བོད་ཡིག

e-texts based on the ACIP/ALL Input

@#/ /chos mngon pa'i mdzod kyi tshig le'ur byas pa/ @##/ /rgya gar skad du/ a b+hi d+harma ko ShA kA ri kA/ bod skad du/ chos mngon pa'i mdzod kyi tshig le'ur byas pa/ 'jam dpal gzhon nur gyur pa la phyag 'tshal lo/ / gang zhig kun la mun pa gtan bcom zhing / /'khor ba'i 'dam las 'gro ba drangs mdzad pa/ /don bzhin ston pa de la phyag 'tshal nas/ /chos mngon mdzod kyi bstan bcos rab bshad bya/ /chos mngon shes rab dri med rjes 'brang bcas/ /de thob bya phyir gang dang bstan bcos gang / /'dir de don du yang dag chud phyir ram/ /'di yi gnas de yin pas chos mngon mdzod/ /chos rnams rab tu rnam 'byed med par nyon mongs rnams/ /gang phyir nye bar zhi bar bya ba'i thabs med la/ /nyon mongs pas kyang 'jig rten srid mtsho 'dir 'khyams te/ /de bas de phyir 'di ni ston pas gsungs so lo/ /zag bcas zag pa med chos rnams/ /lam ma gtogs pa'i 'dus byas rnams/ /zag bcas gang phyir de dag la/ / zag rnams kun tu rgyas par 'gyur/ /zag med lam gyi bden pa dang / /'dus ma byas rnam gsum yang ste/ /nam mkha' dang ni 'gog pa gnyis/ /de la nam mkha' mi sgrib pa'o / /so sor brtags pas 'gog pa gang / /bral ba'o so so so so yin/ /skye la gtan du gegs byed pa/ /'gog gzhan so sor brtags min pas/ /'dus byas chos rnams de dag kyang / /gzugs la sogs pa'i phung po lnga/ /de dag nyid dus gtam gzhi dang / /nges par 'byung bcas gzhi dang bcas/ /gang dag zag bcas nyer len pa'i/ /phung po'ang de dag 'thab bcas kyang / /sdug bsngal kun 'byung 'jig rten dang / /lta gnas srid pa'ang de dag yin/ / gzugs ni dbang po lnga dang don/ /lnga dang rnam rig byed min nyid/ /de dag rnams kyi rnam shes rten/ /mig la sogs gzugs dang ba rnams/ /gzugs rnam gnyis dang rnam nyi shu/ /sgra ni rnam pa brgyad yod de/ /ro ni rnam drug dri rnam bzhi/ /reg bya bcu gcig bdag nyid do/ /g.yengs dang sems med pa yi yang / /dge dang mi dge rjes 'brel gang / /'byung ba che rnams rgyur byas pa/ /de ni rnam rig byed min brjod/ /'byung ba dag ni sa khams dang / /chu dang me dang rlung khams rnams/ /'dzin pa la sogs las su grub/ /sra gsher dro nyid g.yo ba rnams/ /'jig rten gyi ni tha snyad du/ /kha dog dbyibs la sa zhes brjod/ /chu me yang ngo rlung tshogs khams/ /nyid yin de dang 'dra ba'ang yin/ / dbang don de dag kho na la/ /skye mched dang ni khams bcur 'dod/ /tshor ba myong ba'o 'du shes ni/ /mtshan mar 'dzin pa'i bdag nyid do/ /'du byed phung po bzhi las gzhan/ /de gsum rnam rig byed min dang / /'dus ma byas rnams bcas pa ni/ /chos kyi skye mched khams zhes bya/ /rnam shes so sor rnam rig pa/ /yid kyi skye mched kyang de yin/ /khams bdun dag tu 'ang 'dod pa ste/ /rnam par shes pa drug dang yid/ /drug po 'das ma thag pa yi/ /rnam shes gang yin de yid do/ /drug pa'i rten ni rab bsgrub phyir/ /khams ni bco brgyad dag tu 'dod/ /phung po dang ni skye mched dang / /khams gcig gis ni thams cad bsdus/ /rang gi ngo bo nyid kyis te/ /gzhan gyi dngos dang mi ldan phyir/ /mig la sogs pa gnyis mod kyi/ /rigs dang spyod yul rnam par shes/ /'dra ba'i phyir na khams gcig nyid/ /mdzes bya'i phyir na gnyis byung ngo / /spungs dang skye sgo rigs kyi don/ /phung po skye mched khams rnams yin/ /rmongs dbang 'dod rnam gsum gyi phyir/ /phung po la sogs gsum bstan to/ /rtsod pa'i rtsa bar gyur pa dang / /'khor ba'i rgyu phyir rim rgyu'i phyir/ /sems byung rnams las tshor ba dang / /'du shes logs shig phung por gzhag /phung po dag tu 'dus ma byas/ /don du mi rung phyir ma bshad/ /rim ni rags dang kun nyon mongs/ /snod sogs don khams ji bzhin no/ /da lta'i don phyir dang po lnga/ /'byung ba las gyur don phyir bzhi/ /gzhan mi ches ring myur 'jug phyir/ /yang na ji ltar gnas bzhin rim/ /bye brag don dang gtso bo'i phyir/ /chos mang ba dang mchog bsdus phyir/ /gcig ni gzugs kyi skye mched dang / /gcig ni chos zhes bya bar brjod/ /chos kyi phung po brgyad khri dag /gang rnams thub pas gsungs de dag /tshig gam ming yin de dag ni/ /gzugs dang 'du byed dag tu 'dus/ /kha cig bstan bcos tshad ces zer/ /phung po la sogs gtam re yin/ /spyod pa rnams kyi gnyen por ni/ /chos kyi phung po mthun par gsungs/ /de bzhin gzhan yang ci rigs par/ /phung po skye mched khams rnams ni/ /rang gi mtshan nyid legs dpyad de/ /ji skad bshad par bsdu bar bya/ /bu ga nam mkha'i khams shes bya/ /snang dang mun pa dag yin lo/ /zag dang bcas pa'i rnam shes ni/ /rnam shes khams yin skye ba'i rten/ /bstan yod 'dir ni gzugs gcig pu/ /thogs dang bcas pa gzugs can bcu/ /lung ma bstan brgyad de dag nyid/ /gzugs sgra ma gtogs gzhan rnam gsum/ /'dod khams gtogs pa thams cad do/ /gzugs kyi khams na bcu bzhi'o/ /dri dang ro dang sna dang ni/ /lce yi rnam shes khams ma gtogs/ /gzugs med gtogs pa yid dang ni/ /chos dang yid kyi rnam shes khams/ /de gsum zag bcas zag pa med/ /lhag ma rnams ni zag bcas so/ /rtog dang dpyod dang bcas pa ni/ /rnam par shes pa'i khams lnga yin/ /tha ma gsum ni rnam gsum mo/ /lhag ma rnams ni gnyis ka spangs/ /nges par rtog dang rjes dran pa'i/ /rnam par rtog pas rnam mi rtog /de dag yid kyi shes rab g.yeng / /yid kyi dran pa thams cad nyid/ /dmigs bcas sems kyi khams bdun no/ /chos kyi phyed kyang ma zin dgu/ /brgyad po de dag rnams dang sgra/ /dgu po gzhan ni rnam pa gnyis/ /reg bya rnam pa gnyis yin te/ /lhag ma gzugs can dgu po ni/ /'byung gyur chos khams phyogs gcig kyang / /gzugs can bcu ni bsags pa'o/ /gcod byed gcad par bya ba nyid/ /phyi rol gyi ni khams bzhi yin/ /de bzhin bsreg bya 'jal byed pa'o/ /sreg dang gzhal la mi mthun smra/ /rnam par smin las byung ba dang / /rgyas las byung ba nang gi lnga/ /sgra ni rnam smin las skyes min/ /rgyu mthun las byung rnam smin skyes/ /thogs pa med brgyad gzhan rnam gsum/ /rdzas dang ldan gcig tha ma gsum/ / skad cig ma ste mig dang ni/ /rnam shes khams dag so so dang / /lhan cig tu yang 'thob pa yod/ /nang gi bcu gnyis gzugs la sogs/ /ma gtogs chos zhes bya ba ni/ /sten pa dang bcas lhag ma ni/ /de dang mtshungs pa dag kyang yin/ /gang zhig rang gi las mi byed/ /bcu ni bsgom pas spang bya yin/ /lnga yang tha ma gsum rnam gsum/ /nyon mongs can min mthong spang min/ /gzugs min drug pa min skyes min/ /mig dang chos kyi khams phyogs ni/ /lta ba yin te rnam pa brgyad/ /rnam shes lnga dang mtshungs skyes blo/ /nges rtog med phyir lta ma yin/ /mig gis gzugs rnams mthong sten bcas/ /de la brten pa'i rnam shes min/ /gang phyir bar du chod pa yi / /gzugs ni mthong ba min phyir lo/ /mig ni gnyis ka dag gis kyang / /mthong ste gsal bar mthong phyir ro/ /mig dang yid dang rna ba ni/ /yul dang ma phrad gsum gzhan du/ /sna la sogs pa gsum gyis ni/ /yul ni mnyam pa 'dzin par 'dod/ /tha ma'i rten 'das lnga rnams kyi/ /de dag lhan cig skyes pa'ang yin/ /de dag gyur pas 'gyur nyid phyir/ / rten ni mig la sogs pa yin/ /de phyir thun mong ma yin phyir/ /de dag gis ni rnam shes bstan/ /lus la 'og ma'i mig ma yin/ /mig gi gong ma'i gzugs ma yin/ /rnam par shes pa'ang de yi gzugs/ /lus kyi'ang gnyis ka thams cad du/ /rna ba'ang de bzhin gsum dag ni/ /thams cad rang gi sa pa nyid/ /lus kyi rnam shes 'og dang ni/ /rang gi sa yid ma nges te/ /gnyis kyis rnam shes phyi yi lnga/ /'dus ma byas chos rtag pa'o/ /chos kyi phyed dang gang dag ni/ /bcu gnyis nang gir bshad dbang po/ /chos mngon pa'i mdzod kyi tshig le'ur byas pa las/ khams bstan pa zhes bya ba ste gnas dang po'o// //lnga po rnams ni don bzhi la/ /dbang byed bzhi rnams gnyis la lo / /lnga dang brgyad po de rnams ni/ /kun nas nyon mongs rnam byang la/ /rang gi don dang thams cad la/ /dmigs par dbang byed phyir dbang drug /mo nyid pho nyid la dbang phyir/ /lus las mo dang pho dbang dag /rigs gnas kun nas nyon mongs dang / /rnam par byang la dbang byed phyir/ /srog dang tshor ba rnams dang ni/ /dad sogs dbang po lngar 'dod do/ /mya ngan 'das sogs gong nas gong / /'thob pa la ni dbang byed phyir/ /kun shes byed dang kun shes dang / /de bzhin kun shes ldan dbang po/ /sems kyi rten dang de'i bye brag /gnas dang kun nas nyon mongs nyid/ /tshogs dang rnam byang ji snyed pa/ /dbang po dag kyang de snyed du/ /yang na 'jug pa'i rten dang ni/ /skye dang gnas dang nyer spyod las/ /bcu bzhi de bzhin ldog pa la/ /dbang po rnams ni gzhan yin no/ /lus tshor sim pa ma yin gang / /sdug bsngal dbang po'o sim pa ni/ / bde ba'o bsam gtan gsum pa na/ /sems kyi de ni bde dbang po/ /gzhan na de yid bde ba yin/ /sems kyi sim pa ma yin pa/ /yid mi bde ba'o btang snyoms ni/ /bar ma'o gnyis ka'i mi rtog phyir/ /mthong bsgom mi slob lam la dgu/ /gsum yin gsum ni dri ma med/ /gzugs can srog dang sdug bsngal dag /zag dang bcas pa dgu rnam gnyis/ /srog ni rnam smin bcu gnyis gnyis/ /tha ma brgyad dang yid mi bde/ /ma gtogs pa ste de gcig ni/ /rnam par smin bcas bcu rnam gnyis/ /yid dang tshor gzhan dad la sogs/ /dge ba brgyad yid mi bde ba/ /rnam gnyis yid dang tshor gzhan ni/ /rnam gsum gzhan ni rnam pa gcig /dri med ma gtogs 'dod par gtogs/ /pho mo'i dbang dang sdug bsngal dag /ma gtogs gzugs gtogs gzugs can dang / /bde ba'ang ma gtogs gzugs med gtogs/ /yid dang tshor ba gsum rnam gsum/ /gnyis kyis spang bya yid mi bde/ /dgu ni bsgom pas lnga po ni/ /spang bar bya min yang gsum min/ /'dod par dang por rnam smin gnyis/ /rnyed de rdzus te skye bas min/ /de yis drug gam bdun nam brgyad/ /gzugs na drug go gong mar gcig /gzugs med dag tu 'chi ba ni / /srog dang yid dang btang snyoms nyid/ /'gag par 'gyur ro gzugs na brgyad/ /'dod par bcu'am dgu'am brgyad/ /rim gyis 'chi ba dag la bzhi/ /dge la thams cad dag tu lnga/ /'bras bu tha ma gnyis dgus 'thob/ /gnyis ni bdun dang brgyad dang dgus/ /bcu gcig dag gis dgra bcom nyid/ /'ga' zhig srid phyir bshad pa yin/ /btang snyoms dang ni srog dang ni/ /yid dang ldan la nges gsum ldan/ /bde lus ldan la bzhi dag dang / /mig sogs ldan la lnga dang ldan/ /yid bde ldan yang sdug bsngal ldan/ /bdun dang mo yi dbang sogs ldan/ /brgyad dang kun shes ldan pa yi/ /dbang po ldan la bcu gcig ldan/ / kun shes byed pa'i dbang ldan la/ /bcu gsum dag dang ldan pa yin/ /dge med nang na nyung ldan pa/ /lus tshor srog yid brgyad dang ldan/ /gzugs med byis pa'ang de bzhin te/ /btang snyoms srog yid dge rnams dang / /mang por ldan la bcu dgu ste/ /dri ma med rnams ma gtogs so/ /mtshan gnyis 'phags pa chags bcas te/ /mtshan gcig dri med gnyis ma gtogs/ /'dod na dbang po med pa dang / /sgra med phra rab rdul rdzas brgyad/ /lus dbang ldan la rdzas dgu'o/ /dbang po gzhan ldan rdzas bcu'o/ / sems dang sems byung nges lhan cig /thams cad 'dus byas mtshan nyid dang / /thob pa'am sems byung rnam lnga ste/ /sa mang la sogs tha dad phyir/ /tshor dang sems pa 'du shes dang / /'dun dang reg dang blo gros dran / /yid la byed dang mos pa dang / /ting nge 'dzin sems thams cad la/ /dad