig pa'i bar dang nags ma 'am ljon shing gzhon nu tshang tshing gi drung dag ni gnas kyi phyed nyid de nyes byas so zhes bya ba'i tha tshig go/ /'dir gzhung ni zhu ba las btsun pa re zhig dge slong shing ljon pa'i drung du bsnyen par ma rdzogs pa dang lhan cig mchis nyal bar bgyid na ltung ba cir 'gyur/ nyes byas so/ /btsun pa re zhig dge slong rtsig pa'i bar dang tshang tshing gi drung dag tu bsnyen par ma rdzogs pa dang lhan cig mchis nyal bar bgyid na ltung ba cir 'gyur/ nyes byas so zhes gsungs pa yin no/ /de ni dpe tsam du zad de ma bskor ba dang ma bkab pa dang bskor ba'i snod ma phrad pa dang / bya skyibs dang shing ljon pa'i bar la sogs pa dag kyang rnam pa 'di bzhin du shes par bya'o/ /'dir shing ljon pa'i bar zhes bya ba ni gang gi phal cher ma 'khor ba yin par rig par bya'o/ /thibs po dang bcas pa dag tu bud med dang lhan cig nyal ba yang ngo zhes bya ba ni/ thibs po zhes bya ba rtsa'am nags sam 'od ma 'am tsher ma la sogs pa dang bcas pa dag gi nang du bud med dang lhan cig nyal yang nyes byas kyi byed pa po nyid yin no/ /'dis ni kun nas bskor la ma g.yogs pa dang gnas su gyur pa ma yin pa'i phyogs gzhan dag kyang 'phangs par rig par bya'o/ /de ltar yang 'dir gzhung ni btsun pa re zhig dge slong kun nas bskor ba steng ma g.yogs pa'am phyed g.yogs pa dag tu bud med dang lhan cig mchis nyal bar bgyid na ltung ba cir 'gyur/ nyes byas so zhes gsungs pa yin no/ /nyen kor dang bcas pa'i gnas khang tsam gyi pha rol na tha dad par gyur cing gnas pa ni ma yin no zhes bya ba sngar bsnyen par ma rdzogs pa dang lhan cig nyal ba dgag pa spyir bstan pa de bud med dang lhan cig nyal ba la dmigs kyis bsal ba'i bye brag gzhan bstan pa'i phyir/ 'di la ni bya gag 'phur nas bab pa'i lam ni bar du chod par gyur pa nyid yin no zhes bya ba smras te/ bud med dang lhan cig nyal ba 'di la ni bya gag 'phur nas bab pa'i bar gyi lam ji srid yod pa de srid kyis bar du chod par gyur na bar chad dang bcas pa nyid yin no/ /'di skad bstan te/ gnas gcig yin la bar chad du bsgribs kyang rung ma bsgribs kyang rung ste/ gnas de'i phyogs gcig na tha dad par gyur cing gnas nas bar du bya gag 'phur ba nas bab pa'i bar gyi lam tsam gyis chod na gnas tha dad pa nyid yin te gnas gcig pa nyid du mi 'gyur ro/ /nang gcig tu rgyu zhing bar bar na gnas med pa ma yin pa can nyid la ni g.yogs pa thams cad gcig pa nyid yin no zhes bya ba ni/ g.yogs pa thams cad gcig pa nyid yin te/ gnas gcig pa nyid yin no zhes bya bar sbyar ro/ /khyad par ji lta bu can zhig ce na de'i phyir/ nang gcig tu rgyu zhing zhes bya ba smras te/ g.yogs pa gang gi nang gcig tu rgyu zhing 'jug pa gang yin pa de ni nang gcig tu rgyu ba ste de'o/ /bar na gnas med pa ma yin pa can nyid ces bya ba ni g.yogs pa gang la bar te bar skabs na gnas med pa nyid ma yin zhing gnas med pa dang bral ba yod pa de ni/ gnas gzhan med pa ma yin pa can te/ gnas ma yin pas bar du chod pa dang bral ba yin no/ /de'i dngos po ni de nyid de de la ni g.yogs pa thams cad gcig pa nyid yin no/ /'di skad bstan te/ nyen kor du gyur pa ma yin pa phal cher g.yogs shing mtha' bskor ba'i gnas gzhan thams cad gnas tha dad pa nyid ni ma yin no/ /'on kyang gnas gzhan la la nyen kor du gyur pa ma yin yang nang gcig tu rgyu ba yod pa nyid de ni gnas gcig pa nyid de/ de lta bas na g.yogs ma gcig gi phan tshun 'dab chags par gyur cing rgyun srang btags pa la sogs pa'i lam nas ji srid tshun chad du bla gab med par ma byung bar rgyu bar nus pa de ni gnas gcig pa nyid yin no/ /sngar mdo las nyen kor dang bcas pa'i gnas khang tsam gyi pha rol na tha dad par gyur cing gnas pa ni ma yin no zhes bstan pa dang / 'di la ni bya gag 'phur nas bab pa'i lam ni bar du chod par gyur pa nyid yin no zhes bstan pa'i mdo de gnyis kyi yul ma gtogs pa lhag ma thams cad ni gnas gcig pa nyid yin no/ /de lta bas na gnas gzhan cig shos 'ba' zhig na gnas pa'i bsnyen par ma rdzogs pa la sogs pa dang lhan cig nyal bar byed na yang dngos gzhir 'gyur ba yang yod do/ /gal te rgyu ba'i lam g.yogs pa ma yin na ni/ de'i tshe ltung ba med do/ /gal te g.yogs pa la la ma bskor ba yin na ni 'dra bas nyes byas so/ /rang gi char gtogs pa'i sgo gcad pas bcad pa la ni nyen kor yang tha dad pa nyid do zhes bya ba ni/ ltung ba 'byin pa po'i char gtogs pa'i sgo gang yin pa de ni rang gi char gtogs pa'i sgo zhes bya ste/ bdag nyid dbang ba'i sgo'o/ /bud med dang lhan cig nyal ba la sgo de der gtogs pa'i gcad pas bcad pa nyid ma yin na de'i tshe nyen kor pa yang tha dad pa nyid yin te/ gnas tha dad pa nyid yin na/ khyams la sogs pa'i phyogs gzhan dang / gnas khang gzhan dang / sgo khang gzhan dang / bang rim khang la sogs pa gzhan dag gi sgo gcad pas bcad pa la tha dad pa nyid yin pa lta smos kyang ci dgos te/ 'di ni bsnyen par ma rdzogs pa dang lhan cig nyal ba la yang rung bar snang ngo / /ltung ba 'byin par byed pa dge slong gis bsrungs pa nyid dang bud med bdag pos bsrungs pa nyid ni de dang 'dra'o zhes bya ba ni/ ltung ba 'byin par byed pa'i dge slong gal te dge slong gzhan gyis bsrungs pa nyid yin nam bud med bdag pos bsrungs pa nyid yin na yang de'i tshe bud med dang lhan cig nyal ba la rang gi char gtogs pa'i sgo gcad pas bcad pa zhes bstan pa gang yin pa de dang 'dra bar blta bar bya'o/ /'dir gzhung ni dge slong bang rim khang pa na nyal bar byed cing bud med sgo khang na nyal na dge slong des phyi gtan bcug te sgo gcad par bya'am/ dge slong srung ma gzhag par bya'o/ /phyi gtan bcug ste gcod par mi byed dam dge slong srung ma gzhog par mi byed par glos phab nas gnyid log par byed na ji srid du skya rengs ma shar gyi bar du ni nyes byas so/ /skya rengs shar na ni ltung byed do/ /bdag pos bsrungs par gyur na ni ltung ba med do zhes gsungs pa yin no/ / gnas tha dad pa nyid la ni bdag pos bsrungs pa nyid la ltung ba med pa yin gyi gnas gcig pa nyid la ni bdag pos bsrungs pa nyid la yang 'khrig pa'i cha dang lhan cig nyal ba'i phyir nyes byas su 'gyur ro/ /ma la sogs pas bsrungs pa nyid la yang ltung ba med pa yin pas de'i phyir 'dir bdag po zhes smos pa ni dpe tsam du zad do/ /rim khang gzhan la ni skas steng du brtul ba nyid do zhes bya ba ni/ rim khang gi kha khyer gzhan la ni skas steng du brtul ba nyid rang gi char gtogs pa'i sgo gcad pas bcad pa dang 'dra bar rig par bya'o/ / gzhan gnas ma yin pa nyid la ni na smad do zhes bya ba la/ gzhan zhes bya ba ni gnas las gzhan du gyur pa ste nyen kor ro/ /nyen kor de gnas nyid ma yin pa la ni kha na ma tho ba na smad kyi med pa ni ma yin no/ /'di skad bstan te/ gal te nyen kor la sogs pa gnas su gyur pa yin na ni kha na ma tho ba rdzogs par byed par 'gyur la gnas su gyur pa ma yin na ni nyes byas byed pa yin no/ / //bam po sum cu gnyis pa/ ji zhig byas na bsnyen par ma rdzogs pa dang lhan cig nyal ba'i ltung byed du 'gyur zhe na/ de'i phyir/ bsnyen par ma rdzogs pa dang lhan cig gnas gcig tu mtshan mo gsum pa la nyal na'o zhes bya ba smras te/ bsnyen par ma rdzogs pa dang lhan cig gnas gcig tu mtshan mo gsum pa la nyal bas gnyid log na dngos gzhi'i kha na ma tho bar 'gyur ro/ /lhan cig ces smos pas ni gal te bsnyen par rdzogs pa dang / bsnyen par ma rdzogs pa gnyi ga nyal zhing spyod lam de nyid kyis gnyid log na de'i tshe dngos gzhir 'gyur ba bstan to/ /gcig spyod lam gzhan gyis nyal na ni nyes byas so/ /gcig spyod lam gzhan gyis gnyid mi log par byed cing gcig nyal ba la ni ltung ba med de lhan cig gnyid log pa ma grub pa'i phyir ro/ /mtshan mo gsum pa'i dus gang la bsnyen par ma rdzogs pa dang lhan cig nyal ba'i ltung byed du 'gyur zhe na de'i phyir mthar ro zhes bya ba smras te/ mtshan mo'i mthar de skad cig gang gi mjug thogs su skya rengs 'char ba der ro zhes bya ba'i tha tshig go/ /'o na gnas bzhi po de dag tu skya rengs 'char bar byed cing skya rengs shar na ltung byed du 'gyur ba kho nar gsungs pa yin na ji ltar mthar ro zhes brjod ce na/ nyes pa med de skya rengs 'char ba'i skad cig gang gis mtshan mo mtha' skad cig bde blag tu go bar nus pas de'i phyir de skad bstan to/ /mdun rol du ni nyes byas so zhes bya ba ni/ mtshan mo'i mtha'i skad cig gi mdun rol du ni nyes byas so/ /sngar nyin mo tha dad pa nyid kyang ngo zhes bya bas nyin mo ni mtshan mo las ltung ba tha dad pa nyid yin no zhes bstan pa'i skabs de las nyes byas 'di gzhan yin no/ /lam gyis dub pa rmya ba la ni nyes pa med do zhes bya ba ni/ dge slong lam gyis dub pa rmya ba la ni gal te bsnyen par ma rdzogs pa med pa'i gnas rnyed pa med na mtshan mo'i mtha'i mdun rol du gnyid log pa la nyes pa med do/ /mthar ni nyes pa kho nar 'gyur ro/ /mthar yang de bzhin no zhes bya ba ni/ dge slong des mdun rol du gnyid log pa tsam byas su zin kyang rmya ba sangs par ma gyur na de'i tshe na ni mthar yang nyes pa med pa kho na'o/ /dge slong gis byar mi rung ba yod na de sgrub par byed pa dang lhan cig pa'i nad pa dang nad g.yog la yang ngo zhes bya ba ni/ dge slong gis byar mi rung ba byin len la sogs pa gang yin pa'i byar mi rung ba de yod na byar mi rung ba de sgrub par byed pa'i bsnyen par ma rdzogs pa de dang lhan cig pa la mdun rol dang mthar yang nyes pa med pa kho na yin te/ de yang dge slong nad pa dang nad g.yog la nyes pa med pa kho na yin gyi gzhan la ni ma yin no/ /dge tshul dang yang ngo zhes bya ba ni/ lhan cig nyal ba la mdun rol dang mthar yang nyes pa med do/ /dge slong gang la zhe na de'i phyir de dang ldan pa la'o zhes bya ba smras te/ de dang ldan pa zhes bya ba ni/ dge slong gang la dge tshul yod pa de ni de dang ldan pa zhes bya ba ste/ dge slong dge tshul dang ldan pa de la nyes pa med do/ /gang gi tshe zhe na de'i phyir/ gnas de na dge slong sdig can nye bar gyur pa nyid na'o zhes bya ba smras te/ gal te gnas de na dge slong sdig can gzhan nye bar gnas par gyur na de'i tshe dge slong dge tshul dang ldan pa de dge tshul dang lhan cig nyal ba la mdun rol dang mtha' yang nyes pa med do/ /ci de dang ldan pa thams cad la'am zhe na de'i phyir/ de spyugs pa la 'bad pa byas sam byed pa la'o zhes bya ba smras te/ dge tshul dang ldan pa'i dge slong gang gis dge slong sdig can de re zhig spyugs pa'am gtan spyugs pa'i phyir 'bad pa sngar byas par gyur tam da ltar byed kyang rung ste/ dge slong de la nyes pa med pa yin gyi gzhan la ni ma yin no zhes bya ba'i tha tshig go/ /'dir 'bad pa zhes bya ba ni/ ci nus kyi sbyor ba yin par rig par bya'o/ /ji dus thams cad du nyes pa med pa yin nam zhe na de'i phyir/ gnas par khas blangs na dus phyi ma dang snga ma'i gnyis po dag la bab pa na'o zhes bya ba smras te/ gnas par khas blangs na zhes bya ba ni/ dbyar gnas pa snga mar khas blangs kyang rung phyi mar khas blangs kyang rung ste/ khas blangs pa'i dus de ni nyes pa med do/ /de la dbyar gnas pa snga mar khas blangs pa la dus gang la bab pa'i tshe na nyes pa med ce na de'i phyir/ dus phyi ma de'i gnyis po dag la bab pa na'o zhes bya ba smras te/ dus phyi ma'i zhes bya ba ni/ dbyar gnas pa snga mar khas blangs pa la zla ba gsum yod pa'i dang po dbyar zla 'bring po nya nas dbyar zla tha chungs nya'i bar gyi dus dang po de ma gtogs pa'o/ /'o na gang la zhe na/ dus phyi ma de'i gnyen po dag la bab na ste/ dbyar zla tha chungs nya nas ston zla ra ba nya'i bar gyi dus gcig dang ston zla ra ba nya nas ston zla 'bring po nya'i bar gyi dus gnyis po dag la bab pa ni dge slong de dge tshul dang lhan cig nyal ba la nyes pa med do/ /de la dbyar gnas pa phyi mar khas blangs pa la dus gang la bab pa'i tshe na nyes pa med ce na/ de'i phyir snga ma'i gnyis po dag la bab pa na'o zhes bya ba smras te/ snga ma'i zhes bya ba ni/ dbyar gnas pa phyi mar khas blangs pa la zla ba gsum yod pa'i tha ma ston zla 'bring po nya nas ston zla tha chungs nya'i bar gyi dus de'i snga ma'i zla ba gnyis po dag go/ /de yang gang zhe na/ dbyar gnas pa phyi mar khas blangs pa'i zla ba tha ma de'i snga ma'i gnyis po dag la bab pa na ste/ dbyar tha chungs nya nas ston zla ra ba nya'i bar gyi dus gcig dang / ston zla ra ba nya nas ston zla 'bring po nya'i bar gyi dus gnyis po dag la bab pa na dge slong de dge tshul dang lhan cig nyal ba la nyes pa med de/ gnas par khas ma blangs pa la ni der yang nyes byas kho nar 'gyur bas de'i phyir gnas par khas blangs na zhes bya ba smos so/ /gnas par khas blangs pa la yang dbyar zla 'bring po nya nas dbyar zla tha chungs nya'i bar gyis dus dang po la yang nyes pa kho nar 'gyur bas de'i phyir dus phyi ma'i zhes bya ba smos so/ /ston zla 'bring po nya nas ston zla tha chungs nya'i bar gyi dus tha ma la yang nyes pa kho nar 'gyur bas de'i phyir snga ma'i zhes bya ba smos so/ /des lhag par gnas par mi bya ba nyid do zhes bya ba la/ des zhes bya ba ni dbyar gnas par khas blangs pa la bab pa'i dge slong des so/ /lhag par gnas par mi bya ba nyid do zhes bya ba ni/ zla ba gnyis las lhag par gnas par mi bya ba nyid yin no/ /'di ni dbyar gnas par khas blangs pa phyi ma shos kyi dbang du byas te smras pa yin no/ /dbyar gnas par khas blangs pa snga ma shos la ni ma smras kyang grub pa'i phyir ro/ /gnas par khas blangs pa snga ma shos mi bya ba nyid do zhes bya ba ni/ de dbyar gnas par khas blangs pa yang yin la snga ma yang yin pas na gnas par khas blangs pa snga ma zhes bya ba ste/ de dge tshul dang ldan pa'i dge slong des mi bya ba nyid yin no zhes pas snga ma mi bsrung bar bya ba nyid do zhes bya ba ni/ dbyar gnas par khas blangs pa snga ma shos kyi zla ba gnyis kyi snga ma dge slong des mi bsrung bar bya ba nyid yin no/ /des dge tshul nye bar ma bzhag par nye bar gzhag par mi bya'o zhes bya ba ni/ rang gi gnas na dge slong sdig can gnas par gyur pa'i dge slong des gnas sbyin pa la sogs pas dge tshul sngar nye bar ma bzhag par nye bar gzhag par mi bya'o/ /lam du dge tshul gnyid bro bas rmya bar gyur na mdun du btang ste 'gro bar bya'o zhes bya ba ni/ dge slong des dge tshul khrid de lam du 'gro ba na gal te dge tshul gnyid bro bas rmya zhing yur bar gyur na dge slong des dge tshul de mdun rol du btang ste 'gro bar bya'o/ /gal te bru ba tsha bar gyur na de la nang par gyi dus su kha zas sbyin par bya'o zhes bya ba ni/ dge tshul lam du zhugs pa de gal te bkres shing bru ba tsha bar gyur na de'i tshe dge slong des nang par khe'u sus kyi dus su dge tshul de la khe'u sus sbyin par bya'o/ /gal te dro khar yang na de'i tshe yang ngo zhes bya ba ni/ gal te dge tshul de dro khar yang bkres par gyur na dro kha de'i tshe yang dge slong des dge tshul de la dro zan sbyin par bya'o/ /bsnyen par ma rdzogs pa dang lhan cig nyal ba'i ltung byed do zhes bya ba de bshad zin to// //gang la lta ba'i rnam pa mi 'dor ba'i ltung byed du 'gyur zhe na de'i phyir/ ji ltar bcom ldan 'das kyis bar du gcod pa'i chos su gsungs pa gang dag yin pa de dag bsten kyang bar du gcod par mi 'gyur te/ de ltar bcom ldan 'das kyis chos bstan pa bdag gis shes so zhes bya ba la sogs par 'jug pa'i tshig mi gtong ba la'o zhes bya ba smras te/ dge 'dun gyi dbyen byed pa'i dge 'dun lhag ma'i skabs su bsgo ba las gyur pa'i mtshan nyid thun mong ba sngar bstan pa gang yin pa de dag thams cad skabs 'dir yang sbyar bar bya ste/ bzlog pa'i tshul gyis mi gtong ba rjes su sgrub pa'i rang bzhin ni rjes su mthun no/ /gsol ba ni bzlog pa dang 'dra ba nyid do/ /tshig gi skad cig ma gcig nyid do/ /bzlas pa ni tha dad pa nyid do/ /mjug sdud pa ni ma yin no/ /'jug pa ni sbyor ba nyid do/ /bskrad pa dang / gleng ba dang dran par ma byas pa ni de'i'o/ /de la bsgo ba mi bya ba nyid do/ /de dag la bzhams pa dang las kyis mi bsgo bar mi bya'o/ /de'i mtha' la mi gtong na'o zhes bya ba bsgo ba las 'gyur ba'i dge 'dun lhag ma bzhi po dag gi mtshan nyid thun mong ba sngar bstan pa de dag 'dir yang rig par bya'o/ /'dir bye brag cung zhig brjod par bya ste de'i phyir/ ji ltar bcom ldan 'das kyis zhes bya ba la sogs pa smras so/ /bar du gcod pa'i chos zhes bya ba ni/ kun nas nyon mongs par gyur pa pham par 'gyur ba la sogs pa'o/ /sogs pa zhes bya ba'i sgras ni 'di ltar blta ba'i rnam pa gzhan dag kyang bzung ste/ lta ba'i rnam pa gzhan dag la yang bsgrub pa 'dra ba'i phyir ro/ /'jug pa'i tshig mi gtong ba la'o zhes bya ba ni/ rtsom pa'i tshig nyid yongs su mi gtong ba la ltung byed 'dir 'gyur ba'o/ /de la gsol bas smad pa nyid de de'i 'og tu'o zhes bya ba ni/ lta ba'i rnam pa mi gtong ba'i dge slong de la gsol ba dang bzhi'i las kyis smad pa nyid dang gnas nas dbyung ba cig car du bya ste smad par 'os pa'i las dag ni smad pa'o/ /de'i dngos po ni de nyid do/ /gang gi tshe zhe na/ de'i 'og tu ste ltung byed du 'gyur ba'i lta ba'i rnam pa mi gtong ba'i 'og tu las kyi mtha' la'o/ /'di skad bstan te/ bzlog pa'i tshul gyis mi gtong ba rjes su sgrub pa'i rang bzhin rjes su mthun no zhes bya ba la sogs pa'i rim gyis lta ba'i rnam pa mi gtong na las kyi mtha' la ltung byed du 'gyur ro/ /de'i 'og tu de la gsol ba dang bzhi'i las kyis smad pa nyid dang / gnas nas dbyung ba cig car bya'o/ /smad pa nyid ces bya ba ni/ /smad par bya ba nyid du rnam par bzhag par gyur pa'i smad par bya ba spyo zhing smad pa yin no/ /gnas nas dbyung ba zhes bya ba ni spang ba'o/ /lta ba'i rnam pa mi gtong ba'i ltung byed do zhes bya ba de bshad zin to// // spangs pa'i rjes su phyogs pa'i ltung byed la byed pa po gang yin zhe na/ de'i phyir shes gtso bo zhes bya ba smras te/ 'dir yang shes gtso bo zhes bya ba'i ming dang 'du shes gtso cher byed pa po nyid do zhes bya ba'i ming can du sbyor bar byed do/ /gang la 'du shes gtso cher byed pa po nyid yin zhe na de'i phyir/ de skad smra bas spangs pa phyir bcos pa nyid ma byas pa'i dge slong la'o zhes bya ba smras te/ de skad smra bas zhes bya ba ni/ ji ltar bcom ldan 'das kyis bar du gcod pa'i chos su gsungs pa gang dag yin pa de dag bsten kyang bar du gcod par mi 'gyur te/ de ltar bcom ldan 'das kyis chos bstan pa bdag gis shes so zhes bya ba la sogs par 'jug pa'i tshig de skad smra bas so/ /spangs pa zhes bya ba ni/ de skad smra ba'i rgyus dge 'dun gyis spangs pa'i dge slong ngo / /phyir bcos pa nyid ma byas pa zhes bya ba ni/ spangs pa nyid kyi bzod pa gsol ba nyid ma byas pa'o/ /dge slong la'o zhes bya ba ni/ de ltar de skad smra bas spangs pa phyir bcos pa nyid ma byas pa'i dge slong de la 'du shes gtso cher byed pa po nyid yin te/ dge slong de yang de lta bu nyid yin la ltung ba 'byin par byed pa'i dge slong gis kyang de ltar shes na yul de la 'du shes gtso cher byed pa po yin no zhes bya ba'i tha tshig go/ /de lta bas na spangs pa nyid kha na ma tho ba 'di 'byung ba'i rgyu yin gyi lta ba ma btang ba dang ltung ba ma bshags pa ni ma yin no/ /de ltar gyur na ji srid du spang bar bya ba'i las mi byed pa de srid kyi bar du ni lta ba ma btang ba'i dge slong de ltung ba'i byed pa po nyid ma yin la/ de bzhin du lta ba btang ba ltung ba ma bshags pa yang kha na ma tho ba 'di 'byung ba'i rgyu ma yin no/ /ji zhig byas na de byed pa po nyid yin zhe na de'i phyir/ lung dpog pa dang dmigs kyis 'dri ba dang gnas rjes su bstan pa dang gdams ngag sbyin na'o zhes bya ba smras te/ lung dbog pa sbyin pa dang / dmigs kyis 'dri ba'i lan sbyin pa dang gnas 'cha' ba sbyin pa dang / rjes su bstan pa sbyin pa dang gdams ngag sbyin na'o zhes bya ba sbyin pa'i sgra thams cad