བོད་ཡིག

e-texts based on the ACIP/ALL Input

/ /rgya gar skad du/ pid+shi ka br-id+hi/ bod skad du/ nyi shu pa'i 'grel pa/ 'jam dpal gzhon nur gyur pa la phyag 'tshal lo/ /theg pa chen po la khams gsum pa rnam par rig pa tsam du rnam par gzhag ste/ mdo las kye rgyal ba'i sras dag 'di lta ste/ khams gsum pa 'di ni sems tsam mo zhes 'byung ba'i phyir ro/ /sems dang yid dang / rnam par shes pa dang / rnam par rig pa zhes bya ba ni rnam grangs su gtogs pa'o/ /sems de yang 'dir mtshungs par ldan pa dang bcas par dgongs pa'o/ /tsam zhes bya ba smos pa ni don dgag pa'i phyir ro/ /rnam par shes pa 'di nyid don du snang ba 'byung ste/ dper na rab rib can rnams kyis skra zla la sogs pa med par mthong ba bzhin te/ don gang yang med do/ /'dir 'di skad ces brgal te/ gal te rnam rig don min na/ /yul dang dus la nges med cing / /sems kyang nges med ma yin la/ /bya ba byed pa'ang mi rigs 'gyur/ /ji skad du bstan par 'gyur zhe na/ gal te gzugs la sogs pa'i don med par gzugs la sogs pa'i rnam par rig pa 'byung ste gzugs la sogs pa'i don las ma yin na/ ci'i phyir yul la lar 'byung la thams cad na ma yin/ yul de nyid na yang res 'ga' 'byung la thams cad du ma yin/ yul dang dus de na 'khod pa thams cad kyi sems la nges pa med pa 'byung la 'ga' tsam la ma yin/ ji ltar rab rib can nyid kyi sems la skra la sogs pa snang gi/ gzhan dag la ni ma yin/ /ci'i phyir gang rab rib can gyis mthong ba'i skra dang / sbrang bu la sogs pas skra la sogs pa'i bya ba mi byed la/ de ma yin pa gzhan dag gis ni byed/ rmi lam na mthong ba'i bza' ba dang btung ba dang bgo ba dang dug dang mtshon la sogs pas zas dang skom la sogs pa'i bya ba mi byed la/ de ma yin pa gzhan dag gis ni byed/ dri za'i grong khyer yod pa ma yin pas grong khyer gyi bya ba mi byed la/ de ma yin pa gzhan dag gis ni byed/ 'di dag don med par med du 'dra na yul dang dus nges pa dang / sems nges pa med pa dang / bya ba byed pa 'di dag kyang mi rung ngo zhe na/ mi rung ba ma yin te/ 'di ltar/ yul la sogs pa nges 'grub ste / /rmi 'dra'o/ /rmi lam du rmis pa dang mtshungs pas na rmi 'dra'o/ /ji lta zhe na/ rmi lam na yang don med par yul la na grong dang / kun dga' ra ba dang / skyes pa dang bud med la sogs pa ji dag snang la thams cad na ma yin yul de nyid na yang res 'ga' snang la dus thams cad du ma yin pas don med par yang yul la sogs pa nges par 'grub po/ /sems kyang nges pa med/ yi dags bzhin te/ grub ces bya bar bsnyegs so/ /yi dags rnams kyi dang mtshungs pas na yi dags bzhin no/ /ji ltar 'grub / thams cad kyis/ klung la rnag la sogs mthong bzhin/ /rnag gis gang ba'i klung ni rnag gi klung ste/ /mar gyi bum pa bzhin no/ /las kyi rnam par smin pa mtshungs pa la gnas pa'i yi dags rnams ni kun gyis kyang mtshungs par klung rnag gis gang bar mthong ste/ gcig 'gas ni ma yin no/ /rnag gis gang ba ji lta ba bzhin du gcin dang / ngan skyugs dang / me ma mur dang / mchil ma dang / snabs kyis gang ba dang / dbyig pa dang / ral gri thogs pa'i mi dag gis srung ba yang de bzhin te/ sogs pa zhes bya bar bsdu'o/ /de ltar na don med par yang rnam par rig pa rnams kyi sems nges pa med par 'grub bo/ /bya byed rmi lam gnod pa 'dra/ /grub ces bya bar rig par bya'o/ dper na rmi lam na gnyis kyis