dang bag yod shin tu sbyangs/ /btang snyoms ngo tsha shes khrel yod/ /rtsa ba gnyis rnam mi 'tshe dang / /brtson 'grus rtag tu dge la 'byung / /rmongs dang bag med le lo dang / /ma dad pa dang rmugs dang rgod/ /nyon mongs can la rtag tu 'byung / /mi dge la ni khrel med dang / /ngo tsha med pa'o khro ba dang / /khon du 'dzin dang g.yo dang ni/ /phrag dog 'tshig 'chab ser sna dang / /sgyu dang rgyags dang rnam 'tshe ni/ /nyon mongs chung ngu'i sa pa rnams/ /'dod pa'i dge ba'i sems la ni/ /rtog dang dpyod dang bcas pa'i phyir/ /sems las byung ba nyi shu gnyis/ /la la dag tu 'gyod pa bsnan/ /mi dge ba ni ma 'dres dang / /lta dang ldan la'ang nyi shu 'byung / /nyon mongs bzhi dang khro sogs dang / /'gyod pa dang ni nyi shu gcig /bsgribs la bco brgyad lung ma bstan/ /gzhan la bcu gnyis dag tu 'dod/ /gnyid ni kun la mi 'gal phyir/ /gang la yod pa de bsnan no/ /de las 'gyod gnyid mi dge rnams/ /bsam gtan dang po dag na med/ /rtog pa'ang bsam gtan khyad par can/ /de yi gong na dpyod pa yang / /ma gus ngo tsha med khrel med/ /kha na ma tho 'jigs mi lta/ /dga' dang gus nyid ngo tsha shes/ /de gnyis 'dod dang gzugs dag na/ /rtog dang dpyod pa rtsing zhib nyid/ /nga rgyal khengs pa rgyags pa ni/ /rang gi chos la chags pa yi/ /sems ni yongs su gtugs pa'o/ / sems dang yid dang rnam shes ni/ /don gcig sems dang sems byung dang / /rten dang dmigs dang rnam bcas dang / /mtshungs par ldan pa'ang rnam pa lnga/ /mi ldan pa yi 'du byed rnams/ /thob dang ma thob skal mnyam dang / /'du shes med snyoms 'jug pa dang / /srog dang mtshan nyid rnams dang ni/ /ming gi tshogs la sogs pa yang / /thob pa rnyed dang ldan pa'o/ /thob dang ma thob rang rgyud du/ /gtogs pa rnams kyi'o 'gog gnyis kyi/ /dus gsum pa yi rnam pa gsum/ /dge la sogs kyi dge la sogs/ /der gtogs rnams kyi rang khams pa/ /ma gtogs rnams kyi rnam pa bzhi/ /slob dang mi slob min gyi gsum/ /spang bya min pa'i rnam gnyis 'dod/ /lung bstan min thob lhan cig skye/ /mngon shes sprul pa ma gtogs pa/ /bsgribs pa'i gzugs kyi'ang 'dod pa na/ /gzugs kyi sngar ni skye ba med/ /ma thob ma bsgribs lung ma bstan/ /'das ma skyes kyi de rnam gsum/ /'dod sogs gtogs dang dri med kyi'ang / /lam ma thob pa so so yi/ /skye bor 'dod do de thob dang / /sa 'phos nas ni rnam nyams 'gyur/ / skal mnyam sems can 'dra ba'o/ /'du shes med pa pa 'du shes/ /med par sems dang sems byung rnams/ /'gog pa'o rnam smin de 'bras che/ /de bzhin 'du shes med snyoms 'jug /bsam gtan tha mar 'byung 'dod pas/ /dge ba'o skyes nas myong 'gyur nyid/ /'phags pa'i ma yin dus gcig 'thob / /'gog pa zhes pa'ang de bzhin nyid/ /'di gnas don du srid rtse skyes/ /dge ba'o gnyis su myong 'gyur dang / /ma nges 'phags pa'i sbyor bas 'thob/ /thub pa'i byang chub kyis thob bya / /dang por ma yin skad cig ma/ /sum cu rtsa bzhis thob phyir ro/ /gnyis ka 'dod dang gzugs rten can/ /'gog pa dang por mi'i nang du/ /srog ni tshe yin drod dang ni/ /rnam shes rten gang yin pa'o/ /mtshan nyid dag ni skye ba dang / /rga dang gnas dang mi rtag nyid/ /de dag skye ba'i skyes la sogs/ /de chos brgyad dang gcig la 'jug /rgyu dang rkyen dag med par ni/ /skye bas bskyed bya skyed byed min/ /ming gi tshogs la sogs pa ni/ /ming dang ngag dang yi ge'i tshogs/ /'dod dang gzugs gtogs sems can ston/ /rgyu mthun lung bstan min de bzhin/ /skal mnyam rnam par smin pa'ang yin/ /khams gsum pa ste thob rnam gnyis/ /mtshan nyid rnams kyang snyoms 'jug dang / /mi ldan pa dag rgyu mthun pa/ /byed rgyu lhan cig 'byung ba dang / /skal mnyam mtshungs par ldan pa dang / / kun tu 'gro dang rnam smin dang / /rgyu ni rnam pa drug tu 'dod/ /rang las gzhan pa byed rgyu'i rgyu/ /lhan cig 'byung gang phan tshun 'bras/ /'byung bzhin sems kyi rjes 'jug dang / /sems dang mtshan nyid mtshan gzhi bzhin/ /sems las byung dang sdom gnyis dang / /sems dang de dag gi mtshan nyid/ /sems kyi rjes 'jug dus dang ni/ /'bras sogs dge la sogs pas so/ /skal mnyam rgyu ni 'dra ba'o/ /rang rigs sa pa'o sngar skyes rnams/ /sa dgu'i lam ni phan tshun du/ /mnyam dang khyad par can gyi yin/ /sbyor byung de gnyis kho na'i yin/ /thos dang bsams byung la sogs pa/ /mtshungs ldan rgyu ni sems dag dang / /sems byung rten mtshungs can rnams so/ /kun 'gro zhes bya nyon mongs can/ /rnams kyi rang sa kun 'gro snga / /rnam smin rgyu ni mi dge dang / / dge ba zag bcas rnams kho na/ /kun 'gro skal mnyam dus gnyis pa/ /gsum po dag ni dus gsum pa/ /'dus byas bral bcas 'bras bu yin/ /'dus ma byas la de dag med/ /rnam smin 'bras bu tha ma'i yin/ /bdag po'i 'bras bu dang po'i yin/ /rgyu mthun skal mnyam kun 'gro ba'i/ /skyes bu pa ni gnyis kyi yin/ /rnam smin lung du ma bstan chos/ /sems can brjod lung bstan phyis 'byung / /rgyu mthun rgyu dang 'dra ba'o/ /bral ba blo yis zad pa'o/ /gang gi stobs kyis gang skyes pa'i/ /'bras de skyes bu byed las skyes/ / sngon byung ma yin 'dus byas ni/ /'dus byas kho na'i bdag po'i 'bras/ /lnga po da ltar 'bras bu 'dzin/ /gnyis ni rab tu 'byin par byed/ /da ltar gyi dang 'das pa dag /gcig ni 'das pas 'byin par 'gyur/ /nyon mongs can dang rnam smin skyes/ /lhag dang dang po 'phags rim bzhin/ /rnam smin kun 'gro de gnyis dang / /skal mnyam ma gtogs lhag las skyes / /sems dang sems las byung ba yin/ /mtshungs ldan ma gtogs gzhan de bzhin/ /rkyen ni bzhi po dag tu gsungs/ /rgyu zhes bya ba rgyu lnga yin/ /sems dang sems byung skyes pa rnams/ /tha ma min mtshungs de ma thag /dmigs pa chos rnams thams cad do/ /byed rgyu zhes bya bdag por bshad/ /rgyu gnyis po dag 'gag pa la / /bya ba byed do gsum po ni/ /skye la'o de las gzhan pa yi/ /rkyen dag de las bzlog pa yin/ /bzhi yis sems dang sems byung rnams/ /gsum gyis snyoms par 'jug pa gnyis/ /gzhan ni gnyis po dag las skye / /dbang phyug sogs min rim sogs phyir/ /de'i rgyu 'byung ba rnam pa gnyis/ /'byung las gyur pa'i rnam pa lnga/ /'byung gyur rnam gsum phan tshun du/ /'byung ba rnams kyi de rnam gcig /'dod yid dge dang mi dge dang / /bsgribs pa dang ni ma bsgribs pa/ /gzugs dang gzugs med pa dag na/ /mi dge las gzhan zag med gnyis/ /'dod sems dge ba las sems dgu/ / de ni brgyad po kho na las/ /mi dge ba ni bcu dag las/ /de las bzhi ste bsgribs de bzhin/ /ma bsgribs pa ni lnga dag las/ /de las mjug thogs sems bdun no/ /gzugs na dge las bcu gcig go/ /de ni dgu yi mjug thogs su/ /bsgribs pa brgyad las de las drug / ma bsgribs pa ni gsum las so/ /de las drug ste gzugs med pa'ang / /de yi tshul lo dge ba las/ /sems dgu dag go de drug gi/ /bsgribs pa las bdun de de bzhin/ /slob pa bzhi las de las lnga/ /mi slob pa ni lnga las so/ /de las sems ni bzhi dag go/ /bcu gnyis de dag nyi shur yang / /gsum du skyes nas thob pa dang / /sbyor byung dge rnam gnyis phye nas/ /rnam smin skyes dang spyod lam pa/ /bzo yi gnas dang sprul pa dang / /'dod na lung bstan min rnam bzhir/ /gzugs na bzo ma gtogs pa'o/ /khams gsum pa yi nyon mongs can/ /drug dang drug dang gnyis rnyed do/ /gzugs skyes dge la gsum dag go/ /slob pa la bzhi lhag la de/ /chos mngon pa'i mdzod kyi tshig le'ur byas pa las/ /dbang po bstan pa zhes bya ba ste gnas gnyis pa'o// // dmyal ba yi dags dud 'gro dang / /mi rnams dang ni lha drug dag /'dod pa'i khams yin dmyal ba dang / /gling dbye ba las de nyi shu/ /gong ma'i gnas dag bcu bdun ni/ /gzugs khams yin der so so yi/ /bsam gtan sa ni gsum pa yin/ / bzhi pa sa ni brgyad pa yin/ /gzugs med khams na gnas med do/ /skye ba las ni rnam pa bzhi/ /der ni ris dang srog la yang / /sems kyi rgyud ni rten pa yin/ /der ni dmyal sogs 'gro ba lnga/ /rang gi ming gis bstan de dag /nyon mongs can min lung bstan min/ /sems can zhes bya bar srid min/ /lus dang 'du shes tha dad dang / /lus tha dad cing 'du shes gcig /bzlog dang lus dang 'du shes gcig /gzugs can ma yin gsum po dag /rnam shes gnas pa bdun lhag ma/ /de 'joms byed ldan srid rtse dang / /'du shes med pa'i sems can rnams/ /sems can gyi ni gnas dgur bshad/ /mi 'dod bzhin gnas phyir gzhan min/ /gnas pa dag ni yang bzhi ste/ /zag dang bcas pa'i phung po bzhi/ /rang gi sa pa nyid rnam shes/ /'ba' zhig gnas par ma bshad do/ /bsdu na mu ni bzhi yin no/ /der ni sgo nga las skyes sogs/ /sems can skye gnas bzhi dag tu/ /mi dang dud 'gro rnam pa bzhi/ /dmyal ba rnams dang lha rnams dang / /srid pa bar ma rdzus te skye/ /yi dags mngal nas skye ba'ang yin/ /'dir gang 'chi dang skye ba yi/ /srid pa'i bar du 'byung ba'o/ /bgrod pa'i yul du ma phyin phyir/ /srid pa bar ma byung ba min/ /'bru yi rgyun dang chos mthun phyir/ /srid pa chad las byung ba min/ /gzugs brnyan ma grub phyir pa dang / /mi 'dra'i phyir na dpe ma yin/ /gcig na lhan cig gnyis med phyir/ /rgyun min phyir gnyis las byung phyir/ /mgur nas gsungs phyir yod dri za/ /lngar gsungs 'gro mdo las kyang grub/ /de ni 'phen pa gcig pa'i phyir/ /sngon dus srid 'byung sha tshugs can/ /de ni 'chi ba'i sngon rol te/ /skye ba'i skad cig phan chad do/ /rigs mthun lha mig dag pas mthong / /las kyi rdzu 'phrul shugs dang ldan/ /dbang po kun tshang thogs med ldan/ /mi zlog de ni dri za'o/ /blo ni phyin ci log gyur pas/ /rtse dgas 'gro ba'i yul du 'gro/ /dri dang gnas la mngon 'dod gzhan/ / dmyal ba yi ni spyi'u tshugs yin/ /gcig ni shes bzhin du 'jug go/ /gzhan ni gnas pa yang gzhan ni/ /'byung ba 'ang gzhan ni thams cad rmongs/ /sgo nga las skyes rtag tu'o/ /mngal du 'jug pa gsum dag ste/ /'khor los sgyur dang rang byung gnyis/ / las sam ye shes sam gnyis ka /rgya che'i phyir na go rims bzhin/ /bdag med phung po tsam nyid do/ /nyon mongs las kyis mngon 'dus byas/ /srid pa bar ma'i rgyun gyis na/ /mar me bzhin du mngal du 'gro/ /ji ltar 'phangs bzhin rim gyis rgyun/ /skyes nas las dang nyon mongs kyis/ /'jig rten pha rol dag tu 'gro/ /srid pa'i 'khor lo thog ma med/ /de ni rten cing 'brel 'byung ba'i/ /yan lag bcu gnyis cha gsum mo/ /sngon dang phyi mthar gnyis gnyis dang / /bar du brgyad yongs rdzogs ldan la/ /ma rig nyon mongs mngon gnas skabs/ /'du byed dag ni sngon las kyi/ /rnam shes mtshams sbyor phung po yin/ /ming dang gzugs ni de phan chad/ /skye mched drug dod tshun chad do/ /de ni gsum 'dus tshun chad do/ /reg pa bde sdug la sogs kyi/ /rgyu shes nus pa tshun chad do/ /tshor 'khrig tshun chad sred pa ni/ /longs spyod 'khrig pa chags can gyi/ /nye bar len pa longs spyod rnams/ /thob par bya phyir yongs rgyug pa'i/ /de srid 'bras bu 'byung 'gyur ba'i/ /las byed de ni srid pa yin/ /nying mtshams sbyor ba skye ba yin/ /tshor ba'i bar ni rga shi yin/ /'di ni gnas skabs par 'dod lo / /gtso bo'i phyir na yan lag bsgrags/ /sngon dang phyi mtha' bar dag la/ /rmongs pa rnam par bzlog phyir ro/ /nyon mongs gsum mo las gnyis so/ /gzhi bdun de bzhin 'bras bu yin/ /gnyis kyi rgyu 'bras mdor bsdus pa/ /bar ma'i rjes su dpag pa