dang sbyar bar bya'o/ /lta ba smra na'o zhes bya ba ni/ dge slong spangs pa de la rang gi lta ba 'di 'dra'o zhes smra zhing ston na'o/ /'dir gzhung ni zhu ba kha cig las dge slong gis spangs pa la lta ba smra na longs spyod las byung ba'i ltung byed du 'gyur ro zhes gsungs pa yin no/ /zang zing gi longs spyod byed na'o zhes bya ba ni/ lhung bzed la sogs pa zang zing gi longs spyod byed na'o/ /bsnyen bkur bdag gir byed na'o zhes bya ba ni/ spangs pa de las bsnyen bkur bdag gir byed na'o/ /gnas su lhan cig nyal na yang ngo zhes bya ba ni/ spangs pa de dang gnas su lhan cig nyal na yang ngo / /gang gi tshe zhe na de'i phyir/ mthar ro zhes bya ba smras so/ /gang gi mthar zhe na de'i phyir mtshan mo'i zhes bya ba smras te/ skya rengs shar na'o/ /gzhan gyis bsrul na yang ngo zhes bya ba ni/ rnam pa gzhan gyis rnam par gtan la dbab pa las brtsams te/ tha na 'dag rdzas tsam gyis bsrul na yang ste de dang lhan cig 'du 'dzi byed na zhes bya ba'i tha tshig go/ /nad pa dang lta ba dang dbral bar gtogs pa'i don gyis ni ma gtogs so zhes bya ba ni/ nad par gtogs pa'i don dang lta ba dang dbral bar gtogs pa'i don gyis bsrul ba gang yin pa de ni ma gtogs so zhes bya ba'i tha tshig go/ /spangs pa'i rjes su phyogs pa'i ltung byed do zhes bya ba de bshad zin to// //bsnyil ba sdud pa'i ltung byed smra bar 'dod nas/ sngar lta bar 'gyur ba mi gtong ba'i ltung byed kyi skabs su de la mi bsgo bar mi bya ba nyid do/ /de dag la bzhams pa dang las kyis mi bsgo bar mi bya'o zhes bya ba'i cho ga ji skad bstan pa de dag nyid dge tshul rnam pa de lta bu la yang bya ste/ dge tshul ni dge slong gi 'khor du gyur pa nyid yin pa'i phyir ro/ /las kyi mtha' la mi gtong na de'i tshe ji ltar bya zhe na de'i phyir/ tshig de nyid la zhugs pa mi gtong na dge tshul bsnyil bar bya'o zhes smras te/ dge tshul gang ji ltar bcom ldan 'das kyis 'dod pa ni bar du gcod pa'i chos su gsungs pa gang dag yin pa de dag bsten kyang bar du gcod par mi 'gyur te/ de ltar bcom ldan 'das kyis chos bstan pa bdag gis shes so zhes zer ba'i tshig de nyid la zhugs pa de ni tshig de nyid la zhugs pa ste/ de'i dngos po ni de nyid do/ /de mi gtang na dge tshul de bsnyil bar bya'o/ /'dir ji ltar bcom ldan 'das kyis 'dod pa ni bar du gcod pa'i chos su gsungs pa gang dag yin pa zhes bya ba'i 'dod pa zhes bya ba'i sgra smos pa ni lta bar gyur pa rnam pa thams cad kyi dpe yin par rig par bya'o/ /'di la ni smad pa nyid du bya bar rnam par gzhag pa yin gyi spang bar bya ba'i las ni ma yin te/ bstan pa la zhugs pa yongs su ma rdzogs pa nyid yin pa'i phyir ro/ /ma go ba'i dge tshul la ni bzlog pa nyid kyang ma yin la/ tha dad pa'i dngos por bsnyil ba nyid kyang ma yin la/ dge 'dun gyis las byas pa nyi tshe tsam gyis kyang dge tshul gyis go bar mi 'gyur bas de'i phyir cho ga gang gis des go bar bya ba'i cho ga de bstan pa'i phyir/ khyod la dang por gsol ba dang bzhi'i las kyis so/ /de'i 'og tu khyod la bsnyil ba rtsom mo zhes bya ba dang gsol ba byas so/ /las brjod pa dang po dang gnyis pa yang byas zin gyi sdig pa can gyi lta ba'i rnam pa 'di lta bu 'di thong shig ces re re'i mthar dge slong gis de la bsgrags par bya'o zhes bya ba smras te/ dge 'dun du gyur pa'i dge slong dag gis dge tshul de la 'di skad ces khyod la dang por dge 'dun gyis gsol ba dang bzhi'i las mdzad do zhes bya ba rtsom pa dang de'i 'og tu khyod bsnyil ba'i las mdzad do zhes bya ba'i rtsom pas bsgo bar bya'o/ /rtsom pa de yang gang zhe na dang por gsol ba byas pa'i 'og tu de la 'di skad ces khyod kyi phyir dge 'dun gyis gsol ba byas zin gyis sdig pa can gyi lta ba'i rnam pa 'di lta bu 'di thong shig ces bsgrags par bya'o/ /de'i 'og tu las brjod pa dang po byas pa'i 'og tu yang de la 'di skad ces khyod kyi phyir dge 'dun gyis las brjod pa dang po yang byas zin gyi sdig pa can gyi lta ba'i rnam pa 'di lta bu 'di thong shig ces bsgrags par bya'o/ /de'i 'og tu las brjod pa gnyis pa byas pa'i 'og tu yang de la 'di skad ces khyod kyi phyir dge 'dun gyis las brjod pa gnyis pa yang byas zin gyi sdig pa can gyi lta ba'i rnam pa 'di lta bu 'di thong shig ces bsgrags par bya'o/ /re re'i mthar zhes bya ba ni/ gsol ba dang las brjod pa dang po dang las brjod pa gnyis pa byas zin pa re re'i mthar ro/ /dge slong gis zhes bya ba ni/ dge 'dun du gyur pa'i dge slong gis so/ / de la zhes bya ba ni/ sdig pa can gyi lta ba'i rnam pa mi gtong ba'i dge tshul de la'o/ /bsgrags par bya'o zhes bya ba ni/ khyod la dang por dge 'dun gyis gsol ba dang bzhi'i las mdzad pa rtsom mo/ /de'i 'og tu khyod bsnyil ba'i las mdzad pa rtsom mo zhes bya ba dag bsgo bar bya'o/ /de'i 'og tu dge 'dun gyis gsol ba byas zin gyi sdig pa can gyi lta bar gyur pa 'di lta bu thong shig ces bya ba la sogs pa rtsom pas gsum po dag bsgrags par bya'o/ /las brjod pa gsum pa byas zin pa'i 'og tu ni las rdzogs pa zin pa'i phyir bsgrags kyang ci yang mi phan te de'i tshe na dge tshul bsnyil zin pa'i phyir ro/ /brtsams pa mthar phyin pa byas pa ni rigs pa nyid yin no snyam du sems pa bsal ba'i phyir btang na phyi ma mi bya'o zhes bya ba smras te/ gsol ba la sogs pa snga ma dag gis dge tshul des lta ba'i rnam pa btang na dge 'dun gyis las phyi ma mi bya'o/ /dge 'dun gyi dbyen byed pa mi gtong ba la sogs pa gtang bar bya ba'i don gyi las thams cad la yang dngos po de btang nas las phyi ma mi bya'o/ /dge tshul bsnyil ba sdud pa'i ltung byed la byed pa po nyid ni gang yin/ ci zhig spyad na kha na ma tho ba 'dir 'gyur zhe na de'i phyir/ dge tshul bsnyil ba nyid do zhes bya ba smras te/ sngar spangs pa'i rjes su phyogs pa'i ltung byed kyi byed pa po gang dag yin pa de dag nyid 'di'i byed pa po nyid kyang yin la/ dge tshul gyi bsnyil ba nyid la lung 'bogs pa la sogs pa byed na kha na ma tho ba 'dir 'gyur ro/ /de ltar na 'dir tshig gi don 'di 'byung ste shes gtso bo zhes bya bas 'dir yang shes gtso zhes bya ba'i ming dang 'du shes gtso cher byed pa po nyid do zhes bya ba'i ming can du sbyor bar bya'o/ /gang la 'du shes gtso cher byed pa po yin zhe na/ dge tshul bsnyil ba'i gnas skabs su gyur pa la ste/ dge tshul de yang de lta bu nyid yin la ltung ba 'byin par byed pa'i dge slong gis kyang de ltar shes na yul de la 'du shes gtso cher byed pa po yin no zhes bya ba'i tha tshig go/ /ci zhig byas na de byed pa po nyid yin zhe na/ dge tshul de la lung dbog pa dang / dmigs kyis 'dri ba dang / gnas dang rjes su bstan pa dang / gdams ngag sbyin pa dang / lta ba smra ba dang / zang zing gi longs spyod byed pa dang / bsnyen bkur bdag gir byed pa dang / gnas su lhan cig nyal na yang ngo / /mthar ro zhes bya ba dang mtshan mo'i 'o zhes bya ba'i dus su'o/ /gzhan gyis bsrul na yang ltung byed du 'gyur ro/ /phyir bzlog pa na dge tshul gzhi de mi gtong na de la ni nyes byas su 'gyur ro/ /bsnyil ba sdud pa'i ltung byed do zhes bya ba de bshad zin to/ / //ci zhig byas na kha ma bsgyur ba'i gos gyon pa'i ltung byed du 'gyur zhe na de'i phyir/ sngon po 'am dmar po'am ngur smrig gis kha ma bsgyur ba rang gi gos tha na lhung bzed kyi kha g.yogs dang snod dang rkang pa'i 'bob dang ska rags dag gi bgo ba la sogs pa la yongs su longs spyod na'o zhes bya ba smras te/ sngon po zhes bya ba ni/ skye ba'i tshon gyi dpe yin no/ /dmar po zhes bya ba ni sa'i khams so/ /ngur smrig ces bya ba ni/ me tog dang 'bras bu dag gi dpe yin no/ /'am zhes bya ba'i sgras ni gsum po de dag las gang yang rung ba gcig bzung ngo / /kha ma bsgyur ba zhes bya ba ni/ de dag las gang yang rung bas kham bsgyur ba'o/ /rang gi gos zhes bya ba ni/ gzhan gyi gos spyod pa la ni kha na ma tho ba na smad par 'gyur bas de'i phyir/ rang gi zhes bya ba smras so/ /tha na zhes bya bas ni/ chos gos la sogs pa chen po dag lta smos kyang ci dgos zhes bya bar ston to/ /lhung bzed kyi kha g.yogs zhes bya ba ni/ lhung bzed kyi steng nas g.yogs pa'i rdzas so/ /snod ces bya ba ni lhung bzed kyi snod do/ /rkang pa'i 'bob ces bya ba ni/ rkang pa dkri ba'o/ /ska rags dag ces bya ba ni/ rgya cang dang lcag pod la sogs pa dag go/ /bgo ba zhes bya ba ni/ gos kyi rnam grangs spyi la bsnyegs so/ /sogs pa zhes bya ba'i sgras ni bgo ba dag nyi tsher ma zad kyi sle 'u la sogs pa dag kyang bzung ngo / /la yongs su longs spyod na'o zhes bya ba smras te/ rang gi gos kha ma bsgyur ba de dag la longs spyod na ltung byed do/ /chu tshags ni kha bsgyur bar mi rigs par snang ste/ chu la lag nyar blangs pa dang / sog 'jog byas pa dang / byin len ma byas pa dang / dus ma yin par za ba la sogs pa'i nyes pa'i cha la brten par 'gyur ba'i phyir te/ de lta bas na de ni yo byad kyi gos bzhin du kha mi bsgyur bar bya ba yin no/ /so sor thar pa'i mdo las gos sar pa zhes smos pa ni gsar du rnyed pas sar pa yin par rig par bya'i ma spyad pa'i sgo nas sar pa ni ma yin no/ /de lta bas na gos dus tshigs su spyad pa rnying pa zhig gsar du rnyed na yang kha ma bsgyur bar bgo bar mi bya'o/ /sde pa gzhan gyi ni yang rung bar bya mi dgos pa nyid yin no zhes bya ba ni dge slong dang dge slong ma dang dge tshul dang dge slob ma dang dge tshul ma'i sde pa'i 'khor rnams ni sde pa zhes bya ba'i sgrar 'gyur ro/ /sde pa gzhan gang yang rung ba'i gos rang spyod pa la ni yang gzod rung bar bya mi dgos pa nyid yin no/ /khyim pas brkus pa yang mi dgos te zhes bya ba ni/ khyim pas gzhan la brkus pa'i gos rung bar byas zin pa zhig dge slong gis thob na de yang gzod rung bar bya mi dgos pa nyid yin no/ /'dir mdo de gnyis kyi gzhung ni zhu ba kha cig las dge slong gi gos rung bar byas pa gang yin pa de ni dge slong ma rnams la yang rung bar byas pa nyid yin la/ de bzhin du de ni lnga po thams cad la yang rung bar byas pa nyid yin no/ /dge slong gis rgyal po'am phyir rgol ba'am gzhan dag gis gos brkus par gyur pa zhig gal te slad kyis thob par gyur na yang rung bar bgyi 'tshal lam/ nye ba 'khor mi dgos te/ snga ma de nyid rung ba yin pa'i phyir ro zhes gsungs pa yin no/ /kha dog chen por kha bsgyur ba'i gos bsten par mi bya'o zhes bya ba ni/ kha dog chen por kha bsgyur ba'i gos de'i bgo ba bsten par mi bya'o/ /'dir gzhung ni dge slong dag kha dog chen po brgyad po li khri dang thing shing dang rgya skyegs dang mtshal dang gur kum dang btsod dang rma shing dang le brgan rtsis kha sgyur bar byed nas/ bcom ldan 'das kyis bka' stsal pa/ kha dog chen po brgyad ma gtogs pa ngur smrig gzhan 'ga' zhig gis kha bsgyur bar bya'o zhes gsungs pa yin no/ /khyim pa'i gos kyang mi bya'o zhes bya ba ni/ kha tshar dang phun tshar ma bcad pa ni khyim pa'i gos te/ dge slong gos bgo ba bsten par mi bya'o/ /kha ma bsgyur ba dang kha dog chen por kha bsgyur ba yang rung ste/ de yang so sor bkag pa'i phyir ro/ /gtsug lag khang gi nang du ngur smrig gis g.yogs te bsten par bya'o zhes bya ba ni dge slong gis gtsug lag khang gi nang du ni khyim pa'i gos de steng du ngur smrig gis g.yogs te bgo ba bsten par bya'o/ /'dir gzhung ni dge slong gis khyim pa'i gos bgo bar mi bya'o/ /rkyen de lta bu dag yod na steng du ngur smrig gis g.yogs te/ gnas khang dang gtsug lag khang nas phyir mi 'byung bar bgo bar bya'o zhes gsungs pa yin no/ /lam du gos brnyas pa ni thun mong nyid yin no zhes bya ba ni/ lam du gos brnyas pa gcig gis thob pa yang gzhan dang thun mong nyid yin par shes par bya'o/ /su dang thun mong nyid yin zhe na de'i phyir/ grogs dag dang ngo zhes bya ba smras so/ /grogs ji lta bu dag dang zhe na de'i phyir/ dge slong dang dge tshul dag dang ngo zhes bya ba smras so/ /gcig pa nyid yin na rgan rabs nas brtsams te ji srid du sleb pa'i steng du g.yogs so zhes bya ba ni/ gos brnyas pa gcig pu zhig nyid yin na/ rgan rabs nas brtsams te ji srid du slebs shing g.yogs pa de tshun chad kyi steng du dgab par bya'o/ /'dir gzhung ni/ bcom ldan 'das kyis bka' stsal pa/ gang gis rnyed pa de nyid kyis bgo bar mi bya bar 'di ltar thun mong du bya'o/ /gal te gcig pu zhig yin na des ji ltar rgan rabs nas brtsams te gar slebs pa tshun chad kyi steng du g.yogs par bya'o zhes gsungs pa yin no/ /dmigs kyis ma bsngos na gzhan las gyon te bcag par mi bya'o zhes bya ba la/ dmigs kyis ma bsngos pa zhes bya ba ni/ che ge mo zhig la sbyin no zhes dmigs kyis ma bsngos par spyir brnyan por byin te/ de gzhan las bshus nas rang gon te 'chag tu 'gro bar mi bya'o/ /bsod nams 'dod pas mgron du bos na kha tshar ma bcad pa man chad sar pa la mi rtag pas nyen par 'gyur ba'i yid la byed pas steng du brdzi bar bya'o zhes bya ba ni/ sbyin bdag bsod nams 'dod pas dge slong mgron du bos te/ gos sar pa kha tshar ma bcad pa'i bar man chad dag gi steng du brdzir gsol zhes zer na de'i tshe dge slong des gos 'di de'u re mi rtag pas nyen par 'gyur ba'i yid la byed pas steng du rkang pa gnyis kyis brdzi bar bya'o/ /'dir mdo de gnyis kyi gzhung ni/ yang bcom ldan 'das kyis bka' stsal pa/ gang 'chag par byed na des gang zag gi gos gyon te bcag par bya'o/ /gzhan gyis 'chag na 'gal tshabs can du 'gyur ro/ /yang bcom ldan 'das kyis bka' stsal pa/ gal te dge slong lam du zhugs pa la yang bram ze dang khyim bdag dad pa can dag gis gos sar pa kha tshar ring po dag gis bkab cing bdag cag la phan pa'i phyir steng du rdzis shig ces zer na/ mu stegs can zil gyis mnan pa'i phyir mi rtag pas nyen par 'gyur ba'i yid la byed pas steng du brdzi bar bya ste 'di la 'gyod par mi bya'o zhes gsungs pa yin no/ /kha ma bsgyur ba'i gos gyon pa'i ltung byed do zhes bya ba de bshad zin to// //ci zhig byas nas longs pa'i ltung byed du 'gyur zhe na/ de'i phyir/ rin po che rang gi ma yin pa dang der smos pa la reg gam reg tu bcug na'o/ /byed pa po yin no zhes bya ba smras te/ kha na ma tho ba 'di la byed pa po gang yin zhe na/ de'i phyir rin po che rang gi ma yin pa zhes bya ba smras te/ gzhan gyi rin po che'o/ /rang gi la ni spang ba'i ltung byed du bstan pa'i phyir ro/ /der smos pa zhes bya ba ni/ rin po cher smos pa ste/ der zhes bya ba'i sgra ni rin po che la snyegs so/ /rang gi ma yin pa zhes bya ba'i sgra ni 'dir sbyar bar mi bya ste/ rin po cher smos pa ni rang gi yang rung rang gi ma yin pa yang rung ste/ kha na ma tho ba 'di'i byed pa po dag yin no/ /ci zhig byas na de dag kha na ma tho ba 'di'i byed pa po yin zhe na/ de'i phyir reg gam reg tu bcug na byed pa po yin no zhes bya ba smras te/ rin po che rang gi ma yin pa dang rin po cher smos pa la bdag nyid reg gam gzhan reg tu bcug na kha na ma tho ba 'di'i byed pa po yin no/ /rin po cher smos pa bdag gir byed pa ni nyes byas te/ longs pa ni rgyags pa yin la bdag gir byas pa tsam la ni longs pa shas chung ba'i phyir ro/ /rin po cher smos pa zhes bya ba de ci zhig yin zhe na de'i phyir/ de ni g.yul du spyad pa'i mtshon cha dang rol mor spyad pa'i lag cha'o zhes bya ba smras te/ g.yul du dgos shing g.yul dang 'brel ba'i mtshon cha ni g.yul du spyad pa'i mtshon cha'o/ /rol mor dgos shing rol mo dang 'brel ba'i lag cha ni rol mor spyad pa'i lag cha'o/ /de gnyis ji lta bu zhig kha na ma tho ba gang gi byed pa po yin zhe na de'i phyir/ dgos pa'i phyir rung ba nyid du 'gyur ba ni dngos gzhi'o zhes bya ba smras te/ g.yul du dgos pa'i phyir rung ba nyid du gyur pa'i mtshon cha dang rol mor dgos pa'i phyir rung ba nyid du gyur pa'i lag cha ste/ gal te mtshon cha dang lag cha de g.yul dang rol mor dgos pa yin na dngos gzhi'i kha na ma tho ba'i byed pa po nyid yin no/ /gyur pa ma yin pa ni nyes byas kyi'o zhes bya ba ni/ mtshon cha dang lag cha de dag g.yul dang rol mor dgos pa'i phyir/ rung ba nyid du gyur pa ma yin pa ni nyes byas kyi byed pa po yin no/ /ci de gnyis gnas gang yang rung ba na 'dug pa byed pa po yin nam zhe na de'i phyir/ gtsug lag khang dang de'i nyen kor na 'dug pa la bdag gir bya ba dang ma 'brel par rdzas chud mi za bar sems kyis ni ma gtogs so zhes bya ba smras te/ de gnyis gnas khang gang yang rung ba na/ 'dug pa byed pa po yin nam zhe na de ma yin te/ de'i phyir gtsug lag khang dang de'i nyen kor na 'dug pa ni ma gtogs te/ gtsug lag khang dang 'brel pa dang de'i nyen kor na 'dug pa la reg gam reg tu bcug na ni ma gtogs so/ /ci sems gang yang rung bas reg na yang de gnyis byed pa po ma yin nam zhe na/ de'i phyir bdag gir bya ba dang ma 'brel par rdzas chud mi za bar bya ba'i sems kyis ni ma gtogs so zhes bya ba smras te/ dge slong gang la de dag bdag gir bya ba dang ma 'brel ba'i sems dang rdzas de dag chud mi za bar bya ba'i sems yod pa'i sems des gtsug lag khang dang de'i nyen kor na 'dug pa'i mtshon cha dang lag cha de dag la lag pas reg gam reg tu bcug pa ni ma gtogs so/ /de lta bas na yongs su bskyang ba'i phyir reg pa dang reg tu bcug pa la ni nyes pa med do/ /de yongs su bskyang ba'i cho ga bstan pa'i phyir/ de yal bar mi dor ro zhes bya ba smras te/ gtsug lag khang na 'dug pa'am gtsug lag khang gi nyen kor na 'dug pa'i rin po che'am rin po cher smos pa de yal bar mi dor ba ste/ de gal te bdag po las 'khyams par gyur na bsrung ba'i phyir 'bad par bya'o/ / ji ltar de yal bar mi dor bar bya zhe na de'i phyir/ de zhag bdun nam brgyad du bsdu skyog bya'o zhes bya ba smras te/ bdag po las 'khyams pa'i rin po che'am rin po cher smos pa gtsug lag khang ngam gtsug lag khang gi nyen kor na 'dug pa de dge slong des zhag bdun nam brgyad du dus dus su lta ba la sogs pas bsdu skyog bya'o/ /'gro ba'i lam phyogs su sa'am lo ma'i tshogs dag gis g.yogs par bya'o zhes bya ba smras te/ dge slong bsod snyoms la sogs pa'i don du 'gro ba'i lam logs su rin po che'am rin po cher smos pa bdag po las 'khyams pa gtsug lag khang gi nyen kor na 'dug pa de sa'am lo ma'i tshogs sam 'dab ma'i tshogs dag gis g.yogs par bya'o/ /bdag po rtags thams cad la ma bab par kho bo yin no zhes zer ba la sbyin par mi bya'o zhes bya ba ni/ bdag por khas 'che ba zhig rdzas de'i rtags gang yin pa de thams cad thog tu phebs par gyur pa'i don gyi tshig mi smra bar gyi na mun sprul tsam du kho bo'i yin no zhes zer na de la gya tshom du sbyin par mi bya'o/ /'ongs par ma gyur na de'i 'og tu dge 'dun gyi mdzod du gzhug par bya'o zhes bya ba ni/ de'i bdag po zhag bdun nam brgyad du 'ongs par ma gyur na de'i 'og tu rdzas de dge 'dun gyi mdzod du gzhug par bya'o/ /de dag dge 'dun gyi mdzod du yun ji srid cig tu bcang bar bya zhe na/ de'i phyir/ zla ba drug gi mtha' tshun chad du bcang bar bya'o zhes bya ba smras te/ rdzas de dge 'dun gyi mdzod der zla ba drug gi mtha' tshun chad du bcang bar bya'o zhes bya ba'i tha tshig go/ /'og tu ma 'ongs na sangs rgyas sam dge 'dun gyi sa ris gang nas rnyed pa der spyad du rung ngo zhes bya ba ni/ zla ba drug gi 'og tu bdag po ma 'ongs na rdzas de dang po sangs rgyas sam dge 'dun gyi sa ris kyi yul gang gi nang nas rnyed pa der sangs rgyas sam dge 'dun gyi dngos po der spyad du rung ba nyid yin pa'o/ /de rung ba nyid ma yin na des rung ba brtan po nyo bar bya'o zhes bya ba ni/ rdzas de sangs rgyas dang dge 'dun gyi yul la rung ba nyid ma yin na rdzas rung ba nyid ma yin pa des rdzas rung ba brtan po gzhan nyo bar bya'o/ /gal te de'i tshe bdag po 'ongs par gyur na rjes su gnang ba gsol te mi ster na sbyin par bya'o zhes bya ba ni/ gal te de'i tshe zhes bya ba nyos sam ma nyos par spyod pa'i gnas skabs su gyur pa de'i tshe bdag po 'ongs par gyur na de 'ongs pa la rjes su gnang ba gsol bar