བོད་ཡིག

e-texts based on the ACIP/ALL Input

/'jam dpal gzhon nur gyur pa la phyag 'tshal lo/ /so sor thar pa'i bshad pa rnams mi brjed dran byed tsam du bris pa/ yang so sor thar pa bshad pa yang rnam pa gnyis kyi phyir te/ log pa'i ngang tshul spang bar bya ba'i phyir dang / yang dag pa'i ngang tshul rgyas shing bstan par bya ba'i phyir bshad do/ /de la sngon gyi gtam rgyud mdo tsam zhig smos par bya ste/ sangs rgyas bcom ldan 'das mngon par byang chub nas/ chos kyi 'khor lo 'jig rten du lan bcu gnyis bskor te gzhag pa'i che lo bcu gnyis kyi bar du ni de bzhin gshegs pa'i 'khor nyan thos kyi dge slong gi dge 'dun la tshul khrims kyi sgo nas skyon dang 'phan ma byung ste/ tshul khrims yongs su dag pas 'dul ba la bslab pa'i gnas bcas pa yang med de/ de'i tshe dge slong rnams la 'dul ba bshad cing dge ba'i chos rnams bsgrub par bya ba dang / sdig pa mi dge ba'i chos spang bar bya ba'i chos thabs dang gnyen po tsam du bstan pa ni/ sdig pa thams cad mi bya ste/ /dge ba thams cad rdzogs par bya/ /rang gi sems ni yongs su 'dul/ /'di ni sangs rgyas bstan pa'o/ /lus kyi sdom pa legs pa ste/ ngag gi yang ni sdom pa legs/ /yid kyi sdom pa'ang legs pa ste/ /thams cad sdom pa'i dge slong ni/ /sdug bsngal kun las rab tu 'grol/ /zhes bya ba la sogs pa so sor thar pa'i mjug nas 'byung ba'i sh+lo ka gsum po de da ltar gyi so sor thar pa dang 'dra bar gnas so/ /de'i tshe dge slong rnams kyang dge ba'i chos rnams ni sgrub/ sdig pa'i chos rnams ni spong ngo / /de nas lo bcu gsum du sogs pa na nyan thos kyi dge 'dun rnams kyis tshul khrims la rma phyung ste/ phas pham pa la sogs te ltung ba'i rigs lnga yang dang po kho nar byung ngo / /da ltar ba la bcom ldan 'das kyis kyang 'dul ba rma med pa la rma byung ste/ skyon dang 'phan thams cad du gyur nas/ yang dge slong gang 'di lta bu'i chos shig spyad cing byas na nyes pa 'dir 'gyur ro zhes bcom ldan 'das kyis 'dul ba la bslab pa'i gnas bcas so/ /'di bslab pa'i gnas bcas kyang / de dag tsam na dge slong dag kyang bsod nams che zhing dbang po rno bas chos ci dang ci bshad pa yang yid la 'dzin pa tsam du zad do/ /yi ger bris shing bag bag la glan pa med do/ /phyis de bzhin gshegs pa rtswa mchog gi grong khyer du mya ngan las 'das pa'i tshe 'phags pa nyan thos lnga brgya la bka' stsal pa/ nga'i 'dul ba 'di ci nas kyang yun ring du gnas pa dang / lha dang mi la sogs te ma 'ongs pa'i skye bo mang po la phan thogs par 'gyur ba'i phyir ngas sngon ji skad du bshad cing bslab pa'i gnas bcas pa de bzhin du ma nor bar gzhung du yi ger bris te zhog cig ces bcom ldan 'das kyis bka' stsal pa/ nyan thos lnga brgya po de dag 'dus te ji skad du gsungs pa bzhin gzhung du yi ger bris te gzhag go/ /yul mnyan du yod pa la sogs par sngon de bzhin gshegs pa chos 'chad cing ston pa mdzad pa'i tshe zhabs kyis bcags shing byin gyis brlabs pa'i yul yang grangs ma mchis pa zhig yod na/ rtswa mchog gi grong khyer kho nar mya ngan las 'das par bstan pa yang dgos pa'i dbang 'ga' zhig yod dam med ces kha cig dpyod kyang srid de/ de bzhin gshegs pa'i dgongs pa dang ldan par mdzad pas na 'dir mya ngan las 'da' bar bstan pa yang yul de na gyad stobs dang ldan pa sha stag gnas gnas pas phyi'i mu stegs ma dad pa rnams kyis bcom ldan 'das kyi sku gdung sha ri ram chud mi gsan cing grong khyer chen po de na gnas pa'i skye bo mang po rnams thams cad kyis kyang sha ri ram mnyam par thob par bya ba dang / thams cad kyis bsod nams thob pa dang / bsod nams skye bar 'gyur zhing mchod rten du gzung bar bya bar dgongs nas yul der mya ngan las 'da' bar bstan to/ /'dul ba sdud par mdzad pa ni 'phags pa kun dga' bo mchis te sdud pa'i phug chen po'i ri'i sgor phyin pa na nyan thos phal gye nang du ma chud nas kun dga' bos bsams pa/ sngon de bzhin gshegs pa zhal bzhugs pa'i tshe na bdag kyang mang du thos pa dang / shes rab dang l dan zhing thos pa 'dzin pa'i mchog nye gnas bgyid cing zha 'bring na rtag tu bsnyen bkur bgyid na de bzhin gshegs pa mya ngan las 'das nas ring po ma lon par nyan thos de dag gi nang du yang bdag gis ma chud na nyes pa ci zhig byas snyam du mi dga' zhing ngo mtshar che'o snyam du bzung nas mi mi dga' zhing slar log nas rang gi gnas su phyin nas ting nge 'dzin du rtse gcig par zhugs te/ bsgom pas spang bar bya ba'i nyon mongs pa'i sgrib pa rnams spangs nas/ dgra bcom pa mngon sum du byas so/ /gzod 'phags pa nyan thos de dag sdud par mdzad pa'i sgor phyin te/ ting nge 'dzin gyi rdzu 'phrul gyis sgo'i bu ga nas zhugs pas nang du thar ro/ /de nas 'phags pa kun dga' bo la sogs pa rnams 'dus te 'dul ba 'bum pa la sogs pa yang gzhung bag bag la glan no/ /so sor thar pa yang yi ger bris shing 'dir bsdus so/ /'di ltar kun dga' bo nang du ma chud pa yang nyan thos la nyon mongs pa gnyis te/ mthong ba'i lam gyis spang ba dang / /bsgom pa'i lam gyis spang bar bya ba'o/ /kun dga' bos mthong bar bya ba'i nyon mongs pa ni spangs kyi/ bcom ldan 'das kyi zha 'bring na rtag tu bsnyen bkur byed cing bsgom du mi khom pas na bsgom pa'i nyon mongs pa ni ma spangs pas dgra bcom pa de dag gi nang du mi chud ces 'chad do/ /de la kha cig na re kun dga' bo de bzhin gshegs pa'i zha 'bring na rtag tu gnas te/ de bzhin gshegs pa mya ngan las 'das te gshegs kar da dung mya ngan las mi 'da' zhing sems can gyi don mdzad cing bzhugs su ci gnang zhes ma gsol ba dang / nyes pa rnam pa lnga ma bshags ma mthol bas chad par dgra bcom pa lnga brgya po de dag gi phyi rol du bzhag ces kyang 'chad do/ /de yan chad ni sngon byung ba'i gtam rgyud dang / gleng bslang ba tsam du zad do/ /de ni yang dag par sdud pa po 'phags pa rnams kyis so sor thar pa'i mdo sdud par 'dod nas 'gro ba thams cad kyi bla ma sangs rgyas bcom ldan 'das dang / so sor thar pa la bstod pa dang phyag 'tshal bas mchod pa'i phyir/ thams cad mkhyen pa la phyag 'tshal lo/ /snyan pa'i ba dan 'jig rten gsum du grags/ /zhes bya ba la sogs pas mngon par bstod pa dang / kha cig 'di skad du rtog kyang srid de/ bcom ldan 'das kyis bka' stsal cing bstan pa ni yang dge slong dag nyes pa 'di lta bu zhig byas na phas pham par 'gyur ba dang / nyes byas su 'gyur zhes bya ba la sogs te/ ltung ba rigs lnga ni bka' zhal gyis stsal cing 'dul ba la bslab pa'i gnas kyang bcas kyi/ snyan pa'i ba dan zhes bya ba la sogs pa ye ma gsungs na/ 'di sdud tshig gar dgos zhes rtog kyang srid do/ /de yang de bzhin gshegs pas gsungs pa ni ma yin mod kyi/ yang dag par sdud pa po 'phags pa lnga brgya pos dgos pa dang / don dang bcas par byas pa yin gyi/ don med pa'am/ 'ol ras sam/ gya tshom du smras pa ni ma yin te/ de yang rnam pa gsum gyi phyir gzhag go/ /de la rnam pa gsum ni skyes bu dam pa rnams la bstod cing rjes su mthun par bya ba dang bdag cag gis thos pa mang ba bsgrag pa dang / brtsams pa mthar phyin cing bar chad med pa'i phyir brtsams pa yin te/ de yang dper na 'jig rten na skyes bu dam pa ya rabs dag ni gtsug lag rtsom pa la sogs te las ci yang rung / dang po kho nar rang gi lha dang ston pa la mchod cing phyag 'tshal nas rtsom pa srid do/ /skabs 'dir yang so sor thar pa'i mdo sdud par 'dod nas/ yang dag par sdud pa po 'phags pas sangs rgyas bcom ldan 'das dang / so sor thar pa la bstod cing phyag 'tshal bas mchod nas sdud par mdzad do/ /de la snyan pa'i ba dan zhes pa nas/ dar la bab pa yol rnams kyang bde zhes bya ba'i bar du sangs rgyas dang so sor thar pa la bstod pa'i stobs yang dag par zlos par byed pa'i tshig yin pas na gtsug lag rtsom mo cog la dgos pa dang / don med par rtsom mi srid de/ de yang rnam pa bzhi zhig gis bsnyad par bya ste/ de ma bstan na ni ci nyes she na/ slob ma nyan pa la blo 'dun pa rnams spro ba dang / dgos pa'i don med pas nyan pa la blo g.yel bas na de bstan to/ /bzhi yang gang zhe na/ bshad cing bstan par bya ba dang / dgos pa dang / 'brel ba dang / dgos pa'i yang dgos pa'o/ /de la bstan par bya ba ni de bzhin gshegs pa'i yon tan dang / so sor thar pa'i yon tan te/ de dag gi bdag nyid che ba'o/ /dgos pa ni de gnyis kyi yon tan gyi don yongs su shes dgos pa'o/ /'brel ba ni tshig dang don du 'brel ba la bya ste/ tshig gis mtshon nas don shes par byed pas gcig la gcig ltos pa'am brten pas na 'brel ba'o/ /dper na thabs dang thabs su bya ba'am/ rgyu dang 'bras bu lta bu'am/ zhags pas gzung bar bya ba lta bu'i phyir 'brel pa'o/ /dgos pa'i dgos pa ni brtsams pa mthar phyin par bya ba'i dgos pa'i phyir dgos pa'i yang dgos pa'o/ /yang na rnam pa bzhi po 'di ltung ba rigs lnga la yang sbyar bar bya ste/ bshad par bya ba ni ltung ba rigs lnga bshad cing ltung ba lci yang gi bye brag bshad pa'o/ /dgos pa ni de dag shes shing nyes byas phra mo yan chad la lhag par bag dang bcas nas bsdu ba dgos pa'o/ /'brel ba ni de dag nyid don dang gcig tu 'brel cing snyan rnar gtad pa la yang bya'o/ /dgos pa'i dgos pa ni mya ngan las 'das pa'i 'bras bu thob pa yang bya dgos pas na dgos pa'i yang dgos pa ste/ bzhi po 'di dag bstan na slob ma nyan pa rnams dang ba skye zhing spro ba dang / nyan pa la 'jug pa'i phyir 'di dag smos so/ /de la snyan pa'i ba dan zhes bya ba nas/ dar la bab pa yol ba zhes bya ba'i bar du sdud pa pos bstod pa de yang rnam pa bdun du dbye bar bya'o/ /de yang gang zhe na/ sangs rgyas la bstod pa dang / chos la bstod pa dang / sangs rgyas 'byung ba bde ba'i rgyur bstan pa dang / dge ba'i bshes gnyen la brten pa bde bar bstan pa dang / mi dge ba'i grogs po spangs na bde ba dang / 'bras bu thob pa bde bar bstan pa dang / 'bras bu thob pa'i gnas bstan pa'o/ /de la sangs rgyas la bstod pa ni dang po sh+lo ka gnyis dang sbyar bas bya ste/ de yang de rnam pa lnga ste grags pa phun sum tshogs pa dang / bka' phun sum tshogs pa dang / gter phun sum tshogs pa dang / 'khor phun sum tshogs pa dang / khyad zhugs pa phun sum tshogs pa'o/ /da ni so sor thar pa'i tshig gnyer la bab ste/ snyan pa'i ba dan zhes bya ba la sogs pa smos so/ /snyan pa'i ba dan 'jig rten gsum du grags pa zhes bya bas grags pa phun sum tshogs pa ston pa ste/ de la snyan pa ni de bzhin gshegs pa'i sku'i yon tan te/ pha rol tu phyin pa bcu dang / stobs bcu la sogs pa la bya ste/ de yang bsod nams dang ye shes kyi tshogs yongs su rdzogs pa las byung bas na rgyu sbyin pa la sogs pa shin tu snyan pa dang / 'bras bu stobs dang ma 'dres pa la sogs pa shin tu snyan pas na snyan pa zhes kyang bya/ de yang ji ltar snyan ce na/ bcom ldan 'das kyis bka' stsal pa'i mthar chos dang zang zing gi sbyin pa bsam gyis mi khyab pa yongs su gtong bar mdzad do zhes 'jig rten du snyan par grags pa dang / de bzhin du tshul khrims skyon med de yongs su dag pa dang / bzod pa dang / brtson 'grus dang / bsam gtan dang / shes rab la sogs pa mtshungs pa med par mdzad cing mnga' zhes 'jig rten du snyan par sgrogs shing grags pa ste/ de bas na 'jig rten gsum du grags zhes smon pa yin no/ /de ba dan zhes smos pas ni de bzhin gshegs pa'i yon tan pha rol tu phyin pa la sogs pa'i dper bshad pa yin te/ de yang ba dan bzang po gang na btsugs pa'i sa phyogs de na shin tu btsun zhing brjid par gnas pa lta bu'am/ yang skye bo ngan pa rnams bag 'khums shing spa gzhil ba lta bu 'am/ yang na dmag dpon g.yul ngo las rgyal ba'i rtags lta bu 'am/ yang na gnas la brtson par byed pa lta bu ni ba dan yin te/ de dag dang 'dra bar ba dan bzang po btsugs pa'i sa phyogs btsun par gnas pa ltar de bzhin gshegs pa'i yon tan pha rol tu phyin pa la sogs pa'i chos kyang rang bzhin gyis btsun par gnas pa'o/ /yang na ba dan bzang po btsugs pas ngan pa rnams spa gzhil zhing bag 'khums pa ltar de bzhin gshegs pa'i yon tan gyi chos kyis mu stegs can ngan pa log pa'i ngang tshul can la sogs pa rab tu spa gong bar mdzad pas spa gzhil ba zhes kyang bya'o/ /yang na skyes bu g.yul ngo las rgyal ba'i tshe rgyal mtshan btsugs pa ltar bdud kyi dgra las rgyal ba'i rgyal mtshan btsugs pa zhes kyang bya'o/ /yang na gnas la brtson par gyur pas te/ gang na gtsug lag khang yod pa na ba dan bzang po gzugs pa dang / phan chad rgya gar yul la sogs pa na gang na tshong 'dus dang / chang 'tshong ba dang / smad 'tshong ba'i gnas su ba dan gzugs pas ba dan gyis mtshan pas na gnas de nyid du ma son ma phyin du zin gyis kyang / pha gi ni gtsug lag khang ngo / /chang tshong dang tshong 'dus kyi gnas so zhes shes par yang byed cing chud par yang ba dan des mtshon nas khong du chud par rung ngo / /de ltar de bzhin du so so'i skye bo sgrib pa che ba rnams kyis de bzhin gshegs pa mngon sum du ma mthong du zin gyis kyang de bzhin gshegs pa'i yon tan stobs dang pha rol tu phyin pa bcu la sogs pa'i yon tan bshad cing brjod de mngon sum du bstan pa dang / 'o de na 'di 'dra ba'i skyes bu dam pa yon tan gyi bdag nyid can zhig yin pa lta zhes kun gyis shes pas na de bas na de'i phyir mtshon pa'i phyir ba dan zhes bya ba ste/ ba dan gyis gtsug lag khang dang / tshong 'dus la sogs pa yang mtshon pa ltar pha rol tu phyin pa la sogs pa ste/ de bzhin gshegs pa'i yon tan la yang mtshon cing 'jug par byed de/ pha rol tu phyin pa'i yon tan bzang po ba dan dang 'dra bas de bzhin gshegs pa la mtshon par byed pa de'i phyir dpe dang don du bcas te/ snyan pa'i ba dan 'jig rten gsum du grags/ /zhes smos so/ /de la 'jig rten gyi sgra bshad de/ 'jig rten ni 'jig pa yang yin la rten pa yang yin pas na 'jig rten no/ /yang na 'jig rten gnyis te/ snod kyi 'jig rten dang / bcud kyi 'jig rten no/ /yang na 'jig rten gsum ni 'dod pa'i khams dang / gzugs yod pa'i khams dang / gzugs med pa'i khams so/ /de la 'dod pa'i khams ni nyi shu ste/ sems can dmyal ba brgyad dang / gling bzhi dang / byol song dang / yi dags dang / lha'i khams drug go/ /dmyal ba brgyad gang zhe na/ yang sos dang / thig nag dang / kun du 'joms pa dang / ngu 'bod dang / ngu 'bod chen po dang / tsha ba dang / rab tu tsha ba dang / mnar med pa'o/ /byol song dang / yi dags ni dngos su zad do/ /gling bzhi la 'dzam bu'i gling dang / nub kyi ba lang spyod dang / byang gi sgra mi snyan dang / shar gyi lus 'phags so/ /'dod pa'i khams kyi lha'i khams drug la gzhan 'phrul dbang byed pa dang / 'phrul dga' dang / dga' ldan dang / thun spyod pa dang / sum cu rtsa gsum pa dang / rgyal chen bzhi pa'o/ /gzugs yod pa'i khams na gnas bcu drug la tshangs gnas pa dang / tshangs pa'i mdun na 'don pa dang / 'od chung ba dang / tshad med 'od dang / 'od gsal ba dang / dge chung ba dang / tshad med dge ba dang / dge rgyas pa dang / sprin med pa dang / bsod nams che ba dang / 'bras bu che ba dang / mi che ba dang / mi gdung ba dang / bde snang ba dang / gya nom mthong ba dang / 'og min pa'o/ /gzugs med pa'i khams bzhi la nam mkha' mtha' yas skye mched dang / rnam shes mtha' yas skye mched dang / cung zad yod min skye mched dang / cung zad med min skye mched do/ /de ltar na khams gsum po de dag tu sangs rgyas kyi yon tan shin tu snyan par grags pas na grags pa phun sum tshogs pa zhes bya'o/ /de la kha cig 'di skad rgol ba yang srid de/ gzugs med pa'i khams na gzugs dang rna ba'i dbang po yang med la/ tshig tu smra ba dang yang bral bas grags zhes byar yang mi rung na zhes zer yang srid de/ de ni nyes pa med de sngon thos pa'i bag chags yid la yod pas na rung ngo / /yang na 'jig rten gsum zhes bya ba ni lha dang / mi dang / klu'i 'jig rten la bya ste/ de dag la gsung rab kyi chos bshad cing bstan na go'i gzhan la snod du mi 'gyur zhing mi ko bas na ma yin no zhes kha cig de skad ces kyang 'chad do/ /dam pa'i chos smra seng ge'i sgra bsgrags pa zhes pas bka' phun sum tshogs pa dang sbyar te/ de la dam pa ni de bzhin gshegs pa ste/ sgrib pa gnyis spangs pas dam pa zhes bya ste/ des gsungs shing bstan pa'i chos kyang dam pa ste/ kun nas bskor ba dang bag la nyal ba'i nyon mongs pa rnam pa gnyis spong zhing sel nus pas dam pa zhes smos so/ /dam pa'i chos dngos su na gang la bya zhe na/ gsung rab yan lag bcu gnyis dang / 'phags pa'i bden pa bzhi'i chos la bya'o/ /nyon mongs pa'i chos la rang gi mtshan nyid 'dzin pa'i phyir chos zhes gdags mod kyi/ de la bye brag tu nyon mongs pa'i gnyen por gyur pas/ dam pa'i chos zhes smos so/ /yang na dam pa'i chos zhes bya ba rgya gar skad du sad d+ha rmA zhes bya ste/ sad ces bya ba ni yod pa'i sgrar yang bshad du rung ste/ yod par lta na yang ji ltar gzung zhe na/ mu stegs can kha cig gang gis sdig pa byas pa dang / gang gis dge ba byas pa'i 'bras bu med par lta ba'i chos de dag dang mi 'dra ste/ sdig pa dang dge ba byas pa'i 'bras bu chud za ba'am stor bar mi 'gyur la/ 'bras bu yod do zhes smra bas na/ yod pa'i chos zhes kyang bshad do/ /seng ge'i sgra ni dpe bsten to/ /de bzhin gshegs pa ni mi'i seng ge zhe'o/ /de yang ji ltar na seng ge la dpe blang zhe na/ ri dwags kyi rgyal po seng ge ral pa can nags dang gzhongs gang nas gang du rgyu zhing 'gro ba der seng ge'i phul gyis sgra 'byin cing sgrogs pa tsam gyes glang po che dang rta dang / wa la sogs te ri dwags phra mo rnams shin tu skrag cing sdangs pa dang / bag 'khums shing spa gong ba ltar de bzhin gshegs pa seng ge dang 'dra bas chos kyi gsung sgra snyan pa tsam gyis mu stegs can ri dwags dang 'dra ba rnams bag 'khums shing spa gong ba dang gzi brjid 'jil bas de bzhin gshegs pa ni seng ge dang 'dra'o zhes so/ /bsgrags zhes bya ba ni gsungs she'am/ bstan zhe'am/ bshad ces pa'i tha tshig go/ /de ltar na 'di bka' phun sum tshogs pa zhes bya'o/ /phun sum tshogs zhes bya ba ni rdzu 'phrul bsam gyis mi khyab pas gsung gcig gis 'gro ba tha dad pa'i sems can rnams yid bzhin du go bar mdzad pas na bka' phun sum tshogs pa zhes bya'o/ /thams cad mkhyen pa rin chen mdzod brnyes pa zhes bya bas shes rab khyad zhugs shing gter phun sum tshogs pa bstan te/ 'di la thams cad mkhyen pa zhes bya ba ni ma lus par thugs su chud pa'i don te/ 'dus byas dang 'dus ma byas dang / zag pa dang zag pa med pa dang / phung po dang / khams la sogs pa'i chos rnams skyu ru ra'i 'bras bu lag mthil du bzhag pa bzhin du thugs su chud pas thams cad mkhyen pa zhes bya'o/ /rnam pa gzhan du re zhig rnam pa bzhi zhig gis bstan par bya ste/ ma lus pa dang / tshad med pa dang / thun mong ma yin pa dang / phyin ci ma log pa'o/ /ma lus pa zhes bya ba ni phyogs 'ga' tsam shes pa ma yin gyi dngos po kun chub par mkhyen pa'o/ /tshad med pa ni mdo'am ma mo 'ga' tsam shes pa ma yin gyi sde snod tshad med par mkhyen pa'o/ / thun mong ma yin pa ni nyan thos dang / rang sangs rgyas dag dang thun mong ma yin pa'i chos ma 'dres pa bco brgyad dang stobs bcu dang / mi 'jigs pa bzhi la sogs pa thugs su chud pa'o/ /mu stegs can kha cig mang du chud cing shes kyang nor zhing phyin ci log tu bshad pa dag yod na/ de bzhin gshegs pas thugs su chud cing mkhyen kyang nor ba lta bu yod dam med ces 'dri yang srid de de na med de de bzhin gshegs pa phyin ci ma log pa nyid du 'chad de/ de bas na gzhung dag gi nang nas kyang 'khrul ba med pa zhes 'chad do/ /rin chen zhes bya ba ni chos dkon mchog rin po che la bya ste/ de yang gang zhe na/ bshad pa'i chos dang / sgrub pa'i chos dang / 'phags pa'i lam rnams kyi rang bzhin no/ /yang na lhag pa'i tshul khrims dang / lhag pa'i sems dang / lhag pa'i shes rab la yang bya'o/ /rin chen zhes bya ba ni dpe ste/ ji ltar 'jig rten na rin po che shin tu dkon pa dang rin che ba dang / mun nag sel cing mtsho dngas par byed pa dang / rin po che su la bdog pa'i mi de bsam pa yongs su 'grub pa dang 'dra bar chos dkon mchog rin po che bslab pa gsum po yang shin tu rnyed par dka' zhing rin che ba dang / nyon mongs pa rnams sel cing rnam par grol ba'i 'bras bu thob par byed pas chos dkon mchog rin po che zhes bya'o/ /mdzod ces bya ba ni bcom ldan 'das nyid de/ 'di 'dra ba'i chos rin po che'i 'byung khung du gyur pa'i phyir mdzod ces bya'o/ /yang na thams cad mkhyen pas chos dkon mchog 'bras bu 'di 'dra ba brnyes pas na mdzod dang 'dra bas na mdzod brnyes pa zhes kyang bya/ mdzod ni 'phags pa'i dge 'dun la'ang bya ste/ chos dkon mchog gi mdzod dang gnas su 'os pa'i phyir mdzod ces smos te/ de 'dra ba'i slob ma rin po che'i snod du mdzod dang 'dra ba'i bcom ldan 'das kyis 'khor du brnyes pas na/ thams cad mkhyen pa rin chen mdzod brnyes pa zhes bya'o/ /de ltar na nor gyi gter dang 'dra bas gter phun sum tshogs pa zhes bya'o/ /zhabs la tshangs dbang gtsug gi nor bus gtugs/ /zhes bya ba bas 'khor phun sum tshogs pa bstan te/ de la mu stegs can kha cig tshangs pa dang brgya byin la bcom ldan 'das thams cad mkhyen pa yin no zhes lta ba dag yod de/ de ltar lta ba spang zhing thams cad mkhyen pa de dag las 'phags par bstan pa'i phyir 'jig rten pa'i gtso bo mchog phul tshad mar bya ba tshangs pa mi mjed kyi bdag po dang / brgya byin lha'i rgyal po ste/ tshangs pa yang byams pa dang / snying rje dang / dga' ba dang / btang snyoms dang / tshad med pa bzhi dang ldan pa yin la/ brgya byin yang lha'i dbang po yin te/ 'jig rten na grags pa'i mtshan ma rnams kyis kyang rang gi lus kyi nang na dam pa spyi bos kyang btud la/ bsod nams kyis thob pa'i nor bu rin po che rgyan dang bcas pas de bzhin gshegs pa'i zhabs la gtugs shing phyag 'tshal ba la bltas na lhag par yon tan dang ldan zhing mnga' dbang phun sum tshogs pa'am/ lha dang bcas pa'i 'jig rten gyis mchod cing / bsnyen bkur byed par 'os pas na/ zhabs la tshangs dbang gtsug gi nor bus gtugs/ /zhes smos pa yin te/ thams cad mkhyen pa nyid du 'os shing bstan to/ /yang gcig tu na de bzhin gshegs pa'i zhabs kyis tshangs pa dang / dbang po'i gtsug gi nor bu la reg par byas so zhes par rgya gar skad las drang du yang rung ngo / /de ltar na brgya byin dang dbang po la sogs te lha dang bcas pa'i 'jig rten gyis mchod cing bsnyen bkur ba dang / 'khor mang po dang ldan pas na 'khor phun sum tshogs pa zhes bya'o/ /sdug bsngal rgya mtsho pha mtha' med rgal ba/ /zhes bya ba sh+lo ka gcig gis ni yon tan phal las khyad zhugs pa bstan te/ sdug bsngal ni skye ba dang / rga ba dang / 'chi ba la sogs te sdug bsngal gsum dang brgyad la bya'o/ /yang na las dang tshe dang nyon mongs pa nyid 'khor ba'i rgyu yin pas de nyid sdug bsngal yin par bstan te/ sdug bsngal de yang shin tu rgya che zhing mtha' yas pa'i phyir dpe rgya mtsho dang 'dra zhe'o/ /pha mtha' med pa ni 'khor ba la thog ma dang tha ma med pa'i tha tshig ste/ de lta bu las sus rgal zhe na/ de bzhin gshegs pa 'gro ba'i gtso bos rgal te/ de bas na brgya byin dang tshangs pa ni sdug bsngal gyi rgya mtsho nyid la gnas pas/ de dag las bcom ldan 'das khyad zhugs pa'i phyir spyi bos phyag 'tshal lo zhes smos so/ /yang na 'gro ba'i gtso ni skye bo ngan song du 'gro ba las skyob cing dge ba bcu'i chos las blan te/ bde ba'i chos rnams stobs shing thar par 'dren pas na yon tan 'di lta bu dang ldan zhing skye ba gzhan la med pas/ 'gro ba'i gtso la phyag 'tshal lo/ /zhes smos te/ 'di 'dra ba'i yon tan gyi bdag nyid can grags pa phun sum tshogs pa dang rin po che'i gter dang 'dra bar 'khor mang po mnga' ba sdug bsngal rgya mtsho las rgal ba yon tan gyi bdag nyid can la phyag 'tshal zhing bstod pa brtsams nas gdod so sor thar pa la bstod pa brtsam mo zhes 'chad do/ /de la phyag 'tshal ba ni lus dang / ngag dang / yid gsum gyis phyag 'tshal ba la bya'o/ /de ltar phyag 'tshal ba yang cir dgongs she na/ bla ma la mthu bstan pas bgegs dang bar chad kyis mi zug cing brtsam pa mthar phyin par 'gyur ro zhe'o/ /de la slob dpon kha cig na re snyan pa'i ba dan zhes bya ba nas/ zhabs la tshangs dbang gtsug gi nor bus gtugs/ /zhes bya ba'i bar du bcom ldan 'das gzhan gyi don phun sum tshogs par mdzad pa'i sgo nas bstod pa'o/ /sdug bsngal rgya mtsho pha mtha' rgal/ /zhes bya ba nas/ 'gro ba'i gtso la phyag 'tshal lo/ /zhes bya ba'i bar du rang gi don phun sum tshogs pa la bstod pa'o/ /thams cad mkhyen pa'i bslab tshig zhes pa nas/ 'phags pa'i tshogs kyi dbus su dbye/ /zhes bya ba'i bar du so sor thar pa la bstod cing bstan par dam bcas pa ste/ de bas na bdag dang gzhan gyi don phun sum tshogs pa'i thams cad mkhyen pa la bstod cing phyag 'tshal nas/ so sor thar pa la bstod cing bstan par bya'o zhe'o/ /ji ltar na so sor thar pa'i bslab pa'i tshig la bstod ce na/ dkon mchog ces bya ba ste/ rgya gar skad du rat+na zhes bya ba ste/ rat+na ni rin po che la bya bas rin po'i snod dam rin po che'i mdzod dbye zhing gzhan la bstan pa yang dper bya na rin po che la mkhas pa'am rin thang 'debs shes shing sngon chad mthong ba'i mdun du dbye zhing bstan pa yin gyi/ rin po che ma mthong ba dang mi shes pa'i mdun du bstan cing phyir zin gyis kyang bzang ngan bye brag mi phyed la/ cir yang mi mkho ba dang mtshungs te/ chos dkon mchog rin po che yang 'phags pa'i gang zag tshul khrims 'di la 'jug cing spyod par 'gyur ba de dag la dbye zhing bstan par bya'o/ de la mi 'jug pa'i gang zag kun la bstan kyang dgos pa med pa'i phyir 'phags pa'i tshogs kyi dbus su dbye bar bya'o zhes smos te/ des ni so sor thar pa'i bslab tshig la bstod cing dam bcas pa'o/ /thams cad mkhyen pa ni gong ma 'dra/ des bstan pas na bslab pa tshul khrims de ni bslab tshig go/ /dkon mchog ni bslab tshig de dkon zhing mchog dam pa yin pas na dkon mchog go/ /snod dang 'dra ste rnam par dbye ba dang / dngos po la sogs pa'i gzhi'am gnas su gyur ba'i phyir so so thar pa ni snod ces smos so/ /de yan chad sangs rgyas la bstod pa dang sbyar ro/ /'di man chad chos la bstod pa dang sbyar te/ sangs rgyas kyi ni 'dul ba mtsho/ /zhes bya ba la sogs pa smos so/ /de la sangs rgyas ni ma rig pa'i gnyid las sangs shing mkhyen par bgyi ba'i spyod yul la pad mo kha rgyas pa bzhin du rgyas pa la bya/ yang na rgya gar skad du rgyas zhes bya ba'i nyi tshe'i sgra yod de/ sgrib pa rnams yongs su byang nas/ mkhyen par bya ba'i yul la mig dang 'dra ba'i ye shes kyis gsal zhing rgyas par 'gyur ba'i phyir rgyas pa zhes kyang bya'o/ /kyi zhes bya ba ni dgar ba'i tshig ste/ mu stegs can gtogs 'dod pa la sogs pa'i ma yin gyi sangs rgyas kyi 'dul ba mtsho dang 'dra'o zhes pa'i tha tshig go/ /'dul ba zhes bya ba ni mdo sde dang ma mo dag las khyad par du bstan pa'o/ /yang na yon tan gyi sgo nas 'dul ba zhes bya ba smos te/ kun nas bskor ba'i nyon mongs pa 'don zhing 'dul bar byed pas na 'dul ba'o/ /yang na 'dod chags dang / zhe sdang dang / gti mug gi gnyen por 'gyur te 'dul bas na 'dul ba'o/ /'o na 'di lta bu'i 'dul ba'i le'u mang nyung ji tsam cig yod ce na/ tshad bzung zhing dpag dka' bar bstan pas dpe rgya mtsho dang 'dra'o zhes so/ /mtsho dang 'dra bar bstan pa ni zab pa dang rgya che ba'i sgo nas bstan pa'o/ yang na ji ltar na mtsho las nor bu rin po che 'byung ba ltar tshul khrims 'dul ba'i gzhi las yon tan gyi 'bras bu yid bzhin du 'byung bas na mtsho dang 'dra'o zhes/ ma lus zhes smos pa ni 'og nas 'grel te/ gting dang pha rol du med par gnas dang snying gi snying po zhes pa dang sbyar te/ gting dang pha rol med pa ni mtsho de ji ltar gting dpag dka' zhing pha rol med pa ltar 'dul ba yang tshad gzung dka' ba'i phyir ro/ /pha rol med pa ni 'di ni pha rol to/ /'di ni tshul rol to zhes bsnyad pa dang mthong bar mi nus pa'i phyir te/ 'dul ba yang 'di ni thog ma'i mtha'o/ /'di ni tha ma'i mtha'o zhes tshad mi zin pa'i phyir ro/ /yang na 'dul ba'i yon tan de ltar dpag cing tshad gzung ba'am gzhal bar bya ba la yang bya'o/ /gnas dang snying gi snying po ni 'dul ba ma lus pa zhes 'dir sbyar bar bya ste/ ma lus pa ni rnam par dbye ba dang / dngos po dang / phran tsheg la sogs pa de dag ma lus pa'i gnas sam/ lus dran par gyur bas na de bas na so sor thar pa ni gnas zhes bya'o/ /snying dang zhes bya ba ni dam pa lta bu'i dpe ste/ dper na lus kyi nang na dam pa ni snying ngo / /de dang 'dra bar 'dul ba thams cad kyi snying du gyur ba'am/ dam pa lta bur gyur pa'i phyir dpe snying dang 'dra'o zhe'o/ /snying po ni yongs su yang gtso bo lta bu'am/ mthu dang ldan zhing gzhig par dka' ba lta bu'am brtag bzod pa lta bu'i tshig ste/ ji ltar gtso bo lta bur lta zhe na/ 'dul ba thams cad kyi nang na so sor thar pa ni gtso bo'am mchog tu gyur pa lta bu'o/ /ji ltar brtan zhing gzhig par dka' zhe na/ dge sbyong dang mu stegs can la sogs pa log par lta ba rnams kyis mi phyed cing gzhig par mi nus pa'i phyir ro/ /ji ltar na brtag bzod par blta zhe na/ de bzhin gshegs pa'i 'dul ba la skyon dang / dri ma dang / lhad kyis ma nor bas rang bzhin gyis yongs su dag pa'i phyir 'jig rten pa'i tha snyad kyis chos brtag mi bzod pa dang mi 'dra bas snying po zhes bya'o/ /gnas dang snying gi snying po ni don gcig ste yon tan gyi rnam grangs so/ /de lta bu gang yin zhe na/ mdo las so sor thar pa yin no zhes smos te/ des ni 'dul ba gzhan dang / sde snod gzhan las khyad par du so sor thar pa 'di yin no zhes bstan to/ /de la so sor thar pa'i sgra ni nyon mongs pa dang / ngan song gsum dang / ltung ba ris lnga'i nyes pa las thar par byed pa'am/ nyes pa 'di rnams 'dul bar byed pas na thar pa zhes kyang bya/ 'dul ba zhes kyang bya'o/ /yang na skye bo tha dad pa rnams so so nas sdom pa la gnas pa de dag so sor thar pa'i 'bras bu thob par byed pas na so sor thar pa zhes kyang bya'o/ /yang na rgya gar skad las pra ti zhes bya ba'i phyir ram/ kun du ba'i sgra yang rung ste/ thar pa'i phyir ram/ kun du thar pa ste/ kun nas bskor ba'i bag la nyal ba'i nyon mongs pa las thar pa'i phyir ro/ /de la kha cig 'di skad rtog kyang srid de/ bag la nyal ba'i nyon mongs pa ye shes kyis spong ba yin na ji ltar 'dul bas spong zhes bya/ spong zhing bag la nyal ba'i nyon mongs pa phra mo rnams ye shes kyis spong ngo zhes 'byung mod kyi/ 'dul ba yang chos thams cad kyi gzhi dang gnas su gyur pas nyon mongs pa yang brgyud de spong ba dang / mngon sum du spong ba dang gnyis yod pas na skabs 'dir 'dul ba yang brgyud do spang ba'i rgyur 'gro bas nyes pa med do/ /de bas na/ tshul khrims la ni gnas bya zhing / /ting nge 'dzin dag mngon par bsgrub/ /ces tshigs su bcad pa las 'byung ba dag yin te/ tshul khrims sa dang 'dra ba'i gzhi med du mi rung ba'i phyir ro/ /'o na mdo sde dang mngon pa'i chos kyang so sor thar pa zhes mi gdags sam zhes zer yang srid de/ de dag las khyad du bstan pa'i phyir rnam pa bdun zhig gis mdo sde de dag las bye brag tu bstan te/ /rnam pa bdun po ni 'dul ba'i lus dang / 'dul ba'i gnas dang / 'dul ba'i dmigs pa dang / 'dul ba'i rang bzhin dang / 'dul ba'i mtshan nyid dang / 'dul ba'i gleng gzhi dang / 'dul ba'i 'bras bu'o/ /de la lus ni so sor thar pa 'di 'dul ba kun gyi lus yin no zhe'o/ /'dul ba'i gnas ni so sor thar pa de nyid 'dul ba'i gnas su blta ba'am/ las brgya rtsa gcig dang gsol ba dang zhu ba'i gnas so zhe'o/ /'dul ba'i dmigs pa ni nyes byas phra mo yan chad las lhag par bsam pas bsrung zhing bag byed pa'i phyir ro/ /ltung ba ris lnga ni 'dul ba'i rang bzhin no/ /mtshan nyid ni las brgya rtsa gcig la bya'o/ /'dul ba'i gleng gzhi ni yul mnyan du yod pa la sogs te/ yul gang du bslab pa bcas pa la bya'o/ /'dul ba'i 'bras bu ni rnam par grol ba'i 'bras bu thob pa la bya'o/ /rnam pa bdun po des mdo sde dag las bye brag tu bstan to/ /'di ni dam chos rgyal po yi/ /zhes pa dam chos rgyal po ni so sor thar pa nyid la bya'o/ /ci'i phyir mdo sde dang mngon pa'i chos la rgyal po zhes mi bya'i/ 'dul ba nyi tshe la rgyal por bya zhe na/ 'dul ba ni chos thams cad kyi rten tam rtsa bar gyur te/ chos thams cad 'di la brten cing skye bas na gtso bor gyur pa'i phyir rgyal po zhes bya'o/ /yang na dam pa'i chos kyi rgyal po zhes bya ba de bzhin gshegs pa nyid la bya ste/ ci'i phyir zhe na/ chos thams cad la mnga' dbang mdzad cing bdag por gyur bas lha dang mi la sogs pa rnams thams cad kyang lung de las nod pa'i phyir rgyal po'o/ /de lta bu'i chos ni dam pa bas na dam pa'i chos so/ /mi bri bsdus pa zhes bya ba ni sngon de bzhin gshegs pa mngon par byang chub nas lo bcu gsum du sogs pa na 'dul ba skyon med pa la rma byung nas 'dul ba la bslab pa'i gnas bcas pa yang byung mod kyi/ de'i tshe 'phags pa'i dge 'dun dag kyang dbang po rno bas bslab pa yang yid la 'dzin pa tsam du zad kyi/ yi ger bris pa med pas mi bri bsdus pa zhes smos pa la bya'o/ /yang na mdo sde dang / mngon pa'i chos ni sde snod gcig nas gcig tu brgyud cing gnas par bya ba dang / dus dus su klag cing mchod pa'i rten du bya ba'i phyir bri ba yin gyi 'dul ba rnams ni bris te klag pa'am blta ba tsam du bya ba ma yin gyi/ nang nub gnyis su yid la dran zhing 'dris par gzung bar bya'o zhes bya ba'i tha tshig kyang yin no/ /de'i phyir mi bri bsdus pa zhes kyang bya'o/ /yang na mi bri ba yang yin la bsdus pa yang yin te mi bri ba ni snga ma bzhin/ bsdus pa ni 'dul ba 'bum gyi don so sor thar pa'i nang du bsdus so zhe'o/ /sus bsdus she na/ chos kyi bdag po bcom ldan 'das kyis bshad do zhe'o/ /'di ni dge slong tshong pa'i zhes bya ba ni so sor thar pa nyid la bya'o/ /dge slong zhes bya ba ni rnam pa lnga ste/ khas 'ches pa'i dge slong dang / slong ba'i phyir dang / ming gi phyir dang / nyon mongs pa dang bral ba'i phyir dang / gsol ba dang las kyis bsnyen par rdzogs pa'i dge slong sde lnga 'byung mod kyi skabs 'dir gang gsol ba dang las kyis bsnyen par rdzogs shing bslab pa chags pa skyon med pa la dge slong zhes bya ste/ ci'i phyir 'di 'ba' zhig la dge slong zhes bya'i gzhan ma yin zhe na/ nyon mongs pa dang bral ba'i dge slong ni mya ngan las 'das pa'i 'bras bu rnyed zin pas bslab zong la brten cing bsgrub mi dgos pa'i phyir zhe'o/ /gzhan ni bslab pa la mi gnas shing med pas na 'dir bslab zong dang ldan pas zhes smos pas gzhan la mi rigs so/ /tshong pa zhes smos pa ni dge slong bslab pa la brten cing tshul khrims la gnas pas thar pa mya ngan las 'das pa'i 'bras bu sgrub cing khe 'tshol ba'i dpe ste/ tshong pa zong dang ldan pas nor gyi rnam pa khe tshol ba dang 'dra bar dge slong yang tshul khrims ma nyams ma ral pa'i zong gis ni thar pa mya ngan las 'da' ba'i 'bras bu khe btsal du yod kyi/ bslab pa nyams shing ral ba dag gis ma yin te/ rnam par grol ba'i 'bras bu tshol ba'i zong bslab tshig gis byas pas na/ dge slong tshong pa 'dra'o zhe'o/ /bslab zong ni zong dang 'dra ba'i phyir ro/ /tshong 'dus zhes bya ba ni tshong pa nor sna tshogs yod pa der gnas pa'am/ thams cad 'du zhing so sor rang rang ji ltar 'dod pa bzhin khe rnyed pa ltar bslab tshig tshong 'dus dang 'dra ba de la gnas shing brten na/ rigs dang kha dog dang / mi'i 'byor ldan dang / mtho ris bzang 'gro'i bde ba'i rnam pa dang / rnam par grol ba'i 'bras bu dang / mya ngan las 'das pa man chad kyang / 'di la gnas shing brten pas thob pa'i phyir tshul khrims bslab pa nyid nor sna tshogs yod pa'i tshong 'dus bzhin no zhe'o/ /thams cad der 'du ba ltar snang na yang skye bo dge ba'i gang zag bzang 'gro ba dang / mya ngan las 'da' ba man chad thob par byed pa de dag kyang so so nas tshul khrims tshong 'dus dang 'dra ba 'di la ma gnas mi brten pa'i 'bras bu thob mi srid pa'i phyir thams cad 'dus pa lta bur yang bstan pa'o/ /de la kha cig 'di skad zer yang srid de gzhung dag gi nang nas rgyun du zhugs pa'i 'bras bu la sogs pa bslab pa la ma brten te/ khyim na gnas pas thob pa skad du zer ba dang / dgra bcom pa ni dge slong ma yin pa las thob par mi srid do zhes bya ba zhig kyang yod mod kyi/ de 'dul ba la mi brten par thob mi srid de/ dge bsnyen la sogs pa dge ba bcu rang bzhin gyis bsrung ngo zhes byung bas de ni bslab pa'i tshig la gnas par rig par bya'o/ /de bas na lung dag las kyang / tshul khrims kyis ni mtho ris bzang 'gro 'thob/ /ye shes kyis ni rnam par grol bar 'gyur/ /zhes bshad pas/ tshul khrims kyi cha la mi gnas par mtho ris bzang 'gro thob mi srid ces 'byung bas 'gal ba med do/ /chen po zhes bya ba ni bslab zong 'di la brten pas mya ngan las 'da' ba man chad/ lha dang mi yan chad kyi bar du 'bras bu yid bzhin thob par byed pas tshong 'dus chen po zhes bya'o/ /yang na bslab tshig nyung ngu des mya ngan las 'da' ba 'bras bu chen po brnyes pa'i phyir zhe'o/ /tshul khrims ngan pas zin pa zhes bya ba ni tshul khrims kyi sgra dang tshul zhes kyang bya bas ngang tshul ngan pa can ni bdag dang gzhan gyi rgyud shin tu nyon mongs par byed pas sbrul gdug pas zin pa dang 'dra'o zhe'o/ /log pa'i ngang tshul ngan pa srog gcod pa dang / ma byin par len pa la sogs pa mi dge ba bcu byed pa ni tshul khrims ngan pas zin pa zhes bya'o/ /zin pa ni gdug pa'i yid dpe dang sbyar bar bya ste/ srog gcod pa la sogs pa ngang tshul ngan pa can 'di dag ni ci ltar skyes bu sbrul gdug pas zin pa bzhin no zhes smos so/ /de ltar sbrul gdug pas zin pa la sman ma rgad dang / a ka tas sos par nus pa bzhin du tshul khrims ngan pa can de dag la'ang bslab pa 'dis nad dang 'dra ba'i nyes pa sel zhing sbyong ba'am/ 'jil bar byed pa yin te/ de bas na so sor thar pa ni sman dang 'dra'o zhe'o/ /yang gcig tu gang zag tshul khrims nyams par gyur pa'am/ bslab pa phul ba rnams slar tshangs par spyod pa sbyin zhing bslab pa byin pa dang / rab tu 'byung du gnas pas rang sngar tshul khrims nyams shing bslab pa phul bas mi dga' zhing sems tsher ma gdug pas btsugs pa dang 'dra bar gnas pa la tshul khrims 'dis nyes pa sel cing sbyong bas na/ sems kyi gdung ba'am zug rngu ba sman du gyur pas na sman zhes smos so/ /lang tsho zhes pa ni gzhon nu dar la bab pa dregs mi thub cing bdo ba la bya ste/ de lta bu'i tshe na blo gtan la mi phebs shing rgyags par gyur pas 'phrul ba'i nyes pa lhag par 'byung bas na lang tsho 'khrul pa zhes smos te/ dpe glang po gzhon nu dang 'dra'o zhe'o/ /glang po gzhon nu g.yul la ma phyin cing zho sha bdo zhing nyams rtsal che ba'i tshe lam nas lam ma yin par rten cing 'bros pa la lcags kyus k ha lo bsgyur zhing lam ma yin pa nas lam du dgug cing 'dul ba dang 'dra bar byis pa gzhon nu blo gtan la ma phebs shing gnas ma yin par 'jug cing spyod pa la mi dge ba'i phyogs nas dge ba'i phyogs su bsgyur bar byed par so sor thar pas byed pas na glang po bsgyur ba'i lcags kyu dang 'dra'o zhe'o/ /ngan 'gro 'khor ba zab mo zhes bya ba ni ngan par 'gro bas na ngan 'gro ste/ byol song ngan par 'gro ba dang / yi dwags dang / sems can dmyal ba ngan par 'gro ba ste/ ngan song gsum la bya'o/ /yang na 'khor ba nyon mongs pas 'khor ba'i phyir ro/ /'khor ba'i 'gro ba kun la bya'o/ /'khor ba ni gcig nas gcig tu brgyud cing / skye ba mang po len pa ste/ de yang thog ma dang tha ma med pas 'khor ba'o/ /zab mo ni 'khor ba nyid mtha' med la/ sdug bsngal gyi 'jigs pa chen po nyid bskyed pas na shin tu 'jigs shing rgya mtsho na chu srin gnas pa bzhin no/ /de lta bu'i zab mo las sgrol bar gyur pa'i gzings dang 'dra bar gyur pa gang zhe na/ so sor thar pa 'di yin no zhe'o/ /ji ltar gzings dang 'dra ba ji ltar rig par bya zhe na/ chu bo chen po las rgal bar bya ba'i thabs ni gzings bcas te rgal lo/ /de dang 'dra bar 'khor ba zab mo pas rgal bar 'dod pa'i mi des kyang / 'dul ba de la ma brten ma gnas na 'khor ba las rgal bar mi nus pas gzings dang 'dra bar 'dul ba 'di nyid lta zhe'o/ /bzang 'gro zhes bya ba ni lha dang mi la sogs te/ gnas dam par 'gro ba'i phyir bzang 'gro zhes smos te/ de yang rnam pa gsum la bya ste/ dam par 'gro ba dang / bkra shis par 'gro ba dang / mdzes par 'gro ba ste/ 'di ni bzang 'gro'i sgra'o/ /de lta bur 'gro ba'i stegs dang / zam par blta ba gang yin zhe na 'dul ba de nyid stegs dang zam pa'am/ lam lta bur blta'o zhe'o/ /stegs dang zam pa'ang bgrod cing phyin par bya ba'i thabs su zad de de dang 'dra bar so sor thar pa yang bzang 'gror 'gro ba'i thabs yin pa'i phyir ro/ /nges pa'o zhes smos pa ni ci ste 'ga' zhig na re stegs dang zam pa yin par cis mngon zhes zer yang srid de/ de lta bu'i dogs pa bsal ba'i phyir nges pa'o zhes smos so/ /ci'i phyir nges pa zhe na/ de bzhin gshegs pa ni sho be mi gsung gi/ /mi slu ba'i bdag nyid can yin pas des stegs dang / zam pa 'dra'o zhes gsungs pas na nges so/ /nyon mongs pham byed lam zhes pa nyon mongs pa ni 'dod chags dang / zhe sdang dang / gti mug gam yang na kun nas bskor ba'i nyon mongs pa dang / bag la nyal ba'i nyon mongs pa ste/ des lus dang sems kyi rgyud shin tu nyon mongs par byed pas na nyon mongs pa'o/ /pham byed ces bya ba ni nyon mongs pa de dag spong zhing sel ba'i gnyen por gyur pa ste/ so sor thar pa 'di nyid kyis nyon mongs pa rnams mi rgyu zhing bkag pas na pham par byas so zhe'o/ /de ltar so sor thar pa la brten pa'i rgyus na 'phags pa'i lam thob pas na pham byed lam zhes bya ste/ so sor thar pa ni kun nas bskor ba'i nyon mongs pa 'phral du mi spyod pa tsam du spong gi 'phags pa'i lam gyi yan lag brgyad la gnas nas/ mthong ba dang bsgom pas spang bar bya ba'i nyon mongs pa rnams spong zhing rnam par grol ba thob par byed pas na lam de ni 'jig rten pa'i lam las khyad zhugs pa'i phyir lam de ni mchog dam pa'o/ /ji ltar rgyal po g.yul las 'gro ba gang nas gang du bzlog par bya ba de nas der kha lo sgyur zhing shing rta 'dren pas lam 'dren pa de dang 'dra bas nyon mongs pa'i lam sel cing pham par byed pa dang / 'phags pa'i lam thob cing mya ngan las 'da' ba'i khang par phyin par byed pa'i thog mar 'gro ba ni so sor thar pa 'di yin pas 'dren pa mchog lta bur bstan to/ /de la thar pa'i grong 'jug pa zhes bya ba ni thar pa ni mya ngan las 'das pa la bya ste/ de yang ji ltar thob ce na/ rdo rje lta bu'i ting nge 'dzin gyis nyon mongs pa shin tu phra ba'i yang phra ba bcom nas zad pa dang mi skye ba'i ye shes thob pa ste/ de'i gnas ni thar pa'i grong dang 'dra'o/ /'jigs pa dang brtse ba thams cad dang bral bas grong khyer bzhin te/ ji ltar ra bas bskor ba'i grong sgo bsdoms shing bcas pa la dgras 'jigs pa dang bral ba bzhin du mya ngan las 'das pa'i grong yang / zad pa dang mi skye ba'i ye shes kyis sgo bcad pas na/ nyon mongs pa'i dgras mi 'jigs so zhe'o/ /yang na them skas kyi dpes na ji ltar 'jig rten na rim par 'gro ba la them skas btsugs te 'gro bar bya ste/ de ni phyin par bya ba'i thabs su dgos so zhe'o/ /'dul ba de la brten cing gnas pa de dag kyang mya ngan las 'da' ba'i gnas su phyin par yang 'gyur la mya ngan las 'da' ba'i grong khyer du phyin par byed pa'i thabs ni so sor thar pa yin no zhes bya ba'i tha tshig go/ /nga ni mya ngan 'das gyur zhes bya ba la/ nga ni zhes bya ba ni bcom ldan 'das te/ bcom ldan 'das mya ngan las 'da' bar ston pa la dge slong dag gis bcom ldan 'das la zhus pa/ ston pa med na chos dang dge 'dun yang med de dkon mchog gsum yang nub pa la 'jig rten yang stongs so zhes gsol pa dang lan bka' stsal pa/ nga mya ngan las 'das pa'i 'og tu so sor thar pa ni ston par ltos shig / dran pa nye bar gzhag pas ni gnas brtan gyis shig /gang zag mi srun pa ni mi smra bar 'dul zhing lan lon cig /mdo sde'i mgo la ni 'di skad bdag gis thos pa zhes bris shig /nga 'dug pa'i tshe bya ba dang mi bya bar bstan pa rnams de de bzhin du byas na nga 'dug pa dang 'dra'o zhes gsungs so/ /mya ngan las 'das pa zhes bya ba ni nyon mongs pa'am 'khor ba las rgal ba la bya'o/ /khyod kyi ston pa zhes bya ba ni 'khor nyan thos dang / so sor thar pa nyid la bya'o/ /de bas na bcom ldan 'das 'jig rten na bzhugs pa'i tshe kun gyis bsnyen bkur byed pa ltar 'dul ba la yang bsnyen bkur mi chung bar bcom ldan 'das dang 'dra bar ltos shig pa'o/ rang byung nyid kyi nan tan du zhes bya ba ni rang byung ni de bzhin gshegs pa nyid la bya ste/ de bzhin gshegs pa ni gzhan gyi dring dang man ngag la brten cing gnyen po gang gis kyang rab tu ma byung gi rang gi ye shes kyis chos rnams rtogs nas rang byung ba'o/ /yang skra dang kha spu rang byi zhing / bsod nams kyi lhun gyis dkar po chos gzigs te/ mkhan po dang slob dpon gyi rgyus ma yin gyi rang byung gi phyir rang byung ngo / /nan tan du zhes bya ba ni legs par zhes bya ba'i don te/ de ltar dge slong rnams kyi mdun du de bzhin gshegs pa dang 'dra ba 'dul ba la bstod pa'o/ /sangs rgyas zhes bya ba'i sgra de yang / 'jig rten dag na shin tu dkon/ /zhes bya ba la sogs pas so sor thar pa la mnyan pa dang / nan tan gyis rim gro dang / gus par byed du bcug pa'i phyir mi khom par gyur pa las brtsams te sangs rgyas zhes bya ba la sogs pa smos so/ /de la 'jig rten du gshegs shing sangs rgyas kyi sgra thos pa yang shin tu dka' na mthong ba lta ci smos/ de bzhin gshegs pa bskal pa dgu bcu rtsa gcig nas 'jig rten du ston pa mi mdzad de 'jig rten stong ngo zhes 'byung ngo / /ji ltar sangs rgyas kyi sgra thos par yang dka' ba bzhin du mi lus thob pa shin tu dka' ba dang / mi lus thob tu zin gyis kyang / dge ba'i bshes gnyen dang phrad cing rab tu 'byung ba shin tu dka' ba dang / de ltar rab tu byung du zin gyis kyang tshul khrims yongs su dag par shin tu dka' ste/ sangs rgyas dang mi lus thob pa la sogs pa shin tu dka' ba'i dpe ni rgya mtsho 'jing nams kyi nang na rus sbal zhar ba gnas pa de lo stong zhig nas chu'i steng du lan cig 'byung la/ gnya' shing mig gcig pa rgya mtsho'i nang du bor bar yang shar nub kun tu rlung gis bdas pa de'i bu gar rus sbal mgrin pa chud pa ni sla'i/ sangs rgyas la sogs pa'i dge ba'i bshes gnyen dang phrad cing bdag nyid khom pa phun sum tshogs pa dang ldan pa ni shin tu de bas kyang dka' bas na de lta bu'i 'byor pa dang ldan pa'i dus su bdag nyid rab tu byung zhing bsnyen par rdzogs pa dang / so sor thar pa la nan tan gyis gus pas nyan cing tshul khrims skyon med par 'bad cing bsrung ngo zhes pa'i don to/ /de la slob dpon kha cig gis 'di skad kyang 'chad de/ sangs rgyas kyi ni 'dul ba mtsho/ /zhes bya ba nas/ so sor thar pa mnyan par 'bad par bya zhes pa'i bar du rnam pa drug tu 'byed cing ston pa yang yod de/ rnam pa drug ni mthong ba'i 'bras bu dang / ma mthong ba'i 'bras bu dang / so sor thar pa nyid la ston par bstod pa dang / khom pa phun sum tshogs pa dang / dge ba'i bshes gnyen phun sum tshogs pa dang / so sor thar pa la bsti stang dang bcas pas bsrung zhing nyan pa zhe'o/ /de la sangs rgyas kyi ni 'dul ba mtsho/ /zhes bya ba man chad nas/ glang po gzhon nu'i lcags kyu'o/ /zhes bya ba yan chad mthong ba'i 'bras bu dang sbyar ro/ /de nas them skas bzhi dang 'dra bar gnas zhes pa yan chad ni ma mthong ba'i 'bras bu dang sbyar ro/ /nga ni mya ngan 'das gyur na/ /zhes bya ba sh+lo ka gcig gis ni so sor thar pa la ston par bstod pa'o/ /sangs rgyas zhes bya ba'i sgra de yang zhes bya ba ni dge ba'i bshes gnyen phun sum tshogs pa bstan to/ /mi lus thob pa dang rab tu byung ba shin tu dkon pa dang / tshul khrims phun sum tshogs pa zhes bya bas/ khom pa phun sum tshogs pa bstan to/ /so sor thar pa mnyan par 'bad par bya zhes bya ba ni so sor thar pa la bsti stang dang bcas pas bsrung zhe'o/ /de ltar gong du sangs rgyas kyi sgra thos pa dang / mi'i lus thob pa shin tu dka' ba dang / dge ba'i bshes gnyen dang phrad pa dang / rab tu 'byung ba la sogs pa rnyed pa shin tu dka' bar bstan pa bzhin du so sor thar pa thos pa yang shin tu rnyed par dka' bar bstan par bzhed nas/ kham pa phun sum tshogs pa shin tu rnyed par dka' ba'i phyir smras pa/ bskal pa bye ba rnams su yang / /zhes smos so/ /bskal pa bye ba zhes smos pas ni so sor thar pa thob par dka' ba'i dpe ste/ bskal pa bye ba'am/ gal te de las lhag par yang sangs rgyas 'jig rten du mi 'byung la/ brgya la byung du zin gyis kyang bdag nyid yul gyis bskal te sangs rgyas dang mi phrad pa dang / sangs rgyas dang mi lus rnyed pa shin tu dka' bas na sangs rgyas 'jig rten du 'byung ba dang / 'dul ba'i chos rnams kyang yod kyi sangs rgyas mi 'byung ba dang / gsung rab kyi chos 'dul ba yang med pas na de'i phyir so sor thar pa gdung pa dang 'dzin pa dka'o zhes bstan to/ /so sor thar pa zhes bya ba ni nyon mongs pa chung ngu'i chung ngu la sogs pa las shin tu thar par byed pas na/ so sor thar pa zhes smos so/ /thos zhes bya ba ni tshig dang don rna ba'i dbang pos thos pa'o/ /gzung zhes bya ba ni shes rab kyis rtogs pa'o/ /'dzin zhes bya ba ni mi brjed par dran pas de nyid kha ton du sbyor ba la sogs te/ yun ring du mi brjed pa'o/ /sgrub par byed ces bya ba ni de'i don du lus dang / ngag dang yid kyis nan tan du nyams su len cing byed pa'o/ /rnyed dka' zhes bya ba ni bskal pa'i dpe dang sbyar ro/ /dka' ba ni thos pas kyang yid la gzung ba shin tu dka'/ gzung ba las kyang yid la 'dzin cing 'dris par byed pa shin tu dka'/ 'dzin pa bas kyang nyams su len cing sgrub par byed pa ches dka' ste shin tu dkon no zhes bstan to/ /sgrub pa ni tshe dang ldan pa kun dga' bo lta bu nyes byas shin tu phra ba la yang srog dang bsngo zhing 'bad pa chen po dang bcas pas kyang tshogs chen po dang nan tan chen pos rnyed pa'i phyir ro zhes smos pas gzhan zhig smos kyang ci dgos/ yang gcig tu na thos pa'i shes rab dang / bsam pa dang / bsgom pa'i shes rab ste/ shes rab rnam pa gsum gyis nan tan byed pa shin tu dkon zhes bstan pa'o/ /thos pa dang thos pa'i shes rab dang sbyar/ gzung ba 'dzin pa gnyis ni bsam pa'i shes rab dang sbyar/ sgrub par byed pa ni bsgom pa'i shes rab dang sbyar ro zhe'o/ /de yan chad du chos la bstod pa bstan to/ /dkon mchog gsum 'byung ba de bde bar bstan pa'i phyir sangs rgyas rnams zhes bya ba la sogs pa smos so/ /sangs rgyas kyi sgra ni gong du bshad pa dang 'dra ste/ cung zad du na drang srong phying gi ri dang / ang gi ri la sogs pa mngon par shes pa dang ldan pa 'jig rten na grags pa can de dag gis de bzhin gshegs pa'i mkhyen pa la bskyed du med pas sangs rgyas zhes bya ba'i tha tshig go/ /'byung ba bde zhes bya ba ni sangs rgyas 'od gsal lha'i ris nas yum gyi lhums su gshegs te/ glang po dkar po lta bu'i tshul du mngal gyi g.yas rol du mngal gyi dri mas ma gos par gshegs pa dang / bltams sam/ btsas pa'i tshe rgyal po chen po gzugs can snying po la sogs pa bzhi dang / blon po'i bu lnga brgya tsam btsas te/ de dag ni mngal gyi sdug bsngal dang ldan pa yin gyi de bzhin gshegs pa ni sdug bsngal dang / dri mas ma gos te bral bas na mngal du gnas pa dang btsas pa'i tshe bde ba nyid do zhe'o/ /gcig tu ni 'od gsal lha'i ris nas g shegs pa'i tshe zhal gyi sgo nas 'od zer mang po byung nas sems can dmyal ba la sogs pa dag la 'od zer gyis reg par byas nas dmyal ba pa de dag gis bsams pa 'di 'dra ba sel bar byed pa ni skyes bu mthu chen po 'ba' zhig 'od zer 'byin to zhes dad pa skyes pas sdug bsngal las thar pa lta bur snang ba dang / 'on pa rnams kyis ni rnar thos/ long ba rnams kyis ni mig gis mthong / bza' ba dang btung ba dang 'dod pa rnams yid bzhin du rnyed pas sangs rgyas 'byung ba ni 'jig rten na bde ba'i rgyur gyur pas sangs rgyas 'byung ba ni shin tu bde'o zhes so/ /yang na sangs rgyas 'byung ba bde/ /zhes bya ba ni byang chub sems dpa' las mngon par rdzogs par byang chub pa'i tshe rnam par grol ba'i 'bras bu rnam pa mchog thams cad dang ldan pas sangs rgyas 'byung ba bde ba'o zhe'o/ /de la kha cig 'di skad du rgol yang srid de/ mngon par rdzogs par sangs ma rgyas pa'i dus dang / lhums su bltam zhing btsas pa'i tshe byang chub sems dpa' yin na ci'i phyir sangs rgyas 'byung ba bde zhes bya/ rnam pa gcig tu de bzhin gshegs pa skye ba dang 'byung ba dang / mngal du gshegs zhes bya ba mi 'thad de/ ci'i phyir zhe na/ skye ba'i nyon mongs pa bcom pa ste/ 'khor ba las rgal ba'i phyir ro zhes so/ /de ni nyes pa med de/ de'i tshe de bzhin gshegs pa ma yin te/ byang chub sems dpa' yin kyang rgyu la 'bras bu btags te bshad de/ dper na 'jig rten na thags 'thag pa snam bur ma zin par yang snam bu 'thag ces zer ba lta bu dang / 'bras 'tshed kyang zan 'tshed do zhes zer ba dang / yos 'thag kyang phye 'thag go zhes zer ba dang 'dra ste/ de nyid du ma gyur kyang der mngon par 'ong ba rnams rgyu la 'bras bu btags pa srid pas 'di 'ang de'i tshe byang chub sems dpa' yin mod kyi/ phyis sangs rgyas su mngon par 'grub cing mngon par 'gyur pa'i phyir 'di skad ces bya ba la nyes pa med do/ /chos bstan pa bde ba ni gsung rab yan lag bcu gnyis kyi chos rnams 'jig rten du bstan cing bshad pas phyi'i mu stegs la sogs pa lta ba sna tshogs su smra ba rnams spong zhing tshar gcod pa dang gsung rab kyi chos rnams rgyas shing yun ring du gnas pa'i phyir chos bstan pa bde ba'o zhe'o/ /dge 'dun zhes bya ba ni gang zag chen po brgyad po la sogs te/ bzhi yan chad mang po 'dus pa la bya ste/ de'i mthun pa ni tshul khrims dang / lta ba dang / spyod lam dang / 'tsho ba la sogs pa mtshungs par gyur cing bya ba rnams gcig pa ni mthun pa bde zhes bya'o/ /yang na bde ba ni mthun pa'i rgyus mya ngan las 'das pa man chad bzang 'gro la sogs pa'i 'bras bu thob par gyur pas na dper na de bzhin gshegs pa 'jig rten du byon pa'i mthus 'phags pa kau N+Di n+ya la sogs pa rnam par grol ba'i 'bras bu thob pa lta bu yang yin no/ /yang na dge 'dun mthun pa'i mthus bslab pa gsum la bsgrub cing nan tan du byed pas nyon mongs pa nag po'i phyogs spong ba'am/ sel ba'am/ bsreg pa'am/ gdung bar byed pa ni dka' thub ste/ de ltar lhag pa'i tshul khrims dang / lhag pa'i shes rab gnas pa'i nyon mongs pa nag po'i phyogs spong ba de ni bde ba'o zhe'o/ /tshigs su bcad pa 'dis ni dkon mchog gsum 'byung ba bde ba dang / de'i dgos pa bde ba'i rgyu bstan to/ /'phags pa rnams ni mthong ba bde/ /zhes bya bas rnam pa bdun po'i nang nas dge ba'i bshes gnyen la brten par bya ba bshad de/ de la dge ba'i bshes gnyen rnam pa gnyis te/ kun rdzob kyi dge ba'i bshes gnyen dang / don dam pa'i dge ba'i bshes gnyen no/ /de la 'phags pa zhes bya ba ni sdig pa'i chos dang nyon mongs pa'i chos las ring du gyur pas na 'phags pa zhes bya'o/ /dam pa ni gzhan la phan 'dogs pa'i ngang tshul can yin pas 'phags pa nyid la bya'o/ /de lta bu'i skyes bu dam pa mthong na bde'o zhe'o/ /kha cig na re mthong ba lta zhig ci bde zhe na/ zlas rig par bya ste/ 'grogs pa dang / lhan cig gnas par 'gyur ba dang bde zhes kyang 'chad do/ /kha cig na re dper na mi mi srun pa ni ma mthong yang bla zhes bya ba yin pas 'phags pa rnams ni mthong na dga' ba skye ba'i phyir mthong na bde zhes kyang 'chad do/ / 'grogs na bde ba ni de lta bu'i dge ba'i bshes gnyen dang 'grogs na mi dge ba'i chos dang bral nas dge ba'i chos stobs pa dang / nyes pa las 'byin cing stong zhing grogs byed pas na de lta bu dang 'grogs shing lhan cig gnas na 'phral du bde ba sems la 'tsher zhing zug rngu med pa dang / sems dga' zhing dang ba skye ba dang / yul dang bsod nams bde bar smin par 'gyur ba'i phyir dge ba'i bshes gnyen dang 'grogs na bde'o zhe'o/ /byis pa rnams ni ma mthong bde/ /zhes bya ba ni mi dge ba'i grogs po spong ba ston te/ /byis pa zhes bya ba ni ngan du sems shing ngan du smra ba dang / ngan du spyod pa ste/ de lta bu rnams dang mi bsnyen mi 'grogs na rtag tu bde zhe'o/ /dper na 'phra ba can ni 'dom gyis spong ba dang / rwa can ni rgyang grags kyis spang ba dang / mche ba can ni dpag tshad kyis spong zhing bsring ba dang 'dra bar byis pa sdig pa spyod pa rnams kyang bsrings shing ring bar gyur na shin tu bde'o zhe'o/ /de la kun rdzob kyi dge ba'i bshes gnyen yang rnam pa gnyis te/ zhi gnas kyi yan lag la gnas pa dang / lhag mthong gi yan lag la gnas pa'o/ /tshul khrims ldan pa mthong ba bde/ /zhes bya ba ni zhi gnas kyi yan lag la gnas pa bsten te tshul khrims dang ldan pa'i skyes bu ni lus kyi nyes pa dang / ngag gi nyes pa dang bcas pa dang / rang bzhin gyi kha na ma tho ba rab tu bsrungs pas gzhan la mi gnod pa'i phyir de lta bu'i skyes bu dam pa mthong na bde'o zhe'o/ /ci'i phyir zhe na/ dper na rkun po rnams ni ma mthong yang sla zhes 'byung bas/ dge slong tshul khrims dang ldan pa mthong ba dang bdag gi rgyud dang pha rol gyi rgyud la yid ches pas dga' ba yin no/ /mang du thos pa ni the tshom sel zhing bden pa rtogs pa dang / dogs pa rnams med par byed pas mang du thos pa mthong na bde'o zhe'o/ /'di ni lhag mthong gi yan lag la gnas pa'o/ /de la skabs 'dir tshul khrims kyi nang du zhi gnas dang lhag mthong gi cha gnyis ka med dam zhes zer yang srid de/ de ni zhi gnas kyi nang na lhag mthong yod/ lhag mthong gi nang na'ang zhi gnas yod mod kyi/ shas che chung gi phyir dbye ba tsam du zad de/ de la zhi gnas ni g.yeng ba zhi ba'i tshul khrims kyang mi rgod mi 'phyar ba'i rang bzhin te zhi ba shas che bas zhi gnas kyis bstan to/ /mang du thos pa ni thos pa'i shes rab ste/ shes pa shas che bas na lhag mthong gis bstan te/ yan lag la gnas zhes bya ba ni zhi gnas dang lhag mthong mthar rdzogs par ma gyur pa'i phyir ro/ /de la don dam pa'i dge ba'i bshes gnyen la yang zhi gnas kyi mtha' la gnas pa dang / lhag mthong gi mtha' la gnas pa'o/ /yang srid rnam par grol ba zhes bya ba ni yang gi sgra ni phyir zhes pa'i tha tshig ste/ srid pa ni khams gsum la bya'o/ / de bas na phyir srid par 'gro ba'i nyon mongs pa las rnam par grol bas na yang srid par rnam par grol ba zhes bya ste/ rnam par grol ba ni zag pa dang bcas pa nye bar len pa'i phung po nyon mongs pa'i bcings pa las rnam par grol ba'o zhes bya ba'i tha tshig yin te/ de yang gang zhe na/ dgra bcom pa dag mthong na bde zhes 'byung ba de nyid de/ de lta bu'i rnam par grol ba ni dgra bcom pa zhes gdags so/ /dgra bcom pa ni nyon mongs pa'i dgra bcom pas dgra bcom pa zhes kyang bya/ phyir skye ba dang 'byung ba med pas/ rgya gar gyi skad kyis 'byung ba med pa/ skye ba med pa zhes kyang bya'o/ /yang na mchod par 'os pa ste/ yon gyi gnas su gyur cing dad pa dang / ma dad pas byin pa'i zas dang gos zhu bar 'gyur ba'i dgra bcom pas dgra bcom pa zhe 'am/ mchod par 'os pa zhes bya'o/ /de lta bu'i skyes bu dam pa yon tan gyi bdag nyid che ba mthong ba bde'o zhe'o/ /de yan chad kyis dge ba'i bshes gnyen brten par bya ba dang / mi dge ba'i grogs po spong ba bshad zin to/ /da ni rnam pa bdun po las 'bras bu thob pa bstan te/ de yang gang gi rgyus thob ce na/ sngar bstan pa'i dkon mchog gsum 'byung ba dge ba'i bshes gnyen la brten pas rnam par grol ba'i 'bras bu thob po zhe'o/ /de la rnam par grol ba nyid ci lta bu yin pa bstan par 'dod na dper na/ 'bab stegs bde ba'i chu klung bde/ /zhes bya ba bstan te/ ci ltar chu bo chen po las rgal bar 'dod na chu 'gram na nyam nga ba med cing / grog po dang / tsher gad dang / rdo la sogs pa med pa na chu 'gram nyid kyang bde ba yin la/ de rgal ba'i mi dang chu bo 'bab pa nyid kyang shin tu bde ba yin te/ de bzhin du yod pa dang med pa dang / rtag pa dang chad par lta ba'i dri ma'i mu dang bral ba de ni 'phags pa'i lam zhes bya ste/ chu 'gram bde ba'i lam bzang po dang 'dra bar mtha' thams cad dang bral ba'i 'phags pa'i lam gyis thob pa'i chos rnam par grol ba'i 'bras bu thob pa de ni shin tu bde bar bstan to/ /chos las rgyal ba'i skye bo bde/ /zhes bya ba ni de ltar 'phags pa'i lam la gnas shing rnam par grol ba'i 'bras bu thob pas mi mthun pa'i phyogs nag po'i chos rnams sel zhing rgyal bar byas pas na chos las rgyal ba'i skye bo bde'o zhe'o/ /don de nyid phyed 'og nas ston te/ /nga'o nga rgyal zad pa bde'o zhes bstan pa ste/ 'phags pa'i lam ma thob pa'i shes rab kyi ral gris mi mthun pa'i phyogs 'joms shing gcod par byed pa ni shes rab yin te shes rab med par nyon mongs pa spong bar mi nus pas de'i phyir shes rab thob pa bde'o zhe'o/ /de bas rgyu bstan te/ ji ltar shes rab thob pa bde zhe na/ nga'o nga rgyal zad pa bde/ /zhes smras te/ nga'o nga rgyal yang shes rab kyi ral gris yongs su gcod par nus kyi gzhan gyis ni ma yin pa'i phyir/ shes rab thob pa bde zhe'o/ /de'i skabs su nga'o nga rgyal zad ces mi bya bar 'dod chags la sogs pa zad ces smras na ci nyes zhes zer yang srid de/ de ni nyes pa med de/ nga rgyal ni nyon mongs pa thams cad skyed pa'i phyir rtsa ba'am gzhi lta bu yin pas de bcad pa dang 'dod chags la sogs pa yang mi 'byung bar shes par bya'o/ /de ltar yang 'dod chags la sogs pa yang nga dang nga yi ba dang / bdag dang bdag gi zhes pa'i bsam pa ngan pa las byung nas bdag la chags pa skye zhing pha rol gyi phyogs la zhe sdang ste/ de gnyis byung ba dang de'i las gti mug kyang 'byung ba yin pas nga rgyal chod dang gzhan lta zhig zlas mi gnas par rig par bya'o/ /de'i phyir nga rgyal zad pa bde ba'o/ /de yan chad du 'bras bu thob pa bde ba bstan zin to/ /da ni 'bras bu thob pa'i gnas bstan te/ nges par byas zhes bya ba ni sbyangs pa'i yon tan can rnams kyi thog ma'i dag pa bstan te/ dgon pa la gnas par bya bar yang nus na ni bya/ mi nus na ni gtong ngam zhe'am/ bdag gis ci tsam nus pa ni bya/ de ma yin na ni gtong zhes dam bca' ba'i dgon pa can ni dag pa'i bsam pa can ma yin pas/ gang ji tsam du bdag gi don yongs su ma rdzogs par mi btang mi ldog par dam bcas pa dang / yi dam nges par bya ba de ni bsam pa dag pa yin pas nges par bya ba ni de lta bu'o/ / dbang po thul ba ni dbang po mi rgod cing mi 'phyar mi g.yeng ba'i tha tshig ste/ zhi ba bcings pa de zhes bya ba'i tha tshig go/ dngos su na 'dod pa lnga'i yon tan la sems mi 'brang ba de nyid dbang po thul ba zhes bya'o/ /mang du thos pa dgon pa zhi rnams zhes bya ba ni bcom ldan 'das kyis gsungs pa bstan pa 'jig pa gnyis te/ mang du thos pa grong na gnas pa dang / nyung du thos pa dgon pa na gnas pa zhes 'byung bas 'jig par 'gyur ro/ /dgon pa na gnas pa yang tshul khrims lci yang dang gso sbyong gi bye brag dang / mdo sde'i gnas shes pa gnas par bya'i gzhan ma yin/ nyung du thos pa dgon par gnas pa mi rigs pa'i tha tshig go/ /dgon pa ni rgyang grags gcig phan chad do/ /zhi ba ni 'jigs pa dang dogs pa dang / nyam nga ba'i sa ma yin pa la bya'o/ /'jigs pa ni dgras 'jigs pa'o/ /dogs pa ni gcan gzan gyis 'tshe bar dogs pa'o/ /nyam nga ba ni sbrang bu la sogs pa yod pa'o/ /de dag med pa'i gnas su dgon pa bca' bar bya ba ni 'di ltar 'dul ba las gsol ba dang las kyis gang zag cig bskos te/ dgon pa'i gnas rtogs shig ces 'byung ba yin no/ /gnas par gyur pa nags su rgas pa bde/ /zhes pa/ gnas par gyur na ni thog ma'i bsam pa nges pa la bya ste gnas phan chad 'di ltar gnas la me tog rgas shing rang lhags su gnas pa dang 'dra bas ches btags te gnas par bya ba'i tshig go/ /yang gcig tu na dgon pa'i nags su rgas par gyur gyi bar du gnas par bya'o zhes pa dang sbyar ro/ /de la nags 'ba' zhig dgon pa yin nam zhe na/ de ni nyi tshe ba'i mtshan nyid tsam du zad kyi grong dang rgyang grags gcig phan chad gzhan yang 'di dang 'dra bar rig par bya'o/ /dar la bab pa yal ba ni rgas kyi bar du zhes bya ba'i tha tshig go/ /yang na zlas rig bya na ji ltar skyes bu dar la bab pa'i tshe zho sha che zhing rtsal mi thub pa dang 'dra bar rnam par shes pa spre'u dang 'dra bar 'dod pa'i yon tan la gnas shing / ngal ba med par spyod cing rgyu bas de'i gnas las bzlog ste/ de shin tu btul nas gcig tu zhi bar gnas shing nyon mongs pa'i gdung ba yang yal bar byas pas na mya ngan las 'das pa thar pa thob par 'gyur bas/ dar la bab pa yal ba bde/ /zhes bshad do/ /de yan chad 'bras bu thob pa'i gnas bshad zin to/ /yang dag par sdud pa po'i 'phags pa rnams kyis 'dul ba la bstod pa'i stod tra bzlas zin to/ /tshe dang ldan pa dag dpyid rnams las ci tsam lus zhes bya ba nas/ de de bzhin du 'dzin to zhes bya ba yan chad du so sor thar pa'i gleng gzhi ston te/ de yang rnam pa dgu zhig tu dbye bar bya ste/ dgu po yang gang zhe na/ bka' lung dang / mi 'dur mi gnang ba dang / mi 'dur gnang ba dang / mchod pa'i cho ga dang / yang dag par 'dzin du bcug pa dang / yang dag par 'dzin pa'i legs pa dang / yang dag par mi 'dzin pa'i nyes dmigs dang / yang dag par bsgo ba dang / 'khor rnam par dag pa'o/ /de la tshe dang ldan pa dag dpyid rnams la zhes bya ba nas/ bag yod pas thob po zhes bya ba'i bar du rnam pa dgu po'i nang nas bka' lung gi dbang du byas te bstan to/ /tshe dang ldan pa zhes bya ba ni snyan par bod pa'am/ btsun par bod pa'i tshig go/ / dpyid rnams zhes bya ba ni lo gcig la dus gsum du rnam par gzhag ste/ de yang dgun dang / dbyar dang / dpyid gsum mo/ /de la ston zla tha chungs nya nas dpyid zla ra ba nya'i bar du ni dgun gyi dus ni shin tu grang ba'o/ /dpyid zla ra ba nya nas dbyar zla 'bring po nya'i bar du ni dpyid kyi dus te cha ba'i dus so/ /dbyar zla 'bring po nya nas ston zla tha chungs nya'i bar du ni dbyar gyi dus te grang dro snyoms so/ /'dir dpyid smos pa ni nye ba'i mtshan nyid tsam du zad de/ dus gsum po gang la bab pa'i zla ba dang / ci tsam 'das pa'i so sor thar pa 'don pa'i tshe brjod par bya ste/ dper na de ni dpyid zla ra ba bco lnga 'das te/ zhag gcig gis ma tshang ba'i zla ba phyed dang / bzhi 'ongs pa ltar so sor thar pa 'don pas brjod par bya'o/ /ci tsam 'das pa dang / lhag ma ji tsam du lus pa de yang de bzhin du brjod de/ ci tsam zhes bya ba 'das pa dang / ma 'ongs pa la nges pa med pas ci tsam du de nyid smos so/ /des ni gang zag dge ba la mi brtson zhing / dus snyems pa'i gnyen por gsungs so/ /che snyems pa'i gnyen por dga' ba dang / 'chi ba mngon par 'ong ngo zhes bya ba la sogs pa smos so/ / ci'i phyir srid pa'i yan lag mya ngan la sogs pa gzhan 'dir ma smos par/ rga ba dang 'chi ba 'ba' zhig smos she na/ tshangs par spyod pa phun sum tshogs par 'gyur ba'i rgyu'i gtso bo yongs su nyams par brjod pa'i skabs yin pa'i phyir ro/ /de nyams par gyur pa'i rgyu gnyis te/ lus dang / skye gnas so/ /de la lus nyams pa ni rga ba dang 'chi ba ste/ rgas pa ni bcom ldan 'das kyis bstan pa'i gsung rab kyi yan lag 'jig rten gnas su zin kyang lus kyis mi nus shing mi lcogs la nyams kyis dpyad mi bzod pas sbyor zhing rtsol mi nus te/ tshangs par spyad pa las 'phang bar 'gyur ro zhe'o/ /'chi ba ni phung po rgyun 'chad pa la bya bas dge ba'i chos rnams spyad du med de tshangs par spyod pa dang ring bar 'gyur ro/ /de'i phyir skye ba'i gnas nyams pa ni ston pa'i bstan pa 'dzin pa zhes bya ste bstan pa 'dzin pa ni gang zag sgrub pa dang / 'dzin pa dang brjod pa nyams pa'o/ /de'i phyir dus ji ltar 'das pa bzhin du rga ba dang 'chi bas gnod par gyur te/ gsung rab kyi chos kyang 'jig go zhes gsungs pas bag yod pa la rnal 'byor du bya'o zhes smos so/ /ston pa ni don phyin ci ma log par ston pa ste de bzhin gshegs pa'o/ /bstan pa ni gsung rab yan lag bcu gnyis so/ /lha dang mir bcas pa'i 'jig rten la bshad cing bstan pa'i bag yod pa ni dge ba'i chos la gzud pa'i rnal 'byor ni 'jig rten las 'das pa'i lam la sbyor du gzud pa'i don te/ zhi gnas dang lhag mthong zung du 'brel bas 'gro ba'i lam ni rnal 'byor zhes bya'o/ /de ltar bag byas pas thob pa'i 'bras bu gang zhe na/ sangs rgyas kyi byang chub dang dge ba'i chos rnams kyang bag yod pas thob pas na bcom ldan 'das kyis bag yod pa la rnal 'byor du bya'o zhes bka' stsal to/ /de bzhin gshegs pa ni de bzhin du thugs su chud de ston pas na/ de bzhin gshegs pa'o/ /nyon mongs pa'i dgra ma lus par bcom ste/ gang zag thams cad kyis mchod par 'os pas na dgra bcom pa'o/ /yang dag par rdzogs pa ni yang dag pa nyid du mkhyen par bya ba yongs su rdzogs pa la bya'o/ /byang chub kyi sems zhes bya ba ni dran pa nye bar gzhag pa la sogs pa la bya'o/ /de yan chad bka' lung 'das so/ /da ni dge 'dun gyi thog mar bya ba ci zhe na zhes bya ba nas bya ba nyung ngo zhes bya ba yan chad du rnam pa dgu po'i nang nas mi 'dur mi gnang ba bstan par bya ste/ dge 'dun gyi thog mar bya ba ci zhes bya ba ni dri zhing brtags pa lta bu'i tshig gam/ yang na med pa lta bu'i tshig la'ang bya ste/ dri ma lta bu'i tshul du bshad na'ang gso sbyong bya ba'i gnas su chag chag bya ba dang / skyang nul dang dkyil 'khor dang stan gding ba la sogs pa dang po kho nar bya'o zhes bstan pa'o/ /med pa'i tshig ltar bshad na yang nyan thos kyi dge 'dun don nyung ba/ bya ba nyung ba yin pas gang zag gi gso sbyong la sogs pa sngar ma byas na dge 'dun 'du ba'i tshe mi mthun par 'gyur bas na gso sbyong la ched che zhing gces pa ci zhig yod ces dri ba lta bu'o/ /yang na gso sbyong ni phyis bya ba'am/ shol du mi rung bas gso sbyong gi sngon rol du las ci yang bya ba med ces pa'i tha tshig go/ /nyan thos zhes bya ba ni gzhan las thos par bya bas na nyan thos te/ gzhan gyi dring la brten te 'byung ba'i phyir ro/ /de yang ci lta bu zhe na/ dper na mkhan po dang slob dpon las thos par byas nas lan gsum rdzogs pa'i tha ma la khyod ni dge slong ngo / /dge sbyong ngo zhes gdags pa lta bu ste/ de'i phyir gzhan la rag las shing brten te 'byung bas na nyan thos so/ /don nyung ba bya ba nyung ba zhes bya bas 'dod pa chung ba'i rgyu bstan te/ don nyung ba ni lus kyis sgrub pa dang / ngag gis smra ba'i don nyung ba'o/ /bya ba nyung ba ni yod kyi bya ba nyung ba ste/ dngos su na zhing gi rmo rko dang / tshong gi khe sprul dang / yul gyi rnams chos su bya ba med cing yid kyis btsal ba'i don nyung ba ste/ de lta bu'i tshul gyis na bya ba gzhan med pas dang po rings par bya ba nyid gso sbyong yin pas na de'i phyir mi 'dur mi gnang ste/ rkyen ci lta bu byung zhing brel kyang mi 'dur mi gnang gi 'dus shig ces bka' stsal to/ /'di skad du bka' stsal pa las dge slong kha cig bla ma'i khyad par thob tu nye ba las bar chad du gyur te/ ma thob pa dang lam gyis dub pa dag sems rtse gcig tu 'dug par mi nus nas gral na gcog pa lta ba dang / dge slong nad pa kha cig 'phyes 'khrud de gso sbyong gi sar phyin pa dang / shi bar gyur nas de lta bur gyur pa la rjes su gnang ste/ bka' stsal pa/ dge slong dag de lta bu'i rkyen byung ba rnams la dad pa dang yongs su dag pa longs la dge 'dun gyi gso sbyong bar chad du mi 'gyur bar gyis shig ces bka' stsal to/ /de lta bas na tshe dang ldan pa dag ma lhags pa rnams la dad pa dang yongs su dag pa dris shig / dris nas kyang brjod par bya'o zhes smos te/ de ni rnam pa dgu po'i nang nas mi 'dur gnang ba'i dbang du byas nas bstan to/ /tshe dang ldan pa dag ces bya ba ni rgyal po'i khab na dge slong dag gcig la gcig khyim pa'i ming rus nas 'bod pa las khyim bdag 'phya bar gyur nas bka' stsal pa/ tshe dang ldan pa'am/ btsun pa zhes bos shig bcom ldan 'das la yon tan gyi sgo nas 'bod do zhes gsungs so/ /ma lhags pa rnams zhes bya ba ni gang du nad pa la sogs pa gso sbyong sar 'gro mi nus shing mtshams kyi nang na 'khod pa rnams la bya'o/ /nad tshabs che ste smra mi nus na lus kyi brdas phul na yang phul ba'o zhes bya'o/ /de ste yang 'bul ma nus na dge 'dun der deng shig /yang na dge 'dun gyi nang du nad pa blang bar bya'o/ /yongs su dag par 'dri ba ni dad pa dang 'dra bar brjod do/ /'dri ba'i mdun du dad pa 'bul ba'i dge slong gis gso sbyong byas nas rgan gzhon gyi tshul du tsog tsog por 'dug nas gus par bdag ni bar chad kyi chos rnams yongs su gtsang ste/ dge 'dun phrin las mdzad pa la dad pa dang yongs su dag pa dbul lo zhes lan gsum du brjod par bya'o/ /dad pa phul ba ni de ltar dad pa phul bas na dge 'dun dang mthun par 'gyur ro/ /yongs su dag pa phul bas na bdag nyid gso sbyong gi snod du 'gyur ro/ /dris shig ces bya ba ni dbul du gzhug pa'o/ /brjod par bya'o zhes bya ba ni dad pa blangs pa'i dge slong gis gso sbyong gi gnas su dge 'dun tshogs pa la brjod pa'am/ yang na dge slong gcig la brjod na yang dad pa phul ba yin no/ /dad pa dang yongs su dag pa len pa yang nad pa dang nad g.yog dang / dge ba'i phyogs khyad par can la sbyor ba dang / so sor thar pa'i mdo gdon pa la zhugs shing don yid la byed pa'am lam ring po nas dub cing 'gro mi nus pa dang / nad kyis btab ste sos nas ring por ma lon pa la sogs pa rkyen byung ba rnams kyis dad pa phul bar bya'i/ dge ba'i phyogs cung zad tsam byed pa'am cung zad na ba'i phyir snyad btags te dad pa 'bul ba ni ma yin no/ /dad pa len pa'i dge slong bsko ba ni bslab pa byin pa dang / phas pham pa byung na dang bslab pa ma chags pa dang / rang bzhin du mi gnas pa'i dge slong ma yin pa dang / smyos pa la sogs pas dad pa blang bar mi bya'o/ /dad pa len pa'i dge slong gis kun tu spyod pa'i nang dad pa'i tshe mtshams kyi phyi rol nas nang du phan tshun du dbul bar mi bya nam mkha' la gnas shing sa la dbul bar mi bya/ gcig nas gcig tu brgyud de dbul bar mi bya/ dad pa blangs nas rgyug cing mchod par mi bya/ bsam gtan la 'jug cing nyal bar mi bya'o/ /mtshams ni gnyis te/ chen po dang chung du'o/ /chen po ni thang ka dang bla 'og dpag tshad phyed dang gsum kho ra khor yug go/ /chung ngu ni 'di tshun chad dkyil 'khor gyi bar du ste/ dge 'dun bzhi bcu'i las shong ba'o/ /shAkya seng ge zhes pa nas 'dul ba de ni nga las nyon zhes bya ba yan chad du rnam pa dgu po'i nang nas mchod pa'i cho ga bstan par byas te/ sor mo bcu'i thal sbyar zhes bya ba la sogs pa smos te/ de yang rnam pa gnyis kyi phyir te/ de bzhin gshegs pa la khyim pa'i rigs dang / rab tu byung ba'i yon tan las bstod pa dang so sor thar pa la mchod cing bstod pa'o/ /khyim pa'i rigs kyi sgo nas bstod pa ni gdung gtsang zhing rigs btsun pa'i phyir shAkya zhes smos so/ /seng ge zhes bya ba ni rab tu byung ba'i yon tan gyi sgo nas bstod pa ste/ ji ltar seng ge ral pa can phyogs gang nas gang du 'gro ba der 'jigs pa dang bag tsha ba med par 'gro ba bzhin du de bzhin gshegs pa seng ge dang mtshungs pa yang mi 'jigs pa bzhi dang ldan pas mu stegs can gyi tshogs mang po shin tu skrag par mdzad pas seng ge dang 'dra'o zhe'o/ /yang na shAkya zhes bya ba'i sgra ni phod pa'am nus pa'am lcogs pa lta bu'i don te/ sngon rgyal po 'phags skyes po'i bu las yul ka phyi la sdu zhes bya ba spun gnyis shig spyugs pa las de dag kyang mthu stobs lhag par che ste/ yul dang ljongs la sogs pa yang bcom zhing pham/ bdag cag nyid kyang rgyal po'i bu zhig pas ka phyi la zhes bya ba'i drang srong gis kyang ril ba spyi blugs kyis yul gru bcad de byin nas/ de dag skyed pa'i bde bas na phyogs kun du bde'o zhes grags te/ phyogs gang na rgyal po'i sris gtong ba'i rgyal po'i lta bu'am/ rgyal po la ma rangs pa'i blon po lta bu la sogs te/ thams cad kyang 'dir 'du zhing lhags nas rgyal po 'phags skyes po nyid pas kyang bu de dag ni shin tu 'byor cing nus pa dang / phod cing lcogs pa dang / grags che zhing de lta bu las gyur pas na shAkya zhes bya ba khyim pa'i rigs kyi sgo nas bstod do zhe'o/ /so sor thar pa la mchod pa yang bstod pas mchod de/ nyon mongs pa las thar par byed pas na so sor thar pa la zhes yon tan gyis mchod pa'o/ /bshad par bya zhes bya ba ni zla ba phyed phyed cing so sor thar pa bshad pa'am 'don pa la bya'o/ /thal sbyar zhes bya ba ni lus kyis phyag 'tshal ba la sogs te/ phyag rnam gsum gyi bye brag go/ /'dul ba zhes bya ba ni rnam pa bdun gyis bye brag tu bstan pa yang yin te/ yang na 'dod chags dang / zhe sdang dang / gti mug la sogs pa'i chos rnams shin tu 'dul bar byed pas na 'dul ba zhes kyang bya'o/ /mchod pa'i cho ga 'das so/ /nga la nyon zhes bya ba nas/ srab 'dra so sor thar pa 'di'o/ /zhes bya ba'i bar du rnam pa dgu po las yang dag par 'dzin du gzud pa bstan te/ nga la nyon zhes bya ba la sogs pa smos so/ /de yang rnam pa bzhir dbye bar bya ste/ bzhi po yang gang zhe na/ nyan du gzhug pa dang / phyin ci ma log par bsgrub pa dang / mi g.yel bar sbyor ba dang / lta ba la chags su mi gzhug pa'o/ /nga la nyon zhes bya ba ni nyan du gzhug pa dang sbyar ro/ /kha na ma tho phra rnams la/ /sgrims te gus par gyis shig ces bya ba ni mi g.yel bar sbyor ba dang sbyar ro/ /thos nas drang srong chen po yin/ / gsungs pa ji bzhin sgrub par gyis/ /zhes pas ni phyin ci ma log par sgrub par sbyar ro/ /rtag par shin tu bsten pa yis/ /zhes pa nas/ srab 'dra so sor thar pa 'di'o/ /zhes bya ba'i bar du ni lta ba la chags su mi gzhug pa bstan to/ /de la nga la nyon cig ces bya ba ste/ nga zhes bya ba ni so sor thar pa 'don pa'i gang zag go/ /de la ci zhig mnyan zhe na/ so sor thar pa mnyan pa'o/ /des ni dbang po gzhan du mi g.yeng zhing / dran pa mngon sum du byos la rna blags te nyon cig pa ste/ so sor thar pa 'don pa la bsti stang dang bcas pas nyon cig pa'o/ /de la thos nas drang srong chen po zhes bya ba dang / gsungs pa bzhin du sgrub par gyis zhes bya ba gnyis kyis phyin ci ma log par sgrub pa'o/ /des ci thos nas ji ltar sgrub ce na/ drang srong chen pos gsungs bzhin sgrub ces smos so/ /drang srong ni de bzhin gshegs pa la bya'o/ /chen po ni tshul khrims kyis rgyas shing 'jig rten pa'i mu stegs dang / nyan thos dang / rang sangs rgyas kyi drang srong las mngon par shes pa la sogs pas khyad par 'phags pa'i phyir chen po zhes smos so/ /des ji skad gsungs pa bzhin du phyin ci ma log par sgrub pa'o zhes bya ba'i don to/ / kha na ma tho phra rnams la/ /sgrims te gus par gyis shig pa ni mi g.yel bar sbyar ba ste/ kha na ma tho zhes bya ba ni brjod par mi rigs pa'i tshig sdud pa ste/ skyes bu dam pa rnams kyis smad pa'o/ /kha na ma tho zhes bya ba ni rnam pa gnyis te/ rang bzhin gyi dang / bcas pa'i kha na ma tho ba'o/ /de la bcas pa'i kha na ma tho ba las rang bzhin gyi kha na ma tho ba sdig pa che zhing lci bas na/ skabs 'dir phra zhes smos pas na bcas pa'i kha na ma tho ba la bya ste/ de bas na dge ba la brtson pa'i gang zag gis bcas pa'i kha na ma tho ba phra ba'i yang phra ba la brnyas par mi bya zhing shin tu bsgrims te bsrung zhing bsdams par bya na rang bzhin gyi kha na ma tho pa la sogs te sdig che ba sbom po rnams lta ci smos zhes bstan to/ /des ni bslab pa la mi g.yel bar sbyor ba bstan to/ /rtag par shin tu brten pa zhes bya ba ni sh+lo ka gcig gis ni lta ba la chags su mi gzhug pa bstan te/ rtag par shin tu brten pa zhes bya bas sems rta rgod dang mtshungs pa shin tu gdul dka' ba dpe rta rgod las blangs te bstan to/ /rta rmu rgod ma rungs pa 'jug cing 'gro bar bya ba'i lam ma yin par/ brten cing 'tshal ba'am/ 'thar ba ltar sems rta rgod dang mtshungs pa yang nyon mongs pa'i chos 'dod pa lnga'i yon tan la shin tu mos shing gya tshom du 'jug pa las bzlog par dka' ba bstan te/ ci ltar rta rgod ma rungs pa 'jug par bya ba lam ma yin par brten cing 'gro ba la srab kyis kha lo sgyur cing dgug pa ltar sems rta rgod dang mtshungs pa yang gzugs dang / sgra dang / dri dang / ro dang / reg bya'i chos rnams la sems rab tu g.yeng bar spyod cing 'jug pa las bzlog pa dang ldon par byed pa ni so sor thar pa de yin te/ de bas na so sor thar pa srab dang 'dra'o zhes smos so/ /de la sems zhes smos pa ni mu stegs can bdag tu lta ba las bye brag tu bstan zhing bzlog pa'i phyir sems zhes smos te/ nyon mongs pa'i g.yul la brten zhing 'jug kyang bdag ces bya ba med pas na sems 'ba' zhig gdul ba'i don to/ /des ni kun nas nyon mongs pa sbyong zhing spel bar ston gyi/ bdag rtag pa ther zug pa ni rtag par mi 'gyur ba'i rang bzhin du 'dod pas na kun nas nyon mongs pa'ang med/ rnam par byang ba yang med de de nam mkha' dang 'dra'o/ /de bas na bdag tu lta ba la chags su mi gzhug pa bstan to/ /gzer bu rnon po zhes bya ba ni chad pa'i las byas shing 'gyod pa dang / bshags pa dang / mthol ba'i las byas te/ so sor thar pa nyid la gnas na ma 'ongs pa'i nyon mongs pa ngan song gsum du 'gro zhing khrid par byed pa'i kha na ma tho ba rnams rab tu gcod par byed pas na kha na ma tho ba'o/ /brgya pa ni so sor thar pa las 'da' ba rnams tshe 'di la chad pa'i las kyi sgo mang po nas 'gyod cing mi bde ba'o/ /de gnyis kyis mi srab lta bur bstan te/ srab ces smos pa ni ngang tshul ngan pa dang ldan pa'i gang zag 'dul ba ma yin pa la zhugs pa rnams kha das glon zhing snang bar bya ba'i phyir srab ces bstan to/ /'dra zhes bya ba ni 'phags pa dang ma rabs gnyis ka dang mthun te/ bdag la gnod pa'i dka' thub spangs mod kyi sbyangs pa'i yon tan dang yang mthun pas ha cang dog pa yang ma yin/ 'dod pa'i bde ba spangs mod kyi gang zag ma rabs rnams kyi spyod pa dang mthun pas ha cang spangs pa yang ma yin no/ /che ba gang dag ces bya ba sh+lo ka gcig gis ni yang dag par 'dzin pa'i legs pa bstan te/ de la che ba zhes bya ba ni rnam par grol ba'i 'bras bu thob pa dag la che zhes gdags pa yang yod mod kyi/ skabs 'dir ni gang tshul khrims kyi bslab pa la gnas shing bslab pa la 'dod pa rnams la bya ste/ de yang ngag gis bsgo ba tsam gyis ldog pa'o zhe'o/ /ngag tsam zhes bya ba ni rdo dbyig dang khu tshur la sogs pa'i drag shul gyis bda' mi dgos shing / ngag gis smras pa tsam gyis nyon mongs pa'i phyogs las ldog pa'o/ /mtshams zhes bya ba ni bslab pa la bya ste/ bslab pa dang mi bslab pa dang / bya ba dang / mi bya ba dang / gnang ba dang / mi gnang ba la sogs pa'i mtshams shes pas na bslab pa'i mtshams las mi 'da' ba zhes bya'o/ /de la mi rta bzang po zhes bya ba smos pa ni dpe ste/ gong ma'i mi rta ni rdo dbyig dang khu tshur la sogs pas bda' dgos pas na bzang po ma yin te/ de la ngag tsam gyis ldog pas na rta cang shes sam mi shes bzhin can lta bu'i phyir mi rta bzang po'o/ /nyon mongs pa'i g.yul las thar ces pa ni ji ltar thabs dang ldan pa'i skyes bu g.yul ngo bzlog ste g.yul las rgyal ba bzhin du bslab pa gnas pa'i skyes bu cang shes pa ni nyon mongs pa dang 'thab pa'i g.yul las rgyal nas dgra bcom par thar pa la bya'o/ /yang dag par mi 'dzin pa'i nyes dmigs kyi dbang du byas nas su la srab 'di med ces bya ba la sogs pa smos so/ /su la med ces bya ba ni mu stegs can dang / 'dod pa'i longs spyod la zhugs pa rnams te/ de dag la so sor thar pa'i srab 'di med pas na nam du'ang mya ngan las 'das par mi 'gyur ro zhe'o/ /de la kha cig na re mu stegs can gcig pur ma zad kyi/ sangs rgyas kyi bstan pa la zhugs pa rnams kyang tshul khrims kyi skyon dang bcas shing 'dod pa'i longs spyod la gya tshom du 'jug pa de dag kyang mya ngan las 'das pa mi 'dod pa dang 'dra bar nam du yang rnam par grol ba thob par mi 'gyur ro zhe'o/ /de dag nyon mongs g.yul las pham/ /zhes bya ba ni nyon mongs pa ni 'dod chags dang zhe sdang dang / gti mug la sogs pa de dag tshogs pa'am 'dus pa tshig bla dgas su gdags pa ni g.yul zhes bya ste/ bdag nyid nyon mongs pa'i dbang du gyur cing / nyon mongs pa las bdag nyid pham pas na nyon mongs g.yul las pham zhes bstan to/ /dper na ji ltar dgra'i g.yul gyis bzlog pa bzhin pas g.yul las pham pa'o/ /gzungs med rnam par 'khyam par 'gyur/ /zhes pa gang gis gzungs med ce na/ so sor thar pa'i gzungs med pa la bya'o/ /rnam par 'khyam zhes bya ba ni 'gro ba lnga ste/ sems can dmyal ba dang / yi dwags dang / byol song dang / lha dang mi'i nang du yang nas yang 'thor zhing brgyud pas/ nam du'ang thar par mi 'gyur ro zhe'o/ /'khyam zhes bya ba ni ji ltar byis pa don med par 'phyan cing 'khyam pa ltar/ so sor thar pa'i gzungs med cing mya ngan las 'das pa'i don mi tshol bas rtag par 'khor ba nyid kyi nang du 'khyam par 'gyur ro zhe'o/ /dper na rta brtod las shor te/ 'khyam pa'am/ mdzo ru dag med na las kyis mu stor ba lta bu yin te/ de yang so sor thar pa'i gzungs med pas don stor bar 'gyur ro zhe'o/ /de yan chad yang dag par mi 'dzin pa'i nyes dmigs bstan to/ /yang dag par bsgom pa'i dbang du byas nas/ dge 'dun btsun pa gson cig ces bya ba la sogs pa smos so/ /gson cig ces bya ba ni 'dod pa po'i mis 'khor nyan pa rnams la bos nas sems gzhan du mi g.yeng bar nyan du gzhug pa'o/ /dge 'dun zhes bya ba ni dge 'dun rnam pa lnga la bya ste/ bzhi 'dus pas tshul nas 'byung ba dang / bsnyen par rdzogs par bya ba dang / dge 'dun gyi lhag ma'i chad pa dbyung bar mi 'gyur ro/ /lnga 'dus pas ni bsnyen par rdzogs pa dang dbyung bar mi bya'o/ /mtha' 'khob na ni bsnyen par rdzogs par yang bya'o/ /bcu 'dus pas ni dbyung bar mi bya'o/ / nyi shu dang nyi shu las lhag pas ni las thams cad bya'o/ /gso sbyong bcu bzhi'am bco lnga zhes smos pas ni/ sngon mu stegs can gcig gis dge slong dag la di ring tshes grangs ni du gso sbyong byed dam mi byed