las/ /nyon mongs pa las nyon mongs dang / /bya ba nyid do de las gzhi/ /de las gzhi dang nyon mongs skye/ /'di ni srid pa'i yan lag lugs/ /'dir ni 'byung ba rgyu yin te/ /byung ba 'bras bu yin par 'dod/ /rig pa'i mi mthun phyogs chos gzhan/ /ma rig mi mdza' rdzun sogs bzhin/ /kun sbyor sogs tshig phyir gal te/ /shes rab ngan pa'o min lta phyir/ /lta ba de dang mtshungs ldan phyir/ /shes rab nyon mongs bstan phyir ro/ /ming ni gzugs can min phung po/ / reg drug 'dus te byung ba yin/ /lnga ni thogs pa'i reg pa yin/ /drug pa bla dgas tshig ces bya/ /rig dang ma rig dang gzhan reg /dri med nyon mongs can lhag ma/ /gnod sems rjes su chags pa'i reg /bde ba myong 'gyur la sogs gsum/ /de las byung ba'i tshor ba drug / lnga ni lus kyi'o sems kyi gzhan/ /de yid nye bar rgyu ba las/ /rnam pa dag ni yang bco brgyad/ /'dod na thams cad rang dmigs can/ /spyod yul gzugs can bcu gnyis so/ /gong ma gsum gyi bsam gtan ni/ /gnyis na bcu gnyis 'dod 'gro rnams/ / rang la dmigs brgyad gzugs med pa/ /gnyis kyi'o bsam gtan gnyis na drug /drug gi 'dod pa'o rang ni bzhi'i/ /gong ma gcig gi dmigs pa yin/ /gzugs med nye bar bsdogs na bzhi/ /gzugs 'gro gong mar 'gro ba gcig /dngos gzhi na gcig rang yul can/ /bco brgyad thams cad zag dang bcas/ /bshad dang 'chad par 'gyur ba gzhan/ /'dir ni nyon mongs sa bon bzhin/ /klu bzhin rtswa bzhin ljon shing bzhin/ /de bzhin shun pa bzhin du 'dod/ /las ni shun bcas 'bras dang 'dra/ /de bzhin sman dang me tog bzhin/ /gzhi ni bza' btung grub pa bzhin/ /srid pa bzhi po de dag las/ /skye ba'i srid pa nyon mongs can/ /rang gi sa pa'i nyon mongs kun/ /gzhan rnam gsum po gzugs med gsum/ /'gro ba zas kyis gnas pa yin/ /kham gyi zas ni 'dod pa na/ /skye mched gsum gyi bdag nyid do/ /gzugs kyi skye mched ma yin des/ /rang dbang grol la mi phan phyir/ /reg dang sems pa rnam shes ni/ /zag bcas zas yin gsum dag na/ /yid las byung dang srid tshol dang / /dri za srid pa bar ma dang / /'grub pa'o 'di la gnas dang ni/ / rten pa rgyas pa'i don du gnyis/ /srid gzhan 'phen dang 'grub pa yi/ /don du gnyis te go rims bzhin/ /'chad dang mtshams sbyor 'dod chags 'bral/ /nyams dang 'chi 'pho skye ba rnams/ /yid kyi rnam shes kho nar 'dod/ /'chi 'pho skye ba btang snyoms la/ / rtse gcig sems med la de med/ /mya ngan 'da' lung bstan min gnyis/ /'og mi lhar 'gro mi skye rnams/ /rim gyis 'chi na rkang pa dang / /lte ba snying gar yid 'chi 'pho/ /gnad gcod pa ni chu sogs kyis/ /'phags dang mtshams med byed pa dag/ /yang dag log pa nyid du nges/ /de la snod kyi 'jig rten gyi/ /gnas par 'dod pa'i 'og dag gi/ /rlung gi dkyil 'khor rngams su ni/ /sa ya drug 'bum grangs med do/ /chu rngams 'bum phrag bcu gcig dang / /stong phrag dag ni nyi shu'o/ /phyis ni rngams su 'bum phrag brgyad/ /lhag ma dag ni gser du 'gyur/ /chu dang gser gyi dkyil 'khor gyi/ /thad kar 'bum phrag bcu gnyis dang / /stong phrag gsum dang brgya phrag ni/ /phyed dang lnga rnams kho na'o/ /khor yug tu ni sum 'gyur ro/ /de la lhun po gnya' shing 'dzin/ /gshol mda' 'dzin dang seng ldeng can/ /de bzhin blta na sdug ri dang / /rta rna dang ni rnam 'dud dang / /mu khyud 'dzin ri'o de nas ni/ /gling rnams yin no de dag gi/ /phyi rol na ni khor yug ste/ /bdun ni gser yin de lcags so/ /lhun po rin chen bzhi'i rang bzhin/ /chu yi nang du brgyad khri dag / nub bo de bzhin steng du yang / /dpag tshad dag ni brgyad khri'o/ /brgyad po 'phang du phyed phyed dbri/ /de dag rngams su'ang 'phang dang mnyam/ /de dag bar bdun rol mtsho yin/ /dang po stong phrag brgyad cu'o/ /de ni nang gi rgya mtsho yin/ /de yi ngos la sum 'gyur ro/ /rol mtsho gzhan ni phyed phyed do / /lhag ma phyi yi mtsho chen yin/ /'bum phrag gsum dang stong phrag ni/ /nyi shu gnyis so de la ni/ /'dzam bu'i gling ste ngos gsum la/ /stong phrag gnyis so shing rta'i dbyibs/ /gcig la dpag tshad phyed dang bzhi/ /shar gyi lus 'phags zla kham 'dra/ /ngos gsum 'di dang 'dra gcig la/ /dpag tshad sum brgya lnga bcu'o/ /ba lang spyod gling zlum po ste/ /stong phrag phyed dang brgyad yin no/ /de'i dbus stong phrag phyed dang gsum/ /sgra mi snyan brgyad gru bzhir mnyam/ / de yi bar gyi gling brgyad ni/ /lus dang lus 'phags sgra mi snyan/ /sgra mi snyan gyi zla dang ni/ /rnga yab dang ni rnga yab gzhan/ /g.yo ldan dang ni lam mchog 'gro/ /'di nas byang du ri nag po/ /dgu 'das gangs ri'o de nas ni/ /spos ngad ldang ba'i tshu rol na/ /chu zheng lnga bcu yod pa'i mtsho/ /'di 'og stong phrag nyi shu na/ /mnar med pa'o de tsam mo/ /de yi steng na dmyal ba bdun/ /brgyad po kun las lhag bcu drug /de dag gi ni ngos bzhi na/ /me ma mur dang ro myags dang / /spu gri'i lam sogs chu bo yin/ /chu bur can sogs grang brgyad gzhan/ /nyi zla lhun po'i phyed na'o/ /dpag tshad lnga bcu gcig dang bcas/ /nam phyed nyi ma nub pa dang / /nyi ma phyed dang 'char dus gcig /dbyar gyi zla ba gnyis pa yi/ /tha ma'i tshes dgu nas mtshan ring / /dgun rnams kyi ni bzhi pa la/ /thung ngur 'gyur ro nyin mo bzlog / nyin mtshan ring ba thang cig go/ /nyi ma lho byang 'gro tshe'o/ /nyi ma dang ni nye ba las/ /rang gi grib mas 'grib par snang / /'di la bang rim bzhi yod de/ /bar gyi thag ni stong phrag bcu/ /stong phrag dag ni bcu drug dang / /brgyad dang bzhi dang gnyis 'phags so/ /de la lag na gzhong thogs dang / /phreng thogs dang ni rtag myos dang / /rgyal chen bzhi pa'i lha rnams gnas/ /ri ni bdun po dag la yang / /lhun po'i rtse na sum cu gsum/ /de yi ngos la brgyad khri'o/ /phyogs mtshams brtsegs pa bzhi la ni/ /lag na rdo rje gnas dbus na/ /grong khyer blta na sdug ces pa/ /ngos la nyis stong lnga brgya pa/ /dpag tshad phyed dang gnyis gser gyi/ /rang bzhin gzhi bkra mnyen pa yod/ /de na rnam par rgyal byed de/ /ngos la nyis brgya lnga bcu'o/ /phyi rol shing rta sna tshogs dang / /rtsub 'gyur 'dres tshal dga' bas brgyan/ /de dag gi ni phyogs bzhi na/ /nyi shus bcad na sa gzhi bzang / /byang shar mtshams na yongs 'du ste/ /lho nub mtshams na chos bzang ngo / /de steng lha rnams gzhal med khang / /'dod pa spyod pa drug yin no/ /gnyis gnyis 'khyud dang lag bcangs dang / /dgod dang bltas pas 'khrig pa yin/ /byis pa lo lnga lon pa nas/ /lo bcu lon pa lta bu'i bar/ /de dag tu skye gzugs can rnams/ /kun rdzogs gos dang bcas pa nyid/ /'dod pa skye ba gsum po ni/ /'dod pa'i lha dang mir bcas rnams/ /bde ba skye ba gsum po ni/ /bsam gtan gsum la sa dgu yin/ gnas nas gnas 'og ji srid pa/ /de nas de yi gong de srid/ /rdzu 'phrul gzhan rten ma gtogs pa/ /de dag gong ma mthong ba med/ /gling bzhi pa dang nyi zla dang / /ri rab dang ni 'dod lha dang / /tshangs pa'i 'jig rten stong la ni/ /stong ni spyi phud yin par 'dod/ /de stong la ni stong gnyis pa/ /bar ma'i 'jig rten khams yin no/ /de stong la ni stong gsum mo/ /mnyam du 'jig cing 'byung ba yin/ /'dzam bu gling pa rnams kyi tshad/ /khru bzhi pa dang phyed dang bzhi/ /shar dang ba lang spyod dang ni/ /byang zhes bya ba nyis 'gyur bskyed/ /'dod dang ldan pa'i lha yi lus/ /bzhi cha nas ni rgyang grags dag /phyed dang gnyis kyi bar du bskyed/ /gzugs can dang po dpag tshad phyed/ /de yi gong ma phyed phyed bskyed/ /'od chung rnams kyi ltag yan chad/ /lus ni nyis 'gyur nyis 'gyur te/ /sprin med dpag tshad gsum dor ro/ /sgra mi snyan na tshe stong ste/ /gnyis na phyed phyed spangs pa'o/ /'di na ma nges tha mar ni/ /lo bcu dang po dpag tu med/ /mi rnams kyi lo lnga bcu la/ /'dod pa dag gi lha rnams las/ /'og ma dag gi nyin zhag gcig /des na tshe lo lnga brgya'o/ /gong ma gnyis ka nyis 'gyur ro/ /gzugs can nyin mtshan med tshe ni/ /rang lus gzhal ba'i bskal pa yis/ /gzugs med bskal pa stong phrag ni/ /nyi shu lhag pas lhag pa yin/ /'od chung nas bzung bskal chen te/ /de yi 'og ma phyed yin no/ /yang sos la sogs drug rim bzhin/ /'dod lha'i tshe dang nyin zhag mnyam/ /des na de dag rnams kyi tshe/ /'dod pa'i lha dang 'dra ba yin/ /rab tu tsha phyed mnar med ni/ /bar gyi bskal pa'o dud 'gro rnams/ /mchog ring bskal pa'o yi dags rnams/ /zla ba nyin zhag gi lnga brgya/ /til sbyangs nang nas lo brgya zhing / /til gcig phyung bas zad gyur pa/ /chu bur can gyi tshe yin te/ /gzhan gyi tshe ni nyi shus bsgyur/ /sgra mi snyan ma gtogs par 'chi/ /gzugs ming dus mtha' rdul yig dang / /skad cig phra rab rdul dang ni/ /rdul phran dang ni de bzhin du/ /lcags chu ri bong lug dang glang / /nyi zer rdul dang sro ma dang / /de las byung dang de bzhin du/ /sor tshigs zhes bya gong bdun bsgyur / /sor mo nyi shu bzhi la khru/ /khru bzhi la ni gzhu gang ngo / de dag lnga brgya rnams la ni/ /rgyang grags de la dgon par 'dod/ /de brgyad dpag tshad ces bya'o/ /skad cig ma brgya nyi shu la/ /de yi skad cig de dag kyang / /drug cu la ni thang cig go/ /yud tsam nyin zhag zla gsum ni/ /gong nas gong du sum cu 'gyur/ /zhag mi thub dang bcas pa yi / /zla ba bcu gnyis la lo gcig /bskal pa rnam pa mang bshad pa/ /'jig pa'i bskal pa dmyal ba yi/ /srid pa med nas snod zad pa/ /'chags pa dang po'i rlung nas ni/ /dmyal ba'i srid pa'i bar du'o/ /bar gyi bskal pa dpag med nas/ /tshe lo bcu pa'i bar du'o/ /de nas yar skye mar 'bri ba'i/ /bskal pa gzhan ni bco brgyad dang / /yar skye ba ni gcig yin te/ /de dag tshe ni brgyad khri'i bar/ /de ltar 'jig rten chags pa 'di/ /bar gyi bskal pa nyi shur gnas/ /'chags pa dang ni 'jig pa dang / /zhig nas 'dug pa dag mnyam mo/ /de dag brgyad cu la bskal chen/ /de grangs med gsum la sangs rgyas/ /'byung ngo mar ni 'grib pa yi/ /brgya yi bar la de dag 'byung / /rang sangs rgyas rnams gnyis ka la/ /bse ru bskal pa brgya yi rgyus/ /'khor los sgyur ba 'byung ba ni/ /stong phrag brgyad cu las mi 'phyi / /gser dngul zangs lcags 'khor lo can/ /de dag gling gcig gling gnyis dang / /gsum dang bzhi las mas rim bzhin/ /lhan cig gnyis min sangs rgyas bzhin/ /phas bsu rang 'gro g.yul bshams dang / /mtshon brtsams pas rgyal gnod pa med/ /thub mtshan yul na gnas pa dang / /gsal la rdzogs pas 'phags pa yin/ /sngar byung sems can gzugs can bzhin/ /de nas rim gyis ro la chags/ / le los sog 'jog byas nas ni/ /'dzin bcas rnams kyis zhing dpon bstabs/ /de nas las kyi lam lhag pas/ /tshe thung lo ni bcu yin no/ /bskal pa mtshon dang nad dang ni/ /mu ge dag gis tshar phyin to/ /zhag rnams dang ni zla ba dang / /lo bdun dag tu go rims bzhin/ /me dang chu dang rlung dag gis/ /'jig pa dag ni yang gsum yin/ /bsam gtan gnyis sogs gsum po ni/ /de dag gi rtse go rims bzhin/ /de yi skyon dang chos mthun phyir/ /bzhi pa na med mi g.yo'i phyir/ /mi rtag de yi gzhal med khang / / sems can bcas te 'byung 'jig phyir/ /me yis bdun no chu yis gcig /de ltar chu bdun thal nas kyang / /me yis bdun no de nas ni / /mjug tu rlung gis 'jig pa yin/ /chos mngon pa'i mdzod kyi tshig le'ur byas pa las/ /'jig rten bstan pa zhes bya ba