བོད་ཡིག

e-texts based on the ACIP/ALL Input

@##/ /rgya gar skad du/ u dA na brga bi ba ra Na/ bod skad du/ ched du brjod pa'i tshoms kyi rnam par 'grel pa/ thams cad mkhyen pa la phyag 'tshal lo/ /skal ldan mchod 'os blo yi gzer rnon gyis/ /'jigs pa'i gti mug mun sel sems can gyi/ / bde ba'i rgyu gcig mgon la rab btud de/ /shes rab go chas ched brjod bshad pa rtsom/ /'jig rten gzhung mang 'di la 'jigs pa dag /bsdus te bstan na bdag la dga' ba dang / /tshe dang blo dag shin tu chung ba'i phyir/ /de bas bsdus nas bstan la 'jig rten 'jug /thub mchog gsung gi tshig la 'jug pa yi/ /don la gang zhig blos ni mi dpyod pa/ /mi yi cha byang phyugs kyi skye bo de/ /sred pa'i rgya mtsho sdug bsngal gling med ltung / /dbyangs can tshig gi dri ma sun 'byin pa/ /thub gsung dri med chu rgyun dang mkhas pas/ /sbyangs kyang bdag 'dir dam pa'i rjes 'brang ba/ /nad mes 'bar ba'i lus kyang khrus la brten/ /ched brjod tshigs bcad sna tshogs don ldan zhing / /bdag blo don gyi de nyid 'dzin la blun/ /'on kyang de yi rnam par 'grel pa 'di/ /brtsams pa de la bdag blo gsal phyir byas/ /gang zhig ched brjod tshigs bcad tshul bzhin 'don/ /'dzin byed de ni skye bar skye ba dran/ /lta ngan mche bas mi nyen gzhan smras la/ /mi dga' rnam par grol ba bsgrub par 'gyur/ /dam pas 'di thos legs par yid la 'jog /'don dang 'chang dang don la'ang tshul bzhin du/ /rtag 'bad de dag yid bzhin nor bu ltar/ /mngon 'dod 'bras bu 'thob par cis mi 'gyur/ /drang srong che gsung pha rol bgrod dka' zhing / /don zab ldan pas thub min gzhan dag gis/ /legs par rab tu rtogs par mi nus phyir/ /de bas brgyud de 'ongs pa 'di bsten bya/ / dper na skyes bu chu bor rkyal byang yang / /gzings med rgya mtsho rgal bar mi nus ltar/ /de gzhan lung don cung zad shes gyur kyang / /bla ma med par gang yang nus pa med/ /de bas bla ma ston pa bzhin bsten cing / /brgyud pa'i man ngag la yang bsten par bya/ /gang phyir mi dag des bstan lam 'gro na/ /tshig don nyam nga de la'ang 'khrul pa med/ /de bas ji skad bshad bzhin slob dpon la/ /bsten nas de las phun sum tshogs nyid de/ /des na 'di dag tu yang smad med la/ /pha rol tu yang sdug bsngal med par 'gyur/ /byang chub go cha zhes bya byang chub gnyer/ /blo ldan tshig gsal smra dang rgyud mnyen dang / /dam pa'i gzhung spyod mdo sde 'don byed cing / /mdo sogs don gyi de nyid ston pa byung / /bag khal yul gyi ka ba d+h+yar skyes te/ /grags khyab bzod pas brgyan cing yang dag rtogs/ /gzhan yang dri med nor bu'i dam chos kyi/ /gsung gis brgyan cing gzhan phan mtha' yas byed/ /dam chos gsung la ma brten nyi ma'i 'od zer lta bu ste/ /blo rgya che zhing yang dag lam bsten skyes bu rmongs pa'i mun pa 'jig /bdag gi mkhan po dri med man ngag ma lus thos pas ched brjod pa/ /'di nyid gsal bar bya phyir rtsol blo'i tshul gyis don 'grel tshig nyung brtsams/ /lha yi me tog pas kyang mdzes shing 'phags pas bsten/ /blo yi rab rib sel ba'i sgron ma yon tan gyis/ /pad+ma'i nags tshal kha 'byed nyi ma lta bu yi/ / thub pa'i kun bzang gsung ni rab tu mnyan par gyis/ /de nas bde bar gshegs pa thams cad kyi gsung gi snying por gyur pa/ shin tu bkra shis pa'i sgra skad kyis ched du brjod pa zhes bya ba rgyal ba'i gsung gi yan lag gi rnam par 'grel pa'i tshig 'byed par 'dod nas de nyid kyi tshul bstan pa'i phyir/ gnyid dang rmugs pa rnams sol la/ /zhes bya ba la sogs pa yin te/ de yang 'di ltar ched du brjod pa zhes bya ba ni thub pas gsungs pa thams cad kyi snying po ste/ mdor bsdus na sde snod gsum gyi don yang dag par gsal bar byed pas yid bzhin gyi nor bu rin po che bzhin du mngon par 'dod pa'i don thams cad phun sum tshogs par byed pa yin no/ /ched du brjod pa zhes bya ba yang de'i bkra shis pa des rab tu grags pa yin te/ bde bar gshegs pa thams cad kyi gsung ni yid bzhin gyi mtsho chen po lta bu ste/ yid bzhin gyi mtsho chen po las pad+ma skyes pa lta bu'o/ /de ltar na phan tshun brgyud cing thos te yang dag par 'ongs pa yang 'di lta ste/ thub pa mchog rnams byung ba dang 'byung bar 'gyur ba rnams kyis tshig dang yi ge'i go rims 'di nyid kyis gsungs shing gsung bar 'gyur ba yin la/ rgyal ba gcig gi zhal nas gsungs pa yang shin tu bkra shis par 'gyur ba yin na/ bde bar gshegs pa thams cad kyis gsungs pa lta ci smos te/ de yang bshad pa nyon mongs pa'i nad la gtan du phan pa'i nus pa kun du rmongs pas ldongs par gyur pa sel ba'i mig sman gyi thur ma bzang po de bzhin nyid shes pa'i 'od gsal ba'i mig skyed pa yin te/ de bas na bde bar gshegs pa'i gsung ni bkra shis par gyur pa yin no/ /gsung rab kyi yan lag tu gyur pa'i phyir 'di ni gsung rab yan lag bcu gnyis las gcig yin te/ de la 'di nyid kyi brtag pa 'og nas bshad par bya'o/ /'di'i 'grel pa yang nges par bya dgos pa yin te/ don shin tu zab pa'i phyir ro/ /sangs rgyas kyi gsung ni rab tu rtogs par dka' ba yin te/ nyan thos kyi mchog rnams kyis kyang don ji lta ba bzhin du mi rtogs te/ ji srid du gsungs pa shin tu rtogs par dka' ba'i phyir dul ba'i mchog nye rgyal la sogs pa rnams kyang 'khrul cing rmongs par 'gyur ro zhes bya ba yin no/ /'dir ched du brjod pa'i tshoms kyi don gyi rnam par 'grel pa rtsom par 'dod pa la/ dri ba'i tshig rnam pa bzhi dang por 'byung ba yin te/ 'di tshul ji lta bur bstan pa dang / gang gis bstan pa dang / gang la bstan pa dang / ci'i phyir bstan pa'o/ /gang la khyod 'grel pa rtsom pa'i ngal ba chen po 'di lta bu myong bar byed de/ gang gi phyir bshad pa'i ngo bo yongs su shes pa med par ni de'i rnam par 'grel pa brtsams par mi rigs so/ /ston pa po med par tshig 'byung ba mi rigs te/ tshig la 'jug pa ni ston pa la rag lus pa'i phyir te/ ston pa khyad par can gyi tshig la ni don bzang po med kyang dga' bas gus par byed pa'i phyir gsum gyis nye bar 'god pa yin no/ /ji ltar tshe'i rig byed la stsogs pa bstan pa la yang ston pa'i khyad par gang zhe na/ 'di las lus 'byung ba yin no zhes bshad pa nye bar sbyor ro/ /'brel pa med pa'i tshig tu gyur pa mu stegs kyi lung las blangs pa ni tshig rab tu bzang po yin du zin kyang mkhas pas len par mi 'gyur te/ mi gtsang ba'i phung po las bu ram shing phyung ba lta bu'o/ /dgos pa med pa ni lung khyad par can la brten pa yin yang / ji ltar gser gyi ri'i rtse mo las byung ba'i dug lta bur dgos pa med pa yin te/ bdag la phan par 'dod pa rnams kyi don khyad par can med do/ / de ltar bstan pa'i dgos pa dang brjod pa yod na ni 'brel pa dang brjod par bya ba yang yod pa nyid du 'gyur te/ de med na de nyid kyang med pa'i phyir dri tshig tha dad par ma byas so/ /de la re zhig dang po'i rtsod pa de'i lan bstan par bya ste/ sangs rgyas kyi gsung ched du brjod pa ni yan lag bcu gnyis kyi nang du bstan pa'i phyir mdo ji lta ba bzhin no/ /sangs rgyas kyi gsung de yang rnam pa gnyis te/ bstan pa dang / don gyi bdag nyid kyi phyir ro/ /gang bstan pa'i bdag nyid de ni ming gi tshogs la sogs pa'i rang bzhin te/ gang gi phyir ming med par ni sgra'i don gyi khyad par ston par mi nus so/ /'dir spyi dang lhag ma bya ba yin te ston par mi nus so/ /gal te de'i dngos po nges par yod na ni bdag nyid mi snang ste/ de ma yin par tha snyad thams cad rtogs pa med par thal bar 'gyur ro/ /gal te dngos po med na ni de ltar don shes par byed pa yang med de de'i phyir med pa ni ri bong gi rwa la sogs pas rnam par shes pa bskyed par mi 'gyur ba'am/ yang na sa bon la sogs pas myu gu la sogs pa'o/ /de yang gsungs pa/ don rtogs yod par bya ba ni/ /dngos po yin phyir myu gu bzhin/ /de phyir yod par gyur na yang / /sa bon la sogs mi 'dod de/ /dus su myu gu skyes pa na/ /sa bon nyams pas nye bar mtshon/ /de yis 'phangs pa nyid kyis ni/ /sa bon ji bzhin de 'byung ngo / /de bzhin ming la sogs pa'i shes/ /don rnams 'dra bar shes gyur cing / /des na tha snyad de 'jug ste/ /de med 'gro ba de dag med/ /gang gi phyir 'das pa dang / ma 'ongs pa dang / thag ring ba dang / phra ba dang / gtan du med pa la sogs pa rnam par gnas pa la rang dbang gis yid kyi rnam par shes pa 'jug par mi 'dod la/ dbang po'i rnam par shes pas 'jug par 'dod de/ dbang po'i rnam par shes pa la rag lus pa'i phyir/ de kho na nyid ma mthong ba la yid kyi rnam par shes pa 'byung ngo / /de la ni dbang po'i shes pa 'jug pa yang med de/ da ltar byung ba'i yul yin pa'i phyir lhag ma la dbang po'i shes pa 'byung ngo / /yul med par ni shes pa yang mi 'byung ste/ gnyis la brten nas rnam par shes pa 'byung ngo / /zhes khas len pa'i phyir sgron ma bzhin no/ /ming gi tshogs la sogs pa bsgrub pa 'dir tshogs tsam gyi mtshan nyid brjod par bya ste/ de la re zhig ming 'dogs pa ni dang po ming 'dogs pa dang 'jug par 'dod pa dag dang / rtog pa dang dpyod pa gnyis kyis lan du mar yid kyi rnam par shes pas brtags te/ de nyid du skyes bu dngos po la chags pa'i phyir lan du ma zhig tu lag pa la rma rnying dus de nyid du don thams cad dang 'dra bar byed pa yin pas ming la sogs par 'gyur ro/ /de la tha snyad 'dogs pas bstan par bya ste/ gzhan du go bar bya ba'i phyir ming gi sgra'i brdas btags pa yin te/ brda chags pa dang / yang rna bas de mnyan cing len pas rtog pa dang / dpyod pa'i yid kyis brtags te snga ma bzhin du ming la sogs pa skye ba'i rim gyis 'gyur te/ myur du 'jug pa'i phyir yang skad cig ma'i rgyun gyis skad cig ma nyid du bstan to/ /de nyid kyi dbang du byas nas chos mngon pa las gsungs pa ngag las ming 'jug par 'gyur ro/ /ming las don ston pa yin te/ de yang smras pa/ ngag dang yi ge las ni ming / /de dag las ni tshig shes bya/ /dbye bas mtshon pa'i dbye ba ni/ /dngos po sna tshogs shes par bya/ /gang yang don gyi bdag nyid kyi sangs rgyas kyi gsung de ni zag pa med pa'i ting nge 'dzin dang / tshul khrims dang / shes rab kyi ngo bo mdo sde dang 'dul ba dang mngon pa'i chos nyid kyi bdag nyid de/ de yang dri med rtse gcig tshul khrims dang / shes rab rang bzhin rim bzhin du/ /sde snod kyi ni dge bskyed de/ /rnam par smin pa rnam grol byed/ /ces gsungs so/ /de bas na rnam par gzhag pa ni 'di yin te/ bstan pa'i bdag nyid kyi ched du brjod pa ni ming gi tshogs la sogs pa'i dngos po'o/ /don gyi bdag nyid ni zag pa med pa dang / ting nge 'dzin la sogs pa'i rang bzhin sde snod gsum las bsdus pa yin pa'i phyir ro/ /sus nye bar bkod ces bya ba bstan pa de'i lan bstan pa'i phyir smras pa/ 'di'i ston pa po ni rnam pa gnyis te/ ston pa po dang / sdud pa po'i dbye bas so/ /gang gi phyir de bzhin gshegs pa ni tshig gi don lus pa med pa'i de bzhin nyid khyad par du rtogs par spyod pa'i phyir bde bar gshegs pa thams cad kyis bstod de ched du brjod pa bstan pa ni nyid kyis khyad par du gsungs pa yin pa'i phyir dang / bde bar gshegs pa ma lus pas gsungs pa'i phyir te/ 'di nyid nas bshad pa/ rgyal bas ched du brjod gsungs pa/ /zhes bya bas bstan te/ de yang smras pa/ khyad par don ldan ched du brjod/ /sangs rgyas rnams kyis rab gsungs pa/ /legs par gsungs pa 'di lta bu/ /gzhan gyis brjod par mi nus so/ /sdud pa po ni/ 'phags pa chos skyob yin la/ de yang 'di ltar thos te/ mnyan du yod pa na ded dpon zhig gi chung ma rang gi khyim thab dang phrad pa las de sems can dang ldan par gyur kyang rtags mi mngon pas des ma shes te/ 'di ni sems can dang mi ldan no zhes thams cad nges par gyur to/ /ded dpon de yang dus ji lta ba bzhin du tshong zong blangs te yul gzhan du song ngo / /de'i chung ma rim gyis sems can nang du cher skyes pa dang / bsam pa/ kyi hud 'di lta bu skyes pas ring po mi thogs par bdag gi ngo bo 'ong bar 'gyur la/ bdag gis nyes pa med par yang nyes par spyad do zhes shes par 'gyur zhing / nye du'i 'khor thams cad kyis kyang shes par 'gyur ro zhes bsams nas/ ngo tsha bas yid brtan pa'i 'khor la shes par byas nas nad kyis thebs so zhes g.yo byas te gsang nas de na 'dug pa dang / ji tsam zhig na shin tu mdzes pa'i bu zhig btsas so/ /de shin tu yid du 'ong zhing blta na sdug la sdug pa'i bu yin yang 'phya ba la 'dzam pa'i phyir snying gi phyogs las snying phyung ba bzhin du khyim nas mtshan mo yid brtan pa'i na chung zhig gi lag tu gtad de/ srang bar du khyis zos pa ji bzhin du ci'i phyir mi 'dug pa zhes skye ba gzhan dag du ma la sdig pa bsags pa'i rnam par smin pa'i dbang gis khye'u de rgyal po'i lam srang zhig tu bor ro/ /de yang sngon gtum po tshangs pas byin zhes bya ba'i mdun na 'don du gyur te/ tshad med pa'i skye bo gsad par bya ba yongs su gtang ba las gyur pa'i bsod nams kyi mthus khyi dang glang dang glang po che dang rta dag gis yongs su bsrungs so/ /'di ni gdul ba'i dus la bab po snyam du dgongs nas tho rangs kyi dus su bcom ldan 'das dge slong gi tshogs kyis yongs su bskor zhing byon te/ 'di ni mnyan yod du tshong dpon chen por 'gyur zhing yun ring por bde ba nyams su myong nas nga'i bstan pa la rab tu byung ste/ dgra bcom pa nyid mngon sum du byed par 'gyur ro zhes lung bstan te/ rgyal po gsal rgyal la gtad nas rgyal po chen po chos skyob ces bya ba'i khye'u 'di yongs su gsos shig ces bka' stsal te/ des na 'di'i ming du gyur to/ /tshong dpon chen po zhes bstan pas de lta na ni bdag gi bur 'gyur na rim gyis tshong dpon chen por 'gyur ro zhes rgyal po la tshong dpon zhig gis don du gnyer te blangs pas des de la byin no/ /de yang chung ma mi srun pa zhig yod pas 'thabs te/ de 'di skad du ci re zhig bu gsum dang bu mo bzhi yod bzhin du 'di bu skal du byas te gsos pas ci zhig bya zhes zer zhing khye'u de gsad pa'i phyir mi mthun pa dug gis spags pa'i bza' ba dang btung ba yongs su longs spyad pa dang / bsreg pa dang / glang po che dang / rta'i bres dang / shing rta 'dren pa'i bar dag tu bor ba dang / grong khyer gyi phyi rol du rdza mkhan gyi gseb dag tu gzhug pa dang / grong stong pa dag tu khyer ba la sogs pa'i thabs kyis 'bad par byas kyang de'i srog dang bral bar ma nus te/ bdag nyid kyi bu gsum 'chi ba nyi tsher zad do/ /zas su sgrub pa'i snod bzhi mchan khung du thogs te/ rang sangs rgyas mdun na yod pa la sbyin pa'i phyir 'ongs pa las khyi gsum zhig yod pa 'ongs te shin tu khros shing zug pas rdza mkhan gyi rdza ma bsreg pa'i gnas su bcug ste/ de ci'i phyir ma shi zhes bya ba'i ngag gi las kyi rnam par smin pas so/ /de grong de na 'dug pa las khye'u'i lag pa nyid yid brtan te khyim ma'i nang du las pa dag la yi ge bskur ro/ /ring po mi thogs par rgyal po'i khab nas 'ong bar 'gyur ro/ /zhes thos pa dang / dub pas sgo khang du mthe'u chung gis mdzub mo la yi ge dkris te khye'u gnyid log par gyur to/ /phun sum tshogs pa dang rgud pa ni lag pa'i mthil 'di la yod do zhes mtshan mkhan dag gi tshig mnyan te/ myur du rje'u rigs kyi rigs tshong dpon gyi bu mo 'ongs nas de'i sor mo las yi ge phyung ste bltas na/ bde legs su gyur cig /grong gi phyi rol nas tshong dpon chen po'i rigs mthon por byung ba zhes bya bas khyim mi nang las pa la spring pa/ yi ge 'di mthong ma thag nyid du nga'i rigs rgyun gcod par byed pa nyid gsang ste khyim sgor brdegs shing gsad par byos la dong gi nang du chug ces so/ /de nas de bsod nams kyi mthus yongs su bskul bas des de bsal nas yi ge gzhan du bris te/ bde legs su gyur cig /ji srid du yi ge 'di mthong ma thag tu nga'i yid la re ba rdzogs par byed pa'i rgyun du gyur pa/ shin tu yid du 'ong ba'i gzugs can khye'u de la nga'i bu mo de sbyin par bya ste/ dge ba'i tshogs rgyun mi chad pa yin pas de la byin cig /dus 'byor pa yang 'di nyid yin te/ gang bdag med na yang khyed nyid kyis 'di la nan tan gyis shig ces nas rgyal po dang blon po la sogs pa thams cad kyis mngon sum du rgya cher thams cad byas so/ /tshong dpon yang phyi 'bred kyi dus su phyin te/ de'i gtam thos pa dang / khrag dron mo skyugs te shi'o/ / rgyal po chen po des kyang khye'u de tshong dpon gyi go 'phang la bzhag nas/ de'i 'og tu khyim gyi bde ba nyams su myong nas rab tu byung ste/ dge sbyong gi 'bras bu'i mchog thob par gyur to/ /bdag ni chos kyis yongs su bskyabs pa yin te/ bstan pa'i chos ni chos thams cad kyi rtsa ba yin pa'i phyir/ de nyid du de lhag par chos kyis 'jig rten rjes su gzung bar byed 'dod pa'i blo skyes te/ bde bar gshegs pa thams cad kyi zhal nas gsungs pa'i tshigs bcad 'di dag bsdu ba byas so/ /de yang sangs rgyas bcom ldan 'das bzhugs pa nyid na yin te/ gzhan du na gang yang bdag gis bram ze'i tshoms bshad do zhes bya ba ni btsun pa dge 'dun bsrungs kyis bram ze'i tshoms bshad pa dang / dga' bo'i ma'i mdo las kyang ched du brjod pa pha rol du 'gro ba yin no/ /sde snod phran tshegs las kyang da ltar byung ba 'di nyid kyi rim pa brjod par snang ste/ dge slong dag 'di la chos shes par bya ba ni 'di lta ste mdo'i sde dang / dbyangs kyis bsnyad pa la sogs pa'i gsung rab mang po nyams pa thob par 'gyur ro/ /gal te bye brag tu smra ba'i gzhung dang 'gal lo zhe na/ des ni dgongs pa ma rtogs pa'i phyir ston pa 'das te gsung rab las btsun pa chos skyob kyis ched du brjod pa'i tshoms byas pa bzhin no zhes bya ba gang bye brag pas bshad pa 'di'i don ni ston pa 'das pa'i gsung rab de dang de dag las bsdus pa ni 'phags pa kA t+yA ya na'i bus ye shes la 'jug pa las bsdus pa bzhin du/ sangs rgyas bcom ldan 'das bzhugs pa nyid na btsun pa chos skyob kyis ched du brjod pa'i tshoms yang dag par bsdus pa yin pa'i phyir ro/ /dri ba gsum pa'i lan bstan pa ni de bzhin gshegs pa'i gsung rab las nye bar bsdus pa yin te/ gang gi phyir bcom ldan 'das kyis sems can gyi 'jig rten ma lus pa la thugs brtse bas gdul ba dag gi bsam pa dang bag la nyal yongs su mkhyen pas de dang rjes su mthun par skye bo de dang de dag dang / gang zag de dang de dag gi dbang du mdzad nas tshigs bcad de dang de gsungs te/ de las kyang tshoms kyi rim pa 'di nyid du bsdus shing gzhag pa yin no/ /ci'i phyir zhes pa de'i lan ni bstan bcos kyi dgos pa nges par brjod dgos pa'i phyir te/ gang du yang dgos pa dang bral ba la ni rtogs pa dang ldan pa dag 'jug par mi 'gyur te/ ji skad du bshad pa/ gang phyir bstan bcos thams cad dam/ /las kyang rung ste la la dag /ji srid dgos pa ma bstan pa/ /de ni de srid su zhig len/ /zhes pa'o/ /sgrub pa yang rnam pa gnyis te/ dad pa dang chos kyis rjes su 'brang ba'i dbye bas so/ /de la dad pas rjes su 'brang ba ni gzhan gyi dring la 'jog cing 'jug /rjod cig ces bstan na brjod par bya ba'i dgos pa la mi rtog pa nyid du 'jug par 'gyur te/ chos kyis rjes su 'brang ba ni ma yin no/ /de ni gang gi phyir dgos pa brtags nas 'jug pa yin te/ don dang bcas pa dang don med pa mthong nas rtsom pa'i phyir ro/ /de bzhin du ci 'di la de'i dgos pa thabs dang mthun nam mi mthun zhes rtog pa'o/ /de la re zhig ston pa rnam pa gnyis bstan pa las/ dang po'i dgos pa ni dngos po'i de bzhin nyid bstan pa'i phyir/ gdul bya dag la 'di skad gsungs te/ de yang de bzhin nyid rtogs pa'i phyir ro/ /gang gi phyir de bstan pa med par ni de bzhin nyid rtogs pa med de/ dam pa'i chos bstan pa'i lag pa sbyin pas skal ba ji lta ba bzhin du 'dren par mdzad pa'i phyir ro/ /de bzhin nyid rtogs pa yang mya ngan las 'das pa shes pa dang rnam par grol bar 'gyur zhes pa ste/ lung las de nyid shes pas nges par legs pa rtogs zhes pa'i tshig gis so/ /mya ngan las 'das pa yang dgos pa thams cad kyi mthar thug pa yin te/ 'bras bu'i mthar thug pa'i ngo bo yin pa'i phyir/ ji srid du bshad pa/ gang gi phyir dgos pa rgyud pa 'di ni mchog tu mthar thug pa ma yin no zhes pas so/ /brjod par bya ba ni phung po lnga dang 'dus ma byas gsum yin te/ 'di ltar kye ma 'du byed rnams mi rtag / ces bya ba 'dis ni phung po lnga bshad do/ /de dag nye bar zhi ba bde/ /zhes bya ba 'dis ni so sor brtags pa'i 'gog pa chos thams cad bdag med par mthong ba'i shes rab ste/ gang 'dis ni nam mkha' dang so sor ma brtags pa'i 'gog pa yang brjod do/ /de ltar bstan pa dang de ltar brjod pas ni brjod pa dang / brjod par bya ba'i mtshan nyid 'brel ba nyid du bstan pa yin no/ /sdud pa po'i dbang du byas nas dgos pa la sogs pa brjod par bya ste/ bde bar gshegs pa thams cad kyis gsungs pa las 'byung ba'i tshigs bcad kyi khyad par rnams la rigs mthun pa'i tshoms re rer nye bar bkod pa'i phyir ji ltar yang don 'dra ba dag mtshon par byed pa'i tshigs bcad kyi khyad par dag gcig tu bsdus she na/ don 'di las brtsams pa ste/ ci'i phyir zhe na/ bde blag tu zin pa dang / sems pa la mi g.yeng ba dang / smad pa med pa dang / gsal bar bya ba la sogs pa'i phyir ro/ /skud pa la brgyus pa'i me tog dang / g.yos zin pa'i kha zas dang / mgar ba mkhas pas brdungs pa'i rgyan dang / rgyu rkyen tshogs pa'i mar me bzhin du ste go rims bzhin no/ /ji ltar skud pa la brgyus pa'i me tog ni bde bas blang ba dang longs spyad du rung ba yin te/ de bzhin du tshigs su bcad pa tshoms su bkod pa yang ngo / /ji ltar yang g.yos su byas pa'i kha zas dag la ltos shing mngon par 'dod pas bltas na de g.yeng zhing 'khrug pa med par 'gyur te/ de bzhin du bstan pa dang po 'dra ba dag la 'dul ba'i skye bo sgrub pa dag gis tshigs bcad len pa na g.yeng ba med par 'gyur ro/ /bar chad med par 'bar ba'i mes zas bsgrub cing rgyun mi 'chad pa 'dis glang po che ma rung pa 'dul ba yin no/ /bar ma chad par gtsub shing gis gtsubs na ni me 'byung ste/ de nyid kyis na rtag par 'dzin pa'i gdul bya dag gi don du mi rtag pa'i tshoms bkod pa yin no/ /'dod pa dag la bde bar 'dzin cing sbyor ba dang ldan pa la ni 'dod pa'i tshoms la stsogs pa yin no/ /ji ltar yang bzo bo mkhas pas brdungs pa'i rgyan la ni dam pa rnams kyis bsngags pa yin te/ de bzhin du skye bo mkhas pa dag gis yang dag par bsdus pa'i bstan pa yang ngo / /ji ltar yang rgyu rkyen tshogs pa'i mar me ni shin tu 'bar ba yin te/ de bzhin du nye bar sbyar te bstan pa'i dbang gis blo'i kha 'byed par 'gyur ro/ /de ltar rim pa 'dis blo dag par gyur na ni spang bar bya ba spong ba dang / blang bar bya ba len cing / des na bya ba byas par 'gyur te/ lhag ma ni snga ma bzhin no/ /brjod par bya ba ni tshigs bcad kyi tshoms nye bar bkod pa yin te/ brjod pa dang brjod par bya ba'i mtshan nyid kyis 'brel pa yang yin no/ /yang dag par phye ba dang / brjod pa de med par mi bshad pa gsal bar mi 'gyur te/ ji skad du bshad pa/ ji ltar lus 'di ma g.yogs kyang / /mgo ni rab tu g.yogs pa'i mis/ /rab tu gsal bar mi 'gyur ba/ /de bzhin bstan bcos phye spang ba'o/ /ji ltar lus la gos gyon kyang / /gdong ni bkab pa ma byas mi/ /shin tu gsal bar 'gyur ba ste/ /de bzhin bstan bcos phye ldan pa'o/ /mtshan mo mar me med pa yi/ /khyim na dka' bas sten par byed/ /de bzhin brjod bya med pas ni/ /bstan bcos dka' bas bsten par 'gyur/ /zhes so/ /de ste ci'i phyir dang por mi rtag pa'i tshoms bkod pa zhes bya ba la stsogs pa tshoms kyi go rims kyi rgyu brjod par bya'o/ /dge ba'i rtsa ba thams cad bsags pa la spro ba'i rgyu nyid kyi phyir dang / de las mi rtag pa'i 'du shes skye pa'i phyir mi rtag pa bstan te/ de la rag lus pa'i phyir ro/ /'di ltar rtag par 'dzin pa sngon du 'gro bas ni bdag tu lta'o/ /de'i rgyus ni nyon mongs pa thams cad 'byung ngo / /nyon mongs pa'i rgyus ni mi dge ba thams cad 'byung ngo / /de las ni sdug bsngal gyi dra ba thams cad rab tu 'phel lo/ /gang gi tshe yang mi rtag pa bstan pa/ kun tu mnyan pa de'i tshe mi rtag pa'i 'du shes skye bar 'gyur ro/ /de las ni bdag med pa mthong bar 'gyur ro/ /de las ni 'dod chags la sogs pa kun tu mi spyod cing dge ba stsogs par 'gyur ro/ /de las ni bde ba skye bar 'gyur ba yin pa'i phyir dang por mi rtag pa'i tshoms bkod de/ de la sogs pa gzhan yang skabs ji lta ba bzhin du brjod par bya'o/ /dang por brjod par bya ba 'di dag ma lus par bstan nas da ni tshig gi rnam par dbye ba bshad do/ /de la ched du brjod pa dgod pa la skabs ma yin pa brjod pa mi rigs so zhe na/ de ni skabs nyid du 'phags pa chos skyob kyis bkod pa'i tshigs bcad gnyis yin te/ dang por de dgrol bar 'dod nas smras pa/ rnam sol la zhes bya ba la sogs pa smos so/ /phun sum tshogs pa thams cad kyi rtsa ba ni chos mnyan pa yin pa'i phyir/ de'i thabs kyang dor bar bya ba dang blang bar bya ba spang zhing blang ba'i tshul yin te/ thabs des chos mnyan pa la 'jug par bya ba'i phyir dang po'i tshigs bcad bstan to zhes bya ba ni 'di'i bsdus pa'i don to/ /tshig gi don bshad par bya ste/ rnam sol la zhes bya ba ni rnam par bsal bar bya ste/ gnyen pos bsal ba dang / dor ba dang / spang ba nyid de rgyud las ring du tha dad par byas pa zhes bya ba'i don te/ snang ba'i 'du shes kyis gnyid dang rmugs pa sel bar 'gyur ro zhes gsungs pas so/ /'o na bkra shis pa la sogs pa ni bstan bcos dag la gsal bar grags pa yin te/ de bas na dam pa rnams kyi spyod pa bstan pa'i phyir dang por bkra shis pa'i tshig brjod par bya ba yin na/ rnam sol la zhes bya ba'i tshig 'di ni yongs su spang ba'i rnam grangs yin te/ de ni bstan bcos yongs su spongs shig ces mtshon par 'gyur ro zhe na/ smras pa/ 'di ni nyes pa med de/ sangs rgyas kyi gsung la ni spong ba gtso bo nyid kyi phyir don gtso bor bya ba yin pas de nyid la bkra shis pa'i tshig ces bya ba nyes pa med de/ de'i phyir 'di ltar chos mnyan pa'i ched du ma dad pa spong ba ni bkra shis pa'o/ /rab tu byung bas khyim na mi gnas shing mthong ba'i lam gyi mthong bas spang bar bya ba'i phra rgyas dang / bsgom pa'i lam gyi zag pa dang bcas pa thams cad dang / phung po lhag ma med pa'i mya ngan las 'das pa'i dbyings su phyin pa ni 'dus byas thams cad yongs su gtong ba la yang shin tu bkra shis pa'o/ /gang gi phyir spang bas ni sdug bsngal thams cad 'joms par byed do zhes shes te/ de yang smras pa/ gzhan dbang ji snyed yod pa dag /de ni sdug bsngal bkra mi shis/ /gang gis yongs su spangs pa de/ /de ni rab tu bkra shis 'dod/ /ces so/ /ji zhig bsal zhe na/ smras pa/ gnyid dang rmugs pa zhes bya ba'o/ /gnyid dang rmugs pa ni gnyid rmugs so/ /zlas dbye ba thams cad la pa ri b+hA Sha las gcig tu bsdus pas byas so zhes smos pas cho gas gcig tu byas so/ /gang gis bsgoms na sems dang sems las byung ba rmugs par 'gyur ba dang blun par 'gyur ba ste/ dge ba byed pa la sbyor mi bzod par 'gyur ba de ni shin tu sbyangs pa'i mi mthun pa'i phyogs sems las byung ba rmugs pa ste/ sems blun par byed ces pa'i don to/ /gang gis rnam par shes pa yang 'gag par byed pa dang / lus kyi gzungs kyi rlung de ni sems las byung ba gnyid ces bya ba'i don te/ 'dis ni chos mnyan pa'i bgegs su gyur pa gtsor bstan te mthong bar bya ba la mun pa lta bu'o/ /rmugs pa ni nyon mongs pa'i sa chen po ba yin pa'i phyir gcig tu nyon mongs pa nyid yin te/ des na 'dir bgegs su rigs bzung ba'i phyir te/ der 'dir de ni bgegs su rigs pa yin no/ /gnyid kyang bgegs nyid yin no/ /de ni yid kyi sa pa yin pa'i phyir gcig tu nyon mongs pa ni ma yin te/ lung las gnyid ni dge ba dang mi dge bar lung du ma bstan pas so/ /rna ba'i rnam par shes pas bstan pa gzung ba la'o/ /dang gi sgra ni ma dad pa la sogs pa yongs su gzung ba'i phyir te/ de dag kyang chos mnyan pa'i mi mthun pa'i phyogs so/ /de yang ji skad du/ ma dad med pa'i sems dang ni/ /sdang ba'am 'khrug pa med pa yis/ /dam chos shes par nus pa yin/ /zhes gsungs so/ /gzhan dag ni lhag ma dgag pa yongs su gzung ba'i phyir ro zhes ston te/ gang gi phyir 'dod pa las 'dun pa la sogs pa de yang bgegs nyid yin te/ chos mnyan pa mchog tu 'dzin pas shin tu spang bar bya'o/ /spang bar bya ba bstan nas/ blang bar bya ba bshad pa/ dga' ba bskyed de zhes bya ba la sogs pa smos te tshim pa dang / yid bde ba khyad par du sbyar bar bya'o zhes pa'i don to/ /dga' bar gyur na ni mnyan pa legs par nyan par 'gyur te/ nad pa la sman pa chen pos lung phog pa bzhin no/ /yang gi sgra ni chos mnyan pa'i yan lag lhag ma gzung ba'i phyir te/ ji skad du rnam pa bcu drug gis chos mnyan par bya'o zhes rgya cher mdo las gsungs pa'o/ /gzhan du yang gsungs pa/ don du gnyer ba dang / 'tshe ba med pa dang / brtan pa dang / g.yeng ba med pa dang / mi smod pa dang / tshig dang ngag gi nus pas mi brnyas pa dang / shes pas nga rgyal med pa dang / dran pa ma nyams pa dang / bdag la phan par 'dod pas rna blags te nyan pa dang / dpyod par nus pa dang / gus pa dang / mchod pa byed pa ni chos rnam par dbye ba nyan par 'os pa yin no zhes so/ /gzhan dag ni yang gi sgra gnyis smos pa tha dad par bsgrub dgos pas 'dir gnyis bstan pa yin te/ 'di ltar gnyid dang rmugs pa bstsal nas yang yid dga' ba mi 'byung ba yod de gang gi phyir yid skyo bar gyur pas gnyid dang rmugs pa med kyang dga' ba med pa dang / yid dga' bar gyur na yang nges par rmugs pa dang gnyid dang bral ba ma yin pa/ nyon mongs pa la dga' ba yang 'byung ba'i phyir gnyi gar yang rang las ltos pa nyid kyis brjod par bya ste/ ji ltar me tog dang 'bras bu gnyis khyer te shog ces byas na gnyi ga khyer te 'ong gi gcig khyer te shog ces byas na gnyis khyer te mi 'ong ba de bzhin no/ /ci zhig dga' ba yin zhe na/ yid ces bya ba ste/ yid nyid yin pas yid de rang gi don nyid la 'phel bar bya bas sems zhes bya ba'i don to/ /yang gsungs pa/ mnyan bya'i chos la sa dang ni/ /ngan song gsum gyi rgyur gyur pa/ /gnyid dang rmugs gang bstsal nas ni/ /yid kyis legs par yid la bya/ /yid la yang dag dga' byas shing / /chos smra dag la gus byas te/ /tshig ni legs par go byas nas/ /mchog tu zhi ba'i rnam par gyis/ /zhes so/ /rnam pa gnyis po de byas nas ji zhig bsgrub ce na/ smras pa/ nyon zhes bya ba yin te rna gtod par gyis shig pa ste rna ba'i rnam par shes pa'i yul du gyis shig pa'i don to/ /sus smras she na/ bdag gis zhes bya ba 'phags pa chos skyob bdag nyid nye bar ston to/ /rab tu bshad par byas zhes bya ba ni dus phyi mar brjod par bya'o zhes bya ba yin te/ rab tu zhes bya ba'i sgra las dus phyi nas byed pa yin pa'i phyir tsha bo lta bu ste/ bu las dus phyis 'byung ba'i phyir ro/ /'dir yang bcom ldan 'das kyis bstan pa'i phyi nas bdag gis bshad par bya'o zhes pa ste/ 'dis ni sangs rgyas kyis gsungs pa nyid du mtshon pa yin no/ /de gang yin zhe na/ smras pa/ ched du brjod pa zhes bya ba yin te/ gtan dam pa zhes bya ba'i don to/ /ji skad du gsungs pa/ ched du brjod pa mchog tu rnam par 'ong ba dang / yid mgu bar byed pa'i gtam bstan par byed ces bya ba'i don to/ /yang ched du brjod pa zhes bya ba ni gtam gyi rnam grangs yin pa'i phyir te/ ji skad du bshad pa/ ched du brjod pa yang zhes bya ba ni gtam des kyang zhes bya ba'i don to/ /ched du brjod pa'am ched du brjod pa dag ces bya ba'i sgra ni gnyi ga yang 'gal ba med de rtags gnyi ga la brten pa'i sbyor ba snang ba'i phyir ro/ /'dir yang tshigs bcad kyi khyad par spyir bstan pa yin pas ched du brjod pa dag ces bya'o/ /sangs rgyas kyis gsungs pa'i yan lag bcu gnyis las 'di ni yan lag gcig yin te/ ji skad du bshad pa/ dge slong dag 'di la chos shes par gyis shig /'di lta ste/ mdo'i sde zhes bya ba ni kun rdzob dang don dam pa'i bden pa rgya che ba dag dang mthun par bstan pa'i tshig dag las tshig rkyang pas snying po'i don mdor bsdus pa ni mdo'i sde yin te/ 'di lta ste gang zag gcig 'jig rten du skye ba'o/ /'du byed thams cad ni mi rtag pa'o/ /chos thams cad ni bdag med pa'o/ /mya ngan las 'das pa ni zhi ba'o zhes go rims bzhin du dper brjod pa'o/ /dbyangs kyis bsnyad pa'i sde ni mdo'i don gyi rjes su yang dag par brjod cing lhag par tshigs su bcad pa dang ldan pa yin te/ 'di ltar nor ni bdun yin no zhes mdor bstan nas gsungs pa/ dad dang tshul khrims nor dang ni/ /ngo tsha khrel yod las skyes nor/ /thos dang gtong ba'i nor dag dang / /shes rab nor ni bdun pa yin/ /skyes pa'am yang na bud med kyang / /gang la nor ni yod gyur pa/ /de ni phongs pa ma yin zhing / /de yi 'tsho ba don yod yin/ /zhes pa'o/ /gzhan gyis dris par gyur na tshig kyang rjes su bstan pa las byung ba dang 'byung bar 'gyur ba dang / de ltar rjes su bstan pa ni lung du bstan pa ste/ 'di lta ste dper na lung du bstan pa rnam pa bzhi po mgo gcig tu lung du bstan pa la sogs pa'o/ /de yang / tshul ni ji srid rgal na bzang / /'das pa'i dus na rnam par gzigs/ /zhes bya ba'i de bzhin gshegs pa byung ba dang / ma 'ongs pa na ni byams pa zhes bya ba dang / da ltar gyi kun dga' bo song la dge slong 'di'i gnas mal chen po shoms la me tog dang / bdug pa dang / lda ldi la sogs pas brgyan par gyis shig /gang gi phyir de ni 'di nyid kyi nub mo la dgra bcom pa thob par 'gyur ro zhes pa'i rim pas bstan pa yin no/ /snga ma dang 'brel pa las bstod pa'i tshig gi sbyor ba dang ldan pa ni tshigs su bcad pa ste/ 'di ltar gsal rgyal gyi tshigs su bcad pa dang / brag gu'i tshigs su bcad pa la sogs pa ste/ rkang pa gsum dang / bzhi dang / lnga dang / drug gi rnam pas bstan pa'o/ /gang zag la la dag bstan pa la gnas pa kho na'i phyir kun du bstan pa dang dga' ba dang spro ba la ltos nas rab tu bstan pa ni ched du brjod pa ste/ dper na glang po 'di'i glang po zhes bya ba la sogs pa lta bu'o/ /mngon par brjod pa'i gnas skabs kyi tshig ni gleng gzhi ste gzhi 'di dang 'brel pa zhes bya ba'i don no/ /de yang phal cher 'dul ba dang rjes su 'brel pa dang / de'i gleng gzhir rab tu 'byung ba'i phyir ro/ /don gzhan rtogs pa'i phyir gzhan gyi spyod pa bstan cing dpe rgya cher brjod pa dag ni rtogs pa brjod pa ste/ dper na pra ya na dang / ring po len dang / ma ga d+hA bzang mo'i rtogs pa brjod pa lta bu dag go/ /phan tshun brgyud de 'ongs nas bshad pa'i skyes bu'i gtam ni de lta bu 'byung ba ste/ 'di ltar bu mo bdun gyi rtogs pa brjod pa la sogs pa lta bu'o/ /byang chub sems dpa'i sngon gyi skyes bu kun du brjod pa ni skyes pa'i rabs te/ 'di lta ste/ thams cad sgrol dang dred dang ri dwags la sogs pa'i skyes pa'i rabs so/ /chos kyi gtam gyi dbye ba dang ldan pa rgya cher bstan pa ni shin tu rgyas pa ste/ 'di ltar lnga dang / gsum dang / sgyu ma dang / dra ba dang / 'khor lo dang / dri ba drug dang / khams kyi dbye ba dag go/ /dkon mchog gsum gyi lhag pa'i khyad par gsal bar byed pa ni rmad du byung ba'i chos te 'jig rten na rab tu mi spyod pa yongs su rdzogs pa ste/ 'di lta ste/ rmad du byung ba 'dus pa la sogs pa'o/ /mdo la sogs pa rnams kyi don rnam par 'grel cing ming gi lan brjod pa nye bar ston pa ni gtan la bab par bstan pa ste/ 'di lta ste/ 'jig rten pa'i chos kyi mchog gang gis 'di brjod ces bya ba la sogs pa'o/ /des na de nyid kyi phyir 'di ni gsung rab thams cad kyi gnas su gyur pa'i phyir bu'i ma lta bu yin pas ma mo zhes brjod do/ /chos kyi mtshan nyid mngon sum du gyur pa'i phyir dang / phyin ci ma log pa'i chos gsal bar byed pa'i phyir na mngon pa'i chos so/ /gsung rab kyi tshig bcu gnyis mngon par bsdu na ni sde snod gsum zhes brjod do/ /bstan pa shas che ba'i phyir de las gzhan pa'i gsung rab kyi tshig gi yan lag dang 'dres na yang ched du brjod pa zhes bya ba'i ming du mi rung ba nyid ma yin te/ mon sran gre'u la sogs pa dang 'bru'i tshogs 'dres na yang ming brjod pa de bzhin no/ /'dir brjod par bya ba ni gang zhig yin/ gang gis ni 'di gsungs shing gang gis mnyan par bya ba'i phyir/ 'di skad du bshad pa yin zhe na/ bshad pa rgyal bas gsungs pa zhes bya ba 'di lta ste/ sangs rgyas thams cad kyis gsungs pa'o/ /bdud bzhi las rnam par rgyal bas rgyal ba ste/ bde bar gshegs pa rgyal bas gsungs pa ni gsum pa'i bsdu ba'o/ /rgyal bas ched du brjod pa dag ces kha cig tu brjod do/ /mang po'i tshig dang gcig gi tshig tu brjod pa tha dad pa gnyi ga la yang 'dir nyes pa med do/ /'o na nyan thos kyis bshad pa yang 'di na yod de/ gang gi tshul gyis bsdus pa la sogs pa ste/ 'phags pa lan tshwa bzang pos bshad pa dang / so so'i skye bos bshad pa yang yod de/ gser gyi ri bos zhes bya ba la sogs pa nga las nus bshad pa'i phyir te/ de ji lta bu gcig tu rgyal bas gsungs she na/ smras pa/ sngon sangs rgyas kyis bshad pa'i phyir te/ 'di ltar drug cu pa'i bdag po rgyal mo'i tshigs su bcad pa sngar sangs rgyas kyis gsungs pa 'di yang gnod sbyin dbyig gi mig dang / klu'i rgyal po e la'i 'dab gnyis kyis phud pa lta bu'o/ / tshig dang yi ge la sogs pa ji lta bus 'di bkod cing bstan pa dang / rgyal ba yang ji lta bu yin pa de smras pa/ thams cad mkhyen pa ston pa po/ /zhes bya ba la sogs pa ste/ ched du brjod pa'i tshoms 'di zhes bya ba ni tshig gi lhag ma'o/ /rtags gnyi ga yin pa'i phyir 'di ni ched du brjod pa'am ched du brjod pa dag ces bya ba ni 'gal ba med par sngar bstan to/ /mi lhag par dang mi nyung ba'i yi ge la sogs pa bkod pas ji ltar ston pas bstan pa de bzhin du phyin ci ma log par rab tu bshad par bya'o zhes pa'i don to/ /gsungs pa ni bstan pa dang bshad pa'i bar du'o/ /'dis ni bcom ldan 'das rtag tu mnyam par gzhag pa'i phyir skye dgu dag la nye bar gnas pa tsam gyis res 'ga' mi ston cing yid bzhin gyi nor bu bzhin du ston pa yin te/ ji ltar rtsig pa la sogs pa las ston pa yin no zhes rgol ba 'dis gsal te/ tshig ni phyi'i sdug bsngal nyid sa bon yin pa'i phyir dang / mnyam par gzhag pa yang sems nang du bltas pa yang yin te/ rang gi sa bon spangs pa ste/ med pa'am sa bon gzhan las 'bras bu skye bar mi 'dod do zhe na/ rnam par rig byed kyang mnyam par gzhag pa'i sems kyis 'bras bu mngon sum gyis rjes su myong ba yin pa'i phyir me'i 'bras bu du ba bzhin du de la gang na yang 'khrul pa med do/ /nyes pa rnam pa drug gi dngos po dang ldan na ni phyin ci ma log pa'i don bshad par nus pa mi srid de/ 'di lta ste kun nas nyon mongs pa dang ldan pa dang / ci yang mi shes pa dang / le lo dang / snying rje med pa dang / mi brtan pa dang / dus kyi mtha' ring bar 'dod pa yin te/ 'di ltar kun nas nyon mongs pa dang ldan pa las ni gang la rjes su chags pas bu la sogs pa de nyid la ni phyin ci ma log par ston la/ gang dag la ni mi ston pa'o/ /'dod chags dang bral ba yin na yang gang shes pa de nyid kyis ni bstan par bya'i/ gang mi shes pa des ni ji ltar bstan par bya ste/ 'phags pa maud gal gyi bu chen po'i slob ma gnyis ji ltar phyin ci log tu bstan pa'i dpe 'dir brjod do/ /spro ba med pas ni gang du rjes su ma chags shing shes par gyur na yang des bstan par mi nus so/ / snying rje med pa'i phyir spro ba la sogs pa dang ldan yang ji srid du 'di dag rmongs pa de srid du mchog yin no zhes 'di dag la ston par mi byed do/ /mi bstan pas ni bstan pa la zhugs par byas pa'i 'og tu phyed tsam mi bstan nas lhag ma gzhan dag tu 'jug pa'o/ /dus ring ba ni dus mang por bdag 'di nyid du gnas pas gzhan bstan par bya'o zhes smra zhing de bzhin nyid mi ston pa ste/ de bzhin nyid ston pa'i bar chad ni drug po 'di dag go/ /bcom ldan 'das la ni 'di dag mi mnga' ste/ des na gang des gsungs pa ma lus shing phyin ci ma log par zhes bya ba yin no/ /de nyid kyang 'jig rten na ston pa'i gtso bo yin no zhes tshigs bcad 'di'i don gyis bstan pa'o/ /bdag gis ched du brjod pa'i rnam pa 'di gsungs she na/ smras pa/ bcom ldan 'das kyis zhes bya ba la sogs pa 'di lta ste/ sngar bstan pa'i nyes pa de dag rgyal ba la mi mnga' bar ston to/ / nyon mongs pa bcom pa dang ldan pas bcom ldan 'das te/ ji skad du gsungs pa/ 'dod chags de bzhin zhe sdang dang / /gti mug bcom pa'i 'dren pa ste/ /sdig pa bcom pa gang yin pa/ /de ni bcom ldan 'di yin no/ /zhes pa ste/ 'dis ni spangs pa phun sum tshogs pa bstan to/ /de yang bag chags dang bag la nyal rtsa nas spangs pa yin te/ 'di la nyon mongs pa zad pa med pa'o/ /bla ma la sogs pa la brtan pas nyon mongs pa bstsal ba yin te/ ji srid 'tsho'i bar du rab tu byung ba yongs su bsrung bar mthong ba'i phyir te/ gang dag la yang thabs gang gis dus nyung zad la kun du spyod pa ma yin pa med de gtan du kun du spyod pa yang de rnams la yang dag par 'byung ba ni mar me lta bu ste/ gang gi phyir mar me ni dus ji ltar du rtsig pa dang snam bu dang lo ma la sogs pas de ltar bstsal na mi nus te/ ji ltar bar chad can dag la ni mngon par mi gsal ba yin no/ /de yang gtan du bral bar grub ste/ 'di ltar 'dod chags la sogs pa dang gtan du bral bar grub pa yin na/ gzhan ngan song du skye ba la sogs pa 'di dag ni nges par mi 'byung ngo / /de yang gnyen po dang bcas pa'i phyogs yin pa'i phyir sa bon bzhin te/ 'di ltar myu gu skye bar nus pa'i sa bon mi mthun pa'i phyogs mes tshig par gyur na thal bar 'gyur zhing nyams so/ /de bzhin du 'khor ba'i myu gu 'byung zhing skye bar nus pa 'jig tshogs la lta ba sngon du 'gro ba'i 'dod chags la sogs pa'i nyon mongs pa dag bdag med pa mthong ba dang 'brel par gyur na rtsa ba dang bcas par 'gyur te/ de yang gsungs pa/ phyin ci log gis 'khor ba ni/ /rlung gis sprin gyi tshogs bzhin du/ /'khor bar 'gyur te mi rtag blos/ /de las log na de las grol/ /zhes so/ /so so'i skye bo'i sems dri ma dang bcas pa yang gser la sogs pa bzhin du dag par 'gyur te/ 'di ltar gser dang gos dang khar snod la sogs pa dri ma dang ldan pa rnams ni me dang chu dang thal ba la sogs pas yongs su dag par 'gyur ro/ /de bzhin du so so'i skye bo'i sems kyang rjes su mthun pa'i gnyen pos sems dri ma med pa ste/ nyon mongs pa nyid kyi'o/ /gal te de ni mi 'grub po zhe na/ tshad mas grub pa'i phyir rtsod pa med de gang gi phyir de la re zhig rang gi rgyud la ni mngon sum gyis grub pa yin te/ rang rig pa'i phyir sems bzhin no/ /gzhan gyi rgyud la yang rjes su dpag par grub pa yin no/ /de'i 'bras bu mthong ba'i phyir me bzhin no/ /gang gi phyir de rnams kyi nang gi rab tu grub pa ni lus la sogs pa'i nyes par spyod pa'i mtshan nyid kyi 'bras bu snang ba yin la/ nyon mongs pa med pa rnams la ni de med pa'i phyir te/ yang smras pa/ 'dod chags sogs 'bras mngon sum gyis/ /bdag dang gzhan la brtag pa ni/ /rtags dang rtags can du ba las/ /lkog tu gyur pa me bzhin gnas/ /zhes so/ /'dir thams cad du yang lung yin te/ sems can rnams ni ma rig pas bsgribs pas srid pa yang dag par sbyor ba yin te/ sred pas skyes bu skye bar 'gyur ro/ /'ching ba ni gsum ste/ 'dod chags ni 'ching ba'o/ /bcings pa nyid kyis 'ching ba'o/ / bcings pa nyid kyis 'jig rten 'di nas pha rol du 'gro ba'o zhes bya ba la sogs pa'o/ /sems kyi khyad par 'di nyid ni 'dod chags la sogs pa nyid yin no zhes shes par mi rung ste/ 'dod chags dang bcas pa'i sems la 'dod chags dang bcas pa'i sems so zhes yang dag pa ji lta ba bzhin du shes so zhes mdo gzhan dag las gsungs pa'i phyir sems dang sems lhan cig skye ba ni mi rung ste/ sems can gyi sems kyi rgyud re res 'jug ste/ gnyis pa ni de ma thag pa'i rkyen med pa'i phyir ro zhes bya ba la sogs pa'i lung las bstan pa'i phyir ro/ /bdag nyid kyis 'di rjes su myong ngo zhes dran pa dang ngo zhes pa la sogs pa nyams par thal bar 'gyur ro/ /lha sbyin gyis rjes su myong na mchod sbyin gyis yang dag par dran pa la sogs pa ni tshogs pa dang mi ldan pa'i phyir ro/ /gzhung mangs kyis dogs pa'i phyir bcom ldan 'das kyis gsungs pa zhes bya ba ni yang mi bshad de gzhag go/ /thams cad mkhyen pa zhes bya ba ni thams cad lus pa med pa mngon sum du gnas pa bzhin du gsal bar mkhyen pa'i phyir thams cad mkhyen pa ste/ dus gsum dang 'dus ma byas gsum ji lta ba bzhin du rig ces bya ba'i don to/ / des na 'dis ni ye shes phun sum tshogs pa bstan to/ /thams cad mkhyen pa nyid kyang rigs pa dang lung gis grub pa yin te/ de la lung ni dge slong dag da ni thams cad mkhyen pa'o/ /thams cad gzigs pa ste/ de bzhin gshegs pa rnams la mi mkhyen pa'am mi gzigs pa'am/ mi rig pa'am rnam par mi mkhyen pa mi mnga'o/ /gang gi phyir sangs rgyas kyis ni 'das pa yang gzigs so/ /de bzhin du ma 'ongs pa dang da ltar byung ba yang gzigs so/ /des na 'dus byas rnams 'jig pa'i chos can du gzigs so zhes bya ba la sogs pa'o/ /rigs pa'ang rang dang 'brel pa med pa rnam par bzlog cing rgyas pa ste/ ye shes gnyen po dang bcas pa yin pa'i phyir me bzhin no/ /de ni bud shing med pa'i phyir rnam par log pa yin la/ de bzhin du ye shes kyang shes bya med pa'i phyir ro/ /'on kyang ji srid du phyogs sgrib g.yogs dang bcas pa ni mun pas khyab pa yin te/ de srid du snang bas khyab pa med do/ /de bzhin du srog chags ma lus pa'i dngos po gti mug gis khyab pa yin la de yang ye shes kyi rgyud gcig la gnas pas khyab par byed pa yin te/ dngos po ma lus pa la khyab par byed pa'i ye shes gang la yod pa de ni thams cad mkhyen pa'o/ /dri ma ma lus dang bral ba'i mig gis lta bar 'dod par 'gyur la/ yul dag la bar chad med pa'i phyir dngos po ma lus pa'i yul du gyur pa'i ye shes rang bzhin gyis grub pa yin no/ /ye shes kyi rab tu dang lhag par gyi rim pa'i dbye bas 'phel bar snang ba'i phyir yang thams cad mkhyen pas rig pa yin no/ /dngos po 'phel ba yod na de dang rjes su mthun pa'i tshogs 'byung ba yin pas las kyang shin tu mthar thug pa thob pa yin te me bzhin no/ /gang gi phyir de ni lhag par shas che bar gyur na srid pa gsum zad par byed par 'gyur ba'i skabs yod de 'jig pa'i skal ba na'o/ /de bzhin du ye shes kyang dngos po ma lus pa'i don rtogs nus pa'i gnas skabs thob pa yang rig pa nyid do/ /thams cad mkhyen pa nyid grub pa yin na de lta na ni ser skya dang rkang mig can la sogs pa yang thams cad mkhyen par thal bar 'gyur ro zhe na/ de ni nges par thams cad mkhyen pa ma yin te/ bdag dang bdag gir byed pa ma spangs pas so/ /de ni 'dod chags la sogs pa skye ba'i rtsa ba yin te/ gang gi phyir dngos po ji lta ba bzhin du shes par ma gyur pa'i phyir kun du rmongs pa yin te/ de las ni bdag tu 'dzin pa 'byung ngo / /de las ni bdag gir 'dzin pa 'byung la/ de las bdag la sogs par sred pa 'byung ngo / /de dang rjes su mi mthun pa las ni zhe sdang 'byung la/ de las ni nga rgyal la sogs pa'o/ /bdag tu lta ba rnams kyis ni 'jig tshogs la lta ba la sogs pa spangs pa ma yin te/ nyon mongs pas sems dri ma can du byas pa la ni thams cad du thogs pa med pa'i ye shes de ga la zhig yod pas so/ /shes pa ni yul mtha' dag med pa yin no zhes rnal 'byor spyod pa dag smra ste/ de ni 'di ltar bab col yin te/ gang lhag par bsod nams dang ye shes kyi tshogs bsags pa'i phyir 'bras bu khyad par can de yang yang dag par 'thob pa yin te/ thub pa mchog gis ni shing dang bong par mnyam pa nyid du rnam par gnas par bstan to/ /'dir yang smras pa/ bdag ni ya mtshan can mi bsten/ /thams cad mkhyen pa skyabs su 'gro/ /gang zhig cung zad mi shes nyid/ /thams cad mkhyen pa ji ltar 'thob/ /'dod chags la sogs pa'i gnyen po'i dngos po btang snyoms pa'i bab col dang 'dra bar 'gyur te/ de'i yang bag la nyal ni spangs par nges pa yin pas gang du zhes bya ba la sogs pas nges par bya ba yin te/ rgyal ba 'di'i thugs kyis de bzhin nyid ma lus pa'i yul du gyur pa thams cad la ston zhing khyad par du bstan pa yin no/ /gal te ma yin na ni sems can la phan pa'i thabs nges par rab tu gsungs pa/ ji ltar de lta bu yin te/ legs par spyod pa bsags pa'i tshul nges par don med par 'gyur ro/ /de grub na phyi rol gyi don yang grub pa yin te/ de bas na khyod kyi phyogs nges par nyams par 'gyur ro/ /skyob pa po zhes bya ba ni gdul ba'i rgyud yongs su bsrung bas sems can la phan 'dogs pa mchog tu byed ces bya ba'i don te/ ji skad du gsungs pa nyin lan gsum mtshan lan gsum du sangs rgyas kyi spyan gyis 'jig rten la gzigs te/ rgya mtsho chu srin rnams kyi gnas/ /dus rlabs yol bar 'gyur yang srid/ /ces bya ba la sogs pa'o/ /dam pa dag ni nam yang gzhan gyi don yongs su mi gtong ba yin te/ ji skad du gsungs pa/ ji ltar snang byed nyi ma dub med rta yis 'khor/ /rtag tu 'jig rten khur 'dzin sa ni skyo ba med/ /bdag nyid chen po rang don cung zad med ngang gis/ / 'jig rten gzhan phan dag la 'di ltar gcig tu dga'/ /gzhan la phan phyir 'brel bas brtson byed ral gyi yi/ /nags tshal nyid du'ang dam pa rnams ni bde gnas kyi/ /skad cig tsam yang lha yi bu mor 'grogs pa dang / /dga' ba'i tshal dag tu yang dga' ba ma yin no/ /thugs brtse ba zhes bya ba ni gzhan gyi sdug bsngal gzigs pa'i de ma thag nyid na rang gi bde ba las g.yos pa dang / gnod pa dang zhig par 'gyur ba ni thugs brtse ba ste/ de yang thugs rje chen po rnams zhes bya ba'i don te/ 'dis ni gzhan gyi don mdzad pa la mngon par brtson pa'i rgyu bstan te/ gang gi phyir thugs rje chen pos drangs ni de bzhin gshegs pa rnams gzhan gyi don la mi g.yel bar 'gyur te/ ji skad du gsungs pa/ thugs rje 'dod bzhos tshol bas mi skyo ba/ /thams cad mkhyen pa'i rgyud la gnas pa yin/ /zhes rgya cher gsungs pa dang / zhi zhing dben pa las ni grong nang byon/ /zhes bya ba la sogs pa'o/ /thub pa zhes bya ba ni lus la sogs pa'i las nye bar zhi zhing g.yo spangs pa ni 'jig rten na thub pa zhes rab tu grags so/ /'dir yang thub pa ni g.yo sgyu las ldog pa dang / mi brtan pa med cing nye bar zhi ba ni sangs rgyas yin no zhes bya ba'i bar du ste/ mi brtan pa la dge ba med/ /yon tan brtan la gnas pa'o/ /zhes pa'i tshig gis ni gzhan gyi don la mchog tu brtan pas bsgos pa yin no zhes mtshon pa yin no/ /sku yi tha ma 'dzin pa'i tshe/ /zhes bya ba la/ mi rtag pas 'jig pa ni lus te/ bdag gi dngos po zhes bya ba'i don te/ /tha ma ni phyi ma ste gang gi 'og tu bdag srid pa gzhan dang mi 'brel ba'o/ /sku yang yin la tha ma yang yin pas sku tha ma'o/ /de gang 'chang ba de ni/ sku yi tha ma 'dzin pa'o/ /des na tha ma la gnas pa/ /zhes bya ba'i don to/ /'dis ni thub pa mi sdod par gzhan la phan 'dod pa'i rgyu nyid du bstan to/ /da 'dir ni dpyad par bya ste/ bcom ldan 'das sku'i tha ma spangs te yongs su mya ngan las 'da' 'am zhe na/ 'dir smras pa/ yongs su mya ngan las 'da'o zhes nges par bya ba yin te/ rigs pa dang lung las shes pa'i phyir ro/ /de la lung ni bad s+ya'i mdo las ji skad du gsungs pa/ la la zhig nga'i gan du lhags te/ kye gau ta ma nges par mya ngan las 'da' 'am mi 'da' zhes 'dri ba na/ de la ngas dri ba nyid kyis lung bstan te/ gang nga'i mdun du me 'bar ba dang ldan pa gang dang gang nyid rtswa dang shing la sogs pa la brten nas 'bar bar gyur ba de tha mar gzhan gyis ma bsnan na yongs su zad pa ltar len pa med pas mya ngan las 'da' bar 'gyur te/ de sngon gyi gnas su 'gro bar 'gyur zhing phyir mi 'ong ba yin pa'i bar dang / de bzhin du bad s+ya tshul gang gis de bzhin gshegs pa btsas pa dang bcas par gyur pa'i tshul des de bzhin gshegs pa zad par 'gyur ba yin te/ ji srid rnam par shes pa rgyun du skye ba med pa'i chos la de snga ma'i gnas su 'gro ba yin no zhes rgya cher gsungs so/ /rigs pa ni gang gis rgyun 'jug pa de re zhig na gtan du yang chad pa yin te/ ji ltar sa bon lta bur de bzhin gshegs pa'i bdag gi rgyun 'jug pa de yang re zhig na rtsa ba dang bcas pa chad par 'gyur ro/ / sku yi tha ma 'dzin pa'i tshe/ /zhes bya ba bcom ldan 'das la ni dgongs pa cung zad kyang yod par mi snang ste/ sangs rgyas bcom ldan 'das rnams ni dgongs pa med par skad cig tsam yang gnas skabs la sogs pa'i bya ba mi 'dzin te/ gzhan la phan pa'i bya ba 'di'i dgongs pa nyid kyi gnas skabs kyis sems can gcig gis phan pa yod par gyur na yang de bzhin gshegs pa yongs su mya ngan las 'das par mi 'gyur ba'i phyir ro/ /gang gi tshe 'khor ba'i nags tshang tshing na sangs rgyas kyi gdul bya'i sems can gcig kyang ma lus par gyur pa de nyid kyi tshe na thub pa mchog yongs su mya ngan las 'da' bar 'gyur ro zhes bya ba ni yang dag par bstan pa'o/ /gzhan gyi don byas pa'i phyir yang dag par rdzogs pa'i byang chub thob pa yin te/ ji skad gsungs pa/ bdag nyid rgal cing 'gro ba thams cad bsrung / /gang phyir ldongs pa'i lam ni ston byed cing / /de nyid mngon sum byas pas khyod kyis ni/ /da ni 'bras bus mgon dang gzhan phan spyod/ /ces pa'o/ /de bas na sangs rgyas kyi mdzad pa ma lus par mdzad pa'i phyir mya ngan las 'das pa nyid du bzhugs pa yin no/ /yang smras pa/ gzhan la phan pa spyod byed cing / /yun rings dus su mngon dgongs pa/ /thub pa mya ngan las 'das te/ /bud shing med pa'i me bzhin no/ /rga dang 'chi ba'i 'jigs pa dag /yongs spangs thar pa'i 'du shes kyis/ /rin chen gling bzhin shes rab can/ /bya ba byas nas 'dir 'jug go/ /bcom ldan 'das kyis 'di skad gsungs zhes bstan pa la de ji skad du gsungs pa yin zhe na smras pa/ kye ma 'du byed ces bya ba la sogs pa smos te/ tshigs bcad 'di'i gleng gzhi ni bcom ldan 'das rgyal po'i khab kyi ri ngos yangs na bzhugs te/ der bcom ldan 'das kyis dge slong rnams la bka' stsal pa/ dge slong dag 'du byed thams cad ni mi rtag pa ste/ ji srid du rnam par grol bar gyis shig ces bya ba'i bar du'o/ /dge slong dag sngon byung ba na ri 'di'i ming pra tsi na bang sha zhes bya bar gyur te/ gang pra tsi na bang sha'i nye 'khor na mi rnams kyang gnas par gyur te/ mi de dag gi ming ni nyi mi ra zhes bya bar gyur to/ /ti mi ra'i mi rnams kyi tshe'i tshad ni lo stong phrag bzhi bcu yin no/ /dge slong dag ti mi ra'i mi rnams kyis ri pra tsi na bang sha la 'dzeg pa dang babs pa yang zhag bzhi bzhis 'dzeg cing babs so/ /de'i tshe na ston pa log par dad sel zhes bya ba 'jig rten du byung ste/ dge slong dag rgya cher bltas na ji srid du ri de'i ming yang nub par gyur to/ /mi de dag kyang dus las 'das so/ /ston pa de yang yongs su mya ngan las 'das so/ /tshe yang yongs su nyams par gyur to/ /de bzhin du dge slong dag mi rtag pa ni ji tsam na ri de'i ming ni bang ka zhes bya'o/ /mi rnams ni a bi ka zhes bya'o/ /ri de las babs shing 'dzeg pa yang nyin zhag gsum gsum gyis so/ /tshe'i tshad kyang lo stong phrag sum cu ste/ ston pa gser thub byung bar gyur to/ /yang ri de'i ming ni ngos bzangs zhes bya bar gyur to/ /mi rnams kyi ming ni ro hi ta a shra zhes bya'o/ /'dzeg pa dang babs pa yang nyin zhag gnyis gnyis so/ /de'i tshe'i tshad ni lo stong phrag nyi shu ste/ de bzhin gshegs pa 'od srungs zhes bya ba gshegs so/ /de bzhin du da ltar ri'i ming ni ngos yangs zhes bya'o/ /mi'i ming ni ma ga d+hA pa zhes bya'o/ /ri 'di'i 'dzeg pa dang babs pa la ni yud tsam re re'o/ /mi rnams kyi tshe lo ni brgya ste/ ston pa ni nga nyid yin no/ /pra tsi bang sha ti mi ra/ /bang ka dang ni a bi ka /ngos bzangs ro hi tA shwa dang / /ngos yangs ma ga d+hA dag gi/ /de yi ming ni 'das pa ste/ /mi de dag kyang dus las 'das/ /tshe yang nyams te sangs rgyas kyang / /yongs su mya ngan las 'das gyur/ /kye ma 'du byed rnams mi rtag / ces bya ba la sogs pa la rgyal po zhig gi bu mo skye bo rnams kyi snying du rab tu sdug pa zhig yod pa las de'i gzugs phun sum tshogs pa la sogs pa thos nas rgyal po chen po bzhi dpung dang bcas te 'byor pa chen pos de'i yul du 'ongs nas de bslangs pa dang ji tsam na bu mo de rang nyid khyo 'dam pa'i phyir tshogs kyi nang du zhugs so/ /de dag gis mthong ba dang sngon ma thos pa'i/ kye ma 'du byed rnams mi rtag /ces bya ba la sogs pa'i tshig rkang bzhi mngon du gyur te/ de yang tshig rkang re re/ re re'i dbang du byas nas smras pa yin te/ de thos pa las rgyal po de dag gis kyang 'phags pa'i bden pa bzhi rtogs te rgyun du zhugs pa'i 'bras bu thob bo/ /bu mo de yang 'khor lnga dang bcas par rab tu byung ste dgra bcom pa'i 'bras bu thob bo/ /bcom ldan 'das kyis bka' stsal ba/ /dge slong dag tshigs bcad 'di legs par zung shig /'di ni sngon gyi de bzhin gshegs pa rnams kyis kyang gsungs pa yin no zhes pa ste/ gzhan dag ni de'i gleng gzhi 'di ltar 'chad do/ /de la/ kye ma 'du byed rnams mi rtag /ces bya ba la/ 'du byed ni rnam pa gsum ste/ 'das pa dang ma 'ongs pa dang da ltar byung ba'i dbye bas so/ /de la 'das pa'i mi rtag pa ni skyes nas 'jig pa yin pa'i phyir de phyis kyang skye ba med pa dang zad pa med pa ste/ de dag des na/ skye zhing 'jig pa'i chos can no/ /ma 'ongs pa na yang skye zhing 'jig pa'i chos can te/ skye bar 'gyur ba'i phyir/ skyes pa ni 'jig pa'i chos can yin te/ 'jig par 'gyur ba'i phyir yang skye ba med de/ de nyid kyi phyir de dag mnyam pa nyid du brjod de skye zhing 'jig pa'i chos can gang dag yin pa de ni ma 'ongs pa'i skye zhing 'jig pa'i chos can du bstan te/ ci ste skye ba nyi tsher zad cing 'gag par mi 'gyur ram zhe na/ smras pa/ skyes nas 'jig par 'gyur ba ste/ /zhes bya ba smos so/ /gang skyes par gyur pa de nyid kyi phyir 'gag par 'gyur ba ste gang yang skyes nas 'gag par mi 'gyur ba de med de/ gang de dag thams cad ni sdug bsngal ba'o/ /da bde ba gang yin zhe na/ de smras pa/ de dag ces bya ba smos te ma 'ongs pa'i 'dus byas de dag gi rgyu zad par byas pa'i phyir gzhan du skye ba zad par byas pa de ni bde ba yin te/ 'di ni tshigs bcad kyis bsdus pa'i don no/ /yan lag gi don ni nges par rgyu dang 'bras bu spangs pa'i ngo bo ni rtag pa'o/ /de las gzhan pa ni mi rtag pa ste/ skad cig ma dang skyes ma thag pa dang / yun mi rings par gnas pa zhes bya ba'i bar du'o/ /kye ma zhes bya ba ni skyo ba bskyed pa ste/ 'di dag sdug bsngal lo zhes bya ba'i don to/ /gang mi rtag pa de ni sdug bsngal lo zhes mdo las gsungs te/ mi rtag pa nyid thugs rje chen po'i yul yin gyi/ sdug bsngal gyis nye bar gdungs pa nyid kyi don ma yin par mtshon pa'o/ /yang na rnam pa 'di ltar thugs brtse ba yin te/ sems can gyi 'du byed de'i yul la phan 'dogs par mdzad pa'i thugs rje bskyed par bya'o zhes bya ba'i don to/ /'du byed ni tshogs pa las skyes pa'i ngo bo phung po lnga'o/ /skye ba ni 'byung ba'o/ /'jig pa ni zad pa'o/ /chos de gnyis kyis nges par bsgos pa'i tshul gang la yod pa de ni skye zhing 'jig pa'i chos can te/ skye ba dang 'jig pa'i gnas skabs kyis rjes su bsgos pa zhes bya ba'i don te/ rga ba'i chos la sogs pa bzhin du ste/ ji ltar nges par rga ba 'byung ba gang yin pa de ni rga ba'i chos zhes bya ba de bzhin no/ / skye ba med pa'i chos ni de dang 'dra ba las 'dus byas zhes bya ba brtags te/ ston gyi sprin la chu 'dzin zhes btags pa bzhin no/ /gang skyes pa ni da ltar byung ba'i dus su 'ongs nas myong ba zhes bya ba'i don te/ gang skyes pa de ni nges par 'gag par 'gyur ro zhes bsgrub pa'i phyir ro/ /nas zhes bya ba'i sgra ni gang gi phyir zhes bya ba'i don yang yin te/ skyes pa dang ldan pa ni 'gag pa yin no zhes ston te 'gag pa dang zhig par 'gyur ba'o/ /'on kyang de ltar brjod par bya ba la ji ltar 'di dag mi rtag pa yin zhe na/ gang gi phyir/ skye zhing 'jig pa'i chos can yin/ /zhes bya ba ste/ skyes pa ni nges par 'jig pa'i phyir bum pa la sogs pa bzhin no/ /de las bzlog pa ni nam mkha'o/ /'di gnyis cig car byung ba yin te/ skye ba'i dus nyid 'gag pa'i dus yin pas des na 'das pa dang / da ltar byung ba gnyis gcig pa yin no zhes bstan to/ /skyes nas 'jig par 'gyur ba ste/ /zhes bya ste/ da ltar byung bar gyur nas 'das par 'gyur ro zhes bya ba'i don no/ /'di dag ni sdug bsngal ba yin te/ thams cad kyang mi rtag pa'i phyir ro/ /gzhan la rag las pa ni bde ba med pa'i phyir yang ngo / /de lta na ni lam yang sdug bsngal thob par 'gyur ro zhe na/ bden pa'i lam gyi gnas skabs kyi sdug bsngal ni 'phags pa rnams dang mi mthun pa med pa'i phyir ro/ /gzhan ni sdug bsngal ma yin te/ gang mi rtag pa de thams cad sdug bsngal ba yin no zhes pa'i tshig gis so/ /ji ltar sdug bsngal ba ni kha ba la sogs pa'i btung ba 'thungs na nad nye bar zhi ba dang 'brel ba yin pa'i phyir sman bsten pa ni bde ba zhes brjod de/ de bzhin du lam la sogs pa la yang brjod do/ /de'i sdug bsngal 'dus byas rnams nye bar zhe na khyad par gyi tshul gyis grub pa'i ye shes kyis thob pa'i zhi ba ni nye bar zhi ba ste/ so sor brtags pas thob pa'i 'gog pa'o/ /de na bde ba yin te phung po med pa ni bde ba'i mchog go zhes lung las smos pa'i phyir ro/ /yang smras pa/ mi gtsang che'am chung yang rung / /gtsang ma 'dod pa sten mi byed/ /de bzhin ming dang gzugs skad cig /phra rab bde ba 'dod pa yi/ /bdag nyid chen pos thams cad du/ /ma bsten 'khor ba spong bar 'gyur/ mi gtsang cung zad ma bor yang / /khyim de gtsang zhes brjod pa min/ /thar pa mig gis gzung ma yin/ /bstan dang ngag gi lam yang min/ /las dang nyon mongs shes rab kyis/ /zad pas de yang thob par 'gyur/ /ji ltar dmus long gzugs brjod pa/ /sngon gyi ser po la sogs pas/ /gang du'ang yid ches mi 'gyur te/ /byis pa mya ngan de mi 'da'/ /zhes so/ /gleng gzhi gnyis pa ni de la brten nas yang phyin ci log bzhi'i gnyen po bstan pa'i tshul du byas pa mtshon pa yin te/ 'di ltar rgyal po de dag rtag pa dang / gtsang ba dang / bdag dang / bde ba ste 'dus byas rnams la phyin ci log tu gyur pa de'i don du des go rims bzhin du tshig rkang re re bstan pa yin te/ de la mi rtag pa zhes bya ba 'dis ni mi rtag pa la rtag par phyin ci log pa'i gnyen po bstan pa'o/ /mi rtag pa'i rnam pas nges par yid byung bar gyur pa dang ldan pa yin pas de mtshon pa'i phyir kye ma zhes bya ba'i sgra smros so/ /tshig rkang gnyis pas ni gtsang bar phyin ci log pa ste mi rtag pas gtsang ba bsal ba'i phyir 'du byed skye bas so/ /tshig rkang gsum pas ni bdag tu rmongs pa dag la skye ba dang / 'jig pa dang ldan pa'i phyir 'du byed thams cad ni bdag med pa yin no zhes rtogs par 'gyur ro/ /tha mas ni sdug bsngal la bde bar phyin ci log pa la thar ba nyid ni sdug bsngal gsum dang gtan du bral zhing don dam pa'i bde ba yin pa'i phyir mun pa ma lus pa dang bral zhing shin tu 'od gsal ba shar ba bzhin no/ /'dus byas kyi don gyi de nyid ni yid du mi 'ong ba yin na ji ltar 'di la khyed cag blo rmongs par gyur ces de dag la smras par gyur to/ /gnas skabs kyi rim pa bzhin du tshigs bcad 'dis 'phags pa'i bden pa bzhi yongs su gsal bar byed do zhes kyang gzhan dag 'dod do/ /de la dang po'i tshig rkang gis ni kun 'byung bstan te/ gal te de rtag par gyur na ni 'bras bu'i dus na ci'i phyir mi snang zhes bya ba'o/ /gnyis pas ni sdug bsngal yin te/ 'bras bur gyur pa nyid kyis skye ba dang 'gag pas so/ /gsum pas ni lam ste 'dus byas nyid kyi phyir/ da ltar byung ba'i dus na de dang ldan pas so/ /bzhi pas ni 'gag pa ste dge ba rtag pa'i phyir de ni bde ba'o/ /'dir tshong dpon gyi bu spun bzhi zhig gi dper brjod pa yin no/ /de yang 'di skad thos te/ mnyan du yod pa na tshong dpon gyi bu spun bzhi zhig gnas te/ phyug cing rgya che ba'i nor dang ldan pa las de dag gis thos pa 'di lta ste/ bcom ldan 'das bsod nams kyi zhing chen po de las cung zad tsam phul yang mngon par 'dod pa'i 'bras bu yid la re bzhin du 'thob pa yin no zhes nas des bstan pa mnyan te sdug pa yongs su btang nas 'gro bar bya'o zhes bsams te/ de dag gis bsod snyoms rgya che ba dag blangs te khyim nas byung nas bcom ldan 'das spyod yul du gshegs pa la lhung bzed bkang ste phul nas yang myur ba nyid du rang gi khyim du zhugs par gyur to/ /rim gyis nyi ma bzhi la re re'i dbang du byas nas thub pas tshig rkang re re bstan to/ /ji tsam na de dag khyim du lhags pa dang gtam du brjod de/ bdag cag gis ni rnyed pa legs par rnyed de bdag cag gis bsam pa grub bo zhes so/ /de na gcig gis smras pa/ bdag gis ni/ kye ma 'du byed rnams mi rtag /ces bya ba de tsam zhig thos so zhes zer ro/ /gzhan dag kyang tshig rkang re re thos so zhes smra ste/ tshigs bcad kyi don nges par yid la byas pa las bden pa mngon par rtogs shing rgyun du zhugs pa'i 'bras bu thob ste rab tu byung nas dgra bcom pa'i 'bras bu thob par gyur to zhes pa'o/ /'di ni srid pa la mngon par dga' ba rnams dang mya ngan las 'das pa la rgyab kyis phyogs pa'i lus can rnams 'khor ba las skyob par bya ba'i phyir dang / thar pa las 'dod pa skyed pa'i phyir bshad do/ /sngar bshad pa'i tshigs bcad kyis nges par sdug bsngal dang bde ba gnyis spang bar bya ba dang blang bar bya ba gnyis kyi spang ba dang blang ba'i thabs gnyis 'khrul pa med par bstan pa'i phyir smras pa/ de ltar rab tu 'bar ba zhes bya ba la sogs pa smos so/ /'di byung ba'i gleng gzhi mnyan du yod pa na de'i tshe dge slong rab tu mang po bsti gnas kyi khang pa dag tu 'dug ste 'dug nas 'di nyid kyi tshul gyis bar skabs kyi gtam brjod par gyur te/ bdag gi dngos po ni dga' ba skyed pa'o/ /yul dag kyang mgu ba skyed pa ste/ de ci'i phyir zhe na/ gang gi phyir 'di dag yongs su bsten cing bskyangs na ni dga' ba dang mgu ba yang skye bar 'gyur ro zhes brjod pa bcom ldan 'das lha'i snyan rnam par dag pa mi'i las 'das pas gsan par gyur to/ / gsan nas kyang bos te bka' stsal pa/ dge slong dag khyed cag ci'i phyir 'dus shing 'khod nas lus kyis gtam ngan pa dag brjod cing 'khod ces de ltar rgya cher 'khor ba smad par mdzad cing tshigs bcad 'di bka' stsal to/ /de dag gis de thos nas bsgoms te dgra bcom pa'i 'bras bu thob par gyur to/ /gang gi phyir sdug bsngal spangs pa la ni yid 'byung ba thabs yin te/ yid byung bar gyur na 'dod chags dang bral bar 'gyur ro zhes mdo las bstan to/ /zang zing dang bcas pa la chags pa ni skyo ba'i bgegs yin te/ don dam par nges par brtag pa med pa'o/ /don dam par nges par brtag pa'i zag pa med pa'i shes pa de nyid kyang mya ngan las 'das pa 'thob pa'i thabs te/ gnyi gar sbyar ba'i phyir tshigs bcad 'di gsungs pa yin te/ 'di ni bsdus pa'i don to/ /yan lag gi don ni ci zhes bya ba ni gang zhig ce'am/ dgag pa'i don te mkhas pa rnams kyis dgag pa med ces bya ba'i don to/ /zhig ces bya ba ni dpyad par gyur na dga' ba la sogs pa yang dag par med do zhes bstan to/ /yang na nges par gzung ba yin te/ ci zhig kyang med do zhes bya ba'i don te/ tshig gi phrad la sogs pa ni sna tshogs pa'i don yin pa'i phyir ro/ /bdag dang 'brel pa de la chags pa dang 'brel ba'i bdag gi bde ba la yid tshim pa ni dga' ba'o/ /de skye ba ma rig pa dang lhan cig pas dga' ba'i tshul dang khyim du 'dzug pa ni mngon pa'i nga rgyal gyis so/ /'byor pas drangs pas de'i sred pa dang ldan pa ni mgu ba ste/ gzhan la ma blangs bzhin du byin pa'i dngos po lta bu'o/ /'di gnyi ga yang 'khor ba 'jug cing rmongs pa rnams phyin ci log pas bslad pa yin pa'i phyir ro/ /mkhas pa rnams la ni de gnyis med de/ yongs su brtag pas de bzhin nyid la 'jug pa'i phyir ro/ /de ltar na rmongs pa rnams la gang yin zhe na/ de ltar bdag nyid kyi dngos po dang yo byad kyi dngos po'i gnas skabs la'o/ /de la ji lta bu zhe na/ smras pa/ de ltar rab tu 'bar ba la/ /zhes bya ba smos te/ rnam pa 'di dang skabs 'dir rab tu grub pa ste/ rga ba dang na ba dang 'chi ba la sogs pa ni me 'bar ba lta bu yin no/ /gang du shin tu 'bar zhing yang dag par 'byung ba de ni rab tu 'bar ba ste/ ji ltar mes bud shing zad par nus pa dang / ka rany+dza dang seng ldeng la sogs pa 'bar bar nus pa de bzhin du nyon mongs pa de las skyes pa'i sdug bsngal mngon par mi dga' ba bskyed pa dang yid du 'ong ba'i dngos po 'jig par byed pa la rno ba yin pa'i phyir rab tu 'bar bas dper brjod pa yin no/ /gang la la 'das pa dang ma 'ongs pa nyid kyi dngos po ni 'di lta bu yin gyi/ da ltar byung ba ni ma yin te/ 'di la mngon par dga' ba yin no zhes sems pa la smras pa/ la zhes smos te tha snyad yang dag pa la yod pa ni da ltar byung ba nyid yod pa ste/ de la ji skad du dge slong dag 'di la thams cad du kun du 'bar ba yin te/ 'dod chags kyi me dang zhe sdang gi me zhes bya ba la sogs pa mdo las gsungs te/ de nyid du 'dus byas rnams rtag tu gtses pa yin te/ ji ltar bya'i tshang gi shing la me sbar ba bzhin no/ /de kho na nyid mthong ba ni ji ltar yang dga' ba dang mgu ba gnyis skye bar mi 'gyur te yid skyo ba'i phyir ro zhes ston to/ /da ltar byung ba nyid ni ma bshad kyang grub pa yin te/ gang 'das pa dang ma 'ongs pa byung ba dang 'byung bar 'gyur ba gnyis ni 'di ltar mngon sum dang rjes su dpag pas bsgrub pa yin te/ des na ji skad du bshad pa/ mi rnams la ni bdag tu chags pa des/ /mngon sum du ni sdug bsngal shes pa ltar/ da bzhin lha la'ang sdug bsngal med mi shes/ /gang phyir rtag par gnas pa yod ma yin/ /zhes so/ /de ltar yod na thams cad du yang 'dus byas rnams 'tshogs pa las skyes pa'i phyir yod pa nyid de/ 'das pa dang ma 'ongs pa gnyis kyang skye ba la sogs pas mngon par gtses shing nye bar 'jig pa de nyid du bstan to/ /gal te de ltar nye bar gtses na ji ltar bdag cag gis khong du ma chud ce na/ smras pa nang zhugs zhes bya ba smos te/ chud pa'o/ /gang du zhe na/ smras pa/ mun pa zhes bya ba yin te/ mi shes pa zhes bya ba'i don to/ /yang bshad pa/ 'jig rten mthong bar nus pa la/ /ji ltar bgegs ni byed pa yi/ /mun pa de bzhin ma rig pa/ /de nyid mthong la bshad pa yin/ /phongs pa kun gyi gzhir gyur pa/ /de las gzhan ni rang byung yin/ /blo ldan phun sum tshogs kun rgyu/ /dpal la yid bzhin nor bu bzhin/ /zhes pa'o/ /de yang gang dag yin zhe na/ de smras pa/ gnas pa dag ces smos pas khyed cag ces bya ba nyid de/ so so'i skye bo yin pa'i phyir phung khrol thams cad kyi gnas su gyur pa ni so so'i skye bo yin no zhes pa'i tshig gis so/ /de la 'dis ni 'di ltar ston te/ mi shes pa dang ldan pa de las ni las so/ /de las byung ba ni sdug bsngal yin no zhes bya bas so/ /phyin ci log sdug bsngal 'gog pa ni de bzhin nyid la lta ba dang mngon par dga' ba gnyis kyis te/ ye shes la yang dag par 'jug par bya'o zhes pa'i don te/ thar pa'i bde ba 'thob pa'i thabs kyang yang dag pa'i lta ba sngon du 'gro ba'i 'phags pa'i lam yin te/ de nyid la gzud pa'i phyir smras pa/ sgron ma ni snang ba ste/ gang gi phyir 'phags pa'i lam gyi snang ba dang / dad pa dang brtson 'grus la sogs pa'i sgra'i ming du 'dir brjod de/ ji skad du bshad pa/ chos la nges par sems pa'i bzod pa ni snang ba yin no zhes tshig bla dwags su btags pa yin no/ /dad pas ni 'khor ba'i rgya mtsho las rgal bar byed do/ /brtson 'grus kyis ni sdug bsngal spang bar 'gyur ro zhes dper brjod par bya'o/ /ji ltar phyi rol gyi mun pa la sgron me byung bar gyur na de sel bar nus pa yin te/ de bzhin du mi shes pa'i mun pa de 'phags pa'i lam gyis bsal bar nus pa nyid de/ de bas na 'dra ba'i phyir sgron ma bzhin pas sgron ma yin no/ /de ci'i phyir tshol bar mi byed ces bya ba smos te/ de tshol bar mi byed pa ni de ji ltar rtogs pa'i phyir mi byed de 'bad pas bsgrub par gyis shig pa'i don to/ /bcom ldan 'das kyis 'dir nyes pa rnam pa gsum gyis sems can rnams la bskul ba yin te/ bag med pa dang / rang bzhin dang / sgrib pa'i skyon no/ /sems can 'di dag ni bde ba mngon par tshol ba la bde bar gnas pa ste/ bde bar myong ba lta bu ni yul dag la kun tu dga' zhing mgu ba yin te/ 'di dag ni bag med pa'i skyon no/ /gang du yang de mngon par dga' ba de thams cad ni nyon mongs pa'i me dang sdug bsngal gyi me rab tu 'bar ba yin te/ 'di ni rang bzhin gyi skyon no/ /de dag kyang ma rig pa'i mun par zhugs pa la zag pa med pa'i shes pa'i sgron ma mi tshol ba yin te/ 'di ni sgrib pa'i skyon no/ /des na bcom ldan 'das kyis nyes pa gsum bzlog pa'i phyir tshigs bcad 'di bka' stsal pa yin no/ /ji ltar mi rtag pa nyid kyi me rab tu 'bar bas bdag nyid kyi dngos po gang 'di zhes bya ba bstan pa de rtogs par bya ba la kun du spyod pa 'dis nye bar gnod par shes pa la 'bad pa med pa nyid du 'grub pa'i phyir smras pa/ rus pa thi ba'i mdog 'dra ba/ /zhes bya ba la sogs pa smos so/ /'di'i byung ba ni mnyan yod na dge slong gsar bu rnams lhag par khrus dang gos dang rgyan la sogs pa gtsor byed cing gnas par gyur te/ lus la lhag par zhen pas de dag gis glog pa dang la ton la sogs pa yongs su spangs pa dang / ji tsam na bcom ldan 'das kyis de dag la skyo ba bskyed pa'i phyir dur khrod du gshegs shing spyod par gyur to/ /de'i tshe na rkun po lnga brgya bsad de shi ba'i ro dag bor ba yod pas de dag la de nye bar bstan cing bcom ldan 'das kyis bka' stsal pa/ dge slong dag ltos shig /shi ba'i ro 'di dag ni shin tu 'jigs su rung ba yin te/ 'khor bas chog shes par gyis shig /'khor ba'i longs spyod nye bar spyod pas kyang chog shes par gyis shig ces bka' stsal pa dang / ji tsam na de dag gis dgra bcom pa'i 'bras bu thob par gyur to/ /gzhan dag ni mngon pa'i nga rgyal can gyi dge slong lnga brgya tsam gyi dbang du byas nas 'di gsungs so zhes zer ro/ /de la 'dir yang rnam pa lngas mi rtag par yongs su ston pa yin te/ rnam par zhig pa dang / bral ba dang rnam par 'jig pa dang / nye bar gnas pa'i rnam pa dang / chos nyid kyi rnam pas bshad pa'o/ /de la bor ba gang yin 'di dag ni zhes bya bas ni rnam par zhig pas mi rtag pa nyid du bstan te/ gang gi phyir 'tsho ba'i srog yod pa yang rus pa rnam par 'jig pas de ltar bor bar 'gyur ba'o/ / phyogs dang phyogs su rnam 'thor ba/ /zhes bya ba 'dis ni bral bas mi rtag par bstan te/ phyogs sna tshogs pa la gnas pas phan tshun bral ba nyid du grub pa'i phyir ro/ /thi ba'i mdog 'dra ba zhes bya bas ni rnam par 'gyur bas mi rtag par bstan te/ sngon gyi yid du 'ong ba'i mdog las gzhan du gyur pa'i phyir ro/ /de mthong zhes bya ba ni nye bar gnas pa'i mi rtag pa bstan te/ rnam pa gsum po 'di nyid kyis mi rtag pa ste/ da ltar byung ba'i dus su nye ba zhes brjod do/ /de mngon sum du byed pa ni rnam pa'o/ /'di la ci zhig dga' zhes bya ba ni chos nyid kyi rnam pas mi rtag pa ste/ 'di'i lus kyang 'tsho ba nyid kyi chos las 'chi ba'i lus su gyur te rnam pa gsum gyis mi rtag pa nyid du nye bar gnas shing snang ste/ 'di na 'chi ba'i lus kyang de dang 'dra ba'i chos su gcig pa nyid de/ de la ci zhig dgar ci yod/ /ces bya ba ni bsdus pa'i don to/ /yan lag gi don ni gang yin zhes bya ba ni rus pa zhes bya ba dang sbyar ro/ /'di dag ni zhes bya ba ni phyogs nye ba na gnas pa'o/ /bor ba zhes bya ba ni nye bar 'dzin pa'i rlung dang bral bas bor ba'o/ /rnam par 'thor ba ni mi 'dra bar bkod cing rig pa med pa bzhin du 'tshol bar gnas pa ste/ mjing pa'i rus pa rnams ni gzhan/ rkang pa'i rus pa rnams kyang gzhan zhes bya ba la sogs pa mdo las gsungs pa yin no/ /ci nas gang du rten nas bor ba dang / rnam par 'thor nas 'dug pa yin zhe na/ smras pa/ phyogs dang phyogs su zhes bya ba smos te/ 'di zlos pa ni phyogs kyi rnam pa mang po sna tshogs pa ste/ mtho ba dang dma' ba la sogs pa'i phyogs dag tu rnam par gtor ba zhes bya ba'i don to/ /ji lta bu yin zhe na/ smras pa/ thi ba'i mdog 'dra ba zhes bya ba yin te/ thi ba zhes bya ba ni phug ron zhes bya ba'i bya bzhin du mdog snang ba gang yin pa'i rus pa de nyid sngo skya zhes bya ba'i don to/ /de lta bu'i rus pa gang yin pa de mthong ba ni snang ba'o/ /'dir zin pa'i lus la ci zhig dga' zhing lhag par chags zhes bya ba'i don te/ kha dog dang dbyibs nyams pa dang ldan pa'i lus la'o/ /shes rab can ni nam yang mngon par dga' ba skye bar mi 'gyur te/ mthar yid du mi 'ong ba nyid yin pa'i phyir ro/ /de'i phyir bor ba ni tshigs rnams 'brel bzhin du rus pa bor ba nyid du bstan to/ /rnam par 'thor ba ni tshigs rnams bye ba nyid kyis 'thor bar bstan to/ /dbyibs nyams pa rnam pa gnyis kyis bsgrubs nas mdog nyams pa ni thi ba'i mdog 'dra zhes bya bas bstan to/ /de la 'dis 'dod chags rnam pa bzhi'i gnyen por gsungs pa yin te/ de la 'thor ba zhes bya ba 'dis ni nye bar spyod pa'i 'dod chags kyi gnyen po bstan te/ de la nye bar spyod pa med pa'i phyir ro/ /rnam par 'thor ba zhes bya ba 'dis ni dbyibs kyi 'dod chags kyi gnyen po bstan te/ de na 'dod chags dang rjes su mthun pa'i dbyibs med pa'i phyir ro/ /thi ba'i mdog 'dra ba zhes bya bas ni kha dog gi 'dod chags kyi gnyen po bstan te/ mdog 'di ni mngon par mi 'dod pa'i phyir ro/ /rus pa zhes bya bas ni reg pa'i 'dod chags kyi gnyen po bstan te/ reg par mi bzod pa'i phyir ro/ /byung ba gnyis pa'i dbang du byas na yang de bzhin gshegs pas 'di skad du bstan par gyur te/ 'di lta ste gang 'dod chags dang ma bral ba de rnams kyis ni lan du mar lus la 'di bzhin du bsgom par bya ba yin te/ khyed cag kyang 'dod chags dang ma bral ba lta bu yin no zhes pa ste/ de yang 'dis bstan pas nges par bdag cag kyang ni 'dod chags dang ma bral ba dag ste 'dod chags dang bral ba bzhin du mngon pa'i nga rgyal skyes pas des na bdag cag la bcom ldan 'das kyis 'di ltar bskul ba yin no zhes skyo ba yang dag par skyes te/ bcom ldan 'das kyis lam gzhan yang dag par bstan pas/ khams gsum las 'dod chags dang yang dag par bral ba thob par gyur to/ /des na lus la mngon par zhen pa rnams la de las skyo ba bskyed pa'i phyir tshigs su bcad pa 'di gsungs so/ /'dus byas rnams tha mar yid du mi 'ong ba gcig pur ma zad de/ dang po nas brtsams te yid du mi 'ong ba yin no zhes gsal bar bstan pa'i phyir smras pa/ gang gi nub mo zhes bya ba la sogs pa smos so/ /'di byung ba'i gleng gzhi ni mnyan du yod pa na bcom ldan 'das kyis dge slong rnams la thams cad g.yo zhing 'jig rten thams cad 'chi ba'i dbang du 'gro zhes bka' stsal pa dang / ji tsam na dge slong zhig stan las langs te bla gos phrag pa gcig tu gzar nas 'di skad ces gsol to/ /ci btsun pa gang mngal na gnas pa yang rab tu mi gnas pa rab tu mi brtan pa nyid dam/ dge slong dag mtshan mo mi dag ma'i ltor 'jug pa de nyid nas brtsams te 'chi bdag gi drung du nye bar 'gro ste/ de ci'i phyir zhe na/ dge slong dag 'di ltar 'dus byas thams cad ni mi rtag go zhes bya ba'i bar du ston pas de ltar bka' stsal to zhes bya ba'o/ /dang po'i tshig rkang gsum gyis ni skad cig mas tshe zad par bstan to/ /tha mas ni tshe zad pa las phyir yang mi 'ong ba nyid de/ 'di ni bsdus pa'i don te/ lus dang gnas kyi khyad par dang sdod pa dang ldog pa dang re ba dang bral bar 'dis ston pa yin no/ /dus de nyid ni dang po'o mtshan mor mngon par 'dod pa ni gnas so/ /ma'i mngal du gnas pa ni sdod pa'o/ /rtsib logs gcig tu gnas pa ni ldog pa'o/ /song nas yang 'byung ba yin no zhes bya ba ste/ rnam pa bzhis yang yod do zhes re ba dag 'di la med pa yin te/ mkhas pa rnams ni 'tsho bas dregs par mi byed do zhes bya ba ni 'di'i bsdus pa'i don to/ /yan lag gi don ni gnas zhes bya ba ni bstan pa ste/ nub mo zhes bya ba dang sbyar te/ gang ma bstan pa'i nub mo gcig ste dgun nam de las gzhan pa'o/ /kho na zhes bya ba ni nges par gzung ba ste/ gang de mngal du 'jug pa'i nub mo de nyid ces bya ba'i don to/ /nub mo gang yin zhe na/ smras pa/ dang po ste mtshams sbyor ba'i skad cig ma nye bar mtshon pa zhes bya ba'i bar du'o/ /mngal du zhugs pa ni ma'i ltor zhugs te nur nur po la sogs pa'i gnas skabs su gyur pa ste/ zho'i spris ma lta bu'i nur nur po la sogs pa sten par byed pa de lta bu dag yin no/ /de ltar byed pa su yin zhe na des smras pa/ mi'i sems can te yid gang la yod pa de ni mi ste sgra gcan bzhin no/ / bdag dang bdag gi la sogs pa'i nyon mongs pa ma spangs pa nyid mngal du 'jug pa yin no zhes mtshon pa'o/ /nub mo zhes smos pas ni nyin par mngal du 'jug pa med pa'i phyir zhes kha cig 'dod de/ gang phyir mun par 'jug pa yang / /mngal gnas mtshan mo de bzhin te/ /de nyid la ni 'byung 'gyur zhes/ /kha cig de skad rab tu smra/ /ji ltar nyer spyod mi zad pa/ /tshong dus nyid du 'phel ba bzhin/ /gzhan dag tu ni de lta min/ /de bzhin mtshan mo nying mtshams sbyor/ /zhes so/ /nyin par yang de 'dod pa skye ba yod pas mi 'gal te/ de tshogs pa la rag lus pa'i phyir rnam pa thams cad du de la yang nges pa med pas de'i phyir thub pas dus nges par ma gsungs te/ gnas gsum mngon du gyur na bu dang bu mo skye bar 'gyur ro zhes bya ba la sogs pa yin no zhe na/ 'di ni phal che ba'i dbang du byas nas nub mo zhes bstan pa yin te/ de ltar lhag par 'khrig pa'i 'dod chags spyod pa'i phyir bshad pa/ bya ba mang dang 'brel pa'i phyir/ /nyin par 'dod chags skye mi 'gyur/ /bya ba ma lus zhi ba'i phyir/ /mtshan mo 'dod chags rab tu skye/ /zhes pas so/ /sdod med ces bya ba ni gags med pa dang bgegs med par zhes bya ba'i don to/ /de ni zhes bya ba ni mi de'o/ /'gro 'gyur zhing zhes bya ba ni zad pa dang rnam par gyur pa dang 'gro ba zhes bya ba'i bar du'o/ /song ba las zhes bya ba ni 'chi ba'i drung du song ba las ni zhes bya ba'i sgra ni nges par gzung ba dang rim pa bzhin du yang 'di sbyar bar shes par bya ba'o/ /ldog pa med ces bya ba ni ldog pa nyid ni ma yin te/ slar yang ldog par mi 'gyur ba'i don to/ /gang gi phyir 'tsho ba nyid g.yo ba ste des na srog gi nges pa yin no zhes nges par mi gzung ngo / /srog gis snyems pa la de spangs pa'i phyir tshigs bcad 'dis shes par bya ba yin no/ /bar du yang bdag gi dngos po yid du mi 'ong ba nyid du bstan pa'i phyir smras pa/ snga dro zhes bya ba la sogs pa smos so/ /'di'i byung ba dang gleng gzhi ni mnyan yod na rgyal bu gsal rgyal gyi yul mi'i las kyi sna la gtogs pa'i skyes bu zhig lang tsho'i dregs pas snyems pa des gsar du blangs pa'i chung ma zhig gzugs mdzes shing blta na sdug la rab tu mdzes pas de la yang de shin tu lta zhing sems chags par gyur to/ /ji tsam dus gzhan zhig na de yul mi'i bya ba zhig byung nas de der song ngo / /de'i 'og tu de'i chung ma sbrul nag pos zin te dus byas so/ /de phyi dro 'ongs nas bsreg sar shing gi steng du bskyon nas bsregs pa mthong nas de nyid du bdag kyang zhugs te gnyi ga shi'o/ /de nas bcom ldan 'das kyis rgyal po de skyo ba yang dag par bskyed pa'i phyir der gshegs te bka' stsal pa/ rgyal po chen po mi rnams kyi 'tsho ba ni mi rtag go zhes bya ba la sogs pa gsungs nas/ snga dro skye bo mang mthong ba/ /zhes bya ba la sogs pa'i tshigs su bcad pa bzhi bka' stsal pa yin no/ /srog ni yid brtan du mi rung ste dus nges pa med pa'i phyir mar me rlung khar ma bsrungs par gzhag pa la shi ba'i dus nges pa med pa bzhin du ste/ 'di ni bsdus pa'i don to/ /phyi dro zhes bya ba'i sgra ni tshig gi phrad yin te bdun pa'i don la 'jug ste nyin par gyi tha ma phyi 'phred kyi dus zhes bya ba'i don to/ /kha cig ni gcig 'ga'o/ /mthong mi 'gyur zhes bya ba ni ma dmigs pa'o/ /de gang yin zhe na/ smras pa/ snga dro ni thog ma ste de nyid nyi ma'i dang po'o/ /mthong ba ni yang dag par dmigs pa dang / yul du byas zhes bya ba'i don te/ sems can kha cig snga dro mthong ba las phyi dro btsal na shi bar gyur pa'i phyir ma mthong ba yin no/ /skye bo mang po ni skye bo chen po ste/ chen po'i sgra ni 'dir mang po ston par byed pa ste/ skye bo'i tshogs chen po 'dus so zhes bya ba bzhin no/ /snga dro kha cig ces bya ba ni gang nub mo de nyid kyi dang por mthong ba de nyid kyi tha mar ma mthong ba zhes bya ba'i don to/ /de ni don 'di ltar ston pa yin te/ sems can ni rnam pa gnyis te/ 'dod chags can dang / tshong gi tha snyad byed pa dag go/ /de la 'dod chags can bud med kyi skye bo nye bar longs spyod pa'i bde ba spyad pa'i dus su tshol ba na yang 'dod chags can gyis ma mthong ba de'i dbang du byas nas tshigs bcad kyi phyed dang po'o/ /gang yang tshong gi tha snyad byed pa'i bdag po la sogs pa des snga dro'i dus su tshong gi tha snyad dang bcas pa ste/ de tshong gi tha snyad rnams kyis grong dpon la sogs pas snga dro mi mthong ba tshigs bcad phyed 'og ma'o/ /dge ba'i las dag la phyi shol byed pa dag la sbyar ba'i phyir tshigs su bcad pa 'di gsungs so/ /gang gi phyir de ltar 'tsho ba'i srog nges pa med pa des na bdag la phan par 'dod pa rnams kyis 'dir yid brtan par bya ba ma yin pa nyid du bstan pa'i phyir smras pa/ skyes pa bud med mang po dang / /zhes bya ba la sogs pa smos so/ /tshigs bcad snga mas ni dus la sogs pa la nges pa med par bstan nas/ 'dis ni na tshod kyi gnas skabs nges pa med pa nyid du bstan pa yin no/ /yang na yid brtan pa la yid mi ches pa'i rgyus 'dir yang yid brtan par bya ba gang yang med do zhes bya ba ni 'di'i bsdus pa'i don to/ /de la zhes bya ba ni nges pa dang bral ba ste zhes bya ba yin te/ gson pa zhes bya ba 'di dang sbyar ro/ /ci zhig ces bya ba ni gang zhig yod de gdeng drod med pa'i phyir te/ mi zhes bya ba 'di dang sbyar ro/ /gdeng drod ni yid rton par byed pa dang / 'jigs pa med par 'dug pa'o/ /'chi ba'i chos can yin pas mi skye ba ste/ skye bar gyur na nges par 'chi ba yin pa'i phyir dang shes rab ces bya ba ni tshig gi lhag ma'o/ /yang na mi zhes bya ba ni shed las skyes so/ /yid kyis nye bar mtshon pa'i phyir de la blo dang ldan pa nyid du ston to/ /gson pa zhes bya ba ni yid brtan pa yin pa'i phyir te/ gang gi rnam pas yid brtan pa yin zhe na/ bdag ni gzhon no zhes bya ba ste/ na tshod dang po la bdag gnas pa yin no zhes pa 'di'i rnam pas so/ /de nyid de bzhin du 'tsho ba las yid brtan du mi rung ba ste/ mir gyur nas dar la bab pa ste/ re zhig bdag ni gnas skabs 'di la 'chi bar mi 'gyur ro zhes de de lta bur yid brtan par mi bya'o zhes bya ba'i don to/ /de ci'i phyir zhe na/ smras pa/ dar la bab pa'ang zhes pa ste/ gzhon par gyur kyang srog dang bral zhing 'chi ba yin na/ rgas par gyur na lta smos kyang ci dgos pa'o/ /na zhes bya ba ni gang gi phyir zhes pa'i don to/ /mi la sogs pa ni de ltar 'chi ba yin gyi/ lha ni ma yin te/ mi 'chi ba'i phyir rga ba dang na ba dang 'chi ba med pa'i 'chi ba yin no zhes bram ze thang la 'bar gyis bshad pa ni 'jig rten pa yin pas de ni mi rigs te/ sems can thams cad 'chi bar 'gyur zhes pa'i yung gis so/ /rigs pa yang lus ni byas pa yin pa'i phyir zhes bya ba la sogs pas so/ /skyes pa bud med ces bya ba 'dir ni thams cad 'dus pa yin te/ ma ning ni phyogs gnyi ga la brten pa'i phyir gnyi gas gzung ngo / /yang na gtso bo yongs su gzung bas gzhan smos mi dgos pa'i phyir ro/ /mang po zhes bya ba ni lan mang po ste/ tshe rabs tshe rabs su yang dang yang zhes bya ba'i don to/ /gang yang 'chi ba ma yin no zhes bstan pa de ni tshig tsam du zad de/ yang smras pa/ mi 'chi ba zhes bya ba ni ming nyi tsher zad de/ sum cu rtsa gsum pa'i ming ma btags par brjod pa yin no/ /rang gi las 'bras nye bar spyad nas kyang / /nges par ltung zhing nyams par 'gyur ba ste/ /gser gyi bye ma'i tshogs can mtsho bsten pa/ /rtswa 'jam brgyan pa'i sa phyogs nyams dga' dang / /lha yi bu mo'i bde ba nyams dga' rnams lta ba'ang / /'chi ba'i mtshan mas 'khyud cing nyam thag 'o dod 'bod/ /lang tshos dregs shing 'chi ba'i 'jigs pa dang bral ba dag la srid pa las skyo bar bya ba'i tshigs su bcad pa 'di gsungs so/ /lang tshos thob pa gcig pu 'chi bar 'gyur bar ma zad de lang tsho ma thob pa yang 'chi bar 'gyur ro zhes bstan pa'i phyir smras pa/ kha cig mngal du zhes bya ba la sogs pa smos so/ /grong khyer 'phags rgyal na spun bzhi zhig la chung ma yang bzhi yod de/ de las phu bo gnyis kyi bu spa ta la zhes bya ba dang / bde thos zhes bya ba gnyis shig shin tu sha rgyas shing gzugs dang ldan la mdzes pas rgyal po'i btsun mo'i 'khor gyi nang du song ba las de gnyis la rgyal po gtum po rab snang zhes bya ba de rab tu khros te/ de gnyis bsad nas de'i khyim la me btang ste/ de nas sbrum pa dang btsas pa'i bud med dang de'i mes po rgan po yang shi bar gyur to zhes bcom ldan 'das kyis gsan nas tshigs su bcad pa 'di gsungs so/ /'dir yang gnas skabs bzhi ston pa yin te/ mngal dang byis pa dang / gzhon nu dang / dar la bab pa'o/ /de la tshig rkang dang pos ni mngal gyi gnas skabs bstan to/ /gnyis pas ni byis pa'i gnas skabs so/ /gsum pas ni gzhon nu'i gnas skabs so/ /bzhi pas ni lang tsho'i gnas skabs te 'di ni bsdus pa'i don to/ /mngal zhes bya ba ni ma'i ltor nur nur po la sogs pa'i gnas skabs so/ /kha cig ces bya ba ni la las sam gcig ces bya ba'i don to/ /kha cig la de ltar mngal nas btsa' ba'i las med pa'i phyir ro/ /'chi bar 'gyur ba ni 'jig par 'gyur ba'o/ /de bzhin kha cig ces bya ba ni 'chi bar 'gyur ba'o/ /btsas pa'i sar zhes bya ba ni bud med btsas pa'i dus de nyid kyi tshe ste/ btsas pa'i khyim du'o/ /gang du de btsas pa de nyid kyi khyim du ste/ khyim der da ltar yang de la gnas shing skyes pa nyid du byis pa de 'chi ba'o/ /gog tsam na zhes bya ba ni kun tu 'gre zhing yongs su rgyu ba ste/ de las yongs su 'khyam zhing rtse ba dang / srang la sogs pa dag tu rtag tu rtse ba'i gnas skabs yin no/ /na zhes bya ba'i sgra ni 'chi bar 'gyur ro zhes 'dren pa'i don to/ /yongs rgyug na zhes bya ba ni kun du rgyug pa'i ngang tshul gang la yod pa de nyid do/ /rigs pa ni 'dod pa la sogs pa nye bar longs spyod pa'i phyir dus ji lta ba bzhin du 'gro ba dang 'gro bar bya ba ma yin par ro/ /'tsho bas dregs pa rnams bsal ba'i phyir tshigs su bcad pa 'di gsungs so/ /sngar bstan pa dang ma bstan pa rnams kyi mdor bsdu ba'i phyir smras pa/ la la rgan dang zhes bya ba la sogs pa smos so/ /thams cad kyang dus phyi zhig na las ji ltar spyad pa bzhin du 'chi bar 'gyur ro zhes bya ba ni bsdus pa'i don to/ /la la zhes bya ba ni gang su dag rgan pa dang de dag thams cad nyid de/ rim gyis 'gro ba yin no/ /dang gi sgra ni yang gi sgra ste/ dar la bab pa la sogs pa nyi tshe ma yin zhes pa'i don to/ /de la rgan pa ni dbang po rnams yongs su smin pa'o/ /gzhon pa ni lus kyi yan lag nye bar rgyas pa'o/ /la la zhig ces bya ba ni gang yang nye bar 'phel ba dang 'grib pa gnyis ston pa'o/ /dar la bab pa zhes bya ba ni dar la bab pa'ang yin la mi yang yin pas dar la bab pa'i mi ste/ ut+pal sngon po bzhin no/ /dar la bab pa nyid yin pas dar la bab pa ste na tshod bar ma'o/ /skyes bu nyid yin pas mi'o/ /lo lnga bcu phan chad ni rgan po'o/ /lo sum cu'i bar du ni gzhon pa'o/ /bar ma ni dar la bab pa'o zhes kha cig 'dod do/ /tshe'i tshad rnam pa gsum du phye ste/ go rims bzhin du gzhon pa dang bar ma dang rgan po zhes kha cig zer ro/ /rim gyis zhes bya ba ni go rims bzhin du ste/ las ji ltar bsags pa bzhin du zhes bya ba'i don to/ /'gro 'gyur te zhes bya ba ni 'jug pa dang rab tu nyams par 'gyur ba'o/ /'dir dpe ni smin pa zhes bya ba ste/ yongs su smin pa'i dbang gis yan lag rnams zhig par gyur pa ste/ 'dir 'bras bu dang sbyar bar bya'o/ /bzhin zhes bya ba ni dpes nye bar 'jal ba ste/ 'bras bu smin pa lta bu zhes bya ba'i bar du'o/ /'bras bu smin pa de ga las 'gro zhing ltung bar 'gyur zhe na/ smras pa/ ltung ba zhes bya ba yin te/ ltung ba ni rtsa ba'i phyogs su zhes bya ba'i bar du'o/ /'dis ltung ba yin pas ltung ba ste/ ji ltar 'bras bu smin pa rlung la sogs pas gnod pa ma byas pa ltar rang nyid snyi bar gyur nas shing gi rtsa ba'i phyogs su ltung ba de bzhin du srog chags rnams kyang tshe yongs su rdzogs pa ni tshe yongs su nyams shing dbang po rnams ltung ste zhig par 'gyur te/ byang gi sgra mi snyan ma gtogs par rab tu 'chi ba yod do zhes lung las gsungs te/ nyes par spyad pa'i rgyus 'chi ba yin no/ /'di lta bur skye bo rnams kyi 'tsho ba mi brtan zhing kun nas 'jig pa la dam pa rnams kyis yal bar mi dor zhing srid pa zad par bya ba'i phyir 'bad par bya'o zhes bya ba de la sbyar bar bya ba'i phyir tshigs su bcad pa 'di gsungs so/ /'di dag gi dpe dbye ba bstan pa'i phyir smras pa/ dper na 'bras bu smin pa zhes bya ba la sogs pa smos so/ /bcom ldan 'das dge slong gi tshogs kyis yongs su bskor te/ nags tshal dag tu rgyu zhing gshegs pa na shing dag las 'bras bu ltung ba dag gzigs te dge slong rnams la bka' stsal pa/ dge slong dag srog ni yid brtan par bya ba dag ma yin no zhes bya ba'i tshigs bcad de/ de la dper na zhes bya bas dper brjod pa bstan to/ / rtag tu zhes bya ba ni rgyun du'o/ /de ci'i phyir zhe na/ 'bras bu smin pa rnams kyi 'jigs pa smras pa/ lhung ba zhes bya ba ni ltung ba ste 'brel pa'i rgyun las 'brel pa'o/ /'jigs pa ni sems dang 'brel ba yin pa'i phyir ji ltar 'bras bu dag la de yod ce na/ 'jigs pa lta bur 'jigs par btags pa ni nyes pa med de/ ji ltar srog chags rnams la 'tsho ba'i srog dang bral ba'i 'jigs pa yod pa de bzhin du 'bras bu dag la yang ltung ba'i dus dang nye bar gyur pa na 'jig rten pa dag 'jigs pa'i sgrar brjod de/ ji ltar yur ba 'jigs par 'gyur ro zhes bya ba yur ba la de med pa nyid do/ /'jig rten pa rnams kyis gzhung lugs la rjes su 'brang ba yin te/ sangs rgyas kyis kyang kun rdzob kyi chos ni 'jig rten pa'i rjes su 'brang bas mi spang ngo zhes pa'i tshig gis so/ /'dir gcer bu pa dag gis 'bras bu la sogs pa la sems yod pa nyid do zhes bya ba de yang med de/ 'tsho ba'i rtags med pa'i phyir/ ji skad du gsungs pa/ bya ba'i sngon 'gro blo snang na/ /bdag dang gzhan dag de gzung ste/ /blo ni yang dag yod shes pa/ /tshul 'dis blo ni de la med/ /ces pa'o/ /de bzhin du phyi rol gyi dngos po shing la sogs pa la ni rtag pa med do/ sems pa med pa dang / mi 'gul ba'i phyir dang bcad nas yang skye ba la sogs pa 'dir brjod par bya'o/ /de bzhin zhes bya ba ni 'di ltar ro/ /skyes par gyur pa zhes bya ba ni byung bar gyur pa ste/ ji skad du smras pa/ skye dgu rnams la dga' ba la sogs yod par gyur pa