ces dris pa dang / dge slong dag gis mi shes par gyur nas bcom ldan 'das la zhus pa dang / de ni mu stegs zer ba yang bden gyi dge slong dag gso sbyong yang gyis shig /tshes grangs kyang shes par gyis shig /de la dgun gyi dus kyi zla ba phyed brgyad la phyed gsum pa dang / bdun pa ni bcu bzhi yin te/ de yang gang zhe na/ dgun zla ra ba gnam stong dgun zla tha chungs gnam stong / dpyid kyi dus la phyed brgyad la bcu bzhi'i gso sbyong dpyid zla 'bring po gnam stong / dbyar zla ra ba gnam stong / dbyar gyi phyed brgyad la bcu bzhi'i gso sbyong dbyar zla tha chungs gnam stong / ston zla 'bring po gnam stong / dus la bab ces bya ba ni gso sbyong gi dus la bab pa'o/ /dus la ma bab pa dang dus las yol bar byas na/ nyes byas so/ /bzod ces bya ba ni gal te dge slong dag mi gtsang ngam/ las kyis brel tam/ mi mthun par 'gyur na kha ton du 'dod pa'i gang zag la mi dad cing mi bzod par 'gyur bas na de lta bu med de/ bzod cing dad na so sor thar pa'i mdo gdon to zhes bya ba'i tha tshig go/ /gnang bar mdzod cig ces bya ba ni bdag 'don par dge 'dun gyis gnang shig pa'o/ /sus 'don zhe na/ dge 'dun gyi gnas brtan gyis so/ /de yang mi shes na gnas brtan dang 'og gis gdon to/ /de yang mi shes na gsol ba btab nas 'don pa po bsko bar bya'o/ /'di ni so sor thar pa 'don pa po nyid kyi tshig go/ /ci'i phyir dge 'dun thams cad kyis mi gdon zhe na/ kun gyis mthun par yang mi thon la/ chos nyan pa'i tshul du yang mi rung la/ ring du thogs pa dang / sgra ca cos ma zhi ba'i nyes par 'gyur bas na gcig gis ston la gzhan chos nyan na de lta bu'i nyes pa yang med la ltung ba yod pa yang dran par 'gyur ro/ /rang rang gi gnas su so sor thar pa gdon na ci nyes she na/ de yang dge 'dun ma 'dus pas gso sbyong byas pa ma yin no zhe'o/ /'di ni gsol ba'o zhes bya ba ni shes par bya ba'i mtha' ston to/ /tshe dang ldan pa gso sbyong bya ste zhes bya ba la/ ci'i phyir gso sbyong bya zhe na/ dper na skyes bu lus snad pa'am rma dang ldan pa la sman pas sman byas na nad las sos par 'gyur ro/ /de dag 'dra bar sems kyi nad dang rma ni mi dge ba'i chos sdig pa yin te/ de la mi dge ba sel zhing bya dga' sbyin pas na gso sbyong ngo / /yang na de ltar gnyen po la brten zhing byas pas sdig pa'i chos rnams spong zhing dge ba'i chos rnams brtas par byed pas na dge brtas zhes kyang bya'o/ /bya ba ji lta bu zhe na/ tha na bzhi 'dus pa mthun pas kyang so sor thar pa gdon to/ /bzhi gnas pas dad pa mi blang ngo / /gsum man chad gnas pa ni sta gon byas la kha ton bya/ zhi bar bya ste dge slong gzhan nyung na byin gyis brlab po/ /bya ba'i gnas ni spangs shing dben par ro/ / de'i nyin mo zla ba phyed tshun chad kyi nyes pa bsam mo/ /mthol ba ni ltung ba 'dra ba'i mdun du mi bya'o/ /thams cad ltung ba 'dra na gcig gud du mthol du btang la de tshangs nas kun gyis de la bya'o/ /'gro bar su'ang ma dad na gsol bas spyir bsngo'o/ /gso sbyong dus su ma byas sam/ dus ma yin par byas na 'das pa'o/ /dus ma yin par gso sbyong byar rung ba ni bzhi ste/ bar chad brgyad lta bu'i rkyen byung na gsum mam spyi ste/ de ni rkyen gyi'o/ /bsngo ba'i ni dus kyi tshe mi bde na bsngo bar bya'o/ /mthun pa'i rtsod pa sdum pa'i thabs sam chad pas gsol ba'i tshe'o/ / bkra shis kyis ni ltas ngan nam than pa'i tshe'o/ /so sor thar pa'i mdo bshad pa gdon zhes bya ba la/ mdo'i gdon pa lnga ste/ gleng gzhi nas phas pham pa bzhi dang / gleng gzhi nas dge 'dun lhag ma yan chad dang / gleng gzhi nas ma nges pa'i bar du brjod pa dang / gleng gzhi nas thams cad rdzogs kyi bar du gdon pa'o/ /gnas brtan gyis ma thon na de man chad sus thon pas so/ /ma rdzogs na gzhan gyis btud do/ /smyon pas bton na yang rung ste/ 'khor rnam par dag pa'i dbang du byas nas khyed cag su la nyes pa yod pa zhes bya ba la sogs pa smos so/ / nyes pa yod pa ni ltung ba ma mthol ba'o/ /mthol cig ces bya ba ni la la na re der 'phral du dran na/ dge 'dun nam yang na drung na gcig la bshubs te mthol cig /kha cig na re der yid kyis byin gyis brlabs la phyis mthol cig ce'o/ /kha cig na re kha ton 'don pas ni yid kyis byin gyis brlab po/ /so sor dris nas lan btab pa de bzhin du zhes bya ba ni ji ltar ma lhags pa rnams la gnas so sor dris na de dag gis dad pa dang gtsang ma lan gsum gyi bar du bzlas te/ lan btab pa bzhin du 'dir tshogs pa rnams la yang lan gsum gyi bar du bsgrags par bya'o zhe'o/ /lan gsum chud pa ni ring du thogs pa dang yengs pas mi go ba'i nyes pa spong ba'i phyir ha cang mi mang mi nyung ba'o/ /lan gsum gyi bar du dri ba'i tshig ni tshe dang ldan pa dag ces pa nas bsgrags par bya'o zhes bya ba'i bar du'o/ /'khor 'di lta bu zhes bya ba ni 'khor gtsang ma 'di lta bu zhes bstod pa'o/ /dran bzhin du zhes smos pa ni de ltar lan gsum du dris nas nyes pa yod la dran bzhin du mthol na brdzun du 'gyur gyi/ mi dran na brdzun du mi 'gyur ro/ /brdzun ni tshig yin mod kyi/ yod na mthol cig /med na ma smra shig ces bsgo ba las yod bzhin du mi smra bas na/ tshig gis go bar bya'o/ /don brdas go bar byed pas na de nyid brdzun no/ /bar du gcod ces bya ba ni rgyu dang 'bras bu'i bar du gcod de tshe 'di la dge ba'i bar du'o/ /tshe phyi ma la ni bde 'gro dang mya ngan las 'das pa'i bar du gcod do/ /rnam par dag pa 'dod ces bya ba ni mya ngan las 'da' bar 'dod pa yin gyi nan tur 'dod pa ma yin no/ /nyes pa yod ces bya ba ni mthol ba ma byas pa'o/ /dran zhing zhes pa ma brjod pa'i mthong ba zhes pa ni lci yang mthong ba'o/ /bshags na bde bar 'gyur zhes pa ni lnga ste/ le lo'i gnyen po brtson 'grus dang / kha na ma tho ba 'byung ba'i gnyen po kha na ma tho ba med pa dang / bslab pa khyad du gsod pa'i gnyen po gus pa dang / 'gyod pa'i gnyen po 'gyod pa med pa dang / rnam par ma dag pa'i gnyen po ting nge 'dzin dang / yang dag pa ji lta ba bzhin du shes pa rnams dag pas so/ /gleng gzhi zhes bya ba ni so sor thar pa de las 'byung ba'o/ /so sor thar pa dang po brjod pa mi brjed pa'i dran byed tsam du bris la/ so sor thar pa'i mdo gdon pa las brtsams te/ mi tshangs par spyod pa'i gleng gzhi ni lo bcu gnyis kyi bar du nyan thos kyi dge slong rnams tshul khrims kyi sgo nas skyon dang 'phen med pa las/ lo bcu gsum pa la bab pa dang / sangs rgyas bcom ldan 'das yul spong byed bram ze ka lan dka'i grong na bzhugs so/ /de'i tshe na khyim bdag ka lan dka'i bu bzang sbyin zhes bya ba de nor mang zhing longs spyod che ba'i tshad ni ngal so po'i nor la 'gran pa zhig 'dug pa des rigs mnyam pa las chung ma blangs nas rtse dga' yongs su spyod cing 'dug pa las slad kyis khyim bdag de sangs rgyas dang / chos dang / dge 'dun la mngon par dad de skyabs su song nas dge slong gi sdom pa blangs nas skra dang kha spu bregs te 'dug go/ /de nas dus phyi zhig na bzang sbyin gyis bsams pa/ bdag khyim nas phyung ste dge slong gi dngos por gyur kyang gnyen bshes dang 'dres te sngon gyi khyim pa bzhin du gnas pa ni shin tu mi rigs so snyam nas de dag dang dbral ba'i phyir lhung bzed dang chos gos thogs te ljongs rgyur song ba dang / de'i lo la mu ge byung nas pha ma'ang bu la mi ster ba tsam du zas dkon par gyur nas bzang sbyin gyis bsams pa/ de ltar zas dkon pa'i skabs der bdag gi gnyen phyug po kun bsod nams rtag tu bya ma nus kyang dus drug tsam du yang dge 'dun dag la bshos dang spyan gzigs dag sbyor du gzhug go snyam nas bdag gis yul ka lan dkar 'ongs te/ dgon pa'i gnas spyil po zhig na 'dug cing / de bzhin du bsod nams dag kyang 'phel zhing / bdag nyid kyang sbyangs pa'i yon tan can bsod snyoms blangs pa las nang cig bdag gis ma'i sgor 'ongs pa dang der ma yang grong gzhan zhig tu song ste de nas sbyin pa yang ma 'thob/ mi gcig kyang mi snang nas slar myur du song ba dang / bran mo cig gis mthong nas des jo mo ga na ba der song smras na/ mas bsams pa/ bdag gi bu de ni slar khyim par dbab 'dod yang dag snyam nas phyi bzhin brgyugs te bu'i gan du 'ongs nas bu khyod dge sbyong la skyo 'am/ chags pa 'am/ the tshom za ba lta na slar bzhud/ khyod kyi pha'i nor la lta zhig ci smos kyi/ khyod kyi ma'i nor gser dngul spungs pa yang pha rol na mi 'greng bas tshul rol na 'greng ba mi mthong / tshu rol na 'greng bas pha rol na 'greng ba mi mthong ba ni khyod kyi ma'i nor yin na 'di rnams sus bskur/ 'dod pa rnams la spyod/ bsod nams kyang gyis shig ces bya ba dang / bzang sbyin gyis lan smras pa dang / za za bdag dge sbyong la skyo ba'am chags pa ma mchis te/ slar mchi'o zhes smras nas/ mas bsams pa da bdag gis ji ltar byas kyang rung ba lta ma yin snyam nas slar song ste khyim du 'ongs nas mna' ma la smras pa/ khyod nam zla mtshan dang ldan pa dang nga la smros shig ces bsgo nas phyis yang dus gcig na mna' ma de gos dang dri dang phreng bas brgyan nas chas te khrid cing bu'i gan du 'ongs te bu khyod slar 'ong du mi rung na rabs 'chad do/ /khyod kyis nor kun slar bzhes pa res kyang bya ste/ ci dang ci la snyad btags nas bu mo 'di dus la bab kyi sa bon gyi tshul cung zad cig byin cig byas pa dang / bzang sbyin de yang sngon ni bslab pa ma bcas/ ngan song ma mthong bas na/ chung ma shin tu mdog bzang mo mthong ba dang sems la 'dod pa yang skyes nas/ za za de lta bu bgyid dbang ngam zhes bya ba dang / bu sa bon gyi chos tsam ni shin tu dbang ngo zhes smras nas/ bzang sbyin gyis chos gos gzhag ste/ lkog tu khrid de mi tshangs par spyod pa las bcas so/ /rjes su bcas pa ni sangs rgyas bcom ldan 'das rgyal po'i khab na bzhugs pa na/ de'i tshe dge slong zhig dgon pa'i spyil po na gnas pa'i tshe/ spra mo zhig kha zas kyis brid nas de la mi tshangs par spyod do/ /phyis dge slong mang zhig dgon pa'i gnas dag yul zhing dgon par lhags nas mngon du dga' ba'i gtam mang zhig byas nas 'khod pa dang / spra mo de yang der 'ongs nas dge slong de'i mdun na 'dug ste ro smad bsnyen pa dang dge slong de grogs mang po la rab tu ngo tsha bar gyur nas lan gnyis lan gsum phul te bskrad pa dang / dge slong de'i gdong du spra mos bzar te/ sgra mi snyan pa 'byin cing song nas pha zad nas lta zhing tsog bur 'dug go/ /de nas dge slong de dag gis de la 'dir dgon pa'i spra mo 'di khyod la 'di ltar byed/ khyod kyis de la ngo tsha ba'i phyir bskrad/ bcom ldan 'das kyis kyang 'di lta bu mi rigs pa'i chos spongs shig ces ma byung ngam zhes byas pa dang / des smras pa/ bcom ldan 'das kyis bcas pa ni mi la ste/ byol song la ma yin no zhes smras pa dang / dge slong dag gis de la bsngags pa yang med/ gyod btab pa yang med de dong ba bcom ldan 'das la zhib tu gsol nas bcas so/ /de'i tshe na bcom ldan 'das dge slong gi 'khor brgya stong phrag tu ma bsdus te chos ston to/ /'khor der tshe dang ldan pa bzang sbyin yang 'dus par gyur te 'dug go/ /bcom ldan 'das kyis nyan thos rnams la 'dod chags dang zhe sdang dang gti mug dang bral ba'i phyir sems rnam par grol ba dang / shes rab rnam par grol ba'i chos bshad pa dang tshe dang ldan pa bzang sbyin the tshom dang 'gyod pa skyes nas rab tu sems shing 'dug go/ /de nas dus gzhan zhig na dge slong gnas nyung ba dag cig bzang sbyin gyi gnas su phyin pa dang / bzang sbyin sngon chad ni dge slong glo bur du lhags pa la mdun nas bsu zhing chos gos dang 'khar gsil la sogs pa yang len na/ da ni dge slong glo bur du lhags pa rnams mthong na dogs pa dang the tshom skye bar gyur na/ tshe dang ldan pa mi bde ba dag lta med dam zhes smras pa dang / bzang sbyin gyis kyang ji ltar gyur pa drang bor smras pa dang / dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / de ltar gyur pa de'i phyir dge slong gi dge 'dun rnams bsdus so/ /de bzhin gshegs pas don gyi dbang rnam gnyis gzigs pas dge slong gi dge 'dun sdud de/ nga'i nyan thos rnams don kun shes par gyur pa dang / nga'i 'dul ba la bslab pa'i gnas shin tu bca' bar bya'o/ /bcom ldan 'das ni mkhyen bzhin du dri zhing don dang ldan par dri/ don dang ldan par dgongs nas tshe dang ldan pa bzang sbyin khyod kyis de lta bu mi rigs par byas pa bden nam zhes rmad pa dang / btsun pa mad do zhes gsol to/ /bcom ldan 'das kyis smad de dge slong gi bya ba ma yin/ mthun pa ma yin/ rung ba ma yin/ tshul ma yin rab tu byung bas bya ba ma yin no/ /khyod kyis sbrul ma rungs pa'i khar pho mtshan btsug pa ni bla'i/ bud med du gyur pa la ni ma yin no zhes rnam grangs du ma'i sgo nas smad do/ /de lta bas na dge slong rnams legs pa bcu gzigs nas nyan thos rnams la 'dul ba la bslab pa'i gnas bca' bar bya'o/ /de 'di lta ste dge 'dun yang dag par bslab pa dang / dge 'dun dge ba dang / dge 'dun bde ba la reg par gnas par bya ba dang / gnod mi bkur ba'i gang zag rnams la nan tur cher bya ba dang / ngo tsha shes pa'i gang zag rnams bde ba la reg par gnas par bya ba dang / mngon par ma dad pa rnams mngon par dad par bya ba dang / mngon par dad pa rnams phyir zhing 'phel bar bya ba dang / tshe 'di'i zag pa rnams bsdam par bya ba dang / tshe phyi ma'i zag pa rnams yang dag par gzhom par bya ba dang / nga'i tshangs par spyad pa yun ring du gnas par 'gyur ba ste/ ci tsam du lha dang mi dang skye bo mang po la rgya cher rab tu bshad de/ yang dge slong gang zhes bya ba la sogs pa rtsa ba'i tshig rnams smos so/ /yang dge slong gang zhes bya ba ni rnam pa lnga ste/ ming gi dge slong dang / khas 'che ba'i dge slong dang / slong ba'i dge slong dang / nyon mongs pa dang bral ba'i dge slong dang / gsol ba dang bzhi'i las kyis bsnyen par rdzogs pa'i dge slong ngo / /de la ming gi dge slong ni ming du btags pa'am dgar ba'i tshig gam/ tshig bla dgas sam/ brdar dge slong du ming btags pa'o/ /khas 'che ba'i dge slong ni dge slong ma yin yang nga dge slong ngo zhes khas 'che zhing kun gnas su gyur pa'o/ /slong ba'i dge slong ni 'phral la 'tsho ba tsam tshol zhing slong ba la bya'o/ /nyon mongs pa dang bral ba'i dge slong ni/ khams gsum nas nyon mongs pa spangs nas dgra bcom pa la bya'o/ /dge slong bzhi po ma gtogs par skabs 'dir ni gang gsol ba dang bzhi'i las kyis bsnyen par rdzogs pa ma 'khrugs pa skyon med pa de ni dge slong du dgongs te de'i phyir dge slong zhes gsungs so/ dge slong dang lhan cig ces bya ba ni chos mtshungs pa/ tshangs pa mtshungs par spyod pa'i grogs po rnams so/ /bslab pa mtshungs par gyur ces bya ba ni bsnyen par rdzogs nas lo brgya lon pa'i dge slong gis kyang bslab pa 'di la bslab la/ deng bsnyen par rdzogs pas kyang bslab pa 'di la bslab pa'o/ /de ltar na so sor thar pa'i mdo 'chad pa mtshungs pa de ni bslab pa mtshungs par gyur pa zhes bya'o/ /bslab pa ma phul zhes bya ba ji tsam gyis bslab pa ma phul ba yin zhe na/ dge slong khros pa'i zil gyis non pa'am/ smyos pa dang / sems 'khrugs pa dang / nad kyis gzir ba'am/ dben pa la mi dben par 'du shes pas sam/ mi dben pa la dben par 'du shes sam/ 'phags pa la mtha' khob kyi skad dam/ ca co'i nang du 'am gtong ba'i sems kyang med la/ dge slong don du gnyer la/ khyim gyi gnas don du mi gnyer la/ rang bzhin du gnas shing brda phrad pa'i mi la ma byas na bslab pa phul ba ma yin no/ /dge slong gis pha rol smyon pa dang / sems 'khrugs pa'am/ nad kyis gzir ba'am/ lkugs pa dang / 'on pa dang / mtha' khob pa'i skad mi shes pa dang / gnyid log pa dang / snyoms par zhugs pa dang / mi ma yin pa'am/ lha dang / sprul pa dang / byol song dang / sangs rgyas kyi gzugs la bslab pa phul na bslab pa phul ba ma yin no/ /bslab pa 'phul bas gang la phul na phul ba zhes bya zhe na/ dge slong mi dga' zhing dge sbyong don du mi gnyer ram/ the tshom za zhing smod na dge slong gi drung du song nas/ tshe dang ldan pa dgongs shig / bdag ming 'di zhes bgyi ba bslab pa 'bul lo zhe 'am/ dkon mchog gsum 'bul lo zhe 'am/ sde snod gsum 'bul lo zhe 'am/ slob dpon dang mkhan po 'bul lo zhes brda phrad pa'i mi la smras na/ bslab pa phul ba zhes bya'o/ /yang na bdag khyim pa 'am/ dge tshul lam/ za ma dang / ma ning dang / dge slong ma sun phyung ba 'am/ pha bsad pa'am/ ma bsad pa'am/ dgra bcom pa bsad pa'am/ dge 'dun gyi dbyen byas pa dang / de bzhin gshegs pa la ngan sems kyis khrag phyung ba dang / mu stegs can dang / rkun gnas dang / tha dad du gnas pa dang / mi gnas pa dang / mthar na chos mtshungs par spyod pa khyod dang 'grogs mi dgos so zhes smras nas bslab pa phul ba zhes bya'o/ /de la nyams par byas zhes bya ba ni dge slong dge sbyong don du mi gnyer zhing the tshom za nas dge slong gi drung du song nas/ tshe dang ldan pa mkhyen par mdzod cig dang / tshangs par spyad pa ni shin tu dka'o/ /rab tu dben pa dang / gcig pur gnas pa dang / bas mtha' na gnas pa ni shin tu dka' ste sdug bsngal ba'o/ /bdag ni pha ma dang phu nu bo dang sngon gyi slob dpon dran no/ /bdag gis gnyen bshes la gtod cig ces mi dga' zhing chags pa'i tshig gis gzhan la go bar byed na/ bslab pa nyams par bya ba zhes bya'o/ /de yang mtha' bzhir sbyar te nyams par byas pa la bslab pa ma phul ba dang / bslab pa phul la nyams par ma byas pa dang / bslab pa yang phul nyams par yang byas pa dang / bslab pa yang ma phul nyams par yang ma byas pa'o/ /de la nyams par byas la bslab pa ma phul ba ni pha dran na ma dran no zhes gzhan la mi dga' ba'i rtags sna tshogs smra la/ bslab pa 'bul lo zhes mi smra'o/ /de la bslab pa phul la nyams par ma byas pa ni bslab pa 'bul lo zhes brda phrad pa'i mdun du go bar pha ma ma dran no zhes nyams par gyur pa'i tshig mi smra ba'o/ /de la bslab pa yang phul nyams par yang byas pa ni gong ma gnyis ka dang ldan pa'o/ /bslab pa yang ma phul nyams par yang ma byas pa ni gong du smos pa rnams ma gtogs pa'o/ /mi tshangs par spyad pa zhes bya ba ni tshangs pa ni mya ngan las 'das pa ste/ de dang mi mthun zhing bsod nams ma yin pa'i chos skyes pa dang / bud med dang gnyis 'khrig pa ni mi tshangs par spyod pa'o/ /chos zhes bya ba ni rang gi mtshan nyid 'dzin pas chos ma yin pa 'di chos kyi sgrar gsungs so/ /byas zhes bya ba ni spyod pa'o/ /tha na bya ba ni spra mo dang / gzhan yang 'di dang 'dra ba dag go/ /de zhes bya ba ni nye bar bstan pa dang / yang dag par bstan pa'i tshig bla dgas so/ /dge slong zhes bya ba ni gsol ba dang zhu ba'i las kyis bsnyen par rdzogs shing bya ba grub pa gang dge slong gi dngos po yod pa la bya'o/ /phas pham pa zhes bya ba ni ltung ba tha ma 'di lta ste/ tha shal mi bca' ba'i nges pa can mi mtshungs pa ste/ gang la de lta bu'i ltung ba byung ste/ de byung ma thag tu dge slong ma yin shAkya'i sras ma yin te/ dge slong gi dngos po dang bral ba 'khyams pa bshig pa/ ltung ba phas pham pa ste/ slar dge slong du bslang du mi rung ba'o/ /'di ltar dper na shing ta la'i mgo bcad na sngon por mi 'gyur mi skye/ 'phel zhing rgyas par mi 'gyur ba de bzhin du dge slong yang 'di lta bu'i gnas kyi ltung ba byung na/ de byung ma thag tu dge slong ma yin/ shAkya'i sras ma yin/ dge sbyong du bslang du mi rung ste/ de bas na phas pham pa zhes gsungs so/ /gnas par mi bya'o/ /zhes bya ba ni de dang dge slong dag gso sbyong ngam/ tshul nas 'byung ba'am/ gsol ba'am/ gsol ba dang gnyis sam/ gsol ba dang bzhi'i las la mi gnas pa ste/ gang zag bcu gnyis kyi las bsko ba la yang mi chud pa'o/ /des na gnas par mi bya'o zhes gsungs so/ /gzhan yang mi tshangs par spyod pa'i sgo nas phas pham par 'gyur ba'i rnam grangs la/ gleng gzhi ni/ bcom ldan 'das mnyan du yod pa na bzhugs so/ /de'i tshe khyim bdag cig gi bu rgyab rab tu mnyen pa ni byi la'i rgyab 'dra ba zhig btsas te/ de yang dkon mchog gsum la mngon par dad pa nas legs par gsungs pa'i chos 'dul ba la rab tu byung ngo / /ming yang rgyab mnyen du btags so/ /dge slong rgyab mnyen de snga dro'i dus kyi tshe bsod snyoms blangs nas zas zos te/ gnas khang du 'ongs nas nang du yang dag 'jog pa'i phyir 'dug go/ /de'i tshe dbang po ma bsdams pas 'dod pa'i 'dod chags kyis kun nas dkris pas rang gi pho mtshan las su rung bar gyur te/ rang gi sgo dang por spyad pa'i tshe dge slong gnas nyung ba dag gis mthong nas de dag gi yid ma mgu nas ri mo med par byas te/ tshe dang ldan pa de lta bu byed du dbang ngam zhes byas pa dang des smras pa/ bcom ldan 'das kyis bcas pa ni pha rol la byed du ma gnang gi bdag nyid la ni ma yin no zhe na/ de dag gis de la gyod btab pa'am/ bsngags pa yang med de/ de dag gis bcom ldan 'das la gsol ba dang / bcom ldan 'das kyis bka' stsal pa ni gzhan gyi la'ang spangs na rang gi la lta ci smos/ skyes bu gti mug can 'di ni phas pham par gyur to zhes 'dul ba la bslab pa'i gnas bcas so/ /gleng gzhi ni mnyan du yod pa na ste/ khyim bdag cig gi bu pho pho mtshan tshad las 'das pa zhig btsas te/ de'i ming yang mtshan rings su btags te/ de'ang legs par gsungs pa'i chos 'dul ba la rab tu byung nas dge slong gi dngos por gyur te/ des snga dro'i tshe bsod snyoms blangs nas zas zos zin gyi 'og tu nang du yang dag 'jog pa la zhugs pa dang / 'dod pa'i 'dod chags kyis kun tu dkris te/ rang gi pho mtshan las su rung bas sgo tha mar spyad pa dang / dge slong gzhan zhig gis mthong nas snyan du bdas te/ de lta bu yang phas pham par 'gyur ro zhes 'dul ba la bslab pa'i gnas bcas so/ /gleng gzhi mnyan du yod pa na ste/ mchog tu rgyal ba zhes bya ba'i grong khyer na/ ded dpon dga' bo'i bu de shin tu byad bzang zhing mdzes pa zhig 'dug pa yul gzhan zhig tu tshong la 'gro bar chas te/ yang dang yang du dus kyi pha la gsol nas phas kyang yul de na tshong pa/ 'gro ba lnga brgya la yang bu'i grogs gyis shig ces gtad bu la yang gtams te/ 'di ltar tshong pa yul gzhan du 'gro ba la bar chad gsum ste/ rgyan po dang / stu gla dang / chang rin no zhes bsgo nas/ de dag yul gcig nas gcig tu rgyu zhing mnyan du yod par phyin to/ /de nas stu 'tshong ma bzang mo zhes bya ba shin tu bzang po zhig 'dug pa des mthong nas bsams pa/ de'i nor thams cad ma thob na/ nga'i ming bzang mo zhes mi bya mod snyam nas/ bran mo zhig de'i gan du mngags nas tshong pa de dag dang phrad pa'i bar du ste/ tshong pa de'i nor zad zad du mos brid nas tshong grogs kun kyang slar dong nas/ nor med pa dang mos ma 'dod de/ mdzes dga' 'khyams shing 'gro ba dge slong cig dang phrad nas thar par zhugs te/ zhag gnyis gsum du shin tu bslabs nas/ dge slong de na re ri dwags kyis ri dwags mi sos kyi mnyan du yod pa ni bdag gi yul dang 'dras/ phar slong zhing sos shig ces bsgos te btang ngo / /stu 'tshong ma des kyang phyin nas bsams pa/ bdag gis skyes bu de lta bu blta na bzang ba ni phyin chad nyal mi myong ste/ mtshar gcig bya snyam nas bran mo la yang phyin chad byar byos shig ces bsgo nas mdzes dga' de yang yul rgyus la mi mkhas pas slar yang khyim de'i sgor phyin pa dang bran mos rje mo la smras pa/ rab tu byung ste 'dir phyin to zhes bya ba nas rab tu byung yang blas nang du bos zhes bya ste/ des brang brdungs nas rked nas 'khyud de dus nas bdag gis nongs kyis bdag la da yongs su spyod cig tshur byon zhes byas pa dang / mdzes dgas smras pa/ khyod kyis nor dang grogs su yang phral na ci/ nga tshul khrims dad yang bral lam zhes smras pa dang / stu 'tshong mas smras pa/ 'phags pa phyi rol du bdar cing nang du blugs sam/ nang du smyugs la phyir pho na ni tshul khrims ngan par mi 'gyur ro zhes bya ba dang / des bsams pa dang mo de skad zer ba las ni/ dge slong gnas brtan dag kyang 'di ltar bya gor ma chag snyam ste phyi rol tu bdar te nang du blugs nas/ phyis bcom ldan 'das kyis rnam par grol ba'i chos mang po bshad pa'i tshe mdzes dga' shin tu rod nyams pa sman pas brtags na yang sems mi bde bar snang ste/ dge slong dag gis smras na/ khas blangs pa'i bar du bcom ldan 'das la dge slong rnams kyis gsol pa/ skyes bu gti mug pa nyes pa de ltar byas pa yang phas pham par 'gyur ro zhes 'dul ba la bslab pa'i gnas bcas so/ /dge slong gis bud med la gnas gsum du mi tshangs par spyad na phas pham par 'gyur ro/ /bud med la ji lta ba bzhin du ma ning dang / mtshan gnyis pa dang skyes pa la yang mtshams las 'das na phas pham par 'gyur ro/ /bud med la mi tshangs par spyod pa'i sems bskyed na bsdam par bya ba'i nyes byas so/ /gom pa gcig nas gcig tu bor te ma reg gi bar du ni bshags par bya ba'i nyes byas so/ /reg pa'i tshe ni sbom po'o/ /mi tshangs par spyad de yan lag bdun dang ldan na phas pham par 'gyur ro/ /gcig dang mi ldan na sbom por 'gyur ro/ /dge slong gis sngags dang sman gyis bdag dang bud med gnyis ka'ang rung gcig kyang rung / byol song gi skye gnas su bsgyur te mi tshangs par spyad na phas pham par 'gyur ro/ /bud med phyed du bshags pa la/ sgo gsum du spyad na sbom por 'gyur ro/ /bud med rked pa phyed bcad pa la sgo gsum du spyod na pham par 'gyur ro/ /mgo bcad pa la sgo gnyis su spyad na pham par 'gyur ro/ /mi ma yin pa'i bud med la yang phas pham par 'gyur ro/ /sgo gsum du ma reg par spyad pa dang blta ba ste spyad pa ni sbom por 'gyur ro/ /gzhan la gzhan byed du bcug pa ni gong ma bzhin no/ /yul med par bdag gcig por gnas pa la mthar 'gyur ba ni mtshan rings dang rgyab mnyen lta bu'o/ /phying bu'am gro ba sdug pos dkris pa'ang / lam ma nyams pa'am/ lam ma nyams pa la lam du 'du shes pa'am/ bsnyen par rdzogs te bshams te bsnyen par ma rdzogs pa na spyad pa la sogs pa thams cad kyang nyes pa sbom por 'gyur ro/ /dar dang ras dang be+e'u ras srab mos g.yogs te spyad pa ni mthar 'gyur ro/ /bsnyen par ma rdzogs par dge slong ma dang / dge tshul ma dang / dge sbyong phas mi tshangs par spyad na thams cad kyang nyes byas su 'gyur ro/ /dge slong la phas pham par gyur bzhin du bslab pa byin pa dang / dge slong ma yang phas pham par 'gyur ro/ /yan lag bdun dang ldan na phas pham par 'gyur ro/ /bdun gang zhe na/ bslab pa mnos pa dang / bslab pa ma phul ba dang / lam gsum ma nyams pa dang / yan lag skyes mtshams las 'das pa dang / dga' bar tshor ba dang / gnong bkur ba'i sems med pa dang / sems tha mal pa'o/ /bslab pa ma mnos pa ni dge 'dun dang / slob dpon las tshul khrims ma thob pa'o/ /bslab pa ma phul ba ni rang bzhin du gnas pa'i mi brda phrad pa la ma phul ba'o/ /lam gsum ma nyams pa ni pha rol tshu rol gyi mu gnyis nas ma nyams pa'am yang na rma ma zhigs pa'am/ ma rul pa'am/ srin bus ma zos pa'o/ yan lag skyes 'jug pa ni gnas gsum gyi mtshams las 'das pa'o/ /dga' bar tshor ba ni nyams su blang ste/ myong ba yod pa'o/ /gnong mi bkur ba ni kha cig mi tshangs par spyod kyang gnong mi bkur zhing bshags shing mthol ba chen po na bslab pa byin zhing dge sbyong du rung ste/ dper na dge slong nan te ka la bslab pa sbyin zhing dge slong thams cad kyi mi 'jug /dge slong thams cad kyi ni gang du gzhag ste snga dro la mi tshangs par spyad nas 'jigs shing ngo tsha ba chen pos bshags shing 'gyod pas na bslab pa sbyin pa zhe'o/ /kha cig na re phas pham pa'i sbom po'o zhes zer mod kyi phas pham pa'i mtshan ma yod pas na sbom por mi rung ste/ bslab pa sbyin pa nyid du rigs so/ / las dang po pa dang / sems 'khrugs pa dang / nad kyis gzir ba dang / smyon pa la ltung ba med do/ /las dang po la ji lta bu zhe na/ tshe dang ldan pa bzang sbyin gyis bslab pa'i gnas ma bcas pa na bdag gis mi tshangs par spyod pa'i chos mang zhig byas na las dang po pa gang yin snyam the tshom du gyur pa dang / bka' stsal pa bslab pa ma bcas pa na bzang sbyin gyis spyad pa thams cad kyang las dang po pa yin te/ las dang po pa yin pas nyes pa med do/ /smyon pa zhes bya ba ni rnam pa lngas smyos par 'gyur te/ gnyen bshes zad pa dang / longs spyod dang nor zad pa dang / khams mi mnyam pa dang / mi ma yin pas brlams pa dang / sngon gyi las kyi rnam par smin pa ste rnam pa 'di lngas smyo bar 'gyur ro/ /dge slong gi 'du shes yod na nyes par 'gyur ro/ /'du shes med na nyes pa med do/ /sems 'khrugs pa ni rnam pa lnga ste/ mi ma yin pas bdag gi sems dkrug pa dang / mi ma yin pas de la brlams pa dang / mi ma yin pas bdag gi mdangs 'phrog pa dang / khams mi mnyam pa dang / sngon gyi las kyi rnam par smin pa ste/ rnam pa de lngas na sems 'khrugs pa zhes bya ba ste nyes pa med do/ /nad kyis gzir ba ni rnam pa lngas nad kyis gzir ba ste/ de la rlung gis bskyod pa dang / mkhris pa dang bad kan dang 'dus pa dang / dus gyur pa rnams te/ rnam pa de lngas na nad kyis gzir ba ste/ nyes pa med do/ /mi tshangs par spyod pa'i gleng gzhi ni yul 'bri pa'i zi na'o/ /gang zag ni tshe dang ldan pa bzang sbyin no/ /nyes pa ni lus kyis so/ /nyon mongs pa ni 'dod chags so/ /mtshan ma ni phas pham pa ste/ de ltar na phas pham pa dang po legs pa bcu smos pa dang / bslab pa phul ba'i bye brag dang / dge slong zhes bya ba'i ming gi rnam grangs dang / mkhyen bzhin du 'dri ba dang / gleng gzhi dang / gang zag dang / las dang po pa la nyes pa med pa rnams bslab tshig dang po la 'dir smos pas 'og ma gzhan rnams la gang rigs su de bzhin du sbyar ro/ /phas pham pa dang po'i mi brjed pa'i tshig go// //ma byin par len pa'i gleng gzhi ni sangs rgyas bcom ldan 'das rgyal po'i khab 'od ma'i tshal bya ka lan da ka gnas pa na bzhugs so/ /de'i tshe sngon rdza mkhan dge slong nor can zhes bya ba rgyal po'i khab kyi dgon po'i ri la gnas spyil por byas te 'dug go/ /dge slong nor can snga dro'i dus kyi tshe rgyal po'i khab tu bsod snyoms len du song ba'i 'og tu rgyal po'i khab kyi mi ba lang rdzing dang / lug rdzi dang shing thun la sogs pas dge slong nor can gyi spyil po dral bshig ste rtswa shing kun khyer bar mthong ngo / /de nas nor can gyis rtswa shing bsdus nas slar spyil po byas nas lan gnyis lan gsum du bshig cing khyer ba'i lan grangs mang nas nor can gyis bsams pa kye ma'o mi bzod do/ /kye ma'o sdug bsngal lo/ /de ltar spyil po bshig cing khyer mod kyi/ bdag gi pha'i bzo'i gnas dang / las kyi gnas la bdag mkhas kyis ci nas sra ba kun sa las gnas shig bya'o snyam nas/ sa srog chags med pa las 'jim pa byas te khang bu brtsigs nas skams pa dang so btang ste/ shin tu kha dog dmar ba 'tsher ba gcig byas nas bdag gis shin tu legs pa'i khang bu grub ste/ nga 'di khab sro'o snyam nas dge slong dag la khang bu gtams te/ ljongs rgyu zhing song ba'i phyi na bcom ldan 'das dge slong mang po'i 'khor dang bcas te gnas nyul zhing gshegs pa dang / bcom ldan 'das kyis dge slong nor can gyi khang pa tshos shing kha dog shin tu dmar ba gzigs pa dang / bka' stsal pa/ de lta bu su'i khang pa yin/ dge slong nor can gyi lags so zhes gsol pa dang / bka' stsal pa/ dge slong dag khang bu 'di lta bu byed du mi gnang gi grol cig chom cig / de'i phyir mu stegs can rnams kyang 'di ltar dge sbyong gau ta ma 'dug bzhin du nyan thos kha cig la zab pa'i gnas kyi chos 'byung ngo zhes 'cha'o/ /de nas de dag bshig ste slar gshegs pa dang de'i 'og tu nor can yang slar 'ongs te/ nye 'khor gyi mi rnams la khang pa gar song zhes smras pa dang / bcom ldan 'das 'khor dang bcas pas bcom mo zhes smras pa dang / nor can na re de ltar chos kyi bdag po bde bar gshegs pas bcom na legs so zhes smras nas/ de'i 'og tu nor can gyis bsams pa rgyal po'i khab kyi grong khyer na shing srung gi blon po snga nas bdag dang mdza' bas na/ /bdag gi gnas khang thams cad shing las bya'o snyam nas shing srung gi blon po'i gan du song nas kye skyes bu mkhyen par mdzod cig /lus 'phags mo'i bu yul mnyam ka'i rgyal po ma skyes dgras nga la shing byin pa de 'dod kyi byin cig ces byas pa dang / 'phags pa lhas gnang ba yin na ni ci bder snoms shig ces byas pa dang dge slong nor can gyis/ rgyal po'i khab kyi zhig ral gso bar dgos pa'i shing bzhag pa sbas pa gcig bsdams te phyung nas khyer ba mthong ngo / /de nas grong srung gi sna bos shing de lta bu gces pa sus khyer zhes smras pa dang / de na re dge slong nor can gyis khyer ro zhes byas pa dang / de nas grong srung gi sna bos de ltar gyur pa rgyal po la gsol to/ /de nas rgyal pos dge slong nor can dang / shing srung gi sna bo 'gugs par btang ste/ gnyis rgyal po'i spyan sngar lhags so/ /rgyal pos nor can la 'phags pa shing ma byin par len du dbang ngam zhes smras pa dang / gsol pa/ mi dbang ngo / /'o na ci'i phyir shing khyer/ lhas stsal ba lags so/ /'phags pa mi dran no/ /lha bdag gis dgongs par bgyi'o/ /lha 'di ltar yab kyis r gyal srid spyi bo nas dbang bskur nas ring por ma lon pa lhas nga'i yul dge bar grags pas dge slong dang bram ze dag kyang rung rtswa dang shing dang chu rnams deng phan chad ci bder spyod du gnang ngo zhes 'khor mang po'i mdun du bstan du rung ba'i khyu mchog gi sgra bsgrags pa mi dgongs sam 'phags pa de ni gzung ba med pa la bya'i/ gzung ba dang bcas pa la ni ma yin no/ /gzung ba ma mchis pa la lhas mnga' bgyir ci mchis zhes smras pa dang / rgyal po ma skyes dgra'ang khros 'khrugs/ rngam ste dpral ba la khro gnyer gsum byung bzhin bsgyur mig bgrad lag pa mnyes nas 'di skad smras so/ /gsad pa'i rigs pa'i dge sbyong khyod song la phyin chad de ltar ma byed cig ces bsgo'o/ /de nas dge slong nor can rang gi gnas su song ste dge slong grogs po rnams la rgyal po ma skyes dgras had por de bsad de btang ngo zhes smras pa dang / ci nyes zhes byas pa dang ji ltar gyur pa zhib tu smras so/ /de ltar gyur pa dge slong rnams kyis bcom ldan 'das la gsol to/ /de nas bcom ldan 'das kyis tshe dang ldan pa kun dga' bo la khyod dge slong zla zhig khrid la rgyal po'i khab kyi grong gi mngon sum mam/ lam gyi bzhi mdor sgras go bar 'gyur ba'i gnas su 'dug la/ rgyal po ma skyes dgra'i bka' khrims las ci tsam zhig ma byin par blangs na chad pas bcad cing srog dang dbral ba dris shig /btsun pa de bzhin no zhes gsol nas/ kun dga' bos rgyal po'i mi dad pa dang / ma dad pa la ci tsam gyis na srog dang dbral zhes smras pa dang / ma sha ka lnga'am lnga las lhag pas so zhes mchi ba bcom ldan 'das la gsol to/ /de nas bcom ldan 'das byung ba de dang / gleng gzhi dang de ltar gyur pa'i phyir dge slong gi dge 'dun rnams bsdus so/ /sangs rgyas bcom ldan 'das ni mkhyen bzhin du dris pas/ dge slong nor can la khyod kyis 'di lta bu mi rigs pa chos 'di 'dra ba byas pa bden nam zhes smras pa dang / btsun pa mad do zhes gsol to/ /bcom ldan 'das kyis dge sbyong gi bya ba ma yin/ rung ba ma yin/ rigs pa ma yin mthun pa ma yin zhes rnam grangs du ma'i sgo nas smad nas 'di ltar nga'i nyan thos rnams 'dul ba la bslab pa'i gnas bca'o zhes rtsa ba'i tshig yang dge slong gang zhes bya ba la sogs pa smos so/ /yang dge slong gang zhes bya ba ni dge slong bzhi po sngar gong du bkag zin pas na/ skabs 'dir gsol ba dang bzhi'i las kyis bsnyen par rdzogs par ma 'khrugs pa shol bar mi 'os pa de ni dge slong du dgongs so/ /gzhan gyis zhes bya ba ni bud med dang / skyes pa dang / ma ning dang mi rnams kyi'o/ /grong na yod ces bya ba ni ra ba'i nang na mi'i yo byad yod pa'o/ /dgon pa na yod ces bya ba ni ra ba'i phyi rol na nor yod pa'o/ /ma byin zhes bya ba ni skyes pa dang bud med dang / ma ning dang / mi rnams sus kyang de la ma byin pa'o/ /rku ba'i grangs su gtogs zhes bya ba ni gang ma byin pa de rku ba'i grangs su gtogs pa'o/ / blangs zhes bya ba ni len pa'o/ /ji tsam ma byin par blangs pa zhes bya ba ni yul dang dus kyi ma sha ka lnga'am/ lnga las lhag pas so/ /de la rgyal po'i zhes bya ba ni rgyal po nyid dam/ bud med las rgyal thabs kyi dbang bskur ba'am rgyal po rgyal rigs rgyal thabs spyi bo nas dbang bskur ba'am/ yang na rgyal rigs sam/ bram ze'am/ rje'u'i rigs sam/ dmangs rigs kyang rung rgyal thabs spyi bo nas dbang bskur ba la bya'o/ /blon po zhes bya ba ni rgyal po la glo ba nye zhing bka' gros kyis 'tsho ba dang / dbang po chen po chab srid 'dzin pa dang / gang de la gnas shing 'tsho bar sems pa'o/ /bzung nas zhes bya ba ni rgyal po dad pa dang ma dad pa ste/ rgyal po ma dad pas ni bcing ba dang / spyug pa dang / srog dang dbral ba'i chad pas gcod pa'o/ /dad pas ni kye mi khyod rkun ma'o zhes tshig gis spyo ba'o/ /de la gsod ces bya ba ni srog dang 'bral ba'o/ /'ching zhes bya ba ni bcings pa rnam pa gsum ste/ lcags sgrog dang / shing sgrog dang / gres thag gis bcing ba'o/ /spyug ces bya ba ni yul sa dang 'brel pa'o/ /kye mi khyod ni rkun ma'o zhes bya ba ni rku bas na gleng gzhi dang bcas te rkun ma'o zhes spyo ba'o/ /byis pa zhes bya ba ni nyes pa'i las byed cing tshe 'di la nyes pa ma mthong bas na byis pa'o/ /blun po zhes bya ba ni tshe phyi ma'i nyes pa ma mnyes pa na blun pa'o/ /rku ba zhes bya ba ni gshe ba dang bcas pa'i tshig go/ /'di skad ces kyang zer ro zhes bya ba ni smra ba'o/ /de yang zhes bya ba ni nye bar bstan pa'o/ /dge slong zhes bya ba ni gang la dge slong gi dngos po yod pa'o/ /dge slong gi dngos po gang zhe na/ gang bsnyen par rdzogs pa'o/ /bsnyen par rdzogs pa gang zhe na/ gang gsol ba dang bzhi'i las kyis bya ba byas pa yang dag par rdzogs pa ste/ gang zag des kyang khas blangs shing mi smod mi spong ba'o/ /phas pham pa zhes bya ba ni ltung ba'i tha ma tha shal ngan pa mi bca' ba'i nyes pa can gang dang yang mi mtshungs te/ ltung ba de byung ma thag tu de dge slong ma yin/ dge sbyong ma yin/ shAkya'i sras ma yin te/ dge slong gi dngos po dang bral ba 'khyams pa bshig pa/ phas pham pa ste dge sbyong du bslang du mi rung ba'o/ /dper na shing ta la mgo bcad na sngon por mi 'gyur mi skye mi 'phel rgyas par mi rung ba bzhin du dge slong ltung ba de byung na dge sbyong du bslad du mi rung ste/ phas pham par 'gyur ro zhes bshad do/ /gnas par mi bya zhes bya ba ni gso sbyong bya ba'am/ tshul nas 'byung ba'am/ gsol ba dang gnyis sam/ gsol ba dang bzhi'i las la mi gnas pa ste gang zag bcu gnyis kyi las bsko ba yang mi chud pa'o/ /des na gnas par mi bya'o zhes gsungs pas so/ /gzhan yang ma byin par len pa'i sgo nas bslab pa'i gnas bcas pa'i gleng gzhi ni sangs rgyas bcom ldan 'das mnyan du yod pa na bzhugs so/ /de'i tshe dge slong gdol ba dang / char ldan zhes bya ba shin tu mdza' ba gnyis shig lhan cig 'khod de/ gdol ba ni bsod nams che bas chos gos dang yo byad rnams su yang ldan no/ /char ldan ni chos gos la sogs pa yang med do/ /sbyar ma zhigs pa zhig gyon nas dge slong dag gis khyod 'dod pa chung ngu zin gyis kyang rang gi lus sgren mor ston pa mi rigs kyi gos gyon cig ces bsgo ba dang / de na re chos gos ma rnyed do/ /'o na khyod kyi mdza' bo gdol ba la chos gos lhag pa dag yod na ci nyes des mi ster ba snyam na ster gyi slongs shig /ces bsgo ba dang de yang gdol ba'i gnas khang du song ste chos gos ran ma ni blang ngo snyam nas chos gos sad cing 'dug pa dang gdol bas mthong ngo / /khyod kyis ni chos gos rku sems kyis blangs pa na phas pham par 'gyur ro zhes smras pa dang / de yang the tshom skyes nas des bcom ldan 'das la gsol to/ /bka' stsal pa/ sad par bsams pas ltung ba med de phyin chad dge slong gis yid gcugs pa ma yin pa la yid brtan pa ma skyed cig / bskyed na 'das pa dang bcas par 'gyur ro/ /mdza' bo rnam gsum la chung ngu na mdza' ba la chung ngu yid brtan par bya ste/ 'bring po dang cher mdza' ba la yang de bzhin no/ /gleng gzhi ni mnyan du yod pa na ste/ dge slong mi pham pa dang zla bas sbed ces bya ba shin tu mdza' ba gnyis shig 'khod de/ zla ba sbed ni chos gos dang / lhung bzed dang / yo byad rnams su yang ldan na/ mi pham pa ni chos gos dag dang mi ldan te/ sbyar ma dag kyang ngan nas dge slong dag gis zla ba sbed pa la dge slong slongs shig ces bsgo nas/ mi pham gyis zla ba sbed la lhung bzed blangs pas ma ster to/ /'o na chos gos slong zhes byas pa dang / tshar tshar yang mi sbyin na chos gos lta ci smos so/ /mi pham gyis bsams pa chos gos shig rku'o snyam nas skabs tshol zhing 'dug pa dang / zla ba sbed kha dog bsgyur ba'i las byed pa'i tshe mi pham na re kha dog bsgyur ba'i grogs bya'o zhes smras pa dang / des ni shin tu rku bar bshams so snyam du tshor nas de'i nub mo mi pham pa nyal ba'i sngas nas chos gos blangs te bdag gi sngas su bcug ste nyal ba dang tho rangs mi pham gyis zla ba sbed kyi sngas nas chos gos brkus te bros pa dang / nam langs nas bltas pa na bdag gi chos gos yin par gyur nas phas pham pa'i ltung ba ma byung grang snyam du the tshom skyes nas snyan du gsol ba dang / bka' stsal pa rang gi yo byad rku sems kyis blangs na nyes pa sbom por 'gyur ro zhes bcas so/ /gleng gzhi ni mnyan du yod pa na ste/ yang de'i tshe dge slong ma lho phyogs nas 'ongs pa dang / shar phyogs nas 'ongs pa gnyis chos nyan du dong ba las lho phyogs ma'i chos gos lhung ba dang / shar phyogs mas shar phyogs kyi skad du/ a ba sad da zhes byas na/ mos ma shes nas/ chos gos bsdus te rang gi gnas khang du bzhag go/ /slad kyi dge slong ma rmed du 'ongs nas byin pa dang / khyod kyis brkus pas phas pham par 'gyur ro zhes byas pa dang / de yang the tshom skyes nas snyan du gsol ba dang / bka' stsal ba/ a ba sad da zhes bya bas nyes pa med de/ phyin chad yun ring du bzhag na 'das pa dang bcas par 'gyur ro/ /zhes bslab pa'i gnas bcas so/ /gleng gzhi ni mnyan du yod pa na ste/ de'i tshe tshe dang ldan pa maud gal gyi bus khyim bdag mgon med la khyod kyi bu rnams sangs rgyas kyi bka' bslab tu dze ta'i gtsug lag khang du khye shig / khyim bdag gi bu rnams kyang dze ta'i tshal du dong dong ba las/ ston zla tha chungs kyi g.yon can gyis byis pa rnams la lam du brkus so/ /maud gal gyi bus bsams pa byis pa rnams la ma bsams na byis pa yang pha ma dang bral bas sdug bsngal/ pha ma yang bu dang bral bas sdug bsngal/ ma dad pa rnams kyang skabs rnyed/ dad pa rnams kyang gzhan du gyur te phyin chad dze ta'i tshal du su yang 'ong bar mi 'gyur snyam nas rdzu 'phrul gyis rnga brdungs te phyogs bzhi nas bskor ba dang byis pa rnams skye'o/ /de ltar gyur pa drug sde rnams kyis maud gal gyi bu la ltung ba byung ste bskrad pa'i las bya'o zhes gaN+DI brdungs pa dang / snyan du bdas so/ /bka' stsal ba/ maud gal gyi bus bsams pa 'di lta bu byas pas nyes pa med do/ /gleng gzhi ni bcom ldan 'das rgyal po'i khab 'od ma'i tshal du bzhugs so/ /de'i tshe rgyal po gzugs can snying po bcom ldan 'das dang / dge slong gnas brtan dag gi zhabs la rtag tu phyag 'tshal du 'gro'o/ /bcom ldan 'das kyis rgyal po la chos bshad gzengs bstod rab tu dga' bar byas so/ /de nas rgyal po tshe dang ldan pa srung ba'i bu'i gan du song nas 'phags pa lag dar te khang pa rtsig pa ni 'o brgyal bdag gis g.yog lnga brgya gsol lo zhes smras pa dang / srung ba'i dbang po'i bus rgyal po chen po bsnyun mi mnga' bar gyur cig ces byas nas dge 'dun gyi don du blangs so/ /de nas dus gzhan zhig na ston zla tha chungs kyi g.yon can gyis dge slong gi bran rnams kyi khyim brkus so/ /tshe dang ldan pa srung ba'i bus rdzu 'phrul mngon par byas nas grong khyer kun lcags kyi ris bskor to/ /g.yon can dag gis bsams pa mthu bo che 'ga' zhig gis kyal ka byas yang dag snyam nas rdzas kun bor te bros so/ /drug sdes de byas pas ltung ba byung ngo zhes bskrad pa'i las byas pa dang / snyan du bdas te bka' stsal ba/ gal te bdag gis g.yog po rnams la ma bsams na g.yog po yang nor dang bral bas sdug bsngal che/ ma dad pa ni skabs rnyed dad pa ni gzhan du gyur/ gzhan gyis byin pa la ma bsrungs na phyin chad kyang shAkya'i sras dge sbyong rnams la su yang sbyin par bsams pa med pas na rdzu 'phrul mngon par bgyis mad do zhes gsol ba dang / de lta bur bsams pas nyes pa med do zhes bka' stsal to/ /nyes pa ji lta bu zhe na dge slong gis sho gam dang gru btsas ma byin par 'das na pham par 'gyur ro/ /dkon mchog gsum dang pha ma'i phyir yang chos bshad de ster na song shig /ma ster dang sho gam sbyin par bya'o/ /dge slong gis mi'i nor yo byad dam pa bdag gis rkus sam gzhan rkur bcug gam/ pho nya las rkur bcug kyang rung ste/ mi'i yo byad nor bu dang dpung rgyan dang / gdu bu dang se mo do dang / do shal dang / mu tig dang / gser dngul la sogs pa bzhag pa la brku bar sbyor zhing khri las langs te sham thabs bgos nas song na ma reg gi bar du na nyes byas so/ /reg na ni sbom por 'gyur ro/ /gnas nas sbags te rin thang tshang na phas pham par 'gyur ro/ /sngags sam sman gyis gzhan gyi yo byad blangs nas phas pham par 'gyur ro/ /bdag po med pa'i brku na nyes pa sbom por 'gyur ro/ /gru brku na ltar snang gi bar du ni nyes byas sbom por 'gyur ro/ /mi snang na ni phas pham par 'gyur ro/ /dngos po gsum ste/ zhing gi dngos po dang / khyim pa'i dngos po dang / tshong dus kyi dngos po ste/ de la rku bas sbyor na shags khar 'dor ba dang / mtha' ra bas bskor ba'o/ /de la shags khar 'dor ba ni yul dpon nam/ zhal ce gra'am/ rgyal po la shags su bgyi ste mi dbang ba la dge slong nam rgyal ba na phas pham par 'gyur ro/ /bskor ba ni zhing sna phrad pa 'am mtha' rib mas bskor ba'o/ /dge slong gis srog chags rkang gnyis dang / rkang bzhi dang / rkang mangs dang / rkang med brkus te rin thang tshang na phas pham par 'gyur ro/ /rkang bzhi ni rta la sogs pa phyugs rnams te/ nam khyu nas bkar te bdag gi dbang du gyur pa na phas pham par 'gyur ro/ /rkang gnyis ni mi dang bya ste/ mi brku ba ni rnam pa gsum ste/ dus mal dang / brda dang / mtshan ma'o/ /nam rnam pa gsum pos go ste bdag gi dbang du gyur pa na phas pham par 'gyur ro/ /dge slong gis rin thang med pa'i dngos po brkus na phas pham par 'gyur ro/ / rin thang che ches te thang med pa'o/ /rin thang chung ngu brkus pa dang bsnyen par rdzogs na brkus par bshams la/ ma rdzogs pa na brkus na nyes pa sbom por 'gyur ro/ /dge slong gis ma byin par blangs te mtshan gyur na phas pham par 'gyur ro/ /rku ba la rnam pa drug ste/ sgyus rku ba dang / mthus rku ba dang / bskyis pa las brnogs te rku ba dang / gtams pa las brnogs te rku ba dang / sgyong zhing rku ba dang / chos rku ba'o/ /rku ba drug po la chos rku ba ma gtogs par lhag ma rnams ni phas pham par 'gyur ro/ /nor gyi dngos po gcig la mi mang du rku na nyes pa sbom por 'gyur ro/ /'on te so sor dgos pa la re re yang ma sha ka lnga lnga'i thang du thob na phas pham par 'gyur ro/ /ma sha ka lngas pham par 'gyur ro zhes bya ba la ma sha ka gsum gyis kyang pham par 'gyur pa yod do/ /ma sha ka lnga brkus kyang pham par mi 'gyur ba yang yod de/ re re 'am gnyis gnyis sam gsum gsum du brkus kyi lngar ma tshang na'o/ /ji ltar 'dzam bu'i gling du ma sha ka lngas pham par 'gyur ba bzhin du/ nub kyi ba lang spyod dang / shar gyi lus 'phags su yang de bzhin no/ /byang gi sgra mi snyan du ma byin par len pa med do/ /de de rku bar sems bskyed na sbom por 'gyur ro/ /gzhan la byin pa'i phyir rku ba dang / mi ma yin pa'i nor brkus na nyes pa sbom por 'gyur ro/ /mchod rten gyi nye 'khor gyi rgyan srung ma med par brkus na nyes pa sbom por 'gyur ro/ /de bzhin gshegs pa'i ring bsrel dang glegs bam brkus te rin thang tshang na phas pham par 'gyur ro/ /phyogs bzhi'i dge 'dun gyi nor brkus pa dang / gang zag mang po rnams kyi nor brkus pa ni nyes pa sbom por 'gyur ro/ /de las so sor skal ba ma sha ka lnga byung ba brkus na phas pham par 'gyur ro/ /sngar bsngos pa las phyis brkus na phas pham par 'gyur ro/ /yo byad chen po brkus kyang phas pham par mi 'gyur ba yod do/ /gnas khang du bzhag pa'i sa gzhi dang ma bral bar brkus pa'o/ /rnyed pa mi dbang ba la dbang ngo zhes smras na shes bzhin du brdzun zer bas ltung bar 'gyur ro/ /rku sems yod na nyes pa sbom por 'gyur ro/ /dngos po grub na phas pham par 'gyur ro/ /nyes pa gzhan ni 'dul ba rnam par 'byed pa las byung ba bzhin du gar rigs su sbyar/ dge slong nor can gyis bsams pa las dang po pa la nyes pa med do zhes gsungs na/ bdag gis bslab pa ma bcas pa la/ shing mang po zhig ma byin par blangs na/ las dang po pa gang la bya the tshom skyes pa dang / bcom ldan 'das kyis bka' stsal ba/ dge slong dag bslab pa ma bcas pa na dge slong nor can gyis ma byin pa blangs pa thams cad kyang ma byin par blangs pa ma yin te/ las dang po pa la nyes pa med do/ /ma byin par len pa'i gleng gzhi ni rgyal po'i khab na'o/ /gang zag ni dge slong nor can no/ /dngos po ni ma byin par len pa'o/ /nyon mongs pa ni 'dod chags so/ /mtshan ma ni phas pham pa'o/ /yan lag ni rnam pa bdun te/ rku sems nye bar gnas pa dang / dngos po mi'i nor yin pa dang / mi'i nor yin par yang 'du shes pa dang / gnas nas gnas su 'phags pa dang / sbyor ba gcig pa dang / rang gi ma yin pa dang / rin thang tshang ba'o/ /phas pham par 'gyur ba gnyis pa mi brjed pa'i tshig go/ /mi gsod pa'i gleng gzhi ni sangs rgyas bcom ldan 'das yul bri dzi'i ljongs na/ chu bo dga' skyed can gyi 'gram na thang zhig gi nags stug po na bzhugs so/ / de'i tshe bcom ldan 'das kyis 'khor dge slong gi dge 'dun rnams la mi gtsang ba'i chos bshad de/ dge slong dag gis mi gtsang ba la bsgoms nan tan du bgyis pas na lus rnag can 'dis yid byung / ngo tsha/ sgyid lug ste rnam par smod nas/ rang gi lus la mtshon gyis kyang 'debs/ kha cig dug za zhing srin bus kyang 'geg / g.yang du yang mchong / gcig gis gcig la yang gsod pa'i steng du mu stegs can gyi dge sbyong ri dwags dbyug pa can dge sbyong ri dwags srung ba ga la ba der song nas/ kye bzhin bzangs dag tshur shog khyod kyis nga'i srog chod cig dang / chos gos dang lhung bzed kyang khyod kyir 'gyur ro zhes gzhan la yang srog gcod du 'chol bas na ri dwags dbyug pa can des kyang dge slong de bsad nas ral gri khrag can mchan du bcug nas chu bo dga' skyed can gyi 'gram du khyer te khrag tu 'khru zhing 'dug pa dang / de na bdud kyi ris kyi lha zhig nam mkha' las ri dwags dbyug pa can dge sbyong srung ba la 'di skad smras te/ legs so bzhin bzangs khyod kyis bsod nams mang du spel to/ /khyod kyis yon tan can gyi dge sbyong ma bsgral ba ni bsgral ma grol ba ni dgrol/ dbyugs ma phyung ba ni dbugs phyung / kun yongs su mya ngan las 'das pa'i steng du lhag par de dag gi lhung bzed dang chos gos kyang khyod kyir 'gyur ro zhes smras pa thos nas/ de yang phyis phyir sdig pa la blta bar 'gyur ba rab tu thob ste/ bdag gis bde mor bsod nams mang du bskyed do/ /mya ngan las ma 'das pa kun kyang mya ngan las 'das kyi steng du chos gos la sogs pa kun kyang bdag gi yin snyam nas yang ral gri mchan du bcug nas kun dga'i ra ba nas kun dga'i ra bar/ gtsug lag khang nas gtsug lag khang du khang phran nas khang phran du/ 'chags nas 'chag sar byung ste/ des dge slong phrad do cog la ma bsgral ba bsgral lo/ /yongs su mya ngan las ma 'das pa yongs su mya ngan las 'da'o zhes byas nas dge slong cig lus mi gtsang bas skyo ste bsgom zhing 'dug pa langs nas khang bu nas byung ste dge slong srung ba la bzhin bzangs bdag ma bsgral gyis sgrol/ ma khrol gyis khrol cig ces byas nas des srog gcod do/ /de bzhin du gnyis nas gsum nas drug cu'i bar du srog bcad do/ /de'i tshe bcom ldan 'das bco lnga'i gso sbyong gi tshe nyan thos kyi dge slong gi dge 'dun gyi mdun du gdan bting ba la bzhugs so/ /'khor dge slong rnams la glang po che'i lta ba'i tshul gyis gzigs na/ nyan thos kyi 'khor rnams sngon pas rab tu nyung ba dang 'grib cing bsrabs par gyur pa gzigs so/ /bka' stsal ba/ kun dga' bo rgyu gang rkyen gang gis dge slong nyung bar gyur/ btsun pa dus gcig na bcom ldan 'das kyis dge slong rnams la mi gtsang ba bshad de/ mi gtsang ba la bsgom pa nan tan bya zhing bsnyen na 'bras bu che zhing yon tan chen por 'gyur ro zhes bshad pas na/ dge slong rnams kyis mi gtsang ba la nan tan du byas pas lus rnag can 'di nyid kyis yid byung zhing sgyid lug nas dge slong dag rang gis rang la 'gums shing ri dwags dbyug pa can la gsod du bcol bas nyung bar gyur to zhes gsol ba dang / bka' stsal ba/ /kun dga' bo ci dge slong gis kyang dge slong gsod dam/ btsun pa 'gums so zhes gsol ba dang / de ltar na dge sbyong gi bya ba ma yin/ mthun pa ma yin tshul ma yin te/ de ni rab tu byung bas bya ba ma yin no zhes bcom ldan 'das kyis rnam grangs du ma'i sgo nas smad do/ / de bas na dge slong dag nyes pa de dang gling gzhi de dag de ltar gyur pa de'i phyir legs pa rnam pa bcu la gzigs nas/ 'dul ba la bslab pa'i gnas bcas te/ yang dge slong gang zhes bya ba la sogs pa rtsa ba'i tshig rnams so/ /yang dge slong zhes bya ba ni gang la dge slong gi dngos po yod pa ste/ gang gsol ba dang zhu ba'i las kyis bsnyen par rdzogs pa la bya'o/ /mi 'am zhes bya ba ni dbang po drug dang ldan pa ste/ mig dang / rna ba dang / sna dang / lce dang / lus dang / yid kyi dbang po ste dbang po drug dang ldan pa la mi zhes bya'o/ / mir chags zhes bya ba ni gang ma'i mngal du dbang po gsum thob par gyur pa ste/ lus kyi dbang po dang / yid kyi dbang po dang / tshor ba'i dbang po la bya'o/ /ched du bsams te zhes bya ba ni sems kyis dpyad cing brtags pa'o/ /lag dar zhes bya ba ni bdag rang gi lag gis bsnun cing brgyab pa'o/ /srog bcad ces bya ba ni de srog dang bral ba'o/ /mtshon 'byin tam zhes bya ba ni ral gri 'am chu gri 'am spu gri la bya ste/ sngon dge slong gnyis shig 'khod pa las dge slong gcig bdag rang 'chi'o snyam nas dge slong grogs po la gri brnyas te rang gi gnas khang du zhugs te sgo bcad nas gnas khang du skyil mo krung du tsog tsog por 'dug nas rang gi srol sgo gris bcad de gri thogs bzhin du dus las 'das so/ /de bas na mtshon ma byin cig pa'o/ /de la mtshon thogs pa gnyer tam zhes bya ba ni gang la gnyer zhe na/ skyes pa dang bud med dang ma ning rnams la'o/ /de la 'chir 'jug ces bya ba ni tshul khrims dang / tshul khrims ngan pa can dang / nad pa rnams la'o/ /ji ltar tshul khrims ngan pa can la zhe na/ dge slong gis tshul khrims ngan pa can gyi dge slong gi chos gos dang / lhung bzed dang yo byad rnams 'dod de tshul khrims ngan pa can ring du gnas na bdag gi yo byad rnams mi 'thob kyi 'di 'chir gzhug go snyam nas tshe dang ldan pa tshul khrims ngan pa can sdig pa'i chos can ji tsam du yun ring du gnas pa de tsam du lus ngag yid gsum gyi sgo nas bsod nams ma yin pa sdig pa mang du skyes pas sems can dmyal bar skye bar 'gyur ro/ /de bas na tshe dang ldan pa rang gis rang sod cig rang gis rang srog chod cig ces bsgo nas/ rang gis rang bsad na dge slong smra smra ba phas pham par 'gyur ro/ /rang gis ma bsad na nyes pa sbom por 'gyur ro/ /de ste slar 'gyod nas tshe dang ldan pa ngas gyi nar smras kyi/ rang gis rang ma bsad cig ces slar bsgo na/ dang po nyid kyis nyes pa sbom por 'gyur ro/ /ji ltar na tshul khrims dang ldan pa rnams zhe na tshul khrims dang ldan pa 'di ji srid du yun rin du 'tsho ba de srid du yo byad bdag la mi ster gyi de 'chir gzhug go snyam nas tshe dang ldan pa tshul khrims phun sum tshogs pa khyod yul na gnas lo legs pa dang 'dra ba la/ mtho ris ni ras lta bus chod/ thar pa ni yol ba lta bus chod de khyod lus dang bral na lha'i nang du skye bar 'gyur gyi rang gis rang la sod cig rang gis rang la srog chod cig ces bsgo nas rang gis rang bsad na dge slong smra smra ba phas pham par 'gyur ro/ /rang gis rang ma bsad na nyes pa sbom bor 'gyur ro/ /ji ltar na nad pa la zhe na/ dge slong gis nad pa'i chos gos dang yo byad 'dod pa'i phyir ji srid du nad pa ring du gnas pa de srid du bdag gis yo byad mi thob po snyam nas/ tshe dang ldan pa nad pa ji srid ring du gnas pa/ de srid du nad pa sdug bsngal bas gzir cing tshor ba myong bar 'gyur gyi/ rang gis rang srog chod cig ces smras pa las rang gis rang bsad na 'debs 'debs pa phas pham par 'gyur ro/ /rang gis rang ma bsad na nyes pa sbom por 'gyur ro/ /de ltar na 'chir 'jug pa zhes bya'o/ /'chi ba'i bsngags pa brjod ces bya ba ni/ 'chir 'dod pa'i mdun du 'chi ba'i yon tan dang bsngags pa brjod pa'o/ /mi khyod ces bya ba de ni 'bod pa'i tshig bla dgas so/ /sdig pa dang mi gtsang ba 'tsho ba ngan pas ji zhig bya kye mi khyod gson pa bas 'chi ba bla'o/ /'chir 'dod pa'i mdun du smad pa'i tshig go/ /skyed la 'di skad kyang zer zhes bya ba ni smra ba'o/ /sems kyis brtags zhes bya ba ni sems kyis mngon par 'dod pa'o/ /brtags zhes bya ba ni 'di shi na yo byad bdag gis thob par 'gyur ro snyam du sems kyis brtags pa'o/ /rnam grangs du mar 'chir gzhug ces bya ba ni rnam grangs mang po du ma'i sgo nas 'chir bstabs shing 'chi bar 'gyur ba'o/ /'chi ba'i bsngags pa brjod ces bya ba ni 'chi ba'i mdun du rnam grangs du mar 'chi ba'i bsngags pa brjod cing yang dang yang du snon cing mi zlogs par byed pa'i don to/ /de yang thabs des 'chi ba'i dus byas zhes bya ba ni thabs de nyid kyis yin gyi gzhan gyis ma yin no/ /de zhes bya ba ni yang dag par bstan pa'am nye bar bstan pa'i tshig go/ /dge slong zhes bya ba ni gang la dge slong gi dngos po yod pa'o/ /dngos po gang zhe na gsol ba dang bzhi'i las kyis bsnyen par rdzogs shing gang zag nyid kyis kyang mngon sum du khas blangs shing mi 'dor mi spong ba'o/ /phas pham pa zhes bya ba ni ltung ba tha shal ngan pa mi cha ba'i nyes pa can mi mtshungs pa ste gang la ltung ba byung na byung ma thag tu dge slong ma yin/ dge sbyong ma yin shAkya'i sras ma yin te/ dper na shing ta la'i mgo bcad na rgyas shing 'phel bar mi 'gyur ba de bzhin du dge slong la ltung ba de byung na/ dge slong ma yin/ phas pham par bshig pa ltung ba zhes gsungs so gnas par mi bya zhes bya ba ni dge slong dag gso sbyong bya ba'am tshul nas byung ba'am/ gsol pa'am gsol ba dang gnyis sam/ gsol ba dang bzhi'i las la mi gnas pa ste/ gang zag bcu gnyis kyi las la mi chud pas na gnas par mi bya'o zhes gsungs/ gzhan yang mi gsod pa'i sgo nas 'dul ba la gnas bcas pa'i rnam grangs la/ gleng gzhi ni bcom ldan 'das 'brog skyes kyi 'brog dgon pa na bzhugs so/ /de'i tshe dge slong bsod snyoms pa cig gis/ khyim bdag cig dad pa skyes nas/ khyim bdag des dge 'dun gyi phyir gtsug lag khang rtsig par khas blangs nas/ dge slong dag gtsug lag khang rtsig pa'i grogs byed de de'i tshe dge slong dag pha gu gcig nas gcig tu dor bas dge slong gcig pha gus klad du phog nas dus las 'das so/ /de ltar gyur pa snyan du bdas nas bka' stsal pa/ gcig nas gcig tu pha gu ma 'dor bar gcig nas gcig tu brgyud de byin cig ces 'dul ba la bslab pa'i gnas bcas so/ /gleng gzhi ni mnyan du yod pa na ste/ bcom ldan 'das kyis bka' stsal pa/ bsro khang dang me khang rtsigs shig ces bka' stsal nas/ /dge slong dag gdung phyam phan tshun bskyod cing bsgul ba las shing shor nas shing mkhan gyi klad du bsnun te dus las 'das so/ /de ltar gyur pa snyan du bdas nas/ dge slong khyim pa dang bsdebs shing shing gdeg par bya'i mi theg par bteg na 'das pa dang bcas par 'gyur ro zhes bslab pa la gnas bcas so/ gleng gzhi ni mnyan du yod pa na ste/ de'i tshe tshe dang ldan pa 'char bas/ khyim bdag gi bu mo gtum mo zhes bya ba zhig btul nas/ bslab pa'i gnas la bzhag go/ /gtum mos 'char ba la yo byad thams cad kyis bstab na len du ma btub nas yul gzhan du song ngo / /de nas dus gzhan zhig na gtum mo la bu khye'u zhig btsas so/ /de nas bsgo ba khye'u 'di chus khrus la gos dkar pos g.yogs te drang srong gi stan la zhog shig ces bsgo ba dang / des kyang stan gyi steng du bsnyal lo/ /de'i tshe 'char bas snga dro yang bsod snyoms blangs nas mo'i sgor 'ongs/ stan la ma brtags par 'dug pas/ gtum mos 'phags pa bu bu zhes smras bzhin na ma slebs nas 'char ba langs te bltas na bu dus las 'das so/ /de'i gnyen rnams dus pa dang / kye ma'o bcom ldan 'das kyis 'dus byas thams cad mi rtag ces gsungs pa re mad kyi/ bcom ldan 'das kyis gsungs pa dang mi 'gal bas nyes med do/ /de ltar gyur pa snyan du bdas nas bka' stsal pa/ slan chad stan la ma brtags par ma 'dug shig ces 'dul ba la bslab pa'i gnas bcas so/ /gleng gzhi ni mnyan du yod pa na ste/ de'i tshe na khyim bdag gnyis shig rab tu byung nas gcig na ste/ gcig gi nad g.yog gcig gis byed do/ /khyod sngon na ba'i tshe na sman jis gsos zhes smras pa dang / lan tshwas so/ /des kyang rtsab mo'i nang du lan tshwa btab nas byin pa dang de dus las 'das so/ /de ltar gyur pa snyan du bdas nas bka' stsal pa/ sngon ni nad bad kan gyur pas lan tshwas phan gyi/ da ni mkhris pa dang rlung du gyur pas gang sngon phan pa da lta dug tu gyur to/ /des na dge slong gis sman thug thu ba tu ma sbyin par sman pa la dris shig / sman pa med na nad bu can nam rgan po la dris shig /ma dris par sman byin na 'das pa dang bcas par 'gyur ro zhes 'dul ba la bslab pa'i gnas su bcas so/ /gleng gzhi ni mnyan du yod pa na ste/ tshe dang ldan pa maud gal gyi bus u pA li la sogs pa bcu bdun sde rab tu phyung nas/ bcu bdun sde rnams las gang gi res la bab kyang rung ste/ thams cad kyis byed do/ /dus gcig na gcig ni gtsug lag khang skyong byed de dus kyi mchod pa la bab ste/ gtsug lag khang rgyan gyis brgyan nas mtshan thog thag mel tshe byed do/ /grogs rnams gcig gi snying lam na gcig byed snyam nas gcig gis kyang ma bltas par nang bar gtsug lag khang skyong khros shing 'dug pa mthong nas/ kha cig gis rkang pa nas bzung kha cig gis lag pa nas bzung nas bzod par gsol zhes byas na ma btub po/ /gcig gis ga ga tshil byas pa dang kho dgod par gyur pa dang / thabs de rung ngo zhes kun gyis byas pa dang / de rlung gis 'tshub ste shi'o/ /de ltar gyur pa snyan du bdas nas bka' stsal pa/ da slan chad gcig la gag tshil ma byed cig ces 'dul ba la bslab pa'i gnas bcas so/ /gleng gzhi ni mnyan du yod pa na ste/ de'i tshe khyim bdag cig gis dgon pa'i gnas su dge 'dun gyi phyir gtsug lag khang zhig brtsigs te/ dge slong ma zhig gnas der dbyar tshul du bzhugs pa dang / 'dir g.yon can rnams kyis bcom mo snyan du bdas nas bka' stsal pa/ da slan chad g.yon can dag rkur lhags pa dang / sgra cha gaN+DI de khyer te shog /lhung bzed dang sbyar ma khyer te shog ces bos shig dang g.yon can rnams 'bros par 'gyur ro zhes bka' stsal to/ /dus phyi zhig na gtsug lag khang 'dir g.yon can rnams slar rkur lhags so/ /de'i tshe dge slong rgan zhugs shig mel tshe byed pas mthong nas/ de dag sgo steng du 'dzeg cing 'khod pa dang / des bsams pa cung zhig ma bsdigs na yo byad rnams 'phrog tu 'ong snyam nas sgo'i steng du 'dzegs te gaN+DI zhig tshod tsam du 'phangs pa dang nang par bltas nas g.yon can zhig mgor phog ste shi zhing 'dug go/ /de ltar gyur pa snyan du bdas nas bka' stsal pa/ phog par mi 'phen par pha zad tsam nas bsdigs shig ces 'dul ba la bslab pa'i gnas bcas so/ /gleng gzhi ni mnyan du yod pa na ste/ de'i tshe khyim bdag pha spad gnyis shig sngon longs spyod che ba las slad kyis longs spyod kyang 'gribs gnyen bshes dag kyang zad de pha spad gnyis kyang rab tu byung nas gtsug lag khang du 'khod do/ /de nas dge slong dag gis rtag par las la bsko zhing brtse bas pha spad gnyis kyang ljongs rgyu zhing dong dong ba dang gtsug lag khang du phyin du nye ste/ gdugs tshod kyi gaN+DI brdung ba mthong nas phan chad de 'gro ma nus pa dang bus rgyab nas phul ba dang pha dus las 'das so/ /de ltar gyur pa snyan du bdas nas da slan chad phul bar mi bya'i/ sngar song ste pha'i zan skal dag mnos te slar lam du bsdu bar bya'o zhes 'dul ba la bslab pa'i gnas bcas so/ /gleng gzhi ni mnyan du yod pa na ste/ de'i tshe dge slong bran can dang skyong pa po zhes bya ba gnyis shin tu mdza' ba gnyis shig 'khod de skyong ba po nad kyis btab nas mtshan gcig rangs 'bod 'grogs so/ /bran can gyis smras pa/ ngas sngar langs te/ sman pa la sman bslangs nas 'ong gis kha zas cang ma za bar sdod cig ces bsgo ste song ba dang / de nang par khyim mtshes rnams kyis mdang khyod 'bod 'grogs te ci nyes byas pa dang / bkres so/ /khyim mtshes rnams kyis sha dang khur ba dang thug pa mang zhig byin te zos so/ /slad kyis bran can sman khyer te 'ongs nas/ skyong ba sman zo/ /de na re ngas ni zan zos zin te mi 'dod do/ /de na re nga ni dge ba'i phyogs nyams nyams khyod kyi grogs byed na/ khyod ni nad dang mi mthun pa'i kha zas za bas dug za yang bla'o zhes byas pa dang / de yang snod kyi nang nas dug rdog ma gcig rnyed de zos pa dang de dus las 'das so/ /de ltar gyur pa snyan du bdas nas bka' stsal pa/ phyin chad nad pa 'chi bar sems pa'i gtam ma zer cig ces bslab pa bcas so/ /gleng gzhi ni mnyan du yod pa na ste/ de'i tshe dge slong gnyis shig ni lhung bzed btsas khyer te slong du mi rung gcig ni chos gos rul nas bgor mi rung nas tshe dang ldan pa dag chos gos dang lhung bzed med par spyad du mi rung gi chos gos drubs shig lhung bzed tshol cig ces byas pa dang / de gnyis kyis smras pa gnas 'di zhes bya ba na dge slong nad kyis bzhus pa de shi ba dang bdag cag gir 'gyur ro zhes byas pa dang dge slong dag gis snyan du gsol to/ /bka' stsal pa/ gdol pa lta bu'i sems ma bskyed par lhung bzed ni mig bzhin du glan pa dang bsreg par bya'o/ /chos gos ni pags pa bzhin du btsem zhing drub par bya'o zhes bslab pa'i gnas su bcas so/ /nyes pa ji lta bu zhe na/ dge slong gis bud med dang skyes pa dang ma ning rnams la bsad pa'i sems kyis sor mo gcig gis bsnun te/ thabs des 'chi bar gyur na yang phas pham par 'gyur ro/ /dge slong gis mi la dug byin pa'am/ g.yang sar btang ba'am/ stag gzig mang po'i yul du btang ba'am/ lhags pa che ba dang tshad khungs su btang ba'am/ sngags dang sman gyi sbyor bas kyang rung ste/ gsod sems dang ldan na mthar na yungs kar 'brum bu gcig gis brgyab ste shi yang phas pham par 'gyur ro/ /dge slong gis sman dang sngags kyis btab bam pha rol gnyis ka byol song gi skye gnas su bsgyur te mi bsad na yang phas pham par 'gyur ro/ /dge slong gis mi gzhan pas bsad par bsams pa las gzhan shi na nyes pa sbom por 'gyur ro/ /dge slong gis mi bsad na phas pham par 'gyur ro/ /mi ma lags pa bsad na sbom por 'gyur ro/ /'di yin nam ma yin snyam du the tshom za bzhin du bsad na phas pham par 'gyur ro/ /rang gis rang bsad na nyes pa sbom por 'gyur ro/ /dgra bcom pa bsad pa las so so'i skye bo bsad pa dang / so so'i skye bo bsad par byas pa las dgra bcom pa ni gnyis ka yang 'dra ste nyes pa sbom por 'gyur ro/ /mi gcig bsad par byas pa las bros te dge slong dang phrad de bsnyegs ma phyi bzhin du 'ong ste/ dge slong gis bsad sems nye bar bzhag nas bsnyegs ma la bstan bsnyegs ma dang phrad de bsad na phas pham par 'gyur ro/ /ji ltar dge slong la phas pham par 'gyur ba de bzhin du dge slong ma dang bslab pa byin pa la yang phas pham par 'gyur ro/ /dge sbyong pha dang / dge sbyong ma dang / dge slong ma la ni nyes byas su 'gyur ro/ / khyim pa la ni sdig pa mang du 'gyur ro/ /chu bo dga' skyed can gyi 'gram na 'khod pa'i dge slong rnams kyis bsams pa/ las dang po pa nyes pa med do zhes byung na/ bslab pa'i gnas ma bcas na dge slong mang zhig bdag cag gis 'chi bar bstabs na bdag cag gis las dang po pa gang yin snyam du the tshom za ba dang / bcom ldan 'das kyis bka' stsal pa/ chu bo dga' skyed can gyi 'gram na dge slong dag gis nyes pa spyad pa thams cad kyang las dang po pa yin te/ de la nyes pa med do/ /yan lag ni rnam pa bdun te/ dngos po ma yin pa dang / gsod sems nye bar gnas pa dang / sbyor ba gcig pa dang / srog dang bral ba dang / mir 'du shes pa dang / bslab pa blangs pa dang / bslab pa phul ba'o/ /de la mi gsod pa'i gleng gzhi ni yul bri dzi'i chu bo dga' skyed can gyi 'gram na'o/ /gang zag ni dge slong mang po mi gtsang ba bsgom pa rnams so/ /dngos po ni gsod pa'o/ /nyon mongs pa ni mi bzod pa'o/ /mtshan ma ni phas pham pa'o/ /las dang po pa dang / sems 'khrugs pa dang / nad kyis gzir ba dang / smyos pa la ltung ba med do/ / phas pham pa gsum pa ni mi brjed pa'i tshig go// //de la mi'i chos las bla mar gyur pa'i brdzun du smra ba'i gleng gzhi ni bcom ldan 'das yul yangs pa can na bzhugs shing 'od ma'i grong phan tshun ljongs rgyu zhing 'od ma'i grong gi byang phyogs na shing sha pa zhes bya ba'i gnas na bzhugs so/ /de'i lo la mu ge byung nas mi kun kyang sdug bsngal te/ mi mang po shi bar gyur nas zas dkon khyad ni pha ma yang rang gi bu la zas mi ster ba tsam du dkon te/ bcom ldan 'das kyis nya ba lnga brgya po las rab tu byung ba'i dge slong rnams la 'di ltar zas dkon pas na khyed kyang yul yangs pa can dang / bri dzi'i grong phyogs su dbyar tshul du zhugs shing / nga yang g.yog dge slong kun dga' bo dang lhan cig tu 'od ma'i grong 'dir tshul du 'jug go/ /de ltar ma byas na bsod snyoms kyis brel par 'gyur ro zhes byas pa dang / btsun pa de bzhin no zhes pa nas/ yangs pa can du so sor bshes gnyen dag dang bsnyen nas 'khod pa las phan tshun smras pa/ bcom ldan 'das kyis 'dir 'khod dang bde'o zhes gsungs na/ 'di na ni bdag cag gi gnyen yang med na/ bdag cag gi gnyen ni nya ba'i grong na yod kyi/ der dong la gnyen dag bltas te der 'khod dang bde'o zhes nas der dong ste lhags nas dbyar tshul du zhugs te/ de dag gis gros byas pa/ bdag cag ni thos pa nyung bas chos bshad du ni kun gyis kyang mi nus kyi/ gnyen rnams lhags pa dang bdag cag phan tshun yon tan brjod par bya'o zhes nas de dag lhags pa dang / kye khyod kyis grong phyogs 'dir dge 'dun sbyin gnas 'di lta bu dbyar tshul du zhugs pa ni khyod kyis rnyed pa rab tu rnyed do/ /dge slong 'di ni mi rtag pa'i 'du shes thob pa'o/ /'di ni bsam gtan dang po'o/ /'di ni dgra bcom pa'o zhes de bzhin du kun la yon tan re re bsgrags nas de dag gis smras pa 'phags pa'i yon tan gyi 'bras bu brnyes sam zhes pa dang / 'jig rten pa ni yon tan la dga' bas de dag rang rang gi bu'i kha nas kyang phri zhing bsod snyoms 'bul lo/ /de nas dbyar zla gsum 'das pa dang / bcom ldan 'das kyi chos nyid kyis nyan thos kyi dge 'dun rnams 'dun ma chen po rnam pa gnyis yod de/ gcig ni dbyar zla 'bring po nya la 'dun ma 'dus nas lung mnos nas tshul du 'jug go/ /'dun ma gcig ni ston zla 'bring po nya la tshul nas 'byung ba'i tshe 'dun ma 'du ba'o/ /dge slong gzhan de dag kyang bcom ldan 'das la phyag 'tshal zhing 'od ma'i grong na bcom ldan 'das bzhugs pa'i phyogs su dong ngo / /'ong ba dang kun dga' bos mthong ste/ bsu nas tshur spyon tshe dang ldan pa dag bde bar byon tam/ bsod snyoms kyis brel bar ma gyur tam zhes byas te bsu na de dbang shin tu rid cing nyam chung ste lhags nas bdag cag yul bri dzi na dbyar bde bar gnas mod kyi/ bsod snyoms kyis ni rtag tu brel to zhes 'dzer te lhags/ de nas dge slong lnga brgya po de dag kyang lhags/ de bzhin du kun dga' bos bsu ste dris nas/ de dag shin tu tsho mdog bzang ste lhags nas kun dga' bo mad par bdag cag nya ba'i grong na shin tu bde bar 'khod 'khod de bsod snyoms kyis brel kyang ma myong ngo / /'di ltar zas dkon pa na khyod kyis rgyu rkyen cis cis na 'brel par ma gyur/ de dag gis smras pa/ bdag cag gis yon tan brjod par bgyis te'o/ /ci yang dag par ram 'on te brdzun du smras pa/ bdag cag gis brdzun bgyis mod/ des smras pa/ khyed kha zas cung zad kyi phyir brdzun du smrar dbang ngam zhes byas pa dang / de dag gis dbang yang rung mi dbang yang rung / bdag cag gis smras so/ /de nas don nyung du ba'i dge slong rnams 'phya ste/ zang zing cung zad kyi phyir mi'i chos las bla mar gyur pa med la/ med bzhin du ci'i phyir smra zhes smod cing mi snyan par 'dzer ba/ bcom ldan 'das kyi snyan du bdas nas 'dul ba la bslab pa'i gnas bcas so/ /de ltar bcas nas phyis dge slong pha mang zhing dgon pa dang nags 'dab dang / bas mtha'i dgon pa na rnal 'byor la brtson par gnas pa las 'dod pa'i 'dod chags dang gnod sems mi spyod cing 'jig rten pa'i lam gyis zhi gnas kyi mtshan ma 'ga' zhig yid la yod pa la brten nas gnas gnas pa las phan tshun du smras te/ tshe dang ldan pa dag bdag cag gi skye ba ni zad/ tshangs par spyod pa ni spyad byas pa ni byas kyis gnas 'di spangs te grong 'dab du dong ngo zhes te der grong du lhags pa dang / bud med dang / kun dga'i ra ba dang / dge tshul bar 'dres shing gnas pas yang nyon mongs pa skyes nas bdag cag phas pham par ma gyur yang grong snyam du sems te/ tshe dang ldan pa kun dga' bo la/ bcom ldan 'das la zhu bar ci gnang zhes gsol to/ /kun dga' bos bcom ldan 'das la gsol pa dang / bka' stsal pa/ mngon pa'i nga rgyal ma gtogs so zhes gsungs nas de nas bcom ldan 'das kyis bslab pa la 'dod pa dang bslab pa la gtso bor byed pa'i bslab pa brjod de/ yang dge slong mngon pa'i nga rgyal ma gtogs te/ snga ma ni bcas pa'o/ /de ni gnang ba'o/ /zhes gsungs so/ /yang dge slong gang zhes bya ba ni gsol ba dang bzhi'i las kyis bsnyen par rdzogs pa la bya'o/ /mngon par mi shes zhes bya ba ni ci mngon par mi shes she na/ tshor ba dang / 'du shes dang / 'du byed rnams dang / rnam par shes pa la sogs te yod par mi shes shing bdag tu lta ba'o/ /yongs su mi shes zhes bya ba ni gzugs dang / tshor ba dang / 'du shes dang / 'du byed dang / rnam par shes pa rnams mi rtag pa dang / sdug bsngal ba dang / bdag med pa dang / stong pas yongs su mi shes pa'o/ /mi'i chos ni de dag gis thob pa yin gyi/ ngan song gsum dang / ma ning dang mtshan gnyis pas mi thob po/ /bla mar gyur ces bya ba ni 'dod pa'i khams pas gzugs kyi bla mar/ gzugs kyi khams pas gzugs med pa'i bla mar/ yang gcig tu na mi'i chos ni sgrib pa lnga la bya ste/ gang de dag spangs pa de ni bla mar gyur pa zhes bya ba'o/ /mtha' zhes bya ba ni mya ngan las 'das pa la mtha' zhes bya ba'o/ /'phags pa zhes bya ba ni sangs rgyas dang / rang sangs rgyas rnams kyi nyan thos rnams la 'phags pa zhes bya'o/ /bye brag thob ces bya ba ni dge sbyong gi 'bras bu bzhi la bya ste/ rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / dgra bcom pa'i 'bras bu rnams te bye brag thob pa zhes bya'o/ /shes pa zhes bya ba ni shes pa bzhi ste/ sdug bsngal shes pa dang / kun 'byung shes pa dang / 'gog pa shes pa dang / lam shes pa'o/ /mthong zhes bya ba ni mthong ba bzhi ste/ sdug bsngal mthong ba dang / kun 'byung mthong ba dang / 'gog pa mthong ba dang / lam mthong ba'o/ /reg par byed ces bya ba ni/ bsam gtan bzhi la reg par spyod ces bya ba ste/ snyoms par 'jug pa la bya'i sgrub pa la ni ma yin no/ /med ces bya ba ni de'i dngos po med pa'o/ /med bzhin du zhes bya ba ni bdag la med pa'o/ /med bzhin du 'di shes zhes bya ba ci shes she na/ sdug bsngal la sogs pa bden pa bzhi shes pa la bya'o/ /mthong zhes bya ba ni lha dang / klu dang gnod sbyin dang / nam mkha' lding dang / dri za dang / yi dwags dang / sha za dang / grul bum dang / lus srul po dang / lto 'phye chen po mthong ngo zhes zer ba dang / de dag gi sgra thos so zhes smras pa dang / de dag nga'i gan du 'ongs so zhes zer ba dang / de dag gi gan du bdag rtag tu 'grogs shing 'gro'o zhes smras pa dang / 'gog pa'i 'du shes dang / 'dod chags dang bral ba'i 'du shes dang / mi sdug pa'i 'du shes dang / rnam par bsngos pa'i 'du shes dang / mi rtag pa'i 'du shes pa dang / sdug bsngal ba'i 'du shes dang / stong pa nyid la so sor rtog pa'i 'du shes ma thob par ngas thob po zhes zer ba dang / bsam gtan dang po nas bsam gtan bzhi'i bar du thob po zhes brjod pa dang / tshad med pa bzhi dang / nam mkha' mtha' yas skye mched la snyoms par 'jug pa bzhi thob bo zhes brjod pa dang / dge sbyong gi 'bras bu bzhi dang / rdzu 'phrul gyi yul dang / lha'i rna ba dang / sems kyi rnam grangs dang / sngon gyi gnas dang / 'chi 'pho dang / skye ba dang / zag pa zad pa ma thob par thob po zhes zer ba dang / dgra bcom pa la sogs te thob zhes zer ba'o/ /khas 'ches zhes bya ba ni khas len pa'o nyes pa 'byung zhes bya ba ni de'i dngos po byung ba'o/ /tshangs par 'dod ces bya ba ni bral bar 'dod pa'o/ /des dus gzhan zhig na zhes bya ba ni dus de ma yin pa'o/ /dris kyang rung zhes bya ba ni gzhan dag gis so/ /ma dris kyang rung zhes bya ba ni bdag nyid kyang 'gyod pa skyes nas dogs shing rnam par dogs te yid la gcags pa'o/ /tshe dang ldan pa dag bdag gis ni mi shes par shes so zhes smras pa ni yid kyi rnam par shes pa'o/ /ma mthong bar mthong ngo zhes bya ba ni mig gi rnam par shes pas so/ /gsob ces bya ba ni bsgrub pa'i don med pa la bya'o/ /zang zing cung zad kyi phyir dgos pa'i dngos po dang don med pas na gsog go/ /yang dag pa'i 'du shes bcabs nas don gzhan la sgra bzhin du tshig smra ba ni brdzun zhes bya'o/ /mngon pa'i nga rgyal ma gtogs zhes bya ba ni gnas dben pa na gnas shing nyon mongs pa mngon du mi spyod pas yang dag pa'i don chud do snyam du sems pa'i phyir na ma gtogs so/ /de yang zhes bya ba ni nye bar bstan pa'o/ /kun tu yang dag par bstan pa'i tshig go/ /dge slong zhes bya ba ni gang la dge slong gi dngos po yod pa la bya'o/ /dge slong gi dngos po gang zhe na/ bsnyen par rdzogs pa skyon med cing bshol bar mi 'os pa la bya'o/ /phas pham pa zhes bya ba ni ltung ba nyes pa can mi mtshungs pa tha shal de la bya ste/ de byung na byung ma thag tu dge slong ma yin/ shAkya'i sras po yin phas pham pa'o zhes gsungs so/ /gnas par mi bya'o zhes bya ba ni gang la nyes pa de lta bu byung ba'i gang zag dge 'dun gyi nang du mi chud cing gso sbyong dang tshul du 'jug pa dang gang zag bcu gnyis kyi las la mi chud pas na gnas par mi bya'o zhes gsungs so/ /dge slong gis chos bzhi po de dag la zhes bya ba ni gang du phas pham pa bzhi po de gang yang rung ba'o/ /dang po ji lta bu bzhin zhes bya ba ni khyim pa la bya'o/ /gnas par mi bya ba ni dge slong rnams dang chos dang / zang zing gi longs spyod la mi chud cing gnas khang gcig tu mi gnas pa la bya'o/ /phas pham pa'i rim pa yang de ltar gzhag pa yang ci'i phyir gzhag snyam pa la yang rtsa ba bzhi la sdig pa ni srog gcod pa dang ma byin par len pa che ba yin zhes mdo sde dag las 'byung mod kyi 'dir dang po gang sngar byung ba de'i rim pa bzhin du bshad de/ de'i phyir na dang po kho nar mi tshangs par spyod pa'i chos 'jig rten du byung ngo / /de'i 'og tu ma byin par len pa'i chos byung ngo / /de'i phyi nas mi gsod pa dang brdzun du smra ba byung ste/ de ltar na mi tshangs par spyod pa'i rgyus ma byin par len to/ /ma byin par len pa de'i rgyus na nor gyi bdag po gsod do/ /de ltar gsod pa'i rgyus na brdzun du smra ba byung ngo / /de ltar gcig gi rgyus gcig byung bas na rim pa de ltar sbyar te bzhag go/ /gzhan yang brdzun du smra ba las bslab pa bcas pa'i rnam grangs la gleng gzhi ni sangs rgyas bcom ldan 'das yul yangs pa can gyi spre'u rdzing gi khang pa brtsigs pa na bzhugs so/ /de'i tshe yul mnyam ka'i rgyal po ma skyes dgra dang / yul yangs pa can gyi lits+tsha bI rnams su 'thab cing 'khrugs par gyur to/ /ma skyes dgras yan lag bzhi pa'i dpung gi tshogs dang / rta'i tshogs dang / shing rta'i tshogs dang / dpung bu chung gi tshogs kun go bskon te/ yul bri dzi gzhom par bshams pa dang / yul bri dzi na gnas pa'i skye bo mang po rnams kyis ma skyes dgra'i dpung gi tshogs dag mthong nas yangs pa can gyi lits+tsha bI rnams la sbran te/ yangs pa can pa yang dpung bzhi dang chas te dong ngo / lits+tsha bI rnams kyis 'phags pa maud gal la bdag gang rgyal bar 'gyur zhes dris pa dang / lits+tsha bI rnams rgyal bar 'gyur ro zhes bya ba lung bstan to/ /de dag kyang g.yul sprad pa dang / sngar ni lits+tsha bI rnams rgyal/ slad kyis ni ma skyes dgra rgyal bar gyur to/ /'phags pa maud gal gyi bus ma rtogs zhes skye bo rnams 'phya bar gyur te/ drug sde rnams kyis ltung ba byung gi gaN+DI de brdungs te bskrad pa'i las byas pa dang / snyan du bdas te nyes pa med de/ sngar ni lits+tsha bI rgyal bar gyur pas na/ phyis gang rgyal zhes ma smras pas ma nyes so zhes bka' stsal to/ /gleng gzhi ni yangs pa can na ste/ de'i tshe mu stegs can gyis lo bcu gnyis kyi bar du char mi 'bab po zhes lung bstan pa dang / maud gal gyi bus zhag bdun na char 'bab po zhes lung bstan pas so so rang rang gi bang mdzod nas 'bru sna tshogs phyung ste sa bon btab po/ /zhag drug lon pa dang phyogs bzhi nas sprin yang langs/ /char yang cung zad cig 'bab pa dang / de nas sems can gyi las kyis char med par gyur to/ /zhag bdun gyi tshe lung bstan pa bzhin du 'bab la phyis 'bab par 'gyur ram mi 'gyur ma dris pas nyes pa med do/ /gleng gzhi ni yangs pa can na ste/ de'i tshe gcer bu pa'i chung ma zhig rum na bu yod par gyur te/ mu stegs can gyi ltas mkhan gyis ni bu mor lung bstan/ maud gal gyi bus ni khye'ur lung bstan to/ /slad kyis bu mo zhig btsas pa dang / mu stegs can rnams kyis 'phyas te/ drug sde rnams kyis bskrad pa'i las byas pa dang / bka' stsal pa/ nyes pa med do/ /sems can gyi las bsam gyis mi khyab pas mngal gyi nang na khye'u yin te/ phyis nas mtshan gyur te bu mor gyur pas na nyes pa med do/ /gleng gzhi ni rgyal po'i khab na ste/ de'i tshe khyim bdag cig gis thos pa/ dge slong gi dge 'dun rnams mi re bar bshos gsol na longs spyod chen por 'gyur ro zhes thos nas dge 'dun kun spyan drangs te/ zangs khal tshad mar gyis bkang ste/ de'i nang du sha btsos nas sha khu lhung bzed re re phul lo/ /de'i nyin par yul ngan byung nas lhung bzed rnams sha khus snum pas chu dron gyi gan du phyin nas 'khru zhing 'khod pa dang / dge slong des tshe dang ldan pa maud gal gyi bu la chu dron 'di gang nas 'bab ces smras pa dang / maud gal gyi bus mtsho chen po ma dros pa nas 'bab po zhes byas pa dang / bsnyen dga' bos mtsho ma dros pa ni yan lag brgyad dang ldan te/ grang ba yin na ci ste chu tsha bar gyur/ brdzun du smras pa yin no zhes bskrad pa'i las byas pa dang / sangs rgyas kyis bka' stsal pa/ maud gal gyi bu la ltung ba med de/ chu de ni tsha ba'i sems can dmyal ba brgyad kyi steng na 'bab pas dro ba yin no/ /gleng gzhi ni mnyan du yod pa na ste/ de'i tshe na tshe dang ldan pa maud gal gyi bus dge slong dag la smras pa/ bdag cung zad med pa'i skye mched la bdag snyoms par zhugs pa'i tshe rdzing bu sgra bskyung gi 'gram na glang po che brgya stong mang po sgra grag pa bdag gis thos zhes smras pa dang / bsnyen dga' bos chos kyi tshul bshig par ma byed cig / cung zad med pa'i skye mched la snyoms par 'jug pa na gzugs kyi 'du shes med cing sgra'i 'du shes dang bral ba yin na/ de ltar bral ba la gzugs mthong zhing sgra thos par ji ltar 'gyur/ ltung ba byung ngo zhes bskrad pa'i las byas pa dang / bka' stsal pa/ maud gal gyi bu bsam gtan dang po dang / rnam par thar pa la snyoms par 'jug pa'i tshe myur du snyoms par 'jug cing myur du ldang ngo / /de langs pa'i tshe thos pas na maud gal gyi bu la nyes pa med do/ /nyes pa de ji lta bu zhe na/ dge slong gis 'du shes dang bzod pa dang / blo gros sbas nas lha dang klu mthong ngo / /gnod sbyin dang lus srul po rnams mthong ngo zhes smras na phas pham par 'gyur ro/ /ji ltar mthong ba bzhin du thos pa la yang ngo / /tha na rdul khrod kyi sha za mthong ngo zhes zer ba yang nyes pa sbom por 'gyur ro/ /dge slong gis grogs med pa'i dgon pa na mi ma yin pas dge slong rnams gtses so/ /de na dgra bcom pa rnams la mi gtse ste/ nga la yang mi gtse'o zhes zer na phas pham par 'gyur ro/ /stan khra bo la dgra bcom pa rnams 'dug ste/ nga yang 'dug go zhes zer na phas pham par 'gyur ro/ /bdag bla mar 'gyur ro zhe 'am/ bdag ston pa'o zhe na nyes pa sbom por 'gyur ro/ /bdag sangs rgyas thams cad la skyabs su song ngo zhe na/ snga ma'i rnam par gzigs pa la skyabs su song ngo zhe na phas pham par 'gyur ro/ /'on te shAkya thub pa la skyabs su song bas na/ sangs rgyas thams cad la skyabs su song ba 'dra'o zhe na sbom por 'gyur ro/ /bdag mi slob pa'o zhe na mi slob pa'i 'phags pa lung bstan na phas pham par 'gyur ro/ /'on te 'jig rten bya ba mi slob po zhe na/ sbom por 'gyur ro/ /bdag la cung zad kyang med do zhe na nyon mongs pa med par ston na ni phas pham par 'gyur ro/ /de ma yin na ni sbom por 'gyur ro/ /bdag ni 'phos pa'o/ /bdag ni grol ba'o/ /bdag ni 'jig rten pas mi 'jigs pa'o zhes smra na/ 'phags pa'i sar bsams te smras na phas pham par 'gyur ro/ /'on te gzhan du na ni sbom por 'gyur ro/ /bdag gi ming 'di ni dgra bcom pa'o zhes bris la 'di sus bris zhes zer ba dang / gzhan gyis khyed 'bras bu thob bam zhes dris pa la/ shing thog gi 'bras bu mang zhig lag pa na bcangs la/ da dung ma smin no zhes smras na nyes pa sbom por 'gyur ro/ /bdag ni nyams pa'o zhes zer ba dang bdag ni rgyun du zhugs pa dang / lan cig phyir 'ong ba dang phyir mi 'ong ba dang / dgra bcom pa ma yin no zhe na/ nyes pa sbom por 'gyur ro/ /mi la mi ma lags par 'du shes te/ brdzun du smra ba dang / mi ma yin pa la mir 'du shes te smra ba dang / mi ma yin pa la mi ma yin par 'du shes te