ste gnas gsum pa'o/ / //las las 'jig rten sna tshogs skyes/ /de ni sems pa dang des byas/ /sems pa yid kyi las yin no/ /des bskyed lus dang ngag gi las/ /de dag rnam rig rnam rig min/ /lus rnam rig byed dbyibs su 'dod/ /'gro min gang phyir 'dus byas ni/ /skad cig ma yin 'jig phyir ro/ /rgyu med pa las 'ga' mi 'byung / /rgyu yang 'jig pa por 'gyur ro/ /gnyis gzung 'gyur te rdul la med/ /ngag rnams rig byed ni ngag sgra/ /rnam gsum dri med gzugs gsungs dang / /'phel dang ma byas lam sogs phyir/ /'dod gtogs rnam rig min skad cig /phyin chad 'das pa'i 'byung las skye/ /zag bcas lus dang ngag gi las/ /rang gi 'byung ba dag rgyur byas/ /zag med gang du skyes pa'i yin/ /rnam rig byed min ma zin dang / /rgyu mthun las byung sems can ston/ /rgyu mthun zin pa'i 'byung las skye/ /ting 'dzin skyes 'byung ma zin dang / /rgyas byung tha dad min las skyes / /rnam rig min lung bstan min med/ /gzhan ni rnam gsum mi dge ni/ /'dod na'o gzugs na'ang rnam rig min/ /rnam rig dpyod dang bcas dag na/ /'dod pa na yang bsgribs pa med/ /gang phyir kun slong med thar pa/ /dam pa'i don du dge rtsa ba/ /ngo tsha khrel yod bdag nyid kyis/ /de dag dang ldan mtshungs ldan gyis/ /bya ba la sogs kun slong bas/ /bzlog pa mi dge don dam par/ / lung ma bstan pa bstan pa dag /kun slong rnam gnyis rgyu dang ni/ /de yi dus kyi slong zhes bya/ /gnyis las dang po rab 'jug byed/ /gnyis pa rjes su 'jug byed yin/ /mthong bas spang bya'i rnam shes ni/ /rab tu 'jug byed yin yid ni/ /bsgom pas spang bya gnyis ka yin/ /lnga ni rjes su 'jug byed yin/ /rab tu 'jug byed dge sogs las/ /rjes 'jug byed kyang rnam gsum 'gyur/ /thub pa'i 'dra ba'am de dge ba/ /rnam smin las skyes gnyis ka min/ /rnam rig min rnam gsum shes bya/ /sdom dang sdom pa min dang gzhan/ /sdom pa so sor thar zhes bya/ /de bzhin zag med bsam gtan skyes/ /so sor thar zhes bya rnam brgyad/ /rdzas su rnam pa bzhi yin no/ /mtshan las ming ni 'pho ba'i phyir/ /tha dad de dag 'gal ba med/ /spang bya lnga brgyad bcu dang ni/ /thams cad spong ba mnos pa las/ /dge bsnyen dang ni bsnyen gnas dang / /dge tshul ched dang dge slong nyid/ /tshul khrims dang ni legs spyad dang / /las dang sdom pa zhes bya'o/ /dang po'i rnam rig rnam rig min/ /so sor thar dang bya ba'i lam/ /so sor thar dang ldan pa brgyad/ / bsam gtan skyes dang de ldan pa/ /zag med 'phags pa'i sems can dang / /tha ma gnyis ni sems rjes 'brang / /bar chad med lam skyes de gnyis/ /mi lcogs med la spong zhes bya/ /shes bzhin dang ni dran dag gnyis/ /yid dang dbang po'i sdom pa yin/ /so sor thar gnas ji srid du/ /ma btang bar dag da ltar gyi/ /rnam rig min ldan skad cig ma/ /dang po phyin chad 'das pa dang / /sdom min gnas pa'ang de dang 'dra/ /bsam gtan sdom dang ldan pa ni/ /rtag tu 'das dang ma 'ongs dang / /'phags ni dang po 'das dang min/ /mnyam gzhag 'phags lam gnas de gnyis/ /da ltar dang ldan bar gnas la/ /yod na dang po bar gyi dang / /phyin chad dus ni gnyis dang ngo / /sdom min gnas pa dge ba dang / /sdom la gnas pa mi dge ba'i/ /rnam rig min ldan ji srid du/ /rab dang nyon mongs shugs ldan par/ /rnam rig byed ni thams cad la/ /byed pa dag la da ltar ldan/ /ma btang bar du skad cig ma/ /phyin chad 'das ldan ma 'ongs med/ /bsgribs pa dang ni ma bsgribs pa/ /'das pa dag dang ldan pa'ang med/ /sdom pa min dang nyes spyad dang / /'chal pa'i tshul khrims las de'i lam/ /bar ma dor gnas sems zhan pas/ /byed na rnam rig nyid dang ldan/ /rnam rig btang dang ma skyes pa'i/ /'phags pa'i gang zag rnam rig min/ /bsam gtan las skyes bsam gtan gyi/ /sa nyid kyis 'thob zag med ni / /'phags des so sor thar zhes pa/ /gzhan gyi rnam rig byed stsogs kyis / /ji srid 'tsho dang nyin zhag tu/ /sdom pa yang dag blang bar bya/ /nyin zhag pa yi sdom min med/ /de de ltar nod med ces grag /dma' bar 'dug smras bzlas pa yis/ /mi brgyan nam ni nang par du/ /bsnyen gnas yan lag tshang bar ni/ /nang par gzhan las nod par bya/ /tshul khrims yan lag bag yod pa'i/ /yan lag brtul zhugs yan lag ste/ /bzhi gcig de bzhin gsum rim bzhin/ /de yis dran nyams dregs par 'gyur/ /gzhan la'ang bsnyen gnas yod mod kyi/ /skyabs su ma song ba la med/ /dge bsnyen nyid du khas blangs pas/ /sdom pa bstan pa dge slong bzhin/ /gal te thams cad bsdams yin na/ /sna gcig spyod sogs ji lta bu/ /de srung ba la gsungs zhes grag / chung ngu la sogs yid ji bzhin/ /gang zhig gsum la skyabs 'gro de/ /sangs rgyas dge 'dun byed pa'i chos/ /mi slob pa dang gnyis ka dang / /mya ngan 'das la skyabs su 'gro/ /log g.yem shin tu smad phyir dang / /sla phyir mi byed thob phyir ro/ /sdom pa ji ltar khas blangs bzhin/ /'thob kyi rgyud las ma yin no/ /bslab pa thams cad 'das gyur na/ /rdzun du thal bar 'gyur ba'i phyir/ /bcas pa'i kha na ma tho ba/ /myos 'gyur las gzhan bsrung phyir ro/ /'dod gtogs thams cad gnyis ka dang / /da ltar dag las 'thob par 'gyur/ /bsam gtan zag med sdom pa ni/ /dngos dang dus ni thams cad las/ /sdom pa sems can thams cad las/ /yan lag rgyu la dbye ba yod/ /sdom pa min pa thams cad dang / /yan lag kun las rgyus min no/ /sdom pa min pa bya ba'am/ /khas len pa las 'thob par 'gyur/ /lhag ma'i rnam rig min zhing dang / /len dang gus par byed pas 'thob/ /bslab pa phul dang shi 'phos dang / /mtshan gnyis dag ni byung ba dang / /rtsa ba chad dam mtshan 'das las/ /so sor thar pa'i 'dul ba gtong / /kha cig ltung bar 'gyur las smra/ /gzhan dag dam chos nub pa las/ /kha che rnams ni byung ba la/ /bu lon nor bzhin gnyis su 'dod/ /bsam gtan gtogs pa'i dge ba ni/ /sa 'phos nyams pa dag gis gtong / /de bzhin gzugs med gtogs 'phags pa/ /'bras bu thob sbyangs nyams pa las/ /sdom min sdom pa thob pa dang / /shi dang mtshan gnyis byung ba las/ /bar ma shugs blangs bya ba dang / /don tshe rtsa ba chad pa las/ /'dod gtogs dge ba gzugs min ni/ /rtsa chad gong du skyes pa las/ /nyon mongs pa can gzugs min ni/ / gnyen po skyes pas rnam nyams 'gyur/ /za ma ma ning sgra mi snyan/ /mtshan gnyis ma gtogs mi rnams la/ /sdom min sdom pa'ang de bzhin no / /lha la'ang mi rnams la gsum mo / /'dod dang gzugs skyes lha rnams la/ /bsam gtan skyes yod zag med ni/ /bsam gtan khyad par 'du shes med/ /sems can ma gtogs gzugs med na'ang / /las bde mi bde dang gzhan ni/ /dge dang mi dge dang gzhan yin/ /bsod nams bsod nams min mi g.yo/ /bde ba myong 'gyur la sogs gsum/ /bsod nams 'dod khams dge ba'i las/ /mi g.yo gong ma las skyes pa'i/ /gang phyir sa ni de dag tu/ /las rnams smin phyir mi g.yo'i phyir/ /bsam gtan gsum pa'i bar dge ba/ /bde ba myong 'gyur de yan chad/ /sdug min bde min myong 'gyur ba/ /sdug bsngal myong 'gyur 'di'i mi dge/ / 'og na'ang bar ma yod do zhes/ /kha cig zer te gang gi phyir/ /bsam gtan khyad par rnam smin las/ /snga phyi med gsum smin 'dod phyir/ /ngo bo nyid dang mtshungs ldan dang / /dmigs pa dang ni rnam smin dang / /mngon sum du ni gyur pa las/ /myong 'gyur rnam pa lnga yin no/ /de yang nges dang ma nges dang / /mthong ba'i chos la sogs pa la/ /myong 'gyur phyir na nges rnam gsum/ /kha cig las rnam lnga zhes zer/ /gzhan dag mu ni bzhi zhes zer/ /gsum gyis rigs ni 'phen par byed/ /thams cad na ni 'phen pa bzhi/ /dmyal ba na ni dge ba'i gsum/ /gang las 'dod chags bral brten pa'i/ /byis pa der skyes myong mi byed/ /'phags pa gzhan du'ang myong mi byed/ /'dod rtse'i mi brtan pa yang min/ /srid pa bar ma 'dod khams su/ /'phen pa rnam pa nyi shu gnyis/ /de ni mthong chos 'bras bu yin/ /de ni rigs gcig kho na yin/ /nyon mongs rab dang drag po dang / /yon tan zhing dang rgyun chags su/ /byas pa gang zhig yin pa dang / /pha ma gsod gang de nges so/ /mthong chos 'bras bu can gyi las/ /zhing dang bsam pa'i khyad par las/ /sa de'i 'dod chags gtan bral phyir/ /rnam smin nges pa gang yin pa'o/ /gang dag 'gog byams nyon mongs med/ /mthong dang dgra bcom 'bras langs pa/ /de la phan gnod byas pa yi/ /'bras bu 'phral du myong bar 'gyur/ /rnam par rtog pa med pa yi/ / dge ba'i las kyi rnam smin ni/ /sems kyi tshor ba kho nar 'dod/ /mi dge ba'i ni lus kyi yin/ /g.yengs pa'i sems ni yid sems la / /de ni las kyi rnam smin skyes/ /skrag gnod ma mnyam mya ngan gyis/ /sgra mi snyan min 'dod ldan rnams/ /yon skyon snyigs mar gsungs pa ni/ /g.yo dang zhe sdang 'dod chags skyes/ /dkar nag la sogs bye brag gis/ /las ni rnam pa bzhi yin no/ /mi dge gzugs dang 'dod gtogs pa'i/ /dge ba nyid ni rim bzhin du/ /gnag dang dkar dang gnyis ka'i las/ /de zad byed pa zag med yin/ /chos bzod 'dod chags bral ba yi / /bar chad med lam brgyad kyi gang / /sems pa rnam pa bcu gnyis de/ /nag po zad par byed pa'i las/ /dgu pa'i sems pa gang yin pa/ /de ni dkar nag zad byed yin/ /dkar po bsam gtan chags bral ba'i/ /bar chad med lam skyes tha mas/ /gzhan ni dmyal ba myong 'gyur dang / /'dod gzhan myong 'gyur gnyis su rig /gzhan ni mthong bas spang bya gnag /'dod pa las skyes gzhan dkar gnag /mi slob lus ngag las yid nyid/ /thub pa'i gsum ste go rims bzhin/ /legs spyad gsum po thams cad ni/ /gtsang byed rnam pa gsum yin no/ /lus kyi la sogs mi dge ba/ /nyes par spyad pa gsum du 'dod/ /brnab sems la sogs las min yang / /yid kyi nyes spyad rnam gsum mo/ /bzlog pa legs par spyad pa yin/ /de las che long bsdus nas ni/ /dge dang mi dge ci rigs par/ /las kyi lam ni bcur gsungs so/ /mi dge drug ni rnam rig min/ /gcig rnam gnyis so de dag kyang / /byed na dge ba bdun rnam gyis/ /ting 'dzin las skyes rnam rig min / /nyer bsdogs rnams ni rnam rig byed/ /rnam rig byed min 'gyur ba'am/ /ma yin bzlog pa mjug yin no/ /sbyor ba rtsa ba gsum las skyes/ /de yi mjug thogs las byung phyir/ /brnab sems sogs rtsa gsum las skyes/ /dge ba sbyor dang mjug bcas rnams/ /chags sdang gti mug med las skyes / /gsod dang gnod sems tshig rtsub po/ /zhe sdang gis ni mthar phyin byed/ /log g.yem brnab sems ma byin len/ /chags pa yis ni rdzogs par byed/ /log par lta ba gti mug gis/ /lhag ma gsum gyis rdzogs par 'dod/ /gzhi ni sems can longs spyod dang / /ming dang gzugs ni ming yin no/ /snga dang mnyam du shi ba la/ /dngos med lus gzhan skyes phyir ro/ /dmag la sogs par don gcig phyir/ /thams cad byed pa po bzhin ldan/ /srog gcod pa ni bsams bzhin du/ /ma nor bar ni gzhan gsad pa'o/ /ma byin len pa gzhan gyi nor/ /mthu dang 'jab bus bdag gir byed/ /bgrod min 'gro ba 'dod pa yis/ /log par g.yem pa rnam pa bzhi/ /rdzun tshig 'du shes gzhan sgyur ba'i/ /tshig don mngon par go ba'o/ /mig rna yid kyi rnam shes dang / /gsum gyis nyams su myong gang de/ /mthong thos rnam par shes pa dang / /rtogs pa yin te rim bzhin bshad/ /phra ma pha rol dbye ba'i phyir/ /nyon mongs can gyi sems kyi tshig/ /tshig rtsub po ni mi snyan pa/ /nyon mongs can kun kyal pa nyid/ /gzhan ni de las gzhan nyon mongs/ /kha gsag glu dang zlos gar bzhin/ /bstan bcos ngan bzhin