བོད་ཡིག

e-texts based on the ACIP/ALL Input

/rgya gar skad du/ yo gA tsAr+ya b+hU mi/ bod skad du/ rnal 'byor spyod pa'i sa/ bam po dang po/ tshig gi mnga' bdag 'jam dpal gzhon nur gyur pa la phyag 'tshal lo/ / rnal 'byor spyod pa'i sa gang zhe na/ de ni sa bcu bdun du blta bar bya ste/ bcu bdun gang zhe na/ spyi sdom ni/ rnam shes lnga dang ldan pa dang / /yid kyi sa dang gzhan gsum ste/ /rtog dpyod bcas la sogs pa dang / /ting 'dzin bcas dang ma yin dang / /sems yod pa dang sems med dang / /thos dang bsams dang bsgoms pa dang / /de bzhin theg pa gsum ldan dang / /phung por bcas dang phung med gzhan/ /rnam par shes pa'i tshogs lnga dang ldan pa'i sa dang / yid kyi sa dang / rtog pa dang bcas shing dpyod pa dang bcas pa'i sa dang / rtog pa med cing dpyod pa tsam gyi sa dang / /rtog pa yang med la dpyod pa yang med pa'i sa dang / mnyam par bzhag pa'i sa dang / mnyam par ma bzhag pa'i sa dang / sems yod pa'i sa dang / sems med pa'i sa dang / thos pa las byung ba'i sa dang / bsams pa las byung ba'i sa dang / bsgoms pa las byung ba'i sa dang / nyan thos kyi sa dang / rang sangs rgyas kyi sa dang / byang chub sems dpa'i sa dang / phung po dang bcas pa'i sa dang / phung po med pa'i sa ste/ sa bcu bdun po de dag ni mdor na rnal 'byor spyod pa'i sa zhes bya'o/ /rnam par shes pa'i tshogs lnga dang ldan pa'i sa gang zhe na/ rnam par shes pa'i tshogs lnga ste/ ngo bo nyid dang / de dag gi gnas dang / de dag gi dmigs pa dang / de dag gi grogs dang / de dag gi las ni mdor na rnam par shes pa'i tshogs lnga dang ldan pa'i sa'o/ /rnam par shes pa'i tshogs lnga gang zhe na/ mig gi rnam par shes pa dang / rna ba dang / sna dang / lce dang / lus dang / yid kyi rnam par shes pa'o/ /mig gi rnam par shes pa gang zhe na/ gang mig la brten nas gzugs so sor rnam par rig pa'o/ /mig gi rnam par shes pa'i gnas gang zhe na/ mig ni lhan cig 'byung ba'i gnas so/ /yid ni de ma thag pa'i gnas so/ /sa bon thams cad pa lus len par byed pa/ rnam par smin pa bsdus pa kun gzhi rnam par shes pa ni sa bon gyi gnas so/ /de yang mdor bsdu na gnas rnam pa gnyis su 'gyur ro / /gzugs can dang gzugs can ma yin pa'o/ / de la mig ni gzugs can no/ /de las gzhan pa ni gzugs can ma yin pa'o/ /mig gang zhe na/ gang 'byung ba chen po bzhi po dag rgyur byas pa mig gi rnam par shes pa'i rten po gzugs dang ba ste/ bstan du med la thogs pa dang bcas pa'o/ /yid gang zhe na/ gang mig gi rnam par shes pa'i sngon rol du 'das ma thag pa'i rnam par shes pa'o/ /sa bon thams cad pa'i rnam par shes pa gang zhe na/ sngon gyi spros pa/ dga' ba rgyur gyur pa la brten nas sa bon thams cad pa rnam par smin pa mngon par 'grub pa gang yin pa'o/ /mig gi rnam par shes pa'i dmigs pa gang zhe na/ gzugs gang bstan du yod cing thogs pa dang bcas pa'o/ /de yang rnam pa du ma yod do / /mdor na kha dog dang dbyibs dang rnam par rig byed do/ /kha dog gang zhe na/ 'di lta ste/ sngon po dang / ser po dang / dmar po dang / dkar po dang / /grib ma dang / nyi ma dang / snang ba dang / mun pa dang / sprin dang / du ba dang / rdul dang / khug rna dang / nam mkha' kha dog gcig pa'o/ /dbyibs gang zhe na/ 'di lta ste/ ring po dang / thung du dang / lham pa dang / zlum po dang / rdul phra mo dang / rags pa dang / phyal le ba dang / phyal le ba ma yin pa dang / mthon po dang / dma' ba'o/ /rnam par rig byed gang zhe na/ 'di lta ste/ len pa dang / 'jog pa dang / bskum pa dang / brkyang ba dang / 'greng ba dang / 'dug pa dang / nyal ba dang / 'gro ba dang / ldog pa dang / de la sogs pa'o/ /yang kha dog gang zhe na/ gang gzugs dang 'dra ba mig gi rnam par shes pa'i spyod yul du gyur pa'o/ /dbyibs gang zhe na/ gang gzugs rgyas par ring po la sogs par yongs su bcad pa'i rnam pa'o/ /rnam par rig byed gang zhe na/ rgyas pa'i gzugs skyes pa 'gags pa de nyid mi mthun pa'i rgyus skyes pa'i phyogs su mi 'byung ba dang / de las gzhan pa'i phyogs su yang / bar du ma chod pa'am/ bar du chod pa dang bcas pa'am/ nye ba'am ring bar 'byung ba dang / phyogs de nyid du yang mi 'gyur ba 'byung ba ni rnam par rig byed ces bya'o/ /de la kha dog ni snang ba dang gsal ba dang zhes bya ba'i rnam grangs su gtogs pa'o/ /dbyibs ni rgyas pa dang / ring po dang / thung du zhes bya ba la sogs pa'i rnam grangs su gtogs pa'o/ /rnam par rig byed ni las dang byed pa dang / spyod pa dang / g.yo ba dang / yongs su g.yo ba zhes bya ba'i rnam grangs su gtogs pa'o/ /kha dog dang dbyibs dang rnam par rig byed thams cad kyang mig gi spyod yul dang / mig gi yul dang / mig gi rnam par shes pa'i spyod yul dang / mig gi rnam par shes pa'i yul dang / mig gi rnam par shes pa'i dmigs pa dang / yid kyi rnam par shes pa'i spyod yul dang / yid kyi rnam par shes pa'i yul dang / yid kyi rnam par shes pa'i dmigs pa zhes bya ba'i rnam grangs su gtogs pa'o/ /yang de nyid kha dog bzang po dang / kha dog ngan pa dang / de gnyi ga'i bar ma dor gnas pa kha dog lta bu'o/ /grogs gang zhe na/ de dang lhan cig 'byung zhing mtshungs par ldan pa sems las byung ba'i chos rnams te/ 'di lta ste/ yid la byed pa dang / reg pa dang / tshor ba dang / 'du shes dang / sems pa'o/ /sems las byung ba'i chos gzhan gang dag mig gi rnam par shes pa dang lhan cig 'byung zhing mtshungs par ldan pa de dag ni/ dmigs pa gcig pa rnam pa du ma ste/ lhan cig 'byung ba dag kyang re re 'byung la/ thams cad kyang rang gi sa bon las nges par 'byung ba/ mtshungs par ldan pa/ dmigs pa dang bcas pa/ rnam pa dang bcas pa/ gnas dang bcas pa dag go/ /las gang zhe na/ de ni rnam pa drug tu blta bar bya ste/ thog ma kho nar de rang gi yul la dmigs pa rnam par rig pa'i yul las dang / yang rang gi mtshan nyid rnam par rig pa dang / yang da ltar gyi dus rnam par rig pa dang / yang skad cig gcig rnam par rig pa dang / yang rnam pa gnyis kyis yid kyi rnam par shes pa'i rjes su 'jug pa ste/ dge ba nyon mongs pa can gyi rjes su 'jug pa dang / las kun las slong ba'i rjes su 'jug pa dang / yang sdug pa dang mi sdug pa'i 'bras bu yongs su 'dzin pa ste las drug pa'o/ /rna ba'i rnam par shes pa gang zhe na/ gang rna ba la brten nas sgra so sor rnam par rig pa'o/ /gnas gang zhe na/ rna ba ni lhan cig 'byung ba'i gnas so/ /yid ni de ma thag pa'i gnas so/ /sa bon thams cad pa kun gzhi rnam par shes pa de nyid ni sa bon gyi gnas so/ /rna ba gang zhe na/ gang 'byung ba chen po bzhi po dag rgyur byas pa/ rna ba'i rnam par shes pa'i rten po gzugs dang ba ste/ bstan du med la thogs pa dang bcas pa'o/ /yid dang sa bon gyi rnam par dbye ba ni snga ma bzhin no/ /dmigs pa gang zhe na/ sgra rnam pa du ma bstan du med la thogs pa dang bcas pa dag ste/ 'di lta ste/ dung gi sgra dang / rnga bo che'i sgra dang / rdza rnga'i sgra dang / gar byed pa'i sgra dang / glu'i sgra dang / rol mo'i sgra dang / rnga bo che'i sgra dang / bud med kyi sgra dang / skyes pa'i sgra dang / rlung dang shing gi sgra dang / gsal ba dang / mi gsal ba dang / don dang ldan pa dang / don med pa dang / chung ngu dang / 'bring dang / chen po dang / chu klung gi sgra dang / ca co'i sgra dang / lung nod pa'i sgra dang / kha ton byed pa'i sgra dang / 'chad pa'i sgra dang / 'bel ba'i gtam dang / rnam par gtan la 'bebs pa'i sgra dang / de lta bu dang mthun pa'i sgra mang po dag go/ /de yang zin pa'i 'byung ba chen po'i rgyu las byung ba dang / ma zin pa'i 'byung ba chen po'i rgyu las byung ba dang / zin pa dang ma zin pa'i 'byung ba chen po'i rgyu las byung ba'o / /de la dang po ni gang nang rkyen du gyur pa nyid do/ /gnyis pa ni gang phyi rol rkyen du gyur pa nyid do/ /gsum pa ni gang nang dang phyi rkyen du gyur pa nyid do/ /de yang yid du 'ong ba dang / yid du mi 'ong ba dang / de gnyi ga las bzlog pa'o/ /de la sgra dang / dbyangs dang / nga ro dang / nges pa'i tshig dang / sgra skad dang / tshig gi rnam par rig byed ni rnam grangs su gtogs pa'o/ /rna ba'i spyod yul dang / rna ba'i yul dang / rna ba'i rnam par shes pa'i spyod yul dang / rna ba'i rnam par shes pa'i yul dang / rna ba'i rnam par shes pa'i dmigs pa dang / yid kyi rnam par shes pa'i spyod yul dang / yid kyi rnam par shes pa'i yul dang / yid kyi rnam par shes pa'i dmigs pa rnams ni rnam grangs su gtogs pa'o/ /grogs dang las ni mig gi rnam par shes pa'i rang bzhin du rig par bya'o/ /sna'i rnam par shes pa gang zhe na/ gang sna la brten nas dri so sor rnam par rig pa'o/ /gnas gang zhe na/ sna ni lhan cig 'byung ba'i gnas so/ /yid ni de ma thag pa'i gnas so/ /sa bon thams cad pa kun gzhi rnam par shes pa de nyid ni sa bon gyi gnas so/ /sna gang zhe na/ gang 'byung ba chen po bzhi po dag rgyur byas pa/ sna'i rnam par shes pa'i rten po gzugs dang ba ste/ bstan du med la thogs pa dang bcas pa'o/ /yid dang sa bon gyi rnam par dbye ba ni snga ma bzhin no/ /dmigs pa gang zhe na/ dri rnam pa du ma bstan du med la thogs pa dang bcas pa dag ste/ dri zhim pa'am/ dri nga ba'am/ dri mnyam pa bsnam par bya ba 'di lta ste/ rtsa ba'i dri dang / snying po'i dri dang / lo ma'i dri dang / me tog gi dri dang / 'bras bu'i dri la sogs pa dri mang po dag go/ /de la dri dang / bsnam pa dang / bsnam par bya ba dang / kun tu bsnam par bya ba la sogs pa ni rnam grangs su gtogs pa'o/ /sna'i spyod yul dang / sna'i yul dang / sna'i rnam par shes pa'i spyod yul dang / sna'i rnam par shes pa'i yul dang / sna'i rnam par shes pa'i dmigs pa dang / yid kyi rnam par shes pa'i spyod yul dang / yid kyi rnam par shes pa'i yul dang / yid kyi rnam par shes pa'i dmigs pa ni rnam grangs su gtogs pa'o/ /grogs dang las ni snga ma bzhin du rig par bya'o/ /lce'i rnam par shes pa gang zhe na/ gang lce la brten nas so sor rnam par rig pa'o/ /gnas gang zhe na/ lce ni lhan cig 'byung ba'i gnas so/ /yid ni de ma thag pa'i gnas so/ /sa bon thams cad pa kun gzhi rnam par shes pa de nyid ni sa bon gyi gnas so/ /lce gang zhe na/ gang 'byung ba chen po bzhi po dag rgyur byas pa/ lce'i rnam par shes pa'i rten po gzugs dang ba ste/ bstan du med la thogs pa dang bcas pa'o/ /yid dang sa bon gyi rnam par dbye ba ni snga ma bzhin no/ /dmigs pa gang zhe na/ ro rnam pa du ma bstan du med la thogs pa dang bcas pa bdag ste/ de dag kyang ro kha ba dang / skyur ba dang / tsha ba dang / bska ba dang / lan tshwa'i ro dang / mngar ba ste/ yid du 'ong ba dang / yid du mi 'ong ba dang / btang snyoms kyi gnas myang bar bya ba dag go/ /de la ro dang / myang bar bya ba dang / mid par bya ba dang / bza' ba dang / btung ba dang / bldag pa dang / gzhib pa dang / nye bar spyad pa la sogs pa ni rnam grangs su gtogs pa'o/ /lce'i spyod yul dang / lce'i yul dang / lce'i rnam par shes pa'i spyod yul dang / lce'i rnam par shes pa'i yul dang / lce'i rnam par shes pa'i dmigs pa dang / yid kyi rnam par shes pa'i spyod yul dang / yid kyi rnam par shes pa'i yul dang / yid kyi rnam par shes pa'i dmigs pa ni rnam grangs su gtogs pa'o/ /grogs dang las ni snga ma bzhin du rig par bya'o/ /lus kyi rnam par shes pa gang zhe na/ gang lus la brten nas reg bya so sor rnam par rig pa'o/ /gnas gang zhe na/ lus ni lhan cig 'byung ba'i gnas so/ /yid ni de ma thag pa'i gnas so/ /sa bon thams cad pa kun gzhi rnam par shes pa de nyid ni sa bon gyi gnas so/ /lus gang zhe na/ gang 'byung ba chen po bzhi po dag rgyur byas pa lus kyi rnam par shes pa'i rten po gzugs dang ba ste/ bstan du med la thogs pa dang bcas pa'o/ /yid dang sa bon gyi rnam par dbye ba ni snga ma bzhin no/ /dmigs pa gang zhe na/ reg bya rnam pa bstan du med la thogs pa dang bcas pa dag ste/ 'di lta ste/ sa dang / chu dang / me dang / rlung dang / yang ba nyid dang / lci ba nyid dang / 'jam pa nyid dang / rtsub pa nyid dang / grang ba dang / bkres pa dang / skom pa dang / ngoms pa dang / nyams stobs dang / nyam chung ba dang / nad dang / rga ba dang / 'chi ba dang / g.ya' ba dang / brgyal ba dang / 'dred pa dang / ngal ba dang / ngal sos pa dang / nem nem po nyid dang / mdangs bzang ba dang / de lta bu dang mthun pa'i reg bya rnam pa mang po dag go/ /de yang reg na bde ba dang / reg na sdug bsngal ba dang / btang snyoms kyis gnas kyi reg par bya'o/ /de la reg bya dang / reg pa dang / reg par bya ba dang / rtsub pa dang / rlan pa dang / g.yo ba dang / dro ba la sogs pa ni rnam grangs su gtogs pa'o/ /lus kyi spyod yul dang / lus kyi yul dang / lus kyi rnam par shes pa'i spyod yul dang / lus kyi rnam par shes pa'i yul dang / lus kyi rnam par shes pa'i dmigs pa dang / yid kyi rnam par shes pa'i spyod yul dang / yid kyi rnam par shes pa'i yul dang / yid kyi rnam par shes pa'i dmigs pa ni rnam grangs su gtogs pa'o/ /grogs dang las ni snga ma bzhin du rig par bya'o/ /de la mig kyang yongs su ma nyams pa dang / gzugs kyang snang bar gyur du zin kyang / de dang 'byung ba yid la byed pa yang nye bar gnas par ma gyur na/ de las skyes pa'i mig gi rnam par shes pa 'byung bar mi 'gyur te/ 'di ltar mig kyang yongs su ma nyams la/ gzugs kyang snang bar gyur cing / de dang 'byung ba yid la byed pa yang nye bar gnas par gyur na/ de'i phyir de las skyes pa'i mig gi rnam par shes pa 'byung bar 'gyur ro/ /mig gi rnam par shes pa ji lta ba bzhin du/ rna ba dang / sna dang / lce dang / lus kyi rnam par shes pa rnams la yang de bzhin du blta bar bya'o/ /de la mig gi rnam par shes pa byung ba na/ nye bar gnas pa las byung ba dang / tshol ba dang / nges pa'i sems rnam pa gsum rim bzhin du dmigs par 'gyur te/ de la dang po ni mig gi rnam par shes pa nyid do/ /gnyis ni yid kyi rnam par shes pa'o/ /de la nges pa'i sems phan chad nas/ kun nas nyon mongs pa dang / rnam par byang bar 'gyur bar blta'o/ /de nas de'i rgyu mthun pa'i mig gi rnam par shes pa yang / dge ba dang mi dge bar 'byung bar 'gyur te/ rang gi rtog pa'i dbang gis ni ma yin no/ /ji srid du yid de gzhan la rnam par g.yengs bar ma gyur pa de srid du yid kyi rnam par shes pa dang / mig gi rnam par shes pa gnyi ga dge ba'am/ nyon mongs pa can du 'gyur ro/ /mig gi rnam par shes pa byung ba na/ ji lta ba bzhin du lus kyi rnam par shes pa'i bar du yang de bzhin du rig par bya'o/ /de la gnas ni yul gzhan du 'gro ba'i bzhon pa bzhin du blta bar bya'o/ /rnam par shes pa'i tshogs lnga po dag ni grogs rnams ni 'gron po 'grogs pa lta bu'o/ /dmigs pa ni bya ba'i don lta bu'o/ /las ni rang gi nus pa lta bu'o/ /rnam grangs gzhan du na/ de dag gi gnas ni khyim na gnas pa'i khyim lta bur blta'o/ /dmigs pa ni longs spyod lta bu'o/ / grogs ni bran dang bran mo la sogs pa lta bu'o/ /las ni rtsol ba lta bu'o/ /rnal 'byor spyod pa'i sa las rnam par shes pa'i tshogs lnga dang ldan pa'i sa ste dang po'o// //yid kyi sa gang zhe na/ de yang rnam pa lnga kho nar blta bar bya ste/ ngo bo nyid dang / gnas dang / dmigs pa dang / grogs dang / las so/ /de la ngo bo nyid gang zhe na/ sems dang yid dang rnam par shes pa gang yin pa'o/ /sems gang zhe na/ sa bon thams cad dang ldan pa dang / gnas kyi dngos por gyur pa dang / gnas kyi dngos por gnas pa dang / len par byed pa rnam par smin par bsdus pa kun gzhi rnam par shes pa gang yin pa'o/ /yid gang zhe na/ rnam par shes pa'i tshogs drug po dag 'gags ma thag pa gang yin pa dang / nyon mongs pa can gyi yid ma rig pa dang / bdag tu lta ba dang / nga'o snyam pa'i nga rgyal dang / sred pa'i mtshan nyid kyi nyon mongs pa rnam pa bzhi dang rtag tu ldan pa gang yin pa'o/ /rnam par shes pa gang zhe na/ dmigs pa rnam par rig par byed pas nye bar gnas pa gang yin pa'o/ /gnas gang zhe na/ yid de ma thag pa'i gnas dang / snga ma bzhin du sa bon thams cad pa kun gzhi rnam par shes pas sa bon gyi gnas so/ /dmigs pa gang zhe na/ chos thams cad ni dmigs pa ste/ 'ba' zhig gi tshor ba'i phung po dang / 'du shes kyi phung po dang / 'du byed kyi phung po dang / 'dus ma byas dang / bstan du med cing thogs pa med pa'i gzugs dang / skye mched drug dang / sa bon thams cad do/ /grogs gang zhe na/ 'di lta ste/ yid la byed pa dang / reg pa dang / tshor ba dang / 'du shes dang / sems pa dang / 'dun pa dang / mos pa dang / dran pa dang / ting nge 'dzin dang / shes rab dang / dad pa dang / ngo tsha shes pa dang / khrel yod pa dang / ma chags pa dang / zhe sdang med pa dang / gti mug med pa dang / brtson 'grus dang / shin tu sbyangs pa dang / bag yod pa dang / btang snyoms dang / rnam par mi 'tshe ba dang / 'dod chags dang / khong khro ba dang / ma rig pa dang / nga rgyal dang / lta ba dang / the tshom dang / khro ba dang / khon du 'dzin pa dang / 'chab pa dang / 'tshig pa dang / phrag dog dang / ser sna dang / sgyu dang / g.yo dang / rgyags pa dang / rnam par 'tshe ba dang / ngo tsha med pa dang / khrel med pa dang / rmugs pa dang / rgod pa dang / ma dad pa dang / le lo dang / bag med pa dang / brjed ngas pa dang / rnam par g.yeng ba dang / shes bzhin ma yin pa dang / 'gyod pa dang / gnyid dang / rtog pa dang / dpyod pa dang / de lta bu dang mthun pa sems las byung ba'i chos lhan cig 'byung zhing mtshungs par ldan pa rnams kyi grogs zhes bya ste/ dmigs pa gcig la rnam pa du ma dang / lhan cig 'byung ba re re byung ba/ rang gi sa bon las nges par 'byung ba/ mtshungs par ldan pa/ rnam pa dang bcas pa/ dmigs pa dang bcas pa/ gnas dang bcas pa dag go/ /las gang zhe na/ bdag dang gzhan gyi yul gyi dmigs pa rnam par rig par byed pa ni las dang po'o/ /yang rang dang spyi'i mtshan nyid rnam par rig par byed pa'o/ /yang 'das pa dang / ma 'ongs pa dang / da ltar byung ba'i dus rnam par rig par byed pa'o/ /yang skad cig pas rgyu rnam par rig par byed pa'o/ /yang dge ba dang mi dge ba'i chos rnams dang / las rnams la 'jug cing rjes su 'jug par byed do/ /yang de las gzhan pa'i rnam par shes pa'i tshogs rnams kyi sdug pa dang mi sdug pa'i 'bras bu yongs su 'dzin pa ste/ de'i rgyu las byung ba/ rgyu mthun pa kun nas slong ba'i phyir ro/ /yang de las gzhan pa'i rnam par shes pa'i tshogs rnams las thams cad kyi thams cad du khyad par du gyur pa'i las ni/ dmigs pa la rnam par rtog pa dang / dmigs pa la nye bar sems pa dang / ra ro bar byed pa dang / smyo bar byed pa dang / gnyid log par byed pa dang / sad par byed pa dang / brgyal bar byed pa dang / brgyal ba las sangs par byed pa dang / lus dang ngag gi las 'jug par byed pa dang / 'dod chags dang bral bar byed pa dang / 'dod chags dang bral ba las yongs su nyams pa dang / dge ba'i rtsa ba rnams rgyun 'chad pa dang / dge ba'i rtsa ba rnams mtshams sbyor ba dang / 'chi 'pho ba dang skye ba'o/ /dmigs pa la ji ltar rnam par rtog ce na/ rnam par rtog pa bdun gyis rnam par rtog ste/ de dag kyang gang zhe na/ mtshan ma can dang / mtshan ma can ma yin pa dang / rang gi ngang gis 'jug pa dang / tshol ba pa dang / so sor rtog pa dang / nyon mongs pa can dang / nyon mongs pa can ma yin pa'i rnam par rtog pa'o/ /rnam par rtog pa mtshan ma can gang zhe na/ sngon nyams su myong ba'i don rnams la/ dbang bo yongs su smin cing tha snyad la mkhas pa'o/ /mtshan ma can ma yin pa gang zhe na/ sngon gyi rjes su 'brang bas ma 'ongs pa la rtog pa dang / gsar du tha snyad la mi mkhas pa'i rnam par rtog pa gang yin pa'o/ /rang gi ngang gis 'jug pa gang zhe na/ yul nye bar gnas pa la/ rang gi ngang gis yul gyi stobs kho nas 'jug pa gang yin pa'o/ /tshol ba pa gang zhe na/ chos rnams la yongs su tshol zhing spyod pa'i rnam par rtog pa gang yin pa'o/ /so sor rtog pa gang zhe na/ yongs su btsal zhing dpyad pa de rnam par gzhag pa la/ so sor rtog pa'i rnam par rtog pa gang yin pa'o/ /nyon mongs pa can gang zhe na/ 'das pa la blta ba dang ldan pa dang / ma 'ongs pa la mngon par dga' ba dang ldan pa dang / da ltar byung ba la lhag pa'i chags pa dang ldan pa dang / 'dod pa'i rtog pa dang / gnod sems kyi rtog pa dang / rnam par 'tshe ba'i rtog pa gang yin pa'am/ nyon mongs pa dang nye ba'i nyon mongs pa gang yang rung ba dang mtshungs par ldan pa'i rnam par rtog pa gang yin pa'o/ /nyon mongs pa can ma yin pa gang zhe na/ dge ba dang lung du ma bstan pa gang yin pa dang / mngon par byung ba'i rnam par rtog pa dang / gnod sems med pa'i rnam par rtog pa dang / rnam par mi 'tshe ba'i rnam par rtog pa'am/ yang dad pa la sogs pa dge ba'i chos gang yang rung ba dang mtshungs par ldan pa'i rnam par rtog pa dang / spyod lam la 'byung ba dang / bzo'i gnas la 'byung ba'am/ sprul pa sprul par byed pa'i rnam par rtog pa gang yin pa ste/ 'di tsam gyis na dmigs pa la rnam par rtog par 'gyur ro/ / dmigs pa la ji ltar nye bar sems she na/ rigs pas bskyed pa dang / rigs pa ma yin pas bskyed pa dang / rigs pas bskyed pa yang ma yin rigs pa ma yin pas bskyed pa yang ma yin pas nye bar sems pa'o/ /rigs pas bskyed pa ji lta bu zhe na/ 'di lta ste/ phyin ci log rnam pa bzhi po mi rtag pa la rtag par phyin ci log pa dang / sdug bsngal ba la bde bar phyin ci log pa dang / mi gtsang ba la gtsang bar phyin ci log pa dang / bdag med pa la bdag tu phyin ci log pas med pa la sgro 'dogs par mi byed pa dang / yod pa yang dag pa la yang sbyin pa med do zhes bya ba la sogs pa'i rnam pa'i log par lta bas skur pa 'debs par mi byed pa'am/ chos gnas pa'i shes pas kyang / dngos po yang dag pa ji lta ba bzhin du rtogs pa dang yongs su shes pa'am/ yang 'jig rten las 'das pa'i ye shes shin tu rnam par dag pas chos rnams yang dag pa ji lta ba bzhin du mngon par rtogs pa ste/ de ltar rigs pas bskyed pa yin no/ /de las bzlog pa ni/ rigs pa ma yin pas bskyed par blta bar bya'o/ /rigs pas bskyed pa yang ma yin/ rigs pa ma yin pas bskyed pa yang ma yin pa ji lta bu zhe na/ lung du ma bstan pa'i shes rab la brten nas/ chos rnams la nye bar sems pa ste/ de ltar dmigs pa la nye bar sems so/ /ji ltar ra ro bar byed ce na/ rang gzhan gyis lus nyam chung ba dang / chang 'thung ba la ma goms pa dang / chang ha cang rno ba 'thungs pa dang / tshod ma bzung bar 'thung bar byed do/ /ji ltar smyo bar byed ce na/ sngon gyi las kyis 'phangs pa dang / khams mi mnyam pa dang / skrag cing 'jigs pa dang / gnad du phog pa dang / 'byung pos brlams pas byed do/ /ji ltar gnyid log par byed ce na/ rang bzhin gyis lus nyam chung ba dang / ngal bas dub pa'i nyes pa dang / kha zas drags pa dang / mun pa'i mtshan ma yid la byed pa dang / las thams cad btang ba dang / gnyid la goms pa dang / gzhan gyis byas pa 'di lta ste/ lus mnye ba'am/ rig sngags sam/ sman nam mthus gnyid log par byas na gnyid log par byed do/ / ji ltar sangs par byed ce na/ gnyid kyis brtas nas de'i kun nas dkris pa mi bzod pa dang / bya ba yod pa de la sems gtad nas/ nyal te log pa dang / gzhan gyis byas pa byed do/ /ji ltar brgyal bar byed ce na/ rlung dang mkhris pas dkrugs pa dang / snad pa dang / drag tu zags pa 'di lta ste/ phyi sa mang du 'khrus pa'am/ khrag mang du zags pa'am/ mang du zags pa la drag tu brtsal bas byed do/ /ji ltar brgyal ba las sangs par byed ce na/ brgyal ba'i kun nas dkris pa de nyid dang bral bas byed do/ /ji ltar lus dang ngag gi las 'jug par byed ce na/ lus dang ngag gi las kyi gnas lta bu'i shes pa sngon du 'gro ba dang / de las 'dun pa skyo ba dang / de las 'bad pa rtsom pa dang / de las 'bad pa sngon du 'gro ba'i lus dang / ngag gi las dang mthun pa'i rlung 'byung bas byed do/ /ji ltar 'dod chags dang bral bar byed ce na/ 'dod chags dang bral ba dang / mthun pa'i dbang po yongs su smin pa dang / gzhan las mthun pa'i gdams ngag thob pa dang / de'i bar du gcod pa rnam par spangs pa dang / yang dag par phyin ci ma log pa yid la byed pa sgom pas byed do/ /ji ltar 'dod chags dang bral ba las yongs su nyams par 'gyur zhe na/ rang bzhin gyis dbang po rtul ba dang / dge ba'i phyogs la gsar du zhugs pa dang / de'i rnam pa dang / rtags dang mtshan ma yid la mi byed pa dang / yongs su nyams par 'gyur ba'i chos yang dag par blangs te 'dug pa dang / nyon mongs pas bsgribs pa dang / sdig pa'i grogs pos yongs su zin par 'gyur ro/ /ji ltar dge ba'i rtsa ba rnams rgyun 'chad par byed ce na/ dbang po rno la sdig pa'i bsam pa shas chen po la lhag par spyod pa'i chos dang ldan pa dang / de dang mthun pa'i grogs rnyed pa dang / log par lta ba'i kun nas dkris ba de lhun stug par byed pas/ mthar thug par 'gro ba dang / sdig pa thams cad la lhag par spyod pa dag la mi ldog cing 'gyod par mi byed par 'gyur ro/ /de la sa bon yang dge ba'i rtsa ba yin la/ ma chags pa la sogs pa yang dge ba'i rtsa ba yin te/ dge ba'i rtsa ba kun tu spyod pa dang mi mthun pas rgyud gnas par byed cing / dge ba'i rtsa ba gcod pas sa bon 'byin par byed do/ /ji ltar dge ba'i rtsa ba rnams mtshams sbyor bar byed ce na/ rang bzhin gyis dbang po rno ba dang / mdza' bshes dang nye du dang / rten grogs rnams bsod nams bya ba la mngon par brtson pa mthong ba dang / skyes bu dam pa'i thad du song nas dam pa'i chos nyan pa dang / the tshom skye zhing nges par rtogs par byed do/ /ji ltar 'chi 'pho bar 'gyur zhe na/ tshe'i tshad yod par 'gyur ro/ /'chi ba de yang dge ba'i sems dang ldan pa dang / mi dge ba'i sems dang ldan pa dang / lung du ma bstan pa'i sems dang ldan pa yang rung ste/ tshe zad pa dang / bsod nams zad pa dang / yang nga ba ma spangs pas dus dang dus ma yin par rig par bya'o/ /tshe zad pa ji lta bu yin zhe na/ 'di lta ste/ 'di na kha cig ji ltar 'phangs pa'i tshe ril gyis zad par gyur nas/ 'chi 'pho ba ste/ de ni dus la bab na 'chi ba zhes bya'o/ /bsod nams zad pa ji lta bu zhe na/ 'di lta ste/ 'di na kha cig yo byad med pas 'chi 'pho ba lta bu yin no/ /yang nga ba ma spangs pa ji lta bu zhe na/ bcom ldan 'das kyis kyang 'di skad du tshe ma zad par 'chi ba'i dus byed pa ni rgyu dgu dang rkyen dgu yod do / dgu gang zhe na/ kha zas tshod ma zin par za ba dang / mi 'phrod pa za ba dang / ma zhu bar za ba dang / ma zhu ba bsags pa 'byin par mi byed pa dang / smin pa dgag pa dang / sman so sor mi bsten pa dang / goms pa dang / ma goms pa ma shes pa dang / dus ma yin par 'gro ba dang / mi tshangs par spyod pa'o zhes gsungs te/ de ni dus ma yin par 'chi ba zhes bya'o/ /dge ba'i sems dang ldan par 'chi 'pho ba ji lta bu yin zhe na/ 'di lta ste/ 'di na kha cig 'chi ba'i tshe/ dge ba'i chos sngon kun tu bsten pa rnams dran nam/ gzhan gyis dran par byas kyang rung ste/ de'i tshe de la dad pa la sogs pa dge ba'i chos gang dag sems la kun tu spyod pa de dag ji srid du 'du shes rags pa 'byung ba'i bar du'o/ /'du shes cha phra mo rgyu bar gyur pa'i tshe ni dge ba'i sems ldog cing / lung du ma bstan pa'i sems nyid du gnas te/ 'di ltar des ni de'i tshe sngon goms par byas pa'i dge ba la brtsal bar yang mi nus la gzhan dag gis kyang dran par byed mi nus so/ /mi dge ba'i sems dang ldan par 'chi 'pho ba ji lta bu zhe na/ 'di ltar 'di na kha cig 'chi ba'i tshe/ mi dge ba'i chos sngon goms pa rnams dran nam/ gzhan dag gis dran par byas kyang rung ste/ de'i tshe de la chags pa la sogs pa mi dge ba'i chos gang dag sems la kun tu spyod pa de dag ji srid du 'du shes rags pa rgyu ba'i bar du'o zhes bya ba thams cad dge ba'i skabs snga ma dang 'dra'o/ /de la dge ba'i sems dang ldan par 'chi na ni/ bde bar 'chi bas 'chi bar 'gyur te/ 'chi kar de'i lus la sdug bsngal gyi tshor ba drag po 'byung bar mi 'gyur ro/ /mi dge ba'i sems dang ldan par 'chi na ni/ sdug bsngal ba'i 'ching bas 'chi bar 'gyur te/ 'chi kar de'i lus la sdug bsngal gyi tshor ba drag po 'byung bar 'gyur ro/ /dge ba'i sems dang ldan par 'chi ba la ni gzugs mthong ba 'khrul par mi 'gyur ro/ /mi dge ba'i sems dang ldan par 'chi ba ni gzugs mthong ba 'khrul bar 'gyur ro/ /lung du ma bstan pa'i sems dang ldan par 'chi 'pho ba ji lta bu yin zhe na/ dge ba dang mi dge ba byed byed pa yang rung / de ma byas pa yang rung ste/ bdag nyid kyis ma dran nam/ gzhan dag gis dran par ma byas pa'o/ /dge ba'i sems kyang ma yin la/ nyon mongs pa can gyi sems kyang ma yin pa ni/ 'chi ba'i tshe de bde ba'i 'chi bas kyang 'chi bar mi 'gyur la/ sdug bsngal ba'i 'chi bas kyang 'chi bar mi 'gyur ro/ /yang gal te gang zag dge ba dang mi dge ba byed byed pa 'chi ba ni sngon goms pa'i dge ba dang mi dge ba'i chos rnams bdag nyid kyis dran nam/ gzhan dag gis dran par byas kyang rung ste/ de'i tshe des gang lan mang du goms par byas pa de ches stobs dang ldan par 'gyur te/ des sems de gzhol bar 'gyur la gzhan ni brjed par gyur to/ /yang gal te gnyi ga la mtshungs par goms na ni de las gang dang gang thog ma kho nar dran nam/ dran par byed du bcug pa de las ldog par mi 'gyur te/ gzhan du mi 'jug go/ /de'i tshe des rgyu rnam pa gnyis la 'di lta ste/ spros pa la mngon par dga' ba'i rgyu dang / dge ba dang mi dge ba'i las kyi rgyu'i dbang du byas te/ sngon gyi las kyis 'phangs pa'i 'bras bu de spyad nas 'chi ba'i dus byed pa de'i tshe mi dge ba'i las byed byed pa ni mi dge ba sngar byas pa'i mi sdug pa'i 'bras bu'i las kyi snga ltas rnams 'dir myong bar 'gyur te/ 'di lta ste dper na rmi lam bzhin du gzugs mi sdug pa du ma de la snang bar 'gyur te/ bcom ldan 'das kyis de las dgongs nas/ de sngon sdig pa mi dge ba'i las byas shing bsags par gyur pa gang yin pa de de'i tshe de la phye ma red kyi dus kyi tshe ri rnams sam/ ri'i rtse mo rnams kyi grib ma bzhin du bab cing / lhag par 'bab la mngon du 'bab par 'gyur ro zhes gsungs te/ gang zag de ni snang ba nas mun khrod du 'gro ba lta bur rig par bya'o/ /de las bzlog pa sngon gyi mi dge ba'i las kyi 'bras bu yin la/ da ltar 'dir dge ba byed pa ni mun khrod nas snang bar 'gro ba lta bur rig par bya'o/ /de la bye brag ni 'di yin te/ 'chi ba'i dus na de la rmi lam lta bu'i gzugs mi sdug pa ma yin pa yid du 'ong ba rnam pa sna tshogs snang ba 'byung bar 'gyur ro / /de la mi dge ba chen po byed byed pa ni mtshan ma mi sdug pa de mthong bas rdul 'byung bar 'gyur zhing / spu'i khung bu dag na spu zing zhes byed par 'gyur/ rkang lag g.yob pa la sogs pa ni 'byung bar 'gyur/ gcin dang phyi sa 'byung bar 'gyur/ nam mkha' la snyegs pa dang / mi ldog pa dang kha nas [(]dbu [,]lbu [)]ba 'byung ba dang / de lta bu dang mthun pa'i chos rnams 'byung bar 'gyur ro/ /gal te 'bring byed byed na ni/ de la kha cig ni 'gyur ro/ /kha cig ni mi 'gyur te/ kun rdzogs par mi 'byung ngo / /de thams cad kyang 'chi ba'i tshe na 'du shes mi gsal ba'i skabs su ma bab pa'i bar du yun ring po nas/ goms pa'i bdag la chags pa kun tu 'byung ngo / /de'i 'og tu de'i dbang gis bdag ni med par 'gyur ro snyam nas lus la mngon par dga' bar 'gyur te/ de ni de'i bar ma do'i srid pa mngon par 'grub pa'i rten yin no/ /de la rgyun du zhugs pa dang / lan cig phyir 'ong ba la yang de'i tshe bdag la chags pa kun tu 'byung mod kyi/ rgyun du zhugs pa'am/ lan cig phyir 'ong ba des ni bdag la chags pa de shes rab kyis brtags shing brtags shing mngon par spong bar byed kyi dang du len par mi byed de/ dper na mi ches stobs dang ldan pa ni/ mi ches stobs chung ba dang / stobs 'gyed na stobs chung ngu rdung bar byed pa de bzhin du/ 'di la yang tshul de dang 'dra bar blta bar bya'o/ /phyir mi 'ong ba rnams ni de'i tshe bdag la chags pa de kun tu 'byung bar mi 'gyur ro/ /de la gnad 'chad pa ni/ sems can dmyal ba'i 'gro ba dang / lha'i 'gro ba ma gtogs par de las gzhan pa'i skye ba'i gnas thams cad la yod do/ /de la yang rnam pa gnyis te/ shin tu tshabs che ba dang / shin tu tshabs chung ba ste/ las nyes pa byed byed pa rnams kyi ni shin tu tshabs che ba yin no/ /las legs pa byed byed pa rnams kyi ni shin tu tshabs chung ba yin no/ /byang gi sgra mi snyan gyi ni thams cad kyang tshabs chung ba yin no/ /gzugs kyi khams nas 'chi 'pho ba rnams ni dbang po tshang bar 'chi ba'i dus byed do/ /'dod pa'i khams nas 'chi 'pho ba rnams ni kha cig ni dbang po tshang bar 'chi 'pho bar 'gyur/ kha cig ni dbang po nyams te 'chi 'pho bar 'gyur ro/ /dag cing grol ba rnams kyi 'chi ba ni dul ba'i 'chi 'pho ba zhes bya'o/ /dag pa ma yin pa dang / grol ba ma yin pa rnams kyi 'chi ba ni dul ba ma yin pa'i 'chi 'pho ba zhes bya'o/ /de bas na re zhig mi dge ba'i las byed byed pa rnams ni 'chi 'pho ba'i tshe rnam par shes pas ro stod nas lus 'dor bar byed de/ de'i ro stod grang mor 'gyur ro/ /de yang snying gar thug pa'i bar du 'dor bar 'gyur ro/ /legs pa byed byed pa rnams kyi rnam par shes pas ni/ ro smad nas lus 'dor bar byed de/ de'i ro smad grang mor 'gyur ro/ /de yang snying gar thug pa'i bar du 'dor bar 'gyur te/ snying gnas rnam par shes pa 'pho bar rig par bya'o/ /de nas lus thams cad nas grang mor 'gyur te de lus la chags pa skyes pa dang / sngon spros pa la mngon par dga' ba'i rgyus yongs su bsgos pa dang dge ba dang mi dge ba'i las kyi rgyus yongs su bsgos pas/ rgyu de gnyis kyi dbang du byas te/ de ma thag tu rang gi sa bon las bar ma do'i srid pa/ phyogs de nas bar chad med par dus gcig tu 'gag pa dang / skye ba'i tshul gyis srang gi thor to mthon dman du 'gyur ba bzhin du 'byung bar 'gyur ro/ /bar ma do'i srid pa de ni dbang po tshang ba yin no/ /nyes pa'i las byed byed pa rnams kyi bar ma do'i srid pa ni dper na/ phyar ba nag po'am/ mtshan mo'i mun pa mun nag tu snang ba lta bu'o/ /legs pa'i las byed byed pa rnams kyi ni dper na/ snam bu dkar po'am/ zla ba'i 'od dang bcas pa'i mtshan mor snang ba lta bu'o/ /de ni lha'i mig shin tu rnam par dag pa'i spyod yul yin no/ /rnam par shes pa mi gnas pa'i phyir/ de'i tshe sngon gyi lus la 'dod pa de/ de la kun tu mi 'byung gi / yul gyi spros pa la 'dod pa ni kun tu 'byung ngo / /de ni gang du skye bar 'gyur ba de'i sha tshugs lta bur bar ma do'i srid pa skye ste/ skye ba ni gnas ma blangs kyi bar du de'i mig lha'i mig lta bur thogs pa med do/ /'gro ba yang skye ba'i gnas ma blangs kyi bar du rdzu 'phrul dang ldan pa bzhin du thogs pa med do/ /de'i mig de'i bar ma do'i srid pa pa'i sems can bdag dang skal ba mnyam pa rnams dang / de dag gi skye ba'i gnas dang / bdag gi skye ba'i gnas kyang mthong ngo / /nyes pa'i las byed byed pa rnams kyi mig ni thur du gsal te/ spyi'u tshugs su 'gro'o/ /lhar skye ba rnams ni gyen du'o/ /mir skye ba rnams ni thad kar ro/ /bar ma do'i srid pa de yang skye ba'i rkyen ma rnyed kyi bar du de ltar thogs na yang zhag bdun gnas par zad do/ /rkyen rnyed na ni nges pa med do/ /yang ma rnyed na ni lus brjes nas yang zhag bdun du gnas so/ /skye ba'i rkyen ma rnyed na zhag bdun phrag bdun gyi bar du yang gnas so/ /de las 'das phan chad ni/ gdon mi za bar skye ba'i rkyen rnyed par 'gyur ro/ /zhag bdun gyis shi 'phos pa de yang / yang na ni de nyid du mngon par 'grub par 'gyur ro/ /yang na ni skal ba mi mnyam pa gzhan du ste/ gal te las gzhan gyi bya ba yongs su gyur pas/ bar ma do'i srid pa'i sa don yongs su 'gyur bar byed pa'i phyir ro/ /de'i rnam grangs ni 'chi ba'i srid pa dang skye ba'i srid pa gnyis kyi bar mdor 'byung bas na bar ma do'i srid pa zhes kyang bya'o/ /dri'i phyir 'gro ba dang / dri sa brtas par 'gyur bas na dri za zhes kyang bya'o/ /de la brten nas yid skye ba'i gnas su 'gro bas na yid las byung ba zhes kyang bya ste/ lus kyi 'gro bas 'gro ba'i dmigs pa'i 'gro ba ni ma yin no/ /skye ba mngon du 'grub par 'gyur bas na mngon par 'grub pa zhes kyang bya'o/ /bar ma do'i srid pa de yang gzugs med par skye ba'i gnas ma gtogs par blta bar bya'o/ /gal te mi dge ba'i las byed pa lug gsod par gyur tam/ bya gsod par gyur tam/ phag 'tshong du gyur tam/ de ltar sdom pa ma yin pa'i ris gang yang rung ba gnas pa des/ sems can dmyal bar skye bar 'gyur ba sdig pa mi dge ba'i las byas shing bsags pas/ skye ba'i gnas su des sems can de lta bu dag dang / las de lta bu dag dang / lus la sogs pa de dag rmi lam bzhin du mthong nas/ de sngon goms pa'i mngon par dga' bas de nyid du brgyug go/ /skye ba'i gnas kyi gzugs de la yang khong khro bar gyur nas/ bar ma do'i srid pa de med par 'gyur la/ skye ba'i srid pa ni 'grub par 'gyur ro/ /de de nas shi 'phos pa na sngar 'chi ba'i srid pa'i tshe 'khrul pa'i gzugs mthong bar de bzhin du 'byung bar 'gyur ro / /skye ba dang 'gag pa'i tshul ni snga ma bzhin du blta bar bya'o/ /der de rdzus te skyes nas skye mched drug yongs su tshang bar 'gyur te/ de 'di snyam du bdag 'di dang lhan cig tu rtse bar bya'o/ /dga' bar bya'o/ / dga' mgur spyad par bya'o/ /bzo yang bslab par bya'o snyam du sems btang bar gyur la/ de der bzlog bar las kyi gnod pa rnam pa sna tshogs kyis gzir bar 'gyur te/ yongs su tsha ba chen pos kyang reg par 'gyur ro/ /de lta ma yin te/ de lta bur mthong ba med du zin na/ de der 'gro bar 'dod pa nyid kyang med par 'gyur na/ 'gro ba lta ga la 'gyur/ de'i phyir mi 'gro na yang skye bar mi 'gyur ro/ /sems can dmyal ba ji lta ba bzhin du/ sems can dmyal ba dang 'dra ba'i yi dags lba ba can la sogs pa dag tu skye ba yang de dang 'dra bar blta bar bya'o/ /dud 'gro dang / yi dags dang / mi dang / 'dod pa na spyod pa dang / gzugs na spyod pa'i lha'i ris gzhan dag tu skye na ni/ skye ba'i gnas su bdag dang skal ba mnyam pa mngon bar dga' bar gyur ba'i sems can de dag mthong ngam / de nas snga ma bzhin du der dga' ba dang 'dod pa bskyed de song ba dang / skye ba'i gnas de la khro bar gyur nas/ 'chi 'pho ba dang skye ba yang snga ma bzhin du blta bar bya'o/ /de la ma nyams bde zhing zla mtshan ldan pa dang / pha ma chags par gyur cing phrad pa dang / dri za yang nye bar gnas par 'gyur te/ gnas gsum mngon du gyur la/ gal te bar du gcod pa rnam pa gsum po skye gnas kyi nyes pas gyur pa dang / sa bon gyi nyes pas gyur pa dang / las kyi nyes pas gyur pa rnams med na/ ma'i mngal du 'jug par 'gyur ro/ /de la skye gnas kyi nyes pa gang zhe na/ gal te rlung gis ma rung bar byas pa'am/ mkhris pas ma rung bar byas pa'am/ bad kan gyis ma rung bar byas pa'am/ dbung nas 'dra ba'am/ dbung til 'bru 'dra ba'am/ kha shing rta 'dra ba'am/ kha dung 'dra ba'am/ mtshan ma tsam yod pa'am/ yo ba'am/ skyon yod pa'am/ skal ba yod pa'am/ de lta bu dang mthun pa rnams ni skye gnas kyi nyes pa yin par rig par bya'o/ /sa bon gyi nyes pa gang zhe na/ gal te pha'i khu ba byung la/ ma'i ma byung ba'am/ ma'i byung la pha'i ma byung ba'am/ gnyi ga'i ma byung ba'am/ ma'i rul tam/ pha'i rul tam/ gnyi ga'i rul tam/ de lta bu dang mthun pa rnams ni sa bon gyi nyes pa yin par rig par bya'o/ /las kyi nyes pa gang zhe na/ gal te pha'am ma'am/ yang na gnyi gas bu yod par 'gyur ba'i las ma byas shing / ma bsags sam/ yang na sems can des pha ma yod par 'gyur ba'i las ma byas shing / ma bsags sam/ yang na pha ma de gnyis kyi bu de ma yin pa yod par 'gyur ba'i las byas shing bsags sam/ yang na sems can des de ma yin pa dbang che bar grags pa dang / dbang che bar grags pa ma yin pa pha mar 'gyur ba'i las byas shing bsags pa'am/ de lta bu dang mthun pa rnams ni las kyi nyes pa yin par rig par bya ste/ nyes pa de dag kyang med la/ gnas gsum yang mngon sum du gyur na mngal du 'jug bar 'gyur ro/ /bar ma do'i srid pa la gnas pa/ de skal ba mnyam pa'i sems can la blta ba dang / rtse ba la sogs pa bya bar 'dod pas skye ba'i gnas su 'gro 'dod pa skyed par gyur la/ pha ma las byung ba'i khu ba dang / khrag de yang / de'i tshe phyin ci log tu mthong bar 'jug par 'gyur ro/ /de la phyin ci log ni 'di yin te/ pha ma gnyis nyal po byed par mthong na/ de'i tshe na pha ma gnyis nyal po byed pa yang med bzhin du des phyin ci log gi blos de ltar mthong ste/ sgyu ma byas pa mthong ba bzhin no/ /nyal po byed pa de mthong nas kyang de der chags pa skye bar 'gyur te/ gal te bud med du 'gyur bar 'dod na ni de skyes pa la chags te/ nyal bar 'dod pa skye'o/ /gal te skyes par 'gyur bar 'dod na ni de bud med de la chags na nyal bar 'dod pa skye bar 'gyur ro/ /de nas de'i drung du song nas bud med du 'gyur na ni/ bud med dang bral bar 'dod pa skye'o/ /skyes par 'gyur na ni/ skyes pa dang bral bar 'dod pa skye'o/ /de bskyed pas skyes pa'am/ bud med 'ba' zhig mthong bar 'gyur ro/ /de ji lta ji ltar phyogs der nye bar sbyor ba de lta de ltar skyes pa'am/ bud med gang yang rung ba de'i yan lag gzhan snang ba ni med par 'gyur la/ skyes pa dang bud med de la/ mo mtshan du mthong ba'am/ pho mtshan du mthong ba 'ba' zhig nye bar gnas par 'gyur ro/ /de la khong khro bar gyur nas ni 'chi 'pho ba dang skye bar 'gyur ba ni snga ma bzhin du rig par bya'o/ /gal te bsod nams chung ngu zhig yin na ni/ rigs dma' bar skye bar 'gyur te/ 'pho ba'i tshe dang / 'jug pa'i tshe de la ku co'i sgra dang / 'dam bu dang / nags tshal thibs po la sogs pa'i nang du 'gro ba'i mtshan ma 'byung bar 'gyur ro/ /gal te legs pa'i las byed byed pa zhig yin na ni/ rigs mthon por skye bar 'gyur te/ de la zhi ba dang / snyan pa'i sgra 'byung zhing / khang bzangs dang / gzhal med khang la sogs pa'i gnas su 'gro ba'i mtshan ma 'byung bar 'gyur ro/ /de la pha ma gnyis chags par gyur te/ 'dod chags drag po'i skabs su bab pa ni/ mjug kho nar khu ba ska ba 'byung bar 'gyur ro/ /de'i rjes la gnyi ga las khu ba dang khrag gi thigs pa gnyis gdon mi za bar 'byung bar 'gyur te / gnyis ka'i khu ba dang khrag gi thigs pa de gnyis ma'i skye gnas su 'dres par gyur nas/ dper na 'o ma bskol ba grangs pa'i spris ma bzhin du spris ma lta bur chags nas 'dus shing 'dug par 'gyur te/ des sa bon thams cad pa rnam par smin pa bsdus pa/ lus len par byed pa kun gzhi rnam par shes pa 'jug par 'gyur ro/ /ji ltar 'jug par 'gyur zhe na/ khu ba dang khrag 'dus nas spris ma lta bur gyur ba de dang lhan cig tu ste/ phyin ci log tu dmigs pa bar ma do'i srid pa de 'gag par 'gyur la/ de 'gag pa dang dus gcig tu rnam par shes pa sa bon thams cad pa de'i mthus de las gzhan pa dbang po'i 'byung ba chen po 'byung ba chen po cha phra ba dang 'dres pa/ de dang mthun pa'i khu ba dang / khrag 'dus pa dbang po dang bcas pa gzhan 'byung bar 'gyur te/ de'i dus skabs su rnam par shes pa gnas par gyur pa ni nying mtshams sbyor ba zhes bya ste/ de ni mer mer po'i dus yin no/ /mer mer po de'i dbang po'i 'byung ba chen po de dag kyang lus kyi dbang po'i dang lhan cig 'byung ngo / /dbang po'i rten gyi 'byung ba chen po rnams dang / dbang po'i 'byung ba chen po de dag nyid dang / lus kyi dbang po yang lhan cig tu 'byung bar 'gyur ro/ /de nas dbang po'i 'byung ba chen po de dag rgyur byas nas/ mig gi dbang po la sogs pa rim gyis 'grub par 'gyur ro/ /dbang po'i rten gyi 'byung ba chen po de dag kyang rgyur byas nas rim gyis dbang po'i rten rnams kyang 'grub par 'gyur ro/ /dbang po rnams dang / de dag gi rten rnams byung ba las lus thams cad 'grub cing 'thob par 'gyur ro/ / mer mer po'i gzugs de yang sems dang sems las byung ba'i chos de dag dang / gcig la gcig grub pa dang bde bas zhugs pa zhes bya'o/ /sems can gyi dbang gis kyang de rul bar mi 'gyur ro/ /de'i phan pa dang gnod pa las kyang / sems dang sems las byung ba rnams la phan pa dang / gnod par 'gyur ro / /de bas na gcig la gcig grub pa dang bde ba zhes bya'o/ /mer mer po'i phyogs gang du rnam par shes pa zhugs par gyur pa de ni de'i tshe de'i snying gi phyogs yin no/ /de ltar na rnam par shes pa de ni phyogs gang nas 'chi 'pho ba'i phyogs de nyid du thog ma kho nar 'jug go/ /rnam par shes pa sa bon thams cad pa de yang yongs su mya ngan las 'da' ba'i chos can dag gi ni sa bon yongs su tshang ba yin no/ /yongs su mya ngan las 'da' ba'i chos can ma yin pa dag gi ni/ byang chub rnam pa gsum gyi sa bon med pa yin no/ / //bam po gnyis pa/ lus mngon par 'grub pa gang ci yang rung ste / de thams cad ni sa bon thams cad dang ldan pa yin par rig par bya ste/ 'dod pa na spyod pa'i lus la yang gzugs dang gzugs med pa na spyod pa'i sa bon yod do/ /de bzhin du gzugs na spyod pa la yang 'dod pa na spyod pa dang gzugs med pa na spyod pa'i sa bon yod do/ /gzugs med pa na spyod pa la yang / 'dod pa na spyod pa dang gzugs na spyod pa'i sa bon yod do/ /mer mer po de yang skye ba'i tshe ni ming dang gzugs gnyis kyang / de gnyi ga ches rgya che bar 'gyur bas mtshungs mnyam du skye bar 'gyur te/ skye ba de yang lus yongs su rdzogs par 'gyur gyi bar du skye bar blta bar bya'o/ /de la sa'i khams rgyur byas nas lus kyi rgyur byas pa'i gzugs skye zhing ches rgya cher 'gyur ro/ /chu'i khams ni de nyid sdud par byed do/ / me'i khams ni de nyid smin par byed do/ /'dzag par mi 'gyur ba'i tshul gyis brtan par byed do/ /rlung gi khams ni yan lag rnam par 'byed cing gnas par byed do/ /sa bon thams cad la lus mngon par 'grub pa de dge ba dang mi dge ba'i las kyi rgyu las byung ba yin yang spros pa la mngon par dga' ba nyid gtso bo'i rgyu yin par blta bar bya'o/ /rigs dang stobs dang gzugs dang tshe dang / longs spyod la sogs pa 'bras bu'i rgyu'i gtso bo ni dge ba dang / mi dge ba'i las yin no/ /lus de la yang byis pa rnams ni bdag go snyam pa dang / nga'i 'o snyam pa dang / nga'o snyam du 'dzin to/ /'phags pa rnams ni sdug bsngal nyid du 'dzin to/ /mngal du gnas pa la ni rang bzhin gyis sdug bsngal yang ma yin/ bde ba yang ma yin pa'i tshor ba la gnas pa'i rnam par shes pa skye bar 'gyur te/ de'i tshor ba de ni rnam par smin pas bsdus pa yin no/ /de las gzhan pa'i tshor ba thams cad ni rnam par smin pa las byung ba'am/ yul gyi rkyen las gyur ba yin no/ /de la bde ba dang / sdug bsngal ba ni ched 'ga' rkyen mngon du gyur na ni 'byung la/ ched 'ga' ni mi 'byung ngo / /sa bon gyi rgyud kyi rgyun de yang thog ma med pa'i dus nas yod la/ thog ma med pa'i dus nas yod pa nyid yin du zin yang / dge ba dang mi dge ba'i las kyi bye brag gis yongs su bsgos pas/ yang dang yang rnam par smin pa'i 'bras bu yongs su 'dzin pa'i phyir sar par 'gyur ro/ /'bras bu byung nas ni sa bon de 'bras bu spyad zin pa yin te/ de ltar yongs su mya ngan las ma 'das kyi bar du 'khor ba'i rgyun 'jug go/ /de la sa bon gang dag 'bras bu ma byung ba de dag kyang / kha cig ni skyes nas myong bar 'gyur ro/ /kha cig ni lan grangs gzhan la myong bar 'gyur te/ bskal ba 'bum gyis kyang rang gi sa bon las yang lus de dag yongs su rdzogs par 'gyur ro/ /'bras bu gzhan skye ba gang yin pa de yang rang gi sa bon nyid las byung ngo / /tshe zad pa ni 'dir sa bon de 'bras bu yongs su spyad zin pa ni ma yin no/ /lus lhag ma rnams kyi sa bon dag ni 'bras bu ma byin pas na/ 'bras bu rnams ma spyad pa yin no/ /myong bar 'gyur bar ma nges pa'i sa bon gang yin pa de ni lus de nyid la 'bras bu myong bar 'gyur ba'i rigs pa las rkyen dang ma ldan nas myong bar ma gyur te/ sa bon de yang de nyid kyi so na 'dug pa yin no/ /de'i phyir lus thams cad kyi sa bon yin pas/ lus thams cad re re nas gcig la chags na yang thams cad la chags par brjod par bya'o/ /gcig la 'dod chags pa dang bral na yang thams cad la 'dod chags dang bral bar brjod par bya'o/ /lus de dag gi sa bon nyon mongs pa'i phyogs gang yin pa de dag ni/ gnas ngan len zhes bya ba dang / bag la nyal zhes bya bar 'gyur ro/ /rnam par smin pa'i phyogs gang yin pa rnams dang / de las gzhan pa lung du ma bstan pa'i phyogs de dag ni/ gnas ngan len zhes bya ba nyid de/ bag la nyal zhes ni mi bya'o/ /dad pa la sogs pa dge ba'i chos kyi phyogs kyi sa bon gang yin pa de dag la ni bag la nyal zhes bya ba yang med la/ gnas ngan len zhes bya ba med do/ /'di ltar de dag skyes nas lus las su rung ba kho nar 'gyur gyi/ las su mi rung bar mi 'gyur ba'i phyir ro/ /de bas na gnas ngan len dang ldan pa'i phyir dang / gnas ngan len gyi rang bzhin yin pa'i phyir/ de bzhin gshegs pa rnams ni/ 'di lta ste/ 'du byed kyi sdug bsngal nyid kyis / lus mtha' dag sdug bsngal du 'dogs par mdzad do/ /sa bon gyi rnam grangs ni/ khams dang / rigs dang / rang bzhin dang / rgyu dang / 'jig tshogs dang / spros pa dang / kun gzhi dang / len pa dang / sdug bsngal ba dang / 'jig tshogs la lta ba'i gnas dang / nga'o snyam pa'i nga rgyal gyi gnas dang / de lta bu dang mthun pa rnams ni rnam grangs su gtogs par rig par bya'o/ /yongs su mya ngan las 'das pa'i dus na ni rnam par dag pa'i rnal 'byor pa/ gnas gyur pa rnams kyi nyon mongs pa can gyi chos thams cad kyi sa bon gyi gnas 'gyur te/ dge ba dang lung du ma bstan pa'i chos thams cad kyi sa bon rnams kyang rkyen rnams dang mi ldan par byed cing / nang gi rkyen la dbang ba yang 'thob bo/ /mngal na gnas pa de yang zhag bdun phrag sum cu rtsa brgyad kyis mngal du yan lag dang nying lag thams cad dang ldan par 'gyur ro/ /de nas zhag bzhi lon na btsa' bar 'gyur te/ bcom ldan 'das kyis mngal du 'jug pa'i mdo las/ de ni zla ba dgu 'am de las 'das na shin tu rdzogs par 'gyur ro/ /zla ba brgyad kyis ni rdzogs pa yin mod kyi shin tu rdzogs pa ma yin no/ /zla ba drug gam bdun gyis rdzogs par mi 'gyur te/ yan lag ma tshang bar yang 'gyur ro zhes ji skad gsungs pa lta bu'o/ /skye mched drug 'dod pa'i gnas skabs de ni mas kha zas zos pa las 'byung ba'i dngas ma ska ba des de brtas par 'gyur ro/ /mer mer po la sogs pa shin tu sla ba'i dus na ni/ dngas ma shin tu sla bas brtas par 'gyur bar rig par bya'o/ /mngal na gnas pa de la yang dus rnam pa brgyad yod de/ dus rnam pa brgyad po gang zhe na/ mer mer po'i dus dang / nur nur po'i dus dang / ltar ltar po'i dus dang / mkhrang 'gyur gyi dus dang / rkang lag 'gyus pa'i dus dang / skra dang ba spu dang sen mo 'byung ba'i dus dang / dbang po dod pa'i dus dang / mtshan dod pa'i dus so/ /de la spris ma lta bus yogs la nang blan te/ mar 'dug pa na ni mer mer po zhes bya'o/ /phyi nang bcas par spris ma lta bur gyur te/ zho lta bur 'dug la shar ma gyur pa ni nur nur po zhes bya'o/ /shar ni gyur la sla ba ni ltar ltar po zhes bya'o/ /ska bar gyur te mnan du bzod pa ni mkhrang 'gyur zhes bya'o/ /de nyid las sha lhag lta bur gyur te/ yan lag dang nying lag gi mchan ma byung ba ni rkang lag 'gyus pa zhes bya'o/ /de nas skra dang ba spu dang sen mo byung ba ni de nyid kyi dus yin no/ /de nas mig la sogs pa'i dbang po rnams mngon par 'grub pa ni dbang po dod pa'i dus zhes bya'o/ /de nas de'i gnas gsal bar gyur pa ni mtshan dod pa'i dus zhes bya'o/ /mngal na gnas pa de sngon gyi las kyi dbang dang / mas ya nga ba ma spangs pa dang / ya nga ba ma spangs ba las byung ba'i rlung de dang mthun pa dag gis skra mi sdug pa dang / mdog mi sdug pa dang / pags pa mi sdug pa dang / lus mi sdug par 'gyur ro/ /ji skad skra mi sdug par 'gyur zhe na/ des sngon de lta bur 'gyur ba'i sdig pa mi dge ba'i las byas pa dang / de'i mas 'gyur byed dang / lan tshwa'i ra lta bu'i kha zas dang / skom phal cher bsten pa des na/ mngal na gnas pa de'i ba spu dang / skra ngan par 'gyur ro/ /ji ltar mdog mi sdug par 'gyur zhe na/ las ni snga ma bzhin te rgyu yin no/ /da ltar gyi rkyen ni mas nyi ma la sogs pa shin tu tsha ba bsten pas des na de'i mdog gnag pa dang / sngo bsangs su 'gyur ro/ /khyim gyi nang na ha cang grang ba na 'dug pa des ni de'i mdog dkar bar 'gyur ro/ /kha zas ha cang tsha ba zos pa des ni/ de'i mdog dmar por 'gyur ro/ /ji ltar pags pa mi sdug par 'gyur zhe na/ las ni snga ma bzhin te rgyu yin no/ /da ltar gyi rkyen ni mas 'khrig ba'i chos ha cang bsten drags pa des de shu ba can nam/ khyi rngo can nam/ mdze can nam/ pags pa skyon can du 'gyur ro/ /ji ltar lus mi sdug par 'gyur zhe na/ las ni snga ma bzhin te rgyu yin no/ /da ltar gyi rkyen ni ma brgyug pa dang / 'phar ba dang / mchongs pa la sogs pa'i spyod lam drag po byed de/ ya nga ba de ma spangs pa des na/ de'i lus mi sdug pa'am/ dbang po ma tshang bar 'gyur ro/ /gal te mor gyur na ni de ma'i sgal tshigs la brten la brang logs su mdun gyis phyogs shing blo g.yon rol na 'dug go/ /gal te phor gyur na ni ma'i lto logs su brtan la sgal tshigs logs su mdun gyis phyogs shing blo g.yas rol na 'dug go/ /mngal na gnas pa yongs su rdzogs par 'gyur ba ni/ mas mngal na gnas pa shas cher mi bzod pa las/ nang du rlung dag 'byung bar 'gyur te/ de dag ni de la gnod pa skyed par byed do/ / de'i las kyi rnam par smin pa las byung ba/ skye ba'i char gtogs pa'i rlung 'byung bar 'gyur te des mngal na gnas pa de rkang pa ni gyen du bstan/ mgo ni thur du bstan te/ de nas mngal na gnas pa de shams yogs bzhin du 'byung bar 'gyur la/ 'byung ba na sha ma de phyir nang du log ste lto na gnas so/ /mngal gyi sgor byung ma thag tu btsas pa'i dus zhes bya'o/ /de btsas nas rim gyis skye ba'i char gtogs pa'i reg pa 'di lta ste/ mig gi 'dus te reg pa nas yid kyi 'dus te reg pa'i bar du reg par 'gyur ro/ /'di lta ste/ 'jig rten gyi spyod pa la tha snyad rjes su slob pas kyang 'dogs pa la 'jug go/ /'di lta ste/ skye ba'i rgyus dbang po rnams yongs su smin pas khyim na 'dug go/ /'di lta ste/ 'jig rten pa'i bzo'i las kyi gnas rnams kyi las dag kyang byed do/ /'di lta ste/ gzugs la sogs pa sdug pa dang / mi sdug pa'i yul dag la yang spyod do/ /'di lta ste/ sngon gyi las kyi rkyen tam/ da ltar gyi rkyen gyis bde ba dang / sdug bsngal ba yang nyams su myong bar 'gyur ro/ /'di lta ste/ 'gro ba lngar 'gro ba'i rkyen dag gam/ mya ngan las 'das par 'gro ba'i rkyen dag gis kyang rkyen ji lta ba bzhin du 'khrid par 'gyur ro/ /sems can gang dag gi lus sems can gyi ris gang du byung bar gyur pa ste / sems can skal pa mnyam pa gang yin pa de sems can de dag la rkyen rnam pa bzhi po/ /sa bon gyi chos kyis sgrub pa dang / kha zas kyis rgyas par byed pa dang / kun tu legs par bsrung ba dang / lus dang ngag gi las mngon par 'du byed pa la rjes su bslab pas rkyen gyi bya ba byed de/ 'di lta ste/ pha ma gnyis kyis thog ma kho nar khu ba dang khrag gis sgrub par byed do/ /de nas btsas par rig nas gzhan dag kyang de dang mthun pa'i zas ldud par byed/ gso bar byed skyed par byed do/ /de nas dus ma yin par 'gro ba dang / yang bar 'gro zhing rgyu ba las de dang der kun tu srung ba'i bya ba byed do/ /de nas skyes pa'i rgyus dbang po rnams yongs su smin nas smra ba'i tha snyad dag slob tu 'jug ste/ de dag gis kyang gzhan dag slob tu 'jug go / /de ltar na sems can 'di dag ni thog ma med pa'i dus nas/ bde ba dang / sdug bsngal ba so sor nyams su myong ste/ sangs rgyas rnams kyi byang chub la brten nas gzhan gyi sgra'i rgyu las byung ba dang / nang gi tshul bzhin yid la byed pas/ zag pa zad pa thob par ma gyur gyi bar du bde ba dang sdug bsngal ba las 'da' bar mi 'gyur ro/ /de bas na 'di lta ste/ bdag gi ni gang na yang / su yang ci yang med do/ /bdag kyang gang na yang su yang / ci yang ma yin no/ /zhes bya ba'i tshig 'di ni shin tu rtogs par dka' ste/ nang gi dngos po rnams kyi 'chi 'pho dang skye ba ni de lta bu yin no/ /phyi rol gyi dngos po rnams kyi 'jig pa dang 'chags pa ji lta bu yin zhe na/ sems can rnams kyi 'jig pa dang / 'chags par 'gyur ba'i las kyis 'gyur te/ gal te 'jig par 'gyur ba'i las nye bar gnas par gyur na ni/ de nas phyi rol gyi 'jig pa'i rkyen gyis de dag 'jig par 'gyur gyi/ nang gi rnams tshe zad pas 'gyur ba lta bus ni ma yin no/ /de ci'i phyir zhe na/ 'di ltar phyi rol gyi dngos po rnams ni gzugs can rags pa 'byung ba chen po bzhi las byung ba/ rgyun brtan pa yin la nang gi rnams ni de lta bu ma yin pa'i phyir ro/ /snod ni de dag gi chags pa dang / 'jig pa'i las gang yin pa de ni nges par bskal par gnas par 'phen pa yin te/ de las kyang mi ring la de de las kyang mi thung ngo / /sems can du bgrang ba gang yin pa de ni dus nges pa med do/ /'di ltar de dag ni las sna tshogs mngon par 'du byed pa yin te/ de bas na de dag la ni bskal pa las lhag pa dang / de bas thung ba lo bcu'i bar dag kyang yod de/ /'di ltar 'jig pa de la yang rnam pa gsum yod par rig par bya ste/ mes 'jigs pas ni mnar med pa yan chad/ tshangs pa'i 'jig rten man chad 'jig go/ /chus 'jig pas ni bsam gtan gnyis pa man chad mtha' dag 'jig go/ /rlung gis 'jig pas ni bsam gtan gsum pa man chad mtha' dag 'jig go/ /bsam gtan bzhi pa na ni bsam gtan bzhi pa'i sa pa'i lha de dag gzhal med khang dag dang lhan cig skye zhing gzhal med khang dag dang / lhan cig 'chi 'pho bar 'gyur te/ de'i phyir de dag la ni 'jig pa yang med la 'jig pa'i rgyu yang med do/ /'jig pa rnam pa gsum po'i rtse mo'i bsam gtan gnyis pa dang / bsam gtan gsum pa dang / bsam gtan bzhi pa'i bar du'o/ /'jig rten 'di bar gyi bskal pa nyi shur ni 'jig go/ /bar gyi bskal pa nyi shur ni zhig par gnas so/ /bar gyi bskal pa nyi shur ni 'chags so/ /bar gyi bskal pa nyi shur ni chags nas gnas so/ /de dag ni bar gyi bskal pa brgyad cur 'gyur te/ de ni grangs [(]gyi [,]kyi [)]gdags pas bar gyi bskal pa chen po zhes bya'o/ /de la tshangs pa'i 'jig rten na ni tshe'i tshad bskal ba ste/ de ni thams cad kyi tha mar 'jig la/ thams cad kyi dang por de nyid 'chags so/ /bskal pa de'i rnam par gzhag pa gzhan du yang blta bar bya ste/ bar gyi bskal pa nyi shu la bskal pa gcig tu btags pa ni tshangs ris rnams kyi tshe'i tshad du rnam par gzhag go/ /bar gyi bskal pa bzhi bcu la bskal pa gcig tu btags pa ni/ tshangs pa'i mdun na 'don rnams kyi tshe'i tshad du rnam par gzhag go/ /bar gyi bskal pa drug cu la bskal pa gcig tu btags pa ni tshangs chen rnams kyi tshe'i tshad du rnam par gzhag go/ /mes 'jig pa gang zhe na/ sems can tshe dpag tu med pa dag gi tshe 'grib ste / tshe lo brgyad khri la thug par 'gyur ba dang / de dag gis mi dge ba'i chos rnams yang dag par blangs pas/ yang 'grib nas tshe lo bcu pa la thug par 'gyur ba dang / de dag skye bar 'gyur te/ dge ba'i chos rnams yang dag par blangs pas/ tshe nur nas phyir tshe brgyad khri la thug par 'gyur ba de'i dus kyang yod de/ de ltar mar bri ba gang yin pa de dang / yar skye pa gang yin pa de gnyis bsdus te/ grangs rnam par gzhag pas bar gyi bskal pa zhes bya'o/ /bar gyi bskal pa de yang mu ge dang nad dang mtshon rnam pa gsum gyis thal bar 'gyur ro/ /mu ge de yang gang gi tshe mi rnams kyi tshe lo sum cu thub pa de'i tshe 'byung ngo / /'di lta bu dag kyang 'byung bar 'gyur te/ rus pa rnying pa dag kyang bskol zhing bskol zhing srog zungs su byed de/ der brgya la res 'ga' nas kyi 'bru'am/ 'bras kyi 'bru'am/ rgya shug gam/ rgya sran nam/ til gyi 'bru rnyed par gyur na/ de nor bu rin po che bzhin du za ma tog gi nang du bcug ste srung bar byed do/ /sems can de dag las phal cher nyams stobs med de/ sa la gan rkyal du 'gyel nas ldang yang mi nus te/ mu ge de lta bus sems can phal cher 'chi ba'i dus byed par 'gyur ro/ /mu ge de yang re ltar thogs na/ lo bdun dang / zla ba bdun dang / zhag bdun zad de/ de phan chad thal zhes bya'o/ /sems can de dag kyang 'dus shing tshogs nas shas chung ngur skyo bar 'gyur te/ de dag rgyu de dang rkyen des tshe 'grib par mi 'gyur la/ mu ge de yang med par 'gyur ro/ /gang gi tshe mi rnams kyi tshe lo nyi shu thub cing / skyo ba de nyid med par gyur nas/ 'grib pa de'i tshe yams kyi nad dang / gnod pa dang / mgo ba'i nad dang / 'khrug pa mang po 'byung bar 'gyur te de dag nad mang pos phal cher 'chi ba'i dus byed par 'gyur ro/ /de dag gi nad de yang re ltar thogs na zla ba bdun dang zhag bdun kho nar zad de/ de phan chad thal zhes bya'o/ /de nas sems can de dag 'bring du skyo bar 'gyur te/ rgyu de dang rkyen des tshe 'grib par mi 'gyur la/ nad de dag kyang 'byung bar 'gyur ro/ /gang gi tshe mi rnams kyi tshe lo bcu thub cing skyo ba de nyid med par gyur pas tshe 'grib par gyur pa de'i tshe/ sems can de dag gcig gis gcig mthong na bsad pa'i sems drag po nye bar gnas par 'gyur ro/ /de nas de dag gis rtswa'am/ shing ngam/ gseg ma'am/ gyo mo'am/ gang dang gang blangs pa de dang de dag mtshon cha rnon po legs par bdar ba bzhin du 'gyur te/ de dag gis de dag gcig la gcig gsod par byed do/ /de yang re ltar thogs na zhag bdun du zad de de phan chad thal zhes bya'o/ /sems can de dag la de'i tshe mchog tu rgud pa rnam pa gsum 'byung bar 'gyur te/ 'di lta ste/ tshe rgud pa dang / lus rgud pa dang / yo byad rgud par 'gyur ro/ /de la tshe rgud pa ni tshe'i tshad re ltar ring na re ltar lo bcu thub pa yin no/ /de la lus rgud pa ni/ lus kyi tshad re ltar ring na mtho gang dang / chag gang ba yin no/ /de la yo byad rgud pa ni/ kha zas kyi mchog ni khre rgod yin no/ /gos kyi mchog ni skra'i [(]la [,]lwa [)]ba yin no/ /rgyan gyi mchog ni mtshon cha yin no/ /ro rnam pa lnga po mar gyi ro dang / sbrang rtsi'i ro dang / 'bru mar gyi ro dang / bu ram shing las byung ba'i ro dang / lan tshwa'i ro rnams ni thams cad kyi thams cad du med par 'gyur ro/ /de nas sems can de dag shas cher skyo bar 'gyur te/ skyo ba las yongs su nyams par mi 'gyur ro/ /de dag phan tshun 'dus shing tshogs nas tshe yongs su 'grib par 'gyur ba'i sdig pa mi dge ba'i chos rnams ni spangs/ tshe nur bar byed pa'i dge ba'i chos rnams ni yang dag par blangs te 'dug nas/ de dag gi tshe yang phyir nur ro/ /mdog dang stobs dang / bde ba dang / dbang phyug la dbang byed pas kyang dar bar 'gyur te / tshe yang lo brgyad khri la thug par 'gyur ro/ /de ltar mar 'bri ba nyi shu dang / yar skye ba nyi shu ste/ mar 'bri ba dang / yar skye ba bzhi bcu nam thal bar gyur pa de'i tshe/ thams cad kyi tha mar yar skye ba na/ sems can rnams sems can dmyal ba dag nas 'chi 'pho la phyir skye bar mi 'gyur te/ de dag thams cad shi 'phos pa na/ 'di lta ste/ sems can dmyal ba 'jig pas 'jig rten zhig ces bya'o/ /sems can dmyal ba zhig pa ji lta ba bzhin du/ dud 'gro'i 'jig pa dang / yi dags kyi 'jig pa yang de dang 'dra'o/ /mi rnams kyi nang na yang sems can gang yang rung ba zhig gis/ chos nyid kyis thob pa'i bsam gtan gnyis pa'i bar du rdzogs par byas te gnas so/ /sems can gzhan dag kyang de'i rjes su slob cing chos nyid kyis thob pa'i bsam gtan gnyis pa'i bar du rdzogs par byas te gnas so/ /de dag 'di nas shi 'phos nas/ 'od gsal gyi lha'i ris su skye bar 'gyur te/ de'i tshe 'di lta ste/ mi 'jig pas 'jig rten 'di zhig ces bya'o/ /mi'i 'jig pa ji lta ba bzhin du lha'i 'jig pa yang de dang 'dra'o/ /gang gi tshe 'gro ba lnga'i 'jig rten gnas pa na/ sems can gcig kyang med par gyur pa de'i tshe/ yo byad 'byung ba yang med par 'gyur ro/ /gang gi tshe yo byad 'byung ba med par gyur pa de'i tshe char pa yang med par 'gyur ro/ /char pa mi 'bab pas sa chen po 'di la rtswa dang sman dang / shing ci yod de dag skam par 'gyur ro/ /than pa byung nas nyi ma'i dkyil 'khor 'di nyid kyis kyang rab tu shas cher sreg par byed do/ /bsreg par bya ba'i dngos po rnam pa drug yod pa'i phyir 'di lta ste/ sems can rnams kyi 'jig par 'gyur ba'i las kyi dbang nyid kyis nyi ma'i dkyil 'khor gzhan drug 'byung bar 'gyur te/ nyi ma'i dkyil 'khor de dag kyang / nyi ma'i dkyil 'khor 'di las bzhi 'gyur bzhi 'gyur gyi mthus sreg par byed do/ /de dag bdun du gyur nas bdun gyur du sreg par byed do/ /dngos po rnam pa drug po rnams gang zhe na/ lteng ka chung ngu dang / lteng ka chen po de dag ni nyi ma'i dkyil 'khor gnyis pas skems par byed do/ /chu klung chung ngu dang / chu klung chen po de dag ni nyi ma'i dkyil 'khor gsum pas skems par byed do/ /mtsho chen po ma dros pa de ni nyi ma'i dkyil 'khor bzhi pas skems par byed do/ /rgya mtsho chen po de ni nyi ma'i dkyil 'khor lnga pa dang / drug pa'i phyogs gcig gis skems par byed do/ /ri rab dang sa chen po de ni gzugs ches sra ba'i phyir nyi ma'i dkyil 'khor drug pa nyid dang / bdun pas sreg par byed de/ de nas de nyid kyi me lce rlung gis bdas nas tshangs pa'i 'jig rten man chad du 'gro zhing sreg par byed do/ /de dag kyang dngos po rnam pa gsum du gyur te/ chu las byung ba'i dngos po rtswa la sogs pa de dag ni dang po nyid kyis skems par byed do/ /chu'i dngos po de dag nyid ni gzhan lnga po dag gis skems par byed do/ /brtan zhing sra ba'i gzugs kyi dngos po de ni gnyis kyis sreg par byed do / /'jig rten gnas pa de de ltar bsregs shing tshig pa ni mdo nyid las ji skad 'byung ba bzhin du rgyas par bya ste/ dud pa med la thal ba'i lhag ma yang med par 'gyur te/ de tsam gyis na 'di lta ste/ snod 'jig pas/ 'jig rten zhig ces bya ste/ bar gyi bskal pa nyi shu 'das so/ /de bzhin du 'jig rten zhig pa yang bar gyi bskal pa nyi shur gnas so/ /chus 'jig pa gang zhe na/ gang tshun chad mes 'jig pa lan bdun 'das par gyur ba de'i 'og tu/ bsam gtan gnyis pa nyid las byung ba'i chu'i khams 'byung ste/ chu'i khams kyi snod kyi 'jig rten de lan tshwa bzhin du bzhus nas chu'i khams de yang snod kyi 'jig rten de dang lhan cig tu med par 'gyur ro/ /med par gyur nas kyang de bzhin du bar gyi bskal pa nyi shur gnas so/ /rlung gis 'jig pa gang zhe na/ gang tshun chad chus 'jig pa lan bdun 'das par gyur pa de'i 'og tu yang mes 'jig pa lan cig 'byung ngo / /de'i 'og tu bsam gtan gsum pa nyid las byung ba'i rlung gi khams 'byung ste/ snod kyi 'jig rten de rlung gis lus bskams pa bzhin du med par byed do/ /rlung de yang de nyid dang lhan cig tu med par 'gyur te/ 'di ltar 'ga' zhig la rlung gi khams 'khrugs par gyur na/ rus pa'i bar du yang 'bri bar byed pa snang ba bzhin no/ /zhig nas kyang de bzhin du bar gyi bskal pa nyi shur gnas te/ 'jig rten 'jig pa ni de lta bu yin no/ /'chags pa gang zhe na/ bar gyi bskal pa nyi shu po de dag 'das nas yang sems can rnams kyi 'chags par 'gyur ba'i las kyi dbang gis/ 'chags ba'i bskal pa kun tu rtsom par rig par bya'o/ /de la thog ma kho nar 'di lta ste/ snod chags pas/ nam mkha' la bsam gtan gsum pa 'chags par 'gyur te/ bsam gtan gsum pa ji lta ba bzhin du gnyis pa dang dang po yang de dang 'dra'o/ /de la 'jig pa gsum pa'i rtse mo nas sems can tshe zad pa dang / las zad pa dang / bsod nams zad pa rnams shi 'phos nas bsam gtan gsum par skye bar 'gyur te/ de bzhin du thams cad du yang sbyar bar bya'o/ /de bzhin du 'jig pa gnyis pa'i rtse mo nas shi 'phos nas bsam gtan gnyis par skye bar 'gyur te/ de bzhin du thams cad du yang sbyar bar bya'o/ /'jig pa dang po'i rtse mo nas sems can gang yang rung ba zhig tshe zad cing / las zad la/ bsod nams zad nas bsam gtan dang po 'di lta ste/ tshangs pa'i 'jig rten du skye bar 'gyur ro/ /de der tshangs pa'i nang na tshangs pa chen por 'gyur la/ de gcig pu skyo bar 'gyur zhing / mi dga' bar 'gyur te/ kye ma sems can gzhan dag kyang 'dir skyes na ci ma rung snyam nas/ de'i sems mngon [(]bar [,]par [)]'du byed pas/ sems can tshe zad cing las zad la bsod nams zad pa gzhan dag kyang bsam gtan gnyis pa nas shi 'phos nas de dang skal ba mnyam par bsam gtan dang po nyid du skye bar 'gyur te de ltar 'di lta ste/ sems can 'chags pas bsam gtan gsum po de dag 'chags pa yin no/ / de nas 'dod pa na spyod pa'i lha'i ris bzhi po dag gi gzhal med khang nam mkha' las 'byung bar 'gyur te/ gzhal med khang de dag thams cad kyang nam mkha' las sprul pa bzhin du 'byung bar blta bar bya'o/ /de dag tu yang snga ma bzhin du 'od gsal gyi lha'i ris nas sems can dag shi 'phos nas skye bar 'gyur ro/ /de'i 'og tu 'dir stong gsum gyi stong chen po'i 'jig rten gyi khams kyi tshad tsam gyi rlung gi dkyil 'khor stong gsum gyi stong chen po'i 'jig rten dang / sems can gzhal med khang pa ma yin pa rnams kyi rten du gyur pa mngon par 'grub par 'gyur ro/ /de yang rnam pa gnyis te/ 'og gzhir gnas pa dang / glo na gnas pa ste/ des chu de dag thad kar yang mi 'bo la/ thur du yang mi 'dzag go/ /de'i steng du de dag gi las kyi dbang nyid kyis gser gyi snying po'i sprin 'byung bar 'gyur te/ de las char 'bab par 'gyur ro/ /chu de dag kyang rlung gi dkyil 'khor dag la brten to/ /de nas rlung rnams 'dus nas kun du 'thas pa dang sra bar byed de/ de ni steng dang 'og chu'i 'khrug pa thub pa'i phyir gser gyi sa gzhi zhes bya'o/ /de chags nas de'i steng du yang de dag gi las kyi dbang nyid kyis khams sna tshogs kyi snying po'i sprin 'byung bar 'gyur ro / /de las char 'bab par 'gyur ro/ /chu de dag kyang gser gyi sa gzhi la gnas par 'gyur te/ de bzhin du yang rlung rnams kyis kun tu 'thas shing sra bar byed do/ /der yang khams bzang po mchog dang gtso bo dang / gya nom pa gang yin pa de las/ rlung gis bsgrubs pa'i dbang gis ni ri rab 'byung bar 'gyur te / rin po che sna bzhi po gser gyi rang bzhin dang / dngul gyi rang bzhin dang / shel gyi rang bzhin dang / bai DUR+Ya'i rang bzhin can yin no/ / de la khams 'bring gang yin pa de las ni gser gyi ri bdun po 'di lta ste/ gnya' shing 'dzin dang / rnam par 'dud dang / rta rna ri dang / blta na sdug dang / seng ldeng can dang / gshol mda' 'dzin dang / mu khyud 'dzin rnams mngon par 'grub par 'gyur te / de dag kyang rim par ri rab 'khor bar 'dug go/ /ri rab kyi tshad ni 'phang du dpag tshad brgyad khri yod la/ rgyar yang de dang 'dra ste/ dpag tshad brgyad khri ni chu'i nang du nub po/ /gnya' shing 'dzin gyi tshad ni de'i phyed do/ /de las gzhan pa'i gser gyi ri rnam par 'dud la sogs pa nas mu khyud 'dzin la thug pa rnams kyi tshad ni/ phyi ma phyi ma de las phyed phyed 'bri ba'i tshad du rig par bya'o/ /ri de dag gi ming de rnams ni / de dag rtse mo'i rnam pa 'dra ba'i bye brag las blta bar bya'o/ /khams ngan pa rnams las ni ri rab kyi ngos bzhi dang / gser gyi ri rnams gyi phyi rol gyi gling bzhi dang / gling phran brgyad dang / ri khor yug 'byung bar 'gyur ro/ / khor yug gi tshad ni ri mu khyud 'dzin gyi phyed yin te/ des gling bzhi pa 'khor lo bzhin du bskor to/ /lha ma yin gyi gnas rnams ni ri rab chu'i 'og tu nub pa'i nang na yod do/ /gangs ri ni mtsho ma dros pa'i nye 'khor na yod do/ /de'i 'og na ni sems can dmyal ba chen po rnams kyi gnas/ sems can dmyal ba brgyad dang / nyi tshe'i sems can dmyal ba rnams dang / grang ba'i sems can dmyal ba rnams dang / nyen kor gyi sems can dmyal ba rnams dang / dud 'gro dang / yi dags kha cig gnas so/ /gling bzhi po 'di dag ni 'di lta ste/ 'dzam bu'i gling dang / shar gyi lus 'phags dang / nub kyi ba lang spyod dang / byang gi sgra mi snyan to/ /de la 'dzam bu gling ni shing rta 'dra'o/ /shar gyi lus 'phags ni zla gam 'dra'o/ /nub ba lang spyod ni zlum pa'o / /byang gi sgra mi snyan ni gru bzhi'o/ /'dzam bu'i gling gi tshad ni dpag tshad drug stong lnga brgya'o/ /shar gyi lus 'phags kyi tshad ni dpag tshad bdun stong ngo / /nub kyi ba lang spyod kyi tshad ni dpag tshad bdun stong lnga brgya'o/ /byang gi sgra mi snyan gyi tshad ni dpag tshad brgyad stong ngo / /gser gyi ri bdun po de dag gi bar gyi chu gang yin pa de dag ni yan lag brgyad dang ldan pa ste/ de dag ni nang gi rgya mtsho yin no/ /de na klu rnams kyi gnas yod do/ /klu'i nang na klu chen po bskal par gnas shing sa 'dzin pa/ dga' bo dang / nye dga' dang / rta'i gzhi dang / btang bzung dang / gzi can dang / yul 'khor srung dang / nag po chen po dang / e la'i 'dab dang brgyad po 'di dag 'khod do/ /de dag kyang lha'i dbang po brgya byin gyi dpung yin te/ lha dang lha ma yin g.yul 'gyed pa nyams su myong bar byed cing so sor nyams su myong bar byed do/ /klu'i rigs ni rnam pa bzhi yod de klu sgo nga las skye ba dang / mngal nas skye ba dang / drod gsher las skye ba dang / rdzus te skye pa'o/ /nam mkha' lding yang rnam pa bzhi ste/ sgo nga las skye ba dang / mngal nas skye ba dang / drod gsher las skye ba dang / rdzus te skye ba'o/ /nang gi rgya mtsho de'i phyi rol gyi chu gang yin pa de ni phyi rol gyi rgya mtsho yin no/ /ri rab de'i drang na yang bang rim bzhi yod de/ bang rim dang po'i tshad ni/ ri rab las dpag tshad khri drug stong phyir 'phags so/ /lhag ma rnams kyi tshad ni de'i phyed phyed yin te/ rim bzhin du sbyar ro/ /dang po la ni lag na yol go thogs rnams gnas so/ /gnyis pa la ni lag na khrag thogs rnams gnas so/ /gsum pa la ni rtag tu myos rnams gnas so/ /bzhi pa la ni phreng thogs rnams gnas so/ /ri rab kyi steng gi gzhi'i grwa bzhi na rtse mo bzhi yod do / /'phang du dpag tshad lnga brgya yod do/ /de dag na gnod sbyin lag na rdo rje thogs pa rnams gnas so/ /gnya' shing 'dzin gyi ngos bzhi shar dang / lho dang / nub dang / byang rnams na/ rgyal po chen po bzhi po yul 'khor srung dang / 'phags skyes po dang / mig mi bzang dang / rnam thos kyi bu rnams kyi rgyal po'i pho brang gnas te/ rim pa bzhin du sbyar ro/ /gser gyi ri thams cad la ni rgyal po chen po de dag gi grong dang / grong rdal dang / ljongs rnams yod do/ /ri'i rgyal po gangs ri'i nye 'khor na/ gser gyi brag bya skyibs su 'dug pa lha ma yin gyi ngos zhes bya ba chur yang dpag tshad lnga bcu zheng du yang dpag tshad lnga bcu pa zhig yod do/ /de ni glang po che'i rgyal po rab brten gyi gnas yin te/ de ni lha'i dbang po brgya byin gyi g.yul ngor spyad pa yin no/ /de na shing gi rgyal po rab brtan zhes bya ba tA la'i 'phreng rim bdun gyis bskor ba dang rdzing bu dal gyis 'thor zhes bya ba'i rdzing bu lnga brgyas bskor ba zhig yod pa ni rab brtan de nyid kyi rtse ba'i sa yin te/ der de 'dod dgur gzugs bsgyur nas/ rdzing bu de'i nang nas pad+ma'i rtsa ba dang / rtsa lag blangs shing longs spyod par byed de/ de yang ba glang mo lnga brgyas bskor to/ /de'i nye 'khor na yang mtsho chen po ma dros pa zhes bya ba zabs su dpag tshad lnga bcu rgyar yang dpag tshad lnga bcu pa la/ gser gyi bye ma bdal ba/ chu yan lag brgyad dang ldan pas gang ba/ bzang zhing sdug la mdzes pa zhig yod de/ de las chu klung chen po bzhi po 'di lta ste/ gang+gA dang / sin+d+hu dang / si ta dang / pak+Shu rnams gyes te 'gro'o/ /ri rab de'i steng na lha'i pho brang gnas pa'i tshad ni chu zheng du dpag tshad khri khri yod do/ /gzhan dag na ni lha de dag gi grong dang / grong rdal dang / ljongs rnams yod do/ /ri rab de'i phyogs bzhi na ni 'dzam bu gling la sogs pa/ gling bzhi po rnams yod do / /de dag ni de'i phyogs bzhi yin no/ /'dzam bu'i gling du bltas pa'i ngos gang yin pa de ni bai DUR+Ya'i rang bzhin yin no/ /shar gyi lus 'phags su bltas pa'i ngos gang yin pa de ni dngul gyi rang bzhin yin no/ /nub kyi ba lang spyod du bltas pa'i ngos gang yin pa de ni shel gyi rang bzhin yin no/ /byang gi sgra mi snyan du bltas pa'i ngos gang yin pa de ni gser gyi rang bzhin can yin no/ /'dzam bu'i gling gi nye 'khor na 'khor los sgyur ba'i lam gser gyi rang bzhin can yod de/ rgyal chen bzhi'i ris kyi sems can gyi pus mo'i tshad kyi pus nub tsam zhig rgya mtsho chen po na nub cing 'dug ste/ 'khor los sgyur ba'i rgyal po 'jig rten du 'byung ba na/ rgya mtsho chen po chu pus nub tsam zhig skam par 'gyur ro/ / mtsho [)]ma dros pa'i g.yas rol na/ shing 'dzam bu chen po yod de/ de'i ming gis 'di 'dzam bu'i gling zhes bya bar gyur to/ /de'i byang logs na/ shing shal ma li rtse mo shin tu mtho ba yod de/ de la nam mkha' lding rnam pa bzhi po dag gnas so/ /gling bzhi po de dag las gling re re la yang gling phran gnyis gnyis yod de/ gcig ni srin mo'i gling yin no/ /de ltar snod kyi 'jig rten mngon par grub nas/ snga ma kho na bzhin du bskal pa'i dang po myong bar 'gyur ba'i las nyid kyis/ 'od gsal gyi lha'i ris nas sems can rnams shi 'phos nas 'dir skye bar 'gyur ro/ /de yang 'dod pa na spyod pa'i las kyi nang na rab dang mchog dang / gtso bo yin te las de'i 'bras bu ni de nyid kyi tshe mngon par 'grub par 'gyur gyi/ gzhan na ni ma yin no/ /de'i tshe sems can de dag ni bskal pa dang po pa zhes bya'o/ /de dag kyang gzugs bzang zhing yid las byung ba yin te/ de ltar thams cad mdo nyid las byung ba bzhin no/ /de'i tshe khyim dang / khong pa dang grong gnas pa med de/ sa thams cad gzhi mnyam pa kho nar 'dug go/ /de'i 'og tu sems can de dag gi sa'i bcud byung ngo / /de bzhin du rim gyis sa'i sa zhag dang / ldum bu'i tshal dang / ma rmos ma btab pa'i 'bras sA lu shun phrags med pa dang / phub ma med pa 'byung ngo / /de'i 'og tu 'bras kyi 'bru shun phrags dang / phub mas kun tu yogs par 'gyur ro/ /de'i 'og tu sA lu tho rtser skye bar 'gyur ro/ /de'i 'og tu sems can de dag gis de yongs su 'dzin par snang ngo / /de'i 'og tu sems can de dag gis sa'i bcud la sogs pa de dag longs spyod pas mdog ngan par 'gyur zhing / mthu yang med par 'gyur te/ gang gis shas cher zos pa de mdog cher ngan par 'gyur zhing / lus ches lci bar 'gyur ro/ /de'i 'og tu sems can gyis sems can la brnyas par 'gyur te/ mi dge ba'i chos de dag kun tu spyad pa'i rgyus/ snga ma snga ma sa'i bcud la sogs pa med par 'gyur te/ mdo las ji skad 'byung ba kho na bzhin du rgyas par bya'o/ /de'i 'og tu phan tshun mig gis tshugs su blta'o/ /de nas kun tu chags par 'gyur ro/ /de'i 'og tu bud med dang skyes par 'gyur ba'i las kyis/ kha cig la ni mo mtshan 'byung bar 'gyur/ kha cig la ni pho mtshan 'byung bar 'gyur ro/ /de'i 'og tu gnyis gnyis sprod pas nyal po byed de/ /de nas gzhan dag gis rnam par smad par 'gyur ro/ /de nas de'i ched du khyim dag byed do/ /sA lu yongs su gzung ba'i phyir yang zhing yongs su 'dzin par byed do/ /de'i 'og tu de'i gzhi las ma byin par len cing phan tshun 'dren pa dag kyang 'byung ngo / /de nas de'i gzhi las nan thur byed pa'i rgyal po bsgo bar byed de/ de ni phal po che kun gyis bkur ba zhes bya'o/ /de ltar rgyal rigs kyi rgyud de dang / gzhan yang mdo las ji skad 'byung ba bzhin du bram ze dang / rje'u rigs dang / dmangs rigs rnams kyi rgyud rnams 'jig rten du 'byung ngo / / de dag gi lus la yod pa'i 'od de yang med par gyur nas 'jig rten du mun pa 'byung ngo / /de'i 'og tu nyi ma dang zla ba dang rgyu skar rnams 'jig rten du 'byung bar 'gyur ro/ /de la nyi ma'i dkyil 'khor gyi tshad ni dpag tshad lnga bcu rtsa gcig go/ /zla ba'i dkyil 'khor gyi tshad ni dpag tshad lnga bcu'o/ /de la nyi ma'i dkyil 'khor ni me shel gyi rang bzhin yin no/ /zla ba'i dkyil 'khor ni chu shel gyi rang bzhin yin no/ /de gnyis las kyang zla ba'i dkyil 'khor ni ches mgyogs par 'gro ba dang / nges pa med par 'gro bar rig par bya'o/ /nyi ma'i dkyil 'khor gyis ni gling gnyis cig car snang bar byed la/ gling gnyis cig car mun par byed de / de bas na gcig tu ni nyi ma phyed la gcig tu ni 'char ro/ /gcig tu ni nam phyed la gcig tu ni nub po/ /zla ba dang nyi ma dang rgyu skar thams cad ni ri rab kyi phyed nas 'gro zhing rgyu ste/ de yang gnya' shing 'dzin dang mnyam mo de dag gang gi tshe ri rab las thag ring du rgyu ba de'i tshe ni dgun du mngon no/ /gang gi tshe nye bar rgyu ba de'i tshe ni tsha ba'i dus su mngon no/ /de'i phyir myur du nub pa dang / ring zhig nas nub par 'gyur bar rig par bya'o/ /zla ba'i dkyil 'khor ni yid tsam gyis steng du 'dzur ba na zla gam du snang ste/ des pha rol gyi ngos de tshu rol gyi ngos kyis bsgribs pa'i phyir mi snang ste/ ji lta ji ltar 'dzur ba de lta de ltar shin tu gang bar snang ngo / /mar gyi ngo la ji lta ji ltar thur du 'dzur ba de lta de ltar bri bar snang ngo / /rgya mtsho chen po na nya dang rus sbal la sogs pa gnas pa'i gzugs brnyan byung ba'i phyir zla ba'i nang na ri ri po yod par snang ngo / /skar ma rnams kyi tshad ni nang gi che ba rgyang grags bco brgyad do/ /'bring rnams ni rgyang grags bcu'o/ /chung ngu rnams ni rgyang grags bzhi'o/ /rigs bzhi de byung ba na sdug pa dang mi sdug pa'i 'gro ba lnga myong bar 'gyur ba'i las kun tu rtsom par 'gyur ro/ /de'i 'og tu sems can gang yang rung ba zhig /bdag por 'gyur ba'i las kun nas nyon mongs pa can gyi sems can dmyal ba rnams na gshin rje'i rgyal por skye bar 'gyur ro/ /de'i 'og tu sems can dmyal ba'i srung ma rnams ni sprul pa lta bur 'byung bar 'gyur ro/ /gnod pa dang gnod byed lcags zangs la sogs pa rnams dang / sems can dmyal ba'i me yang 'byung bar 'gyur ro/ /de'i 'og tu las kyis ji ltar 'gro ba bzhin du sems can de dag dang / de las gzhan pa'i 'gro ba dag tu skye bar 'gyur ro/ /de lta bu'i tshul gyis gling bzhi pa ther 'bum dang / ri rab ther 'bum dang 'dod pa na spyod pa'i lha'i ris drug po ther 'bum dang / tshangs pa'i 'jig rten ther 'bum gyi stong gsum pa ni/ cig car 'chags la cig car 'jig go/ /de dag kyang 'jig rten gyi khams rnam pa gsum du 'gyur ro/ /'di lta ste/ zla ba stong dang / nyi ma stong dang / tshangs pa'i 'jig rten stong gi bar du gcig tu bsdus pa ni stong chung ngu'o/ /chung ngu de stong ni stong gnyis pa bar ma'o/ /bar ma de stong la ni stong gsum gyi stong chen po'i 'jig rten gyi khams zhes bya ste/ de lta bur shar phyogs dang / lho dang / nub dang / byang dang / steng dang 'og tu 'jig rten gyi khams 'jig pa dang / 'chags pa la mtha' med mu med do/ /'di lta ste/ char pa gshol mda' tsam 'bab pa na/ chu'i rgyun la rgyun 'chad pa med cing bar mtshams med par 'bab pa de bzhin du/ phyogs gzhan thams cad du 'jig rten gyi khams rnams 'jig pa dang / 'chags pa la mtha' med mu med do/ /stong gsum gyi stong chen po'i 'jig rten gyi khams gang yin pa de ni sangs rgyas kyi zhing gcig ces bya ste/ der de bzhin gshegs pa byung nas/ 'jig rten gyi khams tshad med pa dag tu sangs rgyas kyi mdzad pa rnams mdzad do/ /de ltar 'jig rten gnas pa chags nas 'gro ba lnga po sems can dmyal ba pa rnams dang / dud 'gro rnams dang / yi dags rnams dang / lha rnams dang / mi rnams 'byung bar 'gyur ro/ /skye gnas bzhi po sgo nga las skye ba dang / mngal nas skye ba dang / drod gsher las skye ba dang / rdzus te skye ba dang / gzhi drug dang / dus rnam pa bcu ste/ dus tshigs dang / lo dang / zla ba dang / zla ba phyed dang / nyin mo dang / mtshan mo dang / skad cig dang / de'i skad cig dang / thang cig dang / yud tsam dang / yongs su gzung ba'i dngos po bdun dang / lus kyi yo byad bcu dang / 'dod pa la longs spyod pa bcu ste/ de dag kyang lung bar ma las byung ba bzhin no/ /rgyun mi 'chad par rjes su spyad pa rnam pa brgyad dang / 'jig rten gyi chos brgyad de/ rnyed pa dang / ma rnyed pa dang / snyan pa dang / mi snyan pa dang / bde ba dang / sdug bsngal ba dang / smad pa dang / bstod pa dang / phyogs gsum ste/ mdza' bshes kyi phyogs dang / mi mdza' ba'i phyogs dang / tha mal pa'i phyogs dang / 'jig rten gyi spyod pa gsum dang / gtam rnam pa gsum dang / nyes tsam rnam pa nyi shu rtsa gnyis dang / sems can gyi ris drug cu rtsa bzhi dang / dus brgyad dang / mngal du 'jug pa bzhi dang / spyod lam bzhi dang / 'tsho ba rnam pa drug dang / kun nas bsrung ba rnam pa drug dang / sdug bsngal rnam pa bdun dang / nga rgyal rnam pa bdun dang / rgyags pa rnam pa bdun dang / tha snyad bzhi dang / tha snyad kyi gzhi mang po rnams 'byung ngo / /de la sems can dmyal ba'i 'gro ba gang zhe na/ sems can dmyal ba'i phung po sa bon dang / 'bras bus bsdus pa rnams dang / sems can dmyal ba myong bar 'gyur ba'i las gang yin pa'o/ /sems can dmyal ba'i 'gro ba ji lta ba bzhin du/ dud 'gro'i 'gro ba dang / yi dags kyi 'gro ba dang / lha'i 'gro ba dang / mi'i 'gro ba yang de dang 'dra ste/ ci rigs par blta bar bya'o/ /sgo nga las skye ba'i skye gnas gang zhe na/ sems can gang dag sgo nga'i sbubs mngon par brtol nas 'byung ba rnams yin te/ de dag kyang gang zhe na/ 'di lta ste/ ngang pa dang / khrung khrung dang / rma bya dang / ne tsho dang / ri skegs la sogs pa'o/ /mngal nas skye ba'i skye gnas gang zhe na/ sems can gang dag sha mas kun nas yogs shing sha ma brtol nas 'byung ba rnams te/ de dag kyang gang zhe na/ 'di lta ste/ glang po che dang / rta dang / ba lang dang / bong bu la sogs pa'o/ /drod gsher las skye ba'i skye gnas gang zhe na/ sems can gang dag drod gsher gang yang rung ba la brten nas skye ba rnams te/ de dag kyang gang zhe na/ 'di lta ste/ srin bu dang / grog sbur dang / phye ma leb dang / shing srin rnams so/ /rdzus te skye ba'i skye gnas gang zhe na/ sems can gang dag las kyi dbang gis skye mched drug tshang ba'am/ skye mched drug las gang yang rung ba rnams skye ba rnams te/ de dag gang zhe na/ 'di lta ste/ sems can dmyal ba pa rnams dang / lha rnams dang / dud 'gro dang / yi dags dang / mi rnams las kha cig go/ /gzhi drug gang zhe na/ gnas pa'i gzhi 'di lta ste/ 'og gi rlung gi dkyil 'khor dang / chu'i dkyil 'khor dang / sa'i dkyil 'khor ni gzhi dang po ste/ sems can rnams thur du mi ltung ba'i rgyu yin pas de'i phyir gzhi zhes bya'o/ /gnas ni gzhi gnyis pa ste/ de yang khang khyim dang / yang thag la sogs pa ste/ de ni 'dzag gnod byed rnams kyis gnod par mi 'gyur ba'i rgyu yin pas de'i phyir gzhi zhes bya'o/ /khang khyim dang yang thog la sogs [(]ba [,]pa [)]de dag kyang mdor bsdu na ched du byas pa dang / ched du byas pa ma yin pa dang / gzhal med khang dang / sprul pa rnams so/ /lo legs pa ni gzhi gsum pa ste/ de ni kham gyi zas kyi rgyu yin pas de'i phyir gzhi zhes bya'o/ /bde ba ni gzhi bzhi pa ste/ de ni sems can rnams mtshon cha la sogs pas ma rung bar mi 'gyur ba'i rgyu min pas de'i phyir gzhi zhes bya'o/ /nyi ma dang zla ba ni gzhi lnga pa ste/ de ni gzugs rnams snang ba'i rgyu yin pas de'i phyir gzhi zhes bya'o/ /zas ni gzhi drug pa ste/ de dag kyang zas rnam pa bzhi ste/ kham gyi zas dang / reg pa dang / yid la sems pa dang / rnam par shes pa'i zas te/ de ni lus gnas par byed pa dang / rton par byed pa'i rgyu yin pas de'i phyir gzhi zhes bya'o/ / yongs su gzung ba'i dngos po bdun gang zhe na/ bdag dang / pha ma dang / bu dang / chung ma dang / bran dang / bran mo dang / las byed pa dang / zho shas 'tsho ba dang / mdza' bshes dang / blon po dang / nye du dang / snag gi gnyen mtshams rnams dang / zhing gi dngos po dang / khyim gyi dngos po dang / zong dgram pa'i dngos po dang / bsod nams bya ba'i dngos po dang / las kyi mtha' la sbyor ba'i dngos po rnams dang / nor sogs pa'i dngos po dang bdun no/ /yo byad bcu gang zhe na/ zas dang / skom dang / bzhon pa dang / gos dang / rgyan dang / bzhad gad dang / glu bro dang / rol mo'i sgra dang / spos dang / me tog phreng dang / byug pa dang / snod spyad dang / snang ba dang / skyes pa dang / bud med dga' dgur spyod pa rnams so/ /rgyun mi 'chad par rjes su spyad pa brgyad gang zhe na/ 'jig rten dag rgyun mi 'chad par rjes su spyod pa gang yin pa rnams te/ 'di lta ste/ pa char gyis dkri ba dang / lus kyi bsnyen bkur bya ba dang / spyod lam gzhan la yongs su brtag pa dang / kha zas bza' ba dang / gnyid log pa dang / 'khrig pa dang ldan pa'i brtsal ba dang / de dang ldan pa'i gtam rnams so/ /'jig rten gyi spyod pa rnam pa gsum gang zhe na/ 'di lta ste/ smra ba dang / gtam byed pa dang / so sor mgu bar byed pa dang / bag ma gtong ba dang / bag ma len pa dang / 'bod pa dang / g.yar 'dren pa dang / lhag par za ba dang / 'dus shing za ba rnams dang / rtsod pa byung ba rnams la gcig gis gcig gi grogs bya ba rnams so/ /gtam rnam pa gsum gang zhe na/ chos dang ldan pa dang / chos dang ldan pa ma yin pa dang / de las gzhan pa ste/ gzhan pa chos dang ldan pa'i gtam gang zhe na/ 'phags pa yo byad bsnyungs pa can dang ldan pa dang / sems kyi sgrib pa bsal bar 'gyur ba'i gtam bya ba gang yin pa ste/ rgyas par mdo las ji skad 'byung ba bzhin no/ /chos dang mi ldan pa gang zhe na/ gang nyon mongs pa can gyi sems kyis kha zas la sogs pa'i gtam byed pa'o/ /lung dum bstan pa'i sems kyis byas pa rnams ni de las gzhan pa'i gtam zhes bya'o/ / //bam po gsum pa/ nyes rtsom rnam pa nyi shu rtsa gnyis gang zhe na/ 'di lta ste/ gzhal blugs la sgyu byed pa dang / srang la sgyu byed pa dang / gzhal ba la sgyu byed pa dang / log pa'i las la sbyor ba dang / 'thab pa dang / mtshang 'bru ba dang / rtsod pa dang / 'gyed pa dang / gshe ba dang / khro ba dang / dam 'cha' ba dang / bsdigs pa dang / rdeg pa dang / gsod pa dang / 'ching ba dang / go rar 'jug pa dang / gcod pa dang / spyugs pa dang / g.yo byed pa dang / 'drid pa dang / drag shul dang / brdzun zer ba rnams so/ /sems can gyi ris drug cu rtsa bzhi gang zhe na/ 'di lta ste/ sems can dmyal ba pa rnams dang / dud 'gro rnams dang / yi dags rnams dang / lha rnams dang / mi rnams dang / rgyal rigs rnams dang / bram ze rnams dang / rje'u rigs rnams dang / dmangs rigs rnams dang / skyes pa rnams dang / bud med rnams dang / ma ning rnams dang / ngan pa rnams dang / 'bring rnams dang / bzang po rnams dang / khyim pa rnams dang / rab tu byung ba rnams dang / dka' thub drag bo can rnams dang / dka' thub drag po can ma yin pa rnams dang / sdom pa can rnams dang / sdom pa can yang ma yin/ sdom pa can ma yin pa yang ma yin pa rnams dang / 'dod chags dang bral ba rnams dang / 'dod chags dang bral ba ma yin pa rnams dang / log pa nyid du nges pa'i phung po rnams dang / yang dag pa nyid du nges pa'i phung po rnams dang / ma nges pa nyid du nges pa'i phung po rnams dang / dge slong rnams dang / dge slong ma rnams dang / dge slob ma rnams dang / dge tshul rnams dang / dge tshul ma rnams dang / dge bsnyen rnams dang / dge bsnyen ma rnams dang / spong ba pa rnams dang / kha ton pa rnams dang / zhal ta byed pa rnams dang / gnas brtan rnams dang / bar ma rnams dang / gsar bu rnams dang / slob dpon rnams dang / mkhan po rnams dang / lhan cig gnas pa rnams dang / nye gnas pa rnams dang / glo bur du lhags pa rnams dang / dge 'dun gyi las byed pa rnams dang / rnyed pa 'dod pa rnams dang / bkur sti 'dod pa rnams dang / yo byad bsnyungs pa rnams dang / mang du thos pa rnams dang / mkhas shing bsod nams dang ldan pa rnams dang / chos kyi rjes su mthun pa'i chos la zhugs pa rnams dang / mdo sde 'dzin pa rnams dang / 'dul ba 'dzin pa rnams dang / ma mo 'dzin pa rnams dang / so so'i skye bo rnams dang / bden pa mthong ba rnams dang / slob pa rnams dang / mi slob pa rnams dang / nyan thos rnams dang / rang sangs rgyas rnams dang / byang chub sems dpa' rnams dang / de bzhin gshegs pa rnams dang / 'khor los sgyur ba rnams so/ /'khor los sgyur ba de dag kyang / gling gcig la dbang ba rnams dang / gling gnyis la dbang ba rnams dang / gling gsum la dbang ba rnams dang / gling bzhi la dbang ba rnams te/ de la gling gcig la dbang ba la ni lcags kyi 'khor lo 'byung bar 'gyur ro/ /gling gnyis la dbang ba la ni zangs kyi 'khor lo 'byung bar 'gyur ro/ /gling gsum la dbang ba la ni dngul gyi 'khor lo 'byung bar 'gyur ro/ /gling bzhi pa la dbang ba la ni gser gyi 'khor lo 'byung bar 'gyur ro/ /dus brgyad gang zhe na/ 'di lta ste/ mngal na gnas pa'i dus dang / btsas pa'i dus dang / byis pa'i dus dang / gzhon nu'i dus dang / lang tsho'i dus dang / dar la bab pa'i dus dang / rgas pa'i dus dang / 'khogs pa'i dus so/ /de la mngal na gnas pa'i dus ni mer mer po la sogs pa'o/ /btsas pa'i dus ni de yan chad dang / 'khogs pa'i dus man chad do/ /byis pa'i dus ni 'gro ba dang rtse mi nus pa man chad do/ /byis pa gzhon nu'i dus ni de nus pa yin no/ /lang tsho'i dus ni 'dod pa spyod nus pa nas lo sum cu man chad do/ /dar la bab pa'i dus ni lo lnga bcu man chad do/ /rgas pa'i dus ni lo bdun cu man chad do/ /de yan chad ni 'khogs pa'i dus so/ /mngal du 'jug pa bzhi gang zhe na/ 'di lta ste/ shes bzhin du 'jug la mi shes par gnas shing 'byung ba dang / shes bzhin du 'jug cing gnas la mi shes par 'byung ba dang / shes bzhin du 'jug cing gnas te 'byung ba dang / mi shes par 'jug cing gnas te 'byung ba'o/ /de la dang po la ni 'khor los sgyur ba'i 'o/ /gnyis pa ni rang sangs rgyas kyi'o/ /gsum pa ni byang chub sems dpa'i 'o/ /bzhi pa ni de las gzhan pa'i sems can rnams so/ /'tsho ba rnam pa drug gang zhe na/ 'di lta ste/ zhing rmo ba dang / tshong bya ba dang / phyugs 'tsho ba dang / rgyal po la zho shas 'tsho ba dang / yi ge dang / grangs dang / shod dgod pa dang / rtsis dang / lag rtsis dang / de las gzhan pa'i bzo'i gnas rnams so/ /kun nas srung ba rnam pa drug gang zhe na/ 'di lta ste/ glang po che'i tshogs dang / rta pa'i tshogs dang / shing rta'i tshogs dang / dpung bu chung gi tshogs dang / nor gyi stobs dang / mdza' bshes kyi stobs so/ /sdug bsngal rnam pa bdun gang zhe na/ skye ba dang / rga ba dang / na ba dang / 'chi ba dang / mi sdug pa dang phrad pa dang / sdug pa dang bral ba dang / 'dod pas phongs pa rnams so/ /nga rgyal rnam pa bdun gang zhe na/ nga rgyal dang / che ba'i nga rgyal dang / nga rgyal las kyang nga rgyal dang / /nga'o snyam pa'i nga rgyal dang / /mngon pa'i nga rgyal dang / cung zad snyam pa'i nga rgyal dang / log pa'i nga rgyal lo/ /rgyags pa rnam pa bdun gang zhe na/ nad med pa'i rgyags pa dang / lang tshos rgyags pa dang / gson pas rgyags pa dang / rigs kyis rgyags pa dang / gzugs kyis rgyags pa dang / dbang phyug gis rgyags pa dang / thos pas rgyags pa'o/ /tha snyad bzhi gang zhe na/ mthong ba'i tha snyad dang / thos pa'i tha snyad dang / bye brag phyed pa'i tha snyad dang / rnam par shes pa'i tha snyad do/ /mthong ba'i tha snyad gang zhe na/ gang des mig gis phyi rol mngon sum du byas nas de la brten te/ gzhan dag la tha snyad du brjod pa gang yin pa de ni mthong ba'i tha snyad ces bya'o/ /thos pa'i tha snyad gang zhe na/ gang gzhan las thos nas de la brten te/ gzhan dag la tha snyad du brjod pa gang yin pa'o/ /bye brag phyed pa'i tha snyad gang zhe na/ gang des ma mthong ma thos par bdag nyid kyis bsams shing gcal la nye bar brtags nas/ de la brten te/ gzhan dag la tha snyad du brjod pa gang yin pa'o/ /rnam par shes pa'i tha snyad gang zhe na/ gang des nang so sor rang gis rig pa dang / rtogs pa dang / reg pa dang / mngon sum du byas nas de la brten te/ gzhan dag la tha snyad du brjod pa gang yin pa de ni/ rnam par shes pa'i tha snyad ces bya'o/ /tha snyad kyi gzhi mang po dag gang zhe na/ de dag ni nges pa'i tshig gi gzhi rnam shes kyang bya/ spros pa'i gzhi rnams dang / don bsdus pa'i gzhi rnam par shes kyang bya ste/ rnam grangs su gtogs pa'o/ /de dag ni yi ge'i phyi mo'i yi ge rnams kyi don thams cad sdud par rig par bya ste/ de dag kyang 'di lta ste/ sa dang / dbang po dang / yul dang / chos dang / gang zag dang / ngo bo nyid dang / bye brag rnams dang / bya ba dang / bdag dang / gzhan dang / dngos po dang / dngos po med pa dang / dri ba dang / lan glan pa dang / sbyin pa dang / blang ba dang / yang dag pa nyid dang / log pa nyid rnams dang / gnang ba dang / bkag pa dang / yon tan dang / skyon dang / rnyed pa dang / ma rnyed pa dang / snyan pa dang / mi snyan pa dang / bde ba dang / sdug bsngal ba dang / smad pa dang / bstod pa dang / snying po dang / mchog dang / shes pa dang / zhum pa dang / sgyid lug pa dang / de tsam dang / grogs la yang dag par bstan pa dang / yang dag par 'dzin du 'jug pa dang / yang dag par gzengs bstod pa dang / yang dag par rab tu dga' bar bya ba rnams dang / brjod pa'i tshig bdun la de dag kyang rnam par dbye ba bdun po rnams yin te/ skyes pas skyes pa la/ skyes pas zhes bya ba la sogs pa dang / gdags pa dang / gdags su med pa dang / brda sprod pa dang / nges par sems pa dang / rnam par rig par byed pa dang / gnas pa dang / gzhag pa dang / 'dus pa dang / bsags pa dang / nges pa dang / bsgo ba dang / ya mtshan dang / thog ma dang / bar ma dang / tha ma rnams dang / rigs kyi 'du shes pa dang / dam bca' ba dang / tha snyad dang / nan tan dang / longs spyad pa dang / btsal ba dang / kun nas bsrung ba dang / 'dzem pa dang / snying brtse ba dang / bzod pa dang / 'jigs pa dang / so sor rtog ba rnams dang / pha dang ma dang / bu la sogs pa yongs su bzung ba dang / yo byad thams cad kyang brjod par bya'o/ /skye ba dang / rga ba nas 'dod pas phongs pa'i bar dang / mya ngan dang / smre sngags 'don pa dang / lang tsho dang / nad med pa dang / gson pa dang / sdug pa dang phrad pa dang / mi sdug pa dang bral ba dang / 'dod pa 'byor ba dang / rgud pa dang / sngon du 'ong ba dang / phyir 'gro ba dang / mdun du blta ba dang / g.yas g.yos su blta ba dang / bskum pa dang / brkyang ba dang / 'gro ba dang / 'greng ba dang / 'dug pa dang / nyal ba dang / mi nyal ba dang / smra ba dang / mi smra ba dang / gnyid dang / snyom pa bsangs ba rnams dang / zos pa dang / 'thungs pa dang / 'chos pa dang / myangs pa dang / goms pa dang / ma goms pa dang / bag med pa dang / bag yod pa rnams dang / bsdu ba dang / spro ba dang / 'grib pa dang / 'phel ba dang / rtog pa dang / dpyod pa dang / nyon mongs pa dang / nye ba'i nyon mongs pa dang / spros pa dang / spros pa med pa rnams dang / nyams stobs dang / nyam chung ba dang / bsgrub pa dang / sgrub pa dang / 'jug pa dang / so sor nges pa dang / 'byor 'brel dang / mgyogs pa dang / go rims dang / dus dang / yul dang / grangs dang / tshogs pa dang / ma tshogs pa dang / 'dra ba dang / mi 'dra ba rnams dang / 'dres pa dang / thun mong dang / mngon sum dang / lkog dang / bsgribs pa bsgrags pa rnams dang / dgos pa dang / rgyu dang / 'dul ba dang / 'jig rten gyi spyod pa dang / yo byad dang / bden pa dang / brdzun pa dang / phan pa dang / mi phan pa dang / gnas dang / dogs pa dang / ltad mo rnams dang / 'jigs pa med pa dang / 'jigs pa med pa ma yin pa dang / gsal ba dang / mi gsal ba dang / gsad pa dang / bcing ba dang / go rar bzhug pa dang / gcad pa dang / spyugs pa rnams dang / gshe ba dang / khro ba dang / brdeg pa dang / bsdigs pa dang / dam 'cha' ba dang / bsreg pa dang / bsrul ba dang / bskam pa dang / btso ba dang / dril ba dang / rnyog pa can dang / yid ches pa'i lung dang / rjes su dpag pa rnams so/ /ngo bo nyid la sogs ba las kyi bar gyi rnam pa lnga po de dag ni/ gnas gsum po/ gzugs 'dus pa dang / sems dang sems las byung ba'i tshogs dang / 'dus ma byas pas bsdus par rig par bya ste/ de las gzhan pa btags pa yod pa'i chos rnams ni ma gtogs so/ /de la re zhig gzugs 'dus pa la/ chos thams cad nam skye ba na/ rang gi sa bon rnams las skye'o/ /ji ltar 'byung ba chen po rnams rgyur byas te/ gzugs skye zhes bya/ de dag la rgyur byas pa'i gzugs brten pa dang / de dag la gnas pa dang / de dag gis brtan pa dang / de dag gis 'phel bar byas par yang ji ltar 'gyur zhe na/ 'di ltar nang dang phyi rol gyi 'byung ba dang / rgyur byas pa'i gzugs thams cad kyi sa bon rnams ni/ nang gi sems kyi rgyud la gnas pa yin te/ de la ji srid du 'byung ba'i sa bon gyis 'byung ba rnams bskyed par ma gyur pa/ de srid du rgyur byas pa'i gzugs kyi sa bon yang / rgyur byas pa'i gzugs skyed par mi byed de/ 'byung ba rnams skyes nas/ de rgyur byas pa'i gzugs rang gi sa bon nyid las skye ba na/ de rgyur byas nas skyes zhes bya'o/ /de skyes pas mngon du 'gro ba'i phyir te de ltar na 'byung ba rnams ni de bskyed pa yin no/ /rgyur byas pa'i gzugs ji lta de ltar de la brten ce na/ 'di ltar rgyur byas pa'i gzugs skyes ba de 'byung ba'i phyogs dang tha dad pa med par gnas pa'i phyir ro/ /ji ltar de la gnas she na/ 'byung ba chen po'i phan pa dang / gnod pa dag gis grub pa dang / bde ba gcig pa'i phyir ro/ /ji ltar des brtan pa yin zhe na/ de yod pa tsam gyis 'jig par mi 'gyur ba'i phyir ro/ /ji ltar 'phel bar byas she na/ kha zas sam/ gnyid log pa'am/ tshangs par spyod pa la gnas pa'am/ ting nge 'dzin la brten na/ de la gnas pa'i phyir zhing 'phel ba dang / shin tu rgyas par 'gyur te/ de bas na 'phel bar byed pa zhes bya'o/ /'byung ba chen po rnams kyi rnam pa lnga po ni/ rgyur byas pa'i gzugs la byed pa yin par rig par bya'o/ /gzugs 'dus pa la yang rdul phra rab ni nams kyang skye bar mi 'gyur ro / /skye ba na rang gi sa bon las 'dus pa nyid chung ngu'am/ 'bring ngam chen po skye bar zad kyi/ rdul phra rab rnams kyis 'dus pa bskyed pa ni ma yin no/ /rdul phra rab ni blos tshad kyi mtha' yongs su bcad pa las 'dogs par zad de/ de la 'dus pa yang phyogs dang bcas pa yin la/ rdul phra rab kyang phyogs dang bcas pa yin te/ 'on kyang 'dus pa ni yan lag dang bcas pa yin gyi/ rdul phra rab ni ma yin no/ /de ci'i phyir zhe na/ rdul phra rab nyid yan lag yin la/ de yang 'dus pa nyid la yod kyi/ rdul phra rab rnams ni rdul phra rab gzhan gyi ma yin te/ de bas na rdul phra rab ni yan lag dang bcas pa ma yin no/ /tha dad pa med pa ni yan lag dang bcas pa rnam pa gnyis te/ phyogs gcig gi tha dad med pa ni/ 'di lta ste/ gzugs dang / sgra dang / dri dang / ro dang / reg bya dbang po med pa rnams kyi 'byung ba'i rdul phra rab la ni/ dbang po ma gtogs pa rnams dang / dbang po dang bcas pa la ni/ dbang po dang bcas pa rnams phyogs gcig gi tha dad pa med pa yin no/ /yul gcig pa'i phyir 'dres pa'i tha dad med pa ni 'di lta ste/ 'byung ba'i rdul phra rab de nyid las de las gzhan pa'i 'dus pa'i 'byung ba dang / 'byung ba las gyur pa tha dad pa med de/ gzugs 'dus pa de mtha' dag ni/ rdzas rnam pa sna tshogs rdo la legs par btags pa chu dang sbyar ba lta bur 'dres par gyur pa'i tha dad pa med par blta bar bya'i/ til dang / mon sran sde'u dang / mon sran gre'u dang / rgya shug gi 'bru dang / rgya sran la sogs pa'i phung po lta bu ni ma yin no/ /rgyur byas pa'i gzugs thams cad kyang 'byung ba chen po'i phyogs la gnas pa nyid yin gyi/ 'byung ba chen po'i phyogs dang tha dad du ni mi gnas te/ 'byung ba chen po rnams kyis phyogs ji tsam non pa rgyur byas pa'i gzugs kyis kyang de tsam non te/ de'i phyir yang rgyur byas pa'i gzugs ni 'byung ba chen po la brten pa zhes bya'o/ /de nyid kyi phyir 'byung ba chen po rnams ni/ 'byung ba chen po zhes bya ste/ chen por 'byung ba'i phyir 'byung ba chen po zhes bya'o/ /gzugs 'dus pa de dag kyang mdor bsdu na/ rdzas rnam pa bcu bzhi yod de/ 'di lta ste/ sa dang / chu dang / me dang / rlung dang / gzugs dang / sgra dang / dri dang / ro dang / reg bya rnams dang / mig la sogs pa'i dbang po'i gzugs can lnga ste/ yid kyi spyod yul gyi gzugs nyid ma gtogs so/ /de la dbang po gzugs can gyis bsdus pa'i gzugs 'dus pa thams cad ni ji skad bstan pa'i rdzas thams cad kyi khams dang ldan no/ /dbang po gzugs can gyis bsdus pa ji lta bar dbang po gzugs can gyi gnas 'byung ba chen pos bsdus pa yang de bzhin no/ /de las gzhan pa'i 'dus pa ni dbang po gzugs can rnams ma gtogs par/ de las gzhan pa'i khams dang ldan no/ /de la mtshan nyid kyis bsdu pas rdzas bcu bzhi po de dag tu gyur to/ /mtshan nyid kyis chos bsdu ba de nyid la brten nas/ rdzas kyi rdul phra rab gdags so/ /khams kyis bsdus pa ni/ 'dus pa gang khams ji snyed las byung ba de/ rdzas de snyed kyis bsdus par brjod par bya'o/ /dbyer med pas bsdus pa ni nang gi'am/ phyi rol gyi bsdus pa gang la/ mtshan nyid kyis chos ji snyed dmigs pa'i rdzas de nyid kyis 'dus pa de bsdus par rig par bya ste/ 'di ltar 'dus pa la la ni/ 'byung ba gcig pu dmigs te/ 'di lta ste/ rdo dang / nor bu dang / mu tig dang / bai DUR+Ya dang / dung dang / man shel dang / byi rul sogs pa dang / chu mig dang / mtsho dang / mtshe'u dang / chu klung dang / 'bab chu la sogs pa dang / me lce dang / mar me dang / sgron ma la sogs pa dang / shar dang / lho dang / nub dang / byang gi rlung gi dkyil 'khor rdul dang bcas pa'am/ rdul med pa'i rlung la sogs pa la dmigs pa lta bu'o/ /la la la ni gnyis dmigs te/ 'di lta ste/ chab brom dang / shing rlon pa dang / lo ma dang / me tog dang / 'bras bu rlon pa la sogs pa'am/ nor bu la sogs ba bsregs pa lta bu'o/ /la la la ni gsum dmigs te/ 'di lta ste/ shing la sogs pa de dag nyid bsregs sam bskyod pa lta bu'o/ /la la la ni bzhi char dmigs te/ 'di lta ste/ nang gi gzugs 'dus pa lta bu dag ste/ bcom ldan 'das kyis ji skad du/ nang gi so so rang gi skra la sogs pa nas phyi sa la thug pa'i bar gang yin pa de ni nang gi sa'i khams so/ /gcin la sogs pa ni chu'i khams so/ /gang gis lus 'di kun nas gdungs shing kun tu gdungs pa dang / gang gi shas che bas/ rims kyis btab po zhes bya ba'i grangs su 'gro ba de ni me'i khams so/ /rlung gyen du rgyu ba la sogs pa ni rlung gi khams so zhes gsungs pa lta bu ste/ de ltar na gang la gang dmigs pa de ni de'i mtshan nyid kyis yod la gang mi dmigs pa de ni med do/ /sgra ni gzugs 'dus pa thams cad la khams kyi tshul gyis yod do/ /mtshan nyid kyis ni la la la ni da ltar byung ba'i sbyor bas bskyed pas yod do/ /rlung yang rnam pa gnyis te/ rgyud brtan pa dang / rgyud mi brtan pa'o/ /de la rgyud brtan pa ni/ 'dus pa de dang de dag na 'khrul 'khor gyis rgyu ba gang yin pa'o/ /rgyud mi brtan pa ni/ dkyil 'khor na rgyu ba dang / bar snang la rgyu ba'o/ /de la mun pa'i gzugs dang / snang ba'i gzugs dang / khang stong la ni nam mkha'i khams zhes bya'o/ /mun pa'i gzugs de yang / 'jig rten gyi bar dag gi ni brtan pa'o/ /gzhan dag na yod pa ni mi brtan pa'o/ /de bzhin du snang ba'i gzugs la yang / lha rnams kyi rang las 'od 'byung ba rnams ni brtan pa'o/ /gzhan na yod pa ni mi brtan pa ste/ snang ba dang mun pa de yang / kha dog shas che ba'i 'dus pa yin par blta bar bya'o/ /gzugs 'dus pa'i sa bon sems la gnas pa'i mthu dang / /de dang 'dra ba'i rkyen yod pa las/ res 'ga' ni 'dus pa chung ngu'i mjug thogs su 'dus pa chen po 'byung bar 'gyur ro/ /res 'ga' ni 'dus pa chen po'i mjug thogs su 'dus pa chung ngu 'byung bar 'gyur ba yang yod de/ des na 'dus pa rnams kyi 'bri ba dang skye ba mngon no/ /sra ba nyid gang zhe na/ sa'o/ /sra bar gyur pa gang zhe na/ de'i sa bon gang yin pa'o/ /yang sra ba de nyid khams so/ /sra bar gyur pa ni skra la sogs pa'am/ bong ba la sogs pa'o/ /zin par gyur pa gang zhe na/ zin pa nang gang yin pa'o/ /zin par gyur pa ma yin pa gang zhe na/ ma zin pa phyi rol gang yin pa'o/ /yang sems dang sems las byung ba rnams kyis sa bon zin par gyur pa ni/ mtshan nyid zin pa yin no/ /de las bzlog pa zin par gyur pa ma yin pa ni ma zin pa'o/ /yang zin pa ni zin par gyur pa ste/ bdag tu khas len pa'i phyir ro/ /zin pa ni snga ma bzhin no/ /chu'i khams la sogs pa la yang de bzhin du ci rigs par blta bar bya'o/ /de la gzugs 'dus pa thams cad la ni dus thams cad du 'byung ba chen po thams cad kyi khams yod do / 'di lta ste/ shing skam po gtsubs pa las me 'byung ba dang / de bzhin du rdo brdabs pa las me 'byung ba dang / de bzhin du lcags dang dngul dang gser la sogs pa me 'jebs pas bsregs na brkyang brkyang por 'gyur ba dang / de bzhin du chu shel las chu 'byung ba dang / de bzhin du rdzu 'phrul can gyi sems kyi mos pa'i dbang gis sa la sogs pa dang / gser la sogs pa 'byung bar snang ngo / /gzugs 'dus pa de yang rgyu rnam pa gsum gyis 'jug par 'gyur te/ rgyas pa las byung ba dang / rgyu mthun pa las byung ba dang / rnam par smin pa las byung ba'o/ /de la rgyas pa las byung ba ni rnam pa gnyis te/ yul la khyab pa'i rgyas pa las byung ba dang / mtshan nyid brtas par byed pa'i rgyas pa las byung ba'o/ /rgyu mthun pa las byung ba ni rnam pa bzhi ste/ rgyas pa'i rgyu mthun pa las byung ba dang / rnam par smin pa'i rgyu mthun pa las byung ba dang / gyur pa'i rgyu mthun pa las byung ba dang / /rang bzhin gyi rgyu mthun pa las byung ba'o/ /rnam par smin pa las byung ba ni rnam pa gnyis te/ rnam par smin par skyes pa/ rnam par smin par byung ba dang / rnam par smin pa las skyes pa/ rnam par smin pa las byung pa'o/ /gzugs 'dus pa de yang mdor bsdu na/ gnas drug la brten nas 'jug ste/ gzhi'i gnas dang / rten gyi gnas dang / yo byad kyi gnas dang / dbang po'i rten gyi gnas dang / dbang bo'i gnas dang / ting nge 'dzin gyi spyod yul kyi gnas so/ /de la sems dang sems las byung ba'i tshogs la/ sems kyang dmigs la/ sems las byung ba lnga bcu rtsa gcig po ji skad smos pa 'di lta ste/ yid la byed pa la sogs pa nas/ rtog pa dang dpyod pa la thug pa'i bar dag kyang dmigs so/ /sems las byung ba'i chos de dag las/ du zhig sa thams cad pa/ sems can thams cad du/ dus thams cad du/ thams cad 'byung zhe na/ smras pa/ yid la byed pa la sogs pa nas sems pa la thug pa yan chad lnga po rnams so/ /du zhig sa thams cad pa/ thams cad du 'byung la/ dus thams cad du ma yin zhing / thams cad ma yin zhe na/ lnga kho na ste/ 'dun pa nas shes rab la thug pa yan chad do/ / du zhig dge ba kho na yin la/ thams cad du ma yin mod kyi / sa thams cad pa yin te/ dus thams cad du ma yin la/ thams cad kyang ma yin zhe na/ dad pa la sogs pa nas/ rnam par mi 'tshe ba la thug pa yan chad do/ /du zhig nyon mongs can kho na yin la/ sa thams cad pa yang ma yin/ dus thams cad du yang ma yin/ thams cad kyang ma yin zhe na/ 'dod chags la sogs pa nas/ shes bzhin ma yin pa la thug pa yan chad do/ /du zhig thams cad du 'byung la/ sa thams cad pa ma yin/ dus thams cad du ma yin/ thams cad kyang ma yin zhe na/ 'gyod pa la sogs pa nas spyod pa la thug pa yan chad do/ /de la dbang po yang yongs su ma nyams shing / yul yang snang bar gyur la/ de'i 'og tu de dang 'byung ba yid la byed pa nye bar gnas par gyur na/ rnam par shes pa 'byung bar 'gyur ro/ /dbang po yongs su ma nyams pa ji lta bu yin zhe na/ rgyu gnyis kyis te/ ma rung bar ma gyur pa dang / rtul ba'i rang bzhin ma yin pas so/ /yul snang bar gyur pa ji lta bu yin zhe na/ 'di lta ste/ rten tam/ ngo bo nyid dam/ yul lam/ dus sam/ gsal ba'am/ mi gsal ba'am/ dngos po mtha' dag gam phyogs gcig kyang rung ste/ gal te sgrib pa bzhi po dag gis ma bsgribs pa dang / ma bskal pa yin te/ sgrib g.yog gi sgrib pa dang / mi snang bar byed pa dang / zil gyis non pa dang / mig slu bar byed pas ma bsgribs shing / yul gyis bskal pa dang / chung dus bskal pa gnyis kyis ma bskal pa'o/ /de dang 'byung ba yin la byed pa ji ltar 'byung bar 'gyur zhe na/ rnam pa bzhis 'gyur te 'dun pa'i stobs dang / dran pa'i stobs dang / yul gyi stobs dang / goms pa'i stobs kyis 'byung bar 'gyur ro/ /'dun pa'i stobs kyis ji lta bu zhe na/ gang rjes su chags pa der sems shas cher 'jug pa 'byung ba'o/ /dran pa'i stobs kyis ji lta bu zhe na/ gang du shin tu mtshan ma bzung ba dang / shin tu rab tu