smra ba ni nyes pa sbom por 'gyur ro/ /dge slong gis pho nya las mi las bla mar gyur pa'i chos smra ba dang / phrin yig dang / lag brda dang / gcig nas gcig tu brgyud de mi las bla mar gyur pa'i chos smra na nyes pa sbom por 'gyur ro/ /de bzhin smyos pa dang / sems 'khrugs pa dang nad kyis gzir ba dang / 'on pa dang / glen pa rnams la dge slong gis mi las bla mar gyur pa'i chos smra na nyes pa sbom por 'gyur ro/ /de bzhin du ra ro ba dang / 'gro ba gzhan du gnas pa dang / mi dben pa la dben par 'du shes pa dang / sman dang sngags kyis mi snang bar smra ba dang / 'phags pa'i skad kyis mtha' 'khob pa la mtha' 'khob pa'i skad kyis 'phags pa la yang rung ste/ mi'i chos las bla mar gyur pa smras na thams cad kyang nyes pa sbom por 'gyur ro/ /ji ltar dge slong la phas pham par 'gyur ba de bzhin du bslab pa byin pa dang / dge slong ma rnams la yang phas pham par 'gyur ro/ /dge slong ma dang / dge tshul ma dang / dge sbyong la ni nyes byas su 'gyur ro/ /las dang po pa dang / smyos pa dang / sems 'khrugs pa dang / nad kyis gzir ba la ltung ba med do/ /gleng gzhi ni yul yangs pa can na'o/ /gang zag ni nya ba lnga brgya po'o/ /nyes pa ni ngag gis so/ /nyon mongs pa ni khe dang bkur stis so/ /mtshan ma ni phas pham pa'o/ /yan lag ni rnam pa bdun te/ mi'i chos las bla mar gyur pa dang / der yang 'du shes pa dang / pha rol ma yin pa dang mi yin par 'du shes pa dang / tshig tu smras pa dang / pha rol gyi don go ba dang / 'du shes bcabs pa'o/ /phas pham pa bzhi'i mi brjed pa'i tshig ste/ so sor thar pa'i mdo gdon pa gnyis pa rdzogs so// //so sor thar pa'i mdo gdon pa gsum pa las brtsams te mdo zhes bya ba la sogs pa smos so/ /gleng gzhi ni sangs rgyas bcom ldan 'das mnyan du yod pa na dze ta'i tshal mgon med zas sbyin gyi kun dga' ra ba na bzhugs so/ /de'i tshe tshe dang ldan pa 'char ba rang bzhin gyis grong khyer ram grong rdal gang na gnas kyang rung ste/ de nang par sngar langs nas gtsug lag khang chag chag btab/ phyag dar byas/ skyang nul byugs nas de gtsug lag khang gi phyi logs su byung ste rkang lag bkrus/ so shing 'chos nas de snga dro chos gos gyon lhung bzed thogs te grong dang grong khyer du bsod snyoms la 'jug go/ /de de ltar bsod snyoms la zhugs pa'i tshe lus ma bsrungs/ dbang po ma bsdams/ dran pa nye bar ma bzhag pas/ bsod snyoms las slar phyin nas zas kyi bya ba byas te/ nang du yang dag 'jog la zhugs pa'i tshe 'gro ba'i bzang mo dag mthong bas 'dod pa'i 'dod chags kun tu bskor ba'i sems su gyur nas/ de rang gi yan lag skyes las su rung bas lag pa gnyis kyis bzung ste bskyod nas khu ba 'byin to/ /de nas dge slong gnas nyul ba dag /tshe dang ldan pa 'char ba'i gnas ga la ba der dong ste/ tshe dang ldan pa khyod ci bzod cing nyams bde 'am/ bde ba la reg par gnas sam/ bsod snyoms kyis brel ba lta med dam zhes smras pa dang / tshe dang ldan pa bdag ni bsod snyoms kyis brel ba yang med la bdag nyams bde zhing bde ba la reg par gnas so zhes smras pa dang / dge slong dag gis tshe dang ldan pa khyod ji ltar nyams bde zhing bde ba la reg par gnas zhes smras pa dang / bdag 'dod pa'i 'dod chags kyis kun tu bskor ba'i tshe na bdag gi yan lag skyes bskyod de spyad pas na 'dod pa'i 'dod chags dang bral rims nad dang gdung ba dang bral bar gyur te/ bud med la chags pa'i blo mi skye bas bde ba la reg par gnas so zhes smras pa dang / dge slong gis de ltar gyur pa bcom ldan 'das la gsol to/ /de nas bcom ldan 'das kyis 'char ba la khyod kyis de lta bu byas pa bden nam zhes smras pa dang / btsun pa mad do zhes gsol nas 'dul ba la bslab pa'i gnas bcas so/ /rmi lam gyi ma gtogs zhes bya ba'i gleng gzhi ni mnyan du yod pa na ste/ mtshan mo dge slong dag cig nyal ba'i rmi lam na mi gtsang ba khu ba byung bar rmi nas de dag 'gyod pa skyes nas bcom ldan 'das kyis khu ba phyung na lhag mar 'gyur ro zhes bslab pa bcas na/ bdag cag la ltung bar ma gyur tam zhes 'gyod pa skyes nas/ dge slong 'di dag gis kun dga' bo la gsol te/ kun dga' bos snyan du zhus pa dang / bka' stsal pa/ dge slong 'di la bslab par 'dod pa dang / bslab pa la nan tan byed pa bsngags pa brjod nas dge slong de dag la dga' bar tshor ba'i 'du shes kyang yod mod kyi/ de ni nyams par gyur pas rmi lam gyi ltung ba med de ma gtogs so/ /yang dge slong zhes bya ba ni 'char ba'o/ /bsams nas zhes bya ba ni sems kyis brtags pa la bya'o/ /khu ba zhes bya ba ni rnam pa lnga lta bu yod de/ sngon po dang / dmar po dang / ser po dang / gar ba dang / sla ba'o/ /sngon po ni 'khor los sgyur ba'i rgyal po 'am/ de'i bu thu bo'i'o/ /ser po ni bu gzhan rnams kyi'o/ /dmar po ni blon po rnams kyi'o/ /dbang po smin pa rnams kyi ni gar ba'o/ /dbang po ma smin pa rnams kyi dang / khur dang lam gyis dub pa dang mtshon gyis dub pa la sogs pa ni sla ba'o/ /rmi lam gyi ma gtogs zhes bya ba ni rmi lam gyi bkol ba'o/ /phyung zhes bya ba ni phyung ma thag pa'o/ /dge 'dun gyi lhag ma zhes bya ba ni ltung ba de dge 'dun la dbang yod la/ dge 'dun la rag las la dge 'dun la brten pa ste/ ltung ba de dge 'dun gyis dbyung gi/ gang zag gis ni ma yin no/ /lhag ma zhes bya ba ni phas pham pa bzhi la lhag ma med kyi ltung ba de lhag ma dang bcas pas na dge 'dun gyi lhag ma zhes bshad do/ /nyes pa ji lta bu zhe na nyes pa lnga ste/ bde bar bya ba dang sa bon dang / rig sngags dang / sman dang / brtag pa'i phyir ro/ dge slong gis rnam pa lnga lta bu'i tshul gyis khu ba phyung na lhag mar 'gyur ro/ /ma phyin na lhag ma'i sbom por 'gyur ro/ /rman dang g.yan pa dang mdze dang / sha bkra dang / rngo dang / sgo'i them pa la 'gong ba dang / 'obs la mchong ba dang / gos la reg pa dang / bud med sdu gu mthong ba dang / sngon gyi spyod pa rjes su dran pa dang / gcig gi brla la gcig reg ste dga' bar tshor ba ni nyes pa med do/ /las dang po pa dang / sems 'khrugs pa dang / nad kyis gzigs ba la nyes pa med do/ /dang po 'dzin pa'i gleng gzhi ni bcom ldan 'das mnyan du yod pa na bzhugs so/ /de'i tshe drug sde po rang bzhin gyis dze ta'i gtsug lag khang gi sgo stong par mi 'jog ste/ de'i tshe tshe dang ldan pa 'char ba'i res la bab pa na dze ta'i gtsug khang gi sgo na sgo srung zhing 'chag cing 'dug pa dang / tshe dang ldan pa 'char ba ni grong khyer chen po drug gi mi rnams kyi mi'i rus dang / rigs dang / gzugs dang / bzo'i las dang / 'tsho ba la sogs te mi shes pa'am/ mi mthong ba gcig kyang med pas/ de'i tshe grong gi bud med mang zhig gtsug lag khang du lta zhing phyag 'tshal du lhags pa dang / 'char bas 'di zhes bya ba'i bu mo/ 'di zhes bya ba'i chung ma/ 'di zhes bya ba'i mna' ma/ 'di zhes bya ba'i sring mo khyed cag bde bar lhags sam/ khyed cag gar 'gro zhes smras pa dang / 'phags pa 'char ba bdag cag ni mi khom pa dgu dang ldan pas/ gzhan la ni mi khom pa brgyad gsungs na bdag cag khyim gyi bya bas brel ba na rtag tu mchir ni mi khom ste/ de bdag cag lha khang du lta zhing phyag 'tshal du 'ongs so zhes smras pa dang / 'char bas smras pa shin tu legs te/ gser srang khri yon du phul ba bas mchod rten la phyag 'tshal ba bsod nams che zhing dge'o zhe'o/ /gom pa re re bor yang 'khor los sgyur ba'i rgyal por 'gyur ro/ /khyed cag 'phags pa rnams kyi gnas khang la phyag 'tshal bar 'dod dam/ phyag 'tshal bar 'tshal lo/ /'o na sus bstan par bya/ mar me yod bzhin du sgron ma gud du mi tshol te/ 'phags pa nyid kyis bstan du gsol/ 'char bas bsams pa/ gtsug lag khang bstan na ni dge ba'i bar chad du yang 'gyur/ ma bstan na ni ma rungs pa 'di dag gis bsod snyoms kyang mi ster ba'i stengs su/ bcom ldan 'das kyis kyang ma dad pa dang ma dul ba rnams dul ba dang / dad pa dang ba phun sum tshogs par gyis shig ces bka' stsal pas na bdag gis bstan dgos so snyam nas/ de ni sangs rgyas kyi gnas khang ngo / /de ni cang shes kauN+Di n+ya'i'o/ /de ni 'od srungs chen po'i'o/ /de ni shA ri'i sras po'i'o/ /de ni 'phags pa maud gal gyi'o/ /de ni 'phags pa ma 'gags pa'i'o/ /de ni tshe dang ldan pa kun dga' bo'i'o/ /de ni sgra gcan gyi'o/ /de ni drug sde rnams kyi'o/ /de ni nga'i gnas khang ngo / /de ltar thar chags kyis kyang phyag 'tshal du bcug go/ /de ltar phyag 'tshal nas bud med rnams kyis 'char ba la chos bshad du gsol to/ /'char bas kyang che zhe dag legs kyi/ chos bshad kyi gdan bting la 'khod cig ces byas pa dang / de dag gis 'char ba'i rkang pa la phyag 'tshal nas 'khod de/ de dag la 'char ba chos ston pa la zhugs te/ ji lta ji lta bur chos ston pa de lta de lta bur kun du chags so/ /ci ltar chags pa de ltar zhen to/ /ci ltar zhen pa de lta bur lag nas 'dzin cing / yan lag dang nying lag nas nom mo/ /de la gang dag dga' bar tshor ba de dag ni kun du rtse gad rgyangs byed 'dzem snyes lus kyis snyogs so/ /gang dag dga' bar ma tshor ba de dag ni de nas byung ste/ 'chag sa dang sgo khang dag na 'phya ste bdag cag gi skyabs las kyang / gnod pa dang 'khrugs pa de lta bu byung ba lta zhes mi snyan par zer zhing dong ba dang / dge slong dag cig mdun nas 'ong ba thos te/ khyed su la kha zer 'phags pa khyod la'o/ /nged kyis ci zhig byas 'phags pa 'char bas bdag cag gi yan lag dang nying lag khyim thab kyis kyang ma mnam ma reg pa'i gnas thams cad du reg ste mnams pas na gal te bdag cag gi pha ma dang ming pos thos na yang dze ta'i gtsug lag khang du mig gis kyang ltar mi ster na 'gro ba lta ci smos zhes 'dzer to/ /dge slong dag gis che zhes 'char ba ni tshul khrims dang ldan pa yin te/ nye 'phen gyi bu las rab tu byung bas na/ 'dod chags shas che bas na/ thabs de nyid kyis 'dod chags sel to/ /'char ba la slan chad de lta bu ma byed cig ces bsgos che zhe dag de lta bu ma zer bar dengs shig 'phags pa dag bsgo yang rung ma bsgo yang rung ste/ bdag cag ni slan chad dze ta'i gtsug lag khang du mi mchi'o zhes 'phya bzhin du dong ngo / /'char ba yang gtsug lag khang nas dgod bzhin du phyi bzhin du 'ong ngo / /tshe dang ldan pa khyod de lta bu mi mdzes pa byas kyang bgad du ci yod ces smras pa dang / ci ngas chang 'thungs sam 'on te sgog pa zos/ khyim bdag gi bud med rnams ni khyod la 'phya bzhin du dong ngo / /'char bas smras pa/ lhung bzed nag po can rnams kyi rang bzhin gyis de 'dra ste/ ser sna che bas na chos tshig bzhi'i le'u gcig kyang su la yang mi ston pa'i steng du gzhan ston cing sems can gyi don byed pa la yang 'phya'o/ /ci khyod kyis bden pa la bkod dam/ 'char bas smras pa/ de dag re zhig dbang po smin par byas la mthar gyis bden pa thob par 'gyur ro zhes smras pa dang / dge slong rnams 'phya ste gang gis ngo tsha ba de nyid kyis nga rgyal bskyed dam zhes mi snyan par zer ro/ /de ltar gyur pa snyan du bdas nas 'char ba bkug ste/ bka' stsal pa/ de ltar gyur pa bden nam zhes smras pa dang / btsun pa mad do zhes gsol to/ /bcom ldan 'das kyis dge slong gi bya ba ma yin mthun pa ma yin zhes rnam grangs du ma'i sgo nas smad nas 'dul ba la bslab pa'i gnas bcas te yang dge slong gang zhes rtsa ba'i tshig rnams so/ /dge slong zhes bya ba ni 'char ba ste/ gang gzhan yang de 'dra'o/ /chags shing brtul ba'i sems kyis zhes bya ba ni chags pa'i sems yod la brtul ba'i sems med pa dang / brtul ba'i sems yod la chags pa'i sems med pa dang / chags pa yang yod la brtul ba yang yod pa dang / chags pa yang med la brtul ba yang med pa'o/ /chags pa zhes bya ba ni brtul ba ma yin te/ sems gang la chags pa'i dngos po la kun du bskor ba la gnas pa'o/ /brtul ba ni chags pa ma yin te/ sems gang gis sdug pa la zhen pa'i sems so/ /chags pa yang yod la brtul ba yang yod pa ni sems gang chags shing chags pas kun nas bskor ba dang / sdug pa la zhen pa'i sems so/ /chags pa yang ma yin brtul ba yang ma yin pa ni de lta bu med pa'o/ /bud med dang lhan cig ces bya ba ni bud med gang gzhon nu ma mi tshangs par spyad par rung ba'o/ /reg ces bya ba ni lus kyis sprad pa'o/ / gyur tam zhes pa ni byed pa'o/ /lag pa nas bzung zhes bya ba ni mkhrig ma man chad do/ /lan bu nas bzung zhes bya ba ni skra ste/ de dang lhan cig ldan pa cod pan yang ngo / /yan lag dang nying lag kyang rung ba zhes bya ba ni lag pa'am dpung pa nas gzung ba ma gtogs pa gzhan nas bzung ba'o/ /nom kun du nom pa dga' bar tshor zhes bya ba ni nyams su myong ba'o/ /dge 'dun gyi lhag ma zhes bya ba ni ltung ba nyid lhag ma dang bcas pa dang dge 'dun la rag lus pas na dge 'dun gyi lhag ma zhes bshad do/ /de la nyes pa gang zhe na/ rnam pa dgu ste/ nom pa dang / kun du nom pa dang / 'khyud pa dang / 'dzin pa dang / 'dren pa dang / kun du 'dren pa dang / 'degs pa dang / 'bebs pa dang / mngon du btsir ba'o/ /nom pa ji lta bu zhe na/ dge slong 'dod chags kyis brtul ba'i sems kyis bud med gzhon nu ma mi tshangs par spyad du bzod pa de la spyi bo nas mnams te gos kyis ma chod na lhag mar 'gyur ro/ /chod na nyes pa spom por 'gyur ro/ /ji ltar spyi bor nom pa de bzhin du 'phral ba dang mkhur tshos dang / mchu dang / kosko dang / rna ba dang / mgrin pa dang / dpung mgo dang / rgyab dang / tha na rkang pa'i mthe bong yang rung ste/ thams cad du lhag mar 'gyur ro/ /ji ltar kun du nom pa la ji ltar nyes pa'i dmigs su 'gyur ba de bzhin du kun du nom pa dang / 'khyud pa dang / 'dzin pa dang / 'dren pa dang / 'degs pa dang / / 'bebs pa dang / btsir ba la yang kun du nom pa bzhin sbyar ro/ /gang spyad du rung ba la dge 'dun gyi lhag mar sbyar ro/ /spyad du mi bzod pa la sbom por 'gyur ro/ /skyes pa dang / ma ning dang / za ma dang / mtshan gnyis pa spyad du bzod pa la sbom po'o/ /spyad du mi bzod pa la nyes byas/ byol song la yang nyes byas su 'gyur ro/ /ma dang sring mo dang / bu mor 'du shes pa la ltung ba med do/ /me'am chur ltung ba dang / dug zos pa dang / mtshon gyis 'debs pa dang / g.yang du lhung ba dang / thag pas 'geg pa dang / 'chir chas pa la zlog pa ni bud med la reg kyang nyes pa med do/ /bud med lus kyi dbang po nyams pa 'am/ dge slong gi lus kyi dbang po nyams kyang rung ste/ reg na gnyis ka yang 'dra ste sbom por 'gyur ro/ /gnyis ka yang nyams la gcig la gcig reg na nyes byas su 'gyur ro/ /bud med yin nam ma yin snyam du the tshom za bzhin du reg na spom por 'gyur ro/ /sos so la reg pa dang / spus spu la reg pa dang / rma la reg pa dang / sen mo la reg pa ni sbom por 'gyur ro/ /bud med ma lags par 'du shes pa dang / bud med ma lags pa la bud med du 'du shes pa dang / gos kyis g.yogs pa dang / ma g.yogs pa la g.yogs par 'du shes pa ni thams cad kyang sbom por 'gyur ro/ /bud med gzhan la reg par byas pa las bud med gzhan la reg pa dang / bud med kyi ro la reg pa dang / 'gro ba gzhan du gnas pa la reg pa dang / ma ning la reg pa la sogs te thams cad kyang sbom por 'gyur ro/ /gos kyis ma g.yogs pa la bud med kyang yin la spyad kyang bzod pa dang / lus kyang ma nyams lus kyis kyang reg ste dga' bar tshor na yan lag tshang ba zhes bya'o/ /yan lag ma tshang na thams cad kyang sbom por 'gyur ro/ /las dang po pa la sogs pa la nyes pa med do/ /'khrig tshig gleng gzhi ni sangs rgyas bcom ldan 'das mnyan du yod pa na bzhugs so/ /drug sde po rnams rang bzhin gyis dze ta'i tshal gyi gtsug lag khang gi sgo stong par mi 'jog ste/ de'i tshe na tshe dang ldan pa 'char ba gtsug lag khang gi sgo na 'chag cing 'dug pa dang / grong mi'i bud med rnams gtsug lag khang du phyag 'tshal du lhags pa rnams la so so'i rgyus la mkhas pas na/ so so'i ming nas phyung zhing bde bar 'ongs sam zhes dris nas gtsug lag khang dang / gnas khang rim gyis bstan pa'i bar du snga ma bzhin no/ /des de ltar chos ston pa na/ sdig pa can dbyung bar mi 'os pa 'khrig pa dang ldan pa'i tshig smras pa la zhugs pas na khyim mi mo de dag mi snyan par 'phya zhing dong ba dang / dge slong dag gis che zhe khyed cag su la 'phya/ khyod la'o/ /nged kyis ci zhig byas/ bdag cag gis dwa dang / rgyan po pa dang / nal gyi bu las ma thos par khyed 'phags pa 'char ba las thos so/ /khyod cag ma zer cig /nged kyis 'char ba la bsgo bar bya'o/ /bsgo yang rung ma bsgo yang rung / slan chad dze ta'i gtsug lag khang du mig kyang mi lta'o/ /de ltar gyur pa dge slong dag gis snyan du gsol ba dang / bka' stsal pa 'char ba bkug ste rmas pa na/ btsun pa mad do zhes gsol nas/ dge sbyong gi bya ba ma yin zhes bya ba nas/ yang dge slong zhes bya ba'i bar du rtsa ba'i tshig rnams so/ /yang dge slong zhes bya ba ni 'char ba ste/ gzhan yang de dang 'dra ba ste/ chags pa zhes bya ba ni chags pas kun nas bskor ba'o/ /brtul ba zhes bya ba ni chags pa'i dngos po la yang dang yang du zhen pa'o/ /bud med ces bya ba ni gang legs par smras pa dang / nyes par smras pa'i don shes pa'o/ /gnas ngan len ces bya ba ni phas pham pa dang / dge 'dun gyi lhag ma'o/ /'khrig pa dang ldan pa zhes bya ba ni mi tshangs par spyod pa dang ldan pa'o/ /skyes bus na chung la ji lta ba bzhin zhes bya ba ni 'di lta ste skyes pas bud med la'o/ /dge 'dun gyi lhag ma zhes bya ba ni dge 'dun la rag las pa'o/ /nyes pa gang zhe na/ dgu ste/ bsngags par byed pa dang / bsngags par mi byed pa dang / bkug pa dang / nye bar bkug pa dang / 'dri ba dang / kun du 'dri ba dang / smra ba dang / brjod pa dang / gshe ba'o/ /bsngags par byed pa la ji lta bu zhe na/ dge slong gis chags shing brtul ba'i sems kyis bud med legs par smras pa dang / nyes par smras pa'i don go bar nus pa la/ che zhe khyod kyi rma'i sgo gsum bzad byung la shin tu spyod du rung ba'o zhe na/ bden nam zhes smras te/ 'khrig pa dang ldan pa rgya'i rna ru zhes bya ba smras na lhag mar 'gyur ro/ /rgya'i rna ru zhes ma smras na sbom por 'gyur ro/ /bsngags par mi byed pa gang zhe na/ khyod kyi sgo gsum mi bzang / dbyibs kyang mi bzang ste shin tu ngan na rgya'i rna ru zhes smras na gong ma bzhin du nyes pa'o/ /bkug pa ji lta bu zhe na/ che zhe tshur shog 'di dang 'di lta bu zhig bya ba zhes smras te/ 'khrig pa dang ldan pa rgya'i rna ru zhes bya ba nas gong ma bzhin du nyes pa'o/ /nye bar bkug pa gang zhe na/ sring mo bud med gang skyes pa dang 'di dang 'di byed pa 'di ni su la yid du 'ong ba'o/ /sring mo yang nga dang 'di lta bu byas na yid du 'ong ngo zhes rgya'i rna ru zhes smras na gong ma bzhin no/ /'dri ba ni sring mo skyes pa gang bud med la de dang 'di byed pa la/ de de la sdug pa dang yid du 'ong bar 'gyur na bdag cag kyang 'di byas na yid du 'ong bar 'gyur ro zhes rgya'i rna ru smras na gong ma bzhin no/ /kun du 'dri ba ni sring mo skyes pa gang bud med dang 'di dang 'di byed na yid du 'ong ngo zhe na/ de ltar yin nam ma yin zhes smra la rgya'i rna ru zhes smra na gong ma bzhin no/ /smra ba ci lta bu zhe na/ sring mo bdag cag skyed mos tshal ga ge mo zhes bya ba na bza' ba dang btung ba dang bgo ba 'di 'dra ba zhig bgo ste/ bdag cag 'di dang 'di lta bu zhig byas so/ /khyod kyang 'dir 'ongs na 'di lta bu zhig bya'o zhes zer la rgya'i rna ru zhes smras na gong ma bzhin no/ /brjod pa ni lhan cig de lta bu zhig byas na mtho ris su son pa dang 'dra'o zhes zer la rgya'i rna ru zhes smras na gong ma bzhin no/ /spyo ba ni ro lta bu'o zhes spyo zhing rgya'i rna ru zhes smras na gong ma bzhin no/ /bud med legs nyes kyi don go ba de dge slong gi gan du song nas 'phags pa bdag gi rma'i sgo gsum shin tu bzang ste/ do la bab po zhes zer te/ dga' bar tshor ba dge 'dun gyi lhag mar 'gyur te/ dngos po lhag ma brgyad po yang de bzhin du sbyar te/ bud med spyad mi bzod pa dang / skyes pa dang / ma ning dang / mtshan gnyis pa dang / za ma la yang nyes pa sbom por 'gyur ro/ /spyad mi bzod pa dang byol song la yang nyes byas su 'gyur ro/ /skad nges pa'i tshig dang / yul gyi nges pa'i tshig dang / skad zur ma phyin pa na nyes pa med do/ /mtha' 'khob pa'i skad dang bdag nyid mi snang bar byas te smras pa dang / bud med la gzhan smrar gzhug pa dang / gzhan gyi slad du smras pa dang / sprul pa'i bud med dang / phrin yig dang / lag brda dang / gcig nas gcig tu brgyud pa thams cad kyang nyes pa sbom por 'gyur ro/ /smyo ba dang / ra ro ba dang / sems 'khrugs pa dang / glen ma dang / gnyid log pa la dge slong gis gnas ngan len gyi tshig smras na thams cad kyang sbom por 'gyur ro/ /yan lag ni rgya'i rna ru zhes smras pa dang / dbyibs shin tu bzang po'o zhes smras pa dang / bud med spyad du bzod pa dang / don go ba ste rnam pa de rnams dang ldan na lhag ma'o/ /de rnams gcig dang mi ldan na sbom po'o/ /bsnyen par ma rdzogs pa rnams ni thams cad kyang nyes byas su 'gyur ro/ /kun spyod kyi gleng gzhi ni bcom ldan 'das mnyan du yod pa na mgon med zas sbyin gyi kun dga' ra ba na bzhugs so/ /de'i tshe tshe dang ldan pa 'char bas gtsug lag khang du ltar lhags pa'i bud med rnams la bdag gi lus kyis kun du spyad pa'i phyir bsod nams su 'gyur ba'i sgo nas bstod cing bsgo ba'o/ /de la bye brag ni dang po'i lus la bzung ngo / /lus la bzung du ma btub nas phyi nas 'khrig tshig tu smra zhing brjod pa'o/ /'khrig tshig kyang mnyan du ma btub nas bsod nams su 'gyur ba'i tshig gi sgo nas brjod pa'o/ /yang dge slong gang zhes bya ba ni 'char ba ste/ gzhan yang de dang 'dra ba'o/ /chags shing brtul ba ni gong ma bzhin no/ /rang gi lus kyis kun du spyod pa'i phyir zhes bya ba ni bdag gi lus kyis g.yog bya ba'o/ /bud med ces bya ba ni legs pa dang nyes par smra ba'i don go bar nus pa'o/ / nga lta bu dge slong zhes bya ba ni yang dag par bstan pa'o/ /tshul khrims dang ldan pa zhes bya ba ni tshul khrims kyi phung po'o/ /dge ba'i chos can zhes bya ba ni ting nge 'dzin gyi phung po'o/ /tshangs par spyad pa zhes bya ba ni shes rab kyi phung po'o/ /de ltar na phung po gsum dang ldan pa na yon tan dang ldan pa yin pas na de lta bu'i g.yog byed cing mi tshangs par spyad na bsod nams su 'gyur ro zhes bstan pa'o/ /kun du spyad na zhes bya ba ni g.yog bya ba'o/ /che zhe de ni kun du spyad pa'i mchog go zhes bya ba ni 'khrig pa'i chos kyi mchog ni 'di zhes bya'o/ /bsngags pa zhes bya ba ni bstod pa'o/ /lhag ma zhes bya ba ni snga ma bzhin no/ /nyes pa ji lta bu zhe na/ dngos po ni bco brgyad de/ mchog dang / gtso bo dang / bye brag tu 'phags pa dang / bzang po dang / mdzes pa dang / dge ba dang / mchod par 'os pa dang / bstod par 'os pa dang / rgya che ba dang / ches mchog pa dang / ches gtso bo dang / ches bye brag tu 'phags pa dang / ches bzang po dang / ches bzang po mdzes pa dang / ches dge ba dang / ches mchod par 'os pa dang / ches bstod par 'os pa dang / ches rgya che ba'o/ /dge slong chags brtul ba'i sems kyis bud med legs pa dang nyes pa'i don go la/ che zhe 'di lta ste/ nga lta bu'i dge slong tshul khrims dang ldan pa la/ chos 'di lta bu kun du spyad na de ni mchog go zhes zer na lhag ma'o/ /tshul khrims dang ldan pa dang / dge ba'i chos can nga lta bu dang sbyar na yang lhag mar 'gyur ro/ /dge ba'i chos can tshangs par spyad pa nga lta bu dang / 'khrig pa'i chos 'di lta bu sbyar na yang lhag mar 'gyur ro/ /ji ltar tshul khrims dang ldan pa nga lta bu zhe 'am tshangs par spyad pa nga lta bu zhe'am/ dge ba'i chos can nga lta bu zhes smos pa'i tshig gsum po de re re dang / dngos po bco brgyad po de gang yang rung ste bsnor zhing sbyar ro/ /yan lag ni nga lta bu zhes pa dang / tshul khrims dang ldan pa zhes smras pa dang / 'khrig pa'i chos de lta bu byas na bsod nams che'o zhes smras pa dang / bud med kyis don go ba'o/ /de dag dang ldan na lhag mar 'gyur ro/ /de dag gcig dang mi ldan na sbom por 'gyur ro/ /dge sbyong dang / dge sbyong ma dang / dge bsnyen pha dang / dge slob ma dang / dge bsnyen ma la ni thams cad kyang nyes byas su 'gyur ro/ /las dang po pa la nyes pa med do/ /nyes par 'gyur mi 'gyur gyi lci yang gong ma dang 'dra'o/ /smyan byed pa bshad par bya ste/ gleng gzhi ni bcom ldan 'das mnyan du yod pa na bzhugs so/ /de'i tshe ri dwags dgra'i bu nag po zhes bya ba de ltas shes pas bag ma len pa dang bag ma gtong ba'i tshe kun kyang 'di la dris te/ lung bstan pa bzhin du byas pas bag ma blangs so cog kun bkra shis nas kun gyis de la zas dang 'tsho ba'i yo byad sbyin no/ /ri dwags dgra'i bu nag po rab tu byung nas yang sngon gyi las sdig pa smyan byed pa la zhugs te/ 'tsho ba'i yo byad sbyor ba sogs pa gzhan gyis sbyar bas na/ drug sde rnams kyis kyang de'i khe mthong nas drug sde yang smyan byed pa la zhugs so/ /de na mu stegs can rnams dge sbyong shAkya'i bu de rnams bslab pa bzung yang khyim pa skye bo bzhin du smyan byed na/ skye bo dang bsam pa dang bye brag tha dad ci yod ces mi snyan pa 'dzer to/ /de ltar gyur pa dge slong rnams kyis bcom ldan 'das la gsol to/ /bcom ldan 'das kyis drug sde rnams bkug ste rmas na/ btsun pa mad do zhes gsol to/ /bcom ldan 'das kyis byung ba de dang / gleng gzhi de dang / de ltar gyur pa de'i phyir dge slong gi dge 'dun rnams bsdus nas/ yang dge slong gang zhes bya ba la sogs pa smos so/ /yang dge slong gang zhes bya ba ni drug sde rnams te/ gzhan yang de dang 'dra ba'o/ /bud med las skyes pa'i tshig ces bya ba ni bud med gang la skyes pas kun du spyad par sems pa'o/ /skyes pa la bud med kyi tshig ces bya ba ni gang skyes pa la bud med yongs su sems pa'o/ /chung ma 'am mdza' na mo zhes bya ba ni chung ma bdun dang mdza' na mo bcu'o/ /chung ma bdun gang zhe na/ chu sbyin pa'i chung ma dang / nor gyis nyos pa'i chung ma dang / rgyal mtshan gyis phrogs pa'i chung ma dang / dga' bas gnas par bya ba'i chung ma dang / bsgo bas gnas par bya ba'i chung ma dang / mnyam du 'tsho ba'i chung ma dang / de skad cig ma'i chung ma'o/ /chu byin pa'i chung ma gang zhe na/ skyes pa gang pha mas chu blud de 'di ni khyod kyi chung ma'o zhes bsgrags nas de la gzhan gyis spyad du dogs nas shin du rtse zhing srung ba'o/ /ci ltar chus nyes pa bzhin du slad ma drug po rnams la yang de bzhin du srung zhing sba bar sbyar ro/ /mdza' na mo bcu gang zhe na/ phas bsrungs pa dang / mas bsrungs pa dang / ming pos bsrungs pa dang / phu nu mos bsrungs pa dang / sgyug mos bsrungs pa dang / gyos pos bsrungs pa dang / gnyen gyis bsrungs pa dang rigs kyis bsrungs pa dang / rus kyis bsrungs pa dang / 'khrug pa med pa dang bcu'o/ /mas bsrungs pa gang zhe na/ bud med gzhon nu ma khyim thab yul gzhan du song ngam dmag la song na/ de'i chung ma gzhon nu ma mi gzhan gyis yongs su spyad du dogs nas shin tu sba zhing bsrung ba'o/ /mdza' na mo gzhan rnams kyang de bzhin du sbyar ro/ /smyan zhes bya ba ni phrin no/ /byed ces bya ba ni sbyor ba'o/ /skad cig pa zhes bya ba ni thang cig pa yang rung ngo / /dge 'dun lhag ma zhes bya ba ni snga ma bzhin no/ /dge slong bdag nyid kyis bzlugs la/ bdag nyid kyis lan bskyal na lhag mar 'gyur ro/ /de bzhin du gnyis bdag gis/ gcig than gyis sam/ gcig bdag gis/ gnyis than phrin gyis kyang rung ste/ lhag mar 'gyur ro/ /lan gsum du ma bskyal la/ lan gnyis su blangs pa ni spom por 'gyur ro/ /dge slong gis chung ma dang po gsum pa las 'thabs ma thag ste/ 'thabs nas cung zad cig lon la rtswa bcad pa dang rdo gsum bor ba dang / chung ma yin no zhes ma bsgrags pa bsdums na nyes byas su 'gyur ro/ /dge slong gis chung ma dang po gsum po 'thabs par yang gyur/ rtswa bcad pa lta bu dang / rdo gsum bor ba lta bu dang / brtsad de spangs pa dang / chung ma ma yin no zhes bsgrags pa slar bsdums na dge 'dun gyi lhag mar 'gyur ro/ /dge slong gis de las gzhan pa bud med bcu bzhi las 'thabs par yang gyur/ chung ma ma yin no zhes bsgrags pa las slar bsdums na dge 'dun lhag mar 'gyur ro/ /lhag ma mdza' na mo bcu 'thabs par gyur nas slar bsdums na dge 'dun gyi lhag mar 'gyur ro/ /dge slong gis khye'u chung ma blangs pa'i rigs she'am/ bu mo 'di bag mar ci phyir mi btang zhes byas na nyes byas su 'gyur ro/ /smyon pa las phrin blangs te rang bzhin du gnas pa la bskyal tam/ rang bzhin du gnas pa las blangs te/ smyon pa la bskyal na sbom por 'gyur ro/ /de bzhin du sems 'khrugs pa dang / nad kyis gzir ba la yang ngo / /dbang po yod pa las phrin blangs te dbang po med pa la yang ngam/ mi dbang ba las phrin blangs te/ dbang po la yang thams cad la sbom por 'gyur ro/ /mi ma yin pa las phrin blangs te/ bud med la yang ngam/ bud med shin du gzhon nu ma'am/ bud med mngal na gnas pa la smyan byas na thams cad nyes pa sbom por 'gyur ro/ /las dang po pa dang sems 'khrugs pa la ltung ba med do/ /yan lag ni mi yang yin la/ bud med las phrin blangs pa dang / skyes pa dbang po yod pa la bzlugs pa dang / de'i lan slar bskyal ba ste/ lan gsum du yang bskyal la/ dngos po grub na lhag mar 'gyur ro/ /khang pa'i gleng gzhi ni sangs rgyas bcom ldan 'das mnyan du yod pa na bzhugs so/ /de'i tshe na dge slong rnams yon bdag gis gnas khang du brtsigs te byin pa dang / dge slong dag gis 'di ni khang pa ring ches/ 'di ni ha cang yang thung 'di ni kun du grums pa gso zhing bcos dka'o zhes de dag bor ba nas/ khang pa bcos shing gsar du khang pa gzhan brtsigs pa dang / rtswa shing dang mi blas khyim pa rnams la slong bas na/ khyim pa dag kyang 'phya nas/ dge slong yang bya ba mang bas lung dbog pa dang / chos klag pa dang / kha don bya ba dang / rnal 'byor yid la byed pa rnams spangs te bar chad du gyur pas/ khyim pa dag 'phya ba 'od srungs chen pos thos nas 'od srungs chen pos bcom ldan 'das la gsol to/ /bcom ldan 'das kyis dge slong rnams bkug ste/ de ltar gyur pa bden nam zhes rmas pa dang / btsun pa mad do zhes gsol nas/ bcom ldan 'das kyis mgu dka' ba chog mi shes pa zhes rnam grangs du ma'i sgo nas smad nas dge slong gi dge 'dun rnams bsdus nas 'dul ba la bslab pa'i gnas bcas so/ /dge slong zhes bya ba ni chos 'di la zhugs pa'o/ /bdag gis bslangs zhes bya ba ni shing dang rtswa dang mi'i blas so/ /khang pa zhes bya ba ni spyod lam bzhi dang ldan pa ste/ 'chag pa dang / 'greng ba dang / 'dug pa dang / nyal ba shong ba'o/ /byed ces bya ba ni bdag dang gzhan gyis so/ /bdag po med ces bya ba ni bdag po gzhan med de/ bdag gi phyir rtsig pa'o/ /tshad bzhin du brtsigs shing zhes bya ba ni khang pa de'i tshad ni nang srid du bde bar gshegs pa'i mtho bcu gnyis te/ bcu gnyis la mi tha mal pa'i khru bco brgyad do/ /bde bar gshegs pa'i mtho gang la tha mal pa'i khru phyed dang do'o/ /zheng du bde bar gshegs pa'i mtho bdun zhes bya ba ni mi tha mal ba'i khru phyed dang bcu gcig go/ /nang zhes bya ba ni gal te lhag par byas pa'o/ /dge slong de zhes bya ba ni khang pa brtsig par 'dod pa'i dge slong su yang rung pa'o/ /dge slong dag khrid cig ces bya ba ni de na dge slong dag su yod pa dag khrid par bya'o/ /bdag gi mig gis ma brtags kyi bar du dge slong dag ma khrid cig / bdag gis sngar brtag par bya ba ni sa gzhi 'di na sems can sbrul gdug pa dang sems can sha zan dang / sdig pa dag kyang med pa dang / sa gzhi rgyal po'i gces pa dang / mchod rten gyi gzhir dgos pa dang / lam ka dang / khyim bdag gi sa gzhi'am/ mu stegs can gyi gzhi'am/ dge slong ma'i dbyar mo khang ngam/ shing chen po bcad dgos pa'i sa gzhi zhig yin na rtsed dgos pa der yang ma gsol cig /sa gzhi de nye 'khor khron pa'am/ g.yang sa'am/ lam srang lta bu yong na de yangs pa'i gnas ma yin gyi ma gsol cig / de lta bu mi rung ba dang / rtsod pa dang / mi yangs pa ma yin pa'i gnas su khang pa brtsig pa zhes bya ste/ dge 'dun la gsol bar bya'o/ /des dge 'dun la gsol ba dang las byas nas dge 'dun rnams kyis kyang dge slong de la yid ches par ma byed par yang na dge 'dun thams cad der deng la ltos shig / yang na dge slong gcig cig skos shig /dge slong des kyang dmigs kyis legs par brtags nas gnas rtsod pa yang med/ dog pa yang med/ mi rung ba yang ma yin na/ gdod gsol ba dang zhu ba'i las kyis dge 'dun la gsol nas gdod khang pa brtsig par bya'o/ /dge slong khrid pa'i dge slong dag gis zhes bya ba ni dge slong de na su 'khod pa'o/ /sa gzhi zhes bya ba ni khang pa brtsigs pa'o/ /ltos shig ces bya ba ni so sor brtags pa'o/ /rung ba zhes bya ba ni sbrul dang sdig pa la sogs pa med pa'o/ /mi rtsod ces bya ba ni 'thab mo dang mtshang 'dru ba la sogs pa dang bral ba'o/ /yangs pa zhes bya ba ni de'i khor khor yug 'dom gang tshun chad khron pa la sogs pa med pa'o/ /gal te mi rung bar dge slong des zhes bya ba ni sbrul dang sdig pa la sogs pa gnas pa'o/ /rtsod pa zhes bya ba ni 'thab pa dang mtshang 'dru ba dang 'khrug pa dang bcas pa'o/ /mi yangs zhes bya ba ni gtsug lag khang gi 'dom gang kho ra khor yug nye bar spyod du med pa'o/ /bdag gis bslangs pa bdag po med pa zhes bya ba ni/ bdag po gzhan med pa'o/ /gzhi bstan pa'i phyir/ dge slong dag ma khrid dam zhes bya ba ni gzhi rtog pa'i dge slong ma khrid pa'o/ khrid pa dag la ma bstan tam zhes bya ba ni/ dge slong 'gas gnas brtags pa de dge 'dun la ma bzlugs ma gsol ba'o/ /tshad las 'das zhes bya ba ni tshad gsungs pa las lhag par byas pa'o/ /dge 'dun lhag ma zhes bya ba ni dge 'dun la rag lus pas na dge 'dun lhag ma zhes bshad do/ /nyes par 'gyur ba gang zhe na/ mi rung ba'i gnas su brtsigs na nyes pa sbom por 'gyur ro/ /rtsod pa dang bcas par brtsigs na nyes pa sbom por 'gyur ro/ /mi yangs par brtsigs na nyes par sbom por 'gyur ro/ /lung med par brtsigs na nyes pa sbom por 'gyur ro/ /tshad las 'das par brtsigs na nyes pa sbom por 'gyur ro/ /thams cad dang 'gal bar brtsigs na dge 'dun lhag mar 'gyur ro/ /dge slong gis dge slong gzhan zhig la skyon rnam pa lnga po med pas rtsigs shig ces bsgo ba las thams cad dang 'gal bar brtsigs na rtsig rtsig pa la nyes par 'gyur ro/ /thams cad dang 'gal bar brtsigs pa las ma zin pa dang / phyed tsam bgyis nas bor ba ni nyes pa sbom por 'gyur ro/ /bslab pa byin pa la yang dge 'dun lhag mar 'gyur ro/ /yan lag ni mi yangs pa dang / rung ba ma yin pa dang / rtsod pa can dang / lung med pas ma yin pa dang / tshad las 'das na lhag mar 'gyur ro/ /gtsug lag khang gi gleng gzhi ni sangs rgyas bcom ldan 'das yul kau shAm bI dgra zin gyi kun dga'i ra ba na bzhugs so/ /de'i tshe dge slong drug sde po rnams gzhan gyis brtsigs pa'i gtsug lag khang na 'khod pa bzhin du dga' bo bsnyen dga' bo ltos/ 'di ni gogs/ 'di ni ral/ 'di rtsig pa ma legs so zhes gzhan gyis brtsigs pa'i gtsug lag khang la 'phyas 'dogs pa zhugs pa dang / de na dge slong rnams kyis khyed cag nyid kyis pha gu gcig bslang yang mi nus na/ gzhan gyis brtsigs pa la 'phyar ci yod/ drug sde po nang bgros pa/ lhung bzed nag po can de dag bdag cag la shin tu brnyas kyi/ de dag gis sngon ma brtsigs pa'i khang pa gcig bdag cag gis rtsigs shig / bdag cag kun gyis brtsigs na ni kho yang 'phya na ma legs kyi/ bdag cag gi nang na gang khab kyi rjes su gnya' shing chud par nus pa gcig gis bya'o zhes nas de dag gis tshe dang ldan pa mos pa can dad par byas so/ /mos pa can gyis bsams pa/ gzhan ni med na grong khyer 'di na bram ze phyug po ser sna can bya rog la yang gtor ma mi ster ba ma dad cing su'i yon bdag tu yang ma byas pa zhig yod pa de la 'brid do snyam du bsams nas mos pa can gyis grong khyer gzhan nas bslangs pa'i phye zhig khyer te/ bram ze de'i sgor phyin pa dang / sgo bsam ster to/ /de'i sgo ba yang rol mo zhig la g.yeng ba'i bar du nang du song nas bram ze la phye 'tshag tu bcol ba dang / des bran mo phye 'tshag tu bcug pa dang / bdag gi drung du tshogs shig ces byas so/ /de drung na 'tshag pa'i tshe yang de la rab tu rtog nas/ bram zes khyed ci la rtog ces dris na/ de la srog chags yod dam med rtog go/ /yod na ci bya zhes smras pa dang / de las gleng nas srog bcad du mi rung ba dge ba bcu bshad pas bram ze dad par byas so/ /de nas bram ze des dge slong de la zas dang gos kyis bstabs na des phyin chad sgo bcad du dogs nas len du ma btub po/ /de nas dge slong des bsod nams su bya ba'i legs pa bshad pa dang / des 'o na ngas ci bya ba'i rigs zhes byas pa dang / dge 'dun gyi phyir gtsug lag khang brtsig pa'i rigs so zhes byas so/ /'o na rgyu ni bdag gis sbyor nas gzhi med do zhes byas pa dang sa gzhi ngas rgyal po la bslang ngo / /zhal ta sus bgyi zhes dris na ngas bya'o zhes khas blangs so/ /de nas rgyal po la sa gzhi gsol ba dang / rgyal po'i pho brang 'khor ma gtogs pa gzhan gar dga' bar brtsigs shig ces byas so/ /de nas kau shAm+bI dang / dgra zin gyi bar na bram ze'i bu lnga brgya tsam yod pa rtag par smrang klog pa'i grib shing chen po gcig yod de/ bram ze'i bu de dag rtag tu drug sde yan man 'gro ba la 'phya bas na/ de dag la ku re bya ba'i phyir mtshan mo grib shing chen po bcad de mi mngon par byas nas/ de nyin gcig gis lha khang zin par byas te/ skar khung ma btod pa de'i phyi de nyin char chen po bab ste/ khang pa 'jig par 'gyur bas na bram ze mi dga' zhing khrag gis skyugs par bcom ldan 'das kyis mkhyen nas de mtshan gcig lha'i 'khor dang srod kyi bar du chos bshad nas/ phyi de nyin bram ze phas 'ongs pa la mdun nas bsu ste/ mdang de ltar khang pa'i nang du chos bshad do zhes bka' stsal pas na/ de yang dga' bar gyur to/ /grib shing chen po bcad pas na bram ze'i bu rnams dge sbyong shAkya'i bu rnams mi srun pa'i tshig pa can gzhan la gnod par byed pa zhes mi snyan par 'dzer pa dge slong dag gis snyan du gsol to/ /bcom ldan 'das kyis dge slong drug sde po rnams la rung ba ma yin mthun pa ma yin zhes rnam grangs du ma'i sgo nas smad nas/ dge slong gi dge 'dun rnams bsdus nas 'dul ba la bslab pa'i gnas bcas so/ /yang dge slong gang zhes bya ba ni drug sde po rnams te gzhan yang de dang 'dra ba'o/ /gtsug lag khang zhes bya ba ni spyod lam bzhi dang ldan pa'o/ /bdag po yod ces bya ba ni skyes pa dang bud med dang / ma ning dang / mtshan gnyis rnams so/ /dge 'dun gyi phyir zhes bya ba ni de bzhin gshegs pa'i dge 'dun no/ /dge slong 'di zhes bya ba ni chos 'di dang ldan pa'o/ /dge slong dag khrid cig ces bya ba ni de na dge slong su yod pa'o/ /bdag nyid kyis ma brtags kyi bar du dge slong dag sngar ma khrid cig bdag gis brtags te gnas rung ba dang / yangs pa dang mi rtsod pa yin na dge 'dun la gsol nas dge slong gcig gis blta bar bya'o/ /dge 'dun rnams kyis rab tu brtags nas gsol ba dang zhu ba'i las kyis dge 'dun la gsol nas gzhi rung ba dang / mi rtsod pa dang / lung byin pa yin na the tshom med pa yin gyis rtsigs shig / dge 'dun lhag ma zhes bya ba ni ltung ba de dge 'dun la rag las pas na dge 'dun lhag ma'o zhes so/ /nyes pa ji lta bu zhe na/ gnas mi rung bar brtsigs na nyes pa sbom por 'gyur ro/ /rtsod pa can du brtsigs na nyes pa sbom por 'gyur ro/ /mi yangs par brtsigs na nyes pa sbom por 'gyur ro/ /lung med par brtsigs na nyes pa sbom por 'gyur ro/ /thams cad dang 'gal bar brtsigs na dge 'dun lhag mar 'gyur ro/ /dge slong gis gzhan la rtsig tu bcol na yang gnyis kas dga' bar brtsigs na gnyis ka la nyes pa sbom po'o/ /dge slong la ji ltar nyes par 'gyur ba bslab pa byin pa dang / dge slong ma la yang de bzhin no/ /las dang po la yang nyes pa med do/ /rung ba ma yin pa dang / yangs pa dang / rtsod pa'i sgras ni khang pa gong ma bzhin no/ /rtsa ba med pa'i gleng gzhi ni bcom ldan 'das rgyal po'i khab 'od ma'i tshal bya ka lan da ka gnas pa na bzhugs so/ /de'i tshe na grong khyer sdig pa can zhes bya ba na/ gyad sde rgyal zhes bya ba zhig yod de/ /yang rigs mnyam pa las chung ma blangs nas yongs su spyad pa las bu gcig cig btsas te/ khye'u de yang mal stan chen po'i sting du bshang gci dag mi byed pas na nor dang 'dra'o zhes grags te/ de'i phyir yang ming gyad bu nor du btags so/ /gyad bu nor yang sngon dge ba'i rtsa bas bskul bas na 'di snyam du sems te/ lha dang mir bcas pa dge sbyong dang bram zer bcas pa'i 'jig rten na rkang gcig pa dang / rkang gnyis pa dang / rkang bzhi'i nang na/ sman dang sngags dang rigs pa'i tshig 'dzin pa gang gis bdag 'khor ba'i 'brog dgon pa de nas rab tu thar bar byed snyam sems so/ /des mu stegs kyi mkhan po drug la lung mnos na/ de dag la mi mgu nas rab tu sems shing 'dug pa dang / bar skabs 'dir bcom ldan 'das kyis kyang mi mkhyen pa'am mi gzigs pa med pas gyad bu nor yang sngon gyi sangs rgyas la bya ba byas la rgyud yongs su smin spyod lam gyis 'dul bar gzigs nas dge slong rta thul gyis gyad bu nor rab tu phyung shig par bka' stsal nas/ des kyang rab tu phyung ngo / /gyad bu nor gyis kha don bslab pas ni sde snod gsum lobs/ bsam gtan byas pas ni gong nas gong du 'phar ba'i khyad par thob bo/ /de nas gyad bu nor bcom ldan 'das la phyag 'tshal du bcom ldan 'das kyi gan du phyin to/ /bka' stsal pa/ gyad bu nor bde bar 'ongs sam tshur shog /khyod sus phyin to zhes bka' stsal to/ /de'i tshe na rgyal po'i khab na dge 'dun gyi gnas khang dang mal stan dag mi mthun par 'gyed de/ mdo sde 'dzin pa dang 'dul ba 'dzin par/ mdo sde 'dzin pa dang ni ma mo 'dzin par/ ma mo 'dzin pa dang ni dge slong bsam gtan par/ de ltar nang mi mthun par mal stan dang gnas khang bgos pas na/ gcig la gcig sems mi srung zhing mi mdzem pas na dge ba mi 'phel te mi bde bar gnas pa las/ bcom ldan 'das kyis tshe dang ldan pa gyad bu nor mal stan 'ding bar bskos te/ gyad bu nor gyis mdo sde 'dzin pa dang mdo sde 'dzin par/ 'dul ba 'dzin pa dang 'dul ba 'dzin par/ chos smra ba dang chos smra bar/ bsam gtan pa dang bsam gtan par/ rgan rims su thob rgyal med par gnas khang dang mthun mthun du bgos pas na/ dge slong rnams dge ba'i chos mngon par 'phel ba ni chu can gyi ut+pa la bzhin no/ /glo bur du mtshan mo lhag pa rnams la yang rdzu 'phrul gyis rang gi mdzub mo las me 'bar bar byas nas mal stan mtshan mo bting bas na/ dge slong de dag kyang de ltar 'di 'dra ba'i ston pa dang mtshungs pas bdag cag gis lam stan bting bas na bdag cag nyal ba'i mi rigs zhes nam gyi cha stod dang cha smad la brtson par dge bar byed do/ /slad kyis dge slong drug sde po rnams kyis khyim bdag dad pas mgron du gnyer ba'i tshe/ khyim bdag phyug po dang zas zhim po dag gam tha shal dag tu bsres pas gyad bu nor zas 'gyed par yang bskos so/ /gyad bu nor gyis zas rnam pa gsum du bskos te zas zhim rab dang / bar ma dang tha ma'o/ /dge slong rgan rims kyis dang po ni der zas zhim por bsko/ phyi de nyin ni 'bring por bsko'o/ /de'i yang phyi de nyin ni thar mar ro/ /de'i tshe lho'i ri bo zhes bya ba nas dge slong mdza' bo dang sa can zhes bya ba gnyis ljongs rgyu zhing rgyal po'i khab tu phyin to/ /de gnyis kyis dge 'dun gyi zas 'gyed pa dang / mal stan 'gyed pa su yin zhes smras pa dang / gyad bu nor yin no/ /de nas gyad bu nor gyi gan du song nas mal stan dang zas la skos shig ces smras pa dang / de'i tshe mal stan dang zas bskos zin pas nang gi ngan pa tha mar mal stan thob po/ /bram ze phyug po zhig gis der nga zas la bskos pa dang bram ze de yang bu shi ste brel ba dang / bdag gis der su 'ong zhes dris na mdza' bo dang sa can 'ong zhes thos nas gnas ngan len du spyod pas zhal ta dang rim gro cher ma byas te zas ngan pa zhig byin no/ /de'i phyi de nyin zas 'bring por bskos pa dang / de dag gis kyang zhal ta ma byas te zas ngan pa byin no/ /de'i yang phyi de nyin zas ngan pa bskos pas zas ngan pa thob po/ /de nas de gnyis kyis bsams pa/ kye ma'o bdag cag la gyad bu nor gyis zas ngan pa dang gos ngan pas lan du mar mnar te/ lus kyang dmas par gyur na/ bdag cag gnyis kyis de la gnod pa zhig bya'o snyam nas/ de'i mdza' mo sring mo zhes bya ba la sring mo khyod gyad bu nor dang nyal gyis gyad bu nor ni phas pham pa byung ngo zhes bcom ldan 'das la gsol cig dang nged kyis kyang che bzhi bya'o/ /dge slong ma des kyang bcom ldan 'das la gsol to/ /de nas bcom ldan 'das kyis gyad bu nor la bka' stsal pa/ gyad bu nor khyod kyis thos sam dran nam/ btsun pa bdag gis mi dran nam/ khyod kyis nyes sam btsun pa bdag gis nongs sam ma nongs pa bcom ldan 'das kyis mkhyen to/ /de nas bcom ldan 'das kyis dge slong rnams la bka' stsal pa/ gyad bu nor ni nyes pa med cing dran pa dang ldan par zung shig / dge slong ma mdza' mo ni bdag rang gis khas len pa sma phob shig /dge slong mdza' bo dang sa can gnyis shin tu legs par smros la/ gang du mthong ji ltar mthong / khyod gnyis der ji la dong dong ba las mthong zhes zhib tu smros shig /de nas dge slong rnams kyis bka' stsal pa bzhin du zhib tu rmas pa dang / mdza' bo dang sa can gnyis kyi mching nas tshe dang ldan pa gyad bu nor gyis mi tshangs par spyod cing phas pham par gyur pa ni ma mchis kyi gdugs gsum gyi bar du bdag la zas kyis mnar bas na bdag cag zhe sdang gi dbang gis smras so zhes byas pa dang / de ltar gyur pa dge slong dag gis bcom ldan 'das la gsol to/ /bcom ldan 'das kyis mdza' bo dang sa can gnyis bkug nas/ skyes bu gti mug khyed gnyis kyis zas chung ngu'i phyir shes bzhin du brdzun du smra zhes rnam grangs du ma'i sgo nas smad nas yang dge slong gang zhes 'dul ba la bslab pa'i gnas bcas so/ /yang dge slong gang zhes bya ba ni mdza' bo dang sa can gnyis te/ gzhan yang de dang 'dra'o/ /zhe sdang can zhes bya ba ni khros pa'o/ /zhe sdang gis gnod par byed ces bya ba ni yi ma rangs nas gnod par byed pa'o/ /dge slong gtsang ma zhes bya ba ni gyad bu nor te/ gzhan yang de dang 'dra'o/ /nyes pa med ces bya ba ni rtsa ba'i nyes pa med pas na dngos po med pa'o/ /rtsa ba med ces bya ba yang gsum ste/ mthong ba'i rtsa ba dang / dogs pa'i rtsa ba dang / thos pa'i rtsa ba gsum med pa'o/ /phas pham pa zhes bya ba ni phas pham pa bzhi po gang yang rung ba'o/ /skur zhes bya ba ni klang btab pa'o/ /ci nas 'di tshangs par spyod pa dang dbral lo snyam zhes bya ba ni ci nas dge sbyong gi dngos po dang dbral lo snyam pa'o/ /de yang dus gzhan zhig na zhes bya ba ni phyi zhig na'o/ /dris kyang rung zhes bya ba ni gzhan gyis so/ /ma dris kyang rung zhes bya ba ni bdag nyid kyis 'gyod de mthol ba'o/ /rtsod pa de yang rtsa ba med par gyur zhes bya ba ni rtsod pa'i dngos po med par gyur pa'o/ /rtsod pa rnam pa bzhi ste/ rtsod pas rtsod pa dang / mi 'doms pas rtsod pa dang / ltung ba la rtsod pa dang / bya ba la rtsod pa'o/ /dge slong yang zhe sdang la gnas pa zhes bya ba ni bdag gis skur ba gdab par 'dod pa'o/ /khros te smras so zhes bya ba ni skur ba 'debs pa yin no/ /dge 'dun lhag ma zhes bya ba ni dge 'dun la rag las shing nyes pa lhag ma dang bcas pa'i phyir ro/ /de la nyes pa gang zhe na/ nyes pa bcus lhag mar 'gyur ba dang / nyes pa lngas lhag ma med par 'gyur ro/ /gang zag gtsang ma la skur na'o/ /ma mthong ma thos mi dogs par 'du shes dang blo gros sbas nas mthong ngo thos so dogs so zhes smras na lhag ma re rer 'gyur ro/ /thos dogs la de yang brjed par 'gyur la/ bzod pa dang blo gros dang 'du shes sbas nas ma brjed do zhes smras na lhag ma re rer 'gyur ro/ /thos nas yid ches te ngas mthong ngo zhe'am thos nas yid ma ches par mthong ngo zhes smras sam thos la mi dogs par ngas mthong ngo zhe 'am/ thos la dogs par ngas mthong ngo zhe 'am/ dogs la dogs bzhin du ngas mthong ngo zhes smra na tshig re re zhing lhag ma re rer 'gyur ro/ /rnam pa lngas ltung ba med pa gang zhe na/ mthong ba dang thos pa dang / dogs pa dang / dogs pa yang med la/ 'du shes kyang ma sbas pa'o/ /ngas dogs te de yang brjed thos te de yang brjed ces smras na ltung ba med do/ /gang zag nyes pa byung ba dril brdungs pa bzhin du/ kun gyis shes pa dang / ri mo bris pa dang / bdag gis shes pa bzhin du 'jig rten kun gyis shes pa ni nyes pa med do/ /dge slong gis dge slong la phrin dang phrin yig dang lag brda dang gcig nas gcig du brgyud de skur na sbom por 'gyur ro/ /dge slong gis dge slong smyon pa dang sems 'khrugs pa dang / nad kyis gzir ba dang / glan pa dang / lkugs pa dang / 'on pa dang / ra ro ba la skur na nyes pa sbom por 'gyur ro/ /mtha' 'khob pa'i skad dam dben pa la mi dben pa'i 'du shes sam/ sngags dang sman gyis lus mi snang bar byas te smras sam/ lus kyis dmigs te skur na nyes pa sbom por 'gyur ro/ /dge sbyong dang mu stegs can dang / khyim pa skye bo dang bram ze la skur na thams cad kyang nyes byas su 'gyur ro/ /mi ma yin pa dang / ma ning dang / dge slong ma sun phyung ba dang / pha ma dang / dgra bcom pa bsad pa dang / de bzhin gshegs pa la ngan sems kyis khrag phyung ba dang / mu stegs can dang / mu stegs can du song ba dang / rkun gnas su gyur pa dang sngar 'khrugs pa la skur na nyes pa sbom por 'gyur ro/ /dge slong gis dge 'dun la skur pa dang / dge 'dun bye ba dang / mi gnas pa dang / rjes su phyogs pa dang / bslab pa byin pa la skur na thams cad kyang lhag mar 'gyur ro/ /ltung ba 'og ma la yang de bzhin du sbyar ro/ /bag tsam gyi gling gzhi ni sangs rgyas bcom ldan 'das rgyal po'i khab 'od ma'i tshal bya ka lan da ka gnas pa na bzhugs so/ /de'i tshe na tshe dang ldan pa gyad bu nor rgyal po'i khab kyi bya rgod spungs pa'i ri la rdzing bu rdos bskor zhes bya ba zhig yod de/ de'i 'gram yan man gyad bu nor nyin par der gnas shing bsgom mo/ /de'i tshe dge slong ma ut+pa la'i mdog dge ba'i bshes gnyen 'phags pa maud gal gyi bus rab tu phyung ngo / /tshe dang ldan ma ut+pa la'i mdog sangs rgyas dang / 'phags pa maud gal gyi bu dang / 'phags pa gyad bu nor la sogs pa la rtag tu bsnyen bkur byed cing phyag 'tshal du 'gro'o/ /de'i nyin par 'phags pa maud gal la sogs pa la phyag byas nas/ tshe dang ldan pa gyad bu nor la yang phyag 'tshal te chos nyan pa'i phyir mdun na 'dug go/ /de'i tshe na dge slong mdza' bo dang sa can gnyis kyang rtag tu klan ka tshol ba nan tan byed pas nang par de gnyis phyag dar khrod pa mang zhig btus nas rdzing bu rdos bskor du 'khrur lhags pa dang / de'i tshe ri dwags khyu mang po zhig rdzing bu der chu 'thung du lhags nas/ chu 'thungs zin pa'i 'og tu ri dwags rnams gcig la gcig zhon zhing mi tshangs par spyod pa dang mdza' bo dang sa can gnyis kyis mthong nas gcig la gcig smras pa/ dge slong ut+pa la'i mdog dang gyad bu nor gnyis mi tshangs par spyod kyi/ dge slong dag la bsnyad du 'dong zhes byas pa dang / tshe dang ldan pa khar nyin yang bdag cag ang por do spangs nas/ da yang spang ba'i las byed 'dod dam zhes sa can gyis smras pa dang / des khar nyin ni'u bu cag brdzun gyi/ da ni bag tsam gyi cha las blangs pas rung gis dge slong dag la bsnyad du 'dong ngo zhes byas nas/ de dag dge slong dag la gyad bu nor dang dge slong ma ut+pa la'i mdog mi tshangs par spyod do zhes smras pa dang / dge slong dag gis tshe dang ldan pa khyod gnyis lha dang mi ni shin tu spangs kyi/ byol song dang sems can dmyal ba dang / yi dwags ni mngon par bsnyen to zhes bya ba dang / dge slong dag gis yang gong ma bzhin du ci'i phyir mthong / gang du mthong khyed cag ci la dong dong ste mthong zhes smras pa dang / de gnyis kyis ci ltar gyur pa zhib tu smras pa dang / don nyung ba'i dge slong rnams 'phya ste/ dge slong gtsang ma nyes pa med pa la gzhan gyi cha ma yin pa la phas pham par skur ces smod cing mi snyan par 'dzer to/ /de ltar gyur pa snyan du bdas nas/ legs pa rnam pa bcu la gzigs nas/ yang dge slong gang zhes 'dul ba la bslab pa'i gnas bcas te rtsa ba'i tshig rnams so/ /yang dge slong gang zhes bya ba ni mdza' bo dang sa can te gzhan yang de dang 'dra'o/ /zhe sdang can zhes bya ba ni zhe sdang gis kun nas bskor ba'o/ /khros nas gnod par byed ces bya ba ni yi ma rangs te/ 'khrugs pa ma btang ba'o/ /dge slong gtsang ma zhes bya ba ni gyad bu nor ram gzhan yang de dang 'dra'o/ /ma nyes zhes bya ba ni nyes pa de'i dngos po med pa'o/ /gzhan gyi cha ma yin zhes bya ba gzhan gyi mya ngan las 'das pa ste/ de'i cha ma yin pa ni bzhi ste/ phas pham pa'i chos so phas pham pa zhes bya ba ni bzhi po las gang gis kyang rung ngo / /chos zhes bya ba ni rang gi mtshan nyid 'dzin pas so/ /skur zhes bya ba ni klang btab ba'o/ /de ci nas kyang tshangs par spyod pa dang dbral lo snyam pa ni de ci nas kyang dge slong gi dngos po dang dbral lo snyam du sems pa'o/ /dus gzhan zhig na zhes bya ba ni dus phyi zhig na'o/ /dris kyang rung zhes bya ba ni gzhan gyis so/ /ma dris kyang rung zhes bya ba ni bdag nyid kyis te/ rab tu 'gyod cing rnam par 'gyed pa'o/ /gzhan gyi cha ma yin zhes bya ba ni mya ngan las 'das pa las gzhan pa phas pham par smras pa'o/ /rtsod pa ni rnam pa bzhi ste/ rnam par rtsod pas rtsod pa dang / mi 'doms pas rtsod pa dang / ltung bas rtsod pa dang bya bas rtsod pa'o/ /gzhan gyi cha ma yin pas rtsod pa yang bag tsam gyi cha las 'ga' zhig ces bya ba ni ri dwags pho mos 'khrig pa'i cha las blangs pa'o/ /chos zhes bya ba ni chos ma yin par chos kyi sgrar gsungs so/ /blangs pa yin zhes bya ba ni gzung ba yin no/ /dge slong yang zhe sdang la gnas pa zhes bya ba ni klang gdab par 'dod pa'o/ /khros te smras so zhes bya ba ni klang 'debs pa'o/ /dge 'dun gyi lhag ma zhes bya ba ni snga ma bzhin no/ /nyes pa gang zhe na/ dge slong gis dge slong la phas pham pa'i thong ba byung ba mthong nas des de la ltung ba ma yin no snyam du bltas la 'du shes dang blo gros sbas nas phas pham pa byung ba mthong ngo zhes smras na lhag mar 'gyur ro/ /dge slong gis dge slong la phas pham pa byung ba mthong na des dge 'dun gyi lhag ma'o snyam du bltas la 'du shes dang bzod pa sbas na phas pham pa'i ltung ba byung ngo zhes smras na lhag mar 'gyur ro/ /de bzhin du ltung ba rigs lnga la yang sbyar ro/ /dge 'dun gyi lhag ma mthong ba dang / spangs pa dang / ltung ba dang / so sor bshags pa dang / nyes byas byung ba mthong ba la nges 'du shes sbas na blo gros sbas nas phas pham pa byung ngo zhes bya ba smras na thams cad du lhag mar 'gyur ba de re rer sbyor cig /kun gyis shes pa dang / ri mo bris pa 'dra ba dang / las dang po pa la nyes pa med do/ /dge 'dun gyi dbyen gyi gleng gzhi ni sangs rgyas bcom ldan 'das rgyal po'i khab 'od ma'i tshal bya ka lan da ka gnas pa na bzhugs so/ /de'i tshe dge slong lha sbyin dang / de'i grogs rjes su phyogs pa dge slong ko ka li ka dang / khaN+Da dra ba bya dang / ka Da mo ra ka ti Sh+ya dang / rgya mtshos byin la sogs pa dge 'dun 'dum pa dbye ba la zhugs nas gsol ba dang zhu ba'i las kyis lan gsum gyi bar du bzlog kyang ma btub nas/ de bzhin gshegs pa'i bka' bcag pas nyon mongs pas na dge 'dun gyi lhag ma bcu pa dang bcu gcig pa bcas pa'o/ /de'i tshe rgyal po'i khab na mu ge chen po byung nas/ kha zas rab tu dkon te rnyed par dka' nas dge slong rdzu 'phrul thob pa rnams gyis 'dzam bu'i gling nas shing 'dzam bu'i 'bru dang skyu ru ra'i 'bras bu la sogs len/ dge slong kha cig gis byang gi sgra mi snyan gyi gling nas ma btab ma rmos pa'i 'bras len/ kha cig rgyal chen bzhi dang sum cu rtsa gsum du dong nas lha'i zas kyis lhung bzed bkang ste khyer te 'ongs nas bdag kyang za dge slong gzhan rnams la yang sbyin no/ /de nas lha sbyin gyis bsams pa/ da ltar kha zas dkon zhing sdug bsngal che na bdag gis kyang rdzu 'phrul mngon par bsgrubs la bdag kyang zas gzhan la yang sbyin no snyam nas bcom ldan 'das la rdzu 'phrul gyi lam zhig dri'i snyam du bsams pa dang / bcom ldan 'das kyis lha sbyin la rdzu 'phrul bstan na de lta bu'i sdig pa'i 'dod chen skyed par mkhyen nas phung po lnga la rtog tu bcug nas rdzu 'phrul ma bstan to/ /de bzhin du gnas brtan lnga brgya po la dris pa dang / sems kyis brtags nas rdzu 'phrul ma bstan to/ /de nas 'od srungs stobs bcu la dris pa dang / des rdzu 'phrul gyi lam bstan te/lha sbyin gyis rnal 'byor la brtson par gnas pas rdzu 'phrul mngon par thob ste/ lus sna tshogs su bsgyur nas nam mkha' la ni bya bzhin/ chu la ni nya bzhin du rgyal po ma skyes dgra yang mgu bar byas te/ de'i mchil ma yang 'thungs nas ma skyes dgras kyang lha sbyin gyi 'tsho ba yang sbyar ro/ /de nas lha sbyin gyis bcom ldan 'das ni rgas thug ste/ 'khor rnam bzhi la ston kyang mi nus la 'o brgyal gyis 'khor rnam bzhi bdag la gtad par gsol na/ bka' stsal pa/ ngas shA ri'i bu dang maud gal gyi bu la yang ma gtad na skyes bu blun po khyod la ci smos zhes ma gnang ngo / /de nas lha sbyin gyis dge slong grogs ka Da mo ra ka la sogs pa lnga po la khe mo tshur shog / dge sbyong gau ta ma 'dug bzhin du 'khor nyan thos rnams 'khrug par bya'o/ /'u bu cag 'das pa'i 'og tu phyogs phyogs su grags par 'gyur ro/ /zhes bgros nas/ gnas brtan dag ni longs spyod kyis kha drangs/ gzhan ni longs spyod dang bslab pas kha drangs nas/ dge slong 'khor lnga brgya kha drangs so/ /bslab pa lnga bcas te/ 'o ma mi btung ba dang / sha mi bza' ba dang / lan tshwa mi bza' ba dang / skyes bu'i mthu rtsal la gnod pas ras kha tshar bcas pa mi gon pa dang / byin pa'i chos longs spyod bkag pas dgon par mi gnas so zhes bya ba bcas so/ /de ltar gyur pa dge slong gis bcom ldan 'das la gsol to/ /bcom ldan 'das kyis lha sbyin bkug nas lha sbyin de ltar byed pa bden nam zhes smras pa dang / mad do zhes gsol to/ /de ltar gyur pa de'i phyir 'dul ba la bslab pa'i gnas bcas te/ yang dge slong gang zhes bya ba ni rtsa ba'i tshig rnams so/ /de nas bcom ldan 'das kyis dge slong rnams la bka' stsal pa/ lha sbyin dang rjes su phyogs pa'i dge slong dang gzhan yang 'di 'dra ba'i tshig bzhams te bsgo bar bya'o/ /de ste yang gtong du yang ma btub na gsol ba dang bzhi'i las kyis lan gnyis lan gsum du bsgo bar bya'o/ /yang dge slong gang zhes bya ba ni lha sbyin te gzhan yang de dang 'dra'o/ /mthun pa zhes bya ba ni rnam pa drug ste/ cha lugs dang / las dang / tshul khrims dang / lta ba dang / 'tsho ba dang / spyod lam mthun pa de lta bu drug ces bya'o/ /dge 'dun zhes bya ba ni de bzhin gshegs pa'i nyan thos kyi dge 'dun no/ /dbyen byed ces bya ba ni ston pa dang lam gzhan du gzud cing rnam pa gnyis su 'byed pa'o/ /de'i phyir zhugs zhes bya ba ni rtsod par zhugs pa ste/ tshul khrims sam gsol ba byed pa'o/ /dbye ba'i phyir yang zhes bya ba ni zas la sogs pa byin pa dang / grogs po la sogs pa'o/ /rtsod ces bya ba ni 'khrug pa'i rtsod pa'o/ /dge slong rnams zhes bya ba ni las ma byas par bzhams te bsgo zhing slar bzlog par bya'o/ /yang dag par bzung ste zhes bya ba ni sems kyis so/ /rab tu 'dzin ces bya ba ni mngon par chags pas na mi 'gyur ba'o/ /mnyam du zhes bya ba ni chos dang zang zing gi longs spyod la mtshungs pa'am/ phan tshun dad pa la sogs pas sbyin pa la mnyam du 'tsho ba'o/ /kun du dga' zhes bya ba ni dge ba'i tshogs 'phel bar dga' ba'am/ ting nge 'dzin bsgrub pa la dga' ba'o/ /rtsod pa zhes bya ba ni lta ba log par gyur pa la spang bar bya'o/ /rtse gcig ces bya ba ni sems gzhan du mi 'gyur bar thub par bya'o/ /'don ces bya ba ni so sor thar pa'i mdo 'don pa tha dad du mi 'byed pas ni gcig pa'o/ /chu dang 'o ma gcig tu 'des zhes bya ba ni gcig la gcig rim gro byed cing ston pa'i phyir ro/ /ston pa'i bstan pa rgyas par bya ba'i phyir zhes bya ba ni gzhan gyis 'gran par mi byed pas na/ bcom ldan 'das kyis gsung rab bshad cing ston tam bshad cing phye na rgyas par 'gyur ro zhe'o/ /de ltar gsung rab rgyas dang slob ma'i 'khor dge 'dun rnams tshe 'di la bde bar gnas par gyis shig pa'o/ /de yang ji ltar bde zhe na/ lus ni bde ba'o/ /sems ni reg pa'o/ /bzhams te bsgo ba'i tshe ma mnyan na nyes byas su 'gyur ro/ /gsol ba dang zhu ba'i las kyis bsgo ste ldog tu ma btub na nyes pa sbom po gsum dang dge 'dun gyi lhag ma gcig go/ /lan gnyis lan gsum zhes bya ba ni ha cang nyung na yang g.yengs pa kha cig gis mi go la ha cang mang na yang ring du thogs pa'i phyir ro/ /yang dag par bsgo ba zhes bya ba ni dge ba la gzhug par bya ba'o/ /yang dag par bstan zhes bya ba ni mi dge ba las bzlog par bya'o/ /'khor 'gyed par bsams nas gzhan gyi 'khor kha drangs na nyes pa sbom por 'gyur ro/ /gal te dge 'dun 'dus nas chos bzhin du ma byas na smra ba rdzogs kyang nyes pa med do/ /chos bzhin du byas kyang tshogs na ltung ba med do/ /'dus kyang chos kyi gzugs brnyan gyis bsgo na yang nyes pa med do/ /dge 'dun yang tshogs la ston pa'i bstan pa ji lta ba dang / 'dul ba ji lta ba bzhin du bsgo na dge 'dun lhag mar 'gyur ro/ /nyes pa rab tu ma bshags ma mthol bar dge 'dun gyi nang du 'jug cing gnas na thams cad du nyes byas su 'gyur ro/ /rjes su phyogs pa'i gleng gzhi ni gong ma dang gcig go/ /de nas bcom ldan 'das gdan de nyid la bzhugs bzhin du rjes su phyogs pa'i bslab pa bca' bar dgongs nas dge slong rnams la bka' stsal pa/ dge slong dag dge 'dun gyi bya ba cung zad cig yod kyi skad cig sdod cig ces bka' stsal pa/ bcom ldan 'das kyis mkhyen bzhin du 'dri bas na/ ko ka li ka dang / ka Da mo ra ka la sogs pa la de lta bur rjes su phyogs pa bden nam zhes smras pa dang / mad do zhes gsol nas/ dge sbyong gi bya ba ma yin na zhes rnam grangs du ma'i sgo nas smad nas/ yang dge slong zhes bya ba rtsa ba'i tshig rnams so/ /dge slong rjes su phyogs pa rnams la dge 'dun rnams kyis chos dang mthun pa 'dul ba dang mthun pa'i tshig gis lan gnyis lan gsum du bsgo bar bya/ bstan par bya yang dge slong zhes bya ba ni lha sbyin no/ /grogs su gyur ces bya ba ni ko ka li ka la sogs pa'o/ /dbyen byed par phyogs zhes bya ba ni lta ba dang / de'i 'don pa dang / de'i bsam pa'o/ /gcig gam gnyis sam mang po zhes bya ba ni dge 'dun ma longs pa dbyen mi srid pas bzhi yan chad la bya'o/ /gal te de dag dge slong rnams la zhes bya ba ni chos 'di la zhugs pa'o/ /de skad kyang zer zhes bya ba ni smra ba'o/ /tshe dang ldan pa dag dge slong 'di la zhes bya ba ni lha sbyin la bya'o/ /dge yang rung zhes bya ba ni dge ba la ma sbyor cig pa'o/ /sdig kyang rung zhes bya ba ni sdig pa las ma bzlog cig la'o/ dge slong 'di ni chos smra ba 'dul ba smra ba zhes bya ba ni de dag gi don dang mthun pa'o/ /mi shes pa ma yin zhes bya ba ni don rtogs pa'i dge slong de gang la dad pa bdag cag kyang dad do zhes bya ba ni dge slong rjes su phyogs pa lnga po rnams/ lha sbyin gyi bsam pa dang mthun pa'o/ /yang dag par bstan yang dag par bsgo zhes bya ba ni snga ma bzhin no/ /rjes su phyogs pa la zhugs na thams cad du nyes byas su 'gyur ro/ /tshig bzhams te bsgo nas ma btub na nyes pa sbom por 'gyur ro/ /gsol ba dang zhu ba'i las kyis lan gsum du bsko ste/ gtong du ma btub na nyes byas gcig dang sbom po gsum dang lhag ma gcig tu 'gyur ro/ /bsdum par bzhams te ma bsgo bar gsol ba dang / bzhi'i las kyis sngar bsgo na bsgo bar yang mi chud la dge 'dun yang nyes byas so/ /bsdum par bzhams te sngar bsgo nas gsol ba dang bzhi'i las kyis bsgo na bsgo bar yang chud de nyes pa med do/ /las dang po pa la sogs pa la nyes pa med do/ /rigs sun pa'i gleng gzhi ni sangs rgyas bcom ldan 'das mnyan du yod pa na bzhugs so/ /de'i tshe na yul srin bu ri zhes bya ba na dge slong tha skar skyes dang / nab so dang / dge slong dur kha dang dmar zhes bya ba'i dge slong rnams 'khod do/ /de dag rigs sun pa'i sdig pa'i chos kun du spyod pa ni 'di lta ste/ gnas dang longs spyod gnyis kyi sgo nas rigs sun par byed do/ /de dag la gnas kyi sgo nas rigs sun pa ni bud med dang stegs gad rgyangs byed/ 'dzum snyegs lus kyis snyogs shing stan gcig la 'dug pa'o/ /de la longs spyod kyi sgo nas rigs sun pa ni bud med dang snod gcig gi nang du za/ phor bu gcig gi nang du 'thung / glu len/ rnga rdung / gar byed/ 'jong mo dang / glang po che dang / rta dang / bya gag dang / ngur ba lta bu'i skad 'byin de dag 'thab tu gzud/ de ltar rtsed mo sna tshogs byed pas na/ de na gnas pa'i skye bo rnams mi dga' zhing rigs rnams sun pas na skye bo de dag kyang ma dad nas de na gnas pa'i dge slong rnams la yang bsod snyoms mi ster zhing yul gzhan du spong bar byed na glo bur du lhags pa la lta zhig ci smos/ de nas dus gzhan zhig na tshe dang ldan pa kun dga' bo yul snang ba can du ljongs rgyu zhing 'gro ba las de'i nub mo srin bu'i ri'i nags na gnas/ nang par grong khyer du bsod snyoms la zhugs pa dang / bsod snyoms kyang ma rnyed lan kyang ma thob nas kun dga' bos bsams pa nyan thos byis pa mi mkhas pa mi gsal ba 'ga' zhig gis rigs kyi bu mo dag la kha ngan nam lus kyis kun du reg pa zhig byas so snyam du sems so/ /de nas tshe dang ldan pa kun dga' bos sngon chad srin bu ri'i grong khyer de 'byor pa dang rgyas pa dang / lo legs pa dang / skye bo dad pa mang po dag dang ldan pas bsod snyoms dag kyang rnyed sla na da ci nyes zhes skye bo'i tshogs mdun ma pa lnga brgya tsam gyi nang du dris pa dang de'i nang na dge bsnyen chur 'jug ces bya bas dge slong tha skar la sogs pas rigs sun pa'i chos mang du byas so zhes kun dga' bo la rgyas par gsol to/ /kun dga' bos snyan du gsol nas bka' stsal ba/ dge slong gnas brtan dag dang / kun dga' bo nyid song la/ dge slong tha skar skyes dang / nab so gnyis la/ dge sbyong gi chos ma yin pa rnam pa sna tshogs kyi sgo nas gling ba po'i dge slong gsol ba dang zhu ba'i las kyis lam du bskos te/ de rnams bskrad par gyis shig ces bka' stsal nas de nas dge slong tha skar skyes dang / nab so gnyis po la spang ba'i las byas pa dang / ngur kha dang dmar gyi dge slong bdag cag la yang bskrad pa'i las byed par 'ong gis mnyan du yod par bros te dong ngo zhes mnyan du yod par dong nas nyes pa rnams bshags shing mthol/ sems kyi rnam par rtog pa rnam pa sna tshogs kyang yongs su bsdams nas dge slong rang bzhin du gnas pa dang 'dra bar gnas so/ /tha skar skyes dang nam so gnyis kyang spang ba'i las byas pa dang / bdag cag kyang sa la bsgyel na slar yang sa la brten te ldang ba bzhin du bcom ldan 'das nyid la mthol zhing bshags na legs so snyam nas mthar gyis rgyu zhing mnyan du yod par phyin te/ dge slong gnas brtan dag dang ngur kha dang dmar gyi dge slong dag dang phrad nas de na gnas pa'i dge slong gcig gis kyang bltar yang mi btub phyag kyang mi 'tshal lo/ /de gnyis kyis smras pa/ dge slong gzhan ni yus na ngur kha dang dmar gyi dge slong gnyis bdag cag dang 'dra bar nyes pa byed byed na ci ste bdag cag la mi smra zhes byas pa dang / bdag cag ni bshags shing mthol zin pas so zhes byas pa dang / de gnyis khros te bdag cag nyes pa 'dra ba kho na las kha cig ni bskrad kha cig ni ma bskrad pa las dge slong kun dga' bo la sogs pa kha cig ni 'dod chags kyi dbang du 'gro/ kha cig ni zhe sdang gi dbang du 'gro/ gti mug gi dbang du 'gro'o zhes 'dzer ba dang / dge slong rnams bdag cag gis nyes pa sna tshogs byas te/ kun dga' bo dang / gnas brtan dag gis gsol ba dang / zhu ba'i las kyis bskrad par shes bzhin du de skad 'dzer ces 'phya bzhin du snyan du gsal to/ /de nas bcom ldan 'das kyis 'di skad du smra ba dang gzhan yang 'di 'dra ba la dge 'dun rnams kyis tshig 'jam pos sgo shig ces rtsa ba'i tshig rnams so/ /rtsa ba'i tshig rnams kyis bzhams te bsgo yang gtong du ma btub na/ gsol ba dang zhu ba'i las kyis lan gnyis lan gsum du bsgo bar bya'o zhes bka' stsal pa dang / lan gnyis lan gsum du bsgo yang gtong du ma btub pa dang / de ltar gyur pa de'i phyir yang dge slong gang rigs sun pa'i chos byas na dge slong lhag mar 'gyur ro zhes 'dul ba la bslab pa'i gnas bcas so/ /dge slong dag ces bya ba ni tha skar skyes dang nab so gnyis te/ gzhan yang de dang 'dra'o/ /mang po zhes bya ba ni dge slong gnyis yan chad la mang po zhes bya'o/ /grong ngam grong rdal zhes bya ba ni srin bu ri'o/ /de dag kyang rigs sun par byed ces bya ba ni rigs ni bram ze dang / khyim bdag gi rigs te/ de yang rnam pa gnyis kyis sun par byed de gnas dang longs spyod do/ /snang ba zhes bya ba ni mig gi rnam par shes pas so/ /thos so zhes bya ba ni rna ba'i rnam par shes pas so/ /rab tu shes zhes bya ba ni de las gzhan pa'i rnam par shes pas so/ / sdig pa'i chos kun du spyod ces bya ba ni nyes pa sna tshogs byed pa'o/ /dge slong rnams kyis zhes bya ba ni chos 'di pa la zhugs pas so/ /tshig 'di skad smros shig ces bya ba ni tshig 'jam pos bsgo ba'o/ /ji skad bsgo ba ni snga ma bzhin no/ /tshig 'jam pos bsgo na dngos po de gtong ba lta na ni zhes bya ba de ltar lta ba yongs su gtong ba'o/ /gal te mi gtong zhes bya ba ni yongs su mi 'dor ba'o/ /lan gnyis lan gsum du yang dag par bstan par bya ba ni gsol ba dang zhu ba'i las kyis bstan cing bsgo ba'o/ /nyes pa ji lta bu zhe na/ dge slong rnams kyis spangs pa'i las byas par shes bzhin du de dag la 'dod pas zhe sdang gis gti mug gis 'jigs pas 'gro zhes zer na thams cad du nyes byas su 'gyur ro/ /tshig 'jam pos bsgo ste ma btub na nyes byas su 'gyur ro/ /gsol ba dang zhu ba'i las kyis bsgo ste ma btub na sbom po gsum dang lhag mar 'gyur ro/ / bzhams te ma bsgo bar gsol ba dang zhu ba'i las kyis sngar bsgo na dge 'dun la yang nyes byas su 'gyur la bsgo bar yang mi chud do/ /bzhams te yang bsgo la gsol ba'i las kyang byas na bsgo bar yang chud de nyes pa med do/ /bskrad pa'i las ma byas par bzhams te sngar bsgo bar mi chud de dge 'dun la nyes byas so/ /bskrad pa'i las bgyis shing bzhams te bsgo na bsgo bar yang chud la nyes pa yang med de/ bskrad pa'i las ma bgyis par gsol ba dang bzhi'i las kyis bsgo na bsgo bar yang mi chud de dge 'dun la nyes byas so/ /bskrad pa yang byas la gsol ba dang bzhi'i las kyis bsgo na bsgo bar yang chud de nyes pa med do/ /las dang po pa la sogs pa la nyes pa med do/ /bka' blo mi bde ba'i gleng gzhi ni sangs rgyas bcom ldan 'das yul kau shAm+bI dgra zin gyi kun dga' ra ba na bzhugs so/ /de'i tshe kau shAm+bI na dge slong mos pa can la ltung ba byung nas chos bzhin du slar mi byed de/ de ltung ba byung ba grogs po kha cig gis mthong nas grogs po phan par 'dod rnams kyis de la bskul zhing ltung ba shogs shig ces byas na/ su la ltung ba byung ba de slar byed grang ngas ni ltung ba ma mthong ngo / /khyed la ltung ba byung na gzhan du bshags te/ su mthong ba de ltung ba chos bzhin du bshags shing byed grang / tshe dang ldan pa dag dge yang rung / sdig kyang rung cung zad kyang nga la ma smra shig /dge yang rung zhes bya ba ni dge ba la ma gzhug cig pa'o/ /sdig kyang rung zhes bya ba ni sdig pa las ma bzlog cig pa'o/ /khyed rigs dang rus tha dad pa las rab tu byung ba 'dab ma rlung gis brdabs nas gcig tu spungs pa dang 'dra ba khyed cag yin na/ nged kyi rigs las ni byang chub thob po zhes zer ba don nyung ba'i dge slong rnams 'phya ste bde bar gshegs pa'i mdor gtogs pa rnams kyis bsgo na/ ngag mi nyan to zhes snyan du gsol to/ /bka' stsal pa/ dge slong mos pa can dang gzhan yang de dag dang 'dra ba la bslab pa'i mdor gtogs pa rnams kyis bzhams te bsgo bar bya'o/ /zhes rtsa ba'i tshig rnams so/ /de ste yang ltung ba bshags su ma btub na gsol ba dang bzhi'i las kyis lan gnyis lan gsum du bsgo bar bya'o/ /lan gnyis lan gsum du bsgo ste ma btub na nyes byas gcig dang / sbom po gsum dang dge 'dun gyi lhag mar 'gyur ro zhes 'dul ba la bslab pa'i gnas bcas so/ /dge slong 'ga' zhig ces bya ba ni mos pa can te gzhan yang de 'dra ba'o/ /bka' blo mi bde ba'i rang bzhin zhes bya ba ni mthun pa dang rigs pa dang legs su dga' ste smras pa la nyan du mi btub cing log par 'dzin pa ni bka' blo mi bde ba zhes bya'o/ /bstan par gtogs zhes bya ba ni phas pham pa bzhi nas rtsod pa zhi ba bdun gyi bar du ste/ ltung ba'i ris lnga la bya'o/ /bde bar gshegs pa'i mdor gtogs zhes bya ba ni mdo sde'am mngon pa'i chos la bya'o/ /dge yang rung zhes bya ba ni phan pa can no/ /dge slong rnams zhes bya ba ni chos 'di la zhugs pa'o/ /chos dang mthun zhes bya ba ni mdo sde dang ma mo la bya'o/ /'dul ba dang mthun zhes bya ba ni 'dul ba de nyid do/ /bsgo zhes bya ba ni chos dang 'dul ba ji lta ba bzhin du bsgo ba'o/ /khyed kyis bdag la bsgo bas chog gis zhes zer ba ni bka' blo mi bde ba la gnas pa'o/ /dngos po de spang ba'i phyir tshig 'jam pos sgo shig ces bya ba ni gsol ba dang zhu ba'i las ni gong ma dag dang 'dra'o/ /bstan pa'i mdor gtogs pa rnams kyis bsgo ste ma btub na thams cad du nyes byas su 'gyur ro/ /gsol ba dang zhu ba re re la yang sbom po re rer 'gyur ro/ /chos bzhin la ma tshogs pa dang / tshogs pa las chos kyi gzugs brnyan dang / chos ji lta ba dang / 'dul ba ji lta ba bzhin du ma bsgo na nyes pa med do/ /dgu ni dang po dag nyid kyis so zhes bya ba ni byung ma thag tu lhag mar 'gyur ro/ /lan gnyis lan gsum bsgo nas lhag mar 'gyur ba ni dbyen dang rjes su phyogs pa dang / rigs sun pa dang bka' blo mi bde ba'o/ /de dag las gang yang rung zhes bya ba ni lhag ma bcu gsum po dag byung ba la bya'o/ /ji srid du zhes bya ba ni dge 'dun gyi lhag ma byung nas ji srid du bcas pa'o/ /ji srid du bcas pa de srid du chad pa byed du chug shig pa'o/ /sems 'khrugs pa dang / nad kyis gzir ba dang / mi dran pa la nyes pa med do/ /gang zag de'i chad pa ni dge slong rang bzhin du gnas pa dang / stan gcig la mi 'dug lhan cig mi 'chag khyim gcig na mi nyal/ dge slong thams cad kyi 'jug tu gzhag /bsil yab g.yob pa dang lhung bzed bkru bar bya/ chad pa byas nas zhag drug gi bar du dge 'dun la mgu ba'i las bya'o/ /ma bcabs na chad pa mi dgos te mgu bar zad do/ /chad pa byed du gzhug pa ni nga rgyal med pa dang bcas pa'i nyes pa med pa'i phyir ro/ /nang sbyang bar bya ba'i phyir yid mgu bar byed du gzhug go/ /ltung ba las 'byin pa'i phyir 'byung bar gsol lo/ /dge 'dun la rag las zhes bya ba ni dbang yod pa'i don to/ /dge slong nyi shu med ces bya ba ni grangs ma tshang na mi phyin zhes bya ba'i don to/ /de ni 'du shes zhes bya ba ni nges pa'o/ /yang na phyin pa'i dus 'dis zhes bya ba'i rgyu ste gzhung 'di la bya'o/ /glengs shing dran par byas pa la bdag nyid bka' blo mi bde ba la gnas na nyes byas so/ /ma glengs shing dran par ma bgyis par bdag nyid bka' blo mi bde ba la gnas na bsgo ba mi 'chags so/ /mtshams kyi nang rol nas bsgo'am/ phyi rol nas bsgo 'am sa la 'dug ste nam mkha' la 'jug pa'am/ dge 'dun gyis dge 'dun longs pa la bsgo na bsgo bar mi chud do/ /dge 'dun lhag ma bcu gsum mi brjed pa'i tshig go/ /gnyis mi mngon pa'i gleng gzhi ni sangs rgyas bcom ldan 'das mnyan du yod pa na bzhugs so/ /de'i tshe mnyan du yod pa na tshe dang ldan pa 'char ba po bsod snyoms las 'khor te/ khyim bdag gi chung ma sbed ma'i khyim du song ngo / /de stan bting ba la 'dug pa dang / sbed ma yang 'char ba la chos nyan pa'i phyir 'char ba dang stan gcig la pus mo sprad de skyabs yod pa na 'dug cing chos 'chad pa dge bsnyen ma sa gas mthong nas/ de ltar ma dad pa rnams kyis mthong na ni dge sbyong gi chos ma yin pa zhig byed du gdon mi za'o zhes sgur par yang 'gyur na de lta bu mi mdzes pa nyan thos rnams la spangs pa'i phyir dge bsnyen ma des snyan du gsol to/ /legs pa bcu gzigs nas bka' stsal pa/rnam grangs du ma'i sgo nas smad nas/ yang dge slong gang zhes 'dul ba la bslab pa'i gnas bcas so/ /dge slong gang zhes bya ba ni 'char ba ste/ gzhan yang de dang 'dra'o/ /bud med ces bya ba ni mi tshangs par spyad pa'i chos bzod pa'o/ /lhan cig ces bya ba ni de dang lhan cig pa'o/ /gnyis zhes bya ba ni skyes pa dang bud med gnyis so/ /dben pa zhes bya ba ni gang na skyes pa'am/ bud med dam/ ma ning gzhan su yang med pa'o/ /skyabs yod pa zhes bya ba ni rtsig pa 'am sab mo'am/ yol bas bskyabs pa'o/ /stan la zhes bya ba ni stan gyi rnam grangs su gtogs pa gang yang rung ba'o/ /'dug ces bya ba ni 'dom gang gis 'khor ba na rkub bzhag cing 'dug pa'o/ /'dod pa chog pa zhes bya ba ni mi tshangs par spyod du khom pa'i phyir chog pa'o/ /dge bsnyen ma'i tshig gis nges par bya ba ni bden pa bzhi la the tshom med cing rtogs la dkon mchog gsum la skyabs su song ba mngon par btul ba srog gi phyir yang brdzun du mi smra ba ni dge bsnyen ma yid ches pas zhes bya ba'o/ /chos gsum las gang yang rung zhes bya ba ni phas pham pa dang lhag ma dang ltung ba ste/ de dag las gang yang rung ba'o/ /dge slong bud med dang stan gcig la 'dug pa'am/ chang 'thung ba'am/ gong du smos pa gsum las gang yang rung ste/ sdig pa'i las su byed pa cung zad cig mthong ngo zhes dge bsnyen ma smra na de dag las gang dge slong gis khas len pa byed du chug shig ces byed du bcug pa ni ltung ba bshags shing byed du gzhug pa'o/ /'di ni ma nges pa'i chos so zhes bya ba ni chos de dag gtan la ma phebs pa'o/ /de la nyes pa ni dge bsnyen yid ches pa'i tshig gis gang dang gang glengs pa de dang de byed du gzhug go/ /de ste khas mi len na gsol ba dang zhu ba'i las kyis nyes pa'i ngo bo nyid tshol du gsol cig / nyes pa mthong na khas mi len na nyes pa'i ngo bo nyid tshol ba'i dge slong gis chad pa rab tu dbyung bar mi bya/ bsnyen par rdzogs par mi bya/ dge tshul g.yog byed du mi gzhug /mtshams kyi nang na dge slong tshul khrims nyams sam/ lta ba nyams pa'am/ 'tsho ba nyams pa'am/ spyod lam nyams pa la ma gleng shig /dran par ma byed cig /lung ston pa'am 'doms su ma gzhug shig /'dul ba 'dzin pa'i dge slong yod na dge 'dun gyi dbus su 'dul ba ma 'chad cig /gso sbyong dang tshul nas 'byung ba'i tshe/ gsol ba dang las kyi nang du ma gzhug cig / de kun byas na nyes byas su 'gyur ro/ /ma nges pa gnyis pa'i gleng gzhi ni bcom ldan 'das rgyal po'i khab na bzhugs so/ /de'i tshe dge slong ri bo dang khyim bdag gi chung ma nyes sman gnyis 'dod pa ni mi chog par stan la 'dug pa dge bsnyen ma legs skyes mas mthong ste/ de ltar gyur pa snyan du gsol nas 'dul ba la bslab pa'i gnas bcas so/ /'dod pa chog par bya ba'i nyes pa de med de phas pham par mi 'gyur bas na/ chos gnyis zhes bya ba smos te/ gnyis ni dge 'dun gyi lhag ma dang ltung ba ste/ de dag gang gis gleng ba de byed du gzhug go/ /ma nges pa ni snga ma gcig pur ma zad kyi 'di yang ma nges pa'i chos yin pas na gtan la ma phab pa'i don to/ /so sor thar pa'i mdo gdon pa bzhi pa mi brjed pa'i tshig go/ /spang ba'i ltung byed las brtsams te 'chang ba'i gleng gzhi ni bcom ldan 'das mnyan du yod pa na bzhugs so/ /de'i tshe dge slong dag de lta bu'i gos mang por gyur te gos la longs spyod de/ gtsug lag khang chag chag gdab pa la sogs pa las sna re byed kyang gos lan re brje zhing gon nas kha ton dang lung dbog pa dang / bsam gtan byed pa'i bar chad du gyur nas/ dge slong rnams kyis snyan du gsol to/ /de'i tshe sman pa'i rgyal po 'tsho byed kyis ras bzang po gcig sangs rgyas la yon du phul nas kun dga' bo la chos gos su drubs shig ces bka' stsal nas/ sangs rgyas kyi chos gos gsum du drubs pa dang lhag ste kun dga' bo nyid dang / sras rA hu la gnyis kyi yang stod g.yogs gnyis dang lnga longs so/ /de nas bcom ldan 'das lo sar gyi lhags pa che ba'i yul a la byir zhes bya bar gshegs nas de'i nub mo srod la ni chos gos lnga pa gsol to/ /des kyang mi thub ste grang bar gyur nas gung la chos gos bdun pa gsol to/ /des kyang mi thub nas tho rangs chos gos sbyar ma gsol na lhags pa thub pa dang / nga lta bu sha mdangs 'jam zhing gzhon pa yang chos gos gsum gyis chog na/ khyed la des cis mi chog ces 'dod pa chung ba dang mgu sla ba dang / yo byad nyung ngus chog pa dang / nyung ngu la sogs pa'i bsngags pa brjod de/ dge slong gos mang du 'chang zhing yo byad mang po la chags pa la rnam grangs du ma'i sgo nas smad nas/ yang dge slong chos gos zin te gtan pa phyung nas chos gos gsum bcos shig ces 'dul ba la bslab pa'i gnas bcas so/ /de ltar bslab pa bcas pa dang / khyim bdag gcig gis kun dga' bo la bdag gis snga mo zhig nas btsun pa 'od srungs chen po lha dang mi'i mchod pa'i gnas de la bdag gis bshos dang gos shig gsol bar bgyi ba las bdag cag khyim pa las kyis brel te phyag tu ma phul na 'di tsam zhig kun dga' bos 'od srungs chen po la dbul bar gsol zhes byas pa dang / kun dga' bos bsams pa dang / bdag gis blangs na ni bslab pa dang yang 'gal/ ma blangs na ni 'od srungs chen po'i rnyed pa yang nyams la khyim bdag kyang bsod nams mi thob na bdag gis blangs te snyan du gsol lo snyam du bsams nas/ blangs te gsol ba dang rjes su gnang ngo / /de nas bcom ldan 'das kyis bslab pa la nan tan byed pa dang / gus pa'i yon tan brjod nas yang dge slong gang chos gos zin ces bya ba la sogs pa rtsa ba'i tshig rnams so/ /chos gos zin ces bya ba ni dge slong gi chos gos bkru ba dang dra ba dang drub pa dang kha dog bsgyur ba la sogs pa zin pa la bya'o/ /gtan pa phyung zhes bya ba ni tshul du zhugs pa'i dge 'dun rnams tshul nas 'byung ste tshul nas 'byung ba'i yon tan gtan pa drub pa yin pas na gtan pa drubs dang / zhag bcu las 'das kyang spang ba'i ltung bar mi 'gyur te/ gtan pa ma drubs sam gtan pa phyung ba'i tshe zhag bcu las 'das na spang ba'i ltung bar 'gyur ro zhes bshad do/ /dge slong zhes bya ba ni dge slong mang po ste gzhan yang de dang 'dra'o/ /zhag bcu las 'das te/ zhag bcu gcig gi skya rengs shar na spang bar 'gyur ro/ /gos lhag ces bya ba ni byin gyis brlabs pa las lhag pa'o/ /rung ba ma yin zhes bya ba ni rung bar ma byas pa'o/ /chongs shig ces bya ba ni bdag gir bya ba'o/ /de las 'das par bcangs na ni zhes bya ba ni zhag bcu las thal ba'o/ /spang ba'i ltung ba zhes bya ba ni dngos po spangs nas ltung ba bshags par bya'o/ /de la nyes pa ni dge slong gis gos shig rnyed na zhag bcu tshun chad du byin gyis brlab par bya/ spang bar bya/ rung bar bya/ gzhan la sbyin par bya/ de ltar ma byas na zhag bcu gcig gi skya rengs shar na ltung bar 'gyur ro/ /ltung bar 'gyur ba'i dngos po ma bshags sam/ bral bar ma byas sam ma spangs na de tshun chad dge slong gis yo byad ji snyed rnyed pa de thams cad spang ba'i ltung bar 'gyur ro/ /zhag bcu ma lon yang spang ba'i ltung bar 'gyur ba yod de/ snga ma zhag bcu 'das pa'i rgyun gyis spang bar 'gyur ba'o/ /spang bar bya ba'i gos de chus khyer ram mes tshig na spang du med pas nyes pa bshags par bya'o/ /gos rnyed ma thag tu dge slong sems 'khrugs sam/ nad kyis gzir nas mi dran par gyur nas/ nam de'i sems rnyed pa nas zhag bcu ba grang bar bya'o/ /gos mang po zhig sngags kyis ma btab byin gyis ma brlabs par nam 'tsho ba'i bar du 'chang yang ltung bar mi 'gyur ba yang yod do/ /nyi ma re re zhing gos las slar phyung zhing gzhan la byin gyis rlob pa'o/ /zhag bcu las 'das kyang ltung bar mi 'gyur ba yang yod de/ gos kyi rgyu rung la spun mi rung ba'am/ rgyu dang spun gnyis ka mi rung ba ste/ mi rung ba ni rnga mo'i bal dang / ba lang dang / ra dang / ri dwags kyi bal dang 'dres pa ni zhag bcu las 'das kyang ltung ba med de nyes byas su 'gyur ro/ /zhag bcus ltung bar 'gyur ba'i tshe gcig tu bcangs kyang ltung bar mi 'gyur ba yod do/ /zhag bcu tshun chad kyis dus las 'das pa'o/ /zhag bcu ma lon pa la zhag bcu lon par 'du shes sam/ zhag bcu lon pa na ma lon par 'du shes pa ni thams cad kyang nyes byas so/ /gtan pa ni bting yang zhag bcu las 'das pa'i nyes pa yod de/ dge slong gis gos spang bar bya ba ma spangs ma bshags par dge 'dun gyi gtan pa bting ba'o/ /dge slong la ltung bar 'gyur ba de bzhin du dge slong ma dang bslab pa byin pa la yang de bzhin no/ /'bral ba'i gleng gzhi ni sangs rgyas bcom ldan 'das mnyan du yod pa na bzhugs so/ /de'i tshe na dge slong dag mang zhig rnyed par gyur nas/ gos 'khru ba dang / dra ba dang / drub pa dang / kha dog bsgyur ba la sogs pa'i las byas nas tshang thur gyi nang du bcug ste/ dge slong gzhi na gnas pa rnams la bcol nas/ gzhi na gnas pa rnams kyang gos skem pa dang / sdud cing sbed pa dag byed pas lung dbog pa dang klog pa'i bar chad du yang gyur la bdag cag ljongs rgyur dong ba rnams kyang stod g.yogs dang smad g.yogs nyi tshe gyon zhing 'gro bas na/ gos kyis ma g.yogs pa snang zhing mi mdzes par gyur pas/ yang dge slong gang dag chos gos dang 'bral du mi rung ngo zhes 'dul ba la bslab pa'i gnas bcas so/ /de la rjes su gnang ba ni bcom ldan 'das rgyal po'i khab na bzhugs te de'i tshe rgyal po'i khab kyi sde chen po'i phug na 'od srungs chen po gnas te/ bco lnga dang bcu bzhi'i gso sbyong rgyal po'i khab kyi dge 'dun dang lhan cig byed do/ /de nas bco lnga'i gso sbyong gi dus kyi tshe/ 'od srungs chen po gso sbyong la song song ba dang / chu bo dbyar bzangs 'brub nas chos gos sbyar ma la sogs pa yang gsher te/ de'i skam srad la ring mo zhig thogs pas gso sbyong sar phyis par gyur to/ /de ltar gyur pa snyan du bdas nas/ 'od srungs rgas thug pa dang / shA ri'i sras po rlung nad can la sogs pa chos gos dang 'bral bar mi 'gyur bar dge 'dun gyi sdom pa byin cig ces sdom pa gnang ngo / /chos gos zin