brnab sems ni/ /log pas gzhan gyi nor la chags/ /gnod sems sems can la sdang ba/ /dge dang mi dge med lta ba/ /log par lta ba yin 'di la/ /gsum lam bdun ni las kyang yin/ / med par lta bas rtsa ba gcod/ /'dod gtogs skyes nas thob pa rnams/ /rgyu dang 'bras la skur 'debs pas/ /kun gyis rim gyis mi'i nang du/ /skyes pa bud med kyis gcod do/ /lta spyad de ni mi ldan pa'o/ /mtshams ni the tshom yod lta bas/ mtshams med byed pa'i 'di la min/ /mi dge brgyad kyi bar dag dang / /sems pa cig car lhan cig 'byung / /dge ba bcu yi bar dag dang / /gcig dang brgyad dang lnga dang min/ /dmyal ba na ni kyal pa dang / /tshig rtsub gnod sems rnam gnyis so/ /brnab sems log lta ldan pas so/ /sgra mi snyan na gsum yod de / /de na bdun pa dngos su yang / /'dod pa gzhan na mi dge bcu/ /dge ba gsum ni thams cad na/ /rnyed dang mngon du gyur sgo nas/ /gzugs med 'du shes med sems can/ /rnyed pas bdun yod lhag byas na/ /mngon du gyur pa'i sgo nas kyang / /dmyal bcas sgra mi snyan ma gtogs/ /thams cad bdag po rgyu mthun dang / /rnam smin 'bras bu 'byin par 'dod/ /sdug bsngal phyir dang bsad phyir dang / /gzi byin med phyir 'bras rnam gsum/ /lus dang ngag las chags las skyes/ /log 'tsho sbyang dka'i phyir logs shig /bstan to gal te yo byad la/ /chags bslang mdo dang 'gal phyir min/ /drir bcas spong ba'i lam dag gi / /las ni lnga yi 'bras bur bcas/ /dri med bzhi yi zag bcas gzhan/ /dge dang mi dge gang yin pa'ang / /zag pa med pa lhag ma dang / /lung bstan min gang gsum gyis so/ /dge ba'i dge la sogs pa ni/ /bzhi dang gnyis dang de bzhin gsum/ /mi dge'i dge sogs gnyis dang ni/ /gsum dang bzhi ste rim pa bzhin/ /lung bstan min gyi dge la sogs/ /de dag gnyis dang gsum dang gsum/ /'das pa'i thams cad bzhi yin no/ /bar ma yi ni ma 'ongs pa'ang / /bar ma gnyis so ma skyes pa'i/ /'bras bu ma 'ongs gsum yin no/ /rang gi sa pa bzhi yin no/ /gzhan gyi sa pa gsum dang gnyis/ / slob pa'i slob la sogs pa gsum/ /mi slob las kyi 'bras bu ni/ /slob pa yi ni chos la sogs/ /gcig dang gsum dang gnyis yin no/ /de las gzhan pa'i 'bras bu ni/ /slob sogs gnyis dang gnyis dang lnga/ /mthong bas spang bya'i de la sogs/ /gsum dang bzhi dang gcig yin no/ /bsgom pas spang bar bya las kyi/ /de dag gnyis dang bzhi dang gsum/ /spang bya min pa'i de dag gcig /gnyis dang bzhi ste go rims bzhin/ /rigs min bskyed pa nyon mongs can/ /kha cig cho ga nyams pa'ang zhe'o / /gcig gis skye ba gcig 'phen to/ /yongs rdzogs byed pa du ma yin/ /sems med snyoms par 'jug pa dag /'phen byed ma yin thob pa'ang min/ /mtshams med pa yi las rnams dang / /nyon mongs shas chen ngan 'gro dang / /'du shes med pa'i sems can dang / / sgra mi snyan sgrib gsum du 'dod/ /mtshams med gling gsum dag na yod / /za ma sogs la mi 'dod do/ /phan dang ngo tsha chung ba'i phyir/ /lhag ma 'gro ba lnga dag na/ /dge 'dun dbyen ni mi 'phrod pa'i/ /rang bzhin ldan pa ma yin chos/ /nyon mongs can min lung bstan min/ /de dag dge 'dun yang dag ldan/ /de yi kha na ma tho rdzun/ /de dang 'byed po yang dag ldan/ /bskal par mnar med par smin 'gyur/ /lhag pas gnod pa lhag par 'gyur/ /dge slong lta spyad tshul ldan pas/ /'byed do gzhan du'o byis pa rnams/ / ston dang lam gzhan la bzod pa/ /bye ba'o de ni mi gnas so/ /de ni 'khor lo'i dbyen du 'dod/ /'dzam bu'i gling na'o dgu sogs kyi / /las kyi dbyen ni gling gsum na/ /de ni brgyad dag yan chad kyis/ /dang po mtha' skyon zung gcig gi/ /snga rol thub pa nongs pa dang / /mtshams ma bcad pa dag tu yang / /'khor lo'i dbyen ni mi 'byung ngo / /phan 'dogs pa dang yon tan zhing / /spangs dang med par byas phyir ro/ /mtshan ni gzhan du gyur kyang 'gyur/ /gang gi zla mtshan las byung ma / /sangs rgyas brdeg par sems la min/ /bsnun 'og dgra bcom pa la min/ /mtshams med sbyor ba byas pa la/ /'dod chags bral 'bras mi srid do/ /dge 'dun dbye phyir rdzun smra ba/ /kha na ma tho rab cher 'dod/ /'jig rten pa yi dge ba la/ /srid rtse'i sems pa 'bras rab che/ / ma dgra bcom ma sun byas dang / /byang chub sems dpa' nges gnas dang / /slob pa gsod dang dge 'dun gyi/ /'du ba'i sgo ni 'phrog pa dag /mtshams med pa dang cha 'dra ste/ /lnga pa mchod rten 'jig pa yin/ /bzod dang phyir mi 'ong dgra bcom/ /'thob la las gegs shin tu byed/ /gang nas byang chub sems dpa' yin/ /gang nas mtshan gyi las byed pa/ /bde 'gro rigs mthor skye dbang tshang / /phor 'gyur tshe rabs dran mi ldog /de ni 'dzam gling pho gyur nyid/ /mngon sum sangs rgyas la sems pa/ /bsams pa las byung bskal pa brgya/ /lus pa dag tu 'phen par byed/ /re re'ang bsod nams brgya las skye / /rnam gzigs mar me rin chen gtsug /grangs med gsum gyi tha mar byung / /dang po shAkya thub pa yin/ /kun la thams cad snying rje yis / /sbyin par byed pas sbyin pa rdzogs/ /chags bcas yan lag bcad kyang ni/ /mi 'khrugs bzod dang tshul khrims kyi/ /skar rgyal bstod pas brtson 'grus kyi/ /de ma thag la ting 'dzin blo'i/ /gsum po bsod nams bya ba dang / /de'i gzhi dper na las lam bzhin/ /gang gis sbyin byed de sbyin pa/ /mchod dang phan gdags 'dod pa yis/ /lus dang ngag las slong dang bcas/ /de 'bras longs spyod chen po can/ /bdag gzhan don phyir gnyis don phyir/ /gnyis ka'i don du min phyir sbyin/ /de yi khyad par sbyin bdag dang / /dngos dang zhing gi khyad par las/ /sbyin bdag khyad 'phags dad sogs kyis/ /gus la sogs pas sbyin par byed/ /de phyir bkur sti rgya chen dang / /dus dang bar chad med par rnyed/ /kha dog la sogs phun sum dngos/ /de las gzugs bzang grags ldan dang / /dga' dang shin tu gzhon sha dang / /dus su reg na bde lus 'gyur/ /'gro dang sdug bsngal phan 'dogs dang / /yon tan rnams kyis zhing khyad 'phags/ /mchog ni grol bas grol ba'am / /byang chub sems dpa' yis brgyad pa/ /'phags pa min yang pha ma dang / /nad pa dang ni chos smra dang / /skye mtha'i byang chub sems dpa' la/ /yon ni gzhal du med pa yin/ /mjug dang zhing dang gzhi dang ni/ /sbyor dang sems pa bsam pa ste/ /de dag chung dang che ba las/ /las kyang chung dang che ba nyid/ /bsams bzhin pa dang rdzogs pa dang / /mi 'gyod gnyen po med pa dang / /'khor dang rnam par smin pa las/ /bsags pa'i las shes bya ba yin/ /mchod rten la btang rgyus byung ba'i/ /bsod nams len med byams sogs bzhin/ /rgyu las 'bras bu mi 'khrul phyir/ /ngan pa'i zhing la'ang 'bras yid 'ong / /'chal pa'i tshul khrims mi dge'i gzugs/ /de spong tshul khrims rnam gnyis so/ /sangs rgyas kyis ni bcad pa yang / /rnam dag yon tan bzhi ldan no/ /'chal khrims de'i rgyus 'phen ma byung / /de gnyen po dang zhi la rten / /mnyam par bzhag pa'i dge ba ni/ /bsgom pa'o sems la sgo phyir ro/ /mtho ris don du tshul khrims dang / /'bral ba'i don du bsgom gtso'i phyir/ /bskal par mtho ris dga' gnas phyir/ /bzhi yi tshangs pa'i bsod nams yin/ /chos sbyin nyon mongs can min pas/ /mdo sogs yang dag ji bzhin ston/ /bsod nams mya ngan 'das pa dang / /nges 'byed cha mthun dge rnam gsum/ /rigs pas rab tu bcug pa'i las/ /rnam gsum kun slong bcas pa ni/ /yig 'bru brgya dang bgrang bcas pa'i/ /snyan ngag grangs ti go rims bzhin/ / bsgribs ngan kha na ma tho bcas/ /nyan mongs can chos dri med dge/ /gya nom 'dus byas dge bsten bya/ /thar pa bla na med pa yin/ /chos mngon pa'i mdzod kyi tshig le'ur byas pa las/ las bstan pa zhes bya ba ste gnas bzhi pa'o// //srid pa'i rtsa ba phra rgyas drug / 'dod chags de bzhin khong khro dang / nga rgyal ma rig lta ba dang / /the tshom yin te de drug kyang / /'dod chags dbye bas bdun du bshad/ /khams gnyis las skyes srid 'dod chags/ /kha ni nang du bltas phyir der/ /thar pa'i 'du shes bzlog phyir bshad/ /lta ba lnga ste 'jig tshogs dang / /log dang mthar 'dzin lta ba dang / /lta ba dang ni tshul khrims dang / /brtul zhugs mchog tu 'dzin dang bcu/ /de dag bcu dang bdun bdun brgyad/ /lta ba gsum gnyis ma gtogs pa/ /'dod na sdug bsngal la sogs pa/ / mthong bas rim bzhin spong bar byed/ /bzhi ni bsgom pas spang bya yin/ /khong khro ma gtogs de dag nyid/ /gzugs khams gzugs med de dang 'dra/ /de ltar dgu bcu brgyad du 'dod/ /srid rtse las skyes bzod pa yis/ /gzhom bya mthong bas spang bya nyid/ / lhag skyes mthong dang bsgom gnyis kyis/ /bzod pas gzhom min bsgom kho nas/ /bdag dang bdag gi rtag chad dang / /med dang dman la mchog lta dang / /rgyu min lam min der lta ba/ /de dag lta ba lnga yin no/ /dbang phyug sogs rgyur mngon zhen pa/ /rtag bdag phyin ci log pa yis/ /rab tu 'jug pas de phyir de/ /sdug bsngal mthong bas spang bya nyid/ /lta ba gsum las phyin ci log /bzhi tshan phyin ci log phyir dang / /nges rtog phyir dang sgro 'dogs phyir/ /sems dang 'du shes de'i dbang gis/ /nga rgyal bdun rnam dgu gsum po/ /mthong dang bsgom pas zad bya ba/ /bsgom pas spang bar bya ba ni/ /gsod stsogs kun nas dkris pa'o/ /de bzhin 'jig sred 'phags pa la/ /rnam sogs nga'o snyam mi 'byung / /lta bas rgyas par 'gyur phyir ro/ /mi dge'i 'gyod pa'ang ma yin no/ /sdug bsngal rgyu mthong spang bya ba/ /lta dang de bzhin the tshom dang / /gang de lhan cig ma 'dres pa'i/ /ma rig gang yin kun tu 'gro/ /de dag las dgu gong du dmigs/ /lta ba gnyis po ma gtogs so/ /de dag dang ni lhan cig gang / /'byung de'ang kun 'gro thob ma gtogs/ /'gog dang lam mthong spang bya ba/ /log lta the tshom de dag dang / /ldan dang 'ba' zhig ma rig dang / /drug ni zag med spyod yul can/ /rang gi sa pa'i 'gog pa dang / /lam ni phan tshun rgyu yin pas/ /sa drug sa dgu'i lam ni de'i/ /spyod yul can gyi yul yin no/ /'dod chags min te spang bya'i phyir/ /gnod mi byed phyir zhe sdang min/ /zhi dang dag dang mchog gyur phyir/ /nga rgyal ma yin mchog 'dzin min/ /phra rgyas kun tu 'gro rnams ni/ /dmigs pa'i sgo nas rang gi sa/ /thams cad du ni rgyas par 'gyur/ /kun 'gro ma yin rang ris su/ / zag med gong ma'i yul can min/ /bdag gir ma byas gnyen po'i phyir/ /gang zhig gang dang mtshungs ldan pa/ /de ni der mtshungs ldan sgo nas/ /gong ma thams cad lung ma bstan/ /'dod na 'jig tshogs lta ba dang / /mthar 'dzin lhan cig ma rig pa / /lhag ma rnams 'dir mi dge ba'o/ /'dod na 'dod chags khong khro dang / /rmongs rnams mi dge'i rtsa ba yin/ /lung ma bstan pa'i rtsa ba gsum/ /de ni sred dang ma rig blo/ /rnam gnyis mthor 'jug phyir de las/ /gzhan min bzhi zhes nyi 'og pa/ /de dag sred lta nga rgyal rmongs/ /bsam gtan pa gsum ma rig las/ /mgo gcig dang ni rnam phye dang / /dri dang gzhag par lung bstan pa/ /'chi dang skye dang khyad par 'phags/ /bdag gzhan la sogs lta bu yin/ /'das dang nyer gnas 'dod chags dang / /khong khro nga rgyal dag gis ni/ /gang la de skyes ma spangs pa'i/ /dngos po de dang ldan pa yin/ yid kyi de dag ma 'ongs pas/ /kun dang gzhan gyis rang dus pa/ /mi skye rnams kyis thams cad dang / /lhag ma kun gyis kun dang ldan/ /dus rnams kun tu yod gsungs phyir/ /gnyis phyir yul yod phyir 'bras phyir/ /de yod smra