bya ste/ khyod kyis 'di sangs rgyas sam dge 'dun la 'bul ba'i rigs so zhes rjes su gnang ba gsol bar bya'o/ /gsol te gal te mi ster na mi ster ba'i bdag po de la rdzas de phyir sbyin par bya'o/ /gal te skyed slong na kho bo cag gis yongs su bskyangs pa gang yin pa de nyid drin che bar mi sems sam zhes brjod par bya'o zhes bya ba ni/ gal te bdag po de spyad pa'i phyir khe tshol bar byed na de la de skad ces kho bo cag gis khyod kyi rdzas chud ma zos par yongs su bskyangs pa gang yin pa de nyid khyod drin che bar mi sems sam zhes bshad kyi byang bar bya ste skyed sbyin par mi bya'o/ /sngar rung ba nyid du gyur pa zhes gang smos pa de la rung ba nyid gang yin zhe na de'i phyir/ nor bu la sogs pa la ni bdar ba dang phug pa nyid rung ba nyid yin no zhes bya ba smras te/ nor bu la sogs pa la ni bdar ba dang phug pa nyid rung ba nyid du gyur pa yin no/ /sogs pa zhes bya ba'i sgras ni mu tig dang bai DUr+ya la sogs pa dag bsdu'o/ /'dir gzhung ni/ dge slong gi nor bu len na ma bdar ba len na ni nyes byas su 'gyur la bdar ba len na ni ltung byed do/ /nor bu ji lta ba bzhin du mu tig dang bai DUr+ya nas g.yas su 'khyil ba'i bar yang de bzhin no/ /gzhan las kyang dge slong gis nor bu len na ma phug pa len na ni nyes byas su 'gyur la/ phug pa len na ni ltung byed du 'gyur ro/ /nor bu ji lta ba bzhin du mu tig dang bai DUr+ya nas g.yas su 'khyil ba'i bar du yang de bzhin no zhes gsungs pa yin no/ /mgul rgyan dang gdu bu rgyan can dang dpung rgyan dang do shal dang se mo do nyid du gnas pa yang ngo zhes bya ba la/ mgul rgyan dang gdu bu rgyan can dang dpung rgyan dang / do shal dang se mo do rnams kyi dngos po ni de nyid de der gnas pa zhes bya ba de'i dbyibs su red pa ni rung bar gyur pa nyid yin no/ /'di skad bstan te/ mgul rgyan dang gdu bu rgyan can nyid la sogs pa gser dang dngul las byas pa nyid yin la/ rnam pa de lta bur 'dug pa yang yin na gser dang dngul de gnyis ni dngos gzhi'i byed pa po nyid yin no/ /pi wang dang 'od ma dang bal la ri dang ma ha ti dang su g+ho sha ka rnams ni rgyud dang bcas pa nyid yin na 'o zhes bya ba ni/ pi wang dang 'od ma dang bal la ri dang ma ha ti dang su g+ho sha ka rnams ni rgyud dang bcas pa nyid yin zhing rgyud yod pa nyid yin na rung bar gyur pa nyid yin no/ /'dir gzhung ni dge slong gis pi wang len na rgyud dang bcas pa len na ni ltung byed du 'gyur la/ rgyud med pa len na ni nyes byas su 'gyur ro/ /pi wang ji lta ba bzhin du 'od ma dang bal la ri dang ma ha ti dang su g+ho sha ka yang de bzhin no zhes gsungs pa yin no/ /dung dang rnga bo che dang rnga pa Ta ha dang rdza rnga rnams ni sgra 'byin na'o zhes bya ba ni/ de dag ni sgra 'byin du btub pa nyid yin na rung bar gyur pa nyid yin no/ /gzhu ni rgyud dang bcas pa nyid yin na'o zhes bya ba ni gzhu ni rgyud dang bcas pa nyid yin na rung bar gyur pa nyid yin no/ /ral gri dang ral gri 'khyog po dang ral gri so gcig pa dang mdung thung dang 'phang mdung dang lcags kyo rnams ni de nyid yin na'o zhes bya ba ni/ ral gri dang ral gri 'khyog po la sogs pa ni de dag nyid yin na rung ba nyid du gyur pa nyid yin no zhes bya ba'i tha tshig go/ /mda' dang lcags mda' dang mda' phyed lcags las byas pa rnams ni mde'u dang bcas pa nyid yin na'o zhes bya ba ni/ mda' la sogs pa ni mde'u dang bcas pa nyid yin na rung bar gyur pa nyid yin no/ /sku gzugs ni sku gdung dang bcas pa nyid yin na'o zhes bya ba ni/ rin po che las byas pa'i sangs rgyas kyi sku gzugs ni sku gdung dang bcas pa nyid yin na rung bar gyur pa nyid yin no/ /kha na ma tho ba yongs su rdzogs par 'gyur ro/ /sku gdung med pa nyid yin na ni nyes byas so/ /rin po che ma yin pa las byas pa la ni sku gdung med pa nyid yin na ltung ba med do/ /sku gdung dang bcas pa nyid yin na ni nyes byas so/ /mchod rten rin po che las byas pa nyid la sku gdung dang bcas pa nyid yin na ni dngos gzhi'o/ /gang yang rung ba gcig ma tshang na ni nyes byas so/ /nyan thos dang rang sangs rgyas kyi sku gzugs rin po che las byas pa sku gdung dang bcas pa nyid la ni de dag gi sku gdung dang bcas pa yang rung / sangs rgyas kyi sku gdung dang bcas pa yang rung ste nyes byas su 'gyur ro/ /sred med kyi bu la sogs pa'i gzugs ni rin po che las byas pa ma yin pa nyid de dag gi rus pa dang bcas pa yang rung sangs rgyas kyi sku gdung dang bcas pa yang rung ste nyes pa med do/ /rin po che las byas pa nyid yin na ni rdzas tsam pa las nyes byas su 'gyur ro/ /de la ston pa'i 'du shes nye bar bzhag par nyes pa med pa nyid do zhe bya ba ni/ sku gzugs de dag la ston pa'i 'du shes nye bar gzhag ste reg gam reg tu bcug pa la ni nyes pa med do/ /nor bu mching bu dang sog ma'i phreng ba dang mchu sbrang dang rdza rnga kha gcig pa dang gzhu dang mda' ltar bcos pa rnams ni phyed nyid do zhes bya ba ni/ de dag la reg gam reg tu bcug pa ni nyes byas so/ /nor bu mching bu la sogs pa ni dpe tsam du zad de/ sa las byas pa'i nor bu dag kyang phyed nyid do/ /mda' ltar bcos pa zhes bya ba ni shing bu la sogs pa dag la ltong tsam gtod cing 'ol phyir tsam mda' 'dra bar byas pa yin par rig par bya'o/ /gser gyi stegs bu ni mi rung ba nyid do zhes bya ba la/ 'dir gzhung ni zhu ba las dge slong gser gyi stegs bu la 'dug na nyes byas so zhes gsungs pa yin no// //bam po sum cu gsum pa/ 'jigs par gyur na rang gi la mi gnod na dge 'dun gyi dang mchod rten gyi dbyig dang gser sbas nas sam khyer te 'gro bar bya'o zhes bya ba ni rkun po la sogs pas 'jigs par gyur na gal te rang gi rdzas sbas nas sam khyer te 'gro ba la mi gnod na dge 'dun gyi dang mchod rten gyi dbyig dang gser yang sbas nas sam khyer te 'gro bar bya'o/ /gal te gnod par 'gyur na rang gi yo byad chud mi gzan pa'i phyir dang por rang gi chos dang ldan pa'i rdzas sba bar bya ba'am bskur bar bya'o/ /'dir gzhung ni dge slong gis dge 'dun gyi zong dag khyer te khyim pa dang dge tshul dag la byin pa dang de dag gis khyer te bros nas/ bcom ldan 'das kyis bka' stsal pa/ dge slong gis rang gis khyer te 'gro bar bya zhing gang gi tshe gtsug lag khang de nyid na gnas pa yin na de nyid du sbyin par bya'o zhes bya ba la sogs pa'i bar du gsungs pa dang / dge slong dag gis dge 'dun gyi zong dag khyer ba dang de dag gi lhung bzed dang chos gos 'khyams nas/ skabs de dge slong dag gis bcom ldan 'das la gsol ba dang / bcom ldan 'das kyis bka' stsal pa/ de ltar mi bya ste gang zag ni phongs par 'gyur gyi dge 'dun ni mi 'gyur bas de'i phyir dge slong gis dang por rang gi lhung bzed dang chos gos bskur bar bya zhing gal te nus na phyis dge 'dun gyi la yang 'bad par bya'o/ /mchod rten gyi la yang de bzhin no zhes gsungs pa yin no/ / sbed par gyur pa gang gis sbas nas sam/ khyer te zhe na de'i phyir/ dad pa can nam dge tshul gyis so zhes bya ba smras te/ khyim pa dad pa can nam dge tshul gyis so/ /dge tshul la ni dad pa ma smras kyang grub bo/ /med na rang gis so zhes bya ba ni/ de gnyis gcig kyang med na rang gi sa sbas nas sam khyer te 'gro bar bya'o/ /der brko bar bya'o zhes bya ba ni/ sba ba dang bskur ba der khyim pa dang dad pa can nam dge tshul gyis sa brko bar bya'o/ /de gnyis med na rang gis bya'o/ /bskur ba la ji ltar brko dgos she na/ rgyal rdzas de sa'i 'og tu sbas pa'am 'ga' zhig la thogs pa yin na de la yang brko dgos pa'i phyir ro/ /bral na sbyin no zhes bya ba ni/ 'jigs pa dang bral na rdzas sbas pa'am khyer ba de nyid du sbyin pa'o/ /bru ba yang de dang 'dra'o zhes bya ba ni/ sba ba dang bskur ba'i cho ga ji skad bstan pa bzhin du rdzas de sa'i 'og nas bru zhing dbyung ba yang de dang 'dra bar rig par bya ste/ dad pa can nam dge tshul gyis bru'o/ /de gnyis med na rang gis so/ /mi ma yin pa'i gnas na gal te de dag gi bsod nams kyis byung ba'i rin po che'i rang bzhin gyi sa gzhi dang them skas la sogs pa la ni nyes pa med do zhes bya ba ni/ mi ma yin pa lha dang klu la sogs pa'i gnas na de dag gis 'jig rten 'chags pa'i bsod nams kyis byung ba rin po che'i rang bzhin gyi sa gzhi dang them skas la sogs pa dag yod pa de la gal te reg pa la sogs pa la ni nyes pa med pa'o/ /zan gyi phyir snod gzhan med na rin po che las byas pa yang ngo zhes bya ba ni zan gyi phyir zangs ma las byas pa la sogs pa'i snod gzhan med na rin po che las byas pa yang nyes pa med do/ /yang ngo zhes bya ba'i sgra ni mi ma yin pa'i gnas na gal te/ de dag gi bsod nams kyis byung ba rin po che'i rang bzhin la ni nyes pa med do zhes bya ba'i rjes bsnyegs pa'i phyir ro/ /'dug pa'i phyir gnas pa la yang ngo zhes bya ba ni/ 'dug pa'i phyir rin po che'i rang bzhin gyi gnas mal la yang nyes pa med pa'o/ /yang ngo zhes bya ba'i sgra ni mi ma yin pa'i gnas na zhes bya ba la sogs pa dang / gzhan med na zhes bya ba la sogs pa'i rjes bsnyegs pa'i phyir ro/ /'dir gzhung ni dge slong dag lha dang klu'i gnas dag tu 'gro ba na de dag der zan la bos nas de dag gi gnas na gser la sogs pa las byas pa'i snod dag yod cing gzhan dag med na de dag de rnams la 'gyod cing mi za ba nas/ bcom ldan 'das kyis bka' stsal pa/ dge slong dag de lta bas na gang na snod gzhan dag rnyed pa med pa der gser la sogs pa las byas pa'i snod dag tu bza' bar rjes su gnang gi 'di la 'gyod par mi bya'o zhes bya ba'i bar du gsungs pa dang / de bzhin du de dag gis der rin po che las byas pa'i khri stan dag rnyed nas mi 'dug pa dang / bcom ldan 'das kyis bka' stsal pa/ de dag ni sems can de dag gi bsod nams las byung ba yin pas de dag la 'dug par bya'o zhes gsungs pa yin no/ /bzhon pas 'gro bar bya'o zhes bya ba ni/ glang po che'i bzhon pa la sogs pas 'gro bar bya'o/ /chos dang ldan pa'i don gyi dbang nyid kyis so zhes bya ba la/ chos dang mi 'bral ba'i dgos pa'i ched ni chos dang ldan pa'i don gyi dbang ngo / /de'i dngos po ni de nyid de des so/ /chos dang ldan pa'i dgos pa bsgrub pa'i ched kyis bzhon pas 'gro bar bya'o zhes bya ba'i tha tshig go/ /de la yang cha sgeg dang ldan pa nyid kyis mi bya'o zhes bya ba ni/ bzhon pa de la yang gser dang rgya dar la sogs pa dag gi cha sgeg dang ldan pa nyid kyis bzhon zhing 'gro bar mi bya ba'o/ /rgas pa dang na ba dag las gzhan pas mi bya'o zhes bya ba ni/ dge slong dgos pa dang bcas pa'i dbang gis kyang rgas pa dang na ba dag ma gtogs pa de las gzhan pas bzhon pas 'gro bar mi bya ba'o/ /'dir gzhung ni tshe dang ldan pa pi lin da'i bu la gzhon pa rjes su gnang ba dang drug sde dag bzhon pas 'gro bar rtsom nas/ bcom ldan 'das kyis bka' stsal pa/ des 'gro bar mi bya ste nyes dmigs de nyid yod do/ /de lta bas na gnyis kyis bzhon pas 'gro bar bya ste/ rgas pa rga bas nyam chung ba dang / nad pa sbyor mi bzod pas so zhes gsungs pa yin no/ /chos nyan du gzhug pa'i phyir rin po che las byas pa'i seng ge'i khri la mi rtag pas nye bar 'gyur ba'i yid la byed pas 'dug par bya'o zhes bya ba ni 'di la 'dug ste/ nyan pa po rnams la chos bsgrags par bya'o snyam pa'i don gyi phyir rin po che las byas pa'i seng ge'i khri la 'di ni de 'u re mi rtag pas nyen par 'gyur ba yin na snyam pa'i yid la byed pas 'dug par bya'o/ /'dir gzhung ni de nas khyim bdag mgon med zas sbyin gyis thos nas rin po che sna bzhi las byas pa'i seng ge'i khri bshams pa dag / dge slong dag de la mi 'khod nas/ bcom ldan 'das [(]gyis [,]kyis [)]bka' stsal pa/ 'du byed thams cad mi rtag go zhes bya ba ste de la 'dug nas chos bshad par bya'o zhes gsungs pa yin no/ /khyim du des bshams pa na gser dang dngul gyis spras pa dril bu g.yer kas gshibs pa'i gos dag la khyim pa'i yin no snyam du shes par byas nas kyang ngo zhes bya ba la/ khyim du zhes bya ba ni khyim gzhan du'o/ /des bshams pa na zhes bya ba ni/ khyim pas bshams pa na'o/ /gser dang dngul gyis spras pa zhes bya ba ni/ de dag gis brgyan pa'o/ /dril bu g.yer kas gshibs pa zhes bya ba ni/ dril bu chung ngu dag gis g.yogs pa'o/ /gos dag la zhes bya ba ni/ de ltar gser dang dngul gyis spras pa dril bu g.yer kas gshibs pa'i gos de dag la'o/ /khyim pa'i yin no snyam du shes par byas nas zhes bya ba ni/ gos de dag ni khyim pa'i yin no snyam du shes par byas nas so/ /kyang ngo zhes bya ba'i sgras ni mi rtag pas nyen par 'gyur ba'i yid la byed pas 'dug par bya'o zhes bya ba'i rjes bsnyegs pa'i phyir ro/ /'dir gzhung ni bram ze dang khyim bdag dad pa can dag gis dge slong rnams kyi phyir khyim gyi nang du gser dang dngul gyis spras pa gser gyi dril bu g.yer kas gshibs pa'i gos dag bshams pa dang / dge slong dag de la mi 'khod nas/ bcom ldan 'das kyis bka' stsal pa/ 'du byed thams cad mi rtag go zhes bya ba ste/ sbyin pa po rnams kyis sbyin par bya ba'i chos dag la yongs su longs spyad par bya'o zhes gsungs pa yin no/ /de la nor bus spras pa gser dang dngul gyis brgyan pa dag la yang ngo zhes bya ba ni/ seng ge'i khri de la nor bus spras pa gser dang dngul gyis brgyan pa'i gos dag la 'dug par bya'o/ /yang ngo zhes bya ba'i sgra ni mi rtag pas nyen par 'gyur ba'i yid la byed pas 'dug par bya'o zhes bya ba'i rjes bsnyegs pa'i phyir ro/ /'di ltar seng ge'i khri rnams sngar bstan pa 'di dag thams cad 'dus pa yin mod kyi/ 'on kyang gzhung las dngos su gsungs pa'i tshig yod pas mdo 'di logs shig tu byas so/ /de dag brub par bya'o zhes bya ba ni/ seng ge'i khri la gos rnam pa de lta bu bshams pa de dag dge slong dag gis brub par bya'o/ /khyim pa dang dge tshul med na sangs rgyas kyi sku gzugs la ston pa'i 'du shes nye bar gzhag pa rnams kyis chos dang ldan pa'i don gyi dbang nyid kyis reg pa la mi rung ba nyid med do zhes bya ba ni/ khyim pa dang dge tshul med na dge slong dag gis sangs rgyas kyi sku gzugs la ston pa'i 'du shes nye bar bzhag pa de dag gis sangs rgyas kyi sku gzugs rin po che las byas pa la chos dang ldan pa'i don gyi dbang gis reg pa la mi rung ba nyid med pa'o/ /mchod pa'i don gyi dbang nyid du ni gnyi ga yod na yang / reg pa la nyes pa med do/ /de'i rdzas la yang ngo zhes bya ba ni/ sangs rgyas kyi sku gzugs de'i rdzas rgyan la sogs pa la yang de gnyis med na reg pa la mi rung ba nyid med pa'o/ /mchod pa'i don gyi dbang nyid du ni de gnyis yod na yang reg pa la mi rung ba nyid med do/ /rgyan gdags pa bsten par mi bya'o zhes bya ba ni/ gdu bu rgyan can la sogs pa'i rgyan gdags pa bsten par mi bya ba'o/ /'dir gzhung ni de lta bas na dge slong gis lag rgyan dang rkang rgyan gdags par mi bya'o/ /'dogs na 'gal tshabs can du 'gyur ro/ /de bzhin du tshon sna lnga'i sngags skud gdags par mi bya'o/ /'dogs na 'gal tshabs can du 'gyur ro zhes bya ba'i bar du gsungs pa yin no/ /gso ba'i don du ni nyes pa med do/ /rgya bcang bar bya'o zhes bya ba ni/ sngar spyir btang ba byas pa'i dmigs kyis bsal ba yin no/ /rgyan rnam pa ji lta bu zhig ce na de'i phyir/ gdags su mi rung ba'o zhes bya ba smras te/ rgyan du gdags par mi rung ba nyid gang yin pa rnam pa de lta bu'i rgya bcang bar bya'o/ /ci zhig las byas pa zhe na/ de'i phyir ro nye'am zangs sam ra gan nam khar ba'am rgya skyegs kyi tshigs ma'am shing ngam rdo'am sa'am ba so'am rwa dag las byas pa'o zhes bya ba smras te/ de dag gang yang rung ba las byas pa'o/ /'dir gzhung ni gzhung gcig las dge slong gis gser la sogs pa las byas pa'i rgya bcang bar mi bya'o/ /sor gdub rgya yang bcang bar mi bya'o/ /'di ltar rgya ni rnam pa lnga ste/ ra gan las byas pa dang zangs las byas pa dang / khar ba las byas pa dang / ba so las byas pa dang / rwa las byas pa'o zhes gsungs pa dang / gzhung kha cig las 'di ltar rgya rnam pa brgyad po ro nye dang zangs ma dang ra gan dang khar ba dang rgya skyegs kyi tshigs ma dang / shing dang rdo dang sa las byas pa bcang bar bya'o zhes gsungs pa yin no/ /de yang rin po che las gzhan pa'i rdzas kyi dpe yin no/ /rtags ni dge 'dun gyi la ni dbus su 'khor lo ngos gnyis su ri dgas so/ /'og tu gtsug lag khang gi bdag po'i ming bri'o zhes bya ba ni/ dge 'dun gyi rgya la ni rtags 'di lta bu bya ste dbus su 'khor lo bris nas ngos gnyis su ri dgas gnyis bri bar bya zhing / 'khor lo'i 'og tu gtsug lag khang gi bdag po'i ming bri bar bya'o/ /gang zag gi la ni rus pa'i keng rus sam mgo bo'i thod pa'o zhes bya ba ni/ gang zag gi rgya la ni rus pa'i keng rus sam mgo bo'i thod par bri bar bya'o/ /so mangs kyis skra bshad par mi bya'o zhes bya ba ni/ so mangs kyis skra bshad par mi bya ba ste/ de la sogs pa ni longs pa'i dngos po yin pa'i phyir thams cad du sbyar bar bya'o/ /de ni dpe'o zhes bya ba ni/ so mangs zhes bya ba 'di ni bshad spyad du gyur pa'i rdzas gzhan gyi dpe yin te/ skra bshad pa'i spyad gzhan gyis kyang skra bshad par mi bya'o/ /me long gis bzhin lta bar mi bya'o zhes bya ba ni/ me long gis bzhin blta bar mi bya'o/ /chu yan chad kyis so zhes bya ba ni/ tha na chu yan chad kyis kyang ste/ chu yan chad nas mar dang 'bru mar la sogs pa rdzas gzhan gyi bar man chad kyis kyang bzhin blta bar mi bya'o/ /chu brtag pa'i ched nyid dang gnyer ma dang rma dang skra dkar lta ba dang / snga phyi'i mtshan ma bzung ba la ni ltung ba med do zhes bya ba ni/ chu brtag pa'i ched nyid dang rma dang gnyer ma dang skra dkar lta ba dang lus kyi gnas skabs snga phyi'i mtshan ma gzung ba'i phyir lta ba la ni ltung ba med do/ /dpral ris gsum bsten par mi bya'o zhes bya ba ni/ dpral bar sa dkar gyis ri mo gsum mi bya ba'o/ /'dir gzhung ni drug sde dag sa dkar gyis dpral ris gsum du byas te/ bsod snyoms la zhugs pa nas/ bcom ldan 'das kyis bka' stsal pa/ dge slong gis dpral ris gsum mi bya'o zhes bya ba'i bar du gsungs pa yin no/ /gi wang gis bsku ba bsten par mi bya'o zhes bya ba ni/ des kyang bsku bar mi bya'o/ /dri dag gis kyang mi bya'o zhes bya ba yang / bsku bar mi bya'o zhes bya bar sbyar ro/ /gso ba'i ched nyid du ni ma gtogs so/ /bsod nams 'dod pas rkang pa gnyis la lus bsku ba'i dris skud pa bsten par bya'o zhes bya ba ni/ sbyin bdag bsod nams 'dod pas dge slong rnams kyi rkang pa gnyis la lus bsku ba'i dris skud pa bsten par bya'o/ /lus bsku ba'i dri zhes bya ba ni/ lus la bsku bar bya ba'i dri gang yin pa'o/ /de bsten par bya'o zhes bya ba ni/ bdag gir bya ba'o/ /'dir gzhung ni dad pa can dag gis dge slong dag khyim gzhan du mgron du bos te zan sbyin pa na de dag de dag gi rkang pa dag la lus bsku ba'i dri 'bul bar byed nas dge slong dag mi len pa nas bcom ldan 'das kyis bka' stsal pa/ rkang pa dag gis dri bdag gir bya'o zhes gsungs pa yin no/ /de de'i mdun du dor bar mi bya'o zhes bya ba ni/ sbyin bdag bsod nams 'dod pas de'i mdun du dri de dor bar mi bya'o/ /'dir gzhung ni dge slong dag gis blangs nas de dag nyid kyi mdun du dor bar byed pa dang / bcom ldan 'das kyis bka' stsal ba/ de dag nyid kyi mdun du dor bar mi bya'o zhes gsungs pa yin no/ /da ni bsku bar gtogs pa'i cho ga brjod par bya ste/ de dag gis bskus pa dge 'dun gyi nang du 'du bar mi bya'o zhes bya ba ni/ dge slong dri de dag gis bskus pa dge 'dun tshogs pa'i nang du 'du bar mi bya'o/ /khyim pa dag la chos bstan par mi bya'o zhes bya ba ni/ dge slong dri de dag gis bskus pas khyim pa'i nang du song ste/ de dag la chos bstan par mi bya'o/ /khyim dag tu 'gro bar mi bya'o zhes bya ba ni/ dge slong dri dag gis bskus pa bsod snyoms la sogs pa la khyim dag tu 'gro bar mi bya'o/ /mjug tu khrus bya'o zhes bya ba ni/ bsku ba'i las zin pa'i mjug tu khrus bya'o/ /'dir gzhung ni dge slong dri 'chang bas dri yod bzhin du dge 'dun gyi nang du 'du bar mi bya'o/ /bram ze dang khyim bdag 'ongs shing lhags pa rnams la chos bstan par mi bya'o/ /bram ze dang khyim bdag gi khyim dag tu 'gro bar mi bya'o/ /gang gi tshe sos par gyur pa de'i tshe na khrus byas te/ dri bsal nas dge 'dun gyi nang du 'jug par bya'o zhes gsungs pa yin no/ /de dag blang bar bya'o zhes bya ba ni/ dri de dag blang bar bya'o/ /phreng ba'i rgyu dag kyang ngo zhes bya ba yang blang bar bya'o/ /mchod rten la dbul bar bya'o zhes bya ba ni dri dang phreng ba'i rgyu blangs pa de dag mchod rten la dbul bar bya ba'o/ /su'i mchod rten la zhe na de'i phyir/ nyan thos kyi la yang ngo zhes bya ba smras te/ yang ngo zhes bya ba'i sgra las sangs rgyas kyi 'ba' zhig la 'bul bar ma zad gyi zhes bya bar shes so/ /sbyin par byed par mngon par ma dad na mgo logs sam rkang pa logs su bya'o zhes bya ba ni/ dri dang phreng ba rgyu de dag mchod rten la dbul bar sbyin par byed pa mngon par ma dad na rang gi mgo logs kyi sngas sam rkang pa logs kyi rten mar bzhag par bya'o/ /ji ltar zhe na de'i phyir/ sgo'i byang thad ma yin par ro zhes bya ba smra ste/ sgo'i byang thad ma gtogs par ro/ /gzhi gang la de nyid bzhag par bya zhe na/ de'i phyir/ rtsig pa la'o zhes bya ba smras te/ rtsig pa'i ngos su'o/ /dri las dmigs kyis bsal bar gyur ba phreng ba rgyu'i cho ga gzhan brjod par bya ste/ der khab bam tsher ma btsugs pa la phreng ba rgyu dag bcang bar bya'o zhes bya ba ni/ rtsig ngos brtan pa der khab bam tsher ma btsugs pa la phreng ba rgyu de dag bcang bar bya'o/ /mig la phan pa'i dri zhim po dus dus su bsnam par bya'o zhes bya ba ni/ mig la phan pa mig sman ga bur dang ut+pa la sngon po la sogs pa dri zhim po dag dus dus su snar bsnam par bya ba ste/ rtag tu ni ma yin no/ /bram ze'i srad bu thogs pa bsten par mi bya'o zhes bya ba ni/ bram ze'i srad bu zhes bya ba mchod sbyin dag byed srad bu'i se ral phreng thag thogs pa bsten par mi bya ba'o/ / sngags skud kyang ngo zhes bya ba yang / sngags skud thogs pa yang bsten par mi bya'o zhes bya bar sbyar ro/ /nad pa ni ma gtogs so zhes gsungs pas de'i phyir gnas gar gdags pa'i bye brag bstan pa'i phyir/ gso ba'i phyir ni dpung ba g.yon par ro zhes bya ba smras te/ gso ba'i phyir ni tshon sna lnga'i sngags skud thogs pa yang bsten par bya'o/ /lag pa g.yon pa'i gru mo'i gong gi dpung par gdags par bya'o/ /gar bab bab tu mi dor ro zhes bya ba ni/ sos par gyur na sngags skud de gar bab bab tu dor bar mi bya'o/ / gal te lhag ma dang bcas par gyur na chos gos kyi mtha' ma'am ska rags la gdags so zhes bya ba ni/ gal te nad kyi lhag ma dang bcas par gyur na sngags skud de chos gos kyi grwa'am ska rags la gdags par bya'o/ /gal te ma gyur na ka ba'am rtsig pa'i gseb tu gzhug go zhes bya ba ni/ gal te nad kyi lhag ma dang bcas par ma gyur na sngags skud de ka ba'i gseb bam rtsig pa'i gseb tu gzhug par bya'o/ /gar dang glu dang rol mo kun du spyad par mi bya'o zhes bya ba la/ gar ni bro gar ro/ /glu ni glu dbyangs so/ /rol mo ni pheg rdob la sogs pa ste/ de dag kun du spyad par mi bya ba'o/ /bslab par mi bya'o zhes bya ba ni/ gar la sogs pa'o/ /bzlas par mi bya'o zhes bya ba ni/ gar la sogs pa lus kyis bzlas par mi bya'o/ /blta ba'i phyir 'gro bar mi bya'o zhes bya ba ni/ gar la sogs pa la'o/ /dge slong ma kun du gar byed du mi gzhug go zhes bya ba ni/ dge slong ma dang lhan cig kun du gar byed du mi gzhug pa ste/ kun du gar byed pa zhes bya ba ni/ tshom bu tshom bur bro gar byed pa ste/ tshom par byed ces bya ba'i tha tshig go/ /ston pa'i yon tan yang dag par bsgrags pa dang rgyun chags gsum pa gdon pa la dbyangs kyi nga ro bya'o zhes bya ba ni/ ston pa sangs rgyas bcom ldan 'das kyi yon tan yang dag par bsgrag pa stod rabs gdon pa dang rgyun chags gsum gdon pa la ni dbyangs kyi nga ros gtang rag bya'o/ /gzhan gyi dus su ni mi bya ste/ glu rgyang gi khongs su gtogs pa'i phyir ro/ /de dag dben pa'i phyogs su bslab par bya'o zhes bya ba ni/ dbyangs kyi nga ro de dag dben pa'i phyogs su bslab par bya'o/ /tho 'tshams pa dad kun du rtse ba dang kun du ca co 'don pa dang rgod pa dang dregs pa dang lus la brdeg pa dag mi bya'o zhes bya ba la/ tho 'tshams pa zhes bya ba ni gzhan la co 'dri ba'o/ /kun du rtse ba zhes bya ba ni 'jo sgeg byed pa'o/ /kun du ca co 'don pa zhes bya ba ni sgra skad chen po nyid 'byin pa'o/ /rgod pa zhes bya ba ni lag pa dang rkang pa la sogs pa rkyong ba'o/ /dregs pa zhes bya ba ni ngal bar byed pa'o/ /lus la brdeg pa zhes bya ba ni/ phan tshun bzhad gad bya bar snun pa ste de dag mi bya'o/ /rgod pa'i bsam pas lus dang ngag gi rnam par 'gyur ba mi bya'o zhes bya ba ni/ rgod pa'i bsam pas lus dang ngag gi rnam par 'gyur ba mi bya'o zhes bya ba'i tha tshig go/ /'dir gzhung ni ko lpags kyi gzhi las/ lag 'gros mkhan rab tu byung ba zhig rkang khrus sar rkang pa gnyis bkrus nas kha chus bkang ste rma bya'i 'gros kyis 'dug pa dang / drug sde dag gis khas glu blangs pas rol mo'i glu brtsams pa'i skabs de dge slong dag gis bcom ldan 'das la gsol ba nas/ sangs rgyas bcom ldan 'das kyis dge slong de la dge slong khyod kyi bsam pa ji lta bus de ltar byas zhes smras pa dang / btsun pa gnas mal bskyab pa'i don du cung zad dang rgod pa'i bsam pa cung zad kyis bgyis so/ /bcom ldan 'das kyis bka' stsal pa/ gnas mal bskyab pa'i bsam pa gang yin pa de la ni ltung ba med do/ /rgod pa'i bsam pas byas pa la ni nyes byas so/ /drug sde dag gis kyang gsol pa/ btsun pa smad pa'i bsam pa cung zad dag dang / rgod pa'i bsam pa cung zad kyis bgyis so/ /bcom ldan 'das kyis bka' stsal pa/ smad pa'i bsam pa dag gang yin pa de la ni ltung ba med do/ /rgod pa'i bsam pas byas pa de la ni nyes byas so zhes gsungs pa yin no/ /'di la ltung ba dang ltung ba med par ji ltar rnam par bzhag ste/ ci sems rigs mi mthun pas bar du chod pa dag ltung ba tha dad pa byed pa nyid yin nam/ 'on te thams cad gcig tu bsdus nas ltung ba gcig byed pa nyid yin zhe na/ rigs mi mthun pas bar du chod pa dag la ltung ba gcig tu bstan pa'i phyir/ 'dres pa ni char bsdam mo zhes bya ba smras te/ nyon mongs pa can dang / nyon mongs pa can ma yin pa'i sems rnams 'dres shing phan tshun rigs mi mthun pas bar du chod pa nyid ni char bsdam par bya ste/ nyon mongs pa can gyi cha rnams ni nyon mongs pa can dang lhan cig bsdam par bya/ nyon mongs pa can ma yin pa'i cha rnams kyang nyon mongs pa can ma yin pa dang lhan cig bsdam par bya ste/ rgod pa'i kun nas bslang ba'i sems thams cad kyis 'jug pa gcig nyid yin pa'i phyir ltung ba gcig gi rgyu nyid yin no/ /dper na srog gcod pa la sogs pa dag la sbyor ba'i sems rigs mi mthun pas chod pa rnams kyang ltung ba gcig gi rgyu nyid yin pa bzhin te/ rigs mi mthun pas chod pa rnams kyang sbyor ba'i rgyun ma chad pa'i phyir ro/ /snod brgyud pas zas kyi bya ba mi bya'o zhes bya ba ni/ ji ltar chang 'thung ba dag phan tshun skom snod brgyud pas chang 'thung bar byed pa de ltar mi bya ba'o/ /me tog rna rgyan brgyu bar mi bya'o zhes bya ba ni/ me tog la sogs pa dag gis rna rgyan brgyu bar mi bya ba ste/ de ni bzo rjes su bsgrub pa mi bya'o zhes bya ba'i spros pa yin no/ /gdags par mi bya'o zhes bya ba ni/ me tog rna rgyan lus la gdags shing bcang bar mi bya'o zhes bya ba'i tha tshig go/ /'dis ni phreng ba rgyu 'dogs pa thams cad dgag pa byas pa yin no/ /ngo so las byung ba sbyin par mi bya'o zhes bya ba la/ ngo so las byung ba zhes bya ba ni/ gar mkhan gyi ngor lta lta nas mgu ba'i bya dga' sbyin pa ste dge slong gis de sbyin par mi bya'o/ /mi rings par rgyug par mi bya'o zhes bya ba ni/ gtang ba med par rgyug par mi bya ba'o/ /myur ba dang mchong bar mi bya'o zhes bya ba la/ myur ba zhes bya ba ni/ drag tu 'gro ba'o/ / mchong ba zhes bya ba ni/ mchong zhing 'gro ba ste/ de dag mi bya'o/ /brla dang lag pa nya ltar bskor bar mi bya'o zhes bya ba la/ brla bskor bzhes bya ba ni/ brla ya gcig sa la phab ste lus bskor ba'o/ /lag pa bskor ba zhes bya ba ni lag pa phyar te lus la bskor ba'o/ / nya ltar bskor ba zhes bya ba ni/ nya ltar phyis gan du rgyal zhing bskor ba ste/ de ltar bskor bar mi bya'o/ /chur gseg ma gdab par mi bya'o zhes bya ba ni/ chu'i nang na 'phyo ba'i gseg ma dag chur 'debs pa ste de mi bya ba'o/ /chur rdza rnga kha gcig pa dang rnga bo che ltar brdung bar mi bya'o zhes bya ba ni/ chu la rdza rnga kha gcig pa dang / rnga bo che ltar brdung zhing sgra dbyung bar mi bya ba'o/ /rdzab la phyil mo nyug par mi bya'o zhes bya ba ni/ rdzab 'dred pa la phyil mo nyug par mi bya ba'o/ /glang bo che'i skad dang rta'i skad dang khyu mchog gi skad dang rma bya'i skad dang khu byug gi skad mi dbyung ngo zhes bya ba ni/ de dag gi sgra skad 'dra ba'i skad dbyung bar mi bya ba'o/ /khas dung dang sil khrol dang rnga bo che'i skad mi bya'o zhes bya ba ni/ khas dung la sogs pa'i skad mi bya'o/ /longs pa'i gzhir gtogs pa'i ltung byed do zhes bya ba de bshad zin to/ / //khrus byed pa'i ltung byed smra bar 'dod nas/ 'og nas gzhan gyi dus su khrus byed na'o zhes 'byung ba gang las gzhan yin pa'i mtshams bstan pa'i phyir/ so ga rnams kyi zla ba lhag ma phyed dang gnyis dang dbyar rnams kyi dang po las so zhes bya ba smras te/ so ga rnams kyi zla ba lhag ma phyed dang gnyis las zhes bya ba ni/ dbyar zla ra ba tshes nas dbyar zla ra ba nya'i bar gyi zla ba phyed dang dbyar zla ra ba nya nas dbyar zla 'bring po nya'i bar gyi zla ba gcig ste/ zla ba phyed dang gnyis po de las gzhan pa'i dus su'o/ /dbyar rnams kyi dang po las zhes bya ba ni/ dbyar gyi zla ba dang po dbyar zla 'bring po nya nas dbyar zla tha chungs nya'i bar gyi zla ba gcig las gzhan pa'i dus su'o/ /so ga rnams kyi zla ba lhag ma phyed dang gnyis dang dbyar rnams kyi dang po zla ba gcig las gzhan pa'i dus su khrus byed na zhes bya ba'i tha tshig go/ / zla ba phyed dang gsum po de dag la ni tsha ba'i gnyen po'i phyir khrus byed pa rjes su gnang ste/ de las gzhan pa'i dus su yang nyi ma de la tsha ba skyes na khrus bya'o/ /ci dge slong thams cad la der kha na ma tho bar 'gyur ram zhe na de'i phyir/ gos med pa'i zas gnyis pa rnyed pa'i rnam pa gang yin pa la'o zhes bya ba smras te/ mdo 'di ni 'dra bar bstan pa yin no/ /zas gnyis pa gang la gos med pa de ni gos med pa'i zas gnyis pa ste/ gos med pa'i zas gnyis pa de rnyed pa'i dge slong gis dang du blangs pa dang zos pa'i kha na ma tho ba rnams pa ji lta bur 'gyur ba ste/ na ba ma yin pa dang las ma byas pa dang lam du ma zhugs pa la kha na ma tho ba 'dir 'gyur ro zhes bya ba'i tha tshig go/ /ci gnas skabs gzhan thams cad la bab pa la yang kha na ma tho ba 'dir 'gyur ram zhe na de'i phyir/ rlung gis ma bskyod pa na'o zhes bya ba smras te/ gal te rlung gis bskyod pa dang g.yengs par ma gyur na'o/ /'dir tshad ci tsam gyis na bskyod pa nyid yin par rig par bya zhe na/ de'i phyir/ gos kyi grwa 'gul ba ni de'i mtha' yin no zhes bya ba smras te/ gos kyi mtha' zhes bya ba gos kyi phyogs gcig bsgul zhing bskyod pa nyid de'i mtha' yin no/ /gnas skabs de dag 'ba' zhig tu yang ma zad de/ 'di ltar gzhan dag la yang bstan pa'i phyir/ char gyis ma phog pa la'o zhes bya ba smras te/ dge slong gang la char gyis ma phog pa de ni char gyis ma phog pa ste/ gzhan gyi dus su khrus byed pa'o/ /chus phog pa gang yin pa de ni 'dir char gyis phog pa yin no/ /char gyis phog pa 'di'i mtha' gang yin zhe na de'i phyir/ de'i ni thigs pa gnyis kyis phog pa'o zhes bya ba smras te/ char gyis phog pa de'i mtha' ni thigs pa gnyis kyis phog pa'o/ /gang la zhe na/ de'i phyir/ lus la'o zhes bya ba smras te/ gos la ma yin no/ /'dir gzhung ni than chu'i thigs pa gnyis sam/ gsum gyis lus la phog par gyur na zhes gsungs pa yin no/ /bsgrub pa'i tshul gyis ni 'di skad bstan pa yin te/ na ba dang las byas pa dang lam du zhugs pa dang rlung gis bskyod pa dang / char gyis phog pa'i dge slong la ni gzhan gyi dus su khrus byed pa la nyes pa med de dus la bab pa nyid yin pa'i phyir ro/ /ci zhig rjes su bsgrub na khrus byed pa'i ltung byed du 'gyur zhe na/ de'i phyir/ gzhan gyi dus su khrus kyi nyin mo ma yin pa zhag bco lnga'i mdun rol du khrus byed na'o zhes bya ba smras te/ gzhan gyi dus su zhes bya ba ni/ sngar so ga rnams kyi zla ba lhag ma phyed dang gnyis dang dbyar rnams kyi dang po zla ba gcig ste/ zla ba phyed dang gsum bstan pa gang yin pa de las gzhan gyi dus su'o/ /khrus kyi nyin mo ma yin pa zhag bco lnga'i mdun rol du zhes bya ba ni/ bcom ldan 'das kyis zla ba phyed phyed cing khrus kyis shig ces bka' stsal pa las gang gi nyin mo khrus byas par gyur pa nas brtsams te/ zhag bcu bzhi tshun chad kyi bar du ni khrus byar mi rung bas de ni khrus kyi nyin mo ma yin pa yang yin la/ zhag bco lnga'i mdun rol yang yin pas der ro/ /khrus byed na'o zhes bya ba ni/ dus der khrus byed na ltung byed do zhes bya ba'i tha tshig go/ /bcom ldan 'das kyis zla ba phyed phyed cing khrus kyis shig ces gsungs pa yang gang gi nyin mo khrus byas par gyur pa de nyid kyi nyin mo yang khrus gzhan mi bya ste nyi ma de nyid kyang nyi ma gcig tu brtsi zhing de nas brtsams te zhag bco lnga'i mdun rol zhag bcu bzhi pa tshun chad du khrus byed na ltung byed du gsungs pa yin te/ de ltar brtsis na bcom ldan 'das kyis zla ba phyed phyed cing khrus kyis shig ces gsungs pa gang yin pa de dang mthun par 'gyur gyi/ gal te gang gi nyin mo khrus byas par gyur pa de'i phyir de'i nyin par gyi nyi ma gang yin pa de nas bgrang bar rtsom na ni de'i tshe nyi ma bcu drug pa la khrus bya bar 'gyur te/ bco lnga p a la khrus bya'o zhes gsungs pa dang 'gal bar 'gyur bas de'i phyir gang gi nyin mo dge slong khrus byed pa na khrus zin pa nas brtsams te de nyid kyi nyin mo yang khrus gzhan mi bya ba yin pas nyi ma de nyid ma gtogs par de phyin chad nyi ma bco lnga ni khrus kyi nyi ma ma yin pa zhes bya ba ste/ de dag tu khrus byed na ltung byed du 'gyur ro/ /khrus ji ltar bya zhe na/ de'i phyir/ dbang bskur bas sam 'jug pas so zhes bya ba smras te/ dbang bskur ba zhes bya ba ni/ bum pa la sogs pas lus kyi steng nas dbang bskur ba'i tshul du chu blugs pa ste des bkru ba'o/ /'jug pas zhes bya ba ni/ chu'i nang du zhugs pa ste des bkru ba'o/ /chus lus kyi tshad ji tsam du khyab na khrus yin zhe na de'i phyir/ lte bar son na'o zhes bya ba smras te/ chus lte bar son na khrus yin no/ /de yang dbang bskur bas spyi bo nas brtsams te chus lte bar son pa dang / 'jug pas rkang mthil nas brtsams te lte bar son pa rnam pa gnyi ga la kha na ma tho ba rdzogs par 'gyur ro/ /dbang bskur bas mgo ma gtogs pa lag pa dang rkang pa'i phyogs 'khru ba dang / de bzhin du 'jug pas kyang rkang mthil las gzhan pa lag ngar dang byin pa la sogs pa'i phyogs 'khru na nyes byas so/ /gal te lte ba'i ltag yan chad nyi tshe chus 'khru zhing 'og tu ma son pa dang / 'og man chad nyi tshe chus 'khru zhing ltag tu ma son pa yang nyes byas so/ /gal te dbang bskur ba dang 'jug pa gnyi gas dus gcig tu khrus rtsom pa ni de gnyis lte ba'i phyogs su gcig tu phrad par gyur pa la ni kha na ma tho ba yongs su rdzogs pa gcig tu 'gyur ro/ /'di ltar yongs su rdzogs pa'i ngo bo nyid yin pas de'i phyir lte ba'i phyogs kyi gong ngam 'og gi char phyin pa de ni 'dir lte ba zhes smos pa la dngos su gnas pa yin no/ / de lta bas na lte bar ma phyin du zin kyang phyogs bsdoms te chog par gyur na ltung byed du 'gyur la gal te ma chog na ni nyes byas so/ /mdun rol du ni nyes byas so zhes bya ba ni/ chu la reg pa'i mdun rol du sbyor bar byed pa ni sbyor ba'i nyes byas yin par rig par bya'o/ /chu ma yin pas kyang ngo zhes bya ba ni/ 'bru mar dang mar dang phrum khu dang 'o ma la sogs pa dag gis khrus byed na nyes byas su 'gyur ro/ /'dir gzhung ni btsun pa re zhig dge slong gis chu ma lags pa de las gzhan pa'i rdzas de dag gis khrus bgyid na ltung ba cir 'gyur/ nyes byas so zhes gsungs pa yin no/ /thams cad la dus dag yod kyang byin gyis ma brlabs na'o zhes bya ba ni/ khrus 'ba' zhig tu ma zad kyi/ bslab pa'i gzhi thams cad la dus dag yod du zin kyang byin gyis ma brlabs shing mngon sum du ma byas na nyes byas so/ /'dir gzhung ni zhu ba las btsun pa dge slong gis dus byin gyis ma brlabs pa de la yang ltung bar 'gyur ba mchis sam/ nye ba 'khor yod de sbyor ba btang nas byin gyis mi rlob na'o zhes gsungs pa yin no/ /sbyor ba gang gis khrus bya ba de btang nas yul yod pa yang mngon sum du ma byas shing byin gyis ma brlabs na'o zhes bya ba'i tha tshig go/ /zhag bco lnga la khrus kyi nyin mo la khrus bya ba gang yin pa de ni grags pa yin pas der khrus byed pa la ni dus byin gyis brlab par bya mi dgos so/ /don gzhan la gzhol bas chu nyams su myong ba ni khrus ma yin no zhes bya ba ni/ khrus la gzhol ba nyid kyis chu nyams su myong ba gang yin pa de ni khrus yin gyi/ dgos pa gzhan gyi bsam pas chu nyams su myong ba gang yin pa de ni khrus ma yin no/ /de'i phyir ma bsams par rgal ba dang brgyal ba la gdab pa dag la ni ltung ba med do zhes bya ba la/ 'dir gzhung ni dge slong dag chu klung rgal bar byed do zhes gsungs pa dang gzhung gzhan las kyang brgyal ba la chu dbang bskur ba dang / zam pa las ltung ba med do/ /chu klung rgal bar byed pa dang chus gang ba las mchod par byed pa la ltung ba med do zhes gsungs pa yin no/ /a smra pa ran ta'i yul dag na ni 'di med par shes par bya'o zhes bya ba ni/ a smra pa ran ta zhes bya ba'i yul dag na ni khrus la nges pa ni med par shes par bya'o/ /'dir gzhung ni a smra pa ran ta'i yul dag tu khrus bya bar rjes su gnang ngo zhes gsungs pa yin no/ /de'i phyir de ni blo gros de nye bar bzhag ste dus ma yin par yang khrus bya'o/ /cho ga btsan po yod na bag yangs su bya ba la brten par mi bya'o zhes bya ba ni/ 'di ni thams cad kyi dbang du byas pa yin te/ cho ga btsan po zhes bya ba ni/ bcom ldan 'das kyis bkas bcad pa dam po ste/ zla ba phyed phyed cing khrus gyis shig /de las 'dums par byas na ltung byed do zhes bya ba la sogs pa lta bu'o/ /bag yangs su zhes bya ba ni bag yangs su bya ba'i cho ga ste dus la bab pa ma gtogs te na ba dus so/ /las dus so/ /lam dus so/ /rlung dus so/ /char dus so zhes bya ba la sogs pas bslab pa'i gzhi glong cing bag yangs su mdzad pa'o/ /de ltar cho ga btsan po yod na thams cad du bag yangs su bya ba la brten par mi bya'o/ /'dir gzhung ni btsun pa bcom ldan 'das kyis yul mtha' 'khob dag tu 'dul ba 'dzin pa dang lnga'i tshogs kyis bsnyen par rdzogs par bya'o zhes gang gsungs pa de la/ btsun pa gal te bcu'i tshogs mchis bzhin du 'dul ba 'dzin pa dang / lnga'i tshogs kyis bsnyen par rdzogs par bgyid na bsnyen par rdzogs zhes bgyi'am/ nye ba 'khor bsnyen par rdzogs zhes bya ste/ bsnyen par rdzogs par byed pa dag la ni 'gal tshabs can du 'gyur ro zhes gsungs pa yin no/ /de lta bas na zla ba phyed phyed cing khrus bya'o zhes bya ba la sogs pa lta bu'i cho ga btsan po yod na ni na ba dang las dang lam dang rlung dang char dus so zhes bya ba la sogs pa lta bu'o/ /cho ga bag yangs su bya ba la brten par mi bya'o/ /khrus byed pa'i ltung byed do zhes bya ba de bshad zin to// //ci zhig byas na dud 'gro gsod pa'i ltung byed du 'gyur zhe na/ de'i phyir/ gsod pa'i sems kyis dud 'gro la bsnun na'o zhes bya ba smras te/ gsod pa'i sems zhes bya ba bsad pa'i bsam pas dud 'gro zhes bya ba phyugs la sogs pa la bsnun na'o zhes bya ba mtshon la sogs pas bsnun na'o/ /ci