gtan pa phyung zhes bya ba ni gong ma bzhin no/ /nub gcig ces bya ba ni zhag gcig skya rengs shar na ltung bar 'gyur ro/ /chos gos gsum zhes bya ba ni sbyar ma dang / bdun pa dang lnga pa'o/ /chos gos gzhan na 'dug la dge slong mtshams kyi nang na 'dug na skya rengs shar na spang ba'i ltung bar 'gyur ro/ /dge 'dun gyis chos gos byin gyis brlabs te/ nub gcig mtshams kyi phyi rol du 'bral na nyes pa bshags par bya'o/ /gos kyi dngos po ni spang mi dgos so/ /mtshams kyi phyi rol na chos gos bzhag ste/ dge slong mtshams kyi nang na 'dug gam/ dge slong nam mkha' la gnas te/ chos gos sa la 'dug ste/ bar du skya rengs kyis chod na spang ba'i ltung bar 'gyur ro/ /dge slong khyim gcig pa'i gnas shig na gnas nas chos gos nang na kun bzhag pa'am/ khyim gyi phyi rol du 'dom gang tshun chad mi dag 'dug pa ni spang bar mi 'gyur ro/ /yang na khyim de'i yos rngo ba dang phye 'thag pa dang / khye'u sus za ba dang / skom 'thung ba'i gnas de dag ni bdag gi 'dug gnas te nang du skya rengs shar na yang spang ba'i ltung bar mi 'gyur ro/ /nang ngam 'dug gnas su chos gos bzhag ste/ bdag nyid gzhan na 'dug na ltung bar 'gyur ro/ /grong gnyis pa la yang de bzhin du sbyar ro/ /shing thags kyis bskor ba'i grong na 'dug na ni nang kun dang phyi rol 'dom gang tshun chad chos gos bzhag la bdag kyang nang na ltung bar mi 'gyur ro/ /de las 'das na nyes pa nyid do/ /grong rtsig pas bskor ba'i 'dug gnas na kun dang phyi rol 'dom gang tshun chad dam/ ba lang 'gro ba'i mig rdul grar reg pa'am/ mi rang bzhin gyis ngo tsha shes pa'i bshang gci tshun chad ni 'dug gnas te 'bral bar mi 'gyur ro/ /de las 'das na 'bral bar 'gyur ro/ /'obs kyis bskor ba ni de nyid 'dug gnas te/ bral bar mi 'gyur ro/ /grong gcig pa'i 'dug gnas gcig gang zhe na/ lha khang ngam/ 'dun sa 'am/ skyed mos tshal lam/ 'dug gnas su chos gos bzhag gam lha khang du chos gos bzhag na ltung bar mi 'gyur ro/ /gzhan du gnas na ltung bar 'gyur ro/ /spun mang po'i khyim sgo gcig pa zhig na sgo nyid 'dug gnas yin te grong du gnas sam 'dug na spang bar mi 'gyur ro/ / lam du zhugs pa'i dge slong gis 'dom bzhi bcu rtsa dgu tshun chad 'bral bar mi 'gyur ro/ /'greng ba dang 'dug pa dang nyal ba'i 'dom gang kho ra khor yug tshun chad mtshams so/ /mtshams kyi bar du nyal na lus dang bral ma thag tu nyes par 'gyur ro/ /dge slong pha la nyes par 'gyur ba de bzhin du dge slong ma dang bslab pa byin pa la yang de bzhin no/ /dge slong dang / dge slong ma dang / dge sbyong ma ni nyes byas su 'gyur ro/ /gos kha sogs 'jog pa'i gleng gzhi ni sangs rgyas bcom ldan 'das mnyan du yod pa na bzhugs so/ /de'i tshe na dge slong rnams de lta bu'i gos mang du rnyed de sngon po dang / ser po dang / dmar po dang / srab mo stug po la sogs pa rnyed kyang gos su ma langs nas nam de lta bu zhig rnyed na bya'o snyan nas re ba dang bcas pas sogs shing zla ba gcig las 'das par bzhag pas na dge slong dag gis snyan du gsol te/ 'dod pa mang ba mgu mi myong ba gso dka' ba zhes smad nas sbyangs pa'i yon tan la dga' ba dang 'dod pa nyung ba'i bsngags pa brjod nas bslab pa bcas te/ yang dge slong zhes bya ba ni rtsa ba'i tshig rnams so/ /dge slong chos gos zin te gtan pa phyung zhes bya ba ni gong ma bzhin no/ /gos rnyed ces bya ba ni gzhan las so/ /dus ma yin pa'i gos zhes bya ba ni dge slong gis gos rnyed pa'i dus ni gang zhe na/ gnas su gtan pa drubs te/ ston zla tha chungs nas dpyid zla ra ba'i bar du ste/ de ni gos slong ba'i dus so/ /de phan chad ni dus ma yin no/ /gnas su gtan pa ma drubs na thams cad kyang gos kyi dus ma yin no/ /'dod ces bya ba ni dgos par gyur pa'o/ /zla ba gcig gi bar du zhog ces bya ba ni zla ba gcig tshun chad do/ /gos rnyed du re ba yod na zhes bya ba ni dge slong gis gos re ba gang zhe na/ pha ma dang / phu nu dang / mkhan po dang / slob dpon gyis byin grang snyam du sems pa'am/ lo lnga la rnyed pa'am/ lo drug la rnyed pa'am/ gtsug phud kyi dus ston dang / khang pa'i ston mo'am/ dus ston chen po la rnyed grang snyam du sems pa'o/ /kha ma longs pa zhes bya ba ni sbyar ma dang stod g.yogs kyi kha ma longs pa longs par bya ba'i phyir ro/ /de las 'das par bzhag na zhes bya ba ni thal ba'o/ /spang ba'i ltung ba zhes bya ba ni dngos po spangs nas ltung ba bshags par bya'o/ /dge slong gis tshes gcig la gos sngon po'am/ dmar po'am ser po zhig rnyed na de zhag bcu tshun chad du byin gyis brlab par bya'o/ /gzhan la bskur bar byas de ltar rung bar ma byas na spang ba'i ltung bar 'gyur ro/ /de ste dge slong gis gos sngon po'am/ dmar po dang ser po zhig tshes gcig la rnyed nas de kha ma longs na rnyed du re ba yin na zla ba gcig tu gzhag par bya'o/ /de ste tshes gcig gi nyin par kha sogs rnyed na zhag bcu tshun chad du byin gyis brlab par bya'o/ gzhan la bskur bar bya sbyin par bya/ de ltar ma byas na spang ba'i ltung bar 'gyur ro/ /ji ltar gos sngon po la spang ba'i ltung bar 'gyur ba de bzhin du sbyar te/ gos longs ba zhig na zhag bcu 'das nas spang ba'i ltung bar 'gyur ro/ /gos kha ma longs pa kha sogs na ma rnyed pa nas zhag bcu las 'das na spang bar 'gyur ro/ /kha sogs ma rnyed na zla ba gcig las 'das na ltung bar 'gyur ro/ /gos tha na lhag khru gang yan chad la ltung bar 'gyur ro/ /dge slong gis chos gos bkru ba dang / brkyang ba dang / dra ba dang / drubs pa dang / kha dog bsgyur bar bya/ sbyar ma dang / bting ba ni nyis rim du gyis shig /stod g.yogs dang mthang gos ni chig rim du gyis shig /sbyar ma nyis rim las sum rim du sbyar na byed pa'i tshe nyes byas so/ /zhag bcu las 'das na spang bar 'gyur ro/ /nyis rim las phye ste zhag bcu las 'das na spang bar 'gyur ro/ /stod g.yogs dang mthang gos chig rim las nyis rim du sbyar na spang ba'i ltung bar 'gyur ro/ /zla ba gcig las gos lhag pa bcangs na spang bar 'gyur ro/ /zhes 'byung ba/ gos rnyed nas dge slong sems 'khrugs na/ nam rang gi sems rnyed tshun chad zla ba gcig tu brtsi'o/ /zla ba gcig 'das par nyes par 'gyur la/ tshe gcig tu bcangs kyang nyes par mi 'gyur ba yod de/ zla ba gcig tshun chad dus byas pa'o/ /gos lhag zla ba drug tu bcangs kyang nyes par mi 'gyur ba yang yod do/ /gos rnyed nas zla gcig lon pa dang / dge 'dun gyi gtan pa bting bar gyur pa'o/ /kha sogs zla ba gcig tu zhog shig ces bya ba yang / chos gos gsum la gcig ma chog pa la chos gos gsum tshang ba la gos lhag pa thams cad ni kha sogs su mi chud de/ zhag bcu las 'das na spang bar 'gyur ba ni bcom ldan 'das kyis gnang ba'i gos rnam pa bdun po la bya'o/ /mi gnang ba'i gos la zla ba gcig las 'das kyang spang bar mi 'gyur te/ mi gnang ba gang zhe na/ rgyu rung la spun mi rung ba'am/ spun rung la rgyu mi rung ba dang / gnyis ka mi rung ba ste/ rnga mo'i bal dang / ra'i bal dang / ri dgas kyi bal dang 'dres pa ni zla ba gcig las 'das kyang nyes par mi 'gyur ro/ /de la chos gos sbyar ma ni rnam pa dgu ste/ snam bu dgu pa dang / bcu gcig pa dang / bcu gsum pa dang / bco lnga pa dang / bcu bdun pa dang / bcu dgu pa dang / nyi shu rtsa gcig pa dang / nyi shu gsum pa dang / nyi shu lnga pa'o/ /ci'i phyir tshar bu can du bya zhe na/ khyim bdag mgon med kyis dge slong la phyag 'tshal ba las mur 'dug dang nor bas de dang bye brag tu bya ba'i phyir yul mnyam ka'i 'bras zhing rnang la gzigs nas chos gos snam bu can du gyis shig ces bka' stsal to/ /'khru ba'i gleng gzhi ni sangs rgyas bcom ldan 'das mnyan du yod pa na bzhugs so/ /de'i tshe mnyan du yod pa na tshe dang ldan pa 'char ba po yang rab tu phyung ste/ chung ma sbed ma yang skye dgu'i bdag mo gau ta mI sa rab tu phyung nas gau ta mI'i gan nas tshe dang ldan pa 'char ba po 'ongs pa thos nas de [(]bltar [,]ltar [)]'gro'o zhes song ba dang 'char ba po'i gnas khang na gnyis su chos 'chad pa las/ 'dod chags skyes pa mos tshor ba dang bros nas phyi bzhin du bsnyags pa dang / lam du khu ba byung nas 'dod chags zhi ba mthong ba dang / mo yang slar log go/ /de nas gos de mo la 'khru bcol ba dang / mos kyang khu ba blangs nas mtshan gyi nang du blugs pa dang phyis bur chags te bu byung ba las/ ma dad pa rnams 'phya zhing mi snyan par 'dzer te/ 'char ba bkug ste rmas na mad do zhes gsol nas rigs pa ma yin tshul ma yin zhes smad nas/ yang dge slong zhes bya ba ni 'char ba ste gzhan yang de dang 'dra ba'o/ /gnyen ma yin zhes bya ba ni pha dang ma'i zung bdun tshun chad ni gnyen/ de phan chad gnyen ma yin no/ /dge slong ma zhes bya ba ni chos de la zhugs pa'o/ /gos rnying pa zhes bya ba ni sar pa la nyes par mi 'gyur bas rnying pa zhes smos so/ /gos zhes bya ba ni bal las byas pa dang / sha na ka'i shun pa dang / zar ma'i shun pa dang / shing bal gyi dang / rtswa du gu la'i dang / rtswa ko pa la'i bal dang / srin bal te rnam pa bdun po las gang yang rung ba'o/ /'khru zhes bya ba ni tha na chu'i nang du gcal ba tsam yang ngo / /'tshed ces bya ba ni tha na tshon gyi nang du bsubs pa tsam mo/ /'chag ces bya ba ni thal mo brdabs pa tsam mo/ /spang ba'i ltung ba zhes bya ba ni dngos po spangs nas ltung ba bshags par bya'o/ /gnyen yin nam ma yin zhes the tshom za bzhin du bcol na nyes byas su 'gyur ro/ /gnyen ma yin pa'i dge slong ma la bcol kyang ltung bar mi 'gyur ba yang yod do/ /phrin dang phrin yig dang / lag brda dang gcig nas gcig tu brgyud de bcol ba dang / dge slong ma smyon ma dang / sems 'khrugs pa dang / nad kyis gzir ba dang / glen ma dang / lkugs ma dang / 'on ma rnams la 'khrur bcol na thams cad kyang nyes byas su 'gyur ro/ /ma ning ngam/ pha ma dang / dgra bcom pa bsad pa dang / sangs rgyas la ngan sems kyis khrag phyung ba dang / mu stegs can dang / rkun gnas su gnas pa dang / mi gnas pa dang / sngar 'khrugs pa dang / sngar nyes pa byung ba rnams la bcol na thams cad la nyes byas su 'gyur ro/ /dge 'dun gyi gos sam/ bkrus zin pa'am/ thun mong du dbang ba'am/ gzhan gyi phyir bcol ba ni thams cad du nyes byas su 'gyur ro/ /dge 'dun gyi dbyen byed pa dang / rjes su phyogs pa dang / bslab pa byin pa la 'khrur bcol na spang ba'i ltung bar 'gyur ro/ /'gro ba gzhan du gnas pa'i bud med dang / dge sbyong ma dang / mu stegs ma dang / khyim mi mo la bcol na thams cad du nyes byas su 'gyur ro/ /len pa'i gleng gzhi ni sangs rgyas bcom ldan 'das mnyan du yod pa'i dze ta'i tshal na bzhugs so/ /de'i tshe na dge slong ma rnams dgon pa na gnas su gnang ste/ dge slong ma ut+pa la'i kha dog ma 'khor dge slong ma lnga brgya tsam dang langs pa tshal du nyin par bsgom du dong ba las dge slong ma'i 'khor rnams ni mkhan mo lta rdzu 'phrul gyis byon grang zhes der bzhag nas rang rang gi gnas su slar log go/ /mo 'ba' zhig 'gog pa'i snyoms par zhugs shing 'dug pa dang / de'i nub mo mi rgod dag cig lhags pa dang / de dag kyang dad pa skyes nas ras bzang po yug gcig spyan gzigs kyis bkang ste/ de'i drung du bzhag ste dong ngo / /phyi de nyin mo ras dang spyan gzigs khyer te dze ta'i gtsug lag khang du dbul bar byas pa dang / bsnyen dga' bo gtsug lag khang gi sgo na 'chag cing 'dug pas spyan gzigs ni gtsang sbyor la gtad nas rang bslangs so/ /phyis ut+pa la'i kha dog can bcom ldan 'das kyi zhabs la phyag 'tshal du song ba dang / bcom ldan 'das kyis gos ngan na 'dir dbyar gnas pa'i dge slong ma rnams gos kyi rnyed pa ma grub bam zhes kun dga' bo la smras pa dang / btsun pa rnyed mod kyi sring mo 'di ni rang bzhin gyis bsam pa dge ba cung zad ci rnyed kyang dkon mchog gsum la dbul la/ de ring yang ras bzang po gcig rnyed na bsnyen dga' bos blangs so zhes gsol pa dang / ci dge slong ma gnyen ma yin pa las gos len tam zhes smras pa dang / btsun pa de bzhin no zhes gsol nas/ gnyen yin kyang de la sbyin pa'i 'du shes bskyed kyi/ gnyen ma yin pa la chos gos lnga tshang ngam mi tshang mi rtog par thob thob len to/ /grong khyer yangs pa'i mdzod nas chos gos phyung ste/ dge slong ma ut+pa la'i kha dog la byin cig ces bka' stsal to/ /de ltar gyur pa de'i phyir yang dge slong gang gnyen ma yin pa zhes 'dul ba la bslab pa'i gnas bcas te rtsa ba'i tshig rnams so/ /brjod pa ma gtogs zhes bya ba ni mnyan du yod pa na khyim bdag dad pa khyo shug gnyis shig gnas te/ 'jig rten phyi ma'i lam brgyags sogs pa'i khyim bdag gis ni dge 'dun pha rnams spyan drangs te/ gos re re yon du phul/ khyim bdag gi chung mas bshos dang na bza' phrugs re re gsol ba dang / dge slong ma rnams gos rin chen po rnams len du mi gnang bas snyan du zhus te bka' stsal pa/ long la dge slong pha dang brjer gnang ngo / /yang dge slong gang zhes bya ba ni bsnyen dga' bo ste/ gzhan yang de 'dra ba'o/ /gnyen ma yin zhes bya ba ni pha ma'i bdun rgyud tshun chad de phan chad ma gtogs pa'o/ /dge slong ma zhes bya ba ni gang la dge slong ma'i dngos po yod pa'o/ /gos zhes bya ba ni gong du rnam pa bdun smos pa'o/ /brje ba ma gtogs zhes bya ba ni bkol ba'o/ /dngos po spangs nas ltung ba bshags par bya'o zhes gsungs so/ /gnyen ma yin pa la the tshom za bzhin du blangs na nyes byas so/ /dge 'dun la phul ba'i nang du bdag gtogs pa dang / snyan tshig tu smras pa la byin pa dang / bsnyen par rdzogs pa la byin pa dang / rkun pos 'phrogs kyis dogs te byin pa dang / grogs po dang brjes te byin pa dang / grags pa dang bsod nams dang ldan pa la dge slong mas 'di 'dra ba zhig thugs brtse ba'i slad du bzhes su gsol zhes chags pa med par phul ba la nyes pa med do/ /gnyen ma yin pa'i dge slong ma las gos blangs te spang bar mi 'gyur ba yang yod de phrin dang / phrin yig dang / lag brda dang / gos kyi rgyu rung la spun mi rung ba dang / gos kyi rgyu mi rung la spun rung ba dang / gnyis ka mi rung ba dang / dge tshul ma dang / bsnyen par ma rdzogs pa dang / de rnams las gos blangs na thams cad du nyes byas su 'gyur ro/ /bslab pa byin pa dang / dge slong ma dbyen byed pa dang / rjes su phyogs pa la bslabs na spang ba'i ltung bar 'gyur ro/ /slong ba'i gleng gzhi ni bcom ldan 'das mnyan du yod pa na bzhugs so/ /de'i tshe na khyim bdag khyo shug gnyis shig yod de/ longs spyod sgrub par gros byas nas des chung ma la bzang mo/ brgyags sta gon gyis shig tshong la 'gro'o/ /des kyang khyo brdzangs te btang ngo / /de song ba'i 'og tu chung ma brgyags zong gis ras bzang po zung gcig byas nas khyim thab phyir 'ongs ma thag tu byin nas/ ras 'di su la yang ma sbyin cig ces bsgo'o/ /de de nas dze ta'i gtsug lag khang du phyag 'tshal du song ba dang / dze ta'i sgo bas kyang ras bzang po zhes bstod do/ /bsnyen dga' bo yang dze ta'i gtsug lag khang gi sgo na 'chag cing 'dug pas thag ring po nas 'ong ba mthong nas/ gos de ni bdag gis kyang ma thob par mi btang ngo snyam ste/ khyim bdag zla ba tshes pa lta ste 'ongs pa legs so zhes smras nas bsnyen dga' bo yang rang bzhin gyis chos 'chad mkhas pas des sbyin pa'i yon tan bshad pa dang dad pa skyes nas des 'phags pa gos shig yon du dbul lo zhes khas blangs pa dang / khyed kyis gyon pa 'di byin zhes byas pa dang / ras ya gcig byin no/ /byin pa'i bsod nams ni yod na spyad pa'i bsod nams ni med de gos gdang la bkal bas de gsang ste song na ya gcig kyang gsang la byin khyod ni gcer bu pa dang 'dra bar phyugs rjes kyi phyi bzhin du rdul gyi nang du song shig ces nan gyis blangs te/ de yang de bzhin du song ba dang / sgo ba dang phrad de gos bzang po ga re zhes dris na/ de na re bsnyen dga' bos chos kyi sgo nas phrogs so zhes byas pa dang / ma dad pa rnams 'phya bar gyur to/ /de nas khyim bdag mgon med zas sbyin sangs rgyas la phyag 'tshal du chas te dze ta'i sgor phyin pa dang / sgo ba la ci mthong zhes smras na/ gzhan ni ma mthong gi/ 'dir rkun po zhig byung ngo zhes smras pa dang / bsnyen dga' bos khyim bdag la chos bsgo nas khyem bdag las ras blangs so zhes byas pa dang / khyim bdag mgon med zas sbyin gyis de lta bu mi rigs zhes sdom pa bca' bar snyan du gsol nas 'dul ba la bslab pa'i gnas bcas te/ yang dge slong gang zhe na/ rtsa ba'i tshig rnams so/ /dus ma gtogs zhes bya ba ni pa ti'i dge slong bzhi bcu ljongs rgyu zhing dong ba las/ chom bos bcom nas gos med de/ bdag cag khyim pa las slong du ni mi gnang bas/ dze ta'i tshal du dge slong grogs po rnams la slong ngo / /de ltar gyur pa snyan du bdas nas da slan chad gos rkun pos khyer ram/ rlag gam mes tshig gam chus khyer te med na slong ba'i dus yin te dus ma gtogs zhes gsungs so/ /yang dge slong gang zhes bya ba ni/ bsnyen dga' bo ste gzhan yang de dang 'dra ba'o/ /gnyen ma yin zhes bya ba dang / gos rnam pa bdun ni gong ma bzhin no/ /khyim bdag ces bya ba ni skyes pa'o/ /chung ma ni bud med do/ /dus ma gtogs zhes bya ba ni bkol ba'o/ /chos gos rkun pos khyer ba la sogs pa ni gzhan gyis khyer nas bdag la med pa'o/ /spang ba'i ltung ba ni dngos po spangs nas ltung ba bshags par bya'o/ /nyes pa ni rin thang dang kha dog dang khru'o/ /dge slong gis kAr ShA pa Na bcu ri ba dang lnga bcu ri ba'i gos bslangs te grub na spang ba'i ltung bar 'gyur ro/ /kha dog sngon po dang / ser po dang / dmar po blangs te/ de bzhin du grub na spang bar 'gyur ro/ /khru lnga pa la lnga bcu'i bar du bslangs te grub na spang bar 'gyur ro/ /bslangs pa las lhag pa ma rnyed pa ni ltung ba med de nyes byas so/ /phrin dang phrin yig gis bslang ba dang / khyim pa smyos pa dang / sems 'khrugs pa dang / nad kyis zin pa dang / glen pa dang / lkugs pa dang / 'on pa dang / gnyid kyis log pa dang / phyi'i mu stegs can dang / 'gro ba gzhan du gnas pa las bslangs na nyes byas su 'gyur ro/ /gos kyi rgyu rang la spun mi rung ba dang / spun rung la rgyu mi rung ba dang / gnyis ka mi rung ba ni nyes byas su 'gyur ro/ /stod g.yogs dang smad g.yogs slong du gnang ba'i gleng gzhi ni sangs rgyas bcom ldan 'das mnyan du yod pa na bzhugs so/ /de'i tshe bsnyen dga' bos sngon chad ni dus ma yin par gnyen ma yin pa la slong du gnang ba las/ da ni mgon med zas sbyin gyis/ khyim bdag pho la slong du mi gnang bar bcas pa na rnyed pa yang rab tu nyung na yul pa ta'i dge slong mnyan du yod par 'ongs pa las lam du chom pos bcom nas stod g.yogs dang / smad g.yogs bslang du rjes su gnang bas/ drug sde po rnams kyis pa ta'i dge slong 'di dag bslus te/ pa ta'i dge slong la sprin nas/ drug sde po'i 'khor dang bcas pa drug cu dang spel te/ rgyal po dang btsun mo phreng ldan ma man chad gnyen ma yin pa'i khyim bdag gi khyim re rer yang gos phrugs bcu gsum bcu gsum bslangs so/ /de dag la yo byad bcu gsum tshang bar bslangs te 'khod pa dang / gos bzang dgu drug sde bos bdams te khyer ro/ / ngan snyigs thams cad pa ta'i dge slong rnams la byin nas de dag 'tshem zhing 'khod pa dang dge slong dag gis gos mang du rnyed pa ga re zhes smras pa dang / ci ltar gyur pa zhib tu smras pa las snyan du bdas nas pa ta'i dge slong rnams la bka' stsal pa/ da tshod mi zin par slong ba nyes zhes smad nas/ da slan chad dus la bab kyang stod g.yogs dang smad g.yogs las lhag par blangs na spang ba'i ltung ba'o zhes bslab pa'i gnas bcas so/ /dge slong gos rkun pos khyer zhes bya ba ni g.yon can gyis phrogs par gyur pa'o/ /gos rlag ces bya ba ni rlag pa'am brjed de stor ba'o/ /me dang chu dang / rlung ni dngos su zad do/ /gnyen ma yin pa dang gos kyi rgyu rnam pa bdun ni gong ma bzhin no/ /slong zhes bya ba ni bslangs pa'o/ /'dod ces bya ba ni dgos par gyur pa'o/ /stod g.yogs dang smad g.yogs las lhag par ma len cig ces bya ba ni de las lhag par len du mi gnang ngo / /stod g.yogs dang smad g.yogs rnam pa gnyis te/ khyim pa'i dang dge slong gi'o/ /dge slong gi stod g.yogs dang smad g.yogs bslangs pa las lhag par gyur na slong ba'i tshe nyes byas so/ /thob na spang bar 'gyur ro/ /khyim pa'i stod g.yogs la yang de bzhin du sbyar ro/ /stod g.yogs smad g.yogs ma chog na yang slongs shig lhag na yang slar byin cig / ma byin na spang bar 'gyur ro/ /khyim pa'i smad g.yogs stod g.yogs bslangs pa las ma chog na yang ma slong shig /bslangs na spang bar 'gyur ro/ /lhag na yang slar ma byin cig dge slong gis rang gi stod g.yogs dang smad g.yogs lhag par gyur pa slar ma byin nam/ lhag ra bslangs na spang bar 'gyur ro/ /gos kyi rin khyim bdag gis sngar gzas pa las lhag par bslangs pa'i gleng gzhi ni bcom ldan 'das mnyan du yod pa na gzhugs so/ /de'i tshe khyim bdag khyo shug gnyis yod de/ de yang so sor 'phyo zhing bran mo la brdeg pa dang / bsnyen dga' bos khyim bdag la chos dag bshad pas de gnyis kyang snga ma'i skyon kun spangs te bran mo la yang mi rdeg pas rang gi khyim so yang tshugs so/ /de gnyis kyis bsams pa/ bdag cag 'di ltar 'khod pa yang bsnyen dga' bo'i bka' drin yin gyi 'phags pa bsnyen dga' bo la gos rin zhig dbul lo zhes sbags pa dang / bran mo des thos nas bran mo nang gcig bsnyen dga' bo der 'ongs pa la kho'i drin slar glan pa'i phyir bsnyen dga' bo la zong spags pa sbran to/ /de nas bsnyen dga' bos khyim bdag khyo shug la/ khyed kyis nga la sbyin par gzas pa de nga la byin cig ces smras na 'phral du ma 'byor pa dang tshong pa phyug po gcig la khyim bdag skyir song ba dang / bsnyen dga' bos thabs su byas te/ tshong pa ngan pa des ras bzang po phyung ba dang / bsnyen dga' bos nan gyis 'then te khyer ro/ /khyim bdag de la rin gzhal du bcug pa dang / phyis de la rin ma 'khor nas/ de'i phyir tshong pas khyim bdag bzung ste/ nyi tshan la btags pa dang / de'i mdza' bo dag gis mthong nas/ khyod mar 'thungs sam/ rims nad kyis btab bam ci nyes te nyi tshan la 'dug /bdag gis ni mar yang ma 'thungs te bu lon gyi phyir bzung ngo / /khyod nyid kyi tshe'am pha mes kyi tshe chags/ gang yang ma yin te shAkya'i bu dag gis te gang byin pa de ni mi len te lhag par slong ngo / /de ltar gyur pa la snyan du bdas nas dge slong gi tshul ma yin zhes smad de/ gzhan gyis bshams pa las lhag par slong du mi gnang bar bcas so/ /dge slong zhes bya ba ni shAkya'i bu bsnyen dga' bo ste gzhan yang de dang 'dra ba'o/ /gnyen ma yin zhes bya ba ni pha ma'i zung bdun rgyud tshun chad ni gnyen no/ /de phan chad ni gnyen ma yin no/ /khyim bdag ces bya ba ni skyes pa dang bud med do/ /gos kyi rin zhes bya ba ni gser dang dngul lo/ /bdag gi gos kyi rin des de ltar na 'di 'dra'i gos gyis shig ces bya ba ni bal las byas pa dang / sha na ka'i shun pa las byas pa dang / zar ma'i shun pa las byas pa dang / rtswa du gu la las byas pa dang / rtswa ko tam pa las byas pa dang / shing bal gyi dang / srin bal te bdun po las gang yang rung ba'o/ /nyos la zhes bya ba ni nyo ba'o/ /dge slong ming 'di zhes bya ba ni bsnyen dga' bo ste/ de las dus su gos sbyin par sems pa'o/ /sngar ma bsgo zhes bya ba ni ma sbran pa'o/ /rnam par rtog pa 'ga' zhig byung zhes bya ba ni gos tshol bar zhugs pa'o/ /gos de lta bu zhig bskos na legs so zhes bya ba ni bzang po 'dod pa'o/ /spang ba'i ltung ba zhes bya ba ni dngos po spangs nas ltung ba bshags par bya'o/ /de la nyes pa gang zhe na rin thang dang / kha dog dang / khru tshad do/ /kA ra ShA pa Na lnga ri ba bslangs pa las lhag par thob pa dang / khrug lnga pa spags pa las lhag par thob pa dang / kha dog sngon po dang / ser po dang / dmar po byin pa las lhag par bslangs na slong ba'i tshe nyes byas so/ /thob na spang ba'i ltung bar 'gyur ro/ /dge slong gis sngar ma sbran par rnam par rtog pa skyed nas phrin dang / phrin yig dang / lag brda dang / gcig nas gcig tu brgyud pas gos thob na nyes byas so/ /khyim bdag smyon pa dang / sems 'khrugs pa dang / nad kyis gzir ba dang / 'on pa dang / skugs pa dang / mu stegs can dang / bram ze dang / kun du rgyu ba la rnam par rtog pa skyed de gos thob na nyes byas su 'gyur ro/ /khyim bdag la rnga mo'i bal dang / ra'i bal dang / ri dwags kyi bal dang 'dres pa/ rgyu mi rung ba bslangs na nyes byas su 'gyur ro/ /mi ma yin pa la bslangs na nyes byas su 'gyur ro/ /so so nas spags pa'i gleng gzhi ni bcom ldan 'das mnyan du yod pa na bzhugs so/ /de'i tshe khyim bdag khyo shug gnyis shig yod de/ de yang so sor 'phyo zhing longs spyod kyang 'gribs/ bran mo yang brdegs pa las bsnyen dga' bos bslab pa la bzhag pa la sogs pa ltung ba gong ma dang 'dra ba'o/ /khyad par ni khyim bdag dang khyim bdag gi chung mas dge slong la gos kyi rin so sor bzhag pa tsam zhig yod do/ /so sor zhes bya ba ni khyim bdag kyang bdag rang gi nor yin pa dang / chung ma yang rang gi nor gud pa yin pa las de gnyis gcig tu bsdus nas dge slong la byin pa ni so so nas zhes bya'o/ /bdag la bskon cig ces bya ba ni gnyi gas bdag dus su byin cig pa'i don to/ /gnyi gas kyang gyur pa zhes bya ba ni gos bzang po mtshungs par bya bar soms shig pa'o/ /bzang po 'dod pa zhes bya ba ni bde bar bsgrub par bya ba'i rkyen yin te/ 'jam pa la sogs pa'i yon tan dang ldan par 'dod pa'o/ /phyir zhes bya ba ni rgyu la bya'o/ /nyes par 'gyur ba gzhan ni gong ma bzhin no/ /bskur ba'i gleng gzhi ni bcom ldan 'das mnyan du yod pa na bzhugs so/ /de'i tshe rgyal po'i khab na bsnyen dga' bo 'dug pa'i steng du bram ze dbyar phyed kyis gos kyi rin kAr ShA pa Na drug cu sngar byin nas bsnyen dga' bo nyid ni sangs rgyas kyi zhabs 'bring du mnyan du yod par song nas/ /bram ze dbyar byed kyis gos kyi rin tshong pa zhig la phyi bzhin du yod par bskur ba las mnyan du yod par bsnyen dga' bos zong tshong ba'i gan du song ste/ zong tshong ba zhig gi lag tu bzhag go/ /phyir len par dus byas pa las bsnyen dga' bo dus su ma 'ongs nas tshong pa yang bsnyen dga' bo la sdod sdod de/ mdun ma phyis pas rgyal pos chad pa kAr ShA pa Na drug cus bcad do zhes byung ba dang / 'gro khar bsnyen dga' bos zong blangs na tshong pa yang mdun ma la rings pas zong snod dang bcas te bor ba dang rgya gogs nas des klan ka btsal te tshong pa ma btang ba dang / tshong pa chad pas bcad de ma dad par gyur pa dang / rung ba ma yin par len cing pha rol pa'i sems mi srung la thob pa la g.yeng bar byed pas ma dad par byas te/ spos 'tshong gi mas de ltar chad pa kAr ShA pa Na lnga brgya bcad pa de sus len zhes smras pa dang / shAkya'i dge sbyong dag la dga' bas de ltar gyur to zhes 'dzer ba dge slong dag gis thos te snyan du gsol to/ /de ltar gyur pa bden nam zhes bsnyen dga' bo la bkas smras na mad do zhes gsol nas rung ba ma yin rigs pa ma yin zhes bya ba bkas smad nas bslab pa'i gnas bcas te/ yang dge slong zhes rtsa ba'i tshig rnams smos so/ /dge slong gi phyir zhes bya ba ni/ shAkya'i bu bsnyen dga' bo ste/ gzhan yang 'di dang 'dra ba'o/ /rgyal po zhes bya ba ni rgyal po'i rigs la sogs pa rigs rnam bzhi 'am skyes pa'am bud med rgyal por dbang bskur ba la bya'o/ /rgyal po la bka' gros dbul zhing brten pa ni blon po zhes bya'o/ /bram ze ni gtsang sbra can no/ /khyim bdag ces bya ba ni phyug pa'o/ /gzhongs kyi mi zhes bya ba ni yul mi'o/ /nor can zhes bya ba ni phyug po'o/ /tshong dpon zhes bya ba ni thabs byin pa'o/ /ded dpon zhes bya ba ni 'gron pa mang po ded cing lan grangs mang du phyin pa'o/ /pho nya'i lag tu zhes bya ba ni bud med dam skyes pa'am ma ning la'o/ /gos kyi rin zhes bya ba ni gser dang dngul lo/ /de nas pho nyas gos kyi rin de khyer te/ dge slong gal ba der song ste phyin pa dang / dge slong la 'phags pa rgyal po dang bram ze la sogs pa ming 'di zhes bgyis bas khyod la gos kyi rin 'di bskur gyis 'phags pa thugs brtse ba'i slad du 'di dag bzhes su gsol zhes de skad zer ba dang / dge slong des pho nya de la tshe dang ldan pa pho nya dge slong rnams ni gos kyi rin len du mi rung ste bdag cag dus su gos shig rnyed na ni len to zhes bya ba de skad smros shig /rung ba zhes bya ba ni spyad par 'os pa'o/ /gal te pho nya des dge slong de la 'phags pa rnams kyi zhal ta bgyid pa 'ga' mchis sam zhes de skad zer ba dang gos 'dod pa'i dge slong gis zhal ta byed pa ston cig / gos 'dod ces bya ba ni dgos par gyur pa'o/ /kun dga'i ra ba zhes bya ba ni rung bar byed pa'o/ /dge bsnyen zhes bya ba ni skyabs su song zhing bslab tshig lnga la gnas pa'o/ /tshe dang ldan pa pho nya 'di ni dge slong gi zhal ta byed pa'o/ /de nas pho nyas gos kyi rin khyer la zhal ta pa'i der song ste phyin nas zhal ta pa la tshe dang ldan pa zhal ta pa shes par gyis shig /khyod kyis gos kyi rin 'dis 'di 'dra ba'i gos shig nyos ming 'di zhes bgyi ba'i dge slong 'ongs pa dang / de la dus su gos rung ba skon cig rung ba zhes bya ba ni spyad par 'os pa'o/ /de nas pho nyas 'phags pa zhal ta ba bdag la bstan pa la gos bdag gis phul cig par gtad pa lags kyis der long zhes bsgo shig /de nas dge slong gis zhal ta byed pa'i gan du song ste/ tshe dang ldan pa bdag gis gos dgos so zhes lan gnyis lan gsum skul cig / byin na ni legs ma byin na lan lnga drug tu snang ba'i phyogs su 'dug shig /snang ba'i phyogs ni bzhi'o/ /bskul ba'i sgo ni drug go/ /snang ba'i phyogs gang zhe na/ 'dug gnas par khyim dang zhing dang / las byed pa'i gnas so/ /bskul ba'i sgo drug ni khyod byon tam zhe na/ de'i phyir ro zhes bya ba dang / bde bar byon tam zhe na yang don de'i phyir ro zhes bya ba dang / gdan 'di la bzhugs she na yang don de'i phyir ro zhes bya ba dang / bca' ba 'cho zhe na yang don de'i phyir ro zhes bya ba dang / bza' ba zo zhe na yang don de'i phyir ro zhes bya ba dang / btung ba 'thung zhe na yang don de'i phyir ro zhes bya ba dang / drug po bskul ba'i sgo yin par tshig myur du smras te/ pha rol gyis ma go na sgo drug ma rdzogs pa'o/ /mi rings par dal nas smras te pha rol gyis don go na sgo drug rdzogs pa nyid do/ /gal te ma grub na de'i 'og tu stsal te thob na spang ba'i ltung ba zhes bya ba ni dngos po spangs nas ltung ba bshags par bya'o/ /de'i 'og tu gos ma grub na dang po gang nas 'ongs pa der sbron cig ces bya ba ni bdag gis slob ma mngag par bya'o/ /tshe dang ldan pa khyod kyis zong bskur ba bdag gis ci yang ma grub po zhes bya ba ni nad pa'i sman la sogs par phan ma thogs pa'o de ni 'du shes bya ba ni de dang mthun pa'i chos so / / nye bar 'gyur ba ni bdag po yang mi/ pho nya yang mi/ dge slong yang mi yin na ltung bar 'gyur ro/ /mis byin pa la mi ma yin pas pho nya byas sam/ mi ma yin pas byin la mis pho nya byas la rung bar byas na nyes byas su 'gyur ro/ /lan lnga drug tu ma thob pa las slad kyis stsal te grub na ltung bar 'gyur ba de la gzhan gyi sgo nas ltung bar mi 'gyur ba yang yod de/ phrin dang phrin yig gis lan lnga drug las lhag par brtsal te gos grub na nyes byas su 'gyur ro/ /de bzhin lag brda dang gcig nas gcig tu brgyud pa'ang nyes byas su 'gyur ro/ /dge slong gis khyim pa smyon pa dang / ra ro ba dang nad kyis gzir ba dang / sems 'khrugs pa dang / glen pa dang / lkugs pa dang / snyoms par zhugs pa dang / mu stegs can dang / 'gro ba gzhan du gnas pa la/ lan drug las lhag par gos bsgrubs te thob kyang nyes byas su 'gyur ro/ /gos kyi rgyu dang spun mi gnang ba'i nang nas blangs kyang nyes byas su 'gyur ro/ /spang ba'i chos gos kyi tshogs te bcu phung dang po'o// //stan gyi tshogs las brtsams te/ srin bal las stan byed pa'i gleng gzhi ni bcom ldan 'das mnyan du yod pa dze ta'i tshal na bzhugs so/ /de'i tshe na dge slong mang po dag srin bal gyis stan sar pa byed du 'jug ste/ bya ba dang byed pa mang bas kha ton dang lung 'bogs pa'i bar chad du gyur pa dang / srin bal gyi stan bzang po la chags pas bzang po 'dod pa'i phyir rin che zhing dkon pa'i mal stan tshol zhing gzhan la slong bas na de'i phyir srog chags mang po gsod par gyur pas/ phyis mu stegs can rnams dge sbyong mgo reg de la bsod snyoms sbyin par su spro zhes mi snyan par 'dzer ba dge slong dag gis snyan du gsol nas/ bkas smras pa/ mad do zhes gsol ba dang / gso dka' dgang dka' ba zhes smras nas/ chog shes pa dang / sbyangs pa'i yon tan la dga' ba dang yon tan bsngags nas yang dge slong gang yang zhes 'dul ba la bslab pa'i gnas bcas so/ /yang dge slong zhes bya ba ni dge slong mang po ste/ gzhan yang 'di dang 'dra'o/ /stan sar pa zhes bya ba ni sar pa la rnam pa gnyis te/ sar pa nyid sar pa dang / rnyed pa nyid sar pa'o/ /skabs 'dir sar pa nyid la bya'o/ /srin bal gyis stan sar pa byed ces bya ba ni nang tshangs can dang / bcags pa'o/ /byed ces bya ba ni bdag dang gzhan gyis so/ /spang ba'i ltung ba ni dngos po spangs nas ltung ba bshags par bya'o/ /nyes pa ni srin bal gyi phung po dang sgo nga 'byed dam 'jig gam rmel tam rmel du bcug ste/ stan ma zin bar du nyes byas so/ /zin nas spang ba'i ltung ba'o/ /byas pa rnyed pa dang / byas zin pa spyod pa dang / rnying pa 'chos pa la nyes pa med do/ /gzhan bgyid du stsal ba dang / gzhan gyi phyir byed pa dang / gzhan gyis ma zin pa zin par byed pa dang / khyim pa la du stsal ba kun nyes byas su 'gyur ro/ /bslab pa byin pa dang / dge tshul pha dang / dge tshul ma dang / rkun gnas kyi srin bal gyis stan byas na nyes byas su 'gyur ro/ /'gro ba gzhan du gnas pa dang / mu stegs can dang / kun du rgyu ba la stan byed du bcug na nyes byas so/ /rgyu dang spun gcig rung la gcig mi rung ba 'dres bar stan byed du bcug na nyes byas su 'gyur ro/ / srin bal dang / zar ma'i bal dang 'dres par byed du bcug pa dang / srin bal dang se bo dang 'dres par byed du bcug na nyes byas su 'gyur ro/ /gding ba'i tshad bde bar gshegs pa'i tshad du byas na nyes byas su 'gyur ro/ /gding ba chen po'i tshad ni khru phyed dang lnga'o/ /chung ngu ni khru phyed dang gsum mo/ / bar ma ni 'bring ngo / /bal nag po 'ba' zhig las stan byed pa'i gleng gzhi ni bcom ldan 'das mnyan du yod pa na bzhugs so/ /de'i tshe na dge slong mang po dag lug bal nag po 'ba' zhig las stan byed de lug bal nag po yang rin che zhing rnyed dka' ste/ khyim bdag dang bram ze kun la tshol zhing slong bas lung dbog pa dang bsam gtan byed pa'i bar chad du gyur pas/ don nyung ba'i dge slong rnams kyis snyan du gsol nas/ gso dka' ba dgang dka' ba zhes smad nas/ sbyangs pa'i yon tan pa dga' ba dang tshod zin pa'i legs pa bsngags nas 'dul ba la bslab pa'i gnas bcas te/ yang dge slong zhes rtsa ba'i tshig rnams so/ /yang dge slong gang zhes bya ba ni dge slong mang po ste/ gzhan yang de dang 'dra ba'o/ /bal nag po 'ba' zhig ces bya ba ni nag po la rnam pa bzhi ste/ rang bzhin gyis nag pa dang / sngon por btsos pa dang / sa nag gi nang du btsos pa dang / dri ma can lta bu'o/ /skabs 'dir ni rang bzhin gyis nag pa la bya'o/ /lug pa la zhes bya ba ni spu'o/ /sar pa zhes bya ba ni gnyis te/ gsar du byas pa dang / rnyed pa sar pa'o/ /skabs 'dir ni sar pa byas pa'o/ /stan zhes bya ba ni nang tshangs can dang / bcags pa la bya'o/ /byed ces bya ba ni bdag dang gzhan gyis so/ /spang ba'i ltung ba ni dngos po spangs nas ltung ba bshags par bya'o/ /nyes pa ni bal gyi phung po dang / ke'u dang / chun po bshig gam rmel te/ stan du byas na ltung bar 'gyur ro/ /gzhan gyis byin pa dang / byas zin pa la spyod pa dang / rnying pa 'chos pa la ni nyes pa med do/ /phrin dang phrin yig gis byed du bcug pa ni rim pa gong ma bzhin du sbyar ro/ /cha gnyis las stan du byed pa'i gleng gzhi ni bcom ldan 'das mnyan du yod pa na bzhugs so/ /de'i tshe dge slong dag snga ma bzhin du stan nag po gcig pu byed du mi gnang ste/ de la dkar po bsres shig par bka' stsal pa dang / de dag gis bzang po 'dod pa'i phyir dkar po cung zad mtshan ma tsam zhig bsres shing byed pas don nyung ba'i dge slong rnams 'phya ste/ snyan du bdas nas rigs pa ma yin rung ba ma yin zhes smad de/ dge slong stan sar pa byed pa na phyed lug bal nag po 'ba' zhig las chug shig /bzhi cha gcig dkar po las chug shig /bzhi cha gcig 'khob bal las chug shig /de ltar ma byas na spang bar 'gyur ro zhes bslab pa'i gnas bcas so/ /stan sar pa zhes bya ba ni rnam pa gnyis te/ gsar du byas pa dang / rnyed pa sar pa'o/ /skabs 'dir ni gsar du byas pa'o/ /dge slong zhes bya ba ni dge slong mang po ste/ chos 'di la zhugs pa'o/ /stan zhes bya ba ni nang tshangs can dang bcags pa la bya ste/ skabs 'dir bcags pa la bya'o/ /byed ces bya ba ni bdag gis byas pa'am gzhan gyis byas pa'o/ /gnyis kyi cha nag po las chug shig ces bya ba ni bal rang bzhin gyis gnag pa'o/ /bal zhes bya ba ni spu'o/ /bzhi cha gcig dkar po las chug shig ces bya ba ni skang bal lam gnya' bal lam rtsib logs kyi bal lo/ /bzhi cha gcig 'khob bal zhes bya ba ni mgo bal dang brla bal dang lto bal la 'khob bal zhes bya'o/ /ma bcug ces bya ba ni ma bsres pa'o/ /lug bal nag po 'ba' zhig las stan byas na spang ba'i ltung ba zhes bya ba ni dngos po spangs nas ltung ba bshags par bya'o/ / de la nyes pa ni dge slong gis bal srang bcu las stan gcig byed na de la lug bal nag po 'ba' zhig las srang lnga chug shig /srang phyed dang gsum ni bal dkar po las chug shig /srang phyed dang gsum ni 'khob bal las chug shig /gal te dge slong gis phyed lug bal nag po las ma bcug gam/ bzhi cha gcig dkar po las ma bcug gam/ bzhi cha gcig 'khob bal las ma bcug par stan sar pa byas na zin ma thag tu spang ba'i ltung bar 'gyur ro/ /de la bal nag po srang phyed dam/ srang gcig tsam gyis khyed par bcug na thams cad du ltung bar 'gyur ro/ /de la srong bcu pa'i stan ji lta ba bzhin du srang nyi shu pa'am/ lnga bcu pa'am brgya pa yang rung ste/ phyed nag po bzhi cha gnyis 'khob bal dang dkar po bsre bar rig par bya'o/ /stan sar pa byas pa lo drug ma lon par stan sar pa gzhan byed du mi gnang ba'i gleng gzhi ni bcom ldan 'das mnyan du yod pa na bzhugs so/ /de'i tshe na dge slong dag mal stan la longs spyod de stan de ni thung stan de ni ring stan de ni ha cang zheng chung / de ni ha cang zheng ches zhes snga ma bor zhing stan sar pa 'ba' zhig byed pas bya ba dang byed pa mang ste/ dge ba'i phyogs nyams par gyur pas dge slong rnams kyis snyan du gsol nas/ bcom ldan 'das kyis gso dka' ba zhes rnam grangs du mas smad nas chog shes pa dang / sbyangs pa'i yon tan la dga' ba'i bsngags pa brjod de/ stan rnying pa dge slong gis lo drug gi bar du chongs shig /lo drug ma lon par stan sar pa gzhan byed na spang ba'i ltung bar 'gyur ro zhes 'dul ba la bslab pa'i gnas bcas so/ /de la lo drug ma lon par stan sar pa byed du rjes su gnang ba'i gleng gzhi ni bcom ldan 'das 'brog skyes kyi 'brog bzang po na bzhugs so/ /de'i tshe 'brog de na lhags pa dang rlung che bas las sar pa pa'i dge slong stan lo drug tu mi thub nas rdol bas las byed pa btang ngo / /de ltar gyur pa snyan du bdas nas las sar pa pa'i dge slong gang yang rung ste/ de'i stan lo drug tu mi thub pa dang / lo drug tshun chad stan sar pa bya bar dge 'dun la sdom pa gsol cig /dge 'dun gyis kyang stan legs par rtog pa la mi thub pa dang / gsol ba dang zhu ba'i las kyis lo drug tshun chad stan sar pa byed pa'i sdom pa byin cig /stan sar pa zhes bya ba la gnyis te/ gsar du byas pa dang / rnyed pa sar pa'o/ /skabs 'dir ni gsar pa nyid la bya'o/ /dge slong zhes bya ba ni dge slong mang po ste/ gzhan yang de dang 'dra'o/ /stan zhes bya ba ni bcags pa la bya'o/ /byed ces bya ba ni bdag dang gzhan gyis byas pa'o/ /mi 'dod bzhin du zhes bya ba ni ma dad par lo drug gi bar du chongs shig pa'o/ /stan rnying pa zhes bya ba ni snga ma rnying pa gang yin pa'o/ /spangs kyang rung ma spangs kyang rung ste stan sar pa byed ces bya ba ni sar pa'i gzhan gnyis pa byed pa'o/ /dge 'dun gyis gnang ba ma gtogs zhes bya ba ni bkol ba'o/ /spang ba'i ltung ba zhes bya ba ni dngos po spangs nas ltung ba bshags pa'o/ /dge slong gis lo gang la stan byas nas de nyid kyi lo la stan phyi ma gnyis pa byed na nyes byas so/ /zin na spang ba'i ltung ba'o/ /stan byas pa las ma zin te de nyid bor ba ni nyes byas so/ /dge slong phrin dang phrin yig dang lag brda dang / gzhan gyi slad du lo drug tshun chad du stan byed du bcug na nyes byas so/ /rgyu rung la spun mi rung ba dang gnyis ka mi rung ba las byas na nyes byas su 'gyur ro/ /rkun gnas dang / so sor gnas pa dang / mu stegs can dang / 'gro ba gzhan du gnas pa la byed du bcug na nyes byas su 'gyur ro/ /gding ba sar pa la rnying pa mtho gang gis glan pa'i gleng gzhi ni bcom ldan 'das mnyan du yod pa na bzhugs so/ /de'i tshe mnyan du yod pa na rgyal bo zas gtsang ma'i bu 'khor los sgyur ba'i rgyal po'i mtshan can rgyal thabs bor nas rab tu byung ste/ bdud rnam pa bzhi btul nas bla na med pa'i ye shes thob ste/ dbus kyi yul du 'byung ngo zhes sgra kun du grags pa/ byang phyogs kyi tshong pas thos nas/ tshong pa de dag sangs rgyas la bsnyen bkur bya ba dang phyag 'tshal ba'i phyir der 'ongs pa dang / de nas khyim bdag mgon med kyis tshong pa de khrid de sangs rgyas kyi gam du phyag byas nas slar 'khor te dge slong gi gnas su song ba dang / dge slong dag nyin par bsam gtan byed pa'i gnas na dge slong dag nyin par stan la skyil mo krung bcas te 'dug 'dug pas/ de ltar rdol to zhes khyim bdag mgon med zas sbyin gyis tshong pa la byas nas tshong pa dad pa skyes nas ras yug lnga brgya stan rgyur phul lo/ /dge slong dag gis stan rnying pa rnams bla gab med par phyi rol du bor te/ dge slong dag grong du chos ston la song ba'i 'og tu bcom ldan 'das mal stan byul bar bzhed de gtsug lag khang du byon pa dang phyag dar khrod na stan mang po long long por 'dug pa gzigs nas khyim bdag dad pa dang bram ze ni sha khrag zad zad du dge slong dag la sbyin na/ dge slong dag ni tshod mi zin par spyod do zhes smad nas/ sbyangs pa'i yon tan la dga' ba dang / tshod zin pa'i bsngags pa brjod nas/ stan sar pa byed na sra zhing mi rdol bar bya ba dang / stan bzang po la chags pa mi sdug par bya ba'i phyir sar pa la rnying pa mtho gang gis glon cig ces 'dul ba la bslab pa'i gnas bcas so/ /sar pa zhes bya ba la rnam pa gnyis te byas pa dang / rnyed pa sar pa'o/ /skabs 'dir ni byas pa sar pa la bya'o/ /stan zhes bya ba ni gding ba'o/ /dge slong zhes bya ba ni chos 'di la zhugs pa'o/ /byed ces bya ba ni bdag dang gzhan gyis so/ / gding ba rnying pa kun la zhes bya ba ni gal te stan sar pa gnyis pa gzhan yod na de ltar gyis shig pa'o/ /bde bar gshegs pa'i mtho gang zhes bya ba ni bde bar gshegs pa ni ston pa ste/ de'i mtho gang la mi tshad ma'i khru phyed dang do'o/ /kha dog mi sdug par bya ba'i phyir glon cig ces bya ba ni bzang po la chags pa'i gnyen po dang sra bar bya ba'i phyir ro zhe'o/ /ma glan tam zhes bya ba ni ma sbyar ba la bya'o/ /kha dog mi sdug par bya ba'i phyir ma glan na spang ba'i ltung bar 'gyur ro zhes bya ba ni dngos po spangs nas ltung ba bshags par bya'o/ /gding ba sar pa la rnying pas ma glan na thams cad du spang ba'i ltung bar 'gyur ro/ /gding ba rnying pa zhigs te glan du mi rung na ma glan kyang nyes pa med do/ /bde bar gshegs pa'i sor gcig gam sor phyed phri ste glan na spang bar 'gyur ro/ /gzhan la sbyin pa dang khyim pa bgyid du bcug pa ni nyes byas su 'gyur ro/ /rgyu dang spun mi rung ba phri ba'am ma phri ste/ glan na nyes byas su 'gyur ro/ /phrin dang phrin yig dang lag brdas bde bar gshegs pa'i sor gcig phri ste/ byad du bcug na nyes byas su 'gyur ro/ /lam na bal khyer ba'i gleng gzhi ni sangs rgyas bcom ldan 'das mnyan du yod pa na bzhugs so/ /de'i tshe na 'phags pa drug sde po dag nang bgros pa/ lhung bzed nag po can spre'u tshil gyis rkang pa bskus pa de dag ni 'gro ba dang 'ong ba'i tshe na yang rnyed pa bsgrub cing skye bo mang po dga' bar gyur na/ bdag cag ni khron pa'i sbal ba dang 'dra ste gar yang mi 'ong bas rnyed pa yang nyung na rnyed pa sgrub cing 'phags pa 'char ba po ni gzhi na gtsug khang srung du bzhag la bdag cag lnga ni bal yul du rnyed pa sgrub tu 'dong ngo zhes nas tshong pa dag yul du 'gro ba dang lhan cig tu bal yul du song ste/ slar 'khor ba'i tshe lhan cig tu dong dong ba las tshong pa dag gis shing rta bal gyis gang ba shing rta chag nas bal lam du bor ba las/ 'phags pa drug sde bal bslangs te/ bzhis ni bal khur re re khyer/ gcig gis ni bzhi po'i yo byad rnams khur khyer te/ tshong pa sngar gseb lam du dong dong ba las/ ri brags kyi dge slong dang grong mi dag gis mthong nas/ bal lang gis dmag 'ong ngo ri brags kyi grong mi rnams 'bros pa dang / dge slong khur khyer ba la mu stegs can dang bal bdag 'phya zhing / ma dad pa dang / mnyan du yod par 'ongs pa dang / khur chen po sa la bzhag pa'i tshe sgra chen po byung bas/ dge slong rnams ma dad cing 'phya bar gyur te de ltar gyur pa snyan du bdas so/ /de nas bcom ldan 'das kyis drug sde po rnams la/ khyed kyis mi mdzes pa de lta bu byas pa bden nam zhes rmas na/ btsun pa mad do zhes gsol nas dge sbyong gi bya ba ma yin dgos pa dang mthun pa dang rigs pa ma yin zhes smad nas/ dge slong gis bal lam du khyer du mi gnang bar 'dul ba la bslab pa'i gnas bcas so/ /dge slong zhes bya ba ni drug sde ste/ gzhan yang de dang 'dra ba'o/ /lam du zhugs zhes bya ba ni mya ngan gyi lam mam/ skye bo mang po 'gro ba'i lam mo/ /rnyed ces bya ba ni gzhan las so/ /lug gi bal zhes bya ba ni spu'o/ /dge slong des 'dod na zhes bya ba ni gal te dgos par 'gyur ro/ /long shig ces bya ba ni blang bar bya'o/ /blangs nas dpag tshad gsum gyi bar du rang gis khyer cig ces bya ba ni dpag tshad gsum las mi 'da' bar bya'o/ /gzhan gyis khyer ba med ces bya ba ni rung bar byed pa'am g.yog med pa'o/ /de las 'das par zhes bya ba ni thal ba'o/ /spang ba'i ltung ba zhes bya ba ni dngos po spangs nas ltung ba bshags par bya'o/ /dge slong gis bal khyer nas dgon pa'i lam du zhugs te/ rgyang grags phyed dam grong gcig nas gcig tu byung na nyes byas re rer 'gyur ro/ /rgyang grangs gcig tu phyin na spang ba'i ltung bar 'gyur ro/ /zhwa dang / lham dang / lcag pod kyi rgyu ni khyer kyang ltung ba med do/ /lug gi bal dpag tshad gsum las 'das par khyer yang ltung bar mi 'gyur ba yang yod de/ phrin pa la bskur ba dang / phrin yig dang / lag brda dang / gcig nas gcig tu brgyud pa dang / smyon pa dang / sems 'khrugs pa dang / nad kyis gzir ba dang / glen pa dang / lkugs pa dang / 'on pa dang / dmus long rnams la bskur na thams cad du nyes byas su 'gyur ro/ /bal khur bcol ba las slad kyis ma gnang ba'i gleng gzhi ni bcom ldan 'das mnyan du yod pa na bzhugs so/ /de'i tshe drug sde po rnams bal yul nas rnyed pa'i bal sngar ni lngar bgo bar chad pa las slad kyis 'char bas g.yo byas nas drug tu bgos so/ /de nas 'char bas bsams pa bdag gis bal gyi skal ba 'di khyim mi mo la bcol na ni khyim mi mo yang khrims med pas brkus su'ang / dge slong ma bcu bdun sde la bcol na ni bza' ba'i rin 'og tu btang yang dag na gau ta mI skye dgu'i bdag mo ni 'khor dang bcas par 'dul ba 'dzin pa yin gyi de la bcol lo snyam du bsams nas/ 'char ba song song ba dang skye dgu'i bdag mo dang lam du phrad nas 'char bas smras pa bcom ldan 'das kyis bsod nams dang ldan pa ni bsams pa bzhin du 'grub bo zhes gsungs pa ni gzhan du mi 'gyur te/ bdag la yang bsod nams yod lta zhig /bdag la bal nyung zhig mchis na skye dgu'i bdag mo la bcol lo zhes byas pa dang / mo na re de ltar rung gis da ltar sangs rgyas kyi zhabs la phyag 'tshal du 'gro yi do nod len pa btang gis skur cig ces byas so/ /de nas dge slong ma gnyis len du btang na bal chun po dam ches pas khur lci ste/ dge slong ma gnyis kyang ngal te nyal zhing 'dug pa gzhan gyis mthong nas khyed gnyis ci'i phyir nyal zhes smras na/ de'i lo rgyus zhib tu de gnyis kyis smras so/ /de nas skye dgu'i bdag mo yang bal mang po de mthong nas bal mang mod kyi skyes bu dam pa rnams ni khas blangs pa rnams la lcogs par bya dgos/ yang na ni len dgos zhes nas 'phral la slob ma rnams kha bkram nas kun la bcol te byas nas zin te 'char ba'i steng du bskur te gau ta mI skye dgu'i bdag mo lag pa shin tu dmar ba ni btso blags mkhan gyi lag pa dang 'dra bar gyur pa sangs rgyas kyi zhabs la phyag 'tshal ba'i tshe/ bcom ldan 'das kyis gzigs nas bkas rmas pa ji ltar gyur/ 'char bas bal bgyid du stsal to zhes gsol to/ /rigs pa ma yin zhes smad nas bslab pa bcas nas yang dge slong zhes smos so dge slong zhes bya ba ni 'char ba ste/ gzhan yang de dang 'dra ba'o/ /gnyen ma yin zhes bya ba ni pha ma'i zung bdun rgyud tshun chad ni gnyen yin no/ /de phan chad ni gnyen ma yin no/ /dge slong ma zhes bya ba ni chos 'di la zhugs pa'o/ /lug gi bal zhes bya ba ni spu'o/ /'khrur bcol zhes bya ba ni tha na chu'i nang du bcal ba tsam yang ngo / /'tshed du bcol ba zhes bya ba ni tha na tshon gyi nang du bsubs pa tsam yang ngo / /rmel du bcol zhes bya ba ni tha na tshums gcig tsam mam/ 'dab ma gcig tsam mo/ /spang ba'i ltung ba zhes bya ba ni dngos po spangs nas ltung ba bshags par bya'o/ /nyes pa gang zhe na/ dge slong gis gnyen ma yin pa'i dge slong ma la gnyen ma yin par 'du shes bzhin du lug gi bal 'khrur bcol na spang ba'i ltung bar 'gyur ro/ /'tshed du bcug na spang ba'i ltung bar 'gyur ro/ /rmel du bcol na spang ba'i ltung bar 'gyur ro/ /gnyen ma yin pa la ma yin pa'i 'du shes sam the tshom za bzhin du bcol na nyes byas su 'gyur ro/ /dge slong ma gnyen ma lags pa la phrin dang phrin yig dang / lag brda dang gcig nas gcig tu brgyud de bcol ba ni nyes byas su 'gyur ro/ /dge slong ma smyon ma dang / nad kyis gzir ba dang / sems 'khrugs pa dang / glen pa dang / lkugs pa dang 'on pa la 'khrur bcol na nyes byas su 'gyur ro/ /mtshams med pa lnga byas pa dang / khyim mi mo la bcol na nyes byas su 'gyur ro/ /dge 'dun gyi dbyen byed pa dang / bslab pa byin pa la 'khrur bcol na spang ba'i ltung bar 'gyur ro/ /mi rung ba dang 'dres pa ni rnga mo'i bal dang / ra'i bal dang ri dwags kyi bal dang 'dres pa zhig 'khrul bcol na nyes byas su 'gyur ro/ /gzhan gyi bal zhig 'khrur bcol na nyes byas su 'gyur ro/ /bsnyen par ma rdzogs pa la 'khrur bcol ba dang / dge slong ma dang / dge tshul ma dang / dge bsnyen ma dang / khyim pa mo dang / mu stegs can dang / 'gro ba gzhan du gnas pa la 'khrur bcol na nyes byas su 'gyur ro/ /sa le sbram len du mi gnang ba'i gleng gzhi ni bcom ldan 'das rgyal po'i khab bya ka lan da ka gnas pa'i 'od ma'i tshal na bzhugs so/ /de'i tshe na rgyal po'i khab na blon po dang grong dpon gtsug na nor bu la sogs pa dpong sar tshogs nas rtog cing dpyod pa la zhugs te/ la la na re shAkya'i dge sbyong dag la gser rung ngo zhes zer ro/ la la ni mi rung ngo zhes zer ro/ /la la na re gser dngul su la rung ba de la ni 'dod pa'i yon tan lnga dang shing rta la sogs pa yang rung ngo / /zhes zer na de ci 'dra ba zhu ba'i phyir grong dpon gtsug na nor bus ched du song ste sangs rgyas la zhus nas/ bka' stsal pa/ gser dngul ni dge sbyong len du mi rung ngo / /shing rta la sogs pa yon bdag gis phul ba ni len du rung ngo zhes gnang ba dang / khyim bdag song gi 'og tu gser dngul len du mi gnang ngo zhes bka' ni stsal na 'dul ba la bslab pa'i gnas ma bcas so/ /slad kyis bcom ldan 'das mnyan du yod pa na bzhugs pa'i tshe dge slong drug sde po rnams rang gi lag gis sa le sbram dang / dngul len cing len du 'jug/ /phung po gcig dang / phung po gnyis dang / phung po du mar byed/ stan gyi steng dang khri steng skyed cing 'jog pas na/ mu stegs can rnams kyang dge slong 'di dag khyem pa dang khyad par ci yod/ bsam pa ni ci tha dad ces 'phya zhing mi snyan par 'dzer to/ de ltar gyur pa dge slong rnams kyis snyan du gsol nas/ bkas drug sde po la rmas na/ mad do zhes gsol nas rung ba ma yin zhes bya ba rnam grangs du ma'i sgo nas smad nas/ sa le sbram len du mi gnang bar bslab pa bcas so/ /yang dge slong gang zhes bya ba ni drug sde po ste gzhan yang de dang 'dra ba'o/ /rang gi lag gis zhes bya ba ni lag gis 'dzin pas so/ /sa le sbram zhes bya ba ni gser dang dngul lo/ /len zhes bya ba ni bdag nyid kyis so/ /len du bcug ces bya ba ni gzhan la'o/ /spang ba'i ltung ba zhes bya ba ni dngos po spangs nas ltung ba bshags par bya'o/ /nyes pa ni 'di nas long 'di snyed cig long / 'di snyed cig khyer shog ces bsgo ba'i tshe na ni nyes byas so/ /blang na ni spang ba'i ltung bar 'gyur ro/ /dge slong gis gser dang dngul la reg na spang ba'i ltung bar 'gyur ro/ /nor bu dang mu tig dang baiDUR+Ya la reg na re res kyang spang ba'i ltung bar 'gyur ro/ /zangs dang lcags dang / ro nye dang tshon mo steng la reg na nyes pa med do/ /de la gser dngul rjes su gnang ba ni bcom ldan 'das mnyan du yod pa na bzhugs pa'i tshe yul tsam pa na khyim bdag bsam pa dge ba zhig gis gtsug lag khang zhig brtsigs nas dge slong mang zhig spyan drangs te/ dbyar zla ba gsum tshul du zhugs so/ /de nas dbyar zla ba gsum 'das nas tshul nas byung ste mnyan du yod par sangs rgyas [(]gyi [,]kyi[)]zhabs la phyag 'tshal du dong ba'i tshe khyim bdag la gos bslangs na gos 'phral du ma 'byor nas gos rin kAr ShA pa Na byin na ston pas ma gnang nas ma blangs so/ /ma blangs pa dge slong dag la byas pa dang / dge slong gis snyan du gsol te/ khyim bdag dad pas byin na dge slong dag gis len du rung bar thugs rjes dgongs te/ long shig blangs nas sbyin bdag gis bsngos te tshongs shig yang na kun dga' ra ba pa'am/ dge bsnyen la zhog shig/ yon bdag ma shi'i bar du yon bdag la bsngor rung ngo / /yon bdag shi'am yon bdag med na gser dngul dge slong gcig gi mdun du zhog la dngos po rung ba ma yin pa 'di bdag gis rnyed de/ rung ba ma yin pa 'dis rung ba'i gos shig bsgrub po zhes lan gnyis lan gsum du brjod par bya'o/ /dge slong gis phrin dang phrin yig dang gcig nas gcig tu brgyud de len du bcol na nyes byas su 'gyur ro/ /pha rol smyon pa dang / nad kyis gzir ba dang / glen pa dang / 'on pa dang / lkugs pa la gser dngul len du bcug kyang rung ste nyes byas su 'gyur ro/ /gser dngul blangs kyang nyes par mi 'gyur ba yod de/ bdag gir bya ba'i sems med de/ gzhan la sbyin par bsam pa dang mi rung bas rung ba'i dngos po gzhan btsal lo snyam mo/ /mtshan ma btab pa yo byad du mi gnang ba'i gleng gzhi ni bcom ldan 'das mnyan du yod pa na bzhugs so/ /de'i tshe byang phyogs kyi tshong pa la gcer bu pas lung bstan pa dang / 'dir ni sngar gtam thos pa'i nyan thos kyi dge 'dun yin no snyam nas de la tshong pas byang phyogs kyi shing tog dang la ba bzang po zhig byin no/ /de'i grogs dag gis dze ta'i tshal du ngom du btang ba dang / bsnyen dga' bo dze ta'i sgo na 'dug pas chos bshad de bdag gi la ba ngan pa dang brjes pa dang / de nas gcer bu pa'i grogs po dag gis 'dug tu ma ster te nan thur cher byas nas phyir len du bcug pa dang / ma ster nas sangs rgyas la gsol pa dang / ma byin na khrag gis sgyugs te 'chi bas slar byin cig par bkas gtad de des khyim phyags nas slar byin no de ltar mtshan ma btab pas bzang ngan brjes pa dag byung mod kyi bslab pa ma bcas so/ /slad kyis mnyan du yod pa na dge slong drug sde po rnams mtshan ma btab pa rnam pa sna tshogs la spyod cing spogs byed de/ skyed gtong bun 'gyed lhag tshol gser dngul brdungs pa dang / ma brdungs pa gnyis brje zhing spogs byed/ 'bras bu dang nas gsar tog gnyis las gsum mam/ gcig las gnyis su bun 'gyed pa dang / dung gis mu tig brje ba dang / mu tig gis nor bu rin po che brje bar lhag tshol/ de ltar byed pas na mu stegs can rnams 'phya zhing smod pas dge slong rnams kyis snyan du gsol te/ da slan chad mtshan ma btab pa rnam pa sna tshogs la spyod cing bzang ngan brjer mi gnang bar bslab pa bcas so/ /yang dge slong gang zhes bya ba ni drug sde po ste gzhan yang de dang 'dra ba'o/ /rnam pa sna tshogs zhes bya ba ni rnam pa du ma'o/ /mtshan ma btab pa la spyod par byed ces bya ba ni spogs byed pa dang / skyed gtong ba dang / bun 'gyed pa dang / lhag tshol ba'o/ /spang ba'i ltung ba ni dngos po spangs nas ltung ba bshags par bya'o/ /dge slong gis gser dngul lam/ yul phyogs su brin pa'i rdzas gang yang rung ba dang / nas 'bras skyed dang bun 'gyed pa'i tshe na ni nyes byas su 'gyur ro/ /spogs dang / khe bdag gi lag par thob na spang ba'i ltung bar 'gyur ro/ /dkon mchog gsum gyi phyir ram bu lon gyi 'og tu bsab pa'am gzhan la sbyin pa ni nyes pa med do/ /phrin dang phrin yig dang lag brda dang gcig nas gcig tu brgyud de/ nor sna tshogs spogs byed pa ni nyes byas su 'gyur ro/ /sems 'khrugs pa dang / nad kyis gzir ba dang / glen pa dang / 'on pa dang / lkugs pa dang 'gro ba gzhan du gnas pa dang / lhan cig tu nor lhag spogs byed na nyes byas so/ /mi la mir 'du shes na spang bar 'gyur ro/ /mi la mi ma lags par 'du shes na nyes byas so/ /mi ma yin pa la yang de bzhin no/ /bsnyen par rdzogs kha dang bsnyen par ma rdzogs pa na btang yang nyes byas so/ /nor sna tshogs la spogs byas kyang nyes par mi 'gyur ba yang yod de rin thang 'dra mtshungs par brjes pa'o/ /dge slong la spang bar 'gyur ba bzhin du bslab pa byin pa dang / dge slong ma la yang de bzhin no/ /dge slong ma dang dge tshul pho mo la yang de bzhin no/ /bslab pa'i gnas 'dir ji lta ba bzhin du nyo zhing 'tshong ba la yang de bzhin du sbyor cig / nyo tshong byed du mi gnang ba'i gleng gzhi ni bcom ldan 'das mnyan du yod pa dze ta'i tshal na bzhugs so/ /de'i tshe dge slong drug sde po rnams sngar mtshan ma btab pas spogs byed cing dngos skyed/ gnyis ka len par mi gnang bas na nyo zhing tshong byed pa la zhugs te/ dngos ni rin 'og tu thal byung du gtong zhing spogs byed de ji ltar na nyo zhing 'tshong zhe na/ nam rin thang chung ba de na nyos te bzhag nas nam rin che ba de na 'tshong ba'o/ /lo legs pa'i tshe ni nyos te bzhag nas nam lo nyes shing rin che ba'i tshe ni phar 'tshong bar byed de/ de ltar nyo tshong rnam pa sna tshogs byed pas na mu stegs can rnams 'phya zhing smod de/ dge slong shAkya'i bu rnams skyo zhing chog mi shes pa de dag khyim pa skya bo dang ni bye brag ni ci yod/ bsam pa ni cis tha dad ces mi snyan par zer ba de dge slong dag gis snyan du gsol to/ /drug sde rnams de ltar byed pa bden nam zhes rmas pa dang / mad do zhes gsol nas dge sbyong gi bya ba ma yin rigs pa ma yin zhes smad nas nyo tshong byed du mi gnang bar bslab pa bcas so/ /dge slong zhes bya ba ni drug sde po ste gzhan yang de dang 'dra'o/ /rnam pa mang po zhes bya ba ni rnam pa du ma'o/ /nyo ba dang 'tshong bar byed ces bya ba ni kun du spyod pa'o/ /spang ba'i ltung ba zhes bya ba ni dngos po spangs nas ltung ba bshags par bya'o/ /ltung ba ji lta bu zhe na/ dge slong gis khe'i phyir 'tshong / khe'i phyir nyo na nyo ba'i tshe nyes byas so/ /btsongs te rin thob na spang ba'i ltung ba'o/ /khe mi 'dod pa'i phyir nyo tshong byed na ltung ba med do/ /gzhan la sbyin pa'am bu lon chags pa'i phyir bsab pa la nyo tshong byas pa ni ltung ba med do/ /dge 'dun gyi phyir nyo tshong rjes su gnang ba'i gleng gzhi ni bcom ldan 'das yul yangs pa can gyi khang bu brtsegs pa na bzhugs so/ /de'i tshe na byang phyogs kyi tshong pa sngon chad gtsug lag khang dag ma mthong bas de'i gtsug lag khang chen po zhig 'dug pa gsar du mthong nas de na dge slong 'khod pa dag la 'phags pa dag la bdag gis bshos gsol na bdag cag gsar du lhags pas 'bras ma mchis kyis zong gis 'bras 'jal lo zhes byas pa dang / bcom ldan 'das kyis nyo tshong ma gnang ngo zhes ma byin pa dang snyan du bdas te dge 'dun gyi phyir 'bras tshong la rin long shig ces bka' stsal to/ /de lta bu gsol ba mang ste de bzhin du sbyin pas dge 'dun bshos chad par gyur te/ bka' stsal pa/ zong gis 'bras gsar ba nyos la/ rnying pa kun tshong gyis shig ces rjes su gnang ngo / /spang ba nyi shu pa rdzogs so// //spang ba'i bcu phung tha ma lhung bzed lhag ma bcang du mi gnang ba'i gleng gzhi ni bcom ldan 'das mnyan du yod pa na bzhugs so/ /de'i tshe bsnyen dga' bos 'di snyam du bsams so/ /mgon med zas sbyin gyis snyan du gsol nas bslab pa'i gnas bcas te/ /rnyed pa yang rab tu nyung nas mi dga' ste/ khang thog tu 'dzegs te bltas nas skyed mos tshal na sun zin pa drug cu 'dus shing 'khod pa mthong nas der rnyed pa zhig ma grub na bdag gi ming bsnyen dga' bo zhes mi bya mod snyam du bsams nas der song ste de dag la chos bshad de dad par byas pa dang / de na gcig na re 'phags pa la yon zhig 'bul na ci mkho zhes byas pa dang / bdag la lhung bzed mkho'o zhes byas so/ /lhung bzed ni ma mchis na zong zhig 'bul na ji tsam ri/ kAr ShA pa Na drug cu ri'o zhes byas pa dang / des kAr ShA pa Na drug cu byin na gzhan la yang de'i thang du phab nas khyer ba dang / phyis su na zin pa rnams kyis bsod snyoms pa zhig la dge slong la lhung bzed du dgos zhes smras pa dang / gcig las mi dgos so zhes smras pa dang / dge sbyong shAkya'i bu ni 'dod pas gzir ba zhes de dag 'phya'o/ /de byung yang de'i mod la bslab pa ma bcas so/ /slad kyis bcom ldan 'das mnyan du yod pa na bzhugs pa'i tshe/ drug sde po rnams lhung bzed mang du rnyed cing thob pa rnams bsogs te bdag cag nyid kyang mi spyod gzhan yang spyod du mi ster to/ /de ltar gyur pa snyan du bdas nas/ drug sde po rnams la bkas rmad na/ mad do zhes gsol nas/ dge slong gi bya ba ma yin rigs pa ma yin zhes smad nas/ zhag bcu las lhung bzed lhag ma 'chad du ma gnang bar bcas so/ /dge slong zhes bya ba ni drug sde po ste gzhan yang de dang 'dra ba'o/ /lhung bzed lhag ma zhes bya ba ni byin gyis brlabs pa las lhag pa'o/ /chongs shig ces bya ba ni zhag bcu'i bar du bdag gir bcangs pa'o/ /de las 'das par bcangs na zhes bya ba ni zhag bcu las thal ba'o/ /spang ba'i ltung ba ni dngos po spangs nas ltung ba bshags par bya'o/ /ltung bar 'gyur ba gang zhe na dge slong gis tshes gcig gi nyin par lhung bzed lhag ma zhig rnyed na zhag bcu tshun chad byin gyis rlobs shig/ /yang na gzhan du skur cig/ /yang na gzhan la byin cig /de tshun chad du ma bskur ram gzhan la ma byin nam/ yang na snga ma spangs te phyi ma byin gyis ma brlabs na tshes bcu gcig gi skya rengs shar na spang ba'i ltung bar 'gyur ro/ /dge slong gis lhung bzed lhag pa de spang bar bya ba ma spangs/ nyes pa ma bshags na/ de tshun chad yo byad ci snyed pa kun snga ma'i rgyun gyis spang ba'i ltung bar 'gyur ro/ / zhag bcu las lhung bzed lhag par bcangs kyang nyes pa med de/ dge slong gzhan gyis lhung bzed bskur ba'o/ /lhung bzed tshad las ches pa dang / chung ba dang / ma bsregs pa dang dkar po bcangs na nyes byas so/ /dge slong smyos pa'i tshe zhag thal ba nyes pa med do/ /phrin dang phrin yig dang lag brda dang / gcig nas gcig tu brgyud de lhung bzed lhag pa zhag bcu las 'das par bcangs kyang nyes byas su 'gyur ro/ /lhung bzed gcig las lhag pa med kyang spang bar 'gyur ba yod de/ lhung bzed byin gyis ma brlabs pa bcangs pa'o/ /tshes gcig la bcangs kyang nyes pa med de zhag bcu tshun chad kyis shi ba'o/ /lhung bzed spyad bzod pa yod bzhin du lhag par bzang po tshol du mi gnang ba'i gleng gzhi ni bcom ldan 'das mnyan du yod pa na bzhugs so/ /de'i tshe na mnyan du yod pa na spos 'tshong ba'i khye'u zhig gnas te/ de'i tshod 'dus na lhung bzed spyad bzod pa bzang po zhig yod de/ khye'u des nang par sngar dge slong bsod snyoms pa zhig der 'ongs pa la lhung bzed btsongs na ma 'dod do/ /dze ta'i tshal na dge slong gnas pa lhung bzed nyo ba lta yod na der btang du bcol zhes gsol to/ /dge slong des kyang dge slong dag la lhung bzed de 'dra ba zhig yod ces gtam byas pa dang / bsnyen dga' bos thos nas des gzhan la byas su dogs nas gzhan gyis mi thos par bya ba'i phyir/ khyod de lta bu'i bya ba 'ba' zhig byed cing than skyel tam zhes byas nas de'i 'og tu gzhan med pa dang de la bzhams te khyim gang tsam na yod pa zhib tu dris nas tshong dus su bsnyen dga' bo gom pa brgyangs te song ba dang / spos 'tshong ba'i khye'us kyang drug sde bo yin par shes nas lhung bzed sbas so/ /bsnyen dga' bos mthong nas lhung bzed blangs nas bzhin bzangs nad med cing sbyin pa 'dis khyed kyi sems kyi rgyan dang sems kyi yo byad dang rnal 'byor kyi tshogs dang don gyi mchog grub cing lha dang mi'i don du gyur cig ces byas pa dang 'phags pa khyod kyis mang zhig smras mod kyi rin med kyi bar du mi gsol lo zhes ma ster ba dang / bsnyen dga' bo dang bshes pa'i tshong dpon zhig der phyin de bsnyen dga' bo la phyag 'tshal lo zhes byas pa dang / khyed kyi phyag skam pos nga la ci bya/ nga'i ci dag bsgrubs te phyin na phan mod ces byas pa dang / 'o na ngas ci bya lhung bzed de nyos te nga la byin na phan mod/ des kyang nyos nas byin no/ /bsnyen dga' bos lhung bzed de khyer nas lhung bzed bzang po gzhan la spyoms shing ngom pa dang / dge slong gzhon nu zhig gis smras pa gnas brtan lhung bzed bzang po yod bzhin du gzhan la bslang ba'i rigs sam zhes byas pa dang / dge slong gzhan gyis kyang de ni bden no zhes 'phya bar gyur ba snyan du bdas nas/ lhung bzed bzang po tshol du mi gnang bar bcas so/ /de ltar lhung bzed bzang po tshol du mi gnang ba dang / dge slong bsod snyoms pa zhig lhung bzed rdol te 'bras khu dag zags te/ sbrang ma mang po 'du bar gyur pa bram ze'i bu dag gis tshong dpon dang ded dpon 'dra bar 'khor mang pos bskor to zhes 'phya bas bka' stsal pa/ lhung bzed rdol ba glon cig drubs shig /lhan pa lngar ma tshang gi bar du gzhan tshol du mi gnang bar bcas so/ / yang dge slong zhes bya ba ni bsnyen dga' bo ste/ /gzhan yang de dang 'dra ba'o/ /lhung bzed lhan pa lnga las nyung ba zhes bya ba ni lngar ma tshang ba'o/ /spyad bzod par yod bzhin du zhes bya ba ni spyad du rung ba'o/ /lhung bzed sar pa gzhan tshol zhes bya ba ni lhung bzed gzhan gnyis pa tshol ba'o/ /sar pa zhes bya ba ni rnam pa gnyis sar pas sar pa dang / thob pas sar pa'o/ /skabs 'dir sar pa gnyi ga la bya'o/ /tshol zhes bya ba ni tshol bar byed pa'o/ /bzang po 'dod pa'i phyir zhes bya ba ni snga ma las lhag par bzang po 'dod pa'o/ /lhung bzed de grub na zhes bya ba ni rnyed pa'o/ /dge slong des zhes bya ba ni dge slong de nyid do/ /lhung bzed de dge 'dun gyi 'khor la dbul bar bya zhes bya ba ni de na dge slong 'khod pa'i 'khor der lhung bzed su ngan pa la phrogs te sbyin par bya'o/ /lhung bzed bzang po lhag pa 'drim pa'i dge slong pha gsol ba dang las kyis bskos shig /dge slong des lhung bzed thogs la rgan rims su gnas brten dang gsar bu'i bar du lhung bzed kyi yon tan bsngags shing 'di bzhed na snoms shig ces gnas brtan dang po la dbul bar bya'o/ /des ma 'dod na dang 'og dang gsum la dbul bar bya'o/ /gang gis lhung bzed bzang po khyer ba de'i lhung bzed ngan pa gnas brtan nas gcig tu brjes la nan gyis dge slong gsar bu la byin cig / dge slong lhung bzed lhag pa 'chang ba'i chad pa yang dge slong gi 'khor thams cad kyi lhung bzed ngan par gyur pa dge slong de la byin te/ lhung bzed de byin gyis kyang ma brlabs gzhan la yang ma bskur/ gzhan la yang ma byin par tha ma chag pa la thug gi bar du dal bus bags kyis spyad cig ces sgo shig / de'i chad pa dang mthun pa ni de yin no/ /dge slong des kyang lhung bzed snod gnyis gyis la snod gang bzang ba'i nang du ni lhung bzed ma glan pa chug shig /ngan pa'i nang du ni byin gyis brlabs pa chug shig /zas bsod snyoms dang 'gro ba'i tshe ya gnyis ka thogs la kha zas skam po zhig rnyed na ma glan pa'i nang du ldugs shig / kha zas gsher ba zhig rnyed na byin gyis brlabs pa'i nang du ldugs shig /lhung bzed de yang ji srid 'tsho ba'i bar du bcang bar bya ste/ de ni chad pa'o/ /spang ba'i ltung ba ni dngos po spangs nas ltung ba bshags par bya'o/ /dge slong gis lhung bzed spyad bzod pa yod la lhan pa lngas ma btab pa las lhung bzed lhag pa gzhan zhig tshol na tshol ba'i tshe nyes byas so/ /grub na spang ba'i ltung ba'o/ /gnyen ma yin pa'i tha ga pa la gos 'thag tu bcug pa'i gleng gzhi ni bcom ldan 'das mnyan du yod pa na bzhugs so/ /de'i tshe bsnyen dga' bos bsams pa khyim bdag mgon med zas sbyin gyis slong du mi gnang ba'i sdom pa bcas pas rnyed pa yang rab tu nyung na da cung zad rnyed pa dag sgrub po snyam nas khang thog tu 'dzegs te bltas na/ yugs sa mo bal 'khal ba lnga brgya tsam zhig dze ta'i tshal gyi shar sgo na 'dug pa mthong nas bsnyen dga' bo de dag gi gan du song ba dang / bud med gcig gis ni phyag byas kyi gzhan gyis ni ma byas so/ /bsnyen dga' bos bud med gzhan gyis ni tshe phyi ma'i sa bon ma btab kyi bu mo 'di gcig pus tshe phyi ma'i sa bon btab po zhes smras pa dang / de ji lta bu zhes bud med rnams kyis dris pa dang / der chos bshad pas dad pa skyes te bud med rnams kyis 'phags pa yon zhig 'bul lo zhes pa dang / bsnyen dga' bos smras pa/ sangs rgyas 'khor dang bcas pa bshos gsol cig /de ni mi nus so/ /'o na drug sde po rnams spyan drongs shig /de yang mi nus so zhes smras pa dang / 'o na nga la skud pa srang phyed phyed tsam zhig dbul mi nus sam zhes smras pa dang / de ni nus so zhes nas kun gyis bsdus te byin pa dang de'i nang nas gnyis 'khal mkhas pas na de gnyis ka la bkal du bcol to/ /de nas skud pa bkal zin pa dang / de de khyer te tha ga pa spyi cer la 'thag tu bcol na de ma btub pa dang / des chos bshad de byas na de'i chung mas len du bcug ste byas pa dang / phyis rngan pa bdas na ma ster to/ /phyis yang skud pa rnyed nas spyi cer la bcol ba dang snga ma'i rngan pa ma ster bas phyi ma yang ma btub nas de bzo dpon gyi gan du song ste/ de bzo dpon la byas na tha ga pa gzhan la bcol du mi rung ngam zhes dris pa dang / bsnyen dga' bos bsams pa spyi cer yang shin tu mkhas la sngar 'thag tu ma btub pas 'khon yang yod pas spyi cer la mi bcol du mi rung ngo zhes lan du mar nan gyis bzo dpon la gsol nas/ tha mar skud pa skyel ba'i rang rta mnos nas rang rtas bzo dpon gyi tshig gis thogs shig par bsgo na/ ma btub nas lan du mar mthus bsdigs shing nan thur gyis 'thag tu bcug pas na tha ga pas btags zin pa'i 'og tu 'phags pa bdag cag gis chang rin zhig 'phags pa la gsol lo zhes byas na bkren pa khyod ci bcang ba nga'i yin nam dug 'thung na ci nyes zhes bsgo ba dang / khyim bdag de yang ma dad par gyur nas dge sbyong shAkya'i bu de dag ni chos kyis bsgo nas/ rgyal po dang blon po'i mthus 'thag tu bcug go zhes mi snyan par 'dzer to/ /de ltar gyur pa snyan du bdas nas bkas rmas na/ bsnyen dga' bos mad do zhes gsol te/ dge sbyong gi bya ba ma yin zhes rnam grangs du ma'i sgo nas smad nas/ gnyen ma yin pa la 'thag tu mi gnang bar bcas so/ /yang dge slong gang zhes bya ba ni bsnyen dga' bo ste/ gzhan yang de dang 'dra ba'o/ /bdag gis bslangs pa'i skud pa zhes bya ba ni ji tsam du dad pa ste/ la las srang phyed la las [(]sreng [,]srang [)]gnyis/ kha cig las ni zho gcig /kha gcig gis ni zho phyed phyed sbyin pa'o/ /gnyen ma yin zhes bya ba ni gong ma dag dang 'dra'o/ /tha ga pa zhes bya ba ni gos 'thag pa'o/ /'thag tu bcug ces bya ba ni bal gyi dang sha na'i shun pa dang / du gu la'i dang / shing bal gyi dang / rtswa ko tam dang / srin bal gyi dang de dag las gang yang rung ba 'thag tu bcol ba'o/ /grub ces bya ba ni lag tu thob pa'o/ /spang ba'i ltung ba zhes bya ba ni dngos po spangs nas ltung ba bshags par bya'o/ /gnyen ma yin pa la skud pa dang bal slong ba'i tshe nyes byas so/ /gnyen ma yin pa la 'thag tu bcol na spang ba'i ltung bar 'gyur ro/ /gnyen ma yin pa las skud pa bslangs te bdag nyid kyis btags na nyes byas su 'gyur/ gnyen las skud pa bslangs te gnyen la 'thag tu bcug pa ni nyes pa med do/ /gla byin pa yang de bzhin no/ /phrin dang phrin yig dang lag brda dang / gcig nas gcig tu brgyud de bcol ba dang / gzhan gyi phyir bcol ba ni nyes byas su 'gyur ro/ /tha ga pa smyon pa dang sems 'khrugs pa dang / nad kyis gzir ba dang / glen pa dang / 'on pa dang / lkugs pa dang / mi ma yin pa la 'thag tu bcug na nyes byas su 'gyur ro/ /rgyu dang spun mi rung ba dang / gnyis ka mi rung dang 'dres pa 'thag tu bcug na nyes byas so/ /'thag pa gnyis pa'i gleng gzhi ni bcom ldan 'das mnyan du yod pa na bzhugs so/ /de'i tshe na khyim bdag khyo shug gnyis so sor 'phyo zhing nyal po byed pas nor kun 'thor zhing 'gribs par gyur te/ khyo shug gnyis kyis len du mar bran mor brdegs so/ /de ltar gyur pa bsnyen dga' bos rig nas de dag la chos bshad de khrims phog go/ /khrims phog pa'i 'og tu yang bran mo brdegs pa dang / de chung mas bdag cag sngon chad dang mi 'dra bar da bdag cag bden pa mthong na ci'i phyir brdeg ces smras pa dang / khos de ni bden no zhes nas bran mo la gos shig byin no/ /khyim bdag pho mo gnyis kyis bsams pa bdag cag bden pa mthong zhing sdig pa'i dri ma dang bral ba ni 'phags pa bsnyen dga' bo'i drin yin gyis de la gos shig sbyin no zhes sngar 'tham zhing 'khod pa bran mos thos nas bran mos bsams pa/ bdag la sngan chad de bzhin mi brdeg pa dang gos byin pa yang bsnyen dga' bo'i bka' drin yin na/ bdag gis len gzhan ni mi nus kyis gtam snyan pa tsam bskyal lo snyam nas gtam 'di bsnyen dga' bo la sbran no snyam nas bsnyen dga' bo der 'ongs pa la 'phags pa dga' ba skyed cig ces byas nas/ de yang yid ma ches te phyir bsdigs na 'phags pa mang du smra mi 'tshal gyis tha ga pa'i gan du bzhud cig ces byas nas tha ga pa dang phrad nas gos de nga'i phyir 'thag pa yin gyis/ thag ran bzang ba dang yug khyim che bar gyis shig ces bsgo nas/ btsun mo phred ldan ma la bsod snyoms blangs pa'i la du lhung bzed gang tha ga pa la gra rngan du byin no/ /de nas tha ga pas skud pa ma chog nas chung ma dang khyo las so sor lan re blangs te bsnan no/ slad kyis gnyis ka tshogs pa la yang blangs pa dang / de rnyed gyi rgyu zhig khyer na ci 'dra ba zhig ces khyim bdag gis bltas na/ gos bzang po zhig nas de ni sbyin du mi rung gzhan zhig sbyin no zhes khyim bdag khyo shug gnyis kyis bgros pa tha ga pas thos nas bsnyen dga' bo la sbran no/ /bsnyen dga' bo dang tha ga pa gnyis kyis thabs byas nas/ bsnyen dga' bo khyim bdag gi der chos bshad pa'i tshe tha ga pas snam bu khyer te 'ongs nas sngon du tshogs pa la phul lo/ /bsnyen dga' bos sbyin pa'i tshigs bcad sngar blangs te thal byung du khyer ro/ /de nas phyis tha ga bas khyim bdag la gla rngan bdas na khyod kyis nga'i gos dngos kyang stor bar byas na/ phyis gla sbyin pa lta ci smos zhes ma ster ro/ /bsnyen dga' bo la gla rngan bdas na khyod khyim bdag las long shig ces nas lan du mar bdas na yang ma ster nas slad kyis bdas na nga'i la du'i mar dang sbrang rtsi dang spod tshun chad brtsis na yang gla lhag par gyur nas tha ga pa bzung ste nyi tshan la gzhag go/ /de yang gla ma byin pa'i steng du dngos kyang bzung bas 'phya zhing mi snyan par 'dzer bas de ltar gyur pa snyan du bdas so/ /bkas rmas na/ mad do zhes gsol nas/ rnam grangs du ma'i sgo nas smad de/ bzang po 'dod pa'i phyir zas cung zad tsam gyis gos bsgrubs te grub na spang ba'i ltung ba'o zhes bslab pa bcas so/ /dge slong zhes bya ba ni bsnyen dga' bo ste gzhan yang de dang 'dra ba'o/ /gnyen zhes bya ba dang / gos zhes bya ba ni rnam pa bdun po gong ma dang 'dra'o/ /khyim bdag ces bya ba ni skyes pa'o/ /chung ma zhes bya ba ni bud med do/ /'thag tu bcol zhes bya ba ni bal rnam pa bdun gyi skud pa las gang yang rung ba'o/ /sngar ma bsgo zhes bya ba ni sngar gos sbyin no/ /zhes mgron du ma byas pa'o/ /rnam par rtog pa 'ga' zhig byung zhes bya ba ni gzhan las thos pa'o/ /da'i phyir zhes bya ba ni bdag nye bar ston pa'o/ /thag ran bzang zhing yug khyim che ba dang 'jur mdud med pa ni srid dang zheng 'di tsam du gyis la bzang por gyis shig pa'o/ /bca' ba cung zad cig byin nas gos grub ces bya ba ni lag par thob pa'o/ /dngos po spangs nas ltung ba bshags par bya'o/ /gos grub pa'i phyir 'thag pa la bsgo ba'i tshe ni nyes byas so/ /thob na ni spang ba'i ltung ba'o/ /'di lta bu zhig long shig par bsgo ba ni nyes pa med do/ /byin phrog mi gnang ba'i gleng gzhi ni bcom ldan 'das mnyan du yod pa na bzhugs so/ /sangs rgyas bcom ldan 'das mnyan du yod pa nas yul ko sa lar ljongs rgyu zhing gshegs pa'i tshe dge slong drug sde po'i nang nas dga' bo dang bsnyen dga' bo gnyis sangs rgyas dang chos kyi yon tan sgrogs shing sngar 'gro bar dad de grogs med nas dga' bo'i slob ma chos can mkhan po la ma dad de kun dga' bo'i gan na 'dug pa chos gos sbyar ma'i rgyu zhig khyer te mkhan po la zhus te sbyar mar drub po zhes byas pa dang / de bsod snyoms pa zhig dang phrad de khyod chos gos drub zin pa dang / nga la rnying pa slong ngo zhes byas pa dang / rung ngo zhes nas chos can kyis mkhan po la chos gos drub bo zhes zhus pa dang / dga' bo dang bsnyen dga' bo gnyis gros byas nas chos can la chos gos byin nas grogs su sngar khrid par bya ste/ khyod kyi chos gos drub mi dgos kyis zhes nas chos gos gcig byin no/ /chos kyi chos gos rnying pa ni bsod snyoms pa la byin no/ /chos gos kyi rgyu ras sar pa ni dge 'dun la yon du phul lo/ /chos can yang grogs su sngar khrid par byas pa dang slad kyis sangs rgyas kyi zha 'bring du 'gro zhes ma btub pa dang sbyar ma phyir phrogs so/ / de nas yul ko sa lar gshegs te nyan thos kyi 'khor rnams la chos gos dang sham thabs legs par bgos sam ma bgos pa g.yas phyogs su sku thams cad kyis glang po che lta bu'i tshul du gzigs pa dang / tshe dang ldan pa chos can stod g.yogs dang smad g.yogs gnyis phyogs su dang ljongs rgyu zhing 'gro bar gzigs nas dbyar gnas pa'i dge slong gis gos ma rnyed dam zhes kun dga' bo la rmas pa dang / chos gos kyang rnyed de de ltar phrogs so zhes snyan du gsol to/ /dge slong gi bya ba ma yin tshul ma yin zhes rnam grangs du mas smad nas slan chad byin phrogs mi gnang bar bslab pa bcas so/ / yang dge slong gang zhes bya ba ni dga' bo dang / bsnyen dga' bo ste gzhan yang de dang 'dra ba'o/ /dge slong zhes bya ba ni chos can no/ /gos zhes bya ba ni bal la sogs pa rnam pa bdun no/ /byin zhes bya ba ni sngar byin pa'o/ /de'i 'og tu zhes bya ba ni dus gzhan na'o/ /khros zhes bya ba ni 'khrugs pa ma zhi ba'o/ /phrogs zhes bya ba ni bdag gis so/ /'phrog tu bcug ces bya ba ni gzhan gyis so/ /gos kyi lhag ma yod pa zhes bya ba ni de'i tshe lhag ma tsam lus pa'o/ /byin cig ces bya ba ni slar btang ba'o/ /sbyin nas spang ba'i ltung ba zhes bya ba ni slar blangs ma thag tu dngos po spangs nas ltung ba bshags par bya'o/ /nyes pa ni lus dang ngag gi sgo nas byin zin pa'i 'og tu khyer la shog ces smras sam/ lus kyis phrogs kyang rung ste spang ba'i ltung bar 'gyur ro/ /de la don gzhan nam gdul ba'i phyir nyes pa med de ji ltar na gzhan gyi phyir zhe na/ bdag la gnas bca' ba'am/ /bdag gi slob ma yul 'jigs pa'i phyogs su 'gro ba la rkun po dang mi rgod kyis phrogs su dogs pa'i phyir phrogs pa 'am/ chus khyer du dogs pa'i phyir phrogs pa'o/ /ji lta na slob ma 'dul ba'i phyir zhe na/ slob ma dang nye gnas sdig pa can gyi lta bar gyur te bdag gi ngag mi nyan tam/ dge ba la mi 'grus sam/ grogs po ngan pa sdig pa can la brten cing mkhan po slob dpon spong ba la 'dul ba'i phyir phrogs kyang nyes pa med do/ /phrin yig dang lag brda dang gcig nas gcig tu brgyud pa dang / dge slong sems 'khrugs pa dang / nad kyis gzir ba dang / smyon pa dang / glen pa dang / 'on pa dang / lkugs pa dang / mu stegs can dang / dge slong ma dang / dge sbyong dang / dge slob ma dang / dge bsnyen ma la gos byin te phrogs kyang thams cad du nyes byas su 'gyur ro/ /ston zla tha chungs kyi gleng gzhi ni bcom ldan 'das mnyan du yod pa na bzhugs so/ /de'i tshe khyim bdag cig gis ri brags shig gi grong zhig tu btsug lag khang zhig brtsigs te dge slong drug cu'i 'tsho ba'i yo byad cig sbyar nas gtsug lag khang du bkod de/ khyim bdag de yang slad kyis dus las 'das te/ de'i bus kyang dge slong dag gi 'tsho ba ma 'byor nas dge slong gzhan ni so sor gyes so/ /de la rgan zhugs gnyis shig bsod snyoms spyod cing gtsug lag khang na gnas pa dang / de'i tshe byang phyogs kyi tshong pa dag cig yul de'i phyogs su lhags te/ tshong pa rnams kyis dge slong gnyis la 'dir ji lta bu zhes dris pa dang / de gnyis kyang yon bdag shi ba dang bus 'tsho ba ma sbyor ba zhib tu smras so/ /de nas tshong pa dad pa dag gis dge slong drug cu dbyar zla ba gsum gyi 'tsho ba'i zong de gnyis la byin te dge slong spyan drongs shig ces tshong pa dag gis bsgo ba dang / rgan po gcig ni mnyan du yod par spyan 'dren du song na bsnyen dga' bo dang sgor phrad nas der dge slong gis de ltar yon bdag gis 'tsho ba sbyar te spyan 'dren to zhes byas pa dang / bsnyen dga' bos gzhan dag der dong du dogs nas thabs shig byas te/ 'di na dge slong gnas pa ni rgyal pos yon bdag byas te 'tsho ba shin tu 'byor ba dang ldan pa sha stag gnas pas khyod kyi der su zhig 'gro/ khyod ni dge slong rkur 'ongs pas gzhan gyis thos na spang ba'i las byas sa re zhes bsdigs nas 'on kyang ded drug sde po 'khor bcu bcu ste drug cu zhig 'ong gis sngar song la zhal ta gyis shig ces sangs rgyas la phyag byed du yang ma ster bar myur du phyir btang ngo / phyis drug sde po 'khor dang bcas te lhags nas dbyar phyi mar tshul du zhugs te/ dbyar zla ba gsum gyi yo byad bgos nas zla ba gcig tu zad par byas te phyir dong bas na phyis tshong pa dag gtsug lag khang du 'ongs te/ dge slong rgan po gnyis la 'dir dge slong su dag spyan drangs zhes smras na drug sde po zhes byas pa dang / 'phags pa rgya mtsho chen po'i nang du dong ste/ nor bu do zan khyer te 'ongs sam/ dge slong gzhan de na med dam zhes drug sde po la ma dad pa dang / zla ba gsum gyi yo byad zla ba gcig tu bgos pa na ma dad cing 'phya bar gyur pa las snyan du bdas nas slan chad zla ba gsum ma lon par dbyar gyi rnyed pa dus ma yin par len cing 'gyed du mi gnang bar bcas so/ /de nas rgyal po gsal rgyal gyis blon po dmag dpon kha 'da' shag ti dmag dpon du bka' stsal nas/ yul gzhan du 'gro bar lam du zhugs te/ des dge 'dun la tshul gyi tshe yon mang po zhig phul ba dang / dge slong dag gis len cing 'gyed pa'i dus ma yin no zhes ma blangs pa dang / snyan du bdas te bslab pa la gus pa dang / bslab pa la nan tan byed pa'i bsngags pa brjod pas zhag bcus tshul nas ma byung ba la gtad pa'i gos len du rjes su gnang ste/ de las sngar len zhing 'gyed du mi gnang ba dang / dge slong dag gis gos sngar blangs nas mdzod kyi nang du sbas pas gos dag rul bar gyur to/ /de ltar gyur pa snyan du bdas nas/ gos sbed pa'i dge slong yon tan lnga dang ldan pa'i dge slong zhig bskos la dbyar gyi nang logs su len du yang mi gnang / gos 'gyed pa'i dus las yol bar yang len du mi gnang ngo zhes 'dul ba la bslab pa'i gnas bcas so/ /ston zla tha chungs nyar zhag bcus ma tshang ba zhes bya ba ni zhag bcu nas tshul nas byung bar gyur pa'o/ /dge slong zhes bya ba ni drug sde ste chos 'di la zhugs pa'o/ /rnyed ces bya ba ni gzhan las so/ gtad pa'i gos zhes bya ba ni gtod pa'i gos la rnam pa lnga ste/ nad pas byin pa dang / na ba'i phyir byin pa dang / 'chi ba'i tshe byin pa dang / shi ba'i phyir byin pa dang / 'gro ba'i phyir byin pa'o/ /'dod na ni zhes bya ba ni gos bgos pa zhes bya'o/ /gos zhes bya ba ni rnam pa bdun las gang yang rung ba'o/ /long shig ces bya ba ni bdag gi phyir ro/ /blangs nas chos gos 'gyed pa'i dus la ma bab kyi bar du chongs shig ces bya ba ni gtad pa'i gos de gos sbed pa'i lag par gzhag par bya'o/ /gos kyi dus ni gang dus ma yin pa ni gang zhe na gnas su gtan pa ma drub pa zhig ni ston zla tha chungs nyal tshul nas byung ste/ de'i phyi de nyin gos 'gyed pa'i dus yin no/ /lhag ma rnams ni dus ma yin no/ /gnas su gtan pa zhig drub pa zhig na ston zla tha chungs nya nas dpyid zla tha chungs nya'i bar du gos len pa'i dus yin no/ /lhag ma rnams ni dus ma yin no/ /de las 'das par bcangs na zhes bya ba ni thal ba'o/ /spang ba zhes bya ba ni dngos po spangs nas ltung ba bshags par bya'o/ /dbyar ma zad pa'i skabs su dbyar gyi rnyed pa bgos sam 'god pa'i dus las 'das par bcangs na thams cad du spang ba'i ltung bar 'gyur ro/ /sbyin bdag gis sngar phul ba slad kyis bdag rang gis so sor dbul lo zhes dus las 'das kyang ltung ba med do/ /gtad pa'i gos 'gyed pa'i dus las 'das par bcangs kyang nyes par mi 'gyur ba yang yod de/ dge slong gos rnyed ma thag tu smyos sam sems 'khrugs sam/ gos kyi rgyu dang spun mi rung ba dang zhag bcu tshun chad dus las 'das pa'o/ /dgon par chos gos dang bral du gnang ba'i gleng gzhi ni bcom ldan 'das mnyan du yod pa na bzhugs so/ /de'i tshe ri brags kyi grong na khyim bdag dad pa can zhig gnas pa des dgon pa'i gnas su gtsug lag khang bzang po