bkra bar bzung ba der sems shas cher 'jug pa 'byung ba'o/ /yul gyi stobs kyis ji lta bu zhe na/ gang na yul cher rags pa'am/ ches yid du 'ong ba nye bar gnas pa der sems shas cher 'jug pa 'byung ba'o/ /goms pa'i stobs kyis ji lta bu zhe na/ shin tu 'dris shing / shin tu yongs su 'dris par gyur pa gang yin pa der sems shas cher 'jug pa 'byung ba'o/ /de lta ma yin na dmigs pa gcig la rtag tu yid la byed pa rnam pa gcig pu 'byung bar 'gyur ro/ /rnam par shes pa'i tshogs lnga'i skad cig gnyis lhan cig tu 'byung ba yang med la/ phan tshun gyi mjug thogs su phan tshun 'byung bar 'gyur bar yang ma nges so / /skad cig gcig la byung ba'i rnam par shes pa'i tshogs lnga po dag gi mjug thogs su/ yid kyi rnam par shes pa nges par 'byung bar 'gyur ro/ /de ma thag tu gal te rnam par g.yeng bar gyur na ni/ de'i 'og tu rnam par shes pa'am/ rnam par shes pa'i tshogs lnga po dag las gang yang rung ba zhig 'byung bar 'gyur ro/ /gal te rnam par g.yeng bar ma gyur na ni/ de'i 'og tu nges pa zhes bya ba yid kyi rnam par shes pa gnyis pa 'byung bar 'gyur ro/ /yid kyi rnam par shes pa tshol ba dang / nges bde gnyis kyis kyang de la rnam par rtog par byed do/ /de la nyon mongs pa can nam/ dge ba'i chos ni rgyu gnyis pa rnam par rtog pa dang / sngon gyi 'phen pas 'byung bar 'gyur te/ de la yid kyi rnam par shes pa la ni rgyu gnyis kas 'byung ngo / /rnam par shes pa'i tshogs lnga po dag la ni sngon gyi 'phen pa kho nas 'byung ngo / /nyon mongs pa can dang / dge ba'i yid kyi rnam par shes pa'i 'phen pa las de ma thag tu mig la sogs pa'i rnam par shes pa la nyon mongs pa can dang / dge ba'i chos 'byung bar 'gyur gyi rnam par rtog pas ni ma yin te/ de dag ni rnam par mi rtog pa'i phyir ro/ /de nyid kyi phyir mig la sogs pa'i rnam par shes pa rnams ni/ yid kyi rnam par shes pa'i rjes su 'jug pa zhes bya'o/ /gang sems gcig gam/ de'i phyi ma rnam shes bya ba de la/ sems gcig tu ji ltar bzhag ce na/ tha snyad gdags pa'i sems kyi skad cig gis bzhag gi 'jug pa'i skad cig ni ma yin no/ /tha snyad gdags par sems gcig gang zhe na/ tshig gcig la brten nas dngos po gcig la dus ji tsam gyis rnam par rig pa 'byung ba de tsam la sems gcig ces bya'o/ /de dang 'dra bar rgyu ba de la yang gcig ces bya'o/ /mi 'dra ba ni de las gnyis pa zhes bya'o/ /de la yid kyi rnam par shes pa rtsol ba med cing / rnam par g.yeng bar gyur pa dang / dmigs pa ma 'dris pa la ni 'dun pa la sogs pa 'jug pa med do/ /yid kyi rnam par shes pa de ni nye bar gnas ba las byung ba zhes brjod par byas te / 'das pa la dmigs pa kho na'o/ /rnam par shes pa'i tshogs lnga po dag gi mjug thogs su byung ba'i yid la tshol ba'am/ nges pa ni gal te/ de'i yul de'i dmigs pa yin na/ da ltar gyi yul can kho na zhes bya'o/ /de la rnam par shes pas ni dngos po mtha' dag gi mtshan nyid rnam par shes par byed do/ / de nyid rnam par rig par ma gyur pa ni/ rnam par shes par bya ba'i mtshan nyid ces bya ste/ de ni yid la byed pas rnam par shes par byed do/ /de nyid la sdug pa dang mi sdug pa dang gnyis ka las bzlog pa'i mtshan nyid gang yin pa de ni reg pas rig par byed do/ /de nyid la phan pa dang gnod pa dang / gnyis ka las bzlog pa'i mtshan nyid gang yin pa de ni tshor bas rig par byed do/ /de nyid la tha snyad kyi mtshan ma'i mtshan nyid gang yin pa ni 'du shes kyis rig par byed do/ /de nyid la yang dag pa dang log pa dang gnyis ka las bzlog pa'i bsgrub pa'i mtshan ma'i mtshan nyid gang yin pa de ni sems pas rig par byed de/ de lta bas na sems las byung ba yid la byed pa la sogs pa nas/ sems pa la thug pa de dag ni sa thams cad pa/ thams cad la dus thams cad du thams cad 'byung bar 'gyur ro/ /yid la byed pa gang zhe na/ sems kyi 'jug pa'o/ /rig pa gang zhe na/ gsum 'dus pa'o/ /tshor ba gang zhe na myong ba'o/ /'du shes gang zhe na/ kun shes pa'o/ /sems pa gang zhe na/ sems mngon par 'du byed pa'o/ /'dus pa gang zhe na/ gang 'dod pa'i dngos po de dang de la de'i rjes su 'gro zhing byed 'dod pa'o/ /mos pa gang zhe na/ gang des pa'i dngos po de dang de la de'i rjes su 'gro zhing nges par 'dzin nus pa'o/ /dran pa gang zhe na/ gang 'dris pa'i dngos po de dang de la de'i rjes su 'gro zhing mngon par brjod pa'o/ /ting nge 'dzin gang zhe na/ gang brtag pa'i dngos po de dang de la de'i rjes su 'gro zhing nges par sems pa la brten nas sems rtse gcig pa'o/ /shes rab gang zhe na/ gang brtag pa'i dngos po nyid de dang de la de'i rjes su 'gro zhing / chos rnams la rab tu rnam par 'byed pa ste/ rigs pas bskyed pa 'am/ rigs pa ma yin pas bskyed pa'am/ rigs pas bskyed pa yang ma yin rigs pa ma yin pas bskyed pa yang ma yin pa'o/ /de la yid la byed pa las ci byed ce na/ sems gtod pa'i las byed do/ /reg pa las ci byed ce na/ tshor ba dang / 'du shes dang / sems pa rnams kyi gnas sbyin pa'i las byed do/ / tshor ba las ci byed ce na/ srid pa skye ba dang / btang snyoms su 'jog pa'i las byed do/ /'du shes las ci byed ce na/ dmigs pa la sems mtshan mar 'dzin pa'i tha snyad kyi las byed do/ /sems pa las ci byed ce na/ rtog pa dang / lus dang / ngag gi las la sogs pa slong ba'i las byed do/ /'dun pa las ci byed ce na/ brtson 'grus rtsom pa skyed pa'i las byed do/ /mos pa las ci byed ce na/ yon tan nam nyes pa'am/ gnyi ga ma yin pas dmigs pa la dga' bar byed pa'i las byed do/ /dran pa las ci byed ce na/ yun ring po nas bsams pa dang / byas pa dang / smras pa dang / dran pa las rjes su dran pa'i las byed do/ /ting nge 'dzin las ci byed ce na/ ye shes kyi gnas sbyin pa'i las byed do/ /shes rab las ci byed ce na/ spros pa rgyu ba dang / kun nas nyon mongs pa dang / rnam par byang ba dang / mthun pa la spyod pa'i las byed do/ /de la dus gsum rnam par gzhag pa ji lta bu yin zhe na/ sa bon rnams kyi ni chos de las tha mi dad pas na/ 'bras bu byin ma byin las chos de rnam par gzhag pa bzhin du de yang rnam par gzhag go/ /'bras bu rnams kyi ni 'gags pa'i mtshan nyid gang yin pa de ni 'das pa'o/ /rgyu yod la ma byung ba'i mtshan nyid ni ma 'ongs pa'o/ /byung la ma 'gags pa'i mtshan nyid ni da ltar byung ba'o/ /skye ba dang / rga ba dang / gnas pa dang / mi rtag pa nyid ji ltar rnam par gzhag ce na/ rnam par shes pa'i rgyud thams cad la ni sa bon gyi rgyud thams cad lhan cig rgyu bar rnam par gzhag ste/ rkyen yod la/ rkyen yod pa'i dbang gis rgyud snga nas ma byung ba las dang po chos gang 'byung ba de ni 'dus byas kyi mtshan nyid skye ba zhes bya'o/ /de nyid gzhan du 'gyur ba ni rga ba'o/ /de la yang rnam pa gnyis te/ gzhan nyid du gzhan du 'gyur ba dang / tha dad pas gzhan du 'gyur ro / /de la 'dra bar 'byung ba ni gzhan nyid du gzhan du 'gyur ba'o/ /mi 'dra bar 'byung ba ni tha dad par gzhan du 'gyur ba'o/ /skyes ma thag pa'i skye ba tsam gyi skad cig rjes su 'jug pa ni gnas pa'o/ skye ba ni skad cig phan chad skad cig mi gnas pa ni mi rtag pa nyid de/ de dag kyang chos de nyid kyi dus kyi bye brag las mtshan nyid bzhir 'gyur ro/ /rkyen ni bzhi ste/ rgyu'i rkyen dang / mtshungs pa de ma thag pa'i rkyen dang / dmigs pa'i rkyen dang / bdag po'i rkyen dang / de la sa bon gyi rgyu'i rkyen te/ mtshungs pa de ma thag pa'i rkyen ni/ rnam par shes pa gang gi mjug thogs su rnam par shes pa gang dag 'byung bar nges pa de ni de dag gi mtshungs pa de ma thag pa'i rkyen to/ /dmigs pa'i rkyen ni sems dang sems las byung ba'i chos gang dag gi dmigs pa gang yin pa'o/ / bdag po'i rkyen ni sa bon ma gtogs pa'i gnas gang yin pa ste/ 'di lta ste/ mig gi rnam par shes pa'i mig dang / de'i grogs su gtogs pa'i chos gang yin pa rnams so/ /rnam par shes pa lhag ma rnams kyang de dang 'dra ba ste/ 'dod pa dang mi 'dod pa'i 'bras bu yongs su 'dzin pa'i phyir/ dge ba dang mi dge ba nyid gang yin pa dang / de lta bu dang mthun pa rnams ni bdag po'i rkyen to/ /de la sa bon las ni rgyu'i rkyen rnam par gzhag go/ /ngo bo nyid las ni mtshungs pa de ma thag pa'i rkyen rnam par gzhag go/ /dmigs pa las ni de nyid rnam par gzhag go/ /gnas dang grogs la sogs pa las ni bdag po'i rkyen rnam par gzhag go/ /rnam par shes pa 'byung ba'i rgyu gang dag yin pa dang / rkyen gang dag yin pa zhes gang bstan pa de la/ bzhi po 'di dag nyid la rgyu'i rkyen gcig po ni/ rgyu yang yin la/ rkyen yang yin no/ /lhag ma rnams ni rkyen nyid do/ /dge ba dang mi dge ba dang / lung du ma bstan pa zhes gang bstan pa la/ de dag gi rab tu dbye ba gang zhe na/ dge ba ni rnam pa gcig ste/ kha na ma tho ba med pa'i don gyis so/ /rnam pa gnyis te/ skyes nas thob pa dang / sbyor ba las byung ba'o/ /rnam pa gsum ste/ ngo bo nyid dang ldan pa dang / kun nas bslang ba'o/ /rnam pa bzhi ste/ bsod nams kyi cha dang mthun pa dang / thar pa'i cha dang mthun pa dang / nges par 'byed pa'i cha dang mthun pa dang / zag pa med pa'o/ /rnam pa lnga ste/ sbyin pa las byung ba dang / tshul khrims las byung ba dang / bsgoms pa las byung ba dang / sdug pa'i 'bras bu dang / bral ba'i 'bras bu'o/ /dge ba'i rnam pa drug ste/ gzugs dang / tshor ba dang / 'du shes dang / 'du byed dang / rnam par shes pa dang / so sor brtags pas 'gog pa'o/ /rnam pa bdun te dran pa nye bar gzhag par bsdus pa dang / yang dag pa'i spong ba dang / rdzu 'phrul gyi rkang ba dang / dbang po dang / stobs dang / byang chub kyi yan lag dang / lam gyi yan lag tu bsdus pa'o/ /rnam pa brgyad de/ mngon par smra ba dang / phyag 'tshal ba dang / ldang ba dang / thal mo sbyar ba'i las su bsdus pa dang / legs par smras pa la legs so zhes bya ba sbyin pa dang / bden pa'i bsngags pa brjod par bsdus pa dang / nad g.yog bya bar bsdus pa dang / bla ma rnams la gus par bsnyen bkur byed par bsdus pa dang / rjes su yi rang bar bsdus pa dang / gzhan yang dag par 'dzin du 'jug par bsdus pa dang / yongs su bsngo bar bsdus pa dang / tshad med par bsgom par bsdus pa'o/ /rnam pa dgu ste/ sbyor ba dang / bar chad med pa dang / rnam par grol ba dang / khyad par gyi lam du bsdus pa dang / chung ngu dang / 'bring dang / chen po dang / 'jig rten pa dang / 'jig rten las 'das pa'i lam du bsdus pa'o/ /rnam pa bcu ste/ rdzas las byung ba dang / rdzas las byung ba ma yin pa dang / thos pa las byung ba dang / bsams pa las byung ba dang / sdom par bsdus pa dang / sdom pa yang ma yin/ sdom pa ma yin pa yang ma yin par bsdus pa dang / dngos gzhi dang nyer bsdogs su bsdus pa dang / nyan thos kyi theg par bsdus pa dang / rang sangs rgyas kyi theg par bsdus pa dang / theg pa chen por bsdus pa'o/ /yang rnam pa bcu ste/ 'dod pa dang ldan pa dang / bsam gtan dang po dang / gnyis pa dang / gsum pa dang / bzhi pa dang ldan pa dang / nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min skye mched dang ldan pa dang / zag pa med par bsdus pa'o/ /yang rnam pa bcu ste/ dge ba bcu'i las kyi lam rnams so/ /yang rnam pa bcu ste/ mi slob pa'i yang dag pa'i lta ba nas / yang dag pa'i rnam par grol ba dang / yang dag pa'i shes pa'i bar ro/ /yang rnam pa bcu ste/ bsod nams las skye ba brgyad dang / 'khor los sgyur ba'i rgyal por 'gyur ba dang / mi g.yo bar nye bar 'gro ba'i dge ba ste/ de lta bu dang mthun pa rnams ni dge ba'i rab tu dbye ba yin no/ /mdor bsdu na ni dge ba'i don rnam pa gnyis te/ sdug pa'i 'bras bu yongs su 'dzin pa'i don dang / dngos po yongs su shes pa la mkhas pa de'i 'bras bu'i don to/ /mi dge ba de dag ni mi sdug pa'i 'bras bu yongs su 'dzin pa'i phyir dang / dngos po yang dag par yongs su mi shes pa'i phyir ro/ / dge ba'i chos la bgegs byed par gyur ba dang / sgrib par gyur pa yin no/ /lung du ma bstan pa ni rnam pa bzhi ste/ rnam par smin pa las byung ba dang / de la spyod lam las byung ba kha cig dang / bzo'i gnas las byung ba dang / sprul pa byed pa las byung ba'o/ /bzo'i bag gang ci yang rung ste/ dga' ba dang rtse ba'i don du byed kyi/ 'tsho ba'i don du ni yin pa dang / las kyi 'du shes kyis byed pa ma yin pa dang / so sor brtags pas byed pa ma yin pa'i bzo'i gnas las byung ba de ni nyon mongs pa can no/ /gzhan ni lung du ma bstan pa'o/ /bzo'i gnas las byung ba ji lta bar spyod lam las byung ba yang de bzhin no/ /sprul pa byed pa las byung ba ni dge ba dang / lung du ma bstan pa'o/ /mig ni rnam pa gcig ste/ gzugs rnams la lta ba'o/ /rnam pa gnyis te rgyas pa las byung ba dang / rnam par smin pa las byung ba'o/ /rnam pa gsum ste/ sha'i mig dang / lha'i mig dang / shes rab kyi mig go/ /rnam pa bzhi ste/ 'dzums pa dang / mi 'dzums pa dang / brtan pa dang / brtan pa ma yin pa'o/ /de la brtan pa ni gzugs na spyod pa'i'o/ / rnam pa lnga ste/ 'gro ba lngar bsdus pa'o/ /rnam pa drug ste/ rang gi rgyud la yod pa dang / gzhan gyi rgyud la yod pa dang / sdug pa dang / mi sdug pa dang / dri ma can dang / dri ma med pa'o/ /rnam pa bdun te/ rnam par shes pa dang bcas pa dang / rnam par shes pa med pa dang / mthu dang ldan pa dang / mthu chung ba dang / dge ba'i rnam par shes pa'i rten dang / mi dge ba'i rnam par shes pa'i rten dang / lung du ma bstan pa'i rnam par shes pa'i rten to/ /rnam pa brgyad de gnas kyi mig dang / sprul pa'i mig dang / dge ba'i las kyi rnam par smin pa las byung ba dang / mi dge ba'i las kyi rnam par smin pa las byung ba dang / kha zas kyis rgyas par byas pa dang / gnyid log pas rgyas par byas pa dang / tshangs bar spyad pas rgyas par byas pa dang / snyoms par 'jug pas rgyas par byas pa'o/ /rnam pa dgu ste/ thob pa dang / ma thob pa dang / sngon thob pa dang / sngon ma thob pa dang / thob pa las nyams pa dang / spang bar bya ba dang / spang bar bya ba ma yin pa dang / spangs pa dang / ma spangs pa'o/ /rnam pa bcu ni med do/ /rnam pa bcu gcig ste/ 'das pa dang / ma 'ongs pa dang / da ltar byung ba dang / nang gi dang phyi rol gyi dang / rags pa dang / cha phra ba dang / ngan pa dang / bzang po dang / ring po dang / nye ba'o/ /rna ba la sogs pa nas/ lus kyi bar du yang de dang 'dra ba las rnam pa gsum dang / rnam pa bzhi la ni bye brag yod de/ rna ba rnam pa gsum ni/ sha las grub pa dang / lha'i dang / rna slags pa'o/ /rnam pa bzhi ni brtan pa dang / brtan pa ma yin pa dang / skad bskyed na thos pa dang / skad ma bskyed par thos pa'o/ /sna dang lce rnam pa gsum ni/ gsal ba dang mi gsal ba dang / nyams pa'o/ /sna dang lce rnam pa bzhi ni brtan pa dang / brtan pa ma yin pa dang / rnam par shes pa dang bcas pa dang / rnam par shes pa med pa'o/ /lus rnam pa gsum ni ro yod pa dang / ro med pa dang / dbang po thams cad kyi rjes su 'jug pa'i phyir kun tu 'gro ba'o/ /rnam pa bzhi ni brten pa dang / brtan pa ma yin pa dang / rang gi lus las 'od 'byung ba dang / rang gi lus las 'od 'byung ba ma yin pa'o/ /yid ni rnam pa gcig ste/ chos rnam par shes pa'i don gyis so/ /rnam pa gnyis te/ gdags par gtogs pa dang / gdags par gtogs pa ma yin pas te/ de la dang po ni shed byed pa'i tha snyad can rnams kyi'o/ phyi ma ni byis pa rnams kyi'o/ /rnam grangs gzhan yang / 'jig rten pa dang / 'jig rten las 'das pa'o/ /rnam pa gsum ste/ sems dang / yid dang / rnam par shes pa'o/ /rnam pa bzhi ste/ dge ba dang mi dge ba dang / bsgribs la lung du ma bstan pa dang / ma bsgribs la lung du ma bstan pa'o/ /rnam pa lnga ni/ dus lnga'i bye brag las ni gyur te/ rgyu'i dus dang / 'bras bu'i dus dang / bde ba'i dus dang / sdug bsngal ba'i dus dang / sdug bsngal ba yang ma yin bde ba yang ma yin pa'i dus so/ /rnam pa drug ste/ rnam par shes pa'i tshogs drug po rnams so/ /rnam pa bdun te/ rnam par shes pa gnas pa bdun po rnams so/ /rnam pa brgyad de/ tshig bla dgas kyi 'dus te reg pa dang ldan pa dang / thogs pa'i 'dus te reg pa dang ldan pa dang / zhen pa la brten pa dang / mngon par 'byung ba la brten pa dang / zang zing dang bcas pa dang / zang zing med pa dang / 'jig rten pa dang / 'jig rten las 'das pa'o/ /rnam pa dgu ste/ sems can gyi gnas dgu po rnams so/ /rnam pa bcur ni med do/ /rnam pa bcu gcig ste snga ma bzhin no/ /rnam pa bcu gnyis ni sems bcu gnyis te/ 'dod pa na spyod pa dang / dge ba dang / mi dge ba dang / bsgribs la lung du ma bstan pa dang / ma bsgribs la lung du ma bstan pa'o / / gzugs na spyod pa rnam pa gsum ste/ mi dge ba ma gtogs pa dang / gzugs med pa na spyod pa yang de dang 'dra ba dang / 'jig rten las 'das pa slob pa dang mi slob pa'o/ /gzugs ni rnam pa gcig ste/ mig gi spyod yul gyi don gyis so/ /rnam pa gnyis te/ nang gi dang phyi rol gyi'o/ /rnam pa gsum ste/ kha dog dang / dbyibs dang rnam par rig byed do/ /rnam pa bzhi ste/ rang gi rten snang bar byed pa dang / rang gi rten snang bar byed pa ma yin pa dang / bde ba dang / bde ba ma yin par snang ba dang / bsags par gnas pa'o/ /rnam pa lnga ste/ 'gro ba lnga'i bye brag gis so/ /rnam pa drug ste/ gzhir bsdus pa dang / gnas su bsdus pa dang / yul du bsdus pa dang / sems can du bgrang ba dang / sems can du bgrang ba ma yin pa dang / bstan du yod la thogs pa dang bcas pa'o/ /rnam pa bdun te/ yongs su gzung ba rnam pa bdun po dag gi bye brag gis so/ /rnam pa brgyad de/ 'jig rten gyi sna tshogs brgyad de/ de dag kyang sa phyogs sna tshogs dang / ri sna tshogs dang / kun dga' ra ba dang / nags tshal dang / mtsho dang / mtshe'u la sogs pa sna tshogs dang / khang khyim dang gzhal med khang sna tshogs dang / las kyi gnas sna tshogs dang / ri mo bri ba sna tshogs dang / brdung sbyar gyi las sna tshogs dang / yo byad sna tshogs so/ /rnam pa dgu ste/ 'das pa dang / ma 'ongs pa dang / da ltar byung ba dang / rags pa dang / cha phra ba'am/ ngan pa'am/ bzang po'am/ gang rgyang ring ba'am/ gang thag nye ba'o/ /rnam pa bcu ste/ yo byad bcu po rnams so/ /sgra ni rnam pa gcig ste/ rna ba'i spyod yul gyi don gyis so/ /rnam pa gnyis te/ gsal ba'i don gyi sgra skad dang / gsal ba ma yin pa'i don gyi sgra skad do/ /rnam pa gsum ste/ zin pa'i 'byung ba chen po'i rgyu las byung ba dang / ma zin pa'i 'byung ba chen po'i rgyu las byung ba dang / de gnyi ga'i 'byung ba chen po'i rgyu las byung ba'o/ /rnam pa bzhi ste/ dge ba dang / mi dge ba dang / bsgribs la lung du ma bstan pa dang / ma bsgribs la lung du ma bstan pa'o/ /rnam pa lnga ste/ 'gro ba lnga'i bye brag gis so/ /rnam pa drug ste/ lung nod pa dang / kha thon byed pa'i sgra dang / kun tu 'dri ba dang / yongs su 'dri ba'i sgra dang / chos 'chad pa'i sgra dang / 'bel ba'i gtam dang / rnam par gtan la 'bebs pa'i sgra dang / gcig la gcig tshig gis 'debs shing nyes pa las 'byin pa'i sgra dang / 'dres pa ca co'i sgra'o/ /rnam pa bdun te/ bud med kyi sgra dang / skyes pa'i sgra dang / chung ngu dang / 'bring dang / chen po dang / ri dgas dang / bya la sogs pa'i sgra dang / rlung dang shing gi sgra'o/ /rnam pa brgyad de/ 'phags pa'i tha snyad bzhi po'i sgra rnams dang / 'phags pa ma yin pa'i tha snyad bzhi po'i sgra rnams te/ ma mthong bar mthong ngo zhes smra ba dang / mthong ba la ma mthong ngo zhes smra ba 'phags pa'i tha snyad dang / ma thos pa dang / bye brag ma phyed pa dang / rnam par ma shes par rnam par shes so zhes smra ba dang / rnam par shes pa la rnam par mi shes so zhes smra ba 'phags pa ma yin pa'i tha snyad dang / mthong ba la mthong zhes smra ba dang / ma mthong ba la yang ma mthong zhes smra ba 'phags pa'i tha snyad dang / thos pa dang / bye brag phyed pa dang / rnam par shes pa la rnam par shes so zhes smra ba dang / rnam par mi shes pa la yang rnam par ma shes so zhes smra ba 'phags pa'i tha snyad do/ /gzhan yang rnam pa brgyad de/ ngag gi las kyi lam dge ba bzhi dang / mi dge ba bzhi'o/ / rnam pa dgu ste/ 'das pa dang / ma 'ongs pa dang / da ltar byung ba nas / rgyang ring ba dang / thag nye ba'i bar dag go/ /rnam pa bcu ste/ sil snyan gyi rnam pa lngar bsdus pa ste/ de yang gar dang ldan pa dang / glu dang ldan pa dang rol mo'i sgra dang ldan pa dang / bud med dang ldan pa dang / skyes pa dang ldan pa dang / dung gi sgra dang / rnga pa Ta ha'i sgra dang / rnga bo che'i sgra dang / rdza rnga'i sgra dang / sgra bo che'i sgra'o / /dri ni rnam pa gcig ste/ sna'i spyod yul gyi don gyis so/ /rnam pa gnyis te/ nang gi dang / phyi rol gyi'o/ /rnam pa gsum ste/ yid du 'ong ba dang / yid du mi 'ong ba dang / btang snyoms kyi gnas so/ /rnam pa bzhi ni dri chen po rnam pa bzhi ste/ a ka ru'i dri dang / du ru ska'i dri dang / ga pur gyi dri dang / gla rtsi'i dri'o/ /rnam pa lnga ste/ rtsa ba'i dri dang / snying po'i dri dang / lo ma'i dri dang / me tog gi dri dang / 'bras bu'i dri'o/ /rnam pa drug ste/ zas kyi dri dang / skom gyi dri dang / gos kyi dri dang / rgyan gyi dri dang / bzhon pa'i dri dang / gnas kyi dri'o/ /rnam pa bdun te/ shing tsha'i dri dang / spos lo'i dri dang / sug smel gyi dri dang / tsan dan gyi dri dang / tsha ba gsum gyi dri dang / bdug pa'i dri dang / phye ma'i dri'o/ /rnam pa brgyad de/ lhan cig skyes pa dang / lhan cig skyes pa ma yin pa dang / brtan pa dang / brtan pa ma yin pa dang / sbyar ba dang / 'ba' zhig pa dang / dri che ba dang / dri che ba ma yin pa'o/ /rnam pa dgu ste/ 'das pa dang / ma 'ongs pa dang / da ltar byung ba nas/ rgyang ring ba dang / thag nye ba'i bar dag go/ /rnam pa bcu ste/ skyes pa'i dri dang / bud med kyi dri dang / phyi sa'i dri dang / gcin gyi dri dang / ngar snabs kyi dri dang / snabs kyi dri dang / zhag dang / chu ser gyi dri dang / rnag dang / khrag gi dri dang / sha'i dri dang / 'dres pa'i dri dang / rul pa'i dri dang / 'dam rdzab kyi dri'o/ /ro ni rnam pa gcig ste/ lce'i spyod yul gyi don gyis so/ /rnam pa gnyis te/ nang dang / phyi rol gyi'o/ /rnam pa gsum ste/ yid du 'ong ba nas snga ma bzhin no/ / rnam pa bzhi ste/ nas kyi ro dang / sA lu'i ro dang / gro'i ro dang / 'bru gzhan gyi ro'o/ /rnam pa lnga ste/ chang gi ro dang / chang ma yin pa'i ro dang / sngo rngad kyi ro dang / nags tshal gyi shing thog gi ro dang / kha zas kyi ro'o/ /rnam pa drug ste/ kha ba la sogs pa'o/ /rnam pa bdun te/ mar dang / 'bru mar dang / sbrang rtsi dang / bu ram shing las byung ba'i ro dang / mngar ba'i ro dang / lan tshwa'i ro dang / sha'i ro'o / /rnam pa brgyad de/ /dri bzhin no/ /rnam pa dgu ste/ dri kho na bzhin no/ /rnam pa bcu ste/ bca' ba'i ro dang / bza' ba'i ro dang / myang ba'i ro dang / btung ba'i ro dang / gzhib pa'i ro dang / sha 'bri bar byed pa dang / sha brtas par byed pa dang / zhi bar byed pa dang / sbyong bar byed pa dang / brtan par bya ba'i sman gyi ro rnams so/ /reg bya ni rnam pa gcig ste/ lus kyi spyod yul gyi don gyis so/ /rnam pa gnyis te/ dri bzhin no/ /rnam pa gsum ste/ yid du 'ong ba la sogs pa'o/ /rnam pa bzhi ste/ reg par bya ba'i reg par bya ba dang / btsir ba'i reg pa dang / bsnun pa'i reg pa dang / mnye ba'i reg pa'o/ /rnam pa lnga ste/ 'gro ba lnga'i bye brag gis so/ /gzhan yang sha sbrang dang / sbrang bu mchu rings dang / rlung dang / nyi ma dang / sdig sbrul gyi 'dus te reg pa'o/ /rnam pa drug ste/ bde ba dang / sdug bsngal ba dang / sdug bsngal ba yang ma yin bde ba yang ma yin pa dang / lhan cig skyes pa dang / mi mthun pa'i phyogs su bsdus pa dang gnyen por bsdus pa'o/ /rnam pa bdun te/ sra ba dang / gsher ba dang / dro ba dang / g.yo ba dang / mchong ba dang / lhung ba'i 'dus te reg pa dang / byug nom gyi 'dus te reg pa dang / lus 'gyur gyi 'dus te reg pa ste/ 'di lta ste/ 'jam pa la sogs pa rnams la'o/ /rnam pa brgyad de/ /lag pa'i 'dus te reg pa dang / bong ba'i 'dus te reg pa dang / dbyug pa'i 'dus te reg pa dang / mtshon cha'i 'dus te reg pa dang / grang ba'i 'dus te reg pa dang / tsha ba'i 'dus te reg pa dang / bkres pa'i 'dus te reg pa dang / skom pa'i 'dus te reg pa'o/ /rnam pa dgu ste/ dri bzhin no/ /rnam pa bcu ste/ kha zas kyi 'dus te reg pa dang / skom pa'i 'dus te reg pa dang / bzhon pa'i 'dus te reg pa dang / gos kyi 'dus te reg pa dang / rgyan gyi 'dus te reg pa dang / khri dang khri'u'i 'dus te reg pa dang / stan nang tshangs can dang /[ (]la [,]lwa [)]ba'i stan dang / sngas nang tshangs can dang / gor bu'i 'dus te reg pa dang / bud med kyi 'dus te reg pa dang / skyes pa'i 'dus te reg pa dang / de gnyis dga' mgur spyod cing yongs su spyod pa'i 'dus te reg pa'o/ /chos kyi khams ni mdor bsdu na/ gdags pa'i chos rnams dang bcas par chos brgyad cu rtsa bdun yod de/ de dag kyang gang zhe na/ yid la byed pa la sogs pa nas rtog pa dang dpyod pa la thug pa yan chad sems las byung ba lnga bcu rtsa gsum dang / chos kyi skye mched du gtogs pa/ sdom pa dang / sdom ba ma yin par bsdus pa'i gzugs dang / ting nge 'dzin gyi spyod yul gyi gzugs dang / thob pa dang / 'du shes med pa'i snyoms par 'jug pa dang / 'gog pa'i snyoms par 'jug pa dang / 'du shes med pa dang / srog gi dbang po dang / ris mthun pa dang / so so'i skye bo nyid dang / skye ba dang / rga ba dang / gnas pa dang / mi rtag pa nyid dang / ming gi tshogs rnams dang / tshig gi tshogs rnams dang / yi ge'i tshogs rnams dang / 'jug pa dang / so sor nges pa dang / 'byor 'brel dang / mgyogs pa dang / go rims dang / dus dang / yul dang / grangs dang / tshogs pa dang / tshogs pa ma yin pa dang / 'dus ma byas kyi dngos po brgyad de/ nam mkha' dang so sor brtags pa ma yin pas 'gog pa dang / so sor brtags pas 'gog pa dang / dge ba dang / mi dge ba dang / lung du ma bstan pa'i chos rnams kyi de bzhin nyid dang / mi g.yo ba dang / 'du shes dang / tshor ba 'gog pa'o/ /de dag ni brgyad las kyang drug tu 'gyur ro/ drug las kyang brgyad du 'gyur ro/ /chos kyi khams de yang rnam pa gcig ste/ yid kyi spyod yul gyi don gyis so/ /rnam pa gnyis te/ gdags pa'i chos su bsdus pa dang / gdags pa ma yin pa'i chos su bsdus pa'o/ /rnam pa gsum ste/ gzugs can dang / gzugs can ma yin pa dang / 'dus byas dang / 'dus ma byas so/ /rnam pa bzhi ste/ gzugs can gdags pa'i chos su bsdus pa dang / gzugs can ma yin pa sems las 'byung ba'i chos su bsdus pa dang / gzugs can ma yin pa dang ldan ldan pa ma yin pa gdags pa'i chos su bsdus pa dang / gzugs can ma yin pa 'dus ma byas pa gdags pa'i chos su bsdus pa'o/ /rnam pa lnga ste/ gzugs dang / sems las byung ba'i chos rnams dang / sems dang ldan pa ma yin pa rnams dang / 'dus ma byas dge ba dang / lung du ma bstan pa'o/ /rnam pa drug ste/ tshor ba dang / 'du shes dang / 'du byed rnams las mtshungs par ldan pa rnams dang ldan pa ma yin pa rnams dang / gzugs dang / 'dus ma byas so/ /rnam pa bdun te/ tshor ba dang / 'du shes dang / sems pa dang / nyon mongs pa can dang / nyon mongs pa can ma yin pa dang / gzugs dang 'dus ma byas so/ /rnam pa brgyad de/ dge ba dang / mi dge ba dang / lung du ma bstan pa dang / tshor ba dang / 'du shes dang / 'du byed rnams dang / gzugs dang 'dus ma byas rnams so/ / rnam pa dgu ste/ 'das pa dang / ma 'ongs pa la sogs pa'i bye brag gis so/ rnam pa bcu ni/ rnam pa bcu'i phyir te/ rjes su 'brel ba'i skye bo'i don dang / dmigs pa myong ba'i don dang / dmigs pa'i mtshan mar 'dzin pa'i don dang / dmigs pa mngon par 'du byed pa'i don dang / chos de dag nyid dus tha dad pa'i don dang / sgrib pa med pa'i don dang / mi rtag pa dang bral ba'i don dang / mi rtag pa dang ma bral ba'i don dang / rtag pa phyin ci ma log pa'i don dang / bde ba dang sdug bsngal dang bral ba'i don dang / tshor ba dang bral ba ma yin pa'i don dang / tshor ba dang bral ba'i don dang / nang dang phyi'i skye mched rnams kyi rab tu dbye ba de dag ni/ drug brgya drug cu yod do/ /de la zad par ma gyur gyi bar du gzugs rnams la blta ba'i phyir/ spyod cing zad par ma gyur gyi bar du gzugs rnams la blta ba'i phyir spyod pas na mig go/ /'di la grag pa rnams dmigs shing / 'di la grag pa rnams dmigs pas rna ba'o/ /dri rnams snom zhing dri rnams snom pas na sna'o/ /bkres pa'i nyam chung ba sel ba dang / brjod pa rnam pa sna tshogs la 'dris pas 'bod par byed pas na lce'o/ /lus 'di ni dbang po zad par gyi rjes su song bas na lus so/ /yun ring po nas 'di byis pa rnams kyis bcos shing bsrungs la bdag gir bzung ste/ 'di ni bdag gi'o/ /'di ni nga bdag gis so/ /'di ni bdag gis bdag yin no snyam nas/ de la 'jig rten gyi ming / sems can dang / ming dang / srog dang / skye ba po dang / shed las skyes pa dang / shed bu zhes bya bas na yid do/ /yul dang der brtag par byar rung ba dang / yul de dang der gnod par byar rung zhing / skye bas de'i phyir gzugs zhes bya'o/ /brjod bzhin du 'jig pas na sgra'o/ /'di la smra ba sna tshogs gnas pas de'i phyir sgra zhes bya'o/ /rdzi phyogs su 'gro zhing rgyugs pas de'i phyir dri'o/ /nad rnams sdud pa dang / myang bar bya ba yin pas de'i phyir ro'o/ /lus kyi reg par bya zhing / lus kyi reg par bya ba'i phyir reg bya'o/ /yid kyi yul 'ba' zhig tu 'dzin cing / yid kyi yul 'ba' zhig tu 'dzin pas na chos rnams te/ de lta bu dang mthun pa rnams ni chos rnams kyi rab tu dbye ba yin par rig par blta bar bya'o/ /de la sdom ni/ ngo bo nyid dang gnas dang ni/ /dmigs pa dang ni grogs rnams dang / /las te sgo ni lnga po yis/ /sems ni rab tu 'jug par 'gyur/ /de la rnam par shes pa'i tshogs drug gi chos lnga po'o / /ngo bo nyid dang / gnas dang / dmigs pa dang grogs dang / las 'di dag gis ni phung po la mkhas pa yang bsdus par rig par bya'o/ /khams la mkhas pa dang / skye mched la mkhas pa dang / rten cing 'brel par 'byung ba la mkhas pa dang / gnas dang gnas ma yin pa la mkhas pa dang / dbang po la mkhas par yang bsdus par rig par bya'o/ /sangs rgyas kyi bka'i dngos po dgu yang bsdus par rig par bya'o/ /dngos po dgu gang zhe na/ sems can gyi dngos po dang / longs spyod kyi dngos po dang / skye ba'i dngos po dang / gnas pa'i dngos po dang / kun nas nyon mongs pa dang / rnam par byang ba'i dngos po dang / sna tshogs kyi dngos po dang / ston pa po'i dngos po dang / bstan par bya ba'i dngos po dang / 'khor gyi dngos po'o/ /de la sems can gyi dngos po ni/ nye bar len pa'i phung po lnga po rnams so/ /de'i longs spyod kyi dngos po ni skye mched bcu gnyis po rnams so/ /skye ba'i dngos po ni rten cing 'brel par 'byung ba yan lag bcu gnyis pa'o/ /skyes pa'i gnas pa'i dngos po ni zas bzhi po rnams so/ /kun nas nyon mongs pa dang / rnam par byang ba'i dngos po ni 'phags pa'i bden pa bzhi po rnams so/ /sna tshogs kyi dngos po ni khams tshad med pa rnams so/ /ston pa po'i dngos po ni sangs rgyas rnams dang / de dag gi nyan thos rnams so/ /bstan par bya ba'i dngos po ni dran pa nye bar gzhag pa la sogs pa byang chub kyi phyogs kyi chos rnams so/ /'khor gyi dngos po ni 'khor brgyad de/ rgyal rigs kyi 'khor dang / bram ze'i 'khor dang / khyim bdag gi 'khor dang / dge sbyong gi 'khor dang / rgyal chen bzhi'i ris kyi 'khor dang / sum cu rtsa gsum pa'i 'khor dang / bdud kyi ris kyi 'khor dang / tshangs pa'i 'khor to/ /sdom ni/ 'dus pa dang ni tshogs rnams dang / /dus dang mtshan nyid rkyen rnams dang / /dge ba la sogs rab dbye dang / /mkhas pa dngos po [(]tham [,]tha ma [)]yin/ /rnal 'byor spyod pa'i sa las yid kyi sa ste gnyis pa rdzogs so/ / //bam po bzhi pa/ rtog pa dang bcas shing / dpyod pa dang bcas pa'i sa ni gang / rtog pa med pa la dpyod pa tsam gyi sa ni gang / rtog pa med pa la dpyod pa yang med pa'i sa ni gang zhe na/ spyi sdom la/ khams dang mtshan nyid tshul bzhin dang / /tshul min nyon mongs tha ma yin/ /sa gsum po 'di dag ni/ khams gdags pa rnam par gzhag pa dang / mtshan nyid gdags pa rnam par gzhag pa dang / tshul bzhin yid la byed pa gdags pa rnam par gzhag pa dang / tshul bzhin ma yin pa yid la byed pa gdags pa rnam par gzhag pa dang / kun nas nyon mongs pa gdags pa rnam par gzhag pas rnam par gzhag par rig par bya'o/ /sdom la/ grangs dang gnas dang tshad rnams dang / /tshe yi tshad dang longs spyod dang / /skye ba dang ni lus rnams dang / /rgyu dang rkyen rnams rgya cher ro/ /khams gdags pa rnam par gdags pa gang zhe na/ de ni rnam par brgyad du rig par bya ste/ grangs rnam par gzhag pa dang / gnas gzhan rnam par gzhag pa dang / sems can gyi tshad rnam par gzhag pa dang / sems can de dag nyid kyi tshe'i tshad rnam par gzhag pa dang / sems can de dag nyid kyi longs spyod dang / yongs su spyod pa rnam par gzhag pa dang / skye ba rnam par gzhag pa dang / lus rnam par gzhag pa dang / rgyu dang rkyen rnam par gzhag pa'o/ /de la grangs rnam par gzhag pa ni 'di yin no/ /khams ni gsum ste/ 'dod pa'i khams dang / gzugs kyi khams dang / gzugs med pa'i khams te/ khams 'di dag ni gtogs pa yin no/ /thabs dang bcas pas 'jig tshogs 'gog pa/ zag pa med pa'i khams spros pa med pa ni ma gtogs pa yin no/ /de la 'dod pa'i khams mtha' dag dang / gzugs kyi khams nas bsam gtan dang po las/ bsam gtan khyad par can snyoms par 'jug pa dang / skye ba dang bcas pa ma gtogs pa ni rtog pa dang bcas shing dpyod pa dang bcas pa'i sa'o/ /bsam gtan khyad par can snyoms par 'jug pa dang / skye ba dang bcas pa ni rtog pa med pa dpyod pa tsam gyi ste/ 'ga' zhig gis de bsgoms na tshangs pa chen po nyid 'thob bo/ /bsam gtan gnyis pa nas bzung ste/ gzugs kyi khams kyi lhag ma rnams dang / gzugs med pa'i khams mtha' dag ni rtog pa yang med la dpyod pa yang med pa'i sa'o/ /de la rtog pa dang dpyod pa'i 'dod chags dang bral ba'i tshul gyis rtog pa yang med la dpyod pa yang med pa'i sa zhes bya'i/ kun tu dpyod pa med pas ni ma yin te/ 'di ltar 'dod pa rnams las 'dod chags dang bral ba ma yin pa rnams kyang / man ngag yid la byed pa'i khyad par gyis yid kyi rgyu ba res 'ga' rtog pa med cing dpyod pa med par yang 'gyur la/ rtog pa dang bcas pa rnams las 'dod chags dang bral ba yang rtog pa dang dpyod pa kun tu 'byung bar 'gyur te/ 'di lta ste/ der skyes pa rnams dang langs pa rnams la'o/ /de la zag pa med pa'i khams ni/ 'dus byas gang snyoms par 'jug pas bsdus pa'o/ /de la yang bsam gtan dang po'i rtog pa dang bcas shing dpyod pa dang bcas pa'i sa yin te/ rtog pa dpyod pa'i gnas lta bu'i chos rnams kyi de bzhin nyid la dmigs nas/ de la snyoms par 'jug gi rtog pa rgyu bas ni ma yin te/ lhag ma rnams ni snga ma bzhin no/ /de la gnas gzhan rnam par gzhag pa ni 'di yin no/ /'dod pa'i khams ni gnas gzhan sum cu rtsa drug po rnams te/ sems can dmyal ba chen po'i gnas brgyad la 'di lta ste/ yang sos dang / thig nag dang / bsdus 'joms dang / ngu 'bod dang / ngu 'bod chen po dang / tsha ba dang / rab tu tsha ba dang / mnar med pa'o/ /sems can dmyal ba chen po de dag gi thad kar dpag tshad khri'i pha rol na/ grang ba'i sems can dmyal ba'i gnas brgyad yod pa 'di lta ste/ chu bur can dang / chu bur rdol ba dang / so thams thams pa dang / kyi hud zer ba dang / a cu zer ba dang / ut+pal ltar gas pa dang / pad ma ltar gas pa dang / pad ma ltar gas pa chen po'o/ /yang sos ni 'di nas dpag tshad sum khri nyis stong gi 'og na yod do/ /de'i 'og na dpag tshad bzhi stong bzhi stong gis bcal ba na ni de las gzhan pa rnams yod do/ /sems can dmyal ba chen po yang sos kyi gnas ji lta ba bzhin du grang ba'i sems can dmyal ba'i gnas dang po yang de dang 'dra'o/ /de'i 'og tu dpag tshad nyis stong nyis stong gis bcal ba na ni de las gzhan pa rnams yod pa blta bar bya'o/ /yi dags kyi gnas gzhan dang / lha ma yin gyi gnas gzhan dang / dud 'gro ni lha dang mi dang lhan cig rgyu ba nyid yin pas/ de'i phyir de dag gi gnas gzhan logs shig tu rnam par mi gzhag go/ /gling bzhi dang / gling phran brgyad ni snga ma bzhin no/ /'dod pa na spyod pa'i lha rnam pa drug la/ rgyal chen bzhi'i ris dang / sum cu rtsa gsum dang / 'thab bral dang / dga' ldan dang / 'phrul dga' dang / gzhan 'phrul dbang byed kyi lha rnams so/ /bdud kyi gnas ni gzhan 'phrul dbang byed kyi lha rnams kyi nang du gtogs pa'i gnas gzhan khyad par can yin no/ /nyi tshe ba'i sems can dmyal ba rnams dang / nye 'khor gyi sems can dmyal ba rnams ni sems can dmyal ba chen po dang / grang ba'i sems can dmyal ba'i nye 'khor nyid de/ gnas gzhan bye brag can med do/ /nyi tshe ba'i sems can dmyal ba de dag kha cig ni mi rnams kyi nang na yang dmigs te/ gnas brtan maud gal gyi bus ji skad du/ ngas sems can 'bar zhing rab tu 'bar la kun tu mched cing rab tu 'bar te/ me lce gcig tu gyur pa mthong ngo zhes bya ba la sogs pa gsungs pa lta bu'o/ /gnas gzhan sum cu rtsa drug po 'di dag ni 'di ni 'dod pa'i khams zhes bya'o/ /gzugs kyi khams ni gnas gzhan bco brgyad de/ bsam gtan dang po chung ngu dang / 'bring dang chen po yongs su bsgoms pas tshangs ris rnams dang / tshangs pa'i mdun na 'don rnams dang / tshangs pa chen po rnams so/ /bsam gtan gnyis pa chung ngu dang / 'bring dang / chen por yongs su bsgoms pas/ 'od chung rnams dang / tshad med 'od rnams dang / 'od gsal rnams so/ /bsam gtan gsum pa chung ngu dang / 'bring dang / chen por yongs su bsgoms pas/ dge chung rnams dang / tshad med dge rnams dang / dge rgyas rnams so/ /bsam gtan bzhi pa chung ngu dang / 'bring dang / chen por yongs su bsgoms pas/ sprin med pa rnams dang / bsod nams skyes rnams dang / 'bras bu che ba rnams so/ /'du shes med pa ni 'bras bu che ba'i nang du gte gas la/ 'phags pa rnams dang / thun mong ba ma yin pa'i phyir gnas gzhan med do/ /bsam gtan bzhi pa spel mar bsgoms pas/ chung ngu dang / 'bring dang / chen po dang / ches che ba dang / mchog tu che bar yongs su bsgoms pas/ gnas gtsang ma'i sa lnga po mi che ba rnams dang / mi gdung ba rnams dang / gya nom snang ba rnams dang / shin tu mthong ba rnams dang / 'og min rnams so/ /gnas gtsang ma rnams las 'das pa na dbang phyug chen po'i gnas yod de/ byang chub sems dpa' sa bcu la gnas pa rnams kyis sa bcu yongs su bsgoms nas gang du skye ba'o/ /gzugs med pa'i khams ni gnas gzhan bzhi po rnams so/ /yang na gnas gzhan ci yang med pa yang yin no/ /de la sems can gyi tshad rnam par gzhag pa ni 'di yin te/ 'dzam bu'i gling gi mi rnams kyi lus kyi tshad ni nges pa med do / /res 'ga' ni chen por 'gyur ro/ /res 'ga' ni chung ngur 'gyur te/ de yang rang gi khru tshad phyed dang bzhi'o/ /shar gyi lus 'phags pa rnams kyi lus kyi tshad ni nges pa yin te/ de dag kyang rang gi khru tshad phyed dang bzhi pa ste/ lus shin tu che'o/ /shar gyi lus 'phags pa ji lta ba bzhin du/ nub kyi ba lang spyod pa rnams dang / byang gi sgra mi snyan pa rnams kyang lus shin tu che'o/ /rgyal chen bzhi'i ris kyi lha rnams kyi tshad ni rgyang grags kyi bzhi cha gcig go/ /sum cu rtsa gsum pa rnams kyi tshad ni rgyang grags kyi bzhi cha gcig las lhag go/ /lha'i dbang po brgya byin gyi tshad ni rgyang grags phyed do/ /'thab bral ba rnams kyang rgyang grags phyed do/ /de yan chad de las gzhan pa'i lha'i ris thams cad ni bzhi cha re re lhag par blta bar bya'o/ /tshangs ris pa rnams kyi dpag tshad phyed do/ /tshangs pa'i mdun na 'don pa rnams kyi ni dpag tshad gcig go/ /tshangs pa chen po rnams kyi ni dpag tshad phyed dang gnyis so/ /'od chung ba rnams kyi ni dpag tshad gnyis so/ /de yan chad de'i lhag ma'i lha'i ris rnams kyi lus kyi tshad ni de'i nyis 'gyur nyis 'gyur du blta bar bya'o/ /sprin med pa rnams kyi ni ma gtogs te/ de la ni dpag tshad gsum 'bri bar bya'o/ /sems can dmyal ba chen po dag gi tshad ni nges pa med do/ /gang gis sdig pa mi dge ba'i las shin tu drag po byas shing bsags pa de'i lus ni ches che bar 'grub par 'gyur la/ gzhan dag gi ni gzhan du 'gyur ro/ /sems can dmyal ba chen po dag gi ji lta ba bzhin du grang ba'i sems can dmyal ba rnams dang / nyi tshe ba'i sems can dmyal ba rnams dang / nye 'khor gyi sems can dmyal ba rnams dang / dud 'gro dang yi dags rnams kyang de dang 'dra'o/ /lha ma yin rnams kyi lus ni sum cu rtsa gsum pa'i lha'i chad bzhin rnam par gzhag par rig par bya'o/ /gzugs med pa dag gi ni/ gzugs med pa'i phyir tshad med do/ /de la tshe'i tshad rnam par gzhag pa ni 'di yin te/ 'dzam bu'i gling gi mi rnams kyi ni zhag sum cu la zla ba gcig /zla ba bcu gnyis la lo gcig gi tshul gyis tshe'i tshad nges pa med de/ /res 'ga' ni tshe dpag tu med par 'gyur ro/ /res 'ga' ni tshe lo brgyad khri par 'gyur ro/ /res 'ga' ni tshe lo bcu pa'i bar du 'gyur ro/ /shar gyi lus 'phags pa rnams kyi tshe'i tshad ni nges pa yin te/ lo nyis brgya lnga bcu'o/ /nub kyi ba lang spyod pa rnams kyi tshe'i tshad ni lo lnga brgya'o/ /byang gi sgra mi snyan pa rnams kyi tshe'i tshad ni lo stong ngo / /mi rnams kyi lo lnga bcu gang yin pa de ni rgyal chen bzhi'i ris kyi lha rnams kyi nyin zhag gcig go/ /de lta bu'i nyin zhag sum cu la zla ba gcig /zla ba bcu gnyis la lor brtsis pa'i lha'i lo brgya thub bo/ /mi rnams kyi lo brgya gang yin pa de ni sum cu rtsa gsum pa'i lha rnams kyi nyin zhag gcig go/ /de lta bu'i nyin zhag sum cu la zla ba gcig ste/ snga ma bzhin du tshe lo stong thub bo/ /de las gzhan pa'i lha'i ris gzhan 'phrul dbang byed kyi lha rnams kyi bar du/ lha de dag gi tshe'i tshad ni nyin zhag kyang de'i nyis 'gyur la/ tshe'i tshad kyang de'i nyis 'gyur ba yin no/ /rgyal chen bzhi'i ris kyi lha rnams kyi tshe'i tshad rangs pa ni/ sems can dmyal ba chen po yang sos kyi nyin zhag gcig go/ /de lta bu'i nyin zhag sum cu la zla ba gcig go/ /zla ba bcu gnyis la lo gcig ste/ tshe'i tshad kyang sems can dmyal ba pa'i lo lnga brgya thub bo/ /rgyal chen bzhi'i ris kyi lha'i tshe tshad kyis/ sems can dmyal ba chen po yang sos su skyes pa rnams kyi tshe'i tshad bsgre ba de bzhin du/ sum cu rtsa gsum pa rnams kyi tshe'i tshad kyis thig nag tu skyes pa rnams kyi tshe'i tshad bsgre'o/ /'thab bral ba rnams kyi tshe'i tshad kyis bsdus 'joms su skyes pa rnams kyi tshe'i tshad bsgre'o/ /dga' ldan pa rnams kyi tshe'i tshad kyis ngu 'bod du skyes pa rnams kyi tshe'i tshad bsgre'o/ / 'phrul dga' ba rnams kyi tshe'i tshad kyis ngu 'bod chen por skyes pa rnams kyi tshe'i tshad bsgre'o/ /gzhan 'phrul dbang byed pa rnams kyi tshe'i tshad kyis tsha bar skyes pa rnams kyi tshe'i tshad bsgre bar rig par bya'o/ /rab tu tsha bar skyes pa'i sems can rnams kyi tshe'i tshad ni bar gyi bskal pa'i bskal pa phyed do/ /mnar med pa'i sems can rnams kyi tshe'i tshad ni bar gyi bskal pa'i bskal pa gcig go/ /lha ma yin rnams kyi ni sum cu rtsa gsum pa rnams dang 'dra'o/ /dud 'gro dang yi dags rnams kyi tsha'i tshad ni nges pa med do/ /grang ba'i sems can dmyal bar skyes pa'i sems can rnams kyi tshe'i tshad ni sems can dmyal ba chen por skyes pa'i sems can rnams las phyi ma phyi ma phyed phyed zhugs par rig par bya'o/ /nye 'khor gyi sems can dmyal ba dang / nyi tshe ba'i sems can dmyal bar skyes pa'i sems can rnams kyi tshe'i tshad ni nges pa med do/ /tshangs ris pa'i sems can rnams kyi tshe'i tshad ni bar gyi bskal pa nyi shu la bskal pa gcig tu bgrang ba'i bskal pa gcig go/ /tshangs pa'i mdun na 'don pa'i sems can rnams kyi tshe'i tshad ni bar gyi bskal pa bzhi bcu la bskal pa gcig tu bgrang ba'i bskal ba gcig go/ /tshangs chen pa rnams kyi tshe'i tshad ni bar gyi bskal pa drug cu la bskal pa gcig tu bgrang ba'i bskal pa gcig go/ /'od chung ba rnams kyi tshe'i tshad ni bar gyi bskal pa brgyad cu la bskal bar bgrang ba'i bskal ba gnyis so/ /de yan chad de las gzhan pa'i gzugs na spyod pa'i lha'i ris rnams kyi tshe'i tshad ni bar gyi bskal pa brgyad cu po de'i nyis 'gyur nyis 'gyur ro/ /sprin med pa rnams ni ma gtogs te/ de la ni bskal pa gsum dbri bar bya'o/ /nam mkha' mtha' yas skye mched du skyes pa'i sems can rnams kyi tshe'i tshad ni bskal ba nyi khri'o/ /rnam shes mtha' yas skye mched du skyes pa'i sems can rnams kyi tshe'i tshad ni bzhi khri'o/ /ci yang med pa'i skye mched du skyes pa rnams kyi ni drug khri'o/ /'du shes med 'du shes med min skye mched du skyes pa rnams kyi tshe'i tshad ni bskal pa brgyad khri'o/ /byang gi sgra mi snyan ma gtogs par de las gzhan pa rnams la ni bar ma dor 'chi ba yod do/ /de la mi rnams dang / dud 'gro dang / yi dags rnams kyi lus ni ror gyur te 'dug go/ /lha rnams dang sems can dmyal ba pa rnams kyi ni rnam par shes pa dang mgo mnyam du mi snang bar 'gyur te/ lus ror gyur te 'dug pa med do/ /de la longs spyod dang yongs su spyod pa rnam par gzhag pa ni 'di yin te/ 'di lta ste/ bde ba dang sdug bsngal myong ba dang / kha zas kyi longs spyod dang / 'khrig pa'i longs spyod do/ /de la sems can dmyal ba dag na ni sems can rnams gnod pa'i sdug bsngal shas cher nyams su myong bar 'gyur ro/ /dud 'gro rnams gcig la gcig za ba'i sdug bsngal dang / yi dags rnams ni bkres shing skom pa'i sdug bsngal dang / mi rnams ni tshol khros nyon mongs pa'i sdug bsngal dang / lha rnams ni 'chi 'pho ba dang / ltung ba'i sdug bsngal nyams su myong bar 'gyur ro/ /de la sems can dmyal ba chen po yang sos na ni/ gnod pa'i sdug bsngal ni 'di lta bu shas cher nyams su myong bar 'gyur te/ de la sems can de dag phan tshun 'dus nas las kyi dbang gis byung ba'i mtshon cha rnam pa sna tshogs rim gyis 'byung ba dag gis/ gcig la gcig snun par byed de/ brgyal nas sa la 'gyel lo/ /de nas nam mkha' la sems can khyed rnams kyang sos par gyur cig ces sgra 'byung ngo / /de nas yang sems can de dag langs te/ de lta bu'i tshul du gcig la gcig snun par byed do/ /gzhi de las yun ring por sdug bsngal nyams su myong bar 'gyur te/ ji srid du sdig pa mi dge ba'i las thams cad kyi thams cad du yongs su ma zad cing ma byang gi bar du ste/ de bas na sems can dmyal ba de yang sos zhes bya'o/ /de la sems can dmyal ba chen po thig nag na ni gnod pa'i sdug bsngal 'di lta bu cher nyams su myong bar 'gyur te/ de nas sems can de dag der gtogs pa'i mi gnod par byed pa dag gis thig nag pos bcal te/ zur bzhi'am/ zur brgyad dam/ char gse ba rnam pa sna tshogs du mar gzhal bar byed do/ / gzhal nas kyang de lta de lta bur gshegs shing 'jog la kun tu rab tu 'jog go/ /gzhi de las yun ring por sdug bsngal nyams su myong bar 'gyur te/ ji srid du sdig pa mi dge ba'i las thams cad kyi thams cad du yongs su ma zad cing ma byang gi bar du ste/ de bas na sems can dmyal ba de thig nag ces bya'o/ /de la sems can dmyal ba chen po bsdus gzhom na ni/ gnod pa'i sdug bsngal 'di lta bu shas cher nyams su myong bar 'gyur te/ de na sems can de dag gang gi tshe phan tshun nas gcig tu 'dus shing tshogs par gyur pa de'i tshe/ der gtogs pa'i mi gnod par byed pa rnams kyis ra'i gdong lta bu'i lcags kyi ri chen pa gnyis kyi bar du 'tshang bar byed de/ btsangs ma thag tu ri de gnyis kyis btsir ro/ /de dag btsir nas sgo thams cad du khrag gi klung 'bab cing rab tu 'bab bo/ /ra'i gdong lta bu gnyis ji lta ba bzhin du/ lug gi gdong lta bu gnyis dang / rta'i gdong lta bu gnyis dang / glang po che'i gdong lta bu gnyis dang / seng ge'i gdong lta bu gnyis dang / stag gi gdong lta bu gnyis kyang de dang 'dra'o/ /yang 'dus par gyur nas lcags kyi 'khrul 'khor chen po'i nang du bcug nas/ dper na bu ram shing brdungs pa la bya ba bzhin du btsir bar byed do/ /de dag der btsir ba na khrag gi klung 'bab cing rab tu 'bab bo/ /yang 'dus par gyur nas/ steng nas lcags kyi pha 'ong chen po ltung bar 'gyur te/ des sems can de dag lcags kyis gzhi la kun tu gcod cing / kun tu 'byed la/ kun tu brdung zhing kun tu dmyal bar byed do/ /de dag der kun tu gcod cing kun tu 'byed la/ kun tu brdung zhing kun tu dmyal ba na/ khrag gi klung 'bab cing rab tu 'bab bo/ /gzhi de las yun ring por sdug bsngal nyams su myong bar 'gyur te/ ji srid du sdig pa mi dge ba'i las thams cad kyi thams cad du yongs su ma zad cing ma byang gi bar du ste/ de bas na sems can dmyal ba de bsdus gzhom zhes bya'o/ /de la sems can dmyal ba chen po ngu 'bod na ni/ gnod pa'i sdug bsngal 'di lta bu shas cher nyams su myong bar 'gyur te/ de ni sems can de dag gnas tshol zhing lcags kyi khang pa'i nang du 'jug par byed do/ /de dag der zhugs nas me btang ste/ des de dag kun tu 'bar zhing rab tu 'bar la/ kun tu rab tu mched nas bsreg par 'gyur ro/ /de dag de na ngu zhing nyam thag pa'i skad 'byin to/ /gzhi de las yun ring por sdug bsngal nyams su myong bar 'gyur te/ ji srid du sdig pa mi dge ba'i las thams cad kyi thams cad du yongs su ma zad cing ma byang gi bar du ste/ de bas na sems can dmyal ba chen po ngu 'bod ces bya'o/ /de la sems can dmyal ba chen po ngu 'bod chen po na ni bye brag tu ngu 'bod kyi skabs su khang pa bstan pa gang yin pa de/ de na yang khang pa nyid yod pa las khang pa sbrum du 'jug par rig par bya ste/ de bas na sems can dmyal ba de ngu 'bod chen po zhes bya'o/ /de la sems can dmyal ba chen po tsha ba na ni/ gnod pa'i sdug bsngal 'di lta bu shas cher nyams su myong bar 'gyur te/ sems can de dag der gtogs pa'i mi gnod par byed pa rnams kyis lcags zangs dpag tshad du ma yod pa/ tsha zhing kun tu tsha la kun tu rab tu mched cing 'bar ba'i nang du bcug nas bskol zhing yongs su bskol te/ 'di lta ste/ dper na nya bzhin du sreg cing rab tu sreg go/ /gzhan yang lcags kyi gsal shing kun tu 'bar zhing / rab tu 'bar la mas yar phug ste/ gsal shing de yang kun tu zhugs nas spyi bor 'byung ngo / /sems can de dag gi kha dang / mig gi 'bras bu gnyis dang / sna'i bu gu gnyis dang / rna ba'i bu gu gnyis dang / spu'i khung bu thams cad nas kyang / me lce 'bar zhing rab tu 'bar ba 'byung bar 'gyur ro/ /yang lcags kyis gzhi tsha zhing rab tu tsha la kun tu rab tu mched cing 'bar ba la/ gan rkyal lam kha bub tu gzhag ste/ 'di lta ste/ dper na sha'i snag bu la bya ba bzhin du/ lcags kyi tho ba tsha zhing kun tu rab tu 'bar bdag gis brdung zhing kun tu brdung la dmyal zhing kun tu dmyal lo/ /gzhi de las yun ring por sdug bsngal nyams su myong bar 'gyur te/ ji srid du sdig pa mi dge ba'i las thams cad kyi thams cad du yongs su ma zad cing ma byang gi bar du ste/ de bas na sems can dmyal ba de tsha ba zhes bya'o/ /de la sems can dmyal ba chen po rab tu tsha ba na ni/ bye brag tu lcags kyi gsal shing rtse gsum pa rkub tu bcug nas/ de'i rtse mo gcig ni phrag pa ya gcig nas 'byung ngo / /cig shos kyang phrag pa ya gcig nas 'byung ngo / /dbus ma ni spyi bor 'byung ste/ gzhi de las de dag gi kha nas kyang me lce 'bar ba 'byung la/ mig gi 'bras bu gnyis dang / sna'i bu gu gnyis dang / rna ba'i bu gu gnyis dang / spu'i khung bu thams cad nas kyang me lce 'bar ba 'byung ngo / /lcags glegs pa tsha zhing rab tu tsha la/ kun tu rab tu mched cing 'bar ba dag gis kyang lus kun nas yongs su dkri bar byed do/ /yang lcags zangs chen po 'gyur byed bskol bas gang ba kun tu 'bar zhing rab tu 'bar la/ kun tu rab tu mched cing 'bar ba'i nang du sems can de dag spyi'u tshugs su 'jug go/ /bcug nas kyang kun bskol zhing rab tu bskal te/ steng du yang 'gro zhing 'og tu yang 'gro la thad kar yang 'gro ste/ gang gi tshe pags pa dang / sha dang / khrag rnams kun zhig nas/ keng rus 'ba' zhig lus par gyur pa de'i tshe/ yang phyir phyung zhing phyung zhing lcags kyi sa gzhi la 'grems so/ /de nas pags pa dang / sha dang khrag phyir skyes nas yang nang du bcug go/ /lhag ma gzhan ni tsha ba'i skabs bzhin no/ /gzhi de las yun ring por sdug bsngal nyams su myong bar 'gyur te/ ji srid du sdig pa mi dge ba'i las thams cad kyi thams cad du yongs su ma zad cing ma byang gi bar du ste/ de bas na sems can dmyal ba de rab tu tsha ba zhes bya'o/ /de la sems can dmyal ba chen po mnar med pa na ni/ gnod pa'i sdug bsngal 'di lta bu dag nyams su myong bar 'gyur te/ sems can de dag la shar phyogs na sa gzhi dpag tshad brgya phrag du ma yod pa kun tu 'bar zhing rab tu 'bar la/ kun tu rab tu mched cing 'bar ba las/ me 'bar ba'i shugs 'ong bar 'gyur te/ des sems can de dag gi pags pa yang bshig / sha yang bshig / rgyus pa yang bshig / rus pa yang bshig nas/ rus pa dang rkang la thug par byed do / dper na mar me'i snying po bzhin du/ lus thams cad me lce 'bar bas khyab par 'gyur ro/ /shar phyogs ji lta ba bzhin du lho dang / nub dang / byang phyogs kyang de dang 'dra ste/ sems can de dag kyang de'i rgyus me nyid kyi phung po lta bur snang ste/ me'i phung po phyogs bzhi nas 'ongs pa der 'dres par gyur bas/ de dag de na sdug bsngal myong ba la bar skabs med do/ /nyam thag pa'i skad 'byin pas sems can yin par mngon par zad do/ /yang lcags kyi zhib ma'i nang du lcags kyi me mdag me kun tu 'bar zhing rab tu 'bar la/ kun tu rab tu mched cing 'bar ba dag 'khrab cing rab tu 'khrab tu 'jug go/ /yang lcags kyi sa gzhi la lcags kyi ri chen po dag la 'dzeg tu 'jug cing / phyir yang 'bab tu 'jug go/ /yang kha nas lce phyung ste/ lcags kyi phur pa brgyas brgyangs nas/ dper na glang gi ko ba la bya ba bzhin du de thang bcad de/ gnyer ma rangs shing kham khum med par byed do/ /yang lcags kyi sa gzhi de nyid la gan rkyal du bzhag nas/ lcags kyi 'byed spyad kyis kha phye nas/ lcags kyi thu lum kun tu 'bar zhing rab tu 'bar la/ kun tu rab tu mched cing 'bar ba bcug ste/ des de dag gi kha yang tshig par byed cing / lkog ma dang / rgyu ma yang tshig nas phyir ro smad nas 'byung bar 'gyur ro/ /yang de bzhin du zangs bskol ba khar blugs nas/ des kyang kha yang tshig par byed cing lkog ma dang rgyu ma yang tshig nas ro smad nas 'bab par 'gyur ro/ /lhag ma gzhan rnams ni rab tu tsha ba'i skabs bzhin no/ /gzhi de las yun ring por sdug bsngal nyams su myong bar 'gyur te/ ji srid du sdig pa mi dge ba'i las thams cad yongs su ma zad cing ma byang gi bar du ste/ de bas na sems can dmyal ba de mnar med pa zhes bya ste/ der ni phal cher sems can mtshams med pa byed byed pa rnams skye bar 'gyur ro/ /de la 'di dag ni gnod pa che long che long rnams smos par zad kyi/ sems can dmyal ba de dag na de las gzhan pa'i gnod pa'i rnam pa mang po sna tshogs rnams med pa ni ma yin no/ /nye 'khor gyi sems can dmyal ba dag na ni gnod pa'i sdug bsngal 'di lta bu dag sems can rnams kyis nyams su myong bar 'gyur te/ sems can dmyal ba chen po de dag thams cad kyi phyogs bzhi na/ rtsig ngos bzhi dang sgo bzhi yod la/ lcags kyi ra ba dag gis bskor te/ phyogs bzhi de dag na yang sgo bzhi po dag gi phyi rol sgo re re na/ sems can dmyal ba lhag pa bzhi yod de/ 'di lta ste/ me ma mur pus nub tsam yod la/ sems can de dag gnas tshol du 'gro ba na de dag gis der rkang pa bzhag na ni pags pa dang / sha dang khrag kun 'jig par 'gyur ro/ /rkang pa bteg na ni pags pa dang / sha dang khrag phyir skye bar 'gyur ro/ /me mur pus nub tsam po de dang / 'dab chags drung nyid na phyi sa'i 'dam ro ltar mnam pa yod de/ sems can gnas tshol ba de dag gis 'bogs pa dang / de dag der sgyel nas mgo dang rkang pa bcas par bying ste 'dug go/ /phyi sa'i 'dam ro ltar mnam pa de na/ srog chags 'bu mchu rnon zhes bya ba yod de/ de dag gis sems can de dag gi pags pa yang 'bigs la/ sha dang rgyus pa dang rus pa dag kyang 'jig par byed de/ de nas rus pa dang rkang la thug nas 'bru bar byed do/ /phyi sa'i 'dam ro ltar mnam pa de dang 'dab chags drung nyid na/ spu gri'i sos gtams pa'i lam yod de/ sems can gnas tshol ba de dag song ba dang / der de dag gi rkang pa bzhag na ni pags pa dang / sha dang khrag kun gcod par byed do/ /rkang pa bteg na ni pags pa dang / sha dang khrag phyir skye bar 'gyur ro/ /spu gri'i sos gtams pa'i lam de dang 'dab chags drung nyid na/ nags tshal ral gri'i lo ma can yod de/ der sems can gnas tshol ba de dag song ba dang / de'i grib ma la brten cing de dag gi drung du 'khod nas shing las ral gri lhags te / de dag gis sems can de dag gi yan lag dang nying lag rnams 'bigs shing / rnam par gshegs te/ de dag der 'gyel nas khri sre bo dag lhags te/ rgyab kyi bshul 'thog cing za'o/ / nags tshal ral gri'i lo ma can de dang 'dab chags drung nyid na/ lcags kyi shing shal ma li'i tshal yod de/ sems can gnas tshol ba de dag song ba dang / 'dzeg tu 'jug ste/ de dag de la 'dzeg pa'i tshe ni/ tsher ma rnams kyi kha thur du lta bar 'gyur ro/ /'bab pa'i tshe ni tsher ma rnams kyi kha gyen du lta bar 'gyur ro / /de dag gis de dag gi yan lag dang nying lag rnams 'bigs shing / rnam par gshegs par byed do/ /de na khwa lcags kyi mchu can zhes bya ba dag kyang yod de/ de dag sems can de dag gi phrag pa'am mgo bo la 'khod nas mig gi 'bras bu dag 'thog cing za'o/ /lcags kyi shing shal ma li de dang 'dab chags drung nyid na/ chu klung rab med ces bya ba 'gyur byed kyi chu bskol bas gang ba yod de/ sems can gnas tshol ba de dag der lhung nas/ de dag steng du yang 'gro ste bskol zhing 'tshed do/ /'og tu yang 'gro ste bskol zhing 'tshed pa ni dper na zangs chus bkang la me chen po shin tu sbar ba'i nang du mon sran sde'u dang / mon sran gre'u dang / rgya shug gi 'bras bu dang / rgya sran blugs pa bzhin no/ /chu klung de'i ngos gnyis na/ sems can lag na dbyug pa thogs pa dang / lag na mchil ba thogs pa dang / lag na rgya thogs pa dag 'khod de/ de dag gis sems can de dag ni phyir 'byung du yang mi ster la 'byin pa'i mchil pa'am/ 'byin pa'i rgyas phyir phyung nas sa gzhi me chen po kun tu rab tu 'bar ba la gan rkyal du bzhag ste/ kye sems can dag ci 'dod ces 'dri'o/ /de dag gis smras pa/ bdag cag gis kyang mi shes so/ /bdag cag gis kyang mi mthong ste / 'on kyang bdag cag ni bkres so/ /de nas sems can de dag gis lcags kyi 'byed spyad kyis sems can de dag gi kha phye nas/ lcags kyi thu lum me chen po shin tu rab tu 'bar ba khar 'jug pa yang snga ma bzhin no/ /gal te bdag cag ni skom mo zhes zer na ni/ de dag gis de bzhin du zangs bskol ba khar ldugs so/ /gzhi de las yun ring por sdug bsngal nyams su myong bar 'gyur te/ ji srid du sems can dmyal ba myong bar 'gyur ba/ sdig pa mi dge ba'i las thams cad kyi thams cad du yongs su ma zad cing ma byang gi bar du'o/ /de la spu gri'i sos gtams pa'i lam gang yin pa dang / nags tshal ral gri'i lo ma can gang yin pa dang / lcags kyi shing shal ma li'i tshal gang yin pa de lhag pa gcig tu bsdus pas na lhag pa bzhir 'gyur ro/ /de la grang ba'i sems can dmyal bar skyes pa'i sems can rnams kyi ni/ grang ba'i sdug bsngal 'di lta bu dag nyams su myong bar 'gyur te/ chu bur can du skyes pa'i sems can rnams ni/ sa de na yod pa'i lhags pa chen pos btab nas/ lus thams cad chu bur byung ba bzhin du 'khums par 'gyur te/ de bas na sems can dmyal ba de chu bur can zhes bya'o/ /de la chu bur rdol ba can gyi bye brag ni 'di yin te/ chu bur rdol ba bzhin du 'khums par 'gyur te/ de bas na sems can dmyal ba de chu bur rdol ba can zhes bya'o/ / de la so thams thams dang / kyi hud zer dang / a cu zer ba ni tshig tu brjod pa las sems can de dag gi ming du btags pa'o/ /grang ba'i sems can dmyal ba ut+pal ltar gas pa dag na ni/ sa de na yod pa'i lhags pa chen pos btab nas/ pags pa rnam par sngo zhing kha lnga'am/ drug tu gas par 'gyur te/ de bas na sems can dmyal ba de ut+pal ltar gas pa zhes bya'o/ /de la pad+ma ltar gas pa'i bye brag ni 'di yin te/ pags pa sngon por gyur ba las 'das nas rnam par dmar zhing kha bcu'am/ de las lhag par yang gas par 'gyur te/ de bas na sems can dmyal ba de pad+ma ltar gas pa zhes bya'o/ /pad+ma ltar gas pa chen po'i bye brag ni 'di yin te/ pags pa shin tu rnam par dmar ba kho nar gyur nas kha brgya'am de las lhag par yang gas par 'gyur te/ de bas na sems can dmyal ba de pad+ma ltar gas ba chen po zhes bya'o/ /nyi tshe ba'i sems can dmyal ba dag tu skyes pa'i sems can rnams kyis ni rang rang gi lus las rang rang gi las las byung ba'i sdug bsngal 'di lta bu dag nyams su myong bar 'gyur te/ 'di lta ste/ mdo las dpal ldan gyis dris pa ni/ maud gal gyi bus rgyas par brjod pa bzhin te / de bas na sems can dmyal ba de la/ nyi tshe ba'i sems can dmyal ba zhes bya'o/ /de la dud 'gro ni gcig la gcig gsod par byed de/ gang mthu chung ba gsod par byed do/ /gzhi des sdug bsngal myong bar 'gyur ro/ /rang dbang med par yang gsod pa dang / brdeg pa dang / gnod pa byed pa la lha dang mi rnams kyi yo byad du gyur pa yang yin te/ gzhi des na sdug bsngal rnam pa sna tshogs myong bar 'gyur ro/ /yi dags rnams ni mdor bsdu na rnam pa gsum ste/ zas dang skom la phyi rol gyi sgrib pa yod pa dang / zas dang skom la nang gi sgrib pa yod pa dang / zas dang skom la sgrib pa yod pa'o/ /zas dang skom la phyi rol gyi sgrib pa yod pa gang zhe na/ sems can gang dag ser sna shas cher bsten pa'i phyir yi dags kyi gnas su skyes la/ de dag kyang bkres shing skom pa dang ldan pas/ pags pa dang / sha dang khrag kun skams nas/ sdong dum tshig pa lta bur 'dug la gdong skras khebs pa dang / bkres shing skom pa dang ldan pa'i bzhin dang / kha shin tu skams shing lces ldag pa dang / bzhin 'gyur bas/ chu mig dang / mtsho dang / mtshe'u rnams su de dang der kun tu rgyu bar byed de/ de dag tu yang sems can lag na ral gri thogs pa dang / lag na mdung thogs pa dang / lag na mdung thung thogs pa gzhan dag gis chu mig dang / mtsho dang / mtshe'u de dag las phyir 'gog par byed la/ chu de yang rnag dang khrag tu mthong ste/ des na de dag bdag nyid kyang 'thung mi 'dod par 'dug ste/ de lta bu de dag ni zas dang skom la phyi rol gyi sgrib pa yod pa'i yi dags rnams so/ /zas dang skom la nang gi sgrib pa yod pa gang zhe na/ 'di lta ste/ kha khab tsam la/ kha 'bar ba can dang / lba ba can dang / gsus po che ste/ 'di ltar de dag gzhan dag gis bgegs ma byas par bdag nyid kyis zas dang skom nyid du zin kyang / bza' ba dang btung bar mi nus pa de lta bu de dag ni zas dang skom la nang gi sgrib pa yod pa'i yi dags rnams so/ /zas dang skom la sgrib pa yod pa rnams gang zhe na/ yi dags me lce'i phreng ba can zhes bya ba yod de/ de dag gis zos so cog dang 'thungs so cog thams cad tshig par 'gyur te/ des na de dag gi bkres shing skom pa'i sdug bsngal ba rnams kyang med par mi 'gyur ro/ /yi dags ljan ljin za ba zhes bya ba dag kyang yod de/ de dag kha cig ni phyi sa za zhing gcin 'thung ste/ gang mi gtsang zhing mnam la dri nga ba dang / gnod pa dang / smad par bya ba de ni bza' ba'am/ 'thungs bar nus so/ /yang kha cig ni rang gi sha rnams kyang gcad de za la/ gtsang ba'am bsod pa gang yin pa de ni bza' ba dang btung bar mi nus te/ de lta bu de dag ni/ zas dang skom la sgrib pa yod pa'i yi dags rnams so/ /de la mir skyes pa'i sems can rnams ni phongs pa'i sdug bsngal 'di lta bu myong bar 'gyur te/ lhan cig skyes pa'i bkres shing skom pas phongs pa'i sdug bsngal dang / 'dod pas phongs pa/ kha zas ngan pas phongs pa'i sdug bsngal dang / 'gro ba las byung ba dang / tshol khro dang / ngal ba la sogs pas phongs pa'i sdug bsngal dang / dus tshigs 'gyur ba'i grang ba dang / tsha bas gnod par 'gyur ba'i sdug bsngal dang / 'dzag gnod byed las byung ba dang / khang pa la sogs pas ma bskyabs pa las gyur ba'i gnod pa'i sdug bsngal dang / mun pa la sogs pas bsgribs pas tha snyad chad pa las byung ba'i gnod pa'i sdug bsngal dang / de bzhin du yongs su 'gyur ba/ rga ba'i sdug bsngal dang / na ba'i sdug bsngal dang / 'chi ba'i sdug bsngal la'o / /'di ltar sems can dmyal ba dag na ni/ 'chi ba nyid la bde bar 'dzin te/ de bas na de la ni sdug bsngal du rnam par mi gzhag go/ /lha rnams la ni gnad 'chad pa ni med la 'chi 'pho ba dang / ltung ba'i sdug bsngal ni yod de/ ji skad du lha'i bu 'chi 'pho ba na snga ltas rnam pa lnga 'byung ste/ gos dri ma med pa la dri ma can du 'gyur ba dang / me tog gi phreng ba sngon ma rnyings pa rnyings par 'gyur ba dang / mchan khung gnyis nas rngul 'byung bar 'gyur ba dang / lus las dri mi zhim pa 'byung ba dang / lha dang lha'i bu yang rung bdag nyid kyi stan la mi dga' bar 'gyur ba ste/ de'i tshe 'khor gyi nang du 'dus pa na lha'i bu mo de dag de las gzhan pa'i lha'i bu dag dang lhan cig tu dga' mgur spyod pa de dag des mthong nas/ gzhi de las sdug bsngal ba dang / yid mi bde ba chen po myong bar 'gyur ro zhes gsungs pa lta bu'o/ /de bzhin du spa gong bar gyur pa'i sdug bsngal yang myong bar 'gyur ro/ /de ci'i phyir zhe na/ 'di ltar de la bsod nams kyi phung po ches rgya che ba dang ldan pa gang yin pa de'i lha'i 'dod pa lnga'i yon tan ches che bar 'byung bar 'gyur te/ der de las gzhan pa'i lha'i bu bsod nams ches chung ba rnams kyis mthong na spa gong bar 'gyur te/ gzhi de las kyang sdug bsngal ba dang / yid mi bde ba chen po myong bar 'gyur ba'i phyir ro/ /de bzhin du gcad pa dang / dral ba dang / spyugs pa dang / gsad pa'i sdug bsngal yang myong bar 'gyur ro/ /de ci'i phyir zhe na/ 'di ltar lha rnams dang / lha ma yin rnams g.yul sprod pa na/ lha rnams dang / lha ma yin rnams dang / phan tshun du 'gras par 'gyur bas gser dang dngul dang shel dang / bai DUR+Ya'i mtshon cha sna bzhi po dag blangs nas g.yul 'gyed de/ de yang lha rnams dang / lha ma yin rnams kyi yan lag dang / nying lag 'chad pa yang yod/ lus 'dral ba yang yod/ gsod pa yang yod do/ /de dag gi yan lag dang nying lag chad pa rnams kyang phyir skye bar 'gyur la/ lus dral ba yang phyir 'tsho bar 'gyur ro/ /gang gi tshe mgo gcad par gyur pa de'i tshe ni 'chi bar 'gyur ro/ /de la ched 'ga' ni lha rnams pham par 'gyur/ ched 'ga' ni lha ma yin rnams pham par 'gyur te/ lha rnams mthu che ba'i phyir lan mang du lha rnams rgyal bar 'gyur ro/ /de gnyis las gang dag pham par gyur pa de dag ni/ rang gi grong khyer du zhugs nas bde bar 'gyur te/ der zhugs nas de dag gcig la gcig gis mi tshugs so/ /de la lha rnams ni lha ma yin gyi bu mo dag gi phyir lha ma yin rnams dang 'gras par 'gyur ro/ /lha ma yin rnams ni bdud rtsi rnam pa bzhi'i phyir lha rnams dang 'gras par 'gyur ro/ /lha ma yin rnams kyang lha'i 'gro bas bsdus pa kho nar blta bar bya'o/ /'on kyang de dag ni sgyu can 'drid pa'i bsam pa dang ldan pa sgyu dang g.yo'i shas che ba yin te/ de bas na 'di lta ste/ lha rnams bzhin du dkar po'i chos rnams kyi snod du gyur pa ma yin te/ de'i phyir ched 'ga' mdo gzhan dag las 'gro ba tha dad pa'i bstan pas bstan to/ /de dag ni lha nyid yin na/ lha'i chos yang dag par blangs te gnas pa ma yin pas/ de'i phyir lha ma yin rnams zhes bya'o/ /lha'i bu ches mthu dang ldan pa ches 'khrugs par gyur na/ lha'i bu ches mthu chung bar rang gi gnas na spong zhing skrod par byed de/ de bas na lha rnams kyi sdug bsngal gsum po 'chi 'pho ba dang / ltung ba'i sdug bsngal dang / spa gong ba'i sdug bsngal dang / gcad pa dang / dral ba dang / gsad pa dang / spyugs pa'i sdug bsngal myong bar 'gyur ro/ /gzugs dang gzugs med pa na spyod pa'i sems can rnams la ni sdug bsngal de dag rnam pa thams cad du med do/ /'di ltar sems can de dag ni sdug bsngal gyi tshor ba'i snod du gyur pa ma yin pa'i phyir ro/ /'on kyang nyon mongs pa dang ldan zhing sgrib pa dang bcas la/ 'chi 'pho ba dang / gnas pa la rang dbang med pa'i phyir de dag kyang gnas ngan len gyi sdug bsngal gyis ni sdug bsngal lo/ /zag pa med pa'i khams na ni gnas ngan len gyis sdug bsngal thams cad yang dag par chad pa yin te/ de bas na de kho na yang dag par bde ba yin gyi/ gzhan thams cad ni sdug bsngal ba yin par rig par bya'o/ /de la sems can dmyal ba rnam pa bzhi char na yang bde ba myong ba med de/ sems can dmyal ba rnams ji lta ba bzhin du yi dags rnams kyang de dang 'dra'o/ /yi dags rdzu 'phrul chen po rnams dang / dud 'gro rnams dang / mi rnams la ni phyi rol du bltas pa las byung ba'i yo byad kyi bde ba dang / sdug bsngal ba 'dres pas 'dren mar snang ngo / /de la mi rnams kyi nang na 'khor los sgyur ba'i bde ba ni mchog dang / gtso bo dang gya nom pa'i yin no/ /'khor los sgyur ba 'jig rten du 'byung ba na rin po che sna bdun dang ldan par 'byung ste/ de'i rin po che sna bdun po de dag ni 'di lta bu yin te/ 'di lta ste/ 'khor lo rin po che dang / glang po rin po che dang / rta rin po che dang / nor bu rin po che dang / bud med rin po che dang / khyim bdag rin po che dang / bdun pa blon po rin po che'o/ /de'i tshe de'i 'khor lo rin po che ji lta bu zhig 'byung bar 'gyur zhe na/ rin po che sna bdun po dag 'byung ba ni mdo 'di nyid las ji skad 'byung ba bzhin du brjod par bya'o/ /de la gling bzhi pa la ni khams kyi rgyal po rnams rang phyag 'tshal bar 'gyur te/ 'di dag ni lha'i 'bangs lags kyi lhas 'di dag la legs par rjes su bstan du gsol/ bdag cag ni lha'i rjes su mchi ba lags so zhes zer ro/ /'khor los sgyur ba'i rgyal pos/ de dag la bsgo ba gtso bo dag de'i phyir khyed bdag cag gis rang rang gi ris su gtogs pa rnams chos kyis legs par rjes su ston cig /chos ma yin pas ni ma byed cig /khyed kyis chos ma yin pa spyod pa dang / log par spyod pa rnams kyang yul 'khor du 'dug tu ma gzhug shig ces bsgo bar byed do/ /gling gsum pa la ni [(]po [,]pho [)]nya btang bas phyag 'tshal bar 'gyur ro/ /gling gnyis pa la ni rang reng byed de brtsal bas phyag 'tshal bar 'gyur ro/ /gling gcig pa la ni/ mtshon cha kun tu 'khrug pa'i bar du byas pas phyag 'tshal bar 'gyur ro/ /lha rnams ni mtho ris kyi rnam par 'byor ba chen po myong bar 'gyur te/ kha dog dang ldan zhing dga' ba'i shas che la/ rang rang gi gzhal med khang dag na yun ring por gnas so/ /de dag ni lus kyi phyi nang gtsang zhing / dring ba med do/ /de dag la ni 'di lta ste/ mi rnams kyi mi gtsang ba'i rdzas 'di lta ste/ rdul dang / dri ma dang / rus pa dang / rgyus pa dang / rtsa dang / mkhal ma dang / snying la sogs pa gang yin pa de dag med do/ /de dag gi gzhal med khang yang gser las grub pa dang / dngul las grub pa dang / shel las grub pa dang / bai DUR+Ya las grub pa rnam pa bzhi yod do/ /tha dad par phye zhing rnam par bkra ba'i khang pa brtsegs pa nyams dga' ba dag dang / ba gam nyams dga' ba dang / bsil khang nyams dga' ba dag dang / stegs bu nyams dga' ba dag dang / skar khung dra ba can nyams dga' ba dag dang / nor bu'i tshogs kyis spras shing snang ba kun tu 'gyed pa kun nas mdzes pa dag yod do/ /de bzhin du bza' ba 'byung ba'i shing ljon pa dag yod do/ /de dag las bdud rtsi'i kha zas rnam pa bzhi po sngon po dang / ser po dang / dmar po dang / dkar po dag 'byung bar 'gyur ro/ /de bzhin du btung ba 'byung ba'i shing ljon pa dag yod de/ de dag las sbrang rtsi dang / sbrang chang dag 'byung bar 'gyur ro/ /bzhon pa 'byung ba'i shing ljon pa dag yod de/ de dag las bzhon pa rnam pa sna tshogs shing rta dang / khyogs dang khyogs g.yogs pa la sogs pa 'byung ngo / /gos 'byung ba'i shing ljon pa dag yod de/ de dag las gos rnam pa sna tshogs phra bdar che zhing / shin tu dkar ba dang / kha dog rnam pa sna tshogs dang / gser gyis spras pa rnam par bkra ba dag 'byung bar 'gyur ro/ /rgyan 'byung ba'i shing ljon pa dag yod do / de dag las nor bu dang / dpung rgyan dang / rna cha gdub 'khor dang / mgul gdub dang / gdu bu dang / lag pa'i rgyan dang / rkang pa'i rgyan rnams dang / de lta bu dang mthun pa'i rgyan nor bu sna tshogs kyis spras pa dag 'byung ngo / /spos dang / bdug pa dang / me tog phreng 'byung ba'i shing ljon pa dag yod de/ de dag las spos rnam pa sna tshogs dang / bdug pa rnam pa sna tshogs pa dang / me tog phreng ba rnam pa sna tshogs pa 'byung ngo / /de dag gi nang na shing yongs 'du sa brtol zhes bya ba mchog dang / gtso bo dang / rab dang / gya nom pa zhig yod de/ de'i rtsa ba ni dpag tshad lnga bcu thur du zug go/ /'phang du ni dpag tshad brgya yod de / yal ga dang / lo ma dang / lo ma gzhon nu ni dpag tshad brgyad cur khyab par 'dug go/ /de'i me tog thams cad yongs su rgyas pa'i dri yang rdzi phyogs su ni dpag tshad brgyar ngad ldang ngo / /ldog na ni dpag tshad lnga bcur ngad ldang ste/ de'i drung du sum cu rtsa gsum pa'i lha rnams dang / dbyar zla ba bzhi 'dod pa'i yon tan lnga po de dag gis rtse zhing dga' bar byed do/ /de bzhin du bzhad gad dang / gar dang / glu dang / rol mo'i sgra 'byung ba'i shing ljon pa dag yod de/ de dag las bzhad gad dang / gar dang / glu dang / rol mo'i sgra rnams kyi cha byad rnam pa sna tshogs 'byung ngo / /de bzhin du snod spyad kyi yo byad 'byung ba'i shing ljon pa dag yod de/ de dag las snod spyad kyi yo byad rnam pa sna tshogs pa 'di lta ste/ kha zas kyi snod spyad kyi yo byad dang / skom gyi snod spyad kyi yo byad dang / mal cha dang / stan gyi yo byad dang / de lta bu dang mthun pa'i snod spyad kyi yo byad rnams 'byung bar 'gyur te/ de dag ci 'dod pa dang / las ji lta ba bzhin du longs spyod par 'dod pa rnams kyi lag tu yo byad de dag 'ong bar 'gyur ro/ /lha ma yin rnams kyi gzhal med khang dang / rnam par 'byor pa dang / bde ba dang / longs spyod pa rnams kyang de dang 'dra bar rig par bya'o/ /byang gi sgra mi snyan dag na ni shing ljon pa de lta bu dag la dpag bsam shing rnams zhes bya ste/ de dag shing de las rang gis len gyi bsams pas lag tu 'ong ba ni ma yin no/ /de na ma rmos ma btab pa'i 'bras sA lu yang yod de/ sems can de dag ni bdag gir 'dzin pa yang med cing / yongs su 'dzin pa yang med la/ khyad par du 'gro bar nges pa yin no/ /de la lha rnams kyi dbang po brgya byin gyi khang bzangs rnam par rgyal byed ces bya ba/ thams cad kyi mchog tu gyur pa zhig yod de/ de la ba gam brgya rtsa gcig yod do/ /ba gam re re la yang khang pa brtsegs pa brgya brgya yod do/ /khang pa brtsegs pa re re la yang khang mig bdun bdun yod do/ /khang mig re re la yang lha'i bu mo bdun bdun yod do/ /lha'i bu mo re re la yang g.yog mo bdun bdun yod do/ /lha rnams kyi sa gzhi thams cad kyang lag mthil bzhin du mnyam la mthon dman med cing reg na bde ba ste/ rkang pa bzhag na ni nem zhes byed / rkang pa bteg na ni par zhes byed la/ rtag tu me tog man dA ra bas pus mo nub pa tsam du khebs par 'dug ste/ der me tog rnying pa rnams ni rlung gis bsal/ me tog sar pa rnams ni 'grems par byed do/ /lha'i grong khyer de'i phyogs bzhin/ srang bzang zhing blta na sdug la mdzes par byas pa dag yod de/ phyogs bzhin sgo bzhi bzang zhing sdug la mdzes par byas pa dag yod de/ gnod sbyin mang po gzugs bzang ba rnam pa sna tshogs bkod pa dag yod de/ phyogs bzhin skyed mos tshal bzhi la 'di lta ste shing rta sna tshogs can dang / rtsub 'gyur dang / 'dres pa dang / dga' ba'i tshal yod do/ /de dag gi pha rol na sa gzhi bzang po bzang zhing blta na sdug la mdzes pa bzhi yod do/ /lha'i grong khyer gyi byang shar gyi mtshams na/ lha'i mdun sa chos bzangs zhes bya ba yod de/ lha rnams der zhugs nas don sems shing mjal la nye bar rtog par byed do/ /de'i 'dab na [(]la [,]lwa [)]ba dkar po lta bu'i rdo leb dkar po bzang zhing blta na sdug la mdzes pa zhig yod do/ /lha de dag kyang rang rang las 'od 'byung la/ de dag la mtshan mo'i rtags 'di lta ste/ le lor 'gyur ba dang / 'dod pa'i yon tan lnga po dag gis rtse bar mi 'dod pa dang / rmugs pa dang / gnyid 'byung ba dang / bya rnams skad 'byin par mi byed pa dang / de lta bu dang mthun pa'i rtags rnams 'byung ste/ de las de dag 'di snyam du sems te/ mtshan mo ni 'ongs so/ /nyin mo ni 'das so snyam mo/ /de dag nyin mtshan du gcig tu nges par bde ba dang yid bde ba dang ldan zhing lha'i 'dod pa'i yon tan lnga po dag gis dga' la/ gcig tu nges par bag med pa'i dbang du gyur te/ gar gyi sgra rnams dang / glu'i sgra rnams dang / rol mo'i sgra rnams dang / bro gar dang gar mkhan dang / bzhad gad dang / 'jo sgeg la sogs pa'i sgra rnams dang / gcig tu nges par yid du 'ong ba'i gzugs rnam pa sna tshogs la blta ba dang / gcig tu nges par dri zhim po'i spos rnam pa sna tshogs dang / gcig tu nges par ro zhim pa'i ro rnam pa sna tshogs dang / gcig tu nges par reg na bde ba'i lha'i bu mo'i mchog gi reg bya rnam pa sna tshogs dag gis yid 'phrog pas dus 'da' bar byed de/ lha rnams kyis de lta bu'i bde ba myong la de dag la 'di lta ste/ mi rnams kyi skabs su sngar bstan pa lta bu'i nad kyang med/ yongs su 'gyur ba rga ba yang med/ lhan cig skyes pa'i sdug bsngal zas dang skom gyis phongs pa las gyur pa yang med/ de las gzhan pa'i phongs pa'i sdug bsngal rnams kyang med do/ /gzugs na spyod pa'i lha bsam gtan dang po'i sa pa rnams ni dben pa las skyes pa'i dga' ba dang / bde ba can myong ngo / /bsam gtan gnyis pa'i sa pa rnams ni ting nge 'dzin las skyes pa'i dga' ba dang bde ba can myong ngo / / bsam gtan gsum pa'i sa pa rnams ni dga' ba med pa'i bde ba snying po can myong ngo / /bsam gtan bzhi ba'i sa pa rnams ni btang snyoms dang dran pa yongs su dag pa dang / zhi ba'i bde ba can mi g.yo ba myong ngo / /gzugs med par skyes pa rnams ni zhi ba dang rnam par thar pa'i bde ba can myong ngo / /yang bye brag rnam pa drug po tshad kyi bye brag dang / shin tu gzhon sha can gyi bye brag dang / rkyen gyi bye brag dang / dus kyi bye brag dang / sems kyi bye brag dang / lus kyi bye brag gis sdug bsngal gyi bye brag dang / bde ba'i bye brag tu 'gyur bar rig par bya ste/ ji lta ji ltar lus shin tu che bar gyur pa de lta de ltar sdug bsngal gyi bye brag tu 'gyur ro/ /ji lta ji ltar lus shin tu gzhon sha can du gyur pa de lta de ltar sdug bsngal gyi bye brag tu 'gyur ro/ /ji lta ji ltar rkyen shin tu drag pa dang / shin tu mang ba dang / shin tu sna tshogs su gyur pa de lta de ltar sdug bsngal gyi bye brag tu 'gyur ro/ /ji lta ji ltar dus shin tu ring ba dang / shin tu rgyun mi 'chad pa de lta de ltar sdug bsngal gyi bye brag tu 'gyur ro/ /ji lta ji ltar so sor ma brtags pa shin tu stobs che ba'i sems dang ldan par gyur pa de lta de ltar sdug bsngal gyi bye brag tu 'gyur ro/ /ji lta ji ltar lus sdug bsngal gyi snod du shin tu gyur pa de lta de ltar sdug bsngal gyi bye brag tu 'gyur te/ sdug bsngal gyi bye brag gi lta ba bzhin du/ bde ba'i bye brag kyang de dang 'dra bar rgyas par ci rigs par rig par bya'o/ /yang bde ba ni rnam pa gnyis te/ 'phags pa ma yin pa'i nor las byung ba dang / 'phags pa'i nor las byung ba'o/ /de la 'phags pa ma yin pa'i nor las byung ba'i bde ba ni/ yo byad rnam pa bzhi po dga' ba'i yo byad dang / lta ba'i yo byad dang / dag pa'i yo byad dang / gnas pa'i yo byad la brten nas byung ba'o/ /de la dga' ba'i yo byad ni/ 'di lta ste/ bzhon pa dang / gos dang / rgyan dang / bzhad gad dang / gar dang / glu dang / rol mo'i sgra dang / spos dang / me tog phreng dang / byug pa dang / 'tshog chas bzang po rnam pa sna tshogs dang / snang ba dang skyes pa dang / bud med dga' dgur spyod pa dang / nor bsags pa'o/ /de la lta ba'i yo byad ni 'di lta ste/ dgang ba la rtsol ba dang / rdo pang tshad dang / 'khor lo la rtsol ba dang / dbyug tho la rtsol ba dang / de lta bu dang mthun pa rnams so/ /de la dag pa'i yo byad ni 'di lta ste/ rtswa dUr wa dang / dung dang / bil ba dang / bum pa gang ba dang / de lta bu dang mthun pa rnams so/ /de la gnas pa'i yo byad ni zas dang skom mo// //bam po lnga pa/ de la 'phags pa'i nor las byung ba'i bde ba ni/ 'phags pa'i nor bdun po dad pa'i nor dang / tshul khrims kyi nor dang / ngo tsha shes pa'i nor dang / khrel yod pa'i nor dang / thos pa'i nor dang / gtong ba'i nor dang / shes rab kyi nor la brten nas byung ba'o/ /de la 'phags pa'i nor las byung ba'i bde ba ni/ 'phags pa ma yin pa'i nor las byung ba'i bde ba las rnam pa bco lngas khyad par du 'phags te/ bco lnga po gang zhe na/ 'phags pa ma yin pa'i nor las byung ba'i bde ba ni nyes par spyod pa kun nas spong ba yin la/ 'phags pa'i nor las byung ba ni/ legs par spyod pa kun nas slong ba yin no/ /gzhan yang 'phags pa ma yin pa'i nor las byung ba'i bde ba ni kha na ma tho ba dang bcas pa la dga' ba dang ldan pa yin la/ 'phags pa'i nor las byung ba ni kha na ma tho ba med pa la dga' ba dang ldan pa yin no/ /gzhan yang 'phags pa ma yin pa'i nor las byung ba'i bde ba ni lus mtha' dag la khyab pa ma yin pa'i phyir chung ba yin la/ 'phags pa'i nor las byung ba ni lus mtha' dag la khyab pa'i phyir che ba yin no/ /gzhan yang 'phags pa ma yin pa'i nor las byung ba ni/ phyi rol gyi rkyen la rag las pa'i phyir dus thams cad pa ma yin la/ 'phags pa'i nor las byung ba ni/ nang gi rkyen la rag las pa'i phyir dus thams cad pa yin no/ /gzhan yang 'phags pa ma yin pa'i nor las byung ba ni/ 'dod pa na spyod pa nyid yin pa'i phyir/ sa thams cad pa ma yin la/ 'phags pa'i nor las byung ba ni khams gsum na spyod la/ ldan pa ma yin pa'i phyir sa thams cad pa yin no/ /gzhan yang 'phags pa ma yin pa'i nor las byung ba ni/ phyis 'phags pa dang 'phags pa ma yin pa'i nor thob par byed pa ma yin la/ 'phags pa'i nor las byung ba ni phyis 'phags pa'i nor thob par byed pa yin no/ /gzhan yang 'phags pa ma yin pa'i nor las byung ba ni/ longs spyod na yongs su zad cing mthar thug par 'gyur la/ 'phags pa'i nor las byung ba ni bsten na rgya che ba dang / 'phel ba dang / yangs par 'gyur ro/ /gzhan yang 'phags pa ma yin pa'i nor las byung ba ni/ rgyal po rnams sam/ tshem rkun rnams sam/ dgra rnams sam/ me'am/ chu'am gzhan dag gis gcad du rung la/ 'phags pa'i nor las byung ba ni gcad du med pa yin no/ /gzhan yang 'phags pa ma yin pa'i nor las byung ba ni/ 'di nas blangs nas 'gro bar 'gyur ba ma yin la/ 'phags pa'i nor las byung ba ni/ 'di nas blangs nas 'gro bar 'gyur ba yin no/ /gzhan yang 'phags pa ma yin pa'i nor las byung ba ni bsten na chog mi shes pa yin la/ 'phags pa'i nor las byung ba ni bsten na mthar phyin nas chog shes pa yin no/ /gzhan yang 'phags pa ma yin pa'i nor las byung ba ni/ 'jigs pa dang bcas pa dang / khon dang bcas pa dang / gnod pa dang bcas pa dang / yongs su gdung ba dang bcas pa dang / phyis kyang sdug bsngal spong bar 'gyur ba ma yin pa ste/ de la 'jigs pa dang bcas pa ni ma 'ongs pa'i sdug bsngal skyer dogs pa'i gzhi'i gnas su gyur pa'i phyir ro/ /de la khon dang bcas pa ni 'thab pa dang / mtshang 'bru ba dang / 'gyed pa dang / rtsod pa'i gzhi'i gnas su gyur pa'i phyir ro/ /de la gnod pa dang bcas pa ni na ba dang / rga ba dang / 'chi ba'i gzhi'i gnas su gyur pa'i phyir ro/ /de la yongs su gdung ba dang bcas pa ni/ mdze nad phrugs pa bzhin du bde ba yongs su rdzogs pa ma yin zhing / phyin ci log gi gzhi'i gnas su gyur pa'i phyir dang / mya ngan dang smre sngags 'don pa dang / sdug bsngal ba dang / yid mi bde ba dang / 'khrug pa'i gzhi'i gnas su gyur pa'i phyir ro/ /de la phyis kyang sdug bsngal spong bar 'gyur ba ma yin pa ni 'dod chags la sogs pa'i nyon mongs pa dang nye ba'i nyon mongs pa'i gzhi'i gnas su gyur pa'i phyir ro/ /'phags pa'i nor las byung ba ni 'jigs pa med pa dang / khon med pa dang gnod pa med pa dang / yongs su gdung ba med pa dang / phyis kyang sdug bsngal spong bar 'gyur ba yin te/ de las bzlog pa'i tshul gyis ci rigs par rig par bya'o/ /yang 'phags pa shes rab kyis 'tsho ba rnams kyi chos kyi longs spyod ni phyi rol gyi 'dod pa can rnams kyi 'dod pa'i longs spyod las rnam pa lngas khyad par du 'phags te/ des na 'phags pa shes rab kyis 'tsho ba rnams la bla na med pa'i shes rab kyis 'tsho bas 'tsho ba zhes bya ste/ chos kyi longs spyod kun nas nyon mongs pa ma yin pa dang / chos kyi longs spyod gtan du nges pa dang / chos kyi longs spyod gcig tu nges pa dang / chos kyi longs spyod shes rab kyis 'tsho ba dang / de las gzhan pa'i shes rab kyis 'tsho ba rnams dang / thun mong ma yin pa dang / chos kyi longs spyod bde ba yongs su rdzogs pa bdud dang phyir rgol ba nges par bcom pa'i phyir ro/ /de la 'dod pa can rnams kyi 'dod pa'i bde ba yid bde ba'i gnas lta bu ni rjes su chags pa dang ldan/ yid mi bde ba'i gnas lta bu ni khong khro ba dang ldan/ btang snyoms kyi gnas lta bu ni so sor brtags pa ma yin pa'i btang snyoms dang ldan la/ 'phags pa shes rab kyis 'tsho ba rnams kyi chos kyi longs spyod ni de lta ma yin no/ /gzhan yang 'dod pa can rnams kyi 'dod pa'i longs spyod ni sngon gyi mthar mi mngon te/ mi rtag pas 'dod pa gzhan dag 'dod cing / 'dod pa gzhan dag 'thob la/ res 'ga' ni 'thob par mi 'gyur te/ 'phags pa shes rab kyis 'tsho ba rnams kyi chos kyi longs spyod ni de lta ma yin no/ /gzhan yang 'dod pa can 'dod pa'i longs spyod la gnas pa rnams las/ kha cig ni dngos po de nyid yid bde ba'i gnas lta bur 'gyur / kha cig gi ni de nyid yid mi bde ba'i gnas lta bur 'gyur ba dang / de dag la yang dus la lar ni yid bde ba'i gnas lta bur 'gyur/ dus la lar ni yid mi bde ba'i gnas lta bur 'gyur la/ 'phags pa shes rab kyis 'tsho ba rnams kyi chos kyi longs spyod ni de lta ma yin no/ /gzhan yang 'di las phyi rol pa'i shes rab kyis 'tsho ba 'dod pa kun nas spangs pa rnams ni/ lta bar gyur pa rang gi rtog pas kun nas bslang ba log par mos pa'i gzhi de dang de dag la nan tan gyis mchog tu bzung nas/ sems mngon par zhen pa rnams kyi 'dod pa'i kun nas nyon mongs pa de yang rjes su 'brel pa nyid yin pa dang / 'dod chags dang bral par gyur pa rnams kyang yang phyir ldog par 'gyur la/ 'phags pa shes rab kyis 'tsho ba rnams kyi chos kyi longs spyod ni de lta ma yin no/ / gzhan yang 'dod pa la longs spyod pa rnams dang / de'i 'dod chags dang bral ba 'jig rten pa rnams kyi 'dod pa'i bde ba dang / dben pa'i bde ba ni yongs su rdzogs pa ma yin la/ bdud dang phyir rgol ba dang ldan pa yin te/ sgyu ma lta bu dang / brag ca lta bu dang / gzugs brnyan lta bu dang / smig rgyu lta bu dang / rmi lam lta bu dang / sgyu mar byas pa'i rgyan lta bu gang yin pa de la byis pa 'dod pa la longs spyod pa rnams dang / 'jig rten pa'i 'dod chags dang bral ba/ smyon pa lta bu/ ra ro ba la sogs ba lta bu/ bdud kyi g.yul las ma rgyal ba rnams rab tu bsten cing longs spyod par byed de/ de bas na de yongs su ma rdzogs pa dang / bdud dang phyi rgol ba nges par bcom pa yin la/ 'phags pa shes rab kyis 'tsho ba rnams kyi chos kyi longs spyod ni de lta ma yin no/ /yang khams gsum na spyod pa'i sems can rnams kyi lus ni 'di lta ste/ gnas ngan len dang ldan pa'i phyir phol mig kun nas tsha ba lta bur blta'o/ /lus de la bde ba'i tshor ba 'byung ba ji ltar blta zhe na/ dper na phol mig kun nas tsha ba la bsil ba'i reg pa bab pa lta bu'o/ /lus de la sdug bsngal gyi tshor ba 'byung ba ji ltar blta zhe na/ dper na phol mig kun nas tsha ba la sman 'gyur byed bab pa lta bu'o/ /lus de la sdug bsngal yang ma yin bde ba yang ma yin pa'i tshor ba 'byung ba ji ltar blta zhe na / dper na phol mig kun nas tsha ba de nyid la bsil ba dang / sman 'gyur byed kyi reg pa ma yin pa/ rang bzhin gyi kun nas tsha ba lta bu'o/ /de bas na bcom ldan 'das kyis bde ba'i tshor ba ni 'gyur ba'i sdug bsngal gyis sdug bsngal ba zhes gsungs la/ sdug bsngal ba ni/ sdug bsngal gyi sdug bsngal gyis sdug bsngal ba dang / sdug bsngal yang ma yin bde ba yang ma yin ba'i tshor ba ni 'du byed kyi sdug bsngal gyis sdug bsngal ba'o zhes gsungs so/ /yang zang zing dang bcas pa'i dga' ba yang yod/ zang zing med pa'i dga' ba yang yod/ zang zing med pa bas kyang ches zang zing med pa'i dga' ba yang yod do zhes bya ba la sogs pa gsungs pa gang yin pa de yang mdo nyid las ji skad rgyas par 'byung ba bzhin du rig par bya'o/ /bcom ldan 'das kyis khams gnyis na yod pa'i 'du shes dang / tshor ba 'gog pa'i bde ba ni/ bde ba rnams kyi mchog tu rnam par gzhag pa gang yin pa de yang / gnas pa'i bde ba las dgongs pa yin gyi/ tshor pa'i bde ba ni ma yin no/ /bde ba gsum po 'dod chags dang bral ba dang / zhe sdang dang bral ba dang / gti mug dang bral ba zhes gsungs pa'i bde ba gsum po de dag ni zag pa med pa'i dbyings nyid la yod de/ de bas na zag pa med pa'i dbyings ni bde ba gsum po de dag gis dus thams cad du bde ba kho na yin no/ /de la zas kyi longs spyod ni 'di yin te/ 'di lta ste/ khams gsum na spyod pa'i sems can skyes shing byung ba rnams ni/ zas rnam pa bzhi po rnams kyis tshe'i tshad ji tsam pa'i bar du gnas shing 'tsho ba'o/ /de la reg pa dang yid la sems pa dang rnam par shes pa'i zas rnam pa gsum gyis ni khams gsum na spyod pa'i sems can rnams gnas shing 'tsho'o/ /kham gyi zas kyis ni 'dod pa na spyod pa kho na'i sems can rnams gnas shing 'tsho'o/ /de la sems can dmyal bar skyes pa'i sems can rnams kyi khong na ni/ rlung rgyu ba'i kham gyi zas cha phra ba yod do/ /des de dag gnas shing 'tsho'o/ /dud 'gro rnams dang / yi dags rnams dang / mi rnams kyi ni kham gyi zas rags pa yin te/ de dag gis kham gyis gcod cing za'o/ /de yang mer mer por 'dug pa la sogs pa'i sems can rnams dang / 'dod pa na spyod pa'i lha rnams kyi ni cha phra ste/ 'di ltar de dag gi ni kham gyi zas zos ba'i mdo la/ lus kyi yan lag thams cad du song nas zhu par 'gyur te/ de dag la phyi sa dang gcig du 'gyur ba med do/ /de la 'khrig pa'i longs spyod ni 'di yin te/ sems can dmyal ba'i sems can rnams la ni/ thams cad kyi thams cad du med de/ 'di ltar de dag sdug bsngal drag po dang / rnam pa sna tshogs dang / yun ring ba dang / rgyun mi 'chad pa nyams su myong ba'i phyir te/ de bas na de dag ni skyes pa rnams kyang bud med rnams la bud med kyi 'dun pa yang mi skye la/ bud med rnams kyang skyes pa rnams la skyes pa'i 'dun pa yang mi skye na phan tshun gnyis kyis gnyis sbyor ba lta ga la yod/ dud 'gro rnams dang / yi dags rnams dang / mi rnams la ni lus kyi bde ba'am/ sdug bsngal 'dres par yod pas 'khrig pa'i sbyor ba yod de/ skyes pa dang bud med de rnams phan tshun gnyis kyis gnyis sprod par byed de khu ba yang 'byung ngo / /'dod pa na spyod pa'i lha rnams la yang 'khrig pa'i sbyor ba ni yod la/ khu ba 'byung ba ni med de/ de dag ni 'byung ba'i tshe mtshan gyi sgo nas rlung nyi tshe 'byung ngo / /de la rgyal chen bzhi'i ris kyi na gnyis kyis gnyis sprad pas gdung ba med par 'gyur ro/ /rgyal chen bzhi'i ris kyis ji lta ba bzhin du/ sum cu rtsa gsum pa rnams kyang de dang 'dra'o/ /'thab bral ba rnams ni gcig la gcig 'khyud pa tsam gyis gdung ba med par 'gyur ro/ /dga' ldan pa rnams ni gcig la gcig lag pa nas 'dzin pa tsam gyis gdung ba med par 'gyur ro/ /'phrul dga' ba rnams ni gcig la gcig bgad pa tsam gyis gdung ba med par 'gyur ro/ /gzhan 'phrul dbang byed pa rnams kyi ni phan tshun mig gis mig tshugs su bltas pa tsam gyis gdung ba med par 'gyur ro/ / de la 'dzam bu'i gling dang shar gyi lus 'phags dang / nub kyi ba lang spyod kyi gling gsum na ni/ chung ma 'chang ba dang / bag ma gtong ba dang / bag ma len pa yod do/ /byang gi sgra mi snyan dag na ni bdag gir 'dzin pa med cing / yongs su 'dzin pa med pas/ sems can de dag la ni chung ma 'chang ba dang / bag ma gtong ba dang / bag ma len pa med do/ /gling gsum po ji lta ba bzhin du/ yi dags rdzu 'phrul che ba dang / 'dod pa na spyod pa'i lha rnams la 'phrul dga' ba dang / gzhan 'phrul dbang byed kyi lha rnams ma gtogs pa dag kyang de dang 'dra'o/ / 'dod pa na spyod pa'i lha'i ris thams cad ni lha'i bu mo rnams la mngal gyi gnas med do/ /rgyal chen bzhi'i ris kyi ni pha dang ma'i phrag pa'am/ pang par byis pa lo lnga lon pa lta bu rdzus te 'byung bar 'gyur ro/ /sum cu rtsa gsum ba rnams kyi ni lo drug lon pa lta bu'o/ / 'thab bral pa rnams kyi ni lo bdun lon pa lta bu'o/ /dga' ldan pa rnams kyi ni lo brgyad lon pa lta bu'o/ /'phrul dga' ba rnams kyi ni lo dgu lon pa lta bu'o/ /gzhan 'phrul dbang byed pa rnams kyi ni byis pa lo bcu lon pa lta bu phrag pa'am pang par rdzus te 'byung bar 'gyur ro/ / de la skye bar 'dogs pa rnam par gzhag pa ni 'di yin te/ 'di lta ste/ 'dod pa skye ba rnam pa gsum po rnams te/ sems can gang dag 'dod pa nye bar gnas par gyur la/ 'dod pa nye bar gnas par gyur pa dag gis/ dbang phyug la dbang byed pa dag kyang yod do/ /de dag kyang gang zhe na/ 'di lta ste/ mi thams cad dang / rgyal chen bzhi'i ris kyi lha rnams nas bzung ste/ dga' ldan la thug pa de ni 'dod pa skye ba dang po'o/ /sems can 'dod pa sprul la sprul pa de dag sprul zhing dbang phyug la dbang byed pa dag kyang yod de/ de dag kyang gang zhe na/ 'di lta ste/ 'phrul dga'i lha rnams so/ /'phrul dga'i lha de dag gi yang bdag gi phyir 'dod pa sprul pa 'grub kyi/ gzhan gyi phyir ni ma yin no/ /de bas na de dag ni bdag nyid kyis 'dod pa sprul pa rnams kho nas dbang phyug la dbang byed de/ de ni 'dod pa skye ba gnyis pa'o/ / sems can 'dod pa gzhan gyis sprul la/ 'dod pa gzhan gyis sprul pa de dag gis kyang / dbang phyug la dbang byed pa dag kyang yod de/ 'di lta ste/ gzhan 'phrul dbang byed kyi lha rnams te/ 'di ltar lha de dag ni bdag nyid kyi phyir dang / gzhan gyi phyir yang sprul pa 'grub ste/ de bas na de dag ni bdag nyid kyi sprul pa la/ snying las chung ngur gnas pa'i phyir/ gzhan gyis 'dod pa sprul pa dag gis dbang phyug la dbang byed de/ des na de dag la gzhan 'phrul dbang byed ces bya'i/ de dag gzhan gyis 'dod pa sprul pa kho na la brten pa ni ma yin te/ bdag nyid kyi sprul pa la yang brten pa de ni/ 'dod pa skye ba gsum pa'o/ /bde ba skye ba ni rnam pa gsum po 'di dag yin te/ sems can gang dag dben pa las skyes pa'i dga' ba dang bde bas lus brlan pa dag kyang yod de/ 'di lta ste/ bsam gtan dang po'i sa pa'i lha rnams so / / de ni bde ba skye ba dang po'o/ /sems can gang dag ting nge 'dzin las skyes pa'i dga' ba dang / bde bas lus brlan pa dag yod de/ 'di lta ste/ bsam gtan gnyis pa'i sa pa'i lha rnams te/ de ni bde ba skye ba gnyis pa'o/ /sems can gang dag dga' ba med pa'i bde bas lus brlan pa dag kyang yod de/ 'di lta ste/ bsam gtan gsum pa'i sa pa'i lha rnams te/ de ni bde ba skye ba gsum pa'o/ /ci'i phyir 'dod pa skye ba gsum pa dang / bde ba skye ba gsum du rnam par gzhag ce na/ smras pa gsum po 'di dag ni tshol ba yin te/ 'dod pa tshol ba dang / srid pa tshol ba dang / tshangs par spyod pa tshol ba'o/ /de la dge sbyong ngam bram ze 'dod pa tshol ba la 'jug pa gang su yang rung ba de dag thams cad ni 'dod pa skye ba gsum po dag gi phyir te/ de las mi lhag /de las mi mang ngo / /dge sbyong ngam bram ze bde ba'i rgyur srid pa tshol ba gang su yang rung ba de dag thams cad ni/ shas cher bde ba 'dod pas/ bde ba skye ba rnam pa gsum gyi phyir ro/ /gang dag sdug bsngal yang ma yin bde ba yang ma yin pa zhi ba'i skye ba'i don du tshol ba la 'jug pa de dag ni/ 'jig rten na nyung ba bas kyang ches nyung ngo / /de bas na de'i gong du skye ba rnam par mi gzhag go/ /dge sbyong ngam bram ze tshangs par spyod pa tshol ba la 'jug pa gang su yang rung ba de dag thams cad ni zag pa med pa'i dbyings kyi phyir ro/ /yang kha cig ni log pa'i rnam par thar pa yongs su brtags pa/ mi g.yo ba'i don dang / nam mkha' mtha' yas skye mched dang / 'du shes med 'du shes med min skye mched kyi don du log pa'i tshangs par spyod pa tshol ba la 'jug ste/ de ni tshangs par spyod pa tshol ba bla na yod pa yin par rig par bya'o/ /bla na med pa ni zag pa med pa'i dbyings kyi phyir ro/ /de la lus rnam par gzhag pa ni/ 'di lta ste/ khams gsum na sems can rnams kyi lus thob pa rnam pa bzhi yod de/ lus thob pa gang bdag nyid kyi sems kyis 'pho bar 'gyur la/ gzhan gyi sems kyis ma yin pa yang yod de/ 'di lta ste/ 'dod pa'i khams na lha rtsed mos myos pa zhes bya ba dag yod de/ de dag gang gi tshe ha cang rtse ba dang / dga' ba dang / brgyan pa'i gnas kyi sbyor ba dang ldan par gnas pa na/ de dag de ltar gnas pas dran pa brjed par 'gyur ro/ /dran pa brjed par gyur pas sems can de dag gnas de nas 'chi 'pho bar 'gyur ro/ /de bzhin du/ lha'i yid 'khrug par byed pa zhes bya ba dag yod de/ de dag gang gi tshe gcig la gcig mig tshugs su rtog par byed de/ de dag de ltar rtog pa na/ gcig la gcig yid 'khrug par byed de/ yid 'khrug pas sems can de dag gnas de nas 'chi 'pho bar 'gyur ro/ /lus 'thob pa gang gzhan gyi sems kyis 'pho bar 'gyur la/ bdag gi sems kyis ma yin pa'i dag kyang yod de/ 'di lta ste/ sems can ma'i mngal na gnas pa mer mer por gyur pa rnams dang / nur nur por gyur pa rnams dang / mkhrang gyur pa rnams dang / ltar ltar por gyur pa rnams so/ /lus thob pa gang bdag nyid kyi sems kyis kyang 'pho bar 'gyur la/ gzhan gyi sems kyis kyang 'pho bar 'gyur ba'ang yod de/ 'di lta ste/ de dag nyid skyes pa dang / dbang po yongs su rdzogs pa dang / dbang po yongs su smin pa rnams so/ /lus 'thob pa gang bdag nyid kyi sems kyis kyang 'pho bar mi 'gyur la/ gzhan gyi sems kyis kyang 'pho bar mi 'gyur bdag kyang yod de/ 'di lta ste/ gzugs dang gzugs med pa na spyod pa'i lha rnams dang / sems can dmyal ba thams cad dang / sems can dmyal bar skyes pa rnams ji lta ba bzhin du/ yi dags rnams kyang de dang 'dra ba dang / de bzhin gshegs pa'i pho nya dang / srid pa tha ma dang / byams pa la snyoms par zhugs pa dang / 'gog pa la snyoms par zhugs pa dang / nyon mongs pa med pa la snyoms par zhugs pa dang / bar ma do'i srid pa pa dang / de lta bu dang mthun pa'i sems can rnams so/ /de la rgyu dang rkyen dang 'bras bu rnam par gzhag pa ni rnam pa bzhir rig par bya ste/ mtshan nyid dang / gnas dang / rab tu dbye ba dang / rnam par gzhag pa'o/ /de la rgyu'i mtshan nyid gang zhe na/ snga na yod pa gang yin pa gang la brten nas/ gang dang phrad na/ chos gang skye ba'am/ 'thob pa'am grub par 'gyur pa 'am/ 'grub pa'am/ gnas pa'am/ byed par 'gyur ba de ni de'i rgyu zhes bya ste/ snga na yod pa ci zhig ci la brten nas ci dang phrad na/ chos ci zhig skye bar 'gyur zhe na/ rang gi sa bon ni snga na yod pa ste/ sa bon gyi gnas ma gtogs pa/ de las gzhan pa'i gnas gzugs can nam/ gzugs can ma yin pa la yang brten la/ las la yang brten nas/ grogs dang / dmigs pa dang yang phrad na/ 'dod pa dang ldan pa rnams dang / gzugs dang ldan pa rnams dang / gzugs med pa dang ldan pa rnams dang ldan pa ma yin pa rnams 'byung bar 'gyur te/ de yang ci rigs par sbyar ro/ /snga na yod pa ci zhig ci la brten nas/ ci dang phrad na chos ci zhig 'thob par 'gyur zhe na/ nyan thos dang rang sangs rgyas dang / de bzhin gshegs pa'i rigs ni snga na yod pa ste/ nang gi yan lag gi stobs la brten nas phyi rol gyi yan lag gi stobs dang phrad na/ nyon mongs pa dang bral ba mya ngan las 'das pa thob par 'gyur ro/ /de la nang gi yan lag gi stobs ni 'di yin te/ 'di lta ste/ tshul bzhin yid la byed pa dang / 'dod pa chung ba la sogs pa nang gi dge ba'i chos rnams dang / de bzhin du mir 'gyur ba dang / 'phags pa'i gnas su skye ba dang / dbang po rnams ma nyams pa dang / las kyi mtha' ma log pa dang / gnas la dar bar gyur pa de lta bu dang mthun pa'i chos rnams ni nang gi yan lag gi stobs zhes bya'o/ /de la phyi rol gyi yan lag gi stobs ni 'di yin te/ 'di lta ste/ sangs rgyas 'byung ba dang / dam pa'i chos bstan pa dang / chos bstan pa rnams gnas par bya ba dang / gnas par gyur pa rnams kyi rjes su 'jug par byas pa dang / gzhan dag snying brtse ba dang / de lta bu dang mthun pa'i chos rnams ni phyi rol gyi yan lag gi stobs zhes bya'o/ /de la snga na yod pa ci zhig ci la brten nas/ ci dang phrad na/ chos ci zhig grub par 'gyur zhe na/ shes bya la mos shing 'dod pa ni snga na yod pa de dam bcas pa dang gtan tshigs dang / dpe rnams la brten nas/ phyir rgol ba dang / mi mthun pa med pa'i 'khor dang phrad na bsgrub par bya ba'i don grub par 'gyur ro/ /snga na yod pa ci zhig ci la brten nas/ ci dang phrad na chos ci zhig 'grub ce na/ bzo shes ba ni snga na yod pa ste/ de dang mthun pa'i brtson pa la brten nas/ bzo'i las kyi gnas lta bu'i cha spyad yo byad dang phrad na/ bzo'i las kyi gnas de dang de dag 'grub par 'gyur ro/ /snga na yod pa ci zhig ci la brten nas/ ci dang phrad na chos ci zhig gnas par 'gyur zhe na/ sred pa ni snga na yod pa ste/ zas la brten pa'i lus la brten nas/ zas rnam pa bzhi dang phrad na/ sems can byung ba rnams gnas shing / 'tshol brtas par 'gyur ro/ /snga na yod pa ci zhig la brten nas/ ci dang phrad na chos ci zhig byed par 'gyur zhe na/ rang gi sa bon ni snga na yod pa ste/ skye ba la brten nas skye ba'i rkyen dang phrad na/ rang rang gi chos kyi rang gi byed pa yod cing / rang gi las byed de/ 'di lta ste/ mig gi las ni lta ba'o/ /de bzhin du dbang po lhag ma rnams kyang rang rang gi las byed par rig par bya'o/ /de bzhin dus ni rton par byed chu ni rlan par byed/ me ni sreg par byed/ rlung ni skems par byed/ de lta bu dang mthun pa'i phyi rol gyi dngos po rnams kyang rang rang las byed par rig par bya'o/ /rgyu dang rkyen dang 'bras bu'i gnas gang zhe na/ bco lnga po 'di dag ni rgyu'i gnas yin te/ 'di lta ste tshig dang myong ba dang / bag chags dang rlan dang bcas pa'i sa bon dang phrad nas 'gag pa dang / yul dang / dbang po dang / byed pa dang / skyes bu'i byed pa dang / de kho na la lta ba dang / mthun pa dang / mthu sna tshogs dang / tshogs pa dang bar du gcod pa dang / bar du gcod pa ma yin pa'o/ /rgyu dang rkyen dang 'bras bu'i rab tu dbye ba gang zhe na/ rgyu bcu dang / rkyen bzhi dang / 'bras bu lnga'o/ /rgyu bcu po dag gang zhe na/ rjes su tha snyad 'dogs pa'i rgyu dang / ltos pa'i rgyu dang / 'phen pa'i rgyu dang / mngon par 'grub pa'i rgyu dang / yongs su 'dzin pa'i rgyu dang / 'dren pa'i rgyu dang / so sor nges pa'i rgyu dang / lhan cig byed pa'i rgyu dang / mi mthun pa'i rgyu dang / mi mthun pa med pa'i rgyu'o/ /rkyen bzhi po dag gang zhe na/ rgyu'i rkyen dang / mtshungs pa de ma thag pa'i rkyen dang / dmigs pa'i rkyen dang / bdag po'i rkyen to/ /'bras bu lnga po dag gang zhe na/ rnam par smin pa'i 'bras bu dang / rgyu mthun pa'i 'bras bu dang / bral ba'i 'bras bu dang / skyes bu byed pa'i 'bras bu dang / bdag po'i 'bras bu'o/ /rgyu dang rkyen dang 'bras bu rnam par gzhag pa gang yin zhe na/ de la rgyu'i gnas tshig la brten nas/ rjes su tha snyad 'dogs pa'i rgyu 'dogs par byed de/ de ci'i phyir zhe na/ 'di ltar 'dod pa dang ldan pa'i chos rnams dang / gzugs dang ldan pa rnams dang / gzugs med pa dang ldan pa rnams dang ldan pa ma yin pa'i chos rnams la ming rnam par gzhag pa sngar byung nas/ 'du shes 'jug go/ / 'du shes sngar byung nas tshig 'byung ngo / /tshig gis ji ltar mthong ba dang / ji ltar thos pa dang / ji ltar bye brag byed pa dang / ji ltar rnam par shes pa bzhin du rjes su tha snyad 'dogs pa'i phyir te/ de lta bas na tshig la brten nas rjes su tha snyad 'dogs ba'i rgyu 'dogs so/ /de la rgyu'i gnas myong ba la brten nas/ ltos pa'i rgyu 'dogs par byed de/ de ci'i phyir zhe na/ 'di ltar 'dod pa dang ldan pa'i bde ba 'dod pa gang yin pa de ni/ de la ltos nas 'dod pa rnams rnyed pa'am/ kun sogs pa'am/ so sor brten pa yongs su tshol ba dang / gzugs dang gzugs med pa dang ldan pa'i bde ba 'dod pa gang yin pa de ni/ de la ltos nas de'i rkyen rnyed pa'am/ so sor brten pa yongs su tshol ba dang / ldan pa ma yin pa'i bde ba 'dod pa gang yin pa de ni/ de la ltos nas de'i rkyen rnyed pa'am/ so sor brten pa yongs su tshol ba dang / sdug bsngal mi 'dod pa gang yin pa de ni/ de la ltos nas de'i rkyen rnams sam/ de spong ba'i rkyen rnams spong ba'am/ rnyed pa'am/ so sor brten pa yongs su tshol ba'i phyir te/ de bas na myong ba la brten nas ltos pa'i rgyu 'dogs so/ /de la rgyu'i gnas bag chags la brten nas/ phan pa'i rgyu 'dogs par byed de/ de ci'i phyir zhe na/ 'di ltar dge ba dang mi dge ba'i las kyis yongs su bsgos pa'i 'du byed rnams kyis khams gsum du sdug pa dang / mi sdug pa'i 'gro ba rnams su/ sdug pa dang mi sdug pa'i lus rnams 'phen par byed pa dang / de nyid kyi dbang gis phyi rol gyi dngos po rnams kyang / phun sum tshogs pa dang / rgud par 'gyur ba'i phyir te/ de bas na 'du byed rnams kyi dge ba dang mi dge ba'i las kyi bag chags la brten nas 'phen pa'i rgyu 'dogs so/ /de la rgyu'i gnas rlan dang bcas pa'i sa bon la brten nas mngon par 'grub pa'i rgyu 'dogs par byed de/ de ci'i phyir zhe na/ 'di ltar 'dod pa dang ldan pa'i chos rnams dang / gzugs dang gzugs med pa dang ldan pa'i chos rnams/ rang rang gi sa bon las 'byung bar 'gyur ba dang / sred pa ni sa bon gyi rlan ces bya ste/ de bas na des sa bon brlan nas lus 'phags pa rnams mngon par 'grub bar 'gyur ba'i phyir te/ skye ba'i rgyu ni las yin la/ /mngon par 'grub pa'i rgyu ni sred pa yin no zhes ji skad gsungs pa lta bu ste/ de bas na rlan dang bcas pa'i sa bon la brten nas mngon par 'grub pa'i rgyu 'dogs so/ /de la rgyu'i gnas phrad nas 'gags pa la yang brten la/ de bzhin du rgyu'i gnas yul dang / dbang po dang / byed pa dang / skyes bu'i byed pa dang / de kho na la yang lta ba la brten nas yongs su 'dzin pa'i rgyu 'dogs par byed de/ de ci'i phyir zhe na/ 'di ltar 'dod pa dang ldan pa'i chos rnams kyi nang nas 'du byed rnams kyi 'jug pa/ de ma thag tu 'gags pas yongs su zin pa dang / yul gyis yongs su zin pa dang / dbang pos yongs su zin pa dang / byed pas yongs su zin pa dang / skyes bu'i byed pas yongs su zin pa 'byung ba'i phyir ro/ /'dod pa dang ldan pa rnams ji lta ba bzhin du gzugs dang ldan pa rnams dang / gzugs med pa dang ldan pa rnams kyang de dang 'dra'o/ /de kho na la lta bas yongs su zin pa'i chos de las gzhan pa ldan pa ma yin pa rnams kyang 'jug par 'gyur te/ de bas na phrad nas 'gags pa dang / yul dang dbang po dang byed pa dang / skyes bu'i byed pa dang / de kho na la lta ba la brten nas/ yongs su 'dzin pa'i rgyu 'dogs so/ /de la rgyu'i gnas mthun pa la brten nas/ 'dren ba'i rgyu 'dogs par byed de/ de ci'i phyir zhe na/ 'di ltar 'dod pa dang ldan pa'i dge ba'i chos rnams ni 'dod pa dang ldan pa'i dge ba'i chos khyad par can rnams 'dren to/ /de bzhin du 'dod pa dang ldan pa'i dge ba'i chos rnams ni gzugs dang ldan pa dang / gzugs med pa dang ldan pa dang / ldan pa ma yin pa'i dge ba'i chos rnams kyang 'dren te/ de dang mthun pa'i phyir ro/ /'dod pa dang ldan pa rnams ji lta ba de bzhin du/ gzugs dang ldan pa rnams kyang / gzugs dang ldan pa'i dge ba'i chos khyad par can rnams dang / gzugs med pa dang ldan pa dang / ldan pa ma yin pa'i dge ba'i chos rnams 'dren to/ /gzugs dang ldan pa rnams ji lta ba de bzhin du/ gzugs med pa dang ldan pa rnams kyang / gzugs med pa dang ldan pa'i dge ba'i chos khyad par can rnams dang ldan pa ma yin pa'i rnams 'dren to/ /gzugs med pa dang ldan pa'i rnams ji lta ba de bzhin du ldan pa ma yin pa rnams kyang ldan pa ma yin pa'i dge ba'i chos khyad par can rnams 'dren to/ /'dus ma byas pa mngon sum du byas pa yang 'dren to/ /de bzhin du mi dge ba'i chos rnams kyang mi dge ba'i chos khyad par can rnams 'dren te/ 'di lta ste/ 'dod pa'i 'dod chags ni zhe sdang dang / gti mug dang / nga rgyal dang / lta ba dang / the tshom dang / lus kyi nyes par spyod pa dang / ngag gi nyes par spyod pa dang / yid kyi nyes par spyod pa 'dren to/ 'dod pa'i 'dod chags ji lta ba bzhin du/ zhe sdang dang / gti mug dang / nga rgyal dang / lta ba dang / the tshom rnams kyang ci rigs par 'dren par rig par bya'o/ /de bzhin du lung du ma bstan pa'i chos rnams kyang dge ba dang mi dge ba dang / lung du ma bstan pa'i chos rnams 'dren to/ /'di lta ste/ dge ba dang mi dge ba dang / lung du ma bstan pa'i sa bon can kun gzhi rnam par shes pas 'dren to/ /de bzhin du lung du ma bstan pa'i chos rnams ni/ lung du ma bstan pa'i chos khyad par can rnams kyang 'dren te/ 'di lta ste/ kham gyi zas ni sems can byung ba rnams gnas pa dang / 'tsho bar byed pa yin te/ de dang mthun pa'i phyir mdangs dang / stobs dang lta ba 'dren te/ de bas na mthun pa la brten nas/ 'dren pa'i rgyu 'dogs so/ /de la rgyu'i gnas dang mthu sna tshogs la brten nas/ so sor nges pa'i rgyu 'dogs par byed de/ de ci'i phyir zhe na/ 'di ltar 'dod pa dang ldan pa'i chos ngo bo nyid rnam pa sna tshogs pa rnams ni/ ngo bo nyid kyi khyad par rnam pa sna tshogs/ mthu rnam pa sna tshogs can las byung ba'i phyir ro/ /'dod pa dang ldan pa rnams ji lta ba bzhin du/ gzugs dang ldan pa rnams dang / gzugs med pa dang ldan pa rnams dang ldan pa ma yin pa'i rnams kyang de dang 'dra ste/ de bas na mthu sna tshogs la brten nas/ so sor nges pa'i rgyu 'dogs so/ /de la rgyu'i gnas sna tshogs pa la brten nas/ lhan cig byed pa'i rgyu 'dod par byed de/ de ci'i phyir zhe na/ 'di ltar rang skye ba'i tshogs dang phrad nas 'dod pa dang ldan pa'i chos rnams skye ba'i phyir ro/ /'dod pa dang ldan pa rnams ji lta ba bzhin du/ gzugs dang ldan pa rnams dang / gzugs med pa dang ldan pa rnams dang / ldan pa ma yin pa rnams kyang de dang 'dra'o/ /skye ba'i tshogs pa ji lta ba bzhin du thob pa'i tshogs pa dang / grub par 'gyur ba'i tshogs pa dang / 'grub pa'i tshogs pa dang / gnas pa'i tshogs pa dang / byed pa'i tshogs pa rnams kyang de dang 'dra ste/ de bas na tshogs pa la brten nas lhan cig byed pa'i rgyu 'dogs so/ /de la rgyu'i gnas bar du gcod pa la brten nas/ mi mthun pa'i rgyu 'dogs par byed de/ da ci'i phyir zhe na/ 'di ltar 'dod pa dang ldan pa'i chos rnams skye ba la/ gal te bar du gcod pa nye bar gnas par gyur na skye bar mi 'gyur ba'i phyir ro/ /'dod pa dang ldan pa rnams ji lta ba bzhin du/ gzugs dang ldan pa rnams dang / gzugs med pa dang ldan pa rnams dang / ldan pa ma yin pa rnams kyang de dang 'dra'o/ skye ba ji lta ba bzhin du/ thob pa dang / grub par 'gyur pa dang / 'grub pa dang / gnas pa dang / byed pa la yang de dang 'dra ste/ de bas na bar du gcod pa la brten nas mi mthun pa'i rgyu 'dogs so/ / de la rgyu'i gnas par du gcod pa ma yin pa la brten nas/ mi mthun pa med pa'i rgyu 'dogs par byed de/ de ci'i phyir zhe na/ 'di ltar 'dod pa dang ldan pa'i chos rnams skye ba la/ gal te par du gcod pa ma yin pa nye bar gnas par gyur na/ de dag skye bar 'gyur ba'i phyir ro/ /'dod pa dang ldan pa rnams ji lta ba bzhin du/ gzugs dang ldan pa rnams dang / gzugs med pa dang ldan pa rnams dang / ldan pa ma yin pa rnams kyang de dang 'dra'o/ /skye ba ji lta ba bzhin du thob pa dang / grub par 'gyur ba dang / 'grub pa dang / gnas pa dang / byed pa yang de dang 'dra ste/ de bas na bar du gcod pa ma yin pa la brten nas/ mi mthun pa med pa'i rgyu 'dogs so/ /de la rkyen gyi gnas sa bon la brten nas/ rgyu'i rkyen 'dogs