bsnun pa'i dus nyid na'am zhe na de'i phyir/ gzhi des de'i tshe'am gzhan gyi tshe shi na'o zhes bya ba smras te/ gzhi des shi zhes bya ba ni/ gsod pa'i sems kyis bsnun pa'i gzhi des so/ /de'i tshe'am zhes bya ba ni/ bsnun pa'i dus de nyid kyi tshe shi na'o/ /gzhan gyi tshe shi na'o zhes bya ba ni/ bsnun pa'i dus kyi 'og tu dus gzhan gyi tshe shi na'o/ /sbyor ba gcig gis byas na yang gsad par bya ba ji snyed pa re re las ltung byed re rer 'gyur ro/ /lus dang de dang 'brel ba ni tha mi dad do zhes bya ba la sogs pa thams cad gsod pa'i pham par 'gyur ba las rig par bya'o/ /sems can gyi gzugs sems can ma yin pa la ni nyes byas byed pa nyid do zhes bya ba ni/ sems can gyi gzugs zhes bya ba sems can gyi dbyibs ri mo la sogs pa dngos sems can ma yin zhing sems can gyi grangs su bgrang ba ma yin pa la bsnun na nyes byas byed pa nyid yin no/ /'dir gzhung ni zhu ba kha cig las shing las byas pa'am sa las byas pa'i gzugs la bsnun na nyes byas so zhes gsungs pa yin te/ dud 'gro'i rnam pa nyid la ni 'dir gtogs pa'i kha na ma tho bar 'gyur la/ gzhan gyi rnam pa nyid la ni mi gsod par gtogs pa'i kha na ma tho bar 'gyur ro/ /dud 'gro gsod pa'i ltung byed do zhes bya ba de bshad zin to/ / //ji zhig rjes su bsgrub na 'gyod pa bskyed pa'i ltung byed du 'gyur zhe na/ de'i phyir/ khyod bsnyen par rdzogs pa ma yin zhing / pham par gyur pa byung ngo zhes bya ba la sogs pa dge slong ma yin pa'i don gyis 'gyod pa bskyed na'o zhes bya ba smras te/ khyod bsnyen par rdzogs pa ma yin no zhes bya ba'i tshig de ni bsnyen par rdzogs pa'i dngos po med par ston pa yin no/ /pham par gyur pa byung ngo zhes bya ba'i tshig de ni nyams pa nyid du ston pa yin te/ dge slong gang la tshe dang ldan pa khyod la dge sbyong gi tshul ga la yod bram ze'i tshul ga la yod de/ tshe dang ldan pa ni bram ze rab tu byung ba ma yin no zhes bya ba la sogs pas 'gyod pa bskyed pa'o/ /dge slong ma yin pa'i don gyis zhes bya ba ni dge slong nyid ma yin pa'i don dgos pa'i tshig gang la yod pa de ni dge slong ma yin pa'i don te/ dge slong ma yin pa nyid go bar byed pa'i tshig des 'gyod pa bskyed na kha na ma tho bar 'dir 'gyur ro/ /'dir ltung ba rnam par gzhag pa'i bsam pa'i dbang gis te gal te mi'i skyon nas smra ba'i bsam pas go bar byed na ni der gtogs pa'i kha na ma tho bar 'gyur ro/ /bde ba la reg par mi gnas pa'i bsam pas go bar byed na ni 'gyod pa bskyed pa 'dir gtogs pa'i kha na ma tho bar 'gyur ro/ /skur pa gdab pa'i bsam pas go bar byed na ni dge 'dun lhag mar gtogs pa'i kha na ma tho bar 'gyur ro/ /thams cad kyi bsam pa nyid kyis na ni thams cad du gtogs pa'i kha na ma tho bar 'gyur ro/ /mi'i skyon nas smra ba dang 'gyod pa bskyed pa dang dge 'dun lhag ma zhes bya ba ni rnam par rig byed gcig gis te sdom pa yang dag par blangs pa nad pa dang 'dra'o/ /su la 'gyod pa bskyed na zhe na de'i phyir/ dge slong ma'o zhes bya ba smras so/ /ci bsam pa gang yang rung bas sam zhe na de'i phyir/ bde ba la mi reg pa bskyed pa'i sems kyis so zhes bya ba smras te/ 'di bde ba la mi reg pa zhes bya ba ni/ dge slong la yid la gcags pa bskyed pa gang yin pa de yin par rig par bya'o/ / bzhad gad kyis kyang ngo zhes bya ba ni gal te bzhad gad kyis kyang 'gyod pa bskyed par byed na de lta na yang kha na ma tho ba yongs su rdzogs par 'gyur ro/ /ci 'gyod pa skyed pa kho na'am zhe na ma yin te/ de'i phyir/ 'gyod pa ma skyes na yang ngo zhes bya ba smras te/ gal te dge slong de 'gyod pa ma skyes su zin kyang de lta na yang kha na ma tho ba yongs su rdzogs par 'gyur ro/ /gzhan gyis ni nyes byas so zhes bya ba ni/ dge slong ma yin pa'i don las gzhan pa dge 'dun lhag ma la sogs pa'i don gyis 'gyod pa bskyed na nyes byas su 'gyur ro/ /'gyod pa bskyed pa'i ltung byed do zhes bya ba de bshad zin to/ / //ji zhig byas na ga ga tshil byed pa'i ltung byed du 'gyur zhe na de'i phyir/ dge slong la sor mo'am khu tshur ram gru mo'am phrag pa'am mgo'am glo 'am rgyab bam rked pa'am brla'am pus mo'am byin pa'am rkang pa'i mthe bong la sogs pa dag gis ga ga tshil byed pas reg na'o zhes bya ba smras te/ dge slong la sor mo la sogs pa dag gis ga ga tshil byed pas zhes bya ba skyi g.ya' bar byed pas rig na'o zhes bya ba lus kyi dbang po dang lus kyi dbang por reg pa de gnyi gas nyams su myong na kha na ma tho ba 'dir 'gyur ro/ /de ltar yang 'dir gzhung ni rang gi'am gzhan gyi'am gnyi ga'i lus kyi dbang po nyams pa nyid la reg na nyes byas so zhes gsungs pa yin no/ /de lta bas na sogs pa zhes bya ba'i sgras ni rang gi lus kyi yan lag gzhan dag kyang 'phangs pa yin gyi/ gos la sogs pas ni ma yin no/ /lus ma yin pas lus ma yin pa la reg pa dang skra dang sen mo dang so dag gis reg pa ni nyes byas so/ /ci bsam pa gang yang rung bas reg na'am zhe na de'i phyir/ skyi g.ya' bar byed pa'i sems kyis so zhes bya ba smras te/ 'dir skyi g.ya' ba zhes bya ba ni bag 'khums par byed pa ste skyi g.ya' bar byed pa bag 'khums par byed pa 'dar bar byed pa la sogs pa'i lus kyi bya ba'i rnam pa'i bsam pas zhes bya ba'i tha tshig go/ /skyi g.ya' bar bya ba'i bsam pa ma yin pa kun du chags pa med pa'i sems kyis reg pa la ni ltung ba med do/ /kun du 'dod chags dang ldan pa'i sems kyis reg pa la ni dge 'dun lhag mar gtogs pa'i kha na ma tho bar 'gyur ro/ /zhe sdang dang ldan pa'i sems kyis reg pa la ni gsod pa dang rdeg par gtogs pa'i kha na ma tho bar 'gyur ro/ /de dag las gzhan pa'i nyon mongs pa can gyi sems kyis reg pa la ni kha na ma tho ba 'dir 'gyur ro/ /de'i phyir rma dang sbrang bu dang 'brum bu dang sme ba dang spu'i tshoms bstan pa la ni ltung ba med do zhes bya ba ni/ gang gi phyir skyi g.ya' bar bya ba'i sems kyis reg pa la ni kha na ma tho ba 'dir 'gyur ba de'i phyir/ 'di dag la ni ltung ba med do zhes bya ba'i tha tshig go/ /reg byed gcig gam du ma nyid la'o zhes bya ba ni/ sor mo la sogs pa reg byed gcig nyid kyang rung du ma nyid yin kyang rung ste/ ltung ba gcig kho nar 'gyur gyi/ 'dir reg byed re re las ltung ba tha dad par dbye ba ni med do/ /'dir gzhung ni dge slong gis sor mo gcig gis ga ga tshil byed na ltung byed do/ /de bzhin du gnyis sam gsum mam bzhi'am lnga dag gis kyang ltung byed do zhes gsungs pa yin no/ /ga ga tshil byed pa'i ltung byed do zhes bya ba de bshad zin to// // bam po sum cu bzhi pa/ ci zhig byas na chu la rtse ba'i ltung byed du 'gyur zhe na de'i phyir/ chu'i yul la rtse ba rjes su bsgrub na'o zhes bya ba smras te/ chu'i yul la 'og nas 'byung ba'i rtse ba ni zhes bya ba dag rjes su bsgrub cing yongs su rdzogs par gyur na 'dir gtogs pa'i kha na ma tho bar 'gyur ro/ /spyir bshad pa bye brag tu bstan pa'i phyir/ zhugs shing nub pa dang dbyung ba dang ngogs gzhan du rgal ba dang rgyun phyogs dang rgyun las bzlog phyogs su rtsol ba dang chu la rnga bo che dang rdza rnga kha gcig pa'i sgra 'byin pa dang gseg ma 'khrab pa dang 'phen pa dang 'khor yug dang rdo rje dang khron pa dang dba' klong dang chu bsrubs 'dren pa dag byed na dngos gzhi'o zhes bya ba smras te/ dge slong rtse ba'i bsam pas chu'i nang du lte ba man chad tsam nub par zhugs shing chu'i 'og tu nub par byi'u zul byed pa dang / chu'i 'og nas steng du 'byung ba dang / chu'i ngogs gzhan nas gzhan du rgal ba dang chu'i rgyun phyogs su rtsol ba dang chu'i rgyun las bzlog phyogs su rtsol ba dang / chu la rnga bo che nas dba' klong dang chu bsrubs 'dren pa'i bar dag byed na ltung byed du 'gyur ro/ /dbang bskur ba la nub pa la sogs pa yod pa la ni dngos gzhir rnam par mi gzhag go/ /gting la sogs par 'jug pa la nub pa la sogs pa yod pa de la ni ci rigs par rjes su bsgrub pa la dngos gzhir 'gyur ro/ /bem tol gyis rdeg na nyes byas so zhes bya ba ni/ zhugs kyang bem tol gyis rdeg pa la ni nyes byas su 'gyur ro/ /bum pa dang phru ba dang ril ba dang kha phor dang bu ram gyi khu ba 'dzag pa dang sran tshod dang 'u sha dang thang tsha ba nyid yod pa la yang ngo zhes bya ba ni/ gang du 'jug tu rung ba der zhugs te nub pa la sogs pa rjes su bsgrub pa la ni ltung byed du 'gyur la/ bem tol gyis rdeg pa la ni nyes byas so/ /chur ma zhugs par rtse ba thams cad la ni nyes byas kho na'o/ /bu ram gyi khu ba 'dzag pa zhes bya ba ni gang du bu ram gyi shing btsir ba'i khu ba 'dzag pa'o/ /chu ma yin pa la rtse ba yang ngo zhes bya ba la/ yang ngo zhes bya ba'i sgra ni nyes byas so zhes bya ba'i rjes bsnyegs pa'i phyir te chu las gzhan pa'i chu ma yin pa ste de la rtse ba yang nyes byas so/ /gar gyi bdag nyid ma yin pa bong ba la sogs pa 'phen pa dang lus kyi rtsed mor gyur pa g.yo ba'i rtsed mo gzhan thams cad nyes byas yin no/ /gar gyi bdag nyid ni sngar gar dang glu dang rol mo kun du spyad par mi bya'o zhes smos pas bkag zin to/ /'dir gzhung ni zhu ba las btsun pa re zhig dge slong chab ma lags pa dngos po lhag ma la rtse bar bgyid na ltung ba cir 'gyur nyes byas so zhes gsungs pa yin no/ /de lta bu la byed du bcug pa ni de dang 'dra'o zhes bya ba la/ de lta bu zhes bya ba ni/ chu las gzhan pa'i rdzas la ste de las gzhan g.yo ba la sogs pa byed du bcug pa ni rang gis byas pa dang 'dra bar rnam par gzhag par blta bar bya ste/ ji ltar chu las gzhan pa'i rdzas kyis yul la rtse ba la rang byed pas ltung bar rnam par gzhag pa byas pa bzhin du gzhan byed du 'jug pa yang de dang 'dra'o/ /byed du bcug pa la yang rtse ba'i ltung byed kyi yul du gyur pa la ni ltung byed du 'gyur la/ nyes byas kyi yul du gyur pa la ni nyes byas su 'gyur ba yin te/ bsnyen par rdzogs pas byed du bcug na byed du 'jug pa dang byed pa gnyi ga la kha na ma tho ba 'di 'dra bar 'gyur ro zhes bya ba'i tha tshig go/ /'dir gzhung ni rangs pa'i bsam pa la ji lta ba bzhin du rangs su gzhug pa'i bsam pa la yang de bzhin no/ / rtse ba'i bsam pa la ji lta ba bzhin du rtser gzhug pa'i bsam pa la yang de bzhin no/ /dga' ba'i bsam pa la ji lta ba bzhin du dgar gzhug pa'i bsam pa la yang de bzhin no zhes gsungs pa yin no/ /ci bsam pa gang yang rung bas byed dam byed du bcug pa dag la kha na ma tho ba 'dir 'gyur ram zhe na de'i phyir/ rgod pas dga' ba nyams su myong bar bya ba'i 'dun pas so zhes bya ba smras te/ rgod pa'i sgo nas dga' ba nyams su myong bar bya'o snyam pa'i bsam pas zhes bya ba'i tha tshig go/ /'dir gzhung ni zhu ba kha cig las dge slong gis bum pa'i sbyor bas chus 'thor na thams cad du ltung byed do zhes gsungs pa yin no/ /de'i phyir sim par 'dod pas rgal ba la sogs pa la ltung ba med do zhes bya ba ni/ gang gi phyir dgod pas dga' ba nyams su myong bar bya ba'i 'dun pas byed dam byed du bcug pa la ltung ba 'dir 'gyur ba de'i phyir sim par 'dod pas rgal ba la sogs pa ni ltung ba med do/ /sogs pa zhes bya ba'i sgras ni nub pa dang 'byung ba la sogs pa dag bsdus te de dag byas sam byed du bcug pa la yang ltung ba med do/ / rkyal slob ba thad ka'am ltag 'og tu stsol ba la yang ngo zhes bya ba ni/ rkyal slob pa'i bsam pas thad kar rtsol ba dang ltag 'og tu stsol ba la yang ltung ba med do/ /grang bar 'dod pas tsha ba dag la ri mo dod pa la yang ngo zhes bya ba ni/ grang zhing dad las par 'dod pas 'u sha la sogs pa tsha ba dag las dkrugs pa la sogs pas ri mo dod par byed pa la yang ltung ba med pa'o/ /chu la rtse ba'i ltung byed do zhes bya ba de bshad zin to// //ci zhig byas na bud med dang lhan cig nyal ba'i ltung byed du 'gyur zhe na de'i phyir/ bud med dang lhan cig gnas gcig tu gnyid log na'o zhes bya ba smras te/ dge slong bud med dang lhan cig gnas gcig tu gnyid log na'o/ /dus gang gi tshe gnyid log na zhe na de'i phyir/ mtshan mo'o zhes bya ba smras te/ nub mo'o/ /ci mtshan mo thams cad kyi skad cig gang yang rung ba la'am zhe na de'i phyir/ mthar ro zhes bya ba smras te/ mtshan mo'i mtha'i skad cig la'o/ /ci mtshan mo'i mtha'i mdun rol du ltung ba med dam zhe na de'i phyir/ mdun rol du ni nyes byas so zhes bya ba smras te/ mtshan mo'i mtha'i mdun rol du ni nyes byas so/ / 'dir mi'i bud med mthu med pa dang ma ning pho dang ma ning mo dang mi ma yin pa sprul pa dang dud 'gro mthu med pa nyid la yang nyes byas yin na ci bong tshod gang yang rung ba dang ldan pa'i mthu med pa la sogs pa dag la der shes par bya'am zhe na de'i phyir/ bya gag gi tshad ni de byed pa nyid kyi mtha'o zhes bya ba smras te/ dngos gzhi'i byed pa las gzhan gang la bya gag gi bong tshod tsam gyi tshad yod pa de ni bya gag gi tshad do/ /de byed pa nyid kyi mtha'o zhes bya ba ni/ nyes byas byed pa nyid kyi mtha' yin par rig par bya'o/ /'di skad bstan te/ bong tshod de tsam dang lhan cig gnas gcig tu mtshan mo gnyid log na nyes byas su 'gyur la/ mdun rol du ni nyes byas phra mor 'gyur ro/ /bud med dang lhan cig nyal ba'i ltung byed do zhes bya ba de bshad zin to// //gang la sngangs par byed pa'i kha na ma tho bar 'gyur zhe na de'i phyir/ bzhad gad bya bar bsam pas kyang rung ste/ sngangs par 'dod pas 'jigs pa'i rgyu nye bar bsgrub pa sngon du btang ba 'jigs par byed pa/ che ge mo zhig ces dge slong la/ gzhan gyis kyang go bar byed na/ 'jigs pa ma skyes kyang ngo zhes bya ba smras te/ bzhad gad bya bar bsam kyang rung ste zhes bya ba ni/ dgod pa'i bsam pas kyang rung ba'o/ /kyang zhes bya ba'i sgra ni khro ba sngon du btang bas kyang rung ba'o/ /sngangs par 'dod pa zhes bya ba ni/ 'jigs pa bskyed par 'dod pas so/ /'o na sngangs par 'dod pa zhes bya ba'i bye brag 'di smos ci dgos te/ 'jigs pa'i rgyu nye bar bsgrub pa sngon du btang ba go bar byed pa zhes bya ba nyid kyis sngangs par 'dod pas zhes bya ba nyid du 'gyur ro zhe na/ de ni de lta ma yin te/ sngangs par 'dod pa med par yang 'jigs pa'i rgyu nye bar bsgrub pa sngon du btang ba/ go bar byed pa yod pa kho na yin te/ gal te 'di snyam du bdag gis 'di nam yang lan 'ga' yang bdag las 'jigs pa skyes par ma gyur pa'i byung ba'i mtha' rnams rnam pa mang du nyams su myong mod kyi/ 'on kyang re zhig bzhad gad byas par gyur cig snyam du sems pa la ni sngangs par 'dod pa med par yang 'jigs pa'i rgyu nye bar bsgrub pa sngon du btang ba go bar byed pa yod pas de'i phyir sngangs par 'dod pas zhes bya ba'i bye brag 'di smos dgos so/ /'jigs pa'i rgyu zhes bya ba ni/ yid du mi 'ong ba ste de nye bar bsgrub pa sngon du btang ba go bar byed pa ni/ sngangs par byed pa'i kha na ma tho bar 'gyur ro/ /go bar byed pa rnam pa gnyis te don dang go bar bya ba la'o/ /de la don go bar byed pa ni/ 'jigs par byed pa zhes bya bas bstan to/ /ji ltar 'jigs par byed pa go bar byed ce na de'i phyir che ge mo zhig ces smras so/ /go bar bya ba gang la go bar byed ce na/ de'i phyir dge slong la'o zhes bya ba smras te/ dge slong gzhan la'o/ /gzhan gyis kyang go bar byed na zhes bya ba ni/ bdag nyid kyis go bar byed pa 'ba' zhig tu ma zad kyi gzhan go bar byed du bcug na yang kha na ma tho ba yongs su rdzogs par 'gyur ro/ /'jigs pa ma skyes kyang ngo zhes bya ba ni/ dge slong 'jigs pa ma skyes kyang kha na ma tho ba yongs su rdzogs par 'gyur ba ste/ kyang gi sgra ni 'jigs pa skyes nas yang kha na ma tho ba kho nar 'gyur ro/ /'jigs pa'i rgyu ci 'dra ba zhig nye bar bsgrub pa sngon du btang ba go bar byed na kha na ma tho ba ci 'dra bar 'gyur zhe na de'i phyir yid du mi 'ong ba la ni dngos gzhi'o zhes bya ba smras te/ gzugs mi sdug pa la sogs pa nye bar bsgrub pa sngon du btang ba go bar byed na dngos gzhi'i kha na ma tho bar 'gyur ro/ /yid du mi 'ong ba dpes bstan pa'i phyir/ 'di lta ste dper na/ yi dags dang sha za dang grul bum dang lus srul po gzugs la ba nag po dang sol ba dang ka ba tshig pa lta bu seng ge dang stag dang gung dang mtsha' dang gzig dang wa'i skad lta bu bshang ba dang gci ba dang ra ba dang de'i ze ba'i dri lta bu seg dang re lde dang phyar ba'i reg pa lta bu dag nyid sgrogs pa'o zhes bya ba smras te/ 'di dag gis yi dags la sogs pa'i gzugs dang sgra dang dri dang reg bya'i bye brag bstan pa ste de lta bu'i gzugs dang sgra dang dri dang ro dang reg pa dang ldan pa'i yi dags la sogs pa 'di na yod do zhes sgrogs shing go bar byed na dngos gzhi'i kha na ma tho bar 'gyur ro zhes bya bar sbyar ro/ /la ba nag po dang sol ba dang ka ba tshig pa lta bu zhes bya ba'i tshig gsum gyis ni yi dags la sogs pa'i gzugs kyi bye brag bstan to/ /seng ge dang stag dang gung dang mtsha' dang gzig dang wa'i skad lta bu zhes bya ba ni/ yi dags la sogs pa'i sgra'i bye brag bstan to/ /bshang ba dang gci ba dang ra ba dang de'i ze ba'i dri lta bu zhes bya ba ni/ yi dags la sogs pa'i dri'i bye brag bstan to/ /seg dang re lde dang phyar ba'i reg pa lta bu zhes bya ba ni/ yi dags la sogs pa'i reg pa'i bye brag bstan to/ /nyid sgrog pa'o zhes bya ba ni/ yi dags la sogs pa'i bye brag de lta bu dang ldan pa nyid 'di na yod do zhes go bar byed pa'o/ /yid du 'ong ba la ni nyes byas so zhes bya ba ni/ yid du 'ong ba'i rgyu nye bar bsgrub pa sgrogs na nyes byas su 'gyur ba'o/ /'dir yid du 'ong ba dpes bstan pa'i phyir/ 'di lta ste dper na/ lha dang klu dang dri za dang gnod sbyin dang mi'am ci dang lto 'phye chen po gzugs nor can dang tshong dpon dang ded dpon la sogs pa lta bu/ pi wang la sogs pa'i sgra lta bu a ka ru dang / tsan dan dang gur kum dang ta ma la'i lo ma'i dri lta bu dang dar dang ras yug chen dang be'u ras dang dar la dang du gu la'i ras dang ko tam pa'i ras kyis reg pa lta bu dag nyid sgrogs pa'o zhes bya ba smras te/ 'di dag gis ni lha la sogs pa'i gzugs dang sgra dang dri dang reg pa'i bye brag bstan te/ de lta bu'i gzugs dang sgra dang dri dang reg pa dang ldan pa'i lha la sogs pa 'di na yod do zhes sgrogs shing go bar byed na nyes byas su 'gyur ro zhes bya bar sbyar ro/ /nor can dang tshong dpon dang ded dpon la sogs pa lta bu'o zhes bya ba ni/ lha la sogs pa'i gzugs kyi bye brag bstan to/ /sogs pa zhes bya ba'i sgras ni rgyal po dang blon po dag lta bu yang bsdu'o/ /pi wang la sogs pa'i sgra lta bu zhes bya ba ni/ lha la sogs pa'i sgra'i bye brag bstan to/ /sogs pa zhes bya ba'i sgras ni 'od ma dang ba la ri la sogs pa'i sgra lta bu dag kyang bsdu'o/ /a ka ru dang tsan dan dang gur kum dang ta ma la'i lo ma'i dri lta bu zhes bya bas ni/ lha la sogs pa'i dri'i bye brag bstan to/ /dar dang ras yug chen dang be'u ras dang dar la dang du gu la'i ras dang ko tam pa'i ras kyi reg pa lta bu zhes bya bas ni/ lha la sogs pa'i reg pa'i bye brag bstan to/ /nyid sgrogs pa'o zhes bya ba ni/ lha la sogs pa'i bye brag de lta bu dang ldan pa nyid 'di na yod do zhes go bar byed pa'o/ /'dir lha la sogs pa smos pa ni mtshon pa tsam du zad de yi dags dbang che bar grags pa dag kyang bsdu'o/ /skyo bar bya ba'i ched nyid ni ma gtogs so zhes bya ba ni/ gal te skyo bar bya ba'i ched nyid du rnam pa 'di lta bu dag byed na de'i tshe nyes pa med do/ /de'i phyir skyo bar bya ba'i ched nyid du sems can dmyal ba dang dud 'gro dang yi dags kyi gtam la sogs pa la ni ltung ba med do zhes bya ba ni/ gang gi phyir skyo bar bya ba'i ched nyid ma gtogs pa de'i phyir 'di la yang ltung ba med do zhes phan par bstan na sems can dmyal ba'i gtam la sogs pas 'ga' zhig sngangs par gyur kyang ltung ba med do/ /sngangs par byed pa'i ltung byed do zhes bya ba de bshad zin to// //ci zhig byas na sbed pa'i ltung byed du 'gyur zhe na de'i phyir/ rab tu byung ba 'di la dbang ba'i lhung bzed dang chos gos dang drwa ba dang phor bu dang ska rags la sogs pa dang dge sbyong gi 'tsho