zhig brtsigs nas dge slong mang po zhig spyan drangs te/ yo byad dag sbyar nas bkod pa dang dge slong dag kyang yul gzhan du dang ngo / /yul gzhan nas dge slong dag cig gtsug lag khang der lhags so/ /de dag kyang yul gud du rgyu zhing sangs rgyas la phyag 'tshal zhing 'dong bar byas nas yon bdag gis gsol ba/ gtsug lag khang 'di bdag gis pha'i phyir yang ma brtsigs ma'i phyir yang ma brtsigs 'phags pa khyed kyi phyir brtsigs na gud du mi gshegs shing 'dir tshul du 'jug par ci gnang zhes gsol nas de'i sems bsrung ba'i phyir dge slong de dag kyang der gnas so/ /yul de phyogs na lha khang gzhan med de yul gyi mi dad pa kun gyis kyang lha khang der yon phul bas dge slong dag kyang rnyed pa shin du mang ngo / /ston zla tha chungs g.yon can gyi rkun po dag gis bgros pa/ de dag gi nang na dge slong gi rgyus shes pa gcig na re sgo'i them pa brgya rgal zhing lto 'gengs pa de dag la cang med pa'i rigs na zhes byas na de bas kyang rgyus mkhas pa gcig na re de dag rnyed pa rab tu mang ngo zhes nas de na yod dam med pa brtags pa'i phyir gnyis shig lha khang gi nang du zhugs te/ phyag byas nas bskor zhing dad dad ltar byas te dge slong gzhan ni med rgan zhugs shig de na 'dug pa de la 'di gtsug lag khang 'byor pa'am brel pa'i gnas zhes dris na dge slong des ma go nas gtsug lag khang ni 'byor pa'o zhes smras nas rgan zhugs des 'di na brel ba ma yin gyi yo byad dang ldan zhing 'byor pa'i gnas yin te/ gos kyi thum po kun kyang spyoms pa'i phyir bstan to/ /rkun po de dag gis kyang shin tu rtog nas nam tshul nas byung ba'i dus dang sbyar te/ de'i tshe dge slong dag mtshan thog thag chos 'chad cing kha ton byed pa'i tshe g.yon can dag chos nyan pa 'dra bar sgo brdungs te g.yon can dag nad du lhags nas dge sbyong dag gi gos dang yo byad ma lus par phrogs so/ /de nas dge slong 'di dag kyang yon bdag la ni ba bzhos pa bzhin du bya dgos kyi dong ngo zhes nas gcer bus mnyan du yod par phyin te/ de nas dge slong mnyan du yod pa na 'khod pa rnams kyis chos gos la sogs te yo byad bcu gsum byin nas de ltar gyur pa snyan du bdas nas da slan chad 'jigs shing dogs pa'i gnas su chos gos gsum las gang yang rung ste gcig zhag drug gi bar du grong du khyim pa'i der zhog cig ces gnang ba dang / dge slong chos gos dang bral du dogs nas mtshan mo khyim rgyab dag na nyal ba dang / khyim pa dang bud med dag mtshan mo gcer par gcin rkyag dag 'dor ba dang phrad nas 'di na ci'i phyir nyal zhes byas na chos gos kyi phyir ro zhes nas khyod kyis chos gos nged kyis rkus re skan zhes de lta bu la 'phya bar gyur nas snyan du bdas te/ de slan chad zhag drug tshun chad du dgon pa bas chos gos grong du bzhag la mtshams kyi phyi rol na 'dug kyang rung nyes pa med do zhes gnang ba dang drug sde po rnams bsams bzhin du zhag bdun las 'das par byed/ de ltar byed pa bden nam zhes smras na mad do zhes gsol nas da slan chad zhag bdun las 'dar mi gnang bar bslab pa bcas so/ /dge slong zhes bya ba ni drug sde po ste gzhan yang chos 'di la zhugs pa'o/ /mang po zhes bya ba ni gnyis yan chad do/ /dgon pa zhes bya ba ni grong nas gzhu lnga brgya ste/ rgyang grags gcig phan chad do/ /gnas zhes bya ba ni gtsug lag khang ngo / /dbyar tha ma zhes bya ba ni dbyar phyi mar tshul du zhugs so/ /dogs pa dang 'jigs pa dang bcas zhes bya ba ni rkun po dang gcan gzan dang sbrang bus 'jigs pa'o/ /chos gos gsum zhes bya ba ni sbyar ma dang bdun pa dang lnga pa'o/ /zhog cig ces bya ba ni gtams pa'o/ /rkyen 'di 'dra ba byung zhes bya ba ni dge 'dun gyi 'am mchod rten dang gang zag gi don gyi phyir ro/ /mtshams kyi phyi rol du 'gro zhes bya ba ni chos gos kyi mtshams kyi nye 'khor las 'das pa'o/ /zhag drug ces bya ba ni zhag drug tshun chad ni nyes pa med do/ /mtshams kyi phyi rol du bral zhes bya ba ni chos gos gang der gzhag pa'o/ /de las 'das par bral na zhes bya ba ni skya rengs kyis chod pa'o/ /spang ba'i ltung ba ni dngos po spangs nas ltung ba bshags par bya'o/ /zhag drug las mtshams kyi phyi rol du 'das nas chos gos dang bral na spang ba'i ltung bar 'gyur ro/ /bar chad brgyad byung na chos gos dang bral yang ltung ba med do/ /gos rgyu dang spun mi rung ba dang / chos gos mi 'bral ba'i sdom pa byin pa dang / chos gos sa la bzhag la mi nam mkha' la gnas pa ni zhag drug las 'das kyang ltung bar mi 'gyur ro/ /dbyar gyi ras chen dus las sngon rol du btsal tam dbyar 'das par 'chad du mi gnang ba'i gleng gzhi ni bcom ldan 'das mnyan du yod pa na bzhugs so/ /de'i tshe dge slong dag rdzing bu dang khron pa dag na khrus byed pa'i tshe skyabs med par khrus byed pas ni shin tu mi mdzes pa ri dwags dgra'i ma sa gas mthong nas de lta bu mi mdzes pa khyim pa dag gis mthong na 'phya na khrus byed pa'i yol ba gnang ba'i rigs so zhes snyan du gsol nas dbyar gyi ras chongs shig par bkas gnang ngo / /dge slong ras chen 'phral la ma 'byor nas dbyar tshul du 'jug pa'i zla ba gcig gi sngon rol du tshol gcig par gnang / dbyar phyi ma yang ras chen sngar tshol zhing snga ma la zla ba bltas te ring du bcangs pa dang / dus ma yin par ras chen tshol zhing byed pas na bya ba dang / byed pa mang bas lung 'bogs pa dang klog pa'i bar chad du gyur nas dbyar sngon rol du yang tshol la/ dbyar zad nas yang bcangs pas don nyung ba'i dge slong 'phya ba las snyan du bdas te/ gso dka' ba dgang dka' ba zhes smad nas sngon rol du tshol du mi gnang ba dang / dbyar zad nas zla ba phyed las 'das par 'chad du mi gnang bar bslab pa bcas so/ /dpyid zla ba gcig lus zhes bya ba ni zla ba gcig nas dbyar tshul du 'jug pa'o/ /dge slong zhes bya ba ni chos 'di la zhugs pa'o/ /dbyar gyi ras chen zhes bya ba ni dbyar gyi char chen gyi skyabs byed pa'i gos so/ /tshol zhes bya ba ni gzhan las so/ /dbyar zad nas zla ba phyed kyi bar du chongs shig ces bya ba ni tshul nas phyung nas zla ba phyed kyi bar du'o/ /dge slong gis dpyid zla ba gcig gi sngon logs zhes bya ba ni de'i sngon logs su ras chen tshol ba'o/ /dbyar zad nas zla ba phyed kyi bar du chongs shig ces bya ba ni de las 'das par ro/ /spang zhes bya ba ni dngos po spangs nas ltung ba bshags par bya'o/ /sngar tshul du zhugs pa dang dbyar phyi mar tshul du zhugs pa ste/ de dag gis yun ring du bcangs na spang bar 'gyur ro/ /gang phyis tshul du zhugs pa de dag gis kyang sngar btsal tam ha cang ring du bcangs na spang ba'i ltung bar 'gyur ro/ /dbyar gyi ras chen phrin dang phrin yig dang lag brda dang gcig nas gcig tu brgyud pas ring du bcangs na nyes byas su 'gyur ro/ /khyim pa smyon pa dang sems 'khrugs pa dang / nad kyis gzir ba dang / lkugs pa dang / 'on pa dang / glen pa dang / 'gro ba gzhan du gnas pa la de bas sngon rol du btsal tam de dag las rnyed pa ring du bcangs kyang nyes byas su 'gyur ro/ /spyir rnyed pa gang zag gi phyir bsngos pa'i gleng gzhi ni bcom ldan 'das mnyan du yod pa na bzhugs so/ /mnyan du yod pa na bsod snyoms pa zhig gis khyim bdag cig la chos bshad nas dad par byas te/ bsod snyoms spyir bshos gsol te ras yug gcig cig yon du phul lo zhes nas khyim bdag gis khas blangs so/ /bsod snyoms pas dge 'dun spyan drangs par byas nas dge 'dun spyir phrin gyis gsol ba dang / bsnyen dga' bos gsol te nang bar sngar khyim bdag gi der song ste phyin pa dang khyod kyis ras spyir phul ba'i bsod nams ni yod na spyad pa'i bsod nams ni med do/ /ci'i phyir zhe na dge 'dun la kha zas phul ba ni zegs ma re rer yang gos shig /gos ni mar me'i snying po tsam du yang gos shig ces byung bas na khyod kyis de yang spyad pa'i bsod nams med kyi cig car shAkya'i rigs las rab tu byung bas na sde snod gsum dang ldan pa chos smra ba la phul ba'i rigs so zhes smras pa dang / khyim bdag na re 'o na 'phags pa bzhes su gsol/ de ltar byas na do nod sus khyer zhes rmed par gyur na ma legs kyis dge 'dun tshogs pa'i mdun du rim gyis ston la de'i 'og tu nga la byin cig ces byas nas khyim bdag gis kyang kun la rjes su yi rang bar byas shig ces bstan te mjug tu bsnyen dga' bo la byin no/ /de nas khang skyong la yang bsnyen dga' bos ma ster to/ /de nas bsod snyoms pas khyim bdag la khyed kyis 'brug gzhan du bsgrags la/ char gzhan du phab po zhes khyim bdag la gyod btab pa dang / khyim bdag gis de'i rgyus zhib tu smras so/ /dge slong gzhan gyis bsod snyoms pa la gyod btab pa dang / bsod snyoms pas kyang bdag dang khyim bdag gis ni ma nongs te/ bsnyen dga' bos nyes so zhes byas pa dang / dge slong dag 'phya ba la zhugs pa snyan du bdas so/ /bkas bsnyen dga' bo la rmas na/ btsun pa mad do zhes gsol nas/ gso dka' ba dgang dka' ba chog mi shes pa dge sbyong gi bya ba ma yin zhes rnam grangs du mar smad nas/ spyir bsngos pa gang zag bdag gir byas na mi gnang bar bslab pa bcas so/ /dge slong zhes bya ba ni bsnyen dga' bo ste/ gzhan yang chos 'di la zhugs pa'o/ /shes bzhin zhes bya ba ni bdag nyid kyis rig pa 'am gzhan gyis bsgo ba'o/ /dge 'dun zhes bya ba ni bcom ldan 'das kyi nyan thos so/ /rnyed pa zhes bya ba ni rnam pa gnyis te/ gos kyi rnyed pa dang / kha zas kyi rnyed pa'o/ /skabs 'dir ni gos kyi rnyed pa la bya'o/ /gang zag bdag gir bsngos zhes bya ba ni bdag rang gi ched du bsngos pa'o/ /spang ba'i ltung ba ni dngos po spangs nas ltung ba bshags par bya ba'o/ /nyes pa ni gang zag gcig gi rnyed pa bdag gir bsngos sam/ gcig gam gnyis sam gsum mam mang po yang rung ste/ bsdos pa'i tshe ni nyes byas so/ /thob na spang ba'i ltung bar 'gyur ro/ /dge slong gis gang zag gcig gi rnyed pa pha rol gnyis la bsngos sam mang po yang rung ste/ 'god pa'i tshe ni nyes byas so/ /gang zag gi rnyed pa dge 'dun gyir bsngos na 'god pa'i tshe nyes byas so/ /thob na yang nyes byas so/ /de bzhin du gtsug lag khang gi yo byad dang / gtsug lag khang gi rgyan gyi yo byad dang mchod rten gyi phang lo rim bzhin du 'dug pa las ltag 'og bsnor na nyes byas so/ /dge 'dun gyi rnyed pa gang zag bdag gir bsngos na nyes par mi 'gyur ba yang yod de phrin pa dang phrin yig pa dang lag brda dang / gcig nas gcig tu brgyud pa dang / rgyu dang spun mi rung ba rnams ni ltung ba med de nyes byas so/ /sman gzhag pa'i gleng gzhi ni bcom ldan 'das rgyal po'i khab 'od ma'i tshal bya ka len da ka gnas pa na bzhugs so/ /de'i tshe na tshe dang ldan pa srung ba po'i bu la brten cing gnas bca' ba'i nye gnas lhan cig spyod pa'i dge slong dag gis sman byin len byas pa dang / byin len ma byas pa dang snga dro ba dang zhag bdun par 'dres shing mi mngon par de lta bur dus dang dus ma yin par za zhing rang gi lag gis blangs nas za bas na sman zhag bdun gyi bar du byin gyis brlabs la gzhag par bya/ de las 'das par bcang bar mi gnang ste de ltar gyur pa la dge slong dag 'phya ba snyan du bdas nas/ bkas rmas na mad do zhes gsol ba dang / chog mi shes pa gso dka' ba dgang dka' ba'o zhes smad nas/ sman zhag bdun gyi bar du dril zhing bza' bar bya/ de las 'das par bzhag na spang ba'i ltung bar 'gyur ro zhes bslab pa bcas so/ /na ba zhes bya ba ni mi bde ba'o/ /dge slong zhes bya ba ni chos 'di la zhugs pa'o/ /phan pa gang byed pa'i zhes bya ba ni de dang mthun pa'o/ /sman du gsungs zhes bya ba ni bsgrags pa'o/ /mar dang til dang sbrang rtsi dang bu ram zhes bya ba ni dngos su bas so/ /'dod ces bya ba ni gal te 'dod par gyur pa'o/ /zhag bdun gyi bar du zhes bya ba ni zhag bdun tshun chad do/ /rang gis byin gyis rlobs shig ces bya ba ni bdag gis so/ /gzhag par bya ba'i bza' ba'o zhes bya ba ni rang gis blangs nas bza' bar bya ba'o/ /de las 'das par bzhag na zhes bya ba ni de las 'das par ro/ /spang ba'i ltung ba zhes bya ba ni dngos po spangs nas ltung ba bshags pa'o/ /nyes pa ni dge slong gis tshes gcig la sman zhig rnyed na zhag bdun tshun chad du byin gyis rlobs shig / yang na gzhan la skur cig /yang na byin cig /de ltar ma byas na tshes brgyad kyi skya rengs shar nas spang ba'i ltung bar 'gyur ro/ /sman zhag bdun du byin gyis rlob pa ni bdag lag bkrus te sman byin len byas nas tshangs pa mtshungs par spyod pa'i mdun du tsog tsog por 'dug la 'di skad du rjod cig dgongs shig / bdag ming 'di zhes bgyi ba rung ba'i sman 'di zhag bdun tshun chad du bdag dang tshangs pa mtshungs par spyod pa'i phyir byin gyis brlab par bgyi'o/ /de bzhin du lan gnyis lan gsum du smros shig /ji lta bur zos pa yang nyin gcig bzhin du de ni bdag gis nyi ma gcig zos lhag ma yang bza'o zhes tshangs pa mtshungs par spyod pa'i mdun du zhag bdun gyi bar du rjod cig / de ste yang sman lhag ste ma zad na dge sbyong ngam kun dga'i ra ba la sbyin par bya'o/ /sman spang bar bya ba de ma spangs sam bral bar ma byas sam ltung ba ma bshags par gzhan zhig rnyed na yang snga ma'i rgyun gyis phyi ma rnyed pa thams cad spang ba'i ltung bar 'gyur ro/ /zhag bdun las 'das kyang spang bar mi 'gyur ba yang yod de/ sman dge slong 'chad du mi rung ba ni zhag bdun las 'das kyang spang ba'i ltung bar mi 'gyur ro/ /dge slong nad kyis gzir ba dang smyos pa dang sems stor ba ni nam sems 'khrugs pa rnyed pa nas zhag bdun bgrang bar bya'o/ /snga dro ba'i sman ni snga dro spyad par bya phyi dro ba'i sman ni phyi dro spyad par bya/ zhag bdun pa yang zhag bdun tshun chad du spyad par bya/ tshes gcig pa'i sman yang tshes gcig tshun chad du bcad par bya/ de las 'das par bcangs na thams cad du spang ba'i ltung bar 'gyur bar rig par bya'o/ /spang ba'i ltung ba sum cu'i bslab pa'i gnas rdzogs so/ / //shes bzhin du brdzun du smra ba'i gleng gzhi ni bcom ldan 'das rgyal po'i khab na bzhugs so/ /de'i tshe tshe dang ldan pa sgra gcan zin la dad pa'i bram ze dang khyim bdag rnams kyis bcom ldan 'das ga la bzhugs zhes dris na/ bcom ldan 'das 'od ma'i tshal na bzhugs na ni bya rgod phung po'i ri la bzhugs so zhes zer/ pi pi li'i shing drung gi phug na bzhugs na ni sde chen ma'i phug na'o zhes zer te/ de bzhin du khyim bdag gis btsal kyang ma rnyed do/ /de dag gis sgra gcan zin la khyod kyis ched du bsams te/ bdag cag la tho 'tshams sam de bzhin no zhes byas pa dang / de dag 'phya bar gyur ba snyan du bdas nas lcags kyi thu lu ma za ba ni bla'i/ 'di lta bu ni ma yin no zhes bkas smad kyang bslab pa ma bcas so/ /slad kyis bcom ldan 'das mnyan du yod pa na bzhugs pa'i tshe mnyan du yod pa na shAkya'i bu dge slong me bzhi skyes zhes bya ba zhig gnas te/ de yang phyi rol gyi gzhung gzhan la rab tu mkhas shing gzhan dang rab tu 'gyed pa la brtson pa zhig 'dug go/ /de'i tshe lho'i phyogs nas bram ze'i bu zhig sngags tshol zhing mnyan du yod par phyin te/ sngar gnas pa'i bram ze dang cung zad 'gyed par byas pa las/ bram ze dag gis g.yo byas nas shAkya'i dge slong me bzhi skyes la/ gtsug lag gis rgol cig ces byas nas/ de gnyis kyang skyed mos tshal zhig tu dus byas nas/ bram ze ni de'i mtshan thog thag bdag gi phyogs dang gzhan gyi phyogs la sems sems te nam nangs nas dus sar phyin pa dang / dge slong me bzhi skyes ni de'i nyin mo bsod snyoms la song song ste slar log pa dang / bram ze dang phrad nas nga ni brjed do zhes byas so/ /phyi de nyin dus byas pa dang / dge slong de yang dus der ma 'ongs nas grang gzhan na 'gro ba bram ze des mthong nas/ dge slong khyod ci'i phyir 'dir mi 'ong zhes byas pa dang / don de gcig pur zad dam/ bdag ni ston pa dang / bla ma la bsnyen bkur bya dgos/ khyim bdag dang bram ze lhags pa rnams la chos bstan dgos so zhes smras pa dang / bram zes khyod nga la ched du bsams te tho 'tshams sam ci zhes byas pa dang de bzhin no zhes smras pa dang / bram ze'i bu dag dge sbyong de dag ni shes bzhin du brdzun zer ro zhes mi snyan par zer ba snyan du bdas nas rnam grangs du mas smad nas 'dul ba la bslab pa bcas so/ /shes bzhin zhes bya ba ni brtags pa'o/ /brdzun zhes bya ba ni rnam pa dgu ste/ phas pham par 'gyur ba dang lhag mar 'gyur ba dang / ltung bar 'gyur ba dang / nyes byas su 'gyur ba dang / rtsa ba med pa dang / tshul khrims log par zhugs pa dang / lta ba log par zhugs pa dang / cho ga log par zhugs pa dang / 'tsho ba log par zhugs pa'o/ /ltung ba zhes bya ba ni sems can dmyal ba dang byol song dang yi dwags ngan 'gro log par bsregs pa dang btso bar ltung ba'o/ /de la dge slong gi 'du shes sbas nas mthong ngo / /dogs so zhes smras na ltung ba'o/ /dge slong gis mi'i skyon nas 'bod pa'i gleng gzhi ni bcom ldan 'das mnyan du yod pa na bzhugs so/ /de'i tshe na dge slong drug sde po gzhan gyi skyon nas 'bod pa ni 'di lta ste zhar ba dang rkang dos dang gyol po dang sor mo 'jas pa dang / rgur po dang lkog glon can dang / mchu 'phyang dang mgo bo che la sogs pa'i skyon nas bos pas dge slong dag bag 'khums pa dang / mi spobs pa dang / spa gong bar gyur nas dge ba'i bar chad du 'gyur bas snyan du bdas nas/ bkas drug sde la rmas na mad do zhes gsol nas/ dge sbyong gi bya ba ma yin/ rigs pa ma yin zhes rnam grangs du mas smad nas bslab pa bcas so/ /ltung ba zhes bya ba ni ngan song gsum du ltung bar byed pas na ltung ba'o/ /ltung ba de ma bshags na dge ba'i chos rnams sgrib par byed pas na ltung ba zhes gsungs so/ /dge slong gis mi'i skyon nas 'bod par bsams te/ dge slong la tshe dang ldan pa khyod rgyal rigs dang bram ze'i rigs las rab tu byung bas khyod la dge sbyong dang tshangs pa med do zhes byas na dge sbyong spa gong yang rung la ma gong yang rung ste nyes byas su 'gyur ro/ /lham mkhan dang skud ris mkhan dang shing mkhan dang tha ga pa dang / 'dreg mkhan dang / theng po dang / lag sor 'khums pa dang / lkog glon can dang / skrangs pa la sogs pa las khyod rab tu byung bas na dge sbyong dang tshangs pa med do zhes smras na/ dge slong spa gong yang rung ma gong yang rung ste ltung ba re rer 'gyur ro/ /phrin dang phrin yig dang lag brda dang gcig nas gcig tu brgyud pa dang / dge slong smyon pa dang / sems 'khrugs pa dang ra ro ba las mi'i skyon nas bos na nyes byas su 'gyur ro/ /'gro ba gzhan du gnas pa dang mtha' 'khob pa dang / 'phags pa'i skad kyis gcig la gcig brda mi 'jal ba dang / dge sbyong dang / khyim pa dang / de bzhin du pha bsad pa dang ma bsad pa dang dgra bcom pa bsad pa dang / mu stegs can la sogs pa la skyon nas bos na nyes byas su 'gyur ro/ /phra ma'i gleng gzhi ni bcom ldan 'das mnyan du yod pa na bzhugs so/ /de'i tshe na dge slong drug sde po rnams phra ma smra ba la zhugs nas/ de ltar phra ma smra bas na dge slong dag kyang 'khums shing bag tsha bar gyur nas lung 'bogs pa dang kha ton byed pa la sems bag tsha bas dge ba dag btang bas mdza' zhing sdug pa chos bzhin du 'khod par yang ma gyur nas don nyung ngu ba'i dge slong dag 'phya bar gyur pa snyan du bdas nas/ dge sbyong gi bya ba ma yin zhes smad nas/ 'dul ba la bslab pa bcas so/ /dge slong zhes bya ba ni drug sde po'o/ /ltung ba ni snga ma bzhin no/ /dge slong gis phra ma bya bar bsams nas tha ga pa dang / shing mkhan dang 'dreg mkhan la sogs pa las rab tu byung nas dge sbyong dang tshangs pa ga la yod ces zer ro zhes smras na ltung bar 'gyur ro/ /gzhan ni skyon gyi skabs dang sbyar ro/ /phrin dang lag brda yang gong ma bzhin du sbyar ro/ skyo sngogs kyi gleng gzhi ni bcom ldan 'das mnyan du yod pa na bzhugs so/ /de'i tshe na dge slong drug sde po rnams dge slong mkhas pa dge 'dun 'dus pas ches bzhin du rtsod pa zhi bar byas te/ spangs par shes bzhin du slar yang de las su mi rung ste ma byas legs par ma sbyangs pas slar sbyang dgos so zhes yang nas yang du skyo sngogs byas te/ bya ba mang byed pa mang du gyur pas dge slong dag 'phya ba las snyan du bdas nas/ dge slong mkhas pa tshogs pas chos bzhin du las byas shing rtsod pa spangs pa slar skyor du mi gnang bar 'dul ba la bslab pa bcas so/ /dge slong gang zhes bya ba ni drug sde ste/ gzhan yang chos 'di la zhugs pa'o/ /shes bzhin zhes bya ba ni bdag nyid kyis rig pa'am/ gzhan gyis bsgo bar gyur pa'o/ /'du shes zhes bya ba ni dge 'dun tshogs shing mthun pa'o/ /dge 'dun zhes bya ba ni de bzhin gshegs pa'i nyan thos kyi dge 'dun la bya'o/ /chos ji lta ba bzhin du zhes bya ba ni 'dul ba dang mi 'gal ba ste/ ston pas bstan pa ji lta ba bzhin no/ /rtsod pa zhes bya ba ni rtsod pa rnam pa bzhi ste/ 'thabs nas rtsod pa dang ma 'thabs ma bcos par rtsod pa dang / ltung ba'i phyir rtsod pa dang / bya ba'i phyir rtsod pa'o/ /spangs pa zhes bya ba ni rtsod pa rnam pa bzhi po gang yang rung ste zhi bar byas so/ /yang bya bar skyo sngogs byed ces bya ba ni phyi phyir byed du gzhug pa'o/ /ltung ba zhes bya ba ni sems can dmyal bar ltung ba la sogs te snga ma bzhin no/ /nyes pa ji lta bu zhen dge slong gis 'thab pa'i rtsod par 'du shes shing spangs pa la spangs pa'i 'du shes kyis yang bya bar skyo sngogs byed na ltung bar 'gyur ro/ /the tshom za na yang ltung bar 'gyur ro/ /ma spangs pa la yang spangs pa'i 'du shes kyis skyo sngogs byed na nyes byas su 'gyur ro/ /the tshom za na yang nyes byas su 'gyur ro/ /ji ltar 'thab pa la rnam pa bzhir sbyar ba bzhin du mi gdams pa dang / ltung ba dang bya ba'i rtsod pa la yang de bzhin du sbyor cig / bud med la/ chos tshig lnga drug las lhag par 'chad du mi gnang zhing rig pa'i skyes pa med par tshig lnga drug las lhag par bshad pa'i gleng gzhi ni mnyan du yod pa na ste/ de'i tshe na tshe dang ldan pa 'char ba rig pa'i nor bu zhes bya ba yod de/ de'i mthus mtshan gyi rig pa shes te/ snga dro bram ze dang khyim bdag dag gi rigs kyi der bsod snyoms la 'jug cing chos bstan pa'i 'og tu khyim bdag gi mna' ma la khyod kyi sgyug mo ci 'dra zhes dris so/ /des smras pa/ ji ltar bung bu mdas phog pa bzhin no/ /de ni de nyid kyi nyes pa ma yin te/ de la ma rungs pa'i mtshan yod de/ sme ba nag po dang dmar po dang / sbrang ma dang 'dra ba dang mdzer pa ste/ nu ma dang rkub dang / gsang ba'i bar na yod pa'i gun no zhes smras so/ /de'i 'og tu sgyug mo'i gan du song nas khyod kyi mna' ma ci 'dra zhes dris na de ni bdar gyis sbyangs pa ste/ le lo che spro thung zhing kha drag la kha ngan zer ro zhes smras pa dang / de ni de nyid kyi nyes pa ma yin te/ de la mtshan ma ni 'di lta bu yod do zhes gsang ba'i bar du mtshan ma bstan to/ /de nas dus gzhan zhig na mna' ma dang sgyug mo dag gcig la gcig lus mnyed cing khrus byed pa'i tshe de gnyis gcig la gcig gsang ba'i gnas dag tu mtshan brtags na 'char bas smras pa bzhin du yod do/ /nam phan tshun du rtsod pa'i tshe gcig la gcig mtshang 'dru ste/ khyod kyang 'thab mo rgol zhing bsngo'am/ skyes pa 'di lta bu dang 'di 'drar byed pa na ci zhes byas pa dang / de lta bu ni yong ma byas so/ /'o na khyod kyi gsang ba'i bar na mtshan yod pa gzhan gyis ji ltar shes zhes byas pa dang / 'o na khyod kyis kyang skyes pa gzhan gyis shes so/ /nam phan tshun du bzod par byas te mdza' bar gyur pa de na khyod la 'di lta bu sus bstan ces gcig la gcig dris na/ gnyi ga yang mthun te 'char bas bstan to zhes byas pa dang / de gnyis 'phya ste/ bdag cag ni 'char bas ched du bsams te 'thab tu bcug ste zhes smod cing mi snyan pa 'dzer to/ /khyim bdag gis dge slong 'char ba ji lta bu zhes dris na 'char ba ni tshul khrims dang ldan pa ste rig pa'i mthus bud med dag gi mtshan shes so zhes byas pa dang / ci 'phags pa de ltar shes su zin gyis kyang bud med kyi gsang ba'i gnas ngan len smra bar mi rigs so/ /zhes 'phya bar snyan du bangs nas 'di snyam du dgongs te/ cung zad nyes pa'i dmigs su gyur pa yang dge slong bud med la chos bshad pa las byung ngo snyam du dogs nas/ dge slong bud med la chos ma 'chad cig ces bkag go/ /slad kyis dge slong dag bsod snyoms la zhugs pa dang / bud med dag gis chos bshad par gsol ba dang / dge slong dag gis chos ma bshad pas zan ma ster to/ /de lta bu snyan du bdas nas bka' stsal pa/ chos tshig lnga ste/ phung po lnga bshad par gnang ngo / /slad kyis de bzhin du nyung zhes gsol nas/ dbang po drug ste tshig drug bshad par gnang ngo / / tshig drug gis kyang mi chog gis da rung ston cig ces bskul ba dang / slad kyis rig pa'i skyes pa zhog la chos shod cig ces bka' stsal pa dang / drug sdes rig pa'i skyes pa med bzhin du spre'u dang bya bzhag nas tshig lnga drug las 'das par bshad pas na de ltar gyur pa la snyan du bdas nas 'dul ba la bslab pa bcas so/ /yang dge slong zhes bya ba ni drug sde ste/ gang gzhan yang chos 'di la zhugs pa'o/ /bud med ces bya ba ni legs nyes kyi don khong du chud cing don go bar nus pa'o/ /tshig lnga drug las 'das zhes bya ba ni chos tshig lnga bshad par gnang ba las bsams bzhin du drug tu 'das sam/ chos tshig drug 'chad du gnang ba las bsams bzhin du tshig bdun du 'das pa'o/ /chos zhes bya ba ni sangs rgyas kyis bshad pa'o/ /ston ces bya ba ni 'chad pa'o/ /rig pa'i skyes pa ma gtogs zhes bya ba ni skyes pa gan na yod pa'o/ /ltung ba ni snga ma bzhin no/ /nyes pa ni bsams bzhin du tshig lnga drug las 'das sam rig pa'i skyes pa med par bshad na ltung bar 'gyur ro/ /mkhas pa phyi phyir dri ba la lan ldon pa dang khrims dbog pa dang kha don la sogs pa ni ma gtogs te rig pa'i skyes pa med par bshad kyang ltung bar mi 'gyur ro/ /ha cang myur ches te tshig thal ba la ltung ba med do/ /bsnyen par ma rdzogs pa'i gang zag dang / cig car chos kyi tshig gis glog tu mi gnang ba'i gleng gzhi ni bcom ldan 'das mnyan du yod pa na ste/ de'i tshe dge slong drug sde rnams bsnyen par ma rdzogs pa'i gang zag dang gtsug lag khang gi phyogs gcig na chos kyi tshig cig car klog pas skye bo mang po'i sgra mang po tsha tshig bton pa ni dper na bram ze smrang klog pa'am skar mkhan grangs bgrang ba bzhin du sgra chen po grag pa snyan du bdas te/ cig car gdon du mi gnang bar bslab pa bcas so/ /yang dge slong gang zhes bya ba ni drug sde ste/ gang gzhan yang chos 'di la zhugs pa'o/ /bsnyen par ma rdzogs pa'i gang zag ces bya ba ni dge slong pha dang dge slong ma zhes bya ba ma gtogs pa gzhan thams cad do/ /tshig ces bya ba ni tshig 'dra ba dang thal ba dang / yi ge mnyam pa dang thal ba'o/ /tshig mnyam pa ji lta bu zhe na/ slob dpon gyis sdig pa thams cad mi bya'o zhes byas pa dang / slob mas kyang de bzhin du smras pa ni tshig mnyam pa'o/ /tshig thal ba ni slob dpon gyis sdig pa thams cad mi bya'o zhes ma rdzogs par slob mas dge ba phun sum tshogs par bya'o zhes bya ba ni thal ba'o/ /yi ge mnyam pa ni a zhes bya ba tshig mnyam du ston pa'o/ /yi ge thal ba ni a zhes ma rdzogs par a zhes sngar rdzogs pa'o/ /chos zhes bya ba ni sde snod gsum gang yang rung ba'o/ /slob dpon gyis sngar byas nas slob mas phyis byas pa dang kha ton du bton pa la ltung ba med do/ /nyes pa ni bsnyen par ma rdzogs par 'du shes bzhin du klog na ltung bar 'gyur ro/ /the tshom yang de bzhin no/ /bsnyen par rdzogs pa la ma rdzogs par 'du shes na nyes byas so/ / bsnyen par ma rdzogs pa'i gang zag la gnas ngan len gyis nyes pa brjod du mi gnang ba'i gleng gzhi ni mnyan du yod pa na ste/ dge slong 'dod chags dang ma bral ba nyon mongs pa ma spangs pa dag nyes pa rtag tu 'byung ba dang slad kyis dge slong mdo sde dang 'dul ba dang ma mo 'dzin pa dag las ltung ba'i chos rnams mnyan nas de dag ltung ba chos bzhin du slar byed du bcugs pa dang / de dag kyang de bzhin gshegs pa'i dbu skra dang / sen mo'i mchod rten la zhal zhal dang dkyil 'khor byed pa dang / dge slong gnas brtan dag la yang chu 'drim zhing bsil yab g.yob pa'i tshe dge slong drug sde dang gzhon nu dag de lta bu'i las mi byed cing 'khod pa dang / khyim bdag dang bram ze rnams dge slong gnas brtan dag ni khyed dang mi 'dra ste/ dad pa che zhing dge ba la brtson no zhes byas pa dang / drug sde po na re de dag ni dad pa ma yin gyi chad pa'i las byed de/ de dag gis nyes pa 'di lta bu 'di dag byas so zhes lag brda bstan pa dang / khyim bdag gis dge slong gnas brtan rgan po dag kyang 'di lta bu'i nyes pa byung zhing 'dod chags skye na dge slong gsar bu gzhan lta zhig ci smos zhes 'phya ba dang dge slong drug sde dag dge slong gsar bu dag la khyed kyi mkhan po ga re zhes dris na/ de dag na re khyed dang mi 'dra ste/ mchod rten dang gnas brtan dag la mchod pa byed du song ngo zhes byas pa dang drug sde dag na re de dag ni dad pa'i phyir mchod pa byed pa ma yin gyi chad pas bcad de chad pa'i las byed pa'o zhes smras pa dang / de dag gis mkhan po dag la ma dad cing spang bar 'gyur ba dang mkhan pos khyed su las thos zhes smras pa dang drug sde las so zhes smras pas/ de dag mi dga' bar gyur pa snyan du bdas nas bslab pa'i gnas bcas so/ /dge slong zhes bya ba ni drug sde ste gzhan yang de dang 'dra ba'o/ /bsnyen par ma rdzogs par zhes bya ba ni dge slong pha dang dge slong ma gnyis ma gtogs par gzhan thams cad do/ /gnas ngan len ces bya ba ni phas pham pa las byung ba dang lhag ma las byung ba'o/ /dge 'dun gyis gnang ba ma gtogs zhes bya ba ni dge 'dun gyis gnang ba bkol ba'o/ /mnyan du yod pa na dge slong 'phral po che dang dge slong ma drang mo grong de dag tu log par spyad pas skye bo de dag mi dga' bar gyur pas na de dag gi nyes pa rigs so sor rig par byed cing bsgo ba ni ma gtogs zhes gsungs so/ /ltung ba ni snga ma bzhin no/ /nyes pa gang zhe na dge slong gis so sor rig par mi bya bar 'du shes bzhin du so sor rig par ma byas na ltung bar 'gyur ro/ /the tshom na yang ngo / /dge slong gis yang so sor rig par bya ba'i rigs rnams la so sor rig par bya ba ma yin par 'du shes sam/ the tshom bzhin du so sor rig par byas na nyes byas su 'gyur ro/ /dge slong gis nyes pa dril brdungs pa bzhin du kun gyis shes pa'am ri mor bris pa lta bu'am/ bdag gis shes pa bzhin du 'jig rten gzhan gyis shes pa la ni brjod kyang nyes pa med do/ /mi'i chos las bla mar gyur pa'i bden pa smrar mi gnang ba'i gleng gzhi ni yul yangs pa can spre'u rdzing gi 'gram na'o/ /de na gnas pa'i nya pa lnga brgya po rnams 'bad brtson rtsol bas nyon mongs pa thams cad spangs te dgra bcom par gyur to/ /de dag sngon mu ge byung ba'i tshe na ni yon tan med bzhin du smras pas phas pham par bslab pa bcas so/ /'dir ni bden pa mthong bas na mi'i chos las gyur pa'i bden pa bsnyen par ma rdzogs pa las smras na ltung bar bcas te/ brdzun gyi pham pa ji skad zer ba bzhin du sbyor cig /dge slong zhes bya ba ni nya pa lnga brgya ste/ gzhan yang chos 'di la zhugs pa'o/ /bsnyen par ma rdzogs pa ni snga ma bzhin no/ /bla ma zhes bya ba ni 'dod pa'i khams las gzugs kyi khams bla ma'o/ /'di ltar sgrib pa lnga ni mi'i chos zhes bya'o/ /de lnga spangs pa bla ma zhes bya'o/ /smras zhes bya ba ni bsgo ba'o/ /bden pa zhes bya ba ni de'i dngos po bden pa'o/ /ltung ba ni snga ma bzhin no/ /nyes pa ni dge slong gi 'du shes pa dang / bzod pa dang lta ba ma sbas par lha mthong klu mthong de dag gi sgra thos te/ sgra bcom pa nas lha'i bar du ste/ de dag mthong ngo zhe'am 'grogs so zhe na ltung bar 'gyur ro/ /dge 'dun gyi rnyed pa gang zag mdza' ba'i phyir bsngos so zhes zer ba'i gleng gzhi ni rgyal po'i khab na'o/ /de'i tshe na tshe dang ldan pa gyad bu nor dge 'dun gyi mal stan 'gyed pa dang zas la bsko bar bskos te/ gyad bu nor yang dag la bsams pa dge bas na dge 'dun la chos bzhin du zhal ta gus par byed nas/ dkon mchog gsum mam grogs po mdza' ba la ma byin pa cung zad kyang med de/ de ltar dbul zhing sbyin pas na rang gi chos gos smad gsum ngan zhing zhig par gyur to/ /de nas dge 'dun rnams kyis bgros pa/ nam dge 'dun gyis rnyed pa gos shig grub na gyad bu nor la sbyin no zhes snyan du zhus nas bka' stsal pa/ phyis rtsod cing 'khrug par mi 'gyur bar dge 'dun spyir gsol ba byos shig ces 'byung ste/ de bzhin du dge 'dun mthun pas gsol ba byas te byin na phyis mdza' bo dang sa can na re dge 'dun gyi rnyed pa khyed cag gi slob ma mdza' ba la byin no zhes zer nas/ dge slong dag gis de gnyis la khyed gnyis de'i tshe na der ma gtogs sam zhes byas na/ nged kyang der 'dus so/ /'o na khyed ci'i phyir 'phya/ ci nged cag kyang mya ngan byed du yang mi gnang ngam zhes byas pa dang / dge slong dag 'phya ba las snyan du bdas nas 'dul ba la bslab pa bcas so/ /yang dge slong zhes bya ba ni mdza' bo dang sa can te gzhan yang de dang 'dra ba'o/ /sngar mthun te rung bar byas zhes bya ba ni sngar tshogs pas mthun par byin pa'o/ /de'i 'og tu zhes bya ba ni dus phyi zhig na'o/ /'di ltar mdza' ba'i phyir zhes bya ba ni mdza' ba gang zhe na/ mkhan po dang slob dpon gnas 'cha' ba'o/ /lhan cig gnas pa ni mkhan po'o/ /slob dpon gcig pa yang de bzhin du sbyar ro/ /rnyed pa ni gnyis te gos dang zas te/ 'dir gos la bya'o/ /ltung ba ni snga ma bzhin no/ /nyes pa ni dge slong gis sngar mthun te rung bar byas la de'i 'og tu tshe dang ldan pa dag gis 'di ltar mdza' ba'i phyir dge 'dun gyi rnyed par bsngos pa gang zag bdag gir bsngos so zhes zer na thams cad du ltung bar 'gyur ro/ / mdza' ba'i phyir bsngos pa bden na nyes pa med do/ /bslab pa khyad du gsod pa'i gleng gzhi ni mnyan du yod pa na'o/ /dge slong drug sde rnams zla ba phyed phyed cing so sor thar pa'i mdo bstan pa 'don pa'i tshe phas pham pa yan chad 'don pa'i tshe na ni cang mi smra bar 'khod cing dge 'dun gyi lhag ma rtag tu byung bas na lhag ma man chad gdon pa 'don pa'i tshe 'di skad zer te/ tshe dang ldan pa dag bslab pa'i gnas phran tshegs 'di lta bu zla ba phyed phyed cing gdon ci dgos dge slong rnams zhum pa dang bag 'khums par gyur te/ rma rub pa kun phyis gzhig ci dgos/ nyes pa kha cig ni bshags kha cig ma bshags pa yang yod de/ khyod kyis de dag glengs pas na bdag cag the tshom du gyur to zhes bslab pa la smod cing khyad du gsod pa dge slong dag gis snyan du gsol nas 'dul ba la bslab pa bcas so/ /yang dge slong gang zhes bya ba ni drug sde ste gzhan yang 'di la zhugs pa'o/ /zla ba phyed phyed cing so sor thar pa'i mdo gdon pa zhes bya ba ni phas pham pa nas rtsod pa zhi ba'i bar du gdon pa lnga la bya'o/ /bslab pa'i tshig phran tshegs gdon ci dgos zhes zer ba ni bslab pa spong ba'i rtags sna tshogs smra ba'o/ /ltung ba ni snga ma bzhin no/ /phas pham pa bzhi 'don pa'i tshe gdon ci dgos zhes zer na ltung bar 'gyur ro/ /lhag ma dang nyes byas kyi bar du gdon ci dgos zhes zer na ltung bar 'gyur ro/ /de bzhin du 'dul ba dngos po dang phran tshegs dang / gzhung bla ma dang / 'dul ba snga ma dang / bcu drug pa dang / 'grel pa dang / gleng gzhi dang / 'dul ba lta bu'i rnams gdon pa'i tshe gdon ci dgos zhes zer na ltung bar 'gyur ro/ /'dul ba dang mi ldan pa mdo sde la khyad du gsod na nyes byas su 'gyur ro/ /brdzun gyi tshogs bcu phung dang po rdzogs so// //shing gcod du mi gnang ba'i gleng gzhi ni mnyan du yod pa na ste/ de'i tshe na sngon shing mkhan las rab tu byung ba'i dge slong rgan zhugs blun po mi mkhas mi gsal ba gcig gis lha gnas pa'i shing zhig bcad de gtsug lag khang bgyis pa dang / lha de yang rang gi gnas dang rten ma mchis pas srod la bcom ldan 'das kyi snyan du gsol te/ btsun pa deng song dgun gyi dus la bab ste shing gi yal ga yang gas pa tsam du rlung ldang ste/ bdag gi byis pa ni phra bas gnas kyang ma mchis na ji ltar bgyi zhes gsol ba dang / bcom ldan 'das kyis lha gzhan zhig la lha de'i gnas byin cig par gtad nas de'i phyi de nyin mo dge slong gi dge 'dun bsdus te de'i rgyus zhib tu smras nas shing gcod du mi gnang bar stsal ba dang / 'brog skyes kyi 'brog dgon pa na dge slong las sar pa bdag las mi byed de snyan du bdas nas da slan chad las sar pa'i dge slong gis zhag bdun nam brgyad kyi sngon rol nas shing gi drung du dkyil 'khor dang gtor ma dang mchod pa byas nas chos bshad de gdod shing gcad par bya'o/ /mtshan ma lta bu byung na gcod du mi gnang zhes gsungs te de'i tshe bslab pa ma bcas so/ /phyis mnyan du yod pa na dge slong drug sde rnams rang gi lag gis shing dang rtswa dang me tog rnams rnga'am rngar 'jug /gcod dam gcod du 'jug pas na phyi'i mu stegs rnams 'phya bas snyan du bdas te/ sa bon gyi tshogs nas 'byung po'i gnas 'jig tu mi gnang bar bcas/ dge slong zhes bya ba ni drug sde ste/ gzhan yang de dang 'dra ba'o/ /sa bon la rnam pa lnga ste/ rtsa ba'i sa bon dang / sdong po'i sa bon dang / mgo thogs kyi sa bon dang / 'gas pa'i sa bon dang / sa bon gyi sa bon dang lnga'o/ /rtsa ba'i sa bon ni gla sgang dang shu dag dang yung ba dang rong dang sge'u gsher dang gzhan yang rtsa ba btsugs pa las skye ba'o/ /sdong po'i sa bon ni bu ram shing 'od ma dang / lcang ma dang / gzhan yang sdong bu las skyes pa rnams so/ /mgo thogs kyi sa bon btab pa las skyes par gyur pa'o/ /bkas pa'i sa bon ni 'jam byi ra dang ga gon dang / kham rtseg la sogs pa'o/ /sa bon gyi sa bon ni nas 'bras dang khre la sogs pa'o/ /'byung po'i gnas zhes bya ba ni srin bu dang / phye ma leb dang sbrul dang trai la ta ka la sogs pa ni 'byung po zhes bya ste/ de dag shing la gnas pas na de dag gi gnas bshig gam phyung ngam bcad na ltung bar 'gyur ro zhe'o/ /de la gong ma'i sa bon rnam pa lnga po las rtsa ba'i sa bon du 'du shes la/ sngo la sngon por 'du shes de bcad dam bcad du bcug na ltung bar 'gyur ro/ /sngo ba la the tshom du gyur na yang ltung bar 'gyur ro/ /skam po la sngo bar 'du shes te bcad na nyes byas su 'gyur ro/ /the tshom la yang ngo / /ji ltar rtsa ba'i sa bon la rnam pa bzhir sbyar ba bzhin du sa bon lhag ma bzhi po la yang rnam pa bzhir sbyor cig /dge slong gis sa bon rnam pa bzhi po la mer bsregs te ma rung bar gyur tam/ chur bor te ma rung ngam gtun gyi nang du brdungs te ma rung bar gyur na yang ltung ba lnga dang nyes byas lngar 'gyur ro/ /sa bon rnam pa lnga po sa skam po la gzhag gam khu ba tsha bas blugs sam shing gis drud de snad par byas na yang snga ma bzhin no/ /dge slong gis thabs gcig gis shing gcig bcad na nyes byas kyang gcig ltung ba yang gcig tu 'gyur ro/ /thabs gcig gis shing mang du bcad na nyes byas gcig dang ltung ba mang du 'gyur ro/ /ji ltar thabs gcig dang gnyis sam gsum pa'am thabs mang po yang de bzhin du sbyar ro/ /me tog dang lo ma dang shing gi yal ga yang gong ma bzhin du sbyar te sngon po bcad na ltung ba'o/ /skom po ni nyes byas so/ /chu'i nang nas skam po phyi rol du phyung ngam/ sha mo dang phab dgo dgo phyung na ltung bar 'gyur ro/ /'phya zhing gzhogs 'phyas byed pa'i gleng gzhi ni rgyal po'i khab na'o/ /de'i tshe na tshe dang ldan pa gyad bu nor dge 'dun lam la stan dang zas 'gyed de/ de'i tshe na mdza' bo dang sa can gnyis mi sdug pas zas dang gnas khang ma thob bo/ /slad kyis gyad bu nor gyis nged gnyis mnar to zhes byas so/ /phyis bsnyen dga' bo'i mdun du khyod kyang mal stan 'gyed par bskos na/ gyad bu nor bzhin nged la mnar bar byed do zhes smras pa dang / bsnyen dga' bo na re khyod gnyis de skad ma zer cig tshe dang ldan pa gyad bu nor ni mal stan 'ding ba'i mchog tu sangs rgyas kyis bsngags so zhes byas pa dang / de ltar gyur pa snyan du bdas nas/ gsol ba dang las gnyis kyis 'phya bar grangs su chug shig ces bka' stsal nas/ de bzhin du 'phya ba'i grangs su bcug kyang phyi phyir gyad bu nor gyi ming nas ni mi smos kyi dge slong kha cig ni de bzhin du nged la ma nar bar byed grang zhes lkog na gzhogs 'phyas byed pa dang mngon sum du 'phya bas snyan du bdas te/ 'phya bar mi gnang bar bcas 'phya zhing gzhogs 'phyas byed ces bya ba ni 'phya bar bsams nas tshig tu smras na ltung bar 'gyur ro/ /nyes pa ni dge 'dun gyis dge slong 'phya ba'i grangs su bcug kyang dge slong de gang zag bcu gnyis kyi las byed pa la 'phya'am gzhogs 'phyas byed na ltung ba re rer 'gyur ro/ /las kyi grangs su bcug kyang dge slong gang zag bcu gnyis kyi las su bskos pa las mi byed pa rnams la 'phya na ltung bar 'gyur ro/ /dge 'dun gyis 'phya ba'i grangs su bcug kyang dge slong gang zag bcu gnyis kyi las su ma bskos la las byed pa rnams la 'phya na ltung bar 'gyur ro/ /dge slong de 'phya ba'i grangs su ma bcug na dge slong las byed kyang rung mi byed pa rnams la 'phya na thams cad du ltung bar 'gyur ro/ /bsgo ba'i lan log par 'don pa'i gleng gzhi ni kau shAm+bI'i dgra zin gyi kun dga' ra ba na'o/ /de'i tshe na tshe dang ldan pa mos pa can la ltung ba byung nas chos bzhin du slar mi byed pas na/ dge slong phan par 'dod pa bde bar 'dod pa dag gis tshe dang ldan pa ltung ba slar shogs shig ces byas na/ ltung ba su la byung ba de 'chags grangs ngas ni ltung ba mthong ngo / /khyed kyis mthong bas na khyed la ltung ba byung grang / nged kyi rigs las ni byang chub thob pa yod kyi/ khyed kyi rigs tha dad pa las rab tu byung bas na khyed la ni byang chub thob pa su yod des rlom zhing lan log par ldon pas na gsol ba dang las gnyis kyis bsgo ba'i lan log par ldon pa'i grangs su bcug go/ /de nas kyang ngas ni smras pas nyams pa lnga ste/ dper na nags kyi bya yang rang gi skad phyung bas tshig zin pa dang 'dra ste/ da slan chad su ci zer yang mi smra'o zhes zer nas gzhan tshangs par spyod pa phan pa dang bde bar 'dod pa rnams kyis ltung ba shogs shig ces phyi phyir glengs na bdag nyid mi smra bas na lan mi ldon pa'i grangs su bcug go/ /'on kyang phyi phyir mi smra ba dang / log par lan ldon pa gnyis byed byed pas snyan du bdas te/ lan log par ldon du mi gnang bar 'dul ba la bslab pa bcas so/ /bsgo ba'i len log par ldon zhes bya ba ni bsgo ba'i len log par glan par bsams nas gzhan la tshig gis rig par byed pa'o/ /nyes pa ni dge slong rab tu byung ba'o zhes dris pa dang rab tu ma byung ba'o zhes zer na ltung ba'o dge slong lhung bzed thogs pa dag mthong ngam zhes zer ba las rkang pas 'gro ba mthong ngam zhes zer na ltung bar 'gyur ro/ /bu ram shing dang rtsa khur khyer ba mthong ngam zhes dris na gzhan du brgyud na yang ltung bar 'gyur ro/ /gshed mas gsong bar khrid pa la snying rje'i bsam pas 'dus byas bdag med par bsams nas ma mthong ngo zhes smras pa ni nyes pa med do/ /dge 'dun gyi khri bla gab med pa na gding du mi gnang ba'i gleng gzhi ni mnyan du yod pa na ste/ dge slong rnams kyis bla gab med pa la dge 'dun gyi khri dang mal stan rnams bting ste bzhag pa de ma bsdus par khyim bdag gcig gis dge slong rnams spyan drangs na bcom ldan 'das ni mal stan nyul bar bzhed nas der ma gshegs te dge slong dag dong ba'i 'og tu sprin kha dog tha dad pa dag 'dus shing char bab tu nye bas mal stan byul ba dang / kye ma'o yon bdag dad pa ni sha khrag zad zad du sbyor zhing sbyin na dge slong rnams ni tshod mi zin par spyod do zhes nas/ mal stan dang khri rnams bcom ldan 'das phyag dar te nang du bsdus so/ /phyis dge slong dag lhags pa dang / slan chad mal stan ma bsdus par grong du 'gror mi gnang bar bslab pa bcas so/ /dge 'dun zhes bya ba ni phyogs bzhi'i dge 'dun no/ /khri'am khri'u zhes bya ba ni dngos su zad do/ /stan nang tshangs can ni shing bal gyis bkang ba'o/ /gor bu zhes bya ba ni khri'u g.yogs pa'o/ /bla gab med pa zhes bya ba ni steng ma g.yogs pa'o/ /gding ngam zhes bya ni bdag gis so/ /gding du bcug ces bya ba ni gzhan la'o/ /ma brtul zhes bya ba ni bdag gis so/ /brtul du ma bcug ces bya ba ni gzhan la'o/ /de nas song zhes bya ba ni nye 'khor las song ba'o/ /de 'dra'i rkyen ma gtogs zhes bya ba ni khyim pa gnyis shig kho na yod pa las mthu chung ba de rab tu byung ste ljongs rgyu zhing bros te song ba las nub mo lha khang zhig tu dgongs der mal stan dag brnyas nas nyal lo/ /nang par bdag ni 'gro zhes mal stan dag gtad pa las ring du thogs nas/ khyim bdag des bsnyags pas sleb pa dang brdegs pa snyan du bdas te de lta bu'i nyes pa byung ba dang bar chad chen po brgyad la sogs pa byung na ma brtul bar song yang nyes med ce'o/ /mal stan ma rung bar gyur pa rnam pa gnyis te/ rlung dang char dang nyi ma'o/ /dge slong gis gang zag lnga la stan bcol bar mi bya ste/ ngo tsha med pa dang khon yod pa dang / rgas pa dang nad pa dang / bsnyen par ma rdzogs pa thams cad la'o/ /gding ba ma bsdus par 'gro ba'i gleng gzhi ni mnyan du yod pa na ste/ lho phyogs nas dge slong gnyis shig bcom ldan 'das kyi zhabs la phyag 'tshal du 'gro ba mnyan du yod par phyin te/ der dge rgan po ni mal stan dang gnas khang yang thob po/ /dge slong gsar bu ni mal stan 'gyed pa'i tshe ma thob nas gzhon nu de yang nus pa zhig pas rtswa brngas te/ pus mo tsam nub par byas te nyal lo/ /rgan pos kyang rtswa bting ngo / /de gnyis kas rtswa ma bsdus/ dge slong grogs po la yang ma bcol bar dong ba'i 'og tu dge slong dag ni khyim bdag dag gi steng du mgron du gnyer to/ /bcom ldan 'das ni mal stan nyul bar bzhed nas bshos gtsug lag khang du 'dren to/ /gnas khang de yang tshan yod cing sa snyi bas rtswa de la srin bu zhugs nas khang pa phyi nang du srin bus gang ste ma rung bar gyur to/ /de nas bcom ldan 'das kyis phyag dar te rtswa de bsdus nas dge 'dun kun bsogs te/ da slan chad rtswa bting ba ma brtul tam brtul tu ma bcug par 'gror mi gnang bar bslab pa bcas so/ /rkyen ma gtogs zhes bya ba ni de nas slad kyis dge slong ma zhig 'gron pa mang po dang ljongs rgyu zhing dong ba las nub mo gtsug lag khang zhig tu phyin nas rtswa mang zhig bsdus nas bting ste nyal lo/ /de dag nang par rtswa sdud cing 'khod pa las ring du thogs nas 'gron pa mang po dang bral te lam du rkun pos bcom pa snyan du bdas te/ snga ma ni bcas pa'o/ /'di ni gnang ba'o zhes 'dul ba la bslab pa'i gnas bcas so/ /yang dge slong zhes bya ba ni rgan gzhon gnyis te/ gzhan yang de dang 'dra ba'o/ /dge 'dun zhes bya ba ni nyan thos kyi dge 'dun no/ /gnas khang ni gang na spyod lam bzhi dang ldan pa ste/ 'gro ba dang 'greng ba dang / 'dug pa dang / nyal ba dang ldan pa'o/ /rtswa dang lo ma zhes bya ba ni dngos su zad do/ /gding ma 'ding du bcug gam zhes bya ba ni bdag dang gzhan gyis so/ /ma brtul tam brtul tu ma bcol zhes bya ba ni bdag dang gzhan la'o/ /song zhes bya ba ni nye 'khor las 'das pa'o/ /dge 'dun lam bcol zhes bya ba ni nye 'khor na yod pa'i dge slong la'o/ /nyes pa ni bdag gis ma bsdus sam bsdur ma bcol bar song na nye 'khor las ma 'das kyi bar du nyes byas so/ /'das na ltung bar 'gyur ro/ /dge slong skrod du mi gnang ba'i gleng gzhi ni mnyan du yod pa na ste/ de'i tshe tshe dang ldan pa 'char bas dge slong gzhan dag gi slob ma gsar bu rnams spro bar byas te/ kha drangs nas bdag cag ljongs rgyu zhing bdag cag gis grags pa ni bsgrags/ /rgol ba ni tshar bcad/ rnyed pa ni sgrub po/ /khyed la yang lung dbog pa dang klog pas mi bral bar bya'o zhes bsgo ba dang / de dag so so'i mi mkhan po dang slob dpon la gsol te bkag kyang ma btub nas 'char ba'i phyi bzhin du dong ngo / /de dag kyang nye 'khor las 'das pa dang yo byad sna re re bskur te dong ba dang / 'char ba ni lam du khyim bdag dang gtam byed cing 'dug pa dang / lha khang zhig tu gaN+DI brdungs te 'char ba la 'dong zhes byas na de ni las kyi gaN+DI zhig gis bdag cag ngal bsos la dong ngo / /sngar dong du zin gyis kyang khong gis las byed du bcug tu 'ong ngo zhes smras pa dang / slob dpon 'di ni rnyed pa'i gaN+DI zhig kyang srid kyis 'dong zhes byas na khyed sngar deng la nga'i skal ba yang nos shig ces byas nas sngar dong ngo / /'char ba ni phyi na gtam la g.yengs te slob ma dag gis stan dang gnas mnos te bsdad na nam sros kyang ring zhig tu ma 'ongs nas sgo bcad pa'i 'og tu 'ongs te 'bod nas nang du 'ongs te/ slob dpon kun sta gon bgyis lags kyis gzims zhes byas pa dang / khyed cag su zhig la zhus te nyal/ bdag cag ni slob dpon ring du ma byon nas gcig la gcig zhus te nyal lo/ /zhes smras pa dang / de khros te rim gro med pa khyed la lung mi sbyin gyis phyir deng shig ces slob ma rnams mtshan mo phyi rol du lhags pa la gzhug go/ /de nas phyi de nyin slob ma rnams kyis bdag cag phyi phyag 'tshal te mchi'o zhes smras pa dang / khyed ma 'dong bar 'dug shig dang / khyed na na yang ngas nad g.yog bya'o zhes byas na/ bdag cag nad med pa las kyang nad yod par byas na da ni mi na re'o/ /zhes nas ma btub par mnyan du yod par dong ste lhags pa dang / dge slong dag gis de dag la bde bar 'ongs sam zhes byas na/ de ltar gyur pa zhib tu dge slong dag la byas pa snyan du bdas pa dang / phyis 'char ba nyid slar 'khor ba la rmas nas skrod du mi gnang bar bslab pa bcas so/ /de 'dra ba'i rkyen ma gtogs zhes bya ba ni mnyan du yod pa nas phug gi gtsug lag khang zhig na dge slong mang zhig 'khod pa las sprin kha dog lnga pa 'dus te char bab tu nye nas dge slong gzhan ni rdib kyis dogs te phyung ngo / /nad pa gcig rang 'byung ma nus te/ char gyis sa gas rdib nas dus las 'das te de lta bu'i rkyen zhig gis ma dad bzhin du phyi rol du phyung zhing bskrad pa ni nyes pa med do zhes gnang ngo / /dge slong zhes bya ba ni 'char ba ste/ gzhan yang de dang 'dra ba'o/ /khros 'khrugs zhes bya ba ni khros pa'i zil gyis non pa'o/ /gtsug lag khang ngam gnas khang zhes bya ba ni spyod lam bzhir ldan pa ste snga ma bzhin no/ /skrod dam skrod du bcug ces bya ba ni bdag dang gzhan gyis so/ /rkyen ces bya ba ni bkal ba'o/ /dge slong snga na gnas shing 'khod pa la phyis 'ongs shing gnon du mi gnang ba'i gleng gzhi ni mnyan du yod pa na ste/ tshe dang ldan pa 'char bas gzhan gyi slob ma la drangs te ljongs rgyu zhing dong ba las gtsug lag khang gzhan zhig tu gaN+DI brdungs pa la sogs pa'i gtam brgyud ni gong ma bzhin du sbyar ro/ /bye brag ni 'char bas thabs kyis sgo phye ste nang du 'ongs pas slob ma nyal ba'i steng du mnan cing brdzis pa dang / de dag shir dogs nas phyir phyung ste mtshan thog thag phyi rol na nyal bar grang bas nyen nas nang par bdag cag mchi'o zhes phyi phyag 'tshal nas mnyan du yod par phyin te dge slong rnams la smras nas snyan du bdas nas phyis gnon du mi gnang bar bcas so/ /yang dge slong gang zhes bya ba ni 'char ba ste/ gzhan yang de dang 'dra ba'o/ / shes bzhin du zhes bya ba ni bdag gis sam gzhan gyis bdag rim par byas pa'o/ /gtsug lag khang zhes bya ba ni spyod lam bzhi dang ldan pa'o/ /snga na 'khod ces bya ba ni snga na gnas pa'o/ /gnod par byed ces bya ba ni mi bde bar byas pa'o/ /'di 'gro zhes bya ba ni gzhan ma yin par de nyid kyis byas pa'o/ /ci tsam du dge slong gis su la gnod pa de 'gro bar 'gyur ba'i rkyen de nyid kyis dge 'dun gyi gtsug lag khang na dge slong snga na 'khod par shes bzhin du phyis 'ongs te nyal lam 'dug na ltung bar 'gyur ro/ /gnod par bya'o snyam nas ched du bsams te gnod pa'i bag byas na ci'i sgo nas kyang rung ste thams cad du ltung bar 'gyur ro/ /khri'i rtsa ba byung sla ba steng gi yang thog tu bzhag nas lcid kyis phab ste 'dug tu mi gnang ba'i gleng gzhi ni mnyan du yod pa na ste/ 'char ba pos sngan chad gzhan gyi slob ma rnams kha drangs shing gtses pas slad kyis tshe dang ldan pa bsnyen dga' bo ljongs rgyu zhing 'gro bar dad de gzhan gyi slob ma rnams kha drangs na gcig kyang ma btub nas bsnyen dga' bos bsod snyoms pa rgan zhugs zhig dang 'gro bar byas nas/ bsod snyoms pas kyang bsnyen dga' bo gnas ngan len kun du spyod par grags mod kyi/ bdag gnas 'cha' zhing lung dbog mi dgos te des byar ci yod snyam du bsams so/ /bsnyen dga' bos bdag cag gnyis kyi thos pa ni bsgrags rnyed pa ni bsgrubs/ rgol ba ni tshar bcad du 'dong ngo zhes nas de gnyis kyang 'grogs te dong nas nye 'khor las 'das pa dang bsnyen dga' bos rgan po la gnas 'char gzhug cing yo byad dag bskur bar byas na ma btub ste bdag ni gnas dben pa 'cha'o/ /yo byad 'chang ba ni ston pas smad la/ bden pa mthong ba la sgrib pas mi bskur ro zhes ma btub pa dang / mi bskur ba ni rigs na khyod kyis nga la gsher ci yod ces bsnyen dga' bo yang khros so/ /de nas bsnyen dga' bo yang lam na mi 'phrad do cog dang gtam zla yod kyi bar du 'khyal zhing 'dug go/ /de nas gtsug lag khang du phyin du nye ste gaN+DI brdungs pa dang / gtam sna tshogs la dga' ba ni ston pas smad pa yin gyis gaN+DI brdungs pa yang rnyed pa'i gaN+DI srid na 'dong ngo zhes byas na de ni las kyi gaN+DI te/ bdag cag ngal gyi steng du las kyis bsnan du 'ong ngo / /zhes ma btub nas bsod snyoms pa sngar song ba las bsnyen dga' bo'i gnas dang mal cha yang nod du bcol lo/ /des kyang bsnyen dga' bo'i gnas ni yang thog tu mnos/ bdag gi 'og tu mnos nas/ ring zhig bsdad kyang ma 'ongs nas sgo bcad de nyal lo/ /de yang nam sros te 'ongs nas 'bod bzhin du thabs kyis sgo phye ste rgan zhugs la mal gar byas zhes dris nas de yang rang gi gnas su song ngo / /de yang rgan zhugs la gnod par bsams nas yang thog nas rgan zhugs la bos pa dang de gang na zer ba'i thad kar khri'i rtsa ba gzer bu med pa 'byung sla ba'i steng du lcid kyis drag tu phab ste 'dug pas khri'i rtsa ba ltung nas rgan po'i 'phral pa la phog ste/ /gnad nas nad par phyi phyag 'tshal te song nas phyir phyin pa dang / de ltar gyur pa dge slong dag la byas pa snyan du bdas nas khri rtsa ba 'byung sla ba la 'dug tu mi gnang bar bslab pa bcas so/ /dge slong zhes bya ba ni bsnyen dga' bo ste gzhan yang nyes pa de dang 'dra ba'o/ /dge 'dun dang gtsug lag khang ni snga ma bzhin no/ /lcid kyis phab pa ni rkub kyis bcir ba'o/ /nyal zhes bya ba ni lus kyis 'phres pa'o/ /ltung ba ni snga ma bzhin no/ /dge slong gis ci tsam du gtsug lag khang gi khang bur khri'am khri'u rtsa ba 'byung sla bar shes bzhin du lus kyi lcid kyis phab ste 'dug na thams cad du ltung bar 'gyur ro/ /spang leb kyis g.yogs pa'am/ /pha gus g.yogs pa dang khri'i 'og tu rkang rten bcug pa dang / khri bkan te 'dug pa la lcid kyis phab kyang nyes pa med do/ /srog chags dang bcas pa'i chu 'debs su mi gnang ba'i gleng gzhi ni ko shAm+bI'i dgra zin gyi kun dga' ra ba na ste/ de'i tshe na tshe dang ldan pa mos pa can gyis shes bzhin du srog chags dang bcas pa'i chus rtswa dang lci ba dang sa la chag chag 'debs shing 'debs su bcug pa dang / de la dge slong dag gis tshe dang ldan pa mos pa can de ltar ma byed cig ces bsgo ba dang nga la ni sus kyang grangs kyis ma gtad na/ khong nyid lho dang byang dang nub kyi rgya mtsho dang lteng ka dag tu dong na ci nyes zhes zer ba dge slong dag 'phya nas snyan du bdas te/ dge sbyong gi bya ba ma yin no/ /zhes 'dul ba la bslab pa'i gnas bcas so/ /yang dge slong zhes bya ba ni mos pa can te/ gzhan yang de dang 'dra ba'o/ /shes bzhin zhes bya ba ni sems can yod par bdag gam gzhan gyis bsgo ba'o/ /srog chags zhes bya ba ni rnam pa gnyis te mig gis sod pa dang chu tshags la chags pa'o/ /chu dang rtswa zhes bya ba la sogs pa ni chus spyad par bya ba'i gnas thams cad la bya'o/ /'debs sam 'debs su gzhug ces bya ba ni bdag gis sam gzhan la 'debs su bcug pa'o/ /nyes pa ni srog chags yod pa'i chu la srog chags yod par 'du shes sam the tshom bzhin du 'debs sam spyod na ltung ba re rer 'gyur ro/ /srog chags med pa la yod par 'du shes sam the tsom na nyes byas re rer 'gyur ro/ /srog chags yod pa'i yur ba'i chu kha bsgyur na sems can ji snyed yod pa shi na ltung ba yang de snyed du 'gyur ro/ /ma shi na nyes byas re rer 'gyur ro/ /chu la ji lta ba bzhin du sa dang rtswa dang srog chags dang ldan pa la yang de bzhin du sbyar ro/ /gtsug lag khang rim pa gnyis las rtsig tu mi gnang ba'i gleng gzhi ni kau shAm+bI'i dgra zin gyi kun dga' ra ba na ste/ de'i tshe dge slong drug sde rnams gzhan gyis brtsigs pa'i khang pa la 'phya ba la zhugs pa dang / de na dge slong gnas pa rnams kyis khyed nyid rdo gcig bsgreng yang mi nus par gzhan gyis brtsigs pa'i khang pa la 'phya ba'i rigs sam zhes byas pa dang / de dag kyang mos pa can spro bar byas nas mos pa can gyis kau shAm+bI na khyim bdag ser sna can phyug po zhig 'dug pa btul nas gtsug lag khang rtsig pa'i nor sbyar nas gla can kun bsogs te/ gtsug lag khang zlum po stor khung la sogs pa ma btod pa cig nyin gcig gis zin par brtsigs so/ /rgyas par lhag ma'i skabs su gtsug lag khang gi gleng gzhi bzhin du rgyas par sbyor cig gtsug lag khang 'di yang 'jig par thugs su chud nas sangs rgyas kyis lha rnams la srod la chos bshad do/ /nam phyed na char bab nas zhig ste sa'i phung por gyur nas drug sde rnams kyang 'bros pa dang / yon bdag zas dang bcas te gtsug lag khang du 'ongs par bcom ldan 'das kyis mi dga' ba med par spro bar chos bshad do/ /de nas yon bdag dga' bar gyur pa dang / drug sde yang slar lhags so/ /yon bdag gis de dag la gos phrugs re re zhig bskon pa dang / drug sde rnams kyang ngom pa dge slong rnams kyis 'phya ba snyan du bdas nas gtsug lag khang brtsigs na pha gu dang 'jim pa rim pa gnyis gsum las lhag par rtsig tu mi gnang bar bslab pa bcas so/ /yang dge slong gang zhes bya ba ni drug sde ste/ gzhan yang de dang 'dra ba'o/ /gtsug lag khang zhes bya ba ni spyod lam bzhi dang ldan pa'o/ /chen po zhes bya ba ni rnam pa gnyis te/ sbyin pa dang / tshad che ba'o/ /brtsigs pa ni bdag dang gzhan gyis so/ /sgo khang dang gtan pa'i gnas zhes bya ba ni sgo khang dang gtan pa'i gnas snga nas gdod pa'o/ /snang ba gdod pa'i 'du shes bya ba ni skar khung dang chu khung gdod pa'o/ /rmang nas bzung ste rim pa gnyis sam gsum rtsigs shig ces bya ba ni pha gu dang 'jim pa nyis rim dang gsum rim las rtsig tu mi gnang ba'o/ /'das na ltung bar rig par bya'o/ /spel zhes bya ba ni 'ji ba dang / pha gu che chung dgon pa'i rnam grangs so/ /rtsa ba la sogs pa'i gtsug lag khang ngam so phag dang rdo las byas pa'am gtsug lag khang gi bdag pos myur du byos shig pa ni ltung ba med do/ /sa bon gyi tshogs kyi ltung ba'i bcu phung gnyis pa rdzogs so// //ma bskos par dge slong ma rnams la chos ston pa'i gleng gzhi ni mnyan du yod pa na ste/ de'i tshe dge slong gnas brtan rnams la bcom ldan 'das kyis dge slong ma rnams la res kyis lung ston cig ces bka' stsal pa dang / drug sde rnams kyis res mos la bab ste de dag cung zad cig lung bstan nas/ dge slong ma rnams la rtse 'dzin snyogs pa snyan du bdas nas slan chad drug sde bskor mi gnang ste/ ma bskos bzhin du rang dge slong ma rnams la 'chad nas slan chad gsol ba dang gnyis kyis skos shig ces 'byung ba dang / drug sde nyi tshe mtshams kyi phyi rol du gsol ba byas nas gcig la gcig bskos nas dge slong ma rnams la chos 'chad do/ /de yang ma gnang ba dang mtshams kyi nang du nad pa rnams la ni dad pa blangs gzhan ni brel ba'i nang du bcug ste/ dge slong ma rnams la chos 'chad pas nad phyin chad dge 'dun tshogs pas mtshams kyi nang du gsol ba dang las kyis dge slong ma'i ston par ma bskos par ston du mi gnang bar bcas pa dang / dge slong rnams kyis dge slong ma'i ston par dge slong mi mkhas mi gsal ba dag bskos pas bdag mi shes bdag ma dul bas na gzhan zhi bar bya ba'i gnas med pas na de nyid nyes pa'i dmigs su gyur nas bka' stsal pa/ chos lnga dang ldan par skos shig ces bka' stsal to/ /lnga gang zhe na/ tshul khrims dang ldan pa dang / mang du thos pa dang / gnas brtan rgyal po lta bu dang / grong khyer gyi skad shes pa dang / dge slong ma rnams la lus mi sprod cing sun mi 'byin pa'o/ /tshul khrims dang ldan pa ni phas pham pa ma byung ba'o/ /mang du thos pa ni so sor thar pa rgyas pa 'chad nus shing kha ton du shes pa'o/ / gnas brtan rgyal po lta bu ni bsnyen par rdzogs nas lo nyi shu lon pa'am de las 'das pa'o/ /grong khyer gyi skad shes zhes bya ba ni mi mang po'i skad shes pa'o/ /dge slong ma sun ma phyung ba ni lus kyis mi sprod pa yin te/ chos lnga po de dag dang ldan na ston par bsko'o/ /chos de lta bu dang ldan na ma gtogs zhes bya ba ni tshe dang ldan pa lam bstan bcom ldan 'das kyis rdul phyag go/ /zhe sdang gi rdul phyag go zhes chos tshig gnyis zla ba gsum gyi bar du bslabs kyang ma lobs pa las phyis bcom ldan 'das kyis lam bstan yongs su sbyangs nas dgra bcom pa mngon sum du byas so/ /lam bstan dge slong ma'i ston par bskos pas dge slong ma rnams bden pa la bkod do/ /'khor rnams kyang dgra bcom pa nas rgyun du zhugs pa yan chad du thob par byas pas na snga ma ni bcas pa'o/ /'di ni rjes su gnang ba'o/ /dge slong zhes bya ba ni drug sde ste gzhan yang de dang 'dra ba'o/ /ma bskos zhes bya ba ni dge 'dun gyis gsol ba dang zhu ba'i las kyis ma bskos pa'o/ /dge slong ma zhes bya ba ni chos 'di la zhugs pa'o/ /'doms zhes bya ba ni lhag pa'i tshul khrims dang lhag pa'i ting nge 'dzin dang lhag pa'i shes rab kyis chos ston pa'o/ /chos de lta bu ma gtogs zhes bya ba ni bden pa mthong zhing 'bras bu yod par bstan pa ni lam bstan lta bu ste ma bskos kyang gnang ba'o/ /stung ba ni snga ma bzhin no/ /nyes pa ni gang zhe na dge slong dge 'dun gyi mtshams kyi phyi rol du bskos kyi mtshams kyi nang du ma bskos na dge 'dun la nyes byas su 'gyur ro/ /ston pa ni ltung bar 'gyur ro/ /mtshams la ji lta ba bzhin du dge 'dun ma tshogs pa dang gang zag yon tan lnga dang mi ldan pa bskos nas gang zag la ni rnam pa lnga po re re dang mi ldan par bskos na ltung ba re rer 'gyur ro/ /dge 'dun la ni re re zhing yang nyes byas su 'gyur ro/ /nyi ma nub kyi bar du chos 'chad du mi gnang ba ni mnyan du yod pa na ste/ sngon chad dge slong ma rnams la chos ston pa ni bcom ldan 'das nyid kyis 'chad do/ /phyis ni dge slong gnas brtan dag la dge slong ma dag la chos ston cig ces bka' stsal to/ /tshe dang ldan pa dga' byed la chos 'chad pa'i res la bab nas chos shod cig ces bsgo na/ bcom ldan 'das zhal bzhugs so zhes nas ma btub bo/ /bcom ldan 'das kyis zhal gyi sgo nas dge slong ma rnams la chos 'chad du bcug pa dang / dge slong ma ut+pa la'i mdog chos mkhas pas slar dri ba mang ste nam sros nas slar 'khor ba dang / lha khang gi sgo bcad de ma thar nas mnyan du yod pa dang mi ring ba zhig na kun dga' ra ba zhig yod de mtshan mo phyi rol gyi shing khung der dge slong ma gnas shing 'khod pa dang rkun po lnga brgyas kyang glags bltas pa dge slong ma ut+pa la'i mdog gis brtags te tshor nas 'phags skyes po'i dmag tu sprul pa dang / g.yon can rnams kyis skabs ma rnyed de slar dong ngo / /phyi de nyin par nang du song ba dang / mu stegs can la sogs pa dag dge slong ma rnams chos dge ba dang mi dge ba 'dren mar spyod de/ 'phyon ma la dong dong ngo / /zhes 'phya ba las snyan du bdas nas nyi ma nub kyi bar du dge slong ma rnams la ston du mi gnang bar bslab pa bcas so/ /dge slong zhes bya ba ni tshe dang ldan pa dga' byed do/ / dge 'dun gyi bskos zhes bya ba ni gsol ba dang las kyis dge slong ma'i ston par bskos pa'o/ /nyi ma nub ces bya ba ni de ltar bskos kyang nyi ma nub kyi bar du ston na ltung bar 'gyur ro/ /dge slong ma la 'doms zhes bya ba ni bslab pa gsum bshad pa'o/ /ltung ba ni snga ma bzhin no/ / nyi ma nub pa ni nyi ma nub par 'du shes sam the tshom za bzhin du 'chad na ltung bar 'gyur ro/ /nyi ma nub pa la ma nub par 'du shes sam the tshom za na smad de nyes byas su 'gyur ro/ /mtshan thog thag chos ston tam gtsug lag khang gi sgo drung na 'dug gam grong khyer gyi dbus na 'dug ste/ sgom bcad pa la nyes pa med do/ /kha zas cung zad tsam gyi phyir dge slong ma rnams la ston to zhes smrar mi gnang ba'i gleng gzhi ni mnyan du yod pa na ste/ bcom ldan 'das kyis tshe dang ldan pa dga' byed la khyod kyis dge slong ma rnams la chos shod cig ces bka' stsal nas gau ta ma'i skye dgu'i bdag mo 'khor lnga brgya dang bcas pa dga' byed las chos mnyan pa dang / de nas dga' byed kyis chos zab pa'i tshig dang yi ge rnams kyis chos bshad de/ bud med ni yong gis kyang shes rab chung bas khong du ma chud kyang slar 'dri ma [(]sbobs [,]spobs [)]so/ /de nas skye dgu'i bdag mo bcom ldan 'das kyi gan du song nas phyag 'tshal na bkas rmas pa dang bdag cag ma 'dris pas na 'dri ma spobs te/ chos bshad pa khong du ma chud do zhes gsol pa dang / 'dris par bya ba'i phyir mtshan mar zas sam rdzas cung zad byin cig ces bka' stsal nas tshe dang ldan pa dga' byed kyi gan du skye dgu'i bdag mos dge slong ma zhig 'o thug skyel du btang ba dang / dze ta'i tshal gtsug lag khang gi sgo na tshe dang ldan pa bsnyen dga' bo 'chag cing 'dug pa mthong nas ci yin zhes dris na 'o thug yin te/ tshe dang ldan pa dga' byed la 'bul lo zhes byas pa dang / bsnyen dga' bo na re tshe dang ldan pa dga' byed ni zas cung zad tsam gyi phyir dge slong ma la chos ston to zhes smras pa dang / don nyung ba'i dge slong rnams 'phya ba las snyan du bdas nas/ de skad smrar mi gnang bar 'dul ba la bslab pa'i gnas bcas so/ /yang dge slong zhes bya ba ni bsten dga' bo ste gzhan yang de dang 'dra ba'o/ /kha zas cung zad tsam gyi phyir zhes bya ba ni bza' ba lnga dang bca' ba lnga ste gang yang rung ba'o/ /bshad ces bya ba ni lhag pa'i tshul khrims dang lhag pa'i shes rab la bya'o/ /ltung zhes bya ba ni snga ma bzhin no/ /nyes pa ni dge slong rnams la kha zas cung zad tsam gyi phyir dge slong ma rnams la chos ston to zhes zer na thams cad du ltung bar 'gyur ro/ /kha zas cung zad kyi dbang du byas te bshad pa bden na smras kyang nyes pa med do/ /gnyen ma yin pa'i dge slong ma la chos gos sbyin du mi gnang ba'i gleng gzhi ni mnyen du yod pa na ste/ de'i tshe khyim bdag rgan rgon khyo shug gnyis shig nor phyugs dang ldan zhing longs spyod dag che ba las phyis longs spyod dang nor phyugs dag kyang 'grib par gyur nas khyo shug gnyi ga yang legs par gsungs pa'i chos 'dul ba la rab tu byung ngo / /khyim bdag ni yo byad dag dang ldan te 'byor par gyur/ chung ma dge slong ma ni chos gos dang yo byad dang mi ldan te chos gos kyang med do/ / dge slong ma des kyang bdag ni rnyed pa chung ste chos gos kyang med do zhes smras pa dang / dge slong des kyang chos gos sbyar ma dmar ser zhig dge slong ma de la byin nas/ de'i 'og tu de bzhin gshegs pa 'khor rnams dang yul rgyu zhing gshegs pa'i tshe 'khor gyi nyan thos rnams la slar gzigs nas dge slong de stod g.yogs dang smad g.yogs nyi tshe dang 'ong bar gzigs nas ci 'di'i dbyar 'di na gnas pa'i tshe dge slong rnams rnyed pa med dam zhes rmas pa dang / btsun pa mchis so/ /zhes kun dga' bos gsol te/ 'o na ci'i phyir dge slong 'di gos sbyar ma med/ dge slong ma sngon gyi chung ma rnyid pa la stsal to zhes byas pa dang / ci gnyen ma yin pa'i dge slong ma la byin zhing phas kyang len tam/ stsal zhing len to zhes gsol ba dang / gnyen ma yin pa'i dge slong ma la sbyin du ma gnang bar 'dul ba la bslab pa bcas so/ /yang dge slong gang zhes bya ba ni chos 'di la zhugs pa ste/ rgan zhugs so/ /gnyen zhes bya ba ni pha ma'i zung bdun rgyud tshun chad do/ /dge slong ma ni chos 'di la zhugs pa'o/ /gos ni rgyu rnam bdun no/ /sbyin zhes bya ba ni gtan du byin pa'o/ /ltung ba ni snga ma bzhin no/ /nyes pa ni gnyen ma yin pa la ma yin par 'du shes dang the tshom na ltung bar 'gyur ro/ /yin pa la ma yin par 'du shes dang / the tshom na nyes byas su 'gyur ro/ /gos rkun pos khyer ba dang bsnyen par rdzogs pa na byin pa na rin 'og tu byin pa dang / chos legs par bshad pa la byin pa dang / dge slong ma'i dge 'dun la spyir byin pa la ltung ba med do/ /gnyen ma yin pa'i chos gos byed du mi gnang ba'i gleng gzhi ni mnyan du yod pa na ste/ de'i tshe na dge slong ma sbed ma zhes bya ba chos gos lnga char ngan te ras shig btsal te rnyed pa dang / btsun pa 'char ba la drub tu bcol ba dang / 'char bas bsams pa ma drubs na ni mo yang gos kyang med dge ba'i bar chad du yang gyur pa'i steng du kha zer/ drubs na ni slan chad kyang bcu bdun sde dang kun 'chol zhing 'ong gis thabs shig bya'o snyam nas/ slad kyis drug sde rnams kyang 'ongs te/ gos kyi dkyil du tshon sna lnga'i skud pas sngon 'char ba dang sbed ma gnyis gcig gi mgul nas gcig 'khyud cing 'dug pa drubs nas blta ba bzhin du dge slong ma rnams la bskur ro/ /slad kyis dge slong ma dag gis bltas na de ltar 'dug pa mthong nas/ a la la phu nu mo zhes gad mos btab nas 'char ba sbed ma gnyis ring zhig lon na dag dod phrad do zhes skye dgu'i bdag mo la byas pa dang / drug sde rnams ni rang bzhin gyis gnas ngan len spyod pas 'di 'dra'o zhes 'phya ba snyan du bdas nas rnam grangs du ma'i sgo nas smad de bslab pa bcas so/ /dge slong zhes bya ba ni 'char ba ste/ gzhan yang dge slong ma zhes bya ba dang / gos dang bal zhes bya ba ni gong ma bzhin no/ /byed ces bya ba ni drub pa'o/ /gnyen ma yin pa la 'du shes dang the tshom bzhin du byas na ltung ba re rer 'gyur ro/ /gnyen ma yin pa la ma yin par 'du shes dang the tshom na yang nyes byas re rer 'gyur ro/ /dge slong ma'i 'gron mang po dang 'grogs shing lam du 'gror mi gnang ba'i gleng gzhi ni mnyan du yod pa na ste/ de'i tshe dge slong drug sde po rnams kyis bsams pa don nyung ba'i dge slong rnams ni 'gro ba dang 'ong ba na yang rnyed pa mang du rnyed cing 'ong na bdag cag ni khron pa'i sbal bu bzhin du gar yang ma phyin cing rnyed pa nyung na bdag cag rnyed pa sgrub cing ljongs rgyur 'dong na bdag cag gi sring mo bcu gnyis sde yang de bzhin du byas pa dang / khyed dong na ni bdag gi yul dang gtsug lag khang dang chos ston pa yang med do zhes ngus nas/ 'o na che zhe khyed cag kyang 'dong ngo zhes byas pa dang / de ltar mi gnang ba snyam mo zhes smras na/ drug sde pos nam gang du ji skad du ma gnang zhes nas 'thams te/ drug sde po'i brgyags dang g.yar sus sbyor du bcug nas brgyags snga ma ni g.yar sus dang dro zan du zad par byas te song nas/ phos mos rgan gzhon spel te dong ba dang / skye bo rnams 'di ni 'di'i chung ma 'di ni 'di'i khyo'o zhes gzhan gyis dpyas na de dag na re de bzhin no zhes nas de dag gi zla la dge slong rgan zhugs shig song ba yang de dag ma rangs nas phyir log par dge slong de dag la de lta bu'i gtam byas pa dang / snyan du bdas te dge slong ma'i 'gron pa dang 'gror mi gnang bar bslab pa bcas so/ /dus la bab pa ma gtogs zhes bya ba ni dge slong ma gcig mnyan du yod par 'gro ba na grogs med de dge slong rnams la bsdad na dge slong dag kyang 'grogs su ma btub nas dge slong ma rnams bcom pa dang de lta bu'i rkyen ni rjes su gnang ngo / /des na rkyen byung ba dus yin no zhes gsungs so/ /dge slong zhes bya ba ni drug sde ste gzhan yang de dang 'dra ba'o/ /'gron pa mang po 'dong ba'i lam zhes bya ba ni der mi nyung na 'gro bar mi nus pa'o/ /'jigs zhes bya ba ni rkun po dang g.yon can dang stag gzig la sogs pas 'jigs pa'o/ /nyam nga ba ni sbrang bu chu rings dang / srin bu dang nyi ma tsha ba'o/ /nyes pa ni dge slong ma'i 'gron pa mang po dang lhan cig tu 'jug cing 'gro na rgyang grags phyed phyed cing ni nyes byas re rer 'gyur ro/ /rgyang grags re re zhing ni ltung ba yang re rer 'gyur ro/ /'phags pa'i lam yan lag brgyad du 'jug pa la nyes pa med do/ /dge slong ma'i 'gron pa dang grur zhugs te chu 'byam du 'gror mi gnang ba'i gleng gzhi ni mnyan du yod pa na ste/ drug sde dang dge slong ma bcu gnyis sde rnams te bcas pa snga ma bzhin du rgyas par sbyor cig /bye brag ni sngar lam du 'gro zhing 'gror mi gnang ba dang / phyis chu 'byam du dong ba dang / skye bo rnams 'phya ba dang / dge slong bsod snyoms pas dge slong rnams la bsnyad nas snyan du bdas nas/ dge slong ma dang lhan cig gru'i nang du zhugs nas 'dong mi gnang bar bslab pa bcas so/ /thad kar 'gro ba ma gtogs zhes bya ba ni mnyan du yod pa na khyim bdag gcig gis chu'i pha rol du gtsug lag khang zhig brtsigs nas dge 'dun sde gnyis bshos la spyan drangs pa dang / gru gcig gi nang du lhan cig 'gror mi gnang bas snga phyir dod pas gdugs tshod yol te kha cig zan gyi bar chad du gyur nas thad kar pha rol du 'gror gnang ngo zhes rjes su gnang ngo / /dge slong zhes bya ba dang dge slong ma ni snga ma bzhin no/ /gru gcig gi nang du zhes bya ba ni sho gam dang bsel gla dang gru btsas gcig pa'o/ /chu 'byam du thur du 'gro ba dang gyen du 'gro ba dang phar thad kar 'gro ba ni dngos su zad do/ /chu 'byam du dong na rgyang grags phyed phyed cing nyes byas su 'gyur ro/ /rgyang grags re re zhing ltung bar 'gyur ro/ /dgon pa dang grong du 'gro na yang gong ma bzhin du sbyar ro/ /chu 'gyur ba las 'byol lam/ rab mi bde ba las 'byol ba'am/ /skya ba dang gdos pa chag pa'am/ mnyen pa nyan du ma btub pa'am/ /chu 'gram pha rol tshu rol na bar chad brgyad la sogs pa yod pa ni chu 'byam du song yang nyes pa med do/ /sa dben pa na dge slong bud med dang 'dug tu mi gnang ba'i gleng gzhi ni mnyan du yod pa na ste/ de'i tshe na 'char ba snga dro sham thabs dang chos gos gyon te lhung bzed thogs nas grong du bsod snyoms blangs te/ chung ma rnying pa sbed ma'i khyim du phyin te der stan bting ba la 'dug nas sngon ji ltar bsnyen pa dang / sbyar ba dran zhing gtam byed cing sa dben pa na stan la 'khod pa dge slong gzhan zhig der bsod snyoms la phyin pa de gnyis 'khod pa mthong nas sbed mas kyang de la zan byin te/ slar lha khang du song ba dang / phyis 'char ba lha khang du 'ongs na bsod snyoms pa dang phrad pa dang khyod kyi sbed mas nga la bsod snyoms bzang du byin no zhes byas na 'char bas de ni ngas byin du bcug go/ /'o na khyod gnyis po de ltar 'khod du dbang ngam zhes byas pa dang / de ni dbang yang rung mi dbang yang rung ste ngas ni 'dug pa bden zhes byas pa dang / dge slong dag ma dad de 'phya ba las snyan du bdas nas rnam grangs du mas smad de slan chad bud med dang lhan cig tu dben pa na 'dug tu mi gnang bar bslab pa bcas so/ /yang dge slong zhes bya ba ni 'char ba ste/ gzhan yang de dang 'dra ba'o/ /bud med ces bya ba ni mi tshangs par spyad pa'i chos bzod pa'o/ /dben pa zhes bya ba ni skyes pa dang bud med gzhan med pa'o/ /stan gcig ces bya ba ni 'dom gang tshun chad do/ /skyabs yod pa zhes bya ba ni sab ma dang rtsig pa dang yel ba la sogs pas bskyabs pa'o/ /skyabs med pa na 'dug pa ni ltung ba med pa'o/ /sa dben pa na dge slong dge slong ma dang 'greng du mi gnang ba'i gleng gzhi ni mnyan du yod pa na ste/ khyim bdag gi chung ma sbed ma rab tu byung nas dge slong ma rnams kyis gtsug lag khang skyong du bskos pa na/ dge slong ma gzhan ni grong du khyim bdag gis mgron du bos te song ba'i tshe na/ sbed ma 'ba' zhig lha khang nas phyag cing 'dug pa'i gan du tshe dang ldan pa 'char ba 'ongs nas khong gnyis sngon ji ltar rtse zhing dga' ba dang / bag mar 'ongs pa'i tshe yan chad gyi gtam 'dzer cing 'greng 'greng nas phyis mo na re 'phags pa dag ni bzhud ran no/ /dge slong ma dag kyang 'ong du nye/ bdag kyang phyag dar bgyi'o/ /de nas song ba'i 'og tu dge slong ma dag lhags nas khyod ci nyes te phyag dar ma byas zhes byas na/ deng ni phyags ma thabs cig kyang sa la ma bzhag go/ /zhes sbed mas smras pa dang / de gnyis gtam zer ba'i drung na nad pa gcig 'dug pas gtam ci zer ba kun thos pas/ de na re de yang mo zer ba bden mod kyi de'ang 'phags pa 'char ba dang gtam sha stag zer zhing 'greng 'greng ngo zhes byas pa las/ dge slong ma rnams 'phya bar gyur pa dge slong rnams kyis thos nas snyan du bdas te/ 'char ba la rmas nas rnam grangs du ma'i sgo nas smad de/ 'dul ba la 'greng du mi gnang bar bslab pa bcas so/ /gzhan ni gong na 'dug pa bzhin du sbyar ro/ /bye brag ni lhan cig tu 'dom gang tshun chad 'greng na ltung bar 'gyur ro/ /dge slong mas ngos mgron sbyor du bcug pa'i zas zar mi gnang ba ni mnyan du yod pa na ste/ de'i tshe mu ge byung nas dge slong rnams so so'i gnyen dang yon bdag tshol cig ces bka' stsal nas/ dge slong gnas brtan dag ni bram ze dang khyim bdag dad pa can dag gis bshos sbyar ro/ /tshe dang ldan pa drug sde po rnams ni yon bdag med de/ bcu gnyis sde'i der bsod snyoms la song ngo / /de rnams kyis 'phags pa zhal sus gsol cig ces byas na/ deng khyed cag gis kyang byin sang sbyin pa med pas de bzhin du tshol ni mi gnang sring mo bram ze dang khyim bdag dad pa rnams dge slong gnas brtan dag la 'tsho ba sbyin pa dag yong na de dag bdag cag gi yon bdag tu sgyur cig ces byas pa dang / de ltar bsgyur du dbang ngam zhes byas pa dang / gang du ma gnang sas ma gnang zhes byas pa dang / dge slong m a sbom dga' mos nang par mnyan du yod par bsod snyoms la zhugs pa na cang shes kauN+Di n+ya la sogs pa gnas brtan dag gi yon bdag rnams la khyod kyis shAkya'i rigs las rab tu byung ba'i rigs pa dang grol ba'i spobs pa can sde snod gsum gyi chos smra ba rnams la 'tsho ba sbyin na ci nyes zhes byas pa dang / de lta bu su yin zhes smras na 'phags pa dga' bo la sogs pa drug sde po rnams so zhes byas nas de nas der yang blangs so/ /gnas brtan gzhan gyi yon bdag rnams yang bslangs pas drug sde rnams rnyed pa mang zhing mchan sgye'u gang zhing slar song ba dang / de nas gzhan dag gis de snyed ga la rnyed ces dris na/ dge slong ma sbom dga' mo la sogs pa de dag gis de ltar byas te/ sring mo de dag gi bka' drin no zhes 'dzer ba dang / gzhan gyis de lta bu slong du dbang ngam zhes byas pa dang / cis mi dbang ngo zhes nged ltogs te 'khod dam zhes smras pa dang / dge slong rnams 'phya ste snyan du bdas nas/ slan chad dge slong mas sbyor du bcug pa zar mi gnang bar bslab pa bcas so/ /sngar sbyor du ma bcug pa ma gtogs zhes bya ba ni mnyan du yod pa na khyim bdag cig yod de/ de'i las ni zhing rmed cing tshong byed do/ /des dgon pa'i gnas shig tu zhing zhig rmos te tshong la song ngo / /der slar 'khor te zhing legs sam ma legs byul ba dang zhing de'i drung na dge slong bsod snyoms pa zhig spyil bo byas te gnas shing 'dug pas zhing de yang sngon dang mi 'dra bar nas dang ldan par gyur to/ /zhing bdag des kyang bdag gi zhing legs pa ni dge slong de'i yin no snyam nas/ khyim du zan la mgron du gnyer to/ /de'i phyi de nyin mo dge slong ma sbom dga' mo yang khyim der bsod snyoms bslangs pa dang / khyim bdag des dge slong bsod snyoms pa zhig der spyan drangs te/ de zan chad par ma gyur grang zhes byas pa dang / dge slong ma de na re bsod snyoms pa de ngas bos te 'ong na nga la sbyin nam zhes smras pa dang / gsol lo zhes nas dge slong ma de yang lam du bsgugs pa dang / bsod snyoms pa dang phrad de/ 'phags pa khyim bdag 'dis mgron du gnyer ba ni khyod kyi yon tan bdag gis bsngags pas so/ /zhes byas pa dang / ci nga'i yon tan khyod kyis sbrogs shig ces ngas bsgo'am zhes bdag ni ma zos kyang bla'i ltung ba dang bsngo ni mi phod ces slar song ngo / /de ltar gyur pa snyan du gsol nas/ de ni sngar bos pa ma gtogs so zhes rjes su gnang ngo / /dge slong zhes bya ba ni drug sde ste gzhan yang de dang 'dra ba'o/ /dge slong ma zhes bya ba ni chos 'di la zhugs pa'o/ /zas sbyor du bcug ces bya ba ni rnam pa gnyis te/ tshul khrims dang thos pa'i sgo nas sbyor du bcug pa'o/ /zas zhes bya ba ni bca' ba lnga dang bza' ba lnga'o/ /zos zhes bya ba ni mgrin par ming pa'o/ /nyes pa gang zhe na/ dge slong mang po khyim du 'bod pa las dge slong ma zhig der 'ongs nas khyod kyis dge slong 'di la ci sbyin zhes byas pa dang / 'bras brngos pa'i phye sbyin no zhes byas pa dang de ltar ma yin gyi de dag la nas brngos pa'i phye byin cig ce'am/ dge slong 'di ni rgyun du zhugs pa yin gyi de dag la ra'i mar ma sbyin par 'bri'am/ ba'i mar byin cig ces byas te zos na thams cad du ltung bar 'gyur ro/ /dge slong ma'i tshogs te bcu phung gsum pa rdzogs so/ / //yang yang zar mi gnang ba'i gleng gzhi ni yul yangs pa can na ste/ khyim bdag drag shul can gyis dge 'dun rnams khyim du bshos la spyan drangs pa na/ bcom ldan 'das ni bslab pa bca' bar bzhed pa'i phyir gshegs su ma gnang ngo / /de nas/ drug sde po rnams dge slong rgan zhugs shig dang 'grogs te/ lam du nye bar 'gro ba'i grong na shing a smra'i khu ba mang du zos te dong ba dang / slad kyis khyim bdag drag shul can gyi der phyin te/ yon bdag gis khur ba brims pa dang / drug sde rnams khur ba mi za bar 'khod do/ / dge slong rgan zhugs de gral gyi tha ma na 'dug pa'i gam du khur ba 'drim pa'i mi rnams phyin te 'greng du sdod pa dang rgan zhugs kye rmi lam na bdag gis khur ba zos par shes pas mi 'drim gyis khong gis ma rmas pa snga nas bdag gis bsu ste bya'o snyam nas khyim bdag bdag 'ba' zhig gis khur ba zos pa ma yin gyi/ dge slong drug sde rnams kyis kyang zos so zhes byas pa dang / de dag na re nga'i khyim na a mra'i khur ba med snyam du dogs sam zhes khros so/ /de nas dge slong rnams zas zos zin nas phyir 'khor ba dang / dge slong rnams tshim par gyur tam/ bde bar gsol tam zhes bkas rmas pa dang / bshos tshal ni bzang na khyim bdag ni 'di lta bu'i phyir 'khrugs so/ /zhes gsol pa dang / khyim bdag ni yus te rigs par khros so zhes bka' stsal nas drug sde rnams la rmas pa/ rnam pa du mas smad de yang yang zar mi gnang bar 'dul ba la bslab pa'i gnas bcas so/ /na ba dus ma gtogs zhes bya ba ni dge slong gcig cig nad kyis btab ste nyam chung nas sman pa la dris pas zhal sus zo shig dang sos par 'gyur ro/ /zhes nas snyan du bdas te/ na ba dus ni der rjes su gnang ngo / /na ba dus zhes bya ba ni dge slong zas gcig gis 'tsho bar mi nus pa'o/ /las dus ni dge slong gcig cig gtsug lag khang chag chag dang dkyil 'khor dang dri gtsang khang phyag dar byas nas ngal te nyal zhing 'dug pa dang de la gzhan dag gis 'phags pa ci'i slad du 'phres shing gzims/ bdag ni las ches te nyam chung zhing nyal zhing 'dug go/ / 'phags pa 'o na zhal sus gsol cig ces pa dang / snyan du bdas nas las dus zhes rjes su gnang ngo / /las dus ni dge 'dun gyi 'am mchod rten gyi yang rung ste las byas pa dang / tha na re lde tsam gyi sa phyags pa'am ba'i gnas mal tsam gyi skyang nul dkyil 'khor byas pa'o/ /de la lam dus ni dge slong zhig lam du zhugs pa las lam gyis ngal te 'gro ma nus pa las snyan du bdas te zhal sus zar gnang ste lam gyi tshad ni dpag tshad gcig tu song ba dang / dpag tshad phyed nas slar log pa'o/ /gos byin pa dus zhes bya ba ni mnyan du yod pa na khyim bdag cig gis dge slong rnams bshos dang gos phrugs re re gsol gyis spyon cig ces spyan drangs pa las bdag cag zas gnyis za ba spangs so zhes ma btub pa las/ bdag cag gis zas dang gos kyis bstabs kyang 'ong du ma btub ces 'phya ba las gos dus so zhes rjes su gnang ste gos ni ras dang ras chen rnyed pa'o/ /nyes pa ni gos dang ldan pa'i khyim gnyis shig tu mgron du bos pa las gnyis ka zos na yang ltung ba med do/ /sngar gos yod par bos la phyis gos med pa zhig tu bos na snga ma ni nyes pa med do/ /phyi ma ni gzhan la sbyin par bya/ ma byin te bdag kyang ma zos na ltung ba med do/ /gos dang gos rin du byas pa zhig tu bos pa ni ltung ba med do/ /sngar gos med par bos la phyis gos yod par bos na ltung ba med do/ /gnas thun mong bar dge slong zhag lon par 'dug tu mi gnang ba'i gleng gzhi ni mnyan du yod pa na ste/ khyim bdag cig gis phyogs bzhi'i dge 'dun dang phyi'i mu stegs pa'i dge sbyong dang bram ze la sogs pa spyir gnas thun mong ba zhig brtsigs te/ gtsug lag khang der mu stegs pa'i dge sbyong gcer bu pa drug cu bos nas 'tsho ba dang yo byad sbyar te der bkod pa na/ khyim bdag de'i shag po yang chos la dad pa zhig pas gtsug lag khang de'i dge slong rnams la phyag 'tshal du song song ba dang / de na gnas pa dge 'dun ni ma yin gyi/ mu stegs pa sha stag nas/ e ma'o sa bon re bzang na zhing re ngan/ ba tsha'i sa sdig pa'i sa ngan pa'o/ /'o na zhing bzang ga la yod/ bcom ldan 'das kyi nyan thos kyi dge 'dun te mnyan du yod pa na'o/ /de nas yon bdag des yang drug sde rnams spyan drangs nas yo byad kyis mi brel bar sbyar te/ chung ma la zhal ta gyis shig ces bsgo nas khyim bdag de yang don gzhan zhig gi phyir ri brags kyi grong du song ba'i 'og tu chung mas zan 'dri ma pa'i tshe drug sde rnams bud med kyi yan lag nas smos shing 'phya'o/ /de nas khyim bdag phyir 'ongs pa la chung mas byas na yid ma ches pas khyim bdag nyid gud du 'gro ba ltar byas te bgom na bden par gyur te/ khyim bdag gis kyang drug sde rnams bskrad pa'i thabs shig bya'o snyam nas nyi ma re re zhing khur ba re re phri nas gcer bu pa gcig gnas shing gcer bu pa gzhan rnams gud du dong ba la/ yon bdag drug sde la ma dad pa skad du ma sbran nas/ gcer bu pa drug cu slar lhags te drug sde brdegs so/ /de dag kyang ma snad nas gcer bu pa ngal zhing 'khod pa la drug sde gcig gis kyang mi bcu bcu ste drug sde pos ma shi tsam du brdegs so/ /de nas drug sde po yang mnyan du yod par phyir 'ongs nas de'i tshe tshe dang ldan pa/ shA ri'i bus byang phyogs nas rgol du 'ongs pa'i mu stegs can grangs med pa btul nas bden pa la bkod do/ /dge slong rnams kyi sa drug sde