ba'i phyir thams cad/ /yod par smra bar 'dod de dag /rnam bzhi dngos dang mtshan nyid dang / /gnas skabs gzhan gzhan 'gyur zhes bya/ gsum pa bzang ste bya ba yis/ /dus rnams rnam gzhag gegs su byed/ /de yang ji ltar gzhan ma yin/ /dus su mi rung de bzhin du/ /yod na ci phyir ma skyes zhig /chos nyid dag ni zab pa yin/ /sdug bsngal mthong spang bya spangs kyang / /kun 'gro lhag ma rnams kyis ldan/ /dang po'i rnam pa spangs kyang de'i/ /yul can dri ma lhag rnams kyis/ /sdug bsngal rgyu mthong goms pa yis/ /spang bya 'dod khams las skyes pa/ /rang gi gsum dang gzugs gtogs gcig /dri med rnam shes spyod yul lo/ /gzugs khams las skyes rang gi dang / /'og gsum gong gcig dri med kyi'ang / /gzugs med las skyes khams gsum gtogs/ /gsum dang zag med spyod yul lo/ /'gog dang lam mthong spang bya kun/ /rang gis glags pa'i spyod yul lo/ /zag med khams gsum mtha' gsum dang / /zag pa med pa'i spyod yul lo/ /nyon mongs phra rgyas bcas rnam gnyis/ /nyon mongs can min rgyas 'gyur gyis/ /rmongs las the tshom de nas ni/ /log lta de nas 'jig tshogs lta/ /de nas mthar 'dzin de nas ni/ /tshul khrims mchog 'dzin de nas lta/ /rang gi lta la nga rgyal chags/ /gzhan la zhe sdang de ltar rim/ /phra rgyas spangs pa ma yin dang / /yul ni nye bar gnas pa dang / /tshul bzhin ma yin yid byed las/ /nyon mongs rgyu ni tshang ba yin/ /'dod na gti mug ma gtogs pa'i/ /nyon mongs kun nas dkris bcas zag /gzugs dang gzugs ni med pa na/ /phra rgyas kho na srid pa'i zag / de lung ma bstan kha nang bltas/ /mnyam gzhag sa pa'i phyir gcig byas/ /rtsa ba ma rig yin pas na/ /logs shig tu ni zag par bstan/ /chu bo sbyor ba'ang de bzhin du/ /lha rnams gsal phyir logs shig bstan/ /zag par ma yin grogs med rnams/ /'jog pa'i rjes su mi mthun lo/ /ji skad bshad nyid ma rig bcas/ /nyer len rnams te lta rnam gnyis/ /phye ba'i phyir ro ma rig pa/ /'dzin par byed pa min phyir bsres/ /gang phyir de dag phra ba dang / /rjes 'brel rnam gnyis rgyas 'gyur dang / /rjes su 'brang bas de yi phyir/ /phra rgyas dag tu bshad pa yin/ /de dag 'jog byed zag byed dang / /'khyer bar byed dang 'byar byed dang / /nye bar 'dzin phyir zag la sogs/ /de dag gi ni nges tshig yin/ /de dag kun tu sbyor sogs kyi / /dbye bas yang rnam lngar bshad do/ /rdzas dang mchog 'dzin 'dra ba'i phyir/ /lta gnyis kun tu sbyor gzhan no/ /gang phyir gnyis ka'ang gcig tu ni/ /mi dge rang dbang de yi phyir/ /phrag dog ser sna de dag las/ /logs shig kun sbyor gnyis su bshad/ /tha ma'i cha dang mthun rnam lnga/ / gnyis kyis 'dod las mi 'da' la/ /gsum po yis ni phyir zlog byed/ /sgo dang rtsa bas bsdus phyir gsum/ /'gro mi 'dod dang lam nor dang / /lam la the tshom de snyed cig /thar pa bgrod la gegs byed pa/ /de yi phyir na gsum bstan to/ /gong ma'i cha dang mthun lnga nyid/ /gzugs dang gzugs med las skyes pa'i/ /'dod chags gnyis rgod nga rgyal rmongs/ /tshor ba'i dbang gis 'ching ba gsum/ /nyon mongs las gzhan nyon mongs can/ /sems byung 'du byed phung zhes pa/ /gang de'ang nye ba'i nyon mongs te/ /de dag nyon mongs zhes mi bya/ /ngo tsha med dang khrel med dang / /phrag dog ser sna rgod pa dang / /'gyod dang rmugs dang gnyid dang ni/ /kun nas dkris pa rnam pa brgyad/ /khro dang 'chab pa'o 'dod chags kyis/ /ngo tsha med rgod ser sna bslang / /'chab pa rtsod do ma rig las/ /rmugs dang gnyid dang khrel med do/ /the tshom las 'gyod khro ba dang / /phrag dog khong khro'i rgyu las byung / /gzhan yang nyon mongs dri ma drug /sgyu dang g.yo dang rgyags pa dang / /de bzhin 'tshig dang khon 'dzin dang / /rnam 'tshe rgyu dang rgyags pa ni/ /'dod chags las skyes khon 'dzin dang / /rnam 'tshe khong khro las skyes so/ /'tshig pa lta ba mchog 'dzin las/ /g.yo ni lta bas kun nas bslang / /de las ngo tsha med pa dang / /khrel med rmugs gnyid rgod rnam gnyis/ /de las gzhan ni bsgom spang bya/ /rang dbang de bzhin dri ma rnams/ /'dod na mi dge gsum rnam gnyis/ /de yan chad ni lung ma bstan/ /'dod dang bsam gtan dang po na/ /g.yo sgyu tshangs pas 'drid phyir ro/ /rmugs rgod rgyags pa khams gsum na/ /gzhan dag 'dod khams las skyes pa/ /mthong spang bya gnyid nga rgyal bcas/ /yid kyi rnam shes sa pa yin/ /nye ba'i nyon mongs rang dbang yang / /gzhan ni rnam shes drug rten can/ /bde ba dag dang 'dod chags su/ /mtshungs ldan zhe sdang bzlog pa'o/ /ma rig pa dag thams cad dang / /med lta yid bde sdug bsngal dang / /yid mi bde dang the tshom mo/ /gzhan yid bde dang 'dod las skyes/ /btang snyoms dad kun sa gong ma/ /sa ji bzhin du rang rang dang / /'gyod dang phrag dog khro ba dang / /rnam 'tshe khon du 'dzin pa dang / /'tshig pa yid mi bde ba dang / /ser sna dag ni bzlog pa yin/ /g.yo dang sgyu dang 'chab dang gnyis / /gnyis ka dang ldan bde dag dang / /rgyags pa btang snyoms kun tu 'gro/ /bzhi po gzhan ni lnga dag dang / /'dod na sgrib rnams mi mthun dang / /zas dang bya ba gcig pa'i phyir/ /gnyis gcig phung po gnod byed dang / /the tshom phyir na lnga nyid do/ /dmigs pa yongs su shes pa dang / /de la dmigs pa yang dag par/ /zad dang dmigs pa spangs pas so/ /gnyen po skyes pas zad par 'gyur/ /gnyen po rnam bzhi spong ba dang / /gzhi dang srid nyid rnam par ni/ /sun 'byin zhes bya dmigs pa las/ /nyon mongs pa ni spang byar 'dod/ /mtshan nyid mi mthun mi mthun phyogs/ /yul rnam chad dang dus kyis te/ /'byung dang tshul khrims phyogs dang ni/ /dus gnyis ring ba nyid lta bu'o/ /lan cig tu zad de dag gi /bral ba'i thob pa yang dang yang / /gnyen po skyes dang 'bras thob dang / /dbang po rnam par 'phel rnams su/ /yongs su shes dgu 'dod pa na/ /dang po rnam gnyis zad la gcig /gnyis zad pa ni de gnyis so/ /de bzhin gong ma'i de gsum nyid/ /yongs su shes pa gzhan gsum ste/ /tha ma'i cha dang mthun gzugs dang / /zag pa kun zad drug bzod 'bras/ /lhag ma rnams ni shes pa'i yin/ /mi lcogs med 'bras thams cad do/ /bsam gtan rnams kyi lnga'am brgyad/ /nye bar bsdogs pa'i gcig yin te/ /gzugs med dngos gzhi gsum gyi yang / /thams cad 'phags pa'i lam gyi yin/ /'jig rten pa'i gnyis rjes kyi yang / /chos shes pa'i ni gsum yin no/ /de'i phyogs mthun gyi drug dang lnga/ /bral ba'i thob pa zag med dang / /srid rtse nyams par byas pa dang / /rgyu gnyis kun tu bcom pa'i phyir/ /yongs shes khams las 'das pa las / /gcig min mthong la gnas pa ni/ /lnga yi bar dang yang dag ldan/ /bsgom la gnas pa drug gam ni/ /gcig gam yang na gnyis dang ngo / /khams las 'dod chags bral ba dang / /'bras bu thob phyir de dag bsdoms/ /la la gcig gnyis lnga dang drug /gtong ste 'thob pa lnga min no/ /chos mngon pa'i mdzod kyi tshig le'ur byas pa las/ /phra rgyas bstan pa zhes bya ba ste gnas lnga pa'o// //bden pa mthong dang bsgoms pa las/ /nyon mongs spangs pa zhes bshad pa/ /bsgom pa'i lam ni rnam gnyis te / /mthong ba zhes bya zag pa med/ /bden pa dag ni bzhir bshad do/ /sdug bsngal kun 'byung de bzhin du/ /'gog dang lam ste de ltar na/ /de dag ji ltar mngon rtogs rim/ /yid 'ong yid du mi 'ong dang / /de las gzhan zag bcas rnams nyid/ /sdug bsngal nyid gsum ldan pa'i phyir/ /ci rigs ma lus sdug bsngal lo/ /gang la bcom dang blo yis gzhan/ /bsal na de blo mi 'jug pa/ /bum chu bzhin du kun rdzob tu/ / yod de don dam yod gzhan no/ /tshul gnas thos dang bsam ldan pas/ /bsgom pa la ni rab tu sbyor/ /thos stsogs las byung blo rnams ni/ /ming dang gnyis ka don yul can/ /bsring gnyis ldan chog mi shes dang / /'dod chen can la ma yin no/ /rnyed la yang sred chog mi shes/ /ma rnyed la 'dod 'dod chen can/ /bzlog pa de yi gnyen po dag /de gnyis khams gsum gtogs dri med/ /ma chags 'phags rigs de dag las/ /gsum ni chog shes bdag nyid do/ /gsum gyis tshul bstan tha mas las/ /sred pa skye ba'i gnyen po'i phyir/ /bdag gir bdag 'dzin dngos 'dod pa/ /de yi dus dang gtan zhi'i phyir/ /de la 'jug pa mi sdug pa / /dbugs rngub 'byung ba dran pa yis/ /'dod chags rnam rtog lhag rnams so/ /keng rus chags bcas thams cad la/ /rus pa rgya mtsho'i bar du ni/ /spro zhing sdud pas las dang po/ /rkang rus nas ni thod phyed bar/ /btang bas sbyang ba byas par bshad/ /smin ma'i bar du sems 'dzin pas/ /yid la byed pa rdzogs pa yin/ /mi sdug ma chags sa bcu dang / /dmigs pa 'dod snang mis skyed do/ /dbugs rngub dbugs 'byung dran pa ni/ /shes rab sa lnga spyod yul rlung / /'dod rten phyi ba'i ma yin no/ /bgrang la sogs pa rnam pa drug /dbugs rngub dbugs 'byung gang las lus/ /sems can zhes bya ma zin pa'o/ /rgyu mthun las byung 'og ma yi/ /yid kyis de gnyis ma rtogs so/ /zhi gnas grub par gyur pa yis/ /dran pa nyer gzhag bsgom par bya/ /lus tshor sems dang chos rnams la/ /mtshan nyid gnyis su yongs brtags pas/ /shes rab thos sogs las byung ba'o/ / gzhan ni 'brel dang dmigs pa las/ /rim ni ji ltar skye ba bzhin/ /phyin ci log gi gnyen por bzhi/ /de ni chos dran nyer gzhag pa/ /spyi la dmigs pa la gnas te/ /de dag la ni mi rtag dang / /sdug bsngal stong bdag med par lta / /de las dro bar gyur pa 'byung / /de ni bden bzhi'i spyod yul can/ /rnam pa bcu drug dro ba las/ /rtse mo de yang de dang 'dra/ /gnyis ka chos kyis rnam pa gtod/ /gzhan dag gis kyang 'phel bar byed/ /de las bzod pa gnyis de bzhin/ /thams cad chos kyis 'phel bar byed/ / chen po 'dod gtogs sdug bsngal yul/ /de ni skad cig gcig de bzhin/ /chos mchog thams cad phung po lnga/ /thob pa ma gtogs de ltar na/ /nges 'byed cha mthun rnam pa bzhi/ /bsgoms byung mi lcogs med pa dang / /khyad par bsam gtan sa pa'o/ /gnyis ni 'og na'ang yod pa'am/ /'dod rten chos mchog bud med kyis/ /gnyis ka'i rten can 'thob par 'gyur/ /'phags pas de dag sa bor nas/ /gtong ngo 'phags min 'chi bas so/ /dang po gnyis yongs nyams pas kyang / /dngos gzhis de nyid la bden mthong / /rnam par nyams tshe sngon med 'thob/ /nyams pa gnyis ni mi ldan pa/ /rtse mo thob pa rtsa mi 'chad/ /bzod thob ngan song mi 'gro'o/ /gnyis slob rigs las bzlog nas ni/ /sangs rgyas su 'gyur gzhan gsum yang / /ston dang bse ru byang chub bar/ /bsam gtan mtha' rten gcig la kun/ /de yi sngon du thar cha mthun/ /myur ba srid pa gsum gyis thar/ /thos bsams las byung las gsum mo/ /mi yi nang nas 'phen par byed/ /'jig rten pa yi chos mchog las/ /chos kyi bzod pa zag pa med/ /'dod sdug bsngal la de nas ni/ /de nyid la chos shes de bzhin/ /sdug bsngal lhag la rjes bzod shes/ /bden pa gsum la'ang de bzhin no/ /de ltar bden pa mngon rtogs 'di/ /sems bcu drug go rnam gsum ste/ /mthong dmigs bya ba zhes bya'o/ /de ni chos mchog dang sa gcig / bzod dang shes pa go rims bzhin/ /bar chad med dang rnam grol lam/ /de la skad cig bco lnga ni/ /ma mthong mthong phyir mthong ba'i lam/ /dbang po rno rtul de dag tu/ /dad dang chos kyi rjes 'brang ba/ /bsgoms pas spang bya ma spangs na/ /'bras bu dang po la zhugs pa/ / rnam lnga'i bar bcom gnyis pa la/ /dgu pa tshun chad zad pa yin/ /'dod pa'am