nyid de/ rnam pa sna tshogs pa'i gnod pa 'jug cing 'byung bar gyur pa yin te/ shing ma skyes pa ni shin tu drag cing mi bzad pa'i rlung gis bskyod nas 'gul ba la sogs par mi 'gyur ro/ /mi zhes bya ba ni 'chi ba'i chos dang ldan pa'i phyir te/ sems can zhes bya ba'i don to/ /rtag tu zhes bya ba ni gnas skabs thams cad du 'jigs pa'o/ /ci'i phyir zhe na/ 'chi ba zhes bya ba yin te/ ris mthun pa chad pas zhes bya ba'i don to/ /'jigs pa ni 'chi bar dogs pa skyed par byed pa'i phyir sems kyi brtan pa nyams pa'o/ /'di skad bstan pa yin te/ ji ltar 'bras bu ltung bar gyur pa'i chos can yin te/ rgyu des na de dag yongs su smin pa'i dbang ngam phyi rol gyi rkyen gyi dbang gis mi rtag cing ltung bas 'jigs pa de bzhin du skye bo 'di dag kyang 'chi ba'i chos can te/ des na 'di'i tshe yang bri zhing las zad pa dang phyi rol gyi [(]rgyen [,]rkyen [)]nye bar gyur pa las 'chi bas 'jigs pa yin no/ /skye bo rnams 'tsho ba'i dregs pas dge ba la bag med par gyur pa rnams bag med pa dor du gzhug pa'i phyir tshigs su bcad pa 'di gsungs so/ /sa bon las skyes pa 'ba' zhig tu ma zad de/ 'ji ba dang rgyu spun la sogs pa las skyes pa yang 'jig par 'gyur ba'i phyir smras pa/ dper na rdza ma'i mkhan po zhes bya ba la sogs pa'i tshigs bcad lnga yin no/ /bcom ldan 'das gnas bcas kyi grong an dza na'i nags na bzhugs te/ de nas bcom ldan 'das snga dro'i dus su dge slong rab tu mang po dang thabs cig tu bzhugs pa las/ ji tsam na gnas bcas kyi grod du bsod snyoms kyi phyir gshegs par gyur to/ /de'i tshe gnas bcas kyi grong na b+ha ra d+h+wa dza zhes bya ba'i bram ze rgas shing 'khogs la lo brgya nyi shu lon pa dus las 'das so/ /gnyis pa rigs kyi bu gzhon nu lo bdun lon pa zhig kyang shi'o/ /de gnyis khyogs la khyer te skye bo mang po'i tshogs mdun na 'gro zhing bud med rnams ni skra bshig cing du ste rgyab nas 'brang ba bcom ldan 'das kyis gzigs so/ /ji tsam na de'i phyir kun dga' bos bla gos bzhi bltab tu byas shing gdan bshams te/ nyan thos rnams la chos bstan pa/ dge slong dag de ltar 'du byed thams cad ni mi rtag cing mi brtan pa'o zhes rgya cher 'chi bar 'gyur zhing srog ni mthar 'jig pa yin no zhes bstan te/ dge slong dag gang yang rgyal rigs shing sA la chen po lta bu nas dgra bcom pa dang / rang sangs rgyas dang / sangs rgyas bcom ldan 'das zhes bya ba'i bar du brjod par bya'o/ /dge slong dag sngon byung ba skye dgu rnams kyi tshe lo stong phrag brgyad cu sgra ngan zhes bya ba'i 'khor los sgyur ba'i rgyal po byung ste/ de'i skyed mos tshal du rab tu gnas pa zhes bya ba'i shing n+ya gro b+ha'i rgyal po de'i rtsa ba na rtsibs kyi mu khyud ces bya ba'i bram ze'i khye'u lnga brgya tsam la bram ze'i gsang tshig 'don du 'jug go/ /de gcig pu dben par song ste gab cing 'dug nas sems la 'di ltar sems shing rnam par rtog par gyur to/ /mi rnams ni tshe thung ba ste/ da lta na yang 'di lta ste don spyod pa dang / chos spyod pa dang / bsod nams spyod pa dang / bde ba spyod pa dang / dge ba spyod pa'i bar la mi rnams spro ba chung bar gnas pa yin te/ bdag skra dang kha spu bregs te bram ze'i khye'u dang bcas par rab tu 'byung ngo zhe na/ rtsibs kyi mu khyud kyis de ltar bstan par gyur to/ /shes pa brda sprod par gyur to/ /de sgrib pa lnga spangs shing tshad med pa bzhi bskyed de/ 'dod pa dag la 'dod chags dang bral bar gyur nas bram ze'i khye'u dag la chos ston par gyur te/ bram ze'i khye'u dag mi rnams kyi tshe ni shin tu thung ste/ 'di lta ste rdza mkhan dag sa las snod kyi rnam pa dag byed kyang de yang mthar 'jig par 'gyur ba yin te/ sa las byas pa'i snod ji lta ba de bzhin du mi rnams kyi srog kyang de dang 'dra'o/ /'di ltar thags brkyang ba la spun gang dang gang bcug pa spun gyis rting la gtugs pa bzhin no/ /'di lta ste gsad par bya ba'i mi gsad sar khyer ba dag bsad sa'i drung du bsnyen pa de bzhin no/ /'di lta ste ri gzang po las 'bab pa'i 'bab chu ni rgyun drag tu 'bab cing ring du 'gro la rgyun mi ldog pa de bzhin no/ /'di lta ste chu la ri mo bris pa yang myur du 'jig cing ring po mi thogs pa bzhin no zhes bya ba la sogs pa ste/ de ma thag pa'i tshigs bcad dag gis spyir bstan nas re re la yang skabs ji lta ba bzhin du brjod do/ /dpe zhes bya ba ni dpe nye bar ston pa yin no/ /na zhes bya ba'i sgra ni nges par gzung ba ste rigs pas ni 'di dang thams cad la de ltar sbyar bar bya'o zhes bya ba'i don to/ /rdza mkhan ni rdza ma byed pa'o/ /byas pa ni bzo byas pa ste ji zhig byas pa yin zhe na/ smras pa/ 'ji ba'i snod ces bya ba smos te/ 'ji ba nyid yin pas 'ji ba ste/ 'ji ba'i rang bzhin gyi snod dam pa las byas pa'i snod dang che byad ces bya ba'i don to/ /de cir 'gyur zhe na/ smras pa/ tha mar 'jig par 'gyur zhes bya ba yin te/ tha mar cha shas kyis 'jig par 'gyur ba'i don to/ /tha mar 'jig par 'gyur ba 'di la yod pa zhes bya ba ni 'bru mang po yin no/ /thams cad ni ma lus pa ste/ cung zad kyang lus pa med pas zhes bya ba'i bar du ste/ gang byas pa de ni mi rtag pa yin no zhes bstan pa'o/ /des na 'di ni dpe'i tshul gyis phyi rol gyi dngos po yang mi rtag pa nyid du mtshon par byed pa'o/ /mi rnams zhes bya ba ni srog chags te/ srog ni tshe'o/ /de bzhin no zhes bya ba ni tha mar 'jig par 'gyur ba ste/ thams cad 'chi ba'i chos nyid yin pa'i phyir te/ ji ltar rdza mkhan gyis legs par byas pa'i sa las byas pa'i snod dag kyang snying po med pa'i phyir 'jig pa'i rkyen thob par sla bas thams cad kyang tha mar 'jig par 'gyur ba de bzhin du dge ba'i las kyis legs par sbyar ba'am/ las rnam pa sna tshogs pa dang ldan pa'i srog kyang thams cad snying po med pa'i phyir mthar 'jig pa yin no zhes bya ba ni bsdus pa'i don to/ /'dir re re la nges par byung ba'i gleng gzhi ni rgyal byed kyi tshal dang nye ba zhig na rdza mkhan gyis sa las byas pa'i snod mang po dag la gzigs nas bcom ldan 'das kyis tshigs su bcad pa 'di bka' stsal te/ dge slong dag 'di lta ste snod 'di dag ni rkyen dang bral bas thams cad kyang de bzhin du mthar 'jig pa yin te/ de bzhin du srog 'di yang de lta bu'o zhes gsungs shing tshigs su bcad pa 'di bka' stsal to/ /thams cad kyi srog kyang tha mar 'chi ba nyid du bstan pas de la rjes su chags pa spangs pa'i phyir 'di gsungs so/ /thams cad kyi gzhi ni sa yin te/ de bas na sa bstan nas de las byung ba'i dpe bstan pa'i phyir/ dper na thags ni zhes bya ba la sogs pa smos te/ bcom ldan 'das mnyan yod na bsod snyoms kyi phyir gshegs pa na/ de na thags 'thag cing 'dug pa cig gzigs te de yang spun bcug cing phal cher rdzogs pa dag gzigs nas tshigs su bcad pa 'di gsungs pa ste/ ji ltar brkyang ba'i thags la snal ma gang dang gang bcug pa'i spun bcug pa des thags kyis btags par bya ba lus pa shin tu nyung bar 'gyur ro/ /de bzhin du sngon gyi las kyis dus shin tu nyung zad 'dzin pa'i srog la skad cig ma gang dang gang gis 'gro bar 'gyur te/ des tshe shin tu nyung zhing srog gtugs par 'gyur te/ ji srid mthar thug gi bar du zhes bya ba ni bsdus pa'i don to/ /dpe zhes bya ba ni rting la zhes bya ba dang 'dir sbyar bar bya'o/ /thags ni snal ma'i tshogs te snal mar sbrengs shing ring por byas pa'o/ /brkyang ba ni sbrengs shing ring du drangs pa'o/ /spun ni gang dang gang zhes bya ba la/ gang de dang 'byor ba'i skud pa gzung ba'i phyir zlos pa ste/ skud pa gang dang gang gis 'phred du gzhug pa'i skud pas zhes bya ba'i don to/ /'dis spun du bya ba yin pas spun no/ /bar chad med par bcug pa ni bcug pa ste/ ji ltar zhing la sa bon bcug pa de bzhin du bcug pa zhes bya ba'i don te/ /gang thags brkyang pa de la 'thags par gyur pa de tsam na bar mtshams bkag cing go skabs med par 'gyur na gtugs shing lhag ma lus pa shin tu chung bar 'gyur te/ spun gyis rting la bkag pa byas pa yin no/ /de bzhin du skad cig ma nyin dang mtshan gyis gtugs pa myong bar byas pas tshe nyung zad lus zhes bya ba'i don to/ /srog gis dregs pa btsal ba'i phyir tshigs su bcad pa 'di gsungs pa yin te/ yang gsungs pa/ 'tsho ba'i dregs pas dregs byed ni/ /nam yang bla ma mi bsten te/ /gang phyir dug gis slongs pa'i yid/ /yang dag 'gro bar ga la 'gyur/ /gang zhig yang dag ji bzhin shes pa ni/ /'di ni nyes pa'i tshogs su shes nas kyang / /dge ba rnam pa mang po rab byed pa/ /de nyid thar pa'i bsam yod mkhas pa yin/ /sems med pa bstan nas sems yod pa smras pa/ dper na nges par zhes bya ba la sogs pa smos so/ /rgyal po ma skyes dgras rkun ma gshed ma'i lag tu gtad de/ de shing ka ra bI ra'i phreng ba mgo la btags te gshed mas bsdigs shing 'dug pa/ bcom ldan 'das kyis gzigs te/ de btang nas tshigs su bcad pa 'di gsungs so/ /dper na gsad par bya ba gsad pa'i phyir nges par khyer ba de bzhin du sems can rnams kyang 'chi ba'i phyir skyes pa yin no/ /ji ltar des gom pa gang dang gang bor ba de bzhin du skye bo 'di dag kyang skad cig ma gang dang gang gis nyin mtshan la sogs pa'i dus las 'das pa yin no/ /ji ltar de gsad pa'i drung du bsnyen pa de bzhin du 'di yang rigs mthun pa chad pa'i drung du bsnyen pa yin no zhes bya ba 'di'i bsdus pa'i don to/ /dper na zhes bya ba la/ ji ltar gsad pa'i drung du bsnyen pa nyid do/ /gsad par bya ba ni bsad pa dag go/ /nges pa ni nges par khyer ba ste/ de las phyir mi ldog cing rgyal po'i yul las phyir phyung ba ste/ grong gi phyi rol du nges par khyer ba'o/ /gang dang gang zhes bya ba ni bzlas pa nyid de/ gom pa 'dor zhing 'jog pa ste gang dang gang du 'deg pa dang 'jog pa'i don to/ /bor ba ni gom pa bor ba ste/ 'jigs par rtogs pa yin no/ /de ltar gom pa bor ba des ji zhig tu 'gyur zhe na/ smras pa drung du zhes bya ba smos te/ khyer te 'ongs nas gang du gsad par bya ba'i sa ste dur khrod do/ /gsad sa'i nyen 'khor gyi drung gang yin pa de ni de'o/ /de bzhin du srog kyang gsad sa'i drung du bsnyen pa yin te/ 'chi dang nye bar gyur pa zhes bya ba'i don to/ /bag med pas bdag la lhag par zhen pa rnams de las bzlog pa'i phyir tshigs su bcad pa 'di gsungs so/ /sa la sogs pa'i dpe bstan pa/ gzhan dag kyang bstan te/ chu klung drag tu zhes bya ba la sogs pa smos so/ /ri spos kyi ngad ldang gi rtse mo nas shugs chen pos brub pa'i 'bab chu dag gzigs te/ bcom ldan 'das kyis rigs kyi bu dga' bo'i dbang du mdzad de 'di gsungs so/ /drag po ni myur du 'gro ba'o/ /rgyun ni chu'i rgyun gang yin pa ste chu klung de drag tu 'bab pa'i rgyun yin te/ ri las chu klung drag tu 'bab pa zhes bya ba'i don to/ /chu klung ni 'bab chu'o/ /ji ltar zhes bya ba ni ji ltar rgyun ma chad par 'brub cing 'gro la slar mi 'ong ba ste/ de bzhin mi yi tshe 'gro ba/ /song ba las ni ldog pa med/ /ces bya ba ni rtogs par sla'o/ /ji ltar chu'i rgyun drag tu 'bab cing chu klung dma' bar 'gro ba ni/ song nas slar mi ldog pa yin te/ de bzhin du tshe yang song nas slar mi ldog pa ste/ song nas phyir mi ldog ces bya ba ni bsdus pa'i don to/ /'dis ni gang dag rgas pa la sogs pa bcud kyis len gyi khyad par gyi sbyor bas na tshod slar bzlog par 'dod pa mchog tu 'dzin pa dag la dga' ba yin te/ gang 'das pa ni 'das pa nyid yin te/ de yang ji skad du bshad pa/ tshe dang na tshod dag dang ni/ /me lce'i rtse dang chu rgyun dang / /ngan pa dag gi tshe rnams ni/ /'das pa slar ni ldog pa med/ /ces so/ /ji ltar yang bcud kyis len gyi sbyor ba byas te/ skra dang sen mo dang pags pa la sogs pa brjes nas gzhan gsar cing bsngags pa'i mdog la sogs pa bzang po skye bar gyur na yang gang lang tsho la sogs pa 'das pa de ni 'das pa nyid yin te bcud kyis len nye bar spyad pa'i mthus bdag nyid sngar med pa gzhan gyi khyad par skye bar 'gyur te/ lang tsho sngar 'das pa de ni phyir bzlog par mi nus so/ /gzhan du na bcud kyis len la sogs pa'i thabs kyis shi ba'i pha ma la sogs pa yang 'dren par nus par 'gyur na gang gi phyir 'das pa ni gang gi khyad par gyis kyang bzlog par mi nus pa yin pas 'di la rtsod pa med pa nyid do/ /de lta bu'i gnas skabs kyi 'tsho ba ldog pa med pa la tshe ring ba yin no zhes bsam par mi bya'o/ /bag med pa dag yang dag par bskul ba'i phyir tshigs su bcad pa 'di bstan pa yin no/ /chu klung drag tu 'bab pa'i dpes bstan pa/ dal bus 'bab pas smras pa/ dka' ba nyid dang zhes bya ba la sogs pa smos so/ /bcom ldan 'das chu klung du rgyu zhing gshegs te/ gang gA'i ngogs su byon pa na/ bcom ldan 'das kyi phyogs zhig na gnod sbyin gyi bu zhig chu dang nye ba na 'dug cing dbyig pas god pa dang stsogs pa'i rtsibs kyis chu la ri mo 'dri zhing yang dang yang phyung bas zhig par gyur pa gzigs te/ ji tsam na dge slong rnams la dus de'i dbang du mdzad nas 'di gsungs so/ /de la 'dis ni mi rnams kyi 'tsho ba rnyed dka' bas 'thob pa dang sdug bsngal mang ba dang mi rtag pa nyid dang 'brel par bstan pa yin no/ /dka' ba nyid dang zhes bya bas ni rnyed dka' bas 'thob par bstan te/ legs par spyad pa mang po la 'bad pa thob pa'i phyir ro/ / thung ba dang sdug bsngal zhes bya ba ni sdug bsngal mang ba nyid dang / yun thung bar gnas pa'i phyir te/ 'dod pa'i gags la sogs pa'i sdug bsngal stong phrag gis mngon par gtses pa'i phyir ro/ /myur ba nyid du 'jig 'gyur te/ /chu la dbyu gus bris pa bzhin/ /zhes bya bas ni mi rtag pa nyid dang 'brel ba dang / de bsgrub pa'i dpe bstan pa yin te/ de'i phyir lang tsho dang srog kyang rga ba dang mi rtag pa'i dbang du 'gyur ro zhes bya ba ni bsdus pa'i don to/ /dka' ba ni shin tu rnyed par dka' ba ste/ sngar bshad pa'i tshigs bcad kyi tshe zhes bya ba dang sbyar ro/ /dang gi sgra ni bsdu ba'i phyir te/ gcig tu dka' ba nyid yin pa'i phyir ro/ /dka' bas 'thob pa yin yang yun ring du mi gnas pa'i phyir smras pa/ thung ba dang zhes bya ba smos te dus mi ring ba nyid du gnas pa yin no/ /thung bar gyur kyang ji srid 'jug gi bar du bde ba yin no zhe na/ smras pa/ de yang zhes smos te/ de lta bur gyur pa'i tshe nyid kyang sdug bsngal mang po dang 'brel pa yin te/ bde ba shin tu chung zhes bya ba'i don to/ /'dir ji ltar bde ba shin tu chung ba yin zhe na/ gang gi phyir rkyen sna tshogs pa'i dbang gis skyes pas dus ma yin pa nyid du 'jig par 'gyur ro/ /myur ba kho na zhes bya ba ni ring po mi thogs pa nyid do/ /ji lta bu yin zhe na/ des smras pa/ chu la dbyug pas ri mor byas pa ni dbyu gus bris pa ste/ dbyug pa'i ri mo'o/ /bzhin du zhes bya ba ni dpes nye bar 'jal ba'o/ /ji lta chu la dbyug pas bris pa ni myur du 'jig pa yin te/ de bzhin du sems can gyi srog gi rgyun yang nam zhig dka' bas 'thob ste myur du 'bral ba yin no/ /srog la lhag par zhen pa dag la de spang ba'i phyir 'di gsungs so/ /srog 'ba' zhig mi rtag pa'i phyir 'dor ba nyid du ma zad de/ de nye bar 'joms pa'i rkyen du gyur pa yang mi rtag pa nyid du bstan pa'i phyir smras pa/ dper na phyugs rdzi zhes bya ba la sogs pa smos so/ /bcom ldan 'das mnyan yod du nang par shin tu snga ba'i dus zhig tu gshegs te/ ba lang rdzi ba lang gi tshogs gnas su dbyug pas 'byin par byed pa gzigs nas 'di gsungs so/ /dper na zhes bya ba ni gzhan ston par byed pa yin no/ /dbyig thogs zhes bya ba la 'dis 'dul bar byed pas na dbyig pa ste/ lam log pa las blan pa'i cha byad shing gi bye brag go/ /des glang srung bar byed pas na phyugs rdzi'o/ /phyugs rnams zhes bya ba ni phyugs kyi tshogs te/ mang po'i tshig ni las so/ /phyin par byed pa ni thob par byed pa'o/ /dbyug pa'i rgyus ba lang rdzi de ltar byed pa yin te/ ba lang gi spyod yul ji lta ba de bzhin du phyin par byed ces pa'i don to/ /dpe bstan nas dpes mtshon par byed pa'i don smras pa/ de bzhin ni de ltar ro/ /nad ni rims la sogs pa'i nad rnam pa sna tshogs pa'i tshul gyis kun tu gnod par byed pa'i phyir ro/ /rga ba ni lus lhod cing rkang lag zhig par byed pa dang 'gyur ba yin no/ /rga bas rnyis par gyur na nus pa med par 'gyur ro zhes bya ba'i don to/ /ji skad du bshad pa/ gzugs nyams stobs kyang nyams par 'gyur/ /zhes bya ba yin no/ /dang gi sgra ni nad gcig pur ma zad pa rga ba yang yin no zhes pa'i don to/ /yis zhes bya ba ni nges par gzung ba ste/ gtsor 'di rnams kyis mi rnams 'chi bdag gi drung du skyel zhes bya ba'i don to/ /'chi bdag ni 'chi ba'i las so/ /skyel ba ni phyin par byed pa'o/ /gang phyin par byed pa yin zhe na/ smras pa/ mi ste sems can zhes bya ba'i don to/ /de la dbyig pa lta bu ni nad de gnod par byed pa'i phyir ro/ /phyugs rdzi lta bu ni rga ba de nad kyi dbyig pa thogs pa'i phyir te/ phal cher rga ba las nad du ma byung ba'i phyir ro/ /phyugs rnams kyi gnas lta bu ni 'chi bdag ste/ gang gi phyir de nyid kyis 'chi ba'i gnas su phyin par byed pa'i phyir ro/ /ji ltar ba lang rdzis dbyig pas brgyab ste gang du ba lang rnams gnas pa'i ba lang gi spyod yul du phyin par byed pa de bzhin du nad kyis nyen par byas shing rga bas mi nyams 'chi bar byed de/ gang du 'chi ba yod pa der rang gi las kyi 'bras bu la nye bar sbyor ro/ /bag med pa bzlog pa'i phyir tshigs su bcad pa 'di gsungs so/ /ji ltar 'di nges par nad dang rga bas mi rnams 'chi bdag gi drung du skyel zhe na/ smras pa/ 'tsho ba'i gnas te dus dang 'tsho ba ni rang bzhin gyis mi gnas pa dang mi brtan pa yin zhing dngos po gang des de nyams par byed pa yin no/ /ji ltar rang bzhin gyis de gnyis mi gnas pa yin zhe na/ smras pa/ chu bran gyi ni chu lta bur/ /zhes bya ba la sogs pa smos so/ /bcom ldan 'das kyis rgyal po'i khab tu dge slong rnams la bka' stsal pa/ dge slong dag mi rnams kyi tshe ni shin tu thung ba yin no zhes shes par gyis shig ces rgya cher gsungs pa na bdud sdig can bram ze'i khye'u'i cha byad du sprul te bcom ldan 'das la 'di skad ces gsol to/ /nyin par dang mtshan mo la ni 'das pa med cing srog kyang 'jig par mi 'gyur la mi rnams kyi tshe yang mi zad de/ shing rta'i 'khor lo'i chings ma bzhin zhes zhus pa dang / bcom ldan 'das kyis bka' stsal pa/ chu bran gyi ni chu lta bur/ /nyin dang mtshan mo 'das pa yis/ /zhes bya ba smos so/ /gzhan dag na re chu bran gyi chu dag la sos ka'i rab tu tsha ba'i tsha bas gdungs shing chu rab tu zad de de nyung du gyur pa gzigs nas bcom ldan 'das kyis 'di gsungs so zhes so/ /'das pa ni rab tu thal ba dang zhig pa yin te/ gang gi phyir dus la rag lus pa'i srog ni nyin mtshan gyi bdag nyid kyi dus 'das pa'i phyir gnas 'jig pa nyid kyis gnas pa 'tsho ba yang 'jig pa yin te/ 'chi bdag gi drung du 'gro bar byed ces bya ba'i don to/ /de lta bu'i rnam pa'i don du gzhan dag 'dod do/ /'das pa nyid yin gyi/ dus 'das pa ni med do zhes ston to/ /gang 'das pa yin zhe na/ nyin dang mtshan mo ste/ gling dag tu snang ba'i gnas skabs ni nyin par ro/ /mun pa'i gnas skabs ni mtshan mo'o/ /gang gi phyir de tsam gyi dus de ni tshe dang srog yin no/ /kyang gi sgra ni nyin mtshan gcig pu 'das par ma zad de/ 'jig pa yin pa'i phyir srog kyang 'jig par 'gyur zhing zad par 'gyur zhes bya ba'i don to/ / phung po lnga ma smos pa nyid gtso bo yin pa'i phyir/ srog smos pa ni gang gi phyir nang gi phung po rnams ni srog la gnas pa yin te/ 'dir khang bzangs ka ba gcig pa'i dpe sbyar bar bya'o/ /de ltar na nyin dang mtshan mo 'das pa bzhin du srog kyang 'jig par 'gyur zhing mi gnas pa yin te/ des na smras pa/ mi rnams zhes bya ba la sogs pa smos so/ /tshe ni 'dir srog gi yo byad du dgongs pa yin te/ yo byad ces bya ba'i sgra phyi nas byas pa yin no/ /tshe'i yo byad kyang rnam pa gnyis te/ nang gi lus dang phyi rol gyi bza' ba dang btung ba la sogs pa ste/ de gnyis kyang zad par nus pa'i phyir ro/ /gang gi phyir dus kyis rab tu zad par nus pa yin pas 'du byed thams cad de ltar 'gyur ba'i phyir srog gam srog gi yo byad tshe ste srog gi dbang po'o/ /rab tu bsgrub par bya ba ni 'dod par gtogs pa'i 'tsho ba ni nyin mtshan dang 'brel pa'i phyir ro/ /sa gong ma dag gi tshe ni de dang 'brel pa med do/ /de ltar tshe zad pa de yang slar ldog par mi 'gyur te/ tshigs su bcad pa snga ma'i tshul gyis zad pa dang myur du 'jig pa nyid do/ /gal te sems can thams cad 'chi bar 'gyur ba yin na/ mi rnams smos pa ci'i phyir zhe na/ 'di ni mi rnams kyi dbang du byas nas bstan cing 'jug pa yin pas 'gal ba med do/ /yang na 'chi ba'i chos can nyid la mi'i sgra yod de mi nyid ni ma yin no/ /'dir dpe bstan cing smras pa/ chu bran zhes bya ba ni chu lag go/ /chu bran de la 'di ltar sos ka'i dus kyi nyi ma'i 'od zer shin tu tsha bas rab tu gdungs pas skam zhing cung zad lus pa'i chu lta bu ste/ de bzhin du bdag nyid skal ba chung ba'i 'tsho ba yang 'khor ba'i gnas su nad la sogs pas rab tu gdungs shing myur du 'jig pa yin no/ /srog la lhag par zhen pa dag bzlog pa'i phyir 'di gsungs so/ /'di ltar de bzhin gshegs pa ni gzhan la phan pa'i phyir chos ston par mdzad pa yin te/ gzhan gyi bsam pa la sogs pa mkhyen nas ston pa yin gyi/ gzhan dag las bdag nyid kyis go bar bya ba sgrub pa'i phyir ni ma yin te/ ji skad du gsungs pa/ thub rnams chu yis sdig pa 'khru bar mi mdzad cing / /'gro ba'i sdug bsngal phyag gis kyang ni sel mi mdzad/ /bdag gis gzhan la rtog pa spos pa ma yin te/ /chos nyid zhi ba gsung zhing rab tu sgrub pa yin/ /zhes pas so/ /skye ba 'di nyid las skye ba gzhan du srog 'di zad par gyur na/ sdug bsngal thams cad du gyur pa'i 'du byed nye bar zhi ba yin te/ de bas na tshe zad pa la smad par mi bya'o zhes bstan pa'i phyir smras pa/ mel tse byed la zhes bya ba la sogs pa smos te/ dge slong rnams bsti gnas kyi khang pa dag tu 'dus shing 'khod pa na bar skabs su tshig 'di lta bu'i gtam brjod par gyur te/ tshe dang ldan pa dag ci zhig ring ba zhes pa na/ kha cig gis smras pa/ mel tse byed pa la mtshan mo ring ngo zhes so/ /gzhan dag ni lam gyis dub pa la dpag tshad ring ngo zhes brjod pa/ bcom ldan 'das kyis gsan nas tshigs su bcad pa 'di gsungs so/ /gzhan dag ni lha zhig 'ongs te bcom ldan 'das la 'di skad ces zhus te/ mel tse byed la ci zhig ring / /lam gyis dub la ring 'gyur gang / /byis pa la ni ji zhig ring / /dri tshig bdag la bka' stsal gsol/ /zhes pa la/ bcom ldan 'das kyis bka' stsal pa/ mel tse byed la mtshan mo ring / / zhes bya ba la sogs pa'o/ /gzhan dag ni rgyal po gsal rgyal gnyid med pa dang 'gron po'i skyes bu dub pa dag las brtsams te tshigs su bcad pa 'di gsungs so zhes so/ /tshe dang bcas pa'i 'khor ba ni sdug bsngal ba yin te/ de bas na chos yongs su shes par bya ba la 'bad pas nan tan du gyis shig ces bya ba ni 'di'i bsdus pa'i don to/ /ring ba ni rgya che zhing yangs pa ste/ rab tu dub pa ni 'di'i rnam par dbye ba'o/ /la ni gang gi phyir zhes pa'i don to/ /gang la ring zhe na smras pa/ mel tse byed la zhes bya ba smos te gnyid mi thob pa'i skyes bu'o/ /mtshan mo ni mun pa ste 'di la 'dod chags can dag lhag par chags pa skye bas na mtshan mo ste/ 'di ni nges pa'i tshig go/ /mel tse byed pa ni mtshan mo cung zad las ma lus kyang nyis 'gyur sum 'gyur du yod pa snyam sems so zhes bya ba'i don to/ /lam gyis dub pa zhes bya ba ni lam gyis ngal ba las skyes pa'i nyam chung ba dang mi bde bas 'gro ba la sogs pa'i bya ba'i ched du lus dang sems blun zhing dub pa dang ldan pa ni lam gyis dub pa'o/ /dpag tshad ni 'dir rgyang grags bzhi'i lam mo/ /la zhes bya ba'i sgra yang 'dir rjes su 'brang ba ste/ ji ltar mel tse byed pa la mtshan mo ring bar brjod pa de bzhin du lam gyis dub pa la yang dpag tshad tsam gyi lam la yang ring bar shes pa yin te/ de bzhin du byis pa rnams 'khor ba cung zad tsam yin na yang zhes so/ /byis pa ni mi shes pa ste so so'i skye bo thar pa dang srid pa'i yon tan dang skyon 'dis mi shes pa'o/ /yang dang yang 'khor ba dang sred pa'i mthar phyin par ga la 'gyur te/ chos gcig kyang mngon par mi shes shing rab tu mi shes pas ni sdug bsngal gyi mthar byed par 'gyur ro zhes nga mi smra'o zhes mdo las gsungs so/ /'khor ba ni srid par skye ba yongs su gzung ba zhes bya ba'i don to/ /byis pa'i khyad par gyis thabs kyi rgyu bstan pa'i phyir smras pa/ dam chos zhes bya ba smos pa ni bden par 'gyur ba'i chos te/ de ni 'phags pa'i bden pa bzhi'i bdag nyid do/ /de yongs su shes pa la ni mthong ba'i mig gis re ltar thogs na srid pa bdun zhes bya ba yin pa'i phyir ro/ /mi shes pa zhes bya ba ni khong du ma chud pa dang ma rtogs pa zhes bya ba'i bar du'o/ /'phags pa'i bden pa bzhi ji lta ba bzhin du ma mthong bas ni 'khor bar 'gyur ro zhes bya ba'i tha tshig gis te/ shes pas ni thar pa yin la/ mi shes pas ni 'khor ba yin no/ /'khor ba'i rtsa ba ni ma rig pa yin pa'i phyir/ dge slong dag ma rig pas bsgribs na ni rgyun mi 'chad par 'khor bar 'khor ro zhes bya ba la sogs pa mdo las gsungs pa'i phyir ro/ /gzhan dag 'grel pa ni ring ba ni dka' ba yin te/ mtshan mo mel tse byed pa'o/ /lam gyis dub pa la ni dpag tshad kyang dka' ba ste/ nyam thag pa'i phyir ro/ / de bzhin du so so'i skye bo la yang 'khor ba na gnas par dka' ba yin te/ dam pa'i chos mi shes pa'i phyir ro/ /da ni byis pa so so'i skye bo thos pa dang mi ldan pa sdig pa'i las mi byed pa ma yin no zhes mi smra'o zhes gsungs so/ /sdig pa byas pas ni 'khor ba'i sdug bsngal gyi rang bzhin nam/ 'khor ba'i 'bras bu'o/ /las thams cad ni sdig pa nyid yin pas mi 'dod pa'i 'bras bu 'di yin pa'i phyir nye bar len pa'i phung po lnga'i bdag nyid de'i 'bras bu sdug bsngal yin pa'i phyir ro/ /de yang byis pas ma spangs pa ste/ de bas na 'khor bas 'jigs pa rnams kyis chos kyi ngo bo yongs su brtag pa la 'bad par bya'o zhes de la sbyar ba'i tshigs su bcad pa 'di gsungs so/ /dam pa'i chos yongs su ma shes pas ni bdag dang bdag gir 'dzin pas brlag par 'gyur te/ de ltar gyur na ni 'khor bar 'jug pa yin no zhes bstan pa'i phyir smras pa/ bdag la bu yod de bzhin du/ /zhes bya ba la sogs pa smos so/ /mnyan yod na kun dga' bo zhes bya ba'i tshong dpon zhig gnas te/ de la bu brgyad kyang yod la/ dbyig dang gser dang bran pho dang bran mo la sogs pa rnam pa du ma yang yod de/ de bu dang nor gyi dregs pas bsnyems pas bdag dang bdag gir byed cing brlag par 'gyur te/ gang la 'di lta bu'i bu dang nor yod pa de ni 'jigs pa ga la yod ces bag phab ste 'dug par gyur to/ /ji tsam na nad kyis btab ste/ gang las kyang yongs su skyob pa ma rnyed nas shi ste ngan song du lhung nas de'i ched du tshigs su bcad pa 'di gsungs te de thos pas srog chags stong phrag brgyad cus chos mngon par rtogs par gyur to/ /gzhan dag na re dga' bo zhes bya ba'i tshong dpon phyug cing nor mang ba bkren zhing g.yo che ba zhig ste/ de khwa la yang gtor ma mi ster ro/ /de la bu can ngan zhes bya ba yang yod do/ /de bu dang nor gnyis kyis rgya cher dregs par gyur cing shi bar gyur te/ gdol pa mo long zhing rgan pa zhig gi mngal du skyes par gyur to/ /ji tsam na slong ba'i phyir rang gi khyim du zhugs pa las sgo srung gis brdungs shing lus snang par byas te/ de bas na de'i dbang du byas nas tshigs su bcad pa 'di gsungs so/ /bdag dang bdag gi la sred pas ni nang dang phyi rol gyi dngos po la zhen par gyur te/ 'gro ba 'di dag kyang bdag med pa de'i ched du sdug bsngal myong zhes bya ba ni bsdus pa'i don to/ /bu zhes bya ba ni bu nyid de/ yun zhes bya ba ni dmyal ba de las skyob pa'i phyir bu'i sgra 'jug ste/ ji skad du nges brjod kyi rig byed las bshad pa/ 'dir bu lon phra bar gyur pa yin te phas bu gson bzhin du ma mthong na'o/ /bdag la bu yod pas de bas na 'jig rten pha rol 'grub pa yin no zhes byis pa sems pa'o/ /bdag ces bya ba ni bdag gi'o/ /yod pa ni bdog pa'o/ /nor zhes bya ba ni mi rnams kyis bdog pa yin no zhes byas shing gzung ba ste gser la sogs pas zhes bya ba'i don to/ /la la zhes bya ba ni bdag la yod do zhes rjes su 'dren pa'i don to/ /'dis ni 'jig rten 'di'i grub pa'i rgyud nyid de ji ltar bstan pa/ tshul khrims gtsang dang bzod dang mthun pa dang / /'jam dang cho rigs mtho bar skyes pa yang / /skyes bu nor rnams med par gyur pa ni/ /de dag thams cad mdzes par 'gyur ma yin/ /zhes so/ /de bzhin du zhes bya ba ni nges par gzung ba'o/ /'di ni re zhig 'jig rten du grags pa'i gtso bo'i dngos po yin par ston pa'o/ /zhes pas zhes bya ba ni lhag par te bya ba'i khyad par nyid de/ brlag ces bya ba des khyad par du byed do/ /cis brlag pa yin zhe na/ yod ces pas so/ /byis pa ni rmongs pa ste sdug bsngal med par shes pa'i phyir ro/ /brlag pa ni nye bar gtses pa yin te 'dir ni nyon mongs pa du mas so/ /phyi mar ni ngan song gi sdug bsngal gyis zhes bya ba'i don to/ /gang gi phyir byis pa bdag nyid bdag dang bdag gir 'dzin pa gnyis kyis dkrugs shing sdug bsngal ba yin te/ 'dir yang de bu la sred pas bu gso bar bya'o zhes bya ba dang / nor la sred pas nor btsal bar bya'o zhes bya ba ste/ thang dang chu la 'gro ba dang / zhing rmed pa dang / rgyal po'i zhabs 'bring la sogs pas shin tu brlag cing nyon mongs pa'i phyir ro/ /tshe phyi mar yang ngan song du skyes te rang gi nyes par spyod pas drangs pa'i shin tu drag pa'i sdug bsngal myong bas brlag pa'o/ /gang gi phyir byis pa ni sems can du brjod pa thams cad kyis dngos po sdug bsngal gyi rgyu yin te/ mig dang bral ba dag rin po che'i phung po la rkang pa 'dor bas nyams par 'gyur ba dang / 'phrod pa'i zas yin du zin kyang mang du zos pa la sogs pas nad 'byung bar 'gyur ro zhes bya ba la sogs par bstan pa dang 'dra ba yin no/ /ci'i phyir bdag dang bdag gir 'dzin pa gnyis kyis 'di brlag par 'gyur zhe na/ log par shes pas te/ ji ltar dgon pa dag tu smig rgyu la chu klung la sogs par 'khrul pas sdug bsngal sna tshogs rnyed pa bzhin no/ /gal te don dam par bdag nyid yod pa yin na ni de'i bdag gi yang grub pa yin na de yang med pas de bdag gis ji ltar 'grub pa'o/ /phyi rol nang na bdag ces bya la/ bdag ni nang gi byed pa skyes bu rtag pa dang / las rnams kyis byed pa po dang / 'bras bu myong bar byed pa zhes bya ba ni gzhan dag gi gzhung ngo / /na zhes bya ba ni rim pa gzhan du sbyar bar shes par bya'o gang gi phyir med na ste gang gis bdag med ce na/ smras pa/ bdag ces smos te/ rang gi rgyud de mi rnams kyi bdag gi ngo bo phung po lnga'i bdag nyid ces bya ba'i don to/ /gang la la dge sbyong ngam bram ze bdag go zhes mngon par smra ba de thams cad ni phung po lnga po 'di dag yin no zhes mdo las gsungs pa yin no/ /gal te 'di la bdag yod pas gnas par gyur na ni ji ltar rga ba dang 'chi bar 'gyur ba'o/ /des na drang srong chen pos 'gro ba 'di dag bdag med pa yin no zhes gsungs te/ gal te yang bdag gi bdag yod na ni des na bu la sogs pa bdag gir yang yongs su gzung ba yin na/ de ni med de/ des na yang su'i bu ste bdag gi yod par 'gyur ba'o/ /ji zhig nor ni 'di ni ring du spang bar bya ste bdag gir byed pa 'di zhes bya ba'i don to/ / gzhan dag ni gzhan gyis yongs su brtag pa ste/ de la bdag tu nges par brtags na ni rang gi ngo bor bdag nyid med do zhes bya ba'i don te/ bdag nyid med na bdag gi ga la yod do zhes pa'i don to/ /bdag dang bdag gi la chags pa spang ba'i phyir tshigs su bcad pa 'di gsungs so/ /gal te 'jigs kyang phung po'i stobs kyis 'byor ba skyed de de'i stobs kyis nam zhig bcud kyis len la sogs pa nye bar spyad pas skyes pa'am bud med 'chi bar mi 'gyur ro zhe na/ smras pa/ skyes pa bud med ces bya ba la sogs pa smos so/ /ded dpon zhig lan bdun gyi bar du rgya mtshor song ste bsgrubs nas nor mang po bsags te tha mar 'khor ba de nyid kyi nyi ma la rang gi khyim du zhugs ma thag 'chi ba'i dus byas so/ /de la bu med pas de'i nor thams cad rgyal pos khyer ro/ /de'i sdug bsngal gyis gdungs pas chung ma yang shi ste/ de'i phyir rgya cher tshigs su bcad pa 'di gsungs so/ /nor dpag tu med cing khyad par can gyi longs spyod bsgrubs kyang sems can rnams 'chi ba las 'das par mi 'gyur ro zhes bya ba ni bsdus pa'i don to/ /stong nyid yin pas grangs stong ngo / /stong de brgya ni stong phrag brgya pa'o/ /mang po ni du ma ste brgya stong gi grangs gang yin pa'i skyes pa'am bud med de yin te/ des na yang de ltar stong phrag mang po'i grangs zhes bya ba'i don te/ skad cig ma re re la 'khor ba dag tu brgya stong du ma 'chi bar 'gyur bas so/ /skyes pa ni skyes bu'o/ /bud med ni bud med nyid do/ /dang zhes bya ba'i sgra ni brgya stong phrag mang po 'dren pa'i don te de dag 'chi bdag gi drung du 'gro bar 'gyur te rag lus par gyur ces bya ba'i don to/ /ci lan cig yin nam zhe na/ smras pa/ mang po zhes bya ba ste lan du mar ro/ /dmyal ba'i gnas nas yi dwags skye zhing de las sum cu gsum/ /'gro 'gyur de las dge ba nyams te dud 'gro'i skye gnas skye/ /dud 'gro'i las kyang nyams te mi yi 'gro bar skye 'gyur bas/ /las kyis 'phangs pa'i 'gro ba 'phyan cing shing rta'i 'khor lo bzhin/ /ci longs spyod ma thob pas 'tsho ba'i yo byad nyams par 'gyur ram zhe na/ smras pa longs spyod ces smos te/ dbyig dang gser dang yul la sogs pa ni gtsor 'tsho ba'i yo byad yin no zhes bya ba'i don to/ /legs par bsgrubs pa ni yang dag par bsags pa'o/ /'chi bdag ces bya ba ni ris mthun pa rgyun chad pa'i mtshan nyid 'chi ba'o/ /dbang ni de'i bka'i rjes su 'gro zhing rag lus pa'o/ /'gro bar 'gyur ba ni thob pa'o/ /'di yang bdag dang bdag gi la chags pa spangs pa'i phyir bstan to/ /de ni phyi rol dang nang gi dngos po thams cad bsdus te mthar 'jig pa nyid du bstan pa'i phyir smras pa/ bsags pa kun gyi zhes bya ba la sogs pa smos so/ /mnyan yod na tshong dpon bzhi zhig yod pa las gcig ni nor la sogs pa mchog tu 'dzin to/ /gnyis pa ni gnas khang mchog tu byed do/ /gsum pa ni gnyen dang phrad pa mchog tu byed do/ /bzhi pa ni bcud kyis len gyi sbyor ba mchog tu byed par gyur to/ /ji tsam na rgyal pos nor ma lus par phrogs pa dang / khyim mes tshig par gyur pa dang / gnyen dang bral bar gyur pa dang / shi bar gyur nas go rims bzhin du de dag gi dbang du mdzad nas 'di gsungs so/ /yo byad dang bcas par srog 'jig par 'gyur ro zhes bya ba ni 'di'i bsdus pa'i don to/ /kun gyis zhes bya ba ni ma lus pa'o/ /zad pa'i mtha' gang yin pa de ni mtha' zad pa ste/ mthar zad par 'gyur ba dang / mthar 'jig par 'gyur ro zhes bya ba'i don te/ /bsags pa zhes bya ba ni gser la sogs pa'i nor legs par bsgrubs pa'o/ /mtha' ni 'gyel bar 'gyur zhes bya ba ni tha mar zhig par 'gyur ba'o/ /gang yin zhe na/ smras pa/ bslang ba zhes bya ba yin te/ legs par rim gyis bslang zhing bkod pa gang yin pa'i khyim zhes bya ba'i don to/ /gzhan dag na re bslang ba ni lus yin no zhes zer te 'khor dang / longs spyod kyi ched du ni bdag gis bslang ba btang ba ma yin no zhes smon lam gyi tshig gis shes pa'i phyir ro/ /phrad pa ni nye du'i skye bo dang phrad pa'o/ /mthar 'bral zhes bya ba ni de dag spong ba'i phyir ro/ /mthar 'chi ba zhes bya ba ni tha mar 'chi ba ste gang 'di dag sngar bstan pa gcig pur ma zad de 'tsho ba yang ngo / /ni zhes bya ba'i sgra ni nges par gzung ba ste thams cad du ci rigs par sbyar bar bya ste/ mtha' zad cing zhes bya ba la sogs pa la sbyar ba yin pa'i phyir ro/ /de gang yin zhe na/ smras pa/ gson pa ni tshe ste des na gang spyod pa de nor bstsags pa dang gang du spyod pa ste khang pa'i nang du dang / gang gis spyod pa ste lus kyis dang / gang dang lhan cig spyod pa ste pha ma dang / bud smad la sogs pa dang / gang gi phyir spyod pa ste gson pa'i phyir te de thams cad kyang mthar 'jig par 'gyur ro zhes rtogs par bya'o/ /longs spyod la sogs pa dang / khyim dang / lus dang / chung ma dang / gson pas dregs shing bsnyems pa la de spang ba'i phyir 'di gsungs pa yin no/ /gal te kha cig gson pa'i mtha' 'chi bar 'gyur gyi/ thams cad 'chi bar mi 'gyur ro zhe na/ smras pa/ gson mtha' 'chi ba yin pas na/ /zhes bya ba la sogs pa'i tshigs su bcad pa gnyis smos so/ /ko sa lar byung ba'i rgyal po gsal rgyal gyi chung ma sdug cing yid du 'ong ba 'chi ba'i dus byas so/ /des de phyung ste bsregs nas de la mtshun gtor yang byas te nyin re bzhin ngus pas gos dang skra dag gsher bar gyur to/ / ji tsam na de bcom ldan 'das ga la ba der song nas/ btsun pa gal te bdag btsun mo ar+ya'i ka'i phyir 'tsho ba glang po che'i lus thob par gyur te/ glang po che'i lus kyang bdag yongs su btang bar byas la btsun mo ar+ya'i ka'i phyir ji srid du bdag rgyal po byed pa dang / ji srid du bcom ldan 'das kyis legs par gsungs pa mchis kyi bar du'o/ /bcom ldan 'das kyis de'i phyir 'di skad bka' stsal te/ sems can thams cad dang / srog chags thams cad dang / 'byung po thams cad mthar 'chi ba yin zhing 'chi ba mthar 'gag pa yin te/ skyes nas mi 'chi ba med do zhes bya ba'i tshigs bcad kyis rgya cher ro/ /srog chags thams cad ni nges par 'chi ba yin no/ /de la yang rgyu ni kun nas nyon mongs pa'i las kyis yang de dang rjes su mthun pa skye bar 'gyur gyi/ dgra bcom pa ni ma yin no zhes bya ba ni bsdus pa'i don to/ /sems can thams cad ni srog chags ma lus pa'o/ /'chi 'gyur zhing zhes bya ba srog yongs su 'dor bar 'gyur ba'o/ /ci'i phyir zhe na/ 'di ltar srog ni tha mar 'chi ba yin te/ 'dus byas yin pa'i phyir srog ni bum pa bzhin du 'jig par rig pa dang 'di dag gi chos nyid yin pa'i phyir sa'i khams kyi sra ba bzhin no/ /ci srog gi rgyun chad cing skye bar 'gyur ram zhe na/ smras pa/ ji bzhin las zhes bya ba smos te/ las dang rjes su mthun pas las kyi 'bras bu dmigs pa'i phyir nyon mongs pa yang rtogs pa yin te du ba las me bzhin no/ /des na las ji lta ba bzhin du yang 'dir shes par bya'o/ /'di skad du ston pa yin te/ las dang nyon mongs pa ma spangs pa dag ni rjes su 'brang ba yin te/ de'i dbang du 'gro zhes bya ba ni lhag ma'o/ /'dod chags dang bral ba ni ma yin no/ /ji dang ji lta bu'i las byas pa ste legs par spyad pa'am nyes par spyad pas 'phangs pa'i rnam pas de'i gnas su 'gro ba ni rigs pa'o/ /rjes su 'breng zhes bya ba ni 'gro ba'o/ /de gang yin zhe na/ las ji lta ba bzhin 'gro ba de gang gi phyir/ dge sdig 'bras bur nyer 'gro ba'i/ /zhes bya ba smos te/ bsod nams dang sdig pa gnyis kyis legs par spyad pa dang ngan par spyad pa de gnyis kyi 'bras bu la yid du 'ong ba dang yid du mi 'ong ba 'byung bar 'gyur te/ bsod nams dang sdig pa'i 'bras bu ji lta bar nye bar 'gro ba dang / rjes su 'gro ba dang / bsod nams dang sdig pa'i 'bras bu nye bar bsten pas ni yid du 'ong ba dang yid du mi 'ong ba'i 'bras bu la spyod cing ma spangs pa yang skye bar 'gyur zhes bya ba'i don to/ /'di ltar des las dang nyon mongs pa bzhin du yid du 'ong ba dang yid du mi 'ong ba'i 'bras bu nges par myong bar 'gyur te/ des na 'jig rten gzhan dag tu 'brang ba yin no/ / las kyi rgyu can 'dod pa dang mi 'dod pa'i 'bras bu myong ba'i srog 'di ni mi brtan pa yin no zhes shes par byas nas mkhas pa rnams kyis legs par spyod pa la 'bad cing bsgom par bya'o zhes bstan pa'i phyir 'di gsungs so/ /ji bzhin las zhes bstan pa la las gang gis 'gro ba gar rjes su 'brang bar 'gyur zhe na/ smras pa/ sdig pa'i las kyis dmyal ba dang / /zhes bya ba la sogs pa smos te/ bde ba med pa yang so sa la sogs pa'i gnas kyi dmyal ba'o/ /der rnam par smin pa las byung ba'i bde ba med pa'i phyir gcig tu sdug bsngal ba ni dmyal ba'o zhes mdo las gsungs pa'i phyir ro/ /sdig pa'i las gang yin pa de dag ni sdig pa'i las te/ nyes par spyod pa'i las kyis nges par dmyal bar 'gro bar 'gyur te/ dmyal ba ni ngan song gsum ste sogs pa'i sgras phyis pa'am gtso bo smos pa yin no/ /bsod nams byas pas zhes bya ba ni sbyin pa la sogs pa legs par spyad pa bsags pa'o/ /sa zhes bya ba'i sgra ni khyad par gyi don nam yang gi sgra'i don no/ /bde 'gro ni dam pa'am rab tu bsngags pa'i 'gro ba yin pas na bde 'gro ste/ de ni lha dang mi'i 'gro ba zhes bya ba'i bar du'o/ / gang su dag bsod nams byas pa de dag thams cad nyid ci bde 'gror 'gro bar 'gyur ram zhe na/ de ni ma yin pa'i phyir smras pa/ gzhan dag gis ni lam bsgoms pas/ /zhes bya ba smos te/ shin tu bsgom zhing yang dang yang du mngon sum du byas zhes bya ba'i don to/ /gzhan dag ces bya ba ni gang gi phyir gzhan kha cig gis bsod nams lhag par byas pa'o/ /lam ni 'phags pa'i lam yan lag brgyad do/ /mya ngan las 'das par gyur ces bya ba ni song nas nges par byung ba ste/ mya ngan las 'das pa'i grong khyer du 'jug par 'gyur ba'o/ /ji lta bu zhe na/ phung po lhag ma med par 'gro ba yin no zhes bstan pa'i phyir smras pa/ zag med ces smos te/ mthong ba dang bsgom pa'i lam gyis spang bar bya ba'i bag chags spangs nas te/ bag chags lhag ma dang bcas par ni mya ngan las 'da' ba med do/ /'dir sems can las bdag gir byed pa ste/ de yang 'chi bas 'jigs pa la bsgom pa'i lam gyis thar pa yongs su bstan to/ /phung po lhag ma med par gyur pa la ni 'chi bas mi 'jigs pa nyid yin gyi/ gzhan dag la ni ma yin no/ /zhes bstan pa'i phyir/ smras pa/ gang du gnas na zhes bya ba la sogs pa smos te/ phung po lhag ma med pa'am yongs su mya ngan las 'das pa ma yin pa dag ni ji ltar ngos la brten pas dgra las mi thar ba de bzhin du 'chi ba las ni ji ltar yang thar bar mi 'gyur ro zhes bstan pa'o/ /gang du gnas nas zhes bya ba la sogs pa smos so/ /ji ltar du kha ma tri ka zhes bya ba'i blon po skyes bu gti mug can de'i dbang gis rgyal po 'phags skyes pos ser skya'i gzhi la gnod pa bsams te/ de'i tshe las kyi stobs bstan pa'i phyir bcom ldan 'das kyis shAkya'i bu gzhon nu gnyis ni zla ba'i dkyil 'khor gyi nang du gzhag go/ /gnyis ni rgya mtsho'i nang du gzhag go/ /gnyis ni ri rab kyi gseb tu gzhag go/ /gnyis ni nyid kyi lhung bzed kyi nang du gzhag pa las shAkya rnams bsad par gyur pa dang shAkya'i bu de dag kyang shi bar gyur to/ /nye 'khor na gnas pa'i nye gnas rnams kyi ched du mdzad nas tshigs su bcad pa 'di gsungs so/ /de thos pas sems can stong phrag brgyad cus chos mngon par rtogs par gyur to/ /de la bsdu na ni gnas gsum ste/ nam mkha' dang / chu dang / thang ngo / /thang la yang rnam pa gnyis te/ ri dang / sa'i steng ngo / /'dir gnas pa de dag thams cad du yang shi ba las thar bar ma gyur to zhes bya ba ni bsdus pa'i don to/ /yan lag gi don ni med ces bya ba ni gcig tu dgag pa'o/ /mi tshugs pa zhes bya ba 'di ni gcig tu gnod pa byed pas so/ /gang du gnas pas yin zhe na/ bar snang la zhes smos te bar snang gi dkyil te gang la skar ma dang rgyu skar yod pa ste nam mkha' zhes bya ba'i don to/ /rgya mtsho'i nang ni chu gter gyi gting du'o/ /ri bo rnams ni gang ri rab la sogs pa dang 'brel pa'i gseb ste phug la sogs pa'o/ /zhugs pa ni song nas gnas pa zhes bya ba'i don to/ /yod pa ma yin te zhes bya ba ni med pa'o/ /de zhes bya ba ni 'og nas smos pa'i sa phyogs te/ sa'i cha zhes bya ba'i don to/ /gang du gnas zhes bya ba ni sa phyogs de na gnas pa ste/ srog chags zhes bya ba ni tshig gi lhag ma'o/ /mi tshugs pa ni zil gyis mi non pa dang mi thub pa'o/ /'chi bas zhes bya ba ni 'chi bdag gis so/ /'chi ba'i 'jigs pa de ni thams cad na yang yod pa nyid de/ de bas na des 'jigs pa rnams kyis lam nyid bsgom par bya'o zhes bstan pa'i phyir 'di gsungs so/ /gal te da ltar byung ba'i dus nyid la 'chi ba'i 'jigs pas mngon par gtses pa yin gyi gzhan dag tu ni ma yin no zhes rtog pa la de bstan pa'i phyir smras pa/ byung dang zhes bya ba la sogs pa smos so/ /mnyan yod du skye dgu'i bdag mo chen mo gau ta mi dus las 'das nas/ bcom ldan 'das nyan thos kyi dge 'dun dang bcas pa der gshegs te/ 'di ltar 'du byed thams cad ni 'di lta bu'i chos can yin no zhes bya ba la sogs pas chos bstan to/ /ji tsam na 'char kas bcom ldan 'das la 'di skad ces gsol to/ /bcom ldan 'das ji ltar mya ngan mi mdzad/ de ci'i phyir zhe na/ 'di ni bcom ldan 'das kyi yum sru gso zhing skyed pa lags na zhes zhus pa dang 'di gsungs so/ /gang 'jigs pa shes par bya ba lus 'di spang ba'i 'jigs pa dang / gang shes par byed pa ji lta ba bzhin du shes pa'i mkhas pa dang / gang la brten nas shes par bya ba'i sangs rgyas kyis bstan pa'i chos dang / gang bya ba'i tshangs par spyod pa spyad pa ste/ 'dis ni 'di bzhi ston to zhes bya ba ni bsdus pa'i don to/ /byung ba zhes bya ba ni gang sems can gnas par gyur pa de'i gnas skabs kyi sgrub pas 'gro ba sems can dang 'brel pa'i bya ba'i ming yin pa'i phyir te lus 'di btang nas zhes bya ba'i tshig gis so/ /'byung bar 'gyur ba ni skye bar 'gyur ba ste/ ma 'ongs pa'i dus na yang sangs rgyas de bzhin no zhes pa'i tshig gis so/ /dang gi sgra ni bsdu ba'i don to/ /byung ba dang 'byung bar 'gyur ba zhes bya ba'i don to/ /'gro ba zhes bya ba'i don ni 'jig rten pha rol du'ang mya ngan las 'das pa ste/ ji bzhin las kyis zhes bya ba ji skad du sngar bstan pa yin te sdig pa'i las kyis dmyal ba dang zhes bya ba la sogs par ro/ /gang dag byung bar gyur pa de yang 'gro ba yin te/ byung ba 'das par gyur pa yin pa rtogs pa'i phyir te de'i dus kyis gdul bya gzhan dag 'das te yang ldog pas ma bstan to/ /ci zhig spangs nas 'gro ba'am 'das par gyur pa yin zhe na/ smras pa/ lus 'di btang nas zhes smos te/ zin pa'i lus 'di spangs pa'o/ /de kun 'jig par zhes bya ba ni thams cad 'jig cing mi rtag pa nyid de/ de nyid kyi rnam pas thams cad 'das pas ni mi rtag pa'o/ /de sus rtogs pa yin zhe na/ mkhas pas te blo dang ldan pas so/ /rtogs pa ni khong du chud par bya'o/ /gang du gnas nas rtogs pa yin zhe na/ des smras pa/ chos la gnas kyis zhes bya ba smos te/ skyes bu dam pa la brten cing dam pa'i chos nyan pa dang / tshul bzhin yid la byed pa dang / so so thar pa'i sdom pa la sogs pa'i tshul gyis tshogs la rigs pas 'jug pa'o/ /de la gnas nas ci zhig byed ce na/ smras pa/ tshangs par spyod pa zhes bya ba smos te/ 'phags pa'i lam tshangs pa'i 'bras bu'i spyod pa ni tshangs par spyod pa ste/ mya ngan las 'das par 'gro ba la 'bad cing lam bsgom pa zhes bya ba'i don to/ /spyod ces bya ba ni sgoms shig ces bya ba yin te/ ji skad du gsungs pa/ tshul khrims la brten cing tshul khrims la rab tu gnas pas ni chos nyid bsgom par bya ste/ zhi gnas dang lhag mthong ngo zhes bya'o/ /mi rtag pa las bzlog par 'dod pas ni tshogs kyi lam la 'bad par bya'o zhes bstan pa'i phyir 'di gsungs so/ /'gro ba rnams la rga ba dang mi rtag pas nye bar gtses pa mthong nas tshogs kyi lam la sogs pa la nan tan du bsgrub pa dang / mkhas pa rnams kyis 'bad pas brtsam par bya'o zhes bstan pa'i phyir smras pa/ rga ba zhes bya ba la sogs pa smos so/ /bram ze zhig gis bcom ldan 'das la kye gau ta ma khyod kyis 'dod pa rnams spang ba dang yang bar bya'o zhes bstan to/ /zhes bdag gis thos na btsun pa 'di ltar 'dod pa rnams yid du 'ong ba yin yang ci ltar yongs su spang bar bya zhes zhus pa las/ de la bcom ldan 'das kyis bdag nyid drang ba'i phyir gtam rgya cher mdzad de 'di gsungs so/ /gzhan dag ni 'jig rten pa'i chos ni bzhi ste/ sdug pa/ dben pa/ phangs pa/ yid du 'ong ba'o/ /de thams cad kyang tha mar 'jig pa yin no zhes bya ba la sogs pa'o zhes so/ /ci nas kyang rga ba la sogs pa mthong nas ni 'dod pa rnams spong ste gang spong ba ni bstan pa'o/ /gang la 'jig rten pa rnams kyis ni de dag spang bar shin tu dka' ba yin te/ 'dir gsum po 'di dag ma mthong bas zhes bya ba ni bsdus pa'i don to/ /rga ba'i zhes bya ba ni rga bas zil gyis gnon pa'i sems can no/ /mthong ba ni kun du snang ba'o/ /nad kyis sdug bsngal dang zhes bya ba ni tshor ba mi bzad pas yongs su nyam thag pa'o/ / glo bur du byung ba dang lhan cig skyes pa'i nad kyis te/ go rims bzhin du sbyar ro/ /dang gi sgra ni mthong ngo zhes bya ba 'dren pa'i don to/ /shi ba mthong nas ni zhes bya ba ni dus las 'das pa'o/ /ni zhes bya ba'i sgra ni rnam pa gsum gyis mthar phyin pa bstan pa'i phyir ro/ /shi ba'i rang bzhin smras pa/ sems dang bral ba'i zhes bya ba smos pa ni rnam par shes pa spangs pa zhes bya ba'i don to/ /gtsor 'di smos pa yin gyi tshe dang drod dang yang bral bar bsgrub pa yin te/ ji skad du gsungs pa/ tshe dang drod dang rnam shes kyis/ /gang tshe lus 'di spangs pa na/ / de tshe sems med shing bzhin du/ /sa yi steng du bor bar 'gyur/ /zhes bya ba'i tshig gis so/ /'di la 'jig rten pha rol la dmigs nas skyo ba'i gzhis brtan pa gang byed pa de ston pa yin te/ spangs pa ni dor ba'o/ /brtan pa ni mkhas pa ste 'dod pa'i nyes dmigs shes pa'o/ /gang gi phyir ma rtogs pa ni brtan pa mi 'byung ba'i phyir ro/ /ci zhig spangs pa yin zhe na/ btson ra 'dra ba'i khyim zhes bya ba smos te/ khyim la sogs pa yongs su gzung ba la gang 'dun cing chags pa de ni btson ra 'dra ba'i khyim ste/ des der byis pa 'ching bar byed pa yin te/ khyim gyi nyes dmigs yul gyi 'ching ba des 'khor bar gnas pa'i phyir ro/ /de yang rgyu gang gis brtan pa nyid spong gi gzhan ma yin zhe na/ smras pa/ 'dod spang zhes bya ba yin te/ 'dod pa ni 'dun pa'i 'dod chags de'i yul lam/ gzugs sdug pa la sogs pa'o/ /bas zhes bya ba ni gang gi phyir yul ring por 'jig rten pa 'dod pa dag la goms te/ des na brtan pa ma yin pas spong bar mi nus pa yin no/ /'jig rten pa ni zhes bya ba ni so so'i skye bo ste/ yul dag la brkam pa ni 'jig rten te yul la brkam chags can zhes bya ba'i don to/ /nus re skan zhes bya ba ni bde bas spong bar mi nus te spang bar dka'o zhes bya ba'i don to/ /byung ba gnyis pa la brten nas ni rga ba dang / sdug bsngal ba dang / nad dang shi ba'i sgras ni lang tsho dang phun sum tshogs pa dang / nad med pa dang / srog gi rgud pa bstan te/ lhag ma ni snga ma bzhin no/ /gzhan gyi rgud pas skyo bar bya ba'i phyir gnas yin te/ des na yang dang yang du blta bar bya'o zhes bstan pa'i phyir 'di gsungs so/ /rga ba la sogs pas ni nang dang phyi rol gyi dngos po dag la phal cher mnyam par gtses par bstan pa'i phyir/ smras pa/ rgyal po'i shing rta zhes bya ba la sogs pa smos so/ /rgyal po chen po chos gsum po 'di dag ji srid yod kyi bar du 'jig rten dag la mi 'dod pa yin te/ gsum po 'jig rten la yod pa yang 'di lta ste/ nad dang / rga ba dang / 'chi ba'o/ /de bzhin gshegs pa dgra bcom pa yang dag par rdzogs pa'i sangs rgyas 'jig rten du byung bar gyur na ni ma yin te/ de bzhin gshegs pas gsungs pa'i chos 'dul ba la sogs pa bstan pa med par ni shes rab kyis skyo ba med pa'o zhes bya ba la sogs pa mdo las gsungs so/ /tshigs su bcad pa 'di ni rgyal po gsal rgyal gyi dbang du mdzad nas gsungs so/ /gzhan dag na re btsun mo phreng ldan ma lang tsho'i dregs pas bsnyems te/ rgyal po'i shing rta la zhon nas 'ongs pa dang 'khor dang bcas pa'i dbang du byas pa yin no zhes zer ro/ /'di'i bsdus pa'i don ni/ gang yang dor bar bya ba phyi dang nang gi dngos po rga ba'i chos can te/ gang gzung bar bya ba de'i gnyan por gyur pa'i chos zhes bya ba de yongs su bstan pa yin no/ /'jig pa ni rga bas rnam par 'gyur ba'o/ /'ang ni 'jig rten pa nyid de nges par 'chi ba yin gyi/ 'dir gzhan du mi 'gyur ba'o zhes bya ba'i don to/ /de gang yin zhe na/ smras pa/ rgyal po'i shing rta ste dbang phyug dam pas yongs su bsrungs pa yang rnam par 'jig par 'gyur na/ gzhan dag lta smos kyang ci dgos zhes ston to/ /yo byad med pa ma sbyar ba ni nges par 'jig par 'gyur ba yin no zhes smras pa/ shin tu bkra ba zhes smos te/ a ni dang / nor bu rin po che dang / pags pa dang / la ba dkar po la sogs pas legs par sbyar ba ste/ chas pa yin yang zhes bya ba'i don to/ /shing rta'i theg pas rgya che ba nyid yin pa'i phyir de la nye bar gnas pa yang bstan te/ phyi rol gyi dngos po thams cad nye bar 'gyur ba nyid du nye bar mtshon pa'o/ /de bzhin zhes bya ba ni de ltar te/ ji ltar rgyal po'i shing rta legs par bkod pa yang 'jig par 'gyur ba de bzhin du lus kyang yongs su bsrungs su zin kyang rga ba nye bar 'gro ste/ rnam par 'gyur bar nye bar 'gro zhes bya ba'i don to/ /'dis ni nang gi dngos por 'gyur ba bstan to/ /gal te gzugs dang lus rga bar 'gyur ba yin na de lta na gang rga bar mi 'gyur zhe na/ smras pa/ dam pa rnams kyi chos zhes bya ba yin te/ sangs rgyas dang / sangs rgyas kyi nyan thos rnams kyi chos kyi sku'o/ /kyang gi sgra ni khyad par gyi don to/ khyad par de nyid smras pa/ rgas mi 'gyur zhes bya ba ni rnam par 'gyur ba'i gnas ma yin te/ thams cad ni rnam par 'gyur ba'i gzhi yin mod kyi chos kyi sku ni ma gtogs so/ /de rga bar mi 'gyur bar ji ltar shes pa yin zhe na/ smras pa/ dam pa ste zhes bya ba smos te/ gang gi phyir skyes bu dam pa rnams ni phyin ci ma log pa'i chos rtogs shing gzhan dag la ston par byed pas so/ /gal te yang chos kyi sku de lus bzhin du rga bar gyur na ni de rga zhing rnam par gyur te nus pa zad pa'i phyir nus pa chung bas dam pas mi mchog dag las rtogs par byed pa dang rtogs par mi nus so/ /'di zhes bya ba ni chos so/ /mi mchog gzhan zhes bya ba ni snod du gyur cing skal ba dang ldan pa dag go/ /rtogs par byed ces bya ba ni khong du chud par byed pa'o/ /yang na gcig la gcig gtod par byed pa yin te/ bstan pa'i chos dang mngon par 'brel ba'i phyir 'di ltar skyes bu dam pa dag gis sde snod gsum brgyud de/ byin pa'i tshul gyis skyes bu dam pa dag nyid la bstan pa'i chos gnas par bya ba yin te/ des na ji srid 'jig rten du 'phags pa bzhugs pa de srid du chos de yang gnas pa yin no/ /rnam pa gzhan du na ma bshad du zin kyang don de shes rab dang tshul khrims dang / ting nge 'dzin gyi rang bzhin gyi sde snod gsum gyi don ni gnas pa yin pa'i phyir ro/ /gzugs dang lus la mos pa rnams la sangs rgyas kyi chos kyi sku la mos pa dang / dang ba bskyed pa'i phyir 'di gsungs so/ /gang gi phyir rga ba ni thams cad du bye brag med par 'jug cing gzugs mi sdug par byed pa yin te/ des na smad pa'i phyir smras pa/ rga ba khyod ni blun zhing ngan/ /zhes bya ba la sogs pa smos so/ /bcom ldan 'das gyos po'i gnas kun dzi ka zhes bya ba na bzhugs te/ de nas bcom ldan 'das dgun gyi dus su nyi ma la sku rgyab gtad de gdugs bsnams shing bzhugs pa la/ tshe dang ldan pa 'char ka bcom ldan 'das kyi sku rdzi bcag byed cing zhus pa/ btsun pa bcom ldan 'das kyi sku sngon ni gya nom zhing / gya nom par gnas pa lags so zhes gsol ba dang / ji tsam na bcom ldan 'das kyis bka' stsal pa/ rga ba khyod ni zhes bya ba la sogs pa smos so/ /'dir smad pa nyid dang / smad par bya ba dang / smad par byed pa gsungs so/ /khyod ni ngan zhes bya ba ni smad pa'i tshig yin pa'i phyir ro/ /rga ba zhes bya ba ni smad pa'i dngos po bstan pa yin no/ /blun zhing khyod ni mi rigs zhes bya ba la sogs pa ni smod par byed pa'i rgyu yin no zhes bya ba ni bsdus pa'i don to/ /ngan pa ni smad pa'o/ /gang gi dbang du byas te ngan pa zhes smad ce na/ smras pa khyod ni zhes bya ba rga ba ste/ rga ba khyod la smad par bya bar 'gyur zhes bya ba'i don to/ /gang la smad par bya ba de la bod pa'i tshul gyis bstan pa'o/ /rga ba ni lus mi sdug par byed pa ste/ gang gi phyir smad pas smad pa'i tshul du byas pa'o/ /blun pa zhes bya ba ni blun pa las skyes pa yin pas blun pa ste/ rga ba las bye brag mi shes pa zhes bya ba'i don to/ /mi rigs pa byed pa'i phyir yang blun pa yin te/ ci'i phyir zhe na/ blun pa 'dis ni 'di ltar thams cad la khyod mi rigs pa byed pa yin te/ lus sdug pa dang bral bar byed ces bya ba'i don to/ /de ltar thams cad du mi rigs pa byed par ji ltar shes par bya zhe na/ smras pa/ yid du 'ong ba'i gzugs 'di yang zhes bya ba smos te/ de ltar sangs rgyas bcom ldan 'das kyi sku yid du 'ong ba gang bsod nams dang ye shes kyi tshogs chen po bskal pa grangs med pa gsum du bsags pas skyes bu chen po'i mtshan sum cu rtsa gnyis dang / dpe byad bzang po brgyad cus rnam par mdzes pa de lta bu'i yid du 'ong ba'i 'jig rten na de las ches yid du 'ong ba ni cung zad kyang med de/ de khyod kyis mngon par bcom par byas pa'o/ /'di yang zhes bya ba ni de lta bu'o/ /yid mngon par dga' bar byed pa yin pas yid du 'ong ba ste sems dga' ba'o/ / gzugs ni lus so/ /khyod kyis zhes bya ba ni rga bas te/ gang 'di ltar mngon par bcom pa ste zil gyis mnan pa'o/ /de ltar thub pa mchog sems can thams cad las khyad par du gyur pa'i sku la yang rga ba'i chos yod na/ gzhan dag gi lta smos kyang ci dgos zhes bstan to/ /lus la lhag par chags pa spang ba'i phyir 'di gsungs so/ /'dir rga ba 'ba' zhig gis gtses par ma zad de 'chi ba la sogs pas kyang gtses pa yin no zhes bstan pa'i phyir gang zhig lo ni brgyar zhes bya ba la sogs pa smos so/ /mnyan yod na tshong dpon chen po shin tu tshe ring ba zhig nad dang rga bas mngon par gtses te shi ba las bsod snyoms la song ba dag gis shes te de lta bu'i gtam bcom ldan 'das kyis dge slong de dag las gsan te/ bcom ldan 'das kyis 'di gsungs so/ /gang gi tshe 'chi bar 'gyur ba ni dus dang dus ma yin par yang 'chi ste/ ji ltar nad dang rga bas phal cher 'chi bar 'gyur ro zhes 'dir ston to zhes bya ba ni bsdus pa'i don to/ /gang zhig ces bya ba ni gang la la ste thams cad kyang mthar 'chi ba yin no/ /yang gi sgras ni dus ma yin par yang 'chi bar ston to/ /lo brgya zhes bya ba ni lo brgya ste/ dus tshigs brgya zhes bya ba'i don to/ /gang zhig dus 'di ji srid du 'tsho bar gyur ba de yang 'chi bdag nyid kyis khrid pa yin te/ nges par 'chi ba yin no zhes bya ba ni yang gi sgra'o/ /nges pa med de gang zhig lo brgya 'tsho ba yang ste/ lo stong dang 'brel ba med pa 'di ni dus de tsam du yang sems can de 'chi ba las phyogs par nges pa zhes bya ba'i don to/ /ji ltar 'chi bdag gis khrid ce na/ smras pa/ 'di dag ces bya ba ni rjes su 'gro ba'am rjes su 'brang ba ste srog chags so/ /gang yin zhe na/ smras pa/ rga ba zhes bya ba yin te/ rga bas 'joms shing gnod par byed pa ste/ gang lo brgya tshang bar lon pa de ni rga bas bcom pa ste gzugs rnyed par byas shing che'i gnas med pa ste smin pa'i 'bras bu bzhin no/ /gang ma tshang bar nad kyis bcom pa ni 'di nyid yin no zhes bstan pa'i phyir/ yang na na ba'am zhes smos te/ la la 'dod chags bdo bas kyang 'joms par 'gyur ro/ /yang na zhes bya ba ni rnam pa gnyis su brtag pa ste/ rga ba ma byung bar yang gang la la dag nad kyis bcom ste shi ba yin no zhes thos te/ dper na 'phags pa pi lin nga'i bu la sogs pa lta bu ste shing tog ma smin pa dbyig pas bsnun pa lta bu'o/ /de gnyi ga med cing mi rtag pa ni sngon gyi las kyi dbang gis 'chi bas 'joms par 'gyur te/ gang tshe thung ba'i las 'dzin par 'gyur ba de bstan pa'i phyir smras pa/ 'chi bas 'joms zhes bya ba smos te/ yang na 'chi bdag nyid kyis 'di dag 'joms par 'gyur ro zhes pa'i don te/ mngal la sogs pa na yang 'chi ba yod pa'i phyir ro/ /nad dang rga ba ni bcud kyis len la sogs pas de bcos su yod kyi/ 'chi ba ni ma yin no zhes bstan to/ /srog dang nad med pa dang lang tsho'i dregs pas dregs pa rnams la de'i dregs pa spang ba'i phyir 'di gsungs so/ /'dus byas rnams ni 'jig pa'i rgyu la ma brten par skad cig mas 'jig pa yin te/ rang bzhin gyis 'jig pa yin no zhes bstan pa'i phyir smras pa/ rtag tu 'gro zhes bya ba la sogs pa smos te/ a yo rgya ya zhes bya ba'i grong khyer chu bo gang gA dang nye ba na/ nya pa shin tu rgas shing 'khogs pa zhig gnas te nya gson dag bye thang gi steng du chu rab tu khol ba dag yod pa'i nang du brtse ba med pas bcug ste/ de ltar 'gul ba la lta zhing dga' ba dang dgod pa gzigs te/ de'i dbang du mdzad nas tshigs su bcad pa 'di dag gsungs so/ /sems can 'di dag ni rgyun mi 'chad cing ldog pa med pas 'chi ba'i drung du skad cig ma'i rgyun gyis 'gro ba yin no zhes bya ba ni bsdus pa'i don to/ /rtag tu zhes bya ba ni gnas skabs thams cad du 'chi bdag gi drung du 'gro ba yin te/ byis pa dang / gzhon nu dang / lang tsho dang / bar ma dang / rgan pa'i gnas skabs gzhan du 'thob pa yin pas rtag tu 'gro ba nyid yin zhing gnas skabs gang du yang mi sdod pa'o/ /ci re zhig na ldog par yang 'gyur ro zhe na/ smras pa/ ldog pa med pa zhes bya ba smos te/ 'dis ni nges par gzung ba'i 'bras bu bstan te/ gnas skabs phyi mar song bas gnas skabs snga mar mi gnas pa yin no/ /gal te mtshan mo dang nyin mor ldog par mi 'gyur ram zhe na/ smras pa/ nyin dang mtshan du zhes bya ba smos te/ nyin zhes bya ba ni nyin par te/ mtshan mo yang yin no/ /zla ba phyed dang / zla ba dang / lo la sogs pa 'di ni rnam grangs yin pa'i phyir de tsam du bshad do/ / rab tu 'jig pa zhes bya ba ni skad cig ma re re la gzugs dang nad med pa dang stobs la sogs pa'i khyad par yongs su zad pa zhes bya ba'i don to/ /'di dag gis ni na tshod kyi gnas skabs nyin bar dang mtshan mo re re la skad cig mas mi rtag pa nyid du bstan to/ /lhag mas ni sdug bsngal gyis sdug bsngal ba nyid du bstan pa'i phyir smras pa/ chu tshan zhes bya ba smos pa ni las 'dzin pa'i bsdu ba ste/ chu yang yin la tsha ba yang yin pas chu tshan te/ chu de'i nang du bskol ba zhes bya ba'i don to/ /yang na gang la chu tsha ba yod pa'i thang ste/ rab tu bskol ba'i chu'i nang du'o/ /nya dang 'dra ba zhes bya ba ni ji ltar nya lta bu'o/ /gdungs pa zhes bya ba ni bskol ba'o/ /ji ltar nya chu tshan gyi nang du bcug ste bskol ba de bzhin du sems can 'di dag kyang rab tu sdug bsngal ba yin no/ /sems can 'di dag ji ltar sdug bsngal ba yin zhe na/ smras pa/ skye dang 'chi ba'i zhes bya ba smos te/ sdug bsngal ba ni 'du byed la sogs pa mi 'dod pas so/ /sdug bsngal gyi rang bzhin nyid smras pa/ skye dang 'chi ba'i zhes bya ba ste/ 'khor ba yin pa'i phyir ro/ /'khor bas ni skye ba dang 'jig pa mtshon pa'i phyir te/ gnyis pa 'khrul 'khor dang 'dra bas 'gro ba rnams gzir ba yin te/ sdug bsngal gsum dang ldan pa'i phyir rigs dang ldan pa dang 'byor ba dang lang tsho la sogs pa yid du 'ong ba'i dngos po rnam par 'gyur ba nyid du bstan pas 'khor ba la lhag par chags pa spang ba'i phyir tshigs su bcad pa 'di gsungs so/ / dus thams cad dang spyod lam thams cad du srog 'gag pa nyid du 'gyur ba'i phyir smras pa/ tshe 'di nyin dang mtshan mo zhes bya ba la sogs pa smros so/ /ri gangs can gyi gnas na drang srong lnga brgya rga ba dang 'chi ba med par bya ba'i phyir dka' thub spyod cing 'dug go/ /de 'dul ba'i phyir bcom ldan 'das der gshegs te/ 'dod pa la rnam par rtog pa la sogs pas ni ngan song du 'gro'o zhes bstan cing skyo ba skyed de/ ri kha ba can gyi phyogs ri'i steng nas 'og tu gang gA'i chu rgyun 'bab pa la gzigs shing srog la mi 'chi bar bag phab ste 'dug pa de'i dbang du mdzad de 'di gsungs so/ /rtag tu rgyun mi 'chad par tshe zad pa yin no zhes bya ba ni bsdus pa'i don du bstan to/ /tshe ni srog go/ /nyin dang mtshan mo ni nyi ma dang mun pa'o/ /'dis ni dus thams cad du tshe zad par bstan to/ /'gro ba dang ni zhes bya ba ni gal te 'gro na yang grib ma bzhin no/ /'dug pa na zhes bya ba ni dbugs 'byung ba dang rngub pa bzhin te/ 'dug pa na yang lus kyi gnas skabs thams cad du ste/ g.yo ba dang mi g.yo ba'i gnas skabs lus kyi spyod lam thams cad yongs su gzung ngo / /'dir dpe bstan pa/ chu klung chen po'i zhes bya ba la sogs pa smos te/ rgyun ni chu'i rgyun no/ /chu klung chen po ni chu bo gang gA la sogs pa'o/ /bzhin du zhes bya ba ni dpe'o/ /'gro bar 'gyur zhes bya ba ni thug pa med par 'gro bar bstan pa yin te/ tshe ni chu klung chen po'i chu bzhin no/ /phyir mi ldog par zhes bya ba ni tshe 'das par yang ldog pa med pa'i phyir ro/ /chu klung chen po dang 'dra bar ni sems can no/ /rgyun lta bu ni tshe'o/ /ji ltar gnas skabs thams cad du chu bo chen po'i rgyun 'gro zhing ldog pa med pa de bzhin du tshe yang de lta bu'o zhes bstan pa yin no/ /tshe rtag pa yin no zhes rtog pa spang ba'i phyir 'di gsungs so/ /chos kyi sku ni rtag pa nyid de mchog tu 'gyur ba med pa dang 'dod pa'i 'bras bu yin pa'i phyir te/ gzugs kyi lus ni ma yin no zhes bstan pa'i phyir smras pa/ gson mtha' zhes bya ba la sogs pa smos so/ /mnyan yod na u ta ra zhes bya ba'i gnas brtan na tshod lo brgyad cu tsam lon pa las rab tu byung ba rga ba dang nad kyis shin tu gtses shing nyam thag ste/ stan las ldang ba dang rtsol ba la sogs pa mi nus pa zhig yod de khyad par du de'i dbang du mdzad nas 'di gsungs so/ /lang tshos dregs pa spang phyir dang / /rga ba dang nad kyis 'jig cing 'chi ba dang / mi gtsang ba nyid du bstan pa ni 'dir bsdus pa'i don to/ /yongs su rga ba dang zhes bya ba ni rga bas yongs su nyams shing bcom pa zhes bya ba'i don to/ /lus 'di zhes bya ba ni zin pa'i phung po'o/ /nad kyi tshang zhes bya ba ni nad kyi gnas so/ /myur du 'jig cing zhes bya ba ni rang bzhin gyis 'jig pa nyid du 'dis bstan to/ /mchog tu 'jig pa'i ngang tshul gyi gzhi yin te rkyen tshogs pa nyid kyis 'jig pa'i bdag nyid de ji ltar las spyod pas yan lag dang nying lag rnams la mtshon la sogs pas lus bcad pa la sogs pa yod pa'i phyir ro/ /'jig par 'gyur zhes bya ba ni bral ba ste/ gzugs kyi lus dang ming gi tshogs bral ba'i phyir te/ 'dis ni 'chi ba nyid ston to/ /'dis dus ji srid gnas pa'i dus de srid kyi bar du gtsang ba dang dri zhim pa'i rdzas 'dus pa'i bdag nyid yin nam zhe na/ de yang med par bstan pa'i phyir smras pa/ rnag gi tshogs kyang zhes bya ba smos te/ dri nga ba'i rdzas bsags pa zhes bya ba'i don to/ /sgra ba dag tshogs ni lus so zhes brjod pas rnag gi tshogs ma yin pa'i zhes gzhan du brjod par 'gyur te/ dri nga ba'i rdzas 'dus pa yin pa'i phyir 'di ni lus ma yin pa yang 'jig par 'gyur ro zhes bya ba'i don to/ /ci'i phyir 'di ni nges par 'jig pa yin zhe na/ mtha' 'chi ba yin pa'i phyir zhes bya ba smos te/ gang gi phyir srog thams cad ni mthar 'chi ba yin pa'i phyir ro/ /chos nyid kyi rigs pa smras pa/ ji ltar me ni tsha ba'i bdag nyid ces bya ba la sogs pa yin te/ gang gi phyir srog yod cing lus gnas pa yin pa'i phyir 'di ni srog 'jig pa yin te/ des na gnas nyams na gnas pa nyams pa'i phyir nges par 'jig par 'gyur ro/ /lang tsho la sogs pas dregs pa dag la de spang ba'i phyir 'di gsungs so/ /'jig par 'gyur ro zhes bstan pa la 'di ji ltar 'jig par 'gyur zhe na/ smras pa/ kye ma lus 'di mi thogs par/ /zhes bya ba la sogs pa smos so/ /mnyan yod na bcom ldan 'das dur khrod du gshegs shing rgyu ba na phyogs 'ga' zhig na shi ba'i ro myags pa dag gzigs te/ rgyal po la sogs pa rigs mtho ba las rab tu byung ba dag zhag bdun gyi 'og tu nges par 'chi ba las brtsams te 'di gsungs so/ /lus 'di mi rtag pa nyid dang stong pa nyid du yongs su bstan pa yin no zhes bya ba ni bsdus pa'i don to/ /mi thogs pa zhes bya ba ni yun ring por mi thogs pa ste zhag bdun tsam gnas pa yin pa'i phyir srog ni myur du 'chi ba'i chos nyid du bstan pa'o/ /kye ma zhes bya ba ni srog chags dang / de'i lus la snying brtse ba dang rjes su brtse ba yin pa'i phyir ro zhes bstan pa yin no/ /lus 'di zhes bya ba ni zin pa'i phung po'o/ /sa'i steng du zhes bya ba ni dur khrod la sogs pa'i sa phyogs so/ /'gyel bar 'gyur zhes bya ba ni lhags pa ste/ sa'i steng du lhung zhing gnas pa'i don to/ /stong zhing zhes bya ba ni gnas pa gsum dang bral ba ste/ bdag med pa zhes bya ba'i don to/ /'o na rnam par shes pa'i bdag de yang mi gnas sam zhe na/ smras pa/ rnam shes dang bral nas zhes bya ba smos te/ bral ba ni so sor bral ba ste/ rnam par shes pa 'di las bral zhing sems dang bral ba'i don te/ ji skad du/ tshe dang drod dang rnam shes kyis/ /gang tshe lus 'di spangs pa na/ /dper na sems med shing bzhin du/ /sa yi steng du nyal bar 'gyur/ / zhes so/ /bdag med cing rnam par shes pa dang bral ba'i phyir 'chi ba yin no zhes rtogs par bya'o/ /'dir dpe bstan pa/ dur khrod bor ba zhes bya ba yin te/ dur khrod bor ba'i mgal dum bzhin/ /zhes bya ba la/ dgos pa med pa'i shing yin te/ /skyes bu shing gi bsags pa byed par 'dod pas nags tshal du zhugs te/ shing drang po bcad cing blangs nas lhag ma khong stong dang rul pa dgos pa med cing / snying po med pa'i shing ni yongs su 'dor ba yin no/ /dper na nags tshal dag na dgos pa med pa'i shing dag bor na spyod pa med cing gnas pa de bzhin du lus 'di yang rang bzhin gyis bdag gis stong la rnam par shes pa dang bral zhing 'chi ba'i gnas skabs na g.yo ba med cing dur khrod kyi phyogs na 'gyel bar 'gyur ba yin no/ /gzhan dag ni mgal me'i dum bu yin no zhes 'dod de/ sdug pa'i lag mthil gyis gzung dri zhim phreng ba phye ma'i dris mchod cing / /bde ba'i lus 'di dur khrod gnas su mgal dum ltar ni yongs bor nas/ /gdug pa'i gcan gzan brkam pa'i mthus ni mig dag sha lpags snag gu dag /'jig par byed de ngan pa'i rang bzhin mi brtan 'jig rten sgyu ma bzhin/ /zhe'o/ /gzhan dag ni sog mar 'dod de/ ji skad du/ ji ltar btab kyang rung ste sa bon ni/ /bsod nams can gyis lo tog mang po thob/ /bsod nams med na ser bas bcom 'gyur te/ /mgal dum tsam yang 'thob pa ma yin no/ /zhes so/ /lus 'di ni tha mar dur khrod pa yin no zhes bstan pa ste/ de la lhag par zhen pa rnams spangs pa'i phyir 'di gsungs so/ /des na yang lus 'di ni nges par dur khrod kyi gnas yin te/ 'dis ni 'tsho bar gyur na yang mkhas pa rnams kyis dgos pa med do zhes bstan pa'i phyir smras pa/ rgyun du zhes bya ba la sogs pa smos te/ rma'i sgo nas rab tu 'dzag cing gsher ba dang nye du dang sman pa rnams kyis spangs shing bzhi mdor bor ba mdze can zhig gzigs te/ dge slong rnams la bka' stsal pa/ dge slong dag 'di ni nyes pa mang pos ma rung ba ste/ lus ni byas pa chud gzon pa dang dri nga ba yin no zhes rgya cher gsungs so/ /dge slong zhig gis bcom ldan 'das la 'di skad ces gsol to/ /btsun pa de ltar lus 'di ni shin tu ma rung ba lags te/ shin tu smad cing phyag dar gyi phung po lta bu lags so/ /dge slong dag de de bzhin no/ /de de bzhin te zhes bya ba la sogs pa ste/ tshigs su bcad pa gnyis gsungs so/ /gang gi phyir sems can 'di dag brtag par bya na 'di ltar lus 'di la phal cher 'dod pas chags shing gang mi gtsang ba dang / sdug bsngal ba dang mi rtag pa nyid yin te/ de la rgyu gang gis 'dir gtsang ba dang / bde ba dang / rtag pa'i phyin ci log gi gnyen po 'dir bstan to zhes bya ba ni bsdus pa'i don to/ /yang na bstod pa dang / smad pa la sogs pa gsal bar byed pa'i don te/ gang smras pa/ dor ba cir mi rung zhes bya ba ni smad cing bshud pa'i tshig yin no/ /'di zhes bya ba ni zin pa'o/ /smad par bya ba nyid smras pa/ lus zhes bya ba smos te/ dri nga ba'i rdzas bsags par gyur ba'i lus te/ 'dis bya ba cir yang mi rung zhing 'di ci zhig tu dgos zhes bya ba yin no/ /'di'i khyad par gyi tshul gyis smad pa'i rgyu smras pa/ mi gtsang 'dzag pa zhes bya ba smos te/ 'byung zhing 'dzag pa yin te/ rma'i sgo dgu nas rgyun mi 'chad par mi gtsang ba rnam pa mang po 'byung zhes bya ba'i don to/ /'di la mi gtsang zhing dri nga ba yod pa ni mi gtsang ba ste/ des mi 'dod pa'i dri nga ba dang rab tu nyams pa'i dri'o/ /tshig rkang gnyis pa 'dis ni kha dog dang dri rnam par 'gyur ba bstan to/ /de las gzhan pa dang ldan zhing skye ba yin par smras pa/ rgyun du nad kyis mngon gdung zhing / /zhes bya ba smos te/ rtag tu nyam thag par byed pa yin te/ bkres pa dang / skom pa dang / cham pa dang rims tshad par 'khru ba la sogs pa'i nad kyis mngon par gdungs pa yang yin no/ /rga ba dang 'chi bas 'tsher 'grib pa'i zhes bya ba ni rga ba dang 'chi ba gnyis kyis skrag pa'i phyir 'jig pa yin te/ rga ba dang 'chi ba gnyis la rtag tu dogs pa zhes bya ba'i don to/ /de'i phyir rga ba ste nus pa thams cad med par byed pa dang / ris mthun pa chad pa'i 'chi bas rtag tu gnod pa yin te/ lus 'di ni 'byor ba dang mi ldan pa yin no/ /phyin ci log spang pa'i phyir tshigs su bcad pa 'di gsungs so/ /ci lus 'di ni gcig tu dgos pa med pas ci yang mi bya ba nyid kyis dor bar bya'o zhes rtog pa la de spang ba'i phyir smras pa/ myur du zhes bya ba la sogs pa smos so/ /skyon du ma dang ldan zhing g.yo ba'i gzhi yin du zin kyang thar pa thob pa la phan 'dogs pa'i phyir 'dir bsngags par bya ba yin no zhes bya ba ni bsdus pa'i don to/ /'di yis zhes bya ba ni zin pas so/ /yang na 'dod pa na spyod pas so/ /rnag dang ldan pa zhes bya ba ni mi gtsang ba'i rdzas 'dus par gyur pa'i lus kyis so/ /myur du 'jig cing zhes bya ba ni 'jig pa'i ngang tshul yod pa ste/ 'dis ni mi rtag pa nyid du bstan to/ /na ba zhes bya ba ni nad kyis nyam thag pa ste/ des zil gyis non pa zhes bya ba'i don to/ /'dis ni sdug bsngal ba nyid du bstan to/ /'dir mi gtsang bas ni lus kyi rang bzhin gyi mtshan nyid kyi skyon bstan to/ /mi rtag pa dang / sdug bsngal ba nyid kyis ni spyi'i mtshan nyid kyi skyon bstan to/ /don du gnyer bar gyis zhes bya ba ni rjes su shes par gyis shig pa ste bsam pa dang kun du shes par gyis shig ces bya ba'i don to/ /de ltar stobs kyis don du gnyer bar bya ba de gang yin zhe na/ smras pa/ zhi mchog ces bya ba smos te/ mi gtsang ba'i lus la sogs pa 'di de na med pa nyid de gtan du mya ngan las 'das pa phung po lhag ma med pa'i mya ngan las 'das pa'i dbyings su gtsor sdug bsngal nye bar zhi ba zhes bya ba'i don to/ /grub dang bde ba zhes bya ba ni rtag pa nyid du grub pas 'jog pa med pa'o/ /bla na med pa ni sdug bsngal med pa'i phyir ro/ /yang na grub pa dang bde ba ni grub pa dang bde ba'o/ /mya ngan las 'das pa de na 'bral ba med pas grub pa ni gtan du bde ba nyid kyi phyir ro/ /dge ba yin pa'i phyir bde ba ste/ sdug bsngal mtha' dag dang bral ba'i phyir ro/ /bla na med pa zhes bya ba ni dngos po thams cad ni bla na yod pa yin la/ thar pa ni bla na med pa ste/ rtag tu dge ba nyid yin pa'i phyir ro/ /yang bshad pa/ rtag pa'i dge ba med pa ste/ /nam mkha' blo ni 'gog byed pa/ /dad pa la sogs mi rtag dge /gnyis las thar pa bla med yin/ /zhes so/ /nyon mongs pa dang nye ba'i nyon mongs pa thams cad yang dag par gcad pas ni phung po lhag ma dang bcas pa'i mya ngan las 'das pa ste/ mchog tu zhi ba'o/ /'dus byas thams cad gtan du spangs pa phung po lhag ma med pa'i mya ngan las 'das pa'i dbyings ni grub pa dang bde ba bla na med pa'o zhes gzhan dag zer ro/ /gzhan dag ni nyan thos dang rang sangs rgyas kyi byang chub dang mi gnas pa'i mya ngan las 'das pa gsum du bshad pa dang zhi ba dang / grub pa dang / bde ba bla na med pa gsum go rims bzhin du sbyar ro zhes so/ /lus la mngon par dga' ba rnams dang mya ngan las 'das pas skrag pa rnams la skyon dang yon tan bstan pa'i phyir 'di gsungs so/ /gang gi phyir de lta bu'i rnam par grol ba de thob par bya ba'i phyir 'di dag bsten pa la 'bad par bya ba yin te/ gzhan dag la ni yid brtan par bya ba ma yin no zhes bstan pa'i phyir smras pa/ dgun ka dang ni zhes bya ba smos so/ /mnyan yod na ma na si zhes bya ba'i tshong dpon gyi bu zhig yod de nor rnam pa sna tshogs kyi 'byor pa phun sum tshogs pa dang ldan zhing de yang 'dod pa la zhen pa zhig ste/ de dus ji lta ba bzhin du 'dod pa la rab tu longs spyod par 'dod pas yo byad dang bcas pas dgun dang dpyid dang dbyar gyi dus su nye bar longs spyod pa'i khang pa shin tu nyams dga' ba gsum byas so/ /des der yang yid la 'dod pa'i 'bras bu ma spyad pa nyid du shi ba'i dus byas te/ de'i dbang du mdzad nas 'di gsungs so/ /'di thos pas srog chags stong phrag drug cu bden pa mngon par rtogs par gyur to/ /gzhan dag ni tshong dpon chen po nor mang po pa zhes bya ba rnam par rtog pa shin tu mang ba zhig yod pa de'i dbang du mdzad pa'o zhes so/ /mi rigs par sems par byed pa ni dgun ka dang dpyid ka dang dbyar ka 'di dag bya'o zhes sems par byed pa'o/ /mi rigs par sems par byed pa po byis pa zhes bya ba 'dis so/ /mi rigs par byed pa'i rgyu ni bar chad mthong bar ma gyur to zhes bya ba ste 'di ni bsdus pa'i don to/ /'di dag ces bya ba ni khyim dang skyed mos tshal la sogs pa'o/ /dbyar ka zhes bya ba ni dbyar gyi dus so/ /bya'o zhes bya ba ni brtsam par bya ba ste/ de'i dus dang mthun pa'i 'dod pa'i bde ba nyams su myong bar bya'o zhes pa'i don to/ /dgun ka dang ni dpyid ka dang / /zhes bya ba la dang gi sgra ni 'di dag go zhes bya bar drang ba'i don to/ /ni zhes bya ba ni dbye ba'o/ /nges pa med pa'i gnas la ro myang bar bya ba ni rigs pas 'di nyid yin no zhes bya ba ni 'dir blta bar bya'o/ /'di ltar su zhig sems par byed ce na/ smras pa/ byis pa zhes bya ba smos te/ blo ma bye zhing mi shes pa ste/ yon tan dang skyon mi shes pa zhes bya ba'i don to/ /rnam par sems byed pas zhes bya ba ni rnam par rtog par byed pa'o/ /pas zhes bya ba ni de ltar sngar bstan pa'i dgun ka zhes bya ba la sogs pa ston pa yin no/ /gang mkhas pa de ni 'tsho ba 'di la bar chad mang po yod par rtogs pa yin pa'i phyir 'di ltar sems par byed de/ gang dag ni dbugs dbyung ba dang rngub pa tsam du 'tsho ba 'di yang legs par rnyed pa yin no zhes so/ /ci'i phyir byis pa dag de ltar mi sems she na/ smras pa/ bar chad mthong bar ma gyur to/ /zhes bya ba yin te/ gang yang srog 'di la ni bar chad mang po yod de/ de'i phyir ma 'ongs pa'i don phal che ba dag la brtag par mi bya'o/ /gang gi phyir dngos po 'di dag thams cad ni srog gi bar du gcod par byed pa ste/ de shes par mi nus so/ /yang smras pa/ 'tsho ba gcod byed ma lus pa'i/ /'dus byas dug dang 'dra ba yin/ /'di dag rtag par gyur na ni/ /dug tu mi 'gyur gang yang med/ /bar du gcod pa zhes bya ba ni gang 'tsho ba'i bar du gcod pa'i rkyen no/ /thung ba ni shin tu yun thung bar gnas pa'i 'tsho ba yod pa ste/ tshe yod pa'o/ /tshe de yang mi brtan pa yin te/ 'jig pa'i chos can yin pa'i phyir/ ji skad du gsungs pa/ rang bzhin gyis ni lus can 'chi 'gyur zhing / /skad cig tsam zhig srog ni gnas gyur pa/ /skye bo de ni rnyed dang ldan pa ste/ /srog ni rnam par 'gyur zhes mkhas pas shes/ /zhes so/ /mi 'chi ba la sogs par rnam par rtog cing las kyi mtha' ring ba dag la skyo ba bskyed pa'i phyir 'di gsungs so/ /bag med pa'i gnas 'dod pa la chags pa nyi tsher yang ma zad de/ bu la sogs pa la chags pa yang bstan pa'i phyir smras pa/ bu dang nor zhes bya ba la sogs pa smos so/ /gang gA'i klung gi 'gram gyi grong khyer na gang gA'i lha zhes bya ba'i khyim bdag bu mang zhing g.yog 'khor dang nor dang phyugs dang las byed pa la sogs pa dang ldan pa zhig gnas so/ /ji tsam na nub mo gnyid kyis log cing bag phab ste 'dug pa las chu bo chen pos grong khyer thams cad gang gA'i nang du bdas te/ khyer ba de'i dbang du mdzad de tshigs su bcad pa 'di gsungs so/ /gzhan dag na re dge slong ma gau ta mi'i dbang du mdzad nas gsungs so zhes so/ /rmongs pas 'khor ba'i yo byad legs par bsags pa dang bsrungs pa la sogs pa mchog tu byed pa'i mi ni 'chi bdag gis blangs te khyer bar 'gyur zhes bya ba ni 'di'i bsdus pa'i don to/ /bu dang nor mang po de dag ma 'byor pa med pa de la rnam par chags shing lhag par zhen pa'i mi'i yid gang yin pa de ni de lta bu'o/ /'di ltar 'jig rten 'di na phal cher rigs brgyud kyi phyir ni bu 'dod do/ /yul la nye bar longs spyod pa'i phyir ni nor dang phyugs phun sum tshogs pa 'dod do/ /de la nor ni nor dang 'bru la sogs pa'o/ /phyugs ni ba lang dang ma he la sogs pa rkang pa bzhi'o/ /de la rnam par chags pas dus dus su sbyin pa dang / tshul khrims dang / thos pa dang / bsam pa dag la sbyor ba med pa'o/ /mi zhes bya ba ni srog chags so/ /ci nas de ji ltar 'chi bdag gis blangs nas 'gro zhe na/ 'dir dpe bstan pa/ nyal grong zhes bya ba ni grong na gnas pa'i skye bo nub mo gnyid log par gyur pa'o/ /bzhin du zhes bya ba ni dpe'i don te/ ji ltar dbyar gyi dus su chu'i tshogs chen po glo bur du byung nas blangs te chu bo chen po'i nang du ded par byed pa de bzhin du bu la sogs pa la yid rnam par chags shing log par spyod pa dag byed pa na bag med pa'i gnyid kyis log pa ni 'chi bdag nam mkha' lding lta bus klu blangs te 'gro ba bzhin no/ /khyim gyi yongs su bzung ba dag la chags shing bsod nams byed pa la bag med pa rnams skyo ba bskyed pa'i phyir 'di gsungs so/ /bu la sogs pas ni 'chi ba las yongs su skyob par mi nus pa ma yin te/ de'i mthus 'chi bdag gi chu srin gyi kha'i drung nas slar ldog par snang ste/ de bas na de la lhag par chags pa ni dgos pa dang bcas pa yin na ci'i phyir de la smad ces bya bar rtog na/ de ni med de 'di ltar tshe yongs su zad pa las ni bu la sogs pas yongs su skyob par mi byed de/ de nyid smras pa/ 'chi ba'i dus la bab pa na/ /zhes bya ba la sogs pa smos so/ /rgyal po'i khab na mchod sbyin 'dod pa zhes bya ba'i bram ze sA la chen po lta bu rgas shing 'khogs nas gzer ba lo brgya nyi shu lon pa zhig yod de/ de la bdag nyid las skyes pa'i bu nyi shu dang / tsha bo dag mang zhing rgya che ba dang / nye du'i tshogs de rnams dang lhan cig tu skyed mos tshal zhig tu shin tu dga' zhing spyod pa las de dus byas nas de'i dbang du mdzad nas 'di gsungs so/ /gzhan dag ni dge slong ma zhig slong mo spyod cing bu tsha la sogs pa gso bar byed pa las brtsams te 'di gsungs so zhes zer ro/ /gang cung zad sus kyang 'chi ba las yongs su bskyab par ni mi nus te/ 'chi ba ni bzlog par bya ba ma yin pa'i phyir ro zhes bya ba ni bsdus pa'i don to/ /mi 'gyur zhes bya ba ni med pa'o/ /gang yin zhe na/ smras pa/ bu rnams zhes bya ba ste/ lus las skyes pa'o/ /skyabs zhes bya ba ni 'chi ba'i 'jigs pa las yongs su thar bar byed pa'i phyir ro/ /gang yang 'chi ba las yongs su skyob par byed pa'i bu ni 'gro ba dag na med cing 'chi ba las yongs su skyob par byed pa ni mi 'byung ste/ bdag nyid kyang de bas yongs su ma thar pa'i phyir ro/ /pha yang ma yin zhes bya ba ni skyed par byed pa ste/ pha dang ma gnyis kyis kyang bu rnams 'chi bdag las yongs su skyob par mi nus so/ /gnyen 'dun min zhes bya ba ni nye du dag gis kyang 'chi ba las cung zad skyob par mi nus so/ /gang gi phyir sems can kha cig ni bu'i dpung yod do snyam nas bag med pas gnas so/ / kha cig ni pha'i dpung gis so/ /kha cig ni nye du'i dpung gis so/ /kha cig ni gnyis kyis so/ /kha cig ni de dag thams cad la re ba dag yongs su spang pa'i phyir bcom ldan 'das kyis 'di gsungs so/ /dpung 'di dag gis ni yid brtan par mi bya ste/ gang gi phyir don 'di dag gang gis ji ltar yang mi nus so/ /su'i zhe na smras pa/ 'chi ba'i dus la bab pa na/ /zhes smos te/ 'chi bdag gis dbang du byas pa'o/ /gal te de ltar re res ni mi nus kyang de dag tshogs pas ni nus par 'gyur te/ mi ro'i phyogs 'debs pa dang 'dra'o zhe na/ de yang med par bstan pa'i phyir smras pa/ khyod la skyabs su 'gyur ba med/ /ces bya ba smos te/ bu la sogs pa de dag 'dus pas kyang gang zhig 'chi ba las yongs su skyob pa med pa nyid de/ 'jig rten ni rang gi las kyi 'bras bu la spyod do zhes bya ba'i tshig gis so/ /'phags pa'i lam nyid ni 'chi ba las yongs su skyob pa yin pas de la gzud pa'i phyir 'di gsungs so/ /las gang zhig mthar ma phyin par de las gzhan dag rtsom pa ni 'chi ba la sogs pa'i 'jigs pa dang bral ba ma yin no zhes bstan pa'i phyir smras pa/ 'di ni bya ba byas zin zhes bya ba la sogs pa smos so/ /rgyal po'i khab na b+ha ba yab d+ha ka zhes bya bas rgyun du zhugs pa'i 'bras bu thob kyang gong ma'i lam bsgom pa la bag med par gyur te/ 'di ltar yang bdag gis ni ngan song gi sgo ni bkag pas da ni lha dang mi'i 'dod pa la rol cing rjes su myong bar byas te/ khyad par du 'phags pa'i bden pas mya ngan las 'das par bya'o zhes bsam pa las ji tsam na dus las 'das te/ khyim thab spyugs pa zhig gi chung ma'i rum du zhugs te/ btsas nas de bran mo zhig gis mtshan mo lam gyi bzhi mdor tsher ma dang bcas par sgren mor bor ba las shin tu sdug bsngal bas 'gre ldog cing 'o dod 'bod pa 'od ma'i tshal na gnas pa'i dge bsnyen dag gis thos te/ de blangs nas yid dang rjes su mthun pa thob par gyur te/ tshul bzhin du rol pa dang / srid pa'i nyes dmigs mthong ba rnam pa mang po byas te/ de rnams kyis phan btags pa byas nas yongs su mya ngan las 'das so/ /de ltar gyur pa'i gtam dge bsnyen dag las bcom ldan 'das kyis gsan te/ tshigs su bcad pa gnyis po 'di gsungs so/ /de la re zhig dang po smras pa/ 'di ni bya ba zhes bya ba la sogs pa smos te/ 'jig rten pa'i bya ba dag la zhen pa dag gis ni 'chi ba la sogs pas mngon par bcom par 'gyur te/ 'jig rten las 'das pa'i bya ba la mngon du brtson pa ni ma yin no zhes bya ba ni bsdus pa'i don to/ /'di ni byas zhes bya ba ni 'di mthar phyin pa'o/ /bya ba zhes bya ba ni bya ba'i rgyu dang bya ba'o/ /bya ba ni rnam pa gsum ste/ gang byas pa dang / gang bya bar brtsams pa dang / gang ma brtsams pa brtsam par bya ba'o/ /de la dang po ma gtogs pa'i brtsam par bya ba smras pa/ don 'di bya zhes bya ba smos te/ da ni bya ba 'di nyid kyi dus la bab pa'i bya ba'o/ /de dag byas nas zhes bya ba ni brtsams pa de dag yongs su rdzogs par bya ba'o/ /bdag ni bdag nyid do/ /'di bya'o zhes bya ba ni 'di'i 'og tu bsgrub par bya'o/ /de ltar zhes bya ba ni sngar bshad pa'i rnam par rtog pa'i rnam pa bstan to/ /ni zhes bya ba ni nges par gzung ba ste/ 'dir mngon par bcom pa nyid du shes par bya'o/ /su zhig mngon par bcom pa yin zhe na/ smras pa/ mi zhes bya ba smos te sems can no/ /yongs su shom pa na zhes bya ba ni yongs su rtsom pa ste/ rtog pa ngan pa dpag tu med pas sems rnam par g.yen spyo ba'o/ /mngon du bcom zhes bya ba ni zil gyis gnon pa dang / 'jig pa dang zhig par byed pa zhes bya ba'i don to/ /de gang yin zhe na smras pa/ 'chi dang rga bas zhes bya ba smos te/ 'chi dang bcas pa'i rga ba ste/ 'chi ba dang rga ba gnyis kyis 'chi bar skyel bar byed pa yin pas bar gyi tshig mi mngon par byas te rdo rje'i bye ma bzhin no/ /nad dang lhan cig rjes su 'brang ba yin pa'i phyir nad dang bcas so/ /mthar ma phyin pa yongs su rtog pa'i bya ba la ni 'jig rten pa dag rga bas yongs su nyams par byas shing nad kyis gzir te/ 'chi bdag gi dbang du 'gyur ro/ /des na bya ba gzhan thams cad yongs su btang bas 'chi ba la sogs pa bzlog pa'i bya ba la 'bad par bya'o/ /zhes thub pa mchog gis yongs su bstan to/ /'jig rten pa'i las ni mtha' med pa'i phyir te/ ji skad du gsungs pa/ rgyal po dug can la sogs pas/ /bya ba dag ni ma byas te/ /de nas de nyid bya ba dang / /de yang bcas shing 'gag par 'gyur/ /de bzhin bya ba 'di dag la/ /de nyid mthar ni ma phyin par/ /de nas 'jig rten de 'dra'i dgra/ /'chi ba dag ni 'ong bar 'gyur/ /zhes pa'o/ /bya ba ma yin pa'i bya ba mang po dag la yun ring du byed cing mi 'chi ba la sogs pa rnam par rtog pa mang po dag la skyo ba bskyed pa'i phyir 'di gsungs so/ /gang gi phyir de ltar 'jig rten pa'i bya bas rnam par g.yengs pa'i skye bo rga ba dang 'chi ba dang nad dang bcas pas mngon du bcom pa yin te/ de bas na 'jig rten las 'das pa'i bya ba bsgrub pa'i phyir smras pa de ltar zhes bya ba la sogs pa smos te/ 'di'i bsdus pa'i don ni ting nge 'dzin gyi sbyor ba'i rgyu dang / ting nge 'dzin gyi sbyor bas yongs su skyo ba med pa'i yid dang / ting nge 'dzin thob nas ting nge 'dzin tsam gyis chog mi shes pa des mthong ba dang bsgom pa'i lam yongs su rdzogs par bya ba dang / lam bsgom pa'i 'bras bu dang / 'bras bu de'i phan yon 'dir bstan pa yin no/ /de'i phyir de ltar zhes bya ba 'dis ni ting nge 'dzin gyi sbyor ba'i rgyu bstan to/ / de ltar rtag tu ting 'dzin la dga' mnyam par zhog/ /brtson pa skyed la skye dang rga ba'i mtha' ma ltos/ /bdud rnams sde dang bcas pa mngon par zil gnon la/ /dge slong dag gis skye shi'i pha rol 'gro bar gyis/ /zhes bya ba 'di dag gis ni go rims bzhin du lhag ma rnams bstan to/ /da ni tshig so so'i don bshad par bya ste/ de ltar zhes bya ba ni sngar bshad pa'i rgyu ston te/ 'di ltar/ de ltar mi ni yongs su shom pa na/ /rga dang nad bcas 'chi bas mngon du bcom/ /zhes bya ba ste/ rgyu de ltar ro/ /'di ni sbyor ba'i rgyu bstan te/ /'chi ba la sogs pas skyo ba skyed de de ltar shes shing skyo ba skye ba las ni ting nge 'dzin la sbyor ba yod pa nyid de/ 'dis ni gus par byed pa'i sbyor ba bstan nas/ rtag tu byed pa'i sbyor ba smras pa rtag tu zhes bya ba ni dus thams cad du'o/ /ting nge 'dzin la dga' zhes bya ba ni ting nge 'dzin la dga' ba ste/ bsam gtan la dga' ba zhes bya ba'i don to/ /ting nge 'dzin la dga' ba thob pas ni de'i sbyor ba la yongs su gdung ba med pa'i phyir ro/ /mnyam par zhog ces bya ba ni sems rtse gcig pa ste bsam gtan mngon du byas pa zhes bya ba'i don to/ /brtson pa skyed la zhes bya ba ni brtun pas 'bad pa'i brtson 'grus gang la yod pa de ni brtson pa skyed pa ste brtson 'grus brtsam pa zhes bya ba'i don to/ /brtson 'grus dang ldan pa la ni khyad par thob par bya ba la chog mi shes pa nyid du ston te/ ji skad du bshad pa/ khyad par spel la nges par ni/ /khyod ni nam yang ngal ma gyur/ /brtson 'grus drag pos dka' ba las/ /skyo ba yod pa ma yin no/ /zhes bya ba la sogs pa'o/ /'jig rten las 'das pa'i lam 'dod pas ting nge 'dzin tsam gyis chog par mi bya ba nyid du 'dis bstan te/ skye dang rga ba'i mtha' ma ltos/ /zhes bya ba 'di smos so/ /skye ba dang rga ba ni skye rga'o/ /de gnyis kyi mtha' ma ni zad pa ste/ de lta bu'i tshul gang dag la yod pa de nyid ni 'di ltar mthong ba'i lam yongs su rdzogs pa ste/ phal cher skye ba zad de yun ring du thogs nas srid pa bdun yin pa'i phyir skye ba dang rga ba mthong bar 'gyur ro/ /bsgom pa'i lam yongs su rdzogs pa la ni skye ba mthar thug pa yin pa'i phyir yang 'khor bar skye ba dang rga ba'i mtha' ma mthong bar 'gyur ro/ /ci zhig byas shing ji ltar 'gyur zhe na/ smras pa/ bdud rnams zhes bya ba la sogs pa ste/ nyon mongs pa ni bdud de 'chi ba'i chos nye bar bsgrub pa'i phyir ro/ /sde dang bcas pa zhes bya ba ni 'khor dang bcas pa ste/ nye ba'i nyon mongs pa dang bcas pa'i las zhes bya ba'i don to/ /mngon par zil gnon la zhes bya ba ni spangs pa ste/ 'dis ni bsgom pa'i lam gyi 'bras bu bstan to/ /de yang gang dag gis 'di ltar lam bsgom par nus she na/ smras pa/ dge slong dag gis zhes bya ba smos te/ dge slong dag ces bya ba ni rab tu byung zhing yongs su bzung ba spangs pa zhes bya ba'i don te/ de dag gis lus dang sems rnam par dben pa dang / de dang rab tu 'brel ba'i phyir lam bsgom pa yod par 'gyur ro/ /'gro bar 'gyur ba zhes bya ba ni de nyid las skye bar 'gyur gyi/ gzhan la ma yin no zhes bya ba'i don to/ /gzhan dag tu ni 'gro bar gyis/ /zhes brjod de/ 'di'i don ni khyed cag gis 'grub cing 'di'i pha rol du 'gro bar gyis shig ces bya'o/ /skye shi'i pha rol 'gro ba zhes bya ba ni 'khor ba'i pha rol du phung po lhag ma med pa'i mya ngan las 'das pa'i dbyings der 'gro ba yin pas pha rol 'gro ba ste/ nyon mongs pa dang nye ba'i nyon mongs pa rnams spangs pa la phan yon 'di yod de gang phung po lhag ma med pa'i mya ngan las 'das pa'i dbyings su 'jug pa yin no/ /bya ba ngan pa la gnas shing 'brel pa dag 'phags pa'i lam la sbyor ba'i phyir bsrungs so/ /mi rtag pa'i tshoms kyi rnam par 'grel ba ste dang po rdzogs so// //de'i 'og tu 'dod pa'i tshoms dgod pa'i skabs brjod par bya ste/ mi rtag pa bstan pas skyo ba yang dag par bskyed nas 'dod chags dang bral ba'i dngos po thob par bya ba'i phyir 'di nye bar 'god pa yin no/ /gang gi phyir thams cad kyi dang por ni 'dod pa dag las chags pa med pa 'byung ngo / /de nas gzugs dang gzugs med pa las chags pa med pa 'byung ste/ ma ma'i gos las thog ma dri ma rags pa dang bral bar byed la/ de'i 'og tu ni phra ba dag dang bral bar byed pa de bzhin du skabs brjod pa yin no/ /kun rtog las zhes bya ba la sogs pa smos te/ 'di'i gleng gzhi ni bud med cig skyes pa gzhan zhig la chags te/ de la lta ba dang kun du smra bas g.yen spyo ste chu blang pa'i phyir khron pa las bum pa dang chu blang bar bya'o zhes bsams nas rang gi bu mgrin pa la thag pas bcings te/ nang du yud tsam zhig btang ba las de nas bu shi bar mthong ste/ de skyo ba yang dag par skyes pa las tshigs bcad 'di gsungs so/ /'di yang ji ltar gnas pa yin zhe na/ de yang bcom ldan 'das phyogs der gshegs te/ de la bcom ldan 'das kyis tshe dang ldan pa kun dga' bo la bka' stsal pa/ kun dga' bo yang dag par rdzogs pa'i sangs rgyas kyis yang dag par gsungs pa'i tshigs su bcad pa 'di zung shig ces gsungs te/ ci nas kyang 'dod pa'i 'dod chags skye ba dang / ci nas kyang skye ba med pa yin no zhes bya ba ni bsdus pa'i don to/ /tshig gi don so so'i bshad pa/ 'dod pa zhes bya ba ni 'dod par byed pas na 'dod pa ste/ don du gnyer bar byed ces pa'i don to/ /de yang 'dod pa'i yon tan lnga la 'dun pa'i 'dod chags la dgongs so/ /de la bod pa yin te/ kye 'dod pa zhes so/ /shes kyis te zhes bya ba ni 'di nyid nges par byas pa yin te/ de gang yin zhe na/ smras pa/ khyod ni rtsa bar zhes bya ba yin te/ 'dod pa skyed par byed pa'i rgyu ste/ gang gi phyir de ni 'khrig pa dang ldan pa kun tu rtog pa'i rtsa ba ste/ de dag nyid kyi yul la mi 'gro ba'i 'du shes las ni 'dod chags mi skye