rnams la tshe dang ldan pa shA ri'i bus sems can gyi don 'di lta bu byas so zhes byas pa dang / drug sde rnams kyis de ni ngo mtshar ci che nged kyis kyang da bar gcer bu pa drug cu la dbyig pas chos bshad do/ zhes byas pa dang / gzhan 'phya ba las snyan du bdas te/ gnas thun mong bar zan za ba gcig las zar mi gnang bar bcas so/ /na ba ma gtogs zhes bya ba ni yul de nyid du gtsug lag khang snga mar te/ der tshe dang ldan pa shA ri'i bu chos 'chad par 'bod pa'i rigs par grogs po dad pa des bstan nas shA ri'i bu der bos te/ der chos bshad pas na skye bo rnams kyang dad par gyur te/ tshe dang ldan pa shA ri'i bu yang rlung zhugs te nad kyis btab nas/ gnas de nyid du bzhugs su gsol na ma gnang ste dong ba las mnyan du yod par phyin te skye bo mang pos shA ri'i bu'i slob ma la bde bar 'ongs sam zhes smras na/ sems can mang po'i don byas pa ni bde na mkhan po nad kyis btab pa ni mi bde'o zhes byas pa dang / snyan du bdas te/ na ba dus te na ba la pus 'khyud 'chang ba'ang rjes su gnang ngo / /gnas thun mong du zhag lon te zhes bya ba ni gcer bu pa ni nyan thos kyi gnas su'o/ /dge slong zhes bya ba ni drug sde ste gzhan yang ngo / /min zhes bya ba ni shA ri'i bu las dgongs te gnang ba'o/ /zan gcig zo zhig ces bya ba ni de las lhag par zos na ltung bar 'gyur ro/ /nyes pa ni gnas de na gnas pa'i tshe ni nyes byas so/ /lhag par zan zos na ltung ba'o/ /de na gnas shing gud du zan gnas pa la nyes byas so/ /zos na ltung bar 'gyur ro/ /gud du gnas shing gud du za ba ni nyes pa med do/ /gud du gnas shing der za na gnas pa la nyes pa med do/ /der za na ltung bar 'gyur ro/ /mang po'i dang gnyen gyi dang / yon bdag na re 'dug shig ce na ltung ba med do/ /phye la sogs pa lhung bzed gang ba gnyis gsum las len du mi gnang ba'i gleng gzhi ni mnyan du yod pa na ste/ byang phyogs nas tshong pa lhags pa drug sde rnams kyis thos nas de dag la drug sdes gos dang zas dag bslangs te tshod ma zin pa las tshong pa dag brgyags chad de nyes pa'i dmigs su gyur pa dang / phyis mnyan du yod pa na khyim bdag gcig cig gnas pa des chung ma snga phyir lan bdun gyi bar du blangs na yang kun dus las 'das nas slad kyis chung ma dag blangs na su yang mi ster cing 'dug pa dar khyim bdag gzhan zhig gi bu mo mig g.yas pa zhar ma zhig yod de/ de su la byin yang mi 'dod pa de chung ma shi ba'i mi de la sbyin par khyim mtshes rgan mo zhig 'dug pas smyan byas nas blang bar dus byas so/ /de'i grogs po zhig gis bu mo g.yas zhar mo de ci rung len pa'i mi rigs kyi/ gud na yugs sa mo zhig yod de/ de blang gis snga ma thong shig ces nas snga ma btang ba'i klan ka tshol ba'i bar du bag ma blang ba'i dus la bab ste zhag grangs tshang nas/ bu mo'i pha ma yang bu mo gtong ba'i bshos tshal dag shom zhing sbyor ba dang tshe dang ldan pa drug sde rnams lhags te/ che zhe bag mar 'gro ba'i zan ded la byin cig ce nas tshod ma zin te/ phye dang khur ba mang du blangs so/ /de'i rjes la dge slong ma bcu gnyis sdes kyang bslangs pas ston mo'i rgyu zad de/ de dag gis mag pa la bshol bas dus byas na byin na ni snga ma'i dus bzhin du byin cig /de yang klan ka'i skabs rnyed de/ bu mo btang nas yugs sa mo blangs so/ /de nas bu mo g.yas zhar mo yang su la byin yang ma 'dod do/ /de ltar gyur pa khyim mtshes rnams 'phya ste/ bu mo sus kyang mi 'dod pa las bag mar btang bar byas pa las/ drug sdes bar chad byas so zhes 'phya ba las snyan du bdas nas dge sbyong gi bya ba ma yin no zhes bkas smad de/ slan chad khyim bdag dang pas bstabs kyang lhung bzed gsum las len du mi gnang bar bcas so/ /dge slong zhes bya ba ni drug sde ste gzhan yang de dang 'dra ba'o/ /mang po zhes bya ba ni gnyis yan chad la bya'o/ /grong zhes bya ba ni bram ze dang khyim bdag rnams kyi khyim mo/ /dang bzhes bya ba ni dkon mchog gsum la mngon sum du phyogs pa'o/ /dus kyis bdar te 'dod ces bya ba ni dgos par gyur pa'o/ /lhung bzed gsum long shig ces bya ba ni rab 'bring gsum ste chen po ni yul mnyam ka'i 'bras skam drug phul do'i chan dang tshod mar shong zhing kha ra na la mtheb mo'i ngos gang ma thug pa'o/ /chung ngu ni yul mnyam ka'i 'bras drug phul gang gi chan dang tshod mar shong ba'o/ /bar ma ni de gnyis kyi bar ma la bya'o/ /dge slong phyi rol kun dga' ra bar deng la dge slong 'khod pa la gos shig ces bya ba'i snga ma gzhi na 'khod pa rnams la'o/ /nyes pa ni gsum char lhung bzed chen pos blangs nas dge slong ma'i tshe na nyes byas blangs na ltung bar 'gyur ro/ /gnyis chen po gcig chung ngus blangs na yang ngo / /gnyis chen po gcig ni 'bring dang yang ngo / /gnyis ni 'bring po gcig ni chen pos na yang ngo / /dge slong gis 'bras skam drug phul phyed dang lnga'i chan las cung zad cig lhag par blangs na thams cad du ltung bar 'gyur ro/ /zas spangs pa las lhag mar byas pa'i bza' ba dang bca' ba zar mi gnang ba'i gleng gzhi ni mnyan du yod pa na ste/ de na bcom ldan 'das kyis 'khor gyi dge slong rnams la stan gcig par za ba ni bya ba nyung gnod pa nyung / bde ba la reg par gnas shing yon tan gyi tshogs kyang rig gis dge slong khyed rnams kyang stan gcig par zo shig ces bka' stsal nas/ dge slong dag stan gcig par zan za ba'i tshe slob dpon dang mkhan po dang bla ma dag rgyu ba la langs shing phyag byas pas na zas spang bar gyur to snyam nas ma zos pas nyam chung zhing ring pas ma brtas par gyur te/ snyan du bdas nas ma ldang shig ces bka' stsal pa dang / yang zas phyi ma 'drin pa'i tshe chog ces spangs pas snga ma yang spangs par 'gyur ro snyam nas ma zos pas nyam chung zhing rid par gyur nas yang bka' stsal pa/ phyi ma spangs kyang snga ma spangs par mi 'gyur gyi ci tsam 'dod kyi bar du zo zhig ces bka' stsal pa dang / drug sde rnams spangs kyang rung ma spangs kyang 'dres par za bas na snyan du bdas nas/ dge slong gi bya ba ma yin zhes smad de/ spangs pa'i zas za na ltung bar 'gyur ro/ /zhes 'dul ba la bslab pa bcas so/ /lhag mar gnang ba ni phyis khyim bdag cig gis dge slong dag mgron du bos na/ dge slong nad pa mang ste/ nad pa rnams kyi zan bring brang du mnos pa dang / za ma nus pa'i lhag ma rnams sa la bor ba dang / bya khyis thu ba'i sgra tsa tsi thos pa snyan gyis gsan nas yon bdag dad pas byin pa'i zas chud mi za bar bya ba'i phyir lhag mar bya ba'i cho ga gnang ngo / /yang dge slong zhes bya ba ni drug sde ste gzhan yang de dang 'dra ba'o/ /zas zhes bya ba ni bza' ba lnga dang bca' ba lnga'o/ /bca' ba lnga ni spang bar bya ba med do/ /rtsa ba dang sdong po dang lo ma dang / me tog dang 'bras bu dang / bza' bar bya ba lnga la spang bar bya ba yod de/ /gang zhe na 'bras chan dang / sran ma dang / zan dang / sha dang / khur ba la bya'o/ /bza' ba lnga yang spang bar 'gyur ro/ /zhes gsungs pa dang / lag pa khur ba snum la reg pas phyi ma la reg pas phyi ma kun spangs so snyam pa la rnam pa lngas na spangs par rig par bya ste/ zas gnang ba dang / zas 'drim par gnang ba dang / zas 'drim par gzas par gnang ba dang / zas spangs par gnang ba dang / spyod lam las nyams par gnang ba'o/ /zas gnang ba ni bza' ba dang bca' ba lnga gnang ba'o/ /zas 'drim pa ni skyes pa dang bud med gnang ba'o/ /'drim par gzas pa ni nye 'khor na bza' ba lnga gnang ba'o/ /zas spangs par gnang ba ni bza' ba lnga dang bca' ba lnga gnang ba'o/ /spyod lam las nyams pa ni gang la stan 'dug pa de las langs pa ste/ de lngas na zas spangs par rig par bya'o/ /de las ldog pa lngas na ma spangs par rig par bya'o/ /gzhan yang lhag ma lus pa'i tshig lngas na ma spangs par rig par bya'o/ /lhag ma med pa'i tshig lngas na spangs par rig par bya'o/ /lhag ma lus pa'i tshig lngas lus pa gang zhe na/ skad cig mi dgos so zhes byas pa dang / skad cig gzhan la byin cig ces byas pa dang / skad cig phyis zos so zhes byas pa dang / skad cig chog go zhes byas pa dang / skad cig sdod cig ces byas pa ste/ de ltar na lhag ma lus pa'i tshig lnga'o/ /lhag ma med pa'i tshig lnga ni skad cig ces ma smos la gong ma las bzlog pa'i tshig lngas ni lhag ma med pa'i tshig lngar rig par bya'o/ /zos na zhes bya ba ni mgrin par mid pa'o/ /ltung ba ni snga ma bzhin no/ /nyes pa ni dge slong gis spangs pa'i zas spangs par 'du shes bzhin du lhag mar ma byas pa'i bza' ba dang bca' ba zos na ltung bar 'gyur ro/ /spangs pa ma byas par spangs par 'du shes na lhag mar ma byas pa zos na nyes byas su 'gyur ro/ /spangs ba la spangs par 'du shes bzhin du lhag mar ma byas pa zos na ltung bar 'gyur ro/ /spangs par ma byas par the tshom za bzhin du lhag mar ma byas pa zos na nyes byas su 'gyur ro/ /skyo ma dang thug pa ni kha gzar bzhag na mi mthong ba dang / sor mo lnga'i rjes snang na spangs par 'gyur ro/ /skom za ba la spang ba med do/ /lhag mar byas pa ni dge slong bdag gis zan spangs pa phyis za 'dod na yang dge slong zan za zhing 'dug pa spyod lam ma nyams pa'i drung du song la phyag byas la tsog tsog por 'dug ste/ dge slong de la gsol te lhag mar gyis te zo zhing / dge slong gcig gis lhag mar byas na thams cad la zar rung ngo / /zas lhag mar ma byas pa'i zas stobs su mi gnang ba'i gleng gzhi ni mnyan du yod pa na ste/ khyim bdag gcig cig longs spyod dag kyang 'grib par gyur nas dge slong zhig la gsol te rab tu phyung ngo / /rgan zhugs kyang dran pa nyams pa zhig pas rtag tu ltung ba 'byung ngo / /de mkhan pos mdun du tsog tsog bor 'dug tu bcug nas de ltung ba bshags su bcug go/ /de yang rab tu khros nas slad kyis khyim bdag gis dge 'dun rnams spyan drangs so/ /dge slong dag der bshos gsol ba'i 'og tu dge slong de gnyis kyang zas zos nas nye bar 'gro ba'i grong du song ste zan dag byin nas zan zos zhes byas na de dag gis lhag mar byos la khyer cig ces byas pa dang / de gnyis kyis blangs nas mnyan du yod par phyin te/ rgan zhugs ni lhag mar byed du bcug /slob dpon ni chu 'tshag tu song nas slar 'ong ba dang / lhag mar byas sam zhes smras na lhag mar byas so zhes nas zos pa'i 'og tu slob dpon khyod ni lhag mar ma byas pa'i zas zos pas ltung ba byung ngo zhes byas pa dang / ngas ltung ba ma mthong ngo zhes byas pa las snyan du bdas nas/ dge slong gi bya ba ma yin zhes smad nas/ da phyin chad lhag mar ma byas pa'i zas stobs su mi gnang bar bslab pa bcas so/ /dge slong gang zhes bya ba ni rgan zhugs te/ gzhan yang de dang 'dra ba'o/ /shes zhes bya ba ni bdag rang gis rig pa'am gzhan gyis bsgo ba'o/ /dge slong zhes bya ba ni chos 'di la zhugs pa'o/ /zan zos nas spangs par shes zhes bya ba ni 'grangs nas chog par gyur pa'o/ /lhag mar ma byas zhes bya ba ni lhag mar ma byas pa ste bza' ba dang bca' ba lnga pa'o/ /dus kyis stobs zhes bya ba ni yang nas yang du stobs shing klan ka btsal te ltung ba dbyung bar bsams pa'o/ /rkyen de nyid ces bya ba ni gzhan ma yin pa'o/ /ltung ba ni snga ma bzhin no/ /dge slong mtshams kyi nang du 'dus shing zar mi gnang ba'i gleng gzhi ni mnyan du yod pa na ste/ de'i tshe na dge slong lha sbyin kun dga' ra ba'i mtshams kyi nang du dge slong mang shig 'dus shing zan za ba dang mi mthun pa'i mtshan ma ston pas dge slong dag 'phya ba snyan du bdas nas rnam grangs du mas smad de/ 'dus shing zar mi gnang bar bslab pa bcas so/ /na ba dus so zhes bya ba ni slad kyis dge slong mang zhig na nas sman pa la dris na zhal sus logs shig tu zos na phan no zhes nas snyan du gsol to/ /na na logs shig tu bzar gnang ste dge slong nad pa za gcig gis mi 'tsho ba'o/ /las dus ni dge slong dag cig phyag dar dang dkyil 'khor dag byas pas chad de nyal zhing 'dug pa snyan du bdas nas rjes su gnang ste/ las mchod rten dang dge 'dun gyi las byas pa'am/ chung ngu na ba'i gnas mal tsam gyi dkyil 'khor byas pa'o/ /lam gyi dus ni dge slong zhig lam du zhugs pa las/ de dag lam gyis ngal zhing 'gro mi nus pa las rjes su gnang ste/ dpag tshad gcig tu song ba'am dpag tshad phyed nas slar 'khor ba'o/ /grur zhugs pa ni chu 'byam du dong bas 'du mi khom pas dpag tshad phyed dang gcig tu song ba'o/ /dus ston zhes bya ba ni so so'i dus ston chen po'i 'dur mi khom pas so sor byin pa'o/ /dge sbyong gi zas dus zhes bya ba ni phyi rol gyi dkyil 'khor du rab tu byung ba ste/ kun du chos zan byin pa la sogs pa'o/ /ltung ba ni snga ma bzhin no/ /dus ni de dag dang mthun pa ste rjes su gnang ba la bya'o/ /nyes pa ni mtshams kyi nang la mtshams kyi nang du 'du shes dang the tshom du bcas te zos na ltung ba re rer 'gyur ro/ /dge 'dun du ma lags sam bsnyen par ma rdzogs pas grangs su bskang ba ni nyes byas su 'gyur ro/ /shang tse dang lan tshwa kha gzar gang tsam yan man bsres pa'am/ yon bdag gis so so'i gnas su phul ba ni nyes pa med do/ /dus ma yin par kha zas bzar mi gnang ba'i gleng gzhi ni mnyan du yod pa na ste/ de'i tshe na tshe dang ldan pa maud gal gyi bus u pA li la sogs pa gzhon nu bcu bdun rab tu phyung zhing bsnyen par rdzogs par byas nas de dag kyang snga dro bsod snyoms la zhugs pa dang bud med dag gis mthong nas/ e ma'o ngo mtshar che btsas ma thag ste/ kha lan tshas dgang zhing khron pa'i nang du zhugs kyang mi shes sam zhes byas pa dang / de dag kyang skyengs nas bdag cag zan chad pa bla'i 'di lta bu'i tshig ngan pa ni ma thos kyang rung ngo zhes nas/ de dag kyang de'i nyin mo zan ma zos nas nus kyi bar du ni dge ba la spyod/ ma nus nas 'phres shing nyal ba bsnyen dga' bos mthong nas khyed cag gzhan gyi zas zos nas de ltar nyal ba'i rigs sam zhes byas pa dang / nged kyis ma zos so zhes de ltar gyur pa rgyas par smras so/ /de'i tshe grong khyer gyi mi dga' sde rnams zas skom bsdus nas dze ta'i tshal du dong ba bcu bdun sdes mthong ste/ zas skom sbyin na bsod nams su 'gyur ba dag smras pa dang / de rnams kyis kyang bcu bdun sde la zas skom byin no/ /de dag kyang zas skom zos nas 'grangs te/ gnyis gnyis gsum gsum du bcad de kha ton 'don pa la zhugs pa dang / bsnyen dga' bos mthong ste/ khyed cag da ci ni nyal na da ni brtson pa la zhugs sam zhes byas pa dang / kha zas sbyin pa ni yon tan lnga ste tshe byin pa dang mdog byin pa dang / stobs byin pa dang / bde ba byin pa dang / spobs pa byin pa ste/ bdag cag khyim bdag la kha zas bslangs te zos so zhes byas pa dang / ci khyed dus las 'das par zan zar gnang ngam zhes smras pa dang / bdag cag dus su ni zan ma rnyed de/ ltogs te 'chi mi phod do zhes zer ba snyan du bdas nas rnam grangs du mar smad de/ dus yol nas zar mi gnang bar bslab pa bcas so/ /dge slong zhes bya ba ni bcu bdun sde ste gzhan yang de dang 'dra ba'o/ /dus yol zhes bya ba ni dus gnyis te/ nyi ma phyed yol phan chad dang / skya rengs ma shar gyi bar du dus ma yin zhes gsungs so/ /na ba ni ma gtogs so/ /zos zhes bya ba ni bza' ba lnga dang / bca' ba lnga mgrin par ming pa'o/ /dus yol ba la yol bar 'du shes sam the tshom za na ltung bar 'gyur ro/ /dus ma yol ba la yol bar 'du shes sam the tshom za na nyes byas su 'gyur ro/ /kha zas zhag lon pa bzar mi gnang ba'i gleng gzhi ni mnyan du yod pa na ste/ de'i tshe dge slong nag po zhes bya ba grong khyer dang grong rdal dag na gnas shing snga dro zan gyi phyir bsod snyom la 'jug go/ /bsod snyoms kyi zan gsher ba dang skam po rnyed na gsher ba ni 'phral du za/ skam po ni snod du bcu gnas/ nam char 'bab cing rlung ldang ba dang / nam rmus pa'i tshe chu'i nang du sbangs shing bsod snyoms la mi 'jug par za'o/ /dus phyi zhig na bcom ldan 'das gtsug lag khang rgyu zhing gshegs pa dang / nag po'i zas skam pa la gzigs nas su yin zhes rmas pa dang / dge slong nag po'i lags so zhes kun dga' bos gsol te/ dge slong gis kha zas bzhag pa bza' ba'i mi rigs ma brtags pa'o zhes smad de/ bzhag pa'i kha zas zar mi gnang bar bslab pa bcas so/ /dge slong zhes bya ba ni nag po ste/ gzhan yang de dang 'dra ba'o/ /bzhag pa ni rnam pa gnyis te/ snga dro byin len byas pa'i zas ni phyi 'phred kyi dus su bzhag par gyur to/ /phyi dro byin len byas pa ni srod kyi dus su bzhag par gyur to/ /mtshams kyi nang du zhag lon pa dang dge slong gis bcos pa dang / byin gyis ma brlabs pa la yang sbyar ro/ /bca' ba dang bza' ba dang btung ba zhes bya ba ni snga ma bzhin du bzhag pa la bzhag par 'du shes pa dang the tshom za na yang ltung ba re rer 'gyur ro/ /ma bzhag pa la bzhag par 'du shes pa dang the tshom zan nyes byas re rer 'gyur ro/ /lhung bzed bkru ba ma dag ste/ bzhag pa yod pa'am kha gzar dang tsha stegs na bzhag pa yod pa dang spags pa zos na nyes byas su 'gyur ro/ /kha ma bkrus par btung ba 'thungs na nyes byas su 'gyur ro/ /bzhag pa'i me tog dang 'bras bu bzhag pa zos na yang ltung bar 'gyur ro/ /dge slong byin len ma byas par zar mi gnang ba'i gleng gzhi ni mnyan du yod pa na ste/ de'i tshe na dge slong nag po yo byad dang 'tsho ba thams cad kyang dur khrod kyi ste/ lhung bzed kyang dur khrod kyi rdza ma bor ba'o/ /gos kyang dur khrod kyi mi shi ba'i gos bor ba/ zas kyang mi shi ba'i phyir gnyen rnams kyis zan khengs pa bor ba za bas de'i tshe tshe dang ldan pa nag po chen po nam skye bo mang po shi ba'i tshe na lus kyang brtas shing bsod snyoms la yang mi 'jug go/ /nam mi shing ba nyung ba na grong du bsod snyoms la 'jug lus kyang ma brtas par gyur pas na/ yul mnyan du yod pa phyogs su tshe dang ldan pa nag po chen po mi sha bza' bar kun du grags so/ /byin len byos la zo shig par bka' stsal pa las tshe dang ldan pa drug sde po rnams byin len mi byed par za bas na/ bcom ldan 'das kyis nyes pa'i dmigs su gyur pa thams cad kyang byin len ma byas pa las gyur to snyam nas dbang du bya zhing skye bo rnams yid ches par bya ba'i phyir byin len mi byed du mi gnang bar 'dul ba la bslab pa bcas so/ /dge slong zhes bya ba ni drug sde ste gzhan yang de dang 'dra ba'o/ /ma byin zhes bya ba ni skyes pa dang bud med rnams kyis ma byin pa'o/ /kha nas mid ces bya ba ni bza' ba lnga dang bca' ba lnga'o/ /chu dang so shing ma gtogs zhes bya ba ni dge slong dgon pa rnams chu dang so shing yang mi skyod pa las snyan du bdas nas/ chu dang so shing ma gtogs zhes rjes su gnang ba'o/ /ltung ba ni snga ma bzhin no/ /byin len ma byas par 'du shes pa dang the tshom za na yang ltung ba re rer 'gyur ro/ /byin len byas pa la ma byas par 'du shes pa dang the tshom za bzhin du zos na nyes byas so/ /spre'u dang glang po che dang cang shes dang / dred mo cang shes lta bus byin pa ni byin par chud do/ /smod pa can gyi yul na byin len ma byas pa zar yang rung ste/ dkyil 'khor gyi steng du bzhag pa yang byang gi sgra mi snyan lta bur bsngos te bza'o/ /mi na bar zas bzang po gzhan gyi khyim nas slong zhing zar mi gnang ba'i gleng gzhi ni grong khyer ser skya'i gnas na ste/ de'i tshe ni khyim bdag shAkya ming chen gyis bcom ldan 'das la sogs pa dge 'dun rnams bshos la spyan drangs pa dang / bcom ldan 'das 'khor dang bcas par gshegs su gnang ste/ bcom ldan 'das 'khor dang bcas pa ming chen gyi khyim du gshegs te bshos gsol nas/ khyim bdag la chos bstan gzengs bstod rab tu dga' bar mdzad nas slar gshegs so/ /dge slong drug sde rnams nye bar 'gro ba'i grong na mar zan slong zhing thogs pas 'phyis te zan yang ma slebs gdan 'byam dag kyang bsdus pa'i 'og tu ming chen gyi khyim du lhags so/ /der zan dag bslangs pa dang / kha zas dag zad pas na ngan don zhig sbyar ba dang / de dag ma mgu nas gzhan dag gi khyim nas 'o ma dang zho dang mar sar dang / nya dang sha dang sha skam blangs te zos nas slar gtsug lag khang du dong ngo / /de dag gtsug lag khang du lhags pa dang / dge slong rnams kyis khyed zan gar zos she na ming chen gyi der ro/ /'o na nged kyis ma mthong na zhes byas pa dang / nged phyis lhags so/ /der khyed kyis ci lta bu zhig zos zhes byas pa dang / 'o ma dang sha dang nya skam mo/ /'o na nged kyis ma zos na/ khyed de lta bu slong du dbang ngam zhes byas pa dang / dbang yang rung mi dbang yang rung bdag cag gis zos so zhes byas pa dang / dge slong gzhan dag gis 'phyas pa snyan du bdas te/ kha zas bzang po dag gi phyir mi na bar gzhan gyi khyim nas bslangs te bzar mi gnang bar bslab pa bcas so/ /na ba la gnang ba ni dge slong zhig nad kyis btab ste sman pa la dris pa dang / 'phags pa 'o ma dang sha dang nya skam gsol cig dang sos par 'gyur ro/ /bdag la sus sbyin grong du slongs shig dang ster bar 'gyur ro/ /bcom ldan 'das kyis bslab pa bcas so/ /grong du slong du mi gnang ngo zhes pa la snyan du bdas te/ na ba'i dus su zhes rjes su gnang ngo / /dge slong zhes bya ba ni chos 'di la zhugs pa'o/ /gang bzang por gsungs zhes bya ba ni 'o ma dang zho dang mar dang nya dang sha dang sha skam mo/ /yang dge slong gang zhes bya ba ni drug sde ste gzhan yang de dang 'dra ba'o/ /bdag gi phyir zhes bya ba ni gzhan gyi ma yin gyi bdag gi tshed du byas pa'o/ /min zhes bya ba ni na ba ma gtogs te gnang ba'o/ /gzhan gyi grong na zhes bya ba ni bram ze dang khyim bdag gi grong ngo / /dge slong zhes bya ba ni bdag gis so/ /ltung ba ni snga ma bzhin no/ /mi na bar slong zhing zan slong ba'i tshe nyes byas zos na ltung bar 'gyur ro/ /mi na ba'i tshe bslangs la na ba'i tshe zos na slong ba'i tshe nyes byas so/ /zos na ltung ba med do/ /na ba na bslangs la min ba la zos na slong ba la nyes pa med do/ /zos na ltung ba'o/ /na ba'i tshe bslangs shing na ba'i tshe zos na nyes pa med do/ /dge slong bsod snyoms la zhugs pa na 'phags pa ci bzhed ces bstabs pa las bslangs pa ni nyes pa med do/ /zan gyi tshogs te ltung ba bzhi bcu pa rdzogs so// //srog chags dang bcas pa'i chu la shes bzhin du spyod du mi gnang ba'i gleng gzhi ni yul kau shAm+bI kun dga' ra ba na ste/ de'i tshe na tshe dang ldan pa mos pa can srog chags dang bcas pa'i chu la shes bzhin du spyod pa dang / de la dge slong tshangs par spyod pa phan par 'dod pa rnams kyis tshe dang ldan pa khyod srog chags dang bcas pa'i chu ma spyod cig ces bsgo na ngag mi nyan te/ ci nga la de dag grangs kyis gtang ngam/ lho byang shar nub kyi rgya mtsho dang / mtshe'u dang lteng ka dag tu ci'i phyir mi dong zhes zer ba dge slong gzhan rnams kyis thos te/ 'phya bar gyur pa las snyan du bdas nas/ rnam grangs du mas smad de snying rje med pa'o zhes nas/ srog chags dang bcas pa'i chu la spyod du mi gnang bar 'dul ba la bslab pa'i gnas bcas so/ /yang dge slong gang zhes bya ba ni mos pa can te gzhan yang de dang 'dra ba'o/ /shes bzhin zhes bya ba ni bdag gis shes pa 'am gzhan gyis bsgo ba'o/ /srog chags zhes bya ba ni rnam pa gnyis te/ bltar snang ba dang mi snang ba chu tshags la chags pa'o/ /spyod ces bya ba ni rnam pa gnyis te/ phyi'i spyod par bya ba dang / nang gi spyod par bya ba ste/ nang gi spyod par bya ba ni btung ba dang / kha lag bkru ba dang / lus kyi spyod pa ste zho dang rtsab mo dang shing tog srog chags dang ldan pa la yang sbyar ro/ /phyi rol gyi ni lhung bzed dang gos kyi bkru bshal dang / chag chag dang maN+Dal la sogs pa bya ba'o/ /de bzhin du sa dang rtsi shing dang me tog la sogs pa srog chags yod pa la yang sbyar te/ srog gcod pa'i phas pham pa las ci skad cig 'byung ba bzhin du sbyor cig /ltung ba gong ma las srogs chags dang bcas pa'i chu la spyod pa dang / bye brag ni ltung ba gong ma ni gtsug lag khang dang khang pa la sogs pa rtsig pa'i chur spyod pa la bya'o/ /'dir ni rang gi lus kyi phyi nang du spyad pa la bya'o/ /srog chags yod pa la yod par 'du shes pa dang the tshom za na yang ltung bar 'gyur ro/ /med pa la yod par 'du shes pa dang the tshom za na nyes byas re rer 'gyur ro/ /dge slong smye ngan byed pa'i gnas su 'dug tu mi gnang ba'i gleng gzhi ni mnyan du yod pa na ste/ de'i tshe na tshe dang ldan pa 'char ba po nang par sngar langs te/ kha lag bkrus nas bsod nyams la gshegs pa dang / mnyan du yod pa na tshong dus zhig yod pa de na tshong pa kha cig ni tshong dus su zong rnams bkram/ kha cig ni gdod 'ong na/ spos 'tshong gi khye'u zhig gnas pa chung ma gsar du bslangs ma thag pas tshul bzhin ma yin pa yid la byed de/ mi tshangs par spyad do snyam nas tshong khang gi sgo gcod cing 'dug pa 'char bas rig pa'i nor bu yod pa'i mthus tshor te/ ched du de'i bar chad du bya'o snyam nas/ 'char ba sngar de'i chung ma'i gan du song nas chos 'chad cing 'dug pa dang / de'i khyo yang phyi bzhin du 'ongs nas/ chung ma la smras pa 'phags pa 'char ba bshos gsol la thong zhes byas pa dang 'char ba na re/ da bdag ni dge ba'i bar chad du gyur pa bzhin du khyed la chos ston du 'ongs na/ khyod ci'i phyir chos mi nyan par 'dug chos nyon cig ces nas ma dad bzhin du chos bshad do/ /'char ba song gi 'og tu tshong pa ngo mtshar che'o/ /bdag gi chung ma la mi dbang bar gyur ces 'phya ba las/ dge slong dag gis thos pa snyan du bdas nas rnam grangs du mas smad de/ da phyin chad de lta bu na 'dug tu mi gnang bar 'dul ba la bslab pa bcas so/ /yang dge slong gang zhes bya ba ni 'char ba ste gzhan yang de dang 'dra ba'o/ /smye ngan byed ces bya ba ni skyes pa dang bud med gnyis dbyen byed pa'o/ /gnas zhes bya ba ni bram ze dang khyim pa'i khyim mo/ /nan gyis 'then te 'dug ces bya ba ni rkub sa la bzhag pa tsam mo/ /mi shes na ltung ba med do/ /dge slong smye ngan byed par 'greng du mi gnang ba'i gleng gzhi ni mnyan du yod pa na ste/ tshe dang ldan pa 'char bas snga ma bzhin du mi tshangs par spyod par rig nas/ de gnyis 'khrig pa la blta'o snyam nas phyi bzhin song ste/ sgo lkog na gab cing 'dug pa de gnyis 'khrig pa'i tshe chung mas mthong nas 'char ba 'dug gis ma byed ces smras na/ 'phags pa 'char ba ni de tsam rnam par grol ba'i bsam gtan byed cing 'dug go/ /'dir ci 'dod ces byas nas ma btub ste/ spyad zin nas bltas na 'char ba 'dug par mthong nas/ de dag smod cing mi snyan pa 'dzer pa dge slong gis thos pa snyan du bdas te/ smye ngan byed pa'i gnas su 'greng zhing 'dug tu mi gnang ba'i bslab pa bcas so/ /dge slong gang zhes bya ba ni 'char ba ste gzhan yang de dang 'dra ba'o/ /shes bzhin zhes bya ba ni bdag nyid kyis shes pa'am/ gzhan gyis bstan pa'o/ /smye ngan zhes bya ba ni gong ma dang 'dra/ gnas zhes bya ba ni khyim mo/ /dben pa zhes bya ba ni gzhan skyes pa dang bud med med pa'o/ /skyabs yod pa zhes bya ba ni yol ba dang / sab ma dang / rtsig pas bskyabs pa'o/ /'jigs pa dang rkyen byung ba'i tshe 'greng ba ni nyes pa med do/ /gong ma las 'dir ni bye brag 'greng ba bzhag go/ /dge slong gis gcer bu pa'am/ gcer bu pa la rang gi lag nas zan sbyin du mi gnang ba'i gleng gzhi ni mnyan du yod pa na ste/ bcom ldan 'das yul ko sa lar ljongs rgyu ba las mnyan du yod par byon pa'i tshe/ mnyan du yod pa'i skyed mos tshal na khyim pa mo lnga brgya tsam zhig skud pa 'khal zhing 'khod pa bcom ldan 'das kyis chos bshad nas bden pa la rab tu bkod do/ /de nas bud med lnga brgya po de dag gis bcom ldan 'das la bshos gsol lo snyam nas rgyu ji tsam gyis chog ces dris pa na kun dga' bos kAr ShA pa Na lnga brgyas chog go zhes nas/ de dag gis tshe dang ldan pa kun dga' bo la kAr ShA pa Na lnga brgya phul te bdag cag ni bud med kyi bu lags pas sbyor yang mi nus pas snod spyad kyang ma mchis zhes byas pa dang / kun dga' bos khyim bdag 'byor pa zhig la bcol cig ces byas pa dang / kun dga' bos kyang khyim bdag mgon med zas sbyin la bcol te/ 'drim pa'i tshe bud med rnams kyi grogs tshe dang ldan pa kun dga' bos kyang byas so/ /de'i tshe gcer bu ma gnyis shig zan slong du lhags nas gral gyi mjug la bzhag pa dang / kun dga' bos ma bsams par khur ba 'drim pa'i tshe rgan mo la ni gcig /gzhon nu ma la gnyis byin pa dang / rgan mo na re gzhon nu khyod la kun dga' bo skugs kyis sta gon gyis shig byas pa dang / gzhon nu na re rgyal po'i sras las rab tu byung ba ste/ btsun mo'i 'khor dang bzang mo mang du spangs te rab tu byung na nga lta bu dri ma can la 'dis ci zhig rer yod ces smras pa dang / 'on du zin kyang skyes pa ji lta bu la dga' ston med byas pa dang / dge slong rnams kyis thos te snyan du bdas nas gcer bu ma la rang gis byin du mi gnang bar bslab pa bcas so/ /gcer bu zhes bya ba ni gcer bu pa kha cig 'cho ba dang mi ldan te ltogs pa las dge slong rnams la slong ba'i tshe/ dge slong rnams kyis 'tsho ba sbyar cing byin pas na dge slong rnams la 'phya zhing mi snyan par 'dzer ba dang / nged dge slong gi sbyin gnas yin te/ nged la yon sbyin no zhes spyoms pas/ rang gi lag pas sbyin du mi gnang bar bcas so/ /dge slong zhes bya ba ni kun dga' bo ste gzhan yang de dang 'dra ba'o/ /gcer bu ma zhes bya ba ni gos med pa'o/ /kun du rgyu zhes bya ba ni de las gzhan pa'i mu stegs so/ /ltung ba ni snga ma bzhin no/ /na ba dang sdig par lta ba las dbral ba'i phyir sbyin pa ni ma gtogs so/ /kha zas btung ba yang yin la rang gi lag gis kyang sbyin na ltung bar 'gyur ro/ /bza' ba dang bca' ba lnga rung ba la yang ma yin la gzhan nas brgyud de byin na ni nyes byas so/ /dge slong dmag chas pa la bltar 'gror mi gnang ba'i gleng gzhi ni mnyan du yod pa na ste/ de'i tshe yul ko sa la'i rgyal po la ri brags kyi grong dag cig log ste bsngos nas rgyal pos ri brags kyi grong 'bebs par dmag dpon 'khor dang bcas te sngar bkye ba dang / phyis kyang snon ma zhig bkye na ma phebs te slar smas so zhes rgyal po'i steng du 'phar ma 'ongs nas rgyal pos yul na mtshon gyis 'tsho ba thams cad snon du dengs shig ces kun du bsgo nas dmag gi rta pa dang rkang thang la sogs te/ lha k hang gi sgo nas mar dong ba la drug sde rnams gsus po che'i dmag ltar 'dong ngo zhes sbran nas dmag chas pa la lta zhing bkren pa glang po che phag 'dra 'dis ri brags kyi grong phebs par ni mi 'gyur gyi khyed chas te 'dod du yod kyi slar log tu ni med do zhes smras pas de dag kyang bag 'khums shing spa gong bas lam nas slar 'khor to/ /de nas rgyal pos ci'i phyir 'khor zhes byas pa dang / rgyal po khros nas snyan du gsol te/ dmag chas pa la bltar mi gnang bar bslab pa bcas so/ /dge slong zhes bya ba ni drug sde ste/ gzhan yang de dang 'dra'o/ /dmag chas zhes bya ba ni 'thab mo byed 'dod pa'o/ /dmag ces bya ba ni yan lag gcig pa dang / yan lag gnyis pa dang / yan lag gsum pa dang / yan lag bzhi pa'o/ /yan lag gcig pa ni glang po che'i tshogs dang / yan lag gnyis pa ni rta pa'i tshogs so/ /yan lag gsum pa ni shing rta'i tshogs so/ / yan lag bzhi pa ni rkang thang pa'i tshogs so/ /gtsug lag khang lam ka na 'dug pa'i lam ka nas 'dong ba dang / dmag nyid gtsug lag khang du 'ongs pa dang / rgyal po dang / blon po dang / dmag dpon dang / yul mi la sogs bkug pa'am/ bar chad brgyad la sogs pa byung ste/ dmag mthong na ni nyes med do/ /zhag gnyis las lhag par dmag gi nang na lta zhing 'dug tu mi gnang ba'i gleng gzhi ni mnyan du yod pa na ste/ ri brags kyi grong de nyid kyang da rung ma phebs nas rgyal po yang phru ma de nyid du 'dug go/ /blon po rnams kyis gros btab ste/ khyim bdag mgon med zas sbyin blo che la mthu che bas na khyim bdag bkug pa'i rigs par gsol ba dang / dgug par pho nya gcig btang ste bkug go/ /de nas ring zhig lon kyang ma phebs nas/ mgon med kyang mi dga' ba 'dra nas rgyal po gsal rgyal gyis khyim bdag bu smad dang bral ba mi dga' 'am/ ci nyes zhes rmas pa na bdag bu smad dang bral ba ni mi dga' ba med na 'phags pa dge slong dag med pas mi dga'o/ /zhes byas nas de'i phyir rgyal pos dge slong dag 'dir shog shig par yi ge springs nas dge slong rgan po ni rgas te 'gro mi nus/ gsar bu dag ni chos khrims dag ma lobs pas nyan cing 'bad pas ma btub kha cig ni na nas 'gro ma nus pa dang / drug sde rnams bdag cag rgyal po dang blon po rnams chos 'chad du 'dod ngo zhes khas blangs nas/ drug sde rnams dmag gi nang du lhags te zhag du mar 'khod cing dmag brgyus pa las phar phul zhing kyal ka byed de/ bkren pa khyed kyis glang po che phag 'dra ba/ rta bong bu 'dra ba zhes nas mjug ma nas bzung zhing bskor to/ /mi la rtswa mi 'dra ba zhes byas shing gnya' ba na phul bas de dag bag 'khums mi dga' bar gyur nas sems shing 'khod pa las rgyal pos mthong ste/ dge slong dmag gi nang na yun ring du 'dug tu mi gnang bar gsol nas drug sde la bka' rmas te/ dge sbyong gi bya ba ma yin zhes smad nas dmag gi nang du zhag gnyis las 'dug tu mi gnang bar bslab pa bcas so/ /de 'dra ba'i rkyen cig gis zhes bya ba ni rgyal po dang dmag dpon dang yul mis bos pa'o/ /dge slong zhes bya ba ni drug sde ste gzhan yang de dang 'dra ba'o/ /dmag ces bya ba ni yan lag gcig la sogs te/ gong ma bzhin no/ /bltar 'gro na zhes bya ba ni lta 'dod pa'i phyir ro/ /zhag gnyis las 'das zhes bya ba ni dus las yol ba'o/ /ltung ba zhes bya ba ni snga ma bzhin no/ /rgyal po dang blon pos 'dug shig ces bsgo ba'am/ bar chad chen po brgyad byung ba'i dbang gis na ltung ba med do/ /zhag gnyis dmag gi nang na gnas pa'i tshe yang g.yul bshams pa las dkrug tu mi gnang ba'i gleng gzhi ni mnyan du yod pa na ste/ rgyal po gsal rgyal gyis ri brags grong log pa da rung ma phebs nas/ mgon med zas sbyin kyang dge slong dag med pas ma dga' nas/ dge slong kha cig der thong shig par yi ge spring ngo / /dge slong gzhan rnams ni snga ma bzhin du brel to/ /yang drug sde lhags so/ /sngar zhag gnyis las ring du gnas su mi gnang ba dang / slad kyis zhag gnyis kyi tshe na yang glang po che'i tshogs la sogs g.yul bshams pa la snga ma bzhin du dkrugs nas khong bdag cag dgra'i logs su sngar dong nas nags tshang tshing na 'khod de/ dmag 'ong ba dang / drug sdes rnga brdungs dung bus khus btab pa dang / gsal rgyal gyi dmag gis yang skrag par gyur te de dag gi snying lam na dgra byung snyam nas slar log ste bros so/ /de nas yang mdun du brgyugs te/ bsgugs nas khyed ci'i phyir 'bros zhes byas nas/ khyed kyis g.yul dkrugs pa'i phyir bros so zhe'o/ /ded kyis rtsed mo byas pa'i phyir yang skrag ste 'bros/ dgra 'ongs na ji ltar rgol zhes byas pa dang / de dag gis rgyal po la gsol nas/ rgyal pos kyang snyan du gsal te/ zhag gnyis dmag gi nang na gnas pa'i tshe yang g.yul bshams pa dkrug tu mi gnang bar 'dul ba la bslab pa bcas so/ /dge slong zhes bya ba ni drug sde ste/ gzhan yang de dang 'dra ba'o/ /dmag ces bya ba ni rta pa la sogs pa ste snga ma bzhin no/ /bshams pa dkrugs zhes bya ba ni g.yul gyi nang du 'jug pa'o/ /rgyal mtshan zhes bya ba ni seng ge dang chu srin dang / khyu mchog gi rgyal mtshan no/ /g.yul bshams pa rnam pa bzhi ste/ 'bru'i phung po lta bu dang / shing rta dang / zla gam dang nam mkha' lding gi 'dab ma lta bu'o/ /ltung ba ni snga ma bzhin no/ / nyes pa ni glang po che dang rta la sogs pa go bskon pa logs shig tu byung na ltung bar 'gyur ro/ /go ma bskon na nyes byas su 'gyur ro/ /dge slong la rdeg tu mi gnang ba'i gleng gzhi ni mnyan du yod pa na ste/ de'i tshe tshe dang ldan pa maud gal gyi bus u pA li la sogs pa gzhon nu bcu bdun sde rab tu phyung ste bsnyen par rdzogs par byas pa de na de dag drug sde'i rgyus mi shes pas tshe dang ldan pa 'char bas bcu bdun sde gcig la las shig bcol na khyod nga'i slob dpon dang / mkhan po ni ma yin zhes ma btub pa dang des thal mo zhig bsnun pa dang sa la bsgyel te ngus pa dang thams cad kyang sa la 'gyel te ngus pa gzhan dag gis khyed kyi nang nas gcig brdegs na gzhan dag ci'i phyir du zhes byas pa dang / bdag cag thams cad ma dus na kun kyang rdeg tu 'ong ngo zhes smras pa snyan du bdas te/ dge slong la rdeg tu mi gnang bar 'dul ba la bslab pa'i gnas bcas so/ /yang dge slong zhes bya ba ni 'char ba ste gzhan yang de dang 'dra ba'o/ /brdegs zhes bya ba ni bsnun cing brgyab pa'o/ /ltung ba ni snga ma bzhin no/ /dge slong khros 'khrugs te rngam nas dge slong la thal mo dang / khu tshur gyis bsnun na ltung bar 'gyur ro/ /sor mo lngas bsnun na yang ltung ba re rer 'gyur ro/ /tha na rgya shug gi 'brum bu'am nyungs kar gyi 'brum bu lus la phog na ci rnyed phog pa ltung ba re rer 'gyur ro/ /dge slong gis thabs kyi sgo nas brdegs na yang ltung bar 'gyur ro/ /dge slong la rdeg par gzar mi gnang ba'i gleng gzhi ni mnyan du yod pa na ste/ tshe dang ldan pa bcu bdun sde drug sde la bsnyen bkur byed pa na 'char pas yang las bcol ba dang / ma btub nas rdeg tu gnang bas rdeg par gzas te lag pa gzas pa las/ kun dus ba snyan du bdas te/ gzar mi gnang bar 'dul ba la bslab pa'i gnas bcas so/ /rdeg par gzas na tha na nyungs kar 'bru gcig gis kyang rung ste ltung bar 'gyur ro/ /gzhan ni bsnun pa la sbyar ba bzhin du rgyas par sbyor cig /khyim pa yang bsnyen par ma rdzogs pa la rdeg par gzas kyang rung ste nyes byas su na smad do/ /dge slong gis gnas ngan len 'chab tu mi gnang ba'i gleng gzhi ni mnyan du yod pa na ste/ dge slong dga' bos slob ma chos zhes bya ba cig yod de/ de mang du dge ba la brtson pa zhig pas nyin par dge ba spyod pa'i sar stan khyer te 'gro ba las dga' bo dang phrad nas bsnyen dga' bo na re nga'i stan yang khyer te shog ces nas de gnyis kyang lhan cig nyin par dge ba spyod pa'i sa na bsam gtan byed pa las/ bsnyen dga' bo ni sems rgod pas mgo g.yogs te bsam gtan byed na 'on kyang sems ma 'khrugs te/ dge 'dun gyi shing thags la bu mo zhig shing rku zhing 'dug pa mthong nas/ chos can la skrod cig ces byas pa dang / slob dpon rtog pa ma mang bar dze ta'i mdo sde la dgongs shig ces byas pa dang / blun po dge 'dun gyi bcwa shing la ltos shig ces ma gsungs sam/ khyod kyis ma btub na nga rang skrod do zhes nas/ bsnyen dga' bos bu mo bskrad na bu mo de yang phyir bgad pa dang / bsnyen dga' bos bu mo de bzung ste 'og cig byas so/ /de nas slar 'khor te chos can la khyod kyis ci mthong zhes smras pa dang / nang du zhugs pa gcig pu ma mthong gi gzhan ni thams cad mthong ngo zhes byas pa dang / 'o na su la yang ma smra shig ces byas pa na su dang ma phrad kyi bar du mi smra'o/ /'o na khyod kyi mkhan po dga' bo'i nyes pa byung na yang ngas rtag par bcab na nga'i yang khyod mi bcab bam zhes byas na/ des ma btub nas dge slong gzhan dag la byas pa snyan du bdas te/ bkas smad nas/ dge slong gis gnas ngan len 'chab tu mi gnang bar 'dul ba la bslab pa'i gnas bcas so/ /yang dge slong zhes bya ba ni bsnyen dga' bo ste gzhan yang de dang 'dra ba'o/ / gnas ngan len ces bya ba ni dge 'dun gyi lhag ma las byung ba dang / phas pham pa las byung ba'o/ /shes bzhin zhes bya ba ni bdag rang gis rig pa'am gzhan gyis bsgo ba'o/ /ltung ba ni snga ma bzhin no/ /gnas ngan len gyi nyes pa bcabs na skya rengs ma shar gyi bar du nyes byas so/ /skya rengs shar na ltung bar 'gyur ro/ /gnas ngan len gyi nyes pa brjod na dge ba'i bar chad dang tshangs par spyod pa'i bar chad du gyur pa tsam gyi tshod na bcabs kyang nyes med do/ /ltung ba lnga bcu pa rdzogs so// //nga gcig pu na bde'o zhes dge slong bra na gcod du mi gnang ba'i gleng gzhi ni mnyan du yod pa na ste/ tshe dang ldan pa dga' bo'i nye gnas chos can 'gyod phong pa khrel yod pa des bsnyen dga' bo'i nyes pa thams cad smras pas na/ de nas dga' bo khros te de la gnod pa zhig bya'o snyam nas/ dga' bo dang bsnyen dga' bo gnyis grong du bos pa dang / slob ma chos can bsod snyoms la 'gro bar chas pa dang / de gnyis kyis nged kyi phyi bzhin du shog shig dang zan sbyin no zhes nas slob ma yang ngag gcog ma phod nas mkhan po'i phyi bzhin du song ngo / /de dag grong du phyin pa dang / dga' bo dang chos can ni sdod bsnyen dga' bo ni grong du zan la song / bsnyen dga' bo phyir 'ongs nas yang chos can dang gnyis sdod/ dga' bo ni grong du zan la song ngo / /phyi na chos can gyis bsnyen dga' bo da ni nyi ma yol gyi zas la 'dong zhes des yang dang yang du bskul na/ nga ni gcig pu na bde'o zhes nas/ khyod nyid gar dga' bar song shig ces bskrad pa dang / lhung bzed khyer te ma 'ongs pas than bslang du med nas/ slar lha khang du 'ongs nas nyal zhing 'dug pa de dge slong bsod snyoms pa gzhan dag gis mthong nas khyod ci'i phyir de ltar nyal zhes dris pa dang / de'i rgyus zhib tu smras pa las dge slong dag gis snyan du bdas te/ rnam grangs du mas smad nas dge slong gi zan gcod du mi gnang bar 'dul ba la bslab pa'i gnas bcas so/ /yang dge slong gang zhes bya ba ni shAkya'i bu bsnyen dga' bo ste/ gzhan yang de dang 'dra ba'o/ /dge slong 'di zhes bya ba ni chos can te/ gzhan yang chos 'di la zhugs pa'o/ /grong du 'dong zhes bya ba ni khyim bdag dang bram ze'i khyim mo/ /khyod la zan sbyin no zhes bya ba ni bza' ba dang bca' ba lnga sbyin par khas blangs pa'o/ /khyod dang lhan cig pa bde ba med kyis song zhig pa ni zan bcad par bsams nas bskrad pa'o/ /rkyen de nyid ces bya ba ni zan bcad par bsams pa de nyid rkyen yin no/ /ched du bsams nas thabs gang gis kyang rung ste/ dge slong gi zan bcad na ltung bar 'gyur ro/ /na ba'i tshe na sman pas bsgo ba la ni ma gtogs so/ /dge slong me 'bud du mi gnang ba'i gleng gzhi ni mnyan du yod pa nas rgyal po'i khab tu gshegs pa'i tshe ste/ de'i tshe na bcom ldan 'das ljongs rgyu zhing gshegs pa na/ tshong pa phal po che dang 'grogs/ de'i nub mo 'brog dgon pa zhig tu phyin nas/ nub mo dgongs mal yang rgan rims su gos shig ces bka' stsal nas/ de bzhin du bgos pa dang drug sde shing skom zhig gi drung du bab ste me btung ba dang / shing tshig cing dud pas bdugs pas/ shing gi nang na sbrul gdug pa zhig 'dug pa byung ste/ lhung la thug cing shing gi yal ga la 'dug pa dang / drug sde dag gis mthong nas lhung lhung zhes byas pa dang / tshong pa rnams kyang kun bros pa las me 'bud pa las nyes dmigs su gyur pa dang / phyis rgyal po'i khab tu gshegs nas yang drug sde rnams kyis me'i mgal me 'khor lo ltar bskor zhing / nyi ma dang zla ba lta bur byed rgyug rtse rtse bas na/ dge sbyong mgo reg 'di rnams dang / khyim par bye brag dang khyad par ci yod ces mu stegs rnams 'phya ba las me 'bud du mi gnang bar 'dul ba la bslab pa bcas so/ /de ltar me 'bud du mi gnang ba'i dge slong dag me mar yang mi 'bud spos kyang ni sreg bla ma dang slob dpon la rim gro yang mi byed/ /lhung bzed dang / gos kyi kha dog mi bsgyur ba dang / dge slong gcig rlung nad kyis btab nas sman pa la dris na me la zhugs na phan no zhes nas snyan du bdas nas/ de lta bu la sogs pa ni dus yin te gnang gis byin gyis rlob la gyis shig ces gsungs so/ /yang dge slong zhes bya ba ni drug sde ste gzhan yang de dang 'dra ba'o/ /mi na zhes bya ba ni na ba ma gtogs so/ /bdag gi phyir zhes bya ba ni bdag rang gi ched du'o/ /reg gam zhes bya ba ni bdag rang gis reg pa'o/ /reg par byed du gzhug ces bya ba ni gzhan la bcol ba'o/ /ltung ba ni snga ma bzhin no/ /me thogs nas nyi ma dang zla ba lta bu dang rgyug cing rtse na ltung ba re rer 'gyur ro/ /mgal me bskor na ltung bar 'gyur ro/ /me 'bud dam gsod dam mgal pa bcug gam phyung ngam/ mgal pa bsdus sam mgal pa sdud dam/ me ma mur glongs pa'i tshe dus la bab po snyam du soms shig /de ltar ma byas na ltung ba re rer 'gyur ro/ /dge 'dun chos bzhin byed pa las sngar dad pa phul nas de'i 'og tu dad pa mi sbyin no zhes smrar mi gnang ba'i gleng gzhi ni mnyan du yod pa na ste/ drug sde las na ba so so dang tha skar skyes ni shi/ tshe dang ldan pa 'char ka ni dgra bcom/ mos pa can ni kau shAm+bI na cang mi byed par 'dug /dga' bo dang bsnyen dga' bo gnyis ni rang bzhin du dge 'dun gyi nang na gnas ste/ de'i tshe tshe dang ldan pa bcu bdun sde shin tu 'bad cing brtson pas dar nas de dag gis bgros pa/ 'u bu la sngan chad drug sdes gtses pa lta bu sus kyang ma gtses te/ de'i nang na yang bsnyen dga' bos gtses kyis spang ba'i las byas na/ dga' bo shags mkhas kyis de mi 'ong ba'i thabs shig bya'o snyam nas/ dga' bo gos ngan pa zhig gyon bzhin du 'dug pa gnas brtan gos ngan pa 'di ngas bkru'o zhes nas/ des gos thal ba'i nang du bsgres te byin no/ /de'i 'og tu dge 'dun gyi las bya'o zhes las kyi gaN+DI brdungs te/ dga' bo la ni dad pa blangs nas bsnyen dga' bo dge 'dun gyi nang du bkug ste/ khyod kyis sngon ded la bcu bdun sde'i rgyu mas dze ta'i tshal dkri ba la sogs pa dran nam zhes nas spang ba'i las byas pa dang / de yang ngu zhing dga' bo'i gan du song nas ci'i phyir ngu zhes smras na slob dpon gyis dad pa byin nas ci bya ba dag ni spangs so zhes byas pa dang / khyod la spang ba'i las byed pa de grong dang grong khyer gyi spangs par shog shig /de dag gis nga mi shes te/ nga ma 'dus par las byas pas las 'gal te dad pa slar blang ngo zhes so/ /ngas ma shes kyis dad pa de yang slar byin cig ces smras pas/ dge 'dun tshogs pas chos bzhin du las byas pa las skyo zhing dkrugs te/ dge slong rnams 'phya bar gyur pa las snyan du bdas so/ /dge slong gi bya ba ma yin pa zhes smad nas/ dad pa slar blang du mi gnang bar 'dul ba la bslab pa bcas so/ /yang dge slong zhes bya ba ni shAkya'i bu dga' bo ste/ gzhan yang de dang 'dra ba'o/ /dad pa zhes bya ba ni dge 'dun chos bzhin du las byed pa las mthun pa sbyin no/ /de'i 'og tu zhes bya ba ni dus gzhan no/ /'di skad kyang zer zhes bya ba ni smra ba'o/ /dge slong slar byin khyed la dad pa mi sbyin no zhes bya'i tshig go/ /ltung ba zhes bya ba ni snga ma bzhin no/ /dge slong gis dad pa sbyin nas de'i 'og tu bzlog cing dkrug pa'i tshul du byed de/ khyod la dad pa mi sbyin gyis slar byin cig ces smras na thams cad du ltung bar 'gyur ro/ / bsnyen par ma rdzogs pa dang khyim gcig gi nang du nyal du mi gnang ba'i gleng gzhi ni mnyan du yod pa na ste/ dge slong dag khyim pa la rgyun du chos 'chad par zhugs pa dang / tshes brgyad dang bcu bzhi la chos shod cig ces bka' stsal nas/ 'on kyang mtshan rangs par chos 'chad pas na nad zhugs par gyur nas nam phyed tshun chad tsam shod cig ces byung ngo / /nub gcig char 'bab pas khyim pa la chos bshad pa'i sa de nyid du nyal ba dang / me 'bar bas khyim pa dag gis gsod du ma ster to/ /de na rgan zhugs bsod snyoms pa zhig nyal ba'i rmi lam na bud med dang nyal bar rmis nas mi tshangs par spyod pa'i tshul smras pas/ khyim pa de dag grong du lhags nas 'phya bar gyur te/ dge slong gzhan dag gis ni chos legs par bshad na rgan zhugs des ni ma legs par bshad do zhes snyan du bdas te/ bsnyen par ma rdzogs pa'i gang zag dang khyim gcig gi nang du nub gcig las lhag par nyal du mi gnang bar bslab pa bcas so/ /zhag gnyis gnang du yod pa ni mnyan du yod pa na ste/ tshe dang ldan pa sgra gcan 'dzin phyi rol du spyod du song ba'i phyi na/ de'i gnas khang du dge slong gzhan bgos pas sgra gcan 'dzin gnas med de/ bcom ldan 'das kyi snam phyi sa na 'dug pa dang / de'i nub mo char chen po bab ste/ snam phyi sa dang nye ba zhig na sbrul gdug pa ma rung ba zhig gnas te/ snam phyi sar 'gro bas/ tshe dang ldan pa sgra gcan 'dzin bzung ste shi na ma legs te/ shAkya'i rigs la mi snyan par zer bar dgongs nas bcom ldan 'das kyis phyag brkyang nas/ sgra gcan 'dzin blangs nas bcom ldan 'das kyis gnas khang du bzhag nas/ zhag gnyis bsnyen par ma rdzogs pa'i gang zag dang nyal du gnang ngo / /slad kyis na ba dang nad g.yog zhag lon du mi bde ba las snyan du bdas te/ nad pa dang nad g.yog gnyis ni gnang ngo / /de ltar zhag gnyis las nyal bar ma gnang ba dang / tshe dang ldan pa bsnyen dga' bo zhag gnyis las 'da' bar byed pa dang / don nyung ngu ba'i dge slong rnams 'phya ba las snyan du bdas te/ bkas smad nas zhag gnyis las lhag par nyal du mi gnang bar bslab pa bcas so/ /yang dge slong gang zhes bya ba ni rgan zhugs dang bsnyen dga' bo ste/ gzhan yang de dang 'dra ba'o/ /bsnyen par rdzogs pa'i gang zag dang lhan cig ces bya ba ni bsnyen par rdzogs zhes bya ba ni dge slong pha dang dge slong ma'o/ /de ma gtogs pa gzhan thams cad bsnyen par ma rdzogs pa'o/ /zhag gnyis las lhag ces bya ba thal ba'o/ /khyim gcig gi nang na nyal zhes bya ba ni khyim gang cher g.yogs la kun bskor bar gyur pa de lta bu'i nang du nyal na zhag gsum gyi skya rengs shar na ltung bar 'gyur ro/ /shing drung dang rtsig drung dang phug dang / shing gel ba'i drung du nyal na nyes byas su 'gyur ro/ /nyes pa ni bsnyen par ma rdzogs par 'du shes kyi khyim gcig tu nyal na ltung bar 'gyur ro/ /the tshom na yang ngo / /bsnyen par rdzogs par 'du shes dang the tshom na yang nyes byas su 'gyur ro/ /bar chad kyi chos su mi 'gyur ro zhes smrar mi gnang ba'i gleng gzhi ni mnyan du yod pa na ste/ dge slong a ri ta nyes pa byed pa las/ dge slong dag gis bzlog na ma btub nas/ bcom ldan 'das kyis bshad pa ni ngas shes te/ de ltar spyad kyang bar chad du mi 'gyur ro zhes log par lta ba'i phyir gsol ba dang bzhi'i las kyis bsgo na lta ba bzlog tu ma btub nas snyan du bdas te/ lan gsum du sgo shig ces bka' stsal nas/ lan gsum du bsgo ba las ma btub nas/ rnam grangs du mas smad nas 'dul ba la bslab pa bcas so/ /yang dge slong zhes bya ba ni a ri ta ste gzhan yang de dang 'dra ba'o/ /'di skad du ces bya ba ni smra ba'o/ /bcom ldan 'das ni de bzhin gshegs pa'o/ /chos zhes bya ba ni sangs rgyas dang nyan thos kyis gsungs pa'o/ /bshad ces bya ba ni bsgrags pa'o/ /bar du gcod ces bya ba ni phas pham pa'i chos bzhi gnas bdun shin tu zhi ba'i bar du ste/ ltung ba ris lnga rnams spyad kyang bar du mi gcod ces smra ba'o/ /dge slong zhes bya ba ni a ri ta'o/ /dge slong rnams zhes bya ba ni chos 'di la zhugs pa'o/ /de skad du sgo shig ces bya ba ni tshig 'jam pos bsgo ba'o/ /de ste yang dngos po de gtong ba lta na ni legs de ste yang mi gtong na lan gnyis lan gsum du yang dag par bsgo yang dag par bstan par bya zhes bya ba ni gsol ba dang zhu ba'i las kyis yang dag par bsgo ba la bya'o/ /dang po bar du gcod par mi 'gyur ro zhes zer ba'i tshe na nyes byas so/ /tshig 'jam po bsgo ste ma btub na yang nyes byas gnyis su 'gyur ro/ /gsol ba dang zhu ba'i las kyis bsgo nas mi gtong na nyes byas gsum du 'gyur ro/ /gsol ba dang zhu ba'i las kyis lan gnyis bsgo ste mi gtong na nyes byas bzhir 'gyur ro/ /chos ji lta ba dang 'dul ba ji lta ba dang ston pa'i bstan pa bzhin du lan gsum rdzogs par byas kyang ma btub na ltung bar 'gyur ro/ /chos bzhin du bsgo yang ma tshogs na dge 'dun dang gang zag gnyis ka la nyes byas re rer 'gyur ro/ /tshogs la chos bzhin du ma bsgo na yang ltung bar mi 'gyur ro/ /tshogs la chos kyi gzugs brnyan gyis bsgo ba dang / ma tshogs pa la chos kyi gzugs brnyan gyis bsgo ba ni ltung ba med do/ /de ste dge slong de ltung ba rab tu 'gyod cing ma bshags ma mthol na/ de phyin chad gsol ba dang gnyis kyi las kyis nang du 'jug pa na thams cad du nyes byas so/ /dge slong spangs pa dang lhan cig gtam smra zhing khyim gcig gi nang du nyal du mi gnang ba'i gleng gzhi ni mnyan du yod pa na ste/ dge slong bud bu rdzi a ri ta sdig pa can gyi lta ba gtong du ma btub nas dge 'dun rnams kyis gsol ba dang zhu ba'i las kyis spangs pa'i las byas nas ngu zhing bsnyen dga' bo'i gan du song ba dang / de de dang phrad de/ a ri ta khyod ci'i du phyir ngu zhes byas nas/ bdag ni lhung bzed nag po can gyis spangs so zhes byas pa dang / khyod la spong bar byed pa de dag grong dang grong khyer gyis spangs par shog shig ces nas/ tshe dang ldan pa bsnyen dga' bos/ dge slong a ri ta sdig pa'i lta ba ma spangs te dge 'dun gyis chad pas bcad cing spangs par shes bzhin du bsten cing gnas bca' ba dang / lung 'bogs pa dang gnas khang gcig tu zhag lon pa dang nyal zhing gtam smra bar byed pas dge slong dga' 'phya ba la snyan du bdas nas/ bkas smad de 'dul ba la bslab pa'i gnas bcas so/ /yang dge slong gang zhes bya ba ni bsnyen dga' bo ste gzhan yang de dang 'dra ba'o/ /shes bzhin zhes bya ba ni bdag gis shes pa'am gzhan gyis bsgo ba'o/ /'di skad smra ba'i gang zag ces bya ba ni a ri ta'o/ /chos bzhin ma byas zhes bya ba ni de las ma gyur pa'o/ /ma btang zhes bya ba ni sdig pa de lta bu'i lta bar gyur pa ma btang ba'o/ /gtam zer zhes bya ba ni lung 'bogs pa'o/ /kun du smra zhes bya ba ni 'dris pa'i lung ston pa'o/ /gnas zhes bya ba gnas byin pa'o/ /kun du spyod ces bya ba ni de las bsnyen bkur nyams su len pa'o/ /de dang lhan cig khyim gcig na nyal zhing zhes bya ba ni de dang lhan cig zhag lon te skya rengs shar na ltung bar 'gyur ro/ /nyes pa ni de skad zer ba'i gang zag chos bzhin ma byas pa sdig pa'i lta ba ma spangs pa la gtam byas na ltung bar 'gyur ro/ /kun du gtam byas na yang ltung bar 'gyur ro/ /lhan cig gnas na yang ltung bar 'gyur ro/ /lhan cig spyod na yang ltung bar 'gyur ro/ /'dug na yang ngo / /na ba dang sdig pa'i lta ba spangs pa la nyes pa med do/ /dge sbyong spangs pa dang lhan cig bsten cing 'dug tu mi gnang ba'i gleng gzhi ni mnyan du yod pa na ste/ tshe dang ldan pa bsnyen dga' bo la slob ma dge tshul tsher ma can dang / mchod pa can zhes bya ba gnyis shig yod de/ de'i tshe na dge slong nyon mongs pa ma spangs shing 'dod chags dang ma bral ba dag cig dge tshul de gnyis la tho 'tshams gad rgyangs byed dregs shing rgyug pa la sogs pa byed pa la dus phyi zhig na dge tshul gnyis me tog 'thu zhing 'khod 'khod pa las steng gi nam mkha' la grib ma zhig bab nas bltas na dge slong dag cig nam mkha' la dong ba mthong ste/ khyed su zhes smras na nged ming 'di dang 'di zhes bya'o zhes byas pa dang / khyed ni sngon drug sde dang bdag cag lhan cig tu gnas ngan len spyod spyod na da ci'i phyir khyed de ltar gyur ces byas na/ nged kyis sdig pa'i chos de dag btang ste bshags par bya ba ni bshags/ bsdam par bya ba ni bsdams te/ 'bad bsgrims pas na dgra bcom par byas so zhes byas pa dang / dge tshul de gnyis na re gnas ngan len kun du spyod pa de dag gis kyang dgra bcom pa thob pa la bltas na/ bcom ldan 'das kyis 'dod pa ni bar du gcod par 'gyur ro zhes gsungs pa yang bar du gcod par mi 'gyur ro/ /zhes lta ba skyes nas/ de la dge slong rnams kyis lan gnyis lan gsum du bsgo yang lta ba ngan pa gtong du ma btub nas/ dge 'dun gyi mig lam na yang mi snang bar byas te spangs pa bsnyen dga' bos bsten cing shed bskyed pa dang gnas dang yo byad byin zhing gnas 'char bcug pa dge slong rnams kyis thos te/ dge tshul sdig pa can mig lam na mi snang bar byas te spangs pa dang lhan cig tu gnas par byed do zhes 'phya ba las snyan du bdas te/ gang zag chos bzhin du ma byas pas bsten du mi gnang bar 'dul ba la bslab pa bcas so/ /dge tshul ni tsher ma can dang mchod pa can no/ /'di skad du zer zhes bya ba ni 'og nas 'byung ba'i tshig rnams so/ /bcom ldan 'das ni de bzhin gshegs pa'o/ / chos zhes bya ba ni bcom ldan 'das dang nyan thos kyis gsungs pa'o/ /bar du gcod pa ni 'dod pa'i yon tan lnga la bya'o/ /bsten ces bya ba ni spyod pa'o/ /bar du gcod par mi 'gyur zhes bya ba ni dge sbyong gir mi 'gyur ba ma yin pa'o/ /'di skad smos shig ces bya ba ni tshig 'jam pos bsgo ba'o/ /lan gnyis lan gsum du bsgo ba ni gsol ba dang zhu ba'i las kyis bsgo ba'o/ /dge tshul chos bzhin du mi byed pa mig lam na mi snang bar spangs pa las bsten pa ni shAkya'i bu bsnyen dga' bo ste/ gzhan yang de dang 'dra ba'o/ /shes bzhin zhes bya ba ni bdag gis shes pa'am/ gzhan gyis bsgo ba'o/ /de ltar dge tshul mig lam na mi snang bar byas zhes bya ba ni tsher ma can dang mchod pa can no/ /gzhan yang de dang 'dra ba'o/ /gnas byin zhes bya ba ni de bzhag pa'o/ /yo byad byin zhes bya ba ni lhung bzed la sogs pa'o/ /lung 'bogs zhes bya ba ni gnas sbyin zhing kha don dang klog pa sbyin pa'o/ /khyim gcig tu nyal zhes bya ba ni khyim gyi nang du skya rengs kyis chod pa'o/ /nyes pa ni dge tshul mig lam na mi snang bar byas pa shes bzhin du gnas dang yo byad byin nam lhan cig khyim gcig tu gnas na ltung ba re rer 'gyur ro/ /na ba dang sdig par lta ba las bzlog pa ni ma gtogs so/ /gzhan ni ltung ba gong ma bzhin du sbyor cig /gos kha dog ma bsgyur ba dang tshon chen po la btsos pa gyon du mi gnang ba'i gleng gzhi ni rgyal po'i khab na ste/ de'i tshe na rgyal po gzugs can snying po'i yul khams na klu'i rgyal po ri bo dang dga' skyed ces bya ba gnyis shig gnas pas/ chu dron dang mtsho la sogs pa yang rgyas char yang dus dus su bab pas de'i yul na lo legs shing 'byor to/ /de gnyis klu dga' bo dang bsnyen dga' bo gnyis la zla bltas te/ dus dus su bcom ldan 'das la bsnyen bkur byas pas 'khor 'phel te/ gnas med par rgya mtshor 'dod bar sangs rgyas la gsol na ma gnang ste/ khyed gnyis rgyal po'i yul na gnas pas na rgyal po la gsol cig ces bka' stsal to/ /dus gzhan zhig na de gnyis khyim bdag gi cha lugs su sprul te/ sangs rgyas kyi spyan snga na de gnyis chos nyan cing 'dug pa'i tshe/ rgyal po gzugs can snying po yang bdag der 'ongs nas de gnyis langs snyam nas de 'ongs pa dang / ma langs pas rgyal po yang khros te bcom ldan 'das kyis rgyal po la de'i chos kyang ma bshad do/ /rgyal pos ma shes te/ klu gnyis bskrad pas de gnyis kyang mtsho chen por dong ngo / /de'i tshe na rgyal po'i yul phyogs su mtshe'u dang lteng ka dag kyang bskams char dag kyang dus dus su ma bab pas lo nyes so/ /de nas rgyal pos bcom ldan 'das la ji ltar nongs pa zhus pa dang / rgyal pos klu khyim bdag gnyis shig bskrad pa dran nam zhes bkas rmas na dran no zhes gsol pa dang / de gnyis klu'i rgyal po ri bo dang dga' skyed gnyis yin te de gnyis khros pas rgya mtshor dong bas so zhes byas pa dang / 'o na bcom ldan 'das bdag gi yul du ma rung mod ces gsol pa dang / bzod pa gsol ba'i dus dang phyis de gnyis dang phrad par dus bcom ldan 'das kyis mdzad de/ /de gnyis dang gcig la gcig bzod par byas kyi 'og tu/ klu'i rgyal po gnyis kyis phyir rgyal po'i yul du 'ong bar gsol ba btab na/ nged cag gnas pa'i gnas nyid du nged kyis g.yog cig bzhag gi/ de gnyis kyi khang pa brtsigs shig dus dus su 'ong ngo zhes dus byas so/ /de gnyis spro ba'i rol mo byed pa'i tshe phyogs nas rol mo mkhan cig 'ongs pas/ dge slong ma bcu gnyis sde las byang chub spyod pa mdzad pa'i gar thabs bslabs te byas pas dad pa rnams ni dga' bar byas so/ /ma dad pa rnams dga' zhing mos par bya ba'i phyir/ tshe dang ldan pa mos pa can dang 'char ba lta bur bcos nas gcig gi mdun du gcig tsog tsog por 'dug nas gcig la gcig zas kyi lhag mar byas nas/ thal ba gyo mo gang mgo bor bsnun cing drug sde po la dpyas pas ma dad pa rnams kyang dad par gyur/ drug sde ni mi dga' bar gyur nas/ rol mo mkhan de la gnod bzhig bya bar bsams nas/ lha dang rol mo mkhan gyi cha lugs 'dra bar yo byad dang gos dag sbyar nas la bzla bar bya'o zhes phyogs gcig tu byang chub spyod pa gar thabs sbyar bas/ rol mo mkhan rnams kyang drug sde po rnams yin no snyam du 'phrigs te/ dze ta'i tshal du bsgugs na bsnyen dga' bo'i gdong las tshon zhig 'dug pa mthong ste/ de phyin chad bsnyen dga' bo la gar mi bya ba dang 'phyas mi gdab par gsol ba btab ste/ rngan pa'i brdar rol mo'i cha byad bzhag ste phyis ci rnyed pa drug sde la byin pa dang / gar mkhan mi dga' zhing mi snyan par zer ba las/ dge slong dag gis thos pa snyan du bdas te/ drug sde la rmas te bkas smad nas de lta bas na nyes pa'i dmigs su gyur pa thams cad kyang chos gos kha dog ma bsgyur ba dang / tshon chen po las gyur pas na khyim pa'i ma brtags pa dang / tshon chen po'i gos gyon du mi gnang ba'i 'dul ba la bslab pa'i gnas bcas so/ /yang dge slong zhes bya ba ni drug sde ste/ gzhan yang de dang 'dra ba'o/ /gos zhes bya ba ni gos kyi rgyu rnam pa bdun gsungs pa las gang yang rung ba'o/ /gsar zhes bya ba ni rnam pa gnyis te/ sar pas sar pa dang / gsar du rnyed pas gsar ba'o/ /kha dog rnam pa gsum du bsgyur cing zhes bya ba ni 'og nas 'byung ba'i kha dog rnams las gang yang rung ba'o/ /sngon po zhes bya ba ni rims kyis sngo ba'o/ /dmar po zhes bya ba ni btsag go/ /ngur smrig ces bya ba ni shing shun dang me tog gis bsgyur ba'o/ /ltung ba ni snga ma bzhin no/ /nyes pa ni kha dog rnam pa gsum gang yang rung ba ste/ gcig tu ma bsgyur ba gyon na thams cad du ltung bar 'gyur ro/ /tha na lhung bzed kyi snod yan chad kyang kha dog ma bsgyur bar spyod na thams cad du nyes byas su 'gyur ro/ /tshon chen po brgyad mi gnang ba ni rgya skyegs dang / btsod dang / ma tshal dang / gur gum dang / mthing shing dang / li khri dang / rma shing dang / le brgan tshon te de rnams ma brtags na nyes byas su 'gyur ro zhes pa'o/ /rin po che la reg tu mi gnang ba'i gleng gzhi ni mnyan du yod pa na ste/ de'i tshe tshe dang ldan pa 'char kas yul mi'i byis pa rtsal dang rol mo slob cing sbyor ba'i sar song nas/ de dag gi slob dpon gzhan du song ste mi 'dug pa'i phyi na slob ma rnams gtses te/ de dag la 'phong dang rol mo byed du bcug pa dang ma mgu ste/ bzhin bsgyur cing mig btsums nas khyed kyi mkhan po yang mi mkhas na khyed lta ga la shes te khyed rnams ni phub ma 'phyar ba dang 'dra ste/ 'bras bu med do zhes byas nas/ tshe dang ldan pa 'char kas 'phong rtsa la dang gar thabs dag byas te la bzlas pas byis pa rnams kyang mi dga' nas 'gyod cing 'khod pa dang / de dag gi slob dpon 'ongs pa la bdag cag ni phub ma 'phyar ba dang 'dra ba'o zhes/ 'phags pa 'char ka zer ro zhes byas pa dang / 'di ni yus te 'phags pa 'char ka po ni byang chub sems dpa' rol mo'i tshe yang 'phong rtsal dang / rol mo mkhan gyi mchog yin pas de lta bu ni 'u bus mi lobs mod kyi 'on kyang ngas shes pa tsam slobs shig ces slob ma rnams la bsgo nas/ slob dpon gyis 'char ba yang slan chad mi gtse bar gsol te/ de'i rngan pa'i brdar rol mo dang rtsal gyi cha spyad bzhag pas byis pa rnams mi snyan par 'dzer cing 'phya bar gyur pa dang / slad kyis yangs pa'i grong khyer na lits+tsha bI'i byis pa rnams chu la 'khru ba'i tshe rgyan rnams bkrol te bzhag pa dge slong bsnyen dga' bos gnod sbyin gyi nor ro zhes blangs pa byis pa rnams kyis bsnyags te 'dren pa la/ rgan po zhig gis mthong nas des byas te phyir byin pa dang / byis pas sas gtor ba dang / lha khang du phyin nas dge slong dag gis de la ci nyes zhes dris na/ des kyang de bzhin du gtam byas te/ de lta bu'i nyes pa'i dmigs kyang byung mod kyi de'i tshe 'dul ba la bslab pa'i gnas ma bcas so/ /slad kyis grong khyer yangs pa can na lits+tsha bI'i skyed mos tshal sum cu rtsa gsum pa'i 'dres pa'i tshal dang 'dra'o zhes sangs rgyas kyis bsngags pa drug sde dag gis thos nas/ de ci 'dra ba blta'o zhes nang du zhugs te/ khrus kyi rdzing dang rol mo'i cha spyad dag ma skyes dgra la sogs pa'i dgra cha'i rnga bo che yod de/ tshe dang ldan pa drug sde rnams kyis thog mar ni khrus byas/ de'i 'og tu rnga brdungs pas ma skyes dgra'i dmag 'ong snyam ste lits+tsha bI kun skrag ste skyed mos tshal du lhags so/ /drug sde na re dgra ni med kyi nged kyis ku re zhig byas so zhes byas pa dang / de kun ni rab tu skrag cing dkrugs na/ ci rtsed mo zhig ces mi snyan par zer ba las/ rin po che dang nye ba'i rin po che ste rol mo dang dgra cha la sogs pa len cing spyod do zhes skye bo rnams mi snyan par zer ba snyan du bdas nas drug sde rnams la rmas te/ rnam grangs du mas smad nas rin po che dang / rin po che lta bu la reg tu mi gnang ba'i 'dul ba la bslab pa'i gnas bcas so/ /dge slong zhes bya ba ni drug sde ste gzhan yang de dang 'dra ba'o/ /rin po che zhes bya ba ni nor bu dang / mu tig dang / bai DUr+ya dang / man shel dang / g.yas su 'khyil pa dang / gser dngul la sogs pa'o/ /rin po che lta bu zhes bya ba ni 'thab mo'i mtshon cha dang / rol mo'i cha spyad thams cad la rin po che zhes bya'o/ /rang gi lag gis zhes bya ba ni bdag gis blangs pa'o/ /gnas khang gi nang dang kun dga' ra ba'i nang na 'dug pa ma gtogs pa zhes bya ba ni/ gtsug lag khang dang kun dga'i mtshams kyi nang na 'dug pa'o/ /de yang ri dwags dgra'i ma sa ga bcom ldan 'das la phyag 'tshal du 'ongs pa rko long du gyur du dogs nas rgyan rnams bkrol te sgo'i lkog tu bzhag pa tshe dang ldan pa kun dga' bos mthong nas stor du dogs pas blangs te snyan du zhus pa las slan chad de lta bu de dag long la bdag po ma 'ongs na zhag drug gi bar du zhog cig / de ste yang ma 'ongs na dge 'dun gyi mdzod du brubs shig pa'o/ /ltung ba ni ngan song gsum du ltung ba'o/ /nyes pa ni dge slong gis nor bu dang dung dang man shel dang / gser dang dngul dag blangs na ltung bar 'gyur ro/ /rnga dang rol mo'i cha byad dang gzhu rgyud med pa spyad na nyes byas su 'gyur ro/ /gzhu rgyud dang bcas pa dang mda' mde'u can 'chang na yang ltung bar 'gyur ro/ /dung 'bud pa las blangs na ltung bar 'gyur ro/ /sku gzugs ring bsrel dang bcas pa len na ltung bar 'gyur ro/ /ring bsrel med pa'am ston par 'du shes skyed na nyes byas su 'gyur ro/ /khrus byed du sngar mi gnang ste slad kyis tsha ba'i dus la dgongs nas gnang ba'i gleng gzhi ni rgyal po'i kha na ste/ de'i tshe na rgyal po gzugs can snying po'i yul na chu dron gsum bdog ste/ gcig tu ni rgyal po nyid khrus byed/ gnyis par ni btsun mo'i tshogs rnams khrus byed/ gsum par ni 'bangs rnams khrus byed do/ /de nas rgyal pos bsams pa/ bdag gis bcom ldan 'das kyi dge 'dun la cis kyang bstabs na chu dron gyis ma bstabs kyis dbul lo snyam nas rgyal pos sangs rgyas la chos nyan pa'i rjes la btsun mo 'khru ba ni dge 'dun mo rnams la 'bul/ bdag rang 'khru ba'i rdzing ni dge 'dun la phul te/ bdag 'khru ba'i tshe ni dge 'dun gzhes/ dge 'dun 'khru ba'i tshe ni bdag sdod do zhes nas/ de bzhin du gnang ba dang drug sde rnams kyis kyal ka bya bar bsams te/ ring du thogs par bya ba'i tshe res kyis sbreng zhing khrus byed/ gcig 'khru ba'i tshe gcig grogs byed nas/ rgyal po 'khrur 'ongs pa ring zhig tu bsdad na/ drug sde dag ring du thogs nas gdod skyo nas chu bcus te khrus byas so/ /de nas bcom ldan 'das kyi gan du song ste/ phyag byas nas kha rog ste slar song ngo / /de nas bcom ldan 'das kyis kun dga' bo la smras pa/ rgyal po 'di sngon ni phyag byas nas chos kyang mnyan na/ /da ni chos kyang ma mnyan pas slar song na ci nyes zhes rmas na drug sdes kyal ka 'di lta bu byas pas ma rangs pa 'dra'o zhes gsol nas phyin chad 'khrur mi gnang ngo zhes bcas pa las/ phyis dge slong dag dri ma che zhing mnam nas/ khyim pa dag 'phya zhing khyed dri mas grol thar tam zhes 'phya ba las phyin chad zla ba phyed phyed cing khrus byed par gnang ngo / /dpyid tsha ba'i zla ba gsum ni 'khrur gnang ngo / /slan chad na ba dang rlung dang char gyi tshe dus la ma bab par yang 'khrur gnang ngo / /zla ba phyed phyed cing khrus gyis shig ces bya ba ni dpyid tsha ba'i dus te zla ba phyed kyi rjes la gnang ba'o/ /sangs rgyas ni dngos su zad do/ /de dang 'gal bar byas na dus la bab pa ma gtogs zhes bya ba ni dus ni 'di yin te/ dpyid smad kyi zla ba phyed dang gnyis zhes bya ba ni zla ba phyed dang gnyis na dbyar tshul du 'jug pa'o/ /dbyar gyi dngos po zhes bya ba ni tshul du zhugs nas zla ba phyed kyi bar du ste/ zla ba phyed dang gsum po 'di dag ni rab tu tsha ba'i dus so/ / lhag ma na ba dus zhes bya ba ni dge slong nad kyis btab pa khrus ma byas na 'tsho bar mi 'gyur ro/ /las dus zhes bya ba ni dge 'dun nam mchod rten gyi las te/ phyag dar dang dkyil 'khor ba ko tsam byas na 'khrur gnang ngo / /lam dus zhes bya ba ni dpag tshad phyed dam/ gcig tsam nas slar 'khor ba'o/ /rlung dus zhes bya ba ni tha na rlung gis chos gos kyi tha ma bzlog pa'am/ /lus la char gyi thigs pa gcig gnyis phog pa tsam yang ngo / /dus yin zhes bya ba ni de dang mthun pa'i chos so/ /dge slong khrus byed na dus la bab po snyam du sems la khrus kyis shig ma bsams par byas na ltung bar 'gyur ro/ /dge slong klung chu dang 'bab chu dang / rdzing bu gang yang rung bas khrus byed na lte ba khung gi bar ma phyin gyi bar du ni nyes byas so/ /phyin na ltung bar 'gyur ro/ /gzhan ni skabs gzhan nas 'byung ba dang sbyor cig /ltung ba drug cu pa rdzogs so// //byol song gsod du mi gnang ba'i gleng gzhi ni mnyan du yod pa na ste/ de'i tshe na tshe dang ldan pa 'char ka nang par langs nas/ grong du bsod snyoms la phyin pa dang / mnyan du yod pa na 'phong rtsal slob pa dag cig 'dug par mthong ste/ 'phong slob pa'i slob dpon ni gzhan du song ba'i skabs su slob ma dag gi gan du 'char ka song ste/ des byis pa rnams la khyed 'phong slob pa ni slob pa'i mchog la zhugs pa ni legs te/ ngas lta yis snga 'phong phyi 'phong g.yas kyi 'phong g.yon gyi 'phong dang mda' lnga 'phangs pa dag shes sam mi shes 'phang du bcug na de dag mi shes pa dang / mgo bsgyur lag pa dang bzhin bsgyur te mi mgu nas/ byis pa khyed rnams ni phub ma phyar ba dang 'dra ste don med do zhes nas kho bdag gis bya rog gcig nam mkha' la song ba dang mdas bya rog gi mdun rgyab tu mda' re re 'phangs te bar snang la 'phangs pa'i mda' gcig gis bya rog bsad nas song ngo / /de dag gi slob dpon phyis 'ongs pa dang / de dag sems khong du chud cing 'khod pa la rmas na 'char ka 'dir 'ongs te/ 'di skad ces zer te khyed ni phub ma 'phyar ba dang 'dra ste don med do zhes zer ro/ /de na re de rab tu ma byung na 'dzam bu'i gling na 'phong rtsal de de tsam las mkhas pa med de/ de dang bsdor mi rung gis re zhig ngas ci shes pa tsam slob shig ces bsgo nas/ phyi nas yang gtser dogs nas thabs shig bya bar bsams te slob ma dag la bsgo ba khyed kyis kyang 'char ka po'i 'phong lob pa'i thabs yod kyi bya rog gi ro shing kar thogs la 'char ka gang nas gang du bsod snyoms la 'gro ba'i tshe phyi bzhin du song la 'char ka'i 'phong pa la ltos shig ces sgrogs shig ces byas nas/ de dag gis kyang de ltar byas pa dang / dge sbyong shAkya'i bu ni rngon pa dang 'dra ste/ snying rje med pa'o zhes 'phya bas snyan du bdas nas/ byol song gsod du mi gnang bar 'dul ba la bslab pa'i gnas bcas so/ /yang dge slong zhes bya ba ni 'char ka ste gzhan yang chos 'di la zhugs pa'o/ /ched du bsams zhes bya ba ni srog chags yin par yang 'du shes la gsod sems dang yang ldan pa'o/ /byol song gi skye gnas zhes bya ba ni bya rog ste/ gzhan yang byol song gang yang rung ba'o/ /bsad ces bya ba ni srog dang dbral ba'o/ /nyes pa ni dge slong gis byol song gi skye gnas su gyur pa la/ gsod sems kyis tha na rgya shug gi 'brum bu gcig gam yungs kar gyi 'brum bu gcig gis bsnun te shi na thams cad du ltung bar 'gyur ro/ /dge slong gis dge slong la 'gyod pa bskyed du mi gnang ba'i gleng gzhi ni mnyan du yod pa na ste/ dge slong bcu bdun sde dag drug sde dag gis rgyus mi shes kyi bar du de dag la gnas 'cha' zhing bsnyen bkur byed do/ /de'i tshe 'char kas gcig la las shig bcol na/ khyed ni nged kyi slob dpon ni ma yin zhes ma btub pa dang / 'char kas de dag bskrad de bkye ba dang nad bgros pa bdag cag khong gis brnyas pa ni shes pa chung bas de dag gis brnyas kyis zhes thos pa tshol bar dge slong gzhan zhig gi gan du lung nod cing kha don byed do/ /de nas bsnyen dga' bos byis pa de dag gar song zhes smras pa dang 'char kas de dag ni ngag tu ma btub nas ngas bskrad do zhes byas pa dang / bsnyen dga' bo na re de ni ma legs sbrul nyal ba bslangs pa dang 'dra ba bskrad de ci bya/ bdag cag la gnod par 'gyur ro zhes byas pa dang / 'char ka na re de dag gi bar chad bya bar ngas nus so zhes nas de dag gi gan du song ste byis pa khyed rnams ci byed ces smras pa dang / nged ni thos pa tshol lo/ /thos pas ci bya dbang po smin par 'gyur ro/ /des ci zhig bya zag pa med pa'i shes rab bskyed do/ /des ci bya mya ngan las 'da' ba mngon sum du bya'o/ /'char ka na re khyod kyis thos pa ni ma thos ma thos pa ni thos te/ khyed rnams lo nyi shu ma lon par bsnyen bar rdzogs pas na/ khyed rnams kyang bsnyen par ma rdzogs pa la dge slong dag kyang 'das pa dang bcas pa'o zhes ma gsungs sam/ khyed dge slong du ma gyur na mnyan te ci phan zhes byas pas de dag sems khong du chud de 'gyod cing 'khod pa dang / de dag gi slob dpon 'ongs te khyed ci'i phyir sems shing 'khod ces byas pa dang / 'char ka na re 'di skad zer ro zhes zhib tu smras pa dang / slob dpon na re las dang po la nyes pa med ces gsungs pas na khyed la nyes pa med de/ the tshom ma byed cig ces bsgo'o/ /dge slong rnams ci'i phyir dge slong la 'gyod pa bskyed du gzhug ces 'phya ba las snyan du bdas nas/ bkas rmad de dge slong la 'gyod pa bskyed du mi gnang bar bslab pa bcas so/ /yang dge slong zhes bya ba ni 'char ka ste gzhan yang de dang 'dra ba'o/ /ched du bsams zhes bya ba ni sems kyis bya bar sems pa'o/ /skad cig mi dga' bar bya bar bsams nas 'gyod pa bskyed na thams cad du ltung bar 'gyur ro/ /dge slong ma yin pa phas pham pa la sogs pas dge slong 'gyod pa bskyed bcug na 'gyod pa skyes kyang rung ma skyes kyang rung bzhad gad kyi phyir yang rung ltung bar 'gyur ro/ /tshe dang ldan pa khyod kyis nyi ma dang zla ba spyang kis zin pa dang / tshong dpon dang ded dpon dang nor can de lta bu dag dran nam mi dran zhes smras pa las/ mi dran no zhes smras pa la/ 'on kyang khyod kyis bsnyen par ma rdzogs so zhes 'gyod pa bskyed na thams cad du ltung ba re rer 'gyur ro/ /tshe dang ldan pa khyod ni mkhan po dang slob dpon mi rigs pa las bsnyen par rdzogs pas na dge slong gi dngos po med do zhes bya ba'i 'gyod pa bskyed na ltung bar 'gyur ro/ /sdig par lta ba las bzlog pa'am bcos pa'i phyir ni nyes pa med do/ /mdzub mos ga ga tshil byed du mi gnang ba'i gling gzhi ni mnyan du yod pa na ste/ de'i tshe bcu bdun sde rnams gcig las su bskos na/ kun bsdongs shing grogs byed do/ /phyis gcig la gtsug lag khang skyong gi res la bab nas/ des kyang chos 'chad pa'i stan kun bting nas/ bdag gcig pu gtsug lag khang chag chag gdab pa dang / phyag dar dang gtsug lag khang rgyan gyis brgyan pa la sogs pa kun byas te/ de'i nub mo gcig gis kyang grogs ma byas te sha thang ngo / /bcu bdun po gcig la gcig ltos ltos pa las sus kyang grogs ma byas te/ gcig pus mtshan gcig lus pas nang par de khros pa la kun gyis zan zos kyi bar du bzod par gsol na ma btub nas/ gcig gis ga ga tshil byas na de yang dgod pa dang / thabs de rung ngo zhes kun gyis byas pa dang / rlung gis subs te dus las 'das so/ /de nas de rnams ngu zhing 'khod pa las dge slong dag gis mthong ste 'phya ba las snyan du bdas nas/ ga ga tshil byed du mi gnang bar bslab pa bcas so/ /dge slong zhes bya ba ni bcu bdun sde'o/ /ga ga tshil byed ces bya ba ni g.ya' bar 'gyur ba'o/ /chags bzhin du ga ga tshil byas na sor mo dus reg pa ltung ba yang de snyed do/ /rma dang mdze dang sme ba dang / spu 'khril ba la sogs pa bstan cing 'phrug pa la ni nyes pa med do/ /chu la dga' zhing rtser mi gnang ba'i gleng gzhi ni mnyan du yod pa na ste/ de'i tshe na dge slong bcu bdun sde'i nang na u pA li zhes bya ba las nyon mongs pa thams cad spangs te dgra bcom pa mngon sum du byas so/ /des grogs po dag 'dul bar 'dod nas/ chu bo khyim ldan zhes bya ba'i nang na khrus byed pa'i tshe rtse zhing 'khod do/ /tshe dang ldan pa u pA li ni skam la 'dug go/ /de'i tshe na rgyal po gsal rgyal dang / btsun mo phreng ldan ma gnyis khang pa'i yang thog na 'khod pa bcu bdun sde gcer bur byung nas chu'i nang nas mdzes par rtse zhing 'khod par mthong ngo / /rgyal po gsal rgyal na re btsun mo la khyod kyi sbyin gnas kyi mdzes pa la ltos zhes byas pa dang / btsun mo na re de dag ni na gzhon pa rtse ba ni ngo mtshar mi che/ rgyal po bgres po nyid kyang da rung rtsad mo mi gtong na zhes byas so/ /de nas tshe dang ldan pa u pA lis bdag cag chu la rtse ba la mi dag mi dga' ba med grang zhes ting nge 'dzin du zhugs te brtags na/ rgyal po gsal rgyal ma dad par mthong nas/ rgyal po dga' zhing dad par bya ba'i phyir dge slong gzhan dag chos gos la 'jur bcug ste/ steng gi nam mkha' las rgyal po'i steng na mar lding ste dong ba las btsun mos grib ma zhig mthong ste bltas na/ u pA li la sogs pa bcu bdun sde rnams te/ btsun mo dga' nas rgyal po la ngan bu'i sbyin gnas mdzes pa la gzigs zhes byas pa dang / rgyal po na re de dag dgra bcom pa thob kyang rtsed mo ma btang na/ ci mdzes zhes 'phya ba las btsun mos snyan du gsol nas/ bcom ldan 'das kyis smad nas chu la rtser mi gnang bar bslab pa bcas so/ /dge slong zhes bya ba ni bcu bdun sde ste gzhan yang de dang 'dra ba'o/ /chu la rtse zhes bya ba ni rtse bar bsams nas gang lus kyi las dang lus kyi byed pa dang / lus kyis bskyod pa'o/ /ltung ba ni snga ma bzhin no/ /nyes pa ni dgu ste dga' ba dang dga' bar byed du 'jug pa dang / rtse ba dang rtser 'jug pa dang / mgu pa dang mgu bar byed du 'jug pa dang / 'phyar ba dang snyegs pa dang / lus la 'jog par byed du 'jug pa'o/ /dge slong chu la rtse bar bsams nas gos phud de chu'i nang du zhugs te/ chu'i nang du byi'u zul byas sam/ steng du byung ngam/ pha rol tshu rol gyi 'gram du'am/ chur rnga brdung ngam chu'i nang du sbal skad 'byin pa la sogs pa byed na thams cad du ltung ba re rer 'gyur ro/ /chu la bem rdol gyis bsnun tam/ tshod ma'i khu ba dang / 'bras kyi khu ba la ri mo 'dri zhing rtse na nyes byas su 'gyur ro/ /sim zhing bsil bar bya ba dang / rkyal slob pa la nyes med do/ /bud med dang khyim gcig tu nyal du mi gnang ba'i gleng gzhi ni mnyan du yod pa na ste/ de'i tshe na tshe dang ldan pa ma 'gags pa bcom ldan 'das kyi gsung rab la brten te 'bad rtsol bas dgra bcom pa mngon sum du byas so/ /bcom ldan 'das kyi bka' drin bsab cing lan glon pa'i phyir sems can gyi don la ljongs rgyu zhing song ba las nub mo grong zhig tu phyin nas/ dgongs mal med nas grang mi bsten te/ khye'u spyi brtol can gyi khyim du nyol zhes byas pa dang / khye'u spyi brtol can gyis dge slong ma 'gags pa khrid de song nas nub mo der bsnyal ba dang / dge slong yang de na nyal lo zhes sgra kun du grags so/ /de'i nub mo khye'u de'i mas dge slong la zan dang rkang pa bsku ba'i mar gyis bstabs shing / mi tshangs par spyod pa rngod na/ dge slong de yang ma btub bo/ /bud med de yang 'dod chags kyis kun du gnod pas nam phyed na dge slong la bsnyen cing gzung bar byas pa dang / 'phags pa des steng gi nam mkha' la 'phags te/ rdzu 'phrul dang cho 'phrul bstan pa dang de yang dad par gyur te/ zan gyis bstabs pa dang / de yang sgo chod cig dang nang par bza'o zhes nas/ 'phags pa de yang sgo gcod cing nang na 'dug pa dang / bud med de'i ming po gcig cig kyang khyim mtshes gzhan dag dang rtsod cing 'thabs pas na/ khyod kyi sring mos dge slong dag kyang ma shor to byas pa dang de gnyis kyang khros te/ dge slong dang sring mo gnyi ga bsad do zhes ral gri thogs te song ba dang / yul gyi ltad mo la yang mang du lhags nas de sgo phye ste bltas pa dang / 'phags pa ma 'gags pas nam mkha' la rdzu 'phrul byas pa dang / skye bo dag kyang dad par byas so/ /de slar log nas mi rgod lnga brgya lam du btul nas phyir mnyan du yod par phyin pa dang / dge slong dag gis tshe dang ldan pa bde bar 'ongs sam zhes dris na sems can gyi don byas pa ni bde mod kyi/ khye'u spyi brtol can gyi ma'i ming po gnyis kyis had por de'u bsad do zhes byas pa dang / dge slong dag gis snyan du gsol nas bud med dang khyim gcig gi nang du nyal du mi gnang ba'i 'dul ba la bslab pa'i gnas bcas so/ /yang dge slong gang zhes bya ba ni ma 'gags pa ste/ gzhan yang de dang 'dra ba'o/ /bud med ces bya ba ni gang bud med gzhon nu ma mi tshangs par spyod pa 'khrig pa'i chos bzod pa'o/ /lhan cig ces bya ba ni dge slong dang bud med lhan cig tu 'dug pa'o/ /khyim zhes bya ba ni mthar bskor ba dang steng g.yogs pa'o/ /ltung ba ni sreg pa dang btso ba snga ma bzhin no/ /dge slong steng khang na nyal na bud med 'og khang du nyal la/ dge slong des skas phyung shig yang na sgo gtan chug shig yang na bsrung ba'i dge slong zhog shig /de ltar ma byas na skya rengs ma shar gyi bar du ni nyes byas shar na ltung bar 'gyur ro/ /dge slong gcig la gcig sdangs par byed du mi gnang ba'i gleng gzhi ni mnyan du yod pa na ste/ de'i tshe na tshe dang ldan pa bcu bdun sde rnams drug sde rnams la gnas 'cha' zhing bsten tsa pa'i tshe 'char kas gcig la las bcol na ma btub pa las 'char bas bskrad do/ /de dag kyang bdag cag thos pa 'dzin du dong ngo zhes klog pa la zhugs so/ /'char bas de ltar thos pa 'dzin to zhes bsnyen dga' bo la gtam byas pa dang / bsnyen dga' bo na re de ni ma legs te bdag cag la gnod par 'gyur ba'o/ /'char kas bsnyen dga' bo la ngas de dag sngar lobs pa ni brjed la phyi ma la ni mi lobs par bya nus so zhes nas la ba srun mo zhig bzlog ste gyon nas bcu bdun sde me mar dag bus nas klog pa la zhugs pa dang / 'char kas la ba gyon nas 'byung po 'byung po zhes bsdigs pas de dag skrag pas klog pa btang ste 'khod pa dang / de dag gis slob dpon 'ongs pa la byas nas de dag gis 'char ka yin par 'phrigs nas phyi de nub mo gra bzhir mar me bzhi bus te bkab ste bzhag nas 'dug pa dang / yang 'char ka 'ongs te snga ma bzhin du 'byung po 'byung po zhes byas pa dang / de dag gis sgo bcad de mar me phyung ste bzung nas brdegs so/ /de na re nga ni 'char ka po yin zhes smras na/ de dag na re 'char ka po ni de ltar rnam par grol ba'i bsam gtan la 'dug na 'dir ci 'dod ces brdegs nas shin tu snad do/ /nang par lus mar gyis skud cing mnye ba las dge slong gzhan dag gis ci nyes zhes dris na ngas de bzhin du bsdigs pa las khong gis brdegs de snad do zhes byas pa dang / don nyung ba'i dge slong dag 'phya ste ci'i phyir dge slong gis dge slong la sngangs par byed ces 'phya ba las bslab pa bcas so/ /yang dge slong gang zhes bya ba ni 'char ka ste gzhan yang de dang 'dra ba'o/ /dge slong 'di zhes bya ba ni chos 'di la zhugs pa'o/ /sngangs par byed ces bya ba ni bdag gis byed pa'o/ /byed du bcug ces bya ba ni gzhan la'o/ /tha na rtsed mor bsams zhes bya ba ni rtsed mo yang ltung bar 'gyur ro zhe'o/ /dge slong gis sngangs par bya bar bsams nas yid du mi 'ong ba'i gzugs srin mo 'dra ba'am/ yi dwags dang sha za dang grul bum dang / lus srul po lta bu'am/ stag gzig dang 'phar spyang lta bu'am/ kha dog yid du mi 'ong zhing sgra mi snyan pa'i sgo nas/ dge slong la sngangs par byed dam byed du 'jug na yang thams cad du ltung bar 'gyur ro/ /dge slong gis dge slong la sngangs par bya bar bsams nas yid du mi 'ong ba'i gzugs rgyal po dang blon po dang khyim bdag dang tshong dpon dang / nor can dang lha dang klu dang / nam mkha' lding gi gzugs lta bur ston cing de dag khyod la gsod par byed do zhes smras pa las/ dge slong 'jigs par gyur kyang rung / ma gyur kyang rung ste nyes byas su 'gyur ro/ /sems can dmyal ba'i gtam dang byol song dang yi dwags dang lha dang mi'i gtam smras pa la nyes pa med do/ /dge slong gi yo byad dang gos sbed du mi gnang ba'i gleng gzhi ni mnyan du yod pa na ste/ maud gal gyi bus u pA li la sogs pa rab tu byung ste/ bsnyen par rdzogs par byas nas/ drug sde rnams la gnas 'cha' zhing bsnyen bkur byed pa de na khyim bdag cig gis bcom ldan 'das la sogs pa dge 'dun rnams bshos la spyan drangs te/ sangs rgyas bcom ldan 'das 'khor dang bcas pa grong du chos ston la sngar gshegs/ drug sde dang bcu bdun sde ni phyi na mar dben bzhin du 'brangs pa las/ lam gyi bar du gang na rdzing bu zhig chus gang zhing 'dug pa'i gan du phyin pa dang / drug sdes bcu bdun sde la ku re bya bar bsams nas drug sdes smras pa kye bcu bdun sde khyed rnams ni nged cag la shin tu bsngo bar byed na/ chu 'di'i nang du 'u bu cag zhugs la sus chu'i nang du dbugs ring ngu thub pa lta'o zhes byas pa dang / bcu bdun sdes kyang de bzhin du bya'o zhes nas de dag thams cad chu'i gting du zhugs pa dang bsnyen dga' bo de ma thag tu slar byung nas bcu bdun sde'i gos thams cad bsdus nas shing drung gcig tu sbas te bzhag nas/ drug sde rnams rings shing myur bar rdzing nas byung nas bros so/ /de nas bcu bdun sde rnams steng du byung ste bltas na gcig kyang mi snang bar bdag cag pham du dogs nas slar yang chu'i nang du zhugs so/ /slad kyis bltas na drug sde dang gos bcas par mi snang nas tshe dang ldan pa dag bdag c ag la drug sde dag gis ni kyal ka zhig byas so zhes nas gos med de chu'i nang du 'khod pa las de'i tshe na tshe dang ldan pa maud gal gyi bu dang shA ri'i bu gnyis yul rgyu zhing song bas bcu bdun sde rnams gcer bur chu'i nang du 'khod pa mthong nas shA ri'i bus maud gal gyi bu la khyod kyi slob ma mdzes pa la ltos zhes byas so/ /de nas maud gal gyi bus ting nge 'dzin du zhugs te brtags na/ drug sdes gos rnams shing tshang tshing zhig gi nang na sbas pa rnyed do/ /slob ma dag la byin nas zan la dong ba dang dge slong dag zan zos te/ grong nas slar log pa dang lam