བོད་ཡིག

e-texts based on the ACIP/ALL Input

/[ ]@##/ /rgya gar skad du/ pany+tsa skan d+ha pra ka ra Na bi b+hA Sh+yaM/ bod skad du/ phung po lnga'i rab tu byed pa bye brag tu bshad pa/ bam po dang po/ sangs rgyas dang byang chub sems dpa' thams cad la phyag 'tshal lo/ /phung po lnga zhes bya ba la sogs pa'i rab tu byed pa ci'i phyir rtsom zhe na/ chos thams cad kyi rang dang spyi'i mtshan nyid rtogs par bya ba'i phyir ro/ /rnal 'byor spyod pa'i sa la sogs pa'i bstan bcos dag las chos kyi mtshan nyid dpyad zin na yang de dpyad pa don med par mi 'gyur ram/ don med par mi 'gyur te/ mgo smos pas go ba gdul ba'i don gyi phyir ro/ /mgo smos pas go ba ni phyogs tsam gyis de rtogs pa'i khyad par rnams ma lus par khong du chud par nus pas mdor bshad pa nyid la dga'i/ rgya cher bshad pa la ni ma yin no/ /de'i phyir mdor bsdus pa 'dod pa'i sems can la phan gdags pa'i phyir rab tu byed pa 'di brtsams so/ /yang na khyim na gnas pa rnams bya ba mang po la zhugs pa'i phyir le'u grangs rgya cher byas pa rnams la mngon par brtson mi srid pa dang / rab tu byung ba yid la byed pa la mngon par brtson pa rnams kyang le'u grangs rgya cher byas pa la mngon par brtson par byas na g.yeng bar 'gyur bas/ de gnyi gas chos kyi mtshan nyid rtogs par bya ba'i phyir rab tu byed pa 'dir chos kyi mtshan nyid mdor bshad de/ de ltar na de brtsams pa don med par mi 'gyur ro/ /yang na chos kyi mtshan nyid mdor bsdus pa rtogs nas chos kyi mtshan nyid rgyas pa yang bsgrim mi dgos par rtogs nus par 'gyur te/ de'i phyir slob dpon gyis rnal 'byor spyod pa'i sa la sogs pa'i le'u grangs rgya cher byas pa rnams la 'jug par 'gyur ba'i rgyur rab tu byed pa 'di mdzad do/ /chos kyi mtshan nyid rtogs pa med par ci zhig mi 'grub na/ 'di ltar slob dpon gyis chos kyi mtshan nyid bstan par gus par mdzad ce na/ sems rtse gcig tu bya ba dang / 'bel ba'i gtam brtsal bar nges pa rnams la dris pa lung bstan pa la mkhas par bya ba'i phyir te/ 'di ltar chos kyi mtshan nyid la byang bar byas na the tshom med pa'i phyir ji ltar 'dod pa bzhin du dmigs pa la sems rtse gcig tu 'gyur gyi gzhan du ni ma yin no/ /chos kyi mtshan nyid rab tu rnam par 'byed pas kyang shes rab mchog tu 'gyur bas mi 'jigs pa thob ste/ 'jigs pa med pa ni 'bel ba'i gtam rnam par nges pa rnams la dris pa de thams cad du lung ston nus par 'gyur gyi gzhan du ni ma yin no/ /phung po lnga zhes bya ba ni mang nyung dgag pa'i phyir grangs nges par gzung ba'o/ /phung po'i sgra bye brag med par smos pas zag pa dang bcas pa dang / zag pa med pa'i phung po gzung bar bya'o/ /phung po ni lnga kho na ste/ bdag dang bdag gir 'dzin pa'i gzhi rab tu bstan pa'i phyir/ mang ba'am nyung ba ma yin te/ byis pa dag ni phal cher rnam par shes pa nyid la ni bdag tu 'dzin/ gzugs la sogs pa ltag ma rnams la ni bdag gir 'dzin te/ 'di ltar phyi dang nang gi gzugs ni byed pa dang las su bya bar bdag dang 'brel to snyam du gzugs kyi phung po la bdag gir 'dzin to/ /las dge ba dang mi dge ba rnams kyi rnam par smin pa'i tshor ba de bdag gis yang dag par myong bar byed do snyam du tshor ba'i phung po la bdag gir 'dzin te/ de la bde ba myong ba ni las dge ba rnams kyi rnam par smin pa'o/ /sdug bsngal ni las mi dge ba rnams kyi'o/ /sdug bsngal yang ma yin bde ba yang ma yin pa ni gnyi ga'i'o/ /'dir ni kun gzhi rnam par shes pa dar mtshungs par ldan pa'i tshor ba btang snyoms nyid yang dag par na las kyi rnam par smin pa ste/ kun gzhi rnam par shes pa nyid las dge ba dang mi dge ba'i rnam par smin pa yin pa'i phyir ro/ /bde ba dang sdug bsngal gnyis ni rnam par smin pa las 'byung ba'i phyir rnam par smin par gdags pa'o/ /mthong ba dang / thos pa dang / bye brag phyed pa dang / rnam par shes pa'i don rnams la bdag tu 'du shes pa'i sgo nas tha snyad 'dogs par byed do snyam du 'du shes kyi phung po la bdag gir 'dzin to/ /bdag tu 'dod pa'i sems ni 'du byed rnams kyis dge ba dang mi dge ba la sogs pa la 'jug par byed pas 'du byed kyi phung po la bdag gir 'dzin te/ phung po ni lnga kho na'o/ /'o na phung po rnams kyi go rims 'di ci'i phyir zhe na/ ji ltar rags pa'i rim bzhin te/ de la gzugs ni thogs pa dang bcas pa dang / rnam par shes pa'i tshogs lnga'i gnas su gyur pa dang / rnam par shes pa drug gi yul yin pa'i phyir thams cad pas ches rags te/ de bas na gzugs dang por brjod do/ /tshor ba ni gsum po dag pas rgyu ba rags pa'i phyir ches rags pa ste/ 'di ltar 'du shes la sogs pa bzhin du yul na mi gnas kyang nga'i lag par tshor ro/ /nga'i klad par tshor ro zhes rgyu ba rags pa'i phyir yul yongs su chad pas de nyid la brjod kyi/ 'du shes la sogs pa la ni ma yin te/ de'i phyir gzugs kyi 'og tu brjod do/ /'du shes ni mtshan mar 'dzin pa'i bdag nyid yin pas rtogs par sla ba'i phyir gnyis po dag pas ches rags so/ /'du byed ni 'du byed pa'i mtshan nyid yin pas khong du chud par sla ba'i phyir/ rnam par shes pa las ches rags so/ /rnam par shes pa ni thams cad pas phra ba'i phyir kun gyi tha mar brjod do/ /de la gzugs kyi phung po zhes bya ba gzhi mthun pa'am/ de'i skyes bu'i phyir zhes bya bar 'gyur grang na/ gzhi mthun pa ni ma yin te/ phung po rdzas su med pa'i phyir ro/ /gang gi phyir phung po'i sgra spungs ba'i rnam grangs su gtogs pa'i tshig yin pa de'i phyir phung po rnams ni spungs pa bzhin du btags pa'i yod pa ste/ de'i phyir na gzhi mthun pa nyid med do/ /de'i skyes bu'i phyir yang mi 'gyur te/ phan tshun tha dad pa'i ngo bo nyid yod na 'brel par 'gyur bas/ lha sbyin gyi zhang po zhes bya ba lta bu yin la/ gzugs kyi phung po zhes bya ba'i kyi 'di ni 'brel ba'i don yang yin pas gzugs las phung po gzhan nyid du 'gyur na/ btags pa'i yod pa ni rang gi rten las de nyid dang gzhan du brjod du med pa'i phyir de'ang mi 'dod do/ /'di ni nyes pa med de/ tha dad pa ma yin pa dang / de nyid dang gzhan du brjod du med pa la yang drug pa mthong ste/ gzugs su byas pa'i lus dang / gzugs kyi snga na med pa zhes bya'o/ /gzugs su byas pa ni lus las gzhan ma yin no/ /snga na med pa yang dngos po med pa'i phyir gzugs las de nyid dang gzhan du brjod du med de de nyid dang gzhan yin pa gnyis kyi rgyu ni rang gi ngo bo yin pa'i phyir ro/ /rang bzhin med pa'i phyir dngos po gzhan 'dzin pa la ltos pa ste/ gang zhig gang la 'dzin pa dang brjod pa 'jug pa de ni rten dang tha dad pa'i rang bzhin med pas btags pa'i yod pa nyid de/ don du ma yin pas btags pa'i yod pa nyid ces bya'o/ / de'i phyir rang gi rten las de nyid dang gzhan du brjod du med kyang kyir 'gal ba med do/ /de'i phyir 'dir de'i skyes bu'i kyi nyid do/ /gzugs gang zhe na/ 'byung ba chen po bzhi dag dang / 'byung ba chen po bzhi dag rgyur byas pa'o zhes bya ba la phung po smos pa'i skabs su gzugs gang zhe na zhes bya ba'i 'dri ba 'di 'brel ba med do zhe na/ 'brel ba med pa ma yin te/ phung po rnams ngo bo nyid med pa'i phyir/ de'i ngo bo nyid brjod pas ni dmigs kyis dbye bar mi nus kyi/ 'on kyang de'i rten dmigs kyis phye bas 'gyur te/ de'i phyir gzugs gang zhe na zhes 'dri'i/ gzugs kyi phung po ni ma yin no/ /rgyu dang 'bras bu'i dngos por gzugs kyi dbye ba bstan pa'i phyir/ 'byung ba chen po bzhi dag dang zhes bya ba la sogs pa smos te/ 'di ltar 'byung ba chen po bzhi po thams cad ni rgyur byas pa'i gzugs thams cad kyi rgyu yin la/ rgyur byas pa'i gzugs thams cad ni 'byung ba chen po thams cad kyi 'bras bu yin no/ /'byung ba rnams kyi chen po ni rgyur byas pa'i gzugs thams cad kyi rten yin pas gtos che ba'i phyir ro/ /yang na gzugs la sogs pa 'dus pa thams cad la srab la sogs pa yod pa'i phyir ram/ gnas pa tha gru che ba'i phyir chen po'o/ /de dag gi 'byung ba ni rgyur byas pa'i gzugs sna tshogs 'grub pa na de dang de dag gi rnam par 'byung bas 'byung ba rnams so/ /yang na sems can thams cad kyi las kyi dbang gis thog ma med pa'i 'khor ba nas nam yang ma byung ba ma myong bas 'byung ba rnams so/ /gzhan dag la yang 'byung ba nyid thal bar mi 'gyur te/ ming grags pa yin pas sa steng nyal la sogs pa bzhin no/ /de dag ni bzhi kho na ste/ mi nus pa dang mi dgos pa nyid du thal bar 'gyur ba'i phyir mang ba'am nyung ba ma yin no/ /'byung ba'i bya ba ni brten pa dang / sdud pa dang / smin par byed pa dang / skyod par byed pa tsam du zad de/ de dag nyid kyis de'i bya ba yongs su rdzogs pa dang / bya ba gzhan med pa'i phyir 'byung ba dag ni bzhi kho na'o/ /brten pa la sogs pa bzhin du nam mkha'i bya ba ni go 'byed pa yin te/ de yang nam mkhas byed pas na sa la sogs pa bzhin du nam mkha' yang 'byung ba chen po nyid du thal bar 'gyur ram/ de ni de ltar mi 'gyur te/ ci'i phyir zhe na/ thogs pa dang bcas pa'i gzugs med pa tsam ma gtogs par nam mkha' zhes bya ba ci yang med do/ /thogs pa dang bcas pa'i rang gi ngo bo nyid de nas song ste/ rang gi go der thogs pa dang bcas pa la go 'byed par zad kyi nam mkhas ni ma yin te/ gzugs ltar nam mkha' phyogs de nas song ba med pas de go 'byed ces byar mi rung ngo / /thogs pa dang bcas pa'i gzugs ni rang gi phyogs su gzugs gzhan 'byung ba'i bgegs byed kyi nam mkha' ni ma yin no/ /de lta bas na 'dir gang na gang yod na ni go phye ba med la/ de na de med na ni der go phye ba yod pas de'i phyir de nyid gnas de nas song nas go phye ba yin gyi nam mkha' ni ma yin no/ /de bas na nam mkha' ni sa la sogs pa ltar 'byung ba chen po ma yin no/ /'byung ba bzhi dag rgyur byas pa zhes bya ba ni 'byung ba chen po bzhi dag gi gzugs dang 'byung ba chen po bzhi dag rgyur byas pa'i gzugs zhes bya ba'i sgra gnyi gar yang sbyar ro/ /skyed pa dang brten pa dang gnas pa dang ston pa dang 'phel bar byed pa rnams kyi rgyu'i dngos po rnam pa lngas 'byung ba rnams kyis 'byung ba las gyur pa gzung ngo / /rgyur byas pa'i sgra ni rgyu'i don te/ dper na shing rgyur byas nas me byung ngo zhes byas na rgyu de las byung bar shes pa lta bu'o/ /de la skyed pa'i rgyu ni de dag de med par de mi 'byung ba'i phyir ro/ /rten gyi rgyu ni 'byung ba 'gyur na de la brten pa rgyur byas pa'i gzugs kyang rjes su 'gyur ba'i phyir ro/ /gnas pa'i rgyu ni 'byung ba rnams rgyun 'dra bar 'byung ba ni 'byung ba las gyur pa yang 'dra ba'i rgyun mi 'chad pa'i phyir ro/ /rton pa'i rgyu ni de'i stobs kyis rgyun mi 'chad pa'i phyir ro/ /'phel bar byed pa'i rgyu ni 'byung ba 'phel na de la rten pa rgyur byas pa'i gzugs kyang 'phel ba'i phyir ro/ /sa'i khams zhes bya ba la sogs pa bshad pa la rang gi mtshan nyid dang rgyur byas pa'i gzugs 'dzin pa'i phyir sa la sogs pa nyid khams so/ sa la sogs pa smos pa ni phan tshun dang mig gi khams la sogs pa dag las rnam par dbye ba'i phyir ro/ /khams smos pa ni 'jig rten pa'i sa la sogs pa las bye brag tu bya ba'i phyir ro/ /sa la sogs pa ni 'jig rten pa dang bstan bcos las grags pa'i bye brag gis rnam pa gnyis su 'gyur te/ de la 'jig rten pa'i ni kha dog dang dbyibs kyi bdag nyid du kun du tha snyad 'dogs pa yin pa'i phyir khams ma yin no/ /bstan bcos las byung ba rnams la ni sra ba la sogs pa'i ngo bo nyid yod pa'i phyir yang dag par na khams yin no/ /'byung ba bzhin du sa'i khams la sogs pa'i rang gi ngo bo nyid kyang ma bshad par mi shes pas yang sa'i khams gang zhe na zhes bya ba la sogs pa dris so/ /sra ba nyid do zhes bya ba la nyid ni sra ba kho na sra ba nyid de 'di la don gzhan ni med do/ /sra ba dang mkhrang ba dang 'thas pa ni rnam grangs su gtogs pa'o/ /chu'i khams gang zhe na/ gsher ba nyid do zhes bya ba ni 'du bar byed pa'i bdag nyid yin pa dang rlan par byed pas gsher ba'o/ /me'i khams ni sreg par byed pa yin pas tsha ba'o/ /rlung gi khams ni yang zhing g.yo ba nyid do zhes bya ba la yang ba nyid rlung gi khams yin no zhes brjod na ni rgyur byas pa'i gzugs la yang 'byung ba nyid thal bar 'gyur ro/ /rlung gi khams g.yo ba'o zhes brjod pa ni de'i las nyid bstan par 'gyur gyi/ rang gi ngo bo ni ma yin te/ de'i phyir de yang ba rgyur byas pa'i gzugs dang las rnam par gcod pa'i phyir rlung gi khams ni yang zhing g.yo ba'o zhes de skad ces brjod do/ /g.yo ba ni dngos po'i rgyun yul gzhan du 'byung bar byed pa'i rgyu yin no/ /sa dang / chu dang / me dang / rlung gi khams de dag dang rgyur byas pa'i gzugs phan tshun tha dad du mi 'jug par ci mngon zhe na/ las las mngon te/ de'i phyir de dag gi las ni brten pa dang / sdud pa dang / smin par byed pa dang / skyod par byed pa brjod do/ /de dag gi rang gi ngo bo mi dmigs kyang rdo la sogs pa la yod par las las ji ltar rjes su dpag ce na/ 'di ltar rdo la sogs pa la 'dus pa dang / skam pa dang / g.yo ba rnams yod pa las chu dang / me dang / rlung rnams sa'i khams dang lhan cig 'jug par mngon no/ /chu la yang shing 'degs pa dang / pad+ma'i 'dab ma rgyas pa dang / chu g.yo ba rnams yod pa las sa dang / me dang rlung rnams chu'i khams dang lhan cig rgyu bar mngon no/ /me la yang me lces 'degs pa dang / 'dus pa dang / g.yo ba rnams yod pa las sa dang chu dang rlung rnams me dang lhan cig 'jug par mngon no/ /rlung la yang 'degs pa dang / mi 'gyes pa dang / gos la sogs pa skam par byed pa yod pa las/ sa dang chu dang me rnams rlung gi khams dang lhan cig 'jug par mngon no/ /las dang rang gi ngo bo gnyis bye brag ci yod ce na/ bya ba la ltos nas las rnam par gzhag ste/ 'di ltar brten par bya ba'i rdzas brten pa la ltos nas sa'i khams kyi las ni brten pa zhes bya'o/ /bsdu bar bya ba la ltos nas chu'i las ni sdud pa'o/ /smin par bya ba la ltos nas/ ma'i las ni smin par byed pa'o/ /'phel bar bya ba nur nur po dang / myu gu la sogs pa la ltos nas rlung gi las ni skyod par byed pa'o/ /bskyod pa ni 'phel bar byed pa dang 'gyur bar byed pa'o/ /ngo bo nyid ni dngos po gzhan thams cad la mi ltos pa ste/ 'di ni las dang ngo bo nyid kyi bye brag go/ /'byung ba rnams kyi spyi dang khyad par gyi ming dang / rang bzhin bshad zin to/ /'byung ba rnams kyi 'og tu bstan pa rgyur byas pa'i gzugs kyi rab tu dbye ba dang rang gi ngo bo mi shes te/ de'i phyir rgyur byas pa'i gzugs gang zhe na zhes dris te/ rnam pa ni du zhig rang gi ngo bo ni ci 'dra zhes bya ba'i tha tshig go/ /mig gi dbang po'i rang gi ngo bo ci 'dra zhe na/ yul kha dog gzugs dang ba'o zhes bya bas rang gi ngo bor ston te/ skabs yin pas 'byung ba chen po bzhi dag rgyur byas pa zhes bya ba dang sbyar ro/ /kha dog ni sngon po dang ser po la sogs pa rnam pa bzhi'o/ /kha dog la lta ba dang kha dog tu snang ba'i rnam par shes pa'i thun mong ma yin pa'i rgyu yin pa'i phyir kha dog ni de'i yul yin pas yul kha dog ces bya'o/ /'di ni 'dir dang ba'i don te/ dper na gzugs la brten nas de ltar snang ba'i gzugs brnyan me long ngam/ snod kyi chu dang ba'i nang du 'byung ba de bzhin du gzugs dang sgra la sogs pa la brten nas/ de ltar snang ba'i rnam par rig pa mig la sogs pa gzugs dang ba'i bdag nyid lnga po dag las 'byung ngo / /'dir ni mig la sogs pa phan tshun dang / yul gzugs kyi bdag nyid dang ba dang / yid dang / dad pa las rnam par dbye bar bya ste/ gzugs dang ba'i bdag nyid du bye brag med pa dang / yul kha dog yin par bye brag med pa'i phyir yul kha dog gzugs dang ba'o zhes gnyis ka brjod do/ /de la yul kha dog ces bya bas ni rna ba la sogs pa dang / yul gyi gzugs dang ba las rnam par 'byed de/ rna ba la sogs pa dang yul ni dang ba yin yang kha dog yul ma yin no/ /gzugs dang ba'i bdag nyid kyis ni yid las rnam par 'byed de/ de'i yul kha dog yin yang gzugs dang ba'i bdag nyid ni ma yin no/ /gzugs smos pas ni dad pa dang ba'i bdag nyid las rnam par 'byed de/ dad pa ni dang ba'i bdag nyid kyang yin la yul kha dog kyang yin te/ de'i phyir gzugs smos so/ /mig gi dbang po ni dang ba yul kha dog go zhes brjod na dad pa la yang thal bar 'gyur bas de'i phyir gzugs smos te/ dad pa ni gzugs kyi bdag nyid ma yin pa'i phyir/ mig la sogs pa ni dbang byed pa'i phyir dbang po rnams te/ tshogs pa 'di la bdag po byed ces bya ba'i tha tshig go/ /de bas na bdag po'i don ni dbang po'i don te/ ji ltar mig la sogs pa yul can rnams phan tshun yul tha dad pas tha dad par brjod de/ mig gi dbang po gang zhe na/ yul kha dog gzugs dang ba'o/ /rna ba'i dbang po gang zhe na/ yul sgra gzugs dang ba'o zhes bya ba la sogs pas tha dad par brjod pa de bzhin du gzugs la sogs pa yul rnams kyang mig la sogs pa yul can rnams tha dad pas tha dad par brjod de/ gzugs ni mig nyid kyi yul yin te/ rna ba la sogs pa'i ma yin te/ de dag gi yul rnams ni sgra la sogs par rnam par gzhag pa'i phyir ro/ /'dir yid ni skabs ma yin pa'i phyir sgrub pa yang med/ dgag pa yang med do/ /de ltar na gzugs la sogs pa phan tshun tha dad par brjod pa yin no/ /mig gi yul ni gzugs nyid yin gyi/ gzugs ma yin pa ni ma yin te de ltar na mig gi dbang po'i yul sngon po dang ser po la sogs pa phan tshun mi 'dra ba rnams kyang gzugs su tha dad pa med par bstan pa yin no/ /gal te gzugs mig gi yul nyid kyis bye brag tu byas pa yin na kha dog dang dbyibs dang rnam par rig byed do zhes bya ba ci'i phyir smos she na/ gzugs rab tu dbye ba la the tshom za ba dang nor ba dang mi rtogs pa rnams la rab tu dbye ba bstan na the tshom za ba dang nor ba dang mi rtogs pa sel bar 'gyur ro/ /kha dog ni rnam pa bzhi ste/ sngon po dang / ser po dang / dmar po dang / dkar po'o/ /sprin dang / du ba dang / rdul dang / khug rna dang / grib ma dang / nyi ma dang / snang ba dang / mun pa dang / mngon par skabs yod pa dang / nam mkha' zhes bya ba 'di rnams 'dir ci'i phyir ma smos she na/ kha dog dang / dbyibs bzhin du gzugs kyi bye brag tu 'dir ma smos te/ sprin la sogs pa ni yul yongs su chad pa dang / yul yongs su ma chad pa'o/ /de la gang dag yongs su chad pa de dag ni dbyibs kyi nang du 'dus pa nyid de/ gang dag yul yongs su chad pa de dag ni kha dog gi bye brag yin pas/ kha dog dang dbyibs gnyis las tha dad par rnam par gzhag mi nus te/ de'i phyir 'dir logs shig tu ma smos so/ /de la mngon par skabs yod pa ni de las gzhan pa thogs par byed pa'i rig bya dang bral ba'i phyogs gang yin pa'o/ /nam mkha' ni steng na sngon por snang ba gang yin pa'o/ /dbyibs ni ring po dang / thung ngu dang / lham pa dang / zlum po dang / mtho ba dang / dma' ba dang / phya le ba dang / phe le ba ma yin pa'o/ /dbyibs zhes bya ba 'di ci zhig /ring po zhes bya ba la sogs pa ma smras sam/ de nyid mi shes so zhe na gang la ring po la sogs pa'i blo 'byung ba de ring po la sogs pa'i dbyibs so/ /de ltar na 'o na kha dog la sogs pa las gud na dbyibs med par 'gyur ro/ /ci'i phyir zhe na/ 'di ltar kha dog la sogs pa 'dus pa mang po phyogs gcig na gnas pa la ring po'i blo 'byung / chung ngu la ni thung ngu'i blo 'byung / phyogs bzhir mnyam pa la ni lham pa'i blo 'byung / kun nas mnyam pa la ni zlum po'i blo 'byung / dbus su phal che ba la ni mtho ba'i blo 'byung / nyung ba la ni dma' ba'i blo 'byung / phyogs gcig gi ngos la ni phya le ba'i blo 'byung / phyogs tha dad pa'i ngos la ni phya le ba ma yin pa'i blo 'byung ba'i phyir ro/ /kha dog la sogs pa 'dus pa la ring po la sogs pa'i blo 'byung bar zad kyi/ dbyibs don gzhan du gyur pa med par de ji ltar shes she na/ reg pa'i sgo nas kyang ring po la sogs pa'i blo 'byung ba'i phyir ro/ /dbang po gzhan gyi yul la gzhan gyi sgo nas blo 'byung du mi rung ste/ dbang po du ma don med par thal bar 'gyur ro/ /de ni dbang po'i shes pa ma yin gyi/ rjes su dpag pa'i shes pa ste/ dri las me tog gi kha dog shes pa bzhin no/ /dri me tog gi kha dog la nges pa ltar reg pa ni dbyibs la de ltar ma yin te/ bzhag pa 'di ni mthun pa ma yin no/ /de lta bas na dbang po gnyis kyi sgo nas bum pa la sogs pa bzhin du/ ring po la sogs pa'i dbyibs la shes pa 'jug pa'i phyir de kha dog la sogs pa las don gzhan ma yin no/ /rdul phra rab rnams ni cha shas med pa'i phyir ring po la sogs pa'i ngo bor nang phan tshun tha dad par yang mi rigs so/ /de lta bas na sngon po la sogs pa'i rdul phra rab ltar ring po la sogs pa'i rdul phra rab rnams yod pa ma yin no/ /de'i phyir dbyibs kyi rdul phra rab rnams 'dus pa la ring po la sogs pa'i dbyibs shes byar yang mi rung ste/ dbyibs kyi rdul phra rab med pa'i phyir ro/ /dbyibs ni rdzas gcig pa ma yin te/ tshu rol dang dbus dang pha rol gyi cha yod pa'i phyir ro/ /de dag tha dad pa med pa ma yin te/ cig car du mngon sum dang / mngon sum du ma gyur pa dang / 'brel pa can tha dad pa'i phyir de dag gdon mi za bar tha dad par 'gyur ro/ /ci ste tha mi dad na yang de dang 'brel pa can rnams kyang phyogs tha dad pa med par thal bar 'gyur ro/ /de lta bas na dbyibs ni rdzas su yod pa ma yin te/ 'on kyang kha dog la sogs pa de lta de ltar gnas pa rnams la ring po la sogs par 'dogs so/ /'o na rnam par rig byed ces bya ba'i chos 'di gang zhig yin/ de la dmigs pa'i sems las skye ba lus kyi 'byung ba chen po la brten nas 'byung ba lus kyi dbyibs te/ rang kun nas slong ba'i sems rnam par rig par byed pas rnam par rig byed ces bya ba'o/ /'dir ni de la dmigs pa'i sems las skyes pa gang yin pa de nyid rnam par rig byed de/ gzhan la dmigs pa las ni ma yin no/ /de ltar na smra ba'i mchu la sogs pa'i dbyibs ni de la dmigs pa'i sems las skyes pa ma yin pa dang / smon lam las skyes pa yang bkag pa yin no/ /de ni smon lam gyi sems dang gzhan rnam par smin pa'i rgyu'i sems las kyang skyes pa yin te/ de'i phyir rnam par rig byed du mi 'dod do/ /de la gal te rnam par rig byed ces bya ba'i dbyibs gcig pus lus kyi spyir khyab pa yin na ni gcig yin pa'i phyir dang / khyab pa yin pa'i phyir te thams cad na yod pas yan lag so so la yang gzung bar 'gyur ro/ /yang na cha shas su rnam par gnas pa'i phyir gcig tu mi rung ngo / /skye mched bcu ni rdul phra rab bsags pa'o zhes 'byung ba'i grub pa'i mtha' la'ang gnod par 'gyur ro/ /de lta bas na dbyibs zhes bya ba rdzas gzhan du gyur pa med de/ de'i phyir dbyibs ni rnam par rig byed ma yin no/ /gal te lus las don gzhan du gyur pa'i dbyibs rnam par rig byed ma yin na 'o na de gang yin/ de la dmigs pa'i sems pa'i rgyu mtshan can lus kyi rgyud rgyun ma chad par yul gzhan du 'byung ba'i rgyu yin no/ /sems pa rgyur gyur pa ni lus kyi rgyud yul gzhan du 'byung ba'i rgyu rlung gi khams bsgrub pa'i phyir ro/ /lus yul gzhan du 'byung ba de ni rang gi rgyu sems pa rnam par rig par byed pa'i phyir rnam par rig byed do/ /de ni dge ba dang mi dge ba'i ngo bo nyid ma yin te/ 'on kyang de dge ba dang / mi dge ba'i sems pas skyed pa'i phyir 'bras bu la rgyu btags te/ dge ba dang mi dge ba nyid du 'dogs so/ /'dir gzugs rnam par gzhag pa ni ngo bo nyid dang gnas pa dang / byed pa'i mtshan nyid kyis rnam par gzhag ste/ ngo bo nyid ni sngon po la sogs pa kha dog bzhi po rnams te/ de'i ngo bo yin pa'i phyir ro/ /gnas pa ni ring po la sogs pa dbyibs rnam pa brgyad de/ kha dog de lta de ltar gnas pa'i phyir ro/ /byed pa'i mtshan nyid ni rnam par rig byed de/ lus g.yo ba'i bdag nyid yin pa'i phyir ro/ /rdzas su yod pa ni mig la sogs pa'i yul yin la/ dbyibs dang rnam par rig byed ni/ btags pa yod pa'i phyir mig gi yul ma yin pa snyam na ji ltar gzugs mig gi yul zhes brjod/ 'dir 'jig rten dang mthun par bya ba'i phyir dbyibs kyi khyad par dang bcas pa'i kha dog mig gi yul du 'dod de/ 'di ltar dbyibs kyi khyad par can du gyur pa'i kha dog la mig gis 'dzin gyi/ dbyibs sam kha dog gcig pu la ni ma yin te/ ring po la sogs pa'i dbyibs kyi khyad par du gyur pa'i kha dog tu snang ba'i mig gi rnam par shes pa skye ba'i phyir ro/ /de'i phyir kha dog dang dbyibs ni mig gi yul lo zhes 'jig rten na grags so/ /de bzhin du yul gzhan du 'byung bas khyad par du gyur pa'i lus kyi rgyud 'dzin pa'i phyir rnam par rig byed kyang mig gi yul zhes grags so/ /don dam par ni dbyibs bzhin du kha dog kyang mig gi yul ma yin te/ dbyibs bzhin du rdul phra rab ma grub pa'i phyir dang / phyi rol gyi don rnam par shes pa'i yul ma yin pa'i phyir ro/ /de lta bas na slob dpon gyis 'dir 'jig rten dang bstan bcos las grags pa dang / mthun par mdzad par shes so/ /gzugs kyi 'og tu sgra bstan pa'i phyir de bshad ma thag tu sgra bshad par rigs pas na/ sgra gang zhe na zhes dris pa dang / rna ba'i yul de zhes bya ba ste/ rna ba nyid kyi yul yin gyi/ dbang po gzhan gyi ma yin no/ /de ltar na rgyur byas pa'i gzugs yin par khyad par med kyang dbang po gzhan gyi yul gzugs la sogs pa las de bye brag tu bstan pa yin no/ /rna ba'i yul ni sgra nyid do zhes bya bas kyang sgra'i bye brag phan tshun tha dad pa rnams sgra'i skye mched nyid du bye brag med par bstan pa yin no/ /de'i dbye ba bstan pa'i phyir ro/ /zin pa dang ma zin pa dang gnyi ga'i ste/ 'byung ba chen po'i rgyu las byung ba'o zhes bya ba smos so/ /de la zin pa'i ni lus su gtogs pa rnams te/ sems dang sems las byung ba rnams kyis gnas kyi dngos por gzung ba rnams so/ /bzlog pa ni mi zin pa rnams so/ /de dag ni 'di'i rgyu yin pas 'byung ba chen po zin pa dang ma zin pa dang gnyi ga'i ste/ 'byung ba chen po'i rgyu las byung ba'o/ /de la zin pa'i 'byung ba chen po'i rgyu las byung ba ni lag pa dang ngag gi sgra la sogs pa'o/ /mi zin pa'i 'byung ba chen po'i rgyu las byung ba ni rlung dang nags tshal dang 'bab chu'i sgra la sogs pa'o/ / gnyi ga'i 'byung ba chen po'i rgyu las byung ba ni rnga'i sgra la sogs pa'o/ /dri gang zhe na/ sna nyid kyi yul zhes bya ba dang / sna'i yul ni dri nyid do zhes bya ba yang snga ma bzhin no/ /dri mnyam pa ni dbang po'i 'byung ba chen po rnams la phan pa yang mi 'dogs gnod pa yang mi byed pa'o/ /dri ni lhan cig skyes pa dang / sbyar ba las byung ba dang / gyur pa las byung ba'o/ /de la lhan cig skyes pa ni tsan+dan dang gur gum la sogs pa'o/ /sbyar ba las byung ba ni bdug spos ri lu la sogs pa'i dri'o/ /gyur pa las byung ba ni a mra smin pa la sogs pa rnams kyi'o/ / ro gang zhe na zhes bya ba la sogs pa lce nyid kyi yul zhes bya ba dang / lce'i yul ni ro nyid do zhes bya ba yang / snga ma bzhin du rgya cher brjod par bya'o/ /rang bzhin gyis tha dad pa'i phyir tha dad pa drug smos te/ gzhan du dbye na ni de'i sbyar ba tha dad pa mtha' yas par 'gyur ro/ /'dir ni rgyur byas pa'i gzugs bstan pa'i skabs yin pas ro'i 'og tu rgyur byas pa'i gzugs reg bya'i phyogs gcig bstan pas de'i phyir ro bshad pa'i 'og tu reg bya'i phyogs gcig bshad par 'dod nas/ reg bya'i phyogs gcig gang zhe na zhes dris so/ /reg bya ni rnam pa gnyis te/ 'byung ba rnams dang / de dag rgyur byas pa'i gzugs so/ /'byung ba rnams ni sngar bstan pa dang / bshad pa rnams so/ /'dir ni rgyur byas pa'i gzugs kyi skabs yin pas de'i phyir reg bya'i phyogs gcig gang zhe na zhes bya ba ni rgyur byas pa'i gzugs zhes bya ba dang sbyar ro/ /lus kyi yul te zhes bya ba ni lus nyid kyi yul yin gyi/ mig la sogs pa'i ni ma yin no/ /de ltar na gzugs dang sgra la sogs pa las de tha dad par bstan pa yin no/ /lus nyid kyi yul reg bya nyid ces bya bas ni 'byung ba dang 'byung ba las gyur pa gnyis phan tshun mi 'dra yang reg bya nyid du bye brag med par bstan pa yin no/ /lus kyi yul te zhes bya ba 'byung ba rnams kyang lus kyi yul yin pas rgyur byas pa'i gzugs su thal bar 