gnyis phrad pa med par yang khu ba 'byung ba'i mtshan nyid ni rmi lam gyi gnod pa'o/ /de ltar re zhig dpe gzhan dang gzhan dag gis yul dang dus nges pa la sogs pa bzhin 'grub bo/ /thams cad sems can dmyal ba bzhin/ /grub ces bya bar rig par bya'o/ / sems can dmyal ba dag na yod pa dang mtshungs pas sems can dmyal ba bzhin no/ /ji ltar 'grub ce na/ dmyal ba'i srung ma sogs mthong dang / /de dag gis ni gnod phyir ro/ /dper na sems can dmyal ba dag na sems can dmyal ba'i sems can rnams kyis sems can dmyal ba'i srung ma la sogs pa mthong ste/ yul dang dus nges par 'grub po/ /khyi dang bya rog dang lcags kyi ri la sogs pa 'ong ba dang 'gro bar yang mthong ba ni sogs pa zhes bya bar bsdu ste/ thams cad kyis mthong gi / gcig 'gas ni ma yin no/ /de dag gis de dag la gnod pa yang 'grub ste/ dngos po la sems can dmyal ba'i srung ma la sogs pa med par yang rang gi las kyi rnam par smin pa mtshungs pa'i dbang phyir ro/ /de bzhin du gzhan yang yul dang dus nges pa la sogs pa bzhi po 'di dag thams cad grub par rig par bya'o/ /ci'i phyir sems can dmyal ba'i srung ma dang bya rog dang khyi la sogs pa de dag sems can du mi 'dod ce na/ mi rigs pa'i phyir ro/ /de dag ni sems can dmyal bar mi rigs te/ de bzhin du sdug bsngal des mi myong ba'i phyir ro/ /gcig la gcig gnod pa byed na ni 'di dag ni sems can dmyal ba pa dag go/ /'di dag ni sems can dmyal ba'i srung ma dag go zhes rnam par gzhag pa med par 'gyur ro/ byad gzugs dang bong tshod dang stobs mtshungs pa dag ni gcig la gcig gnod pa byed kyang ji lta bur 'jigs par mi 'gyur ro/ /lcags rab tu 'bar ba'i sa gzhi la tsha ba'i sdug bsngal yang mi bzod na ni ji ltar de na gzhan la gnod pa byed par 'gyur/ sems can dmyal ba pa ma yin pa dag sems can dmyal bar 'byung bar ga la 'gyur/ 'o na dud 'gro dag kyang ji ltar mtho ris su 'byung ste/ de bzhin du sems can dmyal bar yang dud 'gro dang yi dgas kyi bye brag sems can dmyal ba'i srung ma la sogs pa 'byung bar 'gyur ro zhe na/ ji ltar dud 'gro mtho ris su/ /'byung ba de ltar dmyal ba min/ /yi dags min te de lta bur/ /de yod sdug bsngal des mi myong / /dud 'gro gang dag mtho ris su 'byung ba de dag ni snod kyi 'jig rten na de'i bde ba myong bar 'gyur ba'i las kyis der 'byung ba dag ste/ de na yod ba'i bde ba so sor myong ngo / /sems can dmyal ba'i srung ma la sogs pa dag ni de bzhin du sems can dmyal ba'i sdug bsngal mi myong ngo / /de'i phyir dud 'gro dag der 'byung bar mi rigs so/ / yi dags kyi bye brag dag kyang ma yin no/ /sems can dmyal ba de dag gi las rnams kyis der 'byung ba'i bye brag dag 'di lta bur 'byung ste/ mdog dang byad gzugs dang bong tshod dang stobs kyi bye brag gang gis sems can dmyal ba'i srung ma la sogs pa'i ming thob pa'o/ /gang lag pa brkyang pa la sogs pa bya ba sna tshogs byed par snang ba de lta bur yang 'grub ste/ de dag 'jigs pa bskyed pa'i phyir ro/ /dper na lug lta bu'i ri dgas 'ong ba dang / 'gro ba dang / lcags kyi shal ma li'i nags tshal tsher ma kha thur du lta ba dang gyen du lta bar 'gyur ba lta bu ste/ de dag ni med pa yang ma yin no zhe na/ gal te de'i las kyis der 'byung ba dag ni byung ba dang / de bzhin 'gyur bar 'dug na go/ /rnam par shes par cis mi 'dod/ /de'i las rnams kyis der rnam par