བོད་ཡིག

e-texts based on the ACIP/ALL Input

/rgya gar skad du/ pra ti mok+Sha sU tra TIka bi na ya sa muts+tsha ya/ bod skad du/ so sor thar pa'i mdo rgya cher 'grel pa 'dul ba kun las btus pa/ bam po dang po/ bkra shis/ dkon mchog gsum la phyag 'tshal lo/ /bde bar gshegs pa'i tshul khrims rnam pa bzhi dngul dang gangs kyi ri bo spo mthon po ston ka'i zla ba'i 'od zer gyi tshogs kyis bskor ba dang / dung dang zla ba rab tu gsal ba dang / me tog ku mu da dang / chu klung sin d+hu dang / me tog sin du ba ra dang / pad ma'i rtsa lag gi chu ba dang / mu tig dag gi chun po'i phreng ba bas kyang ches dkar ba rjes su bskyang bar mdzad pas mthu stobs shin tu chen po yang dag par brnyes pa la phyag 'tshal lo/ /rgyal ba rgya mtsho dpal dang ldan/ /lta bas mi ngoms shin tu zab/ /dus las yol ba mi mnga' zhing / /rin chen phyug la phyag 'tshal te/ /blo gzhan go bar bya ba'i phyir/ /gzhan gyis bcol bas bdag gis ni/ /so sor thar pa'i rgya cher 'grel/ /gsal ba dag ni brtsam par bya/ /gzhan gyis byas pa'i 'grel pa dag /yod kyang de dag tshig mi 'grel/ /gzhan dag mtshan nyid 'gal bar smra/ /don mi gsal bar phal yang che/ /rnam par 'chad pas de dang de/ /bltas nas blo dag rmongs 'gyur bas/ /de phyir 'bad pas brtsam par bgyi/ /nga rgyal dag gi phyir ma yin/ /bdag nyid chen po gang dag gis/ / 'dul ba dag la tshig dang don/ /'bad byas de dag rang gi mthus/ /don rnams 'byed par byed par nus/ /gang dag gzhung rgyas phyir phyogs shing / /mdor bsdus 'dod pa de dag phyir/ /'di la 'bad pas phyogs tsam zhig / rab tu bstan pas brtsam par bya/ /bdag gi brtsams pa 'di 'dra ba/ /mkhas pa dag la bskul ba ste/ /byis pa mkhas pa'i dbus dag tu/ /spyi rtol mi byed med pa bzhin/ /bde bar gshegs pa'i bstan pa gsung rab tu gtogs pa yan lag bcu gnyis sde snod gsum du 'dus pa ni 'dul ba'i sde snod dang / mdo'i sde snod dang / chos mngon pa'i sde snod do/ /de la 'dul ba'i sde snod du gtogs pa thams cad ni 'dul ba 'dzin pa'i mchog 'phags pa nye ba 'khor gyis yang dag par bsdus so/ /mdo sde'i sde snod du gtogs pa thams cad ni mdo sde 'dzin pa'i mchog 'phags pa kun dga' bos yang dag par bsdus so/ /chos mngon pa'i sde snod du gtogs pa thams cad ni ma mo 'dzin pa'i mchog 'phags pa 'od srungs chen pos yang dag par rab tu bsdus so/ /de dag yang dag par bsdu ba yang bcom ldan 'das bzhugs pa'i tshe dang / yongs su mya ngan las 'das pa'i 'og tu yang dag par sdud pa lnga brgya pa dang / bdun brgya pa dang / bzhi brgya pa zhes bya ba la sogs pas yul dang dus gang du gang gi tshe ji ltar yang dag par bsdus pa'i lo rgyus ni bde bar gshegs pa'i lung nyid las gsungs pa bzhin no/ /'dir 'dul ba'i sde snod kyi dbang du bya ba'i skabs yin pas de je brjod par bya ste/ 'dul ba'i sde snod ni yul dang slob dpon dang don gyi dbang du mdzad nas sde bzhi rnam pa bco brgyad du gyes pa'i lo rgyus kyang lung las mang du gsungs te de dag gi rgya cher brjod pa yang 'dul ba'i sde snod nyid kyi gzhung las shes par bya'o/ /da 'dir ni 'phags pa gzhi thams cad yod par smra ba'i so sor thar pa'i mdo rgya cher 'grel pa bshad pa'i skabs yin pas de'i lo rgyus phyogs tsam zhig brjod par bya ste/ de la 'phags pa gzhi thams cad yod par smra ba'i 'dul ba'i sde snod 'di ni sangs rgyas bcom ldan 'das yongs su mya ngan las 'das pa'i 'og tu 'phags pa 'od srungs chen po la sogs pa dgra bcom pa lnga brgya 'dus nas tshangs par spyod pa yun ring du gnas par bya ba'i phyir dang / skye bo mang po la phan gdags pa'i phyir 'dul ba 'dzin pa'i mchog 'phags pa nye ba 'khor la yang dag par bsdu bar gsol nas 'phags pa nye ba 'khor gyis yang dag par bsdus so/ /gzhi thams cad yod par smra ba'i 'dul ba'i sde snod ni dum bu bzhi ste/ 'dul ba rnam par 'byed pa dang 'dul ba gzhi dang / 'dul ba phran tshegs dang / 'dul ba gzhung bla ma'o/ /de dag gi gnas pa'i snying dang snying po ni so sor thar pa'i mdo 'di yin no/ /de dag yang dag par bsdus pa yang ma 'ongs pa'i skye bo lung dang rtogs pa'i bdag nyid med pa dag yan lag la sgro 'dogs pa dang skur pa 'debs pa'i mtha' spang bar bya ba dang / nyan pa po brjod pa nyung ngus don gyi spyi rtogs par 'dod pa dag la phan gdags pa'i phyir sdom rnam pa gsum du bsdus te/ spyi sdom dang / sdom dang / bar sdom du'o/ /de la spyi sdom ni spyi'i don tshigs su bcad par bsdus pa'o/ /sdom ni dngos kyi don tshigs su bcad par bsdus pa'o/ /bar sdom ni yan lag gi don tshigs su bcad par bsdus pa ste/ de dag kyang lung gi skabs dang sbyar te ci rigs par gzung bar bya'o/ /de la so sor thar pa'i mdo zhes bya ba ni don las bstan bcos kyi ming du btags pa ste/ de la rnam grangs gcig tu na dang por thar pa zhes bya bar ston te/ so sor zhes bya ba ni dang po ste/ dang po sdom pa yang dag par len pa'i tshe na gsum la skyabs su 'gro ba'i tshig bzlas nas sdom pa yang dag par blang ba'i tshig brjod pa gsum pa'i tha ma la sdom pa thob pa ni thog ma sdom pa thob pa'i gnas skabs yin pas dang po zhes bya'o/ /thar pa zhes bya ba ni grol ba ste/ de ltar sdom pa dang po thob pa de nyid kyi tshe na sdom pa ma yin pa'i mtshan nyid las grol te/ sdom pa'i mtshan nyid kyis bsdus pa'i rnam par rig byed ma yin pa'i gzugs thob pa ni thar pa zhes bya'o/ /de ltar dang por thar pa'i don de las bstan bcos 'di byung ba'am/ don de bstan bcos 'dir bsdus pas bstan bcos 'di'i ming yang dang por thar pa zhes bya'o zhes sbyar ro/ /yang rnam grangs gzhan du na so sor thar pa zhes bya bar ston te/ so sor zhes bya ba ni rgyud tha dad pa'o/ /thar pa zhes bya ba ni rnam par grol ba ste/ gang zag rgyud tha dad pa gang gis sdom pa yang dag par blangs te bslab pa'i gzhi rjes su sgrub par byed pa de nyid ngan 'gro dang / 'khor ba las rnam par grol bar 'gyur gyi gzhan gyis sdom pa yang dag par blangs te bslab pa'i gzhi rjes su bsgrub pas gzhan rnam par grol bar mi 'gyur bas so sor thar pa zhes bya'o/ /de ltar so sor thar pa'i don de las bstan bcos 'di byung ba'am/ don de bstan bcos 'dir bsdus pas bstan bcos 'di'i ming yang so sor thar pa zhes bya'o/ /yang rnam grangs gzhan du na thar pa'i thabs zhes bya bar ston te/ so sor zhes bya ba ni phyir zhes bya ste thabs kyi don to/ /thar pa zhes bya ba ni nges par 'byung ba ste/ mya ngan las 'das pa'o/ /des na so sor thar pa'i mdo 'di ni nges par 'byung ba thob pa'i thabs kyi phyir gsungs pa ste/ lhag pa'i tshul khrims la brten nas lhag pa'i sems skye la/ lhag pa'i sems la brten nas lhag pa'i shes rab skye ba'i rim gyis nges par 'byung ba thob pa'i thabs su gyur pa'i phyir so sor thar pa'i mdo 'di ni nges par 'byung ba'i tshul khrims yin pas thar pa'i thabs zhes bya'o/ /de ltar thar pa'i thabs kyi don de las bstan bcos 'di 'byung ba'am/ don de bstan bcos 'dir bsdus pas/ bstan bcos 'di'i ming yang thar pa'i thabs zhes bya'o/ /mdo zhes bya ba ni don mdo tsam du bstan pas mdo zhes bya ste/ de ltar na bstan bcos 'di ni dang por thar pa'i mdo zhes bya ba dang / so sor thar pa'i mdo zhes bya ba dang / thar pa'i thabs kyi mdo zhes bya ba dag tu ston to/ /de la so sor thar pa'i mdo 'di'i bsdus pa'i don ni mtshan nyid rnam pa lngas ston te/ mchod pa dang / gleng bslang ba dang / yang dag par rtsom pa dang / gzhung rgyas pa dang / bsdu ba'i mtshan nyid kyis so/ /de la mchod pa'i mtshan nyid ni/ snyan pa'i ba dan 'jig rten gsum du grags/ /zhes bya ba la sogs pa'i tshigs su bcad pa gnyis kyis bstan to/ /gleng bslang ba'i mtshan nyid ni/ sangs rgyas 'dul ba gang chen mtsho/ /zhes bya ba la sogs pa'i tshigs su bcad pa bcu gcig gis ston to/ /yang dag par rtsom pa'i mtshan nyid ni/ bskal pa bye ba rnams su yang / /zhes bya ba la sogs pa tshigs su bcad pa drug gis bstan to/ /gzhung rgyas pa'i mtshan nyid ni/ /tshe dang ldan pa dag so ga rnams kyi 'das pa dang lhag ma ci tsam pa de tsam mo zhes bya ba nas dran pa dang bag yod pas rnal 'byor du bya'o zhes bya ba'i bar gyi gzhung thams cad kyis bstan to/ /bsdu ba'i mtshan nyid ni/ bzod pa dka' thub dam pa bzod pa ni/ /zhes bya ba la sogs pa'i gzhung lhag ma thams cad kyis bstan to/ /de la re zhig mchod pa'i mtshan nyid bshad par bya ste/ mchod pa'i mtshan nyid ces bya ba ni so sor thar pa'i mdo yang dag par brtsam pa gleng bslang ba'i dang por ston pa sangs rgyas bcom ldan 'das la bstod pa dang phyag 'tshal ba'i sgo nas mchod pa bya ba'o/ /de yang 'di ltar yang dag par sdud par byed pa 'phags pa 'od srungs chen po dang / nye ba 'khor dang / kun dga' bo la sogs pa so sor thar pa yang dag par bsdu bar bya bar 'dod pa blo shin tu zhib pa dang / rno ba dang / cha phra ba dang / brtan pa dang / zag pa dang ldan pa nyon mongs pa dang / nye ba'i nyon mongs pa'i dgra'i tshogs ma lus pa las rgyal ba/ 'jig rten las 'das pa'i ye shes 'byam klas pa yang dag par thob pa rang dang spyi'i mtshan nyid yongs su shes pa la mkhas pa'i blo dang ldan pa/ 'gro ba mtha' dag la phan par bya ba'i sems kyi 'jug pa la mkhas pa/ rang gi smra ba nges par zil gyis mi gnon pa/ pha rol smra ba thams cad drung nas dbyung ba la gcig pu dpa' ba/ so so yang dag par rig pa bzhi rjes su thob pa/ yon tan gyi tshogs dpag tu med pa'i nor bu'i 'od zer gyis phyug pa dag gis bar chad kyi rnyog pa gnod pa'i 'dam rdzab ma lus pa bsal ba'i phyir dang / yid la bsams pa'i 'bras bu dge ba yid du 'ong ba khyad par can myur du yang dag par bsgrub par bya ba'i phyir sangs rgyas bcom ldan 'das 'jig rten gsum na nyag gcig dpa' ba/ yon tan gyi tshogs rgya mtsho brnyes pa'i pha rol tu byon pa la bstod pa dang phyag 'tshal ba'i sgo nas mchod par bya ba'i ched du dang po kho nar/ snyan pa'i ba dan 'jig rten gsum du grags/ /dam pa'i chos sgra seng ge'i sgra bsgrags pa/ /thams cad mkhyen pa dkon mchog mdzod brnyes pa/ /zhabs la tshangs dbang gtsug gi nor bus gtugs/ /sdug bsngal rgya mtsho gting mtha' med rgal ba/ 'gro ba'i gtso la spyi bos phyag 'tshal te/ /thams cad mkhyen pa'i bslab gzhi dkon mchog snod/ /'phags pa'i tshogs kyi dbus su dbye bar bya/ /zhes bya ba'i tshigs su bcad pa 'di nyid gsungs so/ /de la 'dir re zhig dang po kho nar tshigs su bcad pa gnyis po 'di'i brjod par bya ba dang / dgos pa dang / 'brel pa dang / dgos pa'i dgos pa dag bstan par bya ste/ 'di ltar gus par nyan pa po blo sngon du gtong ba dag ni brjod par bya ba med pa dang / dgos pa med pa dang / 'brel pa med pa dang / dgos pa'i dgos pa med pa'i tshig tsam yang nyan par mi spro na bstod ra dang / bstan bcos dang / rab tu dbye ba dag lta smos kyang ci dgos te/ gang gi phyir gus par nyan pa blo sngon du gtong ba dag bstod ra la sogs pa'i ming thos pa nyid na 'dir ci zhig brjod snyam du brjod par bya ba'i skabs la dogs pa skye'o/ /de'i 'og tu 'dis don ci ston snyam du dgos pa la the tshom za'o/ /des na tshig gi bdag nyid 'dis don gyi bdag nyid de 'grub par 'gyur ram/ 'on te mi 'gyur du 'brel pa la som nyir 'gyur ro/ /des na de grub pas don khyad par du 'phags pa'i 'bras bu ci zhig yang dag par 'grub par 'gyur snyam du dgos pa'i dgos pa la kun du rmongs pa skye bar 'gyur bas rnam par 'chad par byed pa gzhan la phan par byed pa la gzhol ba/ mkhas pa'i yid dang ldan pas 'di la dogs pa thams cad rnam par bzlog pa'i sgo nas nyan pa po dag nges par gzud par bya'o/ /de la brjod par bya ba ni tshigs su bcad pa gnyis po de las/ snyan pa'i ba dan 'jig rten gsum du grags/ /dam pa'i chos sgra seng ge'i sgra bsgrags pa/ /thams cad mkhyen pa dkon mchog mdzod brnyes pa/ /zhabs la tshangs dbang gtsug gi nor bus gtugs/ /sdug bsngal rgya mtsho gting mtha' med rgal ba/ /'gro ba'i gtso la spyi bos phyag 'tshal te/ /zhes bya ba'i tshigs su bcad pa phyed dang gnyis kyis bcom ldan 'das kyi yon tan gzhan gyi don phun sum tshogs pa dang / bdag gi don phun sum tshogs pa mchog brjod pa'o/ /dgos pa ni de dag gi ngo bo nyid rab tu bstan pa'o/ /'brel pa ni de dag gi ngo bo nyid rab tu bstan pa de yang tshigs su bcad pa phyed dang gnyis po tshig gi bdag nyid 'dis byed pas tshigs su bcad pa phyed dang gnyis po 'di ni thabs yin la/ de dag gi ngo bo nyid rab tu bstan pa don gyi bdag nyid ni thabs las byung ba yin te/ de ltar tshigs su bcad pa phyed dang gnyis dang / dgos pa dag ni thabs dang thabs las byung ba'i mtshan nyid kyis 'brel pa yin no/ /'di ltar tshigs su bcad pa phyed dang gnyis po 'dis bcom ldan 'das kyi yon tan gzhan gyi don phun sum tshogs pa dang / bdag gi don phun sum tshogs pa de dag gi ngo bo nyid mngon par gsal bar byed pas de'i phyir tshigs su bcad pa phyed dang gnyis ni thabs yin la dgos pa ni thabs las byung ba yin par gnas so/ /de nyid rgyu dang 'bras bu'i mtshan nyid dang / sgrub pa dang bsgrub par bya ba'i mtshan nyid kyis 'brel pa yang yin no/ /brgya la 'ga' zhig 'di skad ces de dag gi ngo bo nyid rab tu bstan pa des ci bya/ 'di ltar de ni cir yang dgos par mi 'gyur te/ bya rog gi so brtag pa bzhin du khyod kyi de ni gnas ma yin pa la yongs su ngal ba yin pas de dag gi ngo bo nyid rab tu bstan pa ni don med pa yin no zhes phyir zlog par byed na de'i phyir dgos pa'i dgos pa yang nye bar bstan par bya ste/ de ni dam pa rnams kyi spyod pa'i rjes su 'jug par 'gyur ba dang / bgegs dang log 'dren nye bar zhi bar 'gyur te/ 'di ltar dam pa rnams ni las gang dang gang rtsom par 'dod pa na dang por rang gi lha yid du 'ong ba la bstod pa dang phyag 'tshal ba'i sgo nas mchod pa sngar byed do/ de ltar zhugs pa rnams kyi yid la bsams pa'i 'bras bu dge ba yid du 'ong ba khyad par can myur du yang dag par 'grub par 'gyur ro/ /de'i phyir yang dag par sdud par byed pa 'di dag kyang skyes bu dam pa'i spyod pa rjes su bsgrub pa na/ dang por rang gi ston pa la bstod pa dang phyag 'tshal ba'i sgo nas mchod pa byed pa la zhugs pa yin no/ /bdag nyid chen po gang dag lha yid du 'ong ba la bstod pa dang phyag 'tshal ba'i sgo nas mchod pa'i las byas pa sdig pa'i rnyog pa gnod pa'i dri ma ma lus par bkrus pa/ lha yul gyi chu klung gi chu dri ma med pa bas kyang ches dkar ba'i dge ba'i rtsa ba'i tshogs rgya chen po'i khur yang dag par bskyed pa/ bkra shis dang bzlas brjod dang sbyin sreg mtha' dag byas shing nang dang phyi rol rnam par dag pa'i blo can de dag gi bgegs dang log 'dren chos dang 'gal bar byed pa rnams kyi mthu nyams par 'gyur zhing / de dag gi yid la bsams pa'i 'bras bu dge ba yid du 'ong ba khyad par can dag kyang mngon par 'phel bar 'gyur te/ de ltar yang / bdag nyid chen po gang zhig sems dang khyod mtshan 'dzin/ /de ni tshangs ris bkra shis sbyin sreg bzlas brjod bgyis/ /de ni khrus bgyis chu ngogs kun du dbang bskur zhing / /de ni nang dang phyi rol shin tu dag par 'gyur/ /zhes 'byung ba'i phyir ro/ /yang gzhan yang de bzhin gshegs pa'i yon tan gyi tshogs 'byam klas pa bla na med pa nyan pas yid yang dag par bsdus pa dag gis bcom ldan 'das srid pa'i 'jigs pa nges par bcom pa la dad pa mi phyed pa yang dag par bskyed de/ nyon mongs pa dang nye ba'i nyon mongs pa'i rnyog pa gcod pa'i 'dam rdzab mtha' dag rab tu bsal nas mtho ris dang byang grol gyi mtshan nyid kyi 'bras bu yang dag par 'dod pa rab tu 'thob par 'gyur te/ de ltar yang / gang dag rgyal ba bde gshegs la/ /mchod pa chung ngu'ang byed 'gyur ba/ /de dag mtho ris kun bgrod nas/ / bdud rtsi'i go 'phang thob par 'gyur/ /zhes tshigs su bcad pa las gsungs pa'i phyir ro/ /gzhan las kyang / grags mdangs yid bde rtsom zhing de bzhin 'od dang ldan/ /dga' zhing smra mkhas dri med blo ldan skyon dang bral/ /tshe 'phos bdud rtsi'i go 'phang gzhal yas thob 'gyur bas/ /sangs rgyas bstod 'byung 'bras bur de shes rnams kyis gsungs/ /zhes 'byung ba'i phyir ro/ /gzhan yang ma 'ongs pa'i skye bo rnams la phan gdags pa'i phyir bcom ldan 'das la bstod pa dang phyag 'tshal ba'i sgo nas mchod pa byed de/ 'di ltar klag pa la sogs pa la bgegs gnyis srid de/ gcig ni nang gi mi shes pa'i mtshan nyid do/ /gnyis pa ni phyi rol gyi 'byung po dang sha za la sogs pa'o/ /lha yid du 'ong ba la bstod pa dang phyag 'tshal ba'i sgo nas mchod pa byas na ye shes chen po skye ba dang / bsod nams chen po 'phel bar 'gyur ro/ /ye shes chen po skyes na nang gi mi shes pa'i mtshan nyid kyi bgegs dang bral bar 'gyur te/ ye shes ni mi shes pa'i gnyen po yin pa'i phyir dang / nyon mongs pa rnams ni ye shes kyis gzhom pa yin no zhes gsungs pa'i phyir ro/ / de lta bas na ye shes chen po skyes na mi shes pa ldog par 'gyur ro/ /bsod nams dang ldan pa chen po 'phel bas kyang phyi rol gyi 'byung po dang sha za la sogs pa'i bgegs ldog par 'gyur te/ 'di ltar bsod nams dang ldan pa rnams kyi bya ba rtsom pa'i dus na 'byung po dang sha za la sogs pas bgegs byed mi nus so/ /de nyid kyi phyir/ brjod na sdig pa 'byang bar 'gyur/ /khyod nyid dran na mchog tu dga'/ /btsal na blo gros byed 'gyur te/ /yongs su shes na rnam par dag /khyod la bsu na dpal du byed/ /bsten na blo mchog byed par 'gyur/ / 'grogs na 'jigs pa med par byed/ /bsnyen bkur byas na bde byed 'gyur/ /zhes gsungs so/ /gzhan las kyang / thub pa'i dbang la phyag 'tshal bas/ /'jig rten dag na mi rnams kyi/ /grags pa 'phel zhing legs pa skye/ /snang bas rnam 'phel bgegs kun sel/ /dgra rnams thams cad spong 'gyur zhing / /sems rgyud bde 'gror nges byed la/ /mthar yang nges pa kho nar ni/ /zhi ba'i 'bras bu thob par byed/ /ces gsungs pa lta bu'o/ /gzhan yang bstan bcos dang ston pa la gus pa bskyed pa'i phyir bstan bcos la sogs pa rtsom pa na ston pa la bstod pa dang phyag 'tshal ba'i sgo nas mchod pa byed de/ 'di ltar sgrub pa po ni ston pa'i yon tan shes pa dang / mi shes pa'i bye brag gis rnam pa gnyis so/ /de la ston pa'i yon tan shes pa rnams ni bstan bcos brtsams pa na bcom ldan 'das kyi yon tan gyi tshogs 'byam klas pa bla na med pa brjod pa thos nas bstan bcos la gus pa skye bar 'gyur te/ bstan bcos 'di ni bcom ldan 'das kyi gsung rab kyi rjes su 'jug pa yin no zhes bstan bcos la gus pa skyed par byed do/ /bstan bcos la gus pa skyes par gyur na/ bstan bcos mnyan pa dang / bsam pa dang / rnam par bshad pa dang / sgrub pa la sogs pa dag la gus pas 'jug par 'gyur ro/ /ston pa'i yon tan mi shes pa rnams ni/ de bzhin gshegs pa'i yon tan gyi tshogs yang dag par bsgrags pa thos na/ ston pa la gus pa skye bar 'gyur te/ gang gi yon tan gyi tshogs 'di lta bu dag yang dag par sgrogs pa'i ston pa de ni shin tu che ba yin no zhes ston pa la gus pa skyed par byed do/ /ston pa la gus pa skyed par gyur na bstan bcos kyi don shes par bya ba la gus pas 'jug par 'gyur te/ de dag ni dgos pa'i dgos pa yin no/ /de ltar na 'dir tshig gi don ni 'byung bar 'gyur te/ tshigs su bcad pa phyed dang gnyis po 'di'i brjod par bya ba ni bcom ldan 'das kyi yon tan gzhan gyi don phun sum tshogs pa dang / bdag gi don phun sum tshogs pa mchog brjod pa'o/ /dgos pa ni de dag gi ngo bo nyid rab tu bstan pa'o/ /'brel pa ni de dag gi ngo bo nyid ni rab tu bstan pa de yang tshigs su bcad pa phyed dang gnyis po 'dis byed pas tshigs su bcad pa phyed dang gnyis dang dgos par thabs dang thabs las byung ba'i mtshan nyid kyis 'brel pa'o/ /dgos pa'i dgos pa ni dam pa rnams kyi spyod pa'i rjes su 'jug par 'gyur ba dang / bgegs dang log 'dren nye bar zhi bar 'gyur ba dang / mtho ris dang byang grol gyi mtshan nyid kyi 'bras bu yang dag par 'dod pa rab tu 'thob par 'gyur ba dang / ma 'ongs pa'i skye bo rnams kyi nang dang phyi rol gyi bgegs zhi bar 'gyur ba dang / ston pa'i yon tan shes pa dang / mi shes pa'i sgrub pa po rnam gnyis bstan bcos dang ston pa la gus pa skye bar 'gyur ba'o/ /thams cad mkhyen pa'i bslab gzhi dkon mchog snod/ /'phags pa'i tshogs kyi dbus su dbye bar bya/ /zhes bya ba tshigs su bcad pa 'og ma phyed kyis ni so sor thar pa brtsam par dam bca' ba bstan te/ de yang rtog pa sngon du gtong ba dag gi 'jug pa'i yan lag yin no/ /de la tshigs su bcad pa phyed dang gnyis po 'di'i bsdus pa'i don ni rnam pa gnyis te/ ston pa la bstod pa'i sgo nas mchod pa dang / phyag 'tshal ba'i sgo nas mchod pa'o/ /de la bstod pa'i sgo nas mchod pa yang rnam pa gnyis te/ 'gro ba'i gtso bo sangs rgyas bcom ldan 'das kyi yon tan gzhan gyi don phun sum tshogs pa dang / bdag gi don phun sum tshogs pa'i sgo nas so/ /de la gzhan gyi don phun sum tshogs pa ni tshigs su bcad pa dang po gcig gis bstan to/ /des kyang 'gro ba'i gtso bo sangs rgyas bcom ldan 'das kyi yon tan gzhan gyi don phun sum tshogs pa'i thabs su gyur pa'i phun sum tshogs pa rnam pa lnga bstan te/ rgyu phun sum tshogs pa dang / phan 'dogs pa phun sum tshogs pa dang / shes rab phun sum tshogs pa dang / thugs rje phun sum tshogs pa dang / 'bras bu'i khyad par phun sum tshogs pa'o/ /de la/ snyan pa'i ba dan 'jig rten gsum du grags/ /zhes bya bas ni rgyu phun sum tshogs pa bstan to/ /dam pa'i chos sgra seng ge'i sgra bsgrags pa/ /zhes bya bas ni phan 'dogs pa phun sum tshogs pa bstan to/ /thams cad mkhyen pa zhes bya bas ni shes rab phun sum tshogs pa bstan to/ /dkon mchog mdzod brnyes pa zhes bya bas ni thugs rje phun sum tshogs pa bstan to/ /zhabs la tshangs dbang gtsug gi nor bus gtugs/ /zhes bya bas ni 'bras bu'i khyad par phun sum tshogs pa bstan to/ /bdag gi don phun sum tshogs pa ni tshigs su bcad pa 'og ma'i phyed dang pos bstan to/ /des kyang 'gro ba'i gtso bo sangs rgyas bcom ldan 'das kyi yon tan bdag gi don phun sum tshogs pa'i che ba nyid kyi khyad par phun sum tshogs pa rnam pa gnyis bstan te/ spangs pa phun sum tshogs pa dang / ye shes phun sum tshogs pa'o/ /de la/ sdug bsngal rgya mtsho gting mtha' med rgal ba/ /zhes bya bas ni spangs pa phun sum tshogs pa bstan to/ /'gro ba'i gtso bo zhes bya bas ni ye shes phun sum tshogs pa bstan to/ /de ltar 'gro ba'i gtso bo sangs rgyas bcom ldan 'das kyi yon tan gzhan gyi don phun sum tshogs pa dang / bdag gi don phun sum tshogs pa smos pa des ni ston pa la bstod pa'i sgo nas mchod pa bstan to/ /phyag 'tshal ba'i sgo nas mchod pa ni lus dang ngag dang yid kyi sgo nas phyag 'tshal bas te/ de ni spyi bos phyag 'tshal te zhes bya bas bstan to/ /de ltar phyag 'tshal te ci zhig bya zhe na/ so sor thar pa brtsam par dam bca' bar bya ste/ de ni tshigs su bcad pa 'og ma'i phyed kyis bstan to/ /des kyang gang gis bstan pa dang / ci zhig bstan pa dang / su la bstan pas so sor thar pa'i che ba nyid brjod nas/ gang gis ci zhig bstan pa de nyid su la bstan pa'i tshogs kyi dbus su dbye bar bya'o zhes bstan to/ /de la gang gis bstan zhe na ston pas te/ de ni thams cad mkhyen pa zhes bya bas bstan to/ /ci zhig bstan zhe na/ so sor thar pa ste/ de ni bslab gzhi dkon mchog snod ces bya bas bstan to/ /su la bstan zhe na/ nyan thos kyi dge 'dun la ste/ de ni 'phags pa'i tshogs zhes bya bas bstan to/ /gang gis ci zhig bstan pa de nyid su la bstan pa'i tshogs kyi dbus su dbye bar bya ba'i ston pas so sor thar pa bstan pa de nyid nyan thos kyi dge 'dun gyi dbus su dbye bar bya ste/ de ni/ dbus su dbye bar bya zhes bya bas bstan te/ de ni re zhig spyi'i don yin no/ /da ni yan lag gi don bshad par bya ste/ de la 'gro ba'i gtso bo sangs rgyas bcom ldan 'das kyi yon tan gzhan gyi don phun sum tshogs pa'i thabs su gyur pa rgyu phun sum tshogs pa'i dbang du mdzad nas/ snyan pa'i ba dan 'jig rten gsum du grags/ /zhes bya ba gsungs te/ snyan pa'i zhes bya ba ni de bzhin gshegs pas bskal pa grangs med pa nas bsod nams dang ye shes kyi tshogs dpag tu med pa bsags pa'i rgyu phun sum tshogs pa las byung ba'i 'bras bu spangs pa dang / ye shes bla na med pas bsdus pa'i yon tan dpag tu med pa'o/ /ba dan zhes bya ba ni snyan pa de nyid ba dan dang 'dra bas ba dan zhes bya ste/ yon tan mngon par 'phags pas kun la gsal ba dang / de la dmigs na mngon par mtho ba dang nges par legs pa'i lam mi nor ba'i phyir ro/ /'jig rten gsum zhes bya ba ni/ 'jig tshogs kyi phung po 'jig pa tsam la brten pas bsdu ba'i khams gsum po 'dod pa dang / gzugs dang / gzugs med pa dag go/ /grags zhes bya ba ni de dag tu snyan pa'i sgras khyab pa ste/ bcom ldan 'das dang po mngon par sangs rgyas pa'i tshe dang por sa bla ba la grags la/ de nas bar snang ba la grags/ de nas rgyal chen bzhi'i ris la grags so zhes bya ba nas/ 'og min gyi bar du grags so zhes bya ba la sogs pa'i rim gyis so/ /gzugs med par ji ltar grags she na/ gzugs can gyi khams na gnas pa'i tshe/ grags pa'i bag chags rgyud la yod pas rgyu la 'bras bu btags te grags par brjod do/ /des ni sbyin pa la sogs pa'i rgyu phun sum tshogs pa las byung ba'i yon tan gzhan la ston par byed pa'i sgo nas/ gzhan gyi don phun sum tshogs pa'i thabs su gyur pa rgyu phun sum tshogs pa bstan to/ /phan 'dogs pa phun sum tshogs pa'i dbang du mdzad nas/ dam pa'i chos sgra seng ge'i sgra bsgrags pa/ /zhes gsungs te/ dam pa zhes bya ba ni sangs rgyas bcom ldan 'das te/ nyon mongs pa bag chags dang bcas pa ma lus par spangs pa'i phyir ro/ /chos sgra zhes bya ba ni dam pa des gsungs pa'i chos te/ 'phags pa'i bden pa bzhi po dag dpal gyi mgur nas gsungs pa'i phyir ro/ /seng ge'i sgra zhes bya ba ni dam pa'i chos kyi sgra de nyid seng ge'i sgra dang 'dra ba'i phyir seng ge'i sgra zhes bya ste/ mu stegs can glang po che lta bu skrag par byed cing rigs kyi bu mi'i seng ge'i phru gu lta bu dag sdud par byed pa'i phyir/ bsgrags pa zhes bya ba ni bstan pa ste/ bden pa bzhi la lan gsum du bzlas te chos kyi 'khor lo rnam pa bcu gnyis su bskor ba'i phyir ro/ /des ni ston pas mdzad pa phun sum tshogs pa gzhan la chos ston pa'i sgo nas gzhan gyi don phun sum tshogs pa'i thabs su gyur pa phan 'dogs pa phun sum tshogs pa bstan to/ /shes rab phun sum tshogs pa'i dbang du mdzad nas/ thams cad mkhyen pa zhes bya ba gsungs te/ thams cad mkhyen pa zhes bya ba ni bcom ldan 'das te/ dang por dngos po'i ngo bo nyid ma lus pa dang / thun mong ma yin pa dang / tshad med pa dang / phyin ci ma log par bstan pa'i phyir ro/ /des ni thams cad mkhyen pas lung shin tu rnam par dag pa gtan la phab par bstan pa'i sgo nas gzhan gyi don phun sum tshogs pa'i thabs su gyur pa shes rab phun sum tshogs pa bstan to/ /thugs rje phun sum tshogs pa'i dbang du mdzad nas/ dkon mchog mdzod brnyes pa zhes bya ba gsungs te/ dkon mchog ces bya ba ni bshad pa dang / bsgrub pa'i chos dkon mchog ste/ rin po che dang 'dra bar dkon pa dang / rin che ba dang / dga' bar byed pa dang / phan 'dogs pa dang / mi ma yin pa la sogs pa gnod pa byed pa'i gnyen por gyur pa yin pa'i phyir ro/ /mdzod ces bya ba ni rin chen mdzod dang 'dra bar chos dkon mchog de'i mdzod 'phags pa'i dge 'dun te lung dang rtogs pa'i sgo nas de'i snod du gyur pa yin pa'i phyir ro/ /brnyes pa zhes bya ba ni slob ma nyid du brnyes pa ste/ ston pa'i lam gyi rjes su zhugs pa'i phyir ro/ /des ni 'khor yongs su smin par mdzad pa'i sgo nas gzhan gyi don phun sum tshogs pa'i thabs su gyur pa thugs rje phun sum tshogs pa bstan to/ /'bras bu'i khyad par phun sum tshogs pa'i dbang du mdzad nas/ zhabs la tshangs dbang gtsug gi nor bus gtugs/ /zhes bya ba gsungs te/ zhabs la zhes pas ni de bzhin gshegs pa'i zhabs 'khor lo'i mtshan dang ldan pa la'o/ /tshangs dbang zhes bya ba la/ tshangs pa zhes bya ba ni bsam gtan dang po'i bsam gtan khyad par can bsgrubs te/ tshangs pa'i rgyal po thob pa stong gi 'jig rten la dbang sgyur ba'i tshangs pa chen po'o/ /dbang po zhes bya ba ni sum cu rtsa gsum pa'i lha rnams kyi dbang po brgya byin te/ de gnyis ni sa bla'i gtso bo dang / stong gi khams na gtso bor grags nas 'dir smos par zad kyi gzhan yang de bzhin du gzung bar bya'o/ /gtsug gi nor bu zhes bya ba ni spyi bo ste/ nor bu gdags pa'i gnas yin pa'i phyir ro/ /gtugs zhes bya ba ni des btud de phyag byas pa'o/ /des ni 'jig rten na 'bras bu thob pa'i mchog dag gis spyi bos gtugs pa'i sgo nas gzhan gyi don phun sum tshogs pa pa'i thabs su gyur pa 'bras bu'i khyad par phun sum tshogs pa bstan to/ /de ltar de dag gis ni 'gro ba'i gtso bo sangs rgyas bcom ldan 'das kyi yon tan gzhan gyi don phun sum tshogs pa'i sgo nas ston pa la bstod pas mchod pa bstan to/ /de'i 'og tu 'gro ba'i gtso bo sangs rgyas bcom ldan 'das kyi yon tan bdag gi don phun sum tshogs pa'i che ba nyid kyi khyad par spangs pa phun sum tshogs pa'i dbang du mdzad nas/ sdug bsngal rgya mtsho gting mtha' med rgal ba/ /zhes bya ba gsungs te/ sdug bsngal zhes bya ba ni skye ba dang / rga ba dang / na ba dang / 'chi bas bsdus pa nye bar len pa'i phung po lnga po dag go/ /rgya mtsho zhes bya ba ni sdug bsngal de nyid rgya mtsho dang 'dra bas rgya mtsho zhes bya ste/ shin tu rgya che ba'i phyir ro/ /gting med pa zhes bya ba ni gzhi'i gting med pa ste/ 'dis ni rgya mtsho bzhin du sdug bsngal mang ba nyid bstan to/ / mtha' med pa zhes bya ba ni pha rol gyi mtha' med pa ste/ 'dis ni rgya mtsho bzhin du 'khor ba'i rgyun mi 'chad par bstan to/ /rgal ba zhes bya ba ni 'das pa ste/ las dang nyon mongs pa spangs pas sdug bsngal zad pa'i phyir ro/ /des ni las dang nyon mongs pa skye ba'i mtshan nyid gyi kun nas nyon mongs pa spangs pa'i sgo nas bdag gi don phun sum tshogs pa'i che ba nyid kyi khyad par spangs pa phun sum tshogs pa ston to/ /ye shes phun sum tshogs pa'i dbang du mdzad nas/ 'gro ba'i gtso zhes bya ba gsungs te/ 'gro ba zhes bya ba ni 'jig rten te/ rtag tu 'khor ba'i yang phyir ro/ /gtso zhes bya ba ni zla med pa ste mchog yin pa'i phyir ro/ /de ni 'gro ba'i gtso bo sangs rgyas bcom ldan 'das te shes bya thams cad la chags pa med pa dang thogs pa med pa'i ye shes brnyes pas 'gro ba thams cad kyi gtso bor gyur pa'i phyir ro/ /'dis ni dngos po ji snyed yod pa nyid dang ji lta ba bzhin du yod pa nyid thugs su chud pas 'gro ba'i gtso bor gyur pa'i sgo nas bdag gi don phun sum tshogs pa'i che ba nyid kyi khyad par ye shes phun sum tshogs pa bstan to/ /de ltar de dag gis ni 'gro ba'i gtso bo sangs rgyas bcom ldan 'das kyi yon tan bdag gi don phun sum tshogs pa'i sgo nas ston pa la bstod pas mchod pa bstan to/ /de'i 'og tu phyag 'tshal ba'i sgo nas mchod pa bstan pa'i phyir/ spyi bos phyag 'tshal te zhes gsungs te/ spyi bos zhes bya bas ni lus kyis phyag 'tshal ba dngos su bstan te/ phyag 'tshal te zhes bya bas ni lus dang ngag dang yid gsum char gyis phyag 'tshal ba yang bsdus par blta'o/ /'dis ni lus dang ngag dang yid kyi phyag 'tshal ba'i sgo nas ston pa la mchod pa bstan to/ /de ltar phyag 'tshal te ci zhig bya zhe na/ so sor thar pa brtsam par dam bca' bstan pa'i phyir/ thams cad mkhyen pa'i bslab gzhi dkon mchog snod/ /'phags pa'i tshogs kyi dbus su dbye bar bya/ /zhes bya ba gsungs te/ 'dis ni gang gis bstan pa dang / ci zhig bstan pa dang / su la bstan pas so sor thar pa'i che ba nyid brjod nas/ gang gis ci zhig bstan pa de nyid du su la bstan pa'i tshogs kyi dbus su dbye bar bya'o zhes ston to/ /de la gang gis bstan zhe na/ ston pa ste/ de ni thams cad mkhyen pa zhes bya bas bstan te/ tshig gi don ni snga ma bzhin no/ /ci zhig bstan zhe na/ so sor thar pa ste/ 'di ni bslab gzhi dkon mchog snod ces bya bas bstan te/ bslab pa zhes bya ba ni srog gcod pa spong ba la sogs pa'i mtshan nyid do/ /gzhi zhes bya ba ni tshig ste/ de la don gnas pa'i phyir ro/ /dkon mchog ces bya ba ni bslab pa'i gzhi de nyid de chen po rnams kyi rkyen yin pa'i phyir dang / dkon pa'i phyir rin po che dang 'dra bas dkon mchog go/ /de yang gang zhe na/ rnam par 'byed pa dang / gzhi dang / phran tshegs dang / gzhung bla ma dag go/ /snod ces bya ba ni de dag gi snod de so sor thar pa'i mdo 'di nyid do/ /des ni ston pa thams cad mkhyen pas gsungs pas thams cad mkhyen pa'i bslab gzhi dkon mchog snod ces bya'o/ /su la bstan zhe na/ nyan thos kyi dge 'dun la ste/ de ni 'phags pa'i tshogs zhes bya bas bstan te/ 'phags pa zhes bya ba ni sdig pa mi dge ba'i chos rnams las ring du gyur pa'o/ /tshogs zhes bya ba ni bzhi yan chad do/ /gang gis ci zhig bstan pa de nyid su la bstan pa'i tshogs kyi dbus su dbye bar bya ba ni ston pas so sor thar pa bstan pa de nyid nyan thos kyi dge 'dun gyi dbus su dbye bar bya ba ste/ de ni dbus su dbye ba zhes bya bas bstan te dbus su zhes bya ba nang du'o/ /dbye bar bya ba ni gdon par bya ba'o/ /su dag gi dbus su zhe na/ 'phags pa'i tshogs kyi ste/ dper na rin po che'i snod dbye bar yang rin po che rtog shes pa dag gi tshogs kyi dbus su dbye ba bzhin du thams cad mkhyen pa'i bslab gzhi dkon mchog snod 'di yang bslab gzhi rin po che lta bu rtog shes pa'i 'phags pa'i tshogs kyi dbus su dbye zhing gdon par bya'o zhes bya ba'i tha tshig go/ /mchod pa'i mtshan nyid bshad zin to// //de'i 'og tu gleng bslang ba'i mtshan nyid bshad par bya ste/ gleng bslang ba'i mtshan nyid ces bya ba ni so sor thar pa'i mdo yang dag par brtsams pa gleng bslang ba'o/ /de yang so sor thar pa'i che ba nyid thos nas tshogs kyi lam 'bras bu dang bcas par 'dod pas so sor thar pa bsgrub par bya'o zhes gleng bslang dgos pas de'i phyir/ sangs rgyas 'dul ba gang chen mtsho/ /zhes bya ba la sogs pa'i tshigs su bcad pa bcu gcig gsungs so/ /de la 'dir yang tshigs su bcad pa bcu gcig po de dag gi brjod par bya ba dang / dgos pa dang / 'brel pa dang / dgos pa'i dgos pa brjod par bya ste/ de la brjod par bya ba ni so sor thar pa'i che ba nyid do/ /dgos pa ni rtogs pa'o/ /'brel pa ni rtogs pa de yang gleng bslang ba 'dis byed pas gleng bslang ba'i tshigs su bcad pa'i thabs 'di dang dgos pa thabs las byung ba'i mtshan nyid gnyis 'brel ba'o/ /dgos pa'i dgos pa ni so sor thar pa'i che ba nyid thos nas tshogs kyi lam 'bras bu dang bcas par 'dod pas so sor thar pa sgrub par byed pa'o/ /de la tshigs su bcad pa bcu gcig po 'di dag gi bsdus pa'i don ni rnam pa gsum ste/ so sor thar pa'i che ba nyid brjod pa dang / tshogs kyi lam 'bras bu dang bcas par bya ba dang / so sor thar pa bsgrub par bya ba'o/ /de la so sor thar pa'i che ba nyid brjod pa yang rnam pa gsum ste/ tshe 'di'i 'bras bu dang / tshe phyi ma'i 'bras bu dang / so sor thar pa la ston pa dang 'dra bar bstod pa'o/ /de la/ sangs rgyas 'dul ba gang chen mtsho/ /zhes bya ba la sogs pa tshigs su bcad pa gsum gyis ni tshe 'di'i 'bras bu bstan to/ /mtsho bas zab pa'i 'khor ba las zhes bya ba la sogs pa tshigs su bcad pa gnyis kyis ni tshe phyi ma'i 'bras bu bstan to/ /nga ni mya ngan 'da' gyur na/ /zhes bya ba la sogs pa tshigs su bcad pa gcig gis ni so sor thar pa la ston pa dang 'dra bar bstod pa bstan to/ / tshogs kyi lam 'bras bu dang bcas par bya ba yang rnam pa gsum ste/ tshogs kyi lam dkon pa dang / tshogs kyi lam rnyed pa dang / tshogs kyi lam rnyed pas nan tan bya ba'o/ /de la sangs rgyas zhes bya ba'i sgra 'di yang zhes bya ba la sogs pa tshigs su bcad pa gnyis kyis ni tshogs kyi lam dkon pa bstan to/ /'jig rten sangs rgyas 'byung ba dang / /zhes bya ba la sogs pa'i tshigs su bcad pa gcig gis ni tshogs kyi lam rnyed pa bstan to/ /mkhas pa bdag la legs 'dod cing / /zhes bya ba la sogs pa tshigs su bcad pa gcig gis ni tshogs kyi lam rnyed pas nan tan bya ba bstan to/ so sor thar pa bsgrub par bya ba ni rnam pa bzhi ste/ bdag gi dbang du byas pa dang / gzhan gyi dbang du byas pa dang / chos kyi dbang du byas pa dang / bsgrub pa'i mtshan nyid do/ /de la/ dge slong dbang dul kun dbang po/ / zhes bya bas ni bdag gi dbang du byas pa bstan to/ /sangs rgyas mi 'gyur rab byung ba/ /zhes bya bas ni gzhan gyi dbang du byas pa bstan to/ /nges par thar pa 'dod rnams kyis/ /zhes bya bas ni chos kyi dbang du byas pa bstan to/ /so sor thar pa rtag tu bsrungs/ /zhes bya bas ni bsgrub pa'i mtshan nyid bstan te/ de ni re zhig spyi'i don to/ /yan lag gi don bshad par bya ste/ de la tshe 'di'i 'bras bu'i sgo nas so sor thar pa'i che ba nyid brjod pa'i dbang du mdzad nas/ sangs rgyas 'dul ba gang chen mtsho/ /gting mtha' med pa thams cad kyis/ /gnas pa'i snying dang snying po ni/ so sor thar pa 'di yin no/ /zhes bya ba la sogs pa tshigs su bcad pa gsum gsungs te/ sangs rgyas 'dul ba zhes bya ba ni sangs rgyas kyis gsungs pa'i 'dul ba'o/ /sangs rgyas zhes bya ba ni sangs rgyas bcom ldan 'das te/ don thams cad nges par thugs su chud pa'i phyir ram/ nyon mongs pa bag chags dang bcas pa'i gnyid thams cad dang bral ba'i phyir ro/ /'dul ba zhes bya ba ni 'dul ba'i sde snod 'dul ba rnam par 'byed pa dang / 'dul ba gzhi dang / 'dul ba phran tshegs dang / 'dul ba gzhung bla ma ste/ slob ma rnams dngos po thams cad kyi mchog mya ngan las 'das par 'khrid par byed pa'i phyir ram/ rgyud la kun du spyod pa'i dri ma dang rnam par smin pa'i dri mas skyon chags par byed pa'i nyes pa thams cad rnam par 'dul bar byed pa'i phyir ro/ /gang chen mtsho zhes bya ba ni rgya mtsho ste/ sangs rgyas kyis gsungs pa'i 'dul ba de nyid rgya mtsho dang 'dra ba'i phyir ro/ /ji ltar 'dra zhe na/ gting mtha' med pa zhes bya ba gsungs te/ rgya mtsho la gzhi'i gting dpag med pa bzhin du 'dul ba la yang kun nas slong ba'i gting mtha' dpag tu med pa'i phyir dang / rgya mtsho la pha rol gyi mtha' dpag tu med pa bzhin du 'dul ba la yang 'bras bu'i mtha' dpag tu med pa'i phyir ro/ /'dul ba de dag thams cad kyi gnas pa'i snying dang snying po ni so sor thar pa 'di yin no zhes bya bar sbyar te/ gnas pa'i zhes bya ba ni ltung ba sde lnga dang / bzhi bcu rtsa bdun la sogs pa mtshan nyid rnam par gzhag pa'o/ /de'i snying zhes bya ba ni mtshan nyid rnam par gzhag pa de'i rgyur gyur pa ste/ 'phen pa dang sa bon dang kun nas slong ba gang yin pa'o/ /snying po zhes bya ba ni brtan pa rnam par mi g.yo ba ste/ mtshan nyid gzhan du mi 'gyur ba'o/ /des ni sangs rgyas kyis gsungs pa'i 'dul ba rgya mtsho lta bu gting dang mtha' med pa thams cad kyi mtshan nyid rnam par gzhag pa'i snying dang snying po ni so sor thar pa 'di yin no zhes bya ba'i sgo nas so sor thar pa'i che ba nyid brjod pa bstan to/ / 'di ni dam chos rgyal po yi/ /chos kun gyi ni 'dren pa mchog /'di ni dge slong tshong tshogs kyi/ /bslab zong tshong khang chen po yin/ zhes bya ba la/ 'di ni zhes bya ba ni so sor thar pa'o/ /dam chos rgyal po zhes bya ba ni sangs rgyas bcom ldan 'das te/ thugs su chud pa dang ston par mdzad pa'i phyir ro/ /dam chos rgyal po de'i chos kun zhes bya ba ni mdo'i sde la sogs pa'i chos thams cad do/ /chos de dag gi 'dren pa mchog /ces bya ba ni rgyal po'i blon po rin po che dang 'dra'o zhes bya ba'i tha tshig ste/ 'di la brten te de dag 'byung ba'i phyir ro/ /yang de nyid bye brag tu bya ba'i phyir 'di ni zhes bya ba la sogs pa gsungs te/ 'di ni zhes bya ba ni so sor thar pa'o/ /dge slong tshong tshogs zhes bya ba ni dge slong mya ngan las 'das pa'i nor bu rin po che 'dod pa tshong pa lta bu'i tshogs don mthun pa dag go/ / de dag gi bslab zong zhes bya ba ni mya ngan las 'das pa'i nor bu rin po che sgrub pa'i zong tshul khrims kyi nor/ de ni tshong khang zhes bya ba ni bslab pa'i zong bcer ba'i gnas te/ so sor thar pa'i nang du bslab pa thams cad 'dus pa'i phyir ro/ /chen po zhes bya ba ni bslab pa rin po che'i gnas yin pa'i phyir dang / chen po rnams la 'os pa'i phyir ro/ /de dag gis ni chos kun gyi 'dren pa mchog yin pa dang / bslab pa'i zong gi tshong khang chen po yin pa'i sgo nas so sor thar pa'i che ba nyid brjod pa bstan to/ /tshul khrims 'chal pas zin rnams kyi/ /gdug pa rnam sel sman 'di yin/ /'di ni lang tsho rnam 'khrul pa'i/ /rkang gnyis gzhon nu'i lcags kyo yin/ /zhes bya ba la/ tshul khrims 'chal pa zhes bya ba ni bslab pa nyams pa lhag ma dang bcas pa ste/ bdag dang gzhan la gnod pa nyid kyis sbrul chen po dug myur du khyab par byed pa dang 'dra ba'i phyir/ des zin pa zhes bya ba ni nyams par byas pa'o/ /des zin pa'i gang zag rnams kyi gdug pa zhes bya ba ni ltung ba ste sbrul gyi dug dang 'dra ba'i phyir ro/ /rnam sel zhes bya ba ni rnam par gnon pa ste/ kun du spyod pa sel ba'i phyir ro/ /sman zhes bya ba ni gnod sel te/ 'dis sbyong bar ston pa'i phyir ro/ /de yang so sor thar pa 'di yin te/ des ni ltung ba rnam par sel ba'i rgyud nyid du bstan to/ /yang de nyid bye brag tu bstan pa'i phyir/ 'di ni zhes bya ba la sogs pa gsungs te/ 'di ni zhes bya ba ni so sor thar pa'o/ /lang tsho zhes bya ba ni gzhon pa nyid do/ /rnam 'khrul pa'i zhes bya ba ni bag med pa la sogs pas rnam par rmongs pa'o/ /rkang gnyis zhes bya ba ni mi'o/ /gzhon nu zhes bya ba ni bya ba dang bya ba ma yin pa mi shes pa'o/ /lcags kyo zhes bya ba ni glang po che'i lcags kyo dang 'dra ba ste/ bsnyil ba dang spo ba la sogs pa'i nyes dmigs ston pas kun du skrag par byed pa yin pa'i phyir ro/ /des ni 'dul dka' ba rnams yang dag par sdom pa'i rgyu nyid du bstan to/ /de ltar tshigs su bcad pa gsum po de dag gis ni so sor thar pa la brtsam par byas na tshe 'di la 'bras bu de lta bu 'thob pas tshe 'di'i 'bras bu'i sgo nas so sor thar pa'i che ba nyid brjod pa bstan to/ /tshe phyi ma'i 'bras bu'i sgo nas so sor thar pa'i che ba nyid brjod pa'i dbang du mdzad nas/ mtsho bas zab pa'i 'khor ba las/ /sgrol ba'i rgal thabs 'di yin te/ /'di ni bzang 'gror 'gro ba yin/ /nges pa'i chu lon zam pa yin/ /zhes bya ba la sogs pa tshigs su bcad pa gnyis gsungs te/ mtsho bas zab pa'i 'khor ba zhes bya ba ni rgya mtsho dug can pa bas kyang zab cing ches gting slebs par dka' ba'i 'khor ba 'gro ba lnga'i 'jig rten no/ /'khor ba de las sgrol ba'i rgal thabs zhes bya ba ni rnam par grol bar 'gyur ba'i lam ste/ zam pa dang gru dang gzings dang rkyal pa la sogs pa lta bu'o/ /de yang so sor thar pa 'di yin te/ tshul khrims rnam par dag na lam skye ba'i phyir ro/ /des ni 'khor ba las sgrol zhing nges par legs pa'i lam 'thob pa'i thabs yin par bstan to/ /'di ni zhes bya ba ni so sor thar pa'o/ /bzang 'gro zhes bya ba ni bde 'gro mtho ris te/ lha dang mi'i 'gro ba'o/ /der 'gro ba zhes bya ba ni der 'jug cing 'thob pa'o/ /nges pa zhes bya ba ni bstan pa gcig tu gyur pa gdon mi za ba'o/ /chu lon zam pa zhes bya ba ni chu yang 'gog la rgyun sa'i zam par yang gyur pa ste/ ngan song gi chu bo yang 'gog la mtho ris su 'gro ba'i zam pa yang yin pa'i phyir ro/ / de ni so sor thar pa 'di yin te/ tshul khrims ni bde 'gro'i rgyu yin pa'i phyir ro/ /des ni ngan song las grol zhing mngon par mtho ba'i lam thob pa'i thabs yin par bstan to/ /'di ni nyon mongs pham byed lam/ /rgyal po yi ni 'dren pa mchog /'di ni thar pa'i grong 'jug pa'i/ /them skas gzhi dang 'dra bar gnas/ /zhes bya ba la/ 'di ni zhes bya ba ni so sor thar pa'o/ /nyon mongs zhes bya ba ni 'dod chags dang khong khro ba la sogs pa nyon mongs pa dag go/ /pham byed ces bya ba ni spong bar byed pa'o/ /de gang zhe na/ lam ste/ 'phags pa'i lam yan lag brgyad pa'o/ /rgyal po zhes bya ba ni nyon mongs pa pham par byed pa'i lam de nyid rgyal po dang 'dra bas rgyal po zhes bya ste/ nyon mongs pa'i dgra pham par byed pa'i phyir ro/ /'dren pa mchog ces bya ba ni rgyal po'i snying tshoms lta bu ste/ 'dis 'phags pa'i lam 'dren par byed pa'i phyir ro/ /des ni 'khor ba'i rgyu nyon mongs pa spong zhing mya ngan las 'das pa'i rgyu 'phags pa'i lam 'dren pa yin par bstan to/ /'di ni zhes bya ba ni so sor thar pa'o/ /thar pa zhes bya ba ni mya ngan las 'das pa'o/ /grong zhes bya ba ni thar pa de nyid grong khyer dang 'dra bas grong zhes bya ste/ 'tshe ba thams cad dang bral ba'i phyir ro/ /'jug pa zhes bya ba ni 'gro ba'o/ /them skas gzhi zhes bya ba ni them skas kyi rten ma'o/ /so sor thar pa 'di ni de dang 'dra bar gnas pa yin te/ lam gyi gzhi ni tshul khrims yin pa'i phyir ro/ /des ni mya ngan las 'das pa'i 'bras bu thob pa'i rgyu 'phags pa'i lam gyi gzhi nyid yin par bstan to/ /de ltar tshigs su bcad pa gnyis po de dag gis ni so sor thar pa la brtsal ba byas na tshe phyi ma la 'bras bu de lta bu thob pas tshe phyi ma'i 'bras bu'i sgo nas so sor thar pa'i che ba nyid brjod pa bstan to/ /so sor thar pa la ston pa dang 'dra bar bstod pa'i sgo nas so sor thar pa'i che ba nyid brjod pa'i dbang du mdzad nas/ nga ni mya ngan 'das gyur na/ /'di ni khyod kyi ston pa zhes/ /rang byung nyid kyis gus par bcas/ / nan tan dge slong tshogs mdun bstod/ /zhes bya ba tshigs su bcad pa gcig gsungs te/ nga ni zhes bya ba ni bcom ldan 'das nyid do/ /mya ngan 'das gyur na zhes bya ba ni phung po'i lhag ma ma lus pa'i mya ngan las 'das pa'i dbyings su'o/ /'di ni zhes bya ba ni so sor thar pa'o/ /khyod kyi zhes bya ba ni nyan thos kyi dge slong rnams kyi'o/ /ston pa zhes bya ba ni ston pa dang 'dra'o zhes so/ /rang byung zhes bya ba ni bcom ldan 'das te/ gzhan gyi lung med par bla na med pa'i mkhyen pa brnyes pa'i phyir ro/ /nyid kyis zhes bya ba ni rang gi zhal nyid kyis so/ /gus bcas par zhes bya ba ni dgongs pa gtad de'o/ /nan tan zhes bya ba ni lhur bzhes nas so/ /dge slong zhes bya ba ni gsol ba dang bzhi'i las kyis bsnyen par rdzogs pa'i dge slong ngo / /tshogs zhes bya ba ni mang po 'dus pa'o/ /mdun zhes bya ba ni mngon sum du'o/ /bstod ces bya ba ni ston pa dang 'dra'o zhes so/ /des ni ston pa bcom ldan 'das yongs su mya ngan las 'das pa'i tshe na dge slong dag deng phyin chad bdag la ston pa med par 'gyur ro snyam du dogs pa bzlog pa'i phyir bcom ldan 'das kyis 'di skad ces nga yongs su mya ngan las 'das par gyur pa na/ so sor thar pa 'di khyed la ston par byed par 'gyur ro zhes bstod par mdzad nas so sor thar pa la ston pa dang 'dra bar bstod pa'i sgo nas so sor thar pa'i che ba nyid brjod pa bstan to/ /tshogs kyi lam dkon pas tshogs kyi lam 'bras bu dang bcas par bya ba'i dbang du mdzad nas/ sangs rgyas zhes bya'i sgra 'di yang / /'jig rten dag na rab tu dkon/ /mi nyid shin tu rnyed par dka'/ /rab tu byung ba shin tu dkon/ /zhes bya ba la sogs pa tshigs su bcad pa gnyis gsungs so/ /tshogs kyi lam zhes bya ba ni sbyor ba'i lam dang rnam par dag pa'i lam 'thob pa'i tshogs dang gzhir gyur pa'i lam rnam pa bcu gsum ste/ gzhan gyi 'byor pa dang / bdag gi 'byor pa dang / dge ba'i chos la 'dun pa dang / tshul khrims kyi sdom pa dang / dbang po sdom pa dang / zas kyi tshod rig pa nyid dang / nam gyi cha stod dang nam gyi cha smad la mi nyal bar sbyor ba'i rjes su brtson pa nyid dang / shes bzhin du spyod pa nyid dang / dge ba'i bshes gnyen dang / dam pa'i chos nyan cing sems pa dang / bar chad med pa dang / gtong ba spel ba dang / dge slong gi rgyan gang yin pa'o/ /de la/ sangs rgyas zhes bya'i sgra 'di yang / /'jig rten dag na rab tu dkon/ /zhes bya bas ni gzhan gyi 'byor pa dkon par bstan te/ gzhan gyi 'byor pa gang zhe na/ de ni rnam pa lnga ste/ sangs rgyas rnams 'byung ba dang / dam pa'i chos ston pa dang / chos bstan pa rnams gnas pa dang / chos gnas pa rnams rjes su 'jug pa dang / gzhan gyi phyir rjes su snying brtse bar byed pa'o/ /des ni tha na sangs rgyas zhes bya ba'i sgra 'di yang 'jig rten na rab tu dkon na sangs rgyas rnams 'byung ba lta smos kyang ci dgos/ sangs rgyas rnams 'byung ba dkon na dam pa'i chos ston pa la sogs pa lta smos kyang ci dgos zhes bstan to/ /mi nyid rnyed par shin tu dka'/ /zhes bya bas ni bdag gi 'byor pa dkon par bstan te/ bdag gi 'byor pa gang zhe na/ de yang rnam pa lnga ste/ mir gyur pa dang / yul dbus su skyes pa dang / dbang po tshang ba dang / gnas la dad pa dang / las kyi mtha' ma log pa'o/ /des ni mir gyur pa nyid kyang shin tu rnyed par dka' na yul dbus su skyes pa la sogs pa lta smos kyang ci dgos zhes bstan to/ /rab tu byung ba shin tu dkon/ /zhes bya ba ni dge ba'i chos la 'dun pa dkon pa ste/ dge ba'i chos la 'dun pa gang zhe na/ de bzhin gshegs pa'am/ de'i nyan thos dag las chos thos shing dad pa thob par gyur la dad pa thob nas khyim nas khyim med par rab tu 'byung zhing nan tan gyis bsgrub par bya'o zhes de ltar yang dag par slob pa gang yin pa'o/ /des ni chos thos shing dad pa thob pa yang shin tu dkon na rab tu 'byung zhing nan tan gyis sgrub par byed pa lta smos kyang ci dgos zhes bstan to/ /de bzhin rab tu byung rnams kyi/ /tshul khrims phun sum tshogs rab dkon/ /zhes bya bas ni tshul khrims kyi sdom pa dang / dbang po sdom pa dang / zas kyi tshod rig pa nyid dang / nam gyi cha stod dang nam gyi cha smad la mi nyal bar sbyor ba'i rjes su brtson pa nyid dang / shes bzhin du spyod pa nyid dkon par bstan te/ tshul khrims kyi sdom pa gang zhe na/ rnam pa drug ste/ rnam par dbye ba dang / bsdu ba dang / phun sum tshogs pa dang / rnam grangs dang / rnam par dag pa dang / phan yon no/ /de la rnam par dbye ba ni rnam pa drug ste/ tshul khrims dang ldan par gnas pa dang / so sor thar pa'i sdom pas bsdams pa dang / cho ga phun sum tshogs pa dang / spyod yul phun sum tshogs pa dang / kha na ma tho ba phra rab dag la yang 'jigs par lta ba dang / bslab pa'i gzhi rnams yang dag par blangs te slob pa'o/ /bsdu ba ni rnam pa gsum du bsdu ba ste/ tshul khrims yang dag par blangs pa dang / nges par 'byin pa'i tshul khrims dang tshul khrims bsgom pa'o/ /phun sum tshogs pa ni rnam pa bcus phun sum tshogs par 'gyur te/ dang po nyid nas legs par blangs pa dang / ha cang zhum pa ma yin pa dang / ha cang thal ches pa ma yin pa dang / bag yod pa dang / brtson 'grus kyis yongs su zin pa dang / yang dag par sdom pa dang / cho ga ma nyams pas yongs su zin pa dang / 'tsho ba ma nyams pas yongs su zin pa dang / mtha' gnyis su ma lhung ba dang / nges par byung ba dang / yang dag par blangs pa yongs su ma nyams pa'o/ /rnam grangs ni rnam pa drug ste/ la lar tshul khrims rtsa ba'i don du gsungs pa dang / la lar rgyan dang / la lar byug pa dang / la lar spos dang / la lar legs par spyad pa dang / la lar sdom pa'i sgra gsungs pa'o/ /rnam par dag ni rnam pa gsum ste/ tshul khrims kyi sdom pa de yongs su dag par bya ba'i phyir lus kyi las la so sor rtog par byed pa dang / ngag gi las la so sor rtog par byed pa dang / yid kyi las la so sor rtog par byed pa'o/ /phan yon ni tshul khrims kyi phan yon rnam pa bcu ste/ 'gyod pa med par rim gyis mchog tu dga' ba sngon du 'gro ba'i chos thob par 'gyur ba dang / 'gyod pa med par 'chi ba'i dus byed par 'gyur ba dang / phyogs bcur snyan pa'i bsgrags par 'gyur ba dang / bde bar gnyid kyis log cing bde bar sad par 'gyur ba dang / gnyid log pa na lha rnams srung bar 'gyur ba dang / gzhan las sdig pa'i bag tsha ba dang / 'jigs pa dang / dngang ba med par 'gyur ba dang / dgra bo rnams kyis glags shig rnyed na yang tshul khrims rnam par dag pa'i dbang gis de dag srung ba la sogs pa phan 'dogs par 'gyur ba dang / gnod sbyin dang mi ma yin pa gdug pa gnyug mar gnas pa rnams kyis glags shig rnyed na yang tshul khrims rnam par dag pa'i dbang gis de dag bsrung ba la sogs pas phan 'dogs par 'gyur ba dang / gzhan la chos gos la sogs pa dag chos kyis tshegs chung ngus 'grub par 'gyur ba dang / gang du skye bar 'dod pa la sogs pa'i smon lam thams cad yang dag par 'grub par 'gyur ba'o/ / dbang po sdom pa gang zhe na/ de tshul khrims kyi sdom pa de nyid la brten nas dran pa kun du srung ba dang / dran pa la rtag 'grus byed pa dang / dran pas yid kun du srung ba dang / gnas skabs mnyam pa la 'jog par byed cing / mig dang / rna ba dang / sna dang / lce dang / lus dang / yid kyi gzugs dang / sgra dang / dri dang / ro dang / reg bya dang / chos rnams rnam par shes pa na yang mtshan mar mi 'dzin cing mngon rtags su mi 'dzin la/ gzhi gang kho na las de'i sems kyi rjes su sdig pa mi dge ba'i chos rnams zag par 'gyur ba de dag bsdam par bya ba'i phyir sgrub par byed cing dbang po rnams kyang srung bar byed la dbang po rnams kyis kyang sdom pa sgrub par byed pas dbang po rnams kyi sgo bsdams pa yin no/ /zas kyi tshod rig pa nyid gang zhe na/ de ltar dbang po bsdams pa de so sor brtags shing zas za bar byed la rnam par rtog pa'i phyir ma yin/ rgyags pa'i phyir ma yin/ sgeg pa'i phyir ma yin/ brgyan pa'i phyir ma yin gyi lus 'di gnas par bya ba dang / 'tsho bar bya ba dang / bkres pa bsal bar bya ba dang / tshangs par spyod pa la phan par bya ba dang / tshor ba rnying pa rnams spang bar bya ba dang / gsar pa rnams mi skye bar bya ba'i phyir dang / bdag 'tsho zhing stobs dang bde ba dang / kha na ma tho ba med pa dang bde ba la reg par gnas par yang 'gyur ro snyam du sems shing zas za ba yin no/ /nam gyi cha stod dang nam gyi cha smad la mi nyal bar sbyor ba'i rjes su brtson pa nyid gang yin zhe na/ de ltar zas kyi tshod rig pa de nyid mtshan mo 'chag pa dang 'dug pa dag gis sgrib par 'gyur ba'i chos rnams las sems yongs su sbyong bar byed cing / mtshan mo'i thun dang po la yang 'chag pa dang 'dug pa dag gis sgrib par 'gyur ba'i chos rnams las sems yongs su sbyong bar byed la/ mtshan mo'i gung thun la gtsug lag khang nas phyir byung ste gtsug lag khang gi phyi rol du rkang pa bkrus nas gtsug lag khang gi nang du zhugs te/ glo g.yas pa phab ste rkang pa rkang pa'i steng du gzhag ste snang ba'i 'du shes dang dran pa dang shes bzhin dang ldan pa kho na'i 'du shes yid la byed bzhin du nyal bar byed pa dang / mtshan mo'i thun tha ma la yang myur ba myur ba kho nar sad par byas nas 'chag pa dang 'dug pa dag gis sgrib par 'gyur ba'i chos rnams las sems yongs su sbyong bar byed pa yin no/ /shes bzhin du spyod pa nyid gang zhe na/ de ltar mi nyal bar sbyor ba'i rjes su brtson par gyur pa de 'gro ba dang / ldog pa la shes bzhin du spyod par byed pa dang / chung zad bltas pa dang / rnam par bltas pa dang / bskum pa dang / brkyang ba dang / snam sbyar dang / chos gos dang / lhung bzed bcangs pa dang / zos pa dang / 'thungs pa dang / 'chos pa dang / myangs pa dang / song ba dang / sdod pa dang / 'dug pa dang / nyal ba dang / mi nyal ba dang / smra ba dang / mi smra ba dang / gnyid kyis snyom pa bsang ba la yang shes bzhin du spyod pa yin no/ /de nas ni tshul khrims kyi sdom pa yang rab tu dkon na dbang po sdom pa la sogs pa lta smos kyang ci dgos zhes bstan to/ /tshul khrims yongs su dag gyur kyang / /grogs bzang shin tu rnyed par dka'/ /zhes bya bas ni dge ba'i bshes gnyen dang / dam pa'i chos nyan cing sems pa dang / bar chad med pa dang / gtong ba spel ba dang / dge sbyong gi rgyan dkon par bstan te/ dge ba'i bshes gnyen gang zhe na/ rgyu rnam pa brgyad kyis na rnam pa thams cad yongs su rdzogs pa'i dge ba'i bshes gnyen yin par rig par bya ste/ brgyad gang zhe na/ tshul khrims la gnas pa dang / mang du thos pa dang / rtog pa dang ldan pa dang / rjes su snying brtse ba dang ldan pa dang / yid yongs su mi skyo ba dang / bzod pa dang ldan pa dang / mi 'jigs pa dang ldan pa dang / tshig gi bya ba dang ldan pa yin no/ /dam pa'i chos nyan cing sems pa gang zhe na/ dam pa sangs rgyas dang / sangs rgyas kyi nyan thos rnams kyis bstan pa'i chos gsung rab tu gtogs pa yan lag bcu gnyis sde snod gsum gyis bsdus pa dag 'dzin cing tshig 'bru dang don nyan pa dang / gcig tu dben par song ste bsam gyis mi khyab pa'i gnas rnams spangs nas ji skad thos pa de dag nyid rang dang spyi'i mtshan nyid kyi sgo nas bgrang ba'i rnam pas chos rnams la bgrang ba'i tshul gyis sems par byed pa dang / gzhal ba'i rnam par rigs pas yon tan dang / skyon nye bar brtag pa'i tshul gyis sems par byed pa yin no/ /bar chad med pa gang zhe na/ nang la brten pa'i bar chad dang / phyi rol la brten pa'i bar chad med pa ste/ de la nang la brten pa'i bar chad ni sngon bsod nams ma byas pa'i phyir 'tsho ba'i yo byad rkyen du 'bab ba dag dus dus su rnyed par mi 'gyur ba dang / 'dod chags dang / zhe sdang dang / gti mug shas che zhing yun ring ba dang / sngon nad mang bar 'gyur ba'i las byas pas nad mang ba dang / tshe 'di la mi mthun par spyad pas de'i lus la rlung dang / mkhris pa dang / bad kan 'khrug cing gsud pa la sogs par 'gyur ba dang / zas la gdu ba dang / don mang ba dang / bya ba mang ba dang / tshogs 'du ba mang ba dang / las la dga' ba dang / smra ba la dga' ba dang / gnyid la dga' ba dang / bre mo gtam la dga' ba dang / 'du 'dzi la dga' ba dang / bdag nyid rab tu 'dzin pa dang / mi brtan pa dang / bag med pa dang / yul ngan par skyes pa dang / de lta bu dang mthun pa dag go/ /phyi rol la brten pa'i bar chad ni skyes bu dam pa ma yin pa la brten cing / de las rjes su mthun pa'i gdams ngag dang rjes su bstan pa dus dus su mi 'thob pa dang / yul ngan par gnas pas nyin mo mi sdug pa mang ba dang / mtshan mo skye bo mang po rtag tu sgra 'byin cing ca co mang la klag cor che ba dang / rlung dang nyi ma'i reg pa grang zhing tsha ba dang / mi dang mi ma yin pas 'jigs pa dang / de lta bu dang mthun pa dag go/ /gzhan yang bar chad rnam pa gsum ste/ sbyor ba'i bar chad dang / rab tu dben pa'i bar chad dang / nang du yang dag 'jog gi bar chad dag med pa ni bar chad med pa yin no/ /gtong ba spel ba gang zhe na/ sems kyi rgyan dang / sems kyi yo byad dang / rnal 'byor gyi tshogs dang / don gyi mchog thob par bya ba'i phyir kha na ma tho ba med pa'i sbyin pa sbyin par byed pa ste/ de yang sus sbyin par byed/ su la sbyin par byed/ ci zhig sbyin par byed/ cis sbyin par byed/ ci ltar sbyin par byed/ ci'i phyir sbyin par byed cing / gang gis de'i sbyin pa kha na ma tho ba med par 'gyur ba yin zhe na/ sbyin pa po dang / sbyin bdag gis sbyin par byed do/ /su la sbyin par byed ce na bzhi la ste/ sdug bsngal ba dang / phan 'dogs pa dang / sdug pa dang / khyad par can la sbyin par byed do/ /ci zhig sbyin par byed ce na/ sems can du bgrang ba dang / sems can du bgrang ba ma yin pa'i dngos po sbyin par byed do/ /cis sbyin par byed ce na/ sems mngon par 'du byed pa yid kyi las chags pa med pa dang ldan pa'i sems pa gang yin pa dang / sbyin par bya ba'i dngos po yongs su gtang bar bya ba'i phyir rang gi rgyud dang gzhan gyi rgyud la des kun nas bslang ba'i lus dang ngag gi las gang yin pa des sbyin par byed do/ /ji ltar sbyin par byed ce na/ ma 'ongs pa la lta ba dang / 'bras bu mthong ba'i dad pas sbyin par byed pa dang / 'dud pa'i sems kyis gus par sbyin par byed pa dang / brnyas pa med par rang gi lag nas sbyin par byed pa dang / gzhan la mkho ba'i dus su sbyin par byed pa dang / chos dang mthun pa dang / gzu lums ma yin par legs pa bsgrubs te/ gzhan la mi gnod par sbyin par byed pa dang / gtsang ba dang / bzang po dang / dam pa dang / rung ba sbyin par byed pa dang / ser sna'i dri ma dang gsog 'jog gi dri ma bsal te sbyin par byed pa dang / sbyin pa'i snga rol du yang yid dga' ba la sbyin pa'i tshe na yang rab tu dang bar byed cing byin nas kyang 'gyod pa med par 'gyur ba de ltar sbyin par byed do/ /ci'i phyir sbyin par byed ce na/ sdug bsngal ba rnams la snying rje ba'i phyir dang / phan 'dogs pa rnams la byas pa gzo ba'i phyir dang / sdug pa rnams la byams pa dang gus pa dang gcugs pa'i phyir dang / khyad par can rnams la 'jig rten dang 'jig rten las 'das pa'i khyad par 'dod pa'i phyir sbyin par byed do/ /gang gis de'i sbyin pa kha na ma tho ba med par 'gyur ba yin zhe na/ de sems kyi rgyan dang / sems kyi yo byad dang / rnal 'byor gyi tshogs dang / don gyi mchog thob par bya ba'i phyir rnam pa de dag gis khyim pa'am rab tu byung ba dag la sbyin pa sbyin par byed na sbyin pa de ni kha na ma tho ba med par 'gyur ba yin te/ de ni gtong ba spel ba zhes bya'o/ /dge sbyong gi rgyan gang zhe na/ mdor bsdu na rnam pa bcu bdun te/ dad pa dang ldan pa dang / g.yo med pa dang / nad nyung ba dang / brtson 'grus brtsams pa'i rang bzhin can dang / shes rab rno ba dang / 'dod pa chung ba dang / chog shes pa dang / gso sla ba dang / dgang sla ba dang / sbyangs pa'i yon tan dang ldan pa dang / mdzes pa dang / drod rig pa dang / skyes bu dam pa'i chos dang ldan pa dang / mkhas pa'i rtags dang ldan pa dang / bzod pa che ba dang / des pa dang / gya nom pa yin no/ /des ni dge ba'i bshes gnyen yang shin tu rnyed par dka' na dam pa'i chos nyan cing sems pa la sogs pa lta smos kyang ci dgos zhes bstan to/ /de ltar tshigs su bcad pa gnyis po de dag gis ni tshogs kyi lam dkon pas de 'bras bu dang bcas par bya dgos pa'i sgo nas tshogs kyi lam 'bras bu dang bcas par bya ba bstan to/ /tshogs kyi lam rnyed pas tshogs kyi lam 'bras bu dang bcas par bya ba'i dbang du mdzad nas/ 'jig rten sangs rgyas 'byung ba dang / /mi dang rab tu byung ba dang / /tshul khrims phun sum tshogs pa dang / /grogs bzang rnyed dka' rnyed gyur na/ /zhes bya ba tshigs su bcad pa gcig gsungs te/ 'jig rten sangs rgyas 'byung ba dang / /zhes bya bas ni gzhan gyi 'byor pa rnyed pa bstan to/ /mi dang zhes bya bas ni bdag gi 'byor pa rnyed pa bstan to/ /rab tu byung ba dang zhes bya bas ni dge ba'i chos la 'dun pa rnyed pa bstan to/ /tshul khrims phun sum tshogs pa dang / /zhes bya bas ni tshul khrims kyi sdom pa dang / dbang po'i sdom pa dang / zas kyi tshod rig pa nyid dang / nam gyi cha stod dang nam gyi cha smad la mi nyal bar sbyor ba'i rjes su brtson pa nyid dang / shes bzhin du spyod pa nyid rnyed pa bstan to/ / grogs bzang rnyed dka' rnyed gyur nas/ /zhes bya bas ni dge ba'i bshes gnyen dang / dam pa'i chos nyan cing sems pa dang / bar chad med pa dang / gtong ba spel ba dang / dge sbyong gi rgyan rnyed pa bstan to/ /de ltar tshigs su bcad pa gcig po des ni tshogs kyi lam rnyed pas de'i 'bras bu dang bcas par bya dgos pa'i sgo nas tshogs kyi lam 'bras bu dang bcas par bya ba bstan to/ /tshogs kyi lam rnyed pas nan tan bya ba'i sgo nas tshogs kyi lam 'bras bu dang bcas par bya ba'i dbang du mdzad nas/ mkhas pa bdag la legs 'dod cing / / de dag 'bras bcas byed 'dod pa/ /sdom brtson rnams kyis so sor thar/ /mnyan pa'i phyir ni 'bad par bya/ /zhes bya ba tshigs su bcad pa gcig gsungs te/ mkhas pa zhes bya ba ni mkhas pa'i rtags dang ldan pa ste/ lus kyis legs par bya ba byed pa dang / ngag gis legs par smra ba brjod pa dang / yid kyis legs par bsam pa sems pa'o/ /bdag la legs 'dod cing zhes bya ba ni bdag nyid shes pa zhes bya ba'i tha tshig go/ /de dag 'bras bcas byed 'dod pa/ /zhes bya ba ni tshogs kyi lam de dag 'bras bu dang bcas par byed 'dod pa ste/ sbyor ba'i lam dang rnam par dag pa'i lam thob par 'dod pa zhes bya ba'i tha tshig go/ /sdom brtson rnams kyis zhes bya ba ni rab tu byung ba rnams kyis so/ /de rnams kyis so sor thar pa mnyan pa'i phyir 'bad par bya'o zhes bya bar sbyar te/ thos pa dang / gzung ba dang / 'dzin pa dang / bsgrub pa la 'bad par bya'o zhes bya ba'i tha tshig go/ /de ltar tshigs su bcad pa gcig po des ni tshogs kyi lam rnyed pas nan tan bya ba'i sgo nas tshogs kyi lam 'bras bu dang bcas par bya ba bstan to/ /bdag gi dbang du byas nas so sor thar pa bsgrub pa bstan ba'i phyir/ dge slong dbang dul kun dbang po/ /zhes bya ba gsungs te/ dbang dul zhes bya ba ni mig la sogs pa dbang po lnga po dag bsrungs pa ste/ mig gis gzugs mthong na mtshan mar mi 'dzin mngon rtags su mi 'dzin cing / rjes su chags pa dang / khong khro bar mi 'gyur ba la sogs pa'o/ /kun dbang po zhes bya ba ni gnas skabs mnyam pa la 'jog pa ste/ dbang po dang / dmigs pa dang / yul dang / dus dang / gang zag la sogs pa'i gnas skabs thams cad la dbang po dul bar byed pa'o/ /des ni bdag nyid kyi bsam pa shin tu rnam par dag pa'i phyir dge slong tshul khrims rnams las bslab pa nyams par byed pa ni bdag nyid la brten te ngo tsha shes pa skye ba'i sgo nas bdag gi dbang du byas te so sor thar pa bsgrub par bya ba bstan to/ /gzhan gyi dbang du byas nas so sor thar pa bsgrub pa bstan pa'i phyir/ sangs rgyas mi 'gyur rab byung ba/ /zhes bya ba gsungs te/ sangs rgyas zhes smos pa ni sangs rgyas las sam sangs rgyas kyi phyir rab tu byung ba zhes bya bar sbyar ro/ /mi 'gyur zhes bya ba ni nges shing 'khrul pa med pa ste/ bu lon gyis 'jigs pa'am/ 'tsho ba med pas 'jigs pa'am/ rgyal pos 'jigs pa la sogs pas rab tu byung ba ma yin gyi tshul khrims dang po nyid nas yang dag par blangs pa'i yon tan dang ldan pa'o/ /rab byung ba zhes bya ba ni pha rol las legs par yang dag par blangs te mgo bregs pa'o/ /des ni pha rol las sems legs par yang dag par blangs pa'i phyir dge slong tshul khrims rnams las bslab pa nyams par byed pa na pha rol la brten te khrel yod pa skye ba'i sgo nas gzhan gyi dbang du byas te so sor thar pa bsgrub par bya ba bstan to/ /chos kyi dbang du byas nas so sor thar pa bsgrub pa bstan pa'i phyir/ nges par thar pa 'dod rnams kyis/ /zhes bya ba gsungs te/ nges par thar pa zhes bya ba ni mya ngan las 'das pa ste/ sdug bsngal gtan spangs pa'i phyir ro/ /'dod rnams kyis zhes bya ba ni don du gnyer ba rnams kyis so/ /des ni nyams par gyur na phyir gso bar byed pa'i phyir dge slong tshul khrims rnams las bslab pa nyams pas na 'gyod pa med pa'i sgo nas chos kyi dbang du byas te/ so sor thar pa bsgrub par bya ba bstan to/ /bsgrub pa'i mtshan nyid kyis so sor thar pa bsgrub pa bstan pa'i phyir/ so sor thar pa rtag tu bsrungs/ /zhes bya ba gsungs te/ rtag tu bsrungs zhes bya ba ni thog ma nyid nas nyams par mi 'gyur bar gus pa skyed cing zhes bya ba'i tha tshig go/ /des ni mi nyams par bya ba'i phyir gus pa skyes nas dran pa nye bar gnas pa'i phyir dge slong tshul khrims yang dag par blangs pa bsrungs pa'i sgo nas bsgrub pa'i mtshan nyid kyis so sor thar pa bstan to/ /gleng bslang ba'i mtshan nyid bshad zin to// //de'i 'og tu yang dag par brtsams pa'i mtshan nyid bshad par bya ste/ yang dag par brtsams pa'i mtshan nyid ces bya ba ni so sor thar pa'i gzhung rgyas pa yang dag par brtsam pa'o/ /de yang so sor thar pa rnyed dka' ba dang / dkon mchog gsum 'byung ba bde ba la sogs pa'i sgo nas yang dag par brtsams dgos pas de'i phyir/ bskal ba bye ba rnams su yang / /zhes bya ba la sogs pa'i tshigs su bcad pa drug gsungs so/ /de la 'dir yang tshigs su bcad pa drug po de dag gi brjod par bya ba dang / dgos pa dang / 'brel pa dang / dgos pa'i dgos pa brjod par bya ste/ de la brjod par bya ba ni so sor thar pa la gus par bya ba'o/ /dgos pa ni gus par byed pa'o/ /'brel pa ni gus par bya ba de yang yang dag par brtsams pa 'dis byed pas yang dag par brtsams pa'i tshigs su bcad pa'i thabs 'di dang / dgos pa thabs las byung ba'i mtshan nyid gnyis 'brel pa'o/ / dgos pa'i dgos pa ni so sor thar pa la gus par gyur nas so sor thar pa yang dag par brtsam par 'dod pas so sor thar pa'i gzhung rgyas pa nyan pa la sogs pa byed pa'o/ /de la tshigs su bcad pa drug po 'di dag gi bsdus pa'i don ni rnam pa bdun te/ so sor thar pa rnyed dka' ba dang / dkon mchog gsum 'byung ba bde ba dang / dge ba'i bshes gnyen la brten pa bde ba dang / sdig pa'i grogs po spangs pa bde ba dang / dge ba'i bshes gnyen gyi khyad par la brten pa bde ba dang / thob par bya ba dang / de bsgrub pa bde ba dang / sgrub par byed pa sbyangs pa'i yon tan dang ldan pa bde ba'o/ /de la/ bskal pa bye ba rnams su yang / /zhes bya ba la sogs pa tshigs su bcad pa gcig gis ni so sor thar pa rnyed dka' ba bstan to/ /sangs rgyas rnams ni 'byung ba bde/ /zhes bya ba la sogs pa tshigs su bcad pa gcig gis ni dkon mchog gsum 'byung ba bde ba bstan to/ /'phags pa rnams ni mthong ba bde/ /dam pa dag dang 'grogs pa bde/ /zhes bya bas ni dge ba'i bshes gnyen la brten pa bde ba bstan to/ /byis pa rnams ni ma mthong na/ /rtag tu bde ba nyid du 'gyur/ /zhes bya bas ni sdig pa'i grogs po spangs pa bde ba bstan to/ /tshul khrims ldan pa mthong ba bde/ /zhes bya ba la sogs pa tshigs su bcad pa gcig gis ni dge ba'i bshes gnyen gyi khyad par la brten pa bde ba bstan to/ /'jug ngogs bde ba'i chu klung bde/ /zhes bya ba la sogs pa tshigs su bcad pa gcig gis ni thob par bya ba dang / de sgrub pa bde ba bstan to/ /nges par byas shing dbang po thul ba dag /ces bya ba la sogs pa tshigs su bcad pa gcig gis ni sgrub par byed pa sbyangs pa'i yon tan dang ldan pa bde ba bstan te/ de ni re zhig spyi'i don yin no/ /da ni yan lag gi don bshad par bya ste/ de la so sor thar pa rnyed dka' ba'i sgo nas so sor thar pa yang dag par brtsam pa'i dbang du mdzad nas/ bskal pa bye ba rnams su yang / /so sor thar pa thos pa dang / /gzung dang 'dzin pa rnyed dka' ste/ /sgrub pa'ang shin tu rnyed par dka'/ /zhes bya ba'i tshigs su bcad pa gcig gsungs te/ bskal ba zhes bya ba ni dus kyi bye brag bskal pa chen po ste/ bskal par byed pas bskal pa'o/ /bye ba zhes bya ba ni grangs kyi bye brag ste gnas brgyad pa'o/ /rnams su yang zhes bya ba ni bye brag ba grangs pa dag gis kyang brgya la rnyed par dka' bas mang po'i tshig tu bstan to/ /so sor thar pa zhes bya ba ni lung dang rtogs pa'i mtshan nyid do/ /thos pa zhes bya ba ni rna ba'i rnam par shes pas tshig gi bdag nyid thos pa'o/ / gzung zhes bya ba ni de'i rjes las thob pa yid kyi rnam par shes pas tshig gi bdag nyid dang don gyi bdag nyid yongs su gcod pa'o/ /'dzin pa zhes bya ba ni tshig dang don gyi bdag nyid bzung ba de mi brjed pa'o/ /rnyed dka' ste zhes bya ba ni de gsum char yang rnyed par dka' ste/ rgya mtsho chen por gnya' shing gi mig tu rus sbal zhar ba'i mgrin pa chud pa'i tshul gyis gzhan gyi 'byor pa dang / bdag gi 'byor pa la sogs pa rnyed par dka' bas bskal pa chen po bye ba phrag bgrangs pa 'das pas kyang de dag rnyed dka' ba'i phyir ro/ /sgrub pa zhes bya ba ni so sor thar pa rtogs pa'i don lus dang ngag dang yid dag gis yang dag par sgrub cing nan tan byed pa'o/ /de'ang snga ma de gsum pas kyang shin tu rnyed par dka' ste/ yang dag par bsgrub pa ni mngon par brtson pa la rag las pa'i phyir ro/ /de lta bas na so sor thar pa brjod par byas/ gus par nyon cig /thos nas kyang drang srong chen pos ji skad gsungs pa de bzhin du rjes su bsgrub cing nan tan du bya'o zhes bya ba'i tha tshig go/ /de ltar tshigs su bcad pa des ni lung dang rtogs pa'i sgo nas so sor thar pa rnyed dka' bas so sor thar pa yang dag par brtsam par bya'o zhes bstan te/ thos pa dang gzung ba dang 'dzin pa rnyed par dka' ba ni lung gi sgo nas rnyed dka' ba yin te/ sgrub pa'ang shin tu rnyed par dka' ba ni rtogs pa'i sgo nas rnyed par dka' ba yin no/ /dkon mchog gsum 'byung bar bde ba'i sgo nas so sor thar pa yang dag par brtsams pa'i dbang du mdzad nas/ sangs rgyas rnams ni 'byung ba bde/ /chos bstan pa yang bde ba yin/ /dge 'dun mthun pa bde ba ste/ /mthun pa rnams kyi dka' thub bde/ /zhes bya ba'i tshigs su bcad pa gcig gsungs te/ sangs rgyas rnams ni 'byung ba bde/ /zhes bya ba la/ sangs rgyas 'byung ba zhes bya ba ni rdzogs par byang chub pa'i tshe yang / phyis 'byung ba'i tshul gyis bltam pa'i tshe'o/ /de bde zhes bya ba ni rnam par grol ba'i bde ba thob pa'i rgyu yin pa'i phyir dang / 'bras bu bde bar 'gyur ba'i phyir te/ dper na mi bde'o zhes bya ba dang 'dra bar sangs rgyas rnams 'byung ba bde ba yin no/ /chos bstan pa yang bde ba yin/ /zhes bya ba ni mdo sde la sogs pa gsung rab tu gtogs pa yan lag bcu gnyis po dag bstan pa yang bde ba'i rgyu yin pa dang / 'bras bu bde bar 'gyur bas bde ba yin no/ /dge 'dun mthun pa bde ba ste/ /zhes bya ba ni skyes bu gang zag brgyad kyi bdag nyid kyi dge 'dun tshul khrims dang lta ba dang / cho ga dang 'tsho ba mthun pas ro gcig cing bya ba gcig tu gyur pa yang bde ba'i rgyu yin pa dang / 'bras bu bde bar 'gyur bas bde ba yin no/ /mthun pa rnams kyi dka' thub bde/ /zhes bya ba ni lhag pa'i tshul khrims la sogs pa bslab pa gsum po dag la rjes su bsgrub pa'i dka' thub nyon mongs pa dang / nyes pa spyad pa gdung bar byed pa yang bde ba'i rgyu yin pa dang 'bras bu bde bar 'gyur bas bde ba yin no/ /de ltar tshigs su bcad pa des ni dkon mchog gsum 'byung ba dang / de dag gi 'bras bu bde ba nyid yin pas so sor thar pa yang dag par brtsam par bya'o zhes bstan to/ /dge ba'i bshes gnyen la brten pa bde ba'i sgo nas so sor thar pa yang dag par brtsams pa'i dbang du mdzad nas/ 'phags pa rnams ni mthong ba bde/ /dam pa dag dang 'grogs pa bde/ /zhes bya ba gsungs te/ 'phags pa rnams zhes bya ba ni dgra bcom pa la sogs pa dag ste/ sdig pa dag las ring du song ba'i phyir 'phags pa zhes bya'o/ /mthong ba bde zhes bya ba ni de dag dge ba'i bshes gnyen nyid du mthong na bde ba'i rgyur 'gyur ro/ /dam pa dag ces bya ba ni so so'i skye bo rnams kyi nang na skyes bu dam pa byang chub sems dpa' la sogs pa dag ste/ gzhan la phan 'dogs shing nges pa'i phyir dam pa zhes bya'o/ /'grogs pa bde zhes bya ba ni lhan cig mtshungs par gnas na bde ba'i rgyur 'gyur ba'o/ /de ltar tshigs su bcad pa phyed po des ni 'phags pa'i mthong ba dang / dam pa dang 'grogs pa ni tshe 'di dang phyi ma'i bde ba phun sum tshogs pa'i sngon du 'gro ba yin pas dge ba'i bshes gnyen la brten pa bde ba'i sgo nas so sor thar pa yang dag par brtsam par bya'o zhes bstan to/ /sdig pa'i grogs po spangs pa bde ba'i sgo nas so sor thar pa yang dag par brtsam pa'i dbang du mdzad nas/ byis pa rnams ni ma mthong na/ /rtag tu bde ba nyid du 'gyur/ /zhes gsungs te/ byis pa rnams zhes bya ba ni shes rab 'chal pa log par sgrub pa rnams te/ byis pa'i rtags dang ldan pa'i phyir ro/ /ma mthong na/ rtag tu bde ba nyid du 'gyur/ /zhes bya ba ni sdig pa'i grogs po dang ma 'grogs na rnam pa thams cad du bde bar 'gyur ba'o/ /de ltar tshigs su bcad pa phyed po des ni sdig pa'i grogs po spangs pa bde ba'i sgo nas so sor thar pa yang dag par brtsam par bya'o zhes bstan to/ /dge ba'i bshes gnyen gyi khyad par la brten pa bde ba'i sgo nas so sor thar pa yang dag par brtsam pa'i dbang du mdzad nas/ tshul khrims ldan pa mthong ba bde/ /mang du thos pa mthong ba bde/ /yang srid rnam par grol ba yi/ /dgra bcom pa dag mthong ba bde/ /zhes bya ba tshigs su bcad pa gcig gsungs te/ dge ba'i bshes gnyen gyi khyad par ni rnam pa gnyis te/ nye bar btags pa dang don dam pa'o/ /nye bar btags pa yang rnam pa gnyis te/ zhi gnas kyi yan lag la gnas pa dang / lhag mthong gi yan lag la gnas pa'o/ /de la zhi gnas kyi yan lag la gnas pa ni tshul khrims dang ldan pa zhes bya bas bstan te/ tshul khrims la gnas nas sems mnyam par 'jog pa'i phyir ro/ /de mthong ba bde ba ni tshul khrims dang ldan pa ni gzhan la gnod pa'i bsam pa la log pa las bde ba'i rgyu yin pa'i phyir ro/ /lhag mthong gi yan lag la gnas pa ni mang du thos pa zhes bya bas bstan te/ mang du thos na shes rab skye ba'i phyir ro/ /de mthong ba bde ba ni thos pa dang ldan pa ni thos pa'i stobs kyi lta ba dang 'gyod pa dang / the tshom sel bas bde ba'i rgyu yin pa'i phyir ro/ /don dam pa ni/ yang srid rnam par grol ba yi/ /dgra bcom pa zhes bya ba bstan te/ yang srid rnam par grol ba zhes bya ba ni 'khor bar yang mi skye ba'i chos nyid kyis rnam par grol ba bstan to/ /dgra bcom pa zhes bya bas ni nyon mongs pa'i dgra rnams bcom pa bstan te/ dgra bcom pa zhes bya bas ni sgra 'os pa la sogs pa'i don gzhan du yang 'dren pas dgra bcom pa'i 'bras bu dang ldan pa nyid kyi bye brag bstan pa'i phyir/ yang srid rnam par grol ba zhes bya ba smos so/ /de dag mthong ba bde ba yin/ /dgra bcom pa thob pa ni dge legs kyi bsam pa mchog dang ldan pa yin pas bde ba'i rgyu yin pa'i phyir ro/ /de ltar tshigs su bcad pa des ni dge ba'i bshes gnyen gyi khyad par la brten nas bde ba'i sgo nas so sor thar pa yang dag par brtsam par bya'o zhes bstan to/ /thob par bya ba dang de sgrub pa bde ba'i sgo nas so sor thar pa yang dag par brtsam pa'i dbang du mdzad nas/ 'jug ngogs bde ba'i chu klung bde/ /chos la goms pa'i skye bo bde/ /shes rab thob par gyur pa bde/ /nga'o nga rgyal zad pa bde/ /zhes bya ba la tshigs su bcad pa gcig gsungs te/ thob par bya ba ni rnam par grol ba'o/ /de sgrub pa ni gang zag rnal 'byor pa'o/ /de la thob par bya ba bde ba ni/ 'jug ngogs bde ba'i chu klung bde/ /zhes bya ba bstan te/ dper na chu klung 'jug ngogs kyi chu ka bde na chu blang sla ba de bzhin du rnam par grol ba'i chu klung gi 'jug ngogs kyi lam 'dod pa'i bsod snyoms kyi mtha' dang bdag nyid ngal ba'i mtha' gnyis rnam par spangs pas bde ba'i yang rnam par grol ba'i chu blang sla ste/ des ni thob par byas pa bde ba'i sgo nas so sor thar pa yang dag par brtsam par bya'o zhes bstan to/ /de sgrub par byed pa bde ba ni/ chos la goms pa'i skye bo bde/ /zhes bya ba la sogs pa tshig lhag ma gsum gyis bstan te/ chos la goms pa zhes bya ba ni dge ba'i chos la goms pa ste/ des ni tshogs kyi lam dang sbyor ba'i lam sgrub par byed pa bstan to/ /de bde ba ni rnam par grol ba'i bde ba 'thob pa'i rgyu yin pa'i phyir ro/ /shes rab thob par gyur pa zhes bya ba ni zag pa med pa'i shes rab thob par gyur pa ste/ des ni rnam par dag pa'i lam sgrub par byed pa bstan to/ /de bde ba ni mthong ba dang bsgom pa'i lam gyi rnam par grol ba'i bde ba nyid thob pa'i phyir ro/ / nga'o nga rgyal zad pa bde/ /zhes bya ba ni khams gsum pa'i 'dod chags dang bral ba ste/ des ni mi slob pa'i lam sgrub par byed pa bstan to/ /de bde ba ni rnam par grol ba'i bde ba nyid mngon sum du byas pa'i phyir ro/ /de ltar tshigs su bcad pa des ni thob par bya ba dang / de sgrub pa bde ba'i sgo nas so sor thar pa yang dag par brtsam par bya'o zhes bstan to/ /sgrub par byed pa sbyangs pa'i yon tan dang ldan pa bde ba'i sgo nas so sor thar pa yang dag par brtsam pa'i dbang du mdzad nas/ nges par byas shing dbang po thul ba dag /dgon pa zhi ba rnams su rgas gyur dang / /mang du thos pa nags kyi nang dag tu/ /lang tsho yol ba rnams kyi gnas pa bde/ /zhes bya ba'i tshigs su bcad pa gcig gsungs te/ sgrub par byed pa zhes bya ba ni gang zag rnal 'byor pa ste/ de ni/ nges par byas shing dbang po thul ba dag /ces bya ba dang / mang du thos pa zhes bya bas bstan to/ /sbyangs pa'i yon tan dang ldan pa ni dgon pa pa dang shing drung pa la sogs pa bcu gnyis te/ de ni/ dgon pa zhi ba rnams su rgas gyur dang / /zhes bya ba dang / nags kyi nang dag tu/ lang tsho yol ba rnams zhes bya bas bstan to/ / de bde ba ni gnas pa bde zhes bya bas bstan to/ /de la nges par byas shing zhes bya bas ni sbyangs pa'i yon tan rnam par dag pa bstan te bsam pa nges par blangs shing mngon par brtson pa byas pa'i phyir ro/ /dbang po thul ba dag ces bya bas ni yongs su dag pa bstan te/ dbang po sdom pa dang ldan pa'i phyir ro/ /de ltar nges par byas shing dbang po thul ba dag dgon pa zhi ba rnams su rgas par gyur pa'i gnas bde'o zhes bya bar sbyar te/ dgon pa zhi ba rnams su zhes bya bas ni skye bo med pa nyid kyi gnas phun sum tshogs pa bstan to/ /rgas gyur zhes bya ba ni rab tu dben pa dang sems rtse gcig pa nyid la nges par sbyor ba'i rim gyis so/ /mang du thos pa zhes bya ba ni sde snod gsum gyi bstan bcos dag thos pa ste/ des ni dgon pa zhi ba rnams su rgas par gyur pa de 'bras bu dang bcas par bstan te/ mang du thos pa dgon par gnas pa ni 'bras bu dang bcas par 'gyur gyi gzhan gyi mi 'gyur ba'i phyir ro/ /nags kyi nang dag tu zhes bya ba ni gnas mal shing drung bstan to/ /lang tsho yol ba rnams zhes bya ba ni gzhon pa nyid zad par byas pa rnams so/ /de rnams kyi gnas pa bde zhes bya ba ni gson pa bde ba ste/ tshe 'di dang phyi ma la bde ba dang bdag dang gzhan la bde ba dang / tshangs par spyod pa'i mtha' bde ba'i rgyu yin pa'i phyir ro/ /'dir dgon pa dang nags kyi nang zhes smos pa ni mtshon pa tsam ste/ sbyangs pa'i yon tan bcu gnyis bo thams cad kyang bsdu'o/ /de ltar tshigs su bcad pa des ni sgrub par byed pa gang dag gis mngon par brtson par byas nas dbang po dag thul ba na dgon pa zhi ba grong las thag ring ba'i phyogs dag tu rgas par gyur pa rnams dang / gang dag mang du thos pa na nags kyi nang dag tu lang tsho gzhon pa nyid yol zhing zad par byas pa de rnams kyis gnas pa zhes bya bar gson pa nyid ni bde'o zhes sgrub par byed pa sbyangs pa'i yon tan dang ldan pa bde ba'i sgo nas so sor thar pa yang dag par brtsam par bya'o zhes bstan to/ /yang dag par brtsam pa'i mtshan nyid bshad zin to/ / //so sor thar pa'i mdo rgya cher 'grel pa 'dul ba kun las btus pa bam po gnyis pa/ de'i 'og tu gzhung rgyas pa'i mtshan nyid bshad par bya ste/ gzhung rgyas pa'i mtshan nyid ces bya ba ni so sor thar pa'i gzhung rgyas pa'i mtshan nyid bstan pa'o/ /de yang dus dang por bya ba dang / mdo gdon pa bstan dgos pas de'i phyir/ tshe dang ldan pa dag so ga rnams kyi 'das pa dang lhag ma ji tsam pa de tsam mo zhes bya ba nas dran pa dang bag yod pas rnal 'byor du bya'o zhes bya ba'i bar gyi gzhung thams cad gsungs so/ /de la 'dir yang gzhung rgyas pa de dag gi brjod par bya ba dang / dgos pa dang 'brel pa dang / dgos pa'i dgos pa brjod par bya ste/ de la brjod par bya ba ni gzhung rgyas pa'i mtshan nyid dag go/ /dgos pa ni de dag rtogs pa'o/ /'brel pa ni rtogs pa de yang gzhung rgyas pa 'dis byed pas gzhung rgyas pa'i thabs 'di dang dgos pa thams cad las byung ba'i mtshan nyid gnyis 'brel pa'o/ /dgos pa'i dgos pa ni so sor thar pa'i gzhung rgyas pa'i mtshan nyid yongs su shes pas tshul khrims rnam par dag na 'phags pa'i lam bsgom pas mya ngan las 'das pa 'thob pa'o/ /de la gzhung rgyas pa'i mtshan nyid 'di'i bsdus pa'i don ni rnam pa gnyis te/ dus dang por bya ba dang / mdo gdon pa'o/ /de la dus dang por bya ba ni mdo gdon pa'i snga rol du bya ba ste cho ga'o/ /de'i bsdus pa'i don ni rnam pa drug ste/ so sor thar pa mnyan pa la rna mi gtod pa'i nyes dmigs dang / mi 'du ba dgag pa dang / mchod cing lung dbog pa dang / yang dag par sgrub tu gzhug pa dang / de'i phan yon dang / yang dag par mi sgrub pa'i nyes dmigs bstan pa'o/ / mdo gdon pa ni gsol ba bya ba nas so sor thar pa'i mdo gdon pa rnam pa lnga po dag gdon pa ste las so/ /de'i bsdus pa'i don yang rnam pa drug ste/ gsol ba dang / gleng gzhi gdon pa dang / pham par 'gyur ba gdon pa dang / dge 'dun lhag ma gdon pa dang / ma nges pa gdon pa dang / ril gyis gdon pa'i mtshan nyid bstan to/ /de la tshe dang ldan pa dag so ga rnams kyi 'das pa dang lhag ma ji tsam pa de tsam mo zhes bya ba nas/ bag yod pas 'thob bo zhes bya ba'i bar gyis ni so sor thar pa mnyan pa la rna mi gtod pa'i nyes dmigs bstan to/ /bcom ldan 'das kyis nyan thos kyi dge 'dun ni don nyung ba/ bya ba nyung ba yin pas zhes bya ba nas/ dris nas kyang brjod par bya'o zhes bya ba'i bar gyis ni mi 'du ba dgag pa bstan to/ /shAkya seng ge de la ni/ /zhes bya ba la sogs pa tshigs su bcad pa gcig gis ni mchod cing lung 'bogs pa bstan to/ /thos nas drang srong chen po yis/ /zhes bya ba la sogs pa tshigs su bcad pa gnyis kyis ni yang dag par sgrub tu gzhug pa bstan to/ /che ba gang dag ngag tsam gyis/ /zhes bya ba la sogs pa'i tshigs su bcad pa gcig gis ni de'i phan yon bstan to/ /su la srab 'di med pa dang / /zhes bya ba la sogs pa tshigs su bcad pa gcig gis ni yang dag par mi sgrub pa'i nyes dmigs bstan to/ /dge 'dun btsun pa rnams gsan du gsol zhes bya ba la sogs pa gsol ba 'ba' zhig gi las kyi lam ni gsol ba bstan to/ /tshe dang ldan pa dag bdag cag gso sbyong bya ste zhes bya ba la sogs pa gzhung lhag ma rnams kyis ni gleng gzhi gdon pa la sogs pa rim pa bzhin bstan to/ /de ni re zhig spyi'i don yin no/ /da ni yan lag gi don bshad par bya ste/ so sor thar pa mnyan pa la rna mi gtod pa'i nyes dmigs bstan pa'i dbang du mdzad nas/ tshe dang ldan pa dag sog rnams kyi 'das pa dang lhag ma ji tsam pa de tsam mo zhes bya ba la sogs pa gsungs so/ /tshe dang ldan pa dag zhes bya ba ni rgan pa rnams dang gzhon pa dag la snyan pa'i tshig gis 'bod pa'o/ /sog rnams kyi zhes bya ba ni gso sbyong 'don pa'i dus tshigs mtshon pa ste/ so ga dang / dbyar dang / ston dang / dgun dang / dgun smad dang / dpyid kyi dus tshigs drug po gang gi tshe so sor thar pa'i mdo 'don pa'i dus tshigs de nyid kyi ming smos par bya ba yin no/ /de la dus tshigs drug po re re la yang zla ba gnyis gnyis yod pas mang po'i tshig tu byas te/ so ga'i dus tshigs ni dpyid zla tha chungs nya nas dbyar zla ra ba nya'i bar dang / dbyar zla ra ba nya nas dbyar zla 'bring po nya'i bar gyi zla ba gnyis so/ /dbyar gyi dus tshigs ni dbyar zla 'bring po'i nya nas dbyar zla tha chungs nya'i bar dang / dbyar zla tha chungs nya nas ston zla ra ba nya'i bar gyi zla ba gnyis so/ /ston gyi dus tshigs ni ston zla ra ba nya nas ston zla 'bring po'i nya'i bar dang / ston zla 'bring po nya nas ston zla tha chungs nya'i bar gyi zla ba gnyis so/ /dgun gyi dus tshigs ni ston zla tha chungs nya nas dgun zla ra ba'i nya'i bar dang / dgun zla ra ba nya nas dgun zla 'bring po'i nya'i bar gyi zla ba gnyis so/ /dgun smad kyi dus tshigs ni dgun zla 'bring po nya nas dgun zla tha chungs nya'i bar dang / dgun zla tha chungs nya nas dpyid zla ra ba'i nya'i bar gyi zla ba gnyis so/ /dpyid kyi dus tshigs ni dpyid zla ra ba nya nas dpyid zla 'bring po'i nya'i bar dang / dpyid zla 'bring po nya nas dpyid zla tha chungs nya'i bar gyi zla ba gnyis so/ /de la so ga'i dus tshigs la so sor thar pa 'don na ni so ga rnams kyi zhes brjod par bya'o/ /de bzhin du dbyar dang / ston dang / dgun dang / dpyid kyi dus tshigs la so sor thar pa 'don na yang dbyar rnams kyi zhes bya ba la sogs pa brjod par bya'o/ /'das pa dang lhag ma ji tsam pa de tsam mo zhes bya ba ni zla ba brjod par bya'o zhes bya bar sbyar te/ 'das pa ji tsam pa de tsam brjod par bya ba dang / lhag ma ji tsam pa de tsam brjod par bya'o/ /de la so ga'i dus tshigs la ni gso sbyong 'don pa'i dus bzhi yod de/ dpyid zla tha chungs gnam stong dang / dbyar zla ra ba nya dang / dbyar zla ra ba gnam stong dang / dbyar zla 'bring po nya'o/ /de la dpyid zla tha chungs gnam stong la 'don na ni 'di skad ces tshe dang ldan pa dag so ga rnams kyi zla ba phyed ni 'das so/ /zla ba phyed dang gnyis ni lus so zhes brjod par bya'o/ /dbyar zla ra ba nya la 'don na ni 'di skad ces tshe dang ldan pa dag so ga rnams kyi zla ba gcig ni 'das so/ /zla ba gcig ni lus so zhes brjod par bya'o/ /dbyar zla ra ba gnam stong la 'don na ni 'di skad ces tshe dang ldan pa dag so ga rnams kyi zla ba phyed dang gnyis ni 'das so/ /zla ba phyed ni lus so zhes brjod par bya'o/ /dbyar zla 'bring po nya la 'don na ni 'di skad ces tshe dang ldan pa dag so ga rnams kyi zla ba gnyis 'das te lhag ma ma lus so zhes brjod par bya'o/ /de bzhin du dbyar gyi dus tshigs la yang gso sbyong 'don pa'i dus bzhi yod de/ dbyar zla 'bring po'i gnam stong dang / dbyar zla tha chungs nya dang / dbyar zla tha chungs gnam stong dang / ston zla ra ba nya'o/ /de la dbyar zla 'bring po gnam stong la 'don na ni 'di skad ces tshe dang ldan pa dag dbyar rnams kyi zla ba phyed ni 'das so/ /zla ba phyed dang gnyis ni lus so zhes brjod par bya'o/ /dbyar zla tha chungs nya la 'don na ni 'di skad ces tshe dang ldan pa dag dbyar rnams kyi zla ba gcig ni 'das so/ /zla ba gcig ni lus so zhes brjod par bya'o/ /dbyar zla tha chungs gnam stong la 'don na ni 'di skad ces tshe dang ldan pa dag dbyar rnams kyi zla ba phyed dang gnyis ni 'das so/ /zla ba phyed ni lus so zhes brjod par bya'o/ /ston zla ra ba nya la 'don na ni 'di skad ces tshe dang ldan pa dag dbyar rnams kyi zla ba gnyis 'das te lhag ma ma lus so zhes brjod par bya'o/ /de bzhin du ston gyi dus tshigs la yang gso sbyong gdon pa'i dus bzhi yod de/ ston zla ra ba gnam stong dang / ston zla 'bring po nya dang / ston zla 'bring po gnam stong dang / ston zla chungs nya la'o/ /de la ston zla ra ba gnam stong la 'don na ni 'di skad ces tshe dang ldan pa dag ston rnams kyi zla ba phyed ni 'das so/ /zla ba phyed dang gnyis ni lus so zhes brjod par bya'o/ /ston zla 'bring po nya la 'don na ni 'di skad ces tshe dang ldan pa dag ston rnams kyi zla ba gcig ni 'das so/ /gcig ni lus so zhes brjod par bya'o/ /ston zla 'bring po gnam stong la 'don na ni 'di skad ces tshe dang ldan pa dag ston rnams kyi zla ba phyed dang gnyis ni 'das so/ /zla ba phyed ni lus so zhes brjod par bya'o/ /ston zla tha chungs nya la 'don na ni 'di skad ces tshe dang ldan pa dag ston rnams kyi zla ba gnyis 'das te lhag ma ma lus so zhes brjod par bya'o/ /de bzhin du dgun gyi dus tshigs la yang gso sbyong 'don pa'i dus bzhi yod de/ ston zla chungs gnam stong dang / dgun zla ra ba nya dang / dgun ra ba gnam stong dang / dgun zla 'bring po nya'o/ /de la ston zla tha chungs gnam stong la 'don na ni 'di skad ces tshe dang ldan pa dag dgun rnams kyi zla ba phyed ni 'das so/ /zla ba phyed dang gnyis ni lus so zhes brjod par bya'o/ /dgun zla ra ba nya la 'don na ni 'di skad ces tshe dang ldan pa dag dgun rnams kyi zla ba gcig ni 'das so/ /zla ba gcig ni lus so zhes brjod par bya'o/ /dgun zla ra ba gnam stong la 'don na ni 'di skad ces tshe dang ldan pa dag dgun rnams kyi zla ba phyed dang gnyis ni 'das so/ /zla ba phyed ni lus so zhes brjod par bya'o/ /dgun zla 'bring po nya la 'don na ni 'di skad ces tshe dang ldan pa dag dgun rnams kyi zla ba gnyis 'das te lhag ma ma lus so zhes brjod par bya'o/ /de bzhin du dgun smad gyi dus tshigs la yang gso sbyong 'don pa'i dus bzhi yod de/ dgun zla 'bring po'i gnam stong dang / dgun zla tha chungs nya dang / dgun zla tha chungs gnam stong dang / dpyid zla ra ba nya'o/ /de la dgun zla 'bring po gnam stong la 'don na ni 'di skad ces tshe dang ldan pa dag dgun smad rnams kyi zla ba phyed ni 'das so/ /zla ba phyed dang gnyis ni lus so zhes brjod par bya'o/ /dgun zla tha chungs nya la 'don na ni 'di skad ces tshe dang ldan pa dag dgun smad rnams kyi zla ba gcig ni 'das so/ /zla ba gcig ni lus so zhes brjod par bya'o/ /dgun zla tha chungs gnam stong la 'don na ni 'di skad ces tshe dang ldan pa dag dgun smad rnams kyi zla ba phyed dang gnyis ni 'das so/ /zla ba phyed ni lus so zhes brjod par bya'o/ /dpyid zla ra ba nya la 'don na ni 'di skad ces tshe dang ldan pa dag dgun smad rnams kyi zla ba gnyis ni 'das te lhag ma ma lus so zhes brjod par bya'o/ /de bzhin du dpyid kyi dus tshigs la yang gso sbyong 'don pa'i dus bzhi yod de/ dpyid zla ra ba gnam stong dang / dpyid zla 'bring po nya dang / dpyid zla 'bring po gnam stong dang / dpyid zla tha chungs nya'o/ /de la dpyid zla ra ba gnam stong la 'don na ni 'di skad ces tshe dang ldan pa dag dpyid rnams kyi zla ba phyed ni 'das so/ /zla ba phyed dang gnyis ni lus so zhes brjod par bya'o/ /dpyid zla 'bring po nya la 'don na ni 'di skad ces tshe dang ldan pa dag dpyid rnams kyi zla ba gcig ni 'das so/ /zla ba gcig ni lus so zhes brjod par bya'o/ /dpyid zla 'bring po gnam stong la 'don na ni 'di skad ces tshe dang ldan pa dag dpyid rnams kyi zla ba phyed dang gnyis ni 'das so/ /zla ba phyed ni lus so zhes brjod par bya'o/ /dpyid zla tha chungs nya la 'don na ni 'di skad ces tshe dang ldan pa dag dpyid rnams kyi zla ba gnyis 'das te/ lhag ma ma lus so zhes brjod par bya'o/ /de dag ni gso sbyong bcu bzhi ba'am bco lnga pa'i skabs su zla ba phyed phyed cing so sor thar pa'i mdo 'don pa brjod pa'i sngags yin no/ /bkra shis kyi gso sbyor dang / gnod pa 'byung ba'i don du gso sbyong bya ba la sogs pa nya shi'i dus dang mi sbyor ba'i skabs su ni sngar smos pa'i sngags de dag gi steng du zla ba dang po dang gnyis pa'i yar ram mar gyi ngo'i tshes grangs kyang 'das pa dang lhag ma ji tsam pa de tsam brjod par bya ste/ dper na tshe dang ldan pa dag so ga rnams kyi zla ba dang po'i mar gyi ngo'i tshes gcig ni 'das so/ /zla ba gcig dang zhag nyi shu rtsa dgu ni lus so zhes brjod par bya ba la sogs pa lta bu'o/ /de dag brjod par bya ba ni 'jig rten pa'i tha snyad la mkhas par bya ba dang / tshe'i dus 'das pa sems la gzhag par bya ba dang / 'khor bas skyo bar bya zhing dge ba la brtson par bya ba dang / gso sbyong gi nyi ma yongs su shes par bya ba'i phyir ro/ /de dag brtsi ba ni dge 'dun gyi gnas brtan gyis zla ba ngo re re zhing smyig ma'i thur ma bco lnga skud pa la brgyus pa nyin re re drang bas bgrang zhing / dge skos kyi gnas brtan la brtag ste dge 'dun la nyi ma re re zhing brjod par bya'o/ /zla ba shol dor ba ni rgyal po'i rjes su 'brang bas dor ro/ /rgyu skar ni skar mkhan gyi rjes su 'brang bas shes par bya'o/ /tshe dang ldan pa dag rga ba dang 'chi ba mngon par 'ong zhing ston pa'i bstan pa yang 'jig par 'gyur bas tshe dang ldan pa dag gis bag yod pas rnal 'byor du bya'o zhes bya ba 'dis kyang 'khor bas skyo bar bya zhing dge ba la brtson par bya ba ston te/ de la 'dir 'khor bas skyo bar bya zhing dge ba la brtson par bya ba'i rgyur ci'i phyir rga ba dang 'chi ba mngon par 'ong ba dang ston pa'i bstan pa 'jig par 'gyur ba smos she na/ tshangs par spyod pa'i rgyu'i gtso bo yongs su nyams par bstan pa'i phyir te/ 'di ltar tshangs par spyod pa ni rnam pa gnyis kyis 'grub ste/ lus dang / gnas kyis so/ /de la lus kyi ni lus sbyor bzod pa dang / rgyun ma chad pas tshangs par spyod pa 'grub ste/ de yongs su nyams par bstan pa'i phyir rga ba dang 'chi ba mngon par 'ong zhing zhes bya ba gsungs te/ lus sbyor mi bzod pa dang / rgyun chad pas tshangs par mi spyod pa yongs su nyams par 'gyur ba go rims bzhin no/ /srid pa'i yan lag gzhan dag dang / mya ngan la sogs pa nyes dmigs dag ci'i phyir ma smos par rga shi nyi tshe smos she na/ lang tsho dang gson pas tshangs par spyod pa 'grub cing rga ba dang 'chi bas yongs su nyams par 'gyur ba'i phyir rgyu'i gtso bo smos pas gzhan yang zhar la rig par bya'o/ /gnas kyis ji ltar zhe na/ gnas zhes bya ba ni tshangs par spyod pa skye ba'i gnas su gyur pa sangs rgyas kyi bstan pa ste/ de yongs su nyams par gyur pa bstan pa'i phyir/ ston pa'i bstan pa yang 'jig par 'gyur bas zhes bya ba gsungs te/ ston pa'i bstan pa zhig na tshangs par spyod pa skye ba'i gnas med pa'i phyir ro/ /ston pa zhes bya ba ni sangs rgyas bcom ldan 'das te/ phyin ci ma log par ston pa'i phyir ro/ /de'i bstan pa zhes bya ba ni gsung rab tu gtogs pa yan lag bcu gnyis te/ des slob ma ston par byed pa'i phyir ro/ /de 'jig pa zhes bya ba ni sgrub pa yongs su nyams pas so/ /gang gi phyir de ltar yin pa de'i phyir tshe dang ldan pa dag gis bag yod pas rnal 'byor du bya'o zhes bya ba gsungs te/ bag yod pas zhes smos pa ni rgyu'i dngos pos dge ba'i chos thams cad sdud par byed pa yin pa'i phyir ro/ /rnal 'byor du bya'o zhes bya ba ni bdag nyid kyis brtson par bya'o zhes bya ba'i tha tshig go/ /de nyid bstan pa'i phyir de bzhin gshegs pa dgra bcom pa yang dag par rdzogs pa'i sangs rgyas rnams kyi byang chub dang gzhan yang gang dag de lta bu dang mthun pa dge ba'i chos byang chub kyi phyogs dang mthun pa rnams kyang bag yod pas 'thob bo zhes bya ba gsungs te/ de bzhin gshegs pa zhes bya ba ni don ji lta ba bzhin du gnas pa thugs su chud pa'o/ /dgra bcom pa zhes bya ba ni nyon mongs pa'i dgra rnams bcom pa'am/ mchod par 'os pa'o/ /nyan thos dang rang sangs rgyas dag la'ang de yod pas de las khyad par du bstan pa'i phyir yang dag par rdzogs pa'i sangs rgyas zhes bya ba gsungs te/ ye shes phyin ci ma log par yang dag par shes bya ma lus par rdzogs par thugs su chud cing sangs rgyas pa gang la yod pa'o/ /de rnams kyi byang chub ces bya ba ni thugs su chud pa'o/ /gzhan yang zhes bya ba ni rnam pa gzhan du brtag pa'o/ /gang dag ces bya ba ni dge ba'i chos zhes bya ba dang sbyar ro/ /de lta bu dang mthun pa zhes bya ba ni byang chub dang mthun pa'o/ /dge ba'i chos byang chub kyi phyogs dang mthun pa rnams kyang zhes bya ba ni zad pa dang mi skye ba shes pa'i mtshan nyid kyi byang chub skyed par byed pa'i chos dran pa nye bar gzhag pa la sogs pa dag ste/ de dag kyang bag yod pas 'thob po zhes bya ba'i tha tshig go/ /de ltar skabs de dag gis ni so sor thar pa mnyan pa la rna mi gtod na tshe'i dus 'das pa dang rga shi mngon par 'ong ba dang / ston pa'i bstan pa 'jig par 'gyur ba'i nyes dmigs yod pas so sor thar pa mnyan pa la rna gtod cing bag yod pas dge ba'i chos la brtson par bya'o zhes bya ba'i sgo nas so sor thar pa mnyan pa la rna mi gtod pa'i nyes dmigs bstan to/ mi 'du ba dgag pa'i dbang du mdzad nas bcom ldan 'das kyi nyan thos kyi dge 'dun ni don nyung ba bya ba nyung ba yin pas dge 'dun gyis thog mar bya ba ci yod ces bya ba la sogs pa gsungs te/ bcom ldan 'das zhes bya ba ni bdud bzhi bcom pa dang / legs pa drug dang ldan pa'o/ /nyan thos zhes bya ba ni 'bras bu ji ltar thob pa sgrogs par byed pa'o/ /dge 'dun zhes bya ba ni de dag gi tshogs te mi phyed pa nyid kyi phyir ro/ /don nyung ba zhes bya ba ni yid kyis so/ /bya ba nyung ba zhes bya ba ni lus dang ngag gnyis kyis so/ /dge 'dun gyis thog mar bya ba ci yod ces bya ba ni dgag pa ste/ gang gi phyir bcom ldan 'das kyi nyan thos kyi dge 'dun don nyung ba bya ba nyung ba yin pas de'i phyir dge 'dun la gso sbyong 'di dus su 'du zhing 'dun pa dang yongs su dag par brjod par bya ba las gzhan pa'i thog mar bya ba ci yod de/ ci yang med kyis thams cad 'dus shig ces bya ba med par dgag pa'i sgo nas mi 'du ba dgag pa bstan to/ /yang na dge 'dun gyi thog mar bya ba ci yod ces bya ba ni dri ba ste/ gang gi phyir bcom ldan 'das kyi nyan thos kyi dge 'dun don nyung ba bya ba nyung ba yin pa de'i phyir dge 'dun la gso sbyong gi dus su 'du ba'i tshe gang byas na mi mthun pa nyid kyis 'du bar mi 'gyur ba'i thog mar bya ba ci yod ces dri ba'o/ /de'i lan gdab pa'i tshig tu tshe dang ldan pa dag ma lhags pa rnams la 'dun pa dang yongs su dag pa dris shig / dris nas kyang brjod par bya'o zhes bya ba gsungs te/ ma lhags pa rnams la zhes bya ba ni mthun pa'i gso sbyong rnam pa lnga po/ bcu bzhi pa dang / bco lnga pa dang / bkra shis kyi gso sbyong dang / gnod pa byung ba'i gso sbyong dang / sdum pa'i gso sbyong dag las gang byed kyang rung ste/ de'i dus su mtshams kyi nang na dge slong dge 'dun gyi kha bskang bar 'os pa ji snyed 'khod pa thams cad gso sbyong gi gnas su 'du bar bya ba yin pa las de dag gi nang nas mi 'du bar gnang ba na ba dang / dbang med pa dang / srog gi bar chad dang / tshangs par spyod pa'i bar chad kyis 'jigs pa gang dag gso sbyong gi gnas su ma lhags pa rnams so/ /mi 'du bar gnang ba de dag las ma gtogs pa gzhan ni mtshams kyi nang na 'dug na gso sbyong gi gnas su mi 'du mi rung ste/ mi 'du na thams cad du rang la nyes byas dang / dge 'dun gyi las mi 'chags par 'gyur ro/ /'dun pa dang yongs su dag pa dris shig ces bya ba la/ 'dun pa dri ba ni las mi mthun pa dag mi bya ba'i phyir te/ mi mthun pa ni rnam pa gnyis te/ 'dus par rjes su ma zhugs pa nyid dang / phyir zlog par byed pa'o/ /de la 'dus par rjes su ma zhugs pa ni dge slong las de'i mtshams kyi khongs su gtogs pa tshogs kyi kha skong bar 'os pa lus sam 'dun pas dge 'dun 'dus pa'i nang du rjes su ma zhugs pa nyid kyis mi mthun pa nyid yin pa'o/ /phyir zlog par byed pa ni dge slong las de'i mtshams kyi khongs su gtogs pa rang bzhin du gnas pa/ spyod lam las ma nyams pa/ ngag yang dag par bsdams pa/ 'dul ba'i bya ba mngon par shes pa zhe 'gras pa med pas las gzhan la byed pa chos dang mi ldan pa phyir zlog par byed na mi mthun pa nyid yin pa'o/ /de bas na mi mthun pas de gnyis bsal ba'i phyir ni ma lhags pa rnams la 'dun pa dri bar bya'o/ /yongs su dag pa dri ba ni ma lhags pa gang dag gis 'dun pa phul ba de dag snod du 'gyur bar bya ba'i phyir ro/ / de la cho ga ni dge skos kyis gso sbyong gi tshe tshul shing brims pas dge slong rnams bgrangs shing ma lhags pa dngos su yod dam glo bur du 'ongs pa la sogs pa yod par 'khrigs na gso sbyong de nyid la dge 'dun thams cad las kyi gnas su tshogs pas dge slong 'dun pa dang yongs su dag pa len pa dge slong chos lnga dang ldan pa gcig gam gnyis sam gsum tshig gis bsko bar bya zhing des btsal ba dang / bod pa dang / mthon por 'dug ste phyogs su blta ba la sogs pa dag gis bsam pa thag pa nas mtshams kyi nang btsal te ma lhags pa rnams la deng dge 'dun gso sbyong mdzad na tshe dang ldan pa dag 'dun pa 'bul lam bar chad kyi chos rnams yongs su dag gam zhes yongs su dri bar bya'o/ /ma lhags pa rnams kyis de la 'dun pa dang yongs su dag pa dbul bar bya'o/ /dge slong 'dun pa dang yongs su dag pa 'bul bar byed pa'i kun du spyod pa'i chos ni 'di ltar bya ste/ dge slong 'dun pa dang yongs su dag pa 'bul bar byed pas mchil lham gnyis phud nas bla gos phrag pa gcig tu byas te rgan pa la phyag 'tshal nas tsog tsog por 'dug ste thal mo sbyar nas 'di skad ces brjod par bya ste/ tshe dang ldan pa dgongs su gsol/ deng dge 'dun gyi gso sbyong bco lnga pa lags la/ bdag dge slong bro 'tshal ba sdug bsngal ba bro tshabs che ba ming 'di zhes bgyi ba'i gso sbyong yang bco lnga pa lags te/ bdag dge slong bro 'tshal ba sdug bsngal ba bro tshabs che ba ming 'di zhes bgyi ba bar chad kyi chos rnams yongs su dag go zhes bdag mchi'o/ /dge 'dun chos bzhin du mdzad pa la 'dun pa 'bul lo/ /bdag gi gso sbyong yang yongs su dag go/ /'dun pa dang yongs su dag pa yang brjod do/ /brjod pa yang rig par bgyid do zhes lan gsum bzlas shing / de'i rjes la len pa pos thabs yin no zhes brjod par bya'o/ /'bul bas ni legs so zhes brjod par bya'o/ /'dun pa dang yongs su dag pa snga phyir blang zhing snga phyir dbul du yang rung ste/ sngags kyi bye brag ni 'dun pa dang yongs su dag pa gang 'bul ba de nyi tshe'i ming smos te lan gsum bzlas par bya'o/ /dge slong 'dun pa dang yongs su dag pa 'bul bar byed pas gal te de skad brjod mi nus na lus sam/ ngag gam lus dang ngag gi rnam par rig byed kyis 'dun pa dang yongs su dag pa 'bul bar byed na 'dun pa dang yongs su dag pa phul ba brjod par bya'o/ /lus sam/ ngag gam/ lus dang ngag gi rnam par rig byed kyis 'dun pa dang yongs su dag pa 'bul bar byed mi nus na dge 'dun thams cad der dong zhing gso sbyong bya ba'am/ yang na dge slong de dge 'dun gyi nang du blangs te gso sbyong bya'o/ /dge slong 'dun pa dang yongs su dag pa len pa'i kun du spyod pa'i chos ni 'di lta ste/ dge slong 'dun pa dang yongs su dag pa len pas 'dun pa dang yongs su dag pa blangs nas brgyug par mi bya/ mgyogs par mi bya/ mchong bar mi bya/ phyi rol la mchong bar mi bya/ 'obs la mchong bar mi bya/ bang rim la mchong bar mi bya/ steng gi nam mkha' la 'dug par mi bya/ mtshams kyi phyi rol du 'gro bar mi bya/ gom pa gcig gis skas kyi rim pa gnyis la thod rgal du 'dzeg par mi bya/ gom pa gcig gis them skas kyi them pa gnyis la thod rgal du 'dzeg par mi bya/ chu lkog ma nub pa tsam la 'bog par mi bya/ gnyid log par mi bya/ snyoms par 'jug par mi bya bar dge 'dun gyi nang du 'jug par bya'o/ /dris nas kyang brjod par bya'o zhes bya ba ni de ltar 'dun pa dang yongs su dag pa len pa des de blangs te/ gso sbyong gi gnas su phyin nas dge slong ngam/ dge 'dun la brjod par bya'o/ /de brjod pa'i cho ga dang sngags ni/ so sor thar pa'i mdo 'don pa seng ge'i khri la 'dug pa'i mdun rol du dge 'dun thams cad gso sbyong gi gnas su stan la 'dug pa na gang gi tshe dge 'dun gyi gnas brtan gyis tshe dang ldan pa dag ma lhags pa rnams kyi 'dun pa dang yongs su dag pa brjod cing / brjod pa yang rig par gyis shig ces smras pa'i tshe des dge slong ngam/ yang na dge 'dun la de'i 'dun pa dang yongs su dag pa cig car dbul bar bya'o/ /dge slong la dbul na ni des dge slong drung na 'dug pa'i mdun du 'dug ste 'di skad ces brjod par bya'o/ /tshe dang ldan pa dgongs su gsol/ deng dge 'dun gyi gso sbyong bco lnga pa lags la/ gnas ga ge mo zhig na dge slong bro 'tshal ba sdug bsngal ba bro tshabs che ba ming 'di zhes bgyi ba'i gso sbyong yang bco lnga pa lags te/ gnas ga ge mo zhig na dge slong bro 'tshal ba sdug bsngal ba bro tshabs che ba ming 'di zhes bgyi ba de bar chad kyi chos rnams yongs su dag go zhes kho na nyid mchi'o/ /dge 'dun chos bzhin du mdzad pa la 'dun pa 'bul lo de'i gso sbyong yang yongs su dag go/ /'dun pa dang yongs su dag pa yang brjod do/ /brjod pa yang rig par bgyid do zhes lan gsum du brjod par bya'o/ /dge 'dun la 'bul na ni des dge 'dun gyi dbus su rgan pa'i mthar 'greng ste 'dud pa dang bcas pas 'di skad ces brjod par bya'o/ /dge 'dun btsun pa rnams dgongs su gsol/ deng dge 'dun gyi gso sbyong bco lnga pa lags la/ gnas ga ge mo zhig na dge slong bro 'tshal ba sdug bsngal ba bro tshabs che ba ming 'di zhes bgyi ba'i gso sbyong yang bco lnga pa lags te/ gnas ga ge mo zhig na dge slong bro 'tshal ba sdug bsngal ba bro tshabs che ba ming 'di zhes bgyi ba bde bar bar chad kyi chos rnams yongs su dag go zhes kho na nyid mchi'o/ /dge 'dun chos bzhin du mdzad pa la 'dun pa 'bul lo/ /de'i gso sbyong yang yongs su dag go/ /'dun pa dang yongs su dag pa yang brjod do/ /brjod pa yang rig par bgyid do zhes lan cig brjod par bya'o/ /dge 'dun gyis kyang de dang du blang bar bya ste/ des na 'dun pa phul bas ni dge 'dun gyi las mi mthun par mi 'gyur la/ yongs su dag pa phul bas ni gang zag ma lhags pa bdag nyid snod du 'gyur ro/ /len pa de dge 'dun gyi nang du ma phyin par shi'am/ khyim par babs pa la sogs par gyur na ma blangs pa nyid yin pas yang blang bar bya'o/ /phyin na ma brjod kyang blangs pa nyid yin pas yang blang mi dgos so/ / mi 'du ba dgag pa bshad zin to// //mchod cing lung dbog pa'i dbang du mdzad nas/ shAkya seng ge de la ni/ /sen mo bcu yi thal sbyar te/ /so sor thar pa gdon par byas/ /gdul ba'i don du nga las nyon/ /zhes bya ba gsungs te/ shAkya zhes bya ba ni gdung brgyud de des ni khyim pa'i phyogs kyi rigs rnam par dag pa bstan to/ /seng ge zhes bya ba ni yon tan te/ des ni rab tu byung ba'i phyogs kyi mkhyen pa rnam par dag pa bstan te/ mi bsnyengs pa dag gis mu stegs can gyi ri dgas skrag par mdzad pa'i phyir ro/ /sen mo bcu zhes bya ba ni sor mo bcu mtshon par byed do/ /thal sbyar te zhes bya ba ni lag mthil gnyis kyi sor mo bcu thal mo sbyar te'o/ /de dag gis ni mchod pa bstan to/ /thal mo sbyar te ci zhig bya zhe na/ so sor thar pa gdon par byas zhes bya ba gsungs te/ so sor thar pa'i mdo gdon pa rnam pa lnga po/ gleng gzhi gdon pa dang / pham par gyur pa gdon pa dang / dge 'dun lhag ma gdon pa dang / ma nges pa gdon pa dang / ril gyis gdon pa dag gdon par bya'o zhes bya ba'i tha tshig go/ /gdul ba'i don du nga las nyon/ /zhes bya ba ni slob ma rnams gdul ba'i don du ste yang dag par sdud par byed pa'am so sor thar pa 'don pa nga las nyon cig ces bya bar sbyar ro/ /de dag gis ni lung 'bogs pa bstan to/ /mchod cing lung 'bogs pa bshad zin to// //yang dag par bsgrub tu gzhug pa'i dbang du mdzad nas/ thos nas drang srong chen po yis/ /ji skad gsungs bzhin bsgrub bya zhing / /kha na ma tho phra rnams la/ /brtun zhing byed pa nyid du gyis/ /zhes bya ba la sogs pa tshigs su bcad pa gnyis gsungs te/ thos nas zhes bya ba ni so sor thar pa'i mdo gdon pa rnam pa lnga po dag gi lung phog pa thos nas so/ /drang srong chen po zhes bya ba ni ston pa bcom ldan 'das te/ tshul khrims kyi ngang tshul can yin pa'i phyir ro/ /ji skad gsungs pa bzhin zhes bya ba ni 'dul ba dang mi 'gal ba dang / 'jig rten dang mi 'gal bar bya'o zhes gsungs pa bzhin du'o/ /bsgrub bya zhing zhes bya ba ni sbyor ba dang / dngos gzhi dang / mjug gi sgo nas nan tan du bya ba'o/ /kha na ma tho zhes bya ba ni sdig pa ste/ dam pa rnams kyis smad pa'i phyir ro/ /phra rnams la zhes bya ba ni bcas pa'i kha na ma tho ba dang bcas pa cha phra mo rnams la'o/ /brtun zhing byed pa nyid du gyis/ /zhes bya ba ni bsrung ba la sogs pa dag la 'bad pa lhur blang bar gyis shig ces bya ba'i tha tshig ste/ phra mo rnams la yang brtun zhing byed pa nyid du bya na rang bzhin gyis kha na ma tho ba dang bcas pa chen po rnams la lta smos kyang ci dgos zhes gsungs par shes par bya'o/ /rtag tu 'bad pas bda' ba yi/ /sems rta kha blan dka' ba na/ /mthun pa'i gzer rnon brgya pa yi/ /srab ni so sor thar 'di yin/ /zhes bya ba la/ rtag tu 'bad pas bda' ba zhes bya ba ni sems rta dmu rgod dang 'dra ba 'di ni lam bde ba dang 'dra ba'i dge ba'i phyogs la gzhug pa'i dus na rtag tu brungs bzhin du 'then zhing brtson 'grus kyi lcag gis bda' zhing bskyod dgos pa'o/ /sems rta zhes bya ba ni sems nyid rta dmu rgod dang 'dra ba'o/ /kha blan dka' ba zhes bya ba ni lam gol ba dang 'dra ba'i mi dge ba'i phyogs la 'jug pa'i dus na rlung bzhin du 'phyo zhing chu lon gyis 'gug srab kyi phyir kha blan dka' zhing dgug dka' ba'o/ /mthun pa zhes bya ba ni 'tsham zhing rkyen du 'bab pa ste/ rta dmu rgod rtag t u lcag gi 'bad pas bda' zhing 'gug srab kyi kha lcags kyis blan dka' ba ni gzer bu rnon pa brgya pa'i srab kyis bsrab pa 'tsham zhing rkyen du bab pa la sems dmu rgod rtag tu brtson 'grus kyi 'bad pas bda' zhing tshul khrims kyi chu lon gyis kha bla na dka' ba la ni bslab pa'i gzhi gzer bu gdung ba rnon po brgya ba'i so sor thar pa bcas pa 'di'i 'tsham zhing rkyen du 'bab pa'o/ /gzer rnon brgya pa zhes bya ba ni 'gug srab kyi kha lcags gzer bu rnon po mang po dang ldan pa dang 'dra bar so sor thar pa 'di yang bslab pa'i gzhi gdung bar byed pa mang po dang ldan pa ste/ brgya pa zhes bya ba ni mang po mtshon pa'i tshig yin gyi grangs brgyar nges pa ni ma yin no/ /srab ni so sor thar 'di yin/ /zhes bya ba ni srab dang 'dra ba yin no zhes bya ba'i tha tshig go/ /de dag gis ni de ltar drang srong chen pos ji skad gsungs pa bzhin du bsgrub pa dang / kha na ma tho ba phra mo rnams la yang brtun zhing 'bad par bya ba dang / sems kyi rta dmu rgod la so sor thar pa'i 'gug srab kyis bsrab dgos pa'i sgo nas so sor thar pa yang dag par sgrub tu gzhug pa bstan to/ /yang dag par sgrub tu gzhug pa bshad zin to// //de'i phan yon bstan pa'i dbang du mdzad nas/ che ba gang dag ngag tsam gyis/ /ldog cing mtshams las mi 'da' ba/ /de dag mi rta bzang po ste/ /nyon mongs g.yul las nges rgyal 'gyur/ /zhes bya ba gsungs te/ che ba zhes bya ba ni che ba'i bdag nyid can te bslab pa 'dod pa'i phyir ro/ /ngag tsam gyis zhes bya ba ni chad pa la sogs pa rnam par bsal bas so/ /ldog cing zhes bya ba ni bya ba ma yin pa las so/ /mtshams las zhes bya ba ni bslab pa las so/ /mi 'da' ba zhes bya ba ni mi 'dral ba'o/ /de dag mi rta bzang po ste/ /zhes bya ba ni mi de dag ni rta cang shes dang 'dra ba'o/ /nyon mongs g.yul las zhes bya ba ni nyon mongs pa'i ngo bo nyid ni bdag dang gzhan la gnod pa nyid kyi g.yul dang 'dra ste de la'o/ /des rgyal 'gyur zhes bya bas ni nyon mongs pa mthar byed cing mya ngan las 'das pa'i 'bras bu thob par 'gyur ba'o/ /de dag gis ni de ltar so sor thar pa yang dag par bsgrubs na nyon mongs pa'i g.yul las nges par rgyal bar 'gyur ba'i sgo nas yang dag par bsgrubs pa de'i phan yon bstan to/ /de'i phan yon bshad zin to// //yang dag par mi sgrub pa'i nyes dmigs bstan pa'i dbang du mdzad nas/ su la srab 'di med pa dang / /nam du'ang 'dod par mi 'gyur ba/ /de dag nyon mongs g.yul gyis dkrugs/ /'jog bral rnam par 'khyam par 'gyur/ /zhes bya ba gsungs te/ su la srab 'di med pa zhes bya ba ni mu stegs can dag la med pa ste/ yang dag par ma blangs pa'i phyir ro/ /nam du'ang 'dod par mi 'gyur ba/ /zhes bya ba ni 'dod pa la longs spyod pa dag la ni 'ga' yang 'dod par mi 'gyur te/ tshul khrims la mngon par mi phyogs pa'i phyir ro/ /dkrugs zhes bya ba ni pham par byas pa'o/ /'jog bral zhes bya ba ni lhag pa'i tshul khrims kyi dul bas lhag pa'i sems kyi zhi ba la 'jog par byed pas 'jog pa ni dul ba nyid de de dang bral ba'o/ /rnam par 'khyams par 'gyur zhes bya ba ni lan mi nyung bar ngan song la sogs pa'i 'khor bar 'khor bar 'gyur ba'o/ /de dag gi bslab pa med pa dang / mi 'dod pa yang dag par mi sgrub pa dag dul ba nyid dang bral bas zhi ba mi 'thob cing 'khor bar 'gyur ba'i sgo nas yang dag par sgrub pa'i nyes dmigs bstan to/ /yang dag par mi sgrub pa'i nyes dmigs bshad zin te/ de dag ni dus dang por bya ba ste cho ga'o/ /da ni mdo 'don pa'i las bshad par bya ste/ de la gsol ba'i dbang du mdzad nas/ dge 'dun btsun pa rnams gsan du gsol/ deng dge 'dun gyi gso sbyong bcu bzhi pa'am bco lnga pa ste/ gal te dge 'dun gyi dus la bab cing bzod na dge 'dun gyis gnang bar mdzod cig dang / deng dge 'dun gso sbyong mdzad de/ so sor thar pa'i mdo gdon pa gdon to/ /'di ni gsol ba'o zhes bya ba gsungs te/ 'di ni mdo gdon pa'i gsol ba bstan te/ gsol ba ma brjod na ma bskos par byed pa nyid yin pas mi mthun pa nyid du 'gyur ba'i phyir 'dir so sor thar pa'i mdo gdon pa lnga po dag gdon pa'i mdun rol du gsol ba 'ba' zhig gi las bya'o/ /gdon par byed pas so sor thar pa'i mdo gdon pa'i gsol ba ni 'di ltar bya ste/ mdo gdon pa seng ge'i khri la 'dug nas so sor thar pa'i mdo bstod ra dang / dus dang por bya ba'i tshig dag je bton nas/ de'i 'og tu gsol ba 'ba' zhig gi las 'di bya'o/ /dge 'dun btsun pa rnams zhes bya ba ni mchod pa'i tshig gis bod pa ste/ btsun pa rnams kyi tshogs zhes bya ba'i tha tshig go/ /gsan du gsol zhes bya ba ni gzhan la sems pa dag nyan pa la rna gtod cing gus par gyis shig ces bya ba'i don to/ /deng dge 'dun gyi gso sbyong bcu bzhi pa'am bco lnga pa ste zhes bya ba la/ gso sbyong zhes bya ba ni bslab pa gsum po dag gso zhing sbyong bar byed pa gnas ste/ de yang rnam pa gnyis te/ mthun pa'i gso sbyong dang / zhi gnas kyi gso sbyong ngo / /de la mthun pa'i gso sbyong ni lhag pa'i tshul khrims kyi dbang du byas te/ gnas dang tshogs pa dang cho gas mthun par bya'o/ /zhi gnas kyi gso sbyong ni lhag pa'i sems dang lhag pa'i shes rab kyi dbang du byas te spong ba'i yan lag bsgom pa'o/ /de yang las phyi ma rnams ni mi bya ba'i chu lon gyis bsdams pa yin pas de ni mthun pa'i gso sbyong gis sdom par byed do/ /las snga ma rnams ni bsgom pa'i rnam pas sbyangs pa yin pas de ni zhi gnas kyi gso sbyong gis gso bar byed de des na lhag pa'i tshul khrims la brten te lhag pa'i sems skye la/ lhag pa'i sems la brten te lhag pa'i shes rab skye bas bslab pa gsum po dag gso zhing sbyong ba ni mthun pa'i gso sbyong dang zhi gnas kyi gso sbyong yin par shes par bya'o/ /skabs 'dir ni mthun pa'i gso sbyong gzung bar bya ste/ mthun pa'i gso sbyong ni rnam pa lnga ste/ bcu bzhi pa dang / bco lnga pa dang / bkra shis kyi gso sbyong dang / gnod pa byung ba'i gso sbyong dang / sdum pa'i gso sbyong ngo / /de dag thams cad la yang gsol ba dang / gleng gzhi rnam par gzhag pa sngar byas te so sor thar pa'i mdo gdon pa gdon dgos so/ /mthun pa'i gso sbyong rnam pa lnga po de dag las 'dir ni bcu bzhi pa dang bco lnga pa'i skabs yin par bstan pa'i phyir/ bcu bzhi pa'am bco lnga pa ste zhes bya ba gsungs so/ /de la dus tshigs drug la zla ba gnyis gnyis yong ba dag gi nyi shu gnyis gnyis la gso sbyong nyi shu bzhi yod pa de dag tshes grangs kyi yang dag pa la ltos na ni thams cad gso sbyong bco lnga pa yin no/ /'jig rten pa'i tha snyad kyi dus la ltos na ni gso sbyong bcu bzhi pa yin te/ dus tshigs drug po de dag gi zla ba phyed phyed las pa'i gso sbyong drug po de dag go/ /'di skad ces bstan to/ /dbyar zla gsum dang dgun zla gsum gyi ni ra ba dang tha chungs mar gyi ngos bco lnga mi thub pas ra ba dang tha chungs kyi gnam stong bzhi gso sbyong bcu bzhi pa yin no/ /ston zla gsum dang dpyid zla gsum gyi ni 'bring bo mar gyi ngos bco lnga mi thub pas 'bring bo'i gnam stong gnyis gso sbyong bcu bzhi pa yin no/ /lhag ma bco brgyad ni gso sbyong bco lnga pa yin no/ /bkra shis kyi gso sbyong dang / gnod pa byung ba'i gso sbyong dang / sdum pa'i gso sbyong dag byed na ni de'i tshe deng dge 'dun gyi bkra shis kyi gso sbyong ste zhe'am/ deng dge 'dun gyi gdon pa byung ba'i gso sbyong ste zhe'am/ deng dge 'dun gyi sdum pa'i gso sbyong ste zhes dmigs kyis smos par bya ste/ de dag ni gang gi tshe bya dgos pa de'i tshe bya bar zad kyi dus nges pa ni med do/ /bcu bzhi pa dang bco lnga pa ni dus nges pa yin pas de las snga phyir byar mi rung ngo / /gal te dge 'dun gyi dus la bab cing bzod na zhes bya ba la/ dus la bab cing zhes bya ba ni las bya ba'i dus la bab pa ste/ 'dir ni gso sbyong gi dus dang sbyar ro/ /bzod na zhes bya ba ni las de gzhag par mi 'os shing bya bar bzod pa ste/ 'di yang gso sbyong gi las dang sbyar ro/ /dge 'dun gyis gnang bar mdzod cig ces bya ba ni cang ma smra bas so/ /deng dge 'dun gso sbyong mdzad de zhes bya ba ni las de gzhag par mi 'os pa yin na bya'o zhes bya ba'i tha tshig go/ /so sor thar pa'i mdo gdon to zhes bya ba ni so sor thar pa'i mdo gdon pa rnam pa lnga po gleng gzhi gdon pa dang / pham par 'gyur ba gdon pa dang / dge 'dun lhag ma gdon pa dang / ma nges pa gdon pa dang / ril gyis gdon pa dag go/ /'di ni gsol ba'o zhes bya ba ni go bar bya ba ste/ las brgya rtsa gcig ni las gsum gyis bsdus te/ gso ba'i las dang / gsol ba dang / gnyis kyi las dang / gsol ba dang bzhi'i las kyis so/ /de la gsol ba'i las ni nyi shu rtsa bzhi'o/ /gsol ba dang gnyis kyi las ni bzhi bcu rtsa bdun no/ /gsol ba dang bzhi'i las ni sum cu'o zhes gsungs pa la/ 'di ni gsol ba'i las nyi shu rtsa bzhi po de dag gi nang nas gcig yin no/ /gsol ba bshad zin to// //da ni gleng gzhi gdon pa bshad par bya ste/ de la gleng gzhi rnam par gzhag pa'i dbang du mdzad nas/ tshe dang ldan pa dag bdag cag gso sbyong bya ste zhes bya ba la sogs pa gsungs so/ /gleng gzhi rnam par gzhag pa zhes bya ba ni de ltar so sor thar pa'i mdo gdon pa gdon pa'i gsol ba byas nas so sor thar pa'i mdo gdon pa rnam pa 'di la 'khor yongs su dag cing snod du rung bar bya ba'i phyir ltung ba yod na mthol du gzhug pa dang / med na cang mi smra bar bya ba dang / cang mi smra na yongs su dag par rig par bya ba'i cho gas gleng gzhi rnam par gzhag pa'o/ /gleng gzhi rnam par gzhag pa 'di'i bsdus pa'i don ni rnam pa drug ste/ gleng gzhi rnam par gzhag pa'i lung dbog pa dang / gleng gzhi rnam par gzhag pa'i thabs bstan pa dang / ma dag pa'i nyes dmigs dang / dag pa'i phan yon dang / gdon pa'i mjug bsdu ba dang / gleng gzhi rnam par gzhag pa bsgrag par bya ba'o/ /de la tshe dang ldan pa dag bdag cag gso sbyong bya ste/ so so thar pa'i mdo gdon pa gdon gyi khyed cag su la ltung ba yod pa des mthol cig / ltung ba med na cang mi smra zhig /cang mi smra na bdag gis tshe dang ldan pa dag yongs su dag par rig par bya'o zhes bya bas ni gleng gzhi rnam par gzhag pa'i lung dbog pa bstan to/ /ji ltar so sor dris nas dge slong gis lan btab pa de bzhin du dge slong gi 'khor 'di lta bur yang lan gsum gyi bar du bsgrag par bya ba yin no zhes bya bas ni gleng gzhi rnam par gzhag pa'i thabs bstan to/ /yang dge slong gang dge slong gi 'khor 'di lta bur lan gsum gyi bar du bsgrags pa na ltung ba yod la dran bzhin du mi mthol na de shes bzhin du brdzun du smra ba yin no/ /tshe dang ldan pa dag shes bzhin du brdzun du smra ba ni bcom ldan 'das kyis bar du gcod pa'i chos su gsungs so zhes bya bas ni ma dag pa'i nyes dmigs bstan to/ /de bas na dge slong ltung ba byung ba rnam par dag par 'dod pas ltung ba yod la dran zhing mthong ba mthol bar bya'o/ /mthol nas bde ba la reg par gnas par 'gyur ro/ /ma mthol ma bshags na ni mi 'gyur ro zhes bya ba ni dag pa'i phan yon bstan to/ /tshe dang ldan pa dag bdag gis so sor thar pa'i mdo gdon pa'i gleng gzhi bton zin to zhes bya bas ni gdon pa'i mjug bsdu ba bstan to/ /de la bdag gis tshe dang ldan pa dag la ci 'di la khyed yongs su dag gam zhes lan gnyis lan gsum du dri'o/ /'di la tshe dang ldan pa dag yongs su dag na 'di ltar cang mi smra bas de de bzhin du 'dzin to zhes bya bas ni gleng gzhi rnam par gzhag pa ni bsgrag par bya ba bstan to/ /de la re zhig gleng gzhi rnam par gzhag pa'i lung dbog pa'i yan lag gi don bshad par bya ste/ tshe dang ldan pa dag bdag cag gso sbyong bya ste zhes bya ba ni gnas dang / tshogs pa dang / cho gas mthun pa'i gso sbyong bya ste zhes bya bar sbyar ro/ /rnam pa gang gis gso sbyong bya zhe na/ de'i phyir so sor thar pa'i mdo gdon pa gdon gyi zhes bya bar gsungs te/ sems drang por bsgrub pa dang / 'gal ba bzlog pa la sogs pa'i rnam pa gzhan gyis kyang tshul khrims gso bar byed pa yod pas de dag bsal ba'i phyir so sor thar pa'i mdo gdon pa gdon gyi zhes bya ba gsungs te/ so sor thar pa'i mdo gdon pa rnam pa lnga po dag gdon gyi zhes bya bar sbyar ro/ /so sor thar pa 'don pa ni dge 'dun gyi gnas brtan gyi las yin no/ /des mi nus pa nyid yin na gnyis pa'i las yin no/ / des kyang mi nus pa nyid yin na gsum pa'i las yin no/ /des kyang mi nus pa nyid yin na thams cad kyi res kyis gdon par bya'o/ /res bab pa'i tshe des gdon mi nus na gzhan la bcol bar bya'o/ /de ma btub na de dge 'dun gyis de la bcol bar bya'o/ /'don pa de dag gi tshig phyed kyang ma 'khrul bar legs par thon pa nyid yin na gdon gyi gzhan du na mi 'chags so/ /'don pa'i tshe rdugs na lhag ma gzhan gyis gdon par bya'o/ /dum bu 'dzin pa nyid yin na ji snyed kyis gzhung bsrongs pa de snyed kyis pheg tu bcad de gdon par bya'o/ /'don par byed pas so sor thar pa'i mdo gdon pa rnam pa lnga po gleng gzhi gdon pa dang / pham par 'gyur ba gdon pa dang / dge 'dun lhag ma gdon pa dang / ma nges par gdon pa dang / ril gyis gdon pa dag las/ gleng gzhi gdon pa ni rdzogs pa kho nar mi gdon du mi rung ngo / /gleng gzhi bton nas lhag ma rnams ni thos pa bsgrags pas bsgrub tu rung ngo / /de yang gleng gzhi bton nas pham par 'gyur ba gdon pa brtsams nas pham par 'gyur ba'i sde tshan rdzogs par gdon dgos so/ /pham par 'gyur ba bton nas dge 'dun lhag ma gdon pa brtsams na dge 'dun lhag ma'i sde tshan yang rdzogs par gdon dgos so/ /dge 'dun lhag ma thon nas ma nges pa gdon pa brtsams na ma nges pa'i sde tshan yang rdzogs par gdon dgos te/ pham par 'gyur ba dag dang dge 'dun lhag ma dang ma nges pa yan chad kyi sde tshan ni gdon par mgo brtsams nas gang brtsams pa'i sde tshan de nyid rdzogs par bya dgos so/ /spong ba'i ltung byed man chad kyi sde tshan ni gdon par mgo brtsams nas lhag ma so sor thar pa'i gzhung thams cad rdzogs par gdon dgos te/ ril gyis gdon pa zhes bya ba yang de nyid yin no/ /mgo brtsams pa'i sde tshan rdzogs par bya dgos pa de dag ma rdzogs na mi 'chags so/ /'jigs pa dang bcas pa nyid du 'gron du 'gro ba 'gron po don mthun pa dag sdod du mi btub na 'gro bzhin du gdon par bya ste/ 'di ni las mi 'dug pa nyid kyis bya'o zhes gsungs pa'i dmigs kyis bsal ba yin no/ /sgra mi 'don na mdor bsdus te gdon to/ /de yang mi 'don na byin gyis brlab par bya'o/ /chos ma yin pas 'don na mi 'chags te/ gdon par bya ba dang de'i tshang dang / dus dang 'don par byed pa rnams de kho na bzhin nye bar ma bzung ba ni 'dir chos ma yin pa'o/ /gdon par bya ba de kho na ltar nye bar ma bzung ba ni so sor thar pa'i mdo las gzhan pa phran tshegs la sogs pa 'don pa'o/ /de'i tshad de kho na bzhin nye bar ma bzung ba ni gleng gzhi mi 'don cing lhag ma rnams kyang thos pa bsgrags pas sgrub par mi byed pa'o/ /de'i dus de kho na bzhin nye bar ma bzung ba ni gso sbyong gi dus las gzhan pa'i dus su 'don pa'o/ /'don par byed pa de kho na bzhin nye bar mi gzung ba ni gang zag bsnyen par rdzogs pa dang / mtshan ma dang lta ba dang tshul khrims mthun pa dag las gzhan pas 'don pa'o/ /dge slong gcig pu gnas na des gtsug lag khang chag chag gdab par bya/ phyag dar bya/ ba lang gi lci ba sar pa'i byug pas byug par bya/ seng ge'i khri bsham par bya/ mar me gzugs par bya/ chos nyan du gzhug pa dag bya'o/ /de'i 'og tu phyogs chas chen por 'dug ste phyogs bzhir blta bar bya'o/ /der dge slong yongs su dag pa lta ba mthun pa dag 'ong na 'di skad ces kye tshe dang ldan pa dag myur bar shog shig /deng dge 'dun gyi gso sbyong bco lnga pa yin no zhes brjod par bya zhing de dag dang lhan cig 'dug ste gso sbyong bya'o/ /gal te 'grub na de lta na legs ji ste mi 'grub na dge slong des byin gyis brlab par bya'o/ /'di ltar bya ste des rang gi stan la 'dug ste/ 'di ltar sems bskyed par bya zhing tshig tu yang brjod par bya'o/ /deng dge 'dun gyi gso sbyong bco lnga pa yin la/ bdag dge slong ming 'di zhes bya ba'i gso sbyong yang bco lnga pa yin te/ bdag dge slong ming 'di zhes bya ba bar chad kyi chos rnams yongs su dag go zhes kyang bdag smra/ bdag yongs su dag par lha rnams kyis gzung du gsol/ bdag dge slong ming 'di zhes bya ba tshul khrims kyi phung po yongs su rdzogs par bya ba'i phyir deng gso sbyong byin gyis brlab po/ /gang gi tshe dge 'dun tshogs pa rnyed pa de'i tshe dge 'dun dang lhan cig tu gso sbyong rgya cher nyams su myong bar bya zhing so sor thar pa'i mdo gdon pa gdon par bya'o/ /de bzhin du lan gnyis lan gsum du bzlas/ gang na dge slong gnyis 'khod pa der ni rim pa de bzhin bya zhing / dus kyi bar du bsdad de ma grub na mdun du tsog pur 'dug ste gcig la gcig 'di skad ces brjod par bya'o/ /btsun pa'am tshe dang ldan pa dgongs su gsol/ deng dge 'dun gyi gso sbyong bco lnga pa lags la bdag dge slong ming 'di zhes bgyi ba'i gso sbyong yang bco lnga pa lags te/ bdag dge slong ming 'di zhes bgyi ba bar chad kyi chos rnams yongs su dag go zhes kyang bdag mchis/ bdag yongs su dag par btsun pa'am tshe dang ldan pas gzung du gsol/ bdag dge slong ming 'di zhes bgyi bas tshul khrims kyi phung po yongs su rdzogs par bgyi ba'i slad du deng gso sbyong byin gyis brlab po/ /gang gi tshe dge 'dun tshogs pa rnyed pa de'i tshe dge 'dun dang lhan cig tu gso sbyong rgya cher nyams su myong bar bgyi zhing so sor thar pa'i mdo gdon par bgyi'o/ /de bzhin du lan gnyis lan gsum du bzlas/ gang na dge slong gsum 'khod pa der ni rim pa bzhin bya zhing dus kyi bar du bsdad de/ de ma grub na rgan rims bzhin gral du 'khod de rim gyis byin gyis brlab pa'i sngags snga ma nyid brjod par bya'o/ /gang na dge slong bzhi 'khod pa der ni de rnams kyis gsol ba byas te gso sbyong bya zhing der nad pa'i yongs su dag pa ni blang bar mi bya'o/ /gang na dge slong lnga'am lhag pa 'khod pa der ni de rnams kyis gsol bar byas te gso sbyong bya ste/ der ni nad pa'i yongs su dag pa yang blang bar bya'o/ /khyed cag su la ltung ba yod pa des mthol cig ces bya ba ni bshags par bya ba yod na yang bshags par bya/ bsdam par bya ba yod na yang bsdam par bya/ byin gyis brlab par bya ba yod na yang byin gyis brlab par bya'o/ /'di la gleng gzhi rnam par gzhag pa'i tshul ji lta bu zhe na/ gso sbyong gi gnas su 'du ba'i mdun rol kho nar gso sbyong snga ma 'das pa'i mtha' tshun chad kyi zla ba phyed kyi ltung ba la so sor brtag par bya ste ltung ba shes pa bshags pa'am bsdam pa'am byin gyis brlab pas phyir bcos te las kyi gnas su 'dug par bya'o/ /de'i cho ga dang sngags ni 'di ltar bya ste/ ltung byed 'ba' zhig gam/ so sor bshags par bya ba'am bshags par bya ba'i nyes byas las gang yang rung ba zhig shes na des mchil lham gnyis phud nas bla gos phrag pa gcig tu byas te/ dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa gcig gi mdun du tsog pur 'dug ste thal mo sbyar ba btud nas sde tshan gyi ming dang gang byung ba'i rigs smos te/ cig car mthol ba dang bshags pa byar rung ngo / /de'i sngags ni 'di skad ces brjod par bya'o/ /tshe dang ldan pa dgongs su gsol/ bdag dge slong ming 'di zhes bgyi ba la ltung ba ming dang rigs 'di lta bu 'di byung ste/ bdag dge slong ming 'di zhes bgyi ba la ltung ba de dag pa'i mtha' tshun chad nas bzung ste/ tshe dang ldan pa'i mdun du mthol lo/ /mi 'chab bo/ /'chags so/ /mthol zhing bshags na bdag bde ba la reg par gnas par 'gyur gyi/ ma mthol ma bshags na ni mi 'gyur ro/ /de bzhin du lan gnyis lan gsum du bzlas/ nyan pas ltung ba mthong ngam zhes smra zhing / 'chags pas mthong ngo zhes brjod par bya'o/ /nyan pas phyin chad sdom mam zhes smra zhing / 'chags pas sdom mo zhes brjod par bya ste/ de bzhin du lan gnyis lan gsum du bzlas/ de'i rjes la nyan pas thabs yin no zhes brjod par bya zhing / 'chags pas legs so zhes brjod par bya'o/ /de'i tshe dge slong ltung ba la dogs pa dang yid gnyis za bar gyur na/ dge slong des dge slong mdo sde 'dzin pa dang / 'dul ba 'dzin pa dang / ma mo 'dzin pa rnams la dris te/ ltung ba la dogs pa dang yid gnyis bsal nas dge slong gi mdun du chos bzhin du phyir bya'o/ /bsdam par bya ba'i nyes byas gang yang rung ba zhig shes na rang gi sems kyis bsdam par bya'o/ /dge 'dun lhag ma dang nyes pa sbom po dang / spong ba'i ltung byed kyi ltung ba gang yang rung ba zhig shes na byin gyis brlab par bya'o/ /'di ltar bya ste/ des snga ma bzhin du mchil lham gnyis phud nas dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa zhig gi mdun du tsog pur 'dug ste thal mo sbyar ba btud nas ltung ba'i sde tshan gyi ming dang / gang byung ba'i rigs smos te/ 'di skad ces brjod par bya'o/ /tshe dang ldan pa dgongs su gsol/ bdag dge slong ming 'di zhes bgyi ba la ltung ba ming dang rigs 'di lta bu 'di byung ste/ bdag dge slong ming 'di zhes bgyi bas deng ltung ba de tshe dang ldan pa'i mdun du byin gyis brlabs te gso sbyong bgyi'o/ /sang nang par ltung ba de chos bzhin du slar bgyi'o/ /de bzhin du lan gnyis lan gsum du bzlas/ gso sbyong bco lnga pa de nyid la dge slong gis dge 'dun gyi nang du ltung ba dran na des ltung ba de dge slong drung na mo la byin gyis brlab par bya'o/ /'di ltar bya ste/ des dge slong drung na 'dug pa'i mdun du tsog bur 'dug ste thal mo sbyar ba btud nas 'di skad ces brjod par bya'o/ /tshe dang ldan pa dgongs su gsol deng dge 'dun gyi gso sbyong bco lnga pa lags la/ bdag dge slong ming 'di zhes bgyi ba'i gso sbyong yang bco lnga pa lags te/ bdag dge slong ming 'di zhes bgyi ba dge 'dun gyi nang du ltung ba ming dang rigs 'di lta bu 'di dran te bdag dge slong ming 'di zhes bgyi bas deng ltung ba de tshe dang ldan pa'i mdun du byin gyis brlabs te gso sbyong bgyi'o/ /yang nang par ltung ba de chos bzhin du slar bgyi'o zhes lan cig bzlas par bya'o/ /gso sbyong bco lnga pa de nyid la dge slong dge 'dun gyi nang du ltung ba la yid gnyis dang bcas par gyur na des ltung ba de dge slong drung na mo la byin gyis brlab par bya'o/ /'di ltar bya ste/ des dge slong drung na 'dug pa'i mdun du tsog pur 'dug ste thal mo sbyar ba btud nas 'di skad ces brjod par bya'o/ /tshe dang ldan pa dgongs su gsol/ deng dge 'dun gyi gso sbyong bco lnga pa lags la/ bdag dge slong ming 'di zhes bgyi ba'i gso sbyong yang bco lnga pa lags te/ bdag dge slong ming 'di zhes bgyi ba dge 'dun gyi nang du ltung ba ming 'di dang rigs 'di lta bu 'di la yid gnyis su gyur na bdag gis ltung ba de deng tshe dang ldan pa'i mdun du byin gyis brlabs te gso sbyong bgyi'o/ /sang nang par dge slong mdo sde 'dzin pa dang 'dul ba 'dzin pa dang ma mo 'dzin pa rnams la dris te dogs pa dang yid gnyis bstsal la ltung ba de chos bzhin du slar yang bgyi'o zhes lan cig bzlas par bya'o/ /gso sbyong bco lnga pa de nyid la dge slong las byed pas dge 'dun gyi nang du ltung ba dran na des ltung ba de rang gi sems kyis byin gyis brlab par bya'o/ /'di ltar bya ste/ des 'dug bzhin du sems kyis 'di skad ces brjod par bya'o/ /deng dge 'dun gyi gso sbyong bco lnga pa yin la/ bdag dge slong las byed pa ming 'di zhes bya ba'i gso sbyong yang bco lnga pa yin te/ bdag dge slong las byed pa ming 'di zhes bya ba dge 'dun gyi nang du ltung ba ming dang rigs 'di lta bu 'di dran te/ bdag dge slong las byed pa ming 'di zhes bya bas deng ltung ba de rang gi sems kyis byin gyis brlabs te gso sbyong bya'o/ /sang nang par ltung ba de chos bzhin du phyir bya'o zhes lan cig brjod par bya'o/ /gso sbyong bco lnga pa de nyid la dge slong las byed pa dge 'dun gyi nang du ltung ba yid gnyis dang bcas par gyur na/ des ltung ba de rang gi sems kyis byin gyis brlab par bya'o/ /'di ltar bya ste/ des 'dug bzhin du sems kyis 'di skad ces brjod par bya'o/ /deng dge 'dun gyi gso sbyong bco lnga pa yin la/ bdag dge sbyong las byed pa ming 'di zhes bya ba'i gso sbyong yang bco lnga pa yin te/ bdag dge slong las byed pa ming 'di zhes bya ba dge 'dun gyi nang du ltung ba ming dang rigs 'di lta bu 'di la yid gnyis su gyur na bdag dge slong las byed pa ming 'di zhes bya bas deng ltung ba de rang gi sems kyis byin gyis brlabs te gso sbyong bya'o/ /sang nang par dge slong mdo sde 'dzin pa dang / 'dul ba 'dzin pa dang / ma mo 'dzin pa rnams la dris te dogs pa dang yid gnyis bsal la ltung ba de chos bzhin du phyir bya'o zhes lan cig brjod par bya'o/ /gso sbyong bco lnga pa de nyid la dge 'dun thams cad ltung pa mthun pa dang bcas par gyur na dge slong de rnams kyis gang gi mdun du ltung ba de chos bzhin du phyir bya ba'i dge slong 'ga' zhig gnas gzhan du song la dge slong gi mdun du ltung ba de chos bzhin du phyir byed pa de lta bur spro bar bya'o/ /gal te grub na de lta na legs/ ci ste mi 'grub na dge slong de rnams kyis gsol ba 'ba' zhig gi las kyis byin gyis brlab par bya'o/ /'di lta ste/ gal te gso sbyong gi dus su dge 'dun thams cad kyis ltung ba mthun pa dang bcas par shes par gyur na dge slong zhig mtshams gzhan gyi dge slong gi drung du btang ste/ des der ltung ba phyir bcos te phyir 'ongs nas de'i mdun du thams cad kyi ltung ba shes pa phyir bcos te gso sbyong bya'o/ /gal te cho ga de ma grub na dge slong cig gis gsol ba 'ba' zhig gi las kyis byin gyis brlab par bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ deng dge 'dun gyi gso sbyong bco lnga pa lags la/ bdag cag dge 'dun thams cad ni ltung ba dang bcas par gyur na gang gi mdun du bdag cag ltung ba de chos bzhin du slar bgyi ba bdag cag las dge slong gnas gzhan du mchis la/ dge slong gi mdun du ltung ba de chos bzhin du slar bgyid par spro ba su yang ma mchis na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis deng ltung ba de byin gyis brlabs te gso sbyong mdzad la/ slad kyis dge slong gi mdun du ltung ba de chos bzhin du slar mdzad do/ /'di ni gsol ba'o/ /gso sbyong bco lnga pa de nyid la dge 'dun thams cad ltung ba la yid gnyis dang bcas par gyur na de rnams kyis gang gi mdun du ltung ba de chos bzhin du phyir bya ba'i dge slong 'ga' zhig gnas gzhan du song la dge slong mdo sde dang 'dul ba dang ma mo 'dzin pa rnams la dris te ltung ba la yid gnyis bsal nas chos bzhin du phyir byed pa de lta bu spro bar bya'o/ /gal te grub na legs/ ji ste mi 'grub na dge slong de rnams kyis gsol ba 'ba' zhig gi las kyis byin gyis brlab par bya'o/ /'di ltar bya ste/ gal te gso sbyong gi dus su dge 'dun thams cad ltung ba la yid gnyis dang bcas par gyur na dge slong gcig mtshams gzhan gyi dge slong mdo sde dang 'dul ba dang ma mo 'dzin pa rnams kyi drung du btang ste/ des der ltung ba la dogs pa dang yid gnyis bsal te phyir 'ongs nas de'i mdun du thams cad kyis ltung ba la yid gnyis dang bcas par gyur pa de bsal te gso sbyong bya'o/ /gal te cho ga de ma grub na dge slong cig gis gsol ba 'ba' zhig gi las kyis byin gyis brlab par bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ deng dge 'dun gyi gso sbyong bco lnga pa lags la bdag cag dge 'dun thams cad ltung ba la dogs pa dang yid gnyis dang bcas par gyur na/ gang gi mdun du bdag cag ltung ba de chos bzhin du slar bgyi ba bdag cag las dge slong gnas gzhan du mchis la/ dge slong mdo sde 'dzin pa dang 'dul ba 'dzin pa dang ma mo 'dzin pa rnams la dris te dogs pa dang yid gnyis bsal la ltung ba de chos bzhin du slar bgyid par spro ba su yang ma mchis na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis deng ltung ba de byin gyis brlabs te gso sbyong mdzad la/ slad kyis dge slong mdo sde 'dzin pa dang 'dul ba 'dzin pa dang ma mo 'dzin pa rnams la dris te dogs pa dang yid gnyis bsal la ltung ba de chos bzhin du slar mdzad do/ /'di ni gsol ba'o/ /gso sbyong bco lnga pa de nyid la dge 'dun thams cad ltung ba'i phyir rtsod par gyur na gsol ba 'ba' zhig gi las kyis byin gyis brlabs te gso sbyong bya'o/ /'di ltar bya ste/ gso sbyong bco lnga pa de nyid la dge slong gnyug mar gnas pa gcig pu ma gtogs pa dge 'dun thams cad ltung ba dang bcas par gyur na dge slong de dge slong gtam 'dre ba dang / phebs par smra ba dang / smos 'drin dang / 'grogs bshes gang yin pa de'i drung du song ste/ ci nas kyang dge slong gzhan dag kyang ltung ba 'chags par 'gyur ba de ltar gleng ba dang / dran par bya'o/ /gal te 'grub na de lta na legs/ ci ste mi 'grub cing dge 'dun thams cad ltung ba'i phyir rtsod par gyur na dge slong cig gis gsol ba 'ba' zhig gi las kyis byin gyis brlab par bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ deng dge 'dun gyi gso sbyong bco lnga pa lags la bdag cag dge 'dun thams cad ni ltung ba'i slad du rtsod par gyur na gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis deng ltung ba'i slad du rtsod pa de byin gyis brlabs te gso sbyong mdzad la/ slad kyis dge slong mdo sde 'dzin pa dang 'dul ba 'dzin pa dang ma mo 'dzin pa rnams la dris te rtsod pa zhi bar bgyis la ltung ba de chos bzhin du slar mdzad do/ /'di ni gsol ba'o/ /gso sbyong bco lnga pa de nyid la dge 'dun thams cad ltung ba la nges pa nyid ma yin par gyur na gsol ba 'ba' zhig gi las kyis byin gyis brlabs te gso sbyong bya'o/ /'di ltar bya ste/ gso sbyong bco lnga pa de nyid la dge slong glo bur du 'ongs pa gcig pu ma gtogs pa dge 'dun thams cad ltung ba dang bcas par gyur na dge slong de dag dge slong gtam 'dres pa dang / phebs par smra ba dang / smos 'drin dang / 'grogs bshes gang yin pa de'i drung du song ste/ ci nas kyang dge slong gzhan dag kyang ltung ba 'chags par 'gyur ba de ltar gleng ba dang dran par bya'o/ /gal te 'grub na de lta na legs/ ci ste mi 'grub cing dge 'dun thams cad ltung ba de ni gang yin pa de las ji ltar ni ldang bar 'gyur zhes nges pa nyid ma yin par gyur na dge slong cig gis gsol ba 'ba' zhig gi las kyis byin gyis brlab par bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ deng dge 'dun gyi gso sbyong bco lnga pa lags la/ bdag cag dge 'dun thams cad ni ltung ba la nges pa nyid ma lags par gyur na gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis deng ltung ba la nges pa nyid ma lags pa de byin gyis brlabs te gso sbyong mdzad la/ slad kyis dge slong mdo sde 'dzin pa dang 'dul ba 'dzin pa dang ma mo 'dzin pa rnams la dris te nges pa nyid ma lags pa bsal la ltung ba de chos bzhin du slar yang mdzad do/ /'di ni gsol ba'o/ /ltung ba med na cang ma smra zhig ces bya ba ni bshags par bya ba dang / bsdam par bya ba dang / byin gyis brlab par bya ba'i ltung ba med na de dag phyir bcos pa'i bya ba ma byed cig ces bya ba'i tha tshig go /cang mi smra na bdag gis tshe dang ldan pa dag yongs su dag par rig par bya'o zhes bya ba ni de lta na 'khor rnam par dag pa yin pas bdag gis khyed cag gso sbyong gi snod du gyur pa yin par rig par bya'o zhes bya ba'i tha tshig go/ /de ltar gleng gzhi rnam par gzhag pa'i lung dbog pa ji skad bstan pa de las tshe dang ldan pa dag bdag cag gso sbyong bya ste/ so sor thar pa'i mdo gdon pa gdon gyis khyed cag su la ltung ba yod pa des mthol cig ces bya ba'i lung dbog pa 'di'i gleng gzhi rnam par gzhag pa bsgrag par bya ba ni 'og nas de la bdag gis tshe dang ldan pa dag la ci 'di la khyed yongs su dag gam zhes lan gnyis lan gsum du dri bar bya'o zhes 'byung ba yin no/ / ltung ba med na cang ma smra zhig ces bya ba'i lung dbog pa 'di'i gleng gzhi rnam par gzhag pa bsgrag par bya ba ni 'og nas 'di la tshe dang ldan pa dag yongs su dag na zhes bya ba 'byung ba yin no/ /cang mi smra na bdag gis tshe dang ldan pa dag yongs su dag par rig par bya'o zhes bya ba'i lung dbog pa 'di'i glang gzhi rnam par gzhag pa bsgrag par bya ba ni 'og nas 'di ltar cang mi smra bas de de bzhin du 'dzin to zhes 'byung ba yin par rig par bya'o/ / //de'i 'og tu gleng gzhi rnam par gzhag pa'i thabs bstan pa'i phyir yan lag gi don bshad par bya ste/ ji ltar so sor dris nas dge slong gis lan btab pa zhes bya ba ni gleng gzhi rnam par gzhag pa'i thabs bstan pa'i dpe ste/ dper na gso sbyong gi tshe dge slong dag gso sbyong gi gnas su 'du ba'i sngon rol kho nar gso sbyong snga ma 'das pa'i mtha' tshun chad kyi zla ba phyed kyi ltung ba la so sor rtog par byed cing / ltung ba shes shing mthong na dge slong gcig gi mdun du skabs dbye bar gsol te/ ltung ba mthol ba na dag pa sbyin pa'i dge slong des ltung ba mthong ngam zhes dris pa na/ mthong ngo zhes lan gdab pa dang / phyin chad sdom mam zhes dris pa na sdom mo zhes lan gdab pa lan gsum dris nas dge slong gis kyang lan gsum lan gdab pa'o/ /de bzhin du dge slong gi 'khor 'di lta bur yang lan gsum gyi bar du bsgrag par bya ba yin no zhes bya ba ni gleng gzhi rnam par gzhag pa'i thabs bstan pa'i don nyid yin te/ dge slong gi 'khor 'di lta bur yang zhes bya ba ni so sor thar pa'i mdo gdon pa'i 'khor 'dir yang ngo / /lan gsum gyi bar du bsgrag par bya ba yin no zhes bya ba ni 'og nas gleng gzhi rnam par gzhag pa bsgrag par bya ba'i tshig 'di skad ces de la bdag gis tshe dang ldan pa dag / ci 'di la khyed yongs su dag gam zhes dri'o/ /ci 'di la khyed yongs su dag gam zhes lan gnyis lan gsum du dri'o/ /'di la tshe dang ldan pa dag yongs su dag na 'di ltar cang mi smra bas de de bzhin du 'dzin to zhes 'byung ba de nyid so sor thar pa'i gzhung las ji skad 'byung ba kho na bzhin go rims dang tshig ma 'khrul par lan gcig gdon par bya ba yin te/ de la lan gcig bton pa nyid na dri'o zhes bya ba dang / lan gnyis lan gsum du dri'o zhes smos pa de nyid kyis lan gsum bsgrag par byas pa yin no/ / tshig de skabs 'dir gong du spar te bsgrag par bya ba yang ma yin la/ sngar gleng gzhi rnam par gzhag pa'i lung dbog pa'i tshig ji skad bstan pa de skabs 'dir lan gsum bsgrag par bya ba yang ma yin no/ /de'i 'og tu ma dag pa'i nyes dmigs kyi yan lag gi don bshad par bya ste/ yang dge slong gang zhes bya ba ni 'byung ba'i gleng gzhi'i dbang gis bcas pa ma yin gyi gang yang rung ba spyir bstan pa'o/ /dge slong gi 'khor 'di lta bur yang sngar lan gsum gyi bar du bsgrags pa na zhes bya ba ni so sor thar pa 'don pa'i nang du gleng gzhi rnam par gzhag pa bsgrag par bya ba'i tshig 'og nas 'byung ba lan gcig bton pa na ste/ de lan gcig bton pa na dri'o zhes bya ba dang / lan gnyis lan gsum du dri'o zhes smos pa de nyid lan gsum bsgrags pa yin gyi/ gleng gzhi rnam par gzhag pa bsgrag par bya ba'i tshig de lan gsum bzlas par ni mi bya'o/ /ltung ba yod la zhes bya ba ni sngar chos bzhin du phyir ma bcos pa'o/ /dran bzhin du mi mthol na ni zhes bya ba ni 'dir 'du shes gtso cher byed pa po yin pas mi dran pa la ltung ba med kyi dran bzhin du mi mthol na ltung bar 'gyur ro/ /yid gnyis ni 'du shes dang 'dra bas yid gnyis za ba byin gyis mi rlob na yang ltung ba 'dir 'gyur ro/ /de shes bzhin du brdzun smra ba yin no zhes bya ba ni brdzun la rnam pa lnga ste/ pham par 'gyur ba dang / dge 'dun lhag mar 'gyur ba dang / nyes pa sbom por 'gyur ba dang / ltung byed du 'gyur ba dang nyes byas su 'gyur ba'o/ /de la pham par gyur pa'i brdzun ni 'du shes bsgyur te mi'i chos bla ma smra ba'o/ /dge 'dun lhag mar 'gyur ba'i brdzun ni 'du shes bsgyur te gzhi med pa dang bag tsam gyis skur pa 'debs pa'o/ / nyes pa sbom por 'gyur ba'i brdzun ni dge 'dun gyi dbyen byed pa'i tshe dge 'dun 'dus pa la shes bzhin du chos ma yin pa chos su ston pa dang / chos chos ma yin par ston pa ste/ brdzun du smra ba'i pham par 'gyur ba'i skabs kyi nyes pa sbom po'o/ /ltung byed du 'gyur ba'i brdzun ni snga ma gsum dang nyes byas su 'gyur ba'i brdzun dang bzhi las gzhan pa'i brdzun du smra ba don shes pa'i yul la 'du shes gzhan du bsgyur ba ste/ brdzun du smra ba ni 'du shes kyi dbang gis rnam par gzhag gi dngos po'i dbang gis ni ma yin pa'i phyir ro/ / nyes byas su 'gyur ba'i brdzun ni skabs 'di nyid kyis bstan te/ gso sbyong la ci 'di la khyed yongs su dag gam zhes lan gsum gyi bar du dris pa las ma dag par shes bzhin du cad mi smra bas 'da' bar byed na nyes byas so zhes gsungs pa'i phyir ro/ /des na nyes byas yongs su rdzogs pa yin gyi yid kyi ni ma yin te kha rnam par 'gyur ba la sogs pa'i rnam par rig byed de la yod pa'i phyir ro/ /de ltar shes bzhin du brdzun smra ba de ni ma dag pa yin na ma dag pa'i nyes dmigs gang zhe na/ de'i phyir tshe dang ldan pa dag shes bzhin du brdzun smra ba ni bcom ldan 'das kyis bar du gcod pa'i chos su gsungs so zhes bya ba gsungs te/ brdzun du smra ba de ni rang bzhin gyi kha na ma tho ba dang bcas pa yin pas bsnyen par ma rdzogs pa dang / nyams pa dang / mtshams med pa byas pa dang / sdig pa'i lta ba can dang / sa gzhan na gnas pa dang / tha dad par gnas pa rnams kyis smras na yang mngon par mtho ba dang nges par legs pa'i bar du gcod pa yin la/ dge slong rang bzhin du gnas pas smras na ni rang bzhin gyi kha na ma tho ba dang bcas pa'i kha na ma tho ba dang / gnyi ga lhag par spyad pa yin pas lhag par yang mngon par mtho ba dang / nges par legs pa'i bar du gcod pa yin par gsungs so/ /skabs 'di ni cho ga las 'das na las mi 'chags so zhes gsungs te/ las ni gsol ba dang / brjod pa dang / so sor thar pa gdon pa dang / dgag dbye'i las dang / las brgya rtsa gcig gis bsdus pa'o/ /cho ga ni dge 'dun tshang ba dang / las brjod pa dang / las byed pa gnyis kyi chos ma yin pas mi bya ba dang / mi mthun pa dag mi bya ba dang / tshogs kyi mi bya ba yin pa 'dir so sor thar pa 'don pa ni gso sbyong gi las yin la/ de chos ma yin pas mi bya'o zhes bya ba ni 'khrul pa dang bcas pa dag gis las mi bya ba la sogs pa yin no/ /'dir ltung ba yod pa ni 'khrul pa dang bcas pa yin la/ de dran bzhin du mi mthol ba shes bzhin du brdzun smra ba yang rang bzhin las nyams pa yin pas de ma bshags sam byin gyis ma brlabs pa dag gis gso sbyong gi las byas na las de mi 'chags pa'i nyes dmigs gzhan yang yod do/ /de'i 'og tu dag pa'i phan yon gyi yan lag gi don bshad par bya ste/ de bas na dge slong ltung ba byung ba rnam par dag par 'dod pas zhes bya ba ni shes bzhin du brdzun du smra ba'i nyes byas tsam yang rnam par dag par 'dod pas so/ /ltung ba yod pa la dran zhing mthong ba mthol bar bya'o zhes bya ba ni bshags pa dang bsdam pa dang byin gyis brlabs pa gang bya bar 'os pa de bya'o/ /de ltar mthol ba de ni dag pa yin na dag pa'i phan yon gang zhe na/ de'i phyir mthol na bde ba la reg par gnas par 'gyur ro zhes bya ba gsungs so/ /mthol na tshul khrims kyi phan yon bcu 'thob cing mngon par mtho ba dang nges par legs pa'i bde ba la reg par gnas par 'gyur ba'o/ / tshul khrims kyi phan yon bcu ni 'gyod pa med pa'i rim gyis mchog tu dga' ba sngon du 'gro ba'i chos 'thob par 'gyur ba la sogs pa sngar bstan pa dag go/ /mngon par mtho ba ni mtho ris so/ /nges par legs pa ni mya ngan las 'das pa'o/ /skabs 'dir 'phral du cho ga las ma 'das pa'i las 'chags pa'i phan yon gzhan yang yod do/ /ma mthol ma bshags na ni mi 'gyur ro zhes bya bas ni rjes su 'gro ba sngar bstan pa de nyid ldog pa'i sgo nas bstan to// //de'i 'og tu gdon pa'i mjug bsdu ba'i yan lag gi don bshad par bya ste/ tshe dang ldan pa dag bdag gis so sor thar pa'i mdog don pa'i gleng gzhi bton zin to zhes bya ba la/ gleng gzhi zhes bya ba ni mod gdon pa 'byung ba'i rgyu'o/ /bton zin to zhes bya ba ni dam bcas pa'i don gyi mjug bsdu ba'i phyir dang / nyan pa po rnams spro bar bya ba'i phyir smos so/ /de'i 'og tu gleng gzhi rnam par gzhag par bya ba'i yan lag gi don bshad par bya ste/ de la zhes bya ba ni gleng gzhi ston pa de la'o/ /ci zhes bya ba ni yongs su dris pa'o/ /'di la zhes bya ba ni gso sbyong la'o/ /khyed ces bya ba ni khyed cag go/ /yongs su dag gam zhes bya ba ni ltung ba ma byung ngam zhes bya ba'o zhes bya ba ni dri ba spyil snyegs so/ /dri'o zhes bya ba ni dri ba dang po'o/ /lan gnyis lan gsum du dri'o zhes bya ba ni lan gsum kho nar dri bar bya dgos pas lan gnyis lan gsum du zhes smos te/ nyung na yang la las mi thos la/ mang na yang dus yol ba la sogs pa'i nyes dmigs yod pas de'i phyir lan gsum ni ran par dgongs te/ bshags pa dang byin gyis brlab pa gnyis kyis ltung ba ma bcabs pa sha stag tshogs pa yin nam zhes bya ba'i tha tshig go/ /cang mi smra bas brda byas pas gleng gzhi rnam par gzhag pa bsgrag par bya ba mjug bsdu ba bstan pa'i phyir/ 'di la tshe dang ldan pa dag yongs su dag na 'di ltar cang mi smra bas de de bzhin du 'dzin to zhes bya ba gsungs te/ bshags pa dang byin gyis brlabs pa gnyis kyis ltung ba ma bcabs pa sha stag tshogs pa yin no zhes bya ba'i tha tshig go/ /gleng gzhi gdon pa bshad zin to// //so sor thar pa'i mdo rgya cher 'grel pa 'dul ba kun las btus pa bam po gsum pa/ da ni pham par 'gyur ba gdon pa bshad par bya ste/ de'i phyir/ sdom la/ mi tshangs spyod dang rku ba dang / /mi la gsad par mi bya dang / / brdzun du smra dang bcas pa yi/ /chos bzhi 'dir ni gsungs pa yin/ /zhes bya ba gsungs so/ /sdom la zhes bya ba ni yang dag par sdud par byed pas 'dul ba'i sde snod yang dag par bsdu ba'i tshe ma 'ongs pa'i skye bo lung dang rtogs pa'i bdag nyid med pa dag yan lag la sgro 'dogs pa dang skur pa 'debs pa'i mtha' spang bar bya ba dang / nyan pa po brjod pa nyung ngus don gyi spyi rtogs par 'dod pa dag la phan gdags pa'i phyir sdom rnam pa gsum du bsdus te/ spyi sdom dang / sdom dang / bar sdom du'o/ /de la spyi sdom ni spyi'i don tshigs su bcad par bsdus pa ste/ dper na ltung byed kyi sde tshan bstan pa'i skabs su/ sdom gyi tshigs bcad dgu rim gyis 'byung ba thams cad kyi mgor ni spyi sdom la zhes bya ba'i tshigs su bcad pa gcig gis sdom rnams kyi spyi'i don bsdus pa la sogs pa lta bu'o/ /sdom ni dngos kyi don tshigs su bcad par bsdus pa ste/ dper na pham par 'gyur ba'i chos bzhi po dag gi dngos kyi don sdom la zhes bya ba'i tshigs su bcad pas bsdus pa dang / dge 'dun lhag ma'i chos bcu gsum po dag gi dngos kyi don sdom la zhes bya ba tshigs