'gyur ro/ /de'i phyir 'byung ba chen po rnams gzhag ste zhes bya ba smos so/ /reg bya'i phyogs gcig rab tu bstan pa'i phyir/ 'jam pa nyid dang / rtsub pa nyid dang zhes bya ba la sogs pa smos so/ /lus kyi dbang por reg par bya bas na 'jam pa nyid la sogs pa reg bya zhes brjod na ni/ gang gis gang la reg pa des kyang de la reg par gdon mi za bar 'gyur bas lus kyi dbang po yang reg byar thal bar mi 'gyur ram/ gang gis kyang ci la yang reg pa med de/ bdag nyid thams cad kyis reg na ni gong bu thams cad rdul phra rab kyi tshad tsam du 'gyur ro/ /phyogs kyis reg na ni rdul phra rab rnams cha shas dang bcas par thal bar 'gyur bas rdul phra rab nyid nyams par 'gyur ro/ /de bas na yul dang dbang po gnyis bar ma chad par skye ba na gang la brten nas rnam par shes pas yul dmigs pa des yul la reg ces bya bar gdags kyi yul gyis rnam par shes pa'i gnas pa ni ma yin no/ /de'i phyir lus kyi dbang pos 'byung ba rnams nyid la reg go zhes gdags kyi/ de dag la gnas pa'i gzugs la sogs pa la ni ma yin te/ lus kyi rnam par shes pas mi 'dzin pa'i phyir ro/ /me tog la sogs pa'i kha dog la sogs pa la gnod pa ni de'i gnas la gnod pa'i phyir gyi lus kyis reg pa'i phyir ni ma yin no/ /kha dog la sogs pa'i gnas la yang lus kyis reg pa ma yin na ji ltar gnod par 'gyur zhe na/ 'di ni bsam par bya ba ste/ de lta bas na 'dir 'jig rten gyi tha snyad du 'brang bar bya'i don dam par ni ma yin no/ /'jam pa nyid ni mnyen pa dang / mi rtsub dang / spyad du bzod pa zhes bya ba'i tha tshig go/ /'jam pa kho na 'jam pa nyid do/ /rtsub pa nyid ces bya ba ni 'di la rtsub pa yod pas rtsub pa zhes bya ste/ spu can bzhin no/ /rtsub pa zhes bya ba ni stobs zhes bya ba'o/ /rtsub pa kho na rtsub pa nyid de/ rud rud po dang / hrud hrud po dang / shin tu 'jam pa ma yin pa zhes bya ba'i tha tshig go/ /lci ba ni lcid gnon zhes bya ba'i tha tshig go/ /lci ba kho na lci ba nyid de/ dngos po rnam pa 'jam pa na gang gis dma' bar byed pa'o/ /yang ba nyid ni gang gis dngos po rnams 'jam pa na dma' bar mi 'gyur ba ste/ dbyibs cher zin kyang gang yod na gdeg bla ba ste/ srang mda'i rtse mo dma' bar 'gyur ba'i rgyu zhes bya ba'i tha tshig go/ / gang gis nyen na dro ba 'dod pa de ni grang ba nyid do/ /dpyid dang ston grang ba yod kyang dro ba mi 'dod pa ma yin nam/ dro ba 'dod pa ni gzhan du mi 'byung bas grang ba nyid dro ba 'dod par byed pa zhes nges par gzung ngo / /de ltar na de'i 'bras bu yang de dang rigs gcig pa'i phyir mtshan nyid pa rnams kyis rtogs so/ /bkres pa ni zas 'dod par byed pa'o/ /skom pa ni skom 'dod par byed pa'o/ /sems las byung ba'i chos ni lus kyi dbang po'i yul ma yin no zhe na/ de'i phyir rgyu la 'bras bu gdags pa byas nas 'dir bkres pa dang skom pa bstan te/ rlung gi khams kyi shas che ba ni bkres pa'i rgyu reg bya'i bye brag 'ga' zhig 'byung ba de ni bkres pa'i rgyu yin pa'i phyir/ bkres pa zhes brjod do/ /de bzhin du me'i khams kyi shas che na skom pa'i rgyu yin pa'i phyir skom pa zhes brjod do/ /gzhan nas brgyal ba dang / nyams yod pa dang nyam chung ba la sogs pa reg bya'i bye brag smos pa rnams kyang 'di dag gi nang du 'dus pas logs shig tu ma brjod do/ /brgyal ba ni 'jam pa nyid las gud na med do/ /nyams yod pa ni rtsub pa dang lci ba nyid las logs shig na med de/ de ltar gzhan nas reg bya'i bye brag 'byung ba rnams kyang 'di dag gi nang du mthun mthun du bsdu bar bya'o/ /'jam pa la sogs pa yang gnas kyi bye brag gis phan tshun tha dad de/ chu dang me'i khams kyi shas che na ni 'jam pa nyid de/ sa dang rlung gi khams kyi shas che ba ni rtsub pa nyid do/ /sa dang chu'i khams kyi shas che ba ni lci ba nyid do/ / me dang rlung gi khams kyi shas che ba ni yang ba nyid do/ /de nyid kyi phyir shi ba'i lus la lci ba nyid kyi shas che ba'o/ /chu'i khams kyi shas che ba ni grang ba'o/ /rlung gi khams kyi shas che ba ni bkres pa'o/ /me'i khams kyi shas che ba ni skom pa'o/ /de bzhin du gnas kyi bye brag gis phan tshun bye brag tu gyur par rgyur byas pa'i gzugs gzhan la yang ji ltar mthun mthun du khong du chud par bya ste/ 'dir ni tshig mang du 'gyur ba spangs pa'i phyir phyogs tsam zhig bstan to/ /gzugs kyi phung po'am rgyur byas pa'i gzugs las rnam par rig byed ma yin pa 'ba' zhig lus pas/ rnam par rig byed ma yin pa gang zhe na zhes dris pa dang / rnam par rig byed dang / ting nge 'dzin las byung ba'i gzugs te/ bstan du med pa thogs pa med pa'o zhes bya bas de bstan to/ /de la rnam par rig byed ni rnam pa gnyis te/ lus kyi rnam par rig byed dang / ngag gi rnam par rig byed do/ /de re re la yang dge ba dang / mi dge ba dang lung du mi ston pa'i bye brag gis rnam pa gsum gsum du 'gyur ro/ /rnam par rig byed ma yin pa yang rnam pa gsum nyid do/ /'dod par gtogs pa dang / gzugs su gtogs pa dang zag pa med pa'o/ /de la 'dod pa na spyod pa'i rnam par rig byed ma yin pa ni dge ba dang / mi dge ba'i rnam par rig byed las byung ba ste/ de yang so sor thar pa'i sdom pa dang / byang chub sems dpa'i sdom pa dang / sdom pa ma yin pa dang / de dag ma rtogs pa'o/ /de la so sor thar pa'i sdom pa ni dge slong dang / dge tshul dang / dge bsnyen dang / bsnyen gnas la gnas pa'i bye brag gis rdzas su rnam pa bzhi'o/ /dge slong dang dge slong ma la sogs pa'i bye brag gis ming du ni rnam pa brgyad do/ /de la so sor thar pa'i sdom pa ni gzhan la gnod pa byed pa las gzhi dang bcas par rnam pa thams cad du ldog pa'o/ /byang chub sems dpa'i sdom pa ni lus dang srog gis bsdus pa'i dngos po la mi lta bar/ lus dang ngag dang sems kyis rnam pa thams cad du gzhan la phan 'dogs par zhugs pa'o/ /sdom pa ma yin pa ni rnam pa thams cad du gzhan la gnod pa byed par zhugs pa'o/ /phyogs gcig gis phan 'dogs pa dang gnod pa byed par zhugs pa ni sdom pa yang ma yin sdom pa ma yin pa yang ma yin pa'o/ /de la gzugs su gtogs pa dang / zag pa med pa ni ting nge 'dzin las byung ba ste/ de yang bsam gtan gyi sdom pa dang / zag pa med pa'i sdom pa go rims bzhin no/ /de la bsam gtan bzhi po dag dang / mi lcogs pa med pa dang / bsam gtan khyad par can dag na zag pa dang bcas pa'i ting nge 'dzin dang lhan cig byung ba ni bsam gtan gyi sdom pa'o/ /zag pa med pa'i ting nge 'dzin dang lhan cig byung ba ni zag pa med pa'i sdom pa'o/ /de yang 'byung ba rnams la brten nas 'byung ba dang / rjes su 'jug pa'i phyir rgyur byas pa'i gzugs nyid do/ /'di ni 'di na'o/ /pha bi ni pha bi na'o zhes brjod pa 'di ni bstan pa'o/ /de 'di la med pas bstan du med pa'o/ /rang gi phyogs su gzhan 'byung ba'i gegs byed pa ni thogs pa'o/ /rnam par rig byed ma yin pa ni yul na mi gnas pa'i phyir de mi srid pas thogs pa med pa'o/ /gzugs thams cad ni rnam pa gsum ste/ bstan du yod la thogs pa dang bcas pa dang / bstan du med la thogs pa dang bcas pa dang / bstan du yang med la thogs pa yang med pa'o/ /de la bstan du yod la thogs pa dang bcas pa ni mig gi dbang po'i yul lo/ /bstan du med la thogs pa dang bcas pa ni mig la sogs pa lnga dang / sgra dang / dri dang / ro dang reg bya bzhi'o/ /bstan du yang med la thogs pa yang med pa ni chos kyi skye mched kyi gzugs so/ /de yang rnam pa lnga ste/ bsdus pa las gyur pa dang / mngon par skabs yod pa dang / yang dag par blangs pa las byung ba dang / kun brtags pa dang / dbang 'byor pa'o/ /'dir gzugs kyi phung po ni/ rdzas bcu gcig kho nar 'dod pas yang dag par blangs pa las byung ba'i gzugs nyid du bstan du yang med la thogs pa yang med par bshad de/ gzhan ni ma yin no/ /ci'i phyir de dag mi bstan zhe na/ bsdus pa las gyur pa ni rdul phra rab rnams nyid de/ de dag ni sngon po la sogs pa'i kha dog las gud na med de/ sngon po la sogs pa'i kha dog las kha dog tu snang ba gzhan rnams ni med do/ /mngon par skabs yod pa yang rdul phra rab rnams nyid de/ de las gzhan pa thogs par byed pa'i reg bya dang bral ba rnams so/ /de dag kyang kha dog gi bdag nyid yin pa'i phyir 'dir 'dus pa nyid pas yang ma bshad do/ /kun brtags pa ni gzugs brnyan gyi gzugs keng rus la sogs pa'o/ /dbang 'byor pa ni rnam par thar pa la bsam gtan pa'i spyod yul gyi gzugs gang yin pa ste/ de ni rnam par rtog pa'i bdag nyid yin pas 'dir ma 'dus te/ de ni de'i rnam pa can gyi rnam par shes pa la so sor snang ba las phyi rol na med do/ /gzugs brnyan yang yul du snang ba'i rnam par shes pa nyid do/ /rnam par shes pa las gzugs brnyan nam gzugs brnyan las rnam par shes pa gud na med do/ /de lta bas na yang dag par blangs la las byung ba nyid 'dir bshad kyi/ gzhan ni ma yin no/ /mthu stobs kyis che ba'i blos bskyod pa ni bdag lta bu gang gis kyang rtogs par ga la nus te/ de lta bas na de dag ma bshad pa ni slob dpon gyi dgongs pa btsal bar bya'o/ /de ni 'di skad du rnam par rig byed dang ting nge 'dzin las byung ba dge ba dang mi dge ba las byung ba rgyur byas pa'i gzugs ni sems g.yeng ba dang / ma g.yeng ba dang / sems med pa na yang rjes su 'brang ba gang yin pa ste/ de stong pa'i rgyu med na yod pa ni rnam par rig byed ma yin pa'o zhes bstan par 'gyur ro/ /gzugs dang byed pa'i ngo bo nyid yin du zin kyang rang kun nas slong ba'i sems rnam par rig par byed pa bzhin du gzhan la rnam par rig par mi byed pas rnam par rig byed ma yin pa'o/ /'dir ni bye brag tu smra bas kun brtags pa'i rnam par rig byed bzhin du rnam par rig byed ma yin pa yang med de/ tshad ma'i yul du ma gyur pa'i phyir ro/ /so sor thar pa'i sdom pa la sogs pa ni med pa ma yin te/ 'di ltar sems pas bya bar khas blangs nas bsnyen par rdzogs par bya ba la sogs pa'i cho ga sngon du btang ste/ sems pa gang gis lus dang ngag gi las bkag pa las sdom pa'i sems pa des ma 'ongs pa na de dang rigs gcig pa bskyed pa'i phyir kun gzhi rnam par shes pa la sa bon btab nas/ de'i 'og tu bdag ni srog gcod pa la sogs pa spangs pa'o zhes yang dag par blangs pa dran pa 'byung ste/ de byung nas gang 'dzem pa de bslab pa mi 'dral lo/ /de ltar na yang dag par blang ba'i sems pa rgyun chags pa dang bcas pa ni sdom pa zhes bstan pa yin no/ /de bzhin du bsam gtan nam lam la snyoms par zhugs na rnam par rig byed ma yin pa med par yang gang thob na langs nas log pa'i ngag la sogs pa la mi 'jug pa dang / yang dag pa'i ngag la sogs pa la 'jug pa de lta bu'i bsam pa dang gnas thob ste/ de'i phyir rgyu la rgyu can gdags par byas nas lam gyi yan lag brgyad rnams dang / bsam gtan gyi sdom pa yang rnam par gzhag go/ /sdom pa ma yin pa yang de'i rigs su skyes pa rnams kyi gsad par sbyor bar bya ba'i sems pa dang / gzhan gyi rigs su skyes pa rnams kyi las de bya bar khas len pa'i sems pa ste/ sems pa de med kyang sdom pa ma yin pa btang ba ma yin te/ sems can rnams la gnod pa bya bar bsam pa las ma log pa'i phyir ro/ /de ltar bya ba'i sems pa dang / khas len pa'i sems pa sems can rnams la gnod pa bya ba'i bsam pa dang ldan pa ni sdom pa ma yin pa'o zhes bstan pa yin no/ /'dir rnam par rig byed dang ting nge 'dzin las byung ba nyid ni brda phrad par sla bas yang ma spros so/ /sdom pa dang sdom pa ma yin pa'i sems pa rnams kyi dge ba dang mi dge ba ni bdag nyid kho nas so/ /de'i rgyun chags pa ni dge ba dang mi dge ba'i sems pas 'phangs pa dang / dge ba dang mi dge ba'i sems pa'i 'bras bu yin pa'i phyir ro/ /bsam gtan dang zag pa med pa'i sdom pa yang bsam gtan dang zag pa med pa'i lam rgyu yin pa dang / yang dag pa'i ngag la sogs pa 'bras bu yin pa'i phyir dge ba'o/ /gzugs ni lus dang ngag yul yin pa'i phyir te/ yul can la yul btags pa'i phyir ro/ /bstan du med pa thogs pa med pa ni/ brda phrad par sla bas ma bshad do/ /de'i ci'i phyir rnam par rig byed ma yin pa la thug pa'i gzugs kyi phung po 'di gzugs zhes bya zhe na/ bcom ldan 'das kyis kyang dge slong dag gzugs su rung bas de'i phyir gzugs nye bar len pa'i phung po zhes pa'o/ /ci gzugs she na/ lag pa'i 'dus te reg pas reg na gzugs su rung ba'o zhes rgya cher gsungs so/ /mdo las kyang lag pa la sogs pa'i 'dus te reg pas gzugs yod pa'i phyir gzugs so zhes gsungs so/ /gzugs kyi gzugs su yod pa 'di gang zhe na/ lag pa la sogs pa'i 'dus te reg pa snga ma'i gnas las gzhan du skyed pa ste/ 'di yang rgyun gyi dbang du byas te brjod kyi/ skad cig la ni ma yin te/ skad cig ni skye ba dang 'jig pa'i dus kyi dbang du byas pa dang / gnas pa med pa'i phyir ro/ /gzugs kyi phung po'i 'og tu tshor ba'i phung po bshad pa'i skabs yin te/ de'i 'og tu bstan pas de'i phyir/ tshor ba gang zhe na zhes dris pa dang / myong ba rnam pa gsum ste zhes bya bas bstan to/ /nyams su myong ba ni myong ba ste/ dngos po'i sim pa dang gdung ba dang gnyi ga'i rnam par ma gtogs pa'i rang gi ngo bo mngon sum du byed pa'o/ /yang na sim pa dang / gdung ba dang gnyi ga'i rnam par ma gtogs pa'i dngos po'i rang gi ngo bo myong bar byed pas myong ba'o/ /de yang ngo bo nyid kyi bye brag gis rnam pa gsum ste/ bde ba dang / sdug bsngal dang sdug bsngal yang ma yin bde ba yang ma yin pa'o/ /bde ba dang sdug bsngal ma gtogs par myong ba gsum pa yod pa ji ltar zhe na/ lung dang rigs pas mngon te/ mdo las tshor ba rnam pa gsum zhes gsungs so/ /yang bde ba yang spangs sdug bsngal yang spangs te/ bde ba yang ma yin sdug bsngal yang ma yin zhes gsungs so/ /rigs pa ni tshor ba dang bral ba'i sems skye ba med pa dang / bde ba dang sdug bsngal dang bral ba'i sems kyang mi dmigs so/ / reg pa myong ba ni tshor ba zhes slob dpon 'dus bzang gsungs te/ 'dod pa dang / mi 'dod pa dang / gnyi ga las ldog pa'i reg pa rnams myong ba gang yin pa de tshor ba'o/ /de ni 'di skad du/ bde ba myong bar 'gyur ba'i reg pa la brten nas bde ba'i tshor ba 'byung ngo zhes rgya cher gsungs so/ / bde ba la sogs pa bskyed pa yin pas de rnam par dbye ba'i phyir ro/ /gal te yul myong ba tshor ba yin du zin na dmigs pa gcig pa rnams las 'di khyad par ci yod de/ de'i phyir reg pa myong ba ni tshor ba'o zhes rnam par gzhag go/ /de lta na 'o na ni 'du shes dang mos pa dang / dran pa dang / shes rab la sogs pa yang tshor ba bzhin du dmigs pa'i sgo nas ngo bo nyid brjod par mi bya'o/ /ji ste 'du shes la sogs pa mtshan mar 'dzin pa la sogs pas dmigs pa gcig pa rnams las khyad par du 'dod na ni tshor ba yang yul myong bar ci'i phyir mi 'dod/ de la dmigs par mi srid pa'i phyir reg pa myong ba yang mtshungs par ldan pa'am/ rgyu'i dngos por yongs su brtag grang na/ de la mtshungs par ldan pa ni ma yin te/ sems las byung ba thams cad reg pa dang mtshungs par ldan par bye brag med pa'i phyir ro/ /rgyu'i dngos por yang mi rung ste/ sems las byung ba thams cad kyi rgyu reg pa yin par bye brag med pa'i phyir ro/ /'jig rten dang bstan bcos las kyang myong ba'i sgra ni 'bras bu'am rgyur grags pa med kyi mngon sum du byed par grags so/ /'di snyam du sems te las dge ba dang / mi dge ba rnams kyi 'bras bu rnam par smin pa 'dis myong ba ste/ de la bde ba myong ba ni las dge ba rnams kyi 'bras bu rnam par smin pa'o/ /sdug bsngal ni mi dge ba rnams kyi'o/ /bde ba yang ma yin sdug bsngal yang ma yin pa ni gnyi ga'i'o snyam mo/ /'dir ni kun gzhi rnam par shes pa nyid las dge ba dang mi dge ba'i rnam par smin pa ste/ don dam par na de dang mtshungs par ldan pa'i btang snyoms nyid las dge ba dang mi dge ba'i rnam par smin pa'o/ /bde ba dang sdug bsngal ni rnam par smin pa las byung ba'i phyir rnam par smin pa zhes btags pa'o/ /de la bde ba myong ba ni gang 'gags na zhes bya ba la sogs pa yin na/ 'o na rten cing 'brel bar 'byung ba las gang 'byung na bral bar mi 'dod pa skye ba de bde ba'i tshor ba'o zhes 'byung ba de ji lta bu/ 'di la 'gal ba med de/ don du na cig shos kyang zin pa'i phyir ro/ /gang byung na 'bral bar mi 'dod pa skye ba zhes bya ba ni don du na de 'gags na phrad par 'dod par yang 'gyur ro zhes bstan pa yin no/ /gang 'gags na phrad par 'dod par 'gyur ro zhes bya ba yang 'dir don du na de byung na 'bral bar mi 'dod pa'o zhes bstan pa yin no/ /'o na dka' thub can rnams mi 'dod bzhin du 'dod chags kyi kun nas dkris pa dang phrad pa rnams 'dod chags las byung ba'i bde ba skyes pa'i tshe 'bral bar 'dod pa skye zhing / 'gags pa na phrad par mi 'dod pa gang yin pa de ji lta bu zhe na/ de ni sun 'byin pa'i phyir de nyid las skye ba ma yin te/ bde ba de tshul khrims dang ting nge 'dzin gyi bar du gcod par mthong ba rnams la gnyi ga mi 'byung bas 'gal ba med do/ /sdug bsngal ni gang byung na bral bar 'dod pa'o zhes bya ba ni gang 'gags na yang phrad par mi 'dod pa'o/ /bral na ni de'i rgyun chad pa'o/ /'dod pa ni mngon par 'dod pa dang smon pa'o/ /sdug bsngal yang ma yin bde ba yang ma yin pa ni gang byung na gnyi gar 'dod par mi 'gyur ro/ /de la lus dang sems rgyas par byed pa dang / yid du 'ong ba'i ngo bo nyid yin pa'i phyir/ bde ba myong ba ni gang 'gags na de dang phrad par 'dod pa'o/ /lus dang sems nyams dmas par byed pa dang / ngo bo nyid kyi mi mthun pa'i phyir/ sdug bsngal myong ba ni de byung na de dang bral bar 'dod pa yin no/ /gnyi ga ni mi 'byung ba la yang myong ba gang yin pa de yod de/ bde ba yang ma yin sdug bsngal yang ma yin pa ste/ nag po yang ma yin dkar po yang ma yin pa'i las dang 'dra'o/ /de'i phyir phan 'dogs pa yang med la gnod pa byed pa yang med par zhugs pa'i phyir ro/ /de byung na gnyi gar 'dod pa med do/ /myong ba rnam pa gsum po 'di ni re re la yang gnas kyi bye brag gis rnam pa drug tu gyur te/ mig dang / rna ba dang / sna dang / lce dang / lus dang / yid kyi 'dus te reg pa las byung ba'i phyir ro/ /yang brten par bsdu na ni rnam pa gnyis su 'gyur te/ lus kyi dang sems kyi'o/ /de la mig dang / rna ba dang / sna dang / lce'i dbang po rnams ni lus la tha dad du mi 'jug pa dang / thogs pa dang bcas pa dang bsags pa bzhin pa'i phyir lus kyi nang du bsdus te lus kyi sgrar brjod do/ /de'i phyir mig dang / rna ba dang / sna dang / lce dang / lus kyi 'dus te reg pa las byung ba'i myong ba ni lus kyi zhes bstan to/ /yid kyi 'dus te reg pa las byung ba ni yid tsam la gnas pa yin pa'i phyir sems kyi zhes bya'o/ /yang mi mthun pa'i phyogs dang gnyen po'i bye brag gis myong ba re re la yang rnam pa gnyis gnyis su 'gyur te/ zang zing dang bcas pa dang zang zing med pa dang zhen pa brten pa dang / mngon par 'byung ba brten pa'o/ /zang zing ni lus la sred pa'o/ /lus ni nang gi nye bar len pa'i phung po'o/ /de la sred pa bu gcig pa phongs pa la 'khyud pa'i tshul gyis mi 'brel bar 'dod pa lta bur 'jug pa gang yin pa de ni zang zing ste/ de dang ldan pas zang zing dang bcas pa'o/ /sred pa de dang ldan pa ma yin pa dang bral ba'i rjes su mthun pa ni zang zing med pa'o/ /gzugs la sogs pa 'dod pa'i yon tan sdug pa lnga la lta ba dang / mngon par chags pa dang smon pa'i mtshan nyid kyi 'dod pas zlos shing yang dang yang goms par byed pas 'dod pa'i yon tan rnams te de dag la mngon par chags pa dang smon pa ni zhen pa'o/ /de la brten pa'am zhen pa de brten pas na zhen pa brten pa'o/ /mngon par 'byung ba ni 'dod pa'i yon tan las 'dod chags dang bral ba'am de'i lam ste/ de la brten pa'am de brten pas mngon par 'byung ba la brten pa'o/ /de la 'jig tshogs dang 'dod chags dang bral ba'i dbang du byas te mi mthun pa'i phyogs dang gnyen po'i dngos por zang zing dang bcas pa dang zang zing med pa gnyis rnam par gnas so/ /'jig rten pa dang / 'dod chags dang bral ba'i dbang du byas te zhen pa brten pa dang mngon par 'byung ba la brten pa rnam par gzhag go/ /ci'i phyir 'dir rang gi ngo bo'i bye brag bstan gyi ji ltar gzhan nas 'byung ba bzhin du gnas la sogs pa'i bye brag gis ma yin zhe na/ 'dir ni mdor bsdu bar bzhed pa dang / tha dad pa thams cad kyang rang gi ngo bo las gud na med pa'i phyir ro/ /'dir gnas la sogs pa'i bye brag ma bshad do/ /tshor ba'i phung po bshad pa'i 'og tu 'du shes kyi phung bo bshad pa'i skabs su bab ste/ de'i phyir 'du shes gang zhe na zhes dris pa dang / yul la mtshan mar 'dzin pa zhes bya ba de bstan to/ /yul ni dmigs pa'o/ /mtshan ma ni yul gyi bye brag sngon po dang ser po la sogs pa dmigs pa rnam par gzhag pa'i rgyu'o/ /de la mtshan mar 'dzin pa ni 'di ni sngon po'o/ /'di ni ser po'o zhes rtog pa'o/ /de lta na 'o na ni/ mig la sogs pa'i rnam par shes pa dang / mtshungs par ldan pa'i 'du shes bye brag rtog pa med pa'i phyir yul la mtshan mar 'dzin pa'i bdag nyid du mi 'gyur ro zhe na/ de ni mtshan mar 'dzin pa'i bdag nyid kho na yin par shes pa yin gyi/ zhan pa'i phyir yongs su gcod pa ni ma yin no/ /gzhan du na sngar ma zin pa'i bye brag las phyis kyang 'di ni sngon po'o/ /'di ni ser po'o zhes rtog par mi 'gyur ro/ /rang gi ngo bo tha dad pa med kyang gnas dang dmigs pas 'du shes tha dad par rig par bya'o/ /gnas las 'du shes kyi tshogs drug ste/ mig gi 'dus te reg pa las byung ba'i 'du shes dang / de bzhin du yid kyi bar du 'dus te reg pa las byung ba'i 'du shes so/ /dmigs pa ni mtshan ma dang bcas pa dang / mtshan ma med pa dang / chung ngu dang / rgya chen por gyur pa dang / tshad med pa dang / ci yang med pa'i skye mched do/ /de la sgra'i sgo nas gang don gyi ngo bor sgro btags pa de ni mtshan ma ste/ mtshan ma de dang lhan cig pa'i dngos po'i rang gi ngo bo ni mtshan ma dang bcas pa'o/ /dngos po de la sgro btags pa'i ngo bo de dang / de ni sgra'o snyam pa'i 'du shes gang yin pa de ni mtshan ma dang bcas pa la dmigs pa'o/ /mtshan ma med pa ni sgro btags pa'i mtshan ma med pa ste/ dngos po'i rang gi ngo bo dang / mya ngan las 'das pa dang / srid pa'i rtse mo'o/ /de la sgro btags pa'i mtshan ma med pa dang / gzugs dang tshor ba'i mtshan ma med pa dang / gsal ba ma yin pa'i phyir/ 'di gsum ni mtshan ma med pa zhes bya'o/ /sgra dang don du 'brel ba mi shes pa ni ngo bo la rang gi ngo bo kho na'i 'du shes 'byung mod kyi/ gzugs yin no zhes bya bar ni ma yin te/ de'i phyir yul de la 'du shes pa ni mtshan ma med pa la dmigs pa'o/ /mya ngan las 'das pa'i dbyings kyang 'dus byas thams cad kyi mtshan mar rab tu nub pa'i ngo bo yin pas de la dmigs pa'i ting nge 'dzin dang mtshungs par ldan pa'i 'du shes ni mtshan ma med pa la dmigs pa'o/ /srid pa'i rtse mo ni gsal ba ma yin pa'i phyir mtshan ma med pa ste/ de la snyoms par zhugs pa'i 'du shes ni/ dmigs pa la mtshan mar mi byed pas mtshan ma la dmigs pa'o/ /'dir ni mtshan ma gsal ba ma yin pa'i phyir/ de la dmigs pa yang bu mo lto med ces bya ba'i tshul du mtshan ma med pa zhes bya'i de ni mtshan ma med pa nyid kyi phyir mtshan ma med pa zhes ni mi bya'o/ /gzhan du na ni 'du shes par thal bar 'gyur te/ mtshan ma med pas mtshan mar 'dzin pa yang med par 'gyur ro/ /chung ngu ni 'dod pa'i khams te ngan pa'i phyir ro/ /rgya chen por gyur pa ni gzugs kyi khams te/ mchog tu gyur pa'i phyir ro/ /tshad med pa ni nam mkha' mtha' yas dang / rnam shes mtha' yas skye mched dag ste/ mu thug pa med pa'i phyir ro/ /yongs su gzung ba ci yang med pa'i phyir ci yang med pa ni ci yang med pa'i skye mched do/ /de lta bas na 'dod pa'i khams la sogs pa la dmigs pa ni chung ngu la sogs pa'i 'du shes zhes bya'o/ /'du shes kyi phung po bshad pa'i 'og tu 'du byed kyi phung po bshad par rigs te/ de'i 'og tu bstan pas na de'i phyir/ 'du byed rnams gang zhen zhes dris pa dang / tshor ba dang / 'du shes las gzhan pa sems las byung ba'i chos rnams dang / sems dang ldan pa ma yin pa rnams so zhes bya bas de bstan to/ /rkyen rnams 'dus shing tshogs nas byas pa'i phyir gzugs la sogs pa'i phung por bsdus pa'i chos thams cad ni 'du byed rnams zhes bya'o/ /'dir ni 'du byed kyi phung por bsdus pa nyid 'du byed rnams su 'dod de/ gzugs dang / tshor ba dang / 'du shes kyi phung por bsdus pa rnams ni bshad zin la/ rnam par shes pa'i phung por bsdus pa rnams ni 'og nas 'byung ba de'i tshor ba dang 'du shes gnyis reg pa dang / yid la byed pa la sogs pa rnams dang sems las byung ba nyid du bye brag med kyang / tshor ba dang / 'du shes pa las gzhan pa'i sems las byung ba rnams zhes smos pa ni/ tshor ba dang / 'du shes gnyis sems las byung ba nyid yin du zin kyang tshor ba dang 'du shes gnyis phung por bsdus pas 'du byed kyi phung por ma bsdus par bstan pa'i phyir ro/ /tshor ba ni nye bar spyod pa'i dngos po ste/ 'di ltar tshor bas ni las dge ba dang mi dge ba rnams kyi 'bras bu rnam par smin pa myong bar byed/ 'du shes ni tha snyad 'dogs pa'i gzhi ste/ 'du shes kyis mthong ba dang / thos pa dang / bye brag byed pa dang / rnam par shes pa'i don rnams la mtshan mar bzung nas mthong ba la sogs pa la mthong ngo / /thos so/ /bye brag phyed do/ /rnam par shes so zhes 'jig rten pa'i tha snyad pa 'jug ste/ de'i phyir tshor ba dang / 'du shes nyid so sor phung por byas kyi/ sems las byung ba gzhan rnams ni ma yin no/ /gal te tshor ba dang 'du shes las gzhan pa reg pa la sogs pa sems las byung ba'i chos spyod pa la thug pa rnams dang / sems dang ldan pa ma yin pa thob pa la sogs pa 'du byed kyi phung por bsdu na/ de lta na 'o na ni mdo dang 'gal te/ mdo las ni 'du byed kyi phung po gang zhe na/ sems pa'i tshogs drug go zhes gsungs so zhe na/ de ni gtso bo bstan pa'i phyir 'gal ba med de/ sems pa ni sems mngon par 'du byed pa ni gtso bo yin la/ yid la byed pa la sogs pa ni de'i rjes su 'brang ba yin pas sems pa nyid 'du byed kyi phung por gsungs te/ 'di ltar gang dge ba la yang sems 'jug par byed/ mi dge ba dang / lung ma bstan pa dang / bde ba dang / sdug bsngal gyi gnas rnams la yang sems 'jug par byed pa'i phyir ro/ /'du byed bzhin du sems las byung ba'i chos rnams kyang mi shes pa'i phyir dris pa dang / chos gang dag sems dang mtshungs par ldan pa rnams so zhes bya bas bstan to/ /de dag kyang mi shes pas de'i phyir dris pa dang / reg pa dang / yid la byed pa dang zhes rgya cher smos so/ /reg pa la sogs pa dpyod pa la thug pa de dag kyang gnas dang / dmigs pa dang / rnam pa dang / dus dang / rdzas mtshungs pa nyid rnam pa lngas sems kyi rjes su 'brang ba'i phyir mtshungs par ldan pas mtshungs par ldan pa rnams so/ /sems dang mtshungs par ldan pa bye brag med pa'i phyir thams cad kyang sems thams cad dang mtshungs par ldan par thal bar 'gyur ba de bsal ba'i phyir/ de rnams las lnga ni kun du 'gro ba'o/ /lnga ni yul so sor nges pa'o/ /bcu gcig ni dge ba'o/ /drug ni nyon mongs pa'o/ /lhag ma rnams ni nye ba'i nyon mongs pa'o/ /'gyod pa la sogs pa bzhi ni gzhan du yang ngo zhes bya ba smos so/ /'di dag gi nang nas dang po'i reg pa dang / yid la byed pa dang / tshor ba dang / 'du shes dang / sems pa gang yin pa de dag ni kun du 'gro ba ste/ chos lnga po 'di dag ni sems thams cad kyi rjes su 'gro bas kun du 'gro ba'o/ /'di ltar 'di dag ni khams gsum pa'i dge ba dang / zag pa med pa'i sems dang yang mtshungs par ldan la/ 'dod par gtogs pa'i mi dge ba dang / khams gsum pa'i nyon mongs pa can dang / lung du mi ston pa dang yang mtshungs par ldan no/ /sems kyi 'jug pa thams cad la gdon mi za bar gsum 'dus pa 'byung ste/ gsum 'dus pa yang reg pa las 'khrul pa med pas/ de'i phyir reg pa ni kun du 'gro ba nyid do/ /sems kyi 'jug pa med par dmigs pa la 'jug pa mi srid pas yid la byed pa yang kun du 'gro ba