ba'i yo byad sbed dam sbed du bcug na'o zhes bya bar smras te/ bcom ldan 'das kyis gsungs pa'i rab tu byung ba 'di pa dge slong dang dge slong ma dang dge slong dang dge tshul dang dge tshul ma zhes bya ba'i gang zag gang dag la yod pa de dag ni rab tu byung ba 'di pa zhes bya ba'o/ /rab tu byung ba 'di pa de dag dbang ba'i lhung bzed la sogs pa dge sbyong gi 'tsho ba'i yo byad tshad dang ldan pa rung ba rang gis sbed dam gzhan sbed du 'jug na kha na ma tho ba 'dir 'gyur ro/ /tshad dang ldan pa ma yin pa dang rung ba ma yin pa la ni nyes byas so/ /phan par 'dod pas ni ma gtogs so zhes bya ba ni/ phan pa'i bsam pas sbed dam sbed du bcug pa la ni ltung ba med do/ /sbed pa'i ltung byed do zhes bya ba de bshad zin to// //gang la byin pas nye bar 'tsho ba'i ltung byed du 'gyur zhe na de'i phyir/ dge slong la gos blang ba med par byin gyi des gnang ba med par spyod na'o zhes bya ba smras te/ dge slong gis dge slong la gos phyir blang ba med par gtan byin nas de'i 'og tu des gnang ba'i gdeng med par spyod na kha na ma tho ba 'dir 'gyur ro/ /rang gi blos nye bar 'tsho ba las ltung byed 'dir 'gyur gyi/ gzhan gyi blos nye bar 'tsho ba ni ma byin par len pa dang ldan pa'i sbom por 'gyur te/ brnyan pa nges par byin pa nyid bzhin du nye bar spyod na sbyor ba bzhin no zhes bya ba'i rjes su 'brang ba'i phyir ro/ /de bas na nga nyid kyis byin pa nga nyid spyod do zhes rjes su gnang ba med par spyod na ltung byed do/ /gos las gzhan pa'i yo byad spyod pa la ni nyes byas so/ /'dir gzhung ni btsun pa re zhig dge slong gis gos ma gtogs pa de las gzhan pa'i dge slong gi yo byad stsal nas/ slar ma blangs par spyod na nyes byas cir 'gyur/ nyes byas so zhes gsungs pa yin no/ /ci bsam pa gang yang rung bas spyod pa la'am zhe na de'i phyir/ gal te gzhi des dga' bar mi 'gyur na'o zhes bya ba de smras te/ gal te bdag gis spyad pa'i rgyus dge slong gang la byin pa de dag dga' bar 'gyur ro snyam pa'i bsam pa de lta bu yod na nyes pa med de yid gcugs pas spyod pa'i phyir ro/ /byin pas nye bar 'tsho ba'i ltung byed do zhes bya ba de bshad zin to// //ci zhig byas na skur pa 'debs pa'i ltung byed du 'gyur zhe na de'i phyir/ skur pa 'debs par 'dod pas dge slong la 'du shes bsgyur te/ dge 'dun lhag mas skur pa 'debs na'o zhes bya ba smras te/ dge 'dun lhag ma'i ltung bas skur pa 'debs par 'dod pas dge slong la bden pa'i tshor ba sbas shing 'du shes bsgyur te dge 'dun lhag ma brdzun pas skur pa go bar byas na kha na ma tho ba 'dir 'gyur ro/ /ci gsal bar brjod pa 'ba' zhig la'am zhe na de'i phyir/ bag tsam gyis kyang ngo zhes bya ba smras te/ 'dir gzhung ni btsun pa dge slong gis re zhig bslab pa stsal ba la bag tsam gyi dge 'dun lhag mas skur pa 'debs na ltung ba cir 'gyur/ ltung byed do zhes gsungs pa yin no/ /skur pa 'debs pa'i ltung byed do zhes bya ba de bshad zin to// //bud med dang lhan cig 'gro ba'i ltung byed smra bar 'dod nas/ sngar lam du 'gro ba la bud med byed pa po nyid do zhes gang smos pa de la ci gzhan gang yang rung ba la bud med byed pa po nyid yin nam zhe na/ de'i phyir 'dod pas lam du 'gro na'o zhes bya ba smras te/ rang dgar lam du 'gro na kha na ma tho ba 'dir 'gyur gyi/ gzhan gyi dbang gis 'gro ba la ni ma yin no/ /lam ji srid du 'gro ba la zhe na de'i phyir rgyang grags re rer ro zhes bya ba smras te/ rgyang grags re rer rig pa'i skyes pa med par bud med dang lhan cig rang dgar lam du 'gro ba la bud med byed pa po nyid yin no/ /de'i phyir/ re rer ni nyes byas so zhes bya ba ni/ rgyang grags kyi phyed kyi re rer ni bud med nyes byas kyi byed pa po nyid yin no/ /ci bud med kyi gnas skabs thams cad dge slong gi gnas skabs thams cad la byed pa po nyid yin nam zhe na de'i phyir/ bsel byed pa ni ma gtogs so zhes bya ba smras te/ gal te bud med dge slong lam du 'gro ba'i bsel byed pa ni ma gtogs so/ / phongs pa la sogs par gyur pa de la bsel byed pa la ni nyes pa med par 'gyur ro/ /des lam nor ba lam du 'dzud par byed pa yang ngo zhes bya ba ni/ dge slong des lam nor ba yang lam du 'dzud par byed pa'i bud med kyang ma gtogs so/ /mi nus pa 'khrid pa yang ngo zhes bya ba ni/ dge slong lam du 'gro mi nus pa bkri ba'i phyir grogs byed pa'i bud med kyang ma gtogs so/ /bud med dang lhan cig 'gro ba'i ltung byed do zhes bya ba de bshad zin to// //gang la rkun ma dang lhan cig 'gro ba'i ltung byed du 'gyur zhe na de'i phyir grong 'joms par byed pa'i chon rkun pa dag gam sho gam 'dral pa'i tshong pa dag dang lhan cig 'gro ba la'o zhes bya ba smras te/ bslab pa'i gzhi snga mar 'dod pas 'gro na'o/ /rgyang grags re rer ro/ /de'i phyed re rer ni nyes byas so/ /bsel byed pa ni ma gtogs so/ /des lam nor ba lam du 'dzud par byed pa yang ngo / /mi nus pa 'khrid pa yang zhes ji skad bstan pa thams cad 'dir yang sbyar bar bya'o/ /zol pa dang rku thabs su rab tu byung ba dag ni lhan cig 'gro ba dag la ni nyes byas so zhes bya ba la/ zol pa zhes bya ba ni g.yo sgyus tha snyad byed pa'o/ rku thabs su rab tu byung ba zhes bya ba ni/ rang gi rtags blangs pa ste/ las nyams su myong ba ma thob pa'i dge slong dang dge tshul la sogs pa rab tu byung ba'i rtags can thams cad do/ /'dir yang 'dod pas lam du 'gro na'o zhes bya ba la sogs pa sngar bstan pa thams cad sbyar bar bya'o/ /rgyang grags re rer ni nyes byas so/ /rgyang grags phyed phyed du ni nyes byas phra mo'o/ /'dir gzhung ni zhu ba las zol pa dag dang tshong pa rkun ma dag dang lhan cig lam du 'gro na nyes byas so/ /rku thabs su rab tu byung ba dag dang lhan cig lam du 'gro na nyes byas so zhes gsungs pa yin no/ /rkun ma dang lhan cig 'gro ba'i ltung byed do zhes bya ba de bshad zin to// //lo nyi shu ma lon pa bsnyen par rdzogs par byed pa'i ltung byed la byed pa po gang yin zhe na de'i phyir/ shes gtso bo zhes bya ba smras te/ 'dir yang shes gtso bo zhes bya ba'i ming dang 'du shes gtso cher byed pa po nyid do zhes bya ba'i ming can sbyor bar byed do/ /gang la 'du shes gtso cher byed pa po nyid yin zhe na/ de'i phyir/ bsnyen par rdzogs par bya ba lo nyi shu ma lon pa nyid la'o zhes bya ba smras te/ bsnyen par rdzogs par bya ba gang yin pa de gal te lo nyi shu ma lon pa nyid yin la/ dge slong gis kyang lo nyi shu ma lon pa zhes bya bar shes par gyur na yul de la 'du shes gtso cher byed pa po nyid yin no/ /yan lag gang gis bsnyen par rdzogs par byed pa la kha na ma tho ba 'dir 'gyur zhe na de'i phyir/ mkhan po nyid kyis so zhes bya ba smras te/ 'di ltar rnam par 'byed pa las tshig 'gal tshabs can du 'gyur ro zhes gsungs mod kyi/ 'on kyang mkhan po la ni ltung byed do/ /'dir lhag ma rnams la nyes byas su 'gyur bar ni gleng gzhi dang mod las kyang snang ngo / /'dir gzhung ni sangs rgyas bcom ldan 'das kyis tshe dang ldan pa maud gal gyi bu chen po la rmas te/ maud gal gyi bu khyod kyis lo nyi shu ma lon pa'i gang zag dge slong gi dngos po'i phyir bsnyen par rdzogs par byas pa bden nam/ btsun pa mad do/ /sangs rgyas bcom ldan 'das kyis smad nas/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang zag lo nyi shu ma lon pa dge slong gi dngos por bsnyen par rdzogs par byed na ltung byed do zhes gsungs pa yin te/ mkhan po nyid kyis bsnyen par rdzogs par byed pa'i dbang du mdzad nas/ 'di bca' ba mdzad do/ /ci zhig byas nas 'du shes gtso cher byed pa po nyid yin zhe na/ de'i phyir/ bsnyen par rdzogs par byas na'o zhes bya ba smras so/ /des de la lon pa nyid mi dri bar mi bya'o zhes bya ba ni/ mkhan po des bsnyen par rdzogs par bya ba de la lo nyi shu lon pa nyid mi dri bar mi bya ste/ dri ba kho nar bya'o/ /gzhan gyis kyang mi bya'o zhes bya ba ni/ mkhan po las gzhan pa bsnyen par rdzogs par byed pa dag gis kyang bsnyen par rdzogs par bya ba de lo nyi shu lon pa nyid mi dri bar mi bya'o/ /nges par mi shes pas de bsnyen par rdzogs par mi bya'o zhes bya ba ni dge 'dun du gyur pa'i dge slong dag gis bsnyen par rdzogs par bya ba de la lo nyi shu lon pa nyid du nges par mi shes par bsnyen par rdzogs par mi bya'o/ /rnam pa thams cad du lo nyi shu lon pa la ni bsnyen par rdzogs pa 'chags so zhes bya ba ni/ gal te bsnyen par rdzogs par bya ba de yang dag par lo nyi shu lon pa nyid yin na ni de'i tshe 'du shes gtso cher byed pa po nyid med de 'di ltar bsnyen par rdzogs par bya ba bsnyen par rdzogs par byed pa dag lo nyi shu ma lon pa nyid du 'du shes sam yid gnyis za na ma dris sam ma brjod par rnam pa thams cad du lo nyi shu ma lon pa nyid du 'du shes su zin kyang gang zag lo nyi shu lon pa la bsnyen par rdzogs par 'chags te/ lo nyi shu lon pa'i zhing nyid la nyams par bya bar mi nus pa'i phyir ro/ /cig shos la ni lon par 'du shes pa nyid na'o zhes bya ba ni/ cig shos lo nyi shu ma lon pa'i gang zag la ni lo nyi shu lon pa nyid du 'du shes na bsnyen par rdzogs pa 'chags te 'di la ni 'du shes gtso cher byed pa po nyid yin no/ /mi shes pa dang mi dran pa dang yid gnyis za ba dag la yang ngo zhes bya ba yang cig shos la bsnyen par rdzogs par 'chags so zhes bya bar sbyar ro/ /mi shes pa zhes bya ba ni/ lo grangs mi shes pa'o/ /mi dran pa zhes bya ba ni lo tshigs mi dran pa'o/ /yid gnyis za ba zhes bya ba ni lo nyi shu lon nam ma lon snyam du yid gnyis za ba ste de dag la yang gang zag lo nyi shu ma lon pa lo nyi shu lon pa nyid du 'du shes pa nyid yin na gal te mkhan po la sogs pa bsnyen par rdzogs par byed pa dag la mi shes pa dang mi dran pa dang yid gnyis za ba dag yod du zin kyang bsnyen par rdzogs par bya ba la bsnyen par rdzogs pa 'chags so/ /'di ltar lo nyi shu ma lon pa zhing nyid yin zhe na/ 'dir rnam pa gnyis kyi zhing nyid du rnam par gzhag ste/ dngos po dang yid gnyis so/ /de la dngos po las ni zhing nyid du rnam par gzhag pa ni des lo nyi shu lon pa nyid yin no/ /yid kyis zhing nyid du rnam par gzhag pa ni yang dag par len par byed pa'i yid kyi dbang gis zhing nyid yin pa ste/ gal te bdag nyid lo nyi shu lon par 'du shes pa yin pa'o/ /bsam pa'i dbang gis kyang sdom pa'i zhing nyid mthong ste/ dper na dge ba'i rtsa ba phyir 'byor pa lta bu'o/ /rku thabs su gnas pa nyid kyang de dang 'dra ba nyid du rig par bya ste/ gal te bdag nyid kyi cho ga 'khrugs pa la sogs pa'i nyes pa 'ga' zhig gis sdom pa ma chags pa nyid du shes nas de'i tshe rku thabs su gnas pa nyid skye bar 'gyur la/ gal te mi shes na ni rku thabs su gnas pa nyid skye bar mi 'gyur te/ 'di ltar rku ba'i bsam pas dge 'dun gyi khongs su gtogs par byed pa med pa'i phyir ro/ /shes na ni de zhig go zhes bya ba ni/ lo nyi shu ma lon par bsnyen par rdzogs pas lo nyi shu ma lon par shes na sngar sdom pa 'chags pa de zhig go/ /ci cho ga gcig tu zad dam zhe na/ de'i phyir gal te skyes pa na ma lon pa'i 'o zhes bya ba smras te/ bsnyen par rdzogs pa'i 'og tu bdag nyid lo nyi shu ma lon no snyam pa'i gnas skabs de'i tshe gal te dge slong des lo nyi shu lon par gyur na de'i tshe de'i sdom pa sngar chags pa de zhig go/ /gal te bdag nyid lo nyi shu ma lon par bsnyen par rdzogs so snyam pa'i 'du shes skyes pa'i gnas skabs de'i tshe na des lo nyi shu lon par gyur na ni de'i sdom pa sngar chags pa de mi 'jig go/ /bsams pa tsam gyi dbang gis kyang sdom pa gtong ba snang ste/ dper na dge ba'i rtsa ba chad pa'i phyir ro zhes bya ba lta bu'o/ /ci bsnyen par rdzogs pa'i gnas skabs na bdag nyid lo nyi shu ma lon pa bsnyen par rdzogs par shes pa'i tshe de'i gnas skabs phan chad lo nyi shu lon nam ma lon brtsi ba ste/ dang po mngal gyi gnas nas btsas pa nas brtsams te/ de tshun chad nas brtsi bar bya ba'am 'on te dang po mngal du zhugs pa tshun chad nas brtsi bar bya zhe na de'i phyir/ mngal na gnas pa dang shol gyi zla ba dang yang bcas te'o zhes bya ba smras te/ mngal na gnas pa'i zla ba dag dang shol gyi zla ba lhag ma dag dang yang bcas te/ de'i lo nyi shu nyid brtsi bar bya'o/ /bsnyen par rdzogs par 'dod pa'i gnas skabs su ni brtsi bar mi bya ste/ gal te brtsi bar byed na bsnyen par rdzogs pa ni 'chags la bsnyen par rdzogs par byed pa dag la ni 'gal tshabs can du 'gyur ro/ /ma lon pa bsnyen par rdzogs par byed pa'i ltung byed do zhes bya ba de bshad zin to/ / //gang la sa rko ba'i kha na ma tho bar 'gyur zhe na de'i phyir rko'am rkor bcug pa la'o zhes bya ba smras te/ rang gis sa rko'am gzhan rkor bcug pa la'o/ /rko ba zhes bya ba ni/ sa la sogs pa de tsam zhig sa phyi mo las phral zhing tha dad par byas pa gang yin pa'o/ /de'i phyir 'dir ni lan re btab pa la sbyor ba tha dad par rig par bya ste/ 'dir sbyor ba tha dad pa re re las ltung ba tha dad pa re rer rnam par bzhag go/ /ci zhig rko'am rkor bcug pa la zhe na de'i phyir sa'i sa'o zhes bya ba smras te/ sa'i rang bzhin gyi sa yin gyi bye ma dang rdo thal rgyu dang rdo la sogs pa'i rang bzhin gyi ma yin no zhes bya ba'i tha tshig go/ /ci dus thams cad du de gnyis kha na ma tho ba 'dir 'gyur zhe na de'i phyir/ lag gi blas rgyu skar gyi sbyor bas rung bar byed pa med na thur ma sor bzhi tsam 'dzugs pa ma gtogs so zhes bya ba smras te/ gal te dge slong lag gi blas rgyu skar gyi sbyor bas gtsug lag khang la sogs pa'i thig 'debs pa'i tshe dus las yol du mi rung la de'i tshe na bsnyen par ma rdzogs pa rung bar byed pa'i 'os gzhan med na de'i tshe thur ma sor bzhi tsam gyi tshad sa la 'dzugs pa ni ma gtogs te/ de la ni nyes pa med do zhes bya ba'i tha tshig go/ /sa'i sa ji lta bu zhig kha na ma tho ba ji lta bur 'gyur zhe na de'i phyir/ gal te rang bzhin can yin na dngos gzhi'o zhes bya ba smras te/ gal te rang bzhin du chags pa'i sa yin na de rkos sam rkor bcug na dngos gzhir 'gyur ro/ /rang bzhin can zhes bya ba ni 'thas par gnas pa'o/ /gal te ma yin na nyes byas so zhes bya ba ni/ rang bzhin du chags pa'i sa ma yin na de rkos sam rkor bcug na nyes byas te/ 'thas pa ma yin pa la ltung ba med do zhes gsungs pa yin no/ /rang bzhin can zhes bya ba ni/ ji lta bu zhig yin rang bzhin can ma yin pa zhes bya ba ni ji lta bu zhig yin zhe na de'i phyir/ snga ma shos ni zla ba gsum lon pa'i 'thas pa'o zhes bya ba smras te/ snga ma shos rang bzhin can zhes bya ba ni dang po 'thas pa las zhig pa'i yan lag rnams zla ba gsum lon cing phyir 'thas te 'byor par gyur pa de'i tshe na rang bzhin can zhes bya ba'o/ /ci dus thams cad du yun de srid kyis rang bzhin can du 'gyur ram zhe na de'i phyir/ gal te char chu zhod na'o zhes bya ba smras te/ gang gi tshe nam zhod par gyur cing yang dang yang du char 'bab par gyur pa de'i tshe na zla ba gsum gyis sa rang bzhin can du 'gyur ro/ /dus gzhan gyi tshe na zla ba du lon na rang bzhin du 'gyur zhe na de'i phyir gzhan gyi tshe na drug go zhes bya ba smras te/ nam zhod pa las gzhan gyi dus kyi tshe na ni zla ba drug lon na rang bzhin can du 'gyur ro/ /rtsig pa ni sa nyid ma yin par shes par mi bya'o zhes bya ba ni/ rtsig pa ni sa nyid ma yin par shes pa mi bya ste sa nyid yin no zhes bya ba'i tha tshig go/ /sa'i dngos po ni sa nyid do/ /'dis ni khang thog kyang sa nyid yin par byas par rig par bya'o/ /sa phung gal te steng gi cha ni 'thas la 'og gi cha'i yan lag ma 'thas par gyur na de ni sa nyid ma yin par shes par bya'o/ /'thas par gyur na ni de sa nyid du rnam par gzhag pa kho na yin no/ /'dus pa dag la ni shas che bas mtshan nyid dag rab tu dbye ba nyid yin no zhes bya ba ni/ 'di ltar sa la sogs pa 'dus pa dag la ni shas che ba nyid kyis mtshan nyid dag rab tu dbye ba nyid yin te/ 'dus pa gang la sra ba nyid la sogs pa'i rdzas kyi mtshan nyid gang gi shas che ba nyid yod pa'i mtshan nyid de nyid kyis 'dus pa rab tu dbye zhing bstan pa dang khas blang bar bya ste/ 'dus pa de la de'i shas che ba'i phyir ro/ /de'i phyir nyung ngu gzhan yod pa'i rdzas nyid la ni phal che ba nyid do zhes bya ba ni/ gang gi phyir 'dus pa dag la shas che bas mtshan nyid dag rab tu dbye ba nyid yin pa de'i phyir rdzas rigs mi mthun pa gzhan dang 'dres pa nyid la ni phal che ba nyid lhag pa yin par shes par bya ste/ sa'i tshogs bye ma dang 'dres pa la yang sa phal chen sa nyid yin par blta bar bya'i/ 'dres pa nyid ma yin no zhes bya ba'i tha tshig ste/ 'dir de rkos sam rkor bcug na dngos gzhir 'gyur la gzhan la ni nyes byas so/ /tshig pa nyid ni nyams pa nyid yin no zhes bya ba ni/ sa nyid tshig pa nyid ni nyams pa nyid yin par rig par bya'o/ /nyams pa nyid la ni phyed nyid do zhes bya ba ni/ sa nyid nyams pa nyid la ni phyed nyid de nyes byas byed pa po nyid yin no zhes bya ba'i tha tshig go/ /'dir gzhung ni zhu ba las sa tshig pa rko na nyes byas so/ /rkor 'jug na nyes byas so/ /rnam par nyams pa yang de bzhin no zhes gsungs pa yin no/ /'dir rnam par nyams pa zhes bya ba ni/ 'dam rdzab tu gyur pa nyid la sogs pa yin par shes par bya'o/ /sa zhag dang ngogs dang rtsig pa dang de'i skyang nul grugs pa dag kyang ngo zhes bya ba ni/ phyed nyid do zhes bya bar sbyar ro/ /sa zhag dang ngogs dang rtsig pa dang de'i skyang nul dag gal te grugs par gyur na de dag ni phyed nyid do/ /de'i skyang nul zhes bya ba'i sgras ni rtsig pa'i skyang nul brjod do/ /rdo thal rgyu dang bye ma la sogs pa shas che ba yang ngo zhes bya ba yang phyed nyid do zhes bya bar sbyar ro/ /rdo thal rgyu zhes bya ba'i sgras ni rdo rgyus la sogs pa brjod do/ /sa gang la de gnyis shas che ba de ni phyed nyid do/ /sogs pa zhes bya ba'i sgras ni sa'i ngo bo nyid ma yin pa'i rdzas lhag ma dag kyang bsdu'o/ /bya ba dag kyang ngo zhes bya ba yang phyed nyid do/ /de gang yin zhe na de'i phyir/ phur pa 'byin pa dang ri mo 'dren pa dang sa'i bye ma 'dren pa dang lci ba 'gogs pa dang 'dam bskyod pa dang de dang 'brel ba'i phru ba la sogs pa 'degs pa dang 'jig pa'i bdag nyid kyi tsha sgo dag kyang ngo zhes bya ba smras te/ de dag kyang phyed nyid do zhes bya bar sbyar ro/ /phur pa btab na ni ltung byed du 'gyur la/ phur pa 'byin pa ni nyes byas su 'gyur ro/ / sa la mdzub mo la sogs pas ri mo 'dren pa dang lci ba 'gogs pa gang la sa'i phye ma 'dren par 'gyur ba'i lci ba 'gogs pa de ni sa'i phye ma 'dren pa'i lci ba 'gogs pa ste/ de dag dang 'dam mer mer po bsgul zhing bskyod pa dang 'dam rdzab dang 'brel ba'i phru ba dang bum pa la sogs pa 'degs pa dang rtsig pa la sogs pa 'jig cing 'brul bar byed pa'i bdag nyid can gyi tsha sgo'i rdzas kyi rang bzhin gang yin de 'brul bar byed pa yang nyes byas so/ /ci dge slong gi bsam pa gang yang rung bas 'dir de dag spyad na kha na tho ba rdzogs pa'am chung bar 'gyur ro zhe na de'i phyir/ 'dir gzhig pa'i blo dang ldan na de'i 'o zhes bya ba smras te/ phur pa 'byin pa la sogs pa'i bya ba 'dir dge slong gang la sa gzhig pa'i blo yod pa de ni gzhig pa'i blo dang ldan pa ste/ de byas na kha na ma tho ba 'dir 'gyur ro/ /'dir yang sa la 'du shes gtso cher byed pa po nyid yin no zhes bya bar rig par bya'o/ /'di ltar sar 'du shes pa med na ni sa'i yul la gzhig pa'i blo yang mi 'byung bas gang la gzhig pa'i blo yod pa de la ni sar 'du shes pa yang gdon mi za bar yod par 'gyur ro/ /de'i phyir bgrang ba dang shod dgod pa la sogs pa'i bsam pa la ni ltung ba med do zhes bya ba ni/ gang gi phyir gzhig pa'i bsam pa med pa la ltung ba med pa de'i phyir 'di la yang ltung ba med do/ /sa rko ba'i ltung byed do zhes bya ba de bshad zin to// //mgron du gnyer ba la ring du 'dug pa'i ltung byed smra bar 'dod nas/ ha cang blang bar mi bya'o zhes bya ba smras te/ ma bstabs par slong