so/ /rkyen gyi gnas phrad nas 'gag pa la brten nas de ma thag pa'i rkyen 'dogs so/ /de la rkyen gyi gnas yul la brten nas/ dmigs pa'i rkyen 'dogs so/ /rkyen gyi gnas de las gzhan pa rnams la brten nas/ bdag po'i rkyen 'dogs so/ /de la rgyu'i gnas dang / rkyen gyi gnas bag chags dang / mthun pa la brten nas/ rnam par smin pa'i 'bras bu dang / rgyu mthun pa'i 'bras bu 'dogs so/ /rgyu'i gnas dang / rkyen gyi gnas de kho na la lta ba la brten nas bral ba'i 'bras bu 'dogs so/ /rgyu'i gnas dang rkyen gyi gnas skyes bu'i byed pa la brten nas/ skyes bu byed pa'i 'bras bu 'dogs so/ /rgyu'i gnas dang / rkyen gyi gnas lhag ma rnams la brten nas/ bdag po'i 'bras bu 'dogs so/ /de la rgyu ni phan pa'i don to/ /rkyen ni gnas par byed pa'i don to/ /'bras bu ni grub pa'i don to/ yang rgyu ni rnam pa lngar gzhag pa yin te/ 'di lta ste/ skyed pa'i rgyu dang / thabs kyi rgyu dang / lhan cig byung ba'i rgyu dang / 'gags ma thag pa dang / 'gags nas ring du lon pa'o/ /de la skyed pa ni mngon par 'grub pa'i rgyu'o/ /thabs kyi rgyu ni lhag ma rnams so/ /lhan cig 'byung ba'i rgyu ni 'di lta ste/ yongs su 'dzin pa'i rgyu las gcig ste/ 'di lta ste/ mig ni mig gi rnam par shes pa'i'o/ /de bzhin du rna ba la sogs pa'i ni de las gzhan pa'i rnam par shes pa rnams kyi'o/ /'gags ma thag pa ni 'di lta ste/ mngon par 'grub pa'i rgyu'o/ /'gags nas ring du lon pa ni 'di lta ste/ 'phen pa'i rgyu'o/ /gzhan yang rgyu ni rnam pa lngar gzhag pa yin te/ 'di lta ste/ sdug pa'i rgyu dang / mi sdug pa'i rgyu dang / lta ba'i rgyu dang / 'jug pa'i rgyu dang / ldog pa'i rgyu'o/ /gzhan yang rgyu ni rnam pa bdun du gzhag pa yin te/ 'di lta ste/ mi rtag pa ni rgyu yin te/ rtag pa'i chos ni skye ba'i rgyu'am/ thob pa'i rgyu'am/ grub par 'gyur ba'i rgyu'am/ 'grub pa'i rgyu'am/ gnas pa'i rgyu'am/ byed pa'i rgyu'am/ gang gi rgyur yang mi 'gyur ro/ /mi rtag pa'i chos mi rtag pa'i rgyur 'gyur ba yang / dngos po gzhan dang / rang gi ngo bo phyi ma'i rgyur 'gyur gyi/ skad cig de nyid kyi ni ma yin no/ /gzhan dang rang gi ngo bo nyid phyi ma'i rgyu byed du zin kyang skyes la/ 'gags pas byed kyi ma skyes pa dang ma 'gags pas ni ma yin no/ /skyes la 'gags su zin kyang rkyen gzhan dang phrad na byed kyi ma phrad na mi byed do/ /rkyen gzhan dang phrad du zin kyang / snga ma las gyur na byed kyi ma gyur par mi byed do/ /snga ma las gyur du zin kyang mthu dang ldan pa las 'byung gi / mthu med pa las ma yin no/ /mthu dang ldan du zin kyang de dang mthun zhing 'phrod pa las 'byung gi / mi mthun mi 'phrod pa las ni ma yin te/ de ltar na rnam pa bdun po 'di dag gis rgyu rnams ci rigs par rnam par gzhag par rig par bya'o/ /de la mtshan nyid gdags pa rnam par gzhag pa gang zhe na/ de ni rnam pa bdun du rig par bya ste/ lus dang dmigs pa dang / rnam pa dang / kun nas slong ba dang / rab tu dbye ba dang / rnam par nges pa dang / 'jug pa'o/ /de la sdom ni/ mtshan nyid kyi ni mdor bsdu ba/ /lus dang dmigs pa rnam pa dang / /kun nas slong dang rab dbye dang / /rnam par nges dang 'jug pa yin/ /rtog pa dang dpyod pa rnams kyi lus gang zhe na/ rtog pa dang dpyod pa rnams dmigs pa la mngon par mi rtog pa ni sems pa'i lus yin la/ rtog pa dang dpyod pa rnams dmigs pa la mngon par rtog pa ni shes pa'i lus yin par rig par bya'o/ /de la rtog pa dang dpyod pa rnams kyi dmigs pa gang zhe na/ ming gi tshogs dang / tshig gi tshogs dang / yi ge'i tshogs la brten pa'i don ni dmigs pa yin no/ /rtog pa dang dpyod pa rnams kyi rnam pa gang zhe na/ rtog pa'i rnam pa ni/ dmigs pa de nyid la gtod cing bye brag tu gtod pa'o/ /dpyod pa'i rnam pa ni de nyid la so sor rtog pa'o/ /rtog pa dang dpyod pa rnams kyis ci zhig kun nas slong zhe na/ ngag kun nas slong ngo / /rtog pa dang dpyod pa rnams kyi rab tu dbye ba gang zhe na/ rab tu dbye ba rnam pa bdun te/ mtshan ma can dang / mtshan ma can ma yin pa nas/ nyon mongs pa can ma yin pa'i bar du snga ma bzhin no/ /rtog pa dang dpyod pa rnams kyi rnam par nges pa gang zhe na/ rtog pa dang dpyod pa gang yin pa de ni rnam par rtog pa yang yin no/ /rnam par rtog pa gang yin pa de ni rtog pa dang dpyod pa yang yin la / rnam par rtog pa gang yin pa de ni rtog pa dang dpyod pa yin no/ de ltar rtog pa dang dpyod pa gang yin pa de rnam par rtog pa yang yin mod kyi/ rnam par rtog pa yin la/ rtog pa dang dpyod pa ma yin pa yang yod de/ 'jig rten las 'das pa'i ye shes ma gtogs pa de las gzhan pa'i khams gsum na spyod pa'i sems dang sems las byung ba'i chos thams cad ni rnam par rtog pa yin la rtog pa dang dpyod pa ma yin no/ /rtog pa dang dpyod pa rnams kyi 'jug pa gang zhe na/ sems can dmyal ba pa rnams kyi rtog pa dang dpyod pa rnams kyi rnam pa ni ci/ 'dus te reg pa ni ji lta bu/ ci zhig gis ni spyod / ci dang ni ldan/ ci zhig ni 'dod/ las ni ci zhig byed cing 'jug / sems can dmyal ba pa rnams ji lta ba de bzhin du/ dud 'gro rnams dang / yi dags rnams dang / mi rnams dang / 'dod pa na spyod pa'i lha rnams dang / bsam gtan dang po'i sa pa'i lha rnams kyi rtog pa dang dpyod pa rnams kyi rnam pa ni ci/ 'dus te reg pa ni ji lta bu ci zhig zer ci zhig gis ni bskyod/ ci dang ni ldan/ ci zhig ni 'dod/ las ni ci zhig byed cing 'jug ce na/ de la sems can dmyal ba pa rnams kyi rtog pa dang dpyod pa rnams ni gcig tu nges par zhum pa'i rnam pa dang / mi sdug pa'i yul gyi 'dus te reg pa dang / sdug bsngal gyis bskyod pa dang / yid mi bde ba dang ldan pa dang / sdug bsngal las thar bar 'dod pa dang / sems kun nas 'khrugs pa'i las byed cing 'jug go/ /sems can dmyal ba pa rnams ji lta ba bzhin du/ yi dags sdug bsngal bar gyur pa rnams kyang de dang 'dra'o/ /dud 'gro rnams dang / mi rnams dang / yi dags rdzu 'phrul che ba rnams kyi rtog pa dang dpyod pa rnams ni zhum pa'i rnam pa shas che la/ kun tu dga' ba'i rnam pa shas chung ba dang / mi sdug pa'i yul gyi 'dus te reg pa shas che la/ sdug pa'i yul gyi 'dus te reg pa shas chung ba dang / sdug bsngal gyis bskyod pa'i shas che la/ bde bas bskyod pa'i shas chung ba dang / yid mi bde ba dang ldan pa'i shas che la/ yid bde ba dang ldan pa'i shas chung ba dang / sdug bsngal las thar par 'dod pa'i shas che la/ bde ba dang 'grogs par 'dod pa'i shas chung ba dang / sems kun nas 'khrugs pa'i las byed cing 'jug go/ /'dod pa na spyod pa'i lha rnams kyi rtog pa dang / dpyod pa rnams kyi kun tu dga' ba'i rnam pa shas che la/ zhum pa'i rnam pa shas chung ba dang / sdug pa'i yul gyi 'dus te reg pa shas che la/ mi sdug pa'i yul gyi 'dus te reg pa shas chung ba dang / bde bas bskyod pa'i shas che la sdug bsngal gyis bskyod pa'i shas chung ba dang / yid bde ba dang ldan pa'i shas che la/ yid mi bde ba dang ldan pa'i shas chung ba dang / bde ba dang 'grogs par 'dod pa'i shas che la/ sdug bsngal las thar par 'dod pa'i shas chung ba dang / sems kun du 'khrugs pa'i las byed cing 'jug go/ /bsam gtan dang po'i sa pa'i lha rnams kyi rtog pa dang dpyod pa rnams ni/ gcig tu nges par kun tu dga' ba'i rnam pa dang / gcig tu nges par nang gi sdug pa'i yul gyi 'dus te reg pa dang / gcig tu nges par bde bas bskyod pa dang / gcig tu nges par yid bde ba dang ldan pa dang / gcig tu nges par bde ba dang mi 'bral bar 'dod pa dang / sems kun tu mi 'khrugs pa'i las byed pa yin no/ /de la tshul bzhin yid la byed pa gdags pa rnam par gzhag pa gang zhe na/ de ni rnam pa brgyad du rig par bya ste/ gnas dang dngos po dang / tshol ba dang / longs spyod pa dang / yang dag par 'grub pa dang / nyan thos kyi theg pa'i tshogs la sbyor ba dang / rang sangs rgyas kyi theg pa'i tshogs la sbyor ba dang / pha rol tu phyin pa bsgrub pa la sbyor ba'o/ /de la sdom ni/ gnas dang de bzhin dngos po dang / /tshol ba dang ni longs spyod dang / /bsgrub pa dang ni byang chub gnyis/ /de bzhin pha rol phyin pa'o/ /tshul bzhin yid la byed pa dang ldan pa'i rtog pa dang dpyod pa rnams kyi gnas gang zhe na/ gnas rnam pa drug ste/ 'di lta ste/ nges pa'i dus dang / ldog pa'i dus dang / las kyi dus dang / 'jig rten pa'i 'dod chags dang bral ba'i dus dang / 'jig rten las 'das pa'i 'dod chags dang bral ba'i dus dang / sems can la phan 'dogs pa'i dus so/ /tshul bzhin yid la byed pa dang ldan pa'i rtog pa dang dpyod pa rnams kyi dngos po gang zhe na/ dngos po brgyad de/ sbyin pa las byung ba'i bsod nams bya ba'i dngos po dang / tshul khrims las byung ba dang / bsgoms pa pa las byung ba dang / thos pa las byung ba dang / bsams pa las byung ba dang / de las gzhan pa'i bsgoms pa las byung ba dang / so sor brtags pa las byung ba dang / sems can la phan 'dogs pa las byung ba'o/ /tshul bzhin yid la byed pa dang ldan pa'i rtog pa dang dpyod pa rnams kyi tshol ba gang zhe na/ 'di ltar 'di na kha cig /chos kyi bab chol ma yin par longs spyod tshol gyi/ chos ma yin pas bab chol du ma yin no/ /longs spyod gang zhe na/ 'di ltar longs spyod de nyid de ltar btsal nas chags pa med par longs spyod cing / zhen pa med pa dang / chums pa med pa dang / mdud pa bor ba med pa dang / brgyal ba med pa dang / lhag par chags pa med pa dang / lhag par chags par gyur pa med pa dang / nyes dmigs su lta ba dang / nges par 'byung ba shes bzhin du longs spyod par byed pa'o/ /yang dag par bsgrub pa gang zhe na/ 'di ltar 'di na kha cig mar 'dzin pa dang / phar 'dzin pa dang / dge sbyong du 'dzin pa dang / bram zer 'dzin pa dang / rigs kyi gtso bo la rim gro byed pa dang / don byed pa dang / bya ba byed pa dang / 'jig rten 'di dang / 'jig rten pha rol tu kha na ma tho ba rnams la 'jigs par lta ba dang / sbyin pa dag sbyin zhing bsod nams dag byed pa dang / dus khrims la gnas pa dang / tshul khrims yang dag par blangs te gnas pa'o/ /nyan thos kyi tshogs la sbyor ba ni nyan thos kyis las rgyas par bshad par bya'o/ /rang sangs rgyas kyi tshogs la sbyor ba ni/ rang sangs rgyas kyis las rgyas bar bshad par bya'o/ /pha rol tu phyin pa bsgrub pa la sbyor ba ni/ byang chub sems dpa'i sa las rgyas par bshad par bya'o/ /yang sbyin bdag gi mtshan nyid ni rnam pa bzhi ste/ 'dod pa dang / phyogs mi 'dzin pa dang / phongs pa sel ba dang / yang dag par shes pa'o/ /tshul khrims dang ldan pa'i mtshan nyid ni/ rnam pa bzhi ste/ 'dod pa dang chu lon gyis glon pa dang / kun tu mi spyod pa dang / yang dag par shes pa'o/ /sgom pa po'i mtshan nyid ni rnam pa bzhi ste/ bsam pa rnam par dag pa dang / nye bar sbyor ba rnam par dag pa dang / mos pas snyoms par 'jug pa rnam par dag pa dang / shes pa rnam par dag pa'o/ /zas sbyin pa ni rnam pa drug ste/ yi dam can la sbyin pa dang / kun tu 'tshol zas sbyin pa dang / gnod pa la zas sbyin pa dang / rang bzhin gyis phongs pa la zas sbyin pa dang / yul dang bral bar gnas pa la zas sbyin pa dang / yongs su zhen pa la zas sbyin pa'o/ /gnod pa ni rnam pa brgyad de/ bkres pas gnod pa dang / skom pas gnod pa dang / kha zas ngan pa za bas gnod pa dang / yongs su ngal bas gnod pa dang / grang bas gnod pa dang / tsha bas gnod pa dang / skyabs med pas gnod pa dang / bsgribs pas gnod pa'o/ /yang gnod pa ni rnam pa drug ste/ lhan cig skyes pa dang / 'dod pas phongs pa las byung ba dang / 'gro ba las byung ba dang / dus tshigs 'gyur ba las byung ba dang / 'dzag gnod byed pa las byung ba dang / tha snyad chad pa las byung ba'o/ /phan gdags pa ni rnam pa drug ste/ nye bar rton pas phan gdags pa dang / 'gro bas gnod pa la phan gdags pa dang / g.yogs pas phan gdags pa dang / spos dang me tog phreng dang byug pas phan gdags pa dang / gnas kyis phan gdags pa dang / 'grogs pa la phan gdags pa'o/ /mi mdza' ba'i mtshan nyid ni bzhi ste/ 'khrug pa'i bsam pa mi gtong ba dang / sdug pa la rnam par bgegs byed pa'i gnas dang / mi sdug pa bsgrub pa dang / phan pa ma yin pa bsgrub pa'o/ /de dag nyid las bzlog pa ni mdza' bo'i mtshan nyid rnam pa bzhir rig par bya'o/ /bsgrub pa ni rnam pa gsum ste/ yo byad kyi bde ba bsgrub pa dang / dga' ba dang bcas pa'i bde ba bsgrub pa dang / /dga' ba med pa'i bde ba bsgrub pa'o/ /bzhi po 'di dag ni mkhas pas bstan pa yin zhes bya ba mdo 'di'i rnam par bshad pa ni/ yang mthun par 'jug par khas blang ba ni bzhi po 'di dag yin te/ 'di lta ste/ 'gron la mthun par 'jug par khas blang ba dang / skye bo yongs la mthun par 'jug par khas blang ba dang / bla ma rnams dang mthun par 'jug par khas blang ba dang / tshogs par 'du 'os la mthun par 'jug par khas blang ba ste/ mthun par 'jug par khas blang ba bzhi po 'di dag la/ gnas bzhi bsten nas 'bras bu ldar 'gyur bar rig par bya ste/ 'di lta ste phan gdags pa dang / rnam par tho mi 'tshams pa dang / mchod pa dang / skal ba mnyam pa dang / mthun par 'jug par gnas bzhi po 'di dag bsten nas/ longs spyod che ba dang / phyogs dang phyogs mtshams su grags pa dang / yongs su nyon mongs pa med pa dang / mya ngan las 'das pa 'thob pa dang / bde 'gror 'gro ba ste/ 'bras bu lnga po 'di dag 'grub par 'gyur ro/ /mkhas pa rnams kyi mkhas pa'i mtshan nyid ni/ gsum po 'di dag yin te/ dge ba yang dag par len pa dang / dge ba la gcig tu nges pa dang / dge ba la brten pa'o/ /gzhan yang gsum ste/ lhag pa'i tshul khrims yang dag par len pa dang / lhag pa'i sems yang dag par len pa dang / lhag pa'i shes rab yang dag par len pa'o/ / //bam po drug pa/ de la tshul bzhin ma yin pa yid la byed pa gdags pa rnam par gzhag pa gang zhe na/ de la sdom ni/ rgyu la 'bras bu mngon gsal dang / /'das dang ma 'ongs yod pa dang / /bdag dang rtag dang las rnams dang / / dbang phyug la sogs rnams 'tshe dang / /mtha' dang mtha' med spong ba dang / /rgyu med chad dang med pa dang / /mchog dang dag pa bkra shis pa/ /pha rol smra ba bcu drug yin/ /pha rol smra ba ni bcu drug po 'di dag yin te/ 'di lta ste/ rgyu la 'bras bu yod par smra ba dang / mngon par gsal bar smra ba dang / 'das pa dang ma 'ongs pa rdzas su yod par smra ba dang / bdag tu smra ba dang / rtag par smra ba dang / sngon byas pa rgyur smra ba dang / dbang phyug la sogs pa byed pa por smra ba dang / rnam par 'tshe ba'i chos su smra ba dang / mtha' dang mtha' med par smra ba dang / mtha' mi spong bar smra ba dang / rgyu med par smra ba dang / chad par smra ba dang / med par smra ba dang / mchog tu smra ba dang / dag par smra ba dang / dge mtshan dang bkra shis su smra ba'o/ /rgyu la 'bras bu yod par smra ba gang zhe na/ 'di ltar 'di na dge sbyong ngam bram ze kha cig / rtag pa rtag pa'i dus dang / ther zug ther zug gi dus su/ rgyu la 'bras bu yod pa kho na zhes de ltar lta zhing / de skad smra ba dag yod de/ 'di lta ste/ khyu mchog pa'i tshogs lta bu'o/ /de dag kyang ci'i phyir rgyu la 'bras bu yod par lta zhing rnam par 'jog la/ yongs su ston par byed ce na/ 'di ltar lung dang rigs pas byed de/ lung gang zhe na/ rgyu la 'bras bu yod pa kho na'o zhes de dang ldan pa thos pa gcig nas gcig tu brgyud pa dang / sde snod byin pa'i tshul gyis de dag la 'ongs pa yin no/ /rigs pa gang zhe na/ 'di ltar dge sbyong dang / bram ze rtog ge pa dpyod pa can de nyid/ rtog ger rtogs pa'i sa/ rang gi spobs pa las byung ba/ so so'i skye bo la dpyod pa'i rjes su spyod pa la gnas pa/ de 'di snyam du sems te/ dngos po gang dag las dngos po gang dag 'byung ba de dag ni de dag gi rgyu nyid du grags shing 'dogs kyi de las gzhan pa dag la ma yin no/ /'bras bu 'dod pa rnams kyis kyang 'bras bu de'i don du 'dzin par byed kyi/ de las gzhan pa dag ni ma yin no/ /bya ba de dang de dag tu yang de dag nyid sbyor bar byed kyi/ de las gzhan pa dag ni ma yin no/ /'bras bu de yang de dag las 'byung gi de las gzhan pa rnams las ma yin te/ de bas na 'bras bu de de las yod do/ /de lta ma yin du zin na thams cad kyang thams cad kyi rgyur rnam par gzhag par 'gyur ba dang / thams cad kyang gzung ba dang / bya ba la yang thams cad du sbyar du rung ba dang / thams cad las kyang thams cad skye bar 'gyur ro snyam nas/ de 'dogs pa dang / 'dzin pa dang / bya ba la sbyor ba dang / skye ba la rtag tu rgyu la 'bras bu yod par lta'o/ /de la 'di skad ces brjod par bya ste/ ci'i rgyu'i mtshan nyid dang 'bras bu'i mtshan nyid dang / rgyu la 'bras bu'i mtshan nyid tha dad pa ma yin pa'i mtshan nyid dam/ 'on te tha dad pa'i mtshan nyid du 'dod/ gal te tha dad pa ma yin pa'i mtshan nyid cig yin na ni/ des na rgyu dang 'bras bu gnyis la bye brag med pa'i phyir/ rgyur nges pa dang 'bras bur nges pa med pas/ rgyu la 'bras bu yod ces byar mi rung ngo / /gal te mtshan nyid tha dad pa zhig yin na ni/ des na ci ma skyes pa'i mtshan nyid dam/ 'on te skyes pa'i mtshan nyid du 'dod/ gal te ma skyes pa'i mtshan nyid cig yin na ni/ des na rgyu la 'bras bu ma skyes pa zhig yod do zhes bya ba yang mi rung ngo / /gal te skyes zin pa'i mtshan nyid cig yin na ni/ des na rgyu la 'bras bu skyes zin pa zhig skye'o zhes byar mi rung ngo / /de bas na rgyu la ni 'bras bu med kyi/ rgyu yod na rkyen la ltos te skye bar 'gyur ro/ /de la mtshan nyid rnam pa lngas ni mtshan nyid yod pa'i chos la mtshan nyid yod pa'i chos yod par rig par bya ste/ de'i phyogs na dmigs pa 'di lta ste/ bum pa'i nang na chu 'dug pa lta bu dang / de'i rten la dmigs pa 'di lta ste/ mig la mig gi rnam par shes pa lta bu dang / de nyid bzhin du rang gi mtshan nyid du dmigs pa 'di lta ste/ rgyu ni rjes su dpag par bya ba ma yin zhing / rang gi las byed pa lta bu dang / rgyu 'gyur ba'am/ yang na 'gyur ba'i rkyen rnams kyis 'gyur bar 'ong ba'o/ /de'i phyir yang rtag pa'i dus dang / ther zug gi dus su rgyu la 'bras bu yod pa kho nar mi rung ste/ rnam grangs des na yang 'di ni smra bar rigs pa ma yin pas bskyed pa kho na'o/ /de ltar na bye brag med pa'i mtshan nyid dang / bye brag yod pa'i mtshan nyid dang / ma skyes pa'i mtshan nyid dang / skyes pa'i mtshan nyid kyis kyang mi rung ngo / /mngon par gsal bar smra ba gang zhe na/ 'di ltar 'di na dge sbyong ngam bram ze kha cig /dngos po yod pa nyid mngon par gsal bar byed par zad kyi/ skye ba ni ma yin no zhes de ltar lta zhing de skad smra ba dag yod do/ /'di lta ste/ rgyu la 'bras bu yod par smra ba de nyid dang / sgra'i mtshan nyid smra ba lta bu'o/ /rgyu la 'bras bu yod par smra ba rnams/ ci'i phyir rgyu la 'bras bu yod pa la mngon par gsal bar lta bar byed ce na/ lung dang rigs pas byed de/ lung ni snga ma bzhin du blta bar bya'o/ /rigs pa gang zhe na/ 'di ltar 'di na kha cig bdag nyid rtog ge ba dpyod pa can zhes bya ba nas snga ma kho na bzhin du rgyas par bya'o/ /de dag 'di snyam du sems te/ rgyu la 'bras bu med na skye bar mi rung la/ 'bras bu bsgrub pa'i phyir 'bad par mi byed pa yang ma yin no/ /de yang ci'i phyir byed ce na/ mngon par gsal ba nyid du bya ba'i phyir ro snyam ste/ de de ltar yongs su brtags nas/ mngon par gsal bar smra bar gyur to / /rgyu la 'bras bu mngon par smra ba de la 'di skad ces brjod par bya ste/ ci sgrib pa'i rgyu med pa'am sgrib pa yod par 'dod/ gal te med du zin na ni sgrib pa'i rgyu med pa zhig gis bsgribs so zhes bya bar yang mi rung ngo / /gal te yod na ni yod par yang 'dra na/ 'bras bu dang 'brel ba'i rgyu la yang ci'i phyir sgrib par mi byed de mi rung ngo / /dper na mun pas rdza ma'i nang gi chu bsgribs pa na/ rdza ma la yang sgrib par byed pa bzhin no/ /gal te rgyu yang sgrib pa'i rgyus bsgribs na ni/ des na rgyu la 'bras bu yod ba mngon par gsal bar byed kyi/ rgyu gsal bar mi byed ces byar ni mi rung ngo / /de la 'di skad ces kyang brjod par bya ste/ ci yod pa nyid sgrib pa'i rgyu yin nam/ 'on te 'bras bu nyid sgrib pa'i rgyu yin/ gal te yod pa nyid sgrib pa'i rgyu yin na ni/ des ni rgyu yang yod pa yin te/ yod pa ni dus thams cad du mngon par gsal ba ma yin par 'gyur bas mi rung ngo / /gal te 'bras bu nyid sgrib pa'i rgyu yin na ni/ des na la la'i rgyu yang de nyid yin la/ 'bras bu yang de nyid yin te/ dper na myu gu ni sa bon gyi 'bras bu yin la/ sdong bu la sogs pa'i ni rgyu yin te/ de bas na mngon par gsal ba yang de nyid yin la/ mngon par gsal ba ma yin pa yang de nyid yin zhes byar mi rung ngo / /de la 'di skad ces kyang brjod par bya ste/ ci chos de las mngon par gsal ba tha dad pa ma yin pa'am/ 'on te tha dad par 'dod/ gal te tha dad [(]ba [,]pa[)]ma yin na ni/ rtag tu mngon par gsal ba'i chos yin pas/ mngon par gsal ba mngon par gsal bar byed do zhes byar mi rung ngo / / gal te tha dad na ni des na de rgyu med pa zhig gam/ rgyu yod pa zhig yin/ gal te rgyu med pa zhig yin na ni des na/ rgyu med pa mngon par gsal bar mi rung ngo / /gal te rgyu yod pa zhig yin na ni/ des na mngon par gsal bar ma gyur pa'i phyir/ 'bras bur gyur pa mngon par gsal bas mngon par gsal bar byar yang mi rung ngo / des na sgrib pa'i rgyu med pa dang / sgrib pa'i rgyu yod pa dang / yod pa'i mtshan nyid dang / 'bras bu'i mtshan nyid dang / mngon par gsal ba tha dad pa ma yin pa dang / mngon par gsal ba tha dad pa las kyang mi rung ngo / /de bas na dngos po med pa gang yin pa de'i mtshan nyid de ni med pa nyid do/ /dngos po yod pa gang yin pa de'i mtshan nyid de ni yod pa nyid do/ /med pa'i med pa nyid ni mngon par gsal ba med pa yin no/ /yod pa'i yod pa nyid ni mngon par gsal ba nyid yin no/ / yod pa ji ltar 'dzin par mi 'gyur ba de'i mtshan nyid bshad par bya ste/ yod pa yang thag ring bas mi 'dzin la/ sgrib ba'i rgyu rnam pa bzhi po/ sgrib g.yogs dang / mi snang bar byed pa dang / zil gyis gnon pa dang / mig slu bar byed pas bsgribs pa dang / chung ba dang / sems rnam par g.yengs pa dang / dbang po med par gyur cing nyams pa dang / de dang ldan pa'i shes pa ma byung bas kyang 'dzin par mi 'gyur ro/ /rgyu la 'bras bu mngon par gsal bar smra ba ji lta ba de bzhin du/ sgrar smra ba yang rigs pa ma yin par blta bar bya'o/ / de la sgrar smra ba'i bye brag ni 'di yin te/ sgra'i mtshan nyid ni ji skad 'dogs pa kho na bzhin du rnam par gnas par lta la/ rnam par gnas pa de yang dang yang du brjod pa'i tshul gyis smra ba las/ mngon par gsal bar 'gyur bar lta ste/ des na de 'di snyam du sems te/ sgra ni rtag go snyam mo/ /de bas na mngon par gsal bar smra ba yang rigs pa ma yin pas bskyed pa yin no/ /'das pa dang / ma 'ongs pa rdzas su yod par smra ba gang zhe na/ 'di ltar 'di na dge sbyong ngam bram ze'am/ chos 'di la kha cig kyang 'das pa yang yod/ ma 'ongs pa yang yod de/ da ltar byung ba bzhin du/ mtshan nyid kyis yongs su grub pa yin te/ rdzas su yod pa yin gyi/ brtags pa'i yod pa ni ma yin no zhes tshul bzhin ma yin pas de ltar lta zhing de skad smra ba dag kyang yod do / /ci'i phyir de ltar lta zhing de skad smra bar byed ce na/ lung dang rigs pas byed de/ lung gang zhe na/ de ni snga ma bzhin du blta bar bya'o/ /chos 'di pa yang mdo sde la tshul bzhin ma yin par rtog ste/ 'di lta ste/ skye mched bcu gnyis po thams cad yod de skye mched bcu gnyis po rnams ni mtshan nyid kyis yod do/ /bcom ldan 'das kyis 'di lta ste/ 'das pa'i las ni yod do/ /'di lta ste/ 'das pa'i gzugs ni yod do zhes bya ba nas/ ma 'ongs pa'i rnam par shes pa'i bar du yod do zhes gsungs pa la/ tshul bzhin ma yin par rtog go/ /rigs pa gang zhe na/ 'di ltar 'di na kha cig rtog ge pa dpyod pa can zhes bya ba nas/ snga ma bzhin no/ /de 'di snyam du sems te/ chos gang rang gi mtshan nyid gang gis rnam par gnas pa de ni/ des yongs su grub pa yin no/ /gal te ma 'ongs pa de med du zin na ni/ des na de'i tshe/ rang gi mtshan nyid ma zin par 'gyur ro/ /gal te 'das pa med du zin na ni/ des na de'i tshe rang gi mtshan nyid dang bral bar 'gyur ro/ /de ltar gyur na rang gi mtshan nyid yongs su ma grub par 'gyur te/ de bas na rang gi mtshan nyid ni yongs su ma grub ces bya bar mi rung ngo snyam ste/ des na de 'das pa yang yod/ ma 'ongs pa yang yod ces de ltar lta zhing de skad smra'o/ /de la 'di skad ces brjod par bya ste/ ci 'das pa dang / ma 'ongs pa'i mtshan nyid da ltar gyi mtshan nyid dang / tha dad pa ma yin pa'i mtshan nyid dam/ 'on te tha dad pa'i mtshan nyid du 'dod/ gal te tha dad pa ma yin pa'i mtshan nyid yin na ni/ mtshan nyid dus gsum du rnam par gzhag tu mi rung ngo / /gal te tha dad pa'i mtshan nyid yin na ni/ yongs su grub pa'i mtshan nyid ces byar mi rung ngo / /de la 'di skad ces kyang brjod par bya ste/ ci dus su gtogs pa'i chos rtag pa'i mtshan nyid dam/ 'on te mi rtag pa'i mtshan nyid du 'dod/ gal te rtag pa'i mtshan nyid yin na ni/ dus gsum du gtogs pa zhes byar mi rung ngo / /gal te mi rtag pa'i mtshan nyid yin na ni/ des na dus gsum du de kho na bzhin du yod do zhes bya bar mi rung ngo / /de la 'di skad ces kyang brjod par bya ste/ ci ma 'ongs pa da ltar gyi dus su 'ong bar mthong ngam/ 'phos nas skye'am/ ma 'ongs pa'i de kho na bzhin du 'dug la/ de la brten te da ltar skye'am/ las mi byed pa zhig las/ las byed bar 'gyur ram/ mtshan nyid ma rdzogs pa zhig las mtshan nyid rdzogs par 'gyur ram/ mtshan nyid mi 'dra ba las mtshan nyid mi 'dra ba ma yin par 'gyur ram/ ma 'ongs par 'gyur ba zhig da ltar gyi dngos por 'gyur gal te 'ong ba zhig yin na ni/ des na yul na gnas par yang 'gyur la/ da ltar dang yang bye brag med da/ ther zug par 'gyur bas mi rung ngo / /gal te 'phos nas skye bar 'gyur na ni/ des na ma 'ongs pa yang ma skyes par 'gyur la/ sngon ma byung ba yang skyes par 'gyur ba dang / ma skyes pa yang 'pho bar 'gyur bas de yang mi rung ngo / /gal te de kho na bzhin du 'dug la/ de la brten te skye bar 'gyur na yang / des na ther zug par yang 'gyur la/ sngon ma byung ba yang skyes par 'gyur ba dang / ma 'ongs pa yang ma skyes pa'i phyir mi rung ngo / /gal te las mi byed pa yin pa las/ las byed par 'gyur na ni/ des na ma byung ba byung bar 'gyur te/ skyon snga ma rnams ji lta ba bzhin du 'gyur bas de yang mi rung ngo / /las de yang ci de dang tha dad pa'i mtshan nyid dam/ tha dad pa ma yin pa'i mtshan nyid du 'dod/ gal te tha dad pa'i mtshan nyid yin na ni/ de'i ma 'ongs pa'i mtshan nyid med pas mi rung ngo / /gal te tha dad pa ma yin pa'i mtshan nyid yin na ni/ des na las mi byed pa yin pa las/ las byed par 'gyur ro zhes byar mi rung ngo / /las mi byed pa ji lta ba bzhin du/ mtshan nyid ma rdzogs pa dang / mtshan nyid mi 'dra ba dang / ma 'ongs pa'i dngos po'i mtshan nyid kyang de dang 'dra bar rig par bya'o/ /de la bye brag ni 'di yin te rang bzhin 'dres pa'i skyon yod pa'i phyir mi rung ngo / /ma 'ongs pa dang da ltar ji lta ba bzhin du/ da ltar dang 'das pa la yang gtan tshigs 'di dag nyid dang / lan gyi lam 'di nyid kyis/ ci rigs par skyon dang ldan par blta bar bya ste/ de ltar na rang gi mtshan nyid dang / spyi'i mtshan nyid dang / 'ongs pa dang / 'phos pa dang / brten te skye ba dang / las dang mtshan nyid ma rdzogs pa dang / mtshan nyid mi 'dra ba dang / ma 'ongs pa'i dngos pos kyang 'das pa dang / ma 'ongs pa rdzas su yod par smra ba mi rung ngo / /de skad du lan btab kyang yang 'di skad ces zer te/ gal te 'das pa dang / ma 'ongs pa med du zin na/ dmigs pa med pa la ji ltar blo 'jug par 'gyur/ gal te 'jug na yang skye mched bcu gnyis po thams cad yod do zhes bya ba'i bar du gsungs pa'i lung dang ji ltar 'gal bar mi 'gyur zhes zer ba de la/ 'di skad ces brjod par bya ste/ ci 'jig rten na med do zhes 'dzin pa'i blo mi 'jug gam/ 'on te 'jug par 'dod/ gal te mi 'jug na ni des na bdag med par 'dzin pa dang / rwi bong gi ra dang / mo gsham gyi bu la sogs par 'dzin pa blo gang yin pa de yang med pa kho na'o zhes byar mi rung ngo / /bcom ldan 'das kyis nyan thos g.yo med pa ni ngas gdams ngag byin te/ yang dag par sgrub na/ yod pa la yang yod par shes/ med pa la yang med par shes so zhes gsungs pa gang yin pa de yang mi rung bar 'gyur ro/ /gal te 'jug na ni de lta na ci blo de yod do snyam pa de lta bu'i rnam pa'am/ med do snyam pa de lta bu'i rnam par 'dod/ gal te yod do snyam pa de lta bu'i rnam pa yin na ni/ des na med par 'dzin pa'i blo yod do snyam pa de lta bu'i rnam par 'gyur du mi rung ngo / /gal te med do snyam pa de lta bu'i rnam pa yin na ni/ des na med pa'i rnam pa'i blo de/ ci dngos po yod pa la 'jug gam/ med pa la 'jug par 'dod/ gal te yod pa la 'jug na ni/ des na med do snyam pa de lta bu'i rnam pa'i blo dngos po yod pa la 'jug pa'i phyir mi rung ngo / /gal te dngos po med pa la 'jug na ni/ des na dmigs pa med pa la blo 'jug pa med do zhes byar mi rung ngo / /skye mched bcu gnyis po ji snyed pa thams cad yod do zhes gsungs pa gang yin pa de yang / yod pa la yod pa'i mtshan nyid yod pa dang med pa la med pa'i mtshan nyid yod pa la dgongs nas gsungs pa yin te/ 'di ltar yod pa'i mtshan nyid kyi chos rnams kyang / yod pa'i mtshan nyid 'dzin la/ med pa'i mtshan nyid kyi chos rnams kyang med pa'i mtshan nyid 'dzin te/ de bas na chos rnams zhes bya'o/ /de lta ma yin du zin na yod pa mi shes pa dang / med pa mi shes pas rnal 'byor pas shes bya'i chos la rgyun chags su rtog par mi 'gyur bas mi rung ngo / /'di ltar sems can rnams gnod pa dang bcas pa dang / gnod pa med pa'i tshor ba myong bar byed pas / 'das pa'i las yod do zhes gsungs pa gang yin pa de la yang / bag chags de la de yod pa'i 'dogs pa las dgongs nas gsungs pa yin te/ 'du byed gang dag la dge ba dang mi dge ba'i las skyes nas 'gags pa yod la/ rgyu de dang rkyen des 'du byed bye brag can gyi rgyud 'jug pa de la ni bag chags zhes bya ste/ de rgyun du gnas pa las sdug pa dang mi sdug pa'i 'bras bu grub par 'gyur ba'i phyir mi rung ste/ de'i phyir na nyes pa med do/ /'das pa'i gzugs yod do/ /ma 'ongs pa yod do/ /da ltar byung ba yod do/ /de bzhin du rnam par shes pa'i bar du yod do zhes gsungs pa gang yin pa de la yang 'du byed kyi mtshan nyid rnam pa gsum mo / /rgyu'i mtshan nyid dang / rang gi mtshan nyid dang / 'bras bu'i mtshan nyid las dgongs nas gsungs pa yin te/ rgyu'i mtshan nyid las dgongs nas ma 'ongs pa'i yod do zhes gsungs so/ /rang gi mtshan nyid yod pa 'di las dgongs nas da ltar byung ba yod do zhes gsungs so/ /'bras bu'i mtshan nyid las dgongs nas 'das pa yod do zhes gsungs te/ de'i phyir na yang nyes pa med do/ /gzhan yang 'das pa dang / ma 'ongs pa'i mtshan nyid de ltar rdzas su ni mi rung gi / ma 'ongs pa'i mtshan nyid rnam pa bcu gnyis yod par rig par bya ste/ rgyur rab tu phye ba dang / lus ma skyes pa dang / rkyen la ltos pa dang / skyes pa dang 'dra ba dang / skye ba'i chos can dang / mi skye ba'i chos can dang / kun nas nyon mongs pa ma skyes pa dang / rnam par byang ba ma skyes pa dang / 'dod par bya ba dang / 'dod par bya ba ma yin pa dang / brtag tu rung ba dang brtag tu rung ba ma yin pa'o/ /da ltar byung ba la yang mtshan nyid rnam pa bcu gnyis yod de / 'bras bu rab tu phye ba dang / lus skyes pa dang / rkyen dang ldan pa dang / skyes pa dang 'dra ba dang / skad cig pa dang / mi skye ba'i chos can dang / kun nas nyon mongs pa dang ldan pa dang / rnam par byang ba dang ldan pa dang / yid du 'ong ba dang / yid du mi 'ong ba dang / brtag tu rung ba dang / brtag tu rung ba ma yin pa'o/ /'das pa la yang mtshan nyid rnam pa bcu gnyis yod par rig par bya ste/ rgyu 'das pa dang / rkyen 'das pa dang / 'bras bu 'das pa dang / lus zhig pa dang / 'gags pa'i rang bzhin can dang / mi skye ba'i chos can dang / kun nas nyon mongs pa rnam par zhi ba dang / rnam par byang ba rnam par zhi ba dang / ltas pa'i gnas lta bu dang / ltos pa ma yin pa'i gnas lta bu dang / brtag tu rung ba dang / brtag tu rung ba ma yin pa'o/ /bdag tu smra ba gang zhe na/ 'di ltar 'di na dge sbyong ngam/ bram ze kha cig 'di lta ste/ 'di las phyi rol pa'i mu stegs can/ bdag gam sems can nam/ srog gam/ skye ba po'am/ gso ba'am/ skyes bu'am/ gang zag gam/ de la sogs pa bden par gnas par yod do zhes de ltar lta zhing de skad smra ba dag yod de/ ci'i phyir de ltar lta zhing de skad smra bar byed ce na/ lung dang rigs pas byed de/ de la lung ni snga ma kho na bzhin no/ /rigs pa gang zhe na/ 'di ltar 'di na kha cig rtog ge pa dpyod pa can zhes bya ba nas snga ma bzhin te/ blo sngon du btang ba ma yin pas/ yod pa la sems can gyi blo 'jug pa dmigs pa dang / blo sngon du btang nas spyod pa dmigs pa dang / rnam pa gnyis kyis de 'di snyam du sems te/ gal te bdag med du zin na/ dngos po rnam pa lnga mthong ba na/ rnam pa lngas bdag tu blo 'jug par 'gyur ba'i mi rigs te/ gzugs kyi dbyibs mthong na gzugs kyi blo kho na 'jug pa'i rigs kyi/ sems can gyi blo 'jug pa'i mi rigs so/ /bde ba dang sdug bsngal gyis g.yen spyo ba'i 'du byed mthong na/ tshor ba la sogs pa'i blo kho na 'jug pa'i rigs kyi/ sems can la dmas pa dang ma thos pa'i blo 'jug pa'i mi rigs so/ /ming dang ldan pa ming dang 'brel ba'i 'du byed mthong na/ 'du shes kyi blo kho na 'jug pa'i rigs kyi / rgyal rigs sam/ bram ze'am/ rje'u rigs sam/ dmangs rigs sam/ sangs rgyas byin nam/ yon tan bshes gnyen zhes sems can gyi blo 'jug pa'i mi rigs so/ /dge ba dang mi dge ba'i spyod pa dang 'brel ba'i 'du byed mthong na/ 'du byed kyi blo kho na 'jug pa'i rigs kyi/ byis pa dang mkhas pa zhes sems can gyi blo 'jug pa'i mi rigs so/ /yul la rnam par shes pa 'jug pa mthong na/ sems can gyi blo kho na 'jug pa'i rigs kyi/ ngas mthong ngo zhes bya ba la sogs par sems can gyi blo 'jug pa'i mi rigs so snyam mo/ /de ltar blo sngon du ma btang bar dngos po lnga po rnams la/ rnam pa lngar sems can gyi blo kho na 'jug par 'gyur gyi 'du byed kyi blo 'jug par mi 'gyur te/ de bas na blo sngon du ma btang bar des sems can gyi blo 'jug pa'i dmigs pa mthong nas/ 'di snyam du sems te/ bdag yod do snyam mo/ /de 'di snyam du sems te/ gal te bdag med du zin na/ bdag gi mig gis gzugs rnams mthong bar 'gyur ro/ /mthong ngo / /mthong zin no/ /yang na mthong bar mi 'gyur ro zhes de lta bu'i mngon par 'du byed pa sngon du btang ste/ 'du byed rnams la blo sngon du 'gro ba'i spyod pa dmigs pa'i mi rigs so/ /lta ba la ji lta ba bzhin du/ rna ba dang / sna dang / lce dang / lus dang / yid la yang de dang 'dra bar rig par bya'o/ /de bzhin du dge ba'i las mngon par 'du byed pa las dge ba'i las grub pa dang / mi dge ba'i las mngon par 'du byed pa las mi dge ba'i las 'grub pa la sogs pa la blo sngon du btang nas spyod pa dmigs pa mi rigs te/ de yang 'du byed tsam 'ba' zhig gis ni mi rung ngo snyam mo/ /des na de 'di snyam du sems te/ bdag yod do snyam mo/ /de la 'di skad ces brjod par bya ste/ ci gang mthong ba de nyid la sems can gyi blo 'byung ngam/ 'on te gzhan mthong ba la gzhan la sems can gyi blo 'byung bar 'dod/ gal te de nyid la 'dod na ni/ des na gzugs la sogs pa la sems can du phyin ci log tu gyur pas bdag yod ces byar mi rung ngo / /gal te gzhan la 'dod na ni/ des na dbyibs dang ldan pa la bdag ces byar mi rung ngo / /dmas pa dang / mthos pa dang / rgyal rigs la sogs pa dang / byis pa dang / mkhas pa dang / gzugs la sogs pa'i yul 'dzin pa la yang bdag ces byar mi rung ngo / /ci chos kyi rang gi ngo bo nyid las sems can gyi blo 'byung ba'am 'on te gzhan gyi ngo bo nyid las byung bar 'dod/ gal te rang gi ngo bo nyid las 'dod na ni/ des na gang mthong ba de nyid la blo phyin ci log tu 'gyur ba'i phyir bdag gi blo mi rung ngo / /gal te gzhan las 'dod na yang / des na yul thams cad kyang yul thams cad kyi blo'i rgyur 'gyur bas mi rung ngo / /ci sems can du bgrang bas ma yin pa la sems can du bgrang ba'i blo'am/ sems can du bgrang ba la sems can du bgrang ba ma yin pa'i blo'am/ de las gzhan pa'i sems can du bgrang ba la de las gzhan pa'i sems can du bgrang ba'i blo 'byung bar 'dod dam mi 'dod/ gal te blo 'byung na ni/ des na sems can ma yin pa yang sems can du 'gyur la/ sems can yang sems can ma yin par 'gyur zhing de las gzhan pa'i sems can yang de las gzhan pa'i sems can du 'gyur bas mi rung ngo / /gal te mi 'byung na ni/ des na mngon sum gyi tshad ma la yang skur ba btab bar gyur pas mi rung ngo / /ci sems can gyi blo gang yin pa de mngon sum gyi don 'dzin pa'am/ 'on te rjes su dpag pa'i don 'dzin par 'dod/ gal te mngon sum gyi don 'dzin na ni/ des na gzugs la sogs pa'i phung po rnams nyid/ mngon sum du 'gyur gyi/ sems can mngon sum du mi 'gyur bas mi rung ngo / /gal te rjes su dpag pa'i don 'dzin na ni/ des na byis pa chung ngu rnams kyang ma brtags par 'phral la 'jug par 'gyur bas mi rung ngo / /de la 'di skad ces kyang brjod par bya ste/ ci spyod pa blo'i rgyu las byung ba'am/ 'on te sems can gyi rgyu las byung bar 'dod/ gal te blo'i rgyu las byung na ni/ bdag gi spyod pa zhes byar mi rung ngo / /gal te bdag gi rgyu las byung na ni/ blo sngon du 'gro ba'i spyod pa zhes byar mi rung ngo / /ci spyod pa'i rgyu mi rtag pa'am/ 'on te rtag par 'dod/ gal te mi rtag na ni 'gyur ba yod pas bdag gi spyod pa zhes byar mi rung ngo / /gal te rtag cing 'gyur ba med na ni/ des na 'gyur ba med pas spyod pa zhes byar mi rung ngo / / ci sems can rtsol ba'i bdag nyid can zhig spyod par 'gyur ba'am/ 'on te mi rtsol ba'i bdag nyid can zhig spyod par 'dod/ gal te rtsol ba'i bdag nyid can zhig yin na ni/ des na rtag tu spyod pa dang ldan pas yang spyod do zhes byar mi rung ngo / /gal te mi rtsol ba'i bdag nyid can zhig yin na ni/ des na mi rtsol ba'i bdag nyid can spyod do zhes byar mi rung ngo / /ci rgyu yod pas sems can spyod pa'am/ 'on te rgyu med par spyod par 'dod/ gal te rgyu yod na ni sems can gyi spyod pa la yang / byed du 'jug pa gzhan zhig yod par 'gyur bas mi rung ngo / / gal te rgyu med pa yin na ni/ rtag tu dus thams cad du thams cad spyod par 'gyur bas mi rung ngam ci sems can rang dbang gis spyod pa'am/ 'on te gzhan gyi dbang gis spyod par 'dod/ gal te rang dbang yod na ni/ bdag nyid na ba dang / rga ba dang / 'chi ba dang / sdug bsngal ba dang / kun nas nyon mongs pa'i spyod pa'i mi rigs so/ /gal te gzhan gyi dbang gis spyod na ni/ bdag spyod do zhes byar mi rung ngo / /de la 'di skad ces kyang brjod par bya ste/ ci phung po tsam sems can du 'dogs pa'am/ 'on te phung po la yod pa'am/ phung po rnams dang tha dad pa'am/ phung po med pa zhig tu 'dod/ gal te phung po tsam du zad par 'dod na ni/ des na phung po rnams dang tha dad pa med pas bdag bden par gnas par yod do zhes byar mi rung ngo / /gal te phung po rnams la yod na ni/ de rtag pa'am mi rtag pa zhig yin grang ste/ gal te rtag na ni rtag pa la bde ba dang sdug bsngal gyis phan pa dang / gnod par 'gyur ba'i mi rigs so/ /phan pa dang gnod par 'gyur ba yang med na ni/ chos dang chos ma yin pa la 'jug pa'i mi rigs so/ /chos dang chos ma yin pa la 'jug pa med na ni/ lus gtan skye bar mi 'gyur te/ 'bad mi dgos par bdag rtag tu grol bar 'gyur bas mi rung ngo / /gal te mi rtag na ni/ 'du byed rnams las logs shig dang / 'jig pa dang skye ba rgyun gyis 'jug pa yang mi dmigs pas mi rung la/ 'dir zhig par gyur pa gzhan du ma byas par thob pa'i skyon du yang 'gyur bas mi rung ngo / /gal te phung po rnams dang tha dad na ni/ des na sems can 'du ma byas zhes byar mi rung ngo / /gal te phung po med pa zhig yin na ni/ des na lus dang 'brel pa med pa'i phyir rtag tu kun nas nyon mongs pa can ma yin par 'gyur bas bdag ces byar mi rung ngo / /ci lta ba po la sogs pa'i mtshan nyid gcig yin nam/ 'on te de dang tha dad pa'i mtshan nyid gcig yin par 'dod/ gal te lta ba po la sogs pa'i mtshan nyid gcig yin na ni/ des na ci lta ba la sogs pa la lta ba la sogs par btags nas lta ba po'i mtshan nyid ces bya ba'am/ 'on te de dag dang tha dad pa zhig yin/ gal te lta ba la sogs pa la gdags na ni/ des na lta ba la sogs pa rnams nyid lta ba por gyur gyi/ bdag ni lta ba la sogs pa dang bye brag med pas lta ba bor mi rung ngo / /gal te de dag dang tha dad na ni/ des na lta ba la sogs pa de dag bdag gi las sam byed pa zhig tu 'gyur grang na/ gal te las yin na ni/ de yang sa bon dang 'dra bas des ni mi rtag par 'gyur te mi rung ngo / /gal te rdza mkhan la sogs pa tha snyad du gdags pa'i mi lta bu zhig yin na ni/ des na mi rtag pa dang / kun rdzob tu gyur pas mi rung ngo / /gal te rdzu 'phrul dang ldan pa'i tha snyad du gdags pa'i mi lta bu zhig yin na ni/ des na mi rtag pa dang / kun rdzob tu yang 'gyur la/ de don thams cad la 'dod dgur byed par 'gyur bas mi rung ngo / /gal te sa lta bu zhig yin na ni/ des na mi rtag par yang 'gyur la/ sa ltar las gsal ba yang ma yin pas mi rung ngo / /'di ltar sa'i las ni gsal bar dmigs te/ de'i dbang gis thur du mi ltung ba yin no/ /gal te nam mkha' lta bu zhig yin na ni/ des ni gzugs med pa tsam la nam mkhar gdags par zad pas mi rung ngo / /gdags pas yod pa'i tshul gyis yod pa zhig yin yang / de'i las ni gsal bar dmigs la/ bdag gi ni de lta ma yin pas mi rung ste/ /'di ltar nam mkha' las ni gsal bar dmigs te/ de'i dbang gis 'ong ba dang 'gro ba dang / bskum pa dang / brkyang ba la sogs pa'i las 'jug ste/ de bas na las yin zhes byar mi rung ngo / /gal te byed pa yin na ni/ des na gal te zor ba la sogs pa dang 'dra na/ des na ji ltar zor ba la sogs pas gzhan gcad pa la sogs pa'i bya ba byed pa de bzhin du/ lta ba la sogs pa las/ lta ba la sogs pa tha dad pa gzhan mi dmigs pas mi rung ngo / /gal te me lta bu zhig yin na ni/ des na bdag tu rtog pa don med par 'gyur bas mi rung ste/ 'di ltar me ni sreg pa po med par yang / bdag nyid kyis sreg par byed do/ /gal te lta ba po la sogs pa'i mtshan nyid las gzhan zhig yin na ni/ des na tshad ma thams cad med pa'i mtshan nyid la bdag ces byar mi rung ngo / /de la 'di skad ces kyang brjod par bya ste/ ci gang kun nas nyon mongs pa dang / rnam par byang ba'i mtshan nyid dang ldan pa de/ kun nas nyon mongs pa'am/ rnam par byang bar 'gyur ram/ 'on te de'i mtshan nyid dang mi ldan pa de ltar 'gyur bar 'dod/ gal te gang kun nas nyon mongs pa dang / rnam par byang ba'i mtshan nyid dang ldan pa de kun nas nyon mongs pa'am/ rnam par byang bar 'gyur na ni/ des na 'du byed gang yin pa rnams la/ yams kyi nad dang / gnod pa dang / 'go ba'i nad rnams dang / de zhi bar 'gyur ba dang / phan 'dogs pa dag dmigs te/ 'du byed de dag kun nas nyon mongs pa dang / rnam par byang ba'i mtshan nyid dang ldan pa yin no/ /de bas na bdag med par yang 'di lta ste/ phyi rol gyi dngos po rnams dang / nang gi lus de dag kun nas nyon mongs pa dang / rnam par byang bar 'gyur ba'i phyir mi rung ngo / /gal te de'i mtshan nyid dang mi ldan pa yin na ni/ des na kun nas nyon mongs pa dang / rnam par byang ba'i mtshan nyid dang bral ba'i bdag kun nas nyon mongs pa dang / rnam par byang bar 'gyur bas mi rung ngo / /de la 'di skad ces kyang brjod par bya ste/ ci gang 'jug pa'i mtshan nyid dang ldan pa de 'jug kyang 'jug la ldog kyang ldog par 'gyur ram/ 'on te de'i mtshan nyid dang mi ldan pa de ltar 'gyur bar 'dod/ gal te gang mtshan nyid dang ldan pa de de ltar 'gyur na ni/ des na 'du byed rnams la 'jug pa'i mtshan nyid rnam pa lnga dmigs te/ 'di ltar rgyu dang ldan pa dang / skye ba'i ngang can dang / 'jig pa'i ngang can dang / gzhan dang gzhan gcig nas gcig tu 'jug pa dang 'gyur ba gang yin pa de ni 'jug pa'i mtshan nyid yin te/ de yang 'di lta ste/ 'du byed lus dang / myu gu dang / chu klung dang / mar me dang / bya ba dang / bzhon pa'i rgyun rnams la dmigs te/ des na bdag med par yang 'du byed rnams nyid 'jug cing ldog pa'i phyir mi rung ngo / /gal te de'i mtshan nyid dang mi ldan pa zhig yin na ni/ des na 'jug pa'i mtshan nyid med pa'i bdag nyid 'jug cing ldog par 'gyur ro zhes byar mi rung ngo / /de la 'di skad ces kyang brjod par bya ste/ ci yul gyis bskyed pa'i bde ba dang sdug bsngal bar 'gyur ba gang yin pa dang / sems kyis 'gyur ba gang yin pa dang / nyon mongs pa dang / nye ba'i nyon mongs pa rnams kyis 'gyur ba gang yin pa de ni za ba po'am/ byed pa po'am/ grol pa por 'dod dam/ 'on te mi 'gyur ba gang yin pa de de ltar 'dod/ gal te 'gyur ba de la de ltar 'dod na ni/ des na 'du byed rnams nyid za ba po dang / byed pa po dang / grol ba bor 'gyur bas bdag mi rtag par 'gyur ba'i phyir mi rung ngo / /gal te 'gyur ba med pa zhig yin na ni/ des na zab po dang / byed pa po dang / grol ba po bdag yin par 'gyur te/ 'gyur ba med par mi rung ngo / /de la 'di skad ces kyang brjod par bya ste/ ci bdag nyid la byed pa por 'dogs pa'am/ 'on te bdag las gzhan pa la yang 'dogs par 'dod/ gal te bdag nyid la 'dogs na ni/ me sreg par byed do/ /'od snang bar byed do zhes byar mi rung ngo / /gal te gzhan la yang 'dogs na ni/ des na lta ba la sogs pa'i dbang po rnams la yang / byed pa por 'dogs pas bdag tu rtog pa don med par 'gyur te mi rung ngo / / de la 'di skad ces kyang brjod par bya ste/ ci bdag nyid la bdag tu 'dogs pa'am/ 'on te gzhan la yang 'dogs par 'dod/ gal te bdag nyid la 'dogs na ni/ des na tha snyad du gdags pa'i mi'i lus la yon tan bshes gnyen dang / sangs rgyas byin zhes bya ba la sogs pa gdags su mi rung ngo / /gal te gzhan la 'dogs na ni/ des na 'du byed tsam la bdag tu 'dogs par zad de/ bdag tu rtog pa don med par 'gyur bas mi rung ste/ 'di ltar 'di na tha snyad du gdags pa'i mi nyid/ bdag la yang sems can no snyam du sems la/ gzhan dag la yang rnam par ston par byed do/ /de la 'di skad ces kyang brjod par bya ste/ ci bdag tu lta ba gang yin pa 'di dge ba'am mi dge bar 'dod/ gal te dge ba yin na des na rmongs pa rnams la shas cher lhag par skye ba dang / sbyor ba med par yang skye ba dang / thar pa la skrag par byed pa dang / nyes pa gso bar byed pa'i phyir mi rung ngo / /gal te mi dge ba yin na ni/ des na de lta yin na phyin ci ma log pa zhes byar mi rung ste/ de la phyin ci log yod par gyur na bdag yod ces byar mi rung ngo / /ci bdag med par lta ba dge ba'am mi dge ba yin par 'dod/ gal te dge ba yin na ni/ des na bdag bde bar gnas pa yod par gyur na/ bdag med par lta ba dge ba phyin ci ma log pa zhes byar mi rung ngo / /gal te mi dge ba yin na ni/ des na thams cad mkhyen pas gsungs pa dang / sbyor ba las skyes pa dang / thar pa la skrag par mi byed pa dang / dkar po'i 'bras bu 'phral du thob par byed pa dang / nyes pa rnams kyi gnyen por gyur pa zhes byar mi rung ngo / /ci bdag nyid la bdag yod do snyam du sems sam 'on te bdag tu lta ba yin par 'dod/ gal te bdag kho na'o snyam du sems na ni/ des na nams kyang bdag med do snyam pa'i blo 'byung bar mi 'gyur bas mi rung ngo / /gal te bdag tu lta ba yin na ni/ des na bdag med bzhin du 'du byed tsam la bdag tu lta ba'i dbang gis bdag yod do snyam du sems pa mi rung ste/ de'i phyir yang bdag yod do zhes byar mi rung ngo / /de ltar na blo sngon du ma btang bar de'i blo 'jug pa dang / blo sngon du btang ste spyod pa ston pa dang / phung po rnams la 'dogs pa dang / mtshan nyid rnam par gzhag pa dang / kun nas nyon mongs pa dang / rnam par byang pa rnam par gzhag pa dang / 'jug pa dang / ldog pa rnam par gzhag pa dang / zab po dang / byed pa po dang / grol ba po rnam par gzhag pa dang / byed pa por 'dogs pa dang / brjod par 'dogs pa dang / lta ba 'dogs pas kyang bdag yod par mi rung ngo / /yang yang dag pa'i bdag gi mtshan nyid bshad par bya ste/ chos rnams la bdag 'dogs la/ de rdzas su 'gyur du 'ong ba'i phyir de dag las tha dad pa dang tha dad pa ma yin par brjod par mi bya'o/ /yang na chos de dag bdag gi mtshan nyid kho na yin te/ yang mi rtag pa'i mtshan nyid dang / mi brtan pa'i mtshan nyid dang / yid brtan du mi rung ba'i mtshan nyid dang / rnam par 'gyur ba'i mtshan nyid dang / skye ba'i chos kyi mtshan nyid dang / rga ba dang na ba dang 'chi ba'i chos kyi mtshan nyid dang / chos tsam gyi mtshan nyid dang / sdug bsngal gyi mtshan nyid yin te/ 'di ltar bcom ldan 'das kyis kyang / dge slong dag khyod kyi chos kyi bdag ni 'di yin te/ dge slong khyod kyi bdag ni mi rtag pa'o/ /dge slong khyod kyi bdag ni mi brtan pa dang / yid brtan du mi rung ba dang / rnam par 'gyur ba'i chos can no zhes bya ba la sogs pa gsungs so/ /yang rgyu rnam pa bzhis na/ 'du byed rnams la sems can 'dogs par rig par bya sta/ tha snyad la bde bar bya ba dang / 'jig rten dang mthun par bya ba dang / sems can gyi dngos po rnam pa thams cad kyis med do snyam ste/ skrag pa la gsal ba dang bdag dang / pha rol la tha snyad kyis yon tan dang ldan pa dang / skyon dang ldan par yid ches pa bskyed pa'i phyir te/ de bas na bdag tu smra ba yang rigs pas bskyed pa ma yin no/ /rtag par smra ba gang zhe na/ 'di lta ste/ 'di na dge sbyong ngam/ bram ze kha cig ces bya ba ni snga ma bzhin no/ /bdag dang 'jig rten ni rtag pa ste/ byas pa ma yin pa dang / byas pas byas pa ma yin pa dang / sprul pa ma yin pa dang / sprul pas byas pa ma yin pa dang / gsad du med pa dang / ther zug tu gnas pa dang / srog shing ltar brtan par gnas pa'o snyam du 'dzin to / 'di lta ste/ rtag par smra ba dang / kha cig rtag par 'dzin pa sngon gyi mtha' la rtog pa rnams dang / phyi ma'i mtha' la rtog pa 'du shes can du smra ba rnams dang / 'du shes can ma yin par smra ba rnams dang / /'du shes yod pa yang ma yin 'du shes med pa yang ma yin par smra ba rnams so/ /yang na kha cig ni rdul phra mo rtag par 'dzin to/ /ci'i phyir bdag dang 'jig rten rtag go zhes de ltar lta zhing ji skad smra zhe na/ de'i gtan tshigs ni mdo 'di nyid las ji skad 'byung ba bzhin du ci rigs par rig par bya'o/ /de la sngon gyi mtha' la rtog pa rnams kyis ni/ bsam gtan chung ngu dang / 'bring dang chen po la brten nas/ sngon gyi gnas rjes su dran pas 'das pa'i dus la sngon gyi mthar rtog ste / rten cing 'brel bar 'byung ba la mi mkhas pa/ 'das pa'i 'du byed rnams la dran pa tsam du yang dag pa ji lta ba bzhin du mi shes pa rnams la lta bar gyur pa de 'byung ngo / /yang na lha'i mig la brten nas da ltar gyi dus la sngon gyi mthar rtog pa/ 'du byed rnams skad cig gis 'jig pas rjes su 'jug pa yang dag pa ji lta ba bzhin du mi shes pa rnams dang / 'jig rten 'di nas 'jig rten pha rol du rnam par shes pa'i rgyud kyis rgyun dmigs pa rnams la lta bar gyur pa de 'byung ngo / /tshangs pas rang gi yid la bsams pa grub pa dmigs pa dang / 'byung ba chen po rnam par 'gyur ba dang / rnam par shes pa rnam par 'gyur bar dmigs pa dang / phyi ma'i mthar 'du shes pa dang tshor ba tha dad par ni mthong la/ mtshan nyid tha dad par ni ma mthong ba la lta bar gyur pa de 'byung ste/ des na de 'di snyam du sems te/ bdag dang 'jig rten ni rtag go snyam mo/ /rdul phra mo rtag par 'dzin pa ni 'jig rten pa'i bsam gtan la brten nas/ rten cing 'brel bar 'byung ba yang dag pa ji lta ba bzhin du ma shes pas/ 'di ltar lta ste/ dngos po sngon du 'gro na dngos po rnams kyi 'bras bu bsags pa 'byung la 'bri ba sngon du 'gro na 'jig par rtog ste/ des na de 'di snyam du sems te/ rdul phra mo rnams las ni rdzas rags pa 'byung la/ rdzas rags pa rnam par bshig na ni rdul phra mo'i so na gnas te/ de bas na rdzas rags pa ni mi rtag la rdul phra mo rnams ni rtag go snyam mo/ /de la rtag par lta ba sngon gyi mtha' la rtog pa rnams dang / phyi ma'i mtha' la rtog pa rnams ni bye brag gi mtshan nyid kyis bsdus pa'i phyir/ bdag tu smra ba sun phyung bas bdag gi bye brag gi mtshan nyid du smra ba yang sun phyung bar 'gyur ro/ /gzhan yang de la 'di skad ces brjod par bya ste/ ci sngon gyi gnas rjes su dran pa/ phung po 'dzin pa yin nam/ bdag 'dzin pa yin par 'dod/ gal te phung po 'dzin pa yin na ni/ bdag dang 'jig rten rtag go zhes byar mi rung ngo / /gal te bdag 'dzin pa yin na ni/ des na sems can de dag ni che ge mo zhes bya ste/ der bdag gi ming 'di zhes bya ba dang / rigs 'di zhes bya bar gyur to zhes rgyas par brjod par mi rung ngo / /ci gzugs la dmigs te mig gi rnam par shes pa mngon sum du gyur la/ yul gzugs kho na dang phrad na/ de las gzhan pa'i yul bkod par gyur pa rnams la de las gzhan pa'i rnam par shes pa rnams 'gags pa'am/ 'jug par 'dod gal te 'gag par 'dod na ni/ rnam par shes pa 'gags pa la rtag go zhes byar mi rung ngo / /gal te 'jug na ni des na yul gcig gis dus thams cad du rnam par shes pa thams cad 'jug par 'gyur bas mi rung ngo / /ci 'du shes kyis byas pa'am/ tshor bas byas pas/ bdag la 'gyur ba yod par 'dod dam/ 'on te mi 'dod/ gal te 'gyur ba yod na ni/ des na bdag dang 'jig rten rtag go zhes byar mi rung ngo / /gal te 'gyur ba med na ni/ des na gcig pa nyid kyi 'du shes su gyur nas/ sna tshogs kyi 'du shes dang / chung ngu'i 'du shes dang / tshad med pa'i 'du shes su 'gyur ro zhes byar mi rung la/ gcig tu nges par bde bar gyur nas/ gcig tu nges par sdug bsngal ba dang / bde ba dang bde ba yang ma yin/ sdug bsngal ba yang ma yin par 'gyur ro zhes byar yang mi rung ngo / /de la gang la la srog de lus de yin no zhes lta ba de ni/ bdag gzugs can du lta'o/ /srog kyang gzhan la lus kyang gzhan no zhes lta ba gang yin pa de ni gzugs can ma yin par lta'o/ /bdag cha gnyis ka dang / zad par dang gnyis su med pa dang / ma tshang ba med par lta ba gang yin pa de ni/ gzugs can yang ma yin la/ gzugs can ma yin pa yang ma yin pa dang / de'i gnyen por don de nyid la tshig dang yi ge gzhan gyis mngon par zhen pa/ bdag gzugs can yang ma yin la/ gzugs can ma yin pa yang ma yin par lta'o/ /gal te gzugs can nam/ gzugs can ma yin pa yang rung ste/ chung ngur lta na de ni mtha' yod par lta'o/ /gal te tshad med par lta na de ni/ mtha' med par lta'o/ /gal te zad par du lta ste/ gzugs kyi shas ni chung la/ gzugs med pa'i shas ni tshad med pa'am/ yang na gzugs med pa'i shas ni chung la/ gzugs kyi shas ni tshad med par lta na/ de ni mtha' yod kyang yod la/ mtha' med kyang med par lta'o/ /yang na de'i gnyen por yi ge sna tshogs la mngon par zhen la/ don sna tshogs la mngon par zhen pa ma yin na ni/ mtha' yod pa yang ma yin/ mtha' med pa yang ma yin par lta'o/ /grol ba ni gnyis su med par lta'o/ /rdul phra mo rtag par smra ba la/ 'di skad ces brjod par bya ste/ ci rdul phra rab ma brtags par brtags par 'dod dam/ brtags nas brtags par 'dod/ gal te ma brtags par 'dod na ni/ brtags pa med par rtag pa nyid du nges so zhes byar mi rung ngo / /gal te brtags na ni/ des na tshad ma thams cad dang 'gal bas mi rung ngo / /ci rdul phra rab cha phra ba'i phyir rtag par 'dod dam / 'on te 'bras bu'i rdzas rags pa dang / tha dad pa'i mtshan nyid yin pa'i phyir rtag par 'dod/ gal te cha phra ba'i phyir 'dod na ni/ des na phra ba gang yin pa de ni shin tu nyam chung ba'i phyir rtag ces byar mi rung ngo / /gal te mtshan nyid tha dad pa'i phyir rtag par 'dod na ni/ des na sa dang chu dang me dang rlung gi mtshan nyid las thal bas rigs mi mthun pa'i mtshan nyid las/ 'bras bu de skyer yang mi rung la/ mtshan nyid gzhan du yang mi 'thad pas mi rung ngo / /ci rdul phra rab rnams dang rdzas rags pa tha dad pa'i mtshan nyid dam/ tha dad pa ma yin pa'i mtshan nyid du 'dod/ gal te tha dad pa ma yin pa'i mtshan nyid yin na ni/ rgyu dang bye brag med pas de kho na bzhin du rtag par yang 'gyur la/ rgyur nges pa yang med/ 'bras bur nges pa yang med pas mi rung ngo / /gal te tha dad pa'i mtshan nyid yin na ni/ des na ci rdul phra rab so so na 'dug pa rnams las 'grub pa'am/ 'on te 'dus pa rnams las 'grub par 'dod/ gal te so so na 'dug pa rnams las 'dod na ni/ des na rtag tu 'bras bu thams cad skye bar 'gyur la/ rgyur nges pa yang med/ 'bras bur nges pa yang med pas mi rung ngo / /gal te 'dus pa rnams las 'dod na ni/ des na ci de las lus gzugs logs shig na 'dug pa ma yin pa'am/ 'on te lus gzugs logs shig na 'dug par 'dod/ gal te lus gzugs logs shig na 'dug pa ma yin na ni/ rdzas kyi lus las grub pa ste/ lus de nyid du 'gyur bas mi rung ngo / /gal te lus gzugs logs shig na 'dug na ni/ des na rdul phra rab yan lag med pas rnam par dbye ba med pa'i phyir rdzas rags pa yang rtag par 'gyur te mi rung ngo / /yang na rdul phra rab sngon med pa zhig 'byung na yang rdul phra rab rtag ces byar mi rung ngo / /ci rdul phra rab rnams kyi rdzas rags pa rtsom pa de/ sa bon la sogs pa lta bu yin nam/ 'on te rdza mkhan la sogs pa lta bu yin par 'dod/ gal te sa bon la sogs pa lta bu yin na ni/ des na sa bon la sogs pa bzhin du mi rtag par 'gyur bas mi rung ngo / /gal te rdza mkhan la sogs pa lta bu yin na ni/ des na rdul phra rab sems yod par 'gyur bas mi rung ngo / /gal te sa bon la sogs pa lta bu yang ma yin la/ rdza mkhan la sogs pa lta bu yang ma yin na ni/ des na dpe yod par mi dmigs pas mi rung ngo / /ci phyi rol gyi dngos po rnams 'byung ba sems can gyi phyir 'byung bar 'dod dam/ 'on te ma yin par 'dod gal te sems can gyi phyir 'byung bar 'dod na ni/ des na rdzas rags pa sems can gyi phyir byung la/ de'i rten rdzas cha phra ba sems can gyi phyir 'byung ba ma yin pas mi rung ste de la de'i mthu sus bzlog /gal te sems can gyi phyir byung ba ma yin na ni/ des na phyi rol gyi dngos po rnams byung ba dgos pa med par 'gyur bas mi rung ngo / /de ltar na phung po la sems can rjes su dran pa dang / yul gcig gis rnam par shes pa thams cad kyi rgyun 'jug pa dang / 'du shes dang tshor ba rnams kyis 'gyur ba dang / mi 'gyur bas kyang sngon gyi mthar rtog pa rnams dang / phyi ma'i mthar rtog pa rnams kyi rtag par smra ba mi rung ngo / /brtags pa dang ma brtags pa dang / spyi'i mtshan nyid dang / rang gi mtshan nyid dang rtsom pa dang / bzhi'i dgos pas kyang / rdul rtag par smra ba yang mi rung ngo / /de bas na smra ba 'di yang rigs pas bskyed pa ma yin no/ /de lta mod kyi rtag pa'i mtshan nyid brjod par bya ste/ dus thams cad du mi 'gyur ba'i mtshan nyid dang / rnam pa thams cad du mi 'gyur ba'i mtshan nyid dang / bdag nyid mi 'gyur ba'i mtshan nyid dang / gzhan gyis mi 'gyur ba'i mtshan nyid dang / skye ba can ma yin pa gang yin pa de ni rtag pa'i mtshan nyid yin par rig par bya'o// //bam po bdun pa/ sngon byas pa rgyur smra ba gang zhe na/ 'di ltar 'di na dge sbyong ngam/ bram ze kha cig ces bya ba nas/ rgyas par mdo las ji skad 'byung ba bzhin te/ skyes bu gang zag 'dis myong ba gang ci yang rung ba zhes bya ba ni/ sdug bsngal las bsams pa'o/ /sngon byas pa'i rgyu las byung ba zhes bya ba ni/ sdig pa'i rgyu las byung ba las bsams pa'o/ /'di ltar las rnying rnams ni dka' thub kyis 'byang bar 'gyur ro zhes bya ba ni/ tshe 'di nyid la drag po spyod pa las bsams pa'o/ /las gsar rnams ni mi bya ba dang / chu lon gyis dag go zhes bya ba ni/ mi dge ba rnams las bsams pa'o/ /de lta na phyis nyes 'dzag tu mi 'gyur ro zhes bya ba ni gcig tu nges par dge ba nyid yin pas phyis nyes 'dzag tu mi 'gyur ba zhes bya'o/ /nyes 'dzag med na las zad par 'gyur ro zhes bya ba ni/ sdig pa las bsams pa'o/ /las zad na sdug bsngal zad par 'gyur ro zhes bya bas ni/ sngon byas pa'i rgyu las byung ba dang / tshe 'di'i gnod pa las byung ba las bsams pa'o/ /sdug bsngal zad na sdug bsngal mthar byed par 'gyur ro zhes bya ba ni/ tshe gzhan gyi rgyun 'jug pa las bsams pa ste / 'di lta ste/ gcer bu pa dag lta bu'o/ /ci'i phyir 'di ltar lta zhing / 'di skad smra zhe na/ lung dang rigs pas byed de/ lung ni snga ma bzhin no/ /rigs pa gang zhe na/ 'di ltar 'di na kha cig rtog ge ba yin te zhes bya ba yang snga ma bzhin no/ /tshe 'di'i skyes bu'i byed pa la 'khrul par yod par mthong ste/ 'di ltar nges 'jig rten na yang dag par sbyor ba dang ldan pa la yang sdug bsngal skye ba dang / log pa'i sbyor ba dang ldan pa la yang bde bar skye bar mthong nas/ de 'di snyam du sems te/ gal te 'di skyes bu'i byed pa'i rgyu las byung ba yin na ni/ 'di las log par 'gyur ba'i rigs na/ 'di ltar de log par yang ma gyur te/ de'i phyir 'di ni sngon byas pa'i rgyu las byung ba yin no snyam ste/ des na 'di ltar lta zhing 'di skad smra bar gyur to/ /de la 'di skad ces brjod par bya ste/ ci tshe 'di'i gnod pa las byung ba'i sdug bsngal gang yin pa de sngon byas pa'i rgyu las byung ba yin pa'am/ 'on te tshe 'di'i gnod pa'i rgyu las byung ba yin/ gal te sngon byas pa'i rgyu las byung ba yin na ni/ des na las rnying rnams ni dka' thub kyis 'byang bar 'gyur la/ da ltar byung ba rnams ni mi bya ba dang chu lon gyis bkag na de ltar phyis nyes 'dzag tu mi 'gyur ro zhes rgyas par 'byung ba mi rung ngo / /gal te tshe 'di'i gnod pa'i rgyu las byung ba yin na ni/ skyes bu gang zag 'dis myong ba gang ci yang rung / de thams cad ni sngon byas pa'i rgyu las byung ba'o zhes byar mi rung ste/ de ltar na gnod pa las byung ba'i sdug bsngal ni sngon las byas pa'i rgyu las byung ba dang / skyes bu byed pa'i rgyu las byung bar yang mi rung ste/ de bas na smra ba 'di yang rigs pas bskyed pa ma yin no/ /de lta mod kyi sngon byas pa'i rgyu las byung bar gcig tu nges pa'i sdug bsngal yang yod de/ 'di ltar 'di na kha cig rang gi las kyi dbang gis ngan song rnams dang / rigs ngan rnams dang / /sdug bsngal ba'i khyim rnams su skye ba lta bu'o/ /'dres pa'i rgyu las byung ba'i sdug bsngal yang yod de/ 'di lta ste/ rgyal po la g.yos brten pa/ de ni 'bras bu med pa'i rgyu las byung ba'i sdug bsngal yin no/ /rgyal po la brten pa ji lta ba bzhin du/ khyim pa'i las byed pa dang / zhing las dang rku ba'i las dang / gzhan la phan 'dogs pa la 'jug pa rnams la yang / bsod nams dang ldan pa'i 'grub par 'gyur gyi bsod nams med pa'i skyes bu'i byed pa'i ni 'bras bu med par 'gyur ro/ /skyes bu'i byed pa'i rgyu las byung bar gcig tu nges pa yang yod de / 'di lta ste/ las gsar srid pa gzhan 'phen par byed pa/ dam pa'i chos nyan cing chos rnams mngon par rtogs pa dang / spyod lam byed pa dang / bzo'i las kyi gnas rnams slob pa dang / de lta bu'i dang mthun pa rnams ni skyes bu'i byed pa'i rgyu las byung ba yin no/ /dbang phyug la sogs pa byed pa por smra ba gang zhe na/ 'di ltar 'di na dge sbyong ngam bram ze kha cig ces bya ba nas rgyas par snga ma bzhin te/ skyes bu gang zag 'dis myong ba gang ci yang rung ste / de dag thams cad ni dbang phyug gis sprul pa'i rgyu las byung ba'am/ skyes bu gzhan gyis sprul pa'i rgyu las byung ba la sogs pa ste/ 'di lta ste/ dbang phyug la sogs pa mi mthun pa rgyur smra ba rnams so/ /ci'i phyir de ltar lta zhing de skad smra zhe na/ lung dang rigs pas byed de/ lung ni snga ma bzhin no/ /rigs pa gang zhe na/ 'di ltar 'di na kha cig rtog ge pa yin te zhes bya ba yang snga ma bzhin no/ /rgyu dang 'bras bu la mi 'dod bzhin du byed par 'jug pa mthong ste/ 'di ltar sems can rnams rgyu'i tshe yang dge ba la 'jug par bya'o snyam pa las mi 'dod bzhin du sdig pa la yang 'jug par 'gyur ro/ /'bras bu'i tshe yang bde 'gro mtho ris kyi 'jig rten lha rnams kyi nang du skyes par bya'o snyam pa las ngan song dag tu skye bar 'gyur ba dang / bde ba la longs spyod par bya'o snyam pa las sdug bsngal kho na myong ste/ des na de 'di snyam du sems te/ gang dngos po rnams kyi byed pa po dang / 'byin pa po dang / sprul pa po dang / pha lta bur gyur pa'i dbang phyug gam/ de las gzhan pa de ni yod do snyam mo/ /de la 'di skad ces brjod par bya ste/ sdom ni/ nus pa yod pa ma yin dang / /khongs su gtogs na 'gal ba dang / /dgos pa dang ni dgos pa med/ /rgyu yang skyon dang ldan phyir ro/ /ci dbang phyug gis sprul pa'i nus pa gang yin pa de/ las dang rnal 'byor gyi rgyu las byung ba'am/ 'on te rgyu med pa las byung bar 'dod/ gal te las dang rnal 'byor gyi rgyu las byung ba yin na ni/ des na dbang phyug gi las dang rnal 'byor gyi rgyu las 'gro ba byung ngo zhes byar mi rung ngo / /gal te rgyu med pa yin na ni/ des na dbang phyug gi rgyu las 'gro ba ma byung bas mi rung ngo / /ci dbang phyug 'gro ba'i khongs su gtogs pa'am/ 'on te khongs su ma gtogs par 'dod/ gal te khongs su gtogs na ni/ 'gro ba dang chos mtshungs pas 'gro ba 'byin to zhes byar mi rung ngo / /gal te khongs su ma gtogs na ni des na grol bas 'gro ba 'byin to zhes byar mi rung ngo / /ci dgos pa yod pa'i phyir 'byin pa'am/ 'on te dgos pa med par 'byin par 'dod/ gal te dgos pa yod pa'i phyir 'byin par byed na ni/ des na dgos pa de la dbang med par gyur pas 'gro ba'i dbang phyug ces byar mi rung ngo / /gal te dgos pa med na ni/ des na dgos pa yang med la/ 'byin par yang byed par mi rung ngo / /ci 'byin pa dbang phyug gi rgyu las byung ba'am/ de ma yin pa'i len pa'i rgyu las byung bar 'dod/ gal te dbang phyug gi rgyu las byung ba kho na yin na ni/ des na gang gi tshe dbang phyug yod pa de'i tshe/ 'byin pa yang yod la/ gang gi tshe 'byin pa yod pa de'i tshe dbang phyug kyang yod par gyur pas/ dbang phyug gi rgyu las 'byin pa byung ngo zhes byar mi rung ngo / /gal te de ma yin pa'i len pa'i rgyu las byung na ni/ des na dbang phyug gi 'dod pa'i rgyu las byung ngam/ 'dod pa las ma gtogs pa de ma yin pa'i len pa'i rgyu las byung ngo / gal te dbang phyug gi 'dod pa'i rgyu las byung na ni/ 'dod pa de yang ci dbang phyug gi rgyu las byung ba kho na yin nam/ 'on te ma yin pa'i len pa'i rgyu las byung ba yin/ gal te dbang phyug gi rgyu las byung ba kho na yin na ni gang gi tshe dbang phyug yod pa de'i tshe/ 'dod pa yang yod la gang gi tshe 'dod pa yod pa de'i tshe dbang phyug kyang yod pas/ rtag tu 'byin par 'gyur ba'i phyir mi rung ngo / / gal te de ma yin pa len pa'i rgyu las byung na ni/ len pa yang mi dmigs la/ len pa la dbang byed par yang ma gyur pas 'gro ba'i dbang phyug ces byar mi rung ste/ de ltar na nus pa dang / khongs su gtogs pa dang / khongs su ma gtogs pa dang / dgos pa yod pa dang / dgos pa med pa dang / rgyu'i dngos pos kyang mi rung ste/ de bas na smra ba 'di yang rigs pas bskyed pa ma yin no/ /'tshe ba'i chos su smra ba gang zhe na/ 'di ltar 'di na kha cig ces bya ba nas rgyas bar snga ma bzhin te/ mchod sbyin rnams la gsang sngags kyi cho ga sngon du 'gro bas srog gcod par byed de/ mchod sbyin byed pa gang yin pa dang / mchod sbyin du bya ba gang yin pa dang / gang dag de'i grogs byed pa de dag thams cad mtho ris su 'gro bar 'gyur ro snyam mo/ /ci'i phyir de ltar lta zhing de skad smra zhe na/ de ni tshig las 'das par smra ba yin te/ g.yon can gyis bsgrubs pa yin gyi rigs pas mngon par brtags nas gzhag pa ma yin te/ rtsod pa'i dus la bab pa/ bram ze sha za bar 'dod pa rnams kyis bram ze'i chos rnying pa las 'gal bar byas nas 'di byas par zad do/ /de la 'di skad ces brjod par bya ste/ ci gsang sngags kyi cho ga gang yin pa de chos kyi ngo bo nyid yin pa'am/ 'on te chos ma yin pa'i ngo bo nyid du 'dod/ gal te chos kyi ngo bo nyid yin na ni/ des na srog gcod pa med par/ rang gi sdug pa'i 'bras bu mi 'grub la/ chos ma yin pa yang chos su byed pas mi rung ngo / / gal te chos ma yin pa'i ngo bo nyid yin na ni/ des na bdag nyid chos ma yin pa mi sdug pa'i 'bras bu can yin la/ mi sdug pa'i 'bras bu gzhan zlog par byed do zhes byar mi rung ngo / /de skad du lan btab kyang yang 'di skad du dper na gsang sngags kyi cho gas yongs su zin pa'i dug gis 'chi bar mi byed pa bzhin du/ 'dir yang gsang sngags kyi cho ga la de bzhin du blta bar bya'o zhes zer na/ de la 'di skad ces brjod par bya ste/ ci gsang sngags kyi cho gas phyi rol gyi dug ji ltar zhi bar byed pa de bzhin du/ nang gi 'dod chags dang / zhe sdang dang gti mug gi dug kyang zhi bar byed par 'dod dam/ gal te de kho na bzhin du zhi bar byed na ni/ zhi ba de yang / gang du yang su la yang nam yang de ltar mi dmigs pas mi rung ngo / /gal te de kho na bzhin du zhi bar mi byed na ni/ des na ji ltar gsang sngags kyi cho gas phyi rol gyi dug zhi bar byed pa de bzhin du chos ma yin par zhi bar byed ces byar mi rung ngo / /ci gsang sngags kyi cho ga de kun tu 'gro ba'am/ 'on te kun tu 'gro ba ma yin par 'dod/ gal te kun tu 'gro ba yin na ni/ thog mar gnyen 'dab sdug pa mchod sbyin du ma byas pas mi rung ngo / /gal te kun tu 'gro ba ma yin na ni/ des na de'i nus pa la 'khrul pa yod pas mi rung ngo / /ci gsang sngags kyi cho ga des rgyu kho na bzlog par nus sam/ 'on te 'bras bu yang bzlog nus par 'dod/ gal te rgyu kho na bzlog par nus na ni/ des na 'bras bu la nus pa med pas mi rung ngo / /gal te 'bras bu yang bzlog par nus na ni/ des na 'dod dgur sgyur ba'i gzugs can bzhin du/ phyugs kyang phyugs kyi lus spangs nas lha'i lus 'dzin par 'gyur bas mi rung ngo / /ci gsang sngags rnams byed pa gang yin pa de/ nus pa yang yod la snying rje can zhig yin nam/ 'on te nus pa yang med la/ snying rje yang med par 'dod/ gal te nus pa yang yod la snying rje can zhig yin na ni/ srog gcod pa med par 'jig rten thams cad mtho ris su 'jog par mi byed pas mi rung ngo / /gal te nus pa yang med la/ snying rje can yang ma yin na ni/ des na de'i gsang sngags 'grub par 'gyur zhes byar mi rung ste/ de ltar na rgyu dang / dpe dang 'khrul pa dang / 'bras bu la nus pa med pa dang / gsang sngags byed pas kyang mi rung ste/ de bas na smra ba 'di yang rigs pas bskyed pa ma yin no/ /chos kyi phyir byed pa ma yin pa'i mtshan nyid gang yin pa yang brjod par bya ste/ gang pha rol gsod pa'i las byed la/ tshe 'di la yang nyes pa'i gnyen po mi byed pa de ni chos kyi phyir byed pa ma yin no/ /ya mtshan can thams cad la mi sdug pa'i 'bras bur grags pa gang yin pa dang / thams cad mkhyen pas mi dge bar gcig tu nges par gsungs pa gang yin pa dang / bdag mi 'dod pa gang yin pa dang / nyon mongs pa can gyi sems kyis bskyed pa gang yin pa dang / rig sngags dang bkra shis dang ldan pa gang yin pa dang / rang bzhin gyis lung du ma bstan pa gang yin pa de dag chos kyi phyir byed pa ma yin no/ /mtha' dang mtha' med par smra ba gang zhe na/ 'di ltar 'di na dge sbyong ngam/ bram ze kha cig /'jig rten pa'i bsam gtan la brten nas/ 'jig rten gyi mtha' yod par 'du shes pa dang / mtha' med par 'du shes pa dang / gnyi gar 'du shes pa dang / gnyi ga ma yin par 'du shes pas gnas pa mdo nyid las rgyas par 'byung ba bzhin te/ 'jig rten mtha' yod pa las / mtha' yod pa yang ma yin/ mtha' med pa yang ma yin pa'i bar du de ltar lta zhing de skad smra'o/ /'dir yang gtan tshigs dang / gang zag ni sngar bstan pa'i tshul bzhin du rig par bya'o/ /de la 'jig rten gyi mtha' tha mar chad par 'gyur ram/ mi 'gyur snyam du yang dag par tshol bar byed do/ /gang gi tshe 'jig pa'i bskal pa rjes su dran pa de'i tshe ni mtha' yod pa'i 'du shes 'byung ngo / /gang gi tshe 'chags pa'i bskal pa dran pa de'i tshe ni/ mtha' med pa'i 'du shes 'byung ngo / /yul rgya che ba'i mtha' yang dag par tshor ba na/ gang gi tshe 'og tu ni mnar med pa yan chad las ma mthong / steng du ni bsam gtan bzhi pa yan chad las ma mthong la/ thad kar ni thams cad du pha rol yang mthong ba de'i tshe 'og dang steng du ni mtha' yod pa'i 'du shes 'byung ngo / /thad kar ni mtha' med pa'i 'du shes 'byung ngo / /de dang mi mthun pa'i phyogs kyang yi ge'i khyad par la mngon par zhen la/ don gyi khyad par la ni ma yin te/ mtha' yod pa ma yin pa'i 'du shes dang / mtha' med pa yang ma yin pa'i 'du shes 'byung ngo / /de la 'di skad ces brjod par bya ste/ ci 'jig pa'i bskal pa de'i tshu rol na/ 'jig rten 'byung ba yod par 'dod dam/ 'on te mi 'dod/ gal te yod na ni/ 'jig rten mtha' yod ces byar mi 'byung ngo / /gal te med na ni des ni 'jig rten na gnas la/ 'jig rten gyi mtha' rjes su dran no zhes byar mi rung ngo / /de ltar na tshu rol dngos po yod pa dang / tshu rol dngos po med pas kyang mi rung ngo / /de bas na smra ba 'di yang rigs pas bskyed pa ma yin no/ /lha mi spong ba smra ba gang zhe na/ 'di lta ste/ lha mi spong ba bzhi po rnams te/ mdo nyid las rgyas par 'byung ba bzhin du rig par bya'o/ /de dag kyang mngon par mtho ba'i lam dge ba dang mi dge ba dang / nges par legs pa'i lam sdug bsngal dang / kun 'byung ba dang 'gog pa dang / lam las dri ba dris na/ bdag ni lha mi spong ba yin no snyam du dam bcas nas/ gang du 'chi ba med pa rnam par dag pa'i lha rnams kyi dri ba dris pa/ spang bar bya ba ma yin par der de dag dri ba dris pa rnams la/ tshig gis gzhan dang gzhan du rlung bskur ba dang / phyir rgol ba dang / mthun par byed pa'i tshul gyis spong bar byed do/ /de la lha mi spong ba gcig ni blo ma byang ba kho na'o/ /gnyis pa ni rtogs pa'i mngon pa'i nga rgyal can no/ /gsum pa ni blo byang ba rnam par nges pa ma yin pa'o/ /bzhi pa ni shes pa zhan cing shin tu rmongs pa kho na'o/ /de la dang po ni brdzun du smra bas 'jigs shing 'dzem pa dang / mi shes pa yod pas 'jigs shing 'dzem pa'i phyir mi shes so zhes gsal bar lan 'debs par mi byed do/ /gnyis pa ni rang gis rtogs pa la 'jigs pa yod de/ brgal zhing brtags pas 'jigs shing 'dzem pa dang / brdzun du smra bas 'jigs shing 'dzem pa dang / log par lta bas 'jigs shing 'dzem pa'i phyir bdag gis shes so zhes gsal bar lan 'debs par mi byed do/ /gsum pa ni log par lta bas 'jigs shing 'dzem pa dang / brdzun du smra bas 'jigs shing 'dzem pa dang / brgal zhing brtags pas 'jigs shing 'dzem pa dang / bdag ni nges pa ma yin no zhes gsal bar lan 'debs par mi byed do / /de dag ni der gzhan dang gzhan du rlung skur bar byed pas tshig gis spong bar byed do/ /bzhi pa ni brgal zhing brtags shing 'dzem pa kho na ste/ mngon par mtho ba'i lam dang / nges par legs pa'i lam zhes yi ge tsam la yang / thams cad kyi thams cad du mi mkhas pa'i phyir bdag ni shin tu rmongs so zhes gsal bar lan 'debs par mi byed do/ /de ni gzhan kho na la kun dris nas/ de dang mthun par byed pas tshig gis spong bar byed do/ /smra ba 'di dag ni rgyu dang / gang zag dang / lan kyang gang kho nas 'jigs pa de'i gnas nyid la gnas so zhes mdo las ji skad 'byung ba'i tshul bzhin du bshad zin te/ de dag 'di snyam du 'di ltar phyir rgol ba rnams 'ongs na/ der g.yos bsgrub par bya'o snyam du sems pa 'di ni 'dir lta bar gyur pa yin par rig par bya'o/ /de bas na smra ba 'di yang rigs pas bskyed pa ma yin no/ /rgyu med par smra ba gang zhe na/ de yang bsam gtan la brten pa dang / rtog ge la brten pa'i tshul gyis rnam pa gnyis te/ mdo nyid las ji skad 'byung ba bzhin du rig par bya'o/ /ci'i phyir rtog ge la brten nas de ltar bdag dang 'jig rten rgyu med pa las skyes par lta zhe na/ mdor bsdu na/ bsam pa sngon du ma btang bar nang dang phyi rol gyi dngos po tshad med pa rnam pa sna tshogs snang ba dang / res 'ga' rgyu rnams 'bras bu med par snang ba dang / res 'ga' glo bur du rlung ldang la res 'ga' mi ldang ba dang / res 'ga' glo bur du chu klung 'bab la/ res 'ga' mi 'bab pa dang / res 'ga' glo bur du shing rnams las me tog dang / 'bras bu 'byung la res 'ga' me tog dang 'bras bu mi 'byung ba la sogs pa snang ba'i phyir ro/ /de la 'di skad ces brjod par bya ste/ ci dngos po med pa zhig rjes su dran nam/ 'on te bdag rjes su dran/ gal te dngos po med pa'i rjes su dran na ni dngos po med pa ma goms pa ma 'dris pa rjes su dran zhes byar mi rung ngo / /gal te bdag rjes su dran na ni/ des na bdag sngon ma byung la/ phyis 'byung ngo zhes byar yang mi rung ngo / /ci lus dang phyi rol gyi dngos po rnams rnam pa sna tshogs su 'jug pa dang / glo bur du 'jug pa rgyu med pa'am/ 'on te rgyu yod par 'dod/ gal te rgyu med pa na ni rnam pa sna tshogs su 'jug pa dang / glo bur du 'jug pa dang / yang mi 'jug pa mi rung ngo / /gal te rgyu yod na ni/ des na bdag dang 'jig rten rgyu med par skyes so zhes byar mi rung ngo / /de ltar na dngos po med pa rjes su dran pa dang / bdag rjes su dran pa dang / nang dang phyi rol gyi dngos po rnams rgyu med par rnam pa sna tshogs su 'jug pa dang / rgyu yod de rnam pa sna tshogs su 'jug pas kyang mi rung ste/ de bas na smra ba 'di yang rigs pas bskyed pa ma yin no/ /chad par smra ba gang zhe na/ 'di ltar 'di na dge sbyong ngam/ bram ze la la/ 'di ltar lta zhing 'di skad smra ste/ bdag gzugs can rags pa 'byung ba chen po bzhi las byung ba ji srid du 'dug cing sdod la 'tsho ba de srid du/ nad dang bcas pa/ 'bras dang bcas pa/ zug rngu dang bcas pa/ rims dang bcas pa/ yongs su gdung ba dang bcas pa yin te/ nam shi ba'i 'og tu bdag chad de zhig cing med par gyur pa de na/ bdag gtan chad par 'gyur ro/ /'dod pa na spyod pa'i lha dang / gzugs na spyod pa'i lha dang / gzugs med pa nam mkha' mtha' yas skye mched du nye bar 'gro ba dang / 'du shes med 'du shes med min skye mched du nye bar 'gro ba'i bar du yang de dang 'dra ste/ 'di lta ste/ chad par smra ba bdun po mdo nyid las rgyas par 'byung ba bzhin no/ /ci'i phyir de ltar lta zhing / de skad smra bar byed ce na/ lung dang rigs pas byed de/ lung ni snga ma bzhin no/ /rigs pa gang zhe na/ 'di ltar 'di na kha cig rtog ge ba yin te zhes bya ba yang snga ma bzhin no/ /de 'di snyam du sems te/ gal te shi ba'i 'og tu bdag yod par gyur na/ las rnams ma byas par 'thob pa'i skyon du 'gyur ro/ /gal te bdag gtan med na yang des na las kyi 'bras bu rnams longs spyod pa yang med par 'gyur ro snyam ste/ des rnam pa gnyis ka mi rung bar mthong nas/ shi ba'i 'og tu bdag chad pa dang / zhig pa dang / med par 'gyur te/ 'di lta ste/ gyo mo chag pa rnams phyir mi 'byor ba dang / rdo chag pa phyir mi 'byor ba de bzhin du/ 'di ltar yang tshul de ltar blta bar bya'o zhes de ltar lta zhing de skad smra'o/ /de la 'di skad ces brjod par bya ste/ ci phung po chad par 'gyur ba'am/ 'on te bdag chad par 'gyur bar 'dod/ gal te phung po chad par 'dod na ni/ des na phung po ni mi rtag ste/ rgyu dang 'bras bu gcig nas gcig tu 'jug pas chad par 'gyur zhes byar mi rung ngo / /gal te bdag chad par 'dod na ni/ gzugs can rags pa 'byung ba chen po bzhi las byung ba nad dang bcas pa/ 'bras dang bcas pa/ zug rngu dang bcas pa/ rims dang bcas pa/ yongs su gdung ba dang bcas pa dang / 'dod pa na spyod pa'i lha dang / gzugs na spyod pa'i lha dang / gzugs med pa nam mkha' mtha' yas skye mched du nye bar 'gro ba dang / 'du shes med 'du shes med min skye mched du nye bar 'gro ba'i bar zhes byar mi rung ngo / /de ltar na phung po chad pa dang / bdag chad pas kyang mi rung ste/ de bas na smra ba 'di yang rigs pas bskyed pa ma yin no/ /med par smra ba gang zhe na/ 'di ltar 'di na dge sbyong ngam bram ze la la sbyin pa med do/ /mchod sbyin med do zhes bya ba nas rgyas par bya ste/ 'jig rten na dgra bcom pa med do zhes bya ba'i bar du de ltar lta zhing de skad smra ba lta bu'o/ /yang thams cad ni mtshan nyid thams cad kyis med do zhes de ltar lta zhing de skad smra'o/ /ci'i phyir de ltar lta zhing de skad smra par byed ce na/ lung dang rigs pas byed de/ de la lung ni snga ma bzhin no/ /rigs pa gang zhe na/ 'di ltar 'di na kha cig rtog ge ba ma yin te zhes bya ba yang snga ma bzhin te/ de 'jig rten pa'i bsam gtan la brten nas/ la la tshe thog thag tu sbyin pa dag byed par mthong la/ de shi 'phos te 'chi ba'i dus byas nas rigs dma' ba dang / dbul po dang / bkren pa dang / nor med pa dag tu skyes pa yang mthong nas/ de 'di snyam du sems te sbyin pa med do/ /mchod sbyin med do/ /sbyin sreg med do snyam mo/ /yang la la tshe thog thag tu legs par spyad pa spyod pa'am/ nyes par spyad pa spyod par mthong la/ de shi 'phos te 'chi ba'i dus byas nas/ ngan song ngan 'gro log par ltung ba sems can dmyal ba rnams su skyes pa'am / bde 'gro mtho ris kyi 'jig rten lha rnams kyi nang du skyes pa dag kyang mthong nas/ de 'di snyam du sems te/ legs par spyad pa med do/ /nyes par spyad pa med do/ /legs par spyad pa dang nyes par spyad pa'i las rnams kyi 'bras bu rnam par smin pa med do snyam mo/ /yang la la rgyal rigs las/ bram ze'i rigs dang / rje'u rigs dang / dmangs rigs su skye ba dang / bram ze'i rigs las/ rgyal rigs dang / rje'u rigs dang / dmangs rigs su skye ba yang mthong ngo / /rje'u rigs dang dmangs rigs kyang de bzhin pas/ de 'di snyam du sems te/ 'jig rten pha rol nas 'jig rten 'di rgyal rigs la sogs pa las rgyal rigs la sogs par 'gyur ba med do/ /'jig rten 'di nas 'jig rten pha rol du rgyal rigs la sogs pa las rgyal rigs la sogs par 'gyur ba med do snyam mo/ /yang 'dod chags dang bral ba las sa 'og mar skye ba yang mthong la/ yang ma las bu mor skye ba'am/ bu mo las mar skye ba'am/ pha las bu phor skye ba'am/ bu pho las phar skye ba yang mthong ste/ des na pha ma la nges pa med par mthong nas/ 'di snyam du sems te/ ma yang med do/ /pha yang med do snyam mo/ /yang la la gang zag gi skye ba kun tu btsal na ma mthong la/ gang zag de yang 'du shes med pa rnams sam/ gzugs med pa dag gi nang du skyes sam/ yongs su mya ngan las 'das par gyur nas/ de'i skye mched rab tu mi shes pas/ de 'di snyam du sems te/ sems can skye ba med do snyam mo/ /yang dgra bcom par mngon pa'i nga rgyal can 'chi 'pho ba na/ bdag nyid kyis bdag nyid skye ba mthong nas 'di snyam du sems te/ 'jig rten na dgra bcom pa med do snyam pa nas rgyas par bya'o/ /ci'i phyir thams cad ni mtshan nyid thams cad kyis med do zhes de ltar lta zhing de skad smra zhe na/ de bzhin gshegs pas brjod du med pa'i chos nyid las brtsams te gsungs pa'i mdo sde zab mo dang / zab mor snang ba gang yin pa de dag yang dag pa ji lta ba bzhin du mi shes pa dang / tshul bzhin ma yin pas chos kyi mtshan nyid rnam par gzhag pa las med par lta ba 'byung bar 'gyur te/ des na de 'di snyam du sems te/ thams cad ni mtshan nyid thams cad kyis med do snyam mo/ /de la 'di skad ces brjod par bya ste/ ci skyes nas myong bar 'gyur ba'i las kyang yod la/ lan grangs gzhan la myong bar 'gyur ba'i las kyang yod pa'am/ 'on te thams cad skyes nas myong bar 'gyur ba kho nar 'dod/ gal te yod na ni/ des na sbyin pa med do/ /mchod sbyin med do/ /sbyin sreg med do/ /legs par spyad pa med do/ /nyes par spyad pa med do/ /legs par spyad pa dang nyes par spyad pa'i las rnams kyi 'bras bu rnam par smin pa med do/ /'jig rten 'di med do/ /'jig pha rol med do zhes byar mi rung ngo / /gal te lan grangs gzhan la myong bar 'gyur ba med na ni/ des na gang gzhan dge ba dang / mi dge ba'i las mngon par 'du byed pa rnam pa sna tshogs dang ldan pa de/ cig car skyes nas dge ba dang / mi dge ba'i las rnams kyi rnam par smin pa myong bar 'gyur bas mi rung ngo / /ci gang gis gang bskyed pa de de'i ma yin nam/ 'on te ma yin no / /gang gis bon las gang skyes pa de/ de'i pha yin nam/ 'on te pha ma yin par 'dod/ gal te ma dang pha ma yin na ni ma med do/ /pha med do zhes byar mi rung ngo / /gal te ma yang ma yin/ pha yang ma yin na ni/ des na bskyed kyang bskyed la/ de'i sa bon las kyang byung bzhin du/ ma yang ma yin pha yang ma yin no zhes byar mi rung ste/ gang gi tshe ma dang phar gyur pa de'i tshe ni/ bu mo dang bu pho ma yin la gang gi tshe bu mo dang bu phor gyur pa de'i tshe ni ma dang pha ma yin no/ /ci sems can gang du skye ba na lha'i mig gis mi mthong ba de lta bu'i gnas yod pa'am/ 'on te med par 'dod/ gal te yod na ni des na sems can skye ba med do zhes byar mi rung ngo / /gal te med na ni/ des na 'du shes la chags pa med pa dang / gzugs la chags pa med pa dang / khams gsum pa la chags pa med pa la skur ba btab par 'gyur bas mi rung ngo / / ci dgra bcom par mngon pa'i nga rgyal du 'dzin pa yod pa'am 'on te med par 'dod/ gal te yod na ni 'jig rten na dgra bcom pa med do zhes byar mi rung ngo / /gal te med na ni des na gang la la tshul bzhin ma yin pas zhugs pas phyin ci log tu sems pa de yang dgra bcom pa zhes byar mi rung ngo / /de la 'di skad ces brjod par bya ste/ ci yongs su grub pa'i mtshan nyid dang / gzhan gyi dbang gi mtshan nyid dang / kun brtags pa'i mtshan nyid kyi chos de yod pa'am/ 'on te med par 'dod/ gal te yod na ni des na thams cad ni mtshan nyid thams cad kyis med do zhes byar mi rung ngo / /gal te med na ni des na phyin ci log med do/ /kun nas nyon mongs pa med do/ /rnam par byang ba med do zhes byar mi rung ste/ de ltar na skyes nas myong bar 'gyur ba dang / lan grangs gzhan la myong bar 'gyur ba dang / 'khrul pa med pa dang / skye ba'i gnas yod pa dang / mngon pa'i nga rgyal yod pa dang / mtshan nyid rnam pa gsum yod pas kyang mi rung ste/ de bas na smra ba 'di yang rigs pas bskyed pa ma yin no/ /mchog tu smra ba gang zhe na/ 'di ltar 'di na dge sbyong ngam bram ze la la/ bram ze rnams ni rigs kyi mchog go/ /rigs pas gzhan ni dma' ba yin no/ /bram ze rnams ni rigs dkar po'o/ /rigs gzhan ni gnag pa'o/ /bram ze rnams ni dag par 'gyur ba'o/ /bram ze ma yin pa rnams ni ma yin no/ /bram ze rnams ni tshangs pa'i bu'o/ /snying ga nas byung ba'o/ /kha nas byung ba'o/ /tshangs pa las byung ba'o/ /tshangs pas sprul pa'o/ /tshangs pa'i bgo skal la spyod pa'o zhes de ltar lta zhing de skad smra ba lta bu ste/ 'di lta ste/ rtsod pa'i dus kyi bram ze rnams so/ /ci'i phyir de ltar lta zhing de skad smra bar byed ce na/ lung dang rigs pas byed de/ lung ni snga ma bzhin no/ /rigs pa gang zhe na/ 'di ltar 'di na la la rtog ge pa yin te zhes bya ba nas rgyas par bya ste/ bram ze'i rigs dang / rang bzhin gyi tshul khrims dmigs pa dang / rnyed pa dang / bkur sti la brten pa'i phyir ro/ /de la 'di skad ces brjod par bya ste/ ci de las gzhan pa'i rigs rnams kho na ma las skyes shing mngal nas byung ba kho na yin pa'am/ 'on te bram ze'i rigs kyang 'dod/ gal te de las gzhan pa rnams kho na yin na ni/ des na mngon sum du bram ze'i rigs mngal nas skye zhing ma las byung ba la skur pa btab par 'gyur bas mi rung ngo / /gal te bram ze'i rigs kyang de lta yin na ni/ des na bram ze rnams ni rigs kyi mchog yin la/ rigs gzhan ni dma' ba yin zhes byar mi rung ngo / /mngal nas skye zhing ma las byung ba ji lta ba bzhin du/ mi dge ba byed pa dang / dge ba byed pa dang / lus dang ngag dang yid kyis nyes par skyod par byed pa dang / lus dang ngag dang yid kyis legs par spyod par byed pa dang / tshe 'di la mi 'dod pa dang / 'dod pa'i 'bras bu myong ba dang / tshe phyi ma la ngan song rnams su skye ba dang / bde 'gro mtho ris kyi 'jig rten du lha rnams kyi nang du skye ba dang / gnas gsum po rnams mngon du gyur pa las gang yang rung gang nas kyang rung ste/ ma'i mngal du skye ba dang / 'jig rten pa'i bzo'i gnas dang / las kyi gnas la mkhas pa'am/ mi mkhas pa'am/ rgyal po'am/ de'i tshal za'am/ mkhas shing sgrub phod pa'am/ rgyal po'i rim gro par spus btu ba'am/ spus btu ba ma yin pa'am/ na ba'i chos can nam/ rga ba'i chos can nam/ 'chi ba'i chos can nam/ tshangs pa'i gnas pa rnams bsgoms nas tshangs pa'i 'jig rten du skye ba'am/ byang chub kyi phyogs kyi chos rnams sgom pa'am/ mi sgom pa'am/ nyan thos kyi byang chub dang / rang sangs rgyas kyi byang chub dang / bla na med pa yang dag par rdzogs pa'i byang chub mngon par rdzogs par 'tshang rgya ba'am/ mngon par rdzogs par 'tshang mi rgya ba yang de dang 'dra'o/ /ci skye gnas kho nas khyad par du 'phags pa gang yin pa de mchog yin pa'am/ 'on te thos pa dang tshul khrims kyis kyang 'dod/ gal te skye gnas kho nas 'dod na ni/ des na mchod sbyin la thos pa gtso bo dang / tshul khrims gtso bo gang yin pa de tshad mar yongs su gzung ngo zhes byar mi rung ngo / /gal te thos pa'am tshul khrims kyis 'dod na ni/ des na bram ze rnams ni rigs kyi mchog go/ /rigs gzhan ni dma' ba yin no zhes byar mi rung ngo / /de ltar na skye gnas dang / las dang / skye ba dang / bzo dang / las kyi gnas dang / bdag po dang / des spus btu ba dang / /tshangs pa'i gnas dang / byang chub kyi phyogs bsgom pa dang / byang chub rtogs pa dang / thos pa dang / tshul khrims kyi khyad par gyis kyang mi rung ste/ de bas na smra ba 'di yang rigs pas bskyed pa ma yin no/ /dag par smra ba gang zhe na/ 'di ltar 'di na dge sbyong ngam bram ze la la/ gang gi phyir bdag grol ba yin la/ sems la yang dbang thob pa dang / rnal 'byor la yang dbang thob pas lha'i 'dod pa'i yon tan lnga 'byor cing ldan te/ rtse zhing dga' la dga' mgur spyod kyang / de tshe 'di nyid la mya ngan las 'das pa thob pa'i dag pas dag par 'gyur ro zhes bya ba dang / gang gi phyir 'dod pa rnams las dben pa sdig pa mi dge ba'i chos rnams las dben la/ rtog pa dang bcas dpyod pa dang bcas shing dben pa las skyes pa'i dga' ba dang bde ba can bsam gtan dang po bsgrubs te gnas pa dang / bsam gtan bzhi pa'i bar du bsgrubs te gnas pa dang / de tshe 'di nyid la mya ngan las 'das pa mchog thob pa'i dag pas dag par 'gyur ro zhes de ltar lta zhing / de skad smra ba lta bu dang / 'di ltar 'di na la la gang chu klung mdzes ldan du khrus byed pa de'i sgrib pa thams cad sol bar 'gyur ro/ /mdzes ldan ji lta ba bzhin du chu klung lag sbyin dang / ga ya dang / tshig ldan dang / gang gA yang de dang 'dra'o zhes de ltar lta zhing de skad smra ba lta bu ste/ de der chus khrus byas pas dag par 'dzin pa dang / 'di ltar 'di na kha cig khyi'i brtul zhugs kyis dag par 'dzin pa dag ba lang gi brtul zhugs dang / 'bru mar dang sre mog gi brtul zhugs dang / gcer bu'i brtul zhugs dang / thal ba'i brtul zhugs dang / brtul zhugs drag po dang / brtul zhugs mthar thug pa dang / de lta bu dang mthun pa dag gi brtul zhugs yang dag par blangs pa yang dag pa 'dzin pa ste/ 'di lta ste/ tshe 'di nyid la mya ngan las 'da' bar smra ba rnams dang / chus dag par 'gyur ba la sogs par smra ba rnams lta bu'o/ /ci'i phyir de ltar lta zhing de skad smra bar byed ce na/ lung dang rigs pas byed de/ lung ni snga ma bzhin no/ /rigs pa gang zhe na/ 'di ltar 'di na la la rtog ge pa yin te/ zhes bya ba nas rgyas par bya ste/ de thams cad du bdag po dang / dbang thob nas/ 'dod pa'i dbang phyug dang / rnal 'byor gyi dbang phyug yin no snyam ste/ bdag po dang / dbang de yang yang dag pa ji lta ba bzhin du mi shes so/ /'di ltar 'di na la la nyes pa byas pa las nyes pa las thar pa bzhin du/ bdag nyid chad pas bcad na bdag nyid sdig pa las rnam par thar bar 'gyur bar lta ba lta bu'o/ /de la 'di skad ces brjod par bya ste/ ci 'dod pa'i yon tan lngas rtse ba gang yin pa de/ 'dod pa'i 'dod chags dang bral ba'am/ 'on te 'dod chags dang bral ba ma yin par 'dod/ gal te 'dod chags dang bral ba yin na ni/ rtse zhing dga' la dga' mgur spyod do zhes byar mi rung ngo / /gal te 'dod chags dang bral ba ma yin na ni/ grol lo/ /dag go zhes byar mi rung ngo / /ci bsam gtan bzhi pa'i bar du bsgrubs te gnas pa gang yin pa de thams cad las/ 'dod chags dang bral ba'am/ 'on te 'dod chags dang bral ba ma yin par 'dod/ /gal te thams cad las 'dod chags dang bral ba yin na ni/ bsam gtan bzhi pa'i bar du bsgrubs te gnas so zhes byar mi rung ngo / /gal te thams cad las 'dod chags dang bral ba ma yin na ni/ grol lo/ /dag go zhes byar mi rung ngo / /de la 'di skad ces kyang brjod par bya ste/ ci nang gi dag pa'am/ 'on te phyi rol gyi dag par 'dod/ gal te nang gi dag par 'dod na ni/ des na chu ngogs su khrus byas pas rnam par dag par 'gyur ro zhes byar mi rung ngo / /gal te phyi rol gyi dag par 'dod na ni/ des na 'dod chags dang bcas zhe sdang dang bcas gti mug dang bcas bzhin du/ phyi rol gyi dri ma bsal bas rnam par dag par 'gyur zhes byar mi rung ngo / /ci dngos po gtsang ma zhig blangs pas dag par 'gyur ba'am/ 'on te dngos po mi gtsang ba zhig blangs pas dag par 'gyur bar 'dod/ gal te dngos po gtsang ma zhig blangs pas dag par 'dod na ni/ des na khyi la sogs pa ni 'jig rten na mi gtsang bar bgrang ba yin te/ de blangs pas dag par 'gyur zhes byar mi rung ngo / /gal te dngos po mi gtsang ba blangs pas dag par 'dod na ni/ des na rang bzhin gyis mi gtsang ba'i dngos po gtsang mar 'gyur zhes byar mi rung ngo / /ci khyi la sogs pa'i brtul zhugs blangs pas na/ lus kyi nyes par spyod pa la sogs pa log par bsgrubs pas dag par 'gyur ba'am/ 'on te lus kyi legs par spyad pa la sogs par yang dag par bsgrubs pas dag par 'dod/ gal te log par bsgrubs pas dag par 'gyur na ni/ des na log par yang sgrub la/ dag par yang 'gyur zhes byar mi rung ngo / /gal te yang dag par bsgrubs pas dag par 'gyur na ni/ des na khyi la sogs pa'i brtul zhugs don med par 'gyur te/ des dag par 'gyur zhes byar mi rung ngo / /de ltar na 'dod chags dang bral ba dang / 'dod chags dang bral ba ma yin pa dang / nang gi dang / phyi rol gyi dang / mi gtsang ba dang / gtsang ma blangs pa dang / log pa dang / yang dag par bsgrubs pas kyang mi rung ste/ de bas na smra ba 'di yang rigs pas bskyed pa ma yin no/ /dge mtshan dang bkra shis su smra ba gang zhe na/ 'di ltar 'di na dge sbyong ngam bram ze la la/ 'di ltar lta zhing 'di skad smra ste/ nyi ma dang / zla ba dang / gza' dang / rgyu skar dang / tshes grangs mi mthun pa las bsam pa rnams 'grub par mi 'gyur la/ de dag mthun pa las bsam pa 'grub par 'gyur snyam nas/ de dag de'i phyir nyi ma la sogs pa la mchod pa byed cing / sbyin sreg dang / bzlas brjod dang / rtswa dar ba dang / bum pa gang ba dang / bil ba'i 'bras bu dang / dung la sogs pa nye bar 'jog ste/ 'di lta ste/ rtsis byed pa dag lta bu'o/ /ci'i phyir de ltar lta zhing de skad smra par byed ce na/ lung dang rigs pas byed de/ lung ni snga ma bzhin no/ /rigs pa gang zhe na/ 'di ltar 'di na la la rtog ge pa yin te zhes bya ba yang snga ma bzhin no/ /de yang 'jig rten pa'i bsam gtan rnams thob pa/ skye ba'i tshogs chen pos dgra bcom par bkur ba yin te/ de la bdag nyid 'byor par 'dod pa dang / rgyas par 'dod pa rnams kyis der dri ba dris na/ rten cing 'brel par 'byung ba'i las kyi tshul yang dag par ji lta ba bzhin du mi shes nas/ nyi ma dang / zla ba dang / gza' dang / rgyu skar dang / tshes grangs kun tu spyod pas/ sems can rnams la dge ba dang / mi dge ba'i las rnams kyi 'bras bu rnam par smin par mthong nas/ des de las gyur pa der 'dod pa'i sems can rnams la yongs su ston cing rnam par gzhag go / de la 'di skad ces brjod par bya ste/ ci nyi ma dang / zla ba dang / gza' dang / rgyu skar dang / tshes grangs gyis 'byor pa dang / rgud par byas pa'am/ 'on te dge ba dang mi dge ba'i las kyis byas par 'dod/ gal te nyi ma la sogs pas byas na ni/ des ni bsod nams kyi las rnams dang / bsod nams ma yin pa'i las rnams kyi 'byor pa dang rgud pa ji srid 'tsho'i bar du rjes su 'jug par snang bas mi rung ngo / /gal te dge ba dang mi dge ba'i las kyis byas na ni/ des na nyi ma la sogs pas byas zhes byar mi rung ste/ de ltar na nyi ma la sogs pas byas pa dang / dge ba dang mi dge ba'i las kyis byas pas kyang mi rung ngo / /de bas na smra ba 'di yang rigs pas byas pa ma yin no/ /de ltar na pha rol smra ba bcu drug po 'di dag ni brtag pa'i rigs pa mngon par bsgrub pa rnam pa gnyis kyis nye bar brtags na/ rnam pa thams cad du mi rung ngo / /de la kun nas nyon mongs par gdags pa rnam par gzhag pa gang zhe na/ de ni kun nas nyon mongs pa gsum du rig par bya'o/ /de yang gang zhe na/ nyon mongs pa'i kun nas nyon mongs pa dang / las kyi kun nas nyon mongs pa dang / skye ba'i kun nas nyon mongs pa'o/ /nyon mongs pa'i kun nas nyon mongs pa gang zhe na/ sdom ni/ ngo bo nyid dang rab dbye dang / /rgyu dang gnas skabs sgo rnams dang / /lci ba dang ni phyin ci log/ /rnam grangs dang ni nyes dmigs so/ /nyon mongs pa'i kun nas nyon mongs pa'i ngo bo nyid kyang rig par bya'o/ /rab tu dbye ba dang / rgyu dang / gnas skabs dang / sgo dang / che ba dang / phyin ci log tu bsdus pa dang / rnam grangs dang / nyes dmigs kyang rig par bya'o/ /nyon mongs pa rnams kyi ngo bo nyid gang zhe na/ chos gang skye ba na bdag nyid kyang rab tu ma zhi ba'i mtshan nyid du skye la/ de skyes pas 'du byed kyi rgyud kyang rab tu ma zhi ba kho nar 'jug pa ste/ nyon mongs pa'i ngo bo nyid ni de kho nar zad par rig par bya'o/ /nyon mongs pa rnams kyi rab tu dbye ba gang zhe na/ nyon mongs pa rnam pa gcig kyang yod de kun nas nyon mongs pa'i don to/ /rnam pa gnyis kyang yod de mthong bas spang bar bya ba dang / bsgom pas spang bar bya ba'o / /rnam pa gsum yang yod de/ 'dod pa dang ldan pa dang / gzugs dang ldan pa dang / gzugs med pa dang ldan pa'o/ /rnam pa bzhi yang yod de/ 'dod pa dang ldan pa'i lung du bstan pa dang / lung du ma bstan pa dang / gzugs dang ldan pa'i lung du ma bstan pa dang / gzugs med pa dang ldan pa'i lung du ma bstan pa'o/ /rnam pa lnga yang yod do/ /sdug bsngal mthong bas spang bar bya ba dang / kun 'byung ba mthong bas spang bar bya ba dang / 'gog pa mthong bas spang bar bya ba dang / lam mthong bas spang bar bya ba dang / bsgom pas spang bar bya ba'o / /rnam pa drug ni 'dod chags dang / khong khro ba dang / nga rgyal dang / ma rig pa dang / lta ba dang / the tshom mo/ rnam pa bdun ni/ bag la nyal bdun te/ 'dod pa'i 'dod chags kyi bag la nyal ba dang / khong khro ba'i bag la nyal ba dang / srid pa'i 'dod chags kyi bag la nyal ba dang / nga rgyal gyi bag la nyal ba dang / ma rig pa'i bag la nyal ba dang / lta ba'i bag la nyal ba dang / the tshom gyi bag la nyal ba'o/ /rnam pa brgyad ni/ 'dod chags dang / khong khro ba dang / nga rgyal dang / ma rig pa dang / the tshom dang / lta ba dang / mchog tu 'dzin pa gnyis so/ /rnam pa dgu ni/ kun tu sbyor ba dgu ste/ rjes su chags pa'i kun tu sbyor ba dang / khong khro ba'i kun tu sbyor ba dang / nga rgyal gyi kun tu sbyor ba dang / ma rig pa'i kun tu sbyor ba dang / lta ba'i kun tu sbyor ba dang / mchog tu 'dzin pa'i kun tu sbyor ba dang / the tshom gyi kun tu sbyor ba dang / phrag dog gi kun tu sbyor ba dang / ser sna'i kun tu sbyor ba'o/ /rnam pa bcu ni 'jig tshogs la lta ba dang / mthar 'dzin par lta ba dang / log par lta ba dang / lta ba mchog tu 'dzin pa dang / tshul khrims dang / brtul zhugs mchog tu 'dzin pa dang / 'dod chags dang / khong khro ba dang / nga rgyal dang / ma rig pa dang / the tshom mo/ /nyon mongs pa rnam pa bcu po 'di dag nyid bden pa rnam pa bcu gnyis la log par bsgrub pa rnam par gzhag pa las/ nyon mongs pa brgya nyi shu rtsa brgyad du 'gyur te/ bden pa rnam pa bcu gnyis gang zhe na/ 'dod pa na spyod pa'i sdug bsngal gyi bden pa dang / kun 'byung ba'i bden pa dang / gzugs na spyod pa'i sdug bsngal gyi bden pa dang / kun 'byung gi bden pa dang / gzugs med pa na spyod pa'i sdug bsngal gyi bden pa dang / kun 'byung ba'i bden pa dang / 'dod pa na spyod pa'i dbang gis de yongs su shes pa'i 'bras bu dang / de yongs su shes pas rab tu phye ba'i 'gog pa'i bden pa dang / lam gyi bden pa dang / gzugs na spyod pa'i dbang gis de yongs su shes pa'i 'bras bu dang / de yongs su shes pas rab tu phye ba'i 'gog pa'i bden ba dang / lam gyi bden pa dang / gzugs med pa na spyod pa'i dbang gis de yongs su shes pa'i 'bras bu dang / de yongs su shes pas rab tu phye ba'i 'gog pa'i bden pa dang / lam gyi bden pa'o/ /de la 'dod pa na spyod pa'i sdug bsngal gyi bden pa dang / kun 'byung ba'i bden pa dang / 'dod pa na spyod pa'i dbang gis 'gog pa'i bden pa dang / lam gyi bden pa de dag la ni/ nyon mongs pa bcu po thams cad log par bsgrub po/ / gzugs na spyod pa'i sdug bsngal gyi bden pa dang / kun 'byung ba'i bden pa dang / de'i dbang gis 'gog pa'i bden pa dang / lam gyi bden pa gang yin pa de dag la ni/ nyon mongs pa bcu po de dag nyid las khong khro ba ma gtogs pa rnams log par bsgrub po/ /gzugs na spyod pa ji lta ba bzhin du/ gzugs med pa na spyod pa yang de dang 'dra'o/ /'dod pa na spyod pa'i gnyen po bsgoms pa la ni nyon mongs pa drug log par bsgrub ste/ log par lta ba dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang / the tshom ma gtogs pa rnams so/ /de bzhin du gzugs na spyod pa'i gnyen po bsgoms pa la ni/ nyon mongs pa lnga log par bsgrub ste/ drug po de dag nyid la khong khro ba ma gtogs pa rnams so/ /gzugs na spyod pa'i gnyen po la ji lta ba bzhin du/ gzugs med pa na spyod pa'i gnyen po la yang de dang 'dra'o/ /log par bsgrub pa ji lta ba bzhin du sgrib pa yang de dang 'dra'o/ /de la 'jig tshogs la lta ba gang zhe na/ skyes bu dam pa ma yin pa la brten pa dang / dam pa'i chos ma yin pa thos pa dang / tshul bzhin ma yin pa yid la byed pa dang / gzhan yang rang bzhin gyis dran pa brjed pa la brten nas/ nye bar lan pa'i phung po lnga la bdag gam/ bdag gir yang dag par rjes su lta ba brtags kyang rung ma brtags kyang rung ba'i shes rab nyon mongs pa can gang yin pa'o/ /mthar 'dzin par lta ba gang zhe na/ skyes bu dam pa ma yin pa la brten pa dang / dam pa'i chos ma yin pa thos pa dang / tshul bzhin ma yin pa yid la byed pa dang / gzhan yang rang bzhin gyis dran pa brjed pa la brten nas/ nye bar len pa'i phung po lnga la bdag tu bzung ste/ rtag pa'am chad par yang dag par rjes su lta ba brtags kyang rung / ma brtags kyang rung ba'i shes rab nyon mongs pa can gang yin pa'o/ /log par lta ba gang zhe na/ skyes bu dam pa ma yin pa la brten pa dang / dam pa'i chos ma yin pa thos pa dang / tshul bzhin ma yin pa yid la byed pa la brten nas/ rgyu'am 'bras bu'am byed pa la skur te/ yod pa'i dngos po 'jig pa dngos po la brtags pa kho na'i shes rab nyon mongs pa can gang yin pa'o/ /lta ba mchog tu 'dzin pa gang zhe na/ skyes bu dam pa ma yin pa la brten pa dang / dam pa'i chos ma yin pa thos pa dang / tshul bzhin ma yin pa yid la byed pa la brten nas/ 'jig tshogs la lta ba dang / mthar 'dzin par lta ba dang / log par lta ba rten dang bcas pa'o / /dmigs pa dang bcas pa/ gzhi dang bcas pa/ lhan cig 'byung ba dang / mtshungs par ldan pa dang bcas pa dang / pha rol gyi lta ba la yang brten te/ mchog dang / gtso bo dang / khyad par du 'phags pa dang / dam par yang dag par rjes su lta ba/ brtags pa kho na'i shes rab nyon mongs ba can gang yin pa'o/ /tshul khrims dang / brtul zhugs mchog tu 'dzin pa gang zhe na/ skyes bu dam pa ma yin pa la brten pa dang / dam pa'i chos ma yin pa thos pa dang / tshul bzhin ma yin pa yid la byed pa la brten nas/ lta ba de nyid gang yin pa dang / lta ba de'i rjes su spyod pa tshul khrims sam/ brtul zhugs kyang rung ste/ rten dang bcas pa/ dmigs pa dang bcas pa/ gzhi dang bcas pa/ lhan cig 'byung ba dang mtshungs par ldan pa dang bcas pa la dag pa dang grol ba dang / nges par 'byung bar yang dag par rjes su lta ba/ brtags pa kho na'i shes rab nyon mongs ba can gang yin pa'o/ /'dod chags gang zhe na/ skyes bu dam pa ma yin pa la brten pa dang / dam pa'i chos ma yin pa thos pa dang / tshul bzhin ma yin pa yid la byed pa dang / rang bzhin gyis dran pa brjed pa la brten nas/ brtags kyang rung ste/ phyi rol gyi'am nang gi sdug pa'i yul la lhag par zhen pa'o/ /khong khro ba gang zhe na/ skyes bu dam pa ma yin pa la brten pa dang / dam pa'i chos ma yin pa thos pa dang / tshul bzhin ma yin pa yid la byed pa dang / rang bzhin gyis dran pa brjed pa la brten nas/ brtags kyang rung ma brtags kyang rung ste/ phyi rol gyi'am nang gi mi sdug pa'i yul la khong khro ba gang yin pa'o/ /nga rgyal gang zhe na/ skyes bu dam pa ma yin pa la brten pa dang / dam pa'i chos ma yin pa thos pa dang / tshul bzhin ma yin pa yid la byed pa dang / rang bzhin gyis dran pa brjed pa la brten nas/ brtags kyang rung ma brtags kyang rung ste/ phyi rol gyi'am nang gi mtho ba dang / dma' ba dang / ngan pa dang / bzang po la mthor sems pa gang yin pa'o/ /ma rig pa gang zhe na/ skyes bu dam pa ma yin pa la brten pa dang / dam pa'i chos ma yin pa thos pa dang / tshul bzhin ma yin pa yid la byed pa dang / rang bzhin gyis dran pa brjod pa la brten nas/ shes bya'i dngos po la brtags kyang rung ma brtags kyang rung ba'i nyon mongs pa can gyi mi shes pa gang yin pa'o/ /the tshom gang zhe na/ skyes bu dam pa ma yin pa la brten pa dang / dam pa'i chos ma yin pa thos pa dang / tshul bzhin ma yin pa yid la byed pa la brten nas/ shes bya'i dngos po la brtags pa la/ kho na'i yid gnyis za ba gang yin pa'o/ /nyon mongs pa rnams kyi rgyu gang zhe na/ rgyu ni rnam pa drug ste/ rten dang / dmigs pa dang / 'du 'dzi dang / bshad pa dang / goms pa dang / yid la byed pa las kyang nyon mongs pa skye'o/ de la rten ni bag la nyal ba las skye ba gang yin pa'o/ /de la dmigs pa ni nyon mongs pa'i gnas lta bu'i yul snang bar gyur pa gang yin pa'o/ de la 'du 'dzi ni skyes bu dam pa ma yin pa rnams kyi rjes su slob pa gang yin pa'o/ /de la bshad pa ni dam pa'i chos ma yin pa thos pa gang yin pa'o/ /de la goms pa ni sngon 'dris pa'i stobs bskyed pa gang yin pa'o/ /de la yid la byed pa ni tshul bzhin ma yin pa yid la byed pa las skye ba gang yin pa'o/ /nyon mongs pa rnams kyi gnas skabs su yod ce na/ mdor bsdu na rnam pa bdun te/ bag la nyal gyi gnas skabs dang / kun nas dkris pa'i gnas skabs dang / kun nas brtags pa'i gnas skabs dang / lhan cig skyes pa'i gnas skabs dang / chung ngu'i gnas skabs dang / 'bring gi gnas skabs dang / chen po'i gnas skabs so/ /de la rgyu rnam pa gnyis kyis ni nyon mongs pa'i bag la nyal phra rgyas su 'gyur te/ sa bon gyi rjes su 'brel ba dang / de'i bdag po'i dngos pos so/ /sgo dus ni nyon mongs pas kun nas nyon mongs par 'gyur zhe na/ mdor bsdu na kun nas dkris pa'i sgo dang / bag la nyal gyi sgo ste sgo rnam pa gnyis kyis so/ /kun nas dkris pa'i sgos ji ltar kun nas nyon mongs par 'gyur zhe na/ rnam pa lngas te/ rab tu ma zhi bar gnas pa dang / dge ba'i bar du gcod pa dang / ngan song gi rgyu nyes par spyad pa kun nas slong ba dang / tshe 'di nyid la nyams par 'gyur ba yongs su 'dzin pa dang / skye ba la sogs pa'i sdug bsngal 'grub pas so/ /bag la nyal gyi sgos ji ltar kun nas nyon mongs par 'gyur na/ kun nas dkris pa'i rten byas pa dang / skye ba la sogs pa'i sdug bsngal 'grub par byed pas so/ /gzhan yang sgo bdun gyis nyon mongs pa thams cad mthong ba dang / bsgom pa la bgegs byed cing / sgrib par byed par gyur par rig par bya'o / /'di lta ste/ log par rtogs pa dang / ma rtogs pa dang / rtogs pa yang ma yin ma rtogs pa yang ma yin pa dang / log par rtogs pas log par sgrub pa dang / de'i gzhi'i gnas rten dang / de 'jigs pa bskyed pa dang / rang bzhin gyis kun tu spyod pa'o// //bam po brgyad pa/ nyon mongs pa che ba'i mtshan nyid dang / drag pa'i mtshan nyid dang / lci ba'i mtshan nyid ji ltar rig par bya zhe na/ mdor bsdu na rnam pa drug gis te/ ltung ba dang / skye ba dang / rgyud dang / gzhi dang / las kun nas slong ba dang / mthar gyur pas so/ /de la ltung ba ni nyon mongs pa'i kun nas dkris pa gang gis ltung ba ma lus pa 'byung bar 'gyur ro/ /de la skye ba ni 'dod pa na spyod pa'am/ ngan song du 'gyur ba gang yin pa'o/ /de la rgyud ni lang tsho la bab cing dbang po yongs su smin la/ 'dod chags la sogs pa spyod pa rnams dang / yongs su mya ngan las 'da' ba'i chos can ma yin pa rnams kyi gang yin pa'o/ /de las gzhi ni bla ma'i gnas la dmigs pa dang / yon tan gyi gnas la dmigs pa dang / 'jug par bya ba ma yin pa'i gnas la dmigs pa'o/ /de la las kun nas slong ba ni/ nyon mongs pa'i kun nas dkris pa gang gis zil gyis non cing sems yongs su zin nas/ lus dang ngag gi las kun nas slong ba'o/ /de la mthar gyur pa ni ngo bo nyid kyis shas che ba'i rnam par bsdus pa gang yin pa ste/ de ni thog mar gnyen po chung ngus spong bar 'gyur ro/ /phyin ci log ni rnam pa bdun po 'di dag yin te/ 'di lta ste/ 'du shes phyin ci log dang / lta ba phyin ci log dang / sems phyin ci log dang / mi rtag pa la rtag go snyam pa'i phyin ci log dang / sdug bsngal la bde'o snyam pa'i phyin ci log dang / mi gtsang ba la gtsang ngo snyam pa'i phyin ci log dang / bdag med pa la bdag go snyam pa'i phyin ci log go/ /'du shes phyin ci log gang zhe na/ mi rtag pa la rtag go snyam pa dang / sdug bsngal ba la bde'o snyam pa dang / mi gtsang ba la gtsang ngo snyam pa dang / bdag med pa la bdag go snyam pa'i 'du shes kyi yongs su rtog pa gang yin pa'o/ / lta ba phyin ci log pa gang zhe na/ 'du shes kyi yongs su rtog pa de nyid la/ de bzhin du bzod pa dang / 'dod pa dang / rnam par 'jog pa dang / mngon par zhen pa gang yin pa'o/ /sems phyin ci log pa gang zhe na/ mngon par zhen pa de nyid la de bzhin du 'dod chags la sogs pas kun nas nyon mongs pa gang yin pa'o/ /de la nyon mongs pa rnams ni rnam pa gsum du rig par bya ste/ nyon mongs pa la phyin ci log gi rtsa ba yang yod do/ / phyin ci log gi rgyu mthun pa yang yod do/ /de la phyin ci log gi rtsa ba ni ma rig pa'o/ /phyin ci log ni 'jig tshogs la lta ba dang / mthar 'dzin par lta ba'i phyogs gcig dang / lta ba mchog tu 'dzin pa dang / tshul khrims dang brtul zhugs mchog tu 'dzin pa dang / 'dod chags so/ /phyin ci log gi rgyu mthun pa ni/ log par lta ba dang / mthar 'dzin pa'i lta ba'i phyogs gcig dang / khong khro ba dang / nga rgyal dang / the tshom mo/ /de la 'jig tshogs la lta ba ni/ bdag med pa la bdag go snyam du phyin ci log pa'o/ /mthar 'dzin par lta ba'i phyogs gcig ni/ mi rtag pa la rtag go snyam du phyin ci log pa'o/ /lta ba mchog tu 'dzin pa ni mi gtsang ba la gtsang ngo snyam du sems phyin ci log pa'o/ /tshul khrims dang brtul zhugs mchog tu 'dzin pa ni/ sdug bsngal la bde'o snyam du phyin ci log pa'o/ /'dod chags ni mi gtsang ba la gtsang ngo snyam du phyin ci log pa dang / sdug bsngal ba la bde ba'o snyam du phyin ci log pa gnyis ka yang yin no/ / nyon mongs pa rnams kyi rnam grangs gang zhe na/ rnam grangs mang po ste/ 'di lta ste/ kun tu sbyor ba rnams dang / 'ching ba rnams dang / bag la nyal ba rnams dang / nye ba'i nyon mongs pa rnams dang / kun nas dkris pa rnams dang / chu bo rnams dang / sbyor ba rnams dang / nye bar len pa rnams dang / mdud pa rnams dang / sgrib pa rnams dang / tha ba rnams dang / dri ma rnams dang / sdig pa rnams dang / zug rngu rnams dang / yongs 'dzin rnams dang / rtsa ba rnams dang / nyes par spyod pa rnams dang / zag [(]ba [,]pa [)]rnams dang / phongs pa rnams dang / yongs su gdung ba rnams dang / 'khrug pa rnams dang / 'thab pa rnams dang / me rnams dang / rims nad rnams dang / nags sbyor rnams dang / gegs rnams dang / de lta bu dang mthun pa rnams ni nyon mongs pa'i rnam grangs so/ /de la sdug bsngal kun tu sbyor bar byed pas na/ kun tu sbyor ba rnams so/ /dge ba'i spyod pa la 'dod dgur mi byed pas na 'ching ba rnams so/ /'jig rten pa'i yar 'phel ba thams cad kyi sa bon dang ldan pas na bag la nyal rnams so/ /phyin ci log rnams kyis sems nye bar nyon mongs par byed pas na nye ba'i nyon mongs pa rnams so/ /yang dang yang rgyun mi 'chad par kun tu 'byung bas na/ kun tu dkris pa rnams so/ /gting dpag dka' ba dang / rgyun phyogs su khyer bar byed pas na chu bo rnams so/ /log par sgrub pa'i thabs yin bas na sbyor ba rnams so/ /lus kyi rgyun nye bar len bar byed pas na/ nye bar len pa rnams so/ /dgrol dka' bas na mdud pa rnams so/ /de kho na'i don la sgrib g.yogs byed pas na sgrib pa rnams so/ /dge ba'i lo thog gi zhing du mar gyur pas na tha ba rnams so/ /ngo bo nyid kyis kun nas nyon mongs pa can du gyur pas na dri ma rnams so/ /rtag tu gnod par byed pas na sdig pa rnams so/ /rab tu ma zhi ba'i mtshan nyid yin pa dang / ring du song bas na/ zug rngu rnams so/ /phung po yongs su 'dzin pa'i rgyu byed pas na/ yongs 'dzin rnams so/ /mi dge ba'i rten du gyur pas na rtsa ba rnams so/ /log par sgrub pa'i ngo bo nyid yin pas na nyes par spyod pa rnams so/ /sems rnam par g.yengs par byed pas na zag pa rnams so/ /longs spyod kyis chog mi shes pas na phongs pa rnams so/ /'dod pas phongs par byed pas na yongs su gdung ba rnams so/ /rgud pa 'dren par byed pas na 'khrug pa rnams so/ /'thab rtsod dang / mtshang 'bru ba dang / rtsod pa dang / 'gyed pa'i rgyur gyur pas na/ 'thab pa rnams so/ /dge ba'i rtsa ba bsags so cog gi bud shing sreg par byed pas na me rnams so/ /nad chen por gyur pas na rims nad rnams so/ /lus rnam pa sna tshogs kyi shing sgrub par byed pas na nags sbyor rnams so/ /'dod pa'i yon tan la chags par byed pa dang / 'jig rten las 'das pa'i chos 'thob pa'i bar chad byed pas na gegs rnams te/ de dag ni nyon mongs pa thams cad kyi rnam grangs yin no/ /bcom ldan 'das kyis gtso bor nyon mongs pa de dang de dag rnam grangs de dang der gzhag go/ /kun tu sbyor ba rnams zhes bya ba ni kun tu sbyor ba dgu ste/ rjes su chags pa'i kun tu sbyor ba dang / rgyas par snga ma bzhin no/ /'ching ba rnams zhes bya ba ni 'ching ba gsum ste/ 'dod chags dang zhe sdang dang / gti mug rnams so/ /bag la nyal zhes bya ba ni/ bag la nyal bdun te/ 'dod pa'i 'dod chags kyi bag la nyal ba dang / rgyas par snga ma bzhin no/ /nye ba'i nyon mongs pa rnams zhes bya ba ni/ nye ba'i nyon mongs pa gsum ste/ 'dod chags dang / zhe sdang dang / gti mug rnams so/ /kun nas dkris pa rnams zhes bya ba ni kun nas dkris pa brgyad de/ ngo tsha med pa dang / khrel med pa dang / rmugs pa dang / gnyid dang / rgod pa dang / 'gyod pa dang / phrag dog dang / ser sna'o/ /chu bo rnams zhes bya ba ni chu bo bzhi ste/ 'dod pa'i chu bo dang / srid pa'i chu bo dang / lta ba'i chu bo dang / ma rig pa'i chu bo'o/ /chu bo rnams ji lta ba bzhin du sbyor ba rnams kyang de dang 'dra'o/ /nye bar len pa rnams zhes bya ba ni/ nye bar len pa bzhi ste/ 'dod pa'i nye bar len pa dang / lta ba'i nye bar len pa dang / tshul khrims dang brtul zhugs kyi nye bar len pa dang / bdag tu smra ba'i nye bar len pa'o/ /mdud pa rnams zhes bya ba ni mdud pa bzhi ste/ brnab sems lus kyi mdud pa dang / gnod sems dang / tshul khrims dang / brtul zhugs mchog tu 'dzin pa dang / 'di ni bden no snyam du mngon par zhen pa mchog tu 'dzin pa'i lus kyi mdud pa'o/ /sgrib pa rnams zhes bya ba ni sgrib pa lnga ste/ 'dod pa la 'dun pa'i sgrib pa dang / gnod sems dang / rmugs pa dang / gnyid dang / rgod pa dang / 'gyod pa dang / the tshom gyi sgrib pa'o/ /tha ba rnams zhes bya ba ni tha ba gsum ste/ 'dod chags dang / zhe sdang dang / gti mug go/ /tha ba rnams ji lta ba bzhin du/ dri ma rnams dang / sdig pa rnams dang / zug rngu rnams dang / yongs 'dzin dang / nyes par spyod pa rnams kyang de dang 'dra'o/ /rtsa ba rnams zhes bya ba ni rtsa ba gsum ste/ chags pa mi dge ba'i rtsa ba dang / zhe sdang dang / gti mug mi dge ba'i rtsa ba'o/ /zag pa rnams zhes bya ba ni zag pa gsum ste/ 'dod pa'i zag pa dang / srid pa'i zag pa dang / ma rig pa'i zag pa'o/ /phongs pa rnams zhes bya ba ni phongs pa gsum ste/ 'dod chags dang / zhe sdang dang / gti mug rnams so/ phongs pa rnams ji lta ba bzhin du yongs su gdung ba rnams dang / 'khrug pa rnams dang / 'thab pa rnams dang / me rnams dang / rims nad rnams dang / nags sbyor rnams kyang de dang 'dra'o/ /gags rnams zhes bya ba ni/ gags lnga ste/ lus la lta ba dang / 'dod pa la lta ba dang / 'dre bar gnas pa dang / mthun pa'i gtam med pa dang / chung ngu dang ngan pa tsam gyis chog par 'dzin pa'o/ /nyon mongs pa rnams kyi nyes dmigs gang zhe na/ nyes dmigs rnam pa du mar rig par bya ste/ 'di lta ste/ nyon mongs pa skye ba na thog ma nyid du sems kun nas nyon mongs par byed pa dang / dmigs pa la phyin ci log par byed pa dang / bag la nyal brten par byed pa dang / rgyu mthun pa'i 'du byed kyi rgyud 'jug par byed pa dang / bdag la gnod pa dang / pha rol la gnod pa dang / gnyi ga la gnod par 'gyur ba dang / tshe 'di dang tshe phyi ma dang tshe 'di dang phyi ma gnyi ga'i kha na ma tho ba skyed pa dang / de las skyes pa'i sems las byung ba sdug bsngal ba dang / yid mi bde ba nyams su myong bar byed pa dang / skye ba la sogs pa'i sdug bsngal 'grub par byed pa dang / mya ngan las 'das pa la rgyud thag ring bar byed pa dang / dge ba'i chos rnams las yongs su nyams par byed pa dang / longs spyod nyams par 'gyur ba dang / 'khor gyi nang du song ba na zhum pa dang / dga' ba med pa dang / mi 'jigs pa med pa dang / phyogs dang phyogs mtshams rnams su sdig pa dang bsngags pa ma yin pa grags pa dang / sgra dang tshigs su bcad par grags par 'gyur ba dang / dam pa rnams kyis smad par 'gyur ba dang / 'gyod bzhin du 'chi ba'i dus byed pa dang / lus zhig pa'i 'og tu ngan song ngan 'gro log par ltung ba sems can dmyal ba rnams su skye ba dang / bdag gi don thob par mi 'gyur ba'o/ /las kyi kun nas nyon mongs pa gang zhe na/ sdom ni/ ngo bo nyid dang rab dbye dang / /rgyu dang gnas skabs sgo rnams dang / /lci ba dang ni phyin ci log /rnam grangs dang ni skyon nyid do/ /las rnams kyi ngo bo nyid kyang rig par bya'o/ /rab tu dbye ba dang / rgyu dang gnas skabs dang / sgo dang / lci ba dang / phyin ci log dang / rnam grangs dang / nyes dmigs kyang rig par bya'o/ /las kyi ngo bo nyid gang zhe na/ chos gang skye ba na mngon par 'du byed pa'i mtshan nyid kyang skye la/ de skyes pas de'i rjes la lus kyi mngon par 'du byed pa dang / ngag gi mngon par 'du byed pa 'jug par 'gyur te/ 'di ni las kyi ngo bo nyid ces bya'o/ /las kyi rab tu dbye ba gang zhe na/ rnam pa gnyis su blta bar bya ste/ gang zag gi mtshan nyid kyi rab tu dbye ba dang / chos kyi mtshan nyid kyi rab tu dbye ba'o/ /de dag kyang dge ba dang / mi dge ba bcu'i las kyi lam rnams te/ srog gcod pa dang / srog gcod pa spangs pa dang / ma byin par len pa dang / ma byin par len pa spangs pa dang / 'dod pas log par g.yem pa dang / 'dod pa la log par g.yem pa spangs pa dang / brdzun du smra ba dang / brdzun du smra ba spangs pa dang / phra ma dang / phra ma spangs pa dang / tshig rtsub po dang / tshig rtsub po spangs pa dang / tshig kyal pa dang / tshig kyal pa spangs pa dang / brnab sems dang / brnab sems spangs pa dang / gnod sems dang gnod sems spangs pa dang / log par lta ba dang / log par lta ba spangs pa'o/ /de la gang zag gi mtshan nyid rnam par gzhag pa ni/ srog gcod par byed pa yin zhes rgyas par ji skad gsungs pa lta bu ste/ mdo las ji skad 'byung ba bzhin no/ /de la srog gcod par byed pa yin zhes bya ba 'di ni bstan pa'i tshig go/ /drag po zhes bya ba ni gsod pa dang / rnam par 'tshe ba'i sems nye bar gnas pa'i phyir ro/ /lag pa khrag can zhes bya ba ni de gsad pa sgrub pa'i phyir lus gyur pa'o/ /gsad pa dang gse ba la zhen pa zhes bya ba ni/ srog dang phral nas yan lag so sor gse ste / 'tsho ba'i yo byad du byed pa'i phyir ro/ /ngo tsha med pa zhes bya ba ni bdag gi kha na ma tho ba bskyed pa'i phyir ro/ /snying rje med par zhugs par zhes bya ba ni gzhan dag la mi sdug pa bsgrub pa'i phyir ro/ /rab tu byung ba gcer bu pa zhes bya ba dag yod de/ de dag 'di skad du dpag tshad brgya tshun chad na 'khod pa'i srog chags gang yin pa de dag gi phyir bsdams pa mi bsdam pa yin no zhes zer te/ de'i gnyen por sems can thams cad la zhes gsungs so/ /yang de dag nyid 'di skad du 'di ltar shing la sogs pa phyi rol gyi dngos po rnams srog chags su gyur pa yin no zhes zer te/ de'i gnyen por ni/ srog chags 'byung po rnams la zhes gsungs te/ de ltar na spong ba'i bsod nams bzang po yang gnyen por bstan pa yin la/ spong ba'i bsod nams bzang po ma yin pa yang gnyen por bstan pa yin no/ /ji skad bstan pa'i tshig 'di dag gis ni mngon par 'du byed pas gsod pa kho na yongs su bstan to/ /tha na srog chags grog sbur yan chad kyi phyir zhes bya ba'i tshig 'dis ni bsrung bar dka' ba gsod pa yongs su bstan pa yin no/ /srog gcod pa ma spangs pa yin zhes bya ba ni nam ma spangs kyi bar du srog gcod par byed pa zhes bya ste/ rkyen dang ldan na ldang ba'i skabs yod par yongs su bstan to/ /don mdor bsdu na tshig 'di dag thams cad gyis srog gcod par byed pa'i rtags dang / srog gcod pa'i bya ba dang / srog gcod pa'i rgyu dang / srog gcod pa'i gzhi'i bya ba'i rab tu dbye ba rnams yongs su bstan pa yin no/ /gzhan yang don mdor bsdu na/ srog gcod par byed pa ji lta bu yin pa dang / srog chags ji ltar gsod pa dang / srog chags gsod pa gang gis de srog gcod par byed pa yin pa de yongs su bstan te/ 'di yang srog gcod par byed pa'i gang zag gi mtshan nyid yongs su bstan pa yin gyi srog gcod pa'i mtshan nyid ni ma yin no/ /ma byin par len par byed pa yin zhes bya ba ni bstan pa'i tshig go/ /des gzhan dag gi zhes bya ba ni gzhan gyis yongs su bzung ba'i nor dang / 'bru la sogs pa'i dngos po'o/ /grang na yod pa zhes bya ba ni de dag nyid kyi grong du gzhag pa'am bskyab pa gang yin pa'o/ /dgon pa na yod pa zhes bya ba ni de dag nyid dgon pa nas skyes pa'am/ bsdus pa'am bskyab pa gang yin pa'o/ /rku bar bgrang ba zhes bya ba ni/ ma byin pa dang / ma btang ba dang / ma spangs pa gang yin pa'o/ /len par byed ces bya ba ni bdag gir byed pa gang yin pa'o/ /ma byin par len par byed pa zhes bya ba ni brgya la yo byad med pa'i phyir bdag gir byed pa'o/ /ma byin pa la dga' ba zhes bya ba ni/ rku ba'i las de yang dag par blangs te 'dug pa'o/ ma byin pa dang / ma btang ba dang / ma spangs pa 'dod pa zhes bya ba ni gzhan gyis brkus pa bdag gir byed par 'dod pa'o/ /de la sbyin pa po bdag pos skyin pa'i tshul gyis sngar byin pa ma byin pa zhes bya'o/ /bdag pos len pa po'i phyir yongs su btang ba ma yin pa gang yin pa de ni ma btang ba zhes bya ba'o/ /bdag po nyid kyis skye bo thams cad la yongs su longs spyod pa'i phyir/ ji lta ji ltar 'dod pa bzhin du len par bya ba'i don du/ ma spangs pa gang yin pa de ni ma spangs pa zhes bya'o/ /rku ba bdag nyid yongs su sped do zhes bya ba ni ma byin par len par byed pa dang / ma byin par len pa la dga' ba'i phyir ro/ /brkam pa yongs su sped do zhes bya ba ni ma byin pa dang / ma btang ba dang / ma spangs pa 'dod pa'i phyir ro/ /ma dag pa yongs su sbed ces bya ba ni rtsod pa la pham par gyur te ma dag pa'i phyir ro/ /mi gtsang ba yongs su sbed ces bya ba ni pham par ma gyur kyang / nyes pa des dri ma can du gyur pa'i phyir ro/ /kha na ma tho ba dang bcas pa yongs su sbed ces bya ba ni/ tshe 'di dang phyi ma la mi sdug pa'i 'bras bu'i rgyu yongs su 'dzin pa'i phyir ro/ /ma byin par len pa ma spangs pa yin zhes bya ba ni srog gcod pa rnam par dbye ba bzhin du/ 'di dang de las gzhan pa'i las kyi lam rnams la yang de dang 'dra bar blta bar bya'o/ /don mdor bsdu na/ gang las brkus na ma byin par len par byed pa yin pa dang / gnas gang yin pa dang / thabs ji ltar brku ba dang / nyes pa de las skyon dang ldan par 'gyur ba 'di ni bsdus pa'i don yin no / /'di yang ma byin par len par byed pa'i gang zag gi mtshan nyid yin gyi/ ma byin par len pa'i mtshan nyid ma yin par rig par bya'o / /lhag ma rnams kyang de dang 'dra'o/ /'dod pa la log par g.yem par byed pa yin zhes bya ba ni bstan pa'i tshig go/ /gang de dag pha ma la sogs pas bsrungs zhes bya ba ni/ 'di lta ste/ pha mas bdag gi bu mo khyim thab la gtang ba'i phyir de las gzhan pa dang lhan cig tu 'khrig pa las sba ba dang srung bar byed cing / dus dus su myul ba dang / pha ma shi na yang de dang 'brel pa'i ming po'am phu nu mos bsrungs pa dang / de yang med na gnyen gyis bsrungs pa dang / de yang med na bdag nyid kyis 'di ni tsho rigs kyi cha ma yin no snyam du shes nas/ bdag nyid kyis bdag nyid bsrung ba'o / /gyos po dang / sgyug mos bsrungs pa zhes bya ba ni rang gi bu'i phyir ro/ /chad pa yod pa zhes bya ba ni rgyal po dang / bskos pas chad pa'i khrims kyis bsrungs pa'o/ /bar chad yod pa zhes bya ba ni sgo srung gis bsrungs pa'o/ /bsrungs pa de yang bag mar ma song ba la ni/ mdor bsdu na rnam pa gsum du bstan te/ bla ma dang byams pa'i mi dang / bdag nyid kyis bsrungs pas bsrung ba dang / rgyal po dang bskos pas bsrung ba dang / sgo srung gis bsrung ba'o/ /gzhan gyi chung ma yin zhes bya ba ni de nyid bag mar song ba'o/ /gzhan gyis yongs su ma bzung ba zhes bya ba ni de nyid bag mar ma song ba dang / bsrung ba rnam pa gsum gyis kyang ma bsrungs pa'o/ /des de lta bu dag la bab col du zhes bya ba ni 'khrul pa bskyed nas so/ /mthus zhes bya ba ni mi 'dod pa bzhin pha ma la sogs pa thams cad kyis mthong bar mthu dkar 'dor ba'o/ /nan gyis zhes bya ba ni mi 'dod bzhin du de dag gis ma mthong bar rku ba'o/ /'dod [(]ba[,] pa [)]dag la spyod par byed pa zhes bya ba la 'dir 'dod pa zhes bya ba'i don ni gnyis kyis gnyis spod pa yin par bstan to/ /log par spyod pa la 'jug pa zhes bya ba ni bdag gi chung ma la yang yan lag ma yin pa dang / yul ma yin pa dang / dus ma yin par byed na de dag gis kha na ma tho ba dang bcas par 'gyur ba'o/ /don mdor bsdu na/ gang la 'jug pa dang / ji ltar 'jug na 'dod pa la log par g.yem pa yin pa de yongs su bstan to/ /brdzun du smra ba yin zhes bya ba ni bstan pa'i tshig go/ /rgyal po'i pho brang 'khor zhes bya ba ni/ rgyal po'i 'o/ /bskos pa zhes bya ba ni de'i sna la gtogs pa'o/ /'khor zhes bya ba ni tshong pa'i sde tshan tha dad pa'o/ /'dus pa zhes bya ba ni de dag dang phyogs bzhi'i skye bo'i tshogs so/ /shes pa zhes bya ba de ni tha snyad rnam pa gsum gyis myong ba gang yin pa'o/ /mthong ba zhes bya ba ni mthong ba kho nas myong ba'o/ /bdag gi phyir zhes bya ba ni 'jigs pa'i phyir ram/ zang zing cung zad tsam gyi phyir ro/ /bdag gi phyir ji lta ba bzhin du gzhan gyi phyir ram/ gnyi ga'i phyir yang de dang 'dra'o/ /'jigs pa'i phyir zhes bya ba ni gsod pa dang / 'ching ba dang / chad pa dang / nyams pa dang / smad pa la sogs pas 'jigs pa'i phyir ro/ /zang zing cung zad tsam gyi phyir zhes bya ba ni nor dang / 'bru dang dbyig la sogs pa'i phyir ro/ /shes bzhin du brdzun gyi tshig smra ba zhes bya ba ni 'du shes dang / 'dod pa dang / lta ba bsgyur nas smra ba'i phyir te/ don mdor bsdu na gnas pa dang / gzhan du smra ba dang / gzhi dang / 'du shes bsgyur ba la brdzun du smra ba yin par rig par bya'o/ /phra ma can yin zhes bya ba ni bstan pa'i tshig go/ /rnam par 'byed par byed pa zhes bya ba ni dbye ba'i bsam pa dang ldan pa'i phyir ro/ /'di dag las thos nas de dag la zlos pa dang / de dag las thos nas 'di dag la zlos pa zhes bya ba ni/ dbye ba dang mthun pa'i tshig ji skad thos pa'o/ /mthun pa rnams 'byed par byed ces bya ba na mi dga' ba bskyed pas so/ /bye ba rnams mi 'dum par byed ces bya ba ni/ dga' bar 'gyur ba gcod pas so/ /mi 'dum par dga' ba yin zhes bya ba ni nyon mongs pa can gyi sems kyis mi dga' ba bskyed pa'o/ /mi 'dum par mos pa zhes bya ba ni nyon mongs pa can gyi sems kyis dga' bar 'gyur ba dang mi mthun par byed pa'o/ /mi mthun par bya ba'i tshig smra ba zhes bya ba ni/ ma thos pa'am/ gzhan la 'tshol ba ste/ don mdor bsdu na/ dbye ba'i bsam pa dang / ma bye ba dbye ba'i sbyor ba dang / bye ba mi mthun par bya ba'i sbyor ba dang / bye ba la nyon mongs pa can gyi sems yod pa dang / gzhan la 'chol ba yang yongs su bstan pa yin no/ /tshig rtsub po smra ba yin zhes pa ni bstan pa'i tshig go/ /de la tshul khrims kyi yan lag gis yongs su bzung bas ni mi g.yo ba'i ngag ces bya'o/ /tshig dang yi ge snyan cing mnyen pas na rnar snyan pa'o/ /lhag pa'i bsam pas rab tu sbyar ba dang / bcos ma ma yin pa dang / g.yos gnod par 'gyur ba med pas na yid du 'ong ba zhes bya'o/ /sgro 'dogs par byed pa dang / dus dang / tshod dang / don dang ldan pas na dga' bar byed pa'o/ /mya ngan las 'das pa'i grong khyer gyi dbang du byas pas na pho brang 'khor ba'i skad do/ /tshig dang yi ge snyan pas na snyan cing 'jebs pa'o/ /tshig dang yi ge legs par sbyar bas na rnam par gsal pa'o/ /brda phrad par byed pas na rnam par rig pa'o/ /chos dang ldan pas na mnyan par 'os pa'o/ /zang zing med pa'i sems las byung bas na mi gnas pa'o/ / tshig ran pas na mi mthun pa med pa'o/ /rgyun chags pa dang / 'jigs pa med pas na gtugs pa med pa'o/ /mi g.yo ba man chad gtugs pa med pa'i bar de dag kyang rnam pa gsum du rig par bya ste/ rnam pa gcig ni tshul khrims kyi sdom par 'dus so/ /rnam pa gsum ni yang dag par dga' bar byed pa'o/ /rnam pa lhag ma rnams ni chos ston pa ste/ phyi ma de yang rnam pa dang po ni dbang du bya ba dang ldan pa'o/ /gnyis kyis ni yi ge lnga dang ldan pa'o/ /lhag ma rnams ni sbyor ba dang ldan pa yin par rig par bya'o/ /ma 'ongs pa'i dus la brten na 'dod par bya ba yin pa'i phyir 'dod pa'o/ /'das pa'i dus la brten na 'dod par bya ba yin pa'i phyir sdug pa'o/ /da ltar gyi dus la brten dngos po dang nyams su myong bar 'dod par bya ba yin pa'i phyir dga' ba dang / yid du 'ong bar rig par bya'o/ /yang dag par dga' bar byed pa gang yin pa de ni/ skye bo mang pos 'dod pa dang / skye ba dang / dga' ba dang / yid du 'ong ba'o/ /chos ston pa gang yin pa de ni mnyam par gzhag pa'o/ /tshul khrims kyi yan lag yongs su bzung ba gang yin pa de ni 'gyod pa med pa la sogs pa'i rim gyis ting nge 'dzin du 'gyur ba'o/ /de la zher 'debs pa gang yin pa de ni zhe sdang gi dug gtong ba'i phyir pha rol la gnod pa'o/ /rtsub pa ni sdug bsngal ba'i reg pa yin pa'i phyir pha rol la rtsub pa'o/ /lhag ma rnams ni dkar po'i phyogs bzlog pa las rig par bya'o/ /tshig kyal ba can yin zhes bya ba ni bstan pa'i tshig go/ /dus gsum du tshig lnga'i dbang du byas pa ste/ log par gleng ba'i dus na dus ma yin par smra bas na dus la ma bab par smra ba'o/ /yang dag pa ma yin par smra bas na/ yang dag pa ma yin par smra ba'o/ /don dang mi ldan par smra bas na don med par smra ba'o/ /rtsub por smra bas na chos ma yin par smra ba'o/ /zhe sdang gi skabs smra bas na ma brtags par smra ba'o/ /chos log par ston pa'i dus na ma bsams shing legs par ma brtags par ston pas na ma brtags pa'i tshig smra ba yin no/ /brnyas shing nyan pa na ston pas na dus ma yin pa'o/ /snga ma dang phyi ma'i don 'brel pa med pas na ma 'brel pa'o/ /rigs pa dang mi ldan pa'i gtan tshigs ston pas na ldan par ston pa ma yin pa'o/ /'brel pa med pa'i dpe nye bar sgrub pas na dpe dang ldan pa ma yin no/ /kun nas nyon mongs pa yongs su ston pas na chos dang ldan pa ma yin no/ /bzhad gad dang / glu la sogs pas rtse ba'i dus dang / zlos gar mkhan dang / gar mkhan dang / bzhad pa dang / sgeg pa la sogs pa la lta ba'i dus na don dang ldan pa ma yin pa ste / don mdor bsdu na/ dus gsum ji skad bstan pa dag tu smra ba de ni tshig kyal par yongs su bstan to/ /brnab sems can yin zhes bya ba ni bstan pa'i tha tshig go/ /gzhan gyi nor la 'dod chags kyi dbang du byas nas/ bdag gir bya bar nges par byed pa dang du len pas na kun tu chags pa drag po can no/ /nor zhes bya ba ni zong du bya ba'i nor gyi rigs gang yin pa'o/ /yo byad ces bya ba ni yongs su longs spyad par bya ba gang yin pa'o/ /rdzas zhes bya ba ni de gnyis ka bsdus pa'o/ /gzhan dag gi gang yin pa de bdag gir gyur cig ces bya ba ni brnab sems kyi 'jug pa'i rnam pa yin par yongs su bstan to / /mdor bsdu na brnab sems kyi ngo bo nyid dang / dmigs pa dang / rnam pa yin par rig par bya'o/ / gnod sems kyi sems dang ldan pa yin zhes bya ba ni bstan pa'i tshig go/ /sems can pha rol po rnams la gnod sems kyi dbang du byas nas/ gnod par bya ba nges par skyed pa dang du len pas na yid kyi kun tu rtog pa rab tu sdang ba'o/ /bsad na ci ma rung zhes bya ba ni/ lus bsad de ma rung bar 'gyur bar 'dod pa'o/ /bcings na ci ma rung zhes bya ba ni lus la nyam nga bar 'gyur bar 'dod pa'o/ /pham par gyur na ci ma rung zhes bya ba ni gzhan gyi longs spyod rgud par byed par 'dod pa'o/ /tshul ma yin pas sdug bsngal bar gyur na ci ma rung zhes bya ba ni bdag nyid kyi longs spyod rang rgud par 'dod pa ste/ don mdor bsdu na ni/ snga ma bzhin du blta bar bya'o/ /log par lta ba can yin zhes bya ba ni bstan pa'i tshig go/ /'di ltar lta zhes bya ba de ni bdag nyid kyis brjod par 'dod pa'i don la bzod cing 'dod pa yin par yongs su ston to/ /'di skad du smra ba zhes bya ba de ni brjod par 'dod pa'i don pha rol rnams 'dzin du 'jug par yongs su ston to/ /bsam pa rnam pa gsum po/ longs spyod kyi bsam pa dang / dag pa'i bsam pa dang / lha la mchod pa'i bsam pa'i sbyin pa la skur ba btab pa'i phyir sbyin pa med do/ /mchod sbyin med do zhes zer te/ sbyin sreg ces bya ba ni gsang sngags dang / me dang / lha la mchod pa'i bsam pa can gyi yin par blta bar bya'o/ /tshul khrims las byung ba dang / bsgom pa las byung ba'i dge ba mi mthun pa'i phyogs dang / gnyen por bcas pa dang / sbyin pa las byung ba'i mi mthun pa'i phyogs la skur ba btab pa'i phyir/ legs par spyad pa med do/ /nyes par spyad pa med do zhes zer ro/ /dge ba rnam pa gsum po mi mthun pa'i phyogs dang / gnyen por bcas pa de dag gi 'bras bu la skur ba btab pa'i phyir/ legs par byas pa'i las rnams kyi 'bras bu rnam par smin pa med do zhes zer ro/ /'jug pa'i gnas kyi rkyen la skur ba btab pa'i phyir 'jig rten 'di med do/ /'jig rten pha rol med do zhes zer ro/ /de'i 'bras bu'i rkyen la skur ba btab pa dang / de'i sa bon gyi rkyen la skur ba btab pa'i phyir/ pa med do/ /ma med do zhes zer ro/ /'jug pa'i skyes bu la skur ba btab pa'i phyir sems can skye ba med do zhes zer ro/ /'jug pa'i gnyen po ldog pa la skur ba btab pa'i phyir 'jig rten na dgra bcom pa med do zhes rgyas par zer ro/ /de la so so rang gi kun nas nyon mongs pa zhi bar gyur pa'i phyir yang dag par song ba rnams so/ /sems can rnams la log par sgrub pa rnam par spangs pa la zhugs pa'i phyir yang dag par zhugs pa rnams so/ /tshe 'di zhes bya ba rgyu'i dus su'o / /tshe phyi ma zhes bya ba 'bras bu'i dus su'o / /rang gi zhes bya ba ni rang gi skyes bu'i byed pa yin pa'i phyir ro/ /mngon par shes pas zhes bya ba ni drug pas so/ /mngon sum du byas nas zhes bya ba ni mthong ba'i lam gyis so/ /bsgrubs te zhes bya ba ni bsgom pa'i lam gyis so/ /rab tu rtogs par byed ces bya ba ni rang gis rtogs pa bdag nyid kyis kyang shes shing gzhan dag la yang go bar byed pa'i phyir ro/ /bdag gi skye ba zad do zhes bya ba la sogs pa ni snga ma bzhin du rnam par dbye bar rig par bya'o/ /de la mdor bsdu ba ni 'di yin te/ rgyu la skur ba 'debs pa dang / 'bras bu la skur ba 'debs pa dang / byed pa la skur ba 'debs pa dang / yod pa'i dngos po la skur ba 'debs pa bstan te/ de la byed pa ni sa bon 'debs pa'i byed pa dang / 'dzin pa'i byed pa dang / 'ong ba dang 'gro ba'i byed pa dang / skye bar 'gyur ba'i las kyi byed pa'o/ /bsdus pa'i don ni rnam grangs gzhan yang rgyu dang 'bras bur bcas pa dang / rkyen dang bcas par 'jug pa'i skyes bu'i 'jug pa la skur ba 'debs pa dang / de'i gnyen por gyur pa ldog pa la skur ba 'debs pa yongs su bstan to/ /de la 'jug pa la skur ba 'debs pa ni/ rgyu la skur ba 'debs par blta bar bya'i/ rang gi mtshan nyid la skur ba 'debs pa ni ma yin no/ /ldog pa la skur ba 'debs pa ni yon tan la skur ba 'debs par blta bar bya'i/ gang zag la skur ba 'debs pa ni ma yin no/ /de la dkar po'i phyogs ni thams cad kyang 'di las bzlog par rig par bya'o/ /gang la khyad par gyi mtshan nyid yod pa de yang bshad par bya ste/ 'dod pa la log par g.yem pa la brten nas tshangs par spyod pa zhes bya ba ni bstan pa'i tshig go/ /de yang yongs su dag pa gsum gyis dag par rig par bya ste/ dus dag pa dang / gzhan yid ches pa dag pa dang / sgrub pa dag pas so/ /de la ring du spyod pa zhes bya ba ni ji srid 'tsho'i bar du gcod pa'i phyir ro/ /de ni dus dag pa ste/ rtsod pa dag pas dag pa'o/ /gtsang ma zhes bya ba ni dag par byed pa ste/ de ni gzhan yid ches pa dag pa'o/ /de la dag pa yin la gtsang ba ma yin pa zhes bya ba'i tshul gyis mu bzhir 'gyur te/ de la mu dang po ni/ byas la rtsod pa'i tshe rgyal ba'o/ /mu gnyis pa ni ma byas la rtsod pa'i tshe pham pa'o/ /mu gsum pa ni ma byas la rtsod pa'i tshe rgyal ba'o/ /mu bzhi pa ni byas la rtsod pa'i tshe pham pa'o/ /de la bud med kyi lus la reg pa nyams su mi len pa'i phyir dring ba med pa'o/ /gnyis kyis gnyis sprod pa med pa'i phyir 'khrig pa spangs pa'o/ /lag pas reg pa la sogs pa'i thabs gzhan gyis khu ba 'byin par mi byed pa dang / smon pa med par tshangs par spyod pa khas len pa'i phyir grong pa'i chos spangs pa ste/ de ni sgrub pa phun sum tshogs pa zhes bya'o/ /don mdor bsdu ba yang 'di nyid du 'dus par blta bar bya'o/ /brdzun du smra ba las brtsams nas yid ches pa'i phyir yid brtan du rung ba yin no/ /yid brtan par gyur pas na yid ches pa'o/ /de la rtsod pa na tshad mar gzhag pa yin pas gzhag par bya'o/ /de ltar yang yid brten pa dag la slu bar mi byed cing mi 'khu bas mi slu ba ste/ mdor bsdu na nye bar gzung ba rnam pa gsum du yongs su bstan pa yin te/ bsam pa nye bar gzung ba dang / bsko ba nye bar gzung ba dang / bya ba nye bar gzung ba'o/ /de la chos kyi mtshan nyid rnam par gzhag pa'i srog gcod pa gang zhe na/ gsad pa'i bsam pa can/ nyon mongs pa can gyi sems dang ldan pas/ srog chags pha rol po de nyid la gsad pa'i sbyor ba byas shing gsad pa mthar thug par byas pa'i lus kyi las gang yin pa'o/ /ma byin par len pa gang zhe na/ rku 'phrog byas pa'i bsam pa can/ nyon mongs pa can gyi sems dang ldan pas / gzhan gyis yongs su bzung ba'i dngos po de nyid la rku 'phrog gi sbyor ba byas pa dang / de nyid la rku 'phrog mthar thug par byas pa'i lus kyi las gang yin pa'o/ /'dod pa la log par g.yem pa gang zhe na/ bsten pa'i bsam pa can nyon mongs pa can gyi sems dang ldan pas 'jug par bya ba ma yin pa dang / yan lag ma yin pa dang / yul ma yin pa dang / dus ma yin pa dag tu de nyid la 'dod pa la log par g.yem pa'i sbyor ba byas pa dang / 'dod pa la log par g.yem pa'i mthar thug par byas pa'i lus kyi las gang yin pa'o/ /brdzun du smra ba gang zhe na/ 'du shes bsgyur te smra bar 'dod pa/ nyon mongs pa can gyi sems dang ldan pas/ sems can gzhan dag la de nyid la sgyu'i dbang po'i sbyor ba byas pa dang / de nyid la sgyu'i dbang po mthar thug par byas pa'i ngag gi las gang yin pa'o/ /phra ma gang zhe na/ dbye ba'i bsam pa can nyon mongs pa can gyi sems dang ldan pas sems can pha rol de nyid la dbye ba'i sbyor ba byas pa dang / dbye ba'i mthar thug par byas pa'i ngag gi las gang yin pa'o/ /ngag rtsub po gang zhe na/ ngag rtsub po smra bar 'dod pa nyon mongs pa can gyi sems dang ldan pas/ sems can gzhan dag la de nyid la ngag rtsub po'i sbyor ba byas pa dang / ngag rtsub po'i mthar thug par byas pa'i ngag gi las gang yin pa'o/ /tshig kyal pa gang zhe na/ byung rgyal smra bar 'dod pa nyon mongs pa can gyi sems dang ldan pas/ ma 'brel ba'i byung rgyal gyi sbyor ba byas pa dang / ma 'brel ba'i byung rgyal mthar thug par byas pa'i ngag gi las gang yin pa'o/ /brnab sems gang zhe na/ gzhan gyi nor bdag gir bya ba'i bsam pa can nyon mongs pa can gyi sems dang ldan pas/ gzhan gyi nor bdag gir bya ba'i bsam pa la/ nges par sbyor ba byas pa dang / de mthar thug par byas pa'i yid kyi las gang yin pa'o/ /gnod sems gang zhe na/ gzhan la gnod pa bya ba'i bsam pa can gyi nyon mongs pa can gyi sems dang ldan pas/ gzhan la gnod pa bya ba'i bsam pa la nges par sbyor ba byas pa dang / de mthar thug par byas pa'i yid kyi las gang yin pa'o/ /log par lta ba gang zhe na/ skur ba 'debs pa'i bsam pa can nyon mongs pa can gyi sems dang ldan pas/ skur pa 'debs pa'i bsam pa de la nges par sbyor ba byas pa dang / de la mthar thug par byas pa'i yid kyi las gang yin pa'o/ /srog gcod pa sbangs pa gang zhe na/ srog gcod pa la nyes dmigs kyi bsam pa can/ dge ba'i sems dang ldan pas/ de yang dag par bsdam pa'i sbyor ba byas pa dang / de yang dag par bsdam pa'i mthar thug par byas pa'i lus kyi las gang yin pa'o/ /srog gcod pa spangs pa ji lta ba bzhin du ma byin par len pa dang / 'dod pa la log par g.yem pa dang brdzun du smra ba dang / phra ma dang / ngag rtsub po dang / tshig kyal pa dang / brnab sems dang / gnod sems dang / log par lta ba spangs pa rnams la yang de dang 'dra bar rig par bya'o/ /de la bye brag ni 'di yod de/ ma byin par len pa la nyes dmigs kyi bsam pa can zhes bya ba nas log par lta ba nyes dmigs kyi bsam pa can dge ba'i sems dang ldan pas de yang dag par bsdam pa mthar thug par byas pa'i bar gyi yid kyi las gang yin pa'o/ /de la bcu yod pa las gsum du 'gyur te/ lus kyi las dang / ngag gi las dang / yid kyi las so/ /gsum yod pa las kyang bcur 'gyur ro/ /las rnams kyi rgyu gang zhe na/ de ni rnam pa bcu gnyis su rig par bya ste/ chags pa dang / zhe sdang dang / gti mug dang / bdag dang / pha rol dang / gzhan gyi rjes su 'brang ba dang / zang zing dang / 'jigs pa dang / gnod par bya ba'i phyir dang / rtse zhing dga' ba dang / chos su 'du shes pa dang / log par lta ba'o/ /las kyi gnas skabs gang zhe na/ de ni mdor bsdu na rnam pa lngar rig par bya ste/ chung ngu'i gnas skabs dang / 'bring gi gnas skabs dang / chen po'i gnas skabs dang / byung ba'i gnas skabs dang / bag chags kyi gnas skabs so/ /de la mi dge ba'i las chung ngus ni dud 'gro rnams kyi nang du skye bar 'gyur ro/ /'bring gis ni yi dags rnams kyi nang du skye bar 'gyur ro/ / chen pos ni sems can dmyal ba rnams kyi nang du skya bar 'gyur ro/ /dge ba'i las chung dus ni mi rnams kyi nang du skye bar 'gyur ro/ /'bring gis ni 'dod pa na spyod pa'i lha rnams kyi nang du skye bar 'gyur ro/ /chen pos ni gzugs dang gzugs med pa na spyod pa'i lha rnams kyi nang du skye bar 'gyur ro/ /mi dge ba'i las kyi gnas skabs chung ngu gang zhe na/ chags pa dang zhe sdang dang gti mug gi gzhi chung ngu gang yin pa'o/ /gnas skabs 'bring ni chags pa dang / zhe sdang dang gti mug gi gzhi 'bring gang yin pa'o/ /gnas skabs chen po ni/ chags pa dang / zhe sdang dang gti mug gi gzhi chen po gang yin pa'o/ /dge ba ni ma chags pa dang / zhe sdang med pa dang / gti mug med pa'i gzhi ste/ de bzhin du ci rigs par blta bar bya'o/ /byung ba'i gnas skabs ni/ skyes la ma 'gags pa mngon sum du gyur pa gang yin pa'o/ /bag chags kyi gnas skabs ni skyes nas 'gags pa mngon du gyur pa las 'das pa gang yin pa'o/ /las rnams kyi sgo gang zhe na/ de ni mdor bsdu na rnam pa gnyis te/ 'bras bu 'byin pa'i sgo dang / gnod pa byed pa dang phan 'dogs pa'i sgo'o/ /'bras bu 'byin pa'i sgo gang zhe na/ de yang rnam pa lngar rig par bya ste/ rnam par smin pa'i 'bras bu dang / rgyu mthun pa'i 'bras bu dang / dbang gi 'bras bu dang / tshe 'di'i 'bras bu dang / pha rol gyi dbang gi 'bras bu'o/ /de la rnam par smin pa'i 'bras bu ni/ srog gcod pa la kun tu bsten cing bsgoms te lan mang du byas pas sems can dmyal ba rnams kyi nang du rnam par smin pa smin par 'gyur ro/ /srog gcod pa la ji lta ba bzhin du/ mi dge ba'i las kyi lam lhag ma rnams kyang de dang 'dra ste/ 'di ni de dag gi rnam par smin pa'i 'bras bu'o/ / rgyu mthun pa'i 'bras bu ni gal te mi rnams dang skal ba mnyam pa de lta bur skyes na/ tshe thung bar 'gyur ba dang longs spyod kyis phongs par 'gyur ba dang / chung ma ma bsrungs par 'gyur ba dang / skur pa mang bar 'gyur ba dang / mdza' bo dang 'bye bar 'gyur ba dang / yid du mi 'ong ba'i sgra thos par 'gyur ba dang / tshig mi snyan par 'gyur ba dang / 'dod chags shas che bar 'gyur ba dang / zhe sdang shas che bar 'gyur ba dang / gti mug shas che bar 'gyur ba ste/ 'di ni de dag gi rgyu mthun pa'i 'bras bu'o/ /de la dbang gi 'bras bu ni/ mi dge ba'i las rnams kun tu bsten cing bsgoms te/ lan mang du byas pa de'i dbang gis phyi rol gyi dngos po rnams kyi 'bras bu mthu chung ba dang / 'bras bu mi smin pa dang / 'bras bu 'drul ba dang / 'bras bu gzhan du 'gyur ba dang / 'bras bu shin te mar 'gyur ba dang / 'bras bu mi zhim pa dang / 'bras bu rtag tu ma yin pa dang / 'bras bu chung ba dang / 'bras bu gnod par 'gyur ba dang / 'bras bu med par 'gyur ro / /dge ba'i las rnams ni de las bzlog par rig par bya'o/ /de la tshe 'di'i 'bras bu ni bsam pa'am/ gzhi'i rgyu rnam pa gnyis kyis dge ba'am/ mi dge ba'i las tshe 'di'i 'bras bur 'gyur ba'o / /de la bsam pa ni rnam pa brgyad du rig par bya ste/ 'di lta ste lta ba'i bsam pa dang / mi lta ba'i bsam pa dang / gnod pa'i bsam pa dang / snying rje'i bsam pa dang / kun nas mnar sems kyi bsam pa dang / dang ba'i bsam pa dang / byas pa mi gzo ba'i bsam pa dang / byas pa gzo ba'i bsam pa'o/ /de la lta ba'i bsam pas kyang las mi dge ba tshe 'di la myong bar 'gyur te/ 'di ltar 'di na kha cig lus la lta ba dang / longs spyod la lta ba dang / srid pa la lta ba shas che ba mngon par 'du byed pa lta bu'o/ /de la mi lta ba'i bsam pas kyang las dge ba tshe 'di la myong bar 'gyur te/ 'di ltar 'di na kha cig lus la mi lta ba dang / longs spyod la mi lta ba dang / srid pa la mi lta ba shas che ba mngon par 'du byed pa lta bu'o/ /de la gnod pa'i bsam pas kyang las mi dge ba tshe 'di la myong bar 'gyur te/ 'di ltar 'di na kha cig /sems can gzhan rnams dang / gang zag gzhan dag la gnod pa'i bsam pa shas che ba mngon par 'du byed pa lta bu'o/ /de la snying rje'i bsam pas kyang las dge ba tshe 'di la myong bar 'gyur te/ 'di ltar 'di na kha cig sems can gzhan rnams dang / gang zag gzhan dag la snying rje'i bsam pa dang / phan pa'i bsam pa shas che ba mngon par 'du byed pa lta bu'o/ / de la kun nas mnar sems kyi bsam pa las kyang mi dge ba tshe 'di la myong bar 'gyur te/ 'di ltar 'di na kha cig sangs rgyas sam/ chos sam/ dge 'dun nam/ bla ma lta bu gang yang rung ba'i gzhi la/ kun nas mnar sems kyi bsam pa dang / gnod pa'i bsam pa shas che bas mngon par 'du byed pa lta bu'o/ /de la dang ba'i bsam pas kyang las dge ba tshe 'di la myong bar 'gyur te/ 'di ltar 'di na kha cig sangs rgyas sam/ chos sam/ dge 'dun la dang ba'i shas che bas de ltar mos pa'i bsam pa mngon du 'du byed pa lta bu'o/ /byas pa mi gzo ba'i bsam pas kyang las mi dge ba tshe 'di la myong bar 'gyur te/ 'di ltar 'di na kha cig pha'am/ ma'am/ phan 'dogs pa'i gzhi gang yang rung ba la/ drin du mi gzo ba'i bsam pa dang / 'khu ba'i bsam pa dang / drag po'i bsam pa shas che bas mngon par 'du byed pa lta bu'o/ /de la drin du gzo ba'i bsam pas kyang las dge ba tshe 'di la myong bar 'gyur te/ 'di ltar 'di na kha cig pha'am/ ma'am/ phan 'dogs pa'i gzhi gang yang rung ba la drin du gzo ba'i bsam pa dang / phan gdags pa'i bsam pa shas che ba mngon par 'du byed pa lta bu'o/ /de la gzhi las kyang mtshams med pa rnams dang / mtshams med pa dang mthun pa rnams kyi mi dge ba'i las tshe 'di la myong bar 'gyur ba yang yod de/ mtshams med pa lnga'i las 'di lta ste/ pha gsod pa dang / ma gsod pa dang / dgra bcom pa gsod pa dang / dge 'dun gyi dbyen byed pa dang / de bzhin gshegs pa la ngan sems kyis khrag phyung ba'o/ /mtshams med pa dang mthun pa rnams ni/ 'di ltar 'di na kha cig dgra bcom ma'am ma la nyal ba'am/ srid pa tha ma pa'i byang chub sems dpa' la snun par byed pa'am/ lha'i gnas rnams sam/ lam gyi bzhi mdo'am/ lam gyi sum mdo rnams su phyugs gsod par byed pa'am/ yid gcugs pa'i mdza' bshes sam/ mdza' bo mchog tu yid gcugs par gyur pa la 'khu zhing slu la 'drid par byed pa'am/ sdug cing ci yang med la mgon med pa dang / rten med pa dang / skyabs med par 'ongs te/ skyabs sbyin pas nye bar bzung ba'i 'og tu 'khu zhing gnod pa byed pa'am/ dge 'dun 'du ba'i sgo 'phrog pa pa'am/ mchod rten 'jig par byed pa yang rung ste/ de lta bu dang mthun pa'i las ni mtshams med pa dang mthun pa zhes bya'o/ /dge ba yang gzhi las tshe 'di la myong bar 'gyur ba yang yod de/ 'di ltar 'di na kha cig ma la ma dad pa la dad pa dang ldan pa yang dag par len du 'jug ste/ 'dul zhing 'dzin du 'jug la 'jog pa lta bu ste/ ma la ma dad pa la dad pa dang ldan pa ji lta ba bzhin du/ tshul khrims 'chal ba la/ tshul khrims dang ldan pa dang / ser sna can la gtong ba dang ldan pa dang / shes rab 'chal pa la shes rab dang ldan pa yang de dang 'dra'o/ /ma la ji lta ba bzhin du phal yang de dang 'dra'o/ /byams pa la snyoms par zhugs pa las langs ba la kha zas 'bul zhing bya ba byed pa dang / byams pa'i ting nge 'dzin la ji lta ba bzhin du snying rje dang / 'gog pa'i snyoms par 'jug pa dang / rgyun du zhugs pa'i 'bras bu thob pa las langs pa la kha zas 'bul zhing bya ba byed pa dang / de bzhin du sangs rgyas bcom ldan 'das la mngon sum du bya ba byed pa dang / sangs rgyas bcom ldan 'das la ji lta ba bzhin du slob pa dang mi slob pa'i dge 'dun la yang de dang 'dra'o/ /gzhi de dag nyid la de las bzlog pa'i mi dge ba'i las gnod par 'gyur ba yang tshe 'di la myong bar 'gyur ba yod do/ /de la pha rol gyi dbang gi 'bras bus tshe 'di la las myong bar 'gyur ba yang yod de/ 'di ltar gnas gang na de bzhin gshegs pa bzhugs pa der yams kyi nad rnams dang / gnod pa rnams dang / 'go ba'i nad rnams mi 'byung ste/ 'di lta ste/ sangs rgyas kyi mthus yams kyi nad med pa dang / gnod pa med pa dang 'go ba'i nad med par skye bo'i tshogs bde ba la reg par gnas so/ /sangs rgyas ji lta ba bzhin du/ 'khor los sgyur ba dang / byams pa la gnas pa'i byang chub sems dpa' rnams kyang de dang 'dra'o/ /de bzhin du byang chub sems dpa' snying rje'i bsam pa dang ldan pas sems can dbul po rnams dang / sdug pa rnams dang / gnam gyis mnar ba rnams la mngon par brtags nas zas dang / skom dang / nor dang / 'bru dang / mdzod kyis brtas par byed de/ de dag kyang rkyen des bde ba la reg par gnas te/ de ltar de dang mthun pa rnams ni gzhan gyi dbang las byung ba'i tshe 'di la myong bar 'gyur ba'i las yin par rig par bya'o/ /de la gnod pa dang / phan 'dogs pa las gnod pa ni sgo rnam pa brgyad kyis sems can rnams la/ mi dge ba bcu'i las kyi lam rnam par gzhag pa ste/ gnod par byed pa'i sgo brgyad po rnams gang zhe na/ srog la gnod pa dang / longs spyod la gnod pa dang / chung ma la gnod pa dang / sgyu'i dbang po'i gnod pa dang / grogs po'i tshul gyis gnod pa dang / mtshang 'bru ba'i gnod pa dang / bag med pa skyed pa'i gnod pa dang / 'jigs pa bskyed pa'i gnod pa ste/ 'di dag las bzlog pa ni/ dge ba'i las kyi lam gyi sgo rnams su blta bar bya'o// // bam po dgu pa/ las rnams kyi che ba dang / drag pa dang / lci ba gang zhe na/ de ni rnam pa drug tu rig par bya ste/ mngon par 'du byed pa dang / goms pa dang / ngo bo nyid dang / gzhi dang mi mthun pa'i phyogs su gcig tu nges pa dang / mi mthun pa'i phyogs sel ba'o/ /de la mngon par 'du byed pa ni/ 'di ltar 'di na kha cig chags pa dang / zhe sdang dang / gti mug gi kun nas dkris pa drag po'am/ ma chags pa'am/ zhe sdang med pa dang / gti mug med pa mngon par 'du byed pa drag pos las kun nas slong ba lta bu'o/ /de la goms pa ni 'di ltar 'di na kha cig gis mi dge ba'am/ dge ba'i las yun ring po nas kun tu bsten cing bsgoms la lan mang du byas pa lta bu'o/ /de la ngo bo nyid ni 'di lta ste/ tshig kyal pa las ngag rtsub po kha na ma tho ba ches che ba dang / ngag rtsub po bas phra ma kha na ma tho ba ches che ba dang / phra ma bas brdzun du smra ba kha na ma tho ba ches che ba dang / brdzun du smra ba bas 'dod pa la log par g.yem pa kha na ma tho ba ches che ba dang / 'dod pa la log par g.yem pa bas ma byin par len pa kha na ma tho ba ches che ba dang / ma byin par len pa bas srog gcod pa kha na ma tho ba ches che ba dang / srog gcod pa bas brnab sems kha na ma tho ba ches che ba dang / brnab sems pas gnod sems kha na ma tho ba ches che ba dang / gnod sems pas log par lta ba kha na ma tho ba ches che ba dang / sbyin pa las byung ba bas tshul khrims las byung ba ches kha na ma tho ba med pa dang / tshul khrims las byung ba bas bsgoms pa las byung ba ches kha na ma tho ba med pa dang / thos pa las byung ba bas bsams pa las byung ba ches kha na ma tho ba med pa lta bu'o/ /de la gzhi ni 'di ltar 'di na kha cig sangs rgyas sam/ chos sam/ dge 'dun nam bla ma lta bu'i gzhi gang yang rung ba la gnod pa'am/ phan pa'i dngos po lci ba nyid byed pa lta bu'o/ /de la mi mthun pa'i phyogs su gcig tu nges pa ni/ 'di ltar 'di na kha cig ji srid 'tsho'i bar du gcig tu nges pa mi dge ba'i las 'ba' zhig yang dag par blangs te/ 'dug la dge ba ni lan cig kyang mi byed pa lta bu'o/ /de la mi mthun pa'i phyogs sel ba ni/ 'di ltar 'di na kha cig mi dge ba'i las mi mthun pa'i phyogs su gyur pa spangs nas 'dod chags dang bral bas/ dge ba'i las rnam par sbyong ba lta bu'o/ /las rnams kyi phyin ci log pa gang zhe na/ de ni rnam pa gsum du blta bar bya ste/ bya ba phyin ci log pa dang / 'dzin pa phyin ci log pa dang / dga' ba phyin ci log pa'o/ /de la bya ba phyin ci log pa ni/ 'di ltar 'di na kha cig srog chags gzhan gsad par bya ba las/ gzhan bsad pa lta bu ste/ de la srog gcod pa ni yod la/ srog gcod pa'i kha na ma tho ba ni med de / 'on kyang srog gcod pa dang 'dra zhing rjes su mthun pa'i kha na ma tho ba ni skyed par 'gyur ro/ /gal te srog chags gzhan bsad par ma gyur na yang / srog chags lta bu'i gzhi la bsnun la/ bdag gis srog chags bsad do snyam du sems pas de la ni srog bcad pa yang med la/ srog gcod pa'i kha na ma tho ba yang med mod kyi/ 'on kyang srog gcod pa lta bu dang / srog gcod pa dang 'dra zhing rjes su mthun pa'i kha na ma tho ba ni skyed par 'gyur te/ srog gcod pa ji lta ba bzhin du ma byin par len pa la sogs pa'i las kyi lam rnams la yang bya ba phyin ci log pa ci rigs par rig par bya'o/ /de la 'dzin pa phyin ci log pa ni/ 'di ltar 'di na kha cig 'di ltar lta zhing 'di skad smra ste/ sbyin pa med do/ /mchod sbyin med do zhes log par lta ba rnams rgyas par brjod par bya'o/ /de la 'di snyam du sems te/ gsod pa'am/ gsod du 'jug pa dang / ma byin par len par byed pa dang / 'dod pa rnams la log par g.yem par byed pa dang / brdzun du smra ba rjod par byed pa dang / phra ma byed pa dang / ngag rtsub po smra ba dang / tshig kyal pa smra ba dang / yang na sbyin pa dag sbyin par byed pa dang / bsnyen gnas la gnas pa dang / bsod nams dag byed pa dang / tshul khrims yang dag par blangs te 'dug pa med de/ gzhi de la sdig pa'am bsod nams su 'gyur ba med do snyam mo/ /'di ltar 'di na kha cig 'di ltar lta zhing / 'di skad smra ste/ bram ze la sdang zhing / tshangs pa la sdang ba dang / lha la sdang ba rnams ni gsad par bya'o/ /gsad pa na gzhi de las bsod nams kho nar 'gyur gyi/ sdig par ni mi 'gyur ro/ /de dag la ma byin par len pa dang / 'dod pa la log par g.yem pa dang / brdzun du smra ba dang / phra ma dang / ngag rtsub po dang / tshig kyal pa byas pa yang / bsod nams kho nar 'gyur gyi/ bsod nams ma yin par ni mi 'gyur ro zhes zer ba lta bu'o/ /de la dga' ba phyin ci log pa ni/ 'di ltar 'di na kha cig mi dge ba'i chos yang dag par blangs te/ 'dug cing shin tu dga' ste/ de dag gis rtse ba'i chos spyod pa lta bu'o/ /las rnams kyi rnam grangs gang zhe na las byas pa yang yod do/ /ma byas pa yang yod do/ /bsags pa yang yod do/ /ma bsags pa yang yod do/ /bsams pa yang yod do/ /ma bsams pa yang yod do/ /de bzhin du rnam par smin par nges pa dang / rnam par smin par ma nges pa dang / rnam par smin pa rnam par smin zin pa dang / rnam par smin pa rnam par ma smin pa dang / dge ba dang mi dge ba dang / lung du ma bstan pa dang / sdom pas bsdus pa dang / sdom pa ma yin pas bsdus pa dang / sdom pas bsdus pa yang ma yin la sdom pa ma yin pas bsdus pa yang ma yin pa dang / sbyin pa las byung ba dang / tshul khrims las byung ba dang / bsgom pa las byung ba dang / bsod nams dang / bsod nams ma yin pa dang / mi g.yo ba dang / bde ba myong bar 'gyur ba dang / sdug bsngal myong bar 'gyur ba dang / sdug bsngal yang ma yin bde ba yang ma yin pa myong bar 'gyur ba dang / tshe 'di la myong bar 'gyur ba dang / skyes nas myong bar 'gyur ba dang / lan grangs gzhan la myong bar 'gyur ba dang / 'das pa dang / ma 'ongs pa dang / da ltar byung ba dang / 'dod pa dang ldan pa dang / gzugs dang ldan pa dang / gzugs med pa dang ldan pa dang / slob pa dang / mi slob pa dang / slob pa yang ma yin mi slob pa yang ma yin pa dang / mthong bas spang bar bya ba dang / bsgom pas spang bar bya ba dang / spang bar bya ba ma yin pa dang / gnag la rnam par smin pa gnag pa dang / dkar la rnam par smin pa dkar ba dang / gnag cing dkar la rnam par smin pa gnag cing dkar ba dang / las gnag pa yang ma yin dkar ba yang ma yin la rnam par smin pa yang med de/ de las zad par 'gyur ba dang / yon po'i las dang / nyes pa'i las dang / snyigs ma'i las dang / gtsang ba'i las dang / thub pa'i las kyang yod do/ /byas pa'i las gang zhe na/ bsams pa'am/ bsams nas kyang lus dang ngag gis kun nas bslangs pa gang yin pa'o/ /ma byas pa'i las ni ma bsams pa'am/ ma bsams nas kyang lus dang ngag gis kun nas ma bslangs pa gang yin pa'o/ /bsags pa'i las ni las rnam pa bcu ma gtogs pa ste/ 'di lta ste/ rmi lam du byas pa dang / ma shes par byas pa dang / bsams bzhin ma yin par byas pa dang / drag po ma yin la rgyun chags ma yin par byas pa dang / nor bas byas pa dang / brjed pas byas pa dang / mi 'dod bzhin du byas pa dang / rang bzhin gyis lung du ma bstan pa dang / 'gyod pas bsal ba dang / gnyen pos bsal ba ste/ las rnam pa bcu po 'di dag ma gtogs pa'i las gzhan gang yin pa'o/ /ma bsags pa'i las ni rnam pa bcu po ji skad bstan pa nyid do/ /bsams pa las byung ba'i las ni/ bsams bzhin du byas pa'am/ bsags pa gang yin pa'o/ /ma bsags pa las byung ba'i las ni/ bsams bzhin ma yin par byas pa gang yin pa'o/ /myong bar 'gyur ba nges pa'i las ni/ bsams bzhin du byas pa dang / bsags pa gang yin pa'o/ /myong bar 'gyur bar ma nges pa'i las ni/ bsams bzhin du byas la ma bsags pa gang yin pa'o/ /rnam par smin pa rnam par smin zin pa'i las ni 'bras bu byin zin pa gang yin pa'o/ /rnam par smin pa rnam par ma smin pa'i las ni/ 'bras bu ma byin pa gang yin pa'o/ /dge ba'i las ni/ ma chags pa dang / zhe sdang med pa dang / gti mug med pa gzhir gyur pa gang yin pa'o/ /mi dge ba'i las ni/ chags pa dang zhe sdang dang / gti mug gzhir gyur pa gang yin pa'o/ /lung du ma bstan pa'i las ni/ ma chags pa dang / zhe sdang med pa dang / gti mug med pa gzhir gyur pa yang ma yin la/ chags pa dang zhe sdang dang / gti mug gzhir gyur pa yang ma yin pa gang yin pa'o/ /sdom pas bsdus pa'i las ni/ so sor thar pa'i sdom pas bsdus pa'am/ bsam gtan dang snyoms par 'jug pa dang / spong ba'i sdom pas bsdus pa'am/ zag pa med pa'i sdom pas bsdus pa gang yin pa'o/ /sdom pa ma yin pas bsdus pa'i las ni/ sdom pa ma yin pa'i ris bcu gnyis po rnams kyi gang yin pa ste/ sdom pa ma yin pa'i ris bcu gnyis ni/ 'di lta ste/ lug gsod pa rnams dang / bya gag 'tshong ba rnams dang / nya pa rnams dang / bya pa rnams dang / rgyas 'chor ba rnams dang / chom rkun pa rnams dang / gshed ma rnams dang / btson srung rnams dang / log po pa rnams dang / gnod byed rnams dang / glang po che 'dzin pa rnams dang / sprul tshogs can rnams so/ /sdom pa yang ma yin sdom pa ma yin pa yang ma yin pas bsdus pa'i las ni/ sdom pa rnam pa gsum yang ma gtogs/ sdom pa ma yin pa'i ris kyi las kyang ma gtogs pa/ de las gzhan pa'i ris kyi dge ba dang / mi dge ba dang / lung du ma bstan pa'i las gang yin pa'o/ /sbyin pa las byung ba ni/ gzhi dang / kun nas slong ba dang / ngo bo nyid dang / gnas las rig par bya ste/ de la gzhi ni ma chags pa dang / zhe sdang med pa dang / gti mug med pa'i gzhi'o/ / kun nas slong ba ni/ sbyin par bya ba'i dngos po yongs su gtang ba'i phyir/ lus dang ngag gi las kun nas slong bar byed pa'i sems pa ma chags pa dang / zhe sdang med pa dang / gti mug med pa dang ldan pa gang yin pa'o/ /ngo bo nyid ni sbyin par bya ba'i dngos po yongs su gtong ba la kun nas bslangs pa'i lus kyi las dang / ngag gi las gang yin pa'o/ /de la gnas ni sbyin par bya ba'i dngos po dang / len pa po ni gnas yin no/ /sbyin pa las byung ba ji lta ba bzhin du/ tshul khrims las byung ba dang / bsgom pa las byung ba la yang ci rigs par rig par bya'o/ /de la tshul khrims las byung ba'i gzhi dang / kun nas slong ba ni 'dra'o/ /ngo bo nyid ni sdom pas bsdus pa'i lus kyi las dang ngag gi las so/ /gnas ni sems can dang / sems can ma yin par ston pa'i dngos po'o/ /bsgom pa las byung ba'i gzhi ni/ ting nge 'dzin gyi gzhi ste/ ma chags pa dang / zhe sdang med pa dang / gti mug med pa'o/ /kun nas slong ba ni de dang ldan pa'i ting nge 'dzin sgrub par byed pa'i sems pa'o/ /ngo bo nyid ni ting nge 'dzin to/ /gnas ni phyogs bcu'i sems can gyi khams sdug bsngal ba yang ma yin bde ba yang ma yin pa'o/ /sbyin bdag gi rtags rnams dang / tshul khrims can gyi rtags rnams dang / sgom pa'i rtags rnams ni snga ma bzhin du thams cad rig par bya'o/ /bsod nams kyi las ni bde 'gror rnam par smin pa dang / 'gro ba lnga myong bar 'gyur ba'i dge ba gang yin pa'o/ /bsod nams ma yin pa'i las ni ngan song du rnam par smin pa dang / 'gro ba lnga myong bar 'gyur ba'i mi dge ba gang yin pa'o/ /mi g.yo ba'i las ni gzugs dang gzugs med par rnam par smin pa dang / gzugs dang gzugs med pa myong bar 'gyur ba'i dge ba gang yin pa'o/ /bde ba myong bar 'gyur ba'i las ni bsam gtan gsum myong bar 'gyur ba dang / mi g.yo ba gang yin pa'o/ /sdug bsngal myong bar 'gyur ba'i las ni bsod nams ma yin pa gang yin pa'o/ /sdug bsngal ba yang ma yin bde ba yang ma yin pa myong bar 'gyur pa'i las ni/ thams cad du kun gzhi rnam par shes pa rnam par smin par 'gyur ba'i las gang yin pa'o/ /bsam gtan bzhi pa yan chad ni mi g.yo ba'o/ /tshe 'di la myong bar 'gyur ba'i las ni tshe 'di'i 'bras bu gang yin pa'o/ /skyes nas myong bar 'gyur ba'i las ni bar du ma chod par skye ba'i 'bras bu gang yin pa'o/ /lan grangs gzhan la myong bar 'gyur ba'i las ni de phan chad du skye ba'i 'bras bu gang yin pa'o/ /'das pa'i las ni bag chags [(]gyi [,]kyi [)]gnas skabs 'bras bu byin zin pa'am/ 'bras bu ma byin pa gang yin pa'o/ /ma 'ongs pa'i las ni ma skyes shing / mngon par ma grub pa gang yin pa'o/ /da ltar gyi las ni mngon par 'dus byas shing mngon par bsags la zhig par ma gyur pa gang yin pa'o/ /'dod pa dang ldan pa'i las ni/ 'dod pa'i khams su rnam par smin cing 'dod pa'i khams su gtogs pa gang yin pa'o/ /gzugs dang ldan pa'i las ni gzugs kyi khams su rnam par smin cing gzugs kyi khams su gtogs pa gang yin pa'o/ / gzugs med pa dang ldan pa'i las ni/ gzugs med pa'i khams su rnam par smin cing gzugs med pa'i khams su gtogs pa gang yin pa'o/ /slob pa'i las ni so so'i skye bo dang / so so'i skye bo ma yin pa slob pa'i sems kyi rgyud la yod pa'i dge ba gang yin pa'o/ /mi slob pa'i las ni mi slob pa'i sems kyi rgyud la yod pa'i dge ba gang yin pa'o/ /slob pa'i yang ma yin mi slob pa'i yang ma yin pa'i las ni gnyi ga las ma gtogs pa de las gzhan pa'i sems kyi rgyud la yod pa gang yin pa ste/ dge ba dang mi dge ba dang lung du ma bstan pa gang yin pa'o/ /mthong bas spang bar bya ba'i las ni ngan song myong bar 'gyur pa'i mi dge pa gang yin pa'o/ /bsgom pas spang bar bya ba'i las ni bde 'gro myong bar 'gyur pa'i dge ba dang mi dge ba dang / lung du ma bstan pa gang yin pa'o/ / spang bar bya ba ma yin pa'i las ni 'jig rten pa dang / 'jig rten las 'das pa'i zag pa med pa gang yin pa'o/ /gnag la rnam par smin pa gnag pa'i las ni bsod nams ma yin pa gang yin pa'o/ /dkar la rnam par smin pa dkar ba'i las ni mi g.yo ba gang yin pa'o/ /gnag cing dkar la rnam par smin pa gnag cing dkar ba'i las ni mi dge ba'i gnyen po bsod nams gang yin pa ste/ 'di ltar bsod nams ma yin pa ma spangs la/ bsod nams kyi las su rnam par 'jog par byed pa'o/ /las gnag pa'i yang ma yin dkar ba yang ma yin la/ rnam par smin pa yang med de / las zad par 'gyur ba ni las gsum char yang spong ba'i gnyen por gyur pa'i phyir/ 'jig rten las 'das pa'i zag pa med pa'i las gang yin pa'o/ /yon po'i las ni 'di las phyi rol pa'i mu stegs can rnams kyi dge ba dang mi dge ba gang yin pa'o/ /nyes pa'i las ni yon po'i las gang yin pa de nyid nyes pa'i las kyang de yin no/ /gzhan yang nyes pa'i las ni chos 'di pa'i so so'i skye bo bstan pa la phyin ci log tu lta ba rang gi lta ba mchog tu 'dzin pa la gnas pa log par nges pa rnams kyi dge ba dang mi dge ba'i las gang yin pa'o/ /snyigs ma'i las ni yon po'i las dang / nyes pa'i las gang yin pa de nyid snyigs ma'i las kyang de yin no/ /gzhan yang snyigs ma'i las ni/ chos 'di pa'i so so'i skye bo bstan pa la nges par ma gyur pa the tshom gyi blo dang ldan pa rnams kyi dge ba dang / mi dge ba rnams kyi las gang yin pa'o/ /rnam grangs gzhan yang / phyi rol gyi mu stegs can rnams kyi gsum po ni de la log par bsgrub pa'i phyir yon po'o/ /de la brten pa'i yon tan mngon par bsgrub pa la bgegs su gyur pa'i phyir nyes pa'o/ /de bzhin du brten pa la bgegs su gyur pa'i phyir snyigs ma'i las su rig par bya'o/ /de la gtsang ba'i las ni/ chos 'di pa'i so so'i skye bo bstan pa la yang dag par nges par gyur pa/ the tshom med pa'i blo dang ldan pa rnams kyi dge ba'i las gang yin pa'o/ /thub pa'i las ni chos 'di pa'i so so'i skye bo ma yin pa 'phags pa rnams kyi slob pa dang / mi slob pa'i dge ba'i chos gang yin pa'o/ /las rnams kyi nyes dmigs gang zhe na/ mdor bsdu na nyes dmigs rnam pa bdun du rig par bya ste/ 'di lta ste/ srog gcod pa pos srog gcod pa'i gzhi'i phyir bdag la gnod pa dang / pha rol la gnod pa dang / gnyi ga la gnod par bya bar sems pa dang / tshe 'di'i kha na ma tho ba skyed pa dang / tshe phyi ma'i kha na ma tho ba skyed pa dang / tshe 'di pa dang tshe phyi ma pa'i kha na ma tho ba skyed pa dang / de las skyes pa'i sems las byung ba'i sdug bsngal dang / yid mi bde ba nyams su myong bar 'gyur ro/ /ji ltar bdag la gnod par sems she na/ srog chags la gnod par byed pa na/ gzhi de las bdag nyid gsad pa'am/ bcing ba'am/ nyams pa'am/ smad par 'gyur la/ pha rol la gnod par ni mi nus pa'o/ /ji ltar pha rol la gnod par byed ce na/ de ltar byas pas pha rol la gnod par 'gyur la/ gzhi de las bdag la gsad pa nas smad pa'i bar du mi 'byung ba'o/ /gnyi ga la gnod pa ni de ltar byas pas gzhan la yang gnod par 'gyur la/ gzhi de las pha rol gyis gsad pa nas/ smad pa'i bar du 'gyur ba'o/ /ji ltar na tshe 'di pa'i kha na ma tho ba skyed ce na/ ji ltar bdag la gnod par sems pa bzhin no/ /ji ltar na tshe phyi ma'i kha na ma tho ba skyed ce na/ ji ltar gzhan la gnod par sems pa bzhin no/ /ji ltar na tshe 'di pa dang / tshe phyi ma'i kha na ma tho ba skyed ce na/ ji ltar gnyi ga la gnod par sems pa bzhin no/ /ji ltar na de las skyes pa'i sems las byung ba sdug bsngal ba dang / yid mi bde ba myong bar 'gyur zhe na/ srog chags la gnod pa byas pa na/ gal te nyes dmigs rnam pa drug ma byung la/ srog gcod pa yang de'i 'dod pa ltar ma grub par gyur na/ 'dod pas phongs pa'i gzhi las/ de las skyes pa'i sems las byung ba sdug bsngal ba dang / yid mi bde ba des myong bar 'gyur ro/ /gzhan yang nyes dmigs bcur 'gyur te/ 'chal ba'i tshul khrims kyi skabs nas mdo las ji skad 'byung ba bzhin du rgyas par rig par bya'o/ /gzhan yang dge bsnyen gyi bslab pa la mi dge ba'i las kyi lam bzhi dang / lnga pa ste 'bru'i chang dang / bcos pa'i chang gi skabs su bcom ldan 'das kyis nyes dmigs gsungs pa de dag kyang / 'di lta ste/ dga' byed kyi mdo las 'byung ba bzhin du/ rgyas par rig par bya'o/ /skye ba'i kun nas nyon mongs pa gang zhe na/ de ni rnam pa bzhir blta bar bya ste/ rab tu dbye ba dang / sdug bsngal ba dang / ma nges pa dang / 'jug pa'o/ /de la skye ba'i rab tu dbye ba ni/ khams kyi rab tu dbye ba dang / 'gro ba'i rab tu dbye ba dang / gnas gzhan gyi rab tu dbye ba dang / rigs kyi rab tu dbye ba dang / 'jig rten na lus kyi rab tu dbye bar rig par bya'o/ /de la khams kyi rab tu dbye ba ni/ 'dod pa na spyod pa dang / gzugs na spyod pa dang / gzugs med pa na spyod pa'i skye ba'o/ /'gro ba'i rab tu dbye ba ni 'gro ba lnga po dag tu skye ba rnam pa lnga'o/ /gnas gzhan gyi rab tu dbye ba ni 'dod pa'i khams na gnas gzhan sum cu rtsa drug dang / gzugs kyi khams na bco brgyad dang / gzugs med pa'i khams na gnas gzhan bzhi po dag tu skye ba ste/ de dag tu bsdoms na skye ba lnga bcu rtsa brgyad du 'gyur ro/ /rigs kyi rab tu dbye ba ni/ 'dod pa'i khams ni mi rnams kyi nang du rigs ngan par skye ba ste/ 'di ltar 'di na kha cig gdol pa'i rigs sam/ g.yung po'i rigs sam/ shing rta mkhan gyi rigs sam/ smyig ma mkhan gyi rigs sam/ gzhan yang gang ma rabs rnams dang / dma' ba rnams dang / ngan pa rnams dang / 'tsho ba ngan pa rnams dang / chung ba rnams dang / bza' ba dang / btung ba dang / longs spyod chung ba rnams dang / de lta bu dag gi rigs su skye ba lta bu yin te/ de dag ni skal ba med pa'i mi zhes bya'o/ /rigs btsun par skye ba ni/ 'di ltar 'di na kha cig rgyal rigs shing sA la chen po lta bu'am/ bram ze rigs shing sA la chen po lta bu'am/ khyim bdag gi rigs shing sA la chen po lta bu'am/ rigs gzhan yang gang phyug po rnams dang / nor mang ba rnams dang / longs spyod che ba rnams dang / nor rdzas mang ba rnams dang / bdag dbang ba mang zhing mtha' bzang ba rnams dang / nor dang 'bru dang bang mdzod mang ba rnams dang / de lta bu dag gi rigs su skye ba lta bu yin te/ de dag ni skal pa dang ldan pa'i mi zhes bya'o/ /rigs ngan pa yang ma yin rigs btsun pa yang ma yin par skye ba ni 'di ltar 'di na kha cig de gnyi ga las ma gtogs pa'i bar ma'i rigs rnams su skye ba lta bu'o/ /yang na 'dod pa na spyod pa'i lha rnams la skye ba rnam pa gsum yod de/ lha ma yin du skye ba dang / sa gzhi la brten pa'i nang du skye ba dang / nam mkha'i gzhal med khang la brten pa'i nang du skye ba dang / gzugs kyi khams na skye ba rnam pa gsum yod de/ so so'i skye bo rnams kyi 'du shes dang bcas par skye ba dang / 'du shes med par skye ba dang / gnas gtsang mar skye ba dang / gzugs med pa'i khams na skye ba rnam pa gsum yod de/ 'du shes tshad med pa'i lha rnams dang / ci yang med par 'du shes pa rnams dang / 'du shes med 'du shes med min gyi lha rnams kyi nang du skye ba lta bu'o/ /de la 'jig rten na lus kyi rab tu dbye ba ni/ phyogs bcu'i 'jig rten gyi khams tshad med pa dag na/ sems can tshad med pa rnams kyi skye ba tshad med pa yin par rig par bya'o/ /de ltar sdug bsngal ba ni bcom ldan 'das kyis 'di skad du/ rgya mtsho chen po bzhi'i chu gang yin pa de bas ni/ khyed yun ring po nas 'gro zhing 'khor ba rnams kyi khrag 'dzag cing 'bab pa ches mang ngo / /de ci'i phyir zhe na/ khyed yun ring po nas glang po che rnams dang skal pa mnyam par skyes shing / rta rnams dang / rnga mo rnams dang / ba lang rnams dang / bong bu rnams dang / ra dang / ri dgas dang / ma he dang / phag dang / khyi rnams dang skal pa mnyam par skyes la/ der khyed kyis yan lag dang nying lag bcad pa mang po nyams su myong ste/ der khyed kyi khrag mang po zags shing 'bab par gyur pa'i phyir ro/ /glang po che la sogs pa rnams dang skal pa mnyam par gyur pa ji lta ba de bzhin du/ mi rnams kyi nang du yang de dang 'dra ste/ der khyed kyis pha'i phyir sdug bsngal ba dang / ma'i phyir sdug bsngal ba dang / phu nu po'i phyir sdug bsngal ba dang / sring mo'i phyir sdug bsngal ba dang / gnyen bshes zad pa dang / nor zad pa dang / longs spyod zad pa mang po nyams su myong ste/ der khyed kyi mchi ma mang po zags shing bab par gyur to/ /khrag dang mchi ma ji lta ba bzhin du ma'i nu zho 'thungs pa yang de dang 'dra bar blta bar bya'o zhes gsungs te/ de lta bu dang mthun pa rnams ni skye ba'i sdug bsngal gyi rab tu dbye ba yin par rig par bya'o/ /de la ma nges pa ni bcom ldan 'das kyis 'di skad du/ 'di lta ste/ dper na sa 'di'i steng na rtswa dang / shing dang / yal ga dang / lo ma dang / lo ma gzhon nu ci yod pa de dag /skye bo rnams kyis sor bzhi tsam du dum bur bcad la/ pha dang ma gcig nas gcig tu brgyud pa'i phyir bkod de/ 'di ni bdag gi pha'o/ /bdag gi pha de'i pha ni 'di'o/ /'di ni bdag gi ma'o/ /bdag gi ma de'i ma ni 'di'o zhes byas na/ sor bzhi tsam gyi dum bu de dag ni de lta bu'i tshul gyis ches myur du yongs su zad cing thug par 'gyur gyi/ pha rnams kyi pha'i mtha' dang ma rnams kyi ma'i mtha' ni thug par 'gyur zhes nga mi smra'o zhes gsungs pa dang / gang khyed kyis sems can sdug bsngal ba dang / mchog tu sdug bsngal ba dang / yid mi bde ba dang ldan pa gang dag mthong na/ der khyed kyis bdag cag gis kyang 'di 'dra bar sdug bsngal ba dang / sdug bsngal ba ji lta ba bzhin du/ bde ba yang de dang 'dra bar nyams su myong ngo snyam du mtha' shes par gyis shig ces gsungs pa dang / sngon yun ring po 'das pa nas gang du khyed ma skyes pa dang / ma song ba dang / ma shi ba'i sa phyogs de ni ngas mthong bar dka'o/ /yun ring po 'das pa nas/ sems can gang khyed kyi pha ma'am/ phu nu'am/ sring mo'am/ /slob dpon nam/ mkhan po'am/ bla ma'am/ bla ma'i gnas lta bur ma gyur pa de ni ngas mthong bar dka'o zhes gsungs pa dang / gang zag gcig gi bskal pa gcig gi rus pa rnams kyi rus pa'i phung po yang gal te sdud pa zhig yod la/ bsdus nas kyang gal te 'jig par yang mi 'gyur/ rul bar yang mi 'gyur du zin na 'di lta ste/ ri ngos yangs tsam mo zhes gsungs pa lta bu'o/ /de la skye ba'i 'jug pa gang zhe na/ 'di ltar lus rnams kyi rten cing 'brel bar 'byung ba ste/ de ni de dag gi 'jug pa zhes bya'o/ /rten cing 'brel par 'byung ba gang zhe na/ sdom ni/ lus dang sgo dang don dang yang / /rnam par dbye dang rim pa bstan/ /nges pa'i tshig dang rkyen nyid dang / /rkyen gyi rab tu dbye ba dang / /mdo sde bsdu bar bya ba dang / /rnam pa sna tshogs tha ma yin/ / lus gang zhe na/ mdor bsdu na/ rten cing 'brel bar 'byung ba ni rnam pa gsum du gzhag pa yin te/ sngon gyi mtha' nas ji ltar dbus kyi mthar 'byung ba dang / dbus kyi mtha' nas ji ltar phyi ma'i mthar 'byung ba dang / dbus kyi mthar byung nas ji ltar gnas pa dang / rnam par byung bar 'gyur ba'o/ /de la sngon gyi mtha' nas ji ltar dbus kyi mthar 'byung zhing byung nas kyang dbus kyi mthar gnas par 'gyur zhe na/ 'di ltar 'di ni la la sngon mi mkhas shing ma rig par gyur pas/ ma rig pa'i rkyen las byung ba'i bsod nams dang / bsod nams ma yin pa dang / mi g.yo ba'i lus dang ngag dang yid kyi las byas shing bsags nas/ de'i rnam par shes pa las de dang 'brel zhing nying mtshams sbyor ba'i rnam par shes pa'i rgyur gyur pa/ nam ma shi ba'i dus kyi bar du rjes su 'jug par 'gyur ro/ /nang dang phyi rol gyi sred pa yang 'bras bu mngon par 'grub pa'i tshe/ rnam par shes pa de'i grogs byed pa'i tshul gyis nye bar gnas par 'gyur te/ de 'chi ba'i dus byas nas/ sngon gyi mtha' nas da ltar gyi dus su rgyu'i rnam par shes pa'i rkyen gyis nying mtshams sbyor ba'i 'bras bu'i rnam par shes pa mthar gyis ma'i mngal du lus mngon par 'grub par 'gyur te/ mer mer po la sogs pa'i bar gyi gnas skabs kyi khyad par dag gis/ mngal na gnas pa'i ming dang gzugs de gong nas gong du rga ba'i bar du 'gyur ro/ /rnam par shes pa de nyid nying mtshams sbyar ma thag tu skyes nas myong bar 'gyur ba'i las gang yin pa de/ rnam par smin pa'i tshul gyis 'bras bu 'byin par 'gyur te/ rnam par smin pa'i rnam par shes pa de yang ming dang gzugs de nyid la brten cing 'dug go/ /de yang rten rnam pa drug la brten cing 'dug ste/ des na ming dang gzugs kyi rkyen gyis rnam par shes pa zhes bya'o/ /lhan cig byung ba'i dbang po'i gzugs dang / 'gags ma thag pa'i ming ni ci rigs par rnam par shes pa drug po dag gi rten yin te/ de la brten nas ji srid 'tsho'i bar du rnam par shes pa 'jug par 'gyur ro/ /dbang po gzugs can lnga po dag gi rten ni dbang po'i 'byung ba chen po rnams dang / dbang po'i rten 'byung ba chen pos bskyed pa'i gzugs dang dbang po rnams gang gis zin pa'i ming gang yin pa rgyud la yod pa'i rgyun gyis 'jug pa ste/ de gnyi ga rjes su 'jug pa'i phyir gcig tu bsdus te rten yin no/ /de ltar na rnam par shes pa'i rkyen gyis ming dang gzugs zhes kyang bya la/ ming dang gzugs kyi rkyen gyis rnam par shes pa zhes kyang bya ste/ da ltar gyi dus na tshe ji srid par mdung khyim gyi tshul du 'dug go/ /de ltar na sngon gyi mtha' nas dbus kyi mthar/ 'du byed rnams kyi rten cing 'brel par 'byung bar 'gyur la/ byung ba rnams kyang dbus kyi mthar 'jug pa ste/ de la mngal nas skye ba'i skye gnas su 'jug pa'i rim pa ni de yin no/ /sgo nga las skye ba dang / drod gsher las skye ba ni ma'i mngal ma gtogs pa/ de las gzhan yin par rig par bya'o/ /sems can gzugs can 'dod pa na spyod pa dang / gzugs na spyod pa rnams rdzus te skye ba'i skye gnas su ni dbang po tshang bar 'byung ste/ bye brag ni de yod do/ /gzugs med pa rnams na ni rnam par shes pa ming la brten cing / gzugs kyi sa bon la yang brten la/ gzugs kyi sa bon dang ming yang rnam par shes pa la brten cing 'jug ste/ 'di ltar gzugs yongs su chad pa las phyis sa bon las 'byung bar 'gyur te/ 'di la yang bye brag de yod do/ /bsod nams kyi las kyis ni 'dod pa na spyod pa'i lha dang mi rnams kyi nang du skye bar 'gyur ro/ /bsod nams ma yin pas ni ngan song rnams su skye bar 'gyur ro/ /mi g.yo bas ni gzugs dang gzugs med pa rnams su skye bar 'gyur ro/ /dbus kyi mtha' nas phyi ma'i mthar 'du byed rnams kyi rten cing 'brel par 'byung ba ji ltar na 'byung bar 'gyur/ ji ltar na 'byung bar mi 'gyur zhing / mi 'byung bas rnam par byang bar 'gyur zhe na/ de ltar dbus kyi mthar byung ba'i gang zag des sngon gyi las kyi 'bras bu nang gi rnam par smin pa'i 'bras bu dang / yul las skyes pa'i tshor ba'i dbang gis 'bras bu rnam pa gnyis myong bar 'gyur ro/ /de dam pa'i chos ma yin pa nyan pa'am/ sngon goms pa la brten nas/ 'bras bu rnam pa gnyis la rmongs par 'gyur te/ de nang gi rnam par smin pa'i 'bras bu la rmongs pas yang srid pa mngon par 'grub pa las/ sdug bsngal du yang dag pa ji lta bzhin du rab tu mi shes so/ /de sngon gyi mtha' dang phyi ma'i mtha'i ma rig pa'i dbang du byas nas snga ma bzhin du 'du byed rnams byed cing sogs so// // de'i rnam par shes pa de tshe 'di nyid la gsar du las byed pas las de dang 'brel par 'gyur te/ de ltar na ma rig pa'i rkyen gyis 'du byed rnams 'byung bar 'gyur la/ 'du byed rnams kyi rkyen gyis kyang rnam par shes pa 'byung bar 'gyur ro/ /tshe 'di'i rnam par shes pa de ni ma 'ongs pa na mngon par 'grub pa'i rnam par shes pa'i 'bras bu yongs su 'dzin pa'i phyir rgyur gyur pa yin no/ /rnam par shes pa thams cad kyi dbang du byas nas rnam par shes pa'i tshogs drug ces bya ste/ rnam par shes pa de yang phyi ma la/ yang srid pa'i ming dang gzugs kyi sa bon dang 'brel par 'gyur ro/ /ming dang gzugs kyi sa bon de yang phyi ma la/ yang srid pa'i skye mched drug gi sa bon dang 'brel par 'gyur ro/ /skye mched drug gi sa bon de yang phyi ma la/ yang srid pa'i reg pa'i sa bon dang 'brel par 'gyur ro/ / reg pa'i sa bon de yang phyi ma la/ yang srid pa'i tshor ba'i sa bon dang 'brel bar 'gyur te/ 'di ni dbus kyi mtha' la gnas shing / yang sred pa 'phen pa'i rgyu yin par rig par bya ste/ des na rnam par shes pa la sogs pa nas/ tshor ba la thug pa'i bar dag gi lus mtha' dag 'phen par 'gyur ro/ /de rnam par smin pa'i 'bras bu la rmongs pa snga mas de ltar yang srid pas 'phangs nas/ yul las skyes pa'i 'bras bu la rmongs pa cig shos kyis/ yul gyi tshor ba la dmigs nas sred pa skyed par byed do/ /sred pa des 'dod pa yongs su tshol ba'am/ srid pa yongs su tshol bar byed pa na/ 'dod pa'i len pa'am/ srid pa'i len pa'am/ lta ba dang / tshul khrims dang / brtul zhugs dang / bdag tu smra ba len par byed do/ /len pa blangs nas kyang / sred pa dang len pa lhan cig phrad pa na/ 'phen pa'i rgyu snga ma la srid pa zhes bya'o/ /skye ba mngon par 'grub pa'i rgyur bsdus pa'i srid pa'i rjes la 'chi ba'i dus byas nas/ ji ltar 'phangs pa'i 'phen pa'i rgyus rnam par shes pa la sogs pa nas/ tshor ba la thug pa'i 'du byed rnams rim mam cig car 'byung bar 'gyur te/ de ltar tshe 'di la ma rig pa'i 'dus te reg pa las byung ba'i tshor ba'i rkyen gyis sred pa/ sred pa'i rkyen gyis len pa/ len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga ba dang / na ba dang / 'chi ba la sogs pa'i sdug bsngal gyi bye brag rnams/ skye ba'i gnas kha cig tu mngon du 'gyur la/ kha cig tu ni sa bon gyi rjes su 'brel par rig par bya ste/ de ltar na dbus kyi mthar ma rig pa'i rkyen gyis 'du byed rnams dang / tshor ba'i rkyen gyis sred pa la brten nas/ phyi ma'i mthar 'du byed rnams 'byung bar 'gyur ro/ / gal te tshe 'di la gzhan gyi sgra'am/ sngon gyi tshogs la brten nas/ 'bras bur gyur pa 'du byed rnam pa gnyis la de dag gi rgyu dang / de dag gi 'gog pa dang / de dag 'gog par 'gyur ba'i lam tshul bzhin yid la byed na/ des tshul bzhin yid la byas pa'i rgyus yang dag par lta ba skyed de/ bden pa rnams la rim gyis slob pa dang / mi slob pa'i shes pa mthong ba rnam par dag pa thob par 'gyur ro/ /des shes pa mthong ba des na ma rig pa dang / sred pa de ma lus par spong ngo / /de spangs na de la dmigs pa yang dag pa ji lta ba bzhin du mi shes pa'i ma rig pa'i 'dus te reg pa las byung ba'i tshor ba gang yin pa de spangs par 'gyur ro/ /de spangs pas kyang tshe 'di la ma rig pa dang bral nas shes rab rnam par grol ba mngon sum du byas par 'gyur ro/ /ma rig pa'i 'dus te reg pa las byung ba'i tshor ba dang mtshungs par ldan pa'i sems dang mtshungs par ldan pa'i sred pa dang / 'dod chags gang yin pa'i sems de dang bral bas 'dod chags dang bral ba'i phyir sems rnam par grol ba mngon sum du byas par 'gyur ro/ /ma rig pa de 'gags pas ma rig pa ma spangs na rnam par shes pa la sogs pa nas tshor ba la thug pa'i 'du byed rnams skye bar 'gyur ba de dag phyi ma'i mtha' las brtsams te skye bar mi 'gyur la/ mi skye ba'i chos can du yang 'gyur ro/ /de lta bas na ma rig pa 'gags pas 'du byed 'gag pa'i rim pas rnam par smin pa las skyes pa'i reg pa 'gag ste/ rnam par smin pa las skyes pa'i tshor ba'i bar du 'gag par 'gyur zhes bya'o/ /tshe 'di la ma rig pa 'gags pas/ ma rig pa'i 'dus te reg pa 'gag /ma rig pa'i 'dus te reg pa 'gags pas ma rig pa'i 'dus te reg pa las byung ba'i tshor ba 'gag / ma rig pa'i 'dus te reg pa las byung ba'i tshor ba 'gags pas sred pa 'gag /sred pa 'gags pas snga ma bzhin du mi skye ba'i chos nyid kyis len pa la sogs pa nas 'khrug pa la thug pa'i 'du byed rnams 'gag ces bya'o/ /de ltar na tshe 'di la 'du byed de dag 'jug par mi 'gyur la/ tshe 'di la mi 'jug pas tshe 'di la phung po'i lhag ma dang bcas pa'i mya ngan las 'das pa'i dbyings su mya ngan las 'das pa thob par 'gyur te/ de'i tshe de'i rnam par shes pa'i rkyen gyis ming dang gzugs dang / ming dang gzugs kyi rkyen gyis rnam par shes pa'i lhag ma yod de/ yongs su dag cing yongs su byang bar 'gyur ro/ /de'i lus rnam par shes pa dang bcas pa ji srid du gnas pa de srid du bral nas tshor ba myong bar 'gyur gyi ldan pa ni ma yin no/ /de'i lus rnam par shes pa dang bcas pa de yang sngon gyi las kyis 'phangs pa'i tshe ji tsam pa de srid gnas te/ gang gi tshe de'i tshe zad pa na rnam par shes pas zin pa'i lus spong bar 'gyur te/ srog gi dbang po 'di phan chad kyi de'i srog gi dbang po yongs su zad par 'gyur zhing / phyis rnam par smin par mi 'gyur ro/ /rnam par shes pa de yang 'dir tshor ba thams cad dang bcas par rang gi ngang gis 'gags la/ sngar rgyu 'gags pas gzhan du nying mtshams sbyor ba med cing ma lus par 'gags pa yin no/ /de ni phung po lhag ma med pa'i mya ngan las 'das pa'i dbyings shin tu zhi ba'i gnas yin te/ gang gi don du bcom ldan 'das kyi thad du mya ngan las 'das par nye bar 'gro ba dang / mya ngan las 'das pa'i mtha' tshangs par spyad pa bsten pa'o/ /de ltar na rten cing 'brel par 'byung ba rnam par gzhag pa ni/ sngon gyi mtha' nas dbus kyi mthar 'jug pa dang / dbus kyi mtha' nas phyi ma'i mthar 'jug pa dang / dbus kyi mthar 'jug pa rnam par dag pa rnam pa gsum gyis rgyas par bstan pa yin te/ 'di ni rten cing 'brel par 'byung ba'i lus yin no/ /sgo gang zhe na/ sgo rnam pa brgyad kyis rten cing 'brel par 'byung bar 'jug par 'gyur te/ nang gi rnam par shes pa 'byung ba'i sgo dang / phyi rol gyi lo tog 'grub pa'i sgo dang / sems can gyi 'jig rten 'chi 'pho ba dang skye ba'i sgo dang / snod kyi 'jig rten 'jig pa dang 'chags pa'i sgo dang / zas kyis nye bar bsten pa'i sgo dang / las bdag gir bya ba'i dbang du byas te/ sdug pa dang mi sdug pa'i las dang / de dang mthun pa'i 'bras bu longs spyod pa'i sgo dang / mthu'i sgo dang / rnam par byang ba'i sgo'o/ /rten cing 'brel par 'byung ba'i don gang zhe na/ sems can med pa'i don ni/ rten cing 'brel par 'byung ba'i don de sems can med pa yin na mi rtag pa'i don to/ /mi rtag pa yin na ring po mi thogs pa nye bar gnas pa'i don to/ /ring po mi thogs pa nye bar gnas pa yin na gzhan gyi dbang gi don to/ /gzhan gyi dbang yin na byed pa med pa'i don to/ /byed pa med pa'i don yin na rgyu dang 'bras bu'i rgyun mi 'chad pa'i don to/ /rgyu dang 'bras bu rgyun mi 'chad pa yin na mthun par rgyu dang 'bras bu 'jug pa'i don to/ /mthun par rgyu dang 'bras bu 'jug pa'i don yin na las bdag gir bya ba'i don gyis rten cing 'brel par 'byung ba'i don to/ /don gang yongs su bstan pa'i phyir rten cing 'brel par 'byung ba rnam par gzhag ce na/ smras pa/ rgyu dang rkyen rnams kyis rang gi kun nas nyon mongs pa dang / rnam par byang ba'i don yongs su bstan pa'i phyir ro/ /rnam par dbye ba gang zhe na/ sngon gyi mtha' mi shes pa gang yin pa zhes mdo las rgyas par 'byung ste/ de la sngon gyi mtha' mi shes pa gang zhe na/ 'das pa'i 'du byed rnams la tshul bzhin ma yin par rtog pa'i ste/ ci bdag 'das pa'i dus na byung ba zhig gam/ 'on te bdag 'das pa'i dus na ma byung ba zhig /bdag cir gyur pa zhig /bdag ji lta bur gyur ba zhig snyam pa'i mi shes pa gang yin pa'o/ /phyi ma'i mtha' mi shes pa gang zhe na/ ma 'ongs pa'i 'du byed rnams la tshul bzhin ma yin par rtog pa'i ste/ ci bdag ma 'ongs pa'i dus na 'byung bar 'gyur ram/ 'on te bdag ma 'ongs pa'i dus na 'byung bar mi 'gyur ba zhig /bdag cir 'gyur ji lta bu zhig tu 'gyur snyam pa'i mi shes pa gang yin pa'o/ /sngon gyi mtha' dang phyi ma'i mtha' mi shes pa gang zhe na/ nang du tshul bzhin ma yin par the tshom can gyi tshul gyis ci zhig yod/ cir 'gyur/ sems can 'di dag gang nas 'ongs/ 'di nas shi 'phos nas gang du 'gro bar 'gyur snyam pa'i mi shes pa gang yin pa'o/ /nang mi shes pa gang zhe na/ so sor rang gi 'du byed rnams la tshul bzhin ma yin par bdag tu yid la byed pa'i mi shes pa gang yin pa'o/ /phyi rol mi shes pa gang zhe na/ phyi rol gyi 'du byed sems can du ston pa ma yin pa rnams la bdag gi bar tshul bzhin ma yin par yid la byed pa'i mi shes pa gang yin pa'o/ /nang dang phyi rol mi shes pa gang zhe na/ pha rol gyi rgyud la yod pa'i 'du byed rnams la mdza' bshes dang / dgra dang / tha mal par tshul bzhin ma yin par rtog pa'i mi shes pa gang yin pa'o/ /las mi shes pa gang zhe na/ las kyi byed pa por tshul bzhin ma yin par rtog pa'i mi shes pa gang yin pa'o/ /rnam par smin pa mi shes pa gang zhe na/ rnam par smin pa'i 'bras bur bsdus pa'i 'du byed rnams la tshor ba por tshul bzhin ma yin par rtog pa'i mi shes pa gang yin pa'o/ /las kyi rnam par smin pa mi shes pa gang zhe na/ las dang de'i 'bras bu phyin ci log par tshul bzhin ma yin par rtog pa'i mi shes pa gang yin pa'o/ /sangs rgyas mi shes pa gang zhe na/ sangs rgyas rnams kyi byang chub yid la mi byed pa'am/ log par yid la byed pa'am/ bag med pa'am/ yid gnyis za ba'am/ skur pa 'debs pa'i mi shes pa gang yin pa'o/ /chos kyi mi shes pa gang zhe na/ chos kyis legs par bsrungs pa yid la mi byed pa'am/ log par yid la byed pa'am/ bag med pa'am/ yid gnyis za ba'am/ skur ba 'debs pa'i mi shes pa gang yin pa'o/ /dge 'dun mi shes pa gang zhe na/ dge 'dun gyis legs par bsgrubs pa yid la mi byed pa'am/ log par yid la byed pa'am/ bag med pa'am/ yid gnyis za ba'am/ skur pa 'debs pa'i mi shes pa gang yin pa'o/ /sdug bsngal mi shes pa gang zhe na/ sdug bsngal la sdug bsngal du yid la mi byed pa'am/ log par yid la byed pa'am/ bag med pa'am/ yid gnyis za ba'am/ skur pa 'debs pa'i mi shes pa gang yin pa'o/ /sdug bsngal la ji lta ba bzhin du/ kun 'byung ba dang / 'gog pa dang / lam mi shes pa rnams kyang de bzhin du blta bar bya'o/ /rgyu mi shes pa gang zhe na/ rgyu med par rtog pa'am/ mi mthun pa'i rgyu dang / dbang phyug dang / rang bzhin dang / skyes bu gzhan la sogs par tshul bzhin ma yin par rtog pa'i mi shes pa gang yin pa'o/ /rgyu ji lta bar rgyu las byung ba'i 'du byed rnams la yang de bzhin te/ de dag ni kha na ma tho ba med pa'i phyir dge ba'o/ /de dag ni kha na ma tho ba dang bcas pa'i phyir mi dge ba'o/ /phan pa'i phyir brten par bya ba'o / /gnod pa'i phyir brten par bya ba ma yin pa'o/ /gnag pa'i phyir kha na ma tho ba dang bcas pa'o/ /dkar ba'i phyir kha na ma tho ba med pa'o/ /'dres pa'i phyir so so'i cha yod pa'o/ /reg pa'i skye mched drug la yang dag pa ji lta ba bzhin du yang dag par rtog pa mi shes pa gang zhe na/ rtog pa la sems phyin ci log tu gyur pa mngon pa'i nga rgyal can gyi mi shes pa gang yin pa ste/ de dag bsdoms na mi shes pa rnam pa bcu dgu yod do/ /gzhan yang mi shes pa rnam pa bdun yod de/ dus la rmongs pa dang / dngos po la rmongs pa dang / 'pho ba la rmongs pa dang / mchog la rmongs pa dang / de kho na la rmongs pa dang / kun nas nyon mongs pa dang / rnam par byang ba la rmongs pa dang / mngon pa'i nga rgyal gyis rmongs pa'o/ /mi shes pa rnam pa bcu dgu po gang yin pa dang / mi shes pa rnam pa bdun po gang yin pa de la/ gang gis gang bsdus par blta bar bya zhe na/ mi shes pa dang po gsum gyis ni dang po gcig bsdus so/ /'og ma gsum gyis ni gnyis pa bsdus so/ /'og ma gsum gyis ni gsum pa bsdus so/ /'og ma gsum gyis ni bzhi pa bsdus so/ /'og ma bzhis ni lnga pa bsdus so/ /'og ma drug gis ni drug pa bsdus so/ /tha ma gcig gis ni bdun pa bsdus so/ /gzhan yang mi shes pa rnam pa lnga ste/ don la rmongs pa dang / lta ba la rmongs pa dang / bag med pas rmongs pa dang / de kho na'i don la rmongs pa dang / mngon pa'i nga rgyal gyis rmongs pa'o/ /mi shes pa rnam pa bcu dgu po gang yin pa dang / rnam pa lnga po gang yin pa de la/ gang gis gang bsdus par blta bar bya zhe na lta ba la rmongs pa ni/ dang po'i drug dang / rgyu las byung ba'i chos rnams mi shes pa bsdus par blta bar bya'o/ /bag med pas rmongs pas ni las dang rnam par smin pa dang de gnyi ga mi shes pa bsdus so/ /de kho na'i don la rmongs pas ni sangs rgyas la sogs pa nas lam gyi bden pa la thug pa rnams mi shes pa bsdus so/ /mngon pa'i nga rgyal gyis rmongs pas ni tha ma bsdus so/ /don la rmongs pas ni thams cad bsdus par blta bar bya'o/ /mi shes pa dang / ma mthong ba dang / mngon par ma rtogs pa dang / mun pa dang / rmongs pa dang / ma rig pa'i mun pa zhes bya ba ma rig pa'i rnam pa'i rnam grangs drug po 'di dag ni rmongs pa'i gzhi rnam pa bdun po dag dang / rim bzhin du sbyar bar blta bar bya ste/ rmongs pa'i gzhi tha ma gnyis/ gzhi gcig tu byas pa ni tha ma'i ma rig pa'i mun pa'i rnam grangs de'i nang du bsdu bar blta bar bya'o/ /rnam grangs gzhan yang thos pa las byung ba dang / bsams pa las byung ba dang / bsgoms pa las byung ba'i shes rab kyi mi mthun pa'i phyogs kyis/ rnam grangs gsum po dang rim bzhin du sbyar ro/ /mi mthun pa'i phyogs su gyur pa de nyid la/ chung ngu dang / 'bring dang chen po yod pas na / rnam grangs phyi ma gsum du 'gyur te/ de ltar na mi mthun pa'i phyogs kyi rab tu dbye ba dang / ngo bo nyid kyi rab tu dbye bas rnam grangs drug tu 'gyur ro/ / //bam po bcu pa/ lus kyi 'du byed rnams gang zhe na/ lus kyi las 'dod pa na spyod pa dang / gzugs na spyod pa ste/ 'og ma'i bsod nams dang / bsod nams ma yin par grags pa dang / gong ma'i mi g.yo bar grags pa'o/ / ngag gi 'du byed rnams gang zhe na/ ngag gi las te/ lhag ma ni snga ma bzhin du blta bar bya'o/ /yid kyi 'du byed rnams gang zhe na/ yid kyi las te/ de yang 'dod pa'i khams kyi ni bsod nams dang bsod nams ma yin pa ste / mi g.yo ba ni ma yin no/ /khams gong ma gnyis kyi ni mi g.yo ba nyid do/ /mig gi rnam par shes pa gang zhe na/ phyi ma la mig gi dbang po la brten cing / gzugs so sor rnam par rig pa gang yin pa de / bsod nams dang / bsod nams ma yin pa dang / mi g.yo bas yongs su bsgos pa sa bon du gyur pa'i rnam par shes pa gang yin pa dang / sa bon de las byung ba 'bras bur gyur pa gang yin pa'o/ /mig gi rnam par shes pa ji lta bar/ rna ba dang / sna dang / lce dang / lus dang / yid kyi rnam par shes pa rnams kyang ci rigs par blta bar bya ste/ rten dang / yul las de dag gi so sor rnam par rig pa'i bye brag blta bar bya'o/ /de yang 'dod pa na spyod pa ni rnam pa drug go/ /gzugs na spyod pa ni rnam pa bzhi'o/ /gzugs med pa na spyod pa ni rnam pa gcig pu'o/ /tshor ba'i phung po gang zhe na/ thams cad kyang myong ba'i rnam pa yin te/ de yang khams gsum char na spyod pa yin no/ /'du shes kyi phung po gang zhe na/ thams cad kyang shes pa'i rnam pa yin no/ /'du byed kyi phung po gang zhe na/ thams cad kyang sems mngon par 'du byed pa yid kyi las kyi rnam pa yin no/ /rnam par shes pa'i phung po gang zhe na/ thams cad kyang rnam par rig pa'i rnam pa yin te/ phung po 'di dag khams gsum char na spyod pa yin par blta bar bya'o/ /'byung ba chen po bzhi po dag gang zhe na/ sa'i khams dang / chu'i khams dang / me'i khams dang / rlung gi khams te/ de dag ni khams gnyis na yod do/ /'byung ba chen po bzhi po dag rgyur byas pa'i gzugs gang zhe na/ gzugs can gyi skye mched bcu dang / chos kyi skye mched du gtogs pa'i gzugs te/ 'dod pa na spyod pa'i gzugs bcu dang / btags pa'i yod pa'i chos kyi skye mched kyi gzugs dang / gzugs na spyod pa brgyad dang / chos kyi skye mched du gtogs pa'o/ /de yang rnam pa gnyis te/ rnam par shes pa'i sa bon gyis yongs su zin pa sa bon du gyur pa dang / des mngon par bsgrubs pa 'bras bur gyur pa'o/ /mig gi skye mched gang zhe na/ mig gi rnam par shes pa'i rten po gzugs dang ba ste/ gang gis gzugs rnams mthong ba dang / lta ba dang lta bar 'gyur ba'o/ /mig gi skye mched ji lta bar rna ba dang / sna dang / lce dang / lus dang / yid kyi skye mched rnams kyang de bzhin du ci rigs par blta bar bya ste/ thams cad kyang dus gsum du bstan pas/ las bstan par bya'o/ /de yang rnam pa gnyis te ming dang gzugs kyi sa bon gyis yongs su zin pa sa bon du gyur pa dang / des mngon par bsgrubs pas 'bras bur gyur pa ste/ 'dod pa na spyod pa dang / gzugs na spyod pa ni lnga'o/ /drug pa ni khams gsum char na spyod pa'o/ /mig gi 'dus te reg pa gang zhe na/ gsum 'dus pa las skyes pa/ yul sdug pa la sogs pa'i don 'dzin pa ste/ de bzhin du reg pa lhag ma rnams kyang so so'i yul gyi mtshan nyid bstan pa las khong du chud par bya'o/ / de dag kyang rnam pa gnyis te/ skye mched drug gi sa bon gyis yongs su zin pa sa bon du gyur pa dang / des mngon par bsgrubs pa 'bras bur gyur pa ste/ 'dod pa na spyod pa ni thams cad do/ /gzugs na spyod pa ni bzhi'o/ /gzugs med pa na spyod pa ni gcig go/ /bde ba'i tshor ba gang zhe na/ bde ba'i gnas lta bu'i dbang po dang / yul la brten nas sim par tshor ba'i tshor ba'i rnam pa skye ba gang yin pa'o/ /sdug bsngal gyi tshor ba gang zhe na/ sdug bsngal gyi gnas lta bu'i gnyis po la brten nas/ sim pa ma yin par tshor ba'i tshor ba'i rnam pa skye ba gang yin pa'o/ /sdug bsngal yang ma yin bde ba yang ma yin pa'i tshor ba gang zhe na/ sdug bsngal yang ma yin/ bde ba yang ma yin pa'i gnas lta bu'i gnyis po la brten nas sim pa yang ma yin/ sim pa ma yin pa yang ma yin par tshor ba'i tshor ba'i rnam pa skye ba gang yin pa ste/ 'dod pa na spyod pa ni gsum char ro/ /gzugs na spyod pa'i bsam gtan gsum pa man chad na ni gnyis so/ /bsam gtan bzhi pa yan chad/ 'du shes med 'du shes med min skye mched la thug pa man chad na ni/ sdug bsngal yang ma yin bde ba yang ma yin pa'o/ /tshor ba de dag kyang rnam pa gnyis te reg pa'i sa bon gyis yongs su zin pa sa bon du gyur pa dang / des mngon par bsgrubs pa 'bras bur gyur pa'o/ /'dod pa'i sred pa gang zhe na/ 'dod pa na spyod pa'i 'du byed rnams la brten nas 'dod pa na spyod pa'i 'du byed rnams la don du gnyer ba nyon mongs pa can gang yin pa ste/ gang gis 'dod pa'i khams su sdug bsngal mngon par 'grub par byed pa'o/ /gzugs kyi sred pa gang zhe na/ gzugs na spyod pa'i 'du byed rnams la brten nas/ gzugs na spyod pa'i 'du byed rnams la don du gnyer ba nyon mongs pa can gang yin pa ste/ gang gis gzugs kyi khams su sdug bsngal mngon par 'grub par byed pa'o/ /gzugs med pa na spyod pa'i sred pa gang zhe na/ gzugs med pa na spyod pa'i 'du byed rnams la brten nas/ gzugs med pa na spyod pa'i 'du byed rnams la don du gnyer ba nyon mongs pa can gang yin pa ste/ gzugs med pa'i khams su sdug bsngal mngon par 'grub par byed pa'o/ /'dod pa'i len pa gang zhe na/ 'dod pa rnams la 'dun pa dang / 'dod chags gang yin pa'o/ / lta ba'i len pa gang zhe na/ 'jig tshogs la lta ba ma gtogs pa de las gzhan pa'i lta ba rnams la 'dun pa dang / 'dod chags gang yin pa'o/ /tshul khrims dang brtul zhugs kyi len pa gang zhe na/ tshul khrims dang brtul zhugs log par zhugs pa la 'dun pa dang / 'dod chags pa gang yin pa'o/ /bdag tu smra ba'i len pa gang zhe na/ 'jig tshogs la lta ba la 'dun pa dang / 'dod chags gang yin pa ste/ dang pos ni 'dod pa'i khams nyid kho nar sdug bsngal mngon par 'grub par byed do/ /lhag ma rnams kyis ni khams gsum char du'o/ / 'dod pa'i srid pa gang zhe na/ 'dod pa na spyod pa'i sngon gyi dus kyi srid pa dang / las kyi srid pa dang / 'chi ba'i srid pa dang / bar ma do'i srid pa dang / skye ba'i srid pa dang / sems can dmyal ba dang / dud 'gro dang / yi dags dang / lha dang / mi'i srid pa la 'dod pa'i srid pa zhes bya ste/ de yang sngon byas pa'i 'du byed dang / nyon mongs pas yongs su zin cing bskyed pa yin no/ /gzugs kyi srid pa gang zhe na/ sems can dmyal ba dang / dud 'gro dang / yi dags dang / mi'i srid pa ma gtogs pa de las gzhan pa ni gzugs kyi srid pa yin par blta bar bya'o/ /gzugs med pa'i srid pa gang zhe na/ bar ma do'i srid pa yang ma gtogs pa de las gzhan pa'i srid pas bsdus pa ni gzugs med pa'i srid pa yin par blta bar bya'o/ /srid pa bdun po sems can dmyal ba dang / dud 'gro dang / yi dags dang / lha dang / mi dang / las dang / bar ma do'i srid pa rnams gang gi dbang du byas te rnam par gzhag ce na/ dgos pa gsum gyi dbang du byas pa yin te/ gcig ni 'phen pa'i srid pa'o/ /gcig ni srid pa thob par byed pa'i srid pa'o/ /lnga ni 'bras bu nye bar spyod pa'i srid pa'o/ /skye ba gang zhe na/ mngal nas skye ba dang / sgo nga las skye ba'i skye gnas su thog mar mngon par 'grub pa gang yin pa'o/ /kun tu skye ba gang zhe na/ de nyid kyi nang du lus yongs su rdzogs la phyir ma byung ba gang yin pa'o/ /phyir 'byung ba gang zhe na/ de nas byung ba gang yin pa'o/ / mngon par 'grub pa gang zhe na/ byung nas skye ba gang yin pa'o/ /'byung ba gang zhe na/ drod gsher las skye ba dang / rdzus te skye ba'i skye gnas su cig car 'byung ba gang yin pa'o/ /phung po 'thob pa gang zhe na/ skye gnas 'di dag nyid dang / gnas skabs rnams su nye bar len pa'i phung po lnga po dga' 'byung ba gang yin pa'o/ /khams 'thob pa gang zhe na/ phung po de dag nyid rgyu'i rkyen gyis yongs su zin pa gang yin pa'o/ /skye mched 'thob pa gang zhe na/ phung po de dag nyid de las gzhan pa'i rkyen gyis yongs su zin pa gang yin pa'o/ /phung po mngon par 'grub pa gang zhe na/ phung po de dag nyid nyin gcig bzhin du kha zas kyis brtas shing rgyas par byed pa gang yin pa'o/ /srog gi dbang po 'byung ba gang zhe na/ phung po de dag nyid kyi tshe'i lhag ma'i dbang gis gnas skabs gang yin pa'o/ /skye ba de'i don mdor bsdu ba gang zhe na/ skye ba'i ngo bo nyid gang yin pa dang / gang du skye ba dang / gang skye ba dang / rgyu dang rkyen gang dag gis yongs su zin pa dang / nye bar rton pas bsgrubs pa dang / lhan cig skyes pa gang gis 'tsho ba ste/ de ltar na 'di ni don mdor bsdus pa yin no/ /khyor ba gang zhe na/ lus nyam chung bas khyor khyor ba gang yin pa'o/ /skra dkar ba gang zhe na/ skra'i mdog 'gyur ba gang yin pa'o/ /gnyer ma mang ba gang zhe na/ pags pa snyer snyer po gang yin pa'o/ /rgas pa gang zhe na/ 'dod pa la longs spyod pa'i mthu med cing / gzi brjid nyams pa gang yin pa'o/ /zhom pa gang zhe na/ rang bzhin gyis nad bu can du gyur pa'i phyir brtsal bar bya ba la mthu med pa gang yin pa'o/ /lus sme ba nag pos gang ba gang zhe na/ bzang ba la bgegs su gyur pa'i sme ba nag po mang du 'byung ba'o/ /de la phyam sgur po ltar sgur ba dang mgul ba'i sgra ngar ngar po 'byung zhing dbugs brdzangs pa gang zhe na/ 'gro ba'i spyod lam gyis phye ba'i lus kyi dbyibs dang / de las byung ba'i snga ma bas che ba nyid gang yin pa'o/ /lus mdun du dbyibs sgur por gyur pa gang zhe na/ 'dug pa'i spyod lam du gnas pa'i lus sgur ba nyid gang yin pa'o/ /khar ba la brten pa gang zhe na/ 'greng ba'i spyod lam gyis gnas pa khar bas stobs bskyed pas gnas pa gang yin pa'o/ /mi gsal bar gyur pa gang zhe na/ gnyid log pa'i spyod lam gyis gnas pa na/ rgyun du gnyid stug pos non pa gang yin pa'o/ /zhan pa gang zhe na/ de nyid las myur du sad pa'i mthu med pa gang yin pa'o/ /nyams pa gang zhe na/ dran pa'i blo nyams pa gang yin pa'o/ /yongs su nyams pa gang zhe na/ dran pa'i blo zhan pas dge ba'i chos yang dag par sgrub pa'i mthu med pa gang yin pa'o/ /dbang po rnams yongs su smin pa gang zhe na/ rang bzhin gyis zhan par gyur ba gang yin pa'o/ /yongs su 'bral ba gang zhe na/ yul de dag nyid la mthu med par gyur pa gang yin pa'o/ /'du byed rnams rnyings par gyur pa gang zhe na/ 'chir nye ba'i phyir de dag nyid kyi tha ma'i dus skabs la bab pa gang yin pa'o/ /gtugs par gyur pa gang zhe na/ bya ba byed pa la mthu med par gyur ba'i phyir/ /tshe yongs su zad pa na/ lus 'jig tu cha ba gang yin pa'o/ /rga ba'i don mdor bsdu ba gang zhe na/ lus yongs su 'gyur ba dang / skra yang yongs su 'gyur ba dang / rgyas pa yongs su 'gyur ba dang / gzi brjid dang nyams stobs yongs su 'gyur ba dang / nad med pa yongs su 'gyur ba dang / mdog yongs su 'gyur ba dang / spyod lam yongs su 'gyur ba dang / dbang po gzugs can ma yin pa yongs su 'gyur ba dang / dbang po gzugs can yongs su 'gyur ba dang / gnas skabs 'das pa dang / tshe'i mjug brtul ba ni don gyis mdor bsdu ba yin par blta bar bya'o/ /sems can de dang de dag ces bya ba gang zhe na/ sems can dmyal ba pa la sogs pa'o/ /sems can gyi ris gang zhe na/ de dag thams cad nyid do/ / 'chi 'pho ba gang zhe na/ sems can gang dag gnad chad pa med par 'chi ba'o/ /'chi ba nyid gang zhe na/ sems can gang dag gnad chad de 'chi ba'o/ /'bral ba gang zhe na/ lus las rnam par shes pa 'bral ba gang yin pa'o/ /med par 'gyur ba gang zhe na/ dbang po gzugs can 'gags pa gang yin pa'o/ /tshe nyams pa gang zhe na/ skyigs bu dang rngam par gyur pa'i gnas skabs gang yin pa'o/ /drod yal ba gang zhe na/ g.yo ba med par gyur pa'i gnas skabs gang yin pa'o/ /phung po rnams spangs shing srog gi dbang po 'gags pa gang zhe na/ dus su 'chi ba gang yin pa'o/ /'chi ba gang zhe na/ de'i rkyen dag gis dus lam bab par 'chi 'pho ba gang yin pa'o/ /'chi ba'i dus byed pa gang zhe na/ ring por mi thogs par 'chi ba'i gnas skabs gang yin pa'o/ /rnam grangs gzhan yang 'chi ba ni bdud kyi las te/ 'chi ba'i dus byed ces bya ba yin no/ /'chi ba'i don mdor bsdu ba gang zhe na/ 'chi 'pho ba gang yin pa dang / chos gang 'chi 'pho ba dang / ji ltar 'chi 'pho ba dang / shi 'phos pa de'i mjug thogs kyi dus gang yin pa ste/ 'di ni don gyis mdor bsdu ba yin no/ /de ltar na 'di ni rten cing 'brel bar 'byung ba'i rnam par 'byed pa'i rnam par dbye ba yin par blta bar bya'o/ /ci'i phyir ma rig pa la sogs pa srid pa'i yan lag rnams kyi rim pa 'di lta bur bstan par byas she na/ thog mkho nar shes bya'i dngos po la rmongs so/ /rmongs pa de nyid las log par mngon par 'du byed do/ /log par mngon par 'du byed pas/ sems phyin ci log tu 'gyur ro/ /sems phyin ci log tu gyur pas nying mtshams sbyor ro/ /nying mtshams sbyor bas dbang po yongs su rdzogs par 'gyur ro/ /dbang po yongs su rdzogs pa las gnyis kyis yul yongs su longs spyod par byed do/ yul yongs su longs spyad pa las lhag par zhen pa dang / de 'dod par 'gyur ro/ /'dod nas yongs su tshol bas nyon mongs pa la sogs par 'gyur ro/ /nyon mongs pa bsags pas yang srid par sdug pa dang mi sdug pa'i las kun nas ldang ngo / /las bsags pa kun nas langs pas 'gro ba lnga'i 'khor bar sdug bsngal mngon par 'grub po/ /sdug bsngal mngon par grub par byas pas/ rga shi la sogs pa'i sdug bsngal ba lus yongs su 'gyur ba'i rga shi'i sdug bsngal 'byung ngo / /yul yongs su gyur pa'i rgyu las byung ba ni/ mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa'i sdug bsngal yin te/ de lta bas na bcom ldan 'das kyis yan lag bcu gnyis po 'di dag go rims kyis bstan to/ /go rims kyi rnam grangs gzhan yang rten cing 'brel par 'byung ba las brtsams pa'i rkyen rnam pa gnyis yod de/ lus kyi rkyen dang / yul la nye bar spyod pa'i rkyen to/ /lus kyi rkyen yang yan lag drug gis bsdus shing yul las longs spyad pa'i rkyen yang yan lag drug kho nas bsdus te/ thog mar ni lus la bdag tu 'dzin pa la sogs pas rmongs so/ /de nas las rnams kyi 'bras bu rnam par smin pa/ sdug bsngal bar 'gyur bar ma shes nas las byed do/ /byas nas kyang de nyid la shas cher rjes su rtog ste/ grogs rnam par shes pa de dang ldan pa'i las kyis phyi ma la dbang po 'grub pas bsdus pa dang / de yongs su rdzogs pas bsdus pa dang / yul la longs spyod pas bsdus pas ming dang gzugs dang / reg pa la thug pa'i sdug bsngal rnam pa gsum mngon par 'grub par byed do/ /tshe 'di nyid la yang reg pa'i rkyen gyis tshor ba la sred pa bskyed pa dang / brtsal ba'i sgo dang / rnyed pa dang / bkur sti'i sgo dang / tshul khrims dang brtul zhugs kyi sgo dang / thar pa'i sgo nas 'dod pa yongs su tshol ba'am/ lus yongs su tshol ba'am/ thar pa yongs su tshol ba'ang rung ste/ yul la yongs su longs spyod pa'i rkyen dang ldan pa'i yongs su tshol ba byed do / log par yongs su tshol ba byed pa nyon mongs pa rnams dang / de sngon du 'gro ba'i las rnams byas nas / 'gro ba lnga'i 'khor bar skye'o/ /skyes nas kyang rga zhing 'chi bar 'gyur ro/ /go rims kyi rnam grangs gzhan yang / sems can gyi tshogs gsum yod de/ 'jig rten las 'das pa'i rnam par dag pa 'dod pa rnams dang / 'jig rten pa'i dag pa 'dod pa rnams dang / yul lhur 'dzin pa rnams so/ /de la dang po rnams ni dkar po'i phyogs kyis ni rten cing 'brel bar 'byung ba 'gog par byed la 'phel bar ni mi byed do/ /sems can gnyis pa rnams ni bden pa rnams yang dag pa ji lta ba bzhin du mi shes su zin kyang / dran pa la nye bar gnas shing / bsod nams dang / mi g.yo ba zag pa dang bcas pa bsgom pa las byung ba'i las byas pa'am/ dran pa la nye bar gnas pa ma yin du zin kyang / bsod nams ma yin pa la 'gyod pas yongs su bsgos pa'am/ 'gyod pa med pa la mchog tu dga' bas yongs su bsgos pa'i sems kyis shas cher gnas te/ des na snga ma bzhin du phyi ma la skye ba'i gnas tha ma dang / 'bring dang / khyad par du 'phags pa dag tu mthar gyis ming dang gzugs nas reg pa la thug pa'i sdug bsngal rnam pa gsum mngon par 'grub par 'gyur ro/ /sems can gsum pa da ltar byung ba'i yul la longs spyod pa las byung ba'i tshor ba la gnas pa rnams kyi ni/ snga ma bzhin du yan lag drug po gzhan/ sred pa nas rga shi la thug pa rnams rim gyis 'byung bar blta bar bya'o/ /ci'i phyir rten cing 'brel par 'byung ba/ rga shi nas bzung ste/ lugs las bzlog pa'i go rims su bstan zhe na/ bden pa'i tshul bstan pa'i dbang du byas pa yin te/ 'di ltar skye ba dang rga shi ni sdug bsngal gyi bden pas rab tu phye ba yin no/ /bcom ldan 'das kyis ming dang gzugs la 'gag pa sngon du 'gro ba'i chos ni dgu'o zhes gang gsungs pa/ ci'i phyir ma rig pa 'gag pa sngon du 'gro ba zhes ma gsungs she na/ sems rnam par grol ba rnams la de 'dogs par mdzad pa'i phyir te/ de dag gi tshe 'di la sa bon du gyur pa dang / tshe phyi ma la 'bras bur gyur pa'i ming dang gzugs nas tshor ba la thug pa'i bar du/ mi skye ba'i 'gog pas 'gag par 'gyur zhing / tshe 'di la yang tshor ba myong ba na sred pa'i bag la nyal kun tu bcom pa'i phyir/ mi 'jug pas 'gag par 'gyur la/ de 'gags pas de sngon du 'gro ba'i yan lag rnams 'gag par 'gyur te/ de ltar rnam pa 'di lta bu 'di ni rten cing 'brel par 'byung ba'i go rims bstan pa'i rgyu yin par blta bar bya'o/ /ci'i phyir rten cing 'brel par 'byung ba zhes bya zhe na/ rten cing 'brel par 'byung ba zhes bya ba ni/ zhig nas 'gro ba rnams su nyon mongs pa rnams dang ldan pa dag skye ba'o/ /yi ge'i nges pa'i tshig ni rkyen las skye ba dang / skad cig ma'i don gyi dbang du byas te/ myur du 'jig pa dang ldan par skye ba ni rten cing 'brel bar 'byung ba'o/ /gzhan yang rkyen 'das pa dang / ma btang ba las rang gi rgyud du skye ba ni/ rten cing 'brel par 'byung ba'o/ /'di yod pas 'di 'byung / 'di skyes pas 'di skye ba ste/ gzhan du ma yin no zhes bya ba'i don 'di'i dbang du byas nas/ de nges pa'i tshig tu blta bar bya'o/ /gzhan yang bral zhing bral zhing rgyun du skye ba ni rten cing 'brel par 'byung ba ste/ zhig cing zhig cing zhes bya ba'i tha tshig go/ /gzhan yang 'das pa'i dus su rkyen du gyur nas/ 'brel par rgyun du skye ba ni rten cing 'brel par 'byung ba'o/ /bcom ldan 'das kyis kyang thugs su chud nas/ yang dag pa'i rkyen ngas bstan par bya'o zhes gsungs te/ so sor thugs su chud ces bya ba ni mngon par rdzogs par rtogs zhes bya ba'i tha tshig go/ /de lta bas na rten cing 'brel bar 'byung ba zhes bya ba de nyid ming du chags pa yin no/ /rkyen du zhig gis ma rig pa 'du byed rnams kyi rkyen du 'gyur zhe na/ gzugs can rnams la ni bdag po'i rkyen gyis rkyen du 'gyur ro/ /gzugs can ma yin pa rnams la ni/ de ma thag pa dang / dmigs pa dang / bdag po'i rkyen gsum kho nas rkyen du 'gyur ro/ /yan lag lhag ma rnams la ni ci rigs par rkyen du 'gyur bar blta bar bya ste/ gzugs can rnams ni gzugs can rnams la bdag po'i rkyen gcig gis so/ /gzugs can ma yin pa rnams la ni/ dmigs pa'i rkyen dang / bdag po'i rkyen dang gnyis so/ /gzugs can ma yin pa rnams ni gzugs can rnams la gcig pu kho nas so/ /gzugs can ma yin pa rnams ni/ gzugs can ma yin pa rnams la/ de ma thag pa dang / dmigs pa dang / bdag po'i rkyen gsum gyis so/ /ci'i phyir yan lag 'di dag rgyu'i rkyen gyis rkyen du mi 'gyur zhe na/ rgyu'i rkyen ni rang gi sa bon gyi rkyen gyis phye ba'i phyir ro/ /gal te rgyu'i rkyen gyis rkyen rnams su mi 'gyur na/ ci'i phyir rten cing 'brel par 'byung ba rgyu dang 'bras bu'i tshul du bstan zhe na/ bdag po'i rkyen gyis bsdus pa'i 'dren pa'i rgyu dang / 'phen pa'i rgyu dang / mngon par 'grub pa'i rgyu'i dbang du byas pa'i phyir ro/ /yan lag rnams las su zhig 'phen pa'i rgyur bsdus she na/ ma rig pa nas bzung ste/ tshor ba'i bar du'o/ /yan lag rnams las du zhig mngon par 'grub pa'i rgyur bsdus she na/ sred pa nas bzung ste/ sred pa'i bar du'o/ /yan lag rnams las du zhig 'phen pa dang / mngon par 'grub pa'i rgyu'i 'bras bur bsdus she na/ tshe 'di nas tshe phyi ma'i rnam par shes pa nas tshor ba la thug pa rnams dang / skye ba dang / rga shi'i gnas skabs rnams so/ /ma rig pa ni tshul bzhin ma yin pa yid la byed pa'i rgyu las byung ngo zhes kyang gsungs na/ rten cing 'brel par 'byung ba bshad pa'i skabs su ci'i phyir de thog mar ma bstan ce na/ spong ba'i rgyu ma yin pa dang / kun nas nyon mongs pa'i rgyu ma yin pa'i phyir/ 'di ltar yid la byed pa de ni/ rmongs pa ma yin pa la mi skye la/ rten cing 'brel par 'byung ba ni kun nas nyon mongs pa'i rgyu yin pa dang / ma rig pa ni ngo bo nyid kyis kun nas nyon mongs pa can yin la tshul bzhin ma yin pa yid la byed pa ni/ ngo bo nyid kyis kun nas nyon mongs pa can ma yin pa dang / des ni ma rig pa kun nas nyon mongs par mi byed kyi/ ma rig pa'i dbang gis de kun nas nyon mongs par 'gyur ba dang / skye ba yang las dang nyon mongs pas bskyed pa yin la/ de la las kyi rgyun ni rten cing 'brel par 'byung ba'i dang po ma rig pa yin pa'i phyir te/ de'i phyir yang tshul bzhin ma yin par yid la byed pa ma gsungs so/ /ci'i phyir ngo bo nyid kyi rkyen du ngo bo nyid ma gsungs she na/ ngo bo nyid ni rkyen gzhan dang ma phrad na/ kun nas nyon mongs pa'i tshul gyis ngo bo nyid gso bar byed pa'am/ nyams par byed pa ma yin te/ de bas na ma gsungs so/ /bsod nams dang mi g.yo ba'i 'du byed rnams ni/ so sor brtags nas bsgrims te byas pa ma yin na/ ci'i phyir ma rig pa'i rkyen gyis byung ba zhes bya zhe na/ brdar btags pa'i sdug bsngal gyi rgyu mi shes pa la/ de'i rkyen gyis bsod nams ma yin pa 'byung la/ yang dag pa'i sdug bsngal gyi rgyu mi shes pa la/ de'i rkyen gyis bsod nams dang mi g.yo ba rnams 'byung ste/ de bas na de dag kyang ma rig pa'i rkyen gyis byung ba zhes bya'o/ /chags pa dang zhe sdang dang gti mug kyang las kyi gzhir gsungs na/ ci'i phyir gti mug bzhi kho na zhes bya zhe na/ bsod nams dang bsod nams ma yin pa dang / mi g.yo ba'i las kyi gzhi'i skabs yin pa'i phyir ro/ /chags pa dang / zhe sdang dang / gti mug ni bsod nams ma yin pa kho na'i gzhi yin no/ /sems pa ni lus dang ngag gi las kun nas slong bar byed pas/ 'du byed kyi rkyen gyis kyang 'du byed rnams 'byung bar 'gyur na/ ci'i phyir ma rig pa rkyen kho nar brjod ce na/ 'du byed mtha' dag kun slong ba'i rkyen gyi skabs yin pa dang / nyon mongs pa can dang / dge ba'i sems pa bskyed pa'i rkyen gyi skabs yin pa'i phyir ro/ /rnam par shes pa ni ming dang gzugs kyi rkyen las byung ba yang yin na/ ci'i phyir don de la 'du byed rkyen kho nar brjod ce na/ 'du byed rnams ni rnam par shes pa kun nas nyon mongs pa can du byed pa dang / yang srid par 'phen par byed pa dang / mngon par 'grub par byed pa dang / ming dang gzugs ni rten pa dang / dmigs pa'i tshul gyis bskyed pa'i rkyen byed pa tsam du zad pa'i phyir de lta ma yin no/ /ming dang gzugs ni 'byung ba chen po rnams dang / reg pa rgyur byas pa yin na/ ci'i phyir rnam par shes pa rkyen kho nar brjod ce na/ rnam par shes pa ni de gsar du bskyed pa'i rgyu yin la/ 'byung ba chen po rnams dang / rig pa ni skyes zin pa dang / skye ba'i tshe gnas kyi rgyu 'ba' zhig yin pa'i phyir ro/ / khams drug la brten nas ma'i mngal du 'chags pa yin na/ ci'i phyir rnam par shes pa'i khams kho nar brjod ce na/ rnam par shes pa'i khams yod na/ ma'i mngal du khu chu dang khrag gi 'byung ba chen po dang / mngal gyi sbubs ma tshang ba med pas/ rnam par shes pa'i khams gtso bor nges pa dang / skye gnas dang / srid pa thams cad du skye ba'i skabs yin pa'i phyir ro/ /skye mched drug ni zas kyi rkyen las byung ba yang yin na/ ci'i phyir ming dang gzugs rkyen kho nar brjod ce na/ ming dang gzugs ni de skye ba'i rgyu yin la/ zas ni skyes nas gnas pa dang / ston pa'i rgyu tsam du zad pa'i phyir ro/ /reg pa ni gsum 'dus pa'i rkyen las byung ba yin na/ ci'i phyir 'di skye mched drug rkyen kho nar brjod ce na/ skye mched drug yod na/ de las gzhan pa gnyis nges par tshang bar 'gyur bas/ skye mched drug gtso bo yin pa dang / skye mched drug gis gnyis bsdus pa'i phyir ro/ /tshor ba rnams ni bdag nyid kyis brtsal ba dang / pha rol gyis brtsal ba dang / dus tshigs 'gyur ba dang / sngon gyi las kyis drangs pa dag las dmigs par 'gyur na/ ci'i phyir 'dir reg pa rkyen kho nar bstan zhe na/ reg pa ni kun nas nye bar 'gyur ba'i rgyu yin pa dang / de las gzhan pa'i rkyen rnams 'dren pa yang reg pa yin pa dang / tshor ba de dag kyang reg pa las byung gi reg pa med na mi 'byung ba'i phyir ro/ /sred pa ni ma rig pa'i rkyen dang / de dang mthun pa'i yul gyi rkyen las 'byung bar yang gsungs na/ ci'i phyir/ 'dir tshor ba rnams rkyen kho nar bshad ce na/ 'di ltar tshor ba'i dbang gis yul dang phrad cing / mi 'bral bar 'dod pa 'byung ba dang / de dang mthun pa'i yul la ni gti mug 'ba' zhig gi dbang gis tshor ba de dag 'byung ba dang / nub par 'gyur ba la sogs pa yang dag pa ji lta ba bzhin du mi shes nas/ de la sems zlog par mi byed pa'i phyir ro/ /len pa ni bag la nyal ma spangs pa dang / de dang mthun pa'i chos rnams las kyang 'byung ba yin na/ ci'i phyir 'dir sred pa'i rkyen kho nas len pa zhes brjod ce na/ 'di ltar 'dod pa skyes nas tshol bar byed pa na/ bag la nyal yang sad par byed la/ de dang mthun pa'i chos rnams kyang 'dren pa'i phyir ro/ /sngar ni ma rig pa'i rkyen gyis las kyi srid pa zhes bshad na/ ci'i phyir len pa'i rkyen gyis srid pa zhes bshad ce na/ 'di ltar len pa'i stobs kyis las de nyid la skye ba'i gnas de dang der rnam par shes pa dang / ming dang gzugs la sogs pa 'dren pa'i mthu yod pa'i phyir ro/ /skye ba ni khu chu dang / khrag la sogs pa'i rkyen gyis kyang 'byung na/ ci'i phyir 'dir srid pa can kho nar bshad ce na/ srid pa yod na de las gzhan pa'i rkyen rnams tshang bar nges par yod par 'gyur te/ de nyid rkyen gyi gtso bo yin pa'i phyir ro/ /rga shi ni dus dang ya nga ba ma spangs pa dang / pha rol gyi gnod pa la sogs pa dag las kyang dmigs na/ ci'i phyir 'dir skye ba rkyen kho nar brjod ce na/ rkyen de dag gi rtsa ba yang skye ba yin la/ rkyen de dag med du zin kyang rga shi ni skye ba las gyur pa'i phyir ro/ /yan lag bcu gnyis po 'di dag las/ yan lag du zhig ni nyon mongs pa'i lam yin/ du zhig ni las kyi lam yin/ du zhig ni sdug bsngal gyi lam yin zhe na/ gsum ni nyon mongs pa'i lam mo/ /gnyis ni las kyi lam mo/ /lhag ma rnams ni sdug bsngal gyi lam mo/ /rgyur gyur pa kho na dag ni du zhe na/ dang po gcig go/ /'bras bur gyur pa kho na dag ni du zhe na/ tha ma gcig go/ /rgyu dang 'bras bur gyur pa kho na dag ni du zhe na/ lhag ma rnams so/ /dri ba 'di'i lan gdab pa'i rnam grangs gzhan yang / gsum ni rgyur gyur pa kho na'o/ /gnyis ni 'bras bur gyur pa kho na'o/ /lhag ma rnams ni rgyu dang 'bras bur gyur par blta bar bya'o/ /so so'i mtshan nyid dag ni du/ 'dres pa'i mtshan nyid dag ni du zhe na/ gsum ni so so'i mtshan nyid do/ /'du byed la sogs pa gzhan rnams ni 'dres pa'i mtshan nyid do/ /'du byed rnams dang 'dres pa'i mtshan nyid yin na/ ci'i phyir rnam pa gnyis su bstan zhe na/ sdug pa de mi sdug pa'i 'bras bu 'byin par byed pa dang / 'gro bar 'grub pa'i mthu'i bye brag gis so/ /rnam par shes pa dang / ming dang gzugs dang / skye mched drug gi phyogs gcig kyang 'dres pa'i mtshan nyid yin na/ ci'i phyir rnam pa gsum du bstan zhe na/ kun nas nyon mongs pa'i dus kyi skabs yin pa dang / ldugs pa'i dus kyi skabs yin pa dang / 'jug pa'i dus kyi skabs yin pa'i phyir ro/ /rnam par shes pa la sogs pa nas tshor ba la thug pa dag dang / skye ba dang / rga shi rnams 'dres pa'i mtshan nyid yin na/ ci'i phyir rnam pa gnyis su bstan zhe na/ sdug bsngal ba'i dngos po'i mtshan nyid tha dad par bstan pa'i phyir dang / 'phen pa dang mngon par 'grub pa'i rab tu dbye ba yongs su bstan pa'i phyir ro/ /rten cing 'brel par 'byung ba'i 'jig pa'i don gang zhe na/ skyes pa rnams mi gnas pa'i don gang yin pa'o/ /ldan pa'i don gang zhe na/ rkyen rnams tshogs shing phrad pa'i don gang yin pa'o/ /skye ba'i don gang zhe na/ rkyen tshogs pas yongs su zin pa rnams sar pa sar pa 'byung ba'i don gang yin pa'o/ /rten cing 'brel par 'byung ba ni gang / rten cing 'brel par 'byung ba nyid ni gang zhe na/ 'du byed rnams kyi skye ba'i chos nyid gang yin pa de ni rten cing 'brel par 'byung ba'o/ /skyes pa nyid gang yin pa de ni rten cing 'brel par 'byung ba nyid ces bya'o/ /yan lag rnams las du zhig sdug bsngal gyi bden pas bsdus la/ tshe 'di'i sdug bsngal du 'gyur zhe na/ gnyis te skye ba dang rga shi'o/ /du ni sdug bsngal gyi bden pas bsdus pa nyid yin la/ phyi ma la sdug bsngal kho nar 'gyur zhe na/ rnam par shes pa nas tshor ba la thug pa sa bon du gyur pa rnams so/ /kun 'byung ba'i bden pas bsdus pa gang zhe na/ lhag ma rnams so/ /ci ma rig pa 'du byed rnams kyi lhan cig 'byung