nyid do/ /myong ba med pa dang mtshan mar 'dzin pa la mi ltos pa'i sems med pas na tshor ba dang / 'du shes kyang kun du 'gro ba nyid do/ /sems pa ni yid kyi las nyid yin pas de yang gdon mi za bar sems thams cad la 'byung bas de'i phyir chos lnga po 'di dag ni kun du 'gro ba'o/ /lnga ni yul so sor nges pa'o zhes bya ba ni 'di dag yul so sor nges pa yin gyi thams cad la ma yin pas yul so sor nges pa'o zhes bya ba'o/ /de dag kyang 'dun pa dang / mos pa dang / dran pa dang / ting nge 'dzin dang shes rab bo/ /bcu gcig ni dge ba ste/ de dag kyang dad pa la sogs pa nas rnam par mi 'tshe ba la thug pa yan chad do/ /de dag ni ma dad pa la sogs pa'i gnyen po yin pa dang / dge ba'i rtsa ba dang mtshungs par ldan pa'i phyir dge ba rnams te/ de dang mtshungs par ldan pa'i sems kyang dge ba'o/ /nyon mongs pa drug ni 'dod chags dang / khong khro ba dang / nga rgyal dang / ma rig pa dang / lta ba dang / the tshom ste/ de dag ni sems nyon mongs par byed pas nyon mongs pa rnams so/ /lhag ma rnams ni nye ba'i nyon mongs pa'o zhes bya ba ni de dag kyang khro ba nas shes bzhin ma yin pa la thug pa yan chad do/ /'gyod pa la sogs bzhi ni gzhan du yang ngo zhes 'byung ba de'i phyir lhag ma rnams ni nye ba'i nyon mongs pa'o zhes khyad med par brjod kyang shes bzhin ma yin pa'i mthar thug pa kho na yin par mngon no/ / nyon mongs pa'i char gtogs pa dang / sems nyon mongs par byed pa dang / nyon mongs pa dang nye ba'i phyir nye ba'i nyon mongs pa rnams so/ /'gyod pa la sogs pa bzhi ni zhes bya ba ni 'gyod pa dang gnyid dang rtog pa dang dpyod pa'o/ /gzhan du yang ngo zhes bya ba ni 'di dag nye ba'i nyon mongs pa 'ba' zhig yin par ma zad kyi/ dge ba yin pa dang / lung du mi ston pa yang yin pa'i phyir ro/ /sems las byung ba rnams kyi sdom 'di ni bsdu na lnga bcu rtsa gcig go/ /'di dag gi so so'i rang gi ngo bo mi shes pas/ reg pa gang zhe na/ yid la byed pa gang zhe na zhes bya ba la sogs pa dris so/ /'dir ni mtshan nyid kho na bstan gyi mdor bsdu bar 'dod pas gzhan nas 'byung ba bzhin du las ni ma yin no/ /bdag gis ni bde blag tu rtogs par bya ba'i phyir ro/ /las kyang bshad par bya'o/ /de la rang gi ngo bo ni sngar bstan pa'i phyir sngar bshad de/ de bzhin du gzhan yang ji ltar mthun mthun du brjod par bya'o/ /gsum 'dus nas yongs su gcod pa'o zhes bya ba ni skabs yin pas dbang po dang yul dang rnam par shes pa gsum nyid gsum mo/ /de rgyu dang 'bras bu'i dngos pos gnas pa ni 'dus pa ste/ de yod na de'i dus nyid na bde ba la sogs pa'i tshor ba 'byung ba dang mthun pa dbang po'i 'gyur ba 'di gang yin pa de dang 'dra ba bde ba la sogs pa myong bar 'gyur pa'i yul gyi rnam pa yongs su gcod pa gang yin pa de reg pa'o/ /dbang po yang bye brag gang gis bde ba dang / sdug bsngal ba la sogs pa'i rgyur gyur pa de ni de'i 'gyur ba ste/ dbang po 'gyur ba dang 'dra bas dbang po la reg pa'am dbang pos reg pas reg pa'o/ /'di'i las ni tshor ba'i rten byed pa'o/ /de skad du mdo las kyang bde ba myong bar 'gyur ba'i reg pa la brten nas bde ba'i tshor ba 'byung ngo zhes gsungs so/ /yid la byed pa gang zhe na/ sems kyi 'jug pa'o zhes bya ba ni 'jug par byed pas 'jug pa ste/ dmigs pa la gang gis sems mngon du phyogs par byed pa de sems kyi 'jug pa'o/ /de ni dmigs pa la sems 'dzin pa'i las can te/ sems 'dzin pa ni dmigs pa de nyid la yang dang yang gtod pa'o/ /las de yang sems kyi rgyun gyi dmigs pa nges pas yid la byed pa bye brag can gyi dbang du byas te bshad kyi/ de sems kyi skad cig re re la ni ma yin te/ yid la byed pa thob pa ni ting nge 'dzin thob pa'o zhes gang smos pa ni 'dir dper brjod pa ste/ der yang yid la byed pa khyad par can thob pas yid la byed pa thob pa'o zhes brjod do/ /gzhan du na ni thams cad kyi sems kyi skad cig re re la yid la byed pa thob pa'i phyir sems can thams cad kyis yid la byed pa thob pa nyid du 'gyur ro/ /sems pa gang zhe na/ yon tan dang nyes pa dang / gnyi ga ma yin pa la sems mngon par 'du byed pa yid kyi las so zhes bya ba la/ yon tan ni dge ba'i chos rnams so/ /nyes pa ni mi dge ba rnams so/ /gnyi ga ma yin pa ni lung du ma bstan pa rnams so/ /yang na yon tan ni phan 'dogs pa rnams so/ /nyes pa ni gnod par byed pa rnams so/ /gnyi ga ma yin pa ni bar ma do rnams so/ / sems mngon par 'du byed pa zhes bya ba ni yid g.yo bar byed pa ste/ gang yod na khab len gyi dbang gis lcags g.yo ba bzhin du dmigs pa la sems g.yo bar byed pa'o/ /skad cig gzhan du mi gnas shing / /byed med yid kyang gang gis ni/ /byed dang bcas ltar snang byed pa/ /sems pa de ni yid kyi las/ /zhes gsungs so/ /sems mngon par 'du byed pa zhes de skad ces bstan na/ yid kyi las zhes ci'i phyir bya zhe na/ sems las byung ba thams cad kyis kyang sems mngon par 'du byed pas de'i phyir gzhan dag las rnam par dbye ba'i don du yid kyi las zhes bya ba smos so/ /rnam par shes pa kun du g.yo ba ltar byed pa'i chos gang yin pa de ni sems pa yin gyi/ gzhan ni ma yin no zhes shes par bya ba'i phyir ro/ /yon tan dang nyes pa dang gnyi ga ma yin pa la sems mngon par 'du byed pa zhes bya ba ni las bstan pa'o/ /yid kyi las so zhes bya ba ni sems pa'i rang gi ngo bo bstan to/ /'dun pa gang zhe na/ bsam pa'i dngos po la 'dod pa'o zhes bya ba la/ bsams pa smos pa ni ma bsams pa la 'dun pa med do zhes shes par bya ba'i phyir te/ de ltar na 'dun pa yul so sor nges pa nyid du bstan pa yin no/ /lta ba dang / mnyan pa la sogs pa'i bya ba'i yul du gyur pa la bsam pa'i dngos po gang yin pa de ni bsam pa'o/ /de la lta ba dang mnyan par 'dod pa ni don du gnyer ba'o/ /gal te 'dun pa 'dod pa'i bdag nyid yin na de'i tshe sred pa dang 'dun pa gnyis bye brag ci yod ce na/ sred pa ni mngon par chags pa'i mtshan nyid yin la/ 'dun pa ni 'dod pa'i mtshan nyid yin pas bye brag yod de/ 'di ni brtson 'grus rtsom pa'i rten byed pa'i las can no/ /mos pa gang zhe na/ nges pa'i dngos po la de bzhin du nges par 'dzin pa'o zhes bya ba la nges pa smos pa ni mos pa'i yul yang thams cad ma yin par shes par bya ba'i phyir te/ nges pa med pa'i dngos po la de bzhin du nges par 'dzin mi srid do/ /rigs pa'am yid ches pa'i lung gi dngos po de la the tshom med pa gang yin pa de nges pa ste/ mi rtag pa dang / sdug bsngal ba la sogs pa'i rnam pa gang gis de rnam par nges pa'i rnam pa de nyid kyis dngos po de la sems 'jog pa ste/ 'di ni de bzhin te/ gzhan du ma yin no zhes nges par 'dzin pa ni mos pa'o/ /'di ni mi 'phrogs pa nyid kyi las can te/ mos pa gces su byed pa ni phas kyi rgol ba rnams kyis rang gi grub pa'i mtha' las 'phrog par mi nus so/ /dran pa gang zhe na/ 'dris pa'i dngos po ma brjed pa ste/ sems kyi mngon par brjod pa nyid do zhes bya ba la/ 'dris pa ni ma 'dris pa la dran pa med do zhes bstan pa'i phyir ro/ /'dris pa'i dngos po ni sngon myong ba'o/ /ma brjed pa ni dmigs pa la 'dzin pa chud mi za bar byed pa'i rgyu ste/ de ni sngon bzung ba'i dngos po la dmigs pa'i rnam pa yang dang yang dran pa'o/ /mngon par brjod pa nyid ni mngon par brjod pa dang 'dra bas mngon par brjod pa'o/ /mngon par brjod pa kho na mngon par brjod pa nyid do/ /de ni dmigs pa mngon par brjod pa yod na dmigs pa gzhan nam rnam pa gzhan la sems g.yeng ba med pas de'i phyir mi g.yeng ba'i las can no/ /ting nge 'dzin gang zhe na/ brtag pa'i dngos po la sems rtse gcig pa nyid do zhes bya ba la/ brtag pa zhes bya ba ni gzhan du ma yin te/ de ltar na ting nge 'dzin kyang yul so sor nges pa nyid du bstan pa yin no/ /brtag pa'i dngos po ni yon tan dang nyes pa'o/ /sems rtse gcig pa ni dmigs pa gcig pa nyid de/ 'dir rtse gcig ni dmigs pa la bya'o/ /sems mnyam par bzhag na yang dag pa ji lta ba bzhin du/ yongs su shes pa'i phyir shes pa'i rten byed pa'i las can no/ /de la rtag pa'i dngos po ni bden pa bzhi ste/ 'gog pa'i bden pa la zhi ba la sogs pa'i rnam pa dang / lam gyi bden pa la nges par 'byin pa la sogs pa'i rnam par brtags pas 'gog pa'i bden pa dang / lam gyi bden pa ni yon tan no/ /sdug bsngal gyi bden pa ni mi rtag pa la sogs pa'i rnam pa dang / kun 'byung ba'i bden pa la ni rgyu la sogs pa'i rnam par brtags pas sdug bsngal dang / kun 'byung ba'i bden pa ni nyes pa'o/ /de bzhin dus dgu la 'og ma la ni nyes par lta gong ma la ni yon tan du'o/ /de bzhin du rang dang spyi'i mtshan nyid kyi dmigs pa gzhan rnams la yang ji ltar mthun mthun du brjod par bya'o/ /shes rab gang zhe na/ de dag nyid la rab tu rnam par 'byed pa ste/ rigs pa dang / rigs pa ma yin pas bskyed pa dang / gzhan pa'o zhes bya ba la/ de dag nyid la zhes bya ba ni brtag pa'i dngos po nyid la ste/ de ltar na ting nge 'dzin bzhin du shes rab kyang yul so sor nges pa nyid du bstan pa yin no/ /rab tu rnam par 'byed pas kyang rab tu rnam par 'byed pa ste/ rang dang spyi'i mtshan nyid 'dres pa lta bu'i chos rnams la yang dag pa'am/ log par so sor rtog pa'o/ /rigs pa ni bshad pa ste/ yid ches pa'i lung dang / rjes su dpag pa dang / mngon sum mo/ /rnam pa de gsum gyis bskyed pa gang yin pa de ni rigs pas bskyed pa'o/ /de yang thos pa las byung ba dang / bsams pa las byung ba dang / bsgoms pa las byung ba ste/ de la yid ches pa'i gsung rab las skyes pa'i rtog pa ni thos pa las byung ba'o/ /rigs pa nges par bsam pa las skyes pa ni bsams pa las byung ba'o/ /ting nge 'dzin las skyes pa ni bsgoms pa las byung ba'o/ /rigs pa ma yin pa ni yid ches pa ma yin pa'i lung dang / rjes su dpag ba ltar snang ba dang / log par bsam pa'i ting nge 'dzin te/ rigs pa ma yin pa des bskyed pa ni rigs pa ma yin pas bskyed pa'o/ /de la grangs can dang bye brag pa la sogs pa'i thos pa las byung ba dang / bsams pa las byung ba ni yid ches pa ma yin pa'i lung gis bskyed pa dang / rtog gi ngan pas bskyed pa'i phyir rigs pa ma yin pas bskyed pa'o/ /'dod chags dang bral ba rnams kyi rtag pa dang chad par smra ba rnams kyi dang / kha cig rtag pa rnams kyi yang log par bsam pa'i ting nge 'dzin las skyes pa'i phyir rigs pa ma yin pas bskyed pa'o/ /skye bas thob pa dang / 'jig rten pa'i tha snyad shes pa ni rigs pas bskyed pa yang ma yin/ mi rigs pas bskyed pa yang ma yin pa'o/ /'di ni som nyi bzlog pa'i las can te/ som nyi bzlog pa ni shes rab kyis chos rab tu rnam par phye nas nges par thob pa'i phyir ro// //phung po lnga'i rab tu byed pa'i bye brag tu bshad pa/ bam po gnyis pa/ dad pa gang zhe na/ las dang 'bras bu dang / bden pa dang / dkon mchog la mngon par yid ches pa dang / 'dod pa dang / sems dang ba'o zhes bya ba la las ni rnam pa gsum ste/ bsod nams dang bsod nams ma yin pa dang / mi g.yo ba'o/ /de la bsod nams ma yin pa ni mi dge ba dang mtshungs par ldan pa'i phyir 'dod par gtogs pa nyid do/ /bsod nams ni rnam par smin pa nges ba med pa'i phyir 'dod par gtogs pa nyid do/ /rnam par smin par 'gyur ba la g.yo ba med pa'i phyir mi g.yo ba'o/ /bsod nams ma yin pa'i rnam par smin pa ni 'dod pa'i khams na mi 'dod pa'o/ /bsod nams kyi ni 'dod pa'o/ /mi g.yo ba'i rnam par smin pa ni gzugs dang gzugs med pa'i khams na 'dod pa nyid do/ /de la las dang 'bras bu gnyis yod par mngon par yid ches pa'i rnam pa'i dad pa ni las dge ba dang mi dge ba yod pa dang / de yang 'bras bu 'dod pa dang mi 'dod pa dang go rims bzhin no/ /de yang dge ba dang mi dge ba'i las kyi rgyu las byung ba ste/ dbang phyug la sogs pas sprul pa ni ma yin no zhes de ltar las dang 'bras bu'i rang gi ngo bo phyin ci ma log pa las dang 'bras bu'i rnam par smin pa gnyis rgyu dang 'bras bur 'brel bar mngon par yid ches ba gang yin pa de ni las dang 'bras bu gnyis yod pa nyid du yid ches pa'i rnam pa'i dad pa'o/ /bden pa ni sdug bsngal ba dang / kun 'byung ba dang / 'gog pa dang lam rnams te/ 'phags pa rnams dang mi mthun pa dang / mi rtag pa la sogs pa nyid du ma nor ba'i phyir 'bras bur gyur pa nye bar len pa'i phung po lnga po dag ni sdug bsngal gyi bden pa'o/ /sdug bsngal gyi rgyur gyur pa dang / rkyen la sogs pa'i rnam par phyin ci ma log pa'i phyir rgyur gyur pa'i nye bar len pa'i phung po lnga po de dag nyid kun 'byung ba'i bden pa'o/ /sdug bsngal rgyu dang bcas pa nye bar zhi ba'i bdag dang / zhi ba la sogs pa'i rnam par phyin ci ma log pa'i phyir sdug bsngal 'gog pa ni 'gog pa'i bden pa'o/ /sdug bsngal 'gog pa thob par byed pa dang / nges par 'byin pa la sogs pa'i rnam par phyin ci ma log pa'i phyir/ 'phags pa'i lam yan lag brgyad pa ni 'phags pa'i bden pa'o/ /de la sdug bsngal dang kun 'byung ba'i bden pa gnyis la sdug bsngal yod do/ /kun 'byung ba yod do zhes yod par mngon par yid ches pa'i rnam pa nyid dang ba'o/ /'gog pa dang lam gyi bden pa gnyis la bdag gis 'gog pa thob par bya ba dang / lam bskyed par nus so snyam du 'dod pa'i rnam pa ni dad pa'o/ /dkon mchog ni gsum ste/ sangs rgyas dang chos dang / dge 'dun rnams so/ /dkon pa nyid dang / rin che ba nyid dang / dga' bar byed pa dang / phan 'dogs pa dang / mi ma yin pa la sogs pa gnod pa byed pa'i gnyen por gyur pa'i phyir rin po che dang 'dra bas na dkon mchog go/ /de la dkon pa nyid ni byang chub sems dpa' srid pa dang longs spyod la ma chags pas lus dang srog la mi lta ba rgyun mi chad par byang chub kyi tshogs la zhugs pa rnams kyis kyang sangs rgyas nyid bskal pa grangs med pa gsum gyis thob par bya ba yin pas na dkon pa nyid do/ /de'i phyir sangs rgyas 'byung ba nyid ni u dum bA ra'i me tog 'byung ba dang 'dra bar dkon pa zhes bya'o/ /sangs rgyas 'byung ba la rag las pa'i phyir chos dang dge 'dun dkon mchog kyang dkon pa nyid do/ /rin che ba nyid ni 'dod dgu mthar phyin pa'i gnas thob pa rnams kyis bsod nams dang ye shes kyi tshogs gnyis kas thob par bya ba yin pa'i phyir ro/ /de la bsod nams kyi tshogs ni sbyin pa dang / tshul khrims dang / bzod pa'i pha rol tu phyin pa dang gsum mo/ /ye shes kyi tshogs ni shes rab dang / bsam gtan gyi pha rol tu phyin pa'o/ /bsod nams dang ye shes kyi tshogs kyi yan lag gi dngos por gyur pas brtson 'grus kyi pha rol tu phyin pa ni tshogs gnyi gar gtogs pa'o/ / chos dkon mchog ni 'dus byas thams cad yongs su btang bas thob par bya ba yin pa'i phyir rin che ba'o/ /dge 'dun dkon mchog ni 'khor ba'i 'bras bu 'grub pa las khyad par du gyur pa'i phyir/ bsod nams dang ye shes kyi tshogs gnyis kyis thob par bya ba yin pas rin che ba'o/ /dkon mchog gsum ni mthong ba dang / thos pa dang / rjes su dran na dga' bar byed pa'i phyir dga' ba'i rgyur 'gyur bas dga' bar byed pa'o/ /'di ltar bsu ba dang / bsnyen bkur bya ba dang / brtsal ba dang / yongs su shes par bya ba rnams kyis sems can rnams la phan 'dogs pa yin pas phan 'dogs pa ste/ ji skad du/ khyod la bsu bas dpal du byed/ /bsnyen bkur byas na bde bar byed/ /kun du tshol bas blo gros byed/ /yongs su shes byed rnam par sbyong / /zhes bya ba brjod pa lta bu'o/ /mi ma yin pa la sogs pa gnod par byed pa zhi bar byed pa ni mdo las ji skad du/ dge slong dag gal te khyod dgon pa na gnas kyang rung zhes bya ba nas/ 'jigs sam bag tsha ba'am sbu zing zhes byed pa'i bar du 'gyur ba de zhi bar 'gyur ro zhes rgya cher gsungs pa lta bu'o/ /de bzhin du chos dkon mchog rjes su dran pa dang / dge 'dun dkon mchog rjes su dran pa la yang brjod par bya'o/ /de la shes bya thams cad la chags pa med cing thogs pa med par mkhyen pa'i mthu brnyes pas gnas gyur pa ni sangs rgyas te/ de ni zag pa dang bcas pa'i chos thams cad kyi sa bon dang / bral ba zag pa med pa'i chos thams cad kyi sa bon rgyas pa/ mthu stobs mtha' yas pas yongs su bzung ba'i phyir yid bzhin gyi nor bu rin po che ltar lhun gyis grub par sems can ma lus pa'i don mdzad par spyod pa'o/ /chos ni rnam pa gsum ste/ bstan pa'i chos mdo'i sde dang / dbyangs kyis bsnyad pa'i sde la sogs pa dang / sgrub pa'i chos 'phags pa'i lam yan lag brgyad pa 'khor dang bcas pa dang / don dam pa'i chos mya ngan las 'das pa'o/ /de yang rnam pa gnyis te/ phung po'i lhag ma dang bcas pa dang / phung po'i lhag ma med pa'o/ /de la nyon mongs pa dang bral ba zhes bya ba ni phung po'i lhag ma dang bcas pa'o/ /da ltar gyi skye ba 'gags nas ma 'ongs pa'i skye ba mi 'byung ba ni phung po'i lhag ma med pa'o/ /dge 'dun ni skyes bu gang zag brgyad de/ 'jug pa bzhi dang 'bras bu la gnas pa bzhi'o/ /phan tshun mi phyed pa dang ston pa mi phyed pa'i phyir dge 'dun no/ /yon tan dang nyes pa thams cad mchog tu phyin pa dang / bsal ba'i mthar phyin pa'i gnas pa yin pa'i phyir/ sangs rgyas bcom ldan 'das de la spu zing zhes byed pa dang / mchi ma 'byung ba la sogs pas mtshon pa'i dang ba'i mtshan nyid ni dad pa'o/ /rgyu dang bcas pa'i sdug bsngal thams cad zhi ba'i bdag nyid dang / thob par byed pa dang / gsal bar byed pa'i phyir dang ba'i mtshan nyid ni chos la dad pa'o/ /'khor ba'i 'dam rdzab las rgal ba dang / 'khor ba'i 'dam rdzab las rgal ba'i lam la gnas pa'i phyir/ dge 'dun la dang ba'i bdag nyid ni dad pa'o/ /dad pa ni rnam pa gsum du 'gyur te/ dngos po yod pa yon tan can nam yon tan can ma yin pa la yid ches pa'i rnam pa dang / yod pa'i yon tan can la dang ba'i rnam pa dang / yod pa yon tan can thob pa'am/ skyed nus pa la 'dod pa'i rnam pa'o/ /de ltar na 'dod pa'i rnam pa yin pa'i phyir sred pa'am/ 'dun pa gang yang rung ba zhig tu mi 'gyur ram/ de ni de lta ma yin te/ dge ba yul yin pa'i phyir sred pa ma yin no/ /'dun pa ni dad pa sngon du 'gro ba yin pas 'dun pa ma yin no/ /sems dang ba zhes bya ba la dad pa ni sems kyi rnyog pa dang mi mthun pa ste/ de'i phyir de dang mtshungs par ldan na nyon mongs pa dang / nye ba'i nyon mongs pa'i rnyog pa mi 'byung ste/ dad pa la brten nas sems dang bar 'gyur bas sems dang ba zhes bya ste/ chu dang bar byed pa'i nor bu dang 'dra ba'i chos gzhan sems las byung ba la dang ba zhes bya'o/ /gzugs dang ba'i bdag nyid ni ma yin no zhes bstan pa'i phyir sems dang ba zhes bya ba smos te/ gzugs ni ma yin no/ /de ni 'dun pa'i rten byed pa'i las can no/ /ngo tsha shes pa gang zhe na/ bdag gam chos kyi dbang du byas te/ kha na ma tho bas 'dzem pa'o zhes bya ba ni gang la brten nas su zhig bya ba rnams la 'jug pa dang / ldog pa de ni de'i dbang du byed pa ste/ bdag por byed ces bya ba'i tha tshig go/ /dam pa rnams kyis smad pa dang / rnam par smin pa mi 'dod pa yin pas sdig pa nyid kha na ma tho ba ste/ byas kyang rung ma byas kyang rung bdag gam chos kyi dbang bdag por byas nas/ kha na ma tho ba des sems bag 'khums pa ni 'dzem pa'o/ /rigs dang shes rgya la sogs pa'i yon tan rnams kyis sdig pa bya bar mi rigs par shes pas bdag 'di lta bur gyur pas sdig pa 'di lta bu ga la bya zhe'am/ byed par 'gyur ba lta ga la rung snyam pa dang / mi 'dod pa'i rnam par smin par 'gyur ba dang / gzhan la gnod par byed par zhugs pa'i phyir/ chos las kyang smad pa'o/ /zhes de ltar ji tsam du bdag gam chos la lta zhing kha na ma tho bas 'dzem pa gang yin pa de ngo tsha shes pa'o/ /'di ni nyes par spyod pa yang dag par sdom pa'i rten byed pa'i las can no/ /khrel yod pa gang zhe na/ 'jig rten gyi dbang du byas te kha na ma tho bas 'dzem pa'o zhes bya ba ni 'jig rten na 'di ni smad pa ste/ bdag la las 'di lta bu rigs na smod par 'gyur ro zhes tshigs su bcad pa ma yin pa la sogs pa'i 'jigs pas kha na ma tho ba la 'dzem pa'o/ /'di yang nyes par spyod pa yang dag par sdom pa'i rten byed pa'i las can nyid do/ /ngo tsha shes pa de ni nyes par spyod par byas na yang gdon mi za ba spong bas yang dag par sdom pa yin no/ /ngo tsha shes pa dang khrel yod pa ni nyes par spyod pa byas na yang gdon mi za bar de spong bas yang dag par sdom pa'i rten byed pa'i las can no/ /khrel yod pa ni nyes par spyod par ma byas na yang dag par sdom pas 'di gnyis ni de'i rten byed pa'i las can te/ sngon du 'dren pa nyid do/ /ma chags pa gang zhe na zhes bya ba la ma chags zhes bya ba ni don rnam pa gsum la 'jug ste/ med pa dang / gzhan pa dang / gnyen po la'o/ /'dir ni gnyen po nyid la 'jug gi med pa dang / gzhan la ni ma yin no zhes bstan pa'i phyir/ chags pa'i gnyen po ste zhes bya ba smos so/ /zhe sdang med pa dang / gti mug med pa la yang de bzhin du brjod par bya'o/ /yid 'byung zhing mi len pa'o zhes bya ba ni de'i rang gi ngo bo la rtog pa mdzad pa'o/ /chags pa zhes bya ba ni srid pa dang / longs spyod rnams la kun du chags pa dang smon pa gang yin pa'o/ / de'i gnyen po ni ma chags pa ste/ srid pa dang srid pa'i yo byad rnams la chags pa dang mi phyogs pa'o/ /yid byung ba ni sred pa dang longs spyod kyi nyes dmigs yongs su shes pa'i phyir srid pa dang srid pa'i yo byad rnams la mi phyogs pa'o/ /mi len pa ni srid pa dang longs spyod gnyi ga la ma chags pa'o/ /yang na mi len pa'i bye brag gi phyir yid byung ba smos te/ srid pa dang / srid pa'i yo byad rnams la mi phyogs pa'i rnam pa gang yin pa'i mi len pa de ma chags pa zhes bya'o/ /'di ni nyes par spyod pa la mi 'jug pa'i rten byed pa'i las can no/ / zhe sdang med pa gang zhe na/ zhe sdang gi gnyen po ste/ byams pa'o zhes bya ba la zhe sdang ni sems can rnams dang / sdug bsngal dang sdug bsngal gyi gnas kyi chos rnams la kun nas mnar sems pa ste/ de'i gnyen po ni kun nas mnar sems pa med pa'o/ /zhe sdang gi gnyen po ni gzhan dag kyang yod pas de'i phyir byams pa smos te/ zhe sdang gi gnyen po byams pa'i bdag nyid gang yin pa de ni zhe sdang med pa ste/ gzhan ni ma yin no/ /nyes par spyod pa la mi 'jug pa'i rten byed pa'i las can no/ /gti mug med pa gang zhe na gti mug gi gnyen po ste/ yang dag pa la yang dag par rtogs pa'o zhes bya ba la/ dge ba'i chos thams cad ni nyon mongs pa can gyi chos rnams kun du 'byung ba dang mi mthun pa yin pas gnyen po yin te/ de'i phyir yang dag pa la yang dag par rtogs pa'i zhes bya ba smos te/ yang dag par phyin ci ma log par rtogs pa'o/ /de yang bye brag gis rnam pa gnyis te/ shes pa dang so sor rtog pa'o/ /shes pa yang rnam par smin pa dang / lung dang bsam pa dang / rtogs pa'i rgyu'i bye brag gis rnam pa bzhi'o/ /so sor rtog pa ni shes rab bstan pa dang bcas pa nyid do/ /bstan pa zhes bya ba ni shes rab dang / brtson 'grus dang ting nge 'dzin rnams la bya'o/ /de la shes rab kyi rdzas gnyis 'grogs mi srid pas brtson 'grus sam/ ting nge 'dzin dang mtshungs par ldan pa'i shes rab la so sor rtog pa zhes bya ste/ gang gi stobs kyis nyon mongs pa'i sa bon ma bton ma bcom yang nyon mongs pa rnams kyi skabs mi 'byed pa'o/ /'dir tshig gi don ni 'di yin te/ yang dag pa ji lta ba bzhin du shes pa'i bdag nyid dang / so sor rtog pa'i bdag nyid kyi shes pa khyad par can ni gti mug med pa zhes bya ste/ de'i phyir gti mug med pa ni nyes par spyod pa la mi 'jug pa'i rten byed pa'i las can no/ /brtson 'grus gang zhe na/ le lo'i gnyen po ste/ dge ba la sems mngon par spro ba'o zhes bya ba la sbyor ba dman pa ni le lo ste/ snyom las byed ces bya ba'i tha tshig go de ni dge ba dang mi dge ba la sems mi spro ba'o/ / de'i gnyen po ni brtson 'grus yin pas/ de'i phyir le lo bzhin du gnyi gar thal bar 'gyur ba rnam par gcad pa'i phyir/ brtson 'grus ni dge ba la sems mngon par spro ba'o zhes bya ba smos te/ nyon mongs pa can la spro ba ni ma yin no/ /nyon mongs pa can la spro ba ni smad pa yin pa'i phyir le lo nyid do/ /nyon mongs pa can la shin tu goms pa'i phyir/ /rang gi ngang gis 'jug bzhin du de la spro bar bya ci dgos she na phal cher ni de lta mod kyi/ gang du spro ba la ltos pa yang cung zad yod do/ /de yang gang dang mtshungs par ldan na go cha dang / sbyor ba dang / mi 'gong ba dang / mi ldog pa dang / chog par mi 'dzin pa dang / dge ba'i chos gzhan rnams la yang sems mngon par spro ba de ni brtson 'grus te/ dge ba'i phyogs yongs su rdzogs par byed pa dang / yongs su sgrub pa'i las can no/ /yongs su rdzogs par byed pa ni ji ltar dngos gzhi la 'jug pa lta bu'o/ /yongs su sgrub pa ni de nyid legs par yongs su sbyang bar byas pa'o/ /shin tu sbyangs pa gang zhe na/ gnas ngan len gyi gnyen po ste/ lus dang sems las su rung ba nyid do zhes bya ba la/ lus dang sems kyi gnas ngan len ni las su mi rung ba nyid dang / kun nas nyon mongs pa'i chos kyi sa bon rnams te go rims bzhin no/ /de med na ni shin tu sbyangs pa yod pa'i phyir gnyen po'o/ /shin tu sbyangs pa'i mtshan nyid ni lus dang sems las su rung ba nyid do/ /de la lus las su rung ba ni lus kyi rang gi bya ba rnams la ldang ba yang ba gang las byung ba'o/ /sems las su rung ba ni yang dag pa'i yid la byed pa la zhugs pa'i sems kyi sim pa dang yang bar 'gyur ba'i rgyu sems las byung ba'i chos gzhan du gyur pa gang yin pa ste/ de dang ldan na dmigs pa la sems thogs pa med par 'jug pas de'i phyir sems las su rung ba zhes bya ba'o/ /lus kyi reg bya'i khyad par dga' bas zin pa la lus shin tu sbyang bar rig par bya ste/ yid dga' na lus shin tu sbyangs par 'gyur ro zhes mdo las gsungs pa'i phyir ro/ /'dir lus shin tu sbyangs pa sems las byung ba ma yin du zin kyang sems las byung ba'i skabs yin pas shin tu sbyangs pa yang dag byang chub kyi yan lag tu bshad do/ /yang na lus las su rung ba nyid ni sems las su rung ba sgrub par byed pa'i phyir te/ de'i phyir sems las byung ba ma yin du zin kyang / 'dir lus las su rung ba nyid du brjod do/ /'di ni de'i dbang gis gnas 'gyur bas nyon mongs pa la sogs pa'i sgrib pa ma lus pa sel ba'i las can no/ /bag yod pa gang zhe na/ bag med pa'i gnyen po ste/ ma chags pa nas brtson 'grus kyi bar de dag la gnas nas mi dge ba'i chos spong zhing de'i gnyen po dge ba'i chos rnams kyang bsgom pa'o zhes bya ba la bag med pa ni/ gang gis nyon mongs pa rnams las sems mi srung zhing dge ba rnams 'bri bar byed pa'o/ /bag yod pa ni nyon mongs pa rnams spong zhing de'i gnyen po'i chos rnams kyang bsgom pa ste/ de'i phyir bag yod pa ni bag med pa'i gnyen por bstan pa'o/ /ma chags pa nas brtson 'grus kyi bar zhes bya ba ni ma chags pa dang / zhe sdang med pa dang / gti mug med pa dang / brtson 'grus dang bcas par gzung / ma chags pa la sogs pa nas brtson 'grus la thug pa'i bar de dag la gnas pa ni brten pa dang / gnas bcas nas mi dge ba'i chos rnams spong ba ste/ 'dis ni ma chags pa la sogs pa thams cad bag yod par bstan pa yin no/ /mi dge ba'i chos rnams ni zag pa dang / zag pa'i gnas yul rnams su rig par bya'o/ /de la zag pa rnams sel ba dang / rnam par gnon pa dang / sa bon yang dag pa 'don pa'i bdag nyid ni spong ba'o/ /yul rnams ni yongs su spangs pas spong ngo / /de'i gnyen po zhes bya ba ni mi dge ba'i chos kyi gnyen po rnams te/ de dag kyang dge ba zag pa dang bcas pa dang / zag pa med pa rnams so/ /sgom pa ni de dag goms par byed pa ste/ yang dang yang mngon du byed pa'o/ /'di ltar brtson 'grus dang bcas pa'i ma chags pa la sogs pa la brten nas mi dge ba'i chos rnams spong zhing de'i gnyen po dge ba'i chos kyang sgom pa'i phyir/ brtson 'grus yan chad dang bcas pa'i ma chags pa la bag yod pa gdags te/ 'dis ni gnas dang bcas pa'am/ rgyu dang bcas pa la bag yod pa gdags par bstan pa yin no/ /'di ni 'jig rten pa dang / 'jig rten las 'das pa'i phun sum tshogs pa thams cad yongs su rdzogs par byed pa'i las can no/ /de la 'jig