su bcad pa la sogs pa lta bu'o/ / bar sdom ni yan lag gi don tshigs su bcad pa bsdus pa ste dper na spang ba'i ltung byed sum cu po dag gi dngos kyi don sdom gyi tshigs su bcad pa gcig gis bsdus pa las de dag so so'i ltung ba rnam par gzhag pa'i skabs skabs su tshig yan lag tu 'phros pa dag gi don bar sdom la zhes bya ba'i tshigs su bcad pas bsdus pa la sogs pa lta bu'o/ /de bas na skabs 'dir sdom la zhes smos pas ni pham par 'gyur ba'i chos bzhi'i dngos kyi don bsdus pa yin no/ /mi tshangs spyod dang rku ba dang / /mi la gsad par mi bya ba/ /brdzun du smra dang bcas pa yi/ /chos bzhi 'dir ni gsungs pa yin/ /zhes bya ba la/ mi bya ba zhes bya ba'i tshig da lta dbus na 'dug pa 'di ltag 'og gnyi gar sbyar te/ mi tshangs par spyod par mi bya ba dang / rku bar mi bya ba dang / mi la gsad par mi bya ba dang / mi bya ba de brdzun du smra ba dang yang bcas par bya ste/ brdzun du smra bar mi bya ba dang / chos bzhi bo de dag pham par 'gyur ba gdon pa'i skabs 'dir bcom ldan 'das kyis gsungs pa yin no zhes bya bar sbyar ro/ /tshe dang ldan pa dag pham par gyur pa'i chos bzhi po 'di dag ni zla ba phyed phyed cing so sor thar pa'i mdo gdon pa las byung ngo zhes bya ba ni pham par 'gyur ba gdon pa 'di'i lung dbog pa bstan to/ /pham par 'gyur ba'i chos zhes bya ba ni gzhan rgyal bar byed du 'jug pa'i nyes pa ni pham pa'o/ /de byed par 'gyur ba'i phyir pham par 'gyur ba ste ltung ba'o/ /de nyid kha na ma tho ba'i mtshan nyid 'dzin pas chos zhes bya'o/ /bzhi po 'di dag ni zhes bya ba ni mi tshangs par spyod pa'i pham par 'gyur ba dang / ma byin par len pa'i pham par 'gyur ba dang / gsod pa'i pham par 'gyur ba dang / smra ba'i pham par 'gyur ba'o/ /zla ba phyed phyed cing so sor thar pa'i mdo gdon pa las 'byung ngo zhes bya ba ni sde snod gsum las 'dul ba'i sde snod ni yi ger mi bri ba yin pas thams cad kyi mngon sum du ma gyur pa'i phyir gso sbyong 'don pas pham par 'gyur ba gdon pa 'di ga las shes snyam pa la/ zla ba phyed phyed cing gso sbyong 'don pa'i tshe 'dul ba 'dzin pa'i kha ton las 'byung ngo zhes bstan pa yin no/ /da ltar 'dul ba'i sde snod yang dag par bsdus pa'i gzhung 'di ni ma 'ongs pa'i skye bo dbang po rtul po tshig dang don gyi bdag nyid 'dzin mi nus pa rnams la phan gdags pa'i phyir bcom ldan 'das kyis yang dag par bsdu bar gnang ba yin te/ de bas na 'dul ba'i sde snod kyi las gsang ba 'di ni bsnyen par ma rdzogs pa rnams kyis thos par mi bya'o/ /de la bcom ldan 'das mngon par rdzogs par sangs rgyas te nyan thos kyi 'khor brnyes nas lo bcu gnyis kyi bar du ni bcom ldan 'das kyi nyan thos kyi dge 'dun la skyon med cing chu bur med de/ bcom ldan 'das kyis nyan thos rnams kyi so sor thar pa'i mdo gdon pa yang mdor bsdus te 'di skad ces/ sdig pa thams cad mi bya ste/ /dge ba phun sum tshogs par bya/ /rang gi sems ni yongs su gdul/ /'di ni sangs rgyas bstan pa yin/ /lus kyi sdom pa legs pa ste/ /ngag gi sdom pa legs pa yin/ /yid kyi sdom pa legs pa ste/ /thams cad du ni sdom pa legs/ /kun du bsdams pa'i dge slong ni/ / sdug bsngal kun las rab tu grol/ /ngag rnams bsrung zhing yid kyang rab bsdams te/ /lus kyis mi dge ba dag mi byed cing / /las lam gsum po 'di dag rab sbyangs na/ /drang srong gsungs pa'i lam ni thob par 'gyur/ /zhes ston par gyur pas 'dul ba la nyan thos rnams kyi bslab pa'i gzhi bcas pa med do/ /lo bcu gsum pa la bab pa na sangs rgyas bcom ldan 'das yul spong byed dag na ka lan da ka'i grong na bzhugs pa'i tshe ka lan da ka'i bu bzang byin bcom ldan 'das kyis legs par gsungs pa'i chos 'dul ba la skra dang kha spu bregs te gos ngur smrig dag bgos nas yang dag pa kho nar dad pas khyim nas khyim med par rab tu byung ste/ dgon pa'i spyil bu na 'dug par rang gi mas bslus nas des sngon gyi chung ma dang lhan cig mi tshangs par spyod pa 'khrig pa'i chos bsten te/ zag pa'i gnas lta bu'i chos mang po rnams kyi dang po ka lan da ka'i bu bzang byin gyis mi tshangs par spyod pa'i rkyen gyis byas par gyur na/ bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ bslab pa bca' ba'i phan yon bcu yang dag par gzigs pas 'dul ba la nyan thos rnams kyi bslab pa'i gzhi bca' ba mdzad nas/ de phyin chad gleng gzhi re re'i rgyu las bslab pa'i gzhi re re bcas pa'i sgo nas ltung ba'i sde lnga rnam par gzhag pa mdzad pas da de dag ji ltar bcas pa bzhin du bshad par bya'o/ /de la gdon par gtogs pa'i bslab pa'i gzhi thams cad kyi mtshan nyid ni gleng gzhi dang / bslab pa bcas pa dang / ltung ba rnam par gzhag pas rgyas par bstan te/ de la gleng gzhi ni yul dang / gang zag dang / nyon mongs pa dang / nyes pa'i gzhi'i bye brag gis rnam pa bzhi'o/ /bslab pa bcas pa ni 'jig rten dang 'gal ba dang / 'dul ba dang 'gal ba bzlog pa'i dbang gis rang bzhin gyis kha na ma tho ba dang bcas pa dang / bcas pa'i kha na ma tho ba dang bcas pa dgag pa'i ltung ba sde lnga'o/ /ltung ba rnam par gzhag pa ni bsam pa dang / sbyor ba'i sgo nas dngos gzhi dang / sbyor ba dang / sbyor ba'i sbyor ba ci rigs par rnam par gzhag pa'o/ /de la re zhig /mi tshangs spyod dang rku ba dang / /mi la gsad par mi bya dang / /brdzun du smra dang bcas pa yi/ /chos bzhi 'dir ni gsungs pa yin/ /zhes gsungs pa'i rim gyis pham par 'gyur ba'i chos bzhi po dag go rims bzhin du de bshad par bya'o/ /de la mi tshangs par spyod pa'i pham par 'gyur ba'i gleng gzhi ni bcas pa dang rjes su bcas pa'i dbang gis rnam pa gnyis te/ bcas pa'i gleng gzhi ni s angs rgyas bcom ldan 'das yul spong byed dag na ka lan da ka'i grong na bzhugs pa'i tshe ka lan da ka'i bu bzang byin bcom ldan 'das kyis legs par gsungs pa'i chos 'dul ba la skra dang kha spu bregs te gos ngur smrig dag bgos nas yang dag pa kho nar dad pas khyim nas khyim med par rab tu byung ste/ dgon pa'i spyil bu na 'dug par rang gi mas bslus nas des sngon gyi chung ma dang lhan cig mi tshangs par spyod pa 'khrig pa'i chos bsten te/ sa bon gyi chos gzhag pa'i skabs de dge slong rnams kyis bcom ldan 'das la gsol nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ bslab pa bcas pa'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang dge slong rnams dang lhan cig bslab pa mtshungs par gyur pas bslab pa ma phul bslab pa nyams par ma byas par mi tshangs par spyod pa 'khrig pa'i chos bsten na dge slong de pham par gyur pa yin gyi gnas par mi bya'o zhes bca' ba mdzad de/ yul ni spong byed/ gang zag ni bzang byin/ nyon mongs pa ni 'dod chags/ nyes pa ni mi tshangs par spyod pa'o/ /rjes su bcas pa'i gleng gzhi ni sangs rgyas bcom ldan 'das rgyal po'i khab 'od ma'i tshal na ka lan da ka'i gnas na gzhugs pa'i tshe dge slong zhig dgon pa'i spyil bu na 'dug pas dgon pa'i spra mo zhig zas kyis brngod brngod nas de dang lhan cig mi tshangs par spyod pa 'khrig pa'i chos bsten nas/ bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ bslab pa bca' ba'i phan yon bcu yang dag par gzigs nas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang dge slong rnams dang lhan cig bslab pa mtshungs par gyur pas bslab pa ma phul bslab pa nyams par ma byas par mi tshangs par spyod pa 'khrig pa'i chos bsten na tha na dud 'gro'i skyes gnas su skyes pa dang lhan cig kyang rung ste/ dge slong de pham par gyur pa yin gyi gnas par mi bya'o zhes rjes su bcas pa mdzad de/ yul ni rgyal po'i khab gang zag ni dge slong dgon pa pa/ nyon mongs pa ni 'dod chags/ nyes pa ni dud 'gro dang mi tshangs par spyod pa'o/ /de la bslab pa bca' ba'i phan yon bcu ni 'di lta ste/ dge 'dun bsdu ba'i phyir dang / dge 'dun legs par bya ba'i phyir dang / dge 'dun bde bar gnas par bya ba'i phyir dang / gnong mi bkur ba'i gang zag rnams tshar gcad pa'i phyir dang / ngo tsha shes pa rnams bde bar gnas par bya ba'i phyir dang / mngon par ma dad pa rnams mngon par dad par bya ba'i phyir dang / mngon par dad pa rnams phyir zhing 'byung bar bya ba'i phyir dang / tshe 'di'i zag pa rnams bsdam par bya ba'i phyir dang / tshe rabs phyi ma'i zag pa rnams bzlog pa'i phyir dang / nga'i tshangs par spyod pa skye bo mang po la phan pa yangs par gyur pa lha dang mi'i bar dag la yang dag par rab tu bstan pa yun rang du gnas par 'gyur ba'o zhes gsungs so/ /de la dge 'dun bsdu ba'i phyir zhes bya ba ni mdor bstan pa'i tshig yin te/ rigs bzhi po rgyal rigs dang / bram ze dang / rje'u rigs dang dmangs rigs dag dad pas legs pa kho nar khyim nas khyim med par rab tu byung ba rnams bsdu ba las brtsams pa yin no/ /dge 'dun legs par bya ba'i phyir zhes bya ba ni de ltar rab tu byung ba rnams la 'dod pa'i bsod nyams kyi rjes su brtson pa'i mtha' rnam par spong zhing gzhi dang bcas/ nges par 'byung ba dang bcas/ pha rol gnon pa dang bcas/ cho 'phrul dang bcas pa'i chos bstan pa rjes su 'jug pas dge 'dun legs par 'gyur bar rig par bya'o/ /dge 'dun bde bar gnas par bya ba'i phyir zhes bya ba ni bdag nyid ngal ba'i rjes su brtson pa'i mtha' rnam par spang ba'i phyir ro/ /de ni rnam pa lngas bde bar gnas par 'gyur te/ chos mi mthun pa'i gang zag rnam par bskrad pa dang / 'gyod pa skyes pa sel ba dang / yo byad rkyen du 'bab pa dag yod pa dang / nyon mongs pa'i kun nas dkris pa rnam par gnon pa dang / nyon mongs pa'i bag la nyal spong bas so/ /de la chos mi mthun pa'i gang zag rnam par bskrad pa ni gnong mi bkur ba'i gang zag rnams tshar gcad pa'i phyir zhes bya bas bstan te/ tshul khrims 'chal pa rnams la nan tur bya ba'i phyir ro/ /'gyod pa skyes pa sel ba ni ngo tsha shes pa rnams bde bar gnas par bya ba'i phyir zhes bya bas bstan te/ tshul khrims dang ldan pa rnams 'gyod pa med par bya ba'i phyir ro/ / yo byad rkyen du 'bab pa dag yod pa ni mngon par ma dad pa rnams mngon par dad par bya ba'i phyir dang / mngon par dad pa rnams phyir zhing 'byung bar bya ba'i phyir zhes bya ba tshig gnyis kyis bstan te/ ma zhugs pa rnams gzhug pa'i phyir dang / zhugs pa rnams yongs su smin par bya ba'i phyir ro/ /nyon mongs pa'i kun nas dkris pa rnam par gnon pa ni tshe 'di'i zag pa rnams bsdam pa'i phyir zhes bya bas bstan te/ nyon mongs pa'i kun nas dkris pa rnam par gnon pa dang rjes su mthun pa'i phyir ro/ /nyon mongs pa'i bag la nyal spong ba ni tshe rabs phyi ma'i zag pa rnams bzlog pa'i phyir zhes bya bas bstan te/ smon nas tshangs par spyod pa la gnas pa bsal bar bya ba'i phyir dang / nyon mongs pa'i bag la nyal spang ba dang rjes su mthun par bya ba'i phyir ro/ /de ltar rnam pa de dag gis dge 'dun bde bar gnas par 'gyur te/ dka' thub drag pos gdung ba rjes su bsrung ba'i phyir dang / phan tshun gnod pa rjes su bsrung ba'i phyir dang / sems la 'gyod pa rjes su bsrung ba'i phyir dang / yo byad kyis phongs pa rjes su bsrung ba'i phyir dang nyon mongs pa'i kun nas dkris pa rjes su bsrung ba'i phyir dang / log par smon pa rjes su bsrung ba'i phyir te go rims bzhin no/ /nga'i tshangs par spyod pa skye bo mang po la phan pa yangs par gyur pa lha dang mi'i bar dag la yang dag par rab tu bstan pa yun ring du gnas par 'gyur ba zhes bya ba ni bstan pa rgyun mi 'chad par 'gyur ba ste/ thob pa rnams bde bar gnas par 'gyur ba dang / ma thob pa ma zhugs pa rnams bde bar 'jug par 'gyur ba'i phyir ro/ /de la nga'i tshangs par spyod pa zhes bya ba ni bcom ldan 'das kyi chos 'dul ba mya ngan las 'das pa'i phyir spyod pa'o/ /skye bo mang po la phan pa zhes bya ba ni rgyal rigs la sogs pa'i rigs dang rus rnams la phan pa'i phyir ro/ /yangs par gyur pa zhes bya ba ni sems can gyi rigs de dag nyid gong nas gong du 'phel bar 'gyur ba las brtsams so/ /lha dang mi rnams kyi bar la zhes bya ba ni de dag nyid la mthu yod pa'i phyir yin gyi bcom ldan 'das kyi thugs rje nyi tshe bar gyur pa ni ma yin no/ /yang dag par rab tu bstan pa zhes bya ba ni ji lta ba bzhin du yod pa nyid dang / ji snyed yod pa nyid kyis so/ /phan yon bcu po de dag mdor bsdu na rnam pa bzhi ste/ dang po bsdu ba dang / legs par bsdu ba dang / bsdus pa rnams bde bar gnas par 'gyur ba dang / ma 'ongs pa ma bsdus pa rnams bde bar gnas par 'gyur ba'i thabs yongs su bstan pa yin te/ phan yon dang po dang / phan yon gnyis pa dang / bar ma bdun dang / tha ma go rims bzhin du sbyar ro/ /da ni bslab pa bcas pa'i yan lag gi don bshad par bya ste/ de la dge slong gang zhes bya ba la/ yang zhes bya ba ni yang las dang po pa la ltung ba med par bstan pa ste/ phyin chad gzhan gyis spyad na ltung bar 'gyur ba'o/ /dge slong zhes bya ba ni dge slong rnam pa bzhi po ming gi dge slong dang / khas 'che ba'i dge slong dang / slong ba'i phyir dge slong dang / nyon mongs pa bcom pa'i phyir dge slong dag ma gtogs pa gsol ba dang bzhi'i las kyis bsnyen par rdzogs pa'i dge slong ngo / /gang zhes bya ba ni bzang byin dang / dgon pa pa dang / gzhan yang de lta bu gang yang rung ba'o/ /dge slong rnams dang lhan cig ces bya ba ni de las gzhan pa chos mthun pa tshangs pa mtshungs par spyod pa rnams dang ngo / /bslab pa mtshungs par gyur pas zhes bya ba ni bslab pa gang la bsnyen par rdzogs nas lo brgya lon pa'i dge slong gis bslab par bya ba de la deng bsnyen par rdzogs pas kyang bslab par bya la/ deng bsnyen par rdzogs pas bslab pa gang la bslab par bya ba de la bsnyen par rdzogs nas lo brgya lon pas kyang bslab par bya'o zhes de la tshul khrims nyid kyis ma nyam pa dang / bslab pa nyid kyis ma nyam pa dang / so sor thar pa'i mdo gdon pa nyid kyis mnyam pa gang yin pas so/ /bslab pa ma phul zhes bya ba ni bslab pa ma phul bas bsten na ltung bar 'gyur gyi bslab pa phul ba la ni sdom pa med pas des bsten pa la ni ltung ba rnam par mi gzhag go/ /de la bslab pa dbul ba'i cho ga ni 'di lta ste/ dge slong 'dod pa'am/ mngon par mi dga' ba'am/ rnam par 'khyam 'dod cing dge sbyong gi tshul don du mi gnyer ba'am/ dge sbyong gi tshul gyis sgyid lug pa'am/ dmus byung pa'am/ the tshom za ba'am/ smod pa'am/ dge sbyong gi tshul yongs su gtong 'dod pa na dge slong ngam mi'i 'gro bar gtogs pa rang bzhin ma nyams pa don brda phrad par nus pa'i gan du song ste/ 'di skad ces tshe dang ldan pa dgongs su gsol/ bdag cag ming 'di zhes bgyi ba bslab pa 'bul lo zhe'am/ sangs rgyas sam/ chos sam/ dge 'dun nam/ mdo sde'am/ 'dul ba'am/ ma mo'am/ slob dpon nam/ mkhan po 'bul lo zhe'am/ bdag khyim pa gzung du gsol zhe'am/ dge tshul lam/ za ma'am/ ma ning ngam/ dge slong ma sun phyung ba'am/ rku thabs su gnas pa'am/ tha dad par gnas pa'am/ gnas par mi bya ba'am/ mu stegs can nam/ mu stegs can zhugs pa'am/ pha bsad pa'am/ ma bsad pa'am/ dgra bcom pa bsad pa'am/ dge 'dun gyi dbyen byas pa'am/ de bzhin gshegs pa la ngan sems kyis khrag phyung bar gzung du gsol zhe'am/ tha na 'di skad ces bdag khyod lta bu chos mthun par tshangs pa mtshungs par spyod pa dag dang lhan cig gnas pa'am/ longs spyod pas chog go zhes zer na 'bul lo zhes bya ba'i tshig de dag dang / gzung du gsol zhes bya ba'i tshig de dag dang / chog go zhes bya ba'i tshig de dag las gang yang rung ba zhig smras na yang des bslab pa phul ba yin no/ /de las bzlog pas ni bslab pa phul bar mi 'gyur ba'o/ /phul bar mi 'gyur ba'i rnam pa ni 'di lta ste/ dge slong khros shing khro ba'i zil gyis non pa dang / smyos pa dang / sems 'khrugs pa dang / tshor ba dag gis nyen pa la sogs pas rang bzhin nyams pa la phul na phul ba nyid ma yin no/ /nyan pa pos khros shing khro ba'i zil gyis non pa dang / smyos pa dang / sems 'khrugs pa dang / tshor ba dag gis nyen pa la sogs pas rang bzhin nyams pa la phul na phul ba nyid ma yin no/ /nyan pa po glen pa dang / lkugs pa dang / 'on pa dang / gnyid log pa dang / snyoms par zhugs pa dang / dbus pa'am/ mtha' 'khob pa'i skad dang / tha snyad brda mi phrad pa la sogs pas mi go ba nyid la phul na phul ba nyid ma yin no/ /dben par dben pa nyid dam/ mi dben par 'du shes pa dang / mi dben par dben pa nyid du 'du shes pas phul na phul ba nyid ma yin no/ /lha dang sprul pa dang / dud 'gro dang / gzugs brnyan la sogs pa mi ma yin pa'i 'gro ba la phul na phul ba nyid ma yin te/ bslab pa gtong ba'i sems med cing 'bul ba'i cho ga sngar bstan pa dag 'ga' la yang lus sam/ dag gi rnam par rig byed kyis go bar ma byas pa ni bslab pa ma phul ba zhes bya'o/ /bslab pa nyams par ma byas pa zhes bya ba ni bslab pa nyams par ma byas pas bsten na ltung bar 'gyur gyi/ bslab pa nyams par byas pa la ni sdom pa med pas des bsten pa dag la ltung ba rnam par mi gzhag go/ /de la bslab pa nyams par bya ba'i cho ga ni 'di lta ste/ dge slong 'dod pa'am/ mngon par mi dga' ba'am/ rnam par 'khyam 'dod cing dge sbyong gi tshul don du mi gnyer ba'am/ dge sbyong gi tshul gyis sgyid lug pa'am/ dmus byung ba'am/ the tshom za ba'am/ smod pa'am/ dge sbyong gi tshul yongs su gtong 'dod pa na dge slong ngam mi'i 'gro bar gtogs pa rang bzhin ma nyams pa don brda phrad par nus pa'i gan du song ste 'di skad ces tshe dang ldan pa mkhyen par mdzod cig / tshangs par spyod pa spyad dka'o/ /rab tu dben pa bya dka'o/ /gcig pu nyid la mngon par dga' bar dka'o/ /gnas mal dgon pa nags khrod dang ri drung dang bas mtha' dag tu gnas pa khong du chud par dka'o/ /gcig pu dgon par gnas pa sdug bsngal lo/ /pha ma dang phu nu dang bu sring dran no/ /bdag bzo dag slob tu chug shig /bdag gi las kyi mtha' dag tshol cig /bdag khyim bzang po dag tu gtod cig ces bya ba'i ngag dang tshig dang tha snyad dang skad dang / brjod pa dang nges pa'i tshig dang / tshig gi lam dang tshig gi sgra dang ngag gi las dang ngag gi rnam par rig byed gang yin pa dag rjod par byed na des bslab pa nyams par byas pa yin no/ /de las bzlog pas ni bslab pa nyams par byas par mi 'gyur ro/ /bslab pa phul ba dang bslab pa nyams par bya ba gnyi ga la sdom pa med pa nyid dang 'dra ste/ bslab pa phul bas ni bslab pa gtong ba'i sgo nas sdom pa med par byas la/ bslab pa phul bas nyams par byas pas ni bslab pa'i yul mthu med par byas pa'i sgo nas sdom pa med par byas pa yin no/ /de la bslab pa phul la bslab pa nyams par ma byas pa yang yod/ bslab pa nyams par byas la bslab pa ma phul ba yang yod/ bslab pa nyams par yang byas la bslab pa phul ba yang yod/ bslab pa ma phul la bslab pa nyams par ma byas pa yang yod do/ / de la mu dang po ni bslab pa dbul ba bslab pa nyams par bya ba med par byed pa ste/ rgyu ma bstan pa'i phyir yongs su rdzogs pa ma yin pas bslab pa phul la bslab pa nyams par ma byas pa zhes mu dang por gzhag par zad kyi/ bslab pa phul la bslab pa nyams par ma byas su zin kyang de la dge slong gi dngos po nyid med do/ /mu gnyis pa ni bslab pa nyams par bya ba bslab pa dbul ba med par byed pa ste/ de ni 'bras bu ma bstan pa'i phyir yongs su rdzogs pa ma yin pas bslab pa nyid nyams par byas la bslab pa ma phul ba zhes mu gnyis par gzhag par zad kyi/ bslab pa ma phul la bslab pa nyams par byas na bslab pa ma phul du zin kyang de la yang dge slong gi dngos po nyid med do/ /mu gsum pa ni dge slong gi dngos po med pa nyid gang yin pa de'i rgyu yang bstan la 'bras bu yang bstan pa'i phyir y ongs su rdzogs pa yin pas bslab pa nyams par yang byas na bslab pa phul ba zhes mu gsum par gzhag ste de la yang dge slong gi dngos po nyid med par 'gyur ba'i rgyu de gnyis ka yang ma byas pas de la ni dge slong gi dngos po nyid yod pa yin pas bslab pa ma phul zhing bslab pa nyams par ma byas pa zhes mu bzhi par rnam par gzhag go/ /mu bzhi po de dag las dang po gsum pa ni dge slong gi dngos po nyid med la/ mu bzhi pa la ni dge slong gi dngos po nyid yod pas de'i phyir 'dir bslab pa ma phul ba bslab pa nyams par ma byas par zhes mu bzhi pa nyid smos so/ /mi tshangs par spyod pa zhes bya ba ni gnyis kyis gnyis sprad pa'o/ /'khrig pa zhes bya ba ni mi tshangs par spyod pa gang yin pa de 'khrig pa yang yin te/ gnyis kyis gnyis sprod pa las mi tshangs par spyod pa zhes bya ba'i chos de byung ba'i phyir ro/ /chos zhes bya ba ni chos ma yin pa de chos kyi sgrar gsungs pa'o/ /bsten nas zhes bya ba ni byas na'o/ /tha na dud 'gro'i skye gnas su skyes pa dang / lhan cig kyang rung ste zhes bya ba ni spra mo'am gzhan yang de lta bu gang yin pa dang lhan cig mi tshangs par spyod pa 'khrig pa'i chos bsten kyang rung ste'o/ /dge slong zhes bya ba ni gang la dge slong gi dngos po yod pa'o/ /dge slong gi dngos po gang zhe na/ gsol ba dang bzhi'i las mi g.yo ba gzhag par mi 'os pas bsnyen par rdzogs pa'i sdom pa'o/ /de zhes bya ba ni nye bar bstan pa dang / kun du bstan pa'i tshig bla dgas de'o/ /pham par gyur pa yin gyi zhes bya ba ni de mthar gyur pa dang ltung ba dang dman pa dang mjug na 'dug pa dang tha chad dang yid dang mi mthun pa yin pa'o/ /yang gang gis ltung ba de byas ma thag tu 'di lta ste dper na shing ta la'i mgo bcad na sngon por 'gyur du mi rung la/ 'phel zhing rgyas pa dang yangs par 'gyur du mi rung ba de bzhin du dge slong gi gnas pa de lta bu byas na byas ma thag tu dge slong du mi rung bar 'gyur/ dge sbyong du mi rung / shAkya'i sras kyir mi rung / dge sbyong gi dngos po las nyams par 'gyur te/ de'i dge sbyong gi tshul zhig par 'gyur zhing / nyams pa/ bcom pa/ ltung ba/ pham par gyur pa ste/ de'i dge sbyong gi tshul phyir bslang du med par 'gyur la des na pham par 'gyur ba yin gyi zhes gsungs te/ gzhan rgyal bar byed du 'jug pa'i nyes pas pham par gyur te ltung ba byung bar gyur ces bya ba'i tha tshig go/ /gnas par mi bya'o zhes bya ba ni dge slong rnams kyis de dang gso sbyong dang / dgag dbye dang / gsol ba dang / gsol ba dang gnyis dang / gsol ba dang bzhi'i las la gnas par mi bya ba dang / de gang zag bcu gnyis po gnas khang bsko ba dang / zas la bsko ba dang / thug pa 'brim pa dang / bag chos 'brim pa dang / phran tshegs 'brim pa dang / snod spyad 'drub pa dang / snod spyad 'gyed pa dang / gos sbed pa dang / gos bged pa dang / dbyar gyi ras chen bged pa dang / mngag gzhug pa dang / mdzes chos zhes bya ba dag tu bsko bar mi bya ba ste/ des na gnas par mi bya'o zhes gsungs so/ /de la ltung ba ji ltar 'gyur zhe na/ ltung ba rnam par gzhag pa ni bsam pa dang / sbyor ba'i sgo nas dngos gzhi dang / sbyor ba dang sbyor ba'i sbyor ba ci rigs par rnam par gzhag par bya ste/ 'dir ni dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni bcug reg nyams su myong bar byas na pham par 'gyur ro/ /de'i bye brag ni dge slong gis rang gi ston par byed pa zag byed ma nyams pa bsten par bya ba rang gi dang gzhan gyi dang / mi'i dang 'gro ba gzhan du gtogs pa'i dang / pho'i dang mo'i dang ma ning gi dang / ro'i zag byed dam/ kha'am/ bshang ba'i lam ci rigs par ma nyams par bcug pa dang / rang gi bsten par bya ba ma nyams par de dag ci rigs pa'i sten par mi byed pa ma nyams par bcug pa'i reg pa nyams su myong bar byas na pham par 'gyur ro/ /mi dang 'gro ba gzhan du gtogs pa dang dud 'gro la na smad pa med do/ / rang dang gzhan la na smad pa med do/ /pho dang mo dang ma ning la na smad pa med do/ /gson po dang rol na smad pa med do/ /zag byed dang kha dang bshang ba'i lam la na smad pa med do/ /bsten par bya ba dang sten par byed pa g.yogs ma srab mo can la na smad pa med do/ /gzhan gyis ma tshor ba dang gzhan rang bzhin nyams pa la na smad pa med do/ /bdag dang gzhan mi 'dod bzhin du bcug pa la na smad pa med do/ /phyi rol du 'drud cing nang du ldugs pa dang / nang du smyugs shing phyi rol du dbo ba la na smad pa med do/ /bgrod par bya ba phyed bcad pa nyid la na smad pa med do/ /bsten par bya ba'i dbus dbye ba'i mtshams 'byor par mi mngon pa la na smad pa med do/ /shing dang rdo ba dang gos las bu mo'i gzugs byas pa la brtsal ba na yan lag thams cad du reg pa bsten na na smad pa med do/ /mdun ma dang phyi ma gnyis gang du brtsams pa de las gzhan du gtugs pa la na smad pa med do/ /sgo gsum gyi lam gcig tu brtsams nas lam lhag ma rnams su brtsal bar bya'o snyam pa la na smad pa med do/ /bdag ma nyams par nyams pa'o snyam pa'i bsam pa can la na smad pa med do/ /nad dang dbral bar bya ba'i don nyid la na smad pa med do/ /sgo gsum gyi lam la lam ma yin par 'du shes pa dang / yid gnyis za ba la na smad pa med do/ /rang bzhin gyis las su rung ba nyid yin na na smad pa med do/ /dge slong 'gro ba gzhan gyi rnam pa bsten pa na dge slong gi 'du shes yod pa la na smad pa med do/ /dngos po bzang ngan dang 'dra ba la na smad pa med do/ /mtshan gyur pa ltung ba thun mong gi yul la na smad pa med do/ /'gro ba gzhan las skyes pa dang 'gro ba gzhan gyi rnam pa bsten pa la na smad pa med do/ /gnas skabs gzhan thob pa la na smad pa med do/ /gzhi gcig la bslab pa du ma bcas pa nyid la na smad pa med do/ /dngos po la the tshom za bas bsam pa dang bcas pas zhugs pa la na smad pa med do/ /yul bsams pa dang ma bsams pa la na smad pa med do/ /rang dang gzhan gyi don du byed pa la na smad pa med do/ /dge slong gi dngos por mi shes na rang bzhin gyis nyams pa yin no/ /'di'i byed pa po ni mi dang 'gro ba gzhan dang dud 'gro pho dang mo dang ma ning dang / gson po dang / shi ba'i zag byed dang / kha dang bshang ba'i lam ma nyams pa mi tshangs par spyod pa 'khrig pa'i chos bsten du rung ba'o/ / 'di la yan lag bzhis dngos gzhi'i ltung bar 'gyur te/ bsten du rung ba dang / ma nyams pa dang / dang po'i phyogs su nor bu 'das pa dang / reg pa nyams su myong ba'o de dag las yan lag ma tshang na ci rigs par na smad do/ /bsten du rung ba ni mi tshangs par spyod par 'khrig pa'i chos bsten du rung ba ste/ bsten du mi rung ba ni ma nyams su zin kyang de la dang po'i phyogs su nor bu 'das pa dang / reg pa nyams su myong ba med pas nyes pa sbom po'o/ /ma nyams pa ni sten par byed pa dang bsten par bya ba ma nyams pa ste/ nyams na bsten du rung ba yin yang de la reg pa nyams su myong ba med pas nyes pa sbom po'o/ /dang po'i phyogs su nor bu 'das pa ni rma'i sgo gsum po dag gi dang po'i phyogs su sten par byed pa'i nor bu mthe bong gi rnam pa lta bu 'das pa'o/ /der de ma 'das na bsten du rung ba dang ma nyams pa yin du zin kyang reg pa nyams su myong ba yongs su rdzogs par mi 'gyur bas nyes pa sbom po'o/ /reg pa nyams su myong ba zhes bya ba ni bcug reg nyams su myong bas de med na snga ma gsum yod kyang nyes pa sbom por 'gyur ro/ /reg pa nyams su myong ba yod na ni yan lag gong ma gsum yang gdon mi za bar yod pas 'di ni dngos gzhi'i yan lag yin no/ /sbyor ba'i ltung ba rnam par gzhag pa ni mi tshangs par spyod pa'i sbyor bas bgrod par bya ba la nom par byed nyug par byed la ji srid du bcug reg nyams su myong bar mi byed kyi bar du nyes pa sbom por 'gyur ro/ /bsten par bya ba dang sten par byed pa bsten du mi rung ba dang nyams pa dang / dang po'i phyogs su nor bu ma 'das pa dang reg pa nyams su ma myong ba dag la nyes pa sbom po'o/ /mgo bcad pa'i khar bcug na nyes pa sbom po'o/ /gzhan gyi bsten par bya ba lus las tha dad par byed pa dag tu rang gi sten par byed pa lus las tha dad par ma byas pa 'jud na nyes pa sbom po'o/ /rang dang gzhan gyi sten par byed pa lus las tha dad par byas pa dag tu rang gi bsten par bya ba lus las tha dad par ma byas pa dag tu 'jud na nyes pa sbom po'o/ /gzhan gyi bsten par byed pa lus las tha dad par ma byas pa dag tu 'jud na nyes pa sbom po'o/ /gzhan gyi bsten par bya ba dang sten par byed pa lus las tha dad par byas pa dang ma byas pa sbyor ba byas na nyes pa sbom po'o/ /rma'i sgo gsum las gzhan pa'i bu ga lus las tha dad par byas pa dang ma byas par 'jud na nyes pa spom po'o/ /bsten par bya ba ma ning mo sbubs med pa la sbyor na nyes pa spom po'o/ /mchu gnyis la sbyor na nyes pa sbom po'o/ /so'i phyi rol tshun chad du sbyor na nyes pa sbom po'o/ /ci yang rung ba'i snod du 'jud na nyes pa sbom po'o/ /sten par byed pa lta ba dang mi reg par 'jud na nyes pa sbom po'o/ /bsten pa'i phyir gzhan la khas blangs na nyes pa spom po'o/ /bsten par bya bar ma chud pa dang / chud par bya ba'i phyir rma'i sgo ma nyes na nyes pa sbom po'o/ /'jud pa na skrag pa dang ngo tsha bas kun du 'dod chags ma skyes na nyes pa sbom po'o/ /yan lag gi rnam pa rdol ba'i phyir ro ma myangs na nyes pa sbom po'o/ /las su mi rung ba bcug na nyes pa sbom po'o/ /spyad du mi bzod pa chung ngu la sten par byed na nyes pa sbom po'o/ /sprad pa'i g.yo ba yid tsam myong na nyes pa spom po'o/ /shing dang rdo ba dang gos las bu mo'i gzugs byas pa la brtsal ba na gal te dbang po tsam dod par 'jud na nyes pa sbom po'o/ /bsten pa'i don du rtsol bas yan lag gi rnam par rkang pa 'jud na nyes pa sbom po'o/ /bsten par bya ba la yan lag gi rnam pas reg pa tsam byed na nyes pa sbom po'o/ / bdag dang bsten pa'i phyir ram gzhan bsten du gzhug pa'i phyir bsgo na nyes pa sbom po'o/ /sgo gsum gyi lam ma yin pa la lam du 'du shes pa dang yid gnyis za na nyes pa spom po'o/ /rtsom pa na zag byed dang kha dang bshang ba'i lam du lag pa la sogs pas 'tshir na nyes pa sbom po'o/ /zag byed dang kha dang bshang ba'i lam du mthe bong dang ba so la sogs pa 'jud na nyes pa sbom po'o/ /mi tshangs par spyod pa'i don du nye bar 'gro ba la khu ba shor na nyes pa sbom po'o/ /bsten par bya ba'i dbus su byed pa'i mtshams 'byor par mngon pa la rtsol na nyes pa spom po'o/ /dge slong 'gro ba gzhan gyi rnam pa bsten pa ni dge slong gi 'du shes med pa la nyes pa spom po'o/ /dge slong gi skyes pa'i phyir lus bkan na nyes pa sbom po'o/ /dngos gzhi la sbyor ba tha dad pa ji snyed byas pa re re la nyes pa sbom po re rer 'gyur ro/ /sbyor ba'i sbyor ba'i ltung ba rnam par gzhag pa ni mi tshangs par spyod pa'i sbyor ba'i phyir khri las ldang ba la sogs pa nas ji srid du bgrod par bya ba la nom par mi byed nyug par mi byed kyi bar du nyes byas su 'gyur ro/ /sbyor ba'i ltung ba ji skad bsten pa de dag re re la sbyor ba'i sbyor ba gcig na nyes byas gcig tu 'gyur ro/ /sbyor ba'i sbyor ba tha dad na re re la nyes byas re rer 'gyur ro/ /ltung ba med pa ni rdos pa bud med kyi steng du 'gyel ba la ltung ba med do/ /mi 'dod bzhin du bud med nyam thag pas mgul nas 'khyud na nyes pa med do/ /mi 'dod bzhin du mchur bud med kyi mchus reg pa la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni yul thams cad la gnas skabs thams cad du mi tshangs par spyod pa'i sbyor ba'i sbyor ba nyes byas dang / sbyor ba sbom po dang / dngos gzhir gyur pa rnam pa thams cad du bsten par mi bya bar bslab par bya'o/ /ma bsrungs par nyin mo glos phab ste gnyid log par mi bya'o/ /gong du bud med kyis brjod pa der 'gro bar mi ba'o/ /gong du mi ma yin pas gnod pa phyis brtsam pa der 'gro bar mi bya'o/ /khyi'i mdun du zag byed phyung ste gci bar mi bya'o/ /gang du srog gi bar chad 'byung ba'i dgon pa der gnas par mi bya'o/ /gang na yan lag gi rnam pa 'dzin pa'i 'jigs pa yod pa'i chu klung der sgren mor rgal bar mi bya'o/ / gru rgal ba dang ba lang gi nang du 'gro ba dang khron pa brtag pa dang bsod snyoms la 'gro ba na bud med la mi reg par shes bzhin du bya'o/ /rab tu byung ba dag legs par brtags te bud med ma yin pa nye bar gzhag par bya'o/ /'dod chags shas che bas 'dzag snod bcang bar bya'o/ / de la phyir bcos pa ni pham par 'gyur ba'i sbyor ba'i sbyor ba'i nyes byas dang / sbyor ba sbom po dang / dngos gzhi mthol ba dang / bshags pa dang / gnyis kyis ltung ba las slar bslang bar bya'o/ /de la pham par 'gyur ba'i sbyor ba'i sbyor ba nyes byas phyir bcos pa ni de la bsdam par bya ba'i nyes byas yin na ni gzhan la mthol ba dang / bshags pa mi dgos par rang gi yid kyis ltung ba sngar mthol ba dang phyin chad bsdams pas snga ma 'gyod pa dang phyin chad mi bya'o snyam du bsdams pa byas na ltung ba las ldang ngo / /bshags par bya ba'i nyes byas yin na ni gzhan la mthol ba dang bshags pas phyir bcos par bya dgos so/ /de la bsdam par bya ba'i nyes byas ni bshags par bya ba'i nyes byas kyi phyogs su gtogs pa'i yid kyi nyes byas zhes bya ste dper na mi tshangs par spyod pa'i don du yid kyi rtsol ba la sogs pa lta bu'o/ /bshags par bya ba'i nyes byas ni lus dang ngag gis sbyor ba'i sbyor ba ji skad bstan pa rnams so/ /bshags par bya ba'i nyes byas mthol ba dang / bshags pa'i cho ga ni dge slong gis ltung ba bcab par mi bya ste pham par 'gyur ba'i sbyor ba'i sbyor ba nyes byas b shags par bya ba gang yang rung ba rgyud na bcab pa'i sems gcig tsam gyis kyang bcab par mi bya bar de snyed kyi mod la mchil lham gnyis phud nas dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba dang ming dang rigs las mi mthun pa gcig gi mdun du tsog pur 'dug ste thal mo sbyar ba btud nas ltung ba'i sde tshan gyi ming dang rigs gang byung ba smos te cig car mthol ba dang bshags pa byar rung ngo / /de'i sngags ni 'di yin te/ tshe dang ldan pa dgongs su gsol/ bdag dge slong ming 'di zhes bgyi ba la ltung ba pham par 'gyur ba'i sde tshan las rigs 'di zhes bgyi ba'i sbyor ba'i sbyor ba che ge mo las gyur pa'i nyes byas byung ste/ bdag dge slong ming 'di zhes bgyi ba ltung ba de tshe dang ldan pa'i mdun du mthol lo mi 'chab bo 'chags so/ /mthol zhing bshags na bdag bde ba la reg par gnas par 'gyur gyi/ ma mthol ma bshags na ni mi 'gyur ro zhes lan gsum bzlas/ nyan pa pos ltung ba mthong ngam zhes smra zhing / 'chags pas mthong ngo zhes brjod par bya/ nyan pas phyin chad sdom mam zhes smra zhing 'chags pas sdom mo zhes lan gsum bzlas/ de'i rjes la nyan pas thabs yin no zhes brjod par bya zhing 'chags pas legs so zhes brjod par bya ste/ de tsam gyis na ltung ba las ldang ngo / /de'i mod la gang la mthol zhing bshags par bya ba'i gang zag med na skya rengs ma shar gyi bar du 'chab pa'i nyes pa med do/ /ji srid du gang la mthol zhing bshags par bya ba'i gang zag ma rnyed pa de srid du skya rengs shar kyang ma mthol ma bshags pa la 'chab pa'i nyes pa med do/ /gang la mthol zhing bshags par bya ba'i gang zag med na skya rengs ji srid du gang la mthol zhing bshags par bya ba'i gang zag ma rnyed pa de srid du mthol zhing bshags pa'i sems med pa la 'chab pa'i nyes pa med do/ /gang la mthol zhing bshags par bya ba'i gang zag yod du zin kyang rkyen 'ga' zhig gis bdag nyid der 'gro ba'i skabs med dam/ bdag nyid gnas de nas gzhan du song bar gyur na de'i bar du mthol zhing bshags pa'i sems med pa la 'chab pa'i nyes pa med do/ /gang la mthol zhing bshags par bya ba'i gang zag yod du zin kyang ltung ba byung ba de 'di snyam du gal te de'i gan du song la ma brjod na 'chab pa'i nyes par 'gyur du dogs pas de'i dbang gis der mi 'gro ba'am gzhan du song bas brjod pa ma byas pa la yang 'chab pa'i nyes pa med do/ /rkyen cis kyang ma bskal par de'i gan du mi 'gro ba dang gzhan du 'gro ba dang skya rengs kyi mdun rol du mi mthol ba dang / 'chab pa'i sems bskyed pa dag ni nyes byas so/ /gang la mthol zhing bshags par bya ba'i gang zag dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa med na chos 'di pa gcig la je mthol la/ de'i 'og tu dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa gcig gi mdun du bshags par bya'o/ /ltung ba ming las mi mthun pa'i gang zag med na ltung ba rigs las mi mthun pa'i mdun du bshags par bya'o/ /'dir ming ni ltung ba'i sde tshan no/ /rigs ni ltung ba gang byung ba'o/ /chos 'di pa zhes bya ba ni dge slong dang bslab pa byin pa dang / dge slong ma dang / dge tshul dang / dge tshul ma dang / dge bsnyen dang / dge bsnyen ma dang / khyim pa de bzhin gshegs pa'i lta ba can mtshams kyi nang na 'dug pa dang / lta ba mi mthun pa mtshams gzhan gyi nang na 'dug pa dag go/ /'dir de dag gi rnam par gzhag pa ni/ mtshan mi mthun par bsnyen par rdzogs pa la mthol na bcabs par ni mi 'gyur la nyes byas su ni 'gyur ro/ /bsnyen par ma rdzogs pa dag la mthol na bcabs par ni mi 'gyur la gnas ngan len rig par byed pa las ni ltung byed du 'gyur ro/ /gnas ngan len ma yin par rig par byed pa las ni nyes byas su 'gyur ro/ /chos 'di pa de dag gang yang rung ba mtshams gzhan na 'dug pa dang lta ba mi mthun pa la mthol na bcabs par mi 'gyur la/ nyes byas su ni 'gyur ro/ /dge slong bsnyen par rdzogs pa rang bzhin du gnas pa ma yin pa la mthol na yang bcabs par mi 'gyur la nyes byas su ni 'gyur ro/ /dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las/ mthun pa la mthol na yang bcabs par ni mi 'gyur la nyes byas su ni 'gyur ro/ /dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa la mthol na bcabs par yang mi 'gyur la ltung bar yang mi 'gyur te/ 'og ma gzhan dag la yang de bzhin no/ /ltung ba mthol ba la spyir bstan pa ni mthol ba'i sngags rdzogs par bya'o/ /mthol ba'i sngags ril gyis brjod ma nus na tha na ming ngam rigs gcig go bar byas na yang mthol bar 'gyur ro/ /bshags pa'i sngags ni rdzogs par brjod dgos so/ /nyes byas mthol ba las ni ming dang rigs ma brjod par bdag la ltung ba byung ngo zhe'am/ bdag gis kha na ma tho ba byas so zhes bya ba rnam pa gang yang rung bas rig par byas na yang rung ngo / /pham par 'gyur ba'i dngos gzhi ma gtogs pa sbyor ba dang nyes byas la sogs pa ltung ba gzhan thams cad la yang bcabs pa yod na sngar bcabs pa'i nyes pa phyir bcos par bya zhing phyis ltung ba nyid phyir bcos par shes par bya'o/ / bcabs pa'i nyes pa phyir bcos pa ni ltung ba ming dang rigs gang byung ba dang / ji srid bcabs pa de gnyis je mthol bar bya'o/ /dge 'dun lhag ma la ni bcabs pa'i nyes pa yod na spo ba zhes bya ba'i las kyis de med par bya dgos te/ de ni 'og nas ston to/ /mthol ba dang bshags par bya ba'i skabs yod bzhin du mi mthol mi 'chags na zhag re la nyes byas re rer 'gyur ro/ /gang la mthol ba'i gang zag dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa yod na chos 'di pa gzhan la mthol bar mi bya'o/ /bshags pa ni chos 'di pa gzhan la rnam pa thams cad du mi bya'o/ /pham par 'gyur ba'i sbyor ba nyes pa sbom po'i phyir bcos pa yang mthol ba dang bshags pa gnyis kyis nyes pa sbom po'i ltung ba las bslang ba ste/ de la mthol ba ni dge slong gis kha na ma tho ba bcab par mi bya ste/ pham par 'gyur ba'i ltung ba bzhi po sbyor ba'i nyes pa sbom po lci ba dang yang ba gang yang rung ba byung ba na bcab pa'i sems cig tsam gyis kyang bcab par mi bya bar de nyid kyi mod la mchil lham gnyis phud nas d ge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa gcig gi mdun du tsog pur 'dug ste thal mo sbyar ba btud nas ltung ba'i sde tshan gyi ming dang gang byung ba'i rigs smos te mthol bar bya'o/ /de'i sngags ni 'di yin te/ tshe dang ldan pa dgongs su gsol/ bdag dge slong ming 'di zhes bgyi ba la ltung ba pham par 'gyur ba'i sde tshan las rigs 'di zhes bgyi ba'i sbyor ba che ge mo las gyur pa'i nyes pa spom po byung ste/ bdag dge slong ming 'di zhes bgyi ba ltung ba de tshe dang ldan pa'i mdun du mthol lo/ /mi 'chab bo/ /mthol na bdag bde ba la reg par gnas par 'gyur gyi/ ma mthol na ni mi 'gyur ro zhes lan gsum bzlas/ de'i rjes la nyan pas thabs yin no zhes brjod par bya/ mthol bas legs so zhes brjod par bya ste/ de tsam gyis na mthol ba yin no/ /de'i mod la gang la mthol bar bya ba'i gang zag med na skya rengs ma shar gyi bar du 'chab pa'i nyes pa med do/ /ji srid du gang la mthol bar bya ba'i gang zag ma rnyed pa de srid du skya rengs shar kyang ma mthol ba la 'chab pa'i nyes pa med do/ / gang la mthol bar bya ba'i gang zag med na ji srid du gang la mthol bar bya ba'i gang zag ma rnyed pa de srid du mthol ba'i sems med pa la 'chab pa'i nyes pa med do/ /gang la mthol bar bya ba'i gang zag yod du zin kyang rkyen 'ga' zhig gis bdag nyid der 'gro ba'i skabs med dam/ bdag nyid gnas de nas gzhan du song bar gyur na de'i bar du mthol ba'i sems med pa la 'chab pa'i nyes pa med do/ /gang la mthol bar bya ba'i gang zag yod du zin kyang ltung ba byung ba de 'di snyam du gal te de'i gan du song la ma brjod na 'chab pa'i nyes par 'gyur du dogs pas de'i dbang gis der mi 'gro'am/ gzhan du song bas brjod pa ma byas pa la yang 'chab pa'i nyes pa med do/ /rkyen cis kyang ma bskal par de'i gan du mi 'gro ba dang / gzhan du 'gro ba dang / skya rengs kyi mdun rol du mi mthol ba dang / 'chab pa'i sems bskyed pa dag ni nyes byas so zhes bya ba yang snga ma bzhin no/ /gang la mthol bar bya ba'i gang zag dge slong bsnyen par rdzogs pa rang bzhin du gnas pa'i lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa med na chos 'di pa sngar bstan pa dag la mthol na yang mthol ba nyid yin te/ de dag gi rnam par gzhag pa yang snga ma bzhin no/ /ltung ba mthol ba sngar bstan pa yang snga ma bzhin te/ mthol ba'i sngags rdzogs par bya'o/ /mthol ba'i sngags ril gyis brjod ma nus na yang tha na ming ngam/ rigs gcig go bar byas na yang mthol bar 'gyur te/ 'dir yang ming ni ltung ba'i sde tshan no/ /rigs ni ltung ba gang byung ba'o/ /de ltar ltung ba'i sbyor ba mthol na sbyor ba des sbyor ba nyes byas ni logs shig tu mthol mi dgos so/ /de ltar mthol nas bshags pa ni pham par 'gyur ba'i nyes pa sbom po'i lci ba ni mtshams gang na dge slong drug yan chad 'dug pa'i dge slong gud du ma bcad pa thams cad la bshags par bya ste/ gang na dge slong drug tu ma longs pa'i gnas su bshags su mi rung ngo / /der gnas gzhan nas dge slong dag gnyer te drug yan chad du kha bskang ba la ni bshags su rung ngo / /dge slong drug yan chad gnas par dge slong gzhan gzhag ste/ drug yan chad logs shig tu bcad pa la yang bshags su rung ste/ drug yan chad gnas de na dge slong ji snyed cig gnas pa thams cad la bshags par bya dgos so/ pham par 'gyur ba'i nyes pa sbom po yang ba ni mtshams gang na dge slong bzhi yan chad 'dug pa'i dge slong gud du ma bcad pa thams cad la bshags par bya ste/ gang na dge slong bzhir ma longs pa'i gnas su bshags su mi rung ngo / /der gnas gzhan nas dge slong dag gnyer te bzhi yan chad du kha bskang ba la ni bshags su rung ngo / /dge slong bzhi yan chad gnas par dge slong gzhan gzhag ste bzhi yan chad logs shig tu bcad pa la yang bshags su mi rung ste/ bzhi yan chad gnas de na dge slong ji snyed gnas pa thams cad la bshags par bya dgos so/ /des na pham par 'gyur ba'i nyes pa spom bo lci ba ni mtshams kyi nang du dge slong drug la sogs pa thams cad kyi mdun du bshags par bya ba kho na yin no/ / pham par 'gyur ba'i nyes pa sbom po yang ba ni mtshams kyi nang yang rung phyi rol yang rung ste/ dge slong bzhi la sogs pa thams cad kyi mdun du bshags su yang rung ngo / /pham par 'gyur ba'i nyes pa sbom po lci ba dang yang ba ji ltar shes par bya zhe na/ kha na ma tho ba che ba ni lci ba yin la/ kha na ma tho ba chung ba ni yang ba yin te/ kha na ma tho ba che ba dang chung ba nyid ni yul dang bsam pa shas che chung nyid las shes par bya ste/ dper na bsten du mi rung ba dang nyams pa la rtsol ba ni yang ba yin la/ de bzhin du rtswa dang phub ma la sogs pa rku ba yang yang ba yin la/ sprul pa gsod pa dang skra can 'tshong ba dag kyang yang ba yin/ nor ba dang gzhogs smos byed pas brdzun smra ba la sogs pa yang yang ba yin no/ /bsten du rung ba dang ma nyams par bcug la reg pa nyams su myong ba ni lci ba yin la/ de bzhin du yan lag ma tshang ba'i rdzas mang po rku ba yang lci ba yin/ gsod pa la 'jug pa dang du len pa la sogs pa yang lci ba yin/ rdul khrod kyi sha za zhi gnas kyi rgyu mtshan la sogs pa yang lci ba yin no/ /de la pham par 'gyur ba'i nyes pa spom po lci ba bshags pa'i cho ga dang sngags ni mtshams kyi nang du dge slong bsnyen par rdzogs pa rang bzhin du gnas pa lta ba dang mtshan mthun pa ltung ba ming dang rigs las mi mthun pa drug yan chad ji snyed 'khod pa bsdus nas mchil lham gnyis phud de bla gos phrag pa gcig tu byas nas rgan rims la phyag 'tshal te/ rgan pa'i mtha' logs su tsog pur 'dug nas thal mo sbyar ba btud de 'di skad ces brjod par bya'o/ /tshe dang ldan pa dag dgongs su gsol/ bdag dge slong ming 'di zhes bgyi ba la ltung ba pham par 'gyur ba'i sde tshan las rigs 'di zhes bgyi ba'i sbyor ba che ge mo las gyur pa'i nyes pa sbom po lci ba byung ste/ bdag dge slong ming 'di zhes bgyi ba ltung ba de tshe dang ldan pa dag gi mdun du 'chags so/ /bshags na bdag bde ba la reg par gnas par 'gyur gyi ma bshags na ni mi 'gyur ro zhes lan gsum du bzlas/ nyan pa rnams las rgan pa gcig gis ltung ba mthong ngam zhes smra zhing / 'chags pas mthong ngo zhes brjod par bya'o/ /nyan pas phyin chad sdom mam zhes smra zhing / 'chags pas sdom mo zhes brjod par bya ste/ de bzhin lan gnyis lan gsum du bzlas/ de'i rjes la nyan pas thabs yin no zhes brjod par bya/ 'chags pas legs so zhes brjod par bya ste/ de tsam gyis na pham par 'gyur ba'i nyes pa sbom po lci ba las ldang ngo / /pham par 'gyur ba'i nyes pa sbom po yang ba bshags pa'i cho ga dang sngags ni mtshams kyi nang ngam phyi rol du yang rung ste/ dge slong bsnyen par rdzogs pa rang bzhin du gnas pa lta ba dang / mtshan mthun pa ltung ba ming dang rigs mi mthun pa bzhi yan chad ji snyed 'khod pa bsdus nas mchil lham gnyis phud nas bla gos phrag pa gcig tu byas nas rgan rims la phyag 'tshal te/ rgan pa'i mtha' logs su tsog pur 'dug nas thal mo sbyar ba btud de 'di skad ces brjod par bya'o/ /tshe dang ldan pa dag dgongs su gsol/ bdag dge slong ming 'di zhes bgyi ba la ltung ba pham par 'gyur ba'i sde tshan las rigs 'di zhes bgyi ba'i sbyor ba che ge mo las gyur pa'i nyes pa sbom po yang ba byung ste/ bdag dge slong ming 'di zhes bgyi ba ltung ba de tshe dang ldan pa dag gi mdun du 'chags so/ /bshags na bdag bde ba la reg par gnas par 'gyur gyi ma bshags na ni mi 'gyur ro zhes lan gsum du bzlas/ nyan pa rnams las rgan pa gcig gis ltung ba mthong ngam zhes smra zhing 'chags pas mthong ngo zhes brjod par bya/ nyan pas phyin chad sdom mam zhes smra zhing / 'chags pas sdom mo zhes brjod par bya'o/ /de bzhin du lan gnyis lan gsum du bzlas/ de'i rjes la nyan pas thabs yin no zhes brjod par bya/ 'chags pas legs so zhes brjod par bya ste/ de tsam gyis na pham par 'gyur ba'i nyes pa spom po yang ba las ldang ngo / /de ltar nyes pa sbom po bshags na de'i sbyor ba'i nyes byas ni logs shig tu bshags mi dgos so/ /pham par 'gyur ba'i dngos gzhi phyir bcos pa yang mthol ba dang bshags pa gnyis kyis pham par 'gyur ba'i dngos gzhi las bslangs pa ste/ de la pham par 'gyur ba'i dngos gzhi mthol ba ni dge slong gis kha na ma tho ba bcab par mi bya ste/ pham par 'gyur ba'i ltung ba bzhi po las gang yang rung ba'i dngos gzhi byung ba na bcab pa'i sems cig tsam gyis kyang bcab par mi bya bar de nyid kyi mod la mchil lham gnyis phud nas d ge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa gcig gam gnyis sam mang po'am mtshams gcig gi dge 'dun gnas khang so so na 'dug pa'am thams cad tshogs pa la yang rung ste/ de dag gi mdun du tsog pur 'dug ste/ thal mo sbyar ba btud nas ltung ba'i sde tshan gyi ming dang gang byung ba'i rigs smos te mthol bar bya'o/ /de'i sngags ni 'di yin te/ tshe dang ldan pa dgongs su gsol/ bdag dge slong ming 'di zhes bgyi ba la ltung ba pham par 'gyur ba'i sde tshan las rigs 'di zhes bgyi ba byung ste/ bdag dge slong ming 'di zhes bgyi ba'i ltung ba de tshe dang ldan pa'i mdun du mthol lo/ /mi 'chab bo/ /mthol na bdag bde ba la reg par gnas par 'gyur gyi ma mthol na ni mi 'gyur ro zhes lan gsum bzlas/ de'i rjes la nyan pa gcig gis thabs yin no zhes brjod par bya/ mthol bas legs so zhes brjod par bya ste/ de tsam gyis na mthol ba yin no/ /de'i mod la gang la mthol bar bya ba'i gang zag med na skya rengs ma shar gyi bar du 'chab pa'i nyes pa med do/ /ji srid du gang la mthol bar bya ba'i gang zag ma rnyed pa de srid du/ skya rengs shar yang ma mthol ba la 'chab pa'i nyes pa med do/ /gang la mthol bar bya ba'i gang zag med na ji srid du gang la mthol bar bya ba'i gang zag ma rnyed pa de srid du mthol ba'i sems med pa la 'chab pa'i nyes pa med do/ /gang la mthol bar bya ba'i gang zag yod du zin kyang rkyen 'ga' zhig gis bdag nyid der 'gro ba'i skabs med dam/ bdag nyid gnas de nas gzhan du song bar gyur na de'i bar du mthol ba'i sems med pa la 'chab pa'i nyes pa med do/ /gang la mthol bar bya ba'i gang zag yod du zin kyang ltung ba byung ba de 'di snyam du gal te de'i gan du song la ma brjod na 'chab pa'i nyes par 'gyur du dogs pas de'i dbang gis der mi 'gro'am/ gzhan du song bas brjod par ma byas pa la yang 'chab pa'i nyes pa med do/ /rkyen cis kyang ma bskal par de'i gan du mi 'gro ba dang / gzhan du 'gro ba dang / skya rengs kyi mdun rol du mi mthol ba dang / 'chab pa'i sems bskyed pa dag ni nyes byas so zhes bya ba yang snga ma bzhin no/ /gang la mthol bar bya ba'i gang zag dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa med na/ chos 'di pa sngar bstan pa dag la mthol na yang mthol ba nyid yin te/ de dag gi rnam par gzhag pa yang snga ma bzhin no/ /ltung ba mthol ba spyir bstan pa yang snga ma bzhin te/ mthol ba'i sngags rdzogs par bya'o/ /mthol ba'i sngags ril gyis brjod ma nus na tha na ming ngam rigs gcig go bar byas na yang mthol bar 'gyur te/ 'dir yang ming ni ltung ba'i sde tshan no/ /rigs ni ltung ba gang byung ba'o/ /de ltar ltung ba'i dngos gzhi mthol na de'i sbyor ba dang sbyor ba'i sbyor ba ni logs shig tu mthol mi dgos so/ /de ltar mthol nas bshags pa ni bslab pa sbyin pa'i cho gas dngos gzhi'i ltung ba las ldang bar 'gyur ba ste/ de'i go rims ni 'di yin te/ de rang gis dge 'dun las ji srid 'tsho'i bar du bslab pa sbyin pa lan gsum gsol ba dang / dge 'dun gyis gsol ba dang / bzhi'i las kyis bslab pa sbyin pa dang / des sa gzhan na gnas pa'i spyod pas ji srid du dgra bcom pa nyid ma thob kyi bar du tshe gcig tu bslab pa spyod par bya'o/ /de la rang gis dge 'dun las ji srid 'tsho'i bar du bslab pa sbyin pa lan gsum gsol ba'i cho ga dang sngags ni bdag nyid kyis gnas mal bsham par bya ste/ gaN+DI brdungs nas dris pa'i tshig gis dge slong rnams la yang dag par bsgo nas dge 'dun thams cad 'dug cing mthun par gyur pa la des mchil lham gnyis phud nas bla gos phrag pa gcig tu byas te rgan rims la phyag 'tshal nas/ rgan pa'i mtha' logs su tsog pur 'dug ste thal mo sbyar ba btud nas sngags 'di skad ces brjod par bya'o/ /dge 'dun btsun pa rnams gsan du gsol/ bdag dge slong dga' byed kyi bslab pa ma phul bar mi tshangs par spyod pa 'khrig pa'i chos bsten kyang bcab pa'i sems cig tsam gyis kyang bcab par ma bgyis te/ bdag dge slong dga' byed dge 'dun la ji srid 'tsho'i bar du bslab pa gsol na/ thugs brtse ba can dge 'dun btsun pa rnams kyis thugs brtse ba'i slad du bdag dge slong dga' byed la ji srid 'tsho'i bar du bslab pa stsal du gsol zhes de bzhin lan gnyis lan gsum du bzlas/ de ni de rang gis dge 'dun las ji srid 'tsho'i bar du bslab pa sbyin pa lan gsum gsol ba'i cho ga dang sngags so/ /de'i 'og tu dge 'dun gyis gsol ba dang bzhi'i las kyis bslab pa sbyin pa'i cho ga dang las ni 'di ltar bya ste/ de'i cho ga ni de'i 'og tu dge slong gcig gis gsol ba byas te las bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong dga' byed 'dis bslab pa ma phul bar mi tshangs par spyod pa 'khrig pa'i chos bsten kyang bcab pa'i sems cig tsam gyis kyang bcab par ma bgyis te/ dge slong dga' byed 'di dge 'dun las ji srid 'tsho'i bar du bslab pa gsol na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong dga' byed la ji srid 'tsho'i bar du bslab pa gsol te/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ dge slong dga' byed 'dis bslab pa ma phul bar mi tshangs par spyod pa 'khrig pa'i chos bsten kyang bcab pa'i sems cig tsam gyis kyang bcab par ma bgyis pas dge slong dga' byed 'di dge 'dun las ji srid 'tsho'i bar du bslab pa gsol te/ de'i slad du dge 'dun gyis dge slong dga' byed la ji srid 'tsho'i bar du bslab pa stsol na/ tshe dang ldan pa gang dag dge slong dga' byed la ji srid 'tsho'i bar du bslab pa stsal bar bzod pa de dag ni cang ma gsung shig /gang dag mi bzod pa de dag ni gsungs shig /'di ni las brjod pa dang po ste/ de bzhin du lan gnyis lan gsum du bzlas/ dge 'dun gyis bzod cing gnang nas dge 'dun gyis dge slong dga' byed la ji srid 'tsho'i bar du bslab pa stsal lags te/ 'di ltar cang mi gsung bas de de bzhin du 'dzin to/ /de tsam gyis na bslab pa byin pa yin na/ bslab pa byin pa des gzhan na gnas pa'i spyod pas ji srid du dgra bcom pa nyid ma thob kyi bar du tshe gcig tu bslab pa spyad pa'i kun tu spyad pa'i chos 'di yin te/ des dge slong rang bzhin du gnas pa las mngon par smra ba dang / phyag dang mngon du ldang ba dang / thal mo sbyar ba dang / gus pa'i las bdag gir mi bya'o/ /dge slong rang bzhin du gnas pas kyang de la de dag mi bya'o/ /dge slong rang bzhin du gnas pa dang lhan cig tu gom pa bsri ba nyid las gzhan las bcag par mi bya'o/ /stan ches dma' ba nyid las gzhan pas 'dug par mi bya'o/ /phyi bzhin 'brang ba'i dge slong gi bdag nyid las gzhan pas khyim dag tu 'gro bar mi bya'o/ /g.yogs ma gcig par mal bsham par mi bya'o/ /rab tu byung ba dang bsnyen par rdzogs pa dang gnas sbyin pa dang dge tshul nye bar gzhag par mi bya'o/ /gsol ba dang las brjod pa dag bya bar khas mi blang ngo / /las byed pa dang dge slong ma'i ston pa dang dge 'dun gyis yid brtan par bsko ba khas mi blang ngo / /de dag tu sngar bskos pas kyang mi bya'o/ /dge slong ma la ston par sngar bskos pas kyang bstan par mi bya'o/ /'don pa gzhan med na yang gso sbyong la so sor thar pa gdon par mi bya'o/ / dge slong dge 'dun las ma bkar ba la tshul khrims dang lta ba dang / cho ga dang / 'tsho ba nyams pas gleng bar mi bya'o/ /brjod pa dang bcas pa nyid dang / phur pa dang bcas pa nyid dag mi bya'o/ /gdams ngag dang gso sbyong dang dgag dbye dang gsol ba dang brjod pa dag gzhag par mi bya'o/ /rang bzhin du gnas pa dang mgo mnyam du bsten par mi bya'o/ /bslab pa byin pa de'i rgyu gang yin pa'i nyes pa de yang ngo / /nyes pa gzhan yang ngo / /tshangs pa mtshungs par spyod pa rnams la nyes pa dang mthun pa nyid mi bya'o/ /kun du spyod pa'i chos ji ltar bcas pa dag nyams su ma blangs na brtul zhugs snying po med par 'gyur ro snyam du yid la bya'o/ /nang par sngar langs te gtsug lag khang du sgo dbye ba dang mar me'i kong bu bsal bar bya'o/ /gtsug lag khang du chag chag dang phyag dar dang lci ba 'jam po'i byug pas bsku ba dag bya'o/ /dge 'dun gyi bshang ba dang gci ba'i skyabs dag sbyang ngo / /der sa phyag pa dang dus dang mthun pa'i chu dag gzhag par bya'o/ /gtsug lag khang gi wa'i kha dag bsal lo/ /dge 'dun gyi gdan bsham par bya'o/ /mchod pa'i dus shes par bya ste bdug spos dang de'i pog phor dag nye bar gzhag par bya'o/ /gal te nus pa nyid yin na ston pa'i yon tan dag yang dag par bsgrags par bya'o/ /gal te mi nus na smra ba po la bcol lo/ /dge 'dun gyi bshos kyi spyi bungs bshams pa na gaN+DI brdung ngo / /gal te dge slong rnams tsha na bsil yab bya'o/ /de'i 'dug pa la sogs pa ni bsnyen par rdzogs pa thams cad kyi mtha' nyid du'o/ /zas kyi bya ba byas na gdan cha dben par brtul lo/ /lhung bzed kyi gzhi dor ro/ /dus shes par bya ste mchod rten dag gi phyag dar bya'o/ /lci ba 'jam po'i byug pas bsku'o/ /dge 'dun 'du ba'i dus su yang gdan bshams pa nas ston pa'i yon tan yang dag par bsgrub pa'i bar dag bya'o/ /gal te nus pa nyid yin na tshes grangs kyi nyi ma brjod pa dag bya'o/ /gal te mi nus na dge slong gzhan la bcol lo/ /dgongs kar dus dang mthun pa'i chos dge slong rnams kyi rkang pa bkru'o/ /dgongs kar dge slong rnams kyi rkang pa bsku'o/ /dge slong dag rkang pa bkru ba dang bsku bar mi 'dod na snum dbul lo/ /de'i gtsug lag khang tha mar 'os pa nyid yin no/ /thams cad du rnyed pa dbang ba nyid yin no/ /dge ba'i phyogs las mi g.yel bar bya'o/ /bslab pa byin pas dge slong rang bzhin du gnas pa ma yin pa dang / dge 'dun du ma longs pa dang / gnas de na dge slong yongs su bcad pa dag la bslab pa spyad pa mi 'chags so/ /dge slong mang po nyid yongs su spang bar mi bya'o/ /gnas brtan dang so sor thar pa dang bcas pa nyid du spyad par 'bad par bya'o/ /mtshams gzhan du zhag lon pa la ni nyes pa med do/ /dge 'dun gyi kha bskang ba'i grangs las ma gtogs so/ /de'i kun du spyod pa dge 'dun la spyad par bya'o/ /bslab pa byin pa bzhi yan chad mtshams gcig gi dge 'dun la spyad du mi gnang ngo / /las brgya rtsa gcig ni dge 'dun dang mthun par bya'o/ /bslab pa las 'das pa'i ltung ba thams cad ni dge slong rang bzhin can du gnas pa dang 'dra'o/ /de la 'dun pa dbul du mi rung ngo / /de'i 'dun pa blang du mi rung ngo / /de la dge slong dang / dge slong ma dang / dge slob ma dang dge tshul dang dge tshul mas gtugs te phyag mi bya'o/ /bslab pa byin pa de ni dgra bcom pa nyid thob na rang bzhin du gnas pa thob par 'gyur ro/ /dgra bcom pa ma tho ba na ji srid 'tsho'i bar du bslab pa bcas pa'i cho ga ji skad bstan pa de dag la de bzhin du bslab par bya'o/ /pham par 'gyur ba'i dngos gzhi phyir bcos pa 'di la pham par 'gyur ba'i dngos gzhi byung ma thag tu de'i mod la bcab pa'i sems skyes na cho ga dang las mi 'chags so/ /de ltar dngos gzhi phyir bcos na de'i sbyor ba dang sbyor ba'i sbyor ba ni logs shig tu phyir bcos mi dgos so/ /pham par 'gyur ba'i dngos gzhi byung ma thag tu de'i mod la bcab pa'i sems skyes na pham par 'gyur ba de phyir bcos su mi rung ba yin pas de ni dge 'dun gyis bskrad par bya'o/ /bskrad pa na khro ba la sogs par 'gyur ba bsten pa na yo byad kyang phyung ste dor ro/ /mthus kyang bskrad par bya'o/ /ka ba la 'jus na bcad par bya'o/ /sgo skyes la 'jus na dbyung bar bya'o/ /ka ba dang sgo skyes de dge 'dun gyis sbyin bdag phyir 'chos su gzhug go/ /ma grub na gtsug lag khang gi rdzas kyis bcos par bya'o/ /de ltar pham par 'gyur ba'i sbyor ba'i sbyor ba nyes byas dang / sbyor ba sbom po dang / dngos gzhi phyir bcos pa'i cho ga dang sngags de dag ni pham par 'gyur ba bzhi char dang ci rigs par sbyar te/ bye brag tu na ltung ba'i sde tshan gyi ming dang gang byung ba'i rigs tha dad pa so sor smos par bya ba'i cho ga gzhan thams cad 'dra'o/ /mi tshangs par spyod pa'i pham par 'gyur ba ste dang po bshad zin to// //ma byin par len pa'i pham par 'gyur ba'i gleng gzhi ni bcom ldan 'das rgyal po'i khab na 'od ma'i tshal ka lan da ka'i gnas na bzhugs so/ /sngon rdza mkhan dge slong nor can rgyal po'i khab na dgon pa'i spyil bu na 'dug pa rgyal po'i khab kyi ba lang rdzi la sogs pas bcom zhing rnam par dkrugs te shing thams cad kyang khyer nas/ des rdza ma so btang ba'i khang pa me tog ban du dzi ba ka ltar dmar ba zhig brtsigs pa bcom ldan 'das kyis ma gnang nas dge slong dag gis ston pa'i bka' lung gis bshig cing rnam par dkrugs pa dang / des lus 'phags ma'i bu ma ga d+hA'i rgyal po ma skyes dgra'i shing gang dag grong khyer rgyal po'i khab ral ba dang 'drums pa bcos pa'i phyir brel pa'i don du gzhag pa sbas pa shin tu sbas pa/ bsrungs pa/ shin tu bsrungs pa su la yang ster bar sla ba ma yin pa de dag las shing kha cig ma byin par blangs pa'i skabs de dge slong rnams kyis bcom ldan 'das la gsol nas/ bcom ldan 'das kyis byung ba 'di dag dang gleng gzhi 'di dag dang skabs 'di la dge slong gi dge 'dun bsdu ba mdzad de bslab pa bcas pa'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang gzhan dag gi grong na 'dug pa'am dgon pa na 'dug pa ma byin pa brku ba'i grangs su gtogs pa blangs na ci tsam ma byin par blangs pa de rgyal po'am blon po chen pos bzung nas de la 'di skad ces kye mi khyod ni rkun ma'o/ /byis pa'o/ /blun pa'o/ /rku ba'o zhes zer zhing gsod dam 'ching ngam spyugs kyang rung ste/ de de ltar ma byin par len na dge slong de yang pham par gyur pa yin gyis gnas par mi bya'o zhes bca' ba mdzad do/ /yul ni rgyal po'i khab/ gang zag ni nor can/ nyon mongs pa ni 'dod pa/ nyes pa ni ma byin par len pa'o/ /de la yang dge slong gang zhes bya ba ni snga ma bzhin no/ /gzhan dag gi zhes bya ba ni skyes pa dang bud med dang ma ning dag gi'o/ /grong na 'dug pa'am zhes bya ba ni ra ba'i nang na 'dug pa'o/ /dgon pa na 'dug pa zhes bya ba ni ra ba'i phyi rol na 'dug pa'o/ /ma byin pa zhes bya ba ni de la skyes pa dang bud med dam ma ning gang gis kyang ma byin pa'o/ /rku ba'i grangs su gtogs pa zhes bya ba ni/ ma byin pa gang yin pa de rku ba'i grangs su gtogs pa yang yin no/ /blangs na zhes bya ba ni len na'o/ /ji tsam ma byin par blangs pas zhes bya ba ni ma sha ka lnga'am ma sha ka lnga las lhag pas so/ /de zhes bya ba ni dge slong de'o/ /rgyal po'am zhes bya ba ni bud med rgyal srid la dbang bskur bas dbang bskur bar gyur na de yang rgyal po rgyal rigs spyi bor dbang bskur ba yin la/ rgyal rigs dang bram ze dang rje'u rigs dang dmangs rigs dang / rgyal srid la dbang bskur bas dbang bskur bar gyur na de yang rgyal po rgyal rigs spyi bor dbang bskur ba yin no/ /blon po chen po zhes bya bas ni rgyal po las gzhan pa blon po dang rtsis mkhan dang sna chen po la gtogs pa rgyal srid byed pa gsang tshig mthun pas 'tsho ba gang dag rgyal po la brten nas 'tsho bar byed pa dag gis so/ /bzung nas zhes bya ba ni blangs nas so/ /de la zhes bya ba ni dge slong de la'o/ /'di skad ces kye mi khyod ni zhes bya ba ni bod pa'o/ /rkun ma'o zhes bya ba ni 'jab bus rku ba'o/ /byis pa'o zhes bya ba ni rang gis mi shes pa'o/ /blun pa'o zhes bya ba ni lung phog pa mi shes pa'o/ /rku ba'o zhes bya ba ni mthus rku ba'o zhes zer zhing zhes bya ba ni brjod cing ngo / /gsod dam zhes bya ba ni srog dang bral bar byed pa'o/ /'ching ngam zhes bya ba ni chings ma gsum po lcags las byas pa dang / shing las byas pa dang / rtswa las byas pa dag gis so/ /spyugs kyang rung ste zhes bya ba ni yul med par byed kyang rung ste'o/ /dge slong zhes bya ba ni gang la dge slong gi dngos po yod pa'o/ /dge slong gi dngos po gang zhe na/ gsol ba dang bzhi'i las mi g.yo ba gzhag par mi 'os pas bsnyen par rdzogs pa'i sdom pa'o/ /de yang zhes bya ba ni nye bar bstan pa dang kun du bstan pa'i tshig bla dgas de'o/ /yang de zhes bya ba'i sgra ni snga ma'i rjes bsnyag pa'i phyir ro/ /pham par gyur pa yin gyi gnas par mi bya'o zhes bya ba ni snga ma bzhin no/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni rku'am rkur bcug pa dag gis pham par 'gyur ro/ /de'i bye brag ni dge slong gis rku sems kyis mi gzhan gyi rdzas der 'du shes pas kAr ShA pa Na'i bzhi cha gcig yan chad gnas nas spos na pham par 'gyur ro/ /mi'i rgyud kyis yongs su bzung ba dang / gzhan gyi dang / der 'du shes pa dang / rku sems dang / gnas nas spos pa dang / rin thang tshang ba rnams la na smad pa med do/ / mngags pas rku ba la na smad pa med do/ /rang nyid sho gam mi gcod par gnang bas gzhan gyi rdzas sho gam gzhal dgos pa sho gam gyi gnas nas 'da' bar byed pa la na smad pa med do/ /che ba nyid kyis rin thang gdab par mi nus pa la na smad pa med do/ /sangs rgyas kyi sku gdung ni gzhal du med pa'i rin po che yin pas de la na smad pa med do/ /shags 'gyed pa na kha bsad kyi dogs pas gzhan gyi tshig gi skabs med par byas te rgyal ba la na smad pa med do/ /rgyan la dor byas te rgyal na don du brkus pa yin pas rku sems med kyang na smad pa med do/ /grangs dang shod thabs la sogs pa'i mtshan ma phyis pa dang bsnan pa dang / gnas gzhan du bzhag ste thob pa la na smad pa med do/ /brnyas pa dang bskyis pa dang gtams pa rnams brnogs pa la na smad pa med do/ /spring yig dang lag yig dang lag rtsis la sogs pa la na smad pa med do/ / sbyor ba'i tshe na rku sems med la gnas nas spo ba'i tshe na rku sems yod pa la na smad pa med do/ /nan khugs dang dang na then byed pa la na smad pa med do/ /rdzas gnas dang bcas te khyer ba la na smad pa med do/ /dge 'dun gyi phyir rku ba la na smad pa med do/ /ma byin par ni mi blang ngo / /bgo skal gyi cha ni bdag gir bya'o snyam pas cha blangs pa la na smad pa med do/ /rkun po bya ba'i lam bsrung ba la sogs pa'i lam rjes su sgrub pa la na smad pa med do/ /lhan cig gnas pa nyid dang nye gnas nyid brkus pa la na smad pa med do/ /mu thug la sogs pa'i mtshams spos pa la na smad pa med do/ /dge slong 'gro ba gzhan gyi rnam pa brten pa na dge slong gi 'du shes yod pa la na smad pa med do/ /dngos po bzang ngan dang 'dra ba la na smad pa med do/ /mtshan gyur pa ltung ba thun mong gi yul la na smad pa med do/ /'gro ba gzhan las skyes pa dang 'gro ba gzhan gyi rnam pa brten pa la na smad pa med do/ /gnas skabs gzhan 'thob pa la na smad pa med do/ /gzhi gcig la bslab pa du ma bcas pa nyid la na smad pa med do/ /dngos po la the tshom za bas bsam pa dang bcas par zhugs pa la na smad pa med do/ /yul bsam pa la na smad pa med do/ /rang gi don du byed pa la na smad pa med do/ /dge slong gi dngos por mi shes na rang bzhin gyis nyams pa yin no/ /'di'i byed pa po ni rku sems dang / mi gzhan gyi nor la der 'du shes pas rin thang tshang ba dang gnas nas spos pa'o/ /'di la yan lag drug gi dngos gzhi'i ltung bar 'gyur te/ rku sems dang / ma byin pa dang / mi'i rgyud kyis yongs su bzung ba dang / der 'du shes pa dang / rin thang tshang ba dang / gnas nas spos pa'o/ /de dag las yan lag ma tshang na ci rigs par na smad do/ /de la rku sems ni brku ba'i bsam pa ste/ de med na rang dang brnya ba dang yid gcugs pa'i sems dag gis gzhan la go bar byas te blangs pa la ltung ba med pa'i phyir ro/ /ma byin pa ni de la skyes pa'am bud med dam ma ning gang gis kyang ma byin par gzhan gyis te/ rang gis brkus na ni nyes pa sbom po yin pa'i phyir ro/ / mi'i rgyud kyis yongs su bzung ba ni mi'i rdzas te/ 'gro ba gzhan gyis brkus na nyes pa sbom po yin pa'i phyir ro/ /der 'du shes pa ni mi'i rgyud kyis yongs su bzung bar 'du shes pa ste/ mi'i rgyud kyis yongs su bzung ba la 'gro ba gzhan gyi rgyud kyis yongs su bzung bar 'du shes na nyes pa sbom po yin pa'i phyir ro/ /rin thang tshang ba ni kAr ShA pa Na'i bzhi cha gcig yan chad de/ der ma chog na nyes pa sbom po yin pa'i phyir ro/ /gnas nas spos pa ni rdzas de rang gi gnas nas gnas gzhan du spos pa ste/ gnas nas ma spos na nyes pa sbom po yin pa'i phyir ro/ /de la mi'i rgyud kyis yongs su bzung ba dang 'gro ba gzhan gyi rgyud kyis yongs su bzung ba ni bdag po yod pa yin te/ bdag po'i bye brag ni 'di yin te/ bdag po ni rku ba de'i dus na mi'am 'gro ba gzhan du yod pa nyid bdag po yin no/ /'das pa na byung ba'am phyis 'byung ba ni bdag po nyid ma yin no/ /rin thang tshang ba ni kAr ShA pa Na'i bzhi cha gcig yan chad do zhes smos pa'i bye brag ni 'di yin te/ ka kA ni bzhi la ma sha ka gcig go/ /ma sha ka nyi shu la kAr ShA pa Na gcig go/ /ka kA ni gcig ni 'gron bu nyi shu'i rin thang gi ming ngo / /ma sha ka gcig ni 'gron bu brgyad cu'i rin thang gi ming ngo / /kAr ShA pa Na gcig ni 'gron bu stong drug brgya'i rin thang gi ming yin no/ /kAr ShA pa Na'i bzhi cha gcig ni ma sha ka lnga'i rin thang ste/ 'gron bu bzhi brgya'i rin thang gi ming yin no/ /ma sha ka lnga zhes lung las gsungs pa ni yul dbus na kAr ShA pa Na gcig la ma sha ka nyi shur rtsi bas de'i bzhi cha la brten pa yin no/ /'dir kAr ShA pa Na'i bzhi cha'i rin thang tshang ba'i tshad du gzhag pa ni yul dang dus thams cad du nges pa yin no/ /kAr ShA pa Na'i bzhi cha la ma sha ka du yod pa ni gcig tu ma nges te/ yul dang dus kyis de'i rtsis rnam par gzhag go/ /des na yul dang dus kyi bye brag ni 'di yin te/ deng sang yul dbus na ni ma sha ka nyi shu la kAr ShA pa Na gcig go/ /yul dang dus kha cig na ma sha ka bcu gcig la kAr ShA pa Na gcig tu brtsi ba yang yod/ ma sha ka bcu drug la kAr ShA pa Na gcig tu brtsi ba yang yod/ ma sha ka nyi shu la kAr ShA pa Na gcig tu brtsi ba yang yod/ ma sha ka bzhi bcu la kAr ShA pa Na gcig tu brtsi ba yang yod pas de lta bu'i rin thang brtsi ba des brtsis pa'i kAr ShA pa Na'i bzhi cha gcig brkus na pham par 'gyur bar shes par bya'o/ /yul gzhan dang dus gzhan dang gling gzhan gyi rin thang brtsi ba de yul de'i dus dang gling gzhan du brtsi bar mi bya'o/ /'gron bu nyid kyi rin thang yang rku ba'i yul dang dus kyis rnam par gzhag par shes par bya'o/ /chu'i rgyun dang 'dzag pa dang / 'brul ba'i rgyu ni sbyor ba gcig pa'i mtha' tshun chad rdzas gcig pa nyid du rin thang brtsi'o/ /phung po las rku na lan re re zhing blangs pa tha dad par ro/ /rdzas kyi bdag po du ma nyid yin na de dag gi cha so so'o/ /rkun po du ma nyid yin na yang de dag gi cha so so'o/ /gnas nas spos pa ni rdzas de rang gi gnas nas gnas gzhan du spos pa'o zhes smos pa'i bye brag ni 'di yin te/ rdzas tha dad pa khur du byas nas rku ba la ni khur gnas nas spos na brkus pa yin no/ /shing thog la sogs pa btus nas rku ba la ni phung po gnas nas spos na rku ba yin no/ /rdzas chu la sogs par spyings te rku ba la ni gnas kyi steng nas rdzas kyi steng bying na brkus pa yin te/ rdzas bshal te rku ba la ni gzhi'i mtshams las rdzas kyi mjug 'das na brkus pa yin no/ /gzhi'i mtshams zhes bya ba ni gyong grugs dang gas pa dang bris pa dang kha dog gzhan dang bar mtshams dang bar chad dag go/ /srog chags la ni rtsib ma la sogs pa tha dad par brtag tu rung ba rnams par chad nyid yin no/ /gzhi'i steng du gding ba gzhan bting ba ni gding ba de'i cha tha dad par bzung ngo / /shing la sogs pa skye ba phyung ste rku ba la ni rtsa ba steng du bton pa khyer na brkus pa yin no/ /lag pa la sogs pa la bskon pa'i rdzas rku ba la phud na brkus pa yin no/ /sho gam rang gi lag na 'dug pa brkus pa la ni sho gam gyi sa las 'das na brkus pa yin no/ /mi yul phyogs dang brda dang mtshan mas rku ba la ni de dag grub na brkus pa yin no/ /bya spar te rku ba la ni nam mkha' la spar ba na brkus pa yin no/ /dngos po thams cad kyang rku ba na nam mkha' la spar na brkus pa yin no/ /dud 'gro btags pa ni bkrol na brkus pa yin no/ /brtod dang khyu las bkar te rku ba la ni khyu las mi snang bar gyur pa nyid na brkus pa yin no/ /gsang sngags dag gis 'dren cing rku ba la mig sngar snang na brkus pa yin no/ /phyi nur du gom pa dbri bas rku ba la ni mi snang bar song ba na brkus pa yin no/ /gru skam sa las rku ba la ni mi snang bar gyur na brkus pa yin no/ /gru chu'i rgyun phyogs dang thad kar pha rol du khrid pas rku ba la ni mi snang bar gyur na brkus pa yin no/ /chu'i pha rol gyi 'gram ltar snang bar khrid na ni pha rol gyi 'gram nyid du phyin nas brkus pa yin no/ /gru chu'i rgyun las bzlog phyogs su khrid pas rku ba la ni gru tshugs las 'das na brkus pa yin no/ /gru las ji lta ba bzhin du shing dang snod la sogs pa chu las bshal zhing rku ba thams cad kyang de dang 'dra'o/ /gzhan gyi zhing la sogs pa'i las kyi mtha' dag la chu gtong ba'am 'gog pas bdag gi la phan zhing gzhan gyi la gnod par bya ba la ni rang gis brtsal ba'i las de'i phan pa dang gnod pa grub pa na brkus pa yin no/ / rkun shas thob par bya ba'i ched du chom rkun pa la lam rgyus go bar byed pa la ni shas thob na brkus pa yin no/ /sa gzhi dang khang khyim dag brtsig pa la sogs pas bskor te rku ba la ni bskor ba'i mtshams 'byor na brkus pa yin no/ /shags kyis rku ba la ni gal te bla'i grar ni rgyal na brkus pa yin no/ /'og gzu ni pha rol pos sbyor ba nyid btang na brkus pa yin no/ /gdub kor la sogs pa bshig ste rku ba la ni bshig ste gnas nas spos na brkus pa yin no/ /lhung ba rku ba la ni de las khyer na brkus pa yin no/ /'dzag pa dang 'brul 'ibar byed pa rku ba la ni bu ga nas byung ba na brkus pa yin no/ /rkun po du ma blo gros mi mthun pa yin na rang gi bgo skal thob pa na brkus pa yin no/ /bdag po'i mngon sum du rku ba la ni mig snga nas mi snang ba nyid na brkus pa yin no/ /mi'i mthus rku ba la ni dbang du byas pa nyid na brkus pa yin no/ /sbyor ba'i ltung ba rnam par gzhag pa ni nom par byed nyug par byed la ji srid du gnas nas gnas gzhan du ni spo bar mi byed kyi bar du nyes pa sbom por 'gyur ro/ /rang gi dang mi'i ma yin pa dang / der 'du shes med pa dang rin thang ma tshang ba dang gnas nas ma spos pa na nyes par sbom po'o/ /bdag po med pa'i brkus na nyes pa sbom po'o/ /'gro ba gzhan gyi brkus na nyes pa sbom po'o/ /rang gi la 'gro ba gzhan gyi 'du shes te brkus na nyes pa sbom po'o/ /bdag gir ma byas par sba ba dang / chud gsan pa dang zin pa dang btang ba la sogs pa bral bar byed na nyes pa sbom po'o/ /shags kyis rku ba 'og gzu'i grar rgyal na nyes pa sbom po'o/ /chung ba nyid kyis rin thang gdab tu mi chog pa brkus na nyes pa sbom po'o/ /byang gi sgra mi snyan pa la sogs pa yongs su 'dzin pa med pa dag gi rdzas brkus na nyes pa sbom po'o/ /phung po'i lhag ma med pa'i mya ngan las 'das pa'i dbyings su yongs su mya ngan las 'das pa ni rnam par dag pa'i lha nyid yin pas de'i dkor brkus na nyes pa sbom po'o/ /brnyan pa nges par sbyin pa bzhin du nye bar spyod na nyes pa sbom po'o/ /gsang sngags dang sman dag gis 'bul du bcug na nyes pa sbom po'o/ /gzhan gyi don nyid du rku na nyes pa sbom po'o/ /gzhan gyis yongs su gzung ba la bdag dbang ba'i rtog pas bdag gir byed na nyes pa sbom po'o/ /bdams te bzang po rku bar 'dod pas 'dom par byed na nom pa dang nyug pa'i sbom po las gzhan pa'i nyes pa sbom po'o/ /rgyan la dor byed na rku ba la sbyor ba yin pas gal te rgyal ba nyid du ma gyur pa'i tshe nyes pa sbom po'o/ /grangs la dor byas nas de'i 'og tu thob par rtsol na nyes pa sbom po'o/ /shod thabs la sogs pa'i mtshan ma phyis pa dang / bsnan pa dang gnas gzhan du bzhag nas de'i 'og tu thob pa rtsol na nyes pa sbom po'o/ /brnyas pa dang bskyis pa dang gtams pa rnams bsnyon na nyes pa sbom po'o/ /su la yang phan par mi 'gyur bar bya ba'i phyir sgyid pa gcod pa dang gsod pa la sogs pa byed na nyes pa sbom po'o/ /mtshams kyi nam mkha' las sho gam 'dral na nyes pa sbom po'o/ /sbyor ba'i tshe na rku sems yod pa la gnas nas sbed pa'i tshe na rku sems med na nyes pa sbom po'o/ /phyogs bzhi'i dge 'dun gyi dkor brkus na nyes pa sbom po'o/ /gshed ma dang bkren pa la sogs pas yongs su gzung ba dang bcas pa'i dur khrod nas len na nyes pa sbom po'o/ /gsang sngags kyis rtsa ba la sogs pa skam par byed pas chud gzon na nyes pa sbom po'o/ /dud 'gro rku ba'i phyir chas kyis brjod pa dang zhon te brku'o snyam pas lus 'gyur ba byed na nyes pa sbom po'o/ /gru la yang gru 'dir zhugs te brku'o snyam pas lus 'gyur bar byed na nyes pa sbom po'o/ /gru 'di las rdzas 'di ltar brku'o snyam nas lus 'gyur bar byed na nyes pa sbom po'o/ /pha ma dang phu nu dang bu sring dang mkhan po dang slob dpon dang mchod rten dang dge 'dun la sogs pa la bsngos pa la sho gam gzhal dgos pa bzlas na nyes pa sbom po'o/ /gzhan la byin pa tshu rol pos mi shes pa bar du bcabs na nyes pa sbom po'o/ /yongs su bzung ba la yongs su bzung bar 'du shes na nyes pa sbom po'o/ /bsod snyoms mi dbang ba nod na nyes pa sbom po'o/ /rku ba'i ched du gros byed na nyes pa sbom po'o/ /dge slong 'gro ba gzhan gyi rnam pa bsten pa na dge slong gi 'du shes med pa la nyes pa sbom po'o/ /dngos gzhi la sbyor ba tha dad pa ji snyed byas pa re re la yang nyes pa sbom po re rer 'gyur ro/ / sbyor ba'i sbyor ba'i ltung ba rnam par gzhag pa ni khri las ldang ba la sogs pa nas ji srid du nom par mi byed nyug par mi byed kyi bar du ni nyes byas su 'gyur ro/ /snying rje dang ldan pa'i sems kyis zin pa btang ba la sogs pas bral bar byed na nyes byas so/ /phyir nur du 'gro bas rku na phri ba'i gom pa re re la nyes byas re re'o/ /gru phur pa las bkrol ba ni gru la reg pa ma yin pas nyes byas so/ /mchod pa'i don nyid du sangs rgyas kyi sku gdung rku na nyes byas so/ /grangs la dor byed na nyes byas so/ /shod thabs la sogs pa'i mtshan ma phyis pa dang bsnan pa dang gnas gzhan du gzhag pa yang nyes byas so/ /rnyed pa'i tshogs gzhan du bgrang ba dang snga phyi bsnyon pa dang mi dbang bar dbang bar sgrogs pa dang kha rku na nyes byas so/ /sho gam 'dral bar bsgo ba dang / lam gzhan ston na nyes byas so/ /mgron du ma bos par zan za na nyes byas so/ /sbyor ba'i ltung ba ji skad bstan pa de dag re re la sbyor ba'i sbyor ba gcig na nyes byas gcig tu 'gyur ro/ /sbyor ba'i sbyor ba tha dad na nyes byas re rer 'gyur ro/ /ltung ba med pa ni sku sems med pa la ltung ba med do/ /snying rjes rdzu 'phrul gyis phrogs pa la ltung ba med do/ /gos tha na ba lang gi lci ba btsir bas kyang kha bsgyur ba dang / kha tshar dang phun tshar bcad pa yang sho gam gzhal mi dgos so/ /rku sems med pa la sho gam du gtogs pa'i nyes pa 'byung bar dogs par mi bya'o/ /sho gam gyi gnas su gzhan gyis rang gi snod du gser la sogs pa reg par bya ba ma yin pa bcug pa la thabs gzhan gyis dor bar ma grub na rang gis reg pa la nyes pa med do/ /re zhig dpe bri ba'i don du glegs bam rku ba la nyes pa med do/ /rdzu 'phrul gyis sho gam mtshams las bzlas pa la nyes pa med do/ /bdag nyid kyis brkus pa la nyes pa med do/ /gang bsams pa de dang 'brel pas ma bsams pa blangs pa la nyes pa med do/ /chom rkun pa las sbyin bdag gi sems kyis len pa la nyes pa med do/ /gsang sngags dag gis gtong ba la nyes pa med do/ /bdag dang gzhan gyi rdzas byi bas khyer ba len pa la nyes pa med do/ /rngon pa dag gis mngon par gtses par gyur pa'i ri dgas gnas khang du zhugs pa blangs pa la nyes pa med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du ma byin par len pa'i sbyor ba'i sbyor ba nyes byas dang / sbyor ba sbom po dang / dngos gzhir 'gyur ba rnam pa thams cad bsten par mi bya bar bslab par bya'o/ /sho gam gzhal dgos pa dang bcas par 'gro bar mi bya'o/ /bdag nyid sho gam mi bcad par ma gnang bas rang gi rdzas gzhan gnang ba thob pa dag las sho gam gyi gnas nas bzla bar mi bya'o/ /bdag nyid kyis ma tshor bar rang gi rdzas gzhan gyis 'da' bar byed par mi 'grub par bya ba'i phyir 'bad par bya'o/ /sho gam gyi gnas su gzhan gyi snod bsrong ba dag la 'di la rdzas med dam zhes dri bar bya'o/ /sho gam gyi gnas su pha ma dang dkon mchog gsum la bsngos pa'i rdzas khyer ba mi btang na pha ma dang dkon mchog gsum gyi bsngags pa brjod par bya'o/ /gzhan gyi 'tsho ba'i spyod pa gzhan gyis gtol bar mi bya'o/ /yid gcugs pa ma yin pa la yid gcugs pa nyid du mi bya'o/ /lag pod kyi las bya zhing bsod nams kyi blos kyang bya ste gla rngan gyis mi bya'o/ /gzhan gyi rdzas ltung ba blangs na yun ring du mi bsrel lo/ /rdzas de dge skos la gtad pa nyid du bya'o/ /dge skos kyis de rab tu byung ba yin par dogs na dge 'dun la bstan par bya'o/ /bdag po ma byung na gzar thag la btags te gzhag go/ /nad pas slong bar ma gnang ba'i mi la nad pa'i phyir sman blang bar mi bya'o/ /chom rkun pa'i rkun rdzas dang dur khrod kyi rdzas la sogs pa yongs su bzung ba dang bcas pa dag bdag pos gnang ba las gzhan pa'i thabs kyis bdag gir mi bya'o/ /rdzas chom rkun pa la sogs pas bdag gir byas pa rang gi 'du shes kyis nan khugs kyis dgug par mi bya'o/ /de ni chos bshad pas bslang bar bya'o/ /rin phyed du nye bas kyang blu'o/ /lhung bzed dang chos gos ni rin chen pos kyang blur rung ngo / /mi snyan pa 'byung bar 'gyur ba'i rdzas ni bor ba nyid yin yang skye bo phal po che'i mngon sum du ma bab par bkur bar mi bya'o/ /de'i rdzas mi ma yin pas blangs pa nyid ni blang bar mi bya'o/ /ro ma smas pa las rdzas blang bar mi bya'o/ /bsti gnas nyid du so shing dang chu dang 'dag rdzas dang lci ba dang sa dag ci bder bya'o/ /dge slong dang dge tshul mi 'dod bzhin du sngon gyi chung ma la sogs pa 'brel pas khrid pa na gzung bar bya'o/ /phyag dar khrod la sogs pa dag kun du bzung ba ma yin nam zhes legs par so sor brtag par bya ste blang bar bya'o/ /zhing pa'i mdun du lus bsnyal ba la sogs par mi bya'o/ /tshang gzhig par mi bya'o/ /dbyar gnas gang du ma gnas pa der chos gos kyi cha mi blang ngo / /'ong ba rku thabs can gyi chom rkun par ma grags pa las blang bar mi bya'o/ /chom rkun par grags pa las sbyin bdag gi sems kyis blangs pa mtshon gyis bcad pa dang kha dog ngan par byas te bcang bar bya'o/ / de ltar byas kyang sngon gyi bdag po slong ba na sbyin no/ /don gzhan bsgrub pa'i phyir gnad la bsgre bar mi bya'o/ /rngon pa dag gis mngon par gtses par gyur pa'i ri dgas gnas khang du zhugs pa blang bar bya zhing / de shi na de dag la sbyin par bya ba nyid yin no/ /phyir bcos pa ni snga ma bzhin no/ /ma byin par len pa'i pham par 'gyur ba ste gnyis pa bshad zin to// //so sor thar pa'i mdo rgya cher 'grel pa 'dul ba kun las btus pa bam po bzhi pa/ gsod pa'i pham par 'gyur ba'i gleng gzhi ni sangs rgyas bcom ldan 'das yul spong byed dag na chu klung yid 'ong ldan gyi 'gram sgron shing gi tshal gseb na bzhugs so/ /de'i tshe bcom ldan 'das kyis dge slong gi dge 'dun la dge slong dag mi sdug pa sgoms shig /mi sdug pa bsten cing goms par byas lan mang du byas na 'bras bu chen po dang phan yon chen por 'gyur ro zhes mi sdug pa ston par mdzad cing / mi sdug pa bsgom pa'i bsngags pa brjod par yang mdzad pa na dge slong dag mi sdug pa sgom par byed pa'i tshe rnag gi lus 'dis sgyid lug pa dang / mus byung ba dang / the tshom za ba dang / smod par byed pa na mtshon yang 'byin par byed/ dug kyang za bar byed thag pa'i 'ching bas kyang 'ching bar byed/ g.yang sar yang mchong bar byed cing / 'di ltar dge slong gis kyang dge slong la rtsol bar byed pa'i skabs de dge slong rnams kyis bcom ldan 'das la gsol nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang mi'am mir chags pa la bsams bzhin du rang gi lag dar te srog gcod dam/ de la mtshon byin nam/ de la mtshon thogs pa gnyer ram/ der 'chir bcug gam/ de la 'chi ba'i bsngags pa brjod kyang rung ste/ de la 'di skad ces/ kye mi khyod 'tsho ba sdig pa mi gtsang ba ngan pa 'dis ci zhig bya/ kye mi khyod gson pas shi bla'o zhes zer zhing / sems kyi 'dod pa dang sems kyi kun du rtog pa dag gis rnam grangs du mas der 'chir bcug gam de la 'chi ba'i bsngags pa brjod de/ de yang rtsom pa des dus byas na dge slong de yang pham par 'gyur ba yin gyi gnas par mi bya'o zhes bca' ba mdzad de yul ni spong byed/ gang zag ni dge slong rab tu mang po/ nyon mongs pa ni mi bzod pa/ nyes pa ni gsod pa'o/ /de la yang dge slong gang zhes bya ba ni snga ma bzhin no/ /mi'am zhes bya ba ni gang gis ma'i ltor dbang po drug po 'di lta ste/ mig dang / rna ba dang / sna dang / lce dang / lus dang / yid kyi dbang po thob par gyur pa'o/ /mir chags pa la zhes bya ba ni gang gis ma'i ltor dbang po gsum po 'di lta ste/ lus dang / srog dang / yid kyi dbang po thob par gyur pa la'o/ /bsams bzhin du zhes bya ba ni rnam par brtags nas so/ /rang gi lag dar te zhes bya ba ni lag pas lag pa dar te'o/ /srog gcod dam zhes bya ba ni de'i srog gcod par gyur na'o/ /de la mtshon byin nam zhes bya ba ni ral gri'am spu gri'am chu gri la sogs pa mtshon phul ba'o/ /de la mtshon thogs pa gnyer tam zhes bya ba ni skyes pa'am bud med dam ma ning ngo / /de 'chir bcug gam zhes bya ba ni 'chir gzhug pa ni rnam pa gsum ste/ tshul khrims 'chal pa'am tshul khrims dang ldan pa dang / nad pa'o/ /de gsum la lhung bzed la sogs pa thob tu re bas 'chir bcug ste de shi na pham par 'gyur ro/ /de 'chir ma btub na sbyor ba snga ma de nyid kyis nyes pa sbom por 'gyur ro/ /de 'chir bcug nas dge slong 'gyod pa skyes te/ khyod ma 'chi zhig ces phyir bzlog na/ de lta na yang sbyor ba snga ma de nyid kyis nyes pa sbom por 'gyur ro/ /de phyir bzlog kyang ma btub ste shi na yang sbyor ba snga ma de nyid kyis nyes pa sbom por 'gyur ro/ /de la 'di 'chi ba'i bsngags pa brjod kyang rung ste zhes bya ba ni 'chi bar mngon par mi dga' ba'i mdun du 'chi ba'i bsngags pa brjod pa'o/ /de la 'di skad ces kye mi khyod ces bya ba ni bod pa'i tshig bla dwags so/ /'tsho ba zhes bya ba ni gson pa'o/ /sdig pa zhes bya ba ni sdig pa'i 'bras bu'am sdig pa'i rgyu'o/ /mi gtsang ba zhes bya ba ni lus kyi gzhi mi gtsang ba'i phyir ro/ /ngan pa zhes bya ba ni smad pa'o/ /'dis ci zhig bya zhes bya ba ni 'tsho ba'i sdig pa mi gtsang ba ngan pa 'dis ci bya thong shig ces bya ba'o/ /gson pa bas shi bla ba'o zhes bya ba ni gson pa la smad cing 'chi ba'i bsngags pa brjod pa'o zhes zer zhing zhes bya ba ni brjod cing ngo / /sems kyi 'dod pa zhes bya ba ni gnod sems kyis mi de 'chi bar mngon par 'dod pa'o/ /sems kyi kun tu rtog pa dag gis zhes bya ba ni de'i lhung bzed dang chos gos dang dra ba dang phor bu dang ska rags la sogs pa 'tsho ba'i yo byad thob tu re ba'i rnam par rtog pa dag gis so/ /rnam grangs du ma zhes bya ba ni rnam pa mang pos so/ /de 'chir bcug gam de la 'chi ba'i bsngags pa brjod de zhes yang smos pa ni 'chi ba la mngon par mi dga' ba'i mdun du rnam grangs du mas 'chi ba'i bsngags pa brjod pa de bzlog pa'i phyir bsnan pa'o/ /de yang brtsam pa des dus byas na zhes bya ba ni mi de yang sbyor ba'i brtsam pa de nyid kyis shi zhing gzhan gyis ma yin na'o/ /dge slong de yang pham par gyur pa yin gyi gnas par mi bya'o zhes bya ba ni snga ma bzhin no/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni mi'i srog bcad na pham par 'gyur ro/ /de'i bye brag ni gsod sems kyis mi'i 'gro bar gtogs pa gzhan la der 'du shes pas rnam pa gang yang rung bas gsod dam bsod du bcug na pham par 'gyur ro/ /mi'i 'gro bar gtogs pa gzhan la na smad pa med do/ /skyes pa dang / bud med dang / ma ning dang / mngal na gnas pa la na smad pa med do/ /lus dang de dang 'brel pa dang 'phangs pa dang gzhan dang rang la bsgo ba la na smad pa med do/ /dug dang phye ma dang / dong dang shing dang rang bzhin nyams pa gtong ba dang / brang du 'debs pa dang / 'khrul 'khor dang sgyu thabs dang ro langs dang rjes su sbyor ba rnams la na smad pa med do/ /g.yang du gtong ba dang me dang chur 'jug pa dang / grang ba dang tsha bar 'dogs pa dang / 'chi ba'i phyogs su gtong ba la na smad pa med do/ /rkang pa'i mthe bong dang rgya shug gi tshi gu dang / shing bal la sogs pa la 'chi ba rjes su sgrub pa chung ngu la na smad pa med do/ / sbyor ba'am gzhi des de'i tshe dang dus gzhan na shi ba la na smad pa med do/ /phan par 'dod pa nyid kyis 'chi ba'i phyir sman ma yin pa byin pa la na smad pa med do/ /ga ge mo na 'dug go zhes ston pas bsgo ba la na smad pa med do/ /dge slong 'gro ba gzhan gyi rnam pa bsten pa na dge slong gi 'du shes yod pa la na smad pa med do/ /dngos po bzang ngan dang 'dra ba la na smad pa med do/ /mtshan gyur pa ltung ba thun mong gi yul la na smad pa med do/ /'gro ba gzhan las skyes pa dang / 'gro ba gzhan gyi rnam pa bsten pa la na smad pa med do/ /gnas skabs gzhan thob pa la na smad pa med do/ / gzhi gcig la bslab pa du ma bcas pa nyid la na smad pa med do/ /dngos po la the tshom za bar bsam pa dang bcas par zhugs pa la na smad pa med do/ /yul bsams pa la na smad pa med do/ /rang dang gzhan gyi don du byed pa la na smad pa med do/ /dge slong gi dngos por mi shes na rang bzhin gyis nyams pa yin no/ /'di'i byed pa po ni gsod sems dang mi'i 'gro ba pa gzhan la der 'du shes pas srog gcod pa'o/ /'di la yan lag lngas dngos gzhi'i ltung bar 'gyur te/ gsod sems dang mi'i 'gro ba pa dang gzhan dang der 'du shes pa dang srog gcod pa'o/ /de dag las yan lag ma tshang na ci rigs par na smad do/ /de la gsod sems ni gsod pa'i bsam pa ste/ de med na rang gis ma bsams par zhar la gzhan shi ba la ltung ba med pa'i phyir ro/ /mi'i 'gro ba pa ni mi nyid yin pa ste/ 'gro ba gzhan la ni nyes pa sbom por 'gyur la/ dud 'gro la ni ltung byed du 'gyur ba'i phyir ro/ /gzhan ni rang ma yin pa ste/ rang nyid bsad na nyes pa sbom por 'gyur ba'i phyir ro/ /der 'du shes pa ni ma nor ba ste/ nor na nyes pa sbom por 'gyur ba'i phyir ro/ / srog bcad pa ni bsad pa ste/ ma bsad na nyes pa sbom por 'gyur ba'i phyir ro/ /sbyor ba'i ltung ba ni mi'am mir chags pa gsod pa'i sbyor ba brtsams nas ji srid du srog dang bral bar ma byas kyi bar du nyes pa sbom po'o/ /mi'i 'gro ba pa ma yin pa dud 'gro las gzhan pa dang / bdag nyid dang / der 'du shes pa med pa dang / srog gcod na nyes pa sbom po'o/ /'chir bcug nas de nyid 'chir ma btub na nyes pa sbom po'o/ /'chir bcug nas de'i 'og tu phyir bzlog kyang nyes pa sbom po'o/ /'chir bcug nas de'i 'og tu phyir bzlog kyang ma btub ste shi na yang nyes pa sbom po'o/ /dku mnyes pas ma dang mngal na gnas pa gnyis las ma bsams pa shos shi na nyes pa sbom po'o/ /gsod pa la 'jug pa dang du blangs na nyes pa sbom po'o/ /khyod kyi ming gis 'chi ba'i yo byad sbyin no zhes zer ba dang du len na nyes pa sbom po'o/ /sprul pa bsad na nyes pa sbom po'o/ /mi'i 'gro ba pa'i lag pa gcod na nyes pa sbom po'o/ /nags mes gtong na nyes pa sbom po'o/ /skra can 'tshong na nyes pa sbom po'o/ /chom rkun pa bla'i grar 'bul na nyes pa sbom po'o/ /ma bsams pa gzhan shi na nyes pa sbom po'o/ /bdag nyid gsod na ma shi ba'i gnas skabs su nyes pa sbom po'o/ /kho bo 'chi bar 'ong ngo zhes zer ba la yid mi ches shing de bzhin nyid du sgrub par byed na nyes pa sbom po'o/ /nad pa shi bla'o zhes nad g.yog mi byed na nyes pa sbom po'o/ /ltor mid pa sman la sogs pa mi 'phrod pa sbyin na nyes pa sbom po'o/ /'bras yongs su ma smin pa gtor na nyes pa sbom po'o/ /dong du 'jug pa dang sgo glegs kyis btsir ba la sogs pas nyon mongs par byed na nyes pa sbom po'o/ /bdag nyid g.yang sa nas mchong ba dang 'ching ba la sogs pa 'chi ba'i don du sgrub na nyes pa sbom po'o/ /dge slong 'gro ba gzhan gyi rnam pa bsten pa na dge slong gi 'du shes med pa la nyes pa spom po'o/ /dngos gzhi la sbyor ba ji snyed byas pa re re la nyes pa sbom po re rer 'gyur ro/ /sbyor ba'i sbyor ba'i ltung ba ni mi'am mir chags pa la gsod pa'i sbyor bas khri las ldang ba la sogs pa nas sbyor ba ma brtsams kyi bar du nyes byas so/ /ched du ma bsams par shi na nyes byas so/ /sbyor ba'i ltung ba ji skad bstan pa de dag re re la sbyor ba'i sbyor ba gcig na nyes byas gcig tu 'gyur ro/ /sbyor ba'i sbyor ba tha dad na nyes byas re rer 'gyur ro/ /ltung ba med pa ni bdag sngar shi'am mnyam du shi na nyes pa med de/ tshe rabs gzhan du las skye ba med pa'i phyir ro/ /las dang po pa dang smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni yul thams cad la gnas skabs thams cad du mi gsod pa'i sbyor ba'i sbyor ba nyes byas dang / sbyor ba sbom po dang / dngos gzhi rnam pa thams cad bsten par mi bya bar bslab par bya'o/ /nad pa la 'chi ba'i sems pa dang rjes su mthun pa'i nyes par sgrub pa nye bar bsgrub par mi bya'o/ /nad g.yog mi shes pa la 'chi ba'i dgra bos ma smras par nad pa'i nad g.yog tu mi gzhag go/ /nad g.yog shes pa gzhan yod na mi shes pa mi gzhag go/ /nad pa'i drung du 'chi ba'i 'tshog chas mi gzhag go/ /nad pa 'chi bar rjes su sgrub na nad g.yog gis bzlog par bya'o/ /mngal rlugs par byed pa la sogs pa bya ba ma yin pa byed pa la sems kyis rjes su yi rang bar mi bya'o/ /lhung bzed dang chos gos la sogs pa rdzas thob tu re ba'i phyir gzhan 'chi bar 'dod par mi bya'o/ /dri bar bya ba sman pa dang / de rab tu byung ba dang / des bkol ba dang / dge slong rgan rabs la ma dris par nad pa la sman sbyin par mi bya'o/ /khur gdeg par mi nus pa la grogs nyid mi bya'o/ /gal te de lta bu'i rkyen gyis na khyim pa dag rung ba nyid la cig car gdeg par skad sbyar te gdeg par bya'o/ /gzhag pa la yang cig car gzhag par skad sbyar te gzhag par bya'o/ /so phag mi 'phang ngo / /so phag bye ba dang gas pa ma brjod par de nyid sbyin par mi bya'o/ /rkun po spa bkod ba'i phyir tsham ngam bya'o/ /gaN+DI la sogs pa mi phog par 'phang ngo / /rdzi phyogs nas rdul gyi bum pa dang thal ba'i gyo mo yang 'phang ngo / /'ur rdo bcang bar bya'o/ /dge slong ngal ba mi dbul lo/ /de'i grogs bya'o/ /de'i khur blang bar bya'o/ /dro kar phyi nas 'ong ba na lhung bzed bkru ba dang / byug ris gzhag pa dang / byin len bya ba dang / bya ra bya ba dang / dro kar phyin par 'ong mi nus na zan la sogs pas bsu bar bya'o/ /phyi dro yin na skom gyis bsu bar bya'o/ /nad pa la bab chol du mtshon dang thag pa sbyin par mi bya'o/ /lag gi bla la sogs pa'i zhal ta shes bzhin du bya'o/ /gsang sngags kyi thal lcag bya ba yang shes bzhin du bya'o/ /brnangs pa la sogs pas thogs pa bsal ba'i phyir bsnun pa yang shes bzhin du bya'o/ /rdo la sogs pa dril ba la shes bzhin gyis legs par so sor brtags te bya'o/ /zla'i phyogs nyung ngus 'debs pa lci ba la 'bad par mi bya'o/ /spyi'i tshugs su 'gro bar mi bya'o/ /bdag nyid mtshon gyi las la sogs pa ma bslabs pas gzhan de la sbyar bar mi bya'o/ /mda' la sogs pa mtshon 'phang ba la bsgo bar mi bya'o/ /nad pa mi nus pa lam du mi bkri'o/ /phyir bcos pa ni snga ma bzhin no/ /gsod pa'i pham par 'gyur ba ste gsum pa bshad zin to// //smra ba'i pham par 'gyur ba'i gleng gzhi ni bcas pa dang / gnang ba'i dbang gis rnam pa gnyis te/ de la bcas pa'i gleng gzhi ni sangs rgyas bcom ldan 'das yangs pa can na spre'u rdzing gi 'gram khang pa brtsegs pa'i khang bzangs na bzhugs so/ /de na nya pa lnga brgya chu klung yid 'ong ldan gyi 'gram na rten cing 'khod pa dag bcom ldan 'das kyis rab tu byung zhing bsnyen par rdzogs par mdzad nas/ bcom ldan 'das 'od ma can gyi grong na grong gi byang phyogs shing sha pa'i tshal na bzhugs so/ /de'i tshe na mu ge nyam ngab dgon pa'i slong mo bas zas rnyed par dka' zhing / pha ma dag kyang rang gi bu dag la zas sbyin pa dang bya bar sems pa dka' na slong mo pa dag la lta smos kyang ci dgos pa byung ngo / /de nas bcom ldan 'das kyis dge slong rnams la dge slong dag da lta mu ge byung gi khyed cag smos 'drin ji lta ba dang / phebs par smra ba ji lta ba dang / 'grogs bshes ji lta bas yangs pa can gyi nye 'khor spong byed kyi grong du dbyar gnas par khas long shig /nga yang 'od ma can gyi grong 'di nyid du bsnyen bkur ba dge slong kun dga' bo dang dbyar gnas par khas len to zhes bka' stsal nas/ nya pa las rab tu byung ba'i dge slong lnga brgya po de dag nya pa'i grong gi nye 'khor du lo ma dang 'dab ma'i spyil bu dag byas te dbyar gnas par khas blangs so/ /de dag thos pa nyung ba dang ldan pa yin pas nye du 'ongs pa dag la chos ston mi nus nas/ de dag gis nye du dag la nye du dag khyed cag gang gi grong tshigs na dge slong gi dge 'dun 'di la 'di ltar dbyar gnas par khas blang bar gyur pa'i nye du de dag gis ni rnyed pa legs par rnyed pa yin te/ dge slong 'di ni 'du shes dang / bsam gtan dang / tshad med pa dang / gzugs med pa'i snyoms par 'jug pa dang / dge sbyong gi 'bras bu thob pa dang / rnam par thar pa brgyad la bsam gtan pa dang / gnyis ka'i cha las rnam par grol ba yin no zhes gcig gis gcig la mi'i chos bla ma'i yon tan yang dag pa ma yin pa bsgrags pa'i skabs de dge slong rnams kyis bcom ldan 'das la gsol nas/ bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang mngon par mi shes shing yongs su mi shes la mi'i chos bla ma mtha' dang / 'phags pa dang / bye brag thob pa dang / shes pa dang / mthong ba dang / reg par spyod pa med la med bzhin du 'di shes so/ /'di mthong ngo zhes khas 'ches pa las/ de ltung ba byung ba rnam par dag par 'dod nas/ dus gzhan zhig na dris kyang rung ma dris kyang rung / 'di skad ces tshe dang ldan pa dag bdag gis ni mi shes par shes so zhes smras/ ma mthong bar mthong ngo zhes smras te/ gsob gsog brdzun du smras so zhes zer na dge slong de yang pham par gyur pa yin gyi gnas par mi bya'o zhes bca' ba mdzad de/ yul ni yangs pa can/ gang zag ni nya pa las rab tu byung ba'i dge slong lnga brgya/ nyon mongs pa ni grags pa 'dod pa/ nyes pa ni mi'i chos bla ma yang dag pa ma yin pa smras pa'o/ /gnang ba'i gleng gzhi ni sangs rgyas bcom ldan 'das yangs pa can na bzhugs so/ /dge slong rab tu mang po gnas mal dgon pa nags khrod dang / ri drungs dang / bas mtha' dag na rnal ' byor gyi rjes su brtson par gnas pa dag gis zhi gnas kyi rgyu mtshan nyid du 'dzin pa cung zad cig la brten nas 'jig rten pa'i yid la byed pas nyon mongs pa dag rnam par gnan pas 'dod pa la 'dod chags dang gnod sems dag de dag gi rgyud la kun du mi 'byung nas de'i 'og tu de dag gis gcig la gcig tshe dang ldan pa dag shes par gyis shig / dgon pa pa dag gis thob par bya ba gang yin pa de bdag cag gis thob ste/ bdag cag skye ba ni zad tshangs par spyod pa ni bsten/ bya ba ni byas/ srid pa 'di las gzhan ni mi shes kyis tshur gshegs/ bdag cag gnas mal dgon pa dag btang ste gnas mal grong mtha' dag tu 'jug par bya'o zhes brjod nas/ de dag gis gnas mal dgon pa dag btang ste gnas mal grong mtha' dag tu zhugs pa dang / der de dag yang dang yang du bud med dag mthong zhing / kun dga' ra ba'i dge tshul rnams dang lhan cig 'dre zhing gnas pa dag la yang nyon mongs pa dag byung bar gyur te 'dod pa la 'dod chags dang / gnod sems dag rgyud la kun du byung bar gyur nas/ de dag 'di snyam du sems te/ tshe dang ldan pa dag shes par gyis shig / bcom ldan 'das kyis 'dul ba la nyan thos rnams kyi bslab pa'i gzhi 'di ltar bca' ba mdzad de/ yang dge slong gang mngon par mi shes shing yongs su mi shes la/ mi'i chos bla ma mtha' dang / 'phags pa dang / bye brag thob pa dang / shes pa dang / mthong ba dang / reg par spyod pa med la med bzhin du 'di shes so/ /'di mthong ngo zhes khas 'ches pa las de ltung ba byung ba rnam par dag par 'dod pas dus gzhan zhig na dris kyang rung ma dris kyang rung / 'di skad ces tshe dang ldan pa dag bdag gis ni mi shes par shes so zhes smras/ ma mthong ba mthong ngo zhes smras te/ gsob gsog brdzun du smras gso zhes zer na dge slong de yang pham par gyur pa yin gyi gnas par mi bya'o ces bca' ba mdzad na bdag cag pham par gyur pa'i ltung ba ma byung ngam snyam nas tshe dang ldan pa kun dga' bo la dris so/ /tshe dang ldan pa kun dga' bos bcom ldan 'das la zhus pa dang / bcom ldan 'das kyis bka' stsal pa/ kun dga' bo de lta bas na mngon pa'i nga rgyal ni ma gtogs so/ /de lta bas na snga ma ni bcas pa yin la 'di ni gnang ba yin te/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang mngon par mi shes shing yongs su mi shes la mi'i chos bla ma mtha' dang / 'phags pa dang / bye brag thob pa dang / shes pa dang / mthong ba dang / reg pa spyod pa med la med bzhin du 'di shes so 'di mthong ngo zhes khas 'ches pa las de ltung ba byung ba rnam par dag par 'dod nas dus gzhan zhig na dris kyang rung ma dris kyang rung / 'di skad ces tshe dang ldan pa dag bdag gis ni mi shes par shes so zhes smras/ ma mthong ba mthong ngo zhes smras te/ gsog gsob brdzun du smras so zhes zer na mngon pa'i nga rgyal ma gtogs te/ dge slong de yang pham par gyur pa yin gyi gnas par mi bya'o zhes bca' ba mdzad de/ yul ni yangs pa can/ gang zag ni dge slong rab tu mang po/ nyon mongs pa ni mngon pa'i nga rgyal/ nyes pa ni med do/ /de la yang dge slong gang zhes bya ba ni snga ma bzhin no/ /mngon par mi shes shing zhes bya ba ni bsam gtan dang gzugs med pa'i sa pa'i shes pa zag pa dang bcas pas gzugs mngon par mi shes pa dang / tshor ba dang / 'du shes dang / 'du byed rnams dang / rnam par shes pa mngon par mi shes shing ngo / /yongs su mi shes la zhes bya ba ni bsam gtan dang / gzugs med pa'i sa pa'i shes pa zag pa med pas gzugs nyid yongs su mi shes pa dang / tshor ba dang / 'du shes dang / 'du byed rnams dang / rnam par shes pa yongs su mi shes pa la'o/ /yang na bar chad med pa dang / rnam par grol ba'i lam mngon par mi shes pa dang / yongs su mi shes par go rims bzhin no/ /yang na shes bya de dag ji ltar gnas de ltar rjes su 'gro ba'i sgo nas mi shes pa ni mngon par mi shes pa yin la/ ldog pa'i sgo nas mi shes pa ni yongs su mi shes pa yin no/ /mi'i chos bla ma zhes bya ba la mi'i chos zhes bya ba ni mi rnams kyi chos mya ngan las 'das pa ste/ de rnams kyis de 'thob kyi za ma dang / ma ning dang / mtshan gnyis pa dag gis kyang mi 'thob na sems can dmyal ba dang / dud 'gro dang / yi dags rnams kyis lta smos kyang ci dgos pa'i phyir ro/ /bla ma zhes bya ba ni 'dod pa'i khams pas gzugs kyi khams bla ma yin la/ gzugs kyi khams pas gzugs med pa'i khams bla ma yin pa'o/ /yang na mi'i chos zhes bya ba ni sgrib pa lnga po 'dod pa la 'dun pa dang / gnod sems dang / rmugs pa dang / gnyid dang / rgod pa dang / 'gyod pa dang / the tshom dag go/ /bla ma zhes bya ba ni de dag spangs pa gang yin pa'o/ /mtha' zhes bya ba ni mya ngan las 'das pa ste/ mthar thug pa yin pa'i phyir ro/ / 'phags pa dang bye brag thob pa zhes bya ba ni zag pa med pa thob pa ste/ 'phags pa zhes bya ba ni sangs rgyas dang sangs rgyas kyi nyan thos rnams so/ /bye brag thob pa zhes bya ba ni dge sbyong gi 'bras bu bzhi po dag ste/ rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / dgra bcom pa nyid do/ /shes pa zhes bya ba ni shes pa bzhi po dag ste/ sdug bsngal shes pa dang / kun 'byung shes pa dang / 'gog pa shes pa dang / lam shes pa ste/ rjes su mi tshol ba'i shes rab bo/ /mthong ba zhes bya ba ni mthong ba bzhi po dag ste/ sdug bsngal mthong ba dang / kun 'byung mthong ba dang / 'gog pa mthong ba dang / lam mthong ba ste/ rjes su tshol ba'i shes rab bo/ /reg par spyod pa zhes bya ba ni bsam gtan bzhi po dag la bde bar gnas pa ste/ snyoms par 'jug pa las yin gyi skye ba las ni ma yin no/ /med pa zhes bya ba ni de'i dngos po med pa la ste/ mngon sum du ma gyur pa'am mi srid pa'o/ /med bzhin du zhes bya ba ni bdag nyid la med bzhin du ste ma thob pa'o/ /'di shes so zhes bya ba la/ ci zhig shes so zhe na sdug bsngal ba dang / kun 'byung ba dang / 'gog pa dang lam shes so zhes so/ /'di mthong ngo zhes bya ba la/ ci zhig mthong ngo zhes she na/ lha rnams dang / klu rnams dang / gnod sbyin rnams dang / nam mkha' lding rnams dang / dri za rnams dang / mi'am ci rnams dang / lto 'phye chen po rnams dang / yi dags rnams dang / sha za rnams dang / grul bum rnams dang / srul po rnams dang / lus srul po rnams mthong ngo zer ba dang / de rnams kyi sgra thos zhes zer ba dang / bdag de rnams blta ba'i phyir 'gro'o zhes zer ba dang / de rnams bdag la ltar 'ong ngo zhes zer ba dang / bdag de rnams dang lhan cig gtam 'dre bar byed/ phebs par smra bar byed/ so sor kun dga' bar byed/ rtag tu yang lhan cig gnas par byed do zhes zer ba dang / de rnams bdag dang lhan cig gtam 'dre bar byed/ phebs par smra bar byed/ so sor kun dga' bar byed/ rtag tu yang lhan cig gnas par byed do zhes zer ba dang / bdag gis 'du shes nyi shu dang / bsam gtan bzhi dang / tshad med pa bzhi dang / gzugs med pa'i snyoms par 'jug pa bzhi dang / dge sbyong gi 'bras bu bzhi dang / mngon par shes pa drug dang / rnam par thar pa brgyad la bsam gtan dang / gnyi ga'i cha las rnam par grol ba ma thob bzhin du thob bo zhes zer ba ste/ de dag kyang mngon sum du gyur pa nyid kyis mthong ba dang 'dra ba'i phyir 'di mthong ba'i sgras bsdus so/ /khas 'ches pa las zhes bya ba ni khas blangs pa las so/ / de zhes bya ba ni dge slong de'o/ /ltung ba byung ba zhes bya ba ni gzhi de'i'o/ /rnam par dag par 'dod nas zhes bya ba ni rnam par ldang bar 'dod nas so/ /dus gzhan zhig na zhes bya ba ni dus gzhan na'o/ /dris kyang rung zhes bya ba ni gzhan dag gis glengs kyang rung ngo / /ma dris kyang rung zhes bya ba ni gzhan dag gis ma glengs par de dag nyid 'gyod pa dang / cung zad 'gyod pa dang / rnam par 'gyod pa dang / rab tu 'gyod pa skyes kyang rung ngo / /'di skad ces tshe dang ldan pa dag bdag gis ni mi shes pa shes so zhes smras zhes bya ba ni yid kyi rnam par shes pas so/ /ma mthong ba mthong ngo zhes smras te zhes bya ba ni mig gi rnam par shes pas so/ /gsob gsog brdzun du smras so zhes bya ba de dag ni smras pa'i rnam grangs kyi tshig yin te/ gsob ces bya ba ni don des stong pa'o/ /gsog ces bya ba ni de'i sa bon gyis stong pa ste/ grib ma tsam dang yang bral ba'o/ /brdzun zhes bya ba ni der 'du shes pa dang yang bral ba'o/ /zer na zhes bya ba ni brjod na'o/ /mngon pa'i nga rgyal ma gtogs so zhes bya ba ni mngon pa'i nga rgyal bzhag ste'o/ /mngon pa'i nga rgyal zhes bya ba ni grib ma tsam mthong ba las yon tan thob par nga rgyal byed pa'o/ /ma gtogs te zhes bya ba ni mngon pa'i nga rgyal can gyis don brdzun pa yang dag pa'i 'du shes kyis brjod pa la ltung ba med pa'i phyir ro/ /dge slong de yang pham par gyur pa yin gyi gnas par mi bya'o zhes bya ba yang snga ma bzhin no/ /de la ltung ba ji ltar 'gyur zhe na 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni 'du shes bsgyur te bdag nyid mi'i chos bla ma dang ldan pa nyid du smras na pham par 'gyur ro/ /de'i bye brag ni 'du shes bsgyur te bdag nyid mi'i chos bla ma dang ldan pa nyid du smras te gzhan gyis don go na pham par 'gyur ro/ /mi'i chos bla ma'i 'bras bu la na smad pa med de/ de gang zhe na/ lha dang klu dang / gnod sbyin dang / dri za dang / mi'am ci dang / lto 'phye chen po dang / yi dags dang / sha za dang / grul bum dang / srul po dang / lus srul po rnams bdag gis mthong ba dang / de rnams kyis bdag mthong ba dang / bdag gis de rnams kyi sgra thos pa dang / de rnams kyis bdag gi sgra thos pa dang / bdag de rnams la ltar 'gro ba dang / de rnams bdag la ltar 'ong ba dang / bdag de rnams dang lhan cig gtam 'dre/ phebs par smras/ so sor kun dga' bar byed/ rtag tu lhan cig gnas pa dang / de rnams bdag dang lhan cig gtam 'dre phebs par smra/ so sor kun dga' bar byed/ rtag tu lhan cig gnas pa zhes bya ba ste de dag la na smad pa med do/ /mi'i chos bla ma'i rang bzhin lan smad pa med do/ /de gang zhe na/ mi rtag pa la sogs pa'i 'du shes dang / bsam gtan rnams dang / tshad med pa rnams dang / gzugs med pa rnams dang / dge sbyong gi 'bras bu rnams dang / mngon par shes pa rnams dang / zag pa dang bcas pa dang / zag pa med pa'i yon tan thams cad de/ de dag lan smad pa med do/ / mi'i chos bla ma dang ldan pa rgyun du zhugs pa la sogs pa'i chos dgon par mi ma yin pa dag mi 'tshe ba dang / grong du stan khra bo bkra ba bting ba la sogs pa dang / bdag nyid ldan par smra ba la na smad pa med do/ /mi'i chos bla ma dang ldan pa de yod do zhes gzhan la sbyar nas de'i 'og tu rang la sbyor bar byed pa la na smad pa med do/ /mi'i chos bla ma ma thob par bdag gis thob ste/ yongs su nyams so zhes zer ba dang / thob pa yongs su nyams pa la ma nyams so zhes zer ba la na smad pa med do/ /khyod ni mi'i chos bla ma dang ldan pa'o zhes zer ba'i tshig gis dang du blangs pa la na smad pa med do/ /dge slong 'gro ba gzhan gyi rnam pa bsten pa dang / dge slong gi 'du shes yod pa la na smad pa med do/ /dngos po bzang ngan 'dra ba la na smad pa med do/ /mtshan gyur pa ltung ba thun mong gi yul la na smad pa med do/ / 'gro ba gzhan las skyes pa dang / 'gro ba gzhan gyis skyes pa dang / 'gro ba gzhan gyi rnam pa bsten pa la na smad pa med do/ /gnas skabs gzhan thob pa la na smad pa med do/ /gzhi gcig la bslab pa du ma bcas pa nyid la na smad pa med do/ /dngos po la the tshom za bas bsams pa dang bcas pas zhugs pa la na smad pa med do/ /yul bsams pa dang ma bsams pa la na smad pa med do/ /rang dang gzhan gyi don du byed pa la na smad pa med do/ /nyan pa po don go bar 'gro ba gang yang rung ba dang 'phags pa la na smad pa med do/ / dge slong gi dngos por mi shes na rang bzhin gyis nyams pa yin no/ /'di'i byed pa po ni 'du shes bsgyur ba dang / mi'i chos bla ma bdag nyid kyi phyir rang gi tshig gis smras te gzhan gyi don go ba'o/ /'di la yan lag lngas dngos gzhi'i ltung bar 'gyur te 'du shes bsgyur ba dang / mi'i chos bla ma de nyid dang / bdag nyid kyi phyir dang / rang gi tshig dang / gzhan gyis go ba'o/ /de dag las yan lag ma tshang na ci rigs par na smad do/ /de la 'du shes bsgyur na pham par 'gyur ba'i brdzun nam/ nyes pa sbom po'i brdzun nam/ dge 'dun lhag ma'i brdzun nam/ ltung byed kyi brdzun nam/ nyes byas kyi brdzun gcig tu 'gyur gyi/ 'du shes ma bsgyur ba la de dag gi ltung ba med pa'i phyir ro/ /mi'i chos bla ma de nyid smras na dngos gzhir 'gyur gyi gzhan na ni smad pa'i phyir ro/ /bdag nyid kyi phyir smras na dngos gzhir 'gyur gyi gzhan la sbyor ba na smad pa'i phyir ro/ /rang gi tshig yin na dngos gzhir 'gyur gyi/ rang gis ma smras na nyes pa med pa'i phyir ro/ /gzhan gyis don go na dngos gzhir 'gyur gyi/ ma go na nyes pa sbom por 'gyur ba'i phyir ro/ /sbyor ba'i ltung ba ni 'du shes bsgyur te bdag nyid mi'i chos bla ma dang ldan pa nyid du smra ba'i phyir sbyor ba brtsams nas dngos gzhi la ma thug gi bar du nyes pa sbom por 'gyur ro/ /mi'i chos bla ma dngos gzhir ma gtogs pa dag la nyes pa sbom po'o/ /gzhan gyis don ma go na nyes pa sbom po'o/ /rdul khrod kyi sha za yang nyes pa sbom po'o/ /zhi gnas kyi rgyu mtshan rang gi mtshan nyid 'dzin pa nyon mongs pa rnam par gnon pa yang nyes pa sbom po'o/ /mi'i chos bla ma dang ldan pa de yod do zhes rang la 'dun pa'i bsam pa gzhan la sbyor zhing ston na nyes pa sbom po'o/ / mi'i chos bla ma brjod pa'i 'dun pas mi mthun pa rgyu dang 'bras bu dang / slob pa dang mi slob pa zhes bya ba la sogs pa'i don brjod na nyes pa sbom po'o/ /mi'i chos bla ma gang brjod par 'dod pa de nor te/ de las gzhan brjod na nyes pa sbom po'o/ /gzhogs smos byed na nyes pa sbom po'o/ /gzhogs smos byas nas mjug khas mi len na nyes pa sbom po'o/ /khyod ni mi'i chos bla ma dang ldan pa'o zhes zer ba cang mi smra bas dang du blangs na nyes pa sbom po'o/ /khyod ni mi'i chos bla ma dang ldan pa yin no/ /'di dang 'di rjes su sgrubs shig ces zer ba rjes su bsgrubs na nyes pa sbom po'o/ /dge slong 'gro ba gzhan gyi rnam pa bsten pa na dge slong gi 'du shes med pa la nyes pa sbom po'o/ /dngos gzhi la sbyor ba ji snyed byas pa re re la nyes pa sbom po re rer 'gyur ro/ /sbyor ba'i sbyor ba'i ltung ba ni sbyor ba'i phyir brtsal cing ji srid du sbyor ba nyid la ma thug gi bar du nyes byas su 'gyur ro/ /sbyor ba'i ltung ba ji skad bstan pa de dag re re la sbyor ba'i sbyor ba gcig na nyes byas gcig tu 'gyur ro/ /sbyor ba'i sbyor ba tha dad na re re la nyes byas re rer 'gyur ro/ /ltung ba med pa ni mngon pa'i nga rgyal la nyes pa med de 'du shes bsgyur ba med pa'i phyir ro/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni yul thams cad la gnas skabs thams cad du mi'i chos bla ma smra ba'i sbyor ba'i sbyor ba nyes byas dang / sbyor ba sbom po dang / dngos gzhir 'gyur ba rnam pa thams cad brten par mi bya bar bslab par bya'o/ /'das pa dang ma 'ongs pa la sogs pa'i yul ma bsams par bstan par mi bya'o/ /phyir bcos pa ni snga ma bzhin no/ /smra ba'i pham par 'gyur ba ste bzhi pa bshad zin to/ / //tshe dang ldan pa dag bdag gis pham par 'gyur ba'i chos bzhi po dag bstan zin to zhes bya ba ni gdon ba'i mjug bsdu ba yin no/ /dge slong gis de dag las ltung ba gang yang rung ba zhig byas na zhes bya ba ni pham par 'gyur ba bzhi po de dag las so/ /thog ma ji lta bar phyis kyang de bzhin zhes bya ba ni dang po khyim pa'i gnas skabs na sdom pa med pa ji lta bar ltung ba de byung ba'i gnas skabs na yang de bzhin pa ste/ 'dir ni sdom pa nyam chung ba la bya'i sdom pa gtan med pa ni ma yin te/ 'phags pa gzhi thams cad yod par smra ba'i 'dul ba'i sde snod kyi lung nyid las/ bu lon nor bzhin kha che dag /byung ba la ni gnyis su 'dod/ /ces gsungs pas sdom pa ni sems skyes pa'i bya ba yin la/ bslab pa'i gzhi ni lus dang ngag gis bslab pa'i rnam par rig byed gzugs can yin te de yang sems kyis phyir bcos na mtha'i ltung ba las ldang ba'i thabs kyang yod pa'i phyir ro/ /pham par gyur pa yin te zhes bya ba ni ltung ba'i sde tshan gyi ming bstan pa yin te/ tshig gi don ni sngar bshad zin to/ /dge slong rnams dang lhan cig gnas pa dang / longs spyod du ma'i dbang gis gnas par mi bya'o zhes bya ba ni ma dag pa'i nyes dmigs bstan pa ste/ de yang bslab pa sbyin pa'i phyir ma bcos pa rnams kyi dbang du mdzad de gsungs pa yin gyi bslab pa byin pas phyir bcos pa'i bya ba byas na ni ma yin no/ /lhan cig gnas pa zhes bya ba ni gnas gcig na'o/ /longs spyod pa zhes bya ba ni chos dang zang zing gis so/ /mi dbang gis zhes bya ba ni de'i 'os ma yin pa'o/ /gnas par mi bya'o zhes bya ba ni dge slong rnams kyis de dang lhan cig gso sbyong dang / dgag dbye dang / gsol ba dang / gsol ba dang gnyis dang / gsol ba dang bzhi'i las la gnas par mi bya ba dang / de gang zag bcu gnyis kyi las su bsgo bar mi bya ba'o/ /de la bdag gis tshe dang ldan pa dag la ci 'di la khyed yongs su dag gam zhes dri'o/ /ci 'di la khyed yongs su dag gam zhes lan gnyis lan gsum du dri'o/ /'di la tshe dang ldan pa dag yongs su dag na 'di ltar cang mi smra bas de de bzhin du 'dzin to zhes bya ba ni rnam par gzhag pa bsgrag par bya ba yin te/ de la zhes bya ba ni pham par 'gyur ba'i chos bzhi po bstan pa de la'o/ /lhag ma ni snga ma yin no/ /pham par 'gyur ba'i chos bzhi po gdon pa bshad zin to/ / //da ni dge 'dun lhag ma gdon pa bshad par bya ste/ de'i phyir/ sdom la/ khu ba 'dzin pa 'khrig tshig bsnyen bkur smyan/ /khang pa khang chen dang ni gzhi med pa/ /bag tsam dge 'dun dbyen dang de rjes phyogs/ / khyim sun 'byin dang bka' blo mi bde ba'o/ /zhes bya ba gsungs so/ /sdom la zhes bya ba'i dgos pa dang tshig gi don ni snga ma bzhin no/ /dge 'dun lhag ma ni bcu gsum ste/ khu ba 'byin pa dang / lus kyi reg pa dang / 'khrig pa dang ldan pa smra ba dang / bsnyen bkur bsngags pa dang / smyan byed pa dang / khang pa dang / gtsug lag khang dang / gzhi med par skur pa 'debs pa dang / gzhan gyi cha ma yin pa dang mthun pa dang / dge 'dun gyi dbyen byed pa dang / de'i rjes su phyogs pa dang / khyim sun 'byin pa dang / bka' blo mi bde ba'o/ /tshe dang ldan pa dag dge 'dun lhag ma'i chos bcu gsum po 'di dag ni zla ba phyed phyed cing so sor thar pa'i mdo gdon pa las 'byung ngo zhes bya ba ni dge 'dun lhag ma gdon pa 'di'i lung dbog pa bstan to/ /dge 'dun lhag ma'i chos zhes bya ba ni ltung ba de dge 'dun la rag lus pa dang / dge 'dun dang 'brel ba dang / dge 'dun la brten pa yin te/ ltung ba de dge 'dun las rnam par ldang bar 'gyur gyi gang zag las ma yin pa'o/ /gzhan yang pham par 'gyur ba'i chos bzhi po dag ni lhag ma med pa yin gyi/ 'di ni lhag ma dang bcas pa ste/ des na dge 'dun lhag ma zhes gsungs so/ /de nyid kha na ma tho ba'i mtshan nyid 'dzin pas chos zhes bya'o/ /bcu gsum po 'di dag ni zhes bya ba ni khu ba 'byin pa la sogs pa gong du bstan pa dag go/ /zla ba phyed phyed cing so sor thar pa'i mdo gdon pa las 'byung ngo zhes bya ba ni sde snod gsum las 'dul ba'i sde snod ni yi ger ma bris pa yin pas thams cad kyi mngon sum du ma gyur pa'i phyir gso sbyong 'don pas dge 'dun lhag ma 'don pa 'di ga las shes snyam pa la/ zla ba phyed phyed cing gso sbyong 'don pa'i tshe 'dul ba 'dzin pa'i kha ton las 'byung ngo zhes bstan pa yin no/ /da ltar 'dul ba'i sde snod yang dag par bsdus pa'i gzhung 'di ni ma 'ongs pa'i skye bo dbang po rtul po tshig dang don gyi bdag nyid 'dzin mi nus pa rnams la phan gdags pa'i phyir bcom ldan 'das kyis yang dag par bsdu bar gnang ba yin te/ de bas na 'dul ba'i sde snod kyis las gsang ba 'di ni bsnyen par ma rdzogs pa rnams kyis thos par mi bya'o zhes sngar bstan pa bzhin 'dir yang sbyar ro/ /de la khu ba 'byin pa'i dge 'dun lhag ma'i gleng gzhi ni bcas pa dang gnang ba'i dbang gis rnam pa gnyis te/ de la bcas pa'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe na tshe dang ldan pa 'char ka lus ma bsrungs/ dbang po rnams kyis ma bsdams/ dran pa nye bar ma bzhag par grong dang grong rdal dag tu bsod snyoms la zhugs te phyir log nas de'i sems 'dod pa la 'dod chags kyis kun nas dkris par gyur nas/ des rang gi yan lag gi rnam pa las su rung bar byas te/ lag pa gnyis kyis bzung nas rtsol bar byed cing khu ba 'byin par byed pa'i skabs de dge slong rnams kyis bcom ldan 'das la gsol nas/ bcom ldan 'das kyis byung ba 'di dang gleng gzhi 'di dang / skabs 'di la dge slong gi dge 'dun bsdu ba mdzad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ bsams bzhin du khu ba phyung na dge 'dun lhag ma'o zhes bca' ba mdzad de/ yul ni mnyan yod/ gang zag ni 'char ka /nyon mongs pa ni 'dod chags/ nyes pa ni khu ba 'byin pa'o/ /gnang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe dge slong rab tu mang po nyal ba dag gi rmi lam na khu ba byung bar gyur te/ de dag la 'du shes kyang yod/ sems pa yang yod pas de dag 'gyod pa skyes par gyur nas/ 'di ltar bcom ldan 'das kyis bsams bzhin du khu ba phyung na dge 'dun lhag ma'o zhes 'dul ba la nyan thos rnams kyi bslab pa'i gzhi bca' ba mdzad na/ bdag cag la dge 'dun lhag ma'i ltung ba ma byung ngam snyam nas/ tshe dang ldan pa kun dga' bo la dris so/ /tshe dang ldan pa kun dga' bos bcom ldan 'das la zhus pa dang / bcom ldan 'das kyis bka' stsal pa/ kun dga' bo de lta bas na rmi lam gyi ma gtogs so/ /de lta bas na snga ma ni bcas pa yin la/ 'di ni gnang ba yin te/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ bsams bzhin du khu ba phyung na rmi lam gyi ma gtogs te dge 'dun lhag ma'o zhes gnang ba mdzad de/ yul ni mnyan yod/ gang zag ni dge slong rab tu mang po/ nyon mongs pa ni lung du ma bstan pa/ nyes pa ni med do/ /de la bsams bzhin du zhes bya ba ni rnam par brtags nas so/ /khu ba zhes bya ba ni khu ba rnam pa lnga ste/ sngon po dang / ser po dang / dmar po dang / ska ba dang / sla ba'o/ /de la sngon po ni 'khor los sgyur ba'i rgyal po'i'o/ /'khor los sgyur ba'i rgyal po'i bu thu bo dbang bskur bar 'os la dbang ma bskur bar gnas pa mtshan thob pa gang yin pa de'i khu ba yang sngon po yin no/ /ser po ni 'khor los sgyur ba'i rgyal po'i bu de las gzhan pa dag gi'o/ /dmar po ni sna chen po la gtogs pa 'khor lo'i mtha' pa'i'o/ /ska ba ni dbang po yongs su smin pa rnams kyi'o/ /sla ba ni dbang po yongs su ma smin pa rnams kyi'o/ /yang na sla ba ni bud med kyis dub pa dang / khur gyis dub pa dang / lam gyis dub pa dang / gta' gam pa dang / ya za ma lug gang yin pa de'i yang sla ba yin no/ /phyung na zhes bya ba ni de ma thag tu phyung ba ste/ gzhan gyis bar du mchod pa kho nar rang gi gnas nas 'phral la phyung ba ste/ dang po kho nar gnas nas 'thon ces bya ba'i tha tshig go/ /rmi lam gyi ma gtogs te zhes bya ba ni rmi lam gyi gzhag ste'o/ /de ni tha snyad du byar rung ba ma yin pas de las ltung ba rnam par mi gzhag go/ /dge 'dun lhag ma'o zhes bya ba ni ltung ba de dge 'dun la rag lus pa dang / dge 'dun dang 'brel pa dang / dge 'dun la bsten pa yin te/ ltung ba de dge 'dun las rnam par ldang bar 'gyur gyi gang zag las ma yin pa'o/ /gzhan yang pham par 'gyur ba'i chos bzhi po dag ni lhag ma med pa yin gyi/ 'di ni lhag ma dang bcas pa yin pa ste/ des na dge 'dun lhag ma'o zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni bsams bzhin du khu ba phyung na dge 'dun lhag mar 'gyur ro/ /de'i bye brag ni der 'dun pas rang gi yan lag gi rnam pa la phyi nang gi reg pa sems can du bgrang ba de'i rnam par gnas pas brtsal te rang gi khu ba dang po phyung na dngos gzhir 'gyur ro/ /khu ba dbyung ba'i bsam pas rang gi yan lag gi rnam pa las khu ba dang po phyung ngo cog la na smad pa med do/ /bde ba dang / rig sngags dang / sa bon dang / sman dang / brtag pa'i phyir 'byin pa la na smad pa med do/ /ril gyis bcangs pa dang dam du bcangs pa gnyis med par 'byin pa la na smad pa med do/ /bye brag nges par myong ba'i bde ba dang / byung la thug pa'i bde ba dang / ngad las pa'i bde ba dag med par 'byin pa la na smad pa med do/ /de la bye brag nges par myong ba'i bde ba zhes bya ba ni bud med dang skyes pa kun du sprad pa'i gnas skabs na bde ba gang yod pa'o/ /byung ba thug pa'i bde ba zhes bya ba ni khu ba byung ka'i gnas skabs na bde ba gang skye ba'o/ /ngad las pa'i bde ba zhes bya ba ni 'dod chags kyis gdung ba dang bral ba'i gnas skabs na bde ba gang byung ba'o/ /de dag dang ldan bzhin du 'byin pa la yang na smad pa med do/ /ril dang dam du bcangs pas 'byin pa la na smad pa med do/ /rnam par bsngos pa la sogs pa dang / rnam par zhig pa dang / keng rus dag dang / mgo dang / rna ba dang / sna dag dang / mgul pa'i bar dag dang / rtsib logs dang / rgyab dang / brang dang / gnyer ma dag dang / skra'i gseb dang / lag pa dang / phrag pa dang / dpung pa dag dang / dpung pa'i bar dag dang / rked pa dang / brla dang / rkang pa dang / sgyid pa dag dang / sgyid pa'i bar du 'byin pa la na smad pa med do/ /dge slong 'gro ba gzhan gyi rnam pa bsten pa na dge slong gi 'du shes yod pa la na smad pa med do/ /dngos po bzang ngan dang 'dra ba la na smad pa med do/ /dngos po la the tshom za ba'i bsams pa dang bcas par zhugs pa la na smad pa med do/ /yul bsams pa dang ma bsams pa la na smad pa med do/ /rang dang gzhan gyi don du byed pa la na smad pa med do/ / phyung ba thams cad la pham par 'gyur ba ma gtogs pa la na smad pa med do/ /'di'i byed pa po ni 'byin pa'i bsam pa dang / rang gi khu ba phyung ba'o/ /'di la yan lag bcu'i dngos gzhi'i ltung bar 'gyur te/ phyung ba dang / der 'dun pa dang / rang gi khu ba dang / dang po dang / reg pa dang / phyi rol gyis dang / sems can du bgrang bas dang / de'i rnam par gnas pas dang / brtsal ba dang / yan lag gi rnam pa la'o/ /de la phyung ba zhes bya ba ni khu ba phyung ba ste/ ma byung na yang nyes pa sbom po yin pa'i phyir ro/ /der 'dun pa zhes bya ba ni khu ba dbyung bar 'dun pa ste/ 'dun pa med na nyes pa sbom po yin pa'i phyir ro/ /rang gi khu ba zhes bya ba ni rang gi khu ba las dngos gzhir 'gyur gyi/ gzhan gyi las nyes pa sbom po yin pa'i phyir ro/ /dang po zhes bya ba ni lus 'di la khu ba'i gnas su gyur pa logs shig na 'khris pa lta bu med de/ 'on kyang dper na bu ram shing las khu ba dang / 'bru las 'bru mar bzhin du lus tha dag las 'byung ngo / /de las 'byung ba ni mang du yod de gnas nas 'byung ba dang / sbubs su 'ongs pa las 'byung ba dang / dbang po'i mtha' nas 'byung ba'o/ /de la gnas nas 'byung ba ni sbubs su ma 'ongs par dang por rang gi gnas nas 'byung ba ste/ de myong ba'i gnas skabs na 'dod chags shas cher rab tu 'gyur ba dang / bde ba nyams su myong ba shas chen po skye ba dang snying 'dar ba la sogs pa lus 'gyur ba 'byung ba ste/ 'dir dang po zhes smos pa ni gnas skabs de la bya'o/ /sbubs su 'ongs pa dang / dbang po'i mtha' nas 'byung ba dag la na smad par 'gyur ro/ /reg pa zhes bya ba ni tshul bzhin ma yin pa yid la byed pa la sogs pa tsam gyis ma yin gyi/ nang gi rang dang gzhan gyi lag pa la sogs pa'i reg pas so/ /de'i bye brag gzhan bstan pa'i phyir phyi rol gyis dang / sems can du bgrang bas dang / de'i rnam par gnas pas zhes bya ba smos te/ phyi rol gyis zhes bya ba ni nang gi rang dang gzhan gyi lag pa la sogs pa 'ba' zhig tu ma zad kyi phyi rol gyi reg pas reg na yang yan lag tu 'gyur bar ston to/ /phyi rol yang rnam pa gnyis te/ sems can du bgrang ba shi ba'i lus dang / sems can du bgrang ba ma yin pa gos la sogs pa ste/ de la sems can du bgrang ba shi ba'i lus 'dir yan lag tu gzhag gi sems can du bgrang ba ma yin pa gos la sogs pa 'dir yan lag tu mi gzhag pa bstan pa'i phyir/ sems can du bgrang ba zhes bya ba smos te/ sems can du bgrang ba ma yin pa gos la sogs pa la na smad do/ /phyi rol du gyur pa sems can du bgrang ba shi ba'i lus la yang sems can gyi rnam par mi gnas pa dum grugs phra mor gyis ba dag yod pas de 'dir yan lag tu mi gzhag gi sems can gyi rnam par gnas pa yan lag tu gzhag par bstan pa'i phyir de'i rnam par gnas pas so zhes bya ba smos te/ phyi rol du gyur pa sems can du bgrang ba shi ba'i lus rnam par bsngos pa la sogs pa dang / rnam par zhig pa dang / keng rus dag dang / mgo dang / rna ba dang / sna dag dang / mgul pa'i bar dang / rtsib logs dang / rgyab dang / brang dang / gnyer ma dang / skra'i gseb dang / lag pa dang / phrag pa dang / dpung pa dag dang / dpung pa'i bar dag dang / rked pa dang / brla dang / rkang pa dang / sgyid pa dang / sgyid pa'i bar la sogs pa sems can gyi rnam par gnas pa dag gi reg pa 'dir yan lag tu gzhag gi /phyi rol du gyur pa sems can du bgrang ba shi ba'i lus sems can gyi rnam par mi gnas pa dum grugs phra mor gyes pa dag gis reg pa ni phyi rol gyi gos la sogs pa dang 'dra bas 'dir yan lag tu mi gzhag go/ /de ltar na 'dir reg pa dang phyi rol gyis dang / sems can du bgrang bas dang / de'i rnam par gnas pa zhes bya ba'i yan lag bzhi ni reg pa'i bye brag yin te/ de dag las gang yang rung ba cig gzung ngo / /brtsal ba zhes bya ba ni brtsal bas drud pa ste/ gyi na brla dang gos dang gzhan gyi reg pa dang / g.yan pa phrug pa dag gis bab col du de'i don ma yin par zhugs pa la ltung ba med pa'i phyir ro/ /yan lag gi rnam pa la zhes bya ba ni pho mtshan la ste/ brla la sogs pa phyogs gzhan du reg pa la na smad pa med pa'i phyir ro/ /de dag las yan lag ma tshang na ci rigs par na smad do/ /sbyor ba'i ltung ba ni bsams bzhin du khu ba dbyung ba'i phyir sbyor ba brtsams nas ji srid du dngos gzhi la ma thug gi bar du nyes pa sbom por 'gyur ro/ /'byung du nye ba'i shugs kyis gnas skabs su brtsal ba btang na nyes pa sbom po'o/ /gar byed pa dang rab tu gar byed pas khu ba phyung na nyes pa sbom po'o/ /nam mkha' la bskyod pas khu ba phyung na nyes pa sbom po'o/ /yan lag gi rnam pa las gzhan pa'i phyogs gzhan du reg pas khu ba phyung na nyes pa sbom po'o/ /yan lag gi rnam pa chu'i rgyun las bzlog pa'i phyogs dang / rdzi phyogs ma yin par gtad de khu ba phyung na nyes pa sbom po'o/ / bye brag nges par myong ba'i bde ba dang / byung la thug pa'i bde ba dang / ngad las pa'i bde ba la yid kyis dmigs pas khu ba phyung na nyes pa sbom po'o/ /sngar sbubs su 'ongs pa'i khu ba phyung na nyes pa sbom po'o/ /chags pa'i sems dang ldan pa nyid na yan lag gi rnam pa la gzhal ba'i ched nyid kyis reg na nyes pa sbom po'o/ /dbyung ba'i ched du brtsams pa tsam byas nas brtsal ba gtang na nyes pa sbom po'o/ /gnyid log pa'i gnas skabs na khu ba byung ba las sad nas ro myong bar byed na nyes pa sbom po'o/ / yan lag gi rnam pa cung zad mnyed pa dang / yongs su mnyed pa dang / 'tshir na nyes pa sbom po'o/ /yan lag gi rnam pa las su rung ba la sems can du bgrang ba'i lag pa la sogs pa'i reg pas nom na nyes pa sbom po'o/ /sman zos pas 'byin na nyes pa sbom po'o/ / gzhan gyi yan lag gi rnam pa las 'byin na nyes pa sbom po'o/ /la ba dang / phying ba dang / dre'u rdog dang / sngas nang tshangs can dang / khri dang khri'u dang / stan nang tshangs can dang / khri'i gseb dang / bum pa dang / bum pu dang / bum pa'i bar dang / bya ma bum dang / chol zangs dang / rdo ba dang / skyong nul dang / skyong nul gyi bar dang / sgo gtan dang / shing bu dang / phyi rol gyi gos la sogs pa sems can du bgrang ba ma yin pa dag gi bar du phyung na nyes pa sbom po'o/ /phyi rol du gyur pa sems can du bgrang ba shi ba'i lus sems can gyi rnam par mi gnas pa dum grugs phra mor gyes pa dag gis reg pas phyung na nyes pa sbom po'o/ /yan lag gi rnam pa'i sbu gu 'tshir na nyes pa sbom po'o/ /dbyung ba'i don du nye bar 'gro ba la khu ba shor na nyes pa sbom po'o/ /dbyung ba'i don du gnas nas gnas su 'pho ba la khu ba phyung na nyes pa sbom po'o/ /dbyung ba'i don du bzhin dang / skra dang sen mo dang / so dang / rked pa dang / brla dang / rkang pa dang / zag byed la sogs pa yid la byed pa las khu ba phyung na nyes pa sbom po'o/ /dbyung ba dang der 'dun pas yan lag gi rnam pa gzung ba las khu ba phyung na nyes pa sbom po'o/ /dge slong 'gro ba gzhan gyi rnam pa bsten pa na dge slong gi 'du shes med pa la nyes pa sbom po'o/ /dngos gzhi la sbyor ba tha dad pa ji snyed byas pa re re la nyes pa sbom po re rer 'gyur ro/ /sbyor ba'i sbyor ba'i ltung ba ni bsams bzhin du khu ba dbyung ba'i phyir brtsams nas ji srid cig tu sbyor ba la ma thug gi bar du nyes byas su 'gyur ro/ /chags pa'i sems dang ldan pas yan lag gi rnam pa la lta na nyes byas so/ /yan lag gi rnam pa chu'i rgyun phyogs dang rdzi phyogs su gtod na nyes byas so/ /chags par 'gyur ba'i gzugs dang / sgra dang / dri dang / ro dang / reg bya dag la blta'o snyam pa la sogs pas dbyung ba'i don ma yin par zhugs pa la bab chol du khu ba phyung na nyes byas so/ /yan lag gi rnam pa las su rung ba la sems can du bgrang ba ma yin pa'i reg pas nom na nyes byas so/ /gzhan gyi yan lag gi rnam pa'i bu gu 'tshir na nyes byas so/ /lag pa'i reg pa la sogs pas brtsal ba med par yan lag gi rnam pa 'gul ba la khu ba phyung na nyes byas so/ /sbyor ba'i ltung ba ji skad bstan pa de dag re re la sbyor ba'i sbyor ba gcig na nyes byas gcig tu 'gyur ro/ /sbyor ba'i sbyor ba tha dad na re re la nyes byas re rer 'gyur ro/ /ltung ba med pa ni rmi lam la ltung ba med do/ /brla dang gos dang gzhan gyi rig pa dang / g.yan pa phrug pa dag gis bab col du dbyung ba'i don ma yin par zhugs pas khu ba byung ba la ltung ba med do/ /reg bya'i yul ma gtogs pa gzugs dang sgra dang / dri dang / ro dag nyams su myong ba na dbyung ba'i don ma yin par zhugs pa la bab col du khu ba byung ba la ltung ba med do/ /'dzag snod du 'drud pas khu ba byung ba la ltung ba med do/ / dbyung ba'i don du zhugs pa ma yin pa la sngon gyi chung mas 'khyud pa las khu ba byung ba la ltung ba med do/ /dbyung ba'i don du zhugs pa ma yin pa la bud med kyi rkang pa la sogs pa nas bzung bas bab col du khu ba byung ba la ltung ba med do/ /las dang po ba dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni yul thams cad la gnas skabs thams cad du khu ba 'byin pa'i sbyor ba'i sbyor ba nyes byas dang / sbyor ba sbom po dang / dngos gzhir 'gyur ba rnam pa thams cad du mi bsten par bslab par bya'o/ /grong dang grong rdal dag tu lus ma bsrungs/ dbang po rnams kyis ma bsdams/ dran pa nye bar ma bzhag par bsod snyoms la 'jug par mi bya'o/ /phyir bcos pa ni dge 'dun lhag ma bcu gsum rdzogs pa'i rjes la 'og nas ston to/ / khu ba 'byin pa'i dge 'dun lhag ma ste/ dang po bshad zin to// //lus kyi reg pa'i dge 'dun lhag ma'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /drug sde de dag gi kun du spyod pa ni 'dir bdag cag gis bram ze dang / khyim bdag 'ongs shing lhags pa rnams la yang chos bstan par bya/ rgol ba dag kyang tshar gcad par bya/ rang gi grags pa yang bsgrag par bya'o snyam pas drug sde las gang yang rung ba cig gis rgyal byed tshal gyi sgo stong par mi 'jog pas tshe dang ldan pa 'char ka nang par sngar langs te/ so shing bor nas snam sbyar dmar ser gyon te/ rgyal byed kyi tshal gyi sgo na 'chag cing 'dug go/ /mnyan yod na gnas pa'i bram ze dang khyim bdag gi chung ma rnams kyi kun du spyod pa ni skyed mos tshal du song ste rgyal byed kyi tshal du 'jug pa dang / gtsug lag khang blta ba dang / bcom ldan 'das dang dge slong gnas brtan gnas brtan rnams kyi zhabs la phyag 'tshal du 'gro ba yin pas bram ze dang khyim bdag gi chung ma rab tu mang po dag rgyal byed kyi tshal du 'ongs pa rnams tshe dang ldan pa 'char kas bcom ldan 'das dang / dge slong gnas brtan gnas brtan rnams kyi gtsug lag khang du rim gyis khrid de yon tan brjod cing phyag 'tshal du bcug nas rang gi gtsug lag khang du 'ongs pa na des de dag la chos bstan par brtsam mo/ /ji lta ji ltar chos bstan pa de lta de ltar kun du chags so/ /ji lta ji ltar kun du chags pa de lta de ltar dral to/ /ji lta ji ltar dral ba de lta de ltar de dag gi yan lag dang nying lag dag la nyug par brtsams so/ /de dag la gang dag bdag gir byed pa de dag ni de dag dang lhan cig gzhogs stegs dang 'phyar g.yeng dang / tho 'tshams pa dang / kun du rtse ba dang / kun du ca co 'don pa dang / lus la rdeg pa dag byed do/ /gang dag bdag gir mi byed pa de dag ni de nas phyir byung ste/ 'chags dang / /dag ra dang / sgo gang dag na bdag cag gi yan lag dang nying lag khyim thabs kyis kyang ma byugs pa gang yin pa de dag 'phags pa 'char kas byugs so/ /gal te bdag cag gi pha ma dang phu nu mo dag gis thos par gyur na rgyal byed kyi tshal ga la ba der ltar yang mi ster na/ 'gror lta smos kyang ci dgos zhes smod par byed/ phyar ka gtod bar byed/ kha zer bar byed pa'i skabs de dge slong rnams kyis bcom ldan 'das la gsol nas/ bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang dral cing gyur pa'i sems kyis bud med dang lhan cig lus reg par byed dam/ lag pa nas bzung ngam/ dpung pa nas bzung ngam/ lan bu nas bzung ngam/ yan lag dang nying lag gang yang rung ba la nom pa dang nyug pa bdag gir byed na dge 'dun lhag ma'o zhes bca' ba mdzad de/ yul ni mnyan yod/ gang zag ni 'char ka /nyon mongs ba ni 'dod chags/ nyes pa ni lus kyis reg pa'o/ /de la yang dge slong gang zhes bya ba ni snga ma bzhin no/ /dral cing gyur pa'i sems kyis zhes bya ba ni sems dral cing ma gyur pa yang yod/ gyur cing ma dral ba yang yod/ dral cing gyur pa yang yod/ ma dral cing ma gyur pa yang yod do/ /de la re zhig dral cing ma gyur pa ni sems chags pa dang / kun du chags pa pa dang / kun nas dkris pa gang yin pa'o/ /gyur cing ma dral ba ni sems ltos pa dang ldan zhing sems 'brel pa gang yin pa'o/ /dral cing gyur pa ni sems chags pa dang kun du chags pa dang / kun nas dkris shing sems ltos pa dang ldan pa dang sems 'brel pa gang yin pa'o/ /ma bral cing ma gyur pa ni rnam pa de dag ma gtogs pa'o/ /de la dral zhes bya ba ni 'dod chags kyis ngo tsha shes pa'i chos dral ba ste/ sems chags pa dang / kun du chags pa dang / kun nas dkris par gyur pa gang yin pa ste/ de dag ni chung ngu dang 'bring dang chen po'i gnas skabs su shes par bya'o/ /gyur ces bya ba ni rnam par gyur te/ yul de dang 'brel par 'dod par gyur cing / yul la ltos pa dang ldan pa dang / yul dang 'brel pa gang yid bya'o/ /bud med dang lhan cig ces bya ba ni bud med dam gzhon nu ma mi tshangs par spyod pa 'khrig pa'i chos bsten nus pa gang yin pa dang ngo / /lus reg par zhes bya ba ni lus la lus gzhol bar ro/ /byed dam zhes bya ba ni byed par gyur tam mo/ /lag pa nas bzung ngam zhes bya ba ni mkhrig ma man chad kyi lag pa nas so/ /dpung pa nas bzung ngam zhes bya ba ni mkhrig ma yan chad nas so/ /lan bu nas bzung ngam zhes bya ba la lan bu zhes bya ba ni skra dag dang de dang 'brel ba'i gos so/ /yan lag dang nying lag gang yang rung ba la zhes bya ba ni lag pa nas bzung ba dang dpung pa nas bzung ba ma gtogs pa de las gzhan pa'i yan lag gi rnam pa gang yin pa la ste/ yan lag ces bya ba ni lus so/ /nying lag ces bya ba ni rkang lag la sogs pa'o/ /nom pa dang nyug pa bdag gir byed na zhes bya ba ni ro myong bar byed pa ste/ nom pa zhes bya ba ni cung zhig reg na'o/ /nyug pa zhes bya ba ni phyogs thams cad kyis reg pa'o/ /dge 'dun lhag ma'o zhes bya ba ni snga ma bzhin no/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni lus kyi reg pa bdag gir byed na dge 'dun lhag mar 'gyur ro/ /de'i bye brag ni bud med dam gzhon nu ma mi tshangs par spyod pa 'khrig pa'i chos bsten nus pa'i lus dang skra dang / de dang 'brel pa'i gos la reg pa'i bde ba nyams su myong bar bya ba'i 'dun pa dang kun du 'dod chags dang ldan pas reg pa bdag gir byed pa na dngos gzhir 'gyur ro/ /mi'i 'gro bar gtogs pa bud med mi tshangs par spyod pa 'khrig pa'i chos bsten par bya ba'i mthu yod pa gang yang rung ba la na smad pa med do/ /rdzu 'phrul gyi chos can mo la na smad pa med do/ /dge slong 'gro ba gzhan gyi rnam par sten pa na dge slong gi 'du shes yod pa la na smad pa med do/ /dngos po bzang ngan dang 'dra ba la na smad pa med do/ /'gro ba gzhan las skyes pa dang 'gro ba gzhan gyi rnam pa bsten pa la na smad pa med do/ /gnas skabs gzhan thob pa la na smad pa med do/ /gzhi gcig la bslab pa du ma bcas pa nyid la na smad pa med do/ /dngos po la the tshom za bas bsam pa dang bcas par zhugs pa la na smad pa med do/ /yul bsams pa dang ma bsams pa la na smad pa med do/ /rang gi don du byed pa la na smad pa med do/ /lan bu la na smad pa med do/ /lan bu dang 'brel pa'i gos la na smad pa med do/ /nom pa dang nyug pa dang sprod pa dang / 'dzin pa dang 'dren pa dang yongs su 'dren pa dang / 'og nas 'khyud pa dang steng nas 'khyud pa dang / dam du sbyor ba dag la na smad pa med do/ /bsten par bya ba bud med dam gzhon nu mas nom pa dang nyug pa la sogs pa byas pa la de'i bde ba nyams su myong bar bya ba'i 'dun pa kun du 'dod chags dang ldan pas reg pa bdag gir byed pa la na smad pa med do/ /de la nom pa zhes bya ba ni spyi bo nas rkang pa'i mthe bo'i bar gyi lus gang yang rung ba la dang por lan cig sbyor ba nyid do/ /nyug pa zhes bya ba ni spyi bo nas rkang pa'i mthe bo'i bar gyi lus gang yang rung ba la yang dang yang du sbyor ba nyid do/ /sprod pa zhes bya ba ni mthang sbyar ba'i bsam pas rang gi lus gang yang rung ba bud med kyi lus gang yang rung ba dang bar du ma bcad par sprod pa'o/ /'dzin pa zhes bya ba ni rang gi lag pa la sogs pas bud med kyi lag pa la sogs pa 'chang ba'o/ /'dren pa zhes bya ba ni lag pa la sogs pa nas bzung ste/ thag ring po nas drung du'am drung nas thag ring por 'dren pa'o/ /yongs su 'dren pa zhes bya ba ni lag pa la sogs pa nas bzung ste/ rkang pa'i mtha' nas mgo'i mthar ram/ mgo'i mtha' nas rkang pa'i mthar ram/ glo g.yas pa nas g.yon par ram/ glo g.yon pa nas g.yas par yongs su 'dren pa'o/ /'og nas 'khyud pa zhes bya ba ni sa nas rkang pa'i rtse mo'i steng ngam/ rkang pa'i rtse mo nas spyi bo'i bar gyi steng ngam/ spyi bo nas khri'u'i steng ngam/ khri'u'i steng nas khang bzangs kyi bar gyi steng du 'jog cing 'og nas 'khyud par byed pa'o/ /steng nas 'khyud pa zhes bya ba ni khang bzangs kyi steng nas khri'u'i bar gyi steng ngam khri'u'i steng nas spyi bo'i steng ngam/ spyi bo'i steng nas rkang pa'i rtse mo'i bar gyi steng ngam/ rkang pa'i rtse mo'i steng nas sa'i 'og tu 'jug cing steng nas 'khyud par byed pa'o/ /dam du sbyor ba zhes bya ba ni spyi bo nas rkang pa'i rtse mo'i bar gyi lus gang yang rung ba dang mthang dam du sbyor bar byed pa'o/ /'di'i byed pa po ni lus kyi reg pa'i bde ba nyams su myong bar byed pa'i 'dun pa kun nas 'dod chags dang ldan pa dang / mi'i 'gro bar gtogs pa'i bud med dam gzhon nu ma mi tshangs par spyod pa 'khrig pa'i chos bsten par bya ba'i mthu yod pa nyid do/ /'di la yan lag drug gi dngos gzhi'i ltung bar 'gyur te/ reg pa'i bde ba nyams su myong bar 'gyur ba'i 'dun pa kun du 'dod chags dang ldan pa dang / mo nyid dang / bsten nus pa dang / bar du ma chod pa dang ma nyams pa dang / reg pa bdag gir byas pa'o/ /de dag las yan lag ma tshang na ci rigs par na smad do/ /sbyor ba'i ltung ba ni lus kyis reg pa bdag gir bya ba'i phyir sbyor ba brtsams nas ji srid du dngos gzhi la ma thug gi bar du nyes pa sbom por 'gyur ro/ /bud med dam gzhon nu ma mi tshangs par spyod pa 'khrig pa'i chos bsten nus pa gos kyis bar du chod pa dang nyams pa la nyes pa sbom po'o/ /bud med dam gzhon nu ma mi tshangs par spyod pa 'khrig pa'i chos bsten mi nus pa gos kyis bar du ma chod pa dang ma nyams pa la nyes pa sbom po'o/ /skyes pa dang sprul pa dang / za ma dang ma ning dang / mtshan gnyis pa bsten nus pa gos kyis bar du ma chod pa dang / ma nyams pa la nyes pa sbom po'o/ /bud med dam gzhon nu ma mi tshangs par spyod pa 'khrig pa'i chos bsten nus pa gos kyis bar du mchod pa dang / ma nyams pa la 'jam pa dang dro ba dang snyi ba'i bsam pa nyid ni nyes pa sbom po'o/ /zas dang bong ba la sogs pa bud med kyi dbang por 'phen na nyes pa sbom po'o/ /rang dang gcig gi nyams na nyes pa sbom po'o/ /rnam par bsngos pa mo la sogs pa nyes pa sbom po'o/ /cod pan dang khu tshur la sogs pa la nyes pa sbom po'o/ /sen mo dang so dang sha med pa'i rus pa dang spu dag la nyes pa sbom po'o/ /mi ma yin pa'i 'gro ba mo la nyes pa sbom po'o/ /rang bzhin nyams pa la nyes pa sbom po'o/ /dge slong 'gro ba gzhan gyi rnam pa bsten pa na dge slong gi 'du shes med pa la nyes pa sbom po'o/ /gzhan gyi don du byed pa la nyes pa sbom po'o/ /dngos gzhi la sbyor ba tha dad pa ji snyed byas pa re re la nyes pa sbom po re rer 'gyur ro/ /sbyor ba'i sbyor ba'i ltung ba ni lus kyis reg pa bdag gir bya ba'i phyir brtsams nas ji srid du sbyor ba la ma thug gi bar du nyes byas so/ /bud med dam gzhon nu ma mi tshangs par spyod pa 'khrig pa'i chos bsten mi nus pa gos kyis bar du chod pa dang nyams pa la nyes byas so/ /skyes pa dang sprul pa dang za ma dang ma ning dang mtshan gnyis pa bsten mi nus pa gos kyis bar du ma chod pa dang ma nyams pa la nyes byas so/ /skyes pa dang sprul pa dang za ma dang ma ning dang mtshan gnyis pa bsten nus pa gos kyis bar du chod pa dang nyams pa la nyes byas so/ /rkang pa dang phrag pa la sogs pas bud med la phul na nyes byas so/ /bud med kyi stan de dang bcas pa'am de med pa rkang pa la sogs pas 'phul na nyes byas so/ / 'dred par sgyel ba'i bud med ldang nus pa slong na nyes byas so/ /bud med dam gzhon nu ma mi tshangs par spyod pa 'khrig pa'i chos bsten nus pa la nyes pa sbom po gang yin pa de ni mi nus pa la nyes byas so/ /skyes pa dang sprul pa dang za ma dang ma ning dang mtshan gnyis pas bsten nus pa la nyes byas gang yin pa de ni mi nus pa la nyes byas na smad do/ /nyes byas la na smad na yang nyes byas nyid de nyes byas phra mo dang yid kyis bsdam par bya ba zhes bya ba dag tu 'gyur ro/ /gnyis ka'i lus nyams na nyes byas so/ /sen mo dang so dang sha med pa'i rus pa dang / spu dag gis bsten par bya ba'i so dang / sen mo dang so dang sha med pa'i rus pa dang spu dag la reg pa na nyes byas so/ /mi ma yin pa'i 'gro bar gtogs pa pho la nyes byas so/ /dud 'gro'i 'gro bar gtogs pa mo la nyes byas so/ /dud 'gro'i 'gro bar gtogs pa pho la nyes byas na smad do/ /rnam par 'byed pa las dud 'gro'i skye gnas su skyes pa la yang nyes byas nyid do zhes bya ba gnyis gsungs pa ni dud 'gro pho dang za ma dang ma ning dang mtshan gnyis pa bsten mi nus pa gos kyis bar du ma chod pa dang ma nyams pa la nyes byas su 'gyur ba dang / gos kyis bar du chod pa dang nyams pa la nyes byas phra mor 'gyur bar gsungs pa yin no/ /sbyor ba'i ltung ba ji skad bstan pa la sbyor ba'i sbyor ba tha dad pa ji snyed byas pa la nyes byas re rer 'gyur ro/ /ltung ba med pa ni mer mchong ba dang chus khyer ba dang / dug za ba dang / mtshon 'byin pa dang / g.yang sa nas mchong ba dang / thag pas 'ching ba dang / 'chi ba la mngon par phyogs pa sdug bsngal las thar bar bya ba'i phyir snying brtse bas reg pa la ltung ba med do/ /sems dag pas snying brtse ba'i bud med 'khyud pa la nyes pa med do/ /ma dang sring mo dang bu mo dag la de dag tu 'du shes pas reg pa la nyes pa med do/ /sngon yid gcugs pa'i bud med mthong nas kun dga' bar bya ba'i phyir reg pa la ltung ba med do/ /bud med kyis dge slong dang de'i stan dang dge slong 'dred par sgyel ba slong ba la ltung ba med do/ /mi 'dod bzhin du bud med kyis bzung ba la ltung ba med do/ /mas 'khyud pa la ltung ba med do/ /bu mo pang par 'ongs pa la 'khyud pa la ltung ba med do/ /bud med 'khrul pa steng du 'gyel ba la ltung ba med do/ /las dang po pa dang smyos pa dang sems 'khrugs pa dang tshor ba dag gis nyen pa la ltung ba med do/ /bslab par bya ba ni yul thams cad la gnas skabs thams cad du lus kyis reg pa'i sbyor ba'i sbyor ba nyes byas dang / sbyor ba sbom po dang / dngos gzhir 'gyur ba rnam pa thams cad mi bsten par bslab par bya'o/ /dge slong ma la reg par mi bya'o/ /bud med la reg par mi bya'o/ /mer 'chong ba dang / chus khyer ba la sogs pa sdug bsngal las thar bar bya ba'i phyir snying brtse bas reg par bya ba ni ma dang sring mo dang bu mo'i 'du shes nye bar gzhag ste lag pa'am skra dag las reg par bya'o/ /chur nyam thag pa bsgral ba'i phyir reg par bya ba yang de bzhin no/ /chu nas phyung ba dran pa rnyed par bya ba'i phyir bye ma bdal ba'i steng du khas bub tu gzhag par bya'o/ /de bsrung ba na phyogs gcig tu 'dug ste rang gi kha ton dang yid la bya ba la sogs pa yang mi shor bar bya'o/ /dro khar ba lang rdzi dang phyug rdzi dag la gtad de zan la 'gro bar bya'o/ /'tsho'am 'on te mi 'tsho ba yang dang yang du brtag par bya'o/ /kun du chags par 'gyur ba'i yul la brtag par mi bya'o/ /phyir bcos pa ni 'og nas ston to/ / lus kyi reg pa'i dge 'dun lhag ma ste gnyis pa bshad zin to// //'khrig pa dang ldan pa smra ba'i dge 'dun lhag ma'i gleng gzhi'i mgo ni lus kyi reg pa'i dge 'dun lhag ma'i gleng gzhi'i mgo dang 'dra'o/ /bye brag tu na 'char kas bram ze dang khyim bdag gi chung ma de dag la chos bstan par brtsams nas de ji lta ji ltar dral ba de lta de ltar de dag la gnas ngan len gyi tshig sdig pa can tshogs par mi dbyung ba 'khrig pa dang ldan pa dag skyes bus na chung la ji lta ba bzhin du smra bar brtsams so/ /de dag las gang dag bdag gir byed pa de dag ni de dang lhan cig gzhogs stegs dang phyar g.yeng dang / tho 'tshams pa dang / kun du rtse ba dang / kun du ca co 'don pa dang / lus la rdeg pa dag byed do/ /gang dag bdag gir mi byed pa de dag ni de nas phyir byung ste/ 'chags dang / dag ra dang / sgo gang dag na bdag cag gis dwa rnams dang / rgyan po pa rnams dang / nal gyi bu rnams las kyang tshig gang dag sngon ma thos pa de dag 'phags pa 'char ka las thos so/ /gal te bdag cag gi pha ma dang phu nu mo dag gis thos par gyur na rgyal byed kyi tshal ga la ba der ltar yang mi ster na 'gro bar lta smos kyang ci dgos zhes smod par byed/ phyar ka gtong bar byed/ kha zer bar byed pa'i skabs de dge slong rnams kyis bcom ldan 'das la gsol nas/ bcom ldan 'das kyis byung ba 'di dang / gleng gzhi 'di dang skabs 'di la dge slong gi dge 'dun bsdu ba mdzad de bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang dral cing gyur pa'i sems kyis bud med dag la gnas ngan len gyi tshig sdig pa can tshogs par mi dbyung ba 'khrig pa dang ldan pa dag skyes bus na chung la ji lta ba bzhin du smras na dge 'dun lhag ma'o zhes bca' ba mdzad de/ yul ni mnyan yod/ gang zag ni 'char ka /nyon mongs pa ni 'dod chags/ nyes pa ni 'khrig pa dang ldan pa smra ba'o/ /de la yang dge slong gang zhes bya ba ni snga ma bzhin no/ /dral cing gyur pa'i sems kyis zhes pa bya yang snga ma bzhin no/ /bud med dang zhes bya ba ni bud med dam gzhon nu ma legs par smras pa dang nyes par smras pa'i chos rnams kyi don kun shes par nus pa gang yin pa la'o/ / gnas ngan len ces bya ba ni gnas ngan len gnyis te/ pham par 'gyur ba kun nas slong ba dang / dge 'dun lhag ma kun nas slong ba'o/ /ci'i phyir de dag gnas ngan len ces bya zhe na/ ngo bo nyid las dang kun nas slong ba las so/ /ngo bo nyid las gnas ngan len ces bya ba la/ gnas ngan len ces bya ba ni nyes pa'o/ /de la len pa ni nyes pa skyed pa ste skyon chags pa'o/ /kun nas slong ba las gnas ngan len ces bya ba ni pham par 'gyur ba kun nas slong ba mi'i chos bla ma smra ba dang / dge 'dun lhag ma kun nas slong ba 'khrig pa dang ldan pa smra ba dang / don 'dir ni dge 'dun lhag ma kun nas slong ba yin par dgongs so/ /tshig ces bya ba ni brjod pa'o/ /sdig pa can zhes bya ba la/ sdig pa zhes bya ba ni kha na ma tho ba'o/ /can zhes bya ba ni sdig pa'i don dang ldan pa'o/ /tshogs par mi dbyung ba zhes bya ba ni dbus pa'i mtshams las 'das pa ste tshul dang mi mthun pa'o/ /'khrig pa dang ldan pa dag ces bya ba ni mi tshangs par spyod pa dang ldan pa ste/ gnyis kyis gnyis sprod pa las byung ba'i chos kyi ming dang ldan pa'i tshig go/ /skyes bus na chung la ji lta ba bzhin du zhes bya ba la skyes bu zhes bya ba ni skyes pa'o/ /na chung zhes bya ba ni bud med do/ /smras na zhes bya ba ni bud med kyis ma smras pa la smra ba dang / /bud med kyis smras pa la phyir smra na'o/ /dge 'dun lhag ma'o zhes bya ba ni snga ma bzhin no/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni 'khrig pa dang ldan pa'i tshig smra na dge 'dun lhag mar 'gyur ro/ /de'i bye brag ni bud med dam gzhon nu ma legs par smras pa dang nyes par smras pa'i chos rnams kyi don kun shes par nus pa la smra ba'i bde ba nyams su myong bar bya ba'i 'dun pa kun du 'dod chags dang ldan pa mi tshangs par spyod pa 'khrig pa dang ldan pa'i tshig smras na dngos gzhir 'gyur ro/ /mi'i 'gro bar gtogs pa bud med dam gzhon nu ma legs par smras pa dang / nyes par smras pa dag gi don kun shes par nus pa gang yang rung ba la na smad pa med do/ /dge slong 'gro ba gzhan gyi rnam pa bsten pa na dge slong gi 'du shes yod pa la na smad pa med do/ /dngos po bzang ngan dang 'dra ba la na smad pa med do/ /'gro ba gzhan las skyes pa dang 'gro ba gzhan gyi rnam pa bsten pa la na smad pa med do/ /gnas skabs gzhan thob pa la na smad pa med do/ /gzhi gcig la bslab pa du ma bcas pa nyid la na smad pa med do/ /dngos po la the tshom za bas bsam pa dang bcas par zhugs pa la na smad pa med do/ /yul bsams pa dang ma bsams pa la na smad pa med do/ /rang gi don du byed pa la na smad pa med do/ /don go ba la na smad pa med do/ /rgyal sogs pa'i don rgya'i rna ru dang mi tshangs par spyod pa dang / 'khrig pa dang / nyal po zhes bya ba la sogs pa la na smad pa med do/ /rgya la sogs pa'i don dang ldan pa'i tshig gis bsngags pa dang bsngags pa ma yin pa dang / gsol ba dang / nye bar gsol ba dang / 'dri ba dang / yongs su 'dri ba dang / brjod pa dang / smon pa dang / gshe ba dag la na smad pa med do/ /bud med kyis bsngags pa la sogs pa de dag smras pa la rgya la sogs pa'i don dang ldan pa'i tshig gis phyir smras pa la na smad pa med do/ /de la bsngags pa zhes bya ba ni sru'i rma'i sgo gsum po dag ni te por legs par dod pa dang / legs par gnas pa dang / legs par gyur pa dag yin no zhes zer ba'o/ /bsngags pa ma yin pa zhes bya ba ni de las bzlog pa dag zer ba'o/ /gsol pa zhes bya ba ni sru tshur shog de dang de bya'o zhes zer ba'o/ /nye bar gsol pa zhes bya ba ni sru bud med dang / skyes pa de dang de byed pa gang yin pa de ni de'i dga' ba dang / yid du 'ong ba yin gyi sru bdag cag kyang de dang de byas na sru bdag