shes pa nyid der de lta bur 'gyur ba ci'i phyir mi 'dod la/ ci'i phyir 'byung ba rnams su rtog / gzhan na las kyi bag chags la/ /'bras bu dag ni gzhan du rtog /gang na bag chags yod pa der/ /ci'i phyir na 'dod mi bya/ /sems can dmyal ba pa rnams kyi las gang gis der 'byung ba dag de lta bur 'byung ba dang / 'gyur bar yang rtog pa'i las de'i bag chags de dag nyid kyi rnam par shes pa'i rgyud la gnas te/ gzhan ma yin na bag chags de gang na yod pa de dag nyid la de'i 'bras bu rnam par shes par gyur pa de 'dra bar ci'i phyir mi 'dod la/ gang na bag chags med pa der de'i 'bras bu rtog pa 'di la gtan tshigs ci yod/ smras pa/ lung gi gtan tshigs yod de/ gal te rnam par shes pa nyid gzugs la sogs par snang gi/ gzugs la sogs pa'i don ni med na gzugs la sogs pa'i skye mched yod par ni bcom ldan 'das kyis gsung bar mi 'gyur ro zhe na/ 'di ni gtan tshigs ma yin te/ /'di ltar/ gzugs sogs skye mched yod par ni/ /des 'dul ba yi skye bo la/ /dgongs pa'i dbang gis gsungs pa ste/ /brdzus te byung ba'i sems can bzhin/ /dper na bcom ldan 'das kyis brdzus te byung ba'i sems can bzhin yod do/ /zhes gsungs ba yang phyi ma la sems kyi rgyud rgyun mi 'chad pa la dgongs nas dgongs pa'i dbang gis gsungs pa ste/ 'di na bdag gam sems can med/ /chos 'di rgyu dang bcas las byung / /zhes gsungs pa'i phyir ro/ /de bzhin du bcom ldan 'das kyis gzugs la sogs pa'i skye mched yod par gsungs pa yang de bstan pas 'dul ba'i skye bo'i ched du ste/ bka' de ni dgongs pa can no/ /'dir ci las dgongs she na/ rang gi sa bon gang las su/ /rnam rig snang ba gang byung ba/ /de dag de yi skye mched ni/ /rnam pa gnyis su thub pas gsungs/ /'di skad du bstan par 'gyur zhe na/ gzugs su snang ba'i rnam par rig pa rang gi sa bon 'gyur ba'i bye brag tu gyur pa gang las byung ba'i sa bon de dang snang ba gang yin pa de dang de dag ni de'i mig dang / gzugs kyi skye mched du bcom ldan 'das kyis go rims bzhin du gsungs so/ /de bzhin du reg byar snang ba'i rnam par rig pa'i bar du rang rang gi sa bon 'gyur ba'i bye brag tu gyur pa'i sa bon gang las byung ba'i sa bon de dang / snang ba gang yin pa de dang de dag ni bcom ldan 'das kyis de'i lus dang reg bya'i skye mched du go rims bzhin du gsungs te/ 'di ni 'dir dgongs pa'o/ /de ltar dgongs pa'i dbang gis bstan pa la yon tan ci yod ce na/ de ltar gang zag la bdag med par 'jug par 'gyur ro/ /de ltar bshad na gang zag la bdag med par 'jug par 'gyur te/ drug po gnyis las rnam par shes pa drug 'byung gi/ lta ba po gcig pu nas reg pa po'i bar du gang yang med par rig nas gang dag gang zag la bdag med par bstan pas 'dul ba de dag gang zag la bdag med par 'jug go/ /gzhan du yang / bstan pa chos la bdag med par 'jug 'gyur/ /gzhan du yang zhes bya ba ni rnam par rig pa tsam du bstan pa'o/ /ji ltar chos la bdag med par 'jug ce na/ rnam par rig pa tsam 'di nyid gzugs la sogs pa'i chos su snang bar 'byung ste/ gzugs la sogs pa'i mtshan nyid kyi chos gang yang med par rig nas 'jug go / /gal te chos rnam pa thams cad du med na rnam par rig pa tsam zhes bya ba de yang med pas de ji ltar rnam par gzhag ce na/ chos ni rnam pa thams cad du med pa ma yin pas de ltar chos la bdag med par 'jug par 'gyur te/ brtags pa'i bdag nyid kyis/ gang