rten pa'i phun sum tshogs pa ni srid pa dang / longs spyod kyi khyad par rnyed pa'o/ /'jig rten las 'das pa'i phun sum tshogs pa ni nyan thos la sogs pa'i byang chub thob pa'o/ /btang snyoms gang zhe na/ ma chags pa nas brtson 'grus kyi bar de dag nyid la gnas shing zhes bya ba la sogs pa bag yod pa bzhin du 'dir yang bshad par bya'o/ /sems mnyam pa nyid dang zhes bya ba la sogs pa tshig gsum gyis ni btang snyoms kyi thog ma dang bar dang tha ma'i dus bstan to/ /de la bying ba dang rgod pa ni sems mi mnyam pa ste/ de med pas thog mar sems mnyam pa nyid do/ /de'i 'og tu mngon par 'du byed pa med cing bsgrim mi dgos par mnyam par gzhog pa'i sems kyis ci rigs par mnyam par 'jug pa ni rnal du 'dug pa'o/ /de'i dus na ni bsgoms nas ring po ma lon pa'i phyir bying ba dang rgod pa 'byung bar dogs pa dang ldan no/ /de'i 'og tu bsgom pa khyad zhugs par gyur pas de'i mi mthun pa'i phyogs thag ring du gyur pa'i phyir gnyis 'byung du dogs pa med de/ bying ba dang rgod pa'i gnyen po'i rgyu rnams la rtsol ba mi byed pas/ sems lhun gyis grub par gnas so/ /gang gis nyon mongs pa can gyi chos rnams bsal nas zhes bya ba la gang gis zhes bya ba ni btang snyoms nyid dang sbyar ro/ /nyon mongs pa can gyi chos rnams zhes bya ba ni 'dod chags la sogs pa dag dang bcas pa dag go/ /de dag bsal na yang mi skye ba'o/ /btang snyoms ni nyon mongs pa can du gnas pa dang mi mthun pas gdon mi za bar des 'dod chags la sogs pa 'byung ba'i gnas med do/ /de'i phyir des bsal zhes brjod do/ /'di ltar nyon mongs pa can du gnas pa ni btang snyoms dang mi mthun pas de'i phyir btang snyoms la gnas pa ni nyon mongs pa can ma yin par gnas pa yin te/ de nyid kyi phyir btang snyoms ni kun nas nyon mongs pa'i skabs mi 'byed pa'i rten byed pa'i las can no/ /rnam par mi 'tshe ba gang zhe na/ rnam par 'tshe ba'i gnyen po ste/ snying rje ba'o zhes bya ba la gsod pa dang 'ching ba la sogs pas tho mi 'tshams shing sems can rnams la gnod pa mi byed pa ni rnam par mi 'tshe ba'o/ /rnam par 'tshe ba'i gnyen po ni snying rje ba ste/ bsod nyams bsrel ba'o/ /bsod nyams zhes bya ba ni bde ba ste/ bde ba bsrel zhes bya ba'i tha tshig go/ /snying rje can gyi pha rol sdug bsngal na sdug bsngal bar 'gyur ba'i phyir ro/ /'di yang bag yod pa bzhin du btags pa nyid do/ /zhe sdang med pa'i cha la btags pa'i phyir rdzas su yod pa ni ma yin no/ /tho mi 'tshams pa'i las can no/ /dge ba bcu gcig bshad zin to/ /nyon mongs pa drug brjod par bya ba de dag brjod par bya'o/ /'dod chags gang zhe na/ nye bar len pa'i phung po lnga la zhen pa dang lhag par chags pa'o zhes bya ba la zag pa dang bcas pa'i gzugs dang / tshor ba dang / 'du shes dang / 'du byed dang / rnam par shes pa lnga ni gzugs dang / tshor ba dang / 'du shes dang / 'du byed dang / rnam par shes pa nye bar len pa'i phung po rnams so/ /de la gzugs nye bar len pa'i phung po ni khams gnyis kyi gzugs tshor ba la sogs pa nye bar len pa'i phung bo bzhi ni khams gsum pa'i tshor ba la sogs pa'o/ /'dis srid pa gsum du srid pa skye ba'am/ yang srid pa'i las len pas na/ sred pa la nye bar len pa zhes bya'o/ /nye bar len pa las byung ba dang / nye bar len pa la rag lus pa dang / de dag las nye bar len pa rnams 'byung bas nye bar len pa'i phung po rnams so/ /'jen pa dang 'dra bas zhen pa ste/ ji ltar 'bru mar la sogs pa'i snum ras la sogs pa'i gnas la zhugs te mched pa shin tu bsgrims kyang rang gi gnas nas dbyung bar dka' ba de bzhin du/ 'dod chags kyang rang gi dmigs pa la zhugs nas mched pa ni 'bad pa chen pos kyang dmigs pa de dang dbral bar dka' bas zhen pa zhes bya'o/ /lhag par chags pa ni de'i rang bzhin nyid do/ /yang na reg bya'i khyad par la yang snum pa zhes bya ba yod pa de dang rnam par dbye ba'i phyir lhag par chags pa zhes bya ba smos so/ /'di ni sdug bsngal kun bskyed pa'i las can no/ /sdug bsngal nyid gsum dang ldan pa'i phyir ji ltar mthun mthun du khams gsum pa'i phung po lnga ni sdug bsngal du brjod de/ sdug bsngal de yang 'dod pa dang gzugs dang gzugs med pa'i sred pa'i dbang gis mngon par 'grub pa de'i phyir 'dod chags kyi las ni sdug bsngal kun bskyed par bshad do/ /khong khro ba gang zhe na/ sems can rnams la kun nas mnar sems pa'o zhes bya ba la kun nas mnar sems pa ni sems can rnams la sems rtsub pa ste/ des non na sems can rnams la gsod pa dang / bcing ba la sogs pa'i gnod pa bya bar sems pa'o/ /'di ni reg par mi gnas pa dang / nyes par spyod pa'i rten byed pa'i las can no/ /reg pa ni bde ba ste/ de dang lhan cig gnas pa ni reg par gnas pa'o/ /reg par gnas pa ma yin pa ni reg par mi gnas pa ste/ sdug bsngal dang lhan cig ces bya ba'i tha tshig go/ /kun nas mnar sems kyi sems yod na gdon mi za bar yid mi bde ba kun du 'byung ba'i phyir sems la gdung bar 'gyur ro/ /sems kyi rjes su 'gyur ba'i phyir lus la yang gdung bar 'gyur ba nyid de/ de ltar de spyod lam thams cad du sdug bsngal dang bcas shing phongs pa dang bcas par gnas par 'gyur ro/ /zhe 'gras pa'i sems dang ldan pa ste/ nyes par spyod pa gang dang yang ring ba ma yin pas khong khro ba ni reg par mi gnas pa dang nyes par spyod pa'i rten byed pa'i las can du bshad do/ /nga rgyal gang zhe na/ nga rgyal rnam pa bdun te zhes bya ba la/ nga rgyal ni thams cad kyang 'jig tshogs la lta ba la brten nas 'byung ba'i sems khengs pa'i mtshan nyid de/ 'di ltar phung po lnga po dag la bdag dang bdag gir dngos por sgro btags nas 'di ni bdag go 'di ni bdag gi'o zhes de dang de'i khyad par gyis bdag khengs shing gzhan dag las lhag par rlom sems pa'o/ /'di ni mi gus pa dang / sdug bsngal 'byung ba'i rten byed pa'i las can no/ /mi gus pa ni bla ma rnams dang / gang zag yon tan can rnams la 'gying zhing lus dang ngag gi sri zhu med pa'o/ /sdug bsngal 'byung ba ni 'dir yang srid pa 'byung bar rig par bya'o/ /de ni sems khengs pa'i ngo bo nyid du bye brag med kyang sems khengs pa'i rgyu'i bye brag gis rnam pa bdun du tha dad de/ nga rgyal ba dang / che ba'i nga rgyal dang zhes bya ba la sogs pa'o/ /rigs dang shes rgya dang nor la sogs pas dma' ba bas rigs dang shes rgya dang nor la sogs pas bdag che'o snyam du sems khengs pa gang yin pa'am/ rigs la sogs pas mtshungs pa nyid la de dag dang bdag mtshungs so snyam du sems khengs pa gang yin pa de ni nga rgyal lo/ /che ba'i nga rgyal ni rigs dang shes rgya dang nor la sogs pas mtshungs pas gtong ba dang tshul khrims dang / nyams rtsal la sogs pas bdag che'o snyam pa'am/ rigs dang nor la sogs pas che ba la shes rgya dang nor la sogs pas bdag dang mtshungs so snyam du sems khengs pa gang yin pa ste/ 'di ni che ba'i nga rgyal zhes bya'o/ /nga rgyal las kyang nga rgyal ni rigs dang shes rgya dang nor la sogs pas che ba bas kyang rigs dang shes rgya dang nor la sogs pas bdag che'o snyam du sems khengs pa gang yin pa ste/ 'di ni nga rgyal las kyang nga rgyal lo/ /nga'o snyam pa'i nga rgyal ni nye bar len pa'i phung po rnams la zhes bya la/ 'dun pa dang 'dod chags ni nye bar len pa ste/ ma 'ongs pa'i lus 'dod pa ni 'dun pa'o/ /lhag par chags pa ni 'dod chags so/ /de la ma 'ongs pa'i lus ni 'dun pa'i sgo nas len pa'o/ /da ltar gyi phung bo rnams la ni 'dod chags kyi sgo nas yongs su mi gtong bar len to/ /de'i phyir 'di gnyis ni nye bar len pa zhes bya ste/ 'di dag dang ldan pa'i phung po rnams ni nye bar len pa'i phung po rnams so/ /nye bar len pa'i phung po bdag dang bdag gi dang bral ba de dag la bdag dang bdag gir mngon par zhen nas sems khengs pa gang yin pa ni nga'o snyam pa'i nga rgyal lo/ /mngon pa'i nga rgyal gang zhe na/ gong ma'i khyad par thob par bya ba ma thob par bdag gis thob bo snyam du sems khengs pa gang yin pa'o zhes bya ba la mi'i chos ni 'dod chags dang / zhe sdang dang / gti mug la sogs pa dang / des bskyed pa'i lus dang ngag dang yid kyi las so/ /de'i gnyen por gyur pa ni bsam gtan dang snyoms par 'jug pa la sogs pa gang yin pa ste/ de dag ni mi'i chos rnams las gong ma'i khyad par zhes bya'o/ /de dag thob par bya ba ni rnyed par bya ba'o/ /khyad par thob par bya ba rnyed par bya ba de med par bdag gis gong ma'i khyad par thob par bya ba 'thob bo snyam du sems khengs pa gang yin pa de ni mngon pa'i nga rgyal lo/ /cung zad snyam pa'i nga rgyal ni rigs dang shes rgya dang nor la sogs pa khyad ches 'phags pa bas rigs la sogs pas bdag cung zad cig gis chung ngo snyam du sems khengs pa gang yin pa'o/ /re zhig mtshungs pa dang mtshungs so snyam pa dang / mtshungs pa bas khyad par du 'phags so snyam pa'am/ khyad par can bas kyang 'phags so snyam pa ni khengs pa'i gnas yin pas nga rgyal du rigs na/ bdag chung bar mthong ba khengs pa'i gnas su ci'i phyir 'gyur na 'di ltar de la nga rgyal zhes bya zhe na/ khyad ches 'phags pa bas bdag cung zad gcig gis dma' bar 'dzin gyi ji ltar khyad che ba bzhin du/ dma' bar ni mi 'dzin pa'i phyir de nyid khengs pa'i gnas so/ /yang gang dag sems can mchog dam pa'i tshogs kyi nang na bdag dma' bar 'gyur na'ang tha gi'o snyam du sems khengs pa dag kyang yod do/ /log pa'i nga rgyal gang zhe na/ yon tan ma yin pa dang ldan pa la bdag yon tan dang ldan no snyam du sems khengs pa gang yin pa'o zhes bya ba la/ yon tan ni sbyin pa dang / tshul khrims dang / bzod pa la sogs pa ste/ de dag su la yon tan dang mi ldan pa'o/ /yang na yon tan ma yin pa ni 'chal ba'i tshul khrims la sogs pa ste/ su la yod pa de yon tan ma yin pa dang ldan pa'o/ /de lta bas na yon tan ma yin pa dang ldan pa la bdag yon tan dang ldan no snyam pa'o/ /yon tan ma yin pa dang ldan zhes bya ba 'dis ni sbyin pa dang / tshul khrims la sogs pa med par yon tan dang ldan pa nyid du khas blangs pa yin te/ de'i phyir dngos po med pas na log pa'i nga rgyal zhes bya'o/ /ma rig pa gang zhe na/ las dang 'bras bu dang bden pa dang dkon mchog rnams mi shes pa ste/ de yang lhan cig skyes pa dang / kun du brtags pa'o zhes bya ba de la lhan cig skyes pa ni nyon mongs pa gzhan dang mtshungs par ldan pa ma yin gyi ma 'dres pa'o/ /kun brtags pa ni the tshom dang / log par lta ba dang / tshul khrims dang brtul zhugs mchog tu 'dzin pa la sogs pa'i nyon mongs pa dang mtshungs par ldan pa'o/ /las mi shes pa ni bsod nams dang bsod nams ma yin pa dang / mi g.yo ba'i las yod par mi shes pa gang yin pa ste/ mi rtogs pa dang / khong du mi chud pa'o/ /'di ni lhan cig skyes pa'i ma rig pa'o/ /bsod nams dang bsod nams ma yin pa dang / mi g.yo ba'i las yod pa nyid la the tshom za ba'am/ bsod nams dang bsod nams ma yin pa dang mi g.yo ba'i las med do zhes skur pa 'debs pa dang / bsod nams la bsod nams ma yin par 'du shes pa rnams/ phyugs gsod cing mer 'jug pa la sogs pa byed pa dang / bsod nams ma yin pa la bsod nams su 'du shes pa rnams phyugs gsod cing mer 'jug par byed pa dang / the tshom za ba dang / log par lta ba dang mtshungs par ldan pa'i ma rig pa gang yin pa de ni/ kun du brtags pa'o/ /'di ni chos rnams la log par nges pa dang / the tshom dang / kun nas nyon mongs pa 'byung ba'i rten byed pa'i las can no/ /rtog pa'i bdag nyid kyi shes rab ni lta ba zhes bya ste/ de'i phyir 'jig rten pa'i yang dag par lta ba la sogs pa la yang lta ba thal bar 'gyur bas/ 'dir ni 'jig tshogs la lta ba la sogs pa lta ba lnga la bya bar bzhed par bstan pa'i phyir/ lta ba lnga ste zhes bya ba smos so/ /de dag kyang nyon mongs pa can nyid du bye brag med kyang dmigs pa dang rnam pa'i bye brag gis tha dad par bstan pa'i phyir/ 'jig tshogs la lta ba zhes bya ba rgya cher smos so/ /'jig par 'gyur bas 'jig pa'o/ /bsags pas tshogs te/ 'jig pa'i ngang can mang po la lta ba 'di ni bdag dang bdag gi ba med par ming nyid kyis bstan pa yin te/ bdag ni rtag pa dang / gcig pu yin par bdag tu smra ba rnams khas len la/ 'di ni mi rtag pa dang / du ma'i yul du gyur pa'i phyir bdag yul ma yin par bstan pa yin no/ /nye bar len pa'i phung po rnams la zhes bya ba la sogs pa ni dge sbyong ngam bram ze gang la la dag bdag dang bdag gis rjes su lta bas rjes su lta ba dag ni nye bar len pa'i phung po lnga po 'di dag la'o zhes mdo las gsungs so/ /de dag gis kyang rang gi ngo bor ram/ 'bras bu'i sgo nas bdag tu 'dogs grang na/ grangs can rnams ni bdag shes pa yod pa'i rang gi ngo bo yin par sems te/ de dag kyang sems dang sems las byung ba'i rab tu dbye ba la mi mkhas pas sems dang sems las byung ba'i tshogs nyid kyi spyir shes pa yod pa zhes zer te/ de'i phyir de dag gi phung po bzhi la ni bdag yin pa dang / gzugs kyi phung po la ni bdag gi yin par rtogs so/ /blo'i 'jug pa ma gtogs par shes pa yod pa gzhan zhig yod par ni sems kyi nyams tha mal pas brjod pa'am rtogs par mi nus so/ /tshor ba la sogs pa yang de bzhin no/ /gcer bu pa kha cig ni shes pa'i rang gi ngo bo bdag yin no zhes zer te/ de dag gi bdag dang bdag gir 'dzin pa yang gong du bshad pa bzhin du blta bar bya'o/ /bye brag pa la sogs pa ni lta ba nas sems pa'i bar gang yin pa dang / de bzhin du tshor bar byed pa dang / 'dus te shes par byed pa dang / dran par byed pa dang sems par byed pa dang / rnam par shes par byed pa gang yin pa de dag yin no zhes 'bras bu'i sgo nas bdag tu ston to/ /de dag kyang mig la sogs pa nyid la bdag tu mngon pa'i nga rgyal byed de/ ji ltar de med pa'i phyir mig ma gtogs par lta ba gzhan ni med do/ /mig la sogs pa'i rnam par shes pa la mthong ba la sogs pa zhes bya ste/ de'i thun mong ma yin pa'i rgyu yin pa'i phyir mig gis mthong ngo zhes ston to/ /dper na sgra'i thun mong ma yin pa'i rgyu yin pas dril bu 'khrol lo zhes bya ba lta bu'o/ /'o na gang las mig gis gzugs mthong yang yid dga' bar yang mi 'gyur/ yid mi dga' bar yang mi 'gyur zhes 'byung ba de la ji skad bya/ der yang 'dus pa'am rgyud gang la bdag gdags pa de nyid la mig gis gzugs rnams mthong ngo zhes bya'o/ /gzugs su snang ba nyid la gzugs mthong ngo zhes bya ste/ 'di ltar de yod pa dang / med pa la gzugs mthong ba dang / mi mthong bar rnam par gzhag go/ /thos pa la sogs pa la yang de bzhin du brjod par bya'o/ /gang nas tshor bar byed pas tshor ba zhes bya ba nas/ de bzhin du rnam par shes par byed pas rnam par shes pa zhes 'byung ba der yang rnam par shes pa ma gtogs par rnam par shes pa po dgag pa'i phyir dngos po tsam la byed pa por bstan to/ /tshor ba la sogs pa la yang de bzhin du brjod par bya'o/ /yang na ji ltar gong du bstan pa bzhin du yul du snang ba'i phyir byed pa por bstan to/ /dngos po thams cad ni skad cig ma yin pas byed pa'i dus na mi gnas pa'i phyir bdag thob pa ma gtogs par byed pa gzhan med do/ /byed pa po med par ni bya ba med do/ /dngos po rnams bdag thob ma thag tu gal te 'jig par mi 'gyur na ni rgyu med pa'i phyir phyis kyang 'jig par mi 'gyur te/ 'jig pa po dang / 'jig pa ni phyis kyang rang bzhin bye brag tu gyur pa med pa'i phyir ro/ /'jig pa rgyu dang bcas pas yongs su rtog na yang 'jig pa po nyid dam/ de las gzhan pa zhig 'jig pa'i rgyur yongs su brtag grang na/ phyogs snga ma ltar na ni dngos po rnams bdag thob ma thag tu 'jig pa'am/ 'jig pa med par thal bar 'gyur te/ gang gzhan la mi ltos pa de ni sngar gang gi rgyur ma gyur pa de rang bzhin bye brag tu gyur pa med pas phyis kyang de'i rgyur mi 'gyur ba nyid do/ /phyogs cig shos ltar na yang 'jig pa'i rgyu nges pa med par 'gyur ro/ /'bras bu bzhin du 'jig pa rnams kyi rgyu la yang nges pa yod do zhe na/ de ni de lta ma yin te/ 'bras bu rnams ni phan tshun tha dad pa'i rang gi ngo bo yin pas de dag gi rgyu rnams kyi nus pa yang tha dad pa nges pa yod par 'gal ba med kyi/ 'jig pa ni dngos por brjod pa med pas rang bzhin bye brag tu gyur pa med na nges pa 'di sus byas/ de lta bas na 'jig pa thams cad kyi rgyu thams cad yin pa'am/ 'jig pa la rgyu med pa zhig tu shes par bya'o/ /yang gal te 'jig pa 'jig pa'i rgyu'i snga rol na yod pa de ltar na ni 'jig pa'i rgyu don med pa dang / dngos po rnams kyang zhig bzhin du skye bas zhig zin pa rnams skye bar thal bar 'gyur ro/ /ji ste 'jig pa 'jig pa'i rgyu rnams kyi snga rol na med na de lta na yang dngos po bzhin du dngos po med pa yang snga na med par thal bar 'gyur ro/ /gang la snga na med pa yod pa de ni gdon mi za bar dngos po yin pa'i phyir zhig nas med par yang 'gyur ro/ /de ltar na dngos po dang dngos po med pa gnyis khyad par med pa'i phyir thams cad dngos po'i bdag nyid dam dngos po med pa'i bdag nyid du thal bar 'gyur ro/ /ji ste zhig nas med pa yang zhig nas med par 'gyur na/ de lta na ni zhig nas med pa rnams thug pa med par 'gyur ba'i phyir de'i rgyu rnams kyang 'gyur ro/ /de ltar mi 'dod na ni gnyi ga yang rang bzhin bye brag tu gyur pa med pa'i phyir dngos po zhig nas med par yang 'dod par mi bya'o/ /bya ba yang dngos po las gzhan nam gzhan ma yin par brtag grang na/ gal te gzhan ma yin na ni bdag nyid kyi byed pa po dang las su mi rigs so/ /gal te bdag thob nas bya ba byed na de ni de'i bdag nyid du gyur pa ma yin te/ gang zhig gang med par 'byung ba de ni de'i bdag nyid du gyur par mi rung ngo / /bya bas stong na yang byed pa por mi rung ngo / /bya ba dang bral ba ni bya ba dang ldan pa las gzhan nyid yin na bya ba byed pa po'am/ las kyi bdag nyid du ji ltar 'gyur/ bya ba dang bral ba dang de dang ldan pa gnyis cig car du ma mthong ba'i phyir snga ma 'jig la phyi ma skye bar khas blang bar bya'o/ /ji ste bdag ma thob na de ltar na yang byed pa po dang / bya ba yang de'i bdag nyid du 'gyur bar mi rung ste/ gnyi ga med pa'i phyir ci yang ma yin no/ /gzhan yang gcig ni bya ba dang bral ba yin la cig shos ni bya ba dang ldan pa'i phyir byed pa po med do/ /byed pa po med na bya ba yang med do/ /de ltar na rang gi ngang gis 'jig pa'i phyir skad cig pa nyid du khas blang ba yin no/ /byed pa po dang las gnyis las bya ba gud na yang med de/ byed pa po rnams kyis bya ba skyed la/ bskyed par bya ba yin pas na las nyid yin no/ /bya ba med par yang las dang byed pa por mi rung ste/ gdon mi za bar der bya ba gzhan yod par 'gyur ro/ /de la yang gzhan yod par 'gyur bas bya ba dang byed pa po rnams thug pa med par 'gyur ro/ /ji ste bya ba gzhan la mi ltos par bya ba skyed do zhe na/ de lta na ni bya ba gzhan dang bral ba'i rdzas nyid skyed par ci'i phyir mi 'dod la/ don gzhan du gyur pa rang gi ngo bo dang nus pa yang ma mthong ba'i bya ba yongs su brtags pas ci zhig bya/ gal te yang byed pa po rnams kyis bya ba bskyed kyi rdzas ni ma yin na/ de lta na ni snga na med pa dang / zhig nas med pa gnyis bya ba la yod kyi rdzas la med par 'gyur te/ rdzas thams cad ni rtag pa'am med pa nyid du khas blang bar bya'o/ /gal te yang byed pa po rnams las bya ba gzhan zhig yin na sgrub pa bya ba dang bral bar 'gyur te/ de lta na ni bya ba la thug pa med pa dang sgrub pa yang med par 'gyur ro/ / sgrub pa med pa'i phyir bya ba yang med par 'gyur te/ sgrub pa med na bya ba med do/ /yang gal te 'gro ba po las 'gro ba gzhan pa dang / 'bras rnams las tshos pa gzhan du gyur na/ de lta na ni sngon gyi gnas las 'gyur ba med pa'i phyir 'gro ba po yul gzhan du phyin pa med pa dang / 'bras kyang gnas pa med par 'gyur ro/ /ji ste yang bya ba nyid rang gi gzhir 'gyur ba'i rgyu yin pas sngon gyi gnas las 'gyur ba ma bkag go zhe na/ 'gyur ba zhes bya ba ni sngon las rang bzhin bye brag tu 'gyur ba yin la/ de yang gzhan du 'gyur ba med par mi 'byung ste/ de lta bas na snga ma dang phyi ma gnyis cig car yod pa ma yin pas gdon mi za bar sngar zhig la dus tha dad pa med par phyi ma skye bar khas blang bar bya'o/ /de ltar na bya gzhi med pa dang mi gnas pa'i phyir 'gyur ba'i rgyur ga la 'gyur/ de lta bas na bdag thob ma thag tu 'jig pa can g.yo ba med pa nang na byed pa'i skyes bu med par nye bar len pa'i phung po lnga po nyid yod pa tsam gyis snga ma med pa'i phung po gzhan rnams la rtag pa dang / byed pa po dang za ba por 'dzin pa sngon du btang ba'i bdag dang bdag gir 'dzin gyi/ 'di bdag dang bdag gi la ni ma yin no/ /bdag dang bdag gir zhes bya ba ni mthar 'dzin pa'i lta ba rnam par gcod pa'o/ /yang dag par rjes su lta ba zhes bya ba ni rnam par 'byed pa'o/ /shes rab nyon mongs pa can gang yin pa'o zhes bya ba ni rmongs par ma gyur na/ bdag med pa la bdag tu 'du shes par mi 'gyur te/ de'i phyir gti mug dang mtshungs par ldan pa dang phyin ci log tu gyur pa'i phyir nyon mongs pa can no/ /de la rang gi rgyud du gyur pa rnams la ni bdag tu yang dag par rjes su lta/ gzhan gyi rgyud du gyur pa dang ma zin pa rnams la ni bdag gir yang dag par rjes su lta'o/ /gang gi tshe bdag gi rgyun du gyur pa rnams kyi phyogs gcig la bdag tu lta ba'i tshe gzhan la ni bdag gir lta'o/ /'di ni lta ba thams cad kyi rten byed pa'i las can no/ /de nyid kyi dbang du byas nas zhes bya ba ni 'jig tshogs la lta ba ste/ 'jig tshogs la lta ba'i stobs kyis de'i 'byung ba'i phyir 'jig tshogs la lta ba ni de la dbang byed do/ /rtag pa'am chad pa zhes bya ba ni 'jig tshogs la lta bas dngos po gang la bdag tu dmigs pa de nyid la ste/ rtag pa ni ther zug go/ /chad pa zhes bya ba la chad pa ni 'dir nying mtshams sbyor ba med par 'jig pa'o/ /yang dag par rjes su lta ba'i shes rab nyon mongs pa can gang yin pa'o zhes bya ba ni snga ma bzhin du brjod par bya'o/ /'di ni dbu ma'i lam gyi nges par 'byung ba'i bar du gcod pa'i las can no/ /dbu ma'i lam ni rtag pa dang chad par 'dzin pa spangs nas rten cing 'brel bar 'byung ba shes pa'o/ /rgyu'am 'bras bu'am byed pa la skur pa 'debs pa dang yod pa'i dngos po 'jig pa ste zhes bya ba la sogs pa de yang khyad par can la bya'i/ thams cad la ni ma yin no/ /'di ni dge ba'i rtsa ba gcod pa'i las can dang / mi dge ba'i rtsa ba dam du 'dzin pa'i rten byed pa'i las can no/ /lta ba mchog tu 'dzin pa gang zhe na zhes bya ba ni lta ba la sogs pa la dam par 'dzin pas lta ba mchog tu 'dzin pa'o/ /lta ba rnam pa gsum po de dag nyid ces bya ba ni 'jig tshogs la lta ba dang / mthar 'dzin par lta ba dang / log par lta ba'o zhes bya ba ni lta ba po'i lus zhes bya ba gang yin pa dag ste/ gang dag la brten nas lta ba rnams 'byung ba'o/ /de'i gnas la mchog dang gtso bo dang khyad par du 'phags pa dang dam pa zhes bya ba ni mchog la sogs pa'i sgra de dag don mtshungs mod kyi/ gcig gis gcig bshad pa'i phyir smos so/ /'di ni lta ba ngan pa la mngon par zhen pa'i rten byed pa'i las can te/ lta ba'i mtshan nyid la mngon par zhen pa yon tan gyi ngo bor 'dzin pas de yongs su mi gtong ba'i sgro nas 'di ni lta ba thams cad kyi rten byed par bshad pa yin no/ /tshul khrims dang brtul zhugs dang / de'i gnas phung po rnams la zhes bya ba la/ 'chal ba'i tshul khrims spong ba ni tshul khrims so/ /cha byad dang / tshul dang / lus dang / ngag gi 'jug pa nges par byed pa ni brtul zhugs so/ /phung po gang dag la brten nas tshul khrims sam brtul zhugs 'byung ba'i phung po de dag tshul khrims dang brtul zhugs kyi gnas so/ /lta ba ngan pa la yon tan du bzung nas de mngon du 'gro ba'i tshul khrims dang / brtul zhugs la dam par 'dzin pa ni tshul khrims dang brtul zhugs mchog tu 'dzin pa'o/ /de'i phyir tshul khrims dang brtul zhugs mchog tu 'dzin pas mchog tu 'dzin pa sngar bshad do/ /tshul khrims dang brtul zhugs 'dis sdig pa'i dri ma sel zhing dag par byed pas dag pa'o/ /'dis nyon mongs pa'i 'ching ba las grol bar byed pas grol ba'o/ / 'dis 'khor ba las nges par 'byin par byed pas nges par 'byung ba'o/ /nges par 'byin pa ni thar pa'i lam zhes bya ba'i tha tshig go/ /yang dag par rjes su lta ba zhes bya ba ni rtog pa'o/ /tshul khrims sam brtul zhugs bdag po la sogs pa'i rnam par mngon par zhen pa'i bdag nyid kyi shes rab ni tshul khrims dang brtul zhugs mchog tu 'dzin pa'o/ /nyon mongs pa can ni phyin ci log tu dmigs pa'i phyir ro/ /'di ni ngal ba 'bras bu med pa'i rten byed pa'i las can no/ /the tshom gang zhe na/ bden pa la sogs pa la gang yid gnyis za ba'o zhes bya ba la sogs pa zhes bya bas ni las dang 'bras bu dang / dkon mchog rnams bsdu'o/ /yin nam ma yin zhes som nyi yod pa ni yid gnyis za ba'o/ /'di shes rab las rang bzhin tha dad par blta bar bya ste/ 'di ni dge ba'i phyogs la mi 'jug pa'i rten byed pa'i las can no/ /'dod chags la sogs pa'i nyon mongs pa rnams la du zhig ni kun du brtags pa kho na yin/ du zhig lhan cig skyes pa dang / kun du brtags pa yin zhe na/ lta ba gsum po de dag ni gong ma la yang 'gal bas de'i phyir 'og ma zhes bya ba smos so/ /de dag kyang log par lta ba dang / lta ba la mchog tu 'dzin pa dang / tshul khrims dang brtul zhugs mchog tu 'dzin pa'o/ /'di dag nyi tshe kun du brtags pa yin par ma zad kyi/ the tshom yang kun du brtags pa'o/ /lhag ma ni lhan cig skyes pa dang / kun du brtags pa'o zhes bya ba ni gnyi ga'o/ /lhag ma rnams gang zhe na/ 'dod chags dang / khong khro ba dang / gti mug dang / nga rgyal rnams dang / 'jig tshogs la lta ba dang / mthar 'dzin par lta ba'o/ /nyon mongs pa rnams bshad zin to/ /nye ba'i nyon mongs pa rnams brjod dgos pas de dag bshad par bya'o/ /'phral du zhes bya ba ni da ltar byung ba la bya ste/ ma 'ongs pa dang 'das pa la ni ma yin no/ /gnod par byed pa la gnas te zhes bya ba ni gnod par byed pa gzung ste/ 'dis ni khro bo'i yul bstan to/ /khro bo ni de ltar nyid gnod par byed pa'i dngos po la 'jug gi/ /gzhan du ni ma yin no/ /sems kyi kun nas mnar sems pa'o zhes bya ba 'dis ni rnam par shes pa dang 'brel ba can dang rang gi ngo bo yang bstan to/ /'di ni kun nas mnar sems pa'i rang bzhin yin pas khong khro ba dang tha dad pa ma yin mod kyi/ 'di ni khong khro ba'i cha'i khyad par la btags pa'i phyir khong khro ba'i char gtogs pa nyid de/ 'phral du gnod par byed pa'i dbang du byas nas sems can dang sems can ma yin pa'i yul la sems kyi kun nas mnar sems pa'o/ /dbyug pa len pa la sogs pa'i rten byed pa'i las can gang yin pa de khro ba zhes gdags so/ /khros pa'i 'og tu 'dis bdag la gnod pa 'di byas so zhes shar gnyer ba'i bdag nyid de'i mdud par 'dzin pa mi gtong bar rgyun du 'byung ba ni khon du 'dzin pa ste/ mi bzod pa'i rten byed pa'i las can no/ / mi bzod pa ni gnod par byed pa la ji mi snyam par mi byed kyi/ phyir gnod pa byed 'dod ces bya ba'i tha tshig go/ /'di yang khro ba bzhin du zhe sdang gi gnas kyi khyad par la btags pa yin pas btags pa'i yod par rig par bya'o/ /'chags pa ni 'dun pa dang / zhe sdang dang / 'jigs pa la sogs pa bsal te/ de la phan par 'dod pa'i gleng bar byed pas dus su khyod 'di lta bu byed pa'o zhes bsnyad pa la gti mug gi char gtogs pas kha na ma tho ba mkhyud pa'o/ /'chab pa ni kha na ma tho ba mkhyud pa'i rnam pa yin pas gti mug gi char gtogs pa nyid de/ 'di ni 'gyod pa dang reg par mi gnas pa'i rten byed pa'i las can no/ /'di ni chos nyid yin te/ 'di ltar kha na ma tho ba mkhyud na 'gyod par 'gyur ro/ /'gyod na gdon mi za bar yid mi bde ba dang mtshungs par ldan par 'gyur bas reg par mi gnas so/ /tshig brlang po zhes bya ba ni mtshang 'bru ba'i tshul gyis zhe gcod pa dang / tshig rtsub po zher 'debs par byed pa'i ngang tshul ni zher 'debs pa ste/ de'i dngos po