du phrad nas khyed cag gar ji ltar thogs thogs zhes smras nas/ drug sdes ji ltar byas pa'i gtam byas pa dang / dge slong dag dge slong gis gos sbed ces mi snyan par 'dzer ba snyan du bdas te/ bkas smad nas gos sbed du mi gnang bar 'dul ba la bslab pa'i gnas bcas so/ /yang dge slong gang zhes bya ba ni bsnyen dga' bo ste gzhan yang de dang 'dra ba'o/ /dge slong zhes bya ba ni chos 'di la zhugs pa'o/ /dge slong ma dang dge tshul la sogs pa ming gis smos pa rnams kyi yo byad sbas na nyes par 'gyur gyi gzhan mi 'gyur ba'i don to/ /lhung bzed dang chos gos la sogs pa yo byad smos pa rnams dge slong 'chang du dbang ba'i yo byad sbas na ltung bar 'gyur ro/ /'chang du mi dbang ba sbas na nyes byas so/ /sbed dam zhes bya ba ni bdag gis so/ /sbed du bcug ces bya ba ni gzhan la'o/ /de dang 'dra ba'i rkyen ma gtogs zhes bya ba ni mnyan du yod pa na dge slong gcig la dge slong gcig gis chos gos dag cig bcol ba las/ dge slong de yang rkyen cig byung nas yul gzhan du bos te 'gro ba'i tshe gos sbas nas song ba las slad kyis ltung bar gyur tam ma gyur snyam du the tshom za ba las snyan du bdas nas/ gzhan la gnod par bya ba'i sems med de rkyen byung ba'i tshe sbed pa ni rjes su gnang ba'o/ /mi rgod pa dang rkun pos phrogs su dogs pa lta bu dang / gos stor zhing chus khyer du dogs pa las sbas pa ni nyes pa med do/ /dge slong gis gos gdeng med par gyon du mi gnang ba'i gleng gzhi ni mnyan du yod pa na ste/ de'i tshe tshe dang ldan pa 'char ka ni dgra bcom pa thob/ mos pa can ni kau shAm+bI na 'dug /tha skar skyes dang nab so ni shi/ dga' bo dang bsnyen dga' bo gnyis ni mnyan du yod pa na dge 'dun gyi nang na gnas te/ de yang rgas 'khogs pas nye gnas rnams kyang tshig nyan du ma btub nas/ gos kha dog bsgyur zhing 'tshed par yang mi nus pas thabs shig bya'o snyam nas gnas 'cha' ba rnams gos byin pa ltar byas te/ gos kha dog bsgyur zhing 'tshed du bcug pa dang / de dag gis kyang bden par byin snyam nas/ gos rnying pa thams cad bkrus/ kha dog bsgyur drubs nas 'chang zhing 'khod pa las dus phyi zhig na/ bcom ldan 'das yul gzhan du ljongs rgyu zhing gshegs pa'i tshe de dag kyang zha 'bring du 'gro bar chad de/ gos rnams phyir bsnyen dga' bo nyid la gtams nas dong ngo / /de dag song ba'i 'og tu bsnyen dga' bos gos de dag kun gyon te/ rnyings par byas so/ /de nas de dag phyir 'ongs nas gos bltas na dri ma can du gyur te gos sngon dang mi 'dra'o zhes byas pa dang / bsnyen dga' bo bsnyon to/ /de nas bcom ldan 'das yang yul gzhan du ljongs rgyur gshegs pa'i tshe/ de dag gi gos ngan nas bcom ldan 'das kyis dge slong de dag gos ngan na ci'i phyir zhes smras pa dang / bsnyen dga' bos sngar gos byin te de'i gdeng med par de ltar gyon no zhes zhib tu gsol ba dang / dge slong gi chos ma yin zhes smad de gdeng med par gos gyon du mi gnang bar 'dul ba la bslab pa'i gnas bcas so/ /yang dge slong gang zhes bya ba ni bsnyen dga' bo ste gzhan yang de dang 'dra ba'o/ /dge slong zhes bya ba ni chos 'di la zhugs pa'o/ /gos zhes bya ba ni chos gos gsum po gang yang rung ba'o/ /byin zhes bya ba ni sngar byin pa'o/ /gdeng med ces bya ba ni sngar byin pa'am/ brnyar byin te bgo ba la sogs pa spyad par ma byin pa'o/ /gos gyon pas dga' bar 'gyur ro snyam pa'am/ mdza' bo rnam pa gsum lta bu'i gos spyad pa ni nyes pa med do/ /dge slong la rtsa ba med par dge 'dun lhag mas skur du mi gnang ba'i gleng gzhi ni rgyal po'i khab na ste/ de'i tshe dge slong ma ut+pa la'i mdog sangs rgyas la phyag 'tshal nas/ gyad bu nor bya rgod spungs pa'i ri la 'dug pa'i gan du phyag 'tshal du song ba'i tshe/ gyad bu nor gyi chos gos rlung gis bdas pa/ ut+pa la'i mdog gi mgo la reg pa mdza' bo dang sa can gnyis de'i nye 'khor na phyag dar khrod 'khru zhing 'dug pas mthong nas/ sa can na re cod pan la reg na lhag mar 'gyur ro zhes bka' stsal na/ da ni gleng ba'i dus la bab po zhes byas pa dang / mdza' bo na re sngar kyang bdag cag gis skur pa btab pa las do spangs na/ da yang ci spangs par 'dod dam zhes pa dang / sa can na re sngon ni mi bden pas so/ /da ni bden yang rung zhes glengs pa dang / dge slong gnas brtan dag gis dam du smos shig ces bka' stsal nas/ dge slong gnas brtan dag gis zhib tu smras pa dang / bdag cag gis skur pa btab pa bden no zhes khas blangs pa dang / don nyung ba'i dge slong dag 'phya ba las snyan du bdas te/ rtsa ba med pa'i lhag mas skur du mi gnang bar 'dul ba la bslab pa'i gnas bcas so/ /yang dge slong gang zhes bya ba ni mdza' bo dang sa can te/ gzhan yang de dang 'dra ba'o/ /zhe sdang can zhes bya ba ni zhe sdang ma spangs pa'o/ /khros zhes bya ba ni yi ma rangs pa'o/ /dge slong gtsang ma zhes bya ba ni gyad bu nor te zhes gzhan yang de dang 'dra ba'o/ /rtsa ba med ces bya ba ni rtsa ba gsum ste/ mthong ba'i rtsa ba dang / dogs pa'i rtsa ba dang / thos pa'i rtsa ba med pa'o/ /dge 'dun gyi lhag ma zhes bya ba ni/ dge 'dun gyi lhag ma bcu gsum po'i nang nas gang yang rung ba'o/ /skur ces bya ba ni klang btab pa'o/ /ltung ba ni ngan song gsum du'o/ /nyes pa ni phas pham par gyur pa lhag mar gyur pa las ji skad du 'byung ba bzhin du 'dir yang sbyor cig/ / skyes pa med par bud med dang lhan cig 'gror mi gnang ba'i gleng gzhi ni mnyan du yod pa na ste/ de'i tshe rgyal po'i khab na tha ga pa zhig gnas pa de mnyan du yod pa na khyim bdag cig 'dug pa'i bu mo chung mar blangs so/ /de yang khro zhing gtum pa zhig pas/ rtag tu brdegs pas bros te 'gro'o snyam nas/ khyim mtshes rgan mo zhig la byas pa dang / rgan mo na re bu mo ma bros shig dang / ngas tha ga pa la ma brdegs shig par bsgo'o zhes nas de'i tshe ma bros so/ /slad kyis tha ga pa yang ra ro ste/ chang srin can zhig pas brdegs pa dang / bu mo de yang mnyan du yod par bros te song ngo / /tha ga pas kyang phyi bzhin du bsnyags pa dang / dge slong zhig mnyan du yod par 'gro ba dang 'grogs te song ba mthong nas/ 'phral du gzung du ni bdag gcig pu/ khong ni gnyis pas bdag gis mi gzung ngo snyam nas de tha ga pa'i grong nas tha ga pa rnams la nga'i chung ma shAkya'i dge sbyong gis 'phrogs kyis grogs gyis shig ces byas pa dang / tha ga pa rnams ni yong gis kyang blo rtsing bas/ dge slong de bzung nas shin tu brdegs nas lhung bzed dang / khar gsil ni bcag chos gos ni dral te de'u shi ba las/ tha ga pa dag gis bzod pa gsol te dge slong mnyan du yod par phyin pa dang / dge slong gzhi pa rnams kyis bde bar 'ongs sam zhes byas pa dang / lan du de lta'i phyir brdegs te de'u shi'o zhes byas pa dang / ci'i phyir bud med dang gzhan du 'grogs shing 'gro zhes dge slong dag 'phya ba las snyan du bdas nas 'dul ba la bslab pa'i gnas bcas so/ /skyes pa med ces bya ba ni skyes pa gzhan med pa'o/ /bud med ces bya ba ni rgya rna ru bzod pa'o/ /lam du zhugs zhes bya ba ni 'gro ba'o/ /tha na grong bar phyin par zhes bya ba ni grong khyer gcig nas gcig tu brgyud de song ba'o/ /nyes pa ni rgyang grags re re zhing ltung bar 'gyur ro/ /rgyang grags phyed phyed cing nyes byas su 'gyur ro/ /bud med kyi bsel byas pa dang lam mtshon byas pa la nyes pa med do/ /ltung ba bdun cu pa rdzogs so// //dge slong mgron pa zhig rkun ma dang lhan cig 'grogs shing 'gror mi gnang ba'i gleng gzhi ni mnyan du yod pa na ste/ de'i tshe dge slong zhig rgyal po'i khab na dbyar zla ba gsum tshul du zhugs nas dbyar zla ba gsum 'das nas tshul nas byung ste/ mnyan du yod par 'gro ba'i grogs med de grogs tshol ba las/ tshong pa shog ma las 'byol ba dag cig mnyan du yod par 'gro ba dang phrad nas de dag dang 'grogs te gseb lam du zhugs te dong ba dang / dge slong dag tshong pa de dag pas cung zad sngar song ba dang / shog gam pa dag gis tshor nas sngar mdun du bsgugs te/ dge slong de mdun nas dpags te 'gro ba de dag gis mthong nas/ sngan chad kyang dge slong des lam drangs so zhes nas shin tu brdegs nas chos gos kyang dral lhung bzed kyang bcag go/ /de nas dge slong de mnyan du yod par bde bar 'ongs sam zhes dge slong de dag gis smras na/ de ltar gyur pa zhib tu byas pa dang / dge slong dag ci'i phyir 'gron pa rkun ma dang 'grogs zhes dge slong dag 'phya ba las snyan du bdas nas/ bkas smad de 'gron pa rkun ma dang 'gror mi gnang bar 'dul ba la bslab pa'i gnas bcas so/ /dge slong zhes bya ba ni chos 'di la zhugs pa ste/ rgyal po'i khab nas mnyan du yod par 'gro ba'o/ /rkun po zhes bya ba ni sho gam lam byol ba'o/ /lam zhes bya ba ni dgon pa'i lam mo/ /nyes pa ni rgyang grags re re zhing ltung bar 'gyur ro/ /phyed phyed cing nyes byas so/ /lo nyi shu ma lon pa'i gang zag bsnyen par rdzogs su mi gnang ba'i gleng gzhi ni mnyan du yod pa na ste/ de'i tshe maud gal gyi bus bcu bdun sde lo nyi shu ma lon par rab tu phyung shing bsnyen par rdzogs par byas pa dang / de dag nub mo zan ma byin pa dang grang ba dang / bkres pa dang rlung dang / bru bas gzir bas na/ kun dga' ra ba'i nang na ngu zhing ca co 'don pa snyan du bdas nas/ de dag su yin zhes smras pa dang / tshe dang ldan pa maud gal gyi bus bcu bdun sde lo nyi shu ma lon par bsnyen par rdzogs par byas pas byis pa gzhon nu grang ba dang / bkres pa mi bzod pas ngu'o zhes gsol ba dang / ci dge slong gis gang zag lo nyi shu ma lon par dge slong gi dngos po byed dam zhes smad nas slan chad mi gnang bar 'dul ba la bslab pa'i gnas bcas so/ /dge slong zhes bya ba ni maud gal gyi bu ste/ gzhan yang de dang 'dra ba'o/ /lo nyi shu ma lon zhes bya ba ni lo nyi shu ma tshang ba'o/ / bsnyen par rdzogs zhes bya ba ni gsol ba dang bzhi'i las kyis so/ /gang zag de yang bsnyen par rdzogs par mi 'gyur ro zhes bya ba ni dge slong gi dngos po gang yin pa'o/ /dge slong 'di dag smad pa'o zhes bya ba ni dge slong 'di na 'khod pa na bsnyen par rdzogs par byed pa rnams so dge slong gis lo nyi shu ma lon pa'i gang zag lo nyi shu ma lon par 'du shes pa dang / the tshom za na ltung ba re rer 'gyur ro/ /lo nyi shu lon nam ma lon zhes dris shig /dris te ma lon zhes zer ba bsnyen par rdzogs na ltung bar 'gyur ro/ /dge 'dun la ni nyes byas su 'gyur ro/ /da nas bsnyen par rdzogs zin pa'i 'og tu lo nyi shu ma tshang bar dran na ma'i mngal tshun chad rtsis shig / de ste yang ma tshang na phob shig de nas slad kyis bsnyen par rdzogs par gyis shig /de ltar ma byas na gang zag de rkun gnas su gyur pa yin gyis dge 'dun gyi nang na gnas par mi bya'o/ /lo nyi shu tshang la nyi shu tshang bar 'du shes pa ni nyes pa med do/ /dge slong sa rkor mi gnang ba'i gleng gzhi ni mnyan du yod pa na ste/ de'i tshe na dge slong drug sde po rnams rang gis sa rko zhing rkor 'jug /yur ba byed byed du 'jug pas mu stegs can rnams kyis khyim pa dang bye brag ci yod ces 'phya' ba las snyan du bdas nas/ bkas smad de sa rkor mi gnang bar 'dul ba la bslab pa'i gnas bcas so/ /yang dge slong zhes bya ba ni drug sde ste gzhan yang de dang 'dra'o/ /sa rko zhes bya ba ni bdag gis so/ /rkor 'jug ces bya ba ni gzhan la bcol ba'o/ /sa zhes bya ba rnam pa gnyis te/ 'thas pa dang ma 'thas pa'o dge slong gis sa 'thas pa brkos na ltung bar 'gyur ro/ / sa la bris sam sa la brkos sam/ sa las blangs na ltung bar 'gyur ro/ /sa la phur ba btab pa dang / yur ba drangs pa dang / sa bkogs pa dang / rtsig pa la phur ba btab na ltung bar 'gyur ro/ /rtsig pa la ri mo bris sam/ rtsig ngogs tsan zos pa'i sa bud pa dang / 'dam rdzab [(]gyi [,]kyi [)]nang ril ba bzhag pa phyung ba dang / sa gram pa can brkos na thams cad du nyes byas re rer 'gyur ro/ /bye ma mang po la yang nyes byas so/ /skar ma'i cho ga la bab pa la las sar byed pa'i dge slong des rung bar byed pa'i mi med na sa sor bzhi yan chad phur bas btab pa la nyes pa med do/ /dge slong zla ba bzhir mgron du byas pa las ring du gnas su mi gnang ba'i gleng gzhi ni grong khyer ser skya'i gnas na ste/ de'i tshe na shAkya ming chen gyis bcom ldan 'das la sogs pa nyan thos kyi 'khor rnams zla ba bzhir bshos dang gzims cha la sogs pa sbyar nas/ mgron du gnyer cing zhal zas kyis bstabs pa'i tshe/ drug sde po rnams zla ba bzhi las 'da' bar bya ba'i phyir thabs su sbyar nas/ res kyis na zhing res kyis nad g.yog byed de/ zla ba bzhi tshang nas mjug gcod kyis gyes ston byas nas/ bcom ldan 'das dang dge slong rnams dong ba'i 'og tu drug sde rnams nad g.yog rnams ma thob ste skal ba 'dod do zhes byas pa dang / khyim bdag rnams kyis smras pa/ de dag kun gyis te tshogs kyang bshig nas/ zla ba bzhi ste rgyu med do zhes byas pa dang / drug sde po dag khros nas ci shAkya ming chen gyis ming tsam mgron du byas pas chog gam/ de tsam gyis chog na ni nged kyis kyang nyi ma re re sbyor nus so zhes nas med du mi rung bar bslangs pas khyim bdag dag 'phya zhing mi dga' bar gyur ba las zla ba bzhi las slong zhing 'dug tu mi gnang bar 'dul ba la bslab pa'i gnas bcas so/ /zla ba bzhi zhes bya ba ni zla ba bzhi las ring du mi 'da' ba'o/ /dge slong zhes bya ba ni drug sde ste/ gzhan yang de dang 'dra ba'o/ /mgron du zhes bya ba ni mgron du gnyer zhing bos pa'o/ /bdag gir gyis shig ces bya ba ni zla ba bzhi'i bar du khas blangs pas bdag gir bya'o/ /de las 'das na zhes bya ba ni zla ba bzhi las lhag pa'o/ /so sor mgron du byas pa ma gtogs zhes bya ba ni so sor mgron du byas pa yin te/ zla ba bzhi las yol yang dge slong kha cig so sor tha dad par bos pa'o/ /yang dang yang mgron du byas pa ma gtogs zhes bya ba ni de ltar dge slong de dag yang dang yang mgron du byas pa'o/ /rtag tu mgron du byas pa ni dge slong dag la yon bdag gis rtag tu mgron du byas shing bstabs pa'o/ /de ni dus so zhes bya ba ni de dang mthun pa'i chos so/ /ltung ba zhes bya ba ni ngan song gsum du'o/ /nyes pa ni dge slong la mi zhim pa'i zas shig bstabs pa las zhim po zhig bslangs na slong ba'i tshe nyes byas so/ /zos na ltung bar 'gyur ro/ /dge slong la zhim po zhig bstabs pa las mi zhim pa zhig bslangs pa ni nyes so/ / zos na nyes med do/ /ci 'dod ces bstabs pa las bslangs pa ni nyes med do/ /dge slong gis dge slong la bslab pa 'di la slobs shig ces bsgo ba las bslab pa 'di la mi slob po zhes pa'i gleng gzhi ni rgyal po'i khab na ste/ sngon chad ni bcom ldan 'das kyis nyan thos dge slong pha dang ma rnams kyi spyir 'dul ba la bslab pa'i gnas bcas pa na spyir bsogs nas tshogs pa la 'dul ba la bslab pa'i gnas bcas so/ /zla ba bzhir mgron du gnyer ba las 'dar mi gnang ba las/ dge 'dun sde gnyis phyir 'phya ba yin te/ bslab pa 'di la 'phya ba'i tshe dge slong rnams ma 'dus nas bsgor 'gro ba'i tshe drug sde la bsgo na/ glen pa khyod kyi tshig gis nged mi slob po zhes zer ro/ /de nas dge slong ma bcu gnyis sde la bsgo na yang mi slob po zhes zer ro/ /skye dgu'i bdag mo gau ta mI la bsgo na/ bcom ldan 'das kyi bka' ni gus par spyi bos nod do zhes mnos so/ /lam bstan phyir 'khor nas kun dga' bos bsgo'am zhes dris nas/ bsgo ni bsgo na glen pa'i mi zhes khur blangs so/ /ci nyes zhes smras na drug sde dang bcu gnyis sde ni glen pa khyod kyi tshig gis slobs shig pa ni mi nyan to zhes 'dzer to/ /de skad zer ba dge slong rnams 'phya ba las snyan du bdas te/ drug sde rnams la bkas smad de/ de skad smrar mi gnang bar 'dul ba la bslab pa'i gnas bcas so/ /yang dge slong zhes bya ba ni drug sde ste gzhan yang de dang 'dra ba'o/ /dge slong rnams kyis zhes bya ba ni chos 'di la zhugs pa rnams so/ /bslab pa 'di la slobs shig ces bya ba ni/ phyis bslab par bya ba'i chos de la byas te slobs shig par bsgo ba'o/ /byis pa mi mkhas zhes bya ba ni mi gsal ba'o/ /mi mkhas pa zhes bya ba ni mdo sde dang 'dul ba dang ma mo mi shes/ nyes pa ni bslab pa 'di la slobs shig ces bsgo ba las byis pa mi mkhas mi gsal ba zhes zer zhing slob tu mi btub na thams cad du ltung bar 'gyur ro/ /'dul ba dang ldan pa'i chos kyis slobs shig par bsgo ba las mi nyan na ltung ba'o/ /mdo dang ma mo lta bus bsgo ba las mi nyan na ni nyes byas so/ /glen zhing mi mkhas pa byis pa lta bu ni nyes med do/ /dge slong 'thab mo byed pa la nyen du mi gnang ba'i gleng gzhi ni mnyan du yod pa na ste/ dge slong drug sde po rnams sde zhig nas cang mi smra bar 'khod pa'i tshe na/ bcu bdun sde rnams dar te kha cig ni mdo sde 'dzin kha cig ni 'dul ba 'dzin kha cig ni ma mo 'dzin to/ /de dag nang bgros pas bdag cag la drug sdes gtses pa ltar sus kyang ma gtses/ de'i nang nas yang bsnyen dga' bos gtses kyis/ bsnyen dga' bo spang ba'i las bya'o zhes gros byed pa dang / bsnyen dga' bo yang 'jab cing nyan te/ de dag khang pa'i nang na gros byed na bsnyen dga' bo yang sgo na nyan/ gtsug lag khang du gros byed na skar khung na nyan pa dang / de dag gros byed pa bsnyen dga' bos thos nas/ khyed 'dra bas nga la spang ba las glang po che bcings pas ni glang po che gsod nus kyis/ gres thag gis ni glang po che bcing bar mi nus te/ btang na ni btang du zad mi btang na nan thur cher bya'o zhes byas pa dang / de dag gis kyang spang ma nus nas nged gros byed pa khyed ji ltar thos zhes byas pa dang / ci'i phyir dge slong 'jab cing nyan ces 'phya ba las snyan du bdas nas bkas smad de nyan du mi gnang bar bslab pa bcas so/ /yang dge slong gang zhes bya ba ni bsnyen dga' bo ste/ gzhan yang de dang 'dra ba'o/ /dge slong rnams zhes bya ba ni chos 'di la zhugs pa'o/ /'thab pa dang rtsod pa dang mi mthun par 'gyur ro zhes bya ba ni bdag gi phyogs dang gzhan gyi phyogs tha dad du 'khod pa'o/ /cang mi smra bar bzhabs te nyan cing 'dug ces bya ba ni cang mi zer bar 'jab pa'o/ /de dag ci zer nyan nas de lta de lta bur sta gon bya'o zhes bya ba ni snga nas bsams shing sbyar ro snyam mo/ /rkyen de nyid ces bya ba ni gzhan ma yin pa'o/ /ltung ba ni ngan song gsum du'o/ /nyes pa ni dge slong bar khang ngam sgo khang ngam/ khyams sam dgar 'am yang thog kyang rung ste/ dge slong gros byed pa mthong na/ dge slong des rkang pa'i sgra'am se gol gyi sgra gtogs shig /yang na mgul pa bsal ba'i sgra phyung shig /se gol dang / mgul pa bsal ba'i sgra ma phyung la de dag gi sgra thos na nyes byas so/ /don khong du chud na ltung bar 'gyur ro/ /'khrugs par bya ba ma yin la zhi bar bya ba'i phyir 'ong ba ni ltung ba med do/ /dge slong gros byed pa las cang mi smra bar 'gror mi gnang ba'i gleng gzhi ni mnyan du yod pa na ste/ de'i tshe drug sde po las dga' bo dang bsnyen dga' bo gnyis dge 'dun gyi nang na 'dug pa dang / bcu bdun sde la sngan chad gtses pas/ bsnyen dga' bo bcu bdun sdes spangs pa'i las byas na/ dga' bos shags gdab cing non bya bar bshams nas/ bcu bdun sdes khyod kyang spang 'dod dam zhes bsdigs na/ de yang la ba gyon pa'i khri'i steng na bzhag ste/ kha rog langs te song ngo / /de nas bsnyen dga' bo spangs nas ngu zhing song nas dga' bo la khyod kyis nga'i non ma byas so zhes smras pa dang / bsnyen dga' bo khyod gzhes nas mi 'dug par las byas pas na mi mthun par byas pas na mi btsan no zhes zer ba las/ don nyung ngu ba'i dge slong dag 'phya ba las snyan du bdas te/ phyin chad dge 'dun chos bzhin las byed pa dang / kha rog ste 'gror mi gnang bar bslab pa bcas so/ /dge slong zhes bya ba ni dga' bo ste gzhan yang de dang 'dra ba'o/ /dge 'dun rnam par gdon mi za ba'i gtam 'dzer ba ni gsol ba dang zhu ba'i las gnyis dang gsol ba dang / bzhi'i las byed do/ /stan las langs te 'gro zhes bya ba ni thos pa'i nyan 'khor spangs pa'o/ /dge slong 'khod pa las ma smras zhes bya ba ni dge slong de na su 'khod pa rnams la ma smras pa'o/ /rkyen ma gtogs zhes bya ba ni nad pa dang / nad g.yog dang gzhang nad can rnams so/ / yang na bshang gci la nye 'khor las ma 'das pa'o/ /ltung ba ni ngan song gsum du'o/ /dge slong mi gus su mi gnang ba'i gleng gzhi ni rgyal po'i khab na ste/ de'i tshe na dge slong mang zhig 'dun khang du 'dus nas/ de ni chos so de ni 'dul ba'o/ /de ni ston pas bstan pa'o/ /zhes dge slong dag rtsod pa zhi ba'i las byed pa'i tshe/ ba lang nyal gyi bu dge slong nag po zhes bya ba dge 'dun chos bzhin du smra ba la nyan du mi btub/ kho bo 'ba' zhig gis dge 'dun la las byar rung ngo zhes bzlog /dge 'dun gyis chos bzhin ma byas so zhes kha ngan zer/ dge slong mkhas pa gzhan dag gis bsgo na yang tshig ma rdzogs par slar bzlog / nyan du mi btub na gus par mi byed pas na don nyung ngu ba'i dge slong rnams 'phya ba las snyan du bdas nas nag po la bkas smad nas mi gus su mi gnang bar 'dul ba la bslab pa'i gnas bcas so/ /mi gus zhes bya ba ni rnam pa gnyis te/ dge 'dun dang gang zag la'o/ /de la dge 'dun ni de bzhin gshegs pa'i nyan thos kyi dge 'dun te/ de dag gis bsgo ba la mi nyan pa'o/ /gang zag ni slob dpon dang mkhan pos bsgo ba las mi nyan pa'o/ /de la nyes pa ni dge 'dun gyi las byed pas 'dug shig ces bsgo ba las mi 'dug na ltung ba'o/ /song shig bsgo ba las 'dug na ltung ba'o/ /gnas khang dang mal cha ma len cig ces bsgo ba las len na ltung bar 'gyur ro/ /ji ltar las byed pas bsgo ba la ma gus pa bzhin du slob dpon dang / mkhan po la ma gus na yang nyes byas re rer 'gyur ro/ /ltung ba ni ngan song gsum du'o/ /chang 'thung du mi gnang ba'i gleng gzhi ni mnyan du yod pa na ste/ de'i tshe na yul sbal dkar can na khyim bdag rtogs ldan zhes bya ba zhig yod de de la bu chung zhig btsas te/ khye'u'i ming yang legs 'ongs su btags so/ /nam legs 'ongs btsas pa'i tshe na pha dang ma dang / gnyen bshes dang bran g.yog kun kyang dus las 'das te/ kha cig ni bros nor phyugs dang longs spyod dag kyang 'gribs te med par gyur to/ /legs 'ongs yang mu to ba byed de slong mo spyod pa'i tshe mu to ba gzhan rnams kyis kyang mi 'dod cing brdegs so/ /de yang 'khyams 'khyams pa las sangs rgyas dang phrad de/ bcom ldan 'das kyis lhung bzed kyi lhag ma yang byin/ legs par gsungs pa'i chos 'dul ba la yang rab tu phyung ngo / /de yang 'bad brtson pas dgra bcom pa mngon sum du byas so/ /de'i tshe na yul sbal dkar can na klu am b+ha zhes bya ba mu stegs can yul te phyogs kyi skye bo mang po la gtse zhing gnod pa mi sha za ba zhig gnas pa de/ thul cig par legs 'ongs la bcom ldan 'das kyis bka' stsal nas/ legs 'ongs kyis kyang klu de btul bas na yul phyogs rang gi yul du legs 'ongs kyi yon tan grags pa'i phyir bcom ldan 'das legs 'ongs dang / yul de phyogs su gshegs pa dang yul de'i bram ze dang skye bo mang pos/ bcom ldan 'das la sogs pa la bshos gsol te tshim par byas so/ /legs 'ongs kyi pha dang mdza' ba'i bram ze zhig gis zan byin nas/ zan zhu bar bya ba'i phyir glang po la blud pa'i chang gi nang du mdzub mos smyugs te phabs dang bsres pa byin pas na de yang srang gi grib ma yol gyi bar du sa la ma 'gyel to/ /nam grib ma med de thang la byung ba de na nyi mas lus la phog pa dang chang gi mthus sa la 'gyel to/ /bcom ldan 'das kyis lo ma'i spyil po zhig byas te de'i steng du bzhag go/ /'khor gyi dge slong rnams la bka' stsal pa/ dge slong legs 'ongs klu am b+ha 'dul nus pa da der sbrul gyi phru gu dang sbal pa yang 'dul mi nus so zhes nas legs 'ongs bslangs nas khyod ci nyes zhes bka' stsal pa dang / bdag ni ma brtags pas so zhes gsol pa dang / de bas na dge slong dag nyes pa'i dmigs su gyur pa ni chang 'thungs pa las gyur pas na/ dge slong chang 'thung du mi gnang bar 'dul ba la bslab pa'i gnas bcas so/ /'bru'i chang zhes bya ba ni 'bru las gyur pa dang phye las gyur pa ste phabs dang bsres pa'o/ /'bras bu'i chang zhes bya ba ni rtsa ba las gyur pa dang / sdong bu las gyur pa dang / me tog dang lo ma las gyur pa ni 'bras bu'i chang zhes bya'o/ /'thung ba zhes bya ba ni mgrin par mid pa'o/ /ltung ba ni ngan song gsum du ltung ba'o/ /nyes pa ni dge slong gis chang gi kha dog dang / chang gi dri dang chang gi khu ba 'thungs te myos par gyur na ltung ba'o/ /ma smyos na nyes byas so/ /dge slong gis 'bras bu'i chang gi dri dang chang gi khu ba 'thungs te myos par gyur na ltung bar 'gyur ro/ /myos par ma gyur na nyes byas so/ /chang gi kha dog lta bu dang / tsha lta bu la nyes pa med do/ /chang gi snyigs ma dang gar po 'thungs na ltung bar 'gyur ro/ /phabs zos na nyes byas su 'gyur ro/ /dge slong dus ma yin par grong du 'gro bar mi gnang ba'i gleng gzhi ni mnyan du yod pa na ste/ de'i tshe na khyim bdag zhig la bu mo zhig yod de/ de yang pha'i phyi bzhin du 'brangs shing gtsug lag khang du song ba las/ tshe dang ldan pa 'char kas bu mo de bzung nas 'o byas pa las bu mos pha la sbran te/ de gnyis kyis 'char kas mi tshangs par spyad pa skad du bram ze kun sbran nas/ bram ze'i dmag gis bskor te/ 'char ka rgyal po gsal rgyal dang / btsun mo'i gan du shags la khrid pa dang / rgyal pos btsun mo phreng ldan ma la 'char kas nyes sam ma nyes rtog tu bcug pa las/ btsum mo dang blon pos brtags na 'char kas ma nyes par gyur te/ lhag ma tsam zhig byung bar zad pas bu mo dang / pha dang bram ze rnams ni 'phral la chad pas bcad do/ /btsun mos 'char ka la bsgo ba slan chad de lta bu'i bag med pa mdzad pa mi rigs so zhes bsgo ba dang / 'char ka yang de'i mod la ngo tsha nas bcom ldan 'das kyi gan du 'gro ma nus te/ tshe dang ldan pa shA ri'i sras po'i gan du song nas sngar nyes pa byung ba rnams bshags shing 'gyod de bdag legs par gsungs pa'i chos 'dul ba la rab tu byung yang nyes pa sha stag byung ste/ da ni 'khor bas skyo nas/ da slan chad 'khor bar mi skye ba'i thabs cig gnang zhes gsol nas tshe dang ldan pa shA ri'i bus kyang 'char ba la chos bshad pas 'char kas kyang 'bad cing brtson pas dgra bcom pa mngon sum du byas so/ /de nas 'char kas bsams pa bcom ldan 'das kyi bka' drin lan glan pa'i phyir sems can gyi don la 'gro'o snyam nas/ sems can gyi don mang zhig ni byas so/ /dus phyi zhig na mnyan du yod pa na bud med gtum mo zhes bya ba zhig yod de de'i bu 'char ka dang mdza' bas rtag tu der 'gro zhing chos 'chad do/ /phyi zhig na gtum mo'i bu yul gzhan du song ba'i 'og tu 'char ka yang de'i chung ma'i gan du 'gro zhing chos 'chad do/ /de'i chung ma de mi rgod dpon po dang nyal ba 'char kas tshor na khyo la byas su dogs pas na de sod cig ces mi rgod rbad na/ mi rgod na re dge slong mthu dang ldan pa rgyal pos sras kyi thabs byin pas gsad du mi rung ngo zhes byas na/ dgra bcom pa yang ma dgongs kyi bar du ye shes mthong ba mi 'jug ces zer gyis thabs shig bya'o snyam nas/ mo na ba ltar byas te nyal ba dang / bran mo sbron du btang nas 'ongs pa dang sgo'i steng nas 'jab ste/ ral gris 'char ka'i mgo bcad de bsad do/ /de'i nub mo bco lnga'i gos sbyong la bab nas 'char ka ma 'dus te gar song zhes smra na/ khungs mi phyin te slad de nyid la bcom ldan 'das 'khor dang bcas te 'char ka'i mgo phyag dar khung nas phyung ste/ dge slong la nyes pa'i dmigs su gyur pa ni dus ma yin par grong du 'gro ba las byung ngo zhes nas/ dus ma yin par grong du 'jug tu mi gnang bar 'dul ba la bslab pa'i gnas bcas so/ /yang dge slong gang zhes bya ba ni 'char ka ste gzhan yang de dang 'dra ba'o/ /dus ma yin zhes bya ba ni dus la rnam pa gnyis te/ skya rengs ma shar ba dang nyi ma yol phan chad do/ /grong zhes bya ba ni srang dang sum mdo dang bzhi mdo gang la yod pa'o/ /'jug ces bya ba ni 'gro ba'o/ /'khod pa'i dge slong la smros shig ces bya ba ni gzhi na dge slong su 'khod pa rnams la'o/ /de 'dra ba'i rkyen ma gtogs zhes bya ba ni dge slong gcig cig lhung bzed dang chos gos grong du gtams pa la me thar te/ chos gos dag mes tshig par gyur te/ dge slong brel ba dang / dge slong nad pa dag sman grong du mi len pa dang / dge 'dun gyi 'tsho ba'i yo byad grong du mi tshol ba las thugs rjer dgongs te de lta bu'i phyir gnang nas gzhan ni ltung bar 'gyur ro zhe'o/ /nyes pa dus ma yin pa la dus ma yin par 'du shes bzhin du 'gro na ltung bar 'gyur ro/ /the tshom na yang ngo / /dus yin pa la ma yin par 'du shes sam the tshom na yang nyes byas re rer 'gyur ro/ /ltung ba brgyad cu pa rdzogs so// //zas dang bcas pa'i snga rol du gud du 'gror mi gnang ba'i gleng gzhi ni mnyan du yod pa na ste/ de'i tshe na bsnyen dga' bos khyim bdag gzhan zhig la chos bshad nas dad par byas te/ khyim bdag des bsnyen dga' bo'i phyir bcom ldan 'das la bshos gsol bar khas blangs nas/ dge 'dun bsnyen dga' bos spyan drangs nas nang par khyim du zhal ta byed du song ba dang / bsnyen dga' bos khyim bdag la nga ma 'ongs kyi bar du bshos ma 'drim par sdod cig ces byas nas grong gzhan du 'phyin du song ngo / /de nas bcom ldan 'das 'khor dang bcas pa khyim der gshegs nas gdan la bzhugs te/ zan brims shig ces byas na bsnyen dga' bo 'ongs sam zhes so/ /lan du mar byas kyang 'drim du ma btub nas kun dga' bo la brims shig ces bka' stsal nas kun dga' bos brims nas gdugs tshod yol nas/ dge slong gnas brtan kha cig ni zan chad do/ /kha cig ni 'drim bzhin du bcad de zad pa dang bsnyen dga' bo yang 'ongs nas/ dge 'dun rnams kyis 'gyod pa dang / des kyang khyim bdag la sngar 'drim na ci nyes zhes bsgo ba dang / khyim bdag gis kyang khyod na re ma 'ongs kyi bar du ma 'drim shig ces mi zer ram zhes byas pa dang / bsnyen dga' bo yang skyengs nas/ dge slong gzhan dong yang phyi na khyim bdag gi khyim na thal byung 'dug go/ /de'i tshe gso sbyong gi dus la bab nas bsnyen dga' bo dad pa ma blangs par gyur te/ dge 'dun rnams kyis de sdod sdod nas dge 'dun rnams kyang mi dga' bar gyur te bsnyen dga' bos snga dro ni zas kyis mnar to zhes dge slong dag mi snyen par zer ba snyen du bdas nas/ phyin chad zas kyi snga rol dang / zas zos kyi 'og tu grong rgyu zhing 'gror mi gnang bar 'dul ba la bslab pa'i gnas bcas so/ /yang dge slong gang zhes bya ba ni bsnyen dga' bo ste/ gzhan yang de dang 'dra ba'o/ /zas dang bcas pa zhes bya ba ni gar bos pa'o/ /khyim zhes bya ba ni bram ze dang khyim bdag gi khyim mo/ /mgron du bos zhes bya ba ni zas la'o/ /zas kyi snga rol zhes bya ba ni snga dro ste khyim gnyis las 'das na ltung bar 'gyur ro/ /zas zos kyi 'og ces bya ba ni phyi dro ste/ khyim gsum las 'das par gyur na ltung bar 'gyur ro/ /rgyu zhes bya ba ni 'gro ba'o/ /khyim pa 'dug pa la ma sgo zhes bya ba ni khyim de na khyim pa gang 'khod pa'o/ /ltung ba ni snga ma bzhin no/ /rkyen ma gtogs zhes bya ba ni dge slong nad pa dang nad g.yog dang zhal ta ba rnams ma 'byor par gyur pa las snyan du bdas nas/ de lta bu'i rkyen byung ba ni dus te gnang ngo / /nyes pa ni zas kyi sngon rol du khyim gnyis pa las 'das sam zas zos kyi 'og tu khyim gsum las 'das shing rgyu na ltung bar 'gyur ro/ /mgron du ma bos pa ni nyes med do/ /dge slong rengs ma shar bar rin po che ma bsdus par rgyal po'i sgo gtan las 'dar mi gnang ba'i gleng gzhi ni mnyan du yod pa na ste/ de'i tshe na rgyal po gsal rgyal gyi nu bo nag po dang / khyim bdag bzang sbyin la sangs rgyas kyis chos bshad pa'i tshe de dag ni chos mkhas pas yang nas yang du 'dri zhing lan gsol to/ /rgyal po gsal rgyal kyang der 'dus te 'dug go/ /rgyal po ni chos mi shes pas 'dri rtog kyang ma nus nas 'dug go/ /khyim bdag gnyis chos 'dri rtog pa la rgyal po yi rangs nas btsun mo la bzlas pa dang / rgyal pos kyang gsan par rigs so zhes byas pa dang / nga ni nyin par rgyal srid kyi bya bas brel gyi nub mo zhing khyed la nyan to/ /zhes nas btsun mo na re bdag cag gis mnyan te/ rgyal po la gsol to zhes nas/ phreng ldan ma'i slob dpon du ni 'char ka/ btsun mo dbyar byed kyi ni shA ri'i bu yis gsol nas de gnyis kyang slob dpon du gnang ngo / /der shA ri'i bu ni dus dus su 'gro'o/ /'char ka ni bab bab tu 'gro'o/ /dus gcig na rgyal po yul gzhan zhig tu 'gro ste/ nam ma langs par rta dang glang po che'i sgra dang skye bo mang po'i ca co thon pa dang / tshe dang ldan pa 'char ka ni rmi lam na nam langs snyam nas btsun mo'i gan du nang du song ba dang / btsun mo nyal zhing rin po che'i sgron ma dang bcas pa'i gan du phyin nas se gol gyis bslangs pa dang / btsun mo yang brtabs bzhin du langs te gos brjes bzhin du zhu ba dang / lung 'bogs pa byas nas 'char ka'i lhung bzed zas kyis bkang ste byin nas 'char ka slar song ba dang / shA ri'i bu tshur 'ongs pa dang gnyis lam du phrad nas/ shA ri'i bus 'char ka la de lta bus kyang zag pa zad dam zhes byas nas 'char ka lha khang du phyin nas gar phyin ces dge slong gzhan dag gis dris na rgyal po'i pho brang du'o/ /ci tsam na phyin ces byas nas nam ma longs par ro/ /'o na de ltar dbang ngam zhes byas pa dang / mi dbang yang rung ste/ lhung bzed gang ba ltos zhes byas pa dang / dge slong dag 'phya ba las snyan du bdas te/ phyin chad nam ma langs rin po che'i sgron ma dang / sku srung gi mtshon cha ma bsdus par rgyal po'i sgo gtan las 'dar mi gnang bar bslab pa bcas so/ /yang dge slong zhes bya ba ni 'char ka ste gzhan yang de dang 'dra ba'o/ /nam ma langs zhes bya ba ni nam ma zad pa'o/ /skya rengs ma shar zhes bya ba ni ma byung ba ste/ skya rengs rnam pa gsum yod de sngon po dang ser po dang dmar po'o/ /skya rengs sngon po zhes bya ba ni dang po sngo bar snang ba'o/ /de'i 'og tu ser bar snang ba ni skya rengs ser po'o/ /de'i 'og tu yud tsam dmar bar snang ba ni skye rengs dmar po ste/ skabs der ni dmar po nyid mtshan mar bzung ngo / /rin po che zhes bya ba ni nor rin po che dang bai DUr+ya dang / mu tig la sogs pa nyal ba la 'od snang bar byed pa ni rin po che zhes bya'o/ /rin po che lta bu zhes bya ba ni ral gri dang mda' dang / mdung dang / rol mo'i cha spyad thams cad dang / dgra cha'i mtshon cha thams cad ni rin po che lta bu zhes bya'o/ /ma bsdus zhes bya ba ni de dag btsun srungs rnams kyis ma bsdus pa'o/ /rgyal po rgya rigs spyi bo nas dbang bskur ba zhes bya ba ni rgyal rigs dang / dmangs rigs dang / rje'u rigs dang / bud med gang yang rung ste/ rgyal thabs spyi bo nas dbang bskur ba'o/ /sgo gtan zhes bya ba ni rnam pa gsum ste/ rgyal po'i sgo'i gtan pa dang / btsun mo'i sgo'i gtan pa dang grong khyer gyi sgo'i gtan pa'o/ /rgyal po dang btsun mo'i sgo'i gtan pa las 'das na ltung bar 'gyur ro/ /rgyal po dang btsun mo'i gnas su 'gro ba las grong khyer gyi sgo'i gtan pa las phar 'das na nyes byas su 'gyur ro/ /rkyen ma gtogs zhes bya ba ni rgyal po ma dad pa dang / btsun mo ma dad pa 'dul ba'am/ btsun mo dang blon pos bkug pa ni ma gtogs so/ /dge slong nam ma langs pa la langs par 'du shes pa dang / the tshom bzhin du rgyal po dang btsun mo'i sgo gtan la skya rengs ma shar bar 'das na ltung ba re rer 'gyur ro/ /nam langs pa la ma langs par 'du shes pa dang / the tshom bzhin du 'das na nyes byas su 'gyur ro/ /bar chad chen po brgyad kyis bskal te sgo'i gtan pa las 'das pa ni ltung ba med do/ /so sor thar pa'i mdo 'don pa'i tshe gdod thos so zhes zer du mi gnang ba'i gleng gzhi ni mnyan du yod pa na ste/ bcom ldan 'das kyis dge slong rnams la zla ba phyed phyed cing so sor thar pa bshad par thon cig ces bka' stsal pas na/ dge slong drug sde rnams so sor thar pa'i mdo 'don pa'i tshe/ ri mor byas shing chos mi nyan bla mar mi byed sems btud cing rna ba blags te mi nyan pas/ slad kyis so sor thar pa 'don pa'i tshe drug sde dag na re tshig 'di dag so so thar pa las 'byung bar gdod shes zhes sngan chad ma thos pa skad zer na/ dge slong dag na re sngon chad kyang gso sbyong gi sar lan gnyis lan gsum gyi bar du 'dug na 'di dag ma thos zhes bya ba yang gus par nyan pa'i phyir ro zhes dge slong dag 'phya ba las snyan du bdas te/ bcom ldan 'das kyis tshe dang ldan pa dag ma rnyed pa'o/ /legs par ma rnyed pa'o zhes rnam grangs du mas smad nas 'dul ba la bslab pa'i gnas bcas so/ /yang dge slong gang zhes bya ba ni drug sde ste gzhan yang de dang 'dra ba'o/ /zla ba phyed phyed ces bya ba ni gso sbyong gi dus kyi tshe'o/ /so sor thar pa'i mdo zhes bya ba ni phas pham pa'i chos bzhi nas/ rtsod pa zhi ba'i bar du ltung ba ris lnga rnams la bya'o/ /mdo bshad pa zhes bya ba ni yang dag par bkod pa'am mdo bshad pa la bya'o/ /'don pa'i tshe zhes bya ba ni rab tu bsgrags pa'o/ /'di skad zer ces bya ba ni smras pa'o/ /tshe dang ldan pa bdag gis da gdod shes so zhes bya ba ni da lta la bya'o/ /ji ltar chos 'di mdo'i nang du chud ces bya ba ni ji ltar chos 'di bcom ldan 'das kyis gsungs pa'i mdo'i nang du klag par bya'o/ /de ste de dge slong gis zhes bya ba ni dge slong gang de na 'khod pa'o/ /tshe dang ldan pa sngon 'di na 'dug ces bya ba ni de dag gang yin pa'o/ /gso sbyong gi las lan gnyis lan gsum zhes bya ba ni so sor thar pa'i mdo las lan gnyis lan gsum du ston pa'i tshe yod pa'o/ /mi shes pas thar par mi 'gyur zhes bya ba ni mi shes pas mi grol thar pa med pas na mi shes su mi rung ba'i don to/ /ltung ba ni sems can dmyal ba bar ro/ /chos la bsti stang dang ri mo dang gus par mi byed nas/ so sor thar pa'i mdo lan gnyis lan gsum du thos pa las phas pham pa nas rtsod pa zhi ba'i bar du da gdod thos so/ /zhes smra na thams cad du ltung ba re rer 'gyur ro/ /mi shes yang dag pa la ltung ba med do/ /rwa dang rus pa las khab ral byed du mi gnang ba'i gleng gzhi ni mnyan du yod pa na ste/ de'i tshe na ba so dang rwa 'dus pa'i khab ral mang du byas nas 'chang ba dge slong kun gyis kyang gla rngan nam zan byin pa ni med de/ kun gyis kyang bslangs pa zad par gyur te/ rgyags zong med pas na dbul por gyur pas mu stegs can rnams ba so mkhan sngon nged la dad pa'i tshe ni phyug da ni shAkya'i dge sbyong rnams la dad pas dbul por gyur to zhes 'phya ba las snyan du bdas nas/ mgu mi myong ba chog mi shes pa'o zhes bkas smad do/ /rwa las khab ral byed du mi gnang bar 'dul ba la bslab pa'i gnas bcas so/ /dge slong gang zhes bya ba ni dge slong mang po ste gzhan yang de dang 'dra ba'o/ /ba so zhes bya ba ni so nyid do/ /khab ral zhes bya ba ni rnam pa gnyis te/ kha gab can dang dong bur can no/ /byed ces bya ba ni bdag dang gzhan gyis so/ /bcag nas zhes bya ba ni bcag pa'i 'og tu gdod ltung ba bshags pa'o/ /ltung ba ni sems can dmyal bar ro/ /gang gi mdun du ltung ba bshags pa des kyang khab ral khyod kyis bcag gam ma bcag ces dris shig ma dris par dngos po de bshags na bshags pa dang nyan pa gnyis ka nyes byas su 'gyur ro/ /ltung ba de yang bshags par mi 'gyur ro/ /khri'i rkang pa thung ngu dang ha cang ring po la nyal du mi gnang ba'i gleng gzhi ni mnyan du yod pa na ste/ de'i tshe dge slong bsod snyoms pa zhig khri rkang pa thung ngu zhig gi steng na 'dug ste/ rkang pa bkrus nas sgo khang gi grib ma la khri'i steng na bsam gtan byed cing 'dug pa dang / sbrul tsha bas gdungs pa zhig nye bar 'ongs te/ chu'i nang na 'khyil zhing nyal ba dang dge slong lam gyis ngal bas khri'i steng na 'chag pa dang / khri 'tshigs pa'i sgras sbrul khros te/ dge slong de'i dpral bar zin nas dge slong de yang dus las 'das te sum cu rtsa gsum lha'i khams su skyes so/ /de lta bu'i nyes pa'i dmigs su gyur pa dang / khri'i rkang pa thung ngu la ma nyal cig ces bka' stsal pa dang / drug sde rnams khri rkang pa bcu gnyis pa byas nas skas btsugs te nyal ba dang / de nyid nyes pa'i dmigs su gyur te slan chad khru gang las ring bar byed du mi gnang bar bcas so/ /phyis 'char ka lus ring bas khri la dku rten bcas pa dang pus mo dang ko skor reg pas bu gar gzhug pa ma gtogs te/ bde bar gshegs pa'i sor brgyad ces bya ba ni khru tshad ma gang ngo / /khru gang gzhug pa ma gtogs zhes bya ba ni gnang ba'o/ /de las zhes bya ba ni 'das pa'o/ /bcad nas ltung ba zhes bya ba ni dngos po ring ba de bcad nas ltung ba bshags par bya'o/ /ltung ba ni ngan song gsum du'o/ /gang gi mdun du bshags pa des khyod kyis dngos po de bcad dam ma bcad ces dris shig ma dris par byas na gnyi ga la nyes byas so/ /ltung ba de yang bshags par mi 'gyur ro/ /dge 'dun gyi khri la shing bal brdal du mi gnang ba'i gleng gzhi ni mnyan du yod pa na ste/ dge 'dun gyi mal stan bgos zin pa'i 'og tu de'i nub mo dge slong bsod snyoms pa rgan pa zhig glo bur du 'ongs pa des mal ma thob nas/ dge 'dun rnams kyi nang na bsnyen dga' bo gzhon pas na de'i mal stan bsod snyoms pa la byin cig ces byas pa dang / des ku re sbyar te khri g.yogs kyi nang tshangs shing bal bton te/ khri la brdal nas ras kyis g.yogs te bzhag go/ /nam sros pa dang ras bshus te/ nyal du bcug pas/ nang par lus kun shing bal gyis gos pa las dge slong gzhan rnams kyis khyod ci 'bras kyi yul na nyal nyal lam zhes byas pa dang / bsnyen dga' bos de ltar ku re byas so zhes smras pa dang / don nyung ba'i dge slong dag 'phya ste/ ci'i phyir dge 'dun gyi khri la shing bal brdal zhes mi snyan par 'dzer bsnyan du bdas nas dge slong gi bya ba ma yin zhes smad de/ khri la shing bal brdal du mi gnang bar 'dul ba la bslab pa bcas so/ /yang dge slong gang zhes bya ba ni bsnyan dga' bo ste gzhan yang de dang 'dra ba'o/ /dge 'dun zhes bya ba ni bcom ldan 'das kyi nyan thos so/ /khri dang khri'u ni dngos su zad do/ /shing bal ni rnam pa lnga po las gang rung ste ka sha dang / bu ka dang sha ma li dang / ka sha dang / bal ces bya ba ni bdag nyid kyis so/ /bcug ces bya ba ni gzhan la bcol ba'o/ /ltung ba ni snga ma bzhin no/ /nyes pa gang gi mdun du bshags pa des khyod kyis dngos po de bsdus sam zhes dris shig /ma dris par bshags sam nyams su blangs na gnyi ga la nyes byas so/ /ltung ba de yang ma bshags pa yin gyis slar shogs shig /gding ba tshad las lhag par byed du mi gnang ba'i gleng gzhi ni mnyan du yod pa na ste/ bcom ldan 'das kyis dge slong rnams la gding ba dge 'dun gyi lam stan bzang bar bya ba'i phyir gding ba tshad bzhin du gyis shig ces bka' stsal ba dang / dge slong mang po rnams kyis tshad las 'das par byas pa dang don nyung ngu ba'i dge slong dag 'phya zhing mi snyan par zer bsnyan du bdas nas/ chog mi shes pa mgu mi myong ba zhes bkas smad de gding ba'i tshad srid du bde bar gshegs pa'i mtho do/ /zheng du mtho phyed dang do'i thad du gyis shig ces bslab pa bcas pa dang / phyis tshe dang ldan pa 'char ka po lus ring bas gding bas ma slebs nas mal steng nyes par mi 'gyur bar bya ba'i phyir rkang pa logs su lo mas btud cing nyal ba/ phyis bcom ldan 'das gtsug lag khang nyul ba'i tshe gzigs nas/ de ci yin zhes dris pa dang / bcom ldan 'das kyis gding ba'i tshad sngar gnang bas 'char ka'i lus ring ste ma slebs so zhes gsol pa dang / de ltar na srid du bde bar gshegs pa'i mtho gang gis srings shig par gnang ngo / /gding ba zhes bya ba ni stan no/ /dge slong zhes bya ba ni dge slong mang po dang 'char ka ste gzhan yang de dang 'dra ba'o/ /byed ces bya ba ni bdag dang gzhan gang gis byas kyang rung ste'o/ /tshad bzhin du byos shig ces bya ba ni gding ba'i tshad ni 'di yin te/ srid du bde bar gshegs pa'i mtho do/ zheng du mtho phyed dang do'o/ /srid du yang mtho gang gis snon cig /'di ni gding ba'i tshad do/ /bde bar gshegs pa'i mtho zhes bya ba ni ston pa la bya ste/ de'i mtho do la khru tshad gsum mo/ /phyis mtho gang bsnan pas na de ltar srid du khru phyed dang lnga'o/ /zheng zhes bya ba ni thad kar ro/ /mtho phyed dang do zhes bya ba ni khru tshad ma do dang / sor drug go/ /de las lhag par byed ces bya ba ni tshad las 'das pa'o/ /bcad nas ltung ba zhes bya ba ni dngos po bcad nas ltung ba phyis bshags par bya'o/ /gang gi mdun du ltung ba bshags pa des kyang khyod kyis dngos po de bcad dam ma bcad dris shig / ma dris par bshags pa byas sam nyams su blangs na nyes byas so/ /ltung ba de yang slar bshags par bya'o/ /ltung ba ni ngan song gsum du ltung ba'o/ /nyes pa ni dge slong gis gding ba srid du khru phyed dang lnga dang / zheng du khru do sor drug las lhag par byas na ci tsam gyis lhag par byas pa ltung bar 'gyur ro/ /dge slong gi g.yan pa dgab pa tshad las 'das par byed du mi gnang ba'i gleng gzhi ni mnyan du yod pa na ste/ de'i tshe na dge slong dag la g.yan pa byung nas chos gos la reg pas na chos gos kyang ma rung sbrang ma dag 'du bas/ skye bo dag 'phya ba las g.yan pa dgab pa chongs shig ces bka' stsal te/ g.yan pa dgab pa yang ma bkrus pas sbrang ma dag kyang 'du shing mnam pa las khrus shig 'bud pa'i tshe na gsher bar byos la phud cig ces bka' stsal pa dang / dge slong dag gis ha cang ma 'os par tshad las 'das par byas pa dang / don nyung ba'i dge slong dag 'phya ba las snyan du bdas nas/ dge slong rnams la mang du 'dod pa mgu mi myong ba zhes smad nas g.yan pa dgab pa tshad las 'dar mi gnang bar 'dul ba la bslab pa'i gnas bcas so/ /g.yan pa dgab pa zhes bya ba ni nad kyi gos so/ /dge slong zhes bya ba ni chos 'di la zhugs pa'o/ /byed ces bya ba ni bdag dang gzhan gyis so/ /tshad bzhin du gyis shig ces bya ba ni g.yan pa dgab pa'i tshad ni 'di yin te/ srid du bde bar gshegs pa'i mtho bzhi'o/ /zheng du mtho do'o/ /srid du bde bar gshegs pa'i mtho bzhi la khru drug go/ /zheng du mtho do la khru tshad ma gsum mo/ /de las lhag par byas zhes bya ba ni de las 'das par byas pa'o/ /bcad nas ltung ba'o zhes bya ba ni dngos po sngar bcad nas ltung ba bshags par bya ba'o/ /ltung ba ni ngan song gsum du ltung ba'o/ /nyes pa ni chur khru drug zheng du khru gsum las lhag par byas na thams cad du ltung bar 'gyur ro/ /gang gi mdun du ltung ba bshags pa des bcad dam ma bcad ces dris shig /ma dris par bshags na nyes byas so/ /ras chen tshad las lhag par byed du mi gnang ba'i gleng bzhi ni mnyan du yod pa na ste/ dge slong dag sbren mor skyabs med pa na khrus byed pa ri dwags dgra'i ma sa gas mthong nas/ skye bo ma dad pa rnams 'phyar dogs nas/ slan chad skyabs med par khrus mi byed par bslab pa'i gzhi bca' bar gsol lo snyam nas/ dge bsnyen mas gnyid kyis dge slong khrus kyi tshe ni yol ba dbyar gyi ras chen du phul nas phyin chad ras chen 'chang bar bcom ldan 'das la gsol bar bkas gnang ba dang / dge slong dag gis ha cang ma 'os par chen por byas pa dang / don nyung ngu ba'i dge slong dag 'phya ba las snyan du bdas nas/ gso dka' ba dgang dka' ba zhes smad nas tshad las 'das par byed du mi gnang bar 'dul ba la bslab pa'i gnas bcas so/ /dbyar gyi ras chen zhes bya ba ni char 'bab pa'i gos dang khrus kyi skyabs so/ /dge slong zhes bya ba ni dge slong mang po ste gzhan yang de dang 'dra ba'o/ /byed ces bya ba ni bdag dang gzhan gyis so/ /tshad bzhin du zhes bya ba ni tshad ni 'di yin te/ srid du bde bar gshegs pa'i mtho drug go/ /zheng du mtho phyed dang gsum mo/ /bde bar gshegs pa'i mtho drug la khru dgu'o/ /bde bar gshegs pa'i mtho phyed dang gsum la khru tshad gsum dang sor bco brgyad do/ /lhag pa zhes bya ba ni de las 'das pa'o/ /bcad nas ltung ba zhes pa ni dngos po bcad nas ltung ba bshags par bya'o/ /ltung ba ni ngan song gsum du'o/ /nyes pa ni dge slong gis srid du khru dgu/ zheng du khru gsum dang sor bco brgyad las lhag par byas na thams cad du ltung bar 'gyur ro/ /gang gi mdun du bshags pa des kyang dngos po bcad dam ma bcad dris shig ma dris par bshags na nyes byas so/ /dge slong gis chos gos bde bar gshegs pa'i chos gos kyi tshad dang de las lhag par byed du mi gnang ba'i gleng gzhi ni mnyan du yod pa na ste/ de'i tshe bsnyen dga' bos bzo mkhan zhig la bdag gi chos gos bcom ldan 'das kyi chos gos kyi tshad du gyis shig ces bcol ba dang / de lta bu'i chen pos ci bya zhes byas na/ khyod la ni gla rngan dang zas dgos su zad mdo/ /tshad dri ci dgos zhes byas pa dang / bzo mkhan gyis bsams pa de ni kho zer ba bden no snyam nas drubs te byin pa dang / bsnyen dga' bo yang chos gos de gyon te ji snyed ma rdzogs pa phrag pa la bkal nas/ gtsug lag khang gcig nas gcig tu byung ba dang dge slong gzhan dag gis mthong ste/ phrag pa la bkal ba 'di ci zhig dris na/ bde bar gshegs pa'i na bza'i tshad do zhes byas pa dang / de dag na re ci khyod de lta bu gyon du dbang ngam zhes byas pa dang / dbang yang rung mi dbang yang rung dgra'i phrag par rdog pas brdzis te dbang ngo zhes byas pa dang / dgra su zhes byas na de skad zer bas khyod nyid nga'i dgra'o zhes zer ba las snyan du bdas nas bde bar gshegs pa'i chos gos kyi tshad du bgyid du mi gnang bar bcas pa dang / bsnyen dga' bo de bas kyang lhag par byas te gyon pa las don nyung ba'i dge slong rnams 'phya ste/ bcom ldan 'das kyis bde bar gshegs pa'i chos gos kyi tshad du ma byed cig ces bka' stsal nas/ nga dge slang gis ci'i phyir de bas kyang lhag par byed ces mi snyan par zer ba las snyan du bdas te/ bkas rnam grangs du ma'i sgo nas smad nas/ bde bar gshegs pa'i chos gos kyi tshad dang de las lhag par byed du mi gnang bar 'dul ba la bslab pa'i gnas bcas so/ /dge slong gang zhes bya ba ni bsnyen dga' bo ste gzhan yang de dang 'dra ba'o/ /bde bar gshegs pa'i chos gos zhes bya ba la/ bde bar gshegs pa ni ston pa la bya ste/ de'i chos gos kyi srid du ni bde bar gshegs pa'i mtho bcu la khru tshad ma bco lnga'o zheng du mtho drug ni khru tshad ma dgu'o/ /chos gos zhes bya ba ni rgyu rnam pa bdun po'i nang du gang yang rung ste/ gso ma dang bal dang zar ma dang du gu la dang ko tam pa dang / shing bal dang / srin bal gyi'o/ /byed ces bya ba ni bdag dang gzhan gyis so/ /lhag ces bya ba ni de las 'das pa'o/ /ltung ba ni ngan song gsum du ltung ba la bya'o/ /nyes pa ni bde bar gshegs pa'i chos gos kyi tshad du byas sam/ de las lhag par byas na thams cad du ltung bar 'gyur ro/ /ltung ba dgu bcu pa mi brjed pa'i tshig rdzogs so// //so sor bshags pa dang po ste grong du dge slong ma'i lag nas zas slong du mi gnang ba'i gleng gzhi ni mnyan du yod pa na ste/ de'i tshe dge slong ma ut+pa la'i mdog bsod snyoms snga ma ni spangs shing dge 'dun la phul bar gyur to/ /phyi ma blangs pa ni dge slong bsod snyoms pa zan ma rnyed pa zhig dang lam du phrad nas de la byin te de'i nyin mo dge slong ma de'i zan chad do/ /bsod snyoms pa'i lag na ut+pa la'i mdog gis zas byin pa bzang po zhig khyer ba bsnyen dga' bos mthong nas khyod la 'di sus byin zhes dris na ut+pa li'i mdog gis byin no zhes smras so/ /de'i phyi de nyin yang bsod snyoms blangs nas snga ma dge 'dun la phul phyi nas blangs pa dag bza' zhes byas na bsnyen dga' bos lam du bsgugs te zan bslangs pas na/ de nyi ma gnyis su zan chad pa la nyi tshan gyis phog pas lus rmya ste/ 'gro ma nus na srang du 'gyel ba dang / 'jig rten pa dag na re dge slong ma shAkya gzhon nu dag mthong bas 'dod chags kyis brgyal lo zhes 'phya ba las/ phyin chad dge slong ma grong du 'gro ba la bsod snyoms slong du mi gnang bar bslab pa bcas so/ /yang dge slong gang zhes bya ba ni bsnyen dga' bo ste gzhan yang de dang 'dra ba'o/ /gnyen ma yin pa zhes bya ba ni pha ma'i zung bdun rgyud tshun chad do/ /dge slong ma zhes bya ba ni ut+pa la'i mdog ste gzhan yang de dang 'dra ba'o/ / mal zhes bya ba ni srang ngo / /grong du bsod snyoms spyod ces bya ba ni gang na srang dang / sum mdo dang / bzhi mdo yod pa'i grong ngo / /rang gi lag gis zhes bya ba ni lag nas lag tu len pa'o/ /bca' ba dang bza' zhes bya ba ni bza' ba lnga dang bca' ba lnga la bya'o/ /blangs zhes bya ba ni byin len byas pa'o/ / 'chos sam zos zhes bya ba ni mgrin par mid pa'o/ /dge slong des zhes bya ba ni gang yin pa'o/ /phyi rol gyi kun dga' ra ba zhes bya ba la/ phyi rol du gyur pa ni gtsug lag khang ste/ gtsug lag khang du song shig pa'o/ /dge slong rnams kyi gan du zhes bya ba ni gtsug lag khang de na dge slong du 'khod pa'o/ / shogs shig ces bya ba ni de na dge slong ji snyed 'khod pa de la mthol zhing bshags par bya'o/ /smad pa zhes bya ba ni nyes pa byung ba de smad par rigs pas na smad pa'o/ /mi rigs zhes bya ba ni 'gal ba'i so sor bshags zhes bya ba ni dge slong mang po la bshags pa'o/ /de la ltung ba ni dge slong gis gnyen ma yin pa'i dge slong ma lam na 'dug pa'i bsod snyoms kyi phyir 'gro ba la gnyen ma yin pa'i 'du shes kyis rang gi lag gis bca' ba dang / bza' ba blangs nas 'chos sam zos na so sor bshags par 'gyur ro/ /gnyen ma yin pa la the tshom na yang bshags par 'gyur ro/ /gnyen yin pa lam yin par 'du shes pa dang / the tshom na yang nyes byas re rer 'gyur ro/ /so sor bshags pa dang po'o/ /so sor bshags pa gnyis pa ste/ dge slong mas dge slong zan za ba la stobs pa dang snga nas sbyor du bcug pa zar mi gnang ba'i gleng gzhi ni mnyan du yod pa na ste/ khyim bdag cig gis dge 'dun bshos la spyan drangs pa dang / nang par drug sde rnams kyis dge slong ma sbom dga' mo la sogs pa bcu gnyis sde'i der dod nas 'di skad bsgo ste khyim bdag dad pa rnams kyis der dge 'dun spyir mgron du bos pas na khyed kyis nged la bza' ba dang bca' ba zhim po las mang du sbyin du chug shig ces bsgo ste/ des kyang de bzhin du byas te bshams nas yon bdag zan 'drim pa'i tshe sbom dga' mo rgan rims su 'dug nas khyim bdag la 'phags pa 'di ni shAkya'i rigs las rab tu byung ba sde snod gsum smra ba rigs pa la grol ba'i spobs pa can yin gyis/ de la yang byin cig de bzhin du drug sde po kun gyi yon tan brjod cing zas kyis stobs su bcug pa nas/ de na dge slong kha cig ni zan chad/ kha cig ni khur ba chad kha cig ni ye nas zan ma thob pas/ de na dge slong nyon mongs pa ma spangs shing 'dod pas gzir ba rnams kyis khyim bdag la spyos te/ rgyu med na ci'i phyir bcom ldan 'das dang dge slong gi dge 'dun bshos gsol zhes byas na/ yon bdag gis smras pa/ bdag gis zhal zas mang zhig sbyar na/ sbom dga' mos dge slong drug sde po la yang nas yang du bstabs pas de ltar 'chad par gyur to zhes smras pa dang / de ltar dge slong dag gis snyan du gsol nas de ltar na dge slong dag dge slong ma shom pa la dge slong zas zos zin gyi bar du kha rog 'dug zhig ces bsgo shig / de nas dge slong 'khod pa dag sus kyang ma smras na/ dge slong thams cad la bshags par 'gyur ro/ /zhes 'dul ba bslab pa'i gnas bcas so/ /dge slong mang po zhes bya ba ni gnyis yan chad la mang po zhes bya'o/ /khyim ni bram ze dang khyim bdag gi khyim mo/ mgron du bos zhes bya ba ni bza' ba lnga dang bca' ba lnga la bos pa'o/ /de na gal te dge slong ma zhig bsgo zhing 'dug pa zhes bya ba ni sbom dga' mo ste/ gzhan yang de dang 'dra ba'o/ /dge slong gis zhes bya ba ni de na 'khod pa dag go/ /dge slong ma zhes bya ba ni sbom dga' mo dang gzhan yang rung ngo / /de la 'di skad ces bsgo shig ces bya ba ni mo zer ba bzlog pa'o/ /zan zos kyi bar du sdod cig ces bya ba ni zan zos kyi bar du zer du mi gzhug pa'o/ /dge slong gcig gis kyang dge slong ma de la smrar ma spobs na zhes bya ba ni/ dge slong zan zab gcig gis kyang ma smras pa'o/ /dge slong de dag thams cad phyi rol kun dga' ra bar deng shig ces bya ba ni grong las phyi rol du gyur pa zhig tsug lag khang ste/ der deng la de na dge slong ji snyed pa la bshags par bya'o/ /nyes pa ni dge slong kha cig yang thog na za zhing 'khod/ kha cig ni bar khang na za zhing 'khod na dge slong ma de skad zer ba dang / dge slong dag gis dge slong ma ma zer cig ces bsgo shig /de skad ma byas na so sor bshags par 'gyur ro/ /dge slong kha cig ni 'og khang na zan za kha cig ni sgo khang na za zhing 'khod pa las de na dge slong ma zhig bsgo zhing 'dug na/ de la ma zer cig ces bsgo shig / dge slong gcig gis kyang ma bsgo na dge slong kun la so sor bshags par 'gyur ro/ /dge slong ma de yon bdag yin nam go rims su bab pa la sbyin du bcug pa ni nyes pa med do so sor bshags pa gnyis pa'o/ /so sor bshags pa gsum pa ste/ dge slong gis bslab pa'i sdom pa byin pa'i khyim du slong du mi gnang ba'i gleng gzhi ni yul yangs pa can na ste/ de'i tshe na khyim bdag ded dpon seng ge zhes bya ba zhig yod de/ de sngon chad mu stegs can la mos dad cing dga'o/ /phyis bcom ldan 'das kyis ded dpon de la chos bshad pas na bden pa mthong bar gyur te/ dge slong gi dge 'dun la mngon par dad pas mu stegs can 'ong na yang sgo gcod do/ /shAkya'i dge slong dang / dge sbyong dag 'ong na nang du bos te ci 'dod pa byin zhing rgyun du sbyin gtong la zhugs te/ tshong dang zhing gi las la sogs pa so nam ni btang bas na khyim bdag de yang longs spyod 'gribs te dbul por gyur to/ /de nas dus phyi zhig na shAkya'i mi rnams phongs na spyod pa la zhugs te/ ded dpon seng ge 'di ni sngon chad mu stegs can la dad pa'i tshe na ni phyug cing nor dang ldan/ da ni chos la dad par gyur nas dbul por gyur to zhes mu stegs can dag 'phya'o zhes bcom ldan 'das kyi snyan du bdas nas/ de nyid nyes pa'i dmigs su gyur nas dge slong rnams la bka' stsal pa phyin chad khyim bdag dad pa bden pa mthong ba de'i khyim du 'gro bar mi bya/ zan mi za bar sdom pa chos shig ces gsungs nas dge 'dun rnams kyis gsol pa dang zhu ba'i las kyis sdom pa bcas so/ /sdom pa ma bcas pa'i sngon rol du tshe dang ldan pa shA ri'i bu dang / maud gal gyi bu gnyis ljongs su song ba'i tshe/ ded dpon seng ges dge slong de gnyis phyin chad pa'i der bshos gsol cig ces spyan drangs so/ /sdom pa bcas pa'i 'og tu 'phags pa de gnyis ded dpon seng ge'i gan du 'gro ba drug sdes mthong nas/ 'phags pa gar bzhud ces dris na/ der zan la 'gro'o zhes byas so/ /de dag na re de'i khyim du mi 'gro bar sdom pa bcas na/ da der 'gro ba la dbang ngam zhes byas na/ de gnyis na re sangs rgyas la zhus na/ sdom pa ma bcas pa'i sngon rol du bos pas na gnang ngo / /de ltar sngar bos pas gnang na ni nged kyang khyim bdag bden pa mthong ba'i tshe/ bos kyis 'gro'o zhes drug sde po yang der dong ba dang / sngar dge slong gnyis kyi zan las ma sbyar ba las drug sdes bsnan pas zan kun gtugs la/ de'i byis pa rnams zan chad de bkres pas 'phral du sbyin du med pas ngu zhing tsa tsi 'don pa las snyan du bdas te/ bcom ldan 'das kyi bkas smad nas/ de ltar dge 'dun gyis sdom pa byin par shes bzhin du song ste zas zos na so sor bshags par 'gyur ro zhes bslab pa bcas so/ /dge 'dun zhes bya ba ni de bzhin gshegs pa'i nyan thos so/ /bslab pa'i khyim zhes bya ba ni 'phags pa'i rgyun du zhugs pa yan chad/ dgra bcom pa man chad slob pa'o/ /khyim zhes bya ba ni khyim bdag dang bram ze'i khyim mo/ /bslab pa'i sdom pa sbyin par shes zhes bya ba ni gsol ba'i las kyis so/ /yang dge slong gang zhes bya ba ni drug sde ste gzhan yang de dang 'dra'o/ /de ltar dge 'dun gyis bslab pa'i sdom pa byin par shes zhes bya ba ni bsgo ba'o/ /sngar bos zhes bya ba ni shA ri'i bu lta bu dag go/ /sngar ma bos pa ni drug sde dag gis phyis song ba'o/ /rang gi lag gis zhes bya ba ni rang gis len cing za ba'o/ /phyi rol du kun dgar dengs shig ces bya ba ni gtsug lag khang na dge slong gnas pa dag la mthol bar bya'o/ /ltung bar 'gyur ba ni dge slong gi dge 'dun gyi slob ma'i khyim du gyur pa bslab pa'i sdom pa byin par shes ma thag tu sngar ma bos par song nas rang gi lag gis bca' ba dang / bza' ba blangs te zos sam 'chos na thams cad du so sor bshags par 'gyur ro/ /sngar mgron du bos pa ni ma gtogs so/ /so sor bshags pa bzhi'i gleng gzhi ni grong khyer ser skya'i gnas na ste/ de na dgon pa'i lha khang zhig tu sangs rgyas dang dge 'dun dag dbyar tshul du zhugs nas/ dbyar tshul nas byung ba'i tshe shAkya dag bcom ldan 'das la chos nyan du lhags te chos bshad pa na dad pa skyes te sang gi gdugs tshod bdag gis sbyor te gsol na sang gud du mi gshegs par ci gnang zhes gsol na cang mi gsung bas de bzhin du gnang ngo / /de dag gis de'i nub mo khyim zas zhim dgu sbyar te/ nang par shing rta bkang nas bud med dag mdun du btang ba dang lam du rkun po dag gis bcom nas/ zas ni ma phrogs kyis bud med kyi gos dang rgyan dag phrogs pa dang / bud med dag gis phyir khyim bdag sbran te/ skyes pa dag ni mi rgod snyegs su dong ngo / /bud med dag ni shing khrod na gab cing 'khod zas dang skom ni shing rta bkang ste lam kha na bzhag go/ /de nas drug sde rnams kyis bsams pa shAkya dag lta phyug pas/ de tsam ston mos ra ro bar 'khod kyis/ 'u bu lta brjed kyis bdag cag bsod snyoms la dong zhes nas dong ba dang / lam kha na shing rta zas kyis bkang ba dag mthong nas bud med dag kyang btsal te rnyed pas/ nan gyis ma dang bzhin du bkug nas gcer bur zas 'drim du bcug cing de dag gis kyang kha ngan gyis 'phyas 'dogs shing zan zos nas phyir lha khang du song ngo / /de nas phyis mi rgod dag zin nas mi rgod ni slar btang ste/ shAkya rnams lha khang du lhags nas zan 'drim pa la zhugs pa dang / bud med dag drug sde rnams la mi 'drim nas/ ci'i phyir de dag la mi 'drim zhes khyim thab dag gis byas na/ de dag gis da ci yang zos zin pa'i steng du nged la mi snyan pa zer gyis mi 'drim mo zhes 'drim du ma btub po/ /de nas gzhan dag gis dris na zos pa bden no zhes khas blangs so/ /de nas dge slong dag na re de lta bu'i 'jigs pa na/ dge slong zan za ba'i mi rigs so/ /zhes ma dad pas na/ phyin chad de lta bu'i 'jigs pa na zan za na so sor bshags par 'gyur ro zhes bcas so/ /dge 'dun zhes bya ba ni de bzhin gshegs pa'i nyan thos so/ /dgon pa'i gnas zhes bya ba ni gzhu lnga brgya la rgyang grags gcig ste/ de tsam gyis na grong nas de phan chad ni dgon pa zhes bya ste/ de na gtsug lag khang ci yod pa ni dgon pa'i gnas zhes bya'o/ /dogs pa dang bcas par shes zhes bya ba ni rkun po dang g.yon can yod par shes pa'o/ /'jigs pa dang bcas par shes zhes bya ba ni seng ge dang stag gzig yod par shes so/ /'jigs shing nyam nga ba zhes bya ba ni sha sbrang dang / sbrang bu mchu rings dang rlung dang sbrul dag gis reg pa'o/ /yang dge slong gang zhes bya ba ni drug sde ste/ gzhan yang de dang 'dra ba'o/ /nags ma brtags zhes bya ba ni gsol ba dang zhu ba'i las kyis nags rtog par byed pa'i dge slong zhig skos shig ces byung ba las/ nags rtog pa'i dge slong des kyang brtags na ni nyes pa med kyis ma brtags na nyes par rig par bya'o/ /kun dga'i phyi rol zhes bya ba ni gtsug lag khang gi phyi rol to/ /bza' ba dang bca' ba zhes bya ba ni/ bza' ba lnga dang bca' ba lnga la bya'o/ /blangs zhes bya ba ni byin len byas pa'o/ /zos pa zhes bya ba ni mgrin par mid pa'o/ /dge slong des zhes bya ba ni dge slong gang yin pa'o/ /dge slong rnams la zhes bya ba ni dge slong gang 'khod pa'o/ /so sor bshags par bya ba zhes bya ba ni mthol bar bya ba'o/ /smad pa'i gnas su gyur pa zhes bya ba ni mi rigs mi tshul ba'o/ /nyes pa ni dge slong nags ma brtags par 'du shes bzhin du kun dga'i phyi rol du bca' ba dang bza' ba blangs te 'chos sam zos na so sor bshags par 'gyur ro/ /ma brtags par the tshom na yang so sor bshags par 'gyur ro/ /brtags pa la ma brtags par 'du shes sam/ the tshom na yang nyes byas su 'gyur ro/ /nags rtog par byed pa de shi'am bros na ltung ba med do/ /so sor bshags pa'i mdo 'don pa rnam pa lnga las so sor bshags pa mi brjed pa'i tshig go// //so sor thar pa'i mdo 'don pa lnga pa las brtsams te tshe dang ldan pa dag bsrab pa mang po chos 'di dag ni zla ba phyed phyed cing so sor thar pa'i mdo 'don pa las 'byung ngo zhes bya ba smras so/ /bslab pa mang po zhes bya ba ni dge slong gis yang dag par bslab cing 'dul ba phran tshegs la sogs te/ bslab pa'i gnas thams cad nas 'byung ba'i nyes byas thams cad kyang bslab pa 'di nyid du bsdu bar lta zhing grangs gcig tu ma chad pa'i phyir bslab pa mang po zhes bya'o/ /dge slong gis glu gar rol mo mi bya ba dang brdung bar mi spyad pa dang mtshal mi nyug pa dang / rgyan gyis lus la mi klub pa dang / skra so mangs kyis bshad par mi bya ba dang / me long la sogs pa la gdong mi lta ba dang / 'thab mo'i nang du 'gro zhing 'dug par mi bya ba dang / rtsed mo sna tshogs kyi nang du mi bya ba la sogs pa ste/ 'dul ba phran tshegs dang gzhung bla ma dag las 'byung ba'i bslab pa rnams kyang dge slong gis phyi phyir bslab cing bsrung ba yin mod kyi 'dir ma smos kyi/ gzhan nas 'byung bar rig par gyis shig 'dir ni re zhig sham thabs dang / chos gos ji ltar bgo ba dang / grong du ji ltar 'jug cing khyim du 'dug par bya ba dang / bsod snyoms bslangs pa dang / bza' ba dang / chos 'chad cing bstan pa'i thabs dang / bshang gci bab bab tu mi bya ba la sogs pa 'phral gyi bslab pa la sogs pa nyung shas shig bsdu ba'o/ /sham thabs zlum por bgo bar bya zhes bya ba'i gleng gzhi ni bcom ldan 'das grong khyer khor mo 'jig gi drang srong gi gnas ri dwags rgyu ba na bzhugs so/ /nam bcom ldan 'das kyis dge slong lnga po rnams skyon med de rab tu phyung nas dngos por byas pa de na de dag kyang sngon goms pa'i tshul du khyim pa bzhin du gyon pa bram ze dang khyim bdag gis mthong nas 'phags pa dag de lta bu ni nor can dang / tshong dpon dag gyon na khyed kyang de bzhin nam zhes zer ro/ /de lta bur gyur ba dge slong dag gis bcom ldan 'das la gsol to/ /bcom ldan 'das kyis dgongs pa khyim bdag dag zer ba ni bden te/ sngon gyi yang dag par rdzogs pa'i sangs rgyas kyi nyan thos dag gis sham thabs ji lta bur gyon pa dgongs te bya'o zhes gsungs pa dang / lha rnams kyis gsol pa btsun pa 'di lta ste/ gnas gtsang ma'i ris kyi lha rnams bzhin no/ /bcom ldan 'das kyis ye shes kyis brtags na de bzhin du de nas bcom ldan 'das kyis bka' stsal pa/ de bas na dge slong dag nga'i nyan thos rnams kyis sham thabs zlum por bgo bar bslab par bya'o zhes 'dul ba la bslab pa'i gnas bcas so/ /dge slong lnga po dang nye ba lnga po dang bzang po drug cu sde dang gzhan yang dge slong gcig gis gcig rab tu phyung ba rnams kyang sham thabs zlum por gyon zhing tshul bzhin du gnas so/ /ha cang rtsengs pa yang ma yin/ zhes bya ba ni slad kyis drug sde dag rab tu phyung ba ste/ de dag gis sham thabs rab tu rtsengs shing gyon pa dang dad pa'i bram ze dang / khyim bdag gis mthong ste/ 'phags pa dag rgyan po pa dang / dwa dang nal gyi bu dag ni 'di ltar gyon gyi 'phags pa dag de ltar gyon mi rigs kyis sham thabs brdzes la ma gyon cig byas pa dang / de dag rje thur gyon nas khyim bdag ma dad cing 'phya ba las snyan du bdas te/ khyim bdag 'phya bar bden gyis zhes sham thabs ha cang rtsengs pa ma yin par bgos par bslab par bya'o zhes 'dul ba la bslab pa'i gnas bcas so/ /rtsengs pa ma yin zhes bya ba ni sham thabs pus mo las 'das pa la bya'o/ /ha cang 'jol ba ma yin zhes bya ba ni drug sde po rnams sham thabs long bu las 'das te nar bar gyon pa las dad pa'i bram ze dang bdag gis mthong ste 'phags pa de lta bu ni yul ka ta na zhes bya ba na rigs kyi mna' ma dang bud med rnams gyon te/ de lta bur mi rigs kyis ha cang nar bar ma gyon cig ces 'phya ba las snyan du bdas nas/ 'phya ba yus kyi ha cang 'jol bar mi bgo bar bslab par bya'o zhes bcas so/ /glang po che'i sna ltar ma yin zhes bya ba ni drug sde rnams sham thabs mdun logs su sna gnyis pa la nar zhing gyon pa las 'phags pa dag de lta bu ni byis pa chung ngu dang / ra ro ba dag gyon pas de lta bu ni mi rigs kyis ma gyon cig ces 'phya ba las snyan du bdas nas glang po che'i sna ltar ma yin par bslab pa bcas so/ / ta la'i lo ma ltar ma yin zhes bya ba ni/ drug sde po rnams sham thabs sta zur po rnams kyi steng du me tog kha gyes pa lta bur gyon pa las/ khyim bdag dag 'phya ste de lta bu ni gar mkhan mang po'i nang du gyon zhing 'ongs te/ 'phags pa dag de lta bu ni mi rigs so zhes 'phya ba las snyan du bdas nas/ ta la'i lo ma ltar ma yin par sham thabs bgo bar bslab par bya'o zhes bcas so/ /nas can gyi phur ma ltar ma yin zhes bya ba ni/ dge slong drug sde rnams sham thabs sta zur gyi steng du khyim pa ltar bsdus te thum por byas te gzhag pas khyim bdag dag 'phya bar gyur te/ de lta bu ni nor can dang tshong dpon dang bud med dag ni de ltar gyon te/ 'phags pa dag ci'i phyir de ltar gyon ces 'phya ba las snyan du bdas nas/ sham thabs nas can gyi phur ma ltar ma yin par bgo bar bya'o zhes bcas so/ /sbrul mgo'i gdengs ka ltar ma yin zhes bya ba ni drug sde rnams sham thabs bgos nas/ lte ba'i khung du phyir bzlog cing 'phyang ba sbrul mgo lta bur gyon pa dang / khyim bdag dag 'phya ste/ 'phags pa dag rgyan po pa ni de bzhin gyon te de lta bu mi rigs so zhes 'phya ba las snyan du bdas nas/ sham thabs sbrul mgo'i gdengs ka ltar ma yin par bgo bar bya zhes bcas so/ /sham thabs rnam pa bdun lta bu'i skyon spangs te/ zlum por bgo bar bslab par bya'o zhes bka' stsal pa dang / dge slong rnams chos gos ji ltar gyon pa ni mi shes nas/ chos gos zlum por bgo bar bslab par bya'o zhes bka' stsal pa dang / drug sde rnams chos gos rtsengs par gyon te phus mo las 'das par gyon pa mi mdzes te/ dwa dang nal gyi bu dang / rgyan po ba ni de ltar gyon te de lta bu ni mi rigs so zhes 'phya ba las snyan du bdas te/ khyim bdag 'phya ba ni yus te chos gos ha cang ma rtsengs par bgo bar bslab par bya'o zhes 'dul ba la bslab pa'i gnas bcas so/ /chos gos ma rtsengs par gyon cig ces bka' stsal pa dang / drug sde rnams chos gos ha cang 'jol zhing sham thabs las mar thal bar gyon pa dang / 'phags pa dag de lta bu ni yul ka ta na bud med dang / rigs kyi mna' ma rnams ni de ltar gyon te/ de lta bu gyon pa ni mi rigs te ha cang nar bar ma gyon cig ces 'phya ba las snyan du bdas te/ khyim bdag dag 'phya ba yus te chos gos ha cang 'jol ba ma yin par bgo bar bslab par bya'o zhes bcas so/ /de bas na chos gos ha cang rtsengs pa yang ma yin/ 'jol ba yang ma yin par zlum por bgo bar bya'o zhes gsungs so/ /shin tu bsdams zhes bya ba ni drug sde rnams rkang lag kyog cing khyim pa'i der dong ba dang / dad pa'i bram ze dag na re 'phags pa dag 'byung po dang / chang gis smyos pa dang / sha zas zin pa rnams ni de ltar 'gro'o zhes 'phya ba las snyan du bdas te/ lus shin tu bsdams nas khyim pa'i khyim du 'gro bar bya'o zhes bcas so/ /legs par bgos par zhes bya ba ni drug sde dag chos gos brtul te phrag pa la gzar nas grong du 'gro ba dang / khyim bdag rnams ni de ltar 'gro'o zhes 'phya ste/ 'phags pa dag gyad rnams gyad sar 'gro ba ni de bzhin te/ de ltar mi rigs kyis ma 'gro zhig ces 'phya ba las snyan du bdas nas/ legs par bgos te 'gro bar bya'o zhes 'dul ba la bslab pa bcas so/ / sgra bskyungs zhes bya ba ni drug sde rnams ca co 'don cing grong du 'dong ba dang / dad pa'i bram ze dang khyim bdag dag 'phya ste/ 'phags pa dag chang gis myos pa dang / byis pa chung ngu rnams de bzhin 'dong ste/ de ni mi rigs so zhes 'phya ba las snyan du bdas te/ sgra bskyungs la khyim pa'i khyim du 'gro bar bya'o zhes bcas so/ /mig g.yeng bar mi bya ba ni drug sde rnams mig yan man du g.yengs shing 'gro bas na/ dad pa'i khyim bdag dag 'phya bar gyur pa las snyan du bdas nas/ mig g.yengs shing ma 'gro zhig ces bka' stsal pa dang / drug sde rnams mig btsums shing 'gro ba las rta dang / shing rta 'dren pa dag dang thug par gyur nas sa la 'gyel te mi gtsang ba dang / 'dam rdzab kyis gos par gyur te/ khyim bdag dang bram ze dag 'phya ba las snyan du bdas nas/ mig mi btsums mi g.yeng bar gnya' shing gang tsam du blta zhing khyim pa'i khyim du 'gro bar bya'o zhes gsungs so/ /mgo mi g.yogs pa zhes bya ba ni drug sde rnams mgo g.yogs nas khyim du dong ba dang / khyim bdag rnams 'phya ste rigs kyi mna' ma na ba rnams ni de bzhin dong ste/ 'phags pa rnams de lta bu ni mi rigs so zhes 'phya ba las snyan du bdas te/ mgo mi g.yogs par grong du 'gro bar bya'o zhes bcas so/ /mi brdze ba zhes bya ba ni drug sde rnams sham thabs brdzes te khyim du 'dong ba dang / khyim bdag rnams kyis 'phags pa dag skyes pa bshang gci bya ba'am/ 'dam rdzab dang chu yod na de ltar bya'i de lta bu med pa la ni mi rigs so zhes 'phya ba las snyan du bdas nas/ mi brdze bar khyim pa'i khyim du 'gro bar bya'o zhes bslab pa bcas so/ /gos mi gzar bar 'gro zhes bya ba ni drug sde rnams chos gos gyon pa slar gzar te dong ba las/ khyim bdag na re rgyan po pa dang / nal gyi bu dag ni de ltar 'dong gis 'phags pa dag ci'i phyir de ltar dong zhes 'phya ba las snyan du bdas nas/ chos gos mi gzar bar khyim du 'gro bar bya'o zhes bslab pa bcas so/ /chos gos gnya' gang du bsnol zhing 'gro ba ni drug sde rnams chos gos bgos nas gnya' gang du bsnol nas grong du dong ba dang / bram ze dang khyim bdag dag 'phya ste/ 'phags pa dwa dang nal gyi bu dag ni de bzhin dong ste/ de lta bu mi rigs so zhes 'phya ba las snyan du bdas te/ gnya' gong du bsnol te grong du mi 'gro bar bya'o zhes bcas so/ /phrag pa gnyis kar mi gzar bar 'gro zhes bya ba ni drug sde rnams gos phrag pa gnyis ka la gzar nas 'gro ba las khyim bdag rnams na re/ 'phags pa dag g.yog byed pa ni de ltar byed de de lta bu mi rigs so zhes 'phya ba las snyan du bdas nas phrag pa gnyis ka la mi gzar bar grong du 'gro bar bslab par bya'o zhes bslab pa bcas so/ /brang bas 'gro ba ma yin zhes bya ba ni drug sde rnams rkang pa'i brang bas khyim du dong ba dang / khyim bdag dag 'phya ste/ 'phags pa byis pa chung ngu shing la rtse ba dang / rkang pa'i mthil sa pa rnams ni de ltar 'gro ste/ de lta bu ni mi rigs so zhes 'phya ba las snyan du bdas te/ brang bas grong du mi 'gro bar bya'o zhes bslab pa bcas so/ /'jal thabs su 'gro bar mi bya zhes bya ba ni drug sde rnams gom pa 'jal thabs su grong du dong ba la/ khyim bdag dag 'phya ste de lta bu ni 'jig rten na bzo bo dang / phya mkhan rnams de ltar byed de de ltar ma bzhud cig ces 'phya ba las snyan du bdas te/ grong du gom pa brkyang zhing 'jal thabs su 'gro bar mi bya'o zhes bslab pa bcas so/ /mi mchod par 'gro bar bya ba ni drug sde rnams shing thags de dag la mchod zhing dong bas bram ze dang khyim bdag dag 'phya ste/ 'phags pa dag 'jigs shing skrag pa ni de ltar dong ste/ de lta bu mi rigs kyis de ltar ma byed cig ces 'phya ba las snyan du bdas te/ khyim bdag 'phya ba yus kyi gong bu dang / shing thags la mchong zhing ma 'gro bar lam du deng la mi mchong bar grong du 'gro bar bya'o zhes bslab pa bcas so/ /tsog phur ma yin zhes bya ba ni drug sde rnams tsog pur 'dong pas/ khyim bdag dag 'phya ste de lta bu ni rgan po dang rkang nad can dang / byis pa chung ngu rnams 'gro mi nus pa ni de bzhin du 'gro ste/ 'phags pa dag de lta bu ni mi rigs so zhes 'phya ba las snyan du bdas te/ tsog pur 'gro zhing grong du mi 'dong bar bslab par bya'o zhes bslab pa bcas so/ /dkur mi brten par 'gro bar bya zhes bya ba ni drug sde rnams dkur brten zhing 'gro ba dang khyim bdag dag 'phya ste/ tshong dpon dang ded dpon dag ni de ltar 'gro ste/ 'phags pa rnams de ltar 'gro ba mi rigs so zhes 'phya ba las snyan du bdas te/ dkur mi brten par grong du 'gro bar bya'o zhes bslab pa bcas so/ /lus mi bsgyur bar 'gro bar bya ba ni drug sde rnams lus bsgyur zhing grong du dong ba dang / dad pa'i khyim bdag dag 'phya ste/ 'phags pa dag gzugs kyis 'tsho ba dang / bal glang mo dag de ltar dong ste/ de lta bu mi rigs so zhes zer ba las snyan du bdas te/ lus mi bsgyur bar khyim pa'i khyim du 'gro bar bya'o zhes bslab pa bcas so/ /lag pa mi kyog par 'gro bar bya zhes bya ba ni drug sde rnams lag pa 'khyugs ka byed cing grong du dong bas khyim bdag dag 'phya bar gyur te/ 'phags pa dag byis pa chung ngu dang / dwa dang smyon pa rnams ni de ltar dong ste/ mi rigs so zhes 'phya ba las snyan du bdas te/ lag pa'i 'khyugs ka mi bya bar khyim pa'i khyim du 'gro bar bslab par bya'o zhes bcas so/ /mgo mi bsgyur bar 'gro bar bya zhes bya ba ni drug sde rnams mgo bsgyur zhing grong du dong ba las khyim pa dag 'phya ste/ 'phags pa dag glang po che dang / rtsangs pa dag ni de ltar 'gro zhes 'phya ba las snyan du bdas te/ mgo mi bsgyur bar khyim pa'i khyim du 'gro bar bslab par bya'o zhes bslab pa bcas so/ /phrag pa mi sprad par 'gro'o zhes bya ba ni drug sde rnams grong du dong ba dang / de na mi zhig spos kyis bskus me tog gis btags te/ 'gro ba drug sde dag gis mthong nas dga' bo dang bsnyen dga' bo bskran pa 'di mi dga' bar bya'o zhes nas phrag pa sprad de phul bas de yang sa la 'gyel to/ /de mi snyan par 'phya ba las snyan du bdas te/ khyim pa 'phya ba ni rigs par 'phyas pas/ phrag pa sprad cing khyim pa'i khyim du mi 'gro bar bslab par bya'o zhes bslab pa bcas so/ /lag pa mi sbrel bar 'gro bar bya zhes bya ba ni drug sde rnams grong du dong ba dang / skyes pa zhig me tog dang / spos kyis brgyan nas 'jig rten la ngom bzhin du 'ong ba dang / drug sde dag gis mthong nas de mi dga' bar bya'o zhes nas/ de dag lag pa sbrel te phul ba dang sa la 'gyel to/ /de yang bdag gis nongs pa ci bgyis zhes smod pa las snyan du bdas nas/ khyim pa 'phya ba ni yus te/ lag pa sbrel bar khyim pa'i khyim du 'gro bar mi bya'o zhes bslab pa bcas so/ /ma bsgo bar khyim pa'i stan la mi 'dug ces bya ba ni mnyan du yod pa na bram ze zhig gtsang sbra la dga' ste/ mal sgo khang du bcas nas der bu mo zhig sbrang yab thogs te/ sbrang ma skrod du bcug pa dang bsnyen dga' bo bsod snyoms la bram ze de'i mal sgor 'ongs te bu mo song ste/ bram ze la bsnyen dga' bo sgo na 'dug gi sbron cig ces bsgo ba dang / bdag ni sbrang ma skrod pas mi mchi'o zhes smras pa dang / ngas skad cig bsrung gis song shig ces nas de song ba dang / bsnyen dga' bos rkang pa de'i mal gyi steng du bzhag ste 'dug go/ /bram ze yang nang nas byung ste 'ongs pa dang / des rkang pa bzhag pa mthong nas de na re 'phags pa bdag ni gtsang sbra la dga' ba lags te/ ci'i phyir lhag ma dang bcas par nga'i mal na 'dug ces 'phya zhing smod pa las snyan du bdas te 'phya ba ni rigs par 'phyas pas/ da phyin chad khyim pas ma bsgo bar stan la mi 'dug par bya'o zhes bslab pa bcas so/ /stan la ma brtags par 'dug par mi bya zhes bya ba ni mnyan du yod pa na 'char ka skabs skabs su gtum mo'i gnas der chos 'chad cing 'gro'o/ /phyi zhig na gtum mo la bu gcig btsas te/ de'i tshe ring bar 'dug pa'i phyir ras dkar pos g.yogs te/ drang srong gi stan la bzhag pa dang / phyis 'char ka 'ongs te/ stan la ma brtags par 'dug pas bu de dus las 'das so/ /de dag mya ngan byed cing mi snyan par zer ba snyan du bdas te/ khyim pa'i stan la ma brtags par 'dug tu mi gnang bar bcas so/ /lus thams cad kyi lcid kyis phab ste 'dug par mi bya ba ni bcom ldan 'das mngon par byang chub nas ser skya'i gnas na/ btsun mo grags 'dzin ma'i der bshos gsol ba'i tshe/ tshe dang ldan pa 'char kas grags 'dzin ma bshos 'drim pa'i rkang pa la rkang pas brdegs te btang ngo / /de yang mi dga' ste phyin chad de lta bu mi byed par bya ba'i phyir grags 'dzin mas khri rgyud ma btags pa'i steng gos kyis g.yogs nas bzhag ste/ 'char ba bos shig ces bu mo zhig mngags nas 'char ka yang rnyed pa zhig grub snyam ste myur zhing rengs par 'ongs nas/ khyed kyis nga la ci sbyin zhes byas pa dang / khri la bzhugs shig dang / phye dang zho phor gang gsol lo zhes pa dang / khri de yang dbang mod ces 'char kas smras na khri de mi gsol lo zhes nas 'char kas kyang phye dang zho phor gang lag tu blangs nas/ khri'u de chag go snyam du bsams te steng du ljid kyis phab ste drag tu 'dug pa dang / khri'u rgyud med pas na nub ste/ phye phor gang dang zho phor gang yang de'i gdong du bo nas de dag gad mo byung ste/ 'char ka'i rkang pa nas bzung nas rdzing bu'i nang du bor ro/ /'char ka yang langs te chos gos gcu zhing 'dug pa dang / dge slong dag gis mthong ste/ ci nyes zhes smras na/ ngas khar song rtsed mo zhig byas na di ring gnod pa de dang 'dra bar byas zhes byas pa dang / de dang 'dra bas snyan du bdas te/ khyim pa'i khyim du stan la ljid kyis phab ste mi 'dug par bya'o zhes bcas so/ /rkang pa mi bsnol bar 'dug par bya zhes bya ba ni/ drug sde rnams rkang pa bsnol zhing 'khod pa dang / khyim bdag dag gis 'phags pa dag dra dang nal gyi bu dag ni 'di ltar 'khod de/ de lta bu mi rigs so zhes 'phya ba las snyan du bdas te/ 'phya ba yus kyis khyim pa'i khyim du rkang pa mi bsnol bar bya'o zhes bcas so/ /brla mi bsnol bar 'dug ces bya ba ni drug sde rnams brla bsnol nas 'khod pa dang / 'phags pa dag dwa dang nal gyi bu dag ni de bzhin du 'khod de/ de lta bu mi rigs so zhes 'phya ba las snyan du bdas te/ khyim pa ni rigs par 'phya'o zhes te/ grong du brla bsnol te mi 'dug par bslab par bya'o zhes bcas so/ /long bu'i steng du long bu mi gzhag par bya zhes bya ba ni drug sde rnams long bu'i steng du long bu'i steng du long bu bzhag ste 'khod pa dang / khyim bdag dag na re 'phags pa dag rgyan po pa dang nal gyi bu dag ni de ltar 'khod de mi rigs so zhes 'phya ba las snyan du bdas te/ khyim pa 'phya ba ni rigs par 'phyas/ khyim pa'i khyim du long bu'i steng du long bu mi gzhag par bslab par bya'o zhes bcas so/ /rkang pa bkug ste 'dug par mi bya zhes bya ba ni drug sde rnams rkang pa bkug ste 'dug pa dang / dge bsnyen ma rnams phyag 'tshal na de dag nad med par gyur cig ces mi zer nas/ de dag gis smras pa/ bdag cag la nad med cig ces ci'i phyir mi gsung zhes byas pa dang / nged kyi rkang pa gnyis la phyag ma byas so zhes byas pa dang / de dag gis rkang pa gnyis la phyag 'tshal ba dang / de dag gis bud med kyi rkub la mthos 'jal zhing rkub tshos che ba la ltos zhes zer ba las de dag ngo tsha ste mi smra bar 'khod de/ de ltar gyur pa snyan du bdas te grong du rkang pa mi dgug par bya'o zhes bcas so/ /rkang pa gdangs shing mi 'dug par bya zhes bya ba ni drug sde rnams rkang pa gdangs shing 'dug pa la dge bsnyen ma dag phyag 'tshal ba na de dag nad med cig ces rdzogs par mi zer nas/ 'phags pa ci'i slad du mi gsung zhes byas na/ khyed kyis nged kyi rkang pa gnyis la phyag ma byas so zhes pa dang / de dag yang rkang pa gnyis la phyag byed pa dang / rkub la mthos 'jal ba dang de dag 'phya ba snyan du bdas nas/ rkang pa gdangs shing 'dug par mi bya'o zhes bcas so/ /mdoms mi snang bar 'dug par bya zhes zer ba ni drug sde rnams mdoms snang bzhin du grong na 'khod cing sgren mor 'khod pas na bram ze dang / khyim bdag dag 'phya ba snyan du bdas nas mdoms mi snang bar grong du 'dug par bya'o zhes bcas so/ /legs par zas blang bar bya zhes bya ba ni yul sbal dkar can na rgyal bu rtogs ldan gyis khang bzangs pad mo'i tshon brgya rtsa gcig gis sa gzhi la bris pa zhig brtsigs te/ der dge 'dun rnams bshos la spyan drangs pa dang / rgyal bu nyid ni chos la dad 'khor rnams chos la ma dad pas de dag gis la du 'drim pa'i tshe la du bskyur bas lhung bzed chag ste drug sde rnams kyis de dag mi dga' bar bya'o zhes nas/ 'bras dang tshod ma 'drim pa'i tshe lhung bzed gang bas tshod ma de dag sa la bo nas/ de dag gis 'phags pa rgyal bu rtogs ldan gyi khang bzangs tshon sna tshogs brgya rtsa gcig gis bris pa ma rung bar gyur to/ /drug sde rnams kyis smras pa/ bkren pa khyed kyis ma rung bar sems na/ dge 'dun de dag gi lhung bzed ji ltar bya zhes pa las snyan du bdas te/ zas legs par blang bar bya'o zhes bslab pa'i gnas bcas so/ /mu dang kha da chad du ma yin zhes bya ba ni drug sde rnams rtogs ldan gyi khyim du lhung bzed gang bar blangs pas de dag kyang tshod ma gar blugs zhes byas pa dang de nyid du'o zhes byas te blugs pa dang bo nas de dag gis khang bzangs ma rung bar byas zhes pa las rtogs ldan dang khyed cag nyid kyang 'di la chags pas na yi dwags lba ba can du 'gyur ro zhes byas pa dang / de dag mi dga' zhing 'phya ba las snyan du bdas te/ bka' stsal pa/ mu dang kha da chad du zas mi blang bar bya zhes bslab pa bcas so/ /tshod ma dang mnyam par ma yin zhes bya ba ni drug sde rnams rtogs ldan gyi khyim du lhags te/ de dag gi sngon du tshod ma byin na lhung bzed gang bar blangs so/ /phyis 'bras byin pa yang de nyid du bzed pa dang / ma shong ste bo bas na khang pa ma rung zhes khyim bdag 'phya ba las snyan du bdas te/ bka' stsal pa/ tshod ma dang mnyam par mi blang bar bya'o zhes bslab pa bcas so/ /zas mthar chags su blang bar bya zhes bya ba ni drug sde rnams zas za ba'i tshe tshod ma mi len te/ phyis ring du song ba dang 'bod cing tshod ma len pas tshod ma snga phyir 'phrul bar gyur pa snyan du gsol nas/ bka' stsal pa/ zas mthar chags su blang bar bya'o zhes bcas so/ /lhung bzed blta zhing bza' bar bya zhes bya ba ni mnyan du yod pa na/ khyim bdag cig gis sangs rgyas 'khor dang bcas pa bshos la spyan drangs te/ yon bdag gis khur ba 'drim pa'i tshe/ 'phags pa dag zhal zas zhim po gsol gyis phye mang du ma len cig ces byas pa dang / drug sdes phye mang du blangs so/ /rgan rims la khur ba dag 'drim pa'i tshe drug sde dag gi 'og na rgan zhugs shig 'dug pa de gong du rgan rims la lta ba'i tshe/ drug sdes zan chang chang pos lhung bzed bkang ngo / /khyim bdag des khur ba 'drim pa'i tshe