byis pa rnams kyis chos rnams kyi rang bzhin kun brtags pa'i bdag nyid des de dag bdag med kyi sangs rgyas kyi yul gang yin pa brjod du med pa'i bdag nyid kyis ni med pa ma yin no/ /de ltar rnam par rig pa tsam yang rnam par rig pa gzhan gyis kun brtags pa'i bdag nyid kyis bdag med par rtogs pa'i phyir rnam par rig pa tsam du rnam par gzhag pas chos thams cad la chos la bdag med par 'jug pa yin gyi/ yod pa de la yang rnam pa thams cad du skur pas ni ma yin no/ /gzhan du na ni rnam par rig pa gzhan yang rnam par rig pa gzhan gyi don du 'gyur bas rnam par rig pa tsam nyid du mi 'grub ste/ rnam par rig pa rnams don dang ldan pa'i phyir ro/ /bcom ldan 'das kyis dgongs pa 'dis gzugs la sogs pa'i skye mched yang par gsungs kyi/ gzugs la sogs pa gang dag yod bzhin du de dag rnam par rig pa so so'i yul du mi 'gyur ro zhes bya ba de ji ltar rtogs par bya zhe na/ 'di ltar de ni gcig na'ang yul min la/ /phra rab rdul du du ma'ang min/ /de dag 'dus pa'ang ma yin te/ /'di ltar rdul phran mi 'grub phyir/ /ji skad du bstan par 'gyur zhe na/ gang gzugs la sogs pa'i skye mched gzugs la sogs ba rnam par rig pa so so'i yul yin du zin na de ni gcig pu zhig yin te/ ji ltar bye brag pa rnams kyis cha shas can gyi ngo bor brtag pa'i lta bu'am/ rdul phra rab du ma 'am rdul phra rab de dag nyid 'dus pa zhig tu 'gyur grang na/ gcig pu de ni yul ma yin te/ cha shas rnams las gzhan pa cha shas can gyi ngo bo gang la'ang mi 'dzin pa'i phyir ro/ /du ma'ang yul ma yin te/ rdul phra rab so so la mi 'dzin pa'i phyir ro/ /de dag 'dus pa yang yul ma yin te/ 'di ltar rdul phra rab rdzas gcig tu mi 'grub pa'i phyir ro/ /ji ltar mi 'grub ce na 'di ltar/ /drug gis cig car sbyar bas na/ /phra rab rdul cha drug tu 'gyur/ /phyogs drug nas rdul phra rab drug gis cig car du sbyar na ni rdul phra rab cha drug tu 'gyur te/ gcig gi go gang yin pa der gzhan mi 'byung ba'i phyir ro/ /drug po dag kyang go gcig na/ /gong bu rdul phran tsam du 'gyur/ /ji ste rdul phra rab gcig gi go gang yin pa de nyid du drug po rnams kyi go yang yin na ni des na thams cad go gcig pa'i phyir gong bu thams cad rdul phra rab tsam du 'gyur te/ phan tshun tha dad pa med pa'i phyir gong bu gang yang snang bar mi 'gyur ro/ /kha che'i bye brag tu smra ba rnams nyes pa 'di 'byung du 'ong ngo zhes te/ rdul phra rab rnams ni cha shas med pa'i phyir sbyor ba ma yin gyi / 'dus pa dag ni phan tshun sbyor ro zhes zer ba de dag la 'di skad du/ rdul phra rab rnams 'dus pa gang yin pa de de dag las don gzhan rnams ma yin no zhes brjod par bya'o/ /rdul phran sbyor ba med na ni/ /de 'dus yod pa de gang gis/ /sbyor ba zhes bya bar bsnyegs so/ /cha shas yod ba ma yin pas/ /de sbyor mi 'grub ma zer cig /ji ste 'dus pa dag kyang phan tshun mi sbyor ro zhe na/ rdul phra rab rnams ni cha shas med pa'i phyir sbyor ba mi 'grub bo zhes ma zer cig /'dus pa cha shas dang bcas pa yang sbyor bar khas mi len pa'i phyir ro/ /de bas rdul phra rab rdzas gcig pu mi 'grub bo/ /rdul phra rab sbyor bar 'dod kyang rung mi 'dod kyang rung ste/ gang la phyogs cha tha dad yod/ /de ni gcig tu mi rung ngo / /rdul phra rab kyi shar phyogs kyi cha yang gzhan pa nas 'og gi cha'i bar du yang gzhan te/ phyogs kyi cha tha dad