bas rkyen du 'gyur ram/ 'on te 'gags ma thag pa rkyen du 'gyur la / 'on te 'gags nas ring du lon pa rkyen du 'gyur zhe na/ rnam pa gsum char gyis kyang rkyen du 'gyur bar blta bar bya ste/ lhan cig 'byung ba ni/ 'du byed dang mthun pa'i chos rnams la sgrib pa'i rkyen yin te/ gang gi don du 'du byed rnams slong bar byed pa de mi shes pa'o/ /'gags ma thag pa ni rkyen to/ /lta ba ngan pa dang / bag med par ldan pa'i mi shes pas/ phyi ma la de skye ba dang mthun pa'i rgyud 'jog pas na/ 'gags nas ring du lon pa yang 'phen pa'i rkyen du 'gyur bar blta bar bya'o/ /'du byed rnams rnam par shes pa'i rkyen rnam pa gsum du 'gyur bar ji ltar blta zhe na/ sa bon gyi tshul du yongs su bsgo bas na/ lhan cig 'byung ba'i rkyen du 'gyur ro/ /de'i 'og tu dbang byed pas na/ 'gags ma thag pa ni skyed pa'i rkyen du 'gyur ro/ /phyi ma la 'bras bu mngon par 'grub par 'phel bas na/ 'phen pa'i rkyen du 'gyur te/ ji ltar 'du byed rnams rnam par shes pa'i rkyen du 'gyur ba bzhin du/ rnam par shes pa ming dang gzugs kyi rkyen dang / ming dang gzugs skye mched drug gi rkyen dang / skye mched drug reg pa'i rkyen dang / reg pa tshor ba'i rkyen du 'gyur ba yang de bzhin no/ /tshor ba srid pa'i rkyen rnam pa gsum du 'gyur bar ji ltar blta zhe na/ lhan cig 'byung ba ni/ lhag par zhen pa'i rkyen gyis blta bar bya'o/ /de ma thag pa ni de'i dbang gis yongs su tshol ba la sogs pa'i bya ba rjes su 'jug pas na skyed pa'i rkyen du 'gyur ro/ /phyi ma la de las grol bar dka' ba'i rgyud 'jog par byed pas na/ 'gags nas ring du lon pa yang 'phen pa'i rkyen du 'gyur ro/ /sred pa len pa'i rkyen rnam pa gsum gyis ji ltar rkyen du 'gyur zhe na/ 'dun pa dang / 'dod chags dang ldan pa'i phyir des blang bar bya ba'i chos rnams la 'dod cing zhen pa'i rkyen du gyur pas na/ lhan cig 'byung ba'i rkyen du 'gyur ro/ /de ma thag pa ni de dbang byed pas na/ skyed pa'i rkyen du 'gyur ro/ /de las grol bar dka' ba'i rgyud 'jog par byed pas na/ 'gags nas ring du lon pa yang 'phen pa'i rkyen du 'gyur ro/ /len pa srid pa'i rkyen rnam pa gsum gyis ji ltar rkyen du 'gyur zhe na/ lhan cig 'byung ba ni/ las de'i 'gro ba sgrub par 'gyur bas na/ lhan cig 'byung ba'i rkyen du 'gyur ro/ /de'i stobs kyis skye ba'i gnas de'i rnam par shes pa de la sogs pa 'dren pa'i rkyen du gyur pas na/ 'gags ma thag pa skyed pa'i rkyen du 'gyur ro/ /khams 'grub par 'gyur ba'i mthu yod pa'i rkyen du gyur pas na/ 'gags nas ring du lon pa yang 'phen pa'i rkyen du 'gyur ro/ /srid pa skye ba'i rkyen rnam pa gsum gyis ji ltar rkyen du 'gyur zhe na/ lhan cig 'byung ba'i rkyen ni sa bon gyi tshul gyis yongs su bsgo ba'i phyir ro/ /de ma thag pa ni/ de'i dbang gis 'jug pas skye ba'i rkyen du 'gyur ro/ /'gags nas ring du lon pa yang 'bras bu de mngon par 'grub pa 'phen pa'i rkyen du 'gyur ro/ /ji ltar srid pa skye ba'i rkyen du gyur pa ltar skye ba rga shi'i rkyen du 'gyur ba yang de bzhin du blta bar bya'o/ /srid pa ni rnam pa gnyis su rnam par gzhag ste/ gtso bo'i yan lag ni 'di lta ste/ len pa yongs su zin pa'i las de sngar bshad pa bzhin no/ /mtha' dag gi yan lag ni/ las dang rnam par shes pa la sogs pa tshor ba la thug pa sa bon du gyur pa / len pas yongs su zin pa rnams srid par gzhag par blta bar bya'o/ /ci srid pa'i yan lag 'di lta ste/ 'du byed nas rga shi la thug pa 'di dag gi las rim gyis rkyen du 'gyur ba de kho nar zad dam/ 'on te gzhan 'ga' yang yod dam zhe na/ 'di ltar thams cad kyi las gnyis pa ni rang gi spyod yul ci rigs par 'jug pa yin par blta bar bya'o/ /ci ma rig pa 'du byed rnams 'ba' zhig gi rkyen yin nam/ 'on te yan lag gzhan dag gi yang yin zhe na/ ma rig pa ni rga shi yan chad kyi rkyen yang yin te/ rkyen rab tu nye ba'i phyir na/ 'du byed rnams kyi rkyen kho nar bstan to/ /yan lag lhag ma rnams kyang de bzhin du ci rigs par blta bar bya ste/ yan lag 'og ma rnams ni gong ma gong ma rnams kyi rkyen du mi 'gyur ro/ /ci'i phyir zhe na/ ci nas 'og ma spang ba'i phyir gong ma spang ba la sgrim par byed de/ de spangs pas 'og ma spong bar 'gyur la/ gong ma spang ba'i phyir 'og ma spang bar ni mi byed pa'i phyir ro/ /de lta bas na de dag nyid de dag gi rkyen yin par blta bar bya'o/ /ci'i phyir 'di yod pas 'di 'byung zhes bya zhe na/ rkyen ma spangs pa las de las gzhan pa skye ba'i phyir ro/ /ci'i phyir 'di skyes pa'i phyir 'di skye zhes bya zhe na/ rkyen mi rtag pa las de las gzhan pa skye ba'i phyir ro/ /ci'i phyir skye ba yod na rga shi 'byung la/ skye ba'i rkyen gyis rga shi zhes bya/ ma rig pa dang 'du byed rnams kyi bar du yang brjod pa'i tshul 'di dang sbyar bar bya ste/ byed pa med pa'i rkyen las de las gzhan pa skye ba'i phyir ro/ /ci'i phyir skye ba yod na rga shi 'byung la/ skye ba'i rkyen gyis rga shi ste gzhan la mi bya/ de bzhin du ma rig pa dang / 'du byed rnams kyi bar du yang brjod pa'i tshul 'di dang sbyar bar bya ste/ rang gi rgyud la yod pa'i rkyen gyis rang gi rgyud nyid la/ de las gzhan pa skye ba'i phyir ro/ /ma rig pa'i rkyen gyis 'byung ba'i chos gang dag yin pa 'du byed rnams kyang de dag yin nam/ 'on te 'du byed gang dag yin pa/ ma rig pa'i rkyen gyis byung ba yang de dag yin nam zhe na/ 'du byed rnams yin la/ ma rig pa'i rkyen las byung ba ma yin pa yang yod de/ zag pa med pa dang / ma bsgribs la lung du ma bstan pa'i lus dang ngag dang / yid kyi 'du byed rnams so/ /ma rig pa'i rkyen gyis byung ba yin la/ 'du byed rnams ma yin pa yang yod de/ 'du byed kyis bsdus pa'i srid pa'i yan lag ma gtogs par de las gzhan pa'i srid pa'i yan lag gang yin pa rnams so/ /ma rig pa'i rkyen las byung ba yang yin la/ 'du byed rnams kyang yin pa yang yod de/ /lus dang ngag dang yid kyi 'du byed bsod nams dang bsod nams ma yin pa dang / mi g.yo ba rnams so/ /rnam pa de dag las ma gtogs pa ni/ mu bzhi pa ste/ de ltar na 'di ni mu bzhir dbye ba'o/ /'du byed kyi rkyen las byung ba gang yin pa rnam par shes pa yang de yin nam/ 'on te rnam par shes pa gang yin pa dang / 'du byed kyi rkyen las byung ba yang de bzhin nam zhe na/ 'du byed rkyen las byung ba la/ rnam par shes pa ma yin pa yang yod de/ rnam par shes pa ma gtogs pa da las gzhan pa'i srid pa'i yan lag rnams so/ /rnam par shes pa yin la/ 'du byed kyi rkyen las byung ba ma yin pa yang yod de/ zag pa med pa dang / ma bsgribs la lung du ma bstan pa gang yin pa ste/ rnam par smin pa las byung ba ni ma gtogs so/ /rnam par shes pa yang yin la/ 'du byed kyi rkyen las byung ba yang yin na ni/ yang srid pa pa'i sa bon du gyur pa dang / 'bras bur gyur pa'i rnam par shes pa gang yin pa'o/ /rnam pa 'di dag las ma gtogs pa ni mu bzhi pa ste/ tshul de dang 'dra bar reg pa'i rkyen gyis tshor ba'i bar gyi mur bzhir dbye ba yang ci rigs su blta bar bya'o/ /tshor ba'i rkyen las byung ba gang yin pa de dag thams cad sred pa yin nam/ 'on te sred pa gang yin pa de dag thams cad tshor ba'i rkyen las byung ba yin nam zhe na/ 'di la yang mu bzhir dbye ste/ sred pa yin la tshor ba'i rkyen las byung ba ma yin pa ni/ gong ma'i rnam par thar pa 'dod pa dang / sred pa dge ba la brten nas/ sred pa spong ba gang yin pa'o/ /tshor ba'i rkyen las byung ba sred pa ma yin pa ni/ reg pa'i 'dus te reg pa las byung ba'i tshor ba la brten nas/ de las gzhan pa'i chos rnams skye ba gang yin pa dang / de las gzhan pa'i srid pa'i yan lag gang yin pa rnams so/ / tshor ba'i rkyen las byung ba yang yin la/ sred pa yang yin pa ni nyon mongs pa can gyi sred pa ste/ ma rig pa'i 'dus te reg pa las byung ba'i tshor ba'i rkyen las byung ba'o/ /rnam pa 'di dag las ma gtogs pa ni mu bzhi pa'o/ /sred pa'i rkyen las byung ba gang yin pa de dag thams cad len pa yin nam/ 'on te len pa gang yin pa de dag thams cad sred pa'i rkyen las byung ba yin nam zhe na/ 'di la tshig phyi ma yin par blta bar bya ste/ len pa gang yin pa ji snyed pa de dag thams cad ni sred pa'i rkyen las byung ba yin no/ /srid pa'i rkyen las byung la/ len pa ma yin pa yang yod de/ len pa ma gtogs pa de las gzhan pa'i srid pa'i yan lag rnams dang / dge ba la sred pa la brten nas brtson 'grus rtsom pa la sogs pa dge ba'i chos rnams skye ba gang yin pa'o/ /len pa'i rkyen las byung ba gang yin pa de dag thams cad srid pa yin nam/ 'on te srid pa gang yin pa de dag thams cad len pa'i rkyen las byung ba yin nam zhe na/ sred pa gang ji snyed pa de dag thams cad ni len pa'i rkyen las byung ba yin no/ /len pa'i rkyen las byung la/ srid pa ma yin pa yang yod de/ srid pa ma gtogs pa de las gzhan pa'i srid pa'i yan lag rnams so/ /srid pa'i rkyen las byung ba gang yin pa de dag thams cad skye ba yin nam/ 'on te skye ba gang yin pa de dag thams cad srid pa'i rkyen las byung ba yin nam zhe na/ skye ba gang ji snyed pa de dag thams cad ni srid pa'i rkyen las byung ba yin no/ /srid pa'i rkyen las byung ba skye ba ma yin pa yang yod de/ skye ba ma gtogs pa srid pa'i yan lag gi tha ma rga shi gang yin pa'o/ /skye ba'i rkyen las byung ba gang yin pa de dag thams cad rga shi yin nam/ 'on te rga shi gang yin pa de dag thams cad skye ba'i rkyen las byung ba yin nam zhe na/ rga shi gang ji snyed pa de dag thams cad ni skye ba'i rkyen las byung ba yin no/ /skye ba'i rkyen las byung la/ rga shi ma yin pa yang yod do/ /na ba dang / mi sdug pa dang phrad pa dang / sdug pa dang bral ba dang / 'dod pas phongs pa dang / de las byung ba'i mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams so/ /srid pa'i yan lag 'di rnams las yan lag du zhig yang dag pa'i lta bas bsdus pa'i lam gyi bgegs su gyur pa'i gtso bo yin zhe na/ ma rig pa dang de las byung ba'i yid kyi 'du byed rnams dang / srid pa'i phyogs gcig ni bgegs su gyur pa yin no/ /yang dag pa'i lta ba la ji lta ba bzhin du yang dag pa'i rtog pa dang / yang dag pa'i rtsol ba la yang de bzhin no/ /yang dag pa'i ngag dang / las kyi mtha' dang / 'tsho ba rnams la ni/ lus kyi 'du byed rnams dang / ngag gi 'du byed rnams dang / srid pa'i phyogs gcig bgegs su gyur pa yin no/ /yang dag pa'i dran pa dang / yang dag pa'i ting nge 'dzin la ni yan lag lhag ma rnams bgegs su gyur par blta bar bya'o/ /srid pa'i yan lag 'di dag las yan lag du zhig ni gcig tu nges par kun nas nyon mongs pa'i phyogs yin/ du ni kun nas nyon mongs pa dang rnam par byang ba'i phyogs yin zhe na/ bzhi ni gcig tu nges par kun nas nyon mongs pa'i phyogs yin no/ /de las gzhan pa rnams ni kun nas nyon mongs pa dang / rnam par byang ba'i phyogs yin te/ ngan song rnams dang / de ma yin pa'i mi khom pa rnams su skye ba gang yin pa de ni kun nas nyon mongs pa'i phyogs so/ /mi khom pa ma yin pa'i lha dang mi rnams kyi nang du skye ba gang yin pa de ni/ kun nas nyon mongs pa dang / rnam par byang ba'i phyogs su blta bar bya ste/ yan lag lhag ma rnams kyang phyogs de gnyis su ci rigs par blta bar bya'o/ /ma rig pa gang med na/ 'du byed rnams 'byung bar mi 'gyur la/ ma rig pa gang 'gags pas 'du byed 'gag par 'gyur zhe na/ kun nas dkris pa dang / kun nas ldang ba dang / bag la nyal ba rnam pa gsum du gnas pa'i ma rig pa 'gags pas/ ma rig pa 'gags la/ de 'gags pas/ de 'gag pa yod na/ de las 'du byed 'gag par 'gyur ro/ /'du byed gang dag med na/ rnam par shes pa mi 'byung la/ 'du byed gang dag 'gags pas rnam par shes pa 'gag par 'gyur zhe na/ 'du byed gang dag rang gi rgyud la byas nas 'gags la gnyen po ma bskyed pa dang / gzhan yang yid kyi 'du byed rnams yod na/ lus dang ngag gi 'du byed rnams 'byung ste/ de bas na de yod cing de yod na de'i rkyen gyis rnam par shes pa 'byung la/ de med cing de med par gyur na/ de mtha' dag 'gags pa las rnam par shes pa 'gag par blta bar bya'o/ /rnam par shes pa gang med na ming dang gzugs 'byung bar mi 'gyur la/ rnam par shes pa gang 'gags pas ming dang gzugs 'gag par 'gyur zhe na/ sa bon du gyur pa'i rnam par shes pa med na/ 'bras bur gyur pa'i rnam par shes pa mi 'byung la/ de gnyis 'gags pas ming dang gzugs de gnyis 'gag par 'gyur te/ rnam par shes pa dang / ming dang gzugs kyi tshul ji lta ba de bzhin du/ yan lag lhag ma tshor ba'i bar la yang ci rigs par blta bar bya'o/ /ma rig pa'i rkyen gyis 'du byed rnams ji lta ba de bzhin du/ sred pa'i rkyen gyis len pa dang / len pa'i rkyen gyis srid pa yang de dang 'dra bar blta bar bya'o/ /'du byed kyi rkyen gyis rnam par shes pa ji lta ba bzhin du/ srid pa'i rkyen gyis skye ba yang de dang 'dra bar blta bar bya'o/ /rnam par shes pa'i rkyen gyis ming dang gzugs la sogs pa ji lta ba bzhin du/ skye ba'i rkyen gyis rga shi yang de bzhin no/ /tshor ba gang med na sred pa mi 'byung la/ tshor ba gang 'gags pas sred pa 'gag par 'gyur zhe na/ 'du byed kyi rkyen gyis rnam par shes pa ji lta ba bzhin du 'di'i tshul yang de dang 'dra bar blta bar bya'o// //bam po bcu gcig pa/ rten cing 'brel par 'byung ba'i sgo rnam pa brgyad bshad pa gang yin pa de dag las/ sgo du ni rten cing 'brel par 'byung ba'i yan lag bcu gnyis kyis rab tu phye ba yin la/ du ni ma yin zhe na/ sgo gsum ni des rab tu phye ba yin te/ gnyis kyi ni phyogs gcig rab tu phye ba'o/ /gcig ni yan lag ril gyis rab tu phye'o / /lhag ma rnams ni rab tu phye ba ma yin te/ rnam par shes pa 'byung ba'i sgo dang / las bdag gir bya ba'i sgo ni phyogs gcig rab tu phye'o/ /sems can gyi 'jig rten 'jug pa'i sgo ni yan lag ril gyis rab tu phye'o/ /rten cing 'brel par 'byung ba ma shes pa la nyes dmigs ji snyed yod par blta bar bya zhe na/ lnga ste bdag tu lta bar gyur pa dang / sngon gyi mtha' dang ldan pa'i lta bar gyur pa rnams bskyed pa dang / sngon gyi mtha' dang ldan pa dag ji lta ba bzhin du/ phyi ma'i mtha' dang ldan pa rnams dang / sngon gyi mtha' dang phyi ma'i mtha' dang ldan pa rnams nan gyis mchog tu 'dzin par gnas pa dang / len pa dang bcas pa dang / yongs su gdung ba dang bcas pa dang / tshe 'di la yongs su mya ngan las 'da' bar mi 'gyur ba 'di ni nyes dmigs lnga pa'o/ /shes pa'i phan yon du blta bar bya zhe na/ de dag las bzlog pa lnga po de nyid ni phan yon du blta bar bya'o/ /yan lag bcu gnyis po 'di dag las yan lag du zhig rdzas su yod ce na/ smras pa/ dgu'o/ / rdzas su yod pa ma yin pa du zhe na/ lhag ma gang yin pa rnams so/ /rdzas gcig gi ngo bo nyid du zhe na/ lnga'o/ /rdzas du ma'i ngo bo nyid du zhe na/ lhag ma gang yin pa rnams so/ /shes bya'i sgrib pa'i rgyu du zhe na/ gcig go/ /sdug bsngal 'grub par byed pa du zhe na/ lnga'o/ /sdug bsngal gyi snying po du zhe na/ lnga po nyid do/ /sdug bsngal nyid du zhe na/ gnyis so/ /rgyu'i dngos por bstan pa ni du/ 'bras bu'i dngos por bstan pa ni du/ rgyu dang 'bras bu 'dres pa'i dngos por bstan pa ni du zhe na/ gong ma drug po ma rig pa nas reg pa'i bar dang / sred pa dang / len pa dang / srid pa rnams ni rgyu'i dngos por bstan to/ /tha ma gnyis ni 'bras bu'i dngos por bstan to/ /tshor ba ni 'dres par bstan te/ tshe phyi ma'i reg pa'i rkyen gyis rgyur gyur pa dang / tshe 'di'i sred pa'i rkyen gyis 'bras bur gyur pa ste/ de gnyis ka yang reg pa'i rkyen las byung ba'i phyir 'dres par bstan to/ /yan lag rnams las du ni sdug pa dang mi sdug pa'i 'bras bu 'grub par byed pa yin/ yan lag rnams las du ni las kyi 'bras bu 'grub par byed pa yin zhe na/ gong ma drug ni 'bras bu snga ma shos 'grub par byed pa yin no/ /phyi ma gsum ni phyi ma shos 'grub par byed pa yin no/ /gcig ni 'bras bu de gnyis ka 'grub par byed pa yin no/ /bde ba'i tshor ba dang ldan pa du zhe na/ yan lag gnyis ma gtogs pa de las gzhan pa rnams so/ /sdug bsngal gyi tshor ba dang ldan pa du zhe na/ de dag nyid dang / gzhag pa las yan lag gcig go/ / sdug bsngal ba yang ma yin bde ba yang ma yin pa'i tshor ba dang ldan pa du zhe na/ 'di yang bde ba'i tshul bzhin du blta bar bya'o/ /tshor ba dang ldan pa ma yin pa du zhe na/ gcig ste yan lag gzhag pa gang yin pa'o/ /yan lag rnams las du ni 'gyur ba'i sdug bsngal gyis bsdus she na/ bde ba'i tshor ba dang ldan pa gang dag yin pa dang / tshor ba dang mi ldan pa'i yan lag gang yin pa de'i phyogs gcig go/ /sdug bsngal gyi sdug bsngal gyis du bsdus she na/ sdug bsngal ba dang ldan pa gang yin pa rnams dang / tshor ba dang ldan pa ma yin pa'i yan lag gang yin pa de'i phyogs gcig go/ /'du byed kyi sdug bsngal gyis du bsdus she na/ 'gyur ba'i sdug bsngal dang / sdug bsngal gyi sdug bsngal gyis bsdus pa gang yin pa dag ni/ 'du byed kyi sdug bsngal gyis bsdus pa yang de dag yin no/ /'du byed kyi sdug bsngal gyis bsdus la/ de ma yin pa'i sdug bsngal gnyis kyis ma bsdus pa yang yod de/ sdug bsngal yang ma yin bde ba yang ma yin pa dang / ldan pa gang yin pa rnams dang tshor ba dang ldan pa ma yin pa'i yan lag gang yin pa de'i phyogs gcig go/ /ci skye ba dang snyoms par 'jug pa thams cad du kun tu spyod pa'i tshul gyis yan lag thams cad dmigs sam zhe na/ smras pa mi dmigs te/ 'du shes med pa dang / 'gog pa'i snyoms par 'jug pa dang / 'du shes med pa'i snyoms par 'jug pa la ni gzugs can rnams dmigs la/ gzugs can ma yin pa rnams mi dmigs so/ /gzugs med pa rnams su skyes pa la ni gzugs can ma yin pa rnams dmigs la/ gzugs can rnams mi dmigs so/ /yan lag rnams la brten nas yan lag las dben pa thos par 'gyur ram zhe na/ smras pa/ de'i dus na phyogs gcig las dben par 'gyur gyi/ yan lag thams cad las gtan dben par 'gyur ba ni ma yin te/ sa gong ma pa'i yan lag rnams la brten nas/ sa 'og ma pa rnams las dben par 'gyur ro/ /yan lag rnams las du ni nyon mongs pa can yin la/ du ni nyon mongs pa can ma yin zhe na/ gsum ni nyon mongs pa can no/ lhag ma rnams ni rnam pa gnyis so/ /nyon mongs pa can ma yin pa ni/ dge ba rnams so / /lung du ma bstan pa'i bye brag gis rnam pa gnyis su tha dad par blta bar bya'o/ /'dod pa dang ldan pa du zhe na/ thams cad ril gyis 'dus pa'o/ /gzugs dang ldan pa du zhe na/ thams cad kyi phyogs gcig go/ /der rga ba ji ltar blta zhe na/ 'du byed rnams rnyings pa dang / dengs pa gang yin pa'o/ /gzugs dang ldan pa ji lta ba bzhin du gzugs med pa dang ldan pa yang de dang 'dra'o/ /slob pa du zhe na gang yang ma yin no/ / mi slob pa du zhe na/ gang yang ma yin no/ / slob pa yang ma yin mi slob pa yang ma yin pa du zhe na/ thams cad do/ /ci yan lag dge ba zag pa dang bcas pa gang yin pa de dag slob pa pa ma yin nam zhe na/ 'jug par gtogs pa'i phyir mi rung ste/ slob pa'i dge ba zag pa dang bcas pa'i chos rnams ni 'jug pa dang mi mthun pa dang / rig pa'i rkyen las byung ba'i phyir ro/ /rgyun du zhugs pas du spangs par brjod ce na/ thams cad kyi phyogs gcig ste/ gang yang ril gyis ni ma yin no/ /rgyun du zhugs pa ji lta ba bzhin du/ lan cig phyir 'ong ba yang de dang 'dra'o/ /phyir mi 'ong bas yan lag du spangs par brjod ce na/ 'dod pa na spyod pa ni thams cad do/ /gzugs dang gzugs med pa na spyod pa rnams ni nges pa med do/ / dgra bcom pas yan lag du spangs par brjod ce na/ khams gsum na spyod pa thams cad do/ /mdo sde de dang de dag las rten cing 'brel par 'byung ba rnam pa dus bstan ce na/ mdor bsdu na rnam pa drug ste/ lugs su 'byung bar bstan pa dang / lugs su 'byung ba ma yin par bstan pa dang / phyogs gcig gi yan lag bstan pa dang / yan lag ril gyis bstan pa dang / nag po'i phyogs bstan pa dang / dkar po'i phyogs bstan pa'o/ /bcom ldan 'das kyis rten cing 'brel par 'byung ba ni zab po zhes gsungs pa de/ zab pa ji ltar rig par bya zhe na/ 'di lta ste/ mi rtag pa'i don dang / sdug bsngal ba'i don dang / stong pa'i don dang / bdag med pa'i don las brtsams te/ rnam pa bcus rten cing 'brel par 'byung ba'i don zab par blta bar bya'o/ /de la mi rtag pa'i don las brtsams te/ rang gi sa bon las kyang skye la/ rkyen gzhan las kyang ltos pa dang / rkyen gzhan las kyang skye la/ rang gi sa bon las kyang ltos pa dang / rang gi sa bon dang gzhan gyi rkyen las kyang skye la/ sa bon dang rkyen las kyang de bskyed pa'i phyir g.yo ba'am/ spyod pa'am/ byed pa ci yang med pa dang / sa bon dang rkyen las g.yo ba'am/ spyod pa'am/ byed pa yang med la/ de gnyis la rgyu nyid kyi mthu yang med pa ma yin no/ /yan lag rnams ni thog ma med pa'i dus nas grags pa'i mtshan nyid kyang yin la skad cig re re la sar pa sar pa'i mtshan nyid rnams kyang 'jug go/ /rten cing 'brel par 'byung ba ni/ skad cig la 'jig pa'i ngang can yang yin la/ gnas pa'i tshul du yang snang ngo / /de la sdug bsngal ba'i don las brtsams te/ yan lag rnams sdug bsngal bar ro gcig pa'i mtshan nyid kyang yin la/ rnam pa gsum du yang snang ngo / /de la stong pa'i don las brtsams te/ /yan lag rnams sems can dang / byed pa po dang / sdug bsngal dang bral ba yang yin la/ de dang ma bral ba lta bur yang snang zhing ston to/ / de la bdag med pa'i don las brtsams te/ yan lag rnams rang la dbang med cing bdag med pa'i mtshan nyid kyang yin la/ bdag gi mtshan nyid du yang snang ngo / /don dam par na brjod du med pa'i ngo bo nyid kyang yin la brjod pas kyang de'i ngo bo nyid bstan to/ /shes pa du zhig gis rten cing 'brel par 'byung bar shes par bya zhe na/ chos gnas pa shes pa dang / de kho na shes pa gnyis kyis te/ chos gnas pa shes pas ji ltar shes par bya zhe na/ bcom ldan 'das kyis ji ltar gzhag pa dang / bstan pa de bzhin du shes par bya'o/ / de kho na shes pas ji ltar shes par bya zhe na/ ji ltar slob pa gzhi rnams mthong ba dag gis zab mo'i don du mthong ba bzhin du shes par bya'o/ /rten cing 'brel par 'byung ba ni ngas byas pa yang ma yin/ gzhan dag gis byas pa yang ma yin te/ de bzhin gshegs pa rnams byung yang rung ma byung yang rung ste/ chos nyid dang / chos gnas pa dang / chos kyi dbyings 'di ni gnas pa nyid do zhes gang gsungs pa la/ chos nyid ni gang chos gnas pa ni gang / chos kyi dbyings ni gang zhe na/ thog ma med pa'i dus nas grags pa gang yin pa de ni chos nyid do/ ji ltar grags pa de rigs pa'i tshig dang yi ge rnams kyis rnam par gzhag pa ni chos gnas pa'o/ /gnas pa de'i rgyu chos nyid de yin pas na/ de'i phyir dbyings zhes bya'o/ /gal te skye ba med du zin na/ su yang gang du yang skye bar 'gyur ram/ yang na rnam pa thams cad du skye ba med kyang skye ba'i rkyen gyis rga shi yod dam zhes gang gsungs pa la/ ci'i phyir 'dir ngo bo nyid kyi rkyen du ngo bo nyid gsungs she na/ 'bras bu'i skye ba sa bon dang bcas pa'i dbang du byas pa'i phyir te/ skye ba'i sa bon ni rnam par shes pa la sogs pa tshor ba la thug pa'i yan lag rnams yin pas na/ de yang don gyis skye ba yin te/ de yong na phis de dag nyid 'bras bur gyur pa la srid pa'i rkyen gyis skye ba zhes bya'o/ /de bzhin du yan lag lhag ma ji skad bstan pa rnams kyang ci rigs su blta bar bya'o/ /yan lag thams cad gcig gi rkyen gcig yin par ma gsungs na/ ci'i phyir ming dang gzugs dang / rnam par shes pa gcig gi rkyen gcig yin par rnam par gzhag ce na/ ming dang gzugs ni tshe 'di la rnam par shes pa'i rkyen du 'gyur la rnam par shes pa ni tshe phyi ma la ming dang gzugs kyi rkyen du gyur pa'i phyir te/ 'di ltar ma'i mngal du nying mtshams sbyor ba'i tshe/ gcig gi rkyen du gcig 'gyur ba'i phyir rnam par shes pa'i rkyen gyis ma'i mngal du khu chu dang khrag gi gzugs ming gis yongs su zin pa mer mer por 'dres par 'gyur la/ ming dang gzugs de'i rkyen las byung ba'i rnam par shes pa des der gnas thob par 'gyur ro/ /ci'i phyir byang chub sems dpa' nag po'i phyogs la rnam par lta ba na/ rnam par shes pa las yid phyir ldog par 'gyur la/ yan lag gzhan dag las ma yin zhe na/ 'di ltar de gnyis ni gcig gi rkyen gcig yin pas na/ rnam par shes pa'i rkyen gyis ming dang gzugs ji lta ba bzhin du/ ming dang gzugs kyi rkyen gyis rnam par shes pa yang de dang 'dra ba la rnam par lta ba na/ rnam par shes pa las de'i yid phyir ldog par 'gyur la/ de las gzhan pa yan lag rnams las de ltar phyir ldog par ma gyur te/ de la 'ga' zhig la gcig gi rkyen du gcig 'gyur pa mthong bas na de'i phyir ldog pa zhes brjod do/ /ldog pa'i phyogs la ming dang gzugs ni yang srid pa pa'i rnam par shes pa ldog pa'i rgyu ma yin te/ des na gzhan yin par brtags pa'i phyir ro/ /ci'i phyir yan lag rnams bdag nyid kyis byas pa yang ma yin/ gzhan gyis byas pa yang ma yin/ gnyis nas byas pa yang ma yin la/ rgyu med pa las skyes pa yang ma yin par brjod ce na/ skyed pa po med pa dang / rkyen la g.yo ba med pa dang / rkyen la nus pa yod pa'i phyir ro/ /rten cing 'brel par 'byung ba las gang ni sdug bsngal gyi myu gu lta bu yin/ gang ni sdug bsngal gyi myu gu yongs su bsrung ba lta bu yin gang ni sdug bsngal gyi shing lta bu yin zhe na/ ma rig pa dang 'du byed kyi rkyen gyis rnam par shes pa la sogs pa tshor ba la thug pa rnams ni myu gu lta bu'o/ /sred pa la sogs pa tshor ba'i rkyen las byung ba srid pa la thug pa rnams ni yongs su bsrung ba lta bur blta bar bya'o/ /skye ba dang rga shi ni sdug bsngal gyi shing lta bur blta bar bya'o/ /yan lag rnams las mar me'i snying po lta bur lta ba du zhe na/ rnam par shes pa la sogs pa tshor ba la thug pa rnams so/ /yan lag rnams las mar lta bur lta ba du zhe na/ ma rig pa dang / 'du byed rnams dang / sred pa dang / len pa dang / srid pa'o/ /yan lag rnams las me lce 'bar ba lta bur lta ba du zhe na/ skye ba dang rga shi'o/ /ci'i phyir nag po'i phyogs bstan pas rten cing 'brel par 'byung ba la 'phel ba zhes bya zhe na/ tha mar 'bras bu sdug bsngal gyi phung po 'ba' zhig por 'gyur ba dang / yan lag thams cad rkyen du gyur cing de las gzhan pa'i yan lag ni de las gzhan pa'i yan lag rnams kyi rjes su 'gro ba'i phyir ro/ /ci'i phyir dkar po'i phyogs bstan pas rten cing 'brel bar 'byung ba la 'grib pa zhes bya zhe na/ phyi ma phyi ma spangs pas yongs su 'bri bar 'gyur ba dang / yan lag thams cad sdug bsngal gyi phung po 'ba' zhig po 'grib pa'i rgyur gyur pa'i phyir ro/ /yan lag rnams las du ni rgyu dang bcas pa'i chos rnams zhes bya zhe na/ dang po bdun no/ /yan lag rnams las du ni rgyu dang bcas pa'i sdug bsngal zhes bya zhe na/ de las gzhan pa lnga'o/ /yan lag rnams las du 'gags na zag pa zad pas rab tu phye ba yin zhe na/ gsum mo/ /yan lag rnams las du 'gags na rkyen zad pas rab tu phye ba yin zhe na/ gsum po de dag nyid de de las gzhan pa'i yan lag gi rkyen du gyur pa'i phyir ro/ /yan lag rnams las du 'gags na tshor ba zad pas rab tu phye bar 'gyur zhe na/ gcig ste/ nyon mongs pa rnams spangs nas phung po 'gag pa'i dus na/ 'di nyid du tshor ba thams cad med par 'gyur ba'i phyir ro/ / ci'i phyir rten cing 'brel bar 'byung ba la brten nas shes pa bdun cu rtsa bdun rnam par gzhag ce na/ rgyu dang bcas pa'i kun nas nyon mongs pa shes pas brjod pa'i don dang / rang gi rgyud la rang gis byas pa'i kun nas nyon mongs pa brjod pa'i don dang / sngon gyi mtha' las yan lag rnams kyi thog ma med par brjod pa'i don dang / sngon gyi mtha' las yan lag rnams kyis kun nas nyon mongs pa'i go skabs brjod pa'i don dang / phyi ma'i mtha' las yan lag rnams kyis kun nas nyon mongs pa ldog pa'i go skabs brjod pa'i don dang / yan lag du bsdus pa ma yin pa zag pa dang bcas pa'i shes rab yongs su shes par brjod pa'i don de rgyu 'di dag gi dbang du byas nas yan lag re re la yang bdun bdun yod pas na/ shes pa bdun cu rtsa bdun du 'gyur bar blta bar bya'o/ / ci'i phyir shes pa bzhi bcu rtsa bzhi rnam par gzhag ce na/ yan lag re re la 'phags pa'i bden pa bzhi'i tshul gyis brtags pa'i dbang du byas te/ bzhi bcu rtsa bzhir 'gyur te / de la 'dod pa'i khams su skyes par gyur la/ 'dod pa na spyod pa'i lus kyis sa gong ma'i mig dang / rna ba mngon par sgrub par byed na ni des kyang sa 'og ma pa rnams dang / rang gi sa pa'i gzugs rnams kyang mthong la/ sgra rnams kyang thos so/ /khams gsum na spyod pa'i yid dang ma brtags pa ni lus de nyid kyis mngon du byed do/ /gzugs dang gzugs med pa'i khams su skyes pas ni/ sa 'og ma ma gtogs pa thams cad 'dod pa'i khams kyi bzhin du mngon du byed do/ /kun nas nyon mongs pa rnam pa gsum po / /nyon mongs pa'i kun nas nyon mongs pa dang / las kyi kun nas nyon mongs pa dang / skye ba'i kun nas nyon mongs pa 'di spang ba'i phyir/ mngon par rtogs pa drug yod par rig par bya ste/ 'di lta ste/ bsam pa'i mngon par rtogs pa dang / dad pa'i mngon par rtogs pa dang / tshul khrims kyi mngon par rtogs pa dang / mngon par rtogs pa'i shes pas bden pa mngon par rtogs pa dang / mngon par rtogs pa'i mtha' las byung ba'i shes pa bden pa mngon par rtogs pa dang / mthar thug pa'i mngon par rtogs pa'o/ /rnal 'byor spyod pa'i sa las/ rtog pa dang bcas dpyod pa dang bcas pa dang / rtog pa med la dpyod pa tsam dang / rtog pa yang med dpyod pa yang med pa'i sa ste lnga pa rdzogs so// //mnyam par gzhag pa'i sa gang zhe na/ sdom la/ bstan dang de yi rnam gzhag dang / /yid la byed dang mtshan ma dang / /mdo sde rnam pa sna tshogs las/ /bsdus pa tha mar gyur pa yin/ /mnyam par gzhag pa'i sa ni mdor bsdu na/ bstan pa dang / de'i rnam par gzhag pa dang / yid la byed pa'i rab tu dbye ba dang / mtshan ma'i rab tu dbye ba dang / mdo sde'i bsdu ba yin par rig par bya'o/ /bstan pa gang zhe na/ mdor bsdu na mnyam par gzhag pa'i sa ni rnam pa bzhi ste/ 'di lta ste/ bsam gtan dang / rnam par thar pa dang / ting nge 'dzin dang / snyoms par 'jug pa'o/ /bsam gtan gang zhe na/ bsam gtan bzhi ste/ dben pa las skyes pa rtog pa dang bcas dpyod pa dang bcas pa dang / ting nge 'dzin las skyes pa rtog pa med cing dpyod pa med pa dang / dga' ba med pa dang / btang snyoms dang dran pas yongs su dag pa'o/ /rnam par thar pa gang zhe na/ rnam par thar pa brgyad de/ gzugs can gzugs rnams la lta ba ni/ rnam par thar pa dang po'o/ /nang gzugs med par 'du shes pas phyi rol gyi gzugs rnams la lta ba ni rnam par thar pa gnyis pa'o/ /sdug pa'i rnam par thar pa lus kyis mngon sum du byas nas bsgrubs te gnas pa ni/ rnam par thar pa gsum pa'o/ /nam mkha' mtha' yas skye mched dang / rnam shes mtha' yas skye mched dang / ci yang med pa'i skye mched dang / 'du shes med 'du shes med min skye mched dang / 'du shes dang tshor ba 'gog pa lus kyis mngon sum du byas te/ bsgrubs nas gnas pa ni rnam par thar pa brgyad pa'o/ /ting nge 'dzin gang zhe na/ stong pa nyid dang / smon pa med pa dang / mtshan ma med pa'o/ /yang ting nge 'dzin ni gsum ste/ rtog pa dang bcas dpyod pa dang bcas pa dang / rtog pa med la dpyod pa tsam dang / rtog pa med cing dpyod pa med pa'o/ /yang gsum ste/ chung ngu dang / chen por gyur pa dang / tshad med pa'o/ /yang gsum ste/ dga' ba ldan pa dang / bde ba dang ldan pa dang / btang snyoms dang ldan pa'o/ /yang cha gcig bsgoms pa'i ting nge 'dzin dang / gnyis ka'i cha bsgoms pa'i ting nge 'dzin to/ /yang ting nge 'dzin bzhi bsgoms pa dang ldan pa'i ting nge 'dzin dang / yang 'phags pa'i shes pa lnga dang ldan pa'i ting nge 'dzin dang / yang yan lag lnga dang ldan pa'i ting nge 'dzin dang / yang 'phags pa nyid kyi ting nge 'dzin rgyu dang bcas shing yo byad dang bcas pa dang / yang rdo rje lta bu'i ting nge 'dzin dang / yang slob pa'i ting nge 'dzin dang / mi slob pa'i ting nge 'dzin dang / slob pa yang ma yin mi slob pa yang ma yin pa'i ting nge 'dzin to/ /snyoms par 'jug pa gang zhe na/ mthong ba'i snyoms par 'jug pa lnga dang / zil gyis gnon pa'i skye mched brgyad kyi snyoms par 'jug pa dang / zad par gyi skye mched bcu'i snyoms par 'jug pa dang / gzugs med pa'i snyoms par 'jug pa bzhi dang / 'du shes med pa'i snyoms par 'jug pa dang / 'gog pa'i snyoms par 'jug pa'o/ /de'i rnam par gzhag pa gang zhe na/ ci'i phyir de kho na la mnyam par gzhag pa'i sa zhes bya la/ gang 'dod pa'i khams kyi sems rtse gcig pa nyid ni ma yin zhe na/ 'di ltar ting nge 'dzin de ni 'gyod pa med pa dang / mchog tu dga' ba dang / dga' ba dang / shin tu sbyangs pa dang / bde bas mngon par bsgrubs pa yin la/ 'dod pa na spyod pa ni de lta ma yin te/ 'dod pa'i khams na yang dag pa'i chos la nye bar sems pa med pa ni ma yin no/ /de la bsam gtan dang po ni rab tu dben pa las skyes pa'i dga' ba zhes bya ste/ de mngon sum du byas nas gnas na/ chos lnga spong bar 'gyur te/ 'di lta ste/ 'dod pa dang ldan pa'i yid bde ba dang / 'dod pa dang ldan pa'i yid mi bde ba dang / mi dge ba dang ldan pa'i yid bde ba dang / mi dge ba dang ldan pa'i yid mi bde ba dang / mi dge ba dang ldan pa'i btang snyoms so/ /chos lnga bsgoms pa yang yongs su rdzogs par 'gyur te/ mchog tu dga' ba dang / dga' ba dang / shin tu sbyangs pa dang / bde ba dang / ting nge 'dzin to/ /'dod pa dang ldan pa'i yid bde ba gang zhe na/ 'dod pa lnga'i yon tan dag 'thob pa'i tshe dang / thob par gyur pa dang / nye bar spyod pa dang / mthong ba dang / thos pa dang / myong ba la brten nas de dag nyid rjes su dran pa'i yid bde ba gang yin pa'o/ /'dod pa dang ldan pa'i yid mi bde ba gang zhe na/ 'dod pa lnga'i yon tan de dag nyid mi 'thob pa'i tshe'am/ de la longs spyod pa mi 'thob pa'am/ thob pa rnams nyams pa dang / 'bral ba dang / chud za ba la brten nas yid mi bde ba gang yin pa'o/ /mi dge ba dang ldan pa'i yid bde ba gang zhe na/ 'di ltar 'di na kha cig bde ba dang bcas shing yid bde ba dang bcas bzhin pas/ srog gcod pa na log par lta ba'i bar du 'gyur ba'o/ /mi dge ba dang ldan pa'i yid mi bde ba gang zhe na/ 'di ltar 'di na kha cig sdug bsngal ba dang bcas shing yid mi bde ba dang bcas bzhin pas srog gcod pa nas log par lta ba'i bar du 'gyur ba'o/ / mi dge ba dang ldan pa'i btang snyoms gang zhe na/ 'di ltar 'di na rgyal po'am/ blon po'am/ gang gi bdag po yang rung ba'am/ bla ma'am/ bla ma lta bu la la/ de bdag nyid srog gcod pa'i sdig pa byed mi 'dod la/ bsgo ba bsgrub pa'i mi rnams byed na yang yal bar 'jog ste/ bzlog par mi byed cing 'dul ba la 'god par mi byed la/ de yal bar 'dor bas las de byed par 'gyur zhing / des kyang las de myong bar 'gyur te/ lkog tu mi 'gyur ba dang / btang snyoms gang mi dge bar rjes su rtog cing rjes su dpyod bzhin du de mi spong bar yal bar 'dor ba dang ldan pa dang / mi dge ba la spyod pa na sdug bsngal yang ma yin bde ba yang ma yin pa'i tshor ba gang yin pa'o/ /mchog tu dga' ba gang zhe na/ tshogs kyi sa yongs su dag pa la rnam par lta ba na/ dang po nas dag pa'i dga' ba 'gyod pa med pa sngon du 'gro ba gang yin pa ni mchog tu dga' ba ste/ yid bde zhing sems nyams bde ba'o/ /dga' ba gang zhe na/ yang dag pa'i sbyor ba sngon du 'gro ba'i dga' ba gang yin pa ni dga' ba ste/ yid bde zhing sems nyams bde ba'o/ /shin tu sbyangs ba gang zhe na/ gnas ngan len dang bral bas lus dang sems las su rung ba nyid gang yin pa'o/ /bde ba gang zhe na/ de ltar lus dang sems las su rung ba'i lus dang sems la gnod pa med pa'i bde ba gang yin pa dang / rnam par grol ba'i bde ba ste/ phyogs gang gi gnas ngan len de dang bral bas nye ba'i nyon mongs pa de dag las rnam par grol ba'o/ /ting nge 'dzin gang zhe na/ dmigs pa la yang dag par sems pa'i sems rtse gcig pa gang yin pa ste/ bcom ldan 'das kyis zag pa med pa'i sbyor ba la/ ting nge 'dzin snga la/ rnam par grol ba 'phyi bar gsungs pa ni/ ting nge 'dzin 'grub pa'i dbang gis nyon mongs pa rnams las sems rnam par grol ba 'ba' zhig tu 'gyur ba'i phyir ro/ /zag pa dang bcas pa'i sbyor ba la rnam par grol ba snga la/ ting nge 'dzin 'phyi bar gsungs pa ni/ nyon mongs pa spang ba ni sbyor ba'i mthar thug pa'i yid la byed pa'i 'bras bu yin te/ dngos gzhi'i ting nge 'dzin 'thob par 'gyur ba'i phyir ro/ /ting nge 'dzin rnam par grol ba cig car 'byung bar gsungs pa ni/ 'di lta ste/ sbyor ba'i mthar thug pa'i yid la byed pa de nyid dang / de las gzhan pa'i bar chad med pa dang / rnam par grol ba'i lam gyi ting nge 'dzin rnams la/ rnam par grol ba dang ldan pa'i ting nge 'dzin gang yod pa'o/ /de la sgrib pa lnga ni bsam gtan la snyoms par 'jug pa la sgrib pa gang dag bsam gtan la snyoms par 'jug pa'i tshe/ sgrib par byed pa ste/ 'dod pa la 'dun pa'i sgrib pa dang / gnod sems dang / rmugs pa dang / gnyid dang / rgod pa dang / 'gyod pa dang / the tshom gyi sgrib pa'o/ /'dod pa la 'dun pa gang zhe na/ sdug pa'i mtshan ma'i rjes su 'brang ste/ 'dod pa lnga'i yon tan dag la lta bar 'dod [(]ba [,]pa [)]nas reg par 'dod pa'i bar gang yin pa'am/ sngon myong ba kun rjes su dran nas/ rtog par 'dod pa gang yin pa'o/ /gnod sems gang zhe na/ tshangs pa mtshungs par spyod pa rnams kyis glengs pa la brten tam/ gnod pa khong khro ba'i rgyu gang ci yang rung ba rjes su dran pa'i sems kyi kun nas mnar sems pa gang yin pa'am/ gnod par bya bar 'dod pa khong khro ba'i rgyu de nyid la shas cher rjes su rtog cing rjes su dpyod pa'i sems kyi kun nas mnar sems pa gang yin pa'o/ /rmugs pa gang zhe na/ tshul khrims la sogs pa gang yang rung ba nyams pa la brten tam/ dbang po rnams kyi sgo ma bsdams pa'am/ kha zas kyi tshod ma zin pa'am/ nyal ba'am/ shes bzhin med par gnas pa'am/ spong ba la sbyor ba ma byas pa'i nyon mongs pa thams cad skye ba dang mthun pa/ lus dang sems rmugs pa gang yin pa ste/ lus dang sems las su mi rung ba'o/ /gnyid gang zhe na/ sems mngon par bsdus pa ste/ rmugs pa ni nyon mongs pa bskyed pas spong ba'i sbyor ba 'jig par byed pa la/ gnyid ni sems mngon par sdud pas spong ba'i sbyor ba 'jig par byed do/ /de bas na de gnyi ga sgrib pa gcig tu gsungs te/ las su mi rung bar glong ba'i phyir rmugs pa'o/ /mngon par bsdus pas glong ba'i phyir gnyid do/ /rmugs pa ni gnyid ji ltar skye ba'i rkyen du nye bar gyur pa de bzhin du/ nyon mongs pa dang nye ba'i nyon mongs pa gzhan dag la ma yin te/ nyon mongs pa dang nye ba'i nyon mongs pa gzhan ni skye yang srid mi skye yang srid la/ gnyid ni glong bar gyur pa la gdon mi za bar skye bar 'gyur ro/ /rgod pa gang zhe na/ nye du la rtog pa'am/ yul la rtog pa'am/ 'chi bar mi rtog pa la brten nas/ sngon bgad pa dang / rtses pa dang / dga' ba dang / dga' dgur spyod pa rjes su dran par gyur tam/ rjes su dran par byas na sems rnam par ma zhi zhing 'phyar bar skye ba gang yin pa'o/ /'gyod pa gang zhe na/ nye du la sogs pa la rnam par rtog pa de dag nyid la rtog pa ste/ gang du 'di lta bu'i bza' ba dag za zhing btung ba dag 'thung ba dang / de lta bu'i gos dang / zas dang / mal stan dang / nad kyi gso sman dang / yo byad rnams rnyed pa'i nye du de dag dang / bdag ci'i phyir bral bar gyur/ ci'i phyir yul der ma song / ci'i phyir yul de bor nas 'dir 'ongs she'am/ ci'i phyir bdag 'di ltar gzhon nur rab tu byung / rgas rgas kyi bar du 'dug pa zhig na snyam pa'am/ sngon bgad pa'am/ dga' ba dang / rtses pa la sogs pa rjes su dran nas/ ci'i phyir bdag gang gi dus su rtse ba dang / brgyan pa'i gnas kyi sbyor ba dang ldan pas/ gnas par bya ba de'i dus su nye du rnams ma dad cing mchi mas brnang ba dang bcas pa dang / ngu ba'i bzhin du 'dug bzhin du rab tu byung snyam ste/ de lta bu'i tshul gyi rkyen gyis sems kun tu 'gyod cing / rnam par 'gyod la/ 'gyod cing yid la gcags pa skye ba gang yin pa'o/ /de'i phyir rgod pa dang / 'gyod pa gnyis gzhi mthun pa'i phyir/ rgod pa dang 'gyod pa sgrib pa gcig tu mdzad de gsungs so/ /gzhan yang bya ba'am/ bya ba ma yin pa ci rigs par byas kyang rung ma byas kyang rung ba la/ bya ba'i rigs pa bdag gis ma byas so/ /bya ba'i mi rigs pa bdag gis byas so snyam ste/ 'gyod pa dang po skyes pa de ma gtogs pa/ 'gyod pa'i kun nas dkris pa de nyid bsal ma nus nas phyi ma'i dus su/ sems kyi rgyun kun tu 'gyod pa dang / rnam par 'gyod pa dang / 'gyod pa dang / yid la gcags pas skye ba gang yin pa de ni 'gyod pa'i sgrib pa'i rnam grangs yin no/ /gnas ma yin pa las skyes pa gang yin pa de dang / 'gyod pa phyi ma gang yin pa de ni/ rgod pa dang / gzhi mi mthun mod kyi ji ltar de g.yengs pa'i rnam pas/ nye bar zhi bar mi byed pa de bzhin du/ 'di yang yid mi bde ba'i rnam pas nye bar zhi bar mi byed pa'i phyir ro / /'di yang de dang lhan cig tu bsres te gsungs so/ /the tshom gang zhe na/ ston pa'am/ chos sam/ bslab pa'am/ rjes su bstan pa'am/ rtogs pa la nem nur byed cing the tshom za ba'am/ 'das pa'i dus la nem nur byed cing the tshom za ba ste/ de ltar nem nur dang the tshom du gyur pa de'i sems de ni brtson pa dang / rjes su sbyor ba dang / spong ba dang / nang du yang dag 'jog pa la mi 'jug go/ /'das pa la ji lta ba bzhin du ma 'ongs pa dang / da ltar byung ba la yang de dang 'dra'o/ /yang na sdug bsngal la sogs pa'i bden pa rnams la nem nur dang the tshom za ba ste/ sems gnyis su 'gyur ba dang / som nyi dang / yid gnyis dang / nem nur du gyur pa gang yin pa'o/ /'dod pa la 'dun pa'i sgrib pa'i zas gang zhe na/ sdug pa yang yod la/ de la tshul bzhin ma yin pa yid la byed cing mang du byed pa'o/ /de la sdug pa gang zhe na/ 'dod pa rnams kyi mchog dang / dam pa dang / gya nom pa gang yin pa ste/ gang la ma chags par gyur na tha chad du gyur pa gzhan dag la yang ma chags par 'gyur ba ste/ gyad chen po thub na de las gzhan pa'i gyad thub par 'grub pa de bzhin no/ / de yang gang zhe na/ bud med la yod pa'i sdug pa'i gnas brgyad du bsdus pa gang yin pa ste/ gnas brgyad po gang dag gis bud med kyis skyes pa 'ching bar 'gyur ba 'di lta ste/ gar dang / glu dang / bgad pa dang / bltas pa dang / kha dog dang / reg pa dang / cha byad dang / rma 'byed pa rnams te/ 'di ni 'dod pa la 'dun pa ma skyes pa skyed pa dang / skyes pa rnam par 'phel bar byed pa'i zas yin no/ /zas ma yin pa gang zhe na/ mi sdug pa yang yod la de la tshul bzhin yid la byed cing mang du byed pa'o/ /de yang gang zhe na/ 'di lta ste/ rnam par bsngos pa la sogs pa ste/ lus 'di nyid mi gtsang ba rnam pa sna tshogs kyis gang bar so sor rtog pa'o/ /de ltar nang gi lus la mi sdug par so sor rtog pa dang / /phyi rol gyi lus la rnam par bsngos pa la sogs pa'i mi sdug par so sor rtog pa'i mi sdug pa ni/ rnam pa 'di gnyis kho nar zad de/ 'di ni 'dod pa la 'dun pa ma skyes pa mi skyed pa dang / skyes pa spong ba'i zas ma yin pa'o/ /de la yid la byed pas ni mi skye bar 'gyur la/ lan mang du byas pas ni spong par 'gyur ro/ /nag po'i phyogs ni yid la byed pas skyed la/ lan mang du byas pas ni yang 'phel zhing rgyas par 'gyur ro/ /gnod sems kyi sgrib pa'i zas gang zhe na/ khong khro ba yang yod la/ khong khro ba'i rgyu yang yod de/ de la tshul bzhin ma yin pa yid la byed cing mang du byed pa'o/ /de la gnod pa la brten nas sems kyi kun tu mnar sems pa ni khong khro ba'o/ /gnod pa de nyid tshul bzhin ma yin pa yid la byed pa dang ldan pa ni khong khro ba'i rgyu ste/ 'di lta ste/ kun nas mnar sems kyi dngos po dgu po rnams la'o/ / zas ma yin pa gang zhe na/ byams pa yang yod la/ de la tshul bzhin yid la byed cing mang du byed pa'o/ /de yang gzhan gyi bde ba bsgrub pa'i mtshan nyid de bsgoms pa'i stobs kyis bsdus pa dang / de'i kun nas mnar sems kyi dngos po 'dul bas bsdus pa so sor brtags pa'i stobs ni zas ma yin pa ste/ gang gis gnod sems kyi sgrib pa spong bar 'gyur ba de nyid mdo las gsungs so/ /rmugs pa dang gnyid kyi sgrib pa'i zas gang zhe na/ mun pa yang yod la/ de la tshul bzhin ma yin par yid la byed cing mang du byed pa'o/ / zas ma yin pa gang zhe na/ snang ba yang yod la/ de la tshul bzhin yid la byed cing mang du byed pa'o/ /de la snang ba ni rnam pa gsum ste/ mun pa'i gnyen por gyur pa dang / chos kyi snang ba dang / lus kyi snang ba'o/ /de la mun pa'i gnyen por gyur pa ni/ mtshan mor rtog pa 'di lta ste/ zla ba dang / skar ma la sogs pa dang / nyin mor rtog pa 'di lta ste/ nyi ma dang / de gnyi gar rtog pa 'di lta ste/ me dang nor bu la sogs pa'i snang ba'o/ /de la chos kyi snang ba ni 'di ltar 'di na kha cig ji ltar bzung ba dang / ji ltar bsams pa dang / ji ltar reg pa'i chos rnams la so sor rtog pa'am/ sangs rgyas la sogs pa rjes su dran pa bsgom pa'o/ /de la lus kyi snang ba ni 'di lta ste/ sems can rang las 'od 'byung ba rnams so/ /de la snang ba dang po'i mi mthun pa'i phyogs ni mun pa rnam pa gsum du rig par bya ste/ 'di lta ste/ mtshan mo'i mun pa dang / sprin gyi mun pa dang / chos pa'i mun pa 'di lta ste/ phug la sogs pa'i'o/ /chos kyi snang ba'i mi mthun pa'i phyogs ni/ mun pa'i tshogs gsum ste/ 'di lta ste/ chos de dag yang dag pa ji lta ba bzhin du ma shes nas/ 'das pa'i dus dang / ma 'ongs pa dang / da ltar byung ba'i dus na nem nur byed cing the tshom za ba dang / sangs rgyas dang chos la sogs pa la yang nem nur byed cing the tshom za ba ste/ de la ma rig pa gang yin pa dang / the tshom gang yin pa de gnyi gal ni mun pa'i tshogs zhes bya'o/ /rtogs pa las so sor rtogs pa'i mi mthun pa'i phyogs ni/ rmugs pa dang / gnyid kyi mun pa ste/ des na chos de gsal bar mi 'gyur ba'i phyir ro/ /rgod pa dang 'gyod pa'i sgrib pa'i zas gang zhe na/ nye du la rtog pa la sogs pa la yang yod pa dang / sngon bgad pa dang / rtses pa la sogs pa yang rjes su dran par 'gyur la/ de la tshul bzhin ma yin pa yid la byed cing mang du byed pa'o/ de la nye du rnams kyi dar ba'am/ rgud pa'am/ 'phrad pa'am/ 'bral ba la brten nas/ dga' ba'i rnam pa dang / mi dga' ba'i rnam pa'i sems kyi rtog pa dang / rnam par rtog pa skye bar 'gyur ro/ /yul rnams la yang de bzhin du 'byor pa la sogs pa la brten nas yul la rtog ste/ rgyas par snga ma bzhin no/ /'chi bar mi rtog pa gang zhe na/ gzhon pa'am/ rgan pa'am/ ngan ngon gyi bya ba'am/ yang dag pa'i bya ba la brten nas/ dga' ba dang / mi dga' ba'i rnam pa'i sems kyi rtog pa gang yin pa zhes rgyas par sbyar ro/ /bgad pa zhes bya ba ni 'di ltar kha cig tho 'tshams pa'am/ / 'brel pa smra ba la brten nas so ston cing dgod pa'am/ 'phul ba dang / khong nas dgod pa lta bu'o/ /de la rtses pa ni 'di lta ste/ cho lo'am shing bus rtse ba'am/ nor bus rtse ba'am/ gzhan yang de dang 'dra ba gang yin pa'o/ /de la dga' ba ni/ phan tshun nye bar spyod pa'am/ yul nye bar spyod pa'i longs spyod kyi dga' ba'am/ lhan cig 'dug pa dang / gnas pa dang smra ba la sogs pas gnas pa'i dga' ba gang yin pa'o/ /de la dga' dgur spyad pa ni 'di lta ste/ lag pa nas bzung ba'am/ dpung pa nas bzung ba'am/ lan bu nas bzung ba'am/ yan lag tu gyur pa gang yang rung ba la kun tu nom zhing yongs su nom pa dang / 'khyud pa dang / 'o byed pa dang / lta ba ste/ gzhan yang de lta bu dang mthun pa'i dga' dgur spyod pa'i las yin no/ /zas ma yin pa gang zhe na/ zhi gnas kyang yod la/ de la tshul bzhin yid la byed cing mang du byed pa'o/ /de la zhi gnas ni sems mi 'phro bar gnas pa dang / zhi gnas kyi phyogs kyi chos rnams gang yin pa'o/ /de dag kyang skyo bar 'gyur ba gang ci yang rung ba ste/ 'di lta ste/ bdag gi rgud pa dang / pha rol gyi rgud pa dang / bdag gi 'byor pa dang / pha rol gyi 'byor pa dag gis sems skyo ba dang / skrag pa dang / yid 'byung ba dang / zhi bar gnas pa'o/ /the tshom gyi sgrib pa'i zas gang zhe na/ dus gsum yang yod la/ de la tshul bzhin ma yin pa ni yid la byed cing mang du byed pa ste/ ci bdag 'das pa'i dus na byung ngam zhes rgyas par snga ma bzhin no/ /tshul bzhin ma yin pa yid la byed pa de yang bsam gyis mi khyab pa'i gnas bsdus pa ste/ bsam gyis mi khyab pa'i gnas ni 'di lta ste/ bdag la sems pa dang / sems can la sems pa dang / 'jig rten la sems pa'o/ /de la nang la brten te/ dus rnams su bdag nyid la sems pa'o/ /pha rol la brten pa ni sems pa'o/ /sems can gyi 'jig rten dang / snod kyi 'jig rten la brten pa ni/ 'jig rten la sems pa ste/ 'jig rten rtag pa yin nam/ mi rtag pa yin nam/ rtag pa yang yin la mi rtag pa yang yin nam/ rtag pa yang ma yin la mi rtag pa yang ma yin nam zhes bya ba la sogs pa'o/ /zas ma yin pa gang zhe na/ rkyen 'di pa nyid kyi rten cing 'brel par 'byung ba yang yod la/ de la tshul bzhin yid la byed cing mang du byed pa ste/ de'i chos tsam dang / chos kyi rgyu tsam dang / sdug bsngal tsam dang / sdug bsngal gyi rgyu tsam mthong nas tshul bzhin ma yin pa yid la byed pa'i gzhi ma rig pa gang yin pa de dus gsum du mi skye ba dang / skyes pa'ang spong ba'o/ /de la tshul bzhin ma yin pa yid la byed pa dang / tshul bzhin yid la mi byed pa 'di gnyis bsdus pa la ni/ tshul bzhin ma yin pa yid la byed pa'i phyir zhes bya ste/ gang du gang dgos pa de der shes par bya'o/ /'di lta ste/ mun pa la snang bar 'du shes pa'i tshul gyis tshul bzhin yid la mi byed pa yin gyi/ tshul bzhin ma yin pa nyid ni ma yin te/ 'di la de ma yin pa'i yid la byed pa gzhan yod pa'i phyir ro/ /de la bsam gtan dang po ni yan lag lngar rig par bya ste/ rtog pa dang / dpyod pa dang / dga' ba dang / bde ba dang / sems rtse gcig pa'o/ /gnyis pa ni yan lag bzhi ste/ nang yongs su dang ba dang / dga' ba dang / bde ba dang / sems rtse gcig pa'o/ /gsum pa ni yan lag lnga ste/ btang snyoms dang / dran pa dang / shes bzhin dang / bde ba dang / sems rtse gcig pa'o/ /bzhi pa ni yan lag bzhi ste/ btang snyoms yongs su dag pa dang / dran pa yongs su dag pa dang / sdug bsngal ba yang ma yin bde ba yang ma yin pa'i tshor ba dang / sems rtse gcig pa'o/ /de la bsam gtan dang po'i rtog pa dang dpyod pa ni dmigs pa 'dzin pa'i don du'o/ /ting nge 'dzin ni de dag gi rten gyi don du'o/ /dga' ba ni dmigs pa myong ba'i don du'o/ /bde ba ni gnas ngan len bsal ba'i don du'o/ /bsam gtan gnyis pa'i nang yongs su dang ba ni/ dmigs pa 'dzin pa'i don du'o/ /ting nge 'dzin ni nang yongs su dang ba'i rten gyi don du'o/ /lhag ma ni snga ma bzhin no/ /bsam gtan gsum pa'i btang snyoms dang / dran pa dang / shes bzhin rnams ni dmigs pa 'dzin pa'i don du'o/ /ting nge 'dzin ni de dag gi rten gyi don du'o/ /lhag ma ni snga ma bzhin no/ /bsam gtan bzhi pa'i btang snyoms yongs su dag pa dang / dran pa yongs su dag pa ni dmigs pa 'dzin pa'i don du'o/ /ting nge 'dzin de gnyis kyi rten gyi don du'o/ /lhag ma ni snga ma bzhin no/ /de ma yin pa'i chos gzhan yang yod bzhin du/ de dag nyi tshe yan lag tu bzhag pa ni gtso bor gyur pa dang / bsam gtan pa rnams la ches phan 'dogs pa'i phyir ro/ /ci'i phyir bsam gtan dang po rtog pa dang bcas dpyod pa dang bcas she na/ 'di ltar 'di dag gis 'dod pa'i khams kyang sun 'byin par byed cing / bsam gtan dang po la yang snyoms par 'jug la rtog pa dang / dpyod pa de dag gi skyon yang mi mthong ba'i phyir ro/ /bsam gtan gnyis pa la ni de dag la skyon du lta bas de'i phyir de dag zhi bar gyur pas na bsam gtan gnyis pa'o/ /bsam gtan gnyis pa la rtog pa dang dpyod pa de gnyis skyon du mthong ba'i phyir nye bar zhi bar gyur pa ji lta ba de bzhin du bsam gtan gsum pa la yang dga' ba de skyon du mthong bas nye bar zhi ba'i phyir bsam gtan gsum pa la snyoms par 'jug go/ /bsam gtan bzhi pa la ni bde ba la skyon du lta ba dang / btang snyoms dang dran pa yongs su dag pas khyad par du dbye bar rig par bya'o/ /de la bsam gtan gyi rnam grangs ni 'di dag yin te/ 'di lta ste/ lhag pa'i sems kyi sems yongs su dag pa'i dbang du byas nas/ yang dag par nye bar sems pa'i phyir na bsam gtan no/ /bde ba la gnas pa zhes kyang bya ste/ de dag tu bde ba yongs su rdzogs pa myong ba'i phyir te/ 'di ltar de dag tu dga' ba'i bde ba dang / shin tu sbyangs pa'i bde ba dang / btang snyoms kyi bde ba dang / lus dang sems kyi bde ba myong ba'i phyir ro/ /bsam gtan pa rnams kyis ni de dag snyoms par zhugs so cog dang langs so cog na/ tshe 'di la bde bar gnas pa'i tshul gyis myong bar 'gyur ro/ /de la snyoms par zhugs pa'i tshe ni/ tshe 'di la bde bar gnas pa mngon sum du gyur nas myong bar byed do/ /de la langs pa'i tshe ni bdag bde ba la gnas pa 'di lta bu zhig gis gnas so snyam du myong bar byed do/ /gzugs med pa rnams la ni de ltar myong ba med pas de'i phyir bde ba la gnas pa zhes ma gsungs te/ de dag ni langs nas yang dag par bstan par bya ba yin no/ /ci'i phyir zhe na/ dge slong dgon pa la dri ba 'dri ba dag 'ongs la/ gal te dge slong dgon pa bas der dri ba dris pa la lan ma btab par gyur na/ de la gzhan dag 'di skad du kyi hud de gzugs las 'das nas/ gzugs med pa'i zhi ba'i rnam par thar pa gang yin pa de dag gi dri ba dris kyang lan 'debs par mi nus na/ dgon pa pa 'di'i dgon pa na gnas pas ci zhig bya zhes zer bar 'gyur ro/ /de bas na yang dag par bstan par bya ba'i phyir snyoms par 'jug par bya'i gnas par bya ba'i phyir ni ma yin no/ /bsam gtan ni de'i yan lag gi mya ngan las 'das pa zhes kyang bya la/ rnam grangs kyi mya ngan las 'das pa zhes kyang bya ste/ nyon mongs pa rnams kyi phyogs gcig spangs pa yan lag des mya ngan las 'das pa dang / gcig tu nges pa ma yin pa'i phyir de'i yan lag gi mya ngan las 'das pa'o/ /ma lus pa mya ngan las 'das pa ma yin pa'i phyir rnam grangs kyi mya ngan las 'das pa'o/ /de la bsam gtan bzhi ni tshor ba las nges par byung ba'i gzhi zhes bya ste/ de la yid mi bde ba las nges par byung ba ni bsam gtan dang po'o/ / sdug bsngal gyi dbang po las nges par byung ba ni gnyis pa'o/ /yid bde ba'i dbang po las nges par byung ba ni gsum pa'o/ /bde ba'i dbang po las nges par byung ba ni bzhi pa'o/ /btang snyoms las nges par byung ba ni mtshan ma med pa ste/ bcom ldan 'das kyis kyang / phyin ci ma log pa'i mdo las/ de la dge slong gis yid mi bde ba'i dbang po skyes pa la skyes so zhes yang dag pa ji lta ba bzhin du rab tu shes so zhes gsungs te/ gang gi gnas skabs su shes she na/ de nyid spong ba la sbyor zhing yid mi bde ba'i dbang po dang 'dres pa na sems kyi rgyud shes so/ de yang rgyu dang bcas rkyen dang bcas/ gzhi dang bcas/ rnam pa dang bcas/ 'du byed dang bcas par yang dag pa ji lta ba bzhin du rab tu shes te/ rgyu dang bcas par ji ltar shes she na/ de'i sa bon gyi rgyur shes pa'i tshul gyis so/ /rkyen dang bcas par ji ltar shes she na/ sa bon gyis bsdus pa ma yin pa de'i rten shes pa'o/ /gzhi dang bcas par ji ltar shes she na/ dngos po gang la gnas na yid mi bde ba'i dbang po skye bar 'gyur ba ste/ de yang rgyu mtshan gang yin pa dang / mi shes pa'i sa bon yid mi bde ba'i dbang po kun nas slong ba'o// //bam po bcu gnyis pa/ rnam pa dang bcas par ji ltar shes she na/ 'di ni mi dga' ba'i rnam pa yin no snyam du shes pa'o/ /'du byed dang bcas par ji ltar shes she na/ tshul bzhin ma yin pa yid la byed pa dang / mtshungs par ldan pa'i sems pa ni/ de kun nas slong bar byed pa'i 'du byed yin no snyam du rab tu shes so/ /de ltar yongs su shes nas nges par 'byung ba la sems 'jog par byed do/ /ji ltar 'jog ce na/ nyon mongs pa can du rgyu ba las sems bzlog nas yid la byed pa sgom pa la yang dag par sbyor bar byed do/ /de yang der bag la nyal dang kun nas dkris pa ma lus par 'gag cing mthar thug pa'i bar du 'gyur ro/ /de la 'jig rten pa'i bsam gtan gyis ni de'i phyogs kyi gnas ngan len spong bar 'gyur gyi/ de'i sa bon gyi gnas de 'byin par mi byed do/ /de lta ma yin du zin nas de phyung bas phyis de mi skye ba nyid du 'gyur ba'i rigs so/ /zag pa med pas ni de gnyis ka spong bar 'gyur ro/ /lhag ma rnams la yang de bzhin du ci rigs par blta bar bya'o/ /yid mi bde ba'i dbang po ci lta bu zhig yongs su shes she na/ smas pa/ nyon mongs pa can nam/ nges par 'byung ba'i 'dun pa dang ldan pa'i dge ba dang / sdug bsngal gyi dbang po/ /nang la sogs pa'i dbang gis byung ba'am/ lus ngal ba'i dbang gis byung ba'am/ mes gdungs pa la sogs pa'i dbang gis byung ba'am/ 'dod chags dang bral ba la yang gzhan gyis gnod par byas pa la sogs pa'i dbang gis byung ba'o/ /yid bde ba'i dbang po ni bsam gtan gnyis pa la ste/ bsam gtan gnyis pa'i sa pa yin par ro/ /bde ba'i dbang po ni bsam gtan gsum pa la ste bsam gtan gsum pa'i sa pa yin par ro/ /ci'i phyir bsam gtan dang po sdug bsngal gyi dbang po ma spangs pa zhes bya zhe na/ de na de'i phyogs kyi gnas ngan len ma spangs pa'i phyir ro/ /ma spangs na yang ci'i phyir bsam gtan du skyes pa la de kun tu 'byung bar mi 'gyur zhe na/ de'i grogs kyi cha yid mi bde ba'i dbang pos bsdus pa'i sdug bsngal spangs pa'i phyir ro/ /gal te bsam gtan dang po la yang sdug bsngal gyi dbang po de spangs na ni/ de'i phyir 'dir bsam gtan dang po dang gnyis pa la snyoms par zhugs pa'i rnal 'byor pa gnyis la/ tshor ba las gyur pa'i gnas pa'i khyad par med par 'gyur te/ bsam gtan rnams ni tshor ba la nges par 'byung bar gsungs la / gnyis ka la yang dga' ba dang / bde ba yod pa'i phyir ro/ /'di la ni rtog pa dang dpyod pa nye bar zhi bas gnas ngan len spong ba'i khyad par du 'gyur ba ci yang med de / de bzhin du dbang po gzhan rnams la yang de'i phyogs kyi gnas ngan len spangs pas gong ma rnams kyang spong bar rig par bya'o/ /mtshan ma med pa ni 'dir bcom ldan 'das kyis kyang mdo las/ mtshan ma med pa ni sems kyi ting nge 'dzin to zhes gsungs te/ de la ni btang snyoms kyi dbang po ma lus par bag la nyal gyis 'gag par 'gyur te/ de'i phyogs kyi gnas ngan len bstsal ba'i phyir ro/ /de la mtshan ma med pa la tshor ba nges par yod pa'i phyir kun nas dkris pas ni de 'gag pa med de/ de la ni bde ba dang yid bde ba dang / btang snyoms gsum char yang yod do/ /tshor ba'i dbang po de dag gi bag la nyal ni med do/ /nyon mongs pa de spangs na/ de dag kyang spong par 'gyur ro/ /de'i phyogs kyi gnas ngan len la ni/ de dag gi bag la nyal zhes bya'o/ /btang snyoms kyi dbang po gang yan chad na yod par rig par bya zhe na/ bsam gtan bzhi pa yan chad nas/ srid pa'i rtse man chad na yod do/ /dbang po lnga po'i nges par 'byung ba mtshan ma med pa la thug pa de rnams ni nges par 'byung bar byed pa'i khams lnga po rnams dang gcig gis gcig bsdus par rig par bya'o/ /de la 'dod pa dang / gnod sems dang / rnam par 'tshe ba rnams kyi nges par 'byung bas ni/ bde ba'i dbang po man chad las nges par 'byung bar gsungs so/ /gzugs kyi nges par 'byung ba ni/ bsam gtan bzhi ba'i btang snyoms kyi dbang po gang yin pa las nges par 'byung ngo / /'jig tshogs 'gags pas ni/ gzugs med pa mtha' dag gi btang snyoms kyi dbang po las nges par 'byung ngo / /nges par 'byung bar byed pa zhes bya ba'i don gang zhe na/ de dag la gnas na nges par 'byung bar rig par bya ste/ des na nges par 'byung bar byed pa zhes bya'i/ de dag gis de dag nges par 'byung bar byed pa ni ma yin te/ 'dod chags dang bral ba rnams la yang khams de yod par bstan pa'i phyir ro/ /gang gi tshe 'dod pa dang / gnod sems dang / rnam par 'tshe ba rnams dus gcig kho nar spong bar 'gyur na/ ci'i phyir de dag gi nges par 'byung ba tha dad par rnam par gzhag ce na/ de dag gi nges par 'byung ba dus gcig mod kyi/ gnyen po bsgom pa'i bye brag gis nges par 'byung ba rnam pa gsum du bstan to/ /de la gnyen po'i bye brag ni 'di yin te/ mi sdug pa dang / byams pa dang / snying rje go rims bzhin du sbyar ro/ /de la la la ni mi sdug pa bsgoms pas thams cad la nges par 'byung ngo / / la la ni byams pas nges par 'byung ngo / /la la ni snying rjes nges par 'byung ste/ de'i phyir nges par 'byung ba tha dad par ston par mdzad do/ /de yan chad la ni gnyen po rnam pa gcig pur zad de / de'i phyir yan chad kyi tha dad pa med do/ /lta ba'i shas che na 'dod pa rnams kun tu rjes su dran par 'gyur ba ji lta bu zhe na/ smras pa/ so sor rtog pa yid la byed pa'i phyir te/ dngos po gtso bo yid la byed pa dang / longs spyod la shas cher yid la byed pa'i phyir/ 'dod pa rnams la sems mi 'jug pa ji lta bu zhe na/ de la phan yon du mi lta ba'i phyir ro/ /ji ltar dang bar mi 'gyur zhe na/ de la dga' zhing yid bde ba skyes pa mi bsgom pa'i phyir ro/ /ji ltar kun tu mi gnas she na/ de la nye bar spyod pa'i dga' bas dga' bar mi byed pa'i phyir ro/ /ji ltar mos par mi byed ce na/ de la tshul bzhin ma yin pa'i mtshan ma bzung bar ma mos pa'i phyir ro/ /ji ltar phyir nur bar byed ce na/ rgyas par byed pa na mi 'jug pa'o/ /ji ltar phyir 'byed par byed ce na/ dmigs pa bzung ba 'dor ba'o/ /ji ltar 'jug par mi byed ce na/ so sor brtags nas dmigs pa de la 'dzin pa na mngon par mi dga' ba'o/ /ji ltar btang snyoms su gnas she na/ mnyam pa'i gnas skabs su 'jog pa yin te/ mnyam pa'i gnas skabs su sems 'jog par byed pa'o/ /skyo ba gang zhe na/ de la nyes dmigs su mthong nas mi mthun pa nyid du gyur pa gang yin pa'o/ /de yang rnam pa gsum ste/ mi rtag pa nyid dang / sdug bsngal ba nyid dang / rnam par 'gyur ba'i chos nyid do/ /smod pa gang zhe na/ dang po la nyes dmigs su mthong nas/ mi mthun pa nyid du gyur pa gang yin pa'o/ /phyir bzlog pa gang zhe na/ gnyis pa la nyes dmigs su mthong nas/ mi mthun pa nyid du gyur pa gang yin pa'o/ /mi mthun pa nyid gang zhe na/ gsum pa la nyes dmigs su mthong nas/ mi mthun pa nyid du gyur pa gang yin pa nyid do/ /de las bzlog pa la ni nges par 'byung ba yid la byed da/ 'jug pa ni de la phan yon du lta ba'i phyir ro/ /dang ba ni dad pa dang / mngon par yid ches pas mngon par dang pa skyed pa'i phyir ro/ /kun tu gnas pa ni de la dmigs pa las mi 'phro ba'i phyir ro/ /rnam par grol ba ni nyon mongs pa dang bral ba'i phyir te/ de la nyon mongs pa can ma yin pas 'jug pas so/ /de la skyo ba la sogs pa mi mthun pa'i rnam pa rnams la gnas pa'i tshe ni/ de'i sems de nyams par mi 'gyur te/ btang snyoms su gyur na yang rtsol ba med do/ /ji ltar de'i sems de bde bar song ba yin zhe na/ sbyor ba mthar thug pa'i yid la byed pa la gnas pa'i phyir ro/ /ji ltar legs par bsgoms pa yin zhe na/ de las gzhan pa'i yid la byed pa rnams la legs par bsgoms pa'i phyir te/ des na spong ba'i gnas skabs dang / spong ba'i sbyor ba'i lam gyi gnas skabs kyang bstan par 'gyur ro/ de la grol ba ni kun nas dkris pa las rnam par thar pa'i phyir ro/ /rnam par grol ba ni dmigs pa'i mtshan ma las rnam par thar pa'i phyir ro/ /rnam par rab tu grol ba ni/ bag la nyal las rnam par thar pa'i phyir ro/ /de'i 'dod pa'i rkyen gyis zag pa gang dag skye ba zhes bya ba ni/ 'dod pa'i 'dod chags ma gtogs pa/ de las gzhan pa 'dod pa na spyod pa'i nyon mongs pa gang yin pa rnams so/ /phongs pa rnams ni gzhi de kho na las nyes par spyod pa'i khyad par chad pas gcod pa la sogs pa 'byung ba gang dag yin pa ste/ gang dag byas shing bstsags na ngan song rnams su skye bar 'gyur ba'o/ /yongs su gdung ba rnams ni gzhi de las 'dod pa'i sred pas za ba na lus dang sems kyi yongs su sreg pa gang yin pa'o/ /'khrug pa rnams ni gzhi de las de'i dngos po yongs su 'gyur ba mya ngan dang smre sngags 'don pa dang / sdug bsngal ba dang / yid mi bde ba'i 'khrug pa rnams 'byung ba gang yin pa'o/ /grol ba ni de dag las de langs pa ste/ bral ba dang yongs su bral ba zhes bya ba yang snga ma ltar kun nas dkris pa dang / dmigs pa dang / bag la nyal ba las rnam par thar pa'i phyir te go rims bzhin no/ /ji ltar de de'i rkyen gyis byung ba'i tshor ba myong bar mi byed ce na/ yul la dmigs par 'dod pa'am dmigs pa'i tshe'am/ rjes su dran pa na yang rung ste/ rten des nyon mongs pa can gyi tshor ba kun tu mi 'byung ba'i phyir te/ pad+ma'i 'dab ma la chu'i thigs pa 'dug pa bzhin du/ de'i rten nyon mongs pa rnams kyis gos pa med par gnas so/ /drug po 'di dag ni nges par 'byung bar bya ba'i khams te/ de dag kyang mdo nyid las ji skad 'byung ba bzhin te/ bdag gi byams pa bsgoms pa nas/ bdag ni nga'o snyam du 'dzin pa dang yang bral ba'i bar du yin mod kyi/ 'on kyang bdag gi sems ni the tshom dang nem nur gyi zug rngus yongs su dkris te 'dug ces bya ba ni de'i phyir byams pa la sogs pa ni gnod sems la sogs pa'i gnyen po ma yin no snyam pa'i nyes par bzung ba 'dor du gzhug pa'i phyir/ 'di dag rnam par gzhag par blta bar bya'o/ /de la gzhi ni gnod sems la sogs pa dang bral ba'i gnyen po'i khyad par gyis rnam par gzhag pa yin no/ /mtshan ma med pa ni mtshan ma'i gnyen po dang / 'phags pa'i gnas pa 'thob pa la yongs su rtog pa'i tshul gyis so/ /drug pa ni mthar thug par 'gro ba la yongs su rtog pa'i tshul gyis so/ /byams pa ni kun nas mnar sems med par 'jug pas na/ gnod sems kyi gnyen po'o/ /snying rje ni pha rol gyi sdug bsngal bstsal ba lhag pa'i bsam pas 'jug pas na rnam par 'tshe ba'i gnyen po'o/ /dga' ba ni pha rol gyi bde ba la rjes su yi rang ba'i rnam pas 'jug pas na/ mi dga' ba'i gnyen po'o/ /btang snyoms ni gnyis ka la lhag par btang snyoms pas na/ 'dod pa'i 'dod chags dang / gnod sems kyi gnyen po'o/ /mtshan ma med pa ni mtshan ma dang mi mthun pas na/ mtshan ma thams cad kyi gnyen po'o/ /nga'o snyam pa'i nga rgyal dang bral ba la ni/ rang gi rnam par thar pa'am/ rtog pa la nem nur yod mi srid de/ de bas na nga'o snyam pa'i nga rgyal dang bral ba ni de'i gnyen po yin no/ /gnod sems thams cad las nges par 'byung ba ni 'di yin no zhes bya ba ni/ 'di ni nges par 'byung ba kho na'o zhes gcig tu nges par mdzad pa'o/ /gnod sems la sogs pa kun tu 'byung ba'i nyes pa yod do zhes bya ba ni ma bsgoms pa'i phyir ro/ /de la nges par 'byung bar bya ba'i khams snga ma lnga po gang dag yin pa de dag las/ snga ma bzhi ni lha'i gnas pas bsdus so/ /lnga pa ni 'phags pa'i gnas pas bsdus so/ /yang nges par 'byung ba drug po dag las bzhi ni tshangs pa'i gnas pas bsdus so/ /lnga pa dang drug pa gnyis ni 'phags pa'i gnas pas bsdus pa kho na yin te/ de la gnod sems la sogs pa'i nyes pa las yang dag par 'das pas na/ nges par 'byung ba zhes bya'o/ /rton pa rnams zhes bya ba ni/ nges par 'byung ba de la brtan par bya ba'i phyir te/ de dag kyang bcom ldan 'das kyis chos la brtan gyi gang zag la ma yin/ don la brten gyi tshig 'bru la ma yin nges pa'i don gyi mdo sde la brtan gyi drang ba'i don la ma yin/ ye shes la brtan gyi/ rnam par shes pa la ma yin zhes bzhi gsungs pa yin no/ /de dag ji ltar rnam par gzhag pa yin zhe na/ gang zag rnam pa bzhi'i bye brag gis te/ dang po ni tshul 'chos pa'i gang zag gi bye brag gis so/ /gnyis pa ni 'jig rten rgyang pan pa'i gang zag gi bye brag gis so/ /gsum pa ni rang gi lta ba mchog tu 'dzin pa la gnas pa'i gang zag gi bye brag gis so/ /bzhi pa ni thos pa lhur len pa'i gang zag gis so/ /de la tshul 'chos pa ni chos la brtan gyi/ gang zag la ni ma yin pa ste/ 'brel pa'i gtam gyis rnam par nges par byas nas/ shes pas rtogs par bya ba yin gyi/ spyod lam tsam gyis ma yin no/ /de'i rnam grangs gzhan yang / bcom ldan 'das kyis gang zag kyang gsungs la/ chos kyang gsungs pa de la/ chos kho na la brtan gyi gang zag la ma yin te/ yul gyi mi'i nges pa'i tshig ni mngon par zhen par bya ba ma yin pa'i phyir ro/ /chos de yang rnam pa gnyis te/ tshig 'bru dang don to/ /de la don la brtan gyi tshig 'bru la ma yin pa ni / thos pa lhur blang bar mi bya'o/ don la bsam par bya/ gzhal bar bya/ nye bar brtag par bya'o/ /de la bcom ldan 'das kyis ni mdo las nges pa'i don yang gsungs la/ drang ba'i don kyang gsungs mod kyi/ de la don la nye bar rtog pas/ nges pas don gyi mdo sde la brtan gyi/ drang ba'i don la ma yin no/ /de la bcom ldan 'das kyis bsod nams dang mi g.yo bar nye bar 'gro ba'i rnam par shes pa yang bde 'gror 'gro ba'i phyir gsungs la/ 'phags pa'i bden pa bzhi'i shes pa yang mya ngan las 'da' bar 'gyur ba'i phyir gsungs pa de la/ chos kyi rjes su mthun pa'i chos sgrub pas ye shes la brten gyi/ rnam par shes pa la ma yin no/ /de la mdor bsdu na/ dus bzhir chud za bar 'gyur ba dang / chud za bar mi 'gyur ba'i phyir gang zag bzhir rnam par gzhag ste/ chos kun chub par byed pa'i dus dang / 'dzin pa'i dus dang / don la nye bar rtog pa'i dus dang / chos kyi rjes su mthun pa'i chos sgrub pa'i dus las rton pa bzhi rnam par gzhag pa yin no/ /rnam par gzhag pa rdzogs so// //bsam gtan la sogs pa 'di dag las/ yid la byed pa dang / dmigs pa yang rig par bya ste/ de la yid la byed pa dag ni/ dngos gzhi bdun dang / yid la byed pa gzhan bzhi bcu'o/ /yid la byed pa dngos gzhi bdun po gang zhe na/ 'di lta ste/ mtshan nyid so sor rig pa dang / mos pa las byung ba dang / rab tu dben pa las byung ba dang / dga' ba sdud par byed pa dang / dpyod pa'i yid la byed pa dang / sbyor ba mthar thug pa dang / sbyor ba mthar thug pa'i 'bras bu yid la byed pa'o/ /yid la byed pa gzhan bzhi bcu po gang zhe na/ chos la dmigs pa'i yid la byed pa dang / don la dmigs pa'i yid la byed pa dang / lus la dmigs pa dang / tshor ba dang / sems dang / chos la dmigs pa'i yid la byed pa dang / mos pa'i yid la byed pa dang / de kho na nyid yid la byed pa dang / slob pa dang / mi slob pa dang / slob pa yang ma yin mi slob pa yang ma yin pa dang / yongs su shes pa yid la byed pa dang / spong ba yid la byed pa dang / spangs pa'i tshe yid la byed pa dang / rnam par rtog pa dang bcas pa'i gzugs brnyan la dmigs pa dang / rnam par mi rtog pa'i gzugs brnyan la dmigs pa dang / dngos po'i mtha' la dmigs pa dang / dgos pa yongs su grub pa la dmigs pa dang / mos pa rnam par 'byed pa'i yid la byed pa dang / nye bar zhi bar byed pa dang / cha gcig bsgom pa dang / gnyi ga'i cha bsgom pa dang / rtag tu yid la byed pa dang / bsti stang du byas te yid la byed pa dang / mthun pa las byung ba dang / gnyen po las byung ba dang / dad par bya bar 'os pa dang / so sor brtag par 'os pa dang / bsgrims te 'jug pa dang / skabs su chad cing 'jug pa dang / rtsol ba dang bcas par 'jug pa dang / rang gi ngang gis 'jug pa dang / rnam par 'byed pa'i yid la byed pa dang / nang du yang dag par sdud pa dang / sgrib pa rnam par dag par byed pa dang / rten grub pas spyod yul rnam par dag pa dang / gzhan gyis byas pa dang / so so rang gis rtogs pa dang / rgya che ba dang / thams cad du 'gro ba'i yid la byed pa'o/ /de la chos la dmigs pa gang zhe na/ thos pa las byung ba'i shes rab dang mtshungs par ldan pa gang yin pa'o/ /don la dmigs pa ni bsams pa las byung ba dang / bsgoms pa las byung ba'i shes rab dang mtshungs par ldan pa gang yin pa'o/ /lus la dmigs pa nas chos la dmigs pa'i bar rnams kyi ni dran pa nye bar gzhag pa la brtson pa'i lus la sogs pa rnams la tshul bzhin yid la byed pa'i yid la byed pa gang yin pa'o/ /mos pa'i yid la byed pa ni/ bsam gtan pa rnams kyi ji ltar 'dod pa'i mtshan ma'i dngos po la mos pa'i gang yin pa'o/ /de kho na yid la byed pa ni rang gi mtshan nyid dang / spyi'i mtshan nyid dang / de bzhin nyid kyi mtshan nyid kyis tshul bzhin kyi chos yid la byed pa'i yid la byed pa gang yin pa'o/ /slob pa'i ni ngo bo nyid dang / rgyud las rnam pa gnyis te/ de la ngo bo nyid ni slob pa'i zag pa med pa yid la byed pa gang yin pa'o/ /rgyud la ni slob pa'i dge ba yid la byed pa thams cad do/ /slob pa'i ji lta ba bzhin du/ mi slob pa'i yang de dang 'dra bar rnam pa gnyis su rig par bya'o/ /slob pa yang ma yin mi slob pa yang ma yin pa'i ni/ 'jig rten pa'i yid la byed pa thams cad do/ /yongs su shes pa'i yid la byed pa ni yid la byed pa gang gis dmigs pa yongs su shes la/ nyon mongs pa ni spong bar mi byed pa'o/ /spong ba yid la byed pa ni/ gang gis gnyis ka byed pa'o/ /spangs pa'i tshe'i yid la byed pa ni nyon mongs pa rnams spangs pa'i rjes la yid la byed pa gang yin pa'o/ /rnam par rtog pa dang bcas pa'i gzugs brnyan la dmigs pa yid la byed pa ni gang gis rnam par rtog pa'i lus la dmigs pa'i lhag mthong bsgom pa'o/ /rnam par mi rtog pa'i gzugs brnyan la dmigs pa ni/ gang gis rnam par mi rtog pa'i lus la dmigs pa'i zhi gnas bsgom pa'o/ /dngos po'i mtha' la dmigs pa ni gang gis lus dang / tshor ba dang / sems dang / chos rnams kyi lus la sogs pa'i mtha' la dmigs pa ste/ de las lus med pa nas chos kyi bar du med pa'i phyir ro/ /dgos pa yongs su grub pa la dmigs pa'i yid la byed pa ni/ bdag 'di yid la byed pa dang / bdag 'di ltar yid la byed na/ 'di dang 'dir 'gyur ro/ /'di dang 'di yang 'grub par 'gyur ro snyam pa gang yin pa dang / yongs su dag pa la dmigs pa'i dmigs pa gang yin pa'o/ /mos pa rnam par 'byed pa'i yid la byed pa ni gang gis thog ma nas/ chos rnam par 'byed pa'am/ yang na zhi gnas sngon du btang ste/ rnam par 'byed pa'o/ /nye bar zhi bar byed pa'i yid la byed pa ni/ thog ma nas sems nang du 'jog pa'am/ yang na lhag mthong sngon du btang ste 'jog pa'o/ /cha gcig bsgom pa'i yid la byed pa ni/ gang gis zhi gnas sam/ yang na lhag mthong cha gcig la bsgom pa'o/ /gnyi ga'i cha bsgom pa'i yid la byed pa ni/ gang gis gnyis ka zung du bsgom pa'o/ /rtag tu yid la byed pa ni dus thams cad du bar chad med par rgyun du 'byung ba gang yin pa'o/ /bsti stang du byas te yid la byed pa ni/ mi lhod pa'i sbyor ba las byung ba gang yin pa'o/ /de la mos pa rnam par 'byed pa'i yid la byed pas ni ye shes mthong ba rnam par dag par byed do/ /nye bar zhi bar byed pas ni shin tu sbyangs pa bskyed do/ /cha gcig bsgom pa dang / gnyi ga'i cha bsgoms pas ni sgrib pa rnams las sems grol bar byed do/ /rtag tu yid la byed pas ni/ dus chud mi za bar byed do/ /bsti stang du byas te yid la byed pas ni mngon par shes pa myur bar 'thob par byed do/ /mthun pa las byung ba'i yid la byed pa ni/ nyon mongs pa spong ba dang mthun pa gang yin pa ste/ des ni dmigs pa sun 'byin par byed do/ /gnyen po las byung ba ni gang gis nyon mongs pa rnams spong ba dang / spong ba 'dzin pa dang / nyon mongs pa rnams las rgyud thag ring du byed pa'o/ /dang par bya bar 'os pa yid la byed pa ni/ rjes su dran pa drug bsgom pa'am/ dad par bya bar 'os pa'i dngos po gzhan gang yang rung ba yid la byed pa gang yin pa'o/ /so sor brtag par 'os pa ni gang gis nyon mongs pa rnams spangs pa dang / ma spangs pa dang / spong ba yongs su dpyod pa'am/ yang na bdag gis rtogs pa'am/ sngon dpyad pa'i chos rnams la so sor rtog pa'o/ /bsgrims te 'jug pa ni las dang po pa yid la byed pa ma thob pa rnams kyi gang yin pa'o/ /skabs su 'chad cing 'jug pa ni yid la byed pa 'thob pa rnams kyi rjes la sbyor ba lhod pa rnams kyi gang yin pa'o/ /rtsol ba dang bcas par 'jug pa ni/ brtson 'grus brtsams pa sbyor ba mi lhod pa de dag nyid kyi gang yin pa'o/ /rang gi ngang gis 'jug pa ni/ dus bzhi po yid la byed pa 'thob pa'i dus dang dngos gzhi la snyoms par 'jug pa'i dus dang snyoms par zhugs pa rnams kyi mngon par rtogs pa'i dus dang / dgra bcom pa nyid 'thob pa dang thob zin pa'i dus su nges par 'byung ba gang yin pa'o/ /rnam par 'byed pa'i yid la byed pa ni/ lhag mthong gi phyogs gang yin pa'o/ /nang du yang dag par sdud par byed pa ni zhi gnas kyi phyogs gang yin pa'o/ /sgrib pa rnam par dag par byed pa ni/ gang gis zag pa rnams spong zhing / gnas ngan len yang dag par 'joms pa'o/ /rten grub pas spyod yul rnam par dag pa ni/ gang gis rten gyi gnas ngan len thams cad dang bral bas dmigs pa la spyod du zin kyang / nyon mongs pa kun tu mi 'byung ba'o/ /gzhan gyis byas pa ni 'di lta ste/ nyan thos rnams kyis gzhan gyi sgra la brten nas/ nang gi tshul bzhin yid la byed pa las byung ba'o/ /so so rang gis rtogs pa ni 'di lta ste/ rang sangs rgyas dang / byang chub sems dpa' rnams slob dpon med par mngon par rdzogs par byang chub pa'i phyir ro/ /rgya che ba'i yid la byed pa ni 'di lta ste/ byang chub sems dpa' 'khor ba'i nyes pa dang / de las byung ba shes pa rnams kyi byang chub tu smon lam 'debs par gtogs pa'o/ /thams cad du 'gro ba'i yid la byed pa ni 'di lta ste/ sangs rgyas bcom ldan 'das rnams kyi ye shes thams cad du lkog tu gyur pa ma yin zhing / sgrib pa med pa dang yang dag par ldan pa dang / byang chub sems dpa' rnams kyi theg pa gsum po rnams sam/ yang na rig pa'i gnas lnga po rnams la mkhas par byed pa rnams kyi'o/ /de la mtshan nyid so sor rig pa'i yid la byed pa ni chos la dmigs pa dang / don la dmigs pa'o/ /gzhan drug ni don la dmigs pa kho na'o/ /lus la sogs pa la dmigs pa'i yid la byed pa rnams ni bdun po thams cad kyi nang du 'dus par rig par bya'o/ /mtshan nyid so sor rig pa dang / mos pa las byung ba dang / sbyor ba mthar thug pa'i 'bras bu ni mos pa dang / de kho na yid la byed pas bsdus so/ /dpyod pa'i yid la byed pa ni mos pa'i yid la byed pa kho nas bsdus so/ /lhag ma gsum ni rnam grangs snga ma la brten te/ de kho na yid la byed pa nyid do/ /gzhan rnams ni ci rigs su sbyar bar rig par bya'o/ /bdun po thams cad ni slob pa rnams dang / slob pa yang ma yin mi slob pa yang ma yin pa rnams so/ /gnyis ni mi slob pa ste/ mtshan nyid so sor rig pa dag pa'i sa gang yin pa dang / sbyor ba mthar thug pa'i 'bras bu'o/ /mtshan nyid so sor rig pa dang / mos pa las byung ba dang / dpyod pa'i yid la byed pa rnams ni yongs su shes pa yid la byed pa'o/ /lhag ma gsum ni spong ba yid la byed pa'o/ /sbyor ba mthar thug pa'i 'bras bu ni spangs pa'i tshe'o/ /dpyod pa'i yid la byed pa ni rnam par rtog pa dang bcas pa'i gzugs brnyan la dmigs pa nyid do/ /lhag ma rnams ni gnyi gar gtogs so/ /dngos po'i mtha' la dmigs pa ni thams cad do/ /dgos pa yongs su grub pa la dmigs pa'i rnam grangs dang pos ni thams cad do/ /gnyis pas ni sbyor ba mthar thug pa'i 'bras bu nyid do/ /mos pa rnam par 'byed pa'i yid la byed pa dang po pa gang yin pa de ni bsdus pa ma yin no/ /zhi gnas sngon du btang ba gang de ni thams cad dang sbyar ro/ /nye bar zhi bar byed pa dang po byung ba dang / lhag mthong sngon du btang ba yang de dang 'dra bar rig par bya'o/ /drug ni cha gcig dang / gnyi ga'i cha bsgom pa'o/ /gnyi ga'i cha bsgoms pa nyid ni sbyor ba mthar thug pa'i 'bras bu'o/ /rtag tu yid la byed pa dang / bsti stang du byas te yid la byed pa ni thams cad dang sbyar ro/ /mthun pa las byung ba ni dang po gnyis kyis bsdus so/ /gnyen po las byung ba ni/ rab tu dben pa las byung ba dang / sbyor ba mthar thug pa gnyis dang / dga' ba sdud par byed pa'i phyogs gcig gis bsdus so/ /dad par bya bar 'os pa ni/ dga' ba sdud par byed pa nyid kyi phyogs gcig go/ /spangs pa dang ma spangs pa so sor rtog pa'i yid la byed pas ni/ dpyod pa'i yid la byed pa kho na bsdus te/ de ni spong ba'i gnyen po la brten nas bstan to/ /gzhan dag gis ni ci rigs su rig par bya'o/ /bsgrims te 'jug pa ni gang gis kyang ma bsdus so/ /skabs su 'chad pa dang / rtsol ba dang bcas par 'jug pa ni dga' ba sdud par byed pa'i bar gyis bsdus so/ /rang gi ngang gis 'jug pa ni/ sbyor ba mthar thug pa dang / de'i 'bras bu gnyis kyis bsdus so/ /rnam par 'byed pa'i yid la byed pa ni/ mtshan nyid so sor rig pas bsdus so/ /nang du yang dag par sdud pa ni/ mos pa las byung bas bsdus so/ /sgrib pa rnam par dag par byed pa ni/ rab tu dben pa las byung ba dang / dga' bsdud par byed pa dang / dpyod pa dang / sbyor ba mthar thug pa rnams kyis bsdus so/ /rten grub pas spyod yul rnam par dag pa ni sbyor ba mthar thug pa'i 'bras bu kho nas bsdus so/ /gzhan gyis byas pa dang / so so rang gis rtogs pa ni thams cad kyis bsdus so/ /rgya che ba ni gang gis kyang ma bsdus so/ /thams cad du 'gro ba dang po byung ba gang yin pa ni sbyor ba mthar thug pa'i 'bras bus bsdus so/ /gnyis pa thams cad kyis bsdus so/ /mtshan nyid so sor rig pa'i gzhi gang zhe na/ gal te gzhan gyis byas pa yin na ni/ de'i phyir gzhan gyi sgra dang / nang du tshul bzhin yid la byed pa ni mnyam par gzhag pa'i gzhi yin no/ /'on te so so rang gis rtogs pa yin na ni de'i phyir sngon gyi tshogs nyid de'i gzhi yin no/ /lhag ma rnams ni phyi ma'i gzhi snga ma bzhin no/ /dmigs pa gang zhe na mtshan ma gang yin pa'o/ /mtshan ma yang gang zhe na/ de ni mdor bsdu na rnam pa bzhir blta bar bya ste/ dmigs pa'i mtshan ma dang / gzhi'i mtshan ma dang / yongs su spang bar bya ba dang / so sor bsten par bya'o/ /dmigs pa'i mtshan ma gang zhe na/ shes bya'i dngos po'i rnam par rtog pa'i lus gang yin pa'o/ /gzhi'i mtshan ma gang zhe na/ ting nge 'dzin gyi tshogs gang yin pa'o/ /yongs su spang bar bya ba'i mtshan ma gang zhe na/ de yang rnam pa bzhi ste/ bying ba'i mtshan ma dang / rgod pa'i mtshan ma dang / rnam par g.yeng ba'i mtshan ma dang / chags pa'i mtshan ma'o/ /so sor bsten par bya ba'i mtshan ma gang zhe na/ de ni 'di dag nyid kyi gnyen por rig par bya'o/ /bying ba'i mtshan ma gang zhe na/ dbang po'i sgo ma bsrungs pa dang / kha zas kyi tshod ma zin pa dang / nam gyi cha stod dang / nam gyi cha smad la mi nyal ba'i sbyor ba la mi brtson pa dang / shes bzhin ma yin par gnas pa dang / gti mug spyod pa dang / gnyid che ba dang / thabs mi shes pa dang / le lo dang ldan pa'i 'dun pa dang brtson 'grus dang sems dang / dpyod pa dang / zhi gnas la ma goms pa dang / zhi gnas yongs su byang bar ma byas pa'i zhi gnas phyogs gcig yid la byed pa dang / sems mun pa lta bur 'dug pa dang / dmigs pa la gtod par mi dga' ba'o/ /rgod pa'i mtshan ma gang zhe na/ snga ma bzhin du dbang po'i sgo ma bsrungs pa la sogs pa bzhi dang / 'dod chags spyod pa dang / nye bar ma zhi ba'i tshul can dang / sems skyo ba med pa dang / thabs mi shes pa dang / snga ma bzhin ha cang rab tu 'dzin pa dang ldan pa'i 'dun pa la sogs pa dang / brtson pa la ma goms pa dang / rab tu 'dzin pa la yongs su byang bar ma byas pa de'i phyogs gcig bsgom pa dang / nye du la rtog pa la sogs pa rgod pa dang mthun pa'i chos gang yang rung bas sems rnam par g.yengs pa'o/ /rnam par g.yeng ba'i mtshan ma gang zhe na/ snga ma bzhin du dbang po'i sgo ma bsrungs pa la sogs pa bzhi dang / rtog pa dpyod pa dang / dbang po rtul ba dang / don mang ba dang / bya ba mang ba dang / las kyi mtha' mang pa dang / sems mi skyo ba dang / thabs mi shes pa dang / rab tu dben pa la ma goms pa dang / dmigs pa la gtod par mi dga' ba dang / 'du 'dzis sbyor ba'i bar chad byed pa dang / rnam par g.yeng ba dang rnam par g.yeng ba ma yin pa yongs su shes pa la mi gtod pa'o/ /chags pa'i mtshan ma gang zhe na/ snga ma bzhin du dbang po'i sgo ma bsrungs pa la sogs pa bzhi dang / dbang po rtul ba dang / sred pa la spyod pa dang / nyon mongs pa'i shas che ba dang / tshul bzhin ma yin pa yid la byed pa dang nyes dmigs la mi lta ba dang / gong du nges par 'byung ba la mi lta ba'o/ /bsten par bya ba rnams ni yongs su spang bar bya ba de dag gi gnyen por ci rigs par blta bar bya'o/ /gzhan yang mtshan ma sum cu rtsa gnyis yod de / rang gi sems kyi mtshan ma dang / phyi rol gyi mtshan ma dang / rten gyi mtshan ma dang / spyod yul gyi mtshan ma dang / yid la byed pa'i mtshan ma dang / sems bskyed pa'i mtshan ma dang / gnas pa'i mtshan ma dang / rang gi mtshan nyid kyi mtshan ma dang / spyi'i mtshan nyid kyi mtshan ma dang / rags pa'i mtshan ma dang / zhi ba'i mtshan ma dang / myong ba'i mtshan ma dang / kun tu rtog pa'i mtshan ma dang / lhan cig 'jug pa'i mtshan ma dang / nyon mongs pa can gyi mtshan ma dang / nyon mongs pa can ma yin pa'i mtshan ma dang / yang dag par sbyor ba'i mtshan ma dang / log par sbyor ba'i mtshan ma dang / snang ba'i mtshan ma dang / so sor rtog pa'i mtshan ma dang / ting nge 'dzin bzang po'i mtshan ma dang / zhi gnas kyi mtshan ma dang / rab tu 'dzin pa'i mtshan ma dang / lhag mthong gi mtshan ma dang / btang snyoms kyi mtshan ma dang / ting nge 'dzin gyi mtshan ma dang / ting nge 'dzin gnas pa'i mtshan ma dang / ting nge 'dzin las ldang ba'i mtshan ma dang / skye ba'i mtshan ma dang / 'bral ba'i mtshan ma dang / thabs kyi mtshan ma dang / mngon par bsgrub pa'i mtshan ma'o/ /de la rang gi sems kyi mtshan ma gang zhe na/ 'di la dge slong kun nas nyon mongs pa'i sems kyi snga rol du/ 'di ltar 'di lta bur sems kun nas nyon mongs so zhe'am/ kun nas nyon mongs pa ma yin no zhes bya ba dang / sems bying ba la sogs pa'i thabs ni 'di yin no/ /bying ba med pa la sogs pa bzhi'i thabs ni 'di yin no zhes bya ba dang / yang na sems kun nas nyon mongs pa la sems ma chags par bya ba'i phyir/ rang gi sems la legs par shin tu mtshan mar 'dzin pa'o/ /phyi rol gyi mtshan ma gang zhe na/ 'di ltar sems kun nas nyon mongs pa can du gyur pa la/ bdag gi sems ni kun nas nyon mongs pa can du gyur to snyam du rig nas/ 'di ltar kun nas nyon mongs pa de bstsal ba dang / kun tu 'byung bar mi 'gyur bar bya ba'i phyir/ 'di lta ste snang ba'i mtshan ma'am/ dang bar bya ba'am/ yang na gzhan gang yang rung ba'i phyi rol gyi mtshan ma 'dzin pa'o/ /rten gyi mtshan ma gang zhe na/ lus su gtogs pa'i phung po lnga po sa bon dang bcas pa thams cad kyi rnam par rtog pa'i lus gang yin pa'o/ /spyod yul gyi mtshan ma gang zhe na/ gzugs nas chos la thug pa'i yul gang dang gang rnam par rtog pa'i lus yid la byed pa'o/ /yid la byed pa'i mtshan ma gang zhe na/ de dang 'byung ba'i yid la byed pa yod na/ yul de dang de la de dang 'byung ba'i rnam par shes pa 'byung bar 'gyur te/ bdag gi sems 'di ni yid la byed pa spyod yul la 'jug gi/ yid la byed pa med par ni ma yin no snyam du yid la byed pa'i mtshan ma gang yin pa'o/ /sems bskyed pa'i mtshan ma gang zhe na/ bshad ma thag pa gcig po de dang / gnyis pa 'du byed kyi rkyen dang / ming dang gzugs kyi rkyen gyis sems 'byung ngo snyam du yid la byed pa'i mtshan ma gang yin pa'o/ /gnas pa'i mtshan ma gang zhe na/ rnam par shes pa gnas pa bzhi ste/ gzugs la nye bar song ba'i rnam par shes pa gnas so zhes mdo las rgyas par 'byung ba bzhin du yid la byed pa'i mtshan ma gang yin pa'o/ /rang gi mtshan nyid kyi mtshan ma gang zhe na/ rang gi rigs kyi rang gi mtshan nyid dam/ so so rang gi mtshan nyid yid la byed pa'i mtshan ma gang yin pa'o/ /spyi'i mtshan nyid kyi mtshan ma gang zhe na/ 'du byed kyi spyi'i mtshan nyid dam/ zag pa dang bcas pa'i spyi'i mtshan nyid dam chos thams cad kyi spyi'i mtshan nyid yid la byed pa'i mtshan ma gang yin pa'o/ /rags pa'i mtshan ma gang zhe na/ sa 'og ma la rags par lta ba'i mtshan ma gang yin pa'o/ /zhi ba'i mtshan ma gang zhe na/ sa gong ma la zhi ba'i rnam par 'dzin pa'i mtshan ma gang yin pa'o/ /myong ba'i mtshan ma gang zhe na/ sngon myong ba'i 'du byed 'das pa rnams rjes su dran pa'i mtshan ma gang yin pa'o/ /kun tu rtog pa'i mtshan ma gang zhe na/ ma 'ongs pa'i 'du byed rnams la kun tu rtog pa'i mtshan ma gang yin pa'o/ /lhan cig 'jug pa'i mtshan ma gang zhe na/ da ltar byung ba'i 'du byed rnams yid la byed pa'i mtshan ma gang yin pa'o/ /nyon mongs pa can gyi mtshan ma gang zhe na/ 'dod chags dang bcas pa'i sems la 'dod chags dang bcas pa'i sems so snyam du yid la byed pa nas / rgyas par sems shin tu rnam par grol ba ma yin pa'o zhes bya ba'i bar du yid la byed pa'i mtshan ma gang yin pa'o/ /nyon mongs pa can ma yin pa'i mtshan ma gang zhe na/ de las zlog pa ni nyon mongs pa can ma yin pa'i mtshan mar rig par bya'o/ /de la 'dod chags dang bcas pa la sogs pa la so sor rtog pa ni/ mngon par byung ba la spong ba la brtson par ma byas pa rnams kyi'o/ /brtson pa rnams kyi ni bsdus pa dang / zhum pa la sogs pa la so sor rtog pa'o/ /de la 'dod chags dang bcas pa ni/ 'dod chags dang mtshungs par ldan pa'am/ de'i phyogs gnas ngan len pa dang ldan pa gang yin pa'o/ /de bzhin du sems nyon mongs pa can thams cad kyang / kun nas dkris pa dang / bag la nyal gnyis las ci rigs par rig par bya'o/ /yang na kun nas dkris pa dang / bag la nyal gyi gnyen por nyon mongs pa can ma yin pa rnams rig par bya'o/ /yang dag par sbyor ba'i mtshan ma gang zhe na/ dkar po'i phyogs kyi gzhi'i mtshan ma yid la byed pa'i mtshan ma gang yin pa'o/ /log par sbyor ba'i mtshan ma gang zhe na/ nag po'i phyogs kyi gzhi'i mtshan ma yid la byed pa'i mtshan ma gang yin pa'o/ /de bzhin du dbang po rnams kyi sgo ma bsrungs par gnas pa nas/ shes bzhin med par gnas pa'i bar du/ sems ni 'di lta bur kun nas nyon mongs pa can no snyam du yid la byed pa'i mtshan ma gang yin pa'o/ /snang ba'i mtshan ma gang zhe na/ 'di ltar 'di na la las mun pa'i gnyen po'am/ chos kyi snang ba las legs par shin tu mtshan mar rab tu bzung zhing / legs par yid la byas te/ 'og ji lta ba bzhin du steng yang de dang 'dra'o zhes bya ba la sogs pa mun pa'i mtshan ma'i gnyen por 'di gzhag go/ /so sor rtog pa'i mtshan ma gang zhe na/ 'di la dge slong gis so sor rtog pa'i mtshan ma nyid legs par shin tu rab tu mtshan mar bzung ba yin te/ dper na/ 'greng bas 'dug pa la so sor rtog pa bzhin du/ da ltar gyi 'dzin pas ma 'ongs pa'i gzung ba'i chos la so sor rtog pa dang / 'dug pas nyal ba la rtog pa bzhin du/ da ltar gyi 'dzin pa nyid kyis 'das pa'i gzung ba'i chos la rtog pa dang / mdun du 'gro ba la phyi nas 'ong bas so sor rtog pa bzhin du 'dzin pa phyi ma phyi mas 'dzin pa'i chos snga ma snga ma la so sor rtog pa ste/ de yang mdor bsdu na/ gzung ba dang / 'dzin pa'i chos so sor brtag pa las rnam pa gnyis su bstan to/ /ting nge 'dzin bzang po'i mtshan ma gang zhe na/ 'dod pa'i 'dod chags kyi gnyen por rnam par bsngos pa la sogs pa yid la byed pa'i mtshan ma gang yin pa'o/ /ci'i phyir de la bzang po zhes bya zhe na/ nyon mongs pa thams cad kyi gtso bo ni 'dod chags yin te/ 'dod chags thams cad kyi nang na yang 'dod pa'i 'dod chags ni thams cad kyis legs par gzhom bar dka' ba yin la/ de ni de'i gnyen po la dmigs pa yin pas de'i phyir bzang po zhes bya'o/ / zhi gnas kyi mtshan ma gang zhe na/ rnam par mi rtog pa'i gzugs brnyan yid la byed pa'i mtshan ma gang yin pa'o/ /rab tu 'dzin pa'i mtshan ma gang zhe na/ dang bar bya ba'i mtshan ma gang yang rung ba'am/ snang ba'i mtshan mas sems rab tu 'dzin pa'i mtshan ma gang yin pa'o/ /lhag mthong gi mtshan ma gang zhe na/ thos pa las byung ba dang / bsams pa las byung ba dang / bsgoms pa las byung ba'i shes rab kyis chos rnams yid la byed pa'i mtshan ma gang yin pa'o/ /btang snyoms kyi mtshan ma gang zhe na/ dge ba'i phyogs la sems mnyam par gyur te/ lhag par btang snyoms su byed pa'i mtshan ma gang yin pa'o/ /ting nge 'dzin gyi mtshan ma gang zhe na/ gzhi dang dmigs pa dang / brten par bya ba rnams kyi mtshan ma gang dag gis/ ting nge 'dzin la snyoms par 'jug pa'am/ thob zin pa sngon du byed pa'o/ /ting nge 'dzin gnas pa'i mtshan ma gang zhe na/ mtshan ma de dag nyid legs par 'dzin pa gang yin pa ste/ legs par bzung bas na/ ji srid du 'dod pa de srid snyoms par zhugs par gnas pa dang / ting nge 'dzin de las yongs su nyams par ma gyur pa'i chos gang dag yin pa'o/ /ting nge 'dzin las ldang ba'i mtshan ma gang zhe na/ mnyam par gzhag pa'i sa'i rnam par rtog pa'i lus las ma gtogs pa gang yin pa'o/ /skye ba'i mtshan ma gang zhe na/ ting nge 'dzin thob zin pa/ phyir zhing skye ba dang / 'phel ba dang / rgyas par yid la byed pa'i mtshan ma gang yin pa'o/ /'bral ba'i mtshan ma gang zhe na/ ting nge 'dzin thob zin pa nyams pa dang / 'grib pa dang / chung ba yid la byed pa'i mtshan ma gang yin pa'o/ /thabs kyi mtshan ma gang zhe na/ gnyi ga ste/ phyir zhing 'byung ba dang / 'phel ba dang / rgyas par 'byung ba'am/ nyams par 'gyur pa'i lam gang yin pa'o/ /mngon par bsgrub pa'i mtshan ma gang zhe na/ tshig dang yi ge rgyas pa'i don mdor bsdu ba dang / mngon par shes pa bsgrub pa dang / nyon mongs pa med pa dang / so so yang dag par rig pa dang / smon nas shes pa rnams dang / gzhan yang ting nge 'dzin la brten pa'i yon tan khyad par can nam/ stobs dang mi 'jigs pa la sogs pa bsgrub pa'am/ zab mo'i don dang / tshig shes rab kyis rtogs pa'i mtshan ma gang yin pa'o/ /mtshan ma 'di dag thams cad ni/ mtshan ma'i rtsa ba bzhis bsdus pa yin te/ dmigs pa'i mtshan mas ni thams cad bsdus so/ /gzhi'i mtshan mas kyang bsdus te/ phyi ma phyi ma gsal bas na/ phyi ma'i gzhi snga ma yin pa'i phyir ro/ /yang dag par sbyor ba ni rnam pa thams cad du gzhi'i mtshan ma nyid do/ /yang dag par sbyor ba ji lta ba bzhin du/ log par sbyor ba yang de dang 'dra ste/ gcig ni dkar po'i phyogs kyi'o/ /cig shos ni nag po'i phyogs kyi'o/ /de la nyon mongs pa can gyi mtshan ma ni thams cad kyang yongs su spang bar bya ba'o / /cig shos ni bsten par bya ba ste/ de dang de'i 'phral 'phral la bya bar rig par bya'o/ /de la dmigs pa'i mtshan ma la yid la byed pa ji ltar bsgom zhe na/ mtshan ma gang dang gang yid la byed pa'i yid la byed pa de don rnam pa bzhi byed de/ yid la byed pa de nyid la brten pa dang / de'i mi mthun pa'i phyogs nyon mongs pa thag ring du byed pa dang / 'di lta ste/ phyi ma la ches gsal bar byed pa'i phyir yid la byed pa de nyid dam/ de las gzhan pa gsal bar byed pa dang / yid la byed pa de la brten pa na/ dmigs pa ni sun 'byin par byed/ nyon mongs pa ni spong bar byed/ spong ba ni 'dzin par byed/ rgyu ni nyon mongs pa rnams las thag ring du byed pa ste/ dmigs pa'i mtshan ma yid la byed pa ni/ de ltar sgom mo/ /bsam gtan dang po nas srid pa'i rtse mo man chad ni rnam pa bzhis snyoms par 'jug ste/ rgyu'i stobs dang / sbyor ba'i stobs dang / lung nod pa'i stobs dang / man ngag gi stobs kyis so/ /rgyu'i stobs kyis ji ltar zhe na/ nye ba nye bar bsam gtan la snyoms par zhugs pa yin no/ / sbyor ba'i stobs kyis ji ltar zhe na/ nye bar snyoms par zhugs pa ma yin du zin kyang rtag tu goms par byas pa'i dbang gis rgyun mi 'chad par snyoms par 'jug pa'o/ /lung nod pa'i stobs kyis ji ltar zhe na/ des bsam gtan gyi dbang du bya ba'i chos mang po thos te/ bzung zhes bya ba la sogs ba rgyas par sbyar te/ des chos de dag nyid la brten nas/ gcig tu ma 'dres pa/ bag yod pa brtun pa can sems gtad de/ chos kyi rjes su mthun pa'i chos bsgrub pa ni bsam gtan la snyoms par 'jug pa'o/ /man ngag gi stobs kyis ji ltar zhe na/ mkhan po'am/ slob dpon nam/ bla ma lta bu gang yang rung ba'am/ gzhan su yang rung ba dag las/ bsam gtan dang po'am/ lhag ma rnams kyi rjes su mthun pa'i gdams ngag rjes su bstan pa thob nas/ des de nyid yid la byed cing bsam gtan la snyoms par 'jug pa ste/ de bas rnal 'byor pa ni rgyu'i stobs can dang / sbyor ba'i stobs can dang / dbang po rnon po dang / dbang po rtul po dang / rnam pa bzhi yod do/ /bsam gtan pa ni bzhi po 'di dag ste/ sred pa'i shas che ba'i bsam gtan pa dang / lta ba'i shas che ba'i bsam gtan pa dang / nga rgyal gyi shas che ba'i bsam gtan pa dang / the tshom gyi shas che ba'i bsam gtan pa'o/ /sred pa'i shas che ba'i bsam gtan pa gang zhe na/ des thog ma kho nar bsam gtan la snyoms par 'jug pa'i phan yon ni thos la nges par 'byung ba'i thabs ni ma thos pas/ de la shin tu phan yon du mthong nas/ brtson pa'i rgyus bsam gtan dang po la snyoms par 'jug la/ de ltar snyoms par zhugs pa'i 'og tu yang ro myong par byed pa'o/ /lta ba'i shas che ba'i bsam gtan pa gang zhe na/ 'di na la las bdag nyid kyi ston pa'am/ gzhan yang 'jig rten ni rtag pa'o zhes bya ba la sogs pa dang / de lta bus dag par 'gyur ro/ /grol bar 'gyur ro/ /de lta bur bsam gtan dang po nas srid pa'i rtse mo man chad la snyoms par 'jug par bya'o zhes thos nas/ des lta ba de nyid la brten te brtson pa'i rgyus bsam gtan dang po la snyoms par 'jug la/ de ltar snyoms par zhugs pa'i 'og tu yang / bskal pa du ma'i sngon gyi lus rjes su dran nas/ des 'di snyam du bdag dang 'jig rten ni rtag pa'o snyam du sems te/ ting nge 'dzin de las langs nas/ des lta ba de nyid brtan por byed cing / de'i rjes la yang 'dis ni bdag dag par 'gyur ro/ /grol bar 'gyur ro/ /nges par 'byung bar 'gyur ro snyam du sems shing / rab tu sems la shin tu sems pa'o/ /nga rgyal gyi shas che ba'i bsam gtan pa gang zhe na/ 'di ltar 'di na la las/ tshe dang ldan pa che ge mo bsam gtan dang po nas srid pa'i rtse mo man chad la snyoms par 'jug go zhes thos la/ thos nas kyang de 'di snyam du sems te/ de yang snyoms par 'jug na/ bdag ci'i phyir snyoms par mi 'jug snyam mo/ /de nga rgyal de la brten nas/ brtson pa'i rgyus bsam gtan dang po la snyoms par 'jug la de la snyoms par zhugs pa'i 'og tu yang des rlom sems su byed pa'am yang na snyoms par zhugs pa'i tshe 'di snyam du sems te/ bdag ni bsam gtan dang po la snyoms par 'jug pa thob pa yin gyi/ gzhan ni de lta ma yin no snyam ste/ de nga rgyal de la brten nas/ de'i rjes la yang sems shing rab tu sems la shin tu sems pa'o// //bam po bcu gsum pa/ the tshom gyi shas che ba'i bsam gtan pa gang zhe na/ 'di ltar 'di na la la rang bzhin gyis shes ba zhan cing shin tu rmun la/ de yang sngon zhi gnas spyod pa las/ de'i 'og tu bsam gtan la snyoms par 'jug la/ de ltar snyoms par zhugs pa'i 'og tu yang / 'phags pa'i bden pa bzhi po dag mngon par rtogs pa ma thob pa thob par bya ba'i phyir rtsol bar byed mod kyi/ de shes pa zhan pa dang / shin tu rmun pa'i phyir bden pa mngon par rtogs par byed mi nus pas / de gzhan dag gi rtog pa la yang som nyi byed cing the tshom za ste/ som nyi de la brten cing de'i rjes la yang sems shing rab tu sems la shin tu sems pa'o/ /ro myang ba dang mtshungs par ldan pa'i bsam gtan la ji ltar snyoms par 'jug ce na/ dbang po rtul ba'am/ 'dod chags spyod pa'am/ nyon mongs pa shas che ba yin te/ bsam gtan dang po la snyoms par 'jug pa'i phan yon ni thos la zhes bya ba nas/ sred pa'i shas che ba'i bsam gtan pa ji lta ba bzhin du rgyas par bya ste/ des de'i gong du nges par 'byung ba mi shes pas ro myong bar byed cing nges par 'dzin la/ lhag par zhen cing lhag par zhen nas gnas te/ gang la myong bar byed pa ni de las langs pa zhes brjod par bya'o/ /gang gis myong bar byed pa de ni snyoms par zhugs pa zhes bya'o/ /dag pa'i bsam gtan la ji ltar snyoms par 'jug ce na/ dbang po 'bring ngam dbang po rnon po yin te/ nyon mongs pa cha mnyam pa'am/ nyon mongs pa shas chung la gzhan las bsam gtan dang po la snyoms par 'jug pa'i phyir ro myong ba dang / nyes dmigs dang gong du nges par 'byung ba yang thos te/ brtson pa'i bsam gtan dang po la snyoms par 'jug la snyoms par zhugs nas kyang nyes dmigs de nyid yid la byed cing gong du nges par 'byung ba shes pas ro myong bar mi byed do/ /zag pa med pa'i bsam gtan la ji ltar snyoms par 'jug ce na/ 'di ltar 'di na la la dad pas rjes su 'brang ba'am/ chos kyis rjes su 'brang ba dang / nyon mongs pa'i shas chung ba'i rang bzhin can yin la/ des thog ma kho nar 'phags pa'i bden pa bzhi po dag mngon par rtogs pa'am/ yang na mngon par rtogs par bya ba'i phyir brtson par byed pa na/ des rnam pa dang / mtshan ma dang rtags gang dag gis bsam gtan dang po la snyoms par 'jug pa'i rnam pa dang / mtshan ma dang / rtags de dag yid la mi byed kyi de la yod pa'i gzugs su gtogs pa nas rnam par shes par gtogs pa'i bar gang yin pa'i chos de dag la/ nad la sogs pa dag gi rnam pa dag gis yid la byed de/ 'du byed de dag gis sems skyo zhing 'jigs pa dang / ldog par byed la/ bdud rtsi'i khams su yang sgrub ste/ de ltar zag pa med pa'i bsam gtan la snyoms par 'jug go/ /nyams pa'i cha dang mthun pa la ji ltar snyoms par 'jug ce na/ dbang po rtul zhing dman pa la mos pa yin la/ de brtson pa'i rgyus bsam gtan dang po la snyoms par 'jug pa nyid ni/ de la dga' ba dang bde ba dang / phan yon mi bzod pas/ bsam gtan de las yongs su nyams te/ dbang po rnams gsal bar ma byas kyi bar du/ ji lta ji ltar snyoms par 'jug pa de lta de ltar yongs su nyams pa kho nar 'gyur ro/ /gnas pa'i cha dang mthun pa la ji ltar snyoms par 'jug ce na/ dbang po 'bring ngam/ dbang po rnon po yin la des de'i phan yon thos pa nas/ ro myong ba dang mtshungs par ldan pa ji lta ba bzhin du rgyas par bya ste/ des de'i ro myong bas gang du nges par 'byung bar mi 'gyur la/ mar yang yongs su nyams par mi 'gyur ba'o/ /khyad par du 'gyur ba'i cha dang mthun pa'i snyoms par 'jug pa ji lta bu zhe na/ des de'i nges par 'byung ba yang thos la/ de snyoms par 'jug pa des chog par mi 'dzin pas/ de myong bar yang mi byed la/ gong du rtsol te de'i phyir khyad par yang thob par 'gyur ro/ /nges par 'byed pa'i cha dang mthun pa la ji ltar snyoms par 'jug ce na/ thams cad du 'jig tshogs la nyes dmigs su lta ba yin te/ de'i phyir zag pa med pa la snyoms par 'jug go/ /zag pa med pa thams cad ni shin tu mthar thug pa'i phyir nges par 'byed pa'i cha dang mthun pa zhes bya ste dper na/ nor bu phug zin pa dang / rdza ma phug zin pa dang / rtsig pa phug zin pa zhes bya ba bzhin te/ de las dbug tu med pas na de la phug zin pa zhes bya'o/ /de bzhin du de las nges par dbyer med pas na/ de la nges par 'byed pa'i cha dang mthun pa zhes bya'o/ /bar chad med par ji ltar snyoms par 'jug ce na/ 'di ltar 'di na kha cig bsam gtan dang po nas srid pa'i rtse mo'i bar du yongs su ma dag pa dang / yongs su ma byang ba thob pas/ de srid pa'i rtse mo dang bsam gtan dang po'i bar du lugs su byung ba dang / lugs su byung ba ma yin par snyoms par 'jug go/ /thod rgal du ji ltar snyoms par 'jug ce na/ de dag nyid yongs su dag pa'i phyir/ bsam gtan dang po las langs ma thag tu bsam gtan gsum pa la snyoms par 'jug go/ /de las langs nas nam mkha' mtha' yas skye mched la snyoms par 'jug go/ /de las langs nas ci yang med pa'i skye mched la snyoms par 'jug go/ /gsum pa las 'das par thod rgal du snyoms par 'jug pa ni med de/ shin tu ring ba'i phyir ro/ /lugs su mi 'byung ba la yang de dang 'dra'o/ /de bzhin gshegs pa dang / byang chub sems dpa' bskal pa grangs med pa gnyis kyis/ nges par byung ba ni ma gtogs te/ de gnyis la ni ci dga' dgur snyoms par 'jug pa yod pa'i phyir ro/ /bsam gtan rnams la ji ltar spel bar spyod ce na/ 'di ltar 'di na la la zag pa dang bcas pa dang / zag pa med pa'i bsam gtan bzhi thob la/ snyoms par 'jug pa la dbang thob par 'dod pa'am/ snyoms par 'jug pa la dbang thob pa'i 'bras bu nyams su myong bar 'dod pas/ rgyun chags par zag pa dang bcas pa dang / zag pa med pa'i bsam gtan gcig nas gcig tu spel mar zag pa dang bcas pa las langs ma thag tu zag pa med pa dang / zag pa med pa las langs ma thag tu zag pa dang bcas pa la yang snyoms par 'jug ste/ de tsam gyis na de yongs su grub par rig par bya ste/ de gang du gang gi tshe ji srid du 'dod pa der de'i tshe de srid du snyoms par 'jug pa 'di ni snyoms par 'jug pa la dbang ba'o/ /snyoms par 'jug pa la dbang ba'i 'bras bu ni tshe 'di nyid la/ de'i bde ba la gnas pa ches gsal bar 'gyur ba dang / des de las yongs su nyams par mi 'gyur ba'i lam thob par 'gyur ba dang / rnam par thar pa dang / zil gyis gnon pa'i skye mched dang / zad par gyi skye mched rnams mngon par bsgrub pa'i lam yongs su dag par 'gyur ba'o/ /gal te nyon mongs pa'i lhag ma dang bcas bzhin du 'chi ba'i dus byed par gyur na ni/ de'i phyir gnas gtsang mar skye bar 'gyur te/ bsam gtan la snyoms par 'jug pa chung ngu dang 'bring dang / chen po'i bye brag gis thams cad dus gsum du 'gyur te/ rtog pa dang bcas pa dang / dpyod pa dang bcas pa'i sa la sngar bstan pa bzhin no/ /rtog pa med pa la dpyod pa tsam gyi ting nge 'dzin bsgoms pas ni tshangs pa chen po nyid 'thob par 'gyur ro/ /spel mar bsgom pa chung ngu dang / 'bring dang / chen po dang / shin tu che ba dang / rab tu che bar bsgoms pas gnas gtsang ma'i lnga grub po/ /de la dag pa'i bsam gtan la snyoms par zhugs pas na / bsam gtan gyis rnams su skye bar rig par bya'o/ /ro myang ba dang mtshungs par ldan pas ni skye bar mi 'gyur ro/ /gal te skyes nas ro myang bar byed na yang / de las 'chi 'pho bar 'gyur ro/ /ji ste dag pa bsgom na de nyid du skye ba'am/ yang na 'og mar skye bar 'gyur ro/ /gong ma la snyoms par 'jug na ni steng du 'phar bar 'gyur te/ sngar 'di snyoms par zhugs nas de'i 'og tu der skye bar 'gyur ro/ /de ci'i phyir zhe na/ so so'i skye bo 'dod chags dang ma bral ba ni/ der skye bar mi 'gyur la/ snyoms par ma zhugs pa yang 'dod chags dang bral bar mi 'gyur ba'i phyir ro/ /'di dang der snyoms par zhugs pa gnyis la yang bde ba'i bye brag ni med la/ lus kyi bye brag ni yod do/ /yid la byed pa dang mtshan ma bsgom pa rdzogs so// //mdo sde bsdu ba gang zhe na/ rnam par thar pa brgyad ni/ gzugs can gzugs rnams la lta ba zhes bya ba la sogs pa ste snga ma bzhin no/ /rnam par grol ba ni mos par 'gyur te/ de bas na rnam par thar pa bdun no/ /'du shes dang tshor ba la mi phyogs pas rnam par thar pa brgyad de/ de ltar na rnam par thar pa brgyad ces bya'o/ /gzugs can gzugs rnams la ji ltar lta zhe na/ 'dod pa'i khams su skyes par 'gyur te/ 'dod pa'i 'dod chags dang bral ba ni thob la/ gzugs kyi 'dod chags dang ni ma bral te/ de de ltar grol bar gyur na/ gang dag las grol ba ni 'dod pa na spyod pa'i gzugs de dag nyid yid la byed de/ snang zhing gsal ba dang bcas pa'i mtshan mas mos par byed de / /de rnam pa gnyis kyis gzugs can yin te/ gang 'dod pa'i khams su skyes par gyur pa dang / gang gzugs kyi snyoms par 'jug pa thob nas/ snang ba dang bcas pa la yang mos pa'i phyir ro/ /gzugs rnams la lta zhes bya ba la/ ji lta bu la ni lta/ ci'i phyir na ni lta zhe na/ 'dod pa na spyod pa'i gzugs zil gyis gnon pa'i skye mched rnams su rnam par bshig pa'i gzugs chung ngu kha dog bzang po dang / kha dog ngan pa dang / bzang po rnams gang dag yin pa ste/ chen po rnams la zhes bya ba yang de bzhin du rgyas par bya'o/ /ci'i phyir zhe na/ yon tan khyad par can mngon par bsgrub pa'i phyir/ sbyor ba la yongs su sbyang bar bya ba'i don du ste/ zil gyis gnon pa'i skye mched dang / zad pa'i skye mched dang / 'phags pa'i rdzu 'phrul dang / nyon mongs pa med pa dang / smon nas shes pa dang / so so yang dag par rig pa la sogs pa bsgrub pa'i phyir ro/ /de sngon gzugs de dag las 'dod chags dang bral du zin kyang / des de dag la mos pa'i dbang ma thob pas na/ de thob par bya ba'i phyir yang dang yang du mos par byed do/ /nang gzugs med par 'du shes pas/ phyi rol gyi gzugs rnams la ji ltar lta zhe na / 'dod pa'i khams su skyes par 'gyur la/ gzugs kyi 'dod chags dang ni bral/ gzugs med pa'i snyoms par 'jug pa ni mngon du mi byed la/ de'i 'du shes dang ni ldan te/ nang gi snang ba'i mtshan ma yid la mi byed la/ phyi rol gyi gzugs rnams la mos par byed do/ /gang dag las 'dod chags dang bral bar gyur pa de dag ni de'i phyi rol zhes bya'o/ /de ni rnam pa gnyis kyis nang gzugs med par 'du shes pa zhes bya ste/ gang gzugs med med pa'i snyoms par 'jug pa thob la/ snyoms par 'jug pa de yang bdag nyid kyis shes pa dang / gang nang gi snang ba'i mtshan ma yid la mi byed pa ste/ lhag ma ni snga ma bzhin no/ /sdug pa'i rnam par thar ba lus kyis mngon sum du byas te/ bsgrubs nas ji ltar gnas she na/ 'di ltar 'di na kha cig btang snyoms dang dran pa yongs su dag cing / yongs su byang ba thob par gyur la/ des de la brten nas sdug pa bsgoms te/ 'phags pa'i rnam pas yongs su rdzogs pa ni sdug pa'i rnam par thar pa zhes bya'o/ /ci'i phyir zhe na/ rnam pa gsum gyi phyir te/ bde ba dang sdug bsngal ba la rnam par 'das pa dang / g.yo ba thams cad dang bral ba dang / shin tu yongs su sbyang ba byas pa'i phyir ro/ /lus kyis mngon sum du byas nas zhes bya ba ni/ gnas pa des 'phags pa rnams shas cher gnas pa'i phyir ro/ /nam mkha' mtha' yas skye mched kyi rnam par thar pa ni/ 'di lta ste/ de las 'dod chags dang bral la/ nam mkha' nyid la mos par byed pa'o/ /rnam shes mtha' yas skye mched kyi rnam par thar pa yang de dang 'dra ste/ de las 'dod chags dang bral la/ de nyid la mos par byed pa'o/ /ci yang med pa'i skye mched kyi rnam par thar pa ni/ ci yang med pa'i skye mched thob la/ rnam shes mtha' yas skye mched la mos par byed pa'o/ /srid pa'i rtse mo'i rnam par thar pa ni/ gzhan la mos par mi byed de/ ji srid du zad par gyi 'du shes 'byung ba de srid du mos par bya dgos so/ /sngar mos te yongs su sbyang ba byas nas/ de'i 'og tu zil gyis mnan te/ lta ba'i phyir zil gyis gnon pa'i skye mched ces bya'o/ /zil gyis gnon pa de yang rnam pa lngar rig par bya ste/ chung bar zil gyis gnon pa ni/ dper na bzo la sogs pa 'ga' zhig gis lhag pa'i phyir/ des gzhan chung bar rtsi ba lta bu'o/ /nyams stobs chung bar zil gyis gnon pa ni/ dper na stobs dang ldan pas ches stobs chung ngu brnyas pa lta bu'o/ /mi snang bar zil gyis gnon pa ni/ dper na rtsig pa la sogs pas bar du bcad pa dang / gsang sngags sam/ rdzu 'phrul gyis mi snang bar byed pa lta bu'o/ /sun 'byin pas zil gyis gnon pa ni/ dper na nyon mongs pa rnams sun phyung nas spong bar byed pa lta bu'o/ /dbang byed pas zil gyis gnon pa ni/ dper na rje bos bran la ci dga' dgur bsko ba lta bu'o/ /don 'di'i skabs su ni mi snang bar zil gyis gnon pa dang / dbang byed pas zil gyis gnon pa gzung bar bya ste/ sngar ni rnam par thar pa rnams la mos pas dbang byed do/ /de'i 'og tu ni zil gyis gnon pa'i skye mched rnams la zil gyis gnon pas dbang byed do/ /de la gzugs chung ngu dag mthong zhes bya ba ni/ sems can dang / yo byad ces bya ba rnams so/ /chen po rnams zhes bya ba ni/ khyim dang gnas khang la sogs pa rnams so/ /kha dog bzang po ni kha dog yid du 'ong ba gang yin pa rnams te/ gcig tu nges par mdzes pa'i phyir ro/ /de las bzlog pa ni kha dog ngan pa'o/ /ngan pa ni sgra dang dri dang ro dang reg bya'i sgo nas yid du mi 'ong ba rnams so/ /de las bzlog pa ni bzang po rnams te/ sems can dang yo byad dang / gzhal med khang de dag gi kha dog ni rnam pa bzhi'o/ /zil gyis mnan nas shes zhes bya ba ni mi snang bar byas shing dmigs pa la mos par byed pa'o/ /de ltar 'du shes zhes bya ba ni zil gyis gnon pa'i 'du shes so/ /zad par gyi skye mched rnams kyis ni/ mos par bya ba'i dngos po'i zad par gyi skye mched la mos par byed do/ /de la gnyis su med pa zhes bya ba ni/ 'phags pa la bdag dang bdag gir 'dzin pa'i bye brag med pa'i phyir ro/ /tshad med pa ni thams cad kyi'o/ /gzugs dang reg bya'i skye mched 'di gnyis ci'i phyir rnam par gzhag ce na/ 'di gnyis ni bdag dang / pha rol gnyi ga'i rgyud dang / gzugs can gyi khams thams cad na yod la/ mig la sogs pa rnams ni rang gi rgyud la yod pa kho na yin pa dang / dri dang ro rnams kyang kun na med pa'i phyir ro/ /de rnams kyi nang na gzugs can rnams ni gzugs kyi khams man chad kyi zad par gyi snyoms par 'jug pa'o/ / gzugs med pa dag na ni nam mkha' thams cad du 'gro ba yin pas na/ de'i phyir der zad par gyi skye mched du gzhag go/ /rnam par shes pa yang