gi dga' ba dang yid du 'ong bar 'gyur ro zhes zer ba'o/ /'dri ba zhes bya ba ni sru skyes pa gang bud med gang la de dang de byed pa de'i dga' ba dang yid du 'ong bar 'gyur na kho bos kyang sru la de dang de bya na sru kho bo'i dga' ba dang yid du 'ong bar 'gyur ram zhes zer ba'o/ /yongs su 'dri ba zhes bya ba ni sru skyes pa gang bud med de dang de byed pa gang yin pa de ni de'i dga' ba dang yid du 'ong bar 'gyur na kho bos kyang sru la de dang de bya na sru kho bo la dga' ba dang yid du 'ong bar 'gyur ba de de bzhin nam 'on te ma yin/ de la sru ji snyam byed ces zer ba'o/ /brjod pa zhes bya ba ni sru mo dang sru mo kho bo'i gan du skyed mos tshal lam lha'i gnas sam dus mal che ge mo zhig tu bud med de lta bu zhig don de'i phyir 'ongs par gyur nas kho bos mal me tog gis bkram pa bshams shing mtshan thog thag tu 'bru mar gyi mar me btsugs nas kho bos de dang lhan cig bca' ba de dang de lta bu'i chos shing bza' ba de dang de lta bu yang zos/ btung ba de dang de lta bu yang 'thungs shing / kho bos de dang lhan cig de dang de yang byas te/ sru yang don de'i phyir 'ongs par gyur na kho bos sru dang lhan cig de dag byas par 'gyur ro zhes zer ba'o/ /smon pa zhes bya ba ni sru gang dag sru dang lhan cig de lta de ltar de dag byed pa ni bde bar gyur cing mtho ris thob pa yin pas kho bos yang gal te sru dang lhan cig de dang de yang byas na bde bar 'gyur zhing mtho ris kyang thob par 'gyur ro zhes zer ba'o/ /gshe ba zhes bya ba ni ro lta bu khyod la bong bu dag de ltar byed par gyur cig /khyod kyis der mgal dum dag chug shig ces bya bas spyo bar byed pa'o/ /'di'i byed pa po ni 'khrig pa dang ldan pa smra ba'i bde ba nyams su myong bar bya ba'i 'dun pa kun du 'dod chags dang ldan pa dang / mi'i 'gro bar gtogs pa'i bud med dam gzhon nu ma legs par smras pa dang nyes par smras pa'i chos rnams kyi don kun shes par nus pa'o/ /'di la yan lag lnga'i dngos gzhi'i ltung bar 'gyur te/ smra ba'i bde ba nyams su myong bar bya ba'i 'dun pa kun du 'dod chags dang ldan pa dang / bud med nyid dang / legs par smras pa dang nyes par smras pa'i chos rnams kyi don kun shes par nus pa dang / don go ba dang / 'khrig pa dang ldan pa'i tshig smras pa'o/ /de dag las yan lag ma tshang na ci rigs par na smad do/ /sbyor ba'i ltung ba ni 'khrig pa dang ldan pa'i tshig smra ba'i phyir sbyor ba brtsams nas ji srid du dngos gzhi la ma thug gi bar du nyes pa sbom por 'gyur ro/ /rgya la sogs pa'i don dang ldan pa'i tshig med par rma'i sgo dang zag byed dang bshang ba'i lam zhes bya ba la sogs pa pho dang mo'i rma'i sgo gsum po dag gi ming gi tshig smras na nyes pa sbom po'o/ /rgya la sogs pa'i don dang ldan pa'i tshig med par bsngags pa dang bsngags pa ma yin pa dang / gsol ba dang nye bar gsol ba dang / 'dri ba dang yongs su 'dri ba dang / brjod pa dang smon pa dang / gshe ba dag la nyes pa sbom po'o/ /bud med kyi bsngags pa la sogs pa de dag smras pa la rgya la sogs pa'i don dang ldan pa'i tshig med pa'i phyir smras pa la nyes pa spom po'o/ /khyod ni mdzes pa can yin no/ /khyod ni sdig pa can yin no/ /khyod kyi rma'i sgo gsum po dag ni mdzes pa can yin no/ /khyod kyi rma'i sgo gsum po dag ni sdig pa can yin no/ /bgo bsha' gyis shig /kho bo la bgo bsha' gyis shig /kho bo dang lhan cig nyol cig /kho bo dang phrad par gyis shig ces smras na nyes pa sbom po'o/ /rdzu 'phrul gyi rnam par 'phrul ba'i chos can la rgya la sogs pa'i don dang ldan pa'i tshig smras na nyes pa sbom po'o/ /sru kho bo la nas byin cig /sru khyod la ci mthong ba de byin cig /sru khyod kyi mdun na mo gang yin pa de byin cig /sru khyod kyi yid du 'ong ba gang yin pa de byin cig / sru khyod la kho bo dga'o/ /sru kho bo la chu dang bca' ba dang / nas thug dang / bza' ba byin cig /khyod nyid de dag yin no zhes smras na nyes pa sbom po'o/ /khyod la bong bu dag de byed par gyur cig ces bya ba la sogs pa smras na nyes pa sbom po'o/ / der mgal dum dag chug shig ces bya ba la sogs pa smras na nyes pa sbom po'o/ /khyed skyes bu 'phyon ma dag gi phyir bsod snyoms la rgyu ba'am zhes bya ba la sogs pa smras na nyes pa sbom po'o/ /dge slong rang bzhin gyis gnas ngan len brjod pas gnas ngan len smras na nyes pa sbom po'o/ /bud med dam gzhon nu ma legs par smras pa dang nyes par smras pa'i chos rnams kyi don du kun shes par mi nus pa la nyes pa sbom po'o/ /skyes pa dang sprul pa dang za ma dang ma ning dang mtshan gnyis pa legs par smras pa dang nyes par smras pa'i chos rnams kyi don kun shes par nus pa la nyes pa sbom po'o/ /mi ma yin pa'i 'gro bar gtogs pa mo la nyes pa sbom po'o/ /rang bzhin nyams pa la nyes pa sbom po'o/ /don ma go ba la nyes pa sbom po'o/ /mngags pa dang brgyud pa la sogs pa dang spring yig dang lag yig la sogs pa la nyes pa sbom po'o/ /bdag nyid dang ma 'brel pa dag la nyes pa sbom po'o/ /gzhan gyi don du byed pa la nyes pa sbom po'o/ /rang dang gzhan gnyis ka'i don du smras pa la nyes pa sbom po'o/ /dge 'dun gyi don du smras na nyes pa sbom po'o/ /gnyid log pa dang / snyoms par zhugs pa dang / glen pa dang / 'on pa dang / dbus pa dang / mtha' khob pa'i skad dag kyang don ma go ba nyid yin pas nyes pa sbom po'o/ /lkugs pa dang kla klo la sogs pa de smra mi shes pa dag la don go ba yod kyang / rnam par rig byed kyi yan lag ma yin pas de dag la smras na yang nyes pa sbom po'o/ /dge slong 'gro ba gzhan gyi rnam pa bsten pa na dge slong gi 'du shes med pa la nyes pa sbom po'o/ /dngos gzhi la sbyor ba tha dad pa ji snyed byas pa re re la nyes pa sbom po re rer 'gyur ro/ /sbyor ba'i sbyor ba'i ltung ba ni 'khrig pa dang ldan pa'i tshig smra pa'i phyir brtsams nas ji srid du sbyor ba la ma thug gi bar du nyes byas so/ /bud med dam gzhon nu ma legs par smras pa dang nyes par smras pa'i chos rnams kyi don kun shes par nus pa la nyes pa sbom po gang yin pa de mi nus pa la nyes byas so/ /skyes pa dang sprul pa dang za ma dang ma ning dang mtshan gnyis pa legs par smras pa dang nyes par smras pa'i chos rnams kyi don kun shes par nus pa la nyes pa sbom po gang yin pa de mi nus pa la nyes byas so/ /bud med dam gzhon nu ma legs par smras pa dang nyes par smras pa'i chos rnams kyi don kun shes par nus pa la nyes byas gang yin pa de mi nus pa la nyes byas na smad do/ /skyes pa dang sprul pa dang za ma dang ma ning dang mtshan gnyis pa legs par smras pa dang nyes par smras pa'i chos rnams kyi don kun shes par nus pa de la nyes byas gang yin pa de ni mi nus pa la nyes byas na smad do/ /mi ma yin pa'i 'gro bar gtogs pa pho la nyes byas so/ /dud 'gro'i 'gro bar gtogs pa mo la nyes byas so/ /dud 'gro'i 'gro bar gtogs pa pho la nyes byas na smad do/ /sbyor ba'i ltung ba la sbyor ba tha dad pa ji snyed byas pa re re la nyes byas re rer 'gyur ro/ /ltung ba med pa ni don gzhan la bsam pas ljongs kyi nges pa'i tshig smra ba dper na yul dbus na chu snod kyi bye brag la kun di ka zhes bya ba las bsams te/ yul ko sa la na mo mtshan la kun di ka zhes zer ba'i ming brjod pa lta bu la ltung ba med do/ /ming gi cha nyid 'dra ba dper na nas la ya ba rtswa dang ya bas yol ba la ya ba ni ka zhes bya ba la mi tshangs par spyod pa la ya b+ha zhes bya ba de la nas dang rtswa dang yol ba'i ya b+ha zhes brjod pas ya b+ha zhes bya ba tshig zur 'khrul pa la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni yul thams cad la gnas skabs thams cad du gnas ngan len brjod pa'i sbyor ba'i sbyor ba nyes byas dang / sbyor ba spom po dang / dngos gzhir 'gyur ba rnam pa thams cad mi bsten par bslab par bya'o/ /phyir bcos pa ni 'og nas ston to/ /'khrig pa dang ldan pa smra ba'i dge 'dun lhag ma ste gsum pa bshad zin to// //bsnyen bkur bsngags pa'i dge 'dun lhag ma'i gleng gzhi'i mgo yang lus kyi reg pa'i dge 'dun lhag ma'i gleng gzhi'i mgo dang 'dra'o/ /bye brag tu na 'char kas bram ze dang khyim bdag gi chung ma de dag la chos bstan par brtsams nas de ji lta ji ltar dral ba de lta de ltar de dag gi mdun du bdag nyid kyi lus kyi bsnyen bkur gyi phyir 'di lta ste nga lta bu'i dge slong tshul khrims dang ldan pa dge ba'i chos can tshangs par spyod pa la 'di ltar 'khrig pa dang ldan pa'i chos 'dis bsnyen bkur byas na sru 'di ni bsnyen bkur rnams kyi mchog yin no zhes bsngags pa brjod par brtsams so/ /de dag las gang dag bdag gir byed pa de dag ni de dang lhan cig gzhogs stegs dang / 'phyar g.yeng dang / tho 'tshams pa dang / kun du rtse ba dang / kun du ca co 'don pa dang / lus la rdeg pa dag byed do/ /gang dag bdag gir mi byed pa de dag ni de nas phyir byung ste/ 'chags dang / dgar dang / sgo gang dag na bdag cag gi rang gi khyim thab dag las kyang tshig gang dag sngon ma thos pa de dag 'phags pa 'char ka las thos so/ /gal te bdag cag gi pha ma dang phu nu mo dag gis thos par gyur na rgyal byed kyi tshal ga la ba der ltar mi ster na 'gror lta ci smos kyang ci dgos zhes smod par byed/ phyar ka gtong bar byed/ kha zer bar byed pa'i skabs de dge slong rnams kyis bcom ldan 'das la gsol nas/ bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang dral cing gyur pa'i sems kyis bud med kyi mdun du bdag nyid kyi lus kyi bsnyen bkur bya ba'i phyir 'di lta steng lta bu'i dge slong tshul khrims dang ldan pa dge ba'i chos can tshangs par spyod pa la 'di ltar 'khrig pa dang ldan pa'i chos 'dis bsnyen bkur byas na sru 'di ni bsnyen bkur rnams kyi mchog yin no zhes bsngags pa brjod na dge 'dun lhag ma'o zhes bca' ba mdzad de/ yul ni mnyan yod/ gang zag ni 'char ka /nyon mongs pa ni 'dod chags/ nyes pa ni bsnyen bkur bsngags pa'o/ /de la dge slong gang zhes bya ba ni snga ma bzhin no/ /dral cing gyur pa'i sems kyis zhes bya ba yang snga ma bzhin no/ /bud med la zhes bya ba ni bud med dam gzhon nu ma legs par smras pa dang nyes par smras pa'i chos rnams kyi don kun shes par nus pa'o/ /mdun du'o zhes bya ba ni sngon du'o/ /bdag nyid kyi lus kyi bsnyen bkur bya ba'i phyir zhes bya ba ni bdag nyid kyi bsnyen bkur gyi phyir ro/ /'di lta ste nga lta bu zhes bya ba ni nye bar bstan pa dang / kun du bstan pa'i tshig bla dgas yin no/ / dge slong zhes bya ba ni dge slong gi dngos po ji skad bstan pa dang ldan pa'o/ /tshul khrims dang ldan pa zhes bya ba ni tshul khrims kyi phung po ji skad bstan pa dang ldan pa'o/ /dge ba'i chos can zhes bya ba ni ting nge 'dzin gyi phung po ji skad bstan pa dang ldan pa'o/ /tshangs par spyod pa la zhes bya ba ni shes rab kyi phung po ji skad bstan pa dang ldan pa'o/ /'khrig pa dang ldan pa'i zhes bya ba ni mi tshangs par spyod pa dang ldan pa'o/ /chos 'dis zhes bya ba ni chos ma yin pa chos kyi sgrar bstan pa 'dis yin gyi gzhan gyis ni ma yin pa'o/ /bsnyen bkur na zhes bya ba ni bsnyen bkur byas na'o/ /sru zhes bya ba ni dga' ba'i tshig bla dgas kyis bod pa'o/ /'di ni bsnyen bkur rnams kyi mchog yin no zhes bya ba la mchog yin no zhes bya ba ni gtso bo yin no/ /bsngags pa brjod na zhes bya ba ni bstod pa byas na'o/ /dge 'dun lhag ma'o zhes bya ba ni snga ma bzhin no/ /de la ltung ba ji ltar 'gyur zhe na/ 'dir yang dngos gzhi dang sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni bdag nyid la 'khrig pas bsnyen bkur bya ba bsngags na dge 'dun lhag mar 'gyur ro/ /de'i bye brag ni bud med dam gzhon nu ma legs par smras pa dang nyes par smras pa'i chos rnams kyi don kun shes par nus pa la bsnyen bkur bsngags pa'i bde ba nyams su myong bar bya ba'i 'dun pa kun du 'dod chags dang ldan pas nga lta bu la 'khrig pa dang ldan pa'i chos 'dis bsnyen bkur byas na de ni mchog yin no zhes bsngags na dngos gzhir 'gyur ro/ /mi'i 'gro bar gtogs pa'i bud med dam gzhon nu ma legs par smras pa dang nyes par smras pa'i chos rnams kyi don kun shes par nus pa gang yang rung ba la na smad pa med do/ /dge slong 'gro ba gzhan gyi rnam pa bsten pa na dge slong gi 'du shes yod pa la na smad pa med do/ /dngos po bzang ngan dang 'dra ba la na smad pa med do/ /'gro ba gzhan las skyes pa dang 'gro ba gzhan gyi rnam pa bsten pa la na smad pa med do/ /gnas skabs gzhan thob pa la na smad pa med do/ /gzhi gcig la bslab pa du ma bcas pa nyid la na smad pa med do/ /dngos po la the tshom za bas bsam pa dang bcas par zhugs pa la na smad pa med do/ /yul bsams pa dang ma bsams pa la na smad pa med do/ /rang gi don du byed pa la na smad pa med do/ /nga lta bu dge slong tshul khrims dang ldan pa zhe'am dge ba'i chos can zhe'am tshangs par spyod pa zhe'am tshul khrims dang ldan pa dge ba'i chos can zhe'am/ tshul khrims dang ldan pa tshangs par spyod pa zhe'am/ dge ba'i chos can tshul khrims dang ldan pa zhe'am/ dge ba'i chos can tshangs par spyod pa zhe'am/ tshangs par spyod pa tshul khrims dang ldan pa zhe'am/ tshangs par spyod pa dge ba'i chos can zhe'am/ tshul khrims dang ldan pa dge ba'i chos can tshangs par spyod pa la 'khrig pa dang ldan pa'i chos 'dis bsnyen bkur byas na 'di ni mchog yin no zhe'am/ phul yin no zhe'am/ khyad par du 'phags pa yin no zhe'am/ bzang ba yin no zhe'am/ mdzes pa yin no zhe'am/ dge ba yin no zhe'am/ mchod par 'os pa yin no zhe'am/ bstod par 'os pa yin no zhe'am/ rgya che ba yin no zhe'am/ ches mchog dang / ches phul dang ches khyad par du 'phags pa dang / ches bzang ba dang / ches mdzes pa dang / ches dge ba dang / ches mchod par 'os pa dang / ches bstod par 'os pa dang / ches rgya che ba yin no zhes bsngags pa brjod pa gang yang rung ba la na smad pa med do/ /'khrig pa zhes bya ba'i tshig gi skabs su rgya la sogs pa'i don gyi tshig rgya'i rna ru dang mi tshangs par spyod pa dang / nyal po zhes bya ba la sogs pa'i ming grags pa gang yang rung ba smos te/ 'dis bsnyen bkur byas na de ni mchog yin no zhes bya ba la sogs pas bsngags pa brjod pa gang yang rung ba la na smad pa med do/ /bsten par bya bas de skad bsngags pa de la de de bzhin no zhes rjes su yi rang ba'i tshig brjod pa la na smad pa med do/ /bsten par bya bas de skad bsngags pa de nyid rang gis bzlas pa la na smad pa med do/ /'di'i byed pa po ni bsnyen bkur bsngags pa'i bde ba nyams su myong bar bya ba'i 'dun pa kun du 'dod chags dang ldan pa mi'i 'gro bar gtogs pa'i bud med dam gzhon nu ma legs par smras pa dang nyes par smras pa'i chos rnams kyi don kun shes par nus pa'o/ /'di la yan lag drug gi dngos gzhi'i ltung bar 'gyur te/ bsnyen bkur bsngags pa'i bde ba nyams su myong bar bya ba'i 'dun pa kun du 'dod chags dang ldan pa dang / bud med nyid dang / legs par smras pa dang nyes par smras pa'i chos rnams kyi don kun shes par nus pa dang / don go ba dang / bdag gi phyir dang / rgya la sogs pa'i don gyi bsnyen bkur bsngags pa'o/ /de dag las yan lag ma tshang na ci rigs par na smad do/ /bsnyen bkur bsngags pa'i dge 'dun lhag ma'i dngos gzhi 'di gang las byung ba de la de nyid kyi gnas skabs na 'khrig pa dang ldan pa'i smra ba'i dge 'dun lhag ma'i dngos gzhi yang byung bar rig par bya ste/ snga ma ni 'khrig pa dang ldan pa'i tshig smras ma thag tu dngos gzhi'i ltung bar 'gyur la/ 'di ni 'khrig pa dang ldan pa'i chos 'dis bsnyen bkur byas pa de bsngags pa brjod na ltung ba'i dngos gzhir 'gyur ro/ /sbyor ba'i ltung ba ni bsnyen bkur bsngags pa'i sbyor ba brtsams nas dngos gzhi la ma thug gi bar du nyes pa sbom por 'gyur ro/ /'khrig pa'i ming ma smos par nga lta bu'i dge slong tshul khrims dang ldan pa zhe'am/ dge ba'i chos can zhe'am/ tshangs par spyod pa zhe'am/ tshul khrims dang ldan pa dge ba'i chos can zhe'am/ tshul khrims dang ldan pa tshangs par spyod pa zhe'am/ dge ba'i chos can tshul khrims dang ldan pa zhe'am/ dge ba'i chos can tshangs par spyod pa zhe'am/ tshangs par spyod pa tshul khrims dang ldan pa zhe'am/ tshangs par spyod pa dge ba'i chos can zhe'am/ tshul khrims dang ldan pa dge ba'i chos can tshangs par spyod pa la 'di ltar chos 'dis bsnyen bkur byas na 'di ni bsnyen bkur rnams kyi mchog yin pa'am/ khyad par du 'phags pa'am/ bzang ba'am/ mdzes pa'am/ dge ba'am/ mchod par 'os pa'am/ bstod par 'os pa'am/ rgya che ba'am/ ches mchog gam/ ches phul lam/ ches khyad par du 'phags pa'am/ ches bzang ba'am/ ches mdzes pa'am/ ches dge ba'am/ ches mchod par 'os pa'am/ ches bstod par 'os pa'am/ ches rgya che ba yin no zhes bsngags pa brjod na bye brag med de nyes pa sbom po'o/ /nga lta bu zhes ma smos par dge slong tshul khrims dang ldan pa zhes bya ba la sogs pa la 'di ltar 'khrig pa dang ldan pa'i chos 'dis bsnyen bkur byas na 'di ni mchog la sogs pa yin no zhes bsngags pa brjod na bye brag med de nyes pa sbom po'o/ /'khrig pa dang ldan pa'i chos kyi ming smos pa'i nyes pa sbom po'o/ /'di byung na 'khrig pa dang ldan pa smra ba'i dge 'dun lhag ma yang byung bar shes par bya'o/ /bud med dam gzhon nu ma legs par smras pa dang nyes par smras pa'i chos rnams kyi don kun shes par nus pa la nyes pa sbom po ste 'di'i nyes pa sbom po byung na 'khrig pa dang ldan pa smra ba'i nyes pa sbom po yang byung bar shes par bya'o/ /skyes pa dang sprul pa dang za ma dang ma ning dang mtshan gnyis pa legs par smras pa dang nyes par smras pa'i chos rnams kyi don kun shes par nus pa la nyes pa sbom po ste 'di'i nyes pa sbom po byung ba na 'khrig pa dang ldan pa smra ba'i nyes pa sbom po yang byung bar shes par bya'o/ /rdzu 'phrul gyi chos can mo la nyes pa sbom po'o/ /mi ma yin pa'i 'gro bar gtogs pa mo la nyes pa sbom po'o/ /rang bzhin nyams pa la nyes pa sbom po'o/ /don ma go ba la nyes pa sbom po'o/ /mngags pa dang brgyud pa la sogs pa dang spring yig dang lag yig la sogs pa la nyes pa sbom po'o/ /bdag nyid dang 'brel pa dag la nyes pa sbom po'o/ /gzhan gyi don du byed pa la nyes pa sbom po'o/ /rang dang gzhan gnyis ka'i don du byed pa la bsngags na nyes pa sbom po'o/ /dge 'dun gyi don du bsngags na nyes pa sbom po'o/ /gnyid log pa dang snyoms par zhugs pa dang / glen pa dang 'on pa dang dbus pa dang mtha' khob pa'i skad dag kyang don ma go ba nyid yin pas nyes pa sbom po'o/ /lkugs pa dang kla klo la sogs pa smra mi shes pa dag la don go ba yod kyang rnam par rig byed kyi yan lag ma yin pas de dag la bsngags na yang nyes pa sbom po'o/ /dge slong 'gro ba gzhan gyi rnam pa bsten pa na dge slong gi 'du shes med pa la nyes pa sbom po'o/ /dngos gzhi la sbyor ba tha dad pa ji snyed byas pa re re la nyes pa sbom po re rer 'gyur ro/ /sbyor ba'i sbyor ba'i ltung ba ni bsnyen bkur bsngags pa dang brtsams nas ji srid du sbyor ba la ma thug gi bar du nyes byas so/ /nga lta bu zhes bya ba dang / 'khrig pa dang ldan pa dang zhes ma smos par dge slong tshul khrims dang ldan pa la sogs pa la chos 'dis bsnyen bkur byas na de'i mchog la sogs pa yin no zhes bsngags pa brjod na bye brag med de nyes byas so/ /bud med dam gzhon nu ma legs par smras pa dang nyes par smras pa'i chos rnams kyi don kun shes par nus pa la nyes pa sbom po gang yin pa de mi nus pa la nyes byas so/ /skyes pa dang sprul pa dang za ma dang ma ning dang mtshan gnyis pa legs par smras pa dang nyes par smras pa'i chos rnams kyi don kun shes par nus pa la nyes pa sbom po gang yin pa de mi nus pa la nyes byas so/ /bud med dam gzhon nu ma legs par smras pa dang nyes par smras pa'i chos rnams kyi don kun shes par nus pa la nyes byas gang yin pa de mi nus pa la nyes byas na smad do/ /skyes pa dang / sprul pa dang za ma dang ma ning dang mtshan gnyis pa legs par smras pa dang nyes par smras pa'i chos rnams kyi don kun shes par nus pa la nyes byas gang yang yin pa de mi nus pa la nyes byas na smad do/ /'gro ba gzhan du gtogs pa pho la nyes byas so/ /dud 'gro'i 'gro bar gtogs pa mo la nyes byas so/ /dud 'gro'i 'gro bar gtogs pa pho la nyes byas na smad do/ /bsnyen bkur bsngags pa'i nyes byas byung ba na 'khrig pa dang ldan pa smra ba'i nyes byas kyang rnam pa thams cad du 'byung bar shes par bya'o/ / sbyor ba'i ltung ba la sbyor ba tha dad pa ji snyed byas pa re re la nyes byas re rer 'gyur ro/ /ltung ba med pa ni las dang po pa dang smyos pa dang sems 'khrugs pa dang tshor ba dag gis nyen pa la ltung ba med do/ /bslab par bya ba ni yul thams cad la gnas skabs thams cad du 'khrig pa'i bsnyen bkur bsngags pa'i sbyor ba nyes byas dang / sbyor ba sbom po dang dngos gzhir 'gyur ba rnam pa thams cad mi bsten par bslab par bya'o/ /phyir bcos pa ni 'og nas ston to/ /bsnyen bkur bsngags pa'i dge 'dun lhag ma ste bzhi pa bshad zin to// // so sor thar pa'i mdo rgya cher 'grel pa 'dul ba kun las btus pa bam po lnga pa/ smyan byed pa'i dge 'dun lhag ma'i gleng gzhi ni byung ba dang bcas pa'i dbang gis rnam pa gnyis te/ byung ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /ri dgas 'dzin gyi bu nag po zhes bya ba de mnyan yod pa'i bram ze dang khyim bdag rnams kyi gtam 'dre ba/ phebs par smra ba/ smos 'drin/ 'grogs bshes/ yid gcugs pa/ khyim du 'jug par byed pa yin pas/ gang yang rung ba dag la bu mo sbyin par bya ba yod pa dang / gang yang rung ba dag bu mo slong bar byed pa de dag ri dgas 'dzin gyi bu nag po'i gan du song ste khye'u dang bu mo'i rgyus 'dri zhing gnyen byed do/ /de nas gang dag gi bu mo sbyin nyes pa dang bslang nyes pa de dag ni ri dgas 'dzin gyi bu nag po la mi bsngags pa rjod par byed do/ /gang dag gi bu mo sbyin legs pa dang bslang legs pa de dag ni ri dgas 'dzin gyi bu nag po la bsngags pa rjod par byed do/ /de ltar mnyan yod na ri dgas 'dzin gyi bu nag po la dus gcig tu bsngags pa dang bsngags pa ma yin pa dag byung bar gyur to/ /de dus gzhan zhig na sangs rgyas la mngon par dad/ chos dang dge 'dun la mngon par dad/ sangs rgyas la skyabs su song / chos dang dge 'dun la skyabs su song zhing / des srog gcod pa spangs te srog gcod pa las phyir log / ma byin par len pa dang / 'dod pas log par g.yem pa dang / brdzun du smra ba dang / 'bru'i chang dang / bcos pa'i chang myos par 'gyur ba bag med pa'i gnas spangs te/ 'bru'i chang dang bcos pa'i chang myos par 'gyur ba bag med pa'i gnas las phyir log go/ /de dus cung zhig khyim par khyim na gnas nas dad pa snga ma de nyid rjes su spel zhing / skra dang kha spu bregs te gos ngur smrig dag bgos nas yang dag pa kho nar dad pas legs par gsungs pa'i chos 'dul ba la khyim nas khyim med par rab tu byung ngo / /de de ltar rab tu byung nas kyang mnyan yod pa'i bram ze dang khyim bdag rnams dang sngon bshes pa nyid kyis de dag gi gtam 'dre ba/ phebs par smra ba/ smos 'drin/ 'grogs bshes/ yid gcugs pa khyim du 'jug par byed pa yin pas sngon bzhin du gang yang rung ba dag la bu mo sbyin par bya ba yod pa dang / gang yang rung ba dag bu mo slong bar byed pa de dag ri dgas 'dzin gyi bu nag po'i gan du song ste/ khye'u dang bu mo'i rgyus 'dri zhing gnyen byed do/ /de na gang dag gi bu mo sbyin nyes pa dang bslang nyes pa de dag ni ri dgas 'dzin gyi bu nag po la mi bsngags pa rjod par byed do/ /gang dag gi bu mo sbyin legs pa dang bslang legs pa de dag ni ri dgas 'dzin gyi bu nag po la bsngags pa rjod par byed do/ /de ltar mnyan yod na ri dgas 'dzin gyi bu nag po la sngon bzhin du dus gcig tu bsngags pa dang bsngags pa ma yin pa dag byung bar gyur to/ /de ni re zhig byung ba yin te/ sangs rgyas bcom ldan 'das kyis re zhig 'dul ba la nyan thos rnams kyi bslab pa'i gzhi bca' ba ni mi mdzad de/ yul ni mnyan yod/ gang zag ni ri dgas 'dzin gyi bu nag po/ nyon mongs pa ni 'dod chags/ nyes pa ni smyan du 'gyur ba'o/ /bcas pa'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de dge slong drug sde dag bud med la skyes pa'i tshig dang / skyes pa la bud med kyi tshig nyid kyis chung ma nyid dam mdza' na mo nyid du smyan byed nas mu stegs can dag shes ldan dag shAkya'i bu'i dge sbyong 'di dag ni bud med la skyes pa'i tshig dang / skyes pa la bud med kyi tshig gis chung ma nyid dam mdza' na mo nyid du smyan byed de/ bram ze dang khyim bdag bslab pa'i gzhi yang dag par ma blangs pa gzhan dag kyang skyes pa la bud med kyi tshig dang bud med la skyes pa'i tshig gis chung ma nyid dam mdza' na mo nyid du smyan byed na/ shAkya'i bu'i dge sbyong rnams dang bram ze dang khyim bdag bslab pa'i gzhi yang dag par ma blangs pa rnams la bye brag ni ci yod/ bsam pa ni ci yod/ tha dad du bya ba ni ci yod/ dge slong mgo reg 'di dag la su zhig bsod snyoms sbyin pa dang bya bar sems zhes smod par byed/ phyar ka gtong bar byed/ kha zer bar byed pa'i skabs de dge slong rnams kyis bcom ldan 'das la gsol nas/ bcom ldan 'das kyis byung ba 'di dang / gleng gzhi 'di dang skabs 'di la dge slong gi dge 'dun bsdu ba mdzad de bslab pa bca' ba'i phan yon bcu yang dag par gzigs pas/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang bud med la skyes pa'i tshig dang skyes pa la bud med kyi tshig gis chung ma nyid dam mdza' na mo nyid du smyan byed na tha na thang 'ga' phrad pa la yang rung ste/ dge 'dun lhag ma'o zhes bca' ba mdzad de/ yul ni mnyan yod/ gang zag ni drug sde/ nyon mongs pa ni 'dod chags/ nyes pa ni smyan byed pa'o/ /de la yang dge slong gang zhes bya ba ni snga ma bzhin no/ /bud med la skyes pa'i tshig dang zhes bya ba ni skyes pa'i kun du spyad pa'i bsam pa'i tshig gang yin pa de bud med la brjod pa'o/ /skyes pa la bud med kyi tshig gis zhes bya ba ni bud med kyis kun du spyad pa'i bsam pa'i tshig gang yin pa de skyes pa la brjod pas so/ /chung ma nyid dam mdza' na mo nyid du zhes bya ba ni chung ma bdun dang mdza' na mo bcu nyid du'o/ /chung ma bdun gang zhe na/ chu tshigs kyis byin pa dang / rin chas nyos pa dang / btsan phrogs su thob pa dang / dang bsam du 'dus pa dang / gos zas kyis 'tshos pa dang / kha dum pa dang / thang 'ga' phrad pa ni bdun pa'o/ /de la chu tshigs kyis byin pa'i chung ma gang zhe na/ bud med dam gzhon nu ma gang pha ma dag gis skyes pa la 'di khyod kyi chung ma skye dgu'i bdag mor byos shig ces chu tshigs kyis byin zhing de'i chung ma skye dgu'i bdag mor gyur nas des de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa/ sbas pa shin tu sbas pa de ni chu tshigs kyis byin pa'i chung ma zhes bya'o/ /rin chas nyos pa'i chung ma gang zhe na/ bud med dam gzhon nu ma gang skyes pas 'di bdag gi chung ma skye dgu'i bdag mo bya'o zhes pha ma dag las rin chas nyos shing de de'i chung ma skye dgu'i bdag mor gyur nas des de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa/ sbas pa shin tu sbas pa de ni rin chas nyos pa'i chung ma zhes bya'o/ /btsan phrogs su thob pa'i chung ma gang zhe na/ 'di lta ste/ rgyal po rgyal rigs spyi bor dbang bskur bas dpung gi tshogs yan lag bzhi po go bskon te pha rol gyi yul 'khor dang pha rol gyi yul du song nas ma phebs pa phab cing phebs par gnas nas thob rgyal du sgrogs par byed pa'i tshe de na skyes pas rgyal po rgyal mtshan du byas nas/ bud med dam gzhon nu ma gang yin pa 'di bdag gi chung ma skye dgu'i bdag mo bya'o zhes phrogs shing de de'i chung ma skye dgu'i bdag mor gyur nas des de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa/ sbas pa shin tu sbas pa de ni btsan phrogs su thob pa'i chung ma zhes bya'o/ /gzhan yang btsan phrogs su thob pa'i chung ma gang zhe na/ 'di lta ste chom rkun pa dag gis grong gzhom pa'am grong khyer gzhom pa'am/ ljongs gzhom par byas te/ rang gi mgo bo rgyal mtshan du byas te bud med dam gzhon nu ma gang yin pa 'di bdag gi chung ma skye dgu'i bdag mo bya'o zhes phrogs shing de de'i chung ma skye dgu'i bdag mor gyur nas des de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa/ sbas pa shin tu sbas pa de ni btsan phrogs su thob pa'i chung ma zhes bya'o/ /dang bsam du 'dus pa'i chung ma gang zhe na/ bud med dam gzhon nu ma gang rang gi dad pa dang gcugs pa dang dga' bas skyes pa'i gan du 'ongs te/ 'di skad ces rje'i sras tshur spyon khyod bdag gi khyim thab mdzod cig dang bdag gis khyod kyi btsun mo skye dgu'i bdag mo bgyi'o zhes zer zhing de de'i chung ma skye dgu'i bdag mor gyur nas des de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa sbas pa shin tu sbas pa de ni dang bsam du 'dus pa'i chung ma zhes bya'o/ /gos zas kyis 'tshos pa'i chung ma gang zhe na/ bud med dam gzhon nu ma gang skyes pa'i gan du 'ongs te/ 'di skad ces rje'i sras tshur spyon khyod kyis bdag la zas dang gos stsol cig dang bdag gis khyod kyi btsun mo skye dgu'i bdag mo bgyi'o zhes zer zhing de de'i chung ma skye dgu'i bdag mor gyur nas des de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa sbas pa shin tu sbas pa de ni gos zas kyis 'tshos pa'i chung ma zhes bya'o/ /kha dum pa'i chung ma gang zhe na/ bud med dam gzhon nu ma gang skyes pa'i gan du 'ongs te/ 'di skad ces rje'i sras tshur spyon khyod kyi nor gang lags pa dang bdag gi nor gang lags pa de dag gcig tu bsdus te bdag cag gnyis mnyam du 'tsho bar bgyi zhing bdag cag gnyis las khye'u'am bu mo gang dag mchis par 'gyur ba de dag kyang bdag cag shi zhing dus la bab pa dag la mang po'am/ nyung ngu gang yang rung ba'i sbyin pa dag byin zhing bsod nams dag bgyis nas 'di gnyis gang du skyes pa der 'gro zhing rjes su 'gro bar gyur cig ces ming gi yon bshad pa bgyis par 'gyur bar bgyi'o zhes zer zhing de de'i chung ma skye dgu'i bdag mor gyur nas des de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa sbas pa shin tu sbas pa de ni kha dum pa'i chung ma zhes bya'o/ /thang 'ga' phrad pa'i chung ma gang zhe na/ bud med dam gzhon nu ma gang skyes pas de 'di dang bdag cag lhan cig dga' mgur spyod par bya'o snyam nas/ de de'i dus su klags shing yud tsam par gyur nas des de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa sbas pa shin tu sbas pa de ni thang 'ga' phrad pa'i chung ma zhes bya'o/ /mdza' na mo bcu gang zhe na mas bsrungs pa dang / phas bsrungs pa dang / ming pos bsrungs pa dang / phu nu mos bsrungs pa dang / sgyug mos bsrungs pa dang / gyos pos bsrungs pa dang / nye dus bsrungs pa dang / rigs kyis bsrungs pa dang / rus chags kyis bsrungs pa dang / rnam par 'khrul pa med pa ni bcu pa'o/ /de la mas bsrungs pa'i mdza' na mo gang zhe na/ bud med dam gzhon nu ma gang gi khyim thab shi zhing dus la bab par gyur tam rgyal pos bcings sam/ bsad dam rgyal po'i 'jigs pas yul 'khor gzhan dang yul gzhan du bros par gyur tam/ smyos pa dang sems 'khrugs pa dang / tshor ba dag gis nyen par gyur nas de ma'i gan na gnas shing mas de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa sbas pa shin tu sbas pa de ni mas bsrungs pa'i mdza' na mo zhes bya'o/ /phas bsrungs pa'i mdza' na mo gang zhe na/ bud med dam gzhon nu ma gang dag khyim thab shi zhing dus la bab par gyur tam rgyal pos bcings sam/ bsad dam rgyal po'i 'jigs pas yul 'khor gzhan dang yul gzhan du bros par gyur tam/ smyos pa dang / sems 'khrugs pa dang / tshor ba dag gis nyen par gyur nas de pha'i gan na gnas shing phas de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa sbas pa shin tu sbas pa/ de ni phas bsrungs pa'i mdza' na mo zhes bya'o/ /ming pos bsrungs pa'i mdza' na mo gang zhe na bud med dam gzhon nu ma gang gi pha ma dang khyim thab shi zhing dus la bab par gyur tam/ rgyal pos bcings sam bsad dam/ rgyal po'i 'jigs pas yul 'khor gzhan dang yul gzhan du bros par gyur tam/ smyos pa dang / sems 'khrugs pa dang / tshor ba dag gis nyen par gyur nas de ming po'i gan na gnas shing ming pos de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa sbas pa shin tu sbas pa de ni ming pos bsrungs pa'i mdza' na mo zhes bya'o/ /phu nu mos bsrungs pa'i mdza' na mo gang zhe na/ bud med dam gzhon nu ma gang gi pha ma dang khyim thab shi zhing dus la bab par gyur tam/ rgyal pos bcings sam/ bsad dam/ rgyal po'i 'jigs pas yul 'khor gzhan dang yul gzhan du bros par gyur tam/ smyos pa dang sems 'khrugs pa dang tshor ba dag gis nyen par gyur nas de phu nu mo'i gan na gnas shing phu nu mos de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa sbas pa shin tu sbas pa de ni phu nu mos bsrungs pa'i mdza' na mo zhes bya'o/ /sgyug mos bsrungs pa'i mdza' na mo gang zhe na/ bud med dam gzhon nu ma gang gi pha ma dang khyim thab shi zhing dus la bab par gyur tam/ rgyal pos bcings sam bsad dam/ rgyal po'i 'jigs pas yul 'khor gzhan dang yul gzhan du bros par gyur tam/ smyos pa dang sems 'khrugs pa dang tshor ba dag gis nyen par gyur nas de sgyug mo'i gan na gnas shing sgyug mos de la 'di skad ces kho mo'i bu mthong ba gang yin pa de ni khyod mthong ba yin la/ khyod mthong ba gang yin pa de ni kho mo'i bu mthong ba yin pas kho mo'i zas dang gos kyis mna' ma gnas par gyis shig ces smras nas sgyug mos de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa sbas pa shin tu sbas pa de ni sgyug mos bsrungs pa'i mdza' na mo zhes bya'o/ /gyos pos bsrungs pa'i mdza' na mo gang zhe na/ bud med dam gzhon nu ma gang gi pha ma dang khyim thab shi zhing dus la bab par gyur tam/ rgyal pos bcings sam bsad dam/ rgyal po'i 'jigs pas yul 'khor gzhan dang yul gzhan du bros par gyur tam/ smyos pa dang sems 'khrugs pa dang tshor ba dag gis nyen par gyur nas de gyos po'i gan na gnas shing gyos pos de la 'di skad ces kho bo'i bu mthong ba gang yin pa de ni khyod mthong ba yin la khyod mthong ba gang yin pa de yang kho bo'i bu mthong ba yin pas kho bo'i zas dang gos kyis mna' ma gnas par gyis shig / mna' ma dga' bar gyis shig ces smras nas gyos pos de 'di la gzhan 'dod pa dag gi phyir spyod par ma gyur cig ces bsrungs pa shin tu bsrungs pa sbas pa shin tu sbas pa de ni gyos pos bsrungs pa'i mdza' na mo zhes bya'o/ /nye dus bsrungs pa'i mdza' na mo gang zhe na/ nye du zhes bya ba ni khyim bdun pa tshun chad las brten pa ni nye du yin la de phan chad ni nye du ma yin te bud med dam gzhon nu ma gang gi pha ma dang khyim thab shi zhing dus la bab par gyur tam/ rgyal pos bcings sam bsad dam/ rgyal po'i 'jigs pas yul 'khor gzhan dang yul gzhan du bros par gyur tam/ smyos pa dang sems 'khrugs pa dang / tshor ba dag gis nyen par gyur nas nye dus de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa sbas pa shin tu sbas pa de ni nye dus bsrungs pa'i mdza' na mo zhes bya'o/ /rigs kyis bsrungs pa'i mdza' na mo gang zhe na/ rigs zhes bya ba ni bram ze dang / rgyal rigs dang / rje'u rigs dang / dmangs rigs te/ bud med dam gzhon nu ma gang gi pha ma dang khyim thab shi zhing dus la bab par gyur tam/ rgyal pos bcings sam bsad dam rgyal po'i 'jigs pas yul 'khor gzhan dang yul gzhan du bros par gyur tam/ smyos p a dang sems 'khrugs pa dang tshor ba dag gis nyen par gyur nas de rigs gcig pa'i gan na gnas shing rigs gcig pas de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa sbas pa shin tu sbas pa de ni rigs kyis bsrungs pa'i mdza' na mo zhes bya'o/ /rus chags kyis bsrungs pa'i mdza' na mo gang zhe na/ rus zhes bya ba ni kud pa'i rigs dang / bad sa'i rigs dang / shan di la'i rigs dang / ba ra dwa dza'i rigs dang / lnga pa'i rigs dang / nye lnga pa'i rigs dang / gau ta ma'i rigs te/ bud med dam gzhon nu ma gang dag gi pha ma dang khyim thab shi zhing dus la bab par gyur tam/ rgyal pos bcings sam bsad dam/ rgyal po'i 'jigs pas yul 'khor gzhan dang yul gzhan du bros par gyur tam/ smyos pa dang sems 'khrugs pa dang / tshor ba dag gis nyen par gyur nas de rus chags kyi gan na gnas shing rus chags kyis de 'di la gzhan dag 'dod pa dag gi phyir spyod par ma gyur cig ces bsrungs pa shin tu bsrungs pa sbas pa shin tu sbas pa de ni rus chags kyis bsrungs pa'i mdza' na mo zhes bya'o/ /rnam par 'khrugs pa med pa'i mdza' na mo gang zhe na/ dge slong ma dang spyod pa can mo dang kun tu rgyu mo dang khyim thab kyi lam gyi rjes su 'jug pa dang chos bzhin spyod pa de ni 'khrugs pa med pa'i mdza' na mo zhes bya'o/ /smyan zhes bya ba ni sprad par bya ba las phrin nod pa dang phar skyel ba dang / phyir skyel ba'i rim gyis gnyis phrad par byed pa'o/ /byed na zhes bya ba ni byed par gyur na'o/ /tha na zhes bya ba ni mthar gyur pa gzung na'o/ /thang 'ga' phrad pa la yang rung zhes bya ba ni smad 'tshong ma yud tsam pa la yang rung ba ste/ tshogs can ma dang 'jud mthun ma dang / gzugs 'tshong ma la yang rung ste zhes bya ba'i tha tshig go/ /dge 'dun lhag ma'o zhes bya ba ni snga ma bzhin no/ /de la ltung ba ji ltar 'gyur zhe na 'dir yang dngos gzhi dang sbyor ba dang sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni smyan bya ba'i thabs kyis skyes pa dang bud med gzhan dang gzhan snga ma mi mthun pa mthun par bsgrubs te/ de gnyis kyi mi tshangs par spyod pa'i don la phrad na dge 'dun lhag mar 'gyur ro/ /de'i bye brag ni skyes pa dang bud med snga ma mi mthun pa sprad pa'i don du mthun pa bsgrubs pa'i phyir sprad par bya ba skyes pa'am bud med gang yang rung ba las phrin mnos pa dang phar bskyal ba dang phyir bskyal ba de gsum rjes su bsgrub cing de gnyis mi tshangs par spyod pa'i dngos por phrad par gyur na dge 'dun lhag ma'i dngos gzhir 'gyur ro/ /mi'i 'gro bar gtogs pa pho mos gzhan snga na mi mthun pa phrad pa'i mthu yod pa dag gi smyan byas so cog la na smad pa med do/ /phrin mnos te phar bskyal la phrin lan ma bskyal yang rnam pa gzhan gyis phyir thos te phrad pa la na smad pa med do/ /dge slong mang po dge 'dun du gyur pas kyang sprad par bya ba'i yul gcig la smyan byed na byed pa po re re'i rgyud la na smad pa med do/ /dge slong gcig gis phrad par bya ba mang po dag gi yul la sbyor ba gcig gis smyan byed na sprad par bya ba re re'i rgyud la na smad pa med do/ /mngags pa dang mngags pas mngags pa dag la na smad pa med do/ /sprad par bya ba de ni gnyis kyi bdag po pha ma la sogs pa ni sprad par bya ba nyid dang 'dra ste/ de la na smad pa med do/ /spring yig dang lag yig dang yul phyogs dang brda dang mtshan ma rnams ni tshig dang 'dra ste/ de dag la na smad pa med do/ /smad 'tshong ma ni thang 'ga' phrad pa zhes bya ste/ mi mthun pa mthun par bsgrub pa yin pas de la na smad pa med do/ /mdza' na mo dang / smad 'tshong ma la sogs pa bud med mi dbang ba dang gla med pa sngar lan gsum man chad phrad pa yang mi mthun pa mthun par bsgrub pa yin pas de dag la na smad pa med do/ /chung ma dang mdza' na mo sngar mthun pa nyid du gyur pa phyis 'thabs sam de ma yin par bsgrags te/ mdza' gcugs nyams pa nyid ni mi mthun pa yin pas de dag la na smad pa med do/ /dge slong 'gro ba gzhan gyi rnam pa bsten pa na dge slong gi 'du shes yod pa la na smad pa med do/ /dngos po bzang ngan dang 'dra ba la na smad pa med do/ / mtshan gyur pa ltung ba thun mong gi yul lan smad pa med do/ /'gro ba gzhan las skyes pa dang 'gro ba gzhan gyi rnam pa bstan pa la na smad pa med do/ /gnas skabs gzhan thob pa la na smad pa med do/ /gzhi gcig la bslab pa du ma bcas pa nyid la na smad pa med do/ / dngos po la the tshom za bas bsam pa dang bcas par zhugs pa la na smad pa med do/ /yul bsams pa dang ma bsams pa la na smad pa med do/ /gzhan gyi don du byed pa la na smad pa med do/ /phrin pa dang spring yig skyel ba 'gro ba gzhan du gtogs pa la na smad pa med do/ /chung ma bdun po chu tshigs kyis byin pa dang / rin chas nyos pa dang / btsan phrogs su thob pa dang / dang bsam du 'dus pa dang gos zas kyis 'tshos pa dang / kha dum pa dang / thang 'ga' phrad pa dag re re la yang 'thabs pa'i tshigs bdun bdun yod do/ /'thabs pa nyid kyi mod dang 'thabs pa'i 'og dang / dum pa bcad pa dang / rde'u gsum gtor ba dang / cho ga gtang ba dang / chung ma ma yin par bsgrags pa dang / dril bsgrags pa nyid do/ /de la 'thabs pa nyid kyi mod ces bya ba ni 'thab mo nyid kyi rtsom pa yongs su ma rdzogs pa ste/ da ltar 'thab pa nyid na zhes bya ba'i tha tshig go/ /'thabs pa'i 'og ces bya ba ni/ 'thab mo mthar phyin pa nyid do/ /dum pa bcad pa nyid ces bya ba ni dum pa zhes bya ba ni shing gi rnam pa yod do/ /sprad par bya ba de nyid kyis shing de rked du gcod par byed cing 'di skad ces ji ltar shing dum 'di gnyis phan tshun 'byor pa med pa de bzhin du yu bu cag gnyis kyang de bzhin no zhes smras pa'o/ /kha cig na re rtswa'i rigs ti la ni ta ka zhes bya ba yod de/ de gnyis kyis de dum bur bcad nas ji ltar rtswa 'di gnyis phan tshun 'byor pa med pa de bzhin du yu bu cag gnyis kyang de bzhin no zhes smras pa ni dum pa bcad pa zhes bya'o zhes kyang zer ro/ /rde'u gsum gtor ba zhes bya ba ni de gnyis kyis rde'u gsum phyogs dang phyogs mtshams su 'phangs nas 'di skad ces ji ltar rde'u 'di gsum phan tshun phrad pa med pa de bzhin du 'u bu cag gnyis kyang de bzhin no zhes zer ba'o/ /gzhan dag ni 'di skad ces rde'u mang pos bsnun pa nyid kyis brdegs pa ni rde'u gsum gtor ba'o zhes kyang zer ro/ /cho ga gtang ba zhes bya ba ni khyim so'am khyim thab kyi rkang pa bkru ba la sogs pa 'phral gyi bya ba ni cho ga ste/ de btang ba'o/ /chung ma ma yin par bsgrags pa zhes bya ba ni de gnyis kyis khyo shug ma yin par bsgrags pa nyid do/ /dril bsgrags pa nyid ces bya ba ni bdag po gtang ba'i phyir lha khang la sogs par dril bsgrags pa'o/ / tshigs bdun po de dag ni ltung ba'i phyir tha dad pa yin te/ dper na sprad par bya ba srog chags ji snyed phrad par 'dod pa de dag la smyan byed na ltung ba yang de snyed du 'gyur ba de bzhin du tshigs bdun po 'di dag ji snyed byung ba la smyan byed na tshigs so so de snyed kyi ltung bar 'gyur ro/ /de la chung ma dang po gsum po chu tshigs kyis byin pa dang / rin chas nyos pa dang / btsan phrogs su thob pa dag gis 'thabs pa'i tshigs bdun las dang po gsum ni nyes byas byed pa yin/ bar pa gnyis ni nyes pa sbom po byed pa yin/ tha ma gnyis ni dge 'dun lhag ma byed pa yin te/ des ni dge slong gis chung ma dang po gsum po dga' thabs pa gnyis kyi mod dang / 'thabs pa'i 'og dang / dum pa bcad par gyur pa'i sdums byed cing mthun par gyur na nyes byas gsum du 'gyur ro/ /chung ma dang po gsum po dag 'thabs pa nyid kyi mod dang / 'thabs pa'i 'og dang dum pa bcad pa dang / rde'u gsum gtor ba dang / cho ga gtang bar gyur pa'i sdums byed cing mthun par gyur na nyes byas gsum dang nyes pa sbom po gnyis su 'gyur ro/ /chung ma dang po gsum po 'di dag 'thabs pa nyid kyi mod dang / 'thabs pa'i 'og dang / dum pa bcad pa dang / rde'u gsum gtor ba dang / cho ga btang ba dang / chung ma ma yin par bsgrags pa dang / dril bsgrags par gyur pa'i sdums byed cing mthun par gyur na nyes byas gsum dang / nyes pa sbom po gnyis dang / dge 'dun lhag ma gnyis su 'gyur ro/ /chung ma tha ma bzhi po dang bsam du 'dus pa dang / gos zas kyis 'tshos pa dang / kha dum pa dang / thang 'ga' phrad pa dag 'thabs pa gnyis kyi mod dang / 'thabs pa'i 'og dang / dum pa bcad pa dang / rde'u gsum gtor ba dang / cho ga btang ba dang / chung ma ma yin par bsgrags pa dang / dril bsgrags par gyur pa'i sdums byed cing mthun par gyur na ni re re la sum phrugs su 'gyur bas nyes byas bdun dang nyes pa sbom po bdun dang / dge 'dun lhag ma bdun du 'gyur ro/ /de bas na chung ma dang po gsum gyi 'thabs pa'i tshigs tha ma gnyis dang chung ma tha ma bzhi'i 'thabs pa'i tshigs bdun char gyi dngos gzhi la na smad pa med do/ /'di'i byed pa po ni mi'i 'gro bar gtogs pa'i skyes pa dang / bud med gzhan snga ma mi mthun pa mi tshangs par spyod pa 'khrig pa bsten nus pa dang legs par smras pa dang nyes par smras pa dag gi don kun shes pa'o/ /'di la yan lag bdun gyi dngos gzhi'i ltung bar 'gyur te/ mi ma yin pa dang / gzhan ma yin pa dang / mi mthun pa dang / phrin mnos pa dang / phrin phar bskyel ba dang / phrin phyir bskyal ba dang / gnyis kyis gnyis sprod pa'o/ /de dag las yan lag ma tshang na ci rigs par na smad do/ /sbyor ba'i ltung ba ni smyan byed pa'i sbyor ba brtsams nas dngos gzhi la ma thug gi bar du nyes pa sbom por 'gyur ro/ / phrin mnos te phar bskyal ba dang / phyir bskyal ba ma byas na nyes pa sbom po gcig tu 'gyur ro/ /phrin mnos te phar bskyal la phyir ma bskyal na nyes pa sbom po gnyis su 'gyur ro/ /phrin mnos te phar yang bskyal phyir yang bskyal la de gnyis ma phrad na nyes pa sbom po gsum du 'gyur ro/ /ma ning dang za ma la sogs pa lta bu phrad pa med pa'i smyan byed na nyes pa sbom po'o/ /khyo shug sngar kha dum pa la sogs pa lta bu mi mthun pa mthun par bsgrubs pa med pa'i smyan byed na nyes pa sbom po'o/ /dge slong mang po dge 'dun du gyur pas kyang bskrad par bya ba'i yul cig la sman gyi sbyor ba byed na byed pa po re re'i rgyud la nyes pa sbom po gcig gam gnyis sam mang po ci rigs par 'gyur ro/ /dge slong gcig gis sprad par bya ba mang po dag gi yul la smyan byed na sprad par bya ba re re'i rgyud la nyes pa sbom po gcig gam gnyis sam mang po ci rigs par 'gyur ro/ /mdza' na mo dang smad 'tshong ma la sogs pa bud med mi dbang ba dang / gla med par sngar lan bzhi yan chad phrad pa ni mi mthun pa mthun par bsgrub pa ma yin pas de dag la nyes pa sbom po'o/ /chung ma dang po gsum gyi 'thabs pa'i tshigs par ma gnyis dang / chung ma tha ma bzhi'i 'thabs pa'i tshigs bdun char gyi sbyor ba la nyes pa sbom po'o/ /mngal na gnas pa dang med pa dang nges pa dang mi bsten pa dang nyos pa dang mthun pa dang bdag gi smyan byed na nyes pa sbom po'o/ /skad sbyar ba nyid ston pa dang 'thab krol gyis 'phrog tu 'jug pa dang / chung ma'am bud med che ge mo zhig nyos shig ces zer na nyes pa sbom po'o/ /byin pa las dor byas pa sprad pa dang / chos kyi phung po sngon du btang ste bos pa dang / don gzhan dang ldan pas bos te phrad na nyes pa sbom po'o/ /mi ma yin pa'i 'gro ba la nyes pa sbom po'o/ /pho'am mo'am gnyis ka mi ma yin par gyur na yang nyes pa sbom po'o/ /rang bzhin nyams pa la nyes pa sbom po'o/ /tha mal par gnas pa las phrin blangs te tha mal par gnas pa la phrin phar bskyal zhing rang bzhin nyams pa la phrin phyir bskyal ba la sogs pa yang nyes pa sbom po'o/ /dge slong 'gro ba gzhan gyi rnam pa bsten pa na dge slong gi 'du shes med pa la nyes pa sbom po'o/ /dngos gzhi'i sbyor ba tha dad pa ji snyed byas pa re re la nyes pa sbom po re rer 'gyur ro/ /sbyor ba'i sbyor ba'i ltung ba ni smyan byed pa brtsams nas ji srid du sbyor ba la ma thug gi bar du nyes byas so/ /dge slong mang po dge 'dun du gyur pas kyang sprad par bya ba'i yul gcig la smyan byed na byed pa po re re'i rgyud la sbyor ba'i sbyor ba nyes byas gcig gam gnyis sam mang po ci rigs par 'gyur ro/ /dge slong gcig gis sprad par bya ba mang po dag gi yul la smyan byed na sprad par bya ba re re'i rgyud la sbyor ba ji snyed pa'i sbyor ba'i sbyor ba'i nyes byas gcig gam gnyis sam mang po ci rigs par 'gyur ro/ /sprad par bya ba de gnyis kyi bdag po pha ma la sogs pa ma yin pa de gnyis dang 'brel ba'am 'brel pa ma yin pa la nyes byas so/ /chung ma dang po gsum gyi 'thabs pa'i tshigs dang po gsum dang / chung ma tha ma bzhi'i 'thabs pa'i tshigs bdun char gyi sbyor ba'i sbyor ba la nyes byas so/ /ci'i phyir khye'u 'di khyim mi dbub/ ci'i phyir bu mo 'di gnas mi btsal/ ci'i phyir bu khye'u 'di gyos po'i gan du mi 'gro /bag ma mi len/ ci'i phyir bu mo 'di gyos pa'i gan du mi bkri /bag mar mi gtong zhes zer ba thams cad la nyes byas so/ / bud med nyos shig ces zer ba dang rnyed mod ces zer na nyes byas so/ /skyon chags pa med par sems can gzhan la khu tshur la sogs pa bsnun na nyes byas so/ /dud 'gro'i smyan byas pa la nyes byas so/ /sbyor ba'i ltung ba la sbyor ba tha dad pa ji snyed byas pa re re la nyes byas re rer 'gyur ro/ /ltung ba med pa ni las dang po pa dang / smyos pa dang sems 'khrugs pa dang / tshor ba dag gis nyen pa la ltung ba med do/ /bslab par bya ba ni yul thams cad la gnas skabs thams cad du smyan gyi sbyor ba'i sbyor ba nyes byas dang / sbyor ba sbom po dang / dngos gzhir 'gyur ba rnam pa thams cad mi bsten par bslab par bya'o/ /phyir bcos pa ni 'og nas ston to/ /smyan byed pa'i dge 'dun lhag ma ste lnga pa bshad zin to// //khang pa'i dge 'dun lhag ma'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /dge slong rnams la khang pa 'di lta bur mang ba nyid du gyur te/ kha cig ni khang pa 'di ha cang yang ring ngo zhes de bor nas gzhan byed du 'jug go/ /kha cig ni khang pa 'di ha cang thung ngo / /'di ha cang yangs so/ /'di ha cang dog go/ /'di ha cang rnyings so/ /'di ha cang stobs chung ngo / /'di ha cang brtsigs nyes so zhes de bor nas gzhan byed du 'jug go/ /de dag khang pa byed pa dang / byed du 'jug pas bya ba dang byed pa mang bar gyur nas lung mnod pa dang bklags pa dang kha ton dang / rnal 'byor dang yid la bya ba gtong zhing yang dang yang du rtswa dang shing dang mi blas dang shing rta'i las slong bar byed pas bram ze dang khyim bdag rnams kyis kha bya bar gyur to/ /de'i tshe na tshe dang ldan pa 'od srungs chen po mnyan yod na shar gyi kun dga' ra ba na ri dgas 'dzin gyi ma'i khang bzangs na 'dug pas dge slong rab tu mang po dag la khang pa de lta bur mang ba nyid du gyur pa thos nas phyi dro nang du yang dag 'jog las langs nas bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te mtha' gcig tu 'dug nas bcom ldan 'das la skabs de dag rgyas par gsol te/ bcom ldan 'das kyis thugs brtse ba'i slad du dge slong rnams la khang pa dang khang pa'i gzhi legs par bstan pa gsol lo/ /bcom ldan 'das kyis kyang tshe dang ldan pa 'od srungs chen po la cang mi gsung bas gnang ngo / /de nas tshe dang ldan pa 'od srungs chen po bcom ldan 'das kyis cang mi gsung bas gnang bar rig nas song ste/ de nyid kyi mtshan mo 'das pa dang tshangs pa mtshungs par spyod pa rnams kyi sems srung ba'i phyir lhung bzed dang chos gos thogs te ljongs rgyur song ngo / /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ dge slong rnams la de ltar gyur pa bden nam zhes smra ba mdzad nas/ 'dod pa che ba dang / chog mi shes pa dang / gso dka' ba dang / dgang dka' ba rnam par smad de/ 'dod pa chung ba dang chog shes pa dang / gso sla ba dang / dgang sla ba dang / phri ba dang / yo byad bsnyungs pa dang / sbyangs pa'i yon tan dang / mdzes pa dang / tshod shes pa nyid kyi bsngags pa brjod nas bslab pa bca' ba'i phan yon bcu yang dag par gzigs pas nga'i nyan thos rnams kyang 'dul ba la bslab pa'i gzhi 'di ltar gdon par bya ste/ dge slong gis bdag gis bslangs pa bdag po med pa dag gi phyir khang pa rtsig tu 'jug na dge slong des khang pa tshad bzhin du rtsig tu chug shig / de la khang pa'i tshad ni 'di yin te/ nang srid du bde bar gshegs pa'i mtho'i mtho bcu gnyis zheng du mtho bdun no/ /gzhi blta ba'i phyir dge slong des dge slong dag bkri bar bya'o/ /khrid pa'i dge slong dag gis kyang gzhi rung ba dang rtsod pa med pa dang brtsam du rung bar blta bar bya'o/ /gal te dge slong gis gzhi mi rung ba'am/ rtsod pa dang bcas pa'am/ brtsam du mi rung bar bdag gis bslangs pa bdag po med pa bdag gi phyir khang pa rtsig tu 'jug gam/ gzhi blta ba'i phyir dge slong dag kyang mi khrid dam/ dge slong khrid pa dag la gzhi mi ston nam tshad las 'das na dge 'dun lhag ma'o zhes bca' ba mdzad de/ yul ni mnyan yod/ gang zag ni dge slong rab tu mang po/ nyon mongs pa ni 'dod zhe na/ nyes pa ni khang pa rtsig pa'o/ /de la dge slong gis zhes bya ba ni chos 'di pas so/ /bdag gis bslangs pa zhes bya ba ni 'dun pa las byung ba'i slong mo la la las ni shing / la la las ni rtswa/ la la las ni mi blas/ la la las ni shing rta'i las bslangs pa'o/ /bdag po med pa zhes bya ba ni gang la bdag po skyes pa'am bud med dam ma ning med pa'o/ /bdag gi phyir zhes bya ba ni bdag nyid la bsngos te'o/ /khang pa zhes bya ba ni gang du spyod lam bzhi po 'chag pa dang / 'greng ba dang / 'dug pa dang nyal ba dag shong pa'o/ /rtsig tu 'jug na zhes bya ba ni bdag nyid kyis sam gzhan gyis so/ /dge slong des khang pa tshad bzhin du rtsig tu chug shig /de la khang pa'i tshad ni 'di yin te/ nang srid du bde bar gshegs pa'i mtho'i mtho bcu gnyis zheng du mtho bdun no zhes bya ba la/ bde bar gshegs pa zhes bya ba ni ston pa ste/ de'i mtho gang la ni tshad dang ldan pa'i khru phyed dang do'o/ /des na bde bar gshegs pa'i mtho bcu gnyis gang yin pa de dag la ni tshad dang ldan pa'i khru'i khru bco brgyad do/ /nang srid du tshad dang ldan pa'i khru bco brgyad do/ /bde bar gshegs pa'i mtho bdun gang yin pa de dag la ni tshad dang ldan pa'i khru'i phyed dang bcu gcig ste/ nang gi zheng du khru phyed dang bcu gcig go/ /gzhi blta ba'i phyir dge slong des dge slong dag bkri bar bya'o zhes bya ba la/ gzhi blta ba'i phyir zhes bya ba ni sa gzhi rung ba dang rtsod pa med pa dang brtsam du rung ba nyid blta ba'i phyir ro/ /dge slong des zhes bya ba ni dge slong gang yin pa des so/ /dge slong dag bkri bar bya'o zhes bya ba ni de na dge slong dag yod pa dag yin gyi ji tsam gyi sa gzhi de dag gis bltas par 'gyur ba'i dge slong de tsam bkri bar bya ba ni ma yin no/ /gal te de na sprul gyi gnas sam sdig pa'i gnas sam sril gyi gnas sam grog ma'i gnas yod pa yin na mi rung ba'i phyir bstan par mi bya'o/ /gal te rung ba yin na de'i 'og tu nye bar brtag par bya ste/ gal te rgyal po'i gzhi'am/ mchod rten gyi gzhi'am/ khyim bdag gi gzhi'am/ mu stegs can gyi gzhi'am/ dge slong ma'i dbyar gnas khang ngam/ shing ljon pa gcad par bya ba yod na rtsod pa dang bcas pa yin pa'i phyir bstan par mi bya'o/ / gal te gzhi rung ba dang rtsod pa med pa yin na de'i nye 'khor 'dom gang kho ra khor yug nye bar brtag par bya ste/ gal te de na gzhi chu klung la brten nam khron pa la brten nam/ lam la brten nam ngam grog la brten pa yin na brtsam du mi rung ba'i phyir bstan par mi bya'o/ / gal te gzhi de rung ba dang rtsod pa med pa dang brtsam du rung ba rnam pa thams cad yongs su rdzogs pa yin na dge slong des gtsug lag khang du song ste gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas dge 'dun thams cad 'dug cing mthun par gyur pa la mchil lham gnyis phud de/ bla gos phrag pa gcig tu byas nas rgan rims bzhin du phyag 'tshal te/ rgan pa'i mtha' logs su tsog pur 'dug nas thal mo sbyar nas 'di skad ces brjod par bya'o/ /dge 'dun btsun pa rnams gsan du gsol/ bdag dge slong lag gi bla ming 'di zhes bgyi bas khang pa'i gzhi rung ba rtsod pa ma mchis pa brtsam du rung ba zhig btsal te/ bdag dge slong lag gi bla ming 'di zhes bgyi ba dge 'dun las khang pa'i gzhi rung ba rtsod pa ma mchis pa brtsam du rung ba bstan pa gsol na/ thugs brtse ba can dge 'dun btsun pa rnams kyis thugs brtse ba'i slad du bdag dge slong lag gi bla ming 'di zhes bgyi ba la khang pa'i gzhi rung ba rtsod pa ma mchis pa brtsam du rung ba bstan du gsol/ de bzhin lan gnyis lan gsum du bzlas/ de ni khang pa'i gzhi bstan pa gsol pa'o/ /de'i 'og tu dge slong de dag gis kyang dge slong de la dad pas sam yid ches pas 'gro bar mi bya bar 'di ltar dge 'dun thams cad der 'gro bar bya ba'am/ dge 'dun gyis bskos pa'i dge slong dag gtang bar bya'o/ /de dag gis gzhi de mig gis blta bar bya zhing / gal te de na sbrul gyi gnas sam/ sdig pa'i gnas sam/ sril gyi gnas sam grog ma'i gnas yod pa yin na mi rung ba'i phyir bstan par mi bya'o/ /gal te rung ba yin na de'i 'og tu nye bar brtag par bya'o/ /gal te rgyal po'i gzhi'am/ mchod rten gyi gzhi'am/ khyim bdag gi gzhi'am mu stegs can gyi gzhi'am dge slong ma'i dbyar khang ngam shing ljon pa gcad par bya ba yod na rtsod pa dang bcas pa'i phyir bstan par mi bya'o/ /gal te gzhi rung ba dang rtsod pa med pa yin na de'i nye 'khor 'dom gang kho ra khor yug tu nye bar brtag par bya ste/ gal te de na gzhi chu klung la brten nam/ khron pa la brten nam/ lam la brten nam/ ngam grog la brten pa yin na brtsam du mi rung ba'i phyir bstan par mi bya'o/ /gal te gzhi de rung ba dang rtsod pa med pa dang brtsam du rung ba rnam pa thams cad du yongs su rdzogs pa yin na de'i tshe dge slong de dag gis rgan pa'i mtha' logs su gus pa dang bcas pas 'dug ste 'di skad ces brjod par bya'o/ /gnas brtan dag gzhi de rung ba dang rtsod pa ma mchis pa dang brtsam du rung ba lags kyi da de'i dus la bab par mkhyen par mdzod cig / de ni dus dang por bya'o/ /de'i 'og tu dge slong gcig gis gsol ba byas te las bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong lag gi bla ming 'di zhes bgyi ba 'dis khang pa'i gzhi rung ba rtsod pa ma mchis pa brtsam du rung ba zhig btsal te/ dge slong lag gi bla ming 'di zhes bgyi ba 'di dge 'dun las khang pa'i gzhi rung ba rtsod pa ma mchis pa brtsam du rung ba bstan pa gsol na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong lag gi bla ming 'di zhes bgyi ba la khang pa'i gzhi rung ba rtsod pa ma mchis pa brtsam du rung ba bstan par gsol to/ /'di ni gsol pa'o/ /las ni 'di ltar bya ste/ dge 'dun btsun pa rnams gsan du gsol/ dge slong lag gi bla ming 'di zhes bgyi ba 'dis khang pa'i gzhi rung ba rtsod pa ma mchis pa brtsam du rung ba zhig btsal te/ dge slong lag gi bla ming 'di zhes bgyi ba 'di dge slong las khang pa'i gzhi rung ba rtsod pa ma mchis pa brtsam du rung ba bstan pa gsol te/ de'i slad du dge 'dun gyis dge slong lag gi bla ming 'di zhes bgyi ba la khang pa'i gzhi rung ba rtsod pa ma mchis pa brtsam du rung ba bstan pa gsol na/ tshe dang ldan pa gang dag dge slong lag gi bla ming 'di zhes bgyi ba la khang pa'i gzhi rung ba rtsod pa ma mchis pa brtsam du rung ba bstan pa stsol bar bzod pa de dag ni cang ma gsung shig / gang dag mi bzod pa de dag ni gsungs shig /dge 'dun gyis bzod cing gnang nas dge 'dun gyis dge slong lag gi bla ming 'di zhes bgyi ba la khang pa'i gzhi rung ba rtsod pa ma mchis pa brtsam du rung ba bstan pa stsal lags te/ 'di ltar cang mi gsung bas de de bzhin du 'dzin to/ /dge 'dun gyis dge slong lag gi bla ming 'di zhes bgyi ba gang la khang pa'i gzhi rung ba rtsod pa med pa brtsam du rung ba bstan par byin pa des khang pa rtsig tu gzhug par bya ste/ 'di la 'gyod par mi bya'o/ /khrid pa'i dge slong dag gis kyang zhes bya ba ni dge slong gang dag yin pa de de dag gis kyang ngo / /gzhi zhes bya ba ni khang pa'i dbang du byas pa'i gzhi gang yin pa'o/ /rung ba zhes bya ba ni sprul gyi gnas dang sdig pa'i gnas la sogs pa dag dang bral ba'o/ /rtsod pa med pa zhes bya ba ni 'thab mo dang mtshang 'dru ba la sogs pa dang bral ba'o/ /brtsam du rung ba zhes bya ba ni de'i nye 'khor 'dom gang kho ra khor yug na skyon med pa'o/ /blta bar bya'o zhes bya ba ni so sor brtag par bya'o/ /gal te dge slong gis gzhi mi rung ba'am zhes bya ba ni sbrul dang sdig pa la sogs pa'i gnas kyi shas che ba'o/ /rtsod pa dang bcas pa'am zhes bya ba ni 'thab mo dang bcas pa dang mtshang 'dru ba dang bcas pa dang / rtsod pa dang bcas pa dang 'gyed pa dang bcas pa'o/ / brtsam du mi rung ba zhes bya ba ni gang gi nye 'khor 'dom gang kho ra khor yug med pa'o/ /bdag gis bslangs pa bdag po med pa bdag gi phyir khang pa rtsig tu 'jug gam/ gzhi blta ba'i phyir dge slong dag kyang mi khrid dam dge slong khrid pa dag la gzhi mi ston tam tshad las 'das na zhes bya ba ni ji skad smos pa de dag las 'gal zhing tshad ji skad bstan pa de dag las lhag par rtsig tu 'jug na'o/ /dge 'dun lhag ma'o zhes bya ba ni snga ma bzhin no/ /de la ltung ba ji ltar 'gyur zhe na 'dir yang dngos gzhi dang sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni dge slong gis sa gzhi dang yo byad gzhan las btsal te/ sa gzhi ma dag pa dang ma bstan par gcig gi don du khang pa tshad las lhag par byed dam byed du bcug pa ste/ zin na mthar dge 'dun lhag mar 'gyur ro/ /de'i bye brag ni dge slong ltung ba'i 'byin pa pos khang pa'i sa gzhi mi'i 'gro ba su yang rung ba tha na chos 'di pa rab tu byung ba las kyang btsal ba dang khang pa'i yo byad rtswa dang shing dang mi blas dang shing rta dang so phag dang gla rngan la sogs pa yang gzhan las btsal bas sa gzhi ma dag pa mi rung ba dang rtsod pa dang bcas pa dang brtsam du mi rung ba dang / dge 'dun la ma bstan par bdag nyid gcig p u'am dge slong gzhan gcig gam khyim bdag gzhan gcig kyang rung ba'i don du khang pa'i nang rgya'i srid du tshad dang ldan pa'i khru bco brgyad zheng du tshad dang ldan pa'i khru phyed dang bcu gcig gi tshad las lhag pa bdag nyid byed dam gzhan gyis bdag byed du bcug gam bdag gis gzhan byed du bcug ste zin nas dge 'dun lhag ma'i dngos gzhir 'gyur ro/ /ma bskos par rang byed pa lan smad pa med do/ /gzhan gyis bdag bskos pa la na smad pa med do/ /bdag gis gzhan bskos pa la na smad pa med do/ /dge slong bsko ba pos dge slong byed pa po gzhan la legs par byed du bcug pa las byed pa pos log par bsgrubs na mthar byed pa po lan smad pa med do/ /dge slong bsko ba pos dge slong byed pa po gzhan la legs par byed du bcug pa las byed pa pos log par bsgrubs pa la bsko ba pos lus dang ngag gis dang du len na mthar gnyis ka la na smad pa med do/ /dge slong bsko ba pos dge slong byed pa po gzhan la legs par byed du bcug pa las byed pa pos log par bsgrubs pa la bsko ba pos lus dang ngag gis dang du mi len na mthar byed pa po la na smad pa med do/ /dge slong 'gro ba gzhan gyi rnam pa bsten pa na dge slong gi 'du shes yod pa la na smad pa med do/ /sbyor ba gcig gis dus brgyangs te byas pa la na smad pa med do/ /sa gzhi mi'i 'gro ba pa khyim pa dang rab tu byung ba chos 'di pa dang gzhan mu stegs can dang skyes pa dang bud med dang ma ning dag las btsal ba la na smad pa med do/ /yo byad kyang de dag las btsal ba la na smad pa med do/ /mi'i 'gro ba pa gzhan las skyes pa dang 'gro ba gzhan gyi rnam pa bsten pa la na smad pa med do/ /gzhi ma dag pa mi rung ba dang rtsod pa dang bcas pa dang brtsam du mi rung ba dag la na smad pa med do/ /gzhi blta ba dang gzhi bstan pa gsol ba dang gzhi bstan pa sbyin pa'i gsol ba dang las ma byas pa la na smad pa med do/ /bdag nyid gcig pu'am dge slong gzhan gcig gam rab tu byung ba gcig gam khyim pa gcig gi don du byed pa la na smad pa med do/ /srid kyi tshad las lhag pa dang zheng gi tshad las lhag pa la na smad pa med do/ /de'i mod dang nyin zhag dang lo zla la sogs pas zin pa'i mtha' la na smad pa med do/ /dngos po bzang ngan dang 'dra ba la na smad pa med do/ / mtshan gyur pa ltung ba thun mong gi yul la na smad pa med do/ /de'i byed pa po ni sa gzhi dang yo byad ma brtags pa'i khang pa rtsig pa'o/ /'di la yan lag drug gis dngos gzhi'i ltung bar 'gyur te/ sa gzhi dang yo byad gzhan las btsal ba dang / gzhi ma dag pa dang / ma bstan pa dang / gcig gi don dang / tshad las lhag pa dang zin pa'o/ /de dag las yan lag ma tshang na ci rigs par na smad do/ /gzhi ma dag pa dang ma bstan pa zhes smos pa la gzhi ma dag pa'i mtshan nyid gang zhe na/ gzhi mi rung ba dang rtsod pa dang bcas pa dang la spyan drangs pa na tshe dang ldan pa nye dga' la dge skos kyi bsod snyoms nod pa'i res bab nas des bsams pa/ gang gis dge skos 'di zang cad par bya ba de lta bu'i thabs ci yod snyam nas de 'di snyam du sems te/ gal te bdag la 'ga' zhig mnyam yod na rgyal byed kyi tshal thag ji srid yod 'drin bdag gis de la ji ltar brjod par bya'o/ /rnam pa thams cad du gom bdag gis sa gzhi gzhal bar bya'o snyam nas de gom pa dag gis sa gzhi 'jal zhing dal bus 'ong bas na dge skos kyis bsams pa/ de yun ring du thogs pas bdag zan chad na mi rung gi blta'o snyam nas de shing ljon pa zhig la 'dzegs te blta bar brtsams pa dang / ci tsam na tshe dang ldan pa nye dga' da la bu dal bus 'ong ba mthong nas des bsams pa/ 'di ltar 'ong ba'i stangs las na 'dis bdag zan gcod par byed do snyam du rig nas de shing ljon pa de las babs te 'dug go/ /tshe dang ldan pa nye dga' yang 'ongs pa dang ci tsam na gdugs tshod yol nas dge skos gyis smras pa/ tsher dang ldan pa khyod 'gros de lta bus 'ong ba las na don gyis na khyod kyis ched du bsams te kho bo'i zan gcod du bcug go/ /des smras pa/ khyod kyis kho bo ji ltar mthong / /kho bos shing ljon pa la 'dzegs te bltas so/ /khyod shing ljon pa la 'jog tu rung ngam/ rung yang srid mi rung yang srid de kho bos ni 'dzegs so zhes zer ba'i skabs de dge slong rnams kyis bcom ldan 'das la gsol ba dang / bcom ldan 'das kyis bka' stsal pa/ de lta bas na dge slong gis shing la mi 'dzeg par bslab par bya'o zhes bca' ba mdzad de/ yul ni mnyan yod/ gang zag ni chos 'di pa/ nyon mongs pa ni dus dang bya ba mi shes pa/ nyes pa ni shing la 'dzegs pa'o/ /rdzas su bcas ba'i sgo nas gnang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' rab na bzhugs so/ /bcom ldan 'das kyis dge slong gis shing mi 'dzeg bar bslab par bya'o zhes bka' stsal nas/ dge slong dag tshon rtsi'i las byed par 'dod pas gzungs thag gang dug dgas pa mi shes nas bcom ldan 'das kyis bka' stsal pa/ shing la mi gang tsam du 'dzeg par bya ste/ de lta bas na dge slong gis shing la mi gang tsam las mthor mi 'dzeg par bslab par bya'o zhes rjes su bca' ba'i sgo nas gnang ba mdzad de/ yul ni mnyan yod/ gang zag ni dge slong don nyung ngu dag nyon mongs pa dang nyes pa ni med do/ /rjes su gnang ba'i gleng bzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' rab na bzhugs so/ /bcom ldan 'das kyis dge slong gis shing la mi gang tsam las mthor mi 'dzeg par bslab par bya'o zhes bka' stsal nas/ dge slong zhig don mthun dang lhan cig ljongs rgyur 'phags pa dang / don mthun dgon pa'i lam du mtshan mo btab pa na der stag gi 'jigs pa byung nas don mthun dag ni shing ljon pa la mthor 'dzegs te 'khod do/ /dge slong de shing ljon pa la mi gzang tsam du 'dzegs te 'dug go/ /ji tsam na stag 'ongs nas do mthun rnams kyis smras pa/ 'phags pa stag mchis kyis myur du mthor 'dzegs shig /des bsams pa bcom ldan 'das kyis shing la mi gang tsam las 'thor 'dzeg par ma gnang bas ji ltar mthor 'dzeg snyam nas de de nyid du 'dug pa dang / stag gis mchod pa byas te bsad pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ de lta bas na nga'i nyan thos rnams kyis 'dul ba la bslab pa'i gzhi 'di ltar gdon par bya ste/ gnod pa byung ba ma gtogs par shing la mi gang tsam las 'thor mi 'dzeg par bslab par bya'o zhes rjes su gnang ba mdzad de/ yul ni mnyan yod/ gang zag ni chos 'di la/ nyon mongs pa dang nyes pa ni mod do/ /gnod pa byung ba ma gtogs par shing la mi gang tsam las mthor mi 'dzeg par bslab par bya'o zhes bya ba ni dge slong gnod pa byung pa ma gtog spar shing mi gang tsam las mthor mi 'dzeg par bslab par bya'o/ /'di ni rgyu ba na mi mdzes par snang pa dang snang ba la sogs pa'i nyes dmigs spang pa'i sgo nas 'jig rten dang mi 'gal ba dang / 'dul ba nges par 'byung ba'i tshul khrims kyi rjes su mthun par bslab par bya ba nyid yin no/ /de la 'dir dngos gzhi'i ltung ba rnam par gzhag pa ni dngos gzhi'i gnas skabs su bslab pa de ltar ma byas na bshags par bya ba'i nyes nyes pa sbom po'o/ /steng ma g.yogs pa zhig bya'o snyam pas mthar thug pa la nyes pa sbom po'o/ /du ma'i don du'am gnyis kyi phyir ram mang po'i phyir byed du bcug pa'i mthar thug pa la nyes pa sbom po'o/ /ma bskos par byed du 'jug na nyes pa sbom po'o/ /gang zag rang gi sa gzhi dang yo byad kyis byed du 'jug na nyes pa sbom po'o/ /mi ma yin pa las btsal ba'i sa gzhi dang yo byad kyis byed du 'jug na nyes pa sbom po'o/ /gzhan zhig gnas de byed pa'i zhal ta byed na rang bzhin mi mthun pa'i zhal ta byed pa yin pas nyes pa sbom po'o/ /dge slong 'gro ba gzhan gyi rnam pa bsten pa na dge slong gi 'du shes med pa la nyes pa sbom po'o/ /dngos gzhi la sbyor ba ji snyed byas pa re re la nyes pa sbom po re rer 'gyur ro/ /sbyor ba'i sbyor ba'i ltung ba ni khang pa'i dge 'dun lhag ma'i bya bar brtsams nas ji srid du sbyor ba la ma thug gi bar du nyes byas so/ /ma zin par sbyor ba btang ste/ yang rang bzhin gzhan gyis rjes su bsgrub pa la nyes byas so/ /gzhi btsal nas mi byed na nyes byas so/ /khang pa bstan pa gsol nas mi byed na nyes byas so/ /dud 'gro las btsal ba'i sa gzhi dang yo byad kyis byed du 'jug na nyes byas so/ /btsal ba'i yan lag dang tshad las lhag pa'i yan lag gnyis med na mi rung ba dang rtsod pa dang bcas pa dang brtsam du mi rung ba dang gzhi bstan pa ma gsol ba dang / gcig gi don zhes bya ba'i yan lag de dag thams cad las 'das kyang rung kha cig las 'das kyang rung 'ga' las 'das kyang rung ste/ mthar yang nyes byas su 'gyur la sngar yang nyes byas so/ /kha cig na re mthar sbom po zhes zer ba yang yod do/ /sbyor ba'i ltung ba la sbyor ba tha dad pa ji snyed byas pa re re la nyes byas re rer 'gyur ro/ /ltung ba med pa ni spyod lam bzhi'i snod ma yin pa la nyes pa med do/ /byas pa rnyed pa dang byas pa la longs spyod pa dag la ltung ba med do/ /rnying pa 'chos pa la ltung ba med do/ /las dang po pa dang smyos pa dang sems 'khrugs pa dang tshor ba dag gis nyen pa la ltung ba med do/ /bslab par bya ba ni yul thams cad la gnas skabs thams cad du khang pa'i sbyor ba'i sbyor ba nyes byas dang / sbyor ba sbom po dang / dngos gzhir 'gyur ba rnam pa thams cad mi bsten par bslab par bya'o/ /gzhi ma dag pa la gsol bar mi bya'o/ /dge slong rang dag rtog tu 'dor bar bya'o/ /yang na dge slong bskos pa dag rtog tu gtang ngo / /rnam pa thams cad du yul thams cad la khang pa'i dge 'dun lhag mar 'gyur bar mi bya'o/ /phyir bcos pa ni 'og nas ston te/ khang pa'i dge 'dun lhag ma ste drug pa bshad zin to/ / //gtsug lag khang gi dge 'dun lhag ma'i gleng gzhi ni sangs rgyas bcom ldan 'das kau shA m+bI na gdangs can gyi kun dga' ra ba na bzhugs so/ /drug sde dag gzhan gyis byed du 'jug pa'i gtsug lag khang dag na gnas shing / de dag de dag na gnas pa na dga' bo nye dga' ltos shig /gtsug lag khang 'di ni gyo grugs su gyur pa yin no/ /'di ni gas pa yin no/ /'di ni mtshams nyams pa yin no/ /'di ni ngos nyams pa yin no/ /'di ni ma mo'i khyim 'dra ba yin no zhes 'phya bar byed pa na dge slong rnams kyis de dag la smras pa/ tshe dang ldan pa dag khyed cag re zhig gzhan gyis byed du bcug pa'i gtsug lag khang dag na gnas shing khyed cag gis rdo yang sgreng bar mi nus la 'on kyang 'phya bar byed do/ /drug sde dag nga rgyal gyis khengs par gyur nas phan tshun smra bar brtsams pa/ dga' bo nye dga' lhung bzed nag po can 'di dag gis bdag cag zil gyis mnan gyi tshur shegs bdag cag gis sngon chad lhung bzed nag po can gang gis kyang byed du ma bcug pa'i gtsug lag khang ci 'dra ba'i gtsug lag khang de 'dra ba zhig byed du gzhug go/ /gal te bdag cag thams cad lag gi bla la brtson par gyur na ni lhung bzed nag po can 'di dag rtag pa kho nar bdag cag la skabs tshol bas de dag gis drug sde thams cad lag gi bla la zhugs so zhes skabs rnyed par yang 'gyur la/ bdag cag gis slong mo ster ba'i khyim gang dag yin pa de dag tu yang brel ba dag gi skyon brjod nas rjes su 'jug par 'gyur gyi/ bdag cag gis bdag cag gi nang na tshe dang ldan pa 'dun pa 'di mkhas pa spyod pa gsal ba khab gzhug par gtun bu 'jud nus pa yin pas 'di spro ba bskyed de dge 'dun gyi gtsug lag khang byed du gzhug par bya'o zhes de dag gis tshe dang ldan pa 'dun pa spro ba bskyed de dge 'dun gyi gtsug lag khang byed du bcug go/ /de nas tshe dang ldan pa 'dun pa de'i nub mo gtsug lag khang gi phyi rol du rkang pa gnyis bkrus nas gtsug lag khang du zhugs te/ thabs ci yod na des dge 'dun gyi gtsug lag khang 'grub par 'gyur snyam du sems pa la zhugs so/ /des su zhig su la mngon par dad snyam du rnam par dpyad par brtsams pa dang de 'di snyam du sems te/ re zhig 'jig rten lha dang bcas pa ni bcom ldan 'das la mngon par dad pa yin/ khyim che ge mo zhig ni tshe dang ldan pa kun shes kauN+Di n+ya la mngon par dad/ khyim che ge mo zhig ni tshe dang ldan pa shA ri'i bu la/ khyim che ge mo zhig ni tshe dang ldan pa maud gal gyi bu chen po la/ khyim che ge mo zhig ni tshe dang ldan pa ma 'gags pa la/ khyim che ge mo zhig ni tshe dang ldan pa rta thul la/ khyim che ge mo zhig ni tshe dang ldan pa bzang ldan la/ khyim che ge mo zhig ni tshe dang ldan pa rlangs pa la/ khyim che ge mo zhig ni tshe dang ldan pa ming chen la/ khyim che ge mo zhig ni tshe dang ldan pa gang po la/ khyim che ge mo zhig ni tshe dang ldan pa dri med la/ khyim che ge mo zhig ni tshe dang ldan pa ba lang bdag la/ khyim che ge mo zhig ni tshe dang ldan pa kun dga' bo la/ khyim che ge mo zhig ni bcom ldan 'das kyi gcung sru'i sras tshe dang ldan pa mdzes dga' la/ khyim che ge mo zhig ni bcom ldan 'das kyi sras tshe dang ldan pa sgra gcan zin la/ khyim che ge mo zhig ni tshe dang ldan pa gyad bu nor la/ khyim che ge mo zhig la sogs pa ni tshe dang ldan pa dga' bo la sogs pa la mngon par dang pa yin pas de'i phyir de dag sbyor du gzhug tu mi nus kyi 'di ltar kau shA m+bI na bram ze phyug pa nor mang po longs spyod che ba yongs su bzung ba yangs shing rgya che ba zhig 'dug pa de ni ser sna can mig phra ba bya rog la yang gtor ma mi ster ba yo byad kun 'dzin nus pa yin la/ de la dbyig d ang gser mang po bdog pas gal te rjes su 'jug par byed nus na dge 'dun gyi gtsug lag khang 'grub par 'gyur ro snyam nas de de ltar sems pa la zhugs pas tshegs chen pos nam langs par byas nas snga dro sham thabs bgos lhung bzed dang chos gos thogs te kau shA m+bIr bsod snyoms la zhugs so/ /des khyim gnyis sam gsum du bsod snyoms brgyus nas phye nyung shas zhig khyer te bram ze de'i khyim du 'jug par brtsams pa dang / sgo bas 'phags pa sdod cig ma 'jug shig ces dgag go/ /tshe dang ldan pa 'dun pas smras pa/ bzhin bzangs bcom ldan 'das kyis kho bo cag gi spyod yul ma yin pa ni rnam pa lnga gsungs te/ rol mo mkhan gyi gnas dang / smad 'tshong ma'i gnas dang / chad ma'i gnas dang / gdol pa'i gnas dang / rgyal po'i pho brang yin na ci khyim 'di de dag las gcig yin nam ci na kho bo la 'gog par byed/ sgo bas smras pa/ 'phags pa khyed mang du bkyon par 'gyur mod kyi/ khyim 'di de dag kyang ma lags te/ 'di ltar 'di ni bram ze che ge mo zhig gi khyim lags so/ /'dun pas bsams pa/ gang du re zhig ngo 'phrad pa yang med pa der gzhan ci zhig yod par 'gyur snyam nas de de ltar sgo dgag ste sems khong du chud nas 'dug pa na khyim bdag cig gi bu byung ba der bcu gnyis 'dus pa'i dga' 'dun gar dang glu dang sil snyan gyis zhugs pa dang / sgo ba de de la yengs shing sgo la mi lta ba'i tshe tshe dang ldan pa 'dun pa bram ze de'i khyim du zhugs nas de'i spyod lam mdzes pa 'dod chags dang bral ba'i sa sbyong bar byed pa de bram ze des mthong nas smras pa/ btsun pa 'dun pa byon pa legs so/ /gdan 'di la bzhugs shig /'dun pa don yod pas 'dug pa dang / gtam gyi skabs ma rnyed nas 'dun pas smras pa/ bram ze kho bos bsod snyoms kyi phye nyung shas zhig rnyed pa 'di 'tshag tu chug ste byin zhig /bram zes bu mo la bsgo ba bu mo 'phags pa'i bsod snyoms kyi phye tshogs te phul cig bu mo des btsags par brtsams pa dang / tshe dang ldan pa 'dun pas phye la brtag par brtsams so/ /bram zes smras pa/ 'phags pa ci rtog /smras pa/ srog chags rtog go/ /gal te mchis na ji ltar bgyi/ bza' bar mi bya'o/ /gal te gsol bar gyur na/ nongs pa ci mchis/ bram ze bcom ldan 'das kyis srog gcod pa kun du bsten cing goms par byas lan mang du byas na lus zhig ste shi ba'i 'og tu ngan song dang ngan 'gro log bar ltung ba sems can dmyal ba rnams su skye bar 'gyur zhing / gal te 'di lta bu nyid du mi rnams dang skal ba mnyam par 'ongs na yang tshe thung ba dang nad mang bar 'gyur ro zhes gsungs so zhes bya ba la sogs pa mi dge ba bcu dang dge ba bcu'i las kyi lam dag rgyas par brjod pa dang / bram ze de mngon par dad par gyur nas rang nyid kyis bza' ba dang bca' ba gtsang zhing bsod pas snod bkang ste smras pa/ 'phags pa thugs brtse ba'i slad du 'di bzhes su gsol/ tshe dang ldan pa 'dun pas bsams pa/ gal te blangs par gyur na 'di lta ste/ dper na shing la sogs pa'i snod du bskol ba dang 'dra bar bdag gi dang po 'di nyid tha mar 'gyur ro snyam du rig nas smras pa/ bram ze kho bos bsod snyoms kyi phye nyung shas cig rnyed pa 'di nyid yongs su longs spyad par bya'i/ dad pas sbyin par bya ba blangs te dor du ga la rung bas khyod kyi 'di mi len to/ /bram zes smras pa/ 'phags pa bdag cag bram ze rnams kyi kun du spyod pa ni gal te ngan pa rnyed nas bzang po rnyed par gyur na ngan pa spangs te/ bzang po yongs su longs spyad par bgyi ba lags na de khyed cag la ci nongs/ smras pa bram ze kho bo cag ni bslab pa'i gzhi yang dag par blangs pa yin la/ khyed cag bram ze dag ni bslab pa'i gzhi yang dag par blangs pa ma yin pas khyod bram ze dag ni ci dgar 'jug par byed pa yin no/ /kho bo cag la ni bcom ldan 'das kyis 'phags pa'i rigs bzhi bka' stsal te/ bzhi gang zhe na/ chos gos gang yang rung bas chog shes pa dang / bsod snyoms gang yang rung bas chog shes pa dang / gnas mal gang yang rung bas chog shes pa dang / spong ba dang bsgom pa la dga' ba 'phags pa'i rigs so/ /de nas bram ze de shin tu mngon par dad par gyur nas smras pa/ 'phags pa 'di ni khyod kyi khab lags kyi dus dang dus su gshegs su gsol/ smras pa bram ze khyod kyi sgo ba 'di ni gshin rje'i dbyug pa dang 'dra ba yin pas su yang 'jug tu mi ster gyi legs par sgos shig dang des na kho bo la 'gog par mi byed do/ /bram zes sgo ba bkug ste legs par bsgo ba/ kwa ye nang rje khyim 'di 'phags pa 'dun pa'i yin gyi khyod kyis ma bkag cig /nang mi la yang bsgo ba khyed cag gis 'phags pa 'dun pa la mi gus par mi bya'o/ /tshe dang ldan pa 'dun pas bsams pa bram ze 'di ni mngon par dad par gyur na/ 'on kyang gal te 'dir lhung bzed nag po can dag zhugs par gyur na des 'di ci nas kyang 'khrug par byed par 'gyur bas thabs kyi rnam pa zhig bya'o snyam nas 'dun pas sgo ba de la smras pa/ kwa ye nang rje khyod kyis bram ze de ji ltar kho bo la dad par gyur pa mthong ngam/ 'phags pa mthong ngo / /des kho bo 'ba' zhig 'dir 'jug tu gnang gi /lhung bzed nag po can su yang 'jug tu ma gzhug shig /gal te 'dir lhung bzed nag po can 'ga' zhig 'jug tu bcug na kho bos khyod la khrims chen po 'char gzhug par bya'o/ / 'phags pa shin tu bag yangs su bzhud cig /khyod nyid kyang re zhig de'u ma chud pa lags na/ lhung bzed nag po can gzhan 'jug par 'gyur ba lta smos kyang ci 'tshal/ de nas tshe dang ldan pa 'dun pa yid bde ba skyes te song nas de dus dang dus su bram ze de'i khyim du 'gro bar byed do/ /bram zes kyang de kho na bzhin du yang dang yang du stobs par byed pa na tshe dang ldan pa 'dun pas dang du len par mi byed par sbyin pa dang ldan pa'i chos bstan pa 'ba' zhig byas shing 'gro bar byed do/ /ji tsam dus gzhan zhig na tshe dang ldan pa 'dun pas bram ze la rdzas las byung ba'i bsod nams bya ba'i gzhi bdun po dag gi bsngags pa brjod cing / de dag rgya cher legs par bshad pa dang / bram zes smras pa/ 'phags pa bdag gis kyang rdzas las byung ba'i bsod nams bya ba'i gzhi 'ba' zhig bgyi'o/ /bram ze de bzhin gyis shig /'phags pa ci zhig bgyi/ dge 'dun gyi gtsug lag khang byed du chug shig /bram zes bsams pa bdag gis 'phags pa 'dun pa la rnam pa du mar bstabs na/ 'dis lan 'ga' yang dang du ma blangs te/ da dang du blangs pa gang yin pa 'di yang dge 'dun gyi phyir ro snyam nas de ngo mtshar skyes te smras pa/ 'phags pa bdag la kAr ShA pa Na dag ni mchis na 'on kyang sa gzhi ni rgyal po dbang bas gang du dge 'dun gyi gtsug lag khang bgyid du stsal ba'i dog sa ma mchis so/ /smras pa/ bram ze khyod snying las chung ngur gyis shig dang / kho bos rgyal po las sa gzhi bslang bar bya'o zhes tshe dang ldan pa 'dun pas ko sa la'i rgyal po gsal rgyal las thabs kyis sa gzhi bslangs te grub pa dang drug sde gzhan dag kyang sbran nas/ bram ze las zong blangs te dge 'dun gyi gtsug lag khang brtsig par brtsams so/ /de nas phyogs gang du gtsug lag khang rtsig tu gzhug ces glengs pa dang / kau shA m+bI dang gdangs can gyi kun dga' ra ba'i bar na gnas kyi shing ljon pa zhig yod pa de'i d rung na bram ze 'khor shin tu mang po dang ldan pa zhig bram ze de'i khye'u lnga brgya bram ze'i gsang tshig klog tu 'jug pa de'i bram ze'i khye'u lnga brgya po de dag drug sde dag bsod snyoms la 'jug pa dang 'byung ba na yang dang yang du kye drug sde dag ci bsod snyoms mchog dang bsod snyoms dang po thob bam/ snod khengs sam zhes co 'dri bar byed pas de'i tshe drug sde dag 'di snyam du sems te/ gnas kyi shing ljon pa de'i drung na bram ze de'i slob ma bram ze'i khye'u de dag rtag tu bdag cag la de skad co 'dri bar byed kyi de dag mi dga' bar bya zhing gnas kyi shing ljon pa de gcod du bcug ste phyogs der gtsug lag khang rtsig tu bcug na des na phyin chad yang dang yang du bdag cag la de dag co 'dri bar mi byed do zhes de dag gis kyang bgros nas kAr ShA pa Na dag khyer te/ gla mi mang po bkug nas de'i mtshan mo nam sros pa dang / gnas kyi shing ljon pa de bcad nas shing de thams cad kyang rtsa ba nas phyung / sa phyogs de yang ci nas kyang gnas kyi shing ljon pa de'i phyogs gang na 'dug 'dug par gyur ces bya ba sus kyang mi shes pa de ltar mnyam par byas so/ /drug sde dag gis phyogs der mig gis brtags te gtsug lag khang gis bcad nas deng ngo / /bram ze'i khye'u de dag gi kun du spyod pa ni nyin res kyis gnas kyi shing ljon pa de'i drung du chag chag 'debs par byed/ legs par sku bar byed/ ba lang gi lci ba gsar pa'i byug pas nyug par byed pas de'i phyi de nyin par bram ze'i khye'u zhig la res bab nas de nang par sngar langs te song ba dang / des gnas kyi shing ljon pa de ma mthong nas de mkhan po'i gan du song ste smras pa/ mkhan po'i gnas kyi shing ljon pa de ma mchis so/ /bram zes smras pa/ kwa ye bram ze'i khye'u ci zhig log par ma song ngam/ ma dang sum kho nas shing ljon pa de gar song / bram ze'i khye'u gzhan zhig kyang de dang lhan cig gad mos 'debs shing des smras pa/ mkhan po bram ze'i khye'u 'dis mdang sum 'bras khu'i rtsabs 'tshal bas des na ma mthong ngo zhes mchi'o/ /bram ze des bram ze'i khye'u ches sgrin pa gzhan zhig btang na des kyang de kho na bzhin du ma mthong nas de yang 'ongs te smras pa/ mkhan po de de bzhin te gnas kyi shing ljon pa de ye ma mchis so/ /de nas thams cad 'dus te 'dong ba dang de dag gis de kho na bzhin du ma mthong nas/ bram ze'i khye'u dran pa dang ldan pa zhig yod pa na re phyogs 'di na ni mkhan po gsang tshig 'don par mdzad do/ /phyogs 'di na ni bdag sbyong sbyong na de ci nongs ji ltar gyur pa ma 'tshal to zhes zer ro/ /de dag de ltar sems khong du chud cing 'dug pa na mi zhig 'ongs nas des smras pa/ bram ze ci'i phyir de ltar 'khor dang bcas pa sems khong du chud cing 'khod/ kye nang rje phyogs 'di na gnas kyi shing ljon pa zhig 'dug par gyur pa de mdang sum du gar song ma shes so/ /kye bram ze kho bos mdang sum nam sros tsam na phyogs 'di na drug sde dag mi sta re dang gzhor dang gle ba thogs pa dag dang lhan cig 'dug pa mthong na de dag gis bcad par ma gyur tam/ bram zes smras pa/ kye nang rje 'on kyang de lags so zhes de dag de bzhin du sems khong du chud cing 'khod pa na drug sde dag lhags nas de dag gis smras pa/ bram ze dag ci'i phyir sems khong du chud cing 'khod/ 'phags pa dag phyogs 'di na gnas kyi shing ljon pa zhig mchis par gyur pa de mdang sum du gar mchis ma 'chal to/ /drug sde dag gis bgad par brtsams pa dang / bram zes smras pa/ 'phags pa dag khyed cag gis ma bkum mam/ bkren pa dag khyed cag rtag tu de'i drung na 'khod cing kho bo cag la kye drug sde dag ji bsod snyoms mchog dang gsod snyoms dang po thob bam/ snod khengs sam zhes co 'dri bar byed pas de'i phyir 'di ltar khyed cag mi dga' bar bya'o/ /de dag shAkya'i bu'i dge sbyong rnams kyi dge slong gi tshul ni tshig go/ /bram ze'i tshul ni tshig ste/ de ltar gnas kyi shing ljon pa yang bcad par gyur to zhes smod par byed/ phyar ka gtong bar byed/ kha zer bar byed do/ /thos pa gcig nas gcig tu brgyud pa kau shAm+bI na gnas pa'i skye bo'i tshogs dang yul tha dad pa na gnas pa der lhags pa de dag gis kyang thos nas/ de dag kyang lam po che dang lam srang dang bzhi mdo dang sum mdo dag na smod par byed/ phyar ka gtong bar byed/ kha zer bar byed cing / gang dag ma dad pa de dag gis bsod snyoms la zhugs pa dag la yang bsod snyoms sbyin par mi byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong gis bdag po yod pa dge 'dun gyi phyir gtsug lag khang chen po rtsig tu 'jug na gzhi blta ba'i phyir dge slong des dge slong dag bkri bar bya'o/ /khrid pa'i dge slong dag gis kyang gzhi rung ba dang rtsod pa med pa dang brtsam du rung bar blta bar bya'o/ /gal te dge slong gis gzhi mi rung ba dang / rtsod pa dang bcas pa'am/ brtsam du mi rung bar bdag po yod pa dge 'dun gyi phyir gtsug lag khang chen po rtsig tu 'jug gam/ gzhi blta ba'i phyir dge slong dag kyang mi khrid dam/ dge slong khrid pa dag la gzhi mi ston na dge 'dun lhag ma'o zhes bca' ba mdzad de/ yul ni kau shAm+bI/ gang zag ni drug sde/ nyon mongs pa ni brnyas pa mi bzod pa/ nyes pa ni gtsug lag khang rtsig pa'o/ /de la dge slong gis zhes bya ba ni drug sde'am gzhan yang chos 'di pas so/ /bdag po yod pa zhes bya ba ni gang la bdag po skyes pa'am bud med dam ma ning yod pa'o/ /dge 'dun gyi phyir zhes bya ba ni de bzhin gshegs pa'i nyan thos kyi dge 'dun gyi phyir ro/ /gtsug lag khang zhes bya ba ni gang du spyod lam bzhi po 'chag pa dang / 'greng ba dang 'dug pa dang nyal ba dag shong ba'o/ /chen po zhes bya ba ni chen po gnyis po sbyin par bya ba dang tshad kyis te/ de las 'dir ni sbyin par bya bas chen por dgongs pa yin gyi tshad kyis ni ma yin no/ /rtsig tu 'jug na zhes bya ba ni bdag nyid kyis sam gzhan gyis so/ /gzhi blta ba'i phyir dge slong des dge slong dag bkri bar bya'o zhes bya ba la/ gzhi blta ba'i phyir zhes bya ba ni sa gzhi rung ba dang rtsod pa med pa dang brtsam du rung ba nyid blta ba'i phyir ro/ /dge slong des zhes bya ba ni chos 'di pas so/ /dge slong dag bkri bar bya'o zhes bya ba ni de na dge slong gang dag yod pa dag yin gyi ji tsam gyis gzhi de mig gis bltas par gyur pa'i dge slong de tsam bkri bar bya ba ni ma yin no/ /gal te de na sbrul gyi gnas sam sdig pa'i gnas sam sril gyi gnas sam grog ma'i gnas yod pa yin na mi rung ba yin pa'i phyir bstan par mi bya'o/ /gal te rung ba yin na de'i 'og tu nye bar brtag par bya ste/ gal te rgyal po'i gzhi'am/ mchod rten gyi gzhi'am/ khyim bdag gi gzhi'am mu stegs can gyi gzhi'am/ dge slong ma'i dbyar khang ngam shing ljon pa gcad par bya ba yod na rtsod pa dang bcas pa yin pa'i phyir bstan par mi bya'o/ /gal te gzhi rung ba dang rtsod pa med pa yin na de'i nye 'khor 'dam gang kho ra khor yug nye bar brtag par bya ste/ gal te de na gzhi chu klung la brtan nam lam la brten nam khron pa la brtan nam ngam grog la brten pa yin na brtsam du mi rung ba'i phyir bstan par mi bya'o/ /gal te gzhi de rung ba dang rtsod pa med pa dang brtsam du rung ba rnam pa thams cad yongs su rdzogs pa yin na/ dge slong des gtsug lag khang du song ste/ gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas dge 'dun thams cad 'dug cing mthun par gyur pa la mchil lham gnyis phud de bla gos phrag pa gcig tu byas nas rgan rims bzhin du phyag byas te/ rgan pa'i mtha' logs su tsog pur 'dug nas thal mo sbyar te 'di skad ces brjod par bya'o/ /dge 'dun btsun pa rnams gsan du gsol/ bdag dge slong lag gi bla ming 'di zhes bgyi bas gtsug lag khang gi gzhi rung ba rtsod pa ma mchis pa brtsam du rung ba zhig btsal te/ bdag dge slong lag gi bla ming 'di zhes bgyi ba dge 'dun las gtsug lag khang gi gzhi rung ba rtsod pa ma mchis pa brtsam du rung ba bstan pa gsol na/ thugs brtse ba can dge 'dun btsun pa rnams kyis thugs brtse ba'i slad du bdag dge slong lag gi bla ming 'di zhes bgyi ba la gtsug lag khang gi gzhi rung ba rtsod pa ma mchis pa brtsam du rung ba bstan pa stsal du gsol/ de bzhin lan gnyis lan gsum du bzlas/ de ni gtsug lag khang gi gzhi bstan pa gsol pa'o/ /de'i 'og tu dge slong de dag gis kyang dge slong de la dad pas sam yid ches pas 'gro bar mi bya bar 'di ltar dge 'dun thams cad der 'gro bar bya ba'am/ dge 'dun gyis bskos pa'i dge slong dag gtang bar bya'o/ /de dag gis gzhi de mig gis blta bar bya zhing gal te de na sbrul gyi gnas sam sdig pa'i gnas sam sril gyi gnas sam grog ma'i gnas yod pa yin na mi rung ba yin pa'i phyir bstan par mi bya'o/ /gal te gzhi rung ba yin na de'i 'og tu nye bar brtag par bya ste/ gal te rgyal po'i gzhi'am/ mchod rten gyi gzhi'am khyim bdag gi gzhi'am mu stegs can gyi gzhi'am dge slong ma'i dbyar khang ngam/ shing ljon pa gcad par bya ba yod na rtsod pa dang bcas pa yin pa'i phyir bstan par mi bya'o/ /gal te gzhi rung ba dang rtsod pa med pa yin na de'i nye 'khor 'dom gang kho ra khor yug tu nye bar brtag par bya ste/ gal te de na gzhi chu klung la brten nam/ khron pa la brten nam/ lam la brten nam/ ngam grog la brten pa yin na brtsam du mi rung ba'i phyir bsten par mi bya'o/ /gal te gzhi rung ba dang rtsod pa med pa dang brtsam du rung ba rnam pa thams cad yongs su rdzogs pa yin na de'i tshe dge slong de dag gis rgan pa'i mtha' logs su gus pa dang bcas pas 'dug ste/ 'di skad ces brjod par bya'o/ /gnas brtan dag gzhi de rung ba dang rtsod pa ma mchis pa dang brtsam du rung ba lags kyi da de'i dus la bab par mkhyen par mdzod cig / de ni dus dang por bya ba'o/ /de'i 'og tu dge slong gcig gis gsol ba byas te las bya'o/ /'di ltar bya ste 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong lag gi bla ming 'di zhes bgyi ba 'dis gtsug lag khang gi gzhi rung ba rtsod pa ma mchis pa brtsam du rung ba zhig btsal te/ dge slong lag gi bla ming 'di zhes bgyi ba 'di dge 'dun las gtsug lag khang gi gzhi rung ba rtsod pa ma mchis pa brtsam du rung ba bstan pa gsol na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong lag gi bla ming 'di zhes bgyi ba la gtsug lag khang gi gzhi rung ba rtsod pa ma mchis pa brtsam du rung ba bstan pa gsol to/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ dge slong lag gi bla ming 'di zhes bgyi ba 'dis gtsug lag khang gi gzhi rung ba rtsod pa ma mchis pa brtsam du rung ba zhig btsal te/ dge slong lag gi bla ming 'di zhes bgyi ba 'di dge 'dun las gtsug lag khang gi gzhi rung ba rtsod pa ma mchis pa brtsam du rung ba bstan pa gsol te/ de'i slad du dge 'dun gyis dge slong lag gi bla ming 'di zhes bgyi ba la gtsug lag khang gi gzhi rung ba rtsod pa ma mchis pa brtsam du rung ba bstan pa gsol na/ tshe dang ldan pa gang dag dge slong lag gi bla ming 'di zhes bgyi ba la gtsug lag khang gi gzhi rung ba rtsod pa ma mchis pa brtsam du rung ba bstan pa stsal bar bzod pa de dag ni cang ma gsung shig / gang dag mi bzod pa de dag ni gsungs shig /dge 'dun gyis bzod cing gnang nas dge 'dun gyis dge slong lag gi bla ming 'di zhes bgyi ba la gtsug lag khang gi gzhi rung ba rtsod pa ma mchis pa brtsam du rung ba bstan pa stsal lags te/ 'di ltar cang mi gsung bas de de bzhin du 'dzin to/ /dge 'dun gyis dge slong lag gi bla gang la gtsug lag khang gi gzhi rung ba rtsod pa med pa brtsam du rung ba bstan pa byin pa des gtsug lag khang rtsig tu gzhug par bya ste/ 'di la 'gyod par mi bya'o/ /khrid pa'i dge slong dag gis kyang zhes bya ba ni der dge slong gang dag khrid pa de dag gis kyang ngo / /gzhi zhes bya ba ni gtsug lag khang gi dbang du byas pa'i gzhi gang yin pa'o/ /rung ba zhes bya ba ni sprul gyi gnas dang sdig pa'i gnas la sogs pa dang bral ba'o/ /rtsod pa med pa zhes bya ba ni 'thab mo dang mtshang 'dru ba la sogs pa dang bral ba'o/ /brtsam du rung ba zhes bya ba ni de'i nye 'khor 'dom gang kho ra khor yug na skyon med par ro/ /blta bar bya'o zhes bya ba ni so sor brtag par bya'o/ /gal te dge slong gis gzhi mi rung ba'am zhes bya ba ni sbrul dang sdig pa la sogs pa'i gnas kyi shas che ba'o/ /rtsod pa dang bcas pa'am zhes bya ba ni 'thab mo dang bcas pa dang mtshang 'dru ba dang bcas pa dang rtsod pa dang bcas pa dang 'gyed pa dang bcas pa'o/ /brtsam du mi rung bar zhes bya ba ni gang gi nye 'khor 'dom gang kho ra khor yug med par ro/ /bdag po yod pa dge 'dun gyi phyir gtsug lag khang chen po rtsig tu 'jug gam gzhi blta ba'i phyir dge slong dag kyang mi khrid dam dge slong khrid pa dag la gzhi mi ston na zhes bya ba ni ji skad smos pa de dag las 'das na'o/ /dge 'dun lhag ma'o zhes bya ba ni snga ma bzhin no/ /de la ltung ba ji ltar 'gyur zhe na/ 'dir yang dngos gzhi dang sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa la sogs pa gzhan thams cad ni khang pa'i skabs dang 'dra'o/ /bye brag tu na sa gzhi dang yo byad gzhan las btsal ba zhes bya ba'i yan lag nges pa med de/ btsal kyang rung ma btsal kyang rung ba dang / gcig gi don du zhes bya ba tshogs kyi don du zhes bya bar bsgyur te khyim pa yan chad rab tu byung ba dang ma byung ba yang rung ste/ gang zag bzhi yan chad kyi don dang tshad nges pa med do/ /des na 'di ltar 'gyur te/ dge slong gis sa gzhi dang yo byad gzhan las btsal kyang rung ma btsal kyang rung bas gzhi ma dag pa dang ma bstan par tshogs kyi don du gtsug lag khang tshad spyod lam bzhi shong ba yan chad nges pa med pa byed dam byed du bcug ste zin na mthar dge 'dun lhag mar 'gyur ro/ /'di la yan lag lngas dngos gzhi'i ltung bar 'gyur te/ sa gzhi dang yo byad gzhan las btsal kyang rung ma btsal kyang rung ba dang / gzhi ma dag pa dang ma bstan pa dang / tshogs kyi don dang zin pa'o/ /de dag las yan lag ma tshang na ci rigs par na smad do/ /dngos gzhi dang sbyor ba dang / sbyor ba'i sbyor ba dang / ltung ba med pa dang / bslab par bya ba dang / phyir bcos pa'i bye brag gzhan thams cad ni khang pa'i dge 'dun lhag ma'i skabs su bstan pa dang 'dra bar sbyar ro/ /gtsug lag khang gi dge 'dun lhag ma ste bdun pa bshad zin to// //so sor thar pa'i mdo rgya cher 'grel pa 'dul ba kun las btus pa bam po drug pa/ gzhi med par skur pa 'debs pa'i dge 'dun lhag ma'i gleng gzhi ni sangs rgyas bcom ldan 'das rgyal po'i khab na 'od ma'i tshal ka lan da ka'i gnas na bzhugs so/ /grong khyer sdig byung na gyad kyi sna chen po la gtogs pa rgyal sde zhes bya ba phyug pa nor mang ba longs spyod che ba yongs su bzung ba yangs shing rgya che ba rnam thos kyi bu'i nor dang ldan pa rnam thos kyi bu la nor gyis 'gran pa/ gyad rnams la cod pan med pa'i rgyal srid byed du 'jug pa zhig 'dug pa des rigs mnyam pa las chung ma blangs nas de de dang lhan cig rtse bar byed dga' bar byed dga' mgur spyod par byed pa na/ sems can srid pa tha mal spyod pa tshol ba thar pa'i snying po bzung ba/ mya ngan las 'das pa la phyogs pa 'khor ba las phyir phyogs pa srid pa'i 'gro ba thams cad du 'chi 'pho ba dang skye ba don du mi gnyer ba/ lus tha ma 'dzin pa zhig lha'i rigs bzang po nas shi 'phos te de'i skye dgu'i bdag mo'i mngal du zhugs so/ /de zla ba brgyad dam dgu 'das te btsas pa las khye'u gzugs bzang ba/ blta na sdug pa/ mdzes pa gsal ba/ gser gyi mdog 'dra ba/ mgo bo gdugs lta bu dang ldan pa/ lag pa ring ba/ dpral ba'i dbyes che ba/ smin ma 'jar ba sna'i gzengs mtho ba zhig byung ngo / /de'i nye du ngag 'dus shing lhags nas nyi ma bdun gsum nyi shu rtsa gcig tu btsas pa'i btsas ston rgya cher byas nas/ khye'u'i ming cir gdags zhes ming 'dogs par byed do/ /khye'u de'i kun du spyod pa na ji srid du mal chen po nas ma phab pa de srid du bshang ba dang gci ba mi byed pa yin la/ yul dbus na kun du spyod pa ni gang mkhas pa spyod pa gsal ba de la nor bu lta bu zhes zer bas/ nye du de dag gis smras pa/ shes ldan dag khye'u 'di gyad kyi sna chen po la gtogs pa rgyal sde'i bu yang yin la nor bu lta bu yang yin pas khye'u 'di'i ming gyad bu nor zhes bya'o zhes de'i ming gyad bu nor zhes bya bar btags so/ /de gang gi tshe chen por gyur pa de'i tshe yi ge dang grangs dang rtsis dang dbyung ba dang gzhug pa dang / gzhag pa la nye bar zhugs nas yi ge'i mthar phyin cing 'byed pa dang klog pa dang mkhas pa dang spyod pa gsal ba dang brtag pa la mkhas par gyur to/ /rgyal po rgyal rigs spyi bor dbang bskur ba ljongs kyi dbang phyug mthu dang brtson 'grus thob pas chen po'i dkyil 'khor mngon par rgyal bar byas te gnas pa rnams kyi bzo'i gnas dang / las kyi gnas tha dad par gyur pa gang dag yin pa de dag la yang zhugs shing byang bar gyur ro/ /de dus gzhan zhig na blon po'i bu ne'u ldangs gzhon nu lnga brgya dang ri dgas shor du song ba las ri dgas nyam thag pa rnams la snying rje skyes nas phyir log ste/ dge ba gang yin zhes tshol bas nges par 'byung ba'i mngon par dga' ba btsal bar brtsams so/ /de'i tshe na grong khyer sdig byung na 'dro ba skyong gi bu rdzogs byed dang / gnag lhas kyi bu kun du rgyu dang smra 'dod kyi bu mo'i bu yang dag rgyal ba can dang / mi pham skra'i la ba can dang / ka t+ya'i bu nog can dang / gnyen gyi bu gcer bu zhes bya ba mu stegs can gyi ston pa drug po thams cad shes pa ma yin par thams cad mkhyen par mngon pa'i nga rgyal can dag nye bar sten cing gnas pa dag la gzhon nu gyad bu nor gyis chos kyi tshul dang slob ma la gdams pa dang / tshangs par spyod pa'i 'bras bu dang / phan yon gang yin zhes dris na/ de dag lam gol bar zhugs pa dang / lam ngan pa log par sgrub pa/ lam 'jigs pa dang bcas pa ji lta ba bzhin du mkhas pa rnams kyis spang bar bya ba yin par rig nas snod stong pa bzhin brdabs te bor nas rang gi gnas su song ngo / /de nas gyad bu nor steng gi khang bzangs kyi gzhir gtogs pa na 'di snyam du ma la 'jig rten gyi khams lha dang bcas pa/ bdud dang bcas pa/ tshangs pa dang bcas pa dang / dge sbyong dang bram zer bcas pa'i skye dgu lha dang mir bcas pa'i nang na gang gis bdag 'khor ba dgon pa 'di nas rab tu thar par byed pa'i dge sbyong ngam bram ze sman dang gsang sngags dang rig sngags tshig gcig gam gnyis sam gsum mam bzhi'am de lta bu 'chang ba su yod snyam du bsams so/ /de'i skabs su sangs rgyas bcom ldan 'das la ni mi mkhyen pa dang mi gzigs pa dang ma rig pa dang rnam par mi mkhyen pa cung zad kyang mi mnga' bas sangs rgyas bcom ldan 'das thugs rje chen po dang ldan pa 'jig rten la phan par mdzad pa srung ba gcig pu pa/ nyag gcig pa ba/ gnyis pa med pa/ gnyis su mi gsung ba/ zhi gnas dang lhag mthong gis bzhugs pa/ rig pa gsum gsal bar mdzad pa/ bslab pa gsum la legs par bslabs pa/ dul ba'i gnas gsum gyi gzhi la mkhas pa/ chu bo bzhi las brgal ba/ rdzu 'phrul gyi rkang pa bzhis spyod pa'i gzhi la legs par gnas pa/ bsdu ba'i dngos po bzhi la yun ring po nas yongs su sbyong bar mdzad pa/ mi 'jigs pa bzhis bsnyengs pa mi mnga' ba/ yan lag lnga spangs pa/ 'gro ba lnga las yang dag par 'das pa/ yan lag drug dang ldan pa/ pha rol tu phyin pa drug yongs su rdzogs pa/ rtag tu gnas pa drug gis gnas pa/ byang chub kyi yan lag bdun gyi me tog gis phyug pa/ lam gyi yan lag brgyad ston pa/ mthar gyis gnas pa'i snyoms par 'jug pa dgu la mkhas pa/ stobs bcu'i stobs dang ldan pa/ phyogs bcur snyan pas yang dag par rgyas pa/ brgya phrag bcur dbang sgyur ba las khyad par du 'phags pa rnams kyi chos nyid ni nyin lan gsum mtshan lan gsum sangs rgyas kyi spyan gyis 'jig rten la rnam par gzigs nas/ gang ni nyams par gyur/ gang gi 'phel bar gyur/ gang ni gnod par gyur/ gang ni nyam nga bar gyur/ gang ni mi bde bar gyur/ gang ni gnod pa dang nyam nga ba dang mi bde bar gyur/ gang ni ngan song la gzhol/ gang ni ngan song la 'ba'/ gang ni ngan song gi lam nas bslang ste mtho ris dang thar pa dang / 'bras bu la gzhag par bya/ 'dod pa'i 'dam du bying ba gang gi lag nas ni drang bar bya/ 'phags pa'i nor gyi dbyig dang bral ba gang ni 'phags pa'i nor gyi dbang phyug la gzhag par bya/ gang ni sangs rgyas 'byung bas brgyan pa'i 'jig rten ni 'bras bu dang bcas par bya/ gang gis dge ba'i rtsa ba dag ma bskyed pa dag ni bskyed par bya/ dge ba'i rtsa ba dag bskyed pa gang ni yongs su smin par bya/ yongs su smin pa gang ni rnam par grol bar bya zhes mkhyen pa dang gzigs pa 'jug go/ /de ltar bcom ldan 'das kyis sangs rgyas kyi spyan gyis 'jig rten la rnam par gzigs nas grong khyer sdig byung nas gyad bu nor de rgyud yongs su smin pa dang sngon gyi sangs rgyas rnams la bya ba lhag par byas pa yin te/ de gdul ba'i dus ni 'bras bu yongs su smin pa mtshon gyis brtol ba la bsdad pa lta bu yin par gzigs nas/ bcom ldan 'das 'di snyam du dgongs te/ ci 'di re zhig ston pas gdul ba yin nam/ 'on te nyan thos kyis 'dul ba yin snyam du dgongs nas/ nyan thos kyis 'dul ba yin par gzigs so/ /sgo gang na 'jug par 'gyur/ ci rdzu 'phrul gyis 'dul ba yin nam/ 'on te spyod lam gyis 'dul ba yin snyam du dgongs na/ spyod lam gyis 'dul ba yin par gzigs so/ /bcom ldan 'das la ni gang la spyod lam gyis 'dul ba de la tshe dang ldan pa rta thul gtong bar mdzad de/ 'di ltar de'i spyod lam gyis ni lta dang mi'i yid sdud par byed pa yin pa'i phyir ro/ /de nas bcom ldan 'das kyis tshe dang ldan pa rta thul la bka' stsal pa/ rta thul khyod kyis grong khyer sdig byung na gyad bu nor 'dug pa la soms shig /de nas tshe dang ldan pa rta thul bcom ldan 'das kyi bka' la lhag par bya ba byed pa yin pas de nyid kyi mtshan mo 'das nas snga dro sham thabs bgos lhung bzed dang chos gos thogs te rgyal po'i khab tu bsod snyoms la zhugs so/ /de bsod snyoms la rgyu zhing mthar gyis grong khyer sdig byung du phyin nas pad ma'i tshal gseb na 'dug cing yang 'gro ba dang ldog pa dang cung zad blta ba dang rnam par blta ba dang bskum pa dang brkyang ba dang / snam sbyar dang chos gos dang lhung bzed thogs pa mdzes pas grong khyer sdig byung du bsod snyoms la zhugs so/ /de'i tshe na gyad bu nor steng gi khang bzangs kyi gzhir gtogs pa na dge ba gang yin tshol bas grong khyer la blta zhing 'dug pas tshe dang ldan pa rta thul spyod lam mdzes pas bsod snyoms la rgyu ba thag ring po nas mthong ngo / /mthong nas kyang de 'di snyam du sems te/ grong khyer sdig byung 'dir rab tu byung ba ji snyed cig lhags shing 'dus nas gnas pa dag las 'di lta ste/ rab tu byung ba 'di'i spyod lam 'di lta bu ni bdag gis sngon chad 'ga' yang ma mthong ngo snyam nas 'di snyam du sems te/ rab tu byung ba dag la ni gang dag grong du spyod lam 'chos la dgon par ci dgar spyod pa dag kyang yod pas bdag gis dgon par 'di'i spyod lam brtag par bya'o snyam nas mi zhig la smras pa/ kwa'i nang rje tshur shog rab tu byung ba 'di'i phyi bzhin phyi bzhin rjes su song la/ 'di'i ji ltar grong du spyod lam zhi ba ltar dgon par yang de bzhin nam/ 'on te ma yin pa rtogs shig /mi des de bzhin brtags na tshe dang ldan pa rta thul grong khyer sdig byung du bsod snyoms brgyus nas pad+ma'i tshal gseb ga la ba der song ste phyin pa dang lhung bzed dang chu tshags mtha' gcig tu bzhag nas snam sbyar sprugs te/ rkang pa gnyis bkrus nas lag pa gnyis bsnyal te/ chu btsags nas lo ma lhags pa dag blangs te 'dug nas zas kyi bya ba byas te/ lo ma lhags pa dag bor nas lag pa gnyis bsnyal te lhung bzed dang chu tshags mtha' gcig tu bzhag nas rkang pa gnyis bkrus te shing ljon pa zhig gi drung du bsten nas brang 'gro'i rgyal po nyal ba'i lus bskyil ba ltar skyil mo krung bcas te spyod lam zhi bas 'dug go/ /de nas mi de tshe dang ldan pa rta thul gyi spyod lam zhi ba lha dang mi'i sems sdud par byed pas yid sdud pas gyad bu nor ga la ba der song ste de skad bzlas pa dang / gyad bu nor tshe dang ldan pa rta thul gyi spyod lam 'byor pa phun sum tshogs pa thos pas yid bsdus nas gus par sgrim pa dang bcas pas bzhon pa stod du bcug ste grong khyer sdig byung nas pad ma'i tshal gseb tu song nas/ shing rta kha bsgyur te bzhon pa'i sa ji srid pa de srid du bzhon pas song nas bzhon pa las babs te rkang pas pad+ma'i tshal gseb tu zhugs pa dang / tshe dang ldan pa rta thul dbang po shin tu mnyam par gzhag cing spyod lam zhi bas 'dug pa mthong ngo / /mthong nas kyang de 'di snyam du sems te/ 'di ltar bdag gis rab tu byung ba 'di ting nge 'dzin las bslang ba ni bdag gi tshul dang mthun pa ma yin gyi/ gang gi tshe 'di ting nge 'dzin las langs par gyur pa de'i tshe de'i drung du 'gro bar bya'o snyam du rig nas mtha' gcig tu bsdad do/ /de nas tshe dang ldan pa rta thul phyi 'phred nang du yang dag 'jog las langs pa dang / gyad bu nor tshe dang ldan pa rta thul ga la ba der song ste phyin nas rkang pa gnyis la phyag 'tshal te/ mngon du yang dag par dga' bar 'gyur ba dang yang dag par mgu bar 'gyur ba'i gtam sna tshogs byas te/ 'di skad ces smras so/ /shes ldan khyod ston pa lags sam/ 'on te nyan thos lags/ bzhin bzangs kho bo ni nyan thos ston pa'i lam gyi rjes su zhugs pa yin no/ /shes ldan ston pa dang nyan thos la khyad par ci mchis/ bzhin bzangs khyad par shin tu che ste/ 'di lta ste dper na ri'i rgyal po ri rab dang / yungs kar lta bu dang / rgya mtsho chen po dang / ba lang gi rjes lta bu dang / nyi ma dang srin bu me khyer lta bu dang nam mkha' dang pad+ma'i rtsa ba'i bu ga lta bu'o/ /de nas gyad bu nor 'di snyam du sems te/ ji ltar rab tu byung ba 'di ston pa la stod par byed cing bdag nyid la smod par byed pa lags na sangs rgyas ni dam pa ma yin par mi 'gyur la/ chos bstan pa yang dam pa ma yin par mi 'gyur ro snyam du rig nas tshe dang ldan pa rta thul la 'di skad ces smras so/ /'phags pa bdag legs par gsungs pa'i chos 'dul ba la rab tu byung ba dang bsnyen par rdzogs pa dge slong gi dngos po gnang na bdag 'phags pa'i drung du tshangs par spyod pa spyad par bgyi'o/ / bzhin bzangs khyod pha mas gnang bar byos shig /de nas gyad bu nor gyis pha ma la gsol te/ gnang nas tshe dang ldan pa rta thul gyi drung du rab tu byung ba bsnyen par rdzogs te/ nyin mo klag pa dang kha ton byas pas sde snod gsum po dag lhogs par gyur to/ /mtshan mo bsam gtan byas pas gong nas gong du yid la byed pa'i khyad par thob nas/ 'khor ba'i 'khor lo cha lnga pa g.yo ba dang / mi g.yo ba nyid la 'du byed kyi rnam pa thams cad nyams pa dang / ltung ba dang rnam par 'thor ba dang / rnam par 'jig pa'i chos nyid kyis zil gyis mnan nas nyon m ongs pa thams cad spangs par rigs kyi bu dag gang gi phyir skra dang kha spu bregs te gos ngur smrig dag bgos nas yang dag pa kho nar dad pas khyim nas khyim med par rab tu byung bar byed pa tshangs par spyod pa'i mtha' bla na med pa de'i tshe de nyid la rang gis mngon par shes pas mngon sum du byas te bsgrubs nas bdag gi skye ba ni zad/ tshangs par spyod pa ni bsten/ bya ba ni byas/ srid pa 'di las gzhan ni mi shes so zhes go bar byed cing / dgra bcom pa khams gsum las 'dod chags dang bral ba/ bong ba dang gser du mnyam pa/ nam mkha' dang lag mthil du mtshungs pa'i sems dang ldan pa tsan dan zhag lon par gzhag pa lta bu rig pa'i sgo nga'i sbubs dral bar gyur cing / rig pa dang mngon par shes pa dang / so so yang dag par rig pa thob pa/ srid pa dang 'dod pa'i rnyed pa dang bkur sti la rgyab kyis phyogs pa/ dbang po dang nye dbang dang bcas pa'i lha rnams kyis mchod par bya ba dang / rjed par bya ba dang / mngon du smra bar bya bar gyur to/ /de nas tshe dang ldan pa gyad bu nor nyan thos kyi 'dus pa chen po tshe dang ldan pa rta thul gyi gan du lhags te/ bcom ldan 'das kyi spyan sngar 'dong ba dang 'grogs te bcom ldan 'das kyi spyan sngar song ngo / /de'i tshe na bcom ldan 'das dge slong gi 'khor brgya phrag du ma'i gung la bzhugs shing chos ston pas tshe dang ldan pa gyad bu nor thag ring po nas gzigs nas bka' stsal pa/ gyad bu nor tshur shog 'ongs pa legs so/ / khyod dus su phyin to/ /gyad bu nor rang gi stan ji lta ba la 'dug shig /de nas tshe dang ldan pa gyad bu nor bcom ldan 'das kyi zhabs gnyis la mgo bos phyag 'tshal te mtha' gcig tu 'dug go/ /de'i tshe na rgyal po'i khab na dge slong dag gnas mal mi mthun par 'bogs nas dge slong dag phan tshun sems bsrungs pas dge ba'i phyogs dag mi byed cing de dag dge ba'i phyogs rnams kyis mi 'phel te/ dper na chu med pa nas ut+pa la bzhin no/ /bcom ldan 'das kyis dgongs pa gyad bu nor 'dis/ sngon gyi sangs rgyas rnams dang / bcom ldan 'das d e bzhin gshegs pa dgra bcom pa yang dag par rdzogs pa'i sangs rgyas 'od srungs kyi spyan sngar kye ma bdag skye dgu'i tshe lo brgya pa na bcom ldan 'das de bzhin gshegs pa dgra bcom pa yang dag par rdzogs pa'i sangs rgyas shAkya thub pa'i bstan pa la rab tu byung nas gnas mal 'bogs pa rnams kyi nang na mchog tu gyur cig ces smon lam btab pas 'di dge slong rnams kyi gnas mal 'bogs par bskor gzhug go snyam du dgongs nas dge slong rnams la bka' stsal pa/ dge slong dag khyed kyis dge slong gyad bu nor ram gzhan yang de lta bu chos lnga dang ldan pa spro bar byas te/ gsol ba dang gnyis kyi las kyis dge 'dun gyi gnas mal 'bogs par bsko bar bya'o/ /de nas dge slong rnams kyis tshe dang ldan pa gyad bu nor spro bar byas te/ gsol ba dang gnyis kyi las kyis gnas mal 'bogs par bskos so/ /gang gi tshe tshe dang ldan pa gyad bu nor gnas mal 'bogs par bskos pa de'i tshe na des gnas mal mthun par phog pas dge slong rnams dge ba'i chos rnams kyis 'phel te/ dper na chu nas ut+pa la bzhin no/ /gang gi tshe bcom ldan 'das kyi bstan pa rgyas par gyur pa de'i tshe tshe dang ldan pa bram ze dang khyim bdag dad pa can rnams kyi khyim dag tu dge 'dun gyi zas dag bshams pa na drug sde dag gang na zas bsod pa der dong ste/ kha brngam dang mi rigs pa byed nas bram ze dang khyim bdag gis spyos shing spobs pa med par byas te btang ba'i skabs de dge slong dag gis bcom ldan 'das la gsol pa dang / bcom ldan 'das kyis bka' stsal pa/ dge slong dag khyed kyis gyad bu nor ram gzhan yang de lta bu chos lnga dang ldan pa spro bar byas te/ gsol ba dang gnyis kyi las kyis zas la bsko ba bsko bar bya'o/ /de nas dge slong rnams kyis tshe dang ldan pa gyad bu nor spro bar byas te/ gsol ba dang gnyis kyi las kyis zas la bsko bar yang bskos so/ /gang gi tshe tshe dang ldan pa gyad bu nor zas la bsko ba bskos pa de'i tshe na des dge 'dun la zas rnam pa gsum bshams te/ bsod pa dang 'bring dang ngan pa dag go/ /dge slong gang dag glo bur du lhags pa de dag la ni nyi ma dang po la ni zas bsod pa dag tu sko bar byed/ nyi ma gnyis pa la ni zas 'bring dag tu sko bar byed/ nyi ma gsum pa la ni zas ngan par sko bar byed do/ /nyi ma bzhi pa la ni de dag rang gi spyod yul shes pas ci dgar bsod snyoms la 'jug par byed do/ /de'i tshe na tshe dang ldan pa gyad bu nor rgyal po'i khab na gnas pa dang gnyug mar gnas pa dang / gsol ba byed pa dang / gtams pa 'dzin pa dang / gnas mal 'bogs pa dang / zas la sko bar byed pas de dge 'dun la lugs ji lta ba bzhin dang / rgan rims ji lta ba bzhin dang / go rims ji lta ba bzhin dang / thod rgal med par zas la sko bar byed do/ /tshe dang ldan pa gyad bu nor dang / dge slong mdza' bo dang sa las skyes gnyis tshe rabs tshe rabs nas rjes su 'brel pa'i khon yod pas de gnyis lho'i ri bo dag tu ljongs rgyu zhing 'dong ba na rgyal po'i khab tu phyin nas de gnyis kyis dge slong zhig la dris pa/ tshe dang ldan pa dge 'dun gyi gnas mal 'bogs par bskos pa su yin/ des smras pa/ tshe dang ldan pa gyad bu nor ro/ /de nas de gnyis tshe dang ldan pa gyad bu nor gyi gan du song ste smras pa/ kho bo cag gnyis kyi gnas mal phog shig /de'i tshe na mal cha bzang po gang dag yin pa de dag ni gnas brtan gnas brtan rnams la phog zin pas lhag ma ngan pa dag lus so/ /gtsug l ag khang yang nye 'khor gyi gang dag yin pa de dag ni gnas brtan gnas brtan rnams kyir bskos zin pas mtha'i gtsug lag khang dag 'ba' zhig lus nas tshe dang ldan pa gyad bu nor gyis de gnyis la mal cha ngan pa dag phog cing gtsug lag khang yang mtha' dag tu bskos so/ /de gnyis kyis smras pa/ dge 'dun gyis zas la bsko ba su yin/ tshe dang ldan pa gyad bu nor gyis smras pa/ bdag ste gyad bu nor ro/ /kho bo cag gnyis kyi zas skos shig /tshe dang ldan pa gyad bu nor gyis nyi ma dang po la de nyid zas bsod pa dag tu bskos pa dang / bram ze dang khyim bdag dad pa can dag gis dris pa/ sang bdag cag gi 'dir mgron du su 'ong bar 'gyur/ gzhan dag gis smras pa/ mdza' bo dang sa las skyes gnyis so/ /de dag gis bsams pa/ de gnyis ni gnas ngan len kun tu spyod pa yin pas su zhig de gnyis kyi phyir gus par byed par 'gyur te/ ci yang rung ba zos shing 'gro bar gyur cig snyam nas de dag gis de gnyis la gus par ma byas par zas ngan pa byin no/ /tshe dang ldan pa gyad bu nor gyis nyi ma gnyis pa la de gnyis zas 'bring dag tu bskos pa dang / de bzhin du bram ze dang khyim bdag dad pa can dag gis dris pa/ sang bdag cag gi 'dir mgron du su 'ong bar 'gyur/ gzhan dag gis smras pa/ mdza' bo dang sa las skyes gnyis so/ /de dag gis bsams pa/ de gnyis ni gnas ngan len kun du spyod pa yin pas su zhig de gnyis kyi phyir gus par byed par 'gyur te/ ci yang rung ba zos shing 'gro bar gyur cig snyam nas de dag gis de gnyis la gus par ma byas par zas ngan pa byin no/ /tshe dang ldan pa gyad bu nor gyis nyi ma gsum pa la ni de gnyis rang bzhin gyis zas ngan pa dag tu bskos so/ /de nas mdza' bo dang sa las skyes gnyis 'di snyam du sems te/ kye ma'o sdug bsngal lo/ /kye ma'o mi bzod do/ /tshe dang ldan pa gyad bu nor gyis bsams bzhin du bdag cag gnyis la gnas mal ngan pa phog cing gang dag zos na rdzud par 'gyur zhing shin tu yid du mi 'ong ba'i zas ngan pa dag gis lan gsum gyi bar du mtho btsams gyis 'di la gnod pa ji lta bu zhig bya snyam mo/ /de'i tshe dge slong mdza' bo dang sa las skyes gnyis kyi sring mo dge slong ma mdza' mo zhes bya ba rgyal po'i khab na dge slong ma'i dbyar khang rgyal po'i kun dga' ra ba na 'dug pa de de gnyis la phyag 'tshal du song ba dang / de gnyis kyis sring mo de thabs kyis bsdigs nas/ khyod bcom ldan 'das kyi spyan sngar song la/ tshe dang ldan pa gyad bu nor gyis bdag dang lhan cig mi tshangs par spyad de pham par gyur pa de ni mi mdzes shing tshul ma lags so zhes gsol cig ces/ gzhi med par skur pa 'debs su bcug go/ /de nas dge slong mdza' bo dang sa las skyes gnyis bcom ldan 'das kyi spyan sngar song nas ring po ma lon par dge slong ma mdza' mo bcom ldan 'das kyi spyan sngar song ste/ gsol pa/ btsun pa 'dir 'di ltar 'phags pa gyad bu nor bdag dang lhan cig mi tshangs par spyad de pham par gyur pa de ni mi mdzes shing tshul ma lags so/ /dge slong mdza' bo dang sa las skyes gnyis kyis kyang 'di skad ces gsol to/ /bcom ldan 'das de de bzhin no/ / bde bar gshegs pa de de bzhin te/ bdag cag gnyis kyi sring mos ji skad gsol pa de kho na bzhin du bdag cag gnyis kyis kyang 'tshal to/ /de nas bcom ldan 'das kyis tshe dang ldan pa gyad bu nor la bka' stsal pa/ gyad bu nor khyod kyis thos sam/ bcom ldan 'das bdag gis thos so/ /gyad bu nor de la khyod ji snyam du sems/ bcom ldan 'das mi dran no/ /de nas bcom ldan 'das kyis dge slong rnams la bka' stsal pa/ dge slong dag khyed kyis dge slong gyad bu nor ni dran pa dang ldan par zung shig /dge slong ma mdza' mo ni rang gis khas blangs pas bsnyil bar bya'o/ /dge slong mdza' bo dang sa las skyes gnyis la ni ci zhig mthong / ji ltar mthong / gang du mthong / khyed gnyis don ci la der son pas der mthong zhes legs par rab tu gleng bar gyis shig /brtag par gyis shig ces bka' stsal nas/ bcom ldan 'das gdan las bzhengs te/ nang du yang dag 'jog gi slad du gtsug lag khang du gshegs so/ /de nas dge slong rab tu mang po dag gis bcom ldan 'das nang du yang 'jog la zhugs nas ring po ma lon par rig nas tshe dang ldan pa gyad bu nor ni dran pa dang ldan par bzung / dge slong ma mdza' mo ni rang gis khas blangs pas bsnyil/ dge slong mdza' bo dang sa las skyes gnyis la ni ji zhig mthong / ji ltar mthong / gang du mthong / khyed gnyis don de ci la son pas der mthong zhes legs par rab tu glengs shing brtags pa dang / de gnyis kyis smras pa tshe dang ldan pa dag tshe dang ldan pa gyad bu nor la mi tshangs par spyod pa'i pham par 'gyur ba ma byung ste/ 'di ltar tshe dang ldan pa gyad bu nor gyis bdag cag gnyis la bsams bzhin du gnas mal ngan pa phog cing / gang dag zos na rjud par 'gyur zhing shin tu yid du mi 'ong ba'i zas ngan pa dag gis lan gsum gyi bar du mtho btsams pas bdag cag gnyis kyis tshe dang ldan pa gyad bu nor la 'dun pa dang zhe sdang dang gti mug dang 'jigs pas smras par zad kyi/ tshe dang ldan pa gyad bu nor dge slong ma mdza' mo dang lhan cig mi tshangs par spyad de pham par gyur pa ma lags te/ 'di ltar tshe dang ldan pa gyad bu nor ni dge slong dag la ltung ba med pa yin no/ /de nas bcom ldan 'das phyi 'phred nang du yang dag 'jog las bzhengs nas dge slong gi dge 'dun gyi gung la gdan bshams pa nyid la bzhugs pa dang / dge slong rab tu mang po dag gis skabs de bcom ldan 'das la gsol to/ /de nas bcom ldan 'das kyis byung ba 'di dang gleng gzhi 'di dang / skabs 'di la dge slong gi dge 'dun bsdu ba mdzad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang khros shing zhe sdang bar gyur nas ji nas kyang 'di tshangs par spyod pa dang dbral lo snyam nas dge slong dag la ltung ba med pa la gzhi med par pham par 'gyur ba'i chos kyis skur pa las/ de dus gzhan zhig na dris kyang rung ma dris kyang rung rtsod pa de yang gzhi med pa yin la/ dge slong yang zhe sdang la gnas pas zhe sdang gis smras so zhe na dge 'dun lhag ma'o zhes bca' ba mdzad de/ yul ni rgyal po'i khab/ gang zag ni mdza' bo dang sa las skyes gnyis/ nyon mongs pa ni mi bzod pa/ nyes pa ni gzhi med par skur pa 'debs pa'o/ /de la yang dge slong gang zhes bya ba ni dge slong mdza' bo dang sa las skyes sam/ gzhan yang de lta bu gang yin pa'o/ /khros shing zhes bya ba ni 'khrugs shing ngo / /zhe sdang bar gyur nas zhes bya ba ni yid mi dga' bar gyur nas te/ 'khrugs pa ma bsal bar ro/ /ci nas kyang 'di tshangs par spyod pa dang dbral lo snyam nas zhes bya ba ni ci nas kyang 'di dge slong gi tshul dang dbral lo snyam nas so/ /dge slong dag pa zhes bya ba ni gyad bu nor ram gzhan yang de lta bu gang yin pa'o/ /ltung ba med pa la zhes bya ba ni gzhi de'i ltung ba med pa la'o/ /gzhi med par zhes bya ba ni gzhi gsum po mthong ba'i gzhi dang thos pa'i gzhi dang / dogs pa'i gzhi med par ro/ /pham par 'gyur ba'i chos kyis zhes bya ba ni chos bzhi po gang yang rung ba ste/ de ni chos ma yin pa chos kyi sgrar gsungs pa yin no/ /skur pa las zhes bya ba ni skur pa btab pa las so/ /de dus gzhan zhig na zhes bya ba ni de dus gzhan na'o/ /dris kyang rung zhes bya ba ni gzhan dag gis so/ / ma dris kyang rung zhes bya ba ni de rang nyid 'gyod pa dang cung zad 'gyod pa dang / rnam par 'gyod pa dang / rab tu 'gyod par gyur nas so/ /rtsod pa de yang zhes bya ba ni/ rtsod pa bzhi po 'gyed pa'i phyir rtsod pa dang / mi gdams pa'i phyir rtsod pa dang / ltung ba'i phyir rtsod pa dang / bya ba'i phyir rtsod pa'o/ /gzhi med pa yin la zhes bya ba ni gzhi gsum po de dag med pa la'o/ /dge slong yang zhe sdang la gnas pas zhes bya ba ni skur pa 'debs par 'dod pas so/ /zhe sdang gis smras so zhe na zhes bya ba ni skur pa btab par gyur to zhes zer na'o/ /dge 'dun lhag ma'o zhes bya ba ni snga ma bzhin no/ /de la ltung ba ji ltar 'gyur zhe na/ 'dir yang dngos gzhi dang sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni/ nyams par 'dun pas mthong ba dang thos pa dang dogs pa'i gzhi med par brdzun du smras pas dge slong dang / dge slong ma ma nyams pa dang / nyams pa la pham par 'gyur ba'i chos kyis skur pa mi'i 'gro ba gang yang rung ba la thabs gang yang rung bas go bar byas na dge 'dun lhag mar 'gyur ro/ /de'i bye brag tu ltung ba 'byin par byed pas pha rol po nyams par bya ba bskyed par bya ba'i bsam pas mthong ba dang / thos pa dang / dogs pa'i gzhi gang yang med par brdzun gyi tshig gis dge slong yang rung dge slong ma yang rung / pham par 'gyur ba byung yang rung / ma byung yang rung ba la pham par 'gyur ba'i chos bzhi'am brgyad gang yang rung bas skur pa de nyid dang mi'i 'gro ba pa khyim pa'am/ rab tu byung ba skyes pa dang bud med dang ma ning la sogs pa gang yang rung ba la mngon sum mam/ brgyud pa la sogs pa'i thabs gang yang rung bas brda sprod cing go bar byas na dngos gzhir 'gyur ro/ /nyams par 'dun pa'i bsam pas tshangs par spyod pa dang dbral bar 'dod pa gang yang rung ba la na smad pa med do/ /mthong ba dang thos pa dang dogs pa'i gzhi gsum med pa dang brjed pa gang yang rung ba la na smad pa med do/ /'du shes dang bzod pa dang 'dod pa dang blo gros dang rtog pa dang lta ba bsgyur ba'i brdzun gyi tshig gang yang rung ba lan smad pa med do/ /dge slong dang dge slong ma bsnyen par rdzogs pa dang bcas pa gang yang rung ba la na smad pa med do/ /de gnyis pham par 'gyur ba'i chos kyis nyams pa dang ma nyams pa gang yang rung ba lan smad pa med do/ /pham par 'gyur ba'i chos thun mong gang yang rung ba la na smad pa med do/ /nyan pa po de nyid dang mi'i 'gro ba pa khyim pa'am rab tu byung ba skyes pa dang bud med dang ma ning la sogs pa gang yang rung ba la na smad pa med do/ /brda sprad pa'i thabs mngon sum mam brgyud pa'am phrin dang spring yig dang brda la sogs pas go bar byed pa gang yang rung ba la na smad pa med do/ /gang zag ma nyams pa dag la gzhi bcus ltung bar 'gyur te/ ma mthong ba dang / ma thos pa dang / mi dogs par 'du shes bsgyur te mthong ngo zhe'am/ thos so zhe'am/ dogs so zhes zer ba gsum dang / thos pa la brjed pa dang dogs pa la brjed pa las 'du shes bsgyur te thos te ma brjed do zhe'am/ dogs te ma brjed do zhes zer ba gnyis dang / thos pa la yid ches nas mthong ngo zhe'am/ thos pa la yid ma ches par mthong ngo zhe'am/ thos pa la dogs nas mthong ngo zhe'am/ thos pa la mi dogs par mthong ngo zhe'am/ dogs pa la dogs nas mthong ngo zhes zer ba lnga ste/ de ltar gzhi bcu po dag gang brjod kyang na smad pa med do/ /gang zag dag pa ma dag pa ltar bcos pa la yang gzhi de bcus ltung bar 'gyur ro/ /gang zag nyams pa ma dag pa la ni gzhi bcu gcig gis ltung bar 'gyur te/ ma mthong ba dang / ma thos pa dang / mi dogs par 'du shes bsgyur te mthong ngo zhe'am/ thos so zhe'am/ dogs so zhes zer ba gsum dang / mthong la thos la brjed pa dang / dogs la brjed pa dang / 'du shes bsgyur te/ mthong ste ma brjed do zhe'am/ thos te ma brjed do zhe'am/ dogs te ma brjed do zhes zer ba gsum dang thos pa la yid ches nas mthong ngo zhe'am/ thos pa la yid ma ches par mthong ngo zhe'am/ thos pa la dogs nas mthong ngo zhe'am/ dogs pa la mi dogs par mthong ngo zhe'am/ dogs pa la dogs pa na mthong ngo zhes zer ba lnga ste/ de ltar gzhi bcu gcig po dag gang brjod kyang na smad pa med do/ /gang zag ma dag pa dag pa ltar bcos pa la yang gzhi bcu gcig po de dag gis ltung bar 'gyur ro/ /mtshan dang lta ba las rang gi phyogs ma yin pa la na smad pa med do/ /yid gnyis ni 'du shes dang 'dra bas yid gnyis dang bcas pas skur pa la na smad pa med do/ /gzhi gsum po dag ni tha dad pas de dag nang bsnor ba la na smad pa med do/ /brjed pa ni med pa dang 'dra bas brjed pas skur pa la na smad pa med do/ /don gyi de nyid ni mi brdzun par smra ba nyid kyi rgyu ma yin pas de nyid nyams pa yin yang gzhi med par 'du shes bsgyur na de nyams pa la na smad pa med do/ /dge slong 'gro ba gzhan gyi rnam pa bsten pa na dge slong gi 'du shes yod pa lan smad pa med do/ /dngos po bzang ngan dang 'dra ba la na smad pa med do/ /mtshan gyur pa ltung ba thun mong gi yul la na smad pa med do/ /'gro ba gzhan las skyes pa dang 'gro ba gzhan gyi rnam pa bsten pa la na smad pa med do/ /gnas skabs gzhan thob pa la na smad pa med do/ /gzhi gcig la bslab pa du ma bcas pa nyid la na smad pa med do/ /dngos po la the tshom za bas bsam pa dang bcas par zhugs pa la na smad pa med do/ /yul bsams pa dang ma bsams pa la na smad pa med do/ /rang dang gzhan gyi don du byed pa la na smad pa med do/ /'di'i byed pa po ni nyams par 'dun pas gzhi med par dge slong la pham par 'gyur ba'i chos kyis skur pa 'debs pa'o/ /'di la yan lag lngas dngos gzhi'i ltung bar 'gyur te/ nyams par 'dun pa dang / gzhi med par skur pa dang / bsnyen par rdzogs pa dang / pham par 'gyur ba'i chos dang don go ba'o/ /de dag las yan lag ma tshang na ci rigs par na smad do/ /sbyor ba'i ltung ba ni gzhi med par skur pa 'debs par sbyor ba brtsams nas dngos gzhi la ma thug gi bar du nyes pa sbom por 'gyur ro/ /mi bsten pas skur pa 'debs na nyes pa sbom po'o/ /des na dge slong la pho'i dbang po med pa ma ning pho lta bu dang / dge slong ma la mo'i dbang po med pa mi nang mo lta bus skur pa 'debs na nyes pa sbom po'o/ /nyams par bya ba'i ming ma smos par skur pa 'debs na nyes pa sbom po'o/ /dge slong 'gro ba gzhan gyi rnam pa bsten pa na dge slong gi 'du shes med pa la nyes pa sbom po'o/ /mi ma yin pa'i 'gro ba la go bar byas na nyes pa sbom po'o/ /sbyor ba'i sbyor ba'i ltung ba ni gzhi med par skur pa 'debs pa brtsams nas ji srid du sbyor ba la ma thug gi bar du nyes byas so/ /khros par gyur pa dang / rgod bag dang / byung rgyal gyis skur pa 'debs na nyes byas so/ /dud 'gro'i 'gro ba pa la go bar byas na nyes byas so/ /bsnyen par ma rdzogs pa la skur pa btab na nyes byas so/ /de bzhin gshegs pa la ngan sems kyis khrag phyung ba dang dge 'dun gyi dbyen byas pas skur na nyes byas so/ /gzhi gsum po dag med par bdag gis bsams te smras so zhes bya ba la sogs pas gzhogs smos byed na nyes byas so/ / dge 'dun lhag mas skur na ltung byed do/ /ltung ba gzhan gyis skur na nyes byas so/ /nyes byas kyis skur na nyes byas phra mor 'gyur ro/ /sbyor ba'i ltung ba la sbyor ba tha dad pa ji snyed byas pa re re la nyes byas re rer 'gyur ro/ /ltung ba med pa ni gang zag ma nyams pa dag pa la gzhi lngas ltung bar mi 'gyur te/ ma mthong ba dang / ma thos pa dang / mi dogs pa la 'du shes ma bsgyur bar ma mthong ngo zhe'am/ ma thos so zhe'am/ mi dogs so zhes zer ba gsum dang / thos pa la brjed pa dang / dogs la brjed pa las 'du shes ma bsgyur bar thos te brjed do zhe'am/ dogs te brjed do zhes zer ba gnyis te/ de ltar gzhi lnga po dag gang brjod kyang ltung ba med do/ /gang zag dag pa la dag pa ltar bcos pa la yang gzhi de lnga la ltung ba med do/ /gang zag nyams pa ma dag pa la ni gzhi drug gis ltung bar mi 'gyur te/ mthong ba dang thos pa dang / dogs pa la 'du shes ma bsgyur bar mthong ngo zhe'am/ thos so zhe'am/ dogs so zhes zer ba gsum dang / mthong ba la ma brjed pa dang / thos pa la ma brjed pa dang / dogs pa la ma brjed pa la 'du shes ma bsgyur bar mthong ste ma brjed do zhe'am/ thos te ma brjed do zhe'am/ dogs te ma brjed do zhes zer ba gsum ste/ de ltar gzhi drug po dag gang brjod kyang ltung ba med do/ /gang zag ma dag pa dag pa ltar bcos pa la yang gzhi de drug la ltung ba med do/ /dril bsgrags pa la yang ltung ba med do/ /ngos la ri mo bris pa phan chad la ji ltar bdag gis shes pa de bzhin du 'jig rten thams cad kyis kyang shes so snyam na ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni yul thams cad la gnas skabs thams cad du gzhi med par skur pa 'debs pa'i sbyor ba'i sbyor ba nyes byas dang / sbyor ba sbom po dang / dngos gzhir 'gyur ba rnam pa thams cad mi bsten par bslab par bya'o/ /phyir bcos pa ni 'og nas ston to/ /gzhi med pa la skur pa 'debs pa'i dge 'dun lhag ma ste brgyad pa bshad zin to/ / //gzhan gyi cha ma yin pa dang mthun pa'i dge 'dun lhag ma'i gleng gzhi ni sangs rgyas bcom ldan 'das rgyal po'i khab na 'od ma'i tshal bya ka lan da ka'i gnas na bzhugs so/ /tshe dang ldan pa gyad bu nor rgyal po'i khab na bya rgod phung po'i ri la 'dug ste/ de dang ha cang mi ring ba zhig na rdzing bu rdo rtsig can zhes bya ba zhig yod pa de'i 'gram na tshe dang ldan pa gyad bu nor nyin mo gnas par byed do/ /gang gi tshe na dge slong ma ut+pa la'i mdog dge ba'i bshes gnyen tshe dang ldan pa maud gal gyi bu chen po la brten te l egs par gsungs pa'i chos 'dul ba la rab tu byung zhing dgra bcom pa rnam par rgyal bar bya ba las rnam par rgyal bar gyur pa de'i tshe na de shes nas dad pa dang ldan pas bcom ldan 'das dang dge slong gnas brtan gnas brtan rnams la yang dang yang du blta ba'i phyir 'gro zhing / lhag par yang tshe dang ldan pa gyad bu nor la 'di ltar dgra bcom pa rnam par thar pa brgyad la bsam gtan par gyur kyang / bsam gtan dang / rnam par thar pa dang / ting nge 'dzin la snyoms par 'jug pa'i bde ba dag spangs te/ dge 'dun gyi chos dang ldan pa'i zhal ta'i las dag la brtson par gyur pa ni dka' ba byed pa yin no snyam nas yang dang yang du de blta ba'i phyir 'ong ngo / /de dus gzhan zhig na bcom ldan 'das dang dge slong gnas brtan gnas brtan rnams kyi zhabs la phyag 'tshal nas/ tshe dang ldan pa gyad bu nor ga la ba der song ste phyin pa nas/ tshe dang ldan pa gyad bu nor gyi rkang pa gnyis la mgo bos phyag 'tshal te chos mnyan pa'i phyir mdun du 'dug go/ /de'i tshe na dge slong mdza' bo dang sa las skyes gnyis kyis phyag dar khrod cig rnyed cing / de gnyis tshe dang ldan pa gyad bu nor dang tshe rabs tshe rabs nas rjes su 'brel pa'i kho na yod pas rtag tu klan ka tshol ba la brtson pa yin pas/ mdza' bos smras pa/ sa las skyes phyag dar khrod rnyed pa 'di gang du 'khrur gzhug /sa las skyes kyis smras pa/ rdzing bu rdo rtsig can ni rgyun lugs nyung zhing nye 'khor gtsang ba yin pas der 'dong ngo / /de gnyis phyag dar khrod de khyer nas rdzing bu rdo rtsig can du dong nas/ de gnyis kyis phyag dar khrod de der 'khrur bcug nas/ nyi ma la bting ste 'khod do/ /de'i tshe na ri dgas kyi khyu dag rdzing bu rdo rtsig can du lhags nas chu 'thungs te 'dong bar byed do/ /ri dgas dag ni chos nyid kyis gcig gi rgyab tu gcig rgal bar byed pa yin pas/ ci tsam na ri dgas shig gis ri dgas mo zhig gi rgyab tu rgal te/ mi tshangs par spyod pa 'khrig pa'i chos bsten par brtsams so/ /de mdza' bos mthong nas smras pa/ sa las skyes gyad bu nor 'di dge slong ma ut+pa la'i mdog la mi tshangs par spyod pa 'khrig pa'i chos bsten gyis 'dod la de dge slong rnams la brjod par bya'o/ /sa las skyes kyis smras pa/ mdza' bo do cig de'i tshe yang re zhig bdag cag gnyis gnas nas dbyung ba'i las byas na/ ci da yang gnas nas dbyung ba'i las byed du 'jug par 'dod dam/ mdza' bos smras pa/ sa las skyes/ de'i tshe na ni yang dag pa ma yin pas yin gyi/ da ni bag tsam las bsam pa yod de/ gyad bu nor dang dge slong ma ut+pa la'i mdog dang mi tshangs par spyod pa 'khrig pa'i chos bsten pa ma mthong ngam/ 'di la brdzun du smra ba ga la yod kyi tshur shog 'dong la dge slong rnams la brjod par bya'o/ /sa las skyes de mdza' bos bslus pa na btub par gyur nas/ de gnyis gtsug lag khang du dong ste/ dge slong rnams la smras pa/ tshe dang ldan pa dag /'di ltar bdag cag gnyis kyis tshe dang ldan pa gyad bu nor dge slong ma ut+pa la'i mdog dang mi tshangs par spyod pa 'khrig pa'i chos bsten pa mthong ste/ 'di la bdag cag gnyis gang gi dad pa'am yid ches pas 'gro bar bya/ dge slong rnams kyis smras pa/ tshe dang ldan pa gnyis ji khyed gnyis lha dang mi rnams gcig tu yongs su gtong zhing sems can dmyal ba pa dang / dud 'gro dang / yi dags rnams su gcig tu gnas sam ci na/ dge slong dgra bcom pa rnam par thar pa brgyad la bsam gtan pa mi'i chos bla ma'i rdzu 'phrul gyi cho 'phrul rnam par ston pa de la/ khyed gnyis gzhan gyi cha ma yin pa dang mthun pa pham par 'gyur ba'i chos kyis skur pa 'debs par byed/ de gnyis kyis smras pa/ tshe dang ldan pa dag de ni bdag cag gnyis kyis ma nyes kyi/ 'di ltar bdag cag gnyis kyis mig gis mthong bas mig dbyung bar bya grang / bcom ldan 'das kyis sngar de gnyis la ci zhig mthong / ci ltar mthong / gang du mthong / khyed gnyis don ci la der son pas mthong zhes legs par rab tu gleng bar gyis shig /brtag par gyis shig ces bka' stsal pas dge slong rnams kyis de gnyis la ci zhig mthong / ji ltar mthong / gang du mthong / khyed gnyis don ci la der son pas de mthong zhes legs par rab tu glengs shing brtags so/ /dge slong rab tu mang po dag gis legs par rab tu glengs shing brtags pa na/ de gnyis kyis smras pa/ tshe dang ldan pa dag tshe dang ldan pa gyad bu nor gyis dge slong ma ut+pa la'i mdog la mi tshangs par spyod pa 'khrig pa'i chos ma bsten te/ 'di ltar tshe dang ldan pa gyad bu nor gyis bdag cag gnyis la bsams bzhin du gnas mal ngan pa phog cing gang dag zos na rjud par 'gyur ba shin tu yid du mi 'ong ba'i zas ngan pa dag gis lan gsum gyi bar du mtho btsams pas bdag cag gnyis kyis tshe dang ldan pa gyad bu nor la gzhan gyi cha ma yin pa dang mthun pa pham par 'gyur ba'i chos kyis skur pa btab par zad kyi/ tshe dang ldan pa gyad bu nor gyis dge slong ma ut+pa la'i mdog la mi tshangs par spyod pa 'khrig pa'i chos ma bsten te/ 'di ltar tshe dang ldan pa gyad bu nor ni dge slong dag pa ltung ba med pa yin no/ /dge slong don nyung ngu dag ci'i phyir dge slong dag dge slong dag pa ltung ba med pa la gzhan gyi cha ma yin pa dang mthun pa pham par 'gyur ba'i chos kyis skur pa 'debs par byed ces smod par byed/ phyar ka gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang gleng gzhi 'di dang / skabs 'di la dge slong gi dge 'dun bsdu ba mdzad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang khros shing zhe sdang bar gyur nas ci nas kyang 'di tshangs par spyod pa dang dbral lo snyam nas/ dge slong dag pa ltung ba med pa la gzhan gyi cha ma yin pa dang mthun pa pham par 'gyur ba'i chos kyis skur pa las de dus gzhan zhig na dris kyang rung ma dris kyang rung rtsod pa de yang gzhan gyi cha ma yin pa dang mthun pa yin la/ rtsod pa de gzhan gyi cha ma yin pa dang mthun pas bag tsam las bsams pa tsam gyi chos 'ga' zhig blangs par gyur la/ dge slong yang zhe sdang la gnas pas zhe sdang gis smras so zhe na dge 'dun lhag ma'o zhes bca' ba mdzad de/ yul ni rgyal po'i khab/ gang zag ni mdza' bo dang sa las skyes gnyis/ nyon mongs pa ni mi bzod pa/ nyes pa ni gzhan gyi cha ma yin pa dang mthun par skur pa 'debs pa'o/ /de la yang dge slong gang zhes bya ba ni mdza' bo dang sa las skyes gnyis sam/ gzhan yang de lta bu gang yin pa'o/ /khros shing zhes bya ba ni 'khrugs shing ngo / /zhe sdang bar gyur nas zhes bya ba ni yid mi dga' bar gyur nas te/ 'khrugs pa ma bsal bar ro/ /ci nas kyang 'di tshangs par spyod pa dang dbral lo snyam nas zhes bya ba ni ci nas kyang 'di dge sbyong gi tshul dang dbral lo snyam nas so/ /dge slong dag pa zhes bya ba ni gyad bu nor ram gzhan yang de lta bu gang yin pa'o/ /ltung ba med pa la zhes bya ba ni gzhi de'i ltung ba med pa la'o/ /gzhan gyi cha ma yin pa dang mthun pa zhes bya ba la/ gzhan zhes bya ba ni mya ngan las 'das pa'o/ /de'i cha ma yin pa dang mthun pa ni pham par 'gyur ba'i chos bzhi po dag go/ /pham par 'gyur ba'i zhes bya ba ni bzhi po gang yang rung ba'o/ /chos kyis zhes bya ba ni chos ma yin pa chos kyi sgrar gsungs pas so/ /skur pa las zhes bya ba ni skur pa btab pa las so/ /de dus gzhan zhig na zhes bya ba ni de dus gzhan na'o/ /dris kyang rung zhes bya ba ni gzhan dag gis so/ /ma dris kyang rung zhes bya ba ni de rang nyid 'gyod pa dang cung zad 'gyod pa dang / rnam par 'gyod pa dang / rab tu 'gyod par gyur nas so/ /rtsod pa de yang zhes bya ba ni rtsod pa bzhi po 'gyed pa'i phyir rtsod pa dang / mi gdams pa'i phyir rtsod pa dang / ltung ba'i phyir rtsod pa dang / bya ba'i phyir rtsod pa'o/ /gzhan gyi cha ma yin pa dang mthun pa yin la zhes bya ba ni mya ngan las 'das pa'i cha ma yin pa dang / mthun par pham par 'gyur ba zhes bya ba yin pa'o/ /rtsod pa de gzhan gyi cha ma yin pa dang mthun pas bag tsam las bsams pa tsam gyi chos 'ga' zhig blangs par zad la zhes bya ba ni gzung la/ bag tsam las bsams pa tsam gyi zhes bya ba ni ri dgas dang ri dgas mo dang gzhan yang de lta bu gang yin pa'i'o/ /chos zhes bya ba ni chos ma yin pa de chos kyi sgrar gsungs pa'o/ /blangs par zad la zhes bya ba ni gzung bar gyur la'o/ /dge slong yang zhe sdang la gnas pas zhes bya ba ni skur pa 'debs par 'dod pas so/ /zhe sdang gis smras so zhe na zhes bya ba ni skur pa btab par gyur to zhes zer na'o/ /dge 'dun lhag ma'o zhes bya ba ni snga ma bzhin no/ /de la ltung ba ci ltar 'gyur zhe na/ 'dir yang dngos gzhi dang sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa la sogs pa gzhan thams cad ni gzhi med par skur pa 'debs pa'i skabs dang 'dra'o/ /bye brag tu na sngar brdzun du smra bas zhes smos pa de'i phyir bye brag 'ga' zhig 'dir brjod par bya ste/ 'dir ni brjod par bya ba gzhan la gnas pa'i tshig gis brdzun du smras na dngos gzhir 'gyur ro zhes bya bar sbyar ro/ /de la brjod par bya ba gzhan zhes bya ba ni gang zag 'dis pham par 'gyur ba lhag par spyod par byas so zhes bya ba'i brjod par bya ba don gsal ba de las gzhan pa'i brjod par bya ba don mi gsal ba'o/ /de la gnas pa'i tshig ces bya ba ni brjod par bya ba'i don mi gsal ba de la gnas pa'i tshig ste/ tshig des dge slong nyams pa dang ma nyams pa gang yang rung ba la brdzun gyis pham par 'gyur bas skur pa 'debs sam/ mi'i 'gro ba gang yang rung ba la thabs gang yang rung bas go bar byed pa na dge 'dun lhag mar 'gyur ro/ /dper na kho bo cag gis tshe dang ldan pa gyad bu nor mthong ngo / /dge slong ma ut+pa la'i mdog mthong ngo / /mi tshangs par spyod pa 'khrig pa'i chos bsten pa mthong ngo zhes sgra de gsum gcig la gcig ma sbyar bar kho bo cag gis mthong ngo zhes zer ba lta bu'o/ /des na 'di ltar 'gyur te/ nyams par 'dun pas brjod par bya ba gzhan la gnas pa'i tshig brdzun pas dge slong dang dge slong ma ma nyams pa dang nyams pa la pham par 'gyur ba'i chos kyis skur pa mi'i 'gro ba pa gang yang rung ba la thabs gang yang rung bas go bar byas na dge 'dun lhag mar 'gyur ro/ /'di la yang yan lag lngas dngos gzhi'i ltung bar 'gyur te/ nyams par 'dun pa dang / brjod par bya ba gzhan la gnas pa'i tshig brdzun pas skur pa dang / bsnyen par rdzogs pa dang / pham par 'gyur ba'i chos dang / don go ba'o/ /de dag las yan lag ma tshang na ci rigs par na smad do/ /dge slong gis dge slong pham par 'gyur ba dag / dge 'dun lhag ma dang / ltung byed dang / so sor bshags par bya ba dang / nyes byas kyi ltung ba gang yang rung ba 'byin par mthong zhing / de la ltung ba med pa'am/ dge 'dun lhag ma'am/ ltung byed dam/ so sor bshags par bya ba'am/ nyes byas kyi ltung ba gang yang rung ba thob par gyur nas/ des 'du shes bsgyur te/ 'di skad ces bdag gis dge slong pham par 'gyur ba'i ltung ba 'byin pa mthong ngo zhes zer na thams cad la na smad pa med de dge 'dun lhag mar 'gyur ro/ /dngos gzhi dang sbyor ba dang sbyor ba'i sbyor ba dang / ltung ba med pa dang / bslab par bya ba dang / phyir bcos pa'i bye brag gzhan thams cad ni gzhi med par skur pa 'debs pa'i dge 'dun lhag ma'i skabs su bstan pa dang 'dra bar sbyar ro/ /de la ming gi khyad par ni snga ma ni mthong ba dang thos pa dang / dogs pa'i gzhi med par skur pa 'debs pa'o/ /'di ni gzhan gyi cha ma yin pa dang mthun pa pham par 'gyur ba'i chos kyis bag tsam gyi skur pa 'debs pa ste/ de la gzhan gyi cha ma yin pa dang mthun pa zhes bya ba lung nyid las ni gzhan zhes bya ba ni mya ngan las 'das pa'o/ /de'i cha ma yin pa dang mthun pa zhes bya ba ni pham par 'gyur ba'i chos bzhi po dag go zhes gsungs so/ /'dul ba 'dzin pa dag gis bshad pa las ni gzhan gyi cha dang mthun pa zhes bshad do/ /gzhan la brten pa ni gzhan gyi cha'o/ /de dang rjes su mthun pa ni gzhan gyi cha dang mthun pa'o/ /de yang gzhi med par skur pa 'debs pa don gsal bar go bar byed pa las rnam pa gzhan pa'i skur pa 'debs pa don mi gsal bas go bar byed pa'i tshig dge 'dun lhag ma byed pa ni gzhan gyi cha dang mthun pa zhes bya ste/ bag tsam zhes kyang bya'o zhes zer ro/ /gzhan gyi cha ma yin pa dang mthun pa'i dge 'dun lhag ma ste dgu pa bshad zin to/ / //dge 'dun gyi dbyen byed pa'i dge 'dun lhag ma'i gleng gzhi ni/ sangs rgyas bcom ldan 'das rgyal po'i khab na 'od ma'i tshal bya ka lan da ka'i gnas na bzhugs so/ /de'i tshe na mu ge nyam nga ba dgon pa slong mo bas bsod snyoms rnyed dka' ba byung ngo / /de na dge slong gang dag rdzu 'phrul thob pa de dag ni shing gang gi ming gis 'dzam bu'i gling zhes bya bar shes pa'i shing 'dzam bu de las shing 'dzam bu'i 'bras bu lhags pa kha dog dang dri dang ro dang ldan pa dag dang / de'i nye 'khor na skyu ru ra'i tshal dang / bil ba'i tshal dang / ka pid ta'i tshal yod pa nas/ de dag gi 'bras bu lhags pa kha dog dri dang ro dang ldan pa dag gis lhung bzed bkang ste khyer nas bdag nyid kyang yongs su longs spyod par byed/ lhag ma yod na dge slong rnams la yang bgo bsha' byed do/ /shar gyi lus 'phags dang / nub kyi ba lang spyod dang / byang gi sgra mi snyan du yang song ste ma rmos ma btab pa'i 'bras sA lu'i 'bru dag gis lhung bzed bkang ste khyer nas bdag nyid kyang yongs su longs spyod par byed/ lhag ma yod na dge slong rnams la yang bgo bsha' byed do/ /rgyal chen bzhi'i ris kyi lha rnams dang / sum cu rtsa gsum pa'i ris kyi lha rnams kyi nang du yang song ste/ lha'i bdud rtsi dag gis lhung bzed bkang ste khyer nas bdag nyid kyang yongs su longs spyod par byed/ lhag ma yod na dge slong rnams la yang bgo bsha' byed do/ /yul gang dag 'byor pa rgyas pa bde ba lo legs pa skye bo dang mi mang pos gang ba de dag tu yang song ste/ bca' ba dang bza' ba gtsang ba bsod pa dag gis lhung bzed bkang ste khyer nas bdag nyid kyang yongs su longs spyod par byed/ lhag ma yod na dge slong rnams la yang bgo bsha' byed do/ /de nas dge slong lhas byin 'di snyam du sems te/ da lta mu ge nyam nga ba dgon pa slong mo pas bsod snyoms rnyed dka' ba dag byung ste/ 'di na dge slong gang dag rdzu 'phrul thob pa de dag ni de lta de ltar byed kyi bdag gis kyang gal te rdzu 'phrul thob par gyur na de lta de ltar bya zhing bcom ldan 'das kyi 'khor dbye bar yang bya na/ de'i phyir bdag la rdzu 'phrul gyi lam ston par nus pa su yod snyam mo/ /de nas lhas byin bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te/ mtha' gcig tu 'dug nas 'di skad ces gsol to/ /bcom ldan 'das kyis bdag la rdzu 'phrul gyi lam bstan du gsol/ de nas bcom ldan 'das kyis lhas byin la sdig pa can gyi 'dod pa'i rnam pa de lta bu byung bar thugs su chud nas bka' stsal pa/ gau ta ma'i bu khyod kyis lhag pa'i tshul khrims dang / lhag pa'i sems dang / lhag pa'i shes rab la mngon par brtson par gyis shig dang / khyod la rdzu 'phrul dang gzhan yang 'byung bar 'gyur ro/ /de nas lhas byin 'di snyam du sems te/ bcom ldan 'das kyis bdag la rdzu 'phrul gyi lam mi ston to snyam du rig nas/ bcom ldan 'das kyi zhabs gnyis la mgo bos phyag 'tshal te bcom ldan 'das kyi spyan snga nas song nas tshe dang ldan pa kun shes kauN+Di n+ya ga la ba der song ste phyin nas tshe dang ldan pa kun shes kauN+Di n+ya la 'di skad ces smras so/ /gnas brtan gyis bdag la rdzu 'phrul gyi lam bstan du gsol/ de nas tshe dang ldan pa kun shes kauN+Di n+yas bcom ldan 'das kyi thugs la yang rnam par bltas/ lhas byin la sdig pa can gyi 'dod pa'i rnam pa de lta bu byung bar yang rig nas/ lhas byin la smras pa/ lhas byin khyod kyis gzugs dang / tshor ba dang / 'du shes dang / 'du byed dang / rnam par shes pa tshul bzhin yid la gyis shig dang / khyod la rdzu 'phrul dang gzhan yang 'byung bar 'gyur ro/ /de nas lhas byin 'di snyam du sems te/ gnas brtan kun shes kauN+Di n+ya yang bdag la rdzu 'phrul gyi lam ston par mi byed do snyam du rig nas/ tshe dang ldan pa rta thul dang / bzang po dang / rlangs pa dang / ming chen dang / grags pa dang / gang po dang / dri med dang / ba lang bdag dang / lag bzangs la sogs pa gnas brtan lnga brgya po dag ga la ba der song ste phyin nas/ gnas brtan lnga brgya po dag la 'di skad ces smras so/ /gnas brtan dag gis bdag la rdzu 'phrul gyi lam bstan du gsol/ de nas gnas brtan lnga brgya po dag gis bcom ldan 'das dang dge slong gnas brtan gnas brtan rnams kyi thugs yid la yang rnam par bltas/ lhas byin la sdig pa can gyi 'dod pa'i rnam pa de lta bu de byung bar yang rig nas lhas byin la smras pa/ lhas byin khyod kyis gzugs dang / tshor ba dang / 'du shes dang / 'du byed dang / rnam par shes pa tshul bzhin yid la gyis shig dang / khyod la rdzu 'phrul dang gzhan yang 'byung bar 'gyur ro/ /de nas lhas byin 'di snyam du sems te/ gnas brtan lnga brgya po dag kyang bdag la rdzu 'phrul gyi lam mi ston te/ 'di ltar tshe dang ldan pa 'di dag gis sngar bcom ldan 'das dang lhan cig yang dag par bgros par gyur pas/ des na bdag la 'ga' yang rdzu 'phrul gyi lam ston par mi byed na/ bdag la rdzu 'phrul gyi lam ston par nus pa gzhan su yod snyam mo/ /de'i tshe na tshe dang ldan pa 'od srungs stobs bcu pa rgyal po'i khab na sde can ma'i phug na 'dug go/ /de nas lhas byin 'di snyam du sems te/ gnas brtan 'od srungs stobs bcu pa 'di ni yun ring po nas g.yo med pa sgyu med pa drang po drang ba'i rang bzhin can bdag gi phu nu po rgan po kun dga' bo'i mkhan po yang yin pas/ 'dis bdag la rdzu 'phrul gyi lam ston par nus so snyam du rig nas/ tshe dang ldan pa 'od srungs stobs bcu pa ga la ba der song ste phyin nas/ tshe dang ldan pa 'od srungs stobs bcu'i rkang pa gnyis la mgo bos phyag 'tshal te/ mtha' gcig tu 'dug nas 'di skad ces smras so/ /gnas brtan gyis bdag la rdzu 'phrul gyi lam bstan du gsol/ de nas tshe dang ldan pa 'od srungs stobs bcu pas bcom ldan 'das dang dge slong gnas brtan gnas brtan rnams kyi thugs yid dang / lhas byin la sdig pa can gyi 'dod pa'i rnam pa de lta bu de byung ba la rnam par ma bltas par lhas byin la rdzu 'phrul gyi lam bstan to/ /de nas lhas byin gyis nam gyi cha stod dang nam gyi cha smad la mi nyal bar sbyor ba'i rjes su brtson par spyod cing bsam gtan dang po la brten nas 'jig rten pa'i lam gyis rdzu 'phrul mngon par bsgrubs nas de gcig tu gyur nas mang por 'gyur ro/ /mang por gyur nas gcig tu 'gyur ro/ /shes pa dang mthong bas snang ba dang mi snang ba yang nyams su myong bar byed do/ /ngos kyi rtsig pa dang ngos kyi ra ba dang ri la yang lus kyis mi thogs par 'gro ste/ dper na nam mkha' la bya ba bzhin no/ /sa la yang steng du 'byung ba dang / bye'u zul byed de/ dper na chu la bya ba bzhin no/ /chu la yang mi nub par rgyun phyogs su 'gro ste/ dper na sa chen po la bya ba bzhin no/ /nam mkha' la yang skyil mo krung gis 'gro ste/ dper na 'dab chags bya bzhin no/ /du ba 'thul bar yang byed/ me 'bar bar yang byed de/ dper na me'i phung po chen po bzhin no/ /lus las chu'i rgyun chen po 'byin te/ dper na sprin chen po bzhin no/ /nyi ma dang zla ba 'di gnyis 'di ltar rdzu 'phrul che ba 'di ltar mthu che ba 'di ltar gzi brjid che ba la yang lag pas nom zhing nyug par byed do/ /de nas lhas byin 'di snyam du sems te/ bdag la dge slong gang dag rdzu 'phrul thob pa dag de lta de ltar byed pa lta bu ci zhig byas/ bdag gis yul ma ga d+hA 'di na mi'i gtso bo gang yin pa rjes su 'jug par bya na yul ma ga d+hA 'di na gang rjes su 'jug par byas na tshegs chung ngus skye bo phal bo che'i tshogs kyang rjes su 'jug par 'gyur ba'i mi'i gtso bo rjes su 'jug par bya ba gang yod snyam mo/ /de nas lhas byin 'di snyam du sems te/ rgyal po gzhon nu ma skyes dgra 'di ni pha 'das nas pha'i rgyal srid kyi dbang phyug gi bdag po la gnas par 'gyur ba yin gyi/ bdag gis gzhon nu ma skyes dgra rjes su 'jug par bya ste/ de rjes su zhugs pa na tshegs chung ngus skye bo phal po che'i tshogs kyang rjes su 'jug par 'gyur ro snyam mo/ /de nas lhas byin gyis glang po che mthu dang ldan pa'i phru gu rigs btsun par bdag nyid bsgyur nas gzhon nu ma skyes dgra'i khyim du sgo nas zhugs te/ sge'u chung nas phyir byung zhing sge'u chung nas zhugs te sgo nas phyir byung ngo / /mthu dang ldan pa'i rte'u rigs btsun par bdag nyid bsgyur nas gzhon nu ma skyes dgra'i khyim du sgo nas zhugs te sge'u chung nas phyir byung zhing / sge'u chung nas zhugs te/ sgo nas phyir byung ngo / /de nas dge slong mgo bregs pa snam sbyar gyon par bdag nyid bsgyur nas gzhon nu ma skyes dgra'i khyim du sgo nas zhugs te/ sge'u chung nas phyir byung zhing / sge'u chung nas zhugs te sgo nas phyir byung ba dang / gzhon nu ma skyes dgras kyang kye ma 'di ni 'phags pa lhas byin yin no snyam du shes so/ /de nas lhas byin gyis skyes phran gzhon nu gser gyi 'og pag can zhig tu bdag nyid bsgyur nas/ gzhon nu ma skyes dgra'i pang pa na 'gre bar byed ldog par byed cing / gzhon nu ma skyes dgra yang de la 'khyud par byed/ kha sbyor bar byed kun du 'khyud par byed cing / de'i bar mchil ma yang ldugs par byed pa na/ 'di ltar lhas byin rnyed pa dang bkur stis zil gyis non cing sems yongs su gtugs pas de yang med par byed do/ /gzhon nu ma skyes dgras kyang kye ma 'di ni 'phags pa lhas byin yin no snyam du yang shes so/ /de nas gzhon nu ma skyes dgra kye ma 'phags pa lhas byin ni ston pa bas kyang ches rdzu 'phrul che ba yin no snyam pa'i sdig pa can gyi lta ba rgya chen po thob par gyur cing de la dad pa thob par gyur nas/ dad pa'i ched du bya ba byed par gyur te/ nang par dang / dgongs kar shing rta lnga brgya tsam gyi 'khor dang lhan cig 'byung zhing de la bsnyen bkur byed do/ /de la zas g.yos byas shing snod du btsos pa sna lnga brgya tsam gyi tshom bu tshom bu dag kyang 'bul bar byed do/ /lhas byin yang dge slong lnga brgya tsam dang lhan cig zas kyi gral du bkod par byed do/ /de nas dge slong rab tu mang po dag snga dro sham thabs bgos lhung bzed dang chos gos thogs te rgyal po'i khab tu bsod snyoms la zhugs pa na lhas byin la rnyed pa dang bkur sti rnam pa de lta bu byung bar thos so/ /thos nas kyang rgyal po'i khab tu bsod snyoms brgyus nas zas kyi bya ba byas te/ phyi dro bsod snyoms mi byed par chos gos dang lhung bzed mkhos su phab ste/ rkang pa gnyis bkrus nas bcom ldan 'das ga la ba der dong ste phyin nas bcom ldan 'das kyi zhabs gnyis la mgo bos phyag 'tshal te/ mtha' gcig tu 'khong nas/ bcom ldan 'das la lhas byin gyi rnyed pa dang bkur sti rnam pa de