na de'i bdag nyid kyi rdul phra rab gcig pur ji ltar rung / sgrib dang sgrib par ji ltar 'gyur/ /gal te rdul phra rab re re la phyogs kyi cha tha dad pa med na ni nyi ma shar ba'i tshe ngos gzhan na ni grib ma 'bab par ji ltar 'gyur te/ de la ni gang du nyi ma mi 'bab pa'i phyogs gzhan med do/ /gal te phyogs kyi phyogs tha dad par mi 'dod na rdul phra rab la rdul phra rab gzhan gyis sgrib par yang ji ltar 'gyur/ rdul phra rab gang la yang cha shas gzhan med na gang du 'ong ba'i phyogs la gcig la gcig thogs par 'gyur/ thogs pa med na ni thams cad go gcig tu gyur pas 'dus pa thams cad rdul phra rab tsam du 'gyur te/ de ni bshad zin to/ /grib ma dang sgrib pa rdul phra rab kyi ma yin yang / ci gong bu'i yin pa de ltar yang mi 'dod dam/ rdul phra rab rnams la gong bu gzhan zhig yin par 'dod dam ci na de dag de'i yin/ smras pa/ yin no/ /gong bu gzhan min de de'i min/ /gal te rdul phra rab rnams las gong bu gzhan ma yin na de dag de'i ma yin par grub pa yin no/ /yongs su rtogs pa 'di ni gnas pa'i khyad par te/ gzugs la sogs pa'i mtshan nyid ni ma bkag na rdul phra rab ce'am/ 'dus ba zhes bsam pa 'dis ci zhig bya zhe na/ de dag gi mtshan nyid gang yin / mig la sogs pa'i yul nyid dang / /sngon po la sogs pa nyid do/ /gang mig la sogs pa'i yul sngon po dang / ser po la sogs pa 'dod pa de ci rdzas gcig pu zhig gam/ 'on te du ma zhig ces de dpyad par bya'o/ /'dis ci zhig bya zhe na/ du ma'i nges pa ni bshad zin to/ /gcig na rim gyis 'gro ba med/ /zin dang ma zin cig car med/ /ris chad du mar gnas pa dang / /mig gis mi sod phra ba'ang med/ /gal te mig gi yul sngon po dang ser po la sogs pa gang yin pa de ris su ma chad de rdzas gcig par rtogs nas la rim gyis 'gro bar mi 'gyur te/ gom pa gcig bor bas thams cad du son pa'i phyir ro/ /tshu rol gyi cha zin la pha rol gyi cha ma zin pa cig car du mi 'gyur te/ de'i tshe zin pa dang ma zin pa de mi rigs so/ /glang po che dang rta la sogs pa'i ris su chad pa du ma gcig na 'dug par mi 'gyur te/ gcig gang na 'dug pa de nyid na gzhan yang 'dug na de dag ris su chad par ji ltar rung / de gnyis kyis gang non pa dang ma non pa de dag gcig tu ji ltar rung ste/ bar na de dag gis stong pa gzung du yod pa'i phyir ro/ /gal te mtshan nyid tha dad pa nyid kyis rdzas gzhan kho nar rtog gi gzhan du ma yin na go/ /chu'i skye bo phra mo rnams kyang chen po dag dang gzugs mtshungs pas mig gis mi sod par mi 'gyur ro/ / de'i phyir nges par rdul phra rab tha dad par brtag par bya ste/ de dag gcig tu mi 'grub bo/ /de ma grub pas gzugs la sogs pa yang mig la sogs pa'i yul nyid du mi 'grub ste/ rnam par rig pa tsam du grub pa yin no/ /tshad ma'i dbang gis na yod dam med pa dmigs kyis dbye bar 'gyur la/ tshad ma thams cad kyi nang na yang mngon sum gyi tshad ma ni mchog yin no/ /don de med na 'di ni bdag gi mngon sum mo snyam pa blo 'di ji ltar 'byung zhe na/ mngon sum blo ni rmi sogs bzhin/ /don med par yang zhes sngar bstan pa nyid do/ /de yang gang tshe de yi tshe/ /khyod kyi don de min snang na/ /de ni mngon sum ji ltar 'dod/ /gang gi tshe yul 'di nyid ni bdag gi mngon sum mo snyam du mngon sum gyi blo de byung ba de'i tshe khyod kyi don de mi snang ste/ yid kyi rnam par shes pas yongs su bcad pa