ni zher 'debs pa nyid do/ /tshig brlang pos za ba dang 'dra bar tshig brlang por zher 'debs pa nyid ni 'tshig pa'o/ /'di yang khro ba dang / khon du 'dzin pa sngon du 'gro ba sems kyi kun nas mnar sems pa'i rang bzhin yin pas khong khro ba'i char gtogs pa nyid de/ rdzas su yod pa ni ma yin no/ /'di ni ngag gi nyes par sbyong ba skyed pa'i las can dang / reg par mi gnas pa'i las can te de dang ldan pa'i gang zag dang 'grogs par dka' ba'i phyir ro/ /phrag dog ni rnyed pa dang / bkur sti dang / tshigs su bcad pa dang / rigs dang / tshul khrims dang / thos pa la sogs pa'i yon tan mthong nas zhe sdang gi char mngon par gtogs pa'i sems khong nas 'khrugs pa ste/ rang gi bsam pa la khyab par 'khrug pas khong nas 'khrug pa'o/ /'di ni yid mi bde ba dang / reg par mi gnas pa'i las can no/ /zin pa'i dngos po chos dang zang zing dang mkhas pa'i bdag nyid rnams gang gi phyir mchod pa dang / phan 'dogs par 'dod pas 'dod pa'am/ mi 'dod pa la yang rung ste sbyin par byed pa de ni sbyin pa'o/ /de yod na sbyin pa med par 'gyur ba'i phyir de dang mi mthun pa zhes bya'o/ /rnyed pa dang bkur sti la zhen nas 'tsho ba'i yo byad rnams la 'dod chags kyi shas kyis sems kyis kun tu 'dzin pa dang / yongs su mi gtong bar 'dod pa ni ser sna'o/ /'di ni yo byad ma bsnyungs pa'i rten byed pa'i las can no/ /yo byad ma bsnyungs pa ni ser snas yo byad mi mkho ba rnams kyang sogs pa'i phyir ro/ /rgyu gang zhe na/ gzhan la slu ba'i yang dag pa ma yin pa'i don ston pa'o zhes bya ba ni rnyed pa dang / bkur sti la lhag par chags pas gzhan la slu ba'i bsam pas tshul khrims la sogs pa'i don gzhan du gnas la gnas gzhan du ston pa ste/ 'di ni 'dod chags dang gti mug gnyis kyis yang dag pa ma yin pa'i yon tan ston pas na de gnyis 'dus pa la gdags te/ khro bo la sogs pa bzhin du btags pa nyid yin gyi/ rdzas su ni med do/ /log pas 'tsho ba'i rten byed pa'i las can te/ lus dang ngag gi tshul 'chos pas zin pa'i mal cha la sogs pa nye bar 'tsho'i/ yang dag pa'i rtsol bas rnyed pas ni ma yin pa ni log pas 'tsho ba zhes bya'o/ /g.yo gang zhe na/ bdag gi nyes pa bcab pa'i thabs bzung ba ste/ sems gya gyu ba'o zhes bya ba la bdag gi nyes pa bcab pa'i thabs ni gzhan mgo rmongs par byed pa ste/ de yang gzhan nas gzhan du bsgyur zhing gtam rlung skur ba dang / bsal bar mi byed pa'o/ /de'i phyir g.yo dang 'chab pa gnyis tha dad de/ de ni dngos su mkhyud par byed pa'o/ /'di ni bdag gi nyes pa bcab pa'i thabs bzung ba ste/ de'i rgyu yin pa'i phyir ro/ /sems gya gyu ba ni mi drang ba ste/ de dang ldan na sems lam drang por mi 'jug go/ /'di ni rnyed pa dang bkur sti la lhag par chags nas 'dod chags dang gti mug de gnyis kyi bdag gi nyes pa bcab pa'i phyir mgo rmongs par byed pas de gnyis 'dus pa la de gdags so/ /'di ni yang dag pa'i gdams ngag rnyed pa'i bar du gcod pa'i las can no/ /yang dag pa'i gdams ngag ni gang rnyed na tshul bzhin yid la byed pa ste/ de'i bar chad byed pa'o/ /rgyags pa gang zhe na/ bdag gi phun sum tshogs pa la chags pa'i bar du dga' ba ste/ sems yongs su 'dzin pa'o zhes bya ba ni rigs dang nad med pa dang / gzugs dang / lang tsho la bab pa dang / stobs dang / phyug pa dang / blo dang / yid gzhungs pa la sogs pa mchog tu gyur pa ni rang gi phun sum tshogs pa'o/ /rab tu dga' ba ni dga' ba'i bye brag go/ /sems yongs su 'dzin pa zhes bya bas ni dga' ba'i bye brag nyid ston te/ dga' ba'i bye brag gang gis sems rang dbang med par byed pa des de bdag gi dbang du bya ba byed pas yongs su 'dzin par 'gyur te/ de'i phyir sems yongs su 'dzin pa zhes bshad do/ /'dir ni mdor na dga' ba'i bye brag dang ldan pa'i sred pa'i rnam pa la rgyags pa zhes bya'o/ /'di ni nyon mongs pa dang nye ba'i nyon mongs pa thams cad kyi rten byed pa'i las can no/ /rnam par 'tshe ba ni/ gsad pa dang / bcing ba dang / brdeg pa dang / bsdigs pa la sogs pa gnod pa sna tshogs kyis/ sems can rnams la 'tshe bas rnam par 'tshe ba ste/ 'dis gsad pa dang / bcing ba la sogs pas sems can rnams la rnam par tho 'tshams pas sdug bsngal dang yid mi bde ba skyed pa'i phyir/ rnam par tho 'tshams pa'o/ /de ni khong khro ba'i char gtogs pa ste/ snying brtse ba med pa dang / snying rje med pa dang / brtse ba med pa'o/ /snying brtse ba med pa la sogs pa 'di dag kyang gsod pa la sogs pa bdag nyid kyis byed pa dang / byed du 'jug pa dang gzhan dag byed pa mthong ngam/ thos na rjes su yi rang ba rnams dang go rims bzhin du sbyar bar shes par bya'o/ /yang na gcig gis gcig bshad do/ /'di ni mdor na khong khro ba'i char gtogs pa ste/ sems can rnams la sems rtsub pa dang / sems can rnams la rnam par tho 'tshams ba'i las can ni rnam par 'tshe ba zhes bya'o/ /ngo tsha med pa ni 'di la ngo tsha med pa ste/ de gang dang ldan na de skad ces bya ba de ngo tsha shes pa'i mi mthun pa'i phyogs su gyur pa ni ngo tsha med pa ste/ las de bdag gi cha ma yin pa shes kyang gang kha na ma tho bas mi 'dzem pa de ngo tsha med pa'o/ /'dis khrel ltas byed pas khrel yod pas te/ de las bzlog pa ni khrel med pa'o/ /'di gnyis ni nyon mongs pa dang / nye ba'i nyon mongs pa thams cad kyi grogs byed pa'i las can no/ /bya ba ngan pa thams cad kyi rgyu 'dod chags dang / zhe sdang dang / gti mug gi rnam pa rnams ji ltar mthun mthun du gdags te/ 'dod chags dang / zhe sdang gnyis cig car mi 'byung ba'i phyir ro/ /'di gnyis ni rang gi rgyud ni med do/ /rmugs pa gang zhe na/ sems las su mi rung ba ste/ blong ba nyid do zhes bya ba la blong ba nyid ni rnam grangs gzhan gyis bstan pa'o/ /blong ba'i dngos po ni blong ba nyid de/ de dang ldan na sems blun par gyur nas mi g.yo ba bzhin du dmigs pa rtogs par mi nus pa'o/ /'di yang nyon mongs pa dang / nye ba'i nyon mongs pa thams cad kyi grogs byed pa'i las can no/ /gti mug gi cha la gdags pas btags pa nyid yin gyi rdzas su ni ma yin no/ /rgod pa gang zhe na/ sems ma zhi ba'o zhes bya ba la zhi ba ni zhi gnas te/ de dang mi mthun pa ni ma zhi ba'o/ /de yang 'dod chags dang mthun pa sngon dgod dgod pa dang / rtse rtse ba la sogs pa dran pa'i 'dod chags kyi char gtogs pa sems ma zhi ba'i rgyu ste/ zhi gnas kyi bar du gcod pa'i las can no/ /dad pa'i mi mthun pa'i phyogs zhes bya ba la/ dad pa ni yod pa dang / yon tan can dang / nus pa rnams la mngon par yid ches pa dang / dang ba dang 'dod pa'o/ /de las bzlog pa ni ma dad pa ste/ dad pa med pa ni sbyor ba la 'dun pa med pas le lo'i rten byed pa'i las can no/ /nyal ba dang gnyid pa dang 'phres pa'i bde ba la brten nas gti mug gi char gtogs pas lus dang ngag dang yid kyi las dge ba la sems mi spro ba de ni le lo ste/ ngan pa la sbyor bas ni le lo'o/ / brtson 'grus kyi mi mthun pa'i phyogs zhes bya ba la brtson 'grus ni dge ba'i phyogs la sbyor ba la sems mngon par spro ba'o/ /de'i mi mthun pa'i phyogs yin pas le lo ste/ dge ba'i phyogs la sbyor ba'i bar du gcod pa'i las can no/ /bag med pa ni chags pa dang zhe sdang dang gti mug ji skad du bshad pa rnams la btags te mi dge ba 'phel ba dang dge ba 'grib pa'i rten byed pa'i las can no/ /brjed ngas pa gang zhe na/ dran pa nyon mongs pa can de zhes bya ba la nyon mongs pa zhes bya ba ni nyon mongs pa dang mtshungs par ldan pa'o/ /dge ba la mi gsal ba zhes bya ba la/ nyon mongs pa dang mtshungs par ldan pa'i dran pa ni nyon mongs pa dang yul tha dad pa ma yin pas dge ba la sems gsal bar byed mi nus te/ g.yeng ba'i rten byed pa'i las can no/ /rnam par g.yeng ba ni 'dis sems sna tshogs su g.yeng bar byed pa'o/ / 'dod chags dang / zhe sdang dang gti mug de dag gis sems ting nge 'dzin gyi dmigs pa las phyi rol du 'phro bar byed pa ste/ de dag la ji ltar mthun mthun du nye ba'i nyon mongs pa'i bdag nyid kyi g.yeng ba gdags so/ /'dod chags dang bral ba'i bar du gcod pa'i las can no/ /shes bzhin ma yin pa gang zhe na/ nyon mongs pa dang mtshungs par ldan pa'i shes rab ste/ des lus dang / ngag dang yid kyi spyod pa 'gro ba dang ldog pa la sogs pa la mi shes bzhin du 'jug pa ste/ bya ba dang bya ba ma yin pa mi shes pas ltung ba'i rten byed pa'i las can no/ / //phung po lnga'i rab tu byed pa bye brag tu bshad pa/ bam po gsum pa/ 'gyod pa gang zhe na/ yid la gcags pa'o zhes bya ba la ngan pa byas pas 'gyod de de'i dngos po ni 'gyod pa nyid do/ /ngan pa byas pa'i yul la sems mi dga' ba ste/ sems las byung ba'i skabs yin pas 'gyod pa zhes bya'o/ /'dod pa dang mi 'dod pa dang / dge ba dang / mi dge ba dang / lung du ma bstan pa dang / dus dang dus ma yin pa dang / rigs pa dang mi rigs pa byas sam ma byas kyang rung ste/ gti mug gi char gtogs pa'i sems kyi yid la gcags pa ni 'gyod pa ste/ 'di ni sems gnas pa'i bar du gcod pa'i las can no/ /mngon par dga' ba sngon du 'gro ba'i byed pa gang yin pa de ni 'dod pa'o/ /mi 'dod pa ni gzhan dag gis nan gyis byed du bcug pa gang yin pa dang / nyon mongs pa'i zil gyis non nas byed pa gang yin pa'o/ /dus ni ji srid du ma spangs pa'o/ /dus ma yin pa ni de las thal ba'o/ /rigs pa ni gnas yin pa'o/ /mi rigs pa ni gnas ma yin pa'o/ /de la rnam pa gsum ste/ dge ba dang mi dge ba dang lung du ma bstan pa'o/ / 'dir ni gti mug gi char gtogs pa'i nye ba'i nyon mongs pas bsdus pa kho na gzung ngo / /gnyid gang zhe na/ 'jug pa rang dbang med par sems sdud pa'o zhes bya ba la 'jug pa ni dmigs pa la 'jug pa'o/ /de yang sems kyi rang dbang med pa gang las 'byung ba nyid ces bya'o/ /yang na lus 'dzin mi nus pa'i sems kyi 'jug pa rang dbang med pa de gang las byung ba de gnyid ces bya'o/ /gzhan gyis kyang sems kyi 'jug pa rang dbang med par 'gyur bas de'i phyir sems sdud pa zhes bya ba smos so/ /gzhan gyis kyang sems sdud par 'gyur bas sems kyi 'jug pa rang dbang med pa zhes bya ba smos so/ /sems sdud pa ni mig la sogs pa'i dbang bo'i sgo nas mi 'jug pa'o/ /de yang dge ba dang mi dge ba dang / lung du ma bstan pa'o/ /gnyid kyi rgyu ni nyam chung ba dang / ngal ba dang / lus lci ba dang / mun pa'i mtshan ma yid la byed pa la sogs pa la brten nas gti mug gi char gtogs pa 'byung ste/ bya ba shor ba'i rten byed pa'i las can no/ /'dir ni mi dge ba nyid gti mug gi char gtogs pa yin gyi gzhan ni ma yin no/ /rtog pa gang zhe na/ kun du tshol ba'i yid kyi brjod pa ste/ sems pa dang shes rab kyi bye brag ces bya ba la kun du tshol ba ni 'di ci yin zhes kun du rtog pa'i rnam par zhugs pa'o/ /yid kyi rang bzhin gyi brjod pa ni yid kyi brjod pa'o/ /brjod pa dang 'dra bas brjod pa ste don brjod pa'o/ /sems pa dang shes rab kyi bye brag ces bya ba la sems pa ni gang gis sems kun du g.yo bar byed pa'i bdag nyid yin la/ shes rab ni yon tan dang nyes pa 'byed pa'i rnam pa yin pas de'i dbang gis kyang sems 'jug pas na bar 'ga' sems dang sems pa la rtog pa gdags/ 'ga' ni shes rab dang sems la ste/ mngon par mi rtog pa dang / mngon par rtogs pa'i dus dang go rims bzhin no/ /yang na sems pa dang shes rab nyid la gdags te/ de'i dbang gis de ltar 'jug pa'i phyir ro/ /tshul 'di ni dpyod pa la yang blta bar bya'o/ /sems rtsing ba'o zhes bya ba la che long ste/ dngos po tsam kun du tshol ba'i rnam pa yin pa'i phyir ro/ /dpyod pa gang zhe na/ so sor rtog pa yid kyi dpyod pa ste zhes bya ba ni sngar khong du chud pa la 'di ni 'di'o zhes dpyod pa'i rnam pa yin pa'i phyir ro/ /de bzhin du gang sems zhib pa'o zhes bya ba la de bzhin du zhes bya ba ni/ sems pa dang shes rab kyi bye brag go/ /dngos po la so sor rtog pa'i rnam pa yin pas zhib pa zhes bya'o/ /'di gnyis ni reg par gnas pa dang / reg par mi gnas pa'i rten byed pa'i las can no/ /'di gnyis ni sems rtsing ba dang zhib par rnam par gnas pa tha dad du dbye'o/ /'du byed kyi phung po ni tshor ba dang 'du shes las gzhan pa sems las byung ba'i bdag nyid dang / sems dang ldan pa ma yin pa'i 'du byed kyi bdag nyid do zhes bshad pa de la sems las byung ba rnams bshad zin to/ /da ni sems dang ldan pa ma yin pa'i 'du byed rnams brjod dgos pas de'i phyir/ sems dang ldan pa ma yin pa'i 'du byed rnams gang zhe na zhes bya ba smos te/ dris pa bzhin du gang dag gzugs dang sems dang sems las byung ba'i gnas skabs la gdags pa ste/ de nyid dang gzhan du mi gdags so zhes de dag spyir bstan te/ de dag ni mi ldan pa'i 'du byed yin par skabs kyis sbyar ro/ /gzugs la sogs pa'i gnas skabs pas rang gi ngo bo gud na med pas/ de dag ni gzugs la sogs pa'i gnas skabs la tha snyad gdags pa'i phyir btags pa'o/ /de'i phyir rten dang bcas pa yin pas gnas skabs bzhin du de nyid dang gzhan du mi gdags te/ gnas skabs dang gnas skabs can gcig dang / du ma nyid du thal bar 'gyur ba'i phyir dang / gnas skabs can la 'bras bu rtag par thal bar 'gyur ba'i phyir ro/ /de ltar spyir bstan nas khyad par khong du chud par 'dod nas/ de dag kyang gang zhe na zhes dris pa dang thob pa dang 'du shes med pa'i snyoms par 'jug pa dang zhes bya ba de dag gi khyad par rgya cher bstan to/ /de lta bu'i cha dang mthun pa dag go zhes bya ba ni de lta bu'i rang bzhin can dag ste/ gzhan gang dag gzugs dang sems dang sems las byung ba'i gnas skabs la gdags pa ste/ de dag kyang ldan pa ma yin pa'i 'du byed rnams su rig par bya'o/ /de dag kyang gang zhe na/ 'jug pa dang / so sor nges pa dang / 'byor pa dang / mgyogs pa dang / go rims dang / rus dang / yul dang / grangs dang / tshogs pa zhes bya ba la sogs pa'o/ /da ni tshogs pa la sogs pa'i rang gi ngo bo so sor dmigs kyis dbye ba'i phyir/ thob pa gang zhe na zhes bya ba la sogs pa dris pa dang / rnyed pa dang ldan pa'o zhes bya ba la sogs pa smos so/ /sngon ma thob pa thog ma nyid du thob pa ni rnyed pa'o/ /rnyed pa rnams skad cig gnyis pa la sogs par yod pa ni ldan pa ste/ yang dag par rjes su 'gro ba ni ldan pa zhes bya'o/ /de ltar na thob pa'i sgra ni rnyed pa dang ldan pa la yang snyegs par bstan pa yin no/ /de yang sa bon dang dbang dang mngon du gyur pa dang / rnam pa gsum du dbye'o/ /ci rigs su sbyar ro zhes bya ba de la rigs pa ni 'di yin te/ skad cig dang po thob pa nas brtsams te dbang gi dus kyi bar du sa bon zhes bya ste/ de ltar na sa bon ni rnyed pa dang ldan pa gnyi gar brjod pa yin no/ / dbang dang mngon du gyur pa ni ldan pa yin no/ /sa bon ci la bya zhe na/ dge ba dang mi dge ba dang / lung du ma bstan pa'i chos rnams kyi rnam par shes pa la ma 'ongs pa na de dang rigs gcig pa'i chos kyi rgyu bskyed pa'i nus pa'i bye brag ni sa bon no/ /sa bon rnyed nas de la rag las pa'i phyir mngon du ma gyur kyang de'i sa bon gang yin pa de thob pa zhes bya'o/ /dbang ni de'i rkyen la ltos nas rgyun gyi 'bras bu bsgrub pa'i gnas skabs so/ /mngon du gyur pa ni de'i 'bras bu grub pa'i dus so/ /'du shes med pa'am 'du shes med pa rnams kyi ste/ 'du shes med par snyoms bar 'jug pa'am/ 'du shes med pa rnams kyi snyoms par 'jug pa ni/ 'du shes med pa'i snyoms par 'jug pa'o/ /dge rgyas kyi 'dod chags dang bral ba ni bsam gtan gsum pa'i 'dod chags dang bral ba'o/ /bsam gtan gsum pa ni dge chung dang tshad med dge dang dge rgyas so/ /de la gang dge rgyas las 'dod chags dang bral ba de ni bsam gtan gsum pa las 'dod chags dang bral ba'o/ /gong ma ma yin pa ni bsam gtan gsum pa las gong du gyur pa bsam gtan bzhi pa ste/ bsam gtan bzhi pa la 'dod chags dang ma bral zhes bya ba'i tha tshig go/ /'byung ba'i 'du shes sngon du btang ba zhes bya ba ni 'byung ba'i 'du shes sngon du btang ba'i yid la byed pa su la yod pa de 'byung ba'i 'du shes sngon du btang ba ste/ 'du shes med pa la thar bar 'du shes pa'am/ snyoms par 'jug pa la de'i lam du 'du shes pa rnams 'du shes med pa'i snyoms par 'jug pa la snyoms par 'jug go/ /de'i phyir 'byung ba'i 'du shes ni thar pa'i 'du shes sam/ de'i lam du 'du shes pa'o/ /'dir ni sun 'byin pa'i rnam pa la 'byung ba'i 'du shes sngon du btang ba'i yid la byed pa zhes bya bar 'dod de/ de nyid kyi phyir sems dang sems las byung ba 'gags su zin kyang 'du shes med pa nyid la 'du shes med pa'i snyoms par 'jug pa zhes bstan te/ 'di ltar 'du shes nyid la sun 'byin pas sems dang sems las byung ba ma lus par 'gag pa'i gnas skabs su 'gyur ro/ /sems dang sems las byung ba'i chos brten pa ma yin pa rnams gang 'gog pa'o zhes bya ba la brten pa ma yin pa rnams ni 'jug pa'i rnam par shes par bsdus pa mtshungs par ldan pa dang bcas pa rnam par shes pa'i tshogs drug po dag ste/ gang gi phyir sems med pa'i dus thams cad na med pa dang / sems dang bcas pa'i dus rnams na yang gang gi phyir ni rtag tu yod pa ma yin pa de dag brtan pa ma yin pa rnams so/ /brtan pa ni kun gzhi rnam par shes pa dang / nyon mongs pa can gyi yid mtshungs par ldan pa dang bcas pa ste/ gtan du yod pa'i phyir ro/ /zag pa med pa'i lam gyi bden pa la snyoms par 'jug pa'i dus dang / 'gog pa la snyoms par 'jug pa'i dus dang / mi slob pa'i dus ma gtogs par dus gzhan kun na yod pa'i phyir brtan pa ma yin pa rnams zhes bye brag smos so/ /gang 'gog pa zhes bya ba ni snyoms par 'jug pa'i sems kyis byas pa ste/ 'dis 'gag par byed pas na 'gog pa'o/ /dus gzhan na sems dang sems las byung ba brtan pa ma yin pa kun du 'byung ba dang mi mthun pa'i lus kyi gnas skabs kyi bye brag la bya ste/ de ltar na lus kyi gnas skabs kyi bye brag la 'du shes med pa'i snyoms par 'jug pa la gdags par bstan pa yin no/ /snyoms par 'jug pa'i sems kyis de ma thag pa'i sems gzhan skye ba dang mi mthun pa'i lus skyed pa'i phyir snyoms par 'jug pa'i sems kyis byas pa zhes bya'o/ /'gog pa'i snyoms par 'jug pa gang zhe na/ ci yang med pa'i skye mched kyi 'dod chags dang bral ba srid pa'i rtse mo las gyen du bskyod pa'o zhes bya ba ni/ srid pa'i rtse mo las gyen du ma bskyod kyang ci yang med pa'i skye mched kyi 'dod chags dang bral ba'i so so skye bo'i yang yod pas de'i phyir srid pa'i rtse mo las gyen du bskyod pa zhes bya ba smos so/ /srid pa'i rtse mo las gyen du bskyod pa ci yang med pa'i skye mched kyi 'dod chags dang bral ba kha cig /'bras bu la gnas pa dang 'jug pa yang yod pas/ de'i phyir ci yang med pa'i skye mched kyi 'dod chags dang bral ba zhes bya ba smos so/ /gong ma'i 'dod chags dang bral ba zhes ma brjod pa ni srid pa'i rtse mo'i 'dod chags dang bral ba dgra bcom pa yang 'gog pa la snyoms par 'jug pa yod pa'i phyir ro/ / ci yang med pa'i skye mched kyi 'dod chags dang bral ba dang srid pa'i rtse mo las gyen du bskyod pa zhes bya ba gnyi ga smos pas ni 'di 'phags pa phyir mi 'ong ba'am/ dgra bcom pa'i snyoms par 'jug pa yin gyi/ so so'i skye bo ni ma yin par bstan pa yin no/ /so so'i skye bo ni srid pa'i rtse mo las gyen du mi bskyod do/ srid pa'i rtse mo las gnyen po 'jig rten las 'das pa'i lam med pa'i phyir ro/ /mthong ba'i lam zag pa med pa ni srid pa'i rtse mo'i gnyen po yin te/ de'i phyir 'phags pa nyid mthong bas spang bar bya ba'i nyon mongs pa spangs pa dang / bsgom pas spang bar bya ba'i nyon mongs pa'i phyir ma chags pas srid pa'i rtse mo las bskyod pa'o/ /gnas pa'i 'du shes sngon du btang ba'i yid la byed pas zhes bya ba la 'gog pa'i snyoms par 'jug pa ni 'du shes med pa'i snyoms par 'jug pa bzhin du 'byung ba'i 'du shes sngon du btang ba'i yid la byed pas snyoms par 'jug pa ma yin gyi gnas pa'i 'du shes sngon du btang bas so/ /'gog pa'i snyoms par 'jug pa ni srid pa'i rtse mo pa ste/ 'phags pa rnams ni srid pa las 'byung ba'i 'du shes mi 'jug gi / 'du shes dang tshor bas yongs su skyo nas de med pa'i phyir 'gog pa'i snyoms par 'jug pa la zhi bar gnas pa'i 'du shes su 'gyur ro/ /gnas su mnyam pa'i 'du shes ni gnas pa'i 'du shes so/ /'dis gnas par byed pas gnas pa ste/ dus gzhan du sdod ces bya ba'i tha tshig go/ /snyoms par 'jug pa'i khyad par mya ngan las 'das pa dang 'dra bas gnas par bya'o snyam pa'i 'du shes mngon par 'du byed pa'i yid la byed pa ni gnas pa'i 'du shes sngon du btang ba'i yid la byed pa zhes bya'o/ /srid pa'i rtse mo pa de ni phra ba'i phra ba ste/ de ma thag tu 'gog pa'i snyoms par 'jug pa mngon du 'gyur ba'i phyir ro/ /brtan pa ma yin pa rnams zhes bya ba ni 'gog pa la snyoms par 'jug pa rnams kyi 'jug pa'i rnam par shes pa drug dang bzhi dang gcig 'dod pa dang / gzugs dang gzugs med pa'i khams rnams su go rims bzhin no/ /brtan pa rnams las kyang kha cig ces bya ba la brtan pa ni rnam par smin pa'i rnam par shes par bsdus pa dag kyang yod pas de'i phyir kha cig ces bya ba smos so/ /nyon mongs pa can gyi yid ni 'gog pa'i snyoms par 'jug pa dang / mi slob pa'i dus ma gtogs par zag pa dang bcas pa'i spyod pa thams cad na gnas pa'i tshul can yin pas brtan pa'o/ /'gog pa gang yin pa'o zhes bya ba ni 'jug pa'i rnam par shes pas byas pa ste/ rnam par smin pa'i rnam par shes pa la 'jug pa'i rnam par shes pa rnams dang / nyon mongs pa can gyi yid kyi rnam par shes pa'i sa bon la gnod pa byed pa gang yin pa ste/ 'dis 'jug pa'i rnam par shes pa dang / nyon mongs pa can gyi yid dus gzhan na mi 'byung bar 'gog pas 'gog pa zhes bya'o/ /de ltar na snyoms par 'jug pa'i sems kyis kun gzhi rnam par shes pa la sa bon nyams par byas pa'i gnas skabs la 'gog pa'i snyoms par 'jug pa gdags so/ /'du shes med pa gang zhe na/ 'du shes med pa'i snyoms par 'jug pa'i 'bras bu ste/ 'du shes med pa'i sems can lha rnams kyi nang du skyes pa'i sems dang sems las byung ba'i chos brtan pa ma yin pa rnams gang 'gog pa'o zhes bya ba la lha de dag ni 'bras bu che ba zhes bya ba rnams te/ bsam gtan bzhi pa'i gnas gzhan gsum pa'o/ /de dag gi gong na khang khyim lta bur 'du shes med pa'i sems can lha rnams kyi gnas yod pa der skyes pa'i 'du shes med pa'i snyoms par 'jug pa'i rnam par smin pa'i 'bras bu'o/ /sems dang sems las byung ba'i chos brtan pa ma yin pa rnams gang 'gog pa'o zhes bya ba ni 'di'i rang bzhin nges par bzung ba ste/ der skyes pa'i sems dang sems las byung ba chos brtan pa ma yin pa rnams rang gi gnas la rang gi rigs kyi sems dang sems las byung ba'i sa bon la gnod par byed pa ni srab pa bas kyang ches srab par 'gyur zhing tha mar shin tu srab pa'i bar du gyur nas rang gi gnas la sa bon nyams par byas pa'i phyir sems gzhan dang sbyor mi nus so/ /de'i phyir sems dang sems las byung ba'i brtan pa ma yin pa rnams de'i tshe gnas las mi 'byung ste/ sa bon nyams par gyur pa'i dus de na gnas la 'du shes med pa gdags so/ /de ltar na gnas kyi dus nyid la bya ste/ 'dis 'gog par byed pas na 'gog pa'o/ /srog gi dbang po gang zhe na/ ris mthun pa rnams su sngon gyi las kyis 'phangs pas gang 'du byed rnams kyi gnas ba'i dus nges pa'o zhes bya ba ni 'dis 'tsho bar byed pas srog go/ /ris mthun pa de nyid du gnas par dbang byed pa'i phyir dbang po zhes bya'o/ /ris ni sems can gyi tshogs so/ /skal ba mtshungs pa ni mthun pa ste/ 'dra zhes bya ba'i tha tshig go/ / ris mthun pas ris mthun pa ste/ 'gro ba tha dad pa dang / las tha dad pas tha dad par gyur pa'i ris mthun pa de dag tu so so'i tshe gcig gi phung po'i rgyun gang yin pa de ris mthun pa zhes bya'o/ /de yang sngon bsags pa'i dge ba dang mi dge ba dang / mi g.yo ba'i las kyis 'phangs pa ni las kyis bskyed pa'o/ /gang gnas pa'i dus nges pa zhes bya ba ni tha dad pa ma yin pa'i ris mthun pas bsdus pa'i 'du byed rnams kyi 'jug pa la gnas pa zhes bya'o/ /gnas pa de'i dus nges pa ni 'dis ris mthun pa der lo brgya'am/ lo stong ngam/ dus ji srid du gnas par 'gyur ba de gnas pa'i dus nges pa'o/ /de ltar na gnas pa'i dus nges pa'i rang bzhin la tshe zhes bstan pa yin no/ /de'i gnas ni sngon bsags pa'i las kyis 'phangs pas nus pa'i khyad par can gyi 'du byed brtan pa kun gzhi rnam par shes pa sngon du 'gro ba rnams so/ /ris mthun pa gang zhe na gang sems can rnams kyi lus 'dra ba'o zhes bya ba la sems can ni lha dang mi la sogs pa 'gro ba lngar gtogs pa rnams so/ /de dag gi bdag gi dngos por gang la 'dzin pa de/ sems can rnams kyi lus yin te/ de yang nye bar len pa'i phung po lnga po nyid dam/ phung po bzhi'i bdag nyid do/ / 'dra zhes bya ba ni mtshungs pa'o/ /de ni 'di skad du 'gro ba dang gnas dang lus la sogs pa tha dad pas tha dad pa ni sems can rnams kyi 'gro ba dang / gnas dang lus tha dad pa'i gzhi sems can rnams kyi lus phan tshun 'dra ba gang yin pa de la ris mthun pa gdags so zhes bstan pa yin no/ /skye ba gang zhe na/ ris mthun par gang 'du byed rnams ma byung ba las byung ba'o zhes bya ba la/ ris mthun pa smos pa ni 'du byed tsam gyi 'byung ba la skye ba zhes mi bya'i/ ris mthun par gyur pa'i 'du byed gang yin pa de dag nyid ma byung ba las byung ba la skye ba zhes bya ste/ thams cad ni ma yin no zhes bstan pa'i phyir ro/ /gang dag dngos po la skyes pa med pa dang / zhig pa med pa rnams kyi skye ba don gzhan du 'gyur pa dang byed pa las dus rnam par gzhag par 'dzin pa rnams kyi 'dod pa de bsal ba'i phyir/ ma byung ba las byung ba zhes bya ba smos te/ 'du byed rnams kyi rang bzhin ma byung ba las byung ba ni skye ba zhes bya'o/ /don gzhan gyur pa yang med/ byed pa las dus rnam par gzhag pa yang ma yin no/ /rga ba gang zhe na/ de ltar de dag gi rgyun gzhan du 'gyur ba'o zhes bya ba la de ltar de dag gi zhes bya ba ni ris mthun par gyur pa'i 'du byed rnams nyid kyi'o/ /rgyun gzhan du 'gyur ba'o zhes bya ba ni skye ba'i srid pa nas 'chi ba'i srid pa'i bar du ste/ bar der rgyu dang 'bras bu'i dngos por gnas pa'i 'du byed rnams rgyun mi 'chad par 'byung ba la rgyun ces bya'o/ /de'i gzhan dang gzhan du gyur pa'i dngos po ni gzhan du 'gyur ba ste/ 'di ltar nur nur po'i dus las mer mer por 'gyur ba'i dus dang / de bzhin du dar la bab pa'i dus las rgas pa'i dus kyi bar du'o/ /nur nur po la sogs pa'i dus rnams la yang snga ma las phyi mar 'gyur ba'i skad cig re re la gzhan du 'gyur ba zhes brjod do/ /de ltar na rgyun gzhan du 'gyur ba la rga ba gdags te/ skad cig gcig la yang ma yin pa don gzhan du 'gyur ba yang med do/ /gnas pa gang zhe na/ de ltar de dag gi rgyun rgyud chags pa'o zhes bya ba la/ de ltar zhes bya ba ni ris mthun pa gcig na'o/ /shi ba la thug gi bar du 'du byed rnams kyi rgyun rgyud chags pa la gnas pa gdags te/ skad cig gcig la yang mi bya zhing don gzhan du gyur pa yang med par bstan pa yin no/ /mi rtag pa nyid gang zhe na/ de ltar de dag ni rgyun 'chad pa'i zhes bya ba la de ltar de dag gi zhes bya ba ni ris mthun pa gcig tu 'du byed rnams kyi rgyun chad pa la mi rtag pa gdags te/ skad cig re re la yang ma yin zhing don gzhan du gyur pa yang med par bstan pa yin no/ /rgyun chad pa ni 'dir 'chi ba la bya bar rig par bya'o/ /phyi rol gyi gzugs la yang skye ba dang / rga ba dang / gnas pa dang / mi rtag pa nyid yod par nges na/ ci'i phyir ris mthun pa nyid kyi 'du byed kyi rgyun la skye ba la sogs par bshad kyi/ phyi rol gyi gzugs kyi ni ma yin zhe na/ bcom ldan 'das kyis 'dus byas kyi mtshan nyid skye ba dang / rga ba dang / gnas pa dang / mi rtag pa nyid gang dag bshad pa de dag ni sems can du brjod pa nyid kyi 'du byed kyi dbang du mdzad pa yin gyi/ phyi rol gyi ma yin par bstan pa'i phyir ro/ /gnyi ga la yang skye ba la sogs pa yod par mtshungs na zin pa'i 'du byed kyi dbang du mdzad de/ bcom ldan 'das kyis 'du byed kyi mtshan nyid bshad