rgan zhugs la byin pa dang / lhung bzed lci bas sa la lhung ngo / /yon bdag gis smras pa/ 'phags pa ci'i phyir phye mang du len bdag gis ma blangs so/ /'o na sus blangs/ de ltar gtol med do zhes byas pa dang / drug sde dag gis smras pa/ khyim bdag ma thos sam rgyal po dag la so yul du zhag bdun gyi bar du nor dbyig gi char 'bab pa de bzhin du/ rgan zhugs de la gang zan chang chang por char bab po zhes byas pa dang / de dag cang mi smra bar 'dug go/ /de ltar gyur pa snyan du bdas nas/ de lta bas na lhung bzed la blta bar bya'o zhes bcas so/ /bza' bca' ma 'ongs par lhung bzed mi bzed par bya zhes bya ba ni drug sde rnams bsod snyoms la zhugs pa na zas ma byin par de dag lhung bzed sngar bzed cing 'khod pas dad pa'i bram ze dang khyim bdag dag 'phya ste/ ci'i phyir na bca' ba dang bza' ba ma byin par lhung bzed bzed ces 'phya ba la snyan du bdas nas/ bca' ba dang bza' ba ma 'ongs par lhung bzed mi bzed par bya zhes bslab pa bcas so/ /yang 'dod pa'i phyir 'bras chan gyis tshod ma mi dgab par bya zhes bya ba ni mnyan du yod pa na ste/ khyim bdag cig gis bcom ldan 'das dge slong gi 'khor dang bcas pa bshos la spyan drangs pa de na/ khyim bdag gis 'bras ni mang tshod ma ni nyung ngu byas pa dang / drug sde rnams kyis tshod ma 'bras kyis g.yogs te bzhag pa dang / khyim bdag gis 'bras mthong ste/ tshod ma mchis sam zhes smras pa dang / khyim bdag de nyid la ltos zhes nas tshod ma yang byin no/ /dge slong lha khang du dong ste khyim bdag de'i zan ni bzang ste/ tshod ma ni nyung ngo / /zhes gtam 'dzer ba de na/ drug sde rnams na re nged kyis ni mang du thob ste/ 'bras chan gyis tshod ma bkab bo zhes byas pa dang / dge slong dag 'phya ba las snyan du bdas te/ 'bras chan gyis tshod ma mi dgab par bslab par bya'o zhes bslab pa bcas so/ /tshod mas 'bras chan mi dgab par bya'o zhes bya ba ni mnyan du yod pa na khyim bdag cig gis sangs rgyas 'khor dang bcas pa bshos la spyan drangs pa de na/ khyim bdag gis tshod ma ni mang 'bras chan ni nyung ngu byas pas drug sde rnams kyis tshod mas 'bras chan bkab pas khyim bdag gis tshod ma mthong ste/ 'phags pa 'bras ma mchis sam zhes byas pa dang / khyim bdag de nyid la ltos zhes nas des yang 'bras byin no/ /dge slong de dag yang lha khang du phyin nas/ khyim bdag des tshod ma ni mang du sbyar na/ 'bras chan ni nyung ngu zhes pa dang / drug sde dag na re nged kyis ni 'bras mang du thob bo/ /de lta bu dbang ngam zhes pa dang snyan du bdas te/ tshod mas 'bras chan mi dgab par bslab par bya'o zhes bslab pa bcas so/ /legs par zas bza' bar bya'o zhes bya ba ni drug sde rnams sle ma phyo zhing zan za ba dang / 'phags pa dag byis pa chung ngu dang / gzugs kyis 'tsho ba ni de ltar byed de/ de lta bu ma byed cig ces khyim bdag dag 'phya ba las snyan du bdas te/ legs par zas bza' bar bya'o zhes bslab pa bcas so/ /kham ha cang chung ba yang ma yin pa zhes bya ba ni drug sde rnams grong du zan za ba na kham chung ngu nas zan za bas dad pa'i khyim bdag dag 'phya ste/ byis pa chung ngu dang rigs kyi mna' ma dag ni de ltar za'o zhes 'phya ba las snyan du bdas te/ kham ha cang chung ba yang ma yin pa kham ran par bza' bar bya'o zhes bslab pa'i gnas bcas so/ / kham ha cang chen po yang ma yin par bza' ba zhes bya ba ni drug sde rnams grong du zan za ba na kham ha cang cher bza' bas khyim bdag dag 'phya ste/ 'phags pa dag ltogs pa dang sprang po ni de bzhin du bza' bas de ltar ma gsol cig ces 'phya ba las snyan du bdas te/ kham ha cang chen po yang ma yin chung ngu yang ma yin par kham ran par bza' bar bya'o zhes bslab pa'i gnas bcas so/ /kham ma gzas par kha mi gdangs par bya zhes bya ba ni mnyan du yod pa na khyim bdag cig gis bcom ldan 'das 'khor dang bcas pa bshos la spyan drangs pa dang / drug sde'i 'og na rgan zhugs shig 'dug ste/ de yang kha gdangs nas rgan rims la lta ba dang bsnyen dga' bos de'i khar bong ba gcig bcug ste sngar de zo shig ces byas pa dang snyan du bdas nas/ kham ma gzas par kha mi gdangs par bya ba zhes bslab pa bcas so/ /kha kham gyis bkang ste mi smra bar bya'o zhes bya ba ni drug sde rnams kha kham gyis bkang ste smra bas/ /nga ro nyams shing mi snyan par gyur pa snyan du bdas te bka' stsal pa/ kha kham gyis bkang ste mi smra bar bya'o zhes bslab pa bcas so/ /tsug tsug mi byed ces bya ba ni mnyan du yod pa na khyim bdag cig gis bcom ldan 'das 'khor dang bcas pa bshos la spyan drangs pa dang / des tshod ma shin tu mngar bar sbyar bas drug sde rnams rkan sgra gtogs pas tshong ma shin tu skyur ro zhes byas pa dang / khyim bdag de skyengs pas snyan du bdas te/ bka' stsal pa/ tsug tsug mi bya bar bza' bar bya'o zhes bcas so/ /balcag balcag mi bya bar bza' zhes bya ba ni mnyan du yod pa na ste/ khyim bdag cig gis bcom ldan 'das 'khor dang bcas pa bshos la spyan drangs pa'i tshe/ tshod ma shin tu skyur bar sbyar ba dang / drug sde rnams rkan sgra phyung ste/ shin tu tshod ma mngar ro zhes byas pa las/ khyim bdag skyengs pas snyan du bdas nas bka' stsal pa/ balcag balcag mi bya bar zas bza' bar bya'o zhes bslab pa bcas so/ /hu hu mi bya zhes bya ba ni mnyan du yod pa na khyim bdag cig gis bcom ldan 'das 'khor dang bcas pa bshos la spyan drangs pa de na khyim bdag de snod spyad nyung bas 'bras chan rnams rkon bur blugs te bzhag pas drod che bar gyur to/ /drug sde rnams 'bras de ni grang gi dbugs kyis bsros la zo shig zer ba khyim bdag gis thos te skyengs pa las snyan du bdas te/ bka' stsal pa/ hu hu mi bya bar zas bza' bar bya'o zhes bslab pa bcas so/ /phu phu mi bya bar bza' bar bya zhes bya ba ni mnyan du yod pa na khyim bdag cig gis bcom ldan 'das 'khor dang bcas pa bshos la spyan drangs te/ 'bras bcos nas re lde'i sting du bzhag pa dang grangs par gyur te/ drug sde dag na re 'bras de ni rab tu tsha bas phu phu zhes gyis la zo shig ces byas pa las khyim bdag skyengs pas snyan du bdas nas/ phu phu mi bya bar zas bza' bar bya'o zhes bslab pa bcas so/ /lce phyung ste zas mi za bar bslab par bya zhes bya ba ni khyim bdag ni der zan za ba'i tshe lce phyung nas blta zhing mchu ldag pa dang dge slong dag gis tshe dang ldan pa dag lce phyung nas bltar ci yod ces byas pa dang / de dag gis smras pa 'ga' zhig nang du mi 'jug grang snyam nas bltas so zhes byas pa dang / de dag 'phya bar gyur pa las snyan du bdas te/ bka' stsal pa/ lce phyung ste zas mi za bar bya'o zhes bslab pa bcas so/ /'bru nas tha dad du mi dbye bar zas bza' bar bya'o zhes bya ba ni drug sde po rnams grong du zan za ba na 'bras kyi 'brum bu gtor nas thu zhing za ba dang / dad pa'i khyim bdag dag 'phya ste/ byis pa chung ngu dang nal gyi bu dag de ltar za ste/ 'phags pa dag de bzhin ma za cig ces 'phya ba las snyan du bdas te/ bka' stsal pa/ 'bru nas tha dad mi dbye bar bza' bar bya'o zhes bslab pa bcas so/ /'phyas mi gdags par zas bza' bar bya zhes bya ba ni drug sde rnams khyim pa'i khyim du zan za ba'i tshe/ dga' bo bsnyen dga' bo tshod ma de ni skyur ro/ /'di ni mngar ro zhes byung ba las snyan du bdas te/ bka' stsal pa/ 'phyas mi gdags par zas bza' bar bya'o zhes bslab pa bcas so/ /mkhur ba mi spo bar zas bza' bar bya'o zhes bya ba ni drug sde rnams grong du zan za ba'i tshe/ kham 'gram g.yas g.yon du spo zhing za ba dang khyim bdag dag 'phya te/ byis pa chung ngu dang mu to ba dag ni de bzhin du za ste/ 'phags pa dag mi rigs so zhes bya ba las snyan du bdas te/ bka' stsal pa/ mkhur ba mi spo bar zas bza' bar bya'o zhes bslab pa bcas so/ /rkan mi gtogs shing zas bza' bar bya zhes bya ba ni drug sde rnams grong du zan za ba'i tshe rkan sgra gtogs shing bza' ba khyim bdag dag 'phya ba las snyan du bdas nas/ /bka' stsal pa/ rkan mi gtogs par zas bza' bar bya'o zhes bslab pa bcas so/ /kham 'phror gcod cing zas mi za bar bya'o zhes bya ba ni drug sde rnams khyim bdag gi de na zan za ba'i tshe kham blangs nas phyed ni khar bcug phyed ni lhung bzed du 'dor bas khyim bdag dag 'phya ste/ 'phags pa dag byis pa chung ngu dang gzugs kyis 'tsho ba rnams ni 'di ltar bza'o zhes bya ba las snyan du bdas te/ bka' stsal pa/ kham 'phror byas shing zas mi bza' bar bya'o zhes bslab pa bcas so/ /lag pa mi ldag par zas bza' bar bya'o zhes bya ba ni drug sde rnams khyim pa'i khyim du zas za ba'i tshe/ lag pa la zas dam pa nyid chags so zhes nas bldags pa las/ dge slong dag gis lag pa ldag par mi rigs so zhes 'phya ba las snyan du bdas te/ bka' stsal pa/ lag pa mi ldag par zas bza' bar bya'o zhes bslab pa'i gnas bcas so/ /lhung bzed mi byogs par bya zhes bya ba ni drug sde rnams kyis grong na zan za ba'i tshe/ lhung bzed phyogs pa dang tshe dang ldan pa de lta bu'i mi mdzes pa ci byed ces byas pa dang / gang kha zas dam pa nyid ni 'di la lus so zhes pa las snyan du bdas nas/ bka' stsal pa/ lhung bzed mi byogs par bya'o zhes 'dul ba la bslab pa'i gnas bcas so/ /lag pa mi sprugs par bslab par bya zhes bya ba ni drug sde rnams grong na zan za ba'i tshe lag pa sprugs pa dang / dge slong dag la lag pa'i chu zer gyis phog pa dang / de dag 'phya ba las snyan du bdas te/ bka' stsal pa/ lag pa sprugs shing zas mi bza' bar bya'o zhes bslab pa'i gnas bcas so/ / lhung bzed mi bskyams par bya zhes bya ba ni drug sde rnams kyi gan na dge sbyong sbyar ma ngur kha zhig gon zhing 'dug pas drug sde rnams na re dga' bo bsnyen dga' bo bkren pa 'di'i snying lam na sbyar ma 'di lta bu bdag cag gis ma bgos snyam sems kyis/ de mi dga' bar bya'o zhes nas lhung bzed bkru ba'i chus chos gos de ma rung bar byas so/ /de nas de 'phya ba las snyan du bdas te/ bka' stsal pa/ lhung bzed mi bskyams par bya'o/ /zhes bslab pa'i gnas bcas so/ /mchod rten 'dra bar sbrus te zas mi bza' bar bya'o zhes bya ba ni mnyan du yod pa na khyim bdag cig 'dug pa de dag gcer bu ba la ma dga' ba las/ phyis sangs rgyas la dga' bar gyur nas dge 'dun spyan drangs nas/ des phye brims pa dang / drug sde dag gis phye ba rdzis te mchod rten 'dra bar byas nas bzhag go/ /phyis la phug brims pa dang / de yang bu gu brkos nas srog shing 'dra bar byas so/ /de nas khur ba brims pa dang / de yang la phug gi steng du gdugs lta bur byas nas dga' bo bsnyen dga' bo 'di ni ngan 'gro rdzogs byed kyi mchod rten no zhes 'dzer to/ /de nas yang de bshig ste za ba'i tshe/ ngan 'gro rdzogs byed kyi mchod rten bshig go zhes 'dzer cing za ba khyim bdag gis thos nas/ 'phags pa dag de lta bu'i sdig pa'i lta ba las slar bzlog ni zin na/ khyed cag 'gyod pa da rung ma byang ngam zhes byas pa dang / de dag cang mi zer bar 'khod do/ /de ltar gyur pa snyan du bdas nas/ mchod rten 'dra bar sprus nas zan mi bza' bar bslab par bya'o zhes 'dul ba la bslab pa'i gnas bcas so/ /drung na 'dug pa'i dge slong gi lhung bzed la 'phyas gdags pa'i phyir mi blta bar bya zhes bya ba ni drug sde rnams grong na zan za ba de dag gis gan na/ dge slong zhig mang du za ba la drug sde rnams 'phya nas dga' bo bsnyen dga' bo rgan zhugs 'di mang du za ba la ltos zhes 'dzer ba las snyan du bdas nas bka' stsal pa/ 'phya bar sems shing lhung bzed la mi blta bar bya'o zhes bslab pa bcas so/ /lag pa zas dang 'bags pas chu snod la mi gzung bar bya'o zhes bya ba ni drug sde rnams zan za ba'i tshe lag pa zas dang 'bags pas chu snod la 'dzin pa dang / dad pa'i khyim bdag dang / bram ze dag 'phya ste/ dge slong shAkya'i bu dag ni gtsang sbra med pa zhes 'phya ba las snyan du bdas nas bka' stsal pa/ zas dang 'bags pa'i lag pas chu snod la mi gzung bar bya'o zhes bslab pa bcas so/ /drung na 'dug pa'i dge slong la chu zas dang 'bags pas mi gtor bar bya zhes bya ba ni drug sde rnams grong na zan za ba las gan na dge slong sbyar ma ngur kha zhig gyon zhing 'dug pa las drug sde rnams kyis bkren pa de'i rmi lam na 'u bu cag gis sngon ma gyon snyam gyis mi dga' bar bya'o/ /zhes lag pa zas dang 'bags pa'i chus ma rung bar byas te/ de ltar byas pa snyan du bdas te drung na 'dug pa'i dge slong la zas dang 'bags pa'i chus mi gtor bar bya'o zhes bslab pa bcas so/ /khyim bdag 'dus pa la ma dris par chu zas dang 'bags pa khyim pa'i khyim du mi dbo bar bya'o zhes bya ba ni yul sbal dkar can du rgyal bu rtogs ldan gyis dge 'dun bshos la spyan drangs nas bshos gsol ba dang / drug sde po rnams kyis lhung bzed kyi chu de nyid du pho'o/ /zhal zas 'drim pa'i mi rnams 'phya ste tshon brgya rtsa gcig gis bris pa'i khang pa ma rung bar byas so zhes 'phya ba las snyan du bdas te/ bka' stsal pa/ zas dang 'bags pa'i chus khyim pa'i khyim du mi dbo bar bya'o zhes bslab pa bcas so/ /ma dris zhes bya ba ni khyim pa 'dug pas 'dir pho shig ces zer ba la nyes med do/ /lhung bzed kyi nang du zas kyi lhag ma blugs te mi dor bar bya ba ni/ mnyan du yod pa na bram ze zhig gnas pa'i bu na nas des sman pa la dris pa dang / bram ze de yang chos la dad pa zhig pas/ lhung bzed bkrus pa'i chus khrus byos shig ces bstan pas bram zes dge slong drug sde po'i gan du song nas lhung bzed bkrus pa'i chu bslangs pa dang / de nyid na snod gcig khyer te 'ong ngo zhes nas de nang du song ste lhung bzed kyi nang du 'bras dang phye dang / khur ba dang sha lhag ma chu dang bsres te phyir phyung nas bram ze la bstan pa dang / 'phags pa bu shi yang bla'i de lta bu'i btsog pas ni mi bkru'o/ /zhes zer ba las snyan du bdas nas bka' stsal pa/ lhung bzed bkrus pa'i chu slong ba la lhung bzed du lhag ma blugs te mi sbyin par bslab par bya'o/ /gal te lhung bzed kyi chu zhig slong na lhung bzed lan gsum khrus la zhal nas gsungs pa'i tshigs su bcad pa bklags pas sbyin par bya'o zhes bslab pa bcas so/ /'og gzhi med pa'i sa la lhung bzed mi gzhag par bya zhes bya ba ni mnyan du yod pa na/ dge slong zhig gis 'og gzhi med pa'i sa la lhung bzed gzhag pa na btsas zos pa snyan du bdas te/ bka' stsal ba/ 'og gzhi med pa'i sa la lhung bzed mi gzhag par bya'o zhes bslab pa bcas so/ /gad kar lhung bzed mi gzhag par bya'o zhes bya ba ni dge slong zhig gis lhung bzed gad kar bzhag pa las snyan du bdas te gad kar lhung bzed mi gzhag par bya'o zhes bslab pa bcas so/ /g.yang sar lhung bzed mi gzhag par bya zhes bya ba ni dge slong rnams lhung bzed g.yang sar bzhag pa las rbab tu song gis dogs pa'i phyir/ bka' stsal pa/ g.yang sar mi gzhag par bya zhes bslab pa bcas so/ /dkan gzar por lhung bzed mi gzhag par bya zhes bya ba ni/ dge slong rnams lhung bzed bang rim gyi der bzhag pas de nyid nyes par 'gyur ro zhes bka' stsal pa/ lhung bzed bang rim du mi gzhag par bya'o zhes bslab pa bcas so/ /'greng ste lhung bzed mi bkru zhes bya ba ni mnyan du yod pa na/ dge slong zhig 'greng zhing lhung bzed 'khru bas ma byed cig ces dge slong dag gis bsgo na cir 'gyur/ lhung bzed chag par 'gyur ro zhes byas na ma btub pas lhung bzed lhung nas chag pas snyan du bdas te/ bka' stsal pa/ 'greng ste lhung bzed mi bkru bar bya'o zhes bslab pa bcas so/ /'bab chu drag po'i rgyun las bzlog ste/ lhung bzed kyis chu mi bcu bar bya'o zhes bya ba ni/ dge slong rnams chu bo rgyun drag po las yar bzlog ste/ lhung bzed kyis chu bcus pas lhung bzed chus khyer ba las snyan du bdas te/ bka' stsal pa chu'i rgyun las yar bzlog ste lhung bzed kyis chu mi bcu bar bya'o zhes bslab pa bcas so/ /gad ka dang dkan gzar por lhung bzed mi bkru zhes bya ba ni/ gong du gzhag par mi bya zhes bya ba dang sbyar te bkru bas bye brag go/ /mi na bar 'dug pa la 'greng ste chos mi bshad ces bya ba ni mnyan du yod pa na ste/ drug sde rnams mi na bar 'dug pa la 'greng bzhin du chos ston pa dang / dad pa'i bram ze dang khyim bdag dag 'phya ste/ bcom ldan 'das kyis bskal pa grangs med pa gsum gyi bar du dka' ba spyad de pha rol tu phyin pa drug rdzogs pas bla na med pa'i ye shes brnyes na khyed ni gus par rim gro med par sa la 'dug pa la chos 'chad dam zhes 'phya ba las snyan du bdas te/ mi na bar 'dug pa la 'greng ste chos mi bshad par bya'o zhes bslab pa bcas so/ /mi na bar nyal ba la 'dug ste chos mi bshad par bya'o zhes bya ba ni drug sde rnams mi na bar nyal ba la 'dug ste chos 'chad pas khyim bdag dag 'phya ba las snyan du bdas nas mi na bar nyal ba la 'dug ste chos mi bshad par bya'o/ /zhes bslab pa bcas so/ /mi na bar stan mthon po la 'dug pa la stan dma' ba la 'dug ste chos mi bshad par bya ba ni drug sde rnams stan dma' ba la 'dug nas stan mthon po la mi na bar 'dug pa la chos bshad pas khyim pa dag 'phya ba las snyan du bdas nas/ mi na bar stan mthon po la 'dug pa la/ stan dma' ba la 'dug ste chos mi bshad par bya'o zhes bslab pa bcas so/ /mi na bar mdun du 'gro ba la phyi nas 'gro zhing chos mi bshad par bya zhes bya ba ni drug sde rnams mnyan du yod pa na mi na bar mdun du 'gro ba las/ phyis mi slebs bzhin du chos 'chad pa las khyim pa 'phya ba las snyan du bdas te/ mi na bar mdun du 'gro ba la phyi nas 'gro zhing chos mi bshad par bya'o zhes bcas so/ /mi na bar lam nas 'gro ba la 'gram nas 'gro zhing chos mi bshad par bya'o zhes bya ba ni drug sde rnams ni lam gyi 'gram nas 'gro zhing mi na ba ni lam du 'gro ba la chos 'chad pas khyim pa dag 'phya ba las snyan du bdas te/ mi na bar lam du 'gro ba la lam gyi 'gram nas 'gro zhing chos mi bshad par bya'o zhes bcas so/ /mi na bar mgo g.yogs pa la chos mi bshad par bslab par bya zhes bya ba ni drug sde rnams kyis mgo g.yogs pa la chos bshad pa dang / bram ze dang khyim bdag dag 'phya ste/ bcom ldan 'das kyis bka' stsal pa grangs med pa gsum du dka' ba spyad pa brgya stong du mas pha rol tu phyin pa drug rdzogs te/ bla na med pa'i byang chub thob na 'di dag rim gro med pa la chos 'chad do zhes 'phya ba las snyan du bdas te/ mi na bar mgo g.yogs pa la chos mi bshad par bya'o zhes bslab pa bcas so/ /mgo g.yogs pa la chos bshad pa ji lta ba bzhin du brdzes pa dang / gos gzar ba dang / gos gnya' gong du bsnol ba dang phrag pa gnyis la gzar ba la drug sde rnams chos 'chad pa las bslab pa'i gnas bcas pa ni mgo g.yogs pa ji lta ba bzhin du sbyar ro/ /do ker can dang / zhwa gon pa la drug sde rnams chos 'chad pas bram ze dang / khyim bdag dag 'phya ba las snyan du bdas te/ mi na bar do ker can dang zhwa gyon pa la chos mi bshad par bya'o zhes bslab pa bcas so/ /do ker can dang zhwa gyon pa la ji lta ba bzhin du/ cod pan can dang / phreng ba can dang / thod bcings pa la mi na bar chos mi bshad par bya'o zhes bya ba'i bar du rgyas par sbyar ro/ /mi na bar glang po che zhon pa la chos mi bshad par bya ba ni drug sde rnams glang po che zhon pa la chos bshad pa dang / dad pa'i khyim bdag dag 'phya ste/ 'phags pa dag bcom ldan 'das kyis bskal pa grangs med pa gsum du dka' ba spyad pas bla na med pa'i byang chub brnyes na de lta bu ma gus par rim gro med pa la chos 'chad dam zhes 'phya ba las snyan du bdas nas/ bka' stsal pa/ mi na bar glang po che zhon pa la chos mi bshad par bya'o zhes bcas so/ /mi na bar glang po che zhon pa la chos bshad du mi gnang ba de bzhin du rta zhon pa dang / khyogs na 'dug pa dang / bzhon pa'i steng na 'dug pa dang / lham mthon po gyon pa la chos mi bshad par yang rgyas par sbyar ro/ /mi na bar lag na dbyug pa thogs pa la chos mi bshad par bya zhes bya ba ni drug sde rnams lag na dbyug pa thogs pa la chos bshad pas dad pa'i bram ze dang / khyim bdag gis 'phya ste/ bcom ldan 'das kyis bskal pa grangs med pa du mar dka' ba spyad pas bla na med pa'i byang chub brnyes na/ 'phags pa dag rim gro med pa dang gus pa med pa la yang chos bshad dam zhes 'phya ba las snyan du bdas nas mi na bar lag na dbyug pa thogs pa la chos mi bshad par bya'o zhes bcas so/ /mi na bar lag na dbyug pa thogs pa la chos 'chad du mi gnang ba de bzhin du mi na bar gdugs thogs pa dang / mtshon cha thogs pa dang / ral gri thogs pa dang / lag na dgra cha thogs pa dang / go cha bgos pa la yang chos mi bshad par yang rgyas par sbyar ro/ /mi na bar 'greng ste bshang gci mi bya zhes bya ba ni mnyan du yod pa na bsnyen dga' bos 'greng bzhin du bshang gci byas pas ston pa'i nyan thos rnams ni ngo tsha shes pa rnams yin na/ 'di ni ngo tsha dang khrel gyis mi dogs pa'i nyan thos dag ci yin zhes bram ze dang khyim bdag dag 'phya ba las snyan du bdas nas/ mi na bar 'greng zhing bshang gci mi bya'o zhes bslab pa bcas so/ /mi na bar chu'i nang du bshang gci mi bya'o zhes bya ba ni mnyan du yod pa na bsnyen dga' bos gtso blag mkhan zhig gi gan du song nas nga'i gos 'di khrus te byin cig ces byas pa dang / des smras pa/ 'phags pa sngon ni bdag cag la mgon skyabs dang bsrung ba mdzad na/ da ni mi mdzad na mi bkru'o zhes pa dang / bsnyen dga' bos bkren pa sdod cig ces mi dga' bar bya'o snyam nas/ bkru sman 'thungs te rnyong pas chu'i nang du blugs so/ /btso blag mkhan nang par sngar langs te/ gos bkrus zhes bya ba ni rnyong ba mnam nas/ de kos btsugs bcas te rab tu sems shing 'dug pa dang / bsnyen dga' bos yang phyogs der 'ongs nas bzhin bzangs ci nyes/ 'phags pa sus bdag gis bkru ba'i chu'i nang du rkyag pa bor ba ma 'tshal/ de ni ngas byas te bkran pa khyod mi dga' bar bya'o zhes byas pa dang / de dag 'phya ba las snyan du bdas nas mi na bar chu'i nang du bshang gci mi bya'o zhes bslab pa bcas so/ /mi na bar chu'i nang du bshang gci mi bya ba bzhin du mchil ma dang / snabs dang / skyugs pa dang / sna nas gzags pa yang mi dor bar de bzhin du bslab par bya'o zhes bcas so/ /mi na bar rtswa sngon po yod pa'i phyogs su bshang gci mi bya zhes bya ba ni grong khyer ser skya'i gnas na 'dug ste/ bsnyen dga' bo ldum pa'i gan du song ste/ ldum bu bslangs pa dang ma byin no de nas de mi dga' bar bya'o zhes nas bkru sman 'thungs te rnyong pas gyo mo bkang ste phyags ma thogs nas ldum ra thams cad rnyong pas chag chag btab ste ma rung bar byas so/ /mi gtsang ba mnam pas wa rnams kyang 'dus te je thur ma rung bar byas so/ /nang par ldum pa tshong dus su ldum pa btsong du 'gro zhes ldum rar bltas na ma rung bar gyur te rab tu sems shing 'dug pa dang / bsnyen dga' bos mthong ste/ ci'i phyir sems zhes byas na ldum rar rkyag pas bkang ste/ su mchis ma 'tshal to zhes byas pa dang / bkren pa khyod mi dga' bar bya ba'i phyir ngas ched du byas so zhes byas pa dang de yang 'phya bar gyur pa snyan du bdas nas/ bka' stsal pa/ mi na bar rtswa sngon po'i sa phyogs su bshang gci mi bya bar bslab pa bcas so/ /bshang gci ji lta ba bzhin du mchil ma dang / snabs dang / skyugs pa dang / sna nas gzags pa dag mi dor bar bya'o zhes bcas so/ /gnod pa byung ba ma gtogs te shing la mi gang las mthor 'dzeg tu mi gnang ba ni mnyan du yod pa na khyim bdag cig gis dge 'dun rnams bshos la spyan drangs so/ /bsnyen dga' bos gtsug lag khang skyong gi zan mnos nas/ khang skyong di ring zan chad par bya'o snyam bsams nas dze ta'i tshal nas mnyan du yod pa'i bar du gom pa du yod pa 'jal zhing 'gro ba dang / khang skyong gis kyang dro yol du nye nas shing la 'dzegs te bltas na/ bsnyen dga' bo dal gyis 'ongs pa mthong nas/ gzhir phyin pa la khyod kyis nga zan bcad par bsams te dal gyis 'ongs pa ngas shing la 'dzegs te bltas pas mthong ngo zhes smras pa dang / snyan du bdas te/ shing la 'dzeg tu mi gnang bar bcas so/ /de ltar mi gnang ba dang / dge slong gos kha dog bsgyur ba dag las mi byed nas slad kyis mi gang tsam du 'dzeg tu gnang ba dang / mi gang tsam du 'dzeg tu gnang ba las dge slong zhig 'gron pa mang po dang 'grogs te lam du song ba las/ dgon pa'i lam du stag gis 'jigs nas mthor ma 'dzegs nas stag gis bsad do/ /de ltar gyur pa snyan du bdas nas/ gnod pa byung ba'i dus su mi gang las mtho bar 'dzeg tu gnang ngo / /bslab pa mang po mi brjed pa'i tshig go// //so sor thar pa'i skabs nas 'dul ba'i dngos po bam po lnga bcu rtsa brgyad dang / lnga bcu rtsa dgu pa dang / drug cu'i nang na rtsod pa'i dngos po rgya cher 'chad kyis der ltos shig /rtsod pa zhi bar bya ba bdun smos pa las brtsams te smras pa/ rtsod pa zhes bya ba ni rnam pa bzhi ste/ 'thab pa la rtsod pa dang / mi ston pas rtsod pa dang / nyes pa 'byung ba las rtsod pa dang / bya ba las rtsod pa'o/ de la 'thab cing 'khrug pa'i gleng gzhi ni bcom ldan 'das grong khyer ser skya'i gnas na bzhugs te/ phyi dro rgyal po zas gtsang ma dang / shA kya'i ming chen po la sogs pa la chos ston par mdzad do/ /snga dro ni skye dgu'i bdag mo dang / shA kya ming chen gyi chung ma la sogs te/ shAkya'i bud med rnams la de'i tshe na bu mo gcig cig rang gi mgul nas mu tig gi se mo do cig yod pa yang nas yang du rtog cing / lag pas 'dzin pa skye dgu'i bdag mos mthong ste/ de'i nga rgyal bcag pa'i phyir rang gi mu tig gi se mo do mngag gzhug ma srung ma zhes bya ba len du btang ba dang / bu mo yang chos nyan pa'i bar chad du byas te/ mi dga' bzhin du song ba lam du bas brdungs te dus las 'das so/ /de yang de ma thag tu sing ga la'i rgyal po'i bu mor skyes te de nam skyes pa'i tshe/ de'i yul mu tig gi char bab pas de'i ming yang mu tig mar btags so/ /dus phyi zhig na tshong pa lnga brgya tsam zhig rgya mtshor zhugs te dong ba rlung gis bdas pas seng ga la'i gling du phyin to/ /de dag srod dang tho rangs la gsung rab rnams dbyungs su bklags pa dang bu mo des thos te/ e ma ho/ /de lta bu'i glu snyan yul seng ga la'i mi zhes bya ba ni/ de ni glu ma yin gyis sangs rgyas kyi gsung rab kyi chos so zhes byas nas/ sangs rgyas kyi yon tan rgya cher bstan pas bu mos tshong pa la/ phrin dang yi ge sangs rgyas la gsol te/ sangs rgyas kyi sku'i ri mo dang / yan lag bcu gnyis kyi tshigs su bcad pa tshong pa la bu mo mu tig ma'i drung du bskur te/ de yang bden pa mthong bar gyur to/ /de nas bu mo des skyes lan du sangs rgyas la sogs pa dkon mchog gsum la mu tig bre gsum bskur ba dang / sangs rgyas kyi sku skal ni dri gtsang khang du skyang nul byas so/ /dge 'dun gyi sku skal ni so sor bgos so/ /chos kyi rnyed pa ni chos smra ba dbang ngo zhes byung ba dang / 'dul ba 'dzin pa dang / mdo sde dang / ma mo 'dzin pa rnams so so nas de dbang ngo zhes 'khrug pa las 'thab cing rtsod pa'i dbang por bcas pa dang / phyis mnyan du yod pa na sangs rgyas bzhugs pa'i tshe/ yul yangs pa can na dge slong dag 'thab cing rtsod par gyur pa las/ tshe dang ldan pa shA ri'i bu dang / maud gal gyi bus de dag sdums pa snyan du bdas te/ bcom ldan 'das kyi bkas mngags nas/ dge slong dag gzhan yang rtsod pa 'di lta bu zhi bar bya'o zhes bka' stsal te/ mdor rtsod pa'i chos dang chos ma yin pa dpyod pa las phyogs gnyis su chad de 'thab mor gyur pa'o/ /'khrug cing rtsod pas na/ 'khrug pas rtsod pa zhes bya ste 'khrug pa de'i rtsa ba ni drug ste/ rtsa ba drug dang dbyen du smra ba'i dngos po bcu bzhi'o/ /'khrug pa'i rtsa ba drug po gang zhe na/ khro zhing khon du 'dzin pa dang / 'chab cing 'tshig pa dang / phrag dog cing 'jungs pa dang / sgyu byed cing g.yo byed pa dang / ngo mi tsha zhing khrel gyis mi dogs pa dang / sdig pa la 'dod cing log par lta ba la bdag tu lta ba bsnyems pa'o/ /dbyen du 'byed pa'i dngos po bcu bzhi ni/ 'di ni chos so zhes pa dang / 'di ni chos ma yin no zhes pa dang / 'di ni 'dul ba dang / 'di ni 'dul ba ma yin no zhes pa dang / 'di ni nyes pa'o 'di ni nyes pa ma yin no zhes pa dang / 'di ni lci ba'o 'di ni yang ba'o zhes pa dang / 'di ni lhag ma lus pa'o 'di ni lhag ma ma lus pa'o zhes pa dang / 'di ni bsdam par bya'o/ / 'di ni bshags par bya'o zhes pa dang / 'di ni 'dul ba las 'das pa'o zhes pa dang / 'di ni ngan par smra bar gyur pa'o zhes pa dang / 'di ni dge ba dang 'di ni mi dge ba'o zhes pa dang / 'di ni lung du mi ston par byed pa la rnam pa gsum ste/ dge bar 'dod pa dang / mi dge bar 'dod pa dang / gnyi gar mi 'dod pa yang rim bzhin du sbyar ro/ /gang 'khrug pa de nyid rtsod pa ste/ rnam pa bzhir sbyar ro/ /rnam pa dang po ni mi mthun par smra ba tsam mo/ /gnyis pa ni de las gzhan pa'o/ /gsum pa ni gnyi ga lhan cig pa'o/ /bzhi pa ni de rnams ma gtogs pa'o/ /mi ston pa las rtsod pa'i gleng gzhi ni/ gang gleng bar mi rigs par gleng ba ste/ ngan par ma gtogs par glengs pas na mi ston cing klog pa dang / lung la sogs pa ston pa bkag pas na mi ston pa'i rtsod pa zhes bya'o/ /de yang gang lta bu la bya zhe na/ dper na dge slong ma grogs mos gyad bu nor la phas pham pas skur te glengs pa dang / de la dge slong gzhan gyis kyang de nyid glengs pa dang / de yang ma nyes pas ngo tsha nas ma byas so zhes zer ba dang / dge slong bye ma can smyo nas ci yang byas te sangs nas/ dge slong gzhan gyis nyes pa de shogs shig ces byas nas/ ngas ma dran no zhes nas dge slong rnams kyis de la ston pa bkag ste lung mi ster bas/ sna de lta bu la sogs pas ni mi ston pa las rtsod pa byung ba zhes bya'o/ /nyes pa las rtsod pa byung na ni ltung ba'i ris lnga las gleng gzhir gyur te/ rtsod pa byung ba'o/ /nyes pa'i rtsa ba ni lus dang ngag yid gsum char dang ldan pa las byung ba yang yod/ gnyis dang ldan pa las byung ba yang yod/ gsum char la so sor re re nas byung ba yang yod/ de la lus gcig pu nas byung ba ni/ dper na bsnyen par ma rdzogs pa'i gang zag dang / khyim gcig tu nyal ba las de yang phyir ma byung ba dang phyir byung bar 'du shes de nyal ba dang / bdag khyim gyi nang na nyal ba las bud med phyis 'ongs te nyal ba las/ bdag gnyid kyis log pa las gzhan gyis mal lam khri chen po'i steng du bzhag pa lta bu ni lus 'ba' zhig las byung ba'o/ /ngag 'ba' zhig las byung ba yang yod de/ ji ltar bud med la ma bsams bzhin du tshig lnga drug gam bdun las 'das pas chos bshad pa ni ngag 'ba' zhig las byung ba'o/ /sems gcig pu las nges pa'i mthar 'gyur mi srid do/ /de ci'i phyir zhe na/ sems la ni skad cig tu 'jug pa las skad cig tu ldog ste sems ni cha phra bas bsdam par bya ba'i nyes byas so/ /'dir ma smos so/ /lus dang sems gnyis las nyes pa 'byung ba ni ji ltar srog gcod pa dang chang 'thung ba ste/ lus dang sems gnyis las nyes pa byung ba yin te tshig tu mi smra ba'o/ /tshig dang sems gnyis kyi yang yod de/ ji ltar bsams bzhin du tshig lnga 'am bdun las 'das par bud med la chos bshad pa ni tshig dang sems gnyis las byung ba'o/ / lus dang sems dang tshig gsum char las nyes pa byung ba yang yod de/ dper na srog gcod pa lta bu sems kyis kyang bsams la/ lus kyis kyang sbyar te ngag gis kyang gsod ces smra zhing shi ba legs so zhes smra ba'o/ /spyi de lta bu las rtsod pa 'byung zhing gong ma'i lus ngag yid gsum lta bu las byung ba las nang 'khrug cing mi mthun par gyur pa las rtsod pa byung ba dang / gzhan yang nyes pa gtan la ma phebs pa las rtsod pa byung ba ste/ de yang dper na dge slong mos pa can lta bu nyes pa byung ba las dge slong gzhan phan par dga' ba rnams kyis ltung ba shogs shig ces byas na/ ma mthong ngo zhes bka' blo mi bde zhing bsnyon pa dang / ri dwags dgra'i bu nag po lta bu mnyan du yod pa na gnas te/ de yang tshul dang ldan pas lits+tsha bI rnams kyis bsnyen bkur byas pas yangs pa can gyi dge slong dag gis phrag dog skyes te/ de la spangs pa'i klan ka btsal nas de yang dus gcig na kun khrus byed pa'i tshe des ka sha phud de bzhag pa las/ gzhan gyi ka sha dang nor te gyon pa las klan ka btsal te/ de la yang ma glengs des kyang skabs ma phye bar lkog tu spangs pa'i las byas pa dang de yang ma rangs nas mnyan du yod par bcom ldan 'das kyi gan du song ste/ de la bkas smad pa dang / zhib tu snyan du gsol na/ gzhan gyis kyang ma gleng bdag gis kyang skabs ma phye/ mngon sum du ma gyur par spangs pa'i las byas pa ni mi brtsan no zhes bka' stsal nas spangs so/ /dge slong lag pa can ni gzhan gyis glengs na khas blangs so/ /de nas spang bar bya'i las byas pa dang yang bsnyon te/ de bzhin du yang dang yang du bsnyon zhing khas mi len pas nyes pa gtan la mi phebs pa na/ de lta bu dag las phyogs su chad cing rtsod pa byung ba ni nyes pa dang ltung ba la rtsod pa zhes bya'o/ /bya ba las rtsod pa ni dge slong mkhas pa gsal bar dpyod pa dag 'dus shing tshogs nas chos dang 'dul ba bzhin du gsol ba dang gnyis sam/ gsol ba dang lan gsum ste bzhi 'am/ gsol ba rkyang pa la sogs pa'i las byed pas na/ la la na re 'di ni chos ma yin no zhes smras pa dang / la la na re 'di ni chos bzhin yin no zhes smras pa dang / dge slong 'ga' zhig 'dir ma 'dus pa las rtsod pa dang / kha cig 'phyis nas snga ma byas pa las skyo sngogs byas te rtsod pa dang / nang mi mthun pa las rtsod pa dang / chos bzhin ma yin pa las rtsod de 'thab cing rtsod pa las phyogs gnyis su gyes shing chad pa las 'thab mo byung ba ni bya ba las rtsod pa ste rtsod pa bzhi smras zin to/ /zhi bar bya ba bdun smra bar bya ste/ gong ma'i rtsod pa rnam pa bzhi lta bur bya ba la zhi bar bya ba rnam pa bdun gyis zhi bar bya ba yang so sor kha bstan par bya ste/ de la 'khrugs pas rtsod pa la ni mngon sum du gdul bar bya ba dang / tshul shing mang po sbyin pa dang / gnyis kyis zhi bar bya zhing 'dul bar 'os te de gnyis kyis zhi bar bya'o/ /mngon sum du 'dul zhes bya ba ni/ rtsod pa rnam pa bzhi lta bu byung ste/ dge 'dun gyi phyogs gnyis su chad par gyur na dge slong rnams kyis dge slong gzu bo zhal che ba bsko bar bya ste/ gang zag gsum mngon du gyur pa ste/ de yang gang zhe na rgol ba mngon sum pa dang / lan ldon pa dang mngon sum pa dang / gzu bo mngon sum du gyur pa dang / chos mngon sum du gyur pa ste/ ston pa'i bstan pa ji lta ba bzhin du ston gyis de las mi 'gal ba'o/ /de la rgol ba pos gnas bcu drug tu don shin tu bsams nas gzung bar bya ste/ bden pa dang / dus dang / tshod dang / don du dben pa dang mthong ba dang / thos pa dang / dogs pa dang / lus dang / ngag dang / grong dang / dgon pa dang / mtshan mo dang / nyin par byas pa dang / lhag ma lus pa dang / lhag ma ma lus pa dang / slong bar nus pa'o/ /de'i tshig mi brtsan pa rnam pa lnga ste/ don gtan la ma phebs pa dang / gcig nas gcig tu ba'i tshig dang / bsnyen par rdzogs pa'i tshig las don 'dzin pa dang / mdo sde 'dzin pa dang / gnas mi shes pa'o/ /slar ldog pa lnga ni brtsan no/ /lan ldon pas kyang rnam pa bcu drug po 'di rnams soms la skabs dbye bar bya'o/ /ci ste tshul khrims dang ldan pa yin nam/ 'gyod pa can nam/ mang du thos pa'am/ 'dul ba gtan la 'bebs pa yin nam/ ci mthong ba las gleng bar byed dam zhes pa la sogs pa bcu gnyis ni snga ma bzhin no/ /rnam pa lngas ni tshig mi brtsan par bya ste/ mtshams sbyor ba ni mi smra ba ba dang / gzhan las gzhan du 'gyur ba dang / phyogs la bstan te nyes pa khas len pa las kyang ma nyes par bsnyon pa dang / dge slong rnams la skur pa 'debs pa dang / rim gro med pa'o/ /slar bzlog pa ni brtsan par bya'o/ /rgol ba dang / lan ldon pa gnyis 'thab mo'i nyes dmigs de zhi ba'i yon tan du snang na gnyis kyis gzu bo chos bcu drug dang ldan pa btsal bar bya'o/ /tshul khrims dang ldan pa dang / slob pa 'dod pa dang / thos pa mang ba dang / 'dul ba la mkhas pa dang / gzu bo'i chos bzhin du ma 'dres pa 'dod pa la sogs pa ltar mi 'gro ba dang / 'dod chags dang zhe sdang gi ma yin pa dang / rgyal ba'i tshig las mi 'da' ba dang / ma bcas pa las mi 'cha' ba dang / bcas pa las mi bsgyur ba dang / chos de zhi bar nus pa dang / slong bar nus pa'o/ /gzu bo la gsum ste/ gang lus dang ngag mi sdom par de phyogs gnyi ga'i thad du bdag nyid song nas dkrugs mar byed pa dang / gang dag ma bsdams pa ste/ phrin pa las sbyor ba dang gnyi ga la yang sdom pa ste/ de lta bu bskor bar bya'i snga ma gnyis ni ma yin no/ /byis pa lta bu lnga ste chos ma yin pa'i phyogs su 'jug pa dang / rtsod par 'gyur bar stobs pa dang / gzu bo gzhan las mdo sde dang so sor thar pas dge slong rnams la sman pa dang / rim gro med pa'o/ /slar bzlog pa lnga ni gsal ba'o/ /gzu bos rtsod pa zhi bar bya ba nyams su blang ba dang / bdag nyid la rnam pa brgyad du brtag par bya ste/ ci bdag gis thog ma ci las byung ba shes sam/ bdag ni grogs po gzu bo bzhin nam/ sngon 'dres par byed pa ma yin nam/ ji bdag gi tshig brtsan nam nyes pa de dag rnam par byang nus sam/ lan glan par nus sam/ chos bzhin du zhi bar bya nus sam/ ci mi dge ba las slongs pa la mkhas sam/ gzhan yang rnam pa brgyad de/ 'di na 'di ltar rgyal ba'i gsung bsrung ba mdo sde la sogs pa 'dzin pa lta yod dam/ gang 'phyas 'tshol ba slar zlog par byed pa'i gnas la sogs pa lta yod dam/ rgyal po la brten tam/ khyim pa la brten tam/ phyi rol pa la ma yin gyi dge 'dun yin gyi dge 'dun nyid las zhi bar sbyor ba lta yod dam 'cha' ba'o/ /gzu bo de dag gis mngon sum du 'dul bas rtsod pa zhi bar bya'o/ /mngon sum du bya ba la rnam pa gnyis te/ gang zag mngon sum du bya ba dang / chos mngon sum du bya ba'o/ /gang zag mngon sum du bya ba la rnam pa gnyis te/ gang la zhi bar bya ba dang gang gis zhi bar byed pa de dag mngon sum du gyur pa'o/ /chos mngon sum du bya ba ni ji ltar chos dang 'dul ba bzhin no/ /des rgol ba la rnam pa brgyad du brtag par bya ste/ cho ga dang / spyod yul dang / mdza' ba dang grogs po dang / lus kyi las dang ngag gi las dang / 'tsho ba dang thob pa ste/ sdig pa can du rig na ma smra zhig ces bsgo bar bya'o/ /de bzhin du lan ldon pa la yang rnam pa brgyad du ste/ de ste sdig pa can yin na khyod kyis ngag gi las thog ma ji lta bu yin zhes dris shig /dris na yang ji skad du smra ba de bzhin no gyis shig /rnam pa drug tu sbyar bar bya ste/ rgyal ba nyid rig par bya ba dang / brtag pa dang / 'byung ba dang / dri ba dang / dam 'cha' ru zhugs pa dang / spro bar bya'o/ /lan ldon pa la yang de bzhin du'o/ /rnam pa bcu gnyis su lan ldon pa dang dam 'char gzhug ste/ mdo sde dang sbyar/ chos bzhin 'dul ba bzhin du rtsod pa smra bar bya'o/ /de la rnam pa lngas ni mi nus par 'gyur te/ rjes su bstan pa'i tshig lnga mngon sum du mi shes pa'i phyir te rgol ba dang / lan ldon pa dang / chos bzhin du rigs pa dang chos bzhin du brtags pa dang / chos bzhin du ma yin par rtog pa dang / dam 'cha' ba bzhin mi 'dzin pa'o/ /rnam pa lngas zhi bar mi nus te/ rtsod pa'i rang bzhin dang / 'byung ba dang / gzung ba dang / bcas pa dang / zhi nas yang mi 'byung ba mi shes pa'o/ /gzhan yang rnam pa lnga ste 'khrul ba dang / gsang ste smras pa dang / nor bar smras pa dang / glo bur du smras pa 'dzin pa dang / smras pa yang lan gsum dam 'char mi 'jug pa'o/ /gnas bcu drug tu ltung ba bstan par bya ste/ lci ba dang / yang ba dang / lhag ma lus pa dang / lhag ma ma lus pa dang / gnas ngan len dang lus kyi dang / ngag gi dang / dge ba dang / mi dge ba dang / lung du mi ston pa dang / bcas pa dang / bshags pa dang / bsdam par bya ba dang / ngan du smras par gyur pa dang / 'dul ba las gda' bar 'gyur ba'i rnam pa lnga ste/ de la bsdigs pa la sogs pa'i chad pa'i las dang sbyar ro/ /yang chad pa'i las rnam pa bcu drug ste/ tshangs pa'i dang / bskrad pa dang / yod du mi gzhug pa dang / mig lam du mi snang ba dang / de'i rang bzhin du tshol du gzhug pa dang / spyo bar bya ba dang / smad par bya ba dang / spang bar bya ba dang / phyogs med par bya ba dang / sma dbab par bya ba dang / 'gyod pa dang / dogs pa dang / rab tu 'gyed par byed du gzhug pa dang / dogs par bcas pa dang / zug rngu 'byin pa dang / ro bzhin du bya'o/ / rnam pa bcu drug gi las byas te/ mngon sum du gyur pa dang / skabs phye ba dang / glengs pa dang / dran par byas pa dang / rang gis khas blangs pa dang / pha rol pos khas blangs pa dang / brtags pa dang / brtag mi dgos pa dang / dri ba dang / dri mi dgos pa dang / khas len du gzhug pa dang / de khas len du ma bcug kyang rung ngo / /rnam pa bcu drug gis rtsod pa zhi bar gyur te/ chos bzhin pa dang / dge 'dun gyis bsgo ba dang / rgyal ba'i gsung dang / mthun pa dang / phyogs dang / lan ldon pa'i phyogs la bsgo ba dang / rgol ba 'dul ba las mi 'gal ba dang / rtse ba'i nyes pa mi 'chab pa dang / byung ba dang bcas pa dang / rjes su bcas pa dang / gnang ba dang / mi gnang ba sbyong ba dang / rgol ba dang lan ldon pa'i dam cha 'dzin pa dang / mdo sde ston pa dang / 'dul ba mthun pa dang / chos kyi spyan 'phel ba dang / chos dang 'dul ba bzhin zhi bar byed pa'o/ /slar bzlog pa ni ma zhi ba'o/ /mi nus na dge 'dun rnams la spo bar bya ste/ de la mngon sum du bya ba ni dge 'dun la mngon sum du spos pa dang gsum mo/ /des kyang ma nus na mchog la gtad par bya'o/ /de dag gis kyang ma nus na mchog gi yang mchog la'o/ /de dag gis kyang ma nus na slar dge 'dun la spo bar bya'o/ /de dag gis gnas gud nas gnas brtan dang bcas/ so sor thar par bcas pa'i dge 'dun la rtsod pa khrid nas gtod par byed pa'i dge slong sgo shig /des kyang ji ltar gyur pa smros shig /des kyang ma nus na rtsod pa sbed par byed pa de nyid la gtod cig des mdo sde la sogs pa 'dzin pa la spobs shig /de dag gis kyang ma nus na de nyid la'o/ / des kyang gang na gnas brtan gtso'am grags pa de la thog ma nas smros la gtod cig /des de dag la ci yang blang bar mi bya/ kha don la sogs pa yang sbyin par mi bya/ mdun nas rgyab tu 'dug la/ ma 'thab zhig gnyis ka rgyal bar mi 'gyur gyis/ gcig la'o zhes de skad nyi tshe smos shig / de zhi bar gyur na legs par zhi bar bya ste/ de ltar na mngon sum du 'dul ba yin no/ /de ste gnas brtan gyis kyang ma nus na/ des sbed par byed pa la gtod cig /des kyang dge 'dun la'o/ /dge 'dun gyis kyang tshul shing mang po len du bcug nas zhi bar bya'o/ /rnam pa lngar rgol ba dang / lan ldon pa por 'dzin pa'i phyir rtsub pa dang / gtum par byed pa'i phyir gtum pa dang / rab tu dam du 'dzin pa'i phyir dam du 'dzin pa dang / dbyen du 'gyur ba'i dngos po bcu bzhi 'dzin pas na/ dbyen du 'gyur ba dang dogs pa dang / gnas brtan gyi mtha'i bar du phyin kyang sbyor ba slar bzlog tu mi btub pa'o/ /tshul shing 'brim pa la rnam pa bzhi ste/ gang na gnas brtan chos bzhin mi smra ba mang ba na dgab par bya ba dang / slar bzlog pa de la mi dgab par bya ba dang / rna bar bshubs pa ste/ gang na rna drung du khyod kyi mkhan po des ni chos kyi tshul shing blangs kyis/ khyod kyis kyang long shig ces bsgo ba dang / mnan pa mang shing dge 'dun gyi dang bzhi'o/ /tshul shing chos bzhin ma yin par 'drim pa bcu ste/ chos bzhin ma yin par len pa dang / 'dul bar mi mthun pa dang / ma 'dus par len pa dang / cung zad cig gis nyes pa dang chung ngu dbye bar dogs pa dang / gnas brtan gyi mthar ma phyin par sbyor ba bzlog pa dang / shes par ldan pa la sgyur bar mi byed cing 'dul ba 'dzin pa la sogs pa mi 'dri ba dang / dge 'dun 'byed par 'dod pa dang / dge slong chos bzhin ma yin par smra ba mang por 'dod cing / dge 'dun la dbye bar 'gyur ro snyam du shes pa dang / chos ma yin par smra bar 'gyur ro snyam du shes so/ /slar bzlog pa bcu ni chos bzhin yin no/ /tshul shing 'drim pas tshul shing rnam pa gnyis su ste/ chos kyi tshul shing ni dbyibs dang kha dog dang gzugs su ldan pa'o/ /chos ma yin pa'i tshul shing slar bzlog pa'o/ /chos kyi tshul shing ni lag pa g.yas par long shig/ chos ma yin pa'i tshul shing ni lag pa g.yon pa'o/ /de nas mdun du 'dug pa la bsngags pa dang / mi bsngags pa gnyis brjod par bya'o/ /chos ma yin pa'i tshul shing ni phyir lag pa brkyang ba dang / tshig dang po dang gnyis kyi bar du ma byin cig /gsum pa la sbyin te/ 'dul ba las 'das pa'i nyes byas 'chags su chug shig de ste chos kyi tshul shing gcig gis nyung bar gyur nas/ kun shes kauN+Di n+ya'i phyir yang gcig long / de ste chos kyi tshul shing mang por gyur na/ chos bzhin du rtsod pa de zhi ba yin te/ gang gis bskyod pa de ltung ba'o/ /de ste chos ma yin pa'i tshul shing mang bar gyur na yang / chos bzhin ma yin pas zhi ba yin te/ de yang bskyod na nyes byas so/ /de ltar gang tshul shing mang po brims pas zhi bar gyur pa yin no/ /mi ston pa'i rtsod pa la zhi bar bya ba rnam pa gsum gyis bya ste/ 'khrugs pas rtsod pa bzhin du mngon sum gyis 'dul ba dang / dran pas 'dul ba dang / ma myos pas 'dul ba sbyin par bya ste/ mngon sum gyis 'dul ba ni gong ma dang 'dra bar sbyar ro/ /dran pas 'dul ba sbyin pa ni gyad bu nor la dge slong dag gis phas pham pas skur te de la glengs pa dang / ngas byas pa mi dran no zhes zer ba la dran nam mi dran zhes sems su gzhug ste/ gsol ba dang las gnyis kyis dran pas 'dul ba sbyin par bya'o/ /ma myos pas 'dul ba ni ji ltar dge slong bye ma can myos pa'i tshe byas pa mi dran pas gnang gis nam dran pa tshun chad snga ma rjes su zhugs te byas pa ni nyes pa bshags dgos kyi nam dran pa'i mtshams soms shig ces ma myos pa'i 'dul ba gsol ba dang las gnyis kyis sbyin par bya'o/ /gang mos pa'i tshe glengs pa ni chos bzhin du glengs pa ma yin no/ /nyes pa'i rtsod pa la zhi bar bya ba rnam pa bzhis zhi bar bya ste/ mngon sum gyis zhi bar bya ba dang / khas len pas zhi bar bya ba dang / de'i ngo bo nyid tshol bas zhi bar bya ba dang / rtswa bkram pa lta bus zhi bar bya ba'o/ /de la mngon sum gyis zhi bar bya ba ni/ ri dwags dgra'i bu nag po spang ba las brtsams te/ rgol ba dang / lan ldon pa dang / chos bzhin bya ba mngon sum du gyis shig ces 'byung ba'o/ /khas len pas zhi bar bya ba ni/ nyes pa byas pa pha rol gyis glengs kyang rung ma glengs kyang rung ste/ rang gis chos bzhin du bshags shing mthol bas zhi bar bya ba'o/ /ngo bo nyid tshol bas zhi bar bya ba ni dge slong lag pa can lta bu yang dang yang smyon cing khas len pa ni nyes pa'i dmigs gtan la ma phebs shing gang yin pa gtol med pas/ gang yin pa gtan la 'bebs shing ngo bo nyid tshol ba'i 'dul ba las na sbyin pa yin no/ /rtswa bkram pa lta bus 'dul ba sbyin pa ni/ rtsod pa phyogs gnyis su chad de/ gnas pa la phyogs gnyis ka'i gtso bo gnyis rang rang gi phyogs la bsgo ste/ gcig la gcig bzod par gsol zhing nyes pa bshags te bsdu bas zhi bar bya'o/ /bya bas rtsod pa ni las brgya rtsa gcig las glengs te/ ltung ba ris lnga las rtsod pa byung ba na rtsod pa gong ma kun zhi ni 'di yang zhi bar 'gyur te/ dge 'dun kun mthun zhing 'dum pas zhi ba'i phyir zhi bar bya ba lhag par bya ba med de/ de ltar na rtsod pa bzhi la zhi bar bya ba bdun te/ mngon sum dang / tshul shing mang po len pa dang / dran pa dang / ma myos pa dang / ngo bo nyid tshol ba dang / rtswa bkram pa dang / khas blang bar bya ba lta bus zhi bar bya'o zhe'o/ /de dag gi dngos po zhi bar byed pas na zhi bar byed pa bdun po ni phas pham pa man chad nyes byas yan chad kyi nang du ma gtogs so/ /rtsod pa zhi ba mi brjed pa'i tshig ste/ ming mkhan tsam mo/ /tshe dang ldan pa dag bdag gis yongs su dag pa rig par bya ste zhes bya ba nas/ de de bzhin du 'dzin to zhes bya ba yan chad ni yongs su dag cing gtsang bar byas pas bar du gcod par mi 'gyur zhing las su byas pa yin no zhes bstan pa'i tha tshig go/ /gleng gzhi dang phas pham pa nas/ ltung ba ris lnga po bshad zin to zhes bya ba ni gong du kun smras zin mod kyis/ 'on kyang g.yeng bas kha cig ma go ba dag yod pas/ yang bzlas nas bsdus te smras pa'i tha tshig go/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas zhes bya ba de ni/ yon tan las mtshan du gsol ba ni gong ma dag dang mthun no/ /de'i mdor gtogs zhes bya ba ni 'dul ba 'bum gyi mdo so sor thar pa 'di nyid do zhe'o/ /mdor bsdus zhes bya ba ni tshig dang don du 'dus pa la bya'o/ /de dag tu zad do zhes bya ba ni mdor bstan pa la bya'i rgyas par 'dul ba rnam par 'byed pa dang / phran tshegs la sogs pa'i nang nas 'byung ba'ang rig par bya'o/ /'o na bsgrub par bya ba'i chos der zad dam zhe na ma yin te/ gang gzhan nas 'byung ba zhes bya ba la sogs pa smos te/ gzhan nas 'byung ba zhes bya ba ni 'dul ba'i dngos po dang gzhung dam pa la sogs pa la bya'o/ /gcig tu mthun pa'i chos zhes bya ba ni chos ni mya ngan las 'das pa la bya ste/ de dang mthun pa gang zhe na/ mdo sde dang ma mo dag las 'byung ba bsgrub par bya ba'i chos gang yin pa de dag la yang bslab par bya'o zhes bstan to/ /khyed rnams zhes bya ba ni gang bstan pa la zhugs shing 'khor ba na'ang 'dug pa'i nyan thos rnams la bya'o/ /'dum pa zhes bya ba ni phan tshun mi rtsod cing 'phrod pa'o/ /mthun pa zhes bya ba ni lta ba dang 'tsho ba dang / tshul khrims dang cho ga la sogs pa tha dad pa ma yin zhing / mya ngan las 'das pa'i chos dang / rnam par grol ba'i phyogs su bsgrub par mthun pa'o/ /dga' ba zhes bya ba ni dge ba'i phyogs 'phel bar dga' zhing ting nge 'dzin mngon par bsgrub pa la dga' ba'o/ /mi rtsod pa zhes bya ba ni 'thab mo 'gyed pa'am/ shags su rtsod pa'am/ gcig la gcig mtshang 'dru zhing rgol ba med pa'o/ /sems kun du bsrung ba zhes bya ba ni/ tshangs pa mtshungs par spyod pa rnams kyi yid dang mi 'gal bar sems bsrung ba'o/ /dran pa zhes bya ba ni bya ba dang mi bya ba gnyis las bsams pa'i thog mar gtong zhing blos zin pa'o/ /dga' ba zhes bya ba ni bsgrub pa dang / tshul khrims bsrung ba la sems spro bar bya'o zhes bya ba'i don to/ /brtson par bya'o zhes bya ba ni de ltar gong du bstan pa'i gnas rnams la yang bslab cing brtson par bya'o zhe'o/ /de la 'di man chad ni sngon gyi de bzhin gshegs pa'i nyan thos rnams la/ so sor thar pa mang nyung ngam khyad yod dam med dam de dag gis nyan thos cis 'dul na/ de'i tshe da ltar gyis so sor thar pa 'dra ba med dam/ de dag gis cis 'dul zhes gang yin pa de dag gis so sor thar pa 'dra ba med cing 'dul ba yang ma bshad ma bstan na ni/ de dag kyang ji ltar rnam par grol zhes de lta bu'i rtog pa bsal ba dang / bskal pa bzang po tshun chad de bzhin gshegs pa rnam par gzigs nas/ da ltar gyi shAkya thub pa bzhugs pa phan chad dang / sangs rgyas rabs bdun po de dag gi tshe na sngon gyi de bzhin gshegs pa'i nyan thos rnams la so sor thar pa lnga pa rnams kyang / de dag cis 'dul ji ltar rnam par grol ba dang / sangs rgyas shAkya thub pa'i tshe sems can rnams bsod nams dman pa dbang po rtul ba/ shes rab zhan pas bslab pa'i gnas ci dang ji ltar bcas ston par bzhed de/ bzod pa dka' thub dam pa zhes bya ba la sogs pa ston to/ /de la bzod pa dka' thub dam pa zhes pa nas sh+lo ka gcig gis de bzhin gshegs pa rnam par gzigs kyi sku ring la/ dge slong dag dang sems can dag phal cher log pa'i brtul zhugs lus kyi dka' thub la dad nas/ lta ba de las bzlog cing de'i gnyen por sh+lo ka gcig gis bstan to/ /de yang rnam pa bzhi lta bu'i tshul gyis dad de/ bzhi gang zhe na/ lus kyi dka' thub la dad pa dang / dka' thub kyi nan tan la dad pa dang / dka' thub kyi 'bras bu la dad pa dang / dka' thub ston pa'i gang zag la dad pa'o/ /de la lus dka' thub ji ltar 'dra ba dag la spyod cing gnas she na/ chur mchongs pa dang / wa'i brtul zhugs dang / khyi'i brtul zhugs dang / tshe gcig tu thal ba'i nang du 'greng zhing phur bu 'dzin pa lta bu'o/ /de yang ji ltar de la dad ce na/ mu stegs can gyi log pa'i dka' thub de lta bu dag byas na/ las rnying pa ni dka' thub byas pas 'phya zhing zad par 'gyur/ las sar pa ni ma byas ma spyad pas na chu lon bzhin te/ tshe phyi ma la zag pa zad pas/ las zad pas sdug bsngal zad de/ sdug bsngal zad pas grol thar cing mthar phyin par gyur te/ de ltar ston pa ni dge sbyong yin no zhes zer te/ de'i gnyen por log pa'i dka' thub rnam pa bzhir lta ba las phral nas/ yang dag pa'i dka' thub lta bu la bsten par bya'o/ /bzhi gang zhe na 'phags pa'i bden pa bzhi la dad pa dang / dka' thub kyi nan tan bden pa bzhi'i yon tan la nan tan byed pa dang / dka' thub kyi 'bras bu ni rgyun du zhugs nas dgra bcom pa'i bar dag ste/ bden pa bzhi'i 'bras bu la bya'o/ /ston pa ni de bzhin gshegs pa rnam par gzigs la dad par bya'o zhes bka' stsal to/ /de lta bas na dka' thub thams cad kyi nang na chos la bzod pa ni dam pa ste/ de la ji ltar bzod pa zhe na/ sems kyis 'phags pa'i bden pa bzhi'i chos rnams la bzod pa dang de nyid dam par bstan to/ /de la bzod pa yang gsum ste/ gnod pa la mi mjed pa'i bzod pa dang / sdug bsngal la ji mi snyam pa'i bzod pa dang / chos la nges par rtog pa'i bzod pa'o/ /de ltar bzod pa rnam pa gsum gyi nang na yang chos la nges par rtog pa'i bzod pa dam pa ste/ de ltar sems kyis 'phags pa'i bden pa bzhi la phyin ci ma log par shes par bgyis brtags te/ mi rtag pa dang / sdug bsngal ba dang / stong ba dang / bdag med pa'i chos la sems rtse gcig tu gnas par bzod pa de nyid kyis mya ngan las 'da' bar 'gyur bas dam pa yin no zhes bstan pa yin no/ /lus kyi dka' thub kyis mya ngan las 'da'o/ /zhes sangs rgyas kyis ma gsungs pas na/ lus kyi dka' thub ni mchog dam pa ma yin te/ de las 'phags par bstan pa'i phyir de'i sems kyi bzod pa de nyid kyis na mya ngan las 'das pa mchog gi 'bras bu thob bo zhes sangs rgyas kyis bka' stsal te/ sangs rgyas gsung zhes bya ba ni yid ches par bstan pa'i tshig go/ /mya ngan las 'das pas zhes bya ba ni 'khor ba'i rgyun bcad de/ bsgrub par bya ba'i mthar phyin cing / phung po lhag ma ma lus pa'i mya ngan las 'das pa'o/ /de ltar na sems kyis 'phags pa'i bden pa bzhi la brten cing bgrod pas na/ mya ngan las 'das pa mchog gi 'bras bu dam pa 'thob kyis lus kyi dka' thub dam pa ma yin no zhe'o/ /mchog ces bya ba ni mu stegs can dag lus shin tu sdug bsngal zhing / lus yongs su gdungs par dka' thub byas pas mya ngan las 'da' ba thob po zhes 'chad pa dag kyang yod do/ /de dag gi gtol med par nyon mongs pa thams cad spangs pa bde zhing skyon med pa mya ngan las 'da' ba'i rang bzhin thob pas na mya ngan las 'das pa mchog ces smos so/ /rab tu byung ba gzhan la gnod pa dang / /gzhan la 'tshe ba dge sbyong ma yin no/ /zhes pa sh+lo ka phyed ni lus kyi dka' thub ston pa la dad pa'i gnyen por gsungs te/ rab tu byung ba ni khyim gyi gnas thams cad spangs nas/ gsol ba dang zhu ba'i las kyis legs par gsungs pa'i chos 'dul ba la zhugs pa ni rab tu byung ba zhes bya'o/ /de lta bur rab tu byung ba ni pha rol po gzhan dag sdig pa mi dge ba'i chos dang phral nas phan pa dang bde ba sbyin zhing bstan pa'i rigs kyi/ ci ste lus kyi dka' thub gzhan la gnod cing don med pa de bzhin gshegs pa rnams kyis smad cing bsngags pa ma yin pa de lta bu bya bar ston pa ni gzhan la yang dag par gnod cing gtse ba yin pas de bzhin gshegs pa'i lung dang 'gal bas na de lta bu ston pa ni dge sbyong ma yin no zhe'o/ /'o na dge sbyong zhes bya ba ji lta bu la bya zhe na/ sems kyis 'phags pa'i bden pa bzhi la rtog par bzod pa/ dge sbyong gi 'bras bu bzhi mngon par bsgrub cing tshul dbyung ba zhi ba/ dge ba la gcig tu 'dun cing gnas pa de dag la dge sbyong zhes bya ste/ de bas na de lta bu'i lus kyi dka' thub don med pa la dang bar mi bya'o/ sems kyi dka' thub dam pa gang yin pa la dad par bya'o zhe'o/ /de bzhin gshegs pa gtsug tor can gyi sku ring la de bzhin gshegs pa de'i nyan thos dang / sems can dag tshul khrims bsrung ba dang / dge ba spyad pa rnams mtho ris bzang 'gror skye ba dang / mtho ris kyi longs spyod thob par shog ces smon lam 'debs shing tshangs par spyad pas na de nyid mi rigs shing 'gal bas na/ de ltar lta ba bzlog pa'i phyir gnyen por mthu rtsal mig dang ldan par zhes bya ba sh+lo ka gcig gsungs so/ /mthu rtsal zhes bya ba ni bsod nams dang shes rab kyi tshogs te/ mya ngan las 'das pa'i mthu rtsal yod pa la bya'o/ /mig dang ldan pa ni shes rab kyi mig dang ldan pa la bya ste/ phung po ma lus pa'i mya ngan las 'da' ba thob par byed pa'i mig dang ldan pa'o/ /mthu rtsal dang mig ces bya ba ni dper bstan pa ste/ 'jig rten na skye bo mthu rtsal med cing nyam chung ba dang / mig med cing mig dang mi ldan pa'i mi ni grog po dang tsher ma dang g.yangs dag tu 'gro zhing ltung ba'i rgyur 'gyur ro/ /su mthu rtsal dang mig dang ldan pa'i skye bo ni lam mi bde ba dang nyam nga ba thams cad las 'byol zhing mthu rtsal dang ldan pas na lam nyam nga ba thams cad las 'da' bar byed do/ mig dang ldan pas na grog por mi ltung zhing lam nyam nga ba las thar bar 'gyur ro/ /de bas na skyes bu mig dang ldan pas lam nyam nga ba spong zhing lam bde bar 'gro ba'i rigs so/ /de bzhin du bsod nams kyi mthu rtsal dang ldan zhing shes rab kyi mig dang ldan pas kyang mya ngan las 'das pa'i chos mtha' yun du bde zhing dpe med pa btang ste/ mtho ris bag med pa'i gnas g.yangs dang 'dra ba zad pa'i mtha' can 'khor ba'i rgyu nyon mongs pa'i gnas ji ltar lam nyam nga zhing mi bde ba de lta bur mkhas pa'i skyes bu dam pa dag der sgrub cing smon pa ni shin tu mi rigs so zhes bstan to/ /nyam nga ba dag yod pa ni de ltar mtho ris su smon lam 'debs pa nyid khams gsum du 'khor bar 'gyur bas na/ de ltar sgrub cing smon pa nyid nyam nga ba'o/ /yod pa ni nyon mongs pa ste/ sdug bsngal gsum dang / 'du byed kyi sdug bsngal ba ste/ gzugs med pa'i khams su 'gyur ba'i sdug bsngal te/ gzugs yod pa'i lha man chad 'dod pa'i khams mi yan chad do/ /sdug bsngal ba'i yang sdug bsngal ba ste/ byol song dang yi dwags dang sems can dmyal ba'o/ /sdug bsngal brgyad ni skye ba dang / rga ba dang / na ba dang / 'chi ba dang / gnyen sdug pa dang bral ba dang / dgra sdang ba dang phrad pa dang / 'dod pa mi rnyed pa dang / phung po lnga rgyas pa'i sdug bsngal ba'o/ /mkhas pa'i 'tsho ba 'jig rten 'dir zhes bya ba mkhas pa ni bsod nams dang shes rab dang ldan pa'i skyes bu dam pa mya ngan las 'das pa'i rgyud ldan zhing thob pa'i thabs la mkhas pa'o/ /'tsho ba ni nye bar len pa'i phung po lnga dang ldan zhing 'jig rten na gnas pa'i gang zag nyid la bya'o/ /sdig pa zhes bya ba ni mtho ris su smon lam 'debs pa nyid khams gsum gyi longs spyod la chags pas na/ nyon mongs pa dang 'khor ba las nams kyang thar bar mi 'gyur bas de nyid sdig pa'o zhe'o/ /yongs su spong ba ni mig dang ldan pas nyon mongs pa spangs nas mya ngan las 'das par 'gyur ro/ /de bzhin gshegs pa thams cad skyob kyi sku ring la dge slong dag phal cher rang gi tshul khrims yongs su sdom pa tsam gyis chog par 'dzin te/ gzhan du mu stegs can gyi dge slong la 'phyas 'dogs shing skur ba 'debs pas na/ dge slong gi don dag kyang chud zos par gyur pas na/ de'i gnyen por de bzhin gshegs pa thams cad skyob kyis/ skur ba mi gdab gnod mi bya/ /zhes bya ba la sogs te/ sh+lo ka phyed dang gnyis gsungs so/ /skur pa mi gdab pa ni rab tu byung bas mu stegs can gyi dge sbyong la ngag gi sgo nas skur ba mi gdab par bstan pa'o/ /gnod par mi bya ba ni lus kyis mi gtse zhing yid kyis ngan du mi bsams pa ste/ mdor na sgo gsum nas mu stegs can dang skye bo mang po kun la gnod par mi byed cing mi 'tshe ba'o/ /so sor thar pa'i ni 'gro ba rgyud lnga las thar par byed pas na thar pa'o/ /bsdam par bya ba ni ltung ba ris lnga la bya ste/ de ma ral mi nyams mi 'jig cing shin tu sdoms shig pa'o/ /zas kyi tshod kyang rig par bya ba ni rnal 'byor spyod pas zas kyi tshod rig par bya ste/ ha cang 'grangs ches na brtson 'grus kyi dri mar 'gyur ba dang / ha cang bkres na ni nyon mongs pa mthar ltung bar 'gyur bas brtson 'grus nus shing sems yang ba dang / zas ran par bza'o zhe'o/ /bas mtha'i gnas su gnas par bya/ /zhes bya ba ni dgon pa la bya ste/ de lta bu'i gnas dben par gnas par bya'o zhe'o/ / de ltar na dge slong dag tshul khrims gyis mgu zhing tshul khrims 'dzin pa 'ba' zhig gis chog par mi bya'o/ /bsam gtan la sogs pa yang sgrub cing bsgom par bya'o zhes bya ba'i tshig tu/ lhag pa'i sems la yang dag 'jug /ces smos te/ lhag pa'i sems zhes bya ba ni nyon mongs pa'i sreg pa dang bral ba ste/ lhag pa'i shes rab dang / lhag pa'i ting nge 'dzin dang / lhag pa'i tshul khrims la bya'o/ /skabs 'dir lhag pa'i sgras ni bslab pa gsum char yongs su bsgrub par bya ba bstan to/ /yang gcig tu na tshul khrims kyis mgu zhing chog par 'dzin pa'i gnyen por bstan pas lhag pa'i ting nge 'dzin 'ba' zhig bsgrub par bya'o zhes kyang 'chad de/ de bas na lhag pa'i ting nge 'dzin gyis ma bsgrubs sam/ btsal na mya ngan las 'das pa mi thob ste/ tshul khrims ma god ma ral te/ brgyar thub tu zin gyis kyang mtho ris bzang 'gror skye'o zhes 'byung bas na/ de bas na lhag pa'i ting nge 'dzin mi sgrub tu mi rung bas de'i gnyen por/ lhag pa'i sems la yang dag 'jug /ces smos so/ /yang dag 'jug ces bya ba ni dge slong dgon pa bas bslab pa gsum la gnas shing brtson pa dang spyad par bya'o zhe'o/ /'di ni sangs rgyas bstan pa'o/ /zhes bya ba ni yid ches par bstan pa'o/ /de de bzhin gshegs pa log par dad sel gyi sku ring la de'i nyan thos dag phal cher khe dang bkur sti dang rnyed pa la chags shing grong la lta bar gyur nas 'du 'dzi mang po la spyod pas na/ tshul khrims bsrung zhing ting nge 'dzin bsgrub pa la g.yel zhing gnod par gyur nas de ltar lta ba de bzlog cing de'i gnyen por de bzhin gshegs pa log par dad sel gyis gsungs pa/ ji ltar bung ba me tog ces bya ba sh+lo ka gcig bstan to/ /bung ba me tog ces bya ba ni dper bstan to/ /bung ba zhes bya ba ni gang zag la bya'o/ /me tog ces bya ba ni grong la bya'o/ /kha dog ni tshul khrims la bya'o/ /dri ni ting nge 'dzin gyi ro la bya'o/ /yang na kha dog ni skye bo'i longs spyod nor rdzas la bya'o/ /dri ni 'phral gyi zas la bya ste/ mi gnod ces bya ba ni dper na ji ltar bung bas me tog gi khu ba gzhibs te/ 'gro yang me tog gi dri dang kha dog la mi gnod par 'gro ba bzhin du gang de bzhin gshegs pa yang tshul khrims las mi 'gal zhing ting nge 'dzin bsgrub pa la bar chad du mi 'gyur ba dang / skye bo'i longs spyod dang 'phral gyi kha zas la mi chags shing skye bo'i longs spyod la mi gnod par de 'dra ba'i tshul du bsod snyoms la gshegs shing spyod do/ /de bas na nyan thos khyed rnams kyang de bzhin gshegs pa'i rjes su slob pa dang / tshul khrims dang ting nge 'dzin las mi nyams shing skye bo'i longs spyod la mi gnod cing mi chags par bsod snyoms la rgyu zhing spyad par bya'o zhes bstan pa'o/ /yang na thub pa zhes bya ba ni gang zag nyid la bya ste/ rang gi rgyud la nyon mongs pas mi 'khor zhing lus dang ngag yid gsum thub pas grong du rgyu ba ni sgo gsum nas nyes pa mi 'byung bar thub pa rnams kyi grong du rgyu bar bya'o zhe'o/ /de bas na dge slong bsod snyoms blangs nas grong du mi gnas par dgon pa la gnas par bya'o zhe'o/ /des na khe dang bkur ste'i mtha' spangs par 'gyur te/ bsod snyoms chog pa tsam las lhag par mi len pas ni khe spangs par 'gyur/ dgon pa na dben par gnas pas ni bkur sti spangs par 'gyur ro zhes bstan to/ /de bzhin gshegs pa gser thub kyi sku ring la/ de'i nyan thos dag thos pa'i longs spyod la zhugs shing / tshul khrims kyi gtam gtan la 'bebs pas na/ kha cig gis yon tan bsngags shing gzhan mu stegs can gyi rab tu byung ba dang / skye bo dag la kha zer zhing 'phyas 'dogs pas na/ skyes bu dam pa'i tshul ma yin pa cher spyod de de'i gnyen por gsungs so/ /bdag gi rigs dang mi rigs dang / /zhes sh+lo ka gcig de bzhin gshegs pa gser thub kyis gsungs te/ de la rigs pa zhes bya ba ni dge ba bsgrub cing spyod pa'i rigs pa'o/ /mi rigs pa ni sdig pa mi dge ba'i chos spyod par mi rigs pa'o/ /brtag par bya ba ni gong ma'i dge ba dang mi dge ba gnyis bdag gis dge ba ni ci byas zhes bdag gi sems kyi rgyud la brtag par bya'o zhe'o/ /gzhan rnams kyis mi mthun pa zhes pa gzhan zhes bya ba ni rab tu byung ba 'di ni dge slong dang / mu stegs can gyi dge sbyong dang skye bo spyod pa dag bdag gi yid du mi 'ong ba'o/ /mi mthun pa zhes bya ba ni gzhan rnams kyis bdag dang mi mthun pa'i chos gzhan gyis sdig pa byas pa dang / dge ba byas pa la bdag gis 'di ni byas pa legs so/ /'di ni ma byas pas nyes shing 'phyas gdags shing smad par mi bya ba'i phyir/ gzhan gyis byas dang ma byas rnams la min/ /zhes smos so/ /mdor na bdag gis nyes pa ci byas legs pa ni gang byas ci yod/ legs pa ni ji ltar sgrub/ nyes pa ni ji ltar spang / thabs kyis dor ba sems la brtags shing dpyad par ni rigs kyi/ gzhan gyi legs pa nyes pa la 'phyas gdab pa ni mi rigs so zhes de bzhin gshegs pa gser thub kyis gsungs so/ /de bzhin gshegs pa 'od srungs kyi sku ring la/ /de'i nyan thos phal cher 'jig rten gyi bsam gtan bzhi'i ro la chags shing mngon par zhen nas/ gong du thar pa mi tshol gnyen po la mi brten/ rnam par grol ba snga ma'i sa dag tu rtsom zhing sgrub par mi byed nas/ de ltar lta ba spang ba'i phyir gnyen por/ lhag pa'i sems la bag bya ste/ /zhes bya ba la sogs pa sh+lo ka gnyis de bzhin gshegs pa 'od srungs kyis gsungs te/ lhag pa zhes bya ba ni so so'i skye bo dang mu stegs can la sogs pa lhag pa ste/ 'jig rten gyi bsam gtan bzhi'o/ /bag bya ba ni dper na tshig tu 'ong gis me la bag byos shig ces ring du spang ba'i don to/ /'jig rten gyi bsam gtan bzhi la bag byas na khams gsum gyi khri mon du mi 'khor ro zhe'o/ /'o na de ltar 'jig rten gyi bsam gtan bzhi la bsrings shing bag byas na gang la bslab cing bsten par bya zhe na/ thub pa'i gnas la bslab par bya'o/ /zhe'o/ /thub pa zhes bya ba ni lus dang ngag yid gsum thub pa ste/ de bzhin gshegs pa la bya'o/ /de'i gnas ni 'phags pa'i bden pa bzhi dang / 'phags pa'i lam yan lag brgyad la bya ste/ de rnams la bslabs shing zhugs na/ 'jig rten bsam gtan ring du spong ba dang / de las 'phags pa rnams byung zhing skye bas na/ thub pa'i skye mched ces bya ste/ de las rnam par grol ba'i 'bras bu skye zhing 'byung ba'i phyir ro/ /de bas na nyon mongs pa dang ring du gyur pa'i phyir nyer zhi zhes smos so/ /nyer zhi rtag tu dran ldan pa ste de la nyer zhi ni sdug bsngal gsum dang brgyad zhi ba la bya'o/ /yang na khams gsum gyi mthong bas spang bar bya ba'i nyon mongs pa brgyad cu rtsa brgyad zhi ba'o/ /rtag tu dran ldan pa ni 'bri ba dang gang ba med par rang bzhin gyis shes bzhin dang ldan pa'am/ bden pa bzhi dang 'phags pa'i lam la sems rtse gcig par gnas pas na rtag tu dran ldan par gnas pa'o/ /skyob pa mya ngan mi mnga' zhes bya ba de bzhin gshegs pa dag kyang de 'dra ba'i thub pa'i gnas la brten te mya ngan mi mnga' zhing nyon mongs pa med pa yin pa de bas na skyob pa zhes yon tan gyis mtshan du gsol te/ de'i phyir de'i rjes su dong zhing zhugs pa'i nyan thos dag gis kyang de 'dra bar byas te/ lhag pa'i sems kyi ting nge 'dzin gyi ro la chags pa de spong ngo / /yang na skyob pa ni gang zag de nyid la bya ste thub pa'i gnas la slob pa'i gang zag gang yin pa des ni rang gi rgyud la nyon mongs pa ldang zhing 'byung bar skyob par nus pas skyob pa zhes bya ste/ de nyid skyob pa mya ngan mi mnga'o/ /zhe'o/ /tshigs su bcad pa 'di gsum gyis 'jig rten gyi bsam gtan bzhi'i ro la chags pa ni mngon par spangs/ 'phags pa'i bden pa bzhi'i chos la brten cing bsgoms pas/ mthong ba'i lam gyis spang bar bya ba'i nyon mongs pa brgyad cu rtsa brgyad yongs su spangs pas na rgyun du zhugs pa'i 'bras bu thob par 'gyur ro/ /de lta bu'i gang zag de'i yon tan ni 'dir 'gyur ro/ /zhes bstan pa'i phyir ro/ /byis pa bsod nams rab tu 'phel/ /zhes bya ba la sogs pa sh+lo ka gcig bstan te/ de ltar 'phags pa'i bden pa bzhi la gnas pas na 'jungs pa dang / ser sna'i dri shin tu spangs te phral bas na/ bdag gi longs spyod la ma chags shing gtong ba skyong zhing sbyin par byed pa dang / gzhan gyi longs spyod la mi lta bas na ma byin par mi len to/ /ma byin par mi len pas na bsod nams rab tu 'phel lo zhe'o/ /tshigs su bcad pa rtsa ba 'dis ni 'dod pa'i khams kyi bsgom pas spang bar bya ba'i 'dod chags spong bar 'gyur ro/ /bsdams pas dgra sogs mi 'gyur ro/ /zhes bya ba 'phags pa'i bden pa bzhi mthong bas na bsdams pa zhes bya ste/ bsdams pa ni lus dang ngag yid gsum gyi sgo nas nyes pa mi 'byung zhing shin tu sdom pa ste/ tshul khrims bsrung ba'o/ /tshul khrims bsrungs pas na gzhan gyi srog mi gcod do/ /srog ma bcad pas na sems la byams pa dang ldan par 'gyur te/ byams pa'i bdag nyid du gyur pas khong khro ba med do/ /tshigs su bcad pa rtsa ba 'dis ni 'dod pa'i khams kyi bsgom pas spang bar bya ba'i khong khro ba spangs par ston to/ /dge dang ldan pas sdig pa spong / /zhes bya ba ni 'phags pa'i bden pa bzhi la sems rtse gcig par yongs su bsgoms pas na/ sdig pa mi spyod de de bas na dge ba dang ldan pa nyid do zhe'o/ /tshigs su bcad pa rtsa ba 'dis ni 'dod pa'i khams kyi bsgom pas spang bar bya ba'i nga rgyal dang ma rig pa spong bar ston to/ /sbyin pas bsod nams rab tu 'phel/ /zhes bya ba man chad tshigs su bcad pa rtsa ba 'di gsum gyis/ 'dod pa'i khams kyi bsgom pas spang bar bya ba'i 'dod chags dang / khong khro ba dang nga rgyal dang ma rig pa bzhi gcig tu bsdus nas gsum du bsdoms te/ chen po dang 'bring po dang chung ngu gsum la gcig gsum gsum ste/ nyon mongs pa'i rim pa rnam pa dgu la drug man chad spangs pa ni phyir 'ong ba'i gang zag ces bya'o/ /dgu char spangs pa ni phyir mi 'ong ba'i gang zag ces bya'o/ /nyon mongs zad pa mya ngan 'da'/ /zhes bya ba tshigs su bcad pa 'dis ni/ gzugs dang gzugs med pa'i khams kyi bsgom pas spang bar bya ba 'dod chags dang nga rgyal dang ma rig pa dang gsum khams gnyis na gsum gsum ste/ drug la yang thum po gcig tu byas la/ chen po dang / 'bring po dang / chung ngu gsum ste/ gcig la yang gsum gsum du bya ste/ nyon mongs pa'i rim pa dgu ste/ dgu char spangs pa ni dgra bcom pa'o/ /de bas na gang zag brgyad la bzhi ni dngos su bshad pas bzhi ni nyon mongs pa'i rim pa spong ba la 'jug pa ste/ rgyun du 'jug pa spangs zin pa ni rgyun du zhugs pa ste/ gong ma gsum yang 'di dang 'dra'o/ /de bas na gang zag brgyad kyi rim pa ni 'dir bstan zin to/ /bcom ldan 'das shAkya thub pa'i sku ring la 'dul ba la bslab pa'i gnas ma bcas te/ 'dul ba 'bum dag ma bstan pa'i tshe dge slong nyes pa la mig che zhing mi dge ba'i chos la nye bar gnas pa dang / dge ba cung zad spyad pa tsam gyis kyang thar bar 'gyur ro zhes bsnyems pa'i phyir/ 'di lta bu'i lta ba bzlog cing de'i gnyen por de bzhin gshegs pa shAkya thub pas/ sdig pa thams cad mi bya ste/ /zhes bya ba la sogs pa tshigs su bcad pa phyed dang bzhis bstan to/ /de la/ sdig pa thams cad mi bya'o/ /zhes bya ba sh+lo ka gcig gis nyes pa la mig che ba'i gnyen por bstan to/ /dge ba cung zad tsam gyis kyang mgu zhing sdig pa mi bya ba ni srog gcod pa la sogs te/ mi dge ba bcu dang / ltung ba ris lnga dang / yang na 'jigs rten na yul chos kyis mi mdzes shing / bya ba mi rigs pa thams cad mi bya'o/ /mkhas par bsnyen par rdzogs zhes bya ba ni bcom ldan 'das kyi lung gis gnang zhing rab tu 'byung du rung ba dang / bsnyen par rdzogs par gnang ba de lta bus bsnyen par rdzogs par bya'o zhe'o/ /yang na mkhas pa zhes bya ba ni shes rab dang ldan pa la bya/ bsnyen pa ni dge ba rdzogs par bya ba'i don yin pas ngag gis mi bya ba bzhi ste/ brdzun dang phra ma dang / byung rgyal gyi tshig dang / zhe gcod par mi smra zhing lhag pa'i shes rab kyi phung po dang / lhag pa'i shes rab la rab tu 'jug pa'o zhe'o/ /rang gi sems kyang yongs su gdul/ /zhes bya ba ni/ yid kyis mi bya ba gsum ste/ chags par mi bsams pa dang / ngan du mi bsams pa dang / log par mi lta ba'o/ /gzhan du na ting nge 'dzin gyi phung po dang / lhag pa'i ting nge 'dzin la rab tu 'jug pa'o/ /'di ni sangs rgyas bstan pa zhes bya ba ni yid ches par bya ba'i phyir shAkya thub pas bstan pa'o zhe'o/ /des ni nyes pa la mig che ba bzlog pa'i gnyen por bshad do/ /nyes pa ni spang ba'i thabs bshad de/ lus kyi sdom pa legs pa ste/ /zhes bya ba sh+lo ka phyed dang gnyis smos te/ lus dang ngag yid gsum sdom pa ni gong ma dag dang yang sbyar/ yang na lus kyi nyes pa dang / ngag gi nyes pa dang / yid kyi nyes pa 'di bsdams na sdig pa mi 'phel bas na/ de'i phyir bsdam par bya'o zhes smos so/ /de bas na lus kyi sdom pa yang legs na/ ngag gi lta ci smos/ ngag gi sdom pa yang legs pa yin no/ /yid kyi sdom pa lta smos kyang ci dgos te/ de'i phyir thams cad bsdom par bya'o zhe'o/ /thams cad sdom pa legs pa ni dus gsum du lus dang ngag yid gsum sdom pa'o/ /kun du bsdoms pa'i dge slong ni yul dang / dus dang gang zag la chad pa med par tshul khrims bsrung ba'o/ /sdug bsngal gsum las rab tu grol/ /zhes bya ba sdug bsngal ni gsum dang / brgyad dang / khams gsum gyi nyon mongs pa dgu bcu rtsa brgyad las rnam par grol zhing 'khor ba'i btson ra nas thar par 'gyur ro zhe'o/ /des ni nyon mongs pa spong ba'i thabs su bshad do/ /ngag rnams bsrung zhing yid kyis rab bsdams zhes bya ba sh+lo ka gcig gis dran pa mi brjed pa'i thabs su ston te/ ngag gi srung ba ni ngag gis mi bya ba bzhi dang / gzhan du na rang gi ltung ba lci yang ci byung na dge ba'i bshes gnyen gyis glengs shing bstan na/ slar 'khyal zhing mi smra bar dge ba'i bshes gnyen gyi khar gus par nyan pa'o/ /yid kyis bsdams pa ni 'gyod tshangs byed pa'i tshe/ tshig gis smras pa ma zad kyis/ yid kyis sems thag pa nas mthol ba'o/ /yang na yid kyis mi bya ba de gsum phyin chad mi byed par yid dam du 'cha' ba'o/ /lus kyis mi dge ba mi byed/ /ces bya ba ni/ lus kyis mi bya ba ni gsum ste/ srog mi gcod pa dang / ma byin par mi len pa dang / 'dod pas log par mi spyod pa'o/ /yang na lus snyogs pa dang / 'tshe ba dang / 'tshog pa la sogs pa'i las rnams mi byed pa'o/ /rnam pa gzhan du na lus kyi spyod yul ma yin pa lnga spang bar ston te/ de yang gang yin zhe na/ rgyal po'i pho brang dang / rigs ngan gyi khyim dang / chang 'tshong ba dang rol mo mkhan gyi khyim dang / smad 'tshong gi khyim rnams su mi spyod pa'o/ /las lam gsum po 'di dag rab sbyangs nas/ /drang srong gsungs pa'i lam ni thob par 'gyur/ /zhes bya ba lam zhes bya ba ni dpe ste/ 'di ltar lam la skye bo kun rgyu zhing 'gro ba ltar lus dang ngag yid gsum gyi lam la yang / dge sdig gi dngos po rgyu zhing 'gro bar byed pas lam dang 'dra ste/ de gsum rab tu sbyangs pas na dri ma dang / skyon med par sbyangs pas drang po'i lam zhes bya ste/ des thob pa ni de bzhin gshegs pa'i bka' yin pas na/ 'phags pa'i lam gyi yan lag brgyad la lung dang mthun par spyad pas na/ gang zag brgyad kyi 'bras bu thob par 'gyur ro zhe'o/ /de bas na sangs rgyas shAkya thub pa'i tshe'i nyan thos ni/ lo bcu gnyis kyi bar du sh+lo ka 'di rnams kyis 'dul zhing rnam par grol bar 'gyur zhing spyod do/ /lo bcu gsum du gyur nas ni 'dul ba la bslab pa'i gnas bcas so/ /de la sangs rgyas rabs bdun po smos pa ni bsdu ba'i tshig ste/ gong du smras pa'i tshig 'og tu 'di'o zhes bsdus nas yang dag par bstan pa'o/ /shAkya thub pa gau tam/ /zhes bya ba ni khyim pa'i phyogs nas bstod pa ste/ thub pa ni sgo gsum nas nyes pa mi 'byung bar thub pa'o/ /gau tam zhes bya ba ni yon tan gyi rnam grangs kyi sgo nas bstod pa'o/ /lha'i lha zhes bya ba ni 'jig rten gyi lha dang rnam par grol ba'i lha gnyis yod pa las/ shAkya thub pa rigs kyi 'jig rten gyi lha chen po brjed pa'i tshe/ rgyal bu don grub pa btsas nas rgyal bu don grub kyis lha de la phyag byas pa dang / lha de mgo tshal pa bdun du gas pas/ de bas kyang 'phags par gyur pas na lha'i lha zhes shAkya thub pa la mtshan du gsol/ mi 'dul ba ni shAkya thub pa 'jig rten du gshegs pa'i tshe dus ngan te/ skye bo rnams shin tu gdul dka' ba'i phyir de lta bu gdul bas na mi gdul gdul ba'o/ / yang na mi gdul ba ni 'dod chags dang ldan pa mdzes dga' dang / zhe sdang dang ldan pa sor mo'i phreng ba dang / gti mug dang ldan pa lteng rgyas 'od srungs lta bu shin tu gdul dka' ba yang / bcom ldan 'das kyis btul nas dge ba la bzhag pas na mi 'dul ba'o/ /yang rnyog pa lnga ni sems can dang lta ba dang / nyon mongs pa dang / bskal pa dang / tshe'i rnyog pa'o/ /rnyog pa lnga'i tshe mi 'dul bas na mi 'dul ba'o zhe'o/ /kha lo sgyur ba ni khams gsum gyi sems can nyon mongs pa las 'phags pa'i lam du kha lo sgyur bar byed pa'o/ /bla na med pa ni nyan thos man chad tshangs pa dang / brgya byin gyis gdul ba rgya chung ngu lta bu ma yin te/ rgya che zhing gong na med pas bla na med pa'o/ /'jig rten mgon po skyob pa'i mchog /ces bya ba 'jig rten ni nye bar len pa'i phung po lnga la bya'o/ /mgon po ni sems can thams cad kyi mgon du gyur pas de bzhin gshegs pa la bya'o/ /de skyob pa ni skye bo ngan par spyad cing ngan song du 'gro ba las skyob cing thar par 'dren pas skyob pa zhes bya'o/ /mchog ni skyob par byed pa mang mod kyi sangs rgyas kyi skyob pa lta bu gzhan la med pas na/ sangs rgyas kyi skyob pa ni mchog go zhes bstan to/ /sangs rgyas bdun po zhes smos pa dang / skabs 'dir kha cig the tshom du gyur te/ sangs rgyas bdun por zas kyis phyis 'byung ngam mi 'byung snyam pa la/ phyis sangs rgyas 'byung bar bstan pa'i gleng gzhi ni mdo sde bzang po zhes bya ba'i nang nas 'byung ba bskal pa gsum yod de/ me dang rlung dang / chu'i bskal pa'o/ /de la chu'i bskal pa bdo zhing 'gyur ba'i tshe/ 'od gsal lha'i ris su 'di lta bu'i ltas byung ste/ de bzhin gshegs pa 'jig rten du 'byung ba de snyed kyi pad mo rdzing las skyes te/ de'i tshe rdzing chen po las pad ma stong rtsa bdun byung nas/ lha dag na re e ma'o/ /de bzhin gshegs pa stong rtsa bdun 'byung ba'i ltas shig ces zer te/ de dag las sangs rgyas rabs bdun 'das zin te/ rnam par gzigs nas shAkya thub pa bzhugs pa'i bar du'o/ /stong rtsa bdun las bdun gshegs zin pas ltag pa stong gdod gshegs par 'gyur te/ tha mar ni phyag na rdo rje bzhed pa can zhes bya ba'i de bzhin gshegs par 'gyur zhing / sems can gyi don mdzad do zhes 'byung ngo / /dpa' bo zhes bya ba ni sems can gyi don bya ba la mi skyo mi ldog pa dang / nyon mongs pa dang bdud kyi dgra rnams 'joms par byed pas na dpa' bo'o/ /yang na bskal pa grangs med pa'i bar du sems can gyi don mdzad pas na dpa' bo zhe'o/ /bdun po ni rnam par gzigs nas shAkya thub pa'i bar du sngar byung ba rnams kyi grangs so/ /grags ldan ni sangs rgyas bdun po'i yon tan te/ bdud bzhi bcom nas bsod nams dang / ye shes phun sum tshogs pa dang ldan no zhes 'jig rten du grags pa'o/ /so sor thar pa ni sangs rgyas bdun pos bshad pa'i so sor thar pa/ bzod pa dka' thub dam pa zhes bya ba la sogs pa'o/ /de ni rab tu rgyas par bshad/ /ces bya ba ni de ltar tshig nyung ngu zin gyis kyang don kun 'dir 'dus pas na de dag gi tshe de tsam dag gis kyang nyan thos de dag rnam par grol zhing bslab pa las mi 'da' bar rgyas pa dang 'dra bar 'bras bu thob pas na rgyas pa zhes bshad do/ /'di la sangs rgyas rnams dang gang / /zhes bya ba sh+lo ka gcig gis sangs rgyas bdun gyi yon tan dang / 'bras bu bsngags pa ston te/ 'di la zhes bya ba ni sangs rgyas bdun gyis gsungs pa'i so sor thar pa 'di la'o/ /sangs rgyas nyan thos dag kyang gus/ /zhes bya ba snga ma 'das pa'i sangs rgyas bdun po dag kyang so sor thar pa la bsrung zhing gus pa dang bcas te/ bla mar byas shing yongs su bsrung bas na bla na med pa'i 'bras bu thob po/ /de bzhin du nyan thos rnams kyang gus par byed do/ /de la gus bcas gyur pa dang / /zhes gus pa dang bcas pa ni tshul khrims sdom zhing nan tan du bsrung ba'o/ /'dus ma byas pa thob par 'gyur/ /zhes pa 'dus ma byas pa ni brag pa med pa'i chos te/ 'gog pa dang lam la bya'o/ /de yang ji ltar thob ce na so sor thar pa bsrung zhing yongs su bsdams pas sdug bsngal dang kun 'byung ni spangs/ 'gog pa dang lam ni mngon sum du byas shing yongs su bsgoms pas 'du byed thams cad yongs su spang bar 'gyur ro/ /brtsam par bya zhing 'byung bar bya/ /zhes bya ba sh+lo ka gcig ni slob dpon u pA lis rab tu byung ba dang khyim pa'i phyogs dge ba'i phyogs la gzhen bskul gdab pa dang / dad pa skyed cing spro bar bya ba'i phyir thabs bstan pa ston te/ brtsam par bya ba ni de bzhin gshegs pa'i bstan pa la dad cing mos nas/ de la 'jug cing bslab par brtsams pa'o/ /'byung ba ni brtan pa la bslabs nas don go ba dang khyim spong zhing rab byung ba'o/ /sangs rgyas bstan la 'jug par bya/ /zhes pa sangs rgyas kyi bstan pa ni bden pa bzhi dang so sor thar pa nyid la bya'o/ /khyim nas byung phan chad sangs rgyas kyi bstan pa ni bden pa bzhi dang / 'phags pa'i lam brgyad dang / so sor thar pa yang dag par 'jug pa zhe'o/ /de ni mthong ba'i lam gyis bskyed do/ /'dom bu'i khyim na glang chen bzhin/ /'chi bdag sde rnams gzhom par bya/ /zhes bya ba bsgom pa'i lam gyis bskyed pa ste/ gong du bden pa bzhi dang 'phags pa'i lam brgyad yongs su bsgoms pas 'chi bdag gi ste skye rga na 'chi rnams so sor thar pas bsdams pa dang / bden pa bzhi bsgoms pa'i mthus gzhom par byed pa'o/ /dper na khyim rtswa'i 'am/ 'dom bu'i khyim snying po med cing mi brten pa la glang pos bcom pa bzhin du skye rga na 'chi'i sde rtswa khyim dang 'dra ba la bsod nams dang ye shes kyi glang po dang 'dra bas 'joms par byed pa'o/ /gang zhig rab tu bag yod pa/ /zhes pa sh+lo ka gnyis kyis ni bslab pa la nan tan byed pa'i brjod pa ston te/ gang zhig ces bya ba ni skye bo dge ba can la bya/ bag yod pa ni dge ba can te/ nyon mongs pa la bag byed pa'o/ /chos 'dul 'di la spyod 'gyur ba/ /zhes pa chos 'dul ba ni so sor thar pa dang 'phags pa'i bden pa bzhi la bya'o spyod par 'gyur ba ni skye bo dge ba can 'di la spyod par 'jug pa'o/ /skye ba'i 'khor ba rab spangs zhes pa skye ba ni skye ba rnam pa bzhi la bya'o/ /'khor ba ni lam rgyud lnga la bya ste/ gang du so sor thar pa dang bden pa la bsgoms pas rnam pa de dgu spangs par 'gyur ro zhe'o/ /sdug bsngal tha mar phyin par 'gyur/ /zhes pa gong du skye ba dang / 'khor ba yongs su spangs pas na/ sdug bsngal gsum dang brgyad las thar bar 'gyur te/ mthong ba dang bsgom pa'i lam gyi mthar phyin par 'gyur ro zhe'o/ /phan tshun tshul khrims srung ba zhes bya ba tshul khrims srung ba ni sgo gsum nas nyes pa mi 'byung bar bsdams pa dang / nyes pa byung na yang gcig la gcig bshags shing mthol ba dang nyes pa gsol ba'o/ /bstan pa 'phel bar 'gyur zhes bya ba ni nyes pa mthol zhing gsol bas na/ de bzhin gshegs pa'i gsung rab mi 'grib cing rgyas pa dang 'phel bar 'gyur ro zhe'o/ /so sor thar pa bshad pas ni/ /dge 'dun gyis ni gso sbyong byas/ /zhes bya ba ni gong du smos pa phan tshun tshul khrims mig bzhin du bsrung ba dang / bstan pa rgyas par bya ba'i phyir so sor thar pa bshad cing gso sbyong bya'o zhe'o/ /gang gi phyir ni mdo bshad ces bya ba sh+lo ka gcig gis yang dag par bsrung ba ston te/ srog mi phangs par tshul khrims bsrung bar bya'o zhe'o/ /gang gi phyir ni mdo bshad ces bya ba ni ci'i phyir so sor thar pa'i mdo bshad ces bya ba'i don to/ /gang phyir gso sbyong byas gyur zhes pa tshul khrims dam du srung zhing bsrung bar bya ba'o/ /tshul khrims de ni bsrung byas zhes bya ba ni gso sbyong byas pas chog pa ma yin gyi tshul khrims bsrung ba la nan tan spyod du gzhug pa'o/ /g.yag rnga'i rtse mo ji bzhin no/ /zhes bya ba ni tshul khrims mig bzhin du phangs shing srog gi phyir yang mi dral ba'i dpe ste/ gzhan kha cig na re nags stug po'i nang na gnas pa'i tshe rnga ma shing la mi thogs shing mi zin pa dang mi zegs mi gong cing / shing la thogs shing zin na yang god cing zegs su dogs nas bag byed pa ltar bslab pa la zhugs pa'i gang zag kyang tshul khrims srog gi phyir yang mi dral lo zhes bstan to/ /so sor thar pa bshad pa 'di nas 'phags pa la u pA lis dang po rtsom pa'i tshe bgegs dang bar chad kyis mi tshugs par bya ba dang / brtsams pa rnams mthar phyin par bya ba'i phyir rang gi lha yid du 'ong ba la brten nas/ brtsams pa rnams kyi mthar yang phyin/ bgegs dang bar chad zhi nas skye bo so so'i smon lam btab pa'o/ /so sor thar pa bshad pa ni so sor thar pa bshad pa'o/ /bsod nams grub pa gang yod pa bsod nams grub pa ni de'i bsod nams bdag gis cung zad ci thob pa la bya'o/ /des ni 'jig rten ma lus par de'i bsod nams ma lus pa de nyid kyis so/ /'jig rten ni nye bar len pa'i phung po ma lus pa ni khams gsum mo/ thub dbang go 'phang thob par shog /ces bya ba ni/ thub dbang ni de bzhin gshegs pa ste/ nyan thos dang rang sangs rgyas kyi dbang po'o/ /go 'phang ni de bzhin gshegs pa'i yon tan dang thabs so/ /thob par shog ces bya ba ni khams gsum gyi sems can thams cad kyang 'di ltar gyur cig ces bya ba'o/ / so sor thar pa'i mdo rdzogs pa ni brtsams pa mthar phyin te/ nyan pa rnams dbugs phyin pa'i phyir zhes smos so/ /so sor thar pa'i bshad pa mi brjed dran byed tsam du bris pa rdzogs so// //rgya gar gyi mkhan po dzA ran d+ha ra dang zhu chen gyi lo tsA ba dge slong rin chen bzang pos bsgyur cing zhus te gtan la phab pa// //

CLOSE WINDOW