dang / mig gi rnam par shes pa yang de'i tshe 'gags pa'i phyir ro/ /lhag par yang skad cig mar smra bas de mngon sum du ji ltar 'dod/ de ltar na de'i tshe gzugs dang ro la sogs pa de dag ni 'gags zin to/ myong ba med par yid kyi rnam par shes pa dran par mi 'gyur bas don gdon mi za bar myong bar 'gyur te/ de ni da ma mthong ba yin no/ /de ltar de'i yul gzugs la sogs pa mngon sum du 'dod do zhe na/ myong ba ni don dran pa yin no/ /zhes de ma grub ste/ 'di ltar/ dper na der snang rnam rig bzhin/ /bshad zin / dper na don med par don du snang ba mig gi rnam par shes pa la sogs pa'i rnam par rig pa 'byung ba de bzhin te bshad zin to/ /de las dran par zad/ rnam par rig pa de las dran pa dang mtshungs par ldan pa der snang ba nyid gzugs la sogs pa la rnam par rtog pa yid kyi rnam par rig pa 'byung ste/ dran pa byung ba las don myong bar mi 'grub bo/ dper na rmi lam gyi rnam par rig pa'i yul yod pa ma yin pa de bzhin du/ gal te gnyid kyis ma log pa'i tshe na yang de ltar yin na ni de kho na bzhin du de med par 'jig rten rang rang gis khong du chud pa'i rigs na/ de ltar yang ma yin te/ de'i phyir rmi lam bzhin du don dmigs pa thams cad don med pa ma yin no zhe na/ de ni gtan tshigs su mi rung ste/ 'di ltar/ rmi lam mthong ba yul med par/ /ma sad bar du rtogs ma yin/ /de ltar log par rnam par rtog pa la goms pa'i bag chags kyi gnyid kyis log pa'i 'jig rten ni rmi lam bzhin du yang dag pa ma yin pa'i don mthong te / ma sad kyi bar du de med par ji lta ba bzhin du rtogs pa ma yin gyi/ gang gi tshe de'i gnyen po 'jig rten las 'das pa rnam par mi rtog pa'i ye shes thob nas sad par gyur pa de'i tshe de'i rjes las thob pa dag pa 'jig rten pa'i ye shes de mngon du gyur nas yul med par ji lta ba bzhin du khong du chud de de ni mtshungs so/ /gal te rang gi rgyud gyur pa'i khyad par nyid las sems can rnams kyi don du snang ba'i rnam par rig pa 'byung gi / don gyi khyad par las ma yin na/ brten pa de dang bshad pa de med pas sdig pa'i grogs po dang / dge ba'i bshes gnyen la brten pa dang / dam pa dang dam pa ma yin pa'i chos mnyan pa las sems can rnams kyis rnam par rig pa nges pa ji ltar 'grub par 'gyur/ gcig la gcig gi dbang gis na/ /rnam par rig pa phan tshun nges/ /sems can thams cad kyi rnam par rig pa phan tshun gyi dbang gis phan tshun du rnam par rig pa rnams nges par 'gyur te/ ci rigs su sbyar ro/ /gcig la gcig ces bya ba ni phan tshun no/ /de'i phyir rgyud gzhan gyi rnam par rig pa'i khyad par las rgyud gzhan la rnam par rig pa'i khyad par 'byung gi don gyi khyad par las ni ma yin no/ /dper na rmi lam gyi rnam par rig pa'i don med ba bzhin du gal te gnyid kyis ma log pa'i yang de lta na gnyid kyis log pa dang ma log pa na dge ba dang mi dge ba'i las kun tu spyod pa'i 'bras bu phyi ma la 'dod pa dang mi 'dod pa 'dra bar ci'i phyir mi 'gyur/ sems ni gnyid kyis non pas na/ /de phyir rmi dang 'bras mi mtshungs/ /de ni 'dir rgyu yin gyi don yod pa ni ma yin no/ /gal te 'di dag rnam par rig pa tsam du zad na gang la yang lus dang ngag kyang med pas shan pa la sogs pas gsod pa na lug la sogs pa 'chi bar ji ltar 'gyur/ 'chi ba de des ma byas na ni shan pa la sogs pa srog gcod pa'i kha na ma tho ba dang ldan par ji ltar 'gyur