pa ci'i phyir zhe na/ phyi rol gyi gzugs ni 'jig pa dang chags pas rab tu phye ba yin la/ nang gi 'du byed rnams ni skye ba dang / rga ba la sogs pas rab tu phye ba'i phyir ro/ /de ni 'di skad du 'jig rten na phyi'i gzugs kyi 'jig pa dang / skye ba la 'jig pa dang / chags pa'i sgrar grags pas bcom ldan 'das kyis kyang 'jig rten dang mthun par de skad du bshad de/ skye ba la sogs pa'i sgrar ni ma yin no/ /nang gi 'du byed rnams ni skyes so/ /rgas so/ /gnas so/ /zhig go zhes skye ba dang rga ba la sogs pas rab tu phye ba yin te/ bcom ldan 'das kyis kyang 'jig rten dang mthun par de dag gi 'byung ba la sogs pa la skye ba la sogs pa'i sgrar bstan to zhes bshad pa yin no/ /ming gi tshogs gang zhe na/ chos rnams kyi ngo bo nyid kyi tshig bla dgas so zhes bya ba ni brjod par bya ba dang brjod pa la rnam par shes pa gzhol bar byed pas ming ngo / /de yang don rnams la brda sprod ba'i yi ge 'dus pa ste/ ming ngam yi ge rnams 'dus pa la ming gi tshogs zhes bya'o/ /chos rnams kyi ngo bo nyid brjod du med pa'i phyir sgro btags pa'i tshig la tshig bla dgas zhes bya'o/ /ngo bo nyid ni rang gi mtshan nyid do/ /chos rnams kyi rang gi ngo bo brjod du med kyang gang gis rang gi ngo bo gsal bar byed pa'i brjod pa de ming zhes bya ste/ dper na mig rna ba gzugs sgra zhes bya ba lta bu'o/ /tshig gi tshogs gang zhe na/ chos rnams kyi khyad par gyi tshig bla dgas so zhes bya ba ni 'dis khyad par gyi don shes par byed pas tshig ste/ de lta na ming dang 'jig rten pa'i tshig las tshig bye brag tu byas pa yin no/ /ming dang tshig gnyis yi ge 'dus pa'i bdag nyid yin par bye brag med kyang don gyi bye brag gis bye brag tu dbye ste/ chos rnams kyi ngo bo nyid kyi tshig bla dgas ni ming yin la/ khyad par gyi gzhi ni ngo bo nyid yin pas sngar ngo bo nyid kyi tshig bla dgas smos so/ /khyad par ni mi rtag pa la sogs pa'o/ /'jug pa dang ldog pa'i bdag nyid dang gzhan du mi snyegs pa'i ngo bo nyid las bye brag tu byed pa ni khyad par te/ dper na 'du byed thams cad ni mi rtag pa'o/ /chos thams cad ni bdag med pa'o/ /mya ngan las 'das pa ni zhi ba'o zhes bya ba lta bu'o/ / de ni 'di skad du dngos po'i ngo bo nyid brjod pa tsam ni ming yin la/ dngos po'i ngo bo nyid kyi khyad par brjod pa ni tshig yin no zhes bstan pa yin no/ /lhag ma ni ming bshad pa bzhin du shes par bya'o/ /yi ge'i tshogs gang zhe na/ yi ge rnams te de gnyi ga gsal bar byed pa'i phyir ro zhes bya ba ni 'dis gsal bar byed pas yi ge'o/ /yi ge rnams kyi tshogs ni yi ge'i tshogs so/ /tshogs smos pa ni yi ge thams cad bsdu ba'i phyir ro/ /de zhes bya ba'i sgra 'ba' zhig smos na ni gong ma nyid la sbyor du dgos la/ gnyi ga zhes bya ba nyi tshe smos na yang gnyi ga gang la bya bar gtol med de/ de'i phyir de gnyi ga zhes gnyi ga smos so/ /de ltar na bshad ma thag pa'i ming dang tshig gsal bar byed pa'i phyir yi ge zhes bshad pa yin no/ /ji ltar na yi ge rnams kyis ming dang tshig gsal bar byed ce na/ ngo bo nyid dang khyad par gyi tshig bla dgas kyi gnas skabs su gyur pa'i yi ge 'dus pa rnams la ming dang tshig gdags pa'i phyir te/ de ltar na yi ge rnams kyis ming dang tshig gsal bar byed do/ /yi ge rnams kyi ngag gi rnam par rig byed kyi ngo bo nyid ma yin te/ yi ge la sogs pa ni brjod pa'o zhes 'jig rten na grags so/ /de dag ni ming dang tshig gnas kyis don yang dag par brjod pa'i phyir brjod pa zhes bya'o/ /don gyi gnas gang dag la bstan pa'i gnas de dag la ming dang tshig gdags pas de dag ni de'i gnas zhes bya'o/ /yi ge yang de dag gi rnam grangs su gtogs pa gzhan du mi 'gyur bar byed pa'i phyir te/ 'di ltar mig dang 'dren byed ces bya ba la sogs pa ni rnam grangs su gtogs pa gzhan dag tu 'gyur ba ste/ brjod par bya ba nyid rnam grangs su gtogs pa gzhan rnams kyis shes so zhes bya ba'i tha tshig go/ /gang gis a zhes brjod pa ma gtogs par a zhes bya ba shes par 'gyur ba a zhes bya ba'i rnam grangs de lta bu gzhan med do/ /thams cad ni 'di lta ste/ ngo bo nyid dang khyad par dang de gnyi ga'i tha snyad tsam du zad de/ de dag thams cad ni 'di dag gis rjes su tha snyad gdags pa yin pas de'i phyir ming dang tshig dang yi ge'i tshogs de dag rnam par gzhag go/ /de bzhin du ldan pa ma yin pa gzhan dag kyang tshig dang yi ge'i tshogs bzhin du dgos pa la ltos nas rnam par gzhag par rig par bya'o/ /so so'i skye bo nyid gang zhe na/ 'phags pa'i chos rnams ma thob pa'o zhes bya ba ni chos gang dang ldan na so so'i skye bo zhes brjod pa de so so'i skye bo nyid do/ / sdig pa mi dge ba'i chos rnams las ring du song bas 'phags pa rnams so/ /de dag kyang slob pa dang mi slob pa rnams te/ de dag gi chos rnams ni mthong ba dang bsgom pa dang mi slob pa'i lam rnams te/ de dag ma thob pa ni so so'i skye bo nyid do/ /ma thob pa ni 'dir 'phags pa'i chos ma skyes pa ste/ 'di ltar 'phags pa'i chos ma skyes pa'i sems can gyi rgyud la so so'i skye bo zhes bya'o/ /'phags pa'i chos skyes pa la ni 'phags pa zhes bya'o/ /'jug pa gang zhe na/ rgyu dang 'bras bu rgyun mi 'chad pa la 'jug pa zhes bya ste/ skad cig gcig la'am/ rgyun chad pa la ni 'jug pa gdags pa ma yin no/ /so sor nges pa gang zhe na/ rgyu dang 'bras bu tha dad pa nyid la so sor nges pa rnam par gzhag ste/ rgyu dang 'bras bu tha dad pa yang 'dod pa'i yul gyi ni legs par spyad pa'o/ /mi 'dod pa ni nyes par spyad pa'o zhes bya ba la sogs pa'i ni 'bras bu so so ba rnams kyi rgyu tha dad pa'o/ /'byor ba gang zhe na/ rgyu dang 'bras bu 'tsham pa la 'byor pa gdags te/ dper na sbyin pa ni longs spyod phun sum tshogs pa dang 'tsham par rigs par sbyin pa'i 'bras bu ni longs spyod phun sum tshogs pa lta bu'o/ /mgyogs pa gang zhe na/ rgyu dang 'bras bu myur du 'byung ba la mgyogs pa zhes gdags so/ /go rims gang zhe na/ rgyu dang 'bras bu re re nas 'byung ba la go rims zhes gdags te/ re re nas 'byung gi cig car du 'byung ba ni ma yin no/ /dus gang zhe na/ rgyu dang 'bras bu rgyun du 'byung ba la dus zhes gdags te/ rgyu dang 'bras bu 'byung ba la de las rgyu dang 'bras bu byung nas 'gags pa gang yin pa de 'das pa'i dus zhes gdags so/ /gang ma byung ba de ma 'ongs pa'i dus so/ /gang byung ba ma 'gags pa de da ltar byung ba'i dus so/ /yul gang zhe na/ shar dang / lho dang / nub dang / byang dang / 'og dang / steng dang phyogs bcu thams cad la rgyu dang 'bras bu yod pa nyid la yul zhes gdags te/ rgyu dang 'bras bus phyogs khyab pa la yul zhes gdags so/ /gzugs su bsdus pa ni rgyu dang 'bras bur rig par bya ste/ gzugs med pa rnams ni phyogs la khyab par byed par mi nus pa'i phyir ro/ /grangs gang zhe na/ 'du byed rnams kyi so so tha dad pa la grangs zhes gdags te/ tha dad pa zhes bya ba ni tha dad pa ma yin zhing gcig pa'i bdag nyid la gnyis zhes bya ba grangs mi 'thad pa'i phyir ro/ /tshogs pa gang zhe na/ rgyu dang rkyen 'dus pa la tshogs pa zhes gdags so/ /de ltar na sems dang ldan pa ma yin pa'i 'du byed 'di dag ni chos rnams kyi gnas skabs kyi khyad par la gdags pas rtags yod par rig par bya'o/ /'du byed kyi phung po bshad zin to/ /'du byed kyi phung po'i 'og tu rnam par shes pa'i phung po bshad par bya ste/ de'i phyir rnam par shes pa gang zhe na/ dmigs pa rnam par rig pa'o zhes bya ba smras so/ /dmigs pa ni sems dang sems las byung ba'i yul te/ de yang gzugs nas chos kyi bar du rnam pa drug go/ /de yang rnam par rig pa ni 'dzin pa dang / rtog pa dang khong du chud pa zhes bya ba'i tha tshig go/ /de ni 'jug pa'i rnam par shes pa drug ste mig gi rnam par shes pa nas yid kyi rnam par shes pa'i bar du'o/ /de la mig gi rnam par shes pa ni mig gi dbang po la brten nas yul so sor rnam par rig pa'o/ /de bzhin du yid kyi rnam par shes pa'i bar du yang yid kyi dbang po la brten nas chos thams cad so sor rnam par rig pa'o/ /rnam par shes pa'i rang gi ngo bo bshad nas/ de'i rnam grangs bstan pa'i phyir/ sems dang yid kyang de yin te/ /zhes bya ba smos te/ rnam par shes pa de ni sems zhes kyang bya/ yid ces kyang bya'o/ /rnam grangs kyi don bstan pa'i phyir/ sna tshogs pa dang yid rten byed pa'i phyir zhes bya ba smos te/ sna tshogs pa'i phyir sems zhes bya'o/ /de ma thag pa'i sems kyi rten byed pas yid ces bya'o/ /de la 'jug pa'i rnam par shes pa ni dmigs pa so sor rig pa'i rang bzhin yin pa dang / dmigs pa so sor rnam par rig pa yang rnam pa du ma yin pa'i phyir/ mig la sogs pa'i rnam par shes pa ni sna tshogs zhes bya'o/ /de'i phyir de'i dbang po la brten nas 'byung ba na yul rnam par shes pa zhes bya'i/ dbang po rnams ni ma yin no/ /'di ltar mig gi rnam par shes pa la sogs pa drug po gang dang gang 'gags pa de dang de ni de ma thag pa'i rnam par shes pa 'byung ba'i rten gyi dngos por gnas te/ de'i phyir de ma thag pa'i sems kyi rten byed pas yid ces bya'o/ /sna tshogs pa'i phyir sems zhes bya'o zhes gang bshad pa de ni rigs kyi dbang du byas pa yin gyi skad cig la ni ma yin no/ /skad cig ni dmigs pa so sor nges pa'i rnam pa yin pas sna tshogs zhes mi bya ste/ de ni dngos su sems ma yin no/ /dngos su na sems ni kun gzhi rnam par shes pa ste/ 'dir rgyu bstan pa'i phyir/ 'di ltar de'i 'du byed thams cad kyi sa bon bsags pa'o zhes bya ba smos so/ /skad cig re re la 'du byed thams cad kyi sa bon bsags pas sems zhes bya ste/ dngos su na de nyid sems so/ /bsags pa ni yang dang yang sa bon yongs su gsos pa'am/ 'du byed kyi sa bon rjes su 'brel ba'o/ /'du byed rnams ni 'dir zag pa dang bcas pa'i chos rnams su 'dod de/ de dag kyang rkyen bzhi las 'byung ngo / /de la rgyu'i rkyen ni kun gzhi rnam par shes pa la gnas pa'i bag chags te/ yang dang yang 'du byed rnams kun du 'byung bas sa bon brtas pa la bag chags zhes bya'o/ /bdag po'i rkyen ni mig la sogs pa'i dbang po rnams so/ /de ma thag pa'i rkyen ni rnam par shes pa 'gags ma thag pa'o/ /dmigs pa'i rkyen ni gzugs la sogs pa'o/ /'di ltar mdo las kyang mig nyams par ma gyur la gzugs rnams kyang snang bar gyur pa dang / de skyed pa yid la byed pa yang nye bar gnas par gyur na de las byung ba'i mig gi rnam par shes pa 'byung bar 'gyur ro zhes gsungs so/ /de bzhin du rna ba la sogs pa'i rnam par shes pa la yang ji ltar mthun mthun du brjod par bya'o/ /rgyu'i rkyen rtag tu gnas pa dang / shes par dka' ba'i phyir ma smos so/ /de'i 'og tu kun du tshol ba'i yid kyi rnam par shes pa'o/ /kun du tshol ba'i 'og tu rnam par 'jog pa'o/ /rnam par 'jog pa'i 'og tu rnam par rtog pa'i yid kyi rnam par shes pa 'byung ste/ de'i tshe yul las kun nas nyon mongs pa dang / rnam par byang bar 'gyur ro/ /de'i tshe bsod nams dang bsod nams ma yin pa dang / mi g.yo ba'i 'du byed sems pa'i bdag nyid can rnams mngon par 'du byed do/ /mngon par 'du byas pa de dag 'gag pa na kun gzhi rnam par shes pa la rnam par smin pa'i bag chags so/ /rgyu mthun pa'i bag chags gso bar byed do/ /de la rgyu mthun pa'i bag chags la brten nas kun gzhi rnam par shes pa las bsod nams dang bsod nams ma yin pa dang / mi g.yo ba'i 'du byed rnams 'byung ngo / /rnam par smin pa'i bag chags la brten nas kun gzhi rnam par shes pa las ris mthun pa gzhan dag tu kun gzhi rnam par shes pa nyid rnam par smin pa'i bdag nyid du 'grub bo/ /de la mi dge ba dang dge ba zag pa dang bcas pa'i chos gzhan gang yin pa de dag la yang tshul 'di nyid do/ /lung du ma bstan pa ni rgyu mthun pa'i bag chags nyid gso bar byed kyi/ rnam par smin pa'i bag chags ni ma yin te/ de dag la rnam par smin pa med pa'i phyir ro/ /de ltar na kun gzhi rnam par shes pa de rnam pa gnyis te/ rgyu mthun pa'i bag chags la brten nas rgyu dang 'bras bu ste/ 'di ltar 'du byed thams cad rang gi sa bon bskyed pa ni kun gzhi rnam par shes pa rang bzhin bye brag tu 'gyur ba'i rgyu'i dngos por gnas pas de ni 'du byed rnams kyi 'bras bu'o/ /'du byed thams cad de dag gi sa bon nye bar len pa'i kun gzhi rnam par shes pa las 'byung ba'i phyir kun gzhi rnam par shes pa ni 'du byed thams cad kyi rgyu yin no/ /rnam par smin pa'i bag chags kyi dbang du byas te/ dge ba dang mi dge ba'i 'du byed rnams kyi 'bras bu yin gyi rgyu ni ma yin no/ /rgyu ni rnam par smin pa'i bag chags la brten nas ris mthun pa gzhan dag tu rnam par smin pa'i rnam par shes pa'i rgyu'o/ /'jug pa'i rnam par shes pa ni gzugs dang sgra la sogs pa la dmigs pa dang / rang dang spyi'i mtshan nyid kyi rnam pa yin pa'i phyir dmigs pa yongs su chad pa dang / rnam shes yongs su chad pa'o/ /kun gzhi rnam par shes pa ni dmigs pa dang / rnam pa yongs su ma chad pa ste/ 'di'i dmigs pa dang rnam pa yongs su gcad par mi nus so/ /ci'i phyir zhe na/ 'di ltar kun gzhi rnam par shes pa ni dmigs pa gnyis la 'jug pa ste/ nang gi nye bar len pa'i rnam par rig pa dang / phyi rol gyi snod la rnam par rig pa rnam pa yongs su ma chad pa'o/ /de la nang gi nye bar len pa ni kun brtags pa'i ngo bo nyid la mngon par zhen pa'i bag chags dang / gnas dang bcas pa'i dbang po'i gzugs so/ /dmigs pa 'di gnyis ni phra ba'i phyir 'jig rten gyi mkhas pa rnams kyis kyang rtogs par dka' bas de'i phyir dmigs pa dang rnam pa yongs su ma chad pa zhes bya'i/ dmigs pa med pa nyid ni ma yin no/ /'jug pa'i rnam par shes pa ni dge ba dang / nyon mongs pa can dang / lung du ma bstan pa'i rang bzhin no/ /kun gzhi rnam par shes pa ni rigs gcig pa yin no/ /de la dge ba dang mi dge ba'i rang bzhin ni ma yin te/ de dge ba dang mi dge ba rnams dang mtshungs par ldan pa ma yin pa'i phyir ro/ /de ni sems las byung ba kun du 'gro ba yid la byed pa dang / reg pa dang / tshor ba dang / 'du shes dang / sems pa lnga po kho na dang / mtshungs par ldan no/ /kun gzhi rnam par shes pa ni mtshungs par ldan pa dang bcas par sngon gyi las kyi 'du byed kyi rgyu las byung bas gcig tu rnam par smin pa nyid yin pa'i phyir lung du ma bstan pa'i rigs so/ /rgyun chags par 'jug pa'o/ /de la kun gzhi rnam par shes pa ni ris mthun pa gzhan dag tu nying mtshams sbyor ba nas bzung ste/ ji tsam na 'chi 'pho ba de'i bar du skad cig rgyun mi 'chad par 'jug gi /'jug pa'i rnam par shes pa bzhin du bar skabs bar skabs su chad pa ni ma yin te/ 'di ltar mig gi rnam par shes pa'i 'og tu rna ba la sogs pa'i rnam par shes pa rnams 'byung ba dang / rna ba'i rnam par shes pa'i 'og tu mig la sogs pa'i rnam par shes pa rnams 'byung ba dang / de bzhin du sna la sogs pa'i rnam par shes pa'i 'og tu zhes bya ba rgya cher brjod par bya'o/ /de bzhin du dge ba'i 'og tu mi dge ba 'byung ba dang / mi dge ba'i 'og tu dge ba dang / de gnyis ka'i 'og tu lung du mi ston pa dang / khams dman pa'i 'og tu khams bar ma dang / khams bar ma'i 'og tu khams gya nom pa dang / khams gya nom pa'i 'og tu gya nom pa ma yin pa dang / khams gya nom pa ma yin pa'i 'og tu khams bar ma zhes bya ba rgya cher brjod par bya ste/ shi ba la thug gi bar du rdzas gcig tu 'jug pa ni ma yin no/ /'jug pa'i rnam par shes pa drug po ma gtogs par gzhan kun gzhi rnam par shes pa yod par ci mngon zhe na/ lung dang rigs pas mngon no/ /de la ni 'di ni lung yin te/ bcom ldan 'das kyis chos mngon pa'i mdo las/ thog ma med pa'i dus kyi dbyings/ /chos rnams kun gyi gnas yin te/ /de yod pas na 'gro kun dang / / mya ngan 'das pa'ang thob par 'gyur/ /zhes gsungs so/ /yang dgongs ba nges par 'grel ba'i mdo las kyang / len pa'i rnam par shes pa zab cing phra/ /sa bon thams cad chu bo'i rgyun bzhin 'bab/ /bdag tu rtog par gyur na mi rung zhes/ /'di ni byis pa rnams la ngas ma bstan/ /zhes gsungs so/ /rigs pa'i dbang du byas te/ 'di ltar 'gog pa'i snyoms par 'jug pa dang / 'du shes med pa'i snyoms par 'jug pa dang / 'du shes med pa po rnams las langs nas yang yul rnam par rig pa zhes bya ba 'jug pa'i rnam par shes pa 'byung / zhes bya ba smos te/ kun gzhi rnam par shes pa ni 'jug pa'i rnam par shes pa rnams las don gzhan du gyur pa'o zhes bya ba tshig gi lhag ma'o/ /'gog pa dang / 'du shes med pa'i snyoms par 'jug pa la snyoms par 'jug pa dang / 'du shes med pa par gyur pa na 'jug pa'i rnam par shes pa rnams ma lus par 'gag pa las yang ldang ba'i tshe kun gzhi rnam par shes pa med na 'jug pa'i rnam par shes pa 'byung du mi rung ngo / /snyoms par 'jug pa'i sems las de 'byung du mi rung ste/ de 'gags nas ring du lon pa dang / 'gags pa de med pa'i phyir ro/ / med pa ni rgyur yang mi rung 'bras bur yang mi rung ste/ gtso bo dang bdag la sogs pa bzhin no/ /gang yang 'di snyam du dngos po'i rang gi ngo bo la skye ba dang / 'jig par 'gyur ba'i dngos po med kyi ma 'ongs pa dang / da ltar dang / 'das pa ni dngos po rnams kyi byed pa'i sgo nas yin te/ 'di ltar bya ba mi byed pa ni ma 'ongs pa'o/ /bya ba byed pa ni da ltar ro/ /byed ba rgyun chad pa ni 'das pa'o zhes bya'o snyam du sems pa de lta bu yin na ni byed pa las dngos po gzhan yin par khas blang bar bya ste/ 'das pa dang ma 'ongs pa gnyis kyi dus na byed pa med kyang dngos po khas len pa'i phyir ro/ /de ltar na med pa las byung ba dang / byung nas kyang med par 'gyur ba'i phyir 'byung ba dang 'jig pa ni byed pa yin gyi/ dngos po rnams kyis ni ma yin no/ /gzugs dang / tshor ba dang / 'du shes dang / 'du byed dang / rnam par shes pa rnams kyis ma yin pa nyid de/ rtag tu rang gi ngo bo dang ldan pa dang / de yang 'byung ba dang / 'jig pa med pa'i phyir te/ gzugs la sogs pa'i phung po rnams ni 'gog pa bzhin du mi rtag pa ma yin par 'gyur ro/ /de'i phyir sdug bsngal bar yang mi 'gyur te/ mdo las ni mi rtag pa gang yin pa de sdug bsngal ba'o zhes gsungs so/ /de lta na ni phung po rnams la ni mi rtag pa nyid dang sdug bsngal ba nyid du sems pa phyin ci log nyid du 'gyur ro/ /phyin ci log gis ni nyon mongs pa spang bar mi rigs te/ mi rtag pa dang / sdug bsngal ba la rtag pa dang bde bar phyin ci log pa bzhin no/ /byed pa la ni 'byung ba dang 'jig pa yod pas 'dus byas nyid yin te/ gzugs la sogs pa'i phung po rnams su ni ma 'dus pas phung po drug par khas blang bar bya'o/ /yang nye bar len pa'i phung po rnams kyis zag pa dang bcas pa'i chos thams cad dang / phung po rnams kyis 'dus byas thams cad bsdus so zhes ma zer cig /yang gzhan na re byed pa zhes bya ba ni 'bras bu yongs su 'dzin pa'o/ /chos gang zhig chos gang gi rgyu dngos por gnas pa ste/ chos dang chos de 'bras bur 'dzin pa de'i phyir rgyu'i dngos por gnas pa ni dngos po rnams kyi 'bras bu yongs su 'dzin te/ chos de nyid rgyu'i dngos por gnas pas na chos rnams las byed pa gzhan ma yin no/ /de bas na gong du smos pa'i skyon du mi 'gyur ro zhes zer ro/ /gzhan ma yin zhes bya ba ni de nyid de/ de ni 'di skad du chos las byed pa gzhan ma yin te/ chos nyid byed pa'o/ /de bzhin du byed pa las kyang chos gzhan ma yin te/ byed pa nyid chos yin no zhes bstan par 'gyur ro/ /de lta na ni 'das pa dang / ma 'ongs pa gnyis kyis chos rnams byed pa bzhin du med par 'gyur te/ de'i phyir 'das pa dang / ma 'ongs pa yod do zhes smras pa btang ba yin no/ /yang na byed pa yang chos kyi rang gi ngo bo bzhin du chos las gzhan ma yin pa'i phyir dus gsum par khas blang dgos te/ de lta na yang byed pa las dus rnams rnam par gzhag par smra ba nyams par 'gyur ro/ / bya ba byed pa ni da ltar du 'dod de/ gzhan ni gzhan gyis byed pa la/ de byas zin pa'i phyir bdag nyid kyis ni ma yin no/ /ma byas pa ni byed dgos kyi byas zin pa la ni ma yin no/ /de'i phyir byed pa dang chos gnyis ni byas pa dang / ma byas pa ma yin pas tha dad par mngon no/ /de lta bas na gong du smos pa'i skyon de yod do/ /chos dang byed pa gnyis kyang tha dad pa ma yin na ni rgyu dang 'bras bu med par 'gyur te/ 'di ltar 'bras bu yang rgyu bzhin du thog ma nyid nas yongs su grub pa'i phyir 'bras bu la ji zhig byed na rgyur 'gyur/ mi byed na yang rgyu zhes ji skad du bya 'bras bu yang des ma byas na de'i 'bras bur ji ltar 'gyur/ byed pa rnams nyid phan tshun rgyu dang 'bras bu'i dngos por 'gyur gyi/ chos rnams kyi ni ma yin te/ 'di ltar byed pa yod na byed pa gzhan 'byung gi med na ni ma yin te/ chos kyi rang bzhin la ni ma yin no/ /chos kyi rang bzhin las kyang chos kyi rang bzhin ma yin te/ rtag tu yod pa'i phyir ro/ /de ltar na gang yod na gang 'byung gi med na ni mi 'byung ba de ni de'i rgyu yin no/ /cig shos ni 'bras bu yin no zhes bya ba 'di ni 'jig rten gyi grags pa'o/ /de ltar na chos kyi rang bzhin ni rgyu yang ma yin 'bras bu yang ma yin pa ni 'jig rten pa dang bstan bcos dang 'gal lo/ /gzhan dag na re chos rnams las byed pa de nyid dang gzhan du brjod par bya ba ma yin no zhes zer te/ ci'i phyir de nyid ces mi brjod ce na/ chos kyi rang bzhin ma yin pa'i phyir ro/ /ci'i phyir gzhan zhes mi brjod ce na/ chos kyi rang bzhin de'i ngo bo nyid yang ma yin pas gzhan zhes mi bya'o/ /de lta na ni gang de'i ngo bo nyid kyang ma yin la gzhan gyi ngo bo nyid kyang ma yin pa de ni ri bong gi rwa bzhin du ngo bo nyid med pa'i phyir med pa nyid yin te/ med pa ni dus rnam par gzhag pa'i rgyur ji ltar 'gyur/ de ltar na byed pa las dus rnam par gzhag pa ni rnam pa thams cad du mi 'grub bo/ /de lta bas na dngos po ma byung ba ni ma 'ongs pa yin/ 'gags pa ni 'das pa yin/ byung lam 'gags pa ni de ltar yin par khas blang bar bya'o/ /bya ba mi byed pa ni ma 'ongs pa/ bya ba byed pa ni da ltar/ byed pa rgyun chad pa ni 'das pa'o zhes khas blang bar mi bya'o/ /yang gzhan dag na re dbang po dang bcas pa'i gzugs dang sems ni gcig gi sa bon gcig yin te/ de'i phyir 'gog pa dang / 'du shes med pa'i snyoms par 'jug pa dang / 'du shes med pa las ldang ba na dbang po dang bcas pa'i gzugs las sems 'byung ste/ dper na gzugs med pa'i khams nas 'chi 'pho ba'i sems las kyang 'gags nas ring du lon pa dbang po dang bcas pa'i gzugs 'byung ba lta bu'o/ /de lta bas na 'di la kun gzhi rnam par shes pa ca dgos zhes zer te/ de ltar na sems can re re'i sems kyi rgyud kyang gnyis gnyis su 'gyur te/ gcig ni dbang po dang bcas pa'i gzugs las byung / cig shos ni sems las 'byung bar 'gyur ro/ /gzugs med pa'i sems su 'gog pa la snyoms par zhugs pa ni gzugs med pas ldang ba yang med do/ /de'i phyir 'di ni yongs su mya ngan las 'das pa nyid du 'gyur bas rtog pa 'di ni mi rung ngo / /rgyu ni bdag yod pa dang ldan zhing g.yo ba med la mi rtag cing nus pa yod pa gcig pur 'dod kyi/ bzlog pa ni ma yin no/ /de skad du bcom ldan 'das kyis kyang 'di yod pa'i phyir 'di 'byung / 'di skye ba'i phyir 'di skye ste/ 'di ltar ma rig pa'i rkyen gyis 'du byed rnams zhes gsungs te/ de lta bas na rgyu rtag pa ma yin zhing med pa yang ma yin la/ byed pa yod pa yang ma yin zhing nus pa med pa yang ma yin no/ /kun gzhi rnam par shes pa ni 'dus byas kyi chos thams cad kyi sa bon dang ldan pa ste/ shi ba la thug gi bar du rgyun chags par 'byung ba'o/ /sems med pa'i gnas las ldang ba na kun gzhi rnam par shes pa nyid las 'jug pa'i rnam par shes pa 'byung ste/ mdo las kyang 'gog pa'i snyoms par 'jug pa'i rnam par shes pa lus las mi 'da'o zhes gsungs so/ /snyoms par zhugs pa'i dus na rnam par shes pa lus las mi 'da' ba ni kun gzhi rnam par shes pa las gzhan mi rung ngo / /ci'i phyir zhe na/ gal te 'gog pa la snyoms par zhugs pa'i rnam par shes pa'i kun gzhi rnam par shes pa las gzhan zhig kun du 'byung bar 'dod na/ de lta na ni gsum 'dus pa'i rig pa dang / reg pa dang lhan cig skyes pa'i tshor ba dang / 'du shes dang / sems pa zhes mdo las gsungs pa'i phyir 'du shes dang tshor ba gnyis kyang kun du 'byung bar khas blang dgos so/ /de'i phyir 'du shes dang tshor ba yod pas 'du shes dang / tshor ba 'gog pa nyid du mi 'gyur ro/ /gang yang mdo las tshor ba'i rkyen gyis sred pa zhes gsungs pa yang tshor ba thams cad sred pa'i rkyen ma yin te/ de bzhin du reg pa thams cad kyang 'du shes dang tshor ba'i rkyen ma yin pas nyes pa med do snyam du sems pa de yang de lta ma yin te/ mdo gzhan las ma rig pa dang ldan pa'i reg pa las byung ba'i tshor ba la brten nas sred pa 'byung zhes bye brag tu mdzad kyi reg pa ni gang du yang de ltar bye brag mi mdzad pa 'di mtshungs pa ma yin no/ /de lta bas na 'gog pa dang 'du shes med pa'i snyoms par 'jug pa dang / 'du shes med pa pa rnams las ldang ba na gdon mi za bar kun gzhi rnam par shes pas sa bon thams cad gnas skabs kun du 'byung ba las skye bar khas blang bar bya'o/ /dmigs pa'i rkyen la ltos nas rnam pa gzhan du 'jug pa nyid kyi phyir 'jug pa'i rnam par shes pa las kun gzhi rnam par shes pa gzhan yod par khong du chud par bya'o/ /phyir ro zhes tha mar bstan pa ni 'dir yang sbyar ro/ /dmigs pa'i rkyen ni mig la sogs pa'i rnam par shes pa lnga dang yul gzugs la sogs pa lnga'i yid kyi rnam par shes pa'i chos thams cad do/ /gzugs la sogs pa'i rnam pa las sgra la sogs pa'i rnam pa ni rnam pa gzhan no/ /de bzhin du sgra la sogs pa'i rnam pa las gzugs la sogs pa'i rnam pa dang / ser po la sogs pa'i rnam pa las sngon po la sogs pa'i rnam pa ni rnam pa gzhan no/ /de ltar kun du yang rgya cher brjod par bya'o/ /rnam pa gzhan du 'jug pa bdag thob pa ni rnam par shes pa 'di'i yin pas rnam par shes pa de ni rnam pa gzhan du 'jug pa ste de yod pas rnam pa gzhan du 'jug pa nyid do/ /de dmigs pa'i rkyen la ltos pa'i rgyus rnam pa gzhan du 'jug pa gang gi yin pa de dmigs pa'i rkyen la ltos nas rnam pa gzhan du 'jug pa nyid do/ /nyid kyi phyir ro zhes bya ba ni bzung nas 'jug pa'i rnam par shes pa las kun gzhi rnam par shes pa gzhan yod par shes so/ /'dir ni rnam par shes pa rnams dmigs pa so sor snang ba tha dad pas phan tshun tha dad kyi de ma thag pa dang / bdag po'i rkyen tha dad pas ni ma yin no/ /de'i phyir 'di skad du dmigs pa'i rkyen la ltas nas rnam pa gzhan du 'jug pa nyid kyi phyir ro zhes bshad do/ /rnam pa gzhan du 'jug pa nyid de yang ji ltar dmigs pa la mi ltos par mi rung ba de bzhin du rgyu'i rkyen la mi ltos par mi rung ba nyid do/ /gang dag gi sa bon rnams dang ldan pa gang yin pa de ni de dag gi spyi'i rkyen te/ 'jug pa'i rnam par shes pa rnams ni gcig gi sa bon du gcig mi rung ngo / /dge ba dang mi dge ba dang / lung du ma bstan pa rnams dang / dman pa dang / 'bring dang / gya nom pa'i khams pa rnams dang / 'jig rten pa rnams dang / 'jig rten las 'das pa rnams dang / zag pa dang bcas pa dang / zag pa med pa'i rnam par shes pa rnams la rim pa yod pa'i phyir ro/ /de nyid kyi bag chags bsgo ba yang ma mthong la/ / gzhan gyi dus gzhan na yang ma yin zhing 'brel pa med par yang ma yin no/ /'on kyang lhan cig 'byung ba dang / 'jig pa nyid kyi me tog la sogs pas 'bru mar rnams la bsgo bar mthong ste/ de'i phyir rnam par smin pa'i bag chags kyi rnam par shes pa dang / dus mtshungs pa de nyid las 'byung ba dang / 'gag pa ni 'jug pa'i rnam par shes pa rnams rang dang mthun pa'i 'bras bu skyed nus pa rnam par smin pa'i rnam par shes pa la byed do/ /de'i nus pa ni bag chags zhes bya'o/ /'jug pa'i rnam par shes pa dang / dus rnam pa gzhan du 'jug pa de dag gis bsgos pa rnam par smin pa'i rnam par shes pa las yang dmigs pa la ltos pa dge ba dang mi dge ba la sogs pa'i rnam pa gzhan du 'jug pa 'jug pa'i rnam par shes pa rnams 'byung bar gdon mi za bar khas blang bar bya'o/ /de'i phyir 'jug pa'i