la mi dge ba'i 'du shes kyis kyang 'dod chags dang bral bar 'gyur ro/ /gnas stong pa dag la yang log pa'i kun tu rtog pa'i 'dod chags kyis brlag pa yin no zhes 'dod pa'i rtsa ba bstan pa'i phyir smras pa/ kun rtog las ni zhes bya ba smos te/ tshul bzhin ma yin pa yid la byed pa dang ldan pas rang bzhin med pa dag la gnas rjes su dran zhing gzugs su brtag pa de la ni 'dod pa'i 'dod chags skye bar 'gyur te/ kye 'dod pa zhes so/ /'dod pa zhes bya ba yang smos pa ni gcig tu ma rung ba yin pas spang bar bya ba nyid du bsgrub pa'i phyir ro/ /yang na de'i yul la mi bzod pa bsgrub pa'i phyir ro/ /skyes pas zhes bya ba mngon du byung ba dang / sems kyi rgyud las skyes pa zhes bya ba'i don to/ /sman la sogs pa'i gzhis yongs su spangs pa ma yin pa'i tshul bstan pa'i phyir smras pa/ khyod ni kun rtog ma byed dang / /zhes bya ba smos te/ 'dod pa dag la dge bar ma sems dang rnam par grol bar 'gyur ro zhes so/ /des na khyod la 'byung mi 'gyur/ /zhes bya ba ni de bas na dge bar kun tu ma rtogs pas khyod kyi rgyud la skye bar mi 'gyur te/ rgyu med pas 'bras bu med pa nyid kyi phyir ro/ /'byung bar mi 'gyur ba ni rab tu skye bar mi 'gyur zhing rab tu skye bar mi nus pa nyid du ston to/ /'dod pa'i 'dod chags spong bar 'dod pa rnams la gzhi med par bya ba bstan pa'i phyir dang / yul yongs su spangs pa tsam gyis 'dod pa'i 'dod chags spong ba yin no zhes smra ba rnams tshar gcad pa'i gnas dang / bdag tu smra ba rnams tshar bcad pa'i phyir 'di gsungs so/ /'dod pa yul dang bcas pa 'di dag ni ches kyang spang bar bya ba yin te/ gnod pa thams cad kyi rgyur gyur pa'i phyir ro/ ci'i phyir zhe na/ 'di ltar/ 'dod pa rnams las mya ngan skye/ /zhes bya ba smos te/ bud med de nyid bu dang bral ba yod pa'i dbang gis brang brdung zhing mya ngan gyis gdungs te/ smre sngags 'don pa dang / khyim thab la 'jigs pa yin te/ des 'di lta bu'i don thos par gyur na bdag la gnod pa byed par 'gyur ro zhes pa de'i dbang du byas nas tshigs su bcad pa 'di dag gsungs so/ /de la re zhig dang po'i rnam par 'grel ba smras pa/ 'dod pa rnams las zhes bya ba smos te/ 'dod pa rnams la ro myang bar byas pa'i nyes dmigs dang / nges par 'byung ba byas pa'i phan yon 'dir bstan pa yin te/ de la 'dod pa ni rnam pa gnyis te/ yul gyi 'dod pa ste gzugs sdug pa la sogs pa dang / nyon mongs pa'i 'dod pa dag ste yul de dag nyid la chags pa'o/ /'dod pa byed pa'am/ 'dod par byed pa dag ni rgod pa la brten pa'i phyir ro/ /de gnyi ga dag las skye ba ni 'byung ba'o/ /mya ngan zhes bya ba ni sdug pa dang bral ba'i sems kyi gdung ba'o/ /bdag nyid kyi gzi mdangs skem par byed pa zhes bya ba ni nges pa'i tshig gis so/ /'jigs pa zhes bya ba ni mtshan ma dag la dmigs nas gnod par 'gyur ro zhes dogs pa skye ba'i sems kyi las te/ yang dag par skrag pa zhes bya ba'i don to/ /de gnyi ga yang go rims bzhin du nyon mongs pa dang yul gyi 'dod pa dag las skyes pa ste/ gang gi phyir yul med pa dag la yongs su gzung ba med pa'am yod par gyur na yang 'dod chags dang bral ba rnams la ni de dang bral ba las skyes pa'i mya ngan dang / de dang bral du dogs pa las skyes pa'i 'jigs pa med par 'gyur bas so/ /re zhig 'di dag gi ni 'dod pa dang / mi 'dod pa dag gi nyes dmigs bstan to/ /rgyu med pa'i phyir 'bras bu med pa nyid du bstan pa'i phyir smras pa/ 'dod pa dag ni rnam spangs na/ /zhes bya ba smos te/ 'dod pa dag la 'dod chags dang bral ba'i phan yon bstan pa yin te/ gang yang s o sor brtags pa'i stobs sam bsgoms pa'i stobs kyis 'dod pa rnams la chags pa med pas btsal ba dang rtsa ba dang bcas par spangs na gnyis kyis 'dod pa dag las chags pa dang bral ba dag la ni sdug pa dang bral bar gyur kyang mya ngan med cing gnod pa byung bar dogs pa'i 'jigs pa lta ga la yod par 'gyur ba'o/ /mya ngan gyis ni da ltar gyi nye bar gnas pa'i gnod pa bstan to/ /'jigs pas ni 'byung bar 'gyur ba'i gnod pa bstan to/ /'dod pa'i don du gnyer ba dang / 'dod pa la lhag par chags pa dag 'dod pa dag la 'dun pa'i 'dod chags spang ba'i phyir 'di gsungs so/ /ji ltar nyon mongs pa'i 'dod pa de lta bu ni yul gyi 'dod pa dag gi phan yon las byung ba ma yin te/ de yang tshor ba'i rang bzhin gyi dbang yin te/ tshor ba'i rkyen gyis sred pa zhes bya ba'i tshig gis te/ des na rtsa ba'i rtsa ba nyid bstan pa'i phyir smras pa/ dga' ba rnams las mya ngan skyes/ /zhes bya ba smos te/ shin tu chags par byed pa'i phyir dga' ba dag ste/ /nyon mongs pa dang lhan cig skyes pa'i chags pa yid bde ba ste/ de dag las lhag ma ni snga ma bzhin du brjod par bya'o/ /'dis ni 'di skad ston te/ 'dod pa de gnyis ni tshe las mya ngan la sogs pa 'byung bar ma zad kyi/ nyon mongs pa'i 'dod pa'i tshogs 'jug par gyur pa yang yin te/ sems dang sems las byung ba de dag nyid ma spangs pa dag la mya ngan la sogs pa 'jug cing 'di dag las ni dga' ba dang shin tu chags pa dang rjes su mthun pa'i phyir ro/ /mngon sum du smos pa ni gzhan dag tu de dang mtshungs par ldan pa de bzhin du blta bar bya ste/ chags pa dang rjes su mthun pa'o/ /'di la ji skad du gsungs pa bde bar tshor ba dag ni chags pa la gnas pa yin te/ gang bde ba dang bde ba'i tshor ba 'di zhes bya ba la sogs pa'o/ /'dod pa mya ngan la sogs pa'i rgyur gyur pa yang gang gi don du nye bar spyod pa yang dga' ba nye bar spyad pa'i don te/ des byas pa yin pas 'di dag thams cad ni 'dod pa'i nyes dmigs su shes par bya'o/ /gang yul gyis 'dod chags spangs kyang kun tu rtog pa'i 'dod chags kyis rnam par rtog pa'i dga' ba spangs pa'i phyir 'di gsungs so/ /'dir 'di dag gis mya ngan dang 'jigs pa'i nyes dmigs 'ba' zhig tu ma zad de/ sdig pa'i dra ba ma lus pa 'di dag kyang 'byung ba yin no zhes bstan pa'i phyir smras pa/ 'dod dga'i rnam smin sdug bsngal te/ /zhes bya ba la sogs pa smos so/ /skyes bu gti mug can 'phags skyes bos 'gran zla'i sha khon can ma lus par bsad cing phyung ste/ rgyal srid kyi bde ba la longs spyod cing bden pa mthong ba'i shAkya dpag tu med pa rnams bsad pa de'i 'og tu zhag bdun pa'i nyi ma la btsun mo'i 'khor dang blon po dang g.yog 'khor dang bcas pa chu la rtse ba'i phyir chas pa na dmyal ba'i me 'bar bas kun du bskor te/ 'o dod 'bod bzhin du mnar med pa'i dmyal ba chen por skyes te/ de'i dbang du mdzad nas 'di gsungs so/ /'dir bsdus pa'i don ni 'dod pa dag la ro myong bar byed pa ni dang po mngar bas bstan to/ /lhag ma ni nyes dmigs te 'bras bu tsha bas ni mthong ba'i chos kyi nyes dmigs bstan te mya ngan gyi rgyu yin pa'i phyir ro/ /rnam par smin pa sdug bsngal bas ni 'jig rten pha rol gyi nyes dmigs bstan te/ sreg par byed pa dang chos mthun pa yin pas me sgron gyi dpe bstan pa yin no/ /mngar ba ni yid du 'ong ba dang dga' ba dang sdug pa'o/ /dang po la sogs pa gang yin pa de ni de nyid do/ /'dir dang po'i sgra ni thog ma'i tshig ste/ sngar chu btang nas bsod snyoms byin pa bzhin te/ 'dod pa rnams ni thog mar dga' ba zhes bya ba'i don to/ /'bras bu tsha ba zhes bya ba ni tsha zhing yid du mi 'ong ba dang / mi 'dod pa'i 'bras bu rnam par smin pa de ni 'bras bu tsha ba'o/ /ji skad du gsungs pa/ 'dod pa dag las 'jig rten bsad dang bcing ba byung / /mya ngan 'jig dang ngal dang sna tshogs sdug bsngal te/ /'dod pa de nyid kyis kyang rgyal po ltung gyur te/ / chos nyams bab col pha rol tu ni dmyal bar 'gro/ /zhes so/ /de'i phyir 'dis ni mthong ba'i chos nyid la mya ngan dang smre sngags 'don pa dang sdug bsngal ba dang yid mi bde ba rnams tha mar 'byung ba dang / de'i rgyus ngan par spyod pa bsags pas ngan song gi sdug bsngal rnam par smin pa myong bar 'gyur te/ des na smras pa/ rnam sman sdug bsngal te zhes bya ba smos te/ rnam par smin pa'i 'bras bu ni mngon par mi 'dod pa yin te ngan song gi 'bras bu yin pa'i phyir ro/ /yang ci 'di dag gnas skabs thams cad du de ltar yin nam zhe na/ thams cad la ni de lta ma yin te/ 'on kyang dga' zhes bya ba smos te/ mngon par don du gnyer ba ste gang gi phyir sred pa dang bcas pa'i 'dod pa mngon par 'dod pa de dag nyid la dang po mngar bzhin 'bras bu tsha la rnam par smin pa sdug bsngal bar 'gyur te/ dga' ba med par 'dod chags dang bral ba rnams la ni ma yin no/ /rnam par smin pa sdug bsngal ba yang yin la dga' ba yang yin pas dga' ba'i rnam smin sdug bsngal ba ste/ las 'dzin pa'o/ /tshig rkang 'og ma ni tha dad par byas la 'di ni bsdu ba byas pa ci'i phyir zhe na/ smras pa/ spyi dang khyad par bsgrub pa'i phyir te/ spyi ni 'di ltar 'phags pa dang 'phags pa ma yin pa gnyis kyi 'di dag dang po mngar ba dang 'bras bu tsha ba yin no/ /sdig pa spyod par 'jug pa rnams dga' bar gyur na ni rnam par smin pa sdug bsngal ba ste/ dang po dga' ba yin no/ /'dod pa zhes bya ba ni gzugs sdug gu la sogs pa'o/ /ji ltar dga' ba yod pa las rnam par smin pa sdug bsngal bar 'gyur zhe na smras pa/ sreg byed ces bya ba smos te/ rjes su mched nas yongs su sreg par byed pa'o/ /gang sreg par byed ce na/ smras pa/ byis pa zhes bya ba smos te/ 'dod pa'i rjes su 'gro ba so so'i skye bo ste/ de yang bya ba dang bya ba ma yin pa la kun tu rmongs pa'o/ /ji lta bur sreg par byed ce na/ smras pa/ me sgron zhes bya ba smos te/ 'bar ba dang bcas bzhin du phyar bas bzung ba'o/ /me sgron gyis gang sreg par byed ce na/ smras pa/ ma bor ba zhes bya ba smos te/ gang ma bor ba de'i lag pa sreg par byed do/ /de bzhin du gang dag 'dod pa dag la dga' ba de nyid des tshig par 'gyur te/ mthong ba'i chos la ni mya ngan gyi mes so/ /pha rol du ni sdug bsngal gyi mes so/ /'dod pa dag la mnog tu mthong zhing nyes dmigs su ma mthong ba rnams la 'dod pa rnams skyo ba bskyed pa'i phyir 'di gsungs so/ / 'dod pa'i ching ma dag ni dgrol bar dka' ba yin no zhes bstan pa'i phyir smras pa/ nor bu'i rna cha zhes bya ba la sogs pa'i tshigs su bcad pa gnyis smos so/ /rgyal po gsal rgyal gyis skye bo'i tshogs chen po rnam par bcings zhes grag ste/ kha cig ni lcags kyi ching mas bcings so/ /kha cig ni shing gi ching mas bcings so/ /kha cig ni gres ma'i ching mas bcings so/ /dge slong rnams mnyan yod du bsod snyoms spyod pa dag gis de thos nas bcom ldan 'das la gsol te/ de'i tshe bcom ldan 'das kyis 'di gsungs so/ /gzhan dag ni g.yul las rgyal ba zhes bya ba skyo ba chen po skyes te rab tu byung nas de'i sngar gyi bu khye'u gnyis zhig nye bar gzhag ste/ chags pa med par byung ba las bu de chags pas yang dang yang du bzlog nas ji srid du bdun pa nyid la dgra bcom pa thob par gyur te/ de'i dbang du mdzad nas 'di gsungs so/ / 'phags pa dag gang bcings pa dam po ma yin par 'dod pa dang / gang dam por 'dod pa dang / ji ltar yang gang gis de dam por yin yang 'phags pa rnams kyis myur du gcod par byed pa yin te/ 'di ni tshigs bcad 'di gnyis kyi bsdus pa'i don yin no/ /de dag dam po min zhes bya ba de brtan pa ma yin zhing gcad par mi nus pa ma yin zhes bya ba'i don to/ /de dag ces bya ba ni ching ma'o/ /gang gzhan gyi dbang du gyur pa de ni ching ma ste/ gzhan dbang gi yo byad ces bya ba'i don to/ /'phags pa ni lung dang sangs rgyas dang de'i nyan thos so/ /gsungs pa ni nye bar bstan pa'o/ /de gang zhig yin zhe na smras pa/ gang lcags zhes bya ba ni lcags las gyur pa ste/ de yang lcags kyi rang bzhin lcags sgrog la sogs pa'o/ /shing ni shing gi rang bzhin las gyur pa ste/ shing gi rnam pa las byas pa'o/ /gres ma ni rtswa las byas pa ste/ thag pa la sogs pa'o/ /'dis ni phyi rol gyi 'ching ba la 'phags pa rnams brtan po ma yin par 'dod pa nyid du rab tu shes pa yin no/ /de lta na gang dam po yin zhe na/ smras pa/ yongs su chags sems zhes bya ba la sogs pa smos te/ gang la kun du chags pa'i sems yod pa de ni yongs su chags sems te/ sems la nye ba'i nyon mongs pas kun du nyon mongs pa zhes bya ba'i don to/ /gang yang nyon mongs pa ma yin pa'i yid kyis yongs su chags pa'i sems ni 'di lta ste/ byang chub sems dpa' rnams sems can la snying rje dang bcas pa'i ngo bo yin zhing sred pa'i ngo bo ni ma yin te/ yun ring snying rjes 'brel pa'i phyir/ /zhes bya ba'i bstod pa las so/ /de gang la 'jug pa yin zhe na/ smras pa/ nor bu'i rna cha zhes bya ba smos te/ nor bu'i rna cha ni nor bu'i rna cha ste zlas dbye ba ste/ de dag la'o/ /nor bu zhes bya ba ni bzo ma byas pa'i nor gyi dpe'i don to/ /bzo byas pa'i dpe'i don ni rna cha ste/ rna ba'i rgyan zhes bya ba'i don to/ /'dis ni sems can du gtogs pa ma yin pa'i dngos po de la ltos pa nyid du ston to/ /bu dang bu mo la zhes bya ba ni sems can du gtogs pa'i dngos po la ltos pa nyid du ston to/ /bu la zhes bya ba ni bdag las skyes pa'o/ /bu mo la zhes bya bas ni chung ma yang bsdu'o/ /dang gi sgra ni nor bu la sogs pa nyi tshe ma yin gyi/ bu la sogs pa la yang yin pa'i phyir dang gi sgra smos so/ /gang yin la ltos zhes bya ba ni sred pa yongs su ma spangs pa'i bsam pa can zhes bya ba'i don to/ /ji skad du gsungs pa ltos pa dang ldan pa ni sred pa dang ldan pa zhes bya ba'i don to/ /rab tu dgrol bar dka' zhes 'phags pas gsungs/ /zhes bya ba ni yongs su chags pa'i sems la ltos pa zhes bya ba'o/ /'di nyid ni shin tu 'ching ba dam po yin no zhes mkhas pa rnams ston te/ ci'i phyir zhe na smras pa/ 'dod pa'i ching mas zhes bya ba la sogs pa smos te/ gang yin zhes bya ba'i sgra ni rgyu bstan pa'i phyir ro/ /'di ltar 'di dag la ltos pa'i ching ma ni spang bar bya ba la 'gog cing gags byed pas 'dod chags pa la sogs pa bcad par mi nus pa'i phyir te/ bcings pa ni ji ltar 'dod pa bzhin du 'gro ba ste/ rgyug pa dang mchong ba la sogs pa bya ba'i mthu med do/ /lag na mtshon cha la sogs pa dang ldan pas ni bde bar bcad du rung ba'i phyir grol bar yang 'gyur ro/ /'di ni de lta ma yin te/ des na de nyid kyi phyir 'di ni dgrol bar dka'o zhes 'phags pas gsungs so/ /gzhan dag na re 'dod pa'i ching ma ni chags par byed pa ste/ sems 'phrog par byed pa'i phyir ro/ /lhod kyang zhes bya ba 'gro ba thams cad du bcings kyang nyam nga ba med do/ /lhod pa'i phyir dgrol sla ba yin no zhes rtog pa dag bzlog pa'i phyir smras pa/ rab tu dgrol bar dka' zhes bya ba smos te/ dka' bas thar cing bcad par bya/ /zhes bya ba'i don to/ /mtshon dang me dang chu dang / sngags dang sman la sogs pa dang / thams cad du rab tu smra ba rnams kyis shin tu dgrol bar mi nus pa'i phyir ro/ /'di nyid ni ching ma dam po yin te/ gang gi phyir ltos pa'i ching ma de la btsal bar 'dod cing de bzhin du gang brjod par gyur na yang gcod par mi nus pa'i phyir ro/ /lhod pas ji ltar 'dod pa bzhin du 'jug pa na bdag ni bcings so zhes mi shes pa yin no/ /de rab tu dgrol bar dka' bas dgrol bar 'dod kyang dgrol bar mi nus pa yin te/ sangs rgyas kyi bstan pa dang / brtan pas so sor brtags pa dang / bsgoms pa'i stobs ni ma gtogs so/ /rgyu 'di gsum gyis ni ltos pa'i bcings pa nyid dam po yin gyi/ lcags la sogs pa ni ma yin te/ 'di nyid 'ching ba dam po yin no/ /rab tu dgrol dka' ba de ji ltar su zhig gis gcad par nus she na/ smras pa/ de dag gtubs nas zhes smos te/ gtubs pa ni bcad pa'o/ /myur du zhes bya ba ni ring po mi thogs par te/ lam myur du byed pa'i phyir te sbyor ba gcig gis kyang khams gsum po thams cad kyi bag la nyal spangs par gyur pa'i phyir ro/ /de dag myur du gtubs nas ci zhig byed ce na/ smras pa/ 'gro bar byed ces bya ba yin te/ 'khor ba yongs su spangs nas mya ngan las 'das par 'gro ba'o/ /mya ngan las 'das par 'gro ba ni dgra bcom pa nyid du'o zhes bya ba'i tshig gis so/ /ji ltar byas nas she na/ smras pa/ mi lta bar zhes bya ba smos te/ ltos shing sred pa gang la yod pa de ni lta ba ste/ de dgag pa ni mi lta ba ste/ ma chags pa'o/ /gang la zhe na/ smras pa/ 'dod pa'i bde la zhes bya ba yin te/ 'dod pa'i longs spyod la zhes bya ba'i don to/ /lus dang sems dben pa nyid rtog par smras pa/ brtan rnams zhes bya ba ste/ blo dang ldan pas so sor brtags pa dang bsgoms pa'i stobs kyis skyo ba med pa ste/ de yang brtson 'grus dang shes rab kyi stobs kyis mi dge ba la 'jug pa'i sbyor ba rtsom pa de la ltos pa bcad pas phung po lhag ma med pa'i mya ngan las 'das pa'i dbyings rtogs shing yongs su 'gro bar 'gyur te/ phung po lhag ma med pa'i mya ngan las 'das pa'i dbyings thob par 'gyur ro/ /phyi rol gyi 'ching bas skyo bar byas te/ nang gi lus la sred pas bcings pa la yongs su skyo ba skyed pa'i phyir tshigs su bcad pa 'di gsungs so/ /'di dag yang dag par brtags na ni sred pa nyid 'dod pa yin te/ yul ni ma yin no zhes bstan pa'i phyir smras pa/ 'jig rten sna tshogs zhes bya ba la sogs pa smos so/ /yul kau shAm+bI na dge bsnyen rab tu mang po ltad mo lta ba'i khang pa na 'dus shing 'dug pa las bar skabs su 'di lta bu'i gtam brjod par gyur te/ 'dod pa zhes bya ba gang yin zhe'o/ /de na kha cig gis 'di skad du/ yid du 'ong ba'i chung ma'o zhes zer ro/ /gzhan dag na re zhes ngag nyan pa'i bu yin no zhes so/ /gzhan dag ni mig gi rnam par shes pa'i yul gzugs yin no zhe'o/ /ji tsam na bcom ldan 'das kyi spyan sngar song ba dang / bcom ldan 'das kyis bka' stsal pa/ 'dun pa'i 'dod chags nyid 'dod pa yin gyi/ phyi rol gyi bems po gzugs sdug pa la sogs pa 'di dag ni ci zhig byed par 'gyur zhes rgya cher gsungs te tshigs su bcad pa 'di bka' stsal to/ /'di'i bsdus pa'i don ni gang 'dod pa ma yin pa dang / ci nas kyang de bstan pa'o/ /de 'dod min zhes bya ba ni yul rnams rang bzhin gyis 'dod pa yin no zhes bya ba dgag pa yin no/ /gang dang de gnyis ni rtag tu 'brel pa yin te/ de yang gang yin zhe na/ gang 'dod pa zhes bya ba de smras pa/ 'jig rten sna tshogs gang zhes bya ba smos te/ gang ni gang zhig go/ /'jig rten ni 'gro ba'o/ /sna tshogs pa ni sems skyo bar byed pa ste/ yid tshim par byed pa'i phyir rnam pa sna tshogs pa'i yid du 'ong ba 'dod pa'i 'dod chags dang rjes su mthun pa ste/ gzugs dang sgra dang dri dang ro dang reg bya'o/ /de ni 'dir 'dod pa ma yin te/ seng ge'i phug seng ger mi 'gyur ba de bzhin no/ /de ltar na 'dod pa zhes smos pa de gang yin zhe na smras pa/ kun rtog 'dod chags zhes bya ba smos te/ 'dod pa la rnam par rtog pa dang mtshungs par ldan pa'i 'dod chags sam/ tshul bzhin ma yin pa yid la byed pa las skyes pa'o/ /'dir 'das pa'am ma 'ongs pa'i yul rnams la tshul bzhin ma yin pa yid la byed pas brtags pa ni kun tu rtog pa'o/ /da ltar byung ba la lhag par zhen pa ni 'dod chags so/ /yang na ma thob pa thob pa'i phyir bskyed pa ni kun du rtog pa'o/ /thob pa la zhen pa ni 'dod chags te/ kun du rtog pa dang lhan cig pa'i 'dod chags ni kun rtog 'dod chags so/ /yang na 'dun pa'i 'dod chags ni 'dun pa nyid 'dod chags yin pas 'dun pa'i 'dod chags te/ don du gnyer ba'i 'dod chags so/ /'dun pa yod la 'dod chags med pa yang yod de/ dper na 'gro bar 'dod pa la sogs pa'o/ /'dod chags yod la 'dun pa med pa yang yod de/ dper na gos la mngon par zhen pa lta bu ste/ de bas na 'dir gnyi ga gzung ngo / /skyes bu zhes bya ba ni kun nas nyon mongs pa ste/ yang dang yang du las dang nyon mongs pa 'joms pa'i phyir ro/ /yang ci 'dod pa'i rgyu ni kun rtog nyid yin gyi/ dngos po sna tshogs ni ma yin par bstan pa'i phyir smras pa/ 'di ltar sna tshogs gnas kyang ni/ /zhes bya ba smos te/ gzugs la sogs pa rnam pa sna tshogs gnas pa yin no/ /de bzhin du zhes bya ba ni 'dod pa'i gnas skabs kyi gzugs gang yin pa gzugs la sogs pa rnam pa sna tshogs pa gnas pa bzhin du 'dod chags dang bral ba'i gnas skabs na yang de bzhin du gnas pa'o/ /'on kyang zhes bya ba ni de lta mod kyi zhes bya ba'i don to/ /'di la zhes bya ba ni gzugs rnam pa sna tshogs pa'i yul la'o/ /brtan pa rnams zhes bya ba ni blo dang ldan pa rnams te/ so sor brtags pa dang bsgoms pa'i stobs dang ldan pa'o/ /'dul zhes bya ba ni rnam par sel bar byed pa ste/ rnam par 'jig par byed ces bya ba'i don to/ /'dun pa ni 'dod chags te/ don du gnyer ba'i sred pa'o/ /gal te yul rnams 'dod pa yin par gyur na ni des na rnam pa thams cad du yang dag par gcod par mi nus pa nyid yin gyi brtan rnams 'dod pa spang bar 'dod pas 'dun pa de nyid 'dul bar byed de gang gi phyir gnas pa bzhin du yang de la blo dang ldan pa rnams spong bar 'dod pas des na 'dun pa nyid 'dul bar byed de/ de bas na 'dun pa'i 'dod chags nyid 'dod pa'i yin gyi/ yul ni ma yin no/ /gzhan du na su yang 'dod chags dang bral bar mi 'gyur te/ yul ni de bzhin du gnas pa'i phyir ro/ /gang dag yul spangs pa tsam gyis 'dod pa dag las thar par 'gyur ro zhes rtog pa de tsam spangs pas chog par 'dzin pa rnams kun du rtog pa'i 'dod chags spang ba la gzung ba'i phyir 'di gsungs so/ /rnam pa gzhan gyis yul dag la yang 'dod pa nyid du bstan pa'i phyir smras pa/ mi rnams la ni zhes bya ba la sogs pa smos so/ /kun du rgyu zhing 'di ltar lta zhing 'di skad smra ste/ 'dod pa'i gzugs la sogs pa ni med de/ de ci'i phyir zhe na/ gzugs la sogs pa de dag nyid la/ la la la ni yid du 'ong / la la la ni yid du mi 'ong ba ste skyes bu so sos dngos po de bzhin dang gzhan du bsgom pa mi rigs so/ /ji tsam na bcom ldan 'das rgyal po'i khab 'od ma'i tshal ka lan da ka'i gnas na bzhugs par des thos te/ bcom ldan 'das kyi spyan sngar song nas don 'di zhus te/ de'i dbang du mdzad nas 'di gsungs so/ /'di'i bsdus pa'i don ni tshig rkang dang pos ni nyes dmigs yongs su bstan to/ /gnyis pas ni ro myang ba la skye bo gang gis chags pa'o/ /lhag mas ni nyes dmigs mthong bas nges par 'byung ba ste/ gang gi phyir ro myang ba la rgyab kyis bltas pa yin pa'i phyir nges par 'byung ba yin no/ /da ni tshig gi don brjod par bya ste/ med ces bya ba ni yod pa ma yin pa ste 'dod pa'o/ /ji ltar med ce na/ smras pa/ rtag pa zhes bya ba smos te/ rnam par mi 'gyur ba'i chos can no/ /mi rtag pa ni yod do/ /'dis ni ji ltar 'dod pa rnams yongs su shes par bya ba med pa ma yin pas de ltar ston to/ /gang la zhe na smras pa/ mi rnams la zhes bya ba smos te/ shed bu dag la'o/ /'di la rnam par 'gyur ba'i chos can rnams 'dod pa dag 'jig pa nye bar mthong ba'i phyir yid ches par bya ba rnyed sla ba yin pas mi zhes bya ba tsam smos kyi/ 'dod pa thams cad kyang tshul de lta bu nyid do/ /gal te 'di dag rtag par med na ni de lta na dngos po yod pa zla ba gnyis la sogs pa bzhin du med pa yin no zhe na smras pa/ de yod pa'ang zhes bya ba smos te/ re zhig yod pa'i rkyen la yod pa yin no/ /yang gi sgra ni dngos po yang dag par yod pa ste/ 'bras bu dang ldan pa'i sa bon bzhin no/ /'dus ma byas kyang yod dam zhe na/ des na khyad par bstan pa'i phyir smras pa/ mi rtag pas zhes bya ba smos te/ rnam par 'jig pa'i chos can yin pas mi rtag pa'o/ /gang la yod ce na/ 'di ltar 'dod can zhes bya ba smos te/ 'dod pa la 'dun pa'i 'dod chags gang la yod pa de ni 'dod can te/ 'dod pa la 'dod chags dang ma bral ba'o/ /gang la zhes bya ba ni yul gyi 'dod pa dag la'o/ /chags pa ni rang dbang du ma byas pa'o/ /gang gi phyir btson ra'i nang na yod na su zhig bsdams par mi 'gyur bas so/ /de ltar rtag pa nyid du yang dag par brtags te yod pa de spangs shing bor nas 'dod pa rnams yongs su shes par bya'o zhes ston to/ /de gang yin zhe na/ blang bar bya ba dang / dor bar bya ba dang / lhag par btang snyoms su bya ba gsum po 'di'i dngos po yod cing gnas pa'i phyir ro/ /smras pa/ spang bar bya ba ni nges par zag pa dang bcas pa'i phyir de la dmigs pa'i nyon mongs pa spang gi de nyid ni spang bar bya ba ni rdzogs par mi 'gyur ro/ /gang mig la 'dun pa'i 'dod chags de spang bar 'dod pas 'dun pa'i 'dod chags spangs pa nyid yin gyi/ /gang lta ba de yang nyams par 'gyur ro zhes mdo'i don ma dmigs pa'i phyir ro/ /rab spongs la zhes bya ba ni de la dmigs pa'i nyon mongs pa thob pa bcad pas de spangs pa'o/ /rnam pa zhes bya ba ni rnam pa'i don nam rim pa gzhan du yang blta bar bya ste/ mi 'gyur zhes bya ba 'di'i don to/ /de zhes bya ba ni 'dod pa'o/ /ji ltar 'di spang bar bya ba yin zhe na smras pa/ yang srid med phyir zhes bya ba smos te/ ci nas kyang yang skye ba med par 'gyur ba ste/ 'phags pa'i lam gyis spang bar bstan pa'o/ /de'i phyir dge slong dag gang 'phags pa'i shes rab kyis spang bar bya'o zhes pa'i tshig gis te/ gang 'phags pas 'di dag spangs pa ni yang srid par mi 'gyur ro/ /so so'i skye bo rnams kyis spangs pa 'di dag ni yang skye bar 'gyur ba'i phyir ro/ /de ltar spang bar bya ba'i 'dod pa'i phra rgyas gang yin zhe na smras pa/ mi 'gyur bar zhes bya ba smos te/ mi 'ong bar zhes bya ba nyid de/ 'phags pa'i gang zag de zhes bya ba ni tshig gi lhag ma'o/ /mi 'gyur bar zhes bya ba de gang yin zhe na/ smras pa/ 'chi ba'i gnas zhes smos te/ 'chi ba'i gnas ni gnas pa gang la yod pa de 'chi ba'i gnas te/ 'chi ba'i gnas ni skye ba'i sgo ste/ yang skye ba zhes bya ba'i don to/ /gang gi phyir ma skyes na ni 'chi bar mi 'gyur te/ gang zhig skyes nas mi 'chi ba ni med de des na skye ba la brten pa ni 'chi ba'o/ /gzhan dag na re 'chi ba nyid 'chi ba'i gnas yin te/ ming nyid ming gi gnas lta bu'o zhes so/ /'o na yang gtan du 'dod chags dang bral ba yang phyir mi 'ong bar mi 'gyur te/ 'chi ba'i gnas nyid du 'ong ba yod do zhe na/ de ni de ltar bden pa nyid de 'on kyang nges par ni 'ong ba med do/ /yang na srid pa tha ma pa'i dbang du byas te/ de la dgongs pa yin pas nyes pa med do/ /yang na thams cad bsdus te spang ba'i dus su de dang bral ba'i thob pa rnyed pa'i phyir de spang ba bstan te/ ji skad du gsungs pa/ dgra bcom pa'i gnas skabs de la 'dod pa'i zag pa dang / srid pa'i zag pa dang / ma rig pa'i zag pa las sems rnam par grol bar 'gyur ro zhes so/ /kha cig tu ni mi 'gro bar zhes brjod do/ /mi 'ong ba dang mi skye ba zhes bya ba'i don zhes gsungs pa zhes bya ba'i don ni bdag nyid kyis de skad bshad pa yin gyi/ /gzhan dag gis ni ston par mi nus so zhes ston to/ /'di skad ston pa yin te/ rgyu gsum gyis ni 'dod pa rnams spang bar mi rung bar 'gyur te/ gal te yang rtag par gyur na ni gter lta bu'o/ /gal te mi rtag par gyur na ni ri bong gi rwa lta bur 'gyur ro/ /gal te gnod par ma gyur na ni 'phags pa'i lam lta bur 'gyur ro/ /'di ltar 'dod pa ni rtag pa med de/ mi rtag pa ni yod do/ /yul 'di dag la yang 'dod pa can chags pa yin te/ des na gtan du 'di dag yang srid pa med par bya ba'i phyir spang bar bya ste/ 'di spangs pas ni 'chi ba'i gnas su mi 'gyur ba'i tshul gyis phan yon bstan pa yin no/ /'dod pa rnams yongs su shes par bya ba nas shes shing gzung ba'i phyir 'di gsungs so/ /'dod pa rnams spang bar gyur pa la ni dgra bcom pa nyid ma thob kyang 'dod pa spangs pa'i phan yon bshad pa/ 'dun pa skyes zhes bya ba la sogs pa smos te/ mdo las phyir mi 'ong ba ni rnam pa lnga zhes gsungs so/ /bar ma dor yongs su mya ngan las 'da' ba dang / skyes nas yongs su mya ngan las 'da' ba dang / mngon par 'du byed pa dang bcas pas yongs su mya ngan las 'da' ba dang / mngon par 'du mi byed pas yongs su mya ngan las 'da' ba dang / gong du 'pho ba zhes bya ba bstan pa las bcom ldan 'das kyis 'di gsungs so/ /'dir yang mdor bsdu na tshul khrims la rab tu gnas pa'i dge slong gis khyad par rtog par bya ba'i phyir gang gis yang dag par sbyor ba dang / gang yang dag par sbyor ba dang / gang yang dag par sbyor ba'i 'bras bu dang / gang yang de'i 'bras bu'i phan yon de dag 'dir bstan pa yin no/ /de la 'dun pa skyes pa zhes pas ni gang gis yang dag par sbyor ba'o/ /zad par mi byed pa dang / sems la skyon med pa dang dran pas ni gang yang dag par sbyor ba'o/ /gcig gis ni grong du bsod snyoms kyi phyir rgyu ba na dbang po'i sgo yongs su bsdams pas cho ga dag pa'o/ /gnyis pa la gnas pas ni sgrib pa dag las sems yongs su sbyangs pa ste/ gnas pa dag pa'o/ /gsum pas ni yongs su dag pa'i spyod pa la gnas shing ting nge 'dzin la brten nas bag chags spangs pa'i phyir de'i gnyen po dran pa nye bar gzhag pa bsgom pas so/ /'di yang mnyam par ma bzhag pa'i gnas skabs na yang dag par sbyor ba rnam pa gnyis so/ /mnyam par bzhag pa'i gnas skabs na ni rnam pa gcig tu bstan to/ /gang yang dag par sbyor ba'i 'bras bu ni 'dod pa rnams la so sor ma chags pa zhes bya bas bstan to/ /'bras bu de'i phan yon ni gang du 'pho ba ste 'di dag go/ /tshig re re'i dbye ba yang 'dun pa zhes bya ba ni gang la 'dun pa 'di skyes pa yod pa de ni 'dun pa skyes pa ste/ 'dod pa skyes pa zhes bya ba'i don to/ /gang la 'di lta bu'i tshul gyis chos ni 'dun pa skyes pa yin te/ nam zhig na de'i tshe skye mched rdzogs par byas te gnas par bya'o zhes bya ba dang / gang 'phags pa'i skye mched rdzogs par byas te gnas par bya'o zhes bya ba ni 'dun pa skyes pa'i sgra'i don to/ /'dis ni dang po'i sbyor bas gong du 'pho ba bstan to/ /zag par mi byed dang zhes bya ba ni nyon mongs pa'i yul la 'jug pa ni zag pa'o/ /rgyun du zag cing 'byung ba'i phyir rnag 'dzag pa lta bu ste/ de gang la yod pa de ni zag pa ste/ dbang po'i sgo ma bsdams pa'o/ /de'i phyir mdo las gsungs pa/ ji ltar yang dge slong dag rab tu zag par 'gyur ba yin zhe na/ dbang po'i sgo ma bsdams par gnas pa'o zhes pas so/ /ci'i phyir de la zag pa zhes bya zhe na/ smras pa/ de la skye mched drug dag las yul rnams su zag par byed pa ste/ rkyal pa'i bug pa dag las chu 'dzag pa bzhin no/ /zag par mi byed pa ni de las bzlog par rig par bya'o/ /sems la skyon med ces bya ba ni yid la skyon dang rnyog pa med pa ste/ rnyog pa'i kun du rtog pas kun du mi rtog pa'o/ /rnyog pa'i kun du rtog pa de yang 'dod pa dang gnod sems dang rnam par 'tshe ba'i kun du rtog pa zhes grags pa ste/ nges par mi 'byung ba dang / gnod sems dang / rnam par 'tshe ba'i kun du rtog pa dag gi skyon med par gyur pa'i phyir te/ de ltar na mdo las gsungs pa yin no/ /ji ltar skyon med par kun du rtog par 'gyur zhe na/ nges par 'byung ba dang / gnod sems med pa dang / rnam par 'tshe ba'i kun du rtog par mi 'gyur ba yin no/ /de ltar rim pa 'dis snod du gyur pa dang / rnal 'byor can bden pa rtog par bya ba'i phyir sbyor ba rtsom 'dod par 'gyur te/ dang por dran pa nye bar gzhag pa bzhi'i bsgom pa 'di nyid la brtson par 'gyur ba bstan pa'i phyir smras pa/ dran pa dang zhes bya ba smos te/ dran pa nye bar gzhag pa bzhi la gnas pa yin te/ de ltar na mdo las gsungs pa yin no/ /yang dge slong ji ltar dran par 'gyur zhe na/ 'di la nang gi lus la lus kyi rjes su lta zhing gnas te/ rgya cher chos la'o zhes pa'o/ /ji 'di tsam nyid la gong du 'pho ba yin nam zhe na/ de ni ma yin te smras pa/ 'on kyang 'dod pa rnams la so sor ma chags pa gang zhes bya ba smos te/ gzugs la sogs pa'i yul dag la chags pa med pa ste/ gang gi 'dod pa'i 'dod chags kyi bag la nyal zag pa med pa'i lam gyis rab tu spangs pa zhes bya ba'i don to/ /de ni gong du 'pho ba yin zhes gsungs zhes bya ba la/ gong ni shas cher steng du'o/ /'pho ba ni 'gro ba ste/ gang gi skye ba rang gi gnas dang 'og tu ma yin pa gang du skye ba zhes bya ba'i don to/ /phyir mi 'ong ba rnam pa bzhi ma gtogs pa de ltar de nyid smos pa ni nyams pa'i gnas skabs yin pa'i phyir ro/ /'di ltar 'dod pa na spyod pa'i so so'i skye bo thams cad dang so so'i skye bo ma yin pa dag ni nyams pa nyid de/ 'di ni phyir mi 'ong ba thams cad la yang gang 'gros gzhan pas khyad par ma thob pa de ni nges par gang du 'gro bar 'gyur de la lam gyi tshogs 'dun pa skyes pa la sogs pa dang dran pas ni lam bstan to/ /lhag mas ni phan yon dang bcas pa'i lam gyi 'bras bu yongs su bstan to/ /gzhan dag ni gzhi dang bcas pa'i bslab pa gsum rnam par dag pa'i thabs 'bras bu dang bcas pa dang / phan yon dang bcas pa 'dir bstan to zhes zer te/ de la 'dun pa skyes pa zhes bya bas ni bzhi'o/ /zag par mi byed ces bya bas ni lhag pa'i tshul khrims kyi bslab pa rnam par dag pa'i thabs so/ /sems la skyon med ces bya bas ni lhag pa'i sems kyi bslab pa rnam par dag pa'i thabs te/ 'dir ting nge 'dzin la ro myang ba med pas skyon med pa'i sems su rig par bya'o/ /dran pas ni lhag pa'i shes rab kyi bslab pa rnam par dag pa'i thabs so/ /'og ma dag gis ni phan yon dang bcas pa dang de'i 'bras bu bstan to/ /de la 'di ni 'dod chags dang ma bral ba'i 'phags pa rnams 'dod pa'i khams las 'da' bar bya ba'i phyir dang / de las 'dod chags dang bral ba rnams kyis mi slob pa'i lam mngon sum du bya ba'i phyir 'di gsungs so/ /ci dge ba'i 'dun pa la sogs pa'i yon tan 'thob pa dang / skyon thams cad spang ba cig car du'am/ 'on te gnyi ga rim gyis 'gyur zhes bya ba la de nyid nges par bstan pa'i phyir smras pa/ mgar ba yis ni zhes bya ba la sogs pa smos te/ dge slong zhig du ma'i sgo nas nyon mongs pa nye bar bstan pa thos te/ bdag gis nyon mongs pa spang bar bya ba ni ji ltar nus te/ 'di dag ni mtha' yas pa'i phyir cig car spang bar sus kyang mi nus so zhes rnam par rtog cing yid mi bde ba chen po skyes par gyur pa las ji tsam na bcom ldan 'das de gdul ba'i phyir grong khyer du rgyu zhing gshegs pa las dngul mgar dngul la rim gyis dri ma sel bar byed pa dag gzigs pa dang / yang dge slong de la bka' stsal pa/ dge slong mgar ba 'dis rim gyis dngul gyi dri ma mtha' dag sel bar byed pa ltos shig / btsun pa de de bzhin no zhes gsol to/ /de bzhin du dge slong khyod kyis cung zad tsam gyis sems kyi dri ma bstsal bar byas na ring po mi thogs par dri ma med par 'gyur ro zhes bstan nas tshigs su bcad pa 'di gsungs so/ /gang gi tshe dang gang gis dang / ji ltar yang nyon mongs pa spang bar nus pa de dang mthun pa dang / dpe de 'dir bstan pa yin no zhes bya ba ni bsdus pa'i don to/ /de la rim pa bzhin zhes bya bas ni gang gi tshe zhes bya ba'i dus bstan to/ /gang gis zhes bya ba ni blo gros dang ldan pas so/ /ji ltar zhes bya ba ni/ skad cig skad cig cung zad tsam/ /zhes bya bas bstan to/ /mgar ba dang dngul gyis ni dpe bstan to/ /rim pa bzhin zhes bya ba ni bsam pa phun sum tshogs pa ste/ dge ba'i bshes gnyen bsten pa dang tshul khrims dang thos pa la sogs pa'i tshogs yongs su rdzogs pa'i rim pas so/ /de dang rjes su mthun pa'i tshogs med par ni yon tan 'thob pa med de/ ji skad gsungs pa de la re zhig dge slong dag dge slong la gus pa med par gnas pa ni ma bsngags te/ tshangs pa mtshungs par spyod pa dag la ji srid yang dag par kun du spyod pas chos yongs su rdzogs par 'gyur ba dang / rgya cher rnam par rol pa'i ye shes mthong ba'i phung po yongs su rdzogs par 'gyur ba 'di ni gnas med de/ de bas na rim pa bzhin du bslab na rab tu shes pa yin te/ tshul khrims dang rtogs par 'gyur ro zhes bya ba la sogs pa'o/ /blo gros dang ldan pa zhes bya ba ni shes rab dang blo gang la yod pa de ni blo gros dang ldan pa ste/ blo dang ldan zhing thabs shes pa bzhin bya ba'i don to/ /cung zad cung zad ces bya ba ni nyung du nyung du ste dri ma zhes bya ba 'di dang sbyar ro/ /skad cig skad cig tsam zhes bya ba ni yang nas yang ste/ rtag tu zhes bya ba'i don to/ /de lta na 'di ji lta bu zhe na/ 'dir dpe smras pa/ mgar ba zhes bya ba ste/ lcags dang gser dang dngul la sogs pa thams cad byed pa dag la mgar ba zhes bya'o/ /'dir ni gleng gzhi'i dbang gis dngul mgar la dgongs pa yin no/ /dngul bzhin du zhes bya ba ni dngul lta bu ste/ de'i phyir des bsregs pa dang brdungs pa la sogs pa'i thabs kyis dngul gyi dri ma nag po sel ba de bzhin du blo gros dang ldan pas rang gi dri ma bsal bar bya zhes bya ba yin te/ zag pa med par bya ba dang / spang bar bya ba dang / zad par bya ba'o/ /dri ma ni 'dod chags la sogs pa'i bag chags la lus 'di'i dri ma zhes brjod do/ /rang gi zhes bya ba la rkyen gyi dngos po yin pa'i phyir 'dir ni rang gi sems kyi don la blo gros dang ldan pa rnams kyis bdag tu dgongs so/ /chos thams cad bdag med pa yin na yang de'i dri ma ni nyon mongs pa nyid do/ /de la 'di ni brtson 'grus brtsams pa myur du zag pa zad par 'dod pa rnams rgyud yongs su ma smin pa de dag ma thob pas yongs su skyo ba la de mi skyo bar bya ba'i phyir 'di gsungs so/ /ji srid dri ma spangs pa de tsam du phan yon du 'byung ba yin no zhes bstan pa'i phyir smras pa/ lham mkhan gyis ni zhes bya ba la sogs pa smos so/ /grong gi tsher ma zhes bya ba ni 'dod pa 'di'i tshig bla dwags yin te/ gang gi phyir dge slong dag 'dod pa ni shin tu sdug bsngal ba yin te/ ji srid 'di yongs su spangs pa de srid na yid bde ba 'thob par 'gyur zhes so/ /de'i tshe yul ko sa lar byung ba'i rgyal po gsal rgyal gyi lham mkhan dang ha cang mi ring ba zhig na rgyal po'i shing rta'i bzo byed de de dang nye bar 'tsham pa'i ko ba dag yongs su sbyor bar byed pa las rgya cher de nyid kyi dpe'i dbang du byas nas 'di gsungs so/ /'dod pa rnams ni sdug bsngal ba yin pa'i phyir de yongs su spangs na ni bde ba 'thob bo zhes bya ba ni 'di'i bsdus pa'i don to/ /lham mkhan zhes bya ba ni gang lham mkhan byed cing lham gyi bzo la mkhas pa zhes bya ba'i don to/ /ltar zhes bya ba ni dpe nye bar 'jal ba ston to/ /ko ba dag ces bya ba ni ba lang dang ma he la sogs pa'o/ /yongs su sbyangs nas zhes bya ba la sbyangs pa ni bcad pa ste mtshon gyis bskyed cing sbyangs pa'o/ /yongs su zhes bya ba ni thams cad nas te/ kun nas sbyangs nas zhes bya ba'i don to/ /ci zhig yongs su sbyangs pa yin zhe na/ smras pa/ lham zhes bya ba smos te/ shing rta'i 'khor lo la bcing ba ste ko ba gang gis shing rta'i 'khor lo bcing zhing nye bar spel ba de ni lham zhes bya ba'i sgrar brjod de/ nA ha ban da na zhes bya ba'i skad kyi byings kyis bstan pa'i phyir ro/ /yang na lham mkhan ni ko lpags mkhan te/ 'dis rkang pa la nye bar 'gebs pa yin pas lham ste/ rkang pa skyob pa zhes bya ba'i don to/ /gang dang gang spangs pa zhes bya ba dang ko ba zhes bya bar sbyar ro/ /de ni 'di skad bstan pa yin te/ ji ltar lham mkhan gyis lham de'i mtha' 'di la yang gang dgos pa yongs su sbyangs nas gang dang gang mi dgos pa'i ko ba dag ni yongs su dor bar byas pas de dang des mngon par 'dod pa'i don 'grub par byed do/ /de bzhin du 'dod pa spong bar byed pas kyang gang dang gang cung zad skyes pa'i rnam pa spang bar byas pa de dang des ni bde ba dang ldan par 'gyur te/ bde ba'i rgyu zhes bya ba'i don to/ /de yongs su spang bas ni de'i gzhis sdug bsngal mi 'byung ba'i phyir dang nges par 'byung ba'i bde ba 'byung ba'i phyir bde ba dang ldan pa yin pas rgyu la 'bras bu btags pa'i phyir te/ 'di ltar bde ba ni nad sel ba'i sman bsten pa bde ba yin no zhes bya ba de bzhin no/ /'di ltar 'dod pa yang rnam pa gnyis te/ dngos po dang nyon mongs pa'i bdag nyid do/ /de la dngos po'i 'dod pa ni gzugs la sogs pa yul rnam pa lnga dang / khyim rnams yongs su gzung ba pha dang ma dang bu smad la sogs pa'o/ /rab tu byung ba rnams kyi ni rnyed pa dang bkur sti'o/ /nyon mongs pa'i bdag nyid ni 'dod pa de yang dngos po de dag nyid la 'dod pa ste/ gang 'dun pa'i 'dod chags so/ /de gnyi ga'i sbyor ba 'di dag gi rnam pa yongs su spangs pa de ni bde ba dang ldan pa'o/ /ji skad du gsungs pa/ yongs su bzung ba spang byas na/ /gnod pa de dag mi 'byung ste/ /de bzhin sems kyi dri ma dag /spang byas gnod pa de mi 'byung / /zhes so/ /de la 'di ni 'dod pa la mngon par dga' ba rnams 'dod pa spangs pa la gzud pa'i phyir gsungs so/ /'dod pa rnams ni cung zad tsam spangs pa las bde ba cung zad tsam nyid yin la mtha' dag spangs na ni bde ba phun sum tshogs pa nyid yin no zhes bstan pa'i phyir smras pa/ gal te bde ba zhes bya ba la sogs pa smos so/ /bram ze zhig bcom ldan 'das kyi spyan sngar song ste/ gsol pa/ kye gau ta ma ci zhig spangs na bde ba thams cad thob par 'gyur zhes pa dang / de'i dbang du mdzad de tshigs su bcad pa 'di gsungs so/ /'dod pa thams cad spangs pa phan yon dang bcas pa bstan to zhes bya ba ni 'di'i bsdus pa'i don to/ /kun zhes bya ba ni 'jig rten dang 'jig rten las 'das pa'i bde ba ma lus pa gzung ngo / /gal te zhes bya ba ni ji ste'o/ /bde ba ni 'dod pa rjes su myong ba la sogs pa'o/ /'dod pa zhes bya ba ni rjes su 'brel ba dang mngon par 'dod pa'o/ /'dod pa thams cad ces bya ba ni dngos po'i 'dod chags dang nyon mongs pa'i 'dod chags so/ /yongs su spong zhes bya ba ni rab tu dor ba'o/ /'dod pa gang dang gang spangs pa/ /zhes bya ba ni bde ba'i 'du shes kyi 'dod pa rnams phyogs gcig ma spangs na ni zang zing med pa'i bde ba phun sum tshogs pa thob par mi 'gyur te/ des na bcom ldan 'das kyis bka' stsal pa/ gal te bde ba yongs su rdzogs 'dod na/ /'dod pa thams cad yongs su spang bar bya/ /zhes bya ba yin te/ ci'i phyir zhe na/ smras pa/ 'dod pa thams cad ces bya ba smos te/ gang gi phyir 'dod pa thams cad yongs su gtong ba'i ngang tshul gang yin pa de ni 'dod pa thams cad yongs su spangs pa'o/ /ji ltar yang 'dod pa thams cad yongs su spong bar 'gyur zhe na/ smras pa/ mthong ba dang bsgom pa'i lam gnyis kyis 'dod pa na spyod pa'i nyon mongs pa'i ris gnyis spong bas so/ /mchog tu zhes bya ba ni gtan du'o/ /yang na zag pa med pa'i lam gyis spangs pas bde ba khyad par can du gyur pa ste/ khyad par du gyur pa zhes bya ba'i don to/ /bde ba thob pa zhes bya ba ni bde ba rjes su myong ba dang / bde ba la gnas pa dang thob pa zhes bya ba'i don to/ /ji ltar de yongs su spangs pas mchog tu bde ba thob pa yin zhe na/ gang gi phyir de ni phyir mi 'ong bar gyur nas 'dod pa'i khams su yang mi 'ong ba dang / phung po lhag ma med pa'i mya ngan las 'das pa'i dbyings su 'gro ba yin te/ des na gnod pa dang bcas pa'i khams las yang dag par 'das pa'i phyir mngon par 'dod pa'i bde ba 'thob pa yin no/ /'dod pa phyogs gcig spangs pas chog par 'dzin pa dag 'dod pa thams cad spangs pa la gzud pa'i phyir 'di gsungs so/ /ci'i phyir 'dod pa spangs pas mchog tu bde ba thob par brjod ce na/ gang gi phyir ngoms mi shes pa'i phyir 'dod pa ni sdug bsngal ba yin te/ des na 'dod pa de dag spangs pa 'di ni bde ba yin no zhes bstan pa'i phyir smras pa/ ji srid 'dod pa'i rjes 'brang ba/ /zhes bya ba la sogs pa smos so/ /bde ba 'dod pa zhes bya ba'i gcer bu pa de ni 'di ltar lta zhing 'di skad smras te/ 'di lta ste dka' thub drag pos thar pa thob pa de nyid ngoms pa yin no zhe'o/ /mchod sbyin gyi bdag po zhes bya ba'i bram ze de yang 'di ltar lta zhing 'di skad smras te/ 'di lta ste/ ji ltar 'dod pa bzhin du 'dod pa las longs spyod pa nyid kyis ngoms pa yin gyi/ thabs gzhan gyis ni ma yin te/ dper na chu nye bar longs spyod pas skom pa dang bral ba ni de'i dngos po nyid kyis thar pa'o/ /de bas na de gnyis kyi dbang du byas nas tshigs su bcad pa 'di gnyis gsungs so/ /de la re zhig dang po'i bshad pa smras pa/ ji srid ces bya ba ni dus ji srid kyi bar du'o/ /'dod pa'i rjes 'brang ba zhes bya ba ni gzugs sdug pa la sogs pa yul gyi rjes su 'brang zhing rab tu ston pa dang spyod pa'o/ /de srid bar du ngoms mi 'gyur/ /zhes bya ba ni dus de srid kyi bar du sred pa dang bral ba'i mtha' gnyis so/ /yang thabs gang gis ngoms pa rnyed par 'gyur zhe na/ smras pa/ de las zhes bya ba smos te/ 'dod pa dag las so/ /ldog byed ces bya ba ni spangs pa'o/ /de'i phyir ji srid ji srid du 'dod pa spong bar gyur pa de dang de srid du don gnyer ba dang bral ba yin te/ ji skad du gsungs pa/ gcig tu spang bya spang bya ste/ /yang dag spyan na 'dzeg par 'gyur/ /rang gi lus la 'dod pa yi/ /skas ni bya bar mi rigs so/ /zhes so/ /lus dang sems kyi skyo bar yang dag par bstan pas ting nge 'dzin 'thob par 'dis ston pa yin no/ /gang gi phyir sred pa bsal ba'i thabs ni dben pa'o/ /ci zhig byas nas nyon mongs pa dang 'dod pa rtsa ba nas 'byin par 'gyur zhe na/ smras pa/ shes rab kyis ni zhes bya ba smos te/ zag pa med pa'i ye shes kyis 'dod pa ji lta ba bzhin du yongs su shes pa yin te/ ji skad du gsungs pa las/ gcig kyang mngon par mi shes shing yongs su mi shes pas sdug bsngal gyi mthar byed par 'gyur ro zhes nga mi smra'o zhes so/ / gang dag ces bya ba ni gang la la ste sngar bstan pa'i rim pas dmigs te/ rgyal rigs dang bram ze la sogs pa'i rigs la ltos pa med de/ de bzhin gshegs pa ni rus dang rigs dang rgyud la yongs su mi gzigs te/ dge ba dang mi dge ba'i las la yang dag par gzigs so/ /gang gi phyir dag pa ni shes rab la rag las pa yin gyi/ rigs la rag las pa ni ma yin no/ /tshim pa zhes bya ba ni sred pa dang bral ba ste/ don du gnyer ba spangs pa'o/ /de dag ces bya ba ni phyin ci ma log pa'i thabs rjes su 'brang ba ste/ gang dag gi sgras bstan to/ /'thob ces bya ba ni rnyed pa'o/ /gang shin tu dka' bas dka' thub la gnas pa dang 'dod pa la brten pa ni bzlog pa yin no zhes ston te/ yun ring por yang 'dod pa la brten pa'i phyir ro/ /'di skad ston pa yin te/ 'dod pa dag la bde blag tu rjes su sbyor ba'i phyir te/ de yang bdag nyid nyon mongs pa la sbyor ba yin pa'i phyir dang / de yang ngoms par mi byed pa dang / rab tu bsgrubs pa'o/ /yang dag pa'i lta bas yang dag par gzung bas ni ngoms par byed pa nyid du ston to/ /de la 'di ni 'dod pa bsten pa dang dka' thub byas pa las ni ngoms par mi 'gyur gyi/ de kho na nyid phyin ci ma log par shes pa dang thabs shes pas ni ngoms par 'gyur bas de nyid la gzud pa'i phyir 'di gsungs so/ /dus ji srid 'dod pa nye bar longs spyad pas kyang ngoms pa nyid do zhes rtog pa la smras pa/ 'dod pas ngoms par mi 'gyur bas/ /zhes bya ba la sogs pa smos so/ /skyid pa zhes bya ba ni skyid par byed pa ste 'dod pa la longs spyod pa'i ngoms pa bas khyad par du ngoms pa zhes bya ba'i don to/ /ngoms pa zhes bya ba ni 'dir sbyar te/ gang zhig gis ngoms she na/ smras pa/ shes rab kyis zhes bya ba smos te/ gang de bzhin nyid shes pa'i rgyu des bskyed pa'i ngoms pa de'o/ /ci'i phyir zhe na/ smras pa/ mi 'gyur bas zhes bya ba smos te/ 'dod pa nye bar longs spyod pas su zhig gtan du ngoms par 'gyur te mi 'gyur bas so/ /'dod pa dag las ldog par 'dod pas kyang 'dod pa dag la brten par mi bya'o/ /ci'i phyir zhe na/ smras pa/ 'dod pas ngoms par mi 'gyur bas/ / zhes smos te/ /'di ltar nam yang 'dod pa la longs spyod pas ni chags pa dang bral bar mi 'gyur te/ rgas pa'i gnas skabs na yang dregs pa dang 'dod pa las ldog par mi 'gyur te/ ji skad du bshad pa/ rga bas lus ni rgas gyur cing / /mgo ni skya bor gyur pa dang / /dbang po rnams ni rnyis gyur kyang / /'dod chags zhe sdang rga mi 'gyur/ /zhes pa'o/ /gang gi phyir rgas pa na 'dod pa dag la lhag par bsten du ni lus mtha' dag skams par gyur te/ sred pas sems la khyab par gyur kyang de la longs spyod par mi nus pa yin te/ des na mi bsten pa yin gyi ngoms pa ni ma yin pa'i phyir ro/ /shes rab kyis kyang de bzhin du ngoms par mi 'gyur ram zhe na/ de ni ma yin te ci'i phyir zhe na/ smras pa/ shes rab kyis ni zhes bya ba smos te/ zag pa med pa'i shes rab kyis skyes bu gang ngoms na ni srid pa dang bral ba yin te/ de ni yang 'dod cing sred pa'i dbang du mi 'gro'o/ /de nyid smras pa/ srid pa'i dbang du mi 'gyur ro/ /zhes bya ba smras te/ dbang du mi byed pa ni bdag dang rjes su mthun pa sred pa'i gzhan gyi dbang du mi 'gro ba ste/ de'i bdag nyid la rag ma lus pa zhes so/ /ngoms par 'dod pas ni ye shes nyid la goms par bya'i 'dod pa bskyed par ni mi bya'o zhes nges pa bskyed par bya ba'i phyir 'di gsungs so/ /'dod pa'i dbang du 'gro ba ni skyon 'di yod de/ gang du ngan par spyod pa'i rgyur gyur pa dang / 'dod pas ni de bzhin nyid shes pa la bar du gcod par byed pa yin no zhes bsgrub pa'i phyir smras pa/ 'dod la chags pa'i zhes bya ba la sogs pa tshigs bcad gnyis so/ /yul yangs pa can na khyim bdag drag shul can zhes bya ba bran pho dang bran mo dang las byed pa dag la chad pas bsdigs pa dang 'jigs pas bsdigs pa dag byas nas nyin par bud med kyi tshogs dang rol mos rtse zhing dga' bar spyod la skyed mos tshal nas skyed mos tshal du 'gro ba de gzigs nas/ bcom ldan 'das kyis 'di gsungs so/ /'dod pa la sred pa ni ngan par spyod pa'i rgyur gyur pa dang / kun tu rmongs par bstan pa dang / de la chags pas bya ba ma yin pa la 'bad cing 'jug par 'gyur bas nges par mi rtag par 'gyur ba des ma mthong ba yin no zhes bya ba ni bsdus pa'i don to/ /'dod la zhes bya ba ni dngos po'i 'dod pa la'o/ /mi gang yin zhes bya ba ni sems can gang dag go/ /chags pa zhes bya ba ni lhag par zhen pa ste/ so so'i skye bo 'dod pa na spyod pa dag go/ /chos min zhes bya ba ni lus dang ngag dang yid kyis nyes par spyod pa ste/ ji skad du gsungs pa/ chos ma yin pa gang zhe na/ 'di la gcig ste/ srog gcod par 'gyur ba'o zhes bya ba la sogs pa mdo las rgya cher gsungs so/ /kye ma zhes bya ba ni 'dod pa la lhag par zhen pa rnams la bcom ldan 'das mi gtsang ba'i tshogs kyi nang na srin bu gnas pa bzhin du thugs brtse ba yin te/ mi gang dag 'dod pa la chags pa de dag dang 'dod pa rnams kyi don phun sum tshogs pas dregs pas ngan par spyod pa byed cing dga' bar 'gyur ba la'o/ /de dag ces bya ba ni gang sngar bstan pa'i 'dod pa la chags pa de dag go/ /chos ma yin pa ngan par spyod pa rnam pa bcu po de dag la dga' ba zhes bya ba ni dga' ba dang ldan pa'o/ /ji skad du gsungs pa/ 'dod pa ni gsod par byed pa yin te/ 'dod pa'i gzhi dang 'dod pa'i rgyus rgyal rigs dang rgyal rigs su 'thab par 'gyur ro/ /de dag 'dod pa la chags pa dang chos ma yin pa la dga' ba des kyang 'dod pas blo rnam par g.yen spyo ba de dag gis 'chi ba la nye bar gnas par gyur ba dang / bar chad mthong bar ma gyur pa yin te/ gags ma rtogs shing bar du gcod pa mi bzad pa ma rtogs pa zhes bya ba'i don to/ /'dod pa dang ldan pa rnams la gang yod na glo bur du 'chi ba'i mtshan nyid kyi bgegs yod par 'gyur zhe na/ smras pa/ cung zad gson por 'dug pa na/ /zhes bya ba smos te/ dus shin tu thung bar gnas pa'i tshe yod par gyur pa la ste gang de ltar yun ring du 'tsho ba de yang lo brgya'o zhes lung las gsungs pas so/ /rgyu mtshan gyi 'dun pa'am cung zad gson pa'i ched du bar chad mthong bar ma gyur pa yin te/ ji skad du bshad pa/ lkog mar srog phyin par gyur na ni thams cad kyang gzhan gyi lag tu 'gro ba nyid de ji srid 'tsho ba de srid kyi bar du ni 'dod pa yod do/ /de dang bral na ni 'dod pa dang yang bral bar 'gyur ro zhes so/ /de la 'di ni 'dod pa la zhen pa dag de las 'dun pa bzlog pa'i phyir gsungs so/ /ji ltar yang 'dod pa la chags pa dang / chos ma yin pa la dga' bas bdag dang gzhan gnyi ga nye bar 'joms pa yin no zhes bstan pa'i phyir smras pa/ blo ngan longs spyod kyis zhes bya ba la sogs pa smos so/ /blo ngan ni byis pa ste/ longs spyod kyis byas pa'i sred pa'i kun nas nyon mongs pa dang sred pas byas pa'i ngan par spyod pa'i kun nas nyon mongs pa zhes bya ba ni 'dir bsdus pa'i don to/ /bcom pa ni nye bar gdung bar byed pa ste/ dge ba'i chos ring du byed cing rgyud rgud par byed pa'o/ /gang yin zhe na/ smras pa/ blo ngan zhes bya ba smos te/ blo ngan pa gang la yod pa de ni blo ngan te shes rab dang rtog pa ngan pa ste/ rmongs pa zhes bya ba'i don to/ /de yang gang gis she na/ smras pa/ longs spyod kyi zhes bya ba smos te/ 'dod pas nye bar spyod pa'i phyir longs spyod de/ 'dod pa'i yul rnams so/ /de dag kyang rmongs pa'i skye bo nyid bcom par 'gyur zhing ji srid skyo ba chung ba'i 'phags pa'i gang zag rnams kyang g.yen spyo bar 'gyur ro zhes bstan to/ /mi byed cing zhes bya ba ni nam yang pha rol tshol bar mi byed pa yin te/ 'dod pa dag las pha rol tu nges par 'byung ba ste/ de tshol ba'i ngang tshul gang la yod pa de ni de ste/ de lta bur mya ngan las 'das pa tshol ba med pa ste so so'i skye bo zhes bya ba'i don to/ /gzhan dag tu ni bdag nyid tshol ba zhes brjod de/ bdag nyid la phan pa tshol ba yin pa'i phyir mkhas pa zhes bya ba'i don to/ /'dod pas rmongs pa zhes bya ba la/ rmongs pa'i skye bo ni nye bar gdung ba yin te nye bar chags par 'gyur ro/ /des na ngan par spyod pa bsags pas bdag dang gzhan la nye bar gnod pa yin no zhes bstan pa'i phyir smras pa/ bdag dang gzhan yang phung bar byed/ /ces bya ba smos te/ de yang longs spyod la chags pa dang longs spyod la sred pas bdag phung bar byed de de ngan song nye bar slong ba'i ngan par spyod pas so/ /gzhan yang zhes bya ba ni sems can gzhan yang phung bar byed pa yin te/ rnam pa mang po'i gnod pa byed pas so/ /dang gi sgra ni phung bar byed pa nyid du nges par gzung ba'i phyir ro/ /de gang yin zhe na/ bsam brlag ces bya ba smos te/ gang gi phyir longs spyod ma thob kyang de ni sred pa skyed par byed de/ de yang de la sred pa'i bag chags sgom par byed do/ /de ltar na des longs spyod kyis phung bar 'gyur te/ rang dbang med par 'gyur ro/ /de de ltar longs spyod la sred pa des phung bas bdag nyid kyang phung bar byed de ngan par spyod pa kun du spyod pa'i phyir ro/ /lhag ma ni snga ma bzhin no/ /gang gis de ltar phung bar byed pa yin zhe na/ smras pa/ 'dod la sred pa yis zhes bya ba smos te/ longs spyod la sred pas so/ /longs spyod don du gnyer ba dang longs spyod la chags pa rnams 'dun pa de las bzlog pa'i phyir 'di gsungs so/ /bcom pa zhes bstan pa la ji ltar 'di dag bcom pa yin zhe na/ smras pa/ chog mi shes pa'i phyir dang / mnog chung ba'i phyir dang / nyes pa mang bas so/ /'di nyid smras pa/ kAr ShA pa Na'i char bab kyang / /zhes bya ba la sogs pa'i tshigs su bcad pa bzhi smos so/ /rgyal po nga las nus brgya byin brgya rtsa bcu bzhi'i tshe tshad dang mnyam pa snyed du lha dang mi'i bde ba nyams su myong nas/ de'i tha mar rgya cher smras pa/ bdag gis ni shin tu yun ring por nye bar longs spyod cing lhag par rol par byas kyang 'dod pa rnams kyis ma ngoms te/ de bas na/ kAr ShA pa Na'i char bab kyang / /zhes bya ba la sogs pa smras so/ /gzhan dag na re mnyan yod na ba ka zhes bya ba rab tu byung ba la ni mngon par mi dga' la 'dod pa dag la ni dga' bas de dang dge slong dag las brtsams te dang po'i tshigs su bcad pa gnyis gsungs zhes so/ /de dag kyang gcig la gcig 'brel pa zhes bya ba ni 'dir bsdus pa'i don to/ /ji ltar yang 'dod pa rnams yongs su shes par bya ba ni chog mi shes pa dang / mnog chung ba dang / nyes dmigs mang ba'o/ /gal te 'dir ngoms par 'gyur na ni mnog chung ba dang nyes pa mang du zin kyang ngoms par 'gyur ba'i phyir don du gnyer bar 'gyur ro/ /yang na mnog che bar gyur cing nyes pa med na ngoms par mi byed du zin kyang bde ba'i phyir don du gnyer bar bya'o/ /yang na mnog chung ba yod cing sdug bsngal chung ba yin yang de lta na yang bde ba'i phyir don du gnyer bar bya ba nyid na/ gang gi phyir 'dod pa rnams ni ngoms par mi byed pa dang mnog chung ba dang nyes pa mang ba yin te/ de bas na de ltar yongs su shes par bya'o/ /gang rdzogs pa'i sangs rgyas dang / nyan thos kyis ni de yul du mi byed pas gang 'dod pa la ma chags pa'i phan yon rnams/ de'i 'bras bu ni mya ngan las 'das pa la mngon par dgyes pa ste de 'dir bstan pa yin no/ /kAr ShA pa Na'i char bab kyang / /zhes bya ba la/ kAr ShA pa Na'i gzugs bcom pa'i tshong gi tha snyad la dgongs pa ste/ gser la sogs pa las byas pa'i pa Na'i bye brag go/ /gzhan dag na re zangs ma'i pa Na'i tshad kAr ShA yin no zhes zer ro/ /de dag 'bab pa ni char te rgyun mi chad par 'bab pa'o/ /des kyang sred pa dang ldan pa dag 'dod pas ngoms pa med do/ /ji skad du bshad pa/ gang las rnyed pa de la chags/ /rnyed las chags pa skye bar 'gyur/ /zhes pa dang / sred pa'i dong 'di gting med de/ /dgang dka' ci yis khengs par 'gyur/ /gang zhig chen po blugs gyur kyang / /khengs med gting du rgo bar 'gyur/ /zhes so/ /gzhan dag na re rin po che sna bdun gyi char yin no zhes zer te/ 'di ltar yang rgyal po nga las nu'i pho brang gi nang du zhag bdun gyi bar du rin po che sna bdun gyi char bab ste/ rin po che mang po 'dir thob par gyur pa'i phyir kAr ShA pa Na ni de mtshon par bya ba'i phyir smras pa yin no/ /ngoms pa ni shin tu skom pa dang bral ba'o/ /gang gis mi ngoms she na/ smras pa/ 'dod pa rnams kyis te gzugs la sogs pas so/ /nor phun sum tshogs pa las ni 'dod pa'i sred pa 'phel bar byed do zhes bstan pa yin no/ /mi 'gyur zhes bya ba ni med pa ste/ shes rab nyid kyis 'dir ngoms kyi/ /'dod pa'i yo byad yongs su gzung bas ni ma yin no zhes pa'i don to/ /ji ltar na shes rab kyis ngoms she na/ de bzhin nyid yid la byed pa'i phyir ro/ /de ltar ngoms par mi byed pa'i skyon bstan nas gzhan bstan pa'i phyir smras pa/ 'dod pa mnog chung zhes bya ba smos te/ dug dang 'dres pa'i kha zas lta bur bde ba chung ba dang / rmi lam dang 'dra ba'i phyir ro/ /nyes pa mang ba zhes bya ba ni sdug bsngal mang po gang la yod pa de ni nyes pa mang ba yin no zhes tshig rnam par sbyar te/ gnod pa mang po zhes bya ba'i don to/ /ji skad bshad pa/ gang zhig ri rab yungs 'bru'i khyad par dang / /rgya mtsho'i che dang thigs pa'i khyad par dang / /blo ngan bzang po gnyis kyi bye brag kyang / /mkhas pas bde dang sdug bsngal de ltar 'dod/ /ces so/ /khong du chud pa zhes bya ba ni de bzhin nyid nges par byas shing tshul shin tu rtogs pa'o/ / mkhas pa ni blo rnam par gsal ba'i phyir mi dge ba la sogs pa la yang dag par yongs su brtags pas lam gyi tshogs la 'jug pa zhes bya ba'i don to/ /de ltar rnam pa gsum gyis 'dod pa yongs su shes par byas nas ci zhig ce na/ smras pa/ lha'i 'dod pa rnams las so/ /zhes bya ba smos te/ lha nyid yin pas lha'o/ /de'i 'dod pa ni lhag par yid du 'ong ba ste/ de dag la ma 'ongs pa'i nyes dmigs mthong ba'i phyir mkhas pas de nam yang mngon par mi 'thob na/ mi'i 'dod pa rnams la yang lta smos kyang ci dgos zhes bya ba ni yang gi sgra'o/ /de de ltar 'dod pa rnams la ni mngon par dga' ba med na/ gang la mngon par dga' bar 'gyur ba yod ce na/ smras pa/ sred pa zad pas dgyes par 'gyur/ /zhes bya ba smos te mya ngan las 'das pas mngon par dgyes pa zhes bya ba'i don to/ /ci thams cad kyang nges par 'dod pa dag la mi dga' zhing sred pa zad pas dga' bar 'gyur ram zhe na/ de ni ma yin te/ smras pa/ rdzogs sangs rgyas dang nyan thos rnams/ /zhes bya ba smos te/ de nyid gcig pu ji ltar dgyes par 'gyur gyi/ gzhan ni ma yin te/ 'di ltar phyi rol gyi dngos po dag la 'dod chags dang bral bar gyur nas bsam gtan la dga' bar gyur pa'am/ yang na gzugs med pa la dga' ba'o/ /phyin ci ma log pa'i tshogs des de bzhin nyid kyi dngos po'i don mtha' dag rtogs par bya ba'i phyir rdzogs pa'i sangs rgyas so/ /de'i nyan thos ni/ de'i bka'i rjes su 'brang ba ste/ de nyid la yang dag par rjes su zhugs pa'i phyir ro/ /de la 'di ni 'dod pa rnams kyi ro myong bar byed pa'i nyes dmigs bstan pas de las bzlog pa'i phyir 'di gsungs so/ /kAr ShA pa Na'i char bab pa nyi tshes ma ngoms pa ma yin te/ gser gyi ri bo thob par gyur kyang 'dod pa dag gis ngoms pa ma yin no zhes bstan pa'i phyir smras pa/ gangs can zhes bya ba la sogs pa smos so/ /bcom ldan 'das shi la ba ti zhes bya ba'i shAkya rnams kyi grong rdal na bzhugs so/ /de nas bcom ldan 'das 'di snyam du dgongs te/ rgyal srid ni nges par gsad pa dang gsod par byed du 'jug pas thob par bya ba'o zhes gsungs pa dang / ji tsam na bdud 'ongs te zhus pa/ btsun pa rgyal srid ni thob par bya ba rdzu 'phrul gyis te/ de ltar 'dod pa'i rgyal srid do/ /sdig can ci'i phyir de skad ces smra zhes bka' stsal pa dang / btsun pa bdag gis ni bcom ldan 'das las mngon sum du thos shing bzung ste gang la la zhig gis rdzu 'phrul gyi rkang pa bzhi kun du bsten pa dang / bsgoms pa dang / mang du byas pa dang / 'dod par byas pa des ni ri gangs can dang mnyam pa'i gser gyi ri bo las kyang grol te de yang de bzhin du 'gyur gyi gzhan du ma yin no/ /btsun pa bcom ldan 'das ni rdzu 'phrul gyi rkang pa bzhi dang ldan no zhes rgya cher smras te/ de bas na bdag de ltar smra'o zhes pa dang / ji tsam na bcom ldan 'das kyis tshigs su bcad pa gnyis po 'di gsungs so/ /de la 'dir dang po'i tshigs bcad kyis ni yang dag par bstan pa dang / yang dag par 'dzin du 'jug par byed pa yin te/ de la 'di ji ltar yang dag par bstan pa yin zhe na/ 'dod cing sred pa'i nyes pa ste mang zhing mchog tu gyur pa thun mong ma yin pa'i nor rnyed par gyur kyang ngoms pa med pa'i phyir ro/ /gang la yang dag par 'dzin du 'jug pa yin zhe na/ 'dod cing sred pa'i gzhis ngan par spyod pa las bzlog pa dang / legs par spyod pa la gzud pa ni bsdus pa'i don to/ /ri bo yod gyur kyang zhes bya ba ni tshogs yod par gyur kyang yang ngo / /gang gi zhe na/ smras pa/ gser gyi ri zhes bya ba smos te/ 'dzam bu chu bo'i gser gyi zhes bya ba'i don to/ /tshad ji lta bu zhe na/ smras pa/ mnyam pa ni 'dra ba'o/ /gang dang zhe na/ gangs can te lhag par kha ba mang po gang la yod pa de ni kha ba can te/ des na ri chen po de dang ngo / /'dis ni nor mang po rnyed pas rnyed pa bstan te/ gser gyi zhes bya ba ni nor yod cing rnyed par gyur pa'o/ /de lta mod kyi ri gangs can dang mnyam pa'i gser gyi phung po yod par gyur kyang tshim pa ma yin te zhes bya ba smos te/ chog cing ngoms par mi 'gyur ro zhes bya ba'i don to/ /su zhe na/ smras pa/ gcig kyang zhes bya ba smos te/ gcig kyang sred pa zad par mi 'gyur na mang po lta ci smos/ 'dis ni thun mong ma yin pa'i dus bstan to/ /nor des zhes bya ba ni de'i nor ro/ /yang na 'dis shes pa yin pas nor de bde'o zhes rig cing thob pa dang rjes su myong ba ni nor zhes bya ba'i don to/ /gyis la zhes bya ba ni de'i phyir zhes bya ba'i don te/ gang gi phyir ngoms par mi 'gyur ba de bas na 'dod pa yongs su spongs la dge ba gyis shig ces bya ba'i don to/ /gang yin zhe na/ smras pa/ rtogs pa zhes bya ba smos te/ yon tan dang skyon brtag pa la mkhas pa'o/ /de ltar rtogs par byas nas ci zhig bya zhe na/ smras pa/ legs par spyod ces bya ba smos te/ legs par spyad pa la 'jug par gyis shig pa ste/ legs par spyad pa la 'jug pas legs par spyod pa nyid spyad par bya'i/ nor la chags pa'i phyir sems can la mi mthun par spyad par ni mi bya'o/ /sems can mtha' dag gi spyod pa ni legs par spyod pa la rag las pa'i phyir ro/ /nye du mdza' bshes rtsa lag ni/ /sdug bsngal byung nas ldog par 'gyur/ /gang gis lhan cig 'gro 'gyur ba'i/ /dge ba'i las ni bsten par gyis/ /zhes so/ /nor rnyed pa'i ched du ngan par spyad pa spyod pa dag de las skyo ba bskyed pa'i phyir 'di gsungs so/ /gang 'di ltar 'dod pa rnams kyis nye bar gtses pa yin no zhes rtogs pa de nyid ni de las 'dod chags dang bral bar 'gyur ro zhes bstan pa'i phyir smras pa/ gang dag sdug bsngal zhes bya ba la sogs pa smos te/ 'dir tshigs su bcad pa phyed dang pos ni 'dod pa dag las ma nyams na sdug bsngal gyi rgyu yin pa'i phyir skyon bstan te/ gang gi phyir 'dod pa dag yod na ni phyir rgol ba rnams dang / mang po gsad pa dang bcing ba dang sdug bsngal rnam pa mang po 'thob par 'gyur ro/ /tshigs bcad phyed 'og mas ni 'dod pa nyams pa la lhag par chags pa'i skyon bstan to/ /gang gi phyir de nyams na ni zug rngus zug pa bzhin du sdug bsngal bar gnas shing mya ngan dang bcas pa ni 'di'i bsdus pa'i don to/ /gang dag ces bya ba ni gang la la'o/ /shes pa zhes bya ba ni rtogs pa ste de kho na nyid mthong ba'o/ /ci zhig shes pa yin zhe na/ sdug bsngal zhes bya ba nye bar len pa'i phung po lnga ste/ mdor bsdu na nye bar len pa'i phung po lnga ni sdug bsngal lo zhes gsungs pa'i phyir ro/ /sdug bsngal gsum dang ldan pa yang yin te/ ci rigs par thams cad kyi sdug bsngal la sbyar te ji skad du gsungs pa/ sdug bsngal gsum dang ldan pa ni ci rigs par thams cad la sbyar ro zhes gsungs pas so/ /de'i rgyus zhes bya ba ni 'di las skyes pa ste/ rgyu mtshan 'di dang 'dod pa'i rgyus/ /zhes bya ba'i don te/ sred pa ni kun 'byung gi bden pa yin no zhes pas so/ /'dod pa la zhes bya ba ni yul du gyur pa la ste/ nam yang dga' mi 'gyur zhes bya ba 'di dang sbyar ro/ /de dag ces bya ba ni shes pa'o/ /nam yang dga' mi 'gyur zhes bya ba la/ sdug bsngal thams cad kyi rtsa ba 'dod pa yin no zhes mkhas pas shes pa yin pa'i phyir ro/ /des na 'dod pa mnyam pa la yang su zhig khyad par du dga' bar byed de/ ji ltar 'dod cing sred pa skyed par byed pa'o/ /'dod pa nyams pa la yang bde ba yod par 'gyur ram zhe na de yang med de/ ci'i phyir zhe na/ smras pa/ 'jig rten dag na zhes bya ba smos te/ 'dod pa'i 'jig rten nyams par gyur kyang mya ngan gyi zug rngu skyed par byed pa des mi 'dod pa nyid kyi 'dod pa'o/ /zug rngur 'gyur ba'i rgyur shes par byas nas so/ /'dod pa'i 'du shes kyi yul gyi dngos po'i rgyu ni nye bar longs spyod pa'i phyir sbyin pa dang yongs su gzung ba byas pa yin te/ 'di lta ste/ pha dang / ma dang / bu smad dang / bran pho dang / bran mo dang / las byed pa dang / zho shas 'tsho ba dang / mdza' bshes dang / blon po dang / nye du dang / snag gi gnyen mtshams dang / rta dang / glang po dang / ba glang dang / ra lug dang / nor dang / 'bru dang / dbyig dang / gser dang / bang mdzod dag yongs su bstsags pa yin no/ /de nyams pa'i dus na yang shin tu mi bzad pa'i mya ngan gyi zug rngu 'byung bar 'gyur te/ des na 'di 'dod chen can dag la zug rngur gyur pa yin no/ /de dag ces bya ba ni zug rngur gyur pa'i rgyu'o/ /brtan pa ni mkhas pa'o/ /gdul phyir zhes bya ba ni bral ba dang spang ba'i phyir ro/ /slob par byed ces bya ba ni spong bar byed pa'i lam la brten pa'o/ / bslab pa gsum ni gang gi phyir lam zhes brjod de/ tshul khrims dang / ting nge 'dzin dang / shes rab kyi phung po ni 'phags pa'i lam du gzud pa'i phyir ro/ /'dod pa la mngon par dga' ba dang / 'dod pa la lhag par zhen pa rnams de las 'dun pa bzlog pa'i phyir 'di gsungs so/ /yang gcer bu pa'i phyogs la 'di skad smra ste/ bde ba'i yo byad spang ba'i shAkya rnams la ni 'dod chags dang bral ba ga la yod ces smra ba la de dag 'dod pa'i nyes dmigs bstan pas 'dod chags dang bral bar 'gyur gyi/ yul gyi bsngags pa brjod pas ni ma yin no zhes bstan pa'i phyir gsungs pa'o/ /'dod pa'i tshoms te gnyis pa'i rnam par 'grel pa rdzogs so// //sred pa nyid don dam par 'dod pa yin gyi yul ni ma yin no zhes nges par bsgrub pa'i phyir/ /de'i 'og tu sred pa'i tshoms bkod pa yin no/ /gang gi phyir ji skad du gzugs la sogs pa la 'dod pa'i sgro btags pa ni bram ze'i khye'u la me'i sgro btags pa lta bu'o/ /'o na/ 'jig rten sna tshogs gang de 'dod min gyi/ /zhes bya ba gong du bstan zin na/ ji ltar de'i don du yang 'di'i don la 'bad par bya zhe na/ de ni de lta mod kyi skyes bu'i 'dod pa ni kun du rtog pa'i 'dod chags yin no zhes bya ba ni 'di'i bsdus pa'i don du bshad la/ da ni rgya cher dbye ba bshad pa yin te/ lus can rnam par rtog pas zhes bya ba la sogs pa smos so/ /'di byung ba'i gleng gzhi ni bcom ldan 'das kyis dge slong dag gsum po 'di dag ni byis pa thos pa dang mi ldan pa so so'i skye bo'i sdig pa mi dge ba la rnam par rtog pa yin te/ gsum po gang zhe na/ 'dod pa'i rnam par rtog pa dang / gnod sems kyi rnam par rtog pa dang / rnam par 'tshe ba'i rnam par rtog pa ste/ gang gi phyir byis pa ni ngan par bsam pa sems so zhes rgya cher bshad do/ /'phags pa la ni dge ba'i rnam par rtog pa gsum mnga' ste/ nges par 'byung ba'i rnam par rtog pa la sogs pa'o zhes bstan nas tshigs su bcad pa 'di gnyis gsungs so/ /de la re zhig dang po smras pa/ rnam par rtog pas rab bcom pa/ /zhes bya ba ni 'dir 'dod pa'i sred pa rgyu dang bcas pa 'phel bar bstan to/ /tshul bzhin ma yin pa'i yid la byed pa dang / brjed ngas pa dang / phyin ci log gis de 'phel bar 'gyur te/ rgyu gsum po 'di dag 'dir go rims bzhin du ston pa yin no/ /mi 'dra bar rtog pas rnam par rtog pa ste/ tshul bzhin ma yin pa yid la byed pa dang mtshungs par ldan pa'i kun du rtog pa'o/ /des bcom pa ni rtog pa dang dbang po byas pa ste/ ji skad du gsungs pa/ ji ltar rnam par rtog pas rab tu bcom par 'gyur zhe na/ sngar thos pa dang sngar spyad pa'i 'dod pa rnams la tshul bzhin ma yin par yid la byed de/ dge ba'i rnam par rtog pas rnam par rtog par mi byed de sdig pa la zhen cing gnas pa'o zhes so/ /lus can zhes bya ba ni lus de gang la yod pa ste sems can zhes bya ba'i don to/ /phyi rol gyi dngos po rtsig pa la sogs pa la ni sred pa med pa'i phyir ro/ /ci 'di la log pa'i rnam par rtog pa tsam gyis sred pa 'phel bar 'gyur ram zhe na/ smras pa/ de ni ma yin te/ 'on kyang 'dod chags mi bzad ces bya ba smos te/ 'dod chags drag po gang la yod pa de ni zhes bya bar tshig rnam par sbyar ro/ /'dod pa'i 'dod chags bag la nyal gyi rgyu nye bar bsags shing gnyen po ma bsten pas so/ /de'i gnyen po lus la sogs pa'i rnam pa dran pa'o/ /ji ltar 'dod chags mi bzad pas 'gyur zhe na/ sngar skye ba gzhan dag tu 'dod pa'i 'dod chags kun du bsten pa dang / bsgoms pa dang mang du byas pa de'i rgyus 'di yin no/ /de lta mod kyi tshul bzhin du yid la byas pas sems kyi 'dod chags rjes su sel bar byed do zhes bya ba'i tshig gis so/ /gtsang bar rjes su lta bas zhes bya ba ni kha dog dang dbyibs dang reg pa dang nye bar spyod pa la sdug pa dang gtsang ba ste/ de ltar rjes su lta zhing dmigs pa'i tshul gang la yod pa de ni gtsang bar lta ba ste/ de'i phyir gsungs pa/ ji ltar gtsang bar rjes su lta bas yin zhe na/ dbang po sdom pas nye bar mi gnas pa des bud med mthong bar gyur na dran pa rtse gcig pas chags par 'gyur te/ tshul bzhin ma yin pas gtsang ba'i mtshan mar nye bar 'dzin te/ gzhi des na lus mngon par gdung ba dang / sems mngon par gdung bar byed pa yin no zhes so/ /de ltar gyur pa'i lus can 'di la ni 'dod chags phyir zhing rab tu 'phel bar 'gyur te/ 'dod pa'i 'dod chags shas cher 'phel bar 'gyur ro/ /rtags rnam pa lngas sred pa 'phel bar rig par bya ste/ 'dod chags kyi yul chung ba la yang 'dod pa'i 'dod chags mi bzad pas kun nas dkris shing lhag par chags par 'gyur na gya nom pa la lta smos kyang ci dgos/ chos ma yin pas gang longs spyod mang po yang dag par len pa yin te/ chos ni ma yin no/ /longs spyod shin tu mang po kun du 'dzin par 'gyur te/ de mi gces shing dgos pa med pa'i dngos po yang 'dor bar mi byed na/ gces pa lta smos kyang ci dgos/ dgos pa chung zhing ngan don tsam gyi don du yang ngan par spyod pa mang po spyod na/ dgos pa chen po la lta smos kyang ci dgos/ legs par spyod pa chung ngu yang de'i sems bsgrub cing 'jug par mi dga' na/ chen po la lta smos kyang ci dgos/ mya ngan las 'das pa thos par yang mi 'dod na/ thob par bya ba lta ci smos pa ste/ gang de lta bus ni sred pa 'phel bar 'gyur ro/ /de yis dam por byed ces bya ba ni de nyid kyis lus can la 'ching ba dam por byed do/ /gang gi phyir dam por byed pa ni 'bad pas kyang dgrol bar dka' ba'i phyir ro/ /rnam pa gsum gyis ni 'ching ba dam po nyid du 'gyur te/ shin tu sra ba dang / reg na sdug bsngal ba dang / dus yun ring du 'brel pa'o/ /de la mthong ba'i chos la ngan par spyod pa'i rtsa ba ni chags pa dang zhe sdang dang gti mug go/ /de ni shin tu sra ba'i 'ching bar rig par bya'o/ /dmyal ba la sogs pa'i ngan song du skye bar rig na sdug bsngal ba nyid du rig par bya'o/ /yun ring por 'khor ba na gnas pa ni dus yun ring po dang 'brel par blta'o/ /rang gi 'ching ba zhes bya ba ni rang gi rgyud la gnas pa'i sred pa 'ching ba'i gnas skabs so/ /yang na sdug bsngal gyi 'ching ba yin te/ gang gi phyir sred pa 'phel ba las skye ba la sogs pa'i sdug bsngal lan du mar 'byung ba'i phyir ro/ /de la 'di ni sred pa'i skyon bstan pas de nges par spang pa'i phyir gsungs so/ /sred pa spong ba'i gzugs nye bar blang ba nyid du ston pa'i phyir smras pa/ gang dag rnam rtog nye bar zhi dga' zhing / /zhes bya ba la sogs pa smos so/ /'di'i don ni tshigs su bcad pa snga ma'i gnyen po nyid du shes par bya'o/ /gang gis 'dod pa la sogs pa'i rnam par rtog pa nye bar zhi bar byas pa de ni rnam par rtog pa nye bar zhi ba ste/ nges par 'byung ba la sogs par rtog pa'o/ /de la gang dag dga' ba ni mgu ba yang dag par skyes pa ste/ ji skad du bshad pa/ 'dod pa'i rnam par rtog pa skyes pas yongs su ma bsgoms shing spangs pa dang / bsal ba dang nges par byas pa'o zhes so/ /mi sdug sgom par byed ces bya ba ni lus kyi rnam par 'gyur ba ste rnam par bsngos pa dang / rnam par rul par nang du dmigs pa gang yin pa'i yid la byed pa de ni sdug pa dang dmigs pa yin pa'i phyir mi sdug pa zhes brjod de phyin ci ma log par de bsgom zhing yang dang yang du mngon du byed pas so/ /rtag tu dran pa zhes bya ba ni dus thams cad dran pa la gnas pa ste/ 'dod chags kyi 'jigs pa ni dus thams cad du dran pa la nye bar gnas shing bsgom par bya ste bar chad med par byed pa dang / skyo ba med pa'i brtson 'grus kyis de ltar 'di la 'dod chags kyis skabs rnyed par mi 'gyur ro/ /des de ltar ldan par byas nas ni yun ring pos nges par sred pa spong bar 'gyur te/ de nyid bstan pa'i phyir smras pa/ de yis sred pa zhes bya ba smos te/ mnyam par ma bzhag pa'i sa la bye brag med par bstan pa'o/ /de yis de ltar yang dag par ldan par byas pas rnal 'byor spyod pas ji srid du ma spangs pa de srid du de dag rul par byed pa ni de nyid nyam chung bar byed pa ste spong zhing dgag par nus pa'o/ /sred pa spangs pa'i thabs la gzud pa'i phyir 'di gsungs so/ /sred pa ma spangs pa dag la ni rga ba dang 'chi ba la sogs pa'i sdug bsngal 'byung bar 'gyur ro zhes bstan pa'i phyir smras pa/ 'dod pa mun nag 'dra bas g.yogs/ /zhes bya ba la sogs pa smos so/ /de nas bcom ldan 'das shAkya bzang ldan la sogs pa gdul ba'i dus la bab par mkhyen pa dang / gzhan yang khyad par du 'phags pa dag rab tu byung bar bya ba'i phyir chu bo nas rgyu zhing gshegs pa las chu bo'i 'gram zhig na skye bo'i tshogs chen po dga' ston gyi dus zhig la bab ste/ gar dang glu la sogs pa len pa de dang nye ba zhig na nya mang po zin pa dang / ba'i tshogs kyi rjes su 'o ma la sred pa'i be'u mang po dag 'breng ba gzigs te yang dge slong rnams la bka' stsal pa/ dge slong dag 'jig rten ni 'dod pas ldongs pa yin te/ 'dod pa'i dra bas g.yogs pa'o zhes rgya cher bka' stsal te/ tshigs su bcad pa 'di gnyis gsungs so/ /'dir bsdus pa'i don ni kun 'byung gi bden pa rnam pa lnga dang / sdug bsngal gyi bden pa rnam pa gnyis bstan pa yin te/ rnam pa lnga gang zhe na/ da ltar byung ba'i yul la chags pa dang / 'das pa'i yul la rjes su myong nas chags pa'i kun du rtog pa dang / ma 'ongs pa'i yul la 'dod pa dang / de rnams skyes pa la lhag par zhen pa dang / de yang dge ba byed pa la rang dbang med par byed pa'o/ /rnam pa gnyis gang zhe na/ da ltar byung ba'i gnas pa gzhan du gyur pa'i rga ba dang / ris mthun pa'i rgyun chad pa ste 'chi ba'o/ /'dod pa mun gnag dang 'dra bas g.yogs pa ni zlas dbye ba'o/ /de la 'dod pa ni kun du rtog pa'i 'dod chags te/ skyes bu'i 'dod pa ni 'dod pa'i 'dod chags so zhes pa'i tshig gis so/ /mun pa ni des 'dod pa'i skyon mi shes pa dang / chos dang chos ma yin pa mi shes pa'i phyir te/ ji skad du bcom ldan 'das kyis mun nag gis ldongs par 'jug pa yin te/ ldongs pas 'jug pa gang yin pa'i skyes bu ni 'dod chags dang lhan cig pa yin no zhes gsungs so/ /'dod pas kyang dra bas nya'i tshogs bzhin du rnam par rtog pa rnam pa mang po dang ldan pas kun nas g.yogs pa dang / yongs su mkhyud par byed pa de 'dod chags can gyi rgyud la'o/ /gang du rjes su myong ba'i yul la 'dod chags shing de nyid la rnam pa mang po'i sgo nas kyang 'dod chags kyis kun du rtog pas so/ /sred pa'i dgab pas bkab pa dang / /zhes bya ba ni da ltar byung ba dang 'das pa'i sred pa bshad nas/ 'dis ni ma 'ongs pa la dmigs pa'i sred pa bshad de/ sred pa ni sems can gyi rgyud la dgab pa'am sgrib pa lta bu yin te/ nyi ma'i 'od zer sprin la sogs pas bkab pa lta bu'o/ /des bkab pa ni bsgribs pa ste 'dod pa la sred pa de nyid kyis ma 'ongs pa'i dus las brtsams nas de'i skyon bstan pa yin te/ gang gi phyir yid la yang thar pa 'dod par mi byed na/ de thob pa'i ched du brtson par byed pa lta smos kyang ci dgos/ bag med pa ni bag med pa'i gnas so/ /de'i phyir de ltar gyur pa'i rgyud 'dod pa dag las kyang sems bsrung la ngan par spyod pa dang des bsgom pa las sems bsrung ba yin no/ /de yang de lta bur gang zag nyon mongs pas rang dbang med par byed pa'i phyir bcings par gyur pa yin te/ de nyid smras pa/ 'ching bas bcings pa dag ces bya ba smos te/ 'di la bcings pa yin pas 'ching ba ste/ 'khor ba'i btson rar zhes bya ba'i don to/ /sred pa'i 'ching ba des 'dod pa can bcings pa yin no/ /ji lta bu yin zhe na/ smras pa/ tshed mar chud pa'i nya dang 'dra/ /zhes bya ba smos te/ nya ni chu'i nang du spyod pa'i srog chags nya nyid do/ /tshed ma ni rgya ste dra ba zhes bya ba'i don to/ /der chud pa ni de'i kha dang nang du'o/ / gzhan dag ni chu de'i nang na gnas pa'i chu srin kum bi ra la sogs pa'i rigs de dag gi khar chud pa'i nya ji lta ba bzhin no zhes 'chad do/ /gzhan dag ni lcug ma las byas pa'i nang yangs shing spun la sogs pas bar tshag dam pa kha yod pa nya'i rigs 'dzin par byed cing 'ching ba ni tshed ma yin no zhes zer ro/ /ji ltar nya der 'dzin par byed pa de bzhin du nyon mongs pa'i dbang du gyur pa yang 'khor ba'i nang nas mi 'byung ba'i tshul gyis so/ /der bcings pa la re zhig rgyun mi 'chad par bde ba khyad par can thob pa yin nam zhe na/ smras pa/ rga dang 'chi ba'i rjes su 'gro 'gyur te/ /zhes bya ba yin te/ rga ba'i sdug bsngal dang 'chi ba'i sdug bsngal thob par 'gyur ro zhes bya ba'i don to/ /rga ba dang 'chi ba ni rga shi ste/ zlas dbye ba gcig tu byas pa'o/ /rjes su 'gro ba ni 'ong bar 'gyur ba dang thob par 'gyur ba de gang du rga ba dang 'chi ba yod pa der 'gro ba 'di dag 'brang bar 'gyur ro/ / ji lta bur zhe na/ smras pa/ ma drung nu zho 'dod pa'i be+e'u dang 'dra/ /zhes bya ba smos te/ ba'i be+e'u nu zho 'thung ba 'o ma la sred pa de ni rtag tu ma'i rjes su 'gro ba yin te/ 'dis ni 'di'i thar pa ring du gnas pa ston pa yin no/ /sred pa dang ldan pa 'khor ba'i btson rar yongs su 'khyam pa dang sdug bsngal nyams su myong ba yin pas de spang ba'i phyir 'di gsungs so/ /'dir rga ba dang 'chi ba la sogs pa'i sdug bsngal myong nas der gnas pa ni yang myong bar bya ba ma yin te/ mthong ba nyid du dug gis gnod pa bzhin no zhes mi bden par smra ba la de dgag pa'i phyir smras pa/ skyes bu zhes bya ba la sogs pa smos te/ de nas bram ze zhig dgon pa'i gnas zhig tu lo bzhi bcur tshangs par spyod pa byas nas bu med pas ni gong mar 'gro ba med do zhes bsams te chung ma blang ba'i phyir mnyan yod du 'ongs te/ de la dgos pa'i nor bslangs pa las rgyal po gsal rgyal gyis khang pa brgya byin par khas blangs te/ gzhan du ma slongs shig ces smras so/ /rgyal po chen po de ni stsal na gzhan yang khang pa brgya dang stong dang grong gi phyed nor dang bcas pa slong ngo zhes smras te/ yang khas blangs so/ /rgyal po chen po 'di yang stsal lags na/ gzhan yang bslang ngo zhes smra ba de dang de'i tshe rgyal byed kyi tshal dang nye ba na nags stug po na spre'u shing thog 'dod pa shing nas shing du rgyu ba las ltung ste shi bar gyur pa gzigs nas bcom ldan 'das de nyid kyi tshe gtsug lag khang du gshegs te/ ji tsam na dus de'i gdul bya dag gi dbang du mdzad nas 'di gsungs so/ /ci rigs par sred pa 'phel bar 'gyur ba de'i skyon gang der bstan pa yin no/ /skyes bu zhes bya ba ni mi ste de'i tshe nye bar gnas pa'i phyir ro/ /yang na sems can te de'i rnam grangs yin pa'i phyir sems can gyi rgyu nyid la 'jug gi/ gzhan la ni ma yin no/ / ji lta bu zhe na/ smras pa/ bag med rab tu spyod byed pa zhes bya ba smos te/ bag med par gyur nas rab tu spyod par byed pa ste/ de'i dbang po ma bsrungs pas yul dag la spyod par gyur pa zhes bya ba'i don to/ /sred pa 'phel 'gyur zhes bya ba ni 'dod pa'i sred pa dang / yang srid pa'i sred pa yang 'phel bar 'gyur ba ste/ yang dang yang shas cher spyad pa'i phyir dang / ngan par spyod pa lhag par spyod pa'i phyir ro/ /ji lta bur 'phel bar 'gyur zhe na smras pa/ 'khri shing bzhin du zhes bya ba smos te/ 'khri shing rigs ma lu ta zhes bya ba yod de/ de ni shing la brten nas 'phel bar 'gyur gyi/ ma brten par ni ma yin te/ shing de nyid la yang gnod par byed do/ /de bzhin du sred pas bag med par spyod pa la brten nas 'phel bar 'gyur te/ de nyid kyis gnod par yang byed do/ /yang ji ltar yang gnod par byed ce na/ smras pa/ de yis 'khor bar 'khyam zhes bya ba smos te/ sred pa 'phel ba de nyid kyis gang gi phyir 'khor bar 'khyam pa yin te/ 'khor bar 'khor ba'i phyir shin tu gnod pa yin no/ /yang dang yang du zhes bya ba ni so so so so zhes bya ba'i don te/ de dang de 'gro ba sna tshogs pa dag tu rnam pa sna tshogs kyi rim pa las ji lta ba bzhin du bsgrubs pa zhes bya ba'i don to/ /gzhan dag na re yang dang yang zhes bya ba'i don to zhes kyang brjod to/ /de la 'dis ni 'di'i 'khor ba ring ba nyid du ston to/ /'bras bu 'dod pa zhes bya ba ni shing tog za bar 'dod pa ste/ ji ltar spre'u nags na zhes bya ba shing stug po'i nang du spre'u ltogs pa 'bras bu 'dod pas rgyun mi 'chad par yang dang yang kun du 'khyam pa de bzhin du bag med pa rab tu spyod par byed pa yang sred pa 'phel bas 'khor bar 'khyam par 'gyur ro/ /thar pa 'dod pas bag med pa rnams bag yod pa la gzud pa'i phyir 'di gsungs so/ /sred par byas pa nyid kyis phyir zhing yang skye ba'i kun nas nyon mongs pa bstan pa'i phyir smras pa/ mi dag dran par byed ces bya ba la sogs pa'o/ /yul kun du na rgyal po ko ra bya ri dwags bshor ba'i tshal na tshe dang ldan pa yul 'khor skyong gnas te/ rgyal po de yang re zhig cig na btsun mo'i 'khor dang bcas te de la shin tu mkhas pa rnams kyis yongs su brtags shing skyed mos tshal du song ste rjes su rgyu ba las yul 'khor skyong mthong ste mngon par dga' ste/ de nyid kyi mdun du 'dug cing gtam rnam pa sna tshogs pa byas nas smras pa/ grogs po bzhi po 'di dag gi nyes pas gnod par gyur na ni dge sbyong dang bram ze dag khyim nas khyim med par rab tu byung bar 'gyur te/ 'di lta ste/ skye ba dang / rga ba dang / na ba dang / nye du'i longs spyod yongs su nyams pa'o/ /yul 'khor skyong khyod ni da rung 'di dag ma nyams pa ste/ lo ni nyi shu'am nyi shu las lhag pa tsam lon na ci'i phyir rab tu 'byung zhes smras pa las/ rgyal po chen po dang de gnyis la bcom ldan 'das kyis khyim pa'am rab tu byung bas gnas lnga la so sor brtag par bya zhes rgya cher tshigs su bcad pa 'di gsungs so/ /dran par byed pas na dran pa ste/ dran pa dang mtshungs par ldan zhing lhag par gnas pa zhes bya ba'i don to/ /'dis ni sngar rjes su myong ba'i yul la sred par byed pa bstan to/ /dang gi sgra ni bsdu ba'i don to/ /'di dang 'og nas brjod pa mang ngo / /chags byed dang zhes bya ba 'dis ni da ltar byung ba'i yul la lhag par chags pa'i tshul gyis sred pa bstan to/ /nye bar longs spyod pa ni chags par 'gyur ba'o/ /yid bde ba dang zhes bya ba ni shin tu bsngags pa'i yid gang yin pa de ni yid bde ba ste/ nyon mongs pas mi dga' ba med pa'o/ /nye bar longs spyod pa na mngon du phyogs pa dang / 'thob pa la mngon par phyogs pa'i yul la yid bde bar 'gyur ba ste/ 'dis ni ma 'ongs pa'i yul la don du gnyer ba'i tshul gyis sred pa bstan to/ /de'i phyir 'das pa'i dus la ni dran pa dang ldan pas 'jug go/ /da ltar byung ba'i yul la ni chags pa'i ngo bo nyid do/ /ma 'ongs pa la ni dga' ba dang ldan pas 'jug ste/ dga' ba mngon du 'gro ba'i yid bde ba'o zhes brjod do/ /sdug bsngal dang nye bar gnas pa'i phyir des na dran par byed ces bya ba la sogs pa bsdu bar bya ba yin no/ /gang la 'di dag 'gyur zhe na/ smras pa/ mi dag ces bya ba so so'i skye bo la ste/ skye ba la dga' ba yin pas skye bo'o/ /gang dag 'di dag yod pa de'i nyes dmigs gang yin zhe na/ smras pa/ mi gang rtag tu zhes bya ba la sogs pa smos te/ gang yang 'das pa'i bde ba dran pa dang / da ltar byung ba la lhag par zhen pas chags pa dang / ma 'ongs pa'i bde ba la yang rgyun mi 'chad pa'i mi de nyid ni rgyun mi 'chad par skye ba dang 'chi ba la sogs pa myong bar 'gyur ro/ /gzhan dag na re gang la 'di dag nye bar spyod pa gang yin zhe na/ smras pa/ gang dag sa ta si ta zhes bya ba la/ sa ta ni bde ba myong ba'o/ /de'am de la si ti ni chags pa yin pas sa ta si ta ste shin pa na da na zhes skad kyi byings las bstan pa'i phyir ro/ /bde ba gang la chags pa yin zhe na/ smras pa/ 'di ltar bde ba 'dod byed pa/ /zhes bya ba smos te/ bde ba 'dod pa'i tshul gang dag la yod pa de ni bde ba 'dod par byed pa ste/ bde ba myong bar 'dod pa'i tshul gang la bde ba myong ba'i 'dod chags la lhag par chags pa de nyid yang bde ba myong bar don du gnyer bar byed de/ de nyid dran par 'gyur ba yin no zhes bya ba'i don to/ /de ltar gyur pa des byas pa'i skyon thob par bstan pa'i phyir smras pa/ de nyid ces bya ba ni de nyid kyis so/ /skye dang rga bar nye bar 'gro 'gyur zhing / /zhes bya ba ni skye ba dang rga ba nyid du nye bar 'gro zhing 'jug pa ste/ skye ba dang rga bar nye bar 'gro ba ni yun ring por skye ba dang rga bar 'gyur ro zhes bya ba'i don to/ / 'dis ni bdag nyid grub par byas pa dang / bdag nyid rnam par 'gyur bar byas pa'i sdug bsngal nyid bstan te/ dus gsum la dmigs pa'i nyon mongs pa'i nye bar spyod pa'i dmigs pa dang / de'i 'bras bu rga ba dang 'chi ba'i sdug bsngal gyis 'jigs pa rnams sred pa'i rgyu spang ba la gzud pa'i phyir 'di gsungs so/ /gzhan dag ni gleng gzhi dang tshig mi mthun par 'chad do/ /rgyal po'i khab na phyis khung gi phag las brtsams nas gsungs pa yin te/ skye ba dang chags par byed pa dang / yid bde ba la rtog par byed pa ste/ de la skye bar byed pa ni 'dod chags skye ba dang / rtog par byed pa'i yid du 'ong ba dang / sems 'phrog par byed pa dang / 'jam zhing 'jam pa'i tshig zur gyis smra ba la sogs pa'i ngag gi spyod pa zhes bya ba'i don to/ /yid bde ba zhes bya ba ni mngon par 'dod pa'i lus dang ngag gi spyod pa rjes su dpag pa dang / yid la 'dod pa dang rig pa'o/ /dang gi sgra gsum ni bsdus pa'i don to/ /sdig pa ni mthong ba dang dmigs pa'o/ /gang yin zhe na/ smras pa/ mi dag ces bya ba smos te/ skyes pa dang bud med de gang gi phyir de gnyi ga gcig la gcig mngon par dga' ba'o/ /de la rtog par byed pas ci zhig tu 'gyur zhe na/ smras pa/ rtag tu bde ba 'dod par byed ces bya ba ste/ gang bud med kyis skye bo skyes pa la chags pa ni bud med de nyid kyi mngon par 'dod pas lta bar byed pa yin te/ de la chags pas bde ba'i khyad par 'dod de/ des ma 'ongs pa'i don du gnyer zhing chags par 'gyur ba yin no/ /de bzhin du skyes pa bud med la zhes bya ba la sogs pa brjod par bya'o/ /rtag pa'i dngos po yin pas rtag tu ste/ skye ba dang rga bar nye bar 'gro bar 'gyur ro zhes bya ba 'di dang sbyar ro/ /de ni 'khor ba na yun ring du gnas pa ste/ lhag ma ni snga ma bzhin no/ /tshig gnyi ga yang 'gal ba med mod kyi/ phran tshegs kyi sde snod brjod pa las ni snga ma bzhin no/ /dri ma dang bcas pa'i sdug bsngal las 'dun pa bzlog pa'i phyir 'di gsungs so/ /mkhas pas nges par brtags na ni sred pa nyid kyis sdug bsngal skyed pa yin no zhes rnam pa gzhan gyis bshad pa bstan pa'i phyir smras pa/ skye dgu sred pa rnams kyis mdun du bdar/ /zhes bya ba la sogs pa smos so/ /yul bA rA Na sI na dge slong rab tu mang po dur khrod du rgyu ba na de'i tshe byi bo byed pa'i skye bo mang po ka ra bI ra'i phreng ba mgo la btags te/ gshed ma bas ca co chen pos khyer bzhin du bsad do/ /de dang ha cang yang mi ring ba zhig na ri bong gi rgya brkyang pa gang du ri bong mang po zin te phan tshun mchong bar gyur kyang ma thar ba dag mthong ste/ yang snying rje skyes nas 'di skad du gtam du brjod de/ re zhig mi 'di dag ni ngan par spyod pa spyad pas bsad pa yin na/ ri dwags 'di dag ni shin tu dka' ba spyod de rtswa dang chu nyung zad tsam la spyod cing 'tsho bas gnas par byed pa yin na/ de ji ltar nyes pa med par gsod par byed ces so/ /gnas skabs 'di lta bu dag bcom ldan 'das kyis gsan te 'di gsungs so/ /gzhan dag ni rgyal po'i khab na bcom ldan 'das dge slong gi tshogs kyis yongs su bskor cing bzhugs te/ phyi sa khung na phag cig 'gre zhing ldog la mngon par dga' ba de'i dbang du mdzad de gsungs pas des kyang de thos te sems mngon par dad nas/ de nas shi 'phos te gser gyi sa'i rgyal po'i rigs su skyes te/ bden pa mthong bar gyur to zhes zer ro/ /de la 'dir bsdus pa'i don ni 'khor ba'i rgyu dang / 'khor bar byed pa dang sdug bsngal mang po nyid du bstan pa yin te/ gang kun 'byung gi bden pa ni sred pa rnams kyis mdun du bdar zhes bya ba 'dis bstan to/ /kun sbyor ro la dga' ba zhes bya bas ni 'khor bar byed pa bstan to/ /sdug bsngal gyi bden pa yang dang yang sdug bsngal thob par 'gyur zhes bya ba yin no/ /sred pa rnams kyis mdun du bdar ba ni mngon par brdas pa dang zil gyis non pa'o/ /de yang gang yin zhe na/ smras pa/ skye dgu zhes bya ba smos te/ sred pa rnam pa sna tshogs dang bcas pa'i sems can gyi 'jig rten ston pa yin no/ /so so'i skye bo ni gang dang gang du skye ba de dang der sred pa rjes su 'brang ba yin te/ des bskul nas sdug bsngal rjes su myong ngo / /yongs su rgyug pa zhes bya ba ni kun nas yongs su 'khor ba yin te/ 'gro ba thams cad skye ba thams cad du 'gro ba yin pa'i phyir 'dir dpe bstan pa/ ri bong bzhin zhes bya ba smos te/ 'di gang la yongs su rgyug pa yin zhe na/ rgya gang zhes bya ba smos te/ ri dwags rnams yongs su gzung ba'i dra ba ste rgya'o/ /ji ltar ri bong bde ba la sred pas 'ong ba dang 'bros par byed na yang rgya de nyid du 'jug par byed pa de bzhin du skye dgu bde ba la sred pas sdug bsngal nyid la yongs su rgyug pa yin no/ /de nyid du yongs su rgyug pas rgyu gang gis ci zhig thob pa yin zhe na/ smras pa/ kun sbyor zhes bya ba smos te/ sred pa'i kun du sbyor ba la brten pa'i ro ni kun sbyor ro'o/ /'dir ro yang bde ba nyid du rig par bya ste/ ji skad bshad pa 'dod pa'i ro yang gang zhe na/ gang 'dod pa'i yon tan la brten nas skyes pa'i yid bde ba'i bde ba 'byung ba yin no zhes bya ba ste/ nyon mongs pa'i bde ba zhes bya ba'i don to/ /de la dga' zhing lhag par zhen pa ni sred pa'i kun du sbyor ba la brten nas bde ba myong zhing rjes su 'khor bar 'gyur ro/ /de yang gang zhe na/ smras pa/ byis pa zhes bya ba smos te/ khyad par du 'dun pa'i rgyu 'dis byas pa ste/ mi shes pa dag dug dang 'dres pa'i kha zas la dga' ba bzhin du gang gi phyir de dang de'i nyes dmigs ma mthong ba'i rmongs pa de yang kun sbyor ro la dga' ba'o/ /des na yang ngan par spyod pa rnam pa mang po byas nas yang dang yang du sdug bsngal thob par 'gyur zhes bya ba yin te/ lan du mar ngan song ngan 'gro'i sdug bsngal lam bsad pa dang bcing ba dang brdung ba la sogs pa'i sdug bsngal lo/ /ngan par spyod pas bkag na ni mi 'dod pa ma lus pa 'byung ba mi 'thob cing mi rnyed pa yin no/ /de la 'di ni sred pa mang zhing 'khor ba la mngon par dga' ba'i gdul bya dag la 'khor bas skyo bar bya ba'i phyir gsungs so/ /sred pa'i dbang gis sems can 'di dag dga' ba dang 'chi ba'i rjes su 'gro ba yin no zhes bstan pa'i phyir smras pa/ sred pa rnams kyis mdud pa'i zhes bya ba la sogs pa smos so/ /sred pa ni rnam pa gsum ste/ 'dod pa'i sred pa dang / srid pa'i sred pa dang / srid pa med pa'i sred pa'o/ /zhes bstan pa'i phyir tshigs su bcad pa gnyis po 'di gsungs so/ /gzhan dag na re gang su dag sdig pa rnam pa du ma dang mi dge ba'i chos yang dag par 'byung ba de thams cad ni sred pa'i kun du sbyor bas yin te/ 'di lta ste/ mdor bsdu ba'i phyir sred pa'i kun du sbyor ba ni de rnams kyi nang nas mchog tu bshad pa'i phyir ro zhes zer te/ dper na gang la la zhig gis glang sna phug nas khal bkal na des khal thams cad 'degs shing khal gnas pa yin no zhes brjod do/ /'di la bsdus pa'i don ni tshig rkang dang pos ni sred pa bstan to/ /tshig rkang gnyis pas ni sred pa'i las bstan to/ /lhag mas ni de'i nyes dmigs bstan to/ /de la sred pa rnams zhes bya ba ni bdag la sred pa'i phyir de dang 'brel pa ni kun nas nyon mongs pa thams cad do/ /mdud pa zhes bya ba ni bcing zhing gzhan gyi dbang du byas pa ste/ 'jig rten 'di na sred pas 'khol ba'o zhes mdo las gsungs so/ /gzhan dag na re 'dod pa'i sred pas mdud pa yin no zhes zer ro/ /srid dang srid min dag la sems chags shing / /zhes bya ba ni chags pa'i sems gang la yod pa de ni sems chags pas so/ /srid pa dang srid pa ma yin pa ni srid dang srid min no/ /gang bdag la sred pa de la brten nas rtag par lta ba de ni srid pa la chags pa'i sems te mngon par dga' ba'o/ /gang la yang chad par lta ba de ni srid pa med pa la sems chags shing mngon par dga' ba'o/ /'dir srid pa'i sgra ni khams