lta bu de byung bar thos pa rgyas par gsol pa dang / bcom ldan 'das kyis bka' stsal pa/ dge slong dag khyod cag lhas byin gyi rnyed pa dang bkur sti la dga' bar ma byed cig /de ci'i phyir zhe na/ lhas byin gyi rnyed pa dang bkur sti ni gsod par 'gyur ba dang / zil gyis gnon par 'gyur ba yin pa'i phyir ro/ /dge slong dag 'di lta ste dper na chu shing 'bras bu rgyal ba dang 'od ma dang 'dam bu 'bras bu rgyal ba dang / dre'u mo sbrum ma ni gsod par 'gyur ba dang / zil gyis gnon par 'gyur ba yin pa bzhin du lhas byin gyi rnyed pa dang bkur sti yang gsod par 'gyur ba dang / zil gyis gnon par 'gyur ba yin no/ /dge slong dag lhas byin la ji tsam du rnyed pa dang bkur sti rnam pa de lta bu de 'byung bar 'gyur ba ni mi gti mug can de la yun ring por don med pa dang / gnod pa dang sdug bsngal du 'gyur ro/ /dge slong dag de lta bas na khyod kyis 'di ltar bslab par bya ba ste/ rnyed pa dang bkur sti zil gyis mnan par bya zhing / rnyed pa dang bkur sti byung bas sems yongs su gtugs shing gnas par mi bya ste/ dge slong dag khyod kyis de ltar bslab par bya'o/ /de nas lhas byin rnyed pa dang bkur sti zil gyis gnon cing sems yongs su gtugs pa la sdig pa can gyi 'dod pa'i rnam pa 'di lta bu 'di byung ste/ da ltar bcom ldan 'das ni rgan pa rgas pa dgog tu gyur pas 'khor bzhi po la 'doms pas ngal bar 'gyur bas kye ma bcom ldan 'das kyis dge slong gi dge 'dun bdag la btang bar gyur na bdag gis kyang dge slong gi dge 'dun yongs su drang bar bya zhing / bcom ldan 'das kyang tshe 'di la bde bar gnas pa la sbyor ba'i rjes su brtson pas thugs las chung ngur gnas par 'gyur ro snyam mo/ /des sems de lta bu de skyes ma thag tu de'i rdzu 'phrul yongs su nyams par gyur cing / yongs su nyams kyang bdag yongs su nyams so snyam du mi shes par gyur to/ /de'i tshe na bcom ldan 'das kyi nyan thos kauN+Di n+ya'i bu dge slong nog can gyis bcom ldan 'das kyi drung du tshangs par spyod pa spyad de/ tshangs pa'i gnas bzhi po dag bsgoms nas 'dod pa dag la 'dun pa spangs te/ des mang du gnas pas tshangs pa'i 'jig rten dang ris mthun par skyes so/ /de'i tshe na tshe dang ldan pa maud gal gyi bu chen po yul ngan spong gi bu dag na chu srin byis pa gsod kyi ri la 'jigs su rung gi tshal ri dgas kyi gnas na 'dug go/ /de nas tshangs pa nog can gyis lhas byin rdzu 'phrul de las yongs su nyams par rig nas 'di lta ste/ dper na skyes bu stobs dang ldan pas lag ngar bskum pa las brkyang ba'am/ brkyang ba las bskum par byed pa de bzhin du tshangs pa'i 'jig rten nas mi snang bar gyur nas tshe dang ldan pa maud gal gyi bu chen po'i mdun du 'dug ste 'di skad ces smras so/ /'phags pa maud gal gyi bu chen po mkhyen par mdzod cig /lhas byin rnyed pa dang bkur stis zil gyis non cing sems yongs su gtugs pa la sdig pa can gyi 'dod pa'i rnam pa 'di lta bu 'di byung ste/ da ltar bcom ldan 'das ni rgan po rgas pa dgog tu gyur pas 'khor bzhi po la 'doms pas ngal bar 'gyur bas/ kye ma bcom ldan 'das kyis dge slong gi dge 'dun bdag la btang bar gyur na bdag gis kyang dge slong gi dge 'dun yongs su drang bar bya zhing / bcom ldan 'das kyang tshe 'di la bde bar gnas pa la sbyor ba'i rjes su brtson pas thugs las chung ngur gnas par 'gyur ro snyam nas sems de lta bu de bskyed ma thag tu de'i rdzu 'phrul yongs su nyams par gyur cing / yongs su nyams kyang bdag yongs su nyams so snyam du mi shes par 'gyur gyi/ btsun pa maud gal gyi bu chen po bcom ldan 'das ga la ba der bzhud de byon nas don de bcom ldan 'das la rgyas par gsol na legs so/ /tshe dang ldan pa maud gal gyi bu chen pos tshangs pa nog can la cang mi smra bas dang du blangs so/ /de nas tshangs pa nog can gyis tshe dang ldan pa maud gal gyi bu chen pos cang mi smra bas dang du blangs par rig nas tshe dang ldan pa maud gal gyi bu chen po'i rkang pa gnyis la mgo bos phyag 'tshal te de nyid du mi snang bar gyur to/ /de nas tshe dang ldan pa maud gal gyi bu chen pos tshangs pa nog can song nas ring po ma lon par rig nas/ ji ltar sems mnyam par bzhag nas 'di lta ste/ dper na skyes bu stobs dang ldan pas lag ngar bskum pa las brkyang ba'am/ brkyang ba las bskum par byed pa de bzhin du de nas mi snang bar gyur cing rgyal po'i khab tu 'od ma'i tshal bya ka lan da ka'i gnas su gnas par gyur pa de lta bu'i ting nge 'dzin la snyoms par zhugs so/ /de nas tshe dang ldan pa maud gal gyi bu chen po bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te/ mtha' gcig tu 'dug nas tshangs pa nog can dang lhan cig tu gtam brjod pa ci byung bar gyur pa de dag thams cad bcom ldan 'das la rgyas par gsol to/ /bcom ldan 'das kyis bka' stsal pa/ maud gal gyi bu khyod kyis ches sngar lhas byin gyi sems la sems kyis khyab par byas te rig nas/ de'i 'og tu tshangs pa nog can gyis ma brjod dam/ gsol pa/ btsun pa de lags so/ /bcom ldan 'das tshe dang ldan pa maud gal gyi bu chen po dang lhan cig tu bka' mchid 'di gsungs pa'i skabs su lhas byin grogs dge slong bzhi po ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin dang / lhan cig bcom ldan 'das ga la ba der song ngo / /bcom ldan 'das kyis lhas byin thag ring po nas gzigs nas/ tshe dang ldan pa maud gal gyi bu chen po la bka' stsal pa/ maud gal gyi bu chen po lhas byin de 'ong zhing mi gti mug can de nga'i mdun du bdag nyid kyis bdag nyid lung ston par byed kyi da tshig srungs shig /de nas tshe dang ldan pa maud gal gyi bu chen pos bcom ldan 'das kyi zhabs gnyis la phyag 'tshal te/ rdzu 'phrul mngon par 'du bya ba'i mthus de nas mi snang bar gyur te/ rang gi gnas su song ngo / /de nas lhas byin bcom ldan 'das ga la ba der song ste phyin nas bcom ldan 'das kyi zhabs gnyis la mgo bos phyag 'tshal te mtha' gcig tu 'dug nas/ bcom ldan 'das la 'di skad ces gsol to/ /da ltar bcom ldan 'das bgres po bgres pa dgog tu gyur pas 'khor bzhi po la 'doms pas mnyel bar 'gyur bas bcom ldan 'das kyis dge slong gi dge 'dun bdag la gtad na legs te/ bdag gis dge slong gi dge 'dun yongs su drang bar bgyi zhing / bcom ldan 'das kyang tshe 'di la bde bar gnas pa la sbyor ba'i rjes su brtson pas thugs las chung ngur gnas par 'gyur ro/ /bka' stsal pa/ mi gti mug can khyod ci zer/ nga re zhig shA ri'i bu dang maud gal gyi bu lta bu tshangs pa mtshungs par spyod pa des pa dag la yang dge slong gi dge 'dun gtong bar mi byed na/ ro dang 'dra ba mchil ma za ba khyod la gtong re skan/ de nas lhas byin 'di snyam du sems te/ bcom ldan 'das kyis shA ri'i bu dang maud gal gyi bu gnyis kyi bsngags pa brjod cing / bdag la ni ro dang 'dra ba mchil ma za ba zhes brjod pas kun du spyos so snyam nas/ lhas byin gyis de'i dang por bcom ldan 'das la kun nas mnar sems dang / mi bzod pa dang / yid mi ches par byas par gyur to/ /de nas lhas byin gyis sdod cig ces brjod de/ mgo lan gsum lcogs nas bcom ldan 'das kyi spyan snga nas song ngo / /de'i tshe na tshe dang ldan pa kun dga' bo bcom ldan 'das kyi snam logs na bsil yab thogs te/ bcom ldan 'das la bsil yab kyis g.yo bcing 'dug go/ /de nas bcom ldan 'das kyis lhas byin song nas ring po ma lon par thugs su chud nas/ tshe dang ldan pa kun dga' bo la bka' stsal ba/ kun dga' bo song la 'od ma'i tshal ka lan dka'i gnas na dge slong ji snyed nye bar rten cing gnas pa de dag thams cad dpong sa'i khang pa chen por bsdus shig /tshe dang ldan pa kun dga' bos btsun pa bka' bzhin 'tshal lo zhes bcom ldan 'das kyi bka' mnyan nas/ 'od ma'i tshal ka lan dka'i gnas na dge slong ji snyed nye bar rten cing gnas pa de dag thams cad dpong sa'i khang par bsdus nas/ bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te/ mtha' gcig tu 'dug nas gsol pa/ btsun pa 'od ma'i tshal ka lan dka'i gnas na dge slong ji snyed nye bar rten cing gnas pa de thams cad dpong sa'i khang par mchis shing mthun par gyur na/ bcom ldan 'das kyis da de'i dus la bab par dgongs su gsol/ de nas bcom ldan 'das dpong sa'i khang pa ga la ba der gshegs te byon nas/ dge slong gi dge 'dun gyi gung la gdan bshams pa nyid la bzhugs so/ /bzhugs nas bcom ldan 'das kyis dge slong rnams la bka' stsal pa/ dge slong dag lnga po 'di dag ni 'jig rten na yod cing srid pa'i ston pa dag yin te/ lnga gang zhe na/ tshul khrims yongs su ma dag bzhin du bdag tshul khrims yongs su dag cing kun nas nyon mongs pa med do zhes dam bca' bar byed pa dang / 'tsho ba yongs su ma dag bzhin du bdag gi 'tsho ba yongs su dag cing kun nas nyon mongs pa med do zhes dam bca' bar byed pa dang / shes pa dang mthong ba yongs su ma dag bzhin du bdag gi shes pa dang mthong ba yongs su dag cing kun nas nyon mongs pa med do zhes dam bca' bar byed pa dang / brda sprod pa phun sum tshogs pa ma yin bzhin du bdag ni brda sprod pa phun sum tshogs shing kun nas nyon mongs pa med do zhes dam bca' bar byed pa dang / chos 'dul ba nyes par bshad pa dang ldan bzhin du bdag ni chos 'dul ba la legs par gsungs pa dang ldan zhing / kun nas nyon mongs pa med do zhes dam bca' bar byed pa yin te/ de dag ni rang gi nyan thos rnams kyis de ltar shes kyang yid srung ba dang zang zing la re bas gleng bar mi byed pas/ nyan thos rnams las rjes su bsrung ba re bar byed do/ /dge slong dag nga ni de lta ma yin pas ngas ni khyed la tshar gcad cing tshar gcad cing smra bar byed/ zil gyis mnan cing zil gyis mnan cing smra bar byed de/ khyed la dbyig tu mi 'dzin cing / rdza mkhan gyi snod so ma btang ba dag bzhin du gang snying po yod pa de 'jog par byed kyi nga'i tshig gi lam dag la bzod par gyis shig / de nas lhas byin gyis ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin dag la smras pa/ khyed cag tshur sheg dge sbyong gau ta ma 'dug bzhin du nyan thos kyi dge 'dun mthun par dbye bar bya zhing 'khor lo yang dbye bar bya ste/ des na bdag cag shi zhing dus la bab pa dag na dge sbyong gau ta ma de tsam du rdzu 'phrul che ba de tsam du mthu che ba 'dug bzhin du/ lhas byin 'khor dang bcas pas nga'i dge 'dun nyan thos mthun pa phye zhing 'khor lo yang dbye ba byas so zhes phyogs dang phyogs mtshams rnams su snyan pa'i sgra'i tshogs rgya chen po mngon par grags par 'gyur ro/ /de dag gis smras pa/ lhas byin bdag cag gis de ltar mi nus te/ de ci'i phyir zhe na/ bcom ldan 'das kyi nyan thos mthu che ba rdzu 'phrul che ba lha'i mig dang ldan pa gzhan gyi sems shes pa gang dag yod pa de dag ni thag ring po yang mthong la drung na 'dug pas kyang mthong zhing / de dag gi sems kyis bdag cag gi sems la khyab par byas shing / yid kyis kyang bdag cag rnam par shes par byed pas de dag gis bdag cag gzhi nas 'phags pa dag kyang shes par 'gyur ba'i phyir ro/ /lhas byin gyis smras pa/ grogs po dag thabs 'ga' zhig yod do/ /smras pa/ thabs de gang yin/ tshur sheg dang bdag cag gis dge slong gnas brtan gnas brtan rnams la ni yo byad thams cad kyis bstab par bya/ gzhon nu rnams la ni chos dang zang zing gi ston mo bya'o/ /lhas byin gal te thabs de lta bu yod na de ltar bya'o/ /de nas lhas byin gyis dge 'dun mthun pa dbye ba'i phyir brtul ba dang / dge slong gnas brtan gnas brtan rnams kyis 'phags ma thag tu lhas byin gyis dge 'dun mthun par dbye ba'i phyir brtul to zhes rnam par shes par gyur nas dge slong rnams kyis skabs de bcom ldan 'das la gsol pa dang / de nas bcom ldan 'das kyis dge slong rnams la bka' stsal pa/ dge slong dag khyed kyis lhas byin dang gzhan yang de lta bu gang yin pa la dang por bzhams te bsgo bar bya'o/ /'di skad ces bsgo bar bya ste/ tshe dang ldan pa lhas byin khyed dge 'dun mthun pa dbye ba'i phyir brtul bar ma byed cig /dbyen byed par 'gyur ba'i rtsod pa yang dag par blangs nas rab tu bzung ste ma 'dug shig / tshe dang ldan pa lhas byin khyod dge 'dun dang mthun par gyis shig /dge 'dun mthun mi phyed kun du dga' mi rtsod mchog gcig 'don pa gcig cing chu dang 'o ma gcig tu 'dres pa lta bur gyur la/ ston pa'i bstan pa gsal bar byed na/ bde ba la reg par gnas par 'gyur gyi/ tshe dang ldan pa lhas byin khyod dge 'dun 'byed par byed pa'i gzhi 'di lta bu 'di thong shig ces bsgo bar bya'o/ /dge slong rnams kyis btsun pa bka' bzhin 'tshal zhes bcom ldan 'das kyi bka' mnyan nas lhas byin la dang por bzhams te bsgo'o/ /dge slong rnams kyis de la bzhams te bsgo yang gzhi de nyid la nan gyis mchog tu bzung zhing mngon par zhen nas 'di nyid bden gyi gzhan ni brdzun pa'o zhes rjes su tha snyad 'dogs par byed pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag khyed kyis lhas byin dang gzhan yang de lta bu gang yin pa la gsol ba dang bzhi'i las kyis bsgo bar bya'o/ /'di ltar bsgo bar bya ste/ gnas mal bsham pa byas te gaN+DI brdungs nas dris pa'i tshig gis dge slong rnams la yang dag par bsgo nas/ dge 'dun thams cad 'dug cing mthun par gyur pa la dge slong gcig gis gsol ba byas te las bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong lhas byin 'dis dge 'dun mthun pa dbye ba'i slad du brtul te/ dbyen byed par 'gyur ba'i rtsod pa yang dag par blangs nas rab tu bzung ste/ mchis nas 'di la dge slong mang pos bzhams te bsgo na/ 'di la dge slong mang pos bzhams te bsgo yang gzhi de nyid la nan gyis mchog tu bzung zhing mngon par zhen nas/ 'di nyid bden gyi gzhan ni brdzun pa'o zhes rjes su tha snyad 'dogs par bgyid na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis lhas byin la tshe dang ldan pa lhas byin khyod dge 'dun mthun pa dbye ba'i phyir brtul bar ma byed cig / dbyen byed par 'gyur ba'i rtsod pa yang dag par blangs nas rab tu bzung ste ma 'dug shig /tshe dang ldan pa lhas byin khyod dge 'dun mthun par gyis shig dge 'dun mthun mi phyed kun du dga' mi rtsod mchog gcig 'don pa gcig cing / chu dang 'o ma gcig tu 'dres pa lta bur gyur la/ ston pa'i bstan pa gsal bar byed na bde ba la reg par gnas par 'gyur gyis/ tshe dang ldan pa lhas byin khyod dge 'dun 'byed par byed pa'i gzhi 'di lta bu 'di thong shig ces gsol ba dang / bzhi'i las kyis bsgo ba mdzad de/ 'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ dge slong lhas byin 'dis dge 'dun mthun pa dbye ba'i slad du brtul te/ dbyen bgyid par 'gyur ba'i rtsod pa yang dag par blangs nas rab tu bzung ste mchis nas 'di la dge slong mang pos bzhams te bsgo na/ 'di la dge slong mang pos bzhams te bsgo yang gzhi de nyid la nan kyis mchog tu bzung zhing mngon par zhen nas/ 'di nyid bden gyi gzhan ni brdzun pa'o zhes rjes su tha snyad 'dogs par bgyid do/ /de'i slad du dge 'dun gyis lhas byin la tshe dang ldan pa lhas byin khyod dge 'dun mthun pa dbye ba'i phyir brtul bar ma byed cig /dbyen byed par 'gyur ba'i rtsod pa yang dag par blangs nas rab tu bzung ste ma 'dug shig /tshe dang ldan pa lhas byin khyod dge 'dun dang mthun par gyis shig / dge 'dun mthun mi phyed kun du dga' mi rtsod/ mchog gcig 'don pa gcig cing chu dang 'o ma 'dres pa lta bur gyur la/ ston pa'i bstan pa gsal bar byed na bde ba la reg par gnas par 'gyur gyis/ tshe dang ldan pa lhas phyin khyod dge 'dun 'byed par byed pa'i gzhi 'di lta bu 'di thong shig ces gsol ba dang bzhi'i las kyis bsgo ba mdzad na tshe dang ldan pa gang dag lhas byin la gsol ba dang bzhi'i las kyis bsgo ba mdzad par bzod pa de dag ni cang ma gsung shig / gang dag mi bzod pa de dag ni gsungs shig / 'di ni las brjod pa dang po ste/ de bzhin du lan gnyis lan gsum du bzlas/ dge 'dun gyis bzod cing gnang nas/ dge 'dun gyis lhas byin la gsol ba dang bzhi'i las kyis bsgo ba mdzad lags te/ 'di ltar cang mi gsung bas de de bzhin du 'dzin to/ /dge slong rnams kyis btsun pa bka' bzhin 'tshal zhes/ bcom ldan 'das kyi bka' mnyan nas/ lhas byin la gsol ba dang bzhi'i las kyis bsgo'o/ /gsol ba dang bzhi'i las kyis bsgo yang gzhi de nyid la nan gyis mchog tu bzung zhing mngon par zhen nas/ 'di nyid bden gyi gzhan ni brdzun pa'o zhes rjes su tha snyad 'dogs par byed do/ /de'i grogs byed pa'i dge slong mi mthun par smra ba'i rjes su phyogs par byed pa bzhi po ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin de dag kyang dge slong rnams la 'di skad ces tshe dang ldan pa dag khyed cag dge yang rung sdig kyang rung dge slong 'di la ci yang ma smra shig / de ci'i phyir zhe na/ tshe dang ldan pa dag dge slong 'di ni chos smra ba 'dul ba smra ba dge slong 'di ni chos dang 'dul ba yang dag par blangs nas rab tu bzung ste rjes su tha snyad 'dogs par byed pa/ dge slong 'di ni shes bzhin du smra'i/ mi shes par ma yin pa'i phyir te/ dge slong 'di gang la 'dod cing bzod pa de la bdag cag kyang 'dod cing bzod do zhes zer ba'i skabs de dge slong rnams kyis bcom ldan 'das la rgyas par gsol pa dang / bcom ldan 'das kyis bka' stsal pa/ dge slong dag khyod kyis de dag dang gzhan yang de lta bu gang yin pa de dag la dang por bzhams te bsgo bar bya'o/ /'di skad ces bsgo bar bya ste/ tshe dang ldan pa ko ka li ka /khaN+Da dra ba bya/ ka Da mo ra ka ti sh+ya/ rgya mtshos byin khyed cag shes bzhin du dge slong gang dge 'dun mthun pa dbye ba'i phyir brtul bar byed cing dbyen byed par 'gyur ba'i rtsod pa yang dag par blangs nas rab tu bzung ste/ 'dug pa de'i grogs byed cing mi mthun par smra ba'i rjes su phyogs par ma byed cig /dge slong rnams la 'di skad ces tshe dang ldan pa dag khyed cag dge yang rung sdig kyang rung dge slong 'di la ci yang ma smra shig / de ci'i phyir zhe na/ tshe dang ldan pa dag dge slong 'di ni chos smra ba 'dul ba smra ba/ dge slong 'di ni chos dang 'dul ba yang dag par blangs nas rab tu bzung ste/ rjes su tha snyad 'dogs par byed pa/ dge slong 'di ni shes bzhin du smra'i/ mi shes par yang ma yin pa'i phyir te/ dge slong 'di ni gang la 'dod cing bzod pa de la bdag cag kyang 'dod cing bzod do zhes ma zer cig /de ci'i phyir zhe na/ tshe dang ldan pa dag dge slong 'di ni chos smra ba ma yin 'dul ba smra ba ma yin gyi tshe dang ldan pa dag dge slong 'di ni chos ma yin pa smra ba/ 'dul ba ma yin pa smra ba/ dge slong 'di ni chos ma yin pa dang / 'dul ba ma yin pa yang dag par blangs nas rab tu bzung ste/ rjes su tha snyad 'dogs par byed pa/ dge slong 'di ni mi shes bzhin du smra'i/ shes par ni ma yin pa'i phyir te/ dge slong 'di gang la 'dod cing bzod pa de la tshe dang ldan pa dag 'dod cing bzod par ma byed cig /tshe dang ldan pa dag khyed dge 'dun 'byed pa 'dod par ma byed par/ tshe dang ldan pa dag dge 'dun mthun pa nyid du 'dod par gyis shig / tshe dang ldan pa dag dge 'dun dang mthun par gyis shig /dge 'dun mthun mi phyed kun tu dga' mi rtsod mchog gcig 'don pa gcig cing chu dang 'o ma gcig tu 'dres pa lta bur gyur la/ ston pa'i bstan pa gsal bar byed na bde ba la reg par gnas par 'gyur gyi/ tshe dang ldan pa dag dge 'dun 'byed pa'i rjes su phyogs shing mi mthun par smra ba 'di lta bu 'di thong shig ces bsgo bar bya'o/ /dge slong rnams kyis btsun pa bka' bzhin 'tshal zhes bcom ldan 'das kyi bka' mnyan nas/ de'i grogs byed pa'i dge slong mi mthun par smra ba'i rjes su phyogs pa bzhi po/ ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin rnams la dang por bzhams te bsgo'o/ /dge slong rnams kyis dge slong de dag la bzhams te bsgo yang gzhi de nyid la nan gyis mchog tu bzung zhing mngon par zhen nas/ 'di nyid bden gyi gzhan ni brdzun pa'o zhes rjes su tha snyad 'dogs par byed pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag khyed kyis ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin rnams dang / gzhan yang de lta bu gang yin pa rnams la gsol ba dang bzhi'i las kyis bsgo bar bya'o/ /'di ltar bsgo bar bya ste/ gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas dge 'dun thams cad 'dug cing mthun par gyur pa la dge slong gcig gis gsol ba byas te las bya'o/ /'di ltar bya ste 'dug la 'di skad ces brjod par bya'o/ /dge 'dun btsun pa rnams gsan du gsol/ ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin 'di dag dge slong gang dge 'dun mthun ba dbye ba'i slad du brtul bar bgyid cing / dbyen bgyid par 'gyur ba'i rtsod pa yang dag par blangs nas rab tu bzung ste mchis pa de'i grogs bgyid cing mi mthun par smras nas/ 'di dag la dge slong rnams kyis bzhams te bsgo na/ 'di dag la dge slong rnams kyis bzhams te bsgo yang gzhi de nyid la nan gyis mchog tu bzung zhing mngon par zhen nas/ 'di nyid bden gyi gzhan ni brdzun pa'o zhes rjes su tha snyad 'dogs par bgyid na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin rnams la tshe dang ldan pa dag khyed shes bzhin du dge slong gang dge 'dun mthun pa dbye ba'i phyir brtul bar byed cing dbyen byed par 'gyur ba'i rtsod pa yang dag par blangs nas rab tu bzung ste/ 'dug pa de'i grogs byed cing mi mthun par smra ba'i rjes su phyogs par ma byed cig /dge slong rnams la 'di skad ces tshe dang ldan pa dag khyed cag dge yang rung sdig kyang rung dge slong 'di la ci yang ma smra shig/ de ci'i phyir zhe na/ tshe dang ldan pa dag dge slong 'di ni chos smra ba/ 'dul ba smra ba/ dge slong 'di ni chos dang 'dul ba yang dag par blangs nas rab tu bzung ste/ rjes su tha snyad 'dogs par byed pa dge slong 'di ni shes bzhin du smra'i mi shes par ma yin pa'i phyir te/ dge slong 'di gang la 'dod cing bzod pa de la bdag cag kyang 'dod cing bzod do zhes ma zer cig /de ci'i phyir zhe na/ tshe dang ldan pa dag dge slong 'di ni chos smra ba ma yin/ 'dul ba smra ba ma yin gyi/ tshe dang ldan pa dag dge slong 'di ni chos ma yin pa smra ba/ 'dul ba ma yin pa smra ba/ dge slong 'di ni chos ma yin pa dang / 'dul ba ma yin pa yang dag par blangs nas rab tu bzung ste rjes su tha snyad 'dogs par byed pa/ dge slong 'di ni mi shes bzhin du smra'i shes par ma yin pa'i phyir te/ dge slong 'di gang la 'dod cing bzod pa 'di la tshe dang ldan pa dag 'dod cing bzod par ma byed cig / tshe dang ldan pa dag khyed dge 'dun 'byed 'dod par ma byed par tshe dang ldan pa dag dge 'dun mthun pa nyid du 'dod par gyis shig /tshe dang ldan pa dag dge 'dun dang mthun par gyis shig /dge 'dun mthun mi 'byed kun du dga' mi rtsod/ mchog gcig 'don pa gcig cing chu dang 'o ma gcig tu 'dres pa lta bur gyur la/ ston pa'i bstan pa gsal bar byed na bde ba la reg par gnas par 'gyur gyis/ tshe dang ldan pa dag dge 'dun 'byed pa'i rjes su phyogs shing mi mthun par smra ba 'di lta bu 'di thong shig ces gsol ba dang bzhi'i las kyis bsgo ba mdzad do/ /'di ni gsol ba'o/ /las ni 'di lta bya ste/ dge 'dun btsun pa rnams gsan du gsol/ ko ka li ka dang / khaN+Da drab bya dang / ka Da mor ka ti sh+ya dang / rgya mtshos byin 'di dag dge slong gang dge 'dun mthun pa dbye ba'i slad du brtul bar bgyid cing / dbyen bgyid par 'gyur ba'i rtsod pa yang dag par blangs nas rab tu bzung ste mchis pa de'i grogs bgyid cing mi mthun par smras nas/ 'di dag la dge slong rnams kyis bzhams te bsgo na/ 'di dag la dge slong rnams kyis bzhams te bsgo yang gzhi de nyid la nan gyis mchog tu bzung zhing mngon par zhen nas/ 'di nyid bden gyi gzhan ni brdzun pa'o zhes rjes su tha snyad 'dogs par bgyid de/ de'i slad du dge 'dun gyis ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin rnams la tshe dang ldan pa dag khyed shes bzhin du dge slong gang dge 'dun mthun pa dbye ba'i phyir brtul bar byed cing / dbyen byed par 'gyur ba'i rtsod pa yang dag par blangs nas rab tu bzung ste 'dug pa de'i grogs byed cing mi mthun par smra ba de'i grogs rjes su phyogs par ma byed cig / dge slong rnams la 'di skad ces tshe dang ldan pa dag khyed cag dge yang rung sdig kyang rung dge slong 'di la ci yang ma smra zhig /de ci'i phyir zhe na/ tshe dang ldan pa dag dge slong 'di ni chos smra ba/ 'dul ba smra ba/ dge slong 'di ni chos dang 'dul ba yang dag par blangs nas rab tu bzung ste rjes su tha snyad 'dogs par byed pa/ dge slong 'di ni shes bzhin du smra'i mi shes par ma yin pa'i phyir te/ dge slong 'di gang la 'dod cing bzod pa de la bdag cag kyang 'dod cing bzod do zhes ma zer cig / de ci'i phyir zhe na/ tshe dang ldan pa dag dge slong 'di ni chos smra ba ma yin/ 'dul ba smra ba ma yin gyi/ tshe dang ldan pa dag dge slong 'di ni chos ma yin pa smra ba/ 'dul ba ma yin pa smra ba/ dge slong 'di ni chos ma yin pa dang / 'dul ba ma yin pa yang dag par blangs nas rab tu bzung ste rjes su tha snyad 'dogs par byed pa dge slong 'di ni mi shes bzhin du smra'i shes par ni ma yin pa'i phyir te/ dge slong 'di ni gang la 'dod cing bzod pa de la tshe dang ldan pa dag 'dod cing bzod par ma byed cig /tshe dang ldan pa dag khyed cag dge 'dun 'byed 'dod par ma byed par tshe dang ldan pa dag dge 'dun mthun pa nyid du 'dod par gyis shig / tshe dang ldan pa dag dge 'dun dang mthun par gyis shig /dge 'dun mthun mi phyed kun du dga' mi rtsod mchog gcig 'don pa gcig cing / chu dang 'o ma 'dres pa lta bur gyur la/ ston pa'i bstan pa gsal bar byed na bde ba la reg par gnas par 'gyur gyi/ tshe dang ldan pa dag dge 'dun 'byed pa'i rjes su phyogs shing mi mthun par smra ba 'di lta bu 'di thong shig ces gsol ba dang bzhi'i las kyis bsgo ba mdzad na/ tshe dang ldan pa gang dag ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin rnams la gsol ba dang bzhi'i las kyis bsgo ba mdzad par bzod pa de dag ni cang ma gsung shig /gang dag mi bzod pa de dag ni gsungs shig /'di ni las brjod pa dang po ste/ de bzhin du/ lan gnyis lan gsum du bzlas/ dge 'dun gyis bzod cing gnang nas/ dge 'dun gyis ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin rnams la gsol ba dang bzhi'i las kyis bsgo ba mdzad lags te/ 'di ltar cang mi gsung bas de de bzhin du 'dzin to/ /dge slong rnams kyis btsun pa bka' bzhin 'tshal zhes bcom ldan 'das kyi bka' mnyan nas/ ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin rnams la gsol ba dang bzhi'i las kyis bsgo ba'o/ /gsol ba dang bzhi'i las kyis bsgo yang gzhi de nyid la nan gyis mchog tu bzung zhing mngon par zhen nas 'di nyid bden gyi gzhan ni brdzun pa'o zhes rjes su tha snyad 'dogs par byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis dge slong rnams la bka' stsal pa/ dge slong dag lhas byin gyis nga'i nyan thos kyi dge 'dun mthun pa dbye ba dang 'khor lo yang 'byed par nus te/ 'di ltar de'i grogs byed pa'i dge slong mi mthun pa smra ba nyid kyi rjes su phyogs pa bzhi po/ ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin dag yod pa'i phyir ro/ /lhas byin gyis dge sbyong gau ta mas dge slong dag lhas byin gyis nga'i nyan thos kyi dge 'dun mthun pa dbye ba dang 'khor lo yang 'byed nus te/ de ltar grogs byed pa'i dge slong mi mthun pa smra ba nyid kyi rjes su phyogs pa bzhi po/ ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin dag yod pa'i phyir ro zhes bdag la lung bstan to zhes thos so/ /thos nas kyang ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin rnams la smras pa/ grogs po dag shes par gyis shig /dge sbyong gau ta mas dge slong dag lhas byin gyis nga'i nyan thos kyi dge 'dun mthun pa dbye ba dang / 'khor lo yang 'byed par nus te/ de ltar de'i grogs byed pa'i dge slong mi mthun pa smra ba nyid kyi rjes su phyogs pa bzhi po dag ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin dag yod pa'i phyir ro zhes kho bo la lung bstan to/ /de dag gis smras pa/ lhas byin gal te de lta na legs so/ /de nas lhas byin gyis rgya cher dge 'dun mthun pa dbye ba'i phyir brtul bar brtsams te/ dge 'dun gyi dbyen ni rgyu gnyis kyis 'gyur te/ chos las tha dad pa'i dngos por gsol bas dbye na byed pa dang / don des tshul shing len du 'jug pas dbyen byed pa'o/ /de la dang po ni bcom ldan 'das kyi nyan thos kyi dge 'dun mthun pa tshogs pa las gzhan pa chos ma yin pa'i phyogs dang mthun pa'i dge 'dun ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin rnams la lhas byin gyis gsol ba'i las 'di skad bya ste/ tshe dang ldan pa dag dge sbyong gau ta ma ni sha za ste/ bdag cag gis sha za bar mi bya'o/ /de ci'i phyir zhe na/ gzhi de las srog chags gsod par 'gyur ba'i phyir ro/ /dge sbyong gau ta ma ni 'o ma 'thung ste/ bdag cag gis btung bar mi bya'o/ /de ci'i phyir zhe na/ gzhi de las be'u la gnod pa'i phyir ro/ / dge slong gau ta ma ni lan tshwa za ste/ bdag cag gis bza' bar mi bya'o/ /de ci'i phyir zhe na/ khu ba las gyur pa'i phyir ro/ /dge slong gau ta ma ni gos dras pa gyon te bdag cag gis bgo bar mi bya'o/ /de ci'i phyir zhe na/ gzhi de las dad pas sbyin par bya ba chud zos par 'gyur ba'i phyir ro/ /dge sbyong gau ta ma ni dgon pa na gnas par byed de bdag cag grong du gnas par bya'o/ /de ci'i phyir zhe na/ gzhi de las dad pas sbyin par bya ba yongs su ma spyad par 'gyur ba'i phyir ro/ /tshe dang ldan pa dag gang khyed cag las brtul zhugs kyi gnas lnga po 'di dag gis dag pa dang / grol ba dang / nges par 'byung bar 'dod pa dang / bzod pa dang legs par 'dzin pa des dge sbyong gau ta ma las thag ring du gyis shig /so sor gyis shig /tha dad du gyis shig /rgyang srings shig /thag srings shig / logs shig na 'dug cig ces smras pa yin no/ /de skad ces smras pa dang / bcom ldan 'das kyi nyan thos kyi dge 'dun mthun pa rnams kyi nang nas/ dge slong ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin bzhi po logs shig tu 'dug go/ / gnyis pa ni lhas byin gyi chos ma yin pa'i phyogs kyi tshul shing thogs te/ chos ma yin pa'i phyogs kyi mdun du 'dug ste/ 'di skad ces smras te/ tshe dang ldan pa dag dge sbyong gau ta ma ni sha za ste/ bdag cag gis sha za bar mi bya'o/ /de ci'i phyir zhe na/ gzhi de las srog chags gsod par 'gyur ba'i phyir ro/ /dge sbyong gau ta ma ni 'o ma 'thung ste/ bdag cag gis btung bar mi bya'o/ /de ci'i phyir zhe na/ gzhi de las be+e'u la gnod par 'gyur ba'i phyir ro/ /dge sbyong gau ta ma ni lan tshwa za ste/ bdag cag gis bza' bar mi bya'o/ /de ci'i phyir zhe na/ khu ba las gyur pa'i phyir ro/ /dge sbyong gau ta ma ni gos dras pa gyon te/ bdag cag gis bgo bar mi bya'o/ /de ci'i phyir zhe na/ gzhi de las dad pas sbyin par bya ba chud zos par 'gyur ba'i phyir ro/ /dge sbyong gau ta ma ni dgon pa na gnas par byed de/ bdag cag ni grong du gnas par bya'o/ /de ci'i phyir zhe na/ gzhi de las dad pas sbyin par bya ba yongs su ma spyad par 'gyur ba'i phyir ro/ /tshe dang ldan pa dag khyed cag las gang brtul zhugs kyi gnas lnga po 'di dag gis dag pa dang / grol ba dang / nges par 'byung bar 'dod pa dang legs par 'dzin pa des tshul shing long shig ces smras pa yin no/ /de nas lhas byin gyi grogs/ dge slong ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin rnams kyis chos ma yin pa'i tshul shing blangs te 'khor lo bye'o/ /chos nyid kyis de bzhin gshegs pa'i 'khor lo bye ba ni nyi ma de nyid kyi skya rengs ma shar bar slar mthun par 'gyur ba yin gyi/ skya rengs shar ba las 'da' ba ni mi srid pas des rgya cher dge 'dun mthun pa dbye ba'i phyir brtul bar brtsams pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ lhas byin la smras nas/ rnam grangs du mas smad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang dge 'dun mthun pa dbye ba'i phyir brtul bar byed cing / dbyen byed par 'gyur ba'i rtsod pa yang dag par blangs nas rab tu bzung ste 'dug na dge slong de las dge slong rnams kyis 'di skad ces tshe dang ldan pa khyod dge 'dun mthun pa dbye ba'i phyir brtul bar ma byed cig / dbyen byed par 'gyur ba'i rtsod pa yang dag par blangs nas rab tu bzung ste ma 'dug shig /tshe dang ldan pa dge 'dun dang mthun par gyis shig / dge 'dun mthun mi phyed kun du dga' mi rtsod/ mchog gcig 'don pa gcig cing chu dang 'o ma gcig tu 'dres pa lta bur gyur la/ ston pa'i bstan pa gsal bar byed na bde ba la reg par gnas par 'gyur gyis/ tshe dang ldan pa dag khyed dge 'dun 'byed par byed pa'i gzhi 'di lta bu 'di thong shig ces bsgo bar bya'o/ /dge slong de la dge slong rnams kyis de skad ces bsgo ba na/ gal te gzhi de gtong na de lta na legs gal te mi gtong na gzhi de gtang bar bya ba'i phyir lan gnyis lan gsum du yang dag par bsgo bar bya/ yang dag par bstan par bya'o/ /lan gnyis lan gsum du yang dag par bsgo bar byas yang dag par bstan pa na gzhi de gtong na de lta na legs/ gal te mi gtong na dge 'dun lhag ma'o zhes bca' ba mdzad de/ yul ni rgyal po'i khab/ gang zag ni lhas byin/ nyon mongs pa ni rnyed pa dang bkur sti 'dod pa/ nyes pa ni dge 'dun gyi dbyen byed pa'o/ /de la yang dge slong gang zhes bya ba ni lhas byin nam/ gzhan yang de lta bu gang yin pa'o/ /dge 'dun zhes bya ba ni de bzhin gshegs pa'i nyan thos kyi dge 'dun no/ /mthun pa zhes bya ba ni ro gcig pa dang / bya ba gcig pa ste/ lam gcig tu zhugs pa'i phyir ro/ /dbye ba'i phyir zhes bya ba ni dbye bar bya ba'i phyir te/ gnyis su dbye ba'i phyir ro/ /gzhan yang ston pa gzhan du tshol ba dang / lam gzhan du tshol ba ste/ ston pa gzhan du tshol ba ni bcom ldan 'das las lhas byin gyi phyogs su'o/ /lam gzhan du tshol ba ni 'phags pa'i lam yan lag brgyad las lhas byin gyi brtul zhugs gnas lnga po sha mi za ba dang / 'o ma mi 'thung ba dang / lan tshwa mi za ba dang / gos dras pa mi gyon pa dang / grong du gnas par bya ba dag gang yang dag par len pa'o/ /brtul bar byed cing zhes bya ba ni rtsom par byed cing ngo / /dbyen byed par 'gyur ba'i rtsod pa yang dag par rab tu blangs nas rab tu bzung ste 'dug na zhes bya ba ni ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin yang dag par blangs nas rab tu bzung ste 'dug na'o/ /dbyen byed par 'gyur ba zhes bya ba ni rgyu gnyis kyis dbyen byed de/ 'grogs pa dang / longs spyod pas so/ /ji ltar 'grogs pas she na/ ko ka li ka la sogs pa dang ngo / /ji ltar longs spyod pas she na/ ma skyes dgra la sogs pas zas g.yos byas pa snod lnga brgyas dge slong kha 'dren pas so/ /rtsod pa zhes bya ba ni 'khrug long gi rgyu'o/ /yang dag par blangs nas zhes bya ba ni de la dmigs nas so/ /rab tu bzung ste 'dug na zhes bya ba ni dam du bzung ste 'dug pa'o/ / dge slong de la zhes bya ba ni lhas byin nam/ gzhan yang de lta bu gang yin pa de la'o/ /dge slong rnams kyis zhes bya ba ni chos 'di pa rnams kyis so/ /'di skad ces zhes bya ba ni bzhams te bsgo ba ji skad sngar bstan pa ltar bsgo bar bya ba'o/ /tshe dang ldan pa khyod dge 'dun mthun pa dbye ba'i phyir brtul bar ma byed cig ces bya ba ni rtsol bar ma byed cig ces pa'o/ /dbyen byed par 'gyur ba'i rtsod pa yang dag par blangs nas rab tu bzung ste ma 'dug shig ces bya ba ni de la dmigs nas dam du bzung ste ma 'dug shig ces pa'o/ /tshe dang ldan pa dge 'dun dang mthun par gyis shig ces bya ba ni tshul khrims mthun pa dang / lta ba mthun pa dang / 'tsho ba mthun pa dang / spyod pa mthun par gyis shig ces pa'o/ /dge 'dun mthun mi phyed/ kun du dga' mi rtsod/ mchog gcig 'don pa gcig cing zhes bya ba la/ mthun zhes bya ba ni bya ba gcig pa ste/ lam gcig tu zhugs pa'i phyir ro/ /mi phyed ces bya ba ni 'dres pa ste bar du chod pa med pa'o/ /kun du dga' ba zhes bya ba ni phan tshun yon tan brjod pas dga' ba'o/ /mi rtsod ces bya ba ni rtsod pa ma byung ba'o/ /mchog gcig ces bya ba ni 'bras bu gcig pa ste/ mya ngan las 'das pa ste 'bras bu mchog gcig dang ldan pa'i phyir ro/ /'don pa gcig cing zhes bya ba ni gso sbyong dang mthun pa'o/ /chu dang 'o ma gcig tu 'dres pa lta bur gyur la zhes bya ba ni mthun pa'i dpe ste/ dgag dbye la sogs pa'i las mthun pa'i phyir ro/ /ston pa'i bstan pa gsal bar byed na zhes bya ba la ston pa ni bcom ldan 'das so/ /bstan pa ni sde snod gsum ste/ 'dod chags dang zhe sdang dang gti mug 'dul bar byed pa'o/ /gsal bar byed na zhes bya ba ni lung nod pa dang / klog pa dang kha don byed pa la sogs pa rab tu ston par byed na'o/ /bde ba la reg par gnas par 'gyur gyis zhes bya ba ni mya ngan las 'das pa thob par 'gyur ba ste/ bde ba ni tshe 'di la bde bar gnas pa bsam gtan bzhi po rnams so/ /de dag la reg par ni 'phags pa'i rigs bzhi la brten pa'i rim gyis bsam gtan bzhi po dag la brten nas 'phags pa'i bden pa bzhi mngon par rtogs shing dge sbyong gi 'bras bu bzhi po dag la reg pa'o/ /gnas par 'gyur gyi zhes bya ba ni thob par 'gyur gyi zhes bya ba'o/ /tshe dang ldan pa khyod dge 'dun 'byed par byed pa'i gzhi 'di lta bu 'di thong shig ces bsgo bar bya'o zhes bya ba ni bzhams te bsgo ba ji skad sngar bstan pa ltar bsgo bar bya'o/ /dge slong de la dge slong rnams kyis de ltar bsgo ba na zhes bya ba ni bzhams te bsgo ba na'o/ /gal te gzhi de gtong na zhes bya ba ni gal te lta ba de yongs su gtong na'o/ /de lta na legs zhes bya ba ni de lta na bzang ba ste/ rtsom pa'i nyes byas gcig byung bar zad kyi nyes pa sbom po yang ma byung ba'i phyir ro/ /gal te mi gtong na zhes bya ba ni gzhi de yongs su mi gtong na ste/ de ltar bzhams te bsgo ba na mi gtong na brtsams pa la nyes byas gcig dang bzhams te bsgo ba na ma btang ba'i mthar nyes pa sbom po gcig kyang 'byung ngo / /gzhi de gtang bar bya ba'i phyir lan gnyis lan gsum du yang dag par bsgo bar bya/ yang dag par bstan par bya'o zhes bya ba ni gsol ba dang bzhi'i las kyis bsgo ba ji skad sngar bstan pa ltar bsgo bar bya ste/ yang dag par bsgo ba ni de yin yang dag par bstan pa ni de yin no/ /lan gnyis lan gsum du zhes bya ba ni gsol ba dang gcig dang las brjod pa gsum bya ba'o/ /yang dag par bsgo ba ni kun du dri ba'o/ /yang dag par bstan pa ni dbye ba las bzlog pa'o/ /lan gnyis lan gsum du yang dag par bsgo ba la yang dag par bstan pa na gzhi de gtong na de lta na legs zhes bya ba ni de lta na bzang ba ste/ dge 'dun lhag ma'i dngos gzhi'i ltung ba ma byung ba'i phyir ro/ / sngar ni sbyor ba brtsams pa las nyes byas gcig pa'o/ /bzhams te bsgo ba ma mnyan pa'i mthar nyes pa sbom po gcig go/ /gsol pa byas pa rdzogs pa'i mthar yang nyes pa sbom po gcig go/ /las brjod pa dang po byas pa rdzogs pa'i mthar yang nyes pa sbom po gcig go/ /las brjod pa gnyis pa byas pa rdzogs pa'i mthar yang nyes pa sbom po gcig go/ /gal te mi gtong na dge 'dun lhag ma'o zhes bya ba ni las brjod pa gsum pa dang mjug sdud pa rdzogs pa'i mthar dge 'dun lhag ma'i dngos gzhi gcig 'byung ba'o/ /dge 'dun lhag ma'o zhes bya ba ni snga ma bzhin te/ des na dge 'dun lhag ma'o zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dge 'dun gyi dbyen byed pa dang / de'i rjes su phyogs pa dang / khyim sun 'byin pa dang / bka' blo mi bde ba zhes bya ba dge 'dun lhag ma tha ma bzhi po rnams kyi spyi'i thun mong gi mtshan nyid de bshad par bya ste/ de'i phyir bzlog pa'i tshul gyis mi gtong bar rjes su sgrub pa'i rang bzhin ni rjes su mthun no zhes bya ba smras te/ dge 'dun gyi dbyen byed pa dang / de'i rjes su phyogs pa dang / khyim sun 'byin pa dang / bka' blo mi bde ba zhes bya ba dge 'dun lhag ma bzhi po 'di dag la dang po rtsom par sbyor ba ni sbyor ba'i sbyor ba zhes bya ba'i nyes byas gcig 'byung ngo / /de'i 'og tu de dag la dge 'dun gyis bzhams te bsgo bas bzlog pa'i cho ga bya'o/ /de'i 'og tu gsol ba dang bzhi'i las kyis bsgo bas bzlog pa'i cho ga dang las bya ste/ de la rim pa ni dge 'dun lhag ma bzhi po 'di dag la dang po rtsom par sbyor ba na sbyor ba'i sbyor ba zhes bya ba'i nyes byas gcig byung ba de la dge 'dun gyis dang por bzhams te bsgo bar bya ba dang / de'i 'og tu gsol ba bya ba dang / de'i 'og tu las brjod pa dang po bya ba dang / de'i 'og tu las brjod pa gnyis pa bya ba dang / de'i 'og tu las brjod pa gsum pa dag gis bzlog pa'i tshul gyis bzlog pa'i cho ga dang las byed pa na bzhams te bsgo ba dang / gsol ba dang / las brjod pa dang po dang / las brjod pa gnyis pa dag mi gtong bar rjes su sgrub pa'i rang bzhin ni nyes pa sbom po re rer 'gyur bar rjes su mthun te 'dra'o/ /las brjod pa gsum pa mjug sdud pa dang bcas par rdzogs na ni dge 'dun lhag ma'i dngos gzhir 'gyur ro/ /de ltar na dang po sbyor ba rtsom pa na nyes byas so/ /de'i 'og tu bzhams te bsgo ba mi gtong na de'i mthar nyes pa sbom po gcig go/ /de'i 'og tu gsol ba dang bzhi'i las byed pa na/ gsol ba byas pa na mi gtong na gsol ba rdzogs pa'i mthar yang nyes pa sbom po gcig go/ /de'i 'og tu las brjod pa dang po byas pa na mi gtong na las brjod pa dang po rdzogs pa'i mthar yang nyes pa sbom po gcig go/ /de'i 'og tu las brjod pa gnyis pa byas na mi gtong na las brjod pa gnyis pa rdzogs pa'i mthar yang nyes pa sbom po gcig go/ /de'i 'og tu las brjod pa gsum pa mjug sdud pa dang bcas pa rdzogs pa'i mthar dge 'dun lhag ma'i dngos gzhi gcig tu 'gyur ro/ /de ltar na dge 'dun lhag ma 'di bzhi la dang por rtsom par sbyor ba ni nyes byas byed pa yin/ bzhams te bsgo ba dang / gsol ba dang / las brjod pa dang po dang / gnyis pa ni nyes pa sbom po re rer byed pa yin/ las brjod pa gsum pa mjug sdud pa dang bcas pa rdzogs pa'i mthar dge 'dun lhag ma'i dngos gzhi byed pa yin no/ /de dag gi tshig gi skad cig ma rnams ni gcig nyid de/ tshig gang la skad cig ma gcig la ltung ba 'byung bar 'gyur ba'i skad cig ma de'i khongs su tshig mtha' dag 'dus so/ /des na de dag gi tshig shin tu rgyun ring du zin na yang tshig gcig tu zad de/ ltung ba yang gcig kho na 'byung ba yin gyi cha shas re re la yang ma yin rtsa ba re re la yang ma yin no/ /mjug sdud pa ni tha dad pa ma yin te/ las brjod pa tha ma'i nang du 'dus so/ /de ltar na dge 'dun lhag ma tha ma bzhi char gyi thun mong gi mtshan nyid bstan nas/ da ni dge 'dun gyi dbyen byed pa'i dge 'dun lhag ma'i dngos gzhi'i ltung ba rnam par gzhag pa bstan par bya ste/ ci zhig byas na dge 'dun gyi dbyen byed pa'i dge 'dun lhag mar 'gyur zhe na/ dge 'dun gyi dbyen byed pa la brtul bar byed pa nyid mi gtong na dge 'dun lhag mar 'gyur ro/ /de'i bye brag ni ston pa bzhugs pa'i tshe/ de bzhin gshegs pa'i nyan thos kyi dge 'dun mthun pa'i tshogs l as dge slong bzhi yan chad logs shig tu bkar te chos dang zang zing gi longs spyod tha dad par byed pa la dge 'dun gyis bzhams te bsgo ba dang gsol ba dang bzhi'i las kyis bzlog pa na las brjod pa gsum pa mjug sdud pa dang bcas pa'i mthar mi gtong na dge 'dun lhag ma'i dngos gzhir 'gyur ro/ /dge slong 'gro ba gzhan gyi rnam pa bsten pa na dge slong gi 'du shes yod pa la na smad pa med do/ /dngos po bzang ngan dang 'dra ba la na smad pa med do/ /mtshan gyur pa ltung ba thun mong gi yul la na smad pa med do/ /'gro ba gzhan las skyis pa dang 'gro ba gzhan gyi rnam pa bsten pa la na smad pa med do/ /gnas skabs gzhan thob pa la na smad pa med do/ /gzhi gcig la bslab pa du ma bcas pa nyid la na smad pa med do/ /dngos po la the tshom za bas bsam pa dang bcas par zhugs pa la na smad pa med do/ /yul bsams pa dang ma bsams pa la na smad pa med do/ /rang dang gzhan gyi don du byed pa la na smad pa med do/ /dngos gzhi 'di la chos dang chos ma yin pa gnyis ka la de bzhin nyid du shes pa dang / byed pa la chos su 'du shes pa dang / de gnyis la yid gnyis za na mtshams med par 'gyur ro/ /'di'i byed pa po ni ston pa bzhugs bzhin du dge 'dun gyi dbyen byed pa'o/ /'di la yan lag lngas dngos gzhi'i ltung bar 'gyur te/ ston pa bzhugs pa dang / dge 'dun du longs pa dang / dge 'dun gyi dbyen la brtul bar byed pa nyid dang chos dang mthun pa las bzlog pa dang / las brjod pa gsum pa'i mthar mi gtong ba'o/ /de dag las yan lag ma tshang na ci rigs par na smad pa med do/ /sbyor ba'i ltung ba ni rang bzhin gyi 'khor kha 'dren na nyes pa sbom po'o/ /ston pa yongs su mya ngan las 'das pa'i tshe na nyes pa sbom po'o/ /phyogs dang gzhan gyi phyogs gnyis ka dge 'dun du ma longs pa dang / 'byed par byed pa rang gis kha bskang na nyes pa sbom po'o/ /bzhams te bsgo bas bzlog pa na mi gtong na nyes pa sbom po'o/ /gsol bas bzlog pa na mi gtong na nyes pa sbom po'o/ /las brjod pa dang pos bzlog pa na mi gtong na nyes pa sbom po'o/ /las brjod pa gnyis pas bzlog pa na mi gtong na nyes pa sbom po'o/ /dang po rtsom pa ma gtogs pa bzhams te bsgo ba phyin chad kyi 'jug pa ni sbyor ba nyid de nyes pa sbom po'o/ /dge slong 'gro ba gzhan gyi rnam pa bsten pa na dge slong gi 'du shes med pa na nyes pa sbom po'o/ /mtshan dang lta ba mi mthun pa'i dbyen byed na nyes pa sbom po'o/ /sbyor ba'i sbyor ba'i ltung ba ni dge slong gis cung zad ji tsam du dge 'dun mthun pa dbye ba'i phyir brtul bar byed pa thams cad du nyes byas su 'gyur ro/ /sbyor ba'i ltung ba la sbyor ba tha dad pa ji snyed byas pa re re la nyes byas re rer 'gyur ro/ /chos kyi phyogs khas blangs pa dag khas ma blangs pa dag dang lhan cig longs spyod par byed na nyes byas so/ /mtshan dang lta ba las rang gi phyogs ma yin pa'i dbyen byed na nyes byas so/ /ltung ba med pa ni mi mthun pa dang chos ma yin par sgo bar byed na ltung ba med do/ /mthun pa dang chos gcig yod gcig med pas sgo bar byed na ltung ba med do/ /mthun pa ltar bcos pa dang chos ltar bcos pas sgo bar byed na ltung ba med do/ /chos dang 'dul ba dang / ston pa'i bstan pa ji lta ba bzhin du ma yin par sgo bar byed na ltung ba med do/ /chos kyi phyogs ni khas ma blangs pa dag khas blangs pa dag dang lhan cig longs spyod par byed pa la ni ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni yul thams cad la gnas skabs thams cad du dge 'dun gyi dbyen gyi sbyor ba'i sbyor ba nyes byas dang / sbyor ba sbom po dang / dngos gzhir 'gyur ba rnam pa thams cad mi bsten par bslab par bya'o/ /bsgo ba las gyur pa'i dge 'dun lhag ma byung ma thag tu stan de nyid la 'dug bzhin du mthol bar bya'o/ /gzhi des ma bshags shing so sor ma bshags par gsol ba dang / /gsol ba dang gnyis dang gsol ba dang bzhi'i las thams cad nyams su myong bar mi bya'o/ /phyir bcos pa ni 'og nas ston to/ /dge 'dun gyi dbyen byed pa'i dge 'dun lhag ma ste bcu pa bshad zin to// //so sor thar pa'i mdo rgya cher 'grel pa 'dul ba kun las btus pa bam po bdun pa/ de'i rjes su phyogs pa'i dge 'dun lhag ma'i gleng gzhi ni dge 'dun gyi dbyen byed pa'i dge 'dun lhag ma'i gleng gzhi dang gcig go/ /khyad par du na de ltar bcom ldan 'das kyis dge 'dun gyi dbyen byed pa'i gleng gzhi dang bslab pa bca' ba dang ltung ba rnam par gzhag pa mdzad pa'i mjug thogs su de nas bcom ldan 'das kyis gdan de nyid la bzhugs bzhin du 'dul ba la nyan thos rnams kyi bslab pa'i gzhi gnyis pa bca' bar bzhed nas/ dge slong rnams la bka' stsal pa/ dge slong dag dge 'dun gyi bya ba cung zhig yod kyi re zhig stan las ma ldang shig /sangs rgyas bcom ldan 'das rnams ni mkhyen bzhin du rmed par mdzad pas/ bcom ldan 'das kyis ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin rnams la smras pa/ ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin khyed shes bzhin du dge slong gi dge 'dun mthun pa dbye ba'i phyir brtul bar byed cing dbyen byed par 'gyur ba'i rtsod pa yang dag par blangs nas rab tu bzung ste 'dug pa de'i grogs byed cing mi mthun par smra ba'i rjes su phyogs nas/ dge slong rnams la 'di skad ces tshe dang ldan pa dag khyed cag dge yang rung sdig kyang rung dge slong 'di la ci yang ma smra shig / de ci'i phyir zhe na/ tshe dang ldan pa dag dge slong 'di ni chos smra ba/ 'dul ba smra ba/ dge slong 'di ni chos dang 'dul ba yang dag par blangs nas rab tu bzung ste rjes su tha snyad 'dogs par byed pa/ dge slong 'di ni shes bzhin du smra'i/ mi shes par ma yin pa'i phyir te/ dge slong 'di gang la 'dod cing bzod pa de la bdag cag kyang 'dod cing bzod do zhes smra ba bden nam/ btsun pa mad do/ /sangs rgyas bcom ldan 'das kyis dge sbyong gi tshul ma yin pa rjes su mthun pa ma yin pa/ rung ba ma yin pa/ tshul dang mthun pa ma yin pa de ni rab tu byung bas bya ba ma yin no zhes bya ba la sogs pas rnam grangs du mar smad nas/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong de'i grogs byed pa'i dge slong mi mthun par smra ba nyid kyi rjes su phyogs pa gcig gam gnyis sam mang po dag yod cing / gal te de dag dge slong rnams la 'di skad ces tshe dang ldan pa dag khyed cag dge yang rung sdig kyang rung dge slong 'di la ci yang ma smra shig /de ci'i phyir zhe na/ tshe dang ldan pa dag dge slong 'di ni chos smra ba 'dul ba smra ba/ dge slong 'di ni chos dang 'dul ba yang dag par blangs nas rab tu bzung ste rjes su tha snyad 'dogs par byed pa/ dge slong 'di ni shes bzhin du smra'i/ mi shes par ma yin pa'i phyir te/ dge slong 'di gang la 'dod cing bzod pa de la bdag cag kyang 'dod cing bzod do zhes zer na/ dge slong de dag la dge slong rnams kyis 'di skad ces tshe dang ldan pa dag khyed cag dge yang rung sdig kyang rung dge slong 'di la ci yang ma smra shig / de ci'i phyir zhe na/ tshe dang ldan pa dag dge slong 'di ni chos smra ba/ 'dul ba smra ba/ dge slong 'di ni chos dang 'dul ba yang dag par blangs nas rab tu bzung ste/ rjes su tha snyad 'dogs par byed pa/ dge slong 'di ni shes bzhin du smra'i/ mi shes pa ma yin pa'i phyir te/ dge slong 'di gang la 'dod cing bzod pa de la bdag cag kyang 'dod cing bzod do zhes ma zer cig /de ci'i phyir zhe na/ tshe dang ldan pa dag dge slong 'di ni chos smra ba ma yin/ 'dul ba smra ba ma yin gyi/ tshe dang ldan pa dag dge slong 'di ni chos ma yin pa smra ba/ 'dul ba ma yin pa smra ba/ dge slong 'di ni chos ma yin pa dang 'dul ba ma yin pa yang dag par blangs nas rab tu bzung ste rjes su tha snyad 'dogs par byed pa/ dge slong 'di ni mi shes bzhin du smra'i/ shes par ma yin pa'i phyir te/ dge slong 'di gang la 'dod cing bzod pa de la tshe dang ldan pa dag 'dod cing bzod par ma byed cig /tshe dang ldan pa dag khyed dge 'dun 'byed 'dod par ma byed par tshe dang ldan pa dag dge 'dun mthun pa nyid du 'dod par gyis shig /tshe dang ldan pa dge 'dun dang mthun par gyis shig / dge 'dun mthun mi phyed kun du dga' mi rtsod mchog gcig 'don pa gcig cing chu dang 'o ma gcig tu 'dres pa lta bur gyur la/ ston pa'i bstan pa gsal bar byed na bde ba la reg par gnas par 'gyur gyi/ tshe dang ldan pa dag dge 'dun mthun pa 'byed pa'i rjes su phyogs shing mi mthun par smra ba 'di thong shig ces bsgo bar bya'o/ /dge slong de dag la dge slong rnams kyis de skad bsgo ba na/ gal te gzhi de gtod na de lta na legs/ gal te mi gtong na gzhi de gtang bar bya ba'i phyir lan gnyis lan gsum du yang dag par bsgo bar bya/ yang dag par bstan par bya'o/ /lan gnyis lan gsum du yang dag par bsgo yang dag par bstan pa na gzhi de gtong na de lta na legs gal te mi gtong na dge 'dun lhag ma'o zhes bca' ba mdzad de/ yul ni rgyal po'i khab gang zag ni ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin/ nyon mongs pa ni dbyen byed par 'dod pa/ nyes pa ni de'i rjes su phyogs pa'o/ /de la dge slong 'di zhes bya ba ni lhas byin gyi'o/ /grogs byed pa'i dge slong zhes bya ba ni ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin dag go/ /mi mthun par smra ba nyid kyi rjes su phyogs pa zhes bya ba ni lta ba de dag dang 'dod pa de dag dang bsam pa de dag dang ldan pa'o/ /gcig gam gnyis sam mang po dag yod cing zhes bya ba ni grangs su yang rung ba ste gnyis las lhag pa ni mang po'o/ /gal te de dag ces bya ba ni rjes su phyogs pa de dag go/ /dge slong rnams la zhes bya ba ni chos 'di pa rnams la'o/ /'di skad ces bya ba ni rjes su phyogs pa'i tshig 'di skad ces zer na'o/ /tshe dang ldan pa dag khyed cag dge yang rung zhes bya ba ni dge ba la sbyor bar yang ma byed cig ces pa'o/ /sdig kyang rung zhes bya ba ni sdig pa las zlog par yang ma byed cig ces pa'o/ /dge slong 'di la zhes bya ba ni lhas byin la'o/ /ci yang ma smra shig ces bya ba ni cung zad kyang ma smra shig pa'o/ /de ci'i phyir zhe na/ tshe dang ldan pa dag dge slong 'di ni chos smra ba 'dul ba smra ba zhes bya ba la chos smra ba zhes bya ba ni rigs pa smra ba'o/ /'dul ba smra ba zhes bya ba ni lung gi rjes su 'brang ba'o/ /gzhan yang chos ni 'phags pa'i lam yan lag brgyad pa las/ yang dag pa'i lta ba dang / yang dag pa'i rtog pa dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin to/ /'dul ba ni yang dag pa'i ngag dang / yang dag pa'i las kyi mtha' dang / yang dag pa'i 'tsho ba'o/ /gzhan yang chos smra ba ni don dang ldan par smra ba'o/ /'dul ba smra ba ni 'jam zhing mdza' ba ltar smra ba'o/ /de yang rjes su phyogs pa rnams kyis bsngags par zad kyi/ lhas byin nyid de dang ldan pa ni ma yin no/ /dge slong 'di ni chos dang 'dul ba yang dag par blangs nas rab tu bzung ste rjes su tha snyad 'dogs par byed pa zhes bya ba ni chos ji lta ba dang 'dul ba ji lta ba dang / ston pa'i bstan pa ji lta ba de ltar rjes su tha snyad 'dogs par byed pa ste/ yang dag par blangs nas zhes bya ba ni de la dmigs nas so/ /rab tu bzung ste zhes bya ba ni dam du gzung ste zhes bya ba'i tha tshig go/ /dge slong 'di ni shes bzhin du smra'i mi shes par ma yin pa'i phyir te zhes bya ba ni don rtogs pa yin gyi don ma rtogs pa ma yin pa'i phyir ro/ /dge slong 'di gang la 'dod cing bzod pa de la bdag kyang 'dod cing bzod do zhes zer na zhes bya ba ni dge slong lhas byin 'di gzhi gang la 'dod cing bzod pa de la bdag cag kyang 'dod cing bzod do zhes zer na ste/ 'dod cing zhes bya ba ni yid dang mthun pa'i sgo nas so/ /bzod pa zhes bya ba ni rigs pas rtogs pa'i sgo nas te/ re zhig de dag ni rjes su phyogs pa'i tshig yin no/ /dge slong de dag la zhes bya ba ni ko ka li ka dang / khaN+Da drab bya dang / ka Da mo ra ka ti sh+ya dang / rgya mtshos byin dag la'o/ /dge slong rnams kyis zhes bya ba ni chos 'di pa rnams kyis so/ /'di skad ces tshe dang ldan pa dag khyed cag dge yang rung sdig kyang rung dge slong 'di la ci yang ma smra shig /de ci'i phyir zhe na/ tshe dang ldan pa dag dge slong 'di ni chos smra ba/ 'dul ba smra ba/ dge slong 'di ni chos dang 'dul ba yang dag par blangs nas rab tu bzung ste/ rjes su tha snyad 'dogs par byed pa dge slong 'di ni shes bzhin du smra'i mi shes par ma yin pa'i phyir te/ dge slong 'di gang la 'dod cing bzod pa de la bdag cag kyang 'dod cing bzod do zhes ma zer cig / de ci'i phyir zhe na/ tshe dang ldan pa dag dge slong 'di ni chos smra ba ma yin 'dul ba smra ba ma yin gyi/ tshe dang ldan pa dag dge slong 'di ni chos ma yin pa smra ba/ 'dul ba ma yin pa smra ba/ dge slong 'di ni chos ma yin pa dang 'dul ba ma yin pa yang dag par blangs nas rab tu bzung ste rjes su tha snyad 'dogs par byed pa/ dge slong 'di ni mi shes bzhin du smra'i shes par ma yin pa'i phyir te/ dge slong 'di gang la 'dod cing bzod pa de la tshe dang ldan pa dag 'dod cing bzod do zhes ma zer cig /tshe dang ldan pa dag khyed dge 'dun 'byed par 'dod par ma byed par tshe dang ldan pa dag dge 'dun mthun pa nyid du 'dod par gyis shig / tshe dang ldan pa dag dge 'dun dang mthun par gyis shig /dge 'dun mthun mi phyed kun du dga' mi rtsod mchog gcig 'don pa gcig cing chu dang 'o ma gcig tu 'dres pa lta bur gyur la/ ston pa'i bstan pa gsal bar byed na bde ba la reg par gnas par 'gyur gyi/ tshe dang ldan pa dag dge 'dun 'byed pa'i rjes su phyogs shing mi mthun par smra ba 'di lta bu 'di thong shig ces bsgo bar bya'o zhes bya ba ni bzhams te/ bsgo ba sngar ji skad bstan pa ltar bsgo bar bya'o/ /dge slong de dag la dge slong rnams kyis de skad bsgo ba na zhes bya ba ni bzhams te bsgo ba de skad ces bsgo ba na'o/ /gal te gzhi de yongs su gtong na zhes bya ba ni gal te lta ba de yongs su gtong na'o/ /de lta na legs zhes bya ba ni de lta na bzang ba ste/ rtsom pa'i nyes byas gcig byung bar zad kyi nyes pa sbom po yang ma byung ba'i phyir ro/ /gal te mi gtong na zhes bya ba ni gzhi de yongs su mi gtong na ste/ de ltar bzhams te bsgo ba mi gtong na rtsom pa la nyes byas gcig dang / bzhams te bsgo ba na ma btang ba'i mthar nyes pa sbom po gcig kyang 'byung ngo / /gzhi de gtong bar bya ba'i phyir lan gnyis lan gsum du yang dag par bsgo bar bya yang dag par bstan par bya'o zhes bya ba ni gsol ba dang bzhi'i las kyis bsgo ba ji skad sngar bstan pa ltar bsgo bar bya ste/ yang dag par bsgo ba ni de yin/ yang dag par bstan pa ni de yin no/ /lan gnyis lan gsum du zhes bya ba ni gsol ba gcig byas pa'i 'og tu las brjod pa gsum bya ba'o/ /yang dag par bsgo ba ni kun du dri ba'o/ /yang dag par bstan pa ni dbyen las bzlog pa'o/ /lan gnyis lan gsum du yang dag par bsgo yang dag par bstan pa na gzhi de gtong na de lta na legs zhes bya ba ni de lta na bzang ba ste/ dge 'dun lhag ma'i dngos gzhi'i ltung ba ma byung ba'i phyir ro/ /sngar sbyor ba brtsams pa la nyes byas gcig go/ /bzhams te bsgo ba ma btang na mthar nyes pa sbom po gcig go/ /gsol ba byas pa rdzogs pa'i mthar yang nyes pa sbom po gcig go/ /las brjod pa dang po byas pa rdzogs pa'i mthar yang nyes pa sbom po gcig go/ /las brjod pa gnyis pa byas pa rdzogs pa'i mthar yang nyes pa sbom po gcig go/ / gal te mi gtong na dge 'dun lhag ma'o zhes bya ba ni las brjod pa gnyis pa dang gsum pa dang mjug sdud pa rdzogs pa'i mthar dge 'dun lhag ma'i dngos gzhi gcig 'byung ngo / /dge 'dun lhag ma'o zhes bya ba ni snga ma bzhin no/ /des na dge 'dun lhag ma'o zhes gsungs so/ / de la ltung ba ji ltar 'gyur zhe na/ 'dir yang dngos gzhi dang / sbyor ba dang sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la sngar dge 'dun gyi dbyen byed pa dang / de'i rjes su phyogs pa dang / khyim sun 'byin pa dang / bka' blo mi bde ba zhes bya ba dge 'dun lhag ma tha ma bzhi po rnams kyi spyi'i thun mong gi mtshan nyid ji skad bstan pa thams cad dran par byas nas 'dir de'i rjes su phyogs pa'i dge 'dun lhag ma'i dngos gzhi'i ltung ba rnam par gzhag pa bshad par bya ste/ ci zhig byas na de'i rjes su phyogs pa'i dge 'dun lhag mar 'gyur zhe na/ de'i grogs nyid rjes su sgrub par byed pa mi gtong na dge 'dun lhag mar 'gyur ro/ /de'i bye brag ni ston pa bzhugs pa'i tshe gang zag gang de bzhin gshegs pa'i nyan thos kyi dge 'dun mthun pa'i tshogs pa las dge slong bzhi yan chad logs shig tu bkar te chos dang zang zing gi longs spyod tha dad par byed pa de'i rjes su phyogs shing grogs nyid rjes su sgrub par byed pa la/ dge 'dun gyis bzhams te bsgo ba dang / gsol ba dang bzhi'i las kyis bzlog pa na las brjod pa gsum pa mjug sdud pa dang bcas pa'i mthar mi gtong na dge 'dun lhag ma'i dngos gzhir 'gyur ro/ /gzhan ni snga ma bzhin no/ /'di'i byed pa po ni ston pa bzhugs bzhin du dge 'dun gyi dbyen byed pa'i rjes su phyogs pa'o/ / 'di la yan lag lngas dngos gzhi'i ltung bar 'gyur te/ ston pa bzhugs pa dang / dge 'dun du longs pa dang / dge 'dun gyi dbyen byed pa'i rjes su phyogs pa dang / chos dang mthun pas bzlog pa dang / las brjod pa gsum pa'i mthar mi gtong ba'o/ /de dag las yan lag ma tshang na ci rigs par na smad do/ /sbyor ba dang / sbyor ba'i sbyor ba dang / ltung ba med pa dang / bslab par bya ba dang / phyir bcos pa'i mtshan nyid thams cad ni dge 'dun gyi dbyen gyi lhag ma dang 'dra'o/ /de'i rjes su phyogs pa'i dge 'dun lhag ma ste bcu gcig pa bshad zin to/ / //khyim sun 'byin pa'i dge 'dun lhag ma'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe na re lde'i ri la dge slong 'gro mgyogs dang nab so gnyis dang / dge slong dmar ser can khyim sun 'byin pa'i sdig pa'i chos kun du spyod pa dag 'khod de/ de dag bud med dang lhan cig tho 'tshams par byed/ kun du rtse bar byed/ kun du ca co 'don par byed/ rgod pa dang dregs pa dang / lus la rdeg par byed/ stan gcig la 'dug par byed/ snod gcig tu za bar byed/ phor bu gcig tu myos par 'gyur ba'i btung ba sna tshogs dag 'thung bar byed/ me tog dag 'thog par byed/ 'thog tu 'jug par byed/ phreng ba dag brgyud par byed/ brgyud du 'jug par byed/ me tog rna rgyan dag thogs par byed/ thogs su 'jug par byed/ bro rdung bar byed/ bro rdung du 'jug par byed/ glu len par byed/ glu len du 'jug par byed/ rol mo'i sgra 'byin par byed/ rol mo'i sgra 'byin du 'jug par byed/ bro mkhas pa dang glu mkhas pa dang / rol mo'i sgra 'byin pa mkhas pa la bya dga' sbyin par byed/ chos gos dag brdzes te rgyug par byed/ mchong bar byed/ rab tu mchong bar byed/ brla skor bar byed/ lag pa skor bar byed/ nya ltar skor bar byed/ chur 'phyo ba na 'phen par byed/ chu la rnga mad du ka ltar rdung bar byed/ chu la rnga bo che ltar rdung bar byed/ glang po che'i skad kyi sgra 'byin par byed/ rta'i skad kyi sgra 'byin par byed/ khyu mchog gi skad kyi sgra 'byin par byed/ rma bya'i skad kyi sgra 'byin par byed/ khu byug gi skad kyi sgra 'byin par byed/ khas rdza rnga'i sgra 'byin par byed/ khas dung gi sgra 'byin par byed/ khas rnga bo che'i sgra 'byin par byed/ glang po che'i sgra'i 'thab mo yang byed/ glang po che'i 'thab mo byed du 'jug par yang byed/ rta'i 'thab mo dang / khyu mchog gi 'thab mo dang / ma te'i 'thab mo dang / ra'i 'thab mo dang / lug gi 'thab mo dang / bud med kyi 'thab mo dang / skyes pa'i 'thab mo dang / gzhon nu'i 'thab mo dang / gzhon nu ma'i 'thab mo dang / phyag ga gi 'thab mo dang / thi ba'i 'thab mo dang / bung ba'i 'thab mo yang byed du 'jug /byed du 'jug par yang byed/ de dag dang gzhan yang dge sbyong gi las ma yin pa dag byed cing byed du 'jug ste/ de dag gi spyod tshul dang spyod pa dang / log par sgrub pa des re lde'i ril dge slong ma 'ongs pa dag kyang mi 'ong la/ 'ongs pa dag kyang mngon par mi dga' zhing / re lde'i ri'i gnas spong bar byed do/ /re lde'i ri la gnas pa'i bram ze dang khyim bdag dag kyang yid mi dga' zhing zhe lce bar gyur nas/ dge slong gnyug mar gnas pa dag la yang bsod snyoms dbul ba dang bya bar sems pa dka' na/ glo bur du lhags pa rnams la lta smos kyang ci dgos par gyur to/ /ji tsam dus gzhan zhig na tshe dang ldan pa kun dga' bo yul ka shi dag tu ljongs rgyu zhing 'gro ba na re lde'i ri la phyin nas re lde ri'i gnas na 'dug go/ /de nas tshe dang ldan pa kun dga' bo snga dro sham thabs bgos lhung bzed dang chos gos thogs te re lde ri la bsod snyoms la zhugs nas/ ji ltar lhung bzed bkrus pa kho nas re lde ri la bsod snyoms la zhugs pa de ltar lhung bzed bkrus pa kho nas tha na slong mo gcig sbyin pa yang ma thob phyir gtong ba yang ma thob par phyir byung ngo / /de nas tshe dang ldan pa kun dga' bo 'di snyam du sems te/ sngon ni yang re lde'i ri 'di 'byor pa dang rgyas pa dang / bde ba dang lo legs pa dang / skye bo dang mi mang pos kyang gang bar gyur la/ 'dir slong mo pas kyang bsod snyoms rnyed sla bar gyur na/ da ltar yang re lde'i ri 'di 'byor pa dang / rgyas pa dang / bde ba dang / lo legs pa dang / skya bo dang / mi mang pos gang ba yin na/ 'on kyang ji ltar bdag lhung bzed bkrus pa kho nas re sde ri la bsod snyoms la zhugs pa de ltar lhung bzed bkrus pa kho nas tha na slong mo gcig sbyin pa yang ma thob phyir gtong ba yang ma thob par phyir byung ba lags na/ 'dir bcom ldan 'das kyi nyan thos byis pa blun pa mi gsal ba mi mkhas pa 'ga' zhig gis nyon mongs pa'i dbang du gyur pas spyod yul lam spyod yul gyi lam mam/ rigs kyi bud med dam rigs kyi gzhon nu ma dag la kun du smras pa'am/ nom pa'am/ nyug par byas par ma gyur tam snyam mo/ /de'i tshe na re lde ri pa'i bram ze dang / khyim bdag rnams kyi dpong sa'i gnas na bram ze dang khyim bdag lnga brgya tsam bya ba zhig gi phyir 'dus te mthun par gyur te/ de nas tshe dang ldan pa kun dga' bo re lde ri pa'i bram ze dang khyim bdag rnams kyi dpong sa'i gnas ga la ba der song ste phyin nas/ re lde ri pa'i bram ze dang khyim bdag rnams la sngar ji ltar gyur pa de dag rgyas par smras so/ /de skad ces smras pa dang / re lde ri pa'i bram ze dang khyim bdag de rnams dbang po rnams phyir blan te 'khod do/ /de'i tshe na dge bsnyen chu rgyun can 'khor de nyid du 'dug cing mthun par gyur pas tshe dang ldan pa kun dga' bo'i lag pa gnyis nas bzung ste mtha' gcig tu khrid nas/ tshe dang ldan pa kun dga' bo la ji ltar re lde ri la dge slong 'gro mgyogs dang nab so gnyis dang dge slong dmar ser can khyim sun 'byin pa sdig pa'i chos kun du spyod pa rnams kyis khyim sun phyung zhing / sdig pa'i chos kun du spyad pa de dag rgyas par brjod nas/ btsun pa kun dga' bo gal te khyod la mi dga' na/ khyod kyis thugs brtse ba'i slad du don 'di bcom ldan 'das la rgyas par gsol cig ces smras so/ /de nas tshe dang ldan pa kun dga' bos dge bsnyen chu rgyun can la cang mi smra bas dang du blangs so/ /de nas dge bsnyen chu rgyun can gyis tshe dang ldan pa kun dga' bos cang mi smra bas dang du blangs par rig nas/ tshe dang ldan pa kun dga' bo la 'di skad ces smras so/ /btsun pa kun dga' bo bdag cag gi sdum par bsod snyoms cig gsol bar ci gnang / tshe dang ldan pa kun dga' bos dge bsnyen chu rgyun can la cang mi smra bas dang du blangs so/ /de nas dge bsnyen chu rgyun can gyis tshe dang ldan pa kun dga' bos cang mi smra bas dang du blangs par rig nas/ tshe dang ldan pa kun dga' bo bde bar 'dug pa la rang gi lag nas bca' ba dang bza' ba gtsang zhing bsod pas tshim par byed/ stobs par byed cing / rang gi lag nas bza' ba dang bca' ba bzang zhing bsod pa rnam grangs du mas tshim par byas shing bstabs nas/ tshe dang ldan pa kun dga' bos zos shing lag pa bsnyal lhung bzed dang chos gos gzhag par rig nas stan ches dma' ba zhig blangs te/ tshe dang ldan pa kun dga' bo'i mdun du chos mnyan pa'i phyir 'dug go/ /de nas tshe dang ldan pa kun dga' bo dge bsnyen chu rgyun can la chos dang ldan pa'i gtam yang dag par ston/ yang dag par 'dzin du 'jug /yang dag par gzengs stod/ yang dag par rab tu dga' bar byed cing / chos dang ldan pa'i gtam yang dag par bstan/ yang dag par 'dzin du bcug /yang dag par gzengs bstod/ yang dag par rab tu dga' bar byas nas stan las langs te song ngo / /de nas tshe dang ldan pa kun dga' bos ji ltar yongs su spyad pa'i gnas mal mkhos su phab nas/ lhung bzed dang chos gos thogs te mnyan yod ga la ba der rgyu zhing song nas mthar gyis rgyu zhing 'gro ba na mnyan yod du phyin to/ /de nas tshe dang ldan pa kun dga' bos lhung bzed dang chos gos mkhos su phab ste/ rkang pa gnyis bkrus nas bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te/ mtha' gcig tu 'dug go/ /mtha' gcig tu 'dug nas tshe dang ldan pa kun dga' bos sngar dge bsnyen chu rgyun can dang lhan cig skabs su gtam brjod pa ci byung ba de dag thams cad bcom ldan 'das la rgyas par gsol to/ /de skad ces gsol pa dang / bcom ldan 'das kyis tshe dang ldan pa kun dga' bo la bka' stsal pa/ kun dga' bo khyod dge slong gnas brtan gnas brtan rnams dang lhan cig re lde ri la song la dge slong 'gro mgyogs dang nab so gnyis bskrad pa'i las gyis shig /'di ltar bya ste/ lam gyi bar du 'dug la dge slong gleng ba po 'dun pas mi 'gro ba dang / zhe sdang gis mi 'gro ba dang / gti mug gis mi 'gro ba dang / 'jigs pas mi 'gro ba dang / glengs pa dang ma glengs pa shes pa'i chos lnga dang ldan pa bsko bar bya'o/ /'di ltar bsko bar bya ste/ gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas/ dge 'dun thams cad du 'dug cing mthun par gyur pa la/ je dang por spro bar bya ste/ tshe dang ldan pa ming 'di zhes bya ba khyod re lde'i ri la song ste/ dge slong 'gro mgyogs dang nab so la dge slong gi chos ma yin pa rnam pa mang pos gleng bar spro'am/ gal te spro na des spro'o zhes brjod par bya'o/ /de'i 'og tu dge slong gcig gis gsol ba byas te las bya'o/ /'di ltar bya ste 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong gleng ba po ming 'di zhes bgyi ba 'di re lde'i ri la mchis te/ dge slong 'gro mgyogs dang nab so la dge sbyong gi chos ma lags pa rnam pa mang pos gleng bar spro na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong gleng ba po ming 'di zhes bgyi ba dge slong 'gro mgyogs dang nab so la gleng bar bsko'o/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ dge slong gleng ba po ming 'di zhes bgyi ba 'di re lde ri la mchis nas/ dge slong 'gro mgyogs dang nab so la dge slong gi chos ma lags pa rnam pa mang pos gleng bar spro ste/ de'i slad du dge 'dun gyis dge slong gleng ba po ming 'di zhes bgyi ba dge slong 'gro mgyogs dang nab so la gleng bar bsko na/ tshe dang ldan pa gang dag dge slong gleng ba po ming 'di zhes bgyi ba dge slong 'gro mgyogs dang / nab so la gleng bar bsko bar bzod pa de dag ni cang ma gsung shig /gang dag mi bzod pa de dag ni gsungs shig /dge 'dun gyis bzod cing gnang nas dge 'dun gyis dge slong gleng ba po ming 'di zhes bgyi ba dge slong 'gro mgyogs dang nab so la gleng bar bsko lags te/ 'di ltar cang mi gsung bas de de bzhin du 'dzin to/ /dge slong gang dag ngas dge slong gleng ba po'i kun du spyod pa'i chos bca' bar bya ste/ dge slong gleng ba pos re sde'i ri la song ste/ gnas mal bsham pa byas nas/ gaN+DI brdungs te dris pa'i tshig gis dge slong rnams la yang dag par bsgo ba nas/ dge 'dun thams cad 'dug cing mthun par gyur pa na/ dge slong 'gro mgyogs dang nab so gnyis la khyed kyis khyim sun phyung zhing sdig pa'i chos kun du spyad pa bden nam zhes gleng bar bya'o/ /gal te mthun pa mi sbyin nam gus pa de nyid kyis bskrad pa'i las bya'o/ /gal te mthun pa ster na skabs 'byed du gzhug par bya'o/ /gal te skabs mi 'byed na ma gus pa de nyid kyis bskrad pa'i las bya'o/ /gal te skabs 'byed na gleng bar bya'o/ /gal te ltung ba ma mthong ngo zhes zer na ma gus pa de nyid kyis bskrad pa'i las bya'o/ /gal te ltung ba mthong ngo zhes zer na/ 'di skad ces de kho na'i phyir dge 'dun gyis khyed gnyis la bskrad pa'i phrin las mdzad de zhes brjod par bya'o/ /dge slong gleng ba pos gleng ba po'i chos ji ltar bcas pa yang dag par blangs te 'jug par mi byed nas 'gal tshabs can du 'gyur ro/ /bskrad pa'i las ni 'di ltar bya ste/ dge slong gleng ba pos glengs nas ltung ba mthong zhes zer ba na dge slong gcig gis gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas/ dge 'dun thams cad 'dug cing mthun par gyur pa na gsol ba byas te las bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong 'gro mgyogs dang / nab so 'di gnyis khyim sun 'byin pa sdig pa'i chos kun du spyod pa lags te/ 'di gnyis khyim sun 'byin par yang snang zhing thos la 'tshal/ 'di gnyis sdig pa'i chos kun du spyod par yang snang zhing thos la 'tshal na/ gal te dge 'dun gyi dus la bab cing bzod na/ dge 'dun gyis gnang bar mdzod cig dang / dge 'dun gyis dge slong 'gro mgyogs dang nab so gnyis la khyim sun 'byin pa ma btang ba la bskrad pa'i phrin las mdzad do/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ dge slong 'gro mgyogs dang nab so 'di gnyis khyim sun 'byin pa sdig pa'i chos kun du spyod pa lags te/ 'di gnyis khyim sun 'byin par yang snang zhing thos la 'tshal/ sdig pa'i chos kun du spyod par yang snang zhing thos la 'tshal te/ de'i slad du dge 'dun gyis dge slong 'gro mgyogs dang nab so khyim sun 'byin pa ma btang ba la bskrad pa'i phrin las mdzad na/ tshe dang ldan pa gang dag dge slong 'gro mgyogs dang nab so la bskrad pa'i phrin las mdzad par bzod pa de dag ni cang ma gsung shig /gang dag mi bzod pa de dag ni gsungs shig /'di ni las brjod pa dang po ste/ de bzhin du lan gnyis lan gsum du bzlas/ dge 'dun gyis bzod cing gnang nas dge 'dun gyis dge slong 'gro mgyogs dang nab so khyim sun 'byin pa ma btang ba la bskrad pa'i phrin las mdzad lags te/ 'di ltar cang mi gsung bas de de bzhin du 'dzin to/ /de nas tshe dang ldan pa kun dga' bos btsun pa bka' bzhin 'tshal zhes bcom ldan 'das kyi bka' mnyan nas/ dge slong gnas brtan gnas brtan rnams dang lhan cig re lde ri la song ste/ lam gyi bar du 'dug nas dge slong gleng ba po bskos so/ /de nas dge slong dmar ser can gang dag dge slong 'gro mgyogs dang nab so gnyis dang mtshungs par byed pa de dag gis tshe dang ldan pa kun dga' bo dge slong gnas brtan gnas brtan rnams dang lhan cig 'dir 'ongs te/ lam gyi bar du 'dug nas dge slong gleng ba po bskos so/ /dge slong 'gro mgyogs dang nab so gnyis skrod pa'i las byed par 'gyur ro zhes thos so/ /thos nas kyang de dag 'di snyam du sems te tshe dang ldan pa 'di gnyis kyis kun du spyad pa dang / smras pa dang brtul ba gang dag yin pa de dag las bdag cag gis kun du ma spyad pa dang / ma smras pa dang / ma brtul ba ci yang med pas de'i phyir 'di gnyis la skrod pa'i las byed na/ bdag cag la yang ci'i phyir mi byed de/ gang gi tshe tshe dang ldan pa kun dga' bo dang dge slong gnas brtan gnas brtan rnams 'dir 'ongs te/ dang por 'gro mgyogs dang nab so gnyis bskrad pa'i las byas pas de'i 'og tu bdag cag la yang skrod pa'i las byed pa'i gnas yod par 'gyur bas bdag cag gtur bu'i khur drags te/ nyan rna ba gzhag cing 'khod nas tshe dang ldan pa kun dga' bo dang dge slong gnas brtan gnas brtan rnams sgo gcig nas 'jug par 'gyur ba na/ bdag cag gtur bu'i khur dag thogs te/ sgo gcig nas 'byung zhing mnyan yod du 'dong bar bya gor ma chag snyam mo/ /de nas dge slong gleng ba po re lde ri la song ste/ gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas/ dge 'dun thams cad 'dug cing mthun par 'gyur ba na/ dge slong 'gro mgyogs dang nab so gnyis kyi mthun pa byin te skabs phye nas/ dge slong gleng ba pos glengs pa dang de gnyis kyis smras pa/ tshe dang ldan pa ltung ba mthong ngo / /gleng ba pos smras pa/ de kho na'i phyir dge 'dun gyis khyed gnyis la bskrad pa'i phrin las mdzad do/ /de nas tshe dang ldan pa kun dga' bo dang dge slong gnas brtan gnas brtan rnams sgo gcig nas zhugs par gyur pa na/ dge slong dmar ser can dag gtur bu'i khur dag thogs te sgo gcig nas byung zhing mnyan yod du dong nas de dag gis ltung ba bshags par bya ba gang dag yin pa de dag kyang bshags shing / sems kyi rnam par rtog pa sna tshogs bsdam par bya ba dag kyang sems kyis bsdams te/ dge slong rang bzhin du gnas pa dag dang lhan cig gnas shing dge 'dun gyi bya ba yang rjes su srung bar byed do/ /de nas tshe dang ldan pa kun dga' bo dang dge slong gnas brtan gnas brtan rnams kyis dge slong 'gro mgyogs dang nab so gnyis la bskrad pa'i las byas nas mnyan yod ga la ba der song ste/ mthar gyis rgyu zhing 'gro ba na mnyan yod du phyin to/ /'gro mgyogs dang nab so gnyis kyis bsams pa/ gang sa la sgyel bde ni sa nyid la brten te ldang ba yin pas bdag cag gnyis kyang mnyan yod du song ste/ bcom ldan 'das dang dge slong gi dge 'dun la bzod pa gsol bar bya'o snyam nas de gnyis kyis gros byas nas de nyid kyi mtshan mo 'das pa dang / snga dro chos gos dang sham thabs bgos lhung bzed thogs te/ re lde ri la bsod snyoms la zhugs nas re lde ri la bsod snyoms brgyus te zas kyi bya ba byas nas phyi dro bsod snyoms mi byed pas ji ltar spyad pa'i gnas mal mkhos su phab ste/ chos gos dang lhung bzed thogs nas mnyan yod ga la ba der rgyu zhing song ste/ mthar gyis rgyu zhing 'dong ba na mnyan yod du phyin nas dge slong gnas brtan gnas brtan rnams kyis de gnyis mthong ba dang / de rnams de gnyis la gtam 'dre bar mi byed/ phebs par smra bar mi byed do/ /dge 'dun dmar ser can dag gis kyang de gnyis mthong ba dang de gnyis la gtam 'dre bar mi byed/ phebs par smra bar mi byed do/ /de nas dge slong 'gro mgyogs dang / nab so gnyis kyis dge slong dmar ser can dag la smras pa/ tshe dang ldan pa dag dge slong gnas brtan gnas brtan rnams ni kho bo cag gnyis la gtam 'dre bar mi byed/ phebs par smra bar mi byed pa ni rigs na khyed cag ci'i phyir kho bo cag gnyis la gtam 'dre bar mi byed/ phebs par smra bar mi byed/ kho bo cag gnyis kyis kun du spyad pa dang smras pa dang / brtul ba gang dag yin pa dag las/ khyed cag gis kun du ma spyad pa dang ma smras pa dang ma brtul ba ci zhig yod de dag gis smras pa/ tshe dang ldan pa gnyis de yang bden mod kyi 'on kyang kho bo cag gis ltung ba bshags par bya ba gang dag yin pa de dag kyang bshags shing / sems kyi rnam par rtog pa sna tshogs bsdam par bya ba dag kyang sems kyis bsdams te/ de ltar dge slong rang bzhin du gnas pa dag dang lhan cig gnas shing dge 'dun gyi bya ba yang rjes su srung bar byed pas kho bo cag phyin chad gnas ngan len kun du spyod pa dag lhan cig longs spyod par mi byed do/ /de gnyis kyis smras pa/ tshe dang ldan pa dag 'di na dge slong kha cig 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba dag yin te/ 'di ltar ltung ba 'dra ba kho nas dge slong kha cig ni skrod par byed/ kha cig ni skrod par mi byed do zhes 'phya bar brtsams pa dang / dge slong rnams kyis de gnyis la smras pa/ tshe dang ldan pa gnyis khyed gnyis su la 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba zhes zer/ tshe dang ldan pa kun dga' bo dang / dge slong gnas brtan gnas brtan gang dag re lde ri la dong nas bdag cag bskrad pa'i las byas pa dag la'o/ /dge slong don nyung ngu dag ci'i phyir dge slong dag tshe dang ldan pa kun dga' bo dang dge slong gnas brtan gang dag re lde'i ri la dong nas bdag cag bskrad pa'i las byas par shes bzhin du de dag la 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba zhes zer zhing dge slong rnams la yang de skad ces tshe dang ldan pa dag 'di na/ dge slong kha cig 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba dag yin te/ 'di ltar ltung ba 'dra ba kho na las dge slong kha cig ni skrod par byed/ kha cig ni skrod par mi byed ces smod par byed/ phyar ka gtong bar byed/ kha zer bar byed pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag khyed kyis dge slong 'gro mgyogs dang nab so gnyis dang / gzhan yang de lta bu gang yin pa la bzhams te bsgo bar bya'o/ /'di skad ces bsgo bar bya ste/ tshe dang ldan pa 'gro mgyogs dang / nab so gnyis khyed tshe dang ldan pa kun dga' bo dang / dge slong gnas brtan gnas brtan gang dag re lde'i ri la dong nas khyed bskrad pa'i las byas par shes bzhin du de dag la 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba zhes ma zer cig /dge slong rnams la yang 'di skad ces tshe dang ldan pa dag 'di na dge slong kha cig 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba dag yin te/ 'di ltar ltung ba 'dra ba kho na las dge slong kha cig ni skrod par byed/ dge slong kha cig ni skrod par mi byed do zhes ma zer cig /de ci'i phyir zhe na/ dge slong de dag ni 'dun pas 'gro ba ma yin/ zhe sdang gis 'gro ba ma yin/ gti mug gis 'gro ba ma yin/ 'jigs pas 'gro ba ma yin gyi/ 'di ltar tshe dang ldan pa dag nyid khyim sun 'byin pa sdig pa'i chos kun du spyod pa dag yin te/ khyed kyis khyim dag sun phyung ba yang mthong zhing thos la rab tu shes/ khyod sdig pa'i kun du spyod par yang mthong zhing thos la rab tu shes pa'i phyir te/ tshe dang ldan pa dag 'dun pas 'gro ba zhes bya ba'i tshig gi lam dang / zhe sdang gis 'gro ba/ gti mug gis 'gro ba/ 'jigs pas 'gro ba zhes bya ba'i tshig gi lam 'di lta bu 'di thong shig ces bsgo bar bya'o/ /dge slong rnams kyis btsun pa bka' bzhin 'tshal zhes bcom ldan 'das kyi bka' mnyan nas/ dge slong 'gro mgyogs dang nab so gnyis la bzhams te bsgo'o/ /dge slong rnams kyis de gnyis la bzhams te bsgo yang gzhi de nyid la nan gyis mchog tu bzung zhing mngon par zhen nas/ de nyid bden gyi gzhan ni brdzun pa'o zhes rjes su tha snyad 'dogs par byed pa'i skabs de dge slong rnams kyis bcom ldan 'das la gsol ba dang / bcom ldan 'das kyis bka' stsal pa/ dge slong dag khyed kyis 'gro mgyogs dang nab so gnyis dang gzhan yang de lta bu gang yin pa la gsol ba dang bzhi'i las kyis bsgo bar bya'o/ /'di ltar bsgo bar bya ste/ gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas dge 'dun thams cad 'dug cing mthun par gyur pa la dge slong gcig gis gsol ba byas te las bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong 'gro mgyogs dang nab so 'di gnyis tshe dang ldan pa kun dga' bo dang dge slong gnas brtan gnas brtan gang dag re ldi'i ri la mchis nas/ 'di gnyis bskrad pa'i las bgyis par 'tshal bzhin du de dag la 'dun pas 'gro ba zhes mchi zhe sdang gis 'gro ba/ gti mug gis 'gro ba/ 'jigs pas 'gro ba zhes mchi zhing / dge slong rnams la yang 'di skad ces tshe dang ldan pa dag 'di na/ dge slong kha cig 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba dag yin te/ 'di ltar ltung ba 'dra ba kho na las dge slong kha cig ni skrod par byed/ kha cig ni skrod par mi byed do zhes mchi nas/ 'di gnyis la dge slong mang pos bzhams te bsgo na/ 'di gnyis la dge slong mang pos bzhams te bsgo yang gzhi de nyid la nan gyis mchog tu bzung zhing / mngon par zhen nas 'di nyid bden gyi gzhan ni brdzun pa'o zhes rjes su tha snyad 'dogs par bgyid na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong 'gro mgyogs dang nab so gnyis la/ tshe dang ldan pa 'gro mgyogs dang nab so gnyis khyed tshe dang ldan pa kun dga' bo dang / dge slong gnas brtan gnas brtan gang dag re lde ri la dong nas khyed bskrad pa'i las byas par shes bzhin du de dag la 'dun pas 'gro ba zhes ma zer cig / zhe sdang gis 'gro ba/ gti mug gis 'gro ba/ 'jigs pas 'gro ba zhes ma zer cig /dge slong rnams la yang 'di skad ces tshe dang ldan pa dag 'di na dge slong kha cig 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba dag yin te/ 'di ltar ltung ba 'dra ba kho na las dge slong kha cig ni skrod par byed/ kha cig ni skrod bar mi byed do zhes ma zer cig /de ci'i phyir zhe na/ dge slong de dag ni 'dun pas 'gro ba ma yin/ zhe sdang gis 'gro ba ma yin/ gti mug gis 'gro ba ma yin/ 'jigs pas 'gro ba ma yin gyi/ 'di ltar tshe dang ldan pa dag nyid khyim sun 'byin pa sdig pa'i chos kun du spyod pa dag yin te/ khyed kyis khyim dag sun phyung bar yang mthong zhing thos la rab tu shes/ khyed sdig pa'i chos kun du spyod pa yang mthong zhing thos la rab tu shes pa'i phyir te/ tshe dang ldan pa dge 'dun pas 'gro ba zhes bya ba'i tshig gi lam dang / zhe sdang gis 'gro ba dang / gti mug gis 'gro ba dang / 'jigs pas 'gro ba zhes bya ba'i tshig gi lam 'di lta bu 'di thong shig ces gsol ba dang bzhi'i las kyis bsgo ba mdzad do/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ dge slong 'gro mgyogs dang nab so 'di gnyis tshe dang ldan pa kun dga' bo dang dge slong gnas brtan gnas brtan gang dag re lde ri la mchis nas 'di gnyis bskrad pa'i las bgyis par 'tshal bzhin du de dag la 'dun pas 'gro ba zhes mchi/ zhe sdang gis 'gro ba/ gti mug gis 'gro ba/ 'jigs pas 'gro ba zhes mchi zhing / dge slong rnams la yang 'di skad ces tshe dang ldan pa dag 'di na dge slong kha cig 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba dag yin te/ 'di ltar ltung ba 'dra ba kho na las dge slong kha cig ni skrod par byed/ kha cig ni skrod par mi byed do zhes mchi nas/ 'di gnyis la dge slong mang pos bzhams te bsgo na/ 'di gnyis la dge slong mang pos bzhams te bsgo yang gzhi de nyid la nan gyis mchog tu bzung zhing mngon par zhen nas/ 'di nyid bden gyi gzhan ni brdzun pa'o zhes rjes su tha snyad 'dogs par bgyid de/ de'i slad du dge 'dun gyis dge slong 'gro mgyogs dang nab so gnyis la/ tshe dang ldan pa 'gro mgyogs dang nab so gnyis khyed tshe dang ldan pa kun dga' bo dang / dge slong gnas brtan gnas brtan gang dag re lde'i ri la dong nas/ khyed bskrad pa'i las byas par shes bzhin du de dag la 'dun pas 'gro ba'o zhes ma zer cig / zhe sdang gis 'gro ba/ gti mug gis 'gro ba/ 'jigs pas 'gro ba zhes ma zer cig /dge slong rnams la yang 'di skad ces tshe dang ldan pa dag 'di na dge slong kha cig 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba dag yin te/ 'di ltar ltung ba 'dra ba kho na las dge slong kha cig ni skrod par byed kha cig ni skrod par mi byed do zhes ma zer cig /de ci'i phyir zhe na/ dge slong de dag ni 'dun pas 'gro ba ma yin/ zhe sdang gis 'gro ba ma yin/ gti mug gis 'gro ba ma yin/ 'jigs pas 'gro ba ma yin gyi/ 'di ltar tshe dang ldan pa dag nyid khyim sun 'byin pa sdig pa'i chos kun du spyod pa dag yin te/ khyed gnyis kyis khyim dag sun phyung bar yang mthong zhing thos la rab tu shes/ khyod sdig pa can kun du spyod par yang mthong zhing thos la rab tu shes pa'i phyir te/ tshe dang ldan pa dag 'dun pas 'gro ba zhes bya ba'i tshig gi lam dang / zhe sdang gis 'gro ba/ gti mug gis 'gro ba/ 'jigs pas 'gro ba zhes bya ba'i tshig gi lam 'di lta bu 'di thong shig ces gsol ba dang bzhi'i las kyis bsgo ba mdzad na/ tshe dang ldan pa gang dag dge slong 'gro mgyogs dang nab so gnyis la gsol ba dang bzhi'i las kyis bsgo ba mdzad par bzod pa de dag ni cang ma gsung shig /gang dag mi bzod pa de dag ni gsungs shig /'di ni las brjod pa dang po ste/ de bzhin du lan gnyis lan gsum du bzlas/ dge 'dun gyis bzod cing gnang nas dge 'dun gyis dge slong 'gro mgyogs dang nab so gnyis la gsol ba dang bzhi'i las kyis bsgo ba mdzad lags te/ 'di ltar cang mi gsung bas de de bzhin du 'dzin to/ /dge slong rnams kyis btsun pa bka' bzhin 'tshal zhes bcom ldan 'das kyi bka' mnyan nas/ dge slong 'gro mgyogs dang nab so gnyis la gsol ba dang bzhi'i las kyis bsgo'o/ /gsol ba dang bzhi'i las kyis bsgo yang gzhi de nyid la nan gyis mchog tu bzung zhing mngon par zhen nas/ 'di nyid bden gyi gzhan ni brdzun pa'o zhes rjes su tha snyad 'dogs par byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang gleng gzhi 'di dang skabs 'di la dge slong gi dge 'dun bsdu ba mdzad de/ mkhyen bzhin du rmed pas 'gro mgyogs dang nab so gnyis la smras nas/ rnam grangs du mas smad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong rab tu mang po dag grong ngam grong rdal zhig na nye bar brten cing gnas par gyur la/ de dag kyang khyim sun 'byin pa sdig pa'i chos kun du spyod par gyur cing / de dag gis khyim dag sun phyung bar mthong ngam/ thos sam/ rab tu shes sam/ de dag sdig pa kun du spyod par mthong ngam thos sam rab tu shes na/ dge slong de dag la dge slong rnams kyis 'di skad ces tshe dang ldan pa dag khyim sun 'byin pa sdig pa'i chos kun du spyod pa dag yin te/ khyod kyis khyim dag sun phyung ba yang mthong zhing thos la rab tu shes/ khyed sdig pa'i chos kun du spyod par yang mthong zhing thos la rab tu shes kyi/ tshe dang ldan pa dag khyed cag 'di na gnas pas chog gi gnas 'di nas dengs shig ces bsgo bar bya'o/ /gal te de dag dge slong rnams la 'di skad ces tshe dang ldan pa dag 'di na dge slong kha cig 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba dag yin te/ 'di ltar ltung ba 'dra ba kho na las dge slong kha cig ni skrod par byed/ kha cig ni skrod par mi byed do zhes zer na/ dge slong de dag la dge slong rnams kyis 'di skad ces tshe dang ldan pa dag khyed cag 'di na dge slong kha cig 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba dag yin te/ 'di ltar ltung ba 'dra ba kho na las dge slong kha cig ni skrod par byed/ kha cig ni skrod par mi byed do zhes ma zer cig /de ci'i phyir zhe na/ dge slong de dag ni 'dun pas 'gro ba ma yin/ zhe sdang gis 'gro ba ma yin/ gti mug gis 'gro ba ma yin/ 'jigs pas 'gro ba ma yin gyi/ 'di ltar tshe dang ldan pa dag nyid khyim sun 'byin pa/ sdig pa'i chos kun du spyod pa dag yin te/ khyed nyid kyis khyim dag sun phyung bar yang mthong zhing thos la rab tu shes/ khyed sdig pa'i chos kun du spyod par yang mthong zhing thos la rab tu shes pa'i phyir te tshe dang ldan pa dge 'dun pas 'gro ba zhes bya ba'i tshig gi lam dang / zhe sdang gis 'gro ba dang / gti mug gis 'gro ba/ 'jigs pas 'gro ba zhes bya ba'i tshig gi lam 'di lta bu 'di thong shig ces bsgo bar bya'o/ /dge slong de dag la dge slong rnams kyis de skad ces bsgo ba na gal te gzhi de gtong na de lta na legs/ gal te mi gtong na gzhi de gtang bar bya ba'i phyir lan gnyis lan gsum du yang dag par bsgo bar bya yang dag par bstan par bya'o/ /lan gnyis lan gsum du yang dag par bsgo yang dag par bstan pa na gzhi de gtong na de lta na legs/ gal te mi gtong na dge 'dun lhag ma'o zhes bca' ba mdzad de/ yul ni mnyan yod/ gang zag ni 'gro mgyogs dang nab so gnyis/ nyon mongs pa ni rang skrod pa'i dge 'dun la log pa'i bsam pas 'dun pas 'gro ba'o zhes bya ba la sogs pas brdzun du smra ba/ nyes pa ni khyim sun 'byin pa'o/ /de la dge slong zhes bya ba ni 'gro mgyogs dang nab so dag gam/ gzhan yang de lta bu gang yin pa'o/ /rab tu mang po dag ces bya ba ni grangs su yang rung ba ste/ gnyis las lhag pa ni rab tu mang po dag go/ /grong ngam grong rdal zhig nas zhes bya ba ni re lde ri 'am gzhan yang de lta bu gang yin pa na'o/ /nye bar brten cing gnas par gyur la zhes bya ba ni chos dang zang zing gi longs spyod dag gis so/ /de dag kyang khyim sun 'byin pa zhes bya ba ni bram ze dang khyim bdag gi khyim dag go/ /sun 'byin pa zhes bya ba ni de dag rgyu gnyis kyis sun 'byin par byed de/ 'grogs pa dang longs spyod pas so/ /ji ltar 'grogs pas she na/ bud med dang lhan cig stan gcig la 'dug par byed/ snod gcig tu za bar byed/ phor bu gcig tu myos par 'gyur ba'i btung ba sna tshogs dag 'thung bar byed pas te de ltar 'grogs pas so/ /ji ltar longs spyod pas she na/ zas kyis dang / skom gyis dang / gos kyis dang / me tog gis dang / 'bras bus dang / so shing gis te/ de ltar longs spyod pas so/ /sdig pa'i chos kun du spyod par gyur cing zhes bya ba ni gnas ngan len kun du spyod par gyur cing ngo / /de dag gi khyim dag ces bya ba ni bram ze dang khyim bdag gi khyim dag go/ /sun phyung bar mthong ngam zhes bya ba ni mig gi rnam par shes pas so/ /thos sam zhes bya ba ni rna ba'i rnam par shes pas so/ /rab tu shes sam zhes bya ba ni de las gzhan pa'i rnam par shes pa'i tshogs dag gis so/ /de dag gis sdig pa kun du spyod par zhes bya ba ni gnas ngan len kun du spyod par ro/ /mthong ngam/ thos sam rab tu shes na zhes bya ba ni snga ma bzhin no/ /dge slong de dag la zhes bya ba ni 'gro mgyogs dang nab so gnyis dang gzhan yang de lta bu gang dag yin pa de dag la'o/ /dge slong rnams kyis zhes bya ba ni chos 'di pa rnams kyis so/ /'di skad ces tshe dang ldan pa dag khyim sun 'byin pa sdig pa'i chos kun du spyod pa dag yin te/ khyed kyis khyim dag sun phyung bar yang mthong zhing thos la rab tu shes khyed sdig pa kun du spyod par yang mthong zhing thos la rab tu shes kyi tshe dang ldan pa dag khyed cag gnas 'di na gnas pas chog gi gnas 'di nas dengs shig ces bsgo bar bya'o zhes bya ba ni glengs nas ltung ba mthong ba'i 'og tu bskrad pa'i las ji skad sngar bstan pa ltar bskrad pa'i las bya'o/ /gal te de dag dge slong rnams la 'di skad ces tshe dang ldan pa dag 'di na dge slong kha cig 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba dag yin te/ 'di ltar ltung ba 'dra ba kho na las/ dge slong kha cig ni skrod par byed/ kha cig ni skrod par mi byed do zhes zer na zhes bya ba ni nyon mongs pa'i dbang gis rang skrod par byed pa'i dge 'dun la log pa'i bsam pas 'dun pas 'gro ba zhes bya ba la sogs pas brdzun du smra ba de skad zer na'o/ /dge slong de dag la zhes bya ba ni 'gro mgyogs dang nab so gnyis dang gzhan yang de lta bu gang dag yin pa de dag la'o/ /dge slong rnams kyis zhes bya ba ni chos 'di pa rnams kyis so/ /'di skad ces tshe dang ldan pa dag khyed 'di na dge slong kha cig 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba dag yin te/ 'di ltar ltung ba 'dra ba kho na las dge slong kha cig ni skrod par byed/ kha cig ni skrod par mi byed do zhes ma zer cig /de ci'i phyir zhe na/ dge slong de dag ni 'dun pas 'gro ba ma yin/ zhe sdang gis 'gro ba ma yin/ gti mug gis 'gro ba ma yin/ 'jigs pas 'gro ba ma yin gyi/ 'di ltar tshe dang ldan pa dag nyid khyim sun 'byin pa/ sdig pa'i chos kun du spyod pa dag yin te/ khyed nyid kyis khyim dag sun phyung bar yang mthong zhing thos la rab tu shes/ khyed sdig pa kun du spyod par yang mthong zhing thos la rab tu shes pa'i phyir te/ tshe dang ldan pa dge 'dun pas 'gro ba zhes bya ba'i tshig gi lam dang / zhe sdang gis 'gro ba/ gti mug gis 'gro ba/ 'jigs pas 'gro ba zhes bya ba'i tshig gi lam 'di lta bu 'di thong shig ces bsgo bar bya'o zhes bya ba ni bzhams te bsgo ba ji skad sngar bstan pa ltar bsgo bar bya'o/ /dge slong de dag la dge slong rnams kyis de skad bsgo ba na zhes bya ba ni/ bzhams te bsgo ba na'o/ /gal te gzhi de gtong na zhes bya ba ni lta ba de yongs su gtong na'o/ /de lta na legs zhes bya ba ni de lta na bzang ba ste/ rtsoms pa'i nyes byas gcig byung bar zad kyi nyes pa sbom po yang ma byung ba'i phyir ro/ /gal te mi gtong na zhes bya ba ni yongs su mi gtong na ste/ de ltar bzhams te bsgo ba mi gtong na/ rtsom pa la nyes byas gcig dang / bzhams te bsgo ba ma btang ba'i mthar nyes pa sbom po gcig kyang 'byung ngo / /gzhi de gtang bar bya ba'i phyir lan gnyis lan gsum du yang dag par bsgo bar bya yang dag par bstan par bya'o zhes bya ba ni gsol ba dang bzhi'i las kyis bsgo ba ji skad sngar bstan pa ltar bsgo bar bya ste/ yang dag par bsgo ba ni de yin/ yang dag par bstan pa ni de yin no/ /lan gnyis lan gsum du zhes bya ba ni gsol ba gcig byas pa'i 'og tu las brjod pa gsum bya ba'o/ /yang dag par bsgo ba ni kun du dri ba'o/ /yang dag par bstan pa ni khyim sun 'byin pa las bzlog pa'o/ /lan gnyis lan gsum du yang dag par bsgo/ yang dag par bstan pa ni gzhi de gtong na de lta na legs zhes bya ba ni de ltar na bzang ba ste/ dge 'dun lhag ma'i dngos gzhi'i ltung ba ma byung ba'i phyir ro/ /sngar ni sbyor ba brtsams pa la nyes byas gcig go/ /bzhams te bsgo ba ma btang ba'i mthar nyes pa sbom po gcig go/ /gsol ba byas pa rdzogs pa'i mthar yang nyes pa sbom po gcig go/ /las brjod pa dang po byas pa rdzogs pa'i mthar yang nyes pa sbom po gcig go/ /las brjod pa gnyis pa byas pa rdzogs pa'i mthar yang nyes pa sbom po gcig go/ /gal te mi gtong na dge 'dun lhag ma'o zhes bya ba ni las brjod pa gsum pa dang / mjug sdud pa rdzogs pa'i mthar dge 'dun lhag ma'i dngos gzhi gcig 'byung ba'o/ /dge 'dun lhag ma'o zhes bya ba ni snga ma bzhin te/ des na dge 'dun lhag ma'o zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang sbyor ba'i sbyor bas ltung ba rnam par gzhag pa dang ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la sngar dge 'dun gyi dbyen byed pa dang / de'i rjes su phyogs pa dang / khyim sun 'byin pa dang / bka' blo mi bde ba zhes bya ba dge 'dun lhag ma tha ma bzhi po rnams kyis spyi'i thun mong gi mtshan nyid ji skad bstan pa thams cad dran par byas nas/ 'dir khyim sun 'byin pa'i dge 'dun lhag ma'i dngos gzhi'i ltung ba rnam par gzhag pa bshad par bya ste/ ci zhig byas na khyim sun 'byin pa'i dge 'dun lhag mar 'gyur zhe na/ rang skrod par byed pa'i dge 'dun la log pa'i bsam pas de de la de ltar zhugs so zhes brdzun du smra ba nyid mi gtong na dge 'dun lhag mar 'gyur ro/ /de'i bye brag ni khyim sun 'byin par byed pa'i dge slong la gleng ba pos glengs shing mthun pa byin te skabs 'byed pa la glengs nas ltung ba mthong ngo zhes zer ba la skrod pa'i las byas nas khyim sun 'byin par byed pa'i dge slong rang skrod par byed pa'i dge 'dun la log pa'i bsam pas 'dun pa dang / zhe sdang dang / gti mug dang / 'jigs pa'i dbang gis dge 'dun de bdag skrod pa'i las gang yin pa de la 'dun pas 'gro ba la sogs pas 'di ltar ltung ba 'dra ba kho na las/ dge slong kha cig ni skrod par byed/ kha cig ni skrod par mi byed pa de ltar zhugs so zhes brdzun du smra ba nyid la dge 'dun gyis bzhams te bsgo ba dang / gsol ba dang / bzhi'i las kyis bzlog pa na las brjod pa gsum pa mjug sdud pa dang bcas pa rdzogs pa'i mthar mi gtong na dge 'dun lhag ma'i dngos gzhir 'gyur ro/ /dge slong 'gro ba gzhan gyi rnam pa bstan pa na dge slong gi 'du shes yod pa la na smad pa med do/ /dngos po bzang ngan dang 'dra ba lan smad pa med do/ /mtshan gyur pa ltung ba thun mong gi yul la na smad pa med do/ /'gro ba gzhan las skyes pa dang / 'gro ba gzhan gyi rnam pa bsten pa la na smad pa med do/ /gnas skabs gzhan thob pa la na smad pa med do/ /gzhi gcig la bslab pa du ma bcas pa nyid la na smad pa med do/ /dngos po la the tshom za bas bsam pa dang bcas par zhugs pa la na smad pa med do/ /yul bsams pa dang ma bsams pa la na smad pa med do/ /rang dang gzhan gyi don du byed pa la na smad pa med do/ /'di'i byed pa po ni khyim sun 'byin pa dang bskrad pa'i las byas pa'o/ /'di la yan lag drug gis dngos gzhi'i ltung bar 'gyur te/ khyim sun 'byin pa dang / gleng ba dang / bskrad pa dang rang skrod pa'i dge 'dun la log pa'i bsam pas de de la de ltar zhugs so zhes brdzun du smra ba nyid dang / chos dang mthun pas bzlog pa dang / las brjod pa gsum pa'i mthar mi gtong ba'o/ /de dag las yan lag ma tshang na ci rigs par na smad do/ / sbyor ba'i ltung ba ni bzhams te bsgo bas bzlog pa na mi gtong na nyes pa sbom po'o/ /gsol bas bzlog pa na mi gtong na nyes pa sbom po'o/ /las brjod pa dang pos bzlog pa na mi gtong na nyes pa sbom po'o/ /las brjod pa gnyis pas bzlog pa na mi gtong na nyes pa sbom po'o/ / dang po rtsom pa ma gtogs pa gleng ba dang bskrad pa'i las byas pa phyin chad kyi 'jug pa ni sbyor ba nyid de nyes pa sbom po'o/ /khyim pa dang mi ma yin pa'i 'gro ba la nyes pa sbom po'o/ /khyim pa rang bzhin nyams pa dang brda mi phrad pa la nyes pa sbom po'o/ /dge slong mi ma yin pa'i 'gro ba'i rnam pa bsten pa na dge slong gi 'du shes med pa la nyes pa sbom po'o/ /sbyor ba'i sbyor ba'i ltung ba ni dge slong gis cung zad ji tsam du dge slong de dag gis bdag nyid bskrad pa'i las byas par shes bzhin du de dag la 'dun pas 'gro ba/ zhe sdang gis 'gro ba/ gti mug gis 'gro ba/ 'jigs pas 'gro ba zhes zer na thams cad du nyes byas su 'gyur ro/ /sbyor ba'i ltung ba la sbyor ba tha dad pa ji snyed byas pa re re la nyes byas re rer 'gyur ro/ /gleng ba dang bskrad pa ma byas pa'i tshe na 'dun pas 'gro ba zhes bya ba la sogs pa zer ba yang nyes byas so/ /khyim pa dud 'gro la yang nyes byas so/ /'di la sngar gleng ba dang bskrad pa ma byas par bzlog pa'i cho ga dang las byed na cho ga las 'das pa'i las mi 'chags par byed pa yin pas/ byed pa po'i dge 'dun la yang 'gal tshabs can du 'gyur ro/ /ltung ba med pa ni mi mthun pa dang / chos ma yin pas bsgo bar byed na ltung ba med do/ /mthun pa dang chos gcig yod gcig med pas bsgo bar byed na ltung ba med do/ /mthun pa ltar bcos pa dang / chos ltar bcos pas bsgo bar byed na ltung ba med do/ /chos dang mthun pa dang ston pa ji lta ba bzhin ma yin pas bsgo bar byed na ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni yul thams cad la gnas skabs thams cad du khyim sun 'byin pa'i sdig pa'i chos kun du spyod pa'i sbyor ba'i sbyor ba nyes byas dang / sbyor ba sbom po dang / dngos gzhir 'gyur ba rnam pa thams cad mi bsten par bslab par bya'o/ /bsgo ba las gyur pa'i dge 'dun lhag ma byung ma thag tu stan de nyid la 'dug bzhin du mthol bar bya'o/ /gzhi des ma bshags shing so sor bshags par gsol ba dang / gsol ba dang gnyis dang / gsol ba dang bzhi'i las thams cad nyams su myong bar mi bya'o/ /phyir bcos pa ni 'og nas ston to/ /khyim sun 'byin pa'i dge 'dun lhag ma ste bcu gnyis pa bshad zin to// //bka' blo mi bde ba'i dge 'dun lhag ma'i gleng gzhi ni/ sangs rgyas bcom ldan 'das kau shAm+bI na gdangs can gyi kun dga' ra ba na bzhugs so/ /de'i tshe na tshe dang ldan pa 'dun pa ltung ba byung ba chos bzhin du phyir mi byed nas/ de la dge slong don 'dod pa phan par 'dod pa bde bar 'dod pa bde ba la reg par 'dod pa/ grub pa dang bde bar 'dod pa rnams kyis tshe dang ldan pa 'dun pa khyod ltung ba byung ba de dag chos bzhin du phyir gyis shig ces gleng bar byed dran par byed pa na/ des smras pa su la ltung ba byung ba de phyir byed par 'gyur ro/ /khyod la ltung ba byung na su zhig phyir byed par 'gyur/ su la ltung ba byung ba de phyir 'gyod par 'gyur ba'o/ / khyod la ltung ba byung ba la su 'gyod par 'gyur/ de la dge slong rnams kyis phyir zhing phyir zhing smras pa na de 'thur zhing smras pa/ tshe dang ldan pa dag khyed cag dge yang rung snyig kyang rung bdag la ci yang ma smra shig /bdag kyang dge yang rung sdig kyang rung tshe dang ldan pa dag la ci yang mi smra'i/ tshe dang ldan pa dag gis bdag la tshig gi lam thong shig /khyed la bdag gis smras pas ci zhig bya/ 'di ltar khyed cag ni rigs sna tshogs dang / rus sna tshogs dang / khyim sna tshogs nas rab tu byung ba dag yin te/ 'di lta ste/ dper na shing ljon pa dag gi lo ma sna tshogs rlung gis lhags pa dag gcig tu ltung zhing gcig tu 'dus pa bzhin du/ kho bo'i 'phags pa sangs rgyas bcom ldan 'das kyis ni byang chub thugs su chud pa yin te/ khyed dang kho bo mi 'das kho bo la ci yang ma zer cig ces zer nas/ dge slong don nyung ngu dag ci'i phyir dge slong dag dge slong rnams kyis gdon par gtogs pa bslab pa'i gzhi rnams dang / bde bar gshegs pa'i mdor gtogs pa rnams kyis chos dang mthun pa dang 'dul ba dang mthun par smras pa na/ bdag nyid brjod par bya ba ma yin par byed ces smod par byed/ phyar ka gtong bar byed/ kha zer bar byed pa'i skabs de dge slong rnams kyis bcom ldan 'das la gsol ba dang / bcom ldan 'das kyis bka' stsal pa/ dge slong dag khyed kyis dge slong 'dun pa dang gzhan yang de lta bu gang yin pa la bzhams te bsgo bar bya'o/ /'di skad ces bsgo bar bya ste/ tshe dang ldan pa 'dun pa khyod dge slong rnams kyis gdon par gtogs pa bslab pa'i gzhi rnams dang bde bar gshegs pa'i mdor gtogs pa rnams kyis chos dang mthun pa dang 'dul ba dang mthun par smras pa na/ bdag nyid brjod par bya ba ma yin par ma byed par tshe dang ldan pas bdag nyid brjod par bya ba kho nar gyis shig /dge slong rnams tshe dang ldan pa 'dun pa la chos dang mthun pa dang 'dul ba dang mthun par smra na/ tshe dang ldan pa yang dge slong rnams la chos dang mthun pa dang / 'dul ba dang mthun par smros shig / 'di lta ste/ gcig la gcig brjod par bya ba nyid du byed pa dang gcig la gcig 'doms shing rjes su ston pa dang / gcig gis gcig ltung ba las slong ba nyid de lta bus bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de'i 'khor 'di 'phel bar 'gyur gyis/ tshe dang ldan pa 'dun pa khyod bdag nyid brjod par bya ba ma yin par byed pa'i las kyi mtha' 'di lta bu 'di thong shig ces bsgo bar bya'o/ /dge slong rnams kyis btsun pa bka' bzhin 'tshal zhes bcom ldan 'das kyi bka' mnyan nas/ tshe dang ldan pa 'dun pa la bzhams te bsgo'o/ /de la dge slong rnams kyis bzhams te bsgo ba na gzhi de nyid la nan gyis mchog tu bzung zhing mngon par zhen nas 'di nyid bden gyi gzhan ni brdzun pa'o zhes rjes su tha snyad 'dogs par byed pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag khyed kyis dge slong 'dun pa dang gzhan yang de lta bu gang yin pa la gsol ba dang bzhi'i las kyis bsgo bar bya'o/ /'di ltar bsgo bar bya ste/ gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas/ dge 'dun thams cad du 'dug cing mthun par gyur pa la dge slong gcig gis gsol ba byas te las bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong 'dun pa 'di ltung ba byung ba chos bzhin du slar mi bgyid nas/ 'di la dge slong rnams kyis gdon par gtogs pa'i bslab pa'i gzhi rnams dang / bde bar gshegs pa'i mdor gtogs pa rnams kyis chos dang mthun pa dang / 'dul ba dang mthun par smras pa na/ tshe dang ldan pa dag khyed cag dge yang rung sdig kyang rung / bdag la ci yang ma smra shig /bdag kyang dge yang rung sdig kyang rung tshe dang ldan pa dag la ci yang mi smra'o/ /tshe dang ldan pa dag gis bdag la tshig gi lam thong shig /khyed la yang bdag gis smras pas ci zhig bya zhes bdag nyid brjod par bgyi ba ma lags par bgyid nas/ 'di la dge slong mang pos bzhams te bsgo yang gzhi de nyid la nan gyis mchog tu bzung zhing mngon par zhen nas/ 'di nyid bden gyi gzhan ni brdzun pa'o zhes rjes su tha snyad 'dogs par bgyid na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong 'dun pa la tshe dang ldan pa 'dun pa khyod dge slong rnams kyis gdon par gtogs pa bslab pa'i gzhi rnams dang bde bar gshegs pa'i mdor gtogs pa rnams kyis chos dang mthun pa dang 'dul ba dang mthun par smras pa na/ bdag nyid brjod par bya ba ma yin par ma byed par tshe dang ldan pas bdag nyid brjod par bya ba kho nar gyis shig /dge slong rnams kyis tshe dang ldan pa la chos dang mthun pa dang 'dul ba dang mthun par smra ba na/ tshe dang ldan pa yang dge slong rnams la chos dang mthun pa dang / 'dul ba dang mthun par smos shig /'di lta ste/ gcig la gcig brjod par bya ba nyid du byed pa dang / gcig la gcig 'doms shing rjes su ston pa dang / gcig gis gcig ltung ba las slong ba nyid de lta bus bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de'i 'khor 'di 'phel bar 'gyur gyis/ tshe dang ldan pa 'dun pa khyod bdag nyid brjod par bya ba ma yin par byed pa'i las kyi mtha' 'di lta bu 'di thong shig ces gsol ba dang bzhi'i las kyis bsgo ba mdzad do/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ dge slong 'dun pa 'di ltung ba byung ba chos bzhin du slar mi bgyid nas/ 'di ltar dge slong rnams kyis gdon bar gtogs pa bslab pa'i gzhi rnams dang bde bar gshegs pa'i mdor gtogs pa rnams kyis chos dang mthun pa dang / 'dul ba dang mthun par smras pa na/ tshe dang ldan pa dag khyed cag dge yang rung sdig kyang rung bdag la ci yang ma smra shig /bdag kyang dge yang rung sdig kyang rung tshe dang ldan pa dag la ci yang mi smra'o/ /tshe dang ldan pa dag gis bdag la tshig gi lam thong shig /khyed la yang bdag gis smras pas ci zhig bya zhes bdag nyid brjod par bgyi ba ma lags par bgyid nas/ 'di la dge slong rnams kyis bzhams te bsgo na 'di la dge slong rnams kyis bzhams te bsgo ba yang gzhi de nyid la nan gyis mchog tu bzung zhing mngon par zhen nas/ 'di nyid bden gyi gzhan ni brdzun pa'o zhes rjes su tha snyad 'dogs par bgyid de/ de'i slad du dge 'dun gyis dge slong 'dun pa la tshe dang ldan pa 'dun pa khyod dge slong rnams kyis gdon par gtogs pa bslab pa'i gzhi rnams dang / bde bar gshegs pa'i mdor gtogs pa rnams kyis chos dang mthun pa dang / 'dul ba dang mthun par smras pa na/ bdag nyid brjod par bya ba ma yin par ma byed par tshe dang ldan pas bdag nyid brjod par bya ba kho nar gyis shig /dge slong rnams tshe dang ldan pa la chos dang mthun pa dang / 'dul ba dang mthun par smra ba na/ tshe dang ldan pa yang dge slong rnams la chos dang mthun pa dang 'dul ba dang mthun par smros shig /'di ltar gcig la gcig brjod par bya ba nyid du byed pa dang / gcig la gcig 'doms shing rjes su ston pa dang / gcig gis gcig ltung ba las slong ba nyid de lta bus bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de'i 'khor 'di 'phel bar 'gyur gyi/ /tshe dang ldan pa 'dun pa khyod bdag nyid brjod par bya ba ma yin par byed pa'i las kyi mtha' 'di lta bu 'di thong shig ces gsol ba dang bzhi'i las kyis bsgo ba mdzad na tshe dang ldan pa gang dag dge slong 'dun pa la gsol ba dang bzhi'i las kyis bsgo bar mdzad par bzod pa de dag ni cang ma gsung shig / gang dag mi bzod pa de dag ni gsungs shig /'di ni las brjod pa dang po ste/ de bzhin du lan gnyis lan gsum du bzlas/ dge 'dun gyis bzod cing gnang nas dge 'dun gyis dge slong 'dun pa la gsol ba dang bzhi'i las kyis bsgo ba mdzad lags te/ 'di ltar cang mi gsung bas de de bzhin du 'dzin to/ /dge slong rnams kyis btsun pa bka' bzhin 'tshal zhes bcom ldan 'das kyi bka' mnyan nas dge slong 'dun pa la gsol ba dang bzhi'i las kyis bsgo'o/ /gsol ba dang bzhi'i las kyis bsgo ba na de gzhi de nyid la nan gyis mchog tu bzung zhing mngon par zhen nas 'di nyid bden gyi gzhan ni brdzun pa'o zhes rjes su tha snyad 'dogs par byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ mkhyen bzhin du tshe dang ldan pa 'dun pa la smras nas/ rnam grangs du mas smad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste 'di na dge slong 'ga' zhig bka' blo mi bde ba'i rang bzhin can du gyur la/ de la dge slong rnams kyis gdon par gtogs pa'i bslab pa'i gzhi rnams dang bde bar gshegs pa'i mdor gtogs pa rnams kyis chos dang mthun pa dang 'dul ba dang mthun par smras pa na/ tshe dang ldan pa dag khyed cag dge yang rung sdig kyang rung ba dag la ci yang ma smra shig / bdag kyang dge yang rung sdig kyang rung tshe dang ldan pa dag la ci yang mi smra'o/ /tshe dang ldan pa dag gis bdag la tshig gi lam thong shig /khyed la yang bdag gis smras pas ci zhig bya zhes bdag nyid brjod par bya ba ma yin par byed na/ dge slong de la dge slong rnams kyis 'di skad ces tshe dang ldan pa khyod dge slong rnams kyis gdon par gtogs pa bslab pa'i gzhi rnams dang / bde bar gshegs pa'i mdor gtogs pa rnams kyis chos dang mthun pa dang 'dul ba dang mthun par smras pa na/ bdag nyid brjod par bya ba ma yin par mi byed par tshe dang ldan pas bdag nyid brjod par bya ba kho nar gyis shig / dge slong rnams tshe dang ldan pa la chos dang mthun pa dang 'dul ba dang mthun par smra ba na/ tshe dang ldan pa yang dge slong rnams la chos dang mthun pa dang / 'dul ba dang mthun par smros shig /'di lta ste/ gcig la gcig brjod par bya ba nyid du byed pa dang / gcig la gcig 'doms shing rjes su ston pa dang / gcig gis gcig ltung ba las slong ba nyid de lta bus bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de'i 'khor 'di 'phel bar 'gyur gyi tshe dang ldan pa khyod bdag nyid brjod par bya ba ma yin par byed pa'i las kyi mtha' 'di lta bu 'di thong shig ces bsgo bar bya'o/ /dge slong de la dge slong rnams kyis de skad bsgo ba na gal te gzhi de gtong na de lta na legs/ gal te mi gtong na gzhi de gtang bar bya ba'i phyir lan gnyis lan gsum du yang dag par bsgo bar bya yang dag par bstan par bya/ lan gnyis lan gsum du yang dag par bsgo yang dag par bstan pa na gzhi de gtong na de lta na legs/ gal te mi gtong na dge 'dun lhag ma'o zhes bca' ba mdzad de/ yul ni kau shAm+bI/ gang zag ni 'dun pa/ nyon mongs pa ni gleng bar mi 'dod pa/ nyes ba ni bka' blo mi bde ba'o/ /de la 'di na dge slong 'ga' zhig ces bya ba ni 'dun pa'am gzhan yang de lta bu gang yin pa'o/ /bka' blo mi bde ba'i rang bzhin can du gyur pa la zhes bya ba la/ bka' blo mi bde ba zhes bya ba ni tshig gi lam rjes su mthun pa rjes su mnyan par bya ba/ tshul dang mthun pa/ drang por 'jug pa/ 'grus skyong gi yan lag gi tshogs kun du 'gog pa dang / mi 'dzin pa dang / mi bya ba dang / mi byed pa dang / mi mthun par 'dzin pa'o/ /de la zhes bya ba ni 'dun pa'am gzhan yang de lta bu gang yin pa la'o/ /dge slong rnams kyis zhes bya ba ni chos 'di pa rnams kyis so/ /gdon par gtogs pa bslab pa'i gzhi rnams zhes bya ba ni so sor thar pa'i mdo gdon pa rnam pa bzhi po dag tu gtogs pa ste/ pham par 'gyur ba gdon pa dang / dge 'dun lhag ma gdon pa dang / ma nges pa gdon pa dang / ril gyis gdon par gtogs pa'i bslab pa'i gzhi pham par 'gyur ba'i chos bzhi dang / dge 'dun lhag ma'i chos bcu gsum dang / ma nges pa'i chos gnyis dang / spang ba'i ltung byed kyi chos sum cu dang / ltung byed kyi chos dgu bcu dang / so sor bshags par bya ba'i chos bzhi dang / bslab pa'i chos mang po dang / rtsod pa zhi bar bya ba'i chos bdun po dag go/ /bde bar gshegs pa'i mdor gtogs pa rnams kyis zhes bya ba ni so sor thar pa'i mdo ril gyis gdon par gtogs pa rnams kyis te/ bde bar gshegs pa zhes bya ba ni ston pa'o/ /mdo zhes bya ba ni des nges par sbyar ba'i mdo'am/ yang na mdo yang dag par sbyor ba'o/ /chos dang mthun pa dang zhes bya ba ni chos kyi rjes su 'gro ba ste/ mdo sde dang ma mo dang mthun pa'o/ /'dul ba dang mthun par zhes bya ba ni 'dul ba'i rjes su 'gro ba ste/ 'dul ba nyid dang mthun par ro/ /smras pa na zhes bya ba ni bzlog pa na ste/ chos ji lta ba dang 'dul ba ji lta ba dang ston pa'i bstan pa ji lta ba de ltar bsgo ba na'o/ /tshe dang ldan pa dag khyed cag dge yang rung sdig kyang rung bdag la ci yang ma smra shig ces bya ba ni dge ba la sbyor bar yang ma byed la/ sdig pa las bzlog par yang ma byed cig ces pa'o/ /bdag kyang dge yang rung sdig kyang rung tshe dang ldan pa dag la ci yang mi smra'o zhes bya ba ni dge ba la sbyor bar yang mi byed la sdig pa las bzlog par yang mi byed do zhes pa'o/ /tshe dang ldan pa dag gis bdag la tshig gi lam thong shig /khyed la yang bdag gis smras pas ci zhig bya zhes bya ba ni rgya cher bdag nyid brjod par bya ba ma yin pa nyid du 'jog par byed pa'o/ /bdag nyid brjod par bya ba ma yin pa nyid du byed na zhes bya ba ni bdag nyid gleng bar bya ba ma yin pa nyid du 'jog par byed na'o/ /de dag ni re zhig ltung ba 'byin pa la dge slong rnams kyis gleng ba dang dran par byas pa na bka' blo mi bde ba'i rang bzhin ston pa yin no/ /de la gleng ba ni phyogs gcig tu gyur pa gleng ba yin no/ /dran par bya ba ni yongs su rdzogs par dran par bya ba'o/ /de'i rim pa ni gal te gleng bar bya ba de'i ltung ba shes pa'i dge slong du ma yod pa nyid yin na de lta gleng ba dang dran par bya ba la sogs pa la de dag la rgan rims kyis 'jug par bya bar ma nges kyi gang gleng bar 'dod pa gcig gis ci dgar gleng bar bya'o/ / gleng ba po des kyang dus ma yin par gleng bar mi bya'o/ /dran pa dang shes bzhin nye bar ma bzhag par gleng bar mi bya'o/ /dben pa'i mtha' ma yin par gleng bar mi bya'o/ /skabs 'byed du ma bcug par gleng bar mi bya'o/ /de ltar gleng ba la yang gzhi dang bcas pas gleng bar bya'i/ gzhi med pas gleng bar mi bya ste/ de la gzhi dang bcas pa ni mthong ba'am/ thos pa'am/ dogs pa'i gzhi legs par gleng ba'o/ /gzhi med pa ni de las bzlog pa dang / lha'i mig dang lha'i rna ba dang / gzhan gyi sems shes pa la sogs pa mi'i chos bla mar gyur pa'o/ / de ltar gzhi dang bcas pas glengs pa na mi dran pa dran par bya ste/ yul dang dus dang gzhi gang las ltung ba gang byung ba gleng ba pos ji ltar mthong ba'am thos pa'am/ dogs pa'i sgo nas dran par bya ba'o/ /de ltar glengs shing dran par byas pa na skabs 'byed par mi byed na de la brjod pa dang bcas pa nyid bya ste/ tshe dang ldan pa khyod la brjod pa dang bcas pa nyid byas khyod kyis gnas 'di nas ma zhus par 'gro bar mi bya'o/ /kho bo la tshe dang ldan pa la brjod par bya ba'i phyir dogs pa yod do zhes brjod pa dang bcas pa nyid bya'o/ /des skabs 'byed par mi byed na mi gdams pa nyid du bya ste/ de la gdams ngag dang rjes su bstan pas phan gdags par mi bya'o/ /des kyang skabs 'byed par mi byed na/ de la gtam 'dre ba la sogs pa yang bzlog par bya ste/ de la gtam 'dre ba dang phebs par smra ba dang / so sor kun dga' bar bya ba'i tha snyad kyi tshig sbyin par yang mi bya'o/ /de lta na yang skabs 'byed par mi byed na/ de la gso sbyong gzhag par bya ste/ gso sbyong gi dus su de la gsol ba dang bzhi'i las kyis de'i gso sbyong gzhag par bya'o/ /gso sbyong gzhag pa'i cho ga dang las ni 'di ltar bya ste/ dge 'dun gyis tshes bcu bzhi'am bco lnga'i gso sbyong gi dus su dge 'dun tshogs pa'i mdun du gang zag de bkug ste/ dge slong gcig gis gsol ba byas te las bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong ming 'di zhes bgyi ba 'di glengs shing dran par bgyis kyang skabs 'byed du mi btub ste/ 'di dge slong rnams kyis smra bar mi bgyi ba nyid du rnam par gzhag cing mi gdams par bgyis kyang skabs mi 'byed na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong ming 'di zhes bgyi ba'i gso sbyong gzhag par bgyi'o/ /'di ni gsol ba'o/ /las ni 'di ltar bya ste dge 'dun btsun pa rnams gsan du gsol/ dge slong ming 'di zhes bgyi ba 'di glengs shing dran par bgyis kyang skabs 'byed du mi btub ste/ 'di dge slong rnams kyis smra bar mi bgyi ba nyid du rnam par gzhag cing / mi gdams par bgyis kyang skabs mi 'byed do/ /de'i slad du dge 'dun gyis dge slong ming 'di zhes bgyi ba'i gso sbyong gzhag par bgyi na/ tshe dang ldan pa gang dag dge slong ming 'di zhes bgyi ba'i gso sbyong gzhag par bzod pa de dag ni cang ma gsung shig / gang dag mi bzod pa de dag ni gsungs shig /'di ni las brjod pa dang po ste/ de bzhin du lan gnyis lan gsum du bzlas/ dge 'dun gyis bzod cing gnang nas dge 'dun gyis dge slong ming 'di zhes bgyi ba'i gso sbyong gzhag lags te/ 'di ltar cang mi gsung bas de de bzhin du 'dzin to/ /gso sbyong gzhag par zhes bya ba ni gang zag 'di 'dug pa dang lhan cig dge slong rnams kyis gso sbyong mi bya'o zhes bya ba yin par rig par bya'o/ /de lta na yang skabs 'byed par mi byed na/ de la dgag dbye gzhag par bya ste/ dgag dbye'i dus su de la gsol ba dang bzhi'i las kyis de'i dgag dbye gzhag par bya'o/ /dgag dbye gzhag pa'i cho ga dang las ni 'di ltar bya ste/ dge 'dun gyis dbyar snga ma'am phyi ma'i dgag dbye'i dus su dge 'dun tshogs pa'i mdun du gang zag de bkug ste/ dge slong gcig gis gsol ba byas te las bya'o/ /'di ltar bya ste 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong ming 'di zhes bya ba 'di glengs shing dran par bgyis kyang skabs 'byed du mi btub ste/ 'di dge slong rnams kyis smra bar mi bgyi ba nyid du rnam par gzhag cing / mi gdams par bgyis kyang skabs mi 'byed na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong ming 'di zhes bgyi ba'i dgag dbye gzhag par bgyi'o/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ dge slong ming 'di zhes bgyi ba 'di glengs shing dran par bgyis kyang skabs 'byed par mi btub ste/ 'di dge slong rnams kyis smra bar mi bgyi ba nyid du rnam par gzhag cing / mi gdams par bgyis kyang skabs mi 'byed de de'i slad du dge 'dun gyis dge slong ming 'di zhes bgyi ba'i dgag dbye gzhag par bgyi na/ tshe dang ldan pa gang dag dge slong ming 'di zhes bgyi ba'i dgag dbye gzhag par bzod pa de dag ni cang ma gsung shig / gang dag mi bzod pa de dag ni gsungs shig /'di ni las brjod pa dang po ste/ de bzhin du lan gnyis lan gsum du bzlas/ dge 'dun gyis bzod cing gnang nas dge 'dun gyis dge slong ming 'di zhes bgyi ba dgag dbye gzhag lags te/ 'di ltar cang mi gsung bas de de bzhin du 'dzin to/ /dgag dbye gzhag pa zhes bya ba ni gang zag 'di 'dug pa dang lhan cig dge slong rnams kyis dgag dbye mi bya'o zhes bya ba yin par rig par bya'o/ /skabs phye ba nyid na gal te mnyen pa nyid ma yin na phur pa dang bcas pa bya ste/ gnas 'di'am gzhan du'am/ gzhi 'di'am gang yang rung ba la ji 'dod pa smra bar bya'o zhes bya ba dang / de la ltung ba bkal cing nyes pa bstan te btang bas rta rmu rgod rtod phur la btags pa bzhin du phur pa dang bcas pa bya'o/ / de ltar gzhi dang bcas pas tshul khrims dang / lta ba dang cho ga dang / 'tsho ba nyams pa gleng ba dang / dran pa dang / skabs 'byed du gzhug pa dang / brjod pa dang bcas pa nyid dang / mi gdams pa nyid dang / gtam 'dre bar mi byed pa dang / gso sbyong gzhag pa dang / dgag dbye gzhag pa dang / phur pa dang bcas pa dag byas kyang bka' blo mi bde ba'i rang bzhin mi gtong na de la dge 'dun gyis bzhams te bsgo bar bya'o/ /de'i phyir dge slong de la dge slong rnams kyis zhes bya ba la sogs pa gsungs te/ dge slong de la zhes bya ba ni 'dun pa'am gzhan yang de lta bu gang yin pa la'o/ /dge slong rnams kyis zhes bya ba ni chos 'di pa rnams kyis so/ /'di skad ces tshe dang ldan pa khyod dge slong rnams kyis gdon par gtogs pa bslab pa'i gzhi rnams dang / bde bar gshegs pa'i mdor gtogs pa rnams kyis chos dang mthun pa dang / 'dul ba dang mthun par smras pa na bdag nyid brjod par bya ba ma yin par ma byed par tshe dang ldan pas bdag nyid brjod par bya ba kho nar gyis shig /dge slong rnams tshe dang ldan pa la chos dang mthun pa dang / 'dul ba dang mthun par smra ba na tshe dang ldan pa yang dge slong rnams la chos dang mthun pa dang 'dul ba dang mthun par smros shig ces bya ba la sogs pa ni bzhams te bsgo ba ji skad sngar bstan pa ltar bsgo bar bya'o/ /brjod par bya ba nyid du byed pa'i phan yon gang zhe na/ 'di lta ste zhes bya ba la sogs pa gsungs so/ /gcig la gcig brjod par bya ba nyid du byed pa zhes bya ba ni gcig la gcig gleng ba nyid du byed pa'o/ /gcig la gcig 'doms shing rjes su ston pa zhes bya ba ni gcig la gcig slob pa'o/ /gcig gis gcig ltung ba las slong ba nyid ces bya ba ni gcig gis gcig gi ltung ba sbyong ba'o/ /de lta bus bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de'i zhes bya ba ni ston pa de'i'o/ /'khor 'di zhes bya ba ni dge 'dun no/ /'phel bar 'gyur gyi zhes bya ba ni sngon chad do/ /tshe dang ldan pa khyod bdag nyid brjod par bya ba ma yin par byed pa'i las kyi mtha' 'di lta bu 'di thong shig ces bsgo bar bya'o zhes bya ba ni bzhams te bsgo ba ji skad sngar bstan pa ltar bsgo bar bya ba'o/ /brjod par bya ba ma yin par byed pa'i las kyi mtha' zhes bya ba ni brjod par bya ba ma yin par byed pa'i bya ba'o/ /dge slong de la dge slong rnams kyis de skad bsgo ba na zhes bya ba ni bzhams te bsgo bas bzlog pa na'o/ /gal te gzhi de zhes bya ba ni bka' blo mi bde ba nyid do/ /gtong na zhes bya ba ni yongs su gtong na'o/ /de lta na legs zhes bya ba ni de lta na bzang ba ste/ rtsom pa'i nyes byas gcig byung bar zad kyi nyes pa sbom po yang ma byung ba'i phyir ro/ /gal te mi gtong na zhes bya ba ni yongs su mi gtong na ste/ de ltar bzhams te bsgo ba mi gtong na rtsom pa la nyes byas gcig dang / bzhams te bsgo ba ma btang ba'i mthar nyes pa sbom po gcig kyang 'byung ngo / /gzhi de gtang bar bya ba'i phyir lan gnyis lan gsum du yang dag par bsgo bar bya/ yang dag par bstan par bya'o zhes bya ba ni gsol ba dang bzhi'i las kyis bsgo ba ji skad sngar bstan pa ltar bsgo bar bya ste/ yang dag par bsgo ba ni de yin/ yang dag par bstan pa ni de yin no/ /lan gnyis lan gsum du bzlas zhes bya ba ni gsol ba gcig byas pa'i 'og tu las brjod pa gsum pa bya ba'o/ /yang dag par bsgo ba ni kun du dri ba'o/ /yang dag par bstan pa ni bka' blo mi bde ba las bzlog pa'o/ /lan gnyis lan gsum du yang dag par bsgo/ yang dag par bstan pa na gzhi de gtong na de lta na legs zhes bya ba ni de lta na bzang ba ste/ dge 'dun lhag ma'i dngos gzhi'i ltung ba ma byung ba'i phyir ro/ /sngar ni sbyor ba brtsams pa la nyes byas gcig go/ /bzhams te bsgo ba ma btang ba'i mthar nyes pa sbom po gcig go/ /gsol ba byas pa rdzogs pa'i mthar yang nyes pa sbom po gcig go/ /las brjod pa dang po byas pa rdzogs pa'i mthar yang nyes pa sbom po gcig go/ /las brjod pa gnyis pa byas pa rdzogs pa'i mthar yang nyes pa sbom po gcig go/ /gal te mi gtong na dge 'dun lhag ma'o zhes bya ba ni las brjod pa gsum pa dang / mjug sdud pa rdzogs pa'i mthar dge 'dun lhag ma'i dngos gzhi gcig 'byung ba'o/ /dge 'dun lhag ma'o zhes bya ba ni snga ma bzhin te/ des na dge 'dun lhag ma'o zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la sngar dge 'dun gyi dbyen byed pa dang / de'i rjes su phyogs pa dang / khyim sun 'byin pa dang / bka' blo mi bde ba zhes bya ba ni dge 'dun lhag ma tha ma bzhi po rnams kyi spyi'i thun mong gi mtshan nyid ji skad bstan pa thams cad dran par byas nas/ 'dir bka' blo mi bde ba'i dge 'dun lhag ma'i dngos gzhi'i ltung ba rnam par gzhag pa bshad par bya ste/ ci zhig byas na bka' blo mi bde ba'i dge 'dun lhag mar 'gyur zhe na/ dge slong gis lhag pa'i tshul khrims kyis glengs pa nyid na bdag nyid kyi de la dge slong dag gis brjod par bya ba ma yin pa nyid du byed pa mi gtong na dge 'dun lhag mar 'gyur ro/ /de'i bye brag ni b ka' blo mi bde ba'i dge slong la dge slong rnams kyis gleng ba dang dran par byas pa na bdag nyid la phyogs bcu na gnas pa'i de bzhin gshegs pa'i dge slong gi dge 'dun thams cad kyis lhag pa'i tshul khrims su gtogs pa'i bslab pa'i gzhi thams cad kyis gleng bar mi bya'o zhes zer ba la dge 'dun gyis bzhams te bsgo ba dang / gsol ba dang bzhi'i las kyis bzlog pa na/ las brjod pa gsum pa mjug sdud pa dang bcas pa rdzogs pa'i mthar mi gtong na dge 'dun lhag ma'i dngos gzhir 'gyur ro/ /dge slong 'gro ba gzhan gyi rnam pa bsten pa na dge slong gi 'du shes yod pa la na smad pa med do/ /dngos po bzang ngan dang 'dra ba la na smad pa med do/ /mtshan gyur pa ltung ba thun mong gi yul la na smad pa med do/ /'gro ba gzhan las skyes pa dang 'gro ba gzhan gyi rnam pa bsten pa la na smad pa med do/ /gnas skabs gzhan thob pa la na smad pa med do/ /gzhi gcig la bslab pa du ma bcas pa nyid la na smad pa med do/ /dngos po la the tshom za bas bsam pa dang bcas par zhugs pa la na smad pa med do/ /yul bsams pa dang ma bsams pa la na smad pa med do/ /rang dang gzhan gyi don du byed pa la na smad pa med do/ /'di'i byed pa po ni bka' blo mi bde ba dang gleng ba la sogs pa'i las byas pa'o/ /'di la yan lag drug gis dngos gzhi'i ltung bar 'gyur te/ bka' blo mi bde ba dang / glengs pa dang / dran par byas pa dang / bdag nyid brjod par bya ba ma yin pa nyid du byed pa dang / chos dang mthun pas bzlog pa dang / las brjod pa gsum pa'i mthar mi gtong ba'o/ /de dag las brjod pa yan lag ma tshang na ci rigs par na smad do/ /sbyor ba'i ltung ba ni bzhams te bsgo bas bzlog pa na mi gtong na nyes pa sbom po'o/ /gsol bas bzlog pa na mi gtong na nyes pa sbom po'o/ /las brjod pa dang pos bzlog pa na mi gtong na nyes pa sbom po'o/ /las brjod pa gnyis pas bzlog pa na mi gtong na nyes pa sbom po'o/ /dang po rtsom pa ma gtogs pa gleng ba dang / dran pa dang / skabs 'byed du gzhug pa dang / brjod pa dang bcas pa dang / mi gdams pa dang / gtam 'dre bar mi bya ba dang / gso sbyong gzhag pa dang / dgag dbye gzhag pa dang / phur pa dang bcas pa byas pa phyin chad kyi 'jug pa dang ni sbyor ba nyid de nyes pa sbom po'o/ /sbyor ba'i sbyor ba'i ltung ba ni dge slong cung zad tsam du dge slong rnams kyis gdon par gtogs pa bslab pa'i gzhi rnams dang / bde bar gshegs pa'i mdor gtogs pa rnams kyis chos dang mthun pa dang 'dul ba dang mthun pas smras pa na bdag nyid brjod par bya ba ma yin par byed pa thams cad nyes byas su 'gyur ro/ /sbyor ba'i ltung ba la sbyor ba tha dad pa ji snyed byas pa re re la nyes byas re rer 'gyur ro/ /gleng ba dang / dran pa dang / skabs 'byed du gzhug pa dang / brjod pa dang bcas pa dang / mi gdams pa dang / gtam 'dre bar mi bya ba dang / gso sbyong gzhag pa dang / dgag dbye gzhag pa dang / phur pa dang bcas pa ma byas pa'i tshe na bdag nyid brjod par bya ba ma yin pa nyid du byed pa yang nyes byas so/ /phyogs bcu na de bzhin gshegs pa'i nyan thos kyi dge 'dun ji snyed pa thams cad ma yin pa kha cig gis mi gleng ba nyid du byed pa la yang nyes byas so/ /lhag pa'i tshul khrims su gtogs pa'i gzhi ji snyed pa thams cad ma yin pa kha cig gis mi gleng ba nyid du byed pa yang nyes byas so/ /lhag pa'i sems dang lhag pa'i shes rab la sogs pa bslab pa gzhan gyis mi gleng ba nyid du byed pa la yang nyes byas so/ /'di la sngar gleng ba dang / dran pa dang / skabs 'byed du gzhug pa dang / brjod pa dang bcas pa dang / mi gdams pa dang gtam 'dre bar mi bya'o/ /gso sbyong gzhag pa dang / dgag dbye gzhag pa dang / phur pa dang bcas pa ma byas par bzlog pa'i cho ga dang las byed na cho ga las 'das pa'i las mi 'chags pa byed pa yin pas byed pa po'i dge 'dun la yang 'gal tshabs can du 'gyur ro/ /ltung ba med pa dang / bslab par bya ba dang / phyir bcos pa'i mtshan nyid ni khyim sun 'byin pa'i lhag ma dang 'dra'o/ /bka' blo mi bde ba'i dge 'dun lhag ma ste bcu gsum pa bshad zin to// // da 'di man chad ni dge 'dun lhag ma gdon pa'i mjug bsdu ba dang / de dag gi rnam par gzhag pa dang / phyir bcos pa dang / rnam par gzhag pa bsgrag par bya ba rnams ston to/ /de la dge 'dun lhag ma gdon pa'i mjug bsdu ba ni/ tshe dang ldan pa dag bdag gis dge 'dun lhag ma'i chos bcu gsum po dag bton zin to zhes bya bas bstan to/ /tshe dang ldan pa dag ces bya ba ni bod pa'o/ /bdag gis zhes bya ba ni 'don pas so/ /dge 'dun lhag ma'o zhes bya ba ni ltung ba de dge 'dun la rag las pa dang / dge 'dun dang 'brel pa dang / dge 'dun la bsten pa yin te/ ltung ba de dge 'dun las rnam par ldang bar 'gyur gyi gang zag las ma yin pa'o/ /gzhan yang pham par 'gyur ba'i chos bzhi po de dag ni lhag ma med pa yin gyi/ 'di ni lhag ma dang bcas pa yin pa ste/ des na dge 'dun lhag ma'o zhes gsungs so/ /chos zhes bya ba ni rang gi mtshan nyid 'dzin pa'i phyir ro/ /bcu gsum po dag ces bya ba ni grangs sngar smos pa rnams kyis byung gdab pa'o/ /bton zin to zhes bya ba ni dam bca' ba'i don gyi mjug bsdu ba'i phyir dang / nyan pa po rnams spro bar bya ba'i phyir smos so/ /de dag gi rnam par gzhag pa ni de dag las dgu ni ltung ba dang po dag nyid kyis so/ /bzhi ni lan gsum gyi bar gyis zhes bya bas bstan to/ /de dag las zhes bya ba ni dge 'dun lhag ma'i chos bcu gsum po gdon pa de dag las so/ /dgu ni zhes bya ba ni khu ba 'byin pa dang / lus kyis reg pa dang / 'khrig pa dang ldan par smra ba dang / bsnyen bkur bsngags pa dang / smyan byed pa dang / khang pa dang / gtsug lag khang dang gzhi med par skur pa 'debs pa dang / gzhan gyi cha ma yin pa dang mthun pa rnams so/ /ltung ba dang po dag nyid kyis so zhes bya ba ni dang po sbyor ba rtsom pa dang nyes pa sbom po dang / dngos gzhi'i rim gyis dang por ltung bar 'gyur la/ 'byung ba dang bcas pa ste/ 'di dag la dge 'dun gyis dang por bzhams te bsgo ba dang gsol ba dang bzhi'i las kyis bzlog pa'i tshul gyis mi gtong bar rjes su sgrub pa las dngos gzhir gzhag pa med pa'i phyir ro/ /bzhi zhes bya ba ni dge 'dun gyi dbyen byed pa dang / de'i rjes su phyogs pa dang / khyim sun 'byin pa dang bka' blo mi bde ba rnams so/ /lan gsum gyi bar gyis so zhes bya ba ni las brjod pa lan gsum gyi bar gyis dngos gzhir 'gyur ba ste/ dang po sbyor ba rtsom pa dang / dge 'dun gyis bzhams te bsgo ba dang / gsol ba dang bzhi'i las kyis bzlog pa'i tshul gyis mi gtong bar rjes su sgrub pa na gsol ba byas pa'i 'og tu las brjod pa lan gsum gyi bar du mi gtong na las brjod pa gsum pa rdzogs pa'i mthar dngos gzhir 'gyur la/ 'byung ba dang bcas pa ste/ 'di dag ni bsgo ba las 'gyur ba'i dge 'dun lhag ma zhes bya'o/ /phyir bcos pa ni dge slong gis de dag las ltung ba gang yang rung ba zhig byas la/ ji srid du shes bzhin du 'chab par byed pa de srid du/ des mi 'dod bzhin du spo ba bya'o/ / dge slong gis mi 'dod bzhin du spo ba byas nas/ de'i 'og tu zhag drug gi bar du dge 'dun la mgu bar bya ba spyad par bya'o/ /dge slong gis mgu bar bya ba spyad nas dbyung ba la thogs te chos dang mthun par byas la/ dge slong gi dge 'dun gyi sems mgu bar byas na gang na dge slong nyi shu'i tshogs kyi dge 'dun yod pa der dge slong de dbyung bar bya'o/ /gal te dge slong nyi shur gcig gis ma tshang ba'i tshogs kyi dge 'dun gyis dge slong de 'byin par byed na/ dge slong de yang ma phyin la dge slong de dag kyang smad par bya ba yin te/ de la 'di ni cho ga yin no zhes bya bas bstan te/ 'dis ni dge 'dun lhag ma'i ltung ba phyir bcos pa'i cho ga dang las spyir bstan te/ de la dge slong gis zhes bya ba ni ltung ba 'byin par byed pas so/ /de dag las ltung ba gang yang rung ba zhig byas la zhes bya ba ni dge 'dun lhag ma'i chos bcu gsum po de dag las dngos gzhi'i ltung ba gang yang rung ba zhig byas la'o/ /ji srid du shes bzhin du 'chab par byed pa zhes bya ba ni/ bdag la dge 'dun lhag ma'i dngos gzhi'i ltung ba byung bar shes bzhin du bcab pa'i sems kyis 'chab cing gzhan la mthol bar mi byed pa'o/ /de srid du des mi 'dod bzhin du spo ba bya'o zhes bya ba ni ji srid du shes bzhin du 'chab par byed pa'i dus de srid du dge slong des bdag nyid mi 'dod cing ma dad bzhin du yang spo ba'i las bya dgos pa ste/ spo ba zhes bya ba ni dge 'dun lhag ma'i ltung ba bcabs pa sbyang ba'i chad pa'i las kyi ming ste/ dge slong rang bzhin du gnas pa yongs su dag pa'i sa nas yongs su ma dag pa'i sa gzhan du spo ba'o/ /dge slong gis mi 'dod bzhin du spo ba byas nas/ de'i 'og tu zhag drug gi bar du dge slong mgu bar bya ba spyad par bya'o zhes bya ba ni de ltar ji srid du shes bzhin du 'chab par byed pa de srid des mi 'dod bzhin du spo ba byas nas/ de'i 'og tu des bdag nyid dge 'dun lhag ma'i ltung ba las dbyung ba'i ched du mtshams gcig gi dge 'dun la mgu bar bya ba spyad par bya ste/ mgu bar bya ba spyad pa zhes bya ba ni bsnyen bkur dang chos dang zang zing gi longs spyod kyis dge 'dun thams cad thugs mnyes par bya ba'i bsnyen bkur gyi las kyi ming ngo / /dge slong gis mgu bar bya ba spyad nas dbyung ba la thogs te zhes bya ba ni de ltar dge slong gis zhag drug gi bar du dge 'dun mgu bar bya ba spyad nas/ de'i 'og tu dge 'dun gyis de dge 'dun lhag ma'i ltung ba las dbyung ba'i las bya ba 'ba' zhig la thogs shing rag las pa ste/ dbyung ba zhes bya ba ni dge 'dun lhag ma'i ltung ba las bslang ba'i las kyi ming ngo / /chos dang mthun par byas zhes bya ba ni des bdag nyid dge 'dun lhag ma'i ltung ba las dbyung ba'i don du gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas dge 'dun thams cad 'dug cing mthun par bya ba la sogs pa chos dang mthun pa'i las byas la'o/ /dge slong gi dge 'dun gyi sems mgu par byas nas zhes bya ba ni des dge 'dun thams cad 'dug cing mthun par gyur pa la mchil lham gnyis phud de bla gos phrag pa gcig tu byas nas rgan pa'i mtha' logs su phyag 'tshal te/ tsog pur 'dug nas thal mo sbyar ba btud de/ bdag nyid dge 'dun lhag ma'i ltung ba las dbyung bar gsol ba'i sngags lan gsum brjod pas dge slong gi dge 'dun gyi sems mgu bar byas nas so/ /gang na dge slong nyi shu'i tshogs kyi dge 'dun yod pa der dge slong de dbyung bar bya'o zhes bya ba ni/ dge 'dun gyis mtshams gang na dge slong nyi shu yan chad kyi tshogs kyi dge 'dun yod pa der dge slong de dge 'dun lhag ma'i ltung ba las dbyung ba'i cho ga dang las bya'o/ /dbyung ba zhes bya ba ni dge 'dun gyis dge slong de dge 'dun lhag ma'i ltung ba las dbyung ba'i cho ga dang las kyi ming ngo / /gal te dge slong nyi shur gcig gis ma tshang ba'i tshogs kyi dge 'dun gyis dge slong de 'byin par byed na dge slong de yang ma phyin la/ dge slong de dag kyang smad par bya ba yin te/ de la de ni cho ga ni 'di yin no zhes bya ba ni cho ga las 'das na las mi 'chags so zhes bya ba'i gzhung bstan pa yin te/ 'dir dge 'dun lhag ma las dbyung ba'i cho ga ni bcabs pa na spo ba byed du gzhug pa dang / zhag drug mgu bar bya ba spyad pa dang / dge 'dun la dbyung bar gsol ba dang / dge slong nyi shu yan chad kyi tshogs kyis chos bzhin bya'o/ /las ni dge 'dun gyis gsol ba dang bzhi'i las mi g.yo ba dang gzhag par mi 'os pas de dbyung ba'i las bya ba'o/ / de dag ni re zhig dge 'dun lhag ma phyir bcos pa phyogs tsam zhig bstan pa yin no// //so sor thar pa'i mdo rgya cher 'grel pa 'dul ba kun las btus pa bam po brgyad pa/ da ni bde bar gshegs pas gsungs pa'i 'dul ba rgya mtsho las dge 'dun lhag ma phyir bcos pa'i gzhung rgya chen po 'byung ba las 'dir gzhung ji lta ba bzhin du ci ran cig bshad par bya'o/ /de la dge 'dun lhag ma phyir bcos pa ni dge 'dun lhag ma'i sbyor ba'i sbyor ba nyes byas dang / sbyor ba sbom po dang / dngos gzhi mthol ba dang bshags pa gnyis kyis ltung ba las bslang bar bya'o/ /de la dge 'dun lhag ma'i sbyor ba'i sbyor ba nyes byas phyir bcos pa ni de bsdam par bya ba'i nyes byas yin na ni gzhan la mthol ba dang bshags mi dgos par rang gi yid kyis ltung ba snga ma mthong ba dang / phyin chad bsdams pas snga ma 'gyod pa dang phyin chad mi bya'o snyam du bsdam pa byas na ltung ba las ldang ngo / /bshags par bya ba'i nyes byas yin na ni gzhan la mthol ba dang bshags pas phyir bcos par bya dgos so/ /de la bsdam par bya ba'i phyir nyes byas ni bshags par bya ba'i nyes byas kyi phyogs su gtogs pa yid kyi nyes byas zhes bya ba ste/ dper na khu ba dbyung ba'i don du yid kyis rtsol ba zhes bya ba la sogs pa lta bu'o/ /bshags par bya ba'i nyes byas ni lus dang ngag gis sbyor ba'i sbyor ba ji skad bstan pa rnams so/ /bshags par bya ba'i nyes byas mthol ba dang / bshags par bya ba'i cho ga ni dge slong gis ltung ba bcab par mi bya ste/ dge 'dun lhag ma'i sbyor ba'i sbyor ba nyes byas bshags par bya ba gang yang rung ba byung na/ bcab pa'i sems gcig tsam gyis kyang bcab par mi bya bar de nyid kyi mod la mchil lham gnyis phud nas dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa gcig gi mdun du tsog pur 'dug ste/ thal mo sbyar ba btud nas ltung ba'i sde tshan gyi ming dang gang byung ba'i rigs smos te/ cig car mthol be dang bshags par byar rung ngo / /de'i sngags ni 'di yin te/ tshe dang ldan pa dag dgongs su gsol/ bdag dge slong ming 'di zhes bgyi ba la ltung ba dge 'dun lhag ma'i sde tshan las rigs 'di zhes bgyi ba'i sbyor ba'i sbyor ba che ge mo las gyur pa'i nyes byas byung ste/ bdag dge slong ming 'di zhes bgyi ba ltung ba de tshe dang ldan pa'i mdun du mthol lo/ /mi 'chab po 'chags so mthol zhing bshags na bde ba la reg par gnas par 'gyur gyi/ ma mthol ma bshags na ni mi 'gyur ro zhes lan gnyis lan gsum du bzlas/ nyan pas ltung ba mthong ngam zhes smra zhing / 'chags pas mthong zhes brjod par bya/ nyan pas phyin chad sdom mam zhes smra zhing 'chags pas sdom mo zhes lan gnyis lan gsum bzlas/ de'i rjes la nyan pas thabs yin no zhes brjod par bya/ 'chags pas legs so zhes brjod par bya ste/ de tsam gyis na ltung ba las ldang ngo / /de'i mod la gang la mthol zhing bshags par bya ba'i gang zag med na skya rengs ma shar gyi bar du 'chab pa'i nyes pa med do/ /ji srid du gang la mthol zhing bshags par bya ba'i gang zag ma rnyed pa de srid du skya rengs shar kyang ma mthol ma bshags pa la 'chab pa'i nyes pa med do/ /gang la mthol zhing bshags par bya ba'i gang zag med na ji srid du gang la mthol zhing bshags par bya ba'i gang zag ma rnyed pa de srid du mthol zhing bshags pa'i sems med pa la 'chab pa'i nyes pa med do/ /gang la mthol zhing bshags par bya ba'i gang zag yod du zin kyang rkyen 'ga' zhig gis bdag nyid der 'gro ba'i skabs med dam/ bdag nyid gnas gzhan du song bar gyur na de'i bar du mthol zhing bshags pa'i sems med pa la 'chab pa'i nyes pa med do/ /gang la mthol zhing bshags par bya ba'i gang zag yod du zin kyang ltung ba byung ba de 'di snyam du gal te de'i gan du song la ma brjod na 'chab pa'i nyes pa 'gyur du dogs pas de'i dbang gis der mi 'gro'am/ gzhan du song bas brjod pa ma byas pa la yang 'chab ba'i nyes pa med do/ /rkyen cis kyang ma bskal bar de'i gan du mi 'gro ba dang / gzhan du 'gro ba dang skya rengs kyi mdun du mi mthol ba dang / 'chab pa'i sems skyed pa dag ni nyes byas so/ /gang la mthol zhing bshags par bya ba'i gang zag dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa med na chos 'di pa gcig la je mthol la de'i 'og tu dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa gcig gi mdun du bshags par bya'o/ /ltung ba ming las mi mthun pa'i gang zag med na ltung ba rigs las mi mthun pa'i mdun du bshags par bya'o/ /'dir ming ni ltung ba'i sde tshan no/ /rigs ni ltung ba gang byung ba'o/ /chos 'di pa zhes bya ba ni dge slong ma dang / bslab pa byin pa dang / dge slob ma dang / dge tshul dang / dge tshul ma dang / dge bsnyen dang / dge bsnyen ma dang / khyim pa de bzhin gshegs pa'i lta ba can mtshams kyi nang na 'dug pa dang / lta ba mi mthun pa mtshams gzhan na 'dug pa dag go/ /'dir de dag gi rnam par gzhag pa ni mtshan mi mthun pa bsnyen par rdzogs pa la mthol na bcabs par ni mi 'gyur la nyes byas su ni 'gyur ro/ /bsnyen par ma rdzogs pa dag la mthol na bcabs par ni mi 'gyur la gnas ngan len rig par byed pa las ni ltung byed du 'gyur ro/ /gnas ngan len ma yin par rig par byed pa las ni nyes byas su 'gyur ro/ /chos 'di pa de dag gang yang rung ba mtshams gzhan na 'dug pa dang / lta ba mi mthun pa la mthol na bcabs par ni mi 'gyur la nyes byas su ni 'gyur ro/ /dge slong bsnyen par rdzogs pa rang bzhin du gnas pa ma yin pa la mthol na yang bcabs par ni mi 'gyur la nyes byas su ni 'gyur ro/ /dge slong bsnyen par rdzogs pa rang bzhin du gnas pa lta ba dang mtshan mthun pa/ mtshams kyi nang na 'dug pa ltung ba ming dang rigs las mi mthun pa la mthol na yang bcabs par ni mi 'gyur la nyes byas su ni 'gyur ro/ /dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa la mthol na bcabs par yang mi 'gyur la ltung bar yang mi 'gyur te/ 'og ma gzhan dag la yang de bzhin no/ /ltung ba mthol ba la spyir bstan pa ni mthol ba'i sngags rdzogs par bya'o/ /mthol ba'i sngags ril gyis brjod ma nus na/ tha na ming ngam rigs gcig go bar byas na yang mthol bar 'gyur ro/ /bshags pa'i sngags ni rdzogs par brjod dgos so/ /nyes byas mthol ba la ni ming dang rigs ma brjod par bdag la ltung ba byung ngo zhe'am bdag gis kha na ma tho ba byas so zhes bya ba rnam pa gang yang rung bas rig par byas na yang rung ngo / /pham par 'gyur ba'i dngos gzhi ma gtogs pa sbyor ba dang / nyes pa la sogs pa ltung ba gzhan thams cad la yang bcab pa yod na sngar bcabs pa'i nyes pa phyir bcos par bya zhing / phyis ltung ba nyid phyir bcos par shes par bya'o/ /bcabs pa'i nyes pa phyir bcos pa ni ltung ba ming dang rigs gang byung ba dang / ji srid du bcabs pa de dag je mthol bar bya'o/ /dge 'dun lhag ma la ni bcabs pa'i nyes pa yod na spo ba zhes bya ba'i las kyis de med par bya dgos te/ de ni 'og nas ston to/ /mthol ba dang bshags par bya ba'i skabs yod bzhin du mi mthol mi 'chags na zhag re re nyes byas re rer 'gyur ro/ /gang la mthol ba'i gang zag dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa yod na/ chos 'di pa gzhan la mthol bar mi bya'o/ /bshags pa ni chos 'di pa gzhan la rnam pa thams cad du mi bya'o/ /dge 'dun lhag ma'i sbyor ba nyes pa sbom po phyir bcos pa yang mthol ba dang bshags pa gnyis kyis nyes pa sbom po'i ltung ba las bslang ba ste/ de la mthol ba ni dge slong gis kha na ma tho ba bcab par mi bya ste/ dge 'dun lhag ma bcu gsum gyi sbyor ba'i nyes pa sbom po lci ba dang yang ba gang yang rung ba byung ba bcab pa'i sems gcig tsam gyis kyang bcab par mi bya bar de nyid kyi mod la mchil lham gnyis phud nas/ dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa gcig gi mdun du tsog pur 'dug ste/ thal mo sbyar ba btud nas ltung ba'i sde tshan gyi ming dang gang byung ba'i rigs smos te mthol bar bya'o/ /de'i sngags ni 'di yin te/ tshe dang ldan pa dgongs su gsol/ bdag dge slong ming 'di zhes bgyi ba la ltung ba dge 'dun lhag ma'i sde tshan las rigs 'di zhes bgyi ba'i sbyor ba che ge mo las gyur pa'i nyes pa sbom po byung ste/ bdag dge slong ming 'di zhes bgyi ba ltung ba tshe dang ldan pa'i mdun du mthol lo/ /mi 'chab po/ mthol na bdag bde ba la reg par gnas par 'gyur gyi/ ma mthol na mi 'gyur ro zhes lan gsum du bzlas/ de'i rjes la nyan pas thabs yin no zhes brjod par bya/ mthol bas legs so zhes brjod par bya ste/ de tsam gyis na mthol ba yin no/ /de'i mod la mthol bar bya ba'i gang zag med na skya rengs ma shar gyi bar du 'chab pa'i nyes pa med do/ /ji srid du gang la mthol bar bya ba'i gang zag ma rnyed pa de srid du skya rengs shar kyang ma mthol ba la 'chab pa'i nyes pa med do/ /gang la mthol bar bya ba'i gang zag med na/ ji srid du gang la mthol bar bya ba'i gang zag ma rnyed pa de srid du mthol ba'i sems med pa la 'chab pa'i nyes pa med do/ /gang la mthol bar bya ba'i gang zag yod du zin kyang rkyen 'ga' zhig gis bdag nyid der 'gro ba'i skabs med dam/ bdag nyid gnas de nas gzhan du song bar gyur na de'i bar du mthol ba'i sems med pa la 'chab pa'i nyes pa med do/ /gang la mthol bar bya ba'i gang zag yod du zin kyang ltung ba byung ba de 'di snyam du gal te de'i gan du song la ma brjod na 'chab pa'i nyes pa 'gyur du dogs nas de'i dbang gis der mi 'gro'am/ gzhan du song bas brjod pa ma byas pa la yang 'chab pa'i nyes pa med do/ /rkyen cis kyang ma bskal par de'i gan du mi 'gro ba dang / gzhan du 'gro ba dang / skya rengs kyi mdun rol du mi mthol ba dang / 'chab pa'i sems bskyed pa dag ni nyes byas so zhes bya ba yang snga ma bzhin no/ /gang la mthol bar bya ba'i gang zag dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa med na chos 'di pa sngar bstan pa dag la mthol na yang mthol ba nyid yin te/ de dag gi rnam par gzhag pa yang snga ma bzhin no/ /ltung ba mthol ba spyir bsdams pa yang snga ma bzhin te/ mthol ba'i sngags rdzogs par bya'o/ /mthol ba'i sngags ril gyis brjod ma nus na tha na ming ngam/ rigs gcig go bar byas na yang mthol bar 'gyur te/ 'dir yang ming ni ltung ba'i sde tshan no/ /rigs ni ltung ba gang byung ba'o/ /de ltar ltung ba mthol na sbyor ba de'i sbyor ba nyes byas ni logs shig tu mthol mi dgos so/ /de ltar mthol nas bshags pa ni dge 'dun lhag ma'i nyes pa sbom po lci ba ni mtshams gang na dge slong lnga yan chad 'dug pa'i dge slong gud du ma bcad pa thams cad la bshags par bya ste/ gang na dge slong lngar ma longs pa'i gnas su bshags su mi rung ngo / /der gnas gzhan nas dge slong dag gnyer te/ lnga yan chad du kha bskang ba la ni bshags su rung ngo / /dge slong lnga yan chad gnas par dge slong gzhan gzhag ste lnga yan chad logs shig tu bcad pa la yang bshags su rung ngo / /lnga yan chad gnas de na dge slong ji snyed gnas pa thams cad la bshags par bya dgos so/ /dge 'dun lhag ma'i nyes pa sbom po yang ba ni mtshams kyi nang yang rung ste/ dge slong gcig la bshags pas ltung ba las ldang bar 'gyur ro/ /des na dge 'dun lhag ma'i nyes pa sbom po lci ba ni mtshams kyi nang du dge slong lnga la sogs pa thams cad kyi mdun du bshags par bya ba kho na yin no/ /dge 'dun lhag ma'i nyes pa sbom po yang ba ni mtshams kyi nang yang rung phyi rol du yang rung ste/ dge slong gcig la bshags su rung ngo / /dge 'dun lhag ma'i nyes pa sbom po lci ba dang yang ba ji ltar shes par bya zhe na/ kha na ma tho ba che ba ni lci ba yin la kha na ma tho ba chung ba ni yang ba yin te/ kha na ma tho ba che ba dang chung ba nyid ni yul dang bsam pa shas ches che chung nyid las shes par bya ste/ dper na phyi rol gyi gos la sogs pa sems can du bgrang ba ma yin pa gang gos kyi bar du khu ba phyung ba'i nyes pa sbom po ni yang ba yin la/ yan lag gi rnam pa las su rung ba la sems can du bgrang ba'i lag pa la sogs pas nom pa'i nyes pa spom po ni lci ba yin no/ /de bzhin du skyes pa dang / za ma dang / ma ning dang / mtshan gnyis pa bsten nus pa gos kyis bar du ma chod pa dang / ma nyams pa la reg pa'i nyes pa sbom po ni yang ba yin la/ bud med dam gzhon nu ma mi tshangs par spyod pa 'khrig pa'i chos bsten nus pa gos kyis bar du chod pa dang nyams pa la reg pa'i nyes pa sbom po ni lci ba yin no/ /skyes pa dang za ma dang ma ning dang mtshan gnyis pa kun shes par nus pa la 'khrig pa dang ldan par smras pa'i nyes pa sbom po ni yang ba yin la/ rdzu 'phrul gyi rnam par 'phrul ba'i chos can mo la 'khrig pa dang ldan pa smra ba'i nyes pa sbom po ni lci ba yin no/ /skyes pa dang za ma dang ma ning dang mtshan gnyis pa legs par smras pa dang nyes par smras pa'i chos rnams kyi don kun shes par nus pa la bsnyen bkur bsngags pa'i nyes pa sbom po ni yang ba yin la/ bud med dam gzhon nu ma legs par smras pa dang nyes par smras pa'i chos rnams kyi don kun shes par mi nus pa la bsnyen bkur bsngags pa'i nyes pa sbom po ni lci ba yin no/ /mi ma yin pa'i 'gro ba dang / rang bzhin nyams pa'i smyan byed pa'i nyes pa sbom po ni yang ba yin la/ mi'i 'gro ba dang / rang bzhin ma nyams pa'i smyan byed pa'i nyes pa sbom po ni lci ba yin no/ / sa gzhi dang yo byad gzhan las btsal ba dang / mi rung ba dang / rtsod pa dang bcas pa dang / brtsam du mi rung ba dang / ma bstan pa dang / tshad las lhag pa'i zhes bya ba dag gcig las 'das pa'i khang pa brtsigs pa'i nyes pa sbom po ni yang ba yin la/ de dag gnyis sam/ gsum mam thams cad las 'das pa'i khang pa brtsigs pa'i nyes pa sbom po ni lci ba yin no/ /de dag las tshad ma gtogs pa gcig las 'das pa'i gtsug lag khang brtsigs pa'i nyes pa sbom po ni yang ba yin la/ gnyis sam gsum mam thams cad las 'das pa'i gtsug lag khang brtsigs pa'i nyes pa sbom po ni lci ba yin no/ /nyams par 'dun pa med pa'i gzhi med par skur pa 'debs pa'i nyes pa sbom po ni yang ba yin la/ nyams par 'dun pas gzhi med par skur pa 'debs pa'i nyes pa sbom po ni lci ba yin no/ /nyams par 'dun pa med par brdzun gyi tshig bag tsam gyis skur ba 'debs pa'i nyes pa sbom po ni yang ba yin la/ nyams par 'dun pas brdzun gyi tshig bag tsam gyis skur ba 'debs pa'i nyes pa sbom po ni lci ba yin no/ /bsgo ba las gyur pa'i dge 'dun lhag ma bzhi po dag la yang bzhams te bsgo bas bzlog pa na mi gtong ba yan chad kyi nyes pa sbom po ni yang ba yin la/ las brjod pa dang po dang gnyis pas bzlog pa na mi gtong ba'i nyes pa sbom po ni lci ba yin pa la sogs pa ci rigs par shes par bya'o/ /de ltar dge 'dun lhag ma'i nyes pa sbom po lci ba bshags pa'i cho ga dang sngags ni mtshams kyi nang du dge slong bsnyen par rdzogs pa rang bzhin du gnas pa lta ba dang mtshan mthun pa ltung ba ming dang rigs las mi mthun pa lnga yan chad ji snyed 'khod pa bsdus nas/ mchil lham gnyis phud de bla gos phrag pa gcig tu byas nas rgan rims la phyag 'tshal te/ rgan pa'i mtha' logs su tsog pur 'dug nas thal mo sbyar ba btud de/ 'di skad ces brjod par bya'o/ /tshe dang ldan pa dag dgongs su gsol/ bdag dge slong ming 'di zhes bgyi ba la ltung ba dge 'dun lhag ma'i sde tshan las rigs 'di zhes bgyi ba'i sbyor ba che ge mo las gyur pa'i nyes pa sbom po lci ba byung ste/ bdag dge slong ming 'di zhes bgyi ba ltung ba de tshe dang ldan pa dag gi mdun du 'chags so/ /bshags na bdag bde ba la reg par gnas par 'gyur gyi ma bshags na ni mi 'gyur ro zhes lan gsum bzlas/ nyan pa rnams las rgan pa gcig gis ltung ba mthong ngam zhes smra zhing 'chags pas mthong ngo zhes brjod par bya/ nyan pas phyin chad sdom mam zhes smra zhing / 'chags pas sdom mo zhes brjod par bya ste/ de bzhin lan gnyis lan gsum du bzlas/ de'i rjes su la nyan pas thabs yin no/ / zhes brjod par bya/ 'chags pas legs so zhes brjod par bya ste/ de tsam gyis na dge 'dun lhag ma'i nyes pa sbom po lci ba las ldang ngo / /dge 'dun lhag ma'i nyes pa sbom po yang ba bshags pa'i cho ga dang sngags ni mtshams kyi nang ngam phyi rol du yang rung ste/ mchil lham gnyis phud nas dge slong bsnyen par rdzogs pa rang bzhin du gnas pa lta ba dang mtshan mthun pa ltung ba ming dang rigs las mi mthun pa gcig gi mdun du tsog pur 'dug ste/ thal mo sbyar ba btud nas 'di skad ces brjod par bya'o/ /tshe dang ldan pa dgongs su gsol/ bdag dge slong ming 'di zhes bgyi ba la ltung ba dge 