rnam par shes pa rnams las rnam par smin pa'i rnam par shes pa 'dus byas kyi chos thams cad kyi sa bon dang ldan pa gzhan yin par grub pa'o/ /chad nas 'byung ba'i phyir 'jug pa'i rnam par shes pa rnams las kun gzhi rnam par shes pa gzhan yin par khong du chud par bya'o/ /sems med pa'i gnyid kyis log pa dang / brgyal ba la sogs pa 'jug pa'i rnam par shes pa rgyun chad pa las yang sems med pa'i gnyid kyis log pa dang / brgyal ba las sangs pa na kun gzhi rnam par shes pa med pa'i 'jug pa'i rnam par shes pa 'byung bar mi rung ngo / / 'gog pa'i snyoms par 'jug pa las ldang ba'i sems dang 'dra bar 'dir yang dpyad par bya'o/ /'khor bar 'jug pa dang ldog pa'i phyir ro zhes bya ba ni gang gi rgyu las byung ba'i 'khor bar 'jug pa dang / ldog pa yod pas 'jug pa'i rnam par shes pa las kun gzhi rnam par shes pa gzhan yin par shes so/ /skad cig kyang mi gnas par ris mthun pa rgyun mi 'chad pa'i rgyun gyi nye bar len pa'i phung po 'byung ba ni 'khor ba zhes bya'o/ /de'i 'jug pa ni ris mthun pa gzhan dag tu nying mtshams sbyor ba'o/ /ldog pa ni phung po'i lhag ma dang bcas pa dang / phung po'i lhag ma med pa'i mya ngan las 'das pa'i dbyings so/ /de la kun gzhi rnam par shes pa khas mi len na 'du byed kyi rgyu rkyen gyis rnam par shes pa zhes bya ba med pa'i phyir 'khor bar 'jug par mi rung ngo / /kun gzhi rnam par shes pa khas mi len na/ 'du byed kyi rkyen gyis rnam par shes pa zhes 'byung ba nying mtshams sbyor ba'i rnam par shes pa'am/ 'du byed kyis yongs su bsgos pa'i rnam par shes pa'i tshogs drug 'du byed kyi rkyen las byung bar brtag grang na/ de'i tshe nying mtshams sbyor ba'i rnam par shes pa ni tshe snga ma la bsags pa'i 'du byed kyi rkyen las byung ba ma yin te/ tshe snga ma la bsags pa'i 'du byed ni 'gags nas ring du lon pa'i phyir ro/ /'gags pa ni med pa'i phyir ro/ /med pa ni rkyen du mi 'gyur ba'i phyir ro/ /gal te 'gags pa rkyen du mi 'dod na de ltar na/ da ltar gyi las las ni rnam par smin pa mngon par mi 'grub pa las kyi 'bras bu med pa nyid du 'gyur ro/ /de ni de lta ma yin te/ de las byung ba'i bsgos pa gnas pa'i phyir ro/ /gang las 'gyur ba bye brag tu gyur nas rnam par smin pa 'grub pa'i bag chags las kyis bskyed pa sems kyi rgyud la yod do/ /de lta bas na las kyi 'bras bu med pa ma yin la/ las 'gags pa las rnam par smin pa 'byung ba yang ma yin no/ /nying mtshams sbyor ba'i tshe ni ming dang gzugs kyi yin te/ rnam par shes pa 'ba' zhig ni ma yin na/ de la rnam par shes pa nyid 'du byed kyi rkyen gyis byung gi / ming dang gzugs ni ma yin no zhes bya ba 'di la rigs pa ci yod/ de lta bas na 'du byed kyi rkyen gyis ming dang gzugs zhes brjod par bya'i/ rnam par shes pa ma yin no zhes brjod pa'o/ /rnam par shes pa'i rkyen gyis ming dang gzugs zhes bya ba gzhan gang zhe na/ nying mtshams sbyor ba'i skad cig las dus phyi ma gang yin pa'o zhe na/ de nying mtshams sbyor ba'i ming dang gzugs las rang bzhin bye brag tu gyur pa ci yod na/ 'di ltar de nyid rnam par shes pa'i rkyen gyis byung ba yin la/ snga ma ni 'du byed kyi rkyen gyis byung ba yin la/ phyi ma ni ma yin te de'i phyir 'du byed kyi rkyen gyis ming dang gzugs nyid du 'gyur gyi/ nying mtshams sbyor ba'i rnam par shes pa'i yan lag gzhan kun du brtags pas ci zhig bya/ de lta bas na nying mtshams sbyor ba'i rnam par shes pa ni 'du byed kyi rkyen gyis byung bar mi rung ngo / /'du byed rnams ni ma rig pa'i rkyen gyis byung ba yin la des bsgos pa'i rnam par shes pa ni 'du byed kyi rkyen gyis byung ba dang / de'i rkyen gyis byung ba nying mtshams sbyor ba ni ming dang gzugs nyid do zhes bya ba'i tshul 'di la ni nyes pa med do/ /rnam par shes pa'i tshogs drug po 'du byed kyis yongs su bsgos pa dag 'du byed kyi rkyen gyis rnam par shes pa zhes bya ba'i phyogs 'di yang sbyar ma legs pa nyid de/ ci'i phyir zhe na/ rnam par shes pa ni rnam par smin pa'i bag chags dang / rgyu mthun pa'i bag chags bdag la skyed par mi nus te/ bdag la byed pa 'gal ba'i phyir ro/ /de ma theg pa la yang ma yin te/ de ni de'i tshe ma byung ba'i phyir ro/ /ma byung ba ni med pa'i phyir ro/ /byung ba la yang ma yin te/ de ni de'i tshe sngar 'gags pa'i phyir ro/ /sems med pa'i gnyid kyis log pa la sogs pa'i dus na ni 'du byed kyis yongs su bsgos pa'i sems 'byung mi srid pa'i phyir rnam par shes pa'i rkyen gyis ming dang gzugs med par 'gyur ro/ /de med par skye mched drug kyang med par 'gyur ro/ /de bzhin du rga shi'i bar du yang med par 'gyur ro/ /de'i phyir 'khor bar 'jug pa nyid dang 'gal lo/ /'khor ba las ldog pa yang kun gzhi rnam par shes pa med na mi 'thad de/ 'khor ba'i rgyu ni las dang nyon mongs pa rnams so/ /de gnyis las kyang nyon mongs pa ni gtso bo ste/ 'di ltar nyon mongs pa'i dbang gis na las kyis yang srid pa 'phen nus par 'gyur gyi gzhan du ni ma yin no/ /de'i phyir bden pa mthong ba rnams kyi las las yang srid pa mi 'phen te/ mthong bas spang bar bya ba'i nyon mongs pa med pa'i phyir ro/ /de bzhin du yang srid pa 'phangs pa'i las kyang nyon mongs pa med na yang srid pa 'byung bar mi 'gyur te/ 'di ltar khams gsum gyi 'dod chags dang bral ba rnams kyi yang srid pa 'phangs pa'i las kyang nyon mongs pa med pa'i phyir yang srid pa 'byung bar byed mi nus so/ /de'i phyir de dag gi yang srid pa mngon par mi 'grub bo/ /de ltar na gtso bo yin pa'i phyir nyon mongs pa nyid 'khor bar 'jug pa'i rtsa ba ste/ de'i phyir de dag spangs na 'khor ba las ldog par 'gyur gyi gzhan du ni ma yin no/ /kun gzhi rnam par shes pa med par de dag spang du mi rung ste/ nyon mongs pa mngon du gyur pa'am/ sa bon gyi tshe spang grang na/ de la mngon du gyur pa spang ngo zhe na ni/ de mi 'dod pa nyid de/ de'i tshe de dag spong ba'i lam med pa'i phyir ro/ /sa bon gyi tshe yang spang du mi rung ste/ gang la nyon mongs pa'i sa bon gnas pa de gnyen pos spong na/ de'i tshe ni gnyen po las ci yang khas ma blangs pa'i phyir ro/ /ji ste gnyen po'i sems nyid nyon mongs pa'i sa bon dang 'dres na ni nyon mongs pa'i sa bon dang 'dres pa nyid pas gnyen por mi rung ste/ nyon mongs pa'i sa bon ma spangs pa rnams ni 'khor ba las ldog mi srid do/ /de lta bas na gdon mi za bar kun gzhi rnam par shes pa la de las gzhan pa'i rnam par shes pa dang / lhan cig 'byung ba'i nyon mongs pa dang nye ba'i nyon mongs pa rnams kyis rang gi sa bon gso bar bya ba'i phyir bag chags bsgo bar khas blangs so/ /rgyun 'gyur ba'i bye brag gi stobs ji lta ba bzhin du bsgos pa 'jug pa rnyed nas/ yang de nyid las nyon mongs pa dang nye ba'i nyon mongs pa rnams 'byung ste/ de dag gi sa bon kun gzhi rnam par shes pa la gnas pa ni de dang lhan cig 'byung ba nyon mongs pa'i gnyen po lam gyis sel to/ /de bsal nas gnas de nas nyon mongs pa rnams mi 'byung bas phung po lhag ma dang bcas pa'i mya ngan las 'das pa'i dbyings thob bo/ /sngon gyi las kyis 'phangs pa'i skye ba ni 'gags la/ de las gzhan pa'i skye ba dang nying mtshams mi sbyor ba ni lhag ma med pa'i mya ngan las 'das pa'i dbyings te/ las yod du zin kyang nyon mongs pa rnams spangs na lhan cig byed pa'i rgyu med pa'i phyir/ yang srid pa mngon par 'grub par byed mi nus so/ /de ltar na kun gzhi rnam par shes pa yod na 'khor bar 'jug pa dang ldog par rung gi gzhan du ni ma yin te/ gdon mi za bar kun gzhi rnam par shes pa khas blang bar bya'o/ /ci'i phyir kun gzhi rnam par shes pa zhes bya zhe na/ kun gzhi rnam par shes pa 'di ni sa bon thams cad kyi gzhi nyid do/ /phyir ro zhes bya ba tha mar gang bstan pa de ni thams cad du sbyar bar bya'o/ /kun gzhi rnam par shes pa'i dngos po ni kun gzhi rnam par shes pa nyid do/ /de ni kun gzhi rnam par shes pa zhes bya ba 'jug pa'i rgyu'o/ /de la rnam par shes par byed pas rnam par shes pa ste/ de las ma gtogs par shes par byed pa po med par bstan pa'i phyir dngos po tsam la byed par bstan to/ /sa bon thams cad kyi gzhi nyid ni kun nas nyon mongs pa'i chos kyi sa bon thams cad kyi gnas nyid do/ /gzhi ni gnas kyi rnam grangs su gtogs pa'o/ /yang na 'dir chos thams cad 'bras bu'i dngos por sbyor zhing nye bar 'brel ba'am/ de chos thams cad la rgyu'i dngos por sbyor zhing nye bar 'brel bas kun gzhi'o/ /lus kyi kun gzhi nyid dang rgyu nyid kyi phyir zhes bya ba la lus ni ming dang gzugs so/ /der lus sbyor te/ de'i stobs kyis 'byung bas kun gzhi nyid do/ /de'i dngos po ni kun gzhi nyid do/ /lus kyi rgyu ni de'i sa bon yongs su gsos pas nying mtshams sbyor ba ni lus mngon par 'grub pa'i phyir te/ lus kyi gzhi nyid dang / lus kyi rgyu nyid yin pas kun gzhi rnam par shes pa nyid khas blang bar bya'o gzhan nas de bzhin du 'byung ste/ bdag tu nga rgyal gyi gzhi dang / rgyu nyid kyi phyir ro zhes 'byung ngo / /kun gzhi rnam par shes pa la bdag tu dmigs pa'i nga rgyal gang yin pa de bdag tu nga rgyal lo/ /bdag tu nga rgyal ni 'di la yul can gyi dngos por sbyor bas kun gzhi rnam par shes pa ni bdag tu nga rgyal gyi kun gzhi'o/ /yang na de dag tu nga rgyal la rgyu'i dngos por sbyor bas kun gzhi zhes bya'o/ /lhag ma ni snga ma bzhin no/ /lus la gnas pa nyid kyi yang phyir ro zhes bya ba la yang zhes bya ba ni bsdu ba'i don to/ /lus ni 'dir dbang bo dang bcas pa'i khog pa'o/ /kun gzhi rnam par shes pa ni khog pa thams cad la khyab pa'o/ /de'i phyir lus dang 'brel bar 'jug pas lus la gnas pa'i phyir lus la gnas pa'o/ /de'i dngos po ni lus la gnas pa nyid de/ lus la gnas pa nyid kyi phyir bzung nas 'di kun gzhi rnam par shes pa nyid du khong du chud par bya'o/ /de ni kun gzhi rnam par shes pa zhes bya ba 'ba' zhig tu ma zad kyi/ len pa'i rnam par shes pa yang de yin te/ ci'i phyir de len pa'i rnam par shes pa zhes bya zhe na/ de'i phyir lus len pa'i phyir ro zhes rgyu smos so/ /'dis lus len bas len pa'i rnam par shes pa zhes bya ste/ sems kyis lus len gyi bdag gis ni ma yin no zhes bya bar rab tu grub bo/ /de yang sngon gyi 'du byed kyi rgyu las 'byung ba ste/ khu ba dang khrag gi nang du brgyal ba'i dus na srid pa len te/ de nyid shi ba la thug gi bar lus len par byed par 'dod kyi/ mig la sogs pa'i rnam par shes pa rnams dang / de'i rjes las byung ba yid kyi rnam par shes pas ni ma yin te/ de dag ni de'i 'og tu mig la sogs pa rkyen rgyu yin pa'i phyir ro/ /de la yid kyi rnam par shes pa gzhan 'du byed kyi rgyu las byung ba ni ma yin te/ de dag dge ba dang mi dge ba'i phyir ro/ /'du byed kyi rgyu las byung ba ni rnam par smin pa yin pa'i phyir gcig tu lung ma bstan pa'o/ /rnam par smin pa la yang mig la sogs pa bzhin du rgyun chad nas yang nying mtshams sbyor ba ma yin no/ /gang rnam par smin pa'i rnam par shes pa nyid kun du rtag pa gcig tu lung ma bstan pa'i rang bzhin can ni kun gzhi rnam par shes pa las gzhan ma mthong ngo / /yang rnam par shes pa'i tshogs drug po dag ni gnas so sor nges pa las 'byung ba dang / rgyun chad nas 'byung ba'i phyir gnas thams cad len par mi rung ste/ 'di ltar gnas gang dang gang las rnam par shes pa gang 'byung ba des de nyid zin par 'gyur gyi/ lhag ma ni rnam par shes pa dang bral ba'i phyir zin pa ma yin no/ /de ltar mig la sogs pa'i rnam par shes pa rgyun chad nas yang dang yang 'byung ba'i phyir gnas de yang dang yang nye bar len pa'i skyon du 'gyur ro/ /de lta bas na kun gzhi rnam par shes pa nyid nying mtshams sbyor ba'i dus nas lus bzung nas shi ba la thug gi bar du lus mtha' dag la brten te 'byung bas de nyid nying mtshams sbyor ba nas shi ba la thug gi bar du lus 'dzin pas na len pa'i rnam par shes pa zhes bya'o/ /dngos su na yid kun gzhi rnam par shes pa la dmigs zhes bya ba ni nyon mongs pa can gyi yid kun gzhi rnam par shes pa la rtag par bdag tu dmigs te/ bdag tu rmongs pa dang / lta ba dang / nga rgyal dang / chags par dmigs pa rnams dang mtshungs par ldan pa'i phyir ro/ /de yang rtag par rlom sems pa'i bdag nyid yin pas yod do/ /dngos su na de yid ces bya'o/ /mig la sogs pa'i rnam par shes pa'i tshogs drug po dag 'gags ma thag pa'i rnam par shes pa la yid ces brjod pa gang yin pa de ni drug pa yid kyi rnam par shes pa'i gnas sgrub pa'i phyir yin gyi ngar sems pa'i rna ba'i phyir ni ma yin no/ /de'i phyir dngos su na de ni yid nyid ma yin no/ /de yang bdag tu rmongs pa dang / bdag tu lta ba dang / bdag tu nga rgyal dang / bdag la chags pa ste/ nyon mongs pa bzhi dang / rtag par mtshungs par ldan te/ de la bdag tu rmongs pa ni gti mug tsam dang mtshungs par ldan pa ma yin gyi/ bdag tu rmongs pa gang yin pa'o/ /de bzhin du bdag la chags pa'i bar dag la yang brjod par bya'o/ /sogs pa ni reg pa dang yid la byed pa la sogs pa kun du 'gro ba lnga po dag dang yang rab tu mtshungs par ldan pa'o/ /de yang ma grags pa dang / sems las byung ba rnams dang mtshungs par ldan pas na de'i rang gi ngo bo dmigs kyis dbye ba'i phyir/ rnam par shes pa ste zhes bya ba smos so/ /rigs gcig pa zhes bya ba ni nyon mongs pa can gyi rigs yin gyi/ dge ba'am/ lung du ma bstan pa ni ma yin te/ bdag tu rmongs pa la sogs pa nyon mongs pa bzhi dang / rtag tu mtshungs par ldan pa'i phyir ro/ /rgyun chags par 'jug pa ste zhes bya ba ni rgyun mi 'chad par rjes su 'byung ba zhes bya ba'i tha tshig go/ /spyir btang ba 'di'i dmigs kyis bsal ba rtsom ste/ dgra bcom pa dang / 'phags pa'i lam dang / 'gog pa'i snyoms par 'jug pa'i dus ma gtogs so/ /dgra bcom pa ni khams gsum pa'i nyon mongs pa can gyi chos spangs pa'i phyir dgra bcom pa'i dus ni mi 'byung ngo / /'phags pa'i lam gyi dus na yang mi 'byung ste/ don dam pa shes pa ni bdag tu lta ba kun du 'byung ba dang shin tu mi mthun pa'i phyir ro/ /de'i 'og tu kun gzhi rnam par shes pa las 'byung ste/ slob pa'i dus na ma spangs pa'i phyir ro/ /'gog pa'i snyoms par 'jug pa'i dus na yang mi 'byung ste/ 'du shes med pa'i snyoms par 'jug pa bas 'gog pa'i snyoms par zhugs pa ches zhe ba'i phyir/ de kun du mi 'byung bar rig par bya'o/ /'dir ni nges pa'i tshig dang / dmigs pa dang / mtshungs par ldan pa dang / 'byung ba'i dus kyi yid bstan par rig par bya'o/ /ci'i phyir phung po zhes bya zhe na/ spungs pa'i phyir te zhes bya ba la spungs pa ni phung po zhes bya ba'i grangs su gtogs pa'o/ /de ni 'di skad du gzugs spungs pa ni gzugs kyi phung po ste/ de bzhin du rnam par shes pa'i bar du spungs pa la rnam par shes pa'i phung po zhes bstan par 'gyur ro/ /'di ltar mdo las dus dang / rgyu dang / rnam pa dang / 'gro ba dang / yul tha dad pa'i gzugs la sogs pa mdor bsdus pa'i phyir/ gzugs la sogs pa phung por bstan te/ gzugs gang yin pa ci yang rung 'das pa'am ma 'ongs pa'am da ltar byung pa'am/ nang gi'am phyi'i'am/ rags pa'am/ phra ba'am/ ngan pa'am/ gya nom pa'am/ thag nye ba gang yin pa'am/ rgyang ring ba gang yin pa thams cad gcig tu bsdus nas gzugs kyi phung po zhes bya ba'i grangs su 'gro'o/ /de bzhin du rnam par shes pa'i bar du'o zhes 'byung ste/ 'das pa dang ma 'ongs pa dang / da ltar byung ba zhes bya ba'i bye brag gis dus tha dad pa'o/ /nang ngam phyi zhes bya ba ni rgyu tha dad pas so/ /'di ltar nang gi rnams ni rang gi rgyud du gtogs pa dag go/ /phyi'i rnams ni de las gzhan pa dag go/ /rags pa'am/ phra ba zhes bya ba ni rnam pa'i bye brag gis so/ /de la gzugs kyi rags pa dang / phra ba nyid ni ltos ba can no/ /yang na thogs pa dang bcas pa ni rags pa'o/ /thogs pa med pa ni phra ba'o/ /tshor ba dang / 'du shes dang / 'du byed dang / rnam par shes pa rnams kyang dbang po lnga la brten te/ byung ba dag ni rags pa'o/ /yid la brten te byung ba dag ni phra ba'o/ /ngan pa'am gya nom pa zhes bya ba ni 'gro ba'i bye brag gis tha dad pa rnams te/ 'di ltar 'gro ba ngan pas zin pa dag ni ngan pa rnams so/ /'gro ba gya nom pas zin pa dag ni gya nom pa rnams so/ /thag nye ba gang yin pa'am/ rgyang ring po gang yin pa zhes bya ba ni yul gyi bye brag gis tha dad pa rnams so/ /tshor ba la sogs pa ni gnas kyi dbang gis nye ba dang ring ba'o/ /gzugs la sogs pa zhes bya ba ni gzugs dang / tshor ba dang / 'du shes dang / 'du byed dang / rnam par shes pa rnams so/ /mdor bsdus pa nyid kyi phyir ro zhes bya ba ni dus dang / rgyu dang / rnam pa dang / 'gro ba dang / yul tha dad pa rnams kyi gzugs dang / tshor ba dang / 'du shes dang / 'du byed dang / rnam par shes pa rnams so sor mdor bsdus pa ni mdor bsdus pa'o/ /de'i dngos po ni mdor bsdus pa nyid do/ / de dag mdor bsdus pa'i phyir mdo las spungs pa'i don zhes 'byung ba ni phung po'i don ni zhes bya bar shes te/ 'di ltar 'das pa la sogs pa'i gzugs de dag thams cad ni gcig tu bsdus nas gzugs kyi phung po zhes bya ba'i grangs su 'gro ba zhes bya ba nas/ de bzhin du rnam par shes pa zhes bya ba'i bar du bstan to/ /phung po lnga po rnams dang / phung po'i don bshad zin to// //phung po lnga'i rab tu byed pa bye brag tu bshad pa/ bam po bzhi pa ste tha ma'o/ /'dus byas thams cad ni phung po lngas bsdus la/ 'dus byas dang / 'dus ma byas kyi chos thams cad ni skye mched dang / khams su bsdus par bstan pa de la phung po bshad pa'i 'og tu skye mched rnams brjod dgos pas du zhig gang dang gang skye mched kyi don ni ci zhe na/ de'i phyir/ skye mched bcu gnyis zhes bya ba smos so/ /de dag kyang gang zhe na/ mig gi skye mched dang / gzugs kyi skye mched dang zhes bya ba la sogs pa nas/ yid kyi skye mched dang / chos kyi skye mched do zhes bya ba'i bar du'o/ /mig la sogs pa ni snga ma bzhin du bshad do zhes bya ba ni gzugs kyi phung po rnam par phye ba ni ji ltar mig la sogs pa'i rang gi ngo bo bstan pa de bzhin du 'dir yang rang gi ngo bo bstan par bya'o/ /de la mig gi dbang po ni 'byung ba chen po bzhi rgyur byas pa ste/ yul kha dog gzugs dang ba'o zhes bstan to/ /de bzhin du sgra dang / dri dang / ro dang / reg bya yang yul te/ go rims bzhin no/ /rna ba la sogs pa yang gzugs kyi bdag nyid dang ba'o/ /gzugs dang / sgra dang / dri dang / ro'i skye mched rnams kyang snga ma bzhin du bshad do zhes bya bar sbyar ro/ /sngar ni mig gi yul ni/ kha dog dang / dbyibs dang / rnam par rig byed kyi gzugs so/ /rna ba'i yul ni sgra ste/ zin pa dang / ma zin pa dang / gnyi ga'i ste 'byung ba chen po'i rgyu las byung ba'o zhes bya ba la sogs pa bstan to/ /'byung ba chen po dag dang / gang reg bya'i phyogs gcig bshad pa ste/ de 'byung ba chen po rnams dang bcas pa ni reg bya'i skye mched do/ /de yang 'jam pa nyid la sogs pa'o/ /yid kyi skye mched ni rnam par shes pa'i phung po gang yin pa'o zhes bya ba la rnam par shes pa brgyad ni rnam par shes pa'i phung po ste/ 'jug pa'i rnam par shes pa drug dang / kun gzhi rnam par shes pa dang / nyon mongs pa can gyi yod do/ /skye mched rnam par gzhag pa la ni rnam par shes pa'i phung po nyid la yid kyi skye mched ces bya'o/ /chos kyi skye mched ni rnam pa brgyad de/ tshor ba dang / 'du shes dang / 'du byed kyi phung po dang / rnam par rig byed ma yin pa dang / 'dus ma byas bzhi'o/ /de la tshor ba dang / 'du shes dang / 'du byed kyi phung po dang / rnam par rig byed ma yin pa ni phung po rnam par phye bas bshad pa yin no/ /'dus ma byas ni ma bshad de/ de'i phyir de dag rab tu dbye bar 'dod nas/ 'dus ma byas gang zhe na zhes dris so/ /gang rgyu dang rkyen la rag las pa ma yin pa'i bdag nyid kyi rang gi ngo bo ni 'dus ma byas zhes bya ste/ nam mkha' dang so sor brtags pa ma yin pa'i 'gog pa dang / so so brtags pa'i 'gog pa dang / de bzhin nyid do/ /'dus ma byas kyi rab tu dbye ba ston te/ nam mkha' gang zhe na zhes bya ba ni nam mkha'i rang gi ngo bo khong du chud par bya ba'i phyir 'dri ba'o/ /gang gzugs kyi go 'byed pa'o zhes bya ba ni de'i rang gi ngo bo bshad pa'o/ /de bzhin du so sor brtags pa ma yin pa la sogs pa so sor brjod par bya'o/ /phyogs gang du thogs pa dang bcas pa'i gzugs la thogs par mi byed pa ni go 'byed pa'o/ /de'i phyir dngos po gzugs can rnams la skabs 'byed pa nam mkha' zhes bya'o/ /nam mkha'i 'og tu bstan pa'i phyir de bshad pa'i 'og tu so sor brtags pa ma yin pa'i 'gog pa'i rang gi ngo bo khong du chud par 'dod nas/ so sor brtags pa ma yin pa'i 'gog pa gang zhe na zhes dris so/ /brtags pa dang / gzhal ba dang / rnam par 'byed pa dang / shes rab ces bya ba ni don gcig go/ /so sor zhes bya ba ni spyir bsnyag pa'i don te/ de ni 'di ltar sdug bsngal la sogs pa 'phags pa'i bden pa rnams la so sor rtog pa ni so sor brtags pa ste/ shes rab kyi khyad par zhes bya ba'i tha tshig go zhes bstan par 'gyur ro/ /so sor ma brtags pa ni so sor brtags pa ma yin pa ste/ de yang gang zhe na/ rkyen ma tshang ba'o/ /de ni 'di skad du rkyen ma tshang ba'i phyir ma 'ongs pa'i chos rnams gtan du mi skye ba gang yin pa de so sor brtags pa ma yin pa'i 'gog pa'o zhes bstan par 'gyur ro/ /gang 'gog pa la 'bral ba ma yin pa ste zhes bya ba la sogs pa ni 'dri ba'i lan no/ /'gog pa zhes byas na ni so sor brtags pa ma yin pas 'gog pa bzhin du so sor brtags pa dang / snyoms par 'jug pa dang / skye ba dang / mi rtag pa'i 'gog pa rnams la yang snyegs pas 'dir so sor brtags pa'i 'gog pa rnam par dbye ba'i phyir 'bral ba ma yin pa zhes bya ba smos te/ 'bral ba ma yin zhes bya ba ni sa bon yod na de dag 'byung ba'i chos nyid yin pa'i phyir ma 'ongs pa'i chos rnams dang phrad par rnam par gzhag ste/ de'i gnyen pos rang gi gnas nas de dag gi sa bon bton bzhin gtan mi skye ba gang yin pa de 'gog pa'o/ /de ni 'di skad du sa bon bton la blo sngon du ma btang yang rkyen ma tshang bas ma 'ongs pa'i chos rnams gtan mi skye ba gang yin pa de so sor brtags pa ma yin pa'i 'gog pa'o zhes bstan par 'gyur ro/ /dgra bcom pa la ni ris gzhan dang 'brel ba'i dge ba dang / lung du ma bstan pa'i phung po rnams kyi sa bon yod bzhin du gtan mi skye ba thob pas/ de yang so sor brtags pa ma yin pa'i 'gog par 'gyur ro zhe na/ de'i phyir/ de ni gang nyon mongs pa'i gnyen po med par phung po rnams gtan du mi skye ba'o zhes bya ba smos te/ de ni 'di skad du/ 'di la dge ba dang lung du ma bstan pa'i phung po'i sa bon yod du zin kyang / nyon mongs pa'i gnyen po med par mi thob pas so so brtags pa'i 'gog pa nyid de/ 'di ni so sor ma brtags pa'i 'gog pa ma yin no/ /de ltar na phung po'i lhag ma dang bcas pa dang / phung po'i lhag ma med pa'i mya ngan las 'das pa'i dbyings ni so sor brtags pa'i 'gog pa zhes bstan pa yin no/ / nyon mongs pa'i gnyen po ni 'dir zag pa med pa'i lam du bzhed do/ /gtan du mi skye ba'o zhes bya ba la gtan du smos pa ni skye ba dang snyoms par 'jug pa'i 'gog pa las rnam par dbye ba'i phyir ro/ /de dag mi skye ba yin la gtan du ma yin pa ste/ sems dang sems las byung ba rnams kyang 'byung bar 'gyur ba'i phyir ro/ /mi skye ba'o zhes bya ba ni mi rtag pa nyid kyi 'gog pa las rnam par 'byed de/ mi rtag pa nyid kyi 'gog pa ni de ltar yod la mi skye ba ni da ltar med pas ma 'ongs pa yin pa nyid de/ dper na gzugs kyi rnam pa gcig la mig gi rnam par shes pa yengs pa yul gzhan dang / gzugs kyi rnam pa gzhan 'das pa gang yin pa de dag ni dmigs pa de'i rnam par shes pa'i tshogs lnga bskyed par mi nus te/ da ltar gyi rnam pa la ni de ma thag pa'i rkyen med cing / 'das pa rnams la ni dmigs pa'i rkyen med pa'i phyir ro/ /de'i phyir de dag la so sor brtags pa ma yin pa'i 'gog par 'gyur ro/ /so sor brtags pa'i 'gog pa gang zhe na zhes bya ba la/ so sor rtog pa ni so sor brtags pa ste/ bar chad med pa'i lam gyis shes rab kyi khyad par zhes bya ba'i tha tshig go/ /so sor brtags pas thob par bya ba'i 'gog pa ni so sor brtags pa'i 'gog pa ste/ tshig bar ma ma smos so/ /gang 'gog pa zhes bya ba ni 'gog pa thams cad du thal bar 'gyur bas/ de ni 'brel pa ste zhes bya ba smos so/ /de ltar na 'gog pa lhag ma bzhi po las rnam par phye ba yin te/ de dag ni 'bral ba'i bdag nyid ma yin pa'i phyir ro/ /de ni nyon mongs pa'i gnyen pos phung po gtan du mi skye ba'o zhes bya ba ni 'bral ba nyid dpyod pa ste/ lus 'di ni khams gsum pa'i nyon mongs pa'i sa bon ma lus pa dang / rjes su 'brel bar 'byung ba'o/ /de la gang dang gang gi gnyen po lam gyi skad cig gang dang gang yin pa'i lam de 'byung na lus kyi skad cig de ni des spang bar bya ba'i nyon mongs pa'i sa bon dang ldan pa'i phyi ma lus kyi skad cig gzhan 'byung ba dang / mi mthun pa'i rkyen du gyur pa dang / phyi ma lus kyi skad cig gzhan skyed par mi nus te/ de 'byung ba dang mi mthun pa'i rkyen nye bar gyur pa'i phyir ro/ /'on kyang des spang bar bya ba'i nyon mongs pa'i sa bon ldog pa bdag nyid kho na'i rgyur 'gyur te/ de byung ba dang mthun pa'i rkyen yod pa'i phyir ro/ /lam gyi skad cig de nyid ni des spang bar bya ba'i nyon mongs pa'i sa bon dang ldan pa'i skad cig gzhan 'byung ba dang mi mthun pa'i rkyen du gyur pa dang / cig shos dang mthun par brjod par bya'o/ /de bzhin du bsgom pas spang bar bya ba'i srid pa'i rtse mo'i nyon mongs pa chung ngu chung ngu'i bar gyi gnyen po byung na lus de khams gsum pa'i nyon mongs pa mthong ba dang / bsgom pas spang bar bya ba'i sa bon ma lus par ldog pa'i bdag nyid kho na'i skad cig gzhan gyi rgyur 'gyur ro/ /de bzhin du nyon mongs pa gang dang gang gi lus mi 'byung bas sa bon bton par gyur pa'i nyon mongs pa de dag mtshungs par ldan pa'i chos rnams kyang nyon mongs pa'i gnyen pos gtan du mi skye bar 'byung ste/ so sor brtags pa'i 'gog pa de ni 'bral ba zhes bya'o/ /so sor brtags pa'i 'gog pa'i 'og tu de bzhin nyid bstan pas de'i phyir de bshad pa'i 'og tu de bzhin nyid khong du chud par 'dod nas/ de bzhin nyid gang zhe na zhes 'dri'o/ /gang chos rnams kyi chos nyid dang chos bdag med pa nyid do zhes bya ba de ni de'i bshad pa ste/ gzhan ma yin pa'i don gyi phyir de bzhin nyid do/ /chos rnams zhes bya ba ni gzugs dang / tshor ba dang / 'du shes dang / 'du byed dang / rnam par shes pa rnams so/ /chos rnams kyi dngos po ni chos nyid de ji lta ba bzhin gyi bdag nyid dang yang dag pa'i mthar thug pa'o/ /chos nyid ni chos rnams kyi 'bras bu mi rtag pa nyid la sogs pa yang chos rnams la yod de/ de'i phyir chos bdag med pa nyid ces bya ba smos so/ /chos ni rang bzhin gang gis shes pa dang / brjod pa gnyis kyi yul du 'gyur ba de de dag gi bdag ste/ de'i rang bzhin ma yin pa'i phyir bdag de dang bral ba ni bdag med pa'o/ /de'i dngos po ni bdag med pa nyid do/ /de ni dngos po rnams rnam par brtags pa'i rang bzhin gyi stong pa nyid do/ /'di la dpyad na brjod pa mang du 'byung ste/ de thal bar 'gyur bas kyang chog gi skabs nyid brtsam mo/ /ci'i phyir skye mched ces bya zhe na zhes bya ba la/ skye mched kyi sgra ni mig la sogs pa rang gi ngo bo phan tshun tha dad pa rnams la yang bye brag med par 'byung bas de'i phyir de dag la des spyi'i don rgyur byas nas 'jug go/ /de yang mi shes pas ci'i phyir skye mched ces bya zhes 'dri'o/ /rnam par shes pa skye ba'i sgo'i phyir ro zhes bya ba la/ skye ba zhes bya ba ni 'byung ba ste/ rnam par shes pa rnams 'byung bas bdag nyid thob pa'o/ /rnam par shes pa skye ba'i sgo ni rgyu ste/ byed rgyu dang rgyu mtshan ni rnam par shes pa skye ba'i sgo'o/ /de ni 'di skad du/ rnam par shes pa 'byung ba'i rgyu'i phyir skye mched rnams zhes bya'o zhes bstan par 'gyur ro/ /'di ltar