gsum la brjod de/ 'dir srid pa gsum yang 'dod pa'i srid pa dang / gzugs kyi srid pa dang / gzugs med pa'i srid pa'o zhes mdo las gsungs so/ /'dir sred pa ma yin pa'i sgra ni sred pa med pa la brjod de/ khams gsum gyi ris mthun pa mi rtag pa'am med pa de la dmigs pa'i sred pa ste/ sred pa med pa la dgongs so/ /de'i phyir gsungs pa/ 'di la gcig tu sdug bsngal la sogs pa de nyid du 'gyur ro zhes smra ste/ kye ma'o bdag ni chad par 'gyur ba ste zhig nas pha rol tu skye ba la sogs par mi 'gyur ro zhes smra ba yin no/ /'di ltar gyur pa la skyon cir 'gyur zhe na/ smras pa/ bdud kyi sbyor ba de zhes smos te/ sred pas mdud pa rnams sred pa gsum dang srid pa ma yin pa dag la sems chags pa rnams kyi nyes dmigs bstan te/ 'dis sbyor bar byed pas sbyor ba ste 'ching ba'o/ /de dang ldan pa ni 'ching ba'i sbyor ba dang ldan pa'o/ /bdud kyi zhes bya ba ni nyon mongs pa ste bdud kyi 'ching bas bcings pa ste/ de thos na de las rgyal bar bya ba'i las la gzhan gyi dbang du byas zhes bya ba'i don to/ /bdud kyi sbyor ba dang ldan pa rnams la ni sdug bsngal dang bcas pa dang / 'jigs pa dang bcas pa nyid du bstan pa'i phyir smras pa/ grub dang bde rnams dang bral zhing / / zhes bya ba smos te/ grub pa ni bde ba dang 'brel pa'o/ /bde ba ni 'jigs pa med pa'o/ /grub pa dang bde ba med pa ni grub pa dang bde ba dang bral ba ste/ bral ba yod pa de nyid ni de ste/ sdug bsngal ba dang 'jigs pa yod pa zhes bya ba'i don to/ /ci'i phyir zhe na/ de nyid smras pa/ gang gi phyir de rga ba dang 'chi ba zhes bya ba smos te/ rga bas ni sdug bsngal ba nyid dang / 'chi bas ni 'jigs pa nyid bstan to/ /rjes su 'gro 'gyur te zhes bya ba ni thob par 'gyur ba dang rjes su 'brang bar 'gyur ba'o/ /gang gis ji lta bu zhe na/ ma drung nu zho 'dod pa'i be'u dang 'dra/ /zhes bya ste/ ji ltar nu zho 'thung ba'i be'u 'o ma la sred pas 'gro ba dang / de ltar rtag tu rjes su 'brang ba de bzhin du sred pa'i 'dun pa yod na ni rga ba dang 'chi ba dang rjes su mthun par 'jug par 'gyur zhing rga ba dang 'chi ba nyid kyi rjes su 'gro'i/ mya ngan las 'das par ni ma yin no/ /sred pa'i nyes dmigs bstan pas de spangs pa la gzud pa'i phyir 'di gsungs so/ /sred pa spangs pa las mya ngan las 'das pa yin no zhes bstan pa'i phyir smras pa/ 'di ni sred pa de 'dra zhes bya ba la sogs pa smos so/ /sred pa rnam pa gsum po de bkag cing gtan du spangs pa dang / de spangs pa'i phan yon rab tu bstan pa ni 'di'i bsdus pa'i don to/ /de zhes bya ba ni gang sngar bstan pa'i bdag la sred pa'am 'dod pa'i sred pa'o/ /'dra zhes bya ba ni khyad par gyi don te/ gang de la rjes su 'brang ba ni 'khor ba nyid kyi rjes su 'brang ba yin la gang yang de spang ba ni mya ngan las 'das pa'i grong khyer du 'gro ba yin no zhes khyad par du byed do/ / spong byed pa zhes bya ba ni rjes su mthun pa'i gnyen pos de thob pa rgyud las bstsal pa'o/ /'di na zhes bya ba ni bstan pa 'di la ste/ gzhan dag tu ni de spong ba med pa'i phyir ro/ /de spangs na ni de'i las med pa yin no zhes bstan pa'i phyir smras pa/ srid dang srid min dag la sred bral zhing / /zhes bya ba smos te/ bral ba ni mi ldan pa'o/ /sred pa la mngon par dga' ba'i tshul gang la yod pa de ni de ste/ gang la sred pa spangs par gyur pa la ni srid pa dang srid pa med pa la dmigs pa'i mngon par dga' ba med ces bya ba'i don to/ /'dir gang gis sred pa spangs par byas pa'i phan yon bstan pa'i phyir smras pa/ sred pa zil gyis gnon byed pa zhes bya ba la sogs pa smos te/ sred pa'i kun du sbyor ba thob par gtan du drungs phyung zhing bcad pa'i phyir te/ bkag pa tsam gyis spang ba ni ma yin te/ gtan du bral bar gyur pa'o/ /dge slong zhes bya ba ni nyon mongs pa thams cad bcom pa'i phyir ro/ /lhag ma med pa zhes bya ba la/ gang la grib ma yod pa ma yin pa de ni lhag ma med pa ste/ tshor ba po nyams pa yin no/ /de yang rnam par shes pa'i shing la grib ma lta bu ni tshor ba yin no zhes kun dga' bo'i mdo'i tshig gis so/ /des na gang gis sred pa phyogs gcig spangs pas ni de'i yan lag gi yongs su mya ngan las 'das pa lhag ma dang bcas pas yongs su mya ngan las 'das pa ste/ tshor ba dang bcas pa'i rnam par shes pa'i shing yongs su ma bcad pa'i phyir ro/ /gang gis sred pa thams cad spangs pas ni yan lag thams cad kyis yongs su mya ngan las 'das pa ste/ de ni lhag ma med pas yongs su mya ngan las 'das pa'o zhes brjod de tshor ba dang bcas pa'i rnam par shes pa'i shing nyid bkag cing gzhan yang ma skyes pa'i phyir ro/ /sred pa spangs pa'i phan yon bstan pa'i phyir 'di gsungs so/ /sred pa ma spangs pa dang sred pa spangs pa'i nyes dmigs dang phan yon go rims bzhin du bstan pa'i phyir smras pa/ gang zhig 'jig rten zhes bya ba la sogs pa'i tshigs su bcad pa gsum smos so/ /kha cig ni nye ser skya'i dbang du mdzad nas 'di gsungs so zhes zer ro/ /gzhan dag na re bcom ldan 'das dgon pa na nyan thos kyi tshogs dang dbyar gyi dus su lhan cig tu bzhugs so/ /ji tsam na bi ran zhes bya ba'i rtswa'i rigs 'phel zhing rgyas pa gzigs te/ dge slong sred pa shas che ba dag gi don du 'di gsungs so/ /dge slong dag sred pa ni dra ba dang yul la sred pa yin te/ 'khor ba'i 'ching ba yin no zhes bya ba la sogs pa gsungs so zhes zer ro/ /'di la bsdus pa'i don yang 'dod pa'i sred pa'i skyon mthong ba'i chos 'di nyid la rnam pa bzhi yod de zhes bstan te/ shin tu zil gyis gnon pa dang / dmigs pa dman pa dang / las la mngon par dga' ba dang / zil gyis gnon par dka' zhing mya ngan 'phel ba'o/ /de'i phyir dang por 'dod pa'i sred pa la lhag par btang snyoms kyi sems su 'gyur ro/ /de nas dmigs pa dman pa dang sdig pa'i las la mngon par dga' bar 'gyur ro/ /de nas ngan par spyod pas srid par 'gyur ro/ /de nas 'dod pa'i dngos po yongs su 'gyur bas mya ngan shas cher 'phel bar 'gyur ro/ /gang zhig ces bya ba ni sems can no/ /'dis zhes bya ba ni 'dod pa'i sred pas so/ /khol ba zhes bya ba ni zil gyis mnan pa'o/ /ji lta bur zhe na/ smras pa/ bud med ces bya ba smos te/ dman pa'i dngos po la dmigs pa'i phyir dang / ngan par spyod pa bskyed pa'i phyir dang 'dod pa'i bde ba rjes su spyod pa ni dman pa nyid tha mal pa zhes bya ba la sogs pa'i mdo'i tshig gis so/ /sred pa zhes bya ba ni 'khor ba don du gnyer ba'i las bskyed pa'o/ /'jig rten spang dka' zhes bya ba ni mu stegs pa'i 'jig rten te/ 'di la dka' bas spang zhing dor bas yod pa de ni spang bar dka' ba'am/ 'da' bar dka' ba'am/ dor bar dka' ba zhes bya ba'i don to/ /bdag med pa'i 'du shes de ni de'i gnyen po yin te/ phyi rol pas mi rtog pa'i phyir ro/ /sangs rgyas kyi bstan pa la ni 'di spang bar dka' ba ma yin te/ phyin ci ma log pas de'i gnyen po dmigs pa'i phyir ro/ /de yi mya ngan 'phel bar 'gyur/ /zhes bya ba ni gang gi phyir dngos po gang la 'dod pa'i sred pas zil gyis gnon pa ni dngos po de med cing rnam par 'gyur ba las lhag par zhen pa'i skyes bu'i mya ngan te/ yid kyi gdung ba'o/ /'phel bar 'gyur ba ni stsogs par 'gyur ba ste/ ji srid du gang la sred pa'i dngos po yod pa de ni gang dag rnam par 'gyur ba de srid du mya ngan 'phel bar 'gyur te/ 'dir dpe bstan pa/ rtswa la char pa bab pa bzhin/ /zhes bya ba smos te/ char bab pa ni brlan pa dang / chus blug pa'o/ /'dir rtswa ni bi ra na zhes bya ba'i rtswa'i rigs yod de/ gang gi rtsa ba u shir yin pa'o/ /dper na bi ra na zhes bya ba'i rtswa la ji ltar char bab cing brlan pa de lta de ltar 'phel bar 'gyur ro/ /de bzhin du ji lta ji ltar rang gi sems kyi rgyud la brten pa'i mya ngan gyi sa bon sred pa 'phel bar 'gyur ba de lta de ltar mya ngan 'phel bar 'gyur ro/ /sred pa'i skyon bstan pas de spang ba la gzud pa'i phyir 'di gsungs so/ /dkar po'i phyogs kyi phan yon bstan pa'i phyir smras pa/ gang zhig 'jig rten zhes bya ba la sogs pa smos so/ /gang gis yang yang sred pa 'dis 'khol ba de zil gyis mnan pa dang spangs pa ste/ bud med ces bya ba la sogs pa'i rnam pa'i don to/ /de yi mya ngan ldog 'gyur te/ /zhes bya ba ni srid pa spangs pa'i gang zag de'i ste sems kyi gdung ba thams cad sel ba yin no/ /gang la ji lta bu zhe na/ smras pa/ pad ma la ni chu yi thigs pa bzhin/ /zhes bya ba ste/ pad ma zhes bya ba ni pu ka ra ste/ ji ltar pad ma'i 'dab ma la chu'i thigs pa byung ba ni ldog cing de de'i nang du 'jug par mi 'gyur ro/ /de bzhin du 'dod pa'i sred pa spangs pa yang sdug pa rnam par 'gyur ba las gyur pa'i mya ngan sems la 'jug par mi 'gyur ro/ /'dod pa'i sems spangs pa'i phan yon bstan pa'i phyir 'di gsungs so/ /gang gi phyir sred pa 'phel ba las ni phung khrol 'byung ba yin pas de spang ba'i phan yon bstan pa'i phyir 'di lta ste/ de phyir ji snyed ces bya ba la sogs pa smos te/ 'dir bcom ldan 'das kyis snod du gyur pa la bstan pa dang / phyogs su ma lhung bas bstan pa dang / yang dag par bsgrub pa bstan pa dang / yang dag par bsgrub pa'i phan yon bstan pa yin te/ de'i phyir khyed la zhes bya ba la sogs pas ni snod du gyur pa bstan to/ /de'i phyir ji snyed ces bya ba la sogs pas de'i phyir phan pa'i bsam pas bstan pa'o/ /u shir phyir ni zhes pa dang / sred pa rtsar bcas zhes bya ba la sogs pas ni yang dag par bsgrub pa bstan to/ /sred pa drungs nas phyung shig dang / / zhes bya ba la sogs pas de'i phan yon bstan to zhes bya ba ni bsdus pa'i don to/ /de'i phyir zhes bya ba ni de bas na ste/ gang gi phyir sred pa la ni rjes su 'jug pa ni ma dag pa yin par snang la/ de spangs pa ni phan yon yod pa nyid de/ de'i phyir khyod kyis de spangs pa la 'bad par gyis shig pa'o/ /brgya la de la bdag cag skal ba dang mi ldan pa yin no zhe na/ smras pa/ khyod la zhes bya ba smos te/ khyed cag la zhes bya ba'i don to/ /smra yis zhes bya ba ni bshad do zhes bya ba'o/ /ci zhe na smras pa/ khyed bde shog ces bya ba smos te/ khyed cag phun sum tshogs pa dang ldan par gyur cig pa'o/ /'di skad ston pa yin te/ khyed cag snod du gyur pa yin pas des na ngas khyed la smra bar bya ste/ 'di ni bde ba yin te tshe dang ldan pa khyed cag nye bar gnas pa ste/ 'di lta ste ston pa yang mngon sum du gyur la khyed cag kyang sred pa gnyen pos spong nus pa yin pas so/ /de lta bu gang yin zhe na/ smras pa/ ji snyed bya ba ni tshad ji tsam pa ste/ tshe dang ldan pa gang khyed cag nyid do/ /'dir lhags pa zhes bya ba ni khyed cag nye bar gnas shing gan du phyin pa ste/ khyed cag thams cad do/ /gang yin zhe na/ smras pa/ sred pa ste 'khor ba la 'dod chags pa'am/ 'dod pa'i 'dod chags so/ /rtsar bcas zhes bya ba ni rgyu dang bcas pa ste/ ma rig pa dang bcas pa zhes bya ba'i don to/ /gang gi phyir sred pa'i rtsa ba ni ma rig pa'o/ /gzhan dag na re tshor ba yin te tshor ba'i rkyen gyis sred pa zhes bya ba'i mdo'i tshig gis so/ /rtsa ba dang lhan cig pa yin pas rtsar bcas so/ /bi ra na'i rtsa ba ni u shi ra ste de las skyes pa'i rtswa'i rigs so/ /u shi ra don du gnyer ba ni u shi ra'i phyir te/ de dgos pa yod pa'i phyir ro/ /gang u shi ra 'dod pa de ni rtswa bi ra na rtsa ba dang bcas pa gzhor la sogs pas drungs nas 'byin pa de bzhin du ma rig pa dang bcas par sred pa drungs nas phyung na nya ser skya bzhin du nyams pa thob par mi 'gyur ro/ / de bzhin du yang dag par bsgrub pa'i phan yon smras pa/ sred pa drungs nas phyung shig dang / /zhes bya ba smos te/ phyung shig ces bya ba ni bton pa'o/ /'di rtsa ba nas bton pa gang yin pa de ni rtsa ba nas phyung ba'o/ /de ltar rtsa ba nas byung bar gyur na mya ngan med cing zhes bya ba yin te/ de ltar byung ba'i dus na yang yid gdung ba med cing sdug bsngal ba med do/ /'jigs pa med ces bya bas ni ma 'ongs pa'i dus sdug bsngal yang med pa nyid do/ /gang gi phyir sred pa dang bcas pa rnams la ni da ltar byung ba'i sdug bsngal dang mya ngan yod pa yin la ma 'ongs pa na sdug bsngal ba ste 'jigs pa yod do/ /gzhan dag ni gdul bya nye bar gnas pa dag la tshig rkang drug gis yang dag par len pa dag ste/ rgan po dang bar ma dang gsar bu rnams la tshig rkang snga ma gnyis kyis ni yang dag par gzengs bstod cing yang dag par 'jug pa dag spro ba bskyed pa'i phyir ro/ /tshig rkang phyi ma gnyis kyis ni yang dag par bsgrub pa dag la phyin ci ma log par 'dzin du gzhug pa'i phyir ro/ /tshig rkang gsum pa gnyis kyis ni yang dag par bsgrubs pa'i phan yon bstan pa ni bsdus pa'i don yin no zhes zer ro/ /'di ni sred pa spang ba la gzud pa'i phyir gsungs so/ /yang sred pa skye ba nyid ni skyon ma lus pa'i dra ba yin no zhes bstan pa'i phyir smras pa/ skyes bu sred pa zhes bya ba la sogs pa smos so/ /'di'i gleng gzhi ni bcom ldan 'das kyis ji ltar sred pa'i kun du sbyor ba dang gang zhig mi ldan par sems can rnams yun ring po'i dus su 'khyam zhing 'gro bar 'gyur ba ni ngas gcig kyang ma mthong ngo zhes bya ba la sogs pa gsungs nas/ tshigs bcad gnyis gsungs so/ /kha cig ni dge slong dag 'jig rten ni sred pas 'khol cing thug pa med par 'gro ste/ de lhar skyes nas mir 'gyur ro/ /mir skyes nas ji srid du dmyal ba'i bar du 'gyur te/ de lta bas na sred pa yongs su spongs shig dang / de nyid kyis khyod kyi sdug bsngal zad par 'gyur ro zhes zer ro/ /gzhan dag ni lo drug cu'i bar du mngal du gnas te/ skra dkar dang gnyer ma byung zhing thig le nag pos lus nyams par byas pa'i rgan po zhig gi dbang du byas nas gsungs zhes zer ro/ /de gnyis las re zhig dang po bshad par bya ste/ skyes bu sred pa dang 'grogs na/ /zhes bya ba la sogs pa smos so/ /'di'i bsdus pa'i don ni sred pa dang 'grogs pa dang nye bar len pa gnyis kyis ni kun 'byung gi bden pa bstan to/ /yang dang yang du mngal du 'jug /ces bya bas ni sdug bsngal gyi bden pa bstan to/ /sred pa'i gnyis pa gang ba'i skyes bu de ni sred pa'i gnyis pa ste/ sred pa'i grogs zhes bya ba'i don to/ /sred pa'i rjes su 'gro ba'i phyir dang / sems can gyi rgyud de'i rjes su 'gro ba'i phyir ro/ /skyes bu zhes bya ba ni rtsub pa la sogs pa'i las kyis gang ba yin no zhes bya ba ni nges pa'i tshig ste/ so so'i skye bo zhes bya ba'i don to/ /yun ring zhes bya ba ni thog ma med pa ste/ ji skad du bshad pa/ dge slong dag skye ba'i 'khor ba ni thog ma dang tha ma med do zhes gsungs pa'i phyir ro/ /dus zhes bya ba ni 'khor ba dag tu zad pa ste/ mi rtag pas nyams par byas pa zhes bya ba'i don to/ /'khyam 'gyur bas zhes bya ba ni 'khor ba ste/ 'gro ba'i 'gro ba dag tu las ji lta ba bzhin du 'gro ba'o/ /ci zhig byed par 'gyur zhe na/ smras pa/ yang dang yang du nyer len cing / /zhes bya ba smos te/ rtag tu nye bar len pa rnam pa bzhi nye bar len te/ 'dod pa'i 'dod chags la sogs pa 'dus pas nye bar len pa'i rkyen ni las yin no zhes bya ba'i tshig gis so/ /las med pa ni nye bar len pa mi 'byung ste/ las kyi dbang gis yang mngal du/ /zhes bya ba smos te/ mngal gyi gnas su mi gtsang ba'i nang du dmyal ba dang 'dra bar las kyi dbang gis 'jug pa yin no/ /de ltar nye bar 'gro zhing mngal gyi gnas su nye bar song nas yang ci zhig byed pa yin zhe na/ smras pa/ gnas skabs 'gyur dang zhes bya ba la sogs pa smos so/ /gnas skabs 'gyur bas mngal nas byung ste/ de'i dus phyi zhig na rim gyis bdag nyid yongs su rdzogs par byed pa'i gnas skabs dag ston pa yin te/ 'di lta bu'i rnam pa'i dngos po yin pas gnas skabs 'gyur ba'o/ /de las gzhan du 'gyur ba ni/ snga ma las mi 'dra bar gyur pa ste/ 'dis ni lus yang dang yang nad dang rga ba dang / 'chi bas byas pa'i rnam par 'gyur ba nyid ston to/ /sems can 'ong dang zhes bya ba ni srid pa las sems can 'ong ba'am/ de'i rjes su 'ong ba ste 'jig rten pha rol las 'dir 'ong zhing mi mthong ba'o/ /'gro bar byed ces pa ni 'jig rten 'di las yang 'jig rten pha rol tu 'gro bar byed pa ste/ 'dis ni sred pa'i skyon bstan to/ /de la 'dir yang skyon bsdu na rnam pa gnyis su rig par bya ste/ nyon mongs pa'i kun nas nyon mongs pa'i rgyur gyur pa'i phyir dang / sdug bsngal gyi kun nas nyon mongs pa'i rgyur gyur pa'i phyir te/ de'i phyir yang dang yang nye bar len pa dang mngal la sogs pas go rims bzhin du bstan to/ /sdug bsngal yang 'dir rnam pa gsum du bshad do/ /de yang mngal gyi gnas kyi sdug bsngal dang / skyes nas 'dod pa dang mi 'dod pa'i gnas skabs gzhan du 'gyur ba'i sdug bsngal dang / 'gro ba dag tu 'pho ba'i sdug bsngal lo/ /de bas na 'di dag thams cad ni sred pa la gnas pa yin no zhes shes par byas nas de spang bar bya ba'i phyir 'bad par bya'o zhes bstan pa'i ched du 'di gsungs so/ /sred pa spangs pa'i phan yon bstan pa'i phyir smras pa/ 'dir ni spang dka'i sred pa ste/ /zhes bya ba la sogs pa smos so/ /de la sred pa ni gtan du spang bar dka' ba nyid dang / de'i phan yon yang 'dir bstan pa yin no/ /sred pa de spongs la zhes bya ba ni gang sngar bstan pa ste/ rang dang rjes su mthun pa'i gnyen pos zhes bya ba ni tshig gi lhag ma'o/ /dang gi sgra ni khyad par gyi don to/ /gang sred pa dang 'grogs pa ni 'khor ba yin gyi gang de spangs pa dang ma yin no zhes bya ba'i don to/ /'dir ni zhes bya ba ni bstan pa 'di la'o/ /yang na 'jig rten gyi yid du 'ong ba'i yul la'o/ /ci zhig byas nas sred pa spang bar brjod par bya zhe na/ smras pa/ rgyun chod cig dang zhes bya ba smos te rtsa ba nas rab tu phyung shig pa'o/ /gang gi phyir phyi rol pa rnams kyi ni de spangs pa de yang rtsa ba'i rgyun las gcod par mi nus pa yin te/ sred pa la gnas pas spang bar mi nus pa'i phyir ro/ /dper na la la zhig gis dug shing bcad par gyur na yang de'i rtsa ba drungs nas ma phyung bar ni de yang dbyar gyi dus su skye bar 'gyur ba de bzhin no/ /spang dka' zhes bya ba ni bsal bar dka' ba ste/ srid pa'i rtse mo'i nyon mongs pa thams cad kyi bya ba ni 'phags pa'i lam nyid kyis spang ba yin te/ de yang shin tu rnyed par dka' ba'i phyir ro/ /yang na rgyun ni sa bon te skal ba mnyam pa'i rgyu zhes bya ba'i don to/ /gang gi tshe sred pa des yang so sor brtag pa'i 'gog pas de'i sa bon rtsa ba nas ma spangs pa de'i tshe ni yang skye bar 'gyur ro/ /de ni yang du 'khor mi 'gyur/ /zhes bya ba ni sred pa'i sa bon bcad pa'i 'phags pa'i nyan thos de ni yang 'khor bar mi 'khor ro zhes bya ba yin no/ /ji ltar phyi rol pa de dag gis ni sa bon ma bcad pa'i phyir 'khor bar 'gyur la/ 'di ni de lta ma yin no zhes bstan pa/ ci'i phyir zhe na/ smras pa/ de la sred pa med 'gyur zhing / /zhes bya ba smos te/ gang gi phyir de nyid la ni thams cad kyi thams cad du sred pa med la phyi rol pa rnams la ni lhag ma dang bcas pa'i phyir de ni yang skye ba yin te/ byi ba'i dug rnam par gyur pa bzhin no/ /sred pa thams cad spong bar rab tu zhugs pa'i phyir 'di gsungs so/ /sred pa gtan du ma spangs pa'i nyes dmigs smras pa/ dal 'byor chud ni mi gsan par/ /zhes bya ba la sogs pa'i tshigs bcad phyed dang gnyis smos so/ /thams cad la phyin ci ma log pa'i rjes su bstan pa sbyin par ni dge slong maud gal gyi bu chen pos kyang mi nus na gzhan gyis lta smos kyang ci dgos/ re ba ta ka zhes bya ba de'i nye gnas la ji ltar yang de'i 'dod pa'i 'dod chags kyi rgyu zhes bya ba la sogs pas bstan nas 'di gsungs so/ /'di'i bsdus pa'i don ni gang bcings pa dang / gang gis dang de la ji ltar bsgrub par bya ba dang de sgrub pa'i dus kyang mi rtag pa nyid kyis de'i dus 'das pa nyid na sdug bsngal ba dang yid mi bde ba drag po dang ldan pa nyid du bstan to/ /gang gis zhes bya ba ni yul la sred pa dang lus la sred pa zhes bya ba'i don to/ /lha zhes bya ba ni rgyal chen ris bzhi la sogs pa'o/ /mi ni 'dzam bu gling pa la sogs pa'o/ /dud 'gro ni ngan 'gro rnams kyang ngo / /bcings nas 'jog byed pa zhes bya ba ni chags nas gnas par byed pa'o/ /nas zhes bya ba ni tshig gi kha skong ba'am yang na 'byed pa yin no/ /gang gis 'ching ba ni gzhan yang 'ching ba yin mod kyi/ srid pa gtsor bstan pa ste/ bcings pa de nyid do/ /don gnyer zhes bya ba ni 'dod pa'i phun sum tshogs pa don du gnyer bar byed pa yin te/ de la lha rnams ni 'dod pas yongs su tshol bar bya ba med de/ 'on kyang 'dod pa dag rab tu thob pa la shin tu chags pa'i sems kyis gnas pa yin te/ de nas bcings nas 'jog pa yin no/ /mi rnams ni 'dod pa yongs su tshol bas rtag tu don du gnyer bar byed pa yin no/ /yang na gzugs dang gzugs med pa na spyod pa'i lha rnams ni snyoms par 'jug pa la chags pas bcings nas 'jog par byed pa de nyid do/ /'dod pa na spyod pa'i lha dang mi rnams ni da ltar byung ba'i 'dod pa dag la 'dod cing chags la ma 'ongs pa dag la don du gnyer ba'i sgrar brjod do/ /don du gnyer ba'i ngang tshul gang la yod pa de ni don du gnyer ba'o/ /yul la sred pa zhes bya ba ni yul rnam pa sna tshogs la kun du chags pa de ni yul la sred pa ste/ 'dis ni sred pa'i rang gi ngo bo bstan to/ /de las rgol zhes bya ba ni sred pa spongs shig pa dang / 'da' bar gyis shig pa'o/ /'dir bag med par ma byed cig pa ste/ dal ba las 'das par ma byed cig pa'o/ /bya ba ma yin pa mi bya ba nyid bstan pa'i phyir smras pa/ dal 'byor chud ni mi gsan par/ /zhes bya ba smos te/ mi ni mi khom pa brgyad spangs pa'i dal ba ste/ de khyod kyis chung ma gsan cig pa ni thob nas 'das pa dang don med pas 'da' bar ma byed cig pa'i don to/ /ci'i phyir de ltar sbyar ba yin zhe na/ smras pa/ dal 'byor thal bas zhes bya ba smos te/ dal ba ni ji skad du bstan pa nyid do/ /thal ba ni dal ba las 'das pa ste dal ba nyams pa'o/ /bas zhes bya ba ni rgyu bstan pa'i don te/ gang gi phyir 'di ltar dal 'byor la gnas nas bag med pas sred pa'i dbang du ci dgar spyod pa de ni dmyal ba dag tu skye bar 'gyur ba yin te/ bag med pa dang sred pa de gnyis kyis 'bras bu mngon sum du gyur na ni 'gyod par 'gyur te/ srid pa'i dbang gis sngon bag med pa byas pa ni bdag gis legs par ma byas so zhes so/ /gang gi phyir sngon bdag gis byas pa ma dran par gyur pa de'i tshe na yang sdug bsngal gyi tshor ba'i reg pa drag pos mya ngan dang smre sngags 'don par 'gyur te/ kyi hud bdag ni sdug bsngal ba'o zhes bya ba la sogs pa'o/ /lha dang mi rnams kyi 'ching ba don du gnyer ba nyid bstan nas/ ngan song pa rnams kyi yang de la ji lta bu yin zhe na/ de'i phyir rnam par smin pa'i sgrib pas bcings pa yin te/ des na thar pa thob par mi 'gyur ro/ /lha dang mi rnams kyi yang sred pa'i sgrib pa nyid yin te/ des na nus su zin kyang gzung ba ni skyon dang bcas pa yin pas sred pa spang ba la gzud pa'i phyir bstan to/ /sred pa las 'da' bar ma byas na sdug bsngal thams cad 'byung ba nyid du bstan pa'i phyir smras pa/ gang phyir sred pa'i mtsho zhes bya ba la sogs pa smos so/ /yang na ci'i sred pa nyid kyis 'gyod par 'gyur zhe na/ smras pa/ gang phyir sred mtsho zhes bya ba la sogs pa'o/ /sred pa ni gsum ste/ 'dod pa'i sred pa dang / gzugs kyi sred pa dang / gzugs med pa'i sred pa'o zhes mdo las gsungs pa yin pas 'di gsungs so/ /sred pa ma spangs pa la ni rgyun mi 'chad par sdug bsngal gyi 'khor lo 'khor ba yin no zhes bya ba ni 'dir bsdus pa'i don to/ /sred pa zhes bya ba ni rjes su chags pa'i kun du sbyor ba'o/ /gang phyir zhes bya ba ni de nyid kyi don te/ sred pa kho na zhes bya ba'o/ /gang gi phyir de nyid ni gtso bo'i rgyu nyid du bsgrub pa ste/ 'di ltar yang sdug bsngal gyi rgyu nyid yin te/ ma btul na zhes bya ba 'di dang sbyar bar bya'o/ /rgyur gyur pa zhes bya ba ni bye brag med pas 'khor ba 'grub pa'i rgyur gyur pa yin te/ kun 'byung gi bden pa gang zhe na/ sred pa'o zhes mdo las gsungs pa'i phyir ro/ /'dir mtsho zhes bya ba ni chu bo ste/ de dang chos mthun pa yin pas sred pa'i mtsho de brlan pa'i bdag nyid dang / 'pho zhing rgyun las 'bab pa'i bdag nyid kyi phyir te/ 'di ltar chu bo yang rgyun las 'bab cing gsher ba yin te de bzhin du sred pa'o/ /yul la sred pa zhes bya ba ni yul rnam pa sna tshogs la kun du chags shing lhag par zhen pa'i phyir ro/ /'bras kyi gzhi zhes bya ba ni rnag mang po la sogs pas khengs pa'i 'brum bu'i mtshan ma las/ mi gtsang zhing sdug bsngal gyi gzhi'i lus la 'jug pa'i phyir ro/ /khebs byed pa zhes bya ba ni rnam par rtog pa sna tshogs pa 'byung bas srid pa gsum khyab pa zhes bya ba'i don to/ /dra ba zhes bya ba ni shin tu sdug pa'i dra ba gang la yod pa de ni dra ba ste/ lta ba drug cu rtsa gnyis kyi dra ba'i rnam pa yin pa'i phyir ro/ /'khri shing zhes bya ba ni nags kyi 'khri shing dang 'dra ba ste g.yo ba'i phyir dang / ma 'ongs pa'i phun sum tshogs pa ring ba la bsam pa rjes su 'jug pa'i phyir ro/ /gdung bar byed pa zhes bya ba ni 'dod pa'i yul gyi longs spyod thob pa rnams kyis ngoms pa med pa'i phyir ro/ /ma btul na zhes bya ba ni ma spangs pa zhes ma dor na'o/ /rnam pa kun zhes bya ba ni rgyu dang 'bras bu dang rnam pa'i sa de dang / yang na mthong ba dang bsgom pas spang bar bya ba'o/ /de ltar na rnam pa kun du zhes bya ba 'dis ni rnam pa thams cad du spangs pa zhes bya ba'i don to/ / ldog mi 'gyur zhes bya ba la sogs pas ni sred pas byas pa'i sdug bsngal bstan te/ ldog par mi 'gyur ba ni skye ba dang rab tu 'byung ba'o/ /sdug bsngal ni nang gi skye ba la sogs pa'o/ /'di ni zhes bya ba ni mngon sum du nye bar blangs pa'am 'khor ba'o/ /yang dang yang zhes bya ba ni ma bcad na yang dang yang du ste/ 'jig rten gyi gzhi nyams na yang sdug bsngal ldog pa med pa nyid du bstan to/ /sred pa ma spangs na 'jig rten pa dang 'dod chags dang bral ba rnams yang dang yang du 'ong ba'i phyir ro/ /sred pas byas pa'i nyes dmigs bstan pas de spang ba la gzud pa'i phyir 'di gsungs so/ /'dar yang dpes don bsgrub pa'i phyir smras pa/ dper na ljon shing bzhin zhes bya ba la sogs pa smos so/ /bad sa'i rgyal po 'char byed btsun mo'i 'khor dang bcas te/ skyes mos tshal du rtse ba'i phyir zhugs so/ /yang drang srong lnga brgya tsam nam mkha' la 'phur bas phyogs de nas sgra shin tu yid du 'ong ba thos pa dang dri bsung bzang zhing dga' ba dag bsnams pa las mthu nyams par gyur te/ gshog pa chad pa'i bya bzhin du de'i skyed mos tshal du lhung bar gyur te/ ji tsam na des de dag gi lag pa dang rkang pa bcings par gyur to/ /dus gzhan zhig na rgyal po de dang ba skyes te/ de ltar lhung ba dag la bltas nas smras pa/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas de la phyag 'tshal lo/ /phyag 'tshal lo/ /gang gi nyan thos kyang yul khyad par can brtan pas mi 'gyur ba yin no zhes smras so/ /drang srong de rnams kyis sangs rgyas zhes bya ba'i sgra sngon ma thos pa thos pas ba spu thams cad langs par gyur to/ /de nas rgyal po des de dag khyer te bcom ldan 'das ga la ba de logs su song ste zhes bya ba nas/ rgya cher dgra bcom pa'i 'bras bu thob par gyur te/ de'i dbang du mdzad nas bad sa'i rgyal po 'char byed la bos te tshigs su bcad pa 'di gsungs so/ /kun 'byung gi bden pa gtan du ma spangs pa las ni sdug bsngal gyi bden pa gtan du 'gag par mi 'gyur ro zhes bya ba ni 'di'i bsdus pa'i don to/ /dper na zhes bya ba ni ji ltar ro/ /rtsa ba zhes bya ba ni skyes pa'i gzhi'o/ /ma bton na zhes bya ba ni nyams par ma byas pa dang ma phyung ba dang ma bshig pa'i don to/ /na zhes bya ba ni yang dag par yod pa ste/ mi 'jug pa nyid du'o/ /bcad kyang ljon shing zhes bya ba ni sta re la sogs pas shing dum bu gnyis su byas kyang phyir zhing skye ba kho nar zad ces bya ba yin te/ yang skye bar 'gyur ro/ /dpe bstan pas dpes mtshon pa'i don bshad pa'i phyir smras pa/ de bzhin zhes bya ba ni de ltar ro/ /srid pa'i phra rgyas zhes bya ba ni srid pa'i kun du sbyor ba ste rtsa bar gyur pa'o/ /ma bton na zhes bya ba ni rtsa ba'am drungs nas ma lus par ma phyung ba ste/ 'di ltar srid pa'i rtse mo'i sred pa 'khor ba'i rtsa ba de yang phyi rol pas spang bar mi nus so/ /'dis ni 'jig rten pa'i 'dod chags dang bral bas yid brtan du mi rung ba nyid du bstan to/ /mi ldog ces bya ba ni shin tu sdug bsngal ba'i phung po'i bdag nyid skye bar 'gyur ba'o/ /'di zhes bya ba ni nang ngo / /yang dang yang du zhes bya ba ni phyir zhing phyir zhing ste/ 'khor ba thog ma med pa nas sred pa des yang dang yang du sdug bsngal ba'i phung po 'byung ba'i phyir ro/ /'jig rten pa'i lam gyi nus pa bstan pas 'jig rten las 'das pa'i lam bsgom pa la gzud pa'i phyir 'di gsungs so/ /gang la gnas pas sred pa skye ba nyid kyis nges par me bzhin du phung bar 'gyur ro zhes bsgrub pa'i phyir smras pa/ dper na bdag nyid kyis ni zhes bya ba la sogs pa'i tshigs su bcad pa gnyis smos so/ /mgar ba zhig mtshon byas pa rnams 'tshong zhing 'tsho bar byed pa zhig yod de/ ji tsam dus gzhan zhig na bdag nyid kyis byas pa'i ral gyi mchan khung du bcug ste/ bya ba zhig gi phyir grong bar du chas so/ /de lam de na rkun po sdig pa can dag gnas te/ des de mtshon de nyid kyis bsad nas rdzas khyer te song ba las de'i dbang du mdzad de 'di gsungs so/ /sred pa bdag nyid las skyes pa ste/ rang gi sa bon tshul bzhin ma yin pa yid la byed pa sa bon lta bu las lcug ma la bsgos pas lcug ma de 'phel ba dang 'phel bar byed pa'o/ /de bzhin du sdig pa skyed par byed pas mi 'dod pa'i 'bras bu ngan song yin no zhes bya ba ni 'dir bsdus pa'i don du bstan to/ /dper na zhes bya ba ni ji ltar ro/ /mtshon ni mda'i mde'u la sogs pa'i mtshon te/ phyi rol gyi mtshon gyis nang gi mtshon gyi dpe byas pa yin no/ /bdag nyid kyis ni byas pa zhes bdag nyid kyis byas pa yin te/ gzhan gyis byas pa ni ma yin pa'o/ /bdag nyid ces bya ba ni don 'di la tshig gi phrad du byung ba ste/ bdag ces bya ba bdag nyid 'dod pas byas pa ste/ gzhan gyis byed du bcug pa ni ma yin no/ /de yis bdag gsod pa ltar zhes bya ba ni gang byas pa de nyid kyis bsad pa'o/ /ji lta bu zhe na/ smras pa/ rkun po'i mthu yis zhes bya ba smos te/ mthu gang la yod pa de ni mthu can te/ mthu dang ldan pa des yongs su gzung ste lus la bsnun pa de bzhin du/ phyi rol gyi mtshon dang chos mthun par sbyar ba yin pas de bzhin du zhes bya ba yin no/ /nang gi sems las byung ba zhes bya ba ni bdag dang 'brel nas 'byung ba ste/ bdag nyid kyi rgyud las skyes pa zhes bya ba'i don to/ /dper na mtshon bdag nyid kyis byas pa de bzhin du sred pa 'di yang nang nyid las byung ba yin te/ 'dis ni sred pa rang gi rgyud nyid las skyes pa nyid du ston te/ dbang phyug la sogs pas byas pa dang / byed du bcug pas ni ma yin no/ /dper na mtshon ni bdag nyid byed pa po 'jig pa yin la de bzhin du sred pa de nyid kyis kyang bdag nyid 'jig pa yin te/ gang gis bsgos shing 'phel bar byas pa de nyid la phyis kyang gsod par 'gyur te/ ngan song dag tu sdug bsngal drag po mang po 'byung ba'i phyir ro/ /dper na mtshon mthu dang ldan pa'i lag na 'dug na gsod par byed de de bzhin du sred pa yang ngan song gi stobs dang ldan pa'i las la gnas na sems can rnams ngan song du gsod par 'gyur zhing 'gro ba dang nye bar 'gro bar 'gyur ro/ /'di na zhes bya ba ni 'dod pa'i khams na'o/ / lus can zhes bya ba ni sred pa dang ma bral ba'i sems can no/ /ci'i phyir khyer bar byed ce na/ smras pa/ gsod par byed pa ste rnam pa sna tshogs pa'i gnod pa'i sdug bsngal nyams su myong ba'i phyir ro/ /bdag nyid la sred pa phan 'dogs pa nyid yin no zhes mi bden par smra ba dag dgag pa'i phyir 'di gsungs so/ /gang gi phyir rnam pa sna tshogs pa'i nyes pas ma rung bar gyur pa 'di ni sred pa las byung ba yin te/ des na spang par bya'o zhes bstan par bya ba'i phyir smras pa/ de ltar sred pas zhes bya ba la sogs pa smos te/ dang po'i tshig rkang gnyis kyis 'dir sred pa spang ba'i rgyu bstan to zhes bya ba ni 'di'i bsdus pa'i don to/ /de ltar nyes dmigs zhes bya ba ni gnod pa 'di dag go/ /shes gyis te zhes bya ba ni phyin ci ma log par shes pa'o/ /nyes dmigs kyi rang gi ngo bo gang yin zhe na/ smras pa/ sred las zhes bya ba smos te/ sred pa'i kun tu sbyor ba las so/ /de ni gang gi phyir rang nyid gnod par byed pa ste/ gcig tu nyon mongs pa yin pa'i phyir ro/ /gzhan dag ni nyon mongs pa dang 'brel ba yin no zhes de nyid gsal bar bstan pa'i phyir smras pa/ sdug bsngal 'byung ba zhes bya ba smos te/ sdug bsngal rab tu 'byung ba'i rgyu yin pa'i phyir te/ de las ni sdug bsngal rab tu 'byung ba yin la sred pa dang bral ba rnams la ni sdug bsngal mi 'byung ba'i phyir ro/ /'di las 'byung ba yin pas 'byung ba ste rgyu'o/ /yang na de ltar zhes bya ba ni gang sngar bstan pa'i tshigs bcad kyis nyes dmigs bstan pa ste/ sred pas lus can 'di na gsod sar khyer bar byed/ /ces bya ba yin te/ ji ltar yang gsod sar khyer bar byed ce na/ ngan song gi las nye bar bsgrubs nas ngan song rnams su nye bar len pa yin no zhes 'di la nyes dmigs chen por shes par byas nas so/ /sred las sdug bsngal 'byung ba zhes bya ba 'dis ni nyes dmigs gnyis pa bstan pa yin te/ 'khor ba'i rgyu'i gtso bo yin pa'i phyir ro/ /sred spongs zhes bya ba ni bral zhing spangs pa'i sred pa gang yin pa de ni sred pa spangs pa ste/ sred pa'i bag chags thams cad spangs pa'i phyir ro/ /de spangs na 'khor ba'i 'ching ba'i gzhi thams cad spangs pa yin par bstan pa'i phyir smras pa/ nye bar len med ces bya ba smos te/ len pa nges par spangs pa ni 'di'i nye bar len pa med pa ste/ len pa'i rkyen srid pa spangs pa'i phyir de ni 'jig rten du cung zad kyang len pa med de/ 'dod pa'am/ lta ba'am/ tshul khrims dang brtul zhugs sam/ bdag tu smra ba'o/ /dran ldan zhes bya ba ni dran pa nye bar gzhag pa bzhi la sems yang dag par nye bar gnas pa yin no/ /dge slong zhes bya ba ni yongs su bzung ba mtha' dag spangs pa yin te/ gzhan las blangs pa la sogs pas thob pa tsam la mngon par phyogs shing chog shes pa'o/ /'dis ni lus dang sems dben zhing chog shes pa la sogs pa'i khyad par dang ldan par bstan to/ /yang na nyon mongs pa bcom pa'i phyir phung po lhag ma dang bcas pa'i mya ngan las 'das pa bstan to/ /yongs su rgyus zhes bya ba 'dis ni lhag ma med pa'i mya ngan las 'das pa ste/ 'og nas brjod pa'i phyir ro/ /des na yang 'di gnyis kyis ni sred pa dang bral zhing nye bar len pa med pa'i thabs rtogs pa yin no/ /kun du rgyus zhes bya ba ni yongs su mya ngan las 'das pa'o/ /'dir kun du zhes bya ba ni yongs su zhes bya ba'i tshig yin te/ yongs su 'gro ba yin pas gang yang skye ba gcig mi 'dzin pa'i phyir srid pa'i rtse mo ma yin par yang zhes bya ba'i don to/ /yang na sred pa dang bral ba ni sems can la phan gdags pa'i phyir thams cad du 'gro zhes bya ba'i don te/ ji skad du gsungs pa/ dge slong dag nga ni 'ching ba thams cad las grol bas na gang lha dang mi'i bar du 'gro ste/ yul dag tu rgyu zhing skye bo mang po la phan pa'i phyir zhes rgya cher gsungs so/ /sred pa'i skyon mngon par ma shes pa dang / de spangs pa'i phan yon mi shes pa la gnyi ga bstan pa'i phyir 'di gsungs so/ /sred pa'i tshoms kyi rnam par 'grel pa ste gsum pa rdzogs so// //de'i 'og tu sred pa spong bar nus pa'i gnyen po bstan pa'i phyir bag yod pa'i tshoms bkod pa yin te/ de'i phyir bshad pa/ skyes bu bag med rab tu spyod byed pa/ /'khri shing bzhin du sred pa 'phel 'gyur te/ /zhes bya bas so/ /bag med pas de 'phel ba'i rgyu nyid du 'grub pa yin pas 'dir ma bshad kyang de ltar 'grub pa nyid do zhe na/ 'di lta ste bag med pa 'di ni sred pa zad pa dang / 'gog pa yin pa'i phyir tshoms 'di nyid kyi 'grel pa bshad par bya ste/ de'i phyir smras pa/ bag yod 'chi med gnas yin te/ /zhes bya ba la sogs pa smos so/ /'di'i gleng gzhi ni yul kau shAm+bI na gan di ka zhes bya ba'i blon pos nyes pa med pa dpe med pa'i bud med sngo bsangs can zhes bya ba la sogs pa lnga brgya me la bsregs so/ /de'i phyir yang bad sa'i rgyal po 'char byed kyis blon po lnga brgya bsad de/ de las bcom ldan 'das kyis tshigs su bcad pa 'di gnyis gsungs so/ /de la tshig rkang dang pos ni lam gyi bden pa dang / 'gog pa'i bden pa bstan to/ /gnyis pas ni kun 'byung gi bden pa dang / sdug bsngal gyi bden pa bstan to/ /gsum pas ni gang dag gis 'gog pa thob pa'o/ /bzhi pas ni gang dag gis ma thob pa'o zhes bya ba ni bsdus pa'i don to/ /bag yod pa zhes bya ba ni kun du zag pa dang dag pa'i gnas kyi chos gang dag las sems kun du srung ba'o/ /dge ba'i chos rnams la bsgom pa ni bag yod pa'i chos so zhes bstan pa yin te/ 'di ltar 'di'i mtshan nyid bstan pa ste/ rang la phan pa skyes pa'i lus dang ngag dang yid kun du bsrung ba mchog tu byed pa bag med pa dang 'gal ba'i chos ni bag yod pa'o/ /gang gi dge ba dag las bag med par mi 'gyur ba dang / mi zhig pa ste/ dge ba'i rtsa ba thams cad kyis brten pa'i phyir te/ ji skad du 'di lta ste dge slong dag dud 'gro'i skye gnas kyi srog chags gang ji snyed pa'i rjes de dag thams cad ni glang po che'i rjes kyi nang du 'dus shing de'i khongs su 'dus shing de'i khongs su gtogs par 'gyur te/ glang po che'i rjes ni de rnams las mchog tu bshad de/ 'di lta ste che ba nyid kyis so/ /de bzhin du gang dag dge ba'i chos de dag thams cad kyi rtsa ba ni bag yod pa yin te/ bag yod pa ni de dag thams cad kyi mchog tu bshad do zhes gsungs so/ /'chi med gnas zhes bya ba ni gang du 'chi ba med pa de ni 'chi med de/ mya ngan las 'das pa zhes bya ba'i don to/ /de na 'chi ba la sogs pa'i gnod pa med pa'i phyir ro/ /de'i gnas ni bzhi ste gang gi phyir bag yod pa la gnas pas mya ngan las 'das pa 'thob pa'o/ /yang na 'dis 'chi ba med pa rtog par byed pas gnas te/ mya ngan las 'das pa 'thob par byed pa'i thabs zhes bya ba'i don to/ /bag med ces bya ba ni/ bag yod pa'i mtshan nyid las bzlog par shes par bya'o/ /'chi ba'i gnas zhes bya ba 'chi ba nyid kyi gzhi ste/ bag med pa la gnas pas 'khor ba dag tu yang dang yang du 'chi bar 'gyur ba'o/ /yang na 'chi ba 'thob pa'i thabs yin no/ / ci'i phyir yang bag yod pa ni mi 'chi ba'i gnas yin la/ bag med pa ni 'chi ba'i gnas yin zhe na/ 'dir smras pa/ 'di ltar bag yod 'chi bar mi 'gyur te/ /zhes bya ba yin te/ bag yod pa shA ri'i bu la sogs pa ni 'chi ba med pa'i gnas su zhugs te/ nam yang 'chi bar mi 'gyur ro/ / bag med pa ni nya ser skye la sogs pa lta bu'o/ /de ltar na sngon gyi mtha' dang phyi ma'i mtha' gnyis dang 'dir yang 'chi ba'i chos yin pa'i phyir rtag tu 'chi bar brjod par bya'o/ /bag yod pas mi 'chi ba zhes bshad pa yang ci pha'i bag yod pas bu mi 'chi bar 'gyur ram/ bu'i bag yod pas kyang pha mi 'chi bar 'gyur ram/ de bzhin du bla ma dang slob ma la sogs pa la yang brjod par bya'o/ /bag yod pas kyang mi 'chi bar mi 'gyur ro zhe na/ de ni ma yin te 'on kyang / bag yod 'chi bar mi 'gyur te/ zhes bya ba smras te/ gang bdag nyid kyi bag yod pa'am/ bag med pa de nyid kyis te bag yod pas ni 'chi bar mi 'gyur ro/ /bag med pas ni 'chi bar 'gyur te/ gzhan gyi rgyud kyis rnam pa'i bag yod pa'am/ bag med pa gnyis kyis ni gang la yang mi 'chi ba dang / 'chi ba 'thob par mi 'gyur ro/ /gal te yang thob par 'gyur na ni gang sangs rgyas bcom ldan 'das nyid la bag yod pa mnga' bas sems can thams cad kyang 'chi bar mi 'gyur ro/ /de la 'di ni bag med pa rnams bag yod pa la gzud pa'i phyir dang / bag yod pa rnams brtan par bya ba'i phyir dang / lam ngan pa'i brtul zhugs dang / dka' thub dang mchod sbyin la sogs pas 'chi ba med pa'i gnas thob par bya'o zhes mi bden par smra ba dag dgag pa'i phyir gsungs so/ /bag yod pa'i yon tan yongs su shes pa'i mkhas pa ni de nyid du 'jug par 'gyur ro zhes bstan pa'i phyir de'i khyad par zhes bya ba la sogs pa smos so/ /'di'i bsdus pa'i don ni 'di'i lam yongs su shes shing bag yod pa'i khyad par shes pa des mkhas pa dag bag dang bcas pa las mi nyams par byed do/ /bag yod pa yang rnam pa gnyis te/ ye shes phun sum tshogs pa dang / 'bad pa la gnas pa phun sum tshogs pa'o/ /de la de ltar rab tu zhugs pa las ni bag med pa kha na ma tho ba med pa ma yin no zhes bstan to/ / 'phags pa'i spyod yul la dga' ba nyid kyis ni snga phyi'i khyad par rtogs pa'o/ /de'i zhes bya ba ni gang sngar bstan pa'i tshigs su bcad pa bag yod pa'i khyad par bstan pa ste/ bag yod 'chi med gnas yin te/ /zhes bya ba la sogs pa'o/ /de nyid kyi khyad par rig pa ni 'dir phan yon no/ /khyad par nyid yin pas khyad par ro/ /de rig pas zhes bya ba ni thos pa las byung ba la sogs pa'i shes rab mtshon pa nyid do/ /gang gi khyad par zhe na/ smras pa/ bag dang bcas zhes bya ba smos te/ 'dir bag med pa'i skyon rig pa'o zhes kyang brjod par bya ste/ gcig gis gnyis pa mtshon pa yin no/ / yang na yon tan yang dag par sgrogs pa nyid la mngon par sbyor bar byed de/ mkhas pa rnams ni skyon brjod pa ma yin no zhes ston pa yin no/ /mkhas pa zhes bya ba ni snga ma'i tshogs kyi rnam pa la 'jigs pa med pa dang lhan cig skyes pa'i shes rab dang ldan pa ste/ gang gi phyir de nyid kyis ni nus pa dang ldan pa'i phyir ro/ /rig par byas nas ci zhig tu 'gyur zhe na/ smras pa/ bag yod pa zhes bya ba smos te/ bag yod pa la gnas pa'o/ /de'i gnas skabs kyi phan yon bstan pa'i phyir smras pa/ rab dga' ba zhes bya ba smos te/ rab tu tshim pa dang mgu ba thob pas rab tu dga' ba nyid do/ /dge ba rgya che ba dag la nges par 'byung ba dang ldan zhing bsam gtan 'thob pas so/ /dran pa bsgom pa sngon du 'gro ba bstan pa'i phyir smras pa/ 'phags pa'i spyod yul zhes bya ba smos te/ sangs rgyas dang sangs rgyas kyi sras kyi spyod yul te/ dran pa nye bar gzhag pa bzhi la gnas pa zhes bya ba'i don to/ /de'i phyir bcom ldan 'das kyis gsungs pa/ dran pa nye bar gzhag pa bzhi ni 'phags pa'i spyod yul zhes gsungs so/ /dga' ba yin zhes bya ba ni mngon par dga' ba ste bstan pa'i ro shes pa des gzhan gyis bkrir mi nus pa nyid du bstan to/ /bag yod pa dang thar pa'i lam rnyed par dka' ba yin no zhes bstan pa'i phyir 'di gsungs so/ /bag yod 'chi med gnas yin te/ /zhes bstan pa de ji lta bu zhe na/ 'dir go rims bzhin du bstan pa'i phyir/ de la rgyun du bsgom pa dang / /zhes bya ba la sogs pa smos so/ /dge slong sho na ka'i dbang du mdzad nas 'di gsungs so/ /sho na ka bag yod pa ni gzhi yin te/ dge ba'i chos gang ji rnyed pa ni bag yod pa las rab tu 'byung ba dang / de bzhin gshegs pa dgra bcom pa yang dag par rdzogs pa'i sangs rgyas kyis byang chub kyang bag yod par 'thob pa yin te/ de bas na khyod kyis dge ba dag la bag med par mi bya'o zhes bya ba'i bar du gsungs te/ tshigs su bcad pa 'di bka' stsal to/ /'dir ting nge 'dzin gyis bsdus pa'i don ni ting nge 'dzin bsgoms pa dang / ting nge 'dzin bsgom pa'i thabs dang / ting nge 'dzin bsgoms pa'i 'bras bu dang / grub pa dang bde ba bla na med pa'i phan yon bstan pa yin no/ /de zhes bya ba ni bag yod pa'o/ /bsgom pa'i ngang tshul gang la yod pa de ni bsgom pa ste/ bsam gtan dang po la sogs pa thob pa'o/ /yang na gang dag zhi gnas dang lhag mthong sgom par byed pa ste/ 'di gnyis ni gcig la gcig 'brel pa nyid de/ ji skad du bshad pa/ bsam gtan med par ni shes rab med do/ /shes rab med par yang bsam gtan med do zhes pa'o/ /de yang rang bzhin gyis bsam pa bzang bar byas te/ bag yod pa la brten nas dge ba'i bshes gnyen nye bar bsten pa yin te/ des na yang rnal 'byor dang rjes su mthun pa'i nye bar bsten pa la gus par byed cing nyan par byed la/ thos nas kyang phyin ci ma log par des rnam par bsams te/ thos pa las byung ba la sogs pa'i shes rab bskyed pa'i rim gyis ting nge 'dzin 'thob pa'i phyir bsgom par 'gyur ro/ /rgyun du zhugs pa zhes bya ba ni rtag par yin pas rgyun du ste/ bsgom pa de nyid la rtag tu sbyor ba'i phyir ro/ /de dgun dang so ga la sogs par mi rtag pa yin nam zhe na/ rgyun mi 'chad par sbyor ba'i phyir te/ ji srid mthar thug gi bar du'o/ /'di ni rtag tu byed pa nyid du bstan to/ /pha rol gnon brtan pa'i zhes bya ba la brtan pa ni mi lhod pa'o/ / pha rol gnon pa ni spro ba gang la yod pa ste/ 'dis ni mi lhod pa dang gus par sbyor ba bstan te/ rtsod pa dang 'tshe ba thams cad kyis kyang brtson 'grus nyams pa med pa'i phyir ro/ /reg pa yin zhes bya ba ni thob par 'gyur ba'o/ /'dir reg pa yang rnam pa gnyis te/ lam dang mya ngan las 'das pa'o/ / de la 'dir ni mya ngan las 'das pa nyid la dgongs te/ 'di nyid 'og nas brjod pa'i phyir ro/ /brtan pa ni blo dang ldan pa ste/ thabs 'di dag dang ldan pa nyid du pha rol gnon brtan pa'i zhes bya bas bstan pa'i phyir ro/ /gang gi phyir brtan pa'i bar du mi skrag cing sgyid lug par mi 'gyur ro/ /mya ngan las 'das pa zhes bya ba ni sdug bsngal mthar byed pa ste 'gog pa'o/ /grub pa dang bde ba zhes bya ba ni rig pa ste/ 'bad pas bsgrubs pa'i yang dag pa'i lta ba sngon du 'gro ba'i lam ni grub pa'o/ /des thob pa ni bde ba ste/ grub pa dang bde ba'i mya ngan las 'das pa ni 'jig pa thams cad dang gtan du 'bral ba'i phyir ro/ /'jig rten pa'i bsam gtan yang rnam grangs kyi mya ngan las 'das par ni bcom ldan 'das kyis gsungs te/ ji srid du srid pa'i rtse mo'i rgyun gyi bar du ni bla na yod pa'o/ /'di ni khyad par che ba yin pas bye brag bstan pa'i phyir smras pa/ bla na med pa zhes bya ba yin no/ /bag med pa'i skyon mi shes pa dang / bag yod pa ni phan yon thams cad kyi gzhi yin pas gzud pa'i phyir 'di gsungs so/ /bag med pa spangs pa ni phan yon lhag pa ste/ che ba nyid du bstan pa'i phyir smras pa/ gang tshe mkhas pa zhes bya ba la sogs pa smos so/ /las ngan pas 'tsho ba'i khye'u zhig la chos bstan pa'i dbyig pas drang ba sbyin pa'i thabs kyis las ngan pa'i mi gtsang ba'i phung po las dbyung ba dang / yang dag pa'i bsgrub pa la gzhag pas khyad par du bden pa thob par bya ba dang / de la 'di skad gsungs so/ /gzhan dag na re longs spyod chen po rgya che ba spangs nas rab tu byung ste/ bsgrub pas khams gsum las 'dod chags dang bral ba'i 'phags pa 'od srungs chen po'i dbang du byas nas gsungs so zhes zer ro/ /dang po'i tshig rkang gnyis kyis ni nag po'i phyogs spangs pa dang / dkar po'i phyogs bsten pa nyid du bstan to/ /gsum pas ni de'i 'bras bu shes rab kyi mthar phyin pa bstan to/ /lhag mas ni de'i phan yon bstan to zhes bya ba ni bsdus pa'i don to/ /bag med pa ni bdag dang gzhan gyi phan pa nyams pa ste/ tha mal pa'o/ /yang na rnam pa bzhi ste/ srog dang stobs dang / sems dang nyon mongs pa kun du mi bsrung ba yin te/ yang dag pa'i sbyor ba la rjes su mi 'jug pa'i sbyor bas so/ /bag yod pa shes pa la bag med pa'i mtshan nyid las bzlog pa ni bag yod par gnas pa yin te/ 'di ni bag med par gsal bar nus te/ rjes su mthun pa'i gnyen po yin pa'i phyir mun pa'i sgron ma bzhin no/ /gang gi tshe zhes bya ba gang gi dus na'o/ /bcom pa ni rab tu spangs pa'o/ /de gang gis spong bar byed nus pa yin zhe na/ smras pa/ mkhas pa zhes bya ba la mkhas pa ni rtogs pa ste/ slob pa zhes bya ba'i don to/ /mi slob pa'i gnas skabs bstan pa'i phyir smras pa/ shes rab khang bzangs zhes bya ba la sogs pa smos te/ gang ji skad du gsungs pa bag yod pa la brten pas ji skad bstan pa bag med pa spong ba yin te/ de nyid khyad par du byed pas mi slob pa'i shes rab thob par 'gyur ro/ /shes rab ni khang bzangs bzhin du thams cad kyi steng na gnas pa'i phyir dang / shin tu nyams dga' bar gyur pa'i phyir ro/ /'dzeg pa ni phyin pa'o/ /'dzegs nas ji lta bus ci zhig byed pa yin zhe na/ smras pa/ mya ngan med ces bya ba la sogs pa smos te/ mya ngan dang bral ba gang yin pa de ni mya ngan med pa ste/ 'dis mya ngan dang bral bar bdag la mthong ba yin te/ sdug bsngal thams cad dang bral ba'i phyir ro/ / des gzhan dag la yang ji ltar mthong ba yin zhe na/ smras pa/ gdung ba zhes bya ba smos te/ mya ngan gang la yod pa de ni gdung ba ste byis pa zhes bya ba de dang sbyar ro/ /sdug bsngal gyi tshogs chen po'i gnas yin pa'i phyir dpag tu med pa'i yid kyi gdung ba dang ldan pa'o/ /ji lta bu gang yin zhe na/ 'dir dpe bstan pa/ sa'i steng ri bo'i spo dag las zhes te/ sa'i steng na gnas pa yin pas sa steng ngo / /de ri'i steng na gnas pa yin pas ri bo'i spo dag las te/ dper na ri'i rtse mo las mig dang ldan pas srog chags kyi rnam pa la 'og tu bltas na 'bad mi dgos par mthong ngo / /de bzhin du khyad par du 'phags pa thob pa'i shes rab kyi khang bzangs kyi steng du 'dzegs te/ ngan pa'i phung po la gnas pa'i byis pa rnams la lta zhing rtog par byed ces bya ba'i don to/ /brtan rnams zhes bya ba ni zhum pa med pa ste/ gzhan gnod par bya ba'i byed pa la zhes bya ba ni tshig gi lhag ma ste/ de'i don la lta ba'o/ /bag yod pa dang brtan pa dang / /bdag nyid la ni rtag tu dga'/ /zhes bya ba'i tshigs bcad kyi phyed 'dis gzhan dag brjod mod kyi/ 'di ni yang dag pa ma yin te/ phran tshegs kyi sde snod las tshig rkang drug po 'di nyid smos pa'i phyir dang / 'dir don lhag pa yang med pas brjod par mi bya'o/ /bag med pa rnams thar par 'dod pa la gzud pa'i phyir 'di gsungs so/ /bag yod pa gcig pus ni mngon par 'dod pa'i don mi 'grub pa ste/ 'on kyang 'bras bu'i tshogs thams cad kyi tshogs pa la rag lus pa'i phyir brtson 'grus dang bcas pa nyid du 'dir bstan pa'i phyir smras pa/ brtson 'grus dang ni zhes bya ba la sogs pa smos so/ /a si bad da ka'i bu grong dpon zhig bcom ldan 'das kyi spyan sngar song ste phyin nas 'di skad ces gsol to/ /de bzhin gshegs pa ni gcig la thugs brtse bar gyur pa btsun pa rgyu gang lags rkyen gang lags zhes gsol pa dang / grong dpon de ni gnas med de ji srid du 'di lta ste/ ji ltar yang zhing pa khyim bdag gi zhing ni gsum yod de/ de la zhing dang po ni legs par rmos pa dang / legs par bdal zhing bsnyams pa dang / sa snum zhing 'jam pa dang / rtswa dang tsher ma med pa'o/ /gnyis pa ni legs par rmos pa ste dgon dung ngo / /gsum pa ni tshwa sgo can ma rmos pa'o/ /de la grong dpon zhing pa khyim bdag gis sa bon gang du 'debs par byed/ snga ma ma gtogs par gzhan du ni ma yin te/ de med na ni gnyis pa'o/ /grong dpon de bzhin du de bzhin gshegs pas gdul bya'i bsam pa la ltos te/ chos ston pa la sogs pa'i bya ba mdzad par 'gyur ro zhes bya ba ste/ ji tsam na 'di gsungs so/ /gzhan dag na re 'od ma'i tshal na gnas brtan lam phran bstan las brtsams pa yin no zhes zer ro/ /gzhi dang bcas pa'i tshul khrims dang / sems dang lta ba rnam par dag pa dang / de'i 'bras bu 'dir bstan to zhes bya ba ni 'di'i bsdus pa'o/ /brtson 'grus ni kun nas slong zhing brtson 'grus rtsom pa ste/ de med par ni mngon par 'dod pa'i 'bras bu mi 'thob bo/ /bag yod pa zhes bya ba ni don 'di la shes bzhin gyis gnas pa des sems srung ba ste/ bag yod pa des so/ /yang dag par sdom pa ni lus dang ngag yang dag par sdom pa ste/ des sdig pa la khyad du gsod pa las ldog pa yin no/ /dul ba dang zhes bya ba ni dbang po'i sgo bsrung ba des mig la sogs pa'i dbang po rnams yongs su 'dul ba ste/ gang yul gyis mi 'phrogs pa'o/ /dang gi sgra ni 'dis gling du byed pa yang yin no zhes pa'o/ /gling zhes bya ba ni mya ngan las 'das par rab tu 'jug pa'i phyir te/ de'i phyir mdo sde pa la las mya ngan las 'das pa'i rnam grangs su brjod de/ 'di ltar 'dus ma byas dang / blta bar dka' ba dang / mi 'gyur ba dang / mtha' yas pa dang / zag pa med pa dang / gnas dang / gling dang / skyob pa zhes rgya cher gsungs so/ /des byas pa ni mya ngan las 'das pa 'thob bo zhes bya ba'i don te/ 'dir byas pa ni theg pa la 'jug ste/ ji ltar gzhan dag tu bshad pa/ sdug bsngal mthar byed pa yin no zhes pa'o/ /mkhas pa zhes bya ba ni yul ji lta ba nyid la shes pa'i mkhas pa de gang la yod pa ste/ bden pa mthong ba zhes bya ba'i don to/ /chu bo chen po mngon du bzlog / ces bya ba ni gang de mkhas pas gling du byas pas ni zhes bya bas chu bo rnam pa bzhis zil gyis mnan par mi 'gyur zhing 'phrogs par mi 'gyur ro/ /'di skad ston pa yin te/ brtson 'grus phun sum tshogs pa ste/ 'phags pa'i nyan thos brtson 'grus phun sum tshogs pa la gnas pas bag yod par 'gyur zhing shes bzhin la gnas par 'gyur ro/ /bag yod pa la gnas pas ni nyes par spyod pa dang / kun nas nyon mongs pa la lus dang ngag gis yang dag par sdom par byed do/ /tshul khrims yongs su sbyangs pa'i phyir yul dang nyon mongs pa las dbang po 'dul bar byed do/ /sems yongs su sbyangs pa'i phyir dam pa rnams kyi sdom pa dang bcas shing / tshul khrims la sogs pa rnam par dag pa la brten nas gling du byed do/ /gang du nyon mongs pa zad pa thob na ni yang chu bo bzhis 'phrogs par mi 'gyur ro/ /brtson 'grus kyis ni brtson 'grus kyi dbang po bstan to/ /bag yod pas ni dran pa'i dbang po la nye bar gnas pa ste/ gang gi phyir dran pa yod na ni bag yod par 'gyur ro/ /yang dag par sdom pas ni yul la mched pa'i sems yang dag par sdom pa yin pa'i phyir ting nge 'dzin gyi dbang po bstan to/ /dul bas ni shes rab kyi dbang po bstan te/ gang gi phyir shes rab kyis sems yongs su 'dul bar byed do/ /ji ltar yang nyon mongs pas byas pa'i rnam par smin par yang mi 'gyur ro/ /mkhas pas gling du byas nas ni/ /zhes bya ba ni/ 'phags pa'i nyan thos de 'di la dad pas thar pa don du gnyer bas ni dbang po rnam pa bzhi 'bras bu dang bcas par bstan pa yin no zhes bya ba'i tshig gi rnam pa'i don to/ /de la 'di ni thar pa 'dod pa rnams kyis le lo la sogs pa'i skyon de spang bar bya ba'i phyir 'di gsungs so/ /ston gyi zla ba dri ma med pa las kyang lhag pa'i dri ma med pa'i grags pa ni bag yod pa nyid las 'thob par 'gyur ro zhes bstan pa'i phyir smras pa/ brtson 'grus ldan zhing zhes bya ba la sogs pa smos so/ /grags pa 'dod pa'i rgyal po'i bu zhig bcom ldan 'das kyi spyan sngar 'ongs te/ kye gau ta ma gang gis grags pa 'phel bar 'gyur zhes gsol pa dang / de nas bcom ldan 'das kyis tshigs su bcad pa 'di gsungs so/ /gzhan dag na re rgyal po'i khab tu kun pa go sha zhes bya ba las brtsams te gsungs so zhes 'di la bsdus pa'i don ni brtson 'grus ldan zhing zhes bya ba ni brtson 'grus kyi dbang po'o/ /dran pa ni dran pa'i dbang po'o/ /spyod pa gtsang ba zhes bya ba ni ting nge 'dzin gyi dbang po ste/ gang gi phyir bsam gtan thob na ni tshul khrims yongs su dag go/ /brtags nas byed pa zhes bya ba ni shes rab kyi dbang po ste/ de'i dbang gis ni 'jig rten las 'das pa'i lam 'thob cing yang dag par sdom pa la sogs pa rnams kyis tshul khrims dang 'tsho ba dang sems shin tu yongs su dag par kun du bstan pa'i phyir ro/ / brtson 'grus gang la yod pa de ni brtson 'grus dang ldan pa ste/ brtson 'grus rtsom pa dang ldan pa'o/ /dran pa dang ldan pa zhes bya ba ni dran pa gang la yod pa de ni dran pa dang ldan pa'o/ /spyod pa gtsang ba dang ldan pa zhes bya ba la gtsang zhing dri ma med pa'i spyod pa'i tshul 'di la yod pa'o/ /brtags nas byed pa zhes bya ba ni brtags shing nges par rtog pa dang legs par spyod pa'i tshul gang 'di la yod pa ste/ rtog par byed pa zhes bya ba'i don to/ /yang dag par sdom par byed pa zhes bya ba ni sdig pa las gtan du ldog pa dang / mi byed pa'i sdom pa thob pas 'phags pa'i gang zag gtan du yang dag par sdom par 'gyur ro/ /yang dag par sdom pa dag pa'i thabs bstan pa/ chos kyis 'tsho ba dang zhes bya ba la chos ni rigs pa ste/ des 'tsho ba'i ngang tshul 'di la yod pa de ni de lta bu ste shes rab kyis 'tsho bas so/ /yang na tshul 'chos pa la sogs pa log pa'i 'tsho ba spangs pa'o/ /bag yod rnams kyis zhes bya ba ni bag yod pa'i phyir gang yang 'byung bar mi 'gyur ba de ni 'dir don dam pas bag yod cing dgra bcom pa yin te/ drug la rtag tu gnas pa yin no/ /grags pa mngon par 'phel zhes bya ba ni snyan pas srid pa gsum ma lus par khyab par 'gyur te/ ji skad du pa ri dza ka'i mdo las gsungs pa/ sum cu rtsa gsum pa'i lha rnams lha'i 'dun sa'i chos bzangs su 'dus shing 'khod nas yang dang yang du dge slong dgra bcom pa zag pa zad pa'i grags pa sgrogs pa'i tshul gyis 'dug go zhes so/ /grags pa khyad par du 'phags pa 'di lta bu 'dod pa rnams kyis bag yod pa la nan tan du sbyar ba'i phyir 'di gsungs so/ /bag yod pa ni yon tan thams cad kyi gnas yin pas gang spang ba'i dngos po de bstan pa'i phyir/ dman pa'i chos la mi rten cing / /zhes bya ba la sogs pa'i tshigs su bcad pa gnyis smos so/ /'di'i gleng gzhi ni log pa'i lta ba mchog tu kha na ma tho ba med pa la log par lta ba'i skyes bu gang zag gang yang lus kyi las la de ltar lta ba zhes bya ba la sogs pa rgya cher tshigs su bcad pa 'di gnyis gsungs so/ /gzhan dag ni dge slong zhig dman pa la mos shing le lo can zhig gi dbang du mdzad nas gsungs zhes zer ro/ /tshig rkang dang pos ni tshul khrims 'chal ba bzlog cing lhag pa'i tshul khrims la gzud pa yin no/ /tshig rkang gnyis pas ni 'dod pa'i yon tan dag la g.yeng ba las bzlog cing lhag pa'i sems la gzud pa'o/ /gsum pas ni phyin ci log gi lta ba la mchog tu 'dzin pa bzlog pa ste/ lhag pa'i shes rab la gzud pa yin no/ /bzhi pas ni bslab pa'i 'bras bu ston to zhes bya ba ni bsdus pa'i don to/ /yang na tshig rkang dang pos ni sdig pa spyod pa las bzlog pa'o/ /gnyis pas ni 'dod pa spyod pa las bzlog pa'o/ /gsum pas ni dka' ba spyod pa las bzlog pa yin te/ gang gi dka' thub kyis bdag nyid yongs su gdung bar byed cing 'dis yongs su dag par blta ba'o/ /bzhi pas ni de bsten pa'i nyes dmigs bstan to/ /yan lag gi don ni/ dman pa'i chos la mi rten cing / /zhes bya ba ni ngan par spyod pa lhag par mi byed pa 'dis ngan par spyod pa'i kun nas nyon mongs pa las bzlog pa yin no/ /bag med pa la brten mi bya/ /zhes pa ni bag med pa'i dngos po dang lhan cig mi rten cing mi 'brel bar bya ba ste/ 'dis ni yul la sred pa'i nyon mongs pa las bzlog pa yin no/ /log par lta la 'dod med dang / /zhes bya ba ni sdug bsngal la sogs pa gcod par byed pa/ lta ba ngan pa'i lta ba de la 'dod pa med pa ste/ /de'i yul la 'dod par mi bya ste/ 'dis ni lta ba'i kun nas nyon mongs pa las bzlog pa yin no/ /'jig rten 'phel bar mi bya'o/ /zhes bya ba ni 'jig rten sogs par mi byed pa ste/ gang gis 'jig rten 'phel ba ni skye ba gzhan du 'khor ba ste/ rgyu dang 'bras bu rgyun chags par 'byung bas so/ /'jig rten ni nye bar len pa'i phung po lnga'o zhes bstan to/ /de yang 'jig cing rab tu 'jig pa yin pas 'jig rten no/ /'phel bar bya ba ma yin pa ni 'phel bar mi bya'o/ /'jig rten gyi 'phel ba ni 'jig rten 'phel ba'o/ /de la 'dis ni kun nas nyon mongs pa gsum spang zhing yongs su sbyor bar bstan pa yin no/ /de dag yongs su ma spangs na ni 'khor ba 'phel bar 'gyur la yongs su spangs na ni 'phel bar mi 'gyur ro zhes bstan to/ /yang na dman pa zhes bya ba ni 'jig rten dang 'jig rten las 'das pa ste/ nyan thos la sogs pa'i lam ni gzhan gyi don byed par 'dod pa spangs pa'i phyir ro/ /bag med pa zhes bya ba ni de spong ba'i lam gyi gnyen po dang bral ba nyid du ston to/ /log par lta la zhes bya ba ni skyon thams cad rtsa ba nas 'byin pa la gzud pa'o/ /de lta na ni 'dir phan 'dogs pa nyid du nye bar bstan pa'i phyir smras pa/ 'jig rten 'phel bar mi bya'o/ /zhes bya ba yin no/ /'khor ba yongs su spong bar 'dod pas ni ji skad du bshad pa spyad par mi bya'o zhes yang dag par 'dzin par byed du gzhug pa'i phyir 'di gsungs so/ /gang sngar bshad pa'i/ log par lta la 'dod med dang / /zhes bya ba de dang por gang gis sel ba yin zhe na/ 'jig rten pa'i yang dag pa'i lta bas yin te/ des na de nyid bstan pa'i phyir smras pa/ 'jig rten pa yi yang dag lta/ /zhes bya ba la sogs pa smos te/ re zhig 'jig rten pa'i yang dag pa'i lta ba yang mthu 'di lta bu yod de/ 'di ltar ngan song gsum du ltung ba 'gog par byed pa yin na/ 'jig rten las 'das pa lta smos kyang ci dgos so zhes phan yon bstan pa ni 'di'i bsdus pa'i don to/ /phyin ci ma log pa la 'jug pa'i lta ba ni yang dag pa'i lta ba ste/ gang so so'i skye bo'i dge ba gang mthong ba'i dbang gis las dang / 'bras bu yod pa nyid las brtsams te/ dkon mchog gsum dang bden pa rnams la yid ches shing mos pa dang 'dod pa'o/ / chen po zhes bya ba ni shas che ba dang ldan pa ste/ mdor na khyad par gyi gnas skabs thob pa'i don te/ de'i phyir dro bar gyur pa yang dag par 'dzin pa ni tha ma'o/ /rtse mo yang dag par 'dzin pa ni bar ma'o/ /bzod pa yang dag par 'dzin pa ni chen po'o/ /'jig rten pa nyid yin pas 'jig rten pa'o ste zag pa dang bcas pa'o/ /gang gi gnas skabs kyis 'jig rten pa'i yang dag pa'i lta ba chen po yin zhe na/ smras pa/ 'di lta ste so so'i skye bor gyur pa 'di la 'phags pa'i bden pa bzhi la bzod pa chen po yod pa ste/ de yang nges par 'byed pa'i cha'i bzod pa thob pa'i so so'i skye bo zhes brjod do/ /su la zhes bya ba ni gang zag go/ /yod par gyur pa zhes bya ba ni rgyud la yod pa'o/ /de ni tshe rabs stong du yang / /zhes bya ba ni 'khor ba na 'khor ba'i skye ba stong phrag du yang 'jig rten pa'i yang dag pa'i lta ba chen po thob par gyur pa de ni ngan 'gror 'gro bar mi 'gyur te/ ngan song gsum du skye bar mi 'gyur ba nyid de/ de ni des na so sor brtag pa'i 'gog pa thob par gyur pa'i phyir te/ bzod thob ngan song gsum du mi ltung ngo / /zhes pa'i lung gis so/ /ngan song gis 'jigs shing lam ngan pa la zhugs pa'i 'jig rten pa rnams la yang dag pa'i lta ba'i phan yon bstan pas gzud pa'i phyir 'di gsungs so/ /gang gi phyir yang bag med pa dang / bag yod pa gnyis nyes dmigs dang phan yon dang ldan pa 'di lta bu yin pas bag yod pa nyid 'dzin du gzhug pa'i phyir smras pa/ lhag pa'i sems la bag bya ste/ /zhes bya ba la sogs pa'o/ /yang dag par rdzogs pa'i sangs rgyas 'od srungs kyi nyan thos rab tu mang po snyoms par 'jug pa'i ro la myong bar byed cing gnas pa las de'i dbang du mdzad nas so sor thar pa mdor bsdus pa'i tshigs su bcad pa 'di gsungs so/ /gzhan dag ni rgyal byed kyi tshal na dge slong glo bur du 'ongs pa zhig shin tu bag med pa'i dbang du mdzad de 'di gsungs so zhe'o/ /'dir bsdus pa'i don ni tshig rkang dang pos ni tshul khrims dang ldan zhing mang du thos la thos pa tsam gyis chog par 'dzin cing shes rab kyi tshogs kyi bya ba dang ldan pa dag lhag pa'i sems kyi bslab pa la sbyor ba yin no/ /tshig rkang gnyis pas ni tshul khrims yongs su dag cing mi lhod pa dang / lhag pa'i sems kyi bslab pa bsgom par 'gyur ba'i phyir lhag pa'i tshul khrims kyi bslab pa la sbyor ba'o/ /lhag mas ni de ltar slob pa'i 'bras bu'i phan yon bstan to/ /lhag pa'i sems zhes bya ba la/ sems lhag pa yod pa ni lhag pa'i sems so/ /lhag pa'i sems las ni bsam gtan 'byung ngo / /gang gi phyir bsam gtan gyis ni sems dbang du 'gyur ro/ /yang na gang la lhag pa'i sems yod pa de ni lhag pa'i sems so/ /bag bya ste zhes bya ba ni bag med pa mi byed pa'o/ /ji ltar na lhag pa'i sems la bag bya ba yin zhe na/ gal te sems rtse gcig pas yang dag pa'i yid la byed pa skyes par gyur pa de la ni mya ngan med pa yin zhes bya ba 'di dang sbyar ro/ /'dis ni dge slong bsam gtan gyi ro myong bar byed pa zlog par byed pa yin te/ de'i bde ba ni chags pa'i gnas yin pas bag med par byed pa'i phyir ro/ /thub pa'i zhes bya ba ni thub pa zhes bya ba'i don to/ /des nye bar bstan pa'i phyir thub pas zhes bya ba yin no/ /gang thub pas bstan pa ni mi g.yo ba yin te/ gang blo dang ldan pa thub pas bstan pa'i tshul lo/ /'dod chags dang zhe sdang dang gti mug spangs shing bral bar gyur pa yin no zhes bstan pa ni don dam pa'i thub pa ste thub pa'i dbang po'o/ /de lta na ni dgra bcom pa thams cad kyang thub pa yin no zhe na/ sangs rgyas bcom ldan 'das ni thub pa chen po'o zhes bstan pas so/ /thub pas gsungs pa'i gzhi ni thub pa'i gzhi ste/ de yang bcom ldan 'das kyis bcas pa'i bslab pa'i gzhi rnams so/ /thub pa nyid yin pas thub pa ste de'i gzhi 'di dag go/ /de dag la rab tu gnas na ni thub pa'i dngos po dgra bcom pa nyid thob par 'gyur ro/ /bslab ces bya ba ni brtson pas bya ba ste/ da ltar byung ba'i thub pa'i gzhi dag la'o/ /mya ngan med pa yin zhes bya ba ni yid kyi gdung ba de la mi skye ba nyid de/ 'di la nyon mongs pa'i skyon med pa dang / nyon mongs pa spangs pa'i phyir ro/ /ji lta bu la 'dir mya ngan med pa yin zhe na/ smras pa/ skyob pa zhes bya ba ste rnam par grol bas chos yongs su ma nyams pa'o/ /nye bar zhi ba zhes bya ba ni nyon mongs pa dang bral ba las/ lhag par nye bar zhi ba thob pa'o/ /'dis ni nyon mongs pa spangs pa phun sum tshogs pa bstan to/ /rtag tu dran ldan pa zhes bya ba ni rtag tu dran pa mngon du byas pa ste/ dran pa nyams pa med pa'i chos yin pa'i phyir dang / drug la gnas pa'i phyir ro/ /tshul khrims la brten nas ting nge 'dzin bsgoms pas mngon par 'dod pa'i don thob pa de la gzud pa'i phyir 'di gsungs so/ /khyad par rig pas bag yod pa la 'bad par bya ba yin te/ 'di ltar/ bag med pa la sbyor byed pa/ /zhes bya ba la sogs pa'i tshigs su bcad pa gnyis gsungs so/ /mnyan yod na ded dpon gnyis yod de/ gcig ni phyug cing nor mang ngo / /gcig ni nor nyung ba zhig yod do/ /ji tsam na nor mang shos ni bud med dang rgyan po la sogs pa la chags pas 'byor pa zad par gyur te/ slong mo'i 'tsho ba la zhugs so/ /cig shos kyis ni brtson 'grus la gnas par byas te/ rgya mtshor 'gro ba la sogs pa'i rim gyis nor nye bar bsags te/ 'byor ba dang bde ba phun sum tshogs par gyur to/ /de lta bu'i gtam rgyal po gsal rgyal gyis bcom ldan 'das la gsol to/ /bcom ldan 'das kyis kyang de'i dbang du mdzad nas 'di gsungs so/ /de la 'dir tshig rkang dang pos log par bsgrub pa bstan to/ /gnyis pas ni log par bsgrub pa'i rgyu bstan to/ /lhag mas ni yang dag par bsgrub pa de'i rgyud dang de'i dpe bstan pa ni 'di'i bsdus pa'i don to/ /bag med pa zhes bya ba ni bya ba nan tan du bsgrub pa la yal bar dor bas nye bar mtshon pa'i sems las byung ba'o/ /sbyor byed pas zhes bya ba ni rjes su 'gro ba ste/ dge ba dang mi mthun pa'i chos bsten pas zhes bya ba'i don to/ /'dis ni log par bsgrub pa bstan to/ /byis pas ni rmongs pa ste 'dis ni mi shes pa dang ldan par bstan to/ /bsam brlag ces bya ba 'dis ni log par shes pa dang ldan par bstan to/ /kha cig na re mi shes pa las ni bag med pa 'byung ste/ chos ma thos pa'i phyir ro/ /kha cig na re log par shes pa las bag med pa 'byung ste/ chos log par thos pa'i phyir dper na bram ze bu 'dod pa'i phyir tshangs par spyod pa byed pa dang / mtho ris 'dod pa'i phyir phyugs gsod cing rig byed 'don pa dang / tshig kyal pa smra bar byed pas bdag ni bag yod pa yin no snyam pa dang / gcer bu pa dag thar pa 'dod pa'i phyir shin tu dka' ba'i dka' thub la sogs pa spyod pa yin no/ / skye bo zhes bya ba ni skye ba'i chos dang ldan pa'i phyir 'gro ba thams cad de/ yongs su ma smin pa'i sems can gyi tshogs ston pa yin no/ /mkhas pas bag dang ldan par bya/ /zhes bya ba ni sngar bshad pa'i mtshan nyid kyi bag med pa de mkhas pas bsrung bar bya ba'o/ /dang gi sgra ni khyad par te/ byis pa las mkhas pa khyad par gyi las la brten pas khyad par du byed pa'i phyir ro/ /'di ltar byis pa ni bag med pa la gzhol bar 'gyur te/ 'di ni bag yod pa'o/ /mkhas pa gang la yod pa de ni blo dang ldan pa ste/ phyin ci ma log par shes pa zhes bya ba'i don to/ /ji lta bur bag yod pa 'di ni bsrungs pa yin zhe na/ smras pa/ tshong dpon ltar zhes bya ba smos te/ ji ltar zhes pa dang / rin che ba'i nor zhes kyang 'di dang sbyar te/ dbyig dang gser dang nor bu la sogs pa ni nor te/ dper na 'byor ba 'dod pa'i skyes bus nor bu rin po che la sogs pa bsags pa byas nas/ yongs su srung bar byed pa de bzhin du mkhas pa bag yod pa bsrung ba yin te/ bdag gi dad pa'i dbang po la sogs pa las yongs su nyams par mi 'gyur ro/ /de la 'di ni byis pa dang mkhas pa'i mtshan nyid la kun du rmongs pa rnams la de bstan pa'i phyir dang / rab tu chags pa rnams bag yod pa la gzud pa'i phyir gsungs so/ /des na yang de nyid la gzud pa'i phyir/ bag med pa la mi sbyor zhing / /zhes bya ba la sogs pa smos so/ /tshig rkang dang pos ni ngan par spyod pa'i kun nas nyon mongs pa bzlog pa yin no/ /gnyis pas ni 'dod pa'i kun nas nyon mongs pa las bzlog pa yin no/ /gsum pas ni snyoms par 'jug pa'i kun nas nyon mongs pa las bzlog pa yin no/ /snyoms par zhugs pa'i kun nas nyon mongs pa yang rnam pa gnyis te/ ro myang ba dang / rtag tu sgom par mi byed pa'o/ /de la bag yod pa zhes bya ba ni ro myang ba ma yin par bstan to/ /rtag tu sems byed pa zhes bya bas ni rtag tu bsgom pa nyid du bstan to/ /zag pa zad pa thob par 'gyur/ /zhes bya ba ni/ kun nas nyon mongs pa gsum las rnam par grol ba'i phan yon bstan to/ /yang na tshig rkang snga ma gnyis kyis ni zag pa zad pa dang 'gal ba'i chos las bzlog pa yin no/ /'og ma gnyis kyis ni zag pa zad pa thob par byed pa'i chos la yang dag par sbyor ba yin no/ /bag med pa la mi sbyor zhing / /zhes bya ba ni bag med pa'i skyon 'di lta bu'o zhes rtogs nas rjes su mi 'jug pa ste/ dge ba'i chos mi bsgom pa'i tshul gyis le lo las ldog pa'o/ /'dod la dga' ba mi sogs dang / /zhes bya ba ni/ 'dod pa'i dga' ba dang mtshungs par ldan pa'i yid bde ba ni yid dga' ba'o/ /de la sogs pa ni 'brel ba dang 'dris pa ste/ 'dir yang mi sbyor zhing zhes bya ba rjes su 'brang ngo / /'dod pa la dga' bas byas pa'i mtshungs par ldan pas gnas pa las bzlog pa'o/ /rgyu gnyis kyis sangs rgyas kyi bstan pa la byung bar gyur kyang zag pa zad pa las ring du gnas pa yin te/ le lo dang dge ba'i chos bsgom pa na 'dod pa la dga' ba bsten pa ste/ gang de thob pa la 'gal ba'i chos bsten pa des na de nyid kyi phyir gnyis po de las ldog pa yin no/ /ji ltar zhe na/ 'di ltar bag yod ces bya ba smos te/ gang bag med pa la mi sbyor zhing brtson 'grus rtsom pa zhes bya ba'i don to/ /rtag tu sems byed pa zhes bya ba ni rtag tu bsgom pa'i ngang tshul 'di la yod pa ste/ zhi gnas dang lhag mthong gi tshul gyis rgyun mi 'chad par bsgom pa la 'jug cing mi mthun pa'i phyogs sel bar byed pa yin te/ gang 'dod pa la dga' ba la sogs pa la mi sbyor ba de zhes bya ba'i don to/ /thob par gyur pa ni phyin par 'gyur ba'i don to/ /zag pa zad pa ni nyon mongs pa zad pa ste dgra bcom pa nyid do/ /de thob par gyur na ni zag pa gsum zad par 'gyur ro/ /de la tshigs su bcad pa 'di ni thar pa 'dod pa la le lo che ba dang / yul la mngon par dga' ba rnams la de'i gnyen po la gzud pa'i phyir gsungs so/ /gang gi phyir bag yod pas zag pa zad pa thob pa yin te de'i phyir smras pa/ zag pa zad pa ma thob kyang / /zhes bya ba smos so/ /bcom ldan 'das nyan thos kyi tshogs dang dgon pa dag tu rgyu zhing gshegs pa las ri dwags kyi ma zhig gis g.yang sa nas ltung ba'i seng ge ral pa can srog dang ldan pa'i mig gnyis phyung ba gzigs nas bag med pa'i dge slong dag gi dbang du mdzad de 'di gsungs so/ /'di'i bsdus pa'i don ni tshigs bcad snga ma phyed kyis ni lam rnam par nyams par ston to/ /'og ma phyed kyis de rnam par nyams pa'i 'bras bu ston to/ /dus 'dir bag med mi bya ste/ /zhes bya ba ni mi khom pa brgyad spangs pa'i mi'i lus 'di ni 'dir khom pa zhes bya ba'i don to/ /de yang bag med pas yal bar dor zhing 'bras bu med par bya ba ni mi rigs te/ gang yod par gyur zhe na/ ma thob kyang zhes bya ba smos te/ ma rtogs kyang ngo / /zag pa zad pa zhes bya ba ni khams gsum gyi nyon mongs pa spangs pa'o/ /dper na rin po che'i gling nas 'ongs la rin po che bsags pa ma byas pa ni rab tu dga' bar byas pa ma yin pa de bzhin no/ /de la 'dis ni zag pa zad pa thob par bya ba'i phyir/ bag yod pa bsgom pa la gzud pa yin te/ ci'i phyir zhe na/ bag med pa dag bsad par 'gyur/ /zhes smos te/ dge ba'i chos srog dang 'dra ba 'dis gsod pa yin pas nyams par byed ces bya ba'i don te/ 'chi bdag dang nyon mongs pa la sogs pas so/ /bag med pa rjes su 'brang ba zhes bya ba ni gsod pa'i phyir rjes su 'gro ba yin te/ 'dir dpe bstan pa/ ri dwags ma yis seng ge ltar/ /zhes bya ba ste/ ri dwags kyi mas gsad pa'i phyir seng ge'i rjes su 'brang ba bzhin no/ /ri dwags kyi ma zhes bya ba'i rigs yod de/ de seng ge'i rjes su 'brangs nas lces bldag cing de ltar bde bar byed do/ /ji tsam na de gnyid shin tu stug pos non te gnyid log pa de'i tshe mig gnyis 'dru bar byed pa yin no/ /'di ltar seng ge de yang bag med pa'i gnyid kyi rjes su 'gro bas nyams pa yin na/ ri dgas gzhan lta smos kyang ci dgos/ de lta de ltar stobs dang ldan pa'i dge ba'i rtsa ba la rab tu gnas pa seng ge dang 'dra ba'i slob pa dang mi slob pa'i gang zag kyang bag med pa'i nyon mongs pa'i bdud rjes su 'brang nas ye shes kyi mthong ba nyams par byed na/ so so'i skye bo'i yon tan nyams par byed pa lta smos kyang ci dgos/ 'chi bdag gi bdud kyis bya ba ma byas pa'i slob pa dag kyang bag med pas gsod par byed na/ 'dod chags dang zhe sdang dang gti mug dang le lo dang log pa'i chos ma spangs pa dang / de'i gnyen po dge ba'i chos ma bsgoms pa'i byis pa rnams lta smos kyang ci dgos/ gzhan dag tu ni/ ri dgas ma yis seng ge ltar/ /zhes brjod de/ ri dgas ma ni ri dwags mo ste/ seng ge bza' ba'i ched du rjes su 'brang ba de bzhin du bag med pa'i bdud do/ /de la 'di ni bag med pa'i skyon bstan pas bag yod pa la gzud pa'i phyir gsungs so/ /bag med pa'i nyes dmigs ni/ bag med pha rol zhes bya ba la sogs pa smos so/ /rgyal po'i khab na gzhan gyi bud med la 'gro ba'i skyes bu gzhan gyi chung ma dang dga' bar spyod cing 'dug pa la rgyal po'i skyes bus bzung nas ma skyes dgras gshed ma la gtad de/ lag pa dang rkang pa dang skyes pa'i dbang po dang phral nas dur khrod kyi gnas su bskyal lo/ /de bkres pa dang skom pa la sogs pas nye bar gdungs bzhin du de nas shi ba'i dus byas te dmyal bar skyes pa de'i dbang du mdzad nas 'di gsungs so/ /gzhan dag ni mgon med zas sbyin gyi snag gi tsha bo k+She ma ka zhes bya ba'i tshong dpon gyi bu las brtsams pa yin no zhes zer ro/ /gzhan gyi bud med la chags pas ni nyes pa rnam pa bzhi 'thob par 'gyur te/ 'di lta ste rang gi las dang / gzhan gyi chung ma dang / 'jig rten 'di dang / 'jig rten pha rol nas go rims bzhin du bsod nams ma yin pa'i las sogs par bstan pa yin no zhes bya ba ni bsdus pa'i don to/ /gnas skabs zhes bya ba ni gnas kyi nyes dmigs zhes bya ba'i don te/ 'dir sdug bsngal bas gnas pa ni gnas skabs yin te/ de yang sdug bsngal ba'i bdag nyid kyi nyes dmigs tshigs bcad 'og mas gsal bar byed par 'gyur ro/ /bzhi zhes bya ba ni bde blag tu khong du chud par bya ba'i phyir grangs smos so/ /mi gang yin zhes bya ba ni 'dod chags can gyi sems can no/ /bag med pa ni mchog tu bag med pa yin te/ gang gi phyir bag yod pas ni skyon 'di dag mi 'thob po/ /'byung zhes bya ba ni 'thob par 'gyur ba'o/ /mi gang gis 'di dag thob par 'gyur zhe na/ smras pa/ pha rol bud med sten byed pa'i/ /zhes bya ba ste/ mi gang zhig gis gzhan gyi bud med la spyod cing / gzhan gyi chung ma la 'khyud par byed pa'i rang bzhin can byi po byed pa zhes bya ba'i don to/ /de nyid la gnas skabs 'di dag bstan pa yin no/ /bsod nams mi thob ces bya ba la bsod nams med pa ni bsod nams ma yin pa yin te/ ngan par spyod pa'o/ / de thob pa ni rnyed pa ste re zhig 'di ni gnas skabs dang po'o/ /bde bar mi nyal dang zhes bya ba smos pa la/ bag med par nyal po byed pa ni 'jol nyog gi bde ba'o/ /de la nyal ba ni rjes su myong ba ste/ rgyu la 'bras bu btags pa yin pas sman pa bsten pa'i bde ba lta bu'o/ /bde bar nyal ba ma yin pa ni bde bar mi nyal ba ste/ bde blag tu 'dod pa nye bar longs spyod pa ma yin pa'o/ /'di ni gnas skabs gnyis pa yin no/ /gsum pa smad 'gyur zhes bya ba ni 'jig rten thams cad kyis smad pa'o/ /gsum tshang ba yin pas gsum pa'o/ /bsod nams mi 'thob pa ni dang po yin la/ bde bar mi nyal ba ni gnyis pa'o zhes ci'i phyir ma bstan zhe na/ smras pa/ gdul bya dbang po tha ma la phan gdags pa'i phyir 'di ltar bstan pa yin te/ de yang gcig bstan pas gnyis grangs ma smos pa yang 'dzin par nus te/ lhag pa ni ma yin no zhes 'dzin par nus pa yin te/ des na de ltar byas so/ /yang na bshad pa'i rnam grangs bstan pa'i phyir te/ grangs dang bcas pa ni dbang po zhan pa la bstan to/ /grangs med pa ni dbang po rno ba la bstan to/ /bzhi pa dmyal bar 'gyur zhes bya ba ni dmyal ba ni ngan song gsum mo/ /'byung zhes bya ba ni 'dir yang rjes su 'breng ngo / /rna ba bye ba ri'i rtogs pa brjod pa las shan pa dang / byi bo byed pa mthong ba yang 'dir dper brjod par bya'o/ /gzhan gyi bud med la chags pa'i gang zag dag de las skyo ba bskyed pa'i phyir 'di gsungs so/ /tshigs bcad snga mar bshad pa'i gzhan gyi bud med la brten pa'i nyes dmigs kyi skyon de nyid bstan pa'i phyir smras pa/ bsod nams ma thob ces bya ba la sogs pa smos te/ 'di dang pha rol gnyi ga la skyon dang bcas pa yin no zhes bstan pa ni 'di'i bsdus pa'i don to/ /bsod nams ma thob par gyur na sdig pa'i 'gro bar los kyang skye bar 'gyur te/ gang gi phyir bsod nams ma thob pa dang / de dang 'brel bas ni bdag la gnas skabs ngan pa'i 'gro ba yin no zhes bstan pa'i phyir dang gi sgra gnyis smos so/ /dper na lhas char phab pa dang lo tog kyang skye'o zhes bya ba lta bu'o/ /'di ni re zhig bsod nams ma yin pa 'thob pa'i skyon no/ /'jigs pa dang zhes bya ba ni rang gi rgyud la 'jigs pas g.yen spyo ba ste/ skyes bus 'jigs pa des bud med dang lhan cig bde ba chung ba yin te/ nye bar longs spyod pa'i bde ba chung ba yin no/ /'di ni bde bar mi nyal ba'i skyon bstan to/ /rgyal po zhes bya ba ni mi'i bdag po ste/ yul gyi rje'o/ / chad pa chen po zhes bya ba ni yan lag bcad pa la sogs pa'i chad pa chen po'o/ /gcod par 'gyur ba ni byed par 'gyur ba'o/ /dang gi sgra ni thams cad du yang bsdu ba'i don te/ 'di dang 'di'i skyon yin no zhes mtshon pa yin no/ /'di ni smad 'gyur zhes bya ba ni skyon bstan pa yin te/ 'jig rten thams cad kyis smad par 'gyur na de'i gtam rgyal pos thos nas chad pas gcod par 'gyur ro/ /lus zhig ces bya ba ni ris mthun pa chad pa'i 'og tu'o/ dmyal ba rnams su 'tshed ces bya ba ni yang sos la sogs pa'i dmyal ba'i mes nya chu tshan gyi nang du 'dus pa bzhin du 'tshed pa'o/ / 'di ni dmyal bar 'gro ba'i nyes dmigs kyi skyon bstan pa yin no/ /'dod pas log par g.yem pa la chags pa dag bzlog pa'i phyir 'di gsungs so/ /bag yod pa ni phun sum tshogs pa thams cad kyi gzhi yin pas de la gzud pa'i phyir gang zhig bdag bde zhes bya ba la sogs pa smos so/ / bcom ldan 'das sa ke ta'i a na'i nags na bzhugs te/ de nas bcom ldan 'das dge slong rab tu mang po dang thabs cig tu sa ke ta'i grong khyer du bsod snyoms kyi phyir gshegs so/ /de'i tshe gzhan zhig shing rta lam bzang po bor nas lam log pa dag tu song ste/ shing rta'i srog shing chag par gyur nas/ de nas lam bzang po bor ba de phyogs gcig tu 'dug ste/ sems khong du chud pa bcom ldan 'das kyis gzigs nas/ shing rta pa de la rgya cher tshigs su bcad pa gsum po 'di gsungs so/ /de la dang po re zhig bshad par bya ste/ gang zhig bdag bde zhes bya ba ni brten pas phan pa nyid du rtogs pas nan tan du byas la gzhan thams cad spangs nas der bdag med par ni mi bya ste/ shing rta ba de bzhin du sdug bsngal bsten par 'gyur ro zhes bya ba ni gang bdag la phan 'dogs par 'dod pas brtag par bya zhing shes par bya ste/ gang dang gang phan 'dogs par byed pa ste/ 'di dang gzhan dang mya ngan las 'das pa la bdag nyid kyi phan 'dogs pa la lta zhing de dang de nyid dang por bag yod par bya ba la dmigs par byas la mkhas pas de la bag med pas 'jug par ni mi bya ste/ nor gyi ched dang dge ba byas pa la le lo mi bya'o/ /bdag gi phan pa grub na ni gzhan la phan pa yang de la rag las shing des 'grub pa yin pas gzhan la phan pa ni ma bshad do/ /'dir dpe ni mi mthun pa'i chos kyi dpe bstan pa yin te/ shing rta ba bzhin zhes bya ba smos te/ shing rtas nyo tshong byed pa ni shing rta ste tshong pa'o/ /ji ltar 'di bag med pas mig 'bru mar gyis bskus te/ lam bzang po bor nas lam log par song ba las srog shing chag par gyur to sems khong du chud pa de bzhin du'o/ /shing rta ba yang ji lta bu zhe na/ smras pa/ byis pa zhes bya ba smos te blun po'o/ /rmongs pa med par ni bya ba rnams la brtson 'grus zhan par mi 'gyur ro/ /bstan pa zhes bya ba ni sgyid zhan pa med pa ste/ gang bdud dang g.yul 'gyed par 'dod pa yon tan dang / skyon gyi bye brag shes pa dang brtan pa'i phyir ro/ /brtson 'grus zhan mi bya zhes bya ba smos te/ mi bya ba zhes bya ba ni sgyid zhan pa dang 'bad pa chung bar mi bya'o zhes bya ba'i don to/ /yun ring du 'dug pa dang bag med par gnas pa bag yod pa la gzud pa'i phyir gsungs so/ /dpe de nyid tshigs su bcad pa gnyis kyis gsal bar bstan pa'i phyir smras pa/ dper na byis pa'i shing rta dag /ces bya ba la sogs pa smos te/ de la 'dir/ de bzhin chos ni spangs nas kyang / /zhes bya ba tshigs bcad kyi phyed dang pos ni bag med pa'i ngo bo nyid bstan to/ /byis pa zhes bya ba 'dis ni bag med pa'i gzhi bstan te/ rmongs pa ni bag med pa'i rgyu yin pa'i phyir ro/ /lhag mas ni bag med pa'i nyes dmigs bstan to/ /tshigs bcad snga mas ni mthun pa'i chos kyi dpe bstan to zhes bya ba ni 'dir bsdus pa'i don to/ /dper na zhes bya ba ni ji ltar ro/ /byis pa zhes bya ba ni shes rab nyam chung ba'o/ /bzang po zhes bya ba ni skye bo mang po rgyus shing rdo dang tsher ma la sogs pa'i skyon dang bral ba'o/ /bor nas zhes bya ba ni spangs nas so/ /lam chen zhes bya ba ni lam yangs pa ste/ rgyal po'i lam srang zhes bya ba'i don to/ /lam ngan dag tu 'gro byed pa/ /zhes bya ba ni rdo dang tsher ma dang rdul la sogs pa'i skyon dang ldan pa'i lam la brten cing gnas pa'o/ /mig chag ces bya ba mig 'di la chag pa yod pa ni mig chag ste/ shing rta'i 'khor lo chag ces bya ba'i don to/ /khong du chud pa zhes bya ba ni khong du chud cing mya ngan byed pa'o/ /ji lta bur khong du chud pa yin zhe na/ smras pa/ sems khong du chud pa zhes bya ba yin te/ yid mi bde ba 'di la yod pa de ni sems khong du chud pa ste/ yid mi bde ba'i mes gdungs pa zhes bya ba'i don to/ /'di skad du bstan pa yin te/ rmongs pas gang gi shing rta dang bral bas skyon thams cad 'byung ba ste/ rgyal po'i lam srang bor nas shin tu ngan pa'i lam bsten pas gang las gnod pa 'di lta bu 'byung zhing shing rta mig chag par gyur pa de'i gso ba mi shes pa yin te/ des rgyud gdung bar byed cing de sems pa yin pa ltar/ de bzhin spangs nas kyang zhes bya ba smos te/ de ltar bor ba'o/ /gang spangs pa yin zhe na/ chos zhes bya ba smos te/ legs par spyod pa dang bde 'gro dang thar pa'i thabs zhes bya ba'i don to/ /chos min rjes su 'jug byed pa/ /zhes bya ba ni ngan par spyod pa yang 'di lta bu yin te/ gang du ltung ba'i rgyu la nan tan gyis byed pa'o/ /de gang yin zhe na/ smras pa/ byis pa ste blun pa'o/ /'chi bdag dbang 'gro zhing zhes bya ba ni 'chi ba'i rjes su 'gro zhing 'chi bdag la rag las pa'o/ /dper na byis pa'i shing rta lta bu ni bag med pa'i chos la gnas pa'i gang zag yin no/ /ji ltar lam chen po bzang po lta bu ni bde 'gror 'jug cing 'brel ba'i chos yin no/ /ji ltar lam ngan par 'gro ba lta bu ni chos ma yin pa'o/ / ji ltar shing rta lta bu ni de dang des skyes pa'i bdag gi dngos po'o/ /ji ltar lam chen po bzang po bor nas lam ngan pa dag tu 'gro bar byed pa'i shing rta lta bu ni 'di la nang gi chos spangs nas chos ma yin pa la 'jug pa'i gang zag go/ /ji ltar de mig chag cing sems yongs su gdung ba ste/ da ji ltar bya zhes sems khong du chud cing yid la gcags te/ de gso ba mi shes pa de bzhin du bag med pa la gnas pa'i gang zag 'chi bdag gi dbang du 'gro ba na yang des spang bar mi nus shing yid la gcags par gyur nas bcom pa 'thob pa ste/ rnam par nyams par 'gyur zhing mngon par 'dod pa'i 'bras bu ma thob pa'i phyir dang / mtha' med par ltung ba'i phyir ro/ /ji lta bur bcom pa yin zhe na/ smras pa/ mig chag bzhin du zhes bya ba smos te/ mdor bsdus pa la dga' ba'i sems can rjes su gzung ba'i phyir yang rgya cher ma bstan te/ dpe ni mdor bsdus pa yin no/ /yang na dpe des 'dul ba dag la rjes su gzung ba'i phyir ro/ /yang na dpe 'di ni snga ma'i khyad par yin pa'i phyir ro/ /'di ji lta bur 'chi bdag gi dbang du 'gro zhing bcom pa yin zhe na/ mig chag ces bya ba smos te/ chag cing 'gag pa'i mig dang dbang po gang yin pa ste/ mig la sogs pa'i dbang po nyams pa zhes bya ba'i don te/ 'chi ba'i dus su rim gyis mig la sogs pa'i dbang po 'gag pa yin no/ /de bzhin du zhes bya ba ni de nyid kyi don te bcom pa nyid do/ /yang na bzhin zhes bya ba'i sgra ni cig car 'chi ba nyid du ston pa'i phyir te/ der yang ngan song du ltung bas bcom pa nyid do/ / gnod pa thams cad kyi rgyu bag med pa spang ba la gzung ba'i phyir 'di gsungs so/ /bag med pa'i 'bras bu ni zag pa 'phel ba dang thar pa shin tu thag ring ba yin pas de bstan pa'i phyir/ gang zhig bya ba rnams spangs nas/ /zhes bya ba la sogs pa smos so/ /rgyal po'i khab na lha sbyin gyis 'od srungs stobs bcu pa las bsgrubs te/ de'i rdzu 'phrul gyi lam gyis brtul zhing rdzu 'phrul gyis gzhon nu ma skyes dgra rnam pa sna tshogs kyis dga' bar byas nas/ de'i dpung gis bya ba ma yin pa rnam pa du ma byas te/ 'di lta ste dge 'dun gyi dben pa dang / bcom ldan 'das bgrongs pa'i phyir sgyogs 'phangs pa dang / glang po che smyon pa nor skyong zhes bya ba btang ba la sogs pa byas te de'i dbang du mdzad nas 'di gsungs so/ /'dir bsdus pa'i don yang nyams pa rnam pa gnyis te/ kun 'byung gi bden pa 'phel zhing 'gog pa'i bden pa dang ring du gyur pa dang / de'i rgyu bya ba ma yin pa byed pa yongs su bstan pa yin no/ /gang zhig bya ba zhes bya ba ni bsgrub pa'i las te/ dran pa nye bar gzhag pa bzhi bsgom pa la sogs pa'o/ /yang na lus su gtogs pa dran pa ste ji skad du gsungs pa/ chos gcig bsgom par bya ste/ 'di lta ste lus su gtogs pa dran pa'o zhes pa'o/ /rnams spangs zhes bya ba ni bstsal ba ste des nges par bya ba'o/ /mi bya ba dag byed pa dang / /zhes smos te/ dge 'dun gyi dbyen la sogs pa'i gleng gzhi dang sbyar bar bya'o/ /yang na sred pa rnam pa bzhi bskyed pa yin te/ ji skad du gsungs pa/ chos gos kyi phyir sred pa bskyed cing rab tu gnas pa dang / ji srid du zas dang gnas mal dang 'khor ba'i 'byor ba'i ched du'o/ /kye ma zhes bya ba ni thugs brtse ba yin te/ rjes su mi mthun pa'i tshul gyis spyod cing bag med pa de la thub pa'i dbang po rnams thugs brtse bar mdzad do/ /gang yang de ltar byed pa de'i nyes dmigs bstan pa'i phyir/ rlom byed pa zhes bya ba smos te/ mtho ba dang bsnyems shing log par spyod pa ste/ gang yang mi bsten zhing nga rgyal che la spyod pa log pa de thams cad ni bya ba ma yin pa bsten par 'gyur te/ 'dis ni bya ba ma yin pa byed pa'i rgyu bstan to/ /bag med pa zhes bya ba ni bya ba la nan tan med cing mngon par mi brtson pa ste/ 'dis ni bya ba mi byed pa'i rgyu bstan te/ gang gi phyir bag med pas ni bya ba spong bar 'gyur ro/ /de dag rnams kyi zhes bya ba ni de ltar gyur ba'i rgyud la ni zag pa 'phel bar 'gyur ba ste/ zag pa ni ma skyes pa skye ba dang skyes zin pa'i phyir zhing rgyas par 'gyur ba'o/ /zag pa ni khams gsum gyi nyon mongs pa dang nye ba'i nyon mongs pa'o/ /zag pa 'phel ba'i skyon smras pa/ /'phel gyur pa zhes bya ba ni/ gang de ltar zag pa 'phel ba skye ba ni zag pa med pa rgyang ring ba na gnas pa yin te/ mya ngan las 'das pa thag ring du gyur pa'o/ /'dir rgyang ma zhes bya ba'i sgra ni shin tu thag ring ba'i dngos po'i tshig go/ /sdug bsngal gyi rgyu zag pa yod par gyur na ni sdug bsngal kho na nye bar gnas par 'gyur te/ de zhi bar ni mi 'gyur ro/ /de las ldog pas dkar po'i phyogs smras pa/ gang zhig ces bya ba la sogs pa smos so/ /shA ri'i bu dang maud gal gyi bu gnyis kyis dge 'dun phye ba'i nyi ma de nyid la de'i bsdums byas te/ de'i dbang du mdzad nas 'di gsungs so/ /'dir bsdus pa'i don ni dran pa dang shes bzhin mi nyams pa'i thabs bstan pa dang / lhag mas de'i phan yon bstan pa'o/ /gang zhig ces bya ba ni gang dag bdag nyid chen po dag go/ /legs par brtsams pa zhes bya ba ni phyin ci ma log pa dang gus pas bsgom pa'o/ /rtag tu zhes bya ba ni rgyun du'o/ /lus gtogs dran pa zhes bya ba ni lus kyi rnam pa yin pas lus gtogs te lus la dmigs pa'o/ /dran pa ni shes rab de'i tshogs te dran pa shas cher 'jug pa'i phyir ro/ /dran pa de nye bar gnas par byas pa 'dis ni dran pa nye bar gzhag pa bzhi bstan te/ de'i phyir bcom ldan 'das kyis gsungs pa dge slong ji ltar yang rna blags te nyan pa dang gus par byed pa dang / zhen par byed pa dang / sems rtse gcig tu byed pa dang / sems thams cad kyis bsams pa lus su gtogs pa'i dran pa bsgom pa yin te/ dge slong dag 'di la nang gi lus la lus kyi rjes su lta zhing gnas pa nas ji srid du chos kyi bar du'o/ /ji ltar yang tshor ba la sogs pa lus nyid du gzhag ce na/ lus ni tshogs te ming gi tshogs yongs su gzung ba'i phyir ro/ /de yang gsungs pa/ tshor ba'i tshogs drug dang rnam par shes pa'i tshogs drug dang / sems pa'i tshogs drug go zhes bya ba yin te/ de yang tshor ba dang sems dang chos kyi lus yin pa'i phyir ro/ /lus su gtogs pa'i dran pa bsgom pa'i phan yon bstan pa'i phyir smras pa/ bya ba ma yin zhes bya ba smos te las ma yin pa'o/ /lus su gtogs pa'i dran pa bsgom pa de ni mi byed cing mi spyod par 'gyur ro/ / bya ba ni las dang bsgrub pa ste/ de la yang rgyun du byed par 'gyur te rtag tu byed pa'i ngang tshul 'di la yod pa de ni de nyid de rgyun du lhag par spyod pa zhes bya ba'i don to/ /bya ba byas pa dang / byed pa byas pa 'di nyid kyi phan yon bstan pa'i phyir smras pa/ dran dang shes bzhin zhes bya ba smos te/ dran pa'i khyad par gyis ni sems rab tu gnas pa'o/ /shes bzhin dang ldan pa ni phyin ci ma log pa'i don blos rtogs pa'o/ /zad par 'gyur ba ni mi snang bar 'gyur ba ste/ ma skyes pa skye bar 'gyur ba dang / skyes pa zad par 'gyur ba'o/ /gang gi zag pa zad gyur pa/ /zhes bya ba 'dis ni gang gi nyon mongs pa dang nye ba'i nyon mongs pa rim gyis spong bar 'gyur ba yin te/ zag med thob ces bya ba la brjod par bya'o zhes bya ba ni tshig gi lhag ma ste/ mya ngan las 'das pa thob par gyur cig ces bya ba'i don to/ /lam gyi chos la bag med pa ma byas pa'i phan yon bstan pas bag yod pa la gzud pa'i phyir 'di gsungs so/ /yang dag par mi bsgrub pa la bag yod pa'i phan yon du mi brjod do zhes bstan pa'i phyir ro/ /ji tsam du zhes bya ba la sogs pa smos so/ /btsun pa chos 'dzin pa ni dge slong zhes brjod na/ btsun pa ji tsam gyis dge slong chos 'dzin par 'gyur zhes zhus pa na rgya cher tshigs su bcad pa 'di gsungs so/ /dge slong gi las ni gsum ste/ bsam gtan dang / klog pa dang / dge 'dun gyi las byed pa'o/ /de la 'dir bsam gtan gyi phan yon bstan pas gzhan las gnyis po ni rnam par gcad pa yin te/ thos pa mang ba dang dge 'dun gyi las byed pa ni/ yang dag par chos 'dzin pa ma yin no zhes bya ba ni bsdus pa'i don to/ /de dag ma yin zhes bya ba ni de tsam gyi khyad par gyis so/ /dam chos 'dzin pa ni chos 'dzin pa yin pas chos ston pa ste/ gang mngon par mtho ba dang nges par legs pa 'grub pa'i dam pa'i chos legs par spyod pa de dang / rjes su mthun par 'jug pa ni dam pa'i chos 'dzin pa zhes 'dod do/ /gang dang de gnyis rtag tu 'brel ba nyid du bstan pa'i phyir smras pa/ ji tsam ni khyad par gyis so/ /mang du smra byed pa zhes bya ba ni mdo mang po 'don cing ston pa ste/ lha sbyin dang ser skya dang nye dga' la sogs pa 'dir dper brjod par bya ste/ de dag kyang sde snod gsum dang bcas pa smra zhing spobs pa yod la chos 'dzin par 'dod do/ /de lta bas na yang dag par chos 'dzin pa gang yin zhe na/ chos dag mngon sum byas zhes bya ba smos te/ gang yang chos bsgrub pa'i tshul de ni tshogs kyi lam gyi 'bras bu'i tshul mya ngan las 'das pa mngon sum du byas pa ni reg pa'am goms par byas pa ste/ ji lta ba bzhin no/ /gang gis mngon sum du byas she na/ lus kyis zhes bya ba smos te/ rgyud la gnas par byas pa ste/ lam gyi ye shes kyis kun 'byung ba las thar pa ni phung po'am tshogs kyi rnam grangs yin pa'i phyir ro/ /ye shes kyi yang ming gi tshogs yongs su gzung bas de ltar rtogs pa'o/ /thos nyung yang zhes bya ba ni tshigs su bcad pa gcig gam phyed tsam thos pa yang ste/ ko le ta dang / lam phran bstan dang / spun bzhi la sogs pa yang 'dir dper brjod par bya'o/ /gang dag ces bya ba ni gang bstan pa'i chos 'dzin pa de ni chos 'dzin pa ma yin no/ /gang yang bstan pa tsam gyis lam dang thar pa rtogs pa dang / mngon sum du byas pa de ni don dam pa'i chos 'dzin pa yin no/ /'di la zhes bya ba ni bstan pa 'dir gang gi phyir lung phog pa nyung zad kyis kyang byang chub kyi lam thob pa yin te/ mu stegs pa thams cad kyi tshig mi gtsang ba dang 'dre ba lta bus ni ma yin no/ /de dag ni de nyid do/ /dam chos 'dzin pa yin zhes bya ba ni don dam pa'i chos 'dzin pa'i phyir ro/ /de gang yin zhe na/ smras pa/ gang dag chos la bag byed pa/ /zhes bya ba smos te/ dge ba'i chos bsgom pa'i tshul dang / de'i 'bras bu tha dad par mi 'gyur ro/ /gang yang dag par