'dun lhag ma'i sde tshan las rigs 'di zhes bgyi ba'i sbyor ba che ge mo las gyur pa'i nyes pa sbom po yang ba byung ste/ bdag dge slong ming 'di zhes bgyi ba ltung ba de tshe dang ldan pa'i mdun du 'chags so/ /bshags na bdag bde ba la reg par gnas par 'gyur gyi/ ma bshags na ni mi 'gyur ro zhes lan gsum bzlas/ nyan pas ltung ba mthong ngam zhes smra zhing / 'chags pas mthong ngo zhes brjod par bya'o/ /nyan pas phyin chad sdom mam zhes smra zhing / 'chags pas sdom mo zhes brjod par bya ste/ de bzhin lan gnyis lan gsum du bzlas/ de'i rjes la nyan pas thabs yin no zhes brjod par bya/ 'chags pas legs so zhes brjod par bya ste/ de tsam gyis na dge 'dun lhag ma'i nyes pa sbom po yang ba las ldang ngo / /de ltar nyes pa sbom po bshags na de'i sbyor ba'i nyes byas ni logs shig tu bshags mi dgos so/ /dge 'dun lhag ma'i dngos gzhi'i phyir bcos pa yang mthol ba dang bshags pa gnyis kyis dge 'dun lhag ma'i dngos gzhi las bslang ba ste/ de la dge 'dun lhag ma'i dngos gzhi mthol ba ni/ dge slong gis kha na ma tho ba bcab par mi bya ste/ dge 'dun lhag ma dang po dgu las gang yang rung ba'i dngos gzhi byung ba dang / bcab pa'i sems gcig tsam gyis kyang bcab par mi bya bar de nyid kyi mod la mchil lham gnyis phud nas dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa gcig gi mdun du tsog pur 'dug ste/ thal mo sbyar ba btud nas ltung ba'i sde tshan gyi ming dang gang byung ba'i rigs smos te/ mthol bar bya'o/ /de'i sngags ni 'di yin te/ tshe dang ldan pa dgongs su gsol/ bdag dge slong ming 'di zhes bgyi ba la ltung ba dge 'dun lhag ma'i sde tshan las rigs 'di zhes bgyi ba byung ste/ bdag dge slong ming 'di zhes bgyi ba ltung ba de tshe dang ldan pa'i mdun du mthol lo/ /mi 'chab po/ /mthol na bdag bde ba la reg par gnas par 'gyur gyi/ ma mthol na mi 'gyur ro zhes lan gsum bzlas/ de'i rjes la nyan pas thabs yin no zhes brjod par bya/ mthol bas legs so zhes brjod par bya'o/ /bsgo ba las gyur pa'i dge 'dun lhag ma bzhi ni byung ma thag tu bcab pa'i sems gcig tsam gyis kyang bcab bar mi bya bar de nyid kyi mod la/ las de'i mtshams kyi nang du gtogs pa'i dge 'dun thams cad la mthol bar bya dgos te/ de'i cho ga dang sngags ni dge slong stan de nyid la 'dug pa des tshe dang ldan pa dag bdag la dge 'dun lhag ma'i ltung ba byung ngo zhes brjod par bya ste/ gal te rjod par byed na de lta na legs/ gal te mi brjod na de la nyi ma de nyid nas brtsams te 'chab pa 'byung ngo zhes gsungs pa las shes par bya ste/ de la dge 'dun gyis bzhams te bsgo ba dang / gsol ba dang bzhi'i las byas te las brjod pa gsum pa mjug sdud pa dang bcas pa rdzogs ma thag tu des mchil lham gnyis phud nas las de'i mtshams kyi nang du gtogs pa'i dge 'dun thams cad la bla gos phrag pa gcig tu byas nas rgan rims la phyag 'tshal te/ rgan pa'i mtha' logs su tsog pur 'dug nas thal mo sbyar ba btud de 'di skad ces brjod par bya'o/ /tshe dang ldan pa dag dgongs su gsol/ bdag dge slong ming 'di zhes bya ba la ltung ba dge 'dun lhag ma'i sde tshan las rigs dge 'dun dbyen byed pa'am/ de'i rjes su phyogs pa'am/ khyim sun 'byin pa'am bka' blo mi bde ba de byung ste/ bdag dge slong ming 'di zhes bgyi ba ltung ba de tshe dang ldan pa dag gi mdun du mthol lo/ /mi 'chab po/ /mthol na bdag bde ba la reg par gnas par 'gyur gyi/ ma mthol na ni mi 'gyur ro zhes lan gsum bzlas/ de'i rjes la nyan pa rnams las rgan pa gcig gis thabs yin no zhes brjod par bya/ mthol bas legs so zhes brjod par bya'o/ /dge 'dun lhag ma'i dngos gzhi mthol ba 'di la gal te bcabs pa yod na dus ji srid du bcabs pa nyid sngags kyi nang du bsnan te mthol lo/ /bcabs pa med na mthol ba nyi tshe snga ma bzhin bya ste/ de tsam gyis na mthol ba yin no/ /de'i mod la gang la mthol bar bya ba'i gang zag med na skya rengs ma shar gyi bar du 'chab pa'i nyes pa med do/ /ji srid du gang la mthol bar bya ba'i gang zag ma rnyed pa de srid du skya rengs shar kyang ma mthol ba la 'chab pa'i nyes pa med do/ /gang la mthol bar bya ba'i gang zag med na ji srid du gang la mthol bar bya ba'i gang zag ma rnyed pa de srid du mthol ba'i sems med pa la 'chab pa'i nyes pa med do/ /gang la mthol bar bya ba'i gang zag yod du zin kyang / rkyen 'ga' zhig gis bdag nyid der 'gro ba'i skabs med dam/ bdag nyid gnas de nas gzhan du song bar gyur na/ de'i bar du mthol ba'i sems med pa la 'chab pa'i nyes pa med do/ /gang la mthol bar bya ba'i gang zag yod du zin kyang ltung ba byung ba de 'di snyam du gal te de'i gan du song la ma brjod na 'chab pa'i nyes par 'gyur du dogs pas de'i dbang gis der mi 'gro'am/ gzhan du song bas brjod par ma byas pa la yang 'chab pa'i nyes pa med do/ /rkyen cis kyang ma bskal par de'i gan du mi 'gro ba dang / gzhan du 'gro ba dang / skya rengs kyi mdun rol du mi mthol ba dang / 'chab pa'i sems bskyed pa dag ni nyes byas so zhes bya ba yang snga ma bzhin no/ /'chab pa la dge 'dun lhag ma la yid gnyis za ba ni shes pa dang 'dra'o/ /dge 'dun lhag ma ma shes pa nyid dang bcab pa'i sems ma bzhag pas brjed pa dang / byas sam ma byas ci zhig ci lta bu zhig ces dran par mi nus pa nyid dang / bsnyen par ma rdzogs pa nyid dang / gnas nas phyung ba nyid la 'chab pa mi 'byung ngo / /las dang po pa dang / smyos pa dang / sems 'khrugs pa dang / tshor ba dag gis nyen pa la ni ltung ba thams cad dang / de dag 'chab pa'i nyes pa yang mi 'byung ngo / /sa gang la 'chab pa mi 'byung ba de la spo ba la sogs pa spyad pa yang mi 'byung ngo / /gang la mthol bar bya ba'i gang zag dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa med na chos 'di pa sngar bstan pa dag la mthol na yang mthol ba nyid yin te/ de dag gi rnam par gzhag pa yang snga ma bzhin no/ /ltung ba mthol ba spyir bstan pa snga ma bzhin te/ mthol ba'i sngags rdzogs par bya'o/ /mthol ba'i sngags ril gyis brjod ma nus na tha na ming dang rigs gcig go bar byas na yang mthol bar 'gyur ro/ / 'dir yang ming ni ltung ba'i sde tshan no/ /rigs ni ltung ba gang byung ba'o/ /de ltar ltung ba'i dngos gzhi mthol na de'i sbyor ba dang sbyor ba'i sbyor ba ni logs shig tu mthol mi dgos so/ /de ltar mthol nas bshags pa ni dge 'dun lhag ma las dbyung ba zhes bya ste dge 'dun lhag ma las dbyung ba 'di ni dge slong ngo tsha dang ldan pa dang / mdo sde 'dzin pa dang / 'dul ba 'dzin pa dang / ma mo 'dzin pa dang / shes pas ni dge slong gcig gi mdun du bshags pas dge 'dun lhag ma las ldang ste/ spo ba dang mgu bar bya ba spyad pa dang / dbyung ba'i cho ga dang las gzhan bya mi dgos so/ /de ci'i phyir zhe na/ bsam pas ltung ba las ldang gi chad pa'i las kyis ni ma yin pa'i phyir te/ 'dir gzhung ni sil bu dag las de lta bas na gang dag rnam pa de lta bur rang bzhin gyis ngo tsha shes pa dang ldan pa de dag gis ni gcig gi mdun du bshags par rjes su gnang ngo zhes bya ba la sogs pa gsungs pa yin no/ /dge slong gcig gi mdun du bshags pa'i cho ga dang sngags ni zhal nas gsungs pa'i lung gi rjes su 'brang ba dang / 'dul ba 'dzin pa snga rabs dag gi man ngag las 'di skad 'byung ste/ des dge 'dun lhag ma'i ltung ba byung ba na bcab pa'i sems skad cig tsam gyis kyang bcab par mi bya bar de'i mod la mchil lham gnyis phud nas mtshams kyi nang du dge slong bsnyen par rdzogs pa rang bzhin du gnas pa lta ba dang / mtshan mthun pa ltung ba ming dang rigs las mi mthun pa zhig gi mdun du tsog pur 'dug ste/ thal mo sbyar ba btud nas ltung ba'i sde tshan gyi ming dang / gang byung ba'i rigs smos te cig car mthol ba dang bshags par bya'o/ /de'i sngags ni 'di yin te/ tshe dang ldan pa dgongs su gsol/ bdag dge slong ming 'di zhes bgyi ba la ltung ba dge 'dun lhag ma'i sde tshan las rigs 'di zhes bgyi ba'i dngos gzhi byung ste/ bdag dge slong ming 'di zhes bgyi ba ltung ba de tshe dang ldan pa'i mdun du mthol lo/ /mi 'chab bo/ /'chags so/ /mthol zhing bshags na bdag bde ba la reg par gnas par 'gyur gyi/ ma mthol ma bshags na ni mi 'gyur ro zhes lan gsum bzlas/ nyan pas ltung ba mthong ngam zhes smra zhing / 'chags pas mthong ngo zhes brjod par bya/ nyan pas phyin chad sdom mam zhes smra zhing / 'chags pas sdom mo zhes brjod par bya ste/ de ltar lan gsum gsum bzlas/ de'i rjes la nyan pas thabs yin no zhes brjod par bya/ 'chags pas legs so zhes brjod par bya ste/ de tsam gyis na dge slong ngo tsha shes pa dang ldan pa dang / mdo sde 'dzin pa dang / 'dul ba 'dzin pa dang / ma mo 'dzin pa dang / shes pa dag dge 'dun lhag ma'i dngos gzhi'i ltung ba las ldang bar rig par bya'o/ /de ltar dge 'dun lhag ma'i ltung ba'i dngos gzhi cig car du mthol zhing bshags na/ de'i sbyor ba'i nyes byas dang / sbom po yang logs shig tu mthol zhing bshags mi dgos so/ /de las gzhan pa dag gis ni bcabs pa'i nyes pa yod na ji srid bcabs pa'i dus de srid du spo ba'i las kyis bcabs pa'i nyes pa med par byas nas/ de'i 'og tu zhag drug mgu bar bya ba spyad nas dbyung bar bya'o/ /bcabs pa'i nyes pa med na ni/ zhag drug mgu bar bya ba spyad nas dbyung bar bya'o/ /de ltar na bcabs pa'i nyes pa yod pa la ni tshigs gsum bya dgos te/ spo ba sbyin pa dang / mgu bar bya ba sbyin pa dang / dbyung ba sbyin pa'o/ /bcabs pa'i nyes pa med pa la ni tshigs gnyis bya dgos te/ mgu bar bya ba sbyin pa dang / dbyung ba sbyin pa'o/ /de la spo ba sbyin pa'i go rims ni 'di yin te/ dge 'dun lhag ma'i ltung ba byung ba la bcabs pa'i gang zag des dge 'dun la spo ba gsol ba dang / dge 'dun gyis de la gsol ba dang bzhi'i las kyis spo ba sbyin pa dang / des dus de srid du sa gzhan na gnas pa'i spyod pas spo ba spyad par bya'o/ /de la dge 'dun lhag ma'i ltung ba byung la bcabs pa'i gang zag des dge 'dun la spo ba gsol ba'i cho ga dang sngags ni 'di ltar bya ste/ des dge 'dun lhag ma'i ltung ba gang yang rung ba byung la/ zla ba phyed bcabs na de nyid kyis gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas/ dge 'dun thams cad 'dug cing mthun par gyur pa la mchil lham gnyis phud de bla gos phrag pa gcig tu byas nas rgan rims la phyag 'tshal te/ rgan pa'i mtha' logs su tsog pur 'dug nas thal mo sbyar ba btud de/ rang gi spo ba gsol ba'i sngags 'di skad ces brjod par bya'o/ /dge 'dun btsun pa rnams gsan du gsol/ bdag dge slong 'char ka la che ge mo las byung ba'i dge 'dun lhag ma'i ltung ba byung la zla ba phyed bcabs pas bdag dge slong 'char ka che ge mo las byung ba'i dge 'dun lhag ma'i ltung ba byung ba zla ba phyed bcabs pa de'i slad du dge 'dun las zla ba phyed spo ba gsol na/ thugs brtse ba can dge 'dun btsun pa rnams kyis thugs brtse ba'i slad du bdag dge slong 'char ka la che ge mo las byung ba'i dge 'dun lhag ma'i ltung ba byung la zla ba phyed bcabs pa de'i slad du zla ba phyed spo ba stsal du gsol/ lan gsum du bzlas/ de ni dge 'dun lhag ma'i ltung ba bcabs pa'i gang zag des dge 'dun la spo ba gsol ba'i cho ga dang sngags so/ /dge 'dun gyis de la gsol ba dang bzhi'i las kyis spo ba sbyin pa'i cho ga dang las ni 'di ltar bya ste/ des de ltar sbo ba gsol ma thag tu dge slong gcig gis gsol ba byas te las bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong 'char ka 'di la che ge mo las byung ba'i dge 'dun lhag ma'i ltung ba byung la zla ba phyed bcabs te/ dge slong 'char ka 'di che ge mo las byung ba'i dge 'dun lhag ma'i ltung ba byung la/ zla ba phyed bcabs pa de'i slad du dge 'dun las zla ba phyed spo ba gsol na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong 'char ka la che ge mo las byung ba'i dge 'dun lhag ma'i ltung ba byung la zla ba phyed bcabs pa de'i slad du zla ba phyed spo ba stsal to/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ dge slong 'char ka 'di la che ge mo las byung ba'i dge 'dun lhag ma'i ltung ba byung ba zla ba phyed bcabs te/ dge slong 'char ka 'di che ge mo las byung ba'i dge 'dun lhag ma'i ltung ba byung la zla ba phyed bcabs pa de'i slad du dge 'dun las zla ba phyed spo ba gsol te/ de'i slad du dge 'dun gyis dge slong 'char ka la che ge mo las byung ba'i dge 'dun lhag ma'i ltung ba byung la zla ba phyed bcabs pa de'i slad du dge 'dun las zla pa phyed spo ba gsol na/ tshe dang ldan pa gang dag dge slong 'char ka la che ge mo las byung ba'i dge 'dun lhag ma'i ltung ba byung la zla ba phyed bcabs pa de'i slad du zla ba phyed spo ba stsal bar bzod pa de dag ni cang ma gsung shig /gang dag mi bzod pa de dag ni gsungs shig / 'di ni las brjod pa dang po ste/ de bzhin du lan gnyis lan gsum du bzlas/ dge 'dun gyis bzod cing gnang nas dge 'dun gyis dge slong 'char ka la che ge mo las byung ba'i dge 'dun lhag ma'i ltung ba byung la zla ba phyed bcabs pa de'i slad du zla ba phyed spo ba stsal lags te/ 'di ltar cang mi gsung bas de de bzhin du 'dzin to/ /de ni dge 'dun gyis de la gsol ba dang bzhi'i las kyis spo ba sbyin pa'i cho ga dang las so/ /de dus de srid dus gzhan na gnas pa'i spyod pas spo ba spyad par bya ba'i go rims ni 'di yin te/ des kun du spyod pa'i chos ji ltar bcas pa rnams la spyad par bya ba dang / dge 'dun la brjod par bya ba dang / 'thab krol byed pa 'ong na btang ba dang / de song na bslang ba'o/ /spo ba spyod pa des kun du spyod pa'i chos ni sa gzhan na gnas pa'i spyod pa'i gzhi las 'byung ste/ des dge slong rang bzhin du gnas pa las mngon par smra ba dang / phyag dang mngon du ldang ba dang / thal mo sbyar ba dang / gus pa'i las dag bdag gir mi bya'o/ /dge slong rang bzhin du gnas pas kyang de la de dag ma bya'o/ /dge slong rang bzhin du gnas pa dang lhan cig tu gom pa bsri ba nyid las gzhan pas bcag par mi bya'o/ /stan ches dma' ba nyid las gzhan pas 'dug par mi bya'o/ /phyi bzhin 'brang ba'i dge sbyong gi dbang nyid las gzhan pas khyim dag tu 'gro bar mi bya'o/ /g.yogs ma gcig par mal bsham par mi bya'o/ /rab tu byung ba dang / bsnyen par rdzogs pa dang / gnas sbyin pa dang / dge tshul nye bar gzhag par mi bya'o/ /gsol ba dang las brjod pa dag bya bar khas mi blang ngo / /las byed pa dang dge slong ma'i ston pa dang dge 'dun gyi yid brtan par bsgo ba khas mi blang ngo / /de dag tu sngar bskos pas kyang mi bya'o/ / dge slong ma la ston par bskos pas kyang bstan par mi bya'o/ /'don pa gzhan med na yang gso sbyong la so sor thar pa 'don par mi bya'o/ /dge slong dge 'dun las ma bkar ba la tshul khrims dang / lta ba dang / cho ga dang 'tsho ba nyams pas gleng bar mi bya'o/ /brjod pa dang bcas pa dang / phur pa dang bcas pa nyid dag mi bya'o/ /gdams ngag dang gso sbyong dang / dgag dbye dang / gsol ba dang / brjod pa dag gzhag par mi bya'o/ /rang bzhin du gnas pa dang mgo mnyam du bsten par mi bya'o/ /spo ba byin pa de'i rgyu gang yin pa'i nyes pa de spong ngo / / nyes pa gzhan yang spang ngo / /tshangs pa mtshungs par spyod pa rnams la nyes pa dang mthun pa nyid mi bya'o/ /kun du spyad pa'i chos ji ltar spyad pa dag nyams su ma blangs na brtul zhugs snying po med par 'gyur ro snyam du yid la bya'o/ /nang par snga bar langs te gtsug lag khang du sgo dbye ba dang / mar me'i kong bu bsal bar bya'o/ /gtsug lag khang du chag chag dang phyag dar dang / lci ba 'jam po'i byug pas bsku ba dag bya'o/ /dge 'dun gyi bshang ba dang gci ba'i skyabs dag sbyang ngo / /der sa phyogs pa dang dus dang mthun pa'i chu dag gzhag par bya'o/ / gtsug lag khang gi wa'i kha dag bsal lo/ /dge 'dun gyi gdan bsham par bya'o/ /mchod pa'i dus shes par bya ste/ bdug spos dang de'i pog phor dag nye bar gzhag par bya'o/ /gal te nus pa nyid yin na ston pa'i yon tan yang dag par bsgrag par bya'o/ /gal te mi nus na smra ba po la bcol lo/ /dge 'dun gyi bshos kyi spyi bungs bshams pa na gaN+DI brdung ngo / /gal te dge slong rnams tsha na bsil yab bya'o/ /de'i 'dug pa la sogs pa ni bsnyen par rdzogs pa thams cad kyi mtha' nyid du'o/ /zas kyi bya ba byas nas gdan cha dben par brtul lo/ /lhung bzed kyi gzhi dor ro/ /dus shes par byas te mchod rten dag gi phyag dar bya'o/ /lci ba 'jam po'i byug pas bsku'o/ /dge 'dun 'du ba'i dus su yang sngar bstan pa bzhin du gdan bshams nas/ ston pa'i yon tan yang dag par bsgrag pa'i par dag bya'o/ /gal te nus pa nyid yin na tshes grangs nyid kyi nyi ma brjod pa dag bya'o/ /gal te mi nus na dge slong gzhan la bcol lo/ /dgongs kar dus dang mthun pa'i chus dge slong rnams kyi rkang pa bkru'o/ /dgongs kar dge slong rnams kyi rkang pa bsku'o/ /dge slong dag rkang pa bkru ba dang bsku bar mi 'dod na snum dbul lo/ /de'i gtsug lag khang tha mar 'os pa nyid yin no/ /thams cad du rnyed pa dbang ba nyid yin no/ /dge ba'i phyogs la mi g.yel bar bya'o/ /spo ba byed pas dge slong rang bzhin du gnas pa ma yin pa dang / dge 'dun du ma longs pa dang gnas de nas dge slong yongs su bcad pa dag la spo ba spyad pa mi 'chags so/ /dge slong mang po nyid yongs su spang bar mi bya'o/ /gnas brtan dang so sor thar pa dang bcas pa nyid du spyad par 'bad par bya'o/ /mtshams gzhan du zhag lon par mi bya'o/ /mtshams gzhan du zhag lon na mtshan mo de spo ba spyod pa'i zhag gi kha nas bcad do/ /dge 'dun gyi kha bskang ba'i grangs las ma gtogs so/ /de'i kun du spyod pa dge 'dun la spyad par bya'o/ /spo ba spyod pa bzhi yan chad mtshams gcig gi dge 'dun la spyod du mi gnang ngo / /las brgya rtsa gcig ni dge 'dun dang mthun par bya'o/ /bslab pa las 'das pa'i ltung ba thams cad ni dge slong rang bzhin du gnas pa dang 'dra'o/ /de la 'dun pa dbul du mi rung ngo / /de'i 'dun pa blang du mi rung ngo / /de la dge slong dang dge slong ma dang / dge slob ma dang / dge tshul dang dge tshul mas gtugs te phyag mi bya'o/ /spo ba spyod pa de rang bzhin du gnas pa dang lhan cig g.yogs ma gcig par nyal bar mi bya'o/ /der nyal na mtshan mo de gcad do/ /spo ba byed pas spo ba byed pa gzhan dang lhan cig g.yogs ma gcig par nyal bar mi bya'o/ /ma gus pas spyod pa gtong na nyes byas so/ /de la de'i bde ba lhag par spyod pa yang nyes byas so/ /spo ba spyod pa'i sa nas mi spyod pa'i sar song ste yang phyir 'ong na spyod pa'i gnas skabs nyid yin no/ /des sbyangs pa'i gzhi lhag ma rjes su bsgrub dgos so/ /nyi ma de nyid la phyir 'ong na mtshams gzhan du 'gro ba la nyes pa med do/ /de dang mu stegs can gnas pa la gnas pa dang lhan cig g.yogs ma gcig par nyal ba la nyes pa med do/ /re zhig de dag ni des kun du spyad pa'i chos ji ltar bcas pa rnams la spyad par bya ba yin no/ /dge 'dun la brjod par bya ba ni 'di yin te/ spo ba spyod pa des spyad pa'i dus zla ba phyed tshun chad ni yun thung ngu ba yin la/ zla ba phyed phan chad ni ring ba yin te/ gal te yun thung ngu spyod pa yin na des nyin re lan re nang par ram dro ka'am dgongs ka gang yang rung bar mtshams de'i dge 'dun gaN+DI brdungs te 'dus pa thams cad dam bzhi yan chad tshogs pa la rang gis spo ba blangs pa de'i sngar zhag du 'das pa dang phyis zhag du 'byung ba de sngags kyi tshig gis brjod par bya'o/ /gal te yun ring du spyod pa yin na ni/ des nyi ma gsum mam/ bzhi zhing lan re brjod par bya'o/ /de'i cho ga dang sngags ni rang gis gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas dge slong bzhi yan chad ji snyed tshogs pa la mchil lham gnyis phud de bla gos phrag pa gcig tu byas nas rgan rims la phyag 'tshal te/ rgan pa'i mtha' logs su tsog pur 'dug nas thal mo sbyar ba btud de 'di skad ces brjod par bya'o/ /dge 'dun btsun pa rnams gsan du gsol/ bdag dge slong ming 'di zhes pa la che ge mo las byung ba'i dge 'dun lhag ma'i ltung ba byung ba la zla ba phyed bcabs pas bdag dge slong ming 'di zhes bgyi ba che ge mo las byung ba'i dge 'dun lhag ma'i ltung ba byung la zla ba phyed bcabs pa de'i slad du dge 'dun las zla ba phyed spo ba gsol te/ dge 'dun gyis bdag dge slong ming 'di zhes bgyi ba la che ge mo las byung ba'i dge 'dun lhag ma'i ltung ba byung ba la zla ba phyed bcabs pa de'i slad du spo ba stsal bas zhag 'di snyed cig ni bgyis lags bgyi ba ni zhag 'di snyed cig mchis te/ dge 'dun btsun pa rnams kyis bdag spo ba bgyid pa gzung du gsol zhes lan gsum du bzlas/ gal te dus ring thung las nyin re la lan re'am nyi ma gsum mam bzhi zhing de skad ma brjod na dus gang gi tshe ma brjod pa'i nyin mtshan de bcad par zla ba phyed bya'o/ /de ni des dge 'dun la brjod par bya ba'i cho ga dang sngags so/ /des 'thab krol byed pa 'ong na btang ba'i cho ga dang sngags 'di yin te/ spo ba spyod pa des gal te gang zag thams cad la 'thab krol byed cing phyir rgol ba'am de nyid dang mi mdza' ba nyid du gnas pa'i gang zag 'thab krol byed pa gcig gan du 'ong bar thos shing gal te de dag gis gzhi des dran pa dang gleng bar byed pas 'jigs na de'i tshe des dge 'dun tshogs pa la yang rung gang zag la yang rung ste/ spo ba spyod pa de'i cho ga dang sngags kyis phyir gtang bar bya zhing / bdag nyid rang bzhin du gnas pa nyid du gzhag par bya'o/ /dge 'dun la phyir btang ba'i cho ga dang sngags ni 'di yin te/ bdag nyid kyis gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas/ dge 'dun thams cad 'dug cing mthun par gyur pa la mchil lham gnyis phud de bla gos phrag pa gcig tu byas nas rgan rims la phyag 'tshal te/ rgan pa'i mtha' logs su tsog pur 'dug nas thal mo sbyar ba btud de 'di skad ces brjod par bya'o/ /dge 'dun btsun pa rnams gsan du gsol/ bdag dge slong ming 'di zhes bgyi ba spo ba bgyid pas dge slong 'thab krol bgyid pa/ mtshang 'bru bar bgyid pa/ 'thab mo bgyid pa/ 'gyed par bgyid pa/ rtsod par bgyid pa dag mchi zhes thos te/ de dag gis bdag la gzhi 'dis gleng bar 'gyur dran par bgyid par 'gyur bas bdag gis tshe dang ldan pa dag gi mdun du spo ba slar gtang bar bgyi'o/ /phyir rgol ba mi mdza' ba de dag slar mchis nas yang spo ba blang bar bgyi'o/ /dge 'dun btsun pa rnams kyis bdag rang bzhin du gnas par gzung du gsol zhes lan gsum bzlas/ gang zag la phyir gtang ba'i cho ga dang sngags kyi gzhung ni zhu ba las/ btsun pa bcom ldan 'das kyis gal te spo ba byed pa'i dgra bo 'ong na des spo ba'i spyod pa bag yangs su bya'o zhes bka' stsal na/ der ji ltar bag yangs su bgyi/ nye ba 'khor dge slong des mchil lham gnyis phud de bla gos phrag pa gcig tu byas nas phyag 'tshal te/ dge slong gi mdun du tsog pur 'dug nas thal mo sbyar ba btud de 'di skad ces brjod par bya'o/ /tshe dang ldan pa dgongs su gsol/ bdag dge slong spo ba bgyid pa'i dge slong dgra bo mchis te/ bdag dge slong ming 'di zhes bgyi ba'i spo ba'i spyod pa bag yangs su bgyid slar yang len par bgyid do/ /yang blangs te spyad par bgyid na tshe dang ldan pas bdag ngo tsha ma mchis par mi gzung du gsol zhes lan gsum du bzlas/ dge slong nyan pas thabs yin no zhes brjod par bya/ spo ba gtong bas legs so zhes brjod par bya'o zhes gsungs pa yin no/ /des spo ba btang nas phyir ma blangs kyi bar du spo ba spyod mi dgos par rang bzhin du gnas par bya'o/ /de ni 'thab krol byed pa 'ong ba na spo ba gtong ba'i cho ga dang sngags so/ /'thab krol byed pa song na blang ba'i cho ga dang sngags ni 'di yin te/ gang zag 'thab krol can de song zhing 'jigs pa dang bral na gtsug lag khang de nyid du spo ba spyod pa de dge 'dun nam gang zag las cho ga dang sngags kyis phyir blang bar bya'o/ /dge 'dun las blang ba'i cho ga dang sngags ni de rang gis gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas/ dge 'dun thams cad 'dug cing mthun par gyur pa la mchil lham gnyis phud de bla gos phrag pa gcig tu byas nas rgan rims la phyag 'tshal te/ rgan pa'i mtha' logs su tsog pur 'dug nas thal mo sbyar ba btud nas 'di skad ces brjod par bya'o/ /dge 'dun btsun pa rnams gsan du gsol/ bdag dge slong ming 'di zhes bgyi ba spo ba bgyid pas dge slong 'thab krol bgyid pa/ mtshang 'bru bar bgyid pa/ 'thab mo bgyid pa/ 'gyed par bgyid pa/ rtsod par bgyid pa dag mchi zhing thos te/ de dag gis bdag la gzhi 'dis gleng bar 'gyur/ dran par bgyid par 'gyur bas bdag gis de skad thos nas dge slong rnams kyi mdun du spo ba slar btang ba phyir rgol ba mi mdza' ba de dag slar mchis lags pas bdag spo ba yang slar len to/ /spo ba zhag ma 'khor ba rnams bgyi'o/ /dge 'dun btsun pa rnams kyis bdag spo ba bgyid par gzung du gsol zhes lan gsum du bzlas/ gang zag gi mdun du phyir blang ba'i cho ga dang sngags kyang des mchil lham gnyis phud de bla gos phrag pa gcig tu byas nas phyag 'tshal te/ dge slong gi mdun du tsog pur 'dug nas thal mo sbyar ba btud de 'di skad ces brjod par bya'o/ /tshe dang ldan pa dgongs su gsol/ bdag dge slong ming 'di zhes bgyi ba spo ba bgyid pa'i dgra bo dge slong mchis te/ bdag ming 'di zhes bgyi bas spo ba'i spyod pa bag yangs su bgyis pa/ dgra bo dge slong de dag slar mchis lags pas bdag spo ba yang slar len to/ /spo ba zhag ma 'khor ba rnams bgyi'o/ /tshe dang ldan pas bdag spo ba bgyid par gzung du gsol zhes lan gsum du bzlas/ nyan pas thabs yin no zhes brjod par bya'o/ /spo ba len pas legs so zhes brjod par bya'o/ / des spo ba phyir blangs nas kun du spyad pa'i chos snga ma bzhin du spo ba zhag ma 'khor ba rnams bya'o/ /re zhig de dag ni spo ba spyod pa des dus de srid du sa gzhan na gnas pa'i spyod pas spo ba spyad par bya ba'i chos rnams yin te/ de lta bus bcabs pa'i zhag 'khor na spo ba spyad zin par rig par bya'o/ /da ni spo ba byas la mgu bar bya ba ma byin gyi bar du des kun du spyad par bya ba'i chos rnams bstan par bya ste/ spo ba byas la mgu bar bya ba ma byin pa de ni spo ba'i las ni byas la rang bzhin du gnas pa nyid ni ma yin pa'i phyir des ni sngar spo ba spyod pa'i kun du spyad pa'i chos ji skad bstan pa rnams las des dge slong rang bzhin du gnas pa las mngon par smra ba dang phyag dang mngon du ldang ba dang / thal mo sbyar ba dang / gus pa'i las dag bdag gir mi bya'o zhes bya ba man chad nas nang par sngar langs te gtsug lag khang du sgo dbye ba dang mar me'i kong bu bsal bar bya'o zhes smos pa nyid ma gtogs pa de yan chad dang / de'i 'og nas de'i gtsug lag khang tha mar 'os pa yin no/ /thams cad du rnyed pa dbang ba nyid yin no/ /dge ba'i phyogs la mi g.yel bar bya'o zhes smos pa'i tshig de gsum ni ril gyis spyad par bya dgos so/ /gzhan ni spyad par bya ba la ci dgar zad do/ /de ltar de dag ni bcabs pa'i nyes pa yod pa la spo ba sbyin pa'i cho ga dang las yin no/ /mgu bar bya ba sbyin pa'i go rims ni 'di yin te/ dge 'dun lhag ma'i ltung ba byung la bcabs pa'i nyes pa spo ba'i las kyis med par byas pa yang rung bcabs pa'i nyes pa ye med pa yang rung ste/ des dge 'dun la zhag drug mgu bar bya ba spyad par gsol ba dang / dge 'dun gyis de la gsol ba dang bzhi'i las kyis zhag drug mgu bar bya ba spyad pa sbyin pa dang / des zhag drug tu sa gzhan na gnas pa'i spyod pas mgu bar bya ba spyad par bya'o/ /de la des dge 'dun la zhag drug mgu bar bya ba spyad pa gsol ba'i cho ga dang sngags ni 'di ltar bya ste/ des dge 'dun lhag ma'i ltung ba gang yang rung ba byung ba la bcabs pa'i nyes pa med na de nyid kyis gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas/ dge 'dun thams cad 'dug cing mthun par gyur pa la mchil lham gnyis phud de bla gos phrag pa gcig tu byas nas rgan rims la phyag 'tshal te/ rgan pa'i mtha' logs su tsog pur 'dug nas thal mo sbyar ba btud de rang gis zhag drug mgu bar bya ba spyad par gsol ba'i sngags 'di skad ces brjod par bya'o/ /dge 'dun btsun pa rnams gsan du gsol/ bdag dge slong 'char ka la che ge mo las byung ba'i dge 'dun lhag ma'i ltung ba byung ste/ bdag dge slong 'char ka la che ge mo las byung ba'i dge 'dun lhag ma'i ltung ba byung bas de'i slad du dge 'dun las zhag drug mgu bar bgyi ba gsol na thugs brtse ba can dge 'dun btsun pa rnams kyis thugs brtse ba'i slad du bdag dge slong 'char ka la che ge mo las byung ba'i dge 'dun lhag ma'i ltung ba byung ba de'i slad du zhag drug mgu bar bgyi ba stsal du gsol zhes lan gsum du bzlas/ de ni des dge 'dun la zhag drug mgu bar bya ba spyad pa gsol ba'i cho ga dang sngags so/ /de dge 'dun gyis de la gsol ba dang bzhi'i las kyis zhag drug mgu bar bya ba spyad pa sbyin pa'i cho ga dang las ni 'di ltar bya ste/ des de ltar zhag drug mgu bar bya ba spyad par gsol ma thag tu dge slong gcig gis gsol ba byas te las bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong 'char ka 'di la che ge mo las byung ba'i dge 'dun lhag ma'i ltung ba byung la dge slong 'char ka 'di che ge mo las byung ba'i dge 'dun lhag ma'i ltung ba byung ba de'i slad du dge 'dun las zhag drug mgu bar bgyi ba gsol na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong 'char ka 'di la che ge mo las byung ba'i dge 'dun lhag ma'i ltung ba byung ba de'i slad du zhag drug mgu bar bgyi ba spyad par gsol to/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ dge slong 'char ka 'di la che ge mo las byung ba'i dge 'dun lhag ma'i ltung ba byung la dge slong 'char ka 'di che ge mo las byung ba'i dge 'dun lhag ma'i ltung ba byung ba de'i slad du dge 'dun las zhag drug mgu bar bgyi ba gsol te/ de'i slad du dge 'dun gyis dge slong 'char ka la che ge mo las byung ba'i dge 'dun lhag ma'i ltung ba de'i slad du zhag drug mgu bar bgyi ba gsol na/ tshe dang ldan pa gang dag dge slong 'char ka la che ge mo las byung ba'i dge 'dun lhag ma'i ltung ba byung ba de'i slad du zhag drug mgu bar bgyi ba stsal bar bzod pa de dag ni cang ma gsung shig / gang dag mi bzod pa de dag ni gsungs shig /'di ni las brjod pa dang po ste/ de bzhin du lan gnyis lan gsum du bzlas/ dge 'dun gyis bzod cing gnang nas dge 'dun gyis dge slong 'char ka la che ge mo las byung ba'i dge 'dun lhag ma'i ltung ba byung ba de'i slad du zhag drug mgu bar bgyi ba stsal lags te/ 'di ltar cang mi gsung bas de de bzhin du 'dzin to/ /de ni dge 'dun gyis de la gsol ba dang bzhi'i las kyis zhag drug mgu bar bya ba spyad pa sbyin pa'i cho ga dang las so/ /des zhag drug tu sa gzhan na gnas pa'i spyod pas mgu bar bya ba'i go rims ni 'di yin te/ des kun du spyad pa'i chos ji ltar bcas pa rnams la spyad par bya ba dang / dge 'dun la brjod par bya ba dang / 'thab krol byed pa 'ong na btang ba dang / de song na blang ba'o/ /zhag drug mgu bar bya ba spyod pa des kun du spyad pa'i chos ni sa gzhan na gnas pa'i spyod pa'i gzhi las 'byung ste/ sngar spo ba spyod pas kun du spyod pa'i chos ji skad bstan pa thams cad lhag chad med par 'dir yang sbyar bar bya'o/ /re zhig de dag ni des kun du spyad pa'i chos ji ltar bcas pa rnams la spyad par bya ba yin no/ /dge 'dun la brjod par bya ba ni 'di yin te/ sngar spo ba spyod pa des spyad pa'i dus zla ba phyed tshun chad ni yun thung ba yin la/ zla ba phyed phan chad ni yun ring ba yin te zhes bya ba lta bu 'di la med de/ 'dis ni zhag drug kho na mgu bar bya ba spyad par zad pas des nyin re lan re nang par ram/ dro kha'am/ dgongs ka gang yang rung bar mtshams de'i dge 'dun la gaN+DI brdungs te 'dus pa thams cad dam bzhi yan chad tshogs pa la rang gis zhag drug mgu bar bya ba spyad pa blangs pa de'i sngar zhag du 'das pa dang / phyis zhag du 'byung ba de sngags kyi tshig gis brjod par bya'o/ /de'i cho ga dang sngags ni rang gis gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas/ dge slong bzhi yan chad ji snyed tshogs pa la mchil lham gnyis phud de bla gos phrag pa gcig tu byas nas rgan rims la phyag 'tshal te/ rgan pa'i mtha' logs su tsog pur 'dug nas thal mo sbyar ba btud de 'di skad brjod par bya'o/ /dge 'dun btsun pa rnams gsan du gsol/ /bdag dge slong ming 'di zhes bgyi ba la che ge mo las byung ba'i dge 'dun lhag ma'i ltung ba byung la bdag dge slong ming 'di zhes bgyi ba la che ge mo las byung ba'i dge 'dun lhag ma'i ltung ba byung ba de'i slad du dge 'dun las zhag drug mgu bar bgyi ba gsol to/ /dge 'dun gyis bdag dge slong ming 'di zhes bgyi ba la che ge mo las byung ba'i dge 'dun lhag ma'i ltung ba byung ba de'i slad du zhag drug mgu bar bgyi ba stsal bas zhag 'di snyed cig na bgyis lags/ bgyi ba ni zhag 'di snyed cig mchis te/ dge 'dun btsun pa rnams kyis bdag mgu bar bgyi ba spyod par gzung du gsol zhes lan gsum du bzlas/ gal te nyin re lan re de skad ma brjod na dus gang gi tshe ma brjod pa nyin mtshan de gcad par bya'o/ /de ni des dge 'dun la brjod par bya ba'i cho ga dang sngags so/ /des 'thab krol byed pa 'ong na gtang ba'i cho ga dang sngags ni 'di yin te/ zhag drug mgu bar bya ba spyod pa des gal te gang zag thams cad la 'thab krol byed cing phyir rgol ba'am/ de nyid dang mi mdza' ba nyid du gnas pa'i gang zag 'thab krol byed pa gcig gam du ma 'ong bar thos shing gal te de dag gis gzhi des gleng ba dang dran par byed pas 'jigs na de'i tshe des dge 'dun tshogs pa la yang rung gang zag la yang rung ste/ mgu bar bya ba spyod pa des cho ga dang sngags kyis phyir gtang bar bya zhing bdag nyid rang bzhin du gnas pa nyid du gzhag par bya'o/ /dge 'dun la phyir btang ba'i cho ga dang sngags ni 'di yin te/ bdag nyid kyis gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas dge 'dun thams cad 'dug cing mthun par gyur pa la mchil lham gnyis phud de bla gos phrag pa gcig tu byas nas rgan rims la phyag 'tshal te/ rgan pa'i mtha' logs su tsog pur 'dug nas thal mo sbyar ba btud de 'di skad ces brjod par bya'o/ /dge 'dun btsun pa rnams gsan du gsol/ bdag dge slong ming 'di zhes bgyi ba mgu bar bgyid pas dge slong 'thab krol bgyid pa mtshang 'bru bar bgyid pa/ 'thab mo bgyid pa/ 'gyod par bgyid pa/ rtsod par bgyid pa dag mchi zhes thos te/ de dag gis bdag la gzhi 'dis gleng bar 'gyur dran par bgyid par 'gyur bas bdag gis tshe dang ldan pa dag gi mdun du mgu bar bgyid pa slar gtang bar bgyi'o/ /phyir rgol ba mi mdza' ba de dag slar mchis nas yang mgu bar bgyi ba blang bar bya'o/ /dge 'dun btsun pa rnams kyis bdag rang bzhin du gnas par gzung du gsol zhes lan gsum du bzlas/ gang zag la phyir btang ba'i cho ga dang sngags kyi gzhung ni zhu ba las/ btsun pa bcom ldan 'das kyis gal te mgu ba byed pa'i dgra bo 'ong na des mgu ba byed pa'i spyod pa bag yangs su bya'o zhes bka' stsal na/ des ji ltar bag yangs su bgyi/ nye ba 'khor dge slong des mchil lham gnyis phud de bla gos phrag pa gcig tu byas nas rgan rims la phyag 'tshal te dge slong gcig gi mdun du tsog pur 'dug nas thal mo sbyar ba btud de 'di skad ces brjod par bya'o/ /tshe dang ldan pa dgongs su gsol/ bdag dge slong mgu bar bgyid pa'i dgra bo dge slong mchis te/ bdag ming 'di zhes bgyi ba mgu ba'i spyod pa bag yangs su bgyid cing slar yang len par bgyid do/ /yang blangs te spyod par bgyid na/ tshe dang ldan pas bdag ngo tsha ma mchis par mi gzung du gsol zhes lan gsum du bzlas/ dge slong nyan pas thabs yin no zhes brjod par bya/ mgu bar bya ba gtong bas legs so zhes brjod par bya'o zhes gsungs pa yin no/ /des mgu par bya ba spyod pa btang nas phyir ma blangs kyi bar du mgu bar bya ba spyad mi dgos par rang bzhin du gnas par bya'o/ /de ni 'thab krol byed pa 'ong na btang ba'i cho ga dang sngags so/ /'thab krol byed pa song na blang ba'i cho ga dang sngags ni 'di yin te/ gang zag 'thab krol can de song zhing 'jigs pa dang bral na gtsug lag khang de nyid du mgu bar bya ba spyad pa de dge 'dun nam gang zag las cho ga dang sngags kyis phyir blang bar bya'o/ /dge 'dun las blang ba'i cho ga dang sngags ni de rang gis gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas/ dge 'dun thams cad 'dug cing mthun par gyur pa la mchil lham gnyis phud de bla gos phrag pa gcig tu byas nas rgan rims la phyag 'tshal te/ rgan pa'i mtha' logs su tsog pur 'dug nas thal mo sbyar ba btud de 'di skad ces brjod par bya'o/ /dge 'dun btsun pa rnams gsan du gsol/ bdag dge slong ming 'di zhes bgyi ba mgu bar bgyid pas dge slong 'thab krol bgyid pa/ mtshang 'dru bar bgyid pa/ 'thab mo bgyid pa/ 'gyed par bgyid pa/ rtsod par bgyid pa dag mchi zhes thos te/ de dag gis bdag la gzhi 'dis gleng bar 'gyur dran par bgyid par 'gyur bas bdag gis de skad thos nas dge 'dun rnams kyi mdun du mgu bar bgyi ba slar btang ba'i phyir rgol ba mi mdza' ba de dag slar mchis lags pas bdag mgu bar bgyi ba yang slar len to/ /mgu bar bgyi ba zhag ma 'khor ba rnams bgyi'o/ /dge 'dun btsun pa rnams kyis bdag mgu bar bgyid par gzung du gsol zhes lan gsum du bzlas/ gang zag gi mdun du phyir blang ba'i cho ga dang sngags kyang des mchil lham gnyis phud de bla gos phrag pa gcig tu byas nas phyag 'tshal te/ dge slong gi mdun du tsog pur 'dug nas thal mo sbyar ba btud de 'di skad ces brjod par bya'o/ /tshe dang ldan pa dgongs su gsol/ bdag dge slong ming 'di zhes bgyi ba mgu bar bgyid pa dge slong dgra bo mchis te/ bdag ming 'di zhes bgyi bas mgu ba'i spyod pa bag yangs su bgyis pa/ dgra bo dge slong de dag slar mchis lags pas bdag mgu bar bgyi ba yang slar len to/ /mgu bar bgyi ba zhag ma 'khor ba rnams bgyi'o/ /tshe dang ldan pa bdag mgu bar bgyid par gzung du gsol zhes lan gsum du bzlas/ nyan pas thabs yin no zhes brjod par bya'o/ /mgu bar bya ba len pas legs so zhes brjod par bya'o/ /des mgu bar bya ba'i spyod pa phyir blangs nas/ kun du spyod pa'i chos snga ma bzhin du mgu bar bya ba zhag ma 'khor ba rnams bgyi'o/ /de dag ni mgu bar bya ba spyod pa des zhag drug tu sa gzhan na gnas pa'i spyod pas mgu bar bya ba spyad pa'i chos rnams yin te/ de lta bus zhag drug spyad na mgu bar bya ba spyad zin par rig par bya'o/ /da ni mgu bar bya ba byas la ma phyung gi bar du des kun du spyad pa'i chos rnams bstan par bya ste/ mgu bar bya ba byas la ma phyung ba de ni mgu bar bya ba'i las ni byas la rang bzhin du gnas pa nyid ma yin pa'i phyir des kyang sngar spo ba byas la mgu bar bya ba ma yin pas kun du spyad pa'i chos ji skad bstan pa rnams lhag chad med par spyad par bya'o/ /de ltar na spo ba spyad pa dang mgu ba spyod pa gnyis kyi kun du spyad pa'i chos kyang 'dra la/ spo ba byas la mgu ba ma byin pa dang / mgu bar byas la ma phyung ba gnyis kyi kun tu spyad pa'i chos kyang 'dra'o/ /dbyung ba byas zin pas ni kun du spyad pa'i chos de dag gang yang spyad mi dgos te rang bzhin du gnas par 'gyur zin pa'i phyir ro zhes bya bar shes par bya'o/ /de ltar de dag ni zhag drug mgu bar bya ba sbyin pa'i cho ga dang las yin no/ /de'i 'og tu dbyung ba sbyin pa'i go rims ni 'di yin te/ mgu bar bya ba spyad zin pa des mtshams gang na dge slong stong nyi shu yan chad kyi dge 'dun gnas pa gud du ma spyad pa thams cad dam dkyil 'khor bar gud du spyad pa la yang rung ste/ de dag la rang gis dbyung ba gsol ba dang dge 'dun gyis de la gsol ba dang bzhi'i las kyis bsdigs pa dang gzengs bstod pa dang bcas pas gang zag de dge 'dun lhag ma'i ltung ba las dbyung bar bya'o/ /de la dge 'dun la rang gis dbyung bar gsol ba'i cho ga dang sngags ni 'di ltar bya ste/ des dge 'dun l hag ma'i ltung ba gang yang rung ba byung la mgu ba zhag drug spyad zin na de nyid kyis gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas dge 'dun thams cad 'dug cing mthun par gyur pa la mchil lham gnyis phud de bla gos phrag pa gcig tu byas nas rgan rims la phyag 'tshal te/ rgan pa'i mtha' logs su tsog pur 'dug nas thal mo sbyar ba btud de rang gi dbyung ba gsol ba'i sngags 'di skad ces brjod par bya'o/ /dge 'dun btsun pa rnams gsan du gsol/ bdag dge slong 'char ka la che ge mo las byung ba'i dge 'dun lhag ma'i ltung ba byung la/ bdag dge slong 'char ka dge 'dun gyi gan du mchis te/ che ge mo las byung ba'i dge 'dun lhag ma'i ltung ba byung ba de'i slad du dge 'dun las zhag drug mgu bar bgyi ba gsol nas dge 'dun gyis bdag dge slong 'char ka la che ge mo las byung ba'i dge 'dun lhag ma'i ltung ba byung ba de'i slad du zhag drug mgu bar bgyi ba stsal te/ bdag dge slong 'char kas che ge mo las byung ba'i dge 'dun lhag ma'i ltung ba byung ba de'i slad du zhag drug mgu bar bgyis lags te/ dge 'dun las dbyung ba gsol na/ thugs brtse ba can dge 'dun btsun pa rnams kyis thugs brtse ba'i slad du bdag dge slong 'char ka la che ge mo las byung ba'i dge 'dun lhag ma'i ltung ba byung ba de'i slad du zhag drug mgu ba bgyis lags pa las dbyung ba stsal du gsol/ lan gsum du bzlas/ de ni dge 'dun la rang gi dbyung ba gsol ba'i cho ga dang sngags so/ /dge 'dun gyis de la gsol ba dang bzhi'i las kyis bsdigs pa dang / gzengs bstod pa dang bcas pas de dbyung bar bya ba'i go rims ni 'di yin te/ dang por dge slong gcig gis gsol ba bya'o/ /de'i rjes la bsdigs pa bya'o/ /de'i rjes la las brjod pa dang po dang gnyis pa dang gsum pa mjug sdud pa dang bcas pa bya'o/ /de'i rjes la gzengs bstod par bya ste/ de tsam gyis na dge 'dun lhag ma'i ltung ba las byung ba yin no/ /de la dang por dge slong gcig gis gsol ba bya ba'i cho ga dang sngags 'di yin te/ des de ltar dbyung ba gsol ma thag tu dge slong gcig gis gsol ba bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong 'char ka 'di la che ge mo las byung ba'i dge 'dun lhag ma'i ltung ba byung la/ dge slong 'char ka 'di dge 'dun gyi gan du mchis te/ che ge mo las byung ba'i dge 'dun lhag ma'i ltung ba byung ba de'i slad du dge 'dun las zhag drug mgu bar bgyi ba gsol nas/ dge 'dun gyis dge slong 'char ka 'di la che ge mo las byung ba'i dge 'dun lhag ma'i ltung ba byung ba de'i slad du zhag drug mgu bar bgyi ba stsal te/ dge slong 'char ka 'dis che ge mo las byung ba'i dge 'dun lhag ma'i ltung ba byung ba de'i slad du zhag drug mgu ba bgyis lags te/ dge 'dun las dbyung ba gsol na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong 'char ka che ge mo las byung ba'i dge 'dun lhag ma'i ltung ba byung ba de'i slad du zhag drug mgu ba bgyis pa dbyung bar bgyi'o/ /'di ni gsol ba'o/ /de ni dang por dge slong gcig gis gsol ba bya ba'i cho ga dang sngags so/ /de'i rjes la bsdigs par bya ba'i cho ga dang sngags ni 'di yin te/ de ltar dge slong des gsol ba byas ma thag tu dge slong de nyid kyis ltung ba byung ba rtsa ba bcad de sa la bkram pa ltar lus thams cad sa la khu bub bam gan rkyal lam glos 'gyel du bcug ste/ de ltar skyel ba de la 'di skad ces brjod par bya'o/ /'char ka khyod nyon cig khyod kyis legs pa ma byas so/ /legs pa shin tu ma byas so/ /bya ba gzhan yin na gzhan byas so/ /bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de'i chos ni 'di ltar 'dod chags dang bral bar bya ba'i phyir sems rnam par grol ba dang / shes rab rnam par grol ba'i chos ston cing zhe sdang 'dod chags dang bral bar bya ba dang / gti mug 'dod chags dang bral bar bya ba'i phyir sems rnam par grol ba dang / shes rab rnam par grol ba'i chos ston bzhin du khyod kyis mi mdzes pa 'di lta bu 'di byas pa mi rigs so/ /mi gti mug can khyod kyis sbrul nag po dug myur du khyab par byed pa dug drag pa dug rno ba la lag pa gnyis kas gzung ba ni bla'i/ kun du chags pa'i sems kyis rang gi yan lag gi rnam pa la bzung ba ni de lta ma yin no/ /mi gti mug can khyod lag pa gang dag gis bram ze dang khyim bdag dad pa can rnams kyis dad pas sbyin par bya ba blang par bya ba'i lag pa de gnyis kyis mi mdzes pa 'di lta bu 'di bya bar mi rigs so/ /mi gti mug can khyod kyis bdag la bsnyen bkur bya ba nyams su blangs par gyur to/ /'char ka gnyis po 'di dag ni chos kyi sgron ma dang / chos kyi snang ba dang / chos kyi 'od dang / chos kyi gsal ba dang / chos kyi snang gsal dang / chos kyi mar me dang / chos kyi rab gsal med par byed pa ste/ gnyis gang zhe na/ ltung ba 'byin pa gang yin pa dang / ltung ba byung nas chos bzhin du phyir mi 'chos pa gang yin pa'o/ /gnyis ni sdig pa'i rtsa ba mi rko/ rgyun las bzlog pa la mi 'bad/ 'bab chu dang 'khri shing mi skems/ bdud mi 'dul/ bdud kyi rgyal mtshan mi snyol/ chos kyi rgyal mtshan mi bsgreng / sdig pa'i rgyun mi gcad do/ /de bzhin gshegs pa dgra bcom pa yang dag par rdzogs pa'i sangs rgyas kyi chos kyi 'khor lo chos dang rjes su mthun par bskor ba rjes su mi bskor ba ste/ gnyis gang zhe na/ ltung ba 'byin pa gang yin pa dang / ltung ba byung nas chos bzhin du phyir mi 'chos pa gang yin pa'o/ /gnyis ni kun nas nyon mongs par 'gyur ba dang / gnyis kyis zag pa 'phel bar 'gyur ba ste/ gnyis gang zhe na/ ltung ba 'byin pa gang yin pa dang / ltung ba byung nas chos bzhin du phyir mi 'chos pa gang yin pa'o/ /'char ka khyod kyis ltung ba byung ba 'di ma bshags shing so sor ma bshags na mi rtag pa'i 'du shes dang / mi rtag pa la sdug bsngal ba'i 'du shes dang / sdug bsngal ba la bdag med pa'i 'du shes dang / zas la mi mthun pa'i 'du shes dang / 'jig rten thams cad la mngon par mi dga' ba'i 'du shes dang / nyes dmigs kyi 'du shes dang / spong ba'i 'du shes dang / 'dod chags dang bral ba'i 'du shes dang / 'gog pa'i 'du shes dang / 'chi ba'i 'du shes dang / mi sdug pa'i 'du shes dang / rnam par bsngos pa'i 'du shes dang / rnam par rnags pa'i 'du shes dang / rnam par bam pa'i 'du shes dang / rnam par 'bus gzhigs pa'i 'du shes dang / rnam par zos pa'i 'du shes dang / rnam par dmar ba'i 'du shes dang / rnam par 'thor ba'i 'du shes dang / rus gong gi 'du shes dang / stong pa nyid du so sor rtog pa'i 'du shes kyi 'os ma yin/ bsam gtan dang po dang / gnyis pa dang / gsum pa dang / bzhi pa dang / byams pa dang / snying rje dang / dga' ba dang / btang snyoms dang / nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min skye mched dang / rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / rdzu 'phrul gyi yul dang / lha'i rna ba dang / sems kyi rnam grangs dang / sngon gyi gnas dang / 'chi 'pho dang / skye ba dang / zag pa zad pa'i 'os ma yin no/ /'char ka ltung ba 'di ma bshags shing so sor ma bshags na/ 'gro ba gnyis las gang yang rung ba zhig khyod kyi 'gro ba yin par shes par bya ste/ sems can dmyal ba'am dud 'gro'o/ /bcom ldan 'das kyis kyang las kyi mtha' 'chab pa'i 'gro ba ni gnyis te/ sems can dmyal ba'am dud 'gro'o/ /gang dag nyes pa la yid mi ches pa de dag ni 'chab par sems so zhes gsungs so/ /de ni bsdigs par bya ba'i cho ga dang sngags so/ /de'i 'og tu las brjod pa dang po dang gnyis pa dang gsum pa mjug sdud pa dang bcas pa bya ba'i cho ga dang sngags ni 'di yin te/ de ltar bsdigs pa byas ma thag tu de'i mjug thogs su dge slong las byed pa de nyid kyis ltung ba byung ba de yang thal mo sbyar te/ tsog pur 'dug tu bcug la bdag kyang 'dug bzhin du 'di skad ces brjod par bya'o/ /dge 'dun btsun pa rnams gsan du gsol/ dge slong 'char ka 'di la che ge mo las byung ba'i dge 'dun lhag ma'i ltung ba byung la/ dge slong 'char ka 'di dge 'dun gyi gan du mchis te/ che ge mo las byung ba'i dge 'dun lhag ma'i ltung ba byung ba de'i slad du dge 'dun las zhag drug mgu bar bgyi ba gsol nas/ dge 'dun gyis dge slong 'char ka 'di la che ge mo las byung ba'i dge 'dun lhag ma'i ltung ba byung ba de'i slad du zhag drug mgu bar bgyi ba stsal te/ dge slong 'char ka 'dis che ge mo las byung ba'i dge 'dun lhag ma'i ltung ba byung ba de'i slad du zhag drug mgu bar bgyis lags te/ dge 'dun las dbyung ba gsol na/ de'i slad du dge 'dun gyis dge slong 'char ka che ge mo las byung ba'i dge 'dun lhag ma'i ltung ba byung ba de'i slad du zhag drug mgu bar bgyis pa dbyung bar mdzad nas/ tshe dang ldan pa gang dag dge slong 'char ka che ge mo las byung ba'i dge 'dun lhag ma'i ltung ba byung ba de'i slad du zhag drug mgu bar bgyis pa dbyung bar bzod pa de dag ni cang ma gsung shing / /gang dag mi bzod pa de dag ni gsungs shig /'di ni las brjod pa dang po ste/ de bzhin du lan gnyis lan gsum du bzlas/ dge 'dun gyis bzod cing gnang nas/ dge 'dun gyis dge slong 'char ka che ge mo las byung ba'i dge 'dun lhag ma'i ltung ba byung ba de'i slad du zhag drug mgu bar bgyis pa phyung lags te/ 'di ltar cang mi gsung bas de de bzhin du 'dzin to/ /de ni las brjod pa dang po dang gnyis pa dang gsum pa mjug sdud pa dang bcas pa bya ba'i cho ga dang sngags so/ /de'i 'og tu gzengs bstod pa'i cho ga dang sngags ni 'di yin te/ dge slong las byed pa de nyid kyis de'i mod la dge 'dun gyi dbus su gang zag de thal mo sbyar te tsog pur 'dug tu bcug la 'di skad ces brjod par bya'o/ /'char ka khyod kyis legs pa byas so/ /legs pa shin tu byas so/ /gnyis ni mkhas pa/ gnyis ni gsal ba/ gnyis ni dge ba/ gnyis ni skyes bu dam pa ste/ gnyis gang zhe na/ ltung ba mi 'byin pa gang yin pa dang / ltung ba byung nas chos bzhin du phyir bcos pa gang yin pa'o/ /gnyis ni sdig pa'i rtsa ba rko ba/ rgyun las bzlog pa la 'bad pa/ 'bab chu dang 'khri shing skems pa/ bdud 'dul ba/ bdud kyi rgyal mtshan snyol ba/ chos kyi rgyal mtshan sgreng ba/ sdig pa'i rgyun gcod pa/ de bzhin gshegs pa dgra bcom pa yang dag par rdzogs pa'i sangs rgyas kyi chos kyi 'khor lo chos dang mthun par bskor ba rjes su bskor ba ste/ gnyis gang zhe na/ ltung ba mi 'byin pa gang yin pa dang / ltung ba byung nas chos bzhin du phyir 'chos pa gang yin pa'o/ /gnyis ni rnam par byang bar 'gyur zhing kun nas nyon mongs par mi 'gyur ba dang / gnyis kyis zag pa 'phel bar mi 'gyur te/ gnyis gang zhe na/ ltung ba mi 'byin pa gang yin pa dang / ltung ba byung nas chos bzhin du phyir 'chos pa gang yin pa'o/ /'char ka khyod ltung ba 'di bshags shing so sor bshags pas/ mi rtag pa'i 'du shes dang mi rtag pa la sdug bsngal ba'i 'du shes dang / sdug bsngal ba la bdag med pa'i 'du shes dang / zas la mi mthun pa'i 'du shes dang / 'jig rten thams cad la mngon par mi dga' ba'i 'du shes dang / nyes dmigs kyi 'du shes dang / spong ba'i 'du shes dang / 'dod chags dang bral ba'i 'du shes dang / 'gog pa'i 'du shes dang / 'chi ba'i 'du shes dang / mi sdug pa'i 'du shes dang / rnam par bsngos pa'i 'du shes dang / rnam par rnags pa'i 'du shes dang / rnam par bam pa'i 'du shes dang / rnam par 'bus gzhigs pa'i 'du shes dang / rnam par zos pa'i 'du shes dang / rnam par dmar ba'i 'du shes dang / rnam par 'thor ba'i 'du shes dang / rus gong gi 'du shes dang / stong pa nyid du so sor rtog pa'i 'du shes kyi 'os su gyur pa yin/ bsam gtan dang po dang / gnyis pa dang / gsum pa dang / bzhi pa dang / byams pa dang / snying rje dang / dga' ba dang / btang snyoms dang / nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min skye mched dang / rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / rdzu 'phrul gyi yul dang / lha'i rna ba dang / sems kyi rnam grangs dang / sngon gyi gnas dang / 'chi 'pho dang skye ba dang / 'bras bu'i mchog dgra bcom pa'i 'os su gyur pa yin no/ /'char ka ltung ba 'di bshags shing so sor bshags pas 'gro ba gnyis po las gang yang rung ba zhig khyod kyi 'gro ba yin par shes par bya ste/ lha dang mi'o/ /bcom ldan 'das kyis kyang las kyi mtha' mi 'chab pa'i 'gro ba ni gnyis te/ lha dang mi'o/ /gang dag ngas bshad pa la yid ches pa de dag ni 'chab par mi sems so zhes gsungs so/ /yang gsungs pa/ bcabs pa char pa bzhin du bab/ /bshags pa char bzhin bab mi 'gyur/ /de lta bas na bshags par bya/ /de ltar char bzhin mi 'bab ce'o/ /tshe dang ldan pa 'char ka khyod phyung zin gyis bag yod par sgrubs shig /de ni gzengs bstod pa'i cho ga dang sngags te/ de tsam gyis na de dge 'dun lhag ma'i ltung ba las byung bar rig par bya'o/ /da ni 'dul ba'i gzhi bsdu ba'i khyad par cung zhig bshad par bya ste/ spo ba zhes bya ba'i khyad par ni rnam pa gsum ste/ spo ba dang / gzhi nas spo ba dang / yang gzhi nas blang ste spo ba'o/ / mgu bar bya ba zhes bya ba'i khyad par yang rnam pa gsum ste/ mgu bar bya ba dang / gzhi nas mgu bar bya ba dang / yang gzhi nas bslang ste mgu bar bya ba'o/ /de la spo ba zhes bya ba ni dge 'dun lhag ma'i ltung ba byung la/ ji srid du bcabs pa'i dus de srid du sa gzhan na gnas pa'i spyod pas spo ba byed du gzhug pa ji skad sngar bstan pa'o/ /gzhi nas spo ba byed pa nyid ni dge 'dun lhag ma'i ltung ba rigs mthun pa yang byung na/ spo ba snga ma mnos te byas pa de zhig pas de'i phyir yang gzhi nas bslang ste spo ba gdod brtsam pa'o/ /yang gzhi nas bslang ste spo ba zhes bya ba ni gzhi nas spo ba byed pa nyid na dge 'dun lhag ma'i ltung ba rigs mthun pa yang byung na/ spo ba dang gzhi nas spo ba snga ma mnos te byas pa de nyid zhig pas de'i phyir yang gzhi nas bslang ste spo ba gdod brtsam pa'o/ /mgu bar bya ba zhes bya ba ni dge 'dun lhag ma'i ltung ba las dbyung ba'i phyir zhag drug gi bar du sa gzhan na gnas pa'i spyod pas mgu bar bya ba spyad pa ji skad sngar bstan pa'o/ /gzhi nas mgu bar bya ba zhes bya ba ni mgu bar bya ba byed pa nyid ni dge 'dun lhag ma'i ltung ba rigs mthun pa yang byung na mgu bar bya ba snga ma mnos te byas pa de zhig pas de'i phyir gzhi nas mgu bar bya ba gdod brtsam pa'o/ /yang gzhi nas bslang ste mgu bar bya ba zhes bya ba ni gzhi nas mgu bar bya ba byed pa nyid na dge 'dun lhag ma'i ltung ba rigs mthun pa yang byung na mgu bar bya ba dang / gzhi nas mgu bar bya ba snga ma mnos te byas pa de gnyis zhig pas de'i phyir yang gzhi nas bslang ste mgu bar bya ba gdod brtsam pa'o/ /de dag la dge 'dun lhag ma'i ltung ba rigs mthun par byung bas de ltar 'gyur gyi rigs mi mthun pas ni de ltar mi 'gyur ro/ /de dag las spo ba sbyin pa'i tshigs la mu gsum yod de/ spo ba sbyin pa dang / gzhi nas spo ba sbyin pa dang / yang gzhi nas bslang ste spo ba sbyin pa'o/ /mgu bar bya ba sbyin pa'i tshigs la mu bcu gnyis yod de/ mgu bar bya ba sbyin pa dang / gzhi nas mgu bar bya ba sbyin pa dang / yang gzhi nas bslang ste mgu bar bya ba sbyin pa gsum dang / spo ba byas pa la mgu bar bya ba sbyin pa dang / spo ba byas pa la gzhi nas mgu bar bya ba sbyin pa dang / spo ba byas pa la yang gzhi nas bslang ste mgu bar bya ba sbyin pa gsum dang / gzhi nas spo ba byas pa la mgu bar bya ba sbyin pa dang / gzhi nas spo ba byas pa la gzhi nas mgu bar bya ba sbyin pa dang / gzhi nas spo ba byas pa la yang gzhi nas bslang ste mgu bar bya ba sbyin pa gsum dang / yang gzhi nas bslang ste spo ba byas pa la mgu bar bya ba sbyin pa dang / yang gzhi nas bslang ste spo ba byas pa la gzhi nas mgu bar bya ba sbyin pa dang / yang gzhi nas bslang ste spo ba byas pa la yang gzhi nas bslang ste mgu bar bya ba sbyin pa gsum ste bcu gnyis so/ /de dag sbyin pa'i rim pa yang dang por bdag gis lan gsum gsol ba dang / de nas dge 'dun gyis gsol ba dang bzhi'i las kyis sbyin pa dang / byin nas sa gzhan na gnas pa'i spyod pa kun du spyod pa'i chos ji ltar bcas par spyad cing nyin re lan re'am nyi ma gsum mam bzhi zhing dge 'dun nam gang zag la nyi ma thal ba dang / 'byung ba brjod pa dang / dgra bo 'ong na phyir btang la dgra bo song na phyir blang ba'i cho ga dang rim pa ni snga ma bzhin no/ /sngags kyi tshig la ni bye brag yod de/ kha cig ni 'dul ba'i gzhi dang / las brgya rtsa gcig pa dag las 'byung ba bzhin dngos su sbyar ro/ /kha cig ni 'khor lo bzhin du sbyar ro/ /dbyung ba sbyin pa'i tshigs la yang mu bcu gnyis yod de/ mgu bar bya ba spyad pa dbyung ba dang / gzhi nas mgu bar bya ba spyad pa dbyung ba dang / yang gzhi nas bslang ste mgu bar bya ba spyad pa dbyung ba gsum dang / spo ba dang mgu bar bya ba spyad pa dbyung ba dang / spo ba dang gzhi nas mgu bar bya ba spyad pa dbyung ba dang / spo ba dang yang gzhi nas bslang ste mgu bar bya ba spyad pa dbyung ba gsum dang / gzhi nas spo ba dang mgu bar bya ba spyad pa dbyung ba dang / gzhi nas spo ba dang gzhi nas mgu bar bya ba spyad pa dbyung ba dang / gzhi nas spo ba dang yang gzhi nas bslang ste mgu bar bya ba spyad pa dbyung ba gsum dang / yang gzhi nas bslang ste spo ba dang mgu bar bya ba spyad pa dbyung ba dang / yang gzhi nas bslang ste spo ba dang gzhi nas mgu bar bya ba spyad pa dbyung ba dang / yang gzhi nas bslang ste spo ba dang yang gzhi nas bslang ste mgu bar bya ba spyad pa dbyung ba gsum ste bcu gnyis so/ /de dag sbyin pa'i rim pa yang dang por bdag gis lan gsum dbyung ba gsol ba dang / de nas dge 'dun gyis gsol ba dang bzhi'i las kyis bsdigs pa dang / gzengs bstod pa dang bcas pas dbyung ba'i cho ga dang rim pa ni snga ma bzhin no/ /sngags kyi tshig la ni bye brag yod de/ kha cig ni 'dul ba'i gzhi dang las brgya rtsa gcig pa dag las 'byung ba bzhin dngos su sbyar ro/ / kha cig ni 'khor lo bzhin du sbyar ro/ /gzhi nas spo ba dang yang gzhi nas bslang ste spo ba sbyin pa'i tshigs 'di gnyis la ni ltung ba phyis byung ba de bcabs pa'i dus lhag pa der gzhug dgos la/ dus mnyam pa dang nyung ba ni der gzhug mi dgos te/ des gang la ltung ba snga ma bcabs pa'i dus zla ba phyed yod la/ ltung ba phyi ma bcabs pa'i dus kyang zla ba phyed dam de bas nyung ba yod pa de la ni/ mthol ba dang gzhi nas spo ba dang / yang gzhi nas bslang ste spo ba gsol ba dang / sbyin pa'i sngags kyi tshig tu yang zla ba phyed kho na smos la/ gzhi nas spo ba dang yang gzhi nas bslang ste spo ba yang zla ba phyed kho na sbyin par bya'o/ /gang la ltung ba snga ma bcabs pa'i dus zla ba phyed yod la/ ltung ba phyi ma bcabs pa'i dus zla ba gcig yod pa de la ni mthol ba dang / gzhi nas spo ba dang / yang gzhi nas bslang ste spo ba gsol ba dang / sbyin pa'i sngags kyi tshig tu yang zla ba gcig smos la/ gzhi nas spo ba dang yang gzhi nas bslang ste spo ba yang zla ba gcig sbyin par bya ste/ des ltung ba snga ma zla ba phyed bcabs pa dang / ltung ba phyi ma bcabs pa'i nyes pa gnyis ka med par 'gyur bar shes par bya'o/ /ltung ba phyi ma bcabs pa'i dus lhag ma gnas skabs gang la srid ce na/ spo ba spyod bzhin pa nyid na ltung ba snga ma dang 'dra ba byung la de'i mod la spo ba spyod pa mthar thug pa'i dus dang / de bas 'phyi ba'i dus gzhan du yang ltung ba bar ma mthol ba'i gnas skabs dang / spo ba'am gzhi nas spo ba bas ltung ba rigs mthun pa byung nas 'thab krol byed pa 'ong ba'i tshe phyir spo ba la sogs pa btang ste/ yang phyir len pa des btang ba'i gnas skabs su ltung ba bar ma dang phyi ma ma mthol bar bcabs pa'i dus ches ring du sgrub pa'i gnas skabs la srid do/ /spo ba sbyin pa dang / gzhi nas spo ba sbyin pa dang / yang gzhi nas bslang ste spo ba sbyin pa'i mu 'di gsum la bcabs pa'i dus nges par mi shes pa dang / ltung ba'i grangs nges par mi shes pa dang / ltung ba mang po byung ba la spo ba la sogs pa sbyin pa'i cho ga dang sngags ni 'di ltar bya ste/ bcabs pa'i dus nges par mi shes na bcabs pa'i phyir ni dus dpag tu med pa la brten par bya/ spo ba spyad pa'i phyir ni dag pa'i mtha' can zla ba bzhi la sogs pa la brten par bya ste/ des na spo ba la sogs pa gsol ba dang / sbyin pa dang / brjod pa dang gtong ba dang len pa'i sngags kyi tshig la 'di skad ces dge 'dun btsun pa rnams gsan du gsol/ bdag dge slong ming 'di zhes bgyi ba la che ge mo las byung ba'i dge 'dun lhag ma'i ltung ba byung ba dpag tu ma mchis par bcabs pas bdag dge slong ming 'di zhes bgyi ba la che ge mo las byung ba'i dge 'dun lhag ma'i ltung ba byung la/ dpag tu ma mchis par bcabs pa de'i slad du dge 'dun las dag pa'i mtha' can zla ba bzhi spo ba gsol na/ thugs brtse ba can dge 'dun btsun pa rnams kyis thugs brtse ba'i slad du bdag dge slong ming 'di zhes bgyi ba la che ge mo las byung ba'i dge 'dun lhag ma'i ltung ba byung ba dpag tu ma mchis par bcabs pa de'i slad du dag pa'i mtha' can zla ba bzhi spo ba stsal du gsol zhes brjod par bya'o/ /de la bcabs pa'i dus nges par mi shes pa'i phyir dpag tu med par bcabs zhes smos pas ni bcabs pa'i dus nyung ngur mi 'gyur ro/ /spo ba spyod pa'i phyir dag pa'i mtha' can zla ba bzhi smos pas ni spyad pa'i dus nyung ngur mi 'gyur te/ dge ba'i mtha' can zhes bya ba ni sngon ltung ba ma byung ba dag pa'i mtha' gang yin pa rang gis dran pa tshun chad nas ltung ba mthol ba'i bar ro/ /zla ba bzhi zhes bya ba ni mtshon pa ste/ zla ba phyed dam gcig gam gnyis sam gsum mam bzhi'am lnga la sogs pa dang po dag pa'i mtha' nas bzung ste/ ji tsam gyis na bcabs pa'i dus mi dran pa de nyung ba nyid du mi 'gyur ba de tsam gyi dus la brten na spo ba spyod pa'i dus tshang bar 'gyur ro/ /ltung ba'i grangs nges par mi shes na ltung ba'i phyir yang dpag tu med pa la brten par bya/ bcabs pa'i dus nges par shes na ni spo ba spyad pa'i phyir ni dus zla ba phyed la sogs pa nges pa la brten par bya/ bcabs pa'i dus kyang nges par ma shes na ni dpag tu med pa dang dag pa'i mtha' can zla ba bzhi la brten par bya ste/ des na spo ba la sogs pa gsol ba dang / sbyin pa dang brjod pa dang / gtong ba dang len pa'i sngags kyi tshig 'di skad ces/ dge 'dun btsun pa rnams gsan du gsol/ bdag dge slong ming 'di zhes bgyi ba la che ge mo las byung ba'i dge 'dun lhag ma'i ltung ba dpag tu ma mchis pa byung la/ zla ba phyed dang dpag tu ma mchis par bcabs pas/ bdag dge slong ming 'di zhes bgyi ba la che ge mo las byung ba'i dge 'dun lhag ma'i ltung ba dpag tu ma mchis pa byung la zla ba phyed dam dpag tu ma mchis pa bcabs pa de'i slad du dge 'dun las zla ba phyed dam dag pa'i mtha' can zla ba bzhi spo ba gsol na zhes brjod par bya'o/ /de la ltung ba'i grangs nges par mi shes pa'i phyir/ dpag tu med pa byung la zhes smos pas ni ltung ba bcabs pa nyung ngur mi 'gyur ro/ /bcabs pa'i dus nges par shes pa'i phyir zla ba phyed la sogs pa slob pas ni spo ba zla ba phyed la sogs pa'i dus nyung ngur mi 'gyur ro/ /bcabs pa'i dus nges par mi shes pa'i phyir dpag tu med par bcabs pas zhes smos pas ni spo ba dag pa'i mtha' can zla ba bzhi la sogs pa las nyung ngur mi 'gyur ro/ /ltung ba mang bo byung na ltung ba'i phyir ni tshad shin tu mang po dang ldan pa zhes bya ba la brten par bya/ bcabs pa'i dus nges par shes pa dang / mi shes pa'i phyir ni snga ma bzhin te/ shes na zla ba phyed la sogs pa la brten par bya/ mi shes na ni dpag tu med pa dang dag pa'i mtha' can zla ba bzhi la sogs pa la brten par bya'o/ /ltung ba grangs mang po 'di la ni bcabs pa'i dus ni ltung ba bcabs pa'i dus tha dad pa rnams las gang gi dus yun ring bar gzhi gzung ngo / /gang dag gang byung ba'i rigs rnams kyi ming ni stsogs pa zhes bya bas mgo drang ngo / /de bas ni spo ba la sogs pa gsol ba dang / sbyin pa dang / brjod pa dang / gtong ba dang / len pa'i sngags kyi tshig la 'di skad ces dge 'dun btsun pa rnams gsan du gsol/ bdag dge slong ming 'di zhes bgyi ba la bsams bzhin du khu ba phyung ba'i dge 'dun lhag ma'i ltung ba la sogs pa lus kyis reg pa las byung ba'i dge 'dun lhag ma'i ltung ba dang / 'khrig pa dang ldan pa smra ba las byung ba'i dge 'dun lhag ma'i ltung ba dang / bsnyen bkur bsngags pa las byung ba'i dge 'dun lhag ma'i ltung ba dang / smyan bgyid pa las byung ba'i dge 'dun lhag ma'i ltung ba tshad shin tu mang po dang ldan pa byung la zla ba phyed dam dpag tu ma mchis par bcabs pas bdag dge slong ming 'di zhes bgyi ba la bsams bzhin du khu ba phyung ba'i dge 'dun lhag ma la sogs pa lus kyis reg pa las byung ba'i dge 'dun lhag ma'i ltung ba dang / 'khrig pa dang ldan pa smra ba las byung ba'i dge 'dun lhag ma'i ltung ba dang bsnyen bkur bsngags pa las byung ba'i dge 'dun lhag ma'i ltung ba dang / smyan bgyid pa las byung ba'i dge 'dun lhag ma'i ltung ba tshad shin tu mang po dang ldan pa byung ba la zla ba phyed dam dpag tu ma mchis par bcabs pa de'i slad du dge 'dun las zla ba phyed dam/ dag pa'i mtha' can zla ba bzhi spo ba gsol na zhes brjod par bya'o/ /de ltar ltung ba mang po'i phyir tshad shin tu mang po dang ldan pa zhes smos pas ni grangs nyung ngur bcabs par mi 'gyur ro/ /bcabs pa'i dus nges par shes pa'i phyir zla ba phyed la sogs pa smos pas ni spo ba zla ba phyed la sogs pa'i dus las nyung ngur mi 'gyur ro/ /bcabs pa'i dus nges par mi shes pa'i phyir dpag tu med par bcabs pas shes zhes smos pas ni spo ba dag pa'i mtha' can zla ba bzhi la sogs pa las nyung ngur mi 'gyur ro/ /bcabs pa'i dus gang yun ring bas gzhi gzung bas ni gzhan dag gi bcabs pa'i dus thung ngu rnams ma lus par 'gyur ro/ /sogs pa zhes smos pas ni lhag ma rnams de'i khongs su 'du bar 'gyur ro/ /go rims gang lci ba dang / bsam pa drag pos byas pa dang por smos pas na nyes pa che rims kyis sbyang ba bstan par 'gyur bas de'i phyir ltung ba grangs mang po de dag gi go rims kyang sngar ltung ba gang byung ba de'i ming dang por smos par mi bya bar lci ba dang bsam pa drag pos byas pa nyid dang por smos par bya ste/ 'dir gzhung ni zhu ba las/ btsun pa dge slong la dge 'dun lhag ma'i ltung ba byung zhing bsams bzhin du khu ba phyung ba las byung ba'i dgung gcig bcabs la reg pa las byung ba ni dgung gnyis bcabs pa nas bka' blo mi bde ba las byung ba dgung bcu gsum bcabs pa'i bar du byung na/ btsun pa ltung ba de dag dus gcig dang skad cig gcig la las bgyis pa gcig gis spo ba dang / gzhi nas spo ba dang / mgu bar bgyi ba dang / gzhi nas mgu bar bgyi ba stsal zhing dbyung bar bgyi ba dang / las de dag kyang bgyis par brjod pa dang / des dge 'dun la yang 'gal tshabs can du mi 'gyur bar rung ngam/ nye ba 'khor rung ste/ bsams bzhin du khu ba phyung ba las byung ba zhag gcig bcabs pa'i ltung ba gang yin pa nas/ bka' blo mi bde ba las byung ba zhag bcu gsum bcabs pa'i bar gyi ltung ba gang dag yin pa de dag las dam pa dang rab tu dam pa dang / lci ba dang zhag mang du bcabs pa gang yin pa de'i phyir spo ba dang / gzhi nas spo ba dang / mgu bar bya ba dang / gzhi nas mgu bar bya ba sbyin zhing dbyung bar bya ste/ las de dag kyang byas par brjod par byas la des dge 'dun la yang 'gal tshabs can du mi 'gyur ro zhes gsungs pa yin no/ /spo ba spyod pa la gzhi nas spo ba dang / yang gzhi nas bslang ste spo ba byung ba phyir gso bar 'dod pa skyes na tha dad par sbyin zhing cig car spyad du rung ngo / /mgu bar bya ba spyod pa la gzhi nas mgu bar bya ba dang / yang gzhi nas bslang ste mgu bar bya ba byung ba'i phyir gsol bar 'dod pa skyes na yang tha dad par sbyin zhing cig car spyad du rung ngo / /spo ba dang mgu bar bya ba gnyis ni cig car sbyin zhing cig car spyad du mi rung ste/ /mgu bar bya ba ni sems mgu bar bya ba'i phyir yin la/ spo ba ni bcabs pa'i kha na ma tho ba gzhom par bya ba'i phyir yin pa'i phyir ro/ /des na de gnyis cig car spyad pa mi srid de/ sngar bcabs pa'i phyir spo ba byed du gzhug cing / de'i 'og tu dbyung ba'i phyir mgu bar bya ba byed du gzhug go/ /dge 'dun lhag ma phyir bcos pa bshad zin to// //da ni dge 'dun lhag ma rnam par gzhag pa bsgrag par bya ba bshad par bya ste/ de'i phyir de la bdag gis tshe dang ldan pa dag la ci 'di la khyed yongs su dag gam zhes dri'o/ /ci 'di la khyod yongs su dag gam zhes lan gnyis lan gsum du dri'o/ /'di la tshe dang ldan pa dag yongs su dag na 'di ltar cang mi smra bas de de bzhin du 'dzin to zhes bya ba gsungs te/ de la zhes bya ba ni dge 'dun lhag ma bton pa de la'o/ /ci zhes bya ba ni yongs su dri ba'o/ /'di la zhes bya ba ni gso sbyong la'o/ /khyed ces bya ba ni khyed cag go/ /yongs su dag gam zhes bya ba ni ltung ba ma byung ngam zhes bya ba'o zhes zhes bya ba ni dri ba spyi la snyegs so/ /dri'o zhes bya ba ni dri ba dang po'o/ /lan gnyis lan gsum du dri'o zhes bya ba ni lan gsum kho na dri bar bya dgos pas lan gnyis lan gsum du zhes bya ba smos te/ nyung na yang la las mi thos la/ mang na yang dus yol ba la sogs pa'i nyes dmigs yod pas de'i phyir lan gsum ni ran par dgongs te/ bshags pa dang / byin gyis brlabs pa gnyis kyis ltung ba ma bcabs pa sha stag tshogs pa yin nam zhes bya ba'i tha tshig go/ /cang mi smra bas brda byas pas dge 'dun lhag ma rnam par gzhag pa bsgrag par bya ba'i mjug bsdu ba bstan pa'i phyir/ 'di la tshe dang ldan pa dag yongs su dag na 'di ltar cang mi smra bas de de bzhin du 'dzin to zhes bya ba gsungs te/ bshags pa dang / byin gyis brlabs pa gnyis kyis ltung ba ma bcabs pa sha stag tshogs pa yin no zhes bya ba'i tha tshig go/ /dge 'dun lhag ma gdon pa bshad zin to// //da ni ma nges pa gdon pa bshad par bya ste/ de'i phyir sdom la/ dben pa skyabs yod 'dug pa'o zhes bya ba gsungs so/ /sdom la zhes bya ba'i dgos pa dang tshig gi don ni snga ma bzhin no/ /ma nges pa ni rnam pa gnyis te/ pham par 'gyur ba dang / dge 'dun lhag ma dang / ltung byed kyi chos gsum las gang yin ma nges pa dang / dge 'dun lhag ma dang / ltung byed kyi chos gnyis las gang yin ma nges pa'o/ /de gnyis ka yang sdom las/ dben pa skyabs yod 'dug pa'o zhes gsungs pa 'di'i khongs su 'dus te/ dben pa skyabs yod pa nas 'dod pa byar rung bar 'gyur la 'dug pa las ni ma nges pa dang por 'gyur la/ dben pa skyabs yod pa na 'dod pa byar mi rung bar stan la 'dug pa las ni ma nges pa gnyis par 'gyur ro/ /'di gnyis ni gleng gzhi'i dbang gis dge slong gis ma nges pa'i chos 'di lta bur 'gyur ba'i gnas su 'dug par mi bya'o zhes bca' ba mdzad par zad kyi/ ltung ba rnam par gzhag pa la ni yang na pham par 'gyur/ yang na dge 'dun lhag mar 'gyur/ yang na ltung byed du 'gyur bar ci rigs par sbyar te/ ltung ba sde lngar gzhag pa la ni ma gtogs so/ /tshe dang ldan pa dag ma nges pa'i chos gnyis po 'di dag ni zla ba phyed phyed cing so sor thar pa'i mdo 'don pa las 'byung ngo zhes bya bas ni ma nges pa gdon pa 'di'i lung dbog pa bstan to/ /ma nges pa'i chos zhes bya ba ni gang yin gtol med pas ma nges pa'o/ /de nyid kha na ma tho ba'i mtshan nyid 'dzin pas chos zhes bya'o/ /gnyis po 'di dag ni zhes bya ba ni pham par 'gyur ba dang / dge 'dun lhag ma dang / ltung byed kyi chos gsum las gang yin ma nges pa dang / dge 'dun lhag ma dang ltung byed kyi chos gnyis las gang yin ma nges pa'o/ /zla ba phyed phyed cing so sor thar pa'i mdo 'don pa las 'byung ngo zhes bya ba ni sde snod gsum las 'dul ba'i sde snod ni yi ger mi 'dri ba yin pas thams cad kyi mngon sum du ma gyur pa'i phyir gso sbyong 'don pas ma nges pa gdon pa 'di ga las shes snyam pa la zla ba phyed phyed cing gso sbyong 'don pa'i tshe 'dul ba 'dzin pa'i kha ton las 'byung ngo zhes bstan pa yin no/ /de ltar 'dul ba'i sde snod yang dag par bsdus pa'i gzhung 'di ni ma 'ongs pa'i skye bo dbang po rtul po tshig dang don gyi bdag nyid 'dzin mi nus pa rnams la phan gdags pa'i phyir bcom ldan 'das kyis yang dag par bsdu bar gnang ba yin te/ de bas na 'dul ba'i sde snod kyi las gsang ba 'di ni bsnyen par ma rdzogs pa rnams kyis thos par mi bya'o zhes sngar bstan pa bzhin 'dir yang sbyar ro/ /de la ma nges pa'i chos dang po'i gleng gzhi ni sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /tshe dang ldan pa 'char ka snga dro sham thabs bgos lhung bzed dang chos gos thogs te/ mnyan yod du bsod snyoms la zhugs nas mthar gyis rgyu ba na khyim bdag gi chung ma sbed ma'i khyim ga la ba der song ngo / /khyim bdag gi chung ma sbed mas tshe dang ldan pa 'char ka rgyang ring po kho na nas mthong ste/ mthong nas kyang tshe dang ldan pa 'char ka'i phyir stan shom par byed cing 'di skad ces kyang smras so/ /btsun pa 'char ka tshur spyon/ btsun pa 'char ka byon pa legs so/ /btsun pa 'char ka gdan bshams pa nyid la bzhugs shig /tshe dang ldan pa 'char ka stan bshams pa de la 'dug go/ /de nas khyim bdag gi chung ma sbed mas tshe dang ldan pa 'char ka'i rkang pa gnyis la mgo bos phyag 'tshal te/ pus mo gnyis la pus mo gnyis gtad de/ chos mnyan pa'i phyir 'dug go/ /tshe dang ldan pa 'char kas de la chos snyan pa snyan pa dag bstan par brtsams so/ /de'i tshe na ri dgas 'dzin gyi ma sa ga khyim de'i nye 'khor na 'gro bas khyim bdag gi chung ma sbed ma'i khyim na tshe dang ldan pa 'char ka'i skad kyi gdangs grag pa thos so/ /thos nas kyang de 'di snyam du sems te/ kye ma 'phags pa 'char ka skad kyi gdangs kyis khyim bdag gi chung ma sbed ma la sbrang bu sbrang rtsi 'byin pa dang 'dra bar chos snyan pa snyan pa dag ston par byed kyi bdag kyang gzhan la brtsams pa'i chos mnyan pa'i phyir der 'gro'o snyam mo/ /de nas ri dgas 'dzin gyi ma sa ga khyim bdag gi chung ma sbed ma'i khyim ga la ba der song ba dang / ri dgas 'dzin gyi ma sa gas khyim bdag gi chung ma sbed ma tshe dang ldan pa 'char ka'i pus mo gnyis la pus mo gnyis gtad de/ chos mnyan pa'i phyir 'dug pa mthong ngo / /mthong nas kyang de 'di snyam du sems te/ gal te khyim bdag gam khyim bdag gi chung ma'am khyim bdag gi bu mo dad pa 'ga' zhig gis 'di mthong bar gyur na/ 'phags pa 'char ka 'dis khyim bdag gi chung ma sbed ma dang lhan cig dben pa skyabs yod par dge sbyong gi tshul ma yin pa sdig pa'i las cung zhig byas sam byed par sems so snyam du gdon mi za bar mthar thug par 'gro bar 'gyur bas de'i phyir 'di ni bdag gi bya ba yin no snyam nas/ de nas ri dgas 'dzin gyi ma sa ga bcom ldan 'das ga la ba der song ste phyin nas bcom ldan 'das kyi zhabs gnyis la mgo bos phyag 'tshal te/ mtha' gcig tu 'dug go/ /mtha' gcig tu 'dug nas bcom ldan 'das la ri dgas 'dzin gyi ma sa gas tshe dang ldan pa 'char ka dang khyim bdag gi chung ma sbed ma'i byung ba'i mtha' de dag rgyas par gsol to/ /btsun pa de'i slad du bcom ldan 'das kyis thugs brtse ba'i slad du gang gis 'phags pa dag bud med kyi yul dang lhan cig gcig pu gcig dang dben pa skyabs mchis pa na stan la mchis par mi 'gyur bar 'phags pa rnams la dran par bgyi ba cung zhig bca' ba mdzad na legs so zhes kyang gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ tshe dang ldan pa 'char ka la rmas nas rnam grangs du mar smad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang bud med dang lhan cig gcig pu gcig dang dben pa skyabs yod pa na 'dod pa byar rung bar stan la 'dug par byed cing / de la gal te dge bsnyen ma yid ches pa'i tshig dang ldan pas chos gsum po pham par 'gyur ba'am/ dge 'dun lhag ma'am/ ltung byed las chos gang yang rung bas smras par 'gyur la/ /dge slong gis 'dug par khas blangs nas/ chos gsum po pham par 'gyur ba'am/ dge 'dun lhag ma'am/ ltung byed las chos gang yang rung bas byed du gzhug cing / dge slong de la dge bsnyen ma yid ches pa'i tshig dang ldan pas chos gang dang gang gis smras par gyur pa'i chos de dang des dge slong de byed du gzhug ste/ de ni ma nges pa'i chos so zhes bca' ba mdzad de/ yul ni mnyan yod/ gang zag ni 'char ka /nyon mongs pa ni 'dod chags/ nyes pa ni ma nges pa'o/ /de la yang dge slong gang zhes bya ba ni 'char ka'am gzhan yang de lta bu gang yin pa'o/ /bud med dang zhes bya ba ni bud med dam gzhon nu ma mi tshangs par spyod pa 'khrig pa'i chos bsten nus pa dang ngo / /lhan cig ces bya ba ni de dang lhan cig go/ /gcig pu gcig dang zhes bya ba ni de de dang ngo / /dben pa zhes bya ba ni gang na skyes pa dang / bud med dang ma ning gzhan 'ga' yang med pa'o/ /skyabs yod pa na zhes bya ba ni lngas bskyabs pa ste/ rtsig pas bskyabs pa dang / rib mas bskyabs pa dang / yol bas bskyabs pa dang / thibs pos bskyabs pa dang / mtshan mos bskyabs pa na'o/ /'dod pa byar rung bar zhes bya ba ni bud med mi tshangs par spyod pa byar rung bar thag nye bar ro/ /stan la zhes bya ba ni khri dang khri'u la sogs pa la'o/ /'dug par byed cing zhes bya ba ni 'dom gang gi nang du rkub tshos 'jog par byed cing ngo / /de la gal te dge bsnyen ma yid ches pa'i tshig dang ldan pas zhes bya ba la/ de la zhes bya ba ni 'char ka la'o/ /dge bsnyen ma zhes bya ba ni ri dgas 'dzin gyi ma sa ga'o/ /yid ches pa zhes bya ba ni sangs rgyas la mngon par dad chos dang dge 'dun la mngon par dad pa dang / sangs rgyas la skyabs su song / chos dang dge 'dun la skyabs su song ba dang / sangs rgyas la gcig tu gyur/ chos dang dge 'dun la gcig tu gyur pa dang / sangs rgyas la nem nur med cing je tshom med/ chos dang dge 'dun la nem nur med cing the tshom med pa dang / sdug bsngal dang / kun 'byung dang / 'gog pa dang / lam la nem nur med cing the tshom med pa dang / bden pa mthong ba dang / 'bras bu thob pa dang / mngon par rtogs pa dang ldan pa dang / gang gis rang gi srog gi phyir yang shes bzhin du brdzun gyi tshig smra bar mi nus pa'o/ /tshig dang ldan pas zhes bya ba ni de lta bu'i tshig gi bya ba dang ldan pas so/ /chos gsum po zhes bya ba ni grangs bstan pa'o/ /pham par 'gyur ba'am/ dge 'dun lhag ma'am/ ltung byed las chos gang yang rung bas zhes bya ba la/ pham par 'gyur ba zhes bya ba ni bzhi po dag las gang yang rung ba'o/ /dge 'dun lhag ma zhes bya ba ni bcu gsum po dag las gang yang rung ba'o/ /ltung byed ces bya ba ni dgu bcu po dag las gang yang rung ba'o/ /smras par gyur la zhes bya ba ni brtal bar gyur pa'o/ /dge slong gis 'dug par khas blangs na zhes bya ba ni drang por khas blangs na'o/ /chos gsum po pham par 'gyur ba'am/ dge 'dun lhag ma'am/ ltung byed las chos gang yang rung bas byed du gzhug cing zhes bya ba ni de dag gang khas blangs pa 'chags su gzhug pa'o/ /dge slong de la dge bsnyen ma yid ches pa'i tshig dang ldan pas chos gang dang gang gis smras par gyur pa'i chos de dang des dge slong de byed du gzhug ste zhes bya ba ni 'di ltar dge bsnyen ma yid ches pa'i tshig dang ldan pa ni ltung ba la mi mkhas pa dang / ltung ba'i gleng gzhi la mi mkhas pa dang / ltung ba kun nas slong ba la mi mkhas pa yin pas 'di ltar des dge slong mi'i chos bla ma smra ba'am/ bud med dang lhan cig stan gcig la lus kyis reg par byed pa'am/ snod gcig tu za bar byed pa'am/ phor bu gcig tu myos par 'gyur ba'i btung ba sna tshogs 'thung ba'am/ sa brko ba'am/ rtswa sngon po gcod pa'am/ dus ma yin par za ba'am/ gzhan yang rang bzhin dang bcas pa'i kha na ma tho ba dang bcas pa'i las gang byed par mthong ba de dag las gang khas blangs pa de byed du gzhug pa'o/ /byed du gzhug ste zhes bya ba ni 'chags su gzhug pa'o/ /de ni ma nges pa'i chos so zhes bya ba ni de ni rnam par ma bzhag pa'i chos yin pa'o/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni dge bsnyen ma yid ches pa'i tshig dang ldan pa'i tshig gis dge slong la 'gro ba'am/ 'greng ba'am/ 'dug pa'am/ nyal ba'i spyod lam rnam pa bzhi gang yang rung ba'i sgo nas pham par 'gyur ba'i chos kyis smras la/ dge slong gis kyang khas blangs na pham par 'gyur ba'i dngos gzhir 'gyur ro/ /dge bsnyen ma yid ches pa'i tshig dang ldan pa'i tshig gis dge slong la 'gro ba'am/ 'greng ba'am/ 'dug pa'am/ nyal ba'i spyod lam rnam bzhi gang yang rung ba'i sgo nas/ dge 'dun lhag ma'i chos kyis smras la/ dge slong gis kyang khas blangs na dge 'dun lhag ma'i dngos gzhir 'gyur ro/ /dge bsnyen ma yid ches pa'i tshig dang ldan pa'i tshig gis dge slong la 'gro ba'am/ 'greng ba'am/ 'dug pa'am/ nyal ba'i spyod lam rnam bzhi gang yang rung ba'i sgo nas ltung byed kyi chos kyis smras la/ dge slong gis kyang khas blangs na ltung byed kyi dngos gzhir 'gyur ro/ /sbyor ba'i ltung ba ni dge bsnyen ma yid ches pa'i tshig dang ldan pa'i tshig gis dge slong la 'gro ba'am/ 'greng ba'am/ 'dug pa'am/ nyal ba'i spyod lam rnam bzhi gang yang rung ba'i sgo nas pham par 'gyur ba'i sbyor ba nyes pa spom po'i chos kyis smras la/ dge slong gis kyang khas blangs na pham par 'gyur ba'i sbyor ba'i nyes pa sbom por 'gyur ro/ /dge bsnyen ma yid ches pa'i tshig dang ldan pa'i tshig gis dge slong la 'gro ba'am/ 'greng ba'am/ 'dug pa'am/ nyal ba'i spyod lam rnam bzhi gang yang rung ba'i sgo nas dge 'dun lhag ma'i sbyor ba nyes pa spom pa'i chos kyis smras la/ dge slong gis kyang khas blangs na dge 'dun lhag ma'i sbyor ba'i nyes pa spom por 'gyur ro/ /dge bsnyen ma yid ches pa'i tshig dang ldan pa'i tshig gis dge slong la 'gro ba'am/ 'greng ba'am/ 'dug pa'am/ nyal ba'i spyod lam rnam bzhi gang yang rung ba'i sgo nas ltung byed kyi sbyor ba nyes byas kyi chos kyis smras la/ dge slong gis kyang khas blangs na ltung byed kyi sbyor ba'i nyes byas su 'gyur ro/ dge slong gis kyang khas blangs na pham par 'gyur ba'i sbyor ba'i sbyor ba nyes byas su 'gyur ro/ /dge bsnyen ma yid ches pa'i tshig dang ldan pa'i tshig gis dge slong la 'gro ba'am/ 'greng ba'am/ 'dug pa'am/ nyal ba'i spyod lam rnam bzhi gang yang rung ba'i sgo nas dge 'dun lhag ma'i sbyor ba'i sbyor ba nyes byas kyi chos kyis smras la/ dge slong gis kyang khas blangs na dge 'dun lhag ma'i sbyor ba'i sbyor ba nyes byas su 'gyur ro/ /dge bsnyen ma yid ches pa'i tshig dang ldan pa'i tshig gis dge slong la 'gro ba'am/ 'greng ba'am/ 'dug pa'am/ nyal ba'i spyod lam rnam bzhi gang yang rung ba'i sgo nas dge 'dun lhag ma'i sbyor ba'i sbyor ba nyes byas kyi chos kyis smras la/ dge slong gis kyang khas blangs na dge 'dun lhag ma'i sbyor ba'i sbyor ba nyes byas su 'gyur ro/ /dge bsnyen ma yid ches pa'i tshig dang ldan pa'i tshig gis dge slong la 'gro ba'am/ 'greng ba'am/ 'dug pa'am/ nyal ba'i spyod lam rnam bzhi gang yang rung ba'i sgo nas ltung byed kyi sbyor ba'i sbyor ba nyes byas phra mo'i chos kyis smras la/ dge slong gis kyang khas blangs na ltung byed kyi sbyor ba'i sbyor ba nyes byas phra mor 'gyur ro/ /'di'i byed pa po ni mi'i 'gro bar gtogs pa'i bud med dam/ gzhon nu ma mi tshangs par spyod pa 'khrig pa'i chos bsten du rung ba dang / legs par smras pa dang / nyes par smras pa'i chos rnams kyi don kun shes par nus pa dang / gcig pu dben pa skyabs yod pa na 'dod pa byar rung bar 'dug pa'o/ /'di la yan lag lngas dngos gzhi dang / sbyor ba dang / sbyor ba'i sbyor ba'i ltung ba ci rigs par 'gyur te/ dngos po dang / phyogs dang / bsam pa dang / che bzhi dang / khas blangs pa'o/ /de la dngos po ni dge slong dang bud med dang lhan cig ces bya ba'o/ /phyogs ni gcig pu gcig dang dben pa skyabs yod pa na zhes bya ba'o/ /bsam pa ni 'dod pa byar rung bar stan la 'dug cing zhes bya ba'o/ /che bzhi ni dge bsnyen ma yid ches pa'i tshig dang ldan pa'i chos gsum po pham par 'gyur ba'am/ dge 'dun lhag ma'am/ ltung byed las chos gang yang rung bas smras par gyur pa zhes bya ba'o/ /khas blangs pa ni dge slong gis 'dug par khas blangs na zhes bya ba'o/ /de dag las yan lag ma tshang na ci rigs par na smad do/ /ltung ba med pa ni bud med ma yin pa dang / gcig pu ma yin pa dang / gcig dang ma yin pa dang / dben pa ma yin pa dang / skyabs yod pa ma yin pa dang / 'dod pa byar mi rung ba dang / stan la mi 'dug pa la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba la ni yul thams cad la gnas skabs thams cad du ma nges pa dang po'i chos 'di gsum gyi sbyor ba'i sbyor ba dang / sbyor ba dang / dngos gzhir 'gyur ba rnam pa thams cad mi bsten par bslab par bya'o/ /de dag gi phyogs tsam du 'gyur ba'i shan dang / drings pa yang bsten par mi bya'o/ /phyir bcos pa ni 'dul ba las 'khrug long gi rgyu bzhi las 'khrug long gi rtsod pa rnam pa bzhi 'byung bar gsungs te/ 'khrug long gi rgyu bzhi ni dngos po'i de bzhin nyid la log par sgrub pa dang / gdams ngag la sogs pa 'jog pas gzhan sbong ba dang / ltung ba dang bcas pa nyid dang / las la mthun pa mi sbyin pa'o/ /'khrug long gi rtsod pa rnam pa bzhi ni 'gyed pa'i phyir rtsod pa dang / mi gdams pa'i phyir rtsod pa dang / ltung ba'i phyir rtsod pa dang / bya ba'i phyir rtsod pa ste/ 'khrug long gi rgyu bzhi po de dag las 'khrug long gi rtsod pa rnam pa bzhi po de dag go rims bzhin du 'byung ngo / / de la gzhan gsum ni rtsod pa zhi bar bya ba'i chos bdun gyi skabs su 'og nas rgya cher ston to/ /'dir re zhig 'khrug long gi rgyu gsum pa ltung ba dang bcas pa nyid ces bya ba las 'khrug long byung ba'i phyir rtsod pa zhes bya ba 'byung ste/ de'i phyir bcos pa bshad par bya'o/ /de la ltung ba dang bcas pa nyid ni rnam pa gnyis te rnam par shes pa na rang gi ngo bo'i nyes pas ltung ba dang bcas pa nyid dang / rnam par shes pa na rang gi ngo bo'i nyes pas ltung ba dang bcas pa nyid do/ /de la rnam par shes pa na rang gi ngo bo'i nyes pas ltung ba dang bcas pa nyid ces bya ba ni dngos po dang phyogs dang bsam pa dang / che bzhi dang / khas blangs pa'i sgo nas ltung ba rnam par shes pa na pham par 'gyur ba'am/ dge 'dun lhag ma'am/ ltung byed las gang yang rung ba dang / dngos gzhi'am/ sbyor ba'am/ sbyor ba'i sbyor ba zhes bya ba'i rang gi ngo bo'i nyes pas ltung ba dang bcas pa nyid de/ de las kyang gal te che bzhis phye ba dang / bud med kyis smras pa dang / dge slong gis khas blangs par mthun na che bzhi gnyis la dri ba dang / che bzhi gnyis dang bud med kyis smras par mthun na dge slong mi btsan pa la sogs pa'i sgo nas ltung ba'i phyir rtsod pa 'byung ngo / /rnam par shes pa na rang gi ngo bo'i nyes pas ltung ba dang bcas pa nyid ces bya ba ni brjed pas khas ma blangs pa'i sgo nas ltung ba rnam par mi shes pa na dngos po dang phyogs dang bsam pa dang che bzhi'i sgo nas pham par 'gyur ba'am/ dge 'dun lhag ma'am ltung byed las gang yang rung ba dag gi dngos gzhi'am/ sbyor ba'am/ sbyor ba'i sbyor ba zhes bya ba'i rang gi ngo bo'i nyes pas ltung ba dang bcas pa nyid de/ de las kyang ltung ba ma mthong bas gnas nas dbyung ba dang / phyir mi 'chos pas gnas nas dbyung ba la sogs pa'i sgo nas ltung ba'i phyir rtsod pa 'byung ngo / /rtsod pa de gnyis nye bar zhi bar bya ba ni 'dir phyir bcos pa yin te/ rtsod pa de gnyis nye bar zhi bar bya ba'i rgyu yang rnam pa gnyis te/ phyir bcos pa dang / nges par 'dzin pa la sbyar ba nyid sbyin pa'o/ /de la rnam par shes pa na rang gi ngo bo'i nyes pas ltung ba dang bcas pa nyid la ni khas blang ba dang / mngon sum du bya ba dang / rtswa bkram pa lta bus phyir bcos pas bstsal bar byas na de las byung ba'i rtsod pa nye bar zhi bar 'gyur te/ pham par 'gyur ba'am/ dge 'dun lhag ma'am/ ltung byed kyi chos gsum po dag gi dngos gzhi'am sbyor ba'i sbyor ba gang byung ba de la 'khrug long rnam pa gsum ste/ phyir bcos pa med pa dang / phyir bcos pa dang bcas pa rnam pa gnyis po nyi tshe ba dang / dge slong mtha' dag dang 'brel pa'o/ /de la dang po ni gleng bar bya ba dang / gleng ba po gnyis su la 'khrug long yod pa ste/ de ni khas blangs pas phyir bcos so/ /gnyis pa ni de gnyis 'ba' zhig tu ma zad kyi de dang 'brel pa kha cig la yang 'khrug long yod pa ste/ de ni mngon sum du bya bas phyir bcos so/ /gsum pa ni dge 'dun thams cad la 'khrug long yod pa ste/ de ni rtswa bkram pa lta bus phyir bcos par bya'o/ /rnam par mi shes pas na rang gi ngo bo'i nyes pas ltung ba dang bcas pa nyid la ni rang gi ngo bo btsal nas gsal bar nus pas de la ni nges par 'dzin pa la sbyor ba nyid sbyin pas de las byung ba'i rtsod pa nye bar zhi bar 'gyur te/ gal te dge slong de dge bsnyen ma yid ches pa'i tshig dang ldan pa'i tshig gis spyod lam rnam pa bzhi gang yang rung ba'i sgo nas pham par 'gyur ba'am/ dge 'dun lhag ma'am/ ltung byed kyi chos gsum po dag gi dngos gzhi dang / sbyor ba dang / sbyor ba'i sbyor ba gang yang rung ba brjod pas khas mi len na de la chad pa'i las 'os pa yin pas dge bsnyen ma yid ches pa'i tshig dang ldan pa'i tshig gis de'i ngo bo nyid tshol du gzhug pa sbyin par bya'o/ /de la de'i ngo bo nyid tshol du gzhug pa sbyin pa'i go rims ni 'di yin te/ de rang gis dge 'dun la gsol ba dang / dge 'dun gyis de la gsol ba dang bzhi'i las kyis de'i ngo bo nyid tshol du gzhug pa sbyin pa dang / des ji srid du khas ma blangs kyi bar du sa gzhan na gnas pa'i spyod pa spyad par bya ba dang / des bzod pa gsol na rang bzhin du gnas pa thob par 'gyur ba'o/ /de la de rang gi dge 'dun la gsol ba ni gang zag de rang gis dge 'dun la de'i ngo bo nyid tshol du gzhug pa'i sbyin pa stsal bar gsol ba'i sngags lan gsum bzlas pa'o/ /dge 'dun gyis de la gsol ba dang bzhi'i las kyis de'i ngo bo nyid tshol du gzhug pa sbyin pa ni 'di ltar sbyin par bya ste/ gnas mal bsham pa byas nas gaN+DI brdungs te dris pas tshig gis dge slong rnams la yang dag par bsgo nas/ dge 'dun thams cad 'dug cing mthun par gyur pa la dge slong gcig gis gsol ba byas te las bya'o/ /'di ltar bya ste 'dug la 'di skad ces brjod par bya'o/ /dge 'dun btsun pa rnams gsan du gsol tshe dang ldan pa dge slong 'char ka 'di dge bsnyen ma yid ches pa'i tshig dang ldan pa'i tshig gis 'gro ba yang mchid kyis mi 'tshal/ 'greng ba yang mi 'tshal/ 'dug pa yang mi 'tshal/ nyal ba yang mi 'tshal na/ /gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis tshe dang ldan pa 'char ka la dge bsnyen ma yid ches pa'i tshig dang ldan pa'i tshig gis de'i ngo bo nyid tshol du gzhug pa stsol to/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ tshe dang ldan pa 'char ka 'di dge bsnyen ma yid ches pa'i tshig dang ldan pa'i tshig gis 'gro ba yang mchid kyis mi 'tshal/ 'greng ba yang mi 'tshal/ 'dug pa yang mi 'tshal/ nyal ba yang mi 'tshal te/ de'i slad du dge 'dun gyis tshe dang ldan pa 'char ka la dge bsnyen ma yid ches pa'i tshig dang ldan pa'i tshig gis de'i ngo bo nyid tshol du gzhug pa stsol na/ tshe dang ldan pa gang dag tshe dang ldan pa 'char ka la dge bsnyen ma yid ches pa'i tshig dang ldan pa'i tshig gis de'i ngo bo nyid tshol du gzhug pa stsal bar bzod pa de dag ni cang ma gsung shig /gang dag mi bzod pa de dag ni gsungs shig / 'di ni las brjod pa dang po ste/ de bzhin du lan gnyis lan gsum du bzlas/ dge 'dun gyis bzod cing gnang nas dge 'dun gyis tshe dang ldan pa 'char ka la dge bsnyen ma yid ches pa'i tshig dang ldan pa'i tshig gis de'i ngo bo nyid tshol du gzhug pa stsal lags te/ 'di ltar cang mi gsung bas de de bzhin du 'dzin to/ /de ni dge 'dun gyis de la gsol ba dang bzhi'i las kyis de'i ngo bo nyid tshol du gzhug pa sbyin pa'i cho ga dang las so/ /de ji srid du khas ma blangs kyi bar du sa gzhan na gnas pa'i spyod pa spyad par bya ba ni 'di yin te/ sngar bslab pa byin nas dgra bcom pa nyid ma thob kyi bar du kun du spyad pa'i chos ji ltar bcas pa de dag thams cad 'di'i kun du spyad pa'i chos kyang yin te/ des dge slong rang bzhin du gnas pa la mngon par smra ba dang phyag dang mngon du ldang ba dang thal mo sbyar ba dang gus pa'i las dag bdag gir mi bya'o/ /dge slong rang bzhin du gnas pas kyang de la de dag mi bya'o/ /dge slong rang bzhin du gnas pa dang lhan cig gom pa bsri ba nyid las gzhan pas bcag par mi bya'o/ /stan ches dma' ba nyid las gzhan pas 'dug par mi bya'o/ / phyi bzhin 'brang ba'i dge sbyong gi bdag nyid las gzhan pa'i khyim dag tu 'gro bar mi bya'o/ /g.yogs ma gcig par mal bsham par mi bya'o/ /rab tu dbyung ba dang / bsnyen par rdzogs pa dang / gnas sbyin pa dang / dge tshul nye bar gzhag par mi bya'o/ /gsol pa dang las brjod pa dag bya bar khas mi blang ngo / /las byed pa dang dge slong ma'i ston pa dang dge 'dun gyi yid brtan par bsgo ba khas mi blang ngo / /de dag tu sngar bskos pas kyang mi bya'o/ /dge slong ma'i ston par sngar bskos pas kyang bstan par mi bya'o/ /'don pa gzhan med na sngar yang gso sbyong la so sor thar pa gdon par mi bya'o/ /dge slong dge 'dun las ma bkar ba la tshul khrims dang lta ba dang / cho ga dang 'tsho ba nyams pas gleng bar mi bya'o/ /brjod pa dang bcas pa nyid dang / phur pa dang bcas pa nyid dag mi bya'o/ /gdams ngag dang gso sbyong dang dgag dbye dang gsol ba dang brjod pa dag gzhag par mi bya'o/ /rang bzhin du gnas pa dang mgo mnyam du bsten par mi bya'o/ /de'i ngo bo nyid tshol du gzhug pa byin pa de'i rgyu gang yin pa'i nyes pa de spang ngo / /nyes pa gzhan yang spang ngo / /tshangs pa mtshungs par spyod pa rnams la nyes pa dang mthun pa nyid mi bya'o/ /kun du spyad pa'i chos ji ltar bcas pa dag nyams su ma blangs na brtul zhugs snying po med par 'gyur ro snyam du yid la bya'o/ /nang par sngar langs te gtsug lag khang du sgo dbye ba dang mar me'i kong bu bstsal bar bya'o/ / gtsug lag khang du chag chag dang phyag dar dang lci ba 'jam po'i byug pas bsku ba dag bya'o/ /dge 'dun gyi bshang ba dang gci ba'i skyabs dag sbyang ngo / /der sa phyags pa dang dus dang mthun pa'i chu dag gzhag par bya'o/ /gtsug lag khang gi wa'i kha dag bsal lo/ /dge 'dun gyi gdan bsham par bya'o/ /mchod pa'i dus shes par bya ste/ bdug spos dang de'i pog phor dag nye bar gzhag par bya'o/ /gal te nus pa nyid yin na ston pa'i yon tan yang dag par bsgrag par bya'o/ /gal te mi nus na smra ba po la bcol lo/ /dge 'dun gyi bshos kyi spyi bungs bshams pa na gaN+DI brdung ngo / /gal te dge slong rnams tsha na bsil yab bya'o/ /de'i 'dug pa la sogs pa ni bsnyen par rdzogs pa thams cad kyi mtha' nyid du'o/ /zas kyi bya ba byas nas gdan cha dben par brtul lo/ /lhung bzed kyi gzhi dor ro/ /dus shes par byas te mchod rten dag gi phyag dar bya'o/ /lci ba 'jam po'i byug pas bsku'o/ /dge 'dun 'du ba'i dus su yang gdan bshams pa nas ston pa'i yon tan yang dag par bsgrag pa'i bar dag bya'o/ /gal te nus pa nyid yin na tshes grangs kyi nyi ma brjod pa dag bya'o/ /gal te mi nus na dge slong gzhan la bcol lo/ /dgongs kar dus dang mthun pa'i chus dge slong rnams kyi rkang pa bkru'o/ /dgongs kar dge slong rnams kyi rkang pa bsku'o/ /dge slong dag rkang pa bkru ba dang bsku bar mi 'dod na snum dbul lo/ /de'i gtsug lag khang tha mar 'os pa nyid yin no/ /thams cad du rnyed pa dbang ba nyid yin no/ /dge ba'i phyogs la mi g.yel bar bya'o/ /de'i ngo bo nyid tshol du gzhug pa byin pas dge slong rang bzhin du gnas pa ma yin pa dang / dge 'dun du ma 'ongs pa dang gnas de nas dge slong yongs su bcad pa dag las kun du spyad pa mi 'chags so/ /dge slong mang po nyid yongs su spang bar mi bya'o/ /gnas brtan dang so sor thar pa dang bcas pa nyid du spyad par 'bad par bya'o/ /mtshams gzhan du zhag lon pa la ni nyes pa med do/ /dge 'dun gyi kha bskang ba'i grangs las ma gtogs so/ /de'i kun du spyad pa dge 'dun la spyad par bya'o/ /de'i ngo bo nyid tshol du gzhug pa byin pa bzhi yan chad mtshams gcig gi dge 'dun la spyod du mi gnang ngo / /las brgya rtsa gcig ni dge 'dun dang mthun par bya'o/ /bslab pa las 'das pa'i ltung ba thams cad ni dge slong rang bzhin du gnas pa dang 'dra'o/ /de la 'dun pa dbul du mi rung ngo / /de'i 'dun pa ni blang du mi rung ngo / /de la dge slong dang / dge slong ma dang / dge slong ma dang dge tshul dang / dge tshul mas gtugs te phyag mi bya'o/ /de'i ngo bo nyid tshol du gzhug pa byin pa de ni nam bzod pa gsol ba na rang bzhin du gnas pa thob par 'gyur ro/ / bzod pa ma gsol na ji srid 'tsho'i bar du de'i ngo bo nyid tshol du gzhug pa byin pa spyad pa'i cho ga ji skad bstan pa de dag la de bzhin du bslab par bya'o/ /de ni des ji srid khas ma blangs kyi bar du sa gzhan na gnas pa'i spyod pa spyad par bya ba yin no/ /des bzod pa gsol na rang bzhin du gnas pa thob par 'gyur ba'i go rims ni 'di yin te/ de rang gis dge 'dun la bzod par gsol pa dang / dge 'dun gyis de la gsol ba dang bzhi'i las kyis bzod pa mdzad pa'o/ /de rang gis dge 'dun la bzod pa mdzad par gsol ba'i cho ga dang sngags ni 'di ltar bya ste/ de rang gis gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas/ dge 'dun thams cad 'dug cing mthun par gyur pa la mchil lham gnyis phud de bla gos phrag pa gcig tu byas nas rgan rims la phyag 'tshal te/ rgan pa'i mtha' logs su tsog pur 'dug nas thal mo sbyar ba btud de 'di skad ces brjod par bya'o/ /dge 'dun btsun pa rnams gsan du gsol/ bdag dge slong 'char ka de'i ngo bo nyid tshol du stsal te/ skra 'greng bar gyur/ skra 'phyar bar gyur cing / dge 'dun la spu snyol bar bgyid cing / 'byung bar bskyod/ mtshungs par nye bar ston la/ mtshams kyi nang du mchis te/ bzod par gsol zhing gzhi gang las smad bab pa'i phrin las mdzad pa'i gzhi de las slar ldog na thugs brtse ba can dge 'dun btsun pa rnams kyis thugs brtse ba'i slad du bdag dge slong 'char ka de'i ngo bo nyid tshol du stsal ba la bzod pa mdzad du gsol/ lan gsum du bzlas/ de ni rang gis dge 'dun la bzod pa mdzad par gsol ba'o/ /dge 'dun gyis de la gsol ba dang bzhi'i las kyis bzod pa mdzad pa'i cho ga dang las ni 'di ltar bya ste/ gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas/ dge 'dun thams cad 'dug cing mthun par gyur pa la/ dge slong gcig gis gsol ba byas te las bya'o/ /'di ltar bya ste/ 'dug la 'di skad ces brjod par bya'o/ / dge 'dun btsun pa rnams gsan du gsol/ dge slong 'char ka de'i ngo bo nyid tshol du stsal ba 'di skra 'greng bar gyur/ skra 'phyar bar gyur cing / dge 'dun la spu snyol bar bgyid/ 'byung bar bskyod/ mtshungs par nye bar ston la/ mtshams kyi nang du mchis te bzod par gsol zhing gzhi gang las sma dbab pa'i phrin las mdzad pa'i gzhi de las slar ldog na gal te dge 'dun gyi dus la bab cing bzod na/ dge 'dun gyis gnang bar mdzod cig dang / dge 'dun gyis tshe dang ldan pa 'char ka de'i ngo bo nyid tshol du stsal ba la bzod pa mdzad do/ / 'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ dge slong 'char ka de'i ngo bo nyid tshol du stsal ba 'di skra 'greng bar gyur/ skra 'phyar bar gyur cing / dge 'dun la sbu snyol bar bgyid/ 'byung bar bskyod/ mtshungs par nye bar ston pa la mtshams kyi nang du mchis te bzod pa gsol zhing gzhi gang las sma dbab pa'i phrin las mdzad pa'i gzhi de las slar ldog ste/ de'i slad du dge 'dun gyis dge slong 'char ka de'i ngo bo nyid tshol du stsal ba la bzod pa mdzad na/ tshe dang ldan pa gang dag dge slong 'char ka de'i ngo bo nyid tshol du stsal ba la bzod pa mdzad par bzod pa de dag ni cang ma gsung shig / gang dag mi bzod pa de dag ni gsungs shig /'di ni las brjod pa dang po ste/ de bzhin du lan gnyis lan gsum du bzlas/ dge 'dun gyis bzod cing gnang nas dge 'dun gyis dge slong 'char ka de'i ngo bo nyid tshol du stsal ba la bzod pa mdzad lags te/ 'di ltar cang mi gsung bas de de bzhin du 'dzin to/ /de ni de la dge 'dun gyis gsol ba dang bzhi'i las kyis bzod pa bya ba'i cho ga dang las so/ /de ltar bzod pa byas nas dge slong des dge bsnyen ma yid ches pa'i tshig dang ldan pas chos gsum po dag las gang smras pa khas blangs pa'i chos des de byed du gzhug go/ /'dir dge bsnyen ma zhes smos pa dang / bden pa mthong ba ni gleng gzhi'i dbang gis gsungs par zad kyi su yang rung bar brdzun gyis skur pa mi 'debs par yid ches pa'i che bzhi'i tshig kyang de dang 'dra'o/ /ma nges pa dang po bshad zin to/ / //ma nges pa'i chos gnyis pa'i gleng gzhi ni sangs rgyas bcom ldan 'das rgyal po'i khab na 'od ma'i tshal bya ka lan da ka'i gnas na bzhugs so/ /de nas dge slong shi ri ka snga dro sham thabs bgos lhung bzed dang chos gos thogs te/ rgyal po'i khab tu bsod snyoms la zhugs nas mthar gyis rgyu ba na khyim bdag gi chung ma gso sbyong 'phags kyi khyim ga la ba der song ngo / /khyim bdag gi chung ma gso sbyong 'phags kyis dge slong shi ri ka thag ring po kho na nas mthong ste/ mthong nas kyang dge slong shi ri ka'i phyir stan shom par byed cing 'di skad ces kyang smras so/ /btsun pa shi ri ka tshur spyon btsun pa shi ri ka byon pa legs so/ /btsun pa shi ri ka gdan bshams pa nyid la bzhugs shig /dge slong shi ri ka gdan bshams pa de la 'dug go/ /de nas khyim bdag gi chung ma gso sbyong 'phags kyis dge slong shi ri ka'i rkang pa gnyis la mgo bos phyag 'tshal te/ pus mo gnyis la pus mo gnyis ma reg par chos mnyan pa'i phyir 'dug go/ /dge slong shi ri kas de la chos snyan pa snyan pa dag bstan par brtsams so/ /de'i tshe na dge bsnyen ma legs skyes khyim de'i nye 'khor na 'gro bas khyim bdag gi chung ma gso sbyong 'phags kyi khyim na dge slong shi ri ka'i skad kyi gdangs grag pa thos so/ /thos nas kyang de 'di snyam du sems te/ kye ma 'phags pa shi ri ka skad kyi gdangs kyis khyim bdag gi chung ma gso sbyong 'phags la sbrang bu sbrang rtsi 'byin pa dang 'dra par chos snyan pa snyan pa dag ston par byed kyi bdag kyang gzhan la brtsams pa'i chos mnyan pa'i phyir der 'gro'o snyam mo/ /de nas dge bsnyen ma legs skyes khyim bdag gi chung ma gso sbyong 'phags kyi khyim ga la ba der song ba dang / dge bsnyen ma legs skyes kyis khyim bdag gi chung ma gso sbyong 'phags dge slong shi ri ka'i pus mo gnyis la pus mo gnyis ma reg par chos mnyan pa'i phyir 'dug pa mthong ngo / /mthong nas kyang de 'di snyam du sems te gal te khyim bdag gam khyim bdag gi chung ma'am/ khyim bdag gi bu mo dad pa 'ga' zhig gis 'di mthong bar gyur na 'phags pa shi ri ka 'dis khyim bdag gi chung ma gso sbyong 'phags dang lhan cig dben pa skyabs yod par dge slong gi tshul ma yin pa sdig pa'i las cung zhig byas sam/ byed par sems so snyam du gdon mi za bar mthar thug par 'gro bar 'gyur bas de'i phyir 'di ni bdag gi bya ba yin no snyam nas/ de nas dge bsnyen ma legs skyes bcom ldan 'das ga la ba der song ste phyin nas bcom ldan 'das kyi zhabs gnyis la mgo bos phyag 'tshal te mtha' gcig tu 'dug go/ /mtha' gcig tu 'dug nas/ /bcom ldan 'das la dge bsnyen ma legs skyes kyis dge slong shi ri ka dang khyim bdag gi chung ma gso sbyong 'phags kyi byung ba'i mtha' de dag rgyas par gsol te/ btsun pa de'i slad du bcom ldan 'das kyis thugs brtse ba'i slad du gang gis 'phags pa dag bud med dang lhan cig gcig pu gcig dang dben pa skyabs mchis pa na stan la mchis par mi 'gyur bar 'phags pa rnams la dran par bgyi ba cung zhig bca' ba mdzad na legs lags so zhes kyang gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ dge slong shi ri ka la rmas nas rnam grangs du mar smad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang bud med dang lhan cig gcig pu gcig dang dben pa skyabs yod pa na 'dod pa byar mi rung bar stan la 'dug par byed cing / gal te de la dge bsnyen ma yid ches pa'i tshig dang ldan pas chos gnyis po dge 'dun lhag ma'am/ ltung byed las chos gang yang rung ba smras par gyur la/ dge slong gis 'dug par khas blangs na chos gnyis po dge 'dun lhag ma'am/ ltung byed las chos gang yang rung bas byed du gzhug cing dge slong de la dge bsnyen ma yid ches pa'i tshig dang ldan pas chos gang dang gang gis smras par 'gyur ba'i chos de dang des dge slong de byed du gzhug ste/ de yang ma nges pa'i chos so zhes bca' ba mdzad de/ yul ni rgyal po'i khab/ gang zag ni dge slong shi ri ka /nyon mongs pa ni shes bzhin ma yin pa/ nyes pa ni ma nges pa'o/ /de la yang dge slong gang zhes bya ba ni shi ri ka'am/ gzhan yang de lta bu gang yin pa'o/ /bud med dang zhes bya ba ni bud med dam gzhon nu ma mi tshangs par spyod pa 'khrig pa'i chos bsten nus pa dang ngo / /lhan cig ces bya ba ni de dang lhan cig go/ /gcig pu gcig dang zhes bya ba ni de dang ngo / /dben pa zhes bya ba ni gang na skyes pa dang bud med dang / /ma ning gzhan 'ga' yang med pa'o/ /skyabs yod pa na zhes bya ba ni lngas bskyabs pa ste/ rtsig pas bskyabs pa dang / rib mas bskyabs pa dang / yol bas bskyabs pa dang / thibs pos bskyabs pa dang / mtshan mos bskyabs pa na'o/ /'dod pa byar mi rung bar zhes bya ba ni mi tshangs par spyod pa byar mi rung bar thag ring bar ro/ /stan la zhes bya ba ni khri dang khri'u la sogs pa la'o/ /'dug par byed cing zhes bya ba ni 'dom gang gi nang ma yin par rkub tshos 'jog par byed cing ngo / /de la gal te dge bsnyen ma yid ches pa'i tshig dang ldan pas zhes bya ba la de la zhes bya ba ni shi ri ka la'o/ / dge bsnyen ma zhes bya ba ni legs skyes so/ /yid ches pa zhes bya ba ni sangs rgyas la mngon par dad chos dang dge 'dun la mngon par dad pa dang / sangs rgyas la skyabs su song / chos dang dge 'dun la skyabs su song ba dang / sangs rgyas la gcig tu gyur/ chos dang dge 'dun la gcig tu gyur pa dang sangs rgyas la ne ma nur med cing the tshom med pa dang / chos dang dge 'dun la ne ma nur med cing the tshom med pa dang / sdug bsngal dang / kun 'byung dang / 'gog pa dang / lam la ni ma nur med cing the tshom med pa dang / bden pa mthong ba dang / 'bras bu thob pa dang / mngon par rtogs pa dang ldan pa dang gang gis rang gi srog gi phyir yang shes bzhin du brdzun gyi tshig smra mi nus pa'o/ /tshig dang ldan pas zhes bya ba ni de lta bu'i tshig gi bya ba dang ldan pas so/ /chos gnyis po zhes bya ba ni grangs bstan pa'o/ /dge 'dun lhag ma'am/ ltung byed las chos gang yang rung bas zhes bya ba la/ dge 'dun lhag ma zhes bya ba ni bcu gsum po de dag las gang yang rung ba'o/ /ltung byed ces bya ba ni dgu bcu po dag las gang yang rung ba'o/ /smras par gyur la zhes bya ba ni brtal bar gyur pa la'o/ /dge slong gis 'dug par khas blangs na zhes bya ba ni drang por khas blangs na'o/ /chos gnyis po dge 'dun lhag ma'am ltung byed las chos gang yang rung bas byed du gzhug cing zhes bya ba ni de dag gang khas blangs pa 'chags su gzhug pa'o/ /dge slong de la dge bsnyen ma yid ches pa'i tshig dang ldan pas gang dang gang gis smras par gyur pa'i chos de dang des dge slong de byed du gzhug ste zhes bya ba ni 'di ltar dge bsnyen ma yid ches pa'i tshig dang ldan pa ni ltung ba la mi mkhas pa dang / ltung ba'i gleng gzhi la mi mkhas pa dang / ltung ba kun nas slong ba la mi mkhas pa yin pas/ 'di ltar des dge slong mi'i chos bla ma smra ba'am/ bud med dang lhan cig stan gcig la lus kyis reg par byed pa'am/ snod gcig tu za bar byed pa'am/ phor bu gcig tu myos par 'gyur ba'i btung ba sna tshogs 'thung ba'am/ sa brko ba'am rtswa sngon po gcod pa'am/ dus ma yin par za ba'am/ gzhan yang rang bzhin dang / bcas pa'i kha na ma tho ba dang bcas pa'i las gang byed par mthong ba de dag las gang khas blangs pa de byed du gzhug pa'o/ /byed du gzhug ste zhes bya ba ni 'chags su gzhug pa'o/ /de yang ma nges pa'i chos so zhes bya ba ni de yang rnam par ma bzhag pa'i chos yin no/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la gzhan thams cad ni ma nges pa'i chos dang po'i skabs su bstan pa kho na yin no/ /khyad par du ni 'dir dge slong ni shi ri ka /bud med ni khyim bdag gi chung ma gso sbyong 'phags/ dge bsnyen ma ni legs skyes/ bsam pa ni 'dod pa byar mi rung bar stan la 'dug pa/ ltung ba ni pham par 'gyur ba ma gtogs pa dge 'dun lhag ma dang / ltung byed kyi chos gnyis gang yin pa ma nges pa'o/ /ma nges pa gnyis pa bshad zin to// //tshe dang ldan pa dag bdag gis ma nges pa'i chos gnyis po dag bton zin to zhes bya ba ni ma nges pa gdon pa'i mjug bsdu ba ste/ ma nges pa'i chos gnyis po dag ces bya ba ni sngar bstan pa'i chos gnyis so/ /bton zin to zhes bya ba ni dam bcas pa'i don gyi mjug bsdu ba'i phyir dang / nyan pa po rnams spro bar bya ba'i phyir smos so/ /de la bdag gis tshe dang ldan pa dag la ci 'di la khyed yongs su dag gam zhes dri'o/ /ci 'di la khyed yongs su dag gam zhes lan gnyis lan gsum du dri'o/ /'di la tshe dang ldan pa dag yongs su dag na 'di ltar cang mi smra bas de de bzhin du 'dzin to zhes bya ba ni ma nges pa rnam par gzhag pa bsgrag par bya ba yin te/ de la zhes bya ba ni ma nges pa'i chos gnyis po bton pa de la'o/ /lhag ma ni snga ma bzhin no/ /ma nges pa gdon pa bshad zin to// //so sor thar pa'i mdo rgya cher 'grel pa 'dul ba kun las btus pa bam po dgu pa/ gzhung rgyas pa'i mtshan nyid kyi bsdus pa'i don rnam pa gnyis te/ dus dang por bya ba dang mdo gdon pa'o zhes smos pa la/ dus dang por bya ba ni cho ga ste/ de ni bsdus pa'i don rnam pa drug gis sngar bstan zin to/ /mdo gdon pa'i ni las te/ de'i bsdus pa'i don kyang rnam pa drug ste/ gsol ba dang / gleng gzhi gdon pa dang / pham par 'gyur ba gdon pa dang / dge 'dun lhag ma gdon pa dang / ma nges pa gdon pa dang / ril gyis gdon pa'i mtshan nyid bstan pa'o zhes smos pa la/ gsol ba dang / gleng gzhi gdon pa dang / pham par 'gyur ba gdon pa dang / dge 'dun lhag ma gdon pa dang / ma nges pa gdon pa rnams ni de yan chad du bshad zin to/ /da ni ril gyis gdon pa'i mtshan nyid bshad par bya ste/ ril gyis gdon pa zhes pa ni spang ba'i ltung byed dang / ltung byed 'ba' zhig dang / so sor bshags par bya ba dang / bslab pa'i chos mang po dang / rtsod pa zhi bar bya ba'i chos bdun po rnams sde tshan gcig tu bsdus te/ so sor thar pa'i mdo ril gyis gdon pa'o/ /de la dang por spang ba'i ltung byed gdon pa bshad par bya ste/ de'i phyir sdom la/ 'chang ba 'bral ba 'jog pa dang / /'khrur 'jug pa dang len pa dang / /slong dang stod g.yogs smad g.yogs bcas/ /rin thang so sor bskur ba'o/ /zhes bya ba la sogs pa bcu pa phrag gsum gsungs so/ /sdom la zhes bya ba'i dgos pa dang tshig gi don ni snga ma bzhin no/ /bcu pa dang po 'dis ni spang ba'i ltung byed kyi chos bcu bstan te/ 'chang ba dang / 'bral ba dang / 'jog pa dang / 'khrur 'jug pa dang / len pa dang / slong ba dang / slong bar rigs pa dang / spags pa slong ba dang / so so nas spags pa slong ba dang / bskur ba'o/ /bcu pa gnyis pas kyang spang ba'i ltung byed kyi chos bcu ston la/ bcu pa gsum pas kyang bcu ston te/ spyir spang ba'i ltung byed kyi chos sum cu'o/ /tshe dang ldan pa dag spang ba'i ltung byed kyi chos sum cu po 'di dag ni zla ba phyed phyed cing so sor thar pa'i mdo 'don pa las 'byung ngo zhes bya bas ni spang ba'i ltung byed gdon pa'i lung dbog pa bstan to/ /spang ba'i ltung byed kyi chos zhes bya ba ni dge slong gi yo byad spang bar gyur na de sems kyis chos spangs shing zhag gcig yan chad bdag nyid dang bral bar byas na ltung ba bshags par bya dgos pas spang ba'i ltung byed do/ /de nyid kha na ma tho ba'i mtshan nyid 'dzin pas chos zhes bya'o/ /sum cu po 'di dag ni zhes bya ba ni bcu pa dang po dang / gnyis pa dang / gsum pa las byung ba dag go/ /zla ba phyed phyed cing so sor thar pa'i mdo 'don pa las 'byung ngo zhes bya ba ni sde snod gsum las 'dul ba'i sde snod ni yi ger bri ba ma yin pas thams cad kyi mngon sum du ma gyur pa'i phyir gso sbyong 'don pas spang ba'i ltung byad 'don pa 'di ga las shes snyam pa la/ zla ba phyed phyed cing gso sbyong 'don pa'i tshe 'dul ba 'dzin pa'i kha ton las 'byung ngo zhes bstan pa yin no/ /de ltar 'dul ba'i sde snod yang dag par bsdus pa'i gzhung 'di ni ma 'ongs pa'i skye bo rnams dbang po rtul po tshig dang don gyi bdag nyid 'dzin mi nus pa rnams la phan gdags pa'i phyir bcom ldan 'das kyis yang dag par bsdu ba gnang ba yin te/ de bas na 'dul ba'i sde snod kyi las gsang ba 'di ni bsnyen par ma rdzogs pa rnams kyis thos par mi bya'o/ /spang ba'i ltung byed rnams brjod par 'dod nas/ 'dir dang po kho nar 'chang ba dang / 'bral ba la sogs pa spang ba'i ltung byed rnams kyi spyi'i thun mong gi mtshan nyid rnam par gzhag pa cung zhig je bstan par bya'o/ /de'i phyir nyin mtshan gyi dang po ma yin pa la tha ma ma yin pa med pa nyid do zhes bya ba smras te/ nyin mtshan gyi dang po ma yin pa zhes bya ba ni nyin mtshan gyi tha ma ste/ zhag phyi ma'i skya rengs dang po 'char ka'i mtha'i skad cig ma'o/ /tha ma ma yin pa med pa nyid do zhes bya ba ni mtha'i skad cig ma tha ma de ma yin pa de'i mdun rol gyi dus rnams med pa nyid do/ /'di skad bstan te/ zhag phyi ma'i skya rengs dang po 'char ka'i mtha'i skad cig ma de la de'i mdun rol gyi dus zhag snga ma'i skya rengs dang po shar ba'i 'og rol tshun chad nas zhag phyi ma'i skya rengs dang po nyid ma shar ba phan chad kyi dus rnams med pa nyid de/ med pa nyid ces bya ba ni zhag tu mi brtsi'o zhes bya ba'i tha tshig go/ /de nas zhag phyi ma'i skya rengs dang po 'char ka'i mtha'i skad cig ma de nyid la zhag tu brtsi'o/ /de'i mdun rol gyi dus zhag snga ma'i skya rengs dang po shar ba'i 'og rol tshun chad nas/ zhag phyi ma'i skya rengs dang po nyid ma shar ba phan chad kyi dus rnams la zhag tu mi brtsi bas 'dir ltung ba rnam par gzhag pa la zhag bcu 'das pa dang / zla ba gcig 'das pa dang / zhag drug 'das pa dang / zhag bdun 'das pa la yang nyin mtshan dang po'i mthar gyur pa zhag phyi ma'i skya rengs dang po 'char ka'i mtha'i skad cig ma gang yin pa de kho na la nyin mtshan zhe'am/ zhag ces bya ba'i ming 'thob pas spang ba la yang de nyid yan lag tu gyur pa yin par rig par bya'i/ /skad cig ma snga ma thun bcu'i khongs su gtogs pa rnams ni spang ba rnam par gzhag pa'i yan lag nyid ma yin te/ mdor na skya rengs dang po shar na spang bar 'gyur gyi/ skya rengs dang po ma shar ba'i mdun rol gyi dus zhag snga ma'i skya rengs dang po shar ba'i 'og rol tshun chad nas zhag phyi ma'i skya rengs dang po nyid ma shar ba'i bar gyi nyin mtshan gyi thun rnams la zhag tu mi brtsi bas spang bar mi 'gyur ro zhes spyir bstan pa yin no/ /gnas pa la ni sbyor ba'i snod nyid do zhes bya ba ni tha ma ma yin pa'i dus de rnams gnas pa la ni dngos gzhi'i sbyor ba nyes byas kyi snod nyid yin no zhes bya bar sbyar ro/ /de nas ltung ba rnam par gzhag pa la 'di lta ste/ bsnyen par ma rdzogs pa dang lhan cig gnas pa dang / bsnyen par rdzogs na yang lta ba mi gtong ba dang lhan cig gnas pa dang / dge tshul bsnyil ba dang lhan cig gnas pa dang / mtshan mi mthun pa dang gnas gcig na lhan cig nyal ba dang / mar me dang bcas par nyal ba dang / dmag gi nang na gnas pa dag la mtha'i skad cig ma ma yin pa'i dus snga ma rnams kyang med pa nyid ma yin te/ sbyor ba'i snod nyid yin no/ /de la yang dmag gi nang na gnas pa ma gtogs pa gnas pa'i bslab pa'i gzhi gzhan dag la ni mtshan mor gtogs pa'i dus kho nar sbyor ba'i snod nyid yin gyi nyin par gnas pa ni ma yin no/ /dmag gi nang na gnas pa la ni nyin par gnas pa yang sbyor ba'i snod nyid yin te/ der gnas pa tsam nyid kyis nyes pa sbom po'i ltung ba las bslang ba ste/ de la mthol ba ni dge slong gis kha na ma tho ba bcab par mi bya ste/ dge 'dun lhag ma bcu gsum gyi sbyor ba'i nyes pa sbom po lci ba dang yang ba gang yang rung ba byung ba na bcab pa'i sems gcig tsam gyis kyang bcab par mi bya bar de nyid kyi mod la/ mchil lham gnyis phud nas dge slong bsnyen par rdzogs pa rang bzhin du gnas pa lta ba dang / mtshan mthun pa mtshams kyi nang na 'dug pa ltung ba ming dang rigs las mi mthun pa gcig gi mdun du tsog pur 'dug ste thal mo sbyar ba btud nas/ ltung ba sde tshan gyi ming dang gang byung ba'i rigs smos te mthol bar bya'o/ /de'i sngags ni 'di yin te/ tshe dang ldan pa dgongs su gsol/ bdag dge slong ming 'di zhes bgyi ba la ltung ba dge 'dun lhag ma'i sde tshan rigs 'di zhes bgyi ba'i sbyor ba che ge mo las gyur pa'i nyes pa sbom po byung ste/ bdag dge slong ming 'di zhes bgyi ba ltung ba de tshe dang ldan pa'i mdun du mthol lo mi 'chab bo/ /mthol na bdag bde ba la reg par gnas par 'gyur gyi ma mthol na mi 'gyur ro zhes lan gsum bzlas/ de'i rjes la nyan pas thabs yin no zhes brjod par bya'o/ /mthol bas legs so zhes brjod par bya ste/ de tsam gyis na mthol ba yin no/ /de'i mod la gang la mthol bar bya ba'i gang zag med na skya rengs ma shar gyi bar du 'chab pa'i nyes pa med do/ /ji srid du gang la mthol bar bya ba'i gang zag ma rnyed pa de srid du skya rengs shar kyang ma mthol ba la 'chab pa'i nyes pa med do/ /gang la mthol bar bya ba'i gang zag med na ji srid du mthol bar bya ba'i gang zag ma rnyed pa de srid du mthol ba'i sems yod pa la 'chab pa'i nyes pa med do/ /gang la mthol bar bya ba'i gang zag yod du zin kyang rkyen 'ga' zhig gis bdag nyid der 'gro ba'i skabs med dam/ bdag nyid gnas de nas gzhan du song bar gyur na/ de'i bar du mthol ba'i sems med pa la 'chab pa'i nyes pa med do/ /gang la mthol bar bya ba'i gang zag yod du zin kyang ltung ba byung ba de 'di snyam du gal te de'i gan du song la ma brjod na 'chab pa'i nyes par 'gyur du dogs nas de'i dbang gis der mi 'gro'am/ gzhan du song bas brjod pa ma byas pa la yang 'chab pa'i nyes pa med do/ /rkyen cis kyang ma bskal bar de'i gan du mi 'gro ba dang / gzhan du 'gro ba dang / skya rengs kyi mdun rol du mi mthol ba dang / 'chab pa'i sems skyes pa dag ni nyes byas so zhes bya ba yang snga ma bzhin no/ /gang la mthol bar bya ba'i gang zag dge slong bsnyen par rdzogs pa rang bzhin du gnas pa lta ba dang / mtshan mthun pa mtshams kyi nang na 'dug pa ltung ba ming dang rigs las mi mthun pa med na chos 'di pa sngar bstan pa ngag la mthol na yang mthol ba nyid yin te/ de dag gi rnam par gzhag pa yang snga ma bzhin no/ /ltung ba mthol ba spyir bstan pa yang snga ma bzhin te/ mthol ba'i sngags rdzogs par bya'o/ /mthol ba'i sngags ril gyis brjod ma nus na tha na ming ngam rigs gcig go bar byas na yang mthol bar 'gyur te/ 'dir ming ni ltung ba'i sde tshan no/ /rigs ni ltung ba gang byung ba'o/ /de ltar ltung ba'i sbyor ba mthol na sbyor ba de'i sbyor ba nyes byas ni logs shig tu mthol mi dgos so/ /de ltar mthol nas bshags pa ni dge 'dun lhag ma'i nyes pa sbom po lci ba ni/ mtshams gang na dge slong lnga yan chad 'dug pa'i dge slong gud du ma bcad pa thams cad la bshags par bya ste/ gang na dge slong lngar ma langs pa'i gnas su bshags su mi rung ngo / /der gnas gzhan nas dge slong dag gnyer te lnga yan chad du kha bskang ba la ni bshags su rung ngo / /dge slong lnga yan chad gnas par dge slong gzhan gzhag ste/ lnga yan chad logs shig tu bcad pa la yang bshags su mi rung ste/ lnga yan chad nas de na dge slong ji snyed gnas pa thams cad la bshags par bya dgos so/ /dge 'dun lhag ma'i nyes pa sbom po spang ba ni mtshams kyi nang yang rung phyi rol du yang rung ste/ dge slong gcig la bshags pa nyid nyes byas su 'gyur ba'i phyir ro/ /nyin mtshan de'i dang po ni skya rengs dang po de'o zhes bya ba ni nyin mtshan de'i dang po ni skya rengs dang po ni 'di lta ste/ skya rengs po dang / skya rengs bar ma dang / skya rengs tha ma dag las skya rengs dang po de'i skad cig ma dang por gyur pa gang yin pa de'o/ /des na ltung ba rnam par gzhag pa la 'chang ba dang / 'bral ba dang / 'jog pa la sogs pa dag la yang zhag bcu gcig pa'i skya rengs dang po shar ba dang / zhag gcig gi skya rengs dang po shar ba dang / zla ba gcig las lhag pa'i skya rengs dang po shar na spang bar 'gyur bar shes par bya'o/ /las la ni 'das na nyi ma shar ba'i 'o zhes bya ba ni mtshan nyid snga ma de'i dmigs kyis bsal ba yin te/ gso sbyong dang dgag dbye la sogs pa tshes grangs kyi bye brag dang 'brel pa'i las dag la ni rkyen 'ga' zhig gis dus 'das shing yol bar gyur na nyi ma shar ba'i skad cig ma de'i dang por gyur pa gang yin pa de nyin mtshan gyi dang po yin no/ /des na tshes zhes bya ba ni skya rengs dang po shar bar gyur du zin kyang ji srid du nyi ma shar bar ma gyur na de'i tshe gso sbyong la sogs pa'i las byar rung ngo / /spang ba la ni 'du shes las gtso cher rang gi nyid do zhes bya ba ni spang ba'i dngos po la ni 'du shes las gtso cher rang gi nyid yin gyi dngos po las ni ma yin no/ /ma byin par len pa dang / shi ba'i yo byad gnyis ni dngos po las gtso cher rang gi nyid yin gyi 'du shes las ni ma yin no/ /'dir gzhung ni ko lpags kyi gzhi las/ dge slong gis dge slong la chos gos dag bskur zhing 'di nas btang ba der ma phyin pa dag la ni gang la yang spang bar mi 'gyur ro zhes gsungs pa yin no/ /'di skad bstan te/ 'di ltar chos gos la sogs pa bskur ba de thag ring po nas gnas pa'i dge slong de dbang bar byas na dngos po de la dge slong de rang gi nyid yin pa'i 'du shes med pas des na spang bar mi 'gyur ro/ /gal te bskur ba'i dngos po de nyid las brkus na yang gang la bskur ba de las brkus par mi 'gyur gyi/ gang gis bskur ba de las brkus pa yin no/ /de bzhin du gal te dge slong yang dag par byin pa'i 'du shes can gyis bskur ba'i dngos po de ma thob pa kho nar shi'am/ bskur bar byed pa dang / gnyi ga shi bar gyur na/ de ltar na yang dngos po de skur bar byed pa'i shi ba'i yo byad kho na yin par rig par bya'i/ yang dag par byin pa'i ni ma yin te/ de la ni dngos po las rnam par gzhag gi /'du shes las ni ma yin no/ /de ltar na 'du shes yod pa nyid la ni dngos gzhir 'gyur la/ 'du shes med pa nyid la ni ltung bar mi 'gyur ro/ /de las kyang rang gi ma yin pa la rang gir 'du shes na ni nyes byas so/ /rang gi la yid gnyis za ba ni spang bar 'gyur te/ don ji lta ba nyid la ni dngos gzhi'o/ /don ji lta bu nyid ma yin pa la ni dngos gzhi ma yin no zhes gsungs pa'i phyir ro/ /rang gi ma yin pa la yid gnyis za ba la ni nyes byas te/ yid gnyis ni nyes byas dang 'dra'o zhes gsungs pa'i phyir ro/ /de ni bsngos pa nyid na dral ba nyid do zhes bya ba ni spang bar 'gyur ba rang gi nyid gang yin pa de ni sems kyis yongs su btang ste bsngos pa nyid na byin gyis ma brlabs sam/ rung bar ma byas su zin kyang rang gi nyid dang bral ba nyid de/ rang gi nyid ma yin no/ /'di skad bstan te/ dge slong gis chos gos la sogs pa dag dge 'dun la'am/ gang zag la'am/ gzhan la sngo bar byed na gang la sngo bar byed pa des de shes kyang rung mi shes kyang rung / de'i gan du bskur kyang rung / ma bskur kyang rung ste/ rang gi nyid dang bral ba'i phyir de byin gyis ma brlabs sam/ rung bar ma byas kyang spang bar bya bar mi 'gyur ro/ /'dir gzhung ni ko lpags kyi gzhi las/ gang gis bskur ba de la spang ba 'byung bar mi 'gyur ro zhes gsungs pa gang yin pa de nyid yin no/ /shi ba'i yo byad la ni dngos po las rnam par gzhag gi 'du shes ni ma yin te/ de ltar yang 'dir gzhung ni dge slong gis dge slong la chos gos dag bskur ba gang gis bskur ba des kyang spangs par gyur/ gang la bskur pa des kyang spangs par gyur na/ de la de dag gang la bskur ba de la byin gyis rlob par byed na ni byin gyis ma brlabs pa yin no/ /gang gis bskur ba de la byin gyis rlob par byed na ni byin gyis brlabs pa yin te/ legs par byin gyis brlabs pa yin no zhes gsungs pa yin no/ /de lta bas na rdzas de gang gis sgrub pa de nyid kyi shi ba'i yo byad du rnam par gzhag gi /gang la bsngos pa de ni ma yin no/ /rab tu 'byung ba'i don du nges par byas pa yang de nyid yin no zhes bya ba ni rab tu 'byung ba'i rgyur nges par byas pa rnam par gzhag par nges par bsngos pa yang de nyid de bsngos pa nyid yin pa'o/ /'dir gzhung ni rab tu 'byung ba'i don du srel bar byed na ltung ba med do zhes gsungs pa yin no/ /de yang 'di ltar lhang bzed la gsungs mod kyi/ 'on kyang chos gos la sogs pa dag la yang rung bas spyir bstan to/ /chos gos las kyang rung bar bya'o zhes bya ba ni/ chos gos las kyang rung bar bya ba'i phyir bsngo bar byas na rang gi nyid dang 'bral bar ston to/ /rung bar bya ba'i cho ga dang sngags ni dge slong gi mdun du 'greng ste/ gnyi gas gos kyi grwa nas bzung nas 'di skad ces brjod par bya ste/ tshe dang ldan pa dgongs su gsol/ bdag ming 'di zhes bgyi ba'i gos lhag pa rung bar ma byas pa/ rung bar bya bar 'os pa 'di mkhan po la rung bar bgyi'o/ /mkhan po la yid brtan te bcang bar bgyi'o/ /rkyen ji lta ba bzhin du bgyi'o zhes lan gsum du bzlas/ mkhan po las gzhan pa zhig la rung bar bya na yang che ge mo zhes ming brje bar bya'o/ /'di la rjes su zhugs pa nyid kyang nyams pa yin no zhes bya ba na rang gi nyid ces pa'i ltung ba 'di la bsngos pa nyid dang rung bar bya ba nyid kyi thabs kyis ni rang nyid kyi rjes su zhugs pa nyid ces bya ba ni rgyun 'brel pa nyid kyang nyams pa nyid yin par rig par bya'o/ /rang gi nyid 'ba' zhig nyams par ma zad do/ /'di skad bstan te/ gal te dge slong gis tshes la chos gos rnyed la tshes lnga'i nyin par chos gos de rung bar byed dam sngo bar byed na/ phyis de'i nyin mo nyid la chos gos gzhan zhig rnyed kyang snga ma'i shan 'dres par mi 'gyur te/ rjes su zhugs pa nyid nyams pa'i phyir ro/ /rang bzhin las nyams na yang ngo zhes bya ba yang rjes su zhugs pa nyid nyams pa yin no zhes bya bar sbyar ro/ /'di skad bstan te/ dge slong rang nyid sems rnam par 'khrugs pa la sogs pas rang bzhin tha mal pa'i ngo bo nyid las nyams par gyur na yang de'i tshe rang nyid kyis rjes su mthun pa'i rgyus 'brel pa nyams pa yin pas/ sngar rang bzhin las ma nyams pa'i rjes su mthun pa'i shan des phyis rang gi sems phyir rnyed pa'i gnas skabs kyi rang bzhin la shan 'dres par mi 'gyur ro/ /'dir gzhung ni nye ba 'khor gyis zhus pa las btsun pa dge slong gis chos gos rnyed nas dgung lnga lags nas sems rnam par 'khrugs par gyur na de'i dgung bcu po slad ma gang tshun chad nas bgrang bar bgyi/ nye ba 'khor gang tshun chad nas rang gi sems phyir rnyed pa nas so zhes gsungs pa yin no/ /zhag lnga po snga ma dag mi bgrang ba las na rjes su zhugs pa'i rgyun 'brel pa nyams par mngon te/ bar du sems rnam par 'khrugs pa'i phyir ro/ /de yod na dngos po de lta bu gzhan la yang 'byung ba nyid do zhes bya ba ni rjes su zhugs pa de nyid yod na phyis rnyed pa'i dngos po de lta bu gzhan la yang 'byung ba nyid do/ /dngos po de lta bu zhes bya ba ni khyad par ji lta bu can zhig ce na/ dngos po gang la rjes su mthun pa nyid yod pa de lta bu'i dngos po la ste/ 'di lta ste/ gos zhag bcur gtogs pa'i ni zhag bcu pa la 'byung ba nyid do/ /zla ba gcig par gtogs pa'i ni zla ba gcig la'o/ /lhung bzed du gtogs pa'i ni lhung bzed la'o/ /sman zhag bdun par gtogs pa'i ni sman zhag bdun pa la 'byung ba nyid lta bu'o/ /'di skad bstan te/ chos gos sngar rnyed pa la rang gi nyid kyi rjes su zhugs pa nyid de yod na chos gos phyis rnyed pa la yang rang gi nyid kyi rjes su zhugs pa de nyid du 'byung ba nyid du rig par bya'o/ /de bas na chos gos sngar rnyed pa de nyid dang lhan cig tu phyis rnyed pa'i chos gos de yang zhag bcu'i nang rol de nyid du byin gyis brlabs par bya ba'am/ spang bar bya ba yin gyi/ chos gos phyis rnyed pa de'i zhag bcur bgrang ba logs shig tu ni mi bya ste/ chos gos sngar rnyed pa de nyid kyi shan des phyis rnyed pa de yang shan 'dres par 'gyur bar byas pa'i phyir ro/ /'dir gzhung ni dge slong gis tshes la chos gos shig rnyed la/ des tshes gnyis la chos gos gzhan zhig kyang rnyed par gyur na/ dge slong des zhag bcu po de nyid kyi nang rol du snga ma shos byin gyis brlab par bya zhing phyi ma shos gtang bar bya ba'am/ rung bar bya ba'am/ gzhan la sbyin par bya ba'o/ /gtong bar mi byed dam/ rung bar mi byed dam/ gzhan la sbyin par mi byed na zhag bcu gcig pa'i skya rengs shar nas spang ba'i ltung byed do zhes gsungs pa yin no/ /zhag bdun pa la ni rigs mthun pa la'o zhes bya ba ni sman zhag bdun pa la de'i bye brag gzhan bstan te/ zhag bdun pa la ni zhes bya ba ni mar dang 'bru mar la sogs pa'i rdzas zhag bdun pa nyid du byin gyis brlabs pa la'o/ /rigs mthun pa la'o zhes bya ba ni phyis rnyed pa'i rdzas rigs mthun pa rang bzhin 'dra ba la rang gi nyid kyi rjes su zhugs pa nyid de 'byung ba nyid du shes par bya'i dngos po de lta bu thams cad la 'byung ba ni ma yin pa ste/ 'di lta ste/ rang gi nyid kyi rjes su zhugs pa nyid mar du gtogs pa'i ni mar phyis rnyed pa la 'byung ba nyid yin gyi/ 'bru mar la sogs pa dag la mi 'byung ba dang / de bzhin du rang gi nyid kyi rjes su zhugs pa nyid 'bru mar du gtogs pa'i ni 'bru mar phyis rnyed pa la 'byung ba nyid yin gyi mar la sogs pa dag la mi 'byung ba lta bu'o/ /'dir gzhung ni rnam par 'byed pa las dge slong gis tshes la mar rnyed la des tshes gnyis la gzhan zhig kyang rnyed par gyur na dge slong des snga ma shos bza' bar bya zhing / phyi ma shos gtang bar bya ba'am/ rung bar bya ba'am/ gzhan la sbyin par bya ba'o/ /gtong bar mi byed dam/ rung bar mi byed dam/ gzhan la sbyin par mi byed na/ zhag brgyad pa'i skya rengs shar na/ spang ba'i ltung byed do zhes gsungs pa yin no/ /ltung ba de yin na yo byad tsam bdag gir byas pa la spang ba nyid do zhes bya ba ni spang ba'i ltung byed kyi ltung ba de yod bzhin pa ma bshags pa la phyis yo byad rigs mthun pa'am/ rigs mi mthun pa ci yang rung ba zhig rnyed cing bdag gir byas na spang bar bya dgos pa nyid 'byung gi ltung ba ni mi 'byung ba'o/ /'di skad bstan te dge slong gang la spang ba'i ltung byed yod pa'i dge slong des gal te phyis rigs mthun pa'am/ rigs mi mthun pa'i yo byad tsam rnyed na de'i tshe/ bshags pa'i dus na dge slong des de yang spang bar bya'o/ /de'i phyir ltung ba ni bshags par bya mi dgos te/ de'i gzhi las ltung ba ma byung ba'i phyir ro/ /'dir gzhung ni dge slong gis chos gos spang ba ma spangs shing bral bar ma byas la ltung ba de yang ma bshags par gzhan zhig rnyed na de yang spang ba yin te/ snga ma'i shugs kyis so zhes bya ba la sogs pa gsungs pa yin no/ /chung ba nyid kyi dum bu de ni mi 'gyur ro zhes bya ba ni khru gang khor yug las chung ba nyid kyi dum bu de ni spang ba nyid du mi 'gyur ro/ /'di skad bstan te/ spang bar bya ba'i dngos po snga ma'am/ phyi ma gang yang rung ba dam dum du gyur na bshags pa'i dus na spang bar bya mi dgos te/ khru gang khor yug pas chung ba'i phyir dang / chung ba ni spang bar 'os pa ma yin pa'i phyir ro/ /'dir gzhung ni nye ba 'khor gyis zhus pa las btsun pa dge slong gis chos gos spang ba 'tshig gam/ srog chags dag dang sril dag gis 'tshal bar gyur nas/ de la dam dum gang dag mchis pa dag spang bar bgyi'am/ nye ba 'khor mi bya ste/ ltung byed 'ba' zhig bshags par bya'o zhes gsungs pa yin no/ /dge 'dun gyi yang ngo zhes bya ba ni dge 'dun mnga' ba'i rdzas ris su ma bcad pa yang spang bar mi bya ba nyid do/ /dge 'dun mnga' ba'i dngos po ni rnam pa gnyis te/ dge 'dun mnga' ba gang zag gi bdag nyid du ris su bcad pa dang / dge 'dun mnga' ba'i ris su ma bcad pa'o/ /de la dge 'dun mnga' ba gang zag gi bdag nyid du ris su bcad pa'i dngos po la ni 'chang ba dang 'bral ba dang / 'jog pa'i rgyus spang ba'i ltung byed dag 'byung ste/ de la thams cad gang zag gi dang 'dra bar bdag gir bya ba 'byung ba'i phyir ro/ /dge 'dun mnga' ba ris su ma bcad pa la ni gang zag gzhan gyi dang 'dra bar bdag gir bya ba mi 'byung bas de la ni sngar bstan pa thams cad mi 'byung ngo / /gal te dge 'dun mnga' ba ris su ma bcad pa'i chos gos gang zag 'ga' zhig gis byin gyis rlob par byed cing chos gos de dang 'bral bar byed na/ de'i tshe ltung byed 'ba' zhig bshags par bya ba'i chos gos de spang bar ni mi bya'o/ /'dir gzhung ni nye ba 'khor gyis zhus pa las/ btsun pa dge slong gis dge 'dun gyi chos gos byin gyis brlabs nas/ mtshams kyi slad rol du 'bral bar bgyid na chos gos de dang bral zhes bgyi'am ma bral zhes bgyi/ bka' stsal pa/ chos gos dang bral zhes bya'o/ /chos gos de spang bar bgyi'am/ nye ba 'khor mi bya ste/ ltung byed 'ba' zhig bshags par bya'o zhes gsungs pa yin no/ /de ma yin pa'i phyir de dang bral bar bya mi dgos so/ /'di la med pa nyid gtso bo'i zhes bya ba ni spang bar bya ba 'di la dngos po de gang zag de la mi bdog cing med pa nyid yin na/ de nyid spang ba nyid la gtso bo yin gyi spang bar bya ba'i rdzas ni gtso bo ma yin no/ /de bas na tshig pa la sogs pas nyams pa'i chos gos la ni ltung byed 'ba' zhig bshags par bya'o/ /'dir gzhung ni zhu ba las/ btsun pa dge slong gis chos gos spang ba nyams par gyur na/ ltung byed bshags par bgyi'am/ nye ba 'khor ltung byed 'ba' zhig bshags par bya'o zhes gsungs pa yin no/ /'di gsum ni sra brkyang bting ba la mi 'byung ngo zhes bya ba ni 'og kho na nas 'byung ba 'chang ba dang bral ba dang / 'jog pa zhes bya ba'i spang ba'i ltung byed 'di gsum ni dge slong sra brkyang bting ba mi 'byung ste/ sra brkyang bting ba la dbyar gnas par khas blangs pa'i phan yon bcu yod pa'i skabs yin pa'i phyir ro/ /spang ba'i ltung byed rnams [(]gyi [,]kyi[)]thun mong gi mtshan nyid spyir bstan pa bshad zin to// // da ni spang ba'i ltung byed so so'i skabs brjod par bya ste/ de la 'chang ba'i spang ba'i gleng gzhi ni bcas pa dang / gnang ba'i dbang gis rnam pa gnyis te/ bcas pa'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe na dge slong rnams la chos gos mang po nyid 'di lta bu 'di byung ste/ chos gos gzhan gyis ni gtsug lag khang du chag chag 'debs par byed/ gzhan gyis ni legs par nyug par byed/ gzhan gyis ni lci ba sar pa'i byug pas skud par byed/ gzhan gyis ni lag pa dang rkang pa dag 'khru bar byed/ gzhan gyis ni so shing 'dor bar byed/ gzhan gyis ni grong du bsod snyoms la rgyu bar byed/ gzhan gyis ni zas kyi gral du bkad par byed/ gzhan gyis ni mkhan po dang slob dpon dag la ltar 'gro bar byed/ gzhan gyis ni ston pa'i gdams ngag nyams su myong bar byed/ gzhan gyis ni nyin mo chos mnyan pa nyams su myong bar byed/ gzhan gyis ni mtshan mo chos mnyan pa nyams su myong bar byed de/ de dag gyon pa dang 'bud par byed pa na/ bya ba mang ba dang / byed pa mang bar gyur cing / lung nod pa dang / klag pa dang / kha ton dang / rnal 'byor dang / yid la bya ba dang / nang gi sems kyi zhi gnas gtong bar byed nas/ dge slong don nyung ngu dag ci'i phyir dge slong rnams la chos gos mang po nyid 'di lta bu 'di phyung zhing nyes dmigs de lta bur gyur ces smod par byed/ phyar kha gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang gleng gzhi 'di dang skabs 'di la dge slong gi dge 'dun bsdu ba mdzad de/ dge slong rnams la rmas nas rnam grangs du mar smad de/ bslab pa bca' ba'i phan yon bcu yang dag par gzigs pas/ nyan thos rnams kyis 'dul ba la bslab pa'i gzhi 'di ltar gdon par bya ste/ dge slong chos gos zin pas sra brkyang phyung na chos gos gsum bcang bar bya'o/ /de las lhag par 'chang na spang ba'i ltung byed do zhes bca' ba mdzad de/ yul ni mnyan yod/ gang zag ni dge slong rab tu mang po/ nyon mongs pa ni zang zing la gdu ba/ nyes pa ni bya ba shor ba'o/ /gnang ba'i gleng gzhi ni sangs rgyas bcom ldan 'das rgyal po'i khab na 'od ma'i tshal ka lan dka'i gnas na bzhugs so/ /de'i tshe na tshe dang ldan pa 'od srungs chen po rgyal po'i khab na dgon pa'i spyil bu na 'dug ste/ gang gi tshe bcom ldan 'das kyis tshe dang ldan pa 'od srungs chen po la dge 'dun gtad pa de'i tshe khyim bdag gcig yun ring po nas smon pa/ kye ma bdag gis gnas brtan 'od srungs chen po lha dang mis mchod pa bshos gsol te/ ras yug chen zhig bskon na ci ma rung snyam na de'i 'dod pa yongs su rdzogs par ma gyur nas/ de nas khyim bdag de ras yug chen thogs nas tshe dang ldan pa kun dga' bo ga la ba der song ste phyin nas/ tshe dang ldan pa kun dga' bo'i rkang pa gnyis la mgo bos phyag 'tshal te/ 'di skad ces smras so/ /btsun pa kun dga' bo khyod kyis da ltar gnas brtan 'od srungs chen po ga la bzhugs/ ci gsan/ khyim bdag /dgon pa'i spyil bu na 'dug ces thos so/ /ji tsam na 'dir byon par 'gyur/ 'di nyid kyi gso sbyong bco lnga pa'i tshe'o/ /btsun pa kun dga' bo mkhyen par mdzod cig / 'di na bdag yun ring po nas smon pa/ kye ma bdag gis gnas brtan 'od srungs chen po lha dang mis mchod pa bshos gsol te/ ras yug chen zhig bskon na ci ma rung snyam nas/ bdag gis ras yug chen de yang 'tshal te mchis na/ bdag cag khyim pa dag ni bgyi ba mang ba dang / bgyid pa mang ba lags kyi/ kye ma btsun pa kun dga' bos bdag la thugs brtse ba'i slad du gnas brtan 'od srungs chen po lha dang mis mchod pa la ras yug chen 'di bskon du gsol/ de nas tshe dang ldan pa kun dga' bo 'di snyam du sems te/ gal te bdag gis khyim bdag las ras yug chen blangs na ni bslab pa'i gzhi ral bar yang 'gyur/ gal te ma blangs na ni khyim bdag gi bsod nams kyi bar chad dang / gnas brtan 'od srungs chen po'i rnyed pa'i bar chad du yang 'gyur na bdag gis blangs par gyur na dus ma yin pa'i phyir bcom ldan 'das kyis gnang bar 'gyur ba gang yin pa de'i gnas kyang yod par 'gyur grang snyam nas khyim bdag las ras yug chen blangs te/ bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te/ mtha' gcig tu 'dug go/ /mtha' gcig tu 'dug nas tshe dang ldan pa kun dga' bos skabs de bcom ldan 'das la rgyas par gsol to/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo legs so legs so/ /ngas gnang ba gang yin pa de khyod kyis shes te/ de lta bas na dge slong gis zhag bcu'i bar du gos lhag pa rung bar ma byas pa bcang bar rjes su gnang ngo / /de nas bcom ldan 'das kyis bslab pa 'dod pa rnams dang / bslab pa la gus pa rnams dang / bslab pa la yo byad bsnyungs pa rnams dang / sbyangs pa'i yon tan rnams dang / mdzes pa rnams dang / chog shes pa rnams kyi bsngags pa brjod nas dge slong rnams la bka' stsal pa/ dge slong dag de lta bas na snga ma ni bcas pa yin la/ 'di ni gnang ba yin no/ /nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong chos gos zin pas sra brkyang phyung na zhag bcu'i bar du chos gos lhag pa rung bar byas pa bcang bar bya'o/ /de las 'das par 'chang na spang ba'i ltung byed do zhes gnang bar mdzad de/ yul ni rgyal po'i khab/ gang zag ni tshe dang ldan pa kun dga' bo/ /nyon mongs pa dang nyes pa ni med do/ /de la dge slong zhes bya ba ni chos 'di pa'o/ /chos gos zin pas zhes bya ba ni dge slong gang gis chos gos dag bkru ba dang / dra ba dang / drub pa dang / kha bsgyur bas so/ /sra brkyang phyung na zhes bya ba la/ sra brkyang zhes bya ba ni dge 'dun dbyar snga ma'am/ phyi mar gnas par khas blangs nas dgag dbye byas pa'i 'og tu dge slong thams cad dbyar gyi rnyed pa dang / phan yon gyi gtan pa bca' ba'i chos gos gtan pa lta bu byin gyis brlabs pa'o/ /phyung na zhes bya ba la/ sra brkyang dbyung ba'i dus ni rnam pa gnyis te/ dbyar snga mar gnas par khas blangs pas ston zla 'bring po nya la dgag dbye byas te/ tshes bcu drug la sra brkyang bting na ni de dbyung ba'i dus dpyid zla ra ba'i nya'o/ /dbyar phyi mar gnas par khas blangs pas ston zla tha chungs nya la dgag dbye byas te/ tshes bcu drug la sra brkyang bting na ni de dbyung ba'i dus dpyid zla 'bring po'i nya'o/ /de dag gi rnam par gzhag pa zhib tu ni dbyar gyi gzhi dang / dgag dbye'i gzhi dang / sra brkyang gi gzhi las 'byung ngo / /de la dge slong chos gos zin pas sra brkyang phyung na zhes bya ba la/ chos gos zin la sra brkyang ma phyung ba yang yod/ sra brkyang phyung la chos gos ma zin pa yang yod/ chos gos zin cing sra brkyang phyung ba yang yod/ chos gos ma zin cing sra brkyang ma phyung ba yang yod do/ /de la re zhig ji tsam gyis na chos gos zin la sra brkyang ma phyung ba yin zhe na/ 'di lta ste/ dge slong gis chos gos dag bkru ba dang / dra ba dang / drub pa dang / kha bsgyur zin la dge 'dun gyi sra brkyang ma phyung ba yin no/ /ji tsam gyis na sra brkyang phyung la chos gos ma zin pa yin zhe na/ 'di lta ste/ dge slong gis chos gos dag bkru ba dang / dra ba dang / drub pa dang / kha bsgyur ma zin pa la dge 'dun gyis sra brkyang phyung ba yin no/ /ji tsam gyis na chos gos zin cing sra brkyang phyung ba yin zhe na/ 'di lta ste/ dge slong gis chos gos dag bkru ba dang / dra ba dang / drub pa dang / kha bsgyur zin cing dge 'dun gyis kyang sra brkyang phyung ba yin no/ /ji tsam gyis na chos gos ma zin cing sra brkyang ma phyung ba yin zhe na/ rnam pa de dag ma gtogs pa'o/ /'dir ni sra brkyang phyung ba yan lag gi gtso bor bzhed do/ /zhag bcu pa'i bar du zhes bya ba ni mtshan mo bcu'i mthar ro/ /gos lhag pa zhes bya ba ni byin gyis brlab par bya ba las lhag pa'o/ /rung bar ma byas pa zhes bya ba ni brtag pa ma byas pa'o/ / bcang bar bya'o zhes bya ba ni bdag gir bya'o/ /de las 'das par 'chang na zhes bya ba ni de las thal bar 'chang na'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni dge slong gis rang gi gos 'khor gsum khebs pa'i mtha'i tshad dang ldan pa yod la byin gyis ma brlabs par zhag bcu'i rjes su zhugs pa nyid yin na zhag bcu gcig pa'i skya rengs dang po shar na 'chang ba'i spang ba'i ltung byed kyi dngos gzhir 'gyur ro/ /dge slong gis nyin mtshan gyi rim gyis snga phyir gzhan las 'byung ba'i gos rnyed la/ snga ma byin gyis ma brlabs shing phyi ma byin gyis brlabs na snga ma shos zhag bcu gcig pa'i skya rengs dang po shar na 'chang ba'i spang ba'i ltung byed du gyur pa'i shan gyis phyi ma shos byin gyis brlabs pa yang snga ma'i dus de kho na'i 'chang ba'i spang ba'i ltung byed kyi dngos gzhir 'gyur ro/ /dge slong gis nyin zhag gcig kho nas dus gcig tu gzhan las byung ba'i gos gnyis rnyed la gang yang rung ba cig byin gyis brlabs shing gcig ni ma brlabs na/ gnyi ga zhag bcu gcig po'i skya rengs dang po shar na 'chang ba'i spang ba'i ltung byed kyi dngos gzhir 'gyur ro/ /dge slong gis dge 'dun mnga' ba'i rdzas gang zag gi bdag nyid du ris su bcad pa 'chang ba'i spong bar gtogs pa zhag bcu gcig gi skya rengs las 'das par byas na 'chang ba'i spang ba'i ltung byed kyi dngos gzhir 'gyur ro/ /dge slong la 'chang ba'i spang ba'i ltung byed byung na de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par gos zhag bcu par gtogs pa de lta bu gzhan zhig rnyed na yang snga ma'i shugs kyis spang bar 'gyur te/ de las ltung bar mi 'gyur ro/ /dge slong gis 'chang ba'i spang ba'i ltung byed byung la ji srid du spang ba'i dngos po las ma bshags shing so sor ma bshags par lhung bzed dam chos gos sam/ dra ba'am/ phor bu'am/ ska rags sam/ dge sbyong gi 'tsho ba'i yo byad gang yang rung ba gzhan nye bar 'jog par byed na/ de yang snga ma'i shugs kyis spang bar 'gyur te/ de las ltung bar ni mi 'gyur ro/ /rdzas bzang ngan dang / mang nyung la na smad pa med do/ /kha bskang ba la re ba med na chung ba khru gang yan chad la na smad pa med do/ /byin gyis brlabs par bya ba'i chos gos gsum yod pa nyid yin na yang chung ba khru gang yan chad la na smad pa med do/ /tshes grangs gcig nas bcu'i bar dang / gnyis nas bcu gcig gi bar du lta ba la sogs pa la na smad pa med do/ /gdong phyis dang chu tshags dang / stan dbyam dang dre'u rdog la sogs pa yo byad kyi gos byin gyis ma brlabs pa dag la na smad pa med do/ /gos rung ba nyid dang / tshad dang ldan pa dang / tshad las lhag pa la na smad pa med do/ /'di'i byed pa po ni rang gi gos dang byin gyis ma brlabs pa'o/ /'di la yan lag bdun gyis dngos gzhi'i ltung bar 'gyur te/ rang gi dang / gos dang / 'khor gsum khebs pa'i mtha'i tshad dang / yod pa dang byin gyis ma brlabs pa dang / zhag bcur rjes su zhugs pa dang / zhag bcu gcig pa'i skya rengs shar ba'o/ /de dag las yan lag ma tshang na ci rigs par na smad do/ /sbyor ba'i ltung ba ni nyes byas te/ ji srid du zhag bcu 'das pa'i spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /kha bskang ba la re ba med pa dang / byin gyis brlab tu rung ba'i chos gos gsum med la gos khru gang gi tshad pas chung ba dang / 'khor gsum gyi phyed mi khebs pa la nyes byas so/ /rung ba ma yin pa dang / tshad pas chung ba 'chang ba la nyes byas sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed do/ /sbyor ba nyes byas kyi sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gi sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhir 'gyur ro zhes bya bar shes par bya'o/ /ltung ba med pa ni rang gi ma yin pa dang / gos ma yin pa dang / med pa dang / byin gyis brlabs pa dang / zhag bcur rjes su ma zhugs pa dang / zhag bcu gcig pa'i skya rengs ma shar ba la ltung ba med do/ /sra brkyang bting ba ma phyung ba la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du 'chang ba'i spang bar 'gyur ba rnam pa thams cad mi bsten par bslab par bya'o/ /phyir bcos pa ni spang ba'i ltung byed kyi sbyor ba'i sbyor ba nyes byas phra mo dang sbyor ba'i nyes byas dang / ltung byed kyi dngos gzhi mthol ba dang / bshags pa gnyis kyis ltung ba mi 'byung ba la bslab par bya'o/ /de la spang ba'i ltung byed kyi sbyor ba'i sbyor ba yid kyi nyes byas phra mo phyir bcos pa ni de bsdam par bya ba'i nyes byas yin pas gzhan la mthol ba dang bshags mi dgos par rang gi yid kyis ltung ba snga ma mthong ba dang / phyin chad bsdams pas snga ma 'gyod pa dang / phyin chad mi bya'o snyam du bsdam pa byas na ltung ba las ldang ngo / /spang ba'i ltung byed kyi sbyor ba'i nyes byas phyir bcos pa ni/ ltung ba de bshags par bya ba'i nyes byas yin pas de mthol ba dang bshags pa'i cho ga ni dge slong gis ltung ba bcab par mi bya ste/ spang ba'i ltung byed kyi sbyor ba'i nyes byas bshags par bya ba gang yang rung ba byung ba na bcab pa'i sems gcig tsam gyis kyang bcab par mi bya bar de nyid kyi mod la/ mchil lham gnyis phud nas dge slong bsnyen par rdzogs pa rang bzhin du gnas pa lta ba dang mtshan mthun pa/ mtshams kyi nang du 'dug pa dang ltung ba ming dang rigs las byung ba mi mthun pa gcig gi mdun du tsog pur 'dug ste/ thal mo sbyar ba btud nas ltung ba'i sde tshan gyi ming dang / gang byung ba'i rigs smos te cig car mthol ba dang bshags par byar rung ngo / /de'i sngags ni 'di yin te/ tshe dang ldan pa dgongs su gsol/ bdag dge slong ming 'di zhes bgyi ba la spang ba'i ltung byed kyi sde tshan las rigs 'di zhes bgyi ba'i sbyor ba che ge mo las byung ba'i nyes byas byung ste/ bdag dge slong ming 'di zhes bgyi ba ltung ba de tshe dang ldan pa'i mdun du mthol lo/ /mi 'chab bo/ /'chags so/ /mthol zhing bshags na bdag bde ba la reg par 'gyur gyi/ ma mthol ma bshags na ni mi 'gyur ro zhes lan gsum bzlas nyan pas ltung ba mthong ngam zhes smra zhing / 'chags pas mthong ngo zhes brjod par bya/ nyan pas phyin chad sdom mam zhes smra zhing / 'chags pas sdom mo zhes lan gsum bzlas/ de'i rjes la nyan pas thabs yin no zhes brjod par bya'o/ /'chags pas legs so zhes brjod par bya ste/ de tsam gyis na spang ba'i ltung byed kyi sbyor ba'i nyes byas bshags par bya ba'i ltung ba las ldang ngo / /de'i mod la gang la mthol zhing bshags par bya ba'i gang zag med na/ skya rengs ma shar gyi bar du 'chab pa'i nyes pa med do/ /ji srid du gang la mthol zhing bshags par bya ba'i gang zag ma rnyed pa de srid du skya rengs shar kyang ma mthol ma bshags pa la 'chab pa'i nyes pa med do/ /gang la mthol zhing bshags par bya ba'i gang zag med na/ ji srid du gang la mthol zhing bshags par bya ba'i gang zag ma rnyed na de srid du mthol zhing bshags pa'i sems med pa la 'chab pa'i nyes pa med do/ /gang la mthol zhing bshags par bya ba'i gang zag yod du zin kyang rkyen 'ga' zhig gis bdag nyid der 'gro ba'i skabs med dam/ bdag nyid gnas de nas gzhan du song bar gyur na de'i bar du mthol zhing bshags pa'i sems med pa la 'chab pa'i nyes pa med do/ /gang la mthol zhing bshags par bya ba'i gang zag yod du zin kyang ltung ba byung ba de 'di snyam du gal te de'i gan du song la ma brjod na/ 'chab pa'i nyes par 'gyur du dogs pas de'i dbang gis der mi 'gro'am/ gzhan du song bas brjod pa ma byas pa la yang 'chab pa'i nyes pa med do/ /rkyen cis kyang ma bskal par de'i gan du mi 'gro ba dang / gzhan du 'gro ba dang / skya rengs kyi mdun rol du mi mthol ba dang / 'chab pa'i sems bskyed pa dag ni nyes byas so/ /gang la mthol zhing bshags par bya ba'i gang zag dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang du 'dug pa ltung ba ming dang rigs las mi mthun pa med na/ chos 'di pa gcig la je mthol la/ de'i 'og tu dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa'i mdun du bshags par bya'o/ /ltung ba ming dang rigs las mi mthun pa'i gang zag med na ltung ba rigs las mi mthun pa'i mdun du bshags par bya'o/ /'dir ming ni ltung ba'i sde tshan no/ /rigs ni ltung ba gang byung ba'o/ /chos 'di pa zhes bya ba ni dge slong ma dang / bslab pa byin pa dang / dge slob ma dang / dge tshul dang / dge tshul ma dang / dge bsnyen dang / dge bsnyen ma dang / khyim pa de bzhin gshegs pa'i lta ba can mtshams kyi nang na 'dug pa dang / lta ba mi mthun pa mtshams gzhan na 'dug pa dag go/ /'dir de dag 'ba' zhig gi rnam par gzhag pa ni mtshan mi mthun pa bsnyen par rdzogs pa la mthol na bcabs par ni mi 'gyur la nyes byas su ni 'gyur ro/ /bsnyen par ma rdzogs pa dag la mthol na bcabs par ni mi 'gyur la/ gnas ngan len rig par byed pa las ni ltung byed du 'gyur ro/ /gnas ngan len ma yin par rig par byed pa las ni nyes byas su 'gyur ro/ /chos 'di pa de dag gang yang rung ba mtshams gzhan na 'dug pa dang lta ba mi mthun pa la mthol na bcabs par ni mi 'gyur la nyes byas su ni 'gyur ro/ /dge slong bsnyen par rdzogs pa rang bzhin du gnas pa ma yin pa la mthol na yang bcabs par ni mi 'gyur la nyes byas su ni 'gyur ro/ /dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa la ltung ba ming dang rigs las mthun pa la mthol na yang bcabs par ni mi 'gyur la nyes byas su ni 'gyur ro/ /dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang du 'dug pa ltung ba ming dang rigs las mi mthun pa la mthol na bcabs par yang mi 'gyur la ltung bar yang mi 'gyur ro/ /'og ma gzhan dag la yang de bzhin no/ /ltung ba mthol ba la spyir bstan pa ni mthol ba'i sngags rdzogs par bya'o/ /mthol ba'i sngags ril gyis brjod ma nus na tha na ming ngam rigs gcig go bar byas na yang mthol bar 'gyur ro/ /bshags pa'i sngags ni rdzogs par brjod dgos so/ /nyes byas mthol ba la ni ming dang rigs ma brjod par bdag la ltung ba byung ngo zhe'am/ bdag gis kha na ma tho ba byas so zhes bya ba rnam pa gang yang rung bas rig par byas na yang rung ngo / /pham par 'gyur ba'i dngos gzhi ma gtogs pa/ sbyor ba dang nyes byas la sogs pa ltung ba gzhan thams cad la yang bcabs pa yod na sngar bcabs pa'i nyes pa phyir bcos par bya zhing phyis ltung ba nyid phyir bcos par shes par bya'o/ /bcabs pa'i nyes pa phyir bcos pa ni ltung ba ming dang rigs gang byung ba dang / ji srid bcabs pa de dag je mthol bar bya'o/ /dge 'dun lhag ma la ni bcabs pa'i nyes pa yod na spo ba zhes bya ba'i las kyis de med par bya dgos te/ de ni sngar bstan pa yin no/ /mthol ba dang bshags par bya ba'i skabs yod bzhin du mi mthol mi bshags na zhag re re la nyes byas re rer 'gyur ro/ /gang la mthol ba'i gang zag bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa yod na chos 'di pa gzhan la mthol bar mi bya'o/ /bshags pa ni chos 'di pa gzhan la rnam pa thams cad du mi bya'o/ /de ltar sbyor ba'i nyes byas mthol zhing bshags na/ de'i sbyor ba'i sbyor ba'i nyes byas phra mo ni logs shig tu mthol zhing bshags mi dgos so/ /spang ba'i ltung byed kyi dngos gzhi phyir bcos pa yang mthol ba dang bshags pa gnyis kyis spong ba'i ltung byed kyi dngos gzhi las bslang pa ste/ de la spang ba'i ltung byed kyi dngos gzhi mthol ba ni dge slong gis kha na ma tho ba bcab par mi bya ste/ spang ba'i ltung byed sum cu po dag las gang yang rung ba'i dngos gzhi byung ba na/ bcab pa'i sems gcig tsam gyis kyang bcab par mi bya bar de nyid kyi mod la mchil lham gnyis phud nas dge slong bsnyen par rdzogs pa rang bzhin du gnas pa lta ba dang mtshan mthun pa mtshams kyi nang na 'dug pa ltung ba ming dang rigs las mi mthun pa gcig gi mdun du tsog pur 'dug ste/ thal mo sbyar ba btud nas/ ltung ba'i sde tshan gyi ming dang / gang byung ba'i rigs smos te mthol bar bya'o/ /de'i sngags ni 'di dag yin te/ tshe dang ldan pa dgongs su gsol/ bdag dge slong ming 'di zhes bgyi ba la/ ltung ba spang ba'i ltung byed kyi sde tshan las rigs 'di zhes bgyi ba byung