yang na gong ma las/ /chags bral gsum pa la zhugs pa/ /gang zhig gang la zhugs pa ni/ /bcu drug pa la de 'bras gnas/ /de tshe dbang po rno rtul dag /dad pas mos dang mthong bas thob/ /'bras thob 'bras bu khyad par gyi/ /lam thob med pas de yi phyir/ /'bras gnas khyad par bya ba'i phyir/ /mi brtson pa ni zhugs ma yin/ /sa dang sa na nyes rnam dgu/ /de bzhin du ni yon tan rnams/ /chung dang 'bring dang che rnams kyi/ /chung ngu la sogs tha dad phyir/ /'bras gnas bsgom spang bya ma zad/ /re ltar thogs na lan bdun pa/ /rnam gsum rnam bzhi las grol ba/ /tshe gnyis gsum du rigs nas rigs/ /rnam pa lnga yi bar bcom pa/ /gnyis pa la ni zhugs pa'ang yin/ /rnam pa drug pa zad gyur pa/ /de ni lan cig phyir 'ong ba/ /nyes cha bdun dang brgyad zad pa/ /tshe gcig bar chad gcig pa dang / /gsum pa la ni zhugs pa'ang yin/ /de dgu zad pas phyir mi 'ong / /de ni bar skyes 'du byed dang / /'du byed med yongs mya ngan 'da'/ /gong du 'pho ba rnams de ni/ /bsam gtan spel na 'og min 'gro/ /de 'phar phyed 'phar thams cad du/ /'chi 'pho gzhan srid rtse mor 'gro/ /gzhan ni gzugs med 'gro rnam bzhi/ /gzhan ni 'di la mya ngan 'da'/ /gsum la yang rnam gsum phye nas/ /gzugs su nye 'gro dgur bshad do/ /de dag gi ni khyad par rnams/ /las dbang nyon mongs bye brag las/ /gong du 'pho ba ma phye bar/ /dam pa'i 'gro ba bdun du 'dod/ /dam pa dam min 'jug mi 'jug /son pa phyir mi 'ong phyir de / /'dod par tshe yongs gyur pa'i 'phags/ /khams gzhan du ni 'gro ba med/ /de dang gong mar skyes pa ni/ /yongs nyams dbang po 'pho mi sten / /dang po bzhi pa spel bar byed/ /skad cig ma ni bsres pas grub / /skye dang gnas par bya phyir dang / /nyon mongs pas ni 'jigs phyir yang / /de ni rnam pa lnga yi phyir/ /gnas gtsang skye ba lnga kho na/ /'gog pa thob pa'i phyir mi 'ong / /lus kyis mngon sum byed par 'dod/ /srid rtse'i bar cha brgyad zad pa/ /dgra bcom nyid la zhugs pa yin/ /dgu pa'i bar chad med lam yang / /de ni rdo rje lta bu yin/ /de zad thob dang zad pa shes/ /de tshe de mi slob dgra bcom/ /'jig rten 'das kyis srid rtse las/ /chags 'bral gzhan las rnam pa gnyis/ /'jig rten pa yis chags bral ba'i/ /'phags la bral ba'i thob rnam gnyis/ /kha cig 'jig rten 'das kyis kyang / /btang la nyon mongs mi ldan phyir/ /srid rtse'i phyed las rnam grol dang / / gong du skyes pa bzhin mi ldan/ /zag med mi lcogs med pa yis/ /thams cad las ni 'dod chags 'bral/ /sa gsum rgyal la bsam gtan nam/ /nyer bsdogs las mtha'i rnam grol lam/ /gong ma'i nyer bsdogs las min 'phags/ /brgyad kyis rang gong sa las rgyal/ /'jig rten pa yi rnam grol dang / /bar chad med lam go rims bzhin/ /zhi sogs rags sogs rnam pa can/ /gong dang 'og ma'i spyod yul can/ /gal te mi g.yo'i zad shes las/ /mi skye'i blo gros gal te min/ /zad pa shes sam mi slob lta/ / de ni dgra bcom thams cad la/ /dge sbyong tshul ni dri med lam/ /'bras bu 'dus byas 'dus ma byas/ /de dag brgyad cu rtsa dgu'o/ /grol lam zad pa rnams dang bcas/ /'bras bu bzhir rnam gzhag pa ni/ /rgyu lnga dag ni srid phyir ro/ /'bras la sngon lam btang ba dang / / gzhan thob pa dang zad bsdoms dang / /shes pa brgyad tshan thob pa dang / /rnam pa bcu drug thob pa'o/ /'jig rten pa yis thob 'bras ni/ /bsres dang zag med thob 'dzin phyir/ /de nyid tshangs tshul tshangs pa yi/ /'khor lo tshangs pas bskor phyir ro/ /chos kyi 'khor lo mthong ba'i lam/ /myur bar 'gro sogs rtsibs sogs kyis/ /'dod par gsum 'thob tha ma ni/ /gsum du'o gong na mthong lam med/ /mi skyo lung las 'dir rtsom zhing / /der mthar phyin ces 'byung phyir ro/ /dgra bcom drug 'dod de dag las/ /lnga ni dad pas mos las skyes/ /de dag rnam grol dus dang sbyor/ /mi g.yo'i chos can mi g.yo ba/ /de phyir de dus mi sbyor grol/ /de ni mthong thob rgyu las byung / /kha cig dang po nas de'i rigs/ /kha cig sbyangs pa las gyur to/ /bzhi ni rigs las lnga 'bras la / /nyams 'gyur dang po las ma yin/ /slob dang 'phags min rigs drug ldan/ /mthong ba la ni 'pho ba med/ /thob dang ma thob nyer spyad las/ /yongs nyams rnam pa gsum shes bya/ /ston la tha ma mi g.yo la/ /bar ma'ang gzhan la rnam gsum mo/ /'bras las nyams pa 'chi ba med/ /bya ba ma yin de mi byed/ /mi g.yo rnam grol bar chad med/ /lam dgu'o shin tu bsten phyir ro/ /mthong bas thob la re re'o/ /zag med mi yi nang du 'phel/ /mi slob sa dgu la bsten te/ /slob pa drug la gang gi phyir/ /'phel ba 'bras bu khyad par can/ /btang ste 'bras bu thob par 'gyur/ /sangs rgyas gnyis dang nyan thos bdun/ /de dgu dbang po rnam dgu can/ /gang zag bdun po sbyor ba dang / /dbang po snyoms 'jug rnam grol dang / /gnyis kas byas pa'o de dag drug /'di ltar lam gsum la gnyis gnyis/ /'gog thob gnyis ka las rnam grol/ /shes rab kyis ni cig shos so/ /snyoms 'jug dbang po 'bras rnams kyis/ /slob pa yongs rdzogs zhes bya'o/ /gnyis kyis mi slob yongs su rdzogs/ /mdor na lam ni rnam bzhi ste/ /khyad par can dang rnam grol dang / /bar chad med dang sbyor zhes bya/ /bsam gtan dag gi lam rnams sla / /sa gzhan dag gi dka' ba yin/ /blo rtul mngon shes bul ba ste/ /cig shos kyi ni mngon shes myur/ /zad dang mi skye shes pa ni/ /byang chub de dang mthun nyid phyir/ /sum cu rtsa bdun de'i phyogs mthun/ /ming gi sgo nas rdzas su bcu/ /dad dang brtson 'grus dran pa dang / /shes rab ting 'dzin btang snyoms dga'/ /rtog dang tshul khrims shin tu sbyangs/ /dran pa nyer gzhag shes rab ste/ /brtson 'grus yang dag 'jog ces bya/ /rdzu 'phrul rkang pa ting 'dzin to/ /gtso bo smos pa de dag ni/ /sbyor byung yon tan kun kyang yin/ /sde tshan bdun ni go rims bzhin/ /las ni dang po pa dag dang / /nges 'byed cha mthun rnams dang ni/ /bsgom dang mthong la rab tu phye/ /byang chub yan lag lam yan lag /zag pa med gzhan rnam gnyis so/ /bsam gtan dang po na thams cad/ /mi lcogs med na dga' ma gtogs/ /gnyis pa na ni rtog ma gtogs/ /gnyis na de gnyis ma gtogs pa/ /bsam gtan bar na'ang gzugs med pa/ /gsum na'ang de dang tshul yan lag /byang chub dang ni lam yan lag /ma gtogs 'dod khams srid rtse na / /bden gsum mthong na tshul khrims dang / /chos la shes nas dad pa 'thob / /lam mngon rtogs na sangs rgyas dang / /de yi dge 'dun dag la yang / /chos bden gsum dang rang sangs rgyas/ /byang chub sems dpa'i lam yin no/ /rdzas su gnyis te dad pa dang / /tshul khrims dri ma med pa yin/ /bcings phyir slob pa'i yan lag tu/ /rnam grol ma bshad de rnam gnyis/ /nyon mongs bcom pa 'dus ma byas/ /mos pa 'dus byas yan lag ni/ /de yin de nyid rnam grol gnyis/ /byang chub ji skad bshad ces pa/ /mi slob sems ni skye 'gyur ba/ /sgrib pa las ni rnam grol 'gyur/ /'gag par 'gyur ba'i lam gyis ni/ /de yi sgrib pa rab tu spong / /'dus ma byas nyid khams zhes bya/ /'dod chags kun zad 'dod chags bral/ /spangs pa'i khams ni gzhan dag go/ /'gog pa'i khams zhes bya ba gzhi / /sdug bsngal rgyu bzod shes rnams kyis/ /yid 'byung gang gis spong 'gyur ba/ /kun gyi 'dod chags 'bral bar 'gyur/ /de ltar na ni mu bzhi srid/ /chos mngon pa'i mdzod kyi tshig le'ur byas pa las/ /lam dang gang zag bstan pa zhes bya ba ste gnas drug pa'o// //dri med bzod rnams shes pa min / /zad dang mi skye'i blo lta min/ /de las gzhan 'phags blo gnyis ka/ /gzhan shes drug ni lta ba'ang yin/ /shes pa zag bcas zag pa med/ /dang po kun rdzob ces bya'o/ /zag med rnam gnyis chos dang ni/ /rjes su shes pa kho na yin/ /kun rdzob yul ni thams cad do/ /chos zhes bya ba'i spyod yul ni/ /'dod sdug bsngal sogs rjes shes pa'i/ / spyod yul gong ma'i sdug bsngal sogs/ /de dag nyid bden bye brag gis/ /bzhi ste rnam bzhi de dag ni/ /mi skye ba dang zad pa shes/ /de gnyis dang po skyes pa ni/ /sdug bsngal rgyu rjes shes pa yin/ /bzhi las pha rol sems rig pa/ /des ni sa dbang gang zag 'das/ /zhig dang ma skyes mi rig go/ /chos rjes blo phyogs phan tshun min/ /nyan thos mthong ba'i skad cig gnyis/ /rig ste bse ru lta bus gsum/ /sangs rgyas sbyor ba med par kun/ /zad par shes pa bden rnams la/ /yongs shes la sogs pa nges pa'o/ /yongs shes byar med ces la sogs/ /mi skye ba yi blo 'dod do/ /rang bzhin dang ni gnyen po dang / /rnam pa rnam pa spyod yul dang / /sbyor dang bya ba byas nyid dang / /rgyu rgyas pa las bcu yin no/ /bsgom pa'i lam la 'gog pa'am/ /lam la chos shes gang yin de/ /khams gsum gyi ni gnyen po yin/ /'dod pa'i khams kyi rjes ma yin/ /chos shes pa dang rjes su shes/ /rnam pa bcu drug kun rdzob ni/ /de bzhin gzhan du'ang rang rang gi /bden pa'i rnam pas bzhi yin no/ /pha rol yid shes dri med kyang / /de bzhin dri ma dang bcas ni/ / shes bya rang gi mtshan nyid rnam / /rdzas re re zhig spyod yul lo/ /lhag ma rnam pa bcu bzhi can/ /stong dang bdag med ma gtogs so/ /dri med bcu drug gzhan rnam med/ /gzhan yod ces pa bstan bcos las/ /rdzas su rnam pa bcu drug go/ /rnam pa shes rab dang bcas pa'i/ /dmigs dang bcas pas 'dzin par byed/ /yod pa thams cad gzung bya yin/ /dang po rnam gsum gzhan rnams dge /dang po sa rnams thams cad na/ /drug na chos shes bya bar dgu / /rjes shes bya ba de bzhin drug /gzhan yid shes pa bsam gtan bzhi / /de ni 'dod dang gzugs rten can/ /chos shes bya ba 'dod rten can/ / khams gsum pa yi rten can gzhan/ /'gog blo dran pa nyer gzhag pa/ /gcig ste pha rol sems blo ni/ /gsum mo lhag ma bzhi yin no/ /chos blo'i spyod yul dgu yin no/ /lam rjes blo yi dgu yin no/ /sdug bsngal rgyu blo'i gnyis yin no/ /bzhi yi bcu yin gcig gi min/ / chos bcu dag ni sbyar bar bya/ /khams gsum pa dang dri med chos/ /'dus ma byas rnams gnyis gnyis so/ /kun rdzob gcig pus rang tshogs las/ /gzhan ni bdag med nyid rig 'gyur/ /zag med skad cig dang po la/ /chags can shes pa gcig dang ldan/ /gnyis pa la gsum yan chad ni/ /bzhi la re re 'phel dang ldan/ /mthong ba'i lam la bzod pa dang / /shes pa ji ltar skyes pa rnams/ /ma 'ongs pa 'thob de nyid la/ /rjes gsum la ni kun rdzob kyang / /de phyir mngon rtogs mtha' zhes bya/ /de ni mi skye'i chos can yin/ /rang dang 'og sa 'gog pa'i mtha'/ /rang bden rnam can 'bad las byung / /chags bcas bcu drug pa la drug /'dod las chags dang bral bas bdun/ /de yi gong ma chags bcas kyi/ /bsgom pa'i lam la bdun 'thob bo / /sa bdun las rgyal mngon shes dang / /mi g.yo 'thob dang spel bsgom pa'i / bar chad med pa'i lam dag dang / /gong ma'i grol ba'i lam brgyad la'ang / /slob pa sbyong ba'i grol ba la/ /shes pa drug dang bdun 'thob bam/ /bar chad med pa'i lam la drug /de bzhin srid rtse rnam rgyal la'ang / /zad pa shes pa la dgu'o/ /mi g.yo bas ni bcu 'thob bo/ /der 'pho grol ba'i tha ma la'ang / /bshad pa'i lhag ma la brgyad 'thob/ /gang las chags bral bya phyir gang / /thob pa der yang 'og ma'ang 'thob/ /zad pa shes la zag bcas kyang / /sa kun sngon rnyed mi 'thob bo/ /rnyed dang bsten ces bya ba ni/ /dge ba 'dus byas thob pa'o/ /gnyen po dang ni thag bsring pa'i/ /thob pa zag dang bcas pa'i yin/ /sangs