nan tan du 'bad pa'i chos de nyid ni bstan pa yin no/ /bag med pa rnam par bsgrub pa la bstan pa tsam gyis grol ba 'thob par 'gyur ro zhes 'dod pa bsgrub pa la gzud pa'i phyir 'di gsungs so/ /'o na sde snod gsum shes pa yang dam pa'i chos 'dzin pa nyid yin la/ mdo sde 'dzin pa la sogs pa yang chos 'dzin pa yin no zhes rgol ba'i lan bstan pa'i phyir dang / tshigs bcad snga mar dam bcas pa nyid bsgrub pa'i phyir/ gal te zhes bya ba la sogs pa smos so/ / rgyal po'i khab tu lha sbyin gyis dge slong ma ut+pa la'i mdog khu tshur gyis bsnun te bsad nas bya ba ma yin pa sna tshogs pa byed cing / dus gzhan zhig na 'khor mang po'i nang du 'dug nas rnam grangs du mas snyan par chos ston to/ /bcom ldan 'das kyis bya rgod phung po'i ri la dus ji tsam nyid na de nyid dang nye ba'i phyi 'bred kyi dus su ba lang bgrang zhing 'gro ba gzigs te/ de la 'di gsungs so/ /de'i tshe lam phran bstan shing zhig gi drung na 'dug cing bsgom pa de'i dbang du mdzad nas/ gal te rigs bcas nyung ngu zhes bya ba'i tshigs bcad gsungs so/ /gzhan dag ni grogs po gnyis shig yod de/ de las gcig ni klog pa la mngon par brtson no/ /gcig ni bsgom pa la mngon par brtson par byed pa zhig ste/ de gnyis kyi dbang du mdzad nas 'di gsungs so zhes zer ro/ /de las re zhig dbang po rnam par dgrol bar bya ste/ smras pa/ mang po yang zhes bya ba ni phal cher yang ngo / /gal te zhes bya ba ni ci ste'o/ /rigs bcas zhes bya ba ni rigs pa dang lung dang 'brel pa'o/ /yang na snga phyi mi 'gal ba'o/ /smras pa ni ston pa'o/ /de ltar mi byed pa ni tshig lhur byed cing tshig de'i bsgrub pas ni sbyor bar mi byed pa ste/ chos ma yin pa sgrub par byed kyi/ chos ni ma yin no zhes bya ba'i don to/ /thub pa'i dbang po'i gsung rab la ni sgrub pa snying po bya ba yin gyi/ tshig 'bru lhur blangs pa ma yin no/ /de ltar mi byed pa su zhig yin zhe na/ bag med mi zhes bya ba smos te/ gang de ltar bag med pa la gnas pa'i gang zag de nyid de ltar byed do/ / gang gi phyir zhes bya ba'i sgra ni rab tu bsgrub pa'i phyir ram/ yang na rgyu bstan pa'i phyir te/ gang gi phyir bag med pa de'i phyir de ltar mi byed pa ste gang de ltar mi byed pa bstan pa'o/ /de dag dge sbyong skal ba thob pa yin/ /zhes bya ba ni des 'phags pa'i lam gyis 'thob pa mi rnyed de/ 'dir dpe bstan pa/ dper na phyugs rdzi zhes bya ba ste/ phyugs skyong ba bzhin no/ /phyugs bgrangs pa ni phyugs kyi tshogs rtsis btab pa'o/ /gzhan gyi zhes bya ba ni pha rol gyi'o/ /dper na phyugs rdzis snga dro'i dus su phyugs bgrangs shing blangs nas yang phyi dro'i dus su bdag po la sbyin par byed de/ de ni de las gla rngan tsam zhig 'thob kyi/ skal ba cher mi 'thob cing de las snying po 'o ma dang zho dang zhun mar la sogs pa mi 'thob pa de bzhin du gang rigs pa dang bcas pas mang du smras kyang de dang rjes su mthun par sgrub pa ma byas na de ni tshig dang ldan pa yin no zhes bsngags pa nyi tshe tsam thob par zad kyi/ dge sbyong gi 'bras bu thob pa ni ma yin no/ /tshig 'bru tsam la brten pa rnams sgrub pa la gzud pa'i phyir 'di gsungs so/ /de ltar na gang gis dge sbyong gi skal ba 'thob ce na/ gal te rigs bcas nyung ngu zhes bya ba la sogs pa smos so/ /sngar bstan pa'i tshigs bcad kyi dkar po'i phyogs zhes bya ba ni 'di yin par shes par bya'o/ /nyung yang zhes bya ba ni cung zad kyang zhes bya ba ste/ yang gi sgra ni mang po lta ci smos zhes pa'i sgrub pa'i don to/ /gal te rigs bcas smra zhes bya ba ni tshigs bcad kyi don to/ /gang gi phyir chos kyi rjes su zhes bya la/ gang phyir zhes bya ba ni rgyu bstan pa'i don te/ gang gi phyir de bzhin gshegs pas bstan pa ni khyad par du gyur pa yin te/ des na 'di nyid kyis chos la spyad par bya'o zhes pa'i don to/ /bstan pa'i chos gang la yod pa ni chos kyi rjes su spyod pa ste/ bstan pa'i chos de dang rjes su mthun par bsgrub cing chos la nan tan du byed pa'i ngang tshul can no/ /sgrub pa'i chos la nan tan du byed pa de'i phan yon ni 'dod chags zhe sdang zhes bya ba smos te/ rjes su chags pa dang khong khro ba'i kun du sbyor ba'o/ /gti mug ni ma rig pa'i kun du sbyor ba zhes bya ba'i don to/ /spong byed pa zhes bya ba ni gnyen po bsgom pas de'i 'thob pa bcad pa'o/ /de dag ni de dag gnyis kyis te/ dge sbyong dang 'phags pa'i lam gyi skal ba 'thob par 'gyur ba ni rnyed par 'gyur ba'o/ /sgrub pa nyid kyis mya ngan las 'das pa yang dag par 'dzin du gzhug pa ste/ de bas na thabs 'dis rtogs pa nyid du bya ba'i phyir 'di gsungs so/ / bag med pa dang bag yod pas spang ba dang / blang ba'i skyon dang yon tan bshad de/ bag yod bsngags pa zhes bya ba la sogs pa smos so/ /yul ko sa lar byung ba'i rgyal po gsal rgyal sems la 'di lta bu'i rnam par rtog pa skyes te/ chos gcig brten cing bsgom pa dang mang du byas pas mthong ba'i chos la don yongs su rdzogs par 'gyur ba dang / phyi ma'i don yongs su rdzogs par 'gyur ba'am/ tshe 'di dang phyi ma'i don yongs su rdzogs par 'gyur ba yod dam snyam pa na/ ji tsam na bcom ldan 'das kyis bka' stsal pa/ rgyal po chen po yod de 'di ltar dge ba'i chos thams cad la bag yod pa'o zhes gsungs nas tshigs bcad gsum bka' stsal to/ /gzhan dag ni yul yangs pa can gyi khang pa brtsegs pa'i gnas lha'i dbang po brgya byin gyis 'di ltar zhus pa las brtsams pa yin no zhes zer ro/ /bag yod bsngags pa zhes bya ba ni ji skad bstan pa'i mtshan nyid kyis bag yod pa la rab tu bstod pa yin te/ dam pa de'i bye brag la mkhas pa'o/ /bag med pa la smos pa ni gshung ba'o/ /rtag tu zhes bya ba ni rgyu'i dus dang 'bras bu'i dus na'o/ /gang gi phyir bag yod pa yon tan gyis rtag tu bsngags pa dang / de'i mi mthun pa'i phyogs bag med pa la smod par byed pa de gang gis she na/ 'di ltar bag yod ces bya ba smos te/ de'i rgyus so/ /bdag dang mnyam pa'i mchod sbyin te gzhan la med pas mchod sbyin brgya pa yin pa'i phyir mchod sbyin brgya pa zhes bya'o/ /lha rnams zhes bya ba ni rgyal chen ris bzhi dang sum cu rtsa gsum mo/ /gtso bor gyur zhes bya ba ni dbang po 'thob pa'o/ /gal te rgyu 'dis ni bag yod pa'i bsngags pa brjod pa yin na/ de lta na bag med pa'i smad pa gang zhig gis byed pa yin zhe na/ smras pa/ 'dir bskang bar bya ste/ bag med pas ni dmyal ba mi bzad pa thob ces bya ba ni tshig gi lhag ma ste/ don mthar ma phyin pa'i gzhung dag la ni tshig gi lhag mas rjes su dpag pa ni rigs pa yin no/ /yang na rgyal pos chos gcig mchis sam zhes zhus pa dang / thub pas bag yod pas bstan pa nyid kyi mdor brjod pa bstan pa'o/ /de lta na ni bag med pa la smod pa zhes brjod pa mi rigs so zhe na/ bag yod pa'i sgrib pa nan gyis spang bar bya ba bsgrub pa'i phyir nyes pa med do/ /bde 'gro'i khyad par 'dod pas de la gzud pa'i phyir 'di gsungs so/ /bag yod pa ni thams cad du bsngags pa yin no zhes bstan pa'i bya ba byas rung zhes bya ba la sogs pa smos so/ /bstod pa smra ba yin pas bsngags pa brjod pa'o/ /gang la zhe na/ bya ba byas rung ma byas rung / /zhes bya ba smos te/ gang rnam par dag cing rjes su mthun pa'i lus dang ngag dang yid kyi las de ni bya ba byas pa'o/ /gang de las gzhan pa bde 'gro dang rjes su mthun pa yang de dang rjes su mthun par byas pa'o/ /mkhas pa ni mngon par rig pa ste/ de yang 'jig rten pa dang 'jig rten las 'das pa'o/ /de la 'jig rten las 'das pa ni sangs rgyas dang sangs rgyas kyi nyan thos rnams so/ /'jig rten pa ni 'jig rten na grags pa'i mkhas pa'o/ /de'i phyir rim pa bzhin du/ bya ba byas rung ma byas rung / /zhes bya ba la bag yod pa'i bsngags pa brjod pa yin no/ / gnyis po ni gnyi ga yin pas gnyi ga nyid do/ /ci'i phyir 'di la de ltar bsngags pa smra ba yin zhe na/ 'di ltar bag dang bcas pas don gnyis zhes bya ba smos te/ bag yod pa'i gang zag gi phan yon ni rnam pa gnyis so/ /len par byed ces bya ba ni rab tu brtan par len pa'o/ /gang yin zhe na/ mkhas pa yis ni zhes bya ba smos te/ bya ba dang bya ba ma yin pa rtogs pa'o/ /blun pa ni ma yin te/ des ni bdag dang gzhan la phan pa'i rnam pa gnyis mi shes pas so/ /ji ltar rjes su myong ba'i don yin zhe na/ tshe 'di'i zhes bya ba smos te/ bdag nyid kyi phung po'am mthong ba'i phung po nyid la rjes su myong ba ste zin pa'i phung po la zhes bya ba'i don to/ /don ni gang yin dang zhes bya ba la ni zhes bya ba'i sgra ni khyad par bsgrub pa'i don to/ /gang tshe 'di'i phan yon khyad par du gyur pa ni nor gyi 'byor pa la sogs pa'i mtshan nyid do/ /phyi ma'i don ni gang yin dang / /zhes bya ba ni 'jig rten pha rol gyi ste/ bde 'gror 'gro ba la sogs pa'i tshul lo/ /sngar bshad pa'i mkhas pa zhes bstan pa de'i ngo bo nyid smras pa/ rtogs pas ni zhes bya ba smos te/ don gyi de nyid rtogs pa'o/ /yang na 'phags pa'i bden pa bzhi rtogs pa'o/ /brtan pa ni brtson 'grus kyi sbyor ba khyad par du 'phags pa ste/ le los ni don ji lta ba bzhin du rtag par mi nus pa'i phyir te/ de bas na rtog pa dang brtson 'grus rnam pa gnyis kyis khyad par du blo rnam par gsal ba'i phyir mkhas pa'o zhes bya ba ni de nyid kyi don to/ /'di nyid kyis mkhas pa yin gyi/ gzhan gyis ni ma yin no zhes so/ /mkhas pa bsgrub par 'dod pa rnams la de kho na nyid brtag pa dang / brtson 'grus brtsams pa la gzud pa'i phyir 'di gsungs so/ /yang rnam pa gzhan gyis bag yod pa'i yon tan bstan pa'i phyir/ dge slong bag yod la dga' zhing / /zhes bya ba la sogs pa smos so/ /dge slong rab tu mang po rgyal byed kyi tshal dang nye ba zhig na nags stug po'i nang du yang dag par bstan pa la brtson 'grus brtsams shing bsam gtan bsgom pa byas pa khyad par gyi go 'phang thob bo/ /de nas bcom ldan 'das kyis de las gzhan pa'i dge slong yang khyad par de la gzud par dgongs nas/ rgyal byed kyi tshal nas mngon par byung zhing gang na dge slong de dag yod pa der gshegs so/ /de dag gis kyang bcom ldan 'das rgyang ring po nas de ltar gshegs pa mthong nas zhe sa dang bcas par bcom ldan 'das kyi sngon bsu ba byas so/ /ji tsam na de rnams dang thabs cig tu dgon pa'i phyogs rgyu zhing gshegs pa dang / phyogs de na yul ko sa la'i rgyal po gsal rgyal gyi pra be+e ka zhes bya ba glang po che 'dam du zhugs pa las skye bo'i tshogs chen pos phyung bar gyur to/ /de nas yang gshegs pa dang / rlung shugs dang ldan pas shing gi lo ma rnams lhags par byed pa gzigs so/ /de'i 'og tu me mched de nags chen po tshig pa gzigs so/ /de bzhin du phyogs nyams dga' ba zhig na/ pad ma dang bcas pa'i chu mig dang skyed mos tshal gzigs te/ gnas skabs de dag dang mthun pa'i tshigs su bcad pa drug gsungs so/ /de thos pas dge slong rab tu mang po dang / lha rab tu mang po yang khyad par thob par gyur to/ /bag yod pa la dga' ba yin pas bag yod dga' ba ste/ bag yod pa'i phan yon bstan pas de nyid la ro myang ba thob par gyur ces bya ba'i don to/ /de nyid gang yin zhe na/ dge slong zhes bya ba smos te/ bya ba ngan pa/ g.yeng ba bcom pa dang / rab tu byung zhing dben pa yin no/ /gang gi phyir dben pa la ni bag yod pa yod kyi/ 'du 'dzi dang 'brel pa byas pa la ni med do/ /bag med pa la 'jigs lta bas/ /zhes bya ba smos te/ gang la 'jigs pa mthong ba'i lta bas so/ /bag med pa'i nyes dmigs bstan pas/ bag med pa la 'jigs par lta zhing gnyen po dge ba'i chos bsgom pa la mngon par rtsom par bstan to/ /bag yod pa'i phan yon bstan pa'i phyir/ ngan 'gro las 'dren te zhes bya ba smos te/ ngan 'gror 'gro ba ni ngan par spyod pa'am 'bras bu las kun nas slong zhing 'dren pa yin no/ /bdag nyid ces bya ba ni bdag rang ngan song du ltung ba'am/ de la gzhol ba'o/ /gang bag med pa chung ngus kyang ngan par spyod cing des ngan 'gror 'gro bar 'gyur gyi/ bag med pa chen pos ni ma yin te/ sor mo'i phreng ba dang / dzen ta ka krid ces bya ba la sogs pa yang 'dir dper brjod par bya'o/ /'di ltar gang zhig ji lta bu zhe na/ 'dam rdzab las ni glang chen bzhin/ /zhes bya ba smos te/ skye bo'i tshogs chen po'i grogs la brten nas glang po che 'dam du bying ba las 'byin pa de bzhin du bag yod pa la brten nas bdag nyid shes pa'i dge slong gis ngan 'gro las grol bar byed pa yin te/ nges par 'byed pa'i cha dang mthun pa'i bzod pa thob pa'i phyir ro/ /ngan song gi 'jigs pa rnams la bag yod pa nyid la brten pa la gzud pa'i phyir 'di gsungs so/ /bag yod pa la brten pas ngan song gsum spong ba yin no zhes bstan nas mi dge ba'i chos kyang 'dis spong ba yin no zhes bstan pa'i phyir/ dge sbyong bag yod la dga' zhing / /zhes bya ba la sogs pa smos so/ /tshigs bcad phyed kyi don ni sngar bstan pa'i phyir da yang mi bshad do/ /spyugs par byed pa ni spong bar byed pa'o/ /ci zhig spong bar byed pa yin zhe na/ sdig pa'i chos rnams zhes bya ba smos te/ mi dge ba'i 'dus byas rnams te 'dod pa na spyod pa'i mthong ba dang bsgom pas spang bar bya ba zhes pa'i don te/ gang gi phyir de spang na ni mi dge ba thams cad spang ba'i phyir ro/ /'dir dpe bstan pa/ rlung gis ljon shing lo ma bzhin/ /zhes bya ba smos te/ bzhin zhes bya ba'i sgra ni nyid kyi don to/ /rlung ni rlung drag po'o/ /dper na rlung gi shugs drag pos lo ma smin pa la phyogs pa cung zad lhod pa dag sprugs shing lhung ba dang 'brul bar byas pa de bzhin du bag yod pa'i dge slong gis 'jig rten pa'i 'dod chags dang bral ba'i lam la sogs pa la goms par byas shing kun du spyod pa la lhod par byas te/ mi dge ba'i chos rnams spang bar bya'o/ /gzugs dang gzugs med pa la spyod pa'i phra rgyas rnams kyang 'dis spong ba yin no zhes bstan pa'i phyir/ dge slong bag yod la dga' zhing / /zhes bya ba la sogs pa smos so/ /'dis kun du sbyor ba yin pas na kun du sbyor ba ste/ mdo las kun du sbyor ba dgu bstan pa las 'dir spyi'i tshig tu yongs su gzung ngo / /phra sbom dag ces bya ba ni phra ba dang rags pa'o/ /'di ltar bsam gtan dang po'i sa pa'i kun du sbyor ba ni rags pa'o/ /bsam gtan gnyis pa'i sa pa'i kun du sbyor ba ni phra ba'o zhes bya ba la sogs pa yin no/ /'dis ni chung ngu dang 'bring dang chen po'i rnam pas spong zhing rab tu spong bar ston to/ /'dir dper brjod pa/ me yis bsregs pa bzhin du 'gro/ /zhes bya ba yin te/ dper na me ni chen po'am chung ngu yang rung bdag nyid thob nas shing la sogs pa sreg par byed do/ /de bzhin du zag pa med pa'i ye shes kyi mes kyang kun du sbyor ba rnams bsregs shing yang skye ba med par byed do/ /zag pa med pa'i lam bsgom pa la gzud pa'i phyir 'di gsungs so/ /bag yod pa'i stobs nyid kyis zad pa shes pa thob par 'gyur ro zhes ston pa'i phyir ro/ /dge slong bag yod ces bya ba la sogs pa smos so/ /nyams su myong bar 'gyur zhes bya ba ni rig par 'gyur ba'o/ /rim gyis zhes bya ba ni mthar gyis te/ 'di ltar thog mar ni lam chung ba skye bar 'gyur ro/ /de nas ni bar ma zhes bya ba la sogs pa'o/ /dang po yang nyon mongs pa rags pa spong bar 'gyur ro/ /de nas ni bar ma zhes bya ba la sogs pa lung las gsungs so/ /kun du sbyor ba kun zad pa/ /zhes bya ba ni kun du sbyor ba dgu spangs pa ste/ gang gi phyir zad pa shes pa'i ye shes 'thob pa'i dus su khams gsum gyi kun du sbyor ba rnams las gcig tu bral ba'i 'thob pa rnyed pa yin no/ /khams gsum gyi kun du sbyor ba spang ba'i phyir srid pas skyo ba rnams la gzud pa'i ched du 'di gsungs so/ /bag yod pa ma spangs pa las phung po lhag ma dang bcas pa dang lhag ma med pa'i mya ngan las 'das pa'i dbyings kyang thob par 'gyur ro zhes bstan pa'i phyir/ dge slong bag yod la dga' zhes bya ba la sogs pa smos so/ /so sor rtog pa zhes bya ba ni mngon par rtogs pa bsgrub par gyis shig pa'i don to/ /go 'phang zhes bya ba ni gnas so/ /ji lta bu zhe na/ zhi ba'i zhes bya ba smos te/ 'khor ba'i me 'bar ba lta bu thams cad nye bar zhi ba'o/ /'du byed nyer zhi zhes bya ba la 'dir 'du byed ni yang srid par 'gyur ba'i phung bo'o/ /nye bar zhi ba dang bsal ba 'di la thob pa de ni de nyid do/ /zhi ba'i zhes bya ba ni 'chi ba la sogs pa'i 'jigs pa med pas phung po'i lhag ma med pa'i mya ngan las 'das pa'i dbyings thob pa yin no/ /zhi bar byed pa yin pas zhi ba ste/ zhi ba la sbyor bar byed ces bya ba'i don to/ /yang srid pa'i sdug bsngal mi 'dod pa rnams la zad pa shes pa thob pa la sbyar ba'i phyir 'di gsungs so/ /mi skye ba shes pa thob pas mthong ba'i chos las yongs su nyams pa med par ston te/ dge slong bag yod la dga' zhes bya ba la sogs pa smos so/ /mi srid do zhes bya ba ni mi rigs pa'o/ /gang mi rigs she na/ yongs su nyams par 'gyur zhes bya ba smos te/ yongs su nyams pa ni dgra bcom pa'i 'bras bu las thag ring du gyur pa'o/ /gang la skye ba shes pa'i ye shes skyes pa de la ni lam dang de'i 'bras bu yongs su nyams pa med par ston pa yin no/ /phyi rol pa'i 'dod chags dang bral ba dag las khyad par du gyur pa yin te/ gang gi phyir de dag ni yongs su nyams pa'i chos can te/ mya ngan las 'das pa las ring ba yin zhing gong ma dag tu skyes nas der mngon par rtogs pa med pa yin te/ 'di la rnam pa 'di ltar der mthar thug pa yin no zhes lung las 'byung ba yin pa'i phyir ro/ /chos 'di'i dngos po la yang dag par zhugs na ni yongs su nyams par yang mi 'gyur te/ mya ngan las 'das pa dang nye bar 'gyur ro/ /mya ngan 'das dang zhes bya ba ni yang 'khor bar mi skye ba yin no/ /phung po lhag ma dang bcas pa dang lhag ma med pa'i mya ngan las 'das pa gnyis ni phan tshun nye bar gyur pa'i phyir sa bon dang myu gu bzhin no/ /nye ba'i phyir zhes bya ba ni mi ring ba dang drung na 'dug pa yin te lhag ma dang bcas pa'i mya ngan las 'das pa'i dbyings na gnas pa yang phung po lhag ma med pa'i mya ngan las 'das pa'i dbyings kyi tshul du gnas pa yin no zhes rig par bya ste/ de la gzhol ba'i phyir dge slong dgra bcom pa ni mya ngan las 'das pa la gzhol ba dang / mya ngan las 'das pa la 'bab pa zhes bya ba la sogs pa mdo las gsungs te/ de dag ni gcig tu yongs su mya ngan las 'das pa yin no/ /'khor bas skyo ba rnams 'di la gzud pa'i phyir 'di gsungs so/ /tshigs bcad snga ma dag gis 'jig rten gnyi ga'i nges par legs pa dang phan pa brtson 'grus dang bag yod pas byed pa yin no zhes yang dag par bstan nas/ da ni de nyid yang dag par 'dzin du gzhug pa'i phyir/ brtson 'grus ldan zhing zhes bya ba la sogs pa smos so/ /lha zhig bcom ldan 'das kyi spyan sngar 'ongs te zhus pa/ gang gis 'jig rten 'di dang pha rol du mchog tu bde ba 'thob pa lags/ blo gros chen po bcom ldan 'das kyis bdag la bshad du gsol/ bdag gis de la nan tan du bgyi'o zhes gsol pa dang / bcom ldan 'das kyis bka' rtsal pa/ brtson 'grus ldan zhing zhes bya ba la sogs pa'i tshigs su bcad pa 'di gsungs so/ / brtson 'grus ni ldang ba dang dge ba bya ba dag la kun du spro zhing kun du rtsom pa byed pa'i phyir ro/ /bag yod pas ni bya ba brtsams pa dag la bar du gcod par mi 'gyur te/ bag med par gyur na ni res 'ga' brtson 'grus rtsom par mi 'gyur ro/ /brtson 'grus dang bag yod pa la gnas nas ci zhig byed pa yin zhe na/ smras pa/ chos spyod ces bya ba la sogs pa yin te rigs pa spyod pa'o/ /chos kyi ngo bo nyid smras pa/ legs par spyod ces bya ba la sogs pa ste lus la sogs pa'i dge ba'i chos te/ de gang zhe na/ srog gcod pa las slar ldog pa la sogs pa mdo las gsungs pa'o/ /'di'i phan yon ni/ chos spyod pas ni zhes bya ba smos te/ chos la legs par spyod cing byed pa'i ngang tshul gang la yod pa de ni bde ba 'thob pa ste/ bde ba la gnas pa'o/ /de ni 'khor ba'i gnas su gdung ba med par gnas pa'i don te/ gang legs par spyod pa la ni rnam par smin pa yid du mi 'ong ba 'thob pa ni gnas ma yin zhing go skabs med do zhes bya ba la sogs pa mdo las gsungs so/ /'jig rten 'di ni skye ba 'di'o/ /pha rol ni skye ba gzhan no/ /thams cad du bde ba 'dod pa rnams de'i thabs ma shes pa dang phyin ci log tu 'jug pa rnams la phyin ci ma log par bstan pa'i phyir 'di gsungs so/ /bstan ma thag pa de ni bar chad dang bcas pa yin te/ de'i khyad par bstan pa'i phyir/ /rtsol ba dang ni brtson 'grus skyed/ /ces bya ba la sogs pa smos so/ /mnyan yod du dge slong gsar bu ba mang po bcom ldan 'das kyi spyan sngar phyin te 'di skad ces gsol to/ / btsun pa bdag cag gis gang gis ji ltar bslab par bya ba dang / gang bslab pa'i bar chad du 'gyur zhing bdag cag gis gang spangs te/ bde bar gnas pas gnas par bgyi zhes gsol pa dang / de'i dbang du mdzad de tshigs su bcad pa gnyis gsungs so/ /brtson 'grus skyed ces bya ba ni brtson 'grus bslang shing brtsams par gyis shig pa ste/ yon tan thams cad kyi thabs su gyur pa'i phyir dang / phongs pa thams cad kyi rgya mtsho las sgrol ba'i bkra shis kyi theg pa'i snod du gyur pa'i phyir ro/ /'dis ni ngan song las slong ba'i thabs mthong ba'i lam la gzud pa'o/ /rtsol ba dang ni zhes bya ba ni 'bad pa'i khyad par brtsams pas 'dod pa'i khams las 'das par sbyor ba yin no/ /bslab pa la brten dang zhes bya ba ni 'bad pa mi lhod pa ste mnyam par gzhag pa'i sa pa rnams kyis ni spang dka' ba yin te/ de spong bar byed pa'i lam rnyed par dka' ba'i phyir brtan zhes bya ba bstan to/ /ci'i phyir zhi bar bya zhe na/ mya ngan las 'das pa thob par bya ba'i phyir te/ khams gsum gyi nyon mongs pa zad pa'i phyir zhes bya ba'i don to/ /'di ltar bslab pa rnam gsum la bslabs pas ni bgegs thams cad zad pa'i phyir ro/ /'dis ni khams gong ma'i spang ba la gzud pa'i phyir ro/ / de ltar bslab pa gsum la 'jug pas bgegs mi 'byung bar bya ba'i phyir/ mi dran pa dang zhes bya ba la sogs pa smos te/ mi dran pa ni dran pa nyams pa'o/ /dang gi sgras ni log pa'i dran pa yang gzung ngo / /bag med dang zhes bya ba ni dge ba'i chos rnams la mi bsgom pa'o/ /dang gi sgras ni nyon mongs pa'i chos bsgom pa yang gzung ngo / /brtson 'grus chung dang zhes bya ba ni le lo ste brtson 'grus zhan pa'o/ /dang gi sgras ni thabs ma yin pa la 'jug cing spro ba'o/ /kun sdom med ces bya ba ni yang dag par mi sdom pa'o/ /yang na lus dang ngag dang dbang po mi 'dul ba'o/ /gnyid ni gnyid nyid do/ /snyom pa pa ni le lo'i rnam pa ste gang gi dbang gis lus nyam chung bar byed cing dge ba'i chos bya ba dang byed pa dag la des gnyid 'byung ba dang / rjes su mthun pa'i sems las byung ba'i chos de ni snyom pa'o/ /g.yeng ba zhes bya ba ni rnal 'byor med pa ste/ sems dang sems las byung ba gcig tu dmigs par sbyor ba las 'phro ba ting nge 'dzin la kun du sbyor ba'i mi mthun pa'i phyogs ni g.yeng ba'o/ /'di dag ces bya ba ni sngar bshad pa'i mi dran pa la sogs pa'o/ /bslab pa'i bar chad pas zhes bya ba ni tshul khrims dang ldan pa'i bslab pa'i bgegs te/ bar chad dang bgegs de na yod pa ni bgegs byed pa dang bar du gcod pa zhes bya ba'i don to/ /der zhes bya ba ni de'i phyir te gang gi phyir 'di dag bar chad yin pas de bas na'o/ /khyod kyis so sor rtogs la zhes bya ba ni 'og nas 'chad do/ /yan lag ces bya ba ni skyes bu sdug pa la bod pa yin te/ kye skal ldan zhes bya ba'i don to/ /so sor rtogs zhes bya ba ni so sor rig cing nges par bya ba'o/ /'di dag ni lam gyi bar du gcod pa yin te/ de bas na khyod kyis so sor rtogs shig ces bya ba 'og nas smos so/ /dran pa med pa'i nyes dmigs su 'gro ba shes pa byas nas/ bde bar yongs su gzung bar bya ste skyon de med par bstan pa'i phyir/ dran pa chud ni ma gsan cig /ces bya ba smos te/ dran pa ni lus la sogs pa'i rnam pa de'i ngo bo la dmigs pa ste/ dran pa ma nyams pa de'o/ /khyod kyi zhes bya ba ni khyod nyid kyi rgyud la'o/ /chud ni ma gsan cig ces bya ba ni nyams par ma byed cig pa ste/ de nyams na ni lam gyi tshogs thams cad chud za bar 'gyur ba dang / bar du gcod pa thams cad kyang mngon du 'byung bar 'gyur ro/ /des na bag yod pas ni bgegs thams cad sel bar 'gyur ba'i ngang tshul can yin pas/ dran pa nyid ni 'bad pas srog bzhin du bsrung bar bya'o zhes gzud pa'i phyir 'di gsungs so/ /bar du gcod pa 'di dag gis ni 'khrul bar byed pa yin pas/ gnyen po la sbyar ba'i phyir/ dge slong tshul khrims bzang ba dang / /zhes bya ba la sogs pa smos so/ /yul u dza ya na na tshong dpon gyi bu bzhi gnas te/ de nas gcig ni bag med pa la gnas so/ /gnyis pa ni gzhan gyi chung ma la 'gro zhing ngan par spyod do/ /gsum pa ni log pa'i rnam par rtog pa la gnas so/ /bzhi pa ni dran pa brjed ngas par gyur to/ /bcom ldan 'das der gshegs nas de'i dbang du mdzad de dge slong la bstan pa'i tshul gyis 'di gsungs so/ / bag yod pa zhes bya ba la/ de la khyod kyis dga' ba thob par gyis shig pa ste/ dge ba'i chos thams cad kyi rtsa ba ni bag yod pa yin no zhes bya ba la sogs pa mdo las gsungs so/ /'dis ni bag med pa rnams bag yod pa la sbyor ba'o/ /tshul khrims bzang ba dang zhes bya ba ni mdzes pa'i tshul khrims kyis spyod pa gang yin pa de ni tshul khrims bzang po ste/ gzugs bzang po bzhin no/ /yang na tshul khrims yongs su rdzogs pa ste/ bum pa gang ba bzhin no/ /yang na tshul khrims legs par byas pa ste/ bza' ba dang btung ba legs par spyad pa bzhin no/ /'dis ni tshul khrims phun sum tshogs pa yang dag par 'dzin du bcug pa yin te/ yon tan thams cad de la gnas pa'i phyir ji skad du gsungs pa/ dper na lus can dag dang nags tshal dang / /ljon shing rnams kyang sa la gnas pa ltar/ /de bzhin dge ba'i chos rnams 'di dag gi /rab tu 'byung zhing gnas pa'ang tshul khrims yin/ /zhes pa'o/ /dge slong zhes bya ba ni bod pa ste/ gang tshul khrims dang ldan pa nyid dge slong yin pa'i phyir dang / tshul khrims yod pa dge slong yin/ /zhes pa'i tshig gis so/ /kun rtog legs par mnyam gzhag ste/ /zhes bya ba ni ting nge 'dzin la legs par 'jug pa ste/ kun du rtog pa mnyam par gzhag pa gang yin pa de nyid ni legs par mnyam par gzhag pa'i kun du rtog pa ste/ nges par 'byung ba la sogs par kun du rtog pa zhes bya ba'i don to/ /'dis ni tshul khrims la sogs pa dag pa'i thabs bstan to/ /ji skad du gsungs pa/ tshul khrims rnam par dag pa brjod pa gang zhig yin zhe na/ mi dge ba'i rnam par rtog pa rnams kyis ma bcom pa yin no zhes rgya cher bshad do/ /rang gi sems ni rjes su srungs/ /zhes bya ba ni dran pa'i stobs kyi bdag nyid kyis sems rjes su skyongs shig pa ste/ dran pas sgo bsrungs pa dang ldan pa'i 'phags pa'i nyan thos ni mi dge ba'i chos thams cad spong zhing dge ba'i chos thams cad bsgom pa yin no zhes mdo las gsungs so/ /sgo bsrungs pa yin pas sgo bsrungs so/ /'dis ni bag yod pa la sogs pa la rab tu gnas pas 'phags pa'i lam mngon sum du bya ba'i thabs bstan te/ gang gi phyir dran pa nyams par gyur pas ni dri ma med pa'i lam thob par mi 'gyur ro/ /'di sten cing thos pas ni 'khor de dag thams cad kyis rgyun du zhugs pa'i 'bras bu thob par gyur to/ /dge slong lnga brgya tsam yang len pa med par zag pa las sems rnam par grol lo/ /'dir snga mas ni rgyu bstan to/ /phyi mas ni 'bras bu bstan par shes par bya'o/ /gang gi phyir bag yod pas ni tshul khrims bzang po yin la/ des kyang yang dag pa'i rtog pa yin no/ /de las ni yang dag pa'i dran pa yin no/ /bag med pa la sogs pa de'i skyon la brten pa dag de dag gi gnyen po la sbyar ba'i phyir 'di gsungs so/ /bag yod pa la brten cing mngon par 'dod pa'i yon tan la sogs pa'i tshul bstan pa'i phyir/ brtsam par bya zhes bya ba la sogs pa smos so/ /sin du'i yul ro ru ka zhes bya ba'i grong khyer chen po'i rgyal po u tra ya nas shar phyogs kyi rgyal po gzugs can snying po la ma mthong ba'i grogs po yin no zhes khas blangs te/ rin po che'i rang bzhin gyi khrab rin thang med pa zhig bskur ro/ /rgyal po gzugs can snying pos de dang rjes su mthun pa'i skyes ma rnyed de bcom ldan 'das la thams cad du bsten par bya'o zhes bsams nas phyin te zhu ba zhus so/ /ji tsam na ras la sangs rgyas kyi sku gzugs bris pa dang / dge ba bcu'i las kyi lam dang rten cing 'brel par 'byung ba las brtsams pa'i tshigs su bcad pa gnyis bris so zhes bya ba la sogs pa 'dir dper brjod cing gleng gzhir sbyar bar bya'o/ /brtsam par bya zhes bya ba ni rtsom pa'i dang por bya ba yin pas brtsam par bya ba ste/ skyabs su 'gro zhing yang dag par len pa la sogs pa la yang dag par gzud pa yin te/ bstan pa 'di ni rgya mtsho chen po 'dra bas de la 'jug pa dang 'dra bar rtsom pa'o/ /'byung bar bya zhes pa ni rab tu 'byung ba ste de'i phyir gang dag lhod cing sgrib pas khyim gyi gnas yongs su gtong bar mi nus pa dag snang na de nyid la gzud pa yin te/ skyabs su song ba'i 'og tu rab tu byung ba yongs su gzung ba ni rjes su mthun pa'i phyir ro/ /de med par ni so sor thar pa'i sdom pa med do/ /yang na skyabs su 'gro ba nyid kyis kyang zhes bya ba'i tshig gis so/ /'jug par bya zhes bya ba ni 'bad par bya zhes bya ba yin te/ ji skad du gsungs pa/ tshul khrims la gnas shing tshul khrims la brten pas chos gnyis bsgom par bya ste/ zhi gnas dang lhag mthong ngo zhes so/ /'chi bdag sde ni gzhom par bya/ /zhes bya ba ni 'phags pa'i lam bsgom pa'i 'bras bu la sbyor ba yin no/ /'chi bdag gi sde ni khams gsum gyis mthong ba dang bsgoms pas spang bar bya ba'i nyon mongs pa dang nye ba'i nyon mongs pa ste 'chi bdag dang rjes su mthun par 'jug pa'i phyir ro/ /de gzhom pa ni spangs pa ste de'i 'thob pa gcad cing rgyud la gnas pa las bsal ba'o/ /'dir mthun pa'i chos kyi dpe bstan pa/ 'dam bu'i khyim na glang chen bzhin/ /zhes bya ba yin te/ 'dam bu dag gi khyim ni 'dam bu'i khyim ste 'dam bu'i khang pa'o/ /dper na glang po che smyon pa 'dam bu'i khyim la btang na de ma thag 'joms shing phye mar 'thag par byed do/ /de bzhin du khyed kyis 'chi bdag gi sde gnyen po bsgoms pa'i stobs kyis rgyud la bsal bar gyis shig pa'o/ /bcom ldan 'das ni sgrub pa 'bras bu med par de ltar mi sbyor zhing mi ston pa ste/ de bas na lam bsgom pas nyon mongs pa bsal ba'i khyad par bstan pa'i phyir/ gang zhig chos 'dul zhes bya ba la sogs pa smos so/ /gang zhig ni gang la la ste/ skye ba la sogs pa la ltos pa med par thams cad la 'byung ba yin no/ /ni zhes bya ba'i sgra ni rgyu bstan pa'i phyir ro/ /'di la zhes bya ba ni bde bar gshegs pas bstan pa 'di la'o/ /chos 'dul zhes bya ba ni chos kyi tshul gyi 'dul ba yin pas chos 'dul te skyon med par 'dul ba'i thabs zhes bya ba'i don to/ /yang na de la chos kyis 'dul bas 'dul ba ste/ gang sangs rgyas kyi bstan pa la'o/ /'dir ni mtshon chas bsnun pa dang nor phrog pa la sogs pas 'dul ba ni ma yin no/ /yang na lam yan lag lnga ste/ yang dag pa'i lta ba dang / rtog pa dang / rtsol ba dang / dran pa dang / ting nge 'dzin to/ /yang na 'dul ba ni gsum ste/ yang dag pa'i ngag dang / las kyi mtha' dang / 'tsho ba'o/ /des na yang chos 'dul ba ni 'dir 'phags pa'i lam yin no/ /bag dang ldan par spyod byed pa/ /zhes bya ba ni bag med pa la sogs pa ngan par spyod pa thams cad dang bral bar spyod pa yin no/ /'di skad ston pa yin te/ 'di ltar gang gis g.yeng ba thams cad spangs shing zag pa med pa'i lam bsgom pa la 'jug par byed pas 'khor ba'i skyon thams cad ni spangs la/ kha na ma tho ba med pa'i bde ba'i ngo bo thar pa'i lam ni sgrub par byed pa'o/ / rab spangs pa zhes bya ba ni yongs su dor ba'o/ /skye ba'i 'khor ba zhes bya ba ni skye ba nye bar mtshon pa ste/ khams gsum gyi bdag gi dngos po'o/ /gang gi phyir skye ba med pa ni khams gsum na yod pa'i grangs su mi 'gro ste/ mya ngan las 'das pa'o zhes bya ba'i tshig gis so/ /sdug bsngal tha mar zhes bya ba ni tha ma rnam pa gsum las phung po lhag ma med par mya ngan las 'das pa zhes bya ba'i don to/ /byed par 'gyur zhes bya ba ni thob pa dang / de'i bdag nyid du byed pa'o/ /bag yod pa'i tshoms te bzhi pa'i rnam par 'grel pa rdzogs so// //de'i 'og tu sdug pa'i tshoms dgod pa ni bag yod pa mchog tu byed pas kyang / bdag nyid sdug pa la chags pa'i bgegs las bzlog pa'i phyir te gang gi phyir sdug pa la chags par gyur na ni dge ba la mngon par brtson pa khyad du gyur pa thams cad kyang spangs nas/ des na sdug pa'i skye bo dag rjes su dran zhing 'khor ba'i lam dag srung la yang dag par ston par byed do/ /'di ka ling ka dang shAkya tsi tra zhes bya ba la sogs pa yang dper brjod par bya'o/ /da ni sde tshoms kyi rnam par 'grel pa bshad de sdug pa rnams las zhes bya ba la sogs pa smos so/ /mnyan yod na dga' ba can zhes bya ba'i khye'u gzugs zla med par bzang ba zhig gis dga' mo zhes bya ba'i bu mo de dang mnyam pa'i gzugs yod pa zhig blangs so/ /de'i khyim thab zla ba drug tsam nas dus byas par gyur to/ /de dang bral bas de smyos par gyur te/ gcer bus mnyan yod thams cad du shi ba'i khyim thab tshol zhing rgyus so/ /ji tsam na bcom ldan 'das kyis de gdul ba'i dus la bab par gzigs nas/ tshe dang ldan pa kun dga' bo rjes su 'breng ba dang de'i thad du gshegs so/ /de nas bcom ldan 'das mthong ma thag dran pa rnyed de rang gi lus la gos med par mthong nas shin tu ngo tsha bar gyur to/ /tshe dang ldan pa kun dga' bos de'i bsam pa shes nas bla gos de la byin te/ de lus la gyon te bcom ldan 'das kyi spyan sngar 'ongs te gus pa dang bcas par byas nas phyag 'tshal te/ thub pa mchog gis shis par brjod pa'i tshigs su bcad pa 'di gsungs so/ /gang gis chos gcig ma spangs pas/ /'gro ba 'di kun bcings par gyur/ /kun rmongs 'jigs rung 'di lta bu/ /rtsa nas khyod kyis zad gyur cig /ces so/ /de nas kun dga' bo la lhung bzed gtad de/ sngon su yang ma shi ba'i khyim las chu long la shog shig ces bka' stsal pa dang / de bcom ldan 'das kyi mthus bye ba phrag bco brgyad kyi khyim dag tu myur ba nyid du song ba dang / des chu ma rnyed nas lhung bzed stong pa nyid du slar 'ongs so de bstan nas tshigs su bcad pa gnyis po 'di gsungs so/ /gzhan dag ni bu dang chung ma dang mna' ma shi ba'i nye du zhig rgyun mi 'chad par mya ngan byed pa las brtsams pa ni tshigs su bcad pa dang po'o/ /byi sha ka zhes bya ba'i dge bsnyen dang / yul yangs pa can gyi lits+tsha bI las brtsams pa ni gnyis pa yin no zhes zer ro/ /de nas dang po'i dbye ba bshad pa/ sdug pa rnams las zhes bya ba la sogs pa smos so/ /'di la bsdus pa'i don ni 'dod chags dang bcas pa dang / 'dod chags dang bral ba dag gi nyes dmigs dang phan yon bstan pa'o/ /sdug pa rnams las zhes bya ba ni sdug pa'i yul dag las zhes bya ba yin te/ 'dir nyon mongs pa dang bcas pa'i sdug pa bstan pa ste/ mya ngan la sogs pa'i rgyur gyur pa'i phyir ro/ /don yang rnam pa gnyis te/ sems dang ldan pa dang sems dang mi ldan pa ste/ gang la sred pa 'jug pa'o/ /gang dang 'brel pa zang zing la dga' zhing rjes su myong ba de la sdug pa zhes brjod do/ /'di lta ste/ pha dang / ma dang / bu dang / chung ma dang / dbyig dang / gser dang / nor bu dang / gos dang / skyed mos tshal la sogs pa'o/ /de dang bral zhing spangs te zhig pa las ni mya ngan skye zhes bya ba smos te/ shin tu sems gdung zhing yid mi bde bar gyur ces bya ba'i don to/ /dper na shing bcad pa lhung ba la tsha ba'i dus kyi nyi ma'i 'od kyis skam pa lta bu ni mya ngan no/ /de yang bshad pa/ yid la gdung ba 'phel ba'i mis/ /bdud rtsi dag la longs spyad kyang / /nyin re bzhin du skam 'gyur te/ /khong stong shing gi me bzhin no/ /'das pa dag gi gnod pa bstan nas/ da ltar byung ba'i rnam pa de dang de dag las yang smras pa/ sdug pa dag las 'jigs pa skye/ /zhes bya ba 'jigs pa yin pas 'jigs pa ste/ ma 'ongs pa na gnod pa 'byung bar dogs pa skye ba'i sems gnod pa zhes bya ba'i don to/ /dgra las 'jigs pa skye zhes ma brjod ce na/ mya ngan gyi 'jigs pa ni sdug pa nyid kyi dbang las gyur pa yin pa'i phyir de ltar ni ma bstan to/ /de dag nyid las mya ngan dang 'jigs pa 'byung ba yin te/ ci'i phyir zhe na/ de nyid smras pa/ sdug pa dag ni rnam spangs na/ /zhes bya ba smos te/ ji skad bstan pa'i mtshan nyid kyi sdug pa rnams la chags pa med cing / de la ma dmigs na sred pa zad pa'i phyir ro/ /khams gsum gyi 'dod chags dang bral ba rnams la ni 'dod chags thams cad spangs pa'i phyir de dang 'brel ba'i mya ngan dang 'jigs pa med do/ /sdug pa'i dngos po dang 'brel ba mya ngan la sogs pa de spang ba la sbyar ba'i phyir 'di gsungs so/ /sdug pa dang 'brel na ni nyes dmigs 'di sogs pa yin no zhes bsgrub pa'i phyir/ sdug gu ma las zhes bya ba la sogs pa smos so/ /kha cig 'di skad smra ste/ mnyan yod na bram ze zhig gi bu gnyis dang / glang bzhi dang 'bras kyi zhing dag la ser ba bab ste shi zhing nyams par gyur to/ /chung ma yang khyim gyi las byed pa las de zhig nas lhung ste dus las 'das so/ /de de dag dus byas pa dang 'bras kyi zhing nyams par gyur pa las smyos shing gcer bur byung ste/ sems 'khrugs par gyur nas kun du rgyu ba de'i dbang du mdzad de gsungs so zhe'o/ /sdug pa nyid dang bral ba las de ltar gyur pa yin gyi/ gzhan du ni de lta ma yin no/ /skyes pa ni 'byung ba'o/ /mya ngan ni sgyid lug pa'o/ /sdug bsngal ni kun 'byung sred pa'i 'bras bur gyur pa'i phung po zhes pa'i tshig gis so/ /'jigs pa ni sems kyi gnod pa'o/ /sdug pa las gsum po de dag 'byung ba 'ba' zhig tu ma zad de/ sdug gu ma dag gzhan gyur na/ /zhes bya ba ni med pa dang bral bar gyur pa'i don to/ /yi mug 'gyur ba zhes bya ba ni sems 'khrugs pa'o/ /thob par 'gyur ba zhes bya ba ni rnyed par 'gyur ba'o/ /gnod pa thams cad spang bar 'dod pas sdug pa yongs su spang bar bya ba la gzud pa'i phyir 'di gsungs so/ /sdug pa dang 'brel na de las gzhan pa'i gnod pa bstan pa'i phyir/ 'jig rten sdug bsngal zhes bya ba la sogs pa smos so/ /bram ze zhig bcom ldan 'das kyi thad du phyin nas/ kye gau ta ma gang la brten nas mya ngan dang smre sngags 'don pa dang / sdug bsngal ba dang yid mi bde bar 'gyur zhes gsol ba dang / de'i phyir bcom ldan 'das kyis tshigs su bcad pa drug gsungs so/ /ji rnyed pa zhes bya ba ni gang dag 'jig rten na mya ngan la sogs pa yod pa'o/ /smre sngags 'don pa zhes bya ba ni gang cung zad yid mi bde bas bskyed pa'i tshig brjod pa'o/ /sdug bsngal zhes bya ba ni nang gi nad do/ /ji lta bu zhe na/ rnam pa du ma zhes bya ba smos te/ rnam pa sna tshogs pa'o/ /'dis ni mya ngan la sogs pa thams cad khyad par du byed pa yin te/ de re re yang mtha' yas pa'i dbye ba yod pa'i phyir ro/ /'di lta bu su la 'byung ba yin zhe na/ smras pa/ 'jig rten zhes bya ba ste sems can gyi 'jig rten yin gyi snod kyi 'jig rten ni ma yin te/ sems med pa'i phyir mya ngan la sogs pa med pa nyid do/ /sdug pa dag la brten te zhes bya ba ni sdug pa'i dngos po la gnas pa'o/ /byung zhes bya ba ni rab tu skye ba'o/ /de dag ces bya ba ni mya ngan la sogs pa sngar bshad pa'o/ /ci'i phyir de lta bu yin zhe na/ sdug kyang zhes bya ba smos pa la/ yang gi sgra ni gang gi phyir zhes bya ba'i don te/ gang gi phyir sdug pa spangs shing med par gyur na mya ngan la sogs pa de dag med par 'gyur te/ de dag 'byung bar mi 'gyur ro/ /'di gnyis ni rgyu dang rgyu can gyi mtshan nyid du brjod do/ /gang rgyu yod na ni 'byung la gang med na ni mi 'byung ste/ de yang dper na sa bon dang myu gu bzhin no/ /mya ngan med pa'i bde ba'i khyad par 'dod pa ste/ bram ze de sdug pa yongs su spang ba la gzud pa'i phyir gsungs pa/ gang phyir zhes bya ba la sogs pa smos so/ /gang yin zhes bya ba'i sgra ni nyid kyi don te/ bde ba nyid yin no/ /'di ltar de dag ni 'dod chags dang bral ba'i rnam pa ste/ khams gang na yang cung zad sdug pa med de khams gsum gyi 'dod chags spangs pa'i phyir ro/ /de bas gdung med ces bya ba ni gang gi phyir de ltar bde ba yang dag par skyes pa de bas na de la mngon par phyogs shing bde ba thob par 'dod pas ni 'ga' la yang sdug pa skyes par mi bya ste/ gdung ba thams cad dang sred par byed pa thams cad ni de dang 'brel pa'i phyir ro/ /gdung med ces bya ba ni gang la mya ngan med pa thob pa de nyid de/ gdung ba thams cad bsal ba zhes bya ba'i don to/ /rdul bral zhes bya ba ni nyon mongs pa dang bral ba ste 'dir 'dod chags nyid rdul yin gyi/ sa'i rdul ni ma yin no zhes pa'i lung gis so/ /go 'phang zhes bya ba ni mya ngan las 'das pa ste/ de nyid na sdug bsngal de'i rgyu med pa'i phyir ro/ /don gnyer ba zhes bya ba ni kun du 'dod pa'o/ /yang na thob par 'dod pa ste sgrub par 'dod pa'o/ /sdug par bya ba de mi bya/ /zhes bya ba ni chags pa'i dngos po yongs su gzung bar mi bya ba'o/ /nam yang zhes bya ba ni rnam pa gang gis kyang ste/ nang dang phyi rol des mnyam par gzhag pa dang mnyam par gzhag pa'i sa la sogs pa'o/ /sdug pa dang phrad par 'dod pa bram ze de'i dga' ba dang bcas pa'i blo nges par byas pa las bzlog pa'i phyir/ sdug pa ma mthong zhes bya ba la sogs pa smos so/ /nam yang 'dod chags kyis kun nas dkris pa'i yul la phrad par ma byed cig pa'o/ /nam yang zhes bya ba ni nam zhig kyang ngo / /gdol ba la sogs pa'i sdug pa dang phrad pa yang phung khrol chen por bskyed na/ bram ze la sogs pa'i lta ci smos zhes bya ba'i don to/ /ci sdug pa dang phrad pa bzhin du mi sdug pa dang phrad pa yang 'gag gam ma yin zhe na/ mi sdug mthong na'ang de bzhin no/ /mi 'dod pa'i dngos po rnams dang yang nam yang phrad par ma byed cig pa'o/ /'ang zhes bya ba'i sgras ni khyad par du sdug pa dang phrad pa dgag pa yin no/ /ci'i phyir zhe na/ 'di ltar/ sdug pa ma mthong sdug bsngal la/ /zhes bya ba smras te/ bral ba la sogs pas sdug pa mthong na ni gdung ba skye bar 'gyur ro/ /mi sdug dang yang phrad mi bya/ /zhes bya ba la/ yang gi sgras ni sdug bsngal rjes su 'brang ngo / /sngon ma mthong ba'i dngos po dang phrad na yang rgyun du sdug bsngal mang po 'byung ngo / /des na yang sdug pa dang mi sdug pa gnyis mthong ba dang ma mthong ba sdug bsngal gyi rgyur gyur pa mnyam pa yin te/ 'di bya ba ma yin no/ /sdug pa dang mi sdug pa mthong ba dang ma mthong ba las sdug bsngal zhes bya ba de gang las she na/ sdug pa dang ni zhes bya ba smos te/ sdug pa ni pha dang ma dang bu dang chung ma la sogs pa dang rjes su chags pa'i yul dang / bye zhing bral ba zhes bya ba smos te/ bral bar snang ba na mya ngan mi bzad skye bar 'gyur zhes bya ba 'di dang sbyar ro/ /mi sdug pa dang phrad pa yis zhes bya ba la mi sdug pa yang dgra bo la sogs pa yang phrad pa'o/ /mya ngan mi bzad skye bar 'gyur/ /zhes bya ba ni gdung ba chen po skye ba yin no/ /gdung ba che nyid bstan pa'i phyir/ /gang gis mi dag rgas byed pa'i/ /zhes bya ba smos te/ gang mya ngan skyes pa ni 'dam bu brngas pa nyi mas gdungs pa bzhin du 'dod chags can 'joms par 'gyur te/ bram ze ba la bya zhes bya ba'i bu mo dang slob ma gnyis yun ring por bltas pas rjes su chags pa rgya cher gyur to/ /dus cung zad cig bral ba las shin du phrad par 'dod de/ phrad par gyur pa la phan tshun gcig la gcig shas cher chags shing 'khyud pa tsam gyis shi zhing lus skams par gyur to/ /tsaN+Da gi ri ka zhes bya ba la bltas pa tsam nyid kyis tsam pa'i pha shi ba yang 'dir dper brjod par bya'o/ /gson pa la mi sdug pa nyid de dang 'brel ba'i mya ngan la sogs pa bstan nas/ 'chi bar 'gyur ba'i bstan par bya ste/ sdug pa shi bar gyur pa na/ /zhes bya ba smos te/ nye du dang rtsa lag dang grogs bshes la sogs pa ni sdug pa'o/ /shi bar gyur pa ni dus las 'das pa ste/ srog dang bral bar gyur pa'o/ /na zhes bya ba ni gang gi phyir sdug pa dang bral na nye du la sogs pa sdug bsngal zhing yun ring du mya ngan byed pa yin pa'i phyir/ 'tsho ba'i tshe gcig pur ma zad de/ sdug bsngal mi bzad pas gdungs par gyur pa yin no/ /de bas na sdug pa'i skye bo yongs su spang bar bya'o zhes bstan to/ /sdug bsngal gyis nyam thag pa ni lus dang sems kyi sdug bsngal gyis gnod pa'o/ /gang yin zhe na/ gnyen 'dun zhes bya ba smos te/ pha dang ma dang gnyen du 'brel pa la sogs pa ste/ rang bzhin gyis gnyen du 'brel par ston pa yin no/ /bcos ma ni mdza' bshes zhes bya ba smos te/ mdza' bshes dag la shin tu brtse ba'i snying yod pa de ni mdza' bshes so/ /ji ltar mya ngan byed cing gdung bar byed ce na/ smras pa/ mang po ste lhag ma'i rnam pa du ma'o/ /dus ji tsam zhe na/ smras pa/ yun ring dus su zhes bya ba yin te/ dus ring po zhes bya ba'i don to/ /des na de'i phyir/ sdug dang bral bas sdug bsngal 'gyur/ /zhes bya ba smos te/ gdung bar byed pa ni skye bo sdug pa dang bral ba sdug bsngal gyi rgyu yin pa'i phyir shin tu mi bzad pa'i dug bzhin no/ /gang gi phyir ji skad du gsungs pa ste/ de'i phyir/ sdug par byed pa mi bya'o/ /zhes bya ba smos te/ chags pa'i dngos po ni cung zad kyang mi bya'o/ /ci'i phyir zhe na/ sdug nyid sdig can la zhes bya ba smos te/ gang la sdug pa bstan pa yod pa ni nyon mongs pa'i dga' ba zhes bya ba'i don te/ de yang dpag tu med pa'i sdig pa'i rgyu yin pa'i phyir sdig pa dang bcas pa zhes bya ba'i don to/ /'di ltar gang las ngan par spyod pa thams cad kyi gzhi ni 'di las byung ba yin pas de bas na byed par mi bya'o/ /yang na sdug pa nyid ces bya ba ni sdug pa'i dngos po sems dang bcas pa dang sems med pa'i dngos po la chags pa ste/ spyir rab tu gzung ngo / /mi sdug pa la yang 'di las bzlog par brjod par bya ste/ mi sdug pa dag ma shi bar gyur na gnyen 'dun dang mdza' bshes mang po dus yun ring du mya ngan byed de/ mi sdug pa dang phrad pa'i sdug bsngal gyis so/ /des na de mi sdug par byed par mi bya'o zhes bya ba yin te/ sdug nyid sdig can la zhes bya ba lta bu'o/ /sdug pa dang mi sdug pa gnyis kyi skabs yin pa'i phyir de'i 'og tu yang 'di gnyis kyi mjug bsdu ba'i tshig snang ba'i phyir ro/ /ci'i phyir mngon sum du mi brjod ce na/ smras pa/ zhe sdang gi gnyen por spyod pa dang bcas pa ni spang bar sla ba yin no zhes gsal bar bstan pa'i phyir dang / sred pa'i bcas pa ni rab tu spang bar dka' zhes bstan pa'i phyir mngon sum du de nyid gzung ba yin no/ /de la mdud pa yod min pas/ /zhes bya ba ni mdud pa rnam pa bzhi ste/ brnab sems lus kyi mdud pa dang / gnod sems dang / tshul khrims dang brtul zhugs mchog tu 'dzin pa dang / 'di bden no snyam du mngon par zhen cing mchog tu 'dzin pa'o/ /de dag med pa ni lam bsgom pas de'i thob pa bcad pa'o/ /de gang yin zhe na/ gang la med ces bya ba smos te/ sdug pa dang sdug pa ma yin pa ni sdug dang sdug min no/ /gang la rjes su chags pa dang / khong khro ba med pa'i phyir sdug pa dang / mi sdug pa'i dngos po med de/ de kho na la mdud pa thams cad med pa yin no/ /mdud pa med pas ni gnod pa dang mya ngan la sogs pa med do/ /gang zhig sdug pa yongs su 'dzin par byed pa de ni don yongs su btang nas gnod pa chen po thob par 'gyur ro zhes bstan pa'i phyir smras pa/ sdug la bltas te zhes bya ba la sogs pa'o/ /rgyal byed kyi tshal na dge slong grogs po gsum zhig gnas pa las de dag la bos te bka' stsal ba/ dge slong khyed kyis thos sam/ skye mched drug gi reg pa zhes bya ba'i dmyal ba gang du mig gis mthong ba na yid du mi 'ong ba nyid du mthong ste yid du mi 'ong bar gyur cing ji tsam na 'di ltar yang dge ba'i las rnams nges par ma byas pa'i phyir dang / sdig pa'i las rnams nye bar bsags pa'i phyir ro/ /dge slong dag thos sam skye mched drug gi reg pa zhes bya ba la/ gang du mig gis gzugs rnams mthong ba na yid du 'ong bar mthong ba yin te zhes bya ba nas/ rgya cher tshigs su bcad pa 'di gsungs so/ /mi sbyor zhes bya ba smos pa la/ sbyor zhing legs par byed pa yin pas sbyor ba ste legs par spyod pa'o/ /sbyor ba ma yin pas mi sbyor ba ste/ ngan par spyod pas de la sdig pa khyad du gsod ces bya ba'i don to/ /gzhan dag ni tshul bzhin ma yin pa'i yid la byed pa'am spyod tshul ma yin pa zhes zer ro/ /sbyor ba zhes bya ba ni 'jug par byed pa'o/ /de la gang sbyor ba yin zhe na/ smras pa/ sems te yid do/ /sbyor ba nyid la'ang mi 'jug pa'o zhes bya ba ni sbyor ba med pa las bzlog pas nam zhig na sbyor ba la yang mi 'jug pa'o/ /yang gi sgra ni bsdus pa'i don to/ /nyid ces bya ba'i sgra ni nges par gzung ba ste/ de nyid du sems mi sbyor ba'o/ /de dag byas pa'i nyes dmigs bstan pa ni/ /don btang nas zhes bya ba ste/ bdag la sogs pa'i don ni phan 'dogs pa'i dngos po spangs nas ngan par spyod pa la mngon par brtson pas bslab pa gsum slong ba la mngon par mi brtson pa'i phyir ro/ /su zhig de ltar byed pa yin zhe na/ smras pa/ sdug la lta ba zhes bya ba smos te/ sdug pa yongs su 'dzin pa de mchog tu byed pa'o/ /de ci zhig 'thob cing gang len pa yin zhe na/ smras pa/ reg par byed pa ste don du gnyer bar byed pa'o/ /dper na me tog dag la reg par byed pa ni reg par 'dod pa ste/ bzhi pa'i sbyor ba bstan to/ /don sbyor ba zhes bya ba ni don la sbyor ba ste/ mngon par 'dod pa'i 'bras bu dang ldan pa'o/ /de gang la yod pa de ni bslab pa gsum dang ldan pa'i gang zag go/ /'dod chags kyi dbang du 'gro ba'i skyes bus ni sdug pa la chags pas gzung ste/ de'i ched du byed cing de mchog tu 'dzin par byed la/ bag med pa'i rjes su 'gro zhing bslab pa gsum gyi bslab pa la btang snyoms su byed de 'chi ba'i dus su de mchog tu yon tan gyis brgyan pa yin no zhes rtogs te/ de las shin tu mi bzad pa'i tshor ba drag pos mya ngan yang dag par skye bar 'gyur zhing reg par 'gyur ro/ /de ltar ngan song la sogs par skye bar 'gyur te/ yid la gcags bzhin du 'chi ba'i dus byed par 'gyur zhing lus zhig nas dmyal bar skye bar 'gyur ro zhes pa'i don to/ /gzhan dag ni don rig sbyor bar mi 'gyur ba zhes brjod de reg pa ni thob pa'o/ /don ni dngos po'o/ /mi sbyor bar ni mi rigs par 'brel ba ste/ mi rigs par byas zhes bya ba'i don to/ /ngan par spyod pa las bzlog pa'i phyir dang / legs par spyad pa la gzud pa'i phyir 'di gsungs so/ /sdug pa dang 'brel ba ni sdug bsngal thams cad yin no zhes bstan pa'i phyir/ gzugs sdug bsngal bde bas zhes bya ba la sogs pa smos so/ /yul yangs pa can na tshong dpon zhig gi bu skyes nas lo bcu gnyis lon pa zhig gnas so/ /ji tsam na shing sA la ban dzi ka zhes bya ba'i dga' ston gyi phyir gnyen bshes dang lhan cig grong khyer las phyi rol gyi skyed mos tshal du byung ste shing sA la la 'dzegs nas/ me tog mang po bsdus te nye du rnams la me tog man da ra ba rnams byin no/ /de'i chung mas 'di dag la ni byin te/ bdag la ni ma byin no zhes mi bzod pa skyes te shing shin tu mtho ba zhig la 'dzegs pa las yal ga chag ste lhung ngo / /de'i tshe bcom ldan 'das spre'u'i mtsho bran gyi 'gram na bzhugs te chos ston to zhes de lhung bzhin du thos nas yid la byas pa las bar ma dor mya ngan las 'das par gyur to/ /de'i phyir nye du'i tshogs thams cad 'dus te mya ngan chen po byed par gyur to/ /lha'i 'jig rten du yang man da ra'i shing las lha'i bu zhig lhung ste/ skyes nas yongs su mya ngan las 'das par gyur to/ /de'i ched du lha'i tshogs rnams kyang yongs su mya ngan byed cing 'dug pa las 'dir bcom ldan 'das kyis tshigs su bcad pa gnyis gsungs so/ /de las dang po'i 'grel pa smras pa/ gzugs sdug ces bya ba smos te/ gzugs kyang yin la sdug pa'ang yin pas gzugs sdug go/ /yang na gzugs sdug pa'i rgyu can no/ /bde ba ni myong ba'o/ /gzugs sdug pa'i bde bas bsdams pa zhes bya ba ni bcings pa ste/ de'i ched du so so'i skye bo 'khor ba la chags nas 'dug pa'o/ /de yang gang yin zhe na/ lha'i ris dag tu zhes bya ba smos te/ rgyal chen rigs bzhi la sogs pa'i lha'i tshogs dag tu'o/ /so so ni rnam pa sna tshogs pa nyid kyi lus dang sems yin pa'i phyir ro/ /ming dang zhes bya ba la/ dang gi sgra ni so so'i skye bo 'dren pa yin te/ de yang rnam pa sna tshogs pa'o/ /gzugs sdug pa'i bde bas bsdams pa dag yod par gyur pa des ci zhig tu 'gyur zhe na/ smras pa/ sdug pa byed cing zhes bya ba smos te/ shin tu gnod par byed pa yin pas sdig pa ste/ sdig pa'i las de'i rgyus sems can thams cad la gdung bar byed pa ste/ de dang 'dir rjes su mthun par bsgrub pa'i tshul gang yin pa de ni de nyid de sdig pa byed pa zhes bya ba'i don to/ /bde ba rjes su myong bar byed pa'i phyir sems can rnams 'dod pa la mngon par chags par byed de/ 'dod pa'i ched du yang ngan par spyod pa thams cad spyod do/ /sdig pa'i 'bras bu smras pa/ yongs nyams nas zhes bya ba yongs su zad pa ste/ 'jig rten 'dir lus yongs su nyams pa dang smad pa la sogs pa'i sdug bsngal gyi gzhi yin pa'i phyir bdag nyid la stobs med pa yin te/ mngon par mi 'dod pa zhes bya ba'i don to/ /ji skad du bshad pa/ gal te srid pa rtsad bcad nas/ 'byor pa thams cad lag tu rnyed/ /de la skabs ni yod byas na/ /bran bzhin bka' ni spyi bos nod/ /ces so/ /rga dang 'chi ba'i dbang du 'gro/ /zhes bya ba ni/ rga ba dang 'chi ba'i rjes su 'jug pa ste/ yang dang yang du skye ba blangs nas 'chi ba rjes su myong bar 'gyur ro/ /de la 'dis ni nyon mongs pa dang ngan par spyod pas skye ba la phan par bstan to/ /'dis spang bar 'dod pas sdug pa yongs su spang bar bya'o zhes bsgrub pa'i phyir gsungs so/ /sdug pa yongs su spangs pa'i phan yon gang zhig ces bya ba la sogs pa smos te/ gang zhig ni gang dag go/ /nyin dang mtshan mo zhes bya ba ni nyin par dang mtshan mo'o/ /dang gi sgra ni rgyun mi 'chad pa'i sbyor ba bsgrub pa'i phyir ro/ /bag yod ces bya ba ni bag yod par byed pa ste/ gzugs sdug pa spang ba'i phyir gnyen po bsgom pa zhes bya ba'i don to/ /gzugs sdug spong byed pa zhes bya ba ni sdug pa yongs su 'dor ba ste dngos po de la dmigs pa'i nyon mongs pa spang ba'i phyir ro/ /des zhes bya ba ni de nyid kyis so/ /drungs nas phyung zhes bya ba ni rtsa ba nas phyung ba'o/ /sdig pa'i rtsa ba zhes bya ba ni sdig pa 'phel ba'i phyir bag la nyal zhes bya ba'i don to/ / bdud zas dang zhes bya ba ni 'chi bar byed pa'i 'dren pa dang / zas dang zang zing dang phan 'dogs pa zhes bya ba ni rnam grangs so/ /de'i phyir nyon mongs pa ma spangs pa la ni skye ba dang 'chi ba rnyed sla ba yin no/ /sdig pa'i rtsa ba ni sdig pa thams cad skyed par byed pa yin pa'i phyir ro/ /de bas na bdud kyi zas te ji skad du bstan pa/ gang du 'dod pa de na 'chi ba yod/ /gang du zas yod de na bya rgod ltung / /zhes gzhan dag zer ro/ /spang dka' zhes bya ba ni 'da' bar dka' ba'o/ /bdag nyid ma sbyangs pa rnams la ni kun du sbyor ba rnams spang bar dka' ba nyid du bstan pa'i phyir 'di gsungs so/ /byis pa rnams kyi sdug pa'i dngos po ni slu ba nyid du bstan pa'i phyir/ legs min legs pa'i tshul dang ni/ /zhes bya ba la sogs pa smos te/ bcom ldan 'das a ma la ka la ba zhes bya ba'i shAkya'i grong rdal na bzhugs te/ de'i tshe su pra be sha kro ta zhes bya ba'i bu mo de las khye'u zhig btsas so/ /de nas yang a ma la ka la ba zhes bya ba na gnas pa'i lha de bcom ldan 'das kyi spyan sngar phyin te gsol ba/ btsun pa su pra be+e sha kro ta zhes bya ba'i bu mo de las khye'u zhig btsas so/ /bcom ldan 'das kyis bka' stsal ba/ lha de ni ma legs te shin tu yang ma legs so/ /lha des gsol ba/ 'jig rten na ni bu skyes bde zhes brjod/ /bu skyes na ni yid kyang shin tu dga'/ /pha ma rgas na gso bar byed yin na/ /ci phyir khyod ni legs pa min zhes gsungs/ /zhes gsol pa dang / bcom ldan 'das kyis/ legs min legs pa'i tshul dang ni/ /zhes bya ba la sogs pa bka' stsal to/ /sdug pa'i dngos po 'di dag thams cad ni legs pa ma yin te gnod pa thams cad kyi rgyur gyur pa dang / skye bo dam pas smad pa'i phyir ro/ /de yang legs pa'i tshul gyis te legs pa'i thabs kyis bag med pa'i sems can mngon par 'joms pa yin te/ slu bar byed pa'i chu'i sha za bzhin no/ /sdug pa'i tshul gyis dang zhes bya ba ni sdug pa lta bu'am yid du 'ong ba'i tshul gyis so/ /sdug min zhes bya ba ni yid du mi 'ong ba'i tshul gyis so/ /sdug ces bya ba ni yid mi rtag pas ma rung bar byas pa de lta mod kyi kha na ma tho ba med pas slu ba yin no/ /sdug bsngal bde ba'i tshul gyis su/ /zhes bya ba ni 'khor ba'i srid par bsdus pa thams cad sdug bsngal zhing sdug bsngal rnam pa gsum dang ldan pa yin te ci rigs par yin na de lta yang nan gyis bde ba nyid du yongs su 'dzin pa yin no/ /legs min legs pa zhes bya ba la sogs pa'i tshig rkang gsum gyis ni sdug pa rnams mi gtsang ba dang / mi rtag pa dang bdag med pa dang / sdug bsngal ba'i tshul du yod pa yin yang / de lta mod kyi gtsang ba dang rtag pa dang / bdag dang bde ba nyid du nan gyis phyin ci log par gyur to zhes bya ba ni gzhan dag zer ro/ /yang na lha sbyin gyis bstan pa'i tshigs su bcad pa lugs las bzlog pa ni lan 'dis bstan pa yin no/ / khye'u de cher skyes pa dang pha dang ma gsod par 'gyur zhing rigs rgyud thams cad rlag par byed pa dang / nye du'i rigs thams cad kyang 'jig par 'gyur zhing thams cad sdug bsngal la sbyor bar byed pa yin te/ de ltar don rnam pa gsum/ legs min legs pa'i tshul dang ni/ /zhes bya ba la sogs pa'i tshig rkang gsum gyis bstan to/ /bag med rnams ni zhes bya ba ni rmongs pa ste/ gang gi phyir rmongs na ni bya ba rnams la bag med par 'gyur ro/ /mngon du 'joms pa ni zil gyis gnon pa ste/ lam bzang po nyams zhes bya ba'i don to/ /slu bas 'jigs pa rnams sdug pa spang ba la gzud pa'i phyir 'di gsungs so/ /gzhan sdug cing mngon par 'dod pa rnams ni yal bar dor bar nus na bdag la dga' ba ni mi nus pa yin pas bdag la phan par 'dod par mi bya'o/ /ji ltar bdag la dga' bar bya ba de nyid bstan pa'i phyir/ gal te bdag la dga' byed na/ /zhes bya ba la sogs pa smos so/ / yul ko sa la'i rgyal po gsal rgyal gcig pu dben par song ste 'di lta bu'i sems la sems kyi rtog pa skyes so/ /gang bdag la dga' ba 'di dag ni bdag la dga' ba ma yin no zhes rgya cher sbyar te/ bcom ldan 'das de'i gan du gshegs te/ rgyal po chen po gang la lus kyis legs par spyad pa spyod pa dang / ngag dang yid kyis legs par spyad pa spyod pa de ni bdag la dga' ba yin no zhes bya ba'i bar du ste/ de'i dbang du mdzad nas tshigs su bcad pa lnga gsungs so/ /'jigs su rung ba'i nags na gzhon nu byang chub rgyal po bdag la dga' zhing ngan par spyod pa de'i dbang du mdzad pa zhes sde pa gzhan dag zer ro/ /gal te bdag la dga' byed na/ /zhes bya ba ni re zhig mkhas pas ni bdag mi rtag pa yin pa'i phyir dga' bar mi bya'o/ /gal te gang zhig bdag gi la bdag gi dngos por dga' bar byed par 'dod na ni 'di ni mi bya'o zhes pa ste bdag nyid do/ /sdig la gzhug par byas pa ni ngan par spyod pa la 'jug pa'o/ /gang yang bdag nyid kyis lus la sogs pa'i ngan par spyod pa de dag las bzlog pa de ni bdag la dga' bar gnas pa yin te/ de sdug bsngal gyi rgyu spong ba'i phyir ro/ /ci'i phyir de ltar byed du gzhug pa yin zhe na/ bde blag kho nar zhes bya ba smos te/ gang gi phyir bdag nyid la phan par 'dod pas bde ba ni bde blag tu mi 'thob cing legs pa mi rnyed do/ /gang dag gis she na/ nyes par byed pas zhes bya ba smos te/ sdig pa byed pa'i sems can rnams ni me'i nang du 'jug pa la grang zhing spu ldang ba la sogs pa mi 'byung ba bzhin no/ /nag po'i phyogs bstan nas dkar po'i phyogs bstan pa'i phyir/ gal te bdag la dga' byed na/ /zhes bya ba la sogs pa smos te/ bde ba dag ni gang gi phyir bde blag kho nar thob pa yin no/ /legs par byed pas zhes bya ba ni legs par spyod pa ste/ gang dag rgyun mi 'chad par legs par spyad pa spyod pa de dag gis ni 'jig rten dang 'jig rten las 'das pa'i bde ba bde blag tu 'thob pa yin pas legs par spyod pa ni bde ba thams cad kyi rgyur gyur pa yin te/ ji skad du gsungs pa/ dge slong dag bsod nams dag las 'jigs par ma byed cig /de ci'i phyir zhe na/ 'di ni bde ba zhes bya ba'i tshig bla dwags yin no zhes bya ba la sogs pas so/ /'di ni sdig la gzhug mi bya/ /zhes bya ba la/ gzhug pa zhes bya ba'i sgra'i don ni rnam pa gnyis te/ ldog pa dang 'jug pa'i mtshan nyid kyis so/ /de la re zhig ldog pa'i mtshan nyid rnam par dbye ba'i phyir/ /dper na dgon pa'i zhes bya ba la sogs pa smos so/ /'di ni bsrung bas zhes bya ba ni bdag nyid sdig pa las bzlog pas bsrung bar bya ba yin te/ 'di ni bzlog pa'i sgra la 'jug ste/ dper na nas dag las glang srungs shig ces bya ba ni bzlog pa'i don to/ /ji ltar bsrungs pa yin zhe na/ legs par bsrung zhes bya ba smos te/ 'di ni bya ba'i bye brag yin te/ 'di bzang por bsrung ba'i las so/ /shin tu bstan par bya zhes bya ba'i don te/ ji ltar legs par bsrung bar 'gyur ba de ltar bdag bsrung bar bya'o/ /ji lta bur bsrung bar bya zhe na/ dgon pa'i grong khyer lta bur zhes bya ba smos te/ shin tu thag ring ba'i phyogs gang yin pa de ni dgon pa ste/ yul phyogs mi mnyam pa thag ring ba'o/ /grong khyer zhes bya ba ni dgra seng ge lta bus bab col du bzar mi 'dod pa'i phyir ro zhes bya ba ni nges pa'i tshig go/ /dgon pa yang yin la grong khyer yang yin zhes bya ba ni las 'dzin pa'i bsdu ba'o/ /ri la sogs pa'i gnas mi mnyam pa'i phyogs na gnas pa ste/ rdzong zhes bya ba'i don to/ /de'i khyad par ji lta bu zhe na/ 'obs kyis bskor ba ltar zhes bya ba smos te/ brkos pa'i 'obs kyis bskor ba'i grong khyer gang yin pa de nyid de/ 'obs zab pa zhes bya ba'i bar du'o/ /ji skad du bshad pa/ rgyal po'i dgon pa'i grong khyer du ni 'obs brko bar 'gyur ba yin te/ shin tu zab par brko ba yin no zhes bya ba la sogs pa mdo las gsungs so/ /der sogs pa'i sgra ni bskang bar bya ba yin te/ de yang mdung dang yid ches pa'i mi dag dang / mtshon dang zas la sogs pa yongs su gzung ngo / /gang gi tshe dgon pa'i grong khyer la 'obs rnam pa bdun gyis bskor cing zas rnam pa bzhi ci 'dod pa rnyed pa de la ni pha rol gyi phyir rgol ba rnams kyis bgrod par bya ba ma yin no zhes bya ba'i tshig gis so/ /bstan pa zhes bya ba ni de bzhin du skye bo mdza' bshes dang ldan pa'i phyir te/ gang gi phyir grong khyer gyi skye bo ni med de/ des ni 'khu zhing 'byed pa'i phyir rdzong bsrung dka' bar 'gyur ro/ /dper na rgyal pos grong khyer de dgra dag las bsrungs pas ci nas kyang phyi rol gyi phyir rgol ba rnams kyis bgrod par bya ba ma yin pa de bzhin du/ bdag la phan par 'dod pa'i skye bos bdag dang bdag gi bsrung bar bya ste/ de ltar ngan par spyod pa dag la ji ltar sdig pa las ma gos shing nyams par mi 'gyur ba de ltar bya ste/ ji skad du gsungs pa/ dad pa'i mtshon dang ldan pa'i 'phags pa'i nyan thos kyis ni mi dge ba spong bar 'gyur zhes rgya cher bshad do/ /ji ltar rtag tu 'di dag bsrung bar nus she na/ gal te bdag la dga' byed na/ /zhes bya ba la sogs pa smos te/ nyin par ram mtshan mo cha gsum du bgos pa ni thun te/ de'i gsum ni thun gsum mo/ /de las gang yang rung ba cig ni thun gcig ste/ de tsam gyi dus la'o/ /mkhas pa ni rtog pa'o/ /mel tse bya ba yis zhes bya ba'i khyad par du dge ba dag la brtson par bya ba ste/ ji skad du bshad pa/ don med pa'i nyi ma mi bya ste/ bsod nams ni chung ba ma yin yang nyung ngu nyung ngus bsten na ni de bsags pa'i phun sum tshogs pas/ grog mkhar lta bur de bsags par 'gyur zhing de dang mthun pa'i dngos po de'i mngon par dga' ba'i phun sum tshogs par 'gyur ro/ /'jug pa'i mtshan nyid kyi sbyor ba smras pa/ gal te bdag la dga' byed na/ /zhes bya ba'i don ni bstan zin to/ /'di ni sba bas zhes bya ba ni bdag nyid sba ba ste/ gang gi phyir legs par spyod pa la 'jug pas ni bdag bsrung bar 'gyur te/ ji skad du glang po che dregs pa mur 'gram gyi phyogs su rdul 'byung ba'i stobs kyis an dza na'i ri 'joms par byed pa dang / 'phangs glo ba nye ba rnams kyis lag pa na mdung dang mdung thung dang mtshon cha thogs pa rnams kyis kyang g.yul ngor 'jug pa las mi rnams bsrung bar mi nus so/ /gang g.yul dang 'thab mo dang 'thab mo ma yin pa dag tu yang bsod nams kyi tshogs bsags pas ni srung bar byed do/ /ji ltar sba ba yin zhe na/ legs par sba ba zhes smras te/ legs par sba ba ni 'di lta bu yin te/ 'dir dpe brjod pa smras pa/ dper na zhes bya ba la sogs pa'o/ /srung bar byed pa ltar zhes bya ba ni legs par skyong ba'o/ /phyi ni phyi rol gyi 'obs kyi i shi ka la sogs pa'i yo byad do/ /nang zhes bya ba ni nang rol gyi sgo srung ba ste/ dper na dgon pa'i grong khyer la rgyal pos phyi nang gi yo byad thams cad kyis legs par bsrungs na/ phyir rgol ba rnams kyis de 'phrogs par mi 'gyur ro/ /de bzhin skyes bu dam pa rnams kyis kyang phyi rol gyi srog gcod pa spong ba dang / nang gi bsgom pa la sogs pas bdag legs par bsrung bar 'gyur te/ de legs par bsrungs pas ni/ bdud kyis mi 'phrogs par 'gyur ro/ /de ltar na bdag rim gyis bsrung bar 'gyur ro/ /de ltar bsrung bar bya zhes bya ba ni de ltar myur du bdag bsrung bar bya ba'o/ /ji ltar yang / dal 'byor chud ni mi zos par/ /zhes bya ba smos te/ sangs rgyas 'byung ba la sogs pa'i yon tan dang ldan zhing mir skye ba ni dal ba ste/ de khyod kyis chud ma zos shing ma 'das pa dang don med par ma byed cig pa'o/ /de las 'das pa'i nyes dmigs smras pa/ dal 'byor thal bas zhes bya ba yin te/ ji skad du bshad pa'i mtshan nyid can gyi dal ba'i dal 'byor las thal zhing 'das pa ste/ nyams pa'i mtshan nyid ces bya ba'i don to/ /bas zhes bya ba'i sgra ni gang gi phyir zhes pa'o/ /'gyod par 'ong zhes bya ba ni mya ngan byed par 'gyur ba'o/ /gang du zhe na/ smras pa/ sems can dmyal bar zhes bya ba ste/ yang sos la sogs pa dag tu'o/ /skye ba ni 'byung ba'o/ /'di ltar gang dal ba phun sum tshogs pa don med par byas shing 'das pa des dmyal bar 'gyur ro zhes mya ngan byed cing sdug bsngal gyis gdungs bzhin du bdag gis ni ngan par spyad pa byas shing bsags pas 'dir lhung ngo zhes so/ /de bas na ji ltar dal ba las thal bar mi 'gyur ba de ltar bya'o/ /bsrung ba dang sba ba'i khyad par bstan pa'i phyir smras pa/ 'di gnyis ni tha dad pa ma yin te/ gdul ba nye bar 'ongs pa dag la de'i sgra bsgrub cing phan gdags pa'i phyir gnyi ga gsungs so/ /yang na sdig pa la 'jug pa dag bzlog pa ni bsrung ba'o/ /dge ba la 'jug pa dag ni sba ba'o/ /phyir rol gyi gnod pa dag las bsrung ba dang / nang dag tu sba ba zhes bya ba la sogs pas so/ /bdag nyid sdug par byed pa mi shes pa de dag la bdag nyid sdug par byed pa'i rang gi ngo bo bstan pas de la gzhug pa'i phyir 'di gsungs so/ /bdag dang gzhan bsrung ba'am sba bar ni su zhig gis nus zhes pa dang / gang mi 'tshe ba zhes smos te/ su zhig mi 'tshe ba la stod par byed ces pa la bstan pa'i phyir/ phyogs rnams kun na zhes bya ba la sogs pa smos so/ /gang gi tshe btsun mo phreng ldan mas bcom ldan 'das spyan drangs pa de'i tshe bdag nyid kyi lag btsugs shing tshad mang du g.yos bya ba las rgyal po 'di'i chung ma 'gran zla zhig yod pas 'di'i don byed cing 'di la dga' bo zhes phra ma byas so/ /de nas rgyal po de 'khrugs nas/ ral gyi rnon po shubs nas phyung ste btsun mo phreng ldan ma la bsdigs nas 'jig rten na khyod la ches sdug pa gang yin smros shig ces byas so/ /de bag tsha ba med par bdag nyid yin no zhes smras so/ / de lta bu'i gnas skabs las bcom ldan 'das kyis tshigs su bcad pa gnyis gsungs so/ /gzhan dag ni drug sdes dge slong rnams la rgyun du rnam par 'tshe ba byas pas de'i dbang du mdzad do zhes zer ro/ /phyogs rnams kun du zhes bya ba ni phyogs kyi dbye ba ma lus pa ste phyogs mtha' dag go/ / yongs brtags kyang zhes bya ba ni brtags shing btsal kyang ngo / /sems zhes bya ba ni blos so/ /kyang gi sgra ni nges par gzung ba dang / rim pa gzhan du sbyar ba'o/ /ma mthong na zhes bya ba ni de nyid ma dmigs pa zhes bya ba'i don to/ /ches sdug ces bya ba ni ches 'dod pa'o/ /ga las she na/ bdag las zhes bya ba smos te/ bdag nyid las te/ bdag dang mnyam par sdug pa ni med do zhes bya ba'i tshig gis so/ /de ltar zhes bya ba ni de bzhin no/ /ji ltar sems can gcig bdag nyid la dga' ba ltar ni gzhan la ches dga' ba gang yang cung zad med do/ /de bzhin du bdag dang gzhan dag bdag la so sor sdug pa nyid do/ /so so zhes bya ba ni rnam pa sna tshogs pa'i 'gro ba ste/ skye ba dang phyogs dang skye gnas so/ /gzhan la zhes bya ba srog chags gzhan dag kyang bdag nyid bzhin du sdug pa yin no zhes shes par bya ste/ ji skad du/ bde la gnas shing sdug bsngal bral ba ni/ sems can mnyam par sems par rtogs byas te/ /de bas bdag ni 'dod pa gang yin pa/ /de ni gzhan dag la yang spyad mi bya/ /zhes gsungs so/ /de'i phyir gnod mi bya zhes bya ba ni 'tshe ba mi bya ba'o/ /gzhan la zhes bya ba ni sems can gzhan no/ /gang gis she na/ bdag gis zhes bya ba smras te/ bdag la phan par 'dod pa ste/ gang bdag la sdug par byed par 'dod pa des ni gzhan la gnod par mi bya'o zhes ston to/ /tshigs su bcad pa snga ma'i don de gsal bar bstan pa'i phyir smras pa/ thams cad la yang srog 'di sdug /ces bya ba la sogs pa smos te/ thams cad chad pas 'jigs pas na/ /zhes bya ba ni sems can thams cad 'jigs shing bag tsha bar 'gyur ba'o/ /gang las she na/ chad pas zhes bya ba'i don to/ /gang gi phyir sems dang ldan pa su zhig gnod pas mi 'jigs par 'gyur/ ci'i phyir zhe na/ 'di ltar/ thams cad la yang srog 'di sdug /ces bya ba smos te/ gang gi phyir srog chags thams cad ni tshe 'di 'dod cing yongs su mi gtong ba yin te/ de bas na thams cad srog la gnod par byed pa'i chad pa nyid kyis 'jigs pa yin no/ /des na de'i phyir smras pa/ rang gi nyams las dpag byas te/ /zhes bya ba bdag rang nyid las dper bya ba'o/ /brdeg par mi bya zhes bya ba ni bdag dang gzhan gyis gnod cing 'tshe ba mi bya ba'o/ /gsad mi bya zhes bya ba ni gzhan gyi lag gis kyang / gzhan bsad pa la nan tan mi bya'o/ /yang bshad pa/ ji ltar ha la ha la'i dug /rang ngam yang na gzhan gyis kyang / /byin nas 'chi bar 'gyur ba ni/ /bye brag dag ni med par 'gyur/ /zhes pa'o/ /chad pas 'jigs pas ni gzhan la gnod par byed pa ste/ srog 'gag par byed cing gsod par byed pa dang / brdeg par mi bya ba chad pa la sogs pas 'tshe bar mi bya ba'o/ /'byung po rnams la gsad par mi bya zhing gtse bar mi bya zhes gzhan dag zer ro/ /bdag la dga' ba rnams 'tshe ba las bzlog pa'i phyir 'di gsungs so/ /bdag la dga' ba rnams gzhan la gang gis kyang mi 'tshe ba de la bsod nams dpag tu med pa 'byung bar mkhas pa rnams kyis bshad cing / 'tshe ba med pas mi 'tshe ba nyid ni don dam par bsod nams de nyid yin no zhes bstan pa'i phyir/ dge la lha rnams zhes bya ba la sogs pa'i tshigs su bcad pa bzhi smos so/ /mnyan yod kyi gnas chen po zhig na nor chen po dang ldan pa'i khyim bdag cig shi ba'i dus byas pa las/ rgyal po gsal rgyal gyis nye bar phyin te/ skyes bu dam pa chen po rgyal po chen pos longs spyod rgya chen po thob pa ni/ bdag nyid kyis yang dag par bde bas dga' ba med do zhes rgya cher sngon gyi sbyor ba ta ga ra shi khi zhes bya ba'i rang sangs rgyas la gus par byas te/ bsod snyoms cig sbyin pa byas nas/ dmyal ba ngu 'bod chen po'i skye ba'i chos bshad de zhes rgya cher ro/ /ji tsam na rgyal po gsal rgyal mchi ma phyung ste/ gos kyi mtha' mas phyi zhing bcom ldan 'das la nor dang 'bru dang sa le sbram la sogs pas ni bgyi ba ci yang ma mchis so zhes zhus so/ /bcom ldan 'das kyis bka' stsal pa/ gnyi gar yang bsod nams zhes bya ba la sogs pa'o/ /gzhan dag ni kun dga' bos ci btsun pa drang srong smra ba dag tu lha la sogs pa cung zad 'jig rten gnyi gar yang phan pa byed pa yin no zhes zhus pa de'i dbang du mdzad pa yin no zhes zer ro/ /dge ba ni lus la sogs pa'i legs par spyad pa spyod pa'i skyes bus rigs pas 'ongs pa'i phun sum tshogs pa rnams zhes bya ba ni de'i nges pa'i tshig go/ /lha rnams stod par byed pa ni 'dod pa dang gzugs na spyod pa'i lha rnams dge ba nyid la bsngags pa brjod pa yin te/ ba ri dza ta ka'i mdo las dge slong dag tshes brgyad dang / zla ba phyed ces bya ba la sogs pa 'dir dper brjod par bya'o/ /gang zhig legs spyad spyod byed pa'i/ /zhes bya ba la/ gang zhig ni gang zag go/ /legs spyod ces bya ba ni bsod nams kyi tshul lhag par spyod pa ste/ dge ba byed pa de la gzhan yang bsngags pa smra ba yin no/ /de ltar na mi rnams kyi phar 'dzin pa dang / mar 'dzin pa dang / ji srid du lha'i lus mngon par bskyed par bya'o zhes bya ba la sogs pa'i tshig gis so/ /yang na dge ba ni khyim pa dang rab tu byung ba rnams kyis legs par spyad pa ni thun mong du 'gyur ba'o/ /'dir bsod snyoms kyi 'bras bu legs par spyod par byed pa nyi tshe tsam du ma zad de/ yang 'di na'ang zhes bya ba ni mthong ba'i chos nyid la'o/ /smad par mi 'gyur la zhes bya ba ni dga' zhing rangs pa rgya che ba skye bar 'gyur ba ste/ skye bo thams cad dga' bar byed pa'i phyir dang / skye bo dam pa rnams kyis bsngags pa'i phyir dang / 'khor bar mi 'khor ba la sogs pa'i khyad par dang ldan pa'o/ /yang na smad par mi 'gyur ba zhes bya ba ni mi rnams su'o/ /mtho ris su yang dga' ba 'thob/ ces bya ba ni shi nas 'jig rten pha rol te/ bde 'gro dag tu yang dga' bar 'gyur ro/ /yang gi sgra ni bsod nams byed pa rnams 'di dang / pha rol gnyi gar yang bde ba dang 'brel ba nyid du ston to/ /ji ltar bsod nams byed pa 'jig rten pha rol du dga' bar 'gyur zhe na/ rgyang thag bcad par spyugs pa'i mi/ /zhes bya ba la sogs pa smos te/ yun ring po'i dus su bskrad pa'i tshul 'di la yod pa ni rgyang thag chad par spyugs pa ste yul phyogs gzhan dag tu'o/ /mi ni bu la sogs pa'i tshul gyi sems can no/ /ring nas zhes bya ba ni yul thag ring ba nas so/ /nye zho med 'ongs na zhes bya ba ni bde bar bsdogs pa dang bcas par de 'ongs par mthong ba'o/ /gnyen ni pha dang ma la sogs pa'o/ /bshes ni chung ma dang bu la sogs pa'o/ /mdza' bo ni grogs po la sogs pa'o/ /mngon par dga' zhes bya ba ni lhag par mgu ba'o/ /ji ltar mngon par dga' ba yin zhe na/ a la la zhes bya ba smos te/ a la la ni dga' ba'am yang na ngo mtshar to/ /e ma'o bya ba shin tu bzang zhing che ba grub par gyur to zhes bya ba'i don to/ /dpe bstan nas des bsgrub par bya ba'i don smras pa/ de bzhin bsod nams byas pa'i mi/ /zhes bya ba ste/ gang zag gang gis bsod nams kyi tshogs yang dag par bsags shing lhag par stsogs pa'o/ /de bzhin du 'jig rten 'di nas zhes bya ba 'di ltar ris mthun pa las so/ /pha rol phyin tshe zhes bya ba ni 'jig rten gzhan 'thob pa'o/ /gang zhig ce na/ bsod nams bsags pa de dag ste/ sbyin pa la sogs pa'i legs par spyad pa'o/ /mngon par dga' bar byed ces bya ba ni mngon par dga' ba la sbyor bar byed pa ste/ de la phan 'dogs pa'i phyir 'jug par 'gyur ro zhes pa'i don to/ /ji lta bu zhe na/ smras pa/ gnyen bzhin 'ongs nas zhes bya ba ste/ gnyen sdug pa'i skye bo dag 'ongs pa bzhin du ste/ gnyen gzhan dag gis mthong na mngon par dga' bar byed pa de bzhin no/ /'dir dpe rgya cher sngar bshad mod kyi/ phyis 'ongs pa dang mdor bsdus pa la dga' ba'i gdul bya dag rjes su gzung ba'i phyir mdor bsdus te yang bstan pa'o/ /yang na snga mas ni mngon par dga' ba'i dpe bstan to/ /'dis ni phan 'dogs pa'i bya ba zhes bya ba la sogs par brjod do/ /gang gi phyir de ltar bsod nams ni khyad par du mthu che ba yin te/ de bas na 'di nyid la gzhug pa'i phyir smras pa/ de bas zhes bya ba la sogs pa'o/ /des na de'i phyir bskyed pa dang bsags pa gyis shig pa'o/ /ci zhig ce na/ bsod nams bsags pa zhes bya ba ste/ legs par spyad pa'i tshogs so/ /'jig rten pha rol gyi zhes bya ba ni 'jig rten pha rol te/ skye ba phyi ma'i ched du'o/ /der 'byung ba ni 'jig rten pha rol gyi ste/ 'jig rten pha rol la phan 'dogs par byed pa'o/ /ci'i phyir 'jig rten pha rol gyi ched du zhe na/ smras pa/ 'di ltar bsod nams 'jig rten pha rol gyi zhes bya ba ste/ gang gi phyir sbyin pa la sogs pa'i legs par spyod pa dag rgyud la yongs su bsags pas 'jig rten pha rol du sems can srog chags rnams kyi gnas dang rten du 'gyur te/ ji skad du bshad pa/ 'khor ba nyam nga ba dag tu skye zhing 'khor ba na 'jig rten pa rnams kyi gnas kyi mchog ni bsod nams yin no zhes bya ba lta bu'o/ /bde ba 'dod pa rnams bsod nams bya ba la bag med pa dag la de bstan pa'i phyir tshigs su bcad pa 'di gnyis gsungs so/ /gzhan yang bdag nyid bsod nams mchog tu byed pa la yang skye bo thams cad dga' bar 'gyur te/ de nyid smras pa/ chos gnas zhes bya ba la sogs pa'o/ /de nas sun da ri ka zhes bya ba'i rgyal po'i bu bcom ldan 'das kyi spyan sngar phyin te/ btsun pa skyes bu dam pa rnams kyis ci zhig byas na skye bo thams cad dga' bar 'gyur zhes zhus pa dang / rigs kyi bu 'di la chos kyis 'tsho ba brtag par bya'i chos ma yin pas ni ma yin no zhes rgya cher 'di gsungs so/ /chos gnas zhes bya ba la/ chos ni snying rje ste 'tshe ba med pa ni chos kyi mchog yin no zhes bya ba'i tshig gis so/ /'tshe ba med pa yang g.yo la sogs pa gzhan gnod pa byed pa la snying rjes lta bar byed pa'o/ /de yang gsungs pa/ bdag ni sems can la brtse ba/ /rgyal po chos ni mdor bsdus yin/ /zhes so/ /de la gnas pa ni chos gnas te/ de snying rje dang ldan pa zhes bya ba'i don to/ /tshul khrims phun sum tshogs pa zhes bya ba ni/ tshul khrims kyi legs par spyod pa dang ldan pa ste/ rnam pa thams cad du yongs su rdzogs pa'o/ /ji skad du tshul khrims 'chal ba'i de'i rgyu spong ba ni de'i gnyen po bsten pa yin no zhes gsungs te/ de dang ldan pa ni 'di'i phun sum tshogs pa ste/ tshul khrims ma tshang ba med pa dang ldan pa de ni tshul khrims phun sum tshogs pa'o/ /ngo tsha shes shing zhes bya ba la/ yon tan dang yon tan can dag la gus pa ni ngo tsha'o/ /yang na bdag nyid la mngon par brtags nas nyes pa rnams kyis 'dzem pa ste/ de ni ngo tsha zhes brjod de/ de gang la yod pa de ni ngo tsha shes pa'o/ /bden par smra zhes bya ba ni bdag dang gzhan la gnod pa spangs pas dben par smra ba ste/ bzhi po 'di dag ni bde 'gror 'gro ba'i skabs su gyur pa yin no/ /rang gi bya ba byed pa la/ /zhes bya ba ni bdag nyid kyi phan pa byed pa'o/ /dam pa ni dge ba ste gang gi phyir dge ba rnams ni sngar bstan pa'i yon tan dang ldan pas rtag tu bdag la phan pas legs par spyod pa ste/ de la ni dgra bo dag kyang dga' zhing yid du 'ong bar byed na/ tha mal pa dang grogs bshes lta smos kyang ci dgos/ de nyid du bshad ma thag pa bstan pa de khyad par du 'phags pa yang dag par bstan pa'i phyir smras pa/ dga' 'gyur zhing zhes bya ste/ gang gi phyir snying rje la sogs pa'i yon tan bzhi bsten pa de ni sdug cing phangs par 'gyur ro/ /gang dag la zhe na/ smras pa/ gzhan rnams zhes bya ba ste/ lha dang mi rnams so/ /ji skad du gzhung gi dbang du byas pa ste/ de la lha bdun brgya rgya che ba'i tshangs pa'i gzhal med khang nas nye bar phyin to zhes gsungs pa lta bu'o/ /yang na gzhan rnams zhes bya ba ni gzhan sgra rnams kyang zhes bya ba'i don to/ /rang gi don ni byed pa la/ /zhes bya ba ni thams cad dga' bar 'gyur ba dang / bdag la phan 'dogs pa skyed par byed pa yang yin te/ 'jig rten ni las bdag gir byed ces pa'i tshig gis so/ /mthong ba'i chos la bsngags pa dang / / zhes bya ba ni tshe 'di la thams cad du stod par byed pa'ang yin no/ /pha rol du yang zhes bya ba ni 'jig rten pha rol du yang ngo / /bde 'gror 'gro 'gyur zhes bya ba ni dam par 'gro bar skye ba yongs su 'dzin pa de ni de lta bu'o/ /chos la gnas pa zhes bya ba la sogs pa re res 'dir mthong ba dang / ma mthong ba'i phan yon brjod par bya ste/ go rims bzhin no/ /gzhan dag ni yon tan bzhi'i phan yon bzhi ni 'dir brjod par bya'o zhes zer ro/ /dga' ba la sogs pa'i khyad par 'dod pa rnams de'i thabs la gzud pa'i phyir 'di gsungs so/ /'o na bdag nyid legs par spyod pa mchog tu byed par gyur kyang gzhan la yang nas yang du bya ba ma yin pa las zlog par byed pa la dga' bar 'gyur ro zhe na/ gtams na gnang ba'i tshig smra dang / /zhes bya ba la sogs pa smos so/ /bcom ldan 'das bya rgod kyi phung po'i ri la bzhugs te/ bco lnga pa'i gso sbyong de cung zad lus pa dang / sdig pa spang ba dang yon tan las brtsams pa'i chos kyi gtam ston to/ /de bzhin du gzhan yang 'di lta ste brtson 'grus brtsams pa dang bag yod pa dang / bka' blo bde ba dang / rgya cher ro/ /gang dge slong 'di dag des yon tan dang ldan pa dang / de yid dga' ba dang mgu bar gyur to/ /lha sbyin 'khor dang bcas pa sdug bsngal zhing yid mi bde bas stan las langs te/ bcom ldan 'das kyi spyan snga nas song ngo / /de nas de'i tshe bcom ldan 'das kyis tshigs su bcad pa gnyis po 'di gsungs so/ /gtams na zhes bya ba ni rang nyid tshul khrims la sogs pa'i khyad par la gnas shing gzhan dag kyang de nyid la 'dzud pa ni gtams pa ste/ 'di dag ni bya ba'o/ /'di dag ni bya ba ma yin pa'o zhes rjes su mthun pa'i tshul du ston pa'o/ /gnang ba'i tshig smra dang zhes bya ba ni ting nge 'dzin bskyed pa'i rim pa'i thabs ston cing yid la byed pa bskyed pa'i thabs ston pa ni gnang ba'i tshig smra ba'o/ /mi rigs spyod las zhes bya ba ni tshogs par rung ba'i tshig ni bsngags pa'o/ /de las bzlog pa tshogs par mi rung ba ste/ mi rigs pas byas pa'i las so/ /ji skad du gang ma brtags pa brten pa de ni bcol kyang nan tan du mi bya'o/ /de bas na de las bzlog par bya ste grags pa ma yin pa la sogs pa skyed par byed pas/ 'di ni yang skye bar mi 'gyur bar nam yang mi 'bad par mi bya'o zhes bya ba la sogs pa'i tshig gis so/ /de ltar gyur pa ni skyes bu dam pa'o/ / dam pa ma yin dga' mi 'gyur/ /zhes bya ba ni sdig pa byed pa rnams zhe sdang bar 'gyur te/ nye du dag 'chi ltas byung ba lta bu dang / nyi ma'i 'od zer gyis mig la gnod pa lta bu'o/ /dam pa rnams ni dga' bar byed/ /ces bya ba ni gang yang dam pa ni mkhas pa dag ste/ bdag la phan par 'dod pa de rnams ni gtams na gnang ba'i tshig smra ba'i pha rol po la bla ma bzhin du khyad par du dga' bar 'gyur te/ ston ka'i zla ba lta bu'am/ lus nad kyis gdung zhing 'dug pa la glo bur du grub pa'i sman pa nye bar 'ongs pa lta bu'o/ /'di ltar gang gi phyir dam pa dang dam pa ma yin pa yang dag par nye bar bstan pas dga' ba dang mi dga' ba yin te/ de bas na de'i phan yon dang nyes dmigs bstan pa'i phyir/ de bas mchog dang mchog min la/ /zhes bya ba smras te/ gang gi phyir mchog ma yin pa ni phan pa bstan pa la rmongs pa'i phyir mi dga' ba'o/ /mchog ni khyad par shes pa des dga' bar 'gyur te/ rgyu de'i phyir 'di las gnyi ga 'chi ba'i chos la ni bye brag med kyang pha rol tu ni khyad par dang ldan par 'gyur ba yin te/ shi 'phos bral bar gyur pa na/ /zhes bya ba smos te/ shi 'phos pa ni shi ba'o/ /de rtogs pa'i tshul gang la yod pa de nyid ni 'chi bar rjes su 'gro ba zhes bya ba'i don to/ /gnyi ga yang 'chi ba'i chos la yang bye brag med do zhes sgrub pa'i phyir dang gi sgra'o/ /ji ltar 'di dag 'chi ba la bye brag med pa de bzhin du/ ji ltar skyed par gyur pa na yang yin nam zhe na/ ma yin te smras pa/ 'di ltar/ dam pa ma yin dmyal bar 'gro/ / zhes bya ba yin te/ gang bla ma rnams kyi gdams ngag la rjes su mi 'jug pa de ni dmyal ba la sogs par skye bar 'gyur ro/ /dam pa mtho ris 'gro bar 'gyur/ /zhes bya ba la/ mtho ris ni lha'i gnas te/ der 'gro zhing rab tu gnas pa gang yin pa ste/ dam pa ni bde 'gror 'gro zhing 'byung ba zhes bya ba'i don to/ /sdug pa'i tshoms kyi rnam par 'grel pa ste lnga pa rdzogs so// //'gro ba sdug pa dang mi sdug pa yongs su spangs na ni/ tshul khrims yongs su dag par 'gyur ro zhes bstan pa'i phyir/ de'i rjes thogs la tshul khrims kyi tshoms bstan pa yin te/ sdug pa dang mi sdug pa dang lhan cig gnas pa rnams ni nam yang tshul khrims rnam par dag par mi 'dod do/ /bshad ma thag pa'i sems can dam pa yang gang zhig dang po dmigs shing gang la gnas pas dam pa rdzogs pa 'thob par 'gyur zhe na/ de'i phyir bsngags par 'gyur dang zhes bya ba la sogs pa'i tshig gi rtsom pa smras te/ tshul khrims bsrung bar bya zhes bya ba ni bde ba gsum 'thob par bya ba'i phyir/ mkhas pas tshul khrims bsrung bar bya ste/ bsngags par 'gyur ba bskyed par bya ba ni gzhan dag las chos thams cad kyis don du gnyer bas mkhas pas tshul khrims bsrung ba dang / longs spyod 'byung ba dang / lus dang bral nas bde 'gro mtho ris kyi 'jig rten gyi lha rnams su skye bar bya ba'i phyir/ tshigs su bcad pa gcig gi bar gyis gsungs so/ /tshul khrims zhes bya ba ni legs par spyod pa ste/ lus dang sems tshim par byed pas chu bsil ba dang / tsan dan la sogs pa dang 'dra'o zhes bshad do/ /de yang 'jug pa dang ldog pa'i dbye bas rnam pa gnyis te/ de la 'jug pa'i tshul khrims ni rjes su bsgrub cing spyad par bya ba'i tshul ji skad du bshad pa ste/ nang par langs nas so shing bcas te bla ma'i thad du song nas yongs su dri ba la sogs pa bya'o zhes bya ba la sogs pa'o/ /ldog pa'i tshul khrims ni gang bya ba ma yin pa las ldog par bya ba ji skad du bshad pa ste/ lham mkhan dang / rigs ngan dang / gdol ba dang / de lta bu las rab tu dbyung bar mi bya ba dang / rkun ma la sogs pa ma yin pa dang / gtses pa dang / ya mtshan can la sogs pa yang ma yin no zhes bya ba la sogs pa'o/ /bsrung bar bya zhes bya ba ni yongs su bskyang bar bya ba ste/ bdag nyid kyis byas pa'i 'bras bu nyid phul du byung bas bdag nyid dang / mngon par 'brel cing bdag nyid gang gis 'di nyid cho ga bzhin du bsrung bar bya zhe na/ mkhas pas zhes bya ba smras te/ yongs su rtogs pa'i blo yod pa ste/ rig pa dang ldan pa zhes bya ba'i don to/ /yon tan thams cad nye bar bsdu zhing yongs su bskyang ba'i rtsa ba ni/ ye shes yin la nyes pa thams cad la 'jug pa'i rtsa ba ni mi shes pa yin pas rtogs pa dang ldan pa rnams ni/ dgos pa med pa ci yang mi byed de de bas na 'dir dgos pa ni bsngags pa zhes bya ba la sogs pa bstan pa yin te/ de la bsngags par 'gyur ba zhes bya ba ni bstod par 'gyur ba'o/ /nor thob pa ni dbyig dang gser la sogs pa dngos po mchog tu gyur pa 'thob pa'o/ /sems can dang sems can ma yin pa dag gi grangs su bya ba las 'dod pas 'thob par 'gyur ba bstan pa'i phyir dang gi sgra smos so/ /pha rol zhes bya ba lus dang bral nas 'gro ba'i phyir ro/ /bde 'gro zhes bya ba ni lha'i 'gro ba'am/ mtho ris su 'gro ba ni legs par spyod pa'i 'bras bu yin pa'i phyir bde 'gror skye ba'o/ /bsngags pa dang nor thob par 'dod pa 'ba' zhig gi phyir/ tshul khrims bsrung ba ma yin gyi bde 'gror skye zhing bde ba rjes su myong bar yang 'gyur ba'i phyir dang zhes bya ba'i sgra smos so/ /dga' bar 'gyur zhes bya ba ni mgu bar 'gyur ba ste/ bde ba gsum po ni bde ba rnam pa gsum gyi rgyur gyur pa zhes bya ba'i don to/ /bsngags par 'gyur ba dang / nor thob pa dag ni bde ba'i rgyur gyur pa'i phyir bde ba zhes bya ba ste/ sangs rgyas rnams ni 'byung ba bde/ /zhes bya ba lta bu'o/ /cig shos ni 'dir bde ba nyid de/ gang yang bde ba dang / gang yid bde ba de ni bde ba'o zhes bya ba'o/ /don gnyer bas zhes bya ba ni kun du tshol te/ gang zhig ce na/ bde ba gsum mo/ /sngar smras pa'i tshigs su bcad pa don khyad par dang bcas pas gsal bar bya ba'i phyir 'phags pa dang zhes bya ba la sogs pa smos te/ gnas zhes bya ba ni yid la 'dod pa'i 'bras bu 'byor par 'gyur ba'i dngos por gnas shing mngon par 'dod par bya'o/ /'di dag mthong ba yis zhes bya ba ni sngar bshad pa'i bsngags pa la sogs pa gsum po 'di dag mthong zhing / yang dag par rtag la nges par bsam pa'i phyir/ tshul khrims yongs su bsrung ba'i phyir 'bras bu ni 'di dag yin par khong du chud pa'i phyir/ tshul khrims yongs su bsrung bar bya'o/ /mngon par 'dod par bshad pa'i bde ba'i rgyu nyid do/ /'di nyid khong du chud pa ni mkhas pa ste/ de nyid du gus pas yongs su skyong bar byed do/ /tshul khrims bsrung ba'i phyir mkhas pas zhes bya ba smras te/ thos pa dang bsam pa dang bsgom pa'i gnas la rab tu sbyor zhing 'jug pa ste/ rim pa 'dis nges par 'byed pa'i cha thos pas blo gros byang bar 'gyur ba'o/ /tshul khrims yongs su bsrungs pa'i phan yon dam pa 'jig rten las 'das pa bstan pa'i phyir 'phags pa dang zhes bya ba smras te/ mchod par bya zhing sdig pa'i sgrib pa mi sogs pas 'phags pa'i gang zag ste/ sdig pa mi spyod cing bya ba ma yin pa sdom pa thob pa'o/ /de yang tshul khrims 'di la gnas shing zhi gnas dang lhag mthong la bsgom pas mthong ba'i lam thob ste/ 'phags par gyur cing / 'bras bu de las dang nyon mongs pa'i ngan 'gro'i dogs pa dang bral ba'o/ /mthong ba phun tshogs dang zhes bya ba ni 'phags pa'i bden pa phun sum tshogs shing / yang dag par rjes su myong ba ste/ 'dis ni bden pa mthong ba zhes bya ba'i don to/ /'dis bsgom pa'i lam 'thob par bstan pa'i phyir/ 'jig rten zhes bya ba smos te/ de de lta bu'i lam gyi tshogs la lam bsgom pa'i rjes su 'jug cing / mthong ba'i chos 'di nyid la gnas pa zhes bya ba'i don to/ /zhi ba rten gyur pa'i zhes bya ba ni khams gsum gyi 'dod chags dang bral ba thob par 'gyur ba ste/ mi slob pa'i lam la mya ngan las 'das par 'gyur zhes bya ba'i don te/ lhag ma dang bcas pa dang / lhag ma med pa'i mya ngan las 'das pa de thob pas mi slob pa'i lam la gnas pa'i don te/ nye bar zhi zhing des zhi ba nyid de srid pa zad pa'i bde ba don du gnyer bas kyang / tshul khrims 'di nyid bsrung bar bya'o zhes bya ba ste/ sngar bshad pa 'ba' zhig tu ma zad kyi/ 'jig rten dang 'jig rten las 'das pa'i bde ba 'thob par 'dod pas/ de'i las skyed par byed pa'i lam tshul khrims zhes bya ba la nges par sbyar ba'i phyir 'di gsungs pa yin no/ /tshul khrims kyi sgra'i don nyid rnam par dbye ba'i phyir/ / lus la yongs su gdung med par/ /tshul khrims kyis ni bde ba 'thob/ /ces smos te/ de nas bcom ldan 'das kyis rigs kyi bu tshul khrims 'dod pa rnams la bka' stsal pa/ rigs kyi bu tshul khrims ni bde ba'o/ /tshul khrims yang dag par 'dzin pa ni bde ba'o/ /de ci'i phyir zhe na/ rigs kyi bu tshul khrims dang ldan pa rnams bde bar gnyid kyis log cing bde bar sad pa dang / nyal ba na 'di la lha rnams bsrung bar 'gyur ro/ /'di lta ste so ga'i dus su dgon pa'i nang du chud pa'i lam du zhugs pa rnams ni lus shin tu yongs su gdungs shing ngal ba rnams grib ma dang bcas shing chu mig bsil ba dang bcas pa'i shing drung du phyin pa'am/ dbul phongs gter chen po rnyed pa'am/ long bas mig gam/ mgon med pa rnams la mgon chen po'i zhes bya ba la sogs pa nas/ bde ba zhes bya ba mngon par 'dod pa'i bde ba ma lus par 'thob par byed pa ni/ tshul khrims yang dag par len pa'o zhes bya ste/ legs par spyod pa'i bya ba sngon du 'gro bar khas blangs pa'o/ /bde ba de yang ci'i phyir zhe na/ gang gi phyir 'di na tshul khrims dang ldan par gyur pa ni/ lus la yongs su gdung med par/ /zhes bya ba smos te/ tshul khrims kyis brgyan pa rnams la ni gdung ba'i rgyur gyur pa'i nyes par spyod pa mi srid pas de rgyur gyur pa'i lus kyi gdung ba mi srid de/ tshul khrims 'chal ba rnams la ni/ bdag dang gzhan la gnod pa lag pa gcod pa la sogs pa kun du ma bsdams pas/ lus kyis kun nas gdung ba rjes su myong bar 'gyur ro/ /de bas na bsil bar gyur pas na tshul khrims so zhes nges pa'i tshig tu sbyar ba ste/ tshim par byed pa zhes bya ba'i don to/ /ji skad du/ gang zhig chun 'phyang tsan dan mchog brlan dang / /chu thigs bsil ba'i char dang bcas pa'i rlung / /zla zer sgra med dgon pa ku mu da/ /gdung ba sel bar gyur pa ma yin te/ /srog 'jig tshe na kun du 'byung ba yi/ /dus mtha'i me ltar sreg cing 'jig pa dang / /tshul khrims dran na'ang rjes su sel byed de/ /gang phyir de ni tshim byed rnams kyi mchog /ces gsungs pa lta bu'o/ /mtshan mo bde bar nyal dang zhes bya ba ni mtshan mo shin tu bag phab ste/ gnyid kyis log pa ste g.yeng ba med pa'i phyir ro/ /de bas na tshul khrims yang dag par blangs pa'i khams la yang dag par brten nas tshul khrims kyi sgra'i dgod par bstan pa yin no/ /sad pa na yang dga' bar 'gyur/ /zhes bya ba ni gnyid dang bral bar gyur cing ma nyal ba'i gnas su nye bar 'tshe ba zad cing chos kyi lus la spyod la bar chad med pa'i lam la slob pas yang dag par dga' bar 'gyur zhing mgu bar gyur pa ste/ zang zing med par dga' ba nyams su myong bar 'gyur zhes pa'i don to/ /'dis ni goms pa'i don gyis tshul khrims kyi sgra rnam par 'byed pa rtogs par byed de/ gdung ba ma lus par sel bar byed pa'i tshul khrims la nges par sbyar ba'i phyir 'di gsungs pa yin no/ /sbyin pa la sogs lam gyi tshogs gzhan yongs su dag pa yang tshul khrims phun sum tshogs pa nyid yin par bstan pa'i phyir/ sbyin pa zhes bya ba la sogs pa gsungs te/ sbyin pa dang sbyin pa po dang / so sor len pa rnam par dag pa la sogs pa yod do zhes mdo las gsungs so zhes pa ni tshigs su bcad pa 'di yin no zhes sde pa gzhan dag smra ba'o/ /sbyin pa ni zas dang / skom dang / dbyig dang / rta dang / glang po che la sogs pa so sor ster ba'o/ /sbyin par bya ba ji lta bu zhe na/ tshul khrims dang ldan pa dag ces bya ba ste/ gang zhig shin tu tshul khrims dang ldan zhing gzhan dag nye bar 'tshe ba med pa dang bcas pa'i sbyin pa rnams ster zhing sbyin par byed pa'i sbyin pa dag sbyin no zhes bya ba'i don to/ /byin pa zhes bya ba ni phun sum tshogs pa'i tshul khrims dang ldan pa nyid kyis na de las gzhan pa'i zag pa med pa'i phun sum tshogs pa ni tshul khrims dang ldan par gyur pas tshul khrims dang ldan pa nyid ni sbyin pa dag byed na/ de ni nges par bde ba 'thob par 'gyur ro/ /la la ni thams cad la yang 'di ltar khyad par med par gzung bas so zhes zer te/ ji ltar dung la brten nas rlung de nyid rgyas par 'gyur te/ tshul khrims la brten pa'i sbyin pa yang de bzhin no/ /de bas na sbyin pa rnams kyi