yul zad par gyi spyod yul can yin pa'i phyir ro/ /thog ma kho nar ni rnal 'byor pas mos par byed do/ /de'i 'og tu zil gyis gnon to/ /de nas zil gyis gnon pa la dbang thob nas de'i 'og tu zad par gyi skye mched de nyid la ci dga' dgur mos par byed do/ /de ltar de dag gi go rims ni de yin no/ /gzugs kyi zad par gyi skye mched brgyad yongs su dag pa rnams kyis ni 'phags pa'i mos pa dang dngos po yongs su bsgyur ba'i rdzu 'phrul mngon par sgrub par byed de/ de ji lta ji ltar mos pa dang / ji srid kyi bar du bsgyur ba de kho na bzhin du 'gyur te/ gser la sogs pa de dag gis kyang bya ba byed nus so/ /zad par rnam par shes pa'i skye mched yongs su dag pas ni/ nyon mongs pa med pa dang / so so yang dag par rig pa dang / smon nas shes pa la sogs pa rnams mngon par sgrub par byed do/ /zad par nam mkha'i skye mched yongs su dag pas ni gang 'dod pa de nam mkhar sgyur bar byed de/ dper na rdza mkhan dang / lcags mgar dang / gser mgar rnams kyis 'jim pa la sogs pa rnams thog mar ni sbyor bar byed kyi/ de dag shin tu yongs su byang bar byas pa ma yin te/ rnam par thar pa'i gnas skabs kyang de dang 'dra'o/ /zil gyis gnon pa'i skye mched kyi gnas skabs ni/ ji ltar shin tu yongs su byang bar byas pa lta bu'o/ /zad par gyi skye mched kyi gnas skabs ni/ ji ltar shin tu yongs su byang bar byas nas/ ji srid 'dod pa bzhin du yongs su bsgyur ba lta bur blta bar bya'o/ /ting nge 'dzin ni rnam pa gsum ste/ stong pa nyid dang / smon pa med pa dang / mtshan ma med pa'o/ /stong pa nyid kyi ting nge 'dzin gang zhe na/ sems can dang / srog dang / gso ba dang / gang zag nyid med pa las brtsams nas sems kyi gnas pa rtse gcig pa gang yin pa'o/ /de la stong pa nyid rnam pa bzhi ste/ rtog pa'i stong pa nyid ni 'di lta ste/ rtag pa nas bdag dang bdag gir 'dzin pa'i bar dag gis chos thams cad stong par so sor rtog pa'o/ /de'i 'bras bu stong pa nyid ni 'di lta ste/ sems 'khrug pa med cing rnam par grol ba/ 'dod chags la sogs pa nyon mongs pa thams cad kyis stong pa'o/ /nang stong pa nyid ni 'di lta ste/ ngar 'dzin pa dang / nga yir 'dzin pa dang / nga'o snyam pa'i nga rgyal la mngon par zhen pa rnams kyis lus stong pa'o/ /phyi stong pa nyid ni 'di lta ste/ 'dod pa'i yon tan lnga po rnams/ 'dod pa'i 'dod chags kyis stong pa ste/ ji skad du rnam pa thams cad du gzugs kyi 'du shes rnams las yang dag par 'das pas phyi stong pa nyid lus kyis mngon sum du byas nas bsgrubs te gnas par bya'o zhes rgya cher gsungs pa lta bu'o/ /gzugs kyi 'du shes ni 'dir 'dod pa'i yon tan gyi 'du shes la bya ste/ de'i 'du shes las byung ba'i 'dod chags spangs pa'i phyir te de phyi stong pa nyid ces bya'o/ /rnal 'byor pa yang res 'ga' ni de'i 'bras bu stong pa nyid kyis phyi stong pa nyid yid la byed do/ /res 'ga' ni nang stong pa nyid yid la byed do/ /res 'ga' ni rtog pa'i stong pa nyid kyis nang dang phyi stong pa nyid yid la byed de de'i dbang gis de gnyis la sems 'jug go/ /gal te nang dang phyi stong pa nyid la yang mi 'jug na ni/ de'i 'og tu mi g.yo ba yid la byed de/ mi g.yo ba zhes bya ba ni/ mi rtag pa'i 'du shes sam/ sdug bsngal ba'i 'du shes la bya'o / /de de ltar yid la byas pas nga'o snyam du g.yo bar mi 'gyur te 'di'o/ /bdag go/ /nga'o snyam du rgya cher de'i sems g.yo bar mi 'gyur ro/ /de bas na de gnyis la de'i sems 'jug go/ /smon pa med pa'i sems kyi ting nge 'dzin gang zhe na/ nye bar len pa'i phung po lnga po la/ mi rtag pa'am sdug bsngal bar yid la byed cing / sems kyi gnas pa rtse gcig pa gang yin pa'o/ /mtshan ma med pa'i ting nge 'dzin gang zhe na/ nye bar len pa'i phung po lnga po de dag nyid la 'gog pa dang zhi bar yid la byed cing sems kyi gnas pa rtse gcig pa gang yin pa'o/ /mtshan ma med pa'i sems kyi ting nge 'dzin ni/ 'dud par yang mi byed ces bya ba la sogs pa rgya cher gang gsungs pa de la ji ltar 'dud par mi byed cing mngon par 'dud par mi byed ce na/ mi mthun pa dang mthun pa gnyis dang mi ldan pa'i phyir ro/ /yang na mtshan ma thams cad yid la mi byed pa dang / mtshan ma med pa'i dbyings yid la byed pa dang / rnam pa gnyis kyis mtshan ma med pa la snyoms par 'jug go/ /de la mtshan ma rnams yid la mi byed pas ni de dag la skyo bar mi 'gyur zhing / sun mi 'byin par mngon par 'du mi byed pa kho nar byed de/ de bas na 'dud par mi byed ces bya'o/ /mtshan ma med pa'i dbyings yid la byed pas ni/ de la chags par mi 'gyur te/ de bas na mngon par 'dud par mi byed ces bya'o/ /ting nge 'dzin de yang rnam pa gnyis te/ sbyor ba las byung ba dang / sbyor ba'i 'bras bu'o/ /de la sbyor ba las byung ba ni so sor brtags shing so sor brtags shing 'jog par byed pa mtshan ma rnams las kyang rnam par ma grol ba ste/ 'di ltar de'i rnam par shes pa mtshan ma'i rjes su 'brang bas skabs skabs su sems kun nas dkris shing 'dug go/ /de yang so sor brtags shing so sor brtags shing 'jog pa na/ 'bras bu med par byed de/ mtshan ma'i rjes su 'brang ba las kyang grol bar 'gyur ro/ /rnam par grol ba de yang rnam par grol ba'i phyir ro/ /so sor brtags nas gnas pa ma yin no / /de'i phyir shin tu rnam par grol ba yin no/ /so sor brtags shing so sor brtags shing 'jog pa na yang gnas pa'i phyir rnam par grol ba yin gyi/ shin tu rnam par grol ba ni ma yin no/ /kun shes pa'i 'bras bu dang / kun shes pa'i phan yon zhes bya ba ni/ nyon mongs pa spong ba dang / tshe 'di la bde bar gnas pa 'grub pa'i phyir ro/ /yang 'gog pa dang / lam yang kun nas shes pa yin te/ de gnyis ni kun shes pa'i 'bras bu dang / kun shes pa'i phan yon dang / go rims bzhin du sbyar bar bya'o/ /yang bden pa mngon par rtogs pa yang kun shes pa yin la/ dgra bcom pa nyid kyang kun shes pa yin te/ de la mthong ba'i lam gyi tshe ni kun shes pa'i 'bras bu'o/ /dgra bcom pa'i 'bras bu'i tshe ni kun shes pa'i phan yon no/ /gang la gang med par de des stong par mthong bas na stong pa nyid ces bya'o/ /de ltar mthong ba gang yin pa de ni/ de nyid la smon par mi byed pas na/ smon pa med pa zhes bya'o/ /'du byed thams cad mtshan ma med par mthong bas na mtshan ma med pa zhes bya'o/ /gzhan las ni mi rtag pa gang yin pa de ni sdug bsngal ba'o/ /sdug bsngal ba gang yin pa de ni bdag med pa'o zhes stong pa nyid mjug tu smos na/ ci'i phyir 'dir stong pa nyid sngar bstan ce na/ ji srid du bdag med pa'i 'du shes la yang dag par mi gnas pa de srid du/ gang gis smon pa med par 'gyur ba'i mi rtag pa dang / sdug bsngal ba mthong ba de ltar yongs su dag par mi 'gyur ba'i phyir ro/ /de'i 'og tu smon pa med par 'gyur te/ de bas na mi rtag pa'i 'du shes can du gyur na/ bdag med pa'i 'du shes la yang dag par gnas par 'gyur ro zhes rgya cher gsungs so/ /des mi rtag pa de bdag med par mthong na/ smon par mi byed de/ nges par 'byung ba tshol ba ni / smon pa med pa nyid la smon par byed do/ /de bas na de'i 'og tu mtshan ma med pa bstan to/ /rtog pa dang bcas dpyod pa dang bcas pa'i ting nge 'dzin gang zhe na/ rtog pa dang dpyod pa gnyis ka mtshungs par ldan pa gang yin pa'o/ /rtog pa med la dpyod pa tsam gyi ting nge 'dzin gang zhe na/ dpyod pa tsam dang mtshungs par ldan pa gang yin pa ste/ gang bsgoms pas tshangs pa chen po nyid 'thob pa'o/ /rtog pa med la dpyod pa med pa'i ting nge 'dzin gang zhe na/ rtog pa dang dpyod pa dang ldan pa ma yin pa gang yin pa ste/ gang bsgoms pas de yan chad nas srid pa'i rtse mo man chad du skye bar 'gyur ba ste/ zag pa med pa'i ting nge 'dzin rnams ni ma gtogs so/ /rtog pa med pa dpyod pa med pa'i ting nge 'dzin ji lta bu zhe na/ rtog pa dang dpyod pa gnyis la sems lhag par btang snyoms su bzhag nas/ gal te ngang gcig gis nang gi dmigs pa la mos la/ ngang gcig tu yang dag par snang ba'o/ /chung ba'i ting nge 'dzin gang zhe na/ dmigs pas chung ba ste/ yul gyi gzugs chung ngu mthong ba'i phyir ram/ yang na yid la byed pas chung ba ste / dad pa dang 'dun pa dang / mos pa chung ba'i phyir ro/ /chen por gyur pa'i ting nge 'dzin gang zhe na/ dmigs pa'i sgo nas che ba ste/ de yang gzugs phal mo che mthong ba'i phyir yin gyi/ mtha' yas mu med pa mthong ba ni ma yin no/ /yang na yid la byed pa chen por gyur pas te/ dad pa dang 'dun pa dang / mos pa che ba'i phyir yin gyi/ dad pa dang 'dun pa dang / mos pa mtha' yas mu med pa'i phyir ni ma yin no/ /tshad med pa'i ting nge 'dzin gang zhe na/ dmigs pa las gzugs mtha' yas mu med pa mthong ba'i phyir ram/ yang na yid la byed pas dad pa dang / 'dun pa dang / mos pa mtha' yas mu med pa'i phyir ro/ /de la chen por gyur pa'i sems kyi ting nge 'dzin ni/ lha 'od can rnams lha 'od can rnams shes shing drung gcig tsam du mos par byed pa nas rgya cher 'byung ba'o/ /tshad med pa rnams ni tshad med pa bzhi po rnams so/ /lha 'od can rnams lha 'od can rnams shes shing drung gcig tsam du ji ltar mos she na/ 'dod pa'i khams su na phyung nas bsam gtan dang po thob ste/ ting nge 'dzin de yongs su dag par bya ba'i phyir brtson zhing / des lha 'od can rnams zhes bya ba yang thos te/ des de dag gi lus kyi snang ba'i mtshan ma yid la byed cing shing drung gcig nas/ sa'i steng rgya mtsho'i mthar thug pa'i bar du mos par byed de/ ting nge 'dzin gong nas gong du chen por 'gyur bas na/ de'i khyad par du gyur pas/ skye ba'i khyad par du 'gyur ro/ /yid la byed pa'i rim par ji ltar 'gyur zhe na/ gang ji tsam du mos par byed pa/ de'i yid la byed pa yang de tsam du gdags par 'gyur ro/ /yid la byed pa'i rim pa la brten nas/ bsgom pa'i rim par ji ltar 'gyur zhe na/ yid la byed pa de nyid kyi dbang gis ting nge 'dzin de nyid kyi bsgom pa'i khyad par gdags par 'gyur te/ ches shin tu yongs su dag par 'gyur ba'i phyir ro/ / bsgom pa'i rim pa la brten nas ji ltar lam gyi rim pa gdags par 'gyur zhe na/ ji lta ji ltar ting nge 'dzin ches shin tu bsgoms par gyur pa de lta de ltar skye ba'i rgyu'i khyad par gdags par 'gyur ro/ /lam gyi rim pa la brten nas ji ltar gang zag gi rim pa gdags par 'gyur zhe na/ rgyu des sems can der skyes pa rnams mthon dman dang bzang ngan du gdags par 'gyur ro/ /bsam gtan dang po dang / gnyis pa'i 'od la bye brag ci yod ce na/ dper na nor bu ni phyi rol na 'od yod la/ nor bu nyid 'od ma yin pa de bzhin du/ bsam gtan dang po pa'i lus las phyi rol na 'od yod la/ lus nyid ni 'od ma yin no/ /ji ltar mar me ni/ phyi rol na yang 'od yod la/ mar me nyid kyang 'od yin pa de bzhin du/ bsam gtan gnyis pa'i lus kyang 'od yin par rig par bya'o/ /de bas na de la ni lus gcig ces bya'i snga ma la ni ma yin no/ /tshad med pa bzhi ji ltar rnam par gzhag ce na/ sems can sdug bsngal yang med bde ba yang med pa dang / sdug bsngal dang ldan pa dang / bde ba dang ldan pa rnam pa gsum yod de/ de dag ni bde ba 'dod pa dang / sdug bsngal dang bral bar 'dod pa dang / bde ba dang mi 'bral bar 'dod pa dang go rims bzhin no/ /de dag la nye bar bsgrub pa rnam pa bzhis bzhir rnam par gzhag ste/ gsum ni bde ba nye bar bsgrub pa dang / sdug bsngal bstsal ba nye bar bsgrub pa dang / bde ba dang ma bral ba la rjes su yi rang ba nye bar bsgrub pa gsum dang go rims bzhin no/ /btang snyoms ni bde ba 'dod pa la sogs pa gsum po de dag nyid kyis mi dga' zhing 'dod pa'i kun nas nyon mongs pa med par nye bar bsgrub pa dang / zhe sdang gi kun nas nyon mongs pa med par nye bar bsgrub pa dang / 'dod chags kyi kun nas nyon mongs pa med par nye bar bsgrub pas rnam par gzhag go/ /byams pa dang ldan pa'i sems zhes rgya cher 'byung ba de la / byams pa dang ldan pa ni phan 'dogs pas nye bar gnas pa'i phyir ro/ /phan 'dogs pa'i mtshan nyid ni mdza' ba'o/ /phan 'dogs pa yang rnam pa gnyis te/ phan pa nye bar bsgrub pa dang / bde ba nye bar bsgrub pa ste/ de gnyis kyang tshad med pa thams cad kyis bstan to/ /khon med pa zhes bya ba ni/ rab tu sdang ba'i bsam pa med pa'i phyir ro/ /'gran zla med pa zhes bya ba ni/ mi mthun pa med pa'i tshul du gnas pa'i phyir ro/ /gnod pa med pa zhes bya ba ni gnod par bya ba rnam par mi spyod pa'i phyir ro/ /yangs pa zhes bya ba ni/ dmigs pa che ba'i phyir ro/ /chen por gyur pa zhes bya ba ni/ phan pa dang bde ba nye bar bsgrub pa gtso bor gyur pa'i phyir ro/ /tshad med pa zhes bya ba ni 'bras bu tshad med pa'i phyir te/ chu klung chen po bzhi 'dres pa bzhin no/ /shin tu bsgoms pa zhes bya ba ni shin tu yongs su byang ba'i phyir ro/ /byams pa dang ldan pa la sogs pa'i sems ji lta bus gnas she na/ smras pa/ mos te khyab par byas nas bsgrubs te zhes bya ba ni/ lhag pa'i bsam pas mos te/ khyab par byas te zhes bya ba'i tha tshig go/ /bsgrubs te zhes bya ba ni/ yongs su dag par byas/ yongs su byang bar byas pa'o/ /gnas so zhes bya ba ni/ nyin mtshan 'da' bar byed pa'i tshul gyis dus 'da' bar byed pa'i phyir ro/ /byams pa bsgom pa ni/ dge ba'i mchog yin no zhes rgya cher gsungs pa de/ ci las dgongs te gsungs she na/ 'di lta ste/ bsam gtan gsum pa ni/ bde ba rnams kyi mchog yin pas na/ de nye bar bsgrub pa yongs su bsgoms pa'i byams pa yang mchog yin te/ de bas na dge ba'i mchog ces bya'o/ /snying rje yang nam mkha' mtha' yas skye mched nye bar bsgrub pa yongs su bsgoms pas mchog yin la/ de yang sdug bsngal bstsal ba nye bar bsgrub pa'i bsam pa dang ldan pa'i phyir ro/ /de bas na gzugs med pa dag na de gtan med de/ gcad pa dang dbug pa la sogs pa'i sdug bsngal med pa'i phyir/ snying rje la snyoms par zhugs pas sdug bsngal dang ldan pa'i sems can de dag gang na sdug bsngal rten dang bcas par med pa'i nam mkha' mtha' yas skye mched de nyid du skye bar gyur cig ces nye bar sgrub par byed do/ /dga' ba la snyoms par zhugs pas ni/ sems can bde ba dang ldan zhing dga' ba thob pa rnams rnam shes mtha' yas skye mched du nye bar bsgrub ste/ sems can 'di dag gi bde ba rnam shes mtha' yas skye mched ji tsam du chad med pa de tsam du tshad med par gyur cig snyam ste/ de ltar na rnam shes mtha' yas skye mched nye bar bsgrubs pas yongs su bsgoms pa'i dga' ba ni mchog yin no/ /'di lta ste/ ci yang med pa'i skye mched 'di ni zag pa med pa'i sems kyis sa'i mtha' yin te/ de ni btang snyoms rnams kyi mchog yin no/ /de bas na ji ltar dge slong dgra bcom pa bde ba dang / sdug bsngal ba dang / sdug bsngal yang ma yin bde ba yang ma yin pa spyod pa thams cad la kun nas nyon mongs par mi 'gyur ba de bzhin du/ sems can 'di dag kyang de ltar gyur cig snyam ste/ btang snyoms la snyoms par zhugs pas/ ci yang med pa'i skye mched de nye bar sgrub par byed do/ / de bas na ci yang med pa'i skye mched nye bar bsgrubs pas yongs su bsgoms pa'i btang snyoms mchog yin te/ 'phags pa'i rnam pa byang chub kyi yan lag dang ldan pa 'di dag thams cad ni/ 'phags pa kho nas bsgom par nus so/ /cha gcig bsgoms pa'i ting nge 'dzin gang zhe na/ gang la snang ba'i mtshan ma'am/ yang na gzugs kyi mtshan ma yid la byas nas snyoms par 'jug pa ste/ de gnyis kyis go rims bzhin du snang ba yang dag par shes pa'am/ yang na gzugs mthong bar 'gyur ba'o/ /gnyis ka'i cha bsgoms pa'i ting nge 'dzin gang zhe na/ gnyis ka yid la byas nas snyoms par 'jug ste/ des ni snang ba yang dag par shes la/ gzugs rnams kyang mthong ngo / /de ltar snang ba yongs su bsgoms pa'i ting nge 'dzin la ni/ the tshom la sogs pas rnam pa bcu gcig bar du gcod par rig par bya ste/ mdo las rgya cher ji skad 'byung ba bzhin no/ /de dag ting nge 'dzin gyi mtshan ma gang la sgrib ce na/ dmigs pa'i mtshan ma dang / gzhi'i mtshan ma rnam pa gnyi ga la yang sgrib ste/ gang la brten nas ting nge 'dzin gnas par 'gyur ba'i mtshan ma de las nyams na gnas par mi 'gyur ba'i phyir ro/ /de la thog mar ma bsams par gzugs snang ba mthong ba las ni the tshom za bar 'gyur ro/ /brtson pa lhod pa las ni yid la mi byed par 'gyur te/ dper na gzugs rnams la lta bar mi 'dod pa ni/ yang na mig 'dzums par byed dam/ yang na gdong gud du sgyur ba de bzhin du/ de yang gzugs de dag yid la mi byed par 'gyur ro/ /dbang po'i sgo ma bsdams pa la sogs pa ni lus kyi gnas ngan len du 'gyur ro/ /ha cang gnyid ma log pa'am/ yang na gnyid bsten drags pas ni glong ste/ rmugs pa dang gnyid du 'gyur ro/ /gzugs rnams mi mthong ngam/ yang na tshang bar mi mthong ba la/ de gnyi ga'i phyir shin tu rtsol bar byed de/ ha cang btud de yid la byed pa'i phyir ha cang brtun ngas par 'gyur ro/ /ha cang brtun ngas pa'i nyes pas ni ha cang zhum par byed de/ bya khug rta btsir ba bzhin no/ de snang ba tsam zhig 'dod pa las/ gzugs mthong ba dang lhan cig tu 'byung ste/ gcig 'dod pa las gnyis rnyed pa'i phyir/ gnyer gyi sgo gnyis rnyed pa bzhin du/ shin tu dga' bar 'gyur ro/ /glo bur du phyogs kun tu gzugs bzang po cig car mthong na sngar bar 'gyur te/ glo gnyi ga nas sreg par 'phur ba bzhin no/ /de 'gro yang rung gnas kyang rung ste/ 'jig rten gyi sna tshogs dag la 'du shes sna tshogs su 'gyur na/ phyi rol du 'du shes pa de ni de'i ting nge 'dzin la bar du gcod par byed do/ /yang na ting nge 'dzin des bdag nyid ni mchog tu mthong la/ gzhan ni dma' bar bdag nyid kun tu 'dzin par byed na/ de yang 'du shes sna tshogs yin no/ /ha cang smra ba la brtson pa'am/ yang na ha cang yun ring du rtog pa las ni lus ngal bar 'gyur la/ sems kyang ting nge 'dzin du mi rung bas na/ ha cang smra ba mang na yang bar du gcod pa yin no/ /de nas snang ba'i mtshan ma dang / gzugs snang ba byung na yang / nang gi rnal 'byor la 'jug pa'i yid la byed pa bor nas/ phyi rol du 'jug par byed cing / gzugs rnams la rtog par byed pa'i phyir/ mngon par rtogs pa de yang ting nge 'dzin gyi bar du gcod pa ste/ 'di dag ni mthun mthun du ting nge 'dzin gyi dmigs pa dang / gzhi la bar du gcod par rig par bya ste/ de dag kyang go rims bzhin du dmigs pa dang / gzhi'i mtshan ma rnams las nyams par byed pa'i phyir ro/ /kha cig ni gnyi ga'i mtshan ma las nyams par byed do/ /dga' ba dang ldan pa'i ting nge 'dzin gang zhe na/ bsam gtan dang po dang gnyis pa'i ting nge 'dzin gang yin pa'o/ /bde ba dang ldan pa'i ting nge 'dzin gang zhe na/ bsam gtan gsum pa'i 'o/ /btang snyoms dang ldan pa'i ting nge 'dzin gang zhe na/ bsam gtan bzhi pa yan chad do/ /tshe 'di la bde bar gnas par 'gyur ba'i ting nge 'dzin bsgom pa gang zhe na/ tshe 'di la bde bar gnas pa bzhi po rnams kyi sbyor ba'i lam la ting nge 'dzin bsgom pa gang yin pa'am/ dngos gzhi yongs su ma dag cing / yongs su ma byang ba rnams la ting nge 'dzin bsgom pa gang yin pa'o/ /bcom ldan 'das kyis sngon ma byung ba la snyoms par 'jug pa'i don du bsam gtan dang po la sbyor ba'i lam gsungs so/ /ye shes mthong ba thob par 'gyur ba'i ting nge 'dzin bsgom pa gang zhe na/ de la dge slong gis snang ba'i mtshan ma legs par rab tu shin tu bzung bar gyur ces bya ba mdo las byung ba bzhin du sbyar te/ de nyid ni lha'i mig mngon par bsgrub pa'i sbyor ba'i lam las blta bar bya'o/ /de la lha'i mig gis gzugs rnams la lta zhing / mngon sum du byed pa gang yin pa de ni mthong ba'o/ /'di ltar lha de dag ni/ ming 'di zhes bya/ rigs ni 'di zhes bya zhes bya bar shes pa gang yin pa/ lha'i ched du gsungs pa'i mdo las rgya cher 'byung ba de ni ye shes so/ /shes rab rab tu dbye bar 'gyur ba'i ting nge 'dzin bsgom pa gang zhe na/ sbyor ba'i lam la bden pa mngon par rtogs par rgyun du zhugs pa'i 'bras bu dang / so so yang dag par rig pa rnams kyi ting nge 'dzin bsgom pa gang yin pa'o/ /zag pa zad par 'gyur ba'i ting nge 'dzin bsgom pa gang zhe na/ sbyor ba'i lam la dgra bcom pa nyid kyi 'bras bu gang yin pa'o/ /'phags pa'i shes pa lnga dang ldan pa'i ting nge 'dzin gang zhe na/ bdag gi ting nge 'dzin 'di ni 'phags pa zang zing med pa/ phung po med pa zhes mdo las rgya cher 'byung ba bzhin no/ /des shes pa lnga yongs su bstan te/ 'di lta ste/ ngo bo nyid dang / gang zag dang / yongs su dag pa dang / 'bras bu dang / snyoms par 'jug pa dang / ldang ba'i mtshan ma rnams zhes bya'o / /de la 'phags pa zhes bya ba ni/ dge ba'i 'phags pa dang / zag pa med pa'i 'phags pa'i phyir ro/ /zang zing med pa zhes bya ba ni dge ba'i 'phags pa nyid du ston par byed do/ /phung po med pa zhes bya ba ni zag pa med pa'i 'phags pa nyid du'o/ /skyes bu ngan pa ma yin pas bsten pa zhes bya ba ni 'phags pa sangs rgyas rnams dang / de'i nyan thos rnams kyis bsten pa'o/ /shes pa rnams kyis bsngags pa zhes bya ba ni de dag nyid kyis so/ /shes pa rnams kyis ma smad pa zhes bya ba ni dus thams cad du bsngags pa ste/ dper na bsam gtan dang po ni gong du 'gro bar brtson pa'i phyir/ sngar zhi ba'o zhes bsngags la/ phyis ni rags pa'o zhes rnam par smad pa de lta bu ma yin pa'i phyir ro/ /zhi ba zhes bya ba ni de'i mi mthun pa'i phyogs kyi nyon mongs pa nye bar zhi ba'i phyir ro/ /gya nom pa zhes bya ba ni rang gis pa'i nyon mongs pas ro myong bar mi byed pa'i phyir ro/ / shin tu sbyangs pa'i lam thob pa zhes bya ba ni/ yongs su nyams par mi 'gyur ba'i lam thob pa'i phyir ro/ /sems kyi rgyud gcig tu gyur pa thob pa zhes bya ba ni rtog pa med pa dang dpyod pa med pa'i sa thob pa'i phyir ro/ /da ltar byung ba ni bde ba zhes bya ba ni tshe 'di la bde bar gnas pa'i phyir ro/ /phyi ma la rnam par smin pa bde ba zhes bya ba ni phung po lhag ma med pa'i mya ngan las 'das pa'i bde ba thob par byed pa'i phyir ro/ /dran bzhin du snyoms par 'jug ces bya ba ni ting nge 'dzin gyi mtshan ma legs par gzung ba ma brjed pa'i phyir ro/ /dran bzhin du ldang zhes bya ba ni ldang ba'i mtshan ma legs par gzung ba ma brjed pa'i phyir ro/ /yan lag lnga dang ldan pa'i ting nge 'dzin gang zhe na/ 'di na dge slong lus de nyid la dben pa las skyes pa'i dga' ba dang bde ba zhes bya ba ni bsam gtan dang po'i sa pas so/ /de la dga' bas ni mnyan par byed do/ /bde bas ni yongs su mnyan par byed do/ /sbyor ba'i mthar thug pa'i yid la byed pa'i tshe ni kun tu khyab par byed do/ /yid la byed pa snga ma dag gi tshe ni yongs su tshim par byed do/ /de dag gi tshe na yang dga' ba dang bde ba ni skabs skabs su 'byung bar zad do / /bstan pa yang ma yin la yongs su rdzogs par yang ma yin no/ /sbyor ba'i mthar thug pa'i 'bras bu'i yid la byed pa'i tshe ni des ci yang khyab par ma gyur pa'am/ khyab par bya ba med do/ /de la khrus mkhan nam/ khrus mkhan gyi slob ma mkhas pa ji lta ba de bzhin du ni rnal 'byor spyod pa blta bar bya'o/ /khar ba'i snod dam/ gzhong bu'am/ nya phyis zhes bya ba ni 'dod pa rnams las dben pa las skyes pa'i dga' ba dang bde ba las brtsams pa'i gdams ngag rjes su bstan pa yin par blta'o/ /khrus kyi chal 'dag zhib mo zhes bya ba ni de dang mthun pa nges par 'byung ba la sogs pa'i rtog pa rnams yin par blta'o/ /chus gtor te brlan zhes bya ba ni rtog pa yongs su dag pa'i lam yin par blta'o/ /chal gyi gong bu zhes bya ba ni lus yin par blta'o/ /de mnyen po ni dga' ba dang ldan pa'i phyir ro/ /mnyen pa dang ldan pa ni bde ba dang ldan pa'i phyir ro/ /phyi nang bcas par khyab ces bya ba ni rgyun mi 'chad par dga' ba dang bde ba dang ldan pa ston par byed do/ /mi 'thor ba zhes bya ba ni rnam par mi g.yeng ba'i phyir ro/ /mi 'dzag ces bya ba ni kun nas nyon mongs pa med pas ro myong bar mi byed pa'i phyir ro/ /gnyis pa la yang dpe'i bye brag yod par blta ste/ de la ri lta bu ni rtog pa dang bcas pa'i ting nge 'dzin to/ /de'i spyi bo ljong ba ni bsam gtan gnyis pa'i rtog pa med pa ste/ dmigs pa la ro gcig tu mos pa'i phyir ro/ /mtsho bran ni nang yang dag par dang ba'i phyir ro/ /chu mig ni glo nas chu 'byung ba gang yin pa'o/ /bkod ma ni chu gyen du 'byung ba gang yin pa ste/ de gnyis kyis ni go rims bzhin du dga' ba dang bde ba bstan to/ /mnyen par byed pa la sogs pa'i rnam grangs ni snga ma bzhin no/ /ma khyab pa med ces bya ba ni rgyun mi 'chad par sbyor ba'i phyir ro/ /gsum pa la yang dpe'i bye brag yod de/ de la dga' ba med pa'i bde ba ni ut+pa la sogs pa ji lta ba bzhin no/ /de dang mtshungs par ldan pa'i chos rnams dang / lus kyang dga' ba med pa'o/ /rtog pa med pa dang / dpyod pa med pa'i ting nge 'dzin ni chu lta bu'o/ /dga' ba ni shin tu dga' bar byed pa ste/ de med pa'i phyir sbubs nub pa zhes gsungs so/ /bzhi pa la yang dpe'i bye brag yod do/ /de la yongs su dag pa'i sems kyis zhes bya ba ni/ btang snyoms dang dran pa yongs su dag pa dang / mtshungs par ldan pas te/ sa 'og ma'i skyon las yang dag par 'das pa'i phyir ro/ /yongs su byang ba zhes bya ba ni/ dge bas rang gi sa pa'i kun nas nyon mongs pas ro myong ba med pa'i phyir ro/ /ci'i phyir khyim bdag las dpe blangs she na/ de ni brtags pa bag yod pa'i rang bzhin can/ sems shing 'jal la rtog pa ste de ni 'du ba dang 'god pa ci yang mi shes pa med pa yin no/ /de bzhin du bsam gtan bzhi pa yongs su dag pa thob pa ni brtags pa bag yod par 'jug pa ste/ /don thams cad shes pa gsal ba yin no/ /mi brgyad kyis btags pa'am/ mi dgus btags pa zhes bya ba ni sra ba'i phyir/ sha sbrang dang sbrang bu la sogs pas mi tshugs par ston to/ /mgo rkang bcas par zhes bya ba ni gos srab mo'am/ yang na sgre bor gyur pa'i nyes pa 'di gnyis las tshugs par 'gyur bas na de gnyi ga med par ston to/ /de bzhin du yongs su dag pa'i sems des de khyab pas na g.yo ba thams cad kyis mi tshugs pa yin te/ grang ba dang tsha ba nas 'bod pa dang / smad pa rnams dang / pha rol gyis ngan du smras pa dang / lus dang yid kyi tshor ba rnams bzod pa yin no/ /lnga pa la yang dpe'i bye brag yod de/ so sor rtog pa'i mtshan ma nyid legs par rab tu zhes bya ba ni sngar bshad par zad par rig par bya ste/ dus gsum gyi 'du byed rnams la so sor rtog go/ /gang gis so sor rtog pa de la yang so sor rtog go zhes bya ba 'di ni de'i bsdus pa'i don to/ /'phags pa'i ting nge 'dzin de ni gang yin/ yan lag lnga pa ni ji ltar gzhag ce na/ bsam gtan bzhi po rnams su 'phags pa rnams kyi sems rtse gcig pa nyid dang / so sor rtog pa'i gnas skabs kyi gang yin pa de ni 'phags pa'i ting nge 'dzin to/ /tshe 'di la bde bar gnas pa bzhi po dag gi skabs las yan lag tu gzhag pa dang / rten cing 'brel bar 'byung ba la so sor rtog pa'i skabs las/ kun tu sbyor ba lhag ma rnams spang ba'i phyir yan lag lngar gzhag ste/ de ltar na rnam pa gnyis kyis de rnam par gzhag par blta bar bya'o// //bam po bcu bzhi pa/ 'phags pa'i yang dag pa'i ting nge 'dzin rgyu dang bcas yo byad dang bcas pa gang zhe na/ de la dge ba dang zag pa med pa'i 'phags pas 'phags pa'o/ /lam gyi yan lag lnga po dag ni de'i rgyu ste/ yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba'o/ /yang dag pa'i lta ba dang / yang dag pa'i rtsol ba dang / yang dag pa'i dran pa gsum ni yo byad do/ /de dag bcom ldan 'das kyis gcig tu bsdus nas lam gyi yan lag bdun ni 'phags pa'i yang dag pa'i ting nge 'dzin gyi rgyu zhes kyang bya/ yo byad ces kyang bya'o zhes gsungs te/ de dag mthun mthun du rig par bya'o/ /de la sngon du 'gro ba'i go rims kyi phyir ni lnga po dag rgyu nyid do/ /ting nge 'dzin gyi yo byad kyi phyir ni gsum po dag yo byad do/ /yang dag pa'i lta ba ji lta bar sngon du 'gro ba yin zhe na/ 'jig rten na dgra bcom pa yang dag par zhugs pa yod do snyam du shes nas mngon par 'byung ba la 'dun pa skyed par byed de/ yang dag pa'i lta ba thob nas de'i 'og tu mngon par 'byung ba'i phyir khyim na gnas pa ni gnod pa'o zhes rgyas par yang dag par rtog go/ /des na rab tu byung ste/ tshul khrims dang / 'tsho ba yongs su dag par byed pas/ de'i yang dag pa'i ngag dang / las kyi mtha' dang / 'tsho ba de dag 'byung bar 'gyur ro/ /de'i yang dag pa'i lta ba la sogs pa de dag gi mi mthun pa'i phyogs log par lta ba la sogs pa snga ma spangs te/ des dge ba'i chos lnga po de dag nyid la brten zhing gnas nas/ de'i mi mthun pa'i phyogs kyi chos spangs pa'i phyir/ gzhan gyi sgra'i rgyu las byung bas ni thos pa las byung ba'i yang dag pa'i lta ba skyed par byed do/ /de'i mi mthun pa'i phyogs kyi chos spong ba'i phyir/ so sor rtog pa'i tshul gyis thos pa las byung ba la brten nas/ lam gyi tshogs su gyur pa bsams pa las byung bskyed do/ /bsams pa las byung ba la brten nas bsgoms pa las byung ba skyed de des yang dag pa'i lta ba des/ log par lta ba la log pa'i lta ba yin pa dang / yang dag pa'i lta ba la yang dag pa'i lta bar yang dag pa'i ji lta ba bzhin du rab tu shes nas/ yang dag pa'i 'tsho ba'i bar du yongs su shes nas/ log par lta ba la sogs pa spong ba dang / yang dag pa'i lta ba la sogs pa rdzogs par bya ba'i phyir spro ba skyed do/ /gang gis de'i mi mthun pa'i phyogs rnams spong ba dang / chos de dag rdzogs par bya ba de yang dag par sgrub par byed pa de ni/ de'i yang dag pa'i dran pa yin no/ /dran pa de yang ting nge 'dzin gyi cha yin pa'i phyir/ ting nge 'dzin du yang tshul gyis bstan to/ /gang gi bar skabs su log par lta ba la sogs pa spong zhing / yang dag pa'i lta ba la sogs pa rdzogs par byed pa de'i bar skabs kyi sbyor ba'i lam gyi tshe/ log pa'i rtsol ba dang dran pa yang spong la/ yang dag pa'i rtsol ba dang dran pa yang rdzogs par byed do/ /de spong ba dang / rdzogs pa dang dus mnyam du 'phags pa'i yang dag pa'i ting nge 'dzin kyang yongs su rdzogs par 'gyur ro/ /de la sngon du 'gro ba'i shes rab kyis lhag pa'i tshul khrims la sbyor bar byed do/ pha rol gyi sgra'i rgyu las byung ba'i yid la byed pa gang yin pa dang / lhag pa'i tshul khrims kyi bslab pa gang yin pa de gnyis la brten nas/ sbyor ba'i lam gyi tshe lhag pa'i sems dang / lhag pa'i shes rab kyi bslab pa skye'o/ /de la yang dag pa'i dran pa gang yin pa de ni/ lhag pa'i sems kyi bslab pa'o/ /yang dag pa'i lta ba dang / yang dag pa'i rtsol ba gang yin pa de ni lhag pa'i shes rab kyi bslab pa ste/ bslab pa gsum po de dag ni 'phags pa'i yang dag pa'i ting nge 'dzin gyi tshe/ yongs su rdzogs par 'gyur ro/ /rdo rje lta bu'i ting nge 'dzin gang zhe na/ slob pa thams cad kyi mtha'i ting nge 'dzin yin te/ de ni mchog tu gyur pa dang / gtso bor gyur pa dang / snying por gyur pa dang / nye ba'i nyon mongs pa rnams kyis zil gyis mi non pa dang / nyon mongs pa rnams kyis zil gyis mi non pa'i phyir rdo rje lta bu zhes bya ste/ dper na rdo rje ni nor bu thams cad kyi snying po yin te/ gang gis kyang mi chod la thams cad chod pa bzhin du 'dir de la rdo rje dang 'dra zhes bya'o/ /mthong ba'i snyoms par 'jug pa lnga gang zhe na/ 'di na dge slong lus 'di nyid la zhes mdo las rgyas par 'byung ba bzhin te/ mthong ba la snyoms par zhugs pa de dag ni mthong ba'i snyoms par 'jug pa rnams te/ bsgoms pas spang bar bya ba rnam par gnon pa'i gnyen po dang / spang ba'i gnyen po dang / spangs pa las so sor rtog pa ste/ de ni de dag gi lus bsdus pa yin par rig par bya'o/ /de la dang po ni/ mi sdug pa'i sbyor ba las byung ba'i dran pa nye bar gzhag pa la brten nas/ 'dod pa'i 'dod chags kun du mi 'byung bar bya ba'i phyir/ nang gi lus kyi mi sdug pa la so sor rtog pa'o/ /gnyis pa ni de nyid la brten nas de nyid kun du mi 'byung bar bya ba'i phyir keng rus kyi mi'i bar la so sor rtog pas phyi rol gyi lus kyi mi sdug pa la so sor rtog pa ste/ de tsam gyis na mi sdug pa thams cad so sor brtags par 'gyur ro/ /de la lhag par rtogs shing lhag par rtogs shing zhes bya ba ni/ rnam par bsngos pa la sogs par brtags pa'i rnam pa'i go rims kyis 'das nas zhes bya ba'i tha tshig ste/ mi sdug pa dang po ni nang gi lus la gnas shing 'dug pa'i mi sdug pa la so sor rtog go / /phyi mas ni chos nyid rtogs te/ lus 'di yang 'di lta bu'i chos can te/ 'di 'dra bar 'gyur ro zhes rgyas par sbyar ro/ /rnam par shes pa'i rgyun la so sor rtog ces bya ba ni/ de'i skye ba dang 'jig pa la so sor rtog pa ste/ tshe rabs brgyud mar nying mtshams sbyor ba las ni 'du byed kyi rkyen gyis rnam par shes pa la so sor rtog go/ /skad cig pa brgyud mar nying mtshams sbyor ba las ni 'dod chags dang bcas pa dang / 'dod chags dang bral ba la sogs pa'i rnam par so sor rtog go/ /nyin mtshan de dang de dag dang / skad cig dang / thang cig dang / yud tsam de dang de dag las 'das pa las ni rnam pa du ma mang po rnam pa sna tshogs su gzhan skye zhing gzhan 'gag par so sor rtog go/ /de la slob pa 'dod chags dang bral ba ma yin pa ni/ 'jig rten gnyis ka la gnas pa so sor rtog go/ /'dod chags dang bral ba ni/ 'jig rten pha rol kho na la'o/ /dgra bcom pa ni gang la yang mi gnas par so sor rtog ste/ 'di ni de dag gi spong ba'i so sor rtog pa'o/ /zil gyis gnon pa'i skye mched dang / zad par gyi skye mched kyi snyoms par 'jug pa rnams ni sngar bshad zin to/ /'du shes med pa'i snyoms par 'jug pa ni dge rgyas kyi 'dod chags dang bral la/ gong ma'i 'dod chags dang ma bral la / nges par 'byung ba'i 'du shes sngon du btang ba'i yid la byed pas sems dang sems las byung ba'i chos rnams 'gag pa ste/ de yang ji ltar snyoms par 'jug ce na/ 'du shes ni nad lta bu'o/ /'du shes ni 'bras lta bu'o/ /'du shes ni zug rngu lta bu'o snyam nas/ bsam gtan bzhi pa la snyoms par zhugs te/ 'du shes la mi phyogs pa'i yid la byed pa bsgom zhing 'du shes byung ngo cog la mi phyogs par gnas te/ 'di lta ste/ 'du shes med pa pa 'di ni zhi ba'o/ /'di ni gya nom pa'o snyam nas 'du shes med pa la sems gtod pa de lta bu'i rim gyis dmigs pa thams cad las dben pa'i phyir sems 'gag ste/ 'dir skyes pa ni snyoms par yang 'jug la ldang bar yang byed do/ /der skyes pa ni snyoms par zhugs pa kho na yin no/ /de dag ni 'du shes skyes nas gnas de nas 'chi 'pho bar 'gyur ro/ /'gog pa'i snyoms par 'jug pa gang zhe na/ ci yang med pa'i skye mched kyi 'dod chags dang bral la/ gnas pa'i 'du shes sngon du btang ba'i yid la byed pas/ sems dang sems las byung ba'i chos rnams 'gag pa ste/ de yang ji ltar snyoms par 'jug ce na/ 'phags pa ci yang med pa'i 'dod chags dang bral ba/ 'du shes med 'du shes med min skye mched kyi mtshan ma med pa la snyoms par zhugs kyang rung / yang na 'gog pa'i mtshan ma med pa la snyoms par zhugs kyang rung ste/ de la 'du shes med 'du shes med min skye mched la snyoms par zhugs pa ni de'i gong du sems lhag par btang snyoms su byed de/ 'du shes med 'du shes med min skye mched las bskyod nas dmigs pa yang dag par 'gags pa'i sems 'gag par 'gyur ro/ /'gog pa'i mtshan ma med pa la snyoms par zhugs pa yang de dang 'dra'o/ /'gog pa snyoms par 'jug pa la chos gnyis gces spras byed pa yin te/ zhi gnas dang / lhag mthong ngo / /de la zhi gnas ni gang yin/ lhag mthong ni gang yin/ de gnyis ji ltar na gces spras byed pa yin zhe na/ zhi gnas ni don 'dir mthar gyis gnas pa'i snyoms par 'jug pa brgyad la bya'o/ /lhag mthong ni 'phags pa'i shes rab yin te/ de gnyis las gcig med na snyoms par 'jug tu mi rung ba'i phyir/ gnyi ga tshogs na gces spras byed par 'gyur ro/ /'gog pa'i snyoms par 'jug pa na/ 'du byed rnam pa gsum ji ltar rim gyis 'gag par 'gyur zhe na/ dpyod pa dang gnas pa 'di gnyis te/ de la dpyod pa la gnas pa'i tshe ni gtam byed pa yang yod de/ de la bsam gtan dang po'i bya ba dag gi 'du byed yod pa'i phyir ro/ /gang gi tshe gnas pa rtsom pa de'i tshe/ de dag bsam gtan gnyis pa man chad du mthar gyis gnas pa'i snyoms par 'jug pa'i phyir mthar gyis 'gag par 'gyur ro/ /ldang ba'i tshe yang de bzhin du mi mthun pa 'byung bar blta bar bya'o/ /'gog pa la snyoms par zhugs pa'i sems dang sems las byung ba rnams 'gag par gyur na/ rnam par shes pa lus dang ji ltar 'bral bar mi 'gyur zhe na/ de'i dbang po gzugs can yongs su ma gyur pa rnams la/ 'jug pa'i rnam par shes pa'i sa bon gyis yongs su zin pa kun gzhi rnam par shes pa med pa ma yin te/ phyis de 'byung ba'i chos nyid yin pa'i phyir ro/ /'gog pa la snyoms par 'jug pa na/ 'di snyam du bdag ni 'gog pa la snyoms par 'jug go snyam pa'am/ ldang ngo snyam du ji ltar mi sems she na/ snyoms par 'jug pa'i dus na ni/ mngon par 'du byed pa med par sems 'gag la/ ldang ba'i dus na ni sems sngar 'gags zin pa'i phyir ro/ /des ji ltar sems de sngar yongs su sbyang ba byas pa yin zhe na/ des rnam pa dang / rtags dang / mtshan ma gang dag gis snyoms par 'jug pa dang / ldang ba de la kun tu rten cing lan mang du byas te/ de dag bsgoms pas na rang gi ngang gis snyoms par 'jug la ldang bar yang byed do/ /'gog pa las langs pa'i tshe/ mi g.yo ba dang / ci yang med pa dang / mtshan ma med pa'i reg pa gsum la ji ltar reg par 'gyur zhe na/ snyoms par 'jug pa de las ldang ba'i tshe shas cher srid pa la dmigs pa dang / yul la dmigs pa dang / 'gog pa la dmigs pa'i dmigs pa rnam pa gsum gyis ldang bar 'gyur te/ de dag gis ldang ba'i tshe go rims kho na bzhin du reg pa gsum la reg par 'gyur ro/ /de la srid pa la dmigs pas ldang ba'i tshe ni/ sems kyi g.yo ba nga'o snyam pa'am/ 'di ltar 'gyur ro snyam du mi sems pa nas rgyas par sbyar te/ de bas na mi g.yo ba'i reg pa la reg ces bya'o/ /yul la dmigs pas ldang ba'i tshe ni/ 'dod chags ci yang 'byung bar mi 'gyur/ zhe sdang ci yang 'byung bar mi 'gyur/ gti mug ci yang 'byung bar mi 'gyur te/ de bas ci yang med pa'i reg pa la reg ces bya'o/ /'gog pa la dmigs pas ldang ba'i tshe ni mtshan ma thams cad yid la mi byed pas mtshan ma med pa'i dbyings la dmigs te/ de bas na mtshan ma med pa'i reg pa la reg ces bya'o/ /bsam gtan dang / rnam par thar pa dang / ting nge 'dzin dang / snyam par 'jug pa rnams ni bshad zin to/ /bcom ldan 'das kyis dge slong dag nang gi sems kyi zhi gnas kyi phyir/ nang du yang dag 'jog la brtson par gyis shig ces gang gsungs pa de la mal cha dang / stan dben pa dag la gnas te/ dgon pa na gnas pa nas/ 'dug pa'i bar du rgyas par bya ste/ dran pa mngon du bzhag nas zhes bya ba 'di ni/ nang du yang dag 'jog ste/ de ni lus dben pa yin no/ /nang gi sems kyi zhi gnas ni/ nang gi sems gnas pa rnam pa dgu ste/ de ni sems dben pa yin no/ /de la nang du yang dag 'jog ni nang du sems zhi gnas sgrub par byed do/ /nang gi sems kyi zhi gnas ni lhag mthong sgrub par byed do/ /lhag mthong ni yongs su byang bar byas pa'i chos rnams la yang dag pa ji lta ba bzhin du yang dag par gsal bar byed pa sgrub bo / /bcom ldan 'das kyis dge slong dag tshad med pa'i ting nge 'dzin rtag 'grus dang / dran bzhin du sgoms shig ces gang gsungs pa de la/ ting nge 'dzin sgoms shig ces bstan pa mdzad nas/ de'i bsgom pa rnam pa gsum ston to/ /de la tshad med pa zhes bya ba ni/ tshad med pa bzhi po dag go/ /rtag 'grus zhes bya ba ni/ rtag tu byed pa dang / mkhas par byed pa la rtag 'grus zhes bya'o/ /dran bzhin zhes bya ba ni/ dran pa nye bar gzhag pa bzhi la nye bar gnas pa'i sems yin par bstan to/ /ci'i phyir bsgom pa rnam pa gsum bstan ce na/ phun sum tshogs pa ni 'jig rten pa'i dang / 'jig rten las 'das pa'i rnam pa gnyis yod de/ de la tshad med pa bsgom pa ni/ 'jig rten pa'i phun sum tshogs pa sgrub par byed do/ / dran bzhin pa ni 'jig rten las 'das pa'i phun sum tshogs pa sgrub par byed do/ /rtag 'grus ni gnyi ga'i mngon par shes pa myur bar byed do/ /de'i phyir de gnyis kyi bar du de bstan te/ bstan par bya ba ni de gsum kho nar zad do/ /gzhan yang tshad med pa zhes bya ba ni/ zhi gnas kyi lam yin par bstan to/ /dran bzhin zhes bya ba ni lhag mthong gi lam mo/ /rtag 'grus zhes bya ba ni/ de gnyis myur du yang dag par 'grub pa'i lam mo/ /gzhan yang bsod nams su 'gro ba'i lam dang / mya ngan las 'da' bar 'gro ba'i lam dang / de gnyis myur du 'grub par 'gyur ba'i lam yin par bstan te/ sngar zhi gnas la yongs su byang bar byas pa'i 'og tu lhag mthong dang ldan pa'i ting nge 'dzin rnam pa de gnyis bsgoms na shes bya yang dag pa ji lta ba bzhin du snang bar 'gyur ro/ /bcom ldan 'das kyis bsam gtan pa ting nge 'dzin la mkhas pa/ snyoms par 'jug pa la mi mkhas pa yod do zhes rgyas par mdo'i sdom gyi tshigs su bcad pa gang gsungs pa la/ ting nge 'dzin la mkhas pa ji lta bu yin zhe na/ stong pa nyid la sogs pa'i ting nge 'dzin gsum la mkhas pa'i phyir ro/ /snyoms par 'jug pa la mi mkhas pa ji lta bu yin zhe na/ zil gyis gnon pa'i skye mched dang / zad par gyi skye mched dang / 'gog pa'i snyoms par 'jug pa la mi mkhas pa'i phyir ro/ /snyoms par 'jug pa la mkhas pa yin la/ ting nge 'dzin la mi mkhas pa ji lta bu yin zhe na/ zad par gyi skye mched bcu'i snyoms par 'jug pa rnams kyi snyoms par 'jug pa dang ldan pa nas/ 'du shes med pa'i snyoms par 'jug pa'i bar gyi snyoms par 'jug [(]ba [,]pa [)]dang ldang ba la mkhas pa la/ ting nge 'dzin gsum la ni mi mkhas pa'o/ /gnyi ga la mkhas pa ni gnyi ga la mkhas pa'i phyir ro/ /gnyi ga la mkhas pa ma yin pa ni gnyi ga la mi mkhas pa'i phyir ro/ /de ltar ting nge 'dzin ji skad bstan pa 'di dag ni/ gang du gang 'os la der de bzhin du sbyar bar bya'o/ /gzhan yang ting nge 'dzin mkhas la snyoms par 'jug pa la mi mkhas pa yod do zhes gsungs pa ni/ ting nge 'dzin gyi ming dang tshig dang / yi ge las shes la ting nge 'dzin de'i rnam pa dang rtags dang / mtshan ma gang dag gis snyoms par 'jug par 'gyur ba de ni mi shes pa'o/ /snyoms par 'jug pa la mkhas pa yin la ting nge 'dzin la mi mkhas pa ji lta bu yin zhe na/ 'di ltar 'di na la la ting nge 'dzin la la la'i rnam pa dang / rtags dang mtshan ma gang dag gis snyoms par 'jug pa rnams shes te/ de bzhin du snyoms par zhugs kyang / bdag ni ting nge 'dzin 'di dang 'di la snyoms par zhugs so zhes ting nge 'dzin de'i ming dang / tshig dang yi ge las ni mi shes pa lta bu'o/ /byang chub sems dpa' snyoms par 'jug pa gang yin pa'i ting nge 'dzin brgya dang / stong de dag kyang yod la/ nam sangs rgyas sam/ byang chub sems dpa' dam pa'i pha rol tu son pa dag las ma thos sam/ yang na bdag nyid dam pa'i pha rol tu son par ma gyur gyi bar du/ bdag ni ting nge 'dzin 'di dang 'di la snyoms par zhugs so snyam du/ de dag gi ming dang tshig dang / yi ge'i tshogs ni mi shes pa yang yod do/ /gnas pa gang zhe na/ rnam pa dang / rtags dang / mtshan ma gang dag gis snyoms par 'jug par 'gyur ba de dag legs par bzung ste/ de dag legs par bzung bas ji srid du 'dod pa de srid du snyoms par zhugs te 'dug la/ ting nge 'dzin de las kyang yongs su nyams par mi 'gyur ba ste/ snyoms par zhugs pa'i gnas pa gang yin pa dang / yongs su mi nyams pa gang yin pa dang / rnam pa 'di gnyis ni gnas pa zhes bya'o/ /ldang ba gang zhe na/ 'di ltar 'di na rnam pa dang / rtags dang / mtshan ma gang dag gis snyoms par 'jug par 'gyur ba de dag yid la ma byas par mnyam par ma bzhag pa'i sa pa'i rnam par rtog pa'i lus su gtogs pa ma yin pa mnyam par bzhag pa'i sa dang mi mthun pa'i chos yid la byed pa'am/ 'di lta bu bya ba'i phyir ram/ nges par bya ba'i phyir ram/ bya bar khas blangs pa'i phyir/ ting nge 'dzin de las ldang ba lta bu'o/ /de la 'di lta bu'i bya ba ni 'di lta ste/ chos gos dang / lhung bzed dang / yo byad kyi las so/ /de la nges par byang ni/ bshad pa dang / gci ba dang / bsod snyoms la sogs pa spyad pa dang / bla ma la rim gro bya ba'o/ /de la bya bar khas blangs pa ni 'di ltar 'ga' zhig gi phyir dam bcas pa ste/ des pha rol la khas blangs pas/ 'ga' zhig tu nyams su len par byed pa lta bu'o/ /yang na snyoms par 'jug pa gzhan la snyoms par 'jug par 'dod pa'i phyir yang de las ldang bar 'gyur ro/ /de la rnam pa rnams gang zhe na/ dmigs pa ji lta ba bzhin du rtog cing snyoms par 'jug pa ste/ rags pa dang / zhi ba dang / nad dang / 'bras dang / zug rngu dang / mi rtag pa la sogs pa'i rnam pa zhes bya ba/ ting nge 'dzin de dang de las rnam pa gang dag yod pa rnams so/ /rtags rnams gang zhe na/ gang gi tshe snyoms par 'jug pa la nye bar gyur cing yang dag par nye bar gyur pa de'i tshe gang dag gis de/ bdag ni ring po mi thogs par snyoms par 'jug pa 'di lta bu dang / 'di lta bu zhig la snyoms par 'jug par 'gyur ba'am/ snyoms par 'jug go snyam du shes pa'i snyoms par 'jug pa'i rtags rnams de la 'byung ba'am/ de'i slob dpon gang yin pa des kyang 'dis ni ring po mi thogs par snyoms par 'jug pa 'di lta bu dang / 'di lta bu zhig la snyoms par 'jug par 'gyur ro snyam du de dag las shes par 'gyur ba'o/ /mtshan ma rnams gang zhe na/ mtshan ma gnyis te/ dmigs pa'i mtshan ma dang / gzhi'i mtshan ma'o/ /de la dmigs pa'i mtshan ma ni/ rnam par rtog pa'i lus te/ dmigs pa gang gis snyoms par 'jug pa'o/ /gzhi'i mtshan ma ni ting nge 'dzin gyi tshogs gang gis snyoms par 'jug pa ste/ 'di lta ste/ mthun pa'i man ngag dang / ting nge 'dzin gyi tshogs sogs pa ste/ bsgom pa dang ldan pa'i 'dun pa dang / skyo ba'i sems dang / rnam par g.yeng ba dang / rnam par g.yeng ba ma yin pa yongs su shes pa la sems gtod pa dang / pha rol mi'am mi ma yin pa'i sgra las gyur pa'am/ byed pa las gyur pas ma bslangs pa'o / /nyams bde ba gang zhe na/ gal te de'i ting nge 'dzin 'du byed dang bcas pas mngon par bsdus pa yin la/ chu bzhin du bgag pa dang / chos nyid kyis mngon par bsdus pa ma yin pa dang / zhi ba ma yin pa dang / gya nom pa ma yin pa dang / shin tu sbyangs pa'i lam thob pa ma yin pa dang / sems kyi rgyud gcig tu gyur pa rtog pa ma yin par gyur na/ de'i ting nge 'dzin ni ci bde bar bya bar gnas par bya ba la nyams bde ba ma yin no/ /de las bzlog pa ni nyams bde ba yin no/ /'du byed pas mngon par bsdus pa ji lta bu yin zhe na/ smon pa dang ldan pa'i sems pas/ phyi rol gyi sems bsdus nas/ ting nge 'dzin de la yang dag par gtod pa ste/ de'i yid la byed pa de lta bu de ni rtsol ba dang bcas par 'jug pa yin no/ /ji ltar phyi rol du 'phror mi ster ba de lta bu ni chu bzhin du bkag pa yin no/ /chos nyid kyis mngon par bsdus pa ji lta bu yin zhe na/ 'og ma ni rags pa'i chos nyid du mthong la/ gong ma ni zhi ba'i chos nyid du mthong ba'o/ /zhi ba dang / gya nom pa dang / shin tu sbyangs pa'i lam thob pa dang / sems kyi rgyud gcig tu gyur pa rtogs pa ni/ 'phags pa'i shes pa lnga dang ldan pa'i ting nge 'dzin ji lta ba bzhin no/ /spyod yul gang zhe na/ ting nge 'dzin gyi yul gang yin pa de yan chad kyi snyoms par 'jug pa mi shes pa'i phyir/ 'di lta ste/ bsam gtan dang po la snyoms par zhugs pas/ bsam gtan gnyis pa mi mthong la/ de bzhin du dbang po dang / gang zag khyad par du 'phags pa'i yang mi shes pa lta bu'o/ /mngon par bsgrub pa gang zhe na/ tshig dang yi ge rgyas pa'i don mdor bsdus pa dang / yon tan khyad par can mngon par rdzogs par bya'o/ /ting nge 'dzin la phan pa gang zhe na/ 'di lta ste/ ngo tsha shes pa dang / khrel yod pa dang / dga' ba dang / gus pa dang / dad pa dang / tshul bzhin yid la byed pa dang / dran pa dang / shes bzhin dang / dbang po sdom pa dang / tshul khrims sdom pa dang / yid la gcags pa med pa la sogs pa nas/ bde ba la thug pa yan chad de / bde bar gyur na sems mnyam par gzhog par 'gyur ba zhes 'byung ba lta bu'o/ /de las bzlog pa ni phan pa ma yin par rig par bya'o/ /phan pa dang phan pa ma yin pa ni 'di lta ste/ ngo tsha shes pa dang / khrel yod pa la sogs pa de dag las/ la la dang ldan la/ la la dang mi ldan pa yin te/ ngo tsha dang ldan zhing khrel yod pa dang ldan la/ dga' ba dang gus pa dang mi ldan pa zhes rgyas par sbyar ro/ /skye ba gang zhe na/ ting nge 'dzin thob zin pa 'phel ba'o/ /'bri ba gang zhe na/ ting nge 'dzin las nyams par 'gyur ba gang yin pa'o/ /thabs gang zhe na/ de gnyi gar 'gyur ba'i lam mo/ /zhi gnas dang / rab tu 'dzin pa dang / btang snyoms rnams ni/ zhi gnas la sogs pa'i mtshan ma ji skad bstan pa de kho na bzhin du rig par bya'o/ /bsam gtan pa 'byor pa yod bzhin du/ rgud par 'dzin pa yang yod do / /bsam gtan pa rnam par dbye ba'i mdo le'u bzhi pa las rgyas par 'byung ngo / /de la ting nge 'dzin las nyams pa dang / khyad par du 'gro ba'i dus gnyis su phyin ci log yongs su shes par bya ste/ de las nyams par 'gyur ba'i lam dang / nyams pa ni rgud pa'o/ /khyad par 'gro ba'i lam dang khyad par du 'gro ba ni 'byor pa'o/ /de bdag gi dben pa las skyes pa'i dga' ba dang bde ba ni nyams pa dang / bdag gi ting nge 'dzin ni yongs su nyams so snyam du ji ltar 'dzin par 'gyur zhe na/ 'di la bsam gtan pa ni bsgom pa'i rgyus sems de zhi ba dang gzhol bar 'gyur ro zhes bya ba ni/ btang snyoms dang 'brel ba'i phyir te/ bsam gtan dang po nas bsam gtan gnyis pa'i nyer bsdogs la 'jug la/ de yang de la mi mkhas te/ de de'i gnas skabs su bsam gtan dang po'i sa pa'i dga' ba dang bde ba las ni 'das/ bsam gtan gnyis pa'i sa pa'i ni ma thob nas/ de 'di snyam du sems te/ bdag gi dben pa las skyes pa'i dga' ba dang bde ba ni nyams so snyam nas/ de las sems de gtong bar byed de/ bsam gtan pa des der phyin ci log de yongs su shes par bya'o/ /ting nge 'dzin las nyams par 'gyur ba na/ ji ltar phyin ci log yongs su shes par bya zhe na/ 'di na la la bsam gtan dang po'i snyoms par 'jug pa thob par gyur na / mya ngan las 'das pa la nad med par mthong ba nas rgyas par bdag med pa'i bar du mthong ste/ /'du shes yid la byed pa de las brtsams nas/ tshogs bsags par 'gyur ro/ /de mya ngan las 'das pa'i tshogs yongs su rdzogs pa de la brten nas/ rgyu de dang rkyen des de 'phangs pas/ rang gi ngang gis de la 'du shes yid la byed pa 'di lta bu dag kun tu 'byung ste/ 'du shes yid la byed pa gang dag gis gzugs su gtogs pa nas/ rnam par shes par gtogs pa'i bar du gang de na yod pa de ni/ de la nang du snang ba nas/ rgyas par bdag med pa'i bar du snang ba'o/ /'du shes yid la byed pa de la brten nas/ de'i 'og tu 'jig rten pa'i snyoms par 'jug pa las skyes pa'i dga' ba dang / bde ba de de la kun tu mi 'byung ngo / /des na de 'di snyam du sems te/ bdag gi ting nge 'dzin las skyes pa'i phan pa ni / rten dang bcas par nyams so snyam nas/ de las yid zlog par byed de/ de ltar na bsam gtan pas ting nge 'dzin las nyams pa na/ phyin ci log spang bar bya'o/ /ting nge 'dzin las nyams pa na/ ji ltar phyin ci ma log par yongs su shes par bya zhe na/ 'di na la la bsam gtan dang po'i snyoms par 'jug pas chog par 'dzin te/ gong du 'bad par mi byed la/ de la yang ro myong bar byed pa de ni/ de'i 'dod pa dang ldan pa'i 'du shes yid la byed pa ste/ 'dod pa'i khams dang nye ba'i snyoms par zhugs pa yin pa'i phyir/ des yongs su nyams par 'gyur te/ de ni de'i rgud pa yin la/ de la yang rgud pa yin par 'dzin te/ de la des phyin ci ma log par yongs su shes par bya'o/ /yang bsam gtan gyi snyoms par 'jug pa des bdag ni bsam gtan gyi snyoms par 'jug pa thob pa yin gyi/ gzhan ni de lta ma yin no zhes bdag la stod cing gzhan la smod par byed pa de ni/ de'i 'dod pa dang ldan pa'i 'du shes yid la byed pa ste/ des kun nas dkris pa de rnam par 'phel ba dang / shas che bar byed pas na/ de'i ting nge 'dzin de las yongs su nyams te/ de ni de'i rgud pa yin la/ de la rgud pa yin par yang 'dzin to/ / yang bsam gtan gyi snyoms par 'jug pa thob par 'gyur la/ des kyang de pha rol rgyal po'am/ blon po dag yid ches par byed do / /de dag kyang de la bkur stir byed/ bla mar byed cing / de ting nge 'dzin de las langs na / de dang ldan par rjes su rtog pa de ni de'i 'dod pa dang ldan pa'i 'du shes yid la byed pa ste/ des na kun nas dkris pa de rnam par 'phel bar byed pa nas snga ma bzhin no/ /de ltar ting nge 'dzin las nyams pa na/ bsam gtan pas phyin ci ma log pa yongs su shes par bya'o/ /phyin ci ma log pa gnyis ka ni/ phyin ci log dang po las bzlog pa yin par rig par bya'o/ /phyin ci ma log pa 'di gnyis ni dus gnyis su yongs su shes par bya ste/ phyin ci log pa dang / phyin ci ma log pa 'di dag gi gzhi las le'u bzhir 'gyur ro/ /bsam gtan pa'i rnam par dbye bas brtag pa bzhi pas / rnam pa bzhis ting nge 'dzin 'di ni nyams pa'i cha dang mthun pa'o zhes bya ba nas/ nges par 'byed pa'i cha dang mthun pa'o zhes bya ba'i bar du ting nge 'dzin brtag pa yin te/ ji ltar brtag ce na/ 'di ni ngan pa'o/ /'di ni mchog go/ /'di ni ches mchog go/ /'di ni shin tu mchog go zhes bya ba dang go rims bzhin du sbyar ro/ /ji ltar zhe na/ 'di la bsam gtan pa de bsam gtan dang po las langs nas phyir bsam gtan de la snyoms par 'jug par mi 'dod de/ de rnam pa dang / rtags dang / mtshan ma de dag yid la mi byed cing / 'dod pa dang ldan pa'i 'du shes yid la byed pa ji skad bstan pa rnams kyang kun tu 'byung ba dang / langs na yang rjes su dran zhing ro myong bar byed de/ de'i tshe bsam gtan pas ting nge 'dzin ngan pa nyid du brtag par bya'o/ /gzhan yang bsam gtan pa langs nas / bsam gtan dang po dang mthun pa'i chos ston pa thos la/ de yang bsam gtan dang po'i rnam pa la sogs pa gang yin pa de dag gi mtshan ma legs par rab tu shin tu 'dzin par byed pa ni/ ji ltar yang de'i bsam gtan thob pa de mi brjed pa'i tshul gyis gnas par 'gyur te/ de dang mthun pa'i chos rjes su dran pa ni gnas pa'i cha dang mthun pa'o/ /de'i bsam gtan pas bdag gi ting nge 'dzin ni nyams par yang mi 'gyur/ khyad par du yang mi 'gro la/ nges par 'byed par yang mi 'gyur mod kyi gnas pas na/ bdag gi ting nge 'dzin 'di ni mchog yin no snyam du rig par bya'o/ /gzhan yang bsam gtan dang po las langs nas/ bsam gtan gnyis pa dang mthun pa'i chos ston pa thos la de thos nas kyang bsam gtan gnyis pa'i snyoms par 'jug pa'i lam dang ldan pa'i 'du shes yid la byed pa rnams de la kun du 'byung ngo / /de de'i tshe 'di snyam du rtog ste/ bdag gi ting nge 'dzin 'di ni nyams par yang mi 'gyur/ gnas par yang mi 'gyur/ nges par 'byed par yang mi 'gyur mod kyi/ khyad par du 'gro bas na ches mchog yin no snyam mo/ /gzhan yang bsam gtan pa langs nas/ sdug bsngal la sogs pa'i bden pa dang ldan pa'i chos ston pa thos la/ de thos nas kyang sdug bsngal la sogs pa'i bden pa dang ldan pa'i 'du shes yid la byed pa nges par 'byed pa'i cha dang mthun pa rnams de la kun du 'byung ngo / /de de'i tshe 'di snyam du rtog ste/ bdag gi ting nge 'dzin 'di ni nyams par yang mi 'gyur/ gnas par yang mi 'gyur/ khyad par du yang mi 'gro mod kyi/ nges par 'byed par 'gyur bas na/ shin tu mchog yin no snyam mo/ /mig kyang yod la gzugs rnams kyang yod pa nas/ yid dang chos rnams kyi bar du yang yod mod kyi/ 'on kyang dge slong gis chos 'di dag yod la/ yod bzhin du mi rtogs te/ 'du shes yod bzhin du yang mi rtogs na/ 'du shes med na lta ci smos zhes gang gsungs ji lta bu zhe na/ 'di na dge slong bsam gtan dang po bsgrubs te gnas pa na/ des mig nas chos rnams kyi bar du sun 'byin pa'i zil gyis gnon pas zil gyis gnon par gyur te/ de mig la mig tu yang 'du shes par mi 'gyur la/ 'du shes can yang yin no/ /chos rnams kyi bar la chos su 'du shes par yang mi 'gyur la/ 'du shes can yang yin no/ /ji ltar 'du shes can yin zhe na/ mig la sogs pa la sdug bsngal ba'am/ kun 'byung ba'am/ nad la sogs par yid la byed de/ des chos de dag rang gi mtshan nyid kyi sgo nas rtogs par mi byed do/ /ci yang med pa'i skye mched kyi bar du yang de dang 'dra ste/ 'di ni zag pa med pa'i yid la byed pa'o/ /'du shes med la ji ltar mi rtogs she na/ mtshan ma thams cad yid la mi byed pa'i phyir/ 'gog pa la zhi ba'o snyam du yid la byed de/ mtshan ma thams cad dang bral ba'i 'du shes gang yin pa de nyid 'dir 'du shes med par 'dod do/ /'gog pa'i snyoms par zhugs pa'i 'du shes rnams thams cad kyi thams cad du mi 'byung ba de yang 'du shes med par 'dod do/ /lam ni bzhir bstan te/ ji lta zhe na/ de bzhin du 'dug nas chos rnams rnam par 'byed cing rab tu rnam par 'byed de/ 'di la dge slong bsam gtan dang po la sogs pa ni thob la/ bden pa ni ma mthong ba yang yod de/ des dam pa'i chos mnyan pa dang / mang du thos pas kyang byang bar byas nas/ de 'dug ma thag tu ting nge 'dzin de la brten nas/ sdug bsngal la sogs pa'i bden pa rtogs par byed do/ /de lhag pa'i sems la brten nas/ lhag pa'i shes rab la sbyor bar byed do/ /gzhan yang sdug bsngal nas lam gyi bar du yang dag pa ji lta ba bzhin du rab tu shes la/ bsam gtan dang po la sogs pa ni ma thob ste/ de 'dug ma thag tu sems 'jog ste/ chos rnam par 'byed par ni mi byed do/ /de lhag pa'i shes rab de nyid la brten nas/ lhag pa'i sems la sbyor bar byed do/ /gsum pa ni gnyi ga thob ba yin te/ de'i zhi gnas dang lhag mthong gnyi ga 'dres par gyur nas/ mnyam par zung du 'jug go/ /bzhi pa ni bsam gtan dang po la sogs pa snga nas thob la/ des dam pa'i chos mnyan pa dang / mang du thos pas byang bar ma byas te/ de ston pa'am yang na bla ma gang yang rung ba las bden pa rnams sam/ kun du sbyor ba lhag ma spang ba'i dbang du byas nas chos nyan te/ yang na ni bden pa rnams mngon par rtogs par 'gyur ro/ /yang na ni dgra bcom pa nyid thob par 'gyur ro/ /des mchog tu dga' ba rgya chen po dge ba nges par 'byung ba dang ldan pa yang khong du chud par 'gyur te/ de chos kyis bskyong bas zin pa'i sems des 'jug par byed do/ /de ltar 'dug nas kyang bsam gtan gyi snyoms par 'jug pa'i gnas pas sems de gnas par byed do/ /de la lam bstan pa dang po ni/ mthong ba'i lam bsgrubs pa las brtsams te bstan to/ /gnyis pa dang gsum pa ni bsgom pa'i lam bsgrubs pa las brtsams te bstan to/ /bzhi pa ni gnyi ga bsgrubs pa las brtsams te bstan to/ /rnam par dag pa gtso bo ni bzhi ste/ rnam par dag par 'gyur ba'i gtso bo yin pa'i phyir ro/ /rnam par dag pa ni gang / gtso bo ni gang zhe na/ tshul khrims la sogs pa gang dag thob pa dang / rnyed pa dang mngon par bsgrub pa rnams yongs su rdzogs pa dang / phan 'dogs pa gang yin pa de ni rnam par dag pa'o/ /de brtson 'grus brtsams pa gang gis yongs su ma rdzogs pa yongs su rdzogs par byed pa de ni gtso bo'o/ /tshul khrims yongs su rdzogs pa ni gang / phan 'dogs pa ni gang zhe na/ 'di la la la tshul khrims dang ldan par gnas te/ so so thar pa'i sdom pas bsdams la/ cho ga dang / spyod yul yongs su rdzogs pa yang ma yin/ kha na ma tho ba phra rab tsam dag la 'jigs par lta ba yang ma yin te/ de'i tshul khrims de ni yongs su rdzogs pa ma yin no/ /gang gi tshe de dag thams cad yod par gyur pa de'i tshe ni yongs su rdzogs pa yin te/ 'di ni tshul khrims yongs su rdzogs pa'o/ /gang de'i yun rings po nas goms pas dbang po rnams kyi sgo bsrungs te/ gnas pa zhes bya ba nas/ tshul khrims de la de'i ngang can dang / de'i rang bzhin du gnas pa zhes bya ba'i bar du rgyas par bya ste/ de ni phan 'dogs pa'o/ /ting nge 'dzin yongs su rdzogs pa gang zhe na/ gal te sbyor ba'i mthar thug pa'i 'bras bu thob pa'am/ bsam gtan bzhi par gyur na/ de ni yongs su rdzogs pa yin no/ /de man chad ni yongs su rdzogs pa ma yin no/ /phan 'dogs pa gang zhe na/ ting nge 'dzin thob pa gong nas gong du yongs su dag pa gang yin pa dang / de'i ting nge 'dzin 'du byed pas yongs su zin pa ma yin pa zhes rgyas par sbyar ro/ /lta ba yongs su rdzogs pa ni gang / phan 'dogs pa ni gang zhe na/ pha rol gyi sgra'i rgyu las byung ba dang / tshul bzhin yid la byed pa las yang dag pa'i lta ba bskyed la/ des sdug bsngal nas lam gyi bar du rab tu shes te/ yang dag pa ji lta ba bzhin du mi shes pa de srid du ni yongs su rdzogs pa ma yin no/ /gang gi tshe yang dag pa'i lta ba yang dag pa ji lta ba bzhin du rab tu shes pa de'i tshe ni yongs su rdzogs pa yin no/ /phan 'dogs pa ni de dus gzhan na zag pa rnams zad pas zhes rgyas par bya'o/ /rnam par grol ba yongs su rdzogs pa ni gang / phan 'dogs pa ni gang zhe na/ slob pa'i ye shes mthong bas 'dod chags la sogs pa las rnam par grol ba gang yin pa de ni/ yongs su rdzogs pa ma yin no/ /mi slob pa'i gang yin pa de ni yongs su rdzogs pa'o/ /phan 'dogs pa ni de ji ltar spyod pa dang / ji ltar gnas kyang tshe 'di'i bde bar gnas pa de las yongs su nyams par mi 'gyur ro/ /dge slong sems rnam par dag pa la zhugs pas dus dus su mtshan ma lnga yid la bya'o zhes mdo las byung ba dang / lhag pa'i sems la brtson pa ni/ sems rnam par dag pa la zhugs pa ste/ de la mi dge ba 'dod pa la sogs pa'i rtog pa dang / nye du la sogs pa la rtog pa rnams bar chad byed do/ /de yang rtog pa spyod pa chung ngu dang / 'bring dang / chen po'i bye brag gis gang zag rnam pa gsum yod de/ dang po'i ni mtshan ma gzhan yid la byed pas rtog pa de kun du mi 'byung ngo / /gnyis pa'i ni rtog pa'i nyes dmigs mthong ba'i phyir ram/ dran par mi byed cing / yid la mi byed pa'i phyir te/ ji ltar dran par mi byed cing yid la mi byed par byed ce na/ nang du sems 'jog pa la sogs pas so/ /gang zag gsum pa'i ni de dag gis kyang dang por thams cad kyi thams cad du kun du mi 'byung ba ma yin na/ des ji ltar rags pa zhi bar bya ba dang / rim gyis rnam par gnon pa'i phyir/ mthar gyis rtog pa'i 'du byed bsal bar bya'o/ /des kyang ma nus na rtog pa'i lam rnams dang / rtog pa'i dmigs pa rnams la sems skyo bar byed cing 'jigs par byed de/ skyo ba byas nas/ skyo ba dang ldan pa'i sems kyis de shas cher yid la byed pas/ rtogs pa dang ldan pa'i sems de mnar bar byed de/ tshar gcod par byed do/ /de dag ni gang zag gsum po dag gi rnam pa lnga yin no/ /bcom ldan 'das kyis gser bdar ba'i mdo las/ gser sbyangs pa dang 'dra bar sems sbyang bar gang gsungs pa de ji ltar lta zhe na/ gser rnam par dag pa la rnam pa gsum yod de / skyon rnam par dag pa dang / gar bu rnam par dag pa dang / las su rung ba rnam par dag pa'o/ /de la skyon rnam par dag pa ni 'byung khung na 'dug pa'i gser gyi skyon rags pa dang / 'bring dang / cha phra ba bsal nas ji tsam du gser phye dag par gyur pa kho na lus par gyur pa'o/ /de la gar bu rnam par dag pa ni/ de dag nyid bzhu nas gar bur gyur pa gang yin pa'o/ /de la las su rung ba rnam par dag pa ni/ gar bu de'i khro ba la sogs pa'i skyon rnam par sbyangs pa'i phyir ro/ /de la gser 'byung khung na 'dug pa ji lta ba de bzhin du ni/ rigs la gnas pa'i sems rnam par dag pa la zhugs pa gang yongs su mya ngan las 'da' ba dang / skyo bar 'gyur ba'i skal ba yod pa lta bur blta bar bya'o/ /de yang gang yan chad nas sems rnam par dag pa la zhugs pa zhes bya zhe na/ gang yan chad nas dad pa gang gis mngon par 'byung bar 'gyur ba'i dad pa thob pa yan chad do/ /khyim na gnas pa'i gnas skabs dang / mngon par 'byung ba'i gnas skabs na/ de la nye ba'i nyon mongs pa gsum yod do / / rags pa la sogs pa'o/ /de la khyim pa las mngon par 'byung ba la bgegs byed pa ni gnyis yod de/ las kyi mtha' mi dge ba lus dang ngag gi nyes par spyod pa dga' ba dang mthun pa gang yin pa dang / sdig pa can gyi lta ba 'jig rten na dgra bcom pa yang dag par song ba rnams med do snyam du 'dzin pa ste de ni dad pa ma thob pa'i snga rol du de la bar chad byed pa yin no/ /'dod pa la sogs pa'i rtog pa rnams ni/ mngon par byung ba'i mngon par dga' ba la bgegs byed pa'o/ /nye du la sogs pa la rtog pa rnams ni mngon par dga' bar gyur ba'i dge ba'i chos bsgom pa rgyun du chud par byed pa la bgegs byed pa ste/ de dag spangs na/ dge ba'i chos bsgom pa rgyun du chud par bsgrub pa'i phyir sems dag par 'gyur te/ de ni rtog pa dang bcas dpyod pa dang bcas pa'o/ /gser phye dag par gyur la gar bur ma byas pa ji lta ba de ni sems kyi nye ba'i nyon mongs pa rnam par dag pa yin te/ gser dang 'dra ba'i phyir ro/ /rtog pa dang bcas dpyod pa dang bcas pa rnams nye bar zhi ba nas/ bsam gtan bzhi pa'i bar du bsgrubs te gnas zhes bya ba 'di ni/ sems bsdu ba rnam par dag pa ste/ rtog pa med cing dpyod pa med pa'i ting nge 'dzin gyis bsdus pa'i phyir dang / gser bzhu nas gar bur gyur pa dang 'dra ba'i phyir ro/ /gal te ting nge 'dzin 'du byed pas mngon par zin pa ma yin na zhes rgyas par 'byung ba 'di ni sems kyi las su rung ba sbyang ba byas te / mngon par shes par bya ba'i chos rnams la ci dgar bsgyur du rung ba'i phyir dang / gser gyi khro ba la sogs pa'i skyon bstsal ba dang 'dra ba'i phyir ro/ /gzhan yang mtshan ma gsum yid la bya'o zhes gsungs pa ni gcig tu nges par bying ba la sogs pa'i gnyen por dus dus su zhi gnas la sogs pa yid la bya ba'o/ /de la zhi gnas dang rab tu 'dzin pa gnyis la yongs su byang bar ma byas te/ de'i cha gcig la bsgom pa ni bying ba dang rgod pa'i mtshan ma ste/ de ni sbyor ba'i lam mo/ /dus dus su btang snyoms kyi mtshan ma zhes bya ba 'di ni grub pa'i lam gyi tshe'o/ /de yang cha gcig pu bsgom na ni rten cing 'brel par 'byung ba dang / bden par rab tu rnam par 'byed par mi byed pas na zag pa rnams zad par bya ba'i yang dag pa'i sems la mnyam par gzhag pa ma yin la/ des ni bden pa rnams mngon par ma rtogs pa yang mngon par rtogs par mi 'gyur ro/ /yang na mngon par rtogs na yang zag pa zad pa thob par mi 'gyur te/ gnyis ni ting nge 'dzin yongs su grub pa'i lam mo/ /gsum pa ni ting nge 'dzin la brten nas zag pa zad pa'i lam ste/ mdor bsdu na dus dus su thams cad yid la byed pa'i phyir ro zhes bstan pa yin no/ /bstan pa bsdu bar 'gyur ba'i chos bzhi yod de/ rab tu dben pa dang / bsgom pa dang / bsgoms pa'i 'bras bu dang / bstan pa la mi mthun pa med pa'o/ /de la rab tu dben pa ni/ dgon pa dang / shing drung dang / khyim gyis stong pa rnams so/ /bsgom pa ni der song bas chos gnyis bsgom par bya ba ste zhi gnas dang lhag mthong ngo / /zhi gnas kun du bsten la/ lhag mthong la brten na/ rnam par grol bar 'gyur ro zhes bya ba ni/ 'di lta ste/ bsam gtan dang po nas/ bsam gtan bzhi pa'i bar du thob par gyur na/ des ting nge 'dzin de la brten pas/ sdug bsngal nas lam gyi bar du yang dag pa ji lta ba bzhin du rab tu shes te de lhag mthong de la brten nas mthong bas spang bar bya ba'i nyon mongs pa rnams las sems rnam par grol bar 'gyur ro/ /ji ltar na lhag mthong kun du bsten pas / zhi gnas la brten nas rnam par grol bar 'gyur zhe na/ 'di na kha cig sdug bsngal nas lam gyi bar du yang dag pa ji lta ba bzhin du rab tu shes te/ de lhag pa'i shes rab la gnas nas bsam gtan skyed par byed do/ /de zhi gnas de la brten nas bsgom pas spang par bya'i/ nyon mongs pa rnams las sems rnam par grol bar 'gyur te/ de ltar zhi gnas dang lhag mthong yongs su bsgoms na/ dbyings rnams su rnam par grol bar 'gyur ro/ /de la spong ba'i dbyings ni mthong bas spang bar bya ba'i 'du byed thams cad spong ba'o/ /'dod chags dang bral ba'i dbyings ni/ bsgom pas spang bar bya ba rnams spong ba'o / /'gog pa'i dbyings ni phung po thams cad 'gog pa ste/ 'di ni bsgoms pa'i 'bras bu'o/ /bstan pa la mi mthun pa med pa ni/ ston pa dang / nyan thos rnams kyi don nas don dang / tshig nas tshig dang / yi ge nas yi ger mthun zhing mtshungs pa yin gyi/ gzhan mu stegs can rnams kyi blo sna tshogs du mar tha dad par 'dug pa lta bu ni ma yin no/ / 'di lta ste/ tshig dang po rnams dang zhes bya ba ni/ tshig snga ma rnams te/ gang dag gis gcig la dris la gal te/ de dag nyid kyis cig shos la dris na yang mthun pa yin no/ /'on te gcig las phung po rnams brtsams te dris la/ cig shos la ni gzhan las brtsams te 'dri na ni/ tshig snga ma rnams dang mthun pa ma yin no/ /rnal 'byor spyod pa'i sa las/ mnyam par gzhag pa'i sa rdzogs so// //bam po bco lnga pa/ mnyam par ma bzhag pa'i sa gang zhe na/ de ni sa mdor bsdu na rnam pa bcu gnyis yod par rig par bya'o/ / mnyam par ma bzhag pa'i sa ngo bo nyid kyis mnyam par ma bzhag pa yang yod de/ 'di lta ste/ rnam par shes pa lnga'i tshogs lta bu'o/ /shin tu sbyangs pa med pa'i phyir mnyam par ma bzhag pa'i sa yang yod de/ 'dod pa na spyod pa'i sems dang sems las byung ba'i chos rnams te/ sems rtse gcig tu byed pa yod du zin kyang sems dang sems las byung ba'i chos de dag shin tu sbyangs pas ma zin par 'jug pa'i phyir/ de bas na de mnyam par ma bzhag pa zhes bya'o/ /ma brtsams pa'i phyir mnyam par ma bzhag pa'i sa yang yod de/ 'di lta ste/ 'dod par na spyod pa dag /'dod pa rnams la lhag par chags shing / 'dod pa la nye bar spyod pa rnams kyi lta bu'o/ /rnam par g.yeng ba'i phyir mnyam par ma bzhag pa'i sa yang yod de/ 'di lta ste las dang po pa ting nge 'dzin la brtson pa rnams 'dod pa'i yon tan lnga la sems rnam par g.yeng zhing rjes su 'jug pa lta bu'o/ /bsdus pa'i phyir mnyam par ma bzhag pa'i sa yang yod de/ 'di lta ste/ las dang po pa ting nge 'dzin la brtson pa rnams kyi sems nang du bsdus na/ rmugs pa dang gnyid kyis non pa lta bu'o/ / ma thob pa'i phyir mnyam par ma bzhag pa'i sa yang yod de/ 'di lta ste/ las dang po ba ting nge 'dzin la brtson pa de dag nyid kyi sems rnam par g.yeng ba dang / bsdus pa'i nyon mongs pa can du gyur pa ma yin du zin kyang / yid la byed pa ma thob pa'i sems dang sems/ las byung ba'i chos rnams gang yin pa lta bu'o/ /yongs su ma rdzogs pa'i phyir mnyam par ma bzhag pa'i sa yang yod de/ /'di lta ste/ yid la byed pa thob tu zin kyang / sbyor ba'i mthar thug pa'i yid la byed pa yang ma thob/ de'i 'bras bu yang ma thob pa rnams kyi lta bu'o/ /kun nas nyon mongs pa'i phyir mnyam bar ma bzhag pa'i sa yang yod de/ 'di lta ste/ sbyor ba mthar thug pa dang / 'bras bu'i yid la byed pa thob tu zin kyang / ro myang ba la sogs pa'i nye ba'i nyon mongs pa gang yang rung bas sems nyon mongs pa can du gyur pa lta bu'o/ /dbang med pa'i phyir mnyam par ma bzhag pa'i sa yang yod de/ 'di lta ste/ sbyor ba mthar thug pa dang / 'bras bu'i yid la byed pa yang thob pa nyid kyi sems la kun nas nyon mongs pa can du gyur ba med du zin kyang / snyoms par 'jug pa dang / gnas pa dang / ldang ba'i mtshan ma rnams la dbang ma thob cing / ji ltar 'dod pa dang / gnod pa med pa dang / tshegs med par ma thob pa rnams kyi lta bu'o/ /rnam par ma dag pa'i phyir mnyam par ma bzhag pa'i sa yang yod de/ 'di lta ste/ ji ltar 'dod pa dang / gnod pa med pa dang / tshegs med par thob tu zin kyang / 'jig rten pa'i snyoms par 'jug pa rnams kyi nyon mongs pa'i bag la nyal legs par ma choms pa'i sems dang sems las byung ba rnams lta bu'o/ /rnam par langs pa'i phyir mnyam par ma bzhag pa'i sa yang yod de/ 'di lta ste/ ting nge 'dzin thob pa las langs la yongs su nyams pa ni ma yin pa'i lta bu'o/ /yongs su nyams pa'i phyir mnyam par ma bzhag pa'i sa yang yod de/ 'di lta ste/ ting nge 'dzin thob pa las yongs su nyams pa'i lta bu'o/ /rnal 'byor spyod pa'i sa las mnyam par ma bzhag pa'i sa rdzogs so/ / //sems yod pa dang sems med pa'i sa gang zhe na/ rnam pa de gnyis la yang / rnam pa lnga yod par rig par bya ste/ sar gdags pa rnam par gzhag pa dang / sems 'khrul pa dang / ma 'khrul pa rnam par gzhag pa dang / 'byung ba dang mi 'byung ba rnam par gzhag pa dang / gnas skabs rnam par gzhag pa dang / don dam pa rnam par gzhag pa'o/ /de la sar gdags pa rnam par gzhag pa ni/ rnam par shes pa lnga dang mtshungs par ldan pa'i sa dang / yid kyi sa dang / rtog pa dang bcas dpyod pa dang bcas pa dang / rtog pa med la dpyod pa tsam gyi sa rnams ni gcig tu nges par sems yod pa'o/ /rtog pa med cing dpyod pa med pa'i sa las ni snyoms par 'jug pa dang / skye ba yod pa 'du shes med pa pa dang / 'gog pa'i snyoms par 'jug pa ma gtogs pa de las gzhan pa rnams kyi sems yod pa kho na'i sa'o/ /snyoms par 'jug pa dang / skye ba yod pa 'du shes med pa pa dang / 'gog pa'i snyoms par 'jug pa ni sems med pa'i sa'o/ /de la sems 'khrul pa dang / ma 'khrul pa rnam par gzhag pa ni/ phyin ci log bzhis sems phyin ci log tu gyur pa gang yin pa de ni 'khrul pa zhes bya'o/ /phyin ci log bzhis phyin ci log tu ma gyur pa gang yin pa de ni sems ma 'khrul pa zhes bya'o/ /de la sems 'khrul pa gang yin pa de ni/ rang bzhin las nyams pa'i phyir/ sems med pa zhes bya ste/ 'di ltar 'jig rten na smyo zhing sems 'khrul pa mthong na/ skyes bu gang zag 'di ni sems med pa smyo ba sems 'khrugs pa'o zhes zer ro/ /de'i phyir rnam grangs des na sems 'khrul pa gang yin pa de ni sems med pa'i sa yin la/ ma 'khrul pa gang yin pa de ni sems yod pa yin no/ /de la 'byung ba dang mi 'byung ba ni/ rnam pa brgyad kyis sems 'byung ba'am mi 'byung bar 'gyur te/ 'di lta ste/ dbang po yongs su nyams pa dang / yul mi snang bar gyur pa dang / yid la byed pa med pa dang / ma thob pa dang / mi mthun pa dang / spangs pa dang / 'gags pa dang / skyes pa'o/ /de las bzlog pa ni skye bar blta bar bya ste/ rgyu 'di dag kho nas 'gyur bar zad do/ /de la skye ba'i rgyu rnams kyi sems skye ba gang yin pa de ni/ sems yod pa'i sa'o/ /mi skye ba'i rgyu rnams kyis/ mi skye ba gang yin pa de ni sems med pa'i sa'o/ /de la gnas skabs rnam par gzhag pa ni/ gnas skabs drug ma gtogs pa ste/ sems yod pa'i sa yin par rig par bya'o/ /gnas skabs drug po gang zhe na/ 'di lta ste/ gnyid sems med pa'i gnas skabs dang / brgyal ba sems med pa'i gnas skabs dang / 'du shes med pa'i snyoms par 'jug pa dang / 'du shes med pa pa dang / 'gog pa'i snyoms par 'jug pa dang / phung po'i lhag ma med pa'i mya ngan las 'das pa'i dbyings te/ gnas skabs drug po gang yin pa 'di dag ni sems med pa'i sa'o/ /de la don dam pa rnam par gzhag pa ni phung po'i lhag ma med pa'i mya ngan las 'das pa'i dbyings te/ sems med pa'i sa'o/ /de ci'i phyir zhe na/ de kun gzhi rnam par shes pa 'gag par 'gyur ba'i phyir te/ des na sems med pa'i sa zhes bya'o/ /de las gzhan pa'i gnas skabs dag ni 'jug pa'i rnam par shes pa 'gag la / kun gzhi rnam par shes pa ni 'gag par mi 'gyur te/ des na don dam pa'i sgo nas sems med pa'i sa zhes bya'o/ /rnal 'byor spyod pa'i sa las sems yod pa'i sa dang / sems med pa'i sa rdzogs so// //thob pa las byung ba'i sa gang zhe na/ de yang mdor bsdu na/ rigs pa'i gnas lnga gang yin pa de dag ming dang tshig dang / / yi ge las blo sngon du btang ste/ nyan pa dang / 'dzin pa dang / 'chang ba dang / kha ton byed pa dang / rjes su dran pa dang / ming gi tshogs dang / tshig gi tshogs dang / yi ge'i tshogs la brten pa'i don rtogs pa 'di ni thos pa las byung ba'i sa zhes bya'o/ /rig pa'i gnas lnga gang zhe na/ 'di lta ste nang gi rig pa dang / gso ba rig pa dang / gtan tshigs kyi rig pa dang / sgra'i rig pa dang / bzo'i las kyi gnas kyi rig pa'o/ /nang gi rig pa gang zhe na/ de ni rnam pa bzhir blta bar bya ste/ gzhi gdags pa rnam par gzhag pa dang / ming rab tu dbye ba gdags pa rnam par gzhag pa dang / bstan pa'i don bsdu ba dang / sangs rgyas kyi bka'i shes bya'i gnas so/ /de la gzhi gdags pa rnam par gzhag pa gang zhe na/ gzhi gsum gyis sangs rgyas kyi bka' bsdus pa yin te/ 'di lta ste/ mdo sde'i gzhi dang / 'dul ba'i gzhi dang / ma mo'i gzhi ste/ gsum po 'di dag gi rnam par dbye ba rgyas pa ni gzhi bsdu ba las 'byung ngo / /ming rab tu dbye ba gdags pa rnam par gzhag pa gang zhe na/ sdom la/ gnas dang 'khrul dang spros pa dang / /gnas pa de nyid dge dang mchog / rab zhi rang bzhin rigs pa dang / /brda dang mngon par rtogs pa'o/ /gnas gang zhe na/ 'di lta ste/ skye mched drug po/ yul tshad med pa/ phyogs tshad med pa/ dus tshad med pa dang / khams gsum ste/ 'dod pa'i khams dang / gzugs kyi khams dang / gzugs med pa'i khams dang / gzhan yang khams gsum ste/ stong chung ngu dang / stong gnyis pa bar ma dang / stong gsum gyi stong chen po dang / phyogs bzhi ste/ khyim pa'i phyogs dang / rab tu byung ba'i phyogs dang / dge bsnyen gyi phyogs dang / mi ma yin pa'i phyogs dang / tshor ba gsum ste/ bde ba dang / sdug bsngal ba dang / sdug bsngal yang ma yin bde ba yang ma yin pa dang dus gsum ste/ 'das pa dang / ma 'ongs pa dang / da ltar byung ba dang / dkon mchog gsum ste/ sangs rgyas dkon mchog dang / chos dkon mchog dang / dge 'dun dkon mchog dang / chos gsum ste/ dge ba dang / mi dge ba dang / lung du ma bstan pa dang / kun nas nyon mongs pa gsum ste/ nyon mongs pa'i kun nas nyon mongs pa dang / las kyi kun nas nyon mongs pa dang / skye ba'i kun nas nyon mongs pa dang / 'phags pa'i bden pa bzhi ste/ sdug bsngal ba dang / kun 'byung ba dang / 'gog pa dang / lam dang / mthar gyis gnas pa'i snyoms par 'jug pa dgu ste/ bsam gtan dang po nas/ 'du shes dang tshor ba 'gog pa'i bar dang / byang chub kyi phyogs kyi chos sum cu rtsa bdun te/ dran pa nye bar gzhag pa dang / yang dag pa'i spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / lam gyi yan lag rnams dang / dge sbyong gi 'bras bu bzhi ste/ rgyun du zhugs pa'i 'bras bu dang / lan cig phyir 'ong ba'i 'bras bu dang / phyir mi 'ong ba'i 'bras bu dang / 'bras bu'i mchog dgra bcom pa nyid dang / yon tan khyad par can mang po la 'di lta ste/ tshad med pa rnams dang / rnam par thar pa dang / zil gyis gnon pa'i skye mched dang / zad par gyi skye mched rnams dang / nyon mongs pa med pa dang / smon nas shes pa dang / so so yang dag par rig pa dang / mngon par shes pa drug dang / gzhan yang rgya che ba'i dbang du byas nas/ gzhi lnga ste/ mtshan ma dang / ming dang / rnam par rtog pa dang / de bzhin nyid dang / yang dag pa'i shes pa dang / stong pa nyid rnam pa gnyis te/ gang zag stong pa nyid dang / chos stong pa nyid dang / bdag med pa rnam pa gnyis te/ gang zag la bdag med pa dang / chos la bdag med pa dang / mtha' gnyis rnam par spangs pa'i dbu ma'i lam ste/ sgro btags pa'i mtha' rnam par spangs pa dang / skur pa'i mtha' rnam par spangs pa dang / de kho na nyid rnam pa bzhi ste/ 'jig rten gyi grags pa dang / rigs pa'i grags pa dang / nyon mongs pa'i sgrib pa rnam par dag pa'i ye shes kyi spyod yul dang / shes bya'i sgrib pa rnam par dag pa'i ye shes kyi spyod yul dang / yongs su tshol ba bzhi ste/ ming yongs su tshol ba dang / dngos po yongs su tshol ba dang / ngo bo nyid gdags pa yongs su tshol ba dang / khyad par gdags pa yongs su tshol ba dang / yang dag pa ji lta ba bzhin du yongs su shes pa bzhi ste/ ming yongs su tshol bar gtogs pa yang dag pa ji lta ba bzhin du yongs su shes pa dang / dngos po yongs su tshol bar gtogs pa dang / ngo bo nyid gdags pa yongs su tshol bar gtogs pa dang / khyad par gdags pa yongs su tshol bar gtogs pa yang dag pa ji lta ba bzhin du yongs su shes pa dang / ngo bo nyid rnam pa gsum ste/ yongs su grub pa'i ngo bo nyid dang / gzhan gyi dbang dang / kun du brtags pa'i ngo bo nyid dang / ngo bo nyid med pa rnam pa gsum ste/ mtshan nyid ngo bo nyid med pa dang / skye ba ngo bo nyid med pa dang / don dam pa'i ngo bo nyid med pa dang / byang chub chen po rnam pa lnga ste/ 'di lta ste/ ngo bo nyid dang / mthu dang / thabs dang / 'jug pa dang / ldog pa dang / theg pa chen po rnam pa lnga ste/ sa bon dang / 'jug pa dang / go rims dang / yang dag pa'i bsgrub pa dang / yang dag pa'i bsgrubs pa'i 'bras bu dang / de bzhin du dang po sems bskyed pa dang / sems can rnams la snying rje ba dang / pha rol tu phyin pa dang / bsdu ba'i dngos po rnams kyi bdag dang pha rol gyi rgyud yongs su smin par bya ba dang / dpag tu med pa la 'du shes pa lnga ste/ sems can gyi khams dpag tu med pa la 'du shes pa dang / 'jig rten gyi khams dang / chos kyi khams dang / 'dul ba'i khams dang / 'dul ba'i thabs kyi khams dpag tu med pa la 'du shes pa dang / de kho na'i don gyi rjes su 'gro ba dpag tu med pa thams cad kyi rjes su 'gro ba'i de bzhin nyid gang yin pa dang / de'i ye shes gang yin pa dang / mthu bsam gyis mi khyab pa la mos pa dang / ye shes sgrib pa med pa dang / skyes bu chen po'i mtshan sum cu rtsa gnyis dang / dpe byad bzang po brgyad cu dang / rnam pa thams cad yongs su dag pa bzhi dang / stobs bcu dang / mi 'jigs pa bzhi dang / dran pa nye bar gzhag pa gsum dang / bsrung ba med pa gsum dang / snying rje chen po dang / bsnyel ba mi mnga' ba'i chos nyid dang / bag chags yang dag par bcom pa dang / rnam pa thams cad dang / mchog gi ye shes so/ /de dag kyang bsdu na/ gnas rnam pa gnyis su 'gyur te/ nyan thos kyi theg pa bstan pa'i gnas dang / theg pa chen po bstan pa'i gnas so/ /'khrul pa gang zhe na/ phyin ci log bzhi ste/ mi rtag pa la rtag go snyam pa'i phyin ci log pa dang / sdug bsngal ba la bde ba'o snyam pa dang / mi sdug pa la sdug go snyam pa dang / bdag med pa la bdag go snyam pa'i phyin ci log go/ /spros pa gang zhe na/ nyon mongs pa rnams dang / nyon mongs pa dang bcas pa'i phung po rnams so/ /gnas pa gang zhe na/ rnam par shes pa'i gnas bzhi'am bdun no/ /de kho na gang zhe na/ de bzhin nyid dang / 'phags pa'i bden pa bzhi'o/ / dge ba gang zhe na/ dge ba rnams rnam pa gsum ste/ lus dge ba dang / yul dge ba dang / gnas skabs dge ba'o/ /mchog gang zhe na/ dkon mchog gsum la mchog ces bya ste/ mchog du gdags par rtogs pa'i phyir ro/ /rab tu zhi ba gang zhe na/ dge ba'i chos la 'dun pa yan chad nas/ byang chub kyi phyogs kyi chos 'bras bu dang bcas pa thams cad la rab tu zhi zhes bya'o/ /rang bzhin gang zhe na/ chos rnams kyi mtshan nyid gang yin pa ste/ rang gi mtshan nyid dam/ spyi'i mtshan nyid dam/ brda'i mtshan nyid dam/ rgyu'i mtshan nyid dam/ 'bras bu'i mtshan nyid do/ /rigs pa gang zhe na/ rten cing 'brel bar 'byung ba'am/ rigs pa bzhi'o/ /brda gang zhe na/ chos tsam la gang zag rnam par gzhag pa'am/ mtshan ma tsam la chos su rnam par gzhag pa gang yin pa'o/ /mngon par rtogs pa gang zhe na/ mngon par rtogs pa drug ste/ snga ma bzhin du 'di lta ste/ rtogs pa dang bcas dpyod pa bcas pa'i sa las 'byung ba bzhin no/ /sdom la/ yul can gnas skabs rtog pa dang / /spyod len tshogs dang mun pa dang / /tshig dang rtogs bya yang dag phul/ /dben pa dang ni 'jug pa bzhi/ /yul can gang zhe na/ gzugs kyi phung po gang yin pa'o/ /gnas skabs gang zhe na/ tshor ba'i phung po gang yin pa'o/ /rtog pa gang zhe na/ 'du shes kyi phung po gang yin pa'o/ /spyod pa gang zhe na/ 'du byed kyi phung po gang yin pa'o/ /len pa gang zhe na/ rnam par shes pa'i phung po gang yin pa'o/ /tshogs gang zhe na/ de ni rnam pa gnyis su blta bar bya ste/ nyon mongs pa'i tshogs dang las kyi tshogs so/ /tshogs ji lta ba de bzhin du/ 'bri ba yang rnam pa gnyis so/ /mun pa gang zhe na/ ma rig pa dang the tshom mo/ /tshig gang zhe na/ gsung rab yan lag bcu gnyis la tshig ces bya'o/ /rtogs par bya ba gang zhe na/ bstan pa de dang / de'i don la rtogs par bya ba zhes bya'o/ /yang dag phul gang zhe na/ dge sbyong gi 'bras bu bzhi'o/ /dben pa gang zhe na/ dben pa lnga ste/ nyes par spyod pa las dben pa dang / 'dod pa las dben pa dang / yo byad las dben pa dang / /'du 'dzi las dben pa dang / nyon mongs pa las dben pa'o/ /'jug pa gang zhe na/ khams gsum dang / 'gro ba lnga'o/ /gzhi gang zhe na/ 'das pa la lta ba dang / ma 'ongs pa la mngon par dga' ba dang / da ltar byung ba lhag par chags pa'o/ /sdom la/ rnam par 'byed dang kun du 'byung / /nyal ba dang ni 'brel pa dang / /bsdu dang mtshungs par ldan pa dang / / bsnyad dang ston pa go rims rnams/ /rnam par 'byed pa gang zhe na/ 'di lta ste/ gcig nas rtog pa dang / tshig gong ma dang sbyor ba dang / tshig 'og ma dang sbyor ba dang / mu bzhir sbyor ba dang / dngos po med pa dang / gzugs can gyi chos rnams dang / gzugs can ma yin pa rnams dang / bstan du yod pa rnams dang / bstan du med pa rnams dang / thogs pa dang bcas pa rnams dang / thogs pa med pa rnams dang / zag pa dang bcas pa rnams dang / zag pa med pa rnams dang / 'dus byas rnams dang / 'dus ma byas rnams dang / nyon mongs pa dang bcas pa rnams dang / nyon mongs pa med pa rnams dang / zang zing dang bcas pa rnams dang / zang zing med pa rnams dang / zhen pa la brten pa rnams dang / mngon par 'byung ba la brten pa rnams dang / 'jig rten pa rnams dang / 'jig rten las 'das pa rnams dang / khongs su gtogs pa rnams dang / khongs su gtogs pa ma yin pa rnams dang / nang gi rnams dang / phyi rol gyi rnams dang / rags pa rnams dang / phra ba rnams dang / ngan pa rnams dang / bzang po rnams dang / rgyang ring ba rnams dang / nye ba rnams dang / dmigs pa dang bcas pa rnams dang / dmigs pa med pa rnams dang / mtshungs par ldan pa rnams dang / mi ldan pa rnams dang / rnam pa dang bcas pa rnams dang / rnam pa med pa rnams dang / rten dang bcas pa rnams dang / rten med pa rnams dang / rgyu dang rgyu ma yin pa dang / 'bras bu dang 'bras bu ma yin pa dang / rnam par smin pa dang / rnam par smin pa ma yin pa rnams dang / rgyu dang bcas pa las byung ba rnams dang / rgyu dang bcas pa las byung ba ma yin pa rnams dang / 'bras bu dang bcas pa rnams dang / 'bras bu dang bcas pa ma yin pa rnams dang / rnam par smin pa dang bcas pa rnams dang / rnam par smin pa dang bcas pa ma yin pa rnams dang / zin pa rnams dang / ma zin pa rnams dang / 'byung ba chen po rgyur byas pa dang / 'byung ba chen po rgyur byas pa ma yin pa dang / mtshungs pa rnams dang / de dang mtshungs pa rnams dang / gong na yod pa rnams dang / gong na med pa rnams dang / 'das pa rnams dang / ma 'ongs pa rnams dang / da ltar byung ba rnams dang / dge ba rnams dang / mi dge ba rnams dang / lung du ma bstan pa rnams dang / 'dod pa dang ldan pa rnams dang / gzugs dang ldan pa rnams dang / gzugs med pa dang ldan pa rnams dang / slob pa rnams dang / mi slob pa rnams dang / slob pa yang ma yin mi slob pa yang ma yin pa rnams dang / mthong bas spang bar bya ba rnams dang / bsgom pas spang bar bya ba rnams dang / spang bar bya ba ma yin pa rnams dang / rkyen bzhi ste/ rgyu'i rkyen dang / mtshungs pa de ma thag pa dang / dmigs pa dang / bdag po'i rkyen dang / rton pa bzhi ste/ chos la rton gyi gang zag la ma yin pa dang / don la rton gyi yi ge la ma yin pa dang / nges pa'i don gyi mdo sde la rton gyi/ bkri ba'i don gyi mdo sde la ma yin pa dang / ye shes la rton gyi rnam par shes pa la ma yin pa dang / tshad med pa bzhi dang / dran pa nye bar gzhag pa bzhi dang / yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun dang / 'phags pa'i lam yan lag brgyad pa dang / so so yang dag par rig pa bzhi dang / chos kyi gnas bzhi dang / zhi gnas dang / lhag mthong dang / lhag pa'i tshul khrims dang / lhag pa'i sems dang / lhag pa'i shes rab dang / bslab pa rnams dang / rnam par thar pa rnams dang / zil gyis gnon pa'i skye mched rnams dang / zad par gyi skye mched rnams so/ /kun 'byung ba gang zhe na/ nyon mongs pas kun nas dkris pa gang yin pa'o/ /nyal ba gang zhe na/ nyon mongs pa bag la nyal ba gang yin pa'o/ /'brel pa gang zhe na/ skye mched drug po rnams lus gcig la phan tshun 'brel ba yin par rig par bya'o/ /gzhan yang chos rnams gang dag gis chos rnams gang dag bskyed pa de dag phan tshun 'brel bar rig par bya'o/ /dbang po rnams dang / yul rnams kyang gzung ba dang 'dzin pa'i tshul gyis 'brel par rig par bya'o/ /bsdu ba gang zhe na/ bsdu ba ni rnam pa bcu drug ste/ rgyu bsdu ba dang / mtshan nyid bsdu ba dang / rigs bsdu ba dang / gnas skabs bsdu ba dang / tha mi dad par bsdu ba dang / dus bsdu ba dang / yul bsdu ba dang / phyogs gcig bsdu ba dang / mtha' dag bsdu ba dang / don dam pa bsdu ba dang / phung po bsdu ba dang / khams bsdu ba dang / skye mched bsdu ba dang / rten cing 'brel par 'byung ba bsdu ba dang / gnas dang gnas ma yin pa bsdu ba dang / dbang po bsdu ba'o/ /mtshungs par ldan pa gang zhe na/ de ni rnam pa lngar rig par bya ste/ gzhan gyi dngos pos mtshungs par ldan gyi/ rang gi dngos pos ni ma yin no/ /gzhan gyi dngos pos mtshungs par ldan pa la yang mi mthun pa ma yin pa rnams mtshungs par ldan gyi/ mi mthun pa rnams ni ma yin no/ /mi mthun pa ma yin pa rnams mtshungs par ldan pa la yang chung ngu dang 'bring dang chen po rnams nyid dang / mtshungs par ldan gyi/ gzhan rnams gzhan dag dang mtshungs par ldan pa ni ma yin no/ /chung ngu dang 'bring dang / chen po rnams mtshungs par ldan pa la yang de'i tshe 'byung ba rnams nyid de'i tshe byung ba rnams dang mtshungs par ldan gyi/ gzhan gyi dus su byung ba rnams gzhan gyi dus su byung ba rnams dang mtshungs par ldan pa ni ma yin no/ /de'i tshe 'byung ba rnams kyang de'i dus su de'i sa pa rnams nyid de'i sa pa rnams dang mtshungs par ldan gyi/ gzhan gyi sa pa rnams dang mtshungs par ldan pa ni ma yin no/ /bsnyad pa gang zhe na/ tha snyad bzhi ste/ mthong ba'i tha snyad dang / thos pa dang / bye brag phyed pa dang / rnam par shes pa'i tha snyad do/ /rton pa gang zhe na/ zas bzhi ste/ kham gyi zas dang / reg pa dang / yid la sems pa dang / rnam par shes pa'i zas so/ /go rims gang zhe na/ go rims rnam pa drug ste/ 'jug pa'i go rims dang / bya ba sgrub pa'i go rims dang / bstan pa'i go rims dang / skye ba'i go rims dang / mngon par rtogs pa'i go rims dang / snyoms par 'jug pa'i go rims so/ /sdom la/ bya ba dmigs pa sbyor ba dang / /zhi gnas dang ni lhag mthong dang / /yid la byed dang gdams ngag dang / /yon tan byang chub bstan pa yin/ /bya ba gang zhe na/ bya ba brgyad de/ gnas 'gags pa dang / gnas brje ba dang / dmigs pa yongs su shes pa dang / dmigs pa la mngon par dga' ba dang / 'bras bu 'thob pa dang / 'dod chags dang bral ba dang / dbang po 'pho ba dang / mngon par shes pa bsgrub pa'o / /dmigs pa gang zhe na/ dmigs pa bzhi ste/ khyab par bya ba la dmigs pa dang / spyod par bya ba rnam par spyod pa la dmigs pa dang / mkhas pa la dmigs pa dang / nyon mongs ba rnam par byang ba la dmigs pa'o/ /sbyor ba gang zhe na/ de ni rnam pa bzhi'am/ rnam pa dgu ste/ rnam pa bzhi ni/ dad pa dang / 'dun pa dang / brtson 'grus dang thabs so/ /rnam pa dgu ni 'jig rten pa'i lam dang / 'jig rten las 'das pa'i lam dang / sbyor ba'i lam dang / de ma thag pa'i lam dang / rnam par grol ba'i lam dang / khyad par gyi lam dang / lam chung ngu dang / 'bring dang / chen po'o/ /zhi gnas gang zhe na/ sems gnas pa rnam pa dgu'o/ /lhag mthong gang zhe na/ de ni gzhi gsum pa dang / rnam pa bzhi dang / rab tu dbye ba la dmigs pa drug tu blta bar bya'o/ /de la gzhi gsum pa ni/ mtshan ma med pa dang / yongs su tshol ba pa dang / so sor rtog pa'o/ /de la rnam pa bzhi ni/ gang chos rnams rnam par 'byed pa dang / rab tu rnam par 'byed pa dang / yongs su rtag pa dang / yongs su dpyod par byed pa'o/ /de la gzhi rab tu dbye ba la dmigs pa drug ni don la dmigs pa dang / dngos po la dmigs pa dang / mtshan nyid la dmigs pa dang / phyogs la dmigs pa dang / dus la dmigs pa dang / rigs pa la dmigs pa'o/ /yid la byed pa gang zhe na/ yid la byed pa bdun te/ mtshan nyid so sor yang dag par rig pa la sogs pa'o/ /gdams ngag gang zhe na/ gdams ngag lnga ste/ lung gi gdams ngag dang / rtogs pa'i gdams ngag dang / go rims kyi gdams ngag dang / phyin ci ma log pa'i gdams ngag dang / cho 'phrul gyi gdams ngag go/ /yon tan rnams gang zhe na/ tshad med pa dang / rnam par thar pa la sogs pa ste/ gnas kyi skabs su bstan pa bzhin no/ /byang chub gang zhe na/ byang chub gsum ste/ nyan thos kyi byang chub dang / rang byang chub dang / bla na med pa yang dag par rdzogs pa'i byang chub pa'o / /bstan pa gang zhe na/ 'di lta ste/ skyabs su 'gro ba rnams dang / bslab pa'i gzhi bca' ba dang / ston pa po dang / nyan pa po gzhag pa dang / bla ma dang slob ma gzhag pa dang / sbyin pa'i gtam dang / tshul khrims kyi gtam dang / mtho ris kyi gtam dang / 'dod pa rnams kyi ro myang ba'i nyes dmigs dang / kun nas nyon mongs pa dang / rnam par byang ba dang / mngon par 'byung zhing rab tu dben par gnas pa'i phan yon dang / rnam par byang ba'i phyogs kyi chos rnams zhes rgyas par sbyar ro/ /bstan pa'i don bsdu ba gang zhe na/ goms par bya ba ste/ 'di lta ste/ dge ba'i chos rnams la gus par byed pa dang / rtag tu byed pa dang / bsgom pa dang ldan pa dang / goms par bya ba'i chos rnams 'di lta ste/ dge ba'i chos gang ci yang rung ba rnams dang / nyes dmigs dang bcas pa'i chos rnams gang dag yongs su shes par bya ba dang / kun nas nyon mongs pa'i chos rnams gang dag dang du mi len cing rnam par gnon pas thog mar spang bar bya ba dang / bar du gcod pa'i chos rnams gang dag mngon par rtogs pa'i mthar thug par 'gro ba dang / mi mthun pa dang / mthun pa'i chos rnams gang dag mngon par rtogs pa'i mthar thug par 'gro ba dang mthun pa dang / mtshan nyid la dmigs pa de bzhin nyid du gtogs pa'i chos rnams gang dag so sor khong du chud par bya ba dang / yon tan khyad par can du gtogs pa'i chos rnams gang dag par bya ba dang / 'jig rten dang mthun par bya ba'i chos rnams gang dag so sor bsten pas spang bar bya ba dang / spangs nas kun du 'byung ba rnams dang / mthar phyin pa'i chos rnams gang dag bdag gi don thob pa dag gis mngon sum du bya ba'o/ /sangs rgyas kyi bka' shes bya'i gnas gang zhe na/ sems can gnas pa gsum ste/ nyin gcig bzhin du gnas pa dang / tshe'i tshad ji srid pa'i bar du gnas pa dang / tshe rabs rgyud du dge ba'i chos rnams la gnas pa ste/ dang po ni kha zas kyi dbang gis byung ba'o/ /gnyis pa ni srog gi dbang po'i 'du byed kyi dbang gis byung ba'o/ /gsum pa ni dge ba'i chos rnams la bag yod pa las byung ba'o/ /mi dge ba dang / lung du ma bstan pa'i chos rnams la yang bag yod pa yod de/ 'di lta ste/ kha cig srog chags bsad pa la sogs pa dang / spyod lam dang bzo'i gnas la sogs pa lhur len pa lta bu dag ste/ dge ba'i chos la bag yod pa gang yin pa de ni/ tshe 'di nyid la mya ngan las 'das pa'i bar du 'grub par byed la/ tshe phyi ma la yang bde 'gror 'gro bar byed pa'i phyir/ gces spras byed pa yin no/ /sems can gyi 'jig rten dang / snod kyi 'jig rten las brtsams pa'i spros pa thams cad sdud par 'gyur ba'i chos gnyis te/ 'dzin pa'i chos dang / de'i gnas te gzung ba'i chos so/ /'jig rten rnams kyi kun nas nyon mongs pa'i rtsa ba gnod pa dang / phan pa ma yin pa dang / kun nas nyon mongs par 'gyur ba ni gnyis te/ de kho na mi rtogs pa dang / de sngon du 'gro ba'i gnod pa 'dod pa'o/ /'di las phyi rol pa'i dge sbyong dang bram ze rnams kyi kun nas nyon mongs pa'i rtsa ba ni gnyis te/ 'jig tshogs la lta ba'i dbang du byas nas/ bdag rtag par rtog pa dang / chad par rtog pa'o/ /sems can rnams kyi sdug bsngal gyi rtsa ba ni gnyis te/ zag pa dang bcas pa'i chos rnams la dga' ba dang ldan pas don du gnyer ba dang / rigs pas bskyed pa ma yin pa skyo bar bya ba dang ldan pa don du gnyer ba'o/ /ston pa po dang nyan pa po rnams kyi gdams ngag bstan pa la mi mthun pa'i chos ni gnyis te/ nyan pa pos kyang tshig mi bzod la/ ston pa po yang phyin ci log tu lta zhing log par zhugs pa'o/ /de las bzlog pa'i dkar po'i phyogs kyang chos gnyis su rig par bya'o/ /'jig rten pa dang / 'jig rten las 'das pa'i legs pa'i tshul yang dag par spyod pa'i mtshams las 'das par 'gyur ba'i chos ni gnyis te/ bdag nyid kyi chos kyi dbang las byung ba'i sgo nas 'bras bu mi sdug pa la mi lta bas kha na ma tho ba la mi 'dzem pa dang / gzhan gyis bsad pa dang / bcing ba dang / sma dbab pa dang / smad pa la mi lta bas tshe 'di'i kha na ma tho ba la mi 'dzem pa'o/ /de las bzlog pa'i dkar po'i phyogs kyi chos kyang gnyis su rig par bya'o/ /tshegs med pa dang 'bras bu yod par tshangs par spyod cing gnas par 'gyur ba ni bcas pa gnyis te/ yang dag par bslab pa'i gzhi bcas gang las 'gal bar byas nas/ kha na ma tho ba chen po 'byung bar 'gyur ba dang / 'gal ba byas nas slar yang dag par nges par 'byung bar bcas pa'o/ /bya ba byas pa rnams kyi bdag dang pha rol la phan par 'gyur ba'i chos ni gnyis te/ dben pa na gnas shing sems mnyam par gzhag pa/ tshe 'di la bde bar gnas pa dang / 'du 'dzi'i nang na gnas na yang / rigs kyi bu chos 'dod pa rnams la dus dus su dam pa'i chos ston cing dam pa'i chos la rtog pa'o/ /so so rang gi tshul bzhin yid la byed pa'i rgyu las byung ba dang / pha rol gyi sgra'i rgyu las byung bas/ tshe 'di la bden pa mngon par rtogs par 'gyur ba'i chos ni gnyis te/ phyi ma la dbang po yongs su smin par byas pa'i phyir/ /rgyu las byung ba'i chos rnams kyi yang dag pa'i rgyu so sor rtog pa dang / de bzhin gshegs pas gsungs pa'i mdo sde zab mo zab par snang ba stong pa nyid dang ldan zhing / rkyen 'di'i rten cing 'brel par 'byung ba dang / mthun pa rnam par rgyun du yid la byed pa'o/ /gang zag dbang po yongs su smin pa'i mngon par shes pa myur bar 'gyur ba'i chos ni gnyis te/ gdams ngag rjes su bstan pa ni/ sgyu dang g.yo med pa dang / skyo ba sngon du 'gro ba'i lus dang / ngag dang yid rgod pa med pa spyod pa'o/ /tshangs pa mtshungs par spyod pa rnams dang lhan cig tu 'khod pa nas / gcig la gcig 'grogs na bde bar 'gyur ba'i chos ni gnyis te/ gzhan gyis gnod par byas pa bzod pa dang / bdag nyid kyang gzhan la gnod par mi byed pa'o/ /tshangs pa mtshungs par spyod pa rnams dang lhan cig tu 'khod pa na/ rtsod pa ma byung pa rnams 'byung bar mi 'gyur ba dang byung ba rnams zhi bar bya ba dang / 'thab pa med pa dang / mtshang 'bru ba med pa dang / 'gyed pa med pa dang / rtsod pa med par 'gyur ba'i chos ni gnyis te/ gcig la gcig byams pa'i sems dang ldan pa dang / chos dang zang zing thun mong du longs spyod cing gnas pa'o/ /myur ba myur bar sems gnas par 'gyur ba dang / ting nge 'dzin thob par 'gyur ba dang / tshangs par spyod pa yongs su dag par gnas par 'gyur ba'i chos 'di ni gnyis te/ sngon byas pa dang / sngon smras pa rnams dran pa'i dbang du byas nas / nyes pa'i gnyen po chos bzhin du byed cing / nyes pa med pa la yang dga' ba dang / mchog tu dga' ba de nyid kyi rjes su slob cing nyin mtshan 'da' bar byed pa dang / lus dang ngag dang yid kyi las kyi mtha' thams cad so so yang dag par rtog pa'i dbang du byas nas/ nyes pa mi byed de/ rgyu des 'gyod pa med cing / mchog tu dga' la/ dga' ba nas rnam par grol ba'i ye shes mthong ba'i bar du rgyas par sbyar ba'o/ /sdug bsngal thams cad las yang dag par 'da' bar 'gyur ba 'di lta ste/ ngan song gi sdug bsngal las yang dag par 'da' bar 'gyur ba dang / 'khor ba'i sdug bsngal las yang dag par 'da' bar 'gyur ba'i chos ni gnyis te/ tshe 'di dang tshe phyi ma'i nyes dmigs mthong nas nyes par spyod pa spong ba dang / mnyam par gzhag pa'i sems kyis byang chub kyi phyogs kyi chos rnams goms par byed pa'o/ /spong ba pa rab tu dben pa na gnas pa/ bde ba la reg par gnas par 'gyur ba'i chos ni gnyis te/ yul la kun nas nyon mongs pa med pa las byung ba/ rtog pa ngan pas sems ma dkrugs pa dang / kha zas phan pa dang / dran pa dang / zhu ba'i 'og tu za zhing spong ba dang mthun par lus las su rung ba'o/ /dge slong dge ba'i phyogs la brtson pa'i dus 'da' bar byed pa 'bras bu yod par 'gyur ba'i chos ni gnyis te/ dbang po'i yul du gtogs pa la/ yang dag pa'i chos rab tu rnam par 'byed pa la brtson pa dang / dus su ran par gnyid log par byed pa'o/ /lhag pa'i sems dang / lhag pa'i shes rab kyi bslab pa nyams par 'gyur ba'i chos ni gnyis te/ log pa'i bslab pa 'cha' zhing / yang dag pa'i bslab pa las 'gal bar byed pa dang / yid gnyis dang yang bcas la/ sgro btags pa dang / skur pa'i log par lta ba la yang nges pa'o/ /de las bzlog pa'i dkar po'i phyogs kyi chos kyang gnyis su rig par bya'o/ /gang zag tshogs ni bsags la mngon par rtogs pa ni med pa'i bden pa mngon par rtogs par 'gyur ba'i chos ni gnyis te/ bdag dang pha rol gyi da ltar dang 'das pa'i rgud pa dang / 'byor pa yid la byed pa dang / rnam par rtog pas bden pa yang dag par yid la byed pa'o/ /rnal 'byor pa rnams kyi shin tu mthar thug pa dang / shin tu dri ma med pa dang / tshangs par spyod pa shin tu mthar phyin par 'gyur ba'i chos ni gnyis te / bden pa mngon par rtogs pa dang / gong du yang 'dod chags dang bral ba la brtson zhing snyoms par 'jug pa thams cad kyi ro myang ba'i gnas ma yin pa'o/ /rnal 'byor pa rnams kyi 'jig rten pa dang / 'jig rten las 'das pa'i yon tan thams cad mngon par bsgrub par 'gyur ba'i chos ni gnyis te/ sems gnas pa rnam pa dgu dang / sems mnyam par gzhag pa'i chos rab tu rnam par 'byed pa'i gzhi drug ste/ 'di lta ste/ nyan thos kyi sa las 'byung ngo / /rnal 'byor pa rnams kyi rnam par dag pa ni gnyis te/ yid la byed pa rnam par dag pa dang / rten rnam par dag pa ste/ yid la byed pa rnam par dag pa ni/ dus gsum gyi gti mug dang bral bas ye shes rnam par dag pa'o/ /rten rnam par dag pa ni khams gsum pa'i nyon mongs pa'i phyogs kyi gnas ngan len dang bral ba'o/ /dgra bcom pa sems shin tu rnam par grol ba'i so so rang gis rig par 'gyur ba'i chos ni gnyis te/ tshe 'di la sdug bsngal gyi rgyu zad pa dang / de sngon du 'gro ba phyi ma la sdug bsngal gtan mi skye ba'o/ /sangs rgyas kyi bka'i shes bya'i gnas gnyis gnyis pa rdzogs so/ / // sems can rnams la sems can rnams kyi log par bsgrub pa ngan 'gror 'gro bar 'gyur ba ni rnam pa bcu dang / sgo gsum dang / rnam pa gsum dang / rtsa ba gsum mo/ /de la rnam pa bcu po ni 'di dag yin te/ srog dang / longs spyod pa dang / chung ma ma rung bar byed pa dang / bden pa'i don dang / mdza' bo dang / bsngags pa dang / bya ba ma rung bar byed pa dang / yid kyi rnyog pa rnam pa gsum ste/ gzhan gyi longs spyod pa bdag gir bya bar 'dod pa dang / pha rol mi 'dod pa dang / phrad par 'dod pa dang / skur pa 'debs pa'i lta ba ngan pa'o/ /de la sgo gsum ni 'di dag yin te/ bya ba ma rung bar byed pa dang / bsam pa ma rung bar byed pa dang / sbyor ba ma rung bar byed pa ste/ rnam pa bcu po de dag nyid las bdun ni bya ba ma rung bar byed pa'o/ /gnyis ni bsam pa ma rung bar byed pa'o/ /tha ma ste/ lta ba ngan pa gcig ni sbyor ba ma rung bar byed pa ste/ 'di ltar lta ba ngan pa las ni sdig pa kun du spyod par mi 'gyur ba'i ngo tsha shes pa gang yin pa dang / snying rje gang yin pa de 'byung bar mi 'gyur te/ de ngo tsha mi shes shing / snying rje med pas sdig pa la sbyor ro/ /de la rnam pa gsum ni 'di dag yin te/ lus kyi dang / ngag gi dang / sems las byung ba'i 'o/ /de la rtsa ba gsum ni 'di dag yin te/ bdag la phan par bya ba'i rgyu dang / gzhan dag la gnod par bya ba'i rgyu dang / pha rol la phyin ci log pa ste/ 'di lta ste/ chos ma yin pa la chos su 'du shes pa dang / bya ba ma yin pa la bya bar 'du shes pa lhag par spyod pa'o/ /dbang po ma bsdams par 'gyur ba'i chos ni gsum ste/ log pa'i sa bon rten la yod pa dang / mtshan ma ngan pa 'dzin pa yul la yod pa dang / lkog na rtog pa ngan pa'o/ /rnam pa gsum po de dag kyang 'dod pa la 'dod chags dang / gnod sems dang / rnam par 'tshe ba'i phyogs yin par rig par bya'o/ /rtog pa ngan pa gsum ni/ gnas bzhi la brten nas 'byung bar 'gyur te/ bdag nyid kyi 'jig rten gyi chos dkar po'i phyogs rnyed pa la sogs pa bzhi po rnams 'thob pa'am/ chud mi za ba la brten nas/ 'dod pa la rtog pa 'byung bar 'gyur ro/ /mi mdza' ba dang / tha mal pa'i phyogs la brten nas/ 'di ni mchog tu bgegs byed pa yin no snyam ste/ gnod sems kyi rtog pa 'byung ngo / /mdza' bo'i phyogs la brten nas/ rnam par 'tshe ba'i rtog pa 'byung ste/ 'di ltar skye bo dag ni mdza' bo'i phyogs las brgya la nyes pa zhig byung na/ skye bo la thams cad kyi thams cad du phung bar bya bar 'dod pa mi skye ste/ gnod pa'i sbyor ba chung ngus gnod par bya bar 'dod pa tsam nyi tsher zad do/ /de las bzlog pa dkar po'i phyogs kyang de bzhin du ci rigs par rig par bya'o/ /sa bon thams cad ni mdor bsdu na/ sa bon bzhir 'dus te/ 'jig rten pa dang / 'jig rten las 'das pa dang / ma dag pa'i sa bon dang / dag pa'i sa bon no/ /de la 'jig rten pa'i ni 'dod pa dang gzugs dang gzugs med pa dang ldan pa'i 'du byed rnams kyi sa bon gang yin pa'o/ /'jig rten las 'das pa'i ni theg pa gsum po dag gis 'phags pa'i lam yan lag brgyad pa 'bras bu dang bcas pa thob par 'gyur ba'i sa bon gang yin pa'o/ /ma dag pa'i sa bon ni 'dod pa dang ldan pa'i 'du byed rnams kyi yin par rig par bya'o/ / dag pa'i sa bon ni rnam pa gnyis te/ 'jig rten pa'i dag pa dang / 'jig rten las 'das pa'i'o/ /de la gzugs dang gzugs med pa dang ldan pa'i 'du byed rnams kyi sa bon gang yin pa de ni 'jig rten pa'i'o/ /'phags pa'i lam yan lag brgyad pa 'bras bu dang bcas par 'thob par 'gyur ba gang yin pa de ni 'jig rten las 'das pa'i'o/ /gsum po 'di dag ni rgyu las 'byung ba'i chos zag pa dang bcas pa rnams kyi rgyu ste/ tshul bzhin ma yin pa la brtson pa rnams kyi sdug bsngal 'byung bar 'gyur ba dang / tshul bzhin la brtson pa rnams kyi sdug bsngal gyi rgyu yongs su shes nas spong par 'gyur ba ste 'dod pa dang ldan pa dang / gzugs dang gzugs med pa dang ldan pa'i chos rnams la nyon mongs pa can gyis don du gnyer ba'o/ /nyon mongs pa'i rnam pa gsum po 'di dag ni/ sems can rnams 'khor ba na 'khor bar 'gyur ba ste/ nyon mongs pa'i rnam pa dang po ni/ 'dod pa khyad par can mngon du 'dod pa rnams kyi'o/ /gnyis pa ni gzugs dang gzugs med pa'i khams su lus kyi khyad par can mngon du 'dod pa rnams kyi'o/ /gsum pa ni log pa'i thar pa mngon du 'dod pa rnams kyi'o/ /gsum po 'di dag ni sems can rnams kyi las kyi mtha'i sbyor ba bdun pa'i gzhi las byung ba ste/ 'dod pa khyad par can thob par bya ba dang / lus khyad par can thob par bya ba dang / thar pa'i lam thob par bya ba'o/ /gsum po 'di dag ni khams gsum du sems can rnams kyi lus 'dzin pa'i phyir 'du byed rnams kyi rgyu yin te/ 'phen pa dang / 'thob par byed pa dang / yongs su grub pa ste/ 'phen pa ni las so/ /'thob par byed pa ni dri za nye bar gnas pa'o/ /yongs su grub pa ni gang du gnas na las dge ba dang / mi dge ba rnams kyi rnam par smin pa so sor myong ba'o/ /gsum po 'di dag ni sems can rnams kyi ma rig pa'i phung po ste/ gang dag gis ma rig pa dang ldan pa rnams kyi dus gsum gyi lus las mngon par 'grub par 'gyur ba ste/ 'das pa'i dus na sngon gyi mtha' la sogs pa mi shes pa ni/ da ltar byung ba'i lus mngon par 'grub par 'gyur ba'o/ /da ltar byung ba'i dus na/ sngon gyi mtha' la sogs pa mi shes pa ni ma 'ongs pa'i'o/ / ma 'ongs pa'i dus na sngon gyi mtha' la sogs pa mi shes pa ni ma 'ongs pa nyid kyi phyi ma phyi ma'i lus mngon par 'grub par 'gyur ba'o/ /gsum po 'di dag ni 'phags pa'i mthar thug par gyur pa ma yin pa rnams kyi 'khor ba'i gnod pa dang / so so'i skye bo dang thun mong ba ste/ nad med pa ma rung bar byed pa dang / lang tsho ma rung bar byed pa dang / 'tsho ba ma rung bar byed pa ste / de dag ma 'ongs pa na rjes su 'brang bar yang dag par mthong ba'i mkhas pa rnams kyis de dag las myur ba myur bar rgyags pa gsum spangs te/ tshe 'di nyid la yongs su mya ngan las 'da' bar byed pa'i phyir brtson par bya'o / /gsum po 'di dag ni sems can rnams kyi 'dod chags dang zhe sdang dang gti mug gi 'ching ba'i gnas dang / rten gyi gnas skabs yin te/ de dag ni sems can 'khor ba'i btson rar bcug pa rnams bcing ba dam pos 'ching bar 'gyur te / phan 'dogs pa dang / gnod par byed pa dang / mnyam pa de gnyi ga med pa'o// //bam po bcu drug pa/ sems can rnams kyi sdug bsngal ni/ sdug bsngal gyi gnas gsum gyis bsdus pa yin te/ phrad pa las de dag byung ba dang / bral ba las byung ba dang / rtag tu yod pa'o/ /de la dang po ni gnod par 'gyur ba'i gnas skabs dang phrad pa'o/ /gnyis pa ni phan 'dogs pa las yongs su 'gyur ba'o/ /gsum pa ni gnas skabs thams cad du gnas pa'i gnas ngan len gyis bsdus pa ste/ 'du byed rnams ni de lta bu'i tshul du 'byung ba'i phyir ro/ /de la ni 'phags pa rnams kho na sdug bsngal gyi blo 'byung gi /so so'i skye bo rnams ni de lta ma yin no/ /gsum po 'di dag ni dge sbyong du byed pa thob par bya ba'i phyir brtson pa rnams kyi rgyun du 'jug pa'i yan lag dang mi mthun pa ste/ sems khengs shing dge sbyong du byed pa la bar du gcod par 'gyur ba yin gyi thob par 'gyur ba ni ma yin te/ gzhan dag dang bdag sgrun cing bdag drag go snyam du sems khengs pa dang / bdag 'dra'o snyam pa dang / bdag dma'o snyam du sems khengs pa'o/ /'du byed thams cad 'jug pa la ni sa bon gsum yod par rig par bya ste/ 'bras bu phyung zin pa dang / 'bras bu ma phyung ba dang / 'bras bu nye bar gnas pa'o/ /gsum po 'di dag ni 'du byed rnams kyi tha snyad kyi gzhi ste/ byung zin pa dang / 'byung bar 'gyur ba dang / da ltar gyi'o/ /gzugs kyi mtshan nyid thams cad ni mtshan nyid gsum du 'dus te/ kha dog dang / dbyibs dang / byed par gnas pa'o/ /mig gi rnam par shes pas bzung ba dang / de las gzhan pa'i gzugs de dag gi phyogs su 'gro ba dang / gnas la sgrib par gnas pa dbang po'i gzugs dang / yul gyi gzugs thams cad de/ de dag thams cad gcig tu bsdus na/ gzugs rnam pa bcu yod par rig par bya'o/ /mnyam par gzhag pa'i sa pa'i gzugs ni ting nge 'dzin 'thob pa sprul pa sgrub pa la sbyor ba'i gzugs gang yin pa ste/ so so rang gi sprul pa'i sems kyi yul du gyur pa sprul pa'i sems yongs su ma rdzogs pa'i 'bras bu'o/ /gsum po 'di dag ni nyon mongs pa rnams dang / rjes su 'brel ba dang bcas pa'i yin te/ so so'i skye bo'i sems dang / slob pa yongs su ma rdzogs pa'i sems dang / slob pa yongs su rdzogs pa'i sems so/ /gsum po 'di dag ni chos nyan par byed pa ste/ chos dang don gnyer ba dang / 'dzin par mi nus pa dang / len nus la 'dzin mi nus pa dang / len pa dang 'dzin par yang nus pa'o/ /rnal 'byor pa rnams kyi lus dang ngag dang yid mi rtag par rtag par bya ba la 'jug pa'i thog mar 'gro ba'i chos ni gsum du rig par bya ste/ dbugs rngub pa dang / 'byung ba rnams dang / rtog pa dang dpyod pa rnams dang / 'du shes dang sems pa'o/ /gsum po 'di dag ni khyad par du 'phags pa rim gro bya bar 'os pa yin te/ na tshod kyis lhag pa dang / rigs kyis lhag pa dang / yon tan gyis [(]ltag [,]lhag [)]pa'o/ /gsum po 'di dag ni nges pa dang ma nges pa la gnas pa'i rgyu'o/ /de la gnyis ni nges pa'o/ /gcig ni ma nges pa ste/ ngan song du nges pa ni mtshams med pa'i las so/ /bde 'gro dang / mya ngan las 'das par nges pa ni 'dus byas kyi chos zag pa med pa rnams so/ /de ma yin pa rnams ni ma nges pa'o/ /bstan pa gnas par bya ba'i phyir 'gal bar byas pa gcig la gcig brjod par 'gyur ba'i chos ni gsum ste/ bslab pa las 'gal bar byas pa'i lus dang ngag gi spyod pa mngon sum du gyur ba dang / gzhan las thos pa dang / mtshan ma gzhan las rtogs pa'o/ /de bzhin gshegs pa nyid kyi bsrung ba med pa gsum brjod pas ni/ phyi rol gyi ston pa khong na rong du srel ba/ thams cad mkhyen pa ma yin pa thams cad mkhyen par khas 'che ba rnams la yang dag par bskul bar rig par bya ste/ de dag bdag nyid la yang dag par thams cad mkhyen pa nyid yin par yid ches bskyed pa'i phyir ro/ /gsum po 'di dag ni log par mngon par zhen pa las skyes pa me chen po las byung ba