ci mngon zhe na nges pa'i tshig gis mngon te/ sems dang sems las byung ba rnams kyi 'byung ba mched par byed cing rgyas par byed pas skye mched rnams te/ bdag thob par byed pa rgyun du 'jog ces bya ba'i tha tshig go/ /de la mig dang gzugs rnams ni mig gi rnam par shes pa mtshungs par ldan pa dang bcas pa skye ba'i sgo yin no/ /de bzhin du yid dang chos rnams kyi bar dag kyang yid kyi rnam par shes pa mtshungs par ldan pa dang bcas pa'i skye ba'i sgo yin no/ /skye mched kyi 'og tu khams rnams rab tu dbye ba dang / rang gi ngo bo brjod par bya ste/ de bas na rab tu dbye ba bstan pa'i phyir/ khams bco brgyad ni zhes bya ba smos so/ /de dag nyid kyi rang rang gi ngo bo bstan pa'i phyir/ mig gi khams dang / gzugs kyi khams dang / mig gi rnam par shes pa'i khams dang zhes bya ba nas de bzhin du yid kyi khams dang / chos kyi khams dang / yid kyi rnam par shes pa'i khams dang zhes bya ba'i bar du smos so/ /'dir yang gzugs kyi phung po rnam par dbye ba ni mig dang / rna ba dang / sna dang / lce dang / lus kyi dbang po gang yin pa lnga po dag dang / gzugs dang / sgra dang / dri dang / ro dang / reg pa lnga yang de dag gi yul nyid du bstan to/ /skye mched rnam par gzhag par yang dbang po lnga po de dag nyid mig la sogs pa'i skye mched nyid dang / gzugs la sogs pa'i yul rnams kyang gzugs la sogs pa'i skye mched nyid bstan to/ /khams rnam par gzhag pa yang de dag nyid mig gi khams nas lus kyi khams kyi bar dang / gzugs kyi khams nas reg bya'i khams kyi bar du bstan te/ de'i phyir mig la sogs pa'i khams dang / gzugs la sogs pa'i khams ni skye mched rnams ji lta ba bzhin no zhes bya ba smos so/ /chos kyi khams ni chos kyi skye mched tshor ba la sogs pa phung po gsum dang / rnam par rig byed ma yin pa dang / 'dus ma byas pa zhi gang yin pa nyid do/ /skye mched rnam par gzhag pa'i rnam par shes pa'i phung po nyid yid kyi skye mched do/ /de bzhin du khams rnam par gzhag par yang yid kyi skye mched nyid kyi khams ma yin te/ yid kyi skye mched kyi khams rnam par gzhag pa na/ sems kyi khams bdun no/ /de'i phyir/ rnam par shes pa'i khams drug po dag ni zhes bya ba la sogs pa smos so/ /mig la sogs pa la brten te zhes bya ba ni mig dang / rna ba dang / sna dang / lce dang / lus dang yid la brten te'o/ /gzugs la sogs pa la dmigs pa zhes bya ba ni gzugs dang / sgra dang / dri dang / ro dang / reg bya dang / chos rnams ni dmigs pa'o/ /rnam par rig pa'o zhes bya ba ni rnam par shes pa'o/ /de la mig la brten cing gzugs la dmigs pa ni mig gi rnam par shes pa ste/ mig gi rnam par shes pa'i khams so/ /de bzhin du rna ba dang / sna dang / lce dang / lus dang / yid la brten cing / sgra dang / dri dang / ro dang / reg dang / chos rnams la go rims bzhin du dmigs pa ni rna ba dang / sna dang / lce dang / lus dang / yid kyi rnam par shes pa'i khams te/ rna ba dang / sna dang / lce dang / lus dang / yid kyi rnam par shes pa'i khams so/ /yid kyi khams ni rnam par shes pa drug las gud na med de/ rnam par shes pa'i khams drug po de dag nyid 'gags ma thog pa la yid kyi khams zhes bya'o/ /de ltar na yid kyi khams dang / rnam par shes pa'i khams drug po dag gcig gi nang du gcig 'dus pa'i phyir khams bcu bdun nam bcu gnyis su mi 'gyur ram/ mi 'gyur te 'di ltar rnam par shes pa drug pa'i gnas bstan pa'i phyir/ de ltar khams bco brgyad du rnam par gzhag go/ / de ltar zhes bya ba ni gong du smos pa'i rnam pa bstan pa'o/ /gzugs kyi phung po gang yin pa zhes bya ba la rdzas bcu gcig ni gzugs kyi phung po bstan te/ de la mig la sogs pa dbang po lnga dang / gzugs la sogs pa yul lnga ni skye mched rnam par gzhag par skye mched bcu dang / khams rnam par gzhag par khams bcu dang / chos kyi skye mched kyi phyogs gcig dang / chos kyi khams kyi phyogs gcig ni rnam par rig byed ma yin pa zhes bya'o/ /rnam par shes pa'i phung po gang yin pa de ni yid kyi skye mched dang / sems kyi khams bdun no zhes bya ba ni mig gi rnam par shes pa'i khams nas yid kyi khams kyi bar du'o/ /gzugs dang rnam par shes pa'i phung po las gzhan phung po gsum gang yin pa dag tshor ba dang / 'du shes dang / 'du byed ces bya ba'i phung po rnams so/ /gzugs kyi phung po'i phyogs gcig ni rnam par rig byed ma yin pa zhes bya ste/ de dag 'dus ma byas nam mkha' la sogs pa dang / bcas pa ni chos kyi skye mched dang / chos kyi khams so/ /ci'i phyir khams zhes bya zhe na zhes bya ba ni/ skye mched bzhin du rgya cher brjod par bya'o/ /byed pa med la rang gi mtshan nyid 'dzin pa'i phyir khams so/ /skad cig rnams la ni byed pa med par mi srid do zhes sngar bstan pa nyid do/ /chos gang dag phung po zhes bstan pa de dag nyid skye mched nyid dang / khams nyid du yang bshad pas de'i phyir/ ci'i phyir phung po la sogs pa bshad ce na zhes dris so/ /sangs rgyas bcom ldan 'das rnams kyis bshad pa thams cad ni sems can gyi don du 'gyur ba dang / nyon mongs pa'i gnyen po yin pas dgos pa dang bcas pa'o/ /'dir ni chos de dag nyid rnam pa gzhan dang gzhan gyis yang dang yang bshad pa'i dgos pa yang mi shes nas/ ci'i phyir phung po la sogs pa bshad ce na zhes bya ba ni dgos pa brjod do/ /de'i phyir bdag tu 'dzin pa rnam pa gsum gyi gnyen por zhes bya ba smos so/ /de la bdag tu 'dzin pa gsum dang / gang gi gnyen por bshad pa yang mi shes pas de'i phyir go rims bzhin no zhes bya ba smos te/ bdag tu 'dzin pa rnam pa gsum ni gcig pur 'dzin pa dang / za bar 'dzin pa dang / byed par 'dzin pa'o/ /de la go rims bzhin zhes bya ba la phung po bshad pa ni gcig pur 'dzin pa'i gnyen po'o/ /skye mched bshad pa ni za bar 'dzin pa'i gnyen po'o/ /khams bshad pa ni byed par 'dzin pa'i gnyen po'o/ /bdag tu smra ba thams cad ni mthong ba gang yin pa de nyid thos pa dang / snom pa dang / ro myong ba dang / reg pa yin pa dang / de la de nyid sems par byed pa dang / 'du shes su byed pa dang / rnam par shes par byed pa'o snyam du de ltar 'dzin to/ /sems can rnams kyi lus la ni phung po lnga las gud na gcig pur rnam par gnas pa'i ngo bo gang yang med de/ rang gi ngo bo dang / 'bras bu mi dmigs pa'i phyir ro/ /mig las gud na lta ba po gzhan med de/ mig nyid mthong ba'o zhes rnam par shes pa'i thun mong ma yin pa'i rgyu dang gnas yin pas lta ba po zhes gdags so/ /de bzhin du rna ba la sogs pa so so la yang brjod par bya'o/ /de bzhin du tshor ba ni myong ba'i bdag nyid yin pas myong bar byed/ 'du shes nyid mtshan mar 'dzin pa'i bdag nyid yin pas 'du shes su byed kyi gzhan ni ma yin te/ de ltar thams cad du yang brjod par bya'o/ /de lta bas na sems can rnams kyi lus ni phung po'i bdag nyid yin pas dngos po du ma'i bdag nyid can no/ / 'di la ni phung po lnga las gud na gcig pu med de/ phung po bstan pas gcig pu 'dzin pa ldog pa na de la gcig pur 'dzin pa sngon du 'gro ba'i bdag tu 'dzin pa gang yin pa de yang ldog pa nyid de/ de'i phyir gcig pur 'dzin pa sngon du 'gro ba'i bdag tu 'dzin pa'i gnyen por phung po bshad do/ /gcig pur 'dzin pa ni rgyu la 'bras bu btags nas bdag tu 'dzin pa zhes bya bar bshad do/ /za bar 'dzin pa ni smra ba thams cad ci ltar na las dge ba dang mi dge ba'i 'bras bu 'dod pa dang mi 'dod pa dang / bde ba dang sdug bsngal gyi tshor bas rab tu phye ba dang / gzugs dang sgra la sogs pa yul la gang spyod pa de bdag go zhes so/ /de ltar na bdag tu 'dzin pa 'di'i gnyen por skye mched bshad do/ /las dge ba dang mi dge ba'i 'bras bu dang / gzugs la sogs pa yul rnams la spyod pa ni dmigs pa ste/ de byed pa gang yin pa de ni las kyi 'bras bu dang / gzugs la sogs pa la spyod do/ /dmigs pa rnam pa drug de yang skye mched nyid kyis byed kyi gzhan gyis ni ma yin no/ /de'i phyir mig la sogs pa dang / gzugs la sogs pa ni rnam par shes pa skye ba'i sgo'i phyir skye mched rnams zhes bya'o/ /de lta bas na las kyi 'bras bu dang / yul rnams la spyod pa ni mig la sogs pa las gud na gzhan gang yang med de/ de ltar na skye mched bshad pa ni za bar 'dzin pa'i gnyen po zhes bya'o/ /byed par 'dzin pa ni las dge ba dang mi dge ba rnams 'brel ba dang / sprugs bsigs pa la sogs pa byed pa ste/ bdag tu 'dzin pa 'di'i gnyen por khams bshad do/ /de ltar na byed pa med la rang gi mtshan nyid 'dzin pa'i phyir khams zhes bstan to/ /de ltar rgyu yod pa tsam gyis 'bras bu yang 'byung bar byed cing 'bras bu yang rgyu la ltos nas yod pa tsam du zad de/ rgyu dang 'bras bu'i rang gi ngo bo las ma gtogs par byed pa gzhan med par sngar bstan pa nyid do/ /byed pa med par byed pa po ga la yod de/ de lta bas na byed par 'dzin pa'i gnyen por khams bshad pa yin no/ /de ni chos gang dag rab tu rnam par dbye bas phan gdags pa'i phyir phung po dang skye mched dang / khams nyid du chos gang dag bstan pa de dag la rnam pa gzhan gyis bsam par bya ste/ de la khams rnams kyi nang du gzugs dang sems gnyis rnam par dbye ba lhag par bstan pas zag pa dang bcas pa'i rnam pa la sogs pa bde blag tu rtogs par 'gyur ba'i phyir khams ga las brtsams te/ bsam par bya ba'i phung po dang / skye mched rnams la ni ma yin no/ /de'i phyir khams bco brgyad la gzugs can du zhe na zhes bya ba la sogs pa smos so/ /gzugs su yod pas gzugs te/ 'di dag la yod pas gzugs can no/ /yang na rten dang brten pa'i gzugs ji ltar mthun mthun du 'di dag la yod pas gzugs can no/ /mig la sogs pa'i rnam par shes pa la thal bar yang mi 'gyur te/ mig la sogs pa rten gyi dngos po de dag gi gzhi byed pa ma yin pa'i phyir ro/ /gang dag gzugs kyi phung po'i ngo bo nyid do zhes bya ba de dag ni khams bcu ste/ mig gi khams nas lus kyi bar dang / gzugs kyi khams nas reg bya'i khams kyi bar du'o/ /rnam par rig byed ma yin pa gzugs su yod du zin kyang chos kyi khams gzugs can nyid du thal bar mi 'gyur te/ de la rten dang brten pa'i gzugs med pa dang / gzugs su yod pa med pa dang / gzugs kyi phung por gtogs su zin kyang gzugs su yod pa ma yin pa'i phyir ro/ /gzugs can ma yin pa du zhe na/ lhag ma rnams so zhes bya ba la gzugs can las ldog pa ni gzugs can ma yin pa ste/ de dag ni brgyad de/ sems kyi khams bdun dang / chos kyi khams so/ /bstan du yod pa du zhe na zhes bya ba ni khams bco brgyad kyi skabs yin pas der sbyar ro/ /gzugs kyi khams gcig ste zhes bya ba la 'di ni 'di na'o zhes/ pha bi ni pha bi na'o zhes bstan du rung ba de ni bstan pa'o/ /de dang lhan cig pa ni bstan du yod pa ste/ dmigs pa dang bcas pa bzhin no/ /bstan du yod pa 'di nyid rab tu bstan pa'i phyir/ yul bstan du yod pa'o zhes bya ba smos te/ yul de dang der 'dis bstan du yod pas yul bstan du yod pa'o zhes bya'o/ / gzugs kyi khams gcig kho na bstan du yod pa nyid du smos pas lhag ma khams bcu bdun ni bstan du med par grub bo/ /thogs pa dang bcas pa du zhen zhes bya ba ni khams bco brgyad kyi skabs yin pas thams cad du yang sbyar ro/ /gzugs can ma yin pa rnam par gcad pa'i phyir gzugs can smos so/ /chos kyi khams la yang rnam par rig byed ma yin pa'i gzugs yod pas/ gzugs can yod par bstan pa'i phyir bcu zhes bya ba smos so/ /de dag kyang mig la sogs pa dbang po'i khams rnams dang / de dag gi yul gzugs can gyi khams lnga'o/ /go gcod pas thogs pa ste/ de dang lhan cig pa ni thogs pa dang bcas pa'o/ /go gcod pa ni yul dang dmigs pa dang sgrib pas go gcod pa'i bye brag gis rnam pa gsum mo/ /'dir ni sgrib pa'i go gcod pa nyid thogs pa dang bcas par 'dod pa bstan pa'i phyir gang la gang thogs pa'o zhes bya ba smos so/ /sgrib pa'i go gcod pa ni rang gi yul du gzhan 'byung ba'i gegs su gyur pa'o/ /de ltar na gang gis rang gi yul du gzhan 'byung ba'i gegs byed pa dang / gang la gegs byed pa de gnyi ga yang thogs pa dang bcas pa zhes bstan pa yin no/ /khams gzugs can bcu po de dag kyang rang rang gi yul du 'byung ba la gcig la gcig gegs byed pas sgrib cing go gcod pa'i phyir thogs pa dang bcas pa rnams so/ /lhag ma sems kyi khams bdun dang / chos kyi khams ni thogs pa med par grub po zag pa dang bcas pa du zhe na zhes bya ba ni khams kyi skabs yin no/ /bco lnga dang tha ma gsum gyi cha ste zhes bya ba ni mig la sogs pa dbang po lnga'i khams dang / gzugs la sogs pa yul lnga'i khams dang / mig gi rnam par shes pa la sogs pa rnam par shes pa'i khams lnga ste/ khams bco lnga po dag ni gcig tu zag pa dang bcas pa nyid do/ /dang po la yang gsum yod de/ mig dang / gzugs dang / mig gi rnam par shes pa'i khams yin pas de'i phyir tha ma zhes smos so/ /tha ma gsum ni yid kyi khams dang / chos kyi khams dang / yid kyi rnam par shes pa'i khams so/ /de dag gi cha ni cha shas te/ zag pa dang bcas pa'o/ /mig la sogs pa bzhin du thams cad zag pa dang bcas pa nyid ni ma yin no/ /de dag las kyang lam gyi bden pa dang / 'dus ma byas kyi rang bzhin gyi cha ma yin pa de nyid zag pa dang bcas pa ste/ zag pa dang lhan cig pas zag pa dang bcas pa'o/ /de'i phyir de dag nyon mongs pa skye ba zhes bya ba smos te/ 'di ltar de dag las nyon mongs pa skye bas de'i phyir zag pa dang bcas pa zhes bya'o/ /mig la sogs pa'i rnam par shes pa rnams ni/ rnam par mi rtog pa yin pas ji ltar gzugs la sogs pa rnams la nyon mongs pa skyed ce na/ nyon mongs pa rnams mig la sogs pa'i rnam par shes pa rnams dang / lhan cig tu gzugs la sogs pa la 'byung ba zhes mi bya mod kyi/ 'on kyang mngon sum gyi spyod yul gyi phyir ro zhes bya ba ni gzugs la sogs pas nyon mongs la skyed pa ste/ 'di ltar mig la brten cing gzugs la sogs pa la brten nas mig gi rnam par shes pa 'byung ste/ mig gi rnam par shes pas myong ba'i gzugs rnams la yid kyi rnam par shes pas rnam par rtog par byed pas rnam par rtog pa las nyon mongs pa 'byung ste/ de bzhin du lhag ma rnams la yang brjod par bya'o/ /zag pa med pa du zhe na/ tha ma gsum gyi cha'o zhes bya ba ni yid dang chos dang yid kyi rnam par shes pa'i khams rnams kyi'o/ /lam gyi bden pa dang 'dus ma byas su gtogs pa'i phyogs gang yin pa de ni zag pa med pa'o/ /'dod pa dang ldan pa du zhe na zhes bya ba ni khams bco brgyad ces bya ba dang sbyar te/ gzugs la sogs pa yul lnga ni 'dod par bya ba yin pas 'dod pa rnams te/ de gces su byed pa'i khams rnams ni 'dod pa'i khams su shes par bya'o/ /yang na 'dod pa'i khams dang ldan pa du zhe na zhes brjod pa'i rigs pa las khams zhes bya ba'i sgra ma smos pa 'dod pa dang ldan pa zhes bya ba smos so/ /'dod pa'i khams dang ldan pa dag ni 'dod pa'i khams kyis bsdus pa rnams te/ 'dod pa'i khams kyi ngo bo nyid ces bya ba'i tha tshig go/ /'di ltar gang du 'dod pa'i sred pa kun du 'byung ba thams cad 'dod pa'i khams su bsdus pa'o/ /de dag kyang dbang po'i khams drug dang / yul gyi khams drug dang / rnam par shes pa'i khams drug go/ /gzugs dang ldan pa du zhe na/ bcu bzhi ste/ mig dang / rna ba dang / sna dang / lce dang / lus dang / yid kyi dbang po'i khams dang / yul bzhi dang yul de'i rnam par shes pa'i khams bzhi ste/ bcu bzhi po de dag ni gzugs kyi khams dang ldan pa'o/ /ci'i phyir gzugs kyi khams na dri dang ro dang de'i rnam par shes pa gnyis kyang med ce na/ dri dang ro ni gcig tu kham gyi zas kyi ngo bo nyid yin gyi reg pa dang / sems pa'i zas kyi ngo bo nyid ma yin no/ /yang kham gyi zas kyi 'dod chags dang bral ba rnams ni gzugs kyi khams su skye ste/ gang gi 'dod chags dang bral ba rnams gang du skyes pa de na med de/ dper na/ 'dod chags dang bral ba gzugs med par skyes pa'i mig la sogs pa bzhin du yul med pa'i phyir dri dang ro'i rnam par shes pa gnyis kyang med do/ /gzugs med pa dang ldan pa du zhe na/ tha ma gsum zhes bya ba ni/ yid kyi khams dang / chos kyi khams dang / yid kyi rnam par shes pa'i khams so/ /gzugs kyi 'dod chags dang bral ba rnams ni gzugs med pa'i khams su skye ste/ de'i phyir de na gzugs kyi ngo bo nyid kyi khams bcu dang / de la brten pa dang dmigs pa rnam par shes pa'i khams lnga med do/ /mi ldan pa du zhe na gsum gyi cha'o zhes bya ba ni gang dag 'dod pa dang / gzugs dang gzugs med pa'i sred pa rnams kyis ma dmigs pa ste/ khams gsum dang ldan pa ma yin pa'i phyir mi ldan pa'o/ /lam gyi bden pa dang / 'dus ma byas kyi ngo bo nyid gang yin pa'i yid dang chos dang yid kyi rnam par shes pa'i khams de dag ni zag pa med pa'o/ /dge ba du/ mi dge ba du/ lung du ma bstan pa du zhe na/ khams bco brgyad kyi skabs yin pas der sbyar ro/ /de la ngan pa bsnyil ba'i phyir dge ba ste/ song zhes bya ba'i tha tshig go/ /yang na ku sha ni shes rab kyi rnam grangs su gtogs pa'o/ /la ni len pa ste/ shes rab kyis yongs su zin pa'am/ shes rab yongs su 'dzin pa ni dge ba rnams so/ /yang na ngan pa'i rnam par 'dug pa ni rtswa ku sha ste/ gcod pa dang 'bigs pa'o/ /la ni len pa ste/ su zhig gcod pa dang 'bigs pa spangs te/ rtswa ku sha rnams len pa de ni mkhas pa zhes bya'o/ /de bzhin du gzhan bya ba gang la bsngags par 'os pa de ni dge ba zhes bya'o/ /'dis mi dge ba bzlog ste bshad do/ /dge ba dang mi dge ba'i dngos por lung du bstan pa med pas ma bstan pa'o/ /bcu ni rnam pa gsum char te zhes bya ba ni dge ba yang yin/ mi dge ba yang yin/ lung du ma bstan pa yang yin no/ /khams bco brgyad kyi nang nas bcu gang zhes bya ba de dag kyang mi shes nas/ sems kyi khams bdun dang gzugs dang sgra dang chos kyi khams so zhes bya ba smos so/ /de la sems kyi khams rnams ni mtshungs par ldan pas dge ba dang mi dge ba nyid yin gyi/ ngo bo nyid kyi ni ma yin te/ dge ba dang mi dge ba'i rtsa ba rnams dang mtshungs par ldan pas so/ /de la sems kyi khams bdun ma chags pa dang / zhe sdang med pa dang / gti mug med pa dang / mtshungs par ldan pa rnams ni dge ba'o/ /chags pa dang / zhe sdang dang / gti mug dang mtshungs par ldan pa rnams ni mi dge ba'o/ /gzhan dag ni lung du ma bstan pa'o/ /gzugs dang sgra'i khams lus dang ngag gi rnam par rig byed du bsdus pa dge ba dang mi dge ba'i sems kyis kun nas bslang ba ni dge ba dang mi dge ba'o/ /de las gzhan pa ni lung du ma bstan pa'o/ /chos kyi khams kyang ma chags pa la sogs pa'i ngo bo nyid dang mtshungs par ldan pa dang / kun nas bslang ba dang / so sor brtags pa'i 'gog pa dang / de bzhin nyid ni dge ba'o/ /chags pa la sogs pa'i ngo bo nyid dang mtshungs par ldan pa dang / kun nas bslang ba ni mi dge ba'o/ /de las gzhan pa ni lung du ma bstan pa'o/ /brgyad ni lung du ma bstan pa ste/ dri dang ro dang reg bya dang / mig la sogs pa lnga'o/ /de dag ni lung du ma bstan pa nyid de/ don dam pa dang / ngo bo nyid dang mtshungs par ldan pa dang / kun nas bslang bas dge ba dang / mi dge ba ma yin pa'i phyir ro/ /nang gi du zhe na/ khams bco brgyad ces bya bar sbyar ro/ /bcu gnyis te bcu gnyis gang yin pa de dag kyang mi shes pas/ gzugs dang sgra dang dri dang ro dang reg bya dang chos kyi khams ma gtogs so zhes bya ba smos so/ /lhag ma dbang po'i khams drug dang / rnam par shes pa'i khams drug ste/ bcu gnyis po de dag ni nang gi'o/ /khams rnams las phyi rol gyi du zhe na drug ste/ de dag kyang mi shes nas/ de'i phyir gang dag ma gtogs pa rnams so zhes bya ba smos so/ /'di dag ni phyi'i yin par shes par bya'o/ /ma gtogs pa rnams gang zhe na/ gzugs dang sgra dang dri dang ro dang reg bya dang chos kyi khams rnams so/ /bdag gi dbang du byas pa ni nang zhes bya ba ste/ nang nyid nang ngo / /bdag nyid med na nang ngam phyi zhes bya bar ji ltar 'gyur te/ tshul khrims med na tshul khrims kyi dbang du byas pa'i bslab pa mi rung ba bzhin no zhe na/ ngar 'dzin pa'i gnas yin pa'i phyir sems la bdag ces 'dogs so/ /ngar 'dzin pa'i gzhi ni bdag tu smra ba rnams kyis bdag ces brjod de/ 'di ltar bdag gi yon tan nam/ bdag yul nyid du ngar 'dzin pa rtogs so/ /ngar 'dzin pa yang sems la brten pa ste/ de las gud na bdag med pa'i phyir ro/ /de la nga'o snyam du nga rgyal skyed pas bdag ste/ sems nyid sems las byung ba rnams kyi gnas yin pas sems nyid la bdag tu 'dogs so/ /'dir sems la bdag ces bya bar bzhed par 'di ci mngon zhe na/ bcom ldan 'das kyis/ bdag ni legs par dul gyur na/ /mkhas pas mtho ris thob par 'gyur/ /zhes gsungs so/ /gzhan nas kyang sems 'dul ba gsungs te/ sems 'dul ba ni legs pa ste/ /sems 'dul bde ba thob par byed/ / ce'o/ /'dir sems 'dul ba dang / sems nyid dul na bde ba thob par byed/ /ces gsungs pas de'i phyir/ bdag ni legs par dul gyur na/ /mkhas pas mtho ris thob par 'gyur/ /zhes bya ba 'dir yang sems nyid la bya bar bzhed par mngon no/ /de'i phyir bdag tu lta ba'i sems kyi rten gyi dngos por nye bar gyur pa'i phyir mig la sogs pa ni nang gi nyid do/ /gzugs la sogs pa yul gyi dngos por gyur pa ni phyi'i nyid do/ /de ltar na ni rnam par shes pa'i khams drug nang gir mi 'gyur te/ de dag yid kyi khams nyid du ma gyur gyi bar du sems kyi rten du mi 'gyur ba'i phyir ro zhe na/ nam du yang rung ste/ de dag nyid nad yin pas mtshan nyid las 'da' ba med do/ /dmigs pa dang bcas pa du zhe na zhes bya ba ni khams kyi skabs yin pas de'i phyir bdun zhes bya ba smos so/ /bdun po de dag kyang gang yin mi shes pas de'i phyir sems kyi khams zhes bya ba smos so/ /dmigs pa dang bcas pa 'di dag nyid du zad dam zhe na/ ma yin te/ chos kyi khams kyi phyogs gcig kyang yin te/ kyang gi sgra ni bsdu'o/ /sems kyi khams bdun dang chos kyi khams kyi gcig kyang dmigs pa dang bcas pa yin te/ 'di dag la dmigs pa yod pas dmigs pa dang bcas pa'o/ /yul dang spyod yul dang dmigs pa zhes bya ba rnam grangs su gtogs pa'o/ /sems kyi khams bdun ni mig dang / rna ba dang sna dang / lce dang / lus dang / yid kyi rnam par shes pa rnams so/ /chos kyi khams kyi phyogs gcig ni gang sems las byung ba'i ngo bo nyid do/ /dmigs pa med pa du zhe na/ lhag ma rnams te/ de dag kyang bcu ste/ mig la sogs pa dbang po'i khams lnga dang / gzugs la sogs pa yul gyi khams lnga'o/ /chos kyi khams kyi phyogs gang sems las byung ba'i ngo bo nyid ma yin pa'o/ /rnam par rtog pa dang bcas pa du zhe na/ khams bco brgyad ces bya bar sbyar ro/ /yid kyi khams dang yid kyi rnam par shes pa'i khams dang / chos kyi khams kyi phyogs so zhes bya ba ni gang mtshungs par ldan pa'o/ /'di gnyis ni mngon par dpyod pa dang / rjes su dran pa'i rnam par rtog pa dang / mtshungs par ldan pa ste/ de nyid rnam par rtog pa yin gyi gzhan ni ma yin te/ de gnyis dang mtshungs par ldan pa ma yin pa'i phyir ro/ /chos kyi khams kyi phyogs ni mtshungs par ldan pa can te/ gzhan ni ma yin no/ /de la rjes su dran pa'i rnam par rtog pa ni dran pa nyid la bya ste/ yid kyi myong ba'i dmigs pa ma brjed pa rnams so/ /dus gsum gyi don lkog tu gyur pa la mngon par dpyod pa'i rnam pa 'di ni 'di lta yin gyi de lta ma yin no zhes bya ba shes rab kyi khyad par la'am/ sems pa ni mngon par dpyod pa'i rnam par rtog pa ste/ chos mngon pa kun las btus pa las ji skad du/ rjes su dran pa'i rnam par rtog pa gang zhe na/ gang sngon myong ba la 'du byed bskyed pa'o/ /mngon par dpyod pa'i rnam par rtog pa gang zhe na/ gang 'das pa dang / ma 'ongs pa dang / da ltar gyi don lkog tu gyur pa rnams la mngon par dpyod pa'i rnam par rtog pa'o zhes bshad pa lta bu'o/ /lhag ma rnams ni rnam par mi rtog par 'grub ste/ de dag kyang khams bco lnga ste/ chos kyi khams kyi phyogs te/ de dag ni rnam par mi rtog pa nyid do/ /khams bco brgyad las zin pa du zhe na/ nang gi lnga ste/ de dag ni mig dang / rna ba dang / sna dang / lce dang / lus kyi khams te/ de dag ni zin pa nyid do/ /gzhan las 'di dag gnyis su ma bstan tam/ bstan mod kyi de la yang 'das pa dang / ma 'ongs pa ni zin pa ma yin par brjod de/ de ni med pa nyid do/ /med pa ni zin pa'am ma zin pa yin par brjod du mi rung ngo / /da ltar ni rang yod par gnas pa dang / sems dang sems las byung ba rnams kyis zin pa'i phyir zin pa nyid de/ mig la sogs pa ni ma zin pa ma yin no/ /ci mig la sogs pa lnga po nyid zin pa dag gang zhe na/ ma yin te/ bzhi'i phyogs te/ bzhi po de dag gang yin snyam pa la de'i phyir/ gzugs dang dri dang ro dang reg bya rnams kyi'o zhes bya ba smos so/ /de la gzugs dang dri dang ro dang reg bya'i khams dbang po las tha dad du mi 'jug pa gang dag yin pa de dag dbang po dag bzhin du zin pa rnams so/ /gzhan dag ni ma zin pa dag ste/ 'di lta ste/ drung ma gtogs pa'i skra dang spu dang sen mo dang / so dang phyi sa dang gcin dang mchil ma dang / snabs dang khrag la sogs pa dang / sa dang chu la sogs pa rnams so/ /zin pa zhes bya ba'i don ci zhe na/ phan pa dang / gnod pa gnyis kyis phan tshun rjes su 'gyur ba'i phyir gang sems dang sems las byung ba de rnams kyis byin gyis brlabs pa'i gnas kyi dngos por zin pa dang / 'jig rten na sems bcas pa zhes bya'o/ /zin pa ma yin pa du zhe na/ lhag ma dgu dang / bzhi'i phyogs zhes bya ba ni bshad zin pa rnams las gzhan gang yin pa de dag lhag ma'o/ /de'i phyir sems kyi khams bdun dang / chos kyi khams dang / sgra'i khams so/ /bzhi'i phyogs zhes bya ba ni gzugs dang / dri dang / ro dang / reg pa rnams kyi'o/ /de yang dbang po dang / tha dad du mi 'jug pa'i cha ma gtogs pa dang / drung ma gtogs pa'i skra dang / spu la sogs pa yod pa'o/ /sten pa mtshungs pa du zhe na/ khams bco brgyad kyi skabs yin pas der sbyar ro/ /nang gi gzugs can lnga zhes bya ba ni nang gi bcu gnyis bstan pas de dag gi nang na gang yin pa gtol med pas lnga zhes bya ba smos so/ /gzugs can zhes bya ba de dag ni mig dang / rna ba dang / sna dang / lce dang / lus kyi khams so/ /gang gi sten pa mtshungs pa dang / rnam pa gang gis sten pa mtshungs pa yang mi shes pas de'i phyir/ rang gi rnam par shes pa dag dang yul thun mong pa nyid kyi phyir ro zhes bya ba smos so/ /de la mig gi rang gi rnam par shes pa ni mig gi rnam par shes pa ste/ rang gi rnam par shes pa de dang / mig rang gi yul gzugs su mtshungs te/ gnyi ga yang / mig gi rnam par shes pa skye ba dang mthun pa'i phyir mtshungs pa'o/ /thun mong pa nyid kyi phyir zhes bya ba ni bzung ba ste/ mig gi rang gi yul gzugs dang / sten pa mtshungs pa zhes bya'o/ /de bzhin du rna ba la sogs pa yang / rang gi yul rnams dang / sten pa mtshungs pa zhes brjod par bya'o/ /de ni 'di skad du/ mig la sogs pa gang dag rang gi rnam par shes pa rnams dang / gnas pa de dag sten pa mtshungs pa zhes bstan par 'gyur ro/ /de dag dang mtshungs pa du zhe na/ mig la sogs pa de dag nyid rang gi rnam par shes pas stong pa nyid de de dag dang mtshungs pa'o/ /ci'i phyir de dag ni de dag dang mtshungs pa zhes bya zhe na/ rang gi rigs dang mthun pa'i phyir ro zhes bya ba ste/ rang gi rnam par shes pa stong pa'i mig la sogs pa de dag ni sten pa mtshungs pa'i mig la sogs pa dang / mig la sogs par ris mthun pa ste/ de dag dang 'dra ba'i phyir de dag dang mtshungs pa zhes bya'o/ /de dag ni thun mong ma yin pa'i phyir gcig gi sten pa mtshungs pa dang / de dag dang mtshungs pa gang yin pa de dag ni/ sems can thams cad kyi yang yin pas/ 'di dag gi sten pa mtshungs pa dang / de dag dang mtshungs par ldan pa ni nges pa'o/ /gzugs la sogs pa ni so so'i rgyud la sten pa mtshungs pa dang / de dag dang mtshungs pa nyid du gnas so/ /rnam par shes pa las byed pa gzhan med pa'i phyir/ gzhan dag la ni sten pa mtshungs pa de dang / de dag dang mtshungs pa zhes ma brjod do/ /phung po lnga'i rab tu byed pa bye brag tu bshad pa/

CLOSE WINDOW