zhes bya ba tshig mang po par rigs te/ dman pa dang / bar ma dang / khyad par can gyi zhing la so sor sbyin pa de ni tshul khrims kyi dbang gis 'bras bu che bar 'gyur ro/ /bsod nams kyis zhes bya ba ni tshul khrims la sogs pa legs par spyod pa phun sum tshogs pa'o/ /gang gis 'thob ce na/ mkhas pas zhes bya ba smos te/ rgyu dang 'bras bu yang dag par 'brel pa la sogs pa nges par gyur cing gsung rab la sogs pa la rab tu byung la/ thos pa mang ba dang bcas pas mkhas pa'i stobs kyis sbyin pa dang tshul khrims la sogs pa'i tshogs rnam par sbyong bar byed do/ /ji skad du/ shes rab kyis ni mun pa ma bsal gang / /de yi tshul khrims dag par ga la 'gyur/ /phal cher tshul khrims bral ba de dag ni/ /bzod pa med pas dri mar byas par 'gyur/ /zhes gsungs pa'o/ /gzhan dag ni khyim pa dang rab tu byung ba dag gi bsod nams ni tshigs su bcad pa phyed kyis ji skad du bshad pa'o zhes zer ro/ /'di dang zhes bya ba ni yang dag par rnyed par 'gyur ba'o/ /skyes zin pa'i skye ba'o/ /pha rol zhes bya ba ni 'jig rten gzhan dag tu'o/ /rtag tu zhes bya ba ni rgyun du ste/ ci'i phyir zhe na/ rtag pa ni mya ngan las 'das pa'i bdag nyid can yin pa'i phyir ro/ /bde ba'i zhes bya ba ni phun sum tshogs pa'o/ /'thob par 'gyur ba ni yang dag par rnyed par 'gyur ba'o/ /sbyin pa la sogs pa rnam par dag pa'i 'bras bu'i khyad par 'dod pa rnams la ni thabs bstan par bya ba'i phyir 'di gsungs pa yin no/ /rgyun du lhag par mdzes pa'i rgyan ni tshul khrims yin no zhes bstan par bya ba'i phyir/ rgan pa'i bar la tshul khrims dge /zhes bya ba la sogs pa gsungs te/ lha zhig 'ongs nas bcom ldan 'das la/ rgan pa'i bar du dge ba gang / /legs pa gnas par gang zhig 'gyur/ /mi rnams kyi ni rin chen gang / /chom pos dbrog dka' gang zhig lags/ /zhes zhus pa dang / de nas rgan pa'i bar la tshul khrims dge zhes bya ba 'di gsungs te/ tshul khrims ni byis pa nas brtsams te ji srid rgas par gyur gyi bar du dge zhing bzang la rnam par mdzes pa'o zhes bya ba'i don te/ rgyan la la dag ni byis pa'i tshe mdzes kyi/ rgas par gyur pa la ni ma yin no/ /la la ni skyes pa la mdzes kyi bud med la ni ma yin gyi/ tshul khrims ni gnas skabs kun du yang thams cad la yang mdzes pa yin no/ /dad la rab tu gnas na legs/ /zhes bya ba ni sems rab tu dang ba ni dad pa ste/ legs pa rnams ster ba zhes bya ba ni nges pa'i tshig go/ /ji skad du/ dad pa ma bzhin dge ba skyed pa yin/ /zhes gsungs pa'o/ /rab tu gnas pa ni mi 'bral ba'i tshul gyis gnas pa'i rtsa ba las skyes pa zhes bya ba'i don to/ /de ni legs pa ste dad pa la rab tu gnas pa ni de kho na nyid du rab tu mdzes pa'o zhes gsungs pa'o/ /mi yi rin chen shes rab ste/ /zhes bya ba la/ shes rab ni de kho na nyid la nges pa ste/ de ni mi rnams kyi rin po che'i mchog ste/ dge slong dag 'di lta ste gser ram dbyig 'di ni cung zad tsam gyi rin po che'o/ /'di lta ste shes rab kyi rin po che ni rin po che'i mchog go zhes mdo las gsungs pa'i phyir dang / rnyed par dka' ba dang / mngon par 'dod pa'i phun sum tshogs pa'i rgyur gyur pa'i phyir ro/ /rin po che'i cig shos ni rnyed par sla zhing thun mong du gyur pa'i phyir ro/ /shes rab ni sdug bsngal gyi rgyu ma yin gyi/ phal cher na gcig tu bde ba'i rgyu ni shes rab yin te ji skad du/ rmongs pa rgud pa kun gyi rtsa/ /shes rab phun sum tshogs dang 'brel/ /de bas 'di ltar mi rnams kyis/ /zhes bya ba la sogs pa gsungs pa ste yongs su rtog pa dang ldan pa zhes bya ba'i don to/ /bsod nams chom pos dbrog par dka'/ /zhes bya ba la/ sbyin pa la sogs pa legs par spyod pa ni bsod nams te/ de rkun po rnams kyis dbrog par mi nus pa ste/ shin tu dka' bas kyang de dbrog par mi nus pa'o/ /ji skad du/ skyes pa'am ni bud med kyi/ /bsod nams rgyal po rkun po dag /g.yo zhing brtson par gyur bas kyang / /dbrog par nus pa ma yin no/ /zhes gsungs pa'i phyir ro/ /tshigs su bcad pa bsdus pa'i don ni tshul khrims kyi rgyu ni dad pa yin la/ legs par spyod pa'i rgyu ni shes rab ste/ /tshul khrims dang legs par spyod pa dag gis ni bde 'gro'i phun sum tshogs pa 'byor par 'gyur ro/ /yang na gang la shes rab yod pa de ni dad par 'gyur ro/ /gang zhig dad pa de ni tshul khrims la gnas te/ gang zhig gsum po 'di dag ni legs par spyod pa de ni bsod nams chen po yin no zhes de la nges par sbyar ba'i phyir 'di gsungs pa yin no/ /'bru thams cad sa la brten pa dang 'dra bar yon tan thams cad ni tshul khrims la gnas pa'o zhes bstan par bya ba'i phyir/ dge slong tshul khrims la gnas shing / /zhes bya ba gsungs te/ btsun pa dge slong ji lta bu yongs su nyams par mi 'gyur zhing / mya ngan las 'das pa dang nye bar blta bar bgyi/ 'di na dge slong tshul khrims dang ldan par gnas pa dang / dbang po'i sgo bsdams pa/ zas kyi tshod rig pa dang / nam gyi cha stod dang cha smad la mi nyal ba'i sbyor ba la brtson pa'o zhes gsungs pa ni tshigs su bcad pa gnyis te/ tshul khrims la zhes bya ba ni so so thar pa'i sdom pa la'o/ /gnas shing zhes bya ba ni der rab tu gnas shing yongs su ma nyams pa'i tshul gyis te/ lhag pa'i bsam pas skyong ba'o/ /dge slong pad ma can dper byas pa'i tshig gis tshul khrims kyi sdom pa gsungs nas dbang po bsdams pa bstan pa'i phyir/ dbang po rnams kyang bsdams pa zhes gsungs te/ mig la sogs pa'i dbang po'i sgo bsdams shing sbas pa ste/ yul thams cad las bsrung ba'o/ /de ma bsdams pas ni dge ba thams cad nyams par 'gyur te/ ji skad du/ mi rnams kyi ni dbang po lnga/ / dbang po gcig cing bu gar gyur/ /rgyal ba'i rkang las chu bzhin du/ /de nyid las ni shes rab 'dzag /ces bshad pa'o/ /'dir dang zhes bya ba thams cad ni bsdus pa'o/ /kyang zhes bya ba 'di ni sred pa ste/ bdag med pa bstan pa dang 'dra bar bde 'gro la sogs pa srid pa yin pa'i phyir ro/ /yang na kyang dang / dang gnyi ga yang tshig gi phrad du bsdus pa'i don to/ /zas zhes bya ba ni bza' ba dang / btung ba la sogs pa'o/ /tshod rig pa ni tshad shes pa ste/ zas lhag par zos pas ni ma zhu ba la sogs pa'i nad du 'gyur la/ nyung du zos pas ni lus nyam chung zhing spro ba dang stobs med par 'gyur te/ de bas na ji tsam na nye bar spyad par rigs pa'i tshod shes pa ste/ 'dis ni tshul khrims dang dbang po bsdoms pa nye bar bstan par 'gyur ba'i rgyu gsungs pa yin no/ /mi nyal ba la 'bad pa ste/ /zhes bya ba ni mi nyal bar byed pas na/ mi nyal ba ste lam gyi tshogs la sogs pa bsgoms pa de la brtson zhing snyoms par 'jug pa la sogs pa la mngon par sbyor ba'o zhes gsungs pa yin no/ /ji skad du/ tshul khrims tshul khrims la gnas shing / /chos gnyis po la gnas pa'i phyir/ /zhes bya ba la sogs pa rgya cher gsungs pa'o/ /de ltar gnas par zhes bya ba ni sngar bshad pa'i cho gas gnas pa'i tshul gyis gnas pa de ni de ltar gnas pa ste/ de ltar kun du spyod pa la 'bad pa'o/ /brtson pa dang zhes bya ba ni brtson 'grus rtsom pa'o/ /dus ji srid cig tu zhe na/ nyin mtshan zhes bya ba smos te/ nyin mo dang mtshan mo ni nyin mtshan no/ /de ltar 'dis ni rtag tu bya ba'i sbyor ba gsungs nas/ gus par bya ba'i sbyor ba bstan pa'i phyir/ snyom las mi byed pa zhes bya ba gsungs te/ snyom las lhod pa gang yin pa de ni snyom las te/ de rab tu dgag pa ni snyom las mi byed pa'o/ /de yang sprin med pa'i nam mkha' dang 'dra bar le lo'i rnam par rmongs shing brtson 'grus zhum pa de lta bu'i sems can gang gis bcings pa yin zhe na/ yongs su nyams par 'gyur zhes bya ba ste/ yongs su nyams pa'i chos can yang yon tan las yongs su nyams pa'i tshul gyis yongs su nyams pas snod ma yin par 'gyur na/ yongs su ma nyams pa lta smos kyang ci dgos mya ngan las 'das pa zhes bya ba ni thar pa nyid de/ 'khor ba ma yin par ro/ /de zhes bya ba ni yang dag par 'jug pa'i sbyor ba la spyod pa'o/ /nye ba'i phyir zhes bya ba ni khad nye ba'o/ /gdul bya rnams bya ba nyams su len pa la dmigs pa'i lhag ma med pa'i mya ngan las 'das pa'i dbyings su 'jug par 'gyur zhing mya ngan las 'das pa'i bde ba 'dod pa rnams la de thob pa'i rim pa bstan par bya ba'i phyir 'di gsungs pa yin no/ /sdug bsngal ma lus pa zad pa don du gnyer bas tshul khrims yongs su bsrung ba la sogs pa bya'o zhes bstan par bya ba'i phyir/ mi ni tshul khrims la gnas nas/ /zhes gsungs te/ 'phags pa srung dbang gi bu skyes pa nas brtsams te nad sna tshogs kyis gdungs pa dang / des bcom ldan 'das la btsun pa dge slong ji lta bu sdug bsngal zad pa rjes su thob par 'gyur zhes zhus pa'i don du ji srid tshigs su bcad pa gnyis gsungs so/ /tshul khrims la gnas nas zhes bya ba ni khyim yongs su spangs nas thar pa'i mchog la dmigs pa'i bsam pas so sor thar pa'i sdom pa dag yongs su 'dzin cing rjes su 'jug par byed kyi/ 'tsho ba med pa'i 'jigs pas ni ma yin te/ de'i 'bras bu ni 'khor ba yin pa'i phyir ro/ /mkhas pa zhes bya ba ni shes rab can te 'di nyid tshul khrims yongs su dag pa la gnas pa'i skal ba yod pa'i phyir ro/ /de'i rjes thogs la ci zhig bya zhe na/ sems dang shes rab bsgom pa la/ /zhes pa ste/ ting nge 'dzin dang ye shes la bslab par bya ba ste/ thub pa'i dbang po'i gsung sgrub pa snying por byed pa'o zhes gsungs pas na sgrub pa yang lam bsgoms pa las rdo rje lta bu'i ting nge 'dzin gyi ye shes kyis nyon mongs pa gsod do zhes mdo las gsungs pas sems ni 'dir ting nge 'dzin gyi rjes thogs la ting nge 'dzin rjes su srung bar byed pa'o zhes rnam par dbye'o/ /ji lta bur gnyis po de bsgom par bya zhe na/ brtson zhing zhes bya ba gsungs te/ brtson 'grus brtsams shing yon tan nye bar bsogs pa la ngal bar mi sems pa'o/ /nges gnas zhes bya ba ni 'dul ba'i nyes pa las bdag nyid rtag tu yongs su skyong bar byed pa ste/ bag yod pa zhes bya ba'i don to/ /rgyun du bya ba dang gus par bya ba'i sbyor bas zag pa rnams las sems bsrung bas na 'bras bu 'di dag gsungs so/ /dge slong gis zhes bya ba ni nyon mongs pa ma lus par zad pa'i phyir te/ 'dis na lhag ma dang bcas pa'i mya ngan las 'das pa'i dbyings su gsungs pa yin no/ /sdug bsngal zad pa thob par 'gyur/ /zhes bya ba ni lhag ma med pa'i mya ngan las 'das pa'i dbyings bsgrub pa ste/ de'i tshe nyid na sdug bsngal ma lus pa mthar thug pa yin pa'i phyir ro/ /gang gi phyir tshul khrims la sogs pa'i phan yon de nyid bstan pa ni/ de phyir rtag tu tshul khrims dang / /zhes bya ba gsungs te/ rtag tu 'di ni tshul khrims bcos ma ma yin pa dang / dum bu ma yin pa dang / rgyun mi 'chad par tshul khrims bsrungs pa'o/ /ting 'dzin rjes su srung ba dang / /zhes bya ba ni snyoms par 'jug pa yongs su skyong bar byed pa ste/ ting nge 'dzin bsgoms pa la brtson pa'i phyir ro/ /lhag mthong la ni bslab pa dang / /zhes bya ba ni de'i don du bslab cing rab tu 'jug pas shes rab la bslab par bya'o zhes pa'i don to/ /gang zhig ce na/ shes bzhin so sor dran par bya/ /zhes bya ba gsungs te/ yang dag pa'i ye shes mngon du gyur pa la 'jug pa ni dran pa yin pa'i phyir 'dis ni dbang po sdom pa bshad de/ shes bzhin dang dran pa'i rgyu las dbang po bsdams par 'gyur ro zhes gsungs pa'i phyir de bsdams pas ting nge 'dzin bsgom par 'gyur ro/ /gang de lta bu dang yang dag par ldan pa de cir 'gyur zhe na/ der ni zhes bya ba la sogs pa gsungs te/ yid 'bral zhes bya ba ni dge slong dri ma med pa zhes bya ba sngon dang phyi ma'i mtha' can gyi nye du mang po rnams kyis de'i tshe yongs su mya ngan las 'das pa nye du rnams kyis bcom ldan 'das la btsun pa 'gro ba gang lags zhes zhus pa dang / tshigs su bcad pa 'di gsungs te/ yid 'bral zhes bya ba ni las bdag gir bya ba dang / gang zag la la bdag med pa la sogs pa rtogs pas nga rgyal med cing mthong ba'i lam la sbyor bar gsungs pa'o/ /lhag ma med 'gyur te zhes bya ba ni ma rig pa dang / nga rgyal la sogs pa'i nyon mongs pa dang las dang skye ba'i 'tshe ba dang ldan pas 'dis ni bsgom pa'i lam bshad pa ste/ mi slob pa'i lam yang gsungs pa'o/ /gang gis lhag ma med par 'gyur zhe na/ kun sbyor zad byas nas zhes bya ba gsungs te/ gang gis kun du sbyor ba dgu zad par bya ba'am/ gang gis bag chags zad pa de nyid do/ /lus zhig ces bya ba ni skal ba mnyam pa'i sde ba dang bral ba'o/ /shes rab ldan pa zhes bya ba ni lhag ma dang bcas pa'i mya ngan las 'das pa thob pa ste rmongs pa rnams la 'di yod pa ni ma yin no/ /bgrang du med pa zhes bya ba ni 'gro ba rnams su bgrang bar bya ba ma yin pa'o/ /ci'i phyir zhe na/ gang gi phyir mya ngan las 'das pa zhes bya ba lhag ma med pa'i tshul la zhugs pa ste/ dge slong dag de'i rnam par shes pa ni shar phyogs su 'gro zhes nga mi smra'o zhes bya ba la sogs pa'o/ /'di ni mya ngan las 'das pa'i bde ba 'dod pa rjes su brtags pa'i rim pa nye bar brtag pa'i phyir gsungs so/ /sa'i gzhi'i rgyas par grags pa'i rgyu ni tshul khrims yin no zhes bstan pa'i phyir tshul khrims las zhes bya ba la sogs pa gsungs te/ bsgom pa rnam pa gsum ste/ tshul khrims bsgom pa dang / ting nge 'dzin bsgom pa dang / shes rab bsgom pa'o zhes gsungs pa ni tshigs su bcad pa gnyis so/ /khyim bdag la la zhig nyi ma la dad par byed pa dang / de nyi ma 'char zhing rnam par snang bar gyur pa mthong nas/ bcom ldan 'das la/ 'jig rten 'di na nyi ma ltar/ /lam mer 'bar ba su zhig mchis/ /zhes zhus pa dang / 'di gsungs pa yin no zhes gzhan dag zer ro/ /tshul khrims zhes bya ba ni/ /so sor thar pa'i sdom pa la sogs pa'o/ /ting nge 'dzin ni dge ba la sems rtse gcig pa'o/ /shes rab ni don gyi de kho na nyid nges par shes pa ste/ de dag ji skad du gsungs pa bzhin legs par bsgom pa'o/ /so so bstan par bya ba'i phyir dang zhes bya ba smos so/ /de bas na 'di gsum zhes bya ba gsungs te/ 'phags pa'i sde tshan la ni 'di dag gi bdag nyid can yin pa'i phyir phung po gsum gyi lam yang dag par bsdus pa yin no zhes gsungs pa'i phyir ro/ /rnal 'byor pa gang gis legs par bsgom pa'i 'bras bu bstan pa'i phyir/ shin tu dri med mthar phyin zhes bya ba smos te/ dri ma med pa ni 'dod chags la sogs pa'i dri ma spangs pa'i phyir ro/ /shin tu mthar phyin pa ni srid pa'i rtse mo man chad kyi nyon mongs pa rtsa ba nas 'byin pa'i phyir ro/ /gdung med ces bya ba ni nyon mongs pa spangs pas des bskyed pa'i yid kyi gdung ba dang bral ba'i phyir ro/ /yang srid zad gyur dang zhes bya ba ni skye ba'i rgyu spangs pa'i phyir yang srid par 'byung mi srid pa'i phyir ro/ /chags pa'i 'ching ba las grol zhing / /zhes bya ba ni sred pa spangs pas chags pa dang bral ba ste/ gang gi phyir srid pa'i rtsa ba ni sred pa yin pas de spangs pas na yang srid pa zad pa'o zhes bya ba'i don to/ /kar mi zhes bya ba ni nyon mongs pa can gyi tshor ba spangs pa'i phyir te/ tshor ba'i dbang gis 'dod pa rnams mngon par 'phel ba'i phyir ro/ /shes rab dang ldan pa zhes bya ba ni zad pa dang mi skye ba shes pa thob pa'o/ /ci'i phyir zhe na/ lus spangs zhes bya ba ste/ srid pa gsum gyi sgrib pa las nges par grol ba'o/ /de yang de bskyed pa'i gags su gyur pa'o/ /bdud kyi yul las 'das pa dag /ces bya ba ni bdud kyi yul las 'das nas 'chi bdag gi bdud la sogs pa dang bral ba ste/ ji skad du gang zhig rdzu 'phrul gyi rkang pa bzhi kun du bsgom zhing bsten pa ni bskal pa'am/ bskal pa las lhag par gnas par 'gyur ro zhes gsungs so/ /dpe dman pa dag bstan pa ni/ nyi ma bzhin du lam mer 'bar/ /zhes bya ba gsungs te/ sprin dang bral ba'i nam mkha'i nyi ma dang 'dra bar srid pa gsum du khyad par du 'phags shing rnam par mdzes pa'o/ /gnas ma lus par grags par 'dod pa'i thabs bstan pa'i phyir 'di gsungs so/ /nyi ma la dad pa de nyid mngon par dad par gyur nas 'di snyam du sems te/ gal te 'di ltar tshul khrims la sogs par bsgom pa ni 'bras bu che ste/ de la 'dir gang gi ba gegs su gyur pa ni gang zhig yin/ thams cad rdzogs pa ni gang yin snyam pa dang / de'i bsam pa mkhyen nas tshul khrims la sogs pa la yang dag par zhugs shing bsgom pas yongs su rdzogs par 'gyur gyi/ log par zhugs pa ni ma yin no/ /ji ltar na log par zhugs pa yin/ 'di na gang zhig ni bag med par gyur pa yin zhes gsol ba dang / bcom ldan 'das kyis dge slong zhes bya ba gsungs so/ /dge slong phyi dang nang nyid la/ /zhes bya ba ni gzugs la sogs pa'i yul la sems 'phros pa'o/ /de nyid ni re re zhing bgegs su gyur pa'i phyir ro/ /bag med ces bya ba ni bag med pa la gnas pa'o/ /rlom par byed ces bya ba ni khengs pa ste/ bdag tu rlom sems pas yon tan rnams kyi rtsa ba nas 'byin par gnas te/ dregs pas bcom pas yon tan ring mi gnas/ /zhes bya ba la sogs pa gsungs pas so/ /yang na 'dam bu mthon po dang 'dra bar nang na stong zhing mnog chung ba'o zhes bya ba ni nges pa'i tshig go/ /dge slong zhes bya ba ni rab tu byung bar gyur kyang ngo / /phyi dang nang nyid la zhes bya ba ni gzugs la sogs pa'i yul rnams la sems 'phros pa ste/ de re res kyang go rims ji lta ba bzhin du gags su gyur te/ tshul khrims la sogs pa yongs su rdzogs par mi 'gyur zhing rab kyi mthar thug par bsgrub par mi 'gyur ro/ /tshul khrims la sogs pa yongs su sbyong zhing de'i bar chad dang bral ba la sbyar ba'i phyir 'di gsungs so/ /tshul khrims gang gis dag pa dang ma dag par 'gyur zhe na/ sprin gyis khebs las zhes bya ba la sogs pa gsungs te/ yul kau shAm+bIr tshe dang ldan pa 'dun pa gnas pa na de yang dang yang du ltung ba 'byung ba dang phyir gso bar mi byed do/ /de la dge slong rnams kyis brtsad cing dris pa na/ ngas ltung ba'i rnam pa 'di ma mthong ngo zhes zer ba dang / skabs de dge slong rnams kyis bcom ldan 'das la gsol ba dang / ji srid tshigs su bcad pa gnyis gsungs so/ /sprin gyis khebs las zhes bya ba ni sprin gyis khebs pa bzhin du gang du nyes pa rnams sbed pa de nyid ni 'dir tshul khrims nyams pa'i khyad par yin par shes par bya ste/ gzhan dag mi srid pa'i phyir ro/ /de yang dran pa brjed pa las tshul khrims 'chal pa la cung zad la khyad du gsod cing gal te rnyed pa dang bkur sti rnam par gcod pa'i 'jigs pas bkab pa na nye bar spyod pa de mngon par 'bab cing gzhan dag mngon par 'phel bar 'gyur ro/ /ji ltar nam mkha' la sprin gyis khebs pa las char 'bab par 'gyur zhing / sprin dang bral zhing gnam thang ba las ni char mi 'bab po/ /de bzhin du gang gi tshe/ 'ba' zhig gi drung du so sor 'chags shing smra ba de'i tshe rgyud la 'ching bar mi 'gyur ro/ /de bas khebs pa sol cig dang / /zhes bya ba dang / gtan tshigs de bas na gzhan dag gis yongs su mi shes pa'i sgrib pa yang bshags par bya ste/ de ltar na de 'bab par mi 'gyur zhing rnam pa 'dis sdig pa sogs shing 'phel bar mi 'gyur te/ sprin gyis khebs las char 'bab cing / /zhes bya ba mi shes pa'i sgrib pas 'phags pa'i bden pa bzhi khebs shing / nyon mongs pa dang skye ba'i kun nas nyon mongs pa'i char 'bab par 'gyur gyi/ sgrib pa dang bral ba rnams ni 'di ltar mi byed do zhes gzhan dag zer ro/ /'di'i don ni tshul khrims dang 'brel pa med pas na mi rigs so zhe na/ de ni shin tu yang tshul khrims dag par rigs te/ de ltar rtag tu mthong ba dang / /zhes bya ba smos te/ yon tan nyes pa 'di dag 'dir rtogs pa'o/ /rtag tu bslab ces bya ba ni dus rtag tu yang tshul khrims la sogs pa la bslab par bya ba ste/ dge slong dag sdig pa gang yin pa dang sgrogs pa dang / dge ba rnams sbas pas gnas shing sdig pas ma bsgribs par gyis shig ces bya ba'o/ /dge slong ni bcom ldan 'das kyis bstan pa la rjes su 'jug pa ste/ de'i mtshan nyid ni tshul khrims sdom pa dang zhes bya ba gsungs te/ 'dul ba'i sde snod las gsungs pa'i spyod pa rnams la yang dag par bsdams shing / tshul khrims dang dbang po sdom pa dag dang yang dag par ldan pas bsdams pa'o/ /de'i khyad par ji lta bu bsgrub ce na/ mya ngan las 'das par 'gro ba'i lam zhes bya ste/ mya ngan las 'das par 'gro ba'i thabs so/ /myur ba kho nar zhes bya ba ni rings pa kho nar ro/ /rnam par dag ces bya ba ni bsgom pas yongs su rdzogs par bya ba ste/ lam ni bsgom par bya zhes mdo las gsungs pa'i phyir ro/ /lam bsgom pa'i thabs bstan par bya ba'i phyir 'di gsungs so/ /tshul khrims ni dri mchog rgyas pa yin no zhes bstan pa'i phyir/ me tog dri ni rdzi phyogs min mi 'gro/ /zhes bya ba la sogs pa'i tshigs su bcad pa lnga gsungs te/ de nas tshe dang ldan pa kun dga' bo gcig pu dben par song nas yang dag par gzhag pa ste/ 'di lta bu'i sems kyi yongs su rtog pa skyes pa dang / de bsal ba'i phyir dri'i rigs ni rnam pa gsum ste zhes bya ba la sogs pa rgya cher gsungs so/ /me tog dri ni zhes bya ba ni me tog gi dri yid du 'ong ba'o/ /rdzi phyogs min mi 'gro zhes bya ba ni rlung mngon par mi phyogs par mi 'gro ba'o/ /de lta na ni pa ri dza ta dang / ko bi da ra la sogs pa rnams ni rdzi phyogs ma yin par ni dpag tshad brgyar dris khyab la/ rdzi phyogs su ni dpag tshad lnga brgyar khyab bo zhes bshad na/ de ltar shing de dkar ba yin zhe na/ dgongs pa ni mi rnams kyi me tog gi dri'i dbang du mdzad pa yin pas nyes pa med do/ /rtsa ba zhes bya ba ni a ga ru la sogs pa'i dri ni rtsa ba'i dri zhes bya ba'i don to/ /rgya spos zhes bya ba ni dri 'di ni rgya spos kyi yin no zhes bya ba'o/ /tsan dan rnams kyang min zhes bya ba ni tsan dan gyi dri ste/ 'di dag gis ni dri tha mal pa bshad pa yin no/ /dam pa'i dri zhes bya ba ni tshul khrims dang rlung dang yang grags pa'i rang bzhin gyi dri'o/ /ni zhes bya ba'i sgra ni don gsal bar bya ba'i phyir rdzi phyogs ma ni mi 'gro zhes bya ba smos te/ rlung mngon par mi phyogs par yang mi 'gro ba'o/ /ci'i phyir zhe na/ gang gi phyir phyogs rnams kun du zhes bya ba ste phyogs kyi cha ma lus par ro/ /mi mchog ni spyod pa dam pa'i dri dang bcas pa'o/ /dri yis khyab ces bya ba ni tshul khrims kyi rang bzhin gyi grags pa'i dris khyab ces bya ba'i don to/ /de skad du/ dam pa sa phyogs gang na gnas gyur pa/ /ston zla dri med lta bur grags pa snang / /'jig rten gsum po dag tu'ang snang gyur phyir/ /de bas tshul khrims phyi nang bsrung bar bya/ /ci phyir phyogs rnams kun du khyab pa yi/ /tshul khrims phung po las gzhan dri yod min/ /zhes gsungs pas so/ /bla na med pa'i don 'di nyid gsal bar bya ba'i phyir/ rgya spos dang ni tsan dan dang / ut+pal dang zhes bya ba dag yin te/ ut+pal la dang bcas pa'o/ /mA li ka ni me tog gi rigs so/ /'di dag pas zhes bya ba ni sngar bshad pa'i dri'i rnam pa las zhes bya ba'i tshig gi lhag ma ste/ de rnams ni gcig tu lung du ma bstan pas bla na yod pa dang bcas pa'o/ /tshul khrims dri bsung phul du phyin/ /zhes bya ba ni tshul khrims kyi dri de ni mchog tu gtso bo yin te/ 'bras bu bde ba'i phyir dang / skyes bu dam pas bsngags pa'i phyir dang / gnyis pa med pa'i phyir ro/ /de dag kyang ci'i phyir zhe na/ chung ngu ma zhes bya ba gsungs te/ chung ngu ma tsam du yongs su gyur pa'i dri ni dman pa'o zhes bya ba'i don te/ gang gi phyir 'di nyid na sna tsam gyis nye bar longs spyod pa yin pa'i phyir zhes pa'i don to/ /chung ngu ma tsam du brjod pa'i dri 'di gang yin zhe na/ 'di ni zhes bya ba gsungs te/ rgya spos dang tsan dan la sogs pa gang yin pa'i dri de ni zhes bya ba'i don to/ /tshul khrims ldan pa'i dri bsung gang / /zhes bya ba ni gang yang dam pa rnams kyi grags pa'i dri de'i rlung gis khyab par gyur pa ni mtho ris khyab ces bya ba ste/ gnas gtsang ma'i gnas su yang khyab na 'di ni mi rnams na lta smos kyang ci dgos/ tshul khrims kyi phan yon gzhan bstan pa'i phyir/ tshul khrims rnam par dag par bya/ /zhes bya ba gsungs te/ tshul khrims rnam par dag pa 'di ni rnyog pa rnams kyi bu ga med pa la sogs pa'i khyad par dang ldan pa'o/ /tshul khrims rnam par dag pa la sogs pa'i gtso bo'i yan lag bstan par bya ba'i phyir/ bag yod par ni gnas bya zhing / /zhes bya ba gsungs te/ bag med par spyod pa rnams ni 'dis lam gyi tshogs su gyur par bshad pa'o/ /yang dag shes pas rnam grol na/ /zhes bya ba ni phyin ci ma log cing nges pa ni yang dag pa'i ye shes te/ zag pa med pa'i ye shes so/ /des rnam par grol ba ni khams gsum gyi nyon mongs pa las grol ba'o/ /de rnams ni 'di lta bu'i yon tan la brten pas/ bdud kyi lam ni rnyed mi 'gyur/ /zhes bya ba ste/ lha'i bu'i bdud kyi bgrod par de mi 'gyur ba'o/ /sngar bshad pa 'di nyid bstan par bya ba'i phyir/ 'di ni bde bar 'gro lam ste/ /zhes bya ba gsungs te/ bshad ma thag pa'i tshigs su bcad pas brjod pa ni rgyu dang 'bras bu rnam par dag pa nyid de/ tshul khrims dang bag yod pa la sogs pa dang ldan pa'i lam 'di ni bde bar 'gro ba ste mya ngan las 'das pa thob pa'i thabs so zhes bya ba'i don to/ /'di nyid kyang ci'i phyir zhe na/ gang gi phyir/ rnam par dag byed lam 'di la/ /zhes bya ba gsungs te/ khams gsum gyi bag la nyal spang ba ni rnam par dag pa ste/ de'i don gyi tshul khrims la sogs pa'i tshul ni lam ste/ de thob par byed pa yin pa'i phyir ro/ /ji ltar na 'di nyid khong du chud par bya zhe na/ gang gi phyir rab tu zhugs te zhes bya ba gsungs te/ tshul khrims rnam par sbyong ba dang / bag yod pa la gnas pa dang / lam sgom par byed pa'o/ /bsgoms nas kyang zhes bya ba ni bsgom pa'i ngang tshul can te/ 'di ltar zhi gnas dang lhag mthong bsgom pa la brtson pa'o/ /de yang / shes rab med la bsgom pa med/ /shes rab dag ni bsgoms las 'byung / /zhes lung las gsungs pas so/ /bdud kyi 'ching ba ni bdud kyi zhags pa ste/ de yongs su spangs pa ste/ 'chi ba'i chos can nye bar gdung ba'i bag la nyal ni bdud de/ de nyid ni 'ching ba'o/ /de spang ba ni yongs su 'dor ba ste/ bdud kyi 'ching ba dor bar bya/ /zhes bya bar sbyar ro/ /bdud kyi 'ching ba las rnam par grol ba'i thabs bstan pa'i phyir 'di gsungs pa yin par shes par bya'o/ /tshul khrims kyi tshoms te drug pa'i rnam par 'grel pa rdzogs so// //tshul khrims kyi ngo bo nyid rab tu bstan pa'i phyir ram/ de'i rnam grangs bstan par bya ba'i phyir/ legs par spyod pa'i tshoms bstan par bya ste/ lus kyis nyes par spyod spang zhing / /zhes bya ba la sogs pa gsungs pa ste/ mnyan du yod pa na dge slong gsum zhig lhan cig gnas pa las gcig cig lus kyis nyes par spyod pa'i kha na ma tho ba chen po dang bcas par gnas la/ gzhan dag kyang ngag dang yid kyis nyes par spyod pa dag la gnas te/ de'i dbang du mdzad nas tshigs su bcad pa gsum gsungs pa yin no/ /gang gis shin tu nyes par gyur pa ni nyes par spyod pa ste/ dri mar byed pa'i rgyur gyur pa ni nyes par spyod pa'o zhes bya ba'i don to/ /de las gzhan pas ni lus nye bar bcom zhing nyes par spyod pa ma yin no/ /de la nye bar gzung ba'i las kyi lam yang dag par blangs pas nyes par spyod pa yin pa'am/ lus kyi bdag nyid can yin nam/ lus rgyur gyur pa'i nyes par spyod pa ni lus kyis nyes par spyod pa'i rnam par rig byed ma yin pa'i gzugs te/ de spang zhing de bzlog pa'i phyir 'bad pas rjes su mnos shig pa'o/ / ldog par byed pa'i tshul gyis legs par spyod pa'i tshul gyi rang bzhin smras nas/ 'jug pa'i bdag nyid bstan pa'i phyir/ lus kyis legs spyad spyad pa'i phyir/ /zhes bya ba gsungs te/ lus kyi sdom pa dang yang dag par ldan par 'gyur ba'o/ /sngar gyi tshigs su bcad pa phyed rnam par dbye ba'i phyir/ lus kyi nyes chen las bsrungs na/ /zhes bya ba la sogs pa gsungs te/ de bzhin du ngag dang yid kyi tshigs su bcad pa dag la yang ci rigs par brjod par bya'o/ /lus kyis nyes par spyod spang zhing / /zhes bya ba ni dge slong lhan cig gnas pa gsum po de nyid kyis chos kyi rnam grangs 'di thos pas yang dag pa'i 'du shes skyes te/ bcom ldan 'das la 'di skad ces gsol to/ /de bzhin du mdor bsdus nas btsun pa bdag cag gis chos kyi rnam grangs 'di thos pas yun ring po'i don du 'gyur ro zhes bya ba nas ji srid tshigs su bcad pa gsum gsungs so/ /lus kyis nyes par spyod pa zhes bya ba ni srog gcod pa la sogs pa rnam pa gsum po sbyor ba dang mjug dang bcas pa'o/ /spang ba ni dor ba'o/ /ngag gis nyes par spyod pa zhes bya ba ni brdzun du smra ba la sogs pa ngag gi nyes par spyod pa bzhi'o/ /yid kyis nyes par spyod pa zhes bya ba ni brnab sems la sogs pa rnam pa gsum mo/ /gang gzhan zhes bya ba ni gang yang las kyi lam gzhan dag gis bsdus pa'i nyes par spyod pa de dag kyang spang bar bya'o/ /ci'i phyir zhe na/ gang gi phyir skyon ldan zhes bya ba ste/ nyon mongs pa dang 'brel cing nyon mongs pa slong ba nyid dang 'bras bu mi sdug pa nyid kyi phyir ro/ /de dag spangs nas ci zhig bya zhe na/ lus kyis dge ba rnams bya zhing / /zhes bya ba la sogs pa gsungs te/ lus kyis srog gcod pa spangs pa la sogs pa rang bzhin can gyi legs par spyod par bya ba'o/ /ngag gis dge ba phal cher bya/ /zhes bya ba ni ngag gi legs par spyod pa rnam pa bzhi yod pas phal cher ba ste de bya ba'o/ /yid kyis ji tsam dang ji lta bu'i dge ba bya zhe na/ tshad med bzhi dang bral mi bya/ /zhes bya ba gsungs te/ sems can tshad med pa la dmigs pa'i phyir tshad med pa ste/ lus la sogs pa'i legs par spyod pa ni so sor nges pa'i gang zag la dmigs pas na tshad yod pa'i phyir ro/ /bzhi dang bral ba ni 'tshe ba dang bral ba ste/ mya ngan las 'das pa'i dbyings su gyur pa'o/ /lhag pa'i bsam pas de ltar spyod pa'i phan yon bstan pa'i phyir/ lus kyis dge ba rnams bya zhing / /zhes bya ba la sogs pa gsungs te/ de'i don ni bshad zin to/ /'di dang zhes bya ba ni mthong ba'i chos la myong bar 'gyur ba'o/ /pha rol dag tu yang zhes bya ba ni 'jig rten pha rol du skyes nas myong bar 'gyur ba la sogs pa'i bde ba 'dis 'thob pa'o/ /rtag tu bde ba zhes bya ba ni 'di'i sred pa zad pa'i bde ba ni rtag pa yin pa'i phyir te/ gang rgyu rtag pa dang mngon par ldan pa de ni dag pa'i 'bras bu 'thob bo zhes bya ba'i tshul gyis te/ dge slong dag de nas de'i rjes su 'brang bas de khyad par du 'thob par 'gyur ba'o zhes bya ba'o/ /gang zhig lus la sogs pa'i nyes par spyod pa spang bar nus shing legs par spyod pa la rjes su gnas shing 'gyur ba gang yin pa de ni 'tshe ba med pa nyid du bstan pa'i phyir/ rtag tu lus ni zhes bya ba la sogs pa gsungs te/ de nas mchod sbyin 'dod ces bya ba'i bram ze zhig bcom ldan 'das gang na ba der song ste/ ji tsam na btsun pa bdag ni 'tshe ba med pa'i mchod sbyin bgyid de/ de ci'i slad du zhe na/ gang yang mchod sbyin la ba glang dang / ma he dang ma he mo la sogs pa ji srid 'di dag thams cad bsad pas bde 'gror 'gro'o zhes bya ba de la bdag glo ba mi ches te/ chos ni mi 'tshe ba'i mtshan nyid can zhes bgyi ba lags so zhes gsol pa dang / de nas tshigs su bcad pa bzhi gsungs so/ /gzhan dag ni dge slong shin tu zin cing des pa bzhi bcu po ni gang la yang 'tshe bar mi byed la/ drug sde 'di ni rtag tu gzhan la 'tshe bar byed pas de la bstan pa yin no zhes zer ro/ /rtag tu lus ni bsdams pa'i phyir/ /zhes bya ba ni rgyun du so sor thar pa dang / bsam gtan dang / zag pa med pa'i sdom pas bsdams pa'i lus dang ldan pa'i phyir ro/ /thub pa zhes bya ba ni 'dod chags dang bral ba rnams so/ /'tshe ba med pa yin zhes bya ba ni mi 'tshe bas na 'tshe ba med pa ste/ dbyig pa dang mtshon cha la sogs pas gzhan la mi 'tshe ba zhes bya ba'i don te/ 'dis ni phyi rol gyi 'tshe ba dang / de'i rgyu dang bral ba'o/ /de'i 'bras bu ni/ de ni 'chi med gnas 'gro zhing / /zhes bya ba gsungs te/ de 'chi ba med pa'i gnas zhes bya ba mi 'chi ba'i gnas so/ /'gro zhing zhes bya ba ni thob pa ste mya ngan las 'das pa zhes bya ba'i don to/ /'bras bu de'i phan yon bstan par bya ba'i phyir/ gang du song na mya ngan med/ /ces bya ba gsungs te/ gang du zhes bya ba ni gnas so/ /song ba zhes bya ba ni 'das par gyur pa ste/ yang kun nas gdung ba'i mya ngan rjes su myong bar mi 'gyur te/ 'tshe ba thams cad shin tu spangs pa'i phyir ro/ /ngag dang yid la yang de bzhin brjod par bya'o/ /legs par spyod pa'i mtshan nyid thub pa 'ba' zhig gi ma yin gyi/ brtan pa rnams kyi mtshan nyid kyang de yin te de nyid bstan pa'i phyir/ brtan pa rnams kyi lus bsdam zhing / /zhes bya ba la sogs pa gsungs te/ brtan pa zhes bya ba ni mkhas pa ste/ de nyid ni lus kyis ma chags pa la brten pa'o/ /ngag ces bya ba ni tshig go /kun du bsdam byas na zhes bya ba ni gang yang re re zhig sdom pa de ni brtan pa yin la/ gang gnyis sdom pa de ni shin du brtan pa ni gtsug gi nor bu'o/ /de dag 'gro bar 'gyur ba ni rim pa ji lta ba bzhin du nyan thos dang rang sangs rgyas su gyur cing dam pa'i thar pa'i grong khyer du 'jug par 'gyur te/ chung ngu dang 'bring dang chen po'i tshogs la gnas pa'i phyir ro/ /gang thub pa dang brtan pa de'i mtshan nyid dang / sdom pa bshad nas de ji lta bu yin zhe na/ lus kyi sdom pa zhes bya ba la sogs pa gsungs te/ yang dag par rdzogs pa'i sangs rgyas shAkya thub pa'i nyan thos rnams nyon mongs pa la 'dun cing sdig pa rnams nye bar stsogs te dge ba'i bya ba rnams la ni shin tu brtson pas mi 'jug ste/ dge ba'i phyogs cung zad tsam gyis mgu bar 'gyur bas na de'i dbang du mdzad de/ bcom ldan 'das kyis so sor thar pa'i tshigs su bcad pa gsum gsungs te/ de la/ sdig pa thams cad mi bya ste/ /zhes bya ba'i don de dang 'brel pas sdig pa'i tshoms su bshad de/ gnyis pa ni 'dir bshad do/ /gzhan dag ni dge slong lnga las brtsams pa yin no zhes zer ro/ /lus kyi sdom pa zhes bya ba ni bsdams pa'o/ /legs pa ste zhes bya ba ni bsngags pa ste/ tshe 'dir grags pa'i 'bras bu nyid dang / pha rol du mngon par 'dod par smin pa'i 'bras bu nyid dang / bral ba'i 'bras bu nyid kyis na legs pa ste/ gang 'di lus kyi sdom pa de ni legs pa'i dngos por shes par bya'o zhes pa'o/ /thams cad du ni sdom pa legs/ /zhes bya ba yang ci'i phyir zhe na/ kun du bsdams pa'i dge slong ni/ /zhes bya ba la sogs pa gsungs te/ gang gi phyir gang la la lus la sogs pa kun du bsdams pas gnas pa de ni bar chad med par lam bsgoms pa'i stobs kyis myur du nyon mongs pa zhi bar 'gyur te/ de med cing bcom pas na dge slong ste/ lhag ma dang bcas pa'i mya ngan las 'das pa thob nas lhag ma med pa'i mya ngan las 'das pa'i dbyings thob ste/ sdug bsngal thams cad las rab tu grol zhing sdug bsngal ma lus pa las bskal ba'i phyir ro/ /sdom pa dang ni lam du 'brel la/ de dang 'brel pas sdug bsngal thams cad grol bar 'gyur ro zhes bstan pa'i phyir/ ngag rnams bsrung zhing zhes bya ba la sogs pa gsungs te/ ngag rjes su bsrung ba'i ngang tshul can 'di ni ngag gi sdom pas bsdams pa zhes bya ba'i don te/ ngag rjes su bsrung ba'o/ /de yang bsdam pa'i sgra'i don nam/ nges par brtags te mi dge ba mi bya ba ste/ mi dge ba de las ldog pa'i tshul can ni sdom pa'o/ /ci ldog pa tsam gyis lam la gnas sam ma yin zhe na/ las lam gsum po 'di dag rnam sbyangs na/ /zhes bya ba gsungs te/ sngar bshad pa'i lus la sogs pa'i las kyi dge ba la sogs pa'i lam gyi tshogs la bslab pas dri ma med par bya ba ste/ gsum po de las gzhan pa'i las kyi lam mi srid par bstan pa yin no/ /drang srong gsungs pa'i zhes bya ba ni sangs rgyas kyi bstan pa 'phags pa'i lam zhes bya ba'i don de ni de'i gcig pur gyur pa ste/ de yang dge slong gang dag 'phags pa'i shes rab kyis spang bar bya'o zhes mdo las gsungs pas so/ /lam ni 'thob par 'gyur zhes bya ba nyon mongs pa'i gnyen po kun du bsgrub par gyur pa'o/ /legs par spyad pa'i tshoms te bdun pa'i rnam par 'grel pa rdzogs so// //tshul khrims kyi tshoms su lus la sogs pa'i nyes par spyod pa las ldog pa'i bsngags pa spyir bstan na de ci thams cad la kun du ldog par bya ba yin nam zhe na/ ma yin te smras pa/ de lta mod kyi khyad par du ngag gis nyes par spyod pa yin pas 'di ltar de tsam gyis dge 'dun gyi 'khor lo'i dbyen byas pa las ltung ba thob par 'gyur ba'i phyir te/ des na de nyid smras pa/ gang dag byas bzhin ma byas zhes bya ba la sogs pa'o/ /mnyan yod na mu stegs can gzhan gyis bskul te/ tsan tsa zhes bya ba'i bram ze'i bu mo shin tu yid du 'ong zhing blta na sdug pa zhig gzhong pa dku'i phyogs su bcings te/ bcom ldan 'das 'khor mang po'i nang du chos ston pa'i thad du 'ongs te smras pa/ skad shin tu chags pa dang yid du 'ong zhing snyan pas bdag sbrum par byas so zhes byas te/ da khyod kyis chos shod cig ces smras so/ /bcom ldan 'das kyis/ brdzun du smra ba dmyal bar 'gro bar 'gyur/ /zhes bka' stsal to/ /des gsol ba yang gang zhig byas nas mi smra ba de cir 'gyur zhes pa dang / bcom ldan 'das kyis/ gang dag byas bzhin ma byas zer ba dang / /zhes bya ba la sogs pa bka' stsal to/ /de'i 'og tu brgya byin gyis byi ba zhig tu sprul te/ des gzhong pa bcings pa'i skud pa bcad nas skye bo'i tshogs chen po'i mngon sum du ltung bar byas so/ /de yang sa gas pa'i nang du zhugs te/ mnar med pa'i dmyal ba'i me rab tu 'bar zhing drag pa'i nang du song ngo / /brdzun zhes bya ba ni ma yin bzhin du smra ba ste/ med pa'i skyon brjod pa zhes bya ba'i don to/ /dmyal bar 'gro bar 'gyur zhes bya ba las kyi zhing gi gnas ji lta ba bzhin du yang sos la sogs par 'grub par 'gyur ro/ /gang dag byas bzhin ma byas zer ba dang / /zhes bya ba ni gang yang sdig pa byas nas rnam par sbed par byed pa gzhan gyis dris na yang de tshogs kyi nang du shes shing dran par gyur kyang mi brjod de/ bdag gis ni de ltar ma byas so zhes smra ba'o/ /de yang dmyal bar 'gro bar 'gyur ro zhes bya ba ni dang gi sgra'o/ /ci'i phyir gnyi ga yang dmyal bar 'gro bar 'gyur zhe na/ smras pa/ gnyi ga zhes bya ba ste/ gang dag bdag nyid bzhin la tshig ngan pa brjod pa ste/ gang yang mi rigs pa'i tshig smra ba dang / de ltar bdag ni byed pa ma yin no zhes smra ba 'di gnyi ga ste/ 'di ltar dman pa'i chos zhes bya ba de 'dir blta bar bya'o/ /song nas zhes bya ba ni 'jig rten 'di nas shi 'phos nas 'jig rten gzhan du 'gro ba'o/ /'dra bar zhes bya ba ni mnyam par dmyal ba la sogs par skye bar 'gyur ba'o/ / ci zhig yin zhe na/ smras pa/ dman pa'i chos zhes bya ba yin te/ gang gi phyir 'di ltar smad par bya ba spyad cing / ngan pa'i las brdzun du smra ba byas pas so zhes dgongs so/ /mi de zhes bya ba ni sems can no/ /gang du de ltar rjes su 'gro ba yin zhe na/ smras pa/ pha rol tu phyin zhes bya ba mkhas pa rnams la ste/ de dag ni skye ba thams cad kyi gtso bor gyur pa zhes bya ba'i don to/ /yang na ci mthong ba'i chos nyid la dman pa'i rjes su brjod par bya ba'am zhe na/ ma yin te/ smras pa/ 'on kyang pha rol du zhes bya ba 'jig rten pha rol gyi ched du 'di ltar ngan par spyod pa byas par gyur na yang skye bo'i tshogs chen po'i nang du mi ston pas des legs par spyod pa yin no zhes 'jig rten du bsngags par 'gyur gyi/ 'jig rten pha rol du ni ma yin te/ spyod pa dang mthun pa nyid du der 'bras bur 'byung ba yin pa'i phyir song nas zhes bya ba dang 'dir sbyar bar bya ste/ 'di nas song nas 'jig rten pha rol du zhes bya ba'i don to/ /tshig gi rten lce de yang dag gis nyes par spyod pa'i rgyur gyur ba yin pas smad pa yin te/ ci'i phyir zhe na/ skyes bu skyes pa'i kha nas ni/ /zhes bya ba la sogs pa smos so/ /ko ka li ka zhes bya ba'i dge slong lha sbyin gyi tshogs pa yon tan yang dag par blangs pa la sogs pa spong bar byed cing 'od ma'i tshal na gnas te/ 'od ma'i tshal de'i bram ze dang khyim bdag dad pa rnams ma dad par byed cing 'dug go/ /ji tsam na der shA ri'i bu dang maud gal gyi bu gnyis 'ongs par gyur to/ /de gnyis kyis 'di ltar yi dam bcas te/ nyin re zhing sems can gcig ngan song las ma phyung bar bdag cag gis zan mi bza'o zhes rgya cher te/ des lung phog pa'i mthus gzhan zhig lha'i 'jig rten du skyes te/ de rdzu 'phrul gyis 'od ma'i tshal du 'ongs nas smras pa/ ji ltar nyan thos chen po 'di gnyis la bsnyen bkur mi byed ces dad pa skyed do/ /de nas de dag khros te/ ko ka li ka la ji ltar khyod kyis don 'di lta bu bdag la ma brjod ces smras so/ /de phrag dog gis rab tu gdungs te de gnyis kyi skyon tshol ba mchog tu byed par gyur pa dang / ji tsam na phug cig tu de gnyis bsam gtan gyi phyir zhugs par gyur to/ /skyes bu gnyis shig dang bud med gcig kyang ston ka'i char 'bab pas nyen te/ de nyid du zhugs so/ /skyes bu gnyis ni sngar song la bud med ni phyis byung bas skyes bu de gnyis kyis nye bar longs spyod pa'i mtshan ma mthong nas/ ko ka li kas 'phags pa de gnyis la sdig pa byed pa yin no zhes tshig ngan pa smras so/ /bcom ldan 'das kyis bka' stsal ba/ ko ka li ka shA ri'i bu maud gal gyi bu gnyis la ni mngon par ma dad pa ma bskyed cig /de dag ni nye ba na gnas pa yin la/ de gnyis ni des shing tshangs pa mtshungs par spyod pa yin te/ yun ring por gnod par 'gyur ro zhes gsungs so/ /'di ltar yang bcom ldan 'das kyis bdag la dad par byas pa dang / yid ches par byas kyang bcom ldan 'das kyis bdag la sdig pa 'dod pa yin no zhes smras so zhes zer ro/ /de ma thag tu yungs kar tsam dang mon sran sde'u tsam dang / sran ma tsam dang / rgya shug gi tshi gu tsam dang / bil 'bras bu tsam dang ga pid ta tsam gyi 'brum bu rnams kyis lus la khyab par gyur nas ji tsam na dmyal ba pad+ma chen po ltar gas par skyes te/ de'i phyir tshigs su bcad pa gsum gsungs so/ /'dir kha cig ni de ltar dge slong ar gi ka zhes bya ba dus ji lta ba bzhin du 'ongs te/ bcom ldan 'das la gnod sems shin tu drag po skyed par gyur to/ /bcom ldan 'das kyis kyang de nyi ma bdun la shi 'phos nas dmyal bar skye bar 'gyur ro zhes lung bstan to/ /rgyal po gsal rgyal gyis kyang thos te rang gi yul nas spyugs so/ /de ltar grong khyer chen po drug dang / shing drung la sogs par de'i lha rnams dang / wa rnams kyis kyang gnas rnyed pa yin na bdag gis ni 'dzam bu'i gling du skabs ma rnyed do zhes khrag dron por skyugs te mnar med par skyes pa de'i dbang du mdzad nas 'di gsungs so/ /skyes bu'i skyes pa'i zhes bya ba ni sems med pa dang ma skyes pa rnams la ni las kyis 'phags pa la sogs pa mi srid pa'i phyir te/ da ltar 'byung ba'i 'bras bu lnga len pa yin no zhes lung las 'byung ba'i phyir ro/ /sta re ni shing la sogs pa gcod pa'i cha byad de/ de dang chos mthun pa yin pa'i phyir lce la de skad ces brjod do/ /kha nas skyes gyur nas zhes bya ba ni sdig pa byed pa kha las skyes pa yin no/ /ji ltar zhe na/ lce sta re lta bu las gang zhig bdag nyid gcod par byed par 'gyur ba'i tshig ces bya ba tshig gang zhig gi gnas su gyur pa ni lce yin la/ des 'di ltar bdag nyid 'jig par byed pa yin te/ shing mkhan gyis shing la sta res bya ba byed pa bzhin no/ /des na de sta re yin no/ /bdag nyid gcod par byed pa de gang yin zhe na/ smras pa/ ngan pa smra byed pa zhes bya ba yin te/ brjod par bya ba ma yin pa smra zhing ngag ma bsdams pa zhes bya ba'i don to/ /de gang yin zhe na/ ngan par smra bar byed pa'i ngo bo nyid smras pa/ gang zhig smad 'os skye bo stod byed dang / /zhes bya ba la sogs pa ste/ gang la la zhig smad par rigs pa'i skye bo de ni bstod cing bstod par 'os pa'i skye bo ni rnam par smad par byed pa ste/ yon tan thams cad dang ldan pa'i phyir bstod par 'os pa'i sems can/ 'phags pa shA ri'i bu la sogs pa smod pa'o/ /'di dag ni ngan pa smra bar byed pa ste/ de skad smra ba'i gang zag ni tshig ngan pa smra bar 'gyur ro/ /de ni kha yis 'thab krol kun stsogs shing / /zhes bya ba la/ kha la de gnas pa yin par ston te/ gnas kyis gnas pa ston pa'i phyir grong can 'ongs pa la grong can 'ongs zhes bya ba lta bu'o/ /gang zhig ngan par smra bar byed pa de ni kha yis 'thab krol te/ ngag gis nyes par spyod pa'i bdag nyid gnod pa kun du bsogs par 'gyur zhing 'thab krol can gang gi rgyu des ni 'di dang phyi ma gnyi gar bde ba'am 'dod pa'i 'bras bu rjes su myong bar mi 'gyur ro/ / gzhan yang 'thab krol ni gnod pa byed pa nyid de/ de la 'di zhes ci'i phyir ma smos she na/ smras pa/ 'thab krol de ni cung zad tsam du zad/ /ces bya ba 'di'o/ /'di ni cung zad tsam du zad de/ 'di ltar 'di'i gnod pa gang yin zhe na/ smras pa/ gang 'dir cho los rang nor pham byed pa/ /zhes bya ba yin te/ 'thab krol gang zhig 'jig rten 'dir rgyan po la sogs pa 'jab bu'i mis rang gi nor te dbyig la sogs pa las pham pa dang / 'jig pa dang / nyams par byed pa'o/ /yang na gang zhes bya ba ni gang zag ste dngos po gang gis rang gi nor khyad par can 'jig pa'i mtshan nyid ni 'thab krol gyis sgrub par byed kyang 'di ni nyes pa cung zad tsam du zad de/ tshe 'di'i 'byor pa phun sum tshogs pa tsam 'jig pa'i phyir ro/ /de 'dir 'thab krol shin tu chen po yin/ /zhes bya ba ni 'di nyid ni tshe 'dir yang 'thab krol shin tu chen po yin te/ su zhig ce na/ gang zhig bde bar gshegs la yid 'khrugs pa/ /zhes bya ba ste/ skyon med pa'i dam pa rnams la sems rab tu 'khrugs par byed pa ste/ yid tsam 'khrugs pas kyang de lta bu yin no/ ngag gis 'khrugs par byed pa lta smos kyang ci dgos te/ skye ba du ma dag tu bde ba'i khyad par nyams pa'i phyir dang / shin tu mi bzad pa'i sdug bsngal 'thob pa'i phyir ro/ /gang dam pa rnams la yid 'khrugs par byed cing 'phya bar byed pa de ni dmyal ba gang dang gang du dus ji tsam gnas par 'gyur zhe na/ de'i phyir ngag yid 'phags pas zhes bya ba la sogs pa'o/ /dmyal ba 'di dag gi lo dang tshe'i tshad rnam par phye bar bcom ldan 'das kyis kyang dpe tsam du gsungs te/ dge slong dag 'di lta ste/ yul ma ga d+hA'i khal nyi shu shong ba'i rdzang til gyis bkang ste kha bcings pa las/ de nas la la zhig gis lo brgya brgya zhing til gyi 'bru re re phyung bas ni dge slong dag myur ba nyid du yul ma ga d+hA'i til gyi rdzang khal nyi shu shong ba de rim gyis yongs su zad cing med par 'gyur gyi/ chu bur can du skyes pa'i sems can gyi tshe'i tshad ni de ltar mthar thug par 'gyur ro zhes nga mi smra'o/ /dge slong dag 'di ltar rdzang khal nyi shu'i tshad ni chu bur can gyi yin te/ de gcig tu brtsis pa'i nyi shu 'gyur ni chu bur rdol ba'i yin no/ /de bzhin du pad ma ltar gas pa'i tshe gcig tu brtsis pa'i nyi shu 'gyur ni pad ma ltar gas pa chen po'i yin no/ /de las rdzang gcig ni chu bur can gyi tshad do/ /rdzang nyi shu ni chu bur rdol ba'i'o/ /rdzang de bzhi brgya ni so thams thams kyi'o/ /rdzang de stong phrag brgyad cu ni a chu zer ba'i'o/ /rdzang de 'bum phrag drug khri ni kyi hud zer ba'i'o/ /de 'bum phrag drug cu rtsa gnyis ni ut+pal ltar gas pa'i'o/ /rdzang de bye ba phrag drug dang 'bum phrag bzhi bcu ni pad ma ltar gas pa'i'o/ /rdzang de bye ba phrag brgya nyi shu rtsa brgyad ni pad ma ltar gas pa chen po'i yin no zhes bgrang ba'o/ /tsha ba'i dmyal ba rnams kyi tshe'i tshad kyang de dang mnyam pa yin te/ grang ba'i dmyal ba rnams la skyo ba bskyed pa'i phyir gdul bya rnams la de ltar dper brjod pa yin no zhes gzhan dag zer ro/ /'brum bu phra mos bar mtshams med par lus la khyab pa'i phyir chu bur rdol ba'o/ /'brum bu phra mo bar bar du skyes pa'i phyir chu bur can no/ /dus dang grangs dang lus rnam par gnas pa la skyes pa'i chu bur can la sogs pa go rims bzhin du gnyis dang gsum dang gsum mo/ /chu bur can dang / chu bur rdol ba ni dus dang grangs kyi khyad par gyis rab tu grags pa'i lo bye ba'i tshe tshad yod pa de ni chu bur can no/ /gang dag la bye ba phrag bcu yod pa de ni chu bur rdol ba'o/ /de dag las chu bur rdol ba'i stong phrag brgya ste/ 'bum gyi grangs kyi dus kyi bar du ni 'phags pas smad pa'i sdig pa bsten na dmyal ba 'dir 'gro bar 'gyur ro zhes sbyar bar bya'o/ /bye bar chu bur can dang zhes bya ba ni dus de srid kyi bar du pad ma chen po ltar gas pa'i sems can nyid gnas pa yin te/ shin tu tshe ring por dus de srid kyi bar du ko ka li ka gnas pas des na de nyid dbye ba yin no/ /gang zhes bya ba ni dmyal ba'o/ /'phags pas smad pa ni dam pa rnams kyis so/ /'gro bar 'gyur zhes bya ba ni 'jug pa'o/ /ci zhig byas nas 'gro ba yin zhe na/ ngag yid ces bya ba smos te/ sdig pa can gyi tshig dang sdig pa can gyi yid do/ /bsten pa ni 'jug pa'o/ /smad pa bsten pa na ni dmyal bar 'gro bar 'gyur te/ de la 'di tsam du gnas par 'gyur zhes bya ba ni bsdus pa'i don to/ / ngag gis nyes par spyod pa'i mi 'dod pa'i 'bras bu ma shes pa dag la de'i 'bras bu bstan pas de las bzlog par bya ba'i phyir 'di gsungs so/ /dam pa rnams ni bden pa ma yin pas tshig ngan pa brjod kyang mi 'gyur ba yin no zhes bstan pa'i phyir smras pa/ sdig pa'i sems kyis zhes bya ba la sogs pa'o/ /mdza' bo dang sa las skyes zhes bya ba'i dge slong de gnyis dang tshe dang ldan pa gyad bu nor tshe rabs su khon zhugs par gyur pas de gnyis kyis tshig ngan pa smras te/ 'di lta ste/ gyad bu nor bdag cag gis dge slong ma ut+pa la'i mdog dang mi tshangs par spyod pa mthong ngo zhes bya ba la sogs pa smras te/ de'i dbang du mdzad nas/ sdig pa'i sems kyis ma nyes skyon brjod pa/ /zhes bya ba la sogs pa 'di gsungs so/ /ma nyes pa ni mi bden pa'o/ /skyon brjod pa ni tshig ngan pas sun par byed pa'o/ /gang gis she na/ sdig pa'i sems kyis zhes bya ba ste/ nyon mongs pa'i yid kyis so/ /sems kyi skyon dang bral zhing skyon spangs pa'i 'phags pa rnams ni skyon brjod par mi rung ngo / /skyon brjod pas ci zhig tu 'gyur zhe na/ bdag nyid gsad phyir dmyal ba spel bar zad/ /ces bya ba smos te/ bdag nyid bcom pa'i phyir dmyal ba'i 'gro bar dor bar byed de/ rnam par smin pa'i 'bras bu nye bar len cing shin tu mi bzad pa'i tshor ba myong ba yin te/ gang dag mthong ba'i chos nyid kyi yul gyi ro la dmigs shing mthong la/ ma 'ongs pa'i sdug bsngal chen po'i rgyun ni ma yin pa'o/ /gang mkhas pa dag ni gzhan gyis gnod pa byas kyang mi 'gyur te/ ci'i phyir zhe na/ 'di ltar stobs ldan nyes med ces bya ba ni 'di'i so sor brtags pa'i stobs zhes bya ba'i don to/ /bzod par byed pa ni mi bzod pa med pa'o/ /de la zhes bya ba ni skyon brjod pa de thos kyang ngo / /'di ji ltar shes par bya zhe na/ sems kyang 'khrugs par mi byed do/ /zhes bya ba smos te/ sems rnyog par ma byas pa yin no/ /rigs pa ni dam pa rnams kyi gzhung lugs kyi rjes su 'brang ba ste/ dam pa rnams kyi gzhung rjes su bsrungs pas rnyog pa med pa'o/ /ji skad du/ dam pa rnams ni 'ching gyur kyang / / sems ni 'khrugs par mi 'dod de/ /srog gi phyir yang mi 'khrugs pa/ /de bas mkhas pa 'dod mi byed/ /ces bshad do/ /sems kyang 'bad pas 'khrugs par mi byed do zhes kha cig brjod de/ skye bo dam pa rnams ni nam yang 'khrugs pa dang bcas pa mi byed do zhes bya ba ni 'di'i don to/ /dam pa dang dam pa ma yin pa'i khyad par bstan pa'i phyir 'di gsungs so/ /gang gi phyir 'di la yon tan la smod par byed pa ni mi 'dod pa'i 'bras bu'i khyad par du 'gyur ba yin no zhes bstan pa'i phyir smras pa/ bsam brlag gang zhig ces bya ba la sogs pa'o/ /lha sbyin gyis bcom ldan 'das kyis bstan pa'i lam spangs te/ bslab pa'i gzhi lnga po 'di dag ni don dam pa thob par byed pa yin no zhes ston te/ 'di ltar 'o ma btung bar mi bya ste/ gang gi rgyus be'u la gnod pa'i phyir ro/ /sha bza' bar mi bya ste/ sems can la gnod pa'i las 'byung ba'i phyir ro/ /kha tshar gcad par mi bya ste/ thags mkhan gyi skyes bu byed pa nyams par 'gyur ba'i phyir ro/ lan tshwa bza' bar mi bya ste/ dbang phyug chen po'i khu ba las yang dag par 'byung ba'i phyir ro/ dgon par gnas par mi bya ste/ sbyin pa po rnams kyi sbyin pa'i bsod nams yongs su spyad pa med pa'i phyir ro zhes ston te/ des na 'di gsungs so/ /dge slong zhig sngar mu stegs can zhig pas bcom ldan 'das kyis 'phags pa'i bden pa'i gtam mdzad pa ni/ ji tsam na lan gsum gyi bar du yang tshig ngan pas smod par byed pa dang / bcom ldan 'das kyis dam pa'i chos la smod pa 'dis ni dmyal bar skye bar 'gyur te/ lo bye ba stong phrag brgyad cur sdug bsngal nyams su myong bar 'gyur zhing / de nas shi 'phos nas kyang 'dir skyes te/ de'i tshig thams cad kyis kyang mnyan par mi 'os par 'gyur ro zhes gsungs pa'o/ /zhes gzhan dag zer ro/ /gang zhig ces bya ba ni gang la la zhig go/ / bstan pa ni ji lta ba nyid bstan pa'o/ 'phags pa ni bden pa mthong ba'o/ /dgra bcom pa ni khams gsum gyi nyon mongs pa spangs pa ste/ nyon mongs pa'i dgra thams cad las nges par mi rgyal ba ni dgra bcom par mi 'gyur ro/ /chos kyis 'tsho ba dang zhes bya ba ni mi slob pa'i lam thob pa des ni dogs pa med par chos kyis 'tsho bar rtag pa yin te/ 'dir rtsod pa la mngon du phyogs pa'i kun du rgyu ba'i mdo yang brjod par bya'o/ /spong bar byed pa zhes bya ba ni sangs rgyas dang de'i nyan thos rnams kyis bstan pa las phyin ci log tu byed cing yongs su spangs pa yin no/ /'di ltar ni ma yin no zhes brjod pa'o/ /de gang yin zhe na/ smras pa/ bsam brlag ces bya ba ste/ blo ngan zhing blun po zhes bya ba'i don to/ /ci la brten nas de ltar spong bar byed ce na/ sdig can gyi lta ba la brten nas zhes bya ba yin te/ 'jig tshogs la lta ba ni sdig pa can gyi lta ba ngan pa thams cad kyi rtsa bar gyur ba'i phyir ro/ / yang na sdig pa can gyi lta ba ni lta ba log pa ste/ 'jig tshogs la lta ba la sogs pa'i sdig pa can tshol bar byed pa nyid la brjod de/ dge ba'i rtsa ba thams cad gcod pa'i phyir dang / dam pa'i gzhi nyams par byed pa'i phyir sdig pa can gyi gdol pa lta bu dang / dri nga ba'i mar lta bu'o/ /yang na mu stegs can gzhan gyi lta ba la brten pa ste de la brten pas ni 'di lta bu spong bar byed pa 'byung ba'i phyir ro/ /de'i nyes dmigs bstan pa/ smyig ma 'bru chags lta bur ni/ /zhes bya ba smos te/ smyig ma la tsher ma dang bcas pa'i 'bras bu yod de/ de ni rang nyid gsod pa'i phyir skye bar 'gyur te/ de skyes na de skams par 'gyur ro/ /dper na gang de ltar de rang gi 'bras bus gsod pa bzhin du 'di spong bar byed na rang gi gnas 'jig par byed pa yin te/ rnam par smin pa'i 'bras bu ngan song la sogs par smin cing 'bras bu spangs pa zhes bya ba'i don to/ /dam pa'i chos spong bar dgag pa'i phyir 'di gsungs pa yin no/ /gang gi phyir man ngag ma rungs pa nyid kyis ni mi 'dod pa'i 'bras bu yin te/ des na smras pa/ tshig bzang kho na smra ba yi/ /zhes bya ba la sogs pa'o/ /mnyan yod na bud med gtum mo kha cig bab col du khro ba dang ldan zhing dmod mo 'debs pa yod de/ de dge sbyong dang bram ze mthong na khyad par du dmod mo 'debs par byed pas skye bo thams cad la mi sdug cing yang dang yang du nyon mongs pas khro bar byed de/ de las brtsams nas tshigs su bcad pa gnyis gsungs so/ /tshig bzang kho na zhes bya ba ni kha na ma tho ba med pa ste/ ngag gi skyon rnam pa bzhi dang bral ba'o/ /tshig 'byung ba yin te/ skyabs kyis shes pa'i phyir ro/ /de kho na smra bar bya ba ni brjod par bya ba'o/ /sdig pa can dag smra mi bya/ /zhes bya ba nam yang kha na ma tho ba dang bcas pa brdzun la sogs pa'i nyes pa dang bcas pa'i tshig ni smra bar mi bya'o/ /de'i phan yon dang nyes dmigs smra ba/ smra ba zhes bya ba ni kha nas brjod cing 'don pa'o/ /tshig bzang zhes bya ba ni ngag dam pa ste/ legs par 'byung bar byed pa yin no zhes bya ba ni tshig gi lhag ma ste/ phun sum tshogs pa'i 'bras bu zhes bya ba'i don to/ /sdig pa can ni sngar bshad pa bzhin no/ /gdung byed ces bya ba ni bdag dang gzhan gdung bar byed pa yin te me bzhin no/ /byis pa sdig can zhes bya ba la sogs pas ni khyad par du bdag nyid la gdung bar byed pa dang / bdag nyid la gnod par byed par ston te/ gal te gang zhig sdig pa can gyi tshig smra bar byed na de ni nges par gzhan spong ba yin te/ 'jig rten pha rol yongs su spong ba yin no/ /'dir gzhan zhes bya ba'i sgra ni 'jig rten pha rol gyi rkyen yin pa'i phyir ro/ /gang gi phyir 'jig rten pha rol mchog tu byed pa ni legs kyang mi 'dod pa'i 'bras bu skyed par byed pa'i sdig pa mi byed cing bsod nams nye bar sogs pa yin no/ /de las gzhan pa dag ni the tshom med par sdig pa rtsom par byed do/ /ji ltar sdig pa byed cing 'jig rten pha rol spong ba yin zhes gzung bar bya zhe na/ smra ba'i tshe na 'ching 'gyur la/ /zhes bya ba smos te/ gang gi phyir gang dag sdig pa can gyi tshig dam pa rnams la smra ba na ngan song gi las kyi zhags pas 'ching bar 'gyur te/ de nas der skyes pa na sdug bsngal khyad par can dag myong ba yin no/ /des na de nyid kyi phyir smras pa/ de dag 'phags pa mi gsung ngo / /zhes bya ba ste/ ngag ma rungs pa ni dam pa rnams mi brjod do/ /de lta na gang zhig brjod pa yin zhe na byis pa zhes smos te/ de'i nyes dmigs ma mthong ba'i phyir ro/ /ngag gis nyes par spyod pa ni skyon ma shes pa rnams la de'i skyon bstan pas de las bzlog pa'i phyir 'di gsungs so/ /gang zhig ngag yang dag par sdom par byed pas chos ston pa de'i tshig ni shin tu yid du 'ong ba yin no zhes bstan pa'i phyir smras pa/ dge slong ngag ni bsdams pa dang / /zhes bya ba la sogs pa'o/ /btsun pa dge slong rnams ji tsam gyis na snyan par smra ba zhes brjod pa lags zhes zhus pa dang / ji tsam na 'di gsungs so/ /gzhan dag ni rgyal po gsal rgyal gyis bcom ldan 'das nyan thos kyi dge slong gi dge 'dun dang bcas pa spyan drangs te/ zhal zas btung ba gya nom pa dag gis tshim par byas so/ /tshe dang ldan pa lan tshwa bzang po 'di snyam du sems te/ rgyal pos ni bdag cag la nyin par ni zang zing gis tshim par byas so/ /mtshan mo ni bdag gis kyang chos kyis tshim par bya'o zhes bya bas des ji ltar rnam pa sna tshogs pa'i khyad par thob pa de ltar snyan pa'i chos bstan te/ de'i dbang du mdzad nas 'di gsungs pa yin no zhes zer ro/ /ngag bsdams pa zhes bya ba ni kha yang dag par sdom pa zhes bya ba'i don te/ ngag gis nyes par spyod pa thams cad spangs pa'i phyir ro/ /dge slong zhes bya ba ni lung slob cing slong ba ste/ bcom ldan 'das kyis kyang nyan thos zhes bya ba'i don to/ /gang gi phyir de ni ngag kyal pa spangs pa yang dag par bsdams pa'i tshig yin te/ gzhan mu stegs can gyi tshig dag ni 'brel ba med pa'i tshig tu gyur pa'i phyir ro/ /dal bus smra zhing zhes bya ba ni nyung du smra ba yin te/ don dang ldan zhing dgos pa'i tshig tsam brjod pa'i phyir dal bus smra ba'o/ /de lta bu gang yin zhe na/ smras pa/ rlom pa med ces bya ba ste nye bar zhi zhing mi brtan pa spangs pa'i phyir ro/ /gang zhig chos ldan don ston pa/ /zhes bya ba ni gang sngar bstan pa'i yon tan dang ldan pa ste/ dus dang mtshams dag tu chos kyi don gyi tshig tshul bzhin du ston pa kha ton la sogs pa'i dus su yang don dang ldan pa'i chos phyin ci ma log par ston pa yin no/ /yang na don ni thar ba ste don thams cad kyi mchog tu gyur pa yin pa'i phyir ro/ /chos ni de thob pa'i lam la sogs pa'o/ /de ni snyan par smra ba yin/ /zhes bya ba ni de nyid bdag nyid chen pos bshad pa'i tshig yin te/ yid du 'ong ba dang skyon med pas sbrang rtsi bzhin du chags par byed pa yin te/ snyan cing rna ba'i dbang po tshim par byed pa zhes bya ba'i don to/ /de bas na legs par gsungs pa ni rab tu bsngags pa yin pas legs par smra ba mchog ces bya ba la sogs pa smos so/ /tshig rkang bzhi pa'i chos kyi rnam grangs khyed la bshad par bya bas/ de nyon cig ces pa nas ji srid du 'di gsungs so/ /tha dad pa rnams mtshams sbyar nas smras pa ni legs par smras pa'am legs par gsungs pa ste/ gang gis tha dad pa sbyar bar byas pa'o zhes bya ba ni kho na nyid de legs par smras pa de nyid mtshams sbyar ba de bzhin du'o/ /mchog gam gtso bo ni tha dad pa med par byed pa'i tshig ste/ mtshams byed par gyur pa med pa'i phyir ro/ /'phags pas gsungs pa ni ston pa'o/ /'phags pa ni sangs rgyas dang sangs rgyas kyi nyan thos te/ 'di ni chos kyi tshig dang po'o/ /snyan smra mi snyan ma yin de gnyis pa/ /zhes bya ba ni 'jam par smra zhing dga' ba bskyed pa ste/ mi rtsub pa 'di ni chos kyi tshig gnyis pa yin no/ /bden smra brdzun pa ma yin de gsum pa/ /zhes bya ba ni phyin ci ma log par smra zhing nam yang brdzun gyi tshig mi smra ba 'di ni gsum pa'o/ /chos smra phal pa ma yin bzhi pa'o/ /zhes bya ba ni 'dir rigs pa'i don bzhin du smra ba'o/ /phal pa ste ma 'brel ba'i tshig ma yin pa zhes bya ba'i don to/ /yang na legs par smra ba ni bsngags pa'i tshig legs par gsungs pa la brjod do/ /de yang tshul gsum ste/ yid du 'ong ba dang phyin ci ma log pa dang / phan 'dogs pa'o/ /de go rims bzhin du snyan smra mi snyan ma yin zhes bya ba la sogs pas bstan to/ /snyan par smra bas ni mchog tu dga' bar byed do/ /bden par smra bas ni tshul khrims rdzogs par byed do/ /ci khyod ni tshul khrims nyams sam ma nyams zhes dris pa na bdag gis ji lta ba bzhin du rjod par byed cing ngo tsha bas tshul khrims sam 'chal bar mi byed do/ /'chal par gyur kyang ji lta ba bzhin du sbyangs pas yang yongs su dag par 'gyur ro/ /chos smras pas ni gzhan mi dge ba las bzlog cing dge ba la 'jog par byed pa yin te/ de'i phyir snyan par smra ba la ni brdzun pa dang chos ma yin pa med do/ /phal pa dag la ni mi bden par smra ba la sogs pa yod do zhes rjod par byed do/ /'brel ba med pa'i ngag kyal ba la chags pa rnams legs par bshad pa rnams nyan pa la gzud pa'i phyir 'di gsungs so/ /tshigs su bcad pa de nyid rnam par dbye ba'i phyir smras pa/ tshig de rnams ni smra bya zhing / /zhes bya ba la sogs pa'o/ /gang gi tshe bcom ldan 'das tshig rkang bzhi pa'i chos kyi rnam grangs ston pa de'i tshe tshe dang ldan pa ngag dbang 'di snyam du sems te/ gang bdag gis tshig rkang bzhi pa'i chos kyi rnam grangs 'di la mngon par bstod par bgyi'o zhes rgya cher zhus pa dang / gnang ba thob ste des 'di dag smras so/ /tshig de rnams ni smra bya zhing / /zhes bya ba ni tshig de nyid brjod par bya'o/ /gang gis bdag kyang mi gdung la/ /zhes bya ba ni tshig gis bdag nyid la tshe 'dir grags pa ma yin pa dang / /pha rol du sdug bsngal bas gdung bar mi byed cing mi sreg pa'o/ /pha rol la yang gnod med pa'i/ /zhes bya ba la/ gnod pa ni lus dang ngag gis gzhan la gnod pa mi bya ba ste/ tha dad par mi bya zhing mi dbye bar bya'o/ /tshig de legs par smra bar bya/ /zhes bya ba ni/ tshe de nyid la legs par smra ba yin no/ /tshig rkang dang po'i bstod pa byas nas/ gnyis pa bstod pa'i phyir/ gang gis mngon par zhes bya ba la sogs pa smos so/ /gang gis snyan par smra bas dga' bar 'gyur ba de ni mngon par dga' bar 'gyur ba ste/ snyan par smra ba zhes bya'o/ /des na de nyid smras pa/ gang zhig tshig 'dis dga' 'gyur zhes pa ste/ gang gis thos pas kyang mngon par dga' zhing rangs pa ste/ 'di mnyan pas dga' zhing rangs pa skye bar 'gyur ba'o/ /yang na tshig rkang snga mas ni don snyan par bstan to/ /'dis ni tshig 'bru snyan par bstan to/ /mngon par dga' 'gyur na zhes bya ba de nyid dbye ba'i phyir gang zhig mkhas pa chags par byed pa yod ces bya ba smos te/ tshig gang gis chags pa med pa'i sbyor ba ste/ rtogs pa dag ni cung zad kyang mi 'khrugs pa yin te/ 'on kyang dga' bar ni byed do/ /yang na phra rgyas thams cad sil ba yin no/ /de ni snyan tshig dam pa yin/ /zhes bya ba ni de'i tshig de ni 'phags pa rnams bzhed cing spyod pa yin te/ ji skad du 'jam zhing 'jam pa'i tshig gi ngag yang dag par 'byung ba ni bdag la rag las pa yin pa'i phyir snying stobs dang ldan pa'i skyes bu su zhig tshig rtsub po smra bar 'gyur/ gsum pa bstod pa ni/ bden pa'i tshig ni bdud rtsi ste/ /zhes bya ba smos te/ phyin ci ma log pa smra ba ni bdud rtsi'i tshig tu bshad de/ de la gnas pas na mya ngan las 'das pa 'thob pa'o/ /yang na bdud rtsi ni lha rnams kyis longs spyod pa yin te/ gang gi phyir bden pa nyid ni ro shin tu bsod pa yin no zhes lung las 'byung ste/ des mkhas pa rnams tshim pa'i khyad par dang nyams brtas par 'gyur ba'i phyir lha rnams kyi bdud rtsi bzhin no/ /bden pa'i tshig ni bla med yin/ /zhes bya ba ni thams cad las khyad par du gyur pa yin te/ don thams cad las khyad par du gyur pa'i phyir ro/ /yang na tshig ni gtsug gi nor bur gyur pa'i phyir me tog gi phreng ba shin tu yid du 'ong ba rab tu gnas pa yin no zhes bya ba'i tshig gis te/ legs par pha rol tu phyin pa'i skyes pa'i rabs la sogs pa brjod par bya'o/ /ci'i phyir bla na med pa yin zhe na/ 'dir rgyu smras pa/ bden pa zhes bya ba smos te/ gang gi phyir bden pa'i tshig ni don la rab tu gnas pa yin te/ de las 'byung ba'i phyir ro zhes dam pa rnams brjod de/ 'jig rten 'di'i dgos pa byed pa'i phyir ro/ /chos la yang rab tu gnas pa yin te/ 'jig rten pha rol gyi dgos pa byed pa'i phyir ro/ /yang na don la gnas pa ni 'jig rten pa'i phan yon no/ /chos la gnas pa ni 'jig rten las 'das pa'i phan yon no zhes bya ba la sogs pa'o/ /dam pa'i dngos po'i de kho na nyid reg pa ste/ thams cad mkhyen pa dang / de'i gzhung la spyod pa'i nyan thos dag go/ /gsungs pa ni 'chad pa'o/ /tshig rkang bzhi pa las brtsams te/ sangs rgyas kyis ni gsungs tshig gang / /zhes bya ba la sogs pa smos te/ thams cad mkhyen pa nyid du thugs rje chen pos gzhan gyi don la brtson pa ste/ tshul khrims kyis mtshon pa sems pa khyad par can sangs rgyas so/ /gang cung zad sangs rgyas bcom ldan 'das kyis bshad pa ni gsung rab yan lag bcu gnyis so/ /sangs rgyas bcom ldan 'das kyis ji lta bus gsungs she na/ smras pa/ bden pa ste 'jigs pa med pa mngon par mtho ba'i rgyur gyur pa'i phyir ro/ /mya ngan las 'das par 'gro ba ni thar pa thob par byed pa ste/ nges par legs pa sgrub pa'i phyir ro/ dngos po'i skyon med pas 'dir bsam pa'i skyon yang nam yang med do/ /bsam pa'i skyon med pa'i phyir gzhan gyi don du gang bcom ldan 'das kyis gsungs pa'i tshig de'i don nyid sdug bsngal thams cad spangs pa'i phyir zhes bya ba smos te/ sems can thams cad kyi sdug bsngal thams cad nye bar zhi ba'i phyir ro/ /tshig de bla na med pa yin/ /zhes bya ba ni tshig de nyid zla med pa'o/ /tshig gi tshoms te brgyad pa'i rnam par 'grel pa rdzogs so// //tshul khrims la sogs pa'i tshoms gsum bstan pa las phal cher las kyi tshul gsal bar bstan pa'i phyir/ de'i 'og tu las kyi tshoms bstan to/ /yang na bstan ma thag pa'i tshoms des ni bden pa la sogs pa'i tshig bstan pa yin la 'dis ni/ brdzun du smra ba la sogs pa'i tshig brjod pa yin no/ /yang na tshig las ches khyad par du gyur pa'i las nyid bstan pa'i phyir te gang gi phyir sangs rgyas kyi bstan pa'i stobs kyis sems can rnams 'khor ba las 'don pa yin la/ de'i phyir 'di ni las ches khyad par du gyur pa yin pas de'i rnam par 'grel ba brtsam par 'dod nas smras pa/ chos gcig ces bya ba la sogs pa'o/ /rgyal po'i khab kyi dka' thub 'byin pa'i kun dga' ra ba na tshe dang ldan pa sgra gcan 'dzin gnas te/ de gdul ba'i don du bcom ldan 'das der gshegs so/ /des kyang thag ring po nas bcom ldan 'das der gshegs pa mthong ste/ gdan bshams shing zhabs bkru ba dang zhabs rten yang phyogs gcig tu gzhag ste/ mdun bsu nas chos gos dang lhung bzed khyer ro/ /ji tsam na bcom ldan 'das nyid kyis zhabs bsil te chu snod kyi nang du chu cung zad lhag pa gzhag nas/ tshe dang ldan pa sgra gcan 'dzin la chu cung zad tsam 'di mthong ngam zhes bka' stsal to/ /btsun pa de bzhin no zhes gsol to/ /de ltar cung zad tsam de bzhin du ngas sgra gcan 'dzin khyod la skyes bu gti mug can gyi dge sbyong gi chos smra bar bya'o/ /gang la la zhig shes bzhin du brdzun du smra ba dang / ngo tsha med pa dang / 'dzem pa med pa dang / 'gyod pa med pa de yang bor ba nas de bzhin du 'di la g.yon can dge sbyong gi chos so zhes nga smra'o zhes bya ba dang / ha sti shu Na Da t+ya ga'i dper brjod pas tshigs su bcad pa gnyis gsungs so/ /chos gcig ni gtso bor gyur pa'i don te/ gcig gi sgra ni mchog gi tshig yin pa'i phyir ro/ /chos kyi sgra ni yang don gyi rnam grangs yin pa'i phyir te/ grong 'di na ni rgyal gyi grogs po gnas so zhes gtso bor shes pa bzhin te/ des na bden pa'i tshig ni 'dir chos so/ /'dzin par byed pa yin pas chen po'o/ /gcig kyang yin la chos kyang yin pas chos gcig ces bsdu ba byas so/ /de las 'das pa ni thal ba ste/ bden pa zhes bya ba bor ba dang ldan pa'i skyes bu'o/ /'di ji lta bu yin zhe na smras pa/ brdzun du smra ba'i zhes bya ba ste/ brdzun pa ni phyin ci log ste/ smra ba ni tshig go/ /gang zhig rtag tu brdzun smra ba de nyid ni skye bo dam pas ma bsngags pa bden pa'i chos las 'das pa ste/ dper na dug ha la ha la nye bar longs spyod pa des srog 'phrog par byed pa de bzhin du'o/ /lus can ni sems can no/ /'jig rten pha rol bcom pa zhes pa ni bde 'gro yongs su spangs pa ste/ 'dir pha rol gyi sgra ni bsngags par byas pa'i phyir te/ song nas bde ba sbyin pa ni chos so zhes pa'i tshig gis so/ /de spangs pas ni de'i 'bras bu spong ba'o/ /sdig pa mi bya ci yang med/ /ces bya ba ni des bden pa spangs shing brdzun du smra ba yongs su gzung bas sdig pa bsags te/ rim gyis dge ba'i rtsa ba rnams rgyun gcod par byed pa de ni sngar bshad pa'i sems can gyis ni mi bya ba dang / ngan par spyod pa mi byed pa ci yang med pa'o/ /des na yang de nyid kyi phyir/ lcags gong zos pa ches bla yi/ /zhes bya ba smos te/ lcags kyi gar bu'am lcags kyi gong po mid pa ni rung ngo zhes pa'o/ /ji lta bu zhe na/ bsreg pa ste mes bsregs pa'o/ /me lce 'bar 'dra ba zhes bya ba ni me 'bar ba dang 'dra zhing mtshungs pa gang yin pa ste/ mes sreg cing 'bar ba dang mnyam pa'o/ /bzar mi rung zhes bya ba ni gang zhig zos shing mid pa'o/ /'di skad ston pa yin te/ gang yang lcags kyi thu lum bsregs shing me lce 'bar ba lta bu za ba dang / gang yang tshul khrims 'chal ba yul 'khor gyi bsod snyoms za bar byed pa 'di gnyis las ni lcags kyi thu lum za ba de ni bla'i/ cig shos ni ma yin no/ /ji skad du rnam par smra bar byed pa las dmigs pa ni chos mchog yin gyi/ gang yang mi dmigs pa ni ma yin te/ chos thams cad la bdag med pa'i rnam pa la gang dmigs pa dang / gang yang mi dmigs pa de gnyis las dmigs pa nyid ches mchog yin no zhes pa'i don te/ de bzhin du bstan pa 'di yang shes par bya'o/ /tshul khrims 'chal ba zhes bya ba ni tshul khrims nyams pa ste/ brdzun smra ba la sogs pa zhes bya ba'i don to/ /yul 'khor bsod snyoms zhes bya ba ni grong la sogs pa las rnyed pa'i bsod snyoms te/ gus pa sngon du btang bas dge slong la byin pa'i zas zhes bya ba'i don to/ /mi sdom pas zhes bya ba ni dbang po sdom pa dang mi ldan pa'i phyir te/ gang tshul khrims dang ldan yang dbang po ma dul ba des bsod snyoms nye bar longs spyod pa mi rigs so/ /yang na dge ba'i phyogs la mngon par mi brtson pa ste/ le lo can gyis nye bar blangs pa'i 'tsho ba ni bu lon du spyod pa yin no zhes lung las 'byung ba'i phyir ro/ /'di ni shin tu bsdams pa yin no zhes de la dad pas bsod snyoms la sogs pa 'bul bar 'gyur te/ de ni nang na shin tu ma rungs pa yin na de thams cad ni bu lon du 'gyur ro/ /brdzun du smra ba'i nyes dmigs bstod pas de las bzlog pa'i phyir gsungs so/ /sdig pas 'jigs pa rnams la 'di lta bu'i sdig pa mi bya'o zhes 'dir bstan pa'i phyir khyod ni sdug bsngal gyis 'jigs shing zhes bya ba la sogs pa smos so/ /bcom ldan 'das ci ra ba t+ya zhes bya ba'i chu klung rgyu zhing gshegs pa las nye ba rgan po zhig gis nya rgyas nya mang po bzung zhing phyung ba gzigs te/ ci rigs kyi bu khyod gang la las 'jigs pa yod ces bka' stsal pa dang / kye gau ta ma sdug bsngal las 'jigs pa mchis so zhes gsol to/ /de lta na gzhan dag la sdug bsngal ma bskyed cig /de ci'i phyir zhe na/ gang gis sdug bsngal byas na bde bar 'gyur ba ni med do zhes pa nas ji srid du tshigs su bcad pa gnyis gsungs so/ /gzhan dag ni sdug bsngal gyi 'jigs pa kun du rgyu zhig gis 'di skad ces/ kye gau ta ma bdag 'dir sdug bsngal gyis 'jigs par gyur na/ de thabs gang gis bdag gi sdug bsngal med par 'gyur zhes gsol pa dang / /de nyid kyi phyir 'di gsungs pa yin no zhes zer ro/ /khyod ni zhes bya ba ni gal te'o/ /'jigs pa ni skrag pa'o/ /sdug bsngal gyis zhes bya ba ni ngan song gi sdug bsngal las zhes bya ba'i tshig gi lhag ma ste/ gsum pa'i gnas su lnga pa gzhag pas na sdug bsngal las zhes bya ba'i don to/ /khyod la zhes bya ba ni gal te khyod la sdug bsngal mi sdug pa ste/ bde 'gro'i sdug bsngal lam 'du byed kyi sdug bsngal mi 'dod pa yin na ste/ ngan song gi sdug bsngal ni sngar bshad pa'i phyir ro/ /gang gi phyir yang des nye bar gdung ba yin pa'i phyir mngon par mi 'dod pa ste/ de bas na de'i 'og tu skye ba la mngon du phyogs pa'i phyir sdug bsngal las 'jigs pa yin te/ bdag sdug bsngal bar nam yang ma gyur cig pa'o/ /der ltung ba yongs su spang ba'i sman bsten pa'i thabs bstan pa'i phyir smras pa/ me bya zhes pa ste nam yang ma byed cig pa'o/ /sdig pa can gyi las zhes bya ba ni ngan par spyod pa'o/ /mngon sum ni skye bo thams cad kyis mngon sum du gsal bar ro/ /lkog tu'ang rung zhes bya ba ni yang na skye bos dben pa'i phyogs te/ phag tu zhes bya ba'i don to/ /ji skad du/ ma mthong lkog tu'ang mi bya ste/ /las de 'phags pas mi bya'o/ /zhes gsungs pa'o/ /gal te sdig pa'i las byas sam/ /byed kyang rung ste zhes bya ba ni gal te yang khyod mi shes pas/ nga yongs su mya ngan las 'das pa'i 'og tu srog gcod pa la sogs pa'i nyes dmigs nyes par spyod dam nga nyid da ltar 'dug bzhin du mdun du khyod kyis byas na des na khyod ni/ sdug bsngal las zhes bya ba smos te/ lus dang sems gdung ba las so/ /thar mi 'gyur zhes bya ba ni nges par 'byung ba'o/ /ci zhig byas na thar bar mi 'gyur zhe na/ smras pa/ kog ces langs te bros byas kyang / /zhes bya ba ste/ rang gi yul lam rgya mtsho la sogs pa las rgal zhing 'das par byas pa'am/ yul thag shin tu ring por song bar gyur kyang ste ji skad du/ sdig can bdag nyid gar 'gro ba/ /sdug bsngal nyid ni der 'gro ste/ /gang dang gang du me gnas pa/ /de nyid na ni bsreg par 'gyur/ /zhes gsungs pa'i phyir ro/ /bar snang la sogs par bros na de las thar bar 'gyur ro zhes bden par smra ba gcad pa'i phyir smras pa/ gang du gnas na 'chi bas mi tshugs pa/ /zhes bya ba la sogs pa ste/ 'dir gleng gzhi dang 'brel pa ni mi rtag pa'i tshoms su bshad de/ 'chi ba'i gnas su las nyi tshe brjod pa yin no/ /las kyis zil gyis non par byed pas de bya bar mi rung ba'i phyir smras pa/ pha rol po la brtags nas gang / /zhes bya ba la sogs pa'o/ /rgyal po ma skyes dgras kAr ShA pa Na'i bzhi cha brkus pa tsam dang / gzhan gyis bsgyur ba tsam gyis kyang gsod bar byed do/ /de re zhig cig na rkun ma dang byi bo byed pa dang / zhal che la g.yo byed pa mang po dag gsad pa'i phyir gshed ma pa'i lag tu gtad de/ de'i dbang du mdzad nas 'di gsungs so/ /gang zhes bya ba dang / sdig pa can gyi las zhes bya ba 'dir sbyar bar bya'o/ / pha rol po la zhes bya ba ni rkun po dang byi bo byed pa la sogs pa dag la'o/ /brtags nas zhes bya ba ni nye bar brtags pa dang / yongs su btsal ba ste/ skyes bu gang gis sdig pa byas/ /zhes so/ /sdig pa can zhes bya ba ni 'og nas bshad do/ /mthong ba ni 'jig rten nges par byas pa'o/ /sdig pa can zhes bya ba ni skyes bu dam pa rnams kyis smad pa dang mi 'dod pa'i 'bras bu'o/ /bdag gis zhes bya ba ni rang nyid kyis so/ /de dag mi bya zhes bya ba ni sdig pa can gyi las mi bya ba'o/ /ci'i phyir zhe na/ 'di ltar/ sdig byas las ni rjes su 'brang / /zhes bya ba yin te/ sdig pa byed pa yin no zhes skye bo rnams smod cing sdig pa can gyi skye bo ni tha ma yin no zhes bya ba'i phyir/ rang gis byas pa'i sdig pa'i las de ni 'di dang pha rol tu rjes su 'brang ba yin te/ ji ltar bdag gis mig gis thams cad mthong ba bzhin no/ /sdig pa'i las kyi skyon bstan pas de 'gag pa'i phyir 'di gsungs so/ /gang yang las kyi zhags pas bcings par gyur na ni g.yang sar ltung bar 'gyur ro zhes bstan pa'i phyir smras pa/ las gang shin tu mi bzad dang / /zhes bya ba la sogs pa'o/ /de nas srang la g.yo byed pa'i tshong dpon zhig dang / 'thab mos 'tsho ba'i grong dpon zhig la bcom ldan 'das kyis 'di skad ces bka' stsal to/ /'di la zol byed pas gzhal blugs gcig tu 'tshos pa dang / log pa'i 'tsho bas 'tsho bar byed pa ste/ 'di lta ste khar ba'i srang la zol byed pa dang / gzhal blugs lag cig tu zol byed pa dang mchog tu gtum zhing mi bzad pa lag pa khrag gis spags pa ni ji srid du dmyal ba rnams su skye bar 'gyur ro zhes bya ba nas tshigs su bcad pa gnyis gsungs so/ /gang zhes bya ba dang / mi'i zhes bya bar sbyar te sems can no/ /zol byed gzhal blugs 'chos pa dang / /zhes bya ba ni snga na med pa'i bre la sogs pa 'chos pa'o/ /'dis 'jal ba yin pas gzhal blugs te/ de yang bcos ma de'i sbyor ba byas pa'o/ /de las gab pa las gzhan la 'tshe ba'i thabs bstan nas bsal bar smras pa/ las gang shin tu mi bzad pa/ /zhes bya ba smos te/ srog gcod pa la sogs pa rnam par smad pa'i spyod pa de'o/ /mi la 'tshe bar byed pa dang / /zhes bya ba ni sems can gzhan la nye bar gdung bar byed pa yin no/ /gzhan la byed du 'jug pa zhes bya ba ni gzhan byed par 'jud pa'am/ gzhan gyi lag gis zhes bya ba'i don to/ /de yis g.yang sar ltung bar byed/ /ces bya ba ni rab tu 'gro ba dang 'jug pa zhes bya ba'i don to/ /g.yang sa ni ngan song ngo / /de yis zhes bya ba ni 'tshe ba byed pa la sogs pas so/ /ci'i phyir zhe na/ smras pa/ las de mi yi rjes 'brang bas/ /zhes bya ba yin te/ gang gi phyir sems can de sdig pa ngan song gi 'bras bu'i las nag po'i zhags pa nyid kyis bcings pa ste/ gzhan gyis dbang du byas pa yin pas de bas na mi 'dod kyang ngan song du 'gro ba nyid do/ /'o na lus kyis las byas pa ni lus nyams pas 'jigs par 'gyur te/ gang gi phyir gnas nyams na gnas pa nyams par snang ngo zhe na/ smras pa/ mi yis gang dang gang byas pa'i/ /zhes bya ba ste/ gang cung zad kun nas nyon mongs pa sems can 'di spyod pa'o/ /de gang yin zhe na/ smras pa/ dge ba 'am ni sdig pa yi/ /zhes bya ba smos te/ mi dge ba'i las sam dge ba'i las so/ /de lta de ltar zhes bya ba ni dge ba dang mi dge ba rang gis byas pa las so/ /'bras bur 'gyur zhes bya ba ni bgo skal la spyod pa'o/ /ci'i phyir de ltar 'gyur zhe na/ las rnams chud zar mi 'gyur te/ /zhes bya ba ste gang gi phyir las byas shing bsags pa ni 'bras bu med par mi 'gyur te/ de bas na/ las rnams bskal pa brgyar yang ni/ /chud mi za ba'ang tshogs dang dus/ /zhes bya ba'i tshig gis so/ /sdug bsngal gyis 'jigs pa rnams la sdig pa'i las spong ba la gzud pa'i phyir 'di gsungs so/ /dus cung zad du nyes par spyod pa byas kyang ji srid ma shi'i bar du bde ba yod do zhes pa la/ de nyid smras pa/ de yi tshogs pa de srid du/ / zhes bya ba la sogs pa yin no/ /rgyal po gsal rgyal dang / rgyal po ma skyes dgra gnyis phan tshun mi mthun par gyur te/ ji tsam na ma skyes dgras rgyal po gsal rgyal gyi glang po che'i tshogs la sogs pa thams cad phrogs par gyur to zhes bya ba la sogs pa rgya cher dge slong rab tu mang po bsod snyoms la 'ongs pa dag las gsan nas bcom ldan 'das kyis dgra las rgyal bar gyur cig ces bya ba la sogs pa bka' stsal pa dang / yang 'thab mo la zhugs te rgyal po gsal rgyal gyis rgyal po ma skyes dgra de gson bzhin du bzung ste/ bcom ldan 'das kyi spyan sngar khyer te 'ongs nas gsol pa/ btsun pa 'di ni bdag dang yun ring po nas khon med pa lags na/ 'di nyid kyis dgra bgyis pa nyi tsher zad do zhes pa nas/ grogs po'i bu yin no zhes bya ba'i bar du ji srid du gang gis kyang ma btang ngo zhes pa nas/ rgyal po chen po 'di khyod kyis ma btang ba des ni yun ring por gnod par 'gyur zhing mi phan par 'gyur ro zhes gsungs te/ des na ji tsam na 'di gsungs so/ /rung bar byed ces bya ba ni rnam par 'jig pa dang / rnam par 'joms par byed pa'o/ /de srid ces bya ba ni de srid kyi dus so/ /'di ni zhes bya ba ni ma skyes dgra la sogs pa'o/ /dus ji srid cig tu 'di rung bar byed ce na/ de yi tshogs pa ji srid par/ /zhes bya ba smos te/ dus ji srid kyi bar du de'i dge ba'i las ma zad cing nus pa mngon du phyogs shing gnas pa'am/ sgrub pa'i 'du 'phrod rjes su mthun par gyur pa 'jug pa de srid du'o/ /de nas gzhan yang rung byed de/ /zhes bya ba la/ de nas zhes bya ba ni de'i phyi nas te/ sngar bshad pa'i tshogs pa dang bral bar gyur pa dang / khyod la sogs pa ci la rag pa med par chas nas rgyal po ma skyes dgra la sogs pa gang yang rung ba zil gyis gnon par byed do/ /gzhan dag ni sngar gyis rung bar byed pa de 'jig pa'i 'og tu de las bzlog pa ste/ tshogs pa 'dus pa'i phyir rung bar byed pa gzhan dag gis rung bar byed do/ /bcom ldan 'das dmyal ba'i gnas su rgyu zhing gshegs pa'i tshe/ dmyal ba pa rnams kyis gsol ba btab pa na/ tshe rabs snga ma'i gshin rje'i srung ma dag bstan nas/ 'di gsungs so zhes zer te/ gang gi phyir de ni ji srid 'tsho'i bar du dmyal ba de dag la gnod pa byed la/ shi nas ni dmyal ba'i srung ma shin tu mi bzad pa gzhan dag kyang der skyes nas gnod par byed do zhes so/ /'byor ba thams cad kyi mtha' ni rgud pa yin te/ de'i phyir bag med pa mi bya'o zhes bstan pa'i phyir 'di gsungs so/ /gal te mi 'dod pa'i 'bras bu'i las byed pa'i dus su mi rtogs kyang smin pa'i dus su mi de rtogs pa yin no zhes bstan pa'i phyir/ 'di ni bdag rjes mi 'brang bas/ /zhes bya ba la sogs pa smos so/ /bcom ldan 'das kyis dge slong rnams la bka' stsal pa/ dge slong dag byin pa so so'i skye bo 'di dag ni nges par dmus long yin te/ don ji lta ba bzhin du mi shes pas lus kyis nyes bar spyad pa spyod cing zhes rgya cher dmyal bar skye bar 'gyur te zhes pa nas ji srid du tshigs su bcad pa lnga po 'di gsungs so/ /byas pa ni 'byung ba'o/ /ma brtags pa ni mi shes pa'o/ /byis pa ni skye bo rmongs pa ste/ byis pa'i skye bo de ni byas pa'i las kyang dag lus bzhin du skye ba gzhan du 'byung bar mi 'gyur ro zhes 'di ltar nges par rtog go/ /ji ltar ma brtags pa yin zhe na/ /'di ni bdag rjes mi 'brang bas/ /zhes bya ba ste/ sdig pa'i las 'di ni bdag 'gro ba'i rjes su 'brang ba ma yin te/ dper na lus byed pa po 'di ni 'di nyid du 'jig par 'gyur te/ de bzhin du des byas pas las kyang 'jig par 'gyur ro snyam pa'o/ /ji ltar gang dang gang du lus 'gro ba de dang der grib ma 'gro bar 'gyur la/ de med na ni de med par 'gyur ba de bzhin du pha rol du ni zhes bya ba ste/ 'jig rten pha rol tu rtog par 'gyur ba'o/ /gang du gnas nas shes par 'gyur zhe na/ sdig pa'i las kyis 'gro ba dag / ces bya ba yin te/ de na gnas par gyur pa na/ /zhes bya ba ni tshig gi lhag ma'o/ /sdig pa'i las gang yin pa de ni sdig pa'i las nyid do/ /sdig pa byed pa gang yin pa dmyal ba la sogs pa'i 'gro ba dag tu gnas shing de dang 'brel pa na sdig pa shes par 'gyur ro/ /nam zhig ce na smras pa/ nam zhig na 'di nyid kyis tsha bar 'gyur ba ste/ gang gi tshe 'di nyid kyis sdig pa'i las byas pa'i byis pa de nyid kyi rnam par smin pa'i 'bras bu so sor bstan pa na sdug bsngal chen po skye bar 'gyur zhing de'i tshe sdug bsngal gyi 'bras bus nye bar gdungs pas de'i skyon shes nas yid la gcags par 'gyur te/ bdag gis ni gang sdig pa spyod pa ni legs par ma byas pa ste/ ji skad du/ rigs pa'am yang na mi rigs pas/ /longs spyod bdag gis gang bsags pa/ /gzhan dag bde bas dga' bar 'gyur/ / bdag ni sdug bsngal skal ba len/ /zhes bshad pa'o/ /ji ltar yang sngon sdig pa byas pa mi shes pa ni nyon mongs pa la 'jug cing phyis kyang kun nas dkris pa dang ma bral ba'am/ yang na mi 'dod pa'i 'bras bu 'byung ba ni yid la gcags par 'gyur ba'i phyir smras pa/ gal te zhes bya ba smos te/ ji ltar yang byis pa'i skye bos sdig pa ste/ lus la sogs pa'i las byas pa na rmongs pas sdig pa nyid du mi shes pa'i phyir ro/ /rang gi las kyis zhes bya ba ni bdag nyid kyis byas pa'i sdig pa'i las de dag gis so/ /de'i 'og tu ni kun nas dkris pa dang ma bral ba'i gnas skabs na/ byis pa de gdung bar 'gyur te/ yid la gcags shing tshe 'di dang pha rol tu sdug bsngal gyis gzir bar 'gyur ro/ /me yis bsregs pa bzhin zhes bya ba ni dper na la la zhig mes bsregs par gyur na gdung zhing nyam thag pa de bzhin no/ /mi shes pas bdag nyid kyi don du sdig pa spyod pa'i glen pa de ni dmyal bar ltung bar 'gyur ro zhes bstan pa'i phyir smras pa/ byis pa shes rab chung ngu dag /ces bya ba la sogs pa'o/ /gzhan dag ni rgyal byed kyi tshal na legs par rab tu sad pa zhes bya ba'i kun du rgyu mdze can zhig yod de/ des de bzhin gshegs pa la tshig ngan pa brjod pa las brtsams so zhes zer ro/ /byed pa ni spyod pa'o/ /byis pa'i mtshan nyid smras pa/ shes rab chung ngu zhes bya ba ste/ las dang 'bras bu la sogs pa'i tshul mi shes pa'am/ phyin ci log pa'i blo'o/ /ji ltar byed pa yin zhe na/ smras pa/ bdag la dgra bzhin zhes bya ba ste/ rjes su gnod pa byed cing mi mdza' ba'am/ dgra bo dang phyir rgol ba ste/ bdag gi lus la mi bzad pa'i dgrar zhes pa'i don to/ /ci zhig gcod par byed pa yin zhe na/ sdig can las ni spyod par byed/ /ces bya ba yin te/ spyod pa ni lus la sogs pa'i nyes par spyod pa'o/ /de gang yin zhe na/ gang zhig tshar 'gyur ba zhes bya ba smos te/ gang las smin pa'i dus su gdung bar byed pa yin te/ sdig pa de'i 'bras bu ni mi 'dod pa yin pa'i phyir ro/ /las de yang dam pa rnams kyis smad pa dang / mi 'dod pa'i 'bras bu yin no zhes bstan pa'i phyir smras pa/ las de dag ni ma byas legs/ /zhes bya ba la sogs pa'o/ /las de dag ni byas kyang legs pa ma yin zhing bzang po ma yin te/ dam pa rnams kyis smad pa yang yin la gang dag byas pas gdung bar yang 'gyur zhes bya ba yin te/ las gang bsten pa'i 'og tu yid la gcags pa la sogs pa'i mes gdung bar 'gyur ro/ /rgyu des na legs pa ma yin no/ /'jig rten 'di'i nyes dmigs bstan nas 'jig rten pha rol gyi nyes dmigs smras pa/ ngu bzhin du zhes bya ba yin te/ nyam thag pas nga ro 'don bzhin du'o/ /mchi mas khyab pa'i gdong gang yin pa de ni mchi mas gdong yog pa ste/ rtag tu mchi ma'i rgyun 'bab cing gdong gnag pa'o/ /yang na ngu ba ni mchi ma'i rgyun 'dzag pa ste/ 'dis ni sdug pa la 'jug par byed pa'i gnas skabs bstan to/ /mchi mas gdong yog ces bya ba ni mchi ma 'bab pas gdong gsher bar byas pa ste/ 'dis ni 'gag pa'i gnas skabs bstan to/ /gang gis las byas shing bsags nas rnam par smin pa so sor bstan pa zhes bya ba smos te/ 'bras bu rjes su myong bar 'gyur ba'o/ /nag po'i phyogs bstan nas dkar po'i phyogs bstan pa'i phyir smras pa/ las de dag ni byas na legs/ /zhes bya ba smos te/ de yang las byed pas na dge ba dam pa rnams kyis bsngags pa gang zhig byas na 'jig rten 'dir yang rjes su mi gdung ba dang / pha rol du yang / dga' zhing yid ni bde ba yis/ /zhes bya ba ste/ gang gis las byas shing bsags pas dga' ba yang dag par skyes shing ldan pa'o/ /phyi rol gyi yo byad phun sum tshogs pa thob pas yid bde ba'o/ /nang gi gzugs mdzes pa la sogs pa'i khyad par gyis ni dga' zhing yid bde ba'o/ /dga' ba'i tshig gis bde ba'o/ /yid bde ba zhes bya ba ni 'dod pa na spyod pa'i yid bde ba ste/ bsam gtan las skyes pa ste go rims bzhin no/ /sdig pa'i las kyi 'bras bu bstan pas sdig pa las bzlog pa'i phyir dang / legs par spyod pa'i 'bras bu bstan pas de nyid la gzud pa'i phyir 'di gsungs so/ /rmongs pas bdag nyid kyis bde ba la dgod bzhin du brkam pas ni 'bras bu mi 'dod pa la spyod pa yin no zhes bstan pa'i phyir smras pa/ bdag nyid bde ba 'dod pa'i phyir/ /zhes bya ba la sogs pa'o/ /rgyal po'i khab na gnas brtan shA ri'i bu'i thad du yi dwags shig 'ongs te smras pa/ 'phags pa bdag ni sngon rgyal po'i khab kyi tshong par gyur te/ ser sna dang rigs kyi dregs pa'i dbang dang yi dwags kyi phyogs spyod pa'i dbang gis yi dwags su skyes so/ /bdag gi nye du rnams la sangs rgyas la sogs pa'i dge slong gi dge 'dun bshos gsol bar byed du gzhug na de ni legs so zhes rgya cher smras te/ de'i dbang du mdzad nas tshigs su bcad pa lnga gsungs so/ /gzhan dag ni shA ri'i bu dang maud gal gyi bu gnyis mnar med par song ba na lha sbyin gyi lus dpag tshad du ma can mthong ba na smras pa/ bcom ldan 'das kyis khyod la nad med dam zhes kyang gsungs so/ /des kyang mthong nas shin tu ngu bar gyur nas de'i phyir gsungs so zhes zer ro/ /dgod bzhin zhes bya ba ni bzhin 'dzum pa dang ldan pa'o/ /sdig pa'i las byas pa zhes bya ba ni mi 'dod pa'i 'bras bu'i bya ba kun du spyod pa'o/ /gang yin zhe na/ bdag nyid bde ba 'dod pa'i phyir/ /zhes bya ba smos te/ de dang 'brel ba ni bdag nyid kyi lus la bde ba tshol ba'i byis pa zhes bya ba'i don te/ gzhan dag ni de ltar bde ba mi 'dod do/ /ngu bzhin rnam smin dag ces bya ba smos te/ bdag nyid bde ba 'dod pa'i phyir/ /byas pa'i sdig pa'i las des ngan song du skyes te/ ngu bzhin du mi 'dod pa'i 'bras bu nyams su myong ba yin te/ rnam par smin pa de ni gdung ba'i bdag nyid yin pa'i phyir ro/ /sdig las zhes bya ba ni bsags pas na sdig pa ste/ de'i 'bras bu de yang nye bar bsags pa'am spyod pa'i tshul gang la yod pa de ni de nyid de/ gang gi phyir sdig pa nye bar bsags pa des ni nges par de'i 'bras bu myong bar 'gyur te/ ji skad du gang gis bsams bzhin du las byas shing bsags pas ni rnam par smin pa yang dag par myong bar mi 'gyur ro zhes nga mi smra'o zhes gsungs so/ /bsams bzhin du sdig pa bsags pa dang / mthar phyin par byas pa gnyis dang 'gyod pa med pa'i nyes dmigs yin no/ /ji ltar de sdig pa'i las dgod bzhin du byed pa yin zhe na smras pa/ 'di ltar nges par sdig las zhes bya ba ste/ rgyal byed kyi tshal na yi dwags skom pas nyam thag pa zhig las brtsams pa yin no/ /nges par zhes bya ba ni gcig tu sdig pa can gyi las so/ /'phral du zhes bya ba ni dus de nyid du myur du 'gyur zhing rnam par mi 'gyur te/ byas pa'i dus de nyid du mi smin to zhes bya ba'i don to/ /las thams cad kyi mthong ba'i chos nyid la myong ba'i mi snang ba'i phyir ro/ /mthun pa'i chos kyi dpe bstan pa/ 'o ma lta bur zhes bya ba yin te/ dper na 'o ma ni dus de nyid du zhor mi 'gyur te 'on kyang dus phyi ma zhig na zhor 'gyur ba de bzhin no/ /yang na chos mi mthun pa'i dpe ni 'phral du zhes bya ba ni sad t+ya zhes bya ba'i rtswa'i rigs yod de 'o ma la des btab na bcug pa tsam nyid du zhor 'gyur te/ sdig pa'i las ni de lta bu ma yin no/ /des ni byis pa sreg par byed/ /ces bya ba ni sdig pa'i las smin par 'gyur ba'i dus na shin tu gnod par byed pa'i phyir te/ sdig pa byed pa'i skye bo'i rjes su 'brang bar 'gyur ro/ /thal bas g.yogs pa'i me lta bur/ /zhes bya ba ni thal bas g.yogs pa'i me la dper na byis pa'i gom pa bag rkyong ste 'gro ba sreg par byed pa de bzhin no/ /'di nyid kyi dngos po rnam pa gzhan gyis ston pa yin te/ sdig las 'phral du nges par ni/ /zhes bya ba la sogs pas so/ /gcod pas ni gcod cing dum bur byed pa ste/ zad par byed ces bya ba'i don to/ /ji lta bu yin zhe na/ chos mi mthun pa'i dpe mtshon bzhin du zhes bya ba bstan to/ /dper na mtshon shin tu rnon pos ni reg pa tsam gyis gcod par byed do/ /sdig pa'i las ni de lta bu ma yin no/ /gal te 'phral du mi gcod na phyis kyang de bzhin du yin nam zhe na/ pha rol du ni mngon par 'gyur/ /zhes bya ba smos te/ 'jig rten pha rol du ni gang gis sdig pa byas pas skye ba gang du skye ba der skyes pa na shes par 'gyur te/ sdig pa byas pas sdug bsngal ba'o/ /gang gi phyir 'jig rten pha rol der ni 'dir byas pa'i sdig pa'i 'bras bu shin tu tsha ba nyams su myong bar 'gyur zhing yid du mi 'ong ba'i sdug bsngal 'byung ba zhes bya ba'i don to/ /bdag nyid kyi lus las bskyed pa'i sdig pa yin na yang me bzhin du rang gi gnas 'jig par byed pa yin no zhes bstan pa'i phyir smras pa/ lcags las g.ya' ni zhes bya ba la sogs pa'o/ /rgyal byed kyi tshal na gnas brtan rgyal dang / a kro sha ka dang / ro sha ka dang / pa ri b+ha sha ka la bstan pa'i phyir gsungs so zhes gzhan dag zer ro/ / lcags ni lcags nyid de 'di ltar g.ya' ni dri ma'o/ /langs par gyur pa ni yang dag par byung ba'o/ /ji ltar lcags las dri ma byung zhing gnas pa'i dri ma de ni de las byung ba'i dang de las skyes pa yin zhing de las langs pa yin yang rang gi gnam lcags sam mtshon de nyid za bar byed cing zad pa dang 'jig par byed ces bya ba'i don to/ /de ltar na/ de bzhin ma brtags byas pa yi/ /zhes bya ba ni yongs su ma brtags par byed pa'i byis pa'o/ /rang gi las kyi zhes bya ba ni rang gis byas pa'i nyes par spyad pa'o/ /ngan 'gror 'gro zhes bya ba ni ngan song du skye ba thob par 'gyur ba'o/ / de bas na ngan par spyod pas 'jigs par bya'o zhes bstan pa'i phyir 'di gsungs so/ /las kyi tshoms kyi rnam par 'grel pa ste dgu pa rdzogs so// //ji skad du bshad pa'i sdig pa'i las zad pa'i thabs bstan pa'i phyir de'i 'og tu dad pa'i tshoms bstan te/ gang gi phyir de la brten pas ni ma skyes dgra la sogs pa'i sdig pa zad par gyur pa'i phyir ro/ /'di'i 'grel pa brtsam par bya ste/ dad dang ngo tsha zhes bya ba la sogs pa smos so/ /mnyan yod na tshong dpon gyi bu grogs po bzhi zhig yod de/ gcig ni dad pa med cing ci la yang yid ches pa med do/ /gnyis pa ni ngo tsha med do/ /gsum pa ni sdig pa la spyod do/ /bzhi pa ni ser sna che ba'o/ /de rnams kyang rtag tu bsam pa 'di lta bu skyes te/ nam zhig na bdag cag mtho ris kyi lam bsgrubs te/ gang gis mtho ris su song nas de'i phun sum tshogs pa yang myong bar bya'o zhes bsams so/ /de dag kyang ma tshang ba med pa la sogs pa thob pas yongs su dga' zhing de dag bcom ldan 'das kyi spyan sngar phyin pa dang / de'i dbang du mdzad nas 'di gsungs so/ /dad pa ni sems kyi rab tu dang ba ste/ mngon par yid ches pa dang / don du gnyer ba'i mtshan nyid kyi dbye bas rnam pa gnyis so/ /gang mngon par yid ches pa skyes pa de ni kha cig don du gnyer bar 'gyur ba'i phyir ro/ /gang la mngon par yid ches pa zhes bya ba ni las dang 'bras bu 'brel pa dang dkon mchog gsum la sogs pa la'o/ /mngon par 'dod pas sprul pa'i dngos po la don du gnyer ba yang yin te/ des na 'di ni yon tan thams cad skyed pa yang yin pa'i phyir/ yang bshad pa/ dad pa dge ba skyed byed ma lta bu/ /skye bo dge yid dang po de la 'jug /dad bral byang chub phyogs dang dam chos kyi/ /rin chen tshogs 'dzin nus pa ma yin no/ /zhes pas so/ / re re la yang mtho ris kyi lam du bstan pa'i phyir dang gi sgra'o/ /ngo tsha ba ni gang gis sdig pa las 'dzem zhing zhum par byed la/ yon tan dang yon tan can dag la gus par byed pa'o/ /tshul khrims ni tshul khrims 'chal pa spangs pa ste/ ji skad du sngar bshad pa nyid do/ /sbyin pa ni yongs su gtong ba ste/ 'di la gcig tu sbyin pa ni sbyin pa po yin te/ 'dis sbyin pas sbyin pa'o zhes grub pa'i mtha' las bshad de/ ji skad du/ dge ba'i sems kyis nor dag ni/ /gang tshe bdag gis la ma byin/ /skad cig de la dge ba'i tshogs/ /sbyin pa zhes ni brjod pa yin/ /zhes so/ /chos 'di rnams ni zhes bya ba ni dngos po'i khyad par gyi yon tan 'di dag ni zhes bya ba'i don te chen po nyid du byed pa'i phyir ro/ /chos ni yon tan dang dge ba byed pa po yin no zhes pa'i tshig gis so/ /des na de nyid smras pa/ skyes bu dam pas bsngags zhes bya ba ste sangs rgyas dang de'i nyan thos kyis bsngags pa yin gyi/ skyon dang ldan pa ni bsngags pa ma yin no zhes pa'o/ /'di dag ji ltar bsngags pa yin zhe na/ bde ba'i lam yin pa'i phyir te/ de nyid smras pa/ lam 'di nyid kyis lha yul 'gro bar gsungs/ / zhes bya ba 'di ltar rnam pa bzhi'i khyad par gyis ni mtho ris su 'gro ba'i thabs su mkhas par bstan pa yin te ci'i phyir zhe na/ de nyid smras pa/ 'di yis zhes bya ba ni de bzhi las ma 'das te/ me dang chur 'jug pa dang bral ba'i las mchod pa sogs bsam pa yin no/ /'gro bar 'gyur ba ni 'gro bar byed pa'o/ /lha'i 'jig rten ni lha dang skal ba mnyam pa'o/ /de la dad pa ni dge ba'i bya ba thams cad kyi sngon du 'gro ba'i phyir dang por ston to/ /dang po yod pa la ni ngo tsha dang ldan par 'gyur ro/ /ngo tsha dang ldan pa la ni tshul khrims dag par 'gyur ro/ /tshul khrims dag pa la ni sbyin pa rnam par dag par 'gyur te/ go rims de lta bur 'gyur te/ ngo tsha dang dad pa gnyis kyis ni bsam pa phun sum tshogs pa'o/ /tshul khrims dang sbyin pa gnyis kyis ni spyod pa phun sum tshogs pa'o/ /lhag mas ni de'i phan yon bstan pa ste/ de yang dag par 'dzin du gzhug pa'i phyir 'di gsungs so/ /'dir sbyin pa ni thams cad kyi mthar bkod cing ches dman pa yin pa'i phyir ji ltar mtho ris kyi lam yin zhe na/ 'jungs rnams lha yi 'jig rten mi 'gro zhing / /zhes bya ba la sogs pa smos so/ /sum cu rtsa gsum gyi gnas stong shing shi ri ka las byas pa'i gzhal med khang na lha'i bu zhig gnas pa/ gnas brtan pa ba lang bdag gis mthong nas grogs po khyod 'di nas sngon yun ring por yang gnas pa mthong zhes smras pa dang de ci 'di ma gsan tam/ 'thon par 'byung yang srid ces bya ba rgyal rigs su 'gyur ba de ni bdag yin te/ der chad par smra bar 'gyur na/ bdag btsun pa 'phags pa gzhon nur 'od srungs kyis btul ba'i skye ba la sogs pa zhes smras pa bcom ldan 'das kyi lha'i rna ba'i mngon shes kyis gsan te/ ci tsam na tshigs su bcad pa 'di gsungs so/ / 'jungs rnams lha yi 'jig rten mi 'gro zhing / /zhes bya ba ser sna can nyid ni mtho ris kyi 'jig rten du 'gro ba'i las med pa nyid do/ /ci'i phyir zhe na/ de yis byis pa zhes bya ba yin te gang gi phyir gang dag 'jungs shing rmongs pa ste/ las dang 'bras bu 'brel ba ci lta ba bzhin du ma rtogs pa'i phyir ro/ /des na smras pa/ sbyin pa'i bsngags mi brjod ces bya ba smos so/ /sbyin pa'i bsngags pa mi brjod par ma zad de rmongs pa rnams ni smod pa yang yin pa ji skad du/ 'khor gsum rgyu yi khyad par nor yin pas/ /de nyams ches na gang gis ma nyams 'gyur/ /zhes 'chad do/ /brtan rnams zhes bya ba ni gang yang mkhas pa rnams te/ de ni sbyin la rjes su yi rang ba/ /zhes nor gtong ba'i phan yon yang dag par bsngags par byed pa'o/ /gang gi phyir sbyin pa'i snga rol du ni yid bde ba yin la/ sbyin pa sbyin pa'i tshe na sems dang ba yin zhing / byin nas kyang yid mgu ba yin te 'gyod pa med pa yin no zhes pa'i tshig gis so/ /des ni zhes bya ba ni sbyin pa la rjes su yi rang ba'i rgyus so/ /de dag ces bya ba ni rjes su yi rang bar byed pa yang bde ba myong bar 'gyur ba yin te/ gang gi phyir pa ya si zhes bya bas sbyin gtong gi khang pa byas nas nor la sogs pa dang ldan par byas te/ der sbyin pa byed pa yang gzhag pas bdag nyid kyis ni ma byin mod kyi/ de mtho ris su skyes te brtan pa rnams bde 'gror skyes nas/ lha'i longs spyod ci 'dod pa thob cing bde ba nyams su myong ngo / /gzhan du zhes bya ba ni 'jig rten gzhan no/ /des ni de dag gzhan du bde ba 'thob/ /ces gzhan dag tu brjod do/ /'o na tshigs su bcad pa 'dir dad pa'i sgra med pa'i phyir 'di ni mi rigs so zhe na/ de'i don dang 'brel pa'i phyir nyes pa med de/ de'i phyir ma dad pa'i rtags ni 'jungs pa'i rtags kyis te/ du ba'i rtags kyis me shes pa lta bu'o/ /sbyin pa la rjes su yi rang ba'i phyir na dad pa nyid do/ /de bzhin du gzhan dag la yang ci rigs par dris pa'i lan 'di brjod par bya'o/ /gang gi phyir yang dad pa'i dbang gis brtan pa rnams sbyin pas sems yang dag par tshim zhing rgyas par gyur la/ pha rol tu bde bar gyur pa'i phyir smras pa/ 'di na skyes bu'i nor mchog dad pa ste/ /zhes bya ba la sogs pa'o/ /lha zhig gis/ 'di na skyes bu'i nor mchog gang zhig lags/ /legs spyod gang gis bde ba thob par 'gyur/ /ro yi nang na ro yi mchog ni gang / /tshong pa'i nang na tshong mchog gang lags gsungs/ /zhes gsol pa dang / de'i phyir 'di gsungs so/ /dad pa'i don ni sngar bshad zin to/ /'di na skyes bu'i nor mchog ces bya ba la/ 'dis bde ba myong bas na nor ro/ /sems can rnams kyi nor gyi mchog ni 'jig rten na blo dang ldan pa'i nor te/ ji skad du/ nor 'di dag ni cung zad tsam yin te/ dper na dbyig la sogs pa'i nor rnams kyi nang na ni 'di lta ste/ dad pa'i nor mchog yin no zhes bshad pa dang / phyi rol gyi nor mchog rnams ni gdung bar byed pa'i phyir mchog ma yin te/ ji skad du/ stsogs pas nyon mongs mi dga' la/ /gang tshe srung las 'jigs pa byung / /'jigs na mya ngan 'ba' zhig ste/ /'di la su zhig dga' bar byed/ /ces gsungs pa'i phyir ro/ /chos ni sbyin pa'i bdag nyid kyi legs par spyod pa ste/ tshul khrims kyi bdag nyid la sogs pa ni 'og nas brjod pa'i phyir ro/ /legs spyod ces bya ba ni tshul bzhin du spyod pa ste/ ji skad du skyes bu dam pa'i sbyin pa lnga'i zhes bya ba la sogs pa gsungs so/ /bde ba 'thob ces bya ba ni phan 'dogs par byed pa ste/ 'khor bar yongs su 'khyams pa na/ /sbyin pa ma gtogs gnyen med do/ /zhes bya bas shes par bya'o/ /bden pa kho na ro bro rnams kyi phul zhes bya ba ni bden pa mchog tu gzung ba ni tshul khrims yin te 'dis ni tshul khrims bstan to/ /bden pa'i tshig nyid ni mngon par 'dod par bya ba yin pas lha dang mi rnams kyi zas gya nom pa thams cad pas kyang shin tu bsod pa yin te/ lha dang mi rnams mgu bar byed pa'i phyir ro/ /kho na ni nges par gzung ba yin no/ /shes rab kyis 'tsho ba zhes bya ba la/ shes rab ni de bzhin nyid shes pa ste/ des 'tsho ba ni 'tsho ba bzhin du gang la yod pa de'o/ /yang na shes rab kyis 'tsho ba'i tshul 'di la yod pa ste/ brtags nas byed pa zhes bya ba'i don te/ 'dis ni bsgoms pa las byung ba'i bsod nams bstan to/ /'tsho ba'i zhes bya ba la/ 'tsho bar byed pa de rnams kyi nang nas nges par gzung ba ste drug pa'o/ /mchog tu ces gsungs zhes bya ba ni dam pa zhes 'di nyid kyi nang du 'og nas 'chad par 'gyur te/ stsogs dang zad pa ma mthong ba/ /lo brgyar gson pa gang yin pas/ /zhes bya ba dag yin no/ /de la 'dis ni dad pa sngon du 'gro ba'i sbyin pa dang / tshul khrims dang bsgoms pa las byung ba'i bsod nams bya ba'i dngos po bstan to/ /dad pa ni sbyin pa la sogs pa de dag 'ba' zhig gi sngon du 'gro ba ma yin gyi/ shes rab kyi dbang po la sogs pa'i yon tan gyi yang sngon du 'gro ba nyid du bstan pa'i phyir/ mya ngan 'das par 'gro ba yi/ /zhes bya ba la sogs pa smos so/ /lha zhig gis zhus pa/ 'jig rten skyes bu ji lta bus/ /nges par byed pa'i shes rab dag /'thob 'gyur yang dag lta ba ni/ /bcom ldan 'das kyis bdag la gsungs/ /zhes pa dang / des na 'di gsungs pa yin no/ /dad pa bskyed de zhes bya ba ni yid ches par bya ba ste/ gang 'di la rigs pa dang lung dag gis yid ches par bya'o/ /ci zhig la dad pa bskyed pa yin zhe na/ dgra bcom chos la zhes bya ba ste/ sangs rgyas kyis bstan pa'i lam mo/ /mya ngan las 'das 'gro ba yi/ /zhes bya ba ni thar pa thob par byed pa ste/ de'i phyir bstan pa dang sgrub pa'i chos la brten pas 'bras bu'i chos 'thob pa'o/ /de la dad pa bskyed de de'i don la mngon par rtsom pa yod par gyur na ni nges par 'thob pa yin no/ /'o na ye shes nyid thar pa'i lam la sogs pa thob par byed pa yin na/ de ji ltar 'dir brjod ce na/ 'dir smras pa dad pa yang ye shes kyi rgyu yin pa'i phyir te/ gang 'di ltar dad nor yod pa des ni shes rab 'thob par 'gyur te/ gus par byas te dam pa'i chos mnyan pa ni dad pas mngon par 'dod pa'o/ /gus par nyan pa ni nyan par 'dod pa ste/ gang gi phyir dad pa yang nyan par 'dod pa nyid skyed pa yin no/ /shes rab de ga las 'thob ce na/ smras pa/ de dang de yi zhes bya ba yin te/ bden pa dang phung po dang khams dang skye mched la sogs pa la nges par thob par 'gyur ba'o/ /mkhas pas zhes bya ba ni rtogs pa ste/ rigs pas thob pa'i ye shes kyi sbyor ba las so/ /de la brten nas ni thos pa las byung ba la sogs pa'i shes pa 'byung ba'i phyir ro/ /dad pa'i stobs kyis ni shes rab la sogs pa thob pa gcig pur ma zad kyi nyes pa rnams kyang spong ba yin par bstan pa'i phyir smras pa/ bag can gyis ni rgya mtsho dang / /zhes bya ba la sogs pa'o/ /lha zhig gis gsol pa/ rang gi chu bo gang gis rgal/ /gang gis rgya mtsho rgal bar 'gyur/ /bdag gi sdug bsngal gang gis spong / /gang gis yongs su dag par 'gyur/ /zhes pa dang 'di gsungs so/ /dad pa rgyur 'gyur bas sgrol ba ni 'das pa'o/ /chu bo ni rnam pa bzhi ste/ nyon mongs pa'i rang bzhin no/ /dad pa'i gzings la brten nas chu bo thams cad las brgal ba'i phyir ro/ /pas zhes bya ba ni de nyid kyi don te/ dad pa nyid kyis 'phags pa'i lam gyi nyon mongs pa thams cad spong ba'i phyir te/ 'dir dad pa ni 'phags pa'i lam mo/ /bag yod pa'i stobs kyis ngan song gsum gyi rgya mtsho las brgal ba yin te/ 'dir bag yod pa ni mthong ba'i lam mo/ /brtson 'grus kyis ni sdug bsngal spong / /zhes bya ba brtson 'grus kyi sbyor ba rtul phod pa ste/ bsgom pa'i lam gyis khams gsum gyi sdug bsngal spong ba yin no/ /shes rab kyis ni yongs dag 'gyur/ /zhes bya ba ni mi slob pa'i lam bstan te/ de yod na ni rgyud la dri ma med par 'gyur bas so/ /yang na dad pas ni khyim gyi gnas kyi chu bo las brgal ba yin te/ rab tu 'byung ba la brten pa'i phyir ro/ /bag yod pas ni 'dod pa'i rnam par rtog pa la sogs pa'i rgya mtsho las brgal ba'i phyir ro/ /brtson 'grus kyis sdug bsngal spong ba ni 'dod pa'i khams kyi sdug bsngal dang bcas pa 'chad pa'i phyir ro/ /shes rab kyis ni yongs dag 'gyur/ /zhes bya ba ni sa gong ma dag las 'dod chags dang bral ba'i phyir ro/ /dad pas zhes bya ba ni nyan thos dang rang sangs rgyas dang sangs rgyas kyi byang chub gsum gyi spyir bstan to zhes gzhan dag zer ro/ /bag yod pa'i sgras ni 'dir 'phags pa'i lam gdul bya rnams la mtshon cing bstan pa yin te/ de'i phyir bag yod pa dang / ma dad pa dang / le lo dang rmongs pas ma rungs par byas pa'i gdul bya mtha' dag la dad pa la sogs pa'i man ngag gi gnyen po bstan pa yin no/ /dad pa la brten pas ni 'ching ba thams cad gcod pa yin no zhes bstan pa'i phyir smras pa/ dge slong dad pa'i zhes bya ba la sogs pa'o/ /lha zhig gis gsol ba/ 'di ltar grogs ni gang zhig lags/ /gdams pa yang ni gang zhig gang / / dge slong gang la dga' ba yis/ /bcings pa thams cad gcod par 'gyur/ /zhes pa dang / 'di gsungs so/ /dad pa'i grogs ni gnyis pa gang la yod pa'o/ /dad pa la brtan nas so sor thar pa'i sdom pa la sogs pa'i khyad par thob par 'gyur te de med na ni de med pa'i phyir ro/ / shes rab kyis ni gtams pa dang / /zhes bya ba ni shes pa'i rang bzhin gyi blos dge slong 'di la ji lta ba bzhin du gtams pa dang / ston pa ste 'dis ni rtag pa nyid du bstan to/ /mya ngan 'das la mngon dga' bas/ /zhes bya ba ni thar pa nyid la yang dag par dga' ba skyes par gyur pa'o/ / 'khor ba la rgyab kyis phyogs par byas pa dang / mya ngan las 'das pa la mkhas par 'gyur te/ des na de thob par byed pa'i lam la goms par byed pa'i dge slong gis 'ching ba thams cad de nyon mongs pa'i zhags pa thams cad gcod par byed do/ /de la dad pa dang shes rab kyis ni sbyor ba phun sum tshogs pa bstan to/ /mya ngan 'das la mngon dga' bas/ /zhes bya bas ni bsam pa phun sum tshogs pa bstan to/ /lhag mas ni de'i phan yon bstan to/ /dad pa la sogs pa dang ldan pas ni legs pa zhes brjod pa 'thob par 'gyur te/ gang gis dad dang zhes bya ba la sogs pa smos so/ /bcom ldan 'das kyis dge slong ni legs pa'i ngang tshul can la brjod de/ ji tsam gyis legs pa'i ngang tshul can du brjod ce na zhes bya ba nas 'di gsungs pa yin no/ /gang gis zhes bya ba ni sems can gang la la zhig gis so/ /dad dang zhes bya ba ni snga ma bzhin no/ /'di dag ni re re dang mtha' dag la legs pa zhes brjod pa'i rgyu bstan pa'i phyir/ dang gi sgra gsum smos so/ /nyid ces bya ba ni nges par gzung ba ste/ rim pa gzhan du sbyar ba'i phyir de nyid legs pa'i ngang tshul can zhes brjod do/ /legs bsgoms shing zhes bya ba ni legs par bsten pa'i phyir bstan par 'gyur te/ nyon mongs pa thams cad spang ba'i phyir skyon rnams spangs pa yin te/ spangs pa ni bsal ba ste/ gang gis bag la nyal spangs pa'o/ /mkhas pa zhes bya ba ni 'dir mnyam par gzhag pa la dgongs te/ mnyam par gzhag pa'i sems las ni yang dag pa ji lta ba bzhin du shes pa yin no zhes pa'i tshig gis te rgyu las 'bras bu btags pa'o/ /des na yang dad pa 'jug pa yin te/ tshul khrims dang ting nge 'dzin dang / shes rab kyi phung po ni de la rag las pa yin te/ nyon mongs pa spangs pa gang la yod pa de'o/ /legs pa'i ngang tshul can zhes bya ba la/ legs pa'i ngang tshul dang ngo bo gang la yod pa ste skye bo dam pa'i rang bzhin skye bo dam pas bsngags pa'o/ /brjod pa ni bshad pa'o/ /dad pa dang ldan pa ni thams cad du yang mchod pa yin no zhes bstan pa'i phyir smras pa/ dad dang tshul khrims zhes bya ba la sogs pa'o/ /tshe dang ldan pa shA ri'i bu dang maud gal gyi bu 'khor dang bcas pa gang dang gang du 'gro ba de dang der rgyal po dang rgyal po'i blon po rnams kyis bsnyen bkur byas te/ skabs 'di lta bu gsan nas 'di gsungs so/ /dad pa gang la yod pa de ni dad pa'o/ / dad pa dang ldan pa kho nas tshul khrims dang ldan par 'gyur ba'i phyir tshul khrims phun sum tshogs zhes smos te/ so sor thar pa'i sdom pa dang phrad pa'o/ /tshul khrims dang ldan pa las ni gtong ba phun sum tshogs par 'gyur ba'i phyir smras pa/ gtong ldan zhes bya ba ste/ yongs su gzung ba thams cad yongs su btang ba'i phyir dang / rmongs pas yo byad gzhan yongs su mi 'dzin pa'o/ /gtong ba dang ldan pa'i phan yon smras pa/ 'jungs pa rnam spangs pa zhes bya ba yin te/ ser sna dang bral ba'o/ /ji skad du sbyin pa sems kyi ser sna dang ni chags pa'i skyon gyi rdul rnams 'khru bar byed ces bshad pa yin te/ de nyid kyis bdag nyid rnam par dag pas yul gang dang gang du 'gro ba de dang der khyad par shes pa'i lha dang mi rnams kyis mchod par 'gyur ro/ /dad pa dang tshul khrims phun sum tshogs pa gnyis kyis ni lus dang ngag dag pas bdag gi don phun sum tshogs pa'o/ /gtong ba dang ser sna spangs pa gnyis kyis ni gzhan gyi don phun sum tshogs pa bstan to/ /dad pa dang shes rab kyi nor ni nor gyi mchog yin no zhes bstan pa'i phyir smras pa/ mkhas gang 'tsho ba'i 'jig rten na/ /zhes bya ba la sogs pa'o/ /gter la chags pa'i tshong dpon zhig gis nor gyi mchog ji snyed pa de gter du sbas pa las 'di snyam du bsams te/ gang bdag gis gter thams cad phyung la rin po che'i mchog gang yin pa btsong bar bya na/ bdag gis ni mi shes te/ gang du bcom ldan 'das bzhugs pa der bdag song ste zhu'o snyam pa nas ji srid du 'di gsungs so/ /gang ni gang la la'o/ /'tsho ba'i 'jig rten ni 'gro ba'am/ sems can gyi 'jig rten na'o/ /rten byed pa zhes bya ba ni thob par byed pa'o/ /dad dang shes rab ces bya ba la/ khyad par du 'phags pa'i shes rab ni 'dir shes rab bo/ /gang zhig rten par byed ce na/ /smras pa/ mkhas pa zhes bya ba ste/ mkhas pa ma yin pa ni de gnyis mi sgrub cing de la brtson par mi byed de/ rigs pa'i shes pa'i sbyor ba bstan pa yin no/ /de dag de yi nor mchog ste/ /zhes bya ba ni gang gi phyir mkhas pa de'i nor ni 'di nyid mchog tu 'dod pa yin te/ phun sum tshogs pa thams cad kyi rgyur gyur pa'i phyir ro/ /de yi nor gzhan phal bar zad/ /ces bya ba ni yongs su rtogs par byed pa de'i ste/ skye bo tha mal pas mngon par bkur ba'i gser la sogs pa'i rin po che'i nor dag ni mngon par mi bsngags te/ gdung ba thams cad kyi rgyur gyur pa'i phyir ro/ /phal par zad ces bya ba ni nges par dor dgos pa yin pa'i phyir dang ngan song gi 'bras bur gyur pa'i phyir ro/ /gang tshong dpon la bstan pa'i ched du 'di gsungs pa ste/ de ni dad pa med pa dang shes rab 'chal pa yin pas des na gnyi ga 'dir bstan to/ /me'i rtags du ba las shes par byed pa bzhin du dad pa mi mngon pa'i rtags bstan pa'i phyir smras pa/ 'phags pa lta bar 'dod pa dang / /zhes bya ba la sogs pa'o/ /dge slong dag dad pa gang gi dad pa'i rtags ni gsum po 'di dag go zhes rgya cher te 'di gsungs so/ / 'phags pa ni sdig pa las ring du song ba'i phyir ro/ /yon tan dang ldan pa la lta bar 'dod cing brtson pa ni lta bar 'dod pa ste yang dang yang du de dang phrad pa'i phyir nye bar 'gro bas so/ /gang gi phyir dad pa med par ni gzhan gyis bskul bar gyur kyang ma dad pas 'phags pa'i gan du mi 'gro'o/ /dam chos nyan par dga' ba dang / /zhes bya ba ni bden pa ston pa la sogs pa legs par bshad pa mnyan pa la zhen pa ste/ srog gi phyir yang legs par bshad pa mnyan par 'dod pa skye ba'o/ /ser sna'i dri ma rnam spangs pa/ /zhes bya ba ni gtong ba la mchog tu 'dzin pa'i phyir ser sna'i tshul chags pa'i dri ma gang gis spangs pa'o/ /zhe sdang dang gti mug dang chags pa spyod pa rnams dad pa la go rims bzhin du de'i mtshan nyid bstan pa'i rtags gsum bstan to/ /yang na nyan thos dang rang sangs rgyas dang / sangs rgyas kyi rigs can rnams la gcig dang gnyis dang gsum gyi rtags dang ldan pa nyid du go rims bzhin du bstan pa'i phyir ro/ /'dus pa de dag gis ni dad pa rtog par byed pa yin no zhes gzhag ste/ de nyid dad pa zhes brjod cing dad pa dang ldan pa zhes kyang brjod de/ de'i 'bras bu mthong ba las rjes su dpag pas so/ /'jig rten la rab tu grags pas dge ba'i mtshams sbyor ba'i dus su dad pa yod pa yin gyi/ thams cad la nye bar mtshon pa ni nges par mi brjod do/ /dad pa gcig pu ni 'jig rten las snying po blangs pa yin no zhes bstan pa'i phyir/ dad pa'i lam brgyags zhes bya ba la sogs pa smos so/ /lha zhig gis gsol pa/ lam brgyags gang zhig bskur bya zhing / /rkun pos mi 'phrogs gang zhig lags/ /gang gis 'phrogs na bzlog bgyi zhing / /skye bo gang gis 'phrogs na dga'/ /gang zhig 'ongs nas rtag tu ni/ / mkhas pa mngon par dga' bar 'gyur/ /zhes pa la 'di gsungs so/ /dad pa de ni dad pa dang ldan pa'o/ /bskur ba ni nye bar blangs pa'o/ /lam brgyags ni lam gyi 'tsho ba'o/ /sbyin pa la sogs pa'i bsod nams kyi tshogs ni dad pa'i lag pas bskur bar nus pa yin te/ 'jig rten pha rol tu 'gro ba'i yo byad do/ /ji skad du/ /dper na lam brgyags mang pos ni/ /bde bas 'di na 'gron po 'gro/ /de bzhin 'dir yang dge byas pa'i/ /sems can bde 'gror 'gro ba yin/ /zhes bshad do/ /bsod nams chom pos dbrog mi nus/ /zhes bya ba ni grong 'joms par byed pa'i rkun mas kyang gzhan gyi legs par spyad pa dbrog par mi nus te/ bsod nams rgyal po chom rkun dag /g.yo zhing brtson par byed pas kyang / /'phrog par nus pa ma yin no/ /zhes pa'i tshig gis so/ /chom rkun 'phrog par byed pa bzlog /ces pa la/ rkun mas gzhan gyi nor 'phrog par byed pa ni rgyal po la sogs pas gsad pa la sogs pa'i chad pas byas pas bzlog par bya ba yin no/ /dge sbyong rnams kyis blangs na dga'/ /zhes bya ba ni gzhan gyi bza' ba dang btung ba dang bgo ba dang khang pa la sogs pa 'phrog cing len par byed pa'i sdom brtson dge ba rnams la ni skye bo dad pa dang ldan pa dag shin tu dga' bar byed pa yin te/ 'phags pas 'phrogs shing blangs na bzang ba bzhin zhes bya ba'i tshig gis so/ /dge sbyong 'ongs pa la zhes bya ba ni nye bar zhi ba'i spyod pa can gyi sdom brtson 'ongs pa la'o/ /rtag tu zhes pa ni rgyun du'o/ /mngon par dga' ba ni mngon par 'dod pa'o/ /mkhas pa ni bdag la phan par 'dod pa'o/ /dad pa dang rjes su mthun pa'i zhing la sbyin bdag rnams 'bul bar byed pa na/ phrag dog gi dbang gis skye bo ngan pa rnams ting nge 'dzin nyams par 'gyur ba'i nyes dmigs bstan pa'i phyir smras pa/ skye bo rnams ni ci rigs par/ /zhes bya ba la sogs pa'o/ /khyim bdag mgon med zas sbyin gyis 'phags pa shA ri'i bu dang maud gal gyi bu la chos gos la sogs pas shin tu yang bsnyen bkur byed par gyur to/ /ko ka li ka la sogs pas ni khyim bdag 'di ni gang zag la mngon par dad do zhes 'phya bar byed de ji tsam na tshigs su bcad pa gnyis gsungs so/ /sbyin byed ces bya ba ni yon tan can la 'bul bar byed pa'o/ /gcig ni gcig tu ste dad pa'i sems can dag go/ / dad pa ji bzhin zhes bya ba ni dad pa dang rjes su mthun pa ste/ de chung ngu la sogs pa'i dbye ba dang / des byas pa'i sbyin pa la sogs pa'i dbye bas so/ /ci rigs par bya zhes bya ba ni 'byor pa dang rjes su mthun pa ste/ 'byor pa ci bsags pa bzhin du sbyin pa ste/ dad pa ji lta ba bzhin no/ /'byor pa ma bsags pa dag gis kyang ji ltar 'tshal bar ro/ /de lta zhes bya ba ni zas dang skom sbyin bdag ster ba la'o/ /gang zhig yid ni mi bde ba/ /zhes bya ba ni phrag dog la sogs pa'i dbang gis mi dga' ba'o/ /gzhan zhes bya ba ni len pa po dang 'brel pa zhes bya ba'i tshig gi lhag ma'o/ /des ni nyin dang mtshan rnams su/ /zhes bya ba ni skye bo ngan pa de ni nyin par dang nub mo rnams su'o/ /ting 'dzin 'thob par mi 'gyur ro/ /zhes bya ba ni sems rtse gcig pa mi rnyed pa ste/ phrag dog gis byas pa'i g.yeng ba dang ldan pa zhes bya ba 'og nas smos te/ rang gi rnyed pa la brnyas par mi bya'o zhes bya ba la sogs pa'o/ /nag po'i phyogs bstan nas/ dkar po'i phyogs smras pa/ gang gis zhes bya ba la sogs pa smos te/ gang yang skyes bu dam pas so/ /de 'dra kun du spyod byed pa/ /zhes bya ba ni gzhan gyi rnyed pa'i rgyur gyur pa'i yid mi bde ba drungs 'byin pa'o/ /yang phyis mi skye bar bya ba'i phyir smras pa/ ta la'i mgo bcad ltar zhes bya ba sa bon med par bya ba ste/ ta la'i mgo dang mnyam par 'jug pa ni ta la'i rtse mo ste/ 'di ltar shing ta la'i rtse mo bcad pas yang mi skye ba de bzhin du spang ba'o/ /des ni nyin dang mtshan rnams su/ /zhes bya ba la sogs pa ni rtag par sla'o/ /dad pa med pa ni dam pa rnams kyis bsten par bya ba ma yin no zhes bstan pa'i phyir smras pa/ khron pa skam po zhes bya ba la sogs pa'o/ /dge slong dag dad pa med pa'i gang zag ni sten par ma byed cig /de ci'i phyir zhe na/ dad pa med pa bsten pa ni sdug bsngal ba ste/ gang gi phyir dad pa med pa bsten cing bsten pa las ni lus kyis nyes par spyad pa spyod pa dang / ngag gis nyes par spyod pa nas ji srid du dmyal bar skye bar 'gyur ro zhes bya ba'i bar du'o/ /dkar po'i phyogs kyi tshigs su bcad pa yang ste 'di gnyis gsungs so/ /dad pa med pa zhes bya ba ni sems dad pa dang bral ba'i skye bo zhes bya ba'i don to/ /bsten mi bya zhes bya ba ni bsnyen par mi bya ba ste/ de dang lhan cig 'brel par mi bya'o/ /khron pa skam po ji lta bar/ /zhes bya ba la/ chu btung bar bya ba'i gnas de ni khron pa ste rdzing bu la sogs pa'o/ /ji ltar chu med pa'i skam pa de chu don du gnyer ba dag gis mi bsten pa de bzhin no/ /'on kyang khron pa chu med cing skam du zin kyang brkos par gyur na chu sbyin par byed do zhe na/ ji ste zhes bya ba la sogs pa yin te/ gal te rdzing bu la sogs pa chu med cing skam po la chu don du gnyer bas de kun du brkos kyang de ma thag mi 'byung la/ gal te byung bar gyur na yang 'dam chu dri nga ba 'byung bar 'gyur zhes bya ba smos te/ 'dam rul pa de lta bu'i dri gang la yod pa de ni 'dam chu dri nga ba ste/ de ni dbyig pa can bzhin no/ /shes rab can gyis dad ldan bsten/ /zhes bya ba ni gang la yang dag par rtogs pa yod pa des ni dad pa can dang lhan cig bsten par bya'o/ /'dir dpe bstan pa/ mtsho la chu 'dod ji lta bar/ /zhes bya ba smos te/ dper na chu 'dod pa ste/ khrus dang btung ba dang de'i nang du zhugs par 'dod pas ni mtsho chen po la sten par byed do/ /mtsho ji lta bu zhe na/ smras pa/ chu mang zhes bya ba ste/ chu mang po gang la yod pa de ni chu mang ste/ bya rog gis btung du rung ba zhes bya ba'i don to/ /rnam par dang ba ni rnyog pa dang bral zhing shin tu gtsang ba'o/ /bsil bar gyur cing zhes bya ba ni de yang shing gi grib mas yongs su bskor ba'i phyir/ yid tshim par byed do/ /rnyog pa med pa zhes bya ba ni rdul med cing na kra la sogs pa sems can gdug pa can dang 'dam dang chu bal la sogs pas ma rnyog pa'i phyir ro/ /ji ltar khrus dang btung ba la sogs pa 'dod pas ni mtsho 'di lta bu nye bar sten par byed pa de bzhin du khyad par gyi rnam pa mang po don du gnyer bas kyang lhag par g.yo med pa dang bsam pa dag pas gzhan la phan 'dogs shing dga' bar byed pa dang / mi shes pa dang / tshul 'chos pa la sogs pa dang bral bas rnyog pa med pa'i dad pa can bsten na des ni yid la mngon par 'dod pa'i 'bras bu 'grub par 'gyur ro/ /mkhas pas ni dad pa can bsten par bya'i/ cig shos ni ma yin no zhes bstan pa'i phyir smras pa/ chags sam ma chags zhes bya ba la sogs pa'o/ / tshe dang ldan pa shA ri'i bu dang maud gal gyi bu gnyis dgon pa'i phyogs gcig nas snga dro sham thabs dang chos gos bgos te lhung bzed blangs nas/ bram ze'i grong khyer zhig tu bsod snyoms kyi phyir zhugs pa na/ mu stegs can gzhan dag gis shin tu spyos shing brgyad de lhung bzed kyi nang du yang rdul gyis bkang ngo / /bram ze dad pa dag gis ni mchod par yang gyur to/ /de gnyis dmyal ba dang mtho ris dag tu mi dga' zhing dga' ba yin te/ de'i dbang du mdzad nas 'di gsungs so/ /chags pa ni kha cig dad cing blo dang ldan pa'i bram ze dang khyim bdag dam pa rnams la rjes su chags par bstan pa yin no/ /sam zhes bya ba'i sgra ni ma chags kyang rung zhes bya ba yin te/ skye bo ngan pa kha cig dam pa rnams la rnam par sdang ba bskyed pa'o/ /de yis thub sku mi ngas pas/ /zhes bya ba ni bdag nyid chen po rnams ni chags pa'am ma chags pa ste/ dad pa dang ma dad pa'i sems can gyi rgyur gyur pa zhes sku mi ngas pa ste/ 'gyur bar mi mdzad do/ /ci'i phyir zhe na/ smras pa/ 'di ltar thub pa de ni khams gsum las 'dod chags dang bral ba'i phyir ro/ /gal te sku mi ngas na des ci zhig bya ba yin zhe na/ smras pa/ ma dad pa dag spang bar bya/ /zhes bya ba ste/ ma dad pa'i sems can dor bar bya ste/ chu dang bral ba'i phyir chu 'dod pas khron pa skam po bzhin du sdig pa byed pa de yongs su spang bar bya'o/ /dad pa rnams ni nye bar bsten/ /zhes bya ba ni dad pa can dag dang bsnyen par bya ba nyid de/ chu 'dod pa dag gis mtsho chen po bzhin du ste/ de'i bsod nams kyi tshogs nye bar skyed pa'i phyir ro/ /dad pa'i tshoms te bcu pa'i rnam par 'grel pa rdzogs so// //dad pa'i khyad par gyi 'bras bu bstan pa'i phyir/ de'i 'og tu dge sbyong gi tshoms bstan pa yin te/ dad pa'i stobs kyis ni 'phags pa'i lam skye la/ de'i mthus ni dge sbyong du 'gyur ro/ /yang na bstan ma thag pa'i tshoms su thub pa zhes bya ba de'i rnam grangs dge sbyong yin no zhes bstan pa'i phyir ro 'grel pa smras pa/ bram zes 'dod pa zhes bya ba la sogs pa'o/ /rab tu dang ba phal che ba zhes bya ba'i bram ze zhig ser skya'i thar pa bsgrub par 'dod pa las de'i thabs mi shes te/ sangs rgyas la yid ches pa skyes par gyur nas/ bcom ldan 'das kyi spyan sngar song ste zhus pa las/ de'i phyir tshigs su bcad pa gnyis gsungs te/ de thos pas rab tu byung zhing dgra bcom pa'i 'bras bu thob bo/ /chod cig ces bya ba ni spang zhing dor bar gyis shig ces bya ba'i don to/ /gang yin zhe na/ rgyun zhes bya ba ste skye ba'i rgyun no/ /gang gi phyir 'di ma spangs na ni gcig tu thob par mi 'gyur ro/ /ci zhig byas nas rgyun bcad par nus she na/ brtson 'grus kyis ni zhes bya ba smos te/ sbyor bas bskyed par bya ba'i khyad par ni brtson 'grus te/ dad pas dam pa bsten cing legs par gsungs pa mnyan pa dang / rab tu byung ba yongs su bzung ba dang dge ba la sogs pa'i lam gyi tshogs la 'jug pa zhes bya ba'i don to/ /tshogs 'di la brten nas de'i 'og tu ci zhig bya zhe na/ smras pa/ nyon mongs pa spang bar bya ste/ de spang ba'i rim pa bstan pa'i phyir smras pa/ 'dod pa rab spang zhing zhes bya ba ste/ 'dod pa na spyod pa'i mthong ba dang / bsgom pas spang bar bya ba'i nyon mongs pa spong ba yin te/ de nas gzugs dang gzugs med pa na spyod pa yin no zhes ston te/ 'dod pa'i khams kyi yongs su rdzogs par spangs na bram zer 'gyur te/ 'dod pa'i mi gtsang ba'i nang du 'bying ba las ni bram zer skye bar mi 'gyur ro zhes de nyid bstan pa'i phyir bram ze zhes bya ba smos te/ 'di'i don ni 'dod pa dag las yid rgyab kyis phyogs pa yin no zhes rgyu ci'i phyir 'dod pa la sogs pa spang bar bya ba yin zhe na/ rab tu ma spangs par zhes bya ba ste/ ji srid du 'dod pa la spyod pa la sogs pa'i nyon mongs pa spangs par ma gyur pa de srid du ni de thub pa ma yin te/ gcig tu yang thob pa ma yin no/ /thub pa zhes bya ba ni phung po lhag ma dang bcas pa'i mya ngan las 'das pa thob par gyur pa'o/ /gcig tu zhes bya ba ni phung po lhag ma med pa'i mya ngan las 'das pa ste/ de gnyis kyang nyon mongs pa spangs pas 'thob pa ni rtogs pa'o/ /de ma thob par ni rgyun chod pa ma yin te/ des na 'dod pa la sogs pa nges par spang bar bya ba nyid yin no/ /'dir dge sbyong gi sgra med kyang bram ze dang thub pa'i sgra ni de'i rnam grangs yin pa'i phyir tshigs su bcad pa 'di dge sbyong gi tshoms su dgod par rigs pa nyid do/ /tshigs su bcad pa gnyis por yang kun du rgyu'i sgra'i ni kun rdzob tu dge sbyong la btags pa'i rgyu yin pa'i phyir rtsod pa med do/ /rtag tu byed pa dang gus par byed pa'i sbyor bas sngar bstan pa'i bya ba nus pa yin te/ gzhan du ni ma yin no zhes 'dir bstan pa'i phyir/ kun du rgyu zhes bya ba la sogs pa'o/ /bya ba bya ba zhes bya ba la bzlas pa ni gyis shig gyis shig pa'i don to/ /rtag tu de nyid ces bya ba ni sngar bstan pa'i rgyun gcad par bya ba ste/ rang dang rjes su mthun pa'i gnyen po'i phyogs bsgoms pas rtag tu de nyid du bsgrub par bya ste/ 'dir bag med par ni mi bya'o zhes pa'o/ /gus pa'i sbyor ba la gzud pa'i phyir/ brtson 'grus brtan pa kho na yis/ /zhes bya ba smos te/ dge ba'i bshes gnyen bsten cing / dam pa'i chos mnyan pa la sogs pa bskyed pa la bar chad med pa nyid du brtson 'grus brtsams pas 'jug par gyis shig pa'o/ /de ltar ga las byed du 'jug pa yin zhe na/ kun du rgyu ba zhan pa dag / ces bya ba ni sbyor ba lhod pa ste/ 'di ltar kun du rgyu gal te brtson pa med pa dang / skyo ba med par gyur te/ nga rgyal dang phrag dog la sogs pa dang ldan pas ni de'i tshe spyir yang shas cher stsogs shing 'phel ba yin no/ /nyon mongs pa ni/ las dang nyon mongs pa dang skye ba'i kun nas nyon mongs pa'i bdag nyid ma spangs pa'o/ /gang sngar bstan pa'i kun du rgyu ba zhan pas nyes pa 'byung bar yang ma zad de/ mngon par 'dod pa'i 'bras bu yang sbyin par mi nus so zhes bstan pa'i phyir/ zhan pa'i las ni zhes bya ba la sogs pa smos so/ /dge bsnyen ma zhig gi bu yan lag brgyad pa'i bsnyen gnas kyi gso sbyong gi bslab pa dang ldan pa las nyams par gyur te/ de gnod sbyin zhig gis bzung bar gyur to/ /de nas de'i mas gnod sbyin de rjes su dran par byas te/ tshigs su bcad pa gnyis smras so/ /ji srid bcu bzhi bco lnga ni/ /bsnyen gnas yan lag brgyad pa la/ /'di na legs par mnyam gzhag dang / /gang zhig tshul khrims ldan pa la/ /gnod sbyin 'tshe bar mi 'gyur zhes/ /bdag gis thos na rigs yin nam/ /zhes so/ /gnod sbyin gyis smras pa/ thos pa ji snyed pa de dag ni legs te/ rigs pa yin no zhes smras so/ /de'i phyir gnod sbyin thong shig ces byas pa dang / gnod sbyin des kyang de btang ste/ sangs rgyas kyis gsungs pa'i tshigs su bcad pa gsum yang brjod do/ /de nas dge bsnyen ma des rang gi bu de dgon pa'i gnas su khrid de song nas rab tu phyung zhing ci nas kyang skyo ba bskyed de dgra bcom pa nyid mngon sum du byas par gyur to/ /ji snyed ces bya ba ni thams cad do/ /zhan pa'i las byas zhes bya ba ni rnam par spyod pa dag la spro ba nyams pa'o/ /don chen 'gyur snyam mi byed do/ /zhes bya ba dang 'dir sbyar bar bya'o/ / 'jig rten pa rnams kyi las zhing rmod pa dang / ba lang srung ba dang / rgyal po la zha 'bring byed pa la sogs pa yang rtag tu byas pa dang gus pa'i sbyor ba ma gtogs pa 'bras bu chung ba nyid yin na/ 'jig rten las 'das pa'i las kun du mi spyod pa la sogs pa lta smos kyang ci dgos pa'o/ /kun nas nyon mongs dka' thub dang / /zhes bya ba ni gang yang cung zad dus ma yin pa'i zas la sogs pa las ldog pa'i tshul gal te ma spyad dam/ kun nas nyon mongs pas ji lta ba bzhin du ma spyad pas dri ma can du gyur pa de yang / don chen 'gyur snyam mi byed do/ /zhes bya ba 'di dang sbyar ro/ /yang na kun nas nyon mongs pa'i dka' thub ni phyi rol gyi me lda bsten pa la sogs pa ste/ de ni gcig tu 'bras bu med pa yin no zhes bstan to/ /tshangs spyod yongs su ma dag de/ /zhes bya ba la/ 'dir lam gyi tshogs tshul khrims ni tshangs par spyod par bshad do/ /yang na 'khor bar yongs su zad pa'i tshul khrims yon tan gyi khyad par la bsten pa yin gyi/ don chen 'gyur snyam mi byed do/ /zhes bya ba 'di dang sbyar te/ las la sogs pa ni mi rigs pas bskyed pa gang bstan pa ste/ des ni mngon par 'dod pa'i 'bras bu rgya chen po thob par mi 'gyur ro/ /don chen por mi 'gyur bar ma zad de/ ngan song gi rgyur yang 'gyur ba'i phyir te/ ji lta bu zhe na/ ji ltar mda' ni zhes bya ba ste/ dper na mda' gzung nyes pa zhes bya ba lhod par gzung bas so/ /lag pa ni lag pa nyid de byed pa zhes bya ba'i don to/ /chod par gyur pa zhes bya ba ni dum bu gnyis su bya zhing rma 'byung bar byas pa zhes bya ba'i don to/ /dge sbyong bsrung ba bya nyes dang / /zhes bya ba la/ dge sbyong du btags pa'i rgyu ni 'dir tshul khrims la dge sbyong zhes bshad pa'o/ /yang na de ltar tshul khrims gzung ba legs par ma bsrungs sam/ legs par ma blangs pas bsrung nyes pa'o/ /dmyal bar nye bar khrid par byed/ /ces bya ba ni ngan song du 'dren par byed pa'o/ /ji ltar mda' ni gzung legs dang / /zhes bya ba la sogs pa ni rtogs par sla'o/ /ma shes pas ni dge sbyong yongs su bsrung ba ni dka' ba yin no zhes bstan pa'i phyir smras pa/ dge sbyong rnam par ma shes dang / /zhes bya ba la sogs pa'o/ /dge slong dag rgal dka' ba ni byis pa thos pa dang mi ldan pa so so'i skye bo la rab tu byung ba ni mchog tu rgal dka' ba yin te/ de ci'i phyir zhe na/ dge slong dag gang gi phyir byis pa thos pa dang mi ldan pa so so'i skye bo 'di ni grong ngam grong rdal dag tu nye bar bsten cing gnas te/ ji tsam na der chags par 'gyur ba'i bud med mthong na zhen cing chags par 'gyur ro zhes rgya cher te/ rnam par rtog pas gtses pa na bslab pa gtong zhing 'dor bar 'gyur ro zhes gsungs te/ des na tshigs su bcad pa gnyis po 'di gsungs pa yin no/ /sdug bsngal gyis rgal bar bya ba yin pas rgal dka' ste 'da' bar dka' ba'o/ /de thob pa'i thabs ni thob par dka' ba'i phyir ro/ /bzod par dka' ba zhes bya ba ni bzod par sla ba ma yin pa ste/ grogs dang gnas kyi khyad la rag las pa'i phyir ro/ /yang na gting dpag dka' ba'i phyir pha rol tu rgal dka' ba'o/ /gang gi phyir dge sbyong gi pha rol tu phyin pa ni dka' bas 'thob pa yin te/ rgya mtsho lta bu'o/ /de'i pha rol ni thar pa'o/ /bzod dka' dang zhes bya ba ni 'di la sdug bsngal gyis theg cing bzod pa yin pas bzod dka' ba ste/ bdag nyid ma sbyangs pa dag dus dang gnas skabs rgyun du bsrung ba mi bzod pa'i phyir ro/ /de la gnas pa na yang dga' ba nyi tsher ma zad de mthar thug par rtogs par dka' ba'i phyir dang gi sgra smos so/ /'dir dge slong ni rab tu byung ba'i tshul khrims so/ /de yang kun rdzob dang don dam pa'i dbye ba rnam pa gnyis so/ /gang gis rgal dka' ba dang / bzod par dka' ba yin zhe na/ rnam par ma shes pas zhes bya ba ste/ dngos po'i de bzhin nyid la kun du rmongs pa ste/ de'i ngo bo dang rnam pa la sogs pa ma rtogs pa zhes bya ba'i don to/ /ji lta bu yin zhe na/ sdug bsngal mang po de dag 'byung / /zhes bya ba smos te/ rab tu byung ba la gnod pa dpag tu med pa 'byung ste/ nyams pa'i rgyu zhes bya ba'i don to/ /ji skad du/ gzhan gyi ngor bltas bsags shing 'tsho ba dang / /ngan pa bzhin du skye bos ma brtsis shing / /gos ngan nye du grogs bshes rab bral bas/ /nags mthar lus bor ba yi du ba bzhin/ /zhes bya ba lta bu'o/ /gang dag ces bya ba ni gang dag la sdug bsngal bzod par dka' ba dag gis zil gyis mnan par gyur pa na'o/ /zhan pa ni rmongs pa ste/ yon tan dang skyon gnyis la rtog pa pa'i phyir te/ ji skad du/ rab tu byung la skye bo phal cher ni/ /ma goms pas na rab tu skye bar gyur/ /'dod pa'i 'dod chags kyi ni rjes 'brang bas/ /g.yang sa bzhin du rab tu rtog par 'gyur/ /zhes pa'o/ /'gyod 'gyur ba zhes bya ba ni de nyid las nyams pa zhes bya ba'i don te/ mi dga' ba skye bar 'gyur ba ni bdag ni 'di ltar nyam nga bar gyur to zhes pa'o/ /dge sbyong yongs su bsrung bas ni shes rab gcig pu dag par ma zad de/ sems kyang dul ba'i rgyu yin te/ shes rab dang sems dul ba gnyis kyis ni de dag pa phun sum tshogs par 'gyur te/ de nyid bstan pa'i phyir smras pa/ spyod pa ji ltar bya zhes bya ba smos te/ rnam pa gang gis 'jug pa'o/ /gang la zhe na/ dge sbyong gi tshul khrims yongs su bsrung ba la'o/ /sems ni bzlog pa ma byas par/ /zhes bya ba ni rnam par rtog pa la log pa dang bya ba ma yin pa las zhes bya ba'i tshig gi lhag ma'o/ /ni zhes bya ba'i sgra ni gal te zhes bya ba'i don te/ gal te sems bya ba ma yin pa dang / 'dod pa'i kun du rtog pa la sogs pa'i tshul las ma bzlog pa dang / yang dag pa'i rtog pa la sogs pa la ma sbyar ba de'i tshe ni 'di ji ltar dge sbyong du khas blangs pa yin te/ dge sbyong gi spyod pa la ji ltar tshul khrims rnam par dag pa zhes bya ba'i don to/ /'dis ni rnam par rtog pa la sogs pas nyams par byas na tshul khrims ma dag pa nyid du bstan to/ /gal te sems dul ba med na ji ltar dge sbyong gi spyod pa nus pa yin zhe na/ yang dang yang du zhes smos te/ brtsam zhing brtsams pa na ste bshags pa la sogs pa'i gnas skabs na zhes bya ba'i don to/ /'gyod pa zhes bya ba ni skyo ba dang mi dga' bar gyur ba 'brel na ji ltar de yang bar spyod pa nus par 'gyur ba'o/ /ci'i phyir de thams cad du 'gyod par 'gyur zhe na/ 'di ltar/ kun rtog dbang du 'gro ba yi/ /zhes bya ba yin te/ 'dod pa la sogs pa'i kun du rtog pa ste/ 'dod pa'i rjes su 'gro bar gyur pa'o/ /kun du rtog pa gzhan gyi dbang du gyur pa'i phyir nyon mongs pa'i dbang du 'gro ba ste/ nyon mongs pas ni tshul khrims nyams par byed do/ /gang gis shes pas dge sbyong gi sems dul bar ma byas pa de'i tshe ni nyes par dga' ba yin no zhes bstan pa'i phyir/ nyes par rab byung nyes dga' ba/ /zhes bya ba la sogs pa yin no/ /yul ko sa la'i rgyal po gsal rgyal gyi yul na yongs su 'dri ba zhes bya ba'i bram ze zhig ya mtshan gyis brtul zhugs du ma blangs shing rab tu byung bar yang byed pa zhig yod de/ de rang gi chung ma bor te gzhan gyi chung ma dang smad 'tshong ma dag la chags par gyur to/ /de'i chung ma yang skyes bu gzhan dag la chags pas de'i nor zad par byas so/ /de yang rgyan la sogs pa blangs pa las des ma thob pa dang / de tshig ngan pa smra bar gyur to/ /des kyang de brdungs so/ /ji tsam rgyal po dang lhan cig tu bcom ldan 'das kyi spyan sngar song ste zhus pa/ 'jig rten na ni nyes dga' gang / /khyim du nyes par 'dug 'dod gang / /sdug bsngal bsten par 'dod pa gang / /sdug bsngal nyer stsogs gang zhig lags/ /'di na gang zhig rab brtags pas/ /'di nas ngan 'gror 'gro ba gang / / zhes zhus pa las/ de'i dbang du mdzad de tshigs su bcad pa gnyis gsungs te/ de thos pas skyo ba skyes nas rab tu byung ste/ dgra bcom par gyur to/ /gzhan dag ni yul yangs pa can gyi nags chen po na ba lang rdzi'i bu zhig rab tu byung ba la mngon par mi dga' ba las brtsams so zhes zer ro/ /nyes pa rab tu byung ba zhes bya ba ni rab tu byung ba'i phun sum tshogs pa dang bral ba ste/ rang gi yon tan gyis spangs pa'i rab tu byung ba zhes bya ba'i don to/ /de'i yon tan yang tshul bzhin du bzung ba dang bsrung ba dang / mi gtsang ba la sogs pa'i khyad par bskyed pas thar pa 'thob pa yin no/ /de la 'di ni nyes dga' zhes bya ba ni rab tu bsngags pa la mngon par dga' ba dang bral ba'i phyir dang / dam pa rnams kyi sems rangs par mi byed cing zhes pa'i don te/ rab tu byung ba yongs su bsrungs shing mnyam pas ni khyad par du mngon par dga' ba bskyed pa'i phyir bdag bzhin du'o/ /nyes rtsom byed pa dag ces bya ba ni brtsam par 'os pa ni brtsam par bya ba ste yongs su bskyed pa'o/ /de yongs su bskyed pas bsgrubs par dka' ba ni nyes rtsom byed pa dag ces bya ba yin no/ /'jug par byed pa yin pas 'dug pa ste/ thams cad dang lhan cig tu yang dag par 'dug pas tshul nyams pa zhes bya ba'i don to/ /gang yin zhe na/ khyim du zhes bya ba smos te/ chung ma len pa yin no zhes bya ba'o/ /ji skad du skye dgu khyim sten par byed pa ni bu 'thob pa'i phyir chung ma bstan te/ 'dod pa'i phyir ni ma yin no zhes bya ba'i don yin no/ /ngan par spyod pa'i bud med ni lha rnams kyis kyang mgu bar nus pa ma yin no/ /lhag par zhen pa yin pas 'dug pa ste/ pha dang ma dang bu smad la sogs pa de dag dang gang gi phyir rtag tu khyim na 'dug pa yin no/ /yang na sdug bsngal gyis khyim mam gnas gang dag na 'dug kyang de ni de nyid do/ /nyes dga' ba zhes bya ba yang 'dir sbyar bar bya ste/ nyes pa'am sdug bsngal med pas gzung ba'i khyim ni med do/ /sdug bsngal lhan cig nga rgyal la sten pas dang zhes bya ba la/ nga rgyal dang bcas pa ni nga rgyal dang lhan cig pa ste/ ngar 'dzin pa de dang bcas pa'i gnas skabs na ni nga rgyal dang lhan cig bsten pa yin no/ /de dang lhan cig gnas pas ni sdug bsngal bar byed pa yin te/ sdug bsngal ba ni gdung bar byed pa yin no/ /yang srid sdug bsngal stsogs par zad/ /ces bya ba la/ srid pa ni skye ba ste/ las bsags pa de'i 'bras bu'o/ /gdung bar byed pa'i phyir sdug bsngal te/ dge slong dag 'khor ba mngon par 'grub pa ni sdug bsngal ba yin no zhes bya ba la sogs pa mdo las gsungs so/ /ngur smrig gyon pa dag zhes bya ba la/ gos ngur smrig ni tshon gyis bsgyur ba'i chos gos te/ de gyon pa gang yin pa de ni cha byad tsam 'dzin pa zhes bya ba'i don to/ /tshem bu ni mang po ste/ gang zhig ce na/ ngur smrig gyon pa dag ces bya ba smos te/ 'di ltar sdig pa'i chos can zhes bya ba'o/ /'di dag la sdig pa'i chos yod pa ni sdig pa'i chos te lta ba ngan pa'o/ /lta ba log pas nyams par byas pa ni bsam pa rgud pa yin te/ chos de ni bcos ma nyid de zhes bya ba'i don to/ /yang dag mi sdom zhing zhes bya ba ni shin tu ma bsdams pa ste/ lus dang ngag dang yid rnams kyi phongs pa zhes bya ba'i don to/ / tshigs bcad kyi phyed kyis bdag gi don rgud par bstan nas/ gzhan gyi don rgud par bstan pa'i phyir/ sdig la dga' zhes bya ba ste/ dga' zhes bya ba'i don ni sdig pa'i chos ston cing brjod pa yin te/ gzhan dag la log par ston cing 'chad pa zhes bya ba'i don to/ /gang 'di ni shin tu yang sdig che ba yin te/ bdag nyid rmongs par byas nas/ gzhan rmongs par byed pa'o/ /sdig can zhes bya ba ni bdag nyid kyis byas pa'i sdig pa'i las te/ lus la sogs pas nyes par spyod pa ngan song gi rgyur gyur bas de dag ngan 'gro zhes bya ba'i bstan pa 'di 'am 'jig rten 'di nas der 'gro ste/ ngan song du 'gro ba yin no/ /dge sbyong du bstan pa'i rgyu tshul khrims nyams pa las 'jig rten gnyi gar phongs par 'gyur ba'i phyir smras pa/ sA lu'i shing la zhes bya ba la sogs pa'o/ /de nas ngang tshul ngan pa zhes bya ba'i grong dpon zhig gis bcom ldan 'das la 'di skad ces gsol to/ /kye gau ta ma gang la las lus kyis nyes par spyod pa spyad pas de'i 'gro ba cir 'gyur zhes bya ba la sogs pa gsol to/ /grong dpon 'di la gcig tu tshul khrims nyams pas srog gcod par 'gyur na dmyal bar skye bar 'gyur ro zhes bya ba'i bar du bstan te 'di gsungs so/ /gang zhig ces bya ba ni gang la la'o/ /shin tu tshul khrims 'chal zhes bya ba ni rab tu sdig pa'i tshul can te/ ltung ba tha ma spyad pas tshul khrims nyams pas kun du gnas zhes bya ba'i don to/ /ji lta bu yin zhe na/ sA la'i shing la 'khri shing ltar/ /zhes bya ba lta bu ste/ dper na sA la'i shing la 'khri shing lcug ma dag gis kun nas 'khyud pa de bzhin du lus la sogs pa'i nyes par spyod pa'i bdag nyid dpag tu med pa'i tshul khrims 'chal pas bdag nyid kun du nyams par byas pa'o/ /de ni de ltar bdag la byed/ /ces bya ba ni shin tu tshul khrims 'chal pa'i gang zag de ni rnam pa de ltar bdag la sgrub par byed de/ dmyal ba la sogs pa'i phung por mngon par 'grub par byed do/ /ji ltar dgra bzhin byed par 'dod/ /ces bya ba ni 'di ni bdag la sdang zhing mi dga' ba ste/ mi bde ba dang sdug bsngal la sbyor zhing phrad par byed par 'dod do/ /de bzhin du tshul khrims 'chal pa'i gang zag kyang bdag la ma byed par 'dod do/ /'di ni 'di ltar mtshon pa yin te/ ji ltar yang bdag nyid la bde ba la sogs pa'i khyad par la sbyor ba ni mi 'dod kyi/ sdug bsngal la sogs pa'i khyad par la ni sbyor bar 'dod pa yin no/ /de'i phyir dge sbyong gi dam bcas pa'i tshul nyams pa las ni 'jig rten 'dir grags pa ma yin pa dang / pha rol tu bdag nyid sdug bsngal la sbyor ba yin no/ /tshul khrims la sogs pa'i yon tan dang ldan pa nyid la ni rgan rabs zhes bya'i/ dge sbyong gang yang rung ba ni rgan rabs ma yin te/ don dam par ni rigs la sogs pa rgan rabs ma yin no zhes bstan pa'i phyir smras pa/ mgo bo skye bor gyur bar du/ /zhes bya ba la sogs pa'o/ /bcom ldan 'das yul be ra t+ya'i bi ra ti na De ra bi tsu man da'i rtsa ba na bzhugs te/ de nas yul be ra t+ya'i bram ze lo brgya nyi shu lon pa/ rgas shing 'khogs pas gzir ba zhig gis bcom ldan 'das kyi chos gos kyi grwa las bzung ste gsol ba/ kye gau ta ma khyed shin tu rgan pa dag mthong na ci'i phyir gus par smras pa dang / phyag btsal ba dang / stan las ldang zhing stan bstab pa la sogs pa mi byed ces gsol ba dang / ngas ni lha dang bcas pa'i 'jig rten na bram ze de lta bu yang dag par ma mthong bas so zhes rgya cher ro/ /gau ta ma de ni ro med pa'o/ /gang gis bram ze'i grangs ni yod de/ nga ni ro med pa ma yin te/ gzugs dang 'dod pa'i yon tan spangs pa nye bar longs spyod spyod pa med pa dang / de bzhin du mngal du 'jug pa med pa dang / yang srid pa'i phung po spangs pa'i phyir ro/ /'di lta ste dper na bram ze khyim bya'i sgo nga rnams skye bar gyur pa ji snyed pa la ji snyam du sems/ bram ze gang khyim bya'i phrug pa de rnams las dang por mchu 'am rkang pa'i sen mo'i sgo nga'i sbubs dral cing thog mar byung ba de la ji skad du brjod par bya/ kye gau ta ma de ni rgan rabs zhes bya'o/ /de bzhin du nga yang de rnams kyi nang na ma rig pa'i sgo nga'i sbubs dral nas byung ba yin te de bas na nga ni lus can thams cad kyi rgan rabs yin no zhes pa nas/ ji srid du tshigs su bcad pa gnyis gsungs so/ /gzhan dag ni nye dga' rgan po dag dang lhan cig 'dug cing tshul mnyam la 'phya ba bzhin du ston pa las so zhes zer ro/ /gzhan dag ni rgan rabs ni gsum ste/ rigs kyi rgan rabs dang / kun rdzob kyi rgan rabs dang / chos nyid kyi rgan rabs las tha ma nyid las brtsams so zhes zer ro/ /rgan rabs ni rgan par gyur ba'o/ /da dung ma chud pa zhes bya ba ni de tsam gyi rgyus mi 'gyur ba'o/ /gyur bar du zhes bya ba ni de tsam gyi mtshan mas so/ /mgo bo skya bo ni mgo'i skra dkar ba ste/ gang gi phyir 'di'i skra dkar bas na rgan rabs yin no zhes bya ba de ma yin no zhes bya ba'i don to/ /gal te 'di tsam na rgan rabs ma yin na ci byed byis pa yin nam zhe na/ de ni rgan blun zhes bya'o/ /zhes bya ba yin te/ ci'i phyir de ltar brjod par bya zhe na/ de'i rgyu bstan pa'i phyir/ de ni lang tsho gtugs pa ste/ /zhes bya ba dus la ltos pa'i lus kyi gnas skabs kyi na tshod ni lang tsho ste/ 'dir lang tsho 'di nyid yongs su smin cing gyur pa ni gtugs pa ste/ 'di'i las la sogs pa ni nus pa nyams par gyur pa'o/ /de ni rgan blun zhes bya'o/ /zhes bya ba brjod de/ blun pas rga ba bcom pa yin te/ rgas pas don med par gyur pa'o/ /gang gi phyir yon tan bsgrubs pa des ni don dang bcas pa'i rgan pa'o/ /yang na blun pas bcom pa ste/ bya ba ngan pas nus pa dang bral ba zhes bya ba'i don to/ /'di nyid kyis ni rigs dang gzugs dang 'byor pa la sogs pa'i khyad par gyis 'jig rten na kun rdzob tu rgan rabs zhes brjod pa yang dgag pa yin no/ /thub pa med pa'i phyir dang / yon tan gyi rang bzhin ma yin pa'i phyir te/ de la 'dis ni gzhan rigs kyi rgan rabs su 'dod pa yang dgag pa yin no/ /chos nyid kyi rgan rabs bstan pa'i phyir/ gang zhig ces bya ba la sogs pa smos so/ /gang zhig dge dang zhes bya ba ni bde ba'i 'bras bu'i las so/ /sdig pa dag ces bya ba ni don sdig sdug bsngal gyi 'bras bu las so/ /spangs shing zhes bya ba ni rjes su mthun pa rab tu dor ba'o/ /'dir 'phags pa'i lam nyid ni gnyen po yin no zhes bstan pa'i phyir smras pa/ tshangs par spyod pa dang zhes bya ba ste/ tshangs pa'i 'bras bu'i phyir spyod pa ni mya ngan las 'das pa'i 'bras bu las nan tan du byed pa ste/ 'phags pa'i lam zhes bya ba'i don to/ /tshangs par spyod pas dga' ba yin no zhes bya ba'i tshig gis te/ de gang la yod pa de ni tshangs par spyod ldan no/ /ci phra rgyas thams cad spangs par byas shing mya ngan las 'das par gyur pa tsam gyis kyang rgan rabs zhes bya ba'i ming du brjod dam zhe na smras pa/ yang gang gi tshe/ sde tshogs spangs nas zhes bya ba smos te/ tshogs dang 'brel pa ni sde nyid du byed pa ste/ sde ni phung po dang 'brel pa yin no/ /de spangs pa ni sde tshogs spangs pa ste/ yang srid pa'i phung po dang 'brel pa med pa'i phyir ro/ /der skye ba med pa ni kun du sbyor ba spangs pa'i phyir ro/ /mi slob pa'i lam la gnas par byas nas gzhan gyi don byed pa'i gnas skabs de ni rgan rabs kyi sgrar brjod pa'i phyir/ de ni rgan rabs zhes bya'o zhes pa ste/ de nyid don dam par rgan rabs yin te/ bdag dang gzhan gyi rgyud la phan par byed pa'i phyir ro zhes bya'o zhes bya ba ni dam pa rnams kyis bshad do/ /tshul khrims la sogs pa'i yon tan dang ldan pa nyid ni dge sbyong yin gyi/ cha byad tsam ni ma yin no zhes bstan pa'i phyir/ brtul zhugs med cing zhes bya ba la sogs pa smos so/ /de nas dbyig pa can yul lda len na gnas pa'i rgyas pa dang / ro hi ta ka zhes bya ba'i bram zes bcom ldan 'das la 'di skad ces gsol to/ /kye gau ta ma khyod la dri ste/ btsun pa ji srid du cha byad blangs pa tsam gyis dge sbyong dang bram zer 'gyur ram/ de'i phyir btsun pa lho phyogs kyi yul lnga len na/ dge slong rab tu mang po dang bram ze rab tu mang po cha byad 'dzin pa mchis shing tshul khrims 'chal la sdig pa spyod pa zhes rgya cher te/ de'i ched du tshigs su bcad pa gsum po 'di gsungs so/ /mgo bo bregs tsam dge sbyong min/ /zhes bya ba ni skra dang kha spu bregs pa tsam de ni kun rdzob tu yang dge sbyong du mi 'gyur te rtsig pa la bris pa'i mar me lta bu'o/ /ci'i phyir zhe na/ brtul zhugs med cing zhes bya ba smos te/ brtul zhugs yod pa ma yin pa ste/ 'di la so sor thar pa'i tshul khrims thog mar gzung ba la sogs pas de ma bskyed pa'i phyir ro/ /cing zhes bya ba ni gang gi phyir zhes bya ba'i don te/ dge slong ni 'dir tshul khrims dang ldan pa yin no zhes pa'i tshig gis so/ /ji ltar tshul khrims legs par mi 'dzin par 'gyur ba'i rgyu smras pa/ de gcig pur ma zad de/ de las gzhan pa'i tshul khrims kyis kyang dge sbyong mtshon pa yin te/ bden par smras pa la sogs pas so/ /rab tu byung ba ni bden pa la dgongs pa yin no zhes pa'i tshig gis te/ de nyid smras pa/ brdzun smra na zhes bya ba ste/ brdzun pa dang mi bden pa smra ba ste/ gang gis so sor thar pa'i tshul khrims tshul bzhin du blangs pa yang ngag gis yang dag par bsdams pa ma yin pa'o/ /des na de ni kun rdzob tu yang dge sbyong ma yin no/ /rab tu byung bar gyur nas ji ltar brdzun smra ba yin zhe na/ rmongs pa 'dod la zhugs pa dag /ces bya ba yin te/ srid pa dang ma rig pa gnyis kyis bskul ba'i lta ba de nyid la dmigs pa'o/ /ji ga dge sbyong yin nam kye/ /zhes bya ba ni ma zhi ba de nyid ni nam yang dge sbyong du mi 'gyur ro zhes bya ba'i don to/ /de nyid bshad pa tshul khrims dang bden pa dang bral ba la ni kun rdzob tu yang dge sbyong zhes bya ba'i gdags pa med par 'gyur te/ de gnyi ga dang ldan na ni dge sbyong du 'gyur ro/ /de lta na don dam pa'i dge sbyong gang yin zhe na/ smras pa/ 'phags pa'i gang zag rnam pa gnyis te/ nyon mongs pa'i lhag ma dang bcas pa dang / lhag ma med pa'o/ /de la nyon mongs pa'i lhag ma dang bcas pa'i ni rgyun du zhugs pa la sogs pa bdun las brtsams pa ste tshigs su bcad pa gcig go/ /mgo bo bregs tsam dge sbyong min/ /zhes bya ba ni nges par brtags pa'i don to/ /gang gi sdig pa zhi gyur te/ /zhes bya ba ni gang gi rgyud la mthong ba'i lam gyi mthus lus la sogs pa'i nyes par spyod pa ngan song gi rgyu dang bral ba'o/ /de ni/ mkhas pas dge sbyong yin par shes/ /zhes bya ba ni gang zag de ni don dam par sangs rgyas kyi dge sbyong yin no zhes shes shing khong du chud par bya'o/ /nyon mongs pa'i lhag ma med pa las brtsams te/ gang dag sdig pa che phra zhes bya ba la sogs pa smos so/ /sdig pa zhi ba de dag ni/ /zhes bya ba ni bsgom pa'i lam gyis sdig pa spangs shing bor ba'o/ /de gang zhe na/ che phra dag ces bya ba ste/ khams gsum gyi bsgom pas spang bar bya ba'i phra rgyas so/ /kun la zhes bya ba ni mtha' dag ste/ sa thams cad kyi rnam pa spangs pa'i phyir ro/ /yang na chung ngu la sogs pa'o/ /de'i phyir yang sdig pa brtags nas spangs pa'i phyir zhes bya ba ni nyon mongs pa mtha' dag spangs pa'i rgyus dge sbyong nyid ces brjod par bya zhing de nyid yongs su rdzogs pa'i dge sbyong yin gyi/ gzhan ni ma yin no zhes pa'i don to/ /gal te dge sbyong gi rnam grangs bram ze la sogs par ci'i phyir brjod ce na/ sdig pa spangs pa zhes bya ba la sogs pa smos so/ /bram ze me sbyin gyis bcom ldan 'das la zhus pa/ ji lta bu ni bram ze lags/ /dge sbyong dag ni ji lta bu/ /rab tu byung ba ci zhig lags/ /de ni bdag la bka' stsal gsol/ /zhes pa dang / des na tshigs su bcad pa 'di gsungs so/ /spangs pa ni gang gis spangs pa bcom pa ste/ gang gis sdig pa de bcom par gyur pa nyid ni nyon mongs pa thams cad thag ring du spangs pa ste/ sdig pa la dga' ba'am/ 'dod pa la dga' ba'i sems spangs pa ni bram ze yin gyi tshangs pa'i skud pa gdags pa tsam gyis ni ma yin no/ /zhi bar spyod pa zhes bya bas ni nyon mongs pa thams cad nye bar zhi ba de'i phyir spyod pa ste/ snying rje gdung ba'i blos sems can gyi don dang bdag gi don gang byed pa de nyid ni don dam pa'i dge sbyong dang zhi bar spyod pa zhes bya'o/ /bdag gi dri ma rab spangs pa/ /zhes bya ba ni gang gi phyir sems kyi nyon mongs pa dang nye ba'i nyon mongs pa la sogs pa'i dri ma bsal cing spangs pa des rab tu byung ba zhes bya'i/ khyim gyi gnas yongs su btang ba tsam gyis ni ma yin no zhes bstan to/ /dge sbyong gi tshoms te bcu gcig pa'i rnam par 'grel ba rdzogs so// //don dam pa'i dge sbyong ni 'phags pa'i lam la rag las pa yin pa'i phyir de'i 'og tu lam gyi tshoms rtogs par bya ba'i phyir bstan te/ gang tshe 'phags pa'i zhes bya ba la sogs pa smos so/ /'phags pa'i dge sbyong gi 'phags pa'i bden pa ni bzhi'o zhes mdo las gsungs nas tshigs su bcad pa gsum po 'di bka' stsal to/ /zag pa med pa'i lam 'thob pa'i 'phags pa de'i bden pa ste/ de nyid kyis sdug bsngal la sogs pa ji lta ba bzhin du rtogs pa'i phyir te/ so so'i skye bo phyin ci log la zhugs pas ni ma yin te/ des ni phyin ci log tu gzung ba'i phyir ro/ / bzhi zhes bya ba'i grangs 'di bstan pa ni blang ba dang dor bar bya ba nyid kyi thabs dang bcas pa khong nas rtogs pa'i phyir rnam par grol ba thob pa yin gyi/ srin bu la sogs pa'i grangs kyis ni ma yin no/ /de dag kyang sdug bsngal dang / kun 'byung ba dang 'gog pa dang lam mo/ /de la sdug bsngal ni 'bras bur gyur pa nye bar len pa'i phung po lnga'o/ /de nyid kyi rgyur gyur pa ni kun du 'byung ba'o/ /'gog pa ni thar pa'o/ /lam ni yan lag brgyad do/ /'di dag ni mngon par rtogs pa'i rim pa ste/ thog mar nad mthong zhing de'i nad gzhi dang / nad med pa dang / sman ston pa bzhin no/ /mthong ba ni so sor rtogs pa ste/ shes rab kyis zhes bya ba ni mthong ba'i lam gyis de dang po bskyed pa'i phyir ro/ /gang tshe ni dus gang gi tshe ste/ lam la rjes su shes pa'i bzod pa'i gnas skabs na zhes bya ba'i don to/ /mthong ba'i lam gyi 'bras bu bstan pa'i phyir smras pa/ lam 'di rab tu shes pa yis/ /zhes bya ba ste/ de'i tshe 'di'i rnal 'byor gyis bsgom pa'i lam thob pa yin te/ sems kyi skad cig ma bcu drug pa ni bsgom pa'i lam yin pa'i phyir des na yang de'i 'og tu rtogs pa'i phyir ro/ /lam gyi khyad par ni/ srid pa'i sred pa rab tu 'dral/ /zhes bya ba smos te/ srid pa'i sred pa ste sred pa ni rnam pa gsum mo zhes bya ba'i tshig gis so/ /de rab tu 'dral ba ni spangs pa ste/ gang gis bden pa mthong ba la rag las pa yin pas khams gsum las 'dod chags dang bral ba'o/ /bden pa mthong ba la gzud pa'i phyir 'di gsungs so/ /bden pa mthong ba'i phan yon 'jig rten las 'das pa bstan nas/ 'jig rten pa'i bstan pa'i phyir smras pa/ bslang ba ni gtor ba'o/ /rlung gi zhes bya ba ni rlung mar gyi zhugs kyis so/ /rdul ni sa rdul lo/ /dper na zhes bya ba ni dpes 'jal ba'o/ /char pa bab pas zhi byed ltar/ /zhes bya ba ni sprin las char gyi rgyun 'og tu 'bab na zhi bar byed pa de bzhin du'o/ /kun rtog zhi bar 'gyur zhes bya ba ni de ltar so so'i skye bo'i sems la ngan song gi sdug bsngal gyi 'bras bu bsags pa'am 'dod pa la sogs pa'i rnam par rtog pa zhi bar 'gyur ro/ /gang tshe shes rab kyis mthong ba/ /zhes bya ba ni gang gi gnas skabs na mthong ba'i lam gyis bden pa rtogs pa de'i tshe na rags pa dang rtogs pa ngan pa spangs pa'i phyir ro/ /mthong ba'i lam gyi rgyu smras pa/ /shes rab de ni gtso bo yin/ /zhes bya ba ste/ gang nges par 'byed par 'gyur ba'i shes rab de nyid 'jig rten pa thams cad kyi gtso bo yin te/ 'phags pa'i lam 'thob par byed pa'i phyir ro/ /de nyid kyi rgyu bstan pa'i phyir ni zhes bya ba'i sgra smras so/ /'jig rten zhes bya ba ni zag pa dang bcas pa'i phung po lnga yin te/ des las ches gtso bor gyur pa yin no/ /de ni nges 'byed 'gyur ba yin/ /zhes bya ba ni nges par 'byed pa yin pas nges 'byed de/ mthong ba'i lam zhes bya ba'i don to/ /de ni zhes bya ba ni nges par 'byed par 'gyur te/ mthong ba'i lam rtogs par byed pa dang / 'thob par byed pa dang 'dren par byed pa ste/ 'di lta bu'i tshul ni dro bar gyur pa la sogs pa'i nges par 'byed pa'i cha bzhi'am/ chos kyi mchog ste gang zhe na/ gang gis legs par rtogs pa yis/ /zhes bya ba smos te/ nges par 'byed pa'i shes rab kyi rgyur 'gyur ba gang gis mi rtag pa la sogs pa phyin ci ma log pa nyid du rnal 'byor des rtog pa de ni nges par 'byed par 'gyur bar shes par bya'o/ /de las ni dro bar gyur pa 'byung ngo / /de las ni bden pa bzhi'i spyod yul bcu drug yin no zhes bya ba la sogs pa'i tshig gis so/ /ci zhig rtog par 'gyur ba yin zhe na/ skye shi legs par zad 'gyur zhing / /zhes bya ba ste/ skye ba dang shi ba ni skye shi ste/ sdug bsngal dang kun 'byung gi bden pa gnyi ga ste/ nye bar len pa'i phung po'i bdag nyid yin pa'i phyir de ni skye shi'i rnam grangs yin no/ /zad 'gyur zhing zhes bya ba ni 'gog pa dang lam gnyis bstan pa yin te/ zad pa dang kun du zad pa ni 'gog pa'o/ /'dis zad par byed pas na zad par 'gyur ba ste lam mo/ /skye shi dang zad par 'gyur ba ni/ zlas dbye ba gcig tu bsdus pa ste/ des na 'phags pa'i bden pa bzhi zhes bya ba'i don to/ /gang de'i dbang gis bden pa mngon par rtogs par 'gyur ba ni de las gzhan pa'i 'jig rten pa'i shes pa la nus pa med do/ /des par 'byed pa'i cha nyid ni 'phags pa'i lam dang 'dra zhing mnyam pa'i rnam pa yin pa'i phyir dang / rjes su mthun pa'i rgyu yin pa'i phyir 'bras bu 'byung bar 'dod do/ / de ni skal ba mi mnyam pa'i rgyu las skyes pa yin no zhes gang brjod pa de ni rdzas skal ba mnyam pa ste/ rnam pa mnyam pa med pa'i phyir ro/ /lam gyi tshogs khyad par du gyur pa dang ldan pa'i phyir 'phags pa'i lam ni lam thams cad gtso bo yin no zhes bstan pa'i phyir/ bden pa'i nang na zhes bya ba la sogs pa smos so/ /bcom ldan 'das rgyal po'i khab na 'tsho byed kyi a mra'i nags na bzhugs so/ /de nas 'tsho byed gzhon nus bskyed bcom ldan 'das kyi spyan sngar song ste tshigs bcad kyis zhus pa/ 'bras bu'i nang na skyu ru mchog /rtsa ba'i nang na tsi tra ka / bska ba'i nang na mngar ba mchog /lan tshwa'i nang na rgyam tsha mchog /ces pa dang / de'i phyir tshigs su bcad pa 'di gsungs so/ /lam nang zhes bya ba ni thar pa thob pa'i thabs kyi nang na ste/ grub pa'i thabs gzhan dag tu bstan pa'i 'don pa dang phyag 'tshal ba dang / bzlas brjod dang / dka' thub dang / me la 'jug pa la sogs pa'i nang na ste/ dmigs kyis dbye ba ni bdun pa'o/ /lam thams cad kyi nang nas yang dag pa'i lta ba la sogs pa yan lag brgyad gang la yod pa de ni 'phags pa'i lam yan lag brgyad pa ste/ dbyug pa can bzhin no/ / gang gi phyir lam ni yan lag bsdus pa'i spyi ste/ yan lag drug pa'i phye ma bzhin no/ /mchog ni rab mchog ste/ rang gi 'bras bu sbyin par byed pa la 'khrul pa med pa'i phyir ro/ /lam gyi spyod yul bstan pa'i phyir/ /bden pa'i nang na bden bzhi dang / /zhes bya ba smos te grub pa'i mtha' so so las kyang bden pa zhes brjod de/ 'di lta ste/ sems tsam pa rnams kyi bden pa ni gcig go/ /zad byed pa rnams kyi bden pa ni gnyis te/ kun rdzob dang don dam pa'i bdag nyid dam/ srog dang bcas pa'am srog med pa'i bdag nyid do/ /bram ze rnams kyi bden pa ni gsum mo/ /'dus byas dang dus gsum 'dod pa rnams kyi ni bzhi'o/ /tshig gi don lnga 'dod pa rnams kyi ni lnga'o/ /bye brag pa rnams kyi ni drug go/ /grangs can pa rnams kyi ni nyi shu rtsa lnga zhes bya ba la sogs pa ste/ de rnams kyi nang na 'phags pa'i bden pa bzhi'o/ /dang gi sgra ni mchog gi don to/ /de bzhin nyid phyin ci ma log pa'i phyir de'i yul nyid kho na las lam 'byung ba'i phyir ro/ /chos kyi nang na chags bral mchog /ces bya ba ni chags pa med par 'gyur ba ni 'byor ba med par gyur pa ste/ 'dir 'dod chags dang bral bas thob pa'i mya ngan las 'das pa ste/ don thams cad kyi nang na thar pa ni gtso bo yin te/ dge ba nyid du rtag pa'i phyir ro/ /gang cung zad 'dus byas kyi chos dang 'dus ma byas kyi chos de rnams kyi nang na ni 'dod chags dang bral ba'i chos mchog go zhes mdo las gsungs pa'i phyir ro/ /rkang gnyis nang na mig can dang / /zhes bya ba ni lhag par spyan gsum dang ldan pa'i phyir mig can zhes bya ba yin te/ de bzhin gshegs pa'o/ /de ni rkang gnyis thams cad kyi nang na gtso bo yin te/ sems can gang su dag rkang pa med pa dang / rkang pa gnyis dang / rkang mangs zhes bya ba la sogs pa lung las 'byung ba'i phyir ro/ /sogs pa'i sgra ni phyi nas bstan pa'i phyir te/ rkang gnyis la sogs pa'i nang na bde bar gshegs pa nyid kho na mchog yin pas dang gi sgra'o/ /des na 'dis ni sman pa thams cad kyi nang na mchog ni bcom ldan 'das yin la/ sman thams cad kyi nang na ni lam mo/ /nad thams cad kyi nang na ni 'khor ba'o/ /nad med pa thams cad kyi nang na ni thar pa ste/ de bas na 'di la khyod kyis 'bad par bya'i/ tshe'i rig byed yongs su shes pa ni sman pa yin no zhes ston pa yin no/ /de bas na tshul 'dis ston pa'i bden pa 'khrul pa med pa'i lam de'i yul bden pa ni don thams cad zil gyis non pas thar pa'i 'bras bu'i lam la bdag nyid la phan par 'dod pa rnams kyis brtson 'grus brtsam par bya'o zhes 'dis ston pa yin no/ /rgyu gang gis bden pa mthong bar 'gyur ba yin zhe na/ smras pa/ 'du byed thams cad ces bya ba la sogs pa'o/ /de nas dge slong grogs po bzhi zhig bcom ldan 'das kyi spyan sngar phyin te/ 'di skad ces btsun pa gang gis bdag cag zag pa zad par 'gyur ba de ltar bdag cag la bsdus te chos bstan du gsol zhes zhus pa dang / ji tsam na de dag las gcig ni lta ba gzhan no/ /lhag ma ni bde ba la sogs pa'i lta ba can te/ go rims bzhin du de dag gi dbang du mdzad nas tshigs su bcad pa bzhi dang bsdus pa bzhi gsungs so/ /'du byed thams cad mi rtag par/ / zhes bya ba la/ 'bras bur gyur pa'i nye bar len pa'i phung po lnga'i bdag nyid thams cad ni skad cig ma yin no/ /dngos po'i don thams cad ni 'dus byas yin no zhes mi rtag pa nyid du yid la byed do/ /'o na kun 'byung dang lam yang 'du byed nyid yin na de gnyis la mi rtag pa'i rnam par ma mthong na de ji ltar 'du byed thams cad ces brjod na bshad pa/ thams cad phyogs gcig gi dbang du byas pa ste/ dper na mar thams cad 'thungs zhes bya ba dang / zas thams cad zos zhes bya ba bzhin no/ /gang tshe shes rab kyis mthong ba/ /zhes bya ba ni so sor rtogs shing rig pa ste/ mi rtag pa'i rnam pas gang gis gnas skabs la mthong ba'o/ /de nas sdug bsngal las yid 'byung / /zhes bya ba la/ de nas zhes bya ba ni de'i tshe zhes bya ba'i don te/ gang gi tshe mthong ba de'i tshe'o/ /yid 'byung ba ni skyo ba skye bar 'gyur ba ste/ rnal 'byor can de 'khor ba la rgyab kyis phyogs pa'o/ /gang las she na/ sdug bsngal las zhes bya ba smos te/ 'bras bur gyur pa'i phung po las te/ skyo ba'i gzhi yin pa'i phyir ro/ /ci phyir sdug bsngal las skyo bar 'gyur gyi/ lam las ma yin zhe na/ smras pa/ lam 'di rnam par dag par 'gyur/ /zhes bya ba yin te/ khams gsum gyi sdug bsngal las skyo ba skyed pa nyid ni mi rtag pa'i lam 'di yin te/ khams gsum gyi phra rgyas spong bar nus pa'i thabs zhes bya ba'i don to/ /rnam par dag par 'gyur zhes bya ba ni rnam par grol ba'i phyir te/ 'dod chags dang bral ba thob par byed pa'i phyir 'phags pa'i lam mo/ /ji ltar yid 'byung ba yin zhe na/ de bzhin du 'og nas 'byung ba'i tshigs bcad la yang ci rigs par brjod par bya'o/ /gang mi rtag pa las ni sdug bsngal ba yin no zhes bstan pa'i phyir/ 'du byed thams cad sdug bsngal bar/ /zhes bya ba smos te/ 'phags pa dang mi mthun pa'i phyir te/ gang gi phyir 'phags pa ni mya ngan las 'das pa las gzhol zhing srid pa la mi gzhol ba yin te/ ji ltar spyod pa bzhin du yang rnam par 'byung ba yin no/ /gang gi phyir phung po dag la rtag par 'dzin pa la/ goms pa yin pas de mi rtag pa'i rnam pas mthong ba'i lam la gzud pa yin no/ /gang bde ba las bzlog pa de'i sdug bsngal gyi rnam pas zhes bya ba la sogs pa'o/ /mgon med pa nyid sdug bsngal gyi bdag nyid yin par bstan pa'i phyir smras pa/ 'du byed thams cad stong pa nyid/ /ces bya ba la/ stong pa nyid zhes bya ba ni sus kyang gnas pa med pa'i phyir te/ dper na grong na rgyal po gnas pa bzhin du 'dus byas 'di dag bdag gang gis kyang gnas pa med do/ /ma bzlog pa'i nad la sogs pa ni dri mas nye bar gdung ba'i phyir ro/ /'dus byas kyi tshogs 'di dag ni stong pa ste/ 'di la sems can med do/ /zhes bya ba mdo las gsungs so/ /bde ba dang sdug bsngal la sogs pa ni rtag pa'i rgyu'i dngos po las 'byung ba yin pa'i phyir smras pa/ 'du byed thams cad bdag med pa/ / zhes bya ba ste/ dngos po thams cad la bdag med pa'i tshul gyis mthong ba yin te/ de'i phyir chos thams cad ni rang dbang med pas rga ba dang 'chi ba yin te/ 'dod bzhin du byed pa dang bral ba'i phyir ro/ /mthong ba'i lam la yang sdug bsngal gyi bdag nyid chos la bdag med pa nyid du rtog pa yin no/ /bden pa'i yul ni so sor nges pa yin pa'i phyir te/ mngon par rtogs pa yang sdug bsngal gyi bden pa'i rnam pas yin no/ /lhag ma'i rgyu ni mtshon pa tsam du byas te/ de yang bstan bcos ji lta ba bzhin du shes par bya'o/ /de'i phyir gang la mi rtag pa'i rnam pa la sogs pa'i lam skyes pa de la ni nges par kun 'byung gi bdag nyid rnam pa bcu gnyis gang zag ji lta ba dang / dus ji lta ba bzhin du skye bar 'gyur te/ nges par de las zhes bya ba smos so/ /kun 'byung yang rnam pa bzhir bcad pa ste/ bden pa yin pa'i phyir sdug bsngal gyi bden pa bzhin no zhes bya ba la sogs par brjod par bya'o/ /ji skad du bshad pa'i lam la gdul bya dag gzud pa'i phyir smras pa/ bstan zhes bya ba ni bshad pa'o/ /khyed cag rnams la zhes bya ba ni khyed cag rnams kyi phyir ro/ /ngas ni zhes bya ba ni bdag gi don thams cad grub cing bya ba byas so/ /gal te gzhan dag brjod pa ni gzhan du yang brjod de/ nga ni thams cad mkhyen pa ste/ /thugs rje chen po dang ldan pa gang bdag gis bshad pa ni ma nor ba de bzhin nyid du bstan to/ /lam ni phyin ci ma log pa'i thar pa thob pa'i thabs so/ /a raN+Da dra ka zhes bya ba la sogs pas bstan pa'i lam dgag pa'i phyir smras pa/ mi shes zug rngu gcod byed ces bya ba ni lam gzhan dag gis ni 'di ltar nus pa yin te/ mi shes pa ni zad la mi skye ba'i ye shes de thob pas kun shes pa dang ldan pa yin no zhes bya ba lung las 'byung bas so/ /de'i zug rngu ni mngon sum du gegs yin te/ srid pa'i rtse mo'i nyon mongs pa de gcod pas na gcod pa ste rtsa ba nas bcad pa'o/ /'dis ni ston pa'i lam gyi nyes pa bsal to/ /khyed cag rnams kyis bya dgos so/ /zhes bya ba ni khyed cag nyid kyis bya dgos pa'i phyir te/ lam de rtogs shing goms par bya ba la bag yod par bya ba ste/ gang gi phyir gzhan byed pa ni med do/ /gal te de lta yin na ni bcom ldan 'das sems can thams cad kyi don la nan tan du mdzad pa dgyes par 'gyur ro/ /lam bstan pa ji tsam gyis nus pa de la bag yod par bya'o zhes de nyid bstan pa'i phyir smras pa/ ston pa ste zhes bya ba ste/ ston pa po kho na ni sangs rgyas bcom ldan 'das te/ rdzu 'phrul dang / mchog sbyin pa la sogs pa'i mthus gzhan gyi rgyud la lam bskyed par mi mdzad do/ /ji srid pa'i rtse mo'i phra rgyas spang pa'i lam nyi tshe ston par zad kyi/ sa gzhan gyi gnyen po ma yin nam zhe na/ sred pa'i zug rngu zhes bya ba la sogs pa smos te/ bstan pa zhes bya ba ni rgya cher rnam par phye ba'o/ /sred pa'i zug rngu zhes bya ba ni 'khor ba thams cad kyi rgyu thar pa 'thob pa'i bgegs rjes su chags pa'i kun du sbyor ba yin te/ ji ltar mkhris pa yang dag par skyes shing skom pa'i nad la bkru sman thabs yin pa de bzhin du chags pa 'di la yang 'di bstan pa'i phyir sel ba'i lam zhes bya ba smos te/ lam gyis chags pa'i zug rngu drungs 'byin pa zhes bya ba'i don to/ /sel ba ni 'gro ba'i don te/ rgyud las bstsal cing 'gro bar byed pa ste/ phral ba dang tha dad par byas pa zhes bya ba'i don to/ /ston pa dang bstan pa ni bsdus pa dang rgya cher bstan pa'i dbye ba yin no/ /yang na ston pa ni cung zad 'chad pa ste/ bsdus nas zhes bya ba'i don to/ /gang gi phyir sngar ni nye bar gnas pa'i gdul bya dag gi ngor srid pa'i rtse mo'i spang ba tsam gsungs la/ 'og mar ni sa dgu'i 'dod chags spang ba'o/ /ston pa po ni ston par byed pa'o/ /'o na mthong ba'i lam kho na 'di ltar bstan pas ni nyon mongs pa thams cad spong bar byed mi nus na de ji ltar 'di skad bshad ce na/ dang po mthong ba las ni mthong ba'i lam du bstan te/ de nyid goms par byas na bsgom pa'i lam nyid yin gyi/ gzhan ma yin no zhes bstan pa'i phyir/ /lta ba rnam par dag byed ces bya ba la sogs pa'o/ /'di zhes bya ba ni de bzhin nyid du ste/ ji skad du bshad pa'i rnam pa 'phags pa'i lam nyid thar pa 'thob pa'i thabs yin gyi gzhan ma yin te/ 'jig rten pa'i lam gyis ni srid pa'i rtse mo'i nyon mongs pa spang bar mi nus shing 'thob par mi nus so/ /lam de lta bus ci'i phyir zhe na/ lta ba rnam par dag byed pa/ /zhes bya ba ste/ blo dri ma med pa'i phyir phra rgyas thams cad spong ba yin te/ blo ngan pa dag la ni spong bar nus pa med do/ /de'i phyir dge slong dag gang gi tshe 'phags pa'i shes rab kyis spangs pa zhes mdo las gsungs so/ /yang na 'jig tshogs la lta ba la sogs pa'i de la lta ba rnam par dag pa ste/ de spang ba'i phyir lam 'di la 'jug pa yin te/ 'di nyid mthong ba rnam par dag par byed pa yin no/ /ga las shes par bya/ dad pa tsam mam tshig tsam gyis ma yin nam zhe na/ rab tu zhugs zhes bya ba smos te/ sgrub pa la zhugs pa ste/ 'phags pa'i lam bsgoms pa la mchog tu byed pa'o/ /spang bar gyis zhes bya ba ni yongs su spongs shig ce'o/ /ting nge 'dzin la zhes bya ba ni sems rtse gcig pa la zhugs pa'i zhi gnas te/ yid g.yeng bas ni tshogs 'di bsgrub cing dmigs par mi nus so/ /de lta bus ci zhig spang bar bya zhe na/ bdud kyi 'ching ba zhes bya ba ste/ 'ching ba 'thob par byed pa'i phyir bdud de nyon mongs pa'i 'ching ba 'thob par byed ces bya ba'i don to/ /lam 'di ji skad bshad pa'i 'bras bu yod pa nyi tsher ma zad de/ 'di lta bur yang yod do zhes brtag pa'i phyir/ 'di ni drang lam zhes bya ba la sogs pa'o/ /'di ni zhes bya ba la bstan ma thag pa ste/ 'phags pa'i lam mo/ /mchog tu ma yo ba ste bdag med pa'i rnam pa la sogs pas mya ngan las 'das pa drang po yin pa'i phyir na phyir mi ldog cing drang ba zhes bya ba'i don to/ /'di ni pha rol gnon pa zhes bya ba'i lam 'di kho na ni nyi ma shar ba bzhin du nyon mongs pa dang mun pa'i tshogs sel ba yin zhing / 'dis ni sdug bsngal gyi rgya mtsho las rgal ba'i phyir ro/ /gzhan zil gyis gnon pa ste/ skyes bu byed pa gang rang gi gnyen po bsten par nus pa zhes bya ba'i don to/ /de nyid kyi phyir gnyis kyi khyad par gyi sbyor ba smras pa/ bgrod pa gcig pa zhes bya ba smos te/ gcig po 'dis 'gro bar byed pas na bgrod pa gcig pa ste/ thun mong ma yin pa'i thar pa'i lam 'di la thog mar dge sbyong zhes bya ba la sogs pa mdo las gsungs so/ /ji lta bu zhe na/ ngang pa'i srang ltar zhes bya ba yin te/ ngang pa'i lam yin pas ngang pa'i srang ste ngang pa'i 'gro ba zhes bya ba'i don to/ /dper na ngang pa ni mtsho zhes bya ba ste/ mtsho chen po la bgrod pa gcig pa zhes bya ba ni gcig tu der 'bab pa yin zhing dur khrod kyi sa phyogs su ni ma yin no/ /de bzhin du 'phags pa'i lam yang thar pa la gcig tu 'bab pa yin gyi 'khor bar ni ma yin no/ /de yang gang yin zhe na/ rtogs nas zhes bya ba smos te/ lam gang rtogs pa dang ldan pa'o/ /shAkya thub pas ni rdo rje'i gdan la bzhugs pa nas lam 'di nyid bshad do/ /da ltar gyi bstan pa'i ston pa ni shAkya thub pa yin te/ des na nye bar gnas pa'i phyir smos pa yin gyi/ de ltar de bzhin gshegs pa thams cad kyis kyang lam 'di nyid rtogs pa yin no/ /ji lta bu la gnas nas she na/ mnyam gzhag ces bya ba ste/ g.yeng ba thams cad spangs nas sems rtse gcig tu byas pa yin te/ mnyam par gzhag pa'i sems las ni yang dag pa ji lta ba bzhin du rtogs par 'gyur ro zhes bya ba'i tshig gis so/ /ci yang med pa'i skye mched las 'dod chags dang bral ba ni byang chub sems dpa' thams cad kyis nges par zil gyis gnon to zhes bya ba ni grub pa'i mtha'o/ /ting nge 'dzin med par ni de med pa yin no zhes bstan to/ /bshad pa 'di zhes bya ba ni nyid kyis thugs su chud pa'i lam nyid bshad pa yin te/ thugs rje'i dbang gis gzhan dag la ston te/ bdag nyid kyis rtogs pa gcig pur ma zad de/ gzhan dag la yang de nyid ji lta ba bzhin du ston zhes bya ba'i don to/ /tshogs la zhes bya ba ni sems can gyi phung po la ste/ 'dis ni phyogs su ltung ba med par bstan to/ /yang dang yang zhes bya ba ni skad cig skad cig la ste/ 'dis ni yang 'byung ba med par bstan to/ /sngar bstan pa nyid kyi nus pa bstan pa'i phyir smras pa/ skye shi'i mtha' zhes bya ba la sogs pa'o/ /dge slong dag 'di la dus gcig na u ru bil ba nang gnas te/ chu bo nai rany+dza na'i ngogs na ji tsam na bdag nyid gcig pu 'dug ste/ ring por mi thogs par mngon par rdzogs par sangs rgyas par 'gyur ro zhes rtog pa skyes so/ /bgrod pa gcig pa'i lam 'di ni sems can rnam par dag pa'i phyir dang / mya ngan gyis gdungs pa rnams las 'das pa'i phyir dang / sdug bsngal dang yid mi bde ba med par bya ba'i phyir dang / rigs pa'i chos rtogs par bya ba'i phyir te/ 'di lta ste dran pa nye bar gzhag pa bzhi gang la las 'di dag tu grub pa'i 'phags pa des ni rigs pa'i chos 'thob pa yin te/ gang 'phags pa'i rigs pa'i chos 'thob pa des ni ji srid du 'phags pa'i lam gyi bdud rtsi thob pas de yongs su mi gtang ba yin te/ skye shi zhes bya ba la sogs pa'i tshigs su bcad pa bzhi'o/ /bgrod pa gcig ni mya ngan las 'das pa kho na'i thabs yin gyi/ 'khor ba'i phyir ni ma yin zhes bya ba'i don to/ /skye shi'i mtha' rtogs zhes bya ba ni de bzhin gshegs pa'o/ /skye shi zhes bya ba'i sgra ni 'khor ba rgyu dang bcas pa la brjod do/ /mtha'i sgra ni thar pa ste/ de gnyi ga mngon sum du gzigs pa ni thams cad mkhyen pa zhes bya ba'i don to/ /skye ba dang rga ba dang 'chi ba la sogs pa'i gnod pa dag rtogs pa'i phyir phyin ci ma log par rtogs pa dang ston pa ni de nyid do/ /lam ni rab tu bstan mdzad pa/ /zhes bya ba ni thar pa'i thabs gzhan dag la ston pa'o/ /gzhan la ston pa'i rgyu ni thugs rje nyid yin par bstan pa'i phyir/ phan mdzad thugs brtse ba zhes bya ba smos te/ phan pas 'bras bu'i rjes su brtse ba gang la yod pa ste/ thugs rje chen po zhes bya ba'i don to/ /gang gi phyir thugs rje chen po ni thugs rje che bar byed pa dang yongs su skyob par byed pa yin no/ /bgrod pa gcig pa 'di yang ga las she na/ 'di ltar lam 'di zhes bya ba yin te/ 'phags pa'i lam nyid kyis so/ /sngon zhes bya ba ni sngon gyi dus so/ /rgal ba ni rgal ba ste/ nyon mongs pa'i rgya mtsho dang 'khor ba'i rgya mtsho las rgal ba ste/ mar me mdzad la sogs pa'i thub pa dang / de'i nyan thos dang rang sangs rgyas rnams so/ /de bzhin rgal bar 'gyur zhing zhes bya ba la/ lam 'dis zhes bya ba drang ba'i don ni de bzhin gyi sgra ste/ 'dis ni byams pa la sogs pa ma 'ongs pa na 'byung ba 'khor dang bcas pa rgal bar 'gyur ba'o/ /rgal bar mdzad ces bya ba ni da ltar byung ba'i dus kyi shAkya thub pa 'khor dang bcas pa yang rgal ba yin no/ /gang las rgal ba yin zhe na/ smras pa/ chu bo rnam pa bzhi ste/ nyon mongs pa'i chu bo'am/ 'khor ba'i rgya mtsho las so/ /'phags pa'i lam bstan pas de'i tshogs dang / 'jig rten pa'i dgos pa smras pa/ shin tu mthar gtugs zhes bya ba la sogs pa ste/ gzhan dag ni rje ngar spom po zhes bya ba'i kun du rgyu zhig gis bcom ldan 'das la/ ci'i phyir de bzhin gshegs pas lam bstan zhes gsol pa las/ de'i dbang du mdzad pa yin no zhes zer ro/ /shin tu zhes bya ba ni yang ldog pa med pa'o/ /mthar thug cing tha mar gyur pa gang la yod pa de ni mya ngan las 'das pa ste/ phung po lhag ma med pa'i ming tsam de la'o/ /de rtogs pa'i phyir bstan pa ste/ lam ma rtogs par ni de thob pa med pa'i phyir ro/ /'phags pa'i lam gyi 'bras bu thun mong du bstan nas/ thun mong ma yin pa bstan pa'i phyir/ gdul bya zhes bya ba smos te/ dbang po nye bar zhi ba'i phyir skyes pa ste/ mi slob pa'i lam ni dbang po dul ba la 'khrul pa med pa'i phyir ro/ /phung po lhag ma dang bcas pa'i mya ngan las 'das pa 'dis bstan nas bsgom pa'i lam gyi 'bras bu smras pa/ dag bya dang zhes bya ba yin te/ de la brten nas nyon mongs pa'i sgrib pa thams cad dang bral zhing sems dri ma rnam par dag cing rnam par grol ba de'i phyir 'di yang lam gyi 'bras bu yin no/ /'khor ba'i skye shi zad par bya ba dang / /zhes bya ba smos te/ 'dir 'khor ba ni ngan song gi phung po lnga'i bdag nyid mthong ba'i lam gyi 'bras bu'i gnas skabs so/ /de la gang skye shi ni skye ba dang 'jig pa gnyis so/ /zad pa ni bral ba ste de'i phyir mthong ba'i lam gyi stobs kyis ngan song gi phung po ni so sor ma brtags pa'i 'gog pa thob pa'i phyir ro/ /dang gi sgra ni ting nge 'dzin gyis rnam par rol pa la sogs pa yongs su gzung ba'i phyir ro/ /'phags pa'i lam gyi tshogs su gyur pa'i lam gyi phan yon smras pa/ khams rnams du ma so sor rtogs bya'i phyir/ /zhes bya ba smos te/ khams du ma ni khams mang po pa zhes bya ba la sogs pa'i mdo las gsungs te/ bsam pa dang rang bzhin de rnams so sor yang dag par rig pa'o/ /gnas dang gnas ma yin pa so sor rig cing / gnas rnam pa bdun la mkhas pa la sogs pa de ni 'di'i don to/ /bcom ldan 'das kyis bstan pa'i lam gyi mthu nyid kyis dbang po las 'das pa'i tshig gi don yang yongs su shes par 'byung ba'i phyir ro/ /spyan ldan zhes bya ba ni thams cad mkhyen pa ste/ sangs rgyas kyi spyan gyis kun du lta ba dang / rnam par lta ba yin no zhes lung las 'byung ba'i phyir ro/ /'dir thams cad rtogs pa ni spyan zhes bya ba ste/ de dang ldan pa ni spyan dang ldan pa'o/ /de'i lam ni 'phags pa'i lam dang de'i tshogs te/ 'dir ni 'jig rten 'dir ro/ /rab tu bstan pa ni bshad pa'o/ /'di'i dgos pa'i gtso bo ni thar pa nyid yin te/ de la gzhol ba'i phyir ro zhes de nyid kyi don yang dpe dang bcas par bstan pa'i phyir ro/ /ji ltar chu klung zhes bya ba la sogs pa smos so/ /'di ltar gang gA zhes bya ba ni chu bo'o/ /chu rgyun ni chu'i rgyud do/ /rgya mtsho ni chu chen no/ /de las gzhan ni de'i snod dang rjes su mthun pa med pa'i phyir ro/ 'bab par 'gyur ba ni 'brub par 'gyur ba'i don to/ /chu klung ni chu bo'o/ / ji ltar zhes bya ba ni nges par gzung ba'i don te/ rgya mtsho nyid gang gA'i chu klung dang mthun pa yin gyi/ chu bo chen po gzhan dag ni ma yin te/ de dag gi rgyun 'di nyid du zad par yang srid pa'i phyir te/ de nyid bstan pa'i phyir shugs zhes bya ba smos te/ shin tu che ba'i phyir rgyun chad par mi 'gyur zhing 'byung ba'i mtshan nyid kyi shugs gang la yod pa de ni gang gA'o/ /de bzhin ni de ltar te/ sngar bstan pas lam mo/ /shes rab yangs pas zhes bya ba ni shes bya thams cad la khyab pa'i shes rab yod pa des bstan pa ste/ thams cad mkhyen pas bstan pa'o/ /'jug ces bya ba ni de'i spyod par ro/ /'chi med thob par bya phyir zhes bya ba ni 'chi ba la sogs pas 'jigs pa dang bral ba thob par bya ba'i phyir ro/ /dper na chu bo gang gA ni rgya mtshor bgrod pa gcig pa de bzhin du bcom ldan 'das kyis bstan pa'i lam yang mya ngan las 'das pa 'thob pa'i bgrod ba pa gcig pa'o/ /shes rab yangs pas bshad pa de gang yin zhe na/ gang zhig 'byung po zhes bya ba la sogs pa yin te/ chos ni 'dir 'phags pa'i lam ste/ de 'khor lo bzhin du rtsibs la sogs pa chos kyis mthun pa'i phyir ro/ /'di'i 'byung ba ni lha zhig gis mngon par brjod de/ gnas brtan kauN+Di n+yas bcom ldan 'das la chos kyi 'khor lo bskor bar bskul lo zhes lung las 'byung ngo / /sngon chad ma thos zhes bya ba ni skye ba gzhan dag tu slob dpon brgyud pa las ma 'ongs shing sngon gyi ba ra da la sogs pas mi rnyed pa'i phyir te/ des ni 'jig rten pa'i lam gyi gtam gyi gnas skabs thob pa yin gyi/ 'phags pa'i lam ni ma yin no/ /bskor zhes bya ba ni bskor bar gyur pa ste/ 'di ji ltar bdag gis rtogs pa de bzhin du gzhan gyi rgyud la yang bstan pas bsgrub pa'i phyir ro/ /'byung po kun la thugs brtse bas/ /zhes bya ba ni/ gang la sems can thams cad la bye brag med par 'jug pa'i thugs rje mnga' ba ste/ rgyu med par gzhan la phan pa mdzad pa'i phyir de bzhin gshegs pas lam bstan pa yin te/ grags pa la sogs pas gos pa'i phyir ni ma yin no zhes shes par bya'o/ / skyob pa ni 'dis skyob par byed pas skyob pa ste/ de nyid ston pa'o/ /de ni 'phags pa'i lam bstan pas gdul ba'i skye bo'i rgyud yongs su srung ba ste/ dper na bu gcig pa la brtse ba'i ma zhes bya ba la sogs pa ji skad du gsungs pa'o/ /yang na bcom ldan 'das chos thams cad la mnga' brnyes pas skyob pa zhes bya ba la sogs pa'i tshig gis so/ /de bstan pa gsal bar bya ba'i phyir/ lha dang mi rnams 'dul mdzad pa/ /zhes bya ba smos te/ lha dang mi gnyis gdul bar mdzad pa zhes bya ba'i tshig sbyar te/ lha dang mi rnams kyi ston pa sangs rgyas bcom ldan 'das zhes lung las 'byung zhing de gnyis 'ba' zhig bden pa rtog pa'i skal ba dang ldan pa'i phyir ro/ /'dul mdzad pa ni ston pa mdzad pa'o/ /dam pa de la phyag 'tshal lo/ /zhes bya ba ni sems can khyad par can 'di lta bu ste/ 'phags pa'i khyad par shes pa dang so so'i skye bo gus pa dang bcas pas rgyun du ste/ yongs su mya ngan las 'das kyang phyag 'tshal bar 'gyur na bzhugs par gyur na lta smos kyang ci dgos zhes pa'o/ /'gyur ba zhes bya ba ni sgra bstan pa'i phyir sred pa'i mthar phyin zhes bya ba smos te/ 'khor ba'i mthar thug pa phung po lhag ma med pa'i mya ngan las 'das par phyin pas kyang bsnyen bkur bya ba'o/ /gang gi phyir thub pa ni yon tan dang ldan zhing skyon med pa'i phyir dang / gzhan la phan pa mdzad pa'i phyir skye bo dam pa thams cad kyis mchod pa yin te/ de bas na des bstan pa yang gzung bar bya'o zhes tshigs su bcad pa 'dis bstan to/ /de nas bstan pa 'di la brten pas de'i 'bras bu thob pa yin gyi/ gzhan sems skyo ba dang ldan pa rnams kyis ni ma yin gyi/ de nyid bstan pa'i phyir smras pa/ rnam rtog dge ba zhes bya ba la sogs pa'o/ /sdig pa rnam par rtog pa ni gsum ste/ 'dod pa'i rnam par rtog pa dang / gnod sems kyi rnam par rtog pa dang / rnam par 'tshe ba'i rnam par rtog pa'o/ /dge ba'i rnam par rtog pa yang gsum ste/ nges par 'byung ba'i rnam par rtog pa la sogs pa'o zhes pa nas ji tsam na 'di gsungs so/ /gsum ni grangs gsum mo/ /de las gzhan pa'i rnam par rtog pa ni 'di'i dbye ba yin pas 'di'i nang du 'dus pa'i phyir ro/ /rnam par rtog pa ni kun du rtog pa'o/ /dge ba ni 'dod pa'i 'bras bu ste/ nges par 'byung ba la sogs pa'i rnam par rtog pa/ bsam gtan dang po'i sa pa'i brtag bya zhing / /zhes bya ba ni mngon du phyogs pa dang goms par bya ba'o/ /de la brten nas ji srid na spong ba yin te/ de smras pa/ dge ba ma yin gsum yang rnam par spangs/ /zhes bya ba'i 'dod pa rnam par rtog pa la sogs pa gsum ni 'bras bu'i mi 'dod pa yin pas rnal 'byor can gyi rgyud las thag ring du spang bar bya'o/ /de nas zhes bya ba ni mi dge ba'i rnam par rtog pa gsum spangs shing mnyam par gzhag pas dge ba rnam par rtog pa gsum yongs su blangs nas so/ /rtog dang zhes bya ba ni 'dod pa na spyod pa dang / bsam gtan dang po'i sa ba'i sems rags pa'i mtshan nyid mtha' dag go/ /dpyod pa ni sems phra ba'i mtshan nyid de dpyad pa ni bsam gtan khyad par can gyi sa pa yin no/ /zhi bar bya ba zhes bya ba ni bsal ba dang spang bar bya ba ste/ 'di ltar bsam gtan dang po la brten nas/ 'dod pa na spyod pa'i dge ba dang mi dge ba'i rnam par rtog pa dang / rnam par dpyod pa spong ba yin no/ /bsam gtan gnyis pa la brten nas kyang bsam gtan dang po'i spong ba yin te/ 'dir mthun pa'i dpe bstan pa/ kun nas rdul langs char gyis mnan pa ltar/ /zhes bya ba yin te/ dper na char 'bab pas ni rlung chen po langs pas kun nas bslang pa'i rdul nye bar zhi bar byed pa de bzhin du'o/ /de nas zhes bya ba ni mi dge ba'i rnam par rtog pa dang / dge ba'i rnam par rtog pa dang / dpyod pa gnyis kyang mnyam par gzhag pa'i sa pa dag gis spong zhing / bla med byang chub bde la reg par 'gyur/ /zhes bya ba 'di dang sbyar ro/ /sems la rnam rtog nyer zhi nas/ /zhes bya ba ni gang la rnam par rtog pa rnams nye bar zhi zhing bral ba'i sems la gcig tu gyur pa bsam gtan gnyis pa la sogs pa nyid la byed pa'i rgyus 'dod pa'i khams spang dka' ba de dang / bsam gtan dang po'i g.yeng ba'i rnam par shes pa 'gog par byed pa ni gong ma'i ste/ de'i phyin ci log yin pa'i phyir ro/ /byang chub bde la reg par 'gyur/ /zhes bya ba ni rnal 'byor can des zas la mi skye ba'i ye shes dang 'brel pas sred pa zad pa'i phyir 'thob pa'am/ snyoms par zhugs pa'i khyad par gyi bde ba'o/ /bla na med ces bya ba'i skyon dang bral ba'i phyir byang chub kyi bde ba ni mchog yin no/ /dben pa las skyed pa nyid kho na'i bsam gtan la sogs pas nyon mongs pa'i mdud pa spong ba yin no zhes bstan pa'i phyir smras pa/ ting nge 'dzin zhes bya ba la sogs pa'o/ /mdud pa rnam pa bzhi ste brnab sems lus kyi mdud pa zhes bya ba la sogs pa nas 'di gsungs so/ /btsun pa 'dod pa thams cad gang gis spong bar 'gyur zhes su 'dri ba po'i gcer bu ba'i nyan thos zhig las brtsams so zhes gzhan dag zer ro/ /ting nge 'dzin ni gsum ste/ stong pa nyid dang mtshan ma med pa dang smon pa med pa ste/ grangs gsum po de rnams la'o/ /yid gtad cing zhes bya ba ni rab tu chags pa dang sems zhen par bya ba zhes bya ba'i don to/ /de'i mthus mdud pa thams cad spong ba'i phyir te/ rdo rje lta bu'i ting nge 'dzin zhes bya ba'i mdo las 'byung bas so/ /yang na rtog pa dang bcas shing dpyod pa dang bcas pa la sogs pa gsum mo/ /dben pa las skyes tshad med bsgom par bya/ /zhes bya ba ni gang ting nge 'dzin bsgoms pa'i 'bras bu bstan pa ste/ de la yang dag par bsten pas tshad med pa la sogs pa'i khyad par rnams so/ /sa 'og ma dag las skyo ba skyes nas de byams pa la sogs pa tshad med pa bsgom par bya ste/ ting nge 'dzin gyi mthus thob pa'i phyir ro/ /yang na de bsten par bya'o/ /tshad med pa ni sems can la brten nas 'byung ste/ tshad med pa'i bsod nams 'byung ba'i phyir dang / tshad med pa'i 'dod pa'i 'bras bu yin pa'i phyir ro/ /byams pa dang snying rje dang / dga' ba dang btang snyoms zhes brjod pa ni gnod sems dang / rnam par 'tshe ba la mngon par dga' zhing 'dod pa la 'dod chags dang gnod sems kyi gnyen po yin pa'i phyir tshad med pa bzhi'i sgrar brjod do/ /'jig rten dang 'jig rten las 'das pa'i lam spyir bstan nas/ 'jig rten las 'das pa'i lam gyi rab tu dbye ba ni gnas gsum zhes bya ba smos te/ khams gsum pa 'di ni sems can rnams kyi gnas te rten yin no/ /gzhan dag ni ngan song gsum du 'dod de/ de gang gi phyir de ni so so'i skye bo rnams kyi rang bzhin gyi gnas te/ de yang mthong ba'i lam gyis ring du byas pa yin no/ /gsum po rnams kyis gnas gsum rab tu dral/ /zhes bya ba ni sngar bshad pa'i ting nge 'dzin gsum ste/ de'i gnyen por gyur pas rdo rjes ri chen po phye mar 'joms shing 'thag pa bzhin du spong ba yin no/ /gsum smos pa ni tshad med pa rnam par bcad pa'i phyir ro/ /de dag ni gzhi yin pa'i phyir dang / mos pa tsam yid la byed pa'i phyir ro/ /de nyid yid la byed pas ni nyon mongs pa spong ba nyid do/ /yang na gsum ni tshul khrims dang / ting nge 'dzin dang / shes rab kyi phung po dang / 'phags pa'i lam gyi phung po gsum yin pa'i phyir ro/ /de ltar yang dag par zhugs pa'i rnal 'byor can gyis ni zhi bya zhing zhes bya ba ste/ rab tu spang ba'o/ /mdud pa ni nyon mongs pa dang nye ba'i nyon mongs pa 'ching bar 'gyur ba ste/ bdag nyid 'ching bar byed pa'i phyir mdud pa 'di dag ni phra rgyas te/ 'khor ba'i rtsa ba zhes lung las 'byung ba'i phyir ro/ /'dis bsgom pa'i lam gyi bya ba bstan nas/ mi slob pa'i lam bstan pa/ nges pa srung ba yin pas na rtogs shing mkhas pa ste de nyid kyis bdag dang gzhan yongs su srung bar nus pa'i phyir ro/ /'dis ni shes bzhin dang ldan par bstan to/ /nges par rtog pa sngon du 'gro bas bag yod pa ste/ nges par rtog par byed pa zhes gzhan dag zer ro/ /dran ldan zhes bya ba ni dran pa 'jug pa dang / dran pa dang ldan par rtag tu nye bar mtshon pa yin te/ ji skad du/ drug la rtag tu gnas pa ste/ gang zhe na/ 'di la mig gis gzugs lta ba na yid bde bar mi 'gyur la/ yid mi bde bar yang mi 'gyur zhing btang snyoms la gnas pa ni dran pa shes bzhin zhes bya ba la sogs pa'o/ / khams gsum spangs pa nyid dam mdud pa nye bar zhi ba nyid ni pha rol du phyin pa yin gyi/ rgya mtsho rgal ba ni ma yin no zhes bstan par bya ba'i phyir/ shes rab mtshon cha zhes bya ba la sogs pa'i tshigs su bcad pa gnyis smos so/ /mtshon ni rnam pa gsum ste/ thos pa'i mtshon dang shes rab kyi mtshon dang / /zhes bya ba la sogs pa mdo las gsungs so/ /de las shes rab kyi mtshon ni 'dir shes rab kyi tshogs thos pa la shes rab tu gsungs te/ de ni mtshon bzhin