rgyas chos ni ma 'dres pa/ /stobs la sogs pa bco brgyad do/ /gnas dang gnas min shes pa bcu/ /las 'bras la brgyad bsam gtan sogs/ /dbang po mos dang khams la ni/ /dgu'o lam dag la bcu 'am/ /gnyis ni kun rdzob shes pa yin/ /zad pa drug gam bcu yin no/ /sngon gnas 'chi 'pho skye ba'i stobs/ /bsam gtan dag na lhag ma ni/ /sa rnams kun na ci yi phyir/ /'di'i stobs gang phyir thogs mi mnga'/ /sku la sred med bu yi stobs/ /gzhan dag tshigs na glang chen sogs/ /bdun cus blags pa'i stobs yin no/ /de ni reg bya'i skye mched do/ /mi 'jigs pa ni rnam pa bzhi/ /ji ltar stobs ni dang po dang / /bcu pa gnyis pa bdun pa bzhin/ /dran dang shes bzhin bdag nyid gsum/ /thugs rje chen po kun rdzob blo/ /tshogs dang rnam pa spyod yul dang / /mnyam pa'i phyir dang ches che'i phyir/ /tha dad bya ba rnam pa brgyad/ /sangs rgyas thams cad tshogs dang ni/ /chos sku 'gro ba'i don spyod pas/ /mnyam pa nyid de sku tshe dang / /rigs dang sku bong tshod kyis min/ /chos gzhan slob dang thun mong yin / /kha cig so so'i skye bo dang / /nyon mongs med dang smon nas shes/ /so so yang dag rig mngon sogs/ /nyon mongs med pa kun rdzob shes/ /bsam gtan mtha' na mi g.yo'i chos/ /mis skyes nyon mongs 'dod gtogs pa/ /ma skyes gzhir bcas spyod yul can/ /smon nas shes pa'ang de bzhin no/ / de yi dmigs pa thams cad do/ /de bzhin chos don nges tshig dang / /spobs pa so so yang dag rig /gsum ni go rims bzhin ming dang / /don dang ngag la thogs med shes/ /bzhi pa rigs pa thags thogs med/ /mngon brjod lam la dbang nyid la/ /de yi dmigs pa dag dang lam/ /shes pa dgu'o sa thams cad/ /yang dag don rig bcu'am drug /de ni kun na gzhan kun rdzob/ /chos rig 'dod dang bsam gtan na/ /ngag ni 'dod dang dang po na/ /ma tshang bar ni de thob med/ /drug po de dag rab mtha' bas/ /de ni rnam drug bsam gtan mtha'/ /de ni sa kun gyis mthun byas/ /'phel pa'i rab tu phyin pa yin/ /sangs rgyas las gzhan sbyor las skyes/ /rdzu 'phrul rna ba yid dang ni/ /sngon tshe 'chi 'pho skye ba dang / /zad shes mngon du bya ba yi/ /mngon shes rnam drug rnam grol blo/ /bzhi ni kun rdzob shes pa ste/ /sems la shes pa lnga yin no/ /zad pa'i mngon shes stobs bzhin no/ /lnga ni bsam gtan bzhi dag na/ /rang dang 'og sa'i yul can yin/ /thob bya 'dris pa chags bral bas/ /gsum pa dran pa nyer gzhag gsum/ /dang po rdzu 'phrul rna ba mig /mig dang rna ba'i mngon shes ni/ /lung du ma bstan lhag rnams dge / gsum ni rig pa sngon mtha' sogs/ /ma rig pa ni bzlog phyir ro/ /mi slob tha ma gnyis ni de'i/ /rgyud la skyes phyir de zhes bya/ /slob la 'dod de ma rig dang / /bcas rgyud phyir na rig ma bshad/ /dang po gsum pa drug pa ni/ /cho 'phrul rnams yin bstan pa mchog /mi 'khrul phyir dang phan pa dang / /yid 'ong 'bras la sbyor byed phyir/ /rdzu 'phrul ting 'dzin de las ni/ /sprul dang 'gro ba ston pa la/ /yid mgyogs 'gro ba gzhan dag la/ /phyin byed mos pa las byung yang / /'dod par gtogs pa'i sprul pa ni/ /phyi yi skye mched bzhi rnam gnyis/ /gzugs gtogs gnyis sprul sems dag gis/ /de dag kyang ni bcu bzhi'o/ /bsam gtan 'bras gnyis nas lnga'i bar/ /rim bzhin gong ma las skyes min/ /de rnyed bsam gtan bzhin de ni/ /dag dang rang las de las gnyis/ /rang gi sa pas sprul par byed/ /smrar 'jug pa ni 'og mas kyang / /ston min sprul pa po dang bcas/ /byin gyis brlabs nas gzhan 'jug phyir/ /shi ba la yang byin brlabs yod/ /mi brtan la med gzhan dag min/ /dang po du mas gcig yin te/ /byang bar gyur nas bzlog pa'o/ /bsgoms las skyes pa lung ma bstan/ /skye ba las skyes rnam gsum mo/ /rdzu 'phrul gsang sngags sman dag dang / /las las skyes dang rnam pa lnga/ /lha yi mig dang rna ba yin/ /bsam gtan sa pa'i gzugs dang ba/ /rtag tu rten bcas ma tshang med/ /thag ring phra sogs spyod yul can/ /dgra bcom bse ru ston rnams kyis/ /stong gnyis gsum dang grangs med mthong / /gzhan yang skye bas thob des ni/ /srid pa bar ma mi mthong ngo / /sems shes de ni rnam gsum gang / /rtog dang rig sngags kyis byas pa'ang / /dmyal ba pas ni dang po shes/ /mi la skye bas thob pa med/ /chos mngon pa'i mdzod kyi tshig le'ur byas pa las/ ye shes bstan pa zhes bya ba ste gnas bdun pa'o/ / //bsam gtan dag ni rnam gnyis bzhi/ /der skye ba dag rab tu bshad/ /snyoms 'jug dge ba rtse gcig pa/ /rjes 'brang bcas na phung po lnga/ /dpyod dang dga' dang bde dang ldan/ /yan lag snga snga spangs pa yi / /de bzhin gzugs med phung po bzhi/ /'og ma'i sa las dben las skyes/ /nyer bsdogs gsum dang bcas par ni/ /gzugs kyi 'du shes bshig ces bya/ /gzugs med pa na gzugs med do/ /gzugs ni sems las skye bar 'gyur/ /rnam shes mtha' yas mkha' mtha' yas/ /ci yang med ces bya de ltar/ /sbyor phyir dman phyir 'du shes med/ /'du shes med pa'ang ma yin no/ /de ltar snyoms 'jug dngos gzhi'i rdzas/ /rnam pa brgyad bdun rnam pa gsum/ /ro myang ldan dang dag pa dang / /zag med brgyad pa rnam pa gnyis/ /ro myang mtshungs ldan sred bcas so/ /'jig rten pa yi dge ba ni/ /dag pa de ni des myang bya/ /zag med 'jig rten 'das pa'o/ /dang po la lnga rtog dpyod dang / /dga' dang bde dang ting 'dzin rnams/ /gnyis pa la ni yan lag bzhi/ /rab dang dang ni dga' la sogs/ /gsum pa la lnga btang snyoms dang / /dran dang shes bzhin bde dang gnas/ /mtha' na bzhi dran btang snyoms dang / /bde min sdug min ting 'dzin rnams / /rdzas su bcu gcig dang po na/ /shin tu sbyangs pa bde ba yin/ /rab tu dang ba dad pa yin/ /lung rnam gnyis phyir dga' yid bde/ /nyon mongs can la dga' bde dang / /rab dang shes bzhin dran pa dang / /btang snyoms dran pa dag pa med/ /kha cig shin tu sbyangs btang snyoms/ /skyon brgyad las ni grol ba'i phyir/ /bzhi pa g.yo ba med pa yin/ /rtog dang dpyod dang dbugs dag dang / /bde ba la sogs bzhi yin no/ /skye ba'i bsam gtan dag na ni/ /yid bde bde dang btang snyoms dang / /btang snyoms yid bde bde ba dang / /btang snyoms btang snyoms tshor ba yod / /gnyis pa sogs na lus mig dang / /rna ba'i rnam shes rnam rig slong / /gang yin de ni dang por gtogs/ /de lung ma bstan nyon mongs min/ /de dang mi ldan 'dod chags bral/ /skye ba las ni dag pa 'thob / /zag med 'dod chags bral ba yis/ /nyon mongs can nyams skye ba yis/ /zag pa med pa'i mjug thogs su/ /ltag 'og gsum pa'i bar dge ba/ /skye'o dag pa las de bzhin/ /rang gi sa pa'i nyon mongs kyang / /nyon mongs can las rang dag dang / /nyon mongs 'og ma'i dag gcig kyang / /'chi 'pho'i dag las nyon mongs kun/ /nyon mongs can las gong ma min/ /dag pa nyams pa'i cha mthun sogs/ /rnam bzhi de ni go rims bzhin/ /nyon mongs skye dang rang sa dang / /gong dang zag med rjes mthun pa / /nyams cha mthun sogs mjug thogs su/ /gnyis dang gsum dang gsum dang gcig /sa brgyad rnam gnyis 'brel pa dang / /gcig rgal song zhing 'ongs nas ni/ /rigs mi mthun pa gsum par 'gro/ /thod rgal gyi ni snyoms 'jug yin/ /bsam gtan gzugs med rang dang ni/ /'og sa'i rten can 'og dgos med/ /srid rtser 'phags pa'i ci yang med/ /mngon sum byas nas zag pa zad/ /sred bcas rang gi sred la dmigs/ /bsam gtan dge yul yod dgu yin/ /gzugs med dngos gzhi dge rnams kyi/ /spyod yul zag bcas 'og ma min/ /zag pa med pas nyon mongs rnams/ /spong ngo nyer bzlog dag pas kyang / /de dag la ni nyer bzlog brgyad/ /dag pa bde min sdug bsngal min/ /dang po 'phags pa'ang kha cig gsum/ /rtog med bsam gtan khyad par can/ /rnam gsum bde min sdug bsngal min/ /de ni tshangs chen 'bras bu can/ /man chad rtog dpyod bcas pa yi/ /ting 'dzin yan chad gnyis ka med/ /mtshan med zhi ba'i rnam pa dang / /stong nyid bdag med stong nyid du/ /'jug pa'o smon pa med pa ni/ /de las gzhan bden rnam pa dang / / dag dang dri ma med de dag /dri med rnam thar sgo gsum mo/ /stong nyid stong nyid ces la sogs/ /gzhan yang ting nge 'dzin gsum mo/ /gnyis ni stong dang mi rtag par/ /mi slob pa'i la dmigs pa yin/ /mtshan ma med pa mtshan med ni/ /zhi bar ma brtags zad pa la/ /zag bcas mi nang mi g.yo la/ /nyer bsdogs bdun ni ma gtogs so/ /dge ba'i bsam gtan dang po ni/ /bde 'gyur ting 'dzin sgom pa yin/ /mig gi mngon shes mthong 'gyur 'dod/ /sbyor ba las byung blo dbyer 'gyur/ /rdo rje lta bu'i bsam gtan mtha'i/ /gang yin de zag zad 'gyur bsgom / /tshad med pa ni bzhi yin no/ /gnod sems la sogs gnyen po'i phyir/ /zhe sdang med byams snying rje yang / /yid bde ba ni dga' ba yin/ /btang snyoms ma chags rnam pa ni/ /kye ma bder gyur sdug bsngal dang / /dgar gyur sems can rnams snyam pa/ /spyod yul 'dod pa'i sems can rnams/ /dga' ba bsam gtan gnyis na yod/ /gzhan ni drug na kha cig lnga/ /de yis mi spong mi dag gi /nang du skyed de nges gsum ldan/ /rnam par thar brgyad dang po gnyis/ /mi sdug bsam gtan gnyis na yod/ /gsum pa mtha' na de ma chags/ /gzugs med mnyam gzhag dge rnams so/ /'gog pa'i snyoms par 'jug pa'o/ / phra ba phra ba'i mjug thogs su/ /rang gi dag dang 'og ma yi/ /'phags pa'i sems kyis de las ldang / /dang po 'dod gtogs snang yul can/ /gang dag gzugs can min de dag /spyod yul gong dang rang gi sa'i/ /sdug bsngal sogs dang rjes shes phyogs/ /zil gyis gnon pa'i skye mched brgyad/ /gnyis ni rnam thar dang po bzhin / /gnyis ni gnyis pa bzhin de gzhan/ /sdug pa'i rnam par thar pa bzhin/ /zad par bcu'o brgyad ma chags/ /bsam gtan mtha' na spyod yul ni/ /'dod pa gnyis ni gzugs med dag /spyod yul rang gi phung po bzhi/ /'gog pa bshad zin lhag ma ni/ / 'dod chags bral dang sbyor bas 'thob/ /gzugs med ces bya khams gsum gyi/ /rten can lhag ma mi las skye/ /khams gnyis dag tu gzugs med pa/ /rgyu dang las kyi stobs kyis skye / /gzugs kyi khams su bsam gtan rnams/ /de dag dang chos nyid kyis kyang / /ston pa'i dam chos rnam gnyis te/ / lung dang rtogs pa'i bdag nyid do/ /de 'dzin byed pa smra byed dang / /sgrub par byed pa kho na yin/ /bdag gis mngon pa'i chos 'di phal cher ni/ /kha che bye brag smra ba'i tshul grub bshad/ /nyes par zin gang de 'dir bdag gis nyes/ /dam chos tshul la tshad ma thub rnams yin/ /chos mngon pa'i mdzod kyi tshig le'ur byas pa las/ snyoms par 'jug pa bstan pa zhes bya ba ste gnas brgyad pa'o// //ston pa 'jig rten mig ni zum gyur cing / /dbang gyur skye bo phal cher zad pa na/ /de nyid ma mthong rang dgar gyur pa yi/ /ngan rtog rnams kyis bstan pa 'di dkrugs so/ /rang byung rang byung bstan pa gces 'dzin rnams/ /mchog tu zhir gshegs 'gro mgon med pa na/ /'doms med yon tan 'joms par byed pa yi/ /dri mas dga' mgur deng sang 'di na spyod/ /de ltar thub pa dag gi bstan pa ni/ /lkog mar srog phyin 'dra dang dri ma rnams/ /stobs dang ldan pa'i dus su rig nas ni/ /thar pa 'dod pa dag gis bag yod gyis/ /chos mngon pa'i mdzod kyi tshig le'ur byas pa slob dpon shAkya'i dge slong dbyig gnyen gyis mdzad pa rdzogs so/ / //rgya gar gyi mkhan po dzi na mi tra dang / zhu chen gyi lo ts+tsha ba ban+de dpal brtsegs kyis bsgyur cing zhus te gtan la phab pa'o// //

CLOSE WINDOW