zhe na/ 'chi ba gzhan gyi rnam rig gi/ /bye brag las de dper bya na/ /'dre la sogs pa'i yid dbang gis/ /gzhan gyi dran nyams 'gyur sogs bzhin/ /dper na 'dre la sogs pa'i yid kyi dbang gis gzhan dag gi dran pa nyams pa dang / rmi ltas su mthong ba dang / 'byung po'i gdon phab par 'gyur ba dang / rdzu 'phrul dang ldan pa'i yid kyi dbang gis te/ dper na 'phags pa kA t+yA'i bu chen po'i byin gyi brlabs kyis sa ra Nas rmi ltas su mthong ba dang / drang srong dgon pa pa'i yid 'khrugs pas thags zangs ris bzhin du gzhan gyi rnam par rig pa'i bye brag gis sems can gzhan gyi srog gi dbang po dang mi mthun pa'i 'gyur ba 'ga' 'byung ste de bskal pa 'dra ba'i rgyud kyi rgyun chad pa zhes bya ba 'chi bar rig par bya'o/ /drang srong khros pas dan ta ka'i/ /dgon pa ji ltar stongs par 'gyur/ /gal te gzhan gyi rnam par rig pa'i bye brag gis sems can dag 'chi bar mi 'dod na/ yid kyi nyes pa kha na ma tho ba chen po dang bcas pa nyid du bsgrub pa na/ bcom ldan 'das kyis khyim bdag nye ba 'khor la bka' stsal pa/ khyim bdag khyod kyis dan ta ka'i dgon pa dang / ka ling ka'i dgon pa dang ma tang ka'i dgon pa de dag ci zhig gis stongs pa dang / gtsang mar gyur pa ci thos zhes smras pa dang / des gau ta ma drang srong rnams khros pas de ltar gyur ces thos so zhes gsol to/ /yid nyes kha na ma tho cher/ /ji ltar de yis 'grub par 'gyur/ /gal te 'di ltar rtog ste/ de la dga' ba mi ma yin pa de dag gis de na gnas pa'i sems can rnams kha btag gi/ drang srong rnams kyis yid 'khrugs pas dogs pa ni ma yin no zhe na/ de ltar na las des lus dang ngag gi nyes pa rnams pas yid kyi nyes pa ches kha na ma tho ba chen po dang bcas par 'grub par ji ltar 'gyur te/ de'i yid 'khrugs pa tsam gyis sems can de snyed 'chi bar 'grub bo/ /gal te 'di dag rnam par rig pa tsam du zad na gzhan gyi sems rig pas ci gzhan gyi sems shes sam 'on te mi shes she na/ 'dis ci zhig bya/ gal te mi shes na ni gzhan gyi sems rig pa zhes kyang ci skad du bya/ ji ste shes na yang / gzhan sems rig pas shes pa ni/ /don bzhin ma yin ji ltar dper/ /rang sems shes pa/ de yang ji ltar don ji lta ba bzhin du ma yin zhe na/ sangs rgyas kyi spyod yul ji bzhin ma shes phyir/ ji ltar de brjod du med pa'i bdag nyid du sangs rgyas kyi spyod yul du gyur pa de ltar des ma shes pa'i phyir de gnyi ga yang don ji lta ba bzhin ma yin te/ log par snang ba'i phyir ro/ /gzung ba dang 'dzin pa'i rnam par rtog pa ma spangs pa'i phyir ro/ /rnam par rig pa tsam gyis rab tu dbye ba rnam par nges pa mtha' yas la gting mi dpogs shing zab pa'i/ rnam rig tsam du grub pa 'di/ /bdag gis bdag gi mthu 'dra bar/ /byas kyi de yi rnam pa kun/ /bsam yas/ bdag 'dra bas rnam pa thams cad ni bsam par mi nus te/ rtog ge'i spyod yul ma yin pa'i phyir ro/ /'o na de rnam pa thams cad du su'i spyod yul snyam pa la/ sangs rgyas spyod yul lo zhes bya ba smos te/ de ni sangs rgyas bcom ldan 'das rnams kyi spyod yul te/ shes bya thams cad kyi rnam pa thams cad la mkhyen pa thogs pa mi mnga' ba'i phyir ro/ /slob dpon dbyig gnyen gyis mdzad pa nyi shu pa'i 'grel pa rdzogs so// //rgya gar gyi mkhan po dzi na mi tra dang / shI len dra bo d+hi dang / zhu chen gyi lo tsA ba ban de ye shes sdes zhus te gtan la phab pa/ /

CLOSE WINDOW