ste/ bdag dge slong ming 'di zhes bgyi ba ltung ba de tshe dang ldan pa'i mdun du mthol lo mi 'chab bo/ /mthol na bdag bde ba la reg par gnas par 'gyur gyi ma mthol na mi 'gyur ro zhes lan gsum bzlas/ de'i rjes su nyan pas thabs yin no zhes brjod par bya/ mthol bas legs so zhes brjod par bya'o/ /spang ba'i ltung byed kyi dngos gzhi mthol ba 'di la gal te bcabs pa yod na dus gzhan ji srid bcabs pa nyid sngags kyi nang du bsnan te mthol lo/ /bcabs pa med na mthol ba nyi tshe snga ma bzhin bya ste/ de tsam gyis na mthol ba yin no/ /de'i mod la gang la mthol bar bya ba'i gang zag med na/ skya rengs ma shar gyi bar du 'chab pa'i nyes pa med do/ /ji srid du gang la mthol bar bya ba'i gang zag ma rnyed pa de srid du skya rengs shar kyang ma mthol ba la 'chab pa'i nyes pa med do/ /gang la mthol bar bya ba'i gang zag med na ji srid du gang la mthol bar bya ba'i gang zag ma rnyed pa de srid du mthol ba'i sems med pa la 'chab pa'i nyes pa med do/ /gang la mthol bar bya ba'i gang zag yod du zin kyang rkyen 'ga' zhig gis bdag nyid der 'gro ba'i skabs med dam/ bdag nyid gnas de nas gzhan du song bar gyur na/ de'i bar du mthol ba'i sems med pa la 'chab pa'i nyes pa med do/ /gang la mthol bar bya ba'i gang zag yod du zin kyang ltung ba byung ba de 'di snyam du gal te de'i gan du song la ma brjod na 'chab pa'i nyes par 'gyur du dogs pas de'i dbang gis der mi 'gro ba'am/ gzhan du song bas brjod pa ma byas pa la yang 'chab pa'i nyes pa med do/ /rkyen cis kyang ma bskal par de'i gan du mi 'gro ba'am/ gzhan du 'gro ba dang / skya rengs kyi mdun rol du mi mthol ba dang / 'chab pa'i sems bskyed pa dag ni nyes byas so zhes bya ba yang snga ma bzhin no/ /'chab pa la yang spang ba'i ltung byed la yid gnyis za ba ni shes pa dang 'dra'o/ /spang ba'i ltung byed mi shes pa nyid dang 'dra'o/ /bcab pa'i sems ma bzhag pas brjed pa dang / byas sam ma byas ci zhig ji lta bu zhig ces dran par mi nus pa nyid dang / bsnyen par ma rdzogs pa nyid dang / gnas nas phyung ba nyid la 'chab pa mi 'byung ngo / /las dang po pa dang / smyos pa dang / sems 'khrugs pa dang / tshor ba dag gis nyen pa la ni ltung ba thams cad dang / de dag 'chab pa'i nyes pa yang mi 'byung ngo / /sa gang la 'chab pa mi 'byung ba de la bcab pa'i nyes pa yang mi 'byung ngo / /gang la mthol bar bya ba'i gang zag dge slong bsnyen par rdzogs pa rang bzhin du gnas pa/ lta ba dang mtshan mthun pa mtshams kyi nang na 'dug pa/ ltung ba ming dang rigs las mi mthun pa med na chos 'di pa sngar bstan pa dag la mthol ba na yang mthol ba nyid yin te/ de dag gi rnam par gzhag pa yang snga ma bzhin no/ /ltung ba mthol ba phyir bstan pa yang snga ma bzhin te/ mthol ba'i sngags brjod par bya'o/ /mthol ba'i sngags ril gyis brjod ma nus na tha na ming dang rigs gcig go bar byas na yang mthol bar 'gyur ro/ /'dir yang ming ni ltung ba'i sde tshan no/ /rigs ni ltung ba gang byung ba'o/ /de ltar ltung ba'i dngos gzhi mthol na bar mtshams de'i sbyor ba dang sbyor ba'i sbyor ba ni logs shig tu mthol mi dgos so/ /de ltar mthol nas bshags pa ni spang ba'i ltung byed kyi ltung ba las bslang ba zhes bya ste/ spang ba'i ltung byed kyi ltung ba las bslang ba 'di ni dge slong ngo tsha dang ldan pa dang / mdo sde 'dzin pa dang / 'dul ba 'dzin pa dang / ma mo 'dzin pa dang / shes pas ni dge slong gcig gi mdun du bshags pas spang ba'i ltung byed kyi ltung ba las ldang ste/ dngos po spang ba dang bral bar bya ba'i cho ga dang las gzhan bya mi dgos so/ /de ci'i phyir zhe na/ bsams pas ltung ba las ldang gi chad pa'i las kyis ni ma yin pa'i phyir te/ 'dir gzhung ni sil bu dag las dge 'dun lhag ma'i skabs nas de lta bas na gang dag rnam pa de lta bu rang bzhin gyis ngo tsha shes pa dang ldan pa de dag gis ni gcig gi mdun du bshags par rjes su gnang ngo zhes bya ba la sogs pa gsungs pa de nyid las 'dir spang ba'i ltung byed kyang de dang 'dra bar shes so/ /gzhan yang 'dul ba mdor bsdu ba'i skabs nas rung ba dang mthun la mi rung ba dang 'gal ba ni rung bar bsdu'o/ /rung ba dang 'gal la mi rung ba dang mthun pa ni mi rung bar bsdu'o zhes 'byung bas dge 'dun lhag ma la de ltar rung na spang ba'i ltung byed la yang rung bar mngon no/ /dge slong gcig gi mdun du bshags pa'i cho ga dang sngags ni zhal nas gsungs pa'i lung gi rjes su 'brang ba dang / 'dul ba 'dzin pa snga rabs dag gi man ngag las 'di skad 'byung ste/ de spang ba'i ltung byed kyi ltung ba byung ba na bcab pa'i sems gcig tsam gyis kyang bcab par mi bya bar de'i mod la mchil lham gnyis phud nas/ mtshams kyi nang du dge slong bsnyen par rdzogs pa rang bzhin du gnas pa lta ba dang mtshan mthun pa ltung ba ming dang rigs las mi mthun pa gcig gi mdun du tsog pur 'dug ste/ thal mo sbyar ba btud nas/ ltung ba'i sde tshan gyi ming dang gang byung ba'i rigs smos te cig car mthol ba dang bshags par bya'o/ /de'i sngags ni 'di yin te/ tshe dang ldan pa dgongs su gsol/ bdag dge slong ming 'di zhes bgyi ba la ltung ba spang ba'i ltung byed kyi sde tshan las rigs 'di zhes bgyi ba'i dngos gzhi byung ste/ bdag dge slong ming 'di zhes bgyi ba spang ba'i ltung ba de tshe dang ldan pa'i mdun du mthol lo/ /mi 'chab bo/ /'chags so/ /mthol zhing bshags na bdag bde ba la reg par gnas par 'gyur gyi ma mthol ma bshags na ni mi 'gyur ro zhes lan gsum bzlas/ nyan pas ltung ba mthong ngam zhes smra zhing 'chags pas mthong ngo zhes brjod par bya/ nyan pas phyin chad sdom mam zhes smra zhing / 'chags pas sdom mo zhes brjod par bya ste/ de ltar lan gsum bzlas/ de'i rjes la nyan pas thabs yin no zhes brjod par bya/ 'chags pas legs so zhes brjod par bya ste/ de tsam gyis na dge slong ngo tsha dang ldan pa dang / mdo sde 'dzin pa dang / 'dul ba 'dzin pa dang / ma mo 'dzin pa dang / shes pa dag spang ba'i ltung byed kyi dngos gzhi'i ltung ba las ldang bar rig par bya'o/ /de ltar spang ba'i ltung byed kyi dngos gzhi'i ltung ba cig car mthol zhing bshags na de'i sbyor ba'i nyes byas dang / sbyor ba'i sbyor ba'i nyes byas phra mo ni logs shig tu mthol zhing bshags mi dgos so/ /de las gzhan pa dag gis ni spang ba'i ltung byed kyi ltung ba byung na dngos po spangs shing bral bar byas la/ de'i 'og tu ltung ba bshags par bya'o/ /de'i cho ga ni 'di yin te/ dge slong spang ba'i ltung byed kyi ltung ba byung na des rdzas de spang bar bya ba dang bral ba sngon du btang ste ltung ba bshags par bya'o/ /de la spang ba sngon du btang ba ni rdzas de la bdag gis 'dzin pa'i sems med par bya'o/ /bral ba sngon du btang ba ni rdzas de zhag gcig yan chad ji srid du ltung ba ma bshags kyi bar du dge slong bsnyen par rdzogs pa rang bzhin du gnas pa lta ba dang / mtshan mthun pa ltung ba ming dang rigs las mi mthun pa mtshams kyi nang na 'dug pa yang rung phyi rol na 'dug pa yang rung ba gcig la gzhag par bya zhing / dus de'i tshe rdzas gzhan gyis byin gyis mi brlab cing byin gyis brlab tu rung ba ci yang med par gnas par bya'o/ /de ltar byas nas de'i 'og tu zhag gcig yan chad nam bshags pa'i tshogs ba rnyed pa na dge slong bsnyen par rdzogs pa rang bzhin du gnas pa lta ba dang mtshan mthun pa ltung ba ming dang rigs las mi mthun pa mtshams kyi nang na 'dug pa gcig gi mdun du tsog pur 'dug ste/ thal mo sbyar ba btud nas/ ltung ba'i sde tshan gyi ming dang / gang byung ba'i rigs smos te bshags par bya'o/ /de'i sngags ni 'di yin te/ tshe dang ldan pa dgongs su gsol/ bdag dge slong ming 'di zhes bgyi ba la ltung ba spang ba'i ltung byed kyi sde tshan las rigs 'di zhes bgyi ba'i dngos gzhi byung ste/ bdag dge slong ming 'di zhes bgyi ba ltung ba de tshe dang ldan pa'i mdun du 'chags so/ /bshags na ni bdag bde ba la reg par gnas par 'gyur gyi/ ma bshags na ni mi 'gyur ro zhes lan gsum bzlas/ nyan pas ltung ba mthong ngam zhes smra zhing 'chags pas mthong ngo zhes brjod par bya/ nyan pas phyin chad sdom mam zhes smra zhing / 'chags pas sdom mo zhes brjod par bya ste/ de ltar lan gsum bzlas/ de'i rjes su nyan pas thabs yin no zhes brjod par bya/ 'chags pas legs so zhes brjod par bya ste/ de tsam gyis na spang ba'i ltung byed kyi ltung ba'i dngos gzhi las ldang ngo / /de ltar dngos gzhi bshags na de'i sbyor ba dang sbyor ba'i sbyor ba ni logs shig tu bshags mi dgos so/ /ltung ba bshags nas rdzas spangs shing bral bar byas pa de yang ci bder spyod do/ /gang la spangs shing bral bar byas pa des kyang rdzas de mi brnogs par phyir dbul lo/ /mi ster na dgug par bya'o/ /spang ba'i ltung byed phyir bcos pa'i cho ga 'di 'og ma gzhan thams cad la yang thun mong du ci rigs par sbyar ro/ /'chang ba'i spang ba ste dang po bshad zin to// //'bral ba'i spang ba'i gleng gzhi yang bcas pa dang / gnang ba'i dbang gis rnam pa gnyis te/ bcas pa'i gleng gzhi ni sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe na dge slong rnams la chos gos mang po nyid 'di lta bu byung ste/ dge slong dbyar gnas par khas blangs pa gang yang rung bas chos gos rnyed nas/ des de bkrus shing / dras te drubs nas kha bsgyur te/ gtur pu'i bam po bsgres nas dge slong gnas pa dang gnyug mar gnas pa rnams la rjes su gtad de/ dge slong dag chos gos stod g.yogs dang smad g.yogs dang bcas pas ljongs rgyur 'dod zhing / de dag chos gos stod g.yogs smad g.yogs dang bcas pas ljongs rgyur 'dong ba na/ lus ma sbas pa dang / sbed du ma bcug par gyur to/ /dge slong gnas pa dang / gnyug mar gnas pa dag kyang chos gos de dag skems pa dang gsang ba dang / 'ding ba dang / sprug pa dang / rtul ba dang / sbed pa dag kyang byed pas bya ba mang ba dang byed pa mang bar gyur cing / lung nod pa dang / klag pa dang / kha ton dang / rnal 'byor dang / yid la bya ba dang / nang gi sems kyi zhi gnas gtong bar byed nas/ dge slong don nyung ngu dag ci'i phyir dge slong rnams la chos gos mang ba nyid 'di lta bu 'di byung zhing nyes dmigs de lta bur gyur ces smod par byed/ phyar ka gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ dge slong rnams la rmas nas rnam grangs du mar smad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong chos gos zin pas sra brkyang phyung na gal te nub gcig kyang chos gos gsum las chos gos gang yang rung ba dang mtshams kyi phyi rol du bral bar byed na spang ba'i ltung byed do zhes bca' ba mdzad de/ /yul ni mnyan yod/ gang zag ni dge slong rab tu mang po/ nyon mongs pa ni chos gos stod g.yogs smad g.yogs dang bcas pas ljongs rgyu ba/ nyes pa ni rang gi lus ma sbas pa dang / gzhan gyi bya ba shor ba'o/ /gnang ba'i gleng gzhi ni/ sangs rgyas bcom ldan 'das rgyal po'i khab na 'od ma'i tshal ka lan dka'i gnas na bzhugs so/ /de'i tshe na tshe dang ldan pa 'od srungs chen po rgyal po'i khab na sde tshan ma'i phug na gso sbyong gcig pa'i gnas kyi sdom pas dge 'dun dang mthun par 'dug go/ /de nas dge slong rab tu mang po dag de nyid kyi gso sbyong bco lnga pa'i tshe gso sbyong gi gnas su 'dug cing mthun par gyur nas/ gtso cher tshe dang ldan pa 'od srungs chen po 'ong ba la sdod do/ /de nas tshe dang ldan pa 'od srungs chen po gso sbyong gi gnas su 'phags pa na chu klung dbyar bzang ldan rgal ba dang / chu rlabs chen po byung ba des de'i snam sbyar gsher bar gyur to/ /de nas tshe dang ldan pa 'od srungs chen pos snam sbyar de btsir ba dang / 'ding ba dang skems pa na yun ring du thogs par gyur to/ /de nas tshe dang ldan pa 'od srungs chen pos snam sbyar de btsir zhing bting ste/ bskams nas gso sbyong gi gnas ga la ba der song ste phyin nas/ dge slong gi dge 'dun gyi gong du stan bshams pa nyid la 'dug go/ /de nas dge slong rab tu mang po dag gis tshe dang ldan pa 'od srungs chen po la 'di skad ces smras so/ / btsun pa 'od srungs chen pos mkhyen par mdzod cig /'di na bdag cag dge slong rab tu mang po dag gso sbyong gi gnas su 'dug cing mthun par gyur nas/ gtso cher tshe dang ldan pa 'od srungs chen po la sdod cing 'khod na/ 'di ltar tshe dang ldan pa 'od srungs chen po 'phyis par gyur to/ / smras pa/ tshe dang ldan pa dag 'di na bdag gso sbyong gi gnas su 'phags pa na chu klung dbyar bzang ldan rgal ba dang / chu rlabs chen po byung ba des bdag gi snam sbyar gsher bar gyur na/ bdag snam sbyar 'tshir ba dang / 'ding ba dang / skems pa na yun ring zhig thogs par gyur to/ /tshe dang ldan pa dag da ltar bdag dge slong 'od srungs chen po rgan po rgas pa dgog tu gyur pa lags la/ bdag gi snam sbyar ni lci bas yongs su skyong bar rngo mi thogs na/ bdag gis ji ltar bgyi zhes zer ba'i skabs de dge slong rnams kyis bcom ldan 'das la gsol to/ /de'i tshe na tshe dang ldan pa shA ri'i bu 'khor de nyid du 'dug cing mthun par gyur to/ /de nas tshe dang ldan pa shA ri'i bus dge slong rnams la smras pa/ tshe dang ldan pa dag da ltar bdag dge slong shA ri'i bu rlung nad can lags la bdag gi snam sbyar ni lci bas yongs su skyong bar rngo mi thogs na/ bdag gis ji ltar bgyi zhes zer ba'i skabs de yang dge slong rnams kyis bcom ldan 'das la gsol to/ /bcom ldan 'das kyis bka' stsal pa/ dge slong dag khyed kyis dge slong 'od srungs chen po rgan po rgas pa dgog tu gyur pa dang / dge slong shA ri'i bu rlung nad can dang / gzhan yang de lta bu gang yin pa la snam sbyar dang bral bar mi 'gyur ba'i gnang ba byin cig / 'di ltar sbyin par bya ste/ gnas mal bsham pa byas nas gaN+DI brdungs te/ dris pa'i tshig gis dge slong rnams la yang dag par bsgo nas/ mtshams chen por dge 'dun thams cad 'dug cing mthun par gyur pa la yang rung / dkyil 'khor par dge slong bzhi'i tshogs las mi nyung ba'i dge 'dun thams cad 'dug cing mthun par gyur pa na/ dge slong 'od srungs chen po dang shA ri'i bus mchil lham gnyis phud nas bla gos phrag pa gcig tu byas te/ rgan rims la phyag 'tshal nas rgan pa'i mtha' logs su tsog pur 'dug ste/ thal mo sbyar ba btud nas dge 'dun la snam sbyar bstan te/ 'di skad ces brjod par bya'o/ /dge 'dun btsun pa rnams gsan du gsol/ bdag dge slong 'od srungs chen po rgan po rgas pa dgog tu gyur pa'am/ bdag dge slong shA ri'i bu rlung nad can lags la/ bdag gi snam sbyar ni lci bas yongs su skyong bar rngo mi thogs na/ bdag dge slong 'od srungs chen po rgan po rgas pa dgog tu gyur pa'am/ bdag dge slong shA ri'i bu rlung nad can dge 'dun las snam sbyar dang bral bar mi 'gyur ba'i gnang ba gsol na/ thugs brtse ba can dge 'dun btsun pa rnams kyis thugs brtse ba'i slad du/ bdag dge slong 'od srungs chen po rgan po rgas pa dgog tu gyur pa'am/ bdag dge slong shA ri'i bu rlung nad can la snam sbyar dang 'bral bar mi 'gyur ba'i gnang ba stsal du gsol/ de bzhin du lan gnyis lan gsum du bzlas/ de ni snam sbyar dang 'bral bar mi 'gyur ba'i gnang ba gsol ba'o/ / de'i 'og tu dge slong gcig gis gsol ba byas te las bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong 'od srungs chen po 'di rgan po rgas pa dgog tu gyur pa'am/ dge slong shA ri'i bu 'di rlung nad can lags la 'di'i snam sbyar ni lci bas yongs su skyong bar rngo mi thogs na/ dge slong 'od srungs chen po rgan po rgas pa dgog tu gyur pa'am/ dge slong shA ri'i bu rlung nad can 'di dge 'dun las snam sbyar dang 'bral bar mi 'gyur ba'i gnang ba gsol na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong 'od srungs chen po rgan po rgas pa dgog tu gyur pa'am/ dge slong shA ri'i bu rlung nad can la snam sbyar dang 'bral bar mi 'gyur ba'i gnang ba stsol lo/ /'di ni gsol ba'o/ las ni 'di ltar bya ste/ dge 'dun btsun pa rnams gsan du gsol/ dge slong 'od srungs chen po 'di rgan po rgas pa dgog tu gyur pa'am/ dge slong shA ri'i bu 'di rlung nad can lags la/ 'di'i snam sbyar ni lci bas yongs su skyong bar rngo mi thogs na/ dge slong 'od srungs chen po rgan po rgas pa dgog tu gyur pa'am/ dge slong shA ri'i bu rlung nad can 'di dge 'dun las snam sbyar dang 'bral bar mi 'gyur ba'i gnang ba gsol te/ de'i slad du dge 'dun gyis dge slong 'od srungs chen po rgan po rgas pa dgog tu gyur pa'am/ dge slong shA ri'i bu rlung nad can la snam sbyar dang 'bral bar mi 'gyur ba'i gnang ba stsol na/ tshe dang ldan pa gang dag dge slong 'od srungs chen po rgan po rgas pa dgog tu gyur pa'am/ dge slong shA ri'i bu rlung nad can la snam sbyar dang 'bral bar mi 'gyur ba'i gnang ba stsal bar bzod pa de dag ni cang ma gsung shig /gang dag mi bzod pa de dag ni gsungs shig /dge 'dun gyis bzod cing gnang nas dge 'dun gyis dge slong 'od srungs chen po rgan po rgas pa dgog tu gyur pa'am/ dge slong shA ri'i bu rlung nad can la snam sbyar dang 'bral bar mi 'gyur ba'i gnang ba stsal lags te/ 'di ltar cang mi gsung bas de de bzhin du 'dzin to/ /dge 'dun gyis dge slong gang yang rung ba la snam sbyar dang 'bral bar mi 'gyur ba'i gnang ba byin par gyur na/ des chos gos stod g.yogs smad g.yogs dang bcas pas ljongs rgyur 'gro bar bya ste/ 'di la 'gyod par mi bya'o/ /de nas bcom ldan 'das kyis bslab pa 'dod pa rnams kyi bsngags pa brjod cing bslab pa la gus pa rnams dang / bslab pa la yo byad bsnyungs pa rnams dang / phri ba rnams dang / sbyangs pa'i yon tan rnams dang / mdzes pa rnams dang / tshod shes pa rnams kyi yon tan brjod nas/ dge slong rnams la bka' stsal pa/ dge slong dag de lta bas na snga ma ni bcas pa yin la/ 'di ni gnang ba yin no/ / nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong chos gos zin pas sra brkyang phyung na gal te nub gcig kyang chos gos gsum las/ chos gos gang yang rung ba dang mtshams kyi phyi rol du 'bral bar byed na/ dge 'dun gyis gnang ba ma gtogs te spang ba'i ltung byed do zhes bca' ba mdzad de/ yul ni rgyal po'i khab/ gang zag ni tshe dang ldan pa 'od srungs chen po dang shA ri'i bu/ nyon mongs pa ni rgas pa dang na ba/ nyes pa ni med do/ /de la dge slong zhes bya ba ni chos 'di pa'o/ /chos gos zin pas zhes bya ba ni/ dge slong gis chos gos dag bkru ba dang / dra ba dang / drub pa dang / kha bsgyur bas so/ /sra brkyang phyung na zhes bya ba la sra brkyang zhes bya ba ni dge 'dun dbyar snga ma'am/ phyi mar gnas par khas blangs nas dgag dbye byas pa'i 'og tu dge slong thams cad kyi dbyar gyi rnyed pa dang / phan yon gyi gtan pa bca' ba'i chos gos gtan pa lta bu byin gyis brlabs pa'o/ /phyung na zhes bya ba la sra brkyang dbyung ba'i dus ni rnam pa gnyis te/ dbyar snga mar gnas par khas blangs pas ston zla 'bring po'i nya la dgag dbye byas te/ tshes bcu drug la sra brkyang bting na ni/ de dbyung ba'i dus dpyid zla ra ba nya'o/ /dbyar phyi mar gnas par khas blangs pas ston zla tha chungs nya la dgag dbye byas te/ tshes bcu drug la sra brkyang bting na ni de dbyung ba'i dus dpyid zla 'bring po'i nya'o/ /de dag gi rnam par gzhag pa zhib tu ni dbyar gyi gzhi dang dgag dbye'i gzhi dang / sra brkyang gi gzhi las 'byung ngo / /de la dge slong chos gos zin pas sra brkyang phyung na zhes bya ba la chos gos zin la sra brkyang ma phyung ba yang yod/ sra brkyang phyung la chos gos ma zin pa yang yod/ chos gos zin cing sra brkyang phyung ba yang yod/ chos gos ma zin cing sra brkyang ma phyung ba yang yod do/ /de la re zhig ji tsam gyis na chos gos zin la sra brkyang ma phyung ba yin zhe na/ 'di lta ste dge slong gis chos gos dag bkru ba dang / dra ba dang / drub pa dang / kha bsgyur zin la dge 'dun gyis sra brkyang ma phyung ba yin no ji tsam gyis na sra brkyang phyung la chos gos ma zin pa yang yin zhe na/ 'di lta ste dge slong gis chos gos dag bkru ba dang / dra ba dang / drub pa dang / kha bsgyur te ma zin la dge 'dun gyis sra brkyang phyung ba yin no/ /ji tsam gyis na chos gos zin cing sra brkyang phyung ba yin zhe na/ 'di lta ste dge slong gis chos gos dag bkru ba dang / dra ba dang / drub pa dang / kha bsgyur zin cing dge 'dun gyis sra brkyang phyung ba yin no/ /ji tsam gyis na chos gos ma zin cing sra brkyang ma phyung ba yin zhe na/ rnam pa de dag ma gtogs pa'o/ /'dir ni sra brkyang phyung ba yan lag gi gtso bor bzhed do/ /gal te nub gcig kyang zhes bya ba ni nub gcig gi mthar yang ngo / /chos gos gsum las chos gos gang yang rung ba dang zhes bya ba ni snam sbyar dang / bla gos dang / mthang gos las gang yang rung ba dag go/ /mtshams kyi phyi rol du 'bral bar byed na zhes bya ba ni gzhan du skya rengs 'char bar byed na'o/ /dge 'dun gyis gnang ba ma gtogs te zhes bya ba ni dge 'dun gyis gnang ba gzhag ste'o/ /spang ba'i ltung byed do zhes bya ba ni/ dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'di'i dngos gzhi'i ltung ba rnam par gzhag pa ni dge slong gnang ba ma thob pas chos gos byin gyis brlabs pa dang / gnas nye 'khor dang bcas pa nas zhag gcig bral na/ 'bral ba'i spang ba'i ltung byed kyi dngos gzhir 'gyur ro/ /dge slong la 'bral ba'i spang ba'i ltung ba byung na de ma spangs shing bral bar ma byas pa/ ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par chos gos byin gyis brlab tu rung ba gzhan zhig rnyed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis 'bral ba'i spang ba'i ltung byed byung la ji srid du spang ba'i dngos po de las ma bshags shing so sor ma bshags par lhung bzed dam/ chos gos sam/ dra ba'am/ phor bu'am/ ska rags sam/ dge slong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis dge 'dun la mnga' ba'i chos gos gang zag gi bdag nyid du ris su bcad pa rang gis byin gyis brlabs pa dang bral na/ 'bral ba'i spang ba'i ltung byed kyi dngos gzhir 'gyur ro/ /dge slong gis dge 'dun mnga' ba'i chos gos gang zag gi bdag nyid du ris su ma bcad pa rang gis byin gyis brlab pa dang bral na spang bar ni mi bya la ltung byed du 'gyur ro/ /chos gos bzang ngan dang mang nyung la na smad pa med do/ /chos gos rung ba dang / tshad dang ldan pa nyid dang / tshad las lhag pa la na smad pa med do/ /chos gos dam dum du gyur pa la na smad pa med do/ /gos zhag bcu 'das pa'i spang ba la thug pa la na smad pa med do/ /dge 'dun gyis rang gi byin gyis brlabs pa la na smad pa med do/ /'di'i byed pa po ni byin gyis brlabs pa dang / gnang ba ma thob pa'o/ / 'di la yan lag lngas dngos gzhi'i ltung bar 'gyur te/ gnang ba ma thob pa dang / byin gyis brlabs pa dang / chos gos rung ba dang / gnas nye 'khor dang bcas pa dang / zhag gcig bral ba'o/ /de dag las yan lag ma tshang na ci rigs par na smad do/ /gnang ba ma thob pa dag ni chos gos dang mi 'bral ba'i gnang ba dge 'dun las ma thob pa ste/ rgan po dang nad pas gsol te/ dge 'dun gyis byin na 'thob kyi gzhan gyis ni mi 'thob bo/ /byin gyis brlabs pa ni chos gos gsum ste/ dam dum dang / spang ba dang / dge 'dun gyi rdzas la yang byin kyis brlabs pa 'chags so/ / chos gos rung ba ni rgyu dag rung ba dang tshad dang ldan pa'o/ /gnas nye 'khor dang bcas pa ni mtshan nyid 'og nas 'byung ba lta bu'o/ /zhag gcig bral ba ni mtshams gzhan du skya rengs 'char ba'o/ /gnas nye 'khor dang bcas pa zhes smos pa ni/ 'dir zlos pa tsam la gnas pa mi bzhed de/ / de'i phyir 'di man chad gnas de'i mtshan nyid bstan par bya'o/ /de'i phyir rnam par 'byed pa'i bar sdom las/ khyim gcig pa dang khyim gnyis dang / /khyim gyi tshogs dang ldan pa dang / /rtsig pa rib ma 'obs bskor dang / /rnam bzhir bya ba grong dang khyim/ /sten 'gro mu stegs tshong rdal dang / /tshong khang dgra khang g.yul dang ni/ /g.yul tshoms gru dang shing rta dang / /shing ljon kun dga' ra ba yin/ /lam du 'gro sdod 'dug nyal dang / /thad kar yang ni de bzhin nyid/ /mtshams gzhan nyal ba tha ma yi/ /sde tshan yang dag bsdus pa yin/ /zhes gsungs pa'i rim gyis khyim gcig dang ldan pa'i grong dang / khyim gnyis dang ldan pa'i grong dang / khyim gyi tshogs dang ldan pa'i grong dang / rtsig pas bskor ba'i grong dang / rib mas bskor ba'i grong dang / 'obs kyis bskor ba'i grong dang / rnam bzhir bya ba'i grong nye 'khor gcig pa dang / grong nye 'khor tha dad pa dang / grong rab tu mang po nye 'khor gcig pa dang / grong rab tu mang po nye 'khor tha dad pa dang / khyim nye 'khor gcig pa dang / khyim nye 'khor tha dad pa dang / khyim rab tu mang po nye 'khor gcig pa dang / khyim rab tu mang po nye 'khor tha dad pa dang / sten 'gro'i khyim nye 'khor gcig pa dang / sten 'gro'i khyim nye 'khor tha dad pa dang / sten 'gro'i khyim rab tu mang po nye 'khor gcig pa dang / sten 'gro'i khyim rab tu mang po nye 'khor tha dad pa dang / mu stegs can gyi khyim nye 'khor gcig pa dang / mu stegs can gyi khyim nye 'khor tha dad pa dang / mu stegs can gyi khyim rab tu mang po nye 'khor gcig pa dang / mu stegs can gyi khyim rab tu mang po nye 'khor tha dad pa dang / tshong rdal nye 'khor gcig pa dang / tshong rdal nye 'khor tha dad pa dang / tshong rdal rab tu mang po nye 'khor gcig pa dang / tshong rdal rab tu mang po nye 'khor tha dad pa dang / tshong khang nye 'khor gcig pa dang / tshong khang nye 'khor tha dad pa dang / tshong khang rab tu mang po nye 'khor gcig pa dang / tshong khang rab tu mang po nye 'khor tha dad pa dang / dgra khang nye 'khor gcig pa dang / dgra khang nye 'khor tha dad pa dang / dgra khang rab tu mang po nye 'khor gcig pa dang / dgra khang rab tu mang bo nye 'khor tha dad pa dang / g.yul nye 'khor gcig pa dang / g.yul nye 'khor tha dad pa dang / g.yul rab tu mang po nye 'khor gcig pa dang / g.yul rab tu mang po nye 'khor tha dad pa dang / g.yul gyi tshoms nye 'khor gcig pa dang / g.yul gyi tshoms nye 'khor tha dad pa dang / g.yul gyi tshoms rab tu mang po nye 'khor gcig pa dang / g.yul gyi tshoms rab tu mang po nye 'khor tha dad pa dang / gru nye 'khor gcig pa dang / gru nye 'khor tha dad pa dang / gru rab tu mang po nye 'khor gcig pa dang / gru rab tu mang po nye 'khor tha dad pa dang / shing rta nye 'khor gcig pa dang / shing rta nye 'khor tha dad pa dang / shing rta rab tu mang po nye 'khor gcig pa dang / shing rta rab tu mang po nye 'khor tha dad pa dang / shing ljon pa nye 'khor gcig pa dang / shing ljon pa nye 'khor tha dad pa dang / shing ljon pa rab tu mang po nye 'khor gcig pa dang / shing ljon pa rab tu mang po nye 'khor tha dad pa dang / kun dga' ra ba nye 'khor gcig pa dang / kun dga' ra ba nye 'khor tha dad pa dang / kun dga' ra ba rab tu mang po nye 'khor gcig pa dang / kun dga' ra ba rab tu mang po nye 'khor tha dad pa dang / lam du 'gro ba la sogs pa dang / thad kar 'gro ba la sogs pa dang / mtshams gzhan dag gi gnas su thun mong dang / thun mong ma yin pa'i bye brag gis dge slong chos gos dang mi 'bral ba dang / 'bral ba'i ltung ba nyid rnam par gzhag pa'i bye brag rgya cher bstan to/ /khyim gcig dang ldan pa'i grong la sogs pa ji skad smos pa de dag la/ las kyi mtshams rnams bcad pa dang / rtsig pa dang / rib ma dang / 'obs kyis bskor ba la sogs pa dang / chu klung dang / ngam grog dang / nam mkhas chod pa la sogs pa mtshams byas pa la ni mtshams gnas kyi mtha'o/ /mtshams ma byas pa la ni bdag po gcig pa nyid ma yin pa'i bar gyi mtshams rnams ni tha dad pa nyid do/ /bdag po nor las dad pa tha dad pa dang / lta ba las dad pa tha dad pa rnams kyi bar gyi mtshams rnams kyang tha dad pa nyid do/ /bdag po chos 'di pa dang chos gzhan pa dag ni lta ba las dad pa tha dad pa nyid yin pas de dag gi bar gyi mtshams rnams kyang tha dad pa nyid do/ /bdag po pha dang bu nor tha dad pa dag gis nor las dad pa tha dad pa nyid yin pas de dag gi bar gyi mtshams rnams kyang tha dad pa nyid do/ /bdag po pha'am bu gang yang rung ba lhung bzed khas phub pas sam/ khrims su bya bas spangs pa dang ma spangs pa dag ni pha dang bu nor las dad pa tha dad pa nyid dang 'dra bas de dag gi bar gyi mtshams rnams kyang tha dad pa nyid do/ /mtshams tha dad pa de dag la dge slong gis chos gos nang du gzhag ste/ bdag phyi rol du skya rengs 'char bar byed dam/ bdag nang du 'dug ste chos gos phyi rol du skya rengs 'char bar byed na spang ba'i ltung byed du 'gyur ro/ /khyim gcig dang ldan pa'i grong la sogs par ji skad smos pa de dag la nang dang nye 'khor thun mong ba dang / grong nye 'khor gcig pa la lha'i gnas thun mong ba dang / khyim nye 'khor tha dad pa la sgo thun mong ba dang / sten 'gro'i khyim nye 'khor tha dad pa la rgyal mtshan gyi shing thun mong ba dang / mu stegs can gyi khyim nye 'khor tha dad pa la lha'i gnas tha dad pa thun mong ba dang / tshong rdal nye 'khor tha dad pa la gzhag stegs thun mong ba dang / tshong khang nye 'khor tha dad pa la 'dug stegs thun mong ba dang / dgra khang nye 'khor tha dad pa la ya gad thun mong ba dang / g.yul nye 'khor tha dad pa la g.yul gyi dbus thun mong ba dang / g.yul gyi tshogs nye 'khor tha dad pa la sgo thun mong ba dang / gru nye 'khor tha dad pa la gru gdong thun mong ba dang / shing rta nye 'khor tha dad pa la kha lo ba'i gnas thun mong ba dang / shing ljon pa nye 'khor tha dad pa la rtsa ba thun mong ba dang / kun dga' ra ba nye 'khor tha dad pa la khron pa thun mong ba dang / de dag thams cad la yang sgo yang thun mong ba dag la ni thun mong gi gnas ni mtshams gcig pa yin la de las gzhan pa ni mtshams tha dad pa yin pas mtshams tha dad pa de dag la dge slong gis chos gos thun mong gi gnas su gzhag ste/ bdag thun mong ma yin par skya rengs 'char bar byed dam/ bdag thun mong gi gnas su 'dug ste/ chos gos thun mong ma yin pa'i gnas su skya rengs 'char bar byed na spang ba'i ltung byed du 'gyur ro/ /shing ljon pa la yal ga dang yal ga phra mo dag ma reg pa ni gnas tha dad pa nyid do/ /rtsa ba dang rtsa ba'i rtsa ba la sogs pa ni thun mong ste gnas gcig pa nyid do/ /yal ga dang lo ma reg pa'i shing ljon pa rnams kyang thun mong ste gnas gcig pa nyid do/ /shing ljon pa de'i cha 'og mar dpyangs pa dang / bla gab kyi cha 'og mar dpyangs pa dang / gru dang shing rta dag gi cha 'og mar dpyangs pa yang thun mong ste gnas gcig pa nyid do/ /khang khyim la sogs pa lta bu'i mtshams med pa dgon pa la sogs pa lta bu'i gnas la ni lus kyi yan lag gis khyab pa mtha' nyid de/ de tshun chad gnas gcig pa nyid do/ /phyogs thams cad du shing ljon pa'i yal ga nyid dang / lo ma la sogs pa 'brel pa dang / grong khyer gyi steng la sogs pa 'brel pa dang / thag pas 'brel pa la sogs pas khyab pa'i gnas su ni dbus nas rgyang grags kyi mtha' phan chad ni tha dad pa nyid do/ /lta ba dang mtshan mthun pa gzhan gnas pas dge slong gi mtshams mi nyams so/ /shing ljon pa la sogs pa la de dag la gnas tha dad pa ni mtshams su ma gtogs la/ gnas gcig pa nyid ni mtshams su gtogs pas/ gnas tha dad pa de dag la dge slong gis chos gos gnas tha dad par gzhag ste/ bdag gnas gcig par skya rengs 'char bar byed dam/ bdag gnas tha dad par 'dug ste/ chos gos gnas gcig par skya rengs 'char bar byed na spang ba'i ltung byed du 'gyur ro/ / gnas bstan nas/ da ni gnas de'i nye 'khor brjod par bya ste/ nye 'khor ni rnam pa gnyis te brtsam du rung ba nyid kyi nye 'khor dang / nyes par spyod pa nyid kyi nye 'khor ro/ /de la brtsam du rung ba nyid kyi nye 'khor ni thams cad la yang kho ra khor yug tu 'dom re re'o/ /grong gi bye brag gsum gyi gzhi las ni brtsam du rung ba nyid kyi nye 'khor gyi bye brag ris su chad pa dang / bsgrub pa zhes bya ba dag yod do/ /de la rtsig pas bskor ba'i grong la ni ji tsam du ba lang drug dang ldan pa'i shing rta smyig ma can gyi lam gyis khyab pa'am/ bya gag spar nas 'dug pa'i lam gyis khyab pa nye 'khor ro/ / rib mas bskor ba'i grong la ni ra lug gi rdul gyi lam gyis khyab pa'am/ mi rang bzhin gyi ngo tsha dang ldan pa'i bshang ba'i lam gyis khyab pa nye 'khor ro/ /'obs kyis bskor ba'i grong la ni/ skas gdang bu gcig pa'i srid kyi lam gyis khyab pa'am/ phyag dar bor ba'i bong ba rags pa 'dril ba'i lam gyis khyab pa nye 'khor ro/ /grong gi bye brag gsum gyis gzhi las nye 'khor gyi bye brag de dag las/ rtsig pas bskor ba'i grong gi nye 'khor rnam pa gnyis dang / 'obs kyis bskor ba'i grong gi nye 'khor dang po shos ni ris su bcad pa'i nye 'khor yin no/ /rib mas bskor ba'i grong gi nye 'khor rnam pa gnyis dang / 'obs kyis bskor ba'i grong gi nye 'khor 'og ma shos ni bsgrub pa'i nye 'khor yin te/ de dag ni brtsam du rung ba nyid kyis gnas kyi khongs su gtogs pa zhes bya ba'i nye 'khor ro/ /nye bar spyod pa nyid kyis gnas dang nye bar gyur pa'i nye 'khor ni gnas de'i 'phral gyi bya ba dang / 'gro ba dang / 'dug pa dang / rdul de dag gis der gtogs pa khyab pa ste/ lung las khyim la sogs pa gang na de dag 'drub dang / rdo ba dang / 'thag pa dang / khye'u sus byed pa la sogs pa ni nye 'khor ro zhes gsungs pa yin no/ /mtshams med pa'i lam du dge slong dang chos gos khyer ba tha dad du ma yin par 'gro ba la ni snga phyir 'dom bzhi bcu rtsa dgu tshun chad nye 'khor ro/ /g.yas g.yos su ni skye bo dag gis lam gcig tu gtogs par shes pa de tshun chad nye 'khor ro/ /nam mkha' dang chu la sogs pas chod pa mtshams gzhan ni drung na 'dug kyang nye 'khor ma yin no/ /grong gi nye 'khor du gtogs pa ni gtsug lag khang gi nye 'khor nyid ma yin te/ dper na grong gi nye 'khor du mtshams gcod par byed na yang mtshams su mi 'gyur la/ mtshams su gyur zin pa'i nang du grong gi nye 'khor zhig phyis byung na yang de nyi tshe mtshams su ma gtogs par khol du byung ba lta bu'o/ /de ltar nye 'khor ji skad bstan pa de dag ni gnas kyi khongs su gtogs pa la/ de las gzhan pa ni gnas su ma gtogs pa nyid yin pas dge slong gis chos gos nye 'khor du gzhag ste/ bdag phyi rol du skya rengs 'char bar byed dam/ bdag nye 'khor du 'dug ste/ chos gos phyi rol du skya rengs 'char bar byed na spang ba'i ltung byed du 'gyur ro/ /sbyor ba'i ltung ba ni nyes byas te/ ji srid du zhag gcig 'bral ba'i spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /chos gos rung ba ma yin pa dang / tshad pas chung ba byin gyis brlabs pa dang bral ba la nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed do/ /sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni gnang ba thob pa dang / byin gyis ma brlabs pa dang / zhag gcig ma bral ba la ltung ba med do/ /sra brkyang bting ba ma phyung ba la ltung ba med do/ /gding ba dang bral ba la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du 'bral ba'i spang bar 'gyur ba rnam pa thams cad mi bsten par bslab par bya'o/ /gal te deng nyid phyir ldog cing gnas par bya'o snyam pa med na ni gding ba gzhag ste 'gro bar mi bya'o/ /de ltar bsams te song nas dus ma 'byor na de brnyas te der gnas par bya'o/ / ma rnyed na bla gos bzhi ltab tu byas pa'i sting du yun ring du mi nyal bar mtshan mo 'da' bar bya'o/ /gnas gang na dge slong med pa dang / sgo glegs med pa der snam sbyar gzhag par mi bya'o/ /snam sbyar gzhag par mi 'os pa'i gnas su dbyar gyi gos ras chen yang gzhag par mi bya ste/ char 'bab na dbyar gyi gos ras chen gzhag ste 'gro bar mi bya'o/ /chu [(]glung [,]klung [)]gis chod par 'gro na yang dbyar gyi gos ras chen mi gzhag go/ /char pa 'bab pa dang / chu klung gis chod pa de nyid yod par dogs pa'i gnas su 'gro na yang dbyar gyi gos ras chen mi gzhag go/ /dge slong dang bcas pa nyid dang / sgo glegs dang bcas pa nyid du bcas pa'i gnas med pa dang / char 'bab pa dang / char 'bab par dogs pa med pa dang / bgrod par bya ba chu klung gis chod pa lta bu med na snam sbyar gzhag ste gar yang 'gro bar mi bya'o/ /de dag yod na yang gnang ba ma byin pa dang / sra brkyang ma bting bas snam sbyar med par gar yang 'gro bar mi bya'o/ /gal te dge slong char pa 'bab pa la sogs pa'i rkyen gyis snam sbyar med par grong gzhan du 'gro zhing / nyi ma de nyid la gnas su phyin par mi 'gyur na chos gos kyi sngags phyung ste rang gi gos gzhan nam/ khyim pa yan chad kyi gos sam/ gzhan las brnyas pa la yang byin gyis brlab par bya'o/ /de'i cho ga ni las spyir bstan pa las chos gos dbyung ba dang byin gyis brlab pa ni nye bar mi gnas na/ yid kyis rnam par brtag pas 'chags so zhes 'byung ba yin te/ chos gos byin gyis brlab pa ni dge slong gzhan nye bar mi gnas na chos gos nye bar gnas pa rang gi yid kyis rnam par brtag pas 'chags so/ /chos gos dbyung ba la ni chos gos nye bar mi gnas na dge slong gzhan nye bar gnas pa la yang rung / dge slong gzhan yang nye bar mi gnas na rang gi yid kyis rnam par brtag pas 'chags te/ de bas na chos gos nye bar mi gnas kyang dbyung ba grub pa kho nar 'gyur ro/ /de'i cho ga dang sngags ni ji ltar dge slong gzhan dang chos gos nye bar gnas pa la byin gyis brlab pa dang dbyung ba de ltar dge slong gzhan dang / chos gos nye bar mi gnas pa la yang rang gi yid kyis rnam par brtags te gzhag par bya'o/ /'dir gzhung ni dge slong dag lnga po 'di dag ni sems bskyed pas 'grub pa yin te/ gso sbyong dang / dgag dbye dang / chos gos byin gyis brlabs pa dang / chos gos dbyung ba dang / gang zag gis mgron du bos pa'o zhes gsungs pa yin no/ /snam sbyar lci ba nyid yin na/ rgan po dang nad pa la sogs pa dag la mi 'bral ba'i gnang ba sbyin no/ /de'i cho ga ni sngar gleng gzhi'i skabs su tshe dang ldan pa 'od srungs chen po dang / shA ri'i bu byung ba'i mtha' logs su bstan pa bzhin du bya'o/ /phyir bcos pa ni snga ma bzhin no/ /'bral ba'i spang ba ste gnyis pa bshad zin to// //so sor thar pa'i mdo rgya cher 'grel pa 'dul ba kun las btus pa/ bam po bcu pa/ 'jog pa'i spang ba'i gleng gzhi ni sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyis kun dga' ra ba na bzhugs so/ /de'i tshe na dge slong rnams la gos mang ba nyid 'di lta bu 'di byung ste/ dge slong gang yang rung bas gos sngon po zhig rnyed na des de byed du mi 'jug par gnas gang gi tshe 'di dang 'dra ba rnyed par gyur ba/ de'i tshe gos byed du gzhug go snyam du re bas de 'jog par byed cing / sngon po ji lta ba bzhin du ser po dang / dmar po dang / stug po dang srab mo yang de bzhin nas dge slong don nyung ngu dag ci'i phyir dge slong rnams la gos mang ba nyid 'di lta bu 'di byung ste/ dge slong gang yang rung bas gos sngon po zhig rnyed na des de byed du mi 'jug par de gang gi tshe 'di dang 'dra ba rnyed par gyur pa de'i tshe gos byed du gzhug go snyam du re bas de 'jog par byed cing sngon po ji lta ba bzhin du ser po dang / dmar po dang / stug po dang / srab mo yang de bzhin no zhes smod par byed/ phyar ka gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ dge slong rnams la rmas nas rnam grangs du mar smad de bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong chos gos zin pas sra brkyang phyung na dus ma yin pa'i gos zhig rnyed la 'dod na dge slong des gos de blang bar bya'o/ /blangs nas gal te langs na myur ba kho nar gos su byas te bcang bar bya'o/ /gal te mi langs la kha ma langs pa kha skong ba'i gos la re ba yod na dge slong des gos de zla ba gcig gi mthar gzhag par bya'o/ /de las 'das par 'jog na spang ba'i ltung byed do zhes bca' ba mdzad de/ yul ni mnyan yod/ gang zag ni dge slong rab tu mang po/ nyon mongs pa ni zang zing la gdu ba/ nyes pa ni gos kyi kha sogs 'jog pa'o/ /de la dge slong zhes bya ba ni chos 'di pa'o/ /chos gos zin pas zhes bya ba ni dge slong gis chos gos dag bkru ba dang / dra ba dang / drub pa dang / kha bsgyur bas so/ /sra brkyang phyung na zhes bya ba la sra brkyang zhes bya ba ni dge 'dun dbyar snga ma'am/ phyi mar gnas par khas blangs nas dgag dbye byas pa'i 'og tu dge slong thams cad kyi dbyar gyi rnyed pa dang phan yon gyi gtan pa bca' ba'i chos gos gtan pa lta bu byin gyis brlabs pa'o/ /phyung na zhes bya ba la sra brkyang phyung ba'i dus ni rnam pa gnyis te/ dbyar snga mar gnas par khas blangs pas ston zla 'bring po nya la dgag dbye byas te/ tshes bcu drug la sra brkyang bting na ni de dbyung ba'i dus dpyid zla ra ba nya'o/ /dbyar phyi mar gnas par khas blangs pas ston zla tha chungs nya la dgag dbye byas te tshes bcu drug la sra brkyang bting na ni de dbyung ba'i dus dpyid zla 'bring po nya'o/ /de dag gi rnam par gzhag pa zhib tu ni dbyar gyi gzhi dang / dgag dbye'i gzhi dang / sra brkyang gi gzhi las 'byung ngo / /de la dge slong chos gos zin pas sra brkyang phyung na zhes bya ba la chos gos zin la sra brkyang ma phyung ba yang yod/ sra brkyang phyung la chos gos ma zin pa yang yod/ chos gos zin cing sra brkyang phyung ba yang yod/ chos gos ma zin la sra brkyang ma phyung ba yang yod do/ /de la re zhig ji tsam gyis na chos gos zin la sra brkyang ma phyung ba yin zhe na/ 'di lta ste/ dge slong gis chos gos dag bkru ba dang / dra ba dang / drub pa dang / kha bsgyur zin la dge 'dun gyis sra brkyang phyung ba ma yin no/ /ji tsam gyis na sra brkyang phyung la chos gos ma zin pa yin zhe na/ 'di lta ste/ dge slong gis chos gos dag bkru ba dang / dra ba dang / drub pa dang / kha bsgyur ma zin pa la dge 'dun gyis sra brkyang phyung ba yin no/ /ji tsam gyis na chos gos zin cing sra brkyang phyung ba yin zhe na/ 'di lta ste/ dge slong gis chos gos dag bkru ba dang / dra ba dang / drub pa dang / kha bsgyur zin cing dge 'dun gyis kyang sra brkyang phyung ba yin no/ /ji tsam gyis na chos gos ma zin cing sra brkyang ma phyung ba yin zhe na/ rnam pa de dag ma gtogs pa'o/ /'dir ni sra brkyang phyung ba la yan lag gi gtso bor bzhed do/ /dus ma yin pa'i gos shig ces bya ba la dge slong gi gos kyi dus ni gang yin/ dus ma yin pa ni gang yin zhe na/ sra brkyang bting ba'i gnas na ni ston zla 'bring po nya nas dpyid zla ra ba'i nya'i bar gyi zla ba de dag ni gos kyi dus yin la de phan chad ni dus ma yin no/ /sra brkyang ma bting ba'i gnas na ni thams cad dus ma yin no/ /rnyed pa zhes bya ba ni gzhan las so/ /'dod na zhes bya ba ni gal te don du gnyer na'o/ /dge slong des gos de blang bar bya'o zhes bya ba ni bdag gir bya ba'o/ /gal te langs na zhes bya ba ni gal te chog na'o/ /myur ba kho nar gos su byas te bcang bar bya'o zhes bya ba ni mi brkyang ba kho nar byin gyis brlab tu rung bar byas te'o/ /gal te mi langs la zhes bya ba ni gal te mi chog la'o/ /kha ma langs pa kha skong ba'i zhes bya ba ni snam sbyar ram/ bla gos sam/ mthang gos kha ma langs pa kha skong ba'i'o/ /gos la re ba yod na zhes bya ba ni dge slong ma las bdag la gos sbyin pa'i re ba'am/ pha'am phu nu'am/ sring mo'am/ slob dpon nam/ mkhan pos bdag la gos sbyin pa'i re ba'am/ lo lnga'i dus ston gyi tshe'am/ lo drug gi dus ston gyi tshe'am/ gtsug phud 'breg pa'i dus ston gyi tshe'am/ gnas khang gi dus ston gyi tshe'am/ dus ston chen po'i tshe rnyed du re ba yod na'o/ /dge slong des gos ras chen zla ba gcig gi mthar gzhag par bya'o zhes bya ba ni zla ba gcig gi mtha' tshun chad du'o/ /de las 'das par 'jog na zhes bya ba ni de las thal bar ro/ /spang ba'i ltung byed do zhes bya ba ni dngos po de spang pa'i ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni dge slong gos kha bskang ba la re ba yod pa dang / byin gyis brlab par bya ba'i chos gos gsum med pas gos chung ba khru gang yan chad pa zhag sum cu 'das par 'jog na 'jog pa'i spang ba'i ltung byed kyi dngos gzhir 'gyur ro/ /gos kha bskang bar bya ba'i re ba med pa dang / byin gyis brlab par bya ba'i chos gos gsum yod pa ni gos chung ba khru gang yan chad pa de 'khor gsum khebs pa'i tshad du 'jog pa dang 'dra bas zhag sum cu 'das par 'jog tu mi dbang ste/ zhag bcu 'das na 'chang ba'i spang ba sngar bstan pa nyid kyi dngos gzhir 'gyur ro/ /kha dog la sogs pa las rigs mi mthun pa ni chog pa nyid ma yin te/ des na gos kyi kha sogs chung ba khru gang yan chad pa ni de'i kha skong ba kha dog sngon po dang / ser po dang / dmar po dang / de dag gi bye brag las byas pa las rigs mi mthun pa dang / rgyu dag pa la gos dang ras gos la sogs pa dang / de dag gi bye brag las byas pa la rigs mi mthun pa gzhan rnyed cing sngar gzhag pa dang / phyis rnyed pa bsdongs nas 'khor gsum khebs pa'i tshad yin du zin kyang de 'khor gsum khebs pa'i tshad du chog pa nyid ma yin pas zhag bcu 'das na 'chang ba'i spang bar mi 'gyur ro/ /dkar po nyid ni kha dog thams cad pa nyid yin te/ des na kha sogs kyi gos mang ba nyid sngon po la sogs pa gzhag pa la kha skong ba'i gos dkar po ras chen rnyed pa dang / kha sogs kyi gos dkar po gzhag pa la kha skong ba'i gos sngon po la sogs pa rnyed pa ni rigs mi mthun pa ma yin pas de gnyis bsdongs na 'khor gsum khebs pa'i tshad du langs pa ni zhag bcu 'das pa dang 'chang ba'i ltung ba spang ba'i dngos gzhir 'gyur ro/ /de rnyed na zhag bcu pa de'i dang po la bag la glon pa nyid yin te/ des na kha sogs kyi gos gzhan pa gang yin pa de dang rigs mthun pa kha skong ba'i gos de rnyed na kha sogs kyi gos gzhag pa dang 'brel pa'i dus kyi zhag bcu pa dang po'am/ gnyis pa'am/ gsum pa'am gang dag yin pa'i zhag bcu pa'i skabs de'i dang po de la kha skong ba'i gos phyis rnyed pa de dang / kha sogs kyi gos sngar gzhag pa de nyid so so na 'dug kyang bla ste/ de de'i bag la glon pa nyid yin no/ /de yang gal te de'i tshe bag la glon pa nyid yin na 'khor gsum khebs pa'i tshad du chog pa nyid yin na ni de'i tshe zhag bcu pa de nyid la byin gyis brlab par bya'o/ /gal te byin gyis ma brlabs na zhag bcu 'das na 'chang ba'i spang ba'i ltung byed du 'gyur ro/ /ji ste de gnyis bsdoms kyang 'khor gsum khebs pa'i tshad du ma chog pa nyid yin na ni/ de'i tshe na phyis rnyed pa de yang sngar gzhag pa dang 'dra bar zla ba gcig pa'i khongs su gtogs pa yin te/ sngar gzhag pa de'i shan gyi dbang gis phyi ma de snga ma'i bag la glon pa nyid yin pa'i phyir phyi ma de la yang zla ba gcig pa'i de nyid rnam par gzhag par rig par bya'o/ /zla ba gcig pa'i spang ba 'di la zhag bcu pa dang po dang / gnyis pa dang / gsum pa dag ni shan gyi phyir phan tshun ltos pa med do/ /de ltar yang gzhung las gal te dge slong gis kha sogs kyi gos kyi khru gang gi tshad gcig bzhag nas zhag bcu gcig pa la kha bskang brnyed de chog na ni zhag bcu pa gnyis pa de nyid kyi nang rol du byin gyis brlab par bya ba'am/ gtang bar bya'o/ /gal te byin gyis rlob par mi byed dam/ gtong bar mi byed na zhag nyi shu gcig pa la spang ba'i ltung byed du 'gyur ro zhes gsungs pa yin no/ /dge slong la 'jog pa'i spang ba'i ltung byed du byung na de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par gos zla ba gcig par gtogs pa de lta bu gzhan zhig rnyed la de yang snga ma'i shugs gyis spang bar 'gyur te/ de las ltung bar ni mi 'gyur ro/ /dge slong gis 'jog pa'i spang ba'i ltung byed byung la/ ji srid du spong ba'i dngos po las ma bshags shing so sor ma bshags par lhung bzed dam/ chos gos sam/ dra ba'am/ phor bu'am/ ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis dge 'dun mnga' ba'i rdzas gang zag gi bdag nyid du ris su bcad pas zla bas spangs par gtogs pa zhag sum cu gcig pa'i skya rengs las 'das par byas na/ 'jog pa'i spang ba'i ltung byed kyi dngos gzhir 'gyur ro/ /rdzas bzang ngan dang / mang nyung la na smad pa med do/ /gdong phyis dang chu tshags dang / stan dbyam dang / dre'u rngog la sogs pa yo byad kyi gos byin gyis ma brlabs pa dag la na smad pa med do/ /gos rung ba nyid dang / tshad dang ldan pa dang / tshad las lhag pa la na smad pa med do/ /'di'i byed pa po ni gos kha bskang ba la re ba yod pa dang / byin gyis brlab par bya ba'i chos gos gsum med pa'o/ /'di la yan lag lngas dngos gzhi'i ltung bar 'gyur te/ gos kha bskang ba la re ba yod pa dang / byin gyis brlab par bya ba'i chos gos gsum med pa dang / gos kyi tshad khru gang yan chad dang zhag sum cu 'das pa'o/ /de dag la yan lag ma tshang na ci rigs par na smad do/ /'di man chad ni gos ji lta bu dang / tshad ji tsam la byin gyis brlab pa 'chags par 'gyur ba dang / de las bzlog pa la spang bar 'gyur ba spyir bstan pa brjod par bya'o/ /de'i phyir sar pa las snam sbyar gyi mtha' ni nyis rim mo zhes bya ba gsungs te/ sar pa zhes bya ba ni gang dus tshigs gsum po dag la dus tshigs gcig gis rangs par ma spyad pa ste/ de las snam sbyar byed na snam sbyar de'i rim pa'i tshad kyi mtha' ni nyis rim mo/ /gding ba'i yang ngo zhes bya ba yang snga ma sar pa las byed na de'i rim pa'i tshad kyi mtha' ni nyis rim mo/ /bla gos dang mthang gos gnyis kyi ni chig rkyang ngo zhes bya ba ni bla gos dang / mthang gos gal te sar pa las byed na de/ gnyis kyi rim pa'i tshad kyi mtha' ni chig rkyang ngo / /'dir gzhung ni gal te dge slong des bcag pa dang / kha bsgyur ba dang btsem par nus na gos de las snam sbyar dang / gding ba ni nyis rim du bya'o/ /bla gos dang / mthang gos ni chig rkyang du bya'o zhes gsungs pa yin no/ /dus tshigs su spyad pa las ni nyis 'gyur du bya'o zhes bya ba ni gal te gos dus tshigs gcig tu spyad pa las de dag byed na/ snam sbyar dang gding ba ni bzhi rim du bya'o/ /bla gos dang mthang gos ni nyis rim du bya'o zhes bya ba'i tha tshig go/ /'dir gzhung ni dus tshigs su spyad pa'i chos gos ni bgo zas chung ba yin te/ dus tshigs gsum po dag las dus tshigs gang yang rung ba las gcig tu spyad pa'o zhes gsungs pa yin no/ /phyag dar khrod las byas pa dag la ni nges pa med do zhes bya ba ni phyag dar khrod las byas pa'i gos dag la ni rim pa dag nges pa med do/ /'dir gzhung ni phyag dar khrod la ni ji tsam 'dod par bya'o zhes gsungs pa yin no/ /rnying pa nyid dang dengs pa nyid las ni ci dgos pa lhag par sbyar ro zhes bya ba ni phyag dar khrod pa ma yin pa la yang chos gos rang zad de rnying pa dang / sgo skyes kyis bshud pa la sogs pas dngas pa nyid la ni lhan pa ji tsam dgos pa rim pa'am/ mtha' sngar bstan pa dag las lhag par sbyar bar bya'o/ /'di ni ma mo las gsungs pa bsdus pa yin no/ /lhag par sbyor ba nyid du mi bya'o zhes bya ba ni snam sbyar la sogs pa phyag dar khrod las byas pa ma yin pa ma rnyings ma dengs pa la rim pa sngar bstan pa las lhag par mi sbyar ba ste/ sbyor na sbyor ba nyid na thams cad nyes byas so/ /spang bar 'gyur ba nyid kyang yin no zhes bya ba ni lhag par sbyar ba'i rim pa de zhag bcu 'das na spang ba'i ltung byed du 'gyur ba'o/ /'di skad bstan te/ de la rim pa lhag par sbyar ba gang yin pa de spang bar 'gyur gyi rim pa ji skad bstan pa dag ni spang bar mi 'gyur ro/ /rigs pa ji lta ba bzhin spang bar mi 'gyur ro/ /rigs pa can byi dor byas nas 'di nyid du sbyar bar bya'o snyam pa'i sems ma bskyed pa dbog par mi bya'o zhes bya ba ni rim pa snga ma sbyar zin pa ni byin gyis brlabs pa'i 'os yin pas rigs pa can zhes bya ste/ rim pa rigs pa ji lta ba ji srid du bcag pa la sogs pa'i byi dor byas nas chos gos 'di nyid du phyir sbyar bar bya'o snyam pa'i rnam pa de lta bu'i sems ma bskyed pa de srid du dbog par mi bya'o/ /'di skad bstan te/ gal te dge slong chos gos las rim pa gzhan gyi byi dor bya ba'i ched du dbog par 'dod pas ji srid du bcag pa la sogs pa'i byi dor byas nas phyis 'di nyid du sbyar ro snyam pa'i rnam pa de lta bu'i sems ma bskyed pa de srid kyi bar du dbog par mi bya'o/ /dbog par byed na 'gal tshabs can du 'gyur ro/ /gang yang rung bas phog pas ma sbyar ba'i snga rol du spang bar 'gyur ba nyid do zhes bya ba ni sngar bstan ma thag pa'i rnam pa de lta bu'i sems sam sems kyi rnam pa gzhan gang yang rung bas sbyar ma gzhan phog pa ni phyir de nyid du ma sbyar ba'i snga rol du zhag bcu 'das na spang ba'i ltung byed du 'gyur ba nyid yin no/ /sbyar na ni tshigs gcig pa nyid du gyur pa yin pas nyes pa med do/ /sbyar ma rnam par gzhag pa dang 'brel pa bstan pa'i phyir snam sbyar gyi snam phran dag ni dgu yan chad nyi shu rtsa lnga man chad de zung ma gtogs so zhes bya ba gsungs te chos gos snam sbyar gyi snam phran gyi grangs ni dgu yan chad nas nyi shu rtsa lnga man chad gang yang rung ba yin par rig par bya'o/ /zung ma gtogs so zhes bya ba ni 'di lta ste/ bcu dang / bcu gnyis dang / bcu bzhi dang / bcu drug dang / bco brgyad dang / nyi shu dang / nyi shu gnyis dang / nyi shu rtsa bzhi ma gtogs pa'o/ /de yan chad ni tshem bu'o zhes bya ba ni snam phran nyi shu rtsa lnga po de yan chad las lhag pa dag gis snam bur sbyar ba ni tshem bu ste/ de bas na snam sbyar la ni de las lhag par mi bya'o/ /snam phran de dag la ni glegs bu dang / glegs bu phyed ji ltar rnam par gzhag ce na/ de'i phyir dang po gsum la ni de dag gi glegs bu phyed dang gsum pa nyid do zhes bya ba gsungs te/ dang por gsum la zhes bya ba ni snam sbyar rnam pa dgu las gsum pa dang po la ste/ snam phran dgu pa dang / bcu gcig pa dang / bcu gsum pa dag la'o/ /de dag gi glegs bu phyed dang gsum pa nyid do zhes bya ba ni de dag la glegs bu ni phyed dang gsum pa nyid du bya'o/ /'dir snam phran zhes bya ba'i sgra ni tshal bu la bya'o/ glegs bu dang glegs bu phyed la ni mi bya'o/ /gnyis pa la ni glegs bu phyed dang bzhi pa nyid do zhes bya ba ni snam sbyar gsum pa gnyis pa la ste/ snam phran bco lnga pa dang / bcu bdun pa dang / bcu dgu pa dag la'o/ /glegs bu phyed dang bzhi pa nyid do zhes bya ba ni de dag la glegs bu ni phyed dang bzhi pa nyid du bya ba'o/ /gsum pa la ni glegs bu phyed dang lnga pa nyid do zhes bya ba ni snam sbyar gsum pa gsum pa la ste/ snam phran nyi shu gcig pa dang / nyi shu gsum pa dang / nyi shu lnga pa dag la'o/ /glegs bu phyed dang lnga pa nyid do zhes bya ba ni de dag la glegs bu ni phyed dang lnga pa nyid du bya ba'o/ /bla gos ni snam phran bdun pa dang glegs bu phyed dang gsum pa'o/ /mthang gos ni snam phran lnga pa dag dang glegs bu phyed dang gnyis pa'o/ /de dag gi tshad las lhag pa ji tsam zhe na/ de'i phyir byin gyis brlab tu rung ba chen po dag ni rang gi khru gsum dang lnga dag go zhes bya ba gsungs te/ snam sbyar dang bla gos dang / mthang gos byin gyis brlab tu rung ba chen po dag ni tshad gcig ste/ zheng du khru phyed dang gsum/ chur khru lnga'o/ /de las lhag par byed na gnas spang bar 'gyur ba nyid do/ /chung ngu dag ni gnyis ka las khru phyed phyed phri ba'o zhes bya ba ni chos gos snam sbyar dang / bla gos dang / mthang gos chung ngu dag gi tshad ni sngar chen po dag gi zheng du khru gsum zhes bya ba dang / chur khru lnga zhes bya ba'i tshad de gnyis las khru phyed phyed phri ba yin par rig par bya'o/ /'bring rnams kyi tshad ni bar ma'o zhes bya ba ni chos gos snam sbyar dang / bla gos dang / mthang gos dang 'bring rnams kyi tshad ni chen po rnams kyi khru gsum dang / lnga gang yin pa dang / chung ngu rnams kyi khru phyed dang gsum dang / phyed dang lnga gang yin pa de'i bar ma'i tshigs te zheng du khru phyed dang gsum dang khru'i bzhi cha gcig /chur khru phyed dang lnga dang khru'i bzhi cha gcig yin par rig par bya'o/ /glegs bu dang glegs bu phyed dag mnyam par bya'o zhes bya ba ni glegs bu rnams kyang logs shig tu mnyam par bya/ glegs bu phyed rnams kyang logs shig tu mnyam par bya ba'o/ /tshal bu dag kyang ngo zhes bya ba yang mnyam pa nyid du bya ba'o/ /tshal bu che tshad ni sor bzhi'am bya rog gi mtho gang ngo / /chung tshad ni sor gsum pa dag kyang rung sor phyed dang gsum mam/ sor gnyis sam mtheb sor gcig go/ /'bring tshad ni che chung gnyis kyi bar ma'i zhes bya ba dag ni tshal bu'i zhing tshad de ni gos kyi gzhi phran tshegs la sogs pa'i skabs nas 'byung ngo / /mthang gos kyi tshad kyi rnam pa bstan pa'i phyir mthang gos ni do dang lnga yang yin pa do dang bzhi yang yin no zhes gsungs te/ mthang gos kyi tshad ni zheng du khru do dang / chur khru lnga yang yin la zheng du khru do dang / chur khru bzhi yang yin no zhes bya bar sbyar ro/ /'khor gsum khebs pa nyid yan chad kyang yin no zhes bya ba ni mthang gos kyi rnam pa gzhan yang zheng du khru do chur khru bzhi pa man chad nas 'khor gsum khebs pa nyid yan chad kyi bar gang yang rung ba yang yin par rig par bya'i zheng du khru do dang chur khru do dang lnga bdag dang / zhing du khru do dang chur khru bzhi pa nyi tsher ma zad do/ /khru'i don ni lus kyi cha bdun las gnyis so zhes bya ba ni khru zhes sngar smos pa'i khru tshad ni lus la cha mnyam pa bdun du rnam par phye ba gang dag yin pa de dag las cha gnyis ni khru'i tshad kyi don yin gyi lus la gru mo nas gung mo'i rtse mo'i bar ji tsam yod pa de'i tshad ni ma yin no/ /de ni gang zag gang gi lus la ltos na lag pa'i tshad du thung ba'am ring ba de'i ched du 'di gsungs kyi gang zag gang lus kyi rkyen dang lag pa'i rkyen du 'tsham pa dag la ni rang rang gi khru nyid 'dir yang tshad yin no/ /mi yogs na ral ga dpung chad bya'o zhes bya ba la gang gi lus che ches pas mthang gos kyi tshad de tsam gyis lus mi yogs na/ lus dang 'tsham pa'i ral ga dpung chad can bya ba ste/ khebs par g.yogs par bya'o/ /sbyor ba'i ltung ba ni nyes byas te/ ji srid du zhag sum cu 'das pa'i spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /khru gang gi tshad pas chung ba la nyes byas so/ /rung ba ma yin par 'jog pa la nyes byas so/ /sbyor ba'i sbyor ba'i ltung ba la ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni gos kha bskang ba la re ba med pa dang / byin gyis brlab par bya ba'i chos gos gsum po yod pa dang / zhag sum cu ma 'das pa la ltung ba med do/ /sra brkyang bting ba ma phyung ba la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du 'jog pa'i spang bar 'gyur ba rnam pa thams cad mi bsten par bslab par bya'o/ /phyir bcos pa ni snga ma bzhin no/ 'jog pa'i spang ba'i ltung byed de gsum pa bshad zin to// //'khrur 'jug pa'i spang ba'i ltung byed kyi gleng gzhi ni/ gang gi tshe bcom ldan 'das byang chub sems dpa' dga' ldan gyi gnas na bzhugs pas gzigs pa lnga po rigs dang / yul dang / dus dang / rus dang / bud med la gzigs pa dag gis 'jig rten la gzigs nas/ glang po cher snang bar bsgyur nas yum gyi lhums su zhugs pa dang / zla ba bcu 'das nas yum gyi lhums nas bltams pa de'i tshe sa chen po shin tu g.yos par gyur cing 'jig rten du snang ba chen pos khyab par gyur to/ /gang gi nyin mo bcom ldan 'das byang chub sems dpa' bltams par gyur pa de'i nyin mor mnyan yod na rgyal po chen po rtsibs kyis 'phur tshangs byin gyi bu gsal rgyal dang / rgyal po'i khab na rgyal po pad ma chen po'i bu gzugs can snying po dang / kau shaM bI na rgyal po chen po dmag brgya pa'i bu shar ba dang / 'phags rgyal na rgyal po chen po mu khyud mtha' yas kyi bu rab snang dag kyang btsas so/ /de nyid kyi nyin mor shAkya gzhon nu bzang ldan la sogs pa lnga brgya dang / bsnyen bkur ba 'dun byed la sogs pa lnga brgya yang btsas so/ /rte'u bsngags ldan la sogs pa lnga brgya yang 'brang ngo / /lha rnams kyi gter lnga brgya yang bstan to/ /bcom ldan 'das byang chub sems dpa' de bram ze ltas pa dang / mtshan mkhan dag gis khab na bzhugs par gyur na/ 'khor los sgyur ba'i rgyal po mtha' bzhir rgyal ba chos kyi rgyal po chos dang ldan pa rin po che sna bdun dang ldan pa/ bu dpa' ba rtul phod pa/ yan lag mchog gi gzugs dang ldan pa pha rol gyi sde rab tu 'joms pa stong tshang ba mnga' ba rgya mtsho la thug pa'i sa chen po ma lus pa gnon pas sdo ba med cing 'tshe ba med pa 'di nyid chad pa med cing mtshon gyis bda' ba med la chos dang mthun zhing snyoms pas legs par phab ste gnas par 'gyur ro/ /gal te skra dang kha sbu bregs te gos ngur smrig dag bgos nas/ yang dag pa kho nar dad pas khyim nas khyim med par rab tu byung na ni de bzhin gshegs pa dgra bcom pa yang dag par rdzogs pa'i sangs rgyas 'jig rten du rnam par grags pa'i sgra dang ldan par 'gyur ro zhes lung yang bstan to/ /gang gi tshe bcom ldan 'das byang chub sems dpa' 'jig rten du byung ba de'i tshe na thams cad ri bo gangs kyi ngos dang nye ba chu klung skal ldan shing rta'i tshogs 'gram drang srong ser skya'i bsti gnas dang ha cang mi ring bar shAkya rnams kyi gzhon nu byung ste/ de bram ze ltas pa dang mtshan mkhan dag gis de skad lung bstan to zhes sgra yang grags par gyur to/ /nyi 'og gi rgyal po dag gis kyang de skad thos par gyur cing / thos nas kyang nyi 'og gi rgyal po de dag dag gzhon nu de bsten na dus su 'bras bu ster bar 'gyur bas je gzhon nu bsten pa'i don du de'i yab rgyal po zas gtsang bsten par bya'o snyam nas dus dang mthun pa'i dus su rgyal po zas gtsang la 'dud pas pho nya dang dkor sgrom dag kyang bskur bar byed do/ /de'i tshe gzhon nu de'i mtshan don thams cad grub pa zhes bya ba yang gsol to/ /gang gi tshe bcom ldan 'das byang chub sems dpa' chen por 'khrungs shing / des rgan po dang / nad pa dang / shi ba gzigs nas thugs byung ste/ dka' thub kyi nags tshal du gshegs pa'i tshe rgyal po zas gtsang dang shAkya legs rab rtogs kyi zham 'bring ba mi lnga brgya bkye ste bka' mchid phyir yang skyel bar gyur to/ /nyi 'og gi khams kyi rgyal po dag gis de ltar gzhon nu don thams cad grub pa rab tu byung bar thos nas/ ko sa la'i rgyal po gsal rgyal ma gtogs pa gzhan thams cad kyis da rgyal po zas gtsang bsten kyang don med do zhes de la 'dud pa dang / pho nya dang / kor sgrom 'bul ba rgyun chad par gyur na ko sa la'i rgyal po gsal rgyal 'ba' zhig rgyal po zas gtsang dang snga mkho bzhin 'dud pa dang / pho nya dang / skyes kyis 'drul lo/ /de'i tshe na ko sa la'i rgyal po gsal rgyal la ni blon po'i mchog sbed pa zhes bya ba zhig yod la/ rgyal po zas gtsang la ni mdun na 'don gyi bu 'char ka zhes bya ba zhig yod de/ gang gi tshe ko sa la'i rgyal po gsal rgyal rgyal po zas gtsang gi gan du pho nya gtong bar byed pa de'i tshe na blon po'i mchog sbed pa gtong bar byed/ des rgyal po'i bya ba dang byed pa dag byas nas mdun na 'don gyi bu 'char ka'i khyim du 'jug par byed do/ /gang gi tshe rgyal po zas gtsang ko sa la'i rgyal po gsal rgyal gyi gan du pho nya gtong bar byed pa de'i tshe na ni mdun na 'don gyi bu 'char ka gtong bar byed do/ /des kyang rgyal po'i bya ba dang byed pa dag byas nas blon po'i mchog sbed pa'i khyim du 'jug par byed do/ /sbed pa la chung ma sbed ma zhes bya ba gzugs bzang ba dang / blta na sdug pa/ mdzes pa/ skyes bu dga' ba zhig yod de/ de'i tshe 'char ka sbed ma dang lhan cig kha dum par gyur to/ /sbed pas ji ltar 'char ka sbed ma dang lhan cig kha dum par gyur par shes nas/ des bsams pa 'di gsad par bya'o snyam mo/ / yang bsams pa/ gal te 'di gsad par gyur na yul 'khor gnyis 'khrug pa chen por 'gyur bas/ bdag gis bud med kyi lus kyi phyir ci'i phyir bram ze gsad par bya snyam nas/ des btang snyoms su gzhag go/ /de nas 'char ka 'di snyam du sems te/ bdag sbed pas 'phrigs so snyam du rig nas skrag ste/ khyim nas byung zhing gzhan du 'dug pa dang / sbed pas smras pa/ 'char ka khyod ci'i phyir rang gi khyim spangs te gzhan na 'dug tshur shog /'di khyod rang gi khyim yin gyi ji bder 'dug shig /de nas 'char ka 'di snyam du sems te/ don gyis na 'dis bdag la rjes su gnang ngo snyam du rig nas de nyid na 'dug go/ /de nas dus gzhan zhig na blon po'i mchog sbed pa shi nas/ ko sa la'i rgyal po gsal rgyal gyis de la bu med pa'i phyir nor thams cad rang gi mdzod dang bang bar bcug go/ /sbed mas 'char ka ser skya'i gnas na 'dug pa la gang gi tshe kho mo'i khyim thab gson zhing 'dug ste 'tsho zhing sdod pa de'i tshe na khyod rtag pa kho nar 'ong na da de shi ste ko sa la'i rgyal po gsal rgyal gyis kyang bu med pa'i phyir nor thams cad rang gi mdzod dang bang bar bcug na da khyod kyis gtam tsam yang mi 'dri'am zhes yi ge spring ngo / / de nas 'char kas spring yig gi don thos nas 'di snyam du sems te/ gal te bdag der song bar gyur na gzhi de las 'char ka bud med la chags pas bud med kyi phyir der song ngo zhes gzhan dag kha zer bar 'gyur gyi/ bdag gis thabs kyi rnam pa zhig bya'o snyam nas des lan gnyis lan gsum du rgyal po'i bya ba dang byed pa dag byas nas rgyal po zas gtsang ga la ba der song ste phyin nas 'di skad ces smras so/ /lha gang gi tshe gzhon nu don thams cad grub pa bltams pa de'i tshe na nyi 'og gi khams kyi rgyal po thams cad 'dud cing pho nya dang / dkor sgrom gsol nas/ gang gi tshe gzhon nu don thams cad grub pa rgan po dang nad pa dang / gum pa gzigs nas thugs byung ste/ dka' thub kyi nags tshal du gshegs pa de'i tshe na nyi 'og gi khams kyi rgyal po de dag las ko sa la'i rgyal po gsal rgyal ma gtogs pa gzhan thams cad kyis 'dud pa dang pho nya dang dkor sgrom 'bul bar rgyun bkum nas/ slar ko sa la'i rgyal po gsal rgyal la pho nya dang dkor sgrom dag bka' stsal gyi na bskur nas/ da lta de ltar skyen par gyur pa las da yal bar bor na slad kyis gnod pa chen por 'gyur bas/ de 'o skol dang mtshams 'brel par mchis pas de dang lhan cig sten par mdzad pa rigs so/ /rgyal po zas gtsang gis smras pa/ 'char ka gal te/ de lta na khyod nyid pho nyar song shig /lha bka' bzhin 'tshal zhes de nas 'char kas dkor sgrom dag khyer te mnyan yod ga la ba der 'phags nas mthar gyis mnyan yod du phyin to/ /de nas 'char ka 'di snyam du sems te/ bsten pa la bsten par mi bya bar mi bsten pa la bsten par bya ba yin pas je dang por blon po rnams blta bar bya zhing de'i 'og tu rgyal po bltas te/ sbed ma'i phyir rgyal po la gsol bar bya'o snyam nas/ des blon po rnams la blta bar brtsams te smras pa/ shes ldan dag khyod kyis kho bo ji ltar sbed ma dang lhan cig bshes pa de mi shes sam/ de'i khyim thab shi nas ko sa la'i rgyal po gsal rgyal gyis bu med pa'i phyir de'i nor thams cad rang gi mdzod dang / bang bar bcug pas/ de'i phyir kho bo rgyal po la gsol ba byed kyi khyed kyis grogs kyis shig / de dag gis de bzhin du khas blangs so/ /de nas 'char ka ko sa la'i rgyal bo gsal rgyal ga la ba der song ste phyin nas/ ko sa la'i rgyal po gsal rgyal la rgyal ba dang / tshe spel ba byas te/ mtha' gcig tu 'dug nas/ des lan gnyis lan gsum du rgyal po'i bya ba dang byed pa dag byas te/ ko sa la'i rgyal po gsal rgyal la 'di skad ces smras so/ /lha bdag gi gnas stsol cig /'char ka khyod sngon gang du zhugs/ lha blon po'i mchog sbed pa'i sdum par mchis so/ /'char ka song la de nyid du zhugs shig /lha blon po'i mchog sbed pa gum mo/ / gal te de shi na ji de'i khyim yang shi'am/ lha de'i sdum pa ni ma gum mod kyi 'on kyang de na stan tsam yang ma mchis so/ /rgyal pos blon po rnams la smras pa/ shes ldan dag khyed kyis 'char ka'i gnas byin cig /'char ka phyir byung ba dang / blon po rnams kyis smras pa/ lha ci lags 'char ka la gnas ma mchis snyam mam/ ji ltar 'char ka sbed ma dang lhan cig mjal bas/ don gyis na 'char ka sbed ma'i slad du lha la gsol bar bgyis kyi lha 'char ka ni bram ze mdun na 'don gyi bu lags pas/ bram ze ni mi 'tshal bzhin du dgang bar bgyi ba lags te/ 'di legs par gzung na rgyal po zas gtsang legs par gzung bar 'gyur ro/ /de nas rgyal pos 'char ka la bos te smras pa/ 'char ka ngas khyod ji ltar sbed ma dang lhan cig bshes par sngar ma shes kyi/ da song la sbed ma dang de'i khyim dang / nor thams cad khyod khyer cig /lha bka' drin che'o zhes smras nas/ 'char ka sbed ma'i khyim ga la ba der song ba dang / sbed mas 'char ka 'ongs so zhes thos nas/ sgo gang du 'dug ste ngu bar brtsams so/ /'char kas mthong nas smras pa/ sbed ma khyod ci'i phyir du/ des smras pa/ bdag 'tshal ba'i khyim thab gum na ci bdag khyod kyis kyang yongs su btang ngam/ de nas 'char ka 'di snyam du sems te/ gal te bdag gis mthun par smras na 'di shin tu ngu bar 'gyur bas bdag gis 'di tshar gcad par bya'o snyam du rig nas smras pa/ sbed ma byang chub sems dpa' dka' ba byed pa gang gis btsun mo grags 'dzin dang / sa 'tsho ma dang / ri dgas skyes la sogs pa bud med drug khri spangs te rab tu byung ba de dag gi rkang pa'i rdul tsam du yang khyod kyis mi phod do/ /de nas de cang mi smra bar 'dug pa dang / 'char kas smras pa/ kho bos khyod ma btang bas khyod nyid kyi phyir 'dir 'ongs pa yin no/ /kho bos rgyal po las khyod dang / khyod kyi khyim dang nor thams cad thob na ci khyod 'di nyid du 'dug gam/ ser skya'i gnas su 'gro /des bsams pa/ gal te ser skya'i gnas su song na 'di'i bram ze mo las srog kyang mi thob bo snyam du rig nas/ 'di nyid du mchis so zhes smras te de de nyid du 'dug go/ /de'i tshe da 'char ka la khyim gnyis yod de/ gcig ni mnyan yod na'o/ /gcig ni ser skya'i gnas na'o/ /gang gi tshe bcom ldan 'das byang chub sems dpas lo drug tu dka' ba spyad de/ dka' ba byed pa la don ci yang med par rig nas/ ci bder dbugs rngub pa dang / 'byin pa dang / zhal zas rgya chen po dag gsol ba dang / sku'i bsku mnye dang / dril byas mdzad nas grong sde 'dong du gshegs te/ grong pa'i bu mo dga' mo dang dga' stobs ma gnyis las lan bcu drug brlas pa'i 'o ma gsol nas/ klu'i rgyal po nag pos mngon par bstod de/ rtswa bkra shis 'chong pa las rtswa gser gyi mdog lta bu dag bzhes nas byang chub kyi snying por gshegs te/ mtshan mo'i gung thun la bdud 'byung po dung phyur phrag gsum dang / bye ba phrag drug gi 'khor dang ldan pa byams pa'i stobs kyis mngon par btul nas bla na med pa'i byang chub mngon par rdzogs par sangs rgyas te tshangs pas gsol nas yul bA rA Na sbor gshegs te/ bden pa bzhi la lan gsum du bzlas te rnam pa bcu gnyis su chos kyi 'khor lo bskor nas/ lnga pa dang nye lnga pa dang / grong khyer pa'i khye'u mtho ba mtho ba lnga bcu btul ba dang / ras bal can gyi tshal gseb tu gshegs nas bzang sde'i tshogs drug cu bden pa dag la bkod pa dang / grong sde'i 'dong du gshegs nas grong ba'i bu mo dga' mo dang / dga' stobs ma gnyis bden pa dag la bkod pa dang / lteng rgyas su gshegs nas ral pa can stong rab tu phyung bsnyen par rdzogs par mdzad pa dang / g.ya'i mgo'i mchod rten du gshegs nas/ dge slong stong stong po de dag cho 'phrul gsum gyis gdams par mdzad nas/ dgra bcom pa nyid thob par mdzad pa dang / ltang brang gi tshal gseb tu gshegs nas ma ga d+h+wa'i rgyal po bzo sbyangs gzugs can snying po lha brgyad khri dang / ma ga d+hA'i bram ze dang khyim bdag 'bum phrag du ma dang lhan cig bden pa dag la gzhag pa dang / rgyal po'i khab tu gshegs nas 'od ma'i tshal bzhes te shA ri'i bu dang maud gal gyi bu 'khor nyis brgya lnga bcu dang ldan pa rab tu phyung bsnyen par rdzogs par mdzad pa dang mnyan yod du gshegs nas rgyal byed kyi tshal bzhes te ko sa la'i rgyal po gsal rgyal gzhon nu'i dpe'i mdos btul nas/ de nas sangs rgyas bcom ldan 'das mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de nas kos la'i rgyal po gsal rgyal gyis rgyal po zas gtsang gi gan du pho nya btang ste/ lha dgyes ba skyed cig /khyod kyi sras kyis bdud rtsi thugs su chud de bdud rtsis 'gro ba tshim par mdzad cing mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so zhes spring ngo / /rgyal po zas gtsang gis thos nas bcom ldan 'das kyi spyan sngar pho nya btang ste/ gzhon nu bdag gis ring du ma mthong ste/ bdag gzhon nu mthong bas yongs su skom mo zhes gsol pa dang / pho nya de de nyid du rab tu byung ngo / /pho nya gnyis pa btang ba dang / de yang de nyid du rab tu byung ngo / /de nas rgyal po zas gtsang yid la gcags nas rang gi lag nas bcom ldan 'das spyan drangs pa'i tshigs su bcad pa bris te mdun na 'don gyi bu 'char ka pho nyar btang ngo / /de nas 'char kas phrin yig de blangs te mnyan yod du 'phags nas/ de mthar gyis mnyan yod du phyin te/ bcom ldan 'das la phyag 'tshal nas phran yig phul ba dang / bcom ldan 'das kyis kyang 'dul ba'i don gyi phrin yig klag pa mdzad nas 'char ka rab tu phyung nas rgyal po'i pho nyar bka' stsal te/ zhag bdun na yab sras mjal zhing ser skya'i gnas su gshegs so zhes spring yig spring ngo / /de nas 'char ka rab tu byung bas rgyal po'i pho nya byas te yab zas gtsang la sbran nas/ rgyal po zas gtsang gis bcom ldan 'das kyi phyir rgyal po'i 'byor pa chen po dang / rgyal po'i mthu chen pos yo lang rgya chen po bshams pa dang / bcom ldan 'das kyis kyang gdul ba'i don chen po dag mdzad nas/ tshe dang ldan pa maud gal gyi bu chen po la bka' stsal pa/ maud gal gyi bu khyod song la dge slong rnams la de bzhin gshegs pa ser skya'i gnas su gshegs kyi khyed cag las gang de bzhin gshegs pa dang thabs cig ser skya'i gnas su 'gro ba dang / yab dang sras mjal ba lta bar spro ba des chos gos dag longs shig ces bsgos shig / tshe dang ldan pa maud gal gyi bu chen pos btsun pa bka' bzhin 'tshal zhes bcom ldan 'das kyi bka' mnyan nas dge slong rnams la de skad bsgo'o/ /dge slong dag gis tshe dang ldan pa de bzhin bgyi'o zhes tshe dang ldan pa mod gal gyi bu chen po'i tshig mnyan no/ /de nas bcom ldan 'das dul ba 'khor dul ba dang ldan pa/ zhi ba 'khor zhi ba dang ldan pa/ grol ba 'khor grol ba dang ldan pa/ dbugs phyin pa 'khor dbugs phyin pa dang ldan pa/ thul ba 'khor thul ba dang ldan pa/ dgra bcom pa 'khor dgra bcom pa dang ldan pa/ 'dod chags dang bral ba 'khor 'dod chags dang bral ba dang ldan pa/ mdzes pa 'khor mdzes pa dang ldan pa/ khyu mchog ba lang gi tshogs kyis yongs su bskor ba lta bu/ glang po che glang po che'i phru gu'i tshogs kyis yongs su bskor ba lta bu/ seng ge mche ba can gyi tshogs kyis yongs su bskor ba lta bu/ ngang pa'i rgyal po ngang pa'i tshogs kyis yongs su bskor ba lta bu/ nam mkha' lding bya'i tshogs kyis yongs su bskor ba lta bu/ bram ze slob ma'i tshogs kyis yongs su bskor ba lta bu/ sman pa mkhas pa nad pa'i tshogs kyis yongs su bskor ba lta bu/ dpa' bo ru pa'i tshogs kyis yongs su bskor ba lta bu/ sa mkhan 'dron pa'i tshogs kyis yongs su bskor ba lta bu/ ded dpon tshong pa'i tshogs kyis yongs su bskor ba lta bu/ tshong dpon 'khor gyi tshogs kyis yongs su bskor ba lta bu/ mkhar gyi rgyal po blon po'i tshogs kyis yongs su bskor ba lta bu/ 'khor los sgyur ba'i rgyal po bu stong gi tshogs kyis yongs su bskor ba lta bu/ zla ba rgyu skar gyi tshogs kyis yongs su bskor ba lta bu/ nyi ma 'od zer stong gi tshogs kyis yongs su bskor ba lta bu/ yul 'khor srung dri za'i tshogs kyis yongs su bskor ba lta bu/ 'phags skyes po grul bum gyi tshogs kyis yongs su bskor ba lta bu/ mig mi bzang klu'i tshogs kyis yongs su bskor ba lta bu/ nor sbyin gnod sbyin gyi tshogs kyis yongs su bskor ba lta bu/ thags bzangs ris lha ma yin gyi tshogs kyis yongs su bskor ba lta bu/ brgya byin sum cu rtsa gsum pa'i tshogs kyis yongs su bskor ba lta bu/ tshangs pa tshangs ris kyis yongs su bskor ba lta bu dang / dbang po rnams shin tu dul ba/ spyod lam dang spyod pa ma 'khrugs pa/ rgya mtsho ltar ting nge ba/ sprin ltar chu dang bcas pa/ glang po che'i rgyal po ltar dregs pa dang bral ba/ skyes bu chen po'i mtshan sum cu rtsa gnyis kyis legs par brgyan pa/ dpe byad bzang bo brgyad cus sku rnam par mdzes pa/ 'od 'dom gang gis gzugs can brgyan pa nyi ma stong bas lhag pa'i 'od dang ldan pa/ rin po che'i ri bo 'gro ba lta bu kun du bzang po/ stobs bcu dang / mi 'jigs pa bzhi dang / ma 'dres pa'i tshogs dran pa nye bar gzhag pa gsum dang / thugs rje chen po dang ldan pa/ 'jig rten la phan par zhugs pa/ srung ba gcig pu ba nyag gcig pa/ gnyis pa med pa/ gnyis su mi gsung ba/ zhi gnas dang / lhag mthong gis zhugs pa/ rig pa gsum gsal bar mdzad pa/ bslab pa gsum la legs par bslabs pa/ dul ba'i gnas gsum gyi gzhi la mkhas pa/ chu bo bzhi las rgal ba/ rdzu 'phrul gyi rkang pa bzhis spyod pa'i gzhi la legs par gnas pa/ bsdu ba'i dngos po bzhi la yun ring po nas yongs su sbyong bar mdzad pa/ mi 'jigs pa bzhis bsnyengs pa mi mnga' ba/ yan lag lnga spangs pa 'gro ba lnga las yang dag par 'das pa/ yan lag drug dang ldan pa/ pha rol tu phyin pa drug yongs su rdzogs pa/ rtag tu gnas pa drug gis gnas pa/ byang chub kyi yan lag bdun gyi me tog gis phyug pa/ lam gyi yan lag brgyad ston pa/ mthar gyis gnas pa'i snyoms par 'jug pa dgu la mkhas pa/ stobs bcu'i stobs dang ldan pa/ phyogs bcu'i snyan pas yang dag par rgyas pa/ brgya phrag bcur dbang bsgyur ba las khyad par du 'phags pa 'khor nyan thos chen po tshe dang ldan pa lteng rgyas 'od srungs dang / ga ya 'od srungs dang / chu klung 'od srungs la sogs pa sngon gyi ral pa can stong dang / tshe dang ldan pa shA ri'i bu dang / maud gal gyi bu chen po la sogs pa dge slong gi dge 'dun mang pos mdun du bdar te/ ser skya'i gnas ga la ba der rgyu zhing gshegs so/ /de'i tshe rgyal po zas gtsang gis nyi ma bdun pa la grong khyer ser skya'i gnas thams cad rdo ba dang / gseg ma dang gyo mo med par byas te/ bdug pa dang phye ma 'khrigs pa dang / me tog sna tshogs bkram pa dang / rgyal mtshan dang ba dan bsgreng ba la sogs pa mchod pa'i yo byad rgya chen po dag bshams shing / n+ya gro d+ha'i kun dga' ra bar sa phyogs go skabs yangs par gdan thabs zla gam lta bur bshams te/ n+ya gro d+ha'i kun dga' ra ba nas grong khyer ser skya'i gnas kyi bar gyi lam thams cad mdzes shing rdo ba dang / gseg ma dang gyo mo med par byas te/ spos chu'i chag chag btab cing / bar bar du dar gyi chun po mang po dbyangs te/ me tog gi tshogs dag kyang bshams/ bdug spos dri zhim po'i du ba 'khrigs pa dang / me tog sna tshogs bkram pa dang / rgyal mtshan dang ba dan bsgreng ba dag rnam par gzhag go/ /rgyal po zas gtsang nyid kyang rgyal po'i 'byor pa chen po dang / rgyal po'i mthu chen pos n+ya gro d+ha'i kun dga' ra ba na 'di lta ste/ bcom ldan 'das la sdod cing 'dug go/ /de nas bcom ldan 'das mthar gyis rgyu zhing gshegs pa na chu klung ro ha ka'i 'gram du gshegs so/ /de na dge slong kha cig ni lag pa dang rkang pa dag 'khru bar byed/ kha cig ni so shing 'dor bar byed/ kha cig ni chu 'tshags par byed/ kha cig ni khrus byed do/ /grong khyer ser skya'i gnas na 'khod pa'i shAkya rnams kyis gzhon nu don thams cad grub pa 'ongs shing / rgyal po zas gtsang gis n+ya gro d+ha'i kun dga' ra bar sa phyogs go skabs yangs par gnas mal bshams zhes thos so/ / thos nas kyang shAkya 'bum phrag du ma dag n+ya gro d+ha'i kun dga' ra ba na 'dus par gyur cing de na kha cig ni sngon gyi dge ba'i rtsa ba dag gis bskul zhing lhags so/ /kha cig ni ya mtshan skyes te ji ltar dang por yab kyis sras kyi zhabs la phyag bzhes par mdzad dam/ 'on te sras kyis yab kyi zhabs la phyag bzhes par mdzad pa lta'o snyam pas lhags so/ /de nas bcom ldan 'das 'di snyam du dgongs te/ gal te de bzhin gshegs pa zhabs kyis ser skya'i gnas su gshegs na shAkya nga rgyal can dag gzhon nu don thams cad grub pas chen po ma rnyed de/ 'di ltar 'di sngon byang chub sems dpar gyur pa na grong khyer ser skya'i gnas nas lha 'bum phrag du mas bsu zhing steng gi nam mkha' las byung ste/ song na da 'dis bla na med pa'i ye shes rtogs kyang rkang pas 'ongs so zhes ma dad pa skye bar 'gyur bas bdag rdzu 'phrul gyis ser skya'i gnas su 'jug par bya'o snyam du dgongs shing rig nas/ dge slong rnams la bka' stsal pa/ dge slong dag khyed ni rkang pa dag gis chu klung ro ha ka rgol cig /de bzhin gshegs pa ni rdzu 'phrul gyis gshegs so/ /dge slong rnams kyis btsun pa bka' bzhin 'tshal zhes bcom ldan 'das kyi bka' mnyan nas rkang pa dag gis chu klung ro ha ka rgal te n+ya gro d+ha'i kun dga' ra ba ga la ba der song ngo / /de nas bcom ldan 'das kyis dge slong gi dge 'dun song nas ring po ma lon par thugs su chud nas ting nge 'dzin la snyoms par zhugs te/ rdzu 'phrul gyis chu klung ro ha ka'i pha rol gyi 'gram nas mi snang bar gyur cing / steng gi nam mkha' la ngang pa'i rgyal po 'dab ma brkyang ba ltar mngon par 'phags nas grong khyer ser skya'i gnas kyi steng nas n+ya gro d+ha'i kun dga' ra ba der gshegs te byon nas/ n+ya gro d+ha'i kun dga' ra ba'i steng gi nam mkha' la skyil mo krung bcas te bzhugs so/ /de nas bcom ldan 'das shar phyogs su spyod lam bzhi po 'di lta ste/ bzhud pa dang / bzhengs pa dang / bzhugs pa dang / mnal ba dag mdzad do/ /cho 'phrul zung dag kyang rnam par ston par mdzad de/ sku'i smad nas me 'bar zhing sku'i stod nas chu grang mo'i rgyun 'bab par mdzad do/ /sku'i stod nas me 'bar zhing sku'i smad nas chu grang mo'i rgyun 'bab par mdzad do/ /me'i khams la yang snyoms par 'jug par mdzad de/ sangs rgyas bcom ldan 'das me'i khams la snyoms par zhugs pa'i sku las 'od zer sna tshogs 'di lta ste/ sngon po dag dang / ser po dag dang / dmar po dag dang / dkar po dag dang / bcod ka dag dang / shel dang dngul gyi kha dog lta bu dag byung ngo / /shar phyogs su ji lta ba bzhin du lho phyogs dang / nub phyogs dang / byang phyogs su yang de bzhin te/ de ltar phyogs bzhir rdzu 'phrul gyi cho 'phrul rnam pa bzhi ston par mdzad do/ /de nas bcom ldan 'das 'di snyam du dgongs te/ gal te de bzhin gshegs pas rgyal po zas gtsang gi rkang pa gnyis la gtugs par gyur na ni de'i spyi bo tshal pa bdun du 'gas par gyur la/ gal te rgyal po zas gtsang gis de bzhin gshegs pa'i zhabs gnyis la gtugs par gyur na ni/ shAkya nga rgyal can dag ci'i phyir y ab tu gyur pas sras kyi rkang pa gnyis la gtugs par byed ces ma dad pa skye bar 'gyur bas bdag gis ji nas kyang rgyal po zas gtsang gis lus ma btud bzhin du de bzhin gshegs pa'i zhabs gnyis la phyag 'tshal bar 'gyur ba de lta bu'i rdzu 'phrul mngon par 'du bya ba mngon par 'du bya'o snyam du dgongs par rig nas/ ta la bdun srid tsam gyi steng gi nam mkha' la gzhes shing ta la drug dang / lnga dang / bzhi dang / gsum dang / gnyis dang / gcig srid tsam na gzhes so/ /de nas skyes bu bdun srid tsam na gzhes shing skyes bu drug dang / lnga dang / bzhi dang / gsum dang / gnyis dang / gcig srid tsam na gzhes so/ /de nas rgyal po zas gtsang gis lus ma btud bzhin du de bzhin gshegs pa'i zhabs gnyis la mgo bos phyag 'tshal nas shAkya rnams la go bar bya ba'i phyir de'i tshe tshigs su bcad pa smras pa/ gang tshe khyod bltams dogs rab g.yos dang / /'dzam bu'i grib mas khyod sku ma btang dang / /'di dang lan gsum kun gzigs mkhyen ldan pa/ /sangs rgyas khyod kyi zhabs la bdag phyag 'tshal/ /de nas bcom ldan 'das kyis rdzu 'phrul mngon par 'du mdzad pa de slar bsdu ba mdzad nas/ n+ya gro d+ha'i kun dga' ra bar gshegs te/ dge slong gi dge 'dun gyi gung la gdan bshams pa nyid la bzhugs so/ /de nas rgyal po zas gtsang dang / bre bo zas dang / zas dkar dang / bdud rtsi zas dang / shAkya 'bum phrag du ma dag gis bcom ldan 'das kyi zhabs gnyis la mgo bos phyag 'tshal te/ mtha' gcig tu 'khod do/ /shAkya kha cig ni bcom ldan 'das ga la ba de logs su thal mo sbyar te mtha' gcig tu 'khod do/ /shAkya kha cig ni thag ring po kho na nas bcom ldan 'das mthong nas cang mi smra bar mtha' gcig tu 'khod do/ /de nas rgyal po zas gtsang gis bcom ldan 'das la tshigs su bcad pa'i skad kyis phan tshun kun dga' ba'i gtam mang po zhu ba zhus nas/ bcom ldan 'das kyis de'i yi rangs par mdzad do/ /de nas rgyal po zas gtsang 'di snyam du sems te/ bdag gi bus yon tan gyi tshogs 'di lta bu rtogs pa ni bdag gis rnyed pa legs par rnyed do snyam mo/ /de nas bcom ldan 'das kyis rgyal po dang / skye bo phal po che'i tshogs de'i bsam pa dang bag la nyal ba dang khams dang rang bzhin thugs su chud nas de'i nyin mo rgyal po zas dkar la sogs pa shAkya bdun khri bdun stong gis bden pa dag mthong bar gyur pa de ltar chos bstan pa mdzad do/ /nyi ma gnyis pa la skyed mos tshal skye yod du rgyal po bre bo zas la sogs pa shAkya bdun khri drug stong gis bden pa dag mthong bar gyur pa de ltar chos bstan pa mdzad do/ /nyi ma gsum pa la/ skyed mos tshal tshangs pa'i gnas su rgyal po bdud rtsi zas la sogs pa shAkya bdun khri lnga stong gis bden pa dag mthong bar gyur pa de ltar chos bstan pa mdzad do/ /nyi ma bzhi pa la rgyal po zas gtsang gi sems ha cang zhum pa dang / ha cang mtho ba'i sgrib pa lha la chos kyi 'khor lo bskor ba dang / tshe dang ldan pa maud gal gyi bu rdzu 'phrul bstan pas bsal nas stan de nyid la 'dug bzhin du 'jig tshogs la lta ba'i ri'i rtse mo nyi shu mtho ba ye shes kyi rdo rjes bcom ste/ rgyun du zhugs pa'i 'bras bu mngon sum du byas pa de ltar chos bstan pa mdzad do/ /de nas rgyal po zas gtsang gis bden pa mthong nas/ zas dkar dang / bre bo zas dang / bdud rtsi zas la rgyal srid bstabs na de dag kyang sngar bden pa mthong zin pas rgyal srid nod du ma btub nas shAkya gzhon nu bzang ldan rgyal srid kyi bdag por dbang bskur to/ /de'i tshe na bcom ldan 'das nyan thos kyi dge 'dun dang bcas pa nyin gcig mi 'chad bar rgyal po'i pho brang du gdugs tshod gsol ba dang / rgyal po zas gtsang gis tshe dang ldan pa lteng rgyas 'od srungs la sogs pa ral pa can las rab tu byung ba dka' thub kyis lus mi sdug par snang ba dag mthong ngo / /mthong nas kyang de 'di snyam du sems te/ bdag nyid chen po 'di dag sems ni bzang ba yin na lus mi bzang ste/ dka' thub drag po dag gis lus mi sdug par snang ba dag yin no/ /bcom ldan 'das kyi 'khor ni bcom ldan 'das nyid ci 'dra bar 'khor yang de 'dra ba nyid du gyur na de lta na bcom ldan 'das mdzes par 'gyur ro snyam mo/ /de nas rgyal po zas gtsang gis shAkya rnams bsdus te smras pa/ shes ldan dag gal te gzhon nu don thams cad grub pa rab tu ma byung bar gyur na cir 'gyur/ lha 'khor los sgyur ba'i rgyal por 'gyur ro/ /khyod kyi bu dag cir 'gyur/ lha zham ring bar 'gyur ro/ /'o na da gzhon nu don thams cad grub pas bdud rtsi thugs su chud de/ bdud rtsis 'gro ba tshim par mdzad na khyod kyi bu dag ci'i phyir zham ring mi byed/ lha ci lags de dag rab tu dbyung ngam/ rab tu phyung shig /lha shAkya'i rgyud chad par 'gyur ro/ /rgyal pos smras pa/ khyim re re nas re re rab tu phyung shig /lha bka' stsal pa bzhin 'tshal lo/ /rgyal po zas gtsang gis shAkya gzhon nu rnams kyi khyim re re nas re re byung bar bya'o zhes dril bsgrag par byas so/ /gang gi tshe rgyal po zas gtsang gis dril bsgrags pa de'i tshe na bzang ldan dang / ma 'gags pa dang / nam gru la sogs pa shAkya gzhon nu lnga brgya rab tu byung ngo / /gang gi tshe bcom ldan 'das kyis shAkya gzhon nu lnga brgya rab tu byung ba de'i tshe na bcom ldan 'das kyis 'di lta ste/ rigs mthon po las rab tu byung ba ni rnyed pa phyed dang nye ba yin no zhes gsungs pas de dag la rnyed pa dang bkur sti chen po byung bar gyur to/ /bcom ldan 'das kyis dgongs pa/ rigs kyi bu 'di dag gzhan gyi phyir kho nar rab tu byung ba yin no gzhan kho na 'chags so snyam du dgongs nas/ de nas bcom ldan 'das de dag la rnyed pa dang / bkur sti byung ba gcad par bzhed nas/ ser skya'i gnas su ci dgyes par bzhugs nas mnyan yod ga la ba der gshegs te/ mthar gyis rgyu zhing gshegs pa na mnyan yod du byon nas/ mnyan yod na rgyal bu rgyal byed kyi tshal mgon med zas sbyin gyi kun dga' ra ba na bzhugs so/ /de nas tshe dang ldan pa 'char ka snga dro sham thabs bgos/ lhung bzed dang chos gos thogs te/ mnyan yod du bsod snyoms la zhugs nas mthar gyis mnyan yod du bsod snyoms la rgyu ba na khyim bdag gi chung ma sbed ma'i khyim ga la ba der song ngo / /khyim bdag gi chung ma sbed mas tshe dang ldan pa 'char ka thag ring po kho na nas mthong ngo / /mthong nas kyang brang brdungs te smras pa/ 'char ka ci'i slad du khyod kyis bdag sbed ma spangs te rab tu 'byung / 'char kas smras pa/ byang chub sems dpas btsun mos 'tsho ma dang grags 'dzin dang / ri dgas skyes la sogs pa bud med drug khri spangs te rab tu byung ba ni shin tu dka' ba yin gyi/ rdul gyi rdzab dang 'dra ba khyod la mi bra ba ci yod/ 'char ka bdag kyang rab tu 'byung ngo / /de ltar gyis shig /de nas 'char ka 'di snyam du sems te/ sngon yang bdag cag lhung bzed nag po can rnams kyis brnyas par gyur pas/ gal te bdag gis dge slong ma rab tu phyung bar gyur na/ drug sde dag gis dge slong ma rab tu phyung ngo zhes rgya cher brnyas par 'gyur gyi bdag ni re zhig rgyal po'i khab tu song ste/ der dbyar gnas par khas blangs la sbed ma ni ji nas kyang skye dgu'i bdag mo chen mo gau ta mIs rab tu 'byin cing bsnyen par rdzogs par byed par 'gyur bar bya'o snyam nas/ 'char ka rgyal po'i khab tu song ste/ dbyar gnas par khas blangs pa de'i tshe sbed ma mnyan yod du skye dgu'i bdag mo chen mo gau ta mIs rab tu byung bsnyen par rdzogs par byas so/ /de nas mnyan yod na rgan zhugs shig rgyal po'i khab tu song bas/ 'char ka la sbed ma rab tu byung ba'i gtam brjod pa dang / 'char ka yang sbed ma de gzhan dag gis kha drangs su dogs pas/ myur ba myur ba kho nar mnyan yod du 'ongs te rang gi gtsug lag khang du zhugs so/ /de'i tshe na dge slong ma rgyal byed kyi tshal du 'dun pa 'bul du dong ba rnams kyis 'char ka 'ongs par thos nas sbed ma la sbran pa dang / sbed mas nas kyi ngar phye dang / khrus kyi chal dang / 'bru mar thogs te 'char ka'i gtsug lag khang du song nas sgo brdungs so/ /'char kas smras pa/ de su yin/ sbed mas smras pa/ bdag sbed ma'o/ /khyim bdag gi chung ma sbed ma 'ongs pa legs so legs so/ /bdag da dung yang khyod khyim bdag gi chung ma lags snyam mam/ 'o na ci yin bdag rab tu byung ngo / /khyod sus rab tu phyung / 'phags ma skye dgu'i bdag mo chen mo gau ta mIs so/ /sbed mas ci'i phyir kho bo bdag nyid kyi lag pa la sos 'debs par byed dam/ skye dgu'i bdag mo chen mo gau ta mIs khyod rab tu phyung yang rung kho bos rab tu phyung yang rung ste/ legs kyi nang du zhugs shig dang chos bstan par bya'o/ /sbed ma nang du zhugs te 'char ka'i rkang pa gnyis la phyag 'tshal te chos nyan par bya ba'i phyir mdun du 'dug go/ /des de la chos bstan par brtsams te/ des de la ji tsam pa de tsam du chos bstan nas/ sngon gyi bgad ba dang dga' bar byed pa dang / rtses pa dang / dga' mgur spyad pa dran par bya bar brtsams te/ sbed ma bdag cag gnyis kyis skyed mos tshal dang / lha'i gnas ga ge mo zhig tu zas 'di dang 'di lta bu zos pa dang / bca' ba 'di dang 'di lta bu 'chos pa dang / btung ba 'di dang 'di lta bu 'thungs pa gang yin pa de dran nam zhes smras pa dang / 'char ka kun du chags par gyur to/ /ji lta ji ltar kun du chags par gyur pa de lta de ltar dral lo/ /sbed mas 'char ka chags so snyam du shes nas smras pa/ slad rol du mchis te slad mchi'o/ /'char kas bsams pa/ 'di bshad pa'am gci ba byed 'dod gor ma chag snyam nas smras pa song shig / sbed ma phyir byung bas shing nga dpung bcad brdzes te/ brgyug par brtsams pa dang / 'char ka sgra la mkhas pas/ des de'i ting sgra thos nas phyir byung ste/ dge sbyong ma mgo reg ma gar bros zhes des de'i phyi bzhin brgyug par brtsams pa dang / de la brla'i reg pas khu ba byung nas/ de kun nas dkris pa dang bral te/ glang po che chags pa dang bral ba bzhin du gzhi de nyid na 'dug go/ /sbed mas de kun nas dkris pa dang bral zhing phyir log pa mthong nas drung du song ste smras pa/ 'phags pa gal te bdag gis dang du blangs par gyur na bdag kyang dge slong ma nyid du mi rung la khyod kyang dge slong nyid du mi rung bar 'gyur ro/ /sring mo bcom ldan 'das kyis kyang bdag srung na gzhan srung bar byed la/ gzhan srung na bdag nyid srung bar byed do zhes gsungs pa legs so/ /'phags pa sham thabs 'di tshur stsol bkru bar bgyi'o/ /'char kas sham thabs de sbed ma la byin no/ /sbed mas khu ba de mthong nas 'gyod pa skyes te/ bdag gi lus kyi phyogs btsun pa 'char kas sngon ma mthong ba'am/ ma mnams pa'am/ ma byugs pa ji zhig yod na/ bdag gis dang du ma blangs pa ni ma legs pa zhig byas so snyam du 'gyod pa skyes so zhes sbed ma de ltar rnam par rtog pa na de kun du chags shing dral bar gyur pa'i sems kyis khu ba de rang gi mngal gyi sgor blugs so/ /sems can rnams kyi las kyi rnam par smin pa bsam gyis mi khyab pas de la sems can zhugs par gyur to/ /dge slong ma rnams kyis mthong nas smras pa/ sbed ma kho mo cag ko khyod chos bzang po'i chos kyis 'phags pa 'char ka'i gan du 'gro bar sems kyi kho mo cag des khyod gnas skabs 'di lta bu byas par mi sems so/ /sbed mas smras pa/ phu nu mo dag dge slong de ni tshul khrims dang ldan pa yin te/ gang tshun chad rab tu byung nas/ de kho mo sngon chad lan 'ga' yang lag gis kyang ma byugs so/ /de dag gis smras pa/ ma byugs na yang des khyod gnas skabs 'di 'dra bar byas na/ gal te byugs na des khyod gnas skabs ji lta bur byas par 'gyur zhes zer ba'i skabs de dge slong ma rnams kyis dge slong rnams la brjod do/ /dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ dge slong dag dge slong ma de ni pham par ma gyur gyi/ 'di ltar sa phyogs dben par gzhag ste bsod snyoms kyis brel ba med par gyis shig dang / bu 'od srungs gzhon nu zhes bya ba btsa' bar 'gyur zhing de nga'i bstan pa la rab tu byung nas nyon mongs pa thams cad spangs pas dgra bcom pa nyid mngon sum du byed par 'gyur te/ 'di lta ste/ dge slong 'od srungs gzhon nu de ni nga'i gtam sna tshogs dang / gtan snyan pa dang / spobs pa dge ba can rnams kyi mchog tu 'gyur ro/ /bcom ldan 'das kyis dgongs pa dge slong rnams kyi nyes dmigs gang yin pa de ni dge slong ma nye du ma yin pa la gos rnying pa 'khrur 'jug pa las gyur pa yin no snyam nas de nas bcom ldan 'das kyis byung ba 'di dang / gleng gzhi 'di dang / gnas skabs 'di la dge slong gi dge 'dun bsdu ba mdzad de/ 'char ka la rmas nas rnam grangs du mar smad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang dge slong ma nye du ma yin pa la gos rnying pa 'khrur 'jud dam/ 'tshed du 'jud dam/ 'chag tu 'jud na spang ba'i ltung byed do zhes bca' ba mdzad de/ yul ni mnyan yod/ gang zag ni 'char ka /nyon mongs pa ni 'dod chags nyes pa ni dge slong ma nye du ma yin pa la gos rnying pa 'khrur 'jug pa'o/ /de la yang dge slong gang zhes bya ba ni 'char ka'am/ gzhan yang de lta bu gang yin pa'o/ /dge slong ma zhes bya ba ni chos 'di pa'o/ /nye du ma yin pa la zhes bya ba ni phyi mo dang / mes po dang / phrugs la brten pa'i bdun pa tshun chad ni nye du yin la de phan chad ni nye du ma yin no/ /gos zhes bya ba ni bdun po bal gos dang / sha na'i gos dang / zar ma'i gos dang / du gu la'i gos dang / ras bal gyi gos dang / ko tam pa'i gos dang / nyi 'og gi gos dag las gang yang rung ba'o/ /rnying pa zhes bya ba ni dus tshigs gsum po dag las dus tshigs gang yang rung bar spyad pa gang yin pa'o/ /'khrur 'jud dam zhes bya ba ni tha na chur smyug pa byed du 'jud na'o/ /'tshed du 'jud dam zhes bya ba ni tha na tshon du smyug pa byed du 'jug na'o/ /'chag tu 'jug na zhes bya ba ni tha na thal mos rdebs pa byed du 'jug na'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung pa med pa dang / bslab par bya ba dang phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni dge slong gis byin gyis brlabs pa dang rang gi rnying pa 'khrur gzhug par 'os pa chos gos dang gding ba dag las 'ga' zhig dge slong ma nye du ma yin pa la bsgo bas 'khrur bcug gam/ 'tshed du bcug gam 'chag tu bcug pa dag byas pa nyid ni 'khrur 'jug pa'i spang ba'i ltung byed kyi dngos gzhir 'gyur ro/ /'khru ba dang 'tshed pa dang 'chag pa rigs mi mthun pa'i tshigs rnams dang / de dag grub pa'i mtha' man chad bar skabs su chad pa'i tshigs rnams la ltung ba re rer rnam par mi gzhag par spyir dngos gzhi'i 'bras bu gcig rnam par gzhag go/ /dge slong la 'khrur 'jug pa'i spang ba'i ltung byed byung na de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par gos 'khrur gzhug pa dang / 'tshed du gzhug pa dang / 'chag tu gzhug par 'os pa de lta bu gzhan zhig rnyed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis 'khrur 'jud pa'i spang ba'i ltung ba byung la ji srid du spang ba'i dngos po las ma bshags shing so sor ma bshags par lhung bzed dam/ chos gos sam/ dra ba'am/ phor bu'am/ ska rags sam/ dge slong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /gos kyi grwa la sogs pa phyogs gcig la byas pa dang / 'khru ba la sogs pa las kyi phyogs gcig pa byas pa lan smad pa med do/ /gos kyi rdzas bzang ngan dang mnyam pa la na smad pa med do/ /gos rung ba nyid dang / chos gos dang / gding ba tshad dang ldan pa dang / tshad las lhag pa la na smad pa med do/ /dge slong ma nye du ma yin pa bsnyen par rdzogs pa ma nyams pa la na smad pa med do/ /bshang ba dang / gci ba dang / ljan ljin dang / 'dam rdzab la sogs pas ma rungs par gyur pa 'khru ba dang / 'tshed pa dang / 'chag tu 'jug pa la na smad pa med do/ /'di'i byed pa po ni gos dang dge slong ma nye du ma yin pa'i yul la 'du shes gtso cher byed pa po nyid yin no/ /'di la yan lag brgyad kyis dngos gzhi'i ltung bar 'gyur te/ byin gyis brlabs pa dang / rang gi dang / rnying pa dang / 'khrur gzhug par 'os pa dang / gos dang / dge slong ma nye du ma yin pa dang / bsgo ba dang byas pa'o/ /de dag las yan lag ma tshang na ci rigs par na smad pa med do/ /'di'i byed pa po ni dge slong ma nye du ma yin pa'i yul la 'du shes gtso cher byed pa po nyid yin no zhes smos pas ltung ba 'di dang 'og ma dag gi yan lag ni nye du dang nye du ma yin pa dag yin pas de'i phyir da 'dir nye du'i mtshan nyid brjod par 'dod nas/ sngar lung nyid las nye du ma yin pa la zhes bya ba ni phyi mo dang / mes po dang phrugs la brten pa'i bdun pa tshun chad ni nye du yin la/ de phan chad ni nye du ma yin no zhes gsungs pa'i rjes su 'brang bas pha ma dag gi bdun pa tshun chad las gang yang rung ba gcig tu sngan chad gyur pa yang nye du yin no zhes bya ba smras te pha ma dag ces bya ba ni pha dang ma ni pha ma dag go/ /de bas na pha ma dag gi bdun pa tshun chad ces bya ba ni pha'i phrugs bdun pa tshun chad dang / ma'i phrugs bdun pa tshun chad ces bya ba'i tha tshig go/ /mdo las pha ma zhes bya ba smos pa'i sgra ni pha'i rgyud ma'i yan lag dang bcas pa dang / de bzhin du ma'i rgyud pha'i yan lag dang bcas pa zhes bya bar sbyar ro/ /de ltar na pha'i pha dang pha de'i yang pha dang / de lta bu la sogs pa ni pha'i rgyud do/ /pha de'i ma gang yin pa dang / ma de'i yang ma dang / de lta bu la sogs pa ni pha'i rgyud ma'i yan lag dang bcas pa'o/ /de bzhin du ma'i ma dang / ma de'i yang ma dang / de lta bu la sogs pa ni ma'i rgyud do/ /ma de'i pha gang yin pa dang / pha de'i yang pha dang / de lta bu la sogs pa ni ma'i rgyud pha'i yan lag dang bcas pa yin par rig par bya'o/ /de ltar byas na pha'i rgyud kyang ma'i yan lag dang bcas pa yin pa'i phyir phrugs su gyur pa yin la/ de bzhin du ma'i rgyud kyang pha'i yan lag dang bcas pa yin pa'i phyir phrugs su gyur pa yin no/ /pha ma dag gi phrugs su gyur pa bdun pa tshun chad las pha'i rgyud ma'i yan lag dang bcas pa phrugs su gyur pa dag gam/ ma'i rgyud pha'i yan lag dang bcas pa phrugs su gyur pa dag las gang yang rung ba pha'i rgyud ma'i yan lag dang bcas pa'am/ ma'i yan lag dang bcas pa gcig tu sngan chad gyur pa ste/ pha'i rgyud du sngan chad gyur pa'am/ ma'i yan lag dang bcas pa sngan chad gyur pa'am/ ma'i rgyud du sngan chad gyur pa'am/ pha'i yan lag dang bcas par sngan chad gyur pa de ni nye du zhes bya'o/ /yang zhes bya ba'i sgra ni gnyi gar sngan chad gyur pa 'ba' zhig nye du yin par ma zad kyi gcig tu sngan chad gyur pa yang nye du yin par ston to/ /'di skad bstan te/ 'dir nye du zhes bya ba ni sngan chad pha'i rgyud ma'i yan lag dang bcas pa'am/ ma'i rgyud pha'i yan lag dang bcas pa'am/ gnyi ga'i rigs grangs bdun pa tshun chad du skyes pa de yin no/ /ji skad smras pa las gzhan pa ni nye du ma yin no/ /des na pha'i rgyud la ni pha dang mes po dang yang mes dang / sum mes dang / bzhi mes dang / lnga mes dang / drug mes tshun chad du sngon chad gyur pa ni nye du yin la/ de phan chad ni nye du ma yin no/ /pha'i rgyud ma'i yan lag dang bcas pa la ni pha dang phyi mo dang / yang phyi dang / sum phyi dang / bzhi phyi dang / lnga phyi dang / drug phyi tshun chad du sngon chad du gyur pa ni nye du yin la de phan chad ni nye du ma yin no/ /ma'i rgyud la ni ma dang / ma phyi dang ma rgyud yang phyi dang / ma rgyud sum phyi dang ma rgyud bzhi phyi dang / ma rgyud lnga phyi dang / ma rgyud drug phyi tshun chad du sngan chad gyur pa ni nye du yin la de phan chad ni nye du ma yin no/ /ma'i rgyud pha'i yan lag dang bcas pa la ni ma dang / ma mes dang / ma rgyud yang mes dang / ma rgyud sum mes dang / ma rgyud bzhi mes dang / ma rgyud lnga mes dang / ma rgyud drug mes tshun chad du sngan chad gyur pa ni nye du yin la de phan chad ni nye du ma yin no/ /de la 'khor lo bzhin du sbyar na pha'i rgyud las drug mes spun tshun chad dang / pha'i rgyud ma'i yan lag dang bcas pa las kyang drug phyi spun tshun chad dang ma'i rgyud las kyang ma rgyud drug phyi spun tshun chad dang / ma'i rgyud pha'i yan lag dang bcas pa las kyang ma rgyud drug mes spun tshan chad kyi rus dang / snag gi pho smos kyi rgyud thams cad ni nye du yin la/ de phan chad ni nye du ma yin no/ /bu rgyud dang / spun rgyud dang / bu mo'i rgyud dang / sring mo'i rgyud du phyin chad gyur pa las kyang / bu dang bu rgyud tsha bo dang / yang tsha dang / sum tsha dang / bzhi tsha dang / lnga tsha dang / drug tsha tshun chad dang / spun rgyud kyi bu dang / tsha bo dang / yang tsha dang / sum tsha dang / bzhi tsha dang / lnga tsha dang / drug tsha tshun chad dang / bu mo dang bu mo'i rgyud kyi tsha bo dang / yang tsha dang / sum tsha dang / bzhi tsha dang / lnga tsha dang / drug tsha tshun tshad dang / sring mo'i rgyud kyi bu dang / tsha bo dang yang tsha dang / sum tsha dang / bzhi tsha dang / lnga tsha dang drug tsha tshun chad kyi rus dang / snag gi pho smos kyi rgyud thams cad nye du yin la de phan chad ni nye du ma yin no/ /de la pha'i rgyud ma'i yan lag dang bcas pa dang / ma'i rgyud pha'i yan lag dang bcas pa'i bdun rgyud ni sngan chad der gyur pa yin la/ bu dang spun dang bu mo dang sring mo'i rgyud kyi bdun rgyud ni phyin chad der 'gyur ba yin te da ltar bdag nyid yod pa la ltos pas bdag nyid ma gtogs par pha dang ma nas phyi mes gyen du bgrangs pa'i bdun pa man chad dang / bu dang bu mo dang / spun dang / sring mo'i bu dang / bu mo nas thur du bgrangs pa'i bdun pa yan chad dang / thad kar pha'i rgyud kyi drug mes spun tshun chad kyi ming sring dang / pha'i rgyud ma'i yan lag dang bcas pa'i drug phyi spun tshun chad kyi me'u'i ming sring dang / ma'i rgyud kyi drug phyi spun tshun chad kyi me'u'i ming sring dang / ma'i rgyud pha'i yan lag dang bcas pa'i drug mes spun tshun chad kyi zhang po dang / sru mo dang / bdun ni tsha bo'i tsha bo dang / tsha mo tshun chad kyi rus dang / snag gi pho smos kyi rgyud thams cad la nye du'i sde tshan gyi 'khor lo gcig tu brtsi'o/ / de ltar nye du dang nye du ma yin pa'i mtshan nyid bstan nas/ dge slong ma nye du ma yin pa'i yul la 'du shes gtso cher byed pa po yin no zhes smos par bstan pa'i phyir 'du shes gtso bo nyid la don ji lta ba nyid la ni dngos gzhi'o/ /don ji lta ba nyid ma yin pa la ni dngos gzhi dang nye ba'o zhes bya ba gsungs te/ 'du shes gtso cher byed pa po yin no zhes gsungs pa'i skabs 'di la/ gal te 'du shes ji lta ba bzhin du don yang de lta bu nyid yin te/ dge slong ma nye du ma yin pa nyid du 'du shes shing / dge slong ma nyid kyang nye du ma yin pa nyid yin na/ dngos gzhi ste/ spang ba'i ltung byed nyid du 'gyur ro/ /gal te don ji lta ba nyid ma yin te/ dge slong ma ni nye du yin la 'du shes kyis ni nye du ma yin no snyam na dngos gzhi dang nye ba ste nyes byas su 'gyur ro/ /yid gnyis ni 'du shes dang 'dra ste/ dge slong ma nye du ma yin pa la yid gnyis za bas ni dngos gzhir 'gyur la/ dge slong ma nye du la yid gnyis za bas ni nyes byas su 'gyur ro/ /'di la yan lag brgyad kyis dngos gzhi'i ltung bar 'gyur te/ byin gyis brlabs pa dang / rang gi dang / rnying pa dang / 'khrur gzhug par 'os pa dang / gos dang / dge slong ma nye du ma yin pa dang / bsgo ba dang byas pa'o zhes sngar smos pa dang byin gyis brlabs pa'o zhes smos pa ni byin gyis ma brlabs pa 'khrur 'jug pa la sogs pa byas na nyes byas su bstan pa'i phyir te/ 'dir gzhung ni btsun pa re zhig dge slong gis chos gos spang ba 'khrur stsol na ltung ba cir 'gyur gal te ma spangs pa 'khrur 'jug na ni spang bar 'gyur ro/ /'on te spangs pa 'khrur 'jug na ni nyes byas su 'gyur ro zhes gsungs pa yin no/ /rang gi zhes smos pa ni gzhan gyi bsal ba'i phyir te/ 'dir gzhung ni btsun pa re zhig dge slong gis gzhan dbang ba'i chos gos 'khrur stsol na ltung ba cir 'gyur nyes byas su 'gyur ro zhes gsungs pa yin no/ /rnying pa zhes smos pa ni sar pa dgag pa'i phyir te/ 'dir gzhung ni rnying pa zhes bya ba ni dus tshigs gsum po dag las/ dus tshigs gang yang rung bar spyad pa gang yin pa'o zhes gsungs pa yin no/ /de yang mtshon pa yin par rig par bya ste/ gal te ji srid spyad kyang rung / mi gtsang ba la sogs pas gos pa 'khrur gzhug par 'os pa ni dus tshigs su ma spyad na yang spang bar 'gyur ba bskyed pa kho na'o/ /'dir gzhung ni btsun pa dge slong chos gos rung bas grong du zhugs shing de'i chos gos de yang lus las ma phud par de spang bar bgyi ba'i slad du 'byung bar 'gyur ba mchis sam/ nye ba 'khor yod de/ 'di lta ste/ khyim gyi nang du zhugs pa'i chos gos mi gtsang ba la sogs pas gos par gyur pa de dge slong ma nye du ma yin pa la 'khrur bcug na spang ba'i ltung byed du 'gyur ro zhes gsungs pa yin no/ /'khrur gzhug par 'os pa zhes smos pa ni de las bzlog pa la nyes byas su bstan pa'i phyir te/ 'dir gzhung ni btsun pa re zhig dge slong gis dge 'dun gyi chos gos 'khrur stsol na ltung ba cir 'gyur/ gal te gang zag gis spyad pas dri ma can du gyur pa yin na ni nyes byas su 'gyur ro zhes gsungs pa yin no/ /gos zhes smos pa ni chos gos dang gding ba ste/ de dag ma yin pa thams cad la nyes byas su bstan pa'i phyir te/ 'dir gzhung ni chos gos zhes bya ba ni bdun po bal gos dang / sha na'i gos dang / zar ma'i gos dang / du gu la'i gos dang / ras bal gyi gos dang / ko tam pa'i gos dang / nyi 'og gi gos dag las gang yang rung ba'o zhes gsungs pa yin no/ /dge slong ma nye du ma yin pa zhes smos pa ni de las bzlog pa na smad pa'i phyir ro/ /bsgo ba zhes smos pa ni mngags pa la sogs pa la nyes byas su bstan pa'i phyir te/ 'dir de gnyis kyi gzhung ni btsun pa re zhig dge slong gis dge slong ma nye du ma lags pa la mngags pas chos gos 'khrur stsol na ltung ba cir 'gyur/ nyes byas su 'gyur ro zhes gsungs pa yin no/ /byas pa'o zhes smos pa ni dge slong ma nye du ma yin pas bkru ba la sogs pa ma byas na nyes byas su bstan pa'i phyir te/ 'dir gzhung ni 'khrur 'jug pa dang / 'tshed du 'jug pa dang / 'chag tu 'jug pa dag byas na spang ba'i ltung byed du 'gyur ro zhes gsungs pa yin no/ /sbyor ba'i ltung ba ni nyes byas te/ ji srid du 'khrur 'jug pa'i spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /phyi rol pa'i rab tu byung ba dang ma chags pa dang nyams pa la nyes byas so/ /gos rung ba nyid ma yin pa dang / tshad pas chung ba la nyes byas so/ /byin gyis ma brlabs pa dang / gzhan gyi dang / sar pa dang / 'khrur gzhug par mi 'os pa dang / chos gos dang / gding ba ma yin pa dang / mngag pa la sogs pa dang dge slong mas ma byas pa dag la nyes byas so/ /nye du la nye du ma yin par 'du shes pa dang / nye du la yid gnyis za ba la nyes byas so/ /dre'u rngog dang khyim pa'i gos dang / sngas nang tshangs can dang / rung ba byas pa dang / spangs pa dang / dge 'dun gyi rnams la yang nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed do/ /sbyor ba nyes byas kyi sbyor ba'i sbyor ba yang nyes byas te/ nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /khyim pa'i rtags can mo la nyes byas phra mo'o/ /ltung ba med pa ni nye du la nye dur 'du shes pa la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du 'khrur 'jug pa'i spang bar 'gyur ba rnam pa thams cad mi bsten par bslab par bya'o/ /dge slong ma sbrum ma dben par gzhag go/ /der dge slong ma rnams kyis yal bar mi dor ro/ /de la zas sbyin par bya'o/ /dge 'dun gyi khrims su bya ba bsrung bar bya'o/ /glo bur du 'ongs pas kyang de las mi 'gal ba nyid du bya'o/ /yod dam med pa nyid dang / ji lta bur yongs su shes par bya ba'i phyir des de dri bar bya'o/ /ha cang yun mi ring bar te 'jug pa dang 'jug pa'i gnas btsal ba dang / rdzas gzhag pa dang / re zhig sdod pa de dag thams cad je dang por byas la de'i 'og tu khrims su bya ba dri bar bya'o/ /sangs rgyas kyis gsungs pa dge 'dun las g.yo ba med do/ /lhung bzed dang / chos gos dang / dra ba dang / phor bu dang / ska rags lhag pa 'bul ba na dge 'dun gyis nye bar gzhag pa'i don du blang bar bya'o/ /de ltar nye bar gzhag pa ni de med pa dag gis ji dgar bkur ro/ /phyir bcos pa ni snga ma bzhin no/ /'khrur 'jug pa'i spang ba ste bzhi pa bshad zin to// //so sor thar pa'i mdo rgya cher 'grel pa 'dul ba kun las btus pa/ bam po bcu gcig pa/ len pa'i spang ba'i gleng gzhi ni bcas pa dang gnang ba'i dbang gis rnam pa gnyis te/ bcas pa'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /gang gi tshe bcom ldan 'das kyis dge slong ma rnams dgon par gnas pa ma bkag pa de'i tshe na dge slong ma rnams kyang dgon pa'i gnas su dong ste/ bsam gtan dang / rnam par thar pa dang / ting nge 'dzin dang / snyoms par 'jug pa'i bde ba dag nyams su myong bar byed do/ /de nas dge slong ma ut+pala'i mdog 'khor lnga brgya dang nags mun pa can ga la ba der song ste phyin nas/ shing ljon pa zhig gi drung du brten te skyil mo krung phyed kyis 'dug nas bsam gtan dang / rnam par thar pa dang / ting nge 'dzin dang / snyoms par 'jug pa'i bde ba dag nyams su myong bar byed do/ /dge slong ma de dag phyi 'phreng mnyan yod du 'jug 'dod nas smras pa/ 'phags ma ut+pa la'i mdog bslang bar bya'o/ /kha cig gis smras pa/ 'phags ma ut+pa la'i mdog ni mthu che ba rdzu 'phrul che ba yin pas dang po kho nar dbyar khang du 'gro bar 'gyur ba'i gnas skabs kyang yod do zhes zer nas/ de dag gis de ma bslangs pa kho nar dang ngo / /ut+pa la'i mdog kyang phyi 'phred langs nas dge slong ma de dag thams cad dong bar mthong ba dang / des bsams pa/ cid 'gro'am 'on te 'di nyid du 'dug snyam nas/ de de nyid du 'gog pa la snyoms par zhugs so/ /chom rkun pa g.yon can lnga brgya tsam gyis chom rkun gyi las dag kyang byas nas nags mun pa can du lhags te/ de dag gis smras pa/ bdag cag las nyis brgya lnga bcus ni skal ba dag bgo bar byas te/ nyis brgya lnga bcus ni nags byul bar bya'o zhes de dag las nyis brgya lnga bcus ni skal ba dag bgo bar brtsams/ nyis brgya lnga bcus ni nags byul bar brtsams pa dang / de dag gis ut+pala'i mdog 'dug pa mthong ngo / /des na kha cig na re shes ldan dag 'di dag mtho yor zhig yin no zhes zer/ kha cig na re 'di ni mi zhig yin no zhes zer ro/ /kha cig na re 'di ni dge slong zhig yin no zhes zer ro/ /de na dge slong gi rgyus shes pa gcig 'dug pa des smras pa/ 'di ni dge slong ma zhig yin gyi/ dge slong ni ma yin no/ /ji ltar shes/ dge slong dag ni skyil mo krung gis 'dug la dge slong ma rnams ni skyil mo krung phyed kyis 'dug go/ /de dag ngo mtshar skyes nas shes ldan dag 'di lta bu'i nags 'jigs su rung ba'i nang na dge slong ma gcig pu mtshan mo gnas par khas blangs pa la ltos zhes zer ro/ /de dag dmag dpon gyi gan du dong ba dang / dmag dpon gyis de dag la dris pa/ shes ldan dag khyed kyis nags mun pa can 'di na ngo mtshar cung zad mthong ba yod dam/ mchis te 'di lta bu'i nags 'jigs su rung ba'i nang na dge slong ma gcig pu mtshan mo gnas par khas blangs pa mchis so/ /de bltas 'dong ngo zhes de dag de'i drung du dong ba dang / dmag dpon gyis dge slong ma ut+pa la'i mdog /gzugs bzang ba blta na sdug pa/ mdzes pa mthong ngo / /mthong nas kyang mngon par dad par gyur nas/ de mngon par dad pa skyes nas smras pa/ kye ma dge slong ma 'di gnyi ga nas bzang ba yin te/ mtshan mo zla nyi mo ltar 'dug pa gang yin pa dang / gzugs bzang ba blta na sdug pa mdzes pa gang yin pas so zhes de bslang bar brtsams pa dang / de dag gis smras pa/ ci'i phyir 'di slong bar byed/ zan sbyin par bya'o/ /dge slong gi rgyus shes pa gcig gis smras pa/ 'di ni dus ma yin par mi za'o/ /dmag dpon gyis smras pa/ ci'i phyir/ des smras pa/ 'dis dus ma yin pa'i zas spangs pa yin no/ /dmag dpon gyis smras pa/ kye ma dge slong ma 'di ni gnyi ga nas bzang ba yin te/ gzugs bzang ba blta na sdug pa mdzes pa gang yin pa dang / dus ma yin pa'i zas spangs pa gang yin pas so/ /yang smras pa 'di la chang blud par bya'o/ /dge slong gi rgyus shes pa des smras pa/ 'di ni myos par 'gyur ba'i ltung ba spangs pa yin no/ /dmag dpon gyis smras pa/ kye ma dge slong ma 'di ni gnyis ka nas bzang ba yin te/ gzugs bzang ba blta na sdug pa mdzes pa gang yin pa dang / myos par 'gyur ba'i ltung ba spangs pa gang yin pas so/ /yang smras pa/ kho bos yon gnas zhing 'di lta bu la bsod snyoms kyis bsgrub par ma nus so zhes des ras yug chen po la 'os pa cig dang / bsod snyoms kyi phud cig phul nas shing ljon pa'i yal ga la btags nas smras pa/ 'phags ma 'di ltar khyod la mi mkhyen pa dang / mi gzigs pa dang / mi rig pa dang / rnam par mi mkhyen pa ci yang mi mnga' bas bdag gis khyod la bsod snyoms dang na bza' 'di 'bul lo zhes smras te song ngo / /ut+pa la'i mdog nang par sngar langs pas skye bo phal po che'i rjen shul mthong nas/ des bsams pa dang / chom rkun pa g.yon can lnga brgya nye bar 'ongs par mthong nas/ smras pa/ mi mdzes pa 'ga' zhig rig par ma byas sam snyam nas 'ga' yang ma byas par mthong ngo / /shing ljon pa'i yal ga la ras yug chen dang bsod snyoms btags te gzhag pa mthong nas/ des bsams pa/ 'di ni dad par gyur pa rnams kyis dad pa'i dbang du byas pa yin no snyam nas des bsams pa/ gal te byin len stobs pa la bsdad na bya'am spre'us chud gsan par 'gyur bas bdag ni dge 'dun la bsod snyoms kyi phud 'bul ba yin la/ 'di ltar dge slong rnams la mi rung ba gang yin pa de ni dge slong ma rnams la rung ba yin la/ dge slong ma rnams la mi rung ba gang yin pa de ni dge slong rnams la rung ba yin pas bdag rang nyid kyis 'di khyer te/ dge 'dun la bsod snyoms kyi phud 'bul du 'gro'o snyam nas/ des de khyer te rgyal byed kyi tshal du song ngo / /drug sde rnams kyi kun du spyod pa ni drug sde las gang yang rung bas/ rgyal byed kyi tshal gyi sgo stong par mi 'jog pas nye dga' rgyal byed kyi tshal gyi sgo na 'chag cing 'dug pa des ut+pa la'i mdog mthong nas smras pa/ sring mo ci'i phyir nang par sngar mnyan yod kyi sgo dag phye ste 'ongs/ des smras pa/ bdag mnyan yod du ma mchis kyi/ bdag mdang sum nags mun pa can du mchis par khas blangs so/ /nye dgas smras pa/ nye dga' ni nyin mo nyid nags mun pa can du zhugs na yang spu dag gyen du 'greng bar 'gyur ro/ /sring mo khyer ba 'di ci yin/ des smras pa/ chom rkun pa lnga brgya tsam der mchis nas/ de dag dad par gyur pas bdag nyid la dad pa'i dbang du bgyis pa la stsal to/ /sring mo khyod ni chom rkun pas kyang dad par byas pa yin gyi/ gal te nye dga' de dag gis mthong du zin na lcag rgod mang pos brdabs te khur tsa bar khrid par 'gyur ro/ /'di ltar gang la ras yug chen 'di lta bu yod pa de ni gos sar pa las snam sbyar nyis rim du byas te/ sems las chung ngus dge ba'i phyogs la tron byed par 'gyur ro/ /'phags pa khyod ras yug chen 'di bzhed dam/ lha'i gnas kyi lhag ma bzhin du'o/ /'phags pa bdag gis dge 'dun la bsod snyoms kyi phud phul te slar mchis kyi bar du gzhes shig dang / de'i 'og tu khyod la ras yug chen gsol lo/ /nye dgas bsams pa/ lhung bzed nag po can 'ga' zhig gis 'di la bslangs pa dang / de la byin par 'gyur ro snyam nas/ sring mo bdag gis bsod snyoms kyi phud len pa dag khrid de 'ong gi / de'i bar du 'di nyid du sdod cig /nye dga' rgyal byed kyi tshal du zhugs pa dang / des dge slong bsod snyoms kyi phud len pa dag snying las chung ngur 'khod pa dag mthong nas des smras pa/ tshe dang ldan pa dag sbyin bdag gi khur gyis ngal zhing sdod la khyed cag ni 'dir snying las chung ngur 'khod na tshur sheg / bsod snyoms kyi phud longs shig /de dag gis gzhong bu thogs te dong ba dang / ut+pa la'i mdog gis de dag la bsod snyoms kyi phud phul nas ras yug chen sprugs te nye dga' la phul lo/ /nye dgas khyod sbyin pa 'dis sems kyi rgyan dang / sems kyi yo byad dang / rnal 'byor gyi tshogs dang / don gyi mchog dang / lha dang mi rnams kyi gos kyi mchog dag thob par gyur cig ces smras so/ /ut+pa la'i mdog gis bsams pa/ da dbyar khang du song ste ci rung / bcom ldan 'das kyi zhabs la phyag 'tshal te 'gro bar bya'o snyam nas/ des ut+pa la'i mdog bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te/ mtha' gcig tu 'dug go/ /de'i tshe ut+pa la'i mdog gi chos gos lnga ngan cing snam sbyar yang rnyings par gyur nas/ de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo dge slong ma rnams kyis dbyar gyi gos kyi rnyed pa ma grub sam/ btsun pa grub bo/ /'o na ci'i phyir dge slong ma ut+pa la'i mdog gi chos gos lnga ngan cing snam sbyar yang rnyings par gyur/ btsun pa sring mo 'di ni dad pa dang ldan zhing bzang la dge ba'i bsam pa can lags te/ 'dis sangs rgyas sam/ chos sam/ dge 'dun nam/ dge slong yid du 'thad pa dag la ma phul ba'am/ yongs su ma btang ba ci yang ma mchis te/ 'dis deng yang ras yug chen rnyed nas/ de yang 'dis btsun pa nye dga' la stsal to/ /kun dga' bo dge slong dag dge slong ma nye du ma yin pa las gos lhag ma len tam/ btsun pa len to/ /kun dga' bo dge slong ma nye du ma yin pa ni 'di snyam du 'di'i chos gos lnga tshang ngam/ 'on te ma tshang snyam du mi sems par 'di ltar thob bo cog len par byed kyi/ nye du la ni byin yang len par mi byed do/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo dge slong ma ut+pa la'i mdog la gtsug lag khang chen po nas chos gos lnga byin cig /tshe dang ldan pa kun dga' bos dge slong ma ut+pa la'i mdog la/ gtsug lag khang chen po nas chos gos lnga byin no/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ nye dga' la rmas nas rnam grangs du mar smad de/ bslab pa bca' ba'i phan yon bcu yang dag par gzigs pas/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang dge slong ma nye du ma yin pa las gos len na spang ba'i ltung byed do zhes bca' ba mdzad de/ yul ni mnyan yod/ gang zag ni nye dga'/ nyon mongs pa ni 'dod zhen/ nyes pa ni dge slong ma nye du ma yin pa las gos len pa'o/ /gnang ba'i gleng gzhi ni/ sangs rgyas bcom ldan 'das mnyan yod na/ rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na khyim bdag gcig 'dug pa des rigs mnyam pa las chung ma blangs te/ de de dang lhan cig tu rtse bar byed dga' bar byed dga' mgur spyod par byed do/ /de bdag gi khyim nor du ma dang ldan na/ bdag gis 'jig rten pha rol gyi lam brgyags cung zad kyang ma khyer ro snyam nas/ lag pa la 'gram pa gtad de sems khong du chud cing 'dug pa chung mas mthong nas smras pa/ rje'i sras khyod ci'i slad du lag pa la 'gram pa gtad de sems khong du chud cing bzhugs/ bzang mo kho bo'i khyim nor du ma dang ldan na bdag gis 'jig rten pha rol gyi lam brgyags cung zad kyang ma khyer te/ gal te bdag gis sangs rgyas la sogs pa dge slong gi dge 'dun bshos gsol te/ re re la ras bcos bu sar pa phrugs re re bskon na des bdag gis 'jig rten pha rol gyi lam brgyags khyer bar 'gyur ro/ /chung mas smras pa/ rje'i sras de bzhin mdzod cig /de nas khyim bdag de bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te mtha' gcig tu 'dug go/ /mtha' gcig tu 'dug nas/ bcom ldan 'das kyis khyim bdag de la chos dang ldan pa'i bka' mchid kyis yang dag par ston par mdzad/ yang dag par 'dzin du 'jug par mdzad/ yang dag par gzengs stod par mdzad/ yang dag par rab tu dga' bar mdzad de/ rnam grangs du mar chos dang ldan pa'i bka' mchid kyis yang dag par bstan/ yang dag par 'dzin du bcug / yang dag par gzengs bstod/ yang dag par rab tu dga' bar mdzad nas cang mi gsung ngo / /de nas khyim bdag de stan las langs nas/ bla gos phrag pa gcig tu byas te/ bcom ldan 'das ga la ba de logs su thal mo sbyar ba btud nas/ bcom ldan 'das la 'di skad ces gsol to/ /bcom ldan 'das sang bdag gi sdum par dge slong gi dge 'dun dang thabs cig tu gdugs tshod gsol bar ci gnang / bcom ldan 'das kyis khyim bdag de la cang mi gsung bas gnang ngo / /de nas khyim bdag des bcom ldan 'das kyis cang mi gsung bas gnang bar rig nas/ bcom ldan 'das kyis bka' stsal ba la mngon par dga' ba dang rjes su yi rang bar byas te/ bcom ldan 'das kyi zhabs gnyis la mgo bos phyag 'tshal nas/ bcom ldan 'das kyi spyan snga nas song ngo / /de nas khyim bdag des de nyid kyi mtshan mo bca' ba dang / bza' ba gtsang zhing bsod pa legs par spyad nas nang par sngar langs te/ gdan bshams nas chur bzhag ste/ bcom ldan 'das la spyan 'dren gyi/ btsun pa gdugs tshod sbyar ba'i dus lags na/ de bcom ldan 'das kyis de'i dus la bab par mkhyen par mdzad du gsol zhes gdugs tshod la spyan drangs so/ /de nas bcom ldan 'das snga dro sham thabs gsol lhung bzed dang chos gos bsnams te/ dge slong gi tshogs kyis yongs su bskor zhing / dge slong gi dge 'dun gyis mdun du bdar te/ khyim bdag de'i bkad sa ga la ba der gshegs te byon nas/ dge slong gi dge 'dun gyi gung la gdan bshams pa nyid la bzhugs so/ /de nas khyim bdag des sangs rgyas la sogs pa dge slong gi dge 'dun bde bar bzhugs par rig nas/ rang gi lag nas bca' ba dang / bza' ba gtsang zhing bsod pas tshim par byed/ stobs par byed do/ /rnam grangs du mar bca' ba dang bza' ba gtsang zhing bsod pas rang gi lag nas tshim par byas shing bstabs nas sangs rgyas la sogs pa dge slong gi dge 'dun re re la ras bcos bu sar pa phrugs re re phul lo/ /de nas khyim bdag des stan ches dma' ba zhig blangs nas/ bcom ldan 'das kyi spyan sngar chos mnyan pa'i phyir 'dug go/ /de nas bcom ldan 'das kyis khyim bdag de la chos dang ldan pa'i bka' mchid kyis yang dag par ston par mdzad/ yang dag par 'dzin du 'jug par mdzad/ yang dag par gzengs stod par mdzad/ yang dag par rab tu dga' bar mdzad de/ rnam grangs du mar chos dang ldan pa'i bka' mchid kyis yang dag par bstan/ yang dag par 'dzin du bcug /yang dag par gzengs bstod/ yang dag par rab tu dga' bar mdzad nas gdan las bzhengs te gshegs so/ /de nas khyim bdag des bcom ldan 'das kyi slad bzhin pha zad tsam du song nas/ bcom ldan 'das kyi zhabs gnyis la mgo bos phyag 'tshal te/ bcom ldan 'das la lan gsum bskor ba byas nas/ bcom ldan 'das kyi spyan snga nas phyir log ste rang gi khyim ga la ba der song ste phyin pa dang / steng gi khang bzangs kyi gzhir gtogs pa na gtong ba rjes su dran pa bsgom pa'i tshe/ chung ma la smras pa/ bzang mo bdag gis 'jig rten pha rol gyi lam brgyags mang du khyer gyis/ mchog tu dga' ba dang rjes su yi rang bar gyis shig /chung mas smras pa/ rje'i sras kyis ni 'jig rten pha rol gyi lam brgyags bsnams na bdag gis ma 'tshal to/ /bzang mo bdag cag gnyis kyi longs spyod dag thun mong ma yin nam/ rje'i sras 'di ltar 'o skol cag gi longs spyod dag thun mong lags te/ 'di ltar bdag gis kyang skye dgu'i bdag mo chen mo gau ta mI la sogs pa dge slong ma'i dge 'dun bshos gsol te chen po la 'os pa'i gos dag phul na/ de lta na bdag gis kyang 'jig rten pha rol gyi lam brgyags pa tshal bar 'gyur ro/ /khyim bdag gis smras pa/ bzang mo ci sngar sbyin pa byin pas phyis sbyin pa byar med dam/ de bzhin gyis shig / de nas khyim bdag gi chung ma de skye dgu'i bdag mo chen mo gau ta mI ga la ba der song ste phyin nas/ skye dgu'i bdag mo chen mo gau ta mI'i rkang pa gnyis la mgo bos phyag 'tshal nas mtha' gcig tu 'dug go/ /mtha' gcig tu 'dug nas/ skye dgu'i bdag mo chen mo gau ta mI sa khyim bdag gi chung ma de la chos dang ldan pa'i gtam gyis yang dag par ston par byed/ yang dag par 'dzin du 'jug par byed/ yang dag par gzengs stod par byed/ yang dag par rab tu dga' bar byed de rnam grangs du mar chos dang ldan pa'i gtam gyis yang dag par bstan/ yang dag par 'dzin du bcug /yang dag par gzengs bstod/ yang dag par rab tu dga' bar byas nas cang mi smra'o/ /de nas khyim bdag gi chung ma de stan las langs te/ skye dgu'i bdag mo chen mo gau ta mI ga la ba der logs su thal mo sbyar ba btud nas/ skye dgu'i bdag mo chen mo gau ta mI la 'di skad ces smras so/ /'phags ma sang bdag gi sdum par dge slong ma'i dge 'dun dang thabs cig gdugs tshod gsol bar cig nang / skye dgu'i bdag mo chen mo gau ta mIs/ khyim bdag gi chung ma de la cang mi smra bas dang du blangs so/ /de nas khyim bdag gi chung ma des skye dgu'i bdag mo chen mo gau ta mIs cang mi smra par dang du blangs par rig nas skye dgu'i bdag mo chen mo gau ta mIs smras pa la mngon par dga' ba dang rjes su yi rang bar byas te/ skye dgu'i bdag mo chen mo gau ta mI'i rkang pa gnyis la mgo bos phyag 'tshal nas/ skye dgu'i bdag mo chen mo gau ta mI'i drung nas song ngo / /de nas khyim bdag gi chung ma des de nyid kyi mtshan mo bca' ba dang / bza' ba gtsang zhing bsod pa legs par sbyar nas/ nang par sngar langs te/ stan bshams nas chur bzhag ste/ skye dgu'i bdag mo chen mo gau ta mI la spyan 'dren gyi 'phags ma gdugs tshod sbyar ba'i dus lags na/ da 'phags mas de'i dus la bab par mkhyen par mdzad du gsol zhes dro la bos so/ /de nas skye dgu'i bdag mo chen mo gau ta mIs snga dro sham thabs bgos lhung bzed dang chos gos thogs te/ dge slong ma'i tshogs kyis yongs su bskor zhing / dge slong ma'i dge 'dun gyis mdun du bdar te/ khyim bdag gi chung ma de'i bkad sa ga la ba der song ste phyin nas dge slong ma'i dge 'dun gyi gung la stan bshams pa nyid la 'dug go/ /de nas khyim bdag gi chung ma des skye dgu'i bdag mo chen mo gau ta mI la sogs pa dge slong ma'i dge 'dun bde bar 'dug par rig nas/ rang gi lag nas bca' ba dang / bza' ba gtsang zhing bsod pas tshim par byed stobs par byed do/ /rnam grangs du mar bca' ba dang bza' ba gtsang zhing bsod pas rang gi lag nas tshim par byas shing bstabs nas/ des chen po la 'os pa'i gos dag gi sprog ma phye nas/ chen po la 'os pa'i gos dag thogs te/ rgan pa'i mtha' logs su 'dug go/ /de nas skye dgu'i bdag mo chen mo gau ta mI 'di snyam du sems te/ bcom ldan 'das kyis dge slong ma rnams la chen po la 'os pa'i gos dag dgag pa mdzad pas/ gal te re zhig blangs par gyur na ni bslab pa'i gzhi 'khrugs par yang 'gyur/ gal te ma blangs na ni khyim bdag gi chung ma'i bsod nams kyi bar chad dang / dge slong ma'i dge 'dun gyi rnyed pa'i bar chad du'ang 'gyur ro snyam mo/ /dge slong ma rnams kyis bsams pa/ kye ma 'phags ma skye dgu'i bdag mo chen mo gau ta mIs chen po la 'os pa'i gos dag blangs par gyur cing / bdag cag gis blangs par gyur na bcom ldan 'das kyis kyang dus lags pa'i slad du gnang bar 'gyur ro snyam mo/ /de nas skye dgu'i bdag mo chen mo gau ta mIs/ chen po la 'os pa'i gos dag blangs nas khyim bdag gi chung ma la yon bshad par byas te/ stan las langs nas song ste/ bcom ldan 'das ga la ba der song ste phyin pa dang / bcom ldan 'das kyi zhabs gnyis la mgo bos phyag 'tshal te mtha' gcig tu 'dug go/ /mtha' gcig tu 'dug nas skye dgu'i bdag mo chen mo gau ta mIs skabs de bcom ldan 'das la rgyas par gsol to/ /de skad ces gsol ba dang / bcom ldan 'das kyis skye dgu'i bdag mo chen mo gau ta mI la 'di skad ces bka' stsal to/ /gau ta mI ngas gnang ba gang yin pa de khyod kyis shes pa legs so/ / legs so/ /de lta bas na ngas dge slong ma rnams kyis chen po la 'os pa'i gos dag blangs nas dge slong rnams dang lhan cig brje bar bya bar rjes su gnang ngo / /de nas dge slong ma bcu gnyis sde dag gis gos de dag khyer te drug sde dag gi gan du dong nas smras pa/ 'phags pa dag bcom ldan 'das kyis dge slong ma rnams la chen po la 'os pa'i gos dag dgag pa mdzad de/ bdag cag gis chen po la 'os pa'i gos dag rnyed pa 'di dag khyed bzhes la bdag cag la ngan pa dag stsol cig /drug sde dag gis smras pa/ sring mo dag bdag cag la dge slong ma'i ras ma dag dgos pa med do/ /de'i tshe yang bdag cag byis pa rmongs pa/ mi gsal ba/ mi mkhas pa dag la khur dag bslang bar gyur gyis bdag cag mi len to/ /dge slong ma gzhan dag gnas brtan gnas brtan rnams kyi drung du song ste/ smras pa/ 'phags pa dag bcom ldan 'das kyis dge slong ma rnams la chen po la 'os pa'i gos dag dgag pa mdzad de/ bdag cag gis chen po la 'os pa'i gos dag rnyed pa 'di dag khyed bzhes la bdag cag la ngan pa dman pa dag stsol cig /sring mo dag bcom ldan 'das la zhu'o zhes zer ba'i skabs de dge slong rnams kyis bcom ldan 'das la gsol ba dang / bcom ldan 'das kyis bka' stsal ba/ de lta bas na brjes pa ma gtogs te/ de la brje ba ni 'di yin te/ de tsam gyis sam ji tsam gyis dge slong ma dga' bar 'gyur bas brje bar bya'o/ /de nas bcom ldan 'das kyis bslab pa 'dod pa'i bsngags pa brjod de bslab pa la gus pa dang / bslab pa la yo byad bsnyungs pa dang / sbyangs pa'i yon tan dang / phri ba dang / drod rig pa'i bsngags pa brjod de/ dge slong ma rnams la yang de dang mthun pa dang / de dang 'tsham pa dang / de'i shas che ba dang / de dang ldan pa'i chos dang mthun pa'i bka' mchid bka' stsal nas dge slong rnams la bka' stsal pa/ dge slong dag de lta bas na snga ma ni bcas pa yin la 'di ni gnang ba yin te/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang dge slong ma nye du ma yin pa las gos len na brjes pa ma gtogs te spang ba'i ltung byed do zhes gnang ba mdzad de/ yul ni mnyan yod/ gang zag ni dge slong rab tu mang po/ /nyon mongs pa dang nyes pa ni med do/ /de la yang dge slong gang zhes bya ba ni nye dga' 'am/ gzhan yang de lta bu gang yin pa'o/ /dge slong ma zhes bya ba ni chos 'di pa'o/ /nye du ma yin pa las zhes bya ba ni phyi mo dang / mes po dang / phrugs kyi bdun pa tshun chad ni nye du yin la/ de phan chad ni nye du ma yin no/ /gos zhes bya ba ni gos bdun po bal gos dang / sha na'i gos dang / gso ma'i gos dang / du gu la'i gos dang / ras bal gyi gos dang / ko tam pa'i gos dang / nyi 'og gi gos las gang yang rung ba'o/ /len na zhes bya ba ni bdag gir byed na'o/ /brjes pa ma gtogs te zhes bya ba ni brjes pa gzhag ste'o/ /spang pa'i ltung byed do zhes bya ba ni dngos po de spangs nas/ ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni dge slong gis dge slong ma nye du ma yin pa la nye du ma yin par 'du shes pas gos dag ngag gi rnam par rig byed kyis len na lag tu 'ongs pa'am/ blta ba'i nye 'khor du gyur pa na len pa'i spang pa'i ltung byed kyi dngos gzhir 'gyur ro/ /dge slong la len pa'i spang ba'i ltung byed byung na/ de ma spangs shing bral bar ma byas la ltung ba ma bshags par ram/ spangs shing ma bral bar ma byas la ltung ba ma bshags par ram/ spangs shing bral bar byas la ltung ba ma bshags par gos blang bar 'os pa de lta bu gzhan zhig rnyed na/ de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis len pa'i spang ba'i ltung byed byung la ji srid du spang ba'i dngos po las ma bshags shing / so sor ma bshags par lhung bzed dam/ chos gos sam/ dra ba'am/ phor bu'am/ ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /rung ba nyid dang / tshad dang ldan pa dang / tshad las lhag pa la na smad pa med do/ /dge slong ma nye du ma yin par bsnyen par rdzogs pa ma nyams pa la na smad pa med do/ /lag tu 'ongs pa nyid dang / blta ba'i nye 'khor du gyur pa nyid la na smad pa med do/ /ngag gi rnam par rig byed la na smad pa med do/ /'di'i byed pa po yang snga ma bzhin te/ dge slong ma nye du ma yin pa'i yul la 'du shes gtso cher byed pa po nyid yin no/ / nye du ma yin pa dang / 'du shes kyi mtshan nyid ni snga ma bzhin no/ /'di la yan lag lngas dngos gzhi'i ltung bar 'gyur te/ dge slong ma nye du ma yin pa dang / gos dang / rung ba dang / ngag gi rnam par rig byed dang len pa'o/ /de dag las yan lag ma tshang na ci rigs par na smad do/ /de la dge slong ma nye du ma yin pa zhes smos pas ni dge slong ma nye du ma yin pa la der 'du shes pa'am/ yid gnyis za ba yan lag tu bstan to/ /gos zhes smos pas ni lhung bzed dang / sman la sogs pa sel to/ /rung ba zhes smos pas ni rgyu dag rung ba dang / tshad dang ldan pa yan lag tu bstan to/ /ngag gi rnam par rig byed ces smos pas ni cang mi smra bas dang du len pa dang / ngag las gzhan pa'i rnam par rig byed sel to/ /len pa zhes smos bas ni lag tu ma 'ongs pa nyid dang / blta ba'i nyen kor du ma gyur pa sel to/ /sbyor ba gcig gis gos gcig gam/ gnyis sam/ mang po zhig len na ltung ba'i dngos gzhi gcig tu rnam par gzhag go/ /sbyor ba'i ltung ba ni nyes byas te/ ji srid du len pa'i spang ba'i ltung byed kyi sbyor ba brtsams nas/ dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /dge slong ma nye du la nye du ma yin par 'du shes pa dang / nye du la yid gnyis za ba la nyes byas so/ /gos ma yin pa la nyes byas so/ /mi rung ba la nyes byas so/ /ngag gi rnam par rig byed ma yin pa la nyes byas so/ /nye bar ma gyur pa nod pa la nyes byas so/ /phyi rol pa'i rab tu byung ba dang / ma chags pa dang / nyams pa la nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba'i nyes byas kyi sbyor ba'i sbyor ba yang nyes byas te/ nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /khyim pa'i rtags can la nyes byas phra mo'o/ /ltung ba med pa ni nye du la nye dur 'du shes pa la ltung ba med do/ / dge 'dun la gos 'bul ba dang / legs par smra ba la 'bul ba la ltung ba med do/ /bsnyen par rdzogs par byed pa dang por rlag byung ba dag la ltung ba med do/ /dad rdzas brjod de mdun du bzhag nas mi ltos par rang song ba la ltung ba med do/ /dge slong ma rgya che ba dang nyo tshong gi tha snyad dang bral bas gos la sogs pa byin pa la ltung ba med do/ /re zhig gi sems kyis len pa la ltung ba med do/ /rin sbyin pa brjed pa la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du len pa'i spang bar 'gyur ba rnam pa thams cad mi bsten par bslab par bya'o/ /dge slong mas gos rin chen po dge slong dang brje bar bya ba'i phyir sbyin bdag las blang bar bya'o/ /dge slong gis dge slong ma dang lhan cig gos la sogs pa brje bar bya'o/ /rin mnyam pas sam yang na de dga' ba nyid kyis brje bar bya'o/ /phyir bcos pa ni snga ma bzhin no/ /len pa'i spang ba ste lnga pa bshad zin to// //slong ba'i spang ba'i gleng gzhi yang bcas pa dang / gnang ba'i dbang gis rnam pa gnyis te/ bcas pa'i gleng gzhi ni/ sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na khyim bdag cig 'dug pa des rigs mnyam pa las chung ma blangs te/ de de dang lhan cig rtse bar byed/ dga' bar byed/ dga' mgur spyod par byed pa las des chung ma la smras pa/ bzang mo kho bo zong thogs te yul gzhan du 'gro'o/ /rje'i sras re zhig gzhon pa'i gnas skabs su rol pa dang dgyes pa dang dgyes dgur spyod pa mdzod la bgres pa'i gnas skabs su nor bsgrub pa mdzod cig /bzang mo ci tsam du gzhon pa'i 'byung ba chen po de dag ni grang ba dang tsha ba bzod pa yin pas/ ji nor bsgrub par bya zhing rgas pa'i gnas skabs su bde ba spyad cing 'dug par bya'o/ /chung mas bsams pa/ bdag gis bskul bar bya ba gang yin pa de rang nyid byed do snyam nas/ smras pa/ rje'i sras de ltar mdzod cig / khyim bdag des chung ma de la kha zas tsam byin nas/ zong khyer te yul gzhan du song ngo / /de'i chung ma des bsams pa/ bdag gi khyim thab grang ba na grang bas sbrebs bzhin pa dang / tsha ba na tsha bas gdungs bzhin pa dang / bkres pa dang skom pa dag gis gnod bzhin pa dang / sha sbrang dang / sbrang bu dang / rlung dang nyi ma dang sdig sbrul gyi reg pa dag gis nyen bzhin du longs spyod dag mngon par bsgrub pa'i phyir spro bar byed/ 'bad par byed/ rtsol bar byed pa gang yin pa de dag thams cad bdag gi phyir bya'o snyam pa yin pas/ bdag las med par 'dug pa ni bdag gi tshul dang mthun pa ma yin no snyam nas des tshong dus su song ste/ ras bal bzang po blangs nas dog pa bzang po bkal te/ thag pa mkhas pa la ras zung bzang po 'thag tu bcug nas/ des ras de spos sna tshogs kyis bsgos te/ gos kyi za ma tog tu bcug ste bzhag go/ /khyim bdag des kyang don legs par grub nas khe spogs rnyed de legs par 'ongs nas/ chung ma des khyim bdag de khrus byas nas de la ras zung de phul lo/ /khyim bdag des bsams pa/ bdag gis 'di la kha zas tsam bzhag pa gang yin pa de dag thams cad kyis kyang ras zung 'di mi rnyed do snyam du rig nas/ chung ma la smras pa/ bzang mo ras zung 'di ga las rnyed/ rje'i sras je gsol cig /khyim bdag des de gyon nas yang dris pa/ bzang mo ras zung 'di ga las rnyed/ rje'i sras je bshos gsol cig /des zan zos nas yang dris pa/ bzang mo ras zung 'di ga las rnyed/ des skabs de rgyas par brjod pa dang / khyim bdag gis smras pa/ bzang mo legs so/ /kho bo ni bsgrub pa yin la khyod kyang 'di ltar sred pa yin na bdag cag gi longs spyod dag ring po mi thogs pa kho nar 'phel zhing rgyas pa dang yangs par 'gyur ro/ /chung mas smras pa/ rje'i sras 'di ni bdag gi dka' bas bsgrubs pa lags kyi/ khyod kyis su la yang ma stsal cig /khyim bdag de dad pa dang ldan zhing bzang la/ dge ba'i bsam pa can yin pas de bcom ldan 'das kyi zhabs la phyag 'tshal du rgyal byed kyi tshal du byung ste 'gro ba na mi sgo bas mthong nas des bsams pa/ khyim bdag 'di ras zung 'di lta bu gyon pa las na 'dis ni rnyed pa mang po rnyed pa yin no snyam mo/ /drug sde dag gi kun du spyod pa ni drug sde dag las gang yang rung bas rgyal byed kyi tshal gyi sgo stong par mi 'jog pas/ nye dga' rgyal byed kyi tshal gyi sgo na 'chag cing 'dug pa des khyim bdag de mthong nas des bsams pa/ khyim bdag 'di ras zung 'di lta bu gyon pa las na 'dis ni rnyed pa mang po rnyed pa yin gyi/ gal te bdag gis 'di ma phrogs na nye dga' zhes bya ba'i ming mi bzung ngo snyam nas/ des de la smras pa/ khyim bdag 'ongs pa legs so 'ongs pa legs so/ /khyod yun ring mo ring mo nas zla ba bzhin du ga las 'khor 'khor/ 'phags pa dag zong thogs te yul gzhan du mchis par gyur to/ /khyim bdag khyod kyis rnyed pa mang po grub bam/ 'phags pa chang chung tsam mo/ /khyim bdag mtshe'u ni rnyog pa can nam/ dang ba'i rgyu mthun pas rig par bya ste/ khyod ras zung 'di lta bu gyon pa las na khyod kyis rnyed pa mang po grub par mngon gyi tshur shog chos bstan par bya'o/ /drug sde dag gi kun du spyod pa ni gal te tshul khrims kyi gtam dag byed na nyan pa po dag bdag cag lha rnams su skyes so snyam du sems la/ gal te sbyin pa'i gtam dag byed na nyan pa po dag rang gi sha gang yin pa de yang bcad cing bcad cing sbyin par bya'o snyam du sems so/ /gal te ngan song gi gtam dag byed na nyan pa po dag bdag cag ngan song rnams su skyes so snyam du sems par 'gyur ba yin no/ /khyim bdag des nye dga'i rkang pa gnyis la phyag 'tshal te/ chos mnyan pa'i phyir mdun du 'dug pa dang / nye dgas de la chos bstan par brtsams nas/ des de la ci nas kyang de'i sems dad par 'gyur ba de ltar chos kyi gtam byas so/ /de dad par gyur nas smras pa/ bdag gis 'phags pa la legs par gsungs pa'i na bza' phrugs cig 'bul lo/ /bzhin bzangs a rog gya sbyin pa 'dis khyod kyi sems kyi rgyan dang / sems kyi yo byad dang / rnal 'byor gyi tshogs dang / don gyi mchog thob par gyur cig /bzhin bzangs bcom ldan 'das kyis kyang 'di skad ces/ sang dag 'chi yang sus shes kyi/ /de ring nyid du brtun te bya/ /'chi bdag sde can de dang ni/ /khyed cag bshes pa ma yin no/ /zhes gsungs so/ /bzhin bzangs khyod kyis ras zung bzang po gyon pa 'di nyid kho bo la byin cig dang / kho bos 'di las snam sbyar nyis rim byas te/ sems las chung ngus dge ba'i phyogs la bde bar tron bya'o/ /'phags pa khyod 'di bzhed dam/ lha'i gnas kyi lhag ma ji lta ba bzhin du'o/ /'phags pa bdag khyod la mi 'bul ba ni ma lags na/ 'di ltar 'di ni mchis brang gis bdag la stsal ba lags so/ /khyim bdag kho bos khyod gzhan la dad par byas na/ khyod ko bud med kho na'i dbang yin nam zhes nye dgas dang na dus kyi phyed kyis de'i bla gos blangs nas/ de lag pa gnyis 'dril bar byed bzhin sgyur bar byed do/ /khyim bdag gis de la smras pa/ 'phags pa 'di ci'i tha tshig /khyim bdag 'di ni khyod la yongs su btang ba las byung ba'i bsod nams bya ba'i gzhi ni yod na yongs su longs spyod pa las byung ba'i bsod nams bya ba'i gzhi ni med de/ nam zhig na 'di dang 'dra ba rnyed na/ 'di las chos gos byed par 'gyur bas 'di ni chos gos kyi gdang kho na la zad par 'gyur ro/ / 'phags pa ci bdag sgren mor mchi bar bgyi'am/ khyim bdag khyod la gos gyon pas ci zhig bya/ tshul khrims dang rigs dang / spyod pa gyon pas chog mod gcer bu pa ngo tsha shes pa dang / khrel yod pa nyams pa de dag ni sgren mor 'gro na mi sdug pa yin gyi khyod lta bu ngo tsha shes pa dang / khrel yod pa dang ldan pa la sgren mor 'gro ba mi sdug pa ci yod/ khyim bdag khyod dor thung mi gyon nam/ 'phags pa 'tshal lo/ /khyim bdag khyim bdag rnams kyi kun du spyod pa ni/ dor thung gyon te shing tshal thogs nas ba lang gi phyi bzhin 'gro ba yin pas khyod kyang shing tshal thogs la ba lang gi phyi bzhin song shig dang / skye bo dag gis ba lang bstsur 'gro ba phyir byung ba zhig yin par shes par 'gyur ro zhes/ nye dgas dngan dus kyi phyed kyis de'i smad g.yogs kyang blangs so/ /khyim bdag de shing tshal thogs te ba lang gi phyi bzhin du zhugs pa dang / mi sgo bas mthong nas smras pa/ khyim bdag kho bos da ci kho na khyod chen po la 'os pa'i ras zung gyon par mthong na/ ci de dag chom rkun pa dag gis bcom ba'am/ bzhin bzangs kho bo chom rkun pa dag gis ni ma bcom mod kyi 'di ltar btsun pa nye dgas kha'i chos kyis bcom mo/ /khyim bdag mgon med zas sbyin gyi kun du spyod pa ni nang par sngar langs te 'khor lnga brgya dang lhan cig bcom ldan 'das dang dge slong gnas brtan gnas brtan rnams kyi zhabs la phyag 'tshal du 'gro ba yin pas/ khyim bdag mgon med zas sbyin nang par sngar langs te/ 'khor lnga brgya dang lhan cig mnyan yod nas byung ste/ 'gro ba mi sgo bas mthong nas/ des smras pa/ khyim bdag khyod kyis don mthun mang du khrid de 'ongs kyis ci nas kyang mi chom par bag gyis shig /kye nang rje rgyal byed kyi tshal dang lam gyi bar na chom rkun ba dag 'khod dam ci/ lam gyi bar ma yin gyi/ rgyal byed kyi tshal nyid na 'khod do/ /kye nang rje khyed ni bal gyi rigs nag po dang 'dra ste/ sgo 'di nas bcom ldan 'das dang dge slong gnas brtan gnas brtan dag gshegs pa gang gis kyang khyod dkar por mdzad ma spyod do/ /bcom ldan 'das dang dge slong gnas brtan gnas brtan rnams kyi zhabs kyi rdul ni bdag gis mgo bos blang ba yin na/ khar sang gi nyin mo khyim bdag cig chen po la 'os pa'i ras zung gyon te byung ba de'i ras de nye dgas kha'i chos kyis phrogs nas khyim bdag de smod cing dor thung gis zhugs par gyur to/ /de nas khyim bdag mgon med zas sbyin 'di snyam du sems te/ de ni bdag gi bya ba yin no snyam nas/ rgyal byed kyi tshal du song ba dang / nye dgas mthong nas smras pa/ khyim bdag a rog gya khyim bdag gis smras pa/ a rog gam gya yang rung ngo / /khyim bdag khyod kho bo la sngon chad du ba 'thul na da ni me kho nar 'bar ro/ /kho bo me mi 'bar du ji ltar rung / gzhan dag rab tu byung ba ni 'di 'dod pa spang pa'i phyir yin na/ btsun pa nye dga' ni 'dod pa mngon par spel ba'i phyir kho nar yin no/ /kho bos ci byas/ khyod kyis khyim bdag cig rgyal byed kyi tshal bltar 'ongs pa de'i ras zung dang na dus kyis phrogs nas/ khyim bdag de smod par mi byed dam/ nye dgas smras pa/ de ni 'jig rten na lha ni sbyin par byed la/ yi dags ni zlog par byed do zhes zer ba yin no/ /ci des khyod la ril ba b+h+r-ing ga ra thogs te phul lam/ khyim bdag gal te mi bzod na bslab pa'i gzhi 'char chug shig / ci kho bos de yal bar bor du re'am/ de nas khyim bdag mgon med zas sbyin bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te mtha' gcig tu 'dug go/ /mtha' gcig tu 'dug nas/ bcom ldan 'das la khyim bdag mgon med zas sbyin gyis 'di skad ces gsol to/ /btsun pa 'phags pa 'di dag khyim bdag gam/ khyim bdag gi mchis brang nye du ma lags pa las gos slong bar bgyid na/ kye ma bcom ldan 'das kyis thugs brtse ba'i slad du/ gang gis 'phags pa dag khyim bdag gam/ khyim bdag gi mchis brang nye du ma lags pa la gos slong bar mi 'gyur bar 'phags pa rnams la dran par bgyi ba cung zhig bca' ba mdzad pa'i rigs so/ /bcom ldan 'das kyis khyim bdag mgon med zas sbyin la cang mi gsung bas gnang ngo / /de nas khyim bdag mgon med zas sbyin gyis/ bcom ldan 'das kyis cad mi gsung bas gnang bar rig nas stan las langs te/ bcom ldan 'das kyi zhabs gnyis la mgo bos phyag 'tshal nas/ bcom ldan 'das kyi spyan snga nas song ngo / /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ nye dga' la rmas nas rnam grangs du mar smad de/ bslab pa btsa' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang khyim bdag gam/ khyim bdag gi chung ma nye du ma yin pa'i gan du song ste/ gos slong na sbang ba'i ltung byed do zhes bca' ba mdzad de/ yul ni mnyan yod/ gang zag ni nye dga'/ nyon mongs pa ni 'dod zhe na/ nyes pa ni khyim bdag gam khyim bdag gi chung ma nye du ma yin pa las gos slong ba'o/ /gnang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /grong phreng ba can pa'i dge slong bzhi bcu don mthun dang lhan cig ljongs rgyu zhing 'dong pa na chom rkun bdag gis bcom nas de dag 'di snyam du sems te/ bcom ldan 'das kyis yang dge slong gang khyim bdag gam/ khyim bdag gi chung ma nye du ma yin pa'i gan du song ste gos slong na spang ba'i ltung byed do zhes bslab pa'i gzhi bca' bar mdzad pas/ 'di na bdag cag la nye du 'ga' yang med kyi/ bdag cag mnyan yod du song na der bdag cag la tshangs pa mtshungs par spyod pa rnams kyis gos dag gi bgo bsha' byed par 'gyur ro snyam nas/ de dag gis smras pa/ ci bdag cag sgren mor 'dong bar bya'am/ mtshan mo 'gebs pas 'dong bar bya zhing nyin mo tshang tshing gi nang du zhugs te/ 'khod la mtshan mo lam du 'jug par bya'o zhes de dag mtshan mo 'gebs bas rgyal byed kyi tshal du 'dong ba dang / dge slong nam gyi cha stod dang / nam gyi cha smad la mi nyal bar sbyor ba'i rjes su brtson bdag gis de dag mthong nas smras pa/ gcer bu pa sgre byi dag 'di khyed kyi 'dug gnas kyang ma yin/ gtsug lag khang yang ma yin na khyod ga las 'ongs/ tshe dang ldan pa dag bdag cag ni gcer bu ba ma yin no/ /'o na khyed cag su yin/ dge slong dag go/ /dge slong la 'di lta bu dag yod dam/ gang dag chom rkun pa dag gis bcom pa dag ci 'dra ba yin/ khyed cag ci ming / grong phreng ba can pa'i dge slong bzhi bcu po'o/ /tshe dang ldan pa dag 'ongs pa legs so 'ongs pa legs so zhes de dag gis de dag la la las ni snam sbyar byin/ la las ni bla gos byin/ la las ni mthang gos byin/ la las ni rdul gzan byin pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal ba/ de lta bas na dus ma gtogs te/ de la dus ni 'di yin te/ dge slong gos phrogs sam/ gos rlag gam/ gos tshig gam/ gos rlung gis khyer ram/ gos chus khyer ram/ de la de ni dus yin no/ /de nas bcom ldan 'das kyis bslab pa 'dod pa dang / bslab pa la gus pa dang / bslab pa la yo byad bsnyungs pa'i bsngags pa brjod nas/ dge slong rnams la yang de dang mthun pa dang / de'i shas che ba dang / de dang ldan pa'i chos dang mthun pa'i bka' mchid mdzad nas/ dge slong rnams la bka' stsal pa/ dge slong dag da lta bas na snga ma ni bcas pa yin la/ 'di ni gnang ba yin te/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang khyim bdag gam khyim bdag gi chung ma nye du ma yin pa'i gan du song ste/ gos slong na dus ma gtogs te spang ba'i ltung byed do/ /de la dus ni 'di yin te/ dge slong gos phrogs sam/ gos rlag gam/ gos tshig gam/ gos rlung gis khyer ram/ gos chus khyer na de la de ni dus yin no zhes gnang ba mdzad de/ yul ni mnyan yod/ gang zag ni grong phreng ba can pa'i dge slong bzhi bcu/ nyon mongs pa dang nyes pa ni med do/ /de la yang dge slong gang zhes bya ba ni nye dga' 'am/ gzhan yang de lta bu gang yin pa'o/ /khyim bdag gam zhes bya ba ni skyes pa'o/ /khyim bdag gi chung ma zhes bya ba ni bud med do/ /nye du ma yin pa'i zhes bya ba ni phyi mo dang / mes po dang / phrugs kyi bdun pa tshun chad ni nye du yin la/ de phan chad ni nye du ma yin no/ /gan du song ste zhes bya ba ni drung du song ste'o/ /gos zhes bya ba ni bdun po bal gos dang / sha na'i gos dang / zar ma'i gos dang / ras bal gyi gos dang / du gu la'i gos dang / ko tam pa'i gos dang / nyi 'og gi gos las gang yang rung ba'o/ /slong na zhes bya ba ni slong mo byed na'o/ /dus ma gtogs te zhes bya ba ni dus gzhag ste'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya'o/ /de la dus ni 'di yin te/ dge slong gos phrogs sam zhes bya ba ni 'di lta ste/ dge slong gi gos dag chom rkun pa dag gam/ g.yon can dag gis phrogs par gyur pa'o/ /gos rlag gam zhes bya ba ni 'di lta ste/ dge slong gi gos dag rlag par gyur pa'am/ 'khyams par gyur pa'o/ /gos tshig gam zhes bya ba ni 'di lta ste/ dge slong gi gos dag mes tshig par gyur pa'o/ / gos rlung gis khyer ram zhes bya ba ni 'di lta ste/ dge slong gi gos dag rlung gis khyer bar gyur pa'o/ /gos chus khyer na zhes bya ba ni 'di lta ste/ dge slong gi gos dag chus khyer bar gyur na'o/ /de la de ni dus yin no zhes bya ba ni bslab pa'i gzhi de la de ni gnang ba'i dus yin pa'o/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni dge slong gos phrogs pa dang / rlag pa dang / tshig pa dang / rlung gis khyer ba dang / chus khyer bar ma gyur pa slong bar mi rigs pas mi'i 'gro bar gtogs pa khyim par gyur pa srog dang ldan pa nye du ma yin pa las gos rung ba tshad dang ldan pa las mi chung ba/ rin thang dang / kha dog dang / khru tshad las rnam pa gang bslangs pa de nyid thob nas/ slong ba'i spang ba'i ltung byed kyi dngos gzhir 'gyur ro/ /dge slong la slong ba'i spang ba'i ltung byed byung na de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par gos rin thang dang / kha dog dang / khru tshad de lta bu gzhan zhig rnyed na/ de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis slong ba'i spang ba'i ltung byed byung la ji srid du spang ba'i dngos po las ma bshags shing so sor ma bshags par lhung bzed dam/ chos gos sam/ dra ba'am/ phor bu'am/ ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na/ de yang snga ma'i shugs kyis spang bar 'gyur te/ de las ltung bar ni mi 'gyur ro/ /rin thang dang / kha dog dang / khru tshad las rnam pa gang bslangs pa de lta bu nyid thob pa lan smad pa med do/ /rin thang dang kha dog dang / khru tshad kyi dbye ba ma byas par spyir bslangs pa na gang yang rung ba zhig thob pa lan smad pa med do/ /rung ba nyid dang tshad dang ldan pa dang tshad las lhag pa lan smad pa med do/ /'di'i byed pa po ni mi'i 'gro bar gtogs pa khyim par gyur pa srog dang ldan pa nye dum yin pa'o/ /de la dge slong ji lta bu la ltung ba 'di'i byed pa po yin zhe na/ gos phrogs pa dang / rlag pa dang / tshig pa dang / rlung gis khyer ba dang / chus khyer bar ma gyur pa slong bar mi rigs pa la'o/ /'di la yan lag lngas dngos gzhi'i ltung bar 'gyur te/ dge slong gos phrogs pa dang / rlag pa dang / tshig pa dang / rlung gis khyer ba dang / chus khyer bar ma gyur pa slong bar mi rigs pa dang / sbyin bdag mi'i 'gro bar gtogs pa khyim par gyur pa srog dang ldan pa nye du ma yin pa dang / gos rung ba tshad dang ldan pa las mi chung ba dang / rin thang dang / kha dog dang / khru tshad las rnam pa gang bslangs pa dang / de nyid thob pa'o/ /de dag las yan lag ma tshang na ci rigs par na smad do/ /de la dge slong gos phrogs pa la sogs par ma gyur pa'o zhes smos pas ni de dge slong bar mi rigs pa'i phyir ro/ /sbyin bdag mi'i 'gro bar gtogs pa khyim par gyur pa srog dang ldan pa nye du ma yin pa zhes smos pa ni de las bzlog pa la nyes byas su 'gyur ba'i phyir ro/ /gos rung ba dang / tshad dang ldan pa las mi chung ba zhes smos pa ni zhu ba las nye du ma yin pa las chos gos mi rung ba dang / mi chog pa nyid slong na nyes byas so zhes gsungs pa'i phyir ro/ /rin thang dang / kha dog dang / khru tshad las rnam pa gang bslangs pa dang / de nyid thob pa zhes smos pa ni gzhan thob pa dang / de nyid ma thob pa la ltung ba med do zhes gsungs pa'i phyir ro/ /sbyor ba gcig gis gos gcig gam/ gnyis sam/ mang po zhig thob pa na yang ltung ba'i dngos gzhi gcig rnam par gzhag go/ /sbyor ba'i ltung ba ni nyes byas te/ ji srid du slong ba'i spang ba'i ltung byed kyi sbyor bas brtsams nas/ dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed pa brtsams pa re re la nyes byas re re'o/ /mi'i 'gro bar gtogs pa dang / khyim par gyur pa dang / srog dang ldan pa dang / nye du ma yin pa las bzlog pa la nyes byas so/ /ma grub pa la nyes byas so/ /slong ba'i tshe nyid na nyes byas so/ /mi rung ba la nyes byas so/ /chung ngu la nyes byas so/ /rgyu spun la nyes byas so/ /rgyu spun gyi rang bzhin bal dang / ras bal la sogs pa la nyes byas so/ /khyim bdag dang khyim bdag gi chung ma gnyi ga'am/ gcig ma ning dang mtshan gnyis pa la nyes byas so/ /phyi rol pa'i rab tu byung ba dang ma chags pa dang / nyams pa la yang nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed do/ /sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ / de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni dge slong gos phrogs pa dang / rlag pa dang / tshig pa dang / rlung gis khyer ba dang / chus khyer ba dag ni slong bar rigs pa yin pas de dag la ltung ba med do/ /rin thang gzhan nam kha dog gzhan nam khru tshad gzhan thob pa la ltung ba med do/ /ras ma dang kha tshar slong ba la ltung ba med do/ /kha tshar bslangs pa las ras ma thob pa la ltung ba med do/ /ras ma bslangs na ras yug chen dang / ras yug phran dag 'thob bo snyam nas bslangs shing thob na yang ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du slong ba'i spang bar 'gyur ba rnam pa thams cad mi bsten par bslab par bya'o/ /phyir bcos pa ni snga ma bzhin no/ /slong ba'i spang ba ste drug pa bshad zin to// //slong bar rigs pa'i spang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /nye dga' la blo skyes pa 'di dag thams cad khyim bdag mgon med zas sbyin gyis bslab pa'i gzhi dag gis bsdams pas phyin chad gang nas kyang bca' ba'i rin tsam yang bslang bar mi nus na/ 'di ltar bcom ldan 'das kyis grong phreng ba can pa'i dge slong bzhi bcu la brten nas bslab pa'i gzhi bag yangs su mdzad pa yod pas/ bdag gis grong phreng ba can pa'i dge slong bzhi bcu po dag sngon du btang ste/ rnyed pa bsgrub par bya'o snyam nas de grong phreng ba can pa'i dge slong bzhi bcu po dag ga la ba der song ba dang / ji tsam na grong phreng ba can pa'i dge slong bzhi bcu po dag rnyang rnying dag 'tshem zhing 'khod pa mthong nas des de dag la smras pa/ tshe dang ldan pa dag bdag gis gzhan thos la gzhan mthong ste/ bdag ko grong phreng ba can pa'i dge slong bzhi bcu po dag bsam gtan dang / rnam par thar pa dang / ting nge 'dzin dang snyoms par 'jug pa'i bde ba dag nyams su myong bar byed cing 'dug par sems kyi/ bdag tshe dang ldan pa dag 'di ltar rnyang rnying dag 'tshem zhing 'khod par ni mi sems so/ /gnas brtan bdag cag chom rkun pa dag gis bcom mo/ /kye ma ma legs so ma legs so/ /gnas brtan su'i mya ngan byed ci kho bo cag gi'am/ ma yin te/ gang dag gis khyed cag bcom pa'i ma byin par len pa de dag sgren mo kho nar skye bar 'gyur zhing sgren mo kho nar dus byed par 'gyur bas de dag gi mya ngan byed do/ /tshe dang ldan pa dag khyod ci'i phyir gos dag mi slong / gnas brtan su zhig sangs rgyas dang / chos dang / dge 'dun spangs te kho bo cag la sbyin pa dag bya bar sems par 'gyur/ tshe dang ldan pa dag khyed cag bcom ldan 'das kyis mdo sde'i mtha' de dang de dag tu nges par bstod pa dang / bkur ba dang / bsngags pa dang / rab tu bsngags pa dag ma yin nam/ gnas brtan kho bo cag gis gos su la bslang bar yang mi shes so/ /tshe dang ldan pa dag dge slong rab tu shes pa gang gis khyed cag gi gos dag slong bar 'gyur ba 'ga' zhig la ci'i phyir mi bcol/ gnas brtan dge slong rab tu shes pa su zhig bdag nyid kyi dge ba'i phyogs yongs su nyams par byas te/ kho bo cag gi don du gos dag slong bar 'gyur/ tshe dang ldan pa dag re zhig kho bo bdag nyid dang bcu pa la yang thabs yod la/ gzhan yang kho bo cag mi drug re re la yang bdag nyid dang bcu pa yin pas kho bo cag mi drug cu la yang thabs yod do/ /gzhan yang gal te khyed cag la mi gnod na kho bo cag kyang gzhon nu dag gi don du ras yug phran dang / ras yug chen slong bar byed do/ /gnas brtan de la kho bo cag la gnod pa ci yod/ re zhig re re kyang chos gos gsum gsum slong la rag go/ /tshe dang ldan pa dag kho bo cag gis bsod snyoms la rgyu ba dang / gos dag bslong ba gnyi ga mi nus kyi 'di ltar gang gi tshe phyi rol du zas la bos pa de'i tshe bslang bar bya'o zhes nye dga' de gtsug lag khang gi phyi rol du rkang pa gnyis bkrus nas/ gtsug lag khang gi nang du zhugs te 'dug nas des bsams pa/ thabs ci zhig byas na des mnyan yod thams cad chub par 'gyur snyam nas des yang bsams pa/ je dang po kho nar dbul po'i srang du 'gro bar bya zhing de'i 'og tu phyug po'i srang du 'gro bar bya/ de'i 'og tu ko sa la'i rgyal po gsal rgyal gyi pho brang dang / btsun mo rgyal rigs dbyar tshul ma'i khyim dang / btsun mo phreng ldan ma'i khyim dang / khyim bdag mgon med zas sbyin gyi khyim dang / btsun mo'i 'khor gyi zhal ta pa drang srong byin dang / rnying pa gnyis kyi khyim dang / dge bsnyen ma ri dgas 'dzin gyi ma sa ga'i khyim dang / dge bsnyen ma khyim bdag gi chung ma legs skyes kyi khyim dag tu 'gro bar bya'o snyam mo/ /de'i tshe na khyim bdag cig gis sangs rgyas la sogs pa dge slong gi dge 'dun khyim gzhan du gdugs tshod la spyan drangs nas/ nye dgas gzhon nu rnams la smras pa/ tshe dang ldan pa dag gal te khyed cag la las su bsko ba dag 'ong bar gyur na/ khyed cag gis mi gnod par 'di skad ces bdag cag la mkhan po dang / slob dpon dag gi bya ba cung zhig yod do zhes brjod par bya'o/ /nye dgas phyi de nyin par gzhon nu zhig grong phreng ba can pa'i dge slong bzhi bcu po dag gi gan du btang ste/ chos gos dag bslang gi tshur sheg shig ces spring ngo / /gzhon nu de der ma song ba dang / nye dgas smras pa/ bkren pa khyod brtson 'grus 'di lta bus zag pa zad pa mngon sum du byed par 'gyur ram/ nye dga' rang nyid 'gro'o zhes de song nas/ dpong sa'i khang pa'i sgo glegs la rting pas brdabs pa dang / dbong sa'i khang pa thams cad 'gul nas/ de dag ting nge 'dzin de las langs nas smras pa/ tshe dang ldan pa dge slong bzhi bcu po dag chos gos gsum bslang bar bya na/ khyed cag snying las chung ngur 'khod dam tshur sheg 'dong ngo / /gnas brtan je so shing por nas 'dong ngo / /tshur sheg lam ka nyid du 'or cig /de dag 'phags pa dang nye dgas smras pa/ tshe dang ldan pa dag kho bo cag drug sde dag ni bya rog dkar po dang 'dra bas kho bo cag gis rgan rims bzhin du 'khod par mi bya bar/ bar bar du rgan pa dag gis 'khod par bya'o/ /de dag dbul po'i srang du dong nas dngar ka byas te bsdad pa dang / de dag gis de dag mthong nas nyam nga bar gyur te smras pa/ 'phags pa dag nyes dmigs 'ga' zhig ma byung ngam/ bzhin bzangs dag nyes dmigs byung ngo / /ci nongs khyed kyis grong phreng ba can pa'i dge slong bzhi bcu po gang dgra bcom ldan 'das kyis mdo sde'i mtha' de dang de dag tu bstod pa/ bkur ba/ bsngags pa/ rab tu bsngags pa de dag thos sam/ thos so/ /de dag chom rkun pa dag gis bcom mo/ /de dag gis smras pa/ shes ldan dag mda' gzhu long shig /phub dang dbyug pa dag long shig / chom rkun pa dag 'dzin du 'dong ngo / /drug sde dag gis smras pa/ de dag bcom nas yun ring du lon cing yul 'khor gzhan du bcom par gyur to/ /'o na ji ltar bgyi/ de dag la gos dag byin cig /de dag gis de dag la gos sar pa dang rnying pa dag byin no/ /de dag gis gos dag khur du drags te/ gzhon nu dag la gtad nas smras pa/ deng la 'di dag gtsug lag khang du skyol cig /gzhon nu dag gis de dag khyer te/ gtsug lag khang du dong ba dang / de dag phyug po'i srang du dong nas dngar ka byas te bsdad pa dang / de dag nyam nga bar gyur te smras pa/ 'phags pa dag nyes dmigs 'ga' zhig ma byung ngam/ bzhin bzangs dag nyes dmigs byung ngo / /ci nongs/ khyed kyis grong phreng ba can pa'i dge slong bzhi bcu po gang dag bcom ldan 'das kyis mdo sde'i mtha' de dang de dag tu bstod pa/ bkur ba/ bsngags pa/ rab tu bsngags pa de dag thos sam/ thos so/ /de dag chom rkun pa dag gis bcom mo/ /de dag gis smras pa/ shes ldan dag mda' gzhu long shig /phub dang dbyug pa dag long shig /chom rkun pa dag 'dzin du 'dong ngo / /drug sde dag gis smras pa/ de dag bcom nas yun ring du lon cing yul 'khor gzhan du bcom par gyur to/ /'o na ji ltar bgyi/ de dag la gos dag byin cig /de dag gis de dag la chen po la 'os pa'i gos dag byin no/ /drug sde dag gis gos de dag khur du drags te gzhon nu dag la gtad nas smras pa/ deng la 'di dag gtsug lag khang du skyol cig / gzhon nu dag gis de dag khyer te gtsug lag khang du dong ba dang / de dag ko sa la'i rgyal po gsal rgyal gyi pho brang du dong nas dngar ka byas te bsdad pa dang / ko sa la'i rgyal po gsal rgyal gyis de dag mthong nas nyam nga bar gyur te smras pa/ 'phags pa dag nyes dmigs 'ga' zhig ma byung ngam/ lha nyes dmigs byung ngo / /ci nongs/ lhas grong phreng ba can pa'i dge slong bzhi bcu po gang dag bcom ldan 'das kyis mdo sde'i mtha' de dang de dag tu bstod pa/ bkur ba/ bsngags pa/ rab tu bsngags pa de dag gsan tam/ thos so/ /de dag chom rkun pa dag gis bcom mo/ /rgyal pos dmag dpon 'phags skyes po la bsgo ba/ song la myur du chom rkun pa dag dang rkun rdzas dag khug shig /drug sde dag gis smras pa/ lha de dag ni bcom nas yun ring du lon cing yul 'khor gzhan du bcom par gyur to/ /'o na ji ltar bya/ lha de dag la gos dag stsol cig /rgyal pos dge slong re re la yo byad bcu gsum bcu gsum byin no/ /drug sde dag gis gos de dag khur du drags te gzhon nu rnams la gtad nas smras pa/ deng la 'di dag gtsug lag khang du skyol cig /gzhon nu dag gis de dag khyer te gtsug lag khang du dong ba dang / grong phreng ba can pa'i dge slong bzhi bcu po dag gis smras pa/ gnas brtan dag da chog gis thong shig /drug sde dag gis smras pa/ tshe dang ldan pa dag ha cang brtabs mang shig /khyed la kho bo cag gis dang po nyid nas tshe dang ldan pa dag gal te khyed la mi gnod na kho bo cag gzhon nu dag gi don du ras yug phran dang / ras yug chen dag slong ngo zhes ma smras sam/ de dag dge slong dbang che bar grags pas/ bsgo bas cang mi smra bar 'khod do/ /de dag btsun mo rgyal rigs dbyar tshul ma'i khyim dang / btsun mo phreng ldan ma'i khyim dang / khyim bdag mgon med zas sbyin gyi khyim dang / btsun mo'i 'khor gyi zhal ta pa drang srong byin dang / rnying pa gnyis kyi khyim dang / dge bsnyen ma ri dgas 'dzin gyi mas ga'i khyim dang / dge bsnyen ma khyim bdag gi chung ma legs skyes kyi khyim du mthar gyis song ste/ sngar bstan pa skad brjod pa dang / de dag gis kyang dge slong re re la yo byad bcu gsum bcu gsum byin no/ /de nas drug sde dag gis smras pa/ tshe dang ldan pa dag gal te dge slong brgya gral du ma bkad na gral stong par 'gyur gyis deng la gral du bkod cig /ma nyes te bdag cag kyang bsod snyoms blangs te 'ong ngo / /drug sde dag gis gtsug lag khang du dong ste/ rnyang rnying dag las bzhi bcu phung por byas te gzhag go/ /dge slong bzhi bcu po dag zas kyi bya ba byas te 'ongs pa dang / drug sde dag gis lhan cig gnas pa dang / nye gnas dag la smras pa/ tshe dang ldan pa dag tshur sheg don nyung ngu dag bos shig /de dag gis de dag bos pa dang / drug sde dag gis smras pa/ tshe dang ldan pa dag ci kho bo cag khyed kyi gos srung ba yin nam rang gi gos dag long shig /dge slong bzhi bcu po dag gis phan tshun gdong du blta bar brtsams pa dang / drug sde dag gis smras pa/ tshe dang ldan pa dag ci'i phyir phan tshun gdong du blta/ gnas brtan thams cad rnyang rnying sha stag yin no/ /tshe dang ldan pa dag 'di dag mdud pa bor cig dang snam sbyar yin no/ /'di dag ni drubs shig dang bla gos yin no/ /'di dag ni drubs shig dang mthang gos yin no/ /'di dag ni drubs shig dang rdul gzan yin no/ / gal te mi dga' na 'dong dang yang bslong bar bya'o/ /kye ma'o gnas brtan dag 'di dag nyid kyang ma bslangs kyang rung ngo / /de dag gis rnyang rnying de dag khyer te dgon par dong nas 'tshem zhing 'khod do/ /thams cad du sgra grags pa grong phreng ba can pa'i dge slong bzhi bcu po dag re res kyang yo byad bcu gsum bdun bdun rnyed do zhes grags so/ /de dag dge slong rnams kyis mthong nas smras pa/ tshe dang ldan pa dag bdag cag gis gzhan thos la gzhan mthong ste/ bdag cag gis grong phreng ba can pa'i dge slong bzhi bcu po dag re res kyang yo byad bcu gsum bdun bdun rnyed do zhes thos na/ tshe dang ldan pa dag ko rnyang rnying dag 'tshem zhing 'khod do/ /de dag gis smras pa/ khyed cag gis lta kho bo cag rang rang gis phrag pa dag gis khyer zhes kyang thos so zhes zer ba'i skabs de dge slong rnams la brjod nas dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ grong phreng ba can pa'i dge slong bzhi bcu dang drug sde rnams la rmas nas rnam grangs du mar smad de/ /bslab pa bca' ba'i phan yon bcu yang dag par gzigs pas/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong gos phrogs sam/ gos rlag gam/ gos tshig gam/ gos rlung gis khyer ram/ gos chus khyer na khyim bdag gam/ khyim bdag gi chung ma nye du ma yin pa'i gan du song la gos bslang bar bya'o/ /gal te de la bram ze'am khyim bdag dad pa zhig gis dus kyis gos mang po stobs la 'dod na dge slong des de las gos stod g.yogs smad g.yogs dang bcas pa'i mthar thug par blang bar bya'o/ /de las lhag par len na spang ba'i ltung byed do zhes bca' ba mdzad de/ yul ni mnyan yod/ gang zag ni grong phreng ba can pa'i dge slong bzhi bcu dang drug sde rnams/ nyon mongs pa ni ma brtags par spyod pa dang 'dod zhe na/ nyes pa ni len pa'i drod mi shes pa'o/ /de la dge slong zhes bya ba ni chos 'di pa'o/ /gos phrogs sam zhes bya ba ni 'di lta ste/ dge slong gi gos dag chom rkun pa dag gam/ g.yon can dag gis phrogs par gyur pa'o/ /gos rlag gam zhes bya ba ni 'di lta ste/ dge slong gi gos dag rlag par gyur pa'am/ 'khyams par gyur pa'o/ /gos tshig gam zhes bya ba ni 'di lta ste/ dge slong gi gos dag mes tshig par gyur pa'o/ /gos rlung gis khyer ram zhes bya ba ni 'di lta ste/ dge slong gi gos dag rlung gis khyer bar gyur pa'o/ /gos chus khyer na zhes bya ba ni 'di lta ste/ dge slong gi gos dag chus khyer bar gyur na'o/ /khyim bdag gam zhes bya ba ni skyes pa'o/ /khyim bdag gi chung ma zhes bya ba ni bud med do/ /nye du ma yin pa zhes bya ba ni phyi mo dang / mes po dang / phrugs kyi bdun pa tshun chad ni nye du yin la de phan chad ni nye du ma yin no/ /gan du song la zhes bya ba ni drung du song la'o/ /gos zhes bya ba ni bdun po bal gos dang / sha na'i gos dang / zar ma'i gos dang / ras bal gyi gos dang / du gu la'i gos dang / ko tam pa'i gos dang / nyi 'og gi gos las gang yang rung ba'o/ /bslang bar bya'o zhes bya ba ni slong mo bya ba'o/ /gal te de la bram ze'am khyim bdag dad pa zhig gis dus kyis gos mang po stobs la zhes bya ba ni 'bul ba'o/ /'dod na zhes bya ba ni don du gnyer na'o/ /dge slong des de las gos stod g.yogs smad g.yogs dang bcas pa'i mthar thug pa blang bar bya'o zhes bya ba ni stod g.yogs smad g.yogs dang bcas pa ni gnyis te/ dge slong gi stod g.yogs smad g.yogs dang bcas pa dang / khyim pa'i stod g.yogs smad g.yogs dang bcas pa'o/ / dge slong gi stod g.yogs smad g.yogs dang bcas pa ni sar pa las snam sbyar nyis rim dang / ras yug phran khru lnga pa dang do pa'o/ /khyim pa'i stod g.yogs smad g.yogs dang bcas pa ni ras yug chen khru bcu gnyis pa dang / ras yug phran khru bdun pa dang do pa'o/ /de las lhag par len na zhes bya ba ni de las gong ma'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni dge slong gos phrogs pa dang / rlag pa dang / tshig pa dang / rlung gis khyer ba dang / chus khyer ba slong bar rigs pas mi'i 'gro bar gtogs pa khyim par gyur pa srog dang ldan pa nye du ma yin pa las stod g.yogs smad g.yogs dang bcas pa rung ba tshad las mi chung ba phrugs gcig las lhag par len na slong bar rigs pa'i spang ba'i ltung byed kyi dngos gzhir 'gyur ro/ /dge slong la slong bar rigs pa'i spang ba'i ltung byed byung na de ma spangs shing bral bar ma byas na ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par gos stod g.yogs smad g.yogs dang bcas pa'i mthar thug pa de lta bu gzhan zhig rnyed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis slong bar rigs pa'i spang ba'i ltung byed byung la ji srid du spang ba'i dngos po las ma bshags shing so sor ma bshags par lhung bzed dam/ chos gos sam/ dra ba'am/ phor bu'am/ ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /tshe tshad las lhag pa la na smad pa med do/ /phrugs las lhag pa la na smad pa med do/ /pha las lhag pa la na smad pa med do/ /lhag pa sbyin par bya ba mi sbyin pa la na smad pa med do/ /rung ba nyid dang / tshad dang ldan pa dang / tshad las lhag pa la na smad pa med do/ /'di'i byed pa po yang snga ma bzhin te/ mi'i 'gro bar gtogs pa khyim par gyur pa srog dang ldan pa nye du ma yin pa'o/ /de la dge slong ji lta bu la ltung ba 'di'i byed pa po yin zhe na/ gos phrogs pa dang / rlag pa dang / tshig pa dang / rlung gis khyer ba dang / chus khyer bar gyur pa slong bar rigs pa la'o/ /'di la yan lag lngas dngos gzhi'i ltung bar 'gyur te/ dge slong gos phrogs pa dang / rlag pa dang tshig pa dang / rlung gis khyer ba dang / chus khyer bar gyur pa slong bar rigs pa dang / sbyin bdag mi'i 'gro bar gtogs pa khyim par gyur pa srog dang ldan pa nye du ma yin pa dang / stod g.yogs smad g.yogs dang bcas pa rung ba tshad dang ldan pa las mi chung ba dang / stod g.yogs smad g.yogs dang bcas pa gcig gi mthar thug pa las lhag pa dang len pa'o/ /de dag las yan lag ma tshang na ci rigs par na smad do/ /de la dge slong gos phrogs pa la sogs par gyur pa zhes smos pa ni de dag slong bar rigs pa'i phyir te/ dge slong gang las chos gos gsum la sogs pa yo byad bcu gsum po byin gyis brlab par bya ba thams cad dam/ gang dang gang med pa de slong bar rigs pa nyid de slong bar mi rigs pa slong bar byed na ni slong ba'i spang bar gtogs pa'i ltung bar 'gyur la slong bar rigs pa slong bar byed na ni stod g.yogs smad g.yogs dang bcas pa'i mthar thug pa las lhag pa len na slong bar rigs pa'i spang bar gtogs pa'i ltung bar 'gyur te bye brag ni de yod do/ /sbyin bdag mi'i 'gro bar gtogs pa khyim par gyur pa srog dang ldan pa nye du ma yin pa zhes smos pa ni de las bzlog pa las nyes byas su 'gyur ba'i phyir ro/ /stod g.yogs smad g.yogs dang bcas pa rung ba tshad dang ldan pa las mi chung ba zhes smos pa ni zhu ba las nye du ma yin pa las chos gos mi rung ba dang / mi chog pa nyid slong na nyes byas so zhes gsungs pa'i phyir ro/ /stod g.yogs smad g.yogs dang bcas pa phrugs cig gi mthar thug pa las lhag pa len pa zhes smos pa ni phrugs cig gi mthar thug pa len pa la nyes pa med pa'i phyir ro/ /stod g.yogs smad g.yogs dang bcas pa ni rnam pa gnyis te/ khyim pa dang / dge slong gi'o/ /de gnyis smos pa ni dge slong gos 'chang bar 'dod pa rnam pa gnyis kyi dbang du mdzad pa'i phyir te/ gos ma dras pa 'chang bar 'dod pa dang / dras pa 'chang bar 'dod pa'o/ /de la gos ma dras pa 'chang bar 'dod pa ni khyim pa'i stod g.yogs smad g.yogs dang bcas pa slong ngo / /gos dras pa 'chang bar 'dod pa ni dge slong gi stod g.yogs smad g.yogs dang bcas pa slong ngo / /de la khyim pa'i stod g.yogs che tshad ni ras yug chen srid du khru bcu gnyis dang / zheng du khru gsum pa yin la/ smad g.yogs che tshad ni ras yug phran srid du khru bdun dang zheng du khru do pa'o/ /dge slong gi stod g.yogs che tshad ni snam sbyar gyi rim pa ji skad bstan pa'o/ / smad g.yogs che tshad ni sham thabs kyi rim pa ji skad bstan pa'o/ /de la dge slong khyim pa'i stod g.yogs smad g.yogs dang bcas pa slong bas de thob na gal te chung na yang bslang bar mi bya la lhag na yang sbyin par mi bya'o/ /dge slong gis stod g.yogs smad g.yogs dang bcas pa slong bas de dag thob na ni gal te chung na yang bslang bar bya la lhag na yang sbyin par bya'o/ /sbyor ba gcig gis stod g.yogs smad g.yogs dang bcas pa gcig gam gnyis sam/ mang po zhig thob na yang ltung ba'i dngos gzhi gcig rnam par gzhag go/ /sbyor ba'i ltung ba ni nyes byas te/ ji srid du slong bar rigs pa'i spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /mi'i 'gro bar gtogs pa dang / khyim par gyur pa dang / srog dang ldan pa dang / nye du ma yin pa las slong ba la nyes byas so/ /slong ba'i tshe nyid na nyes byas so/ /mi rung ba la nyes byas so/ /chung ngu la nyes byas so/ /khyim bdag dang khyim bdag gi chung ma gnyis ka'am/ gcig ma ning dang / mtshan gnyis pa la nyes byas so/ /phyi rol pa'i rab tu byung ba dang / ma chags pa dang nyams pa dag la nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni slong bar rigs pas ma lhag pa len pa la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du slong bar rigs pa'i spang bar 'gyur ba rnam pa thams cad mi bsten par bslab par bya'o/ /phyir bcos pa ni snga ma bzhin no/ /slong bar rigs pa'i spang ba ste bdun pa bshad zin to/ / //so sor thar pa'i mdo rgya cher 'grel pa 'dul ba kun las btus pa/ bam po bcu gnyis pa/ spags pa slong ba'i spang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na khyim bdag cig 'dug pa des rigs mnyam pa las chung ma blangs te/ de de dang lhan cig rtse bar byed/ dga' bar byed/ dga' mgur spyod par byed do/ /khyim bdag de gzhan gyi chung ma la chags par gyur nas/ de la chung mas rje'i sras de ltar ma mdzad cig ces phyir bzlog na/ ji tsam du de phyir bzlog kyang phyir ma log pa de tsam du de'i chung ma de yang skyes pa gzhan dag dang lhan cig 'khrul pa rtsom par byed do/ /khyim bdag de yang bud med gzhan dag la sbyin par byed la/ chung ma de yang skyes pa gzhan dag la sbyin par byed pas/ de ltar khyim de gnyis ka nas rgud par gyur nas/ de gnyis la bu mo mngag gzhug ma zhig yod nas/ khyim bdag des bu mo de la 'dis khyim rgud par byas so zhes khu tshur dang thal lcag dag gis rdeg par byed do/ /bu mo des smras pa/ bdag gis khyim rgud par gyur pa 'di ci las gyur ba 'tshal mod kyi 'on kyang bdag gis ji ltar rje dag la bsngags pa ma lags par brjod par bgyir rung / nye dgas de tshor nas khyim bdag de dang khyim bdag gi chung ma de'i gan du song ste/ ci nas kyang de nyid skyabs su 'gro ba dang bslab pa'i gzhi dag la gnas par 'gyur ba de lta de ltar tshul khrims kyi bsngags pa brjod cing / tshul khrims 'chal ba'i bsngags pa ma yin pa yang brjod nas/ des de gnyis skyabs su 'gro ba dang / bslab pa'i gzhi dag la gnas par byas so/ /khyim bdag de gtum pa brtun ngas pa drag shul che ba yin pas yang bu mo de dag la rdeg par brtsams pa dang / chung mas de la smras pa/ rje'i sras gang gi tshe bdag cag las dang las kyi rnam par smin pa mi mkhyen pa de'i tshe go rdeg par mdzad mod/ da bdag cag dge ba'i bshes gnyen 'phags pa nye dga' la brten nas las dang las kyi rnam par smin pa mkhyen pas/ 'di ltar 'jig rten ni rang gi las kyi 'bras bu la spyod pa lags pas su zhig su'i bran lags/ bu mo 'di la rdeg par ma mdzad cig /bzang mo khyod zer ba ma nyes so/ /bu mo tshur shog /khrus gyis la shog shig /bu mo de khrus byas te 'ongs pa dang / des de la gos phrugs cig bskon nas smras pa/ bu mo dga' zhing las byos shig / bu mo des bsams pa/ khyim bdag khyo shug 'di sngon gtum pa brtun ngas pa/ drag shul che ba yin te/ yang dang yang du bdag la khu tshur dang thal lcag dag gis rdeg par byed cing / zas dang gos ngan pa dag sbyin par byed na/ da 'di bdag gi pha ma dang 'dra bar gyur to snyam nas yang bsams pa/ gang tshun chad nas 'phags pa nye dga'i khyim 'dir 'jug par brtsams pa de tshun chad nas khyim bdag 'di pha ma dang 'dra bar gyur pas bdag gis 'phags pa nye dga' la ci zhig gis dga' bar bya snyam nas/ des bsams pa/ gal te bdag gis 'di las cung zhig brkus te dbul du ni khyim bdag 'dis bdag rdeg 'tshog mang po byas te sngon gyi gnas su gzhag par 'gyur ro snyam nas/ de sdod cing 'dug go/ /khyim bdag gi chung ma des khyim bdag de la smras pa/ rje'i sras mkhyen par mdzod cig /'phags pa nye dga' ni bdag cag gi dge ba'i bshes gnyen lags te/ 'phags pa nye dgas bdag cag las kyi mtha' dri ma can dang phral nas skyabs su 'gro ba dang / bslab pa'i gzhi dag la bkod de/ yang dang yang du bdag cag la chos kyis sdud par byed pas/ bdag cag gis kyang de la zang zing cung zad kyis bsdu bar bgyi'o/ /bzang mo de bzhin bya'o/ /ci zhig bgyi/ de la ras yug chen cig dbul bar bya'o/ /bu mo des de thos nas bsams pa/ bdag gis 'phags pa nye dga' la dga' ba de sbran par bya'o snyam mo/ /nye dga' yang snga dro sham thabs bgos/ lhung bzed dang chos gos thogs te mnyan yod du bsod snyoms la zhugs nas mthar gyis bsod snyoms la rgyu ba na khyim der zhugs pa dang / bu mo des khyim legs par byugs shing phyag dar bor nas des nye dga' mthong ba dang / rkang pa gnyis la phyag 'tshal te smras pa/ bdag gis 'phags pa nye dga' la dgyes pa sbran par bgyi'o/ /khyim bdag 'di khyod la ras yug chen 'bul bar 'gyur ro/ /nye dgas bsams pa/ sa'i steng na 'dod pa'i bdag nyid can gang ji snyed pa de dag dang bdag mnyam par deng bu mo 'dis kyang 'phrigs so snyam nas des bshes te smras pa/ bu mo gal te bden par gyur na ni ngas khyod la gshe ba dag la shugs ma bya'o/ /ci ste brdzun par gyur na ni rdeg 'tshog mang po byed du bcug ste/ sngon gyi gnas ji lta bar gzhag par bya'o/ /'phags pa spyo ba mang du mdzad na bzhud cig dang khyod nyid kyis mkhyen par 'gyur ro/ /de zhugs nas stan bshams pa nyid la 'dug pa dang / khyim bdag chung ma dang bcas pas rkang pa la phyag 'tshal te/ stan ches dma' ba blangs nas chos mnyan pa'i phyir mdun du 'dug go /nye dgas smras pa/ khyim bdag kho bo la ras yug chen sbyin par byas pa gang yin pa de blta'o/ /de gnyis kyis phan tshun gdong du blta bar brtsams te/ 'di skad ces kyang smras so/ /'phags pa bdag cag gis gsangs te smras pa/ 'phags pa la sus bgyis/ ci 'phags pas gzhan gyi sems kyang mkhyen tam/ nye dgas smras pa/ kho bo lhung bzed du zos shing so lhags pa dang / skra dkar por gyur pa yin na kho bo la de tsam yang mi srid dam/ khyim bdag des ras yug chen blangs te nye dga' la phul ba dang / nye dgas ras yug chen mthong nas lag pa gnyis 'dril bar byed/ bzhin sgyur bar byed do/ /khyim bdag gis smras pa/ 'phags pa ci'i slad du phyag gnyis 'dril bar mdzad/ zhal sgyur bar mdzad/ nye dgas smras pa/ khyim bdag 'di ni khyod la yongs su btang ba las byung ba'i bsod nams ni yod na/ yongs su longs spyad pa las byung ba'i bsod nams ni med de/ /ras yug chen 'di ni mchil lham phyi ba'am skar khung klan par rung ste/ 'di ni chos gos kyi gdang la yongs su zad pa dang mthar thug par 'gyur ro/ /'o na ji ltar bgyi/ ras yug chen bzang po gzhan byin cig /ras yug chen gzhan ma mchis so/ /tshong dus nas nyos te byin cig /rin ma mchis so/ /dus thob la byin cig /khyim bdag des chung ma'i gdong du blta bar brtsams pa dang / chung mas smras pa/ rje'i sras bdag cag la 'phags pa nye dgas phan btags kyi ras yug chen 'jol la phul cig /khyim bdag de nye dga' dang lhan cig srang du song nas tshong khang du phyin pa dang / nye dgas bsams pa/ tshong pa 'di nga rgyal bskyed par bya ste/ des na ras yug chen bzang po ster bar 'gyur ro snyam nas/ nye dgas khyim bdag la smras pa/ khyim bdag tshong pa 'di ni gcam bu zhig yin pas 'di la ras yug chen bzang po med kyi gzhan du 'dong ngo / /tshong pa des de thos nas chen po la 'os pa'i ras yug chen bstan te smras pa/ 'phags pa ras yug chen la gzigs/ ras yug chen 'di ni bzang na rin ji tsam 'di dang 'di tsam mo/ /khyim bdag 'di 'jal lo/ /khyim bdag 'jal lam/ 'jal lo/ /dus ji tsam na/ dus 'di tsam na'o/ /tshong pa des khyim bdag de la ras yug chen de byin nas khyim bdag des nye dga' la phul ba dang / nye dgas khyim bdag a rog gya zhes smras nas/ khyed sbyin pa 'dis sems kyi rgyan dang / sems kyi yo byad dang / rnal 'byor gyi tshogs dang / don gyi mchog thob pa dang / lha dang mi rnams kyi gos thob par gyur cig ces smras te song ngo / /khyim bdag de longs spyod srabs nas des rin de dus de tsam gyis 'bul bar ma nus nas tshong pa des khyim bdag de nyi ma la btags pa dang / de chung po grogs dag gis mthong nas smras pa/ ji khyod zhun mar 'thungs sam/ 'on te rims kyis btab/ bu lon pas bzung ste 'dug go/ /khyod kyi phas kyang bu lon pa yod par ma byas/ mes po dag gis kyang ma byas na bu lon pa ga las byung / des smras pa/ gang dag shAkya'i bu'i dge sbyong dag la dad par byed pa de dag 'di ltar 'gyur te/ 'di ltar gang byin pa de mi len par lhag pa slong bar byed do zhes zer ba'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ nye dga' la rmas nas/ rnam grangs du mar smad de/ bslab pa bca' ba'i phan yon bcu yang dag par gzigs pas/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong gi phyir khyim bdag gam/ khyim bdag gi chung ma nye du ma yin pas gos kyi rin dag spags nas/ bdag gi gos kyi rin 'di dag gis gos 'di dang 'di lta bu zhig nyos la dge slong ming 'di zhes bya ba 'ongs pa dang / de la gos rung ba dus su bskon no snyam pa las de na gal te dge slong de la sngar ma bstabs par rnam par rtog pa 'ga' zhig byung ste/ bzang po 'dod pa'i phyir khyim bdag dang / khyim bdag gi chung ma nye du ma yin pa de'i gan du song nas/ 'di skad ces tshe dang ldan pas bdag gi phyir gos kyi rin gang dag spags pa'i gos kyi rin de dag gis tshe dang ldan pa gos 'di dang 'di lta bu zhig nyos la/ bdag la gos rung ba dus su legs par skon cig ces smras te gos grub na spang ba'i ltung byed do zhes bca' ba mdzad de/ yul ni mnyan yod/ gang zag ni nye dga'/ nyon mongs pa ni 'dod zhe na/ nyes pa ni spags pa slong ba'o/ /de la dge slong gi phyir zhes bya ba ni shAkya'i bu nye dga' 'am/ gzhan yang de lta bu gang yin pa'i phyir ro/ /khyim bdag gam zhes bya ba ni skyes pa'o/ /khyim bdag gi chung ma zhes bya ba ni bud med do/ /nye du ma yin pa zhes bya ba ni phyi mo dang / mes po dang / phrugs kyi bdun pa tshun chad ni nye du yin la de phan chad ni nye du ma yin no/ /gos kyi rin dag ces bya ba ni gser ram dngul lo/ /spags nas zhes bya ba ni sta gon byas nas so/ /bdag gis gos kyi rin 'di dag gis zhes bya ba ni gser ram dngul la sogs pa gang dag spags pa dag gis so/ /gos 'di dang 'di lta bu zhig ces bya ba ni bdun po bal gos dang / sha na'i gos dang / zar ma'i gos dang / du gu la'i gos dang / ras bal gyi gos dang / ko ta ma pa'i gos dang / nyi 'og gi gos las gang yang rung ba'o/ /nyos la zhes bya ba ni nyos te'o/ /dge slong ming 'di zhes bya ba 'ongs pa dang zhes bya ba ni shAkya'i bu nye dga' 'am/ gzhan yang de lta bu gang yin pa'o/ /de la gos rung ba dus su bskon no snyam pa las zhes bya ba ni longs spyod par bzod pa'o/ /de na gal te dge slong de la sngar ma bstabs par zhes bya ba ni sngar mgron du ma bos par ro/ /rnam par rtog pa 'ga' zhig byung ste zhes bya ba ni bsnyen bkur byed pa 'ga' zhig byung ste'o/ /bzang po 'dod pa'i phyir zhes bya ba ni rab dang mchog 'dod pa'i phyir ro/ /khyim bdag gam khyim bdag gi chung ma nye du ma yin pa de'i gan du song nas zhes bya ba ni drung du song nas so/ /'di skad ces tshe dang ldan pa bdag gi phyir gos kyi rin gang dag spags pa'i gos kyi rin de dag gis tshe dang ldan pa gos 'di dang 'di lta bu zhig nyos la zhes bya ba ni cig nyos te'o/ /bdag la gos rung ba dus su legs par skon cig ces smras te zhes bya ba ni spags pa slong ba'i tshig de skad ces smras te'o/ /gos grub na zhes bya ba ni gos thob na'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i spyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la spags pa slong ba'i ltung byed 'di ni sngar slong ba'i spang ba bshad pa'i rab tu dbye bar gyur pa yin pas de'i phyir spags pa slong ba'i spang ba 'di'i dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa'i mtshan nyid rnams ni sngar slong ba'i spang ba'i skabs su bstan pa kho na bzhin du shes par bya'o/ /de'i bye brag cung zhig brjod par bya ste/ de'i phyir spags pa ma phul bar shes pa ni ma spags pa dang 'dra'o zhes bya ba smras te/ spags pa ma phul bar shes pa zhes bya ba ni spags pa slong ba'i spang ba 'di nyid kyi skabs yin te/ sbyin bdag gis dge slong la gos spags pa dge slong de la ma phul bar dge slong des gang yang rung ba zhig gis shes pa'o/ /ma spags pa dang 'dra'o zhes bya ba la ma spags pa zhes bya ba ni sngar slong ba'i spang ba bshad pa'i skabs yin te/ sbyin bdag gis dge slong la gos 'bul bar ma spags pa'o/ /'dra'o zhes bya ba ni spags pa ma phul bar shes pa zhes bya ba spags pa slong ba'i spang ba 'di dang / ma spags pa zhes bya ba slong ba'i spang ba sngar bstan pa de'i mtshan nyid dang 'dra'o zhes bya ba'i tha tshig go/ /spags pa'am ma spags pa mi shes par gyur pa ni slong ba'i spang ba'i yul yin la/ spags pa shes pa ni 'di'i yul yin no/ /don de nyid bstan pa'i phyir de nyid gzhan yin no zhes smras te/ de nyid ces bya ba ni gos spags pa ltung ba 'byin pa'i gang zag gis mi shes pa de nyid do/ /gzhan yin no zhes bya ba ni ma spags pa nyid yin pa'o/ /de ltar na bye brag 'di yod de/ spags pa ma phul bar shes pa ni spags pa slong ba'i spang ba 'di'i yul yin la/ spags kyang rung ma spags kyang rung mi shes pa ni slong ba'i spang ba sngar bstan pa'i yul yin no/ /de ltar spags pa slong ba'i spang ba dang / slong ba'i spang ba gnyis kyi mtshan nyid spyir 'dra ba dang / khyad par cung zad yod pa go sla bar bya ba'i phyir dang por bstan nas/ da ni spags pa slong ba'i spang ba nyid kyi mtshan nyid rgya cher bstan par bya ste/ de la 'dir dngos gzhi'i ltung ba rnam par gzhag pa ni dge slong gos phrogs pa dang / rlag pa dang / tshig pa dang / rlung gis khyer ba dang / chus khyer bar ma gyur pa slong bar mi rigs pas mi'i 'gro bar gtogs pa khyim par gyur pa srog dang ldan pa nye du ma yin pa las gos rung ba tshad dang ldan pa las mi chung ba spags pa ma phul bar shes pa rin thang dang kha dog dang khru tshad las rnam pa gang bslangs pa de nyid thob na spags pa slong ba'i spang ba'i ltung byed kyi dngos gzhir 'gyur ro/ /dge slong la spags pa slong ba'i spang ba'i ltung byed byung na de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par gos spags pa ma phul bar shes pa rin thang dang kha dog dang khru tshad de lta bu gzhan zhig rnyed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis spags pa slong ba'i spang ba'i ltung byed byung la/ ji srid du spang ba'i dngos po las ma bshags shing so sor ma bshags par lhung bzed dam/ chos gos sam/ dra ba'am/ phor bu'am/ ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /rin thang dang kha dog dang khru tshad las spags pa ma phul bar shes pa rnam pa gang bslangs pa de lta bu nyid thob pa la na smad pa med do/ /rin thang dang kha dog dang khru tshad kyi dbye ba ma byas par spags pa ma phul bar shes pa spyir bslangs pa na gang yang rung ba zhig thob pa la na smad pa med do/ /rung ba nyid dang tshad dang ldan pa dang / tshad las lhag pa spags pa ma phul bar shes pa la na smad pa med do/ /'di'i byed pa po yang snga ma bzhin te/ mi'i 'gro bar gtogs pa khyim par gyur pa srog dang ldan pa nye du ma yin pa'o/ /de dge slong ji lta bu la ltung ba 'di'i byed pa po yin zhe na/ gos phrogs pa dang / rlag pa dang / tshig pa dang / rlung gis khyer ba dang / chus khyer bar ma gyur par slong bar mi rigs pa la'o/ /'di la yan lag lngas dngos gzhi'i ltung bar 'gyur ro/ /dge slong gos phrogs pa dang / rlag pa dang / tshig pa dang / rlung gis khyer ba dang / chus khyer bar ma gyur pa slong bar mi rigs pa dang / sbyin bdag mi'i 'gro bar gtogs pa khyim par gyur pa srog dang ldan pa nye du ma yin pa dang / gos rung ba tshad dang ldan pa las mi chung ba spags pa ma phul bar shes pa dang / rin thang dang kha dog dang khru tshad las spags pa ma phul bar shes pa rnam pa gang bslangs pa dang / de nyid thob pa'o/ /de dag las yan lag ma tshang na ci rigs par na smad do/ /de la dge slong gos phrogs pa la sogs par ma gyur pa zhes smos pa ni de de dag slong bar mi rigs pa'i phyir ro/ /sbyin bdag mi'i 'gro bar gtogs pa khyim par gyur ba srog dang ldan pa nye du ma yin pa zhes smos pa ni de las bzlog pa la nyes byas su 'gyur ba'i phyir ro/ /gos rung ba tshad dang ldan pa las mi chung ba spags pa ma phul bar shes pa zhes smos pa ni zhu ba las nye du ma yin pa las chos gos mi rung ba dang / mi chog pa spags pa ma phul bar shes pa nyid slong na nyes byas so zhes gsungs pa'i phyir ro/ /rin thang dang / kha dog dang / khru tshad las spags pa ma phul bar shes pa rnam pa gang bslangs pa dang / de nyid thob pa zhes smos pa ni gzhan thob pa dang / de nyid ma thob pa la ltung ba med do zhes gsungs pa'i phyir ro/ /sbyor ba gcig gis gos spags pa gcig gam/ gnyis sam/ mang po zhig thob na yang ltung ba'i dngos gzhi gcig rnam par gzhag go/ /spyor ba'i ltung ba ni nyes byas te/ ji srid du spags pa slong ba'i spang ba'i ltung byed kyi sbyor ba brtsams nas/ dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /mi'i 'gro bar gtogs pa dang / khyim par gyur pa dang / srog dang ldan pa dang / nye du ma yin pa las bzlog pa la spags pa ma phul bar shes pa slong ba dang thob pa la nyes byas so/ /spags pa ma phul bar shes pa slong ba'i tshe nyid na nyes byas so/ /spags pa ma phul bar shes pa mi rung ba slong ba dang thob pa la nyes byas so/ /spags pa ma phul bar shes pa chung ngu slong ba dang thob pa la nyes byas so/ /rgyu spun spags pa ma phul bar shes pa slong ba dang thob pa la nyes byas so/ /rgyu spun gyi rang bzhin pa la dang / ras bal la sogs pa spags pa ma phul bar shes pa slong ba dang thob pa la nyes byas so/ /khyim bdag gam khyim bdag gi chung ma gnyi ga'am gcig ma ning dang mtshan gnyis pa la spags pa ma phul bar shes pa slong ba dang thob pa la nyes byas so/ /phyi rol pa'i rab tu byung ba dang / chos 'di pa'i rab tu byung ba mtshams med pa byas pa la sogs pa gtan gyi bar chad kyis sdom pa dang po nas ma chags pa dang / sdom pa chags pa bslab pa nyams pa dag la spags pa ma phul bar shes pa slong ba dang thob pa la nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni dge slong gos phrogs pa dang / rlag pa dang / tshig pa dang / rlung gis khyer ba dang / chus khyer ba dag ni slong bar rigs pa yin pas de dag spags pa ma phul bar shes pa slong ba la ltung ba med do/ /rin thang gzhan nam/ kha dog gzhan nam/ khru tshad gzhan spags pa ma phul bar shes pa thob pa la ltung ba med do/ /ras ma dang / kha tshar spags pa ma phul bar shes pa slong ba la ltung ba med do/ /kha tshar spags pa ma phul bar shes pa bslangs pa las ras ma thob pa la ltung ba med do/ /ras ma spags pa ma phul bar shes pa bslangs na ras yug chen dang / ras yug phran dag thob bo snyam nas bslangs shing thob na yang ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab bar bya ba ni dge slong gis yul thams cad la gnas skabs thams cad du spags pa slong ba'i spang bar 'gyur ba rnam pa thams cad mi bsten par bslab par bya'o/ / phyir bcos pa ni snga ma bzhin no/ /spags pa slong ba'i spang ba ste brgyad pa bshad zin to// //so so nas spags pa slong ba'i spang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na khyim bdag cig 'dug pa des rigs mnyam pa las chung ma blangs te/ de de dang lhan cig rtse bar byed/ dga' bar byed/ dga' dgur spyod par byed do/ /khyim bdag de gzhan gyi chung ma la chags par gyur nas/ de la chung mas rje'i sras de ltar ma mdzad cig ces phyir bzlog na ji tsam du de phyir bzlog kyang phyir ma log pa de tsam du de'i chung ma de yang skyes pa gzhan dag dang lhan cig 'khrul pa rtsom par byed do/ /khyim bdag de yang bud med gzhan dag la sbyin par byed la/ chung ma de yang skyes pa gzhan dag la sbyin par byed pas de ltar khyim de gnyis ka nas rgud par gyur nas de gnyis la bu mo mngag gzhug ma zhig yod nas khyim bdag des bu mo de la 'dis khyim rgud par byas so zhes khu tshur dang thal lcag dag gis rdeg par byed do/ /bu mo des smras pa/ bdag gis khyim rgud par gyur pa 'di ji las gyur pa 'tshal mod kyi/ 'on kyang bdag gis ji ltar rje dag la bsngags pa ma lags pa brjod pa bgyir rung / nye dgas de tshor nas des khyim bdag de dang khyim bdag gi chung ma de'i gan du song ste ci nas kyang de gnyis skyabs su 'gro ba dang / bslab pa'i gzhi dag la gnas par 'gyur ba de lta de ltar tshul khrims kyi bsngags pa brjod cing / tshul khrims 'chal pa'i bsngags pa ma yin pa yang brjod nas des de gnyis skyabs su 'gro ba dang / bslab pa'i gzhi dag la gnas par byas so/ /khyim bdag de gtum pa brtun ngas pa drag shul che ba yin pas yang bu mo de la rdeg par brtsams pa dang / chung mas de la smras pa/ rje'i sras gang gi tshe bdag cag las dang las kyi rnam par smin pa mi mkhyen pa de'i tshe ko rdeg par mdzad mod/ da bdag cag dge ba'i bshes gnyen 'phags pa nye dga' la brten nas las dang las kyi rnam par smin pa mkhyen pas/ 'di ltar 'jig rten ni rang gi las kyi 'bras bu la spyod pa lags pas su zhig su'i bran lags/ bu mo 'di la rdeg par ma mdzad cig /bzang mo khyod zer ba ma nyes so/ /bu mo tshur shog khrus gyis la shog shig /bu mo de khrus byas te 'ongs pa dang / des de la gos phrugs cig bskon nas smras pa/ bu mo dga' zhing las byos shig / bu mo des bsams pa/ khyim bdag khyo shug 'di sngon gtum pa brtun ngas pa drag shul che ba yin te/ yang dang yang du bdag la khu tshur dang thal lcag dag gis rdeg par byed cing zas dang / gos ngan pa dag sbyin par byed na/ da 'di bdag gi pha ma dang 'dra bar gyur to snyam nas yang bsams pa/ gang tshun chad nas 'phags pa nye dga' khyim 'dir 'jug par brtsams pa de tshun chad nas khyim bdag 'di pha ma dang 'dra bar gyur pas bdag gis 'phags pa nye dga' la ji zhig gis dga' bar bya snyam nas/ des bsams pa/ gal te bdag gis 'di las cung zhig brkus te dbul du ni khyim bdag 'dis bdag la rdeg btsog mang po byas te sngon gyi gnas su gzhag par 'gyur ro snyam nas/ de sdod cing 'dug go/ /khyim bdag gi chung ma des khyim bdag de la smras pa/ rje'i sras mkhyen par mdzod cig /'phags pa nye dga' ni bdag cag gi dge ba'i bshes gnyen lags te/ 'phags pa nye dgas bdag cag las kyi mtha' dri ma can dang phral nas skyabs su 'gro ba dang bslab pa'i gzhi dag la bkod de/ yang dang yang du bdag cag la chos kyis sdud par byed pas bdag cag gis kyang de la zang zing cung zad kyis bsdu bar bgyi'o/ /bzang mo de bzhin bya'o/ /ci zhig bgyi/ de la bdag cag so so nas ras yug chen dag dbul bar bya'o/ /bu mo des de thos nas bsams pa/ bdag gis 'phags pa nye dga' la dga' ba de sbran par bya'o snyam mo/ /nye dga' yang snga dro sham thabs bgos lhung bzed dang chos gos thogs te/ mnyan yod du bsod snyoms la zhugs nas mthar gyis bsod snyoms la rgyu ba na khyim der zhugs pa dang / bu mo des khyim legs par phyags shing / phyag dar bor nas des nye dga' mthong ba dang / rkang pa gnyis la phyag 'tshal te smras pa/ bdag gis 'phags pa nye dga' la dgyes pa sbran par bgyi'o/ /khyim bdag dang khyim bdag gi chung ma 'di khyod la so so nas ras yug chen dag 'bul bar 'gyur ro/ /nye dgas bsams pa/ sa'i steng na 'dod pa'i bdag nyid can gang ji snyed pa de dag dang bdag mnyam par deng bu mo 'dis kyang 'phrigs so snyam nas/ des bshes te smras pa/ bu mo gal te bden par gyur na ni ngas khyod la gshe ba dag la shugs ma bya'o/ /ji ste brdzun par gyur na ni rdeg btsog mang po byed du bcug ste sngon gyi gnas ji lta bar gzhag par bya'o/ /'phags pa spyod mang du mdzad na bzhud cig dang khyod nyid kyis mkhyen par 'gyur ro/ /de zhugs nas stan bshams pa nyid la 'dug pa dang / khyim bdag de chung ma dang bcas pas rkang pa la phyag 'tshal te stan ches dma' ba blangs nas chos mnyan pa'i phyir mdun du 'dug go/ /nye dgas smras pa/ khyim bdag kho bo la so so nas ras yug chen sbyin par byas pa gang dag yin pa de dag blta'o/ /de gnyis kyis phan tshun gdong du blta bar brtsams te 'di skad ces smras so/ /'phags pa bdag cag gis gsangs te smras pa de 'phags pa la sus bgyis/ ci 'phags pas gzhan gyi sems kyang mkhyen tam/ nye dgas smras pa/ kho bo cag lhung bzed du zos shing so lhags pa dang / skra dkar por gyur pa yin na kho bo la de tsam yang mi srid dam/ khyim bdag de dang khyim bdag gi chung ma des so so nas ras yug chen blangs te/ nye dga' la phul ba dang / nye dgas ras yug chen de dag mthong nas lag pa gnyis 'dril bar byed/ bzhin sgyur bar byed do/ /khyim bdag gis smras pa/ 'phags pa ci'i slad du phyag gnyis 'dril bar byed/ zhal sgyur bar byed/ nye dgas smras pa/ khyim bdag 'di dag ni khyed la yongs su btang ba las byung ba'i bsod nams ni yod na/ yongs su longs spyod pa las byung ba'i bsod nams ni med do/ ras yug chen 'di dag ni mchil lham phyi ba'am/ skar khung glan par rung ste/ 'di dag ni chos gos kyi gdang la yongs su zad pa dang mthar thug par 'gyur ro/ /'o na ji ltar bgyi/ ras yug chen bzang po gzhan dag byin cig /ras yug chen gzhan dag ma mchis so/ /tshong dus nas nyos te byin cig /rin dag ma mchis so/ /dus thob la byin cig /khyim bdag des chung ma'i gdong du blta bar brtsams pa dang / chung mas smras pa/ rje'i sras bdag cag la 'phags pa nye dgas phan btags kyi/ ras yug chen dag 'jol la de la phul cig /khyim bdag de nye dga' dang lhan cig srang du dong nas/ tshong khang du phyin pa dang / nye dgas bsams pa/ tshong pa 'di nga rgyal bskyed par bya ste/ des na ras yug chen bzang po ster bar 'gyur ro snyam nas nye dgas khyim bdag la smras pa/ khyim bdag tshong pa 'di ni gcam bu zhig yin pas 'di la ras yug chen bzang po med kyi gzhan du 'dong ngo / /tshong pa des de thos nas/ des chen po la 'os pa'i ras yug chen dag bstan te smras pa/ 'phags pa ras yug chen dag la gzigs/ ras yug chen 'di dag ni bzang na rin ji tsam 'di dang 'di tsam mo/ /khyim bdag 'jal lo/ /khyim bdag 'jal lam/ 'jal lo/ /dus ji tsam na dus 'di tsam na'o/ /tshong pa des khyim bdag de la ras yug chen de dag byin nas khyim bdag des nye dga' la phul ba dang / nye dgas khyim bdag a rog gya zhes smras nas/ khyod sbyin pa 'dis sems kyi rgyan dang / sems kyi yo byad dang / rnal 'byor gyi tshogs dang / don gyi mchog thob pa dang / lha dang mi rnams kyi gos dag thob par gyur cig ces smras te song ngo / /khyim bdag de longs spyod srabs nas des rin de dag dus de tsam gyis 'bul bar ma nus nas/ tshong pa des khyim bdag de nyi ma la btags pa dang / de chung po grogs dag gis mthong nas smras pa/ ji khyod zhun mar 'thungs sam/ 'on te rims kyis btab/ bu lon pas bzung ste 'dug go/ /khyod kyi phas kyang bu lon pa yod par ma byas/ mes po dag gis kyang ma byas na bu lon pa ga las byung / des smras pa/ gang dag shAkya'i bu'i dge slong dag la dad par byed pa dag 'di ltar 'gyur te/ 'di ltar gang byin pa de dag mi len par lhag pa dag slong bar byed do/ / zhes zer ba'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ nye dga' la rmas nas rnam grangs du mar smad de/ bslab pa bca' ba'i phan yon bcu yang dag par gzigs pas/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong gi phyir khyim bdag dang khyim bdag gi chung ma nye du ma yin pas gos kyi rin so so ba dag spags nas/ bdag cag gnyis kyis gos kyi rin so so ba 'di dag gis gos 'di dang / 'di lta bu so so ba dag nyos la dge slong ming 'di zhes bya ba 'ongs pa dang / bdag cag gnyis kyis so so nas de la gos rung ba dus su bskon no snyam pa las/ de na gal te dge slong de la sngar ma bstabs par rnam par rtog pa 'ga' zhig byung ste/ bzang po 'dod pa'i phyir khyim bdag dang khyim bdag gi chung ma nye du ma yin pa de dag gi gan du song nas/ 'di skad ces tshe dang ldan pa dag gis bdag gi phyir gos kyi rin so so ba gang dag spags pa'i gos kyi rin so so ba de dag gis tshe dang ldan pa dag gos 'di dang 'di lta bu so so ba dag nyos la gnyi ga 'dus te/ bdag la gos rung ba cig dus su legs par skon cig ces smras te gos grub na spang ba'i ltung byed do zhes bca' ba mdzad de/ yul ni mnyan yod/ gang zag ni nye dga'/ nyon mongs pa ni 'dod zhe na/ nyes pa ni so so nas spags pa slong ba'o/ /de la dge slong gi phyir zhes bya ba ni shAkya'i bu nye dga' 'am/ gzhan yang de lta bu gang yin pa'i phyir ro/ /khyim bdag dang zhes bya ba ni skyes pa'o/ /khyim bdag gi chung ma zhes bya ba ni bud med do/ /nye du ma yin pa zhes bya ba phyi mo dang / mes po dang / phrugs kyi bdun pa tshun chad ni nye du yin la/ de phan chad ni nye du ma yin no/ /gos kyi rin ces bya ba ni gser ram dngul lo/ /so so ba dag ces bya ba ni tha dad pa dag go/ /spags nas zhes bya ba ni sta gon byas nas so/ /bdag cag gnyis kyis gos kyi rin so so ba 'di dag gis zhes bya ba ni gser ram/ dngul la sogs pa so so ba gang dag spags pa dag gis so/ /gos 'di dang 'di lta bu zhes bya ba ni bdun po bal gos dang / sha na'i gos dang / zar ma'i gos dang / du gu la'i gos dang / ras bal gyi gos dang / ko tam pa'i gos dang / nyi 'og gi gos las gang yang rung ba'o/ /so so ba dag ces bya ba ni tha dad pa'o/ /nyos la zhes bya ba ni nyos te'o/ /dge slong ming 'di zhes bya ba 'ongs pa dang zhes bya ba ni shAkya'i bu nye dga' 'am/ gzhan yang de lta bu gang yin pa'o/ /bdag cag gnyis kyis so so nas de la gos rung ba dus su bskon no snyam pa las zhes bya ba ni longs spyod par bzod pa'o/ /de na gal te dge slong de la sngar ma bstabs par zhes bya ba ni sngar mgron du ma bos par ro/ /rnam par rtog pa 'ga' zhig byung ste zhes bya ba ni bsnyen bkur byed pa 'ga' zhig byung ste'o/ /bzang po 'dod pa'i phyir zhes bya ba ni rab dang mchog 'dod pa'i phyir ro/ /khyim bdag dang khyim bdag gi chung ma nye du ma yin pa de dag gi gan du song nas zhes bya ba ni drung du song nas so/ /'di skad ces tshe dang ldan pa dag gis bdag gi phyir gos kyi rin so so ba gang dag spags pa'i gos kyi rin so so ba de dag gis tshe dang ldan pa dag gos 'di dang 'di lta bu so so ba dag nyos la zhes bya ba ni tha dad pa dag nyos te'o/ /gnyi ga 'dus te zhes bya ba ni gnyi ga tshogs te'o/ /bdag la gos rung ba cig dus su legs par skon cig ces smras te zhes bya ba ni so so nas spags pa slong ba'i tshig de skad ces smras te'o/ /gos grub na zhes bya ba ni gos thob na'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang sbyor ba dang sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la so so nas spags pa slong ba'i spang ba 'di ni sngar spags pa slong ba'i spang ba bshad pa'i rnam pa yin mod kyi/ 'on kyang sbyin par byed pa'i spungs kyi bye brag las ltung ba tha dad par rnam par gzhag par bya ste/ 'di ltar tshe dang ldan pa nye dgas khyim bdag dang khyim bdag gi chung ma la so so nas ras yug chen yang dag par sbyin du gzhug par bya ba'i phyir ro/ /spags pa slong bar 'dra mod kyi 'on kyang bye brag brjod par bya ste/ de'i phyir sbyin par byed pa spungs che bas spags pa ma phul bar shes pa yang ma spags pa dang 'dra'o zhes bya ba smras te/ sbyin par byed pa spungs che ba zhes bya ba ni khyim gcig nas khyim bdag dang khyim bdag gi chung ma gnyi gas so so nas tsham tshom med par gos kyi rin spog phod pa'o/ /de lta bu'i sbyin par byed pa spungs che bar spags pa ma phul bar shes pa zhes bya ba ni sngar spags pa slong ba'i spang ba'i skabs su sbyin par byed pa khyim bdag dang khyim bdag gi chung ma gnyi gas spyi la gos kyi rin gcig spogs pa spungs chung ngu'i bye brag las ltung ba tha dad par rnam par gzhag par bya ste/ so so nas spags pa slong ba'i spang ba 'di nyid kyi skabs yin no/ /sbyin par byed pa spungs che bas so so nas dge slong la gos dag spags pa dge slong de la ma phul bar dge slong des gang yang rung ba zhig gis shes pa ni sbyin par byed pa spungs che bas spags pa ma phul bar shes pa zhes bya'o/ / de yang ma spags pa dang 'dra'o zhes bya bar sbyar te/ ma spags pa zhes bya ba ni sngar slong ba'i spang ba bshad pa'i skabs yin te/ sbyin bdag gis dge slong la gos dbul bar ma spags pa'o/ /'dra'o zhes bya ba ni sbyin par byed pa spungs che bas spags pa ma phul bar shes pa zhes bya ba so so nas spags pa slong ba'i spang ba 'di yang ma spags pa zhes bya ba ni slong ba'i spang ba sngar bstan pa de'i mtshan nyid dang 'dra'o zhes bya ba'i tha tshig go/ /so so nas spags pa'am/ ma spags pa mi shes par gyur pa ni slong ba'i spang ba'i yul yin la so so nas spags pa shes pa ni 'di'i yul yin no/ /don de nyid bstan pa'i phyir 'dir yang snga ma bzhin du de nyid gzhan yin no zhes bya ba smras te/ de nyid ces bya ba ni 'dir sbyin par byed pa spungs che bas gos spags pa ltung ba 'byin pa'i gang zag gis mi shes pa de nyid do/ /gzhan yin no zhes bya ba ni ma spags pa nyid yin pa'o/ /de ltar na slong ba'i spang ba dang / spags pa slong ba'i spang ba dang / so so nas spags pa slong ba'i spang ba la bye brag 'di yod de/ sbyin par byed pas spags kyang rung ma spags kyang rung / mi shes pa ni slong ba'i spong ba sngar bstan pa'i yul yin la sbyin par byed pa spungs chung ngus spags pa ma phul bar shes pa ni spags pa slong ba'i spang ba'i yul yin/ sbyin par byed pa spungs che bas spags pa ma phul bar shes pa ni so so nas spags pa slong ba'i spang ba 'di'i yul yin no/ /de ltar na sngar spags pa slong ba'i spang ba'i skabs su spags pa slong ba'i spong ba dang / slong ba'i spang ba gnyis kyi mtshan nyid spyir 'dra ba dang / khyad par cung zad yod par bstan pa bzhin du 'dir so so nas spags pa slong ba'i skabs su yang so so nas spags pa slong ba'i spang ba 'di nyid dang / sngar spags pa slong ba'i spang ba dang / slong ba'i spang ba bstan pa dag gi mtshan nyid spyir 'dra ba dang / khyad par cung zad yod pa yang bstan pa yin no/ /de ltar so so nas spags pa slong ba'i spang ba dang / spags pa slong ba'i spang ba dang / slong ba'i spang ba gsum gyi mtshan nyid spyir 'dra ba dang / khyad par cung zad yod pa go sla bar bya ba'i phyir dang por bstan nas/ da ni so so nas spags pa slong ba'i spang ba nyid kyi mtshan nyid rgya cher bstan par bya ste/ de la 'dir dngos gzhi'i ltung ba rnam par gzhag pa ni dge slong gos phrogs pa dang / rlag pa dang / tshig pa dang / rlung gis khyer ba dang / chus khyer bar ma gyur pa slong b ar mi rigs pas sbyin par byed pa spungs che ba mi'i 'gro bar gtogs pa khyim par gyur pa srog dang ldan pa nye du ma yin pa las gos rung ba tshad dang ldan pa las mi chung ba so so nas spags pa ma phul bar shes pa dag rin thang dang kha dog dang khru tshad las rnam pa gang dag bslangs pa de dag nyid thob nas/ so so nas spags pa slong ba'i spang ba'i ltung byed kyi dngos gzhir 'gyur ro/ /dge slong la so so nas spags pa slong ba'i ltung byed byung na de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par sbyin par byed pa spungs che bas gos so so nas spags pa phul bar shes pa rin thang dang / kha dog dang / khru tshad de lta bu gzhan zhig rnyed na de dag kyang snga ma'i shugs kyis spang bar 'gyur te/ de dag las ltung bar ni mi 'gyur ro/ /dge slong gis so so nas spags pa slong ba'i spong ba'i ltung byed byung la/ ji srid du spang ba'i dngos po las ma bshags shing so sor ma bshags par lhung bzed dam/ chos gos sam/ dra ba'am/ phor bu'am/ ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /rin thang dang kha dog dang khru tshad las so so nas spags pa ma phul bar shes pa rnam pa gang bslangs pa de lta bu nyid thob pa la na smad pa med do/ /rin thang dang / kha dog dang / khru tshad kyi dbye ba ma byas par so so nas spags pa ma phul bar shes pa spyir bslangs pa na gang yang rung ba zhig thob pa la na smad pa med do/ /rung ba nyid dang tshad dang ldan pa dang / tshad las lhag pa so so nas spags pa ma phul bar shes pa la na smad pa med do/ /'di'i byed pa po ni sbyin par byed pa spungs che ba mi'i 'gro bar gtogs pa khyim par gyur pa srog dang ldan pa nye du ma yin pa'o/ /de dge slong ji lta bu la ltung ba 'di'i byed pa po yin zhe na/ gos phrogs pa dang / rlag pa dang / tshig pa dang / rlung gis khyer ba dang / chus khyer bar ma gyur pa slong bar mi rigs pa la'o/ /'di la yan lag lngas dngos gzhi'i ltung bar 'gyur te/ dge slong gos phrogs pa dang / rlag pa dang / tshig pa dang / rlung gis khyer ba dang / chus khyer bar ma gyur pa slong bar mi rigs pa dang / sbyin bdag spungs che ba mi'i 'gro bar gtogs pa khyim par gyur pa srog dang ldan pa nye du ma yin pa dang / gos rung ba tshad dang ldan pa las mi chung ba so so nas spags pa ma phul bar shes pa dang / rin thang dang / kha dog dang / khru tshad las so so nas spags pa ma phul bar shes pa rnam pa gang bslangs pa dang / de nyid thob pa'o/ /de dag las yan lag ma tshang na ci rigs par na smad do/ /de la dge slong gos phrogs pa la sogs par ma gyur pa zhes smos pa ni de dag slong bar mi rigs pa'i phyir ro/ /sbyin bdag spungs che ba mi'i 'gro bar gtogs pa'i khyim par gyur pa srog dang ldan pa nye du ma yin pa zhes smos pas ni de las bzlog pa la nyes byas su 'gyur ba'i phyir ro/ /gos rung ba tshad dang ldan pa las mi chung ba so so nas spags pa ma phul bar shes pa zhes smos pa ni zhu ba las nye du ma yin pa las chos gos mi rung ba dang / mi chog pa so so nas spags pa ma phul bar shes pa nyid slong na nyes byas so zhes gsungs pa'i phyir ro/ /rin thang dang / kha dog dang / khru tshad las so so nas spags pa ma phul bar shes pa rnam pa gang bslangs pa dang / de nyid thob pa zhes smos pa ni gzhan thob pa dang / de nyid ma thob pa la ltung ba med do zhes gsungs pa'i phyir ro/ /sbyor ba gcig gis gos so so nas spags pa gcig gam/ gnyis sam/ mang po zhig thong na yang ltung ba'i dngos gzhi gcig rnam par gzhag go/ /sbyor ba'i ltung ba ni nyes byas te/ ji srid du so so nas spags pa slong ba'i spong ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /sbyin par bya ba spungs che ba mi'i 'gro bar gtogs pa dang / khyim par gyur pa dang / srog dang ldan pa dang / nye du ma yin pa las bzlog pa las so so nas spags pa ma phul bar shes pa slod pha la nyes byas so/ /so so nas spags pa ma phul bar shes pa slong ba'i tshe nyid na nyes byas so/ /so so nas spags pa ma phul bar shes pa mi rung ba slang ba dang / thob pa la nyes byas so/ /so so nas spags pa ma phul bar shes pa chung ngu slong ba dang thob pa la nyes byas so/ /rgyu spun so so nas spags pa ma phul bar shes pa slong ba dang thob pa la nyes byas so/ /rgyu spun gyi rang bzhin bal dang / ras bal la sogs pa so so nas spags pa ma phul bar shes pa slong ba dang thob pa la nyes byas so/ /khyim bdag dang khyim bdag gi chung ma gnyis ka'am/ gcig ma ning dang mtshan gnyis pa la so so nas spags pa ma phul bar shes pa slong ba dang thob pa la nyes byas so/ /phyi rol pa'i rab tu byung ba dang / chos 'di pa'i rab tu byung ba mtshams med pa byas pa la sogs pa gtan gyi bar chad kyis sdom pa dang po nas ma chags pa dang / sdom pa chags pa bslab pa nyams pa dag la so so nas spags pa ma phul bar shes pa slong ba dang thob pa la nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas phra mo'o/ /de yang dang po yid la sems pa ni sbyor ba'i nyes byas phra mo'o/ /de nas lus dang ngag gi sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni dge slong gos phrogs pa dang / rlag pa dang / tshig pa dang / rlung gis khyer ba dang / chus khyer ba dag ni slong bar rigs pa yin pas de dag so so nas spags pa ma phul bar shes pa slong ba la ltung ba med do/ /rin thang gzhan nam kha dog gzhan nam/ khru tshad gzhan so so nas spags pa ma phul bar shes pa thob pa la ltung ba med do/ /ras ma dang kha tshar so so nas spags pa ma phul bar shes pa slong ba la ltung ba med do/ /kha tshar so so nas spags pa ma phul bar shes pa las ras ma thob pa la ltung ba med do/ /ras ma so so nas spags pa ma phul bar shes pa bslangs na ras yug chen dang ras yug phran dag thob bo snyam nas bslangs shing thob na yang ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du so so nas spags pa slong ba'i spang bar 'gyur ba rnam pa thams cad mi bsten pa bslab par bya'o/ /phyir bcos pa ni snga ma bzhin no/ /so so nas spags pa slong ba'i spang ba ste dgu pa bshad zin to// //so sor thar pa'i mdo rgya cher 'grel pa 'dul ba kun las btus pa bam po bcu gsum pa/ skur pa spang ba'i gleng gzhi ni sangs rgyas bcom ldan 'das rgyal po'i khab na 'od ma'i tshal ka lan dka'i gnas na bzhugs so/ /nye dga' la blo skyes pa 'di dag thams cad khyim bdag mgon med zas sbyin gyis bslab pa'i gzhi dag gis bsdam par byas pas phyin chad ras yug phran sgre bo yang su las kyang bslang bar mi nus kyi 'di na bdag dang lhan cig yi ge'i grwa na yig 'bru'i yi ge dag slob pa bram ze dbyar tshul yod kyis de'i gan du song ste bltas na de nas de las chung zad 'thob kyang srid do snyam nas de de'i khyim du song ba dang / sgo bas 'phags pa ma 'jug cig ces dgag go/ /nye dgas smras pa/ bzhin bzangs bcom ldan 'das kyis bdag cag gi spyod yul ma yin pa ni rnam pa lnga gsungs te/ rol mo mkhan gyi khyim dang / smad 'tshong ma'i khyim dang / chang 'tshong ma'i khyim dang / rgyal po'i pho brang dang / gdol pa'i khyim yin na/ ji 'di de dag gcig gi khyim yin nam/ sgo bas smras pa/ 'phags pa khyod spyo ba mang du mdzad de/ 'di ni de dag gang gi khyim yang ma lags kyi/ 'di ltar de ni bram ze dbyar tshul gyi sdum pa lags so/ /nye dgas smras pa/ kwa'e nang rje song la bram ze dbyar tshul la nye dgas shes ldan lta bar 'dod cing sgo na sdod do zhes gyis shig / sgo bas smras pa/ khyod rgyal po gzugs can snying po'i snying tshoms gces pa lags sam/ nye dgas smras pa/ bkren pa gal te sbron na ni son cig /mi sbron na khyod la mtshams chen po gcod pa sbyin par bya'o/ /sgo bas bsams pa/ 'di 'di ltar 'jigs pa med pa dang / bag tsha ba med par tshig gtong ba las na ma sbran na gnod pa byed kyi song la sbran no snyam nas de der song ste smras pa/ jo bo btsun pa nye dga' jo bo lta bar 'chal zhing chab sgo na sdod do/ /dbyar tshul gyis smras pa/ btsun pa nye dga' la su 'gog /btsun pa nye dga' 'jug tu chug shig / nye dga' zhugs pa dang / dbyar tshul gyis smras pa/ btsun pa nye dga' byon pa legs so/ /byon pa legs so/ /btsun pa nye dga' gdan bshams pa nyid la bzhugs shig /nye dga' de'i mdun du 'dug ste/ des sgra mthon po dang / sgra yid du 'ong ba dang / sgra zab mos sbyin pa'i bsngags pa brjod par brtsams so/ /gang gi tshe nye dga' yid dga' zhing yid dga' nas sbyin pa'i bsngags pa rjod par byed pa de'i tshe na bram ze dang khyim bdag dad pa can dag 'di snyam du kye ma rang gi sha dag kyang bcad cing bcad cing sbyin par bya'o snyam du sems pas/ bram ze dbyar tshul gyis smras pa/ btsun pa nye dga' dbyar gnas pa la kAr ShA pa Na drug cu 'bul lo/ /nye dgas a rog gya sbyin pa 'dis khyod sems kyi rgyan dang / sems kyi yo byad dang / rnal 'byor gyi tshogs dang / don gyi mchog thob pa dang / lha dang mi rnams kyi longs spyod kyang thob par gyur cig ces smras te song ngo / /de'i tshe mnyan yod nas dge slong gnyis shig bcom ldan 'das kyi zhabs la phyag 'tshal du rgyal po'i khab tu 'ongs so/ /bcom ldan 'das kyis kyang tshe dang ldan pa kun dga' bo la bka' stsal pa/ kun dga' bo khyod song la dge slong rnams la de bzhin gshegs pa ko sa la dag tu ljongs rgyur gshegs kyi/ khyod cag las gang de bzhin gshegs pa dang thabs cig ko sa la dag tu ljongs rgyur 'gro bar spro ba des chos gos kyi las gyis shig ces sgo shig / tshe dang ldan pa kun dga' bos btsun pa bka' bzhin 'tshal zhes bcom ldan 'das kyi bka' mnyan nas dge slong rnams la de skad bsgo'o/ /dge slong rnams kyis kyang tshe dang ldan pa kun dga' bo bka' bzhin 'tshal zhes tshe dang ldan pa kun dga' bo'i tshig mnyan to/ /mnyan yod nas 'ongs pa'i dge slong de gnyis kyis de thos nas bdag cag kyang mnyan yod du 'gro dgos so snyam nas/ mi dga' bar gyur to/ /nye dgas kyang de thos nas nyam nga bar gyur te/ bdag la brgya la brgya lam na rnyed pa byung ba de'i bar chad byung ngo snyam nas/ de bram ze dbyar tshul gyi gan du song ste sgra dma' ba dang / sgra yid du mi 'ong ba dang / sgra mi zab pas sbyin pa'i bsngags pa brjod par brtsams pa dang / dbyar tshul gyis smras pa/ btsun pa nye dga' khyod sngon sgra mthon po dang / sgra yid du 'ong ba dang / sgra zab mos sbyin pa'i bsngags pa brjod par mdzad na/ khyod da ltar sgra dma' ba dang / sgra yid du mi 'ong ba dang / sgra mi zab pas sbyin pa'i bsngags pa brjod par mdzad na 'di la rgyu ci mchis/ nye dgas smras pa/ chung po grogs bdag cag brgya la brgya lam na phrad pa byung na/ de yun mi ring ba kho nas 'bral bar 'gyur ba'i phyir ro/ /ma ga d+hA pa zur gyis go/ /ko sa la pa brjod na shes/ /pany+tsal pa yig phyed kyis/ /nub mi ma smras mi shes so/ /zhes bya ba yin pas dbyar tshul gyis bsams pa 'di ni shAkya'i rigs rgya che ba spangs te/ rab tu byung ba yin pas 'di bdag dang 'bral ba la mya ngan mi byed kyi kA ra ShA pa Na drug cu 'tshor ba'i mya ngan byed do snyam nas smras pa/ btsun pa nye dga' gang dang gang du gnas par bdag gis kAr ShA pa Na drug cu bskur bar bya'o/ /nye dgas a rog gya de lta na phan tshun med pa dang / kun nas nyon mongs pa med pa'i sbyin pa dag sbyin zhing bsod nams dag byed pa yin no zhes smras nas/ stan las langs te song ngo / /de nas bcom ldan 'das dul ba 'khor dul ba dang ldan pa/ zhi ba 'khor zhi ba dang ldan pa/ grol ba 'khor grol ba dang ldan pa/ dbugs phyin pa 'khor dbugs phyin pa dang ldan pa/ thul ba 'khor thul ba dang ldan pa/ dgra bcom pa 'khor dgra bcom pa dang ldan pa/ 'dod chags dang bral ba 'khor 'dod chags dang bral ba dang ldan pa/ mdzes pa 'khor mdzes pa dang ldan pa/ khyu mchog ba lang gi tshogs kyis yongs su bskor ba lta bu/ glang po che glang po che'i phru gu'i tshogs kyis yongs su bskor ba lta bu/ seng ge mche ba can gyi tshogs kyis yongs su bskor ba lta bu/ ngang pa'i rgyal po ngang pa'i tshogs kyis yongs su bskor ba lta bu/ nam mkha' lding bya'i tshogs kyis yongs su bskor ba lta bu/ bram ze slob ma'i tshogs kyis yongs su bskor ba lta bu/ sman pa mkhas pa nad pa'i tshogs kyis yongs su bskor ba lta bu/ dpa' bo ru pa'i tshogs kyis yongs su bskor ba lta bu/ sa mkhan 'gron po'i tshogs kyis yongs su bskor ba lta bu/ ded dpon tshong pa'i tshogs kyis yongs su bskor ba lta bu/ tshong dpon 'khor gyi tshogs kyis yongs su bskor ba lta bu/ mkhar gyi rgyal po blon po'i tshogs kyis yongs su bskor ba lta bu/ 'khor los sgyur ba'i rgyal po bu stong gi tshogs kyis yongs su bskor ba lta bu/ zla ba rgyu skar gyi tshogs kyis yongs su bskor ba lta bu/ nyi ma 'od zer stong gi tshogs kyis yongs su bskor ba lta bu/ yul 'khor srung dri za'i tshogs kyis yongs su bskor ba lta bu/ 'phags skyes po grul bum gyi tshogs kyis yongs su bskor ba lta bu/ mig mi bzang klu'i tshogs kyis yongs su bskor ba lta bu/ nor sbyin gnod sbyin gyi tshogs kyis yongs su bskor ba lta bu/ thags bzangs ris lha ma yin gyi tshogs kyis yongs su bskor ba lta bu/ brgya byin sum cu rtsa gsum pa'i tshogs kyis yongs su bskor ba lta bu/ tshangs pa tshangs ris kyi tshogs kyis yongs su bskor ba lta bu/ dbang po rnams shin tu dul ba/ spyod lam dang spyod pa ma 'khrugs pa/ mtsho ltar ting nge ba/ sprin ltar chu dang bcas pa/ glang po che'i rgyal po ltar dregs pa dang bral ba/ skyes bu chen po'i mtshan sum cu rtsa gnyis kyis legs par brgyan pa/ dpe byad bzang po brgyad cus sku rnam par mdzes pa/ 'od 'dom gang gis gzugs can brgyan pa/ nyi ma stong bas lhag pa'i 'od dang ldan pa/ rin po che'i ri bo 'gro ba ltar kun du bzang ba/ stobs bcu dang mi 'jigs pa bzhi dang / ma 'dres pa'i dran pa nye bar gzhag pa gsum dang / thugs rje chen po dang ldan pa/ 'jig rten la phan par zhugs pa/ srung ba gcig pu pa/ nyag gcig dpa' ba/ gnyis pa med pa/ gnyis su mi gsung ba/ zhi gnas dang lhag mthong gis bzhugs pa/ rig pa gsum gsal bar mdzad pa/ bslab pa gsum la legs par bslabs pa/ dul ba'i gnas gsum gyi gzhi la mkhas pa/ chu bo bzhi las rgal ba/ rdzu 'phrul gyi rkang pa bzhis spyod pa'i gzhi la legs par gnas pa/ bsdu ba'i dngos po bzhi la yun ring po nas yongs su sbyang ba mdzad pa/ mi 'jigs pa bzhis bsnyengs pa mi mnga' ba/ yan lag lnga spangs pa/ 'gro ba lnga las yang dag par 'das pa/ yan lag drug dang yang dag par ldan pa/ pha rol tu phyin pa drug yongs su rdzogs pa/ rtag tu gnas pa drug gis gnas pa/ byang chub kyi yan lag bdun gyi me tog gis phyug pa/ lam gyi yan lag brgyad ston pa/ mthar gyis gnas pa'i snyoms par 'jug pa dgu la mkhas pa/ stobs bcu'i stobs dang ldan pa/ phyogs bcur snyan pas yang dag par rgyas pa/ brgya phrag bcur dbang bsgyur ba las khyad par du 'phags pa/ 'khor nyan thos chen po tshe dang ldan pa kun shes kauN+Di n+ya dang / rlangs pa dang / ming chen dang / ma 'gags pa dang / shA ri'i bu dang / maud gal gyi bu dang / 'od srungs dang / kun dga' bo dang / nam gru la sogs pa nyan thos chen po dag dang / gzhan yang dge slong gi dge 'dun mang pos yongs su bskor zhing mdun du bdar nas/ ko sa la dag tu ljongs rgyur gshegs te/ mnyan yod du byon nas/ mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod kyi tshong pa dag zong thogs te rgyal po'i khab tu dong ba dag gal te 'gron po don mthun mang na de la rgyal po'am/ bram ze dbyar tshul shog ma gcod par byed pas bram ze dbyar tshul gyis sho gam pa dag la smras pa/ gang gi tshe mnyan yod pa'i tshong pa dag mnyan yod du phyir 'gro ba de'i tshe na kho bo la sbron cig /sho gam pa dag gis tshong pa dag la bsgo nas/ de dag gis zong bsgyur te rin blangs nas/ bram ze dbyar tshul gyi gan du dong ste/ bdag cag mnyan yod du mchi na bgyi ba ci mchis zhes smras pa dang / bram ze dbyar tshul gyis tshong pa cig la kAr ShA pa Na drug cu gtad de/ khyod kyis 'di btsun pa nye dga'i gan du khyer la phul cig ces bsgo'o/ /tshong pa des bsams pa/ gang bram ze dbyar tshul gyis dad par bya ba'i dge slong de ni gdon mi za bar grags pa yin pas bdag gis kyang de la dga' ba cung zad byas/ gos dag bskon no snyam nas/ de 'od ma'i tshal du song ste dge slong gi gan du phyin nas dris pa/ 'phags pa dge slong gi tshul dang mthun pa'i gos dag ji lta bu lags/ dge slong des smras pa/ bzhin bzangs ji khyod dge 'dun la ras yug chen gyi sbyin pa byed dam/ tshong pas smras pa/ 'phags pa bdag dge 'dun la ras yug chen gyi sbyin pa mi bgyid de/ de ltar bram ze dbyar tshul gyis btsun pa nye dga' la/ kAr ShA pa Na drug cu bskur ba dag de'i gos dag tu bsgyur te mchi'o/ /dge slong des smras pa/ bzhin bzangs gos dag kyang len cing / khyod kAr ShA pa Na drug cu yang 'bul du 'jug pa gang yin pa de lta bu'i gnas yod par 'gyur ro/ /tshong pa des bsams pa/ 'di ni gor ma chag par de dang kho na yod pa yin no snyam nas/ de dge slong gzhan zhig gi gan du song ste dris pa/ 'phags pa dge slong gi tshul dang mthun pa'i gos dag ji lta bu lags/ bzhin bzangs ji khyod dge 'dun la ras yug chen gyi sbyin pa byed dam/ 'phags pa dag dge 'dun la ras yug chen gyi sbyin pa mi bgyid de/ 'di ltar bram ze dbyar tshul gyis btsun pa nye dga' la kAr ShA pa Na drug cu bskur ba dag de'i gos dag tu bsgyur te mchi'o/ /dge slong des smras pa/ gal te rgyas ma btab par khyer na khyod yul gyi khe spogs 'bul du 'jug pa gang yin pa de lta bu'i gnas yod par 'gyur ro/ /tshong pa des bsams pa/ 'di dang de gnyis mthun no snyam nas/ de bram ze dbyar tshul gyi gan du song ste smras pa/ dbyar tshul kAr ShA pa Na 'di dag rgyas thob shig /bzhin bzangs yid ches kyi khyod nyid kyis khyer cig dbyar tshul bdag la thugs ches mod kyi/ 'on kyang bdag gis legs par bgyi ba bgyi'o/ /dbyar tshul gyis rgyas btab nas des de dag khyer te mnyan yod du song nas de rgyal byed kyi tshal du song ste dge slong rnams la dris pa/ 'phags pa dag btsun pa nye dga'i gtsug lag khang gang lags/ de dag gis de'i gtsug lag khang 'di yin no zhes bstan nas/ de der song ba dang / nye dga' mi snang nas des de dge slong zhig la dris pa/ 'phags pa btsun pa nye dga' gar bzhud/ des smras pa/ nyin mo spyod pa'i phyir ro/ /tshong pa des smras pa/ bram ze dbyar tshul gyis de la kAr ShA pa Na drug cu bskur ba 'di dag zhog la de mchis na stsol cig / bzhin bzangs khyod kyis sgron ma rab tu 'bar ba mgo bos 'dzin pa 'ga' mthong ngam/ des bsams pa/ 'di ni gdon mi za bar de dang kho na yod pa yin no snyam nas/ de dge slong gzhan zhig gi gan du song ste smras pa/ 'phags pa bram ze dbyar tshul gyis/ btsun pa nye dga' la kAr ShA pa Na drug cu bskur ba 'di dag zhog la de mchis na stsol cig / bzhin bzangs gal te khyod kyis rgyas ma btab par 'ongs na/ khyod yul gyi khe spogs 'jal du 'jug pa gang yin pa de lta bu'i gnas yod par 'gyur ro/ /des bsams pa/ 'di dang de gnyis mthun gyi khyim du song la de nyid du de 'ongs pa la bde bar tshig gi lan gdab bo snyam nas smras pa/ 'phags pa btsun pa nye dga' mchis na 'di skad ces bdag gi sdum pa ni phyogs ga ge mo zhig na mchis kyi/ gal te kAr ShA pa Na bzhed na gshegs su gsol zhes gsungs shig ces smras te song ngo / /nye dga' yang gtsug lag khang du 'ongs nas/ dge slong rnams kyis smras pa/ btsun pa nye dga' bcom ldan 'das kyis tshul khrims dang ldan pa'i sems kyi smon pa 'grub ste/ de yang tshul khrims rnam par dag pa'i phyir ro zhes bka' stsal pa de legs par gsungs pa yin te/ khyod deng kho na'i nyin mo spyod yul du song bas deng nyid du kAr ShA pa Na drug cu grub bo/ /gang gis bcom ldan 'das kyi 'khor stong nyis brgya lnga bcu re re la kAr ShA pa Na drug cu sbyin pa'i sbyin bdag de lta bu gang yin/ btsun pa nye dga' dge 'dun thams cad la ma yin gyi khyod gcig pu la'o/ /gang gis nye dga' la kAr ShA pa Na drug cu sbyin pa'i sbyin bdag de lta bu de gang yin/ bram ze dbyar tshul gyis bskur ro/ /de ni phyi rol gyi rnyed pa kho na yin na/ rgya ma byid dam/ ma zhu'am/ sgyu ma zhugs sam/ sus brtags/ ma brtags pa kho nar blangs sam/ sus blangs/ kho bo ni dgra bo sha stag gi nang na 'dug go/ /de la dge slong gzhan mas smras pa/ btsun pa nye dga' yi chad du ci yod/ khyim bdag de na re bdag gi sdum pa ni phyogs ga ge mo zhig na mchis kyi gal te kAr ShA pa Na bzhed na gshegs su gsol zhes zer ro/ /nye dgas snam sbyar blangs nas gom pa bskyed de song ba dang / khyim bdag des thag ring po kho na nas 'ong ba mthong nas/ des bsams pa/ dge sbyong hral po gom pa 'di lta bus 'ong ba 'di ni btsun pa nye dga' yin gor ma chag snyam nas/ des thag ring po kho na nas de la smras pa/ khyod btsun pa nye dga' ma lags sam kho bo yin no/ /bram ze dbyar tshul gyis khyod la kAr ShA pa Na drug cu bskur ba 'di lags kyi bzhes shig /a rog gya sbyin pa 'dis khyod sems kyi rgyan dang / sems kyi yo byad dang / rnal 'byor gyi tshogs dang / don gyi mchog thob pa dang / lha dang mi rnams kyi longs spyod kyang thob par gyur cig /'phags pa ci'i slad du bdag gi ming gis phan yon bshad pa mdzad/ bram ze dbyar tshul gyi ming gis yon bshad pa mdzod cig /bkren pa 'di la 'god pa ci yod/ 'di ltar khyod kyis kyang mang du byas te/ khyod kyis khyer te 'ongs pa'i phyir ro/ /gang gis 'di khyer te srang du 'gro ba'i khye'u zhig re zhig rnyos shig /'phags pa bdag cag la khye'u ma mchis so/ /bkren pa rgyal po'i khab nas thag ring po 'di srid du khyer te 'ongs na srang du skyel mi nus sam/ des khye'u la smras pa/ kAr ShA pa Na khyer te 'phags pa'i phyi bzhin song la phyi rol du ma byung shig / 'dis khyod la bca' ba'i rin dag phab pa re/ khye'u des kAr ShA pa Na de khyer te de'i phyi bzhin srang du song nas/ tshong rdal dang por phyin pa dang / des smras pa/ 'phags pa kAr ShA pa Na 'di dag 'dir thoms shig / nye dgas khye'u khyod shin tu legs par bslabs so zhes des spos 'tshong [(]gyi [,]gi [)]khye'u zhig la smras pa/ bzhin bzangs kAr ShA pa Na 'di dag re zhig gtams so/ /'phags pa bdag ni bla ma la rag las pa lags so/ /khyod nam yang rang dbang can du ma gyur cig /des spos 'tshong gi khye'u gzhan zhig gi gan du song ste smras pa/ bzhin bzangs kAr ShA pa Na 'di dag re zhig gtams so/ /'phags pa bdag gi bla ma slad rol du mchis so/ /nam yang nang du 'jug par ma gyur cig /des spos 'tshong gi khye'u dad pa gsar dang ldan pa zhig yod pa de'i gan du song ste smras pa/ bzhin bzangs kAr ShA pa Na 'di dag re zhig gtams so/ /'phags pa bdag ma la rag las pa lags so/ /kho bos khyod dad pa dang ldan par shes kyi/ kho bos khyod ji ltar rtug pa la dad par ni mi shes so/ /gal te khyod kyis dad pa ma thob tu zin na ni khyod kyis shing tshal blangs te/ dge slong skrod par yang 'gyur ro/ /de skyengs nas smras pa/ 'phags pa gzhag tu gsol/ nye dgas kAr ShA pa Na de dag der gtams nas/ khyim bdag gi khye'u de phyir btang ste song ngo / /de nas tshong ba'i tshogs kyis kyang bdag cag las gang nang par sngar mi 'du bar nyi ma shar nas 'ong ba de dag bdag cag gis kAr ShA pa Na drug cu 'jal du gzhug go zhes khrims su bya ba bcas nas spos 'tshong gi khye'u de la mas smras pa/ bu ci nas kyang bdag nyid kAr ShA pa Na drug cu 'jal du mi bcug pa de ltar gyis shig /nye dga' mtshan mo 'gyod pa skyes te/ spos 'tshong gi khye'u de dad pa gsar dang ldan pa yin pas kAr ShA pa Na de dag bsnyon par 'gyur ba gang yin pa de lta bu'i gnas yod par 'gyur ro snyam nas/ de nang par sngar langs te khye'u zhig khrid nas de'i tshong rdal du song ba dang / spos 'tshong gi khye'u de tshong rdal 'byed cing 'dug pa des mthong nas smras pa/ bzhin bzangs kAr ShA pa Na de dag byin cig /'phags pa tshong pa'i tshogs kyis bdag cag las gang nang par sngar mi 'du bar gdugs shar na mchi ba de kAr ShA pa Na drug cu 'jal du stsal ba'i khrims su bgyi ba bcas pas/ bdag tshong pa'i tshogs kyi nang du mchis te/ slar mchis kyi bar du yud tsam zhig gzhes su gsol/ bkren pa su zhig khyod kyi lto gol ba yin snyam/ su zhig byin pa gnyis skrangs skrangs su khyod kyi sgo na sdod par 'gyur/ gal te ma byin par 'gro na ko sa la'i rgyal po gsal rgyal gyis kAr ShA pa Na drug cu 'jal du gzhug pa'i gyod la bsgrin par bya'o/ /spos 'tshong gi khye'u de khros nas kAr ShA pa Na'i thum po de 'phangs pa dang / de'i rgya gogs so/ /nye dgas smras pa/ rgya ma byid dam/ ma zhu'am/ sgyu ma zhugs sam blta'o/ /ci kho bo la khyod kyis brtags te gtad dam/ gal te khyod kyis brtags te blangs na ci'i phyir rgya 'tshog par byed/ nye dgas spos 'tshong gi khye'u de de srid du bsgor gyi bar du tshong pa'i tshogs kyis de'i khyim nas kAr ShA pa Na drug cu'i gta' bcad nas de la mas smras pa/ bu khyod kyis las ci byas na des khyod kyis bdag nyid kAr ShA pa Na drug cu'i gyod la bsgrin par gyur/ khye'us smras pa/ gang dag shAkya'i bu'i dge sbyong rnams la mngon par dad par byed pa de dag 'di ltar gyur te/ dad pa'i myu gu skyes ma thag pa nyid nyams par byas so zhes zer ba'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ nye dga' la rmas nas rnam grangs du mar smad pa mdzad de/ bslab pa bca' ba'i phan yon bcu yang dag par gzigs pas/ nga'i nyan thos rnams kyis 'dul ba la bslab pa'i gzhi 'di ltar gdon par bya ste dge slong gi phyir/ rgyal po'am/ blon po chen po'am/ bram ze'am/ khyim bdag gam/ grong rdal gyi mi'am/ yul mi'am/ nor can nam/ tshong dpon nam/ ded dpon gyis pho nya'i lag tu gos kyi rin dag bskur bar gyur la/ de nas pho nye de gos kyi rin de dag khyer nas dge slong de ga la ba der song ste phyin nas/ dge slong de la 'di skad ces 'phags pa mkhyen par mdzod cig /khyod la rgyal po'am blon po chen po'am/ bram ze'am/ khyim bdag gam/ grong rdal gyi mi'am/ yul gyi mi'am/ nor can nam/ tshong dpon nam/ ded dpon che ge mos gos kyi rin 'di dag bskur gyi/ 'phags pa thugs brtse ba'i slad du 'di dag bzhes shig ces zer nas/ dge slong des pho nya de la 'di skad ces tshe dang ldan pa pho nya dge slong dag ni gos kyi rin dag len du mi rung ste/ bdag cag gos rung ba dus su rnyed na ni len to zhes brjod par bya'o/ /gal te pho nya de dge slong de la 'di skad ces 'phags pa rnams kyi zhal ta bgyid pa 'phags pa rnams kyi zhal ta nyams su len pa gang lags pa 'ga' mchis sam zhes zer na dge slong gos 'dod pas pho nya 'di ni dge slong rnams kyi zhal ta byed pa ste/ 'di ni dge slong rnams kyi zhal ta nyams su len pa'o zhes kun dga' ra ba pa'am dge bsnyen zhal ta byed pa bstan par bya'o/ /de nas pho nya des gos kyi rin de dag khyer nas zhal ta byed pa ga la ba der 'gro bar bya zhing phyin nas/ zhal ta byed pa de la 'di skad ces/ tshe dang ldan pa zhal ta byed pa shes par gyis shig khyod kyis gos kyi rin 'di dag gis gos 'di dang 'di lta bu zhig nyos la dge slong ming 'di zhes bya ba 'ongs pa dang / de la gos su rung ba dus su skon cig ces brjod par bya'o/ /de nas pho nya des zhal ta byed pa de la shin tu legs par yang dag par bsgo zhing / yang dag par bstan nas/ dge slong de ga la ba der 'gro bar bya zhing phyin nas dge slong de la 'di skad ces 'phags pas zhal ta bgyid pa bstan pa gang lags pa de la bdag gis yang dag par bstan lags kyi de'i gan du bzhud cig dang / des khyod la gos su rung ba dus su bskon par 'gyur ro zhes brjod par bya'o/ /dge slong gos 'dod pas zhal ta byed pa'i gan du song la tshe dang ldan pa zhal ta byed pa bdag gos 'dod do/ /tshe dang ldan pa zhal ta byed pa bdag gos 'dod do zhes lan gnyis lan gsum du bskul bar bya'o/ /dran par bya'o/ /lan gnyis lan gsum du bskul zhing dran par byas pa na/ gal te gos dag grub pa na de lta na legs/ gal te ma grub na lan bzhi lan lnga lan drug gi bar du phyogs su cang mi smra bar bsdad par bya'o/ /lan bzhi lan lnga lan drug gi bar du phyogs su cang mi smra bar bsdad pa na/ gal te gos de grub na de lta na legs/ gal te ma grub na de'i 'og tu gos bsgrub pa'i phyir brtsal te/ gos grub na spang pa'i ltung byed do/ /gal te ma grub na phyogs gang nas gos kyi rin de dag 'ongs pa der bdag 'gro bar bya'o/ /yang na yid brtan pa'i pho nya las/ tshe dang ldan pa dag gis dge slong che ge mo'i phyir gos kyi rin gang dag bskur ba de dag ni dge slong de'i don ji ltar yang ma grub kyi shes par gyis shig / tshe dang ldan pa dag gis rang gi nor chud ma gzan cig ces spring bar bya ste/ de la de ni cho ga yin no zhes bca' ba mdzad de/ yul ni mnyan yod/ gang zag ni nye dga'/ nyon mongs pa ni nor dang / nyes pa ni mi mdzes pa'o/ /de la dge slong gi phyir zhes bya ba ni shAkya'i bu nye dga' 'am/ gzhan yang de lta bu gang yin pa'i phyir ro/ /rgyal po'am zhes bya ba ni 'di lta ste/ bud med rgyal srid la dbang bskur bas dbang bskur bar gyur na de yang rgyal po rgyal rigs spyi bo nas dbang bskur ba yin la/ rgyal rigs dang / bram ze'i rigs dang / rje'u'i rigs dang / dmangs rigs rgyal srid la dbang bskur bas dbang bskur bar gyur na de yang rgyal po rgyal rigs spyi bor dbang bskur ba yin no/ /blon po chen po'am zhes bya ba ni rgyal po las gzhan pa blon po dang / rtsis mkhan dang / sna chen po la gtogs pa rgyal srid byed pas gsang tshig mthun pas 'tsho ba gang dag rgyal po la brten nas 'tsho bar byed pa dag go/ /bram ze'am zhes bya ba ni bram ze gtsang sbra can no/ /khyim bdag gam zhes bya ba ni phyug po'o/ /grong rdal gyi mi'am zhes bya ba ni grong khyer gyi mi'o/ /yul mi'am zhes bya ba ni yul gyi mi'o/ /nor can nam zhes bya ba ni nor bye bas phyug pa'o/ /tshong dpon nam zhes bya ba ni cod pan bcings pa'o/ /ded dpon gyis zhes bya ba ni gang gis lan gnyis sam lan gsum 'gron pa don mthun bdas par gyur pas so/ /pho nya'i lag tu zhes bya ba ni skyes pa dang / bud med dang / ma ning gi lag tu'o/ /gos kyi rin dag ces bya ba ni gser ram dngul dag go/ /bskur bar gyur la zhes bya ba ni bsrang bar gyur pa la'o/ /de nas pho nya de gos kyi rin de dag khyer nas dge slong de ga la ba der song ste/ phyin nas dge slong de la 'di skad ces 'phags pa mkhyen par mdzod cig /khyod la rgyal po'am/ blon po chen po'am/ bram ze'am/ khyim bdag gam/ grong rdal gyi mi'am/ yul mi'am/ nor can nam/ tshong dpon nam/ ded dpon che ge mos gos kyi rin 'di dag bskur gyi/ 'phags pas thugs brtse ba'i slad du 'di dag bzhes shig ces zer na zhes bya ba ni pho nyas dge slong la sbyin bdag gi gos kyi rin bskur ba dag phul nas phrin de skad ces smra na'o/ /dge slong des pho nya de la 'di skad ces tshe dang ldan pa pho nya dge slong dag ni gos kyi rin dag len du mi rung ste/ bdag cag gos rung ba dus su rnyed na ni len to zhes brjod par bya'o zhes bya ba ni dge slong dag dngos po mi rung ba rung bar ma byas pa dag mi len pa dang / gos rung ba dus su rnyed pa len du rung ba'i tshul go bar bya ste/ gos kyi rin dag ni gser dang / dngul la sogs pa mi rung ba rung bar ma byas pa dag go/ / gos rung ba ni spyad bzod pa'o/ /dus su rnyed pa ni gos [(]bged [,]'gebs [)]pa'i dus dang / slong bar rigs pa'i dus dang / bstabs pa'i dus su rnyed pa'o/ /len to zhes bya ba ni bdag gir byed do zhes bya ba ste/ de skad brjod par bya'o/ /gal te pho nya de dge slong de la 'di skad ces 'phags pa rnams kyi zhal ta bgyid pa 'phags pa rnams kyi zhal ta nyams su len pa gang lags pa 'ga' mchis sam zhes zer na zhes bya ba ni pho nyas dge slong rnams kyi rung bar byed pa su yod ces brtags pa ste/ zhal ta bgyid pa zhes bya ba dang / zhal ta nyams su len pa zhes bya ba ni brnan pa'i tshig gi gzhi gcig tu bsdu'o/ /dge slong gos 'dod pas pho nya 'di ni dge slong rnams kyi zhal ta byed pa ste/ 'di ni dge slong rnams kyi zhal ta nyams su len pa'o zhes kun dga' ra ba pa'am/ dge bsnyen zhal ta byed pa bstan par bya'o zhes bya ba ni dge slong gis dge slong rnams kyi rung bar byed pa bstan pa ste/ dge slong gos 'dod pa zhes bya ba ni gal te gos don du gnyer bas so/ /kun dga' ra ba pa zhes bya ba dang / dge bsnyen zhal ta byed pa zhes bya ba ni gzhi tha dad de gnyis ka yang zhal ta byed pa dang / zhal ta nyams su len pa yin par sbyar ro/ /de la kun dga' ra ba pa zhes bya ba ni rung ba byed pa ste/ lha 'bangs dang / rtse rgod la sogs pa'o/ /dge bsnyen zhes bya ba ni gsum la skyabs su song ba bslab pa'i gzhi lnga blangs pa ste/ dge slong gi 'khor du gtogs pa'o/ /de nas pho nya des gos kyi rin de dag khyer nas zhal ta byed pa ga la ba der 'gro bar bya zhing phyin nas zhal ta byed pa de la 'di skad ces tshe dang ldan pa zhal tu byed pa shes par gyis shig / khyod kyis gos kyi rin 'di dag gis gos 'di dang 'di lta bu zhig nyos la/ dge slong ming 'di zhes bya ba 'ongs pa dang / de la gos rung ba dus su skon cig ces brjod par bya'o zhes bya ba ni pho nyas gos kyi rin dag zhal ta byed pa la gtad cing / de dag gos rung bar bsgyur la/ dge slong de la dus su phul cig ces gdams shing rjes su bstan pa'i tshig yin no/ /de nas pho nya des zhal ta byed pa de la shin tu legs par yang dag par bsgo zhing / yang dag par bstan nas/ dge slong de ga la ba der 'gro bar bya zhing phyin nas dge slong de la 'di skad ces 'phags pas zhal ta bgyid pa bstan pa gang lags bde la/ bdag gis yang dag par bstan lags kyi de'i gan du bzhud cig dang / des khyod la gos rung ba dus su bskon par 'gyur ro zhes brjod par bya'o zhes bya ba ni yid gcugs pa'i tshig gis sngar mngon sum du gtugs pa'i don bsgrub pa phyir rjes su go bar bya ba'i tshig yin no/ /dge slong gos 'dod pas zhal ta byed pa'i gan du song la/ tshe dang ldan pa zhal ta byed pa bdag gos 'dod do/ /tshe dang ldan pa zhal ta byed pa bdag gos 'dod do zhes lan gnyis lan gsum du bskul bar bya/ dran par bya'o zhes bya ba ni dge slong gis 'jig rten dang mi 'gal ba dang / 'dul ba dang mi 'gal bar bya ba'i tshul bstan pa ste/ lan gcig gis grub na gnyis pa bya mi dgos/ gnyis pas grub na gsum pa bya mi dgos/ gnyis pas yang ma grub na gsum pa yang bya ste/ re zhig de dag ni dus dang por bya ba yin no/ /lan gnyis lan gsum du bskul zhing dran par byas nas gal te gos de grub na de lta na legs zhes bya ba ni de lta na bzang ba ste/ sbyin bdag dang pho nya dang zhal ta byed pa la yang btang ba las byung ba dang / yongs su longs spyad pa las byung ba'i bsod nams bya ba'i gzhi 'phel bar 'gyur la/ dge slong la yang 'jig rten dang 'gal ba dang / 'dul ba dang 'gal ba'i nyes pa med pa'i phyir ro/ /gal te ma grub na lan bzhi lan lnga lan drug gi bar du phyogs su cang mi smra bar bsdad par bya'o zhes bya ba ni dge slong gis 'jig rten dang mi 'gal ba dang / 'dul ba dang mi 'gal bar spyad pa'i cho ga yin no/ /phyogs su zhes bya ba ni phyogs bzhi po dag tu ste phyogs bzhi po dag gang zhe na/ 'bod gnas dang / khyim gnas dang / las kyi mtha' dang las kyi gnas dag go/ /de la 'bod gnas ni rdza mkhan gyi gnas dang / 'dreg mkhan gyi gnas so/ /khyim gnas ni khyim gyi gnas sam/ chu'i gnas so/ /las kyi mtha' ni bu ram shing gi las kyi mtha' dang / 'bras sA lu'i las kyi mtha' dang / lan tshwa'i las kyi mtha' dag go/ /las kyi gnas ni tshong khang dang tshong rdal lo/ /cang mi smra bar bsdad par bya'o zhes bya ba ni bskul ba'i sgo drug po dag gi ste/ bskul ba'i sgo drug po dag gang zhe na/ khyod 'ongs sam zhes zer ba la de'i phyir ro zhes bya ba dang / 'ongs pa legs so zhes zer ba la de'i phyir ro zhes bya ba dang / stan 'di la 'dug shig ces zer ba la de'i phyir ro zhes bya ba dang / rkang pa khrus shig ces zer ba la de'i phyir ro zhes bya ba dang / bca' ba dang / bza' ba zo shig ces zer ba la de'i phyir ro zhes zer ba dang / btung ba 'thungs shig ces zer ba la de'i phyir ro zhes bya ba'o/ /bskul ba'i sgo drug po de dag ha cang myur ba dang / thogs pa med par brjod cing / de la gzhan gyi tshig gi skabs med par byed na bskul ba'i sgo drug po dag yongs su ma rdzogs pa yin par rig par bya'o/ /bskul ba'i sgo drug po de dag ha cang mi myur ba dang / thogs pa dang bcas par brjod cing / de la gzhan gyi tshig gi skabs yod par byed na bskul ba'i sgo drug po dag yongs su rdzogs pa yin par rig par bya'o/ /lan bzhi lan lnga lan drug gi bar du phyogs su cang mi smra bar bsdad pa na/ gal te gos de grub na de lta na legs zhes bya ba ni dge slong la 'dul ba dang 'gal ba'i kha na ma tho ba'i dngos gzhi dang / sbyor ba dang sbyor ba'i sbyor ba'i ltung ba yang med la/ sbyin bdag dang / pho nya dang / zhal ta pa dag la yang btang ba las byung ba dang / yongs su longs spyod pa las byung ba'i bsod nams bya ba'i dngos gzhi 'phel bar 'gyur ba'i phyir ro/ /gal te ma grub na de'i 'og tu gos bsgrub pa'i phyir brtsal te/ gos grub na spang ba'i ltung byed do zhes bya ba ni ltung ba 'di'i byed pa po yin te/ de'i 'og tu zhes bya ba ni de'i 'og rol du'o/ /gos bsgrub pa'i phyir brtsal te zhes bya ba ni 'jig rten dang 'gal ba dang / 'dul ba dang 'gal ba'i 'dzem pa spangs nas so/ /gos grub na zhes bya ba ni thob na'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /da ni dus dang por bya ba dang / ltung ba med par bya ba'i cho ga sngar bstan pa de dag la tshul bzhin du gnas pa'i dge slong bslab pa'i gzhi 'di'i ltung ba ma byung bas sbyin bdag dang / pho nya dang dge slong rang nyid kyi 'dod pa bzhin ma grub na zhal ta byed pas/ 'jig rten 'di dang pha rol gyi don la ma gzems par spyi thun gyi rdzas dang bsod nams bar du brnogs pa la dge slong gis chos bzhin du bsgrub pa'i cho ga bstan par bya ste/ gal te ma grub na phyogs gang nas gos kyi rin de dag 'ongs pa der bdag 'gro bar bya'o zhes bya ba ni dge slong bdag nyid sbyin bdag gi drung du brda sprod du 'gro bar bya'o/ /yang na yid brtan pa'i pho nya las tshe dang ldan pa dag gis dge slong che ge mo'i phyir gos kyi rin gang dag bskur ba de dag ni dge slong de'i don cir yang ma grub kyi shes par gyis shig / tshe dang ldan pa dag gi nor chud ma gzan cig ces spring bar bya ste zhes bya ba ni yang na lhan cig gnas pa'am/ nye gnas las de skad ces spring bar bya'o/ /de la de ni cho ga yin no zhes bya ba ni skabs de la thabs de ltar bya ba de ni 'jig rten dang mi 'gal ba dang / 'dul ba dang mi 'gal ba'i rjes su mthun pa'i chos yin pa'o/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang sbyor ba'i sbyor ba'i ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni dge slong gis sbyin bdag mi'i 'gro bar gtogs pa khyim par gyur pas gos kyi rin gser dngul la sogs pa rung ba ma yin pa pho nya mi'i 'gro bar gtogs pa khyim par gyur pa las skur pa spangs nas pho nyas dge slong gi zhal ta byed pa mi'i 'gro bar gtogs pa khyim par gyur pa dris shing dge slong gis bstan pa la pho nyas bsgo zhing smras te/ dge slong la yang brjod pa'i zhal ta byed pa de la bskul ba lan gsum dang bsdad pa lan gsum las lhag gam/ sbyin bdag gi sems bsdu bar rjes su bsgrub pa khas ma blangs pa las gos blangs na skur ba'i spang ba'i ltung byed kyi dngos gzhir 'gyur ro/ /dge slong la bskur ba'i spang ba'i ltung byed byung na/ de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par sbyin bdag dang / pho nya dang / zhal ta byed pa'i mi'i 'gro bar gtogs pa khyim par gyur pa las gos kyi rin gser dngul la sogs pa rung ba ma yin pa dang / gos de lta bu gzhan zhig rnyed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis skur pa'i spang ba'i ltung byed byung la/ ji srid du spang ba'i dngos po las ma bshags shing / so sor ma bshags par lhung bzed dam/ chos gos sam/ dra ba'am/ phor bu'am/ ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /'di'i r nam par gzhag pa ni sbyin bdag mi'i 'gro bar gtogs pa khyim par gyur pas gos kyi rin gser dngul la sogs pa rung ba ma yin pa pho nya mi'i 'gro bar gtogs pa khyim par gyur pa las skur pa pho nyas dge slong la phul ba na dge slong gis tshe dang ldan pa pho nya dge slong dag ni gos kyi rin dag len du mi rung ste/ bdag cag gos rung ba dus su rnyed na ni len to zhes re zhig spang bar bya'o/ /pho nyas kyang dge slong de la 'phags pa rnams kyi zhal ta bgyid pa/ 'phags pa rnams kyi zhal ta nyams su len pa gang lags pa 'ga' mchis sam zhes dge slong gi zhal ta byed pa mi'i 'gro bar gtogs pa khyim par gyur pa ji yod pa dri bar bya'o/ /de la dge slong gis kyang pho nya 'di ni dge slong rnams kyi zhal ta byed pa ste/ 'di ni dge slong rnams kyi zhal ta nyams su len pa'o zhes kun dga' ra ba pa'am/ dge bsnyen zhal ta byed pa bstan par bya'o/ /de nas pho nya des kyang gos kyi rin de dag khyer nas zhal ta byed pa ga la ba der 'gro bar bya zhing byin nas zhal ta byed pa de la 'di skad ces tshe dang ldan pa zhal ta byed pa shes par gyis shig / khyod kyis gos kyi rin 'di dag gis gos 'di dang 'di lta bu zhig nyos la dge slong ming 'di zhes bya ba 'ongs pa dang / de la gos rung ba dus su skon cig ces brjod par bya'o/ /de nas pho nya des zhal ta byed pa de la shin tu legs par yang dag par bsgo zhing yang dag par bstan nas/ dge slong de ga la ba der 'gro bar bya zhing phyin nas dge slong de la 'di skad ces 'phags pas zhal ta bgyid pa bstan pa gang lags pa de la bdag gis yang dag par bstan lags kyi de'i gan du bzhud cig dang / des khyod la gos rung ba dus su bskon par 'gyur ro zhes brjod par bya'o/ /de nas zhal ta byed pa des kyang gos rung ba dus su bsgrub cing dge slong la dbul bar bya ste/ re zhig de dag ni sbyin bdag dang / pho nya dang / zhal ta pa la yang sbyin pa las byung ba'i bsod nams bya ba'i dngos po rgya chen por 'gyur la dge slong la yang 'jig rten dang 'gal ba dang / 'dul ba dang 'gal ba'i nyes pa med par 'gyur ba'i sbyor ba bzang po yin no/ /gal te zhal ta byed pas de bzhin ma bsgrubs na dge slong gos 'dod pas zhal ta byed pa'i gan du song la tshe dang ldan pa zhal ta byed pa bdag gos 'dod do/ /tshe dang ldan pa zhal ta byed pa bdag gos 'dod do zhes lan gnyis lan gsum du bskul bar bya/ dran par bya'o/ /gal te des kyang ma grub na yang lan gnyis lan gsum gyi bar du phyogs su cang mi smra bar bsdad par bya'o/ /gal te des kyang ma grub na phyogs gang nas gos kyi rin de dag 'ongs pa der bdag 'gro bar byed pa'am/ yang na yid brtan pa'i pho nya las tshe dang ldan pa dag gis dge slong che ge mo'i phyir gos kyi rin gang dag bskur ba de dag ni dge slong de'i don cir yang ma grub kyi shes par gyis shig / tshe dang ldan pa dag gis rang gi nor chud ma gzan cig ces spring par bya ste/ de la de ni dus dang por bya ba dang cho ga yin no/ /de'i 'og tu dge slong gis zhal ta byed pa la gos bsgrub pa'i phyir sngar bskul ba lan gsum byas pa las lhag pa dang / sngar bsdad pa lan gsum byas pa las lhag par 'tshal tam/ zhal ta byed pas sbyin bdag gi sems bsdu bar rjes su bsgrub pa khas ma blangs par dus der gos blangs na bskul ba'i spang ba'i ltung byed kyi dngos gzhir rnam par gzhag go/ /sbyin bdag dang / pho nya dang zhal ta byed pa mi nyid dang / khyim pa nyid lan smad pa med do/ /de gsum nye du dang nye du ma yin pa la na smad pa med do/ /de gsum skyes pa dang bud med nyid la na smad pa med do/ /bskul ba dang phyogs na sdod pa go rims bzhin nam/ snga phyir byas pa la na smad pa med do/ /'di'i byed pa po ni sbyin bdag dang pho nya dang zhal ta byed pa gsum char mi nyid dang khyim pa nyid yin pa dang / bskul ba dang bsdad pa lhag pa dang / sbyin par byed pa'i sems bsdu bar rjes su bsgrub pa khas ma blangs pa'o/ /'di la yan lag lngas dngos gzhi'i ltung bar 'gyur te/ sbyin bdag dang / pho nya dang / zhal ta byed pa gsum char mi nyid yin pa dang / gos kyi rin rung ba ma yin pa spangs pa dang / bskul ba dang bsdad pa lhag pa dang / sbyin par byed pa'i sems bsdu bar rjes su bsgrub par khas ma blangs pa dang gos blangs pa'o/ /de dag las yan lag ma tshang na ci rigs par na smad do/ /de la sbyin bdag dang / pho nya dang / zhal ta byed pa gsum char mi nyid dang / khyim pa nyid ces smos pa ni de las bzlog pa dag la nyes byas su gsungs pa'i phyir ro/ /gos kyi rin rung ba ma yin pa spangs pa zhes smos pa yang de las bzlog pa dag la nyes byas su gsungs pa'i phyir ro/ /'dir kha cig 'di skad ces zer te/ gos kyi rin gser la sogs pa rung bar ma byas pa dag ni rigs pa 'di nyid kyis nye bar sbyar bar bya'o/ /gos kyi rin gser la sogs pa rung bar byas pa dag ni blangs kyang nyes pa med do/ /de skad du yang bcom ldan 'das kyis bka' stsal pa/ blang bar bya zhing blangs nas kyang sbyin bdag de nyid la yid brtan te bcang bar bya'o zhes gsungs pa yin no zhes zer ro/ /kho bo ni 'di skad ces zer te/ gal te sbyin bdag gis gos kyi rin gyi bsam pas sbyin par byed cing / dge slong la yang gos kyi dgos pa yod na de'i tshe ni gos kyi rin de dag sngar bstan pa'i rim pa 'di nyid kyis nye bar sbyar bar bya'o/ /ji ste sbyin pa'i bsam pas sbyin par byed cing dge slong la yang sangs rgyas mchod pa la sogs pa dang / dge 'dun mchod ston gsol ba la sogs pa dag la dgos pa yod na de'i tshe ni bcom ldan 'das kyis gsungs pa'i rung ba byas nas bdag gir bya'o/ /bskul ba dang / bsdad pa lhag pa zhes smras pa bskul ba lan gsum las ma lhag pa dang / bsdad pa lan gsum las ma lhag pa la nyes pa med pa'i phyir te/ bskul ba gsum ni tshig gi bdag nyid do/ /bsdad pa gsum ni phyogs na sdod pa'i bdag nyid do/ /de dag la go rims nges pa ni med de/ gal te sngar phyogs na sdod par byed la phyis skul bar byed na de lta na yang nyes pa med do/ /de bzhin du gal te bskul ba gnyis byed cing sdod pa bzhi byed na yang de lta na yang nyes pa med de/ sdod pa'i gnas skabs dman pa'i phyir ro/ /bskul ba dang bsdad pa'i don pha rol pos brda ma phrad na bskul ba nyid ma yin no/ /bcom ldan 'das kyis bskul ba'i sgo drug po gang dag gsungs pa de dag ni mngon par smra ba dang legs par sbyor ba dang / zas skom dag gi dbang du byas nas re re la yang gnyis gnyis te drug tu 'gyur ro/ /de la mngon par smra ba ni khyod 'ongs sam zhes zer ba la de'i phyir ro zhes zer ba dang / legs par 'ongs sam zhes zer ba la de'i phyir ro zhes zer ba'o/ /legs par sbyor ba ni stan 'di la 'dug shig ces zer ba la de'i phyir ro zhes zer ba dang / rkang pa khrus shig ces zer ba la de'i phyir ro zhes zer ba'o/ /zas skom gyi dbang du byas pa ni zan zo shig ces zer ba la de'i phyir ro zhes zer ba dang / skom 'thungs shig ces zer ba la de'i phyir ro zhes zer ba de dag thams cad kyang so sor dbye bar bya ste/ sbyor ba gcig gis byas na ni drug po thams cad kyang bskul ba'i sgo gcig kho nar 'gyur bas de'i phyir so sor dbye bar bya'o/ /sbyin par byed pa'i sems bsdu bar rjes su bsgrub pa khas ma blangs pa zhes smos pa ni zhal ta byed pas sbyin par byed pa'i sems bsdu bar rjes su bsgrub pa khas blangs pa la dge slong gis gos len pa la ltung ba med pa'i phyir te/ sbyin par byed pa'i sems bsdu bar rjes su bsgrub pa khas blangs pa zhes bya ba ni dge slong gis sngar ji skad bstan pa'i rnam pa de dag gis zhal ta byed pa las gos kyi rnyed p a ma grub cing re ba med par gyur nas sbyin par byed pa'i sbyin bdag la zhal ta byed pas bdag la ci yang ma byin gyi khyod nyid shes par gyis shig ces bsgrags shing spangs par gyur zin pa'i 'og tu phyis zhal ta byed pas dge slong la gos 'bul bar byed na de'i tshe dge slong des zhal ta byed pa de la 'di s kad ces kho bos sbyin bdag la zhal ta byed pas bdag la ci yang ma byin gyi khyod nyid shes par gyis shig ces gos spangs pa smras zin to zhes rjes su bsgrag par bya zhing de ltar gos spangs pa shes par byas kyang gal te zhal ta byed pas de 'di skad ces 'phags pa bdag las gos 'di long shig dang / bdag gis sbyin bdag gi sems bsdu bar bya'o zhes khas len par byed na de'i tshe dge slong des zhal ta byed pa de las gos de blang bar bya'o/ /gos blangs pa'o zhes smos pa ni ma blangs pa la ltung ba med pa'i phyir ro/ /sbyor ba gcig gis gos gcig gam gnyis sam mang po zhig thob na yang ltung ba'i dngos gzhi gcig rnam par gzhag go/ /sbyor ba'i ltung ba ni nyes byas te ji srid du bskur ba'i spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /sbyin par byed pa dang pho nya dang zhal ta byed pa gsum char mi nyid ma yin pa dang / khyim pa nyid ma yin pa la nyes byas so/ /mi ma yin pas sbyin par byed cing mi ma yin pa'i pho nya dang / mis rung bar byed na yang nyes byas so/ /mi ma yin pas sbyin par byed cing mi'i pho nya dang / mi ma yin pas rung bar byed na yang nyes byas so/ /mis sbyin par byed cing mi ma yin pa'i pho nya dang mi ma yin pas rung bar byed na yang nyes byas so/ /mis sbyin par byed cing mi'i pho nya dang / mi ma yin pas rung bar byed na yang nyes byas so/ /mis sbyin par byed cing mi ma yin pa'i pho nya dang / mis rung bar byed na yang nyes byas so/ /mi ma yin pas sbyin par byed cing mi'i pho nya dang mis rung bar byed na yang nyes byas so/ /khyim pa nyid dang khyim pa nyid ma yin pa'i 'gres la yang de bzhin du sbyar ro/ /pho nyas byung ba'i mtha' rjes su brjod pa sngar byas pa ma smras par dge slong gis zhal ta byed pa la skul par byed na nyes byas so/ /rung ba ma yin pa dbyig la sogs pa chos gos kyi rin dge slong des pho nya la 'di skad ces tshe dang ldan pa pho nya dge slong dag ni gos kyi rin dag len du mi rung ste zhes bya ba la sogs pa'i tshig gis ma spangs par len na nyes byas so/ /bskul bar byas pa dang / phyogs su bsdad pa byas pas spang ba byas pa na zhal ta byed pas gos sbyin par byed pa'i tshe kho bos 'di yongs su spangs kyi song la sbyin bdag nyid la phyir byin cig ces de skad du yongs su spong bar mi byed par len na yang nyes byas so/ / pho nyas ma dris par zhal ta byed pa ston na nyes byas so/ /zhal ta byed pa'i lag nas gos 'thob pa'i phyir re ba med pa nyid na sbyin bdag la ma sbran na nyes byas so/ /bskul ba dang bsdad pa lhag pa rtsom pa'i tshe nyid na nyes byas so/ /gos mi rung ba len pa dang thob pa la nyes byas so/ /chung ngu len pa dang thob pa la nyes byas so/ /rgyu spun len pa dang thob pa la nyes byas so/ /rgyu spun gyi rang bzhin bal dang ras bal la sogs pa len pa dang thob pa la nyes byas so/ /sbyin bdag dang pho nya dang zhal ta byed pa gsum char ram gnyis sam gcig ma ning dang mtshan gnyis pa la nyes byas so/ /de gsum char ram gnyis sam gcig gi phyi rol pa'i rab tu byung ba dang chos 'di pa'i rab tu byung ba dang ma chags pa dang nyams pa la nyes byas so/ /sbyor ba'i sbyor ba'i ltung ba ni nyes byas phra mo ste sbyor ba ji snyed pa la sbyor ba'i sbyor ba yang de snyed de sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang bo yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gi sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ / ltung ba med pa ni bskul ba gsum dang bsdad pa gsum byed pa la ltung ba med do/ /sbyin par byed pa'i sems bsdu bar rjes su bsgrub pa khas len pa la ltung ba med do/ /las dang po pa dang / smyos pa dang sems 'khrugs pa dang / tshor ba dag gis nyen pa la ltung ba med do/ / bslab par bya ba ni dge slong gis yul thams cad la gnas skabs thams cad du bskur ba'i spang bar 'gyur ba rnam pa thams cad mi bsten par bslab par bya'o/ /ma grub na sbyin par byed pa la bsgrag par bya'o/ /phyir bcos pa ni snga ma bzhin no/ /bskur ba'i spang ba ste bcu pa bshad zin to/ / //so sor thar pa'i mdo rgya cher 'grel pa 'dul ba kun las btus pa/ bam po bcu bzhi pa/ sdom la/ srin bal 'ba' zhig cha gnyis dang / /drug dang mtho gang lam dang ni/ /'khru ba dang ni gser dngul dang / /mngon mtshan can dang nyo tshong ngo / /zhes bya ba ni bcu pa gnyis pa yin te/ sdom la zhes bya ba'i dgos pa dang / tshig gi don ni snga ma bzhin no/ /bcu pa gnyis pa 'dis kyang spang ba'i ltung byed kyi chos bcu bstan te/ srin bal dang / bal nag po 'ba' zhig dang / cha gnyis bsres pa dang / lo drug tu bcang ba dang / mtho gang dang / bal thogs pa dang bal rmel du 'jug pa dang gser dngul la reg pa dang / mngon mtshan can gyis spyod pa dang / nyo tshong byed pa'o/ /de la srin bal gyi spang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe na dge slong dag srin bal gyi stan sar pa byed pa dang / byed du 'jug ste/ dge slong dag srin bal gyi stan sar pa byed pa dang / byed du 'jug pa na srin bal dkon zhing rin che bas bya ba mang ba dang / byed pa mang bar gyur cing / lung nod pa dang / klag pa dang / kha don dang / rnal 'byor dang / yid la bya ba dang / nang gi sems kyi zhi gnas kyang gtong bar byed/ srin bal 'dod pa dang srin bal gyi don nyid du 'ongs pa dag bram ze dang / khyim bdag rnams la yang dang yang du rig par byed nas/ gzhan mu stegs can dag shes ldan dag shAkya'i bu'i dge sbyong 'di dag ni srog gcod par byed pa dag ste srog gcod pa las ma log ma spangs so sor ma spangs pas des na srin bal gyi stan sar pa byed pa dang / byed du 'jug ste/ de dag srin bal gyi stan sar pa byed pa dang byed du 'jug pas srin bal 'byung ba'i srin bu srog chags mang po'i tshogs bsgrubs shing srog gcod par byed de/ su zhig dge sbyong mgo reg 'di dag la bsod snyoms sbyin pa dang / bya bar sems zhes smod par byed phyar kha gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ dge slong rnams la rmas nas/ rnam grangs du mar smad de/ bslab pa bca' ba'i phan yon bcu yang dag par gzigs pas pa'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang srin pa la gyi stan sar pa byed na spang ba'i ltung byed do zhes bca' ba mdzad de/ yul ni mnyan yod/ gang zag ni dge slong rab tu mang po/ nyon mongs pa ni 'dod zhe na/ nyes pa ni srin bal gyi stan sar pa byed pa'o/ /de la yang dge slong gang zhes bya ba ni chos 'di pa'o/ /srin bal gyi zhes bya ba ni dar gyi srin bu las byung ba'i srin bal gyi'o/ /stan sar pa zhes bya ba ni stan gnyis te/ nang tshangs can dang blings pa'o/ /don 'dir ni gnyis ka yin par dgongs so/ / sar ba zhes bya ba ni sar pa gnyis te gsar pas sar pa dang rnyed pas sar pa'o/ /don 'dir ni gsar pas sar pa yin par dgongs so/ /byed na zhes bya ba ni bdag nyid kyis byed dam gzhan byed du 'jug na'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni dge slong gis srin bal sar pa'i chun po dang 'da' ba dang / phung po las stan nang tshangs can nam/ blings pa rang gis byas sam/ gzhan byed du bcug na dang po bkram pa nyid kyi tshe na srin bal gyi spang ba'i ltung byed kyi dngos gzhir 'gyur ro/ /dge slong la srin bal gyi spang ba'i ltung byed byung na de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par srin bal dang srin bal gyi stan de lta bu gzhan zhig rnyed na de yang snga ma'i shugs kyis spang bar 'byung te/ de las ltung bar ni mi 'gyur ro/ /dge slong gis srin bal gyi spang ba'i ltung byed byung la ji srid du spang ba'i dngos po las ma bshags shing so sor ma bshags par lhung bzed dam/ chos gos sam/ dra ba'am/ phor bu'am/ ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /srin bal sar pa'i stan nang tshangs can dang blings pa la na smad pa med do/ /gsar pas sar pa la na smad pa med do/ /rang gis byas pa dang gzhan byed du bcug pa la na smad pa med do/ /stan la ni bkram pa nyid byed pa mthar thug pa'i dang po yin pas der dgos pa'i srin bal 'byed pa dang / 'jig pa dang / rmel ba'i 'og rol du dang por bkram pa nyid la na smad pa med do/ /srin bal gyi rdzas bzang ngan dang mnyam pa la na smad pa med do/ /srin bal ma nyams pa la na smad pa med do/ /srin bal dang bal nag po la sogs pa dkon zhing rin che ba cha mnyam pa bsres pa la na smad pa med do/ /srin bal rung ba la na smad pa med do/ /stan gyi tshad ni gsum ste/ chen po dang / 'bring dang / chung ngu'o/ /chen po'i srid ni khru phyed dang lnga chung ngu'i srid ni khru phyed dang gsum/ 'bring gi srid ni de gnyis kyi bar te/ khru phyed dang bzhi'o/ /de dag gi zheng tshad ni gding ba'i zheng dang tshad mnyam ste/ zhed du bde bar gshegs pa'i mtho phyed dang do ste/ tha mal pa'i khru do dang sor drug go/ /srin bal gyi stan tshad de dag dang / de dag pas ltag pa la na smad pa med do/ /yul gang na bal dkar po dkon zhing rin che la srin bal mod cing rin chung ba der ni srin bal gyi gnas su bal dkar po rig par bya ste/ de ltar na srin bal gyi stan byed pa la ni ltung ba med la bal dkar po'i stan byed pa la ni skabs 'di'i ltung bar 'gyur ro/ /'di'i byed pa po ni srin bal sar pa'i stan nang tshangs can dang blings pa tshad dang ldan pa'am/ de bas lhag par byed pa nyid do/ /'di la yan lag lngas dngos gzhi'i ltung bar 'gyur te/ srin bal dang / sar pa dang / stan dang / byas pa dang / byed pa mthar thug pa'i dang po bkram pa nyid do/ /de dag las yan lag ma tshang na ci rigs par na smad do/ /de la srin bal zhes smos pa ni de las gzhan pa dag la kha cig la nyes pa med la/ kha cig la nyes byas su gsungs pa'i phyir ro/ /sar pa zhes smos pa ni rnying pa dang nyams pa dag la nyes byas su gsungs pa'i phyir ro/ /stan zhes smos pa ni stan las gzhan pa gding ba la sogs pa dag la na smad pa'i phyir te/ gding ba dang stan ni tha dad de/ 'di ltar gding ba ni gos kyi ngo bo nyid yin te/ tshig rkyang dang sbyar ma zhes bya ba la sogs par brjod pa'i phyir ro/ /stan ni stan gyi ngo bo nyid yin te/ nang tshangs can dang blings pa'i ngo bo nyid yin pa'i phyir ro/ /dgos pa tha dad pa'i yang phyir te/ stan ni grang ba'i gnyen po yin te/ 'di ltar 'phrog phyogs dag tu grang bas gnod par gyur pa dag gi dbang du mdzad nas stan rjes su gnang ba yin la/ gding ba ni mal stan g.yogs pa dang kun du bsrung ba dag gi dbang du mdzad nas rjes su gnang ba yin pa'i phyir ro/ /de ltar yang 'dir gzhung ni rnam par 'byed pa las/ gding ba ni so sor gding ba dang / kun du gding ba dang / nye bar gding ba zhes rgya cher gsungs la/ mdo sde las kyang gding ba phrag pas blangs nas 'gro bar bya'o zhes 'byung ste/ lam du 'gro bas stan nang tshangs can dang / blings pa ras bal can dang / dbyam po dag phrag pas blangs nas khyer ba ni tshul ma yin pas de'i phyir gding ba dang stan ni tha dad do/ /byas pa zhes smos pa ni ma byas pa dang byed du ma bcug pa la ltung ba med pa'i phyir ro/ /byed pa mthar thug pa'i dang po bkram pa nyid ces smos pa ni stan byed pa la der gtogs pa'i byed pa ni mthar thug pa'i dang po ni srin bal bkram pa nyid yin te/ de tsam byas na dngos gzhir 'gyur zhing de phyin chad gang byed pa de ni de'i khongs su 'dus pa yin la/ bkram pa nyid kyi sngon rol du 'byed pa dang 'jig pa dang / rmel ba dag ni sbyor ba'i nyes byas yin pa'i phyir ro/ /sbyor ba gcig gis srin bal gyi stan gcig gam gnyis sam mang po zhig byed na yang ltung ba'i dngos gzhi gcig rnam par gzhag go/ /sbyor ba'i ltung ba ni nyes byas te/ ji srid du srin bal gyi spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /srin bal dang bal dkar po'am/ sha na'i ras bal lam/ gso bal la sogs pa'i rdzas nyung ngu dang bsres te stan byed pa nyid la nyes byas so/ /srin bal rnying pa dang nyams pa nyid la nyes byas so/ /stan las gzhan pa byed pa la nyes byas so/ /byed pa mthar thug pa'i dang po 'grems pa'i mdun rol du 'byed pa dang / 'jig pa dang rmel ba dag la nyes byas so/ /rgyu rung ba ma yin pa la nyes byas so/ /tshad pas chung ba la nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni byas zin pa rnyed pa dang / gzhan gyis byas pa la yongs su longs spyod pa dang / rnyed pa'i byi dor mngon par 'du byed pa la ltung ba med do/ /stan gyi phyi shun gyi rdzas gzhan la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du srin bal gyi spang bar 'gyur ba rnam pa thams cad mi bsten par bslab par bya'o/ /stan tha mal pa nang tshangs can dang / blings pa ras bal can dang / dbyam po zhes bya ba dag bcang bar bya'o/ /phyir bcos pa ni snga ma bzhin no/ /srin bal gyi spang ba ste bcu gcig pa bshad zin to/ / //bal nag po 'ba' zhig gi spang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe dge slong dag lug bal nag po 'ba' zhig gi stan sar pa byed pa dang byed du 'jug ste/ dge slong dag lug bal nag po 'ba' zhig gi stan sar pa byed pa dang / byed du 'jug pa na lug bal nag po 'ba' zhig dkon shing rin che bas bya ba mang ba dang byed pa mang bar gyur cing / lung nod pa dang / klag pa dang / kha ton dang / rnal 'byor dang / yid la bya ba dang / nang gi sems [(]gyi [,]kyi[)]zhi gnas kyang gtong bar byed/ lug bal nag po 'ba' zhig 'dod pa dang / lug nag po 'ba' zhig gi don nyid du 'ongs pa dag bram ze dang / khyim bdag rnams la yang dang yang du rig par byed nas dge slong don nyung ngu dag ci'i phyir dge slong dag lug bal nag po 'ba' zhig gi stan sar pa byed pa dang byed du 'jug ste/ dge slong dag lug bal nag po 'ba' zhig gi stan sar pa byed pa dang / byed du 'jug pa na lug bal nag po 'ba' zhig dkon zhing rin che bas bya ba mang ba dang byed pa mang bar gyur cing / lung nod pa dang klag pa dang / kha ton dang / rnal 'byor dang yid la bya ba dang nang gi sems kyi zhi gnas kyang gtong bar byed/ lug bal nag po 'ba' zhig 'dod pa dang / lug bal nag po 'ba' zhig gi don nyid du 'ongs pa dag bram ze dang khyim bdag rnams la yang dang yang du rig par byed ces smod par byed/ phyar kha gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ dge slong rnams la rmas nas rnam grangs du mar smad de/ bslab pa bca' ba'i phan yon bcu yang dag par gzigs pas/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang lug bal nag po 'ba' zhig gi stan sar pa byed na spang ba'i ltung byed do zhes bca' ba mdzad de/ yul ni mnyan yod/ gang zag ni dge slong rab tu mang po/ nyon mongs pa ni 'dod zhe na/ nyes pa ni lug bal nag po 'ba' zhig gi stan sar pa byed pa'o/ /de la yang dge slong gang zhes bya ba ni chos 'di pa'o/ /lug bal zhes bya ba ni lug gi bal lo/ /nag po 'ba' zhig gi zhes bya ba ni nag po bzhi ste/ rang bzhin gyis gnag pa dang / sngo bas gnag pa dang / 'dam kha dang / kham pa'o/ /stan zhes bya ba ni stan gnyis te/ nang tshangs can dang / blings pa'o/ /don 'dir ni blings pa yin par dgongs so/ /sar pa zhes bya ba ni sar pa gnyis te gsar pas sar pa dang rnyed pas sar pa'o/ /don 'dir ni gsar pas sar pa yin par dgongs so/ /byed na zhes bya ba ni bdag nyid kyis byed dam gzhan byed du 'jug na'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la bal nag po 'ba' zhig gi spang ba 'di dang / sngar srin bal gyi spang ba'i rnam pa bstan pa'i gnas skabs thams cad 'dra ste/ khyad par du na sngar srin bal zhes bya ba de'i gnas su 'dir/ bal nag po 'ba' zhig ces bya ba'i ming gzhan brjod par bya ste/ de'i phyir lug gi bal nag po 'ba' zhig dag go zhes bya ba smras so/ /de la 'dir dngos gzhi'i ltung ba rnam par gzhag pa ni dge slong gis lug bal nag po sar pa 'ba' zhig gi chun po dang 'dra ba dang / phung po las stan blings pa rang gis byas sam gzhan byed du bcug na dang po bkram pa nyid kyi tshe na bal nag po 'ba' zhig gi spang ba'i ltung byed kyi dngos gzhir 'gyur ro/ /dge slong la bal nag po 'ba' zhig gi spang ba'i ltung byed byung na/ de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par lug bal nag po 'ba' zhig dang / lus bal nag po 'ba' zhig gi stan de lta bu gzhan zhig rnyed na/ de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis bal nag po 'ba' zhig gi spang ba'i ltung byed byung la/ ji srid du spang ba'i dngos po las ma bshags shing so sor ma bshags par lhung bzed dam/ chos gos sam/ dra ba'am/ phor bu'am/ ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /lug bal nag po sar pa 'ba' zhig gi stan blings pa la na smad pa med do/ /ci zhig gis nag por gyur pa yin zhe na/ nag po bzhi ste rang bzhin gyis gnag pa dang / rang bzhin gyis sngo ba dang / rang bzhin gyis 'dam kha dang / rang bzhin gyis kham pa ste/ de dag la na smad ba med do/ /gsar pas sar pa la na smad pa med do/ /rang gis byas pa dang / gzhan byed du bcug pa la na smad pa med do/ /stan la ni bkram pa nyid byed pa mthar thug pa'i dang po yin pas/ der dgos pa'i lug nag po 'ba' zhig 'byed pa dang / 'jig pa dang / rmel ba'i 'og rol du dang po bkram pa nyid la na smad pa med do/ /lug bal nag po 'ba' zhig gi rdzas bzang ngan dang mnyam pa la na smad pa med do/ /lug bal nag po 'ba' zhig ma nyams pa la na smad pa med do/ /lug bal nag po dang srin bal la sogs pa dkon zhing rin che ba cha mnyam par bsres pa la na smad pa med do/ /lug bal nag po rung ba la na smad pa med do/ /stan gyi tshad ni gsum ste/ chen po dang / 'bring dang / chung ngu'o/ /chen po'i srid ni khru phyed dang lnga/ chung ngu'i srid ni khru phyed dang gsum/ 'bring gi srid ni de gnyis kyi bar te khru phyed dang bzhi'o/ /de dag gi zheng tshad ni gding ba'i zheng dang mnyam ste/ zheng du bde bar gshegs pa'i mtho phyed dang do ste tha mal pa'i khru do dang sor drug go/ /lug bal nag po 'ba' zhig gi stan tshad de dag dang / de dag las lhag pa la na smad pa med do/ / yul gang na bal dkar po dkon zhing rin che ba la bal nag po mod cing rin chung ba der ni bal nag po'i gnas su bal dkar por rig par bya ste/ de ltar na bal nag po phyed pas lhag pa la ni ltung ba med la/ bal dkar po phyed pas lhag pa la ni skabs 'di'i ltung bar 'gyur ro/ / 'di'i byed pa po ni lug bal nag po sar pa 'ba' zhig gi stan blings pa tshad dang ldan pa dang / de bas lhag par byed pa nyid do/ /'di la yan lag lngas dngos gzhi'i ltung bar 'gyur te/ lug bal nag po 'ba' zhig dang / sar pa dang / stan dang byas pa dang / byed pa mthar thug pa'i dang po bkram pa nyid do/ /de dag las yan lag ma tshang na ci rigs par na smad do/ /de la lug bal nag po 'ba' zhig ces smos pa ni de las gzhan pa dag la/ kha cig la nyes pa med la/ kha cig la nyes byas su gsungs pa'i phyir ro/ /sar pa zhes smos pa ni rnying pa dang nyams pa dag la nyes byas su gsungs pa'i phyir ro/ /stan zhes smos pa ni stan las gzhan pa gding ba la sogs pa dag la na smad pa'i phyir ro/ /byas pas zhes smos pa ni ma byas pa dang byed du ma bcug pa la ltung ba med pa'i phyir ro/ /byed pa mthar thug pa'i dang po bkram pa nyid ces smos pa ni stan byed pa la der gtogs pa'i byed pa mthar thug pa'i dang po ni lug bal nag po 'ba' zhig bkram pa nyid yin te/ de tsam byas na dngos gzhir 'gyur zhing / de phyin chad gang byed pa de ni de'i khongs su 'dus pa yin la/ bkram pa nyid kyi sngon rol du 'byed pa dang / 'jig pa dang / rmel ba dag ni sbyor ba'i nyes byas yin pa'i phyir ro/ /sbyor ba gcig gis bal nag po 'ba' zhig gi stan gcig gam gnyis sam mang po zhig byed na yang ltung ba'i dngos gzhi gcig rnam par gzhag go/ /sbyor ba'i ltung ba ni nyes byas te/ ji srid du bal nag po 'ba' zhig gi spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /bal nag po dang bal dkar po'am sha na'i ras bal lam/ gso bal la sogs pa'i rdzas nyung ngu dang bsres te stan byed pa nyid la nyes byas so/ /lug bal nag po rnying pa dang nyams pa nyid la nyes byas so/ /stan las gzhan pa dag byed pa la nyes byas so/ /byed pa mthar thug pa'i dang po 'grems pa'i mdun rol du 'byed pa dang / 'jig pa dang / rmel bdag la nyes byas so/ /rgyu rung ba ma yin pa la nyes byas so/ /tshad pas chung ba la nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni byas zin pa rnyed pa dang / gzhan gyis byas pa la yongs su longs spyad pa dang / rnying pa'i byi dor mngon par 'du byed pa la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du bal nag po 'ba' zhig gi spang bar 'gyur ba rnam pa thams cad mi bsten par bslab par bya'o/ /stan tha mal pa nang tshangs can dang blings pa ras bal can dang / dbyam po zhes bya ba dag bcang bar bya'o/ /phyir bcos pa ni snga ma bzhin no/ /bal nag po 'ba' zhig gi spang ba ste/ bcu gnyis pa bshad zin to/ / //cha gnyis bsres pa'i spang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /bcom ldan 'das kyis dge slong gis lug bal nag po 'ba' zhig gi stan sar pa mi bya'o zhes gsungs pas/ de dag bal dkar po dang 'khob bal cung zhig bcug nas lug bal nag po 'ba' zhig gi stan sar pa byed pa dang byed du 'jug ste/ des kyang de dag bya ba mang ba dang byed pa mang bar gyur cing / lung nod pa dang / klag pa dang / kha ton dang / rnal 'byor dang yid la bya ba dang / nang gi sems kyi zhi gnas kyang gtong bar byed/ de 'dod pa dang de'i don nyid du 'ongs pa dag bram ze dang khyim bdag rnams la yang dang yang du rig par byed nas/ dge slong don nyung ngu dag ci'i phyir dge slong dag bal dkar po dang 'khob bal cung zhig bcug nas/ lug bal nag po 'ba' zhig gi stan sar pa byed pa dang byed du 'jug ste/ des kyang bya ba mang ba dang / byed pa mang bar gyur cing / lung nod pa dang / klag pa dang / kha ton dang / rnal 'byor dang / yid la bya ba dang nang gi sems kyi zhi gnas kyang gtong bar byed/ de 'dod pa dang de'i don nyid du 'ongs pa dag bram ze dang khyim bdag rnams la yang dang yang du rig par byed ces smod par byed/ phyar kha gtong bar byed/ kha zer bar byed pa'i skabs de/ dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ dge slong rnams la rmas nas/ rnam grangs du mar smad de/ bslab pa bca' ba'i phan yon bcu yang dag par gzigs pas/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong gis stan sar pa byed pa na cha gnyis ni lug bal nag po 'ba' zhig las gzhug par bya/ gsum pa ni dkar po las/ bzhi pa ni 'khob bal las gzhug par bya'o/ /gal te dge slong gis cha gnyis lug bal nag po 'ba' zhig las ma bcug gam/ gsum pa dkar po las/ bzhi pa 'khob bal las ma bcug par stan sar pa byed na spang ba'i ltung byed do zhes bca' ba mdzad de/ yul ni mnyan yod/ gang zag ni dge slong rab tu mang po/ nyon mongs pa ni 'dod zhe na/ nyes pa ni bal dkar po dang 'khob bal cung zhig bcug nas lug bal nag po 'ba' zhig gi stan sar pa byed pa'o/ /de la dge slong gis zhes bya ba ni chos 'di bas so/ /stan zhes bya ba ni stan gnyis te/ nang tshangs can dang blings pa'o/ /don 'dir ni blings pa yin par gsungs so/ /sar pa zhes bya ba ni sar pa gnyis te/ gsar pas sar pa dang / rnyed pas sar pa'o/ /don 'dir ni gsar pas sar pa yin par dgongs so/ /byed na zhes bya ba ni bdag nyid kyis byed dam gzhan byed du 'jug na'o/ /cha gnyis ni lug bal nag po 'ba' zhig las gzhug par bya zhes bya ba la cha gnyis zhes bya ba ni rangs pa gcig la bzhi cha bzhir bsres pa'i bzhi cha gnyis te phyed do/ /lug bal zhes bya ba ni lug gi bal lo/ /nag po 'ba' zhig las zhes bya ba ni nag po bzhi ste/ rang bzhin gyis gnag pa dang / sngo bas gnag pa dang / 'dam kha dang / kham pa ste de las so/ / gzhug par bya zhes bya ba ni bsre bar bya'o/ /gsum pa ni dkar po las zhes bya ba la/ gsum pa zhes bya ba ni rangs pa gcig la bzhi cha bzhir bsres pa'i bzhi cha gsum pa ste bzhi cha gcig go/ /dkar po las zhes bya ba ni glo'i bal dang rgyab kyi bal dang gnya' ba'i bal te de las so/ / bzhi pa ni 'khob bal las gzhug par bya'o zhes bya ba la/ bzhi pa zhes bya ba ni rangs pa gcig la bzhi cha bzhir bsres pa'i bzhi cha bzhi pa ste bzhi cha gcig go/ /'khob bal las zhes bya ba ni/ rkang pa'i bal dang / mgo bo'i bal dang / lto ba'i bal te de las so/ /gzhug par bya'o zhes bya ba ni bsre bar bya ba'o/ /de ltar stan rangs pa gcig gi rgyu'i phyed ni lug bal nag po bzhi cha ni dkar po/ bzhi cha ni 'khob bal las spyir bsres te bling bar bya'i/ stan phyed nag po bzhi cha dkar po bzhi cha 'khob bal kyi kha dog las khra bor bya ba ni ma yin no/ /gal te dge slong gis cha gnyis lug bal nag po 'ba' zhig las ma bcug gam/ gsum pa dkar po las/ bzhi pa 'khob bal las ma bcug par zhes bya ba ni ma bsres par ro/ /stan sar pa byed na zhes bya ba ni stan blings pa gsar pas sar pa bdag nyid kyis byed dam gzhan byed du 'jug na'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /cha gnyis bsre ba'i spang ba 'di yang sngar srin bal gyi spang ba dang bal nag po 'ba' zhig gi spang ba'i rnam pa bstan pa'i gnas skabs dang 'dra ste/ khyad par du na sngar srin bal zhes bya ba dang / bal nag po 'ba' zhig ces bya ba de'i gnas su 'dir cha gnyis bsre ba zhes bya ba'i ming gzhan brjod par bya ste/ de'i phyir lug bal nag po de dag phyed pas lhag pa nyid na'o zhes bya ba smras so/ /de la 'dir dngos gzhi'i ltung ba rnam par gzhag pa ni dge slong gis stan sar pa byed na phyed ni lug bal nag po bzhi cha gcig ni dkar po/ /bzhi cha gcig ni 'khob bal las gzhug par gsungs pa'i srang tshad las lug bal nag po dag phyed pas lhag pa nyid las stan blings pa gsar pas sar pa rang gis byas sam gzhan byed du bcug na dang por bkram pa nyid kyi tshe na cha gnyis bsre ba'i spang ba'i ltung byed kyi dngos gzhir 'gyur ro/ /dge slong la cha gnyis bsre ba'i spang ba'i ltung byed byung na de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par cha gnyis bsre ba'i bal dang / cha gnyis bsres pa'i stan de lta bu gzhan zhig rnyed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis cha gnyis bsre ba'i spang ba'i ltung byed byung la ji srid du spang ba'i dngos po las ma bshags shing so sor ma bshags par lhung bzed dam chos gos sam dra ba'am phor bu'am ska rags sam dge sbyong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /lug bal nag po sar pa stan phyed kyi srang tshad las lhag pa las stan blings pa lan smad pa med do/ /ji zhig gis nag por gyur pa yin zhe na/ nag po bzhi ste/ rang bzhin gyis gnag pa dang / rang bzhin gyis sngo ba dang / rang bzhin gyis 'dam kha dang / rang bzhin gyis kham pa ste/ de dag lan smad pa med do/ /dkar po dang 'khob bal gnyi ga bsdoms pa phyed kyi tshad pas chung ba la na smad pa med do/ /gsar pas sar pa lan smad pa med do/ /rang gis byas pa dang / gzhan byed du bcug pa la na smad pa med do/ / stan la ni bkram pa nyid byed pa mthar thug pa'i dang po yin pas der dgos pa'i lug bal nag po phyed pas lhag pa dang / dkar po dang 'khob bal gnyi ga bsdoms pa phyed pas chung ba 'byed pa dang / 'jig pa dang rmel ba'i 'og rol du dang po bkram pa nyid la na smad pa med do/ / lug bal gyi rdzas bzang ngan dang mnyam pa la na smad pa med do/ /lug bal ma nyams pa la na smad pa med do/ /lug bal dang srin bal la sogs pa dkon zhing rin che ba cha mnyam par bsres pa la na smad pa med do/ /yul gang na bal dkar po dkon zhing rin che la nag po dang 'khob bal mod cing rin chung na de ni bal nag po'i gnas su dkar po rig par bya ste/ dkar po phyed pas lhag cing nag po dang 'khob bal bsdoms pa phyed pas chung ba la na smad pa med do/ /yul gang na 'khob bal rin che zhing dkon pa la yang de bzhin du sbyar ro/ /cha gnyis bsre ba'i bal rung ba la na smad pa med do/ /stan gyi tshad ni gsum ste/ chen po dang / 'bring dang / chung ngu'o/ /chen po'i srid ni khru phyed dang lnga/ chung ngu'i srid ni khru phyed dang gsum/ 'bring gi tshad ni de gnyis kyi bar te khru phyed dang bzhi'o/ /de dag gi zheng tshad ni gding ba'i zheng dang mnyam ste/ zheng du bde bar gshegs pa'i mtho phyed dang do ste/ tha mal pa'i khru do dang sor drug go/ /lug bal nag po phyed pas lhag pa'i stan tshad de dag dang de dag pas lhag pa lan smad pa med do/ /lug bal dkar po ni gang yin/ 'khob bal ni gang yin zhe na/ glo dang rgyab dang gnya' ba nas skyes pa ni dkar po'o/ /mgo dang rkang pa dang lto ba nas skyes pa ni 'khob bal lo/ /'di'i byed pa po ni yul gang na lug bal nag po dkon zhing rin che bar lug bal nag po sar pa phyed pas lhag pa nyid kyi stan tshad dang ldan pa dang / de bas lhag par byed pa nyid do/ /'di la yan lag lngas dngos gzhi'i ltung bar 'gyur te/ lug bal nag po dang phyed pas lhag pa nyid dang / sar pa dang / stan dang / byas pa dang / byed pa mthar thug pa'i dang po bkram pa nyid do/ /de dag las yan lag ma tshang na ci rigs par na smad do/ /de la lug bal nag po dag phyed pas lhag pa nyid ces smos pa ni ma lhag pa la ltung ba med pa'i phyir ro/ /sar pa zhes smos pa ni rnying pa dang nyams pa dag la nyes byas su gsungs pa'i phyir ro/ /stan zhes smos pa ni stan las gzhan pa gding ba la sogs pa dag la na smad pa'i phyir ro/ /byas pa zhes smos pa ni ma byas pa dang byed du ma bcug pa la na ltung ba med pa'i phyir ro/ /byed pa mthar thug pa'i dang po bkram pa nyid ces smos pa ni stan byed pa la der gtogs pa'i byed pa mthar thug pa'i dang po ni lug bal nag po dag phyed pas lhag pa bkram pa nyid yin te/ de tsam byas na dngos gzhir 'gyur zhing de phyin chad gang byed pa de ni de'i khongs su 'dus pa yin la bkram pa nyid kyi sngon rol du 'byed pa dang / 'jig pa dang / rmel ba dag ni sbyor ba'i nyes byas yin pa'i phyir ro/ /sbyor ba gcig gis bal nag po dag byed pas lhag pa'i stan gcig gam gnyis sam mang po zhig byed na yang ltung ba'i dngos gzhi gcig rnam par gzhag go/ /sbyor ba'i ltung ba ni nyes byas te/ ji srid du cha gnyis bsre ba'i spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /'khob bal bas dkar po lhag par byed na nyes byas so/ /lug bal rnying pa dang nyams pa nyid la nyes byas so/ /stan las gzhan pa dag byed na nyes byas so/ /byed pa mthar thug pa'i dang po 'grems pa'i mdun rol du 'byed pa dang / 'jig pa dang / rmel ba dag la nyes byas so/ / rgyu rung ba ma yin pa la nyes byas so/ /tshad pas chung ba la nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni byas zin pa rnyed pa dang / gzhan gyis byas pa la yongs su longs spyod pa dang / rnying pa'i byi dor mngon par 'du byed pa la ltung ba med do/ /dkar po dang 'khob bal dag ni lhag par gyur pa la bal nag po dag ni nyung ba'am mnyam par gyur pa la ltung ba med do/ /dkar po'am 'khob bal lhag pa la yang ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du cha gnyis bsre ba'i spang bar 'gyur ba rnam pa thams cad mi bsten par bslab par bya'o/ /stan tha mal pa nang tshangs can dang blings pa ras bal can dang / dbyam po zhes bya ba dag bcang bar bya'o/ /phyir bcos pa ni snga ma bzhin no/ /cha gnyis bsre ba'i spang ba ste bcu gsum pa bshad zin to// //lo drug tu bcang ba'i spang ba'i gleng gzhi ni bcas pa dang gnang ba'i dbang gis rnam pa gnyis te/ de la re zhig bcas pa'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe na dge slong rnams la stan mang ba nyid 'di lta bu 'di byung bar gyur te/ de dag stan 'di ni ha cang ring ngo / /'di ni ha cang thung ngo / / zhes de bor nas gzhan byed du 'jug go/ /stan 'di ni ha cang dog go/ /'di ni ha cang yangs so/ /'di ni thams cad kyi thams cad du bug rdol dang sha zad pa dang bcos dka' ba nyid yin no zhes de bor nas gzhan byed du 'jug pas dge slong de dag stan byas shing byas shing 'dor ba na bya ba mang ba dang / byed pa mang bar gyur cing / lung nod pa dang / klag pa dang / kha ton dang / rnal 'byor dang / yid la bya ba dang / nang gi sems kyi zhi gnas gtong bar byed nas dge slong don nyung ngu dag ci'i phyir dge slong rnams la stan mang ba nyid 'di lta bu 'di byung bar gyur to/ /'di dag stan 'di ni ha cang ring ngo / /'di ni ha cang thung ngo zhes de bor nas gzhan byed du 'jug /stan 'di ni ha cang dog go/ /stan 'di ni ha cang yangs so/ /'di ni thams cad nas thams cad du bug rdol dang sha zad pa dang bcos dka' ba yin no zhes de bor nas gzhan byed du 'jug pas dge slong 'di dag stan byas shing byas shing 'dor ba na/ bya ba mang ba dang / byed pa mang bar gyur cing / lung nod pa dang / klag pa dang / kha ton dang / rnal 'byor dang / yid la bya ba dang / nang gi sems kyi zhi gnas gtong bar byed ces smod par byed/ phyar kha gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ dge slong rnams la rmas nas/ rnam grangs du mar smad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong gis stan sar pa byed na mi 'dod bzhin du lo drug tu bcang bar bya'o/ /gal te dge slong gis lo drug tshun chad du stan rnying pa de spangs kyang rung ma spangs kyang rung stan sar pa gzhan byed na spang ba'i ltung byed do zhes bca' ba mdzad de/ yul ni mnyan yod/ gang zag ni dge slong rab tu mang po/ nyon mongs pa ni 'dod zhe na/ nyes pa ni stan lo drug ma lon par stan sar pa gzhan byed pa'o/ /gnang ba'i gleng gzhi ni sangs rgyas bcom ldan 'das 'brog gnas na 'brog gi gnas mchog na bzhugs so/ /'brog gnas grang zhing rlung che bas dge slong lag gi bla dag lo drug tu stan gyis mi thub pa de dag grang ba dag gis mkhar lan dag rgyun bcad par gyur to/ /sangs rgyas bcom ldan 'das rnams ni mkhyen bzhin du rmed par mdzad pa ste/ mkhyen bzhin du rmed pa/ mkhyen kyang mi rmed pa/ dus las yol bar mi rmed pa/ don dang ldan pa rmed pa/ don dang mi ldan pa ni mi rmed pas sangs rgyas bcom ldan 'das rnams ni don dang mi ldan pa rmed pa la chu lon gyis bzlog pa mdzad pa yin no/ /de la sangs rgyas bcom ldan 'das rnams ni don dang ldan pa rmed pa la dus mkhyen pa yin pas/ sangs rgyas bcom ldan 'das kyis tshe dang ldan pa kun dga' bo la rmas pa/ kun dga' bo ci'i phyir dge slong lag gi bla dag gis mkhar len dag rgyun bcad par gyur/ btsun pa bcom ldan 'das kyis 'di ltar dge slong gis stan sar pa byed na mi 'dod bzhin du lo drug tu bcang bar bya'o/ /gal te dge slong gis lo drug tshun chad du stan rnying pa de spangs kyang rung / ma spangs kyang rung / stan sar pa gzhan byed na spang ba'i ltung byed do zhes 'dul ba la nyan thos rnams kyi bslab pa'i gzhi bca' ba mdzad pas/ dge slong lag gi bla dag dgung lo drug gi bar du stan gyis mi thub pa de dag grang ba dag gis mkhar lan dag rgyun bkum par gyur to/ /bcom ldan 'das kyis bka' stsal pa/ kun dga' bo dge slong lag gi bla gang la la lo drug tu stan gyis mi thub pa'i dge slong des dge 'dun las lo drug tshun chad du stan gyi gnang ba gsol bar bya'o/ /'di ltar gsol par bya ste/ de rang gi gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo nas/ dge 'dun thams cad 'dug cing mthun par gyur pa la dge slong lag gi bla des mchil lham gnyis phud de bla gos phrag pa gcig tu byas nas rgan rims bzhin du phyag 'tshal te/ rgan pa'i mtha' logs su tsog pur 'dug nas thal mo sbyar te/ 'di skad ces brjod par bya'o/ /dge 'dun btsun pa rnams gsan du gsol/ bdag dge slong lag gi bla ming 'di zhes bgyi ba lo drug stan mi bgyid pa las/ bdag dge slong lag gi bla ming 'di zhes bgyi ba dge 'dun las lo drug tshun chad du stan gnang ba gsol na/ thugs brtse ba can dge 'dun btsun pa rnams kyis thugs brtse ba'i slad du/ bdag dge slong lag gi bla ming 'di zhes bgyi ba la lo drug tshun chad du stan gnang ba stsal du gsol/ de bzhin du lan gnyis lan gsum du bzlas/ de ni dge slong lag gi blas lo drug tshun chad du dge 'dun las stan gyi gnang ba gsol ba'o/ /de'i 'og tu dge slong de dag gis kyang dge slong lag gi bla de la dad pas sam/ yid ches pas 'gro bar mi bya bar 'di ltar dge 'dun thams cad der 'dong bar bya ba dang / dge 'dun gyis bskos pa'i dge slong dag gtang bar bya zhing / de dag gis stan de rang gi mig sngar bab par bya ba'am/ yang na stan de dge 'dun gyi dbus su dbyung bar bya ste/ gal te stan de ha cang ring ba yin na de dag gis gcad par bya'o/ /gal te ha cang thung ba yin na bal sbyin par bya'o/ /gal te ha cang yangs pa yin na de de dag gis gcad par bya'o/ /gal te ha cang dog pa yin na bal sbyin par bya'o/ /gal te ral ba dang rdol ba yin na bal sbyin par bya'o/ /gal te thams cad kyi thams cad du bug rdol dang sha zad pa dang / bcos dka' ba nyid yin na de'i tshe dge slong de dag gis rgan pa'i mtha' logs su gus pa dang bcas pas 'dug ste/ 'di skad ces brjod par bya'o/ /gnas brtan dag dge slong lag gi bla ming 'di zhes bgyi ba'i stan de dag thams cad kyi thams cad du bug rdol dang sha zad pa dang / bcos dka' ba nyid lags kyi de de'i dus la bab par mkhyen par mdzod cig /de ni dus dang por bya ba'o/ /de'i 'og tu dge slong gcig gis gsol ba byas te las bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong lag gi bla ming 'di zhes bgyi ba 'di lo drug tu stan mi bgyid pa las dge slong lag gi bla ming 'di zhes bgyi ba 'di dge 'dun las lo drug tshun chad du stan gnang ba gsol na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong lag gi bla ming 'di zhes bgyis pa la lo drug tshun chad du stan gnang ba stsol to/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ dge slong lag gi bla ming 'di zhes bgyi ba lo drug tu stan mi bgyid pa las/ dge slong lag gi bla ming 'di zhes bgyi ba 'di dge 'dun las lo drug tshun chad du stan gnang bar gsol te/ de'i slad du dge 'dun gyis dge slong lag gi bla ming 'di zhes bgyi ba la lo drug tshun chad du stan gnang ba stsol na/ tshe dang ldan pa gang dag dge slong lag gi bla ming 'di zhes bgyi ba 'di la lo drug tshun chad du stan gnang ba stsal bar bzod pa de dag ni cang ma gsung shig / gang dag mi bzod pa de dag ni gsungs shig /dge 'dun gyis bzod cing gnang nas dge 'dun gyis dge slong lag gi bla ming 'di zhes bgyi ba la lo drug tshun chad du stan gnang ba stsal lags te/ 'di ltar cang mi gsung bas de de bzhin du 'dzin to/ /dge 'dun gyis dge slong lag gi bla gang la lo drug tshun chad du stan gnang ba byin pa des lo drug tshun chad du stan byed du bzhug ste 'di la 'gyod par mi bya'o/ /de nas bcom ldan 'das kyis bslab pa 'dod pa dang / bslab pa la gus pa dang / bslab pa la yo byad bsnyungs pa'i bsngags pa brjod de/ dge slong rnams la yang de dang mthun pa dang / de'i shas che ba dang / de dang 'tsham pa'i chos dang ldan pa'i bka' mchid mdzad nas/ dge slong rnams la bka' stsal pa/ dge slong dag de lta bas na snga ma ni bcas pa yin la 'di ni gnang ba yin te/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong gis stan sar pa byed na mi 'dod bzhin du lo drug tu bcang bar bya'o/ /gal te dge slong gis lo drug tshun chad du stan rnying pa de spangs kyang rung ma spangs kyang rung stan sar pa gzhan byed na dge 'dun gyis gnang ba ma gtogs te spang ba'i ltung byed do zhes gnang ba mdzad de/ yul ni 'brog gnas/ gang zag ni dge slong lag gi bla/ nyon mongs pa dang nyes pa ni med do/ /de la dge slong gis zhes bya ba ni chos 'di pas so/ /stan zhes bya ba ni stan gnyis te/ nang tshangs can dang / blings pa'o/ /don 'dir ni blings pa yin par dgongs so/ /sar pa zhes bya ba ni sar pa gnyis te/ gsar pas sar pa dang / rnyed pas sar pa'o/ /don 'dir ni gsar pas sar pa yin par dgongs so/ /byed na zhes bya ba ni bdag nyid kyis byed dam gzhan byed du 'jug na'o/ /mi 'dod bzhin du zhes bya ba ni ma dad bzhin du'o/ /lo drug tu bcang bar bya'o zhes bya ba ni lo drug tshun chad du bcang bar bya ba'o/ /gal te dge slong gis lo drug tshun chad du zhes bya ba ni de tshun chad du'o/ / stan rnying pa de zhes bya ba ni stan gang yod pa de'o/ /spangs kyang rung ma spangs kyang rung zhes bya ba ni yod kyang rung med kyang rung ste'o/ /stan sar pa gzhan byed na zhes bya ba ni gnyis pa'o/ /dge 'dun gyis gnang ba ma gtogs te zhes bya ba ni dge 'dun gyis gnang ba gzhag ste'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni/ dge slong lo drug tshun chad du stan sar pa bya ba'i phyir dge 'dun las gnang ba ma thob pa stan snga ma gzhan yod pa'am rang dgar btang bas/ lo drug ma lon par stan blings pa phyi ma gzhan byed na zin pa'i mtha' lo drug tu bcang ba'i spang ba'i ltung byed kyi dngos gzhir 'gyur ro/ /dge slong la lo drug tu bcang ba'i spang ba'i ltung byed byung na/ de ma spangs shing bral bar ma byas la ltung ba ma bshags par ram/ spangs shing bral bar ma byas la ltung bar ma bshags par ram/ spangs shing bral bar byas la ltung ba ma bshags par lo drug tu bcang ba'i stan de lta bu gzhan zhig rnyed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis lo drug tu bcang ba'i spang ba'i ltung byed byung la ji srid du spang ba'i dngos po las ma bshags shing so sor ma bshags par lhung bzed dam chos gos sam dra ba'am/ phor bu'am/ ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /gnang ba ma thob pa la na smad pa med do/ /stan snga ma gzhan yod pa dang med pa la na smad pa med do/ /lo drug tu ma lon pa la na smad pa med do/ /stan blings pa la na smad pa med do/ /stan gsar pas sar pa la na smad pa med do/ /rang gis byas pa dang gzhan byed du bcug pa la na smad pa med do/ /stan la ni bkram pa nyid byed pa mthar thug pa 'di'i dang po yin pas der dgos pa'i bal dag 'byed pa dang / 'jig pa dang rmel ba'i 'og rol du dang po bkram pa nyid la na smad pa med do/ /bal gyi rdzas bzang ngan dang mnyam pa la na smad pa med do/ /bal ma nyams pa la na smad pa med do/ /bal dang srin bal la sogs pa dkon zhing rin che ba cha mnyam par bsres pa la na smad pa med do/ /rgyu rung ba la na smad pa med do/ /stan gyi tshad ni gsum ste/ chen po dang 'bring dang chung ngu'o/ /chen po'i srid ni khru phyed dang lnga/ chung ngu'i srid ni khru phyed dang gsum/ 'bring gi tshad ni de gnyis kyi bar te khru phyed dang bzhi'o/ /de dag gi zheng tshad ni gding ba'i zheng dang mnyam ste/ zheng du bde bar gshegs pa'i mtho phyed dang do ste/ tha mal pa'i khru do dang sor drug go/ /bal gang yang rung ba las stan blings pa tshad de dag dang de dag pas lhag pa la na smad pa med do/ /'di'i byed pa po ni gnang ba ma thob pas lo drug tshun chad du stan blings pa tshad dang ldan pa dang / de bas lhag pa byed pa nyid do/ /'di la yan lag drug gis dngos gzhi'i ltung bar 'gyur te/ gnang ba ma thob pa dang / lo drug ma lon pa dang / sar pa dang / stan dang / byas pa dang / byed pa thams cad mthar thug pa'i dang po bkram pa nyid do/ /de dag las yan lag ma tshang na ci rigs par na smad do/ /de la gnang ba ma thob pa zhes smos pa ni gnang ba thob pa la ltung ba med pa'i phyir ro/ /lo drug ma lon pa zhes smos pa ni lo drug lon pa la ltung ba med pa'i phyir ro/ /sar pa zhes smos pa ni rnying pa dang nyams pa dag la nyes byas su gsungs pa'i phyir ro/ /stan zhes smos pa ni stan las gzhan pa gding ba la sogs pa dag la med pa'i phyir ro/ /byas pa zhes smos pa ni ma byas pa dang byed du ma bcug pa la ltung ba med pa'i phyir ro/ /byed pa mthar thug pa'i dang por bkram pa nyid ces smos pa ni/ stan byed pa la der gtogs pa'i byed pa mthar thug pa'i dang po ni bal bkram pa nyid yin te/ de tsam byas na dngos gzhir 'gyur zhing / de phyin chad gang byed pa de ni de'i khongs su 'dus pa yin la/ bkram pa nyid kyi sngon rol du 'byed pa dang / 'jig pa dang / rmel ba dag ni sbyor ba'i nyes byas yin pa'i phyir ro/ /sbyor ba gcig gis lo drug tshun chad du stan gcig gam gnyis sam mang po zhig byed na yang ltung ba'i dngos gzhi gcig rnam par gzhag go/ /sbyor ba'i ltung ba ni nyes byas te/ ji srid du lo drug tu bcang ba'i spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /bal rnying pa dang nyams pa nyid la nyes byas so/ /byed pa mthar thug pa'i dang po 'grems pa'i mdun rol du 'byed pa dang / 'jig pa dang / rmel ba dag la nyes byas so/ /rgyu rung ba ma yin pa la nyes byas so/ /tshad pas chung ba la nyes byas so/ / stan snga ma ma zin pa'i 'og rol du phyi ma rtsom pa la nyes byas so/ /stan snga ma brtsams pa nyid na de dang lhan cig tu'am phyis stan gnyis pa rtsom pa la nyes byas so/ /stan snga ma brtsams pa ma zin par de nyid dang lhan cig tu'am phyis stan gnyis pa la brtsams pa sngar zin par gyur na nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni byas zin pa rnyed pa dang / gzhan gyis byas pa la yongs su longs spyod pa dang / rnying pa'i byi dor mngon par 'du byed pa la ltung ba med do/ /sngar stan brtsams nas bar du khyim pa la sogs par babs te yang phyis rab tu byung zhing bsnyen par rdzogs pa'i tshe mthar thug par byed pa la ltung ba med do/ /gnang ba thob pa la ltung ba med do/ /lo drug lon pa la ltung ba med do/ /ma byas pa dang / byed du ma bcug pa la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du lo drug tu bcang pa'i spang bar 'gyur ba rnam pa thams cad mi bsten par bslab par bya'o/ /stan thams cad kyi thams cad du bug rdol dang sha zad pa dang / bcos dka' ba nyid ma yin pas gnang ba gsol bar mi bya'o/ /dge slong rang dag rtog tu 'dong bar bya'o/ /yang na dge slong bskos pa dag rtog tu btang ngo / /rtog pa'i dge slong dag gis kyang / chu dang zheng gnyi gar lhag pa nyid yin na gcad par bya'o/ /thung ba nyid dang dog pa nyid dag ni bskyed par bya'o/ /ral na btsem par bya'o/ /bug rdol du gyur tam sha zad pa dag ni sbyar bar bya'o/ /bcos dka' ba nyid yin na dge 'dun gyis gsol ba dang gnyis kyi las kyis stan gyi gnang ba sbyin par bya'o/ /lag gi bla ni gleng gzhi'i dbang gis smos par zad kyi dge slong gzhan dag la yang cho ga 'dra bar shes par bya'o/ /phyir bcos pa ni snga ma bzhin no/ /lo drug tu bcang ba'i spang ba ste bcu bzhi pa bshad zin to// // mtho gang gi spang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /gang gi tshe bcom ldan 'das kyis bla na med pa'i mkhyen pa thugs su chud pa de'i tshe na thams cad du yul dbus su sangs rgyas 'jig rten du byung ngo zhes grag go zhes sgra grags so/ /byang phyogs na tshong pa dag gis yul dbus su sangs rgyas 'jig rten du byung ste/ gang dag de la mchod pa dag byed pa de dag gi mchod pa byas pa de dag ni shin tu 'bras bu che ba dang / phan yon che ba dang gsal ba che ba dang / rgya chen por 'gyur ro zhes thos so/ /thos nas kyang de dag 'di snyam du sems te/ bdag cag zong dag thogs te mnyan yod du 'dong zhing / der bdag cag gis khe spogs kyang bsgrub par bya/ bcom ldan 'das la yang bsnyen bkur bya'o snyam du rig nas/ tshong pa lnga brgya byang phyogs nas zong dag thogs te yul dbus su 'phags so/ /de dag mthar gyis mnyan yod du phyin nas de dag gis zong mkhos su phab ste/ khyim bdag mgon med zas sbyin ga la ba der dong nas phyin pa dang / khyim bdag mgon med zas sbyin la 'di skad ces smras so/ /khyim bdag bdag cag sangs rgyas bcom ldan 'das lta bar 'dod do/ /shes ldan dag de bzhin gshegs pa dgra bcom pa yang dag par rdzogs pa'i sangs rgyas rnams ni blta bar bya ba rin po che kho na yin te/ de bzhin gshegs pa dgra bcom pa yang dag par rdzogs pa'i sangs rgyas rnams ni 'di lta ste/ dper na u dum bA ra'i me tog ltar blta ba dang 'byung ba dkon pa yin no/ /de nas khyim bdag mgon med zas sbyin gyis tshong pa lnga brgya po de dag khrid nas bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te mtha' gcig tu 'dug go mtha' gcig tu 'dug nas/ bcom ldan 'das tshong pa de dag la chos dang ldan pa'i bka' mchid kyis yang dag par ston par mdzad/ yang dag par 'dzin du 'jug par mdzad/ yang dag par gzengs stod par mdzad/ yang dag par rab tu dga' bar mdzad do/ / rnam grangs du mar chos dang ldan pa'i bka' mchid kyis yang dag par bstan/ yang dag par 'dzin du bcug /yang dag par gzengs bstod/ yang dag par rab tu dga' bar mdzad nas cang mi gsung ngo / /de nas tshong pa de dag gis bcom ldan 'das la bsnyen bkur byas nas/ dge slong gnas brtan gnas brtan rnams kyi gtsug lag khang blta bar brtsams pa dang / tshong pa de dag gis dge slong gnas brtan gnas brtan rnams kyi mal dag ni gding ba dbus rdol ba dag mthong ngo / /mthong nas kyang khyim bdag mgon med zas sbyin la 'di skad ces smras so/ /khyim bdag ci'i phyir dge slong gnas brtan gnas brtan 'di dag gi gding ba dag dbus rdol bar gyur/ khyim bdag mgon med zas sbyin gyis smras pa/ bdag nyid chen po 'di dag ni phal cher mtshan mo skyil mo krung gis 'da' bar byed do/ /de dag sems mngon par dad par gyur nas/ dad pa skyes pa de dag gis dge slong rnams la ras yug chen lnga brgya phul lo/ /dge slong