ba ni mi rigs pa kho na yin pas de'i phyir 'di ni bstabs pa'i phyir byas pa yin no/ /mgron du bos pa'i khyim du gdugs tshod la ma bskul ba de med na 'gror rung ngo zhes bya ba ni/ mgron du bos pa'i khyim du 'gror rung ngo zhes bya bar sbyar te/ khyim gang du zas sbyar bar khas blangs pa'i khyim der ni mgron du bos pa'i khyim ste der 'gror rung ngo / /su zhe na gdugs tshod ma bskul ba ste/ dge slong la sbyin bdag gis da gdugs tshod la bab na gshegs su gsol zhes ma bskul ba gang yin pa de ni gdugs tshod ma bskul ba ste/ der 'gror rung ngo / /gang gi tshe zhe na de med na ste/ gdugs tshod bskul ba med na'o/ /'dir gzhung ni bdag gis gdugs tshod bskul bar mi nus kyi rang gis dus shes nas shog shig ces gsungs pa yin no/ /dus las yod du byed na rims shig ces bsgo ba yang ngo zhes bya ba yang / mgron du bos pa'i khyim du song ba na gdugs tshod yol du byed na dge slong rang gis sbyin bdag la da gdugs tshod brims shig ces bskul du rung ba nyid yin pa'o/ /tshig 'bru de nyid ma yin pa la gus par mi bya'o zhes bya ba ni/ bcom ldan 'das kyis gsol ba dang bzhi'i las la sogs pa'i tshig 'bru gang du gsungs pa de nyid ma gtogs pa de las gzhan pa'i tshig 'bru 'jig rten gyi tha snyad du bya ba'i don gyi skabs dag tu gsungs pa gang yin pa de la gcig tu 'chel zhing gus par mi bya ste/ don de go bar bya ba'i tshig 'bru yul dang dus gang du gang 'jebs shing go bar 'gyur ba'i tshig 'bru gzhan du bsgyur te/ smras kyang nyes pa med pa'o/ /de ltar yang 'dir gzhung ni stan dag ci bder gyis shig /tshe dang ldan pa khyed kyi ci bde zhes bya ba ni bdag mi shes kyi 'di ltar stan dag ni khyed kho na'i phyir bshams so zhes zer ba dang / bcom ldan 'das kyis bka' stsal pa/ gal te de skad zer na ci bder byas par brjod par bya'o zhes gsungs pa yin no/ /'di ni tha snyad thams cad la sbyar bar bya ba yin pa'i phyir spyir mdor byas pa yin no/ /so sor mgron du bos pa bdag gir bya'o zhes bya ba ni/ tha dad pa mgron du bos pa bdag gir bya ba'o/ /dge 'dun spyan drangs pa yod na gang zag gis khas blang bar mi bya ste/ mgron du bos pa gnyi ga bkag pa'i phyir ro snyam du dogs pa bsal ba'i phyir/ dge 'dun dang bcas te mgron du bos pa yang ngo zhes bya ba smras te/ 'di ltar dge 'dun spyan drangs pa yod na gang zag gis kyang khas blangs pa la nyes pa med pa'o/ /dus thams cad du yang ngo zhes bya ba ni/ dge 'dun nam gang zag ji srid 'tsho ba'i bar du mgron du bos na yang bdag gir bya'o zhes bya ba'i tha tshig go// //bam po sum cu lnga pa'o/ /ci zhig byas na mgron du gnyer ba las ring du 'dug pa'i ltung byed du 'gyur zhe na de'i phyir/ tshigs rnam par gzhag pa med par mgron du gnyer ba dang ldan pa las phyis gzhan nam yang dang yang du'am dus kyis mgron du gnyer ba ma byas par zla ba bzhi pa yongs su rdzogs pa'i 'og tu bshams pa zos na'o zhes bya ba smras te/ tshigs rnam par gzhag pa med par zhes bya ba ni/ sbyin pa po dang sbyin bdag gang yin pas bdag gis khyod dus 'di srid du mgron du gnyer to zhe'am khyod rtag tu mgron du gnyer to zhes bya ba rnam pa de lta bus dus nges par byas pa'i tshigs rnam par gzhag pa med par ro/ /mgron du gnyer ba dang ldan pa zhes bya ba ni/ sbyin pa po'am sbyin bdag des gang zag gam dge 'dun gyi khongs su gtogs pas mgron du gnyer bas dge slong 'ga' zhig mgron du gnyer bar 'gyur ba'i sbyin pa po'am sbyin bdag gang yin pa de ni mgron du gnyer ba dang ldan pa zhes bya ba ste/ dgag pa phye ba dang ldan pa'i phyir bzlog pa brtsal ba dang ldan pa/ mgron du gnyer ba bos pa dang ldan pa zhes bya ba'i tha tshig go/ /sbyin pa po'am sbyin bdag mgron du gnyer ba dang ldan pa de las phyis dge slong des gnas skabs kyi khyad par ji lta bur gyur pa zhig tu zos na de'i phyir/ phyis gzhan nam yang dang yang du'am dus kyis mgron du gnyer ba ma byas par zhes bya ba smras te/ sbyin pa po'am sbyin bdag mgron du gnyer ba dang ldan pa des sngar dge slong de mgron du gnyer ba dang ldan pa ma gtogs par de las gzhan pa'i dus su phyis dge slong de mgron du gnyer bar ma byas pa gang yin pa de ni phyis mgron du gnyer ba ma byas pa ste/ rnam pa gang gis phyis mgron du gnyer ba ma byas par shes na de'i phyir gzhan nam yang dang yang du'am dus kyis mgron du gnyer ba ma byas pa yin no/ /de la gzhan gyis mgron du gnyer ba ma byas pa zhes bya ba ni/ sngar tshigs rnam par gzhag pa med par mgron du gnyer ba las gzhan pa'i rnam pa gzhan gyis mgron du gnyer ba ma byas pa'o/ /yang dang yang du mgron du gnyer ba ma byas pa zhes bya ba ni/ nyin re nyin re zhing yang dang yang du mgron du gnyer ba ma byas pa'o/ / dus kyis mgron du gnyer ba ma byas pa'o zhes bya ba ni/ bsam pa shas chen po nyid kyis mgron du gnyer ba ma byas pa'o/ /de ltar sbyin pa po'am sbyin bdag gang gis sngar mgron du gnyer ba dang ldan pa des de las gzhan pa'i dus su phyis gzhan nam yang dang yang du'am dus kyis mgron du gnyer ba ma byas par de las dge slong des zla ba bzhi pa yongs su rdzogs pa'i 'og tu sngar bshams pa'i zas zos na mgron du gnyer ba las ring du 'dug pa'i ltung byed du 'gyur ro zhes bya ba'i tha tshig go/ /'di skad bstan te/ gal te sbyin pa po'am sbyin bdag gis sngar dge slong de zla ba bzhi'i bar du mgron du bos nas phyis de'i 'og tu dge slong de gzhan nam yang dang yang du'am dus kyis mgron du ma bos par dge slong des zla ba bzhi tshang ba'i 'og tu sbyin bdag de las zas bshams pa zos na ltung byed do/ /sngar mgron du bos pa'i gnas kyi yul la kha na ma tho ba 'di rnam par gzhag gi mgron du ma bos pa'i gnas kyi yul la ni bsod pa slong ba'i kha na ma tho bar 'gyur te de gnyis kyi bye brag ni 'di yin no/ /'di la ni ngan pa dang bzang po gnyis la bye brag med de thams cad du kha na ma tho bar 'gyur ro/ /'dir gzhung ni ltung ba bstan pa las dge slong zla ba bzhi'i bar du mgron du bos pa las cung zad lhag par ro myong bar byed na so sor mgron du bos pa dang / rtag tu mgron du bos pa ma gtogs par thams cad du ltung byed du 'gyur ro zhes gsungs pa yin no/ /rnam par rig byed la ni nyes byas so zhes bya ba 'di ni sbyor ba la nyes byas so zhes bya ba de'i spros pa yin te/ 'dir rnam par rig byed ces bya ba ni zla ba bzhi las lhag par bshams pa'i zan gyi phyir nye bar 'gro ba yang yin par rig par bya'o/ /nad pa la ni ltung ba med do zhes bya ba ni/ nad pa'i phyir lus dang ngag gi phyir rnam par rig byed kyi zas grub pa la ni ltung ba med pa'o/ /'dir gzhung ni mi na bar blangs te zan blangs pa la ni nyes byas so/ /zos pa la ni ltung byed do zhes zhu ba las gsungs pa de nyid mdo 'dir bsdus pa yin no/ /nye du las kyang ngo zhes bya ba ni/ sbyin bdag nye du las blangs te zos pa la yang ltung ba med pa'o/ /'dir gzhung ni zhu ba las khyim bdag de de'i pho nu'am bu tsha'am bu sring yin na de dag las ro myang bar bya'o zhes gsungs pa yin no/ /rnam par 'khyams pa las snga ma ni tha dad pa nyid do zhes bya ba ni/ rnam par 'khyams pa zhes bya ba ni khyim par babs pa las snga ma zhes bya ba de dge slong nyid ni tha dad pa nyid yin pa'o/ /'dir gzhung ni zhu ba las tshe dang ldan pa la gang dag dgos pa de khyer cig ces dge slong la bstabs par gyur pa las dge slong de rnam par 'khyams par gyur cing de yang bsnyen par rdzogs par bgyid na dge slong des cho ga snga ma de nyid kyi ro myong bar bgyi'am/ gal te yang stobs par byed na ni ro myang bar bya'o/ /stobs par mi byed na ni ro myang bar mi bya'o zhes gsungs pa yin no/ /de ni ma stobs pa'i nyes pa byed pa nyid yin no zhes bya ba ni/ rnam par 'khyams pa'i 'og tu bsod pa slong bar byed pa la sogs pa de ni ma bstabs pa'i nyes par byed pa yin te/ de ni ma bstabs pa'i nyes pa gang yin pa de ni byed pa nyid yin no/ /'di skad bstan te/ rnam par 'khyams pa'i 'og tu lan gnyis pa bsnyen par rdzogs pa na dge slong ma bstabs par slong bar byed pa la sogs pa de'i kha na ma tho ba gang yin pa de ni bsod pa slong ba'i khongs su gtogs par rig par bya'o/ /mdun rol du yang gang gis ma bstabs pa'o zhes bya ba ni/ zla ba bzhi'i 'og 'ba' zhig tu ma zad kyi/ zla ba bzhi ma tshang ba'i mdun rol du yang bza' bar bya ba'i dngos po gang gis ma bstabs pa de slong ngam za na ma bstabs pa'i nyes pa byed pa nyid yin pa'o/ /mgron du gnyer ba las ring du 'dug pa'i ltung byed do zhes bya ba de bshad zin to// //bslab pa la nye bar 'jog pa spong ba'i ltung byed la byed pa po nyid gang yin zhe na de'i phyir/ shes gtso zhes bya ba smras te/ 'dir yang shes gtso zhes bya ba'i ming dang 'du shes gtso cher byed pa po nyid do zhes bya ba'i ming can du sbyor bar byed do/ /gang la 'du shes gtso cher byed pa po nyid yin zhe na/ de'i phyir/ mngon par shes pa nyid la'o zhes bya ba smras te/ yongs su shes pa nyid la'o/ /mngon par shes pa nyid gang la zhe na/ de'i phyir smra ba po la'o zhes bya ba smras te/ smra bar byed pa la'o/ /des gang la mngon par shes pa nyid yin zhe na de'i phyir bslab pa la'o zhes bya ba smras te/ 'dul ba las gsungs pa la'o/ /'di skad bstan te gal te dge slong dag gis dge slong 'ga' zhig la khyod kyis bslab pa 'di la slobs shig ces smras te de 'di skad ces kho bo ni byis pa glen pa mi gsal ba mi mkhas pa khyed cag gi tshig gis bslab pa 'di la mi slob po zhes zer la des smra ba po de bslab pa'i yul la mngon par shes pa nyid du yang shes na de'i tshe kha na ma tho ba 'dir 'gyur ro/ /gal te smra ba po bslab pa'i yul la mngon par mi shes pa nyid yin na ni de'i tshe nyes pa med do/ /'dir gzhung ni yang dag pa kho nar byis pa glen pa mi gsal ba mi mkhas pa dag yin na ltung ba med do zhes gsungs pa yin no/ /gang la de byed pa po nyid yin zhe na de'i phyir/ dge slong gis khyod kyis 'di la bslab par bya'o zhes brjod pa na 'am bsgo ba na mi slob po zhes rgyu'i dngos po des go bar byed pa las mi shes pa nyid sgrogs par byed pa'i tshig brjod na'o zhes bya ba smras te/ dge slong gis zhes bya ba ni/ go bar byed pa'i dge slong gis so/ /khyod kyis zhes bya ba ni/ ltung ba 'byin par byed pas so/ /'di la zhes bya ba ni/ 'dul ba las gsungs pa la ste mdo sde las gsungs pa la ni nyes byas kyi'o zhes 'byung ba'i phyir ro/ /bslab par bya'o zhes brjod pa na zhes bya ba ni/ dngos gzhi'i ltung ba so sor nges pa'i bslab pa la khyod kyis bslab par bya'o zhes brjod pa na'o/ /bsgo ba na'o zhes bya ba ni/ brjod pa 'di la khyod kyis bslab par bya'o zhes smos par byas na'o/ /de ltar bya bar rjod pa na'am bsgo ba na go bar byed pa'i dge slong la la ltung ba 'byin par byed pas mi shes pa nyid sgrogs par byed pa'i tshig brjod na de la de byed pa po nyid yin no zhes bya bar sbyar ro/ /rnam pa gang dang gang zhe na de'i phyir/ mi slob po zhes rgyu'i dngos po des zhes bya ba smras te/ kho bo bslab pa 'di la mi slob po zhes zer zhing de'i rgyu'i dngos po ni 'di skad ces bdag dge slong mdo sde 'dzin pa dang 'dul ba 'dzin pa dang ma mo 'dzin pa rnams la 'di'i bar du mi slob bo zhes zer ba ste/ de yang yang dag par ni ma yin no/ /gang la mi shes pa nyid sgrogs par byed ce na/ de'i phyir go bar byed pa la'o zhes bya ba smras te/ 'dul ba dang ldan pa'i bslab pa'i yul la mngon par shes pa nyid dang ldan pa'i dge slong dag la'o/ /mi shes pa nyid sgrogs par byed pa'i tshig ji skad brjod ce na de'i phyir mi shes pa nyid sgrogs par byed pa'i tshig brjod na'o zhes bya ba smras te/ de ni byis pa glen pa mi gsal ba mi mkhas pa khyed kyi tshig gis bslab pa 'di la mi slob po zhes de skad zer ba ste/ gang gi phyir khyod mi shes pa de'i phyir kho bo mi slob po zhes go bar byed pa la mi shes pa nyid sgrogs par byed pa'i tshig gang yin pa de brjod na kha na ma tho ba 'dir 'gyur ro zhes bya ba'i tha tshig go/ /mdo sde las gsungs pa la ni nyes byas kyi'o zhes bya ba yang mngon par shes pa nyid la'o/ /smra ba po la'o/ /slob pa po la'o/ /dge slong gis khyod kyis 'di la bslab par bya'o zhes brjod pa na'am bsgo ba na mi slob po zhes rgyu'i dngos po des go bar byed pa la mi shes pa nyid sgrogs par byed pa'i tshig brjod na de la de nyes byas kyi byed pa po nyid yin no zhes bya ba'i tha tshig go/ /'dir gzhung ni zhu ba cig las 'dul ba dang ldan pa dag ma gtogs pa mdo sde dag la 'di skad ces kho bo 'di la mi slob po zhes zer na nyes byas so zhes gsungs pa yin no/ /de ltar na 'dir tshig gi don 'di 'byung ste/ gal te ltung ba 'byin par byed pa'i dge slong gis dge slong smra ba po de b slab pa'i gzhi'i yul la dge slong 'dis mngon par shes so zhes yongs su shes pa gang yin pa de shes shing dge slong smra ba po des khyod kyis bslab pa 'di la bslab par bya'o zhes brjod pa ni gal te ltung ba 'byin par byed pa des go bar byed pa de la mi shes pa nyid bsgrags par bya'o snyam pa'i bsam pas 'di skad ces kho bo mi slob po zhes sgrogs par byed na ltung ba 'byin par byed pa'i tshig gang yin pa de brjod na kha na ma tho ba 'dir 'gyur ro/ /bslab pa la nye bar 'jog pa spong ba'i ltung byed do zhes bya ba de bshad zin to// //ci zhig byas na nyan rna las gyur pa'i ltung byed du 'gyur zhe na de'i phyir/ dge slong dag rtsod par gyur pa dge slong dag gros byed pa na mnyan pa'i phyir rna gtod na de nye bar zhi bar 'dod pas ni ma gtogs so zhes bya ba smras te/ yul gyi don gcig la brten pa'i rgol ba dang phyir rgol ba dag mang po zhig yod mod kyi 'on kyang rigs gnyis yod pa'i phyir/ dge slong dag ces gnyis kyi tshig tu byas so/ /rgol ba dang phyir rgol ba'i dge slong dag la gal te rtsod par gyur pa ni rtsod pa de dge slong dag dang gros byed pa na dge slong 'di dag ji skad zer ba bzhin de bdag gis mnyan te de ltar de lta bur sta gon bya'o snyam nas rkyen de nyid kyis mnyan pa'i phyir ci'ang mi smra bar bzhabs te rna gtod cing nyan na ltung byed do/ /ci rna gtod pa thams cad la'am zhe na de'i phyir nye bar zhi bar 'dod pas ni ma gtogs so zhes bya ba smras te/ rtsod pa de nye bar zhi bar 'dod pas rna gtod cing nyan pa ni ma gtogs so zhes bya ba'i tha tshig go/ /'dir gang la kha na ma tho ba ji ltar 'gyur zhe na de'i phyir/ sgra thos pa la ni nyes byas so zhes bya ba smras te/ gal te sgra tsam thos na nyes byas so/ /don la ni dngos gzhi'o zhes bya ba smras te/ gal te sgra'i don go na de'i tshe dngos gzhi'i ltung byed do zhes bya ba'i tha tshig go/ /ci don gang yang rung ba go na dngos gzhir 'gyur ram zhe na de'i phyir/ gal te 'khrug long bya ba la gzhol bas so zhes bya ba smras te/ gal te 'khrug long bya ba la gzhol bas de'i don go na de'i tshe dngos gzhi'o/ /don gzhan gyi dbang nyid kyis son cing shes pa'i 'og tu rkang pa dang se gol dang lud pa'i sgra dag gis go bar mi byed na nges par ltung ba 'byin pa nyid du 'gyur te/ gal te nor pa dang zhi bar 'dod pa ni ma gtogs so zhes bya ba ni/ dgos pa gzhan gyi dbang nyid kyis gros byed pa'i gnas su son cing gal te dge slong des kyang 'di na dge slong dag gros cung zhig byed do snyam du de ltar shes la de ltar shes pa'i 'og tu rkang pa'i rting sgra'am se gol gyi sgra'am lud pa'i sgra dag gis gros byed pa de dag la go bar mi byed na go bar mi byed pa'i dge slong des nges par ltung ba 'byin pa nyid du 'gyur ro/ /gal te nor par gyur tam zhi bar 'dod na ni ma gtogs so/ /'thab gcugs mi bya'o zhes bya ba ni/ 'thab mo spar bar mi bya'o/ /mnyan par mi bya'o zhes bya ba ni 'thab mo'o/ /de byed pa la nye bar bskor te 'dug par mi bya'o zhes bya ba ni/ 'thab mo de byed pa'i gang zag la nye bar bskor zhing 'dug par mi bya ba ste/ de'i drung na 'dug par mi bya ba'o zhes bya ba'i tha tshig go/ /nye bar zhi bar bya ba'i phyir mi 'bad par mi bya'o zhes bya ba ni/ rtsod pa de nye bar zhi bar bya ba'i phyir 'bad par bya'o zhes bya ba'i tha tshig go/ /nyan rna las gyur pa'i ltung byed do zhes bya ba de bshad zin to// //gang la mi smra bar 'gro ba'i ltung byed du 'gyur zhe na de'i phyir gsol ba la sogs pa'i las la 'dus pa dge slong las smras par 'gro na'o zhes bya ba smras te/ gsol ba la sogs pa'i las la zhes bya ba ni/ gsol ba 'ba' zhig dang gsol ba dang gnyis dang gsol ba dang bzhi'i las kyis bdag nyid gso sbyong dang dgag dbye la sogs pa la ste rab tu byung ba la ltos pa zhu ba la sogs pa la ni ma yin no/ /'dus pa zhes bya ba ni/ dge 'dun 'dus pa'i nang du zhugs pa'i dge slong ngo / /dge slong la ma dris par 'gro na'o zhes bya ba ni/ der 'dus pa'i dge slong de 'phral gyi bya ba la sogs pa'i rkyen cig byung na ltag 'og na 'dug pa'i dge slong cig la ma smras par stan las langs te 'gro na ltung byed du 'gyur ro/ /'dir dge slong la smras pa zhes bya ba yang dge 'dun phrin las mdzad pa la sdod du gzhug pa'i phyir ni ma yin gyi/ mthun pa sgrub pa'i phyir te 'dun pa 'bul ba dang 'dra'o/ /thag ji srid du song na kha na ma tho ba cir 'gyur zhe na de'i phyir/ thos pa'i nyen kor las 'das na dngos gzhi'o zhes bya ba smras te/ sgra thos pa'i nyen kor gang yin pa de las 'das na dge slong de la dngos gzhir 'gyur ro/ /mdun rol du nyes byas so zhes bya ba ni thos pa'i nyen kor las 'da' ba'i mdun du ni nyes byas su 'gyur ba'o/ /don med pa dang mi rigs par 'gro ba'o zhes bya ba ni/ dgos pa med pa dang / mi rigs pa'i tshul gyis dgos pa ni/ dge slong la smras te 'gro na yang nyes byas su 'gyur ba'o/ /gsol ba byas pa nyid la'o/ zhes bya ba ni/ thos pa'i nyen kor las 'das pa la yang nyes byas kho nar 'gyur ba'o/ /'dir gzhung ni btsun pa las brjod pa bgyis pa na dge slong stan las langs te mchi zhing dge slong mchis pa dag la yang mi mchi na ltung ba cir 'gyur/ nye ba 'khor nyes byas so zhes gsungs pa yin no/ /chos dang ldan pa nyid ma yin pa'i las la yang ngo zhes bya ba yang / ma smras par thos pa'i nyen kor las 'da' na nyes byas kho nar 'gyur ba'o/ /de ltar mdo gsum po de dag la ni dngos gzhi'i gnas su nyes byas su rig par bya'o/ /'dir gzhung ni zhu ba kha cig las chos dang ldan pa nyid ma yin pa'i las byed pa na 'gro na nyes byas so zhes gsungs pa yin no/ /thos pa'i yul las mi 'da' bar 'dod pas ni ltung ba med do zhes bya ba ni thos pa'i yul yongs su mi gtong ngo snyam pa'i bsam pas 'gro ba la ni ltung ba med do/ /'di ni sngar mdun rol du ni nyes byas so zhes smras pa de'i dmigs kyis bsal ba yin no/ /'dir gzhung ni zhu ba las gsol ba brtsams pa na bshang ba'i sa'am gci ba'i sar 'gro zhing dge slong 'khod pa dag la mi smra bar yang thos pa'i nyen kor yongs su mi gtong ba gang yin pa la ni ltung ba med do/ /gtong na ni dngos gzhi kho nar 'gyur ro zhes gsungs pa yin no/ /mi smra bar 'gro ba'i ltung byed do zhes bya ba de bshad zin to// //gang la ma gus pa'i tshul gyis ltung byed du 'gyur zhe na de'i phyir/ 'dug pa dang 'gro ba dang gnas mal dang gtsug lag khang len pa dang smra ba la sogs pa bsgo ba'i don la ma gus pas chos dang ldan par shad kyis sbyang ba med par de la bzlog pa ste 'gal bar byed pa'o zhes bya ba smras te/ dge slong gi dge 'dun gyis 'dug pa dang 'gro ba dang gnas mal len pa dang gtsug lag khang len pa dang smra ba la sogs pa bsgo ba'i don la ma gus pas chos dang ldan par shad kyis sbyang ba med par de las bzlog ste mi 'dug pa dang mi 'gro ba dang gnas mal mi len pa dang / gtsug lag khang mi len pa dang mi smra ba la sogs pas 'gal zhing 'da' bar byed pa las kha na ma tho ba 'dir 'gyur ro/ /sogs pa zhes smos pa'i sgras ni don lhag ma dag kyang bsdu ba'i phyir ro/ /ma gus pas zhes bya ba dang chos dang ldan pas shad kyis sbyang ba med par zhes bya ba'i tshig gnyi ga smos pa ni phan tshun 'khrul pa med par bstan pa'i phyir te/ 'di lta ste dper na/ smros shig ces byas na shin tu shed dman pa'i