du bag la nyal la sogs pa 'joms par byed pa'i phyir ro/ /brtson 'grus stobs zhes bya ba la sogs pas ni dben pa'i mtshon bstan to/ /'jig rten skye dang zhes bya ba la sogs pas ni shes rab kyi mtshon bstan to/ /kun las rab tu rnam grol zhes bya ba la sogs pas ni de'i 'bras bu ste/ 'di ni bsdus pa'i don to/ /btsun pa pha rol du phyin pas na dge slong zhes brjod na ji tsam gyis pha rol tu phyin par 'gyur zhes pa las de'i dbang du mdzad nas gsungs so zhes gzhan dag zer ro/ /'dir don rgya cher bshad pa gang la shes rab kyis de bzhin nyid nges par byas pa'i mtshon yod pa de ni shes rab mtshon no/ /dper na 'thab mo'i dus su mtshon gyis dgra'i dpung pham par byed pa de bzhin du len par rab tu zhugs pa'i shes rab kyis nyon mongs pa ste/ ye shes kyis ni nyon mongs pa gcod pa yin no zhes mdo las gsungs so/ /brtson 'grus stobs zhes bya ba la/ brtson 'grus ni yang dag par spong ba bzhi ste/ de dag ni dpung gi tshogs yan lag bzhi pa bzhin te/ brtson 'grus kyi stobs dang ldan pa'i 'phags pa nyan thos dag gis ni mi dge ba rnams spong bar 'gyur ro zhes pa'i tshig gis so/ /de dang ldan pa ni thob pa ste/ de phun sum tshogs pa zhes bya ba'i don to/ /mnyam par gzhag pa zhes bya ba ni sems rtse gcig pa ste/ g.yeng ba gcod par byed cing nan tan du nus pa'i phyir ro/ /ting nge 'dzin la dga' bas zhes bya ba ni de la mos pa ste/ yid ches pa skyes shing dad pa thob par gyur na ni de bsgom par 'gyur ro/ /yang na dga' ba ni ro myang ba ste/ de'i phyir de sgom pa mchog tu byed par 'gyur ro/ /dran ldan zhes bya ba ni dran pa dang ldan pa ste/ 'dis ni 'phags pa'i lam gyi tshogs dbang po lnga'i stobs bstan nas 'phags pa'i lam bshad pa/ 'jig rten skye dang 'jig par rtogs nas ni/ /zhes bya ba ni nye bar len pa'i phung po la zag pa med pa'i ye shes kyis 'byung ba dang 'gag par rtogs pa de ni pha rol du phyin zhes brjod par bya ba dang sbyar ro/ /ji lta bur shes pa yin zhe na/ de rig yin zhes bya ba smos te/ de shes par byed pa yin te/ gang mthong ba de ni mig dang ldan par de bzhin no/ /'dis ni ye shes phun sum tshogs pa bstan to/ /kun las rab tu rnam grol zhes bya ba ni phra rgyas thams cad dang de'i gzhi dag las yongs su grol ba ste/ 'dis ni spangs pa phun sum tshogs pa bstan to/ /'jig rten mtha' ma zhes bya ba ni 'khor ba'i mtha' ma'o/ /legs par rtogs gyur nas zhes bya ba ni/ de nyid phyin ci ma log par yongs su rtogs pa ste/ 'dis ni phung po lhag ma dang bcas pa'i mya ngan las 'das pa bstan to/ /de'i 'og tu de bzhin nyid shes pa kho nas 'jig rten gyi mthar grol bar 'gyur gyi gzhan du ni ma yin no zhes bstan pa'i phyir 'jig rten mthar son pa zhes bya ba smos te/ phung po lhag ma med pa'i mya ngan las 'das par zhugs pa ni pha rol tu phyin pa zhes brjod do/ /'dis ni 'dus byas thams cad kyi rgya mtsho las rgal ba'i phyir ro/ /yang 'jig rten las 'das pa'i lam bstan pa'i phan yon rgya cher bshad pa/ gang gis zhi ba zhes bya ba la sogs pa'o/ /bde 'dod bde ba 'thob ces bya ba la/ gal te bde ba 'dod na ni bde 'gro'i bde ba dang sred pa zad pa'i bde ba 'thob par 'gyur ro/ /de gang gis she na/ de ltar spyod pas zhes bya ba smos te/ sngar bstan pa'i rnam pas lam bsgom pa'i khyad par la spyod pas so/ /snyan pa thob ces bya ba ni mngon du rab tu bsngags pa 'thob pa'o/ /grags pa 'phel bar 'gyur zhes bya ba ni lkog na grags pa de'i bsngags pa yang dag par brjod pa ste/ de stsogs shing 'phel bar 'gyur ro/ /gang gi tshe zhe na/ smras pa/ gang zag gang gis lam drang po bsgom pa zhes bya ba dang sbyar ro/ /'phags pa de ji lta bu zhe na/ zag pa med pa'o/ /lam yan lag brgyad ces bya ba ni yang dag pa'i lta ba la sogs pa 'di la yod pa'o/ /drang po ni ma yo ba ste/ don dam pa'i don yin pa'i phyir ro/ /gang bde ba 'dod pa dag gis bsgom pa zhi ba ni 'khor ba'i gnod pa zhi ba thob par byed pa'i phyir ro/ /lam bsgom pa zhes bya ba ni thar pa'i thabs la goms par byed pa'o/ /ci'i phyir zhe na/ des ni bdud rtsi rnyed ces bya ba yin te/ 'chi ba med pa'i gnas sgrub pa'i phyir ro/ /gang bde ba 'dod pa dag gis bsgoms na ji srid du bdud rtsi des nges par 'thob pa yin te/ slu ba med pa'i phyir ro/ /lam gyi tshoms te bcu gnyis pa'i rnam par 'grel pa rdzogs so// //da ni bkur sti'i tshoms brjod par bya ba ste/ lam bsgoms pa la ni gcig tu bgegs 'jug pa yin pas de spang ba'i phyir ro/ /rnyed pa dang bkur sti la mngon par dga' ba rnams ni khyad par gyis thob pa las nyams pa yin te/ gang las she na/ gtsang ba'i thob pa las so/ /dre'u mo rang gi mngal gyis zhes bya ba la sogs pa smos te/ rgyal po'i khab na lha sbyin gyis 'di lta bu'i tshul gyis rnyed pa dang bkur sti bsgrub par 'gyur te/ lus 'phags mo'i bu ma ga d+h+wa'i rgyal po ma skyes dgra shing rta lnga brgya tsam dang lhan cig nang dang nub tu bsnyen bkur byed cing phyir byung ba dang lnga brgya tsam gyi 'di la snod kyi btso ba dag rim gyis 'bral bar byed do/ /lha sbyin yang dge slong lnga brgya tsam dang lhan cig zas kyi gral dang por nye bar 'dug par gyur to/ /de nas dge slong rab tu mang po snga dro zhes bya ba nas/ ji tsam na dge slong dag khyed cag lha sbyin gyi rnyed pa dang bkur sti la 'dod par ma byed cig /de ci'i phyir zhe na/ dge slong dag lha sbyin gyi rnyed pa dang bkur sti ni gnod par byed pa'i phyir te/ 'di lta ste gsod pa'i phyir chu shing 'bras bu 'byung bar 'gyur ba lta bu'o zhes bya ba nas ji srid du tshigs su bcad pa gnyis gsungs so/ /chu shing 'bras bus phung ba ltar/ /zhes bya ba ni chu shing gi 'bras bu mo tsa zhes bya ba skyes par gyur na de nyid kyis chu shing phung ba ste skem par byed do/ /ltar zhes bya ba ni de bzhin no/ /smyig ma 'bras bus zhes bya ba ni gro lta bu zhig skyes par gyur na de nyid kyis smyig ma'am/ 'od ma ste phung ba ni skam pa'o/ /'dam bu 'bras bus zhes bya ba ni gang gi tshe 'dam bu'i 'bras bu skyes pa de'i tshe 'dam bu skam par 'gyur ro/ /de'i 'bras bu sa bon ni me tog phreng ba lta bu zhig yod de/ me tog tsam kho na de'i 'bras bu yin no zhes gzhan dag zer ro/ /dre'u mo rang gi mngal gyis dang / /zhes bya ba ni/ gang gi tshe dre'u mo'i mngal chags pa de'i tshe de'i mngal dang bcas par ma nyid 'chi bar 'gyur te/ 'di ltar de nang du mngal chags pa smin par shes nas/ de la bslab pa'i skyes bu mtshon gyis dku dral te mngal de blang bar bya'i/ gzhan du na mngal dang bcas par ma nyid 'chi bar 'gyur te/ des dpe bstan nas dpes gzhal bar bya ba smras pa/ pho bshal bkur stis phung bar 'gyur/ /zhes bya ba yin te smad pa'i mi ni skyes bu ngan pa ste rmongs pa'o/ /bdag la mchod cing gus par byas pa'i bsnyen bkur gyis ni skyes bu glen pa phung bar 'gyur ba yin te/ thob pa'i yon tan dag las nyams shing tshul khrims dang lta ba dang spyod pa dang / kun du 'tsho ba phun sum tshogs pa dang mi mthun pa nyid yin te/ dpe rnam pa bzhis bstan pa yin no/ /rnyed pa dang bkur sti thob pa'i yon tan dag nyams par byed pa 'ba' zhig tu ma zad de/ skye ba'am bskyed par 'dod pa'i yon tan dag gi yang bgegs nyid du bstan pa'i phyir/ ji srid blun po zhes bya ba la sogs pa smos so/ /nges par bzung zhing bcad pa'i phyir 'di ni tshig gi phrad yin te/ 'di la ji tsam gyi tshad ni ji srid de/ ji srid du shas che zhing che ba rnams kyi dbye bas blun po dag la mchod pa byas par 'gyur ba ste/ bkur sti'i 'ching ba zhes bstan pa de srid kyi bar du phung ba ni brlag par 'gyur ba ste/ gang yon tan thams cad nyams pa 'thob par 'gyur ba'o/ /ji srid ces bya ba'i sgra'i nus pa ni ma bshad pa rnams kyang bsdu ba ste/ de srid ces pa'i sgra dang 'brel ba yin pa'i phyir ro/ /mchod byas pa zhes bya ba ni bsnyen bkur dang mchod pa zhes bya ba'i don te/ 'dir shes pa'i sgra ni mchod pa la 'jug pa ste/ ji ltar phar shes pa dang mar shes pa la sogs pa lta bu'o/ /'o na sangs rgyas bcom ldan 'das la bsnyen bkur bya ba dang bla mar bya ba la sogs pa brjod de brlag par 'gyur ram zhe na/ smras pa/ byis pa zhes bya ba ste glen pa'o/ /ji ltar 'di nyid brlag par 'gyur ba yin zhe na/ dkar po'i cha 'grib cing zhes bya ba smos te/ dkar po ni thar pa dang de'i lam ste/ dkar po ni mya ngan las 'das pa'i yul ston pa yin no zhes pa'i tshig gis so/ /de'i cha ni nges par 'byed pa'i cha ste/ de yang rnyed pa dang bkur stis nyams par byed pa yin na/ dge ba gzhan lta smos kyang ci dgos/ dro bar gyur ba nyams par 'gyur ba ni re zhig phar gzhag gi /'on kyang de yi spyi bo'ang nges par nyams/ /zhes bya ba ste/ spyi bo'i ming can de la yang gnod pa yin te/ byis pa 'dis nges par 'byed pa'i cha nyams par byed cing yongs su 'jig par byed do/ /lha sbyin las brtsams te 'di bshad pa yin gyi/ rtse mo thob par gyur pa la ni 'di med de/ dge ba'i rtsa ba rgyun chad pa med pa'i phyir/ rtse mo thob pa rtsa mi 'chad/ /ces bya ba yin pas so/ /ma thob pa nyams pa'i dbang du byas pa yin pas tshig 'di la rtsod pa med do/ /gzhan dag ni 'od ma'i tshal na tshong dpon gzhal ba la g.yo byed pa zhig yod de/ spyi'i srang mda' cha spyad bcos pa las 'di gsungs te/ des na de la yang rtsod pa'i skabs med do/ / byis pa nyid la ni khyad par du bar du gcod par byed pa yin no zhes bstan te/ de ga las she na/ smras pa/ 'di ltar ngan pa zhes bya ba la sogs pa'o/ /rigs khyad par can las rab tu byung ba bum pa bzang po'i rgan po zhig gis grangs stong tsam gyi dge 'dun nye dga' la sogs pa spyan drangs pa las de dag kyang de'i gtsug lag khang du song ste/ de dag la cung zad kyang ma byin nas de thams cad de'i gnas su 'dug pa ni nyes pa gcig go/ /de nyid kyis glo bur du 'ongs pa'i shin tu rgan pa dag gi mdun du 'dug cing bdag po byed pa 'di ni gnyis pa'o/ /de bzhin du dge slong gzhan dag gnas na rab tu gnas pa las 'byin pa 'di ni gsum pa'o/ /bram ze dang khyim bdag gi khyim dag dang gtsug lag khang gzhan dag tu de yang mchod pa 'dod pa 'di ni bzhi pa ste/ de'i dbang du mdzad nas tshigs su bcad pa bzhi gsungs so/ /ngan pa ni byis pa ste pho bshal zhes bya ba'i don to/ /rnyed pa 'dod pa ni nor la sogs pa thob par mngon par 'dod pa'o/ /gzhan dag tu ni srid pa 'dod pa zhes brjod de srid pa ni yang dag par srid pa ste/ shes par byed pa dang brjod pa ste 'jig rten pa rnams bdag la ma dag pa yin yang dad par shes su 'jug pa zhes bya ba la sogs pa'o/ /yang na rnyed pa dang bkur sti'i dngos po don du gnyer ba'o/ /gang yang skye bo ngan pa'i mtshan nyid gcig tu gnas pa bstan pa'i phyir/ dge slong 'khor ni 'dod pa dang / /zhes bya ba smos te/ yon tan che ba'i rgan zhing rgan pa'i dge slong rnams las gtso bo dang mchog dang bcas pa dang 'dren pa nyid du 'dod pa ni dang gi sgra'o/ /yang na 'khor nyid du ste/ kye ma'o dge slong dag nga la 'khor gyi dri ba dris la bsnyen bkur gyis te 'dug shig dang zhes pa'o/ /gnas la ser sna byed pa dag /ces bya ba ni gtsug lag khang dang gnas khang sde la sogs pa las dam pa dag kun du 'dzin pa yin te/ 'di dag tu ni mi gnas pa ma yin te zhes bya ba la sogs pas gzhan gyis thob par mi 'dod cing bdag nyid kyis yongs su 'dzin pa yin no/ /rigs gzhan dag gis mchod pa dang / / zhes bya ba ni rigs gzhan de dag ni nye du'i rigs ma yin pa ste/ kye ma'o nga la gnyen bzhin du sbyin pa dang mchod pa gyis shig gzhan dag la ni ma yin no zhes so/ /yongs su shes par byed pas chags pa la sogs pa srid pa yin no zhes bstan pa'i phyir/ rab tu byung dang zhes bya ba la sogs pa'o/ /yang nges par de ltar gyur cig pa ste/ gang khyim pa thams cad dam rab tu byung ba thams cad de gang yang rung bas bdag la gtso bo nyid du 'phrigs par gyur cig ces dam pa ma yin pa yongs su rtogs par byed pa'o/ /khyim pa dag ni khyim na gnas pa'o/ /rab tu byung ba ni khyim spangs pa ste/ khyim pa dang rab tu byung ba gang yang rung bas bdag la de ltar 'phrigs par 'gyur gyi/ gzhan dag la ni ma yin par ro/ /bdag dbang gyur na zhes bya ba ni bdag la rag lus pa dang 'brel pa'o/ /re stes zhes bya ba ni gyur cig pa ste/ gang yang rung ba zhes bya ba 'di rjes su 'breng ngo / /gang du zhe na/ bya ba byas rung ma byas rung / /zhes bya ba smos te/ gang cung zad bya ba dang mi bya ba thams cad la 'di dag byed pa'am mi byed pa de yang bdag gi lung bzhin du byed par gyur cig pa'i don to/ /yang na bya ba che chung cung zad byas pa dang ma byas pa dag la ste/ lha mo sked med bzhin no/ /de ltar byis pa kun rtog na/ /zhes bya ba ni rnam pa 'dis na rnyed pa dang bkur stis zil gyis non pa'i klan pa ni tshul bzhin ma yin pa yid la byed pa'i rnam par rtog pa 'phel ba yin te/ rtswa la char 'bab pa bzhin du/ /sems la 'dod chen 'phel bar 'gyur/ /zhes bya ba ste/ sred pa dang nga rgyal 'di'i phyir nye bar 'phel bar 'gyur te/ gnyis po 'di dag ni 'khor ba'i rtsa ba yin no/ /rnyed pa dang bkur stis ni 'khor bar yongs su 'khyam pa yin zhing thar pa thob pa ni ma yin te/ ci'i phyir zhe na/ rnyed pa'i thabs ni gzhan yin la/ /zhes bya bas bstan te thabs ni byed pa dang rgyu yin no/ /de ni gzhan ltar snang ba yin te/ 'di ltar 'khor ba 'thob pa'i thabs ni sred pa la sogs pa ste/ de nyid ni lus la sogs pa 'thob pa'i thabs yin no/ /mya ngan las 'das par 'gro ba dang 'thob par byed pa'i thabs ni gzhan yin te/ de las gzhan pa nyid ni thar par 'gro ba'i thabs yin te/ chos shes pa dang / bdag med pa dang / tshul khrims la goms pa'i bdag nyid can no/ /rnyed pa dang bkur sti ni thabs gzhan yin te/ tshul bzhin ma yin pa'i yid la byed pa'i tshul te/ de'i 'bras bu yang 'khor ba'o zhes bya ba ni tshig gi lhag ma'o/ /lhag ma ni bstan zin to/ /rnyed pa dang bkur sti thar pa'i bgegs byed pa yin te/ de gang gis gang shes par 'gyur zhe na/ shes pa can gyis shes pa yin no zhes de nyid bstan pa'i phyir smras pa/ de ltar ci rigs shes nas su/ /zhes bya ba la sogs pa'o/ /de ltar zhes bya ba ni sngar bstan pa'am/ 'og nas smos pa ste/ thar pa'i bar du gcod pa'am/ 'khor bar 'jug pa yin pa ji lta ba bzhin du shes nas so/ /su zhig gis ji ltar bya zhe na/ dge slong zhes bya ba smos te/ khyim gyi gnas yongs su spangs pa ste/ rab tu byung ba'o/ /ser skya la sogs pa la yang dge slong yod do zhe na/ smras pa/ sangs rgyas nyan thos yin zhes bya bas bstan te/ de bzhin gshegs pa'i bka'i rjes su 'brang ba'o/ /gang gi phyir de nyid kyis thar pa la dmigs shing gzhal bar nus kyi/ gzhan dag ni 'khor ba na 'bab pa'i phyir ro/ /bkur sti dag la mi dga' zhing / /zhes bya ba ni don du mi gnyer ba'o/ /log pa'i lta ba mang po la mi rtog pa 'dis ni sems dben par bstan to/ /dge slong gi sgras ni lus dben par bstan pa'i phyir/ dben pa rim gyis 'phel byed pa/ /zhes bya ba ni gang gi dben pa yin pas dben pa ste/ nyon mongs pa gang dag las so so bar gyur pa 'phags pa'i lam zhes bya ba'i don to/ /de rim gyis 'phel ba ni bsgom pas sogs par byed pa'o/ /de'i phyir dben pa rnam pa gnyis la brten pa'i ye shes kyis rnyed pa dang bkur sti'i skyon nges par spang bar bya zhing lam bsgom pas snod du gyur pa nyid du bsgom par bya'o/ /rnyed pa dang bkur sti dang ma bral na ni ting nge 'dzin gyi bar chad yin no zhes bstan pa'i phyir/ thams cad la ni mi rtsol zhing / /zhes bya ba la sogs pa'i tshigs su bcad pa gnyis so/ /dge slong zhig bcom ldan 'das kyi spyan sngar phyin te gsol ba/ /btsun pa ci tsam du dge slong gis rtsol zhing 'bad pa bgyis na ting nge 'dzin 'thob par 'gyur/ dge slong 'di la gcig tu mi g.yeng bar 'gyur ba dang / thams cad kyis shes par mi 'gyur bar te/ gang la las bdag 'phrigs par 'gyur ro zhes bya ba la sogs pa nas 'di gsungs so/ /mi rtsol zhing zhes bya ba ni rtsol ba mi bya ba ste thams cad la bya ba dag la rnam par chags par mi 'gyur bar ro/ /'dis ni tshul khrims yongs su bsrung ba la gzud pa yin no/ /ting nge 'dzin ni de la brten pa'i phyir ro/ /mi yis 'phrigs par ma gyur pas/ /zhes bya ba ni 'phrigs par ma gyur pa'i mi yin pas na/ mi yis 'phrigs par ma gyur pa nyid du ste/ skye bo thams cad la bdag gi yon tan bstan par mi bya'o/ /khyed cag gis sdig pa ni bsgrags par bya zhing dge ba ni mi spyoms par gnas par bya'o zhes mdo las gsungs so/ /'dis ni tshul khrims rnam par dag pa'i thabs bstan to/ /phal cher 'phrigs pa las ni tshul khrims la sogs pa'i khyad par nyams par 'gyur bar ngas thos shing mthong ste/ dge slong tshul khrims dang ldan zhing dge ba'i chos can kAraShA pa Na brgya stong gi ched du brdzun mi brjod de/ de nyid dus gzhan zhig na rnyed pa dang bkur stis zil gyis non pas/ kAr ShA pa Na gcig gi phyir yang brdzun smra ba mthong ngo zhes bya ba la sogs pa gsungs so/ /'tsho ba gzhan la mi rten cing / /zhes bya ba ni rgyal po'am gzhan la yang mi rten cing 'tsho ba gzung bar mi bya'o zhes bya ba'i don to/ /khyed cag ni bdag nyid kyi gling la gnas shing bdag nyid kyi skyabs la gnas par bya ste/ gzhan ni gling ma yin no zhes mdo las gsungs so/ /chos la tshong pa bzhin mi spyad/ /ces bya ba ni bdag gi tshul khrims la sogs pa'i chos bstan pas tshong pa'i tshul du nye bar sbyar zhing des rnyed pa'i don du gnyer zhing tshong pa bzhin du byas nas gang yang spyad par mi bya ste/ bdag ni mang du thos pa'o/ /bdag ni mdo sde 'dzin pa'o/ /bdag ni tshul khrims dang ldan pa'o zhes smra ba ste/ des na bdag la rnyed pa chen po kun du 'byung bar 'gyur zhes bya ba la sogs pa'i tshul du tshong mi bya'o/ /rang gi rnyed pa blang bya zhing / /zhes bya ba ni rigs pas legs par 'ongs pa'i chung ngu byin pa'am/ chos gos la sogs pa'i rang gi rnyed pa ni 'di ltar shes par mi bya ste/ 'dis ci zhig bya zhes brnyas par mi bya'o/ /gzhan gyi la ni 'dod mi skyed/ /ces bya ba ni gzhan bsod nams dang ldan pa dag gis shin tu rnyed pa chen po thob pa dag la yang chags par mi bya ste/ nam zhig bdag gis 'di lta bu 'thob par 'gyur zhes so/ /ci'i phyir zhe na/ gzhan gyi zhes bya ba ste/ 'di ltar dge slong gang dag gzhan gyi rnyed pa la zhen par gyur pa dang rang rnyed pa mi len pa ste/ de gnyis kyi phyir g.yeng bas ting nge 'dzin 'thob par mi 'gyur ro zhes bya ba smos te/ sems rtse gcig pa nyid thob par mi 'gyur ro/ /bgegs de dag spangs shing the tshom med pas ni ting nge 'dzin khyad par can thob par 'gyur ro/ /rnyed pa dang bkur sti la rgyab kyis phyogs pa nyid ni legs par 'tsho ba yin no zhes gsal bar bstan pa'i phyir/ gal te bde bar 'tsho 'dod ces bya ba la sogs pa'i tshigs su bcad pa gsum smos so/ /'phags pa'i rigs pa bzhi zhes bya ba la sogs pa mdo las gsungs te/ de'i phyir 'di sogs so/ /gzhan dag ni nye dga' dge 'dun gyi yo byad kyis chog ma shes pa lhag pa la rtsol bar gyur to/ /ji tsam na khyim bdag cig gis dus de nyid du shin tu blta na sdug pa'i chung ma zhig blangs te shin tu srung bar byed do/ /nye dga' yang de bzhin du de'i khyim du sgo bas ma mthong ste/ zhugs pa las khyim bdag 'ongs te mthong nas khros te/ de'i lhung bzed bcag cing chos gos dral nas shin tu yang brnyas thabs su byas te khyim nas byung bar gyur pa las/ de'i dbang du mdzad nas 'di gsungs so zhes zer ro/ /gal te bde bar 'tsho 'dod cing / /zhes bya ba ni gal te gnod pa med pa dang 'tshe ba med par 'tsho bas spyod par gang zhig 'dod na zhes bya ba'o/ /'dis ni 'di'i khyad par bstan nas pha rol gyi bshad pa/ dge sbyong 'di la lta 'dod na/ /zhes bya ba smos te/ dge slong nyid du'am 'phags pa'i lam la'o/ /lta ba'i mtshan nyid yin pas lta ba ste/ de gang la yod pa ni dga' ba dang ldan zhing mngon par 'dod pa'o/ /de ltar gyur pa'i bde bar 'tsho ba ni tshul khrims ma ral par gyur pa la lam bsgom pa ste/ de ltar 'dod pa'i las gang yin pa de nyid bstan pa/ dge 'dun gyis ni chos gos blang / /zhes bya ba nyid la dge 'dun gyi thun mong gi chos gos la bzang po 'dod pas mi blang bar mi bya ba'o/ /bza' btung byin par gyur na blang / /zhes bya ba ni bza' ba dang btung ba nyon mongs pa med par grub par dka' ba med pa'i gzhi yin pa'i phyir ro/ /'dis ni chos gos dang bsod snyoms ngan ngon tsam gyis chog shes pa'i 'phags pa'i rigs gnyis bstan to/ /gnas mal ngan ngon tsam gyis chog shes pa'i 'phags pa'i rigs smras pa/ gal te bde bar 'tsho 'dod cing / /zhes bya ba la sogs pa ste/ dge 'dun gyi gnas la sogs pa la yang lhag par zhen pa med par gnas par bya ste/ byi ba'i khung la sprul lta bur/ /zhes bya ba smos te/ dper na sprul po che ne'u le la sogs pa'i 'jigs pas byi ba'i khung bu shin tu dog pa'i nang du 'jug ste/ shin tu dogs par bsrungs pa'i phyir de la mi dga' ba dang 'byung bar 'dod pas 'jug pa ltar 'phags pa'i nyan thos gtsug lag khang la sogs pa'i gnas mal la yang de bzhin no/ /dge slong dag 'di la gnas mal la rab tu brten pa ni chags pa'i phyir ma yin te ji srid du de dag 'di ltar tha mal pa rnams kyis yongs su zag pa gzhom pa'i phyir nang du yang dag 'jog la mchog tu bya'o zhes mdo las gsungs so/ /bsten par gyis zhes bya ba ni gnas par gyis shig pa'o/ /gnas mal dag ces bya ba ni gtsug lag khang la sogs pa'i rab tu sbyangs pa'i gnas yin pa'i phyir ro/ /spong ba dang bsgom pa la dga' ba'i 'phags pa'i rigs smras pa/ gal te bde bar 'tsho 'dod cing / /zhes bya ba la sogs pa ste/ ngan ngon tsam gyis zhes bya ba ni chos gos la sogs pa dman pa byin pa ste/ sngar bshad pa'i 'tsho ba tsam bskyed pas so/ /chog shes shing zhes bya ba ni chog shes par bya ba'o/ /de ltar chog shes par byas nas las ci zhig bya zhe na smras pa/ chos gcig po yang bsgom par bya/ /zhes bya ba smos te/ gtso bo'i chos te thar pa mchog go/ /bsgom par bya ba ni thob par bya ba'o/ / yang na lus su gtogs pa'i dran pa bsgom pa ste/ chos gcig bsgom par bya ba ste/ /'di ltar lus su gtogs pa'i dran pa'o/ /zhes mdo las 'byung ba'i phyir ro/ /yang na 'phags pa'i lam mo/ /rnyed pa dang bkur sti'i rjes su 'gro bar mi bya ste/ smad pa la sogs pa'i rgyu'i phyir dang / tshul khrims la sogs pa'i rjes su 'brang bar bya ste/ rab tu bsngags pa dang 'brel ba'i phyir ro zhes bstan pa'i phyir/ gal te mang po mi shes shing / /zhes bya ba la sogs pa smos so/ /khyed cag dge ba mi spyoms pa/ /sdig pa mi bcab pas gnas par bya ste/ de ci'i phyir zhe na/ gang gi phyir dge ba mi spyoms pa las ni dge ba'i chos 'phel bar 'gyur te/ 'di lta ste/ 'bras sA lu'i zhing la zhing pas yongs su bsrungs pa ltar zhes pa nas ji srid du tshigs su bcad pa gsum gsungs so/ /mang pos sam mang po la yongs su mi shes pa ste/ gal te mang pos mi rigs par gyur pa'o/ /'on kyang / tshul khrims legs par mnyam gzhag na/ /zhes gsungs te/ de la mchog tu byed pa ste/ sdom pa bsrung ba las shin tu gus pa dang / kha na ma tho ba phra rab tsam la yang 'jigs par lta ba zhes bya ba'i tshig gis so/ /tshul khrims dag la zhes bya ba mang po'i tshig ni spong ba bdun yin pa'i phyir dang / so sor thar pa dang / bsam gtan dang zag pa med pa'i dbye bas so/ /de shes pa dag stod byed pa/ /zhes bya ba ni mkhas pa de dag nyid bsngags pa brjod pa yin no/ /ji lta bur zhe na/ 'tsho dag cing zhes bya ba ste/ kha na ma tho ba med pa'i 'tsho ba ste mang pos mi shes pa la ni log pa'i 'tsho ba med pa'i phyir ro/ /'dis ni mang pos mi shes pa'i 'bras bu bstan to/ /snyom las med ces bya ba ni snyom pa ma skyes pa ste/ tshul khrims dang ting nge 'dzin la sogs pa la le lo med pa'am/ tshul khrims yongs su bsrung ba la le lo med cing brtson pa'i phyir ro/ /'tsho ba rnam par dag pa dang / brtson 'grus kyis tshul khrims kyi phung po yongs su rdzogs par bsgrub pa yin no/ /de shes pa dag stod byed ces pa ci'i phyir zhe na/ gal te zhes bya ba la sogs pa smos so/ /rig pa gsum ldan zhes bya ba ni sngon gyi gnas dang / 'chi 'pho dang / skye ba dang zag pa zad pa'i khyad par dang ldan pas so/ /rig pa gsum dang gal te ldan par gyur pa ste/ rig pa gsum gyi dngos po dang ldan pas rig pa gsum ldan no/ /'dis shes pa phun sum tshogs pa ste/ 'jig rten dang 'jig rten las 'das pa'i ye shes dang ldan pa'i phyir ro/ /rig pa gsum thob pa'i phan yon smras pa/ 'chi bdag zad byed pa zhes bya ba'o/ /'di la 'chi bdag zad par byed pa'i ngang tshul yod pa ni 'chi bdag nyams byed pa ste/ 'chi ba'i rjes su 'gro ba las 'das pa'o/ /de nyid ci'i phyir zhe na/ 'di ltar zag pa med ces bya ba smos te/ de ni nyon mongs pas gzhan du dbang du ma byas pa'i phyir 'chi ba thob par mi 'gyur ro/ /'dis ni spangs pa phun sum tshogs pa bstan te de ltar gyur kyang bdag nyid chen po ni bsams nas/ de la zhes bya ba skye bo mang pos de la yongs su mi shes par shes nas so/ /'phya ba ni brnyas pa dang khyad du gsod pa'i bar du'o/ /blun po zhes bya ba ni khyad par mi shes pa'o/ /gal te bza' dang btung ba yi/ /zhes bya ba ni gal te yang thams cad nas bza' ba dang btung ba shin tu gya nom pa mang po gang zhig gi rnyed pa dag dang ldan par gyur nas zhes bya ba dman pa'i dngos po rnyed pa ma yin par ston to/ /zas ni tha mar bshang ba dang gci ba la sogs pa'i dri mar 'gyur ba yin pa'i phyir ro/ /sdig pa'i chos can la zhes bya ba ni 'di la sdig pa'i chos yod pa ste ngan par spyod pa'o/ / gal te yang des mtshams med pa la sogs pa'i sdig pa'i nyes pa bsags par gyur pa yin na yang 'on kyang de la blun po de dag ste/ mkhas pa ma yin pa'i nang du ni mchod pa dang bsnyen bkur byed par 'gyur ro/ /rnyed pa dang bkur dang bral ba ni dgra la sogs pa yin no zhes bstan pa'i phyir/ mgo bregs ngur smrig ces bya ba la sogs pa'i tshigs su bcad pa gnyis smos so/ /mu stegs can gzhan zhig gis sngon ni bdag cag la bsnyen bkur byed par gyur la/ da ni sangs rgyas bcom ldan 'das nyan thos dang bcas pa la bsnyen bkur bar gyur pas gang bdag gis nges par kun du rgyu mdzes dga' mo bsad la/ rgyal byed kyi tshal du 'obs brkos te bcug la de'i ched du ni mi snyan pa bsgrag par bya'o zhes bsams pa nas ji tsam na zhag bdun gyi 'og tu kun la gsal bar gyur nas/ rgyal po gsal rgyal rgyal po dang khyim bdag rnams dang lhan cig 'dus te bcom ldan 'das kyi thad du lhags nas 'di skad ces btsun pa ma d+hu rar skyes pa'i lus ni phyogs mtshams su mi mdzes par gyur to zhes gsol pa dang / bcom ldan 'das kyis bsngags pa ma yin pa 'di gsan nas/ rgyal po chen po 'di ni da ltar byung ba'i las ma yin te/ 'di ni 'das pa'i las yin no zhes pa nas ji srid du 'di gsungs so/ /dgra byed mang ba kho nar zad/ /ces bya ba ni dgra du ma ste/ phrag dog gi dbang gis mi bzod pas sems can rnams kyis gnod pa thob par 'gyur te/ bdag gir 'dzin pas 'di la rnam par 'tshe ba'i dgrar 'gyur zhing dgra mthong ba yin te/ de bas na de nyid 'byung bar bstan pa'i phyir/ mgo bregs zhes bya ba smos te/ skra dang kha spu bregs pa'o/ /lha nyes pa la sogs pa'i ched du yang mgo bregs pa yin no zhe na/ ngur smrig gyon pa zhes bya ba smos te/ chos gos tshon gyis kha bsgyur ba'i gos gyon pa ste/ gos bsgyur bas rab tu byung ba nyid de yongs su gzung ba spang bar bstan to/ /ji lta bu zhe na/ bza' ba dang ni zhes bya ba smos te/ lus kyi yo byad ni rnam pa gsum zhes bstan te/ bza' ba dang bgo ba dang gnas khang gi bdag nyid do/ /de'i yo byad rnyed pa dang bkur sti btang ba'i phan yon gsal bar byed do/ /de ltar/ skyon rnams khong du chud byas nas/ /zhes bya ba sngar bstan pa'i nyes dmigs rtogs par byas nas so/ /gang gis she na bkur sti zhes bya ba smos te/ dngos su rnyed pa dang bkur sti'i'o/ /skyon gyi khyad par smras pa/ 'jigs chen zhes bya ba ste/ gang la tshul khrims kyis phongs pa la sogs pa chen po'i 'jigs pa yod pa'o/ /de ltar khong du chud par byas nas gang byung zhing gyur pa'i bsgrub pa de smras pa/ 'phrigs nyung zhes bya ba mang pos mi shes pa ste/ lus kyis rnam par dben pa'i gnas skabs yin pa'i phyir ro/ /sems khral bskyungs nas su zhes bya ba ni spro ba chung ba ste/ yul dag la chags pa med pa'i phyir de'i rnam par rtog pa med par bstan to/ /dben pa'i 'bras bu bshad pa'i phyir/ /dran ldan zhes bya ba smos te/ dran pa nye bar gzhag pa bzhi la legs par gnas pa ste/ dran pa 'dis ni lam gyi tshogs ston pa yin no/ /dge slong ni nyon mongs pa thams cad bcom pa'i phyir te/ phung po lhag ma dang bcas pa'i mya ngan las 'das pa bstan to/ /phung po lhag ma med pa'i mya ngan las 'das pa bstan pa'i phyir/ kun tu rgyus zhes bya ba smos te/ mya ngan las 'das pa nyid do/ /gal te de ltar nyes dmigs yin pa de lta na ni bsod snyoms la sogs pa btsal bar mi bya'am zhe na/ smras pa/ kham gyi zas kyis zhes bya ba la sogs pa'o/ /'di lta ste/ srog chags kha cig g.yan pa'i nad kyis btab ste/ bde ba la reg par mi gnas shing dgon par yang dga' ba med la/ dur khrod du yang dga' ba med de/ des mngon par gtses bzhin du dus byas so/ /de bzhin du dge slong gang rnyed pa dang / bkur stis zil gyis non par gyur cing yongs su 'dzin pa'i sems yod pa de ni grong du yang dga' ba med la dgon par yang dga' ba med de/ ji srid na nyams par 'gyur zhing dge slong dag 'di ni 'chi ba yin te/ gang 'phags pa'i chos 'di la gcig tu bslab pa gtong zhing nyams par 'gyur ro zhes de skad gsungs pa na dge slong rnams yid byung bar gyur te/ yang phyis bsod snyoms la mi 'jug cing zhag gcig kyang kha zas gcod par byed de ji tsam na de dag skya bo bseng bseng por gyur pas de bas na tshigs su bcad pa gnyis gsungs so/ /'tsho ba 'di phyir mi bza' mi bya ste/ /zhes bya ba ni 'dir 'tsho ba'i ched du bza' ba dang btung ba ma spyad na ni srog gnas par mi 'gyur te/ 'dod pa na spyod pa ni kham gyi zas kyis gnas pa yin te/ de med na ni de 'jig par 'gyur ro/ /gal te de ltar zas dang skom nye bar sbyar ba mchog tu byas pas ji ltar 'gyur zhe na/ smras pa/ kham gyi zas kyis lus zhir mi 'gyur yang zhes bya ba kham gyis bcad cing zos zos pa yin na yang ngo / /kham gyis bsnyod pa ni byams pa'i gnas kyi bdag nyid pa zhes bya ba la sogs pa 'dir brjod par bya'o/ /de la yang 'di la lhag par mang du zos par gyur na yang sems zhi bar mi 'gyur zhes bya ba yin te/ lus dang sems nye bar zhi bar mi 'gyur gyi/ nad dang dri ma dang nye ba'i nyon mongs pa'i rgyur gyur pa'i phyir ro/ /de ltar na bza' bar mi bya'o zhe na smras pa/ kha zas kyis ni lus dag gnas 'gyur ba/ /zhes bya ba smos te/ kha zas kyis 'jug pa 'di ni lus kyi bdag nyid gnas pa'i dngos po yin te/ 'gro ba zas kyis gnas pa'o zhes lung las 'byung ba'i phyir ro/ /'dod pa na spyod pa'i ni kham gyi zas ma yin par gnas pa med de/ ji ltar yang tshad dang ldan pa'i kham gyi zas te kha zas kyi bdag nyid rags pa'am phra ba de'i bdag nyid kyis 'dod pa spyod pa'i lus rgyas par 'gyur te de thams cad dang bral na ni 'chi bar 'gyur ba'i phyir ro/ /de ltar rtogs nas zhes bya ba ni de ltar shes nas so/ /bsod snyoms dag la rgyus zhes bya ba bsod snyoms dag yongs su tshol cig pa ste/ lus 'tsho ba tsam btsal ba'i rgyus ni ma rung pa med pa'i phyir ro/ /de la rnyed pa dang bkur sti 'di ni mkhas pa rnams la ni phan 'dogs pa yin la blun po rnams la ni ma yin te/ gang gi phyir de ni blun pa'i skyon gyis ltung bar 'gyur zhing yon tan las nyams la zug rngu'i gdung ba skye bar 'gyur ro zhes de nyid bstan pa'i phyir/ rigs kyis zhes bya ba la sogs pa smos so/ /'dam zhes bya ba ni mngon par 'bying ba dang chos mthun pa'i phyir 'dam zhes mngon par rtogs par bya ste/ phyag rgyas mchod pa zhes bya ba dang sbyar bar bya'o/ /dper na 'dam de la gnas na ni 'bying bar 'gyur ba de bzhin du rnyed pa dang bkur sti de'i rjes su 'gro na/ skyon nam sdug bsngal du ltung ba zhes bya ba'i don to/ /rab tu rtogs pa zhes bya ba ni rab tu bstan pa dang bshad pa zhes bya ba'i don to/ /gyis zhes bya ba ni khyed cag gis zhes bya'o/ /ci gang zhig bdag gis 'dam dang 'dra bar rab tu rtogs par bya zhe na/ rigs kyis phyag byas mchod pa gang yin 'di/ /zhes bya ba smos te/ phyag byas pa ni phyag btsal ba'o/ /mchod pa ni ri mor byas pa'o/ /gang yin 'di zhes bya ba ni mngon sum du nyams su myong ba ste/ bram ze la sogs pa'i rigs kyis phyag dang bcas pa'i mchod pas ni bdag la 'dam dang 'dra bar byas pa'o/ /'di ni yon tan dag las kyang nyams par byed pa yin te/ dper na zug rngus 'tsho ba nyams par byed pa de bzhin no zhes de nyid bstan pa'i phyir zug rngu phra mo zhes bya ba smos te/ rnyed pa dang bkur sti'i zug rngu gang yin pa 'di ni shin tu shes par dka' ste/ lus kyi nang du zhugs pa'i mde'u la sogs pa bzhin du blta bar bya'o/ /de nam zhig na rgyud las dka' bas 'byin pa yin no zhes bstan pa'i phyir 'byung bar dka' ba ste zhes bya ba yin te/ 'bad pas dbyung dgos pa'i phyir ro/ /mi yis zhes bya ba ni skyes bu blun pos so/ /shin tu spang bar dka' ba nyi tsher ma zad de dus de nyid du yang spangs par dka'o zhes bstan pa'i phyir spangs dka' zhes bya ba smos te/ dus de nyid du yang zhes bya ba ni tshig gi lhag ma'o/ /skyes bu dam pa rnams kyis kyang bde bar spong bar mi nus te/ don rig pa nyid kyi phyir ro/ /gzhan dag tu ni bzod dka' zhes brjod de/ bzod par dka' ba dang zil gyis gnon pa zhes bya ba'i don to/ /bkur sti'i tshoms te bcu gsum pa'i rnam par 'grel pa rdzogs so// //rnyed pa dang bkur sti la lhag par zhen pa'i dbang gis ni mngon par 'khu ba la sogs pa phung khrol stong phrag bsten par 'gyur ro zhes bsgrub pa'i phyir de'i 'og tu 'khu ba'i tshoms bstan to/ /yang na rnyed pa dang bkur sti ni 'dam dang zug rngu lta bur blta bar bya'o zhes bstan ma thag pa de ci'i phyir zhe na/ bshad pa 'khu ba la sogs pa'i nyes pa dang 'brel pa'i phyir te/ 'khu zhes bya ba smos so/ /lha sbyin dmyal ba'i me 'bar bas nyam thag cing nga ro 'don pa de'i dbang du mdzad nas tshigs su bcad pa gnyis gsungs so/ /gzhan dag ni 'phags skyes pos shAkya rnams bsad pa de'i dbang du mdzad pa'o zhes zer ro/ /phan 'dogs pa dang gnod pa byed pa yang bag 'bebs pa dang tha mal pa la sogs pas te/ gang gnod pa dang 'khu bar bya ba ma yin pa la'o/ /de ltar 'khu bar bya ba ma yin pa gang yin pa de nyid la gang 'khu ba zhes bya ba ni 'khu bar byed cing rnam par 'tshe bar byed ces bya ba'i don to/ /ji ltar 'khu bar bya ba ma yin zhe na smras pa/ sdig pa'i las ni mi byed pa/ /zhes bya ba ste/ cung zad nyes pa'am gnod pa mi byed pa dang phan 'dogs par ni byed pa'o/ /de nyid byis pa rnams la gos/ /zhes bya ba ni 'khu ba ste/ 'khu bar mi bya ba nyid la 'khu bar byed pa'i skyes bu glen pa de la ni ste/ 'khu bar byed pa po nyid la gnod par byed cing nye bar gdung bar byed pa yin no/ /gang du zhe na/ 'jig rten 'di dang zhes bya ba smos te/ mthong ba'i chos nyid la grags pa ma yin pa la sogs pa ste/ dred dang ru ru'i skyes pa'i rabs dang / ko ka li ka la sogs pa'i yang 'dir brjod do/ /pha rol du zhes bya ba ni 'jig rten phyi mar yang ngan song du ltung ba la sogs pa'o/ /gnyi ga la gnod par byed pa yin na yang bdag nyid la gnod pa dang por bstan pa'i phyir/ dang por bdag ni phung byed cing / /zhes bya ba la sogs pa yin no/ /gang zhig pha rol la 'khu bar brtson pa de ni dang po ste/ sngon du bdag ni rang nyid do/ /phung byed cing zhes bya ba ni gnod par gyur pa ste/ phung ba ni gnod par byed pa'o zhes bstan pa'i phyir te/ ngan par spyod pas grags pa ma yin pa 'phel ba la sogs pa'i nye bar gdung bas so/ /phyi nas gzhan yang phung bar byed/ /ces bya ba ni dus phyi nas tshogs pa dang ldan pa na sems can gzhan yang phung bar byed pa yin no/ /des na phung zhing gzhan yang phung bar byed ces bya ba ni dang por bdag nyid phung bar byas nas de'i 'og tu gzhan yang phung bar byed pa yin te/ ji lta bu zhe na/ khra yis gzan ma'i bya lta bur/ /zhes bya ba ste/ gshog pa'i rtsa ba dang bral ba gang yin pa'i bya ni gzan ma'i bya ste/ gshog pa gcad pa'i bya des bya gzhan rnams gsod par byed pa de bzhin no/ /yang na bya khra shin tu ltogs pas phan tshun bltas pa na/ sha ri ka la sogs pa'i bya mthong nas gsad pa'i phyir shugs kyis babs pa na phyogs mi mnyam pas de gnyis shi bar 'gyur ro zhes gzhan dag zer ro/ /gzhan dag ni shi ba'i gzan ma'i bya zhes zer ro/ /yang na bya shi ba zhig gi gzan lcags kyi phur bu brgyus pas btags te gzhag pa na/ de la khras mthong ste shugs kyis de la babs pa na gzer bu des phog cing de yang shi bar 'gyur ro zhe'o/ /yang na thub pa'i cha byad can 'jigs su rung ba yin te/ ji skad du ca ra ka las bshad pa/ sman pa'i sgras ni rjod byed cing / /nad kyis btab pas tshol byed ltar/ /'jigs su rung la brten nas ni/ /nags kyi bram ze bya ba bzhin/ /zhes pa ste/ gang gi phyir bya ba ni a dzi na nag po la sogs par dka' thub can gyi cha byad du bsgyur nas dgon pa'i gnas dag na 'jigs pa med pa'i bya dang ri dwags la sogs pa gsod par byed do/ / de nas ri dwags kyi pags pa la sogs pa yod pa dang ri dwags gzhan yang gsod par byed pa de bzhin no zhes so/ /gzhan dag ni gzeb ces zer te/ bdag nyid srog med pas gzhan srog dang bcas pa gcod par byed do/ /'khu bar bya ba ma yin pa la 'khu bas ni skyon rnam pa sna tshogs 'thob par gsal bar bstan pa'i phyir rdeg par byed la zhes bya ba la sogs pa smos so/ /rnyed pa dang bkur sti la lhag par zhen pa'i dbang gis ni mngon par 'khu ba la sogs pa phung khrol stong phrag skye bar 'gyur ro zhes bsgrub pa'i phyir de'i 'og tu 'khu ba'i tshoms bstan to/ / yang na rnyed pa dang bkur sti ni 'dam dang zug rngu ste/ lha zhig gis bcom ldan 'das la gsol pa/ 'jig rten na ni gang zag bzhis/ /bzhi po dag ni thob gyur pa/ /skal ba chen po gang lags pa'i/ /zhus pa'i lan de bdag la gsungs/ /zhes pa dang / rdeg par byed pas rdeg pa 'thob/ /ces bya ba la sogs pa gsungs so/ /lha zhig gis gzhan la rdeg par byed pa ste/ dbyug pa dang mtshon cha la sogs pa rnam pa sna tshogs kyis rdeg par bya bas so/ /brdeg pa des kyang phal cher 'di nyid du bdag nyid la rdeg pa 'thob ste/ longs spyod dang 'tsho ba rnams 'phrogs par byed pa'o/ /'dir gzugs can snying po dang ma skyes dgra yang phan tshun du brjod par bya'o/ /lus kyi gnod pa'i skyon bstan nas ngag gi gnod pa smras pa/ khon du 'dzin pa ni khon du gzung ba ste zhe sdang dang 'brel pa gang la yod pa ni khon can te/ gzhan la tshig ngan dang mtshang 'dru ba la sogs pas gzhan gyi rgyud la khon skyes pa zhes bya ba'i don to/ /de khon du 'dzin pa des khon can mthong ste/ nyams su myong ba skyed pa yin no/ /ji ltar de gang dag gi gnas skabs la gzhan la khon du 'dzin pa de bzhin du gzhan de yang nang du khon du 'dzin par 'gyur te drug sde bzhin no/ /de bzhin gshe bas gshe ba ste/ /zhes bya ba ni tshig rtsub po brjod pa ni gshe ba'o/ /de gang smra ba de ni gshe ba ste/ gshe bar byas pa'i 'og tu bdag la gzhan las gshe ba 'thob par 'gyur te/ gang de gshe ba ni b+ha ra d+h+wa dza la sogs pa bzhin no/ / khro bar byed la khro ba 'byung / /zhes bya ba ni gang la la gzhan dag la khro bar byed pa ste/ khro bar byed pa'i skye bo ngan pas phyir yang 'thob par 'gyur te/ nye dga' la sogs pa bzhin no/ /de la 'dir ni dge sbyong byed pa'i chos bzhi bstan te/ go rims bzhin du brdeg pa la slar brdeg par mi bya ba dang / mtshang 'dru ba la slar mtshang 'dru bar mi bya ba dang / gshe ba la slar gshe bar mi bya ba dang / khro ba la slar khro bar mi bya ba dang / gzhan du na gnod pa 'thob par 'gyur ba'o/ /mi shes pa'i rgyud las ni 'khu ba thams cad 'byung ngo zhes bstan pa'i phyir/ 'di gzhan dge sbyong zhes bya ba la sogs pa smos so/ /yul kau shAm+bI'i dge slong dag las brtsams pa yin te/ dge slong dag sngon byung ba'i dus na ka shi'i rgyal po tshangs pas byin zhes bya ba dang / ko sa la'i rgyal po dir gi la zhes bya ba phan tshun mi mthun par gyur te/ rgya cher dir gi la'i mdo dang lung bar ma las 'byung ste/ de nyid smras pa/ ji ltar yang bcom ldan 'das kyis de skad du gsungs pa de ltar na yang bdag cag gis ni nus so zhes pa nas ji srid du tshigs su bcad pa bcu gnyis gsungs so/ /gang byis pa rnams kyi 'ching ba dang khon de smras pa/ 'di gzhan zhes bya ba ni thos pa med pa ste/ chos zhes bya ba 'di dang sbyar ro/ /dam pa'i chos ma mnyan pas ni gcig tu dang por khon byed pa dang 'brel pa yin gyi gzhan ma yin no zhes bya ba'i don to/ /'di gzhan zhes bya ba ni gzhan gyi phyir ma yin pa ste/ ma thos pa ni mi nyan pa'o/ /mi sems pa dang mi bsgom pa la sogs pa yang srid pa'i phyir 'dir sogs pa'i sgras brjod do/ /gang zhig de ltar khon du byed pa yin zhe na/ byis pa zhes bya ba yin te/ byis pa'i mtshan nyid ni mi mkhas pa zhes bya ba ste rnam par mi shes pa'o/ /de gang yin zhe na don gyi de nyid cung zad kyang mi rig pa yin te/ dam pa'i chos zhes bya ba 'dir yang rjes su 'brang ngo / /thos pa nyams pa dang ma thos pa yongs su brtag pa yang mi rig pa'i phyir te/ gang gis de ltar dam pa'i chos mi shes pa yin pas de nyid byed pa yin no/ / gang yang de mngon par shes pa de ni nam yang da ltar gyi spyod pa des spyod par mi byed do/ byis pa zhes bya ba yang rig pas thob pa'i shes pa med pa'i phyir smras pa/ yang dag par mngon par shes pa med pas te/ gzhan las shes pa med pa'o/ /gal te shin tu tshe ring ba yin te/ de bas na tshe'i dregs pas rlom par 'gyur te khon du 'dzin par byed do zhe na/ yongs su tshe thung 'di la yang / /zhes bya ba smos te/ 'di la zhes bya ba ni yongs su snang ba'i rnam pa 'dis yun shin tu thung bar gnas pa'i srog yod kyang blun pas khon par byed do/ /gyi na'i phyir zhes bya ba ni sems can gzhan dag lhan cig gyi na tsam la kun du 'khrug pa'i rgyu des bdag la rjes su 'ching bar byed do/ /'khon pa'i 'bras bu 'thab pa la sogs pa ni ma thos pa dang mi shes pa las 'byung ngo zhes bstan pa'i phyir/ 'di ni mchog ces bya ba la sogs pa smos so/ /so sor smra zhing zhes bya ba ni so so tha dad pa'i rnam pa'i sgra yod pa de ni so sor smra ba nyid de/ khyed cag gi nang nas 'di dag kha cig ni phan tshun rnam pa sna tshogs kyis mi mthun pa'i tshig rtsub po la spyod par gyur ces bya ba'i don to/ /mthun par 'jug pa ni mnyam du 'jug pa ste/ gang du 'thab par 'dod pa dang / phyir rgol bar 'dod pa dang / ha cang mi myur ba dang mi mgyogs pas rnam par 'khrug pa la 'jug par 'gyur te/ 'thab mo de dag ni myur du zhi bar 'gyur gyi gzhan ni ma yin no/ /'thab mo 'di dag kyang ji lta bu zhe na/ dge slong dag khyed cag gi nang nas kha cig gis 'di lta bu zhes bya ba smras te/ 'di ni mchog ces bsams nas su/ /zhes bya ba gal te 'di gzhan gyi phyogs kyis byas pa ni mchog ma yin no zhes ji ste de ltar phan tshun mngon par zhen pas bsam pa ste rtsis pa dang / lhag par grol ba zhes bya ba'i don to/ /'di skad ston te/ gal te khyed cag kho nas ji ltar khyed cag gi phyogs la so sor smra zhing mthun par 'jug par mi 'gyur gang du yang de ltar bsam pa yin zhe na/ smras pa/ khyed cag nyid kyis dge 'dun 'byed pa'i tshe/ /zhes bya ba smos so/ /'di zhes bya ba ni gang gi phyir zhes bya ba'i don to/ /gang du de bzhin gshegs pa'i nyan thos kyi dge 'dun 'byed pas rtsol bar byed pa dang / tshogs pa med cing skabs la dmigs par gyur pa de 'on kyang khyed cag ci'i phyir 'di gzhan gyis byas pa mchog ma yin pa dang / bdag gis byas pa yang mchog yin no zhes bsams par byed/ e ma'o kyi hud rmongs pa zhes bya ba'i don to/ /'di ni zhes bya ba ni 'di nyid dge 'dun te/ thar pa'i lam bsgom par nus pa yin te/ bdag med pa la lhag par mos pas so/ /mu stegs can la sogs pa ni dge 'dun ma yin no zhes mtshon pa yin te/ 'thab mo zhi bar bya ba mtshon pa'o/ /ci phyir stobs med sems mi byed/ /ces bya ba ni khyed cag gi nang nas gang la la bdag nyid la yang nyam chung ba ste/ ci'i phyir mi shes pa dang mi dmigs pa'o/ /gal te kha cig bdag nyid la bdag nyid shes pas stobs med pa ni nus pa med pa ste/ mi rtag pa la sogs pa'i skyon gzhan gyi dbang nyid du bran dang dman par shes par byas nas nga rgyal de dang bral bar 'gyur te/ des na de dag yan lag ma tshang ba'i phyir smras pa yin te/ phyogs gcig bzhin du phyogs kyis ni rtsod pa 'phel bar 'gyur ro/ /de ltar phyogs dang gzhan nyid kyis bye bar gyur pa ni yang phyis 'dum par 'gyur ba med de sa bon bsregs pa'i myu gu mi 'byung ba bzhin no zhes rtogs pa la/ rus pa gcog cing zhes bya ba la sogs pa ste/ rus pa bcag pa yin pas rus pa gcog pa ste dgra de dag yang 'dum par 'gyur te/ dper na ka shi ka dang ko sa la'i rgyal po bzhin no/ /srog gcod la zhes bya ba ni srog la sogs pa 'phrog pa tsam yang 'dum par 'gyur te/ 'di dag gcig la gcig rnam par 'khrug par byed pa yang phyis dga' ba sgrub par byed do/ /de'i yo byad nyams pa yang sgrub par byed pa'i phyir smras pa/ rta dang phyugs dang / nor 'phrog pa'i ngang tshul gang la yod pa de ni de dag go/ /rta la sogs pa'i skye ba'i gnas 'jig par bstan pa'i phyir/ yul 'khor 'joms par byed pa yang / /zhes bya ba smos te/ yul yang phan tshun 'jig par byed do/ /phyi nas zhes bya ba ni de'i 'og tu ste/ de dag gyi na tsam gyi rnam pas 'dum par 'gyur te/ mjal dum ni phrad pa dang dga' ba dang byams pa zhes bya ba'i don to/ /khyed cag ci phyir byed mi 'gyur/ /zhes bya ba ni khyim na gnas pa ste/ 'di ltar 'dod pa'i sems kyis khyim kun du bzung ba yang de ltar 'dum par byed na/ khyed cag khyim yongs su spangs par gyur kyang rgyu gang gis 'dum par mi byed ces so/ /thos pa nyung ba'i phyir ro zhe na/ yang chos 'di rnam par shes na go zhes bya ba smos te/ khyed cag gis yan lag bcu gnyis bstan pa'i chos phyin ci ma log par khong du chud par gyur kyang rgyu gang gis 'dum par mi byed ces so/ /thos pa nyung ba'i phyir ro zhe na/ yang chos 'di rnam par shes na go/ /zhes bya ba smos te/ khyed cag gis yan lag bcu gnyis bstan pa'i chos phyin ci ma log par khong du chud par gyur na zhes pa'o/ /yul kau shAm+bI'i dge slong mdo sde 'dzin pa dang / 'dul ba 'dzin pa dang / ma mo 'dzin pa mi bzad pa rnam par gnon pa zhes bya ba lung las 'byung ngo / /mdo sde la sogs pa thams cad la yang rnam pa thams cad du rtsod pa smad de/ dge slong dag 'thab pa dang mtshang 'dru bar ma byed cig ces bya ba la sogs pa bstan pas so/ /ji lta bu chos rnam par shes pa dang / bstan pa'i chos de yang ji lta bu zhe na/ mkhas pas brtags shing zhes bya ba la sogs pa smos te/ brtags shing zhes bya ba ni mchog tu brtags shing brtags pa ste/ rigs pa dang 'brel pa zhes bya ba'i don to/ /mkhas pa zhes bya ba ni blo gsal ba ste/ mkhas pas ni de gsal bar byed pa dang / yang dag par ston par byed pa dang / legs par 'chad par byed do/ /tshig ni ngag ste de nyid shes pa dang ldan pas bshad pa ste/ ji skad du bshad na shes par 'gyur ba ste/ ston par byed na zhi ba'i tshig /ces gsungs pa'o/ /tshig ces bya ba ni bstan pa'i chos te/ de nyid kyi yang khyad par ni/ /spyod yul ston par byed pa yi/ /zhes bya ba ste/ dran pa nye bar gzhag pa bzhi la gnas pa ni 'phags pa'i chos 'dul ba'i spyod yul zhes brjod de/ de ston pa'i tshul gang la yod pa'i de'o/ /khyad par gyi don dang ldan pa 'dis ston pa yin no/ /gang gi don du yang thub pa mchog gis bstan pa/ de yi don ni rtsol byed pa/ /zhes bya ba la sogs pa ste/ byed cing 'dug pa'o/ /'dod chags la sogs pa'i gnyen po bstan pa'i bya ba de'i rjes su 'jug pas nyams su myong ba'i phyir ro/ /ci'i phyir 'dod chags la sogs pa 'dis bsal ba yin zhe na/ 'di ltar kha bya yis zhes bya ba shin tu phyin ci log pa nyid de/ gcig tu srid pa gsum la rgyab kyis phyogs pa med pa'i phyir ro/ /de yang dag par ma go bas rang gi don med pa yin gyi/ gzhan du ma yin no zhes bstan pa'i phyir/ lus can zhes bya ba smos te/ gang gi tshig kyang bden pa ma yin pas khyed cag nyid 'thab mo'i lus can thob par byas te/ gang gi de chad pa'i byed pa po bla ma gang gis byas pa des khyed cag nyid rnam par 'khrug par byas so/ /khyod ni mi mkhas zhes bya ba ni khyed kyi ston pa de yang phyin ci ma log pa'i don mi shes pa yin na/ de la brten pa'i khyed cag lta smos kyang ci dgos zhes ston pa yin no/ /ci'i phyir de mi shes pa yin zhe na/ phan tshun rab tu 'gal ba yin te/ ji skad du bshad pa ma dad pa'i sems kyis zhes bya ba la sogs pa ste/ de nyid bstan pa'i phyir/ pha rol po dag ces bya ba ni da ltar gyi phyir rgol ba nyid de rab tu zhe sdang bas gnod pa dang sdang ba'i sems yod pa'o/ /'dir tshig gam gsung rab de'i don la mi shes pa zhes bya ba ni don nam tshig 'bru ji lta ba bzhin du ma rtogs pa'o/ /gang gis ji lta ba bzhin du shes pa yin zhe na/ sangs rgyas bcom ldan 'das dang / 'phags pa'i nyan thos de'i rjes su 'jug pa dag ni ma gtogs so zhes bstan pa'i phyir/ bdag ni zhes bya ba smos so/ /bdag nyid gnod sems med pas 'di nyid rtogs pa'am/ 'di nyid sgrub pa la brtson par bya zhing bya ba byed pa'o/ /'di na mkhas pa gang yin pa/ /zhes bya ba ni 'phags pa shA ri'i bu la sogs pa yang ste/ gang gang dag tu nus pa des der bya ba yin te/ 'dir bdag nyid kyis bya bar nus pa zhes bya ba'i don to/ /'di na mkhas pa gang yin pa/ /de dag bzhams pa'i tshig gis zhi/ /zhes bya ba ste/ phan tshun mtshams sbyor ba'i pho nya dang pho nya'i lan dang / bsgo ba dang phyir bsgos pa'i rgyun gyis ni sel bar 'gyur te/ rtsod pa nye bar zhi bar 'gyur ro zhes bya ba'i don to/ /gzhan dag ni 'di na don gzhan du ston te/ de nyid smras pa/ yul kau shAm+bI pa'i dge slong gnyug mar gnas pa gdug cing pha rol gnon pa mdo sde 'dzin pa la sogs pa 'khor dang bcas pa dang / yangs pa can gyi glo bur du 'ongs pa dag kyang de bzhin du der lhags pa dang / de dag mdo'i tshig gi rnam par dbye ba'i ched du rtsod pa byung bar gyur te/ de nas kau shAm+bI pas de'i skyon btsal ba'i nang khrims bcas so/ /de la yangs pa can gyi dge slong dag rjes su mi 'jug ste/ des na de dag lo bcu gnyis su rtsod par gyur to/ /de la kau shAm+bI pas smras pa/ bdag cag gi mdo'i rnam par 'grel pa ni don dang ldan pa yin zhing de skabs la bab par byas pa yin no zhes yul yangs pa can dag la mtshang brus nas smras pa/ mkhas pas brtags shing zhes bya ba la sogs pa brjod do/ /brtags pa ni gzhan gyis brtags pa ste/ yongs su mi gsal zhing rigs pa dang 'brel pa med pa'i phyir dang / mngon par 'dod pa'i don dang tshig 'bru dang mi ldan pa'i phyir ro/ /brtags shing gsungs pa'i tshig gcig pur ma zad de mkhas pa ltar snang ba yang yin te/ mkhas pa ni blo dang ldan pa ste/ der snang ba gang gi tshig ste mkhas par smos so/ /'on kyang de las gzhan pa'i skye bo dang mnyam pa thob par 'gyur te/ mkhas pa'i gzugs brnyan te 'dis na mkhas pa zhes pas byas pa yin no zhes bya ba'i don to/ /tshig ni ngag go/ / spyod yul ston par byed pa yi/ /zhes bya ba ni gnas su bskyed pa dang skabs dang ldan pa'i phyir ro/ /gal te spyod yul ston par byed pa ma yin na ni/ thams cad kyi thams cad du rigs pa dang ldan pa med par 'gyur te/ de ltar mtshang 'dru bar byed do/ /kau shAm+bI pa la des mtshang brus te smras pa/ /khyod ni mi mkhas zhes bya ba la sogs pa'o/ /kha bya yis ni rtsol byed pa/ /zhes bya ba ni gti mug gi dbang gis rjes su mthun pa'i mchog nyams pa ni kha bya zhes brjod de/ kha ni kha'i sgo'o/ /rtsol byed pa zhes bya ba de ni rab tu 'bad pa'o/ /khyed cag gis kha'i bya ba gcig pur ma zad de/ bstan bcos kyi don yang cung zad rtog pa med de/ nges par khyed cag gzhan gyis bskul ba dang gzhan gyi tshig gi lugs can te gzhan gyi dbang du byas pa'o/ /khyed ni mi mkhas zhes bya ba ni khyed cag gis skul bar byed pa'i bla mas kyang ci yang mi shes te/ des kyang rang nyid kyis kyang ci yang mi shes na des khyed cag la ci zhig slob par 'gyur zhes so/ /de dag gis de la yang lan smras pa/ pha rol po dag mi shes pas/ /zhes bya ba yin te/ gang bdag cag dang bdag cag gi 'dren pa la tshig ngan pa brjod pa ni khyed cag ste pha rol po nyid ces bya ba'i don to/ /'di la zhes bya ba ni mdo'i don gyi dbye ba la'o/ /mi shes pas zhes bya ba ni don gyi de nyid mi shes pa'o/ /des na/ 'di la bdag ni brtson par byed/ /ces bya ba smos te/ bdag nyid 'dir mngon par brtson par byed kyi/ bdag cag ma yin par ni tshangs pa la sogs pas kyang 'di byed par nus pa ma yin no/ /yangs pa can pa dag gis smras pa/ 'di na zhes bya ba ni gang bya ba 'di la yang gang dag ji lta ba bzhin du rtog pa de dag nyid zhi bar nye bar 'gro ba yin no/ /bzhams pa'i tshig ces bya ba ni mtshams sbyor bar byed pa gang dag bye ba rnams sdum par byed pa yod pa de ste rtsod pa'i rgyu de dag la nye bar sbyor ba nyid de/ de med na ni de yang med do/ /bzhams pa'i tshig ces bya ba rtsod pa'i rgyu mtshang 'dru ba la sogs pa zhes gzhan dag zer ro/ /thos pa med pa las ni mi shes pa'o/ /mi shes pa las ni gzhan gyis gnod pa byas pa dran pa'o/ /de las ni khon no/ /kho na las ni rtsod pa ste/ de ltar brgyud pa de bstan pa'i phyir/ bdag la kha zer zhes bya ba la sogs pa smos so/ /bdag la gshe zhes bya ba ni sngon bdag tshig rtsub pa 'dis smras so zhes gnod pa byed pa dran pas khon du 'dzin pa'o/ /bdag la kha zer zhes bya ba ni smras pa ste/ ci zhe na/ bdag ni 'di gang de'i bran yin pas smras pa lta bu'o/ /bdag pham zhes bya ba ni bdag pham par byas shing bslus pas brnyas pa byas pa'o/ /bdag pham byed pa zhes bya ba ni gzhan gyi lag gis bdag la pham par byas pa ste/ gzhan byed du bcug pa'i tshul gyis zhes bya ba'i don du/ 'di gang sems la 'dzin byed pa/ /zhes bya ba ni sngar bstan pa'i rnam par 'gyur ba'i mtshan mas gang byis pa rab tu 'dzin pa yin no/ /de yi khon ni zhi mi 'gyur/ /zhes bya ba ni de dag gi rtsod pa'i rgyu zad par mi 'gyur ro/ /de dag bzlog pas dkar po'i phyogs kyi tshigs bcad smras pa/ bdag la kha zer bdag la gshe/ /zhes bya ba la sogs pa ste/ rtogs par sla'o/ /ci'i phyir rgyu gang gis khong khro ba dang khon du 'dzin pa de nyid kyis khon du 'dzin pa zhi bar mi 'gyur zhe na/ 'di na khon gyis zhes bya ba la sogs pa smos so/ /gnod sbyin mos bud med cig zin pa'i dbang du byas nas 'di gsungs te/ gnod sbyin mo des smras pa/ gal te khon khyod kyis btang na khyod ngas btang ngo zhes pa dang / des mi gtang ngo zhes bya ba la sogs pa ste/ de'i dbang du thub pas 'di gsungs so/ /de thos pas gnod sbyin mo dul bar gyur to/ / med ces bya ba ni dgag pa'o/ /pa zhes bya ba ni gang gi phyir te dri mas dri ma sel ba dang / mun pas mun pa bstsal ba de ni med de/ gcig gi bdag nyid yin pa'i phyir ro/ /de bzhin du 'dir yang khon te gnod pa dran pa las skyes pa des yid 'khrugs par byed pa'i rgyu des te tshul de nyid kyis ni khon can dag zhi bar 'gyur ba dang sel bar 'gyur ba yod pa ni mi srid de/ 'di na zhes bya ba ni 'dod pa'i khams te/ gong ma dag na ni khon med pa'i phyir ro/ /nam yang zhes bya ba ni dus gang gi tshe na'o/ /de lta na gang gis zhi bar 'gyur zhe na/ bzod pas zhes bya ba smos te/ gzhan gyi gnod pa la bzod pas khon med pa ste/ sgron mas mun pa bsal ba bzhin no/ /ci da lta'i sbyor ba nyid kyis bstan pa yin nam/ 'on te sngon gyi spyod pas yin zhe na/ /'di ni chos kyi rang bzhin yin/ /zhes bya ba smos te/ 'dis khon med pa yang khon rab tu zhi ba'i grangs su 'gro ba bstan pa ni dus rtag tu yod do/ /sngon gyi sangs rgyas kyis ma mdzad de dam pa'i chos kyi rang bzhin gsal bar byed pa'i phyir ro/ /khon gyis byas pa'i nyes dmigs mthong ba'i mkhas pa ni gang du yang khon par mi byed do zhes bstan pa'i phyir smras pa/ khon gyis khon can nam yang zhi mi 'gyur/ /zhes bya ba la sogs pa smos te/ khon gyis khon ni nam yang sel bar mi 'gyur te/ mi gtsang bas mi gtsang ba bzhin te/ chos nyid de'i rang bzhin gyis de'i rang bzhin ni sel bar mi 'gyur ro/ /de lta na gang gis zhi bar 'gyur zhe na/ khon med rnams kyis te/ bzod pa dang byams pa dang / snying rje bskyed pa la sogs pas so/ /khon sel bar mi 'gyur ba'i skyon ni sha khon zhugs pa zhes bya ba smos te/ khon dang 'brel pa'o/ /gnod pa ni sems can rnams la phan pa ma yin pa zhes bya ba'i don te/ grags pa ma yin pa sogs pa byed pa'i phyir dang / sbrul la sogs pa skye gnas ngan pa dang gzugs ngan pa la sogs pa'i rgyu yin pa'i phyir ro/ /de bas na rgyu de nyid kyis nam yang khon par mi bya ste/ mkhas pa ni bdag la phan par 'dod pa dang bde bar 'dod pa'o/ /khon bsten pas ni shin tu mi bzad pa'i ngan song du 'gro ba yin la de bas na rnyed par gyur na ni/ rtag tu dam pa de dag dang bsten par bya'o zhes bstan pa'i phyir/ brtan pas legs gnas zhes bya ba la sogs pa smos so/ /rgyal po'i khab na 'tsho byed gzhon nus bskyed la bu gnyis yod de/ de gnyis kyis gnang ba thob ste/ gcig ni drug sde las rab tu byung ngo / /gcig ni ka phi las rab tu byung ngo / /de las gcig ni mi dge ba'i bshes gnyen gyi skyon gyis nyams par gyur to/ /cig shos ni dam pa dag la brten pas de ltar ma yin te/ de de las brtsams nas tshigs su bcad pa gnyis gsungs so/ / gal te rnyed na zhes bya ba ni de ltar de kho na spang bar gal te 'dod na ni dam pa btsal bar bya ste/ gal te thob par gyur na'o/ /grogs po mkhas pa zhes bya ba ni rtag tu byed pa dang / gus pa'i sbyor ba gnyis kyis bdag nyid ngan par spyod pa dag las srung ba yin te/ mkhas pa ni bag yod pa ste/ de'i grogs ni chen po yin pa'i phyir dge ba'i bshes gnyen chen po'o/ /lhan cig spyod pa ni gang gis gnas gcig la rtag pa nyid du'o/ /brtan pas zhes bya ba ni mkhas pa ste/ mi 'gyur ba de nyid kyis de'i yon tan rtogs pa'i phyir ro/ /nyon mongs thams cad mngon par zil mnan nas/ /zhes bya ba la/ kun nas 'dzag pa'i nyon mongs pa ste/ tshad la sogs pa'i yo byad kyis nges par spang bar bya ba ma yin te/ de dag yang mi rtsol bas spang ba ste/ chags pa thams cad las so/ /de yang spyad ces bya ba ni grogs po mkhas pa bsten pa'o/ / ji lta bus she na/ dga' ba'i yid kyis zhes bya ba ste mgu ba'i yid kyis te/ de'i spyod pa khyad par can mthong ba'i phyir ro/ /dran ldan zhes bya ba ni dran pa mngon du byas pa ste/ de'i lung khyad par can ma brjod pa'i phyir ro/ /'di ni dran pa dang shes bzhin dang ldan par bstan to/ /rmongs pa dag la ni ma yin te/ dran pa nyams pa yod pa'i phyir dam pa dag la rten par byed pas so/ /brten pas legs gnas zhes bya ba la sogs pa ni rtogs par sla'o/ /yul 'khor yangs pa spangs pa'i rgyal po ltar/ /zhes bya ba ni dper na rgyal po chen po legs mthong shin tu rgyas pa'i 'khor los sgyur ba'i rgyal srid spangs te/ chos la dad nas yul 'khor dang yul mi rgya che zhing shin tu yangs pa rgya mtsho chen po bzhi'i mthas gtugs pa spangs nas gcig tu spyod par gyur pa de bzhin du gcig pus spyad pa ni grogs med par yang 'dug par bya ste/ sdig pa dag ni mi bya ba'o/ /sdig can gyi skye bo la brten pas ngan par bstsags par mi bya ba yin te/ ngan par spyod pa thams cad ni mi dge ba'i bshes gnyen la rag las pa'i phyir ro/ /rnam pa thams cad du skyes bu dge ba'i grogs po btsal zhing skye bo ngan pa ma yin no zhes gsal bar bstan pa'i phyir/ bdag dang mthun par spyod pa zhes bya ba la sogs pa smos so/ /dge slong zhig gis skyes bu dam pa la brten par bya'o zhes bya ba la sogs pa thos nas rang gi yul dag tu grogs bzang po btsal ba las gang yang ma rnyed nas/ bcom ldan 'das gang na ba der song ste phyin nas don de gsol ba dang / de'i dbang du mdzad nas 'di gsungs so/ /bcom ldan 'das kyang de nyid bsnams te/ dgon par rgyu zhing gshegs pa na/ /glang po che rgan po zhig glang po che gzhon pa'i tshogs dag gis rnam par gtses pa las skyo bar gyur te/ rang gi tshogs bor nas gcig pu zhig gzhan gyis ma zos pa'i rtsi thog za ba dang / shin tu dngas shing gtsang ba'i chu 'thungs la sems khral bskyungs pa gzigs nas tshigs bcad 'og ma gsungs so/ /spyad pa zhes bya ba ni gal te grogs po dam pa thams cad du rgyus shing btsal yang 'on kyang rnyed par ma gyur pa ni thos par ma gyur pa'o/ /ji lta bu zhe na/ grogs bzang dag dang mthun pa'i zhes bya ba smos te/ bdag dang mnyam pa ni bdag dang yon tan mnyam pa'i grogs po yang yin na khyad par du gyur pa lta ci smos/ bzang po dang mnyam pa ni yin gyi grogs po gzhan ni yongs su spang bar bya ba'i phyir ro/ /de'i bya ba dang rjes su mthun pa smras pa/ gcig pus spyod pa brtan par bya/ /zhes pa ste/ de lta bu'i gnas skabs na ni mi g.yo bar 'dug par bya'o/ /ci'i phyir zhe na/ byis pa grogs su mi 'gyur bas/ /zhes bya ba smos te/ gang gi phyir skye bo ngan pa las ni phan 'dogs pa med do/ /grogs po'i don ni phan 'dogs pa yin pa'i phyir ro/ /yang dag par na skye bo ngan pa ni thams cad kyi dgra yin te lha sbyin la phyogs shing ma la sogs pa bsten pas ma skyes dgra dang 'phags skyes po la sogs pa sdug bsngal bar gyur pa yang 'dir brjod par bya'o/ /'o na bya ba la sogs pa la yang grogs po'i gnas skabs med na ci'i phyir mi rnams la ni yin zhes rtog pa la/ gcig pu spyod par byed bla bas/ /zhes bya ba smos so/ /gcig pur 'dug cing gnas pa ni dam pa rnams kyis mchog tu bsngags pa yin no/ /byis pa grogs su mi 'gyur bas/ /zhes bya ba ni mi dge ba'i bshes gnyen la ni ma yin te/ de la brten na ni dam pa yin yang de'i dbang gis smad pa la sogs pa 'thob pa'i phyir ro/ /des na de nyid smras pa/ sems khral bskyungs te gcig pu spyod/ / ces bya ba yin te/ gang gcig pu skye bo ngan pa spangs shing gnas pa de ni gdung ba med par gnas pa yin no/ /sems khral ni spro ba ste/ nam zhig 'di las grol zhes de lta bu'i sems la gdung ba de dang bral ba'i phyir sems khral bskyungs pa'o/ /yang na bskyungs pa'i sgra ni dgag pa'i don te/ ji lta bu zhe na/ ma tang dgon pa'i glang po ltar/ /zhes bya ba ste/ ma tang gi zhes bya ba ni sngon dgon pa de na drang srong ma tang gi zhes bya ba gnas pas so/ /yang na dmod pa'i ser bas skye bo dang yul mang po bsregs pas dgon par gyur pa ste/ de na gnas pa'i glang po ni dgon pa'i glang po ste/ des ji ltar rang gi khyu spangs nas gcig pu bag rkyong zhing rang dgar gnas la gdung ba med pa de bzhin no/ /'khu ba'i tshoms te bcu bzhi pa'i rnam par 'grel pa rdzogs so// //sngar bstan pa'i 'khu ba spang ba'i thabs bstan pa'i phyir/ de'i 'og tu dran pa'i tshoms bstan te rngub pa la sogs pa'i dran pa med par blo legs par bsgoms pa med do/ /sde tshoms kyi 'grel pa smras pa/ sangs rgyas kyis ni zhes bya ba la sogs pa'o/ /dge slong dag dbugs 'byung ba dang rngub pa dran par gyis shig /gang gi phyir ji tsam na rnam par rtog pa rgyun chad par 'gyur ro zhes pa ste/ des na tshigs su bcad pa gnyis gsungs so/ /rngub pa yin pas rngub pa ste/ rlung nang du 'jug pa'o/ /'byung ba yin pas 'byung ba ste/ gang phyir 'byin pa'o/ de ltar gsungs pa dge slong dag dbugs rngub pa ni rlung 'thung zhing 'jug pa'o/ / dbugs 'byung ba ni rlung phyir 'byin pa ste/ mngon par 'byin pa yin no zhes so/ /dbugs rngub pa dang 'byung rngub bo/ /de la dran pa ri de la dmigs pa ste/ dbugs 'byung rngub dran pa'o/ /de yang shes rab kyi bdag nyid de dngos po la rtogs pas 'jug pa'i phyir ro/ /de la dran pa'i tshig ni de'i tshogs shas che bar 'jug pa ste/ rlung 'jug pa dang 'byung ba la dran pa brjed pa med pa'i phyir ro/ /gang zhig ces bya ba ni khyim pa'am/ rab tu 'byung ba chos 'di pa ste/ phyi rol pa rnams la ni bdag la lhag par mos pa de med pa'i phyir ro/ /yongs su rdzogs par zhes bya ba ni yongs su dag pa'i gnas skabs na 'di ltar 'jug pa yin no/ /gal te mnyam par gzhag na 'gyur ba yin no zhes bstan pa'i phyir smras pa/ legs bsgoms pas zhes bya ba smos te/ mnyam par gzhag pa'i sa pa yin pa'i phyir/ 'dod pa'i khams na ni bsgom pa med na ji ltar de'i sa na legs par bsgoms par 'gyur zhe na/ legs par bsgoms pa ni yang dag par bsten pa'o/ /bsgoms pa yongs su byang ba ni rim pa nyid kyis ston par 'dod pa'i phyir rim gyis zhes bya ba smos te/ grangs la sogs pa'i rim pas lhag par bgrang ba ste/ de'i phyir 'di ni rnam pa drug tu bgrang ba yin te/ bgrang ba dang / rjes su 'gro ba dang / 'jog pa dang / mtshan nyid dang / bsgyur ba dang / yongs su dag pa'i dbye bas so/ /'dod pa ni nye ba'i rim pas kyang mngon du bya ba yin no/ /ji lta bur zhe na/ sangs rgyas kyis ni bstan pa bzhin/ /zhes bya ba ni/ bcom ldan 'das kyis rim pa gang gis mdo dang / mngon pa'i chos dag tu gsungs pa ste/ dbugs rngub pa dang 'byung ba gang zhe na/ rnam pa bcu drug po zhes bya ba la sogs pa rgya cher ro/ /bsgoms pa'i 'bras bu ni/ /'jig rten 'di na kun nas gsal/ /zhes bya ba ste/ gang zag gang gis 'di la legs par bsgoms pa des ni 'gro ba 'di dag thams cad mngon par zil gyis gnon cing kun nas gsal ba yin te/ ji lta bu zhe na smras pa/ bral ba ste/ las dang nyon mongs pa'i 'ching ba spangs pa'i phyir 'dir dpe bstan pa ni/ sprin bral zhes bya ba smos te/ dper na dbyar gyi sprin dang bral ba ste/ ston gyi dus su zla ba gang ba ni lhag par mdzes pa yin te/ de bzhin du de yang srid pa gsum na'o/ /ji ltar 'byung rngub dran pa bsgoms pa yin zhe na/ smras pa/ lus ni 'jog byed cing zhes bya ba ste/ lus mi 'gul zhing brtan pas yul dag la lhag par mi g.yeng ba yin te/ gang gi phyir g.yeng ba las ni lus 'gul bar 'gyur zhing de las ni blo g.yo bar 'gyur ro/ /de las ni bsgom par mi nus pa yin no/ /lus 'jog nus par gyur na ni lhag par gnas pa'i ngang tshul can yin te dper na grang ba dang tsha ba la sogs pa mdo las 'dir brtag par bya'o/ /de bzhin sems ni zhes bya ba ni 'jog par byed pa nyid yin te/ sems kyis log pa'i rnam par rtog pa spangs pa las ni yang dag par nges par lus dben pa la gzhog pa zhes bya ba'i don to/ /dang gi sgra ni gnyi ga 'jog pa yin te/ lus 'jog par byed pa na sems kyang 'jog pa zhes bya ba'i don to/ /ji lta bur byas na de ltar bsgoms par nus pa de bsgrub pa'i phyir/ 'greng dang zhes bya ba la sogs pa smos te/ spyod lam gang gis de ltar bsgoms par nus pa yin pa de nyid smras pa/ 'greng ba ni langs pa'o/ /'dug pa ni nye bar 'dug pa ste/ skyil mo krung bcas pa la sogs pa'o/ /dang gi sgra ni 'dir gnyi gar yang sbyar te 'dug pa dang 'greng ba'o/ /de bzhin nyal ba na zhes bya ba ni 'dug pa na yang zhes bya ba'i don to/ /'gro ba na ni g.yeng ba yin pa'i phyir dran pa thams cad du med par ston pa yin no/ /de zhes bya ba ni dbugs 'byung rngub dran pa'o/ /'jog ces bya ba ni gang de ltar bcom ldan 'das kyi nyan thos legs par 'jog pa ste/ lhag par bsgoms shing yongs su len na'o/ /thob par 'gyur ba ni rnyed par 'gyur ba'o/ /ci zhig ce na/ snga phyi'i khyad par rnams bya ba smos te/ snga ma'i dang phyi ma'i khyad par ni snga phyi ste/ rlung 'jug pa ni snga ma'o/ /'byung ba ni phyi ma ste/ de'i khyad par ni phan yon te/ skye ba dang 'jig pa yongs su brtags na mi rtag pa'i 'du shes la sogs pa'i tshal 'thob par 'gyur ro/ /khyad par 'di thob pas cir 'gyur zhe na/ 'chi bdag rgyal pos bltar yang med par 'gro/ /zhes bya ba ste/ 'chi bdag gi ming can de'i dbang dang yul du mi snang ba ste/ 'chi ba med pa'i go 'phang du 'gro ba'o/ /gang gi tshe dngos po rnams kyi skye ba dang 'jig pa'i chos 'phags pa'i lam gyis rtogs par gyur na ni phra rgyas spangs shing der 'gro ste/ gang du 'chi ba'i bdud kyis mthong zhing bgegs su 'gyur ba thams cad du 'jug pa'i 'chi bdag gi rgyal pos mthong ba las grol ba ste thar pa la gnas pa yin no zhes so/ /ji ltar khyad par 'thob pa yin zhe na/ lus gtogs zhes bya ba la sogs pa ste/ dgon pa na gnas pa'i dge slong rab tu mang po zhig gi dpyod pa skyes te/ bcom ldan 'das kyi spyan sngar song nas btsun pa mya ngan las 'das pa ji lta bu lags zhes gsol ba dang / bcom ldan 'das kyis bka' stsal pa/ de ni brjod par mi rung ste/ dge slong dag dper na 'ga' zhig gis dmus long la gzugs rnam pa sna tshogs pa yid du 'ong zhing yid 'phrog pa bstan na ci des shes par 'gyur ram/ btsun pa de ni ma lags so/ /de dag ni rang gis rig pa yin te/ ci'i phyir zhe na/ gzhan gyi tshig gis ni ji ltar yang rtogs par mi 'gyur ro/ /'on kyang de ji ltar rtogs pa de ltar legs par rab tu nyon cig dang zhes bya ba'i bar du ste/ 'di na gcig pu nyam nga ba ni khyim na gnas pa ste/ dran pa nye bar gzhag pa bzhi bsgom par bya'o zhes pa nas ji tsam du tshigs su bcad pa 'di gsungs so/ /lus kyi rnam pa yin pas lus su gtogs pa ste/ lus la dmigs pa'i dran pa nye bar gzhag pa bzhi'o/ /lus su gtogs pa'i dran pa gang zhe na/ dge slong dag 'di la nang gi lus la lus kyi rjes su lta zhing zhes bya ba la sogs pa mdo las gsungs pa'o/ /nye bar gzhag pa ni nye bar gnas pa dang / nye bar skyes pa dang / mngon du gyur pa'o/ /'di'i mtshan ma ni tshul khrims dang dbang po sdom pa yin no zhes bstan pa'i phyir smras pa/ reg pa'i skye mched drug ces bya ba smos te/ yul dang dbang po dang rnam pa 'dus pa la skyes pa'i sems yul la reg pa ni reg pa zhes bya'o/ /de'i skye mched ni skyed par byed pa dang rgyu nyid de mig la sogs pa drug ste/ grangs drug po de dag la'o/ /bsdams pa ni dul ba ste/ dge slong dag 'di la mig gi dbang po sdom pas bsdam par bya'o zhes mdo las gsungs so/ /dbang po sdom pas ni tshul khrims kyi sdom pa ma bstan kyang rtogs pa yin te/ tshul khrims ma gtogs par ni dbang po sdom pa med do/ /gang gi phyir de 'di nyid la 'jug pa'i spyod pa de dag gis ni lus su gtogs pa'i dran pa bsgom par nus kyi gzhan gyis ni ma yin no/ / 'dis ni dran pa'i 'bras bu bstan te/ de'i mthus dbang po dul ba'i phyir ro/ /gang zhig ces bya ba ni gang zag tshul khrims dang dbang po sgom pa la gnas pa la ni lus su gtogs pa'i dran pa bsgom pa yod de/ /rtag tu mnyam gzhag 'jog byed de/ /zhes bya ba sngar bstan pa'i rnal 'byor pa'i yon tan bstan pa yin te/ rtag tu mnyam par 'jog byed pa/ /zhes bya ba ni rgyun du ting nge 'dzin la bsgom pa mchog tu byed pa'o/ /yang na rtag pa'i sgra ni mya ngan las 'das pa'i bye brag go/ /mnyam par gzhag pa de ni rtag tu mya ngan las 'das pa bdag nyid kyis rtogs par 'gyur te/ mnyam par gzhag pa'i sems las ni ji lta ba bzhin du shes par 'gyur ro zhes pa'i tshig gis so/ /gang gis mya ngan las 'das pa rnam par gnas par thob ce na/ bdag nyid kyis zhes bya ba ste/ sems can so so'i bdag nyid kyis mya ngan las 'das pa rtogs par 'gyur te/ phyi rol la yang de med pa'i phyir ro/ /dran pa'i stobs nyid kyis ni srid pa'i rgya mtsho las rgal bar 'gyur ro zhes bstan pa'i phyir smras pa/ gang zhig ces bya ba la sogs pa'o/ /tshe dang ldan pa shA ri'i bu spyod lam rnam pa bzhis mdzes pa dang shin tu chog shes pa lags so zhes dge slong dag gis bcom ldan 'das kyi spyan sngar bsngags pa brjod do/ /bcom ldan 'das kyis bka' stsal ba/ de ni ngo mtshar mi che ste/ de ci'i phyir zhe na/ gang la la zhig dran pa nye bar gzhag pa bzhi la gnas shing bsgom pa zhes bya ba la sogs pa ste/ dge slong gang gis yongs su 'dzin pa spangs pa la ni yod pa yin no zhes bya ba 'di gsungs so/ /rnam pa thams cad du zhes bya ba ni rnam pa kun nas te lus la sogs pa'i yul la dran par byed pa ston pa bzhin no/ /dran pa ni dran pa nyams pa med pa'i tshul lo/ /rtag tu zhes bya ba ni rgyun du'o/ /lus su gtogs pa dran pa nye bar gzhag pa nyi tsher ma zad de thar pa 'dod pa yang yin no zhes bstan pa'i phyir smras pa/ bdag nyid med cing zhes bya ba smos te/ de ltar gyur kyang 'di la ngar 'dzin pa'i dngos po spangs par gyur pa'o/ /'dis ni da ltar byung ba'i bdag ni dngos po spong bar 'dod pa bstan to/ /bdag gir 'dzin pa med ces bya ba ni da ltar byung ba'i dngos po spang bar bstan to/ /gnyi ga rnam par spang bar bya ba'i phyir yang gi sgra gnyis kyis bstan to/ /'dis ni phung po lhag ma dang bcas pa'i mya ngan las 'das pa bstan nas/ phung po lhag ma med pa'i mya ngan las 'das pa 'dod pa'i phyir/ bdag tu mi 'gyur zhes bya ba smos te/ ma 'ongs pa'i bdag dang bdag gir bya ba'i dngos po spang bar 'dun par gsal bar byed pa yin no/ /de ltar dge slong mnyam 'jog ces bya ba la/ rnam pa des de bzhin gshegs pa'i nyan thos kyis dran pa nye bar gzhag cing thar pa'i bsam pa khyad par can skyes par gyur na ni rtse gcig pa'i sems kyis bsgom pa bsgrub par 'gyur te/ rtse gcig tu gyur pa'i yid kyis ni myur du/ yul la sred pa dag las rgal bar 'gyur/ /zhes bya ba yin te/ sred pa rnam pa gsum yul rnam pa sna tshogs las skyes pa spang ba nyid do/ /'khor ba'i rtsa ba ni 'di yin pa'i phyir 'khor ba'i zag pa thams cad skems pa yin no/ /de ltar yul la sred pa dag las rgal bar byas nas skye ba dang rga ba las kyang rgal bar 'gyur ba bstan pa'i phyir/ gang zhig dran par zhes bya ba la sogs pa'o/ / dge slong dag gang la la zhig dad pa phun sum tshogs par 'gyur ba nas/ ting nge 'dzin phun sum tshogs pa'i bar du yin no/ /de ni ring por mi thogs par skye ba dang rga ba'i mtha' ma thob par 'gyur ro zhes bya ba nas tshigs su bcad pa bzhi gsungs so/ /gang zhig ces bya ba ni 'og nas smos pa la nan tan byed pa ste/ yang dag par rab tu zhugs pa zhes bya ba'i don to/ /mel tse byed pa zhes bya ba ni 'bad pas brtson 'grus brtsams pa'o/ /mel tse byed pa ni brtson 'grus te/ khyad par thams cad ni brtson 'grus kyis 'dren pa'i phyir ro/ /dran ldan ni lus su gtogs pa'i dran pa dang ldan pa'i phyir ro/ /shes bzhin ni phyin ci ma log par nges par rtog pa ste/ shes pa khyad par can dang ldan pa nyid do/ /dga' ba ni tshul khrims phun sum tshogs pa de dang ldan pas 'gyod pa med cing rtag tu dga' ba yin pa'i phyir ro/ /rab tu dang ba zhes bya ba ni dad pa'i dbang gis rnyog pa rnams bsal ba yin te/ ston gyi dus su mtsho chen po rab tu dang bar 'gyur ba bzhin no/ /de bzhin du kun rdzob kyi tshogs te dad pa la sogs pa'i dbang po la sogs pa phun sum tshogs pa'i phyir ro/ /dus dus su zhes bya ba ni mthar gyis mngon par rtogs par 'byung ba'i phyir ro/ /chos ni 'phags pa'i bden pa la sogs pa'o/ /dpyod pa ni mthong ba'i lam la sogs pas yongs su brtag pa ste/ de'i stobs kyis nyon mongs pa thams cad spong zhing / de las mi slob pa'i lam la gnas pa yin no/ /gdul ba'i bya ba la nan tan du gang byed pa de nyid smras pa/ rgal bar 'gyur zhes bya ba smos te/ rab tu spangs pa'i phyir ro/ /skye ba dang rga ba ni 'khor ba'i phung po ste/ lhag ma med pa'i mya ngan las 'das pa 'thob par 'gyur bas so/ /gsungs pa ni 'jigs pa med pas nga nyid smras te/ phyin ci ma log pa'i shes pa thob pa'i phyir ro/ /gzhan dag gi bshad pa ni phyin ci log dang ldan pa'i phyir ro/ /gang gi phyir yang brtson 'grus dang ldan pas de nyid la gzud pa'i phyir/ de ltas rtag tu mel tse byed ston cing / /zhes bya ba smos te/ dus rtag tu brtson 'grus brtsams par gyis shig pa ste/ gang gi phyir mel tse ni brtson 'grus yin la/ le lo ni gnyid kyi rang bzhin yin pa'i phyir ro/ /brtson pa yis zhes bya ba ni brtun pas spyod cing gus pa ste/ de gang la yod pa de ni brtson pa can te/ dbyug pa can bzhin no/ /sdod pa med par rtag tu sbyor bas nyin mo 'chag pa dang / 'dug pa gnyis kyis sems sgrib pa dag las sbyang bar bya'o zhes bya ba la sogs pa mdo las gsungs so/ /snga mar rtag tu sbyor ba bstan nas/ 'dis ni gus par sbyor ba bstan te/ dge slong zhes bya ba ni dad pa dang / tshul khrims phun sum tshogs pa tsam gyis gang zag snga ma'i gnas skabs yin pa'i phyir 'di byas pa yin te/ de dang ldan pa ni dge slong zhes bya bar brjod par rigs so/ /mkhas pas ni rtogs pa ste/ shes bzhin dang ldan pa'i phyir ro/ /dran ldan zhes bya ba ni dran pa yod pa ste/ de nyid dbang po'i stobs kyis nye bar bkag pa'i rnal 'byor can no/ /kun du sbyor ba spangs nas su/ /zhes bya ba ni rjes su chags pa dang khong khro ba la sogs pa ste/ rnam pa dgu bye brag med par bstan to/ /skye rga'i zhes bya ba 'dis ni srid pa'i kun du sbyor ba'i dngos po thams cad spangs par bstan to/ /des ni 'di la mya ngan 'das pa thob/ /ces bya ba ni mthong ba'i chos nyid la des nges par thar pa sgrub pa yin te/ legs par gsungs pa mnyan pa dang 'brel pa'i brtson 'grus la sogs pas so/ /bstan pas nyan du gzhug pa'i phyir smras pa/ gnyid log ces bya ba la sogs pa smos so/ /mel tse bdag las khyod nyon cig / ces bya ba ni mel tse byed par gyur pas shin tu gus pa dang zhes bya ba ngas khyed la bstan gyis nyon cig pa ste/ tshad med pa'i bde ba'i thabs bstan pa'i phyir ro/ /gus par mi nyan pa'i dbang du byas nas/ gnyid log de dag sad par byed pa yi/ /zhes bya ba rab tu sad par gyis shig pa ste/ gang de dag bag med pa la sogs pa'i gnyid kyis zil gyis non pa de dag sad par gyis shig pa'o/ /gzhan du na sangs rgyas 'byung ba med par ni 'gro ba dag tu chos kyi phun sum tshogs pa med pa'i phyir ro/ /gang dag bdag dang gzhan gyi don bya ba la brtson 'grus 'thob pa de dag ni gnyid ma log pa bzhin du 'thob par byas pa ste/ de dang rjes su mthun par bstan pas nyan pa'i snod du 'gyur ba nyid du 'dis sbyor ba yin no/ /ci'i phyir de ltar sbyor ba yin zhe na/ 'di ltar/ nyal bas mel tse byed bla ste/ /zhes bya ba yin te/ le lo la sogs pa'i dngos po nyal ba las ni brtson 'grus la sogs pa'i tshul mel tse byed pa mchog yin te/ mngon par 'dod pa'i don sgrub pa'i phyir ro/ /rgyu gzhan yang bstan pa'i phyir smras pa/ mel tse byed la 'jigs pa med/ /ces bya ba smros te/ la zhes bya ba ni rgyu bstan pa'i don to/ /gang gi phyir dge ba bya ba dag la mel tse byed par gyur na ni dmyal ba la sogs pa'i 'jigs pa med de/ dge slong bsod nams dag gis 'jigs par mi 'gyur ro zhes lung las 'byung ngo / /mel tse byed pas 'jigs pa med pa de ci'i phyir zhe na/ 'di ltar/ mel tse byed par brtson pa dang / /zhes bya ba smos te/ gnyid mi log pa yin pas mel tse'o/ /mel tse byed pa nyid kyi dngos po yin pas mel tse byed pa nyid do/ /brtson 'grus la rjes su 'jug pa'i rnal 'byor pa rnams kyis gus pa'i sbyor ba bstan nas rtag tu byed pa'i sbyor ba/ nyin mtshan rjes su slob byed cing / /zhes bya ba smos te/ mtshan mo ni mun pa ste/ gang gi phyir bslab pa gsum po dag la rjes su mthun par bslab pa dag mya ngan las 'das par phyin pa'o/ /brtson 'grus kyis lhag pa'i 'bras bu 'di bstan pa'i phyir/ 'chi ba med la lhag mos pa'i/ /zhes bya ba mya ngan las 'das pa la 'dod pa ste/ thar pa'i bsam pa 'phel bar 'gyur zhing zag pa med pa'i lam skye bar 'gyur ro/ /'phags pa'i lam skyes pas kyang gang du 'gyur zhe na/ de smras pa/ zag pa rnams ni zad par 'gyur/ /zhes bya ba ste/ nyon mongs pa thams cad mi snang bar 'gyur du thob pa bcad pa'i phyir ro/ /'jigs pa spang bar bya ba'i rgyu 'di dag spyad pa'i phyir/ 'jigs pa thams cad dang bral bar 'gyur ba yin no/ /sangs rgyas la sogs pa'i rjes su dran pa'i phan yon bstan pa'i phyir/ gang zhig nyin dang mtshan rnams su/ /zhes bya ba la sogs pa smos so/ /yul be ra t+ya na skyes bu zhig sangs rgyas kyi sgra thos nas dkon mchog gsum la skyabs su song ngo / /gzhan zhig ni sangs rgyas rjes su dran pa bsgoms par gyur to/ /gzhan dag ni chos rjes su dran pa'o/ /gzhan dag ni dge 'dun rjes su dran pa'o/ /de nas rgyal po chen po rnam thos kyi bu de dag la dang ba skyes te/ nor sbyin par byed do/ /de dag gis kyang shin tu yun ring por bde ba nyams su myong ste rab tu byung nas dgra bcom pa'i 'bras bu 'thob par gyur pa las/ de'i dbang du mdzad nas tshigs su bcad pa gsum gsungs so/ /gzhan dag ni lha'i bu zhig rgyal po'i khab tu pag mo'i mngal du skye ba de'i dbang du mdzad pa'o zhes zer ro/ /rnyed pa ni 'dir mngon par 'dod pa'i dngos po khyad par can thob pa la bya'o/ /de yang rnam pa bzhi ste/ bsod nams dang / rgya cher mchog tu dga' ba dang / ting nge 'dzin dang / rnam par dag pa'i ngo bo nyid do/ /de la bsod nams rnyed pa ni pha rol du bdag la phan 'dogs pa ste/ g.yog 'khor phun sum tshogs pa 'byung ngo / /rgya cher mchog tu dga' ba dang / ting nge 'dzin rnyed pa gnyis ni mthong ba'i chos nyid la bde bar gnas pa phun sum tshogs pa'o/ /rnam par dag pa rnyed pas ni sdug bsngal thams cad gtan du zad pa'o/ /de dag mi yi zhes bya ba ni sems can de rnams kyi'o/ /rgyu'i stobs dang rkyen gyi stobs te ji skad du gsungs pa/ rgyu gnyis dang rkyen gnyis kyis ni yang dag pa'i lta ba skye bar 'gyur te/ dngos po ma lus par pha rol gyis bstan pa dang / nang du yang tshul bzhin yid la byed pa'o zhes so/ /de gang zhe na/ gang dag sangs rgyas zhes bya ba smos te/ gang dag ces bya ba ni mi gang dag go/ /sangs rgyas ni sangs rgyas bcom ldan 'das te/ dngos po ma lus pa rtogs pa'i phyir sangs rgyas so/ /skyabs su song ba zhes bya ba ni yongs su skyob pa la brten na/ de dag mi yi rnyed pa zhes bya ba dang sbyar ro/ /gang gi rgyud la rnam pa bzhi'i dngos po mnga' ba de ni sangs rgyas te/ rnam pa thams cad dang / / 'jig rten dang 'jig rten las 'das pa mngon par rdzogs par sangs rgyas pa dang / bag la nyal bag chags dang bcas pa spangs pa dang / thams cad la thun mong du phan 'dogs par spyod pa'o/ /rgyu rnam pa bzhis skyabs su 'gro bar nges pa yin te/ yon tan shes pa nyid dang / khyad par shes pa nyid dang / khas len pa dang / ston pa gzhan gyis bstan pa ma yin pa nyid do/ /rnyed pa chen po 'di yang de dag gi thob pa nyid du bstan pa'i phyir/ gang zhig nyin dang mtshan rnams su/ /zhes bya ba ni sems te/ gang zhig ces bya ba ni sems can no/ / nyin mtshan nyi nyin dang mtshan mo'o/ /rtag tu zhes bya ba ni rgyun mi 'chad par ram/ ji srid 'tsho'i bar du sangs rgyas rjes su dran pa yod pa de la de dag gi rnyed pa yin gyi/ skyabs su 'gro ba 'ba' zhig tsam gyis ni ma yin no/ /sangs rgyas rjes su dran pa na sangs rgyas la dmigs pa'i dran pa'o/ /de yang rnam pa bzhi ste/ dge ba'i rtsa ba'i phyogs la mngon par brtson pa dang / de la mchod pa'i bya ba dang / de la rjes su dran pa dang / phan 'dogs pa rjes su dran pa'o/ /de ltar bsgom pa 'di la ni yon tan rnam pa bdun re bar bya ste/ skye ba dran par 'gyur ba dang / dad pa shas cher 'gyur ba dang / dman pa'i chos la dga' ba med par 'gyur ba dang / gzhan la rnam par 'tshe ba byed par mi 'gyur ba dang / gzhan las 'tshe ba thob par mi 'gyur ba dang / 'gyod pa med pas dus byed par 'gyur ba dang / bde 'gror skye bar 'gyur ba'o/ /chos rnams zhes bya ba la ni chos ni rnam pa gsum ste/ bstan pa dang / sgrub pa dang / 'bras bu'i dbye bas so/ /de bstan pa'i chos ni gsung rab yan lag bcu gnyis te/ ji lta ba bzhin du rig pas bshad pa'i bdag nyid yin pa'i phyir ro/ /sgrub pa'i chos ni bsam pa phun sum tshogs pa dang / sbyor ba phun sum tshogs pa dang / de la snga ma ni 'bad pa mthar thug pas lam rnam pa gnyis te/ 'jig rten pa dang 'jig rten las 'das pa'i dbye bas so/ /de gal te sangs rgyas kyi rgyud kyi rnam pa yin na ni/ sangs rgyas zhes brjod do/ /'phags pa'i gang zag bzhi'i rgyud kyis ni dge 'dun no/ /de la sbyor ba phun sum tshogs pa yang tshul khrims la sogs pa dam pa'i spyod pa la rjes su 'jug pa ste/ de bzhin du shes par bya'o/ /gang yang thar pa'i cha lhag ma lus pa de yang 'dir sgrub pa'i chos su gnas pa yin no/ /'bras bu'i chos ni thar pa ste/ 'bras bu mthar thug pa'i ngo bo yin pa'i phyir ro/ /gsum po de dag kyang rim pa bzhin du chung ngu dang bar ma dang chen po nyid kyis skyabs so/ /bcom ldan 'das kyis bstan pa ni dgag pa nyid la ston par gsungs so/ /chos ni 'dod chags dang bral ba'i mchog tu bshad do/ /gling dang skyob pa dang skyabs zhes bya ba la sogs pa bstan pas skyabs so/ /dam pa'i chos nyid mnyan pa dang / de'i don nyid bsgom pa dang bsgrub pas de'i 'bras bu nyid sgrub pa yin te/ 'di ni bdag gir byed pa'o/ /chos rnams rjes su dran byed cing / /zhes bya ba ni chos rnam pa gsum ste/ rnam pa dang ngo bo nyid dang 'bras bu'i phan yon la sogs pa mthong bas so/ /lhag ma ni snga ma bzhin no/ /gang dag dge 'dun zhes bya ba ni bkur ba'i phyir dge 'dun te/ slob pa dang mi slob pa'i lam de las skyes pa yin gyi gzhan ni ma yin pa'i phyir ro/ /de dang 'brel ba'i gang zag gi dge 'dun yin te/ de yang rnam pa lnga las ngo tsha mi shes pa'i dge 'dun te/ tshul nyams pa'i phyir ro/ /lug ltar lkugs pa'i dge 'dun te/ gsung rab mi shes pa'i phyir ro/ /skyabs kyi dge 'dun te mi mthun pa'i las byed pa'i phyir ro/ /des na 'di gsum gyi rnam pa thob pa ni chos ma yin pa'i las byed pa'o/ /nyan thos dang lam ste nyan pa'i don ston pa'i phyir dang / 'bras bu mchog yin pa'i phyir dang / dge ba phyin ci ma log pa'i thabs kyi 'bras bu'i phyir/ dge 'dun gyi rnam pa 'di dag gis yang dang yang du mngon du byed pa ste/ 'khor ba spong zhing thar pa thob pa dang / thar pa'i lam de'i tshul yin pa'i phyir te/ lam 'di lta bu rnam par dag pa ni 'di lta ba gzhan dag la med pa'i phyir ro/ /gang zhig de ltar sangs rgyas la sogs pa rjes su dran zhing sgom par byed pa de nyid ni don dam par mel tse byed pa nyid yin gyi/ gzhan ni bag chags med pas gnyid log pa yin no zhes bstan pa'i phyir/ gang zhig nyin dang mtshan rnams su/ /zhes bya ba la sogs pa smos so/ /de nas bcom ldan 'das kyis drang srong drug cu rtsa gsum la cho 'phrul gsum gyis bstan to/ /ji tsam na rdzu 'phrul gyis rab tu byung ba'i dge slong gcig dang / lhan cig tu sangs rgyas rjes su dran pa bsgom par 'gyur ro zhes rgya cher bstan to/ /de nas de ltar bsgoms pas mya ngan las 'das pa la yid mngon par mos pas nang par tho ras kyi dus su de dag thams cad la brda phrad par lung bstan te/ de'i dbang du mdzad nas 'di gsungs so/ /gzhan dag ni shing rtas shing thu ba'i bu rang gi las la mchog tu byed pa las brtsams so zhes zer ro/ /rab tu sad pa yin pas sad par gyur pa'o/ /legs par rab tu sad pa'i bya ba la/ legs par sad pa ni bya ba'i khyad par yin pa'i phyir ro/ /sad par gyur pa zhes bya ba ni legs par rab tu sad pa'i don te/ de bzhin nyid du khong du chud pa'i legs par mel tse byed pa zhes bya ba'i don to/ /de nyid gang zhe na/ smras pa/ gau ta ma'i nyan thos te zhes bya ba yin te/ drang srong chen po gau ta ma'i rgyud du 'byung ba'i phyir gau ta ma ste/ bcom ldan 'das shAkya thub pa'o/ /'dis ni bcom ldan 'das cho rigs phun sum tshogs par bstan te/ rigs khyad par can du skye bar gyur ba dag ni rta cang shes bzhin du bag med pa nyid mchog tu byed pa ma yin no zhes ston pa yin no/ /de'i nyan thos de ni bka'i rjes su 'jug pa ste/ gang gi phyir bcom ldan 'das kyi gsung bdag med pa'i de bzhin nyid bstan pa'i rjes su 'gro ba ste/ de bas na de'i phyir de dag ni legs par sad pas rab tu sad pa yin te/ 'jug pa'i sgo de dag ni 'phags pa'i lam dang mi gtsang ba dang dbugs 'byung rngub dran pa rtog par bya ba'o/ /de gang yin zhe na/ gang dag /sangs rgyas rjes su dran byed pa/ /zhes bya ba ste/ sangs rgyas rjes su dran par byed pa ni sangs rgyas kyi yon tan la dmigs pa dang / khong du chud pa'o/ /yon tan yang rnam pa gnyis te/ sku dang thugs yin pa'i phyir ro/ /'bras bu ni rnam pa gsum ste/ gzhan la phan pa phan tshun tshogs pa yin pa'i phyir ro zhes bya ba'o/ /chos dang dge 'dun rjes su dran pa yang de bzhin no/ /yon tan thams cad kyi rtsa ba ni dkon mchog gsum yin la/ de la brten pas ni so sor thar pa'i tshul khrims la sogs pa'i khyad par byung ba yin te/ de nyid bstan pa'i phyir/ tshul khrims rjes su dran byed pa/ /zhes bya ba yin te/ de la tshul khrims ni dam pa rnams kyi spyod pa yin pa'i phyir gcig go/ /'jug pa dang ldog pa'i tshul gyis ni rnam pa gnyis so/ /lus la sogs pa'i legs par spyod pa'i bdag nyid kyi 'brel bas ni rnam par dag pa gsum mo/ /'di la 'tsho ba'i rnam par dag pas ni rnam pa bzhi'o/ /'di la chang 'thung ba las ldog pas ni bcas pa'i kha na ma tho ba dag pa las ni rnam pa drug go/ /rnam pa brgyad du yang mngon par brtag par bya ste/ rgyu dang 'bras bu dang rang bzhin zhes bya ba la sogs pa las rjes su dran pa'o/ /tshul khrims dang ldan na ni sbyin pa dag par 'gyur ro zhes bstan pa'i phyir/ gtong ba rjes su dran byed pa/ /zhes bya ba smos te/ skyes bu dam pa rnams kyis sbyin pa rnam pa lnga dang yan lag rnam pa drug dang ldan pa dang / sbyin pa yan lag dgu dang ldan pa dus su sbyin pa'i rdzas la sogs pa ste/ de la dmigs pa zhes bya ba'i don to/ /sngar bshad pa'i yon tan rnams bsten na/ lha'i 'gro ba rnyed pa sla'o zhes bstan pa'i phyir/ lha ni rjes su dran byed pa/ /zhes bya ba smos te/ lha ni 'dod pa na spyod pa dang / de las gzhan pa ste rnam pa gnyis so/ /dang po ni rnam pa drug go/ /de las gzhan pa ni rnam pa gnyis te/ gzugs can dang gzugs med pa'o/ /gzugs can ni gnas bcu drug go/ /gzugs can ma yin pa ni bzhi'o/ /der skyes pa yang sbyin pa dang tshul khrims dang bsgoms pa dag gis ci rigs par sbyar ro/ /'dod pa'i khams las 'dod chags dang bral ba'i thabs bstan pa'i phyir/ lus rtogs dran byed pa zhes bya ba smos te/ sa bon dang zhing dang bsam pa dang rgyu mthun pa dang / rang gi mtshan nyid dang 'jig pa ste/ lus kyi rnam par rtog pa rnam pa drug tu 'dod do zhes rgya cher bshad do/ /'dod pa na spyod pa'i lus gcig las 'dod chags dang bral ba ni 'dod pa'i khams thams cad las 'dod chags dang bral ba yin no/ /'di'i 'bras bu bstan pa'i phyir/ ting 'dzin bzhi dran pa zhes bya ba smos te/ de yang rnam pa gnyis te/ bsam gtan dang snyoms par 'jug par skye ba'i dbye bas so/ /snyoms par 'jug pa ni dge ba la rtse gcig pa'o/ /rnam pa lnga la sogs pa rtog pa dang dpyod pa zhes bya ba la sogs par brjod par bya'o/ /bsam gtan gyi ro myang ba'i phan yon bstan pa'i phyir/ bsgom pa la ni yid dga' ba/ /zhes bya ba smos te/ yang dang yang du bsgoms shing mngon sum du byas te/ de'i khyad par rjes su myong bas mngon par 'dod pa'i sems skye ba thob par 'gyur ro/ /yang na bsgoms pa las byung ba'i dge ba'i rtsa ba'o/ /rigs pas thob pa dang thos pa las byung ba gnyis ni mchog tu khyad par can yin pa'i phyir 'di nyid ni rnal 'byor pa'i sems las brtsams pa yin no/ /bsgom pa la dga' ba'i 'bras bu bstan pa'i phyir/ 'tshe ba med la yid dga' ba/ /zhes bya ba yin te/ gzhan gyi gnod pa las ldog pa ni 'tshe ba med pa'o/ /de la mngon par dga' ba ni khyad par can gyi dge ba'i phyogs la yang dag par bsten pa'i phyir ro/ /zhi gnas kyi rgyus mnyen par byas nas de ji ltar gzhan la gnod par 'gyur ro/ /gnod sems med la yid dga' ba/ /zhes bya ba ni bsam gtan dang bsgom pa la yang dag par bsten pa'i khyad par yang dag par ston pa yin te/ de snyoms par 'jug pa'i stobs kyis byams pa la sogs pa 'thob par 'gyur ba'i phyir/ gnod sems med pa ni zhe sdang med pa'i dge ba'i rtsa ba'i ngo bo ste/ byams pa dang snying rje'o/ /tshad med pa rnams dang / so so yang dag par rig pa'i nor tshang bar rnyed pa'o zhes gzhan dag zer ro/ /yang gsungs pa dag kyang rig par bya ste/ de ltar zil gyis non pa'i skye mched la sogs pa brjod par bya'o/ / gzugs med pa'i khams las 'dod chags dang ba'i lam gyi thabs bstan pa'i phyir/ stong pa nyid la yid dga' ba/ /zhes bya ba smos te/ stong pa nyid kyi rnam par thar pa'i sgo ste/ bdag med pa dang stong pa'i rnam pa la 'jug pa'o/ /mtshan ma med la yid dga' ba/ /zhes bya ba ni 'dus byas rnam pa bcu'i rtags su gyur pa'i mtshan ma dang bral ba ni mya ngan las 'das pa ste/ mtshan ma med pa'o/ /de dag kyang gang zhe na/ skyes pa dang bud med dang / gzugs dang / sgra dang / dri dang / ro dang / reg bya dang / skye ba dang / rga ba dang / mi rtag pa zhes brjod pa dag go/ /yang na rgyu med pa'i phyir mtshan ma med pa ste/ 'dus ma byas ni med pa'o zhes bya ba'i tshig gis te/ de la dmigs pa'i ting nge 'dzin ni mtshan ma med pa yin te/ mtshan ma med pa ni zhi ba'i rnam pa'o zhes bya ba'i tshig gis so/ /ci yang med la yid dga' ba/ /zhes bya ba ni ci yang med par rab tu rtogs pa ste/ 'dus byas dag rnam par 'gyur ba'i phyir ro/ /de la dmigs pa'i ting nge 'dzin ci yang med la dgongs pa yin te/ smon pa med pa zhes bya ba'i don to/ /gang gi phyir 'di ni gang la yang smon par mi byed cing gnas par mi byed la/ de mngon par dga' ba med de/ lam yang 'jig rten pa lta bur spang par bya ba yin pa'i phyir ro zhes bya ba la sogs pa'o/ /de yang rnam pa bcu po 'di lta ste/ smon pa med pa dang / bden pa'i rnam pa dang / de las gzhan gyis zhes gsungs pa/ de dag nyid zag pa med pa'i rnam par thar pa'i sgo zhes brjod de zag pa dang bcas pa la ni thar par 'jug pa'i thabs med pa'i phyir ro/ /rnam par thar pa'i sgo de dag nyid kyis phan yon go rims bzhin du bstan pa'i phyir smras pa/ nges par 'byung ba la mngon par dga' ba dang / dben pa la mngon par dga' ba dang / de'i phyir dus rtag tu bdag nyid lus dang srog dang ldan pa yin no zhes yid ches pas lan du mar 'di 'khor bar 'khyams pa yin gyi/ gang gi tshe yang stong pa nyid rnam par thar pa'i sgo stong pa nyid du 'gyur ba de'i tshe ni 'khor ba la rgyab kyis phyogs shing mya ngan las 'das pa dang / don dam pa dang nges par 'byung bar mngon par dga' ba skye'o/ /sngar yang 'di mi shes pas yul dag ro myang bar gyur to/ /mtshan ma med pas thob pa ni rnam pa de bzhin te don gyi nom pa dag gang mthong na der dga' ba ste/ de lta bu 'gog pa'i rnal 'byor pa la ni med pa yin te/ rgyab kyis phyogs pa yin zhes grub pa'i mtha'o/ /sngon med pa'i mthus 'dus byas gang la yang smon par mi byed pa yin te/ phung po lhag ma med pa'i mya ngan las 'das pa la gzhol ba dang mos pa'i phyir ro/ /de'i bdag nyid du gyur pa la ni spro ba thams cad nye bar zhi ba yin no/ /dran pa'i tshoms te bco lnga pa'i rnam par 'grel pa rdzogs so// //

CLOSE WINDOW