rnams kyis gding ba rnying pa de dag khang pa chen po'i gtsug lag khang bla gab med pa zhig tu gzhag go/ /de'i tshe na khyim bdag gcig gis sangs rgyas la sogs pa dge slong gi dge 'dun khyim gzhan du gdugs tshod la spyan drangs pa dang / dge slong gi dge 'dun ni zhugs so/ /bcom ldan 'das ni rdzas las byung ba na bzhugs shing bsod snyoms mngon par bsgrubs so/ /sangs rgyas bcom ldan 'das rnams ni rgyu lngas rdzas las byung ba na bzhugs shing bsod snyoms mngon par bsgrub par mdzad de/ lnga gang zhe na/ nang du yang dag 'jog la bzhed pa dang lha rnams la chos ston par bzhed pa dang / nad pa la blta bar bzhed pa dang / gnas mal la rtog par bzhed pa dang / 'dul ba la nyan thos rnams kyi bslab pa'i gzhi bca' bar bzhed pa'o/ /don 'dir ni bcom ldan 'das gnas mal la rtog par bzhed pa dang / 'dul ba la nyan thos rnams kyi bslab pa'i gzhi bca' bar bzhed pas rdzas las byung ba na bzhugs shing bsod snyoms mngon par bsgrub par mdzad do/ /de nas bcom ldan 'das kyis dge slong gi dge 'dun song nas ring po ma lon par thugs su chud nas/ lde mig bsnams te kun dga' ra ba nas kun dga' ra bar/ gtsug lag khang nas gtsug lag khang du/ khang khyim nas khang khyim du/ 'chags nas 'chag sar dang / gol ba nas gol bar gshegs shing mthar gyis gshegs pa na khang pa chen po'i gtsug lag khang ga la ba der gshegs so/ /de'i tshe na khang pa chen po'i gtsug lag khang de na gding ba rnying pa rdol ba dang ral bas rdul gyi phye ma dang 'dres pa rab tu mang po dag sa la bkram zhing 'dug go/ /bcom ldan 'das kyis gding ba rnying pa rdol ba dang ral bas rdul gyi phye ma dang 'dres pa rab tu mang po dag sa la bkram zhing 'dug pa dag gzigs so/ /gzigs nas kyang e ma zhes gsung zhing smad nas 'di snyam du dgongs te/ bram ze dang khyim bdag dad pa can dag gis pags pa dang sha dang khrag dag btsir zhing btsir zhing sbyin pa dag sbyin bsod nams dag byed pa gang yin pa de la dge slong dag drod mi shes pa dang / so sor mi rtog par yongs su longs spyod par byed do snyam du dgongs so/ /de nas bcom ldan 'das kyis gding ba rnying pa de dag legs par brtul zhing sprugs nas bting zhing bskams te rtsig pa la mi reg par mdzad nas gtsug lag khang gi phyi rol du zhabs gnyis bsil te/ nang du yang dag 'jog gi slad du gtsug lag khang du gshegs so/ /de nas dge slong bsod snyoms bsgrubs pas bsod snyoms blangs nas bcom ldan 'das ga la ba der song ngo / /sangs rgyas bcom ldan 'das rnams ni chos nyid kyis bsod snyoms sgrub pa'i dge slong la dge slong ji ltar zas bsod dam dge slong gi dge 'dun tshim par byas sam zhes so sor kun dga' bar mdzad pa 'dis so sor kun dga' bar mdzad pa yin pas bcom ldan 'das kyis dge slong bsod snyoms bsgrub pa la/ dge slong ji ltar zas bsod dam/ dge slong gi dge 'dun tshim par byas sam zhes so sor kun dga' bar mdzad pa dang / des gsol pa dang / btsun pa te por zas bsod cing dge slong gi dge 'dun tshim par bgyis so/ /de nas bcom ldan 'das zhal zas kyi bya ba mdzad nas/ gtsug lag khang gi phyi rol du zhabs gnyis bsil te nang du yang dag 'jog gi slad du gtsug lag khang du gshegs so/ /de nas bcom ldan 'das phyi dro nang du yang dag 'jog las bzhengs nas dge slong gi dge 'dun gyi gung la gdan bshams pa nyid la bzhugs so/ /bzhugs nas bcom ldan 'das kyis dge slong rnams la bka' stsal pa/ dge slong dag 'di na ngas dge slong gi dge 'dun song nas ring po ma lon par shes nas/ lde mig khyer te kun dga' ra ba nas kun dga' ra bar/ gtsug lag khang nas gtsug lag khang du/ khang khyim nas khang khyim du/ 'chags nas 'chag sar dang / gol ba nas gol bar song zhing mthar gyis 'gro ba na khang pa chen po'i gtsug lag khang zhig ga la ba der phyin nas/ ngas khang pa chen po'i gtsug lag khang de na gding ba rnying pa rdol ba dang / ral bas rdul gyi phye ma dang 'dres pa rab tu mang po dag sa la bkram zhing 'dug pa mthong ngo / /mthong nas kyang e ma zhes byas te smad nas 'di snyam du bram ze dang khyim bdag dad pa can dag gis pags pa dang sha dang khrag dag btsir zhing btsir zhing sbyin pa dag sbyin bsod nams dag byed pa gang yin pa de la/ dge slong dag drod mi shes pa dang so sor mi rtog par yongs su longs spyod par byed do snyam du dgongs kyi/ dge slong dag khyed kyis dad pas sbyin par bya ba la drod ran par yongs su longs spyod pa dang / spang zhing yongs su longs spyad pa dang / dus su yongs su longs spyad pa dang / brtag cing brtag cing yongs su longs spyad pa dang / khad kyis yongs su longs spyad na legs so/ /de nas bcom ldan 'das kyis drod ran pa dang / spang ba dang / dus dang / brtag pa dang / khad kyis yongs su longs spyad pa'i bsngags pa brjod nas dge slong rnams la bka' stsal pa/ dge slong dag de lta bas na phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong gis gding ba sar pa spyod na sar pa kha dog mi sdug par bya ba'i phyir gding ba rnying pa bde bar gshegs pa'i mtho gang 'khor bas glan par bya'o/ /gal te dge slong gis sar pa kha dog mi sdug par bya ba'i phyir gding ba rnying pa bde bar gshegs pa'i mtho gang 'khor bas ma glan par gding ba sar pa spyod na spang ba'i ltung byed do zhes bca' ba mdzad de/ yul ni mnyan yod/ gang zag ni dge slong rab tu mang po/ /nyon mongs pa ni drod mi shes pa dang so sor mi rtog par yongs su longs spyod par byed pa/ nyes pa ni gding ba sar pa la rnying pas ma glan par rnying pa bor ba'o/ /de la dge slong gis zhes bya ba ni chos 'di pas so/ /gding ba zhes bya ba ni so sor gding ba'o/ /sar pa zhes bya ba ni sar pa gnyis te/ gsar pas sar pa dang rnyed pas sar pa'o/ /don 'dir ni gsar pas sar pa yin par dgongs so/ /byed na zhes bya ba ni bdag nyid kyis byed dam gzhan byed du 'jug pa'o/ / sar pa kha dog mi sdug par bya ba'i phyir zhes bya ba ni sar pa sra bar bya ba'i phyir ro/ /gding ba rnying pa bde bar gshegs pa'i mtho gang 'khor bas glan par bya'o zhes bya ba ni gal te de la gding ba rnying pa bde bar gshegs pa'i mtho gang 'khor ba gzhan yod na'o/ /bde bar gshegs pa'i zhes bya ba ni ston pa'o/ /bde bar gshegs pa'i mtho gang la ni tshad dang ldan pa'i khru'i khru phyed dang do yod do/ /'khor bas zhes bya ba ni kun nas mtho re yod pas so/ /glan par bya'o zhes bya ba ni sbyar bar bya ba'o/ /gal te dge slong gis sar pa kha dog mi sdug par bya ba'i phyir gding ba rnying pa bde bar gshegs pa'i mtho gang 'khor bas ma glan par zhes bya ba ni ma sbyar ro/ /gding ba sar pa spyod na zhes bya ba ni gding ba'i dgos par spyod na'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni dge slong gis gding ba rnying pa las bde bar gshegs pa'i mtho gang gis ma glan pa'i gding ba sar pa spyod na spyad par brtsams pa'i tshe nyid na mtho gang gi spang ba'i ltung byed kyi dngos gzhir 'gyur ro/ /dge slong la mtho gang gi spang ba'i ltung byed byung na/ de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par bde bar gshegs pa'i mtho gang gis glan dgos pa'i gding ba de lta bu gzhan zhig rnyed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis mtho gang gis spang ba'i ltung byed byung la/ ji srid du spang ba'i dngos po las ma bshags shing so sor ma bshags par lhung bzed dam/ chos gos sam/ dra ba'am/ phor bu'am/ ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /gal te gding ba rnying pa ril gyis yod na des de ltar bya ste/ de la na smad pa med do/ /gal te gding ba rnying pa bde bar gshegs pa'i mtho gang tsam zhig yod na yang des de ltar bya ste/ de la na smad pa med do/ /gal te gding ba rnying pa mi sra ba bcos par nus pa zhig yod na yang des de ltar bya ste/ de la na smad pa med do/ /gal te gding ba rnying pa dam dum mthud cing sbyar du rung ba zhig yod na yang des de ltar bya ste/ de la na smad pa med do/ /gding ba sar pa shos gsar pas sar pa yin na des de ltar bya ste/ de la na smad pa med do/ /rang gis byas pa dang / gzhan byed du bcug pa lan smad pa med do/ /gding ba'i rdzas bzang ngan dang mnyam pa la na smad pa med do/ /rgyu rung ba la na smad pa med do/ /gding ba'i tshad ni srid du bde bar gshegs pa'i mtho'i mtho do/ zheng du bde bar gshegs pa'i mtho'i mtho phyed dang do ste/ gding ba gsar pas sar pa tshad de dag dang de dag pas lhag pa la na smad pa med do/ /'di'i byed pa po ni gding ba gsar pas sar pa byas pa dang / gding ba rnying pa yod pa nyid yin no/ /'di la yan lag lngas dngos gzhi'i ltung bar 'gyur te/ gding ba gsar pas sar pa dang / byas pa dag gding ba rnying pa yod pa dang / bde bar gshegs pa'i mtho gang gis ma glan pa dang spyod pa nyid do/ /de dag las yan lag ma tshang na ci rigs par na smad do/ /de la gding ba gsar pas sar pa dang / byas pa zhes smos pa ni/ gsar pas sar pa ma yin pa dang / ma byas pa la ltung ba med pa'i phyir ro/ /gding ba rnying pa yod pa zhes smos pa ni gding ba rnying pa med pa la ltung bar mi 'gyur ba'i phyir ro/ /bde bar gshegs pa'i mtho gang gis ma glan pa zhes smos pa ni chad de tsam dang / de bas che bas glan pa la ni ltung ba med la/ de bas chung bas glan pa la ni na smad pa'i phyir ro/ /sbyor ba nyid ces smos pa ni rang gir mi sbyor bar ltung ba med pa'i phyir ro/ /sbyor ba gcig gis gding ba gcig gam gnyis sam mang po zhig byed na yang ltung ba'i dngos gzhi gcig rnam par gzhag go/ /sbyor ba'i ltung ba ni nyes byas te/ ji srid du mtho gang gi spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /rgyu rung ba ma yin pa la nyes byas so/ /tshad pas tshung ba la nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni byas zin pa rnyed pa dang / gzhan gyis byas pa la yongs su longs spyod pa dang / rnying pa'i byi dor mngon par 'du byed pa la ltung ba med do/ /gding ba gsar pa ma byas pa dang / rnying pa mi bdog pa dang / bde bar gshegs pa'i mtho gang gis glan pa dang mi spyod pa la ltung ba med do/ /gding ba rnying pa ril gyis mi bdog pa dang / bde bar gshegs pa'i mtho gang tsam yang mi bdog pa dang / mi sra bar bcos par mi nus pa dang / dam dum mthud cing sbyar du mi rung ba la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du mtho gang gi spang bar 'gyur ba rnam pa thams cad mi bsten par bslab par bya'o/ /gding ba rnying pa ril gyis bdog gam/ bde bar gshegs pa'i mtho gang gi tshad tsam zhig bdog gam/ mi sra bar bcos par nus pa zhig bdog gam/ dam dum mthud cing sbyar du rung ba zhig bdog na yang de dag gis ci rigs par glan par bya'o/ /phyir bcos pa ni snga ma bzhin no/ /mtho gang gi spang ba ste bco lnga pa bshad zin to/ / //so sor thar pa'i mdo rgya cher 'grel pa 'dul ba kun las btus pa/ bam po bco lnga pa/ bal thogs pa'i spang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ / drug sde dag gis smras pa/ kye dga' bo nye dga' lhung bzed nag po can 'di dag ni rkang pa spre'u zhag gis bskus te 'gro na yang 'gro bar chas pa'i rnyed pa sgrub par byed/ 'ong na yang glo bur du 'ongs pa'i rnyed pa sgrub par byed cing / skye bo mang po dga' ba dang yid du 'ong bar yang 'gyur ro/ /yu bu cag ni khron ba'i rus sbal dang 'dra bar gar yang mi 'dong gang nas kyang mi 'ong bas rnyed pa 'thob pa dang / skye bo mang po dga' ba dang yid du 'ong ba ga la 'gyur gyi yu bu cag kyang 'dod ngo / /gang du 'dong / gang du 'dron pa don mthun 'grub par ro/ /de dag gis bsams pa/ gal te thams cad 'dong bar gyur na bdag cag gi slong mo ster ba'i khyim gang dag yin pa de dag kyang lhung bzed nag po can dag gis kha phyin par 'gyur gyis bdag cag gis gcig gzhag ste 'dong bar bya na su gzhag par bya/ btsun pa 'char ka'o/ /btsun pa 'char ka khyod ni 'di nyid du 'dug shig dang / kho bo cag 'dong bar bya'o/ /de bzhin gyis shig ces 'char ka de nyid du 'dug go/ /lnga po dag gis 'dron pa don mthun btsal bar brtsams pa dang / de dag gis bal yul du 'gro ba'i 'dron pa don mthun mthong nas de'i drung du song ste smras pa/ bzhin bzangs dag khyed gang du 'dong / 'phags pa dag bal yul du'o/ /bzhin bzangs dag kho bo cag kyang khyed dang lhan cig 'dong ngo / /'phags pa dag bal yul ni rnga mo'i rgyab 'dra ba lags pas khyed cag der dgyes par mi 'gyur ro/ /bzhin bzangs dag gal te de lta bu yin du zin kyang yul mthong bar 'gyur gyi 'dong bar bya'o/ /'phags pa dag gal te de lta na tshur spyon bzhud do/ /drug sde dag 'dron pa don mthun de dang lhan cig bal yul du 'phags nas mthar gyis bal yul du phyin pa dang / nyi ma gang kho na la bal yul du phyin pa'i nyi ma de la mngon par mi dga' bar gyur nas/ de dag nang par sngar langs te lam srang du dong ba dang / tshong pa dag gis drug sde dag mthong nas de dag gi rkang pa la phyag 'tshal te smras pa/ 'phags pa dag bal yul ji 'dra/ khyed cag mngon par mi dgyes par ma gyur tam/ bzhin bzangs dag nyi ma gang kho na la bal yul du phyin pa'i nyi ma de nyid la mngon par mi dga' bar gyur to/ /'phags pa dag bdag cag gis khyed la dang po kho na nas bal yul na ni rnga mo'i rgyab 'dra ba lags pas khyed cag der dgyes par mi 'gyur ro zhes ma bgyis sam/ bzhin bzangs dag ji de lta na 'gro'am/ 'dong ngo / /'phags pa dag bdag cag gis zong ma bsgyur te/ de ltar lags mod kyi 'on kyang bdag cag dang bshes pa'i tshong pa gzhan dag mchis pa de dag gis zong bsgyur bas/ de dag la gtad par bgyi yis de dag dang thabs cig tu bzhud cig /drug sde dag gis smras pa/ de ma nongs kyi de bzhin bgyi'o/ /bal yul na bal dang ldong ros gnyis mod pas/ 'dron pa don mthun de dag gis bal gyis shing rta bkram ste chas pa dang / drug sde dag kyang 'dron pa don mthun pa de dag dang lhan cig 'phags so/ /drug sde dag gi kun du spyod pa ni rdul gyis 'jigs pas yang na ni don mthun gyi mdun du 'gro/ /yang na ni phyi bzhin 'brang zhing 'gro bas/ de dag don mthun gyi phyi bzhin 'gro bar brtsams pa dang / ji tsam na tshong pa de dag gi shing rta'i srog shing chag nas tshong ba de dag gis bsams pa/ gal te shing rta'i srog shing bcos na/ sgras chom rkun pa dag 'ong bar 'gyur zhing / de dag gis dang por bdag cag gsad par 'gyur la de'i 'og tu nor yang 'phrog par 'gyur gyi/ bdag cag gis gces pa dag khyer te 'dong ngo snyam nas yid mi dga' zhing 'khod pa dang / drug sde dag lhags nas de dag gis smras pa/ shes ldan dag ci'i phyir yid mi dga' zhing 'khod/ 'phags pa dag shing rta'i srog shing chag ste/ gal te shing rta'i srog shing bcos na sgras chom rkun pa dag mchi bar 'gyur zhing de dag gis dang por bdag cag bkum par 'gyur la/ de'i 'og tu nor yang 'phrog par 'gyur bas bdag cag gis gces pa dag 'tshal te mchi'o snyam nas yid mi dga' zhing mchis so/ /bzhin bzangs dag khyed kyis bal dag yongs su btang ngam/ gal te khyed cag la mi gnod na zhwa dang lham sgro gu can dang / stod kor nang tshangs can dang rgya cang dang lcag pod dang shur bu phre'u la sogs pa'i don du cung zhig bskur ro/ /'phags pa dag bdag cag la 'dis ci bgyi/ thams cad snoms shig /drug sde dag gis smras pa/ kye dga' bo nye dga' phyag dar khrod rnyed do zhes de dag gis lnga char gyi lhung bzed dang chos gos dag gcig la bskur nas/ mi bzhis de nyid las thag pa bkal te/ khur po che bzhi drags nas de dag gis de khur te dong ngo / /de dag gis khur de dag khyer te/ 'phags pa dang / tshong pa de dag gis drug sde dag bal gyi khur bslang ste phyi bzhin 'ong ba mthong nas smras pa/ 'phags pa dag bdag cag gis gla mi dag khrid de mchi'o snyam du bsams na khyed cag gis bal 'di thams cad bsnams te byin gyis 'phags pa dag la gla gsol lo/ /bkren pa dag kho bo cag khyed kyi gla mi dag yin nam/ 'phags pa dag med kyang bzhad gad bgyi'o/ /don mthun de'i nang du mu stegs can dag cig 'dong ba de dag gis smras pa/ kye ma drug sde dag khyed cag gang du khur 'jig par 'gyur/ gang du rnyed pa 'grub par 'gyur/ mu stegs can dag khyed kyi ma'i lto dral te der 'jig par 'gyur zhing / der rnyed pa 'grub par 'gyur ro/ /drug sde dag gis smras pa/ kye dga' bo nye dga' gal te don mthun dang lhan cig 'dong na tho 'tshams pa mang du 'byung gi /don mthun gyi mdun du 'dong ngo zhes de dag don mthun gyi mdun du 'phags te dong ba dang / ri brags shig na chom rkun pa bcad pa'i phyir yang rgod kyi mi mang po bkod cing 'khod pa de dag gis de dag thag ring po kho na nas mthong ngo / /mthong nas kyang nyam nga bar gyur nas/ de dag gis smras pa/ shes ldan dag glang po che dang bcas pa'i dmag byung ngo zhes ri brags pa de dag thams cad skrag nas nags khrod du byer ro/ /de dag gi nang nas kha cig gis smras pa/ 'di dag ni glang po che dang bcas pa'i dmag ma yin gyi 'di ltar rnga mo dag cig 'ongs pa yin no/ /kha cig gis smras pa/ 'di dag ni rnga mo ma yin gyi 'di ltar glang dag cig yin no/ /kha cig gis smras pa/ 'di dag glang ma yin gyi 'di dag ni khur thogs pa dag cig yin no/ /de dag thag nye bar gyur pa dang / yang rgod de dag gis ngo shes te smras pa/ 'phags pa dag khyed cag 'di lta bu'i khur dag thogs pas de'i phyir ri brags pa thams cad skrag ste/ nags khrod du phyir ro/ / bkren pa dag gal te chom rkun pa dag gis khyed cag de ltar bred ngas par shes par gyur na nyin mo'i nyi ma kho na la yang bcings te nags khrod du khrid par 'gyur ro/ /kye dga' bo nye dga' gal te lam du 'dong na tho 'tshams pa mang du 'byung gi lam gol bar 'dod do zhes de dag lam gol bar zhugs te dong ba dang / sho gam pa dag gis tshong pa sho gam 'dral ba bsgugs pa'i phyir 'gag sgugs pa'i mi mang po dag bkod cing 'khod pa de dag gis de dag mthong nas smras pa/ e ma'o tshong pa sho gam 'dral ba dag ci'i phyir sho gam 'dral te 'dong / bkren pa dag kho bo cag khyed kyi tshong pa sho gam 'dral ba dag yin nam/ khyed cag su yin/ 'phags pa drug sde dag gam/ yin no/ /bzhud cig /de dag gis smras pa/ kye dga' bo nye dga' gal te rgyal byed kyi tshal gyi sgo nas zhugs na lhung bzed nag po can dag las tho 'tshams pa mang du 'byung gi / sge'u chung nas 'jug par bya'o zhes de dag sge'u chung nas zhugs pa dang / rgan zhugs zhig gis mthong nas des smras pa/ e ma 'o khur tsa ba dag ci'i phyir grong dral te 'jug par byed/ rgan zhugs kho bo cag khyod kyi khur tsa ba dag yin nam/ des smras pa khyed cag su yin/ tshe dang ldan pa drug sde dag gam/ yin no/ /tshe dang ldan pa dag byon pa legs so byon pa legs so/ /de dag nang du zhugs nas de dag gis bal gyi khur de dag bshig pa dang / ri rab kyi rnam pa 'dra ba'i phung po chen por rnam par gnas so/ /de dag la dge slong rnams kyis smras pa/ tshe dang ldan pa dag khyed cag khur 'di lta bu dag thogs na khyod la tho 'tshams pa dag mi 'byung ngam/ tshe dang ldan pa dag ji kho bo cag gis kha zas bza' ba kho na'i phyir mngon par bsgrubs sam/ gang kho bo cag la tho 'tshams bar byed pa de la kho bo cag gis kyang nyis bsgyur sbyin par bya'o zhes zer na/ dge slong don nyung ngu dag ci'i phyir dge slong dag yan lag gang gis ngo tsha bar bya ba'i yan lag de nyid kyis khengs par byed ces smod par byed/ phyar kha gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ drug sde dag la rmas nas/ rnam grangs du mar smad de bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong lam du zhugs pas lug bal dag rnyed la 'dod na dge slong des blang bar bya'o/ /blangs nas khyer ba med na dpag tshad gsum gyi mtha'i bar du bdag nyid kyis bskur bar bya'o/ /de las 'das par khyer na spang ba'i ltung byed do zhes bca' ba mdzad de/ yul ni mnyan yod/ gang zag ni drug sde/ nyon mongs pa ni 'dod zhen dang ngo tsha med pa/ nyes pa ni rgyang grags kyi mthar bal khur ba'o/ /de la dge slong zhes bya ba ni drug sde'am/ gzhan yang de lta bu gang yin pa'o/ /lam du zhugs pas zhes bya ba ni dgon pa'i lam du zhugs pas so/ /lug bal dag ces bya ba ni lug gi bal dag go/ /rnyed la zhes bya ba ni gzhan las so/ /'dod na zhes bya ba ni gal te don du gnyer na'o/ /dge slong des blang bar bya'o zhes bya ba ni mnod par bya ba'o/ /blangs nas khyer ba med na zhes bya ba ni rung bar byed pa med na'o/ /dpag tshad gsum gyi mtha'i bar du zhes bya ba ni dpag tshad gsum gyi mthar thug pa'i bar tshun chad du'o/ /bdag nyid kyis bskur bar bya'o zhes bya ba ni bdag rang gis bskur bar bya'o/ /de las 'das par khyer na zhes bya ba ni de las thal bar byed na'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni dge slong lam du zhugs pas lug bal dag rnyed la 'dod cing blangs nas khyer ba med na dpag tshad gsum las rgyang grags gcig gi mtha' las 'das par khyer na bal thogs pa'i spang ba'i ltung byed kyi dngos gzhir 'gyur ro/ /dge slong la bal thogs pa'i spang ba'i ltung byed byung na de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par lug bal de lta bu gzhan zhig rnyed na de yang snga ma'i shugs kyis spang bar 'gyur te de las ltung bar ni mi 'gyur ro/ / dge slong gis bal thogs pa'i spang ba'i ltung byed byung la/ ji srid du spang ba'i dngos po las ma bshags shing so sor ma bshags par lhung bzed dam/ chos gos sam/ dra ba'am/ phor bu'am/ ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na/ de yang snga ma'i shugs kyis spang bar 'gyur te/ de las ltung bar ni mi 'gyur ro/ /khyer ba med pa la dpag tshad gsum las 'das pa'i mtha' nas rgyang grags gcig gi mthar phyin pa la na smad pa med do/ /khyer ba yod bzhin du bdag nyid kyis khyer na gzhi nyid nas brtsams te rgyang grags gcig gi mthar phyin pa la na smad pa med do/ /lug bal gyi rdzas bzang ngan dang mnyam pa la na smad pa med do/ /bal rung ba la na smad pa med do/ /zhwa dang lham sgro gu can dang stod kor nang tshangs can dang rgya cang dang lcag pod dang shur bu phre'u la sogs pa de tsam dag gi rgyu'i tshad las lhag pa la na smad pa med do/ /'di'i byed pa po ni lug bal rung ba dang rgyang grags kyi mthar khyer ba nyid yin no/ /'di la yan lag lngas dngos gzhi'i ltung bar 'gyur te/ lug bal dang rung ba dang / zhwa rgyu la sogs pa'i tshad las lhag pa dang / rang gis khyer ba dang rgyang grags kyi mthar phyin pa'o/ /de dag la yan lag ma tshang na ci rigs par na smad do/ /de la lug bal dang rung ba zhes smos pa ni lug bal ma yin pa dang / ra bal la sogs pa rung ba ma yin pa la nyes byas su gsungs pa'i phyir ro/ /zhwa rgyu la sogs pa'i tshad las lhag pa zhes smos pa ni de dag gi don du de tsam dag khyer ba la ni nyes pa med la de dag gi don ma yin par de tsam dag khyer ba la ni na smad pa'i phyir ro/ /rang gis khyer ba zhes smos pa ni gzhan gyis bskur ba la nyes pa med pa'i phyir ro/ /rgyang grags kyi mthar phyin pa zhes smos pa ni rgyang grags phyed du phyin pa la nyes byas su gsungs pa'i phyir ro/ /sbyor ba gcig gis lug bal rung ba zhwa rgyu la sogs pa'i tshad las lhag pa'i chun po gcig gam gnyis sam mang po zhig khyer na yang ltung ba'i dngos gzhi gcig rnam par gzhag go/ /rgyang grags kyi mthar phyin pa zhes smos pa de la 'dir rgyang grags dang dpag tshad kyi tshad rdul phra rab la sogs pa las bsgyur te bsgre ba bstan pa'i phyir rdul phra rab dang rdul phra mo dang / chu dang lcags dang ri bong dang lug dang glang dang nyi zer gyi rdul dang / sro ma dang / shig dang nas dang sor rnams ni snga ma drug las phyi ma gcig tu bsgre'o/ /sor nyi shu rtsa bzhi la khru gang ngo / /khru phyed dang bzhi la mi'i srid do/ /khru bzhi la gzhu gcig go/ /gzhu lnga brgya la yang rgyang grags gcig go/ /rgyang grags brgyad la dpag tshad gcig go/ /dgon pa'i dang po yang rgyang grags gcig gi mtha'o zhes gsungs so/ /sbyor ba'i ltung ba ni nyes byas te/ ji srid du bal thogs pa'i spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /bal rung ba ma yin pa la nyes byas so/ /zhwa rgyu la sogs pa'i tshad dang de bas chung ba de dag gi don ma yin par khyer ba la nyes byas so/ /khyer ba med pa na bdag nyid kyis dpag tshad gsum gyi mtha' nas brtsams te rgyang grags phyed du khyer na nyes byas so/ /khyer ba yod bzhin du bdag nyid kyis khyer na ni rtsom pa'i dus kho na nas nyes byas gzhan gcig go/ /rgyang grags phyed du phyin na nyes byas gzhan gcig go/ /rdzu 'phrul las gzhan pas nam mkha' la khyer te 'gro na nyes byas so/ /sprul pas khyer te 'gro na nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni khyer ba med na bdag nyid kyis dpag tshad gsum gyi bar du khyer ba la ltung ba med do/ /zhwa dang lham sgro gu can dang / stod kor nang tshangs can dang rgya cang dang lcag pod dang shur bu phre'u la sogs pa'i don du de tsam dag khyer ba la nyes pa med do/ /las dang bo pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du bal thogs pa'i spang bar 'gyur ba rnam pa thams cad mi bsten par bslab par bya'o/ /lus kyi khur phrag rdang zhes bya ba ni mi bskur ro/ /glo dang rgyab dang rked pa dang mgo bo dag gis khur ba yang mi bskur ro/ /khur phyed kyi srang tshad las lhag pa mi bskur ro/ /'dir dge slong dang dge slong ma thun mong ma yin pa nyid du dogs par mi bya'o/ /phyir bcos pa ni snga ma bzhin no/ /bal thogs pa'i spang ba ste bcu drug pa bshad zin to// //bal rmel du 'jug pa'i spang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med sbyin gyi kun dga' ra ba na bzhugs so/ /drug sde dag gis smras pa/ kye dga' bo nye dga' bal bgo bar bya'o/ /cha dur bya/ de dag gis smras pa/ bdag cag gis btsun pa 'char ka 'di nyid na 'dug 'dug pa la ci'i phyir skal ba sbyin cha ldar bya'o/ /'char kas thos nas des smras pa tshe dang ldan pa dag khyed kyis der rnyed pa gang grub pa de yang khyed nyid kyir gyis shig / kho bo 'di nyid na 'dug 'dug pas rnyed pa gang grub pa de yang kho bo nyid kyir bya'o/ /nye dgas bsams pa/ 'di 'di nyid na 'dug 'dug pas rnyed pa mang po grub gor ma chag snyam nas/ des smras pa/ tshe dang ldan pa dag bdag cag dus thams cad du drug sde yin na/ de ci'i phyir lnga sder 'gyur bar bya/ cha drug kho nar bya'o/ /su 'god du gzhug /btsun pa 'char ka sdum pa yin gyis de 'god du gzhug go/ /'char kas cha drug tu byas te bdag nyid kyi skal ba rang gi gnas khang du bcug ste gzhag go/ /de dag gis smras pa/ btsun pa 'char ka khyod kyis rnyed pa gang grub pa de khyer shog bgo'o/ /'char kas smras pa/ kho bos de'i bar du ka ka ni gcig tsam yang ma rnyed do/ /khyod kyis kho bo cag bslus so/ /'char kas bsams pa/ bdag gis bal nyung du ma zhig rnyed pa 'di su rmel du gzhug / gal te khyim bdag la bcol na ni de dag bslab pa yang dag par ma blangs pa yin pas thams cad brku bar 'gyur ro/ /gal te bcu bdun sde de dag la bcol na ni bca' ba'i rin du 'jog par 'gyur ro/ /chos byin la bcol du yang chos byin na mdo sde'i mtha' pa yin la/ 'khor yang mdo sde'i mtha' pa dang ldan pa yin pas de mdo sde'i tshig dag sems pa na dus 'gyangs par 'gyur ro/ /gau ta ma'i skem mo la bcol du yang gau ta ma'i skem mo ni 'dul ba 'dzin pa yin la 'khor yang 'dul ba 'dzin pa dang ldan pa yin pas de 'di ni ltung ba yin no/ /'di ni ltung ba ma yin no zhes sems pa na dus 'gyangs par 'gyur ro/ /skye dgu'i bdag mo chen mo gau ta mI ni spong ba yin la 'khor yang spong ba dang ldan pa yin pas de sems rtse gcig tu 'jog pa la bal rmel ba mi gnod kyi/ bdag gis de la bal rmel du bcol lo snyam nas/ de de snyam sems shing 'dug ba na skye dgu'i bdag mo chen mo gau ta mI bcom ldan 'das ga la ba la ba der 'ongs pa de'i tshe tshe dang ldan pa 'char kas thag ring po kho na nas mthong nas smras pa/ gau ta mI bcom ldan 'das kyis tshul khrims dang ldan pa'i sems kyis smon pa 'grub ste/ de yang tshul khrims rnam par dag pa'i phyir ro zhes bka' stsal pa de legs par gsungs pa yin te/ da gzod kho na bdag kye ma skye dgu'i bdag mo chen mo gau ta mI 'ongs na ci ma rung snyam pa'i blo skyes na khyod kyang 'dir 'ongs so/ /bdag gis bal nyung ngu zhig rnyed pa de khyod kyis rmel du chug ste byin cig / 'phags pa bdag bcom ldan 'das kyi zhabs la phyag 'tshal te slar mchis nas/ dge slong ma gnyis gtang gi de gnyis kyi sug par stsol cig /'char kas bal de dag gzar thag gis bam po gnyis su dam rab tu bcings te sgo glegs kyi phag tu gzhag ste/ de nas skye dgu'i bdag mo gau ta mI bcom ldan 'das kyi zhabs la phyag 'tshal te/ dbyar khong du song nas des de'i gan du dge slong ma gnyis btang ste/ 'phags pa 'char ka'i gan du deng la bal de bskur du gsol zhes gyis shig ces bsgo'o/ /de gnyis der dong ste smras pa/ 'phags pa gau ta mI'i mchid nas bal de bskur du gsol zhes mchi'o/ /'char kas de gnyis la smras pa/ sgo glegs kyi phag na bam po gnyis su 'dug pa de gnyis khyer la deng shig de gnyis gnas khang du zhugs te gdeg par brtsams pa dang / bsgul ba tsam du yang ma nus nas de gnyis kyis smras pa/ 'phags pa ci 'dir rang thag gi gor ma dag stsal tam/ gzhon nu ma gnyis ji khyed gnyis gzhon nu ma gta' gam pa yin nam zhes des mthe'u chung gis gdeg ste gcig ni gcig gi mgor bskur/ gcig ni gcig gi rked du bskur ro/ /de gnyis mgo chag la thug go/ /rked pa chag la thug go zhes zer zhing dbyar khang du dong nas khur sa la bzhag ste khri steng du sgyel cing 'dug go/ /dge slong ma rnams kyis de gnyis la smras pa/ 'phags ma gnyis gzhon nu ma gta' gam pa yin nam/ de gnyis kyis smras pa/ khyed cag las stobs dang ldan pa gang yin pa des je 'di thegs shig /de dag gis de gdeg par brtsams pa dang / bsgul ba tsam du yang mi nus nas de dag gis smras pa/ 'phags ma gnyis ji 'dir rang thag gi rdo dag bcug gam zhes de dag gis bam po de gnyis bshig pa dang / ji tsam na bal de dag 'bongs te phung po chen por rnam par gnas par gyur to/ /dge slong ma rnams kyis rta gad kyis btab ste smras pa/ 'phags pa 'char ka na re bal cung zhig ces zer ba yang 'di lta bur gyur na/ gal te mang bar gyur na ji lta bur 'gyur/ skye dgu'i bdag mo chen mo gau ta mIs smras pa/ nu mo dag mgo bregs shing mchan khung ral bu can dag yin na dgod du ci yod/ 'phags pa 'char ka'i mched nas bal nyung ngu zhig ces mchi ba yang 'di lta bur gyur na/ gal te mang bar gyur na ni ji lta bur 'gyur/ skye dgu'i bdag mo chen mo gau ta mIs smras pa/ nu mo dag de dag ni gnas ngan len kun du spyod pa dag yin pas de dag gis bcom ldan 'das kyi bstan pa la 'drums pas ltung bas ltung bar byed do/ /nu mo dag bcom ldan 'das kyis 'di gnyis ni skyes bu dam pa yin te khur ma blangs pa mi len pa gang yin pa dang / khur blangs pa mthar phyin par byed pa gang yin pa'o zhes gsungs te/ 'di'i khur blangs pa yin pas mthar phyin par bya dgos kyi/ khyed cag las gang gis ji tsam rmel bar spro ba des de tsam rmel ba de'i gan du khyer te byin cig / de dag yun ring du thogs pa dang 'char kas bsams pa/ de dag gis bal de bca' ba'i rin du gzhag gor ma chag /bdag gis ma legs pa zhig byas te/ bdag gis bal de ni char pas 'jig pa dang la khar bzhag pa dang 'dra bar gyur to snyam mo/ /dge slong ma gnyis kyis bal kha cig rmel te khyer 'ongs nas smras pa/ 'phags pa 'char ka bal dag 'tshal te mchis na gang du gzhag par bgyi/ 'char kas bsams pa/ da dung spyod yul lhag ma dang bcas pa yin no snyam nas smras pa/ gnas khang du chug ste zhog shig /de gnyis kyis bzhag ste song ba dang / gzhan dag gis kyang khyer te 'ongs so/ /ji tsam na thams cad kyis kyang khyer te lhags so/ /de nas skye dgu'i bdag mo chen mo gau ta mIs bcom ldan 'das ga la ba der song ste phyin nas bcom ldan 'das kyi zhabs gnyis la phyag 'tshal te mtha' gcig tu 'dug go/ /de'i tshe na skye dgu'i bdag mo chen mo gau ta mI'i lag pa gnyis 'di lta ste dper na btso blag mkhan gyi lag pa dmar ba ltar dmar ba shin tu dmar bar gyur to/ /de nas bcom ldan 'das kyis skye dgu'i bdag mo chen mo gau ta mI la 'di skad ces bka' stsal to/ /gau ta mI ci'i phyir khyod kyi lag pa gnyis 'di lta ste dper na btso blag mkhan gyi lag pa dmar ba ltar dmar ba shin tu dmar bar gyur/ bcom ldan 'das 'di na bgyi ba gzhan lags na gzhan bgyid do/ /ji ltar gyur/ 'phags pa 'char kas bdag bal rmel du stsal to/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo dge slong ma nye du ma yin pa la lug bal dag rmel du 'jud dam/ btsun pa rmel du gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ 'char ka la rmas nas rnam grangs du mar smad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang dge slong ma nye du ma yin pa la lug bal 'khrur 'jud dam 'tshed du 'jud dam rmel du 'jug na spang ba'i ltung byed do zhes bca' ba mdzad de/ yul ni mnyan yod/ gang zag ni 'char ka /nyon mongs pa ni dge sbyong gi tshul ma yin par 'dod pa/ nyes pa ni dge slong ma nye du ma yin pa la lug bal dag rmel du 'jug pa'o/ /de la yang dge slong gang zhes bya ba ni 'char ka'am gzhan yang de lta bu gang yin pa'o/ /dge slong ma zhes bya ba ni chos 'di pa'o/ /nye du ma yin pa la zhes bya ba ni phyi mo dang mes po dang phrugs la brten pa'i bdun pa tshun chad ni nye du yin la de phan chad ni nye du ma yin no/ /lug bal zhes bya ba ni lug gi bal lo/ /'khrur 'jud dam zhes bya ba ni tha na chur smyug pa byed du 'jud na'o/ /'tshed du 'jud dam zhes bya ba ni tha na tshon du smyug par byed du 'jud na'o/ /rmel du 'jud na zhes bya ba ni tha na 'da' ba byed du 'jud na'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na 'dir yang dngos gzhi dang / sbyor ba dang / sbyor pa'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /bal rmel du 'jud pa'i spang ba 'di ni sngar 'khrur 'jug pa'i spang bar bstan pa dang mtshan nyid thams cad 'dra bar shes par bya'o/ /'dir bye brag 'ga' tsam zhig yod pa gang yin pa de bstan pa'i phyir chos gos rnying pa'i gnas su lug gi bal dag go/ /'chag par rmel ba'o zhes bya ba smras te/ sngar 'khrur 'jug pa'i skabs su byin gyis brlabs pa rang gi rnying pa 'khrur gzhug par 'os pa chos gos dang gding ba dag las 'ga' zhig ces smos pa'i gnas su 'dir lug gi bal dag ces bya ba'i ming gzhug pa dang / sngar 'khrur 'jug pa'i sdang ba'i skabs su 'chag pa zhes smos pa'i gnas su 'dir rmel ba zhes bya ba'i ming gzhug par shes par bya'o/ /de la 'dir dngos gzhi'i ltung ba rnam par gzhag pa ni dge slong gis lug bal dag dge slong ma nye du ma yin pa la bsgo bas 'khrur 'jug gam 'tshed du 'jug gam rmel du bcug bdag byas pa nyid na/ bal rmel du 'jug pa'i spang ba'i ltung byed kyi dngos gzhir 'gyur ro/ /'khru ba dang 'tshed pa dang / rmel ba'i rigs mi mthun pa'i tshigs rnams dang / de dag grub pa'i mtha' man chad bar skabs su chad pa'i tshigs rnams la ltung ba re rer rnam par mi gzhag par spyir dngos gzhi'i 'bras bu gcig rnam par gzhag go/ /dge slong la bal rmel du 'jug pa ni spang ba'i ltung byed byung na de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par lug bal 'khrur gzhug pa dang 'tshed du gzhug pa dang rmel du gzhug pa de lta bu gzhan zhig rnyed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis bal rmel du 'jug pa'i spang ba'i ltung byed byung la/ ji srid du spang ba'i dngos po las ma bshags shing so sor ma bshags par lhung bzed dam chos gos sam dra ba'am phor bu'am ska rags sam/ dge slong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /bal gyi grwa la sogs pa phyogs gcig la byas pa dang / 'khru ba la sogs pa las phyogs gcig byas pa la na smad pa med do/ /lug bal gyi rdzas bzang ngan dang mnyam pa la na smad pa med do/ /bal rung ba la na smad pa med do/ /zhwa dang lham sgro gu can dang stod kor nang tshangs can dang rgya cang dang lcag pod dang shur bu phre'u la sogs pa de tsam gyi rgyu'i tshad las lhag pa la na smad pa med do/ /dge slong ma nye du ma yin pa bsnyen par rdzogs pa ma nyams pa la na smad pa med do/ /bshang ba dang gci ba dang ljan ljin dang / 'dam rdzab la sogs pas ma rung bar gyur pa 'khru ba dang 'tshed pa dang rmel du 'jug pa la na smad pa med do/ /'di'i byed pa po ni lug bal dang dge slong ma nye du ma yin pa'i yul la 'du shes gtso cher byed pa po nyid yin no/ /'di la yan lag lngas dngos gzhi'i ltung bar 'gyur te/ lug bal dang rung ba dang dge slong ma nye du ma yin pa dang bsgo ba dang byas pa'o/ /de dag las yan lag ma tshang na ci rigs par na smad do/ /de la lug bal dang rung ba'o zhes smos pa ni lug bal ma yin pa dang ra bal la sogs pa rung ba ma yin pa la nyes byas su gsungs pa'i phyir ro/ /dge slong ma nye du ma yin pa la zhes smos pa ni nye du la ltung ba med pa'i phyir ro/ /bsgo ba zhes smos pas ni mngags pa la sogs pa la nyes byas su gsungs pa'i phyir ro/ /byas pa'o zhes smos pa ni dge slong ma nye du ma yin pas bkru ba la sogs pa ma byas na nyes byas su gsungs pa'i phyir ro/ /sbyor ba gcig gis lug bal rung ba zhwa rgyu la sogs pa'i tshad las lhag pa'i chun po gcig gam gnyis sam mang po zhig 'khru ba dang 'tshed pa dang rmel ba dang bar skabs su bcad na yang ltung ba'i dngos gzhi gcig rnam par gzhag go/ /sbyor ba'i ltung ba ni nyes byas te ji srid du bal rmel du 'jug pa'i spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /phyi rol pa'i rab tu byung ba dang ma chags pa dang nyams pa la nyes byas so/ /bal rung ba ma yin pa la nyes byas so/ /zhwa rgyu la sogs pa'i tshad dang de bas chung ba la nyes byas so/ /lug bal ma yin par ra bal la sogs pa la nyes byas so/ /tshig gis ma bsgo bar mngags pa la sogs pa ni nyes byas so/ /dge slong mas ma byas pa la nyes byas so/ /nye du la nye du ma yin par 'du shes pa dang nye du la yid gnyis za ba la nyes byas so/ /rung bar byas pa dang / spangs pa dang dge 'dun gyi la nyes byas so/ /nye du dang nye du ma yin pa'i mtshan nyid ni sngar 'khrur 'jug pa'i spang ba'i skabs su bstan pa bzhin no/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed do/ sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /khyim pa'i rtags can mo la nyes byas phra mo'o/ /ltung ba med pa ni dge slong ma nye du la nye du nyid du 'du shes pa la ltung ba med do/ /las dang po pa dang / smyos pa dang / sems 'khrugs pa dang tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du bal rmel du 'jug pa'i spang bar 'gyur ba rnam pa thams cad mi bsten par bslab par bya'o/ /phyir bcos pa ni snga ma bzhin no/ / bal rmel du 'jug pa'i spang ba ste bcu bdun pa bshad zin to// //gser dngul la reg pa'i spang ba'i gleng gzhi ni byung ba dang bcas pa'i dbang gis rnam pa gnyis te/ de la re zhig byung ba'i gleng gzhi ni sangs rgyas bcom ldan 'das rgyal po'i khab na 'od ma'i tshal ka lan dka'i gnas na bzhugs so/ /de nas grong dpon gtsug na nor bu bcom ldan 'das ga la ba der song ste phyin nas/ bcom ldan 'das kyi zhabs gnyis la mgo bos phyag 'tshal te mtha' gcig tu 'dug go/ /mtha' gcig tu 'dug nas bcom ldan 'das la grong dpon gtsug na nor bus 'di skad ces gsol to/ /btsun pa sngon gyi gdugs rnams kyi ches snga ba zhig na rgyal po'i pho brang na rgyal po dang blon po'i 'khor mchis shing mthun par gyur pa rnams la bar skabs kyi bka' mchid kun du brjod pa ni 'di lta bu byung bar gyur te/ shes ldan dag ji ltar dge slong rnams la mngon m tshan can rung zhing shAkya'i sras kyi dge sbyong rnams gser bdag gir bgyid dam 'on te dge slong rnams la mngon mtshan can mi rung zhing shAkya'i sras kyi dge sbyong rnams gser bdag gir mi bgyid ces mchi nas de na kha cig ni 'di skad ces dge slong rnams la mngon mtshan can rung zhing shAkya'i sras kyi dge sbyong rnams gser bdag gir bgyid do zhes mchi/ kha cig ni 'di skad ces dge slong rnams la mngon mtshan can mi rung zhing shAkya'i sras kyi dge slong rnams gser bdag gir mi bgyid do zhes mchi na btsun pa de la gang dag de skad ces dge slong rnams la mngon mtshan can rung zhing shAkya'i sras kyi dge sbyong rnams gser bdag gir bgyid do zhes mchi na/ btsun pa ji ltar gang dag de skad mchi ba de dag de ltar brda sprod par bgyid pa na bcom ldan 'das la skur pa 'debs par mi bgyid cing ha cang thal bar yang mi bgyid pa dang / de dag bcom ldan 'das kyis gsungs pa'i rjes su smra ba dang / chos smra ba dang / chos kyi rjes su mthun pa'i chos brda sprod par bgyid pa dang / gsungs pa'i rjes su smra ba de dag la gzhan las chos dang mthun pas smad pa'i gnas lta bu'i chos 'ga' yang mi mchi ba lags sam/ bcom ldan 'das kyis bka' stsal pa/ grong dpon gang dag de skad ces dge slong rnams la mngon mtshan can rung zhing shAkya'i sras kyi dge sbyong rnams gser bdag gir byed do zhes zer ba de dag de ltar brda sprod par byed na nga la skur pa 'debs par byed cing ha cang thal bar byed pa dang / de dag ngas smras pa'i rjes su smra ba ma yin pa dang / chos smra ba ma yin pa dang / chos kyi rjes su mthun pa'i chos brda sprod par byed pa ma yin pa dang / smras pa'i rjes su smra ba ma yin pa de dag la gzhan las chos dang mthun pas na smad pa'i gnas lta bu'i chos shin du 'ong ba yin no/ /de ci'i phyir zhe na/ grong dpon dge slong rnams la mngon mtshan can mi rung zhing shAkya'i sras kyi dge sbyong rnams gser bdag gir mi byed do/ /gang la la la mngon mtshan can rung zhing gser bdag gir byed pa de ni dge sbyong gi chos ma yin zhing de ni shAkya'i sras kyi chos ma yin pa'i phyir ro/ /grong dpon ngas khyod la don de nyid kyi phyir lan gnyis lan gsum gyi bar du brjod par bya ste/ dge slong rnams la mngon mtshan can mi rung zhing shAkya'i sras kyi dge sbyong rnams gser bdag gir mi byed de gang la la la mngon mtshan can rung zhing gser bdag gir byed pa de ni dge sbyong gi chos ma yin zhing de ni shAkya'i sras kyi chos ma yin no/ /btsun pa gang gi slad du bcom ldan 'das kyis de skad ces dge slong rnams la mngon mtshan can mi rung zhing shAkya'i sras kyi dge slong rnams gser bdag gir mi byed do/ gang la la la mngon mtshan can rung zhing gser bdag gir byed pa de ni dge sbyong gi chos ma yin zhing de ni shAkya'i sras kyi chos ma yin no zhes bka' stsal te/ ji tsam du bcom ldan 'das kyis legs par gsungs pa de ni ngo mtshar to/ /btsun pa gang gi slad du bcom ldan 'das kyis de skad ces grong dpon ngas khyod la don de nyid kyi phyir lan gnyis lan gsum gyi bar du brjod par bya ste/ dge slong rnams la mngon mtshan can mi rung zhing shAkya'i sras kyi dge sbyong rnams gser bdag gir mi byed do/ gang la la la mngon mtshan can rung zhing gser bdag gir byed pa de ni dge sbyong gi chos ma yin zhing de ni shAkya'i sras kyi chos ma yin no zhes bka' stsal pa'i bcom ldan 'das kyis bka' de ni rgya cher bzang ba lags so/ /btsun pa bdag kyang 'di snyam bgyid de/ dge slong rnams la mngon mtshan can mi rung zhing shAkya'i sras kyi dge sbyong rnams gser bdag gir mi bgyid de/ gang la la la mngon mtshan can rung zhing gser bdag gir bgyid pa de la ni 'dod pa'i yon tan lnga po dag kyang rung ba kho na lags so/ /grong dpon de de bzhin no/ /de de bzhin te/ dge slong rnams la mngon mtshan can mi rung zhing shAkya'i sras kyi dge sbyong rnams gser bdag gir mi byed de/ gang la la la mngon mtshan can rung zhing gser bdag gir byed pa de ni dge sbyong gi chos ma yin zhing de ni shAkya'i sras kyi chos ma yin no/ /de nas grong dpon gtsug na nor bus bcom ldan 'das kyis bka' stsal pa la mngon par dga' ba dang rjes su yi rang ba byas nas bcom ldan 'das kyi zhabs gnyis la mgo bos phyag 'tshal te/ bcom ldan 'das kyi spyan snga nas song ngo / /de nas bcom ldan 'das kyis tshe dang ldan pa kun dga' bo bcom ldan 'das kyi snam logs na bsil yab thogs te bcom ldan 'das la g.yob cing 'dug pa la bka' stsal nas/ 'od ma'i tshal ka lan dka'i gnas na dge slong ji snyed nye bar brten cing gnas pa de dag thams cad dpong sa'i khang par bsdus te/ grong dpon gtsug na nor bus ji skad gsol ba dang / bcom ldan 'das kyis ji skad bka' stsal pa de dag thams cad dge slong rnams la bzlas nas 'di skad ces bka' stsal to/ /dge slong dag de ltar grong dpon gtsug na nor bu de rgyal po dang bcas pa'i mdun du dge slong rnams la mngon mtshan can mi rung zhing shAkya'i sras kyi dge sbyong rnams gser bdag gir mi byed do/ /gang la la la mngon mtshan can rung zhing gser bdag gir byed pa de ni 'dod pa'i yon tan lnga po dag kyang gdon mi za bar rung ba yin no zhes cha gcig bzung ste/ khyu mchog gi tshig rgya chen po smras shing 'khor gyi nang du yang dag par seng ge'i sgra bsgrags so/ /dge slong dag ngas kyang de skad ces dge slong rnams la mngon mtshan can mi rung zhing shAkya'i sras kyi dge sbyong rnams gser bdag gir mi byed do/ /gang la la la mngon mtshan can rung zhing gser bdag gir byed pa de ni dge sbyong gi chos ma yin zhing de ni shAkya'i sras kyi chos ma yin no zhes smras so/ /dge slong dag de lta bas na khyed la da deng phyin chad shing 'dod pa dag gis ni shing yongs su btsal bar bya/ rtswa 'dod pa dag gis ni rtswa/ shing rta'i las 'dod pa dag gis ni shing rta'i las/ mi blas 'dod pa dag gis ni mi blas yongs su btsal bar bya zhes smra'i/ 'di skad ces rnam grangs gang gis kyang gser bdag gir bya ba ni mi smra'o/ /'di ni re zhig byung ba yin gyi sangs rgyas bcom ldan 'das re zhig 'dul ba la nyan thos rnams kyi bslab pa'i gzhi 'cha' bar ni mi mdzad de/ yul ni rgyal bo'i khab/ gang zag ni shAkya'i sras kyi dge sbyong spyi/ nyon mongs pa dang nyes pa ni med do/ /bcas pa'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe na dge slong drug sde dag rang gi lag gis gser dang dngul len par byed/ len du 'jug par byed/ phung po gcig tu byed/ phung po gnyis su byed/ khri dang khri'u dang khri'u chung ngu dag tu 'jog par byed nas/ gzhan mu stegs can dag shes ldan dag shAkya'i bu'i dge sbyong dag ni ma log ma spangs so sor ma spangs pa yin te/ 'di ltar rang gi lag gis gser dang / dngul len par byed/ len du 'jug par byed/ phung po gcig tu byed/ phung po gnyis su byed/ khri dang khri'u dang khri'u chung ngu dag tu 'jog par byed do/ /bram ze dang khyim bdag dag kyang rang gi lag gis gser dang dngul len par byed/ len du 'jug par byed/ phung po gcig tu byed/ phung po gnyis su byed/ khri dang khri'u dang khri'u chung ngur 'jog par byed na/ shes ldan dag shAkya'i bu'i dge sbyong rnams dang bram ze dang khyim bdag rnams kyi bya ba 'di la bye brag ni ci yod/ bsam pa ni ci yod/ tha dad du bya ba ni ci yod su zhig dge sbyong mgo reg 'di dag la bsod snyoms sbyin par bya bar sems zhes smod par byed/ phyar kha gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ drug sde dag la rmas nas/ rnam grangs du mar smad de/ bslab pa bca' ba'i phan yon bcu yang dag par gzigs pas/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang rang gi lag gis gser dang dngul len tam len du 'jug na spang ba'i ltung byed do zhes bca' ba mdzad de/ yul ni mnyan yod/ gang zag ni drug sde/ nyon mongs pa ni dge sbyong gi tshul ma yin pa byed 'dod pa nyes pa ni rang gi lag gis gser dang dngul len pa dang / len du 'jug pa'o/ /de la yang dge slong gang zhes bya ba ni drug sde'am gzhan yang de lta bu gang yin pa'o/ /rang gi lag gis zhes bya ba ni rang gi lag pas so/ /gser dang dngul zhes bya ba ni gser dang dbyig go/ /len tam zhes bya ba ni bdag nyid kyis so/ len du 'jug na zhes bya ba ni gzhan no/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni/ dge slong gis rin po che nor bu dang mu tig dang bai DUr+ya dang shang ka shi la dang byi ru dang dngul dang gser dang rdo'i snying po dang spug dang dmar po dang g.yas su 'khyil ba la sogs pa rung bar ma byas pa 'thob par lcogs pa nyid kyi phyogs na 'dug pa bdag gir byas pa dang / rang gi rin po che rung bar ma byas pa la rnam pa gang yang rung bas reg gam reg tu bcug na/ gser dang dngul la reg pa'i spang ba'i ltung byed kyi dngos gzhir 'gyur ro/ /dge slong la gser dngul la reg pa'i spang ba'i ltung byed byung la/ de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par rin po che de lta bu gzhan zhig rnyed na/ de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis gser dngul la reg pa'i spang ba'i ltung byed byung la/ ji srid du spang ba'i dngos po las ma bshags shing so sor ma bshags par lhung bzed dam chos gos sam dra ba'am phor bu'am ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na/ de yang snga ma'i shugs kyis spang bar 'gyur te/ de las ltung bar ni mi 'gyur ro/ /rkang pa'i drung dang 'thob par lcogs pa nyid kyi phyogs na 'dug pa'i rin po che bdag gir byas pa la na smad pa med do/ /lus dang ngag dang yid kyi rnam par rig byed gang yang rung ba bdag gir byas pa la na smad pa med do/ /rin po che'i rnam pa gang yang rung ba la na smad pa med do/ / gang rin po che rung bar ma byas pa la reg gam reg tu bcug pa la na smad pa med do/ /lus dang ngag dang yid kyi rnam par rig byed gang yang rung bas reg gam reg tu bcug pa la na smad pa med do/ /'di long shig /'di nas long shig /'di tsam long shig ces bya ba dang / 'di khyer shog / 'di nas khyer shog /'di tsam khyer shog ces bya ba dang / 'di zhog shig /'dir zhog shig /'di tsam zhog shig ces bya ba dang / de long shig /de nas long shig /de tsam long shig ces bya ba dang / de khyer shog /de nas khyer shog /de tsam khyer shog ces bya ba dang / de zhog shig /der zhog shig /de tsam zhog shig ces bya ba'i gzhi bco brgyad kyi dngos gzhi la na smad pa med do/ /rin po che rdungs su byas pa dang / mngon mtshan can la na smad pa med do/ /'di'i byed pa po ni rin po che nor bu la sogs pa rung bar ma byas pa nyid yin no/ /'di la yan lag lngas dngos gzhi'i ltung bar 'gyur te/ rin po che dang 'thob par lcogs pa nyid kyi phyogs na 'dug pa dang / bdag gir byas pa dang / rung bar ma byas pa dang / reg gam reg tu bcug pa'o/ /de dag las yan lag ma tshang na ci rigs par na smad do/ /de la rin po che zhes smos pa ni rin po che nor bu dang mu tig dang be+e DUr+ya dang shang ka shi la dang byi ru dang dngul dang gser dang rdo'i snying po dang spug dang dmar po dang / g.yas su 'khyil pa la sogs pa ma yin pa de dag las gzhan pa kha cig la ni nyes byas su 'gyur la/ kha cig ni ltung ba med pa'i phyir ro/ / 'thob par lcogs pa nyid kyi phyogs na 'dug pa zhes smos pa ni 'thob pa dang lag tu 'ong bar lcogs pa nyid kyi phyogs na 'dug pa la bdag gir byed na dngos gzhir 'gyur gyi/ de bas pha zad na 'dug pa la bdag gir byed pa ni phyed nyid du na smad de nyes byas su 'gyur ba'i phyir ro/ /bdag gir byas pa zhes smos pa ni bdag gir ma byas pa gzhan gyi la ltung byed du na smad pa'i phyir ro/ /rung bar ma byas pa zhes smos pa ni sbyin bdag bdag po nyid du mos su gzhug pa dang / zhal ta byed pa la sogs pa bdag po nyid du khas len du gzhug pa dang / byin gyis brlab pa zhes bya ba'i rung ba rnam pa gsum gang yang rung ba gcig byas pa la reg gam reg tu bcug pa la nyes pa med pa'i phyir ro/ /reg gam reg tu bcug pa zhes smos pa ni rang gi rung bar ma byas pa la reg gam reg tu ma bcug na ltung ba med pa'i phyir ro/ /sbyor ba gcig gis rin po che gcig gam gnyis sam mang po zhig bdag gir byas sam reg gam reg tu bcug na yang ltung ba'i dngos gzhi gcig rnam par gzhag go/ /sbyor ba'i ltung ba ni nyes byas te/ ji srid du gser dngul la reg pa'i spang ba'i ltung byed kyi sbyor ba brtsams nas/ dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed pa brtsams pa re re la nyes byas re re'o/ /'thob par lcogs pa nyid kyi phyogs pas pha zad na 'dug pa la bdag gir byed na nyes byas so/ /dong tse dang pa na la sogs pa'i ming dang mtshan ma byas pa la yul gyi tha snyad gdags su rung ba'i zangs ma la nyes byas so/ /rin po che yin yang gas pa dang chag pa dang dum bu dang tshig pa dang mngon mtshan can song na lan 'ga' nyo tshong byas pa'i dus kyang 'jig rten na mi grag pa dang / mngon mtshan can gyi zong du ma byas pa dang / mtshan dang mi ldan pa dang / sa dang rtswa dang rdo ba la sogs pa dag las nor bu dang / dong tse dang / mngon mtshan can dang / rgyan dang 'gron bu la sogs pa'i rnam par bcos pa nyo tshong gi tha snyad gdags su mi rung ba dag la nyes byas so/ /'di long shig /'di nas long shig /'di tsam long shig ces bya ba la sogs pa gzhi bco brgyad kyi sbyor ba la nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te/ nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni dong tse dang pa na la sogs pa'i ming dang mtshan ma byas pa yul gyi tha snyad gdags su rung ba'i zangs ma las gzhan pa'i zangs ma la ltung ba med do/ /zha nye dang khro chu dang ro nye dang lcags dang rag na dang rno lcags dang khar ba dag la yang ltung ba med do/ /dge tshul dang dge tshul ma gnyis kyis rin po che la reg gam reg tu bcug pa la ltung ba med do/ /sbyin bdag bdag po nyid du mos su gzhug pa dang / zhal ta byed pa bdag po nyid du khas len du gzhug pa dang / byin gyis brlab pa zhes bya ba'i rung ba rnam pa gsum gang yang rung ba gcig byas pa bdag gir bya ba med pa la reg gam reg tu bcug pa la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du gser dngul la reg pa'i spang bar 'gyur ba rnam pa thams cad mi bsten par bslab par bya'o/ /rang gi rin po che rung ba ma byas pa la reg gam reg tu bcug pa la na smad pa med do zhes smras na/ rung ba gang ma byas na rung ba ma yin pa'i rung ba de ji 'dra ba zhig ce na/ de'i phyir sbyin bdag bdag po nyid du mos su gzhug pa dang / zhal te byed pa bdag po nyid du khas len du gzhug pa dang / byin gyis brlab pa zhes bya ba ni rung ba dag yin no zhes bya ba smos so/ /'dir gzhung ni de nas bcom ldan 'das 'di snyam du dgongs te/ kye ma bram ze dang khyim bdag dad pa can dag kyang gos kyi rin dag sbyin par byed la/ nga'i nyan thos rnams kyang gos kyi rin dag 'dod kyi ngas nyan thos rnams la rung bar bya ba cung zhig gnang bar bya'o snyam du dgongs nas/ bcom ldan 'das kyis bka' stsal pa/ dge slong dag de lta bas na/ chos gos kyi rin dag rnyed pa na blang bar bya zhing blangs nas kyang sbyin pa dag de nyid la yid brtan te bcang bar bya bar ngas rjes su gnang ngo zhes gsungs pa de ni rung ba dang po yin no/ / de bzhin du dge slong rnams kyis ji srid 'tsho'i bar du rung ba ma yin pa'i dngos po gang cung zad ci snyed pa de dag thams cad kun dga' ra ba pa'am/ dge bsnyen zhal ta byed pa spro bar bya zhing de'i ming gis bcang bar bya'o zhes gsungs pa de ni rung ba gnyis pa yin no/ /sbyin bdag dang zhal ta byed pa de gnyis ji srid du gson pa dang / 'dug pa dang 'tsho ba dang sdod pa'i bar du shin tu ring du song yang cho ga de gnyis nyams pa med do/ /rung ba gsum pa ni byin gyis brlab pa zhes bya ba yin par rig par bya ste/ de ltar yang 'dir gzhung ni rnam par 'byed pa dang / bram ze'i bu mos zhus pa las dge slong rnams kyis chos gos kyi rin dag rnyed la sbyin bdag med nas de dag 'gyod pa skyes te mi len pa'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ blang bar bya zhing blangs nas kyang dge slong gi mdun du 'greng ste 'di skad ces tshe dang ldan pa dgongs su gsol/ bdag dge slong ming 'di zhes bgyi bas dngos po rung ba ma lags pa 'di rnyed de/ bdag dge slong ming 'di zhes bgyi bas dngos po rung ba ma lags pa 'di byin gyis brlab po/ /dngos po rung ba ma lags pa 'dis dngos po rung ba bsgrub par bgyi'o/ /lan gsum du bzlas/ thabs yin no/ /legs so zhes brjod par bya zhing / 'gyod par yang mi bya'o zhes gsungs pa yin no/ /'di'i cho ga ni len pa'i tshe rang gi lag gis mi blang bar mdun du gzhag ste/ cho ga dang sngags 'dis byin gyis brlabs pa yin no/ / rung ba rnam pa gsum po de dag ni bdag gir bya ba spang ba'i thabs yin te/ de gsum gang byas kyang rung ste/ bdag gir bya ba med na de'i tshe dngos po rung ba ma yin pa la dgos pa'i dbang gis reg gam reg tu bcug pa la ltung bar mi 'gyur ro/ /ji ste rung ba gsum yang byed bzhin du rdzas de la bdag nyid kyir bdag gir byed pa dang / rjes su 'brel na ni de lta na yang thams cad du ltung bar 'gyur ba kho na yin no/ /de'i phyir dge slong gis gos kyi rin rung ba ma yin pa dag rnyed pa na rung ba 'di gsum las gang yang rung ba gcig bya zhing rdzas de la bdag nyid kyir bdag gir byar med pa'i sems bskyed par bslab par bya'o/ /rung ba de dag gsum yang chos dang ldan pa'i don ni mi bdog pa'i rkyen las gzhan pa la mi 'chags te chos dang ldan pa'i don ces bya ba ni rang gi lhung bzed dang chos gos dang dra ba'am phor bu'am ska rags sam dge spong gi 'tsho ba'i yo byad gang yang rung ba dang / na ba'i rkyen dang sman gyi yo byad la sogs pa dag go/ /de dag mi bdog pa'i rkyen las gzhan pa zhes bya ba ni/ gal te chos dang ldan pa'i don bdog pa kho na yin bzhin du rung ba ma yin pa'i rdzas de la rung ba byed pa yang mi 'chags la/ chos dang ldan pa'i don mi bdog pa btsal ba'i rkyen las gzhan pa chos dang ldan pa'i don ma yin pa gzhan gyi ched du rdzas de rung bar byed na yang mi 'chags so/ /de lta bas na chos dang ldan pa'i don mi bdog pa'i rkyen las gzhan pa la rung ba de gsum byed du zin kyang dge slong des de la reg gam reg tu bcug na spang ba'i ltung byed du 'gyur bas/ de lta bu'i mi 'chags pa mi bya bar bslab par bya'o/ /dge slong gtsug lag khang nas gzhan du 'gro dgos pa'i rkyen byung na/ dge 'dun gyi'am mchod rten gyi dbyig dang gser sbas te 'gro bar bya'o/ /de sba ba la kun dga' ra ba pa'am dge bsnyen nam/ dge bsnyen dad pa can nam/ dge tshul dag med na dge slong rang gis sba bar bya'o/ /de sba ba la dong brko dgos pa la kun dga' ra ba pa'am/ dge bsnyen nam/ dge bsnyen dad pa can nam/ dge tshul med na dge slong rang gis brko bar bya'o/ /sbas pa de la 'jigs pa dang bral ba na kun dga' ra ba pa la sogs pa'i rnam pa de lta bu nyid kyis phyung ste dge 'dun la dbul bar bya'o/ /phongs pa'i dus dag tu gnang ba gang yin pa de bde ba'i dus dag tu spyad par mi bya bar bslab par bya'o/ /dge slong gis bdag nyid kyi lus 'tsho bar bya ba'i don du rdzas rung bar byas pa des bza' btung gi zas sbyor du gzhug tu rung bas de ltar bslab par bya'o/ /bza' ba de byed pa'i mi la zong dbul ba'i phyir yon bdag las rung ba byed pa'i lag nas kAr ShA pa Na blangs pa yang rung bas de ltar bslab par bya'o/ /dge slong lam du 'gro bas lam brgyags ni rin po che man chad las bskur du rung bas de ltar bslab par bya'o/ /'dir gzhung ni dge slong dag gis lam brgyags ji lta bu mi shes nas/ bcom ldan 'das kyis bka' stsal pa/ dge slong gi lam brgyags ni bza' ba lnga dang / bza' bar smos pa lnga dang / rin po che lnga dang / rin po cher smos pa lnga'o/ /bza' ba lnga gang zhe na/ 'bras chan dang / zan dron dang / sha dang / nya sha dang / snum khur ro/ /bza' bar smos pa lnga gang zhe na/ ci tse dang / khre rgod dang / rgya sran dang / bra rgod dang / khre'o/ /rin po che lnga gang zhe na/ gser dang / dngul dang / bai DUR+Ya dang / shel dang / mu tig go/ /rin po cher smos pa lnga gang zhe na/ zhe nye dang / zangs dang / ro nye dang / khro chu dang / lcags so zhes gsungs pa yin no/ /dge slong gis me'i don du me shel nye bar gzhag par bya'o/ /de ma sbas par gzhag par mi bya'o/ /ma byin par len pa la bsten par mi bya'o/ /des me phyung nas me ni ma byin par len pa la yang sbyin par bya'o/ /chu'i don du chu shel nye bar gzhag par bya'o/ /de bsrung ba la sogs pa'i cho ga yang snga ma bzhin no/ /shan bsre ba'i kha na ma tho ba dgag pa'i phyir yo byad rjes su gnang bar rin po che bdag gir bya ba'i shan bsre bar mi bya ba nyid do zhes bya ba smras te/ rgya la sogs pa'i 'tshog chas ni yo byad de/ de ni rjes su gnang ba yin no/ /de rjes su gnang ba'i khongs su rin po che bdag gir bya ba'i shan bsre ba gzhug par mi bya ba nyid du bslab par bya'o/ /der yang 'dir gzhung ni phran tshegs dag las/ bcom ldan 'das kyis bka' stsal pa/ de lta bas na dge slong dag gis rgya dang / khab dang / sman phor dang / phul ba'i btung phor bcang bar bya ba rjes su gnang ngo / /dge slong gis gser dang dngul dang bai DUr+ya dang shel las byas pa'i rgyal sogs pa bcang bar mi bya'o zhes gsungs pa yin no/ /gleng gzhi dag las kyang bcom ldan 'das kyis dud pa'i sman gce'u bcang bar bya'o zhes gsungs pa dang / zhus pa ji lta bu zhig bcang bar bgyi/ bka' stsal pa nye ba 'khor rin po che las byas pa ma gtogs so/ / snar blugs pa'i spyad dang / phul ba'i btung phor dang / khab dang / khab ral dang / mig sman gyi gab tse dang / sman phor dang / rkang rten dang / khri'u dang / sman gyi nal ze bcang bar bya'o/ /lcags kyi gar bu la lu gu rgyud gdags par bya'o zhes gsungs pa thams cad la yang ji lta bu zhig bcang bar bgyi zhes bya ba nas ji lta bu zhig gdags par bgyi zhes bya ba'i bar du zhus pa dang / nye ba 'khor rin po che las byas pa ma gtogs so zhes bka' stsal pa de lta bu'i tshig yod do/ /rag na dang zangs dang khar ba dang shing gi lhung bzed bdag gir mi bya'o/ /ra gan la sogs pa'i lhung bzed de dag bsnyen par rdzogs pa'i gnas skabs kyi sngon rol bsnyen par ma rdzogs pa'i tshe bdag gir byas pa'am/ bdag gir ma byas pa gzhan dang 'brel pa dag kyang rung ste gal te yongs su spyad dgos pa de lta bu'i rkyen cig byung bar gyur na/ sman phor du bsngos te yongs su spyad par bya zhing / bsod snyoms la sogs pa la bskur bar bya bar bslab par bya'o/ /de la snga ma shos kyi lung ni 'di yin te/ nye bar ma bzhag pa dag ni nye bar gzhag par mi bya'o zhes gsungs pa'o/ /phyi ma shos kyi lung ni 'di yin te/ nye bar bzhag pa dag ni sman phor gyi yongs su spyad pas yongs su longs spyad par bya'o zhes gsungs pa yin no/ /lhung bzed byin gyis brlab tu rung ba ni gnyis te/ lcags las byas pa dang / sa las byas pa'o/ /de gnyis byin gyis brlab par bya'o/ /rin po che'i rnam pa bstan pa'i phyir nor bu dang / mu tig dang / bai DUr+ya dang / shang ka shi la dang / byi ru dang / dngul dang / gser dang / rdo'i snying po dang / spug dang / dmar po dang / g.yas su 'khyil pa la sogs pa ni rin po che'o zhes bya ba smras te/ de dag bdag gir mi bya ba dang / rung bar ma byas pa la reg gam/ reg tu mi gzhug par bslab par bya'o/ /sangs rgyas kyi sku gdung la sogs pa yang de bzhin no/ /phyir bcos pa ni snga ma bzhin no/ /gser dngul la reg pa'i spang ba ste bco brgyad pa bshad zin to// //so sor thar pa'i mdo rgya cher 'grel pa 'dul ba kun las btus pa/ bam po bcu drug pa/ mngon mtshan can gyis spyod pa'i spang ba'i gleng gzhi ni byung ba dang bcas pa'i dbang gis rnam pa gnyis te/ de la re zhig byung ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /gang gi tshe bcom ldan 'das 'jig rten du byung ba de'i tshe na thams cad du yul dbus su sangs rgyas bcom ldan 'das byung ngo zhes sgra grags te/ de'i nyan thos rnams 'bar ba dang gsal ba dang char 'bab pa dang / glog 'byin pa'i cho 'phrul dag byed pas gang dag de la mchod pa dag byed pa de dag gi mchod pa byas pa de dag ni shin tu 'bras bu che ba dang / phan yon che ba dang / gsal ba che ba dang / rgyas pa chen po kho nar 'gyur ro zhes byang phyogs pa'i tshong pa dag gis thos nas de dag gis smras pa/ shes ldan dag yul dbus su 'dong ngo / /der khe spogs mang po yang bsgrub par bya/ sangs rgyas dang / chos dang dge 'dun dag la yang mchod pa bya'o zhes byang phyogs pa'i tshong pa de dag zong thogs te yul dbus su 'phags nas mthar gyis mnyan yod du phyin to/ /mnyan yod na shes pa can rtsis mkhan pa zhig 'dug pa des byang phyogs nas tshong pa don mthun dag 'ongs zhes thos nas/ des bsams pa/ song ste je bltas na der cung zad 'thob po snyam nas des cung zad dmigs pas kyang shes/ cung zad rtog gis kyang shes nas/ des song ste ded dpon la ming dang rus nas brjod cing ming 'di zhes bya ba 'ongs pa legs so/ /'ongs pa legs so/ /khyod kyi ma ni ming 'di zhes bya/ khyod kyi pha ni ming 'di zhes bya/ khyod kyi rdzas ni 'di snyed cig 'ongs so/ /nyi ma mang ge mo zhig la ni khal 'jig par 'gyur ro/ /khe spogs ni 'di snyed cig 'grub par 'gyur ro zhes smras pa dang / ded dpon des bsams pa/ bcom ldan 'das kyi nyan thos gang dag 'bar ba dang / gsal ba dang / char 'bab pa dang / glog 'byin pa'i cho 'phrul byed ces grags pa de dag las 'ga' zhig 'di yin gor ma chag snyam nas/ des de la dad pas byang phyogs kyi nags kyi 'bras bus slong phor bkang ste byin nas/ la ba srin bu'i mdog lta bu cig kyang bskon no/ /shes pa can des de blangs shing gyon te/ tshangs pa mtshungs par spyod pa rnams kyi gan du song ba dang / de dag gis de mthong nas smras pa/ shes pa can khyod kyis mgo bzlog ste/ nyal ba gang zhig las bzlog /des smras pa/ byang phyogs nas tshong pa don mthun pa 'ongs nas der kho bos ded dpon la ming dang rus nas brjod nas/ des kho bo la dad pas dad pa'i dbang du byas pa yin no/ /de dag gis smras pa/ shes pa can bdag cag la shAkya'i bu'i dge sbyong de dag rtag tu khyed cag la tha ga pa dag dang phreng rgyud dag dang 'bru mar mkhan dag las gzhan pa mi gtso bo 'ga' yang mngon par dad par mi byed do zhes tho 'tshams par byed kyi khyod la ba 'di gyon te song la shAkya'i bu'i dge sbyong de dag gi snying dag gas par gyis shig / de ltar bya'o zhes smras te/ de nas shes pa can de la ba de gyon nas rgyal byed kyi tshal du song ngo / /drug sde dag gi kun du spyod pa ni 'dir bdag cag gis bram ze dang khyim bdag 'ongs pa rnams la yang chos bstan par bya/ rgol ba dag kyang tshar gcad par bya/ rang gi grags pa yang bsgrag par bya'o snyam nas drug sde las gang yang rung bas rgyal byed kyi tshal gyi sgo stong bar mi 'jog pas nye dga' rgyal byed kyi tshal gyi sgo na 'chag cing 'dug pa des shes pa can de thag ring po kho na nas mthong ngo / /de nas nye dgas bsams pa/ gcer bu pa ngan pa 'di la ba bzang po zhig gyon te 'ongs kyi/ gal te bdag gis de ma phrogs na nye dga' zhes bya ba'i ming mi gzung ngo snyam nas/ des de la smras pa/ shes pa can khyod gcer bu pa yin la la ba 'di lta bu gyon na phyir babs sam ci/ kho bos phyir ma babs te/ 'di ltar byang phyogs nas tshong pa don mthun 'ongs nas der kho bos ded dpon la ming dang rus nas brjod nas des kho bo la dad pas dad pa'i dbang du byas pa byin no/ /ma legs so ma legs so/ /khyod kyis rgas pa'i gnas skabs su tshul khrims 'chal ba kun du spyod do/ /tshur shog 'dug shig dang chos bstan par bya'o/ /shes pa can de nye dga'i mdun du 'dug pa dang / nye dga' yid dga' zhing yid dga' nas de la sbyin pa'i bsngags pa brjod par brtsams so/ /drug sde dag gi kun du spyod pa ni gal te tshul khrims kyi gtam dag byed na nyan pa po dag bdag cag lha rnams su skyes so snyam du sems la/ gal te sbyin pa'i gtam dag byed na/ nyan pa po dag rang gi sha gang yin pa de yang bcad cing bcad cing sbyin par bya'o snyam du sems so/ /gal te ngan song gi gtam dag byed na nyan pa po dag bdag cag ngan song rnams su skyes so snyam du sems par 'gyur ba yin pas nye dgas shes pa can de la smras pa/ shes pa can khyod kyi ston pa ni ngan pa la mos pa yin te/ gal te de bzang po 'dod par gyur na des khyod cag la gos 'bum ri ba dang / zas ro brgya dang ldan pa dang khang pa brtsegs pa mig lnga brgya pa yang gnang bar 'gyur ba zhig na ma gnang ngo / /kho bo cag gi ston pa ni bzang po la mos pa yin pas de kho bo cag la gos 'bum ri ba dang zas ro brgya dang ldan pa dang khang pa brtsegs pa mig lnga brgya pa yang gnang ngo / /gal te khyod la ba 'di lta bu gyon te slong mo la 'gro bar gyur na bram ze dang khyim bdag dad pa can dag gis shes pa can 'dis tshul khrims 'chal pa kun du spyod do snyam du shes pas khyod kyi slong mo yang mi rnyed par 'gyur gyi khyod kyi la ba 'di kho bo la byin cig dang / kho bos khyod la la ba gzhan zhig sbyin no/ /kho bo la ba 'di gyon te bsod snyoms la 'jug pa na/ bram ze dang khyim bdag dad pa can dag gis kho bo mthong nas btsun pa nye dgas la ba 'di lta bu ga las rnyed ces zer na kho bos de dag la 'di skad ces shes pa can che ge mo zhig gis byin no zhes brjod par bya'o/ /des na de dag gis shes pa can dad pa dang ldan par gyur to snyam du shes par 'gyur zhing de dag gis khyod slong mo la zhugs pa la chang dang nur rdzis slong phor bkang ste sbyin par 'gyur ro/ /des smras pa/ btsun pa nye dga' ba zhes shig /nye dgas smras pa/ shes pa can khyod kyi tshangs pa mtshungs par spyod pa dag ni tshul khrims 'chal pa yin pas khyod de dag gi tshig thos nas yang phyir 'phrog tu 'ong bar 'gyur ba de lta bu'i gnas yod do/ /btsun pa nye dga' ji kho bo'i la ba 'di tshangs pa mtshungs par spyod pa de dag dbang ba yin nam/ la ba 'di ni kho bo nyid dbang ba yin gyi bzhes shig dang slar 'phrog tu mi mchi'o/ /nye dgas la ba de blangs nas klam rtsub mo gzhan zhig de la byin nas shes pa can de klam rtsub mo de gyon nas tshangs pa mtshungs par spyod pa rnams kyi gan du phyir song ba dang / de dag gis de mthong nas smras pa/ shes pa can khyod kyis yang mgo bsgyur te nyal ba gang las thob/ des smras pa/ 'di ni blo gzhan nas grub pa yin no/ /ji ltar 'gyur/ kho bos la ba de btsun pa nye dga' la byin nas des kyang kho bo la la ba 'di byin no/ /de dag gis spyos te smras pa/ shes pa can shAkya'i bu'i dge sbyong rnams ni yu bu cag gson pas kyang mi dga' ba yin no/ /drug sde dag ji lta bar gzhan de lta ma yin pa la/ nye dga' ji lta bar drug sde gzhan de lta ma yin no/ /gal te khyod kyis dge slong gnas brtan gzhan 'ga' zhig la byin par gyur na/ kho bo cag kyang rjes su yi rang bar byed na khyed kyis nye dga' la byin te/ de ni bdag cag la zong gis kyang khrag gi phyis bu len par 'dod pa yin gyi gal te la ba khyer te 'ongs na de lta na legs/ gal te khyer te mi 'ong na kho bo cag gis khyod tshangs pa mtshungs par spyod pa'i nang nas gnas nas dbyung bar bya zhing / tshul shing yang dbyung bar bya/ spang leb khri'u yang bsgyur bar bya/ slong phor yang khas dbub par bya/ khar ba yang dor bar bya'o/ /de skrag nas nye dga' ga la ba der song ba dang nye dgas thag ring po kho na nas de 'ong ba mthong nas/ des bsams pa/ shes pa can 'gros 'di lta bus 'ong ba 'di ni bdag gi la ba 'phrog par byed pa yin no snyam nas/ de gtsug lag khang gi nang du zhugs nas sgo bcad de 'dug go/ /shes pa can des sgo brdung bar brtsams te/ btsun pa nye dga' btsun pa nye dga' zhes bos pa dang / nye dga' cang mi smra bar 'dug go/ /dge slong rnams kyis de la smras pa/ shes pa can khyod la btsun pa nye dgas ci bya/ des smras pa/ des kho bo'i la ba zhig khyer ro/ /shes pa can gal te khyod la ba 'dod na song la bcom ldan 'das la skyabs sgrubs shig /de bcom ldan 'das ga la ba der song ba dang / bcom ldan 'das kyis shes pa can de thag ring po kho na nas 'ongs pa gzigs so/ /gzigs nas kyang dge slong rnams la bka' stsal pa/ dge slong dag khyed shes pa can thag ring po kho na nas 'ong ba la ltos shig /btsun pa bka' bzhin 'tshal/ 'di ni la ba'i phyir 'ongs te gal te la ba thob na de lta na legs/ gal te ma thob na khrag tsha ba skyugs te dus byed par 'gyur ro/ /de nas shes pa can de phyin nas bcom ldan 'das la 'di skad ces gsol to/ /bcom ldan 'das btsun pa nye dgas bdag gi la ba 'tshal ba de bcom ldan 'das kyis bdag la slar stsal du stsol cig /gal te bcom ldan 'das kyis bdag la la ba slar stsal du ma stsal na/ 'di ltar bdag tshangs pa mtshungs par spyod pa'i nang nas gnas nas phyung bar 'gyur zhing tshul shing yang phyung bar 'gyur/ spang leb khri'u yang bsgyur bar 'gyur/ slong phor yang khas phub par 'gyur/ khar ba yang bor bar 'gyur ro/ /de nas bcom ldan 'das kyis tshe dang ldan pa kun dga' bo la bka' stsal pa/ kun dga' bo song la nye dga'i gan du song ste shes pa can gyi la ba phyir byin cig /gal te ma byin na shes pa can 'di khrag tsha ba skyugs te dus byed par 'gyur ba'i gnas de lta bu yod do zhes gyis shig /tshe dang ldan pa kun dga' bos btsun pa bka' bzhin 'tshal zhes bcom ldan 'das kyi bka' mnyan nas/ nye dga' ga la ba der song ba dang / nye dgas tshe dang ldan pa kun dga' bo thag ring po kho na nas 'ong ba mthong nas/ des bsams pa/ shes pa can gyis pho nya 'di lta bu khrid de 'ong bas 'dis kho bo'i la ba phrog par 'gyur ro snyam mo/ /de nas tshe dang ldan pa kun dga' bos nye dga' la 'di skad ces smras so/ /bcom ldan 'das kyis bka' stsal pa/ shes pa can gyi la ba phyir byin cig gal te 'di'i la ba phyir ma byin na/ shes pa can 'di khrag tsha ba skyugs te dus byed par 'gyur ba'i gnas de lta bu yod par 'gyur ro zhes 'byung ngo / /nye dgas smras pa/ btsun pa kun dga' bo ston pa'i bka' mnyan par zad kyi gzhan du na sgre byi gcer bu 'di khrag tsha ba skyugs te dus byed par 'gyur ba las/ gal te shes pa can sha stag gis 'dzam bu'i gling 'di lta ste dper na/ bu ram shing gi tshal lam/ 'dam bu'i tshal lam/ 'od ma'i tshal bzhin du gang bar gyur la/ de dag thams cad khrag tsha ba skyugs te kha dag cing dus byed par gyur kyang / nye dga'i spu'i rtse mo tsam yang mi g.yos te/ 'on kyang bzhud cig dang sbyin no/ /de nas tshe dang ldan pa kun dga' bo song ba dang / nye dgas smras pa/ kwa ye gcer pu pa nyon cig /khyod kyi ston pa brdzun ma des brdzun du smra bas 'jig rten bslus nas/ sems can dmyal ba rnams su skyes te de'i lce la thong gshol lnga brgyas rmed par byed na/ khyod kyang de bas kyang brdzun ma chen po yin pas khyod kyi lce la yang thong gshol stong gis rmo bar yang 'gyur ro/ /gzhan yang kho bo'i la ba khyod kyis spyad na ci kho bos kyang khyod kyi la ba spyad snyam mam/ btsun pa nye dga' ma lags so/ /nye dgas de'i la ba des mdoms kyi phyogs thams cad phyis nas bzhi bltab tu bltab ste lag pa g.yon pa'i steng du bzhag nas lag pa g.yas pas thal lcag gis bsnun pa dang rim pa thams cad rdol bar gyur nas smras pa/ shes pa can lag pa gnyis rkyong shig /des lag pa gnyis brkyang ba dang / nye dga'i lag pas de khas bub tu sgyel bar 'gyur ba de lta bu'i shugs kyis la ba lag tu byin pa dang / de khas bub tu sgyel nas/ nye dgas rdog pas bsnun te smras pa/ gcer bu ba sgre byi gtsug lag khang slad pas ma bslad par song shig /btsun pa nye dga' gal te ma gum na mchi ste/ slan chad rgyal byed kyi tshal du mi mchi'o/ /de ni re zhig byung ba yin gyi bcom ldan 'das re zhig 'dul ba la nyan thos rnams kyi bslab pa'i gzhi 'cha' bar ni mi mdzad de/ yul ni mnyan yod/ gang zag ni nye dga'/ nyon mongs pa ni 'dod zhe na/ nyes pa ni gcer bu pa'i la ba mngon mtshan can zhe nom byas pa'o/ /bcas pa'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe na dge slong drug sde dag mngon mtshan can gyis spyod pa rnam pa sna tshogs byed de/ kun du sbyor bar byed/ rab tu sbyor bar byed/ bun 'gyed par byed/ skyed 'gyed par byed/ byas pa'i phyir byas pa dang / byas pa'i phyir ma byas pa dang / ma byas pa'i phyir byas pa dang / ma byas pa'i phyir ma byas par gtong bar byed do/ /ji ltar kun du sbyor bar byed ce na/ kun du rtsom par byed/ yul tshol bar byed/ shing rta sogs par byed/ yul du 'gro ba'i rdzas shom par byed/ le'u pa dang / gro ba dang / snag tsa dang / smyu gu dang / yi ge pa tshol bar byed de/ de ltar kun du sbyor bar byed do/ /ji ltar rab tu sbyor bar byed ce na/ brgyad shas dang / bcu shas dang / bcu gnyis kyi shas kyi phyir dpang po dang / gro ba dang / snag tsa dang / smyu gu dang / yi ge pa tshol bar byed do/ /de ltar rab tu sbyor bar byed do/ /ji ltar bun 'gyed par byed ce na/ nas dang 'bru rnying pa gsar byed dang nyes sde'i phyir gtong ba dang / gzhal ba'i snod dang bre'u chung ngu dang / phul dang / gro ba dang / snag tsa dang / smyu gu dang / yi ge pa tshol bar byed de/ de ltar bun 'gyed par byed do/ /ji ltar skyed 'gyed par byed ce na/ dung gi tshogs kyi phyir nor bu'i tshogs gtong bar byed pa dang / nor bu'i tshogs kyi phyir mu tig gi tshogs gtong bar byed pa dang / mu tig gi tshogs kyi phyir bai DUr+ya'i tshogs gtong bar byed cing / dpang po dang gro ba dang / snag tsa dang / smyu gu dang / yi ge ba tshol bar byed de/ de ltar skyed 'gyed par byed do/ /ji ltar byas pa'i phyir byas pa gtong bar byed ce na/ gser mngon mtshan can gyi phyir mngon mtshan can gtong bar byed de/ de ltar byas pa'i phyir byas pa gtong bar byed do/ /ji ltar byas pa'i phyir ma byas pa gtong bar byed ce na/ gser mngon mtshan can gyi phyir mngon mtshan can med pa gtong bar byed de/ de ltar byas pa'i phyir ma byas pa gtong bar byed do/ /ji ltar ma byas pa'i phyir byas pa gtong bar byed ce na/ gser mngon mtshan can ma yin pa'i phyir mngon mtshan can gtong bar byed de/ /de ltar ma byas pa'i phyir byas pa gtong bar byed do/ /ji ltar ma byas pa'i phyir ma byas pa gtong bar byed ce na/ gser mngon mtshan can ma yin pa'i phyir mngon mtshan can ma yin pa gtong bar byed de/ de ltar ma byas pa'i phyir ma byas pa gtong bar byed nas gzhan mu stegs can dag shes ldan dag shAkya'i bu'i dge sbyong rnams ni ma log ma spangs so sor ma spangs pa yin te/ 'di ltar mngon mtshan can gyis spyod pa rnam pa sna tshogs byed de/ kun du sbyor bar byed/ rab tu sbyor bar byed/ bun 'gyed par byed/ skyed 'gyed par byed/ byas pa'i phyir byas pa dang / byas pa'i phyir ma byas pa dang / ma byas pa'i phyir byas pa dang / ma byas pa'i phyir ma byas par gtong bar byed do/ /bram ze dang khyim bdag rnams kyang mngon mtshan can gyis spyod pa rnam pa sna tshogs byed de/ kun du sbyor bar byed/ rab tu sbyor bar byed/ bun 'gyed par byed/ skyed 'gyed par byed/ byas pa'i phyir byas pa dang / byas pa'i phyir ma byas pa dang / ma byas pa'i phyir byas pa dang / ma byas pa'i phyir ma byas pa gtong bar byed na/ shes ldan dag shAkya'i bu'i dge sbyong rnams dang / bram ze dang khyim bdag rnams la bye brag ni ci yod/ bsam pa ni ci yod/ tha dad du bya ba ni ci yod/ su zhig dge sbyong mgo reg 'di dag la bsod snyoms sbyin pa dang / bya bar sems zhes smod par byed/ phyar kha gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ drug sde dag la rmas nas/ rnam grangs du mar smad de/ bslab pa bca' ba'i phan yon bcu yang dag par gzigs pas/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang mngon mtshan can gyis spyod pa rnam pa sna tshogs byed na spang ba'i ltung byed do zhes bca' ba mdzad de/ yul ni mnyan yod/ gang zag ni drug sde/ nyon mongs pa ni dge sbyong gi tshul ma yin pa byed 'dod pa/ nyes pa ni mngon mtshan can gyis spyod pa rnam pa sna tshogs byed pa'o/ /de la yang dge slong gang zhes bya ba ni drug sde dag gam gzhan yang de lta bu gang yin pa'o/ /mngon mtshan can gyis spyod pa zhes bya ba ni khe spogs 'dod pa nyid kyis pa na dang rin po che la sogs pa mngon mtshan can gyis spyod pa'o/ /rnam pa sna tshogs zhes bya ba ni rnam pa du ma'o/ /byed na zhes bya ba ni kun du sbyor bar byed pa dang / rab tu sbyor bar byed pa dang / bun 'gyed par byed pa dang / skyed 'gyed par byed pa dang / byas pa'i phyir byas pa dang / byas pa'i phyir ma byas pa dang / ma byas pa'i phyir byas pa dang / ma byas pa'i phyir ma byas pa gtong ba lhag par spyod par byed na'o/ / spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la spang ba snga ma dang 'di dang 'og ma gsum gyi yul la bye brag ni 'di yin par rig par bya ste/ snga ma ni rin po che la sogs pa la reg pa las so/ /'di ni khe spogs 'dod pa nyid kyis pa na dang rin po che la sogs pa spyod pa las so/ /'og ma ni gang yang rung bas rnyed pa 'dod cing nyo tshong la sogs pas spyod pa las skyed phyin na'o/ /de ltar bye brag bstan nas/ da ni spang ba'i dngos gzhi'i ltung ba rnam par gzhag pa bstan par bya ste/ dge slong gis rnyed pa 'dod pas pha rol po khyim pa nyid dang nye du ma yin pa nyid la pa na dang rin po ches spyod pa las skyed phyin na skyed de las mngon mtshan can gyis spyod pa'i spang ba'i ltung byed kyi dngos gzhir 'gyur ro/ /dge slong la mngon mtshan can gyis spyod pa'i spang ba'i ltung byed byung na/ de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par mngon mtshan can gyis spyod pa de lta bu gzhan zhig rnyed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis mngon mtshan can gyis spyod pa'i spang ba'i ltung byed byung la/ ji srid du spang ba'i dngos po las ma bshags shing so sor ma bshags par lhung bzed dam chos gos sam dra ba'am phor bu'am ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /kun du sbyor bar byed pa dang / rab tu sbyor bar byed pa dang / bun 'gyed par byed pa dang / skyed 'gyed par byed pa dang / byas pa'i phyir byas pa dang / byas pa'i phyir ma byas pa dang / ma byas pa'i phyir byas pa dang / ma byas pa'i phyir ma byas pa gtong bar byed pa la na smad pa med do/ /rnyed pa 'dod pa skyed 'dod pas pa na dang rin po che la sogs pa spyod pa las skyed phyin pa la na smad pa med do/ /bdag nyid kyi don du rnyed par 'dod pa nyid kyi dngos gzhi la na smad pa med do/ /pha rol po khyim pa nyid dang nye du ma yin pa nyid la na smad pa med do/ /rtsa ba bas sngon nam phyis skyed thob pa la na smad pa med do/ /bshags pa'i dus na yang skyed nyid spang bar 'os pa nyid yin gyi rtsa bar gyur pa'i rdzas ni ma yin no/ /gang gi tshe skyed dang rtsa ba gnyis dus gcig tu byung na de'i tshe cha gang las ltung ba 'byin pa po'i gang zag skyed du gyur pa nyid du lhag par chags pa skye ba de nyid spang bar bya ba yin no/ /skyed phyin pa la na smad pa med do zhes smras na skyed phyin pa ni tshong la sogs pa las kyang 'byung la khe spogs 'dod pa nyid las kyang 'byung na de'i phyir mngon mtshan can gyis spyod pa'i spang ba 'di la skyed gang las phyin na dngos gzhi'i ltung bar 'gyur zhe na/ de'i phyir pa na'am rin po ches spyod pa las so zhes bya ba smras te/ pa na dang rin po che dag gis rnyed pa'i don du skyed skye zhing spyod pa gang yin pa de las skyed gang phyin pa de la mngon mtshan can gyis spyod pa'i spang bar 'gyur ro/ /gal te dge slong gis mngon mtshan can gyis spyod pa'i phyir rin po che la sogs pa la reg gam gzhan reg par byed du 'jug na de de lta na ni reg gam reg tu 'jug pa las byung ba'i spang ba'i ltung byed snga mas bsdus pa yin par rig par bya'i 'dir gtogs par bya ba ni ma yin no/ / dge slong gang gis nyo tshong ma byas par snga ma bskyed pa tsam kho na las rnyed pa grub na yang 'dir gtogs pa'i kha na ma tho ba'i dngos gzhir 'gyur ro/ /lus dang ngag dang yid kyi rnam par rig byed gang yang rung bas bskyed pa la na smad pa med do/ /pa na dang rin po che'i rnam pa gang yang rung bas spyad pa la na smad pa med do/ /rin po che rdungs su byas pa dang mngon mtshan can la na smad pa med do/ /'di'i byed pa po ni rnyed pa 'dod pa dang pha rol po khyim pa nyid dang nye du ma yin pa nyid dang / pa na dang rin po ches spyad pa dang / skyed phyin pa nyid yin no/ /'di la yan lag lngas dngos gzhi'i ltung bar 'gyur te/ rnyed pa 'dod pa dang / pha rol po khyim pa nyid dang nye du ma yin pa nyid dang / pa na dang rin po ches spyad pa dang / skyed phyin pa'o/ /de dag las yan lag ma tshang na ci rigs pa na smad do/ /de la rnyed pa 'dod pa zhes smos pa ni rnyed pa 'dod pa'i ltung ba 'byin pa po de la ltung ba 'di rnam par gzhag gi thob pa tsam la na smad pa'i phyir ro/ /pha rol po khyim pa nyid dang nye du ma yin pa nyid ces smos pa ni pha rol po gang dang lhan cig tu mngon mtshan can gyis spyod pa 'di byed pa de gal te/ khyim pa nyid dang nye du ma yin pa nyid yin na de'i tshe dngos gzhi'i ltung bar 'gyur gyi de las gzhan pa la na smad pa'i phyir ro/ /pa na dang rin po ches spyad pa zhes smos pa ni pa na dang rin po che dag gis rnyed pa'i don du skyed bkye zhing spyod pa gang yin pa de las skyed gang phyin pa de la mngon mtshan can gyis spyod pa'i spang bar 'gyur gyi/ nyo tshong la sogs pa las skyed phyin pa ni nyo tshong byed pa'i spang ba'i skabs yin pa'i phyir ro/ /skyed phyin pa'o zhes smos pa ni gang gi tshe skyed phyin pa de'i tshe na dngos gzhi'i ltung bar 'gyur gyi/ skyed med na ni sbyor ba tsam du zad pa'i phyir ro/ /sbyor ba gcig gis mngon mtshan can gcig gam gnyis sam mang po zhig gis spyad na yang ltung ba'i dngos gzhi gcig rnam par gzhag go/ /sbyor ba'i ltung ba ni nyes byas te ji srid du mngon mtshan can gyis spyod pa'i spang ba'i ltung byed kyi sbyor ba brtsams nas dngos gzhi lam thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /gal te bdag nyid kyi don du rnyed pa 'dod pa nyid yin na ni sbyor ba la nyes byas so/ /gzhan gyi don du na ni dngos gzhi'i gnas skabs la nyes byas su 'gyur la/ sbyor ba la nyes byas phra mor 'gyur ro/ /pha rol po khyim pa nyid ma yin pa dang nye du nyid la nyes byas so/ /skyed ma phyin na nyes byas so/ /rnyed pa ma grub na ni de'i tshe sbyor ba zhes bya ba'i nyes byas su 'gyur te/ 'di la nyo tshong ni yan lag ma yin pa'i phyir ro/ /skyed grub pa bas mdun rol du dge slong gis rnyed pa bsgrub pa'i phyir brtsal ba gang cung zad byed na brtsal ba de dag thams cad ni gcig pa nyid yin pas de'i phyir sbyor ba la ni gcig pa nyid do zhes smras te/ de ltar yang 'dir gzhung ni ji srid du rnyed pa sgrub par mi byed kyi bar du ni nyes byas so/ /rnyed pa bsgrubs na ni spang ba'i ltung byed du 'gyur ro zhes gsungs pa yin no/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la bsams pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /gzhan gyi don du rnyed pa 'dod pa nyid yin na sbyor ba la nyes byas phra mo'o/ /ltung ba med pa ni dkon mchog gi don du bskyed pa la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ / bslab par bya ba ni dge slong gis yul thams cad la gnas skabs thams cad du mngon mtshan can gyis spyod pa'i spang bar 'gyur ba rnam pa thams cad mi bsten par bslab par bya'o/ /dge 'dun gyi phyir mkhar lan gyi rgyu mi zad pa blang bar bya'o/ /dge slong gi dge 'dun gyi gtsug lag khang ni sum rtseg tu bya'o/ /dge slong ma'i dge 'dun gyi dbyar khang ni nyis rtseg tu bya'o/ /dge 'dun gyi phyir mkhar lan gyi rgyu mi zad pa rab tu sbyar bar bya'o/ /sangs rgyas dang chos dang dge 'dun gyi phyir mi zad pa rab tu sbyar bar bya zhing de las skyed gang grub pa des sangs rgyas dang chos dang dge 'dun la mchod par bya'o/ /yon bdag de dag nyid dang phyug po dag dang dbul po dag la gtang bar mi bya'o/ /kun dga' ra ba pa'am/ dge bsnyen dag yod na bsgo bas dkon mchog gi don du bskyed par bya'o/ /gta' nyi rir blang bar bya'o/ /dpang po dang lo dang zla ba dang nyi ma dang dge 'dun gyi gnas brtan dang dge skos dang len pa po dang rdzas dang skyed rnams dpang rgyar bris nas skyed du gtang bar bya'o/ /rgyus shes pas de gzhan la yang khong du chud par bya'o/ /'dir de dag gi gzhung ni ma mo las 'di lta ste/ yangs pa can gyi tshong pa rnams kyis bcom ldan 'das kyis mchod rten yang byed du bcug / gtsang khang phyur bu yang byed du bcug nas dge slong rnams la mchod rten dang / gtsang khang phyur bu dag zhig ral du mi 'gyur ba'i yo byad rjes su gtad pa na dge slong dag 'gyod cing len par mi byed pa'i skabs de dge slong rnams kyis bcom ldan 'das la gsol ba dang / bcom ldan 'das kyis bka' stsal pa/ kun dga' ra ba pa'am/ dge bsnyen dag gis mchod rten zhig ral du mi 'gyur ba'i yo byad blang bar bya zhing blangs nas kyang bskyed par bya ste/ de las rnyed pa ji tsam byung ba des mchod rten la mchod pa bya bar ngas rjes su gnang ngo zhes gsungs pa dang / gzhan las kyang dge slong gnyug mar gnas pa dag gis dge slong glo bur du lhags pa dag la gang zag che ge mo las zla ba re re zhing 'di tsam zhig mnod do zhes brjod par bya'o zhes gsungs pa yin no/ /phyir bcos pa ni snga ma bzhin no mngon mtshan can gyis spyod pa'i spang ba ste bcu dgu pa bshad zin to/ / //nyo tshong byed pa'i spang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe na dge slong drug sde dag nyo tshong rnam pa sna tshogs byed de/ len par byed/ gtong bar byed/ nyo bar byed/ 'tshong bar byed do/ /ji ltar len par byed ce na/ gang gi tshe ljongs su lo legs shing grong khyer du lo nyes pa de'i tshe ljongs nas grong khyer du len par byed de/ de ltar len par byed do/ /ji ltar gtong bar byed ce na/ gang gi tshe grong khyer du lo legs shing ljongs su lo nyes pa de'i tshe na grong khyer nas ljongs su gtong bar byed de/ de ltar gtong bar byed do/ /ji ltar nyo bar byed ce na/ gang gi tshe rin chung ba de'i tshe na nyo bar byed de/ de ltar nyo bar byed do/ /ji ltar 'tshong bar byed ce na/ gang gi tshe rin che ba de'i tshe na 'tshong bar byed de/ de ltar 'tshong bar byed nas gzhan mu stegs can dag shes ldan dag shAkya'i bu'i dge sbyong rnams ni ma log ma spangs so sor ma spangs pa yin te/ 'di ltar nyo tshong rnam pa sna tshogs byed de/ len par byed/ gtong bar byed/ nyo bar byed/ 'tshong bar byed cing bram ze dang khyim bdag rnams kyang nyo tshong rnam pa sna tshogs byed de/ len par byed/ gtong bar byed/ nyo bar byed/ 'tshong bar byed na/ shAkya'i bu'i dge sbyong rnams dang bram ze dang khyim bdag 'di dag la bye brag ni ci yod/ bsam pa ni ci yod/ tha dad du bya ba ni ci yod/ su zhig dge sbyong mgo reg 'di dag la bsod snyoms sbyin pa dang / bya bar sems zhes smod par byed/ phyar kha gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ drug sde rnams la rmas nas/ rnam grangs du mar smad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang nyo tshong rnam pa sna tshogs byed na spang ba'i ltung byed do zhes bca' ba mdzad de/ yul ni mnyan yod/ gang zag ni drug sde/ nyon mongs pa ni dge sbyong gi tshul ma yin pa byed 'dod pa/ nyes pa ni nyo tshong rnam pa sna tshogs byed pa'o/ /de la yang dge slong gang zhes bya ba ni drug sde dag gam/ gzhan yang de lta bu gang yin pa'o/ /nyo tshong zhes bya ba ni gang yang rung bas rnyed pa 'dod cing nyo tshong byed pa'o/ /rnam pa sna tshogs zhes bya ba ni rnam pa du ma'o/ /byed na zhes bya ba ni len par byed pa dang / gtong bar byed pa dang / nyo bar byed pa dang / 'tshong bar byed pa dag lhag par spyod par byed na'o/ / spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /nyo tshong byed pa'i spang ba 'di ni sngar mngon mtshan can gyis spyod pa'i spang pa bstan pa'i bye brag yin te/ de'i phyir sngar skyed phyin na dngos gzhi'o zhes smras na/ 'dir gang gis skyed phyin pa bstan pa'i phyir gzhan gyis so zhes bya ba smras te/ sngar bstan pa'i spyod pa las gzhan gyis skyed phyin na 'di'i dngos gzhi'o zhes bya bar sbyar ro/ /gzhan gyis so zhes bya ba ni sngar bstan pa'i pa na dang rin po che dag las gzhan pa gzhal bar bya ba la sogs pa'i spyod pa las skyed phyin na ltung ba 'dir 'gyur ro/ /yang na gzhan gyis so zhes bya ba ni bskyed pa'i khe spogs 'dod pa las gzhan pa nyo tshong gi spyod pa las skyed phyin na ltung ba 'dir 'gyur ro/ /de lta bas na spang ba snga ma gnyis dang / 'di dang gsum gyi yul la bye brag ni 'di yin par rig par bya ste/ gser dngul la reg pa'i spang ba ni rin po che la sogs pa la reg pa las so/ /mngon mtshan can gyis spyod pa'i spang ba ni khe spogs 'dod pa nyid kyis pa na dang rin po che la sogs pa spyod pa las so/ /nyo tshong byed pa'i spang ba ni gang yang rung bas rnyed pa 'dod cing nyo tshong la sogs pas spyod pa las skyed phyin na'o/ /de ltar bye brag bstan nas/ da ni nyo tshong byed pa'i spang ba'i dngos gzhi'i ltung ba rnam par gzhag pa bstan par bya ste/ dge slong gis rnyed pa 'dod pas pha rol po khyim pa nyid dang nye du ma yin pa nyid la nyo tshong la sogs pas spyod pa las skyed phyin na skyed de las nyo tshong byed pa'i spang ba'i ltung byed kyi dngos gzhir 'gyur ro/ /dge slong la nyo tshong byed pa'i spang ba'i ltung byed byung na/ de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par nyo tshong byed pa de lta bu gzhan zhig rnyed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis nyo tshong byed pa'i spang ba'i ltung byed byung la/ ji srid du spang ba'i dngos po las ma bshags shing so sor ma bshags par lhung bzed dam chos gos sam dra ba'am phor bu'am ska rags sam/ dge sbyong gi 'tsho ba'i yo byad gang yang rung ba gzhan nye bar 'jog na de yang snga ma'i shugs kyis spang bar 'gyur te/ de las ltung bar ni mi 'gyur ro/ /len par byed pa dang / gtong bar byed pa dang / nyo bar byed pa dang / 'tshong bar byed pa lan smad pa med do/ /rnyed pa 'dod pa skyed 'dod pas nyo tshong la sogs pas skyed pa las skyed phyin pa la na smad pa med do/ /bdag nyid kyi don du rnyed pa 'dod pa nyid kyi dngos gzhi la na smad pa med do/ /pha rol po khyim pa nyid du ma yin pa nyid la na smad pa med do/ /rtsa ba bas sngon nam phyis skyed thob pa la na smad pa med do/ /bshags pa'i dus na yang skyed nyid spang bar 'os pa nyid yin gyi rtsa bar 'dod pa'i rdzas ni ma yin no/ /gang gi tshe skyed pa dang rtsa ba gnyis dus gcig tu byung na de'i tshe cha gang las ltung ba 'byin pa po'i gang zag skyed du gyur pa nyid du lhag par chags pa skye ba de nyid spang bar bya ba yin no/ /skyed phyin pa la na smad pa med do zhes smras na/ skyed phyin pa ni tshong la sogs pa las kyang 'byung la/ khe spogs 'dod pa nyid las kyang byung na de'i phyir nyo tshong byed pa'i spang ba 'di la skyed gang las phyin na dngos gzhi'i ltung bar 'gyur zhe na/ de'i phyir gzhan gyis so zhes bya ba smras te/ pa na dang rin po che dag las gzhan pa gzhal bar bya ba la sogs pa'i spyod pa las skyed phyin na ltung ba 'dir 'gyur ro/ /yang na gzhan gyis so zhes bya ba ni bskyed pa'i khe spogs 'dod pa las gzhan pa nyo tshong gi spyod pa las skyed phyin na ltung ba 'dir 'gyur ro/ /gal te dge slong gis nyo tshong bya ba'i phyir rin po che la sogs pa la reg gam gzhan reg par byed du 'jug na de lta na ni gser dngul la reg pa'i spang ba'i ltung byed snga mas bsdus pa yin par rig par bya'i 'dir gtogs pa ni ma yin no/ / dge slong gis khe spogs 'dod pa nyid kyis pa na dang rin po che la sogs pa spyod pa las skyed phyin na ni mngon mtshan can gyis spyod pa'i spang bar 'gyur ro/ /dge slong gis gang yang rung bas rnyed pa 'dod cing nyo tshong byas nas skyed par byed pa las skyed phyin pa ni nyo tshong byed pa'i spang ba 'dir gtogs pa'i dngos gzhi'i kha na ma tho bar 'gyur ro/ /lus dang ngag dang yid kyi rnam par rig byed gang yang rung bas bskyed pa la na smad pa med do/ /nyo tshong gi dam pa gang yang rung bas spyad pa la na smad pa med do/ /zong gi rnam pa gang yang rung bas spyad pa la na smad pa med do/ /'di'i byed pa po ni rung ba 'dod pa dang pha rol po khyim pa nyid dang nye du ma yin pa nyid dang / nyo tshong gis spyad pa dang skyed phyin pa nyid yin no/ /'di la yan lag lngas dngos gzhi'i ltung bar 'gyur te rnyed pa 'dod pa dang / pha rol po khyim pa nyid dang / nye du ma yin pa nyid dang / nyo tshong gis spyad pa dang / skyed phyin pa'o/ /de dag las yan lag ma tshang na ci rigs par na smad do/ /de la rnyed pa 'dod pa zhes smos pa ni rnyed pa 'dod pa'i ltung ba 'byin pa po de la ltung ba rnam par gzhag gi thob pa tsam la na smad pa'i phyir ro/ /pha rol po khyim pa nyid dang nye du ma yin pa nyid ces smos pa ni pha rol po gang dang lhan cig tu nyo tshong byed pa 'di gal te khyim pa nyid dang nye du ma yin pa nyid yin na de'i tshe dngos gzhi'i ltung bar 'gyur gyi/ de las gzhan pa la na smad pa'i phyir ro/ /nyo tshong gis spyad pa zhes smos pa ni len pa dang gtong ba dang / nyo ba dang 'tshong bas rnyed pa'i don du skyed bkye zhing spyod pa gang yin pa de las skyed gang phyin pa de la nyo tshong byed pa'i spang bar 'gyur gyi/ pa na dang rin po che la sogs pas spyad pa las skyed phyin pa ni mngon mtshan can gyis spyod pa'i spang ba'i skabs yin pa'i phyir ro/ /skyed phyin pa'o zhes smos pa ni gang gi tshe skyed phyin pa de'i tshe na dngos gzhi'i ltung bar 'gyur gyi/ skyed med na ni sbyor ba tsam du zad pa'i phyir ro/ /sbyor ba gcig gis nyo tshong gcig gam gnyis sam mang po zhig gis spyod na yang ltung ba'i dngos gzhi gcig rnam par gzhag go/ /sbyor ba'i ltung ba ni nyes byas te/ ji srid du nyo tshong byed pa'i spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /gal te bdag nyid kyi don du rnyed pa 'dod pa nyid yin na ni sbyor ba la nyes byas so/ /gzhan gyi don du ni dngos gzhi'i gnas skabs la nyes byas su 'gyur la sbyor ba la nyes byas phra mor 'gyur ro/ /pha rol po khyim pa nyid ma yin pa dang nye du nyid la nyes byas so/ /skyed ma phyin na nyes byas so/ /rnyed pa ma grub na ni de'i tshe sbyor ba zhes bya ba'i nyes byas su 'gyur te/ 'di la nyo tshong nyid yan lag yin pa'i phyir ro/ /skyed grub pas mdun rol du dge slong gis rnyed pa bsgrub pa'i phyir brtsal ba gang cung zad byed na brtsal ba de thams cad ni gcig pa nyid yin pas de'i phyir sbyor ba la ni gcig pa nyid do zhes smras te/ de ltar yang 'dir gzhung ni ji srid du rnyed pa sgrub par mi byed kyi bar du ni nyes byas so/ /rnyed pa grub na ni spang ba'i ltung byed du 'gyur ro zhes gsungs pa yin no/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /gzhan gyi don du rnyed pa 'dod pa nyid yin na sbyor ba la nyes byas phra mo'o/ /ltung ba med pa ni dkon mchog gi don du nyo tshong byed pa la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du nyo tshong byed pa'i spang bar 'gyur ba rnam pa thams cad mi bstan par bslab par bya'o/ / dge 'dun gyi bshos kyi phyir dge 'dun gyi 'bras la sogs pa rim gyis nyo ba la sbyin par bya'o/ /gal te de nyid kyis dge 'dun gyi bshos kyi phyir nyo bar byed na/ 'theb dang bcas par bskyed de sbyin par bya'o/ /dge 'dun gyi 'bras la sogs pa zad na ni rin des 'bras la sogs pa gzhan dag nyo bar bya'o/ /dge 'dun gyi 'bras la sogs pa 'bru sar pa yang nyo bar bya'o/ /dge 'dun gyi 'bras la sogs pa 'bru rnying pa dag la gal te srog chags med na btsong bar bya'o/ /rin thang mi gdab po/ /khyim pa'i nyo tshong dag tu lag gzhug par mi bya'o/ /chos gos la sogs pa dag khyim pa nyor gzhug go/ /gal te khyim pa med na rang gis rdzas de'i rin thang nges par gcad par bya zhing rin 'di tsam gyis byin cig ces lan gsum gyi bar du tshig brjod par bya'o/ /zong la rtseg pa ni gzhan gyi don du yang mi bya na rang gi don du lta ci smos te/ dkon mchog gsum ni ma gtogs so/ /yal zug 'khra zhing gta' gzhug par mi bya'o/ /dge 'dun gyi sbyin par bya'o zhes smras na/ de la ji ltar sbyin par bya/ sus rjes su bsgrub par bya zhe na/ de'i phyir dge 'dun gyis rdzas de spogs pa la dge 'dun gyi las byed pa la gtad do zhes bya ba smras te/ dge 'dun mnga' bdag tu gyur pas dge 'dun gyi las byed pa la dge slong spogs pa 'di la dbyig la sogs pa phog cig ces bka' stsal bar bya zhing dam zhag pa la sogs pa las byed pa des dge slong skyed mkhan la sogs pa spogs pa de la dbyig la sogs pa gtad par bya ste/ dge slong spogs pa des chos bzhin tshul bzhin du dge 'dun gyi rnyed pa bsgrub par bya'o/ /dge slong spogs pa de'i kun du spyad pa'i chos ni 'di ltar bya ste/ des rgan rabs rgan rabs dag la ma zhus par dge 'dun gyi don du brtson par mi bya'o/ /de'i tshig yi ge bri ba'i dam zhag la nan tan bya'o/ /de dag ni gzhan gyi kha'i skabs brtsal ba dang / bdag nyid kyis dran par bya ba dang / 'gyod pa mi bskyed par bya ba'i phyir ro/ /phyir bcos pa ni snga ma bzhin no/ /nyo tshong byed pa'i spang pa ste nyi shu pa bshad zin to/ /sdom la/ lhung bzed gnyis dang tha ga gnyis/ /byin 'phrog ston zla tha chungs dang / / dgon pa pa dang ras chen dang / /bsdos pa dang ni gsog 'jog go/ /zhes bya ba ni bcu pa gsum pa yin te/ sdom la zhes bya ba'i dgos pa dang tshig gi don ni snga ma bzhin no/ /bcu pa gsum pa 'dis kyang spang pa'i ltung byed kyi chos bcu bstan te/ lhung bzed 'chang ba dang / lhung bzed 'tshol ba dang / 'thag tu 'jug pa dang / 'thag pa skyed pa dang / 'phrog pa dang / brtad pa las byung ba dang / zhag bdun gyis 'bral ba dang / dbyar gyi ras chen dang / bsdos pa la bsgrub pa dang gsog 'jog go/ /de la lhung bzed 'chang ba'i spang ba'i gleng gzhi ni byung ba dang bcas pa'i dbang gis rnam pa gnyis te/ byung ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de nas tshe dang ldan pa nye dga' 'di snyam du sems te/ 'di dag thams cad khyim bdag mgon med zas sbyin gyis bslab pa'i gzhi dag gis khyab par byas pas phyin chad gang nas kyang rnyed pa bsgrub par mi nus so snyam nas/ de de snyam du sems pa na dga' 'dun drug cu skyed mos tshal du dong ba de dag nye dgas mthong ngo / /mthong nas kyang 'di snyam du sems te/ gal te 'di dag las rnyed pa ma grub na nye dga' zhes bya ba'i ming gzung bar mi bya'o snyam mo/ /drug sde dag gi kun du spyod pa ni gal te sbyin pa'i gtam dag byed na nyan pa po dag bdag cag gis rang gi sha dag kyang bcad cing bcad cing sbyin par bya'o snyam du sems la/ gal te tshul khrims kyi gtam dag byed na nyan pa po dag bdag cag lha rnams kyi nang du skyes so snyam du sems so/ /gal te ngan song gi gtam dag byed na nyan pa po dag bdag cag ngan song rnams su skyes so snyam du sems pa yin pas des lhung bzed gsal ba zlum pa longs spyad par bzod pa mchan khung gis khyer te/ dga' 'dun de dag ga la ba der song ste phyin nas dga' 'dun gcig la ci nas kyang de'i sems mngon par dad par 'gyur ba de ltar sbyin pa'i gtam byas nas/ /de sems dad par gyur te smras pa/ 'phags pa ci'i slad du byon/ nye dgas smras pa/ bzhin bzangs bdag la lhung bzed dgos so/ /'phags pa bdag la lhung bzed ma mchis te/ gal te rin gyis rnyed na bdag gis 'jal te gsol lo/ /nye dgas lhung bzed mchan khung nas phyung ste/ de bstan nas smras pa/ bzhin bzangs lhung bzed 'di yang rin gyis rnyed pa yin no/ /'phags pa 'di'i rin ci tsam/ kAr ShA pa Na drug cu'o/ / bdag gis 'di'i rin kAr ShA pa Na drug cu 'bul lo/ /bzhin bzangs a rog gya de dag khyod kyir gyur cig /sbyin pa 'dis khyod kyi sems kyi rgyan dang / sems kyi yo byad dang / rnal 'byor gyi tshogs dang don gyi mchog thob pa dang / lha dang mi rnams kyi nang du snod du 'gyur bar gyur cig de bzhin du des dga' 'dun drug cu po dag re re yang kAr ShA pa Na drug cu drug cu sbyor du bcug nas song ngo / /dga' 'dun de dag thams cad gcig tu 'dus par gyur nas/ de na dga' 'dun gcig gis smras pa/ shes ldan dag kho bos btsun pa nye dga' shAkya'i rigs las rab tu byung ba chos sgrog pa'i rigs pa dang grol pa'i spobs pa dang ldan pa la lhung bzed kyi rin du kAr ShA pA Na drug cu phul gyi rjes su yi rang bar gyis shig / gzhan zhig gis smras pa/ kho bos kyang phul lo/ /yang gzhan zhig gis smras pa/ kho bos kyang dbul lo/ /de bzhin du thams cad kyis kho bos kyang dbul lo/ /kho bos kyang dbul lo zhes smras nas/ de dag phan tshun blta bar brtsams te/ shes ldan dag dge slong gcig la lhung bzed du dgos zhes de dag gis dge slong zhig la dris pa/ 'phags pa dge slong gcig la lhung bzed du 'tshal/ des smras pa bzhin bzangs dag gcig kho na dgos so/ /de dag gis shAkya'i sras kyi dge sbyong rnams ni rnyed pa 'dod pas zil gyis non pa dag yin no zhes smad par brtsams so/ /de ni re zhig byung ba yin gyi sangs rgyas bcom ldan 'das re zhig 'dul ba la bslab pa'i gzhi 'cha' bar ni mi mdzad de/ yul ni mnyan yod/ gang zag ni nye dga'/ nyon mongs pa ni 'dod zhen/ nyes pa ni lhung bzed kyi rin slong ba'o/ /bcas pa'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /de'i tshe na dge slong drug sde dag lhung bzed rnyed do cog sogs par byed cing bdag nyid kyang spyod par byed de/ dge slong gzhan dag la sbyin par mi byed nas dge slong don nyung ngu dag ci'i phyir dge slong dag lhung bzed rnyed do cog sogs par byed cing / bdag nyid kyang spyod par mi byed/ dge slong gzhan dag la yang sbyin par mi byed ces smod par byed/ phyar kha gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ drug sde dag la rmas nas rnam grangs du mar smad de/ bslab pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong gis lhung bzed lhag pa zhag bcu'i bar du bcad bar bya'o/ / de las 'das par 'chang na spang ba'i lhung byed do zhes bca' ba mdzad de/ yul ni mnyan yod/ gang zag ni drug sde/ nyon mongs pa ni dge sbyong gi tshul dang mthun pa ma yin pa byed 'dod pa/ nyes pa ni lhung bzed lhag pa zhag bcu las 'das par 'chang ba'o/ /de la dge slong gis zhes bya ba ni chos 'di pas so/ /lhung bzed lhag pa zhes bya ba ni byin gyis brlab par bya ba las lhag pa'o/ /zhag bcu'i bar du zhes bya ba ni nyin mtshan bcu'i mtha'i bar du'o/ /bcang bar bya'o zhes bya ba ni bdag gir bya ba'o/ /de las 'das par 'chang na zhes bya ba ni de las thal bar 'chang na'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes gsungs so/ /de la ltung ba ji ltar 'gyur zhe na/ 'dir yang dngos gzhi dang sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la lhung bzed 'chang ba'i spang ba 'di'i mtshan nyid ni sngar gos 'chang ba'i spang ba'i mtshan nyid bstan pa dang thams cad 'dra ste/ bye brag tu na sngar gos zhes smos pa'i gnas su 'dir lhung bzed ces bya ba'i ming gzhug par bya ba dang / sngar 'khor gsum khebs pa'i mtha'i tshad dang ldan pa zhes smos pa'i gnas su 'dir byin gyis brlab tu rung ba chung ngu dang / 'bring dang chen po'i mtha'i tshad dang ldan pa zhes brjod par bya'o/ /de ltar mtshan nyid 'dra ba dang mi 'dra bar bstan nas/ da ni lhung bzed 'chang ba'i spang ba 'di'i dngos gzhi'i ltung ba rnam par gzhag pa bstan par bya ste/ dge slong gis rang gi lhung bzed byin gyis brlab tu rung ba chung ngu'am/ 'bring ngam/ chen po'i mtha'i tshad dang ldan pa yod la byin gyis ma brlabs par zhag bcur rjes su zhugs pa nyid yin na zhag bcu gcig pa'i skya rengs dang po shar na lhung bzed 'chang ba'i spang ba'i ltung byed kyi dngos gzhir 'gyur ro/ /dge slong gis nyin mtshan gyi rim gyis snga phyir gzhan las byung ba'i lhung bzed rnyed la snga ma byin gyis ma brlabs shing phyi ma byin gyis brlabs na snga ma shos zhag bcu gcig pa'i skya rengs dang po shar na spang ba'i ltung byed du 'gyur ba'i shan gyis phyi ma shos byin gyis brlabs pa yang snga ma'i dus de kho nar lhung bzed 'chang ba'i spang ba'i ltung byed kyi dngos gzhir 'gyur ro/ /dge slong gis nyin zhag gcig kho nar dus gcig tu gzhan las byung ba'i lhung bzed gnyis rnyed na gang yang rung ba cig byin gyis brlabs shing gcig ni ma brlabs na/ gnyi ga zhag bcu gcig pa'i skya rengs dang po shar na lhung bzed 'chang ba'i spang ba'i ltung byed kyi dngos gzhir 'gyur ro/ /dge slong gis dge 'dun mnga' ba'i lhung bzed gang zag gi bdag nyid du ris su bcad pa lhung bzed 'chang ba'i spang bar gtogs pa zhag bcu gcig pa'i skya rengs las 'das par byed na lhung bzed 'chang ba'i spang ba'i ltung byed kyi dngos gzhir 'gyur ro/ /dge slong la lhung bzed 'chang ba'i spang ba'i ltung byed byung na/ de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par ltung byed zhag bcu par gtogs pa de lta bu gzhan zhig rnyed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis lhung bzed 'chang ba'i spang ba'i ltung byed byung la/ ji srid du spang ba'i dngos po las ma bshags shing so sor ma bshags par lhung bzed dam chos gos sam dra ba'am phor bu'am skar gas sam dge sbyong gi 'tsho ba'i yo byad gang yang rung ba gzhan nye bar 'jog par byed na/ de yang snga ma'i shugs kyis spang bar 'gyur te/ de las ltung bar ni mi 'gyur ro/ /lhung bzed bzang ngan dang mang nyung la na smad pa med do/ /lhung bzed byin gyis brlab tu rung ba la na smad pa med do/ /lhung bzed byin gyis ma brlabs pa dang byin gyis brlabs pa yod pa lan smad pa med do/ /rang gi nyid lan smad pa med do/ /zhag bcur rjes su zhugs pa nyid la na smad pa med do/ /zhag bcu gcig pa'i nyi ma'i dang po lan smad pa med do/ /'di la gzhan yod na byin gyis ma brlabs pa de'i shan tshun chad las na smad pa med do/ /tshe grangs gcig nas bcu'i bar dang gnyis nas bcu gcig gi bar lta bu la sogs pa la na smad pa med do/ /lhung bzed rung ba nyid na tshad dang ldan pa la na smad pa med do/ /'di'i byed pa po ni rang gi lhung bzed dang byin gyis ma brlabs pa'o/ /'di la yan lag bdun gyis dngos gzhi'i ltung bar 'gyur te/ rang gi dang / lhung bzed dang / byin gyis brlab tu rung ba gsum gyi mtha'i tshad dang / yo byad dang / byin gyis ma brlabs pa dang / zhag bcur rjes su zhugs pa dang / zhag bcu gcig pa'i skya rengs dang po shar ba'o/ /de dag las yan lag ma tshang na ci rigs par na smad do/ /sbyor ba'i ltung ba ni nyes byas te/ ji srid du lhung bzed 'chang ba'i spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /skya ba dang dkar ba dang che ba rnams ni rung ba nyid ma yin te/ byin gyis brlab par bya ba ma yin pas de dag 'chang ba la nyes byas so/ /ma tshos pa la yang chung ngu nyid yin te/ lhung bzed nag por gyur kyang ma tshos na chung ngu nyid dang rung ba ma yin pa nyid yin pas de 'chang na nyes byas so/ /rung ba ma yin pa dang tshad las chung ba dang / che ba 'chang ba la nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa'i spang ba ni ltung byed kyi dngos gzhi'o zhes bya bar shes par bya'o/ /ltung ba med pa ni rang gi ma yin pa dang / lhung bzed ma yin pa dang / med pa dang / byin gyis brlabs pa dang / zhag bcur rjes su ma zhugs pa dang / zhag bcu gcig pa'i skya rengs ma shar ba la ltung ba med do/ /rab tu 'byung ba la ltos pa'i don nyid du nges par byas pa ni spang ba nyid yin pas de 'chang ba la ltung ba med do/ /lhung bzed chung ngu dag sman phor du yongs su spyad pa'i bsam pas 'chang ba la ltung ba med do/ /lhung bzed chung ngu gcig la ni nyes pa med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du lhung bzed 'chang ba'i spang bar 'gyur ba rnam pa thams cad mi bsten par bslab par bya'o/ /phyir bcos pa ni snga ma bzhin no/ /lhung bzed 'chang ba'i spang ba ste nyi shu gcig pa bshad zin to// //lhung bzed 'tshol ba'i spang ba'i gleng gzhi ni/ sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na spos 'tshong gi khye'u zhig 'dug pa des lhung bzed shin tu gsal ba dbyibs legs pa longs spyad par bzod pa zhig rnyed do/ /bsod snyoms pa zhig kyang snga dro sham thabs bgos lhung bzed dang chos gos thogs te mnyan yod du bsod snyoms la zhugs nas des bsod snyoms brgyus te srang du phyin pa dang / spos 'tshong gi khye'u des de mthong nas smras pa/ 'phags pa bdag gis lhung bzed shin tu gsal ba dbyibs legs pa longs spyad par bzod pa zhig rnyed kyi gal te bzhed na snoms shig /bzhin bzangs bdag la lhung bzed yod do/ /'phags pa gal te dge slong gzhan 'ga' zhig lhung bzed 'tshal ba mchis na de gtang du gsol/ gtang bar bya'o/ /de nas bsod snyoms pa des mnyan yod du bsod snyoms la brgyus nas rgyal byed kyi tshal du song ste/ des zas zos nas lhung bzed 'khru ba na dge slong rnams la smras pa/ tshe dang ldan pa dag srang che ge mo zhig na spos 'tshong gi khye'u zhig 'dug pa des lhung bzed shin tu gsal ba dbyibs legs pa longs spyad par bzod pa zhig rnyed kyi khyed cag las gang lhung bzed 'dod pa de song shig / de dang ha cang thag mi ring ba na nye dga' 'dug pa des de thos nas des bsams pa/ de lhung bzed nag po can 'ga' zhig gis thos nas rab tu rgyug par gyur na mi rung gi smad par bya'o snyam nas/ des de la smras pa/ tshe dang ldan pa khyod dad pas byin pa zos nas lhung bzed kyi gtam dang chos gos kyi gtam las gzhan 'ga' yang med mod/ des bsams pa/ 'jig rten na 'dod pa'i bdag nyid can gang ji snyed pa de dag dang nye dga' mtshungs pa yin na 'dis kyang re zhig bdag smad par gyur na gal te dge slong gnas brtan gnas brtan gzhan zhig gis thos par gyur na des rgya cher smad par 'gyur ro snyam nas de cang mi smra bar 'dug go/ /nye dgas de bkar te smras pa/ tshe dang ldan pa khyod kyi mkhan po dang kho bo bshes pas de'i phyir kho bos khyod smad kyi ma gshe shig /gnas brtan gal te bdag yang smra bar gyur na khyod kyis bdag la yang smad par mdzod cig /tshe dang ldan pa kho bo yang nye bar ma zhi ba tsam du zad kyi ji lhung bzed de lhung bzed ma yin nam/ gnas brtan snga ma nyid kyang smra bar mi bgyi ba lags kyi 'tshal to/ /tshe dang ldan pa de lta mod kyi 'on kyang re zhig smros shig gnas brtan srang ga ge mo zhig na spos 'tshong gi khye'u zhig mchis pa des lhung bzed shin tu gsal ba dbyibs legs pa longs spyad par bzod pa zhig rnyed nas/ de'i mchid nas gal te dge slong lhung bzed 'tshal ba 'ga' mchis na de gtang du gsol zhes mchi'o/ /de ni de tsam du zad de/ de yang nye bar ma zhi ba tsam kho nar zad do/ /de nas nye dgas snam sbyar gyon te 'gros bskyed nas phar song ba dang / spos 'tshong gi khye'u des de 'gros bskyed de 'ong ba thag ring po kho na nas mthong nas/ des bsams pa/ dge slong hral po 'gros 'di lta bus 'ong ba 'dis bdag gi lhung bzed 'di 'phrog par 'ong ngo snyam nas des lhung bzed de blangs te/ 'jong tse'i 'og tu bcug ste gzhag pa dang / nye dgas de sbed pa'i tshe mthong nas/ des smras pa bzhin bzangs ci lhung bzed 'di nal gyi bu yin nam/ ci na de'i phyir sbed par byed ces de la lag pa brkyang ste/ lhung bzed blangs nas smras pa/ bzhin bzangs a rog gya sbyin pa 'dis khyod kyi sems kyi rgyan dang / sems kyi yo byad dang / rnal 'byor gyi tshogs dang / don gyi mchog thob pa dang / lha dang mi rnams kyi nang na snod du 'gyur bar gyur cig / 'phags pa bdag cag tshong pa dag ni khe spogs 'tshal bas 'tsho ba lags pas 'dir rin ma mchis par mi 'bul te 'di ltar rin gyi phyir 'bul lo/ /bzhin bzangs ci khyod drang srong gi snod 'tshong bar byed dam/ tshigs su bcad pa yang smras pa/ gal te skyes bus sa snod kyis/ /gser gyi snod ni thob gyur na/ /de yis mya ngan ci phyir bya/ /bslus pa med par kho bos mthong / /'phags pa khyod mang du gsungs mod kyi 'on kyang rin ma mchis par mi 'bul lo/ /nye dgas smras pa/ khyod kyis lhung bzed la lhag par chags pa 'dis yi dags wa ba can dag gi nang du skye bar bya dgos so zhes de de skad spyo bar byed pa na/ khyim bdag cig phyogs der 'ongs nas des smras pa/ 'phags pa phyag 'tshal lo/ /btsun pa nye dga' phyag 'tshal lo/ /nye dgas smras pa/ bzhin bzangs dag khyod kyi phyag skam po 'dis ji bya/ 'phags pa bdag la btsun pa nye dgas bka' stsal pa gang zhig bdag gis ma bsgrubs/ lhung bzed 'di nyos te byin cig /khyim bdag des spos 'tshong gi khye'u de la smras pa/ bzhin bzangs lhung bzed 'di rin ji tsam/ 'di dang 'di tsam mo/ /kho bos khyod la sbyin no/ /spos 'tshong gi khye'u des lhung bzed de khyim bdag de la byin nas/ khyim bdag des kyang nye dga' la phul lo/ /nye dgas smras pa/ a rog gya sbyin pa 'dis khyod kyi sems kyi rgyan dang / sems kyi yo byad dang / rnal 'byor gyi tshogs dang / don gyi mchog thob pa dang / lha dang mi rnams kyi nang na snod du 'gyur bar gyur cig / khyim bdag de song ba dang / nye dgas spos 'tshong gi khye'u de la smras pa/ bkren pa khyod kyis nye dgas lhung bzed kyi rin sbyor du 'jug mi nus snyam du shes sam/ khyod kyis lhung bzed la lhag par chags pa 'dis yi dags spa ba can dag gi nang du skye bar bya dgos so/ /'phags pa ji zhig sbyor mchis/ khyod kyis kyang lhung bzed thob la/ bdag gis kyang rin thob kyi bzhud cig /nye dgas yang lhung bzed de khyer te gtsug lag khang du song nas/ des lhung bzed de dge slong rnams la bstan te smras pa/ tshe dang ldan pa dag ltos shig /kho bo'i lhung bzed ji 'dra/ gzhon nu zhig gis smras pa/ gnas brtan ji khyod la lhung bzed gzhan ma mchis sam/ yod do/ /'o na gnas brtan gyis lhung bzed yod cing bdog bzhin du lhung bzed gzhan btsal du rung ngam/ dgra bo rnams kyi gre bar rkang pas mnan nas so/ /gnas brtan la dgra bo dag kyang mchis sam/ gang gi phyir khyod kho bo'i lhung bzed gnyis pa yang mi bzod pas je khyod kho bo'i dgra thu bo yin no zhes zer nas dge slong don nyung ngu dag ci'i phyir dge slong dag lhung bzed yod cing bdog bzhin du lhung bzed gzhan 'tshol bar byed ces smod par byed/ phyar kha gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ nye dga' la rmas nas rnam grangs du mar smad de/ dge slong rnams la bka' stsal pa/ dge slong dag de lta bas na dge slong gis lhung bzed yod cing bdog bzhin du lhung bzed gzhan btsal bar mi bya'o/ /bcom ldan 'das kyis dge slong gis lhung bzed yod cing bdog bzhin du lhung bzed gzhan btsal bar mi bya'o zhes bka' stsal nas/ bsod snyoms pa zhig gi lhung bzed cung zhig rdol nas des de thogs te mnyan yod du bsod snyoms la zhugs pa dang / des phye dag rnyed nas des de dag lhung bzed kyi snod kyis mnos so/ /'bras chan gsher ba dag rnyed nas des de dag lhung bzed kyis mnos pa dang / de nas zags pas phye dag gsher bar gyur te/ de dag gis lhung bzed kyi snod ma rung bar gyur nas/ de sbrang bu dag gis yongs su bskor bar gyur pa na/ de la khye'u dang bu mo dag gis mtho btsams shing khyim bdag mgon med zas sbyin gyis ci'i phyir lhung bzed gzhan mi tshol zhes bskul ba na bsod snyoms pa des smras pa/ bcom ldan 'das kyis dge slong gis lhung bzed yod cing bdog bzhin du lhung bzed gzhan btsal bar mi bya'o zhes dgag pa mdzad do/ /khyim bdag mgon med zas sbyin gyis smras pa/ 'phags pa khyod kyi lhung bzed 'di 'dra ba yod cing bdog pa yin nam zhes zer ba'i skabs de dge slong rnams kyis bcom ldan 'das la gsol pa dang / bcom ldan 'das kyis bka' stsal pa/ gang gi lhung bzed rdol ba des glan par bya'o/ /lhan pa snyi ba lnga po/ bu ram dang / rgya skyegs kyi tshigs ma dang / spra tshil dang / ro nye dang / tshon mo steng dag gis mi glan par lhan pa sra ba lnga po/ lhan rings dang / tham phran dang / lhan pa dang / chu srin gyi so lta bu dang / phye mas glan par bya'o/ /phye ma gnyis te/ lcags kyi phye ma dang / rdo'i phye ma'o/ /lcags kyi lhung bzed la ni lcags kyi phye mas glan par bya'o/ /sa'i lhung bzed la ni rdo'i phye mas glan par bya'o/ / lcags kyi phye ma ni 'bru mar dang sbyar te lcags sam ku ru bin das bdar zhing spra tshil 'dra bar gyur pas lhung bzed dro ba la glan zhing gro bas g.yogs te 'jim pas bskus la ji ran tsam du bsro zhing / 'bru mar gyis spangs la rdo 'jam po la sogs pas bdar ro/ /rdo'i phye ma ni bu ram dang 'jim pa dang sbyar te snga ma bzhin bya'o/ /lcags kyi lhung bzed rtag tu spyod pa nyid yin na zla ba drug cing bsreg go/ /sa'i lhung bzed ni zla ba phyed cing bsreg go/ /lhung bzed la zas med par bya'o/ /lhung bzed chag pa la srad bus brgyu bar mi bya'o zhes bka' stsal pa nas/ bcom ldan 'das kyis rnam grangs du mar bslab pa 'dod pa dang / bslab pa la gus pa dang / bslab pa la yo byad bsnyungs pa'i bsngags pa brjod nas/ dge slong rnams la de dang mthun pa dang / de'i shas che ba dang / de dang 'tsham pa'i chos dang ldan pa'i bka' mchid mdzad nas/ bslab pa pa bca' ba'i phan yon bcu yang dag par gzigs pas nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang lhung bzed lhan pa lnga med pa spyad bzod pa yod bzhin du bzang po 'dod pa'i phyir lhung bzed sar pa gzhan tshol zhing lhung bzed grub na spang ba'i ltung byed do/ /dge slong des lhung bzed de dge slong gi 'khor la dbul bar bya'o/ /dge slong gi 'khor de'i lhung bzed tha mar gyur pa gang yin pa de dge slong de la dge slong khyod kyis lhung bzed 'di byin gyis brlab par mi bya/ gtang bar mi bya/ gzhan la sbyin par mi bya bar chag pa'i mthar thug gi bar du khad kyis dal bu dal bus spyad par bya'o zhes sbyin par bya ste/ de la de ni cho ga yin no zhes bca' ba mdzad de/ yul ni mnyan yod/ gang zag ni nye dga'/ nyon mongs pa ni 'dod zhe na/ nyes pa ni lhung bzed yod cing bdog bzhin du lhung bzed gzhan tshol bar byed pa'o/ /de la yang dge slong gang zhes bya ba ni chos 'di pa'o/ /lhung bzed lhan pa lnga med pa zhes bya ba ni lhung bzed lhan pa lnga ma tshang ba'o/ /spyad bzod pa yod bzhin du zhes bya ba ni yongs su longs spyad par bzod pa yod bzhin du'o/ /bzang po 'dod pa'i phyir zhes bya ba ni mchog 'dod pa'i phyir ram/ yang dang yang du 'dod pa'i phyir ro/ /lhung bzed sar pa zhes bya ba ni sar pa gnyis te/ gsar pas sar pa dang / rnying pas sar pa ste/ don 'dir ni gnyi ga yin par dgongs so/ /gzhan zhes bya ba ni gnyis pa'o/ /tshol zhing zhes bya ba ni tshol bar byed cing ngo / /lhung bzed grub na zhes bya ba ni lhung bzed thob na'o/ /spang ba'i ltung byed do zhes bya ba ni snga ma bzhin no/ /'di man chad ni lhung bzed 'brel ba med pa brim pa dang spyad pa la sogs pa'i cho ga ston te/ dge slong des zhes bya ba ni dge slong gang yin pa des so/ /lhung bzed de zhes bya ba ni lhung bzed 'brel pa med pa'o/ /dge slong gi 'khor la dbul bar bya'o zhes bya ba ni de na dge slong gang dag 'khod pa la'o/ /dge slong gi 'khor de'i lhung bzed tha mar gyur pa gang yin pa de dge slong de la dge slong khyod kyis lhung bzed 'di byin gyis brlab par mi bya/ gtang bar mi bya/ gzhan la sbyin par mi bya bar chag pa'i mthar thug gi bar du khad kyis dal bu dal bus spyad par bya'o zhes sbyin par bya ste zhes bya ba la/ de'i rnam par gzhag pa zhes bya ba ni dge slong gi dge 'dun gyis lhung bzed 'brel pa med pa 'drim pa'i dge slong chos lnga dang ldan pa spro bar byas pa ste gsol ba dang gnyis kyi las kyis bsgo zhing / des kyang kun du spyad pa'i chos ji ltar bcas pa bzhin du dge 'dun la zhag gcig gi mdun rol nas bsgo zhing / dge 'dun tshogs pa'i dus su brims te dge slong gi 'khor de'i lhung bzed tha mar gyur pa gang yin pa de dge slong de la dge slong khyod kyis lhung bzed 'di byin gyis brlab par mi bya/ gtang bar mi bya/ gzhan la sbyin par mi bya bar chag pa'i mthar thug gi bar du khad kyis dal bu dal bus spyad par bya'o zhes sbyin par bya'o/ /lhung bzed 'brel pa med pa 'chang ba'i dge slong gis kyang de snod bzang por gzhug pa dang / 'bras chan skam po blang ba dang / de dkyil 'khor gyi steng du gzhag pa dang / de byi dor sngar bya ba dang / de ngos khung bzang por gzhug pa dang / de bsregs pa la sogs pa'i byi dor gces par bya ba dang / de bdag gis bskur ba dang / phrag pa g.yas pas bskur ba dang / de ji srid 'tsho'i bar du 'chang ba la sogs pa gzhung las ji skad gsungs pa bzhin du bya'o/ /de la de ni cho ga yin no zhes bya ba ni de la de ni rjes su mthun pa'i chos yin pa'o/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam pa par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni dge slong de la lhung bzed lhan pa bzhi man chad nas de dag rung zhing yongs su spyad pa bzod pa yod bzhin du bzang po 'dod pa'i phyir lhung bzed sar pa gzhan khyim pa nye du ma yin pa las/ ngag gi rnam par rig byed kyi bslang bas yongs su btsal te grub na lhung bzed tshol ba'i spang ba'i ltung byed kyi dngos gzhir 'gyur ro/ /dge slong la lhung bzed tshol ba'i spang ba'i ltung byed byung na de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par lhung bzed tshol bar gtogs pa de lta bu gzhan zhig rnyed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis lhung bzed 'tshol ba'i spang ba'i ltung byed byung la ji srid du spang ba'i dngos po las ma bshags shing so sor ma bshags par lhung bzed dam chos gos sam dra ba'am phor bu'am ska rags sam/ dge sbyong gi 'tsho ba'i yo byad gang yang rung ba gzhan nye bar 'jog par byed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /lhung bzed bzang ngan dang mang nyung la na smad pa med do/ /lhung bzed byin gyis brlab tu rung ba gsum la na smad pa med do/ /lhung bzed yod pa nyid dang / tshad dang ldan pa la na smad pa med do/ /'di'i byed pa po ni lhung bzed lhan pa lnga med pa spyad bzod pa yod pa dang / bzang po 'dod pa'i phyir lhung bzed sar pa gzhan 'tshol ba'o/ /'di la yan lag lngas dngos gzhi'i ltung bar gyur te/ lhung bzed yod pa nyid dang / bzang po 'dod pa dang / khyim pa nye du ma yin pa las tshol ba dang / ngag gi rnam par rig byed kyi bslang bas tshol ba dang / lhung bzed thob pa'o/ /de dag las yan lag ma tshang na ci rigs par na smad do/ /sbyor ba'i sbyor ba'i ltung ba ni nyes byas te/ ji srid du lhung bzed tshol ba'i spang ba'i ltung byed kyi sbyor ba brtsams nas dngos gzhi lam thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /lhung bzed mi rung ba nyid dang / tshad dang ldan pa ma yin pa la nyes byas so/ /lhung bzed tshol ba tsam nyid la nyes byas so/ /lhung bzed med pa nyid la yod pa'i blo can gyis gzhan tshol ba la nyes byas so/ /ngag gi rnam par rig byed kyi bslang ba ma yin pa rang gi yo byad dag gis lhung bzed gzhan tshol na nyes byas so/ /rang gi yo byad lhung bzed kyi rin du rung ba dag yod pa nyid na lhung bzed med cing mi nyo bar lhung bzed gzhan slong bar byed na nyes byas so/ /lhung bzed bzang po 'dod pas brjes na nyes byas so/ /nye du dang rab tu byung ba las tshol na nyes byas so/ /bdag po med pa'i lhung bzed btsal ba las grub na nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te/ nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni lhung bzed med pa nyid na slong ba la ltung ba med do/ /bzang po 'dod pa nyid med par lhung bzed rin gyis len pa dang brje bas len pa la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du lhung bzed tshol ba'i spang bar 'gyur ba rnam pa thams cad mi bsten par bslab par bya'o/ /dngos po thams cad la ha cang chags par mi bya'o/ /yo byad la ha cang chags par mi bya'o/ / gang la zhen pa de bcang bar mi bya'o/ /chos gos dang lhung bzed kyang med na bslang bar bya'o/ /phyir bcos pa'i sbyor ba gzhan ni snga ma bzhin no/ /'dir bshags pa'i sbyor ba'i bye brag gzhan bstan par bya ste/ de'i phyir dge slong des lhung bzed de dge slong gi 'khor la dbul bar bya'o/ / dge slong gi 'khor de'i lhung bzed tha mar gyur pa gang yin pa de dge slong de la dge slong khyod kyis lhung bzed 'di byin gyis brlab par mi bya/ gtang bar mi bya/ gzhan la sbyin par mi bya bar chag pa'i mthar thug pa'i bar du khad kyis dal bu dal bus spyad par bya'o zhes sbyin par bya ste/ de la de ni cho ga yin no zhes gsungs te/ dge slong lhung bzed lhag pa tshol ba des lhung bzed de sems kyis spangs shing dge slong gi dge 'dun la dbul bar byas te/ de'i 'og tu ltung ba bshags par bya'o/ /de'i lhung bzed de dge 'dun la phul nas de la chad par dge 'dun thams cad kyi lhung bzed las gang tha chad du gyur pa snyigs te byin pa'i lhung bzed de'i ming ni lhung bzed 'brel pa med pa zhes bya ste/ de yang dge slong rnams kyis lhung bzed kyi yul 'brel pa ni gnyis te/ byin gyis brlab pa bdag nyid kyis spyad pa dang / yongs su spang ba'i dus na yang rang dbang nyid du bstan par bya ba yin na lhag pa'i chad pa can gyi lhung bzed de la dge slong de 'brel pa de gnyis kyi rang dbang med de/ bdag nyid kyis byin gyis rlob tu yang mi dbang la/ gzhan la gtong zhing sbyin du yang mi dbang bas de'i phyir lhung bzed de'i ming ni 'brel pa med pa zhes bya'o/ /dge slong des lhung bzed de dge slong gi 'khor la dbul zhing dge slong gi 'khor de'i lhung bzed tha mar gyur pa 'brel pa med pa de dge slong de la sbyin pa'i go rims rnam par gzhag pa ni 'di ltar bya ste/ dang por dge 'dun gyi lhung bzed 'brel pa med pa 'drim pa'i dge slong bsko bar bya ste/ lhung bzed 'brel pa med pa 'drim pa'i dge slong chos lnga dang ldan pa ni ma bskos pa yang bsko bar mi bya la/ bskos pa yang dbyung bar bya ste/ lnga gang zhe na/ 'dun pas 'gro ba dang / zhe sdang gis 'gro ba dang / gti mug gis 'gro ba dang / 'jigs pas 'gro ba dang / lhung bzed 'brel pa med pa brims pa dang ma brims pa mi shes pa'o/ /lhung bzed 'brel pa med pa 'drim pa'i dge slong chos lnga dang ldan pa ni ma bskos pa yang bsko bar bya la/ bskos pa yang dbyung bar mi bya ste/ lnga gang zhe na/ 'dun pas mi 'gro ba dang / zhe sdang gis mi 'gro ba dang / gti mug gis mi 'gro ba dang / 'jigs pas mi 'gro ba dang / lhung bzed 'brel ba med pa brims pa dang ma brims pa shes pa'o/ /'di ltar bsgo bar bya'o/ /je dang por spro bar bya ste/ ming 'di zhes bya ba khyod dge 'dun la lhung bzed 'brel ba med pa 'drim par spro'am zhes 'dri bar bya'o/ /gal te spro na des spro'o zhes rjod par bya'o/ /de'i 'og tu des gnas mal bsham pa byas nas/ gaN+DI brdungs te dris pa'i tshig gis dge slong rnams la yang dag par bsgo nas dge 'dun thams cad 'dug cing mthun par gyur pa la dge slong gcig gis gsol ba byas te las bya'o/ /'di ltar bya ste/ 'dug la 'di skad ces brjod par bya'o/ /dge 'dun btsun pa rnams gsan du gsol/ dge slong ming 'di zhes bgyi ba 'di dge 'dun la lhung bzed 'brel pa med pa 'drim par spro na/ gal te dge 'dun gyi dus la bab cing bzod na dge 'dun gyis gnang bar mdzod cig dang / dge 'dun gyis dge slong ming 'di zhes bgyi ba 'di dge 'dun la lhung bzed 'brel pa med pa 'drim par bsko'o/ /'di ni gsol ba'o/ /las ni 'di ltar bya ste/ dge 'dun btsun pa rnams gsan du gsol/ dge slong ming 'di zhes bgyi ba 'di dge 'dun la lhung bzed 'brel pa med pa 'drim par spro ste/ de'i slad du dge 'dun gyis dge slong ming 'di zhes bgyi ba 'di dge 'dun la lhung bzed 'brel pa med pa 'drim par bsko na tshe dang ldan pa gang dag dge slong ming 'di zhes bgyi ba 'di dge 'dun la lhung bzed 'brel pa med pa 'drim pa bsko bar bzod pa de dag ni cang ma gsung shig /gang dag mi bzod pa de dag ni gsungs shig / dge 'dun gyis bzod cing gnang nas dge 'dun gyis dge slong ming 'di zhes bgyi ba 'di dge 'dun la lhung bzed 'brel pa med pa 'drim par bskos lags te/ 'di ltar cang mi gsung bas de de bzhin du 'dzin to/ /lhung bzed 'brel pa med pa 'drim pa'i dge slong gi kun du sbyar ba'i chos ni 'di ltar bya ste/ lhung bzed 'brel pa med pa 'drim pa'i dge slong gis dge 'dun tshe dang ldan pa dag sang dge 'dun la lhung bzed 'brel pa med pa 'drim par 'gyur gyi khyed cag nang par gaN+DI brdubs pa na rang rang gi lhung bzed dag thogs la dge 'dun gyi nang na gshegs par mdzod cig ces bsgo bar bya'o/ /de nas lhung bzed 'brel pa med pa 'drim pa'i dge slong gis phyi de nyin par gnas mal bsham pa byas nas gaN+DI brdungs te dris pa'i tshig gis dge slong rnams la yang dag par bsgo bar bya'o/ /dge slong rnams kyis kyang rang rang gi lhung bzed dag byin gyis brlabs pa phyung zhing thogs te dge 'dun gyi nang du 'jug par bya'o/ /de nas lhung bzed 'brel pa med pa 'drim pa'i dge slong gis dge 'dun thams cad 'dug cing mthun par gyur pa la lhung bzed 'brel ba med pa thogs te rgan pa'i mtha' logs su phyag 'tshal nas dge 'dun gyi gnas brtan gyi mdun du 'dug ste/ gnas brtan lhung bzed 'di ni shin tu gsal ba/ dbyibs legs pa/ longs spyad par bzod pa lags kyi gal te bzhed na snoms shig ces yon tan ji lta ba bzhin du lhung bzed 'brel pa med pa'i bsngags pa brjod de dbul bar bya'o/ /dge 'dun gyi gnas brtan gyis kyang gal te 'dod na blang bar bya'o/ /gal te dge 'dun gyi gnas brtan gyis lhung bzed de blangs nas dge 'dun gyi gnas brtan gyi lhung bzed gang yin pa de gnas brtan gnyis pa la dbul bar bya'o/ /gnas brtan gnyis pa'i lhung bzed gang yin pa de gnas brtan gsum pa la dbul bar bya'o/ /de bzhin du dge 'dun gyi gsar bu gnyis pa'i lhung bzed gang yin pa de dge 'dun gyi gsar bu la dbul ba'i bar du bya'o/ /gal te dge 'dun gyi gnas brtan gyis ma blangs na gnas brtan gnyis pa la dbul bar bya'o/ / gal te gnas brtan gnyis pas ma blangs na gnas brtan gsum pa la dbul bar bya'o/ /gal te gnas brtan gsum pas blangs pa na dge 'dun gyi gnas brtan slong bar byed na brjod pa dang po la sbyin par mi bya zhing / brjod pa gnyis pa la yang sbyin par mi bya'o/ /brjod pa gsum pa la sbyin par bya ste/ dge 'dun gyi gnas brtan gyis 'dul ba dang 'gal ba'i nyes byas kyi ltung ba bshags par bya'o/ /de bzhin du dge 'dun gyi gsar bu gsum pas ma blangs na gsar bu gnyis pa la dbul bar bya'o/ /gal te gsar bu gnyis pas ma blangs na gsar bu la dbul bar bya'o/ /gal te dge 'dun gyi gsar bus blangs pa na gsar bu gsum pa slong bar byed na brjod pa dang po la sbyin par mi bya zhing / brjod pa gnyis pa la yang sbyin par mi bya'o/ /brjod pa gsum pa la sbyin par bya ste/ dge 'dun gyi gsar bu gsum pas 'dul ba dang 'gal ba'i nyes byas kyi ltung ba bshags pa'i bar du bya'o/ /dge slong gi 'khor de'i lhung bzed tha mar gyur pa gang yin pa de dge slong de la dge slong khyod kyis lhung bzed 'di byin gyis brlab par mi bya/ gtang bar mi bya/ gzhan la sbyin par mi bya bar chag pa'i mthar thug gi bar du khad kyis dal bu dal bus spyad par bya'o zhes sbyin par bya'o/ /lhung bzed 'brel pa med pa 'chang ba'i dge slong gi kun du spyad pa'i chos ni 'di ltar bya ste/ lhung bzed 'brel pa med pa 'ching ba'i dge slong gis lhung bzed kyi snod gnyis nye bar gzhag par bya ste/ de la bzang po gang yin pa der lhung bzed 'brel pa med pa gzhug par bya zhing / cig shos su lhung bzed byin gyis brlabs pa gzhug par bya'o/ /des lhung bzed gnyis ka thogs te bsod snyoms la 'jug par bya zhing / gal te 'bras chan skam po rnyed na lhung bzed 'brel pa med pas blang bar bya'o/ /gal te 'bras chan gsher ba rnyed na lhung bzed byin gyis brlabs pas blang bar bya'o/ /gtsug lag khang du 'ongs nas dkyil 'khor byas te lhung bzed 'brel pa med pa mdun du gzhag nas lhung bzed byin gyis brlabs par bza' bar bya'o/ /zos zin nas byi dor dang kha zas 'bags pa'i dril phyi bya ba yang dang por lhung bzed 'brel pa med pa la bya zhing de'i 'og tu lhung bzed byin gyis brlabs pa la bya'o/ /bkru ba dang bskam pa dang lci bas drud pa la yang de bzhin bya'o/ /gal te lhung bzed kyi ngos khung gnyis yod na bzang po gang yin pa der lhung bzed 'brel ba med pa gzhug par bya zhing / cig shos su lhung bzed byin gyis brlabs pa gzhug par bya'o/ /gal te ngos khung gcig yod la gal te shod bzang na shod du lhung bzed 'brel ba med pa gzhag par bya zhing ngos khung du lhung bzed byin gyis brlabs pa gzhag par bya'o/ /gal te ngos khung bzang na ngos khung du lhung bzed 'brel ba med pa gzhug par bya zhing shod du lhung bzed byin gyis brlabs pa gzhag par bya'o/ /lhung bzed kyi las byed pa na gal te rdza bo gnyis yod na rdza bo bzang po gang yin pa der lhung bzed 'brel pa med pa bsreg par bya zhing / cig shos su lhung bzed byin gyis brlabs pa bsreg par bya'o/ /gal te rdza bo gcig yod na gal te 'og ma legs par tshos par 'gyur na 'og tu lhung bzed 'brel ba med pa gzhag par bya zhing / steng du lhung bzed byin gyis brlabs pa gzhag par bya'o/ /gal te steng du gzhag pa legs par tshos par 'gyur na steng du lhung bzed 'brel pa med pa gzhag par bya zhing 'og tu lhung bzed byin gyis brlabs pa gzhug par bya'o/ /lam du 'gro na lhung bzed kyi snod gnyis bskur bar bya ste/ de la bzang po gang yin pa der lhung bzed 'brel pa med pa gzhug par bya zhing / cig shos su lhung bzed byin gyis brlabs pa gzhug par bya'o/ /gal te khur tsa ba 'ga' zhig yod na de la lhung bzed byin gyis brlabs pa bskur bar bya zhing / bdag nyid kyis lhung bzed 'brel pa med pa bskur bar bya'o/ /gal te khur tsa ba 'ga' yang med na phrag pa g.yon pas lhung bzed 'brel pa med pa bskur bar bya zhing phrag pa g.yas pas lhung bzed byin gyis brlabs pa bskur bar bya'o/ /'di ni de'i chad pa'i las yin te tshul khrims yang dag par rjes su bsrung bas ji srid 'tsho'i bar du bcad bar bya'o/ /de ltar lhung bzed 'brel pa med pa 'drim pa bsko ba'i rim gyis dge slong ltung ba 'byin pa de la lhung bzed du ma yod pa nyid yin na mchog tu 'dod pa gcig dge 'dun la spang ba dang gzhan ni rab tu byung ba 'di pa la thams cad kyi thams cad du spang bar bya zhing de la lhung bzed tha chad 'brel pa med pa sbyin par bya ste/ de'i cho ga dang las zin pa'i rjes la des ltung ba snga ma dag bzhin du chos bzhin phyir bya'o/ /lhung bzed tshol ba'i spang ba ste nyi shu gnyis pa bshad zin to// //so sor thar pa'i mdo rgya cher 'grel pa 'dul ba kun las btus pa/ bam po bcu bdun pa/ 'thag tu 'jug pa'i spang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /nye dgas bsams pa/ 'di dag thams cad khyim bdag mgon med zas sbyin gyis bslab pa'i gzhi dag gis bsdams pas phyin chad ras yug phran spom po gcig gi rin yang ga las kyang bslang bar mi nus kyi/ song ste bltas na gal te la las bslang bar nus so snyam nas de snga dro sham thabs bgos/ lhung bzed dang chos gos thogs te mnyan yod du bsod snyoms la zhugs nas yugs sa mo lnga brgya dog pa 'khal zhing 'dug pa dag las dog pa shas shas kyis bslangs nas/ bu mo bde gnas ma zhig dang lag brjes te dog pa phra mo bslangs nas/ ko sa la'i rgyal po gsal rgyal gyi yid brtan pa'i mi che ba zhes bya ba dang bsdongs te/ tha ga pa'i sna bo spyi ther nan khugs kyis 'thag tu bcug nas/ de smod par byed/ phyar kha gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ nye dga' la rmas nas rnam grangs du mar smad de/ bslab pa bca' ba'i phan yon bcu yang dag par gzigs pas/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ yang dge slong gang rang gis bslangs pa'i dog pas tha ga pa nye du ma yin pa la gos 'thag tu 'jug na gos grub na spang ba'i ltung byed do zhes bca' ba mdzad de/ yul ni mnyan yod/ gang zag ni nye dga'/ nyon mongs pa ni 'dod zhe na/ nyes pa ni tha ga pa nye du ma yin pa la gos 'thag tu 'jug pa'o/ /de la yang dge slong gang zhes bya ba ni shAkya'i bu nye dga' 'am gzhan yang de lta bu gang yin pa'o/ /rang gis bslangs pa'i dog pas zhes bya ba ni 'dun pas la la las srang gcig /la la las srang phyed/ la la las zho gnyis/ la la las zho gcig bslangs pa'i dog pas so/ /tha ga pa zhes bya ba ni thags mkhan no/ /nye du ma yin pa la zhes bya ba ni phyi mo dang / mes po dang / phrugs la brten pa'i bdun pa tshun chad ni nye du yin la de phan chad ni nye du ma yin no/ /gos 'thag tu 'jug na zhes bya ba ni bdun po bal gos dang / sha na'i gos dang / zar ma'i gos dang / du gu la'i gos dang / ras bal gyi gos dang / ko tam pa'i gos dang / nyi 'og gi gos las gang yang rung ba'o/ /gos grub na zhes bya ba ni gos thob na'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes bya ba gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni tha ga pa khyim pa nye du ma yin pa la rin med par ngag gis bsgo bas sam/ pho nya la sogs pa gzhan gyis kyang gos 'thag tu bcug na 'thag tu 'jug pa'i spang ba'i ltung byed kyi dngos gzhir 'gyur ro/ /dge slong la 'thag tu 'jug pa'i spang ba'i ltung byed byung na/ de ma spangs shing dral bar ma byas la ltung ba ma bshags par ram/ spangs shing bral bar ma byas pa ltung ba ma bshags par ram/ spangs shing bral bar byas la ltung ba ma bshags par 'thag tu 'jug par gtogs pa de lta bu gzhan zhig rnyed na/ de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis 'thag tu 'jug pa'i spang ba'i ltung byed byung la/ ji srid du spang ba'i dngos po las ma bshags shing so sor ma bshags par lhung bzed dam/ chos gos sam/ dra ba'am/ phor bu'am/ ska rags sam/ dge sbyong gi 'tsho ba'i yo byad gang yang rung ba gzhan nye bar 'jog par byed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /tha ga pa khyim pa dang nye du ma yin pa la na smad pa med do/ /rin med par ngag gis bsgo ba la na smad pa med do/ /pho nya la sogs pa gzhan gyis 'thag tu bcug pa la na smad pa med do/ /gos rung ba nyid dang tshad dang ldan pa la na smad pa med do/ /tha ga pa nye du dang nye du ma yin pa gnyi gas cig car grub pa la na smad pa med do/ /tha ga pa khyim pa dang rab tu byung ba gnyi gas cig car grub pa la ni smad pa med do/ /bdag nyid dang nye du ma yin par bcas pas 'thag pa la na smad pa med do/ /rin byin pa dang ma byin pa gnyi gas 'thag tu bcug pa la na smad pa med do/ /'di'i byed pa po ni tha ga pa khyim pa nye du ma yin pa dang rin med par bsgo bas sam gzhan gyis kyang 'thag tu 'jug pa'o/ /'di la yan lag lngas dngos gzhi'i ltung bar 'gyur te/ thag pa khyim pa nye du ma yin pa dang rin med pa dang / ngag gi rnam par rig byed dam gzhan gyis bsgo ba dang / gos rung ba tshad dang ldan pa dang / 'thag tu bcug pa dang / gos grub pa'o/ /de dag las yan lag ma tshang na ci rigs par na smad do/ /sbyor ba'i ltung ba ni nyes byas te/ ji srid du 'thag tu 'jug pa'i spang ba'i ltung byed kyi sbyor ba brtsams nas/ dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /tha ga pa ma ning dang mtshan gnyis pa dag la nyes byas so/ /tha ga pa phyi rol pa dang / 'di pa'i rab tu byung ba dang / ma chags pa dang nyams pa dag la nyes byas so/ /rdzas mi rung ba nyid dang tshad dang ldan pa ma yin pa la nyes byas so/ /'thag tu bcug pa'i don ma go na nyes byas so/ /gos ma grub na nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te/ nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni tha ga pa nye du la ltung ba med do/ /bdag nyid la ltung ba med do/ / rin byin pa la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la gnas skabs thams cad du 'thag tu 'jug pa'i spang bar 'gyur ba rnam pa thams cad mi bsten par bslab par bya'o/ /phyir bcos pa ni snga ma bzhin no/ /'thag tu 'jug pa'i spang ba ste nyi shu gsum pa bshad zin to// //'thag pa bskyed pa'i spang ba'i gleng gzhi ni sangs rgyas bcom ldan 'das mnyan yod na rgyal byed kyi tshal mgon med zas sbyin gyi kun dga' ra ba na bzhugs so/ /mnyan yod na khyim bdag bza' bran gnyis shig 'dod pa la log par spyod pas bu mo mngag gzhug ma cig yod pa la rtag tu brdegs nas nye dgas de tshor nas khyim bdag bza' bran gnyis ci nas kyang skyabs su 'gro ba dang bslab pa'i gzhi dag la gnas par 'gyur ba de de ltar tshul khrims kyi bsngags pa brjod cing / tshul khrims 'chal ba'i bsngags pa ma yin pa yang brjod nas/ des de gnyis skyabs su 'gro ba dang bslab pa'i gzhi dag la gnas par byas so/ /de phyin chad de gnyis bu mo de la yang mi brdeg cing nye dga' la yang dog pa 'jam bo dag cig tha ga pa che ge mo zhig la ras yug chen 'thag tu bcug ste bskon par glengs pa bu mo des thos nas/ nye dga' la smras pa dang / nye dga' snga dro bsod snyoms la rgyu ba na btsun mo phreng ldan ma'i khyim nas hwags kyi la du dag thob pa khyer te/ tha ga pa de'i gan du song nas smras pa/ bzhin bzangs la du 'di dag zo la kho bo'i ras yug chen 'di zhing che ba dang / khrun ring ba dang / thar gyis zhag pa dang / thag ran bzang bar legs par gyis shig ces 'thag pa bskyed du bcug nas/ khyim bdag bza' bran gnyis kyi dog pa yang gron skyes/ tha ga pas kyang khyim bdag bza' bran gnyis las gla ma thob nas/ nye dga' la bdas pa dang / nye dgas tha ga pa de nyi tshan la btags te btang nas des smod par byed/ phyar ka gtong bar byed/ kha zer bar byed pa'i skabs de dge slong rnams kyis bcom ldan 'das la gsol to/ /de nas bcom ldan 'das kyis byung ba 'di dang / gleng gzhi 'di dang / skabs 'di la dge slong gi dge 'dun bsdu ba mdzad de/ nye dga' la rmas nas/ rnam grangs du mar smad de/ bslab pa bca' ba'i phan yon bcu yang dag par gzigs pas/ nga'i nyan thos rnams kyis 'dul ba la bslab pa'i gzhi 'di ltar gdon par bya ste/ dge slong gi phyir khyim bdag gam/ khyim bdag gi chung ma nye du ma yin pas tha ga pa nye du ma yin pa la gos 'thag tu 'jug pa las/ de na gal te dge slong de la sngar ma bstabs par rnam par rtog pa 'ga' zhig 'di byung nas thag pa nye du ma yin pa'i gan du song ste 'di skad ces tshe dang ldan pa tha ga pa shes par gyis shig /gos 'di kho bo'i phyir 'thag gi tshe dang ldan pa tha ga pa gos 'di zhing che ba dang / khrun rin ba dang / thar gyis zhag pa dang thag ran bzang bar legs par gyis shig /tshe dang ldan pa tha ga pa 'di ltar kho bos gla rngan 'di lta ste/ bza' ba'am/ bza' ba tsam mam bza' rgyu cung zad cig sbyin no zhes smras na/ de la gal te dge slong des gos bsgrub pa'i phyir gla rngan 'di lta ste bza' ba'am bza' ba tsam mam bza' rgyu cung zad cig sbyin zhing gos grub na spang ba'i ltung byed do zhes bca' ba mdzad de/ yul ni mnyan yod/ gang zag ni nye dga'/ nyon mongs pa ni 'dod zhe na/ nyes pa ni gos 'thag pa bskyed pa'o/ /de la dge slong gi phyir zhes bya ba ni shAkya'i bu nye dga' 'am/ gzhan yang de lta bu gang yin pa'i phyir ro/ /khyim bdag gam zhes bya ba ni skyes pa'o/ /khyim bdag gi chung ma zhes bya ba ni bud med do/ /nye du ma yin pa zhes bya ba ni phyi mo dang mes po dang phrugs kyi bdun pa tshun chad ni nye du yin la/ de phan chad ni nye du ma yin no/ /tha ga pa zhes bya ba ni thags mkhan no/ / nye du ma yin pa zhes bya ba ni phyi mo dang mes po dang phrugs kyi bdun pa tshun chad ni nye du yin la de phan chad ni nye du ma yin no/ /gos 'thag tu bcug pa las zhes bya ba ni bdun po bal gos dang / sha na'i gos dang / zar ma'i gos dang / du gu la'i gos dang / ras bal gyi gos dang / ko tam pa'i gos dang / nyi 'og gi gos dag las gang yang rung ba'o/ /de na gal te dge slong de la zhes bya ba ni shAkya'i bu nye dga' la'o/ /sngar ma bstabs par zhes bya ba ni sngar mgron du ma bos par ro/ /rnam par rtog pa 'ga' zhig byung zhes bya ba ni bsnyen bkur byed pa 'ga' zhig byung nas so/ /tha ga pa nye du ma yin pa'i gan du song ste zhes bya ba ni drung du song ste'o/ /de skad ces tshe dang ldan pa tha ga pa shes par gyis shig /gos 'di kho bo'i phyir 'thag gi zhes bya ba ni bdag nyid nye bar ston par byed pa'o/ /tshe dang ldan pa tha ga pa gos 'di zhes bya ba ni 'thag tu bcug pa'i'o/ /zhing che ba zhes bya ba ni rgya che ba'o/ /khrun ring ba zhes bya ba ni chu ring ba'o/ /thar gyis zhag pa zhes bya ba ni 'jur mdud med pa'o/ /thag ran bzang ba zhes bya ba ni byer zug snyoms pa dang / shas bzang ba dang sang seng med par ro/ /legs par gyis shig ces bya ba ni lag byad bzang por ro/ /tshe dang ldan pa tha ga pa 'di ltar kho bos gla rngan 'di lta ste zhes bya ba ni 'og ma lta bu dag sbyin no zhes dam bcas pa'o/ /bza' ba'am zhes bya ba ni bza' ba lnga po dag go/ /bza' ba tsam mam zhes bya ba ni bca' ba lnga po dag go/ /bza' rgyu zhes bya ba ni bza' ba'i rgyu'o/ /cung zad cig sbyin no zhes smras nas zhes bya ba ni khas blangs nas so/ /de la gal te dge slong des zhes bya ba ni shAkya'i bu nye dgas so/ /gos bsgrub pa'i phyir zhes bya ba ni gos thob par bya ba'i phyir ro/ /gla rngan 'di lta ste bza' ba'am bza' ba tsam mam bza' rgyu cung zad cig sbyin zhing zhes bya ba ni btsun mo phreng ldan ma'i khyim nas thob pa'i hwags kyi la du la sogs pa lta bu'o/ /gos grub na zhes bya ba ni gos thob na'o/ /spang ba'i ltung byed do zhes bya ba ni dngos po de spangs nas ltung byed kyi ltung ba bshags par bya ba ste/ des na spang ba'i ltung byed do zhes bya ba gsungs so/ /de la ltung ba ji ltar 'gyur zhe na/ 'dir yang dngos gzhi dang / sbyor ba dang / sbyor ba'i sbyor bas ltung ba rnam par gzhag pa dang / ltung ba med pa dang / bslab par bya ba dang / phyir bcos pa rnams kyis 'di'i mtshan nyid shes par bya'o/ /de la 'dir dngos gzhi'i ltung ba rnam par gzhag pa ni sbyin bdag dang thag pa nye du ma yin pas dge slong gi phyir gos btags par bsams pa'i 'thag pa bskyed nas/ gal te sbyin bdag gi dog pa la sogs pa zad pa dang / tha ga pa la gla rngan ma byin par gos grub na 'thag pa bskyed pa'i spang ba'i ltung byed kyi dngos gzhir 'gyur ro/ /dge slong la 'thag pa bskyed pa'i spang ba'i ltung byed byung na/ de ma spangs shing bral bar ma byas la ltung ba ma bshags par ram/ spangs shing bral bar ma byas la ltung ba ma bshags par ram/ spangs shing bral bar byas la ltung ba ma bshags par 'thag pa bskyed par gtogs pa de lta bu gzhan zhig rnyed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /dge slong gis 'thag pa bskyed pa'i spang ba'i ltung byed byung la ji srid du spang ba'i dngos po las ma bshags shing so sor ma bshags par lhung bzed dam chos gos sam dra ba'am phor bu'am ska rags sam dge sbyong gi 'tsho ba'i yo byad gang yang rung ba gzhan nye bar 'jog par byed na de yang snga ma'i shugs kyis spang bar 'gyur te/ de las ltung bar ni mi 'gyur ro/ /sbyin bdag dang tha ga pa khyim pa dang nye du ma yin pa la na smad pa med do/ /dge slong de'i phyir gos btags pa bsams pa las byung ba nyid la na smad pa med do/ /kho lag che ba nyid dam 'bras bzang ba nyid la thag pa nges par sbyar ba la na smad pa med do/ /gal te sbyin bdag gi dog pa la sogs pa zad par gyur pa la na smad pa med do/ /tha ga pa la rngan pa ma byin pa la na smad pa med do/ /sbyin par byed pas dge slong gos kho lag che ba nyid dam 'bras bzang ba nyid du bya ba'i don du rjes su ma gnang bas de dag byas pa la na smad pa med do/ /gos rung ba nyid dang tshad dang ldan pa la na smad pa med do/ /sbyin bdag dang / tha ga pa nye du dang nye du ma yin pa gnyi gas cig car 'thag pa bskyed pa la na smad pa med do/ /sbyin bdag dang tha ga pa khyim pa dang rab tu byung ba gnyi gas cig car 'thag pa bskyed pa la na smad pa med do/ /bdag nyid dang sbyin bdag dang tha ga pa nye du ma yin par bcas pas 'thag pa bskyed pa la na smad pa med do/ /rngan pa khas blangs kyang rung ma blangs kyang rung ste/ bcol bas 'thag pa bskyed pa nyid la na smad pa med do/ /'di'i byed pa po ni dge slong de'i phyir btags par bya ba bsams pa las byung ba nyid dang / kho lag che ba nyid dam 'bras bzang ba nyid la 'thag pa nges par sbyar ba dang / sbyin par byed pas de'i don du rjes su ma gnang ba lta bu ni byed pa po dag yin no/ /'di la yan lag drug gis dngos gzhi'i ltung bar 'gyur te/ sbyin bdag dang tha ga pa khyim pa nye du ma yin pa nyid dang / dge slong de'i gos 'thag tu bcug pa dang / dge slong gis 'thag pa bskyed pa dang / gal te sbyin bdag gi dog pa la sogs pa zad pa dang / tha ga pa la gla rngan ma byin pa dang gos grub pa'o/ /de dag las yan lag ma tshang na ci rigs par na smad do/ /sbyor ba'i ltung ba ni nyes byas te/ ji srid du 'thag pa bskyed pa'i spang ba'i ltung byed kyi sbyor ba brtsams nas dngos gzhi la ma thug gi bar du nyes byas so/ /dngos gzhi la sbyor ba tha dad pa ji snyed brtsams pa re re la nyes byas re re'o/ /gos grub pa'i mdun rol du gos bsgrub pa de'i phyir bsod snyoms la 'gro ba dang / bca' ba la sogs pa tshol zhing der khyer ba dang / lag pa dag snyol bar byed pa dang / lhung bzed dag 'khru bar byed pa dang / 'gro ba dang 'ong ba dang / bsod snyoms thob nas tha ga pa la sbyin par byed pa la sogs pa bsams pa las byung ba rjes su bsgrub pa tha dad pa dag ni nyes byas so/ /sbyin bdag gis ma bsgo bar dge slong sbyin bdag dang tha ga pa'i gan du 'gro ba la yang nyes byas so/ /sbyin bdag dang tha ga pa ma ning dang mtshan gnyis pa dag la nyes byas so/ /sbyin bdag dang tha ga pa phyi rol pa dang / 'di pa'i rab tu byung ba dang / ma chags pa dang nyams pa dag la nyes byas so/ /rdzas mi rung ba nyid dang tshad dang ldan pa ma yin pa la nyes byas so/ /'thag pa bskyed pa'i don ma go na nyes byas so/ /gos ma grub na nyes byas so/ /sbyor ba'i sbyor ba'i ltung ba ni nyes byas phra mo ste/ sbyor ba ji snyed pa la sbyor ba'i sbyor ba yang de snyed de/ sbyor ba nyes byas kyi sbyor ba'i sbyor ba yang nyes byas te nyes byas phra mo'o/ /de yang dang po yid la sems pa ni sbyor ba'i sbyor ba'i nyes byas phra mo'o/ /de nas lus dang ngag gis sbyor ba ni sbyor ba'i nyes byas dngos so/ /de nas mthar thug pa ni spang ba'i ltung byed kyi dngos gzhi'o zhes bya bar shes par bya'o/ /ltung ba med pa ni sbyin bdag dang thag pa nye du la ltung ba med do/ /bdag nyid la ltung ba med do/ /gla rngan byin pa la ltung ba med do/ /las dang po pa dang / smyos pa dang / sems 'khrugs pa dang / tshor ba dag gis nyen pa la ltung ba med do/ /bslab par bya ba ni dge slong gis yul thams cad la/ gnas skabs thams cad du 'thag pa bskyed pa'i spang bar 'gyur ba rnam pa thams cad mi bsten par bslab par bya'o/ /phyir bcos pa ni snga ma bzhin no/ /'thag pa bskyed pa'i spang ba ste nyi shu bzhi pa bshad zin to// //

CLOSE WINDOW