phyir cung zad kyang smra bar mi nus par cang mi smra bar 'dug cing chos dang ldan par shad kyis sbyong bar mi byed na de la ni ma gus pa med la/ tshig rtsub mos chos dang ldan par shad kyis sbyong bar byed na de la ni ma gus pa yod pas de'i phyir gang la gnyi ga yod pa de la ni kha na ma tho ba yongs su rdzogs par 'gyur la/ gang yang rung ba med pa la ni nyes byas so/ /sus bsgo ba'i don las 'gal bar byed pa la ltung ba ji ltar 'gyur zhe na de'i phyir/ dge slong gi dge 'dun gyis la ni dngos gzhi'o zhes bya ba smras te/ dge slong gi dge 'dun gyis bsgo ba'i don las 'gal bar byed pa la ni dngos gzhir 'gyur ro/ /mkhan po dang slob dpon gyis la ni nyes byas so zhes bya ba ni/ de dag gis bsgo ba'i don las 'gal bar byed pa la ni nyes byas su 'gyur ba'o/ /chos dang ldan pa nyid ma yin pa'i bsgo ba las kyang ngo zhes bya ba ni/ dge slong gi dge 'dun gyis bsgo ba'i don chos dang ldan pa nyid ma yin pa'i bsgo ba las 'gal bar byed pa la yang nyes byas so zhes bya ba'i tha tshig go/ /'dir gzhung ni zhu ba las btsun pa dge slong gis dge slong gnas brtan rnams chos dang ldan pa'i bka' mchid rnam par gtan la 'bebs pa na glo bur du bka' mchid mchi la ltung bar yang mi 'gyur ba mchis sam yod de 'di lta ste/ dge slong gnas brtan dag chos ma yin pa smra la gsar bu dag ni chos smra bas glo bur du gtam zer na nyes byas su 'gyur ba'o zhes gsungs pa yin no/ /gtam zer ba ni de nyid do zhes bya ba ni/ gzhan dag chos dang ldan pa'i gtam rnam par gtan la 'bebs pa'i bar du glo bur du gtam zer ba ni/ dge slong gi dge 'dun gyis bsgo ba las 'gal bar byed pa yin te ltung byed do zhes bya ba'i tha tshig go/ /'dir gzhung ni glang chen lhas kyi bdag po'i bu nag pa gtam gyi mjug mod par mi byed gus par mi byed zhes mi byed cing phyir smra bar bya'o snyam du sems so zhes bya ba'i bar du gsungs pa de dang 'dir gzhung ni zhu ba'i gzhung las kyang gsar bu chos ma yin pa smra ba dag gnas brtan chos smra ba rnams la glo bur du gtam zer ba ni ltung byed do zhes gsungs pa yin no/ /dge 'dun gyi tha snyad pa ni de'i kha yin no zhes bya ba ni/ dge 'dun gyi tha snyad pa ni dge 'dun gyi kha yin te/ dge 'dun gyi tha snyad pas bsgo ba yin pa de ni dge 'dun nyid kyis bsgo ba ma yin no zhes bya ba'i tha tshig go/ /sangs rgyas ni dge 'dun dang 'dra'o zhes bya ba ni/ sangs rgyas la ma gus pa las kha na ma tho ba yongs su rdzogs par 'gyur ba ni dge 'dun dang 'dra ba ste/ bslab pa las 'gal bar byed pa'i dus na gal te de'i tshig mi dgos pa 'dis ci zhig bya zhes bya ba la sogs pas sangs rgyas bcom ldan 'das la ma gus pa skye ba la ni ltung byed do/ /gal te bslab pa tsam la cung zad tsam dang ngan ngon tsam 'dis ci zhig bya zhes bya ba la sogs pas bslab pa la ma gus pa skye na ni nyes byas so/ /rgyal po dang dgra bcom pa dang dge 'dun gyi gnas brtan rnams kyi tshig rnam par dkrug par mi bya'o zhes bya ba la/ 'dir gzhung ni shA ri'i bu lnga po dag gi tshig ni mi bskyod par bya ba ste/ yang dag par rdzogs pa'i sangs rgyas dang / dge slong dgra bcom pa zag pa zad pa dang / rgyal po rgyal rigs spyi bo nas dbang bskur ba dang / dge 'dun gyi gnas brtan dang dge skos kyi'o zhes gsungs pa yin no/ /de la sangs rgyas ni dge 'dun dang 'dra'o/ / dge 'dun gyi tha snyad pa ni de'i kha yin no zhes bya ba'i mdo snga ma gnyis kyis ni yang dag par rdzogs pa'i sangs rgyas kyi bka' dang dge 'dun gyi dge skos kyi tshig dang 'gal bar byed pa la ltung byed du bstan pa yin no/ /mdo 'dis ni lhag ma gsum po rgyal po rgyal rigs spyi bo nas dbang bskur ba dang / dge slong dgra bcom pa zag pa zad pa dang / dge 'dun gyi gnas brtan rnams kyi tshig las 'gal bar byed pa las nyes byas su bstan pa yin no/ /ma gus pa'i tshul gyis ltung byed do zhes bya ba de bshad zin to// //ci zhig byas na myos par 'gyur ba 'thung ba'i ltung byed du 'gyur zhe na de'i phyir/ myos par 'gyur ba 'thung na'o zhes bya ba smras te/ myos par 'gyur ba'i bltung ba 'thung na'o/ /de bskol na ni de nyid las nyams pa yin no zhes bya ba la/ myos par 'gyur ba de bskol na ni myos par 'gyur ba de nyid las nyams pa yin no/ /'dir gzhung ni bskol ba 'thung ba la ni ltung ba med do zhes gsungs pa yin no/ /snga ma dang tshigs ma za ba la ni de'i 'jug pa yod do zhes bya ba ni/ /sbang ma dang tshigs ma za ba la ni myos par 'gyur ba de'i 'jug pa yod do zhes bya ba'i tha tshig go/ /sbang ma zhes bya ba ni 'bru'i chang gi sbang ma'o/ /tshigs ma zhes bya ba ni bcos pa'i chang gi tshigs ma'o/ /'dir gzhung ni sbang ma za na ltung byed do/ /tshigs ma za na ltung byed do zhes gsungs pa yin no/ /phabs kyi chang bu ni phyed nyid do zhes bya ba ni/ myos par 'gyur ba'i phyed nyid de nyes byas nyid yin no zhes bya ba'i tha tshig go/ /rtsa ba dang sdong bu dang 'dab ma dang me tog dang 'bras bu myos par 'gyur ba rnams kyang ngo zhes bya ba ni/ myos par 'gyur ba'i phyed nyid do/ /myos par 'gyur ba'i dri dang ro bro ba'i thug pa myos par mi byed pa rnams kyang ngo zhes bya ba yang myos par 'gyur ba'i phyed nyid do/ /mdog tsam myos par 'gyur ba dang 'dra ba la ni ltung ba med do zhes bya ba ni/ 'dir gzhung ni mdog tsam 'ba' zhig myos par 'gyur ba dang 'dra ba 'thung ba la ni ltung ba med do zhes gsungs pa yin no/ /mkhur bar bsrel ba dang lus skud pa ni sbyor ba dang 'dra'o zhes bya ba ni/ myos par 'gyur ba mkhur bar bsrel ba dang des lus skud pa ni sbyor ba dang 'dra bar rig par bya ste nyes byas byed pa nyid yin no zhes bya ba'i tha tshig go/ /nad pa la ni ltung ba med do zhes bya ba ni/ nad pas mkhur bar bsrel ba dang lus skud pa dag byed pa la ni ltung ba med pa'o/ /'dir gzhung ni sman pa'i lung gis mkhur bar bsrel ba dang lus dag skud pa ni ltung ba med do zhes gsungs pa yin no/ /de nyid sbyor ba dang 'dra'o zhes bya ba ni mdo snga ma shos kyi khungs yin no/ /myos par 'gyur ba 'thung ba'i ltung byed do zhes bya ba de bshad zin to// //dus ma yin par 'gro ba'i ltung byed la byed pa po nyid gang yin zhe na de'i phyir/ shes gtso bo zhes bya ba smras te/ 'dir yang shes gtso bo zhes bya ba'i ming dang 'du shes gtso cher byed pa po nyid do zhes bya ba'i ming can du sbyor bar byed do/ /gang la 'du shes gtso cher byed pa po nyid yin zhe na de'i phyir dus ma yin pa nyid la'o zhes bya ba smras te/ dus ma yin pa'i yul la 'du shes gtso cher byed pa po nyid yin no/ /dus ma yin pa'i mtshan nyid ni sngar dus ma yin par za ba'i skabs su rang gi phyed nyid yol nas skya rengs shar ba'i bar ni dus ma yin no zhes bstan pa yin no/ /dge slong khyad par ji lta bu can zhig la de byed pa po nyid yin zhe na de'i phyir dge slong 'khod pa las ma smras pa la'o zhes bya ba smras te/ gang gis dge slong 'khod cing yod pa la ma smras pa de ni dge slong 'khod pa la ma smras pa ste de la 'du shes gtso cher byed pa po nyid yin no/ /ci zhig byas na dge slong de la 'du shes gtso cher byed pa po nyid yin zhe na de'i phyir grong du zhugs na'o zhes bya ba smras te/ khyams gcig pa'i gnas kyang grong nyid yin par gsungs pas de'i phyir khang pa gcig tsam yod pa'i gnas kyang grong nyid yin no/ /grong pa'i chos dang ldan par lhag par spyod pa'i gnas dag la ni grong gi sgra 'jug par 'gyur bas de'i phyir ma smras par phyi rol pa'i rab tu byung ba'i gnas su 'jug pa la nyes pa med do/ /bskor ba dang bcas pa'i grong la ni sgo gtan gyi bar du 'jug na zhugs pa yongs su rdzogs par rig par bya'o/ /ma bskor ba la ni bskor ba'i mtha'i 'dom gang la sogs par ro/ /ci zhugs pa thams cad la'am zhe na de'i phyir/ gal te gtad pa'i bya ba ma byung na'o zhes bya ba smras te/ gang la chom rkun la sogs pas gnod pa'i bya ba gtad pa med pa de la kha na ma tho ba 'dir 'gyur ro/ /de'i dbang gis 'jug pa gang yin pa de la ni ltung ba med do/ /gzhan du rgyu ba la ni nyes byas so zhes bya ba ni/ de phyogs gang du grong ba'i phyir smras pa'i phyogs de las gzhan pa de'i yan lag tu gyur pa'i phyogs gang yin pa der rgyu ba de la ni nyes byas so/ /grong gcig pa'i khyim gzhan du 'gro ba smra zhing khyim gzhan du rgyu ba yang nyes byas so/ /grong gzhan du rgyu ba la ni ltung byed do/ /grong yongs su chad par byed cing khyim yongs su chad par mi byed par grong de'i khyim du 'jug pa yang nyes byas kho na'o/ /'dir gzhung ni zhu ba las gang la nyen kor gcig yin pa'i nyen kor shes pa las 'das ste der 'gro na nyes byas so zhes gsungs pa yin no/ /'dir nyen kor gcig nyid ces bya bas ni grong gcig nyid bstan par rig par bya'o/ /'di la dge slong med na dge slong ma yang de dang 'dra'o zhes bya ba ni/ dge slong 'khod pa la smras te/ 'gro bar bya ba 'di la gang la smra bar bya ba'i dge slong med na dge slong ma yang de dang 'dra bar rig par bya ste/ gal te dge slong med na dge slong ma de la smra bar bya'o zhes bya ba'i tha tshig go/ /de yang med na dge tshul la'o zhes bya ba ni/ dge slong ma de yang med na dge tshul dge slong dang 'dra bar rig par bya'o/ /de yang med na dge slob ma'o zhes bya ba ni/ dge tshul de yang med na dge slob ma dge slong dang 'dra'o/ /de yang na dge tshul ma'o zhes bya ba ni/ gal te dge slob ma de yang med na dge tshul ma yod na de la smra bar bya'o zhes bya ba'i tha tshig go/ /'dir gzhung ni dge slong gis dge slong la smra bar bya zhing dge slong ma dang dge tshul dang dge slong ma dang dge tshul ma la yang smra bar bya ste 'khor lo bzhin du sbyar bar bya'o zhes gsungs pa yin no/ /brda mi phrad pa ni med pa nyid do zhes bya ba ni/ glen pa dang lkugs pa dang kla klo la sogs pa dag des brda mi phrad pa yin na smra bar bya ba nyid ma yin no/ /'dir gzhung ni tha mal par smras pa mi thos pa dang tha mal par smras pa mi shes pa gang dag yin pa de dag dang lhan cig 'dug pas de dag la ma smras par 'jug pa la ltung ba med do zhes gsungs pa yin no/ / mtshams gzhan na gnas pa dang / spangs pa dang gzhan gyi phyogs dang mthun pa dag kyang ngo zhes bya ba yang med pa nyid yin pa'i mtshams gzhan na gnas pa zhes bya ba ni/ nam mkha' la gnas pa'i dge slong la sa la gnas pa'i dge slong gis ma smras par 'jug pa la ltung ba med pa'o/ /de bzhin du spangs pa dang / gzhan gyi phyogs su gyur pa la ma smras par 'jug pa la yang ltung ba med do/ /gzhan gyi phyogs dang mthun pa zhes bya ba ni/ tha dad par gyur pa'i dge 'dun gyi phyogs gzhan du gtogs par rig par bya'o/ /'dir gzhung ni sa la gnas pas nam mkha' la gnas pa la ma smras par 'jug pa la ltung ba med do/ /tha dad par smras pa dang lhan cig 'dug pas de la ma smras par 'jug pa la ltung ba med do/ /de bzhin du mi ma yin pa rab tu byung zhing bsnyen par rdzogs pa dag dang lhan cig 'dug pas de la ma smras par 'jug pa la ltung ba med do/ /sngon ltung ba byung ba dang / dang po 'khrugs pa dang / rku thabs su gnas pa dang / dge slong ma sun phyung ba dang / mtha'i ltung ba 'byung ba dang lhan cig 'dug pas de dag la ma smras par 'jug pa la ltung ba med do/ /de las gzhan pa'i dge sbyong dang bram ze dag dang lhan cig 'dug pas ma dris par 'jug pa la ltung ba med do zhes gsungs pa yin no/ /rdzu 'phrul gyis ni ltung ba med do zhes bya ba ni/ rdzu 'phrul gyis grong du 'jug pa la ni ltung ba med do/ /'dir gzhung ni rdzu 'phrul gyis nam mkha' la 'jug na ma smras kyang ltung ba med do zhes gsungs pa yin no/ /dus ma yin par 'gro ba'i ltung byed do zhes bya ba de bshad zin to// //gang la grong rgyu ba'i ltung byed du 'gyur zhe na de'i phyir dus ma yin par khyim bzhi pa la sogs par 'gro ba la'o zhes bya ba smras te/ dge slong gung tshigs las yol ba'i dus ma yin par khyim bzhi pa la sogs par 'gro ba de la kha na ma tho ba 'dir 'gyur ro/ /ltung byed snga ma la ni dge slong 'khod pa dag la ma smras par 'gro ba la ltung byed du bstan to/ /'dir ni dge slong 'khod pa dag la smras su zin kyang ltung byed du 'gyur ro/ /ci 'dir de 'ba' zhig la'am zhe na de'i phyir/ de'i tshig gis dge 'dun spyan drangs pa ni sbyin bdag la kho bo ma 'ongs pa'i dbang gis brim pa yol bar mi bya shig ces ma bsgo bar gsum pa la sogs par rgyu ba la yang ngo zhes bya ba smras te/ dge slong de'i tshig gis dge 'dun zas dang bcas pa'i khyim du spyan drangs pa na gal te dge slong des sbyin pa po dang sbyin bdag la 'di skad ces kho bo ma 'ongs pa'i dbang gis khyod kyis dge slong rnams la zas brim pa yol bar mi bya shig ces ma bsgo bar khyim gsum pa la sogs par rgyu zhing 'gro ba de la yang kha na ma tho ba 'dir 'gyur ro/ /dge sbyong gi tshul dang srog la sogs pa'i bar chad kyi dbang gis ni ltung ba med do/ /'dir ni khyim re rer song ba la ltung byed re rer 'gyur ba de'i phyir khyim bzhi pa la sogs par 'gro ba la'o zhes bya ba'i mdo snga ma la ni khyim bzhi pa dang lnga pa dang drug pa la sogs par 'gro ba las zhes bya ba'i tha tshig ste/ khyim so sor 'gro ba la ni gsum pa la sogs par rgyu ba la yang ngo zhes bya ba'i mdo phyi ma la ni khyim gsum pa dang bzhi pa dang lnga pa la sogs par 'gro ba la zhes bya ba'i tha tshig ste/ khyim so sor 'gro ba la ni sbyor ba tha dad pa'i phyir ro/ /zan gcad par bya ba'i bslab pa la ni 'dir khyim re re la ltung byed gzhan yod par rig par bya'o/ /grong rgyu ba'i ltung byed do zhes bya ba de bshad zin to// //rgyal po'i pho brang du nub mo 'gro ba'i ltung byed la byed pa po gang yin zhe na/ de'i phyir shes gtso bo zhes bya ba smras te/ 'dir yang shes gtso zhes bya ba'i ming dang 'du shes gtso cher byed pa po nyid do zhes bya ba'i ming can du sbyor bar byed do/ /gang la 'du shes gtso cher byed pa po nyid yin zhe na/ de'i phyir/ nam ma langs pa nyid la'o zhes bya ba smras te/ nam ma langs pa'i yul la 'du shes gtso cher byed pa po nyid yin te/ nam yang ma langs la dge slong gis kyang nam ma langs par 'du shes na zhes bya ba'i tha tshig go/ /nyin mo'i dang po ni skya rengs dang po shar ba yin par gsungs pa de'i mdun rol ni mtshan mo'i mtha' yin par rnam par gzhag na/ ci 'dir yang de bzhin du rnam par gzhag gam zhe na ma yin te de'i phyir/ 'di ni skya rengs tha ma shar ba nyid de nyid yin no zhes bya ba smras te/ skabs 'dir ni skya rengs tha ma ma shar ba nyid nam ma langs pa nyid yin la/ skya rengs tha ma shar ba nyid ni nam langs pa nyid yin no zhes bya ba'i tha tshig go/ /gnas skabs gang la de byed pa po nyid yin zhe na de'i phyir/ btsun mo'i 'khor 'dug pa'i gnas dang 'brel ba nyid la'o zhes bya ba smras te/ btsun mo'i 'khor 'dug pa'i gnas dang ltung ba 'byin par byed pa'i lus su 'brel pa nyid la 'du shes gang yin pa de byed pa po nyid yin no/ /'di skad bstan te/ gal te dge slong nub mo btsun mo'i 'khor gyi gnas su lus 'brel bar gyur cing der 'du shes par yang gyur na de'i tshe/ kha na ma tho ba 'dir 'gyur ro/ /ci nub mo gang la 'brel pa nyid du 'gro ba'i skabs byed pa po de la 'du shes gang yin pa de byed pa po nyid yin nam 'on te dus gzhan gyi tshe 'gro ba'i skabs byed pa po la yang yin zhe na de'i phyir/ de'i tshe skabs ma yin pa la yang ngo zhes bya ba smras te/ de'i nub mo dang 'brel ba nyid kyi skabs ma yin pa de ni de'i tshe skabs ma yin pa ste/ de'i skabs ma yin pa dus gzhan gyi tshe de'i skabs la yang 'du shes gang yin pa de byed pa po yin no/ /'di skad bstan te/ nub mo'am nyin mo gzhan gang gi tshe 'gro ba'i skabs byed pa de la yang 'du shes gang yin pa de byed pa po nyid yin no/ /'dir gzhung ni gang gi tshe 'phags pa shA ri'i bu btsun mo dpal ldan gyis ji srid du bden pa dag ma mthong gi bar du chos dang ldan pa'i gtam gyis yang dag par ston par byed/ yang dag par 'dzin du 'jug par byed pa'i tshe nyi ma nub pa'i dus la bab pa la dge slong rnams stan dag las langs te dong ba dang / tshe dang ldan pa shA ri'i bus kun du brtags pa 'di ltar bcom ldan 'das kyis rjes su ma gnang mod kyi/ 'on kyang rkyen 'di lta bu nyid kyi dbang du byas na rjes su gnang bar 'gyur ba'i gnas de ni yod do snyam nas 'dul ba la ltos pas de nyid du 'dug go zhes gsungs pa yin te/ 'di ltar 'phags pa shA ri'i bus nyin mo 'brel pa nyid du 'gro ba'i skabs byas mod kyi/ 'on kyang dogs pa nyid du gyur pas de'i phyir mdo 'di byas so/ /mtshan mo du mar 'brel pa nyid la ci thams cad la 'du shes gcig kho na byed pa po nyid yin nam zhe na de'i phyir/ mtshan mo re re la'o zhes bya ba smras te/ mtshan mo re re la 'brel pa nyid du gyur pa re re'i nang rol du 'du shes byed pa po nyid yin no/ /mtshan mo thams cad la ltung ba tha dad par 'gyur ro zhes bya ba'i tha tshig go/ /mtshan mo'i cha gang yang rung ba la ltung byed du 'gyur ba yin gyi/ mtha' 'ba' zhig la ltung byed du 'gyur ba ni ma yin no/ / sngar 'chang ba'i spang ba'i ltung byed la sogs pa'i thun mong gi mtshan nyid rnam par gzhag pa bstan pa'i skabs su nyin mtshan gyi dang po ma yin pa la tha ma ma yin pa med pa nyid do zhes smos pa des ni nyin mtshan gyi mtshan nyid bstan pa yin gyi mtshan mo 'ba' zhig gi mtshan nyid bstan pa ni ma yin pas de'i phyir rnam pa de ni 'dir khas mi blang ngo / /mtshan mo'i dang po gang yin zhe na/ nyi ma nub pa'i 'og tu 'od dmar po chags pa gang yin pa de 'das par gyur pa ni mtshan mo'i dang po yin te/ de yang nam nangs pa nyid bstan pa'i rjes su 'brangs pa la khong du chud par bya'o/ /ji ltar 'dir nyin mo'i dang po ni skya rengs tha ma zhes bya ba dmar rengs shar ba yin pa de bzhin du 'od dmar po de nub pa yang nyin mo'i mtha' yin la de phyin chad ni mtshan mo yin par rig par bya'o/ /dge slong gal te mtshan gcig thog thag tu rgyun du gnas par byed pa de la ji ltar kha na ma tho ba nyid kho nar 'gyur zhe na/ de'i phyir/ ji ste btsun mo'i 'khor gyi mtshams las 'das nas phyir byung zhing yang nang du 'jug par byed na ni de lta na ni ltung ba tha dad par 'gyur te sbyor ba tha dad pa'i phyir ro/ /ji ste mtshan thog thag 'byung 'jug med par 'jug na ni ltung byed gcig tu 'gyur ro/ /gang nas brtsams te sgor 'jug pa la btsun mo'i 'khor 'dug pa'i gnas su rig par bya zhe na de'i phyir/ de'i sgo'i gtan pa dang nyen kor gnyis kyi mtha' gnyis ni de'i dang po yin no zhes bya ba smras te/ btsun mo'i 'khor gyi gnas de'i nang rol gyi sgo'i gtan pa gang yin pa de dang sgo'i gtan pa'i nyen kor gyi mtha' ste mur thug gang dag yin pa de gnyis ni btsun mo'i 'khor gyi gnas de'i dang po yin par rig par bya'o/ /'dir nyen kor de'ang gang zhe na/ phyogs gang du sgo gtan gyi rtsa ba gtan pa de nas de'i rtse mo sgo logs su bstan te bsnyal ba dang / de nyid nas de'i rtse mo phyir bzlog ste phug logs su bsnyal ba'i sgo'i gtan pa des phyogs ji srid khyab pa de ni nyen kor yin par shes par bya ste de'i mtha' gang yin pa de ni btsun mo'i 'khor gyi dang po yin no/ /yul gyi rnam par dbye ba ni 'di ltar shes par bya ste/ gal te sgo ma bcad na ni nyen kor gyi mtha' btsun mo'i 'khor gyi dang po yin la/ gal te sgo bcad na ni de'i tshe sgo gtan gyi mtha' btsun mo'i 'khor gyi dang po yin no/ /rgyal po'i pho brang dang grong khyer dag kyang de dang 'dra'o zhes bya ba ni ji ltar btsun mo'i 'khor 'dug pa'i gnas kyi dang po de'i gtan pa dang nyen kor gyi mtha' gnyis yin pa bzhin du rgyal po'i pho brang dang grong khyer dag gi dang po yang de'i sgo'i gtan pa dang nyen kor gyi mtha' gnyis yin pa'o/ /btsun mo'i 'khor la gang gi tshe sgo btsugs par rnam par bzhag pa de'i tshe ni sgo'i gtan pa dang nyen kor gyi mtha' gnyis dang po yin no/ /gang gi tshe btsun mo'i 'khor 'dug pa'i gnas kyi sgo ma btsugs par rnam par gzhag pa de'i tshe ni 'obs la sogs pa'i nang gi ngos btsun mo'i 'khor gyi dang po yin no/ /zhar las byung ba rdzogs so// //

CLOSE WINDOW