sems can rnams yongs su sreg pa ste/ sred pa'i yongs su sreg pa dang / mya ngan gyi yongs su sreg pa dang / phyin ci log gi yongs su sreg pa'o/ / gsum po 'di dag ni bsod nams 'dod nas log par phyi rol gyi me la rim gro bya bar mos pa'i sems can rnams kyi rim gror bya ba don med par mi 'gyur bar bya ba'i phyir/ me ma yin par me'i sgrar brjod pa ste/ pha ma dang / bu dang / chung ma dang / yon gnas rnams so/ /mngon par mtho ba 'dod pa rnams kyi/ mngon par mthong ba'i lam bstan pa ni gsum du rig par bya ste/ longs spyod chen po'i phyir ni sbyin pa'o/ /bde 'gror 'gro ba'i phyir ni tshul khrims so/ /sdug bsngal gyi tshor ba dang bral bar bya ba'i phyir dang / gcig tu nges par bde zhing gnod pa med pa'i 'jig rten du skye bar bya ba'i phyir ni bsgom pa'o/ /'dod pa gsum gyis ni 'dod pa can thams cad kyi chung ngu dang 'bring dang / khyad par du 'phags par 'gyur bar rig par bya ste/ 'dod pa las skyes pa'i bde ba la brten nas/ tshegs che zhing rkyen la rag las pa 'di lta ste/ 'dod pa nye bar gnas pa rnams kyi'o/ /tshegs chung zhing sems la rag las pa ni 'di lta ste/ 'dod pa sprul pa rnams kyi'o/ /tshegs chung zhing sems la rag las pa ni 'di lta ste/ 'dod pa gzhan kyi sprul pa rnams kyi'o/ /rnam pa gsum gyi 'dod chags pa las yang dag par 'das pa'i bde ba chung ngu dang / 'bring dang / khyad par du 'phags par 'gyur bar rig par bya ste/ rtog pa dang bcas/ dpyod pa dang bcas pa'i dga' ba dang / rtog pa yang med dpyod pa yang med pa'i dga' ba dang / /dga' ba med pa'i bde ba'o/ /shes bya khong du chud pa rnam pa gsum ni theg pa gsum po dag gis sdug bsngal thams cad las nges par 'byung bar 'gyur ba ste/ gzhan gyi sgra'i rgyu las byung ba dang / so so rang gis dpyad pa'i rgyu las byung ba dang / zhi gnas dang lhag mthong la goms pa'i rgyu las byung ba'o/ /gzhan yang shes bya khong du chud pa gsum yod de/ 'ching ba mtha' dag yod pa dang / 'ching ba nyams pa dang / 'ching ba thams cad kyi thams cad du med pa'o/ /rnal 'byor pa rnams kyi bya ba gsum bya ba'i phyir rnam pa gsum gyi dbang du byas nas/ dad pa la sogs pa dge ba'i chos bsgom par rig par bya ste/ mthong bas spang bar bya ba'i nyon mongs pa rnams spangs pas rgyun du zhugs pa'i 'bras bu 'thob pa dang / bsgom pas spang bar bya ba'i nyon mongs pa rnams spangs pas lan cig phyir 'ong ba dang / phyir mi 'ong ba dang / dgra bcom pa nyid kyi 'bras bu thob pa dang / dgra bcom pa nyid thob nas kyang tshe 'di la bde bar gnas par 'gyur ba'o/ /cha gsum gyis shes bya thams cad la lta ba'i dbang du byas nas/ mig gsum rnam par gzhag par rig par bya ste/ sha'i mig gis ni gzugs snang ba dang / bar du ma chod pa dang / bstan du yod pa mthong ngo / /lha'i mig gis ni gzugs snang ba dang / mi snang ba dang / bar du chod pa dang / ma chod pa mthong ngo / /shes rab kyi mig gis ni gzugs can dang gzugs can ma yin pa'i chos thams cad kyi rnam pa thams cad mthong ngo / /chos gsum po 'di dag ni nyon mongs pa phyir rgol ba kun du 'byung ba 'joms par 'gyur ba ste/ gzhan las yid ches pa dang / khyim pa rab tu byung ba rnams dang mi 'dre bar gnas pa dang / so so rang gis shes bya'i de kho na rtogs pa'o/ /yang dag par rjes su bstan pa'i sbyor ba rnam pa gsum ni mya ngan las 'das pa thob par bya ba la gong nas gong du rtogs par 'gyur ba ste/ tshul khrims dang / sems gnas pa dang / shes bya'i de kho na rtogs pa'o/ /yang dag par rjes su bstan pa'i sbyor ba rnam pa gsum yod pa bzhin du yang dag par rjes su bstan pa'i sbyor ba la goms par bya ba yang de bzhin du rig par bya'o/ /yang dag par rjes su bstan pa'i sbyor ba la gnas pa'i bde ba la reg par gnas par 'gyur ba'i chos gsum ste/ stong pa nyid dang / smon pa med pa dang / mtshan ma med pa dang / 'gog pa'i snyoms par 'jug pa rnams dang / bsam gtan bzhi dang / tshad med pa bzhi'o/ /mdor bsdu na/ sems rtse gcig pa rnam pa gsum ni/ yang dag par ji lta ba bzhin du ye shes mthong bar 'gyur ba ste/ yid la brjod pa'i tshe dmigs pa rnam pa sna tshogs tha dad pa la spyod pa'i rnam pa dang / yid la brjod pa'i mjug thogs su dmigs pa rnam pa sna tshogs tha dad pa la spyod pa'i rnam pa dang / yid la brjod pa 'das pa'i 'og tu sems rtse gcig pa dmigs pa rnam pa sna tshogs ma yin zhing tha dad pa ma yin pa la spyod pa'i rnam pa'o/ /gnas gsum ni skye mched ngan pa la log par che ba'i bdag nyid du mos pa rnams dang / 'dul ba tha mal par gnas pa rnams bzlog par bya ba dang / bstan pa la 'dun par byed pa ste/ bdag gi mthu yang dag par bstan pa dang / pha rol gyi kun nas nyon mongs pa dang / rnam par byang ba'i spyod pa dang / byed du gzhug pa dang / dam pa'i chos bstan pas yang dag par 'doms shing rjes su ston pa'o/ /gtsang bar 'dod pas 'bab stegs kyi chus phyi rol gyi dri ma re zhig bsal ba tsam gyis bdag gtsang mar 'dzin pa rnams kyi log pa'i nga rgyal de spang ba'i phyir/ yang dag pa'i gtsang ma gsum rnam par gzhag par rig par bya ste/ mi gtsang ba'i gnas su skyes pa las yang dag par 'da' ba'i rgyu yin pa'i phyir ro/ /thub pa'i brtul zhugs can dag bsdams pa tsam gyis bdag nyid thub pa yin par log par 'dzin pa rnams/ phyin ci ma log pa'i thub pa'i rang bzhin bstan pa'i phyir/ thub par bya ba gsum rnam par gzhag par rig par bya ste/ de yang 'phags pa dgyes pa'i tshul khrims kyis bsdus pa'i lus dang ngag gi las dang / zag pa med pa'i sems so/ /chos gsum po 'di dag ni rab tu dben pa na gnas pa'i rtog pa ngan pa kun du 'byung ba spang bar 'gyur te/ pha rol gyis spyad pa dang / bdag nyid smod pa dang / don chen po nyon mongs par 'gyur ba'i dbang du byas te/ khrel yod pa dang / ngo tsha shes pa dang / gces par 'dzin cing gus par byed pa'o/ /lam dang lam gyi 'bras bu las brtsams te/ dam pa bla na med pa gsum yod par rig par bya ste/ mi rtag pa dang sdug bsngal shes pa bas bdag med pa shes pa dang lam bzhi las sla la mngon par shes pa myur ba dang / 'jig rten pa dang / 'jig rten las 'das pa dang / /slob pa dang mi slob pa'i dus kyis rnam par grol ba thams cad las sems rnam par grol ba mi bskyod pa dam pa bla na med pa yin te/ rnal 'byor pas thog ma kho nar ye shes thob par 'gyur ro/ /ye shes kyi nyon mongs pa spong ba bsgrub pa'o / /bsgrubs na sems rnam par grol bar 'gyur ro/ /sngon dang phyi ma dang / dbus kyi mtha' rnams la rtag pa dang / chad pa dang / mthar nyes pa 'dzin cing / tshe 'di la mya ngan las 'da' ba la kun du rmongs pa'i dge sbyong dang bram ze rnams ma rig pa la gnas par bstan pa'i phyir rig pa gsum rnam par gzhag par rig par bya'o/ /sangs rgyas kyi bka'i shes bya gnas gsum gsum pa rdzogs so/ / //chos bzhi po 'di dag ni shes bya dang / shes par bsdu bar 'gyur ba yin te/ lus dang / thos pa dang / bsam pa dang / bsgom pa'i dbang du byas nas/ dran pa nye bar gnas pa la brten te/ lus la dmigs pa'i shes rab bo/ /lus dang lus la dmigs pa'i shes rab ji lta ba bzhin du/ tshor ba dang / sems dang / chos dang / de dag la dmigs pa'i shes rab kyang de dang 'dra bar rig par bya'o/ /rnam grangs gzhan yang sems kyi 'ching ba ni bzhi ste/ nye bar len pa'i 'ching ba dang / myong ba'i 'ching ba dang / rnam par rig pa'i 'ching ba dang / der mngon par zhen pa'i 'ching ba'o/ /de la nye bar len pa'i 'ching bas ni lus la sems bcings so/ /nang gi myong ba'i 'ching bas ni tshor ba rnams la bcings so/ /rnam par rig pa'i 'ching bas ni gzugs la sogs pa yul gyi mtshan ma rnams la bcings so/ /'dod chags la sogs pa nyon mongs pa dang nye ba'i nyon mongs pa rnams kyis ni/ mngon par zhen pa'i 'ching bas ji skad du bstan pa'i lus la sogs pa de dag nyid la bcings te/ 'ching ba bzhi po dag gi gnyen po ni dran pa nye bar gzhag pa bzhi yin par rig par bya'o / /bzhi po 'di ni nyes dmigs la rtog pa dang / gnyen po'i gzhir gyur cing 'dun pa dang / rtsol ba sngon du 'gro ba ste/ mi dge ba'i chos kun du spyod par 'gyur ba spang ba'i phyir dang / de dang ldan pa spang ba'i phyir dang / dge ba'i chos thob par bya ba'i phyir dang / de 'phel par bya ba'i phyir ro/ /bzhi po 'di dag ni sems gnas par bya ba dang / ting nge 'dzin 'thob par bya bar brtson pa'i sems gnas par 'byor bar 'gyur ba'i skye ba'i sgo yin te/ mngon par 'byung bar 'dun pa dang / lung mnod pa dang / kha ton bya ba dang / slob pa la brtson pa dang / ting nge 'dzin bzang po'i mtshan ma 'dzin pa'i sems dang / dben pa na gnas shing chos dpyod pa'o/ /bzhi po 'di dag ni sems mnyam par gzhag pa/ sems gnas par 'gyur ba ste / rtog pa dang bcas dpyod pa dang bcas/ dga' ba dang bcas pa'i sems gnas pa dang / rtog pa med cing dpyod pa med pa la dga' ba dang bcas pa dang / dga' ba med pa dang / btang snyoms dang / dran pa yongs su dag pa dang / bde ba dang sdug bsngal las yang dag par 'das pa'o/ /bzhi po 'di dag ni kun nas nyon mongs pa dang / rnam par byang ba'i phyogs kyi de kho na shes par bya ba ste/ de dag shes na mthong ba dang bsgom pas spang bar bya ba'i nyon mongs pa rnams spong bar 'gyur te/ nyon mongs pa'i phyogs kyang 'bras bu'i de kho na dang / rgyu'i de kho na'o/ /rnam par byang ba'i phyogs kyang 'bras bu'i de kho na dang / rgyu'i de kho na'o/ /bzhi po 'di dag ni 'du shes sngon du 'gro ba'i spros pa'i 'ching ba ste/ 'dod pa chung ngu rnams la 'du shes sngon du 'gro ba'i spros pa'i 'ching ba dang / gzugs chen por gyur pa rnams la 'du shes sngon du 'gro ba'i spros pa'i 'ching ba dang / nam mkha' dang rnam shes mtha' yas skye mched tshad med pa la 'du shes sngon du 'gro ba'i spros pa'i 'ching ba dang / ci yang med pa'i skye mched la/ 'du shes sngon du 'gro ba'i spros pa'i 'ching ba'o/ /chos bzhi po 'di dag ni/ sems can rnams la gnod sems dang / rnam par 'tshe ba dang / mi dga' ba dang / 'dod pa la 'dun pa'i gnyen por bsgoms na bsod nams chen po 'phel ba dang / 'dod pa'i 'dod chags dang bral bar 'gro bar 'gyur ba ste / byams pa dang / snying rje dang / dga' ba dang / btang snyoms so/ /chos bzhi po 'di dag ni gzugs kyi khams las 'da' zhing / ring du 'gro bar 'gyur ba ste/ nam mkha' dang / rnam par shes pa dang / ci yang med pa dang / 'du shes med 'du shes med min skye mched rnams so/ /bzhi po 'di dag ni rnal 'byor pa rnam par grol ba yongs su rdzogs par bya bar brtson pa'i 'phags pa'i rnam par grol ba'i rgyu gang gi rten lta bu'i chos rnams te/ sred pa bzhi spang ba'i dbang du byas nas don nyung ba chos gos kyi phyir dang / kha zas kyi phyir dang / mal cha dang / stan gyi phyir rtsol bar mi byed cing g.yeng bar mi byed pa dang / dus su sbyor ba 'bras bu yod par byed cing sems rnam par g.yeng ba med pa'i nyon mongs pa spong ba'i lam bsgom pa la dga' ba'o// bzhi po 'di dag ni lam bsgom pa'i 'bras bu nyon mongs pa spong ba yin te/ mthong bas spang bar bya ba'i nyon mongs pa rnams spong ba dang / bsgom pas spang bar bya ba rnams spong ba dang / 'og ma'i cha dang mthun pa chen po dang / 'bring rnams dang / de dag nyid ma lus par spong ba dang / gong ma'i cha dang mthun pa rnams ma lus par spong ba'o/ /rgyun du zhugs pa'i yan lag bzhi po 'di dag ni/ bstan pa 'di dang / bde 'gro las bsam gtan du mi g.yo bar 'gyur ba ste/ ston pa de kho na rtog pa las byung ba'i sems dang ba mi g.yo ba dang / ston pa la ji lta ba bzhin du chos dang / chos de gang dag gis rtogs pa dang / de rtogs par bya ba'i phyir zhugs pa rnams la yang de dang 'dra ste/ 'di gsum ni sems dang po'o/ /bzhi pa ni gzugs dang ba ste/ 'phags pa dgyes pa'i tshul khrims su gtogs pa'o/ / de la gsum ni bstan pa las mi g.yo bar 'gyur ba'o/ /tha ma gcig ni bde 'gro las mi g.yo bar 'gyur ba'o/ /bzhi po 'di dag ni rgyun du zhugs pa'i 'bras bu thob par bya ba'i yan lag ste/ ston pa po dang / 'doms pa mgu bar byed pa dang / phyin ci ma log pa'i chos bstan pa dang / 'doms pa nyan pa dang / de yang dag pa'i bsam pas rtogs par byed pa dang / bsgom pas bsgrub pa'o/ /shes pa bzhi po 'di dag ni shes pa thams cad sdud par 'gyur ba ste/ gcig tu nges par zag pa med pa'i chos rnams la mngon sum gyi shes pa dang / lkog tu gyur pa'i shes pa dang / gcig tu nges par zag pa dang bcas par rigs pas bskyed pa dang / rigs pas bskyed pa ma yin pa dang / rigs pa yang ma yin rigs pa ma yin pa yang ma yin pas bskyed pa'i 'jig rten pa'i shes pa dang / pha rol gyi sems kyi rnam grangs shes pa zag pa dang bcas pa dang / zag pa med pa'o/ /'jug pa dang ldog pa'i phyogs kyi de kho na 'dzin pa'i shes pa bzhin 'di dag ni zag pa thams cad spong bar 'gyur ba ste/ 'jug pa'i phyogs kyi 'bras bu'i de kho na shes pa dang / rgyu'i de kho na shes pa dang / ldog pa'i phyogs kyi 'bras bu'i de kho na shes pa dang / rgyu'i de kho na shes pa'o/ /chos bzhi po 'di dag ni dad pa can gyi nyon mongs pa spong ba las brtsams nas yang dag pa'i sbyor bar 'gyur ba ste/ rgyun du chud pa dang / gus par bya ba'i brtson 'grus dang / shes bzhin du spyod pa'i dran pa dang / zhig nas dang / lhag mthong ngo / /bzhi po 'di dag ni chos so sor rtog par byed cing / gong du yang zag pa zad par 'gyur ba'i gnas yin te/ 'phags pa'i lam thob par bya ba'i zag pa dang bcas pa'i shes rab dang / thob nas kyang nyon mongs pa 'bri bar 'gyur ba dang / dngos po 'bri bar 'gyur ba dang / nyon mongs pa dang dngos po ma lus par spang ba'i phyir lam thob pa ji lta ba bzhin du goms par byed pa'o/ /chos bzhi po 'di dag ni mtshungs par ldan pa dang / dmigs pa dang bcas pa dang / 'dres par 'dug pa dang / dmigs pa gcig tu 'dug pa ste/ tshor ba dang / 'du shes dang / 'du byed rnams dang / rnam par shes pa'o/ kun nas bsrung ba rnam pa bzhi ni/ bstan pa la zhugs pa rnams bstan pa la mngon par dga' bar 'gyur ba ste/ srog kun nas bsrung ba dang / stobs kun nas bsrung ba dang / sems kyi kun nas nyon mongs pa kun nas bsrung ba dang / yang dag pa'i sbyor ba kun nas bsrung ba'o/ /bzhi po 'di dag ni yang dag pa'i lta ba thob par bya ba dang / rig pa'i don la dpyod pa'i gnas yin te/ rnam pa gsum gyis ni spyod pa dag par 'gyur ro/ /gcig gis ni gnas pa dag par 'gyur te/ dbang po'i sgo bsrungs pas yul la ngo mi chod par yang mi byed pa dang / zhe 'gras par yang mi byed pa dang / dbang po'i sgo bsrung ba'i phyir dran pa'i dbang du byas te/ shes bzhin du spyod pa dang / rab tu dben pa na gnas pa'i sems rtse gcig pa kun nas nyon mongs pa med pa'o/ /rnam pa bzhis rig pa dang / rnam par grol ba mngon sum du byed par rig par bya ste/ dran pa dang / mig dang / shes rab kyis ni rig pa mngon sum du byed do/ /lus kyis ni mi bskyod pa'am/ dus kyis rnam par grol ba mngon sum du byed do/ /chos bzhi po 'di dag ni rgyu las byung ba'i gzugs chen po rnam pa du ma 'jug pa'i rten du 'byung ba ste/ sra ba nyid dang / gsher ba nyid dang / tsha ba nyid dang / yang zhing g.yo ba nyid do/ /chos bzhi po 'di dag ni sems can byung ba rnams gnas pa'i gzhi dang / 'byung bar 'dod pa rnams la phan 'dogs pa ste/ 'di lta ste/ gzhi bsdu ba las 'byung ba bzhin no/ /bzhi po 'di dag ni 'khor ba na rnam par shes pa'i rgyun 'jug pa'i gnas yin te/ gzugs mthong bas nye bar 'gro ba dang / sred pas dmigs par 'gyur ba dang / rten du yul 'grogs pas gnas pa dang / de la rnam par shes pa gnas nas nyon mongs pa can gyi yid bde ba dang lhan cig tu 'jug ste/ des na yang srid par 'dzag go/ /gzugs la ji lta ba bzhin du tshor ba dang / 'du shes dang / 'du byed rnams la yang de bzhin du rig par bya'o/ /dge slong ni tshe 'di'i lus dang srog la lta ba la brten nas chos gos dang / mal cha dang / stan la 'dod pa skye'o/ / tshe phyi ma'i lus dang srog la lta ba la brten nas/ yang srid pa 'dod do/ /mya ngan las 'das pa la rmongs pa la brten nas 'byor pa 'dod pa skye'o/ /de dag kyang mdor bsdu na 'dod pa rnam pa bzhir 'gyur te/ chos gos dang / kha zas dang / mal cha dang / stan dang / srid pa dang / 'byor pa la'o/ chos bzhi po 'di dag ni sems can rnams bya ba ma yin pa kun du spyod par 'gyur ba ste/ sdug pa'i dngos po'i ngo mi chod pa dang / mi sdug pa'i dngos po dang / zhe 'gras pa dang / phyir rgol ba stobs dang ldan pas 'jigs pa dang / sems phyin ci log pas tshe 'di dang phyi ma'i 'bras bu la rmongs pa'o/ /'dri ba la lung bstan pa bzhi ni/ the tshom bcad pa dang / ma rtogs pa rtogs par bya ba dang / nges pa'i stobs bskyed par 'gyur ba ste/ chos kyi mtshan nyid la ni mgo gcig gis so/ /sems can rnams kyi las kyi rnam par smin pa las ni phye bas so/ /dgongs te gsungs shing kha du mar 'gyur ba la ni yongs su dri bas so/ /tshul bzhin ma yin pa las ni gzhag pas so/ /'di la lung bstan pa zhes ji skad bya zhe na/ 'di ni bcom ldan 'das kyis lung ma bstan to zhes bya ba yod pas na 'di yang 'dir dri bar lung bstan pa zhes bya'o/ /gtong ba rnam par dag pa dang / rnam par ma dag pa ni rnam pa bzhir rig par bya'o/ /de la rnam pa gsum gyis ni rnam par dag pa ste/ bdag gi tshul khrims dang lta ba phun sum tshogs pa dang / gzhan dag gi tshul khrims dang lta ba phun sum tshogs pa dang / gnyi ga'i tshul khrims dang lta ba phun sum tshogs pa'o/ /rnam pa gcig gis rnam par ma dag ste/ bdag dang gzhan dag gi tshul khrims dang lta ba nyams pa'o/ / de la rnam par dag pa ni 'di yin te/ bde 'gror skyes pa'i yo byad phun sum tshogs pa'o/ /rnam par ma dag pa ni ngan 'gror skyes pa'i yo byad kyis phongs pa med pa'o/ /thabs rnam pa bzhi po 'di dag ni 'khor bsdu ba na 'khor yang dag par sdud par 'gyur ba ste/ phan 'dogs pa dang / sdud pa dang / 'jug par byed pa dang / yongs su dag par byed pa'o/ /bzhi po 'di dag ni sems can las kyi skye gnas pa rnams 'gro ba de dang de dag tu skye ba'i rten gyi sgo yin te/ las kyi sgo nga dang / las kyi mngal dang / las kyi drod gsher dang / las nyid do/ /de dang de dag tu sems can skyes pa rnams kyi 'chi ba'i dus byed pa ni rnam pa bzhi ste/ bdag gi kha na las pa ni 'di lta ste/ rtsed mos myos pa dang / yid 'khrug par byed pa'i lha rnams kyi nang du skyes pa'o / /gzhan gyi kha na las pa ni 'di lta ste/ mar mer po dang / nar nar po dang / gor gor po ma'i lto na 'dug pa'i 'o/ /gnyi ga'i kha na las pa ni/ de las gzhan pa'i sems can 'dod pa na spyod pa rnams kyi'o/ /bdag gi kha na las pa yang ma yin/ gzhan gyi kha na las pa yang ma yin pa ni 'di lta ste/ srid pa'i rtse mor gtogs pa man chad gzugs dang gzugs med pa na spyod pa'i sems can rnams kyi'o/ /bzhi po 'di dag ni rnam par dag pa'i lam ste/ 'bad pa'i dbang po yang ma rdzogs/ mngon par dga' ba yang ma rdzogs pa dang / 'bad pa'i dbang po ni rdzogs la mngon par dga' ba ni ma rdzogs pa dang / mngon par dga' ba ni rdzogs la 'bad pa'i dbang po ni ma rdzogs pa dang / mngon par dga' ba yang rdzogs la 'bad pa'i dbang po yang rdzogs pa'o/ /gzhan yang rnam par dag pa'i lam bzhi ste/ nyes par bshad pa'i chos 'dul ba la mi phyogs pa dang / legs par bshad pa'i chos 'dul ba la mngon du phyogs pa dang / tshogs kyi lam dang / rnam par dag pa'i lam mo/ /de la dang po ni 'di ltar 'di na kha cig phyi rol pa'i lta bar gyur pa rnams dang / gnod pa dang ldan pa'i dka' thub drag po mi 'dod cing mi bzod pa'o/ /gnyis pa ni/ 'di ltar 'di na kha cig phung po dang khams dang skye mched dang / rten cing 'brel bar 'byung ba dang / gnas dang gnas ma yin pa la mkhas shing 'dod pa dang bzod pa ste/ de yang grang ba la sogs pa bzod cing dang du len pa'i rang bzhin can no/ /gsum pa ni tshul khrims dang dbang po'i sgo bsrungs pa la sogs pa dge ba'i tshogs su gtogs pa'i chos rnams so/ /bzhi pa ni nyon mongs pa spang ba dang / tshe 'di la bde bar gnas par bya ba'i phyir zhi gnas dang lhag mthong ngo / /bzhi po 'di dag ni slob pa'i lhag pa'i sems kyi sbyor ba ste/ 'dod pa rnams las 'dod chags dang ma bral bas phyir mi 'ong ba'i 'bras bu thob par bya ba'i phyir dang / mi lcogs pa med pa la brten nas phyir mi 'ong bas/ tshe 'di la bde bar gnas par bya ba'i phyir dang / gzhan dag gi sdig pa spang bar bya ba dang bde 'gror 'gro bar bya ba'i phyir dang / bdag gi nyon mongs pa thams cad spang bar bya ba'i phyir ro/ /las gnyis ni rnam pa bzhir rig par bya ste/ 'jug par gtogs pa'i las rnam pa gsum dang / ldog par gtogs pa'i las so/ /de la gcig tu nges par mi sdug pa'i 'bras bu ni ngan song du rnam par smin pa'o/ /gcig tu nges par sdug pa'i 'bras bu ni gzugs dang / gzugs med par rnam par smin pa'o/ /sdug pa dang mi sdug pa'i 'bras bu ni 'dod pa na spyod pa'i lha dang mir rnam par smin pa'o/ /bzhi pa ni las rnam pa gsum char yang spong bar 'gyur ba'o/ /bzhi po 'di dag ni sems can rnams kyi lhag par chags pa ste/ bde la mi phan pa dang / phan la mi bde ba dang / phan yang phan la bde yang bde ba dang / phan pa yang ma yin bde ba yang ma yin pa'o/ /sems can rnams kyi nyon mongs pa ni sgo bzhi nas 'jug cing skye ba la sogs pa'i sdug bsngal dang phrad par 'gyur te/ 'dod pa la lhag par chags pa'i sgo dang / gzugs dang gzugs med pa'i snyoms par 'jug pa la lhag par chags pa'i sgo dang / 'di las phyi rol pa rnams kyi lta ba'i sgo dang / chos 'di pa chos kyi mig ma thob pa rnams kyi mi shes pa'i sgo'o/ /'phags pa'i lam bsgom pa ni sgo bzhi po de nyid kyi sdug bsngal dang bral bar 'gyur ba'o/ /sdug bsngal dang phrad pa ji lta ba bzhin du/ rgyun phyogs su 'gro ba dang / yang srid pa pa'i las nye bar len pa dang / rnam par dgrol dka' ba'i phyir yang de dang 'dra bar sbyar ro/ /gang zag bzhi po 'di dag ni gang zag thams cad 'dus par rig par bya ste/ so so'i skye bo dang / slob par 'dod pa'i 'dod chags dang ma bral ba dang / slob par 'dod pa'i 'dod chags dang bral ba dang / 'jig tshogs las yang dag par 'das pa'i mi slob pa'o/ /gzhan yang gang zag bzhi ste/ bdag nyid sdom pa la gnas la gzhan dag la chos mi ston pa dang / bdag nyid sdom pa la mi gnas la gzhan la yang chos ston pa dang / gnyi ga byed pa dang / gnyi ga mi byed pa'o/ /gang zag ni bzhi yod de rigs dma' la chos dkar po kun du spyod pa dang / rigs bzang la sdig pa'i chos kun du spyod pa dang / rigs dma' la sdig pa'i chos kun du spyod pa dang / rigs bzang la chos dkar po kun du spyod pa'o/ /de la dang po ni tshe 'di la sdug bsngal la tshe phyi ma la ma yin no/ /gnyis pa ni tshe phyi ma la sdug bsngal la/ tshe 'di la ma yin no/ gsum pa ni gnyi gar sdug bsngal ba'o/ /bzhi pa ni gnyi gar bde ba'o/ /yang gang zag bzhi yod de/ bdag nyid sdug bsngal la sbyor bar byed la pha rol ni ma yin te/ bsod nams bskyed pa ma yin pa ni 'di lta ste dka' thub drag po can lta bu'o/ /pha rol sdug bsngal la sbyor bar byed la/ bdag ni ma yin te/ bsod nams ma yin pa yang bskyed pa ni 'di lta ste/ sdom pa can ma yin pa rnams las gang yang rung ba'o/ /gnyi ga sdug bsngal la sbyor bar byed de/ bsod nams ma yin pa yang skyed pa ni 'di lta ste/ /rgyal po mchog sbyin gyi bdag po'i rta skye ba'i mchod sbyin la sogs pa lta bu'o/ /bdag dang pha rol sdug bsngal la sbyor bar mi byed de/ bsod nams kyang bskyed pa ni 'di lta ste/ gang zag bsam gtan la gnas pa sdig pa thams cad spangs pa lta bu'o/ / ngag gi nyes pa ni mdor bsdu na rnam pa bzhi ste/ log pa dang / 'byed pa dang / yon tan med pa dang / don med pa'o/ de las bzlog pa ni yon tan du rig par bya'o/ /'phags pa ma yin pa'i log pa'i tshig ni mdor bsdu na rnam pa bzhi ste ma mthong ba'am/ yang na ma mthong na phyin ci log tu smra ba dang / thos pa dang bye brag phyed pa dang / rnam par shes pa la yang de bzhin du rig par bya ste/ de las bzlog pa ni 'phags pa'i bden pa'i tshig yin par rig par bya'o/ /sangs rgyas kyi bka'i shes bya'i gnas bzhi bzhi pa rdzogs so// // lnga po 'di dag ni 'dun pa dang / 'dod chags kyi phyogs gnas ngan len gyi rjes su 'brangs pas 'jug pa kun nas nyon mongs par gtogs pa'i 'du byed kyi tshogs te/ rten dang yul gyi ngo bo nyid kyi 'du byed kyi tshogs dang / myong ba'i ngo bo nyid dang / tha snyad kyi gnas skabs yongs su bcad pa'i phyir/ mtshan mar 'dzin pa'i ngo bo nyid dang / spyod pa'i ngo bo nyid dang / dmigs pa'i ngo bo nyid kyi 'du byed kyi tshogs so/ /de las bzlog pa lnga ni 'dun pa dang 'dod chags kyi phyogs gnas ngan len dang bral ba/ ldog pa rnam par byang bar gtogs pa'i 'du byed kyi tshogs yin par rig par bya'o/ /lnga po 'di dag ni yongs su btsal zhing longs par spyod pa'i phyir/ 'dod pa can rnams kyi 'dod par bya ba'i yul dang / 'dod pa la mi phyogs pa rnams kyi yang dag par nye bar brtag par bya ba yin te/ gzugs rnams dang / sgra rnams dang / dri rnams dang / ro rnams dang / reg bya rnams so/ /de la btsal bar bya ba dang / brtag par bya ba dang / lhag par chags par bya ba'i dngos po las brtsams te/ 'dod par bya ba rnam pa bzhi yod par rig par bya'o/ /de la ma 'ongs pa 'dod par bya ba ni btsal ba'o/ /'das pa ni rtag pa'o/ /da ltar byung ba ni lhag par chags par bya ba'o/ /de la yang rnam pa gnyis te/ dngos po 'dod par bya ba dang / de las skyes pa'i tshor ba 'dod par bya ba'o/ /lnga po 'di dag ni sems can rnams kyi sdug pa dang mi sdug pa'i las kyi 'bras bu rnam par smin pa nye bar spyad pa'i phyir lus thob par 'gyur ba ste/ lha dang mi dang / sems can dmyal ba pa dang / dud 'gro dang / yi dags kyi yul pa'o/ /rnyed pa'i rgyu sgrub pa dang / mya ngan las 'das pa la mi phyogs pa ni rnam pa lngar rig par bya ste/ gang du longs spyad pa dang / gang las rnyed pa dang / gang rnyed pa dang / gang gi phyir rnyed pa dang / ji lta bus rnyed pa ste/ gnas 'di dag tu sems kun du 'dzin pa gang yin pa'o/ /chos lnga po 'di dag ni rnal 'byor pa'i tshul khrims dang / thos pa la gnod pa sngon du 'gro bas zhi gnas dang / lhag mthong dang mi mthun pa ste/ 'dod pa rnams la chags pa dang / skul ba dang / dran pa byed pa dang / 'doms pa dang / rjes su ston pa rnams la kun nas mnar sems dang / khong khro ba'i sems su byed pa ste/ tshul khrims yang dag par ma blangs pa ni/ yang dag par mi len pa'i phyir dang / yang dag par blangs pa ni spong ba'am nyams par byed pa'i phyir ro/ /gnyid dang / nyal ba dang / mngon par ma zhi ba dang / nyon mongs pa can gyi 'gyod pa dang chos rnams la som nyi byed de/ thos pa ma bzung ba ni 'dzin par mi byed la/ bzung pa ni brjed par 'gyur zhing / ma brjed pa yang nges par rtogs par mi 'gyur ba'o/ /'og ma'i cha ni gnyis te/ mthong ba'i lam ni bsgom pa'i lam gyi 'og ma'i cha'o/ /'dod pa'i khams ni gzugs dang gzugs med pa'i 'og ma'i cha'o/ /'og ma'i cha 'di gnyis la brten nas 'og ma'i cha lnga la kun du sbyor ba zhes bya ste/ 'og ma'i cha dang po las brtsams pa ni/ 'jig tshogs la lta ba dang / tshul khrims dang brtul zhugs mchog tu 'dzin pa dang / the tshom mo/ /gnyis pa las brtsams pa ni 'dod pa la 'dun pa dang / gnod pa'i sems so/ /'di gnyis ni gong ma'i cha ste/ gzugs kyi khams dang / gzugs med pa'i khams so/ /gong ma'i cha 'di gnyis la brten nas/ gong ma'i cha lnga la kun du sbyor ba zhes bya ba ste/ kun du sbyor ba bye brag med pa ni/ gzugs kyi 'dod chags dang / gzugs med pa'i 'dod chags so/ /kun du sbyor ba bye brag can ni sred pa shas che ba'i bsam gtan pa'i rgod pa dang / nga rgyal shas che ba'i bsam gtan pa'i nga rgyal dang / ma rig pa shas che ba'i bsam gtan pa'i ma rig pa'o/ /ma gus pa rnam pa lngas yongs su zin na/ sems las su mi rung zhing / dge ba'i rtsa ba skye bar mi 'gyur te/ ston pa po dang / bstan pa dang / lhag pa'i tshul khrims kyi bslab pa dang / lhag pa'i sems dang / lhag pa'i shes rab kyi bslab pa dang / yang dag par bskul zhing rjes su 'doms la ston pa dang / tshangs pa mtshungs par spyod pa rnams la ma gus pa'o/ /lnga po 'di dag ni nyon mongs pa spang bar yang dag pa'i brtson 'grus rtsom pa'i bar du gcod pa ste/ snyoms par 'jug pa dang / skye ba la lhag par chags pa dang / rnyed pa dang bkur sti la lhag par chags pa dang / bag med pa dang / 'chal ba'i shes rab dang / sems zhum pa dang / mngon pa'i nga rgyal lo/ /bzod pa med pa'i skyes bu gang zag la ni/ pha rol phyir rgol ba la log par sgrub pa rnam pa lnga yod par rig par bya ste/ 'di la bzod pa med pa ni/ pha rol phyir rgol ba la log par sgrub pa rnam pa lnga yod par rig par bya ste/ 'di la bzod pa med pa ni/ pha rol phyir rgol ba la thog ma kho nar kun nas mnar sems kyi sems dang ldan par 'gyur te/ khon gyi bsam pa dang / de'i mdza' bo'i skye bo dang / yang dbye bar 'dod cing / 'byed pa dang / de bzhin du gnod par bya ba'i phyir zhugs pas/ de la sdug bsngal ba dang yid mi bde ba yang sgrub pa dang / bdag gis yang dag par blangs pa'i tshul khrims kyang nyams par byed pa dang / lus dang ngag dang yid rnams kyis kyang nyes par spyod pa kun du spyod par 'gyur te/ log par bsgrub pa rnam pa lnga po de dag ni 'dir skyes na yang / 'di rgyu mthun pa'i nyes dmigs gsum yod par rig par bya ste/ dgra mang ba dang / mdza' po dang / dbye ba dang / pha rol pos sdug bsngal ba dang / yid mi bde bar gyur pa'i mi 'dod pa rnam pa sna tshogs kun du spyod pa'o/ /gcig ni tshe 'di'i ste/ 'chi ba'i tshe 'gyod par 'gyur ba'o/ /gcig ni rnam par smin pa las skyes pa'i tshe phyi ma'i ste/ shi nas kyang ngan song du skye bar 'gyur ba'o/ /de las bzlog pa ni bzod pa can rnams kyis pha rol phyir rgol ba la yang dag par sgrub pa rnam pa lngar 'gyur ba ste/ de ltar byas pa'i phan yon ni ci rig par bya'o/ /chos lnga po 'di dag ni tshe 'di dang tshe phyi ma la sdug bsngal ba dang / yid mi bde ba 'byung bar 'gyur ba ste/ nye du rnams phung ste 'chi ba'i dus byed pa dang / longs spyod kyi gzhi rnams tshul ma yin par chud za ba dang / rang gi lus la nad byung ba 'di gsum ni tshe 'di'i sdug bsngal ba dang yid mi bde ba 'byung bar 'gyur ba'o/ / 'chal ba'i tshul khrims dang / thams cad la yang skur pa 'debs pa'i log par lta ba ni tshe phyi ma'o/ /de las bzlog pa'i chos lnga po rnams ni tshe 'di dang tshe phyi ma la bde ba dang yid bde ba 'byung bar 'gyur ba yin par rig par bya'o/ /rnam pa lngas gzhan dag gi don bya bar 'dod pa'i skul ba yongs su dag cing yongs su byang bar 'gyur te/ 'gal bar byas pa ma nor bar smra ba dang / sems dang mthun par smra ba dang / bya ba byed pa smra ba dang / ngag gi nyes pa rnam par spangs nas smra ba dang / yid kyi nyes pa rnam par spangs nas smra ba'o// dgra bcom pa ni longs spyod pa tshol zhing longs spyod par snang du zin kyang / log par tshol ba rnam pa gsum las 'das pa dang / log par longs spyod pa rnam pa gnyis las 'das par rig par bya ste/ srog gcod pa dang / ma byin par len pa dang / brdzun du smra ba dang ldan pa'i log pa'i tshol ba las kyang 'das la/ chung ma 'chang ba dang / bag med par sogs pa'i log par longs spyod pa las kyang 'das so/ /spong ba po ni chos rnam pa lnga dang ldan na dge ba'i phyogs la ci dgar sbyor ba dang mngon par shes pa myur ba yin te/ ji skad bstan pa'i spong ba 'dun pa drag po dang / sgrub pa ji lta ba bzhin du bdag gi brjod pa dang / lus kyi nyams stobs dang / rgyun du chud pa dang / gus par sbyor ba dang ldan pa'i sems kyi spro ba dang / zhi gnas dang rab tu 'dzin pa dang / btang snyoms kyi mtshan ma'i dus/ so sor rig pa'i shes pa'o/ /chos lnga po 'di dag ni rnam par grol ba yongs su rtogs par byed pa skyo ba'i mi mthun pa'i phyogs yin par rig par bya ste/ chos rnams la rmongs pa rnam pa gsum la brten nas/ phyin ci log rnam pa gsum ste/ dus la rmongs pa dang gnas skabs la rmongs pa dang / ngo bo nyid la rmongs pa la brten nas/ mi rtag pa la rtag par phyin ci log pa dang / sdug bsngal la bde bar phyin ci log pa dang / bdag med pa la bdag tu phyin ci log pa dang / rnyed pa la rab dang / srog la re ba'o/ /mi mthun pa'i phyogs rnam pa lnga po 'di dag gi gnyen po las mtshan mar 'dzin pa rnam pa lngar rig par bya ste/ 'du byed thams cad la mi rtag pa dang / sdug bsngal bar mtshan mar 'dzin pa dang / chos thams cad la bdag med pa dang / zas la mi mthun pa dang / srog gi dbang po la 'gag par mtshan mar 'dzin pa'o/ /lnga po 'di dag ni ting nge 'dzin dang / shes pas rab tu phye ba'i rnal 'byor pa gnyis kyi sems rnam par grol bar 'gyur ba'i skye ba'i sgo yin te/ rnal 'byor pa ting nge 'dzin gtso bor byed pa/ bden pa'i gnas kyi gtam thos nas chos dang don legs par rig pa dang / ji ltar thob pa de bzhin du go bar byed pa'i sgras kha ton byed pa dang / gzhan dag la don yang dag par ston pa dang / lkog na 'dug cing sems te chos dang don legs par rig pa dang / rnal 'byor pa shes pa gtso bor byed pa'i shas cher rnam par g.yeng bar byed pa 'dod pa la 'dod chags kyi gnyen po legs par yid la byed pa'o/ /rnal 'byor pa'i bsam pa dang / sbyor ba phun sum tshogs pa ni rnam pa lngar rig par bya ste/ mya ngan las 'das pa dang / byang chub la mngon par yid ches pa drag po ni bsam pa phun sum tshogs pa'o/ /rtag tu gus par byed pa dang / shes bzhin du spyod pa dang / zhi gnas dang lhag mthong ni sbyor ba phun sum tshogs pa'o/ /chos lnga ni sems can rnams kyi sdug pa dang mi sdug pa'i las byed pa'i 'bras bu nye bar spyad pa dang / lus dang sems kun nas nyon mongs par 'gyur ba dang / sdug bsngal thams cad sdud par 'gyur ba ste/ bde ba dang / sdug bsngal dang / yid bde ba dang / yid mi bde ba dang / btang snyoms so/ /snga ma bzhin du rnal 'byor pa bsam pa dang / sbyor ba'i phyir mi ldog pa rnam pa lnga dang ldan pa ni myur ba myur bar bden pa mngon par rtogs pa'i skal ba can du 'gyur zhing / dge ba'i phyogs la shin tu bstan par 'gyur ba'o/ /lnga po 'di dag ni slob pa'i 'dod pa'i 'dod chags dang bral la kun du sbyor ba'i lhag ma dang bcas pa'i skye ba'i bye brag ste/ yang na ni bar ma do'i srid pa la gnas pa nyid kyi tshe mthar thug pas yongs su mya ngan las 'da' ba'am / yang na ni bsam gtan dang por skyes ma thag kho nar mthar thug pas yongs su mya ngan las 'da' 'am/ yang na ni skyes nas tshegs chung ngus lam mngon sum du byas pa'am/ yang na ni tshegs med pa las lam mngon sum du byas nas yongs su mya ngan las 'da' 'am/ yang na ni gzugs kyi mtha' 'og min man chad du song ba'am/ gzugs med pa'i mtha' srid pa'i rtse mo man chad du song nas mthar thug pas yongs su mya ngan las 'da'o/ /lnga po 'di dag ni bsam gtan bzhi pa spel mar bsgoms pa'i 'bras bu phyir mi 'ong ba rnams kyi skye ba'i sa ste/ bsam gtan chung ngu bsgoms pa'i 'bras bu'i skye ba'i sa dang / bsam gtan 'bring dang / chen po dang / ches che ba dang / shin tu che ba'i 'bras bu'i skye ba'i sa'o/ /rnal 'byor pa rnams kyi dpyod pa yid la byed pa rnam pa lnga ni khams gsum pa'i nyon mongs pa spang bar nges par mthar phyin par byed pa ste/ 'dod pa'i rnam par rtog pa drag pos 'dod pa'i mtshan ma yid la byed kyang / sems rang gi ngang gis btang snyoms su gyur pa'i 'dod pa rnams las gzhol bar mi 'gyur ba dang / rang gi ngang gis mngon par 'byung ba'i mtshan ma yid la byed cing sems gzhol bar mi 'gyur ba dang / 'dod pa dang / mngon par 'byung ba'i mtshan ma ji lta ba bzhin du/ gnod sems la gnod sems med pa'i mtshan ma dang / rnam par 'tshe ba la rnam par 'tshe ba med pa'i mtshan ma dang / gzugs la gzugs med pa'i snyoms par 'jug pa dang / skye ba'i mtshan ma dang / mya ngan las 'das pa'i mtshan ma yang de dang 'dra'o/ /sangs rgyas kyi bka' shes bya'i gnas lnga lnga pa rdzogs so// //bam po bcu bdun pa/ bdag dang sems can dang srog tu lta bar gtogs pa'i sems can rnams/ bdag med pa la 'jug par 'gyur ba/ sems can gyi dngos po rab tu dbye ba brgyad po 'di dag ni/ rnam pa drug drug ste/ bdag gi rten gyi dngos po rab tu dbye ba dang / yul gyi dngos po rab tu dbye ba dang / ngo bo nyid kyi dngos po rab tu dbye ba dang / nye bar spyod pa'i mtshan ma'i dngos po rab tu dbye ba dang / nye bar spyod pa'i dngos po rab tu dbye ba dang / rjes su tha snyad 'dogs pa'i dngos po rab tu dbye ba dang / spyod pa'i dngos po rab tu dbye ba dang / 'dod pa'i dngos po rab tu dbye ba'o/ /dngos po rab tu dbye ba 'di dag la yongs su byang bar byas pa'i rnal 'byor pa de la/ bdag ni mig la sogs pa la brten nas/ gzugs la sogs pa'i yul rnams la/ reg pa dang tshor ba rnams kyis nye bar spyod do/ /de bzhin du ming ni 'di zhes bya/ rigs ni 'di zhes bya/ rus ni 'di zhes bya/ kha zas ni 'di lta bu zhig ces bya ba la sogs par/ bdag dang pha rol la rjes su tha snyad 'dogs shing / chos dang chos ma yin pa yang byed la/ sdug pa'i dngos po dang phrad pa dang / gnas pa dang phyir zhing 'byung bar 'dod pa dang / mi sdug pa'i dngos po dang mi phrad pa dang / mi gnas pa dang / med par 'gyur bar 'dod pa sngon byung ba gang yin pa de de'i dus na 'byung bar mi 'gyur ro/ /dkon mchog dang / bslab par gtogs pa rnam pa drug la khyad du gsod ba ni dge ba'i chos ma thob pa las kyang yongs su nyams par 'gyur la/ thob pa las kyang yongs su nyams pa dang / bstan pa yang yongs su gtod pa dang / tha na sangs rgyas dang / chos dang / dge 'dun rnams dang / lhag pa'i tshul khrims dang / lhag pa'i sems dang / lhag pa'i shes rab rnams la dad pa tsam yang nyams par 'gyur ba'o/ /de la sdig pa'i grogs pos ni lhag pa'i sems dang / lhag pa'i shes rab las brtsams te 'doms shing ston pa log par rnyed par 'gyur ro/ /bka' blo mi bde bas ni rnyed par yang mi 'gyur ro/ /de log par gyur pa dang / rnyed par yang ma gyur pas dge ba'i chos rnams las yongs su nyams par 'gyur ro/ / de las bzlog pa ni dge ba'i phyogs su rig par bya'o/ /drug po 'di dag ni 'dod chags kyi gzhi yin zhing / tshul bzhin ma yin pa yid la byed pa dang ldan la/ gzugs la sogs pa'i yul rnams la/ sems can rnams kyi sems bde bar 'gyur ba'i gnas skabs yin no/ /ji ltar 'dod chags kyi gzhi yin zhing / bde bar 'gyur ba'i gnas skabs yin pa bzhin du/ zhe sdang gi gzhi yin zhing mi bde bar 'gyur ba'i gnas skabs dang / gti mug gi gzhi yin zhing / bde ba yang ma yin mi bde ba yang ma yin par 'gyur ba'i gnas skabs kyang de dang 'dra bar rig par bya'o/ /rnam pa drug gis ni shin tu rnam par dag pa'i bdag nyid can gnas gyur pa 'gro yang rung / gnas kyang rung ste/ mig gis shes par bya ba gzugs rnams dang / yid kyis shes par bya ba chos kyi bar dag la/ shin tu bar chad med cing / rgyun mi 'chad pa kun nas nyon mongs pa med par mnyam pa nyid du gnas par rig par bya'o/ /chos drug po 'di dag ni dbang po gzugs can lnga po rten dang bcas pa rnams kyi ci rigs par rten byed pa dang / mi sgrib pa dang / khrid pa dang / yongs su bsrung ba dang / skyes so cog gi dbang byed par 'gyur ba ste/ 'byung ba chen po bzhi dang nam mkha'i khams dang rnam par shes pa'o/ /de la rnam par shes pa ni 'dir bsod nams dang / bsod nams ma yin pa bstsags pa/ tshe phyi ma la dge ba dang / mi dge ba'i 'bras bur 'gyur bar khrid pa'o/ /rnam par shes pas rten byas nas dbang po lnga po rten dang bcas pa yang 'jig par mi 'gyur 'dul bar mi 'gyur ro/ /tshe 'di nyid la yang rnam par shes pa skyes so cog gi dbang gis dge ba dang / mi dge ba dang / lung du ma bstan pa'i bya ba rnams la 'jug go/ /gnas gsum po 'di dag ni rnal 'byor pa rnams kyi 'da' bar dka' ba ste/ 'dod pa'i 'dod chags dang / gnod sems dang / rnam par 'tshe ba dang / mi dga' bas yongs su zin pa'i khams ngan pa las yang dag par 'da' ba dang / 'du byed rnams kyi mtshan ma kun du 'byung ba las yang dag par 'da' ba dang / srid pa'i rtse mo las yang dag par 'da' ba'o/ /'da' bar dka' ba'i gnas gsum po 'di dag las yang dag par 'da' bar bya ba'i gnyen po ni/ gong na med pa drug yod par rig par bya ste/ dang po'i ni tshad med pa bzhi'o/ /gnyis pa'i ni mtshan ma med pa'i ting nge 'dzin to/ /gsum pa'i ni nga'o snyam pa'i nga rgyal zad pa'o/ /ting nge 'dzin 'di dag kyang mi mthun pa'i phyogs nges par bcom na/ yongs su grub par 'gyur bar rig par bya'o/ /mi mthun pa'i phyogs nges par gzhom pa yang gnyen pa legs par bsgoms pa la/ de kun du mi 'byung ba'i phyir ro/ /nga'o snyam pa'i nga rgyal spangs pa ni/ bdag mthar phyin tam 'on te ma phyin zhig gu snyam du the tshom gyi sems kyis yongs su zin cing 'dug par nam yang mi 'gyur te/ de ltar na gang la the tshom yod pa de la ni nga'o snyam pa'i nga rgyal dang bral ba med do/ /gang nga'o snyam pa'i nga rgyal dang bral ba de la ni the tshom med par rig par bya'o/ /drug po 'di dag ni 'gyed pa'i rtsa ba'i gzhi yin te/ phan tshun mi mthun pa rnams yid du mi 'ong bar spyod pa dang / sdig pa 'chab pa dang / mtshungs pa rnams kyi rnyed pa dang / bkur sti lhag par bdag gir byed pa dang / chos gos la sogs pa'i rnyed pas gcig la gcig 'drid pa dang / bslab pa'i gzhi las 'gal bar byed pa dang / chos kyi don phyin ci log tu 'dzin pa'o/ /drug po 'di dag rtsod pa'i rtsa ba'i gzhi 'di dag spong bar 'gyur ba ste/ byams pa'i lus dang / ngag dang yid kyi las ni dang po dang gnyis pa'i'o/ /rnyed pa thun mong du longs spyod pa ni/ gsum pa dang bzhi pa'i 'o/ /tshul khrims mthun par bya ba ni lnga pa'i'o/ /lta ba mthun par bya ba ni drug pa'i'o/ /chos drug po 'di dag ni rnal 'byor pa rnams kyi mthu thams cad dang / mthar phyin pa sdud par 'gyur ba ste/ rdzu 'phrul gyi yul dang lha'i rna ba dang / sngon gyi gnas dang / sems kyi rnam grangs dang / 'chi 'pho rnams ni mthu sdud pa yin no/ /zag pa zad pa ni mthar phyin pa sdud pa yin no/ /drug po 'di dag ni gang zag bden pa mngon par ma rtogs pa'i bden pa mngon par rtogs par bya ba la bgegs su gyur pa'i chos yin te/ snga ma bzhin du rmongs pa rnam pa gsum gyi dbang du byas nas phyin ci log gsum dang / rnyed pa la re ba dang / srog la re ba'o/ /de la bye brag ni 'di yin te/ nyes par mthong ba dang / thos pa dang / smras pa dang / brtags pa dang / mthun pa'i chos rnams la nyes par mthong ba dang nyes par thos pa dang / nyes par smras pa dang / nyes par brtags pa la mngon par dga' ba'o/ /de yang so so'i skye bo bden pa mngon par ma rtogs pa'i sems shin tu 'phrogs pa dang / bar du gcod pa'i gtso bor 'dug pa yin te/ 'phags pa ni ma yin no/ /de bas na rigs dang mthun pa rnams kyi skabs su bstan gyi/ rnam par grol ba yongs su smin pa'i skabs su ni ma yin no/ /bgegs su gyur pa'i chos de dag gi gnyen por mtshan mar 'dzin pa rnam pa drug yang dag par rig par bya ste/ snga ma bzhin du rnam pa lnga dang 'jig rten thams cad la yang mngon par mi dga' ba'i mtshan mar 'dzin pa'o/ /phun sum tshogs pa rjes su dran pa 'di gnyis ni rnam pa drug ste/ rnal 'byor pa sems zhum pa rnams legs par rab tu 'dzin cing / mngon par dga' bar byed par 'gyur te/ skyabs phun sum tshogs pa rjes su dran pa rnam pa gsum 'thob pa phun sum tshogs pa rjes su dran pa yang rnam pa gsum ste/ rnam pa gsum las/ sangs rgyas dang / chos dang / dge 'dun rjes su dran pa ni skyabs rjes su dran pa zhes bya'o/ /mya ngan las 'da' bar 'gro ba'i lam dang longs spyod du 'gro ba dang / mtho ris su 'gro ba rnam pa las rjes su dran pa ni/ thob pa rjes su dran pa zhes bya'o/ /chos drug po 'di dag ni/ legs par gsungs pa'i chos 'dul ba bla na med pa dang / 'di las phyi rol pa'i mu stegs can rnams dang thun mong ma yin pa ste/ ston pa la lta ba dang / dam pa'i chos nyan pa dang / dad pa rnyed pa dang / bslab pa'i gzhi rnams la rjes su slob pa dang / rnam pa las ston pa rjes su dran pa ste/ kye ma bcom ldan 'das 'di ni yang dag par rdzogs pa'i sangs rgyas yin te/ 'dis ni chos thams cad sangs rgyas so zhes bya ba la sogs pa dang / ston pa de nyid la lus dang ngag dang / bsgrub pas bsnyen bkur bya'o/ /chos drug po 'di dag ni sred pa zad par bya ba'i phyir brtson pa rnams bdag ni da dung sred pa dang bcas pa yin gyi/ sred pa med pa ni ma yin no snyam du nges par rtogs par 'gyur ba ste/ gzugs la sogs pa nas/ chos la thug pa'i bar gyi yul rnams dang sems 'brel pa nyid do/ /rnam pa drug gis ni las dang bden pa la rton gyi/ rigs dang cho rigs dang / rus la rton pa ma yin par rig par bya ste/ gang gi phyir gang zag rigs dma' ba yin du zin kyang / ngan 'gror 'gro ba'i mi dge ba yang bskyed cing / bde 'gror 'gro ba'i dge ba yang bskyed la/ tshe 'di nyid la yang yongs su mya ngan las 'da' ba dang / rigs bzang po yin du zin kyang de dang 'dra'o/ /sangs rgyas kyi bka'i shes bya'i gnas drug drug pa rdzogs so// //chos bdun po 'di dag ni bden pa yang dag pa ji lta ba bzhin du mngon par rtogs shing rnam par grol ba yongs su rdzogs par 'gyur ba yin te/ lhag mthong gi phyogs gsum ste/ chos rnam par 'byed pa dang / brtson 'grus dang / dga' ba dang / zhi gnas kyi phyogs gsum ste/ shin tu sbyangs pa dang / ting nge 'dzin dang / btang snyoms dang / gcig ni zhi gnas dang / lhag mthong gi phyogs te/ 'di lta ste dran pa'o/ /dbang po dang / 'bras bu dang / rnam par thar pa las gang zag bdun du rnam par gzhag par rig par bya ste/ zhugs pa'i lam la dbang po rtul po dang / dbang po rnon po dad pa dang / chos kyi rjes su 'brang ba gnyis dang / 'bras bu'i lam la/ de gnyis nyid dang pas mos pa dang / lta bas thob pa dang / snyoms par 'jug pa'i sgrib pa las ni rnam par grol la/ nyon mongs pa'i sgrib pa las ni rnam par ma grol ba ste/ lus kyi mngon sum du byed pa dang / nyon mongs pa'i sgrib pa las ni rnam par grol la/ snyoms par 'jug pa'i sgrib pa las ni rnam par grol ba ste/ shes rab kyis rnam par grol ba dang / snyoms par 'jug pa dang / nyon mongs pa gnyi ga'i sgrib pa las rnam par grol ba ste/ gnyi ga'i cha las rnam par grol ba'o/ /rgyu gsum po rnam pa bdun po 'di dag ni nang gi sems mnyam par 'jog cing / yang dag par sems rtse gcig tu byed par 'gyur ba ste/ 'jug par byed pa dang / gnas pa dang / mthun pa dang / sdud par byed pa'o/ /'jig rten pa'i yang dag pa'i lta ba sbyin pa yod do zhes bya ba la sogs pa'i rnam pa dang / de dag nyid la brten nas khyim gyi gnas ni kun du gnod pa'o/ /khyim ni skyon yin no zhes bya ba la sogs pa'i rnam pa ste/ mngon par 'byung ba dang ldan pa'i yang dag pa'i rtog pa ni 'jug par byed pa'o/ /zhugs zin nas yang dag pa'i ngag dang / las dang 'tsho ba yang dag par blangs pa ni gnas pa dang mthun pa'o/ /'jug par byed pa'i rgyu dang / gnas pa dang mthun pa'i rgyu de'i 'og tu tshul bzhin yid la byed pa dang ldan pa na yang dag pa'i rtsol ba dang / dran pa gang yin pa de ni sdud par byed pa'i rgyu yin par rig par bya'o/ /'dod pa la nye bar spyod pa rnams ni 'di lta bu'i phyir nor sogs par 'dod de/ 'di ltar bde ba 'dod pa kho na'i phyir yin la/ bde ba bdun po 'di dag ni 'phags pa'i nor bdun las byung ba ste/ de dag ni phal pa'i nor kun du bsags pa thams cad kyis thob par mi 'gyur pa ste/ dang ba dang ldan pa'i bde ba dang / bde 'gror skye ba las byung ba dang / bdag gi cha ma yin pa la ltos nas/ kha na ma tho ba kun du mi spyod pas 'gyod pa med pa las byung ba dang / de bzhin du gzhan gyis smad pa la ltos pa dang / chos dang don legs par rtogs pa dang ldan pa'i bde ba dang / phyi ma la yo byad dang mi ldan pa med pa las byung ba dang / don dam pa rtogs pa las byung ba'i bde ba ste/ rnam pa du ma kha na ma tho ba med pa'i bde ba 'di dag ni/ 'jig rten pa'i nor kun du bsags pa las rnam pa thams cad kyi thams cad du thob par mi 'gyur te/ gzhan du na tshe 'di nyid la yo byad kyis mi brel ba las byung ba tsam du zad la de yang kha na ma tho ba dang bcas pa yin no/ /bdun po 'di dag ni bdud dang nyon mongs pa'i phyogs kyi stobs yin te/ bstan pa la gnod par byed pa dang / ngan 'gror 'gro ba'i nyes par spyod pa kun du spyod pa dang / bdag gi cha ma yin par mi lta ste/ bar du gcod pa'i chos bsten pa dang / gzhan gyis smad pa las mi lta ste/ bar du gcod pa'i chos bsten pa dang / dge ba dang / mi dge ba dang / kha na ma tho ba dang bcas pa dang kha na ma tho ba med pa dang / ngan pa dang / bzang po dang / nag po dang / dkar po'i rab tu dbye ba dang bcas pa'i rten cing 'brel bar 'byung ba'i chos rnams mi rtogs pa dang / ser sna'i dri mas zil gyis non pa'i sems kyis/ snod spyad dang / yo byad mang po 'chang ba dang / blun zhing blo chung ba shin tu rmongs pa'o / /bdud dang nyon mongs pa'i phyogs kyi stobs 'di dag zil gyis mnan pa dang / rnam par bstsal ba'i phyir 'phags pa'i chos 'dul ba la dad pa la sogs pa'i stobs bdun po kho na yod par rig par bya'o/ /don dam pa'i chos mya ngan las 'das pa'i mi mthun pa'i phyogs kyi chos bdun po 'di dag ni dam pa'i chos yongs su 'grib cing / nub par 'gyur ba ste/ de dag kyang rgud pa rnam pa gsum du 'dus te/ nye bar spyad pa rgud pa dang lhag pa'i bsam pa rgud pa dang / sbyor ba rgud pa'o/ /de la chos gos la sogs pa bzang po 'dod pa dang / mang po 'dod pa dang / de las byung ba'i longs spyod ni nye bar spyad pa rgud pa'o/ /lam dang lam gyi 'bras bu mya ngan las 'das pa la/ mngon par yid mi ches pa ni lhag pa'i bsam pa rgud pa'o/ /le lo dang brjed ngas pa dang / sems rnam par g.yengs pa dang / 'chal ba'i shes rab ni sbyor ba rgud pa'o/ /de la nye bar spyad pa rgud pa ni/ chags pa mi dge ba'i rtsa ba'i phyogs so/ /bsam pa dang sbyor ba rgud pa ni gti mug mi dge ba'i rtsa ba'i phyogs so/ /de dag las bzlog pa ni dkar po'i phyogs yin par rig par bya'o/ / don dam pa'i chos mya ngan las 'das pa'i phyogs kyi chos bdun po 'di dag ni dam pa'i chos yongs su mi 'grib cing / yun ring du gnas par gyur pa ste/ thos pa las byung ba'i shes rab dang / bsams pa las byung ba dang / bsgoms pa las byung ba'i shes rab dang / lus kyi gnod pa bsal ba dang / zang zing dang / chos yang dag par yongs su tshol ba dang / mngon pa'i nga rgyal med pa dang / gang zag bkur sti bya bar 'os pa dang / bkur sti bya bar 'os pa ma yin pa rnams la/ bkur sti bya ba dang / bkur sti bya ba ma yin pa'i bye brag phyed pa'o/ /de la thos pa ni ma rtogs pa'i don rtogs par byed pa'o/ /bsam pa ni legs par nges par byas pa'i don la dpyod pa'o/ /bsgom pa ni nyon mongs pa spong ba'o/ /lus kyi gnod pa bsal ba ni spong ba bzod par las su rung bar byed pa'o/ /zang zing dang / chos yang dag par yongs su tshol ba ni mngon par shes pa myur bar byed pa'o/ /nga rgyal med pa ni ngan ngon tsam thob pas chog mi shes par byed pa'o/ /gang zag gi bye brag phyed pa ni/ bsod nams che bar grags pa rnams la chags pa med pa dang / 'dod pa chung ba rnams la dga' bar byed pa'o/ /bdun po 'di dag ni sems can rnams kyi skye ba'i gnas yin te/ de dag tu sems can rnams kyi rnam par shes pa rgyun du mngon du gyur par 'jug ste/ ngan song rnams dang / 'du shes med pa'i sems can rnams dang / 'du shes med 'du shes med min skye mched ni ma gtogs te/ ngan song rnams ni skyo ba'i gzhi'i gnas su gyur pa'i phyir rnam par shes pa gnas pa ma yin no/ /'du shes med pa'i sems can rnams ni de na gcig tu nges par rnam par shes pa kun du 'byung ba med pa'i phyir na ma yin no/ /'du shes med 'du shes med min skye mched ni kun du rgyu ba dang / kun du rgyu ba med pa gcig tu nges pa med pa'i phyir ro/ /de la lus mi 'dra ba ste/ lus sna tshogs dang / 'du shes mi 'dra ba ste 'du shes sna tshogs dang / de las bzlog pa ni lus 'dra ba dang / 'du shes 'dra bar rig par bya'o/ /de la tshangs pa'i 'jig rten man chad ni lus mi 'dra ba ste/ lus kyi rang bzhin gyi tshul rnam pa sna tshogs su skye ba'i phyir ro/ /tshangs pa'i 'jig rten na ni der thog mar mngon par grub pa gang yin pa de dag 'di snyam du sems te/ bdag cag ni tshangs pas bskyed do snyam mo/ /tshangs pa yang 'di snyam du 'di dag ni bdag gis bskyed do snyam ste/ de ltar na de dag ni 'du shes 'dra'o/ /bsam gtan gnyis pa yan chad ni thams cad kyang lus 'od 'dra ba yin pas/ lus 'dra ba zhes bya'o/ /'od gsal gyi lha'i gnas ni na snga phyir skyes pa rnams/ tshangs pa'i 'jig rten tshig pa'i me lce mthong ba las 'jigs pa dang / mi 'jigs pa'i 'du shes su 'gyur bas/ de dag ni 'du shes mi 'dra bar rig par bya'o/ / sems can rnams kyi gnas ngan len bdun gyis ni nyon mongs pa'i phyogs kyi gnas ngan len thams cad bsdus par rig par bya ste/ khams ngan pa'i 'dod chags dang / zhe sdang gi phyogs dang / khams 'bring ba dang / gya nom pa'i 'dod chags kyi phyogs dang / khams ngan pa dang / 'bring dang / gya nom pa'i nga rgyal dang / ma rig pa dang / lta ba dang / the tshom gyi phyogs kyi gnas ngan len to/ /rnam pa bdun gyis ni 'di la phyi rol pa rnams kyi nyes par bshad pa'i chos 'dul ba skyon dang bcas par rig par bya ste/ rtogs pa'i skyon dang / spyod pa'i skyon dang / rten gyi skyon dang / rtog pa'i skyon dang / 'bad pa'i skyon dang / lhag pa'i sems kyi skyon dang / lhag pa'i shes rab kyi skyon no/ /'di las phyi rol pa rnams ni thos pa 'dzin par byed du zin kyang / de dag ni phyin ci log rnam pa bzhi dang mthun pa'i phyir dang / klan ka tshol ba dang / de lta bu smra ba las thar pa'i phan yon gyi gtan tsam du nye bar gnas pa'i phyir/ de dag gis byas pa rtogs pa ni skyon dang bcas pa'o/ /tshul khrims ni cho ga dang / 'tsho ba nyams pas yongs su zin pa dang / rang gis nges par 'byin pa ma yin pa'i phyir skyon dang bcas pa'o/ /mdza' bshes ni phyin ci log gi lam ston pa'i phyir skyon dang bcas pa'o/ /dben pa ni log par rtog pas sems nyams pa'i phyir skyon dang bcas pa'o/ /'bad pa ni thabs med pa'i phyir skyon dang bcas pa'o/ /lhag pa'i sems ni brjed ngas pa dang / sred pa dang / nga rgyal dang / ma rig pa dang / /the tshom shas che ba'i bsam gtan pa yin pa'i phyir skyon dang bcas pa'o/ /lhag pa'i shes rab ni lta bar gyur pa drug cu rtsa gnyis kyi nyams pa'i phyir skyon dang bcas pa'o/ / de dag las bzlog pa ni legs par gsungs pa'i chos 'dul ba la gzhi bdun po 'di dag nyid skyon med par rig par bya'o/ /chos bdun po 'di dag ni dge slong rnams kyi ltung ba byung ba'i rtsod pa zhi bar byed par 'gyur ba ste/ lhag ma ni 'di lta ste/ gzhi bsdu ba las byung ba yin no/ /de la bdun po 'di dag ni ltung ba'i rtsod pa ste/ ltung ba mngon du bsgo bas rtsod pa dang / 'das pa brjed pa'i ltung ba bsgo bas rtsod pa dang / rang dbang med pa'i ltung ba bsgo bas rtsod pa dang / ltung ba brtags pas rtsod pa dang / ltung ba gtan la 'bebs pas rtsod pa dang / bdag nyid kyis ltung ba la 'gyod pa rtsod pa dang / phyogs gzhan gyi phyogs su gnas pa phan tshun ltung ba gleng ba mi bzod pas rtsod pa'o / /sangs rgyas kyi bka'i shes bya'i gnas bdun bdun pa rdzogs so// //kun du sbyor ba ma lus par spang ba'i phyir/ dge slong gis bsgom pa yan lag brgyad kyis bsdus pa gsum du rig par bya ste/ tshul khrims bsgom pa dang / ting nge 'dzin bsgom pa dang / shes rab bsgom pa'o/ /yang dag pa'i ngag dang / las kyi mtha' dang / 'tsho ba rnams kyis ni tshul khrims bsgom mo// yang dag pa'i dran pa dang / ting nge 'dzin gyis ni ting nge 'dzin bsgom mo/ /yang dag pa'i lta ba dang / rtog pa dang / rtsol ba rnams kyis ni shes rab bsgom mo/ /yang dag pa'i sbyor ba 'bras bu dang bcas pa'i dbang du byas nas rnam par byang ba'i phyogs kyi gang zag brgyad rnam par gzhag par rig par bya ste/ zhugs pa bzhi dang / 'bras bu la gnas pa bzhi'o/ /skyon dang bcas pa'i sbyin pa dang / skyon med pa'i sbyin pa 'di gnyis ni rnam pa brgyad du rig par bya ste/ de la rnam pa bdun gyi skyon dang bcas pa'o/ /rnam pa gcig ni skyon dang bral ba'o/ /sbyin pa le los nyams par gyur pa'i phyir/ skyon dang bcas pa'ang yod/ zang zing gi sems dbul gyis 'jigs pa dang / dbang phyug 'dod de mi 'dod bzhin du byed pas skyon dang bcas pa yang yod/ 'das pa la lta ba'i phyir skyon dang bcas pa yang yod/ ma 'ongs pa la mngon par dga' ba'i phyir skyon dang bcas pa yang yod/ brnyas pa'i skyon gyis skyon dang bcas pa yang yod/ grags pa 'dod pa'i skyon gyis skyon dang bcas pa yang yod/ longs spyod 'dod pa'i phyir skyon dang bcas pa yang yod/ skyon med pa'i sbyin pa ni zang zing med pa'i sems kyis yongs su mya ngan las 'das par bsngos la/ de'i tshogs su yang gyur bzhin du bde 'gror yang 'gro ba dang / longs spyod chen por yang 'gyur ba'o/ /gnas bzhi la brten nas/ dus brgyad du le lo byad par ston te/ brtson 'grus mi rtsom pa ni/ gang zag 'di ni le lo'i rang bzhin can te/ brtson 'grus mi rtsom pa'i rang bzhin can yin par rig par bya ste/ bsod snyoms la brten pa dang / 'di lta bu bya ba dang / rgyu zhing 'gro ba dang / khams mi mnyam pa'o/ /gnas bzhi po 'di dag la brten nas/ kha zas bsod pa dang / mang ba zos pas lus lci bar gyur pa'i dus dang / kha zas nyung la ngan pa zos pas lus rmya ba'i dus dang / 'di lta bu bya bar sbyor 'dod de/ nyams stobs sri ba'i dus dang / 'di lta bu bya ba byas nas ngal so ba'i dus dang / rgyu zhing 'gro 'dod de nyams stobs sri ba'i dus dang / slar log nas lam gyis dub pa ngal so ba'i dus dang / nad kyis btab ste/ nad kyi sdug bsngal ba dang phrad pa'i dus dang / nad sos nas phyir ltas dogs pa'i dus te/ de ltar gang zag le lo'i rang bzhin can de ni le lo'i rkyen dang ma phrad pa'i bar du ni de brtson 'grus byed pa tsam du snang la gang gi tshe phrad par gyur pa de'i tshe ni myur ba myur bar de le lo ston par 'gyur te/ de lta bas na le lo'i rang bzhin can zhes bya'o/ /de las bzlog pa ni gnas bzhi po de dag nyid la brten nas/ dus brgyad po de dag nyid kyi tshe brtson 'grus rtsom zhing le lo zil gyis gnon pas/ gang zag brtson 'grus brtsams pa'i rang bzhin du rig par bya ste/ de ni la lo'i rkyen dang phrad pa'i tshe yang brtson 'grus rtsom na/ ma phrad pa'i tshe lta ci smos te/ de lta bas na brtson 'grus rtsom pa'i rang bzhin can zhes bya'o/ /yid du 'ong bar skye ba'i rgyu yang dag pa'i smon lam gyis zin pa brgyad po 'di dag ni 'dod pa dag la mngon par mtho bar 'dod cing / 'dod pa las dben pa thams cad kyi thams cad du mi 'dod pa rnams yid du 'ong ba'i gnas rnam pa brgyad du skye bar byed pa ste/ mi skal ba ngan par smon lam btab pa ni/ sbyin pa las byung ba dang / tshul khrims las byung ba chung ngu yin no/ /de bzhin du mi skal ba bzang po dang / rgyal chen bzhi dang / sum cu rtsa gsum pa dang / 'thab bral dang / dga' ldan dang / 'phrul dga' dang / gzhan 'phrul dbang byed kyi lhar smon lam btab pa yang / sbyin pa las byung ba dang / tshul khrims las byung ba chung ngu yin no/ /rgyu bzhis ni mi rnams kyi nang na de bzhin gshegs pa'i 'khor bzhir rnam par gzhag par rig par bya'o/ / rgyu gsum gyis lhar gyur pa rnams kyi 'khor bzhir rnam par gzhag par rig par bya ste/ bdag po'i mchog tu gyur pa dang / yon gnas su bkur ba dang / gzhan la rag ma las pa'i longs spyod kyis 'tsho ba dang / longs spyod yang dag par spangs pas 'tsho ba'i rgyu 'di bzhis ni/ mir gyur pa'i nang nas 'khor bzhir rnam par gzhag par rig par bya'o/ /sa gzhi la brten pa'i mthar gyur pa dang / 'dod pa'i khams kyi mthar gyur pa dang / ngag gi 'du byed kyi mthar gyur pa'i phyir ni lhar gyur pa rnams kyi 'khor bzhir rnam par gzhag par rig par bya'o/ /'jig rten gnas gsum la gnas na/ 'jig rten dag rtag tu rgyun mi 'chad par chos brgyad dang phrad par 'gyur te/ 'dod pa dang / 'bad pa dang / rkyen rnams la'o/ /'dod pa gnas na ni rnyed pa dang yang phrad la / ma rnyed pa dang yang phrad par 'gyur ro/ /pha rol 'dod pa'am/ mi 'dod pa'i 'bad pa la gnas na ni/ lkog dang ldan pa'am/ mngon par gyur pa dang ldan pa'i bsngags pa'am/ bsngags pa ma yin pa brjod pa dang phrad par 'gyur ro/ /rkyen la gnas na ni sngon gyi'am tshe 'di'i bde ba'i rkyen nas/ sdug bsngal gyi rkyen gyi bde ba dang sdug bsngal dang phrad par 'gyur ro/ /mos pa brgyad po 'di dag ni phyir mi 'ong ba rnams sam/ dgra bcom pa rnams kyi 'phags pa'i mthu dang gnas pa chen po sgrub par byed pa ste/ nang la gzugs su 'du shes pa zil gyis mnan nas/ phyi rol gyi gzugs la mos pa kun nas nyon mongs pa can ma yin pa dang / gnyis pa ste nang na gzugs su 'du shes pa zil gyis mnan pa dang / sdug pa dang mi sdug pa gnyis su med pa'i gzugs su mchog tu btang snyoms pa la mos pa cha phra ba ste/ rnam par thar pa gsum po 'di dag ni gzugs thams cad la dbang byed pa'i phyir/ 'phags pa'i rdzu 'phrul sgrub par byed pa ste/ rdzu 'phrul de dag ni so so'i skye bo thams cad dang thun mong ma yin pa'o/ /nam mkha' mtha' yas par mos pa dang / rnam par shes pa mtha' yas par mos pa dang / ci yang med par mos pa dang / 'du shes med 'du shes med min du mos pa dang / sems cha phra ba yang cha phra ba rang gi ngang gis 'jug pa la mos pa dang / mos pa lnga po 'di dag ni mthar gyis shin tu yongs su sbyang ba byas na/ 'du shes dang tshor ba 'gog pa'i snyoms par 'jug pa mchog gi gnas pa sgrub par byed do/ /rnam par thar pa dang po gsum po dag la brtson pa na gzugs gang dag mthong ba dang / ji ltar mthong ba de bzhin du rnam par thar pa gsum gyi sbyor ba'i lam du 'dus pa'i zil gyis gnon pa'i skye mched brgyad kyang rig par bya'o/ / de la gzugs chung ngu rnams dang / chen por gyur pa rnams kha dog bzang po dang / kha dog ngan pa rnams dang / ngan pa dang bzang po rnams mthong ste/ phyi rol mnyam par ma bzhag pa'i spyod yul snang bar gyur pa rnams mthong ste/ ting nge 'dzin gyi spyod yul la dmigs pa'i yid la byed pas mi snang ba'i tshul du zil gyis mnan nas/ zhi gnas kyi rnam pas ni ting nge 'dzin gyi spyod yul de dag shes so/ /lhag mthong gi rnam pas ni mthong ste/ ting nge 'dzin gyi spyod yul de dag ji ltar shes shing mthong ba dang / de dag ji ltar de dag dpyad cing brtags pa de bzhin du phyi rol ting nge 'dzin gyi spyod yul ma yin pa de dag la 'du shes par 'gyur te/ de ltar gzugs de dag mthong ngo / /sangs rgyas kyi bka'i shes bya'i gnas brgyad brgyad pa rdzogs so// //kun du sbyor ba dgu rnam par gzhag pa yang rig par bya ste/ 'di lta ste/ gzhi bsdu ba las 'byung ba bzhin/ dgu po 'di dag ni skye ba'i gnas yin te/ de dag tu skyes pa'i sems can rnams de dag dang de na mtshungs par gnas par shes so/ /ngan song rnams ni ma gtogs te/ snga ma bzhin du skye ba'i gzhi'i gnas su gyur pa'i phyir ro/ /sangs rgyas kyi bka'i shes bya'i gnas dgu dgu pa rdzogs so// //zad par gyi skye mched bcu po dag gis ni/ rnam par thar pa rnams kyis dgos pa yongs su grub par rig par bya'o/ /rnam par thar pa dang / zil gyis gnon pa'i skye mched dang / zad par gyi skye mched rnams kyi lhag ma ni/ 'di lta ste/ gzhi bsdu ba las 'byung ba bzhin no/ /mi slob pa'i yan lag bcu po dag gis ni mi slob pa rnams kyi phung po lnga po dag bsdu bar rig par bya ste/ tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes mthong ba'i phung po rnams so/ /sangs rgyas kyi bka'i shes bya'i gnas bcu bcu pa rdzogs so// //sangs rgyas kyi bka'i shes bya'i gnas rdzogs so// //gso ba'i rig pa gang zhe na/ de ni rnam pa bzhir blta bar bya ste/ 'di lta ste/ nad la mkhas pa dang / nad ci las gyur pa la mkhas pa dang / nad byung ba bstsal ba la mkhas pa dang / nad bsal nas phyis mi 'byung bar bya ba la mkhas pa'o/ /mkhas pa 'di dag gi rnam par dbye ba ni mdo las ji skad 'byung ba kho na bzhin du rig par bya'o/ /gtan tshigs kyi rig pa gang zhe na/ brtag pa'i don du yod pa'i dang po gang yin pa ste/ de yang gang zhe na 'di lta ste/ smra ba dang / smra ba'i zhal ce ba dang / smra ba'i gzhi dang / smra ba'i rgyan dang / smra ba chad pas bcad pa dang / smra ba las 'byung ba dang / smra ba gces spras la dgos pa'i chos rnams so/ /smra ba gang zhe na/ de yang rnam pa drug tu blta bar bya ste/ smra ba dang / rmad khyer ba smra ba dang / rtsod pa smra ba dang / tshig ngan smra ba dang / mthun pa smra ba dang / gdams par smra ba'o/ /de la smra ba gang zhe na/ ngag tu brjod pa dang / ngag tu brjod de/ ngag gi nges pa'i nges tshig thams cad ni smra ba zhes bya'o/ /rmad khyer ba smra ba gang zhe na/ 'jig rten gyi grags pa smra ba gang yin pa'o/ /rtsod pa smra ba gang zhe na/ 'dod pa rnams las brtsams te/ rang gis yongs su gzung ba'i 'dod pa rnams la gzhan dag 'phrogs pa'am/ gzhan gyis yongs su gzung ba'i 'dod pa rnams gzhan dag las dbrog par 'dod pa'am/ sdug pa'i sems can gyis yongs su gzung ba'i 'dod pa rnams 'phrogs pa'am/ dbrog par 'dod pa'am/ yongs su gzung ba ma yin pa'i 'dod pa rnams la 'di lta ste/ zlos gar mkhan dang / gar mkhan dang / sgeg pa dang / bzhad gad pa la sogs pa dang ldan pa rnams dang / bud med smad 'tshong dang ldan pa rnams la blta ba'i phyir dang / longs spyad pa'i phyir yang rung ste/ de lta bu'i rnam pa'i 'dod pa rnams la sems can 'dod chags dang ma bral ba 'dod pa la 'dod chags kyis chags pa rnams lhag par zhen pa'i phyir dang / rnam par bcings pa'i phyir dang / yongs su zhen pa'i phyir dang / kun du 'dod chags pa'i phyir dang / nyes par brtsams shing 'gyed la rtsod pa la zhugs pa rnams rnam pa sna tshogs su smra zhing rtsod la/ mi mthun pa smra ba dang / yang nyes par spyod pa las brtsams te/ lus kyis nyes par spyod pa dang / ngag gis nyes par spyod pa bdag gis byas pa la/ gzhan dag gis gleng ba'am/ lus kyis nyes par byed pa dang / ngag gis nyes par spyod pa gzhan gyis byas pa la/ gzhan dag la gleng ba dang / sdug pa'i sems can gyi lus kyis nyes par spyod pa dang / ngag gis nyes par spyod pa byas pa la/ gzhan dag gis gleng ba ba'am/ gzhan dag gleng ba dang / lus kyis nyes par spyod pa dang / ngag gis nyes par spyod pa ma byas la/ bya bar bsams pa de lta bu'i rnam pa'i nyes par spyod pa kun du spyod pa la/ sems can chags pa dang ma bral ba/ zhe sdang dang ma bral ba/ gti mug dang ma bral ba/ chags pa dang / zhe sdang dang / gti mug gis zil gyis non pa rnams lhag par zhen pa'i phyir dang / rnam par bcings pa'i phyir dang / yongs su zhen pa'i phyir dang / kun du 'dod chags pa'i phyir dang / gcig la gcig nyes par brtsams te/ kun nas nyon mongs pa'i sems su gyur/ 'gyed la rtsod pa la zhugs pa rnams rnam pa sna tshogs su smra zhing rtsod la/ mi mthun par smra ba dang / yang lta ba las brtsams te 'di lta ste/ 'jig tshogs la lta ba dang / chad par lta ba dang / rgyu med par lta ba dang / mi mthun pa la rgyur lta ba dang / rtag par lta ba dang / khyu mchog pa'i tshogs kyi lta ba dang / log par lta ba dang / yang sdig pa can gyi lta ba gang ci yang rung ba de lta bu dang mthun pa'i lta ba bdag gis yongs su gzung ba rnams la gzhan dag gis bzlog pa'am/ gzhan gyis yongs su gzung ba rnams gzhan dag bzlog pa'am/ sdug pa'i sems can gyis yongs su gzung ba la gzhan dag gis bzlog pa'am/ gzhan dag bzlog pa'am/ yang yongs su ma bzung ba rnams yongs su gzung bar 'dod pa'i phyir/ sems can 'dod chags dang ma bral pa rnams snga ma bzhin du rnam pa sna tshogs su smra zhing rtsod la/ mi mthun par smra ba 'di ni rtsod pa smra ba zhes bya'o/ /tshig ngan pa smra ba gang zhe na/ nyes pa rtsom zhing kun nas nyon mongs pa can gyi sems dang ldan pa rnams gtam gyi 'phro bor te phan tshun rtsub pa dang ldan pa dang / tshogs par brjod par mi 'os pa dang ldan pa dang / tshig kyal pa dang ldan pa gang yin pa dang / nyes par bshad pa'i chos 'dul ba'i chos ston pa dang / 'bel ba'i gtam gtan la dbab pa dang / 'doms shing rjes su ston pa gang yin pa 'di ni tshig ngan smra ba zhes bya ba'o / /mthun par smra ba gang zhe na/ legs par gsungs pa'i chos 'dul ba'i chos ston pa dang / 'bel ba'i gtam rnam par gtan la 'bebs pa dang / rjes su ston pa dang / the tshom skyes pa bcad pa'i phyir dang / zab mo'i don gyi tshig rtogs par bya ba dang / ye shes mthong ba rnam par dag par bya ba dang / thar pa dang mthun pa'i rjes su mthun par smra ba ste/ da lta bas na mthun par smra ba zhes bya ste/ 'di ni mthun par smra ba zhes bya ba'o / /gdams pa smra ba gang zhe na/ gang zag lhag pa'i sems dang / lhag pa'i shes rab la brtson par 'dod pa sems mnyam par ma bzhag pa mnyam par bzhag par bya ba dang / sems mnyam par bzhag pa thar par bya ba smra ba dang / de kho na shes pa rtogs par bya ba dang / de kho na shes pa khong du chud par bya ba'i phyir smra ba gang yin pa ste/ de lta bas na gdams pa smra ba zhes bya ste/ 'di ni gdams pa smra ba zhes bya ba'o / /smra ba drug po 'di dag las smra ba du zhig ni yang dag pa dang / de kho na dang / don dang ldan pa dang / bsten par bya ba yin/ smra ba du zhig ni yang dag pa ma yin pa dang / de kho na ma yin pa dang / don dang ldan pa ma yin pa dang / yongs su spang bar bya ba yin zhe na/ smra ba tha ma gnyis ni yang dag pa dang / de kho na dang / don dang ldan pa dang / bsten par bya ba yin no/ /smra ba bar ma gnyis ni yang dag pa ma yin pa dang / de kho na ma yin pa dang / don dang ldan pa ma yin pa dang / yongs su spang bar bya ba yin no/ /smra ba dang po gnyis ni gnyi ga yin no/ /smra ba'i zhal ce pa gang zhe na/ de yang rnam pa drug tu blta bar bya ste/ 'di lta ste/ rgyal po bzhugs pa'i sa dang / bskos pa 'du ba'i sa dang / 'khor dang / 'du ba dang / chos dang don la mkhas pa'i dge sbyong dang bram ze rnams dang / chos dang don 'dod pa'i sems can rnams so/ /smra ba'i gzhi gang zhe na/ de ni rnam pa bcur blta bar bya ste/ bsgrub par bya ba'i don rnam pa gnyis dang / bsgrub pa rnam pa brgyad do/ bsgrub par bya ba'i don rnam pa gnyis gang zhe na/ ngo bo nyid dang / bye brag go/ /de la ngo bo nyid bsgrub pa ni/ yod pa yang yod par bsgrub/ med pa yang med par bsgrub pa'o/ /bye brag bsgrub pa ni/ bla na yod pa'ang bla na yod par bsgrub pa dang / bla na med pa yang bla na med par bsgrub pa dang / rtag pa yang rtag par mi rtag pa yang mi rtag par/ gzugs can yang gzugs can du/ gzugs can ma yin pa yang gzugs can ma yin par bsgrub pa dang / gzugs can dang / gzugs can ma yin pa ji lta ba bzhin du/ bstan du yod pa dang / bstan du med pa dang / thogs pa yod pa dang / thogs pa med pa dang / zag pa yod pa dang / zag pa med pa dang / 'dus byas dang / 'dus ma byas kyang de bzhin te/ de la sogs pa rab tu dbye ba'i tshul gyis bye brag bsgrub pa blta bar bya'o/ /bsgrub pa rnam pa brgyad gang zhe na/ dam bca' ba dang / gtan tshigs dang / dper brjod pa dang / mthun pa dang / mi mthun pa dang / mngon sum dang / rjes su dpag pa dang / yid ches pa'i lung ngo / /dam bcas pa gang zhe na/ bsgrub par bya ba'i chos don rnam pa gnyis las brtsams nas phan tshun bdag gis phyogs yongs su 'dzin pa ste/ bstan bcos yongs su 'dzin pa'am/ bdag gi spobs pa'am/ gzhan la brnyas pa'am/ gzhan las thos pa'am/ de kho na mngon par rtogs pa'am/ bdag gi phyogs su gzugs pa'am/ gzhan gyi phyogs sun dbyung ba'am/ gzhan zil gyis mnan pa'am/ gzhan khyad du gsad pa'am/ gzhan la snying brtse ba'i phyir ro/ /gtan tshigs gang zhe na/ dam bcas pa'i don de nyid bsgrub pa'i phyir dper brjod pa la brten nas mthun pa'am/ mi mthun pa'am/ mngon sum mam/ rjes su dpag pa'am/ yid ches pa'i lung gis bskyed pa'i rigs pa smra ba gang yin pa'o/ /dper brjod pa gang zhe na/ dam bcas pa'i don de nyid bsgrub pa'i phyir gtan tshigs la brten nas/ 'jig rten na 'dres shing grags pa'i dngos po dang / sbyor ba dang ldan pa smra ba gang yin pa'o/ /mthun pa gang zhe na/ chos la la 'ga' zhig dang 'dra bas 'ga' zhig dang 'dra ba gang yin pa'o/ /de yang rnam pa lngar blta bar bya ste/ rtags 'dra ba dang / ngo bo nyid 'dra ba dang / chos 'dra ba dang / rgyu dang 'bras bu 'dra ba'o/ /rtags 'dra ba gang zhe na/ da ltar gyi'am/ sngon mthong ba'i mngon mtshan dang / mtshan mas 'brel pas phan tshun mthun pa gang yin pa'o/ /ngo bo nyid 'dra ba gang zhe na/ phan tshun mtshan nyid 'dra ba gang yin pa'o/ /las 'dra ba gang zhe na/ phan tshun byed pa 'dra ba gang yin pa'o/ /chos 'dra ba gang zhe na/ phan tshun chos nyid 'dra ba gang yin pa ste/ 'di lta ste/ mi rtag pa ni sdug bsngal ba'i chos nyid du 'dra'o/ /sdug bsngal ba ni bdag med pa'i chos nyid du 'dra'o/ /bdag med pa rnams ni skye ba'i chos nyid du 'dra'o/ /skye ba'i chos can rnams ni rga ba'i chos nyid du 'dra'o/ /rga ba'i chos can rnams ni shi ba'i chos nyid du 'dra'o/ /gzugs can dang / gzugs can ma yin pa dang / bstan du yod pa dang / bstan du med pa dang / thogs pa yod pa dang / thogs pa med pa dang / zag pa yod pa dang / zag pa med pa dang / 'dus byas dang / 'dus ma byas pa'i chos nyid dang / de lta bu dang mthun pa'i chos nyid du 'dra ba'o/ /rgyu dang 'bras bu 'dra ba gang zhe na/ phan tshun rgyu dang 'bras bu 'grub pa dang / bsgrub pa 'dra ba gang yin pa ste/ 'di ni mthun pa zhes bya ba'o / /mi mthun pa gang zhe na/ la la 'ga' zhig dang mi 'dra bas 'ga' zhig dang mi 'dra ba gang yin pa ste/ de yang de las bzlog pa las rnam pa lnga nyid du blta bar bya'o/ /mngon sum gang zhe na/ lkog tu ma gyur pa dang / mngon par brtags zin pa ma yin pa dang / mngon par brtag par bya ba ma yin pa dang / ma 'khrul pa gang yin pa'o/ /lkog tu ma gyur pa gang zhe na/ de ni rnam pa bzhir rig par bya ste/ dbang po yongs su ma nyams shing / yid la byed pa mngon du gnas pa na mthun par skye ba dang / yang dag par 'das nas skye ba dang / sgrib pa med pa dang / thag ring ba ma yin pa'o/ /mthun par skye ba gang zhe na/ 'dod pa la spyod pa'i dbang po'i yul 'dod pa na spyod pa ma yin pa dang / gong ma'i sa pa'i dbang po'i yul/ gong ma'i sa pa'i skyes pa gang yin pa de/ skyes pa dang / byung ba dang / grub pa ste/ de ni mthun par skye ba zhes bya'o/ /yang dag par 'das nas skyes pa gang zhe na/ gong ma'i sa pa'i dbang po'i yul 'og ma'i sa pa'i skyes zhes bya ba la sogs pa gang yin pa ni/ yang dag par 'das nas skyes pa zhes bya'o/ /sgrib pa med pa gang zhe na/ de yang rnam pa bzhir rig par bya ste/ sgrib g.yogs kyi sgrib pa dang / mi snang bar byed pa dang / zil gyis gnon pa dang / rmongs pa'i sgrib pas ma bsgribs pa gang yin pa de ni ma bsgribs pa zhes bya'o/ /sgrib g.yogs kyi sgrib pa gang zhe na/ 'di lta ste/ mun pa mun nag dang / ma rig pa'i mun pa dang / gzugs gtan mi gsal ba'o/ /mi snang bar byed pa'i sgrib pa gang zhe na/ 'di lta ste/ sman gyi stobs sam/ sngags kyi stobs sam/ rdzu 'phrul gyi mthu'i stobs so/ /zil gyis gnon pa'i sgrib pa gang zhe na/ 'di lta ste/ mang pos nyung du zil gyis mnan nas mi snang ba ste/ bza' ba dang / btung ba'i nang du 'dug gam/ skra rtse'i dum bu yod dam/ gzhan yang de lta bu dang mthun pa 'di lta ste/ dper na/ 'od chen pos 'od chung ngu zil gyis mnan nas mi snang ba dang / nyi ma'am zla bas skar ma'i gzugs rnams zil gyis mnan nas mi snang ba dang / 'di lta ste/ gnyen po'i mi mthun pa'i phyogs zil gyis mnan nas mi snang ba ste/ mi sdug pa yid la byed pas sdug pa zil gyis mnan pa'am/ mi rtag pa dang / sdug bsngal ba dang / bdag med pa yid la byed pas bde ba zil gyis mnan pa'am/ mtshan ma med pa yid la byed pas mtshan ma thams cad zil gyis mnan pa'o/ /rmongs pa'i sgrib pa gang zhe na/ 'di lta ste/ sgyu ma'i las sam/ gzugs kyi mtshan ma'i bye brag dang / rjes su mthun pa dang / nang dang / so so'i nang dang / rab rib tu gyur pa dang / gnyid log pa dang / brgyal ba dang / myos pa dang / bag med pa dang / smyos pa dang / gzhan yang de lta bu dang mthun pa'i sgrib pa gang yin pa rnams ni rmongs pa'i sgrib pa zhes bya'o/ /thag ring ba ma yin pa gang zhe na/ thag ring ba rnam pa gsum gyis ring ba ma yin pa gang yin pa ste/ yul thag ring ba dang / dus thag ring ba dang / cha phra bas thag ring ba ste/ lkog tu gyur pa ma yin pa de dag thams cad mdor bsdus pa ni/ lkog tu ma gyur pas mngon sum gyi tshad mar blta bar bya'o/ /mngon par brtags zin pa ma yin pa dang / mngon par brtag par bya ba ma yin pa'i mngon sum gang zhe na/ gzung ba tsam du grags pa'i dmigs pa'i rten gyi yul gang yin pa dang / yul la gnas pa'i dmigs pa'i rten gyi yul gang yin pa'o/ /gzung ba tsam du grags pa'i dmigs pa'i rten gyi yul gang zhe na/ yul gang gzung ba tsam du grags pa'i dmigs pa'i rten gyi bya ba byed pa ste/ 'di lta ste/ sman pas nad pa la sman kha dog dang / dri dang / ro dang / reg phun sum tshogs pa dang / nus pa dang / smin pa dang / mthu che ba byin pa dang / de'i kha dog dang / dri dang / ro dang / reg rnams ni gzung ba tsam du grags pa'i dmigs pa'i rten du gyur pa yin par blta bar bya'o/ /nus pa dang / sman pa dang / mthu che ba ni nad med par ma byas kyi bar du mngon par brtag par bya ba ma yin no/ /byas pa'i 'og tu ni brtags zin pa yin te/ de lta bu dang mthun pa ni gzung ba tsam du grags pa'i dmigs pa'i rten gyi yul du rig par bya'o/ /yul la gnas pa'i rten gyi yul gang zhe na/ yul gang yul la gnas pa'i dmigs pa'i rten gyi bya ba byed pa gang yin pa ste/ 'di lta ste/ rnal 'byor spyod pas / sa dang / chu dang / me dang / rlung gi khams brtags nas/ chu la sar mos par byed pa na/ sa'i 'du shes kho nas gnas te/ chu'i 'du shes ni ldog par 'gyur ro/ /me dang rlung la sar mos pa na/ sa'i 'du shes kho nas gnas te/ me dang rlung gi 'du shes ni ldog par 'gyur ro/ / de'i sa'i 'du shes gang yin pa de ni yul gnas pa'i dmigs pa'o/ /sa gang yin pa de ni yul la gnas pa'i dmigs pa'i rten to/ /sa la ji lta ba bzhin du/ chu dang / me dang rlung la yang ci rigs par blta bar bya ste/ 'di ni yul la gnas pa'i dmigs pa'i rten gyi yul zhes bya'o/ /de la yul la gnas pa'i dmigs pa'i rten gyi yul gang yin pa de ni mngon par brtags zin pa yang ma yin la/ mngon par brtag par bya ba yang ma yin no/ /khams rnams ni mos pa ma grub pa'i tshe ni mngon par brtag par bya ba yod do / /grub nas ni mngon par brtags zin pa yin te/ 'di ni mngon par brtags zin pa yang ma yin/ brtag par bya ba yang ma yin pa'i mngon sum gyi tshad ma zhes bya'o/ /yul ma 'khrul pa'i mngon sum gang zhe na/ de ni rnam pa lnga'am/ rnam pa bdun du blta bar bya ste/ rnam pa lnga gang zhe na/ rnam pa lngas 'khrul pa'o/ /rnam pa lngas 'khrul pa yang gang zhe na/ 'du shes 'khrul pa dang / grangs 'khrul pa dang / dbyibs 'khrul pa dang / kha dog 'khrul pa dang / las 'khrul pa'o/ /'khrul pa rnam pa bdun gang zhe na/ 'khrul pa rnam pa lnga po 'di dag nyid kyi nang du kun du 'gro ba'i 'khrul pa rnam pa gnyis bsres nas 'khrul pa rnam pa bdun du 'gyur ro/ /'khrul pa rnam pa gnyis gang zhe na/ sems 'khrul pa dang / lta ba 'khrul pa'o/ /'du shes pa 'khrul pa gang zhe na/ de'i mtshan nyid ma yin pa la der 'du shes pa gang yin pa ste/ dper na 'od zer gyi mtshan ma can gyi smig rgyu ba la chur 'du shes pa lta bu'o/ /grangs 'khrul pa gang zhe na/ nyung ngu la mang por mngon pa'i nga rgyal byed pa gang yin pa ste/ dper na rab rib can gyis zla ba gcig pu la/ zla ba mang po mthong ba lta bu'o/ /dbyibs 'khrul pa gang zhe na/ dbyibs gzhan la de las gzhan pa'i dbyibs su mngon pa'i nga rgyal byed pa gang yin pa ste/ dper na mgal me la 'khor lo'i dbyibs su mthong ba lta bu'o/ /kha dog 'khrul pa gang zhe na/ kha dog gzhan la de las gzhan pa'i kha dog tu mngon pa'i nga rgyal byed pa gang yin pa ste/ dper na mig ser gyi nad kyis btab pa'i dbang pos gzugs ser po ma yin pa rnams la gzugs ser por mthong ba lta bu'o/ / las 'khrul pa gang zhe na/ las med pa la las yod par mngon pa'i nga rgyal byed pa gang yin pa ste/ dper na khu tshur dam du bcangs te rgyug pas shing phyir 'gro bar mthong ba lta bu'o/ /sems 'khrul pa gang zhe na/ 'khrul pa rnam pa lnga po de dag nyid kyis rnam par 'khrul pa'i don la sems mngon par dga' ba gang yin pa'o/ /lta ba 'khrul pa gang zhe na/ 'khrul pa rnam pa lnga po nyid kyis rnam par 'khrul pa'i don la 'dod pa dang / gsal bar byed pa dang / rnam par gzhog pa dang / bkra shis par 'du shes pa dang / mngon par zhen pa gang yin pa'o/ /mngon sum de su'i mngon sum du brjod par bya zhe na/ mdor bsdu na bzhi ste/ dbang po gzugs can gyi mngon sum dang / yid kyis myong ba'i mngon sum dang / 'jig rten gyi mngon sum dang / dag pa'i mngon sum mo/ /dbang po gzugs can gyi mngon sum gang zhe na/ ji skad bstan pa'i mngon sum gyi mtshan nyid kyis dbang po gzugs can lnga po rnams kyi spyod yul te yul gang yin pa'o/ /yid kyis myong ba'i mngon sum gang zhe na/ ji skad bstan pa'i mngon sum gyi mtshan nyid yid kyi spyod yul te yul gang yin pa'o/ /'jig rten gyi mngon sum gang zhe na/ de gnyi ga gcig tu bsdus pa ni/ 'jig rten gyi mngon sum zhes bya'o/ /dag pa'i mngon sum gang zhe na/ 'jig rten gyi mngon sum gang yin pa ni dag pa'i mngon sum yang de yin no/ / ngag dag pa'i mngon sum yin la 'jig rten gyi mngon sum ma yin pa yang yod de/ 'jig rten las 'das pa'i ye shes kyi spyod yul te yul gang yin pa ste/ yod pa la yang yod par/ med pa la yang med par/ bla na yod pa la yang bla na yod par/ bla na med pa la yang bla na med par shes pa ni 'jig rten pa rnams dang thun mong ma yin pa ste/ 'di ni mngon sum gyi tshad ma zhes bya'o// //bam po bco brgyad pa / rjes su dpag pa gang zhe na/ mngon par brtags pa dang bcas pas mngon par brtags pa dang / mngon par brtag par bya ba'i yul lo/ /de yang rnam pa lngar blta bar bya ste/ rtags dang / ngo bo nyid dang / las dang / chos dang / rgyu dang 'bras bu'o/ /rtags las rjes su dpag pa gang zhe na/ de ltar ram sngon mthong ba'i mngon mtshan dang mtshan ma 'ga' zhig gis 'brel pa las yul mngon par brtags pa gang yin pa ste/ dper na ru mtshon las shing rta rjes su dpag pa dang / dud pa las me dang / rgyal po las yul 'khor dang / khyim thab las bud med dang / nog dang rwa las ba lang dang / byis pa dang / skra gnag pa dang / lang tsho gzhon pa las gzhon nu dang / gnyer ma dang / skra dkar la sogs pa las rgan po dang / rang gi cha lugs 'dzin pa las khyim pa'am/ rab tu byung ba dang / 'phags pa rnams la lta bar 'dod pa dang / dam pa'i chos nyan pa dang / ser sna dang bral ba las dad pa can dang / legs pa'i bsam pa sems pa dang / legs pa'i smra ba smra ba dang / legs pa'i bya ba'i las byed pa la mkhas pa dang / snying brtse ba dang / snyan par smra ba dang / brtan pa dang / sbar ma chums pa dang / zab mo'i don gyi dgongs pa nges par 'grel pa las/ byang chub sems dpa' dang / rgod pa dang / 'phyar ba dang / co 'dri ba dang / rtse ba dang / ca co che ba las 'dod chags dang bral ba ma yin pa dang / rtag tu spyod lam rab tu zhi ba las 'dod chags dang bral ba dang / de bzhin gshegs pa'i mtshan rnams dang / dpe byad bzang po rnams dang / de bzhin gshegs pa'i ye shes dang / nye bar zhi ba dang / sgrub pa dang / mthu las de bzhin gshegs pa dgra bcom pa yang dag par rdzogs pa'i sangs rgyas thams cad mkhyen pa dang / gzhon nu'i tshe mthong ba'i mtshan ma las de nyid 'di yin no snyam du rgan po rjes su dpag pa dang / de lta bu dang mthun pa ni/ rtags las rjes su dpag pa yin par rig par bya'o/ /ngo bo nyid las rjes su dpag pa gang zhe na/ mngon sum gyi ngo bo nyid kyis lkog na 'dug pa'i ngo bo nyid brtag pa'am/ ngo bo nyid kyi phyogs gcig la phyogs gcig brtags pa gang yin pa ste/ dper na da ltar las 'das pa rjes su dpag pa dang / 'das pa las ma 'ongs pa dang / da ltar byung pa nye ba las thag ring ba dang / da ltar byung ba las ma 'ongs pa rjes su dpag pa dang / bza' ba dang / btung ba dang / bzhon pa dang / gos dang / rgyan rnams kyi phyogs gcig pa dang / nyung zad dang / shas shig dang / chung ngu brtag pas yon tan dang / skyon brtag pa las bza' ba dang / btung ba dang / bzhon pa dang / gos dang / rgyan gyi tshogs mtha' dag rjes su dpag pa dang / phyogs gcig tshos pas lhag ma yang tshos pa dang / de lta bu dang mthun pa ni ngo bo nyid las rjes su dpag pa yin par rig par bya'o/ /las las rjes su dpag pa gang zhe na/ byed pas las kyi rten brtag pa gang yin pa ste/ dben na mi 'gul ba dang / bya tshang yod pa la sogs pa las sdong dum du rjes su dpag pa dang / 'gul ba dang / yan lag bskyod pa la sogs pa las mi dang / rka lag gi rjes las glang po che dang / lus kyis 'gro ba'i rjes las sbrul dang / skad tse re re zer ba las rta dang / nga ro sgrogs pa las seng ge dang / 'bu zhes zer ba las khyu ba dang / mthong ba las mig dang / thos pa las rna ba dang / snom pa las sna dang / myang ba las lce dang / reg pa las lus dang / rnam par shes pa las yid dang / chu'i nang du snang ba la bgegs byed pa las sa dang / snum pa dang sngon po'i phyogs mthong ba las chu dang / thal ba tsha ba mthong ba las me dang / shing g.yo ba las rlung dang / rtag tu mig 'dzums shing khar ba thogs pa dang / gzhan gyis bkri ba dang / steg 'cha' ba dang / lam ma yin par 'gro ba las long ba dang / skad chen pos thos pa las 'on pa dang / dad pa can dang / mkhas pa dang / 'dod chags dang / 'dod chags dang bral ba ma yin pa dang / byang chub sems dpa' dang / de bzhin gshegs pa rnams la las las rjes su dpag par snga ma bzhin du blta bar bya'o/ /chos las rjes su dpag pa gang zhe na/ mi 'bral ba'i chos dang / 'brel pa las de dang 'brel pa'i chos nyid brtag pa gang yin pa ste/ dper na mi rtag pa dang 'brel pa las sdug bsngal ba rjes su dpag pa dang / sdug bsngal ba dang 'brel pa las stong pa dang bdag med pa dang / skye ba dang 'brel pa las rga ba'i chos nyid dang / rga ba dang 'brel pa las 'chi ba'i chos nyid dang / gzugs can bstan du yod pa dang / thogs pa yod pa dang 'brel pa las phyogs dang / lus yod par rjes su dpag pa dang / zag pa dang bcas pa dang 'brel pa las / sdug bsngal ba dang / zag pa med pa dang 'brel pa las/ sdug bsngal ba med pa dang / 'dus byas dang 'brel pa las skye ba dang 'jig pa dang / gnas pa gzhan du 'gyur ba'i chos nyid dang / 'dus ma byas dang 'brel pa las skye ba med pa dang / 'jig pa med pa dang / gnas pa gzhan du 'gyur ba med pa'i chos nyid dang / de lta bu dang mthun pa ni chos las rjes su dpag pa yin par rig par bya'o/ /rgyu dang 'bras bu las rjes su dpag pa gang zhe na/ rgyu las 'bras bu'am/ 'bras bu las rgyu brtag pa gang yin pa ste/ dper na 'gro ba las yul gzhan du phyin par rjes su dpag pa dang / yul gzhan du phyin pa las 'gro ba rjes su dpag pa dang / rgyal po mnyes par byas pa las/ bya dga' chen po 'thob pa dang / bya dga' chen po 'thob pa las rgyal po mnyes par byas pa dang / las legs par byas pa grub pa las nor dang / 'bru mang po 'thob pa dang / nor dang 'bru mang po thob pa las las legs par byas pa grub pa dang / sngon gyi legs par spyod pa dang / nyes par spyod pa las phun sum tshogs pa dang / rgud pa dang / phun sum tshogs pa dang / rgud pa las sngon gyi legs par spyod pa dang / nyes par spyod pa dang / kha zas mang po zos pa las tshim pa dang / tshim pa las kha zas mang po zos pa dang / kha zas mi mthun pa zos pa las nad dang / nad las kha zas mi mthun pa zos pa dang / bsam gtan las 'dod chags dang bral ba dang / 'dod chags dang bral ba las bsam gtan dang / lam las dge sbyong gi 'bras bu dang / dge sbyong gi 'bras bu las lam dang / de lta bu dang mthun pa na rgyu dang 'bras bu las rjes su dpag pa yin par rig par bya ste/ 'di ni rjes su dpag pa zhes bya'o/ /yid ches pa'i lung gang zhe na/ thams cad mkhyen pas gsungs pa'am/ de la thos pa'am/ de'i rjes su mthun pa'i chos gang yin pa'o/ / de yang rnam pa gsum du blta bar bya ste/ gsung rab sdud pa dang / kun nas nyon mongs pa'i gnyen po dang / mtshan nyid dang mi 'gal ba'o/ /gsung rab sdud pa gang zhe na/ nyan thos kyis bshad pa'am/ sangs rgyas kyis gsungs pa'i mdo sde gcig nas gcig tu brgyud nas 'ongs pa gang yin pa de ni nang du chos sdud pa dang / don sdud pa gang yin pa'o/ /kun nas nyon mongs pa'i gnyen po gang zhe na/ chos gang bsgoms nas 'dod chags 'dul bar 'gyur ba dang / zhe sdang 'dul ba dang / gti mug 'dul ba dang / nyon mongs pa dang nye ba'i nyon mongs pa thams cad 'dul bar 'gyur ro/ /mtshan nyid dang mi 'gal ba gang zhe na/ mtshan nyid dang 'gal ba las bzlog pa ni mtshan nyid dang mi 'gal ba yin par blta bar bya'o/ /mtshan nyid dang 'gal ba gang zhe na/ 'di ltar mtshan nyid med pa la mtshan nyid du sgro 'dogs pa ste/ dper na bdag gam sems can nam/ srog gam skye ba po la sogs brtag pa'am/ chad pa'am/ gzugs can nam/ gzugs med pa la sogs pa lta bu'o/ /mtshan nyid gcig tu nges par yod pa las nges pa med pa rnam par 'jog ste/ dper na 'dus byas thams cad ni mi rtag pa'o/ /zag pa thams cad ni sdug bsngal ba'o/ /chos thams cad ni bdag med pa'o zhes bya ba yin na/ 'di ni kha cig ni rtag par rnam par 'jog par byed/ kha cig ni mi rtag par rnam par 'jog par byed/ kha cig ni sdug bsngal bar rnam par 'jog par byed/ kha cig ni sdug bsngal ba ma yin par rnam par 'jog par byed/ kha cig ni bdag med par rnam par 'jog par byed/ kha cig ni bdag tu rnam par 'jog par byed pa dang / de bzhin du lung du ma bstan pa'i gzhi rnams/ bcom ldan 'das kyis rnam par gzhag pa de dag la gcig tu nges par lung bstan du rung bar yongs su tshol zhing / lung bstan par rnam par gzhag pa yang yid ches pa dang / ma nges pa la gcig tu nges par rnam par 'jog par byed de/ dper na bde pa'i tshor ba thams cad las ni 'dod chags rgyas par 'gyur ro zhes bya ba dang / sdug bsngal thams cad las ni zhe sdang ngo / /bde ba'i tshor ba zag pa dang bcas pa thams cad ni gcig tu nges par bde ba'o zhes bya ba dang / ched du bsams pa'i las kyis ni gcig tu nges par sdug bsngal gyi rnam par smin pa 'ba' zhig myong bar 'gyur ro zhes bya ba la sogs pa dang / mtshan nyid yod la khyad par med pa'i mtshan nyid gang yin pa de ni khyad par can du rnam par 'jog pa'am/ khyad par can gyi mtshan nyid gang yin pa de ni khyad par med par rnam par 'jog ste/ dper na 'dus byas la khyad par can gyi mtshan nyid gang yin pa de yang / 'dus ma byas su rnam par 'jog par byed/ 'dus ma byas la khyad par med pa'i mtshan nyid gang yin pa de yang 'dus byas su rnam par 'jog par byed pa lta bu'o/ /'dus byas dang 'dus ma byas la ji lta ba bzhin du gzugs can rnams dang gzugs med pa rnams dang / bstan du yod pa rnams dang / thogs pa dang bcas pa rnams dang / thogs pa med pa rnams dang / zag pa dang bcas pa rnams dang / zag pa med pa rnams la sogs pa la yang ci rigs su rig par bya'o/ /mtshan nyid yod pa kho na la yang rgyu dang / 'bras bus rigs pa ma yin par gtogs pa'i mtshan nyid du rnam par 'jog ste/ dper na legs par spyod pa'i 'bras bu mi sdug par 'gyur ba dang / nyes par spyod pa'i sdug bar 'gyur ba dang / nyes par bshad pa'i chos 'dul ba la log par bsgrubs pas rnam par dag par 'gyur ba dang / legs par gsungs pa'i chos 'dul ba la yang dag par bsgrubs pas kun nas nyon mongs par 'gyur bar rnam par 'jog pa dang / gdags par smra bas yongs su ma grub pa'i mtshan nyid la/ gdags par [(]sma [,]smra [)]bas yongs su grub pa'i mtshan nyid du rnam par 'jog pa ste/ dper na brjod du med pa'i chos thams cad la brjod par don dam pa rnam par 'jog pa dang / de lta bu dang mthun pa ni mtshan nyid mi mthun par blta bar bya'o/ /de las bzlog pa ni mtshan nyid mi mthun pa med pa'o/ /de ni mtshan nyid mi mthun pa med pa zhes bya ste/ 'di ni yid ches pa'i lung zhes bya'o/ /gang gi tshe chos thams cad rang rang gi chos nyid la gnas par rang gi mtshan nyid la gnas kyi grub pa'i tshe ci'i phyir bsgrub par bya ba'i don rnam pa gnyis bstan zhe na/ pha rol yid ches pa bskyed pa'i phyir yin gyi/ mtshan nyid bskyed pa'i phyir ni ma yin no/ /ci'i phyir bsgrub par bya ba'i don bsgrub par thog mar dam bca' bar byed ce na/ 'di ltar 'dod cing bsams pa'i don yongs su bstan pa'i phyir ro/ /ci'i phyir gtan tshigs kyis bsgrub ce na/ 'di ltar mthong ba'i dngos po la brten pa'i rigs pas dam bcas pa'i don de nyid pha rol 'dzin du gzhug pa'i phyir ro/ /ci'i phyir dpe bsgrub ce na/ 'di ltar mthong ba'i dngos po ni/ rigs pa de nyid kyi gnas yin par bstan pa'i phyir ro/ /ci'i phyir mthun pa dang / mi mthun pa dang / mngon sum dang / rjes su dpag pa dang / yid ches pa'i lung bsgrub ce na/ 'di ltar gtan tshigs dang / dper brjod pa de gnyis kyi 'gal ba dang / mi 'gal ba'i shes pa yongs su bstan pa'i phyir ro/ /'gal ba de yang rnam pa gnyis kyis rig par bya ste/ ma nges pa dang / bsgrub par bya ba dang 'dra bas so/ /mi 'gal ba ni rnam pa gnyis kho nas rig par bya ste/ gcig tu nges pa dang / bsgrub par bya ba'i khyad par gyis so/ /gang na 'gal ba yod pa de ni dam bcas par bsgrub pa tshad mar bya ba ma yin pa'i phyir tshad ma ma yin no/ /gang la 'gal ba med pa de ni dam bcas pa bsgrub pa la tshad mar bya ba yin pa'i phyir tshad ma zhes bya ste/ 'di ni smra ba'i gnas zhes bya ba'o / /smra ba'i rgyan gang zhe na/ de ni rnam pa lngar blta bar bya ste/ 'di lta ste/ bdag dang pha rol gyi lugs shes pa dang / tshig gi sbyor ba phun sum tshogs pa dang / mi 'jigs pa dang / brten pa dang / ngo mi bzlog pa'o/ /bdag dang pha rol gyi lugs shes pa gang zhe na/ 'di ltar 'di na kha cig chos 'dul ba la mngon par dga' ste/ bstan bcos dang / lugs dang / grub pa'i mtha' de la 'don pa dang / dga' ba dang / nyan pa dang / bsams pa dang / yongs su smin par bya ba dang / sgrub pas mkhas par byas shing tshig gis goms par byas te/ byang bar byas pa gang yin pa dang / gzhan yang chos 'dul ba la mngon par mi 'dod cing / mngon par mi dga' ste/ pha rol gyi bstan bcos dang / pha rol gyi lugs dang / pha rol gyi grub pa'i mtha' de la 'don pa dang / dga' ba dang / nyan pa dang / bsams pa dang / yongs su smin par byed la/ sgrub par ni mi byed de/ mkhas par byas shing tshig gis goms par byas te/ byang bar byas pa gang yin pa 'di ni bdag dang pha rol gyi lugs shes pa zhes bya'o/ /tshig sbyor ba phun sum tshogs pa gang zhe na/ 'di ltar 'di na kha cig tshig zur phyin pas smra ba po yin gyi/ tshig zur mi phyin pas ma yin pa lta bu ste/ tshig gang zhe na/ de ni yon tan rnam pa lnga dang ldan par rig par bya ste/ grong mi'i skad ma yin pa dang / yang ba dang / brjid pa dang / 'brel pa dang / don bzang po yin no/ /ji ltar grong mi'i skad ma yin pa yin zhe na/ yul ngan pa dang / yul 'khor ngan pa dang / yul mi ngan pa'i skad ma yin pa'o/ /ji ltar na yang ba yin zhe na/ 'jig rten na grags shing shin tu rigs pa'i tshig sbyor bar byed pa'o/ /ji ltar na brjid pa yin zhe na/ don gang brjod pa'i skabs su bab pa'i don de bsgrub pa'i phyir legs par sbyar zhing mthu yod pa'o/ /ji ltar na 'brel pa yin zhe na/ chos dang don snga ma dang phyi ma mi 'brel ba ma yin pa'o/ /ji ltar na don bzang ba yin zhe na/ mngon par mtho ba'am/ nges par legs pa las brtsams te/ phyin ci ma log pa'o/ /tshig zur phyin par smra ba rnams kyi tshig sbyor ba de yang 'di ltar rnam pa dgu phun sum tshogs par rig par bya ste/ ma 'tshal ba dang / nyes par rtsom pa ma yin pa dang / brda phrad pa dang / ran pa dang / don dang ldan pa dang / dus dang / sbyor ba dang / bstan pa dang / gsal ba dang / rgyun chags pa'o/ /de dag thams cad gcig tu bsdus pa ni tshig sbyor ba phun sum tshogs pa ste/ 'di ni tshig sbyor ba phun sum tshogs pa zhes bya'o/ /mi 'jigs pa gang zhe na/ 'di ltar 'di ni kha cig ris kyi 'khor mang po rnam pa sna tshogs kyi ris dang / rags pa'i ris dang / mngon par zhen pa'i ris dang / tshogs pa'i ris dang / mkhas pa'i ris kyi nang du yang rung ste/ sems zhum pa med pa dang / sems dman pa med pa dang / sems 'jigs pa med pa dang / lus mi rdul ba dang / bzhin mi 'gyur ba dang / skad mi 'dar ba dang / gcom mi chung bar tshig smra ba ste/ 'di ni mi 'jigs pa zhes bya ba'o / /brtan pa gang zhe na/ 'di ltar 'di na kha cig dus la bab pa na tshig dal bus smra bar byed kyi rings par mi smra ba lta bu ste/ 'di ni brtan pa zhes bya'o/ /ngo mi bzlog pa gang zhe na/ 'di ltar 'di na kha cig des shing gzhan dag la rnam par tho mi 'tshams pa'i rang bzhin can yin pas/ de des pa rnams kyi des pa'i tshul gang yin pa de las 'gal bar mi byed pas/ pha rol gyi sems srung zhing tshig smra ba ste/ de yang dus la bab pa dang / bden pa dang / don dang ldan pa dang / 'jam pa dang / mdza' ba'i tshul gyis byed pa lta bu ste/ 'di ni ngo mi bzlog pa zhes bya'o/ /smra ba'i rgyan rnam pa lnga po'i skabs de lta bu 'di la yang phan yon rnam pa nyi shu rtsa bdun yod par rig par bya ste/ nyi shu rtsa bdun po gang zhe na/ 'khor gyi nang du shin tu bkur bar 'gyur zhing / shin tu tshig btsun par 'gyur la/ shin tu 'jigs pa med par 'gyur ba dang / gzhan gyi gzhung lugs kyi skyon shes par 'gyur ba dang / bdag gi gzhung lugs kyi khyad par shes par 'gyur ba dang / mngon par zhen pa med par 'gyur ba dang / bstan bcos yongs su 'dzin pa la phyogs la chags pa med pa dang / bdag gi 'dul ba las mi 'gyur ba dang / gzhan gyis smras pa shin tu myur du go ba dang / gzhan gyis smras pa shin tu myur bar 'dzin nus pa dang / gzhan gyis smras pa'i lan shin tu myur bar 'debs nus pa dang / tshig gi yon tan gyis 'khor dga' bar byed pa dang / rig pa de la mos pa rnams mgu bar byed pa dang / don gyi nges pa'i tshig bzang pos/ tshig dang yig byed pa dang / lus kyis gnod par mi 'gyur ba dang / yid kyis gnod par mi 'gyur ba dang / tshig mi thogs par smra ba dang / spobs pa thug pa med pa dang / lus mi ngal ba dang / brjod pa med pa dang / sems nyams pa med pa dang / lkog ma nyams par mi 'gyur ba dang / de'i tshig gsal zhing brda phrad pa dang / bdag nyid srung zhing bdag mi 'khrug pa dang / pha rol gyi sems srung zhing pha rol 'khrug par mi byed pa dang / phyir smra ba'i sems mngon par dang bar byed pa dang / khon med cing 'gran zla med par 'gyur ba'i lam la zhugs pa dang / phyogs dang phyogs mtshams su bsngags pa dang / grags pa dang sgra dang tshigs su bcad pa rgya cher grags par 'gyur ba dang / slob dpon chen po slob dpon chen po zhes bya ba'i grangs su 'gro ba dang / 'jig rten du sgra grags par 'gyur ba ste/ dper na 'dod pa la longs spyod pa ni/ nor bu dang / mu tig dang / bai DUr+ya la sogs pas spras pa'i mgul gdub dang / gdu bu dang / dpung rgyan la sogs pa'i rgyan btags pas shin tu lham me lhan ne/ lhang nger 'dug pa de bzhin du/ smra ba po yang phan yon nyi shu rtsa bdun po 'di dag gis smras pa'i rgyan rnam pa lnga po 'di dag gis brgyan na shin tu lham me lhan ne lhang nger 'gyur ro/ /de bas na smra ba'i rgyan zhes bya ste/ 'di ni smra ba'i rgyan zhes bya'o/ /smra ba chad pas bcad pa gang zhe na/ de ni rnam pa gsum du blta bar bya ste/ brjod pa gtong ba dang / brjod pa [(]sma [,]smra [)]dbab pa dang / brjod pa'i nyes pa'o/ /brjod pa gtong ba gang zhe na/ 'di la smra ba pos ngag gi rnam par rig byed rnam pa bcu gsum gyis phyir smra ba la rnam par rig par byed cing brjod pa yongs su gtong bar byed pa'o/ /ngag gi rnam par rig byed rnam pa bcu gsum gang zhe na/ 'di lta ste/ bdag gi ni ma legs so/ /khyod kyi ni legs so/ /bdag gi ni legs par brtags pa ma yin no/ /khyod kyi ni legs par brtags pa'o/ /bdag gi ni rigs pa ma yin no/ /khyod kyi ni rigs pa yin no/ /bdag gi ni 'brel pa ma yin no/ /khyod kyi ni 'brel ba yin no/ /bdag gi smra ba ni tshar chod par gyur to/ / khyod kyi smra ba ni brtan por gyur to/ /'dir bdag gi spobs pa ni 'di tsam du zad do/ /phyi ma ni bsams te smra bar bya'o/ /de tsam gyis chog gi yang brjod par mi bya'o zhes zer ba ste/ ngag gi rnam par rig byed rnam pa bcu gsum po 'dis phyir smra ba la rnam par rig par byed cing brjod pa'i skabs yongs su gtong ngo / /de yongs su btang nas thub cing rdugs la pham par gyur te rgyab kyis bltas par byas shing tshar bcad pa yin no/ /de lta bas na brjod pa gtong ba chad pas bcad pa'i gnas zhes bya'o/ / brjod pa [(]sma [,]smra [) dbab pa gang zhe na/ 'di lta ste/ smra ba po pha rol smra bas zil gyis mnan pas gzhan nas gzhan du 'gyur ba dang / ma gtogs pa'i gtam gleng ba dang / khro ba dang / zhe sdang dang / nga rgyal dang / 'chab pa dang / kun nas mnar sems dang / mi bzod pa dang / rkyen ngan pa ston par byed pa dang / yang na cang mi smra bar 'dug pa dang / yul yul por gyur pa dang / phrag pa bcum pa dang / gdong smad pa dang / sems khong du chud pa dang / spobs pa med par gyur pa'o/ /gzhan nas gzhan du gyur pa ji lta bu zhe na/ dam bcas pa snga ma btang nas/ dam bcas pa gzhan la 'chel ba dang / gtan tshigs dang dper brjod pa dang / mthun pa dang / mi mthun pa dang / mngon sum dang / rjes su dpag pa dang / yid ches pa'i lung snga ma btang ste/ yid ches pa'i lung gzhan la 'chel bar byed pa'o/ /ma gtogs pa'i gtam gleng ba ji lta bu zhe na/ brjod pa'i skabs btang nas kha zas kyi gtam dang / skom gyi gtam dang / rgyal po'i gtam dang / chom rkun gyi gtam dang / bar srang gi gtam dang / smad 'tshong ma'i gtam dang / de lta bu dang mthun pa'i gtam gang yin pa rnams brjod pa ni/ brjod pa'i skabs su ma gtogs pa'i gtam zhes bya ste/ lan btab pa btang nas de dag gleng bar byed do/ /khro ba ston pa ji lta bu zhe na/ tshogs pa'i nang du tshig rtsub po brjod par mi 'os pa smra bas phyir smra ba 'jil bar byed pa'o/ /zhe sdang ston pa ji lta bu zhe na/ yang byed dam zhes bya ba'i tshig gis phyir sma ba la rgol ba'o/ /nga rgyal ston pa ji lta bu zhe na/ rigs dang / rus dang / cho 'brang dma' ba la sogs pa'i tshig gis phyir smra ba la smod pa'o/ /'chab pa ston pa gang zhe na/ nyes pa spyod pa bcabs pa mos pa'i tshig gis phyir smra ba la gleng bar byed pa'o/ /kun nas mnar sems ston pa ji lta bu zhe na/ gsod pa dang / phyir rgol ba dang / dgra'i tshig gis phyir smra ba la smra ba'o/ /mi bzod pa ston pa ji lta bu zhe na/ khon du gzung ba'i tshig gis phyir smra ba la bsdigs pa'o/ /rkyen ngan pa ston pa ji lta bu zhe na/ spyod pa nyams pa'i tshig gis phyir smra ba spyod pa'o / /cang mi smra bar 'dug pa ji lta bu zhe na/ ngag gi las zhum par gyur pa'o/ /yul yul por gyur pa ji lta bu zhe na/ yid kyi las zhum par gyur pa'o/ /phrag pa bcum pa dang / gdong smad pa ji lta bu zhe na/ lus kyi las dang / brtan pa zhum pa'o/ /sems khong du chud pa dang / spobs pa med par gyur pa ji lta bu zhe na/ spobs pa zhum pa'o/ /de ltar rnam pa bcu gsum po 'di dag gis brjod pa [(]sma [,]smra [) dbab par rig par bya ste/ dang po gnyis kyis ni rnam par g.yeng bar sgrub bo/ /bar ma bdun gyis ni log par sgrub bo/ /tha ma bzhis ni mi sgrub ste 'di ni brjod pa sma dbab cing chad pas bcad pa'i gnas zhes bya'o/ /brjod pa'i nyes pa gang zhe na/ nyes pa dgus skyon chags pa'i brjod pa ni brjod pa'i nyes pa zhes bya ste/ nyes pa dgu gang zhe na/ 'di lta ste/ tshig 'chal pa dang / nyes pa rtsom pa dang / brda ma phrad pa dang / ran pa ma yin pa dang / don dang ldan pa ma yin pa dang / dus ma yin pa dang / mi brtan pa dang / mi gsal ba dang / tshig rgyun chags ma yin pa'o/ /tshig 'chal ba gang zhe na/ brjod pa'i skabs btang ste/ gtam rnam pa sna tshogs su 'phro ba gang yin pa'o/ /nyes pa rtsom pa'i tshig gang zhe na/ khro ba'i rgod pa dang / drod mi thub pa'i rgod pa gang yin pa'o/ /brda mi phrad pa'i tshig gang zhe na/ chos dang don gyi sgo nas 'khor ba dang / phyir smra ba gnyi gas mi go ba gang yin pa'o/ /ran pa ma yin pa'i tshig gang zhe na/ lhag pa dang / don zlos pa dang / don ma tshang ba gang yin pa'o/ /don dang ldan pa ma yin pa'i tshig gang zhe na/ rnam pa bcur blta bar bya ste/ dgos pa med pa dang / don med pa dang / rigs pa las nyams pa dang / bsgrub par bya ba dang / 'dra ba dang / ltag chod dang / tshig dor dang ldan pa rnams dang / don mi dmigs pa dang / don dang mi 'brel ba dang / ma nges pa dang / sgrub pa yang bsgrub par bya ba yin pa dang / tshul bzhin ma yin zhing tshogs pa'i nang du mi 'os pa'i smra ba thams cad kyi rjes su 'brang ba'o/ /dus ma yin pa'i tshig gang zhe na/ sngar smra bar bya ba phyis brjod pa dang / phyis smra bar bya ba sngar brjod pa gang yin pa'o/ /tshig mi brtan pa gang zhe na/ dam bcas pa las 'dor ba dang / bor ba las phyir dam 'cha' ba dang / ha cang rings thabs su myur ches pas myur te/ mi gsal ba gang yin pa'o/ /tshig mi gsal ba gang zhe na/ tshig bsdeb pa'i mtshan nyid las 'gal bar byas te/ phyir ma bzlas par lan 'debs pa dang / legs par sbyar ba'i skad las brtsams la phal pa'i skad kyis mjug mthud pa dang / phal pa'i skad las brtsams pa legs par sbyar ba'i skad kyis mjug mthud pa gang yin pa'o/ /tshig rgyun chags ma yin pa gang zhe na/ bar skabs su rgyun chad de/ tshig gi spobs pa chad pa gang yin pa'o/ /nyes pa dgu po 'di dag gis skyon chags pa'i tshig ni brjod pa'i nyes pa zhes bya ste/ 'di ni brjod pa'i nyes pa chad pas bcad pa'i gnas zhes bya'o/ /smra ba las nges par 'byung ba gang zhe na/ brtag pa rnam pa gsum gyis legs par brtags nas smra bar mi byed pa'am yang na byed pa ni nges par 'byung ba zhes bya'o/ /brtag pa rnam pa gsum gang zhe na/ yon tan dang / nyes pa brtag pa dang / 'khor brtag pa dang / mkhas mi mkhas brtag pa'o/ /yon tan dang nyes pa brtag pa gang zhe na/ 'di lta ste/ smra ba po dang / smra ba rtsom pa na / 'di ltar so sor rtog par byed de/ ci bdag gi smra bar bya ba 'di bdag la gnod pa dang / pha rol la gnod pa dang / gnyi ga la gnod par 'gyur ba dang / tshe 'di dang / tshe phyi ma dang / tshe 'di dang / tshe phyi ma gnyi ga'i kha nam tho ba skye ba dang de las skyes pa'i sems las byung ba'i sdug bsngal ba dang / yid mi bde ba skye ba dang / mtshon len pa dang / dbyug pa len pa dang / 'thab pa dang / mtshang 'bru ba dang / 'gyed pa dang / rtsod pa dang / g.yo sgyu'i tshig dang / gnod pa dang / brdzun du smra ba dang / sdig pa mi dge ba'i chos rnam pa du ma skye bar 'gyur gyi/ bdag la phan pa ma yin pa dang / pha rol la phan pa ma yin pa dang / skye bo mang po la phan pa ma yin pa dang / skye bo mang po la bde ba ma yin pa dang / 'jig rten la snying brtse ba ma yin pa dang / lha dang mi rnams kyi don dang / phan pa dang bde ba ma yin pa zhig tu mi 'gyur grang snyam du rtog ste/ gal te de de ltar so sor rtog pa na bdag gis brtsad par bya ba 'di ni bdag la gnod par 'gyur zhes bya ba nas rgyas par lha dang mi rnams kyi don dang / phan pa dang bde ba ma yin pa'i bar du 'du shes na/ smra ba po des so sor brtags te smra bar mi bya'o/ /gal te de 'di ltar so sor rtog pa na/ bdag gi smra bar bya ba 'di ni bdag la gnod par mi 'gyur ba nas/ rgyas par lha dang mi rnams kyi don dang phan pa dang bde ba yin zhes bya ba'i bar du shes na/ rtsod pa po des so sor brtags nas brtsod par bya ste/ 'di ni 'di lta ste/ mi bya ba dang / bya ba las smra ba las 'byung ba dang po'o/ /'khor brtag pa gang zhe na/ 'di lta ste/ smra ba po 'di ltar so sor rtog ste/ ci 'khor 'di dag mngon par zhen pa yin nam/ mngon par zhen pa ma yin nam/ tshogs pa bzang po yin nam/ tshogs pa ngan pa yin nam/ mkhas pa yin nam/ mi mkhas pa yin snyam du rtog ste/ gal te de so sor rtog pa na 'khor 'di dag ni mngon par zhen pa yin gyi/ mngon par zhen pa ma yin pa dang / tshogs pa bzang po ma yin gyi/ tshogs pa ngan pa yin pa dang / mkhas pa ma yin gyi mi mkhas pa yin par shes na/ smra ba po des so sor brtags te 'khor de la gtam mi bya'o/ /gal te so sor rtog pa na 'khor 'di dag ni mngon par zhen pa med pa yin gyi/ mngon par zhen pa ma yin pa dang / tshogs pa bzang po yin gyi/ tshogs pa ngan pa ma yin pa dang / mkhas pa yin gyi mi mkhas pa ma yin par shes na smra ba po des so sor brtags nas 'khor de la gtam bya ste/ 'di ni 'di lta ste/ mi bya ba dang / bya ba las smra ba las 'byur ba gnyis pa'o/ /mkhas mi mkhas brtag pa gang zhe na/ 'di lta ste/ smra ba po bdag nyid la mkhas mi mkhas so sor rtog pa ste/ ci bdag smra ba dang / smra ba'i zhal ce ba dang / smra ba'i gzhi dang / smra ba'i rgyan dang / smra ba'i chad pas bcad pa la mkhas sam 'on te mi mkhas/ ci bdag la bdag gi smra ba'i gzhung 'dzugs pa dang / chad pas bcad pa'i gnas nas thar par bya ba dang / smra ba'i zla tshar bcad pa'i mthu yod dam snyam du rtog ste/ gal te de de ltar so sor rtog pa na/ bdag mkhas pa ma yin gyi mi mkhas pa dang / mthu yod pa ma yin gyi mthu med par shes na/ smra ba po des so sor brtags te phyir smra ba la gtam mi bya'o/ /gal te 'di ltar so sor rtog pa na/ bdag ni mkhas pa yin gyi/ mi mkhas pa ma yin pa dang / bdag ni mthu yod pa yin gyi/ mthu med pa ma yin par shes na/ smra ba po des so sor brtags te phyir smra ba la gtam bya ste/ 'di ni 'di lta ste/ mi bya ba dang / bya ba las smra ba las nges par 'byung ba gsum pa ste/ 'di ni smra ba las 'byung ba zhes bya'o/ /smra ba la gces spras byed pa'i chos rnams gang zhe na/ chos gsum ni smra ba la gces spras byed par rig par bya ste/ bdag dang pha rol gyi gzhung lugs shes pa dang / mi 'jigs pa dang / spobs pa'o/ /ci'i phyir chos gsum po 'di dag smra ba la gces spras byed pa zhes bya zhe na/ 'di ltar smra ba pos bdag dang pha rol gyi gzhung lugs shes na/ dngos po thams cad la gtam byed nus so/ /mi 'jigs pas ni 'khor thams cad kyi nang du gtam byed nus so/ /spobs pas ni smra ba thams cad la lan 'debs nus so/ /de bas na chos gsum po 'di dag smra ba la gces spras byed pa zhes bya ste/ 'di dag ni smra ba la gces spras byed pa'i chos rnams zhes bya'o/ /sdom la/ /smra dang de yi zhal ce pa/ /de yi gnas dang rgyan rnams dang / /de yi chad pas bcad pa dang / /'byung dang gces spras byed pa'o/ /sgra'i rig pa gang zhe na/ de ni rnam pa drug tu blta bar bya ste/ chos gdags pa rnam par gzhag pa dang / don gdags pa rnam par gzhag pa dang / gang zag gdags pa rnam par gzhag pa dang / dus gdags pa rnam par gzhag pa dang / grangs gdags pa rnam par gzhag pa dang / gzhi yan lag dang bcas pa gdags pa rnam par gzhag pa'o/ /sdom la/ chos dang don dang gang zag dus/ /grangs dang gzhi ni yan lag bcas/ /gang yin de dag mdor na 'dir/ /sgra rnams kyi ni gnas yin no/ /de la chos gdags pa rnam par gzhag pa ni/ ming gi tshogs dang / tshig gi tshogs dang / yi ge'i tshogs rnams dang / yon tan lnga dang ldan pa'i sgra ste/ grong mi'i skad ma yin pa dang / yang ba dang / brjid pa dang / 'brel pa dang / don bzang po'o/ /de la don gdags pa rnam par gzhag pa ni/ rnam pa bcur rig par bya ste/ dbang po rnam par gzhag pa dang / 'byung ba chen po rnam par gzhag pa dag las rnam par gzhag pa dang / yongs su tshol ba rnam par gzhag pa dang / chos ma yin pa rnam par gzhag pa dang / chos rnam par gzhag pa dang / 'byor pa rnam par gzhag pa dang / rgud pa rnam par gzhag pa dang / longs spyod rnam par gzhag pa dang / rjes su srung ba rnam par gzhag pa'o/ /sdom la/ mig la sogs dang sa la sogs/ /lus kyi la sogs tshol ba dang / /chos min chos dang 'byor pa dang / /rgud dang longs spyod rjes su bsrungs/ /de la dbang po rnam par gzhag pa ni 'di lta ste/ lta ba'i don dang / nyan pa'i don dang / snom pa'i don dang / myang ba'i don dang / reg pa'i don dang / rnam par shes pa'i don to/ /de la 'byung ba chen po rnam par gzhag pa ni 'di lta ste/ rten la sogs pa'i don dang / brlan pa la sogs pa'i don dang / snang ba la sogs pa'i don to/ /de la las rnam par gzhag pa ni 'di lta ste/ 'gro ba la sogs pa'i don dang / smra ba la sogs pa'i don dang / sems pa dang / dran pa dang / blo la sogs pa'i don to/ /de la tshol ba rnam par gzhag pa ni 'di lta ste/ gnyer ba la sogs pa'i don to/ / de la chos ma yin pa rnam par gzhag pa ni 'di lta ste/ 'tshe ba dang / rku ba la sogs pa'i don to/ /de la chos rnam par gzhag pa ni 'di lta ste/ sbyin pa dang / legs par sdom pa la sogs pa'i don to/ /de la 'byor pa rnam par gzhag pa ni 'di lta ste/ thob pa dang / dga' ba dang / rangs pa la sogs pa'i don to/ /de la rgud pa rnam par gzhag pa ni 'di lta ste/ 'jigs pa dang / mi dga' ba la sogs pa'i don to/ /de la longs spyod rnam par gzhag pa ni 'di lta ste/ bza' ba dang / btung ba dang / bgo ba dang / 'khyud pa dang / bsnyen bkur bya ba la sogs pa'i don to/ /de la rjes su bsrung ba rnam par gzhag pa ni 'di lta ste/ bskyang ba dang / gso ba dang / dgang ba la sogs pa'i don to/ /yang mdor bsdu na don rnam pa drug tu rig par bya ste/ ngo bo nyid kyi don dang / rgyu'i don dang / 'bras bu'i don dang / bya ba'i don dang / khyad par du sbyor ba'i don dang / 'jigs pa'i don to/ /sdom la/ ngo bo nyid dang rgyu dang 'bras/ /de yi bya ba sbyor dang 'jigs / /de la gang zag gdags pa rnam par gzhag pa ni/ skyes pa dang / bud med dang / ma ning rnam par gzhag pa dang / skyes bu dang po dang / bar ma dang / mchog rnam par gzhag pa'o/ /de la dus gdags pa rnam par gzhag pa ni/ dus rnam pa gsum ste/ 'das pa ste 'das pa'i bye brag dang / ma 'ongs pa ste ma 'ongs pa'i bye brag dang / da ltar gyi ste da ltar gyi bye brag go/ /de la grangs gdags pa rnam par gzhag pa ni/ grangs rnam pa gsum ste/ gcig gi grangs dang / gnyis kyi grangs dang / mang po'i grangs so/ /de la gzhi rnam par gzhag pa dang / yan lag rnam par gzhag pa la gzhi ni lnga ste/ sbyar ba dang / ming dang / bsdu ba dang / de la phan pa dang / snyad pa'o/ /yan lag ni skad kyi dbyings las 'byung ba la sogs pa ste/ de gnyi ga bsdus pa la ni gzhi yan lag dang bcas pa zhes bya'o/ /de la bzo'i las kyi gnas kyi rig pa gang zhe na/ bzo ni mdor bsdu na rnam pa bcu gnyis te/ de dag shes pa gang yin pa de dag ni bzo'i las kyi gnas kyi rig pa zhes bya'o/ /bzo rnam pa bcu gnyis gang zhe na/ 'di lta ste/ snams su bya ba'i bzo dang / nyo tshong gi bzo dang / rgyal po'i zham 'bring bya ba'i bzo dang / yi ge dang / rtsis dang / shod dgod pa dang / grangs dang / lag rtsis kyi bzo dang / ltas su blta ba'i bzo dang / blo gros kyi bzo dang / 'bur gyi bzo dang / bskyed pa'i bzo dang / snams su bya ba'i bzo dang / sbyor ba'i bzo dang / g.yos su bya ba'i bzo dang / rol mo'i bzo'o/ /rnal 'byor spyod pa'i sa las/ thos pa las byung ba'i sa rdzogs so// //bsams pa las byung ba'i sa gang zhe na/ de ni mdor bsdu na rnam pa gsum du rig par bya ste/ ngo bo nyid rnam par dag pa dang / shes bya rab tu rnam par 'byed pa dang / chos rab tu rnam par 'byed pa'o/ /de la ngo bo nyid rnam par dag pa gang zhe na/ de ni rnam pa dgur rig par bya ste/ 'di lta ste/ kha cig ji ltar thos pa dang / ji ltar kun chub par byas pa'i chos rnams gcig pu dben pa na 'dug cing sems te/ bsam par bya ba ma yin pa yongs su spangs nas/ bsam par bya ba sems pa dang / nag po bstan pa dang / chen po bstan pa yang yongs su shes pa dang / don la rton cing sems kyi/ tshig 'bru la mi rton pa dang / kha cig la ni dad pas mos par byed pa dang / kha cig la ni shes rab kyis rnam par dpyod par byed pa dang / sran thub par sems pa dang / brtan por sems pa dang / rgyas par sems pa dang / bsam pa de yang mthar phyin par byed kyi/ bar ma dor sgyid lug par mi byed pa ste/ de ltar rnam par dag pa rnam pa dgu po 'dis bsam pa shin tu rnam par dag pa zhes bya'o/ /de la shes bya rab tu rnam par 'byed pa gang zhe na/ brtag par bya ba'i don rab tu rnam par 'byed pa gang yin pa ste/ brtag par bya ba'i don gang zhe na/ yod pa la yang yod par/ med pa la yang med par brtag pa ni/ brtag par bya ba'i don ces bya'o/ /brtag par bya ba yod pa'i dngos po gang zhe na/ de ni rnam pa lngar blta bar bya ste/ rang gi mtshan nyid kyis yod pa dang / spyi'i mtshan nyid kyis yod pa dang / brda'i mtshan nyid kyis yod pa dang / rgyu'i mtshan nyid kyis yod pa dang / 'bras bu'i mtshan nyid kyis yod pa'o/ /rang gi mtshan nyid kyis yod pa gang zhe na/ de ni rnam pa gsum du blta bar bya ste/ don dam pa'i mtshan nyid kyis yod pa dang / mtshan ma'i mtshan nyid kyis yod pa dang / da ltar gyi mtshan nyid kyis yod pa'o/ /don dam pa'i mtshan nyid kyis yod pa gang zhe na/ chos thams cad kyi brjod du med pa'i don 'jig rten las 'das pa'i ye shes kyi spyod yul mtshan nyid rnam par gzhag tu med pa gang yin pa'o/ /mtshan mas yod pa gang zhe na/ de ni rnam pa bzhir blta bar bya ste/ gang la ming yang dmigs pa dang / dngos po yang dmigs pa dang / ming de yang dngos po de la nor ba'i 'khrul pa dang / mi rtag pa'i 'khrul pas 'khrul pa med pa dang / ming de yang dngos po de thogs pa med par 'jug ste/ gang du yang mi 'jug la gang las kyang mi ldog pa'o/ /da ltar yod pa gang zhe na/ byung ba rgyu dang 'bras bur gyur pa gang yin pa ste/ de dag thams cad gcig tu bsdus pa la ni/ rang gi mtshan nyid kyis yod pa zhes bya'o/ /spyi'i mtshan nyid kyis yod pa gang zhe na/ de yang rnam pa lngar blta bar bya ste/ skye ba'i spyi'i mtshan nyid dang / bya ba bsgrub pa'i spyi'i mtshan nyid dang / 'du byed thams cad kyi spyi'i mtshan nyid dang / zag pa dang bcas pa thams cad kyi spyi'i mtshan nyid dang / chos thams cad kyi spyi'i mtshan nyid do/ /skye ba'i spyi'i mtshan nyid gang zhe na/ gzugs dang / tshor ba dang / 'du shes dang / 'du byed dang / rnam par shes pa rnams kyi rang rang gi skye ba gang yin pa ste/ de dag gcig tu bsdus pa la ni skye ba'i spyi'i mtshan nyid ces bya'o/ /bya ba sgrub pa'i spyi'i mtshan nyid gang zhe na/ dge ba zag pa dang bcas pa'i chos rnams ni sdug pa'i 'bras bu mngon par 'grub pa la bya ba sgrub pa'i spyi'i mtshan nyid kyis spyi'i mtshan nyid rnams dang / dge ba'i chos sdug pa'i 'bras bu mngon par 'grub pa la ji lta ba bzhin du/ mi dge ba'i chos rnams kyang mi sdug pa'i 'bras bu mngon par 'grub pa la de de dang 'dra ba dang / dran pa nye bar gzhag pa rnams dang / yang dag par spong ba rnams dang / rdzu 'phrul gyi rkang pa rnams dang / dbang po rnams dang / stobs rnams dang / byang chub kyi yan lag rnams dang / lam gyi yan lag byang chub kyi phyogs kyi chos rnams ni byang chub thob par bya ba la bya ba bsgrub pa'i spyi'i mtshan nyid kyis spyi'i mtshan nyid rnams so/ /'du byed thams cad kyi spyi'i mtshan nyid gang zhe na/ 'du byed thams cad kyi mi rtag pa nyid do/ /zag pa dang bcas pa thams cad kyi spyi'i mtshan nyid gang zhe na/ zag pa dang bcas pa thams cad kyi sdug bsngal ba nyid do/ /chos thams cad kyi spyi'i mtshan nyid gang zhe na/ chos thams cad kyi stong pa nyid dang / bdag med pa ste/ 'di ni spyi'i mtshan nyid ces bya'o/ /brda'i mtshan nyid gang zhe na/ gang la brjod pa rnam pa drug 'byung ba de ni brda'i mtshan nyid du rig par bya'o/ /brjod pa rnam pa drug gang zhe na/ bdag po dang 'brel par ldan pa'i brjod pa dang / des de dang gzhan gyis gzhan spangs pa'i brjod pa dang / brda las byung ba'i brjod pa dang / mang po las byung ba'i brjod pa dang / kun du 'gro ba ma yin pa'i brjod pa dang / mi rtag pa'i brjod pa'o/ /bdag po dang 'brel par ldan pa'i brjod pa gang zhe na/ brjod pa gang / bdag po dang 'brel pas mtshan nyid so sor rtogs par 'gyur gyi/ bdag po dang 'brel pa med pa ma yin pa ste/ dper na skye ba zhes smras na/ 'di gang gi skye ba zhes bdag po dang 'brel pa la ltos pa'i brjod pa 'byung ste/ gzugs kyi skye ba dang / tshor ba dang / 'du shes dang / 'du byed rnams dang / rnam par shes pa'i skye ba zhes bya'i gzugs zhes smras na 'di su'i gzugs zhes bdag po dang 'brel pa la ltos pa'i brjod pa ni med pa lta bu'o/ /skye ba la ji lta ba bzhin du rga ba dang / gnas pa dang / mi rtag pa dang / de lta bu dang mthun pa'i sems dang mi ldan pa'i 'du byed rnams kyang de dang 'dra bar ci rigs par rig par bya'o/ /'di ni bdag po dang 'brel par ldan pa'i brjod pa zhes bya ste/ de gang la yod pa de ni brda'i mtshan nyid du rig par bya'o/ des de dang gzhan gyis gzhan spangs pa'i brjod pa gang zhe na/ brjod pa gang nges de dang / gzhan gyis gzhan bstan par mi 'gyur ba de ni/ des de dang gzhan gyis gzhan spangs pa zhes bya'o/ /de nyid kyis de bstan pa'i brjod pa gang yin pa de ni rdzas kyi mtshan nyid dang / brda'i mtshan nyid la yang 'jug go/ /gzhan gyis gzhan bstan pa'i brjod pa gang yin pa de yang rdzas kyi mtshan nyid dang / brda'i mtshan nyid la yang 'jug go/ /des de bstan pa med pa dang gzhan gyis gzhan bstan pa med pa'i brjod pa gang yin pa de ni gcig tu nges par brda'i mtshan nyid kho na la 'jug go/ /des de nyid bstan pa'i brjod pa rdzas kyi mtshan nyid la 'jug pa gang zhe na/ 'di lta ste/ sa'i mkhrang ba brjod pa gang yin pa lta bu'o/ /brda'i mtshan nyid la yang 'jug pa ji lta bu zhe na/ rdo'i zlum pa zhes bya ba'i brjod pa gang yin pa lta bu'o/ /sa'i mkhrang ba dang / rdo'i zlum pa ji lta ba bzhin du/ chu'i gsher ba dang / 'bru mar gyi thigs pa dang / me'i tsha ba dang / me'i me lce dang / rlung gi yang zhing g.yo ba dang / rlung gi shugs kyang de dang 'dra'o/ /gzhan gyis gzhan bstan pa'i brjod pa rdzas su yod pa la 'jug pa ji lta bu zhe na/ 'di lta ste/ mig gi rnam par shes pa dang / lus kyi reg pa zhes bya ba la sogs pa lta bu'o/ /brtags pa'i yod pa ji lta bu zhe na/ 'di lta ste/ sangs rgyas byin nam/ yon tan bshes gnyen gyi bza' ba dang / btung ba dang / bzhon pa dang / gos dang / rgyan ces bya ba la sogs pa lta bu'o/ /des de bstan pa med pa dang / gzhan gyis gzhan bstan pa med pa'i brjod pa/ gcig tu nges par brda'i mtshan nyid kho na la 'jug pa ji lta bu zhe na/ 'di lta ste/ khyim gyi sgo dang / khyim gyi rtsig pa dang / bum pa'i kha dang / bum pa'i ngos dang / dmag gi shing rta dang / nags tshal gyi shing dang / brgya'i bcu dang / bcu'i gsum zhes bya ba la sogs pa lta bu ste/ 'di ni des de dang / gzhan gyis gzhan spangs pa'i brjod pa zhes bya'o/ /brda las byung ba'i brjod pa gang zhe na/ mtshan ma'i mtshan nyid rnam pa drug la tha snyad las byung ba'i ngo bo nyid gdags pa'i brjod pa gang yin pa ste/ mtshan ma'i mtshan nyid rnam pa drug po gang zhe na/ dngos po'i mtshan nyid dang / rnam par shes par bya ba'i mtshan nyid dang / sdug pa la sogs pa'i mtshan nyid dang / phan 'dogs pa la sogs pa'i mtshan nyid dang / tha snyad kyi mtshan ma'i mtshan nyid dang / log par bsgrub pa la sogs pa'i mtshan ma'i mtshan nyid do/ /dngos po'i mtshan nyid gang zhe na/ rnam par shes pas gzung ba gang yin pa'o/ /rnam par shes par bya ba'i mtshan nyid gang zhe na/ yid la byed pas rnam par shes pa skye bar byed pa gang yin pa'o/ /sdug pa la sogs pa'i mtshan nyid gang zhe na/ reg pas gzung ba gang yin pa'o/ /phan 'dogs pa la sogs pa'i mtshan nyid gang zhe na/ tshor bas gzung ba gang yin pa'o/ /tha snyad kyi mtshan ma'i mtshan nyid gang zhe na/ 'du shes kyis gzung ba gang yin pa'o/ /log par bsgrub pa la sogs pa'i mtshan ma'i mtshan nyid gang zhe na/ sems las gzung ba gang yin pa'o/ /mang po las byung ba'i brjod pa gang zhe na/ phal po che 'dus shing tshogs pa rnams la ngo bo nyid rnam par gzhag pa'i brjod pa gang yin pa ste/ 'di lta ste/ nang gi gzugs dang / tshor ba dang / 'du shes dang / 'du byed rnams dang / rnam par shes pa rnams la/ bdag la sogs pa brjod pa dang / phyi rol gyi gzugs dang / dri dang / ro dang / reg bya ji lta ji lta bur 'dug pa rnams la khyim dang / bum pa dang / dmag dang / nags tshal la sogs par brjod pa'o/ /kun du 'gro ba ma yin pa'i brjod pa gang zhe na/ brjod pa gang kha cig la ni 'jug /kha cig las ni ldog pa ste/ 'di lta ste/ khyim la khyim zhes brjod pa ni grong dang / grong khyer dang / yul 'khor la sogs pa las ldog go/ /bum pa la bum pa zhes brjod pa ni/ rdza ma dang / rdze'u dang / kham phor la sogs pa las ldog go/ /dmag ces brjod pa ni skyes pa dang / bud med dang / khye'u dang / bu mo la sogs pa re re las ldog go/ /nags tshal zhes brjod pa ni/ shing dang / rtsa ba dang / sdong bu dang / lo ma dang / me tog dang / 'bras bu la sogs pa re re ba las ldog go/ /mi rtag pa'i brjod pa gang zhe na/ 'di ni rnam pa bzhir blta bar bya ste/ tha dad pa dang / tha dad pa ma yin pa dang / mngon par byas pa dang / yongs su gyur pa'o/ /de la tha dad pa ji lta bu zhe na/ 'di lta ste/ bum pa chag na bum pa zhes brjod pa gang yin pa de ni med par 'gyur la/ gyo mor brjod pa ni 'byung ba lta bu'o/ /tha dad pa ma yin pa ji lta bu zhe na/ 'di lta ste/ rdzas sna tshogs bsdus pa las phye ma'am bdug par sbyar na/ rdzas sna tshogs su brjod pa gang yin pa de ni med par 'gyur la/ phye ma'am bdug par brjod pa ni 'byung ba lta bu'o/ /mngon par byas pa ji lta bu zhe na/ 'di lta ste/ legs par bcos pa ma yin pa'i gser gyi gar bu las/ mgul gdub dang / gdu bu dang / dpung rgyan la sogs pa legs par bcos shing bsgyur na/ gser gyi gar bu brjod pa gang yin pa de ni med par 'gyur la/ mgul gdub dang / gdu bu dang / dpung rgyan du brjod pa ni 'byung ba lta bu'o/ /yongs su gyur pa ji lta bu zhe na/ 'di lta ste/ bza' ba dang / btung ba yongs su smin na/ bza' ba dang btung ba brjod pa gang yin pa de ni med par 'gyur la/ phyi sa dang / gcin du brjod pa ni 'byung bar 'gyur te/ de lta bu dang mthun pa ni mi rtag pa'i brjod pa ma yin par rig par bya'o/ /de ltar brjod pa rnam pa drug po 'di gang la 'jug pa de ni brda'i mtshan nyid du rig par bya ste/ 'di ni brda'i mtshan nyid ces bya'o// //bam po bcu dgu pa/ rgyu'i mtshan nyid gang zhe na/ de ni mdor bsdu na rnam pa lngar blta bar bya ste/ sdug pa'i rgyu dang / mi sdug pa'i rgyu dang / lta ba'i rgyu dang / 'byung ba'i rgyu dang / ldog pa'i rgyu'o/ /sdug pa'i rgyu gang zhe na/ dge ba zag pa dang bcas pa'i chos rnams so/ /mi sdug pa'i rgyu gang zhe na/ mi dge ba'i chos rnams so/ /lta ba'i rgyu gang zhe na/ sngar skyes pa'i dge ba dang / mi dge ba dang / lung du ma bstan pa'i chos rnams kun du bsten cing bsgoms te lan mang du byas pa rnams ni phyis skyes pa'i dge ba dang / mi dge ba dang / lung du ma bstan pa'i chos rnams gong nas gong du ches lta ba dang / shin tu lta ba rnams kyis lta ba'i rgyu zhes bya'o/ /'byung ba'i rgyu gang zhe na/ sa bon gang dang / bag chags gang dang / grogs gang gis chos gang dag 'byung bar 'gyur ba de ni de dag gi 'byung ba'i rgyu zhes bya'o/ /ldog pa'i rgyu gang zhe na/ 'du byed ldog pa dang / kun nas nyon mongs pa ldog pa'i rgyu zhi ba thob par byed pa'i lam thams cad de/ yongs su mya ngan las 'das pa thob par byed pa/ rdzogs pa'i byang chub tu 'gro ba tshogs kyi sbyor ba dang bcas pa/ skye ba dang bcas pa/ 'grub pa dang bcas pa ni ldog pa'i rgyu zhes bya'o/ /'di dag bsdus pa ni rgyu'i mtshan nyid ces bya ste/ rgyas par rnam par dbye ba ni/ rgyu dang 'bras bu bstan pa las 'byung ba bzhin du blta bar bya'o/ /'bras bu'i mtshan nyid gang zhe na/ rgyu rnam pa lnga po 'di dag las skyes pa dang / thob pa dang / grub pa dang / rdzogs pa dang / zhugs pa gang yin pa de ni 'bras bu'i mtshan nyid du rig par bya'o/ /brtag par bya ba med pa'i dngos po gang zhe na/ de yang mtshan nyid rnam pa lngar blta bar bya ste/ ma skyes pas med pa dang / 'gags pas med pa dang / gcig la gcig med pa dang / don dam par med pa dang / gtan med pa'o / /ma skyes pas med pa gang zhe na/ ma 'ongs pa'i 'du byed rnams so/ /'gags pas med pa gang zhe na/ 'das pa'i 'du byed rnams so/ /gcig la gcig med pa gang zhe na/ chos gzhan rnams gzhan gyi mtshan nyid dang bral zhing med pa'am / chos gzhan dang gzhan rnams dang mi 'phrad pa gang yin pa'o/ /don dam par med pa gang zhe na/ tha snyad kyis ngo bo nyid du 'dogs pa'i brjod pas ngo bo nyid rnam par gzhag pa gang yin pa'o/ /gtan med pa gang zhe na/ mo gsham gyi bu la sogs pa dang / de lta bu dang mthun pa gang ci yang rung ba rnams so/ /gzhan yang chos rnam pa lnga ni yod pa nyid do/ /rnam pa lnga ni med pa nyid do/ /de la rnam pa lnga yod pa nyid gang zhe na/ yongs su grub pa'i mtshan nyid yod pa nyid dang / gzhan gyi dbang gi mtshan nyid yod pa nyid dang / kun brtags pa'i mtshan nyid yod pa nyid dang / bye brag gi mtshan nyid yod pa nyid dang / brjod par bya ba ma yin pa'i mtshan nyid yod pa nyid do/ /de la dang po ni don dam pa'i mtshan nyid do/ /de'i 'og ma gnyis pa ni rten cing 'brel par 'byung ba'i mtshan nyid do/ /de'i 'og ma gsum pa ni brda'i mtshan nyid do/ /de'i 'og ma bzhi pa ni dus kyi mtshan nyid dang / skye ba'i mtshan nyid dang / rga ba'i mtshan nyid dang / gnas pa'i mtshan nyid dang / mi rtag pa'i mtshan nyid dang / sdug bsngal ba'i mtshan nyid dang / stong pa nyid kyi mtshan nyid dang / bdag med pa'i mtshan nyid dang / dngos po'i mtshan nyid dang / rnam par shes par bya ba'i mtshan nyid dang / gzung ba'i mtshan nyid dang / sdug pa la sogs pa'i mtshan nyid dang / phan 'dogs pa la sogs pa'i mtshan nyid dang / tha snyad kyi mtshan ma'i mtshan nyid dang / log par bsgrub pa la sogs pa'i mtshan ma'i mtshan nyid dang / de lta bu dang mthun pa'i mtshan nyid de/ de ni bye brag gi mtshan nyid du rig par bya'o/ /de'i 'og ma lnga pa ni brjod par bya ba ma yin pa rnam pa bzhis brjod par bya ba ma yin pa'i mtshan nyid de/ med pa'i phyir ba ni 'di lta ste/ gang zag phung po rnams las gzhan nam/ gzhan ma yin zhes bya ba'o/ /zab pa'i phyir ba ni 'di lta ste/ chos nyid du brjod du med pa dang / de bzhin gshegs pa rnams kyi chos kyi sku bsam gyis mi khyab pa dang / sangs rgyas kyi yul bsam gyis mi khyab pa dang / de bzhin du de bzhin song ba shi phan chad yod ces bya ba la sogs pa'o/ /don dang ldan pa ma yin pa'i phyir ba ni/ 'di lta ste/ chos gang dag chos dang don dang / tshangs par spyod pa dang ldan pa ma yin pa de dag ni bcom ldan 'das kyis thugs su chud du zin kyang ma gsungs so/ /de bzhin du chos kyi mtshan nyid rnam par gzhag pa'i phyir ba ni 'di lta ste/ de bzhin nyid 'du byed rnams las gzhan nam gzhan ma yin par brjod par bya ba ma yin pa'o/ /rnam pa lnga med pa nyid gang zhe na/ don dam pa'i mtshan nyid med pa dang / gzhan gyi dbang gi mtshan nyid med pa nyid dang / thams cad kyi thams cad du rang gi mtshan nyid med pa nyid dang / bye brag med pa'i mtshan nyid med pa nyid dang / brjod par bya ba'i mtshan nyid med pa nyid do/ /chos rab tu rnam par 'byed pa gang zhe na/ de ni rnam pa gnyis su blta bar bya ste/ mdo'i don rab tu rnam par 'byed pa dang / tshigs su bcad pa'i don rab tu rnam par 'byed pa'o/ /de la mdo'i don rab tu rnam par 'byed pa ni/ gzhi bsdu ba dang / byang chub sems dpa'i sde snod kyis 'doms pa las rgyas par bshad par bya'o/ /tshigs su bcad pa'i don rab tu rnam par 'byed pa ni rnam pa gsum du blta bar bya ste/ don dam pa'i tshigs su bcad pa rnam par gzhag pa dang / dgongs pa'i don gyi tshigs su bcad pa rnam par gzhag pa dang / 'dus pa'i don gyi tshigs su bcad pa rnam par gzhag pa'o/ /de la don dam pa'i tshigs su bcad pa rnam par gzhag pa ni/ bdag po gang yang yod ma yin/ /byed po med cing tshor po med/ /chos rnams kun kyang spyod pa med/ /de lta mod kyi byed pa yod/ /srid pa'i yan lag bcu gnyis dang / /phung po rnams dang skye mched khams/ /de dag thams cad rnams brtags na/ /gang zag dmigs par mi 'gyur ro/ /nang gi thams cad stong pa ste/ /phyi rol gtogs pa'ang thams cad stong / /stong pa nyid bsgom gang yin pa/ /de yang su yang yod ma yin/ /bdag nyid kyis ni bdag med de/ /phyin ci log tu rtog par zad/ /'di na bdag gam sems can med/ /chos rnams 'di dag rgyu dang bcas/ /'du byed thams cad skad cig pa/ /mi brtan byed pa ga la yod/ /gang dag skye ba de nyid byed/ /de nyid byed pa po zhes bya/ /mig gis gzugs rnams mi mthong la/ /rna bas sgra rnams mi thos te/ /sna yang dri rnams mi snom zhing / /lce yis ro rnams myang ba med/ /lus kyis reg rnams reg mi byed/ /yid kyang chos rnams rtog mi byed/ /'di dag byin gyis rlob pa med/ /byed du 'jug pa'ang yod ma yin/ /de ni gzhan gyis bskyed pa yin/ /bdag nyid kyang ni mi skye ste/ /dngos po rnams ni brten nas skye / /rnying pa ma yin gsar zhing gsar/ /'di ni gzhan gyis 'jig mi byed/ /bdag nyid kyang ni 'jig pa min/ /rkyen yod na ni skye 'gyur la/ /skyes nas rang gi ngang gis 'jig / phyogs gnyis la ni brten pa yi/ /skye bo dag ni dmigs 'gyur te/ /yul rnams la ni bag med dang / /log par 'jug pa byed pa'o/ /yul rnams la ni bag med pa/ /gang yin de dag sred pas phrogs/ /log par zhugs pa gang yin pa/ /gti mug gis ni de dag phrogs/ /chos rnams rgyu dang bcas pa ste/ /sdug bsngal yang ni de 'dra phyir/ /nyon mongs dngos gzhi gnyis byas nas/ /yan lag bcu gnyis rnam gnyis byas/ /bya ba bdag gis byas pa med/ /de bzhin gzhan gyis byas ma yin/ /gzhan gyis byed du bcug pa'ang min/ /'on kyang bya ba med pa min/ /'du byed skyes par ma gyur pa/ /nams kyang dmigs par mi 'gyur te/ /nang na ma yin phyi rol min/ /de gnyis na'ang mi dmigs so/ /'du byed skyes par gyur pa yang / /de nyid kyis ni rtog mi byed/ /ma 'ongs pa la mtshan ma med/ /'das pa la ni rnam par rtog /myong ba la yang rtog pa med/ /ma myong ba yang rtog pa med/ /'du byed rnams ni thog ma med/ /'on kyang thog ma yod par snang / /gzugs ni dbu ba rdos pa 'dra/ /tshor ba chu yi chu bur 'dra/ /'du shes smig rgyu lta bu ste/ /'du byed rnams ni chu shing 'dra/ /rnam shes sgyu ma lta bu zhes/ /nyi ma'i gnyen gyis bka' stsal to/ /'du byed rnams ni skye ba 'dra/ /gnas pa dang ni 'gag pa 'dra/ /gti mug gti mug rmongs mi byed/ /pha rol la rmongs rmongs mi byed/ /de la'ang pha rol rmongs mi byed/ / 'on kyang gti mug med pa min/ /tshul bzhin ma yin yid byed pas/ /rmongs pa de ni skye bar 'gyur/ /tshul bzhin ma yin yid byed pa'ang / /rmongs pa med las mi 'byung ngo / /mi g.yo bsod nams bsod nams min/ /'du byed rnam pa gsum du 'dod/ /las rnams gsum po gang yin pa/ /de dag kun kyang 'brel pa med/ /da ltar gyi ni rab tu 'jig /'das pa gang na'ang gnas pa med/ /ma skyes pa dag rkyen khar las/ /sems ni phyi bzhin 'phrad ba yin/ /mtshungs par ldan pa gcig tu nges/ /mi ldan pa yang de bzhin te/ /thams cad kun dang ldan pa yin/ sems ni nye bar 'gro zhes bya/ /rgyun ni 'dra dang mi 'dra ba/ /rgyun chad ma gyur de la ni/ /bdag lta rjes su 'brang ba yis/ /kun rdzob 'di ni bya ba yin/ /gzugs kyi lus ni 'gyes par 'gyur/ /ming gi lus kyang 'jig 'gyur te/ /tshe 'di dang ni phyi ma la/ /bdag gis byas la spyod ces bya/ /snga dang phyi mas tha dad cing / /rang gi rgyu 'bras bsdus pa'i phyir/ /de nyid byed dang tshor ba yin/ /tha dad par ni brjod mi bya/ /rgyu yi lam ni mi 'chad phyir/ /tshogs par gyur na med pa 'byung / /rang gi rgyu las skye ba yin/ /yongs su 'dzin par byed par 'gyur/ /spros la mngon dga' rgyu yin te/ /legs nyes las kyang de bzhin no/ /sa bon kun pa rnam smin dang / /sdug dang mi sdug 'bras bu yin/ /sa bon kun pa rnam smin la/ /bdag tu lta ba skye bar 'gyur/ /de ni so so rang rig ste/ /gzugs can ma yin bstan du med/ /de la mi shes byis pa rnams/ /nang la bdag tu rtog par byed/ /bdag tu lta la brten nas kyang / /de bzhin lta ba mang po 'byung / /ril 'dzin rang gi sa bon dang / /sngon chad goms dang grogs gyur dang / /de dang mthun pa thos pa las/ /bdag tu lta ba 'byung bar 'gyur/ /de yi rkyen gyis nang la ni/ /chags pa shin tu skye bar 'gyur/ /phan gdags 'dod pa phyi rol du/ /bdag gi snyam du chags par 'gyur/ /'jig rten 'di ni gang gis 'jigs/ /de ni rmongs pas de sgrub byed/ /thog ma nyid du gnas byas nas/ /des na spros pa khas len to/ /gnas byas gang yin de la ni/ /'phags pas sdug bsngal yin par rtogs / /skad cig tsam yang zhi bar mi 'gyur bas/ /des na byis pa rtag tu sdug bsngal 'gyur/ /sems ni mi mthun pa yis yongs dkris pas/ /de 'dra'i sdug bsngal kun nas stsogs par 'gyur/ /byis pa rnams kyis de ni kun bstsags pas/ /nga rgyal dang ni bde dang sdug bsngal rkyen/ /de la byis pa thams cad chags gyur pa/ 'dam rdzab chen por glang chen bying ba bzhin/ /der ni lhag par kun tu rmongs par 'gyur/ /kun du 'gro zhing kun la spyod par byed/ /'jig rten rgyun rnams mi bzad gang yin pa'i/ /rgyun rnams thams cad mtsho de dbyer med byed/ /de ni chos kyi spyod pa ma gtogs par/ /me dang rlung dang nyi mas bskam mi nus/ /sdug bsngal bdag nyid bdag ni sdug bsngal snyam/ /yang na bde na'ang bde snyam nges par byed/ /yongs su rtog pa lta bas bskyed pa ste/ /des kyang de bskyed de yang skyed par byed/ /rtag tu nyon mongs can gyi yid/ /nyon mongs lhan cig skye zhing 'gag /de phyir de ni nyon mongs las/ /thar par ma gyur 'gyur ba yin / /de ni phyis skye ma yin te/ /gzhan zhig dag par 'gyur ba yin/ /de yang snga nas nyon mongs yin / /nyon mongs rnams las grol zhes bya/ /nyon mongs can gang de 'dir gzhan/ /dag pa de ni rang bzhin gsal/ /'di la gang yang 'dag pa med/ /gang las kyang ni bdag mi 'gyur/ /sa bon thams cad legs gsal bas/ /nyon mongs thams cad yongs zad phyir/ /de la kun nas nyon mongs med/ /de phyir tha dad rnam gnyis bstan/ /so so rang gi rig pa dang / /sdug bsngal tsam yang yongs zad phyid / /de bzhin spros pa med pa'i phyir/ /rnam pa kun du spros mi byed/ /rgyun la gang zag ces bya ste/ /mtshan nyid la ni chos shes bya/ /'di na gang yang 'khor ba med/ /su yang mya ngan 'da' ba med/ /sgro btags pa dang skur 'debs pa'i/ /mtha' gnyis kyi ni gnyen po'i phyir/ /gang zag la bdag med pa'i don dam pa de'i skabs kyi don dam pa'i tshigs su bcad pa rnams te/ de la bdag po ni yongs su gzung ba'i'o/ /byed pa po ni bya ba rnams kyi'o/ /tshor ba po ni de'i 'bras bu rnams kyi yin te/ tshigs su bcad pa phyed pa 'dis ni don tha dad par yongs su brtags pa'i bdag sel te/ chos rnams kun kyang spyod pa med/ /ces bya bas ni chos rnams nyid la bdag tu lta ba sel te/ 'dis ni sgro btags pa'i mtha' yongs su spong bar byed do/ /de lta mod kyi byed pa yod ces bya ba 'dis ni chos yod pas skur ba'i mtha' yongs su spong bar byed do/ /de la byed pa ni rnam pa gsum ste/ bdag po'i byed pa dang / byed pa po'i byed pa dang / tshor ba po'i byed pa ste/ byed pa gang gis bdag po'am/ byed pa po'am/ tshor ba por 'dogs pa'o/ /chos de dag gang yin pa ma bstan te/ de'i phyir srid pa'i yan lag ces gsungs te/ tshigs su bcad pa phyed po 'dis ni/ srid pa'i yan lag gi go rims bzhin du phung po la sogs pa gang yin pa de dag yongs su ston to/ /phung po dang / khams dang / skye mched smos pa ni/ bdag po dang / byed pa po dang / tshor ba por 'dzin pa'i gnyen po yin pa'i phyir te/ mig dang gzugs rnams la brten nas 'bras bu mig gi rnam par shes pa 'byung gi tshor ba ni gang yang med do zhes khams bco brgyad kyis tshor ba po med par yongs su ston to/ /bdag po med do zhes bstan pa de yang ji ltar med pa ni/ de dag thams cad rnams brtags nas/ /gang zag dmigs par mi 'gyur ro/ /zhes bya bas de ston to / / rnam par brtags na zhes bya ba ni tshad ma gsum brtag pa'o/ /de med du zin na/ nang dang / phyi rol rnam par gzhag pa ji ltar 'grub snyam pa la/ nang gi thams cad stong pa ste/ /phyi rol rtogs pa'ang thams cad stong / /zhes bya ba gsungs te/ de ni rnam par gzhag pa tsam du zad do zhes brda sprad pa yin no/ /'o na brtag par bya ba la rtog pa por rnam par gzhag pa ji ltar 'grub snyam pa la/ stong pa nyid sgom gang yin pa/ /de yang su yang yod ma yin/ /zhes bya ba gsungs so/ /'o na 'phags pa dang so so'i skye bo rnam par gzhag pa ji ltar 'grub snyam pa la/ bdag nyid kyis ni bdag med de/ /phyin ci log tu rtog par zad/ /ces bya ba gsungs te/ 'phags pa dang so so'i skye bo'i bdag nyid ni/ de'i bdag nyid kyis yongs su grub pa med de/ phyin ci log tu brtags par zad do zhes brda sprad pa yin no/ /'o na gzhan dang bdag rnam par gzhag pa ji ltar 'grub snyam pa la/ 'di na bdag gam sems can med/ /ces bya ba gsungs so/ /'o na kun nas nyon mongs pa dang / rnam par byang ba dang / rnam par gzhag pa ji ltar 'grub snyam pa la/ chos rnams 'di dag rgyu dang bcas/ /zhes bya ba gsungs te/ kun nas nyon mongs pa can nam/ rnam par byang ba can gang yang med pa'i phyir ro/ /chos rnams kun kyang spyod pa med/ ces gsungs na/ ji ltar spyod pa med pa ma gsungs te/ de'i phyir/ 'du byed thams cad skad cig la/ /mi brtan byed pa ga la yod/ /ces bya ba gsungs so/ /de lta mod kyi byed pa yod/ /ces gsungs na/ byed pa med na ji ltar byed pa 'byung bar 'gyur snyam pa la/ gang dag skye ba de nyid tshe / /de nyid byed pa po zhes bya/ / zhes gsungs te/ 'bras bu yin pa'i phyir byed pa'o/ /rgyu yin pa'i phyir byed pa po'o/ /skye ba de ni skye mched rnams las rnam par shes pa 'byung bas ston te/ de 'byung ba yang mig la sogs pa med par de mi 'grub pa'i phyir ro/ /chos rnams kun kyang spyod pa med/ /ces gsungs pa la/ spyod pa med cing rnam pa drug tu ston te/ byed pa'i sbyor ba med pa ni mig gis gzugs rnams mi mthong la zhes bya ba la sogs pas ston to/ /rjes su 'jug pa'i byed pa'i spyod pa med pa ni/ 'di dag byin gyis rlob par byed/ /byed du 'jug pa'ang yod ma yin/ /zhes bya ba yin te/ bdag po dang / /byed pa po med pa'i phyir go rims bzhin du/ gang gi rjes su 'jug par byed par 'gyur/ skyed pa'i spyod pa med pa ni/ /de ni gzhan gyis skyed pa min/ /zhes bya ba yin no/ /skye ba'i spyod pa de dag ni/ /bdag nyid kyang mi skye ste/ zhes bya ba yin no/ /'pho ba'i spyod pa med pa ni/ /dngos po rnams ni brten nas skye/ /rnying pa ma yin gsar zhing gsar/ /zhes bya ba yin no/ /'jig pa'i spyod pa med pa ni/ /'di ni gzhan gyis 'jig mi byed/ /ces bya ba yin no/ /zhig pa'i spyod pa med pa ni/ /bdag nyid kyang ni 'jig pa med/ /ces bya ba yin no/ /ci brten nas skye ba ji lta ba de bzhin du/ brten nas rnam par 'jig par 'gyur ram snyam pa la/ rkyen yod na ni skye 'gyur la/ /skyes nas rang gi ngang gis 'jig /ces bya ba gsungs so/ /chos rnams 'di dag rgyu dang bcas/ /zhes gsungs pas na/ de'i phyir/ kun nas nyon mongs pa'i ngo bo nyid/ khyim pa dang rab tu byung ba'i chos de dag rgyu dang bcas par ston te/ phyogs gnyis la ni brten pa yi/ /zhes bya ba la sogs pa'i tshigs su bcad pa gnyis kyis/ ma rig pa dang / sred pa rgyu yin par ston to/ /de man chad tshigs su bcad pa lngas ni kun nas nyon mongs pa de nyid kyi rab tu dbye ba dang / rten dang / rgyu dang / dus ston to/ /de la chos rnams rgyu dang bcas pa ni ma rig pa nas tshor ba yan chad do/ /rgyu dang bcas pa'i sdug bsngal ni/ /sred pa nas rga shi yan chad do/ /'dis ni nyon mongs pa dang / las dang skye ba'i kun nas nyon mongs pa dang rnam pa gsum ston to/ /nyon mongs dngos gzhi gnyis byas nas/ zhes bya ba ni/ nyon mongs pa'i kun nas nyon mongs pa las/ nyon mongs pa'i kun nas nyon mongs pa gtso bor gzung ba ston to/ /bya ba bdag gis byas pa med/ /ces bya ba las kyi kun nas nyon mongs pa yang logs shig tu smos pa ni/ des sna tshogs byas pa'i phyir dang / de'i rnam par smin pa yang bsam gyis mi khyab pa'i phyir ro/ /de la bya ba bdag gis byas pa med pa ni sdig pa'i grogs po dang / /dge ba'i bshes gnyen pha rol gyis bsgrub pa la ltos pa'i phyir ro/ /gzhan gyis byas pa kho na ma yin na/ skyes bu'i byed pa la ltos pa'i phyir ro/ /gzhan kho nas bya ba byed du bcug pa ma yin no/ /sngon gyi tshe rabs kyi rgyu la ltos pa'i phyir ro/ /'du byed skyes par ma gyur pa/ /zhes bya ba la sogs pa'i tshigs su bcad pa 'dis ni/ ma 'ongs pa la brten nas kun nas nyon mongs pa skye ba med de / da ltar byung ba dang / 'das pa'i 'du byed la brten nas kun nas nyon mongs pa ston to/ /'du byed skyes par gyur pa yang / /de nyid kyis ni rtog mi byed/ /ma 'ongs pa la mtshan ma med pa'i phyir mi rtog ste/ gzhan du brtags la ji snyed gzhan du 'gyur ba yang yod pas 'di dang 'di lta bur 'gyur ro zhes nges par byar med pa'i phyir ro/ /'das pa la ni rnam par rtog /ces bya ba ni/ 'di dang 'di lta bu zhig tu gyur to zhes mtshan mar gzung du yod pa'i phyir ro/ /myong ba 'ba' zhig la rtog pa ma yin te/ ma myong ba ma 'ongs pa la mtshan mar gzung du med bzhin du'ang rnam par rtog par byed do / /'dis ni rtog pa'i rgyu las byung ba'i kun nas nyon mongs pa da ltar byung ba'i 'du byed la brten pa ston to/ /'du byed rnams ni thog ma med/ /'on kyang thog ma yod par snang / zhes bya ba ni/ kun nas nyon mongs pa'i dus te/ thog ma med pa'i dus nas rjes su 'brang ba'i phyir dang / gsar du skye ba'i phyir ro/ /'di man chad kyis ni rnam par byang ba'i phyogs ston to/ /ji ltar gzugs la sogs pa dbu pa rdos pa la sogs pa lta bur rang gi mtshan nyid dang / skye ba dang / gnas pa dang / 'gag pa mtshungs pas 'dus byas kyi spyi'i mtshan nyid yin pa'i phyir/ spyi'i mtshan nyid dang / kun rdzob dang / don dam pa'i bden pas yongs su brtags na rnam par byang bar 'gyur te/ 'di ltar gti mug par byed pa gang yang med la/ rten cing 'brel par 'byung ba'i gti mug ni med pa ma yin te/ kun rdzob tu na gti mug ni rmongs par byed pa'o zhes bya'o/ /gang gi phyir rmongs pa med pa la ni tshul bzhin ma yin pa yid la byed pa med de/ de bas na gti mug de rmongs par mi byed do zhes ston to/ /de bzhin du rnam par shes pa yang kun rdzob tu na/ bsod nams la sogs pa'i 'du byed du nye bar 'gro ba zhes bya'i/ don dam par ni nye bar 'gro ba med do/ /gsum du 'dod ces bya ba ni/ 'das pa dang / ma 'ongs pa dang / da ltar byung ba rnams so/ /las rnams gsum po gang yin pa/ /zhes bya ba ni/ lus la sogs pa'i las so/ /de dag kun kyang 'brel pa med/ /ces bya ba ni/ phan tshun 'grogs pa med pa'i phyir te/ 'di ltar da ltar gyi rnams ni 'jig pa'i ngang tshul can yin la/ 'das pa rnams ni gang na yang mi gnas pa dang / ma skyes pa rnams ni rkyen la rag las pa'i phyir ro/ /sems ni phyi bzhin 'brang ba yin/ /zhes bya ba ni/ de dag dang mtshungs par ldan pa gang yin pa'o/ /de lta na/ ji ltar bsod nams la sogs pa'i 'du byed rnams 'brel pa med pa de bzhin du/ de dang mtshungs par ldan pa'i sems kyang de bzhin du/ 'gyur ba'i rigs na/ ji ltar de nye bar 'gro bar 'gyur/ gang gi phyir sems 'du byed gang dang mtshungs par ldan pa'am/ yang na mi ldan par gyur na/ de ni de dang nams kyang mtshungs par ldan pa ma yin pa'am/ yang na mi ldan pa yang ma yin par mi 'gyur ba'i rigs so/ /sems thams cad dang mtshungs par ldan pa'am/ mi ldan pa yang ma yin te/ de lta na yang dag par sems kyi nye bar 'gro ba ma grub pa kun rdzob tu/ sems ni nye bar 'gro zhes bya/ /zhes bya ste/ gtan tshigs gang gis ston zhe na/ /rgyun ni 'dra dang mi 'dra ba/ /zhes bya ba la sogs pa'i tshigs su bcad pas ston to/ /kun rdzob 'di ni bya ba yin/ /zhes bya ba ni de nye bar 'gro ba'o/ /ji ltar byed pa po dang / tshor ba po yang dag par med bzhin du yang zhe na/ kun rdzob tu bdag gis byas pa la nye bar spyad pa zhes bya ba yang bstan to/ /snga dang phyi mas tha dad cing / /zhes bya ba la sogs pa'i tshigs su bcad pas ni/ ji ltar yang des byed cing des myong ngam/ 'on te gzhan gyis zhes bya ba lung du mi bstan pa de yongs su ston to/ /de lta na bdag po'am/ byed pa po'am/ tshor ba po yang dag par med kyi/ rgyu dang 'bras bu yod pa tsam las rgol ba'i lan gdab pa'am/ rgyu dang 'bras bu'i mtshan nyid dang / de nyid la bdag tu phyin ci log pa ni tshigs su bcad pa lngas ston to/ /de la ji ltar bdag med bzhin du yang srid pa 'byung zhing rgyun mi 'chad pa dang / ji ltar rgyu las 'bras bu cig car mi 'byung ba dang / ji ltar thams cad las thams cad mi 'byung ba dang / ji ltar rgyu'i lam de rgyun chad par mi 'gyur ba de ni tshigs su bcad pa gcig gis ston te/ rtsa ba bzhis rgol ba bzhi'i lan go rims bzhin du 'debs so/ /gnyis pas ni rgyu dang 'bras bu'i mtshan nyid ston to/ /phyi ma gsum gyis ni rgyu dang 'bras bu bdag med pa de la ji ltar bdag tu lta bar phyin ci log pa ston to/ /de yang dmigs pa dang / rten dang / 'bras bu dang / rgyu las ston te/ de'i dmigs pa ni tshigs su bcad pa gcig gis bstan to/ /de yang gzugs med pa dang / bstan du med pa gnyis kyis so so rang gis rig par sgrub par byed de/ gzugs rnams ni brtag tu rung ba'o zhes mdo las 'byung bas brtag tu med pa'i phyir dang / gzhan dag la bstan du mi rung bas bstan du med pa'i phyir ro/ /rten dang 'bras bu ni gnyis pas bstan to / /byis pa rnams ni rten yin no/ /de las gzhan pa'i lta ba rnams ni 'bras bu'o/ /rgyu ni gsum pas bstan te/ de la lhan cig skyes pa'i bdag tu lta ba ni ril por 'dzin pa dang / de'i bag la nyal rang gi sa bon las byung ngo / /mu stegs can gyi bdag tu lta ba yongs su brtags pa ni sngon goms pa la sogs pa las 'byung ste/ mu stegs can gyi lta ba de yang goms par gyur la/ 'dir yang tshul bzhin ma yin pa la rtog cing / de dang mthun pa'i dam pa'i chos ma yin pa yang pha rol las thos te/ de ltar rten dang / yid la byed pa dang / dmigs pa'i nyes pa rnams kyis yongs su brtags pa'i bdag tu lta ba 'byung ba ston to/ /de'i 'og tu ji ltar bdag tu lta ba des kun nas 'byung ba'i go rims kyis sdug bsngal 'grub par byed pa dang / ji ltar sdug bsngal de nga rgyal dang bcas pa'i sdug bsngal gnyis kyi rgyur 'gyur ba dang / ji ltar na thar pa'i bgegs su 'gyur ba de ni tshigs su bcad pa lngas bstan te/ de la tshigs su bcad pa dang pos kun 'byung ba ston to/ / gnyis pa dang gsum pas ni sdug bsngal dang / 'du byed kyi sdug bsngal du bsdus pa'i kun gzhi rnam par shes pa de la de gnas par byas nas/ 'gyur ram mi 'gyur zhig gu snyam pa la sogs par spros pa khas len to/ /gnas byas zhes bya ba ni/ lus yongs su 'dzin par byed pa'o/ /skad cig tsam yang zhi bar mi 'gyur ba ni/ sdug bsngal de yang dus thams cad du rjes su 'brel ba'i phyir ro/ /bzhi pas ni ji ltar sdug bsngal ba de sdug bsngal gzhan gnyis dang / nga rgyal gyi rkyen yin pa ston to/ /lnga pas ni ji ltar thar pa'i bgegs su 'gyur ba ston to / /der ni lhag par kun du rmongs par 'gyur ba zhes bya ba ni sdug bsngal gzhan gnyis las lhag pa'o/ /kun du 'gro zhes bya ba ni/ tshor ba thams cad kyi rjes su 'brang ba'i phyir ro/ /kun la spyod par byed ces bya ba ni/ dge ba dang / mi dge ba dang / lung du ma bstan pa la'o/ /kun gzhi'i rnam par shes par gtogs pa'i sdug bsngal de mtsho dang 'dra bar bstan nas/ da ni skom par 'gyur ba ston te/ chos spyod pa kho nas skom par 'gyur ba'i phyir ro/ /de la mi bzad pa'i rgyun rnams ni/ mig la sogs pa drug dang / 'gro ba lnga dang / khams gsum la sogs pa'o/ /chos spyod pa de yang 'ching ba dang / thar pa yongs su shes par bstan to/ /de la 'ching ba yongs su shes pa ni/ 'di ltar yongs su shes pa ste/ sdug bsngal la yang sdug bsngal lo snyam du 'dzin pa dang / bde na yang bdag nyid bde'o snyam du 'dzin pa'o/ /yongs su rtog pa de yang lta ba skyed par byed pa yin la/ lta ba de nyid las kyang de 'byung ste/ de ni skyed pa yin no/ /thar pa yongs su shes pa ni/ tshigs su bcad pa lhag ma drug gis bstan to/ /rtag tu nyon mongs can gyi yid/ /nyon mongs lhan cig skye zhing 'gag /de phyir de ni nyon mongs las/ /thar par ma gyur ces bya ba ni/ gang gi tshe nyon mongs pa rnams dang lhan cig skye ba na'o/ /'gyur ba min zhes bya ba ni/ gang gi tshe de dag dang lhan cig 'gags pa na'o/ /gang gi tshe thar pa zhes bya ba de ston te/ /de nyid phyis dag par skye ba ni ma yin gyi/ yid gzhan dag par 'gyur te/ /de ni thog ma nyid nas kun nas nyon mongs pa can ma yin pas na 'gro ba zhes bya'o/ /nyon mongs can gang de 'dir gzhan// zhes bya ba ni/ tshigs su bcad pa 'di ni/ don 'di nyid sgrub pa'o/ /thar pa de yang rnam pa gnyis su bstan te/ /nyon mongs pa las thar pa dang / /dngos po las thar pa'o/ /nyon mongs pa las thar pa ni/ sa bon thams cad legs par bstsal bas/ nyon mongs pa yongs su zad pa'i phyir ro/ /dngos po las thar pa ni de nyid la kun nas nyon mongs pa med pa'i phyir te/ dge slong dag mig la 'dun pa'i 'dod chags gang yin pa de spangs na/ de lta bus khyed kyi mig de spong bar 'gyur ro zhes mdo las 'byung ba'i tshig lta bu'o/ /de ltar phung po'i lhag ma dang bcas pa'i thar pa bstan nas/ so sor gi rig pas phung po'i lhag ma med pa stan te/ med pa tsam du 'dzin pa la btsal ba'i phyir/ de bsam gyis mi khyab par ston to/ /phung po'i lhag ma med pa ni/ sdug bsngal tsam zad pas bstan to/ /de bas na de las tha dad pa'am/ tha dad pa ma yin pa'am/ shi ba'i 'og tu yod pa'am/ med par 'gyur zhes bya ba la sogs pa rnam pa thams cad du/ spros pa med pa'o/ /rgyun la gang zag ces bya ste/ /zhes bya ba la sogs pa/ tshigs su bcad pa 'dis ni 'ching ba dang thar pa yod bzhin du/ gang zag dang chos 'khor ba'am/ yongs su mya ngan las 'das pa ji ltar med pa de yongs su ston to/ /don dam pa'i tshigs su bcad pa rnams kyi yid ches pa'i lung rnam par bshad pa rdzogs so// //de la dgongs pa'i don gyi tshigs su bcad pa rnam par gzhag pa ni/ de nas mi mjed kyi bdag po tshangs pa/ bcom ldan 'das ga la ba der song ste phyin nas/ bcom ldan 'das kyi zhabs la mgo bos phyag 'tshal te/ /phyogs gcig tu 'dug go / /phyogs gcig tu 'dug nas mi mjed kyi bdag po tshangs pas/ bcom ldan 'das la tshigs su bcad pa brjod pas zhu ba zhus pa/ bslab pa rnams la pha rol gshegs/ /the tshom thams cad sel mdzad pa/ /bslab dang bslab rnams bslab bgyi ba/ /gang lags zhu na bdag la gsungs/ /grogs po mdor na bslab pa gsum/ /lhag pa'i tshul khrims lhag pa'i sems/ /lhag pa'i shes rab de dag la/ /bslab pa gang yin mnyan par gyis/ /yan lag drug dang ldan pa dang / gnas bzhi bde dang ldan pa dang / /bzhi po yi ni rnam pa bzhi/ /rtag tu ye shes dag pa yin/ /rtsa ba shin tu brtan pa dang / /zhi ba'i sems la dga' ba dang / /'phags pa'i lha dang sdig pa'i lha/ /ldan par bya zhing 'bral bar bya/ /dang po dag cing bsam gtan dga'/ /bden pa la yang mkhas par bya/ /bden pa nyid ni bskyed pa dang / /spang bar bya zhing spel bar bya/ /bslab pa gsum gyi gzhi rnams la/ /'gro ba rnam pa bzhi yod de/ /'gro ba rnam pa gnyis spangs la/ /'gro ba gnyis ni bsgrub par bya/ /gnyis ni gnyis la nye bar gnas/ /gcig ni mya ngan 'da' bar 'gro/ /go rims bzhin du rgyur 'gyur te/ /so so dang mi 'dren mar bsgom/ /gang gi thog mar 'gyod med la/ /phyi nas bde dang ldan 'gyur la/ /mkhas pa gang la slob pa de/ /bslab pa kun gyi thog ma yin/ /gang gis dge ba 'byung ldan pa/ /ye shes rnam par spyod byed pa/ /mkhas pa gang la bslab pa de/ /bslab pa kun gyi bar ma yin/ /gang gis sems ni rnam grol la/ /spros pa yang ni 'gag 'gyur ba/ /mkhas pa gang la slob pa de/ /bslab pa kun gyi gtso bo yin/ /lam gyi thog mar bstan pa de / / ma dag 'gro bar 'gyur ba'i lam/ /de bzhin bde 'gror 'gro ba ste/ /de ni gcig pus 'gyur bar 'dod/ /lam gyi bar mar bstan pa de/ /rnam par dag par 'gro ba'i lam/ /thams cad gtan du 'gro ba min / /de ni gcig pu ma yin 'dod/ /lam gyi gtso bo bstan pa de/ /rnam par dag par 'gro ba'i lam/ /thams cad gtan du 'gro ba ste/ /de yang gcig pu ma yin 'dod/ /slob dang mi slob gang yin de/ /gnyi ga mkhas par 'dod pa yin/ /slob dang mi slob gang yin pa/ /de ni gnyi ga byis par 'dod/ /yongs su 'dzin pa spangs pa dang / /gnas ngan len dang bral ba dang / /de bzhin shes bya mngon sum phyir/ /bslab pa blang ba rnam gsum gyur/ /dmigs bcas dmigs pa med pa dang / /phra ba dang ni rags par ldan/ /yang dag blang dang rab dben dang / /sgra dang bstod pas yang dag bsgrubs/ /bslab pa gcig ni gcig pu 'byung / /phyi ma zla dang bcas pa yin/ /gcig ni zla dang gsum yin te/ /de dag mkhas pas 'da' bar byed/ /bslab las tshul khrims ma nyams dang / /dam bcas dang yang ldan pa dang / /chog bzang po ma smad dang / /gnas lnga dag kyang rnam par spangs/ /'byin pas 'gyod pa med par 'gyur/ /'gyod pas nyes pa med par 'gyur/ /bslab pa la ni brten par bya/ /de la snying nas nan tan bya/ /phyir ni spang bar mi bya zhing / /srog gi phyir yang gzhig mi bya/ /rtag tu nan tan gnas par bya/ /'dul ba la ni 'jug par bya/ /dam bcas thog mar dag par bya/ /'tsho ba yang ni dag par bya/ /mtha' gnyis po ni spangs nas kyang / /smon pa rnam par spong bar bya/ /bar chad byed pa'i chos rnams la/ /ji ltar yang ni chags mi bya/ /sems ni 'khrug par byed pa'i chos/ /byung ba dang du blang mi bya/ /ha cang mi zhum thal ches min/ /rtag tu dran pa nye bar gzhag /dngos gzhi nyer bsdogs rnams kyis dang / /tshangs spyod dag par spyad par bya/ /brtson 'grus kyang ni brtsam par bya/ /rtag tu brtun pa brtan por bya/ /yan lag lnga po rab brtan pa'i/ /bag yod pa ni brten par gyis/ /dge ba spyoms par mi bya ste/ /sdig pa rnams ni bshags par bya/ /chos gos la sogs ngan pa'am/ /bzang po'ang rung ste chog shes bya/ /nyung dus kyang ni gnas par bya/ / ran pas kyang ni gnas par bya/ /nyon mongs spangs pas zhi don du/ /sbyangs pa'i yon tan yang dag blang / /spyod lam dag dang ldan par bya/ /len pa la yang ran par bya/ /de yi ched du spyod lam rnams/ /bcos par nams kyang mi bya'o/ /bdag gi yon tan bden pa yang / /brjod par mi bya brjod mi gzhug /yang na yon tan de dag dang / /'dod pa'i mtshan ma bstan mi bya/ /gzhan dag la ni nan gyis su/ /slong mo gdab par mi bya'o/ /chos bzhin thob pa'i rnyed pa la/ /'di la rnyed pa smad mi bya/ /rnyed pa dang ni bkur sti la/ /cis kyang mngon par chags mi bya/ /sgro 'dogs skur pa'i lta ba la/ /mngon par zhen par yod mi bya/ /'jig rten rgyang pan gsang ba'i tshig /don med mchog tu gzung mi bya/ /lhung bzed dang ni chos sogs dang / /dgos med lhag pa bcang mi bya/ / nyon mongs 'phel bar 'gyur ba yi/ /khyim pa rnams la brten mi bya/ /ye shes rnam par dag byed pa'i/ /'phags pa rnams dang bsten par bya/ /mya ngan rnam par g.yeng byed pa/ /mdza' sde dag kyang spong mi bya/ /sdug bsngal bskyed pa'i nyon mongs rnams/ /byung ba dang du blang mi bya/ /brtul zhugs nyams pas ji ltar yang / /dad pas byin pa spyad mi bya/ /dam pa'i chos ni ji ltar yang / /yongs su spang bar mi bya'o/ /pha rol dag gi 'khrul skyon la/ /mi bsam bde bar 'gyur bar bya/ /bdag gi 'khrul par nyes pa ni/ /shes par byas nas bsgrags par bya/ /de bzhin nyes pa byung ba la/ /chos bzhin du ni rab tu bya/ /de bzhin las su bya ba rnams/ /rang gis bya zhing bsgrim par bya/ /sangs rgyas rnams dang nyan thos kyi/ /mthu stobs dang ni bstan pa la/ /dad ldan kha na ma tho ba/ /mthong bar skur ba yang mi gdab/ /rtog ge'i spyod yul ma yin pa/ /shin tu zab mos chos rnams la/ /sngon gyi lung rnying yongs btang ste/ /rang lta mchog tu gzung mi bya/ /bas mtha' yi ni mal stan du/ /rnam par dben par gnas par bya/ /dge ba'i chos rnams bsgom par bya/ / brtson 'grus brtun pa brtan po bya/ /'dun pa med cing 'dun pa bskyed/ /sdang ba med cing sun 'byin la/ /gnyid mi log cing dus su nyal/ /zhi bar yang ni gnas mi byed/ /'gyod pa med dang 'gyod dang bcas/ /som nyi byed cing 'dod par byed/ /rnam pa kun dang dus kun ldan/ /yang dag sbyor dang ldan pa yin/ /'jug par byed dang sad byed dang / /gzhan yang de bzhin kun du sbyor/ /mtshan mar 'dzin dang chags pa dang / /gzhan yang de bzhin steg par byed/ /'jums pa dang ni mchog tu chags/ /rtog pa zhes ni bya ba ste/ /'dod pa'i 'dod chags skyed pa de/ /mkhas pas yongs su spang bar bya/ /'dod pa rnams ni mi ngoms byed/ /de bzhin mang po'i thun mong ba/ /chos ma yin pa'i rgyur gyur dang / /de bzhin sred pa 'phel bar byed/ /dam pa rnams kyis spang bar 'os/ / myur du 'jig par 'gyur ba dang / /'dod rnams rkyen la brten pa dang / /bag med kyi ni sa yang yin/ /'dod pa rnams ni keng rus 'dra/ /de bzhin sha yi kham tshad 'dra/ /rtswa yi sgron ma 'dra ba yang / /de bzhin me yi dong dang 'dra/ /gdug pa'i sbrul dang 'dra ba dang / /de bzhin rmi lam lta bu dang / /brnyan po'i rgyan dang 'dra ba dang / /de bzhin shing thog 'dra ba yin/ /'dod rnams de ltar shes nas ni/ /ji lta bur yang chags mi bya/ /dam pa'i chos ni rtag tu nyon/ /bsam pa dang ni bsgom par gyis/ /thog mar zhi dang rgya che ba/ /mthong nas gcig tu nges par bsgom/ /nyon mongs gnas ngan len spangs la/ /spong ba la yang dga' bar gyis/ /mtshan ma la yang dpyad par bya/ /sbyor ba nyams su blang bar bya/ /'dod pa'i 'dod chags bral ba dang / gzugs kyi 'dod chags bral bar bya/ /bden pa mngon par rtogs par bya/ /kun nas 'dod chags bral bar bya/ /tshe 'dir mya ngan 'da' bar byed / /de bzhin phung po zad par bya/ /bslab pa rnams la pha rol gshegs/ /the tshom thams cad sel mdzad pa/ /bslab dang bslab rnams bslab bgyi ba/ /gang lags zhu na bdag la gsungs/ /zhes bya ba'i tshigs su bcad pa ni bcom ldan 'das la tshangs pas bslab pa thams cad kyi mchog gi pha mthar byon pa / rang gi don phun sum tshogs pa thun mong ma yin pa las kyang brtsams/ sems can thams cad kyi the tshom skyes so cog gcod pa'i sgo nas pha rol gyi don sgrub pa thun mong ma yin pa las brtsams te/ bstod pa sngar byas nas/ bslab pa rnams gang yin pa dang / du yod pa dang / de dag la ji ltar bslab par bgyi zhes zhus pa'o/ /de nas bcom ldan 'das kyis bya ba mang pos skrag pa dang / /le lo'i rang bzhin can rnams spro ba skyed par dgongs nas bslab pa thams cad bsdus te/ grogs po mdor na bslab pa gsum/ /lhag pa'i tshul khrims lhag pa'i sems/ /lhag pa'i shes rab de dag la/ /bslab pa gang yin mnyan par gyis/ /zhes mdor bslab pa gsum du bstan to/ /de la tshul khrims dang / sems dang / shes rab kyi dbang du byas nas/ sems rnam par g.yeng ba la/ rnam par g.yeng ba med pa'i sbyor ba bstan pa'i phyir lhag pa'i tshul khrims kyi bslab pa dang / sems mnyam par gzhag pa la mnyam par gzhag pa'i sbyor ba bstan pa'i phyir/ lhag pa'i sems kyi bslab pa dang / mnyam par gzhag tu zin kyang / sems rnam par ma grol ba la/ rnam par grol ba'i sbyor ba bstan pa'i phyir lhag pa'i shes rab kyi bslab pa'i rnal 'byor pa rnams kyi bya ba thams cad yongs su rdzogs par 'gyur bas na/ bslab pa thams cad bslab pa gsum po 'di dag ni nang du bsdu ba'i dgongs pas/ bcom ldan 'das kyis bstan to/ /de dag la bslab par bya ba ni/ sbyor ba gang gis bslab pa de dag rdzogs par 'gyur ba'o/ /de la yan lag drug dang ldan pa dang / gnas bzhi bde dang ldan pa dang / /bzhi po yi ni rnam pa bzhi/ /rtag tu ye shes dag pa yin/ /zhes bya ba'i tshigs su bcad pa 'dis ni go rims bzhin du bslab pa gsum po de dag la bslab pa ston te/ yan lag drug dang ldan pa zhes bya ba ni/ lhag pa'i tshul khrims kyi bslab pa'i dbang du byas nas bslab pa ste/ yan lag drug ni/ tshul khrims dang ldan par gnas pa dang / so so thar pa'i sdom pas bsdams pa dang / cho ga dang ldan pa dang / spyod yul dang ldan pa dang / kha na ma tho ba phra rab tsam dag la yang 'jigs par lta ba dang / bslab pa'i gzhi rnams yang dag par blangs nas slob pa ste/ yan lag drug po de dag gis tshul khrims rnam par dag pa bzhi bstan to/ /de la tshul khrims dang ldan par gnas zhes bya ba'i dbang du byas nas/ so sor thar ba'i sdom pas bsdams zhes bya ba 'dis ni nges par 'byin pa'i tshul khrims rnam par dag par bstan te/ nges par 'byin pa ni thar pa'i dbang du byas pa'o/ /cho ga dang spyod yul dang ldan pa zhes bya ba 'di gnyis kyis ni tshul khrims ma smad pa rnam par dag pa bstan to/ /kha na ma tho ba phra rab tsam dag la yang 'jigs par lta ba zhes bya bas ni/ tshul khrims ma nyams pa rnam par dag pa bstan to/ /bslab pa'i gzhi rnams yang dag par blangs te slob ces bya bas ni/ tshul khrims phyin ci ma log pa rnam par dag pa bstan to/ /de ltar yan lag rnam pa drug dang ldan pas lhag pa'i tshul khrims kyi bslab pa'i sbyor ba la brten nas/ gnas bzhi bde dang ldan pa dang / /zhes bya bas ni lhag pa'i sems kyi bslab pa'i sbyor ba ston te/ sems kyi gnas pa rnam pa bzhi ni bsam gtan bzhi yin la/ de yang tshe 'di nyid la bde bar gnas pa yin pas na bde ba zhes bya'o/ /bzhi po yi ni rnam pa bzhi/ /rtag tu ye shes dag pa yin/ /zhes bya ba ni/ lhag pa'i shes rab kyi bslab pa'i sbyor ba'i dbang du byas nas gsungs pa yin te/ sdug bsngal dang / kun 'byung ba dang / 'gog pa dang / lam gyi bden pa bzhi po dag las re re la yang mi rtag pa la sogs pa'i rnam par shes pa dag pa bzhi bzhis lhag pa'i shes rab kyi bslab pa rab tu phye ba'i phyir ro// //bam po nyi shu pa/ rtsa ba shin tu brtan pa dang / /zhi ba'i sems la dga' ba dang / /'phags pa'i lha dang sdig pa'i lha/ /ldan par bya zhing 'bral bar bya/ /zhes bya ba'i tshigs su bcad pa 'dis ni bslab pa gsum po go rims bzhin du skye ba ston to/ /bslab pa dang po lhag pa'i tshul khrims ni rtsa ba yin te/ phyi ma gnyis de'i rgyu las byung ba'i phyir ro/ /de'i 'og tu tshul khrims dang ldan pa 'gyod pa med pa la sogs pa'i go rims bzhin du sems mnyam par gzhag pa la mngon par dga' ba ni gnyis pa'o/ /de nas sems mnyam par gzhag pas yang dag pa ji lta ba bzhin du mthong ba'i phyir 'phags pa'i lta ba dang ldan pa dang / sdig pa'i lta ba dang bral na ni gsum pa'o/ /dang po dag cing bsam gtan dga'/ /bden pa la yang mkhas par bya/ /bden pa nyid ni bskyed pa dang / /spang bar bya zhing spel bar bya/ /zhes bya ba'i tshigs su bcad pa 'dis ni/ bslab pa gsum po de dag nyid kyi dag pa'i khyad par go rims bzhin du ston to/ /de la dang po dag cing zhes bya ba ni/ dang po'i dag pa'i khyad par bstan pa'o/ /bsam gtan dga' zhes bya ba ni gnyis pa'i 'o/ / bden pa la mkhas pa zhes bya ba ni gsum pa'i 'o/ /bden pa la mkhas pa zhes bya ba de la yang bskyed par bya zhes bya ba ni lam gyi bden pa bskyed pa'i phyir ro/ /spang bar bya zhes bya ba ni sdug bsngal dang kun 'byung ba'i bden pa gnyis spong ba'i phyir ro/ /spel bar bya zhes bya ba ni/ 'gog pa'i bden pa yang dang yang du nyon mongs pa chung ngu dang / 'bring dang / chen po spong zhing 'gog pas 'phel bar bya'o/ /bslab pa gsum gyi gzhi rnams la/ /'gro ba rnam pa bzhi yod de/ /'gro ba rnam pa gnyis spangs la/ /'gro ba gnyis ni bsgrub par bya/ zhes bya ba'i tshigs su bcad pa 'dis ni tshul khrims dang / sems dang / shes rab ces bya ba'i bslab pa'i gnas rnams kyi bslab pa rnams bsgrub pa dang nyams par bya ba las mthun mthun du sbyar te/ de'i 'bras bur gyur ba 'gro ba bzhi gang yin pa 'dod pa'i khams kyi lha dang / mi'i 'gro bar gtogs pa'i bde 'gro lhag pa'i tshul khrims phun sum tshogs pa'i 'bras bu dang / 'dod pa'i khams nyid na de las gzhan pa'i 'gro bar gtogs pa lhag pa'i tshul khrims kyi bslab pa nyams pa'i 'bras bu ngan 'gro dang / gzugs dang / gzugs med pa'i khams kyi lha'i 'gro bar gtogs pa lhag pa'i sems kyi 'bras bu gong ma'i 'gro ba dang / khams gsum du ma gtogs pa lhag pa'i shes rab kyi 'bras bu mya ngan las 'das pa'i 'gro ba gang yin pa ste/ 'gro ba de dag las dang po'i bde 'gro dang / ngan 'gro gnyis spangs la/ phyi ma'i gong ma'i 'gro ba dang / mya ngan las 'das pa'i 'gro ba gnyis 'jig rten dang 'jig rten las 'das pa'i lam gnyis kyis bsgrub par bya'o zhes bstan to/ /gnyis ni gnyis la nye bar gnas/ /gcig ni mya ngan 'das par 'gro/ /go rims bzhin du rgyur 'gyur te/ /so so dang ni 'dren mar bsgom/ /zhes bya ba'i tshigs su bcad pa 'dis ni/ ji ltar lhag pa'i tshul khrims dang / lhag pa'i sems kyi bslab pa gnyis las/ dang pos rim bzhin du lhag pa'i sems dang / lhag pa'i shes rab kyi bslab pa gnyis la rgyu'i dngos por nye bar gnas pa dang / /bar mas lhag pa'i shes rab dang / bsam gtan gyi sdom par gtogs pa'i lhag pa'i tshul khrims bslab pa gnyis pa rgyu'i dngos por nye bar gnas pa dang / mchog gcig pus mya ngan las 'das pa la rgyu'i dngos por nye bar gnas pa dang / so so dang 'dren mar mthun mthun du bsgom pa de ston to/ /gang gis thog mar 'gyod med la/ /phyi nas bde dang ldan 'gyur ba/ /mkhas pa gang la slob pa de/ /bslab pa kun gyi thog ma yin/ /zhes bya ba'i tshigs su bcad pa 'dis ni/ ji ltar lhag pa'i tshul khrims kyi bslab pa 'gyod pa med pa la sogs pa'i go rims bzhin du phyi ma'i rgyu'i dngos po nye bar gnas pa de ston to/ /gang gis dge ba 'byung ldan pa/ /ye shes rnam par sbyong byed pa/ /mkhas pa gang la slob pa de/ /bslab pa kun gyi bar ma yin/ /zhes bya ba ni lhag pa'i sems kyi bslab pa bsgom pa las byung ba'i dge ba'i rtsa ba khyad par du 'phags pa 'byung ba la sogs pa'i go rims bzhin du bslab pa mchog gi rgyu yin par ston to/ /gang gis sems ni rnam grol la/ /spros pa yang ni 'gag 'gyur ba/ /mkhas pa gang la slob pa de/ /bslab pa kun gyi gtso bo yin/ /zhes bya ba ni/ lhag pa'i shes rab kyi bslab pa mya ngan las 'das pa'i rgyu yin pa'i phyir gtso bor ston to/ /lam gyi thog ma bstan pa de/ /ma dag 'gro bar 'gyur ba'i lam/ /de bzhin bde 'gror 'gro ba ste/ /de ni gcig pus 'gro bar 'dod/ /ces bya ba ni ji ltar lhag pa'i tshul khrims kyi bslab pa nyams na ngan 'gro'i rgyur 'gyur ba dang / yang dag par bsgrubs na bde 'gro'i rgyur 'gyur ba dang / bslab pa phyi ma gnyis med par yang 'ba' zhig gis sgrub nus pa de ston to/ / lam gyi bar ma bstan pa de/ /rnam par dag par 'gro ba'i lam/ /thams cad gtan du 'gro ba min/ /de ni gcig pu ma yin 'dod/ /ces bya ba ni ji ltar lam bar ma 'dod pa'i khams kyi 'dod chags dang bral bas rnam par dag pa'i phyir/ rnam par dag par 'gro ba dang / khams gong ma'i 'dod chags dang ma bral zhing / 'dod pa'i 'dod chags kyi bag la nyal yang gtan du ma yin pa'i phyir/ thams cad gtan du rnam par dag par 'gro ba ma yin pa dang / ji ltar mchog med cing dang po med par 'ba' zhig gis 'grub par mi 'gyur ba ston to/ /lam gyi gtso bor bstan pa de/ /rnam par dag par 'gro ba'i lam/ /thams cad gtan du 'gro ba ste/ /de yang gcig pu ma yin 'dod/ /ces bya bas ni/ khams gsum pa'i 'dod chags dang bral ba dang / bag la nyal yang gtan gyi phyin pa dang / ji ltar mchog de thams cad gtan du 'gro ba yin la/ snga ma gnyis med par yang / gcig pus 'grub par mi 'gyur ba de ston to/ /slob dang mi slob gang yin de/ gnyi ga mkhas par 'dod pa yin/ /zhes bya ba'i tshigs su bcad pa phyed kyis ni bslab pa gsum po 'di dag la bslab pa rnams yang dag par slob kyi/ log par mi slob pa'i phyir/ mkhas pa'i mtshan nyid du ston to/ /slob dang mi slob gang yin pa/ /de ni gnyi ga yin par 'dod/ /ces bya ba 'og ma phyed kyis ni log par slob pa dang / mi slob pa'i phyir byis pa'i mtshan nyid du ston to/ /yongs su 'dzin pa spangs pa dang / /gnas ngan len dang bral ba dang / /de bzhin shes bya mngon sum phyir/ /bslab pa blang ba rnam gsum 'gyur/ /zhes bya bas/ khyim dang chung ma la sogs pa yongs su 'dzin pa yongs su btang ba gang yin pa dang / ting nge 'dzin gyi mi mthun pa'i phyogs gnas ngan len spangs pa gang yin pa dang / bden pa bzhi'i mtshan nyid shes par bya ba'i de kho na nyid mngon sum du byas pas go rims bzhin du bslab pa gsum 'grub par 'gyur ba de ston to/ /dmigs bcas dmigs pa med pa dang / /phra ba dang rags par ldan/ /zhes bya ba'i tshigs su bcad pa phyed pa 'dis ni/ mchog gnyis dang / dang po go rims bzhin du dmigs pa dang bcas pa dang / dmigs pa med pa dang / phra ba dang / rags pas rab tu dbye ba ston to/ / yang dag blang dang rab dben dang / /sgra dang bstod pas yang dag bsgrubs/ /shes bya 'og ma phyed kyis ni/ /dang po dang bar ma dang mchog rnams go rims bzhin du dam bcas pas mngon par bsgrubs pa dang lus dang sems dben pas mngon par bsgrub pa dang / gzhan gyi sgra dang nang gi tshul bzhin yid la byed pas mngon par bsgrub pa ston to/ /bslab pa gcig ni gcig pus 'byung / /phyi ma zla dang bcas pa yin/ /gcig ni zla dang gsum yin te/ /de dag mkhas pas 'da' bar byed/ /ces bya bas ni/ dang po gcig ni gcig pus 'byung ba ston to/ /bar ma la ni de med du mi rung ngo / /mchog la ni de gnyi ga med du mi rung ngo / /de dag las yang dag par 'da' ba ni mi slob pa dgra bcom pa yin par rig par bya'o/ /bslab las tshul khrims ma nyams dang / /dam bcas dang yang ldan pa dang / /cho ga bzang po ma smad dang / /gnas lnga dag kyang rnam par spangs/ /zhes bya ba la/ bslabs las tshul khrims ma nyams dang / /zhes bya ba ni/ tshul khrims dang ldan par gnas pa zhes bya ba de ston to/ /dam bcas dang yang ldan pa dang / /zhes bya ba ni/ so sor thar pa'i sdom pas bsdams pa ston to/ /cho ga bzang po ma smad dang / /zhes bya bas ni cho ga ma nyams pa ston to/ /gnas lnga dag kyang rnam par spangs/ /zhes bya bas ni spyod yul ma nyams pa ston to/ gnas lnga ni/ dge slong gi spyod yul ma yin pa ston to/ rgyal po'i pho brang dang / sha 'tshong gi gnas dang / chang 'tshong gi khyim dang / smad 'tshong gi gnas dang / gdol pa'i gnas so/ /de la sha 'tshong gi gnas ni gsod pa'i gnas yin par blta bar bya ste/ der 'bod cing shan pa byed pa la sogs pas shin tu kha na ma tho ba sdig pa'i las lug la sogs pa gsod par byed pa'o/ / 'byin pas 'gyod pa med par 'gyur/ /'gyod pas nyes pa med par 'gyur/ /zhes bya bas ni/ kha na ma tho ba phra rab dag la 'jigs par lta ba ston to/ /de la ji ltar na 'byin pa de ltar 'gyod pa med la/ ji ltar 'gyod pa de ltar nyes pa mi byed do/ /bslab pa la ni brten par bya/ / de la snying nas nan tan bya/ /zhes bya bas ni/ bslab pa'i gzhi rnams yang dag par blangs te slob po zhes bya ba de ston to/ /phyir ni spang bar mi bya zhing / /srog gi phyir yang gzhig mi bya/ /rtag tu nan tan gnas par bya/ /'dul ba la ni 'jug par bya/ /zhes bya ba'i tshigs su bcad pa 'dis ni/ rtsa ba bzhis go rims bzhin du/ tshul khrims rtag pa dang / tshul khrims brtan pa dang / rgyun mi 'chad par byed pa dang / rgyun du gnas par ston to/ /dam bcas thog mar dag par bya/ /'tsho ba yang ni dag par bya/ /zhes bya ba'i tshigs su bcad pa phyed po 'dis ni cho ga dang / 'tsho ba rnam par dag pa ston te/ cho ga ni sngar dam bcas pas gdod spyad pas na/ dam bcas pa zhes bya'o/ /mtha' gnyis po ni spangs nas kyang / /smon pa rnam par spang bar bya/ /zhes bya bas ni/ 'dod pa'i bsod nams la sbyor ba'i mtha' dang / lus ngal bar 'gyur ba la sbyor ba'i mtha' gnyis dang / mtho ris la sogs pa la smon pa rnam par spong bas tshul khrims rnam par dag pa kho na ston to/ /bar chad byed pa'i chos rnams la/ /ji ltar yang ni chags mi bya/ /sems ni 'khrul par byed pa'i chos/ /byung ba dang du blang mi bya/ /zhes bya ba'i tshigs su bcad pa 'dis ni dbang po'i sgo ma bsrungs pa la sogs pa bslab pa rnam par dag pa'i par du gcod pa rnams la yon tan ma yin par mthong nas mngon par ma chags pa dang / mi dge ba 'dod pa dang / gnod sems kyi rtog pa la sogs pa yid kun du 'khrug par byed pa skyes pa rnams dang du mi len pas bslab pa rnam par dag pa ston to/ /ha cang mi zhum thal ches min/ /rtag tu dran pa nye bar gzhag /dngos gzhi nyer bsdogs rnams kyis ni/ /tshangs spyod dag par spyod par bya/ /zhes bya bas ni/ chud zad 'gyod pa dang / gnas ma yin pa 'gyod pa rnam par spangs pa dang / brjed ngas pa rnam par spangs nas/ mthar phyin pa'i tshe dang / sbyor ba'i tshe tshangs par spyod pa dag par ston to/ /brtson 'grus kyang ni brtsam par bya/ /rtag tu brtun pa brtan por bya/ /legs par gnas pas bag yod pa/ /yan lag lnga pas brtan par bya/ /zhes bya bas ni/ go cha dang / sbyor ba mi bzlogs pa'i brtson 'grus dang / bag yod pa rnam pa lnga la brten pas/ bslab pa rnam par dag [(]ba'i [,]pa'i [)]khyad par kho na ston to/ /de la bag yod pa'i yan lag rnam pa lnga ni/ 'das pa dang / ma 'ongs pa dang / da ltar byung ba dang / snga nas bya ba dang / mthun par spyad pa'o/ /dge ba spyoms par mi bya ste/ /sdig pa rnams ni bshags par bya/ /chos gos la sogs ngan pa'am/ /bzang po'ang rung ste chog shes bya/ /nyung dus kyang ni gnas par bya/ /ngan pas kyang ni gnas par bya/ /nyon mongs spangs pas zhi don du/ /sbyangs pa'i yon tan yang dag blang / /tshigs su bcad pa 'di gnyis kyis shes kyi khe 'dod pa ni 'dod chen che ba dang / chog mi shes pa'i rgyur gyur pa ste/ 'dod chen che ba dang / chog mi shes pa bslab pa rnam par dag pa la bgegs byed pa'i rgyur gyur pa de gnyis yongs su spangs nas/ /bslab pa rnam par dag pa ston to/ /spyod lam dag dang ldan par bya/ /len pa la yang ran par bya/ /de yi ched du spyod lam rnams/ /bcos par nams kyang mi bya'o/ /zhes bya bas ni spyod lam phun sum tshogs pa gzhan dag la tshul 'chos pa'i don du bya ba ma yin pa dang / lan pa la tshod shes pas ji tsam gyis tshangs par spyod pa la gnas par bya ba'i phyir srog gnas par bya ba'i yo byad len pa las bslab ba rnam par dag pa kho na ston to/ /bdag gi yon tan bden pa yang / /brjod par mi bya brjod mi gzhug /yang na yon tan de dag dang / /'dod pa'i mtshan ma bstan mi bya/ /gzhan dag la ni nan gyis su/ /slong mos gdab par mi bya'o/ /chos bzhin thob pa'i rnyed pa la/ /'di la rnyed pa smad mi bya/ /zhes bya ba'i tshigs su bcad pa gnyis kyis ni/ kha gsag dang / gzhogs slong dang / thob kyis 'jal ba dang / rnyed pas rnyed par byed 'dod pa yongs su spangs pas/ bslab pa rnam par dag pa'i khyad par ston to/ /rnyed pa dang ni bkur sti la/ /cis kyang mngon par chags mi bya/ /sgro 'dogs skur ba'i lta ba la/ /mngon par zhen par yod mi bya/ /zhes bya bas ni/ rnyed pa dang bkur sti la ma chags pa dang / lta ba ngan pa rnam pa lnga la mngon par zhen pa med pas/ rnam par dag pa'i khyad par ston to/ /'jig rten rgyang pan gsang ba'i tshig / don med mchog tu gzung mi bya/ /lhung bzed dang ni chos gos kyang / /dgos med lhag par bcang mi bya/ /zhes bya bas ni/ nye bar len pa'i phung po lnga las/ thar pa'i bgegs bya ba'i phyir/ /'di la phyi rol pa'i bstan bcos ngan pa lta ba ngan ba'i rgyud 'jig rten rgyang pan pas byas pa rnams la mchog tu mi 'dzin pa dang / rnyed pa dang bkur sti la chags pa'i rgyu lhung bzed dang / chos gos la lhag par 'chang ba yongs su spangs pas/ rgyu rnam par dag pas bslab pa rnam par dag pa ston to/ /nyon mongs 'phel bar 'gyur ba yi/ /khyim pa rnams dang bsten mi bya/ /ye shes rnam par dag byed pa'i/ /'phags pa rnams dang bsten par bya/ /zhes bya bas ni/ mi mthun pa'i phyogs kyi rgyu dang / /gnyen po'i rgyu spang ba dang / bsten pas rnam par dag pa ston to/ /mya ngan rnam par g.yeng byed pa/ / mdza' sde dag kyang yong mi bya/ /sdug bsngal skyed pa'i nyon mongs rnams/ /byung ba dang du blang mi bya/ /zhes bya bas ni/ ji ltar khyim pa rnams dang lhan cig 'dre ba mya ngan dang / rnam par g.yeng ba byas bas nyon mongs pa rnam par 'phel bas sdug bsngal gyi rgyu yin pa dang / / ji ltar 'phags pa dang 'dre ba sdug bsngal bskyed pa'i nyon mongs pa skyes pa dang du len par mi byed pas gnyen po'i rgyur 'gyur ba de ston to/ /brtul zhugs nyams pas ji ltar yang / /dad pas byin pas spyad mi bya/ /dam pa'i chos rnams ji ltar yang / /yongs su spang bar mi bya'o/ /zhes bya bas ni/ rnyed pa dang bkur sti la mngon par chags pa med pa dang / lta ba ngan pa mngon par zhen pa med pa ni/ dad pas byin pa chud mi gzon pa dang / dam pa'i chos mi spong bas/ phyi ma la yang 'dod pa la lhag par chags pa dang / lta ba ngan pa'i skye pa'i rgyu yongs su spong pas rnam par dag pa'i khyad par ston to/ /pha rol dag gi 'khrul skyon la/ /mi bsam bde bar 'gyur bar bya/ /bdag gi 'khrul pa'i nyes pa ni/ /shes par byas nas bsgrags par bya/ /zhes bya bas ni/ gzhan gyi nyes pa mthong nas bsam pa rnam par spangs pa dang / rang gi dge ba'i phyogs mi 'dor bas yid bde ba skyes pa'i phyir bdag gi nyes pa yongs su shes nas sgrogs pas nga rgyal med pa'i phyir/ bslab pa rnam par dag pa ston to/ /de bzhin nyes pa byung ba la/ /chos bzhin du ni rab tu bya/ /de bzhin las su bya ba rnams/ /rang gis bya zhing grims par bya/ /zhes bya bas ni/ nyes pa las dbyung ba dang / gzhan dag la rim gro dang / bsnyen bkur bya ba bdag gir bya bar 'dod pa yongs su spangs pas kyang / rnam par dag pa ston to/ /sangs rgyas rnams dang nyan thos kyi/ /mthu stobs dang ni bstan pa la/ /dad ldan kha na ma tho ba/ /mthong bas skur pa yang mi gdab/ /ces bya bas ni/ dad pa dang ldan pa dang / skur pa 'debs pa la kha na ma tho ba yin par lta bas rnam par dag pa bstan to/ /rtog ge'i spyod yul ma yin pa/ /shin tu zab mo'i chos rnams la/ / sngon gyi lung rnying yongs btang ste/ /rang lta mchog tu gzung mi bya/ /zhes bya bas ni/ rang gi lta ba mchog tu 'dzin pa la gnas pa yongs su spangs pas kyang / rnam par dag pa'i khyad par bstan to/ /bas mtha' yi ni mal stan du/ /rnam par dben par gnas par bya/ /dge ba'i chos rnams bsgom par bya/ /brtson 'grus brtun pa brten por bya/ /zhes bya bas ni/ lus dang sems rnam par dben pa dang / ting nge 'dzin dang mthun pa'i mal stan bsten pa dang / mi dge ba la rtog pa spong zhing gcig tu nges par dkar po'i chos sgom pa dang / /bying ba dang rgod pa la sogs pa'i nye ba'i nyon mongs pa rnams kyis zil gyis mi non pas/ sbyor ba yongs su rdzogs pa'i phyir lhag pa'i sems la bslab pa'i thabs kyi khyad par ston to/ /'dun pa med cing 'dun pa skyed/ /sdang ba med cing sun 'byin pa/ /gnyid mi log cing dus su nyal/ /zhi bar yang ni gnas mi byed/ /'gyod pa med la 'gyod dang bcas/ /som nyi med cing 'dod par byed/ /rnam pa kun dang dus kun ldan/ /yang dag sbyor dang ldan pa yin/ /zhes bya ba'i tshigs su bcad pa 'di gnyis kyis ni/ 'dod pa la 'dun pa dang / gnod sems dang / rmugs pa dang / gnyid dang / rgod pa dang / 'gyod pa dang / the tshom gyi sgrib pa yongs su spangs pas / dge ba'i chos la 'dun pa dang / 'dod pa la sun 'byin pa dang / dge ba'i phyogs la sbyor ba la/ nyams bde bar bya ba'i rgyus dus su gnyid la brten pa dang / sems zhi bar byed pa na bying bar gyur tam/ bying bar 'gyur du dogs na/ dad par bya ba'i mtshan ma yid la byed pas zhi bar mi gnas pa dang / rgyu zhing 'gro ba na nyes pa ma byung ba'i snga rol nas/ de mi byed pas 'gyod pa med pa dang / gong nas gong du khyad par 'gro ba dang / gus par byed pa dang / rtag tu byed pas yang dag par sbyor ba'i lhag pa'i sems kyis bslab pa rnams yang dag par ston to/ /'jug par byed pas sad byed dang / /gzhan yang de bzhin kun du sbyor/ /mtshan mar 'dzin dang chags pa dang / /gzhan yang de bzhin steg par byed/ /'jums pa dang ni mchog tu chags/ rtog ba zhes ni bya ba ste/ /'dod pa'i 'dod chags bskyed pa de/ /mkhas pas yongs su spang bar bya/ /zhes bya ba 'di la 'khrig pa'i 'dod chags skyed pa'i rtog pa rnam pa brgyad dang po nas brtsams te/ mjug tu phyin gyi bar du go rims bzhin du skye ba yongs su spangs par bslab pa rnam par dag pa'i khyad par ston to/ /de la 'jug par byed pa'i rnam par rtog pa'i chags par bya ba'i gzhi de nyid la tshul bzhin ma yin pa yid la byed pa dang ldan sems 'jug par byed pa gang yin pa'o/ /sad par byed pa ni gzhi de nyid la 'dod chags kyi kun nas dkris pa sad pa dang ldan pa gang yin pa'o/ /kun du sbyor ba ni gzhi de nyid tshol ba'o/ /mtshan mar 'dzin pa ni gzhi de nyid las sdug pa'i mtshan ma rnam pa sna tshogs 'dzin pa'o/ /chags pa ni gzhi thob pa de nyid la lhag par chags pa dang ldan pa'o/ /steg pa ni gzhi de nyid la rnam pa sna tshogs su longs spyod par 'dod pa sgo du mar 'jug pa gang yin pa'o/ /'jums pa ni gnyis kyi dbang po gnyis phrad pa'i dus gang yin pa'o/ /mchog tu chags pa ni khu ba 'byung ba'i dus gang yin pa'o/ /'dod pa rnams ni mi ngoms byed/ /de bzhin mang po thun mong yin/ /chos ma yin pa'i rgyur gyur dang / /de bzhin sred pa 'phel bar byed/ /dam pa rnams kyis stong ba'i 'os/ /myur du 'jig par 'gyur ba dang / /'dod rnams rkyen la brten pa dang / /bag med gyi ni sa yang yin/ /zhes bya ba rnam pa brgyad kyis ni ci rigs par tshe 'di nyid dang / tshe phyi ma'i 'dod pa rnams kyi nyes dmigs bstan pas 'dod pa la 'dun pa spong ba'i thabs ston to/ /'dod pa rnams ni keng rus 'dra/ /de bzhin sha yi kham tshad 'dra/ /rtswa yi sgron ma 'dra ba dang / /de bzhin me yi dong dang 'dra/ gdug pa'i sprul dang 'dra ba dang / /de bzhin rmi lam lta bu dang / /brnyan po'i rgyan dang 'dra ba dang / /de bzhin shing thog 'dra ba yin/ /'dod rnams de ltar shes nas ni/ /ji lta bur yang chags mi bya/ /zhes bya ba 'di la 'dod pa rnams ngoms par mi byed pa la sogs pa rnam pa brgyad po sngar bstan pa'i nyes dmigs 'jig rten thams cad la grags pa'i dper gzhag pa rnams kyis nyes dmigs su ston te/ de kho na ltar nyes dmigs mang po bstan na/ de dag la mkhas pa ga la zhig mngon par chags par byed ces bstan pa'i phyir ro/ / de la ngoms par mi byed pa ni keng rus dang 'dra ba'i phyir ro/ /mang po dang thun mong ba ni/ sha'i kham tshad dang 'dra ba'i phyir ro/ /chos ma yin pa'i rgyur 'gyur ba ni/ /rtswa'i sgron ma dang 'dra ste/ ma bor na tshig par 'gyur ba nye bar gnas pa'i phyir ro/ /sred pa 'phel bar byed pa ni me dong lta bu ste/ skom par byed pa dang tshul 'dra ba'i phyir ro/ /dam pa rnams kyis spong ba'i 'os su gyur pa ni/ sbrul gdug pa dang 'dra ba'i phyir ro/ /myur du 'jig par 'gyur ba ni rmi lam dang 'dra ba'i phyir ro/ /rkyen la brten pa ni brnyan po'i rgyan dang 'dra ba'i phyir ro/ /bag med pa'i sa ni shing kha'i 'bras bu dang 'dra ba'i phyir ro/ /dam pa'i chos ni rtag tu nyon/ /bsam pa dang ni bsgom par gyis/ /thog mar zhi dang rgya che ba/ /mthong na gcig tu nges par bsgom/ /nyon mongs gnas ngan len spongs la/ /spong ba la yang dga' bar gyis/ /mtshan ma la yang dpyad par bya/ /sbyor ba nyams su blang bar bya/ /'dod pa'i 'dod chags bral ba dang / /gzugs kyi 'dod chags bral bar bya/ /bden pa mngon par rtogs par bya/ /kun las 'dod chags bral bar bya/ /tshe 'dir mya ngan 'da' bar bya/ /de bzhin phung po zad par bya/ /zhes bya ba 'di la/ mtshan nyid so sor rig pa la sogs pa yid la byed pa bdun po 'di dag gis/ 'jig rten pa dang / 'jig rten las 'das pa'i lam rnam par dag pas phung po dang bcas pa dang / phung po med pa'i mya ngan las 'das pa'i 'bras bu can lhag pa'i shes rab kyi bslab pa rnam par dag pa bstan to/ /de la mtshan nyid so sor rig pa ni/ dam pa'i chos nyan pa dang / bsam pa'i tshig gis bstan to/ /mos pa las byung ba ni bsgom pa'i tshig gis bstan te/ der mos pas bsgom pa'i phyir ro/ /thog mar zhi dang rgya che dang / mthong nas zhes bya ba ni rab tu dben pa'o/ /gcig tu nges par bsgom zhes bya ba ni/ dga' ba sdud pa'o/ /mtshan ma la yang spyad par bya/ /zhes bya ba ni spyod pa'i yid la byed pa'o/ /sbyor ba nyams su blang bar bya/ /zhes bya ba ni sbyor ba'i mthar thug pa'o/ /'dod pa'i 'dod chags bral ba dang / /gzugs kyi 'dod chags bral bar bya/ /bden pa mngon par rtogs par bya/ /kun las 'dod chags bral bar bya/ /zhes bya ba ni 'jig rten dang 'jig rten las 'das pa'i sbyor ba mthar thug pa'i 'bras bu'o/ /dgongs pa'i don gyi tshigs su bcad pa bstan pa rdzogs so/ / //de la 'dus pa'i don gyi tshigs su bcad pa rnam par gzhag pa ni/ 'jig rten kun du yid dang ngag rnams dang / /lus kyi sdig pa ci yang mi bya ste/ /'dod rnams bral zhing dran ldan shes bzhin can/ /gnod par ldan pa'i sdug bsngal bsten mi bya/ /zhes bya ba ni tshigs su bcad pa yin te/ de la sdig pa zhes bya ba ni nyes pa spyod pa'o/ /nyes pa spyod pa de yang rnam pa thams cad dang / gzhi thams cad dang / gnas thams cad du mi byed pa'o/ /rnam pa thams cad du ji ltar mi byed ce na/ 'di lta ste/ lus dang ngag dang yid kyis mi byed do/ /gzhi thams cad kyis ji ltar mi byed ce na/ 'di lta ste/ chags pa las byung ba dang / zhe sdang las byung ba dang / gti mug las byung ba'o/ /gnas thams cad du ji ltar mi byed ce na/ 'di lta ste/ sems can gyi dngos po'i gnas dang / sems can ma yin pa dngos po'i gnas su'o/ /'dod pa rnams dang ji ltar bral zhe na/ dngos po'i 'dod pa spangs pa dang / /nyon mongs pa'i 'dod pa spangs pa'i phyir ro/ /dngos po'i 'dod pa spangs pa gang zhe na/ 'di ltar 'di na kha cig de bzhin gshegs pas gsungs pa'i chos 'dul ba la dad pa rnyed nas/ khyim na gnas pa ni gnod pa'o snyam ste/ nges par 'byung bar sems so zhes bya ba nas/ dad pas khyim nas khyim med par legs pa kho nar rab tu 'byung ba'i bar du ste/ de yang 'dod pa rnams las 'dod chags dang bral ba ni ma yin te/ 'di ni dngos po'i 'dod pa spangs pa zhes bya'o/ /nyon mongs pa'i 'dod chags spangs pa gang zhe na/ de de ltar rab tu byung nas/ 'dod pa'i 'dod chags ma lus par spangs pa'i phyir/ dgon pa dang / nags 'dab dang / bas mthar gnas 'cha' bar byed de/ de dgon pa na gnas pa na / khyim gyis stong gi bar du gnas pa na/ dngos po'i 'dod pa de dag la kun tu rtog pa'i 'dod chags nyon mongs pa'i 'dod par gtogs pa gang yin pa de'i gnyen por dran pa nye bar gzhag pa bzhi sgom la/ de las langs na yang de grong ngam grong rdal gang la brten zhing gnas pa na/ de lus shin tu bsrungs pa dang / dbang po rnams shin tu bsdams pa dang / dran pas shin tu gnas pas grong ngam grong rdal de nyid du 'jug pa dang / rgyu ba dang phyir 'byung bar byed do / /de der 'gro ba dang / ldog pa dang / gnyid kyis snyom pa bsal ba'i bar du shes bzhin gyis gnas te/ de dran pa nye bar gzhag pa bzhi po rnams la dran pas shin tu gnas pa de la brten nas/ 'dod pa'i 'dod chags kyi bag la nyal ba'i phyir gnyen po sgom par byed do/ /shes bzhin du gnas pa de nyid la brten nas/ sgrib pa dang bral bar 'gyur zhing / brtun par bya ba dang / brtson par bya ba dang / spang bar bya ba dang / nang du yang dag gzhag par bya ba'i phyir/ lus las su rung ba dang / sems las su rung bar 'gyur ro/ /de ltar de dran pa dang / shes bzhin la brten pas/ nyon mongs pa'i 'dod pa spong ba mngon sum du byed cing / 'dod pa rnams las dben pa nas/ bsam gtan dang po'i bar du bsgrubs te gnas so/ /de de ltar na de'i 'dod pa la bsod nyams su sbyor ba'i mtha' ngan pa grong pa/ phal pa so so'i skye bo pa spangs shing yongs su shes pa yin no/ /gnod pa dang ldan pa'i sdug bsngal gang zhe na/ 'di ltar 'di na dge sbyong ngam/ bram ze la la bdag nyid kyis dka' thub drag po byas te/ tshe 'di la sdug bsngal gyi rnam grangs du ma nyams su len pas bdag nyid kun du gdung zhing rab tu gdung la yongs su gdung bar byed de/ tshe 'di la sdug bsngal nyams su blangs pa 'dis bdag sdug bsngal las yongs su thar bar 'gyur ro snyam pa las/ de gang gi don du yongs su gdung bar byed pa'i don de yang ma thob la/ phongs pa chen po'i skal ba can du 'gyur ba de ni gnod pa dang ldan pa'i sdug bsngal zhes bya ste/ 'phags pa nyan thos des de ltar bdag nyid ngal bar byed pa'i mtha'/ sdug bsngal ba 'phags pa'i ma yin pa gnod pa dang ldan pa de rtogs nas ring du yongs su spong bar byed de/ mi bsten mi bsnyen cing 'grogs par mi byed do/ /bshad pa 'di'i mdor bstan pa ni 'di yin te/ mdor bstan pa ni gang zhe na/ sems can rnams kyi 'byor pa ni rnam pa gnyis te/ mngon par mtho ba'i 'byor pa dang / nges par legs pa'i 'byor pa'o/ /de la mngon par mtho ba'i 'byor pa ni bde 'gror 'gro ba'o/ /nges par legs pa'i 'byor pa ni sred pa zad pa dang / 'dod chags dang bral ba dang / 'gog pa dang / mya ngan las 'das pa zhes bya ste/ 'byor pa 'di gnyis ni bgegs byed pa spong bas 'thob par 'gyur ro/ /de la rnam pa thams cad dang / gzhi thams cad dang / gnas thams cad du thabs kyi nyes par spyod par mi byed pa gang yin pa de mngon par mtho ba'i 'byor pa la bgegs byed pa spong ba ste/ mngon par mtho ba'i 'byor pa thob par 'gyur ro/ /de la 'dod pa bsod nyams la sbyor ba'i mtha' dang / bdag nyid ngal bar byed pa la sbyor ba'i mtha' yongs su spong ba gang yin pa de ni/ nges par legs pa'i 'byor pa la bgegs byed pa spong ba ste/ nges par legs pa'i 'byor pa thob par 'gyur ba ste/ de ni 'dir mdor bstan pa yin par rig par bya'o/ /sems can brjod bya'i 'du shes can/ /brjod bya la ni gnas pa rnams/ / brjod bya yongs su mi shes pas/ /'chi ba dang ni phrad par 'gyur/ /brjod bya yongs su shes na ni/ /gang gis de la gzhan dag gis/ /brjod pa de ni de la med/ /brjod pa por ni sems pa med/ /mtshungs sam khyad zhugs 'on te dma'o zhes/ /gang 'dzin de ni des na rtsod par 'gyur/ /gang zhig rnam pa gsum la mi g.yo ba/ /de la mtshungs dang khyad par zhugs pa med/ /'dir ni ming dang gzugs la sred bcad cing / /nga rgyal spangs nas chags pa med pa de/ /dud pa sangs shing 'joms med re ba med/ /lha mi'i 'jig rten dag na de mi snang / /tshe 'di dang tshe phyi ma la zhes bya ste/ tshigs su bcad pa bzhi yod do/ /brjod bya zhes bya ba ni/ 'dus byas thams cad de/ 'di ltar 'dus byas thams cad ni tha snyad kyi gzhi gsum du 'dus so/ /don gyi skabs 'dir ni/ 'dod pa'i yon tan lnga po dag la brjod bya zhes bya'o/ /gzhan yang 'dod pa'i yon tan lnga po 'di dag ni/ dge sbyong dang bram ze gzhan dag gis sbyin du 'jug pa dang / sbyin bdag rnams las yongs su btsal bar bya ba yin zhing / rje bo dag gis bran dang / bran mo dang / las byed pa dang / zho shas 'tsho bar byed pa rnams la bsgo nas/ longs spyad par bya ba yin te/ rgyu 'dis ni de dag ni brjod bya zhes bya'o/ /gzhan yang 'dod pa can rnams kyis ni/ bdag nyid kyi 'dod pa rnams kyi nyes dmigs bde blag tu mi shes te/ sangs rgyas rnams dang sangs rgyas kyi nyan thos rnams nyi tshes brjod bya de dag nyes dmigs kyi sgo nas brjod par mdzad pa'i phyir / rgyu 'dis kyang brjod bya zhes bya'o/ /'dod pa can 'dod pa de dag la tshul bzhin ma yin pas mtshan mar 'dzin cing mngon rtags su 'dzin pa de dag ni 'dod pa de dag la chags shing zhen pa nas lhag par chags pa'i bar du gyur nas yongs su spyod de/ de dag de ltar lhag par chags par gyur pas/ 'dod pa rnams la nyes dmigs yod bzhin du/ de ltar yang dag pa ji lta ba bzhin du mi shes te/ 'dod pa 'di dag ni mi rtag pa/ gsob/ gsob/ /brdzun pa slu ba'i chos can/ sgyu ma lta bu/ byis pa/ 'drid pa/ mnog chung zhing nyes dmigs che ba ste/ de dag mnog ni chung la nyes dmigs ni ches che'o zhes 'dod pa rnams las nges par 'byung ba'i thabs yod bzhin du/ yang dag pa ji lta ba bzhin mi shes so/ /de dag tu 'dun pa'i 'dod chags 'dul ba nas/ yang dag par 'da' ba'i bar gang yin pa de ni de dag las nges par 'byung ba'o/ /de dag de ltar nyes dmigs ma mthong ba dang / nges par 'byung ba mi shes pas/ 'dod pa rnams la yongs su spyod de/ de dag gzhi de las 'dod pa'i khams su skye ba'i rtsa ba'i 'du byed rnams la mngon par dga' zhing / skye ba'i rtsa ba'i las rnams kyang byas nas 'dod pa'i khams su skye'o/ /skyes nas kyang 'chi'o/ /skyes nas 'chi dus byed do/ /de ltar na/ sems can brjod bya'i 'du shes can/ /brjod bya la ni gnas pa rnams/ /brjod bya yongs su mi shes pas/ /'chi ba dang ni phrad par 'gyur/ /zhes bya'o/ /gang dag skyes bu dam pa la yang dag par brten pa la brten pa dang / dam pa'i chos nyan pa dang / tshul bzhin yid la byed pa la brten nas/ 'dod pa de dag nyid la/ de ltar nyes dmigs yin pa dang / nges par 'byung ba yang dag par shes te/ 'dod pa 'di dag ni mi rtag pa'o zhes bya ba nas/ 'dun pa'i 'dod chags las 'das pa'i bar du rgyas par sbyar ro/ /de dag de bzhin gshegs pas gsungs ba'i chos 'dul ba la dad pa rnyed nas/ 'dod pa rnams kyi nyes dmigs mthong ba de nyid rjes su 'phel bar byed de/ longs spyad par bya ba'i tshogs nyung yang rung mang yang rung ba dang / nye du'i tshogs kyang spangs nas/ 'di lta ste/ rga ba dang / 'chi ba thams cad kyi thams cad du 'gag par bya ba'i phyir/ dad pas khyim nas khyim med par legs pa kho nar rab tu 'byung ste/ de dag de ltar rab tu byung nas/ bdag tshul khrims dang / dka' thub dang / tshangs par spyod pa la gnas pa 'dis/ lha'am/ lha gang yang rung ba zhig tu gyur cig ces smon nas tshangs par spyod pa ma yin te/ de dag la log par smon pa med do/ /med pas/ gang gis de dag la gzhan dag gis bzhin bzangs khyod dang po lang [(]tshol [,]tsho la [)]bab pa dang ldan la nye du rnams kyang mi dga' bzhin du ci'i phyir tshe 'di'i 'dod pa rnams spangs te/ tshe gzhan gyi 'dod pa rnams kyi don du tshangs par spyod pa la gnas pa khas blangs zhes de ltar mngon par smra bas mngon par smra zhing / klan ka btsal bas klan ka tshol la/ gleng gzhi dran par byed kyang / gzhan gyis bdag la klan ka tshol bar mi mthong zhing mi sems la dogs pa med de/ de ltar na/ brjod bya yongs su shes na ni/ /gang gis de la gzhan dag gis/ /brjod pa de ni de la med/ /brjod pa por ni sems pa med/ /ces bya ste/ 'di ni de'i tshul khrims rnam par dag pa'o/ /de ni lta ba rnam par dag pa dang yang ldan pa yin te/ de ci'i phyir zhe na/ phyin ci log tu lta ba ni nga rgyal skyed par byed la/ nga rgyal gyis mngon par zin nas/ dge sbyong dang bram ze gzhan dag dang lhan cig tu rtsod pa yongs su 'dzin cing 'dug ste/ de ltar na lta ba 'di ni rnam grangs des na rtsod pa'i rtsa ba yin te/ de la dge sbyong ngam/ bram ze gang la la rtsod pa'i rtsa ba lta ba la brten nas mtshungs pa'am khyad par du 'phags pa'am/ chung bar sems khengs par ston to/ / rgyu de dang rkyen des 'di lta ste/ bdag nyid che ba dang / mtshungs pa dang / chung bar bsgrub pa'i phyir/ bdag che'o snyam pa'i nga rgyal gyi rnam pa dang / bdag mtshungs so zhes bya ba dang / chung ngo zhes bya ba'i nga rgyal gyi rnam pa las brtsams nas/ dge sbyong dang bram ze gzhan dag dang lhan cig rtsod pa yongs su bzung ste 'dug go/ /'phags pa nyan thos de dag ni bdag go snyam du mi g.yo ste/ bdag yin no zhes bya ba nas/ bdag ni 'du shes med 'du shes med min du mi 'gyur ro zhes bya ba'i bar du mi g.yo'o/ /des ni 'du byed thams cad rten cing 'brel bar 'byung bar rtogs pas/ 'du byed rnams la chos tsam du mthong ba'i phyir gzhan dag las bdag che'am/ mtshungs so snyam du bdag nyid yongs su 'jal bar mi byed na/ rlom sems su byed pa'am/ rtsod pa yongs su 'dzin cing 'dug par lta ga la 'gyur/ 'phags pa nyan thos de dag gzhan dag la bdag gi smra ba ston la/ pha rol smra ba tshar gcod par byed pa de ni chos kyi chos nyid bzang po kho na la brten nas snying brtse zhing / snying rje ste/ ji ltar gzhan dag gis legs par gsungs pa tshig gcig gi don tsam rtogs na yang / ji tsam du khong du chud pa de tsam du/ de dag gi yun ring po'i don dang / phan pa dang bde bar 'gyur zhing / dam pa'i chos kyang yun ring du gnas par 'gyur ba'i phyir yin gyi/ nga rgyal la brten pa'am/ rnyed pa dang bkur sti'i phyir rtsod par 'dod pa ni ma yin te/ de ltar na de ni tshe 'di'i 'dod pa rnams kyi don du tshangs par spyod pa la gnas par khas blangs pa ma yin te/ de'i tshangs par spyod pa la gnas pa ni 'di ltar log par smon pa dang bral zhing log par lta ba dang bral la/ rnyed pa dang bkur sti la chags pa bral ba dang / rnam pa thams cad du yongs su dag pa la lam me lhan ne lhang nge ste/ lha dang mi rnams kyis bsngags par 'os pa yin gyi/ smad par 'os pa ma yin te/ rga ba dang / 'chi ba las 'da' bar 'gyur ba yang yin no/ /de ltar na/ mtshungs sam khyad zhugs 'on te dma'o zhes/ /gang 'dzin de ni nges na rtsod par 'gyur/ /gang zhig rnam pa gsum la mi g.yo ba/ /de la mtshungs dang khyad par zhugs pa med/ /ces bya'o/ /ming dang gzugs zhes bya ba ni nye bar len pa'i phung po lnga ste/ de dag la gang gis sdug bsngal bar mthong zhing mngon par rtogs par gyur na/ des bden pa mngon par rtogs pa'i mdo las/ nye bar len pa'i phung po ma lus par sdug bsngal ba'o snyam nas/ bsam pa thag pa nas nye bar len pa'i phung po lnga po dag la sred pa yang dag par chad par 'gyur te/ bag la nyal gyis ni ma yin no/ /des lam ji ltar thob pa de nyid bsgoms te/ nga'o snyam pa'i nga rgyal ma lus par spangs nas zag pa thams cad rab tu zad pa'i dgra bcom par 'gyur ro/ /des de ltar dgra bcom pa nyid thob nas/ sems shin tu rnam par grol bar 'gyur te/ lus dang lus kyi yo byad rnams la/ kun nas dkris pa dang / bag la nyal gyi sgo nas chags pa med cing / rgyags pa med la/ bag med pa med par 'gyur ro/ /de de ltar chags pa med cing / rgyags pa med la bag med par gyur pas/ dud pa sangs shing 'joms pa med pa dang / re ba med par 'gyur ro/ /ji ltar dud pa sangs par 'gyur zhe na/ dud pa zhes bya ba ni sred pa yin te/ de ci'i phyir zhe na/ dper na/ dud pa ni me'i khams kyi sngon du 'gro ba yin te/ mig la yang gnod la/ tha mal par 'dug tu mi ster ba'i sgo nas rnam par 'khrugs par byed do/ /des sred pa de spangs par gyur te / de bzhin du/ sred pa yang 'dod chags dang / zhe sdang dang / gti mug gi sngon du 'gro ba yin te/ shes rab kyi mig la yang gnod la/ 'di ltar gnod pa dang ldan pa'i rtog pa rnams kyis/ sems kyi rgyud rnam par 'khrugs par byed do/ /des sred pa de spangs par gyur te/ yongs su shes pas phyi ma'i bar du yang mi skye ba'i chos can du 'gyur te/ de ltar na/ dud pa sangs pa yin no/ /de de ltar dud pa sangs shing chags pa dang bral yang / 'tsho ba'i yo byad rnams yongs su tshol te/ mi tshol ba ma yin mod kyi/ sred pa des yongs su tshol ba'i kun nas nyon mongs pa las rnam par grol bzhin du yongs su tshol lo/ /ji ltar na 'joms pa med par 'gyur zhe na/ de 'di ltar yongs su tshol ba la zhugs pa na/ gal te gzhan dag gis byin nam sbyin du bcug kyang rung ste/ gus par byin gyi ma gus par ma yin pa dang / bzang po yin gyi ngan pa ma yin pa dang / mang po yin gyi/ nyung ngu ma yin pa dang / myur te byin gyi bgyong bar mi byed na yang / de de dag la chags pa med de/ rnyed pa de dag kyang chags pa dang / len pa dang / 'chums pa nas/ lhag par chags pa'i bar dag gis yongs su spyod par mi byed de/ de ltar na de ni 'di lta ste/ 'tsho ba'i yo byad longs spyod pa la 'dod chags kyi 'joms pas mi choms pa yin no/ /gal te pha rol dag gis sbyin pa ma byin nam/ gegs byed dam/ ma gus pas byin gyi gus pas ma yin pa nas/ bgyangs te byin gyi/ myur te ma byin par gyur na yang / des de yi chad par mi 'gyur zhing / de'i gzhi la zhum pa dang / 'gong bar mi 'gyur la/ rnyed pa'i longs spyod des 'gyod par yang mi byed/ gdung bar yang mi 'gyur/ kun nas mnar sems kyang mi byed/ khong khro bar yang mi 'gyur ro/ /de ltar na zhe sdang gi 'joms pas mi choms pa yin no/ /des rnyed pa de bzang yang rung / ngan kyang rung ba'i nyes dmigs mthong ba dang / nges par 'byung bar shes pa dang / dran pas nye bar gnas pa dang / rmongs pa med pas yongs su spyod pas na de gti mug gi 'joms pa des mi choms pa yin no/ /ji ltar re ba med ce na/ re ba zhes bya ba ni ltos shing sems kyis 'dzin pa yin la/ de 'di snyam du bdag gis 'di las bza' ba dang bca' ba bzang po dang / chos gos dang / bsod snyoms dang / mal cha dang / stan dang / na ba'i gsos sman dang / yo byad ci dgos pa rnyed par 'gyur ro snyam nas mgo 'phang bstod de/ 'di lta ste/ rgyal rigs shing sA la chen po lta bu rnams sam/ bram ze'i rigs shing sA la chen po rnams sam/ khyim bdag gi rigs shing sA la chen po lta bu rnams kyi khyim dag tu 'gro bar mi byed do/ /de ltar na de gang yongs su tshol ba dang / gang spyod pa'i rnyed pa de la re ba med de/ de mtshan mo 'das te/ nyin mo byung ngam/ nyin mo 'das te mtshan mo byung yang rung / rtag tu rgyun mi 'chad par 'chi ba'i 'du shes kyis nye bar gnas shing / bdag 'chi bar 'gyur ba'i rkyen ni mang ste/ bdag gi rlung 'khrug par gyur tam zhes bya ba nas/ bdag ni mi ma yin pas kyang 'jigs so zhes bya ba'i bar du/ mdo las ji skad 'byung ba bzhin du sbyar ro/ /de ltar na/ de ni rnyed pa de gang gi phyir yongs su tshol ba dang / gang gi phyir spyod pa'i srog de la yang re ba med de/ de ltar na chags pa dang bral zhing dud pa sangs la mi choms shing re ba med pa de ni dbang po dang bcas pa dang / dbang bdag dang bcas pa dang / skye dgu'i bdag po dang bcas pa'i lha rnams kyis/ 'dir yang lha dang mir skye ba'i rgyu yod par ma mthong la/ phyi ma la yang lha dang mi'i rgyu dang 'bras bur ma mthong ngo / /gling bzhi pa 'di'i lha dang mi'i 'jig rten gang yin pa'am/ gzhan gyi'am/ 'jig rten gyi khams 'di'am/ gzhan gyi lha dang mi'i 'jig rten gang yin pa der yang ma mthong ngo / /de la tshigs su bcad pa dang pos ni dus gzhan gyi 'dod pa rnams dang / 'dod pa rnams la log par bsgrub pa dang / log par bsgrubs pa'i 'bras bu bstan to/ /tshigs su bcad pa gnyis pas ni/ 'dod pa yongs su spangs pa'i rigs pa'i ngo bo yin pa dang / tshangs par spyad pa la gnas pa yongs su dag pa la klan ka tshol ba mi rigs pa'i ngo bo yin pa dang / 'dod pa rnams nyid dus gzhan gyi yin par bstan to/ /gnyis pa ji lta ba bzhin du/ gsum pa'ang de dang 'dra'o/ /tshigs su bcad pa bzhi pas ni/ bcom ldan 'das kyis chos tshe 'di dang / nad med pa nas/ mkhas pa rnams kyis so so rang gis rig pa'i bar bstan to/ /de la 'dod pa rnams gzhan na 'grub pa ni/ tshigs su bcad pa dang po las/ 'dod pa rnams kyi brjod par bya ba'i mtshan nyid kyi sgo nas bstan pa yin te/ de dag kyang 'dod pa tsam gyis 'grub pa ni ma yin te/ yongs su tshol ba dang longs spyad pa yang brjod pa sngon du 'gro ba yin pa'i phyir ro/ /'du shes dang / gnas pa dang / yongs su ma shes pas ni de dag la log par bsgrub pa bstan to/ /'chi bo dang phrad pas ni log par bsgrub pa'i 'bras bu bstan to/ /'dod pa yongs su shes pa dang / log par smon pa rnam par spangs pa dang / tshangs par spyod pa la gnas pa dang / lta ba rnam par spangs pa dang / lta ba'i rtsa ba las byung ba'i nga rgyal rnam par spangs pa dang / rnyed pa dang bkur sti la zhen pa rnam par spangs pa ni/ 'dod pa yongs su spangs pa'i rigs pa'i ngo bo yin par bstan te/ des kyang pha rol gyi klan ka btsal bar mi rigs pa'i ngo bo yin pa dang / 'dod pa rnams dus gzhan na 'byung ba bstan te/ 'di ltar sngon bsod nams ma byas pa la ni skyes bu'i rtsal dang ldan du zin kyang 'dod pa 'grub par mi 'gyur ro/ /tshe 'di nyid la bsod nams byas na yang / tshe 'di nyid la 'dod pa 'grub par mi 'gyur te/ de'i gzhi las phyi ma la 'grub par 'gyur ro/ /rnam grangs des na 'dod pa rnams dus gzhan na 'grub par bstan pa yin no/ / tshigs su bcad pa bzhi pas ni/ mthong bas spang bar bya ba'i nyon mongs pa rnams spangs pas/ tshe 'di nyid la dge sbyong gi tshul dang / dge sbyong gi 'bras bu dang po bstan to/ /bsgom pas spang bar bya ba rnams spangs pas ni/ tshe 'di nyid la dge sbyong gi tshul dang dge sbyong gi 'bras bu phyi ma bstan to/ /sred pa bcas pa dang / nga'o snyam pa'i nga rgyal spangs pas ni/ de ltar tshe 'di pa'i chos bstan pa yin no/ /chags pa dang bral ba dang / dud pa sangs pas ni/ nad med pa dang / mkhas pa rnams kyis so so rang gis rig pa'i bar bstan to/ /de de ltar so so rang gis rig par bya ba'i chos thob par pha rol dag gis ji ltar rig par bya zhe na/ mi choms pa dang / re ba med pa'i rtags kyis rig par bya'o/ /de la tshigs su bcad pa gsum gyis ni bcom ldan 'das kyis lha'i yid la dge slong 'dis ni bstan pa'i don bshad par mi nus kyi/ bshad na bdag gis ni brda phrad par nus so snyam du dge slong la brnyas pa'i sems skyes pa dang / bdag nyid nga rgyal gyi sems bstsal to/ /tshigs su bcad pa bzhi pas ni bstan pa'i don rgyas par bstan to// //bam po nyi shu gcig pa/ 'dod pa'i chags pas zil mnan pas/ /bdag gi sems ni yongs su bsregs/ /kye kye gau ta ma thugs brtse ba/ /khyod kyis zhi 'gyur bdag la gsungs/ /'du shes phyin ci log pa yis/ /khyod kyi sems ni yongs su bsregs/ /de phyir 'dod chags ldan pa yi/ /sdug pa'i mtshan ma spang bar gyis/ /khyod kyis rtse gcig mnyam gzhag pas/ /mi sdug rtag tu bsgom par gyis/ /'dod chags me ni myur du sod/ /phyi phyir zhing ni bsregs sa re/ /sdug bsngal de bzhin bdag med pas/ /'du byed thams cad nyid la ltos/ /lus la dran pa gnas byos la/ /shas cher yang ni skyo bar gyis/ /nga rgyal bag nyal sel ba yi/ /mtshan ma med pa'ang bsgom par gyis/ /des na nga rgyal mngon rtogs pas/ /sdug bsngal mthar ni 'byin par 'gyur/ /zhes bya ba 'di ni tshigs su bcad pa yin no/ /'du shes phyin ci log pa gang zhe na/ mi sdug pa'i dngos po la/ mi sdug pa'i mtshan ma spangs nas/ sdug pa'i sgo nas tshul bzhin ma yin pa'i mtshan ma dang / mngon rtags su 'dzin pa'o/ /mtshan ma yongs su spangs pa gang zhe na/ 'di ltar 'di na la la bud med gzhon nu kha dog bzang zhing chags su rung ba mthong na/ dbang po rnams g.yeng bar mi byed cing gtod par mi byed pa lta bu'o/ /rtse gcig tu mnyam par gzhag pas ji ltar mi sdug pa bsgom zhe na/ 'di ltar 'di na la la ting nge 'dzin bzang po'i mtshan ma 'di lta ste/ rnam par bsngos pa nas/ rus gong dang rus pa'i keng rus kyi bar du snga nas/ legs par bzung bas/ chags su rung ba'i dngos po de nyid snang ba na/ mtshan ma de nyid sngar ji lta ba de bzhin du phyis kyang yid la byed pa de lta bu'o/ /yang na bdag gam pha rol gyi nang gi lus mi gtsang ba rnam pa sna tshogs kyis gang bar rtog ste/ lus 'di la skra man chad nas gcin gyi bar rnams yod do snyam pa'o/ /sdug bsngal ba'i phyir 'du byed ji ltar tha chad du mthong zhe na/ 'di ltar 'di na la la 'di snyam du sems te/ bud med gzhon nu kha dog bzang zhing chags su rung ba mthong na/ sreg pa dang longs spyad par 'dod pa skye ba gang yin pa de ni kun 'byung ba'i bden pa sdug bsngal gyi rgyu ste/ gang gis skye bar 'gyur ba dang / skyes nas kyang rga ba dang / 'chi ba dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung ngo snyam pa lta bu'o/ /bdag med pa'i phyir 'du byed ji ltar tha chad mthong zhe na/ 'di ltar 'di na la la 'di snyam du sems te/ bdag gi lus dang bdag gi gzugs 'di dang / bud med kyi lus dang / bud med kyi gzugs de la bdag gam/ sems can nam/ longs spyod par byed pa'am/ longs spyad par bya ba de gang yang med de/ 'di ni 'du byed tsam du zad do/ /'di ni chos tsam du zad do/ /'di ni rten cing 'brel bar 'byung ba yin no snyam pa lta bu'o/ /lus la dran pa gnas par byas nas shas cher skyo bar byed pa ji lta bu zhe na/ 'di ltar 'di na la la rang bzhin gyis 'dod chags shas che ba'i ngang can yin te/ de 'dod chags shas che ba'i ngang can des dbang po rnams g.yengs kyang / 'dod chags kyis sems ma rung bar byed la/ mi sdug pa yid la byed cing / sdug bsngal ba dang bdag med par yid la byed du zin kyang / 'dod chags kyis sems ma rung bar byed de/ des mi sdug pa yid la byed pa'am/ sdug bsngal ba dang / bdag med pa yid la byed pa la brten nas/ re zhig skyo ba dang / smod pa dang / ldog pa dang / zhe 'gras pa de thob nas dran pa de nyid lus dran pa nye bar gnas pa las gzhag ste/ kun tu rten cing bsgom pa len mang du byed na/ de de ltar zhugs shing de la shas cher gnas pas 'dod chags shas che ba gang yin pa de 'bri bar 'gyur te/ de'i dbang po rnams g.yengs pas kyang / 'dod chags kyis sems ma rung bar mi byed la/ mi sdug pa dang / sdug bsngal ba dang / bdag med pa yid la byed pas kyang / 'dod chags kyis sems ma rung bar mi byed do/ /de ltar rnam pa de dag gis kyang / de'i 'dod chags kyi kun nas dkris pa de kun du spyod pa'i sgo nas spang bar 'gyur gyi/ bag la nyal gyi sgo nas ni ma yin no/ /'dod pa'i 'dod chags de yang so so'i skye bo'i rgyud dang / slob pa'i rgyud de gang zag gnyis kyi rgyud la bag la nyal dang kun nas dkris pa'i tshul gyis 'jug par dmigs te/ de las kyang slob pa kha cig la ni mi dmigs mod kyi/ de yang 'og ma'i 'dod chags dang bral bas grub pa dang bde ba thob tu zin gyis kyang / gong ma'i 'dod chags dang ma bral bas grub pa dang bde ba ma thob pa'o / /mi slob pa'i rgyud la ni bar ma dang / gya nom pa'i khams kyi 'dod chags kyang mi dmigs na khams ngan pa'i lta ci smos/ mi slob pa dang 'og ma dang gong ma'i 'dod chags spangs pas thams cad du grub pa bde ba rjes su thob bo snyam du rig nas/ des na 'di na 'dod pa'i 'dod chags dang bral ba'i slob pa kha cig phyis mi slob pa nyid du 'gyur bar bya ba'i phyir/ yid kyis smon nas mya ngan las 'das pa la zhi bar mthong ste/ mtshan ma thams cad yid la mi byed pa dang / mtshan ma med pa'i dbyings kyang yid la byed pas mtshan ma med pa'i ting nge 'dzin la slob cing / de nyid lan mang du byas pas khams gsum na spyod pa'i bsgom pas spang bar bya ba'i nga'o snyam pa'i nga rgyal spong bar 'gyur ro/ /de spangs pa'i phyir steng ma dang / 'og ma'i 'dod chags spangs pas grub pa dang / bde ba thob pa'i sgo nas mi slob pa khams gsum pa'i 'dod chags dang bral bar 'gyur te/ sdug bsngal thams cad gyi rgyu yongs su spangs pas sdug bsngal thams cad kyi mtha' rjes su thob pa yin no/ /de ltar nga rgyal gyi bag la nyal sel ba mtshan ma med pa bsgom pa dang / nga rgyal mngon par rtogs pa'i phyir yang sdug bsngal gyi mtha' rjes su thob pa yin no/ / bshad pa 'di'i mdor bstan pa ni 'di yin te/ 'dod pa'i 'dod chags ji ltar skye bar 'gyur ba dang / ji ltar rnam par zhi bar 'gyur ba dang / gang rnam par zhi bar 'gyur ba de bstan pa 'di ni 'dir mdor bstan pa yin par rig par bya'o/ /'dod pa'i 'dod chags ji ltar skye bar 'gyur zhe na/ de ni rgyu rnam pa lngas skye bar 'gyur te/ sdug par 'du shes pa dang / bde ba la mngon par dga' ba dang / sems can du 'du shes pa dang / 'dod chags shas che ba dang / bag la nyal lus pa'o/ /de la 'dod pa'i 'dod chags skyes pa ji ltar rnam par zhi bar 'gyur zhe na/ de ni rgyu rnam pa lngas rnam par zhi bar 'gyur te/ mi sdug pa yid la byed pa dang / sdug bsngal ba dang / bdag med pa dang / shas cher skyo ba dang / bag la nyal legs par bcom pa'o/ /de la rnam par zhi ba gang zhe na/ rnam par zhi ba ni rnam pa gnyis te/ kun du mi spyod pas rnam par zhi ba dang / bag la nyal spangs pas phyis mi skye'o / /de la 'dod pa'i 'dod chags rnam par zhi ba'i rgyu bzhis ni rnam par zhi ba dang po 'grub par 'gyur ro/ /lnga pas ni gnyis pa'o/ /ji ltar dge slong phal cher gnas gyur na/ /chu bo lnga rgal 'di la drug pa rgal/ /ji ltar gnya' dag ma thob bsam gtan pa/ /'dod pa'i sred pa chen po rgal bar 'gyur/ /tshogs sbyangs sems ni shin tu rnam par grol/ /'du byed med cing dran ldan 'khrug pa med/ /chos kun shes shing rtog med bsam gtan pa/ /'khrug pa chags dang rmugs pa'i nyes pa med/ /de ltar dge slong phal cher gnas gyur na/ /chu bo lnga rgal 'di la drug pa rgal/ /de ltar gnya' dag ma thob bsam gtan pa/ /'dod pa'i sred pa chen po rgal bar 'gyur/ /zhes bya ba ni gzhon nu mas zhus pa'i tshigs su bcad pa yin no/ /chu bo drug ni 'di dag yin te/ mig ni gzugs la lta ba'i phyir chu bo yin pa nas/ yid ni chos rnams rnam par shes pa'i phyir chu bo yin pa'i bar du'o/ /de la 'phags pa nyan thos slob pa'i gzhi mthong ba ni mig gis shes par bya ba'i gzugs yid bde ba dang ldan pa rnams la rjes su chags pa med par gnas la/ yid mi bde ba dang mthun pa rnams la khong khro ba med pa dang / btang snyoms dang mthun pa rnams la so sor brtags shing btang snyoms su gnas so/ /de 'di lta ste/ yid bde ba'i tshogs dang / yid mi bde ba'i tshogs dang / btang snyoms kyi tshogs de gsum la brten nas 'dod chags kyi kun nas dkris pa'am/ zhe sdang dang gti mug gi kun nas dkris pa skyes pa de dang du len par mi byed cing sel ba'i bar du byed do/ /de ltar na des tshogs gsum po de dag /de dang 'brel ba'i nyon mongs pa kun nas dkris pa kun du mi spyod pas shin tu sbyangs par 'gyur ro/ /de lta bu'i tshogs shin tu sbyangs pa yin gyi/ bag la nyal ma spangs pas sems shin tu rnam par grol ba ni ma yin no/ /de dus gzhan na de dang 'brel pa'i bag la nyal yang spangs na/ de dang 'brel pa'i nyon mongs pa dang 'brel ba med par 'gyur te/ de ltar na tshogs gsum po de dag la/ 'dod chags dang / zhe sdang dang / gti mug rnams las sems shin tu rnam par grol bar 'gyur ro/ /mig gis rnam par shes par bya ba'i gzugs rnams la ji lta ba bzhin du/ lus kyis rnam par shes par bya ba'i reg bya rnams kyi bar du yang de dang 'dra'o/ /de ltar na de tha ma'i cha dang mthun pa'i kun du sbyor ba lnga spangs nas/ chu bo lnga las rgal ba yin no/ /gzugs rnams la lta ba'i phyir mig gi chu bo de las rgal ba yin pa nas/ reg bya rnams la reg pa'i phyir lus kyi chu bo'i bar du de las rgal ba yin no/ /de ltar chu bo lnga las rgal nas/ lhag ma drug pa ste/ yid kyi chu bo las rgal bar bya ba'i phyir mngon par 'du mi byed cing mi 'khrug la dran pa dang ldan par byed do/ /ji ltar mngon par 'du mi byed ce na/ mya ngan las 'das pa la yid gtad nas nga'o snyam du g.yo bar mi 'gyur/ mi sems/ mngon par 'du mi byed de/ 'di ni bdag gi bdag yin no zhes bya ba nas/ bdag 'du shes med 'du shes med min gyi bar du 'gyur ro snyam du g.yo bar mi 'gyur/ mi sems/ mngon par 'du mi byed do/ /ji ltar mi 'khrug ce na/ gong ma'i cha dang mthun pa'i kun du sbyor ba rnams de'i sems la yongs su 'dzin cing mi 'dug 'khrug par mi byed/ yongs su 'gyur bar mi byed/ sems gzhan du sgyur bar mi byed do/ /de zhi ba la snyoms par 'jug pa gang yang rung ba'i ro myong bar mi byed/ ji ltar mi 'khrug /sgrub pa dang / lhag par zhen pa dang / lhag par zhen cing 'dug par mi byed do/ /ji ltar dran pa dang ldan pa yin zhe na/ gong ma'i cha dang mthun pa'i kun du sbyor ba rnams spang bar bya ba'i phyir/ /nang gi lus la lus kyi rjes su lta zhing gnas te/ rgyas par dran pa nye bar gzhag pa rnams dang sbyar ro/ /de de ltar mngon par 'du mi byed pas skye ba'i sred pa spangs te 'khrug pa med par gyur nas/ kun du spyod pas snyoms par 'jug pa'i sred pa spangs te/ dran pa dang ldan zhing gong ma'i cha dang mthun pa'i kun du sbyor ba thams cad ma lus par spangs pa'i phyir gnyen po sgom par byed do/ /de de ltar mngon par 'du mi byed cing dran pa dang ldan pa la 'khrug pa med do/ gong ma'i cha dang mthun pa'i kun du sbyor ba rnams ma lus par spangs pas chu bo drug pa ste chos rnams rnam par shes pa'i phyir yid kyi chu bo las rgal lo/ /rnam grangs gzhan yang ji ltar mi 'khrug ce na/ mi 'khrug pa zhes bya ba ni byams pa dge ba'i rtsa ba ste/ gnod sems med pa'i ngo bo nyid yin pa'i phyir ro/ /de bas na rnam grangs 'dis 'phags pa nyan thos de 'jig tshogs la log par smon pa spangs nas/ zhi gnas dang lhag mthong sgom par byed do/ /byams pas ni zhi gnas bsgom mo/ /dran pa nye bar gzhag pa rnams kyis ni lhag mthong bsgom mo/ /de ltar yang dag par brtson pa de'i gong ma'i cha dang mthun pa'i kun du sbyor ba spong ba dang mthun pa'i sems gsum bsgom pa yongs su rdzogs par 'gyur te/ gsum ni gong ma'i 'jig tshogs la sbyor ba med pa'i sems dang / 'og ma'i sems can rnams la gnod sems med pa'i sems dang / gong ma dang 'og ma'i yul thams cad la bag yod pas kun nas nyon mongs pa ma yin pa'i sems so/ /lhag ma ni snga ma bzhin te/ de ltar na de chu bo lnga rgal nas chu bo drug pa rgal lo/ /ji ltar na chos kun shes pa yin zhe na/ de sdug bsngal gyi chos kun du shes shing mngon par rtogs la/ des kun 'byung ba dang / 'gog pa dang / lam gyi chos kun du shes shing mngon par rtogs pa'o/ /ji ltar na rtog pa med pa'i bsam gtan pa yin zhe na/ de ltar chos kun du shes nas khyim gyi 'dod pa'i rdzas rnams spong ba dang / 'dor ba la gnas te/ dgon pa na 'dug gam/ shing drung na 'drug gam/ khyim stong pa na 'dug kyang rung / mig gis shes par bya ba'i gzugs yid bde ba dang mthun pa rnams la yid bde ba'i tshogs dang / yid mi bde ba dang mthun pa rnams la yid mi bde ba'i tshogs dang / btang snyoms dang mthun pa rnams pa btang snyoms pa tshogs gang yin pa de la dmigs shing 'dod pa'i rtog pas kun nas dkris pa'i sems kyis lan mang du gnas par mi byed pa nas/ khyim gyi 'byor pa dang ldan pa'i rtog pas kun nas dkris pa'i sems kyi bar gyis lan mang du gnas par mi byed la/ 'dod pa'i rtog pa nas khyim gyi 'byor pa dang ldan pa'i rtog pa'i bar dag byung na yang / nges par 'byung ba yang dag pa ji lta ba bzhin du rab tu shes so/ /de 'dod pa'i rtog pa kho na la dmigs te/ rtog par byed pa dang / rab tu rtog par byed pa dang / shin tu rtog par byed pa med pa nas/ khyim gyi 'byor pa dang / ldan pa'i rtog pa'i bar la dmigs par mi byed de/ de thabs de dang lam bsgom pa des yid bde ba'i tshogs las chags pa'i nyes pa spong bar byed cing / yid mi bde ba'i tshogs las 'khrug pa'i nyes pa dang / btang snyoms kyi tshogs las rmugs pa'i nyes pa kun nas dkris pa'i sgo nas spong zhing tshogs shin tu sbyangs par 'gyur la/ bag la nyal gyi sgo nas spangs pa'i tshogs gsum po nyon mongs pa can 'dod pa dang mtshungs par ldan pa de dag las sems shin tu rnam par grol bar 'gyur ro/ /de de'i tshe sred pa gang gzugs rnams nas reg bya rnams kyi bar du 'phros pas 'phrad pa'i sred pa dang / yang dang yang du 'dod pa'i sred pa dang / bral bar mi 'dod pa'i sred pa dang / phrad par mi 'dod pa'i sred pa dang / 'bri bar 'dod pa'i sred pa dang / bral bar 'dod pa'i sred pa dang / 'dod pa'i khams su yang skye bar 'dod pa'i sred pa ste/ 'dod pa'i sred pa rgyas pa de dag las rgal bar 'gyur ro/ /rnam grangs gzhan yang ji ltar rtog pa med pa'i bsam gtan pa yin zhe na/ rtog pa med pa dang / dpyod pa med pa'i bsam gtan thob pa ste/ lhag ma ni snga ma bzhin no/ /bshad pa 'di'i mdor bstan pa ni 'di yin te mdor bsdus na/ lha mo des dgos pa gsum/ sangs rgyas bcom ldan 'das la zhus te/ tha ma'i cha dang mthun pa'i kun du sbyor ba rnams spang ba dang / gong ma'i cha dang mthun pa'i kun du sbyor ba rnams spang ba'i thabs dang / tha ma'i cha dang mthun pa'i kun du sbyor ba de dag nyid spang ba'i thabs te/ ji ltar de dag legs par spong bar 'gyur ba zhus so/ /de skad zhus nas/ bcom ldan 'das kyis kyang / de'i rkyen dang 'tsham pa kho nar lan btab ste/ de la tshogs shin tu sbyangs pa dang / sems shin tu rnam par grol bas ni/ tha ma'i cha dang mthun pa'i kun du sbyor ba rnams spangs pa kho na'i lan btab pa yin gyi/ spang ba'i thabs ni ma yin no/ /mngon par 'du byed pa med pa dang / dran pa dang / 'khrug pa med pa rnams kyi ni/ gong ma'i cha dang mthun pa'i kun du sbyor ba rnams spang ba'i thabs kyi lan btab pa yin gyi/ spang ba'i ni ma yin te/ de dag spang ba ni lha mo des snga ma'i rjes su dpag pas shes pa'i phyir ro/ /tha ma'i cha dang mthun pa'i kun du sbyor ba rnams spang ba'i thabs dang / ji ltar de dag legs par spong bar 'gyur ba lus te/ de la rtog pa med pa'i bsam gtan pa'i rnam grangs dang pos ni bcom ldan 'das kyis sus spong bar byed pa dang / ji ltar spong ba dang / gang spang par bya ba dang / spang ba'i thabs rgyas par lan btab ste/ de la chos kun du shes pa ni spong bar byed pa'o/ /rtog pa med pa'i bsam gtan pas ni spong ngo / /zhen pa'i phyogs 'khrug pa'i nyes pa dang / 'dod chags kyi phyogs 'dod pa'i nyes pa dang / gti mug gi phyogs rmugs pa'i nyes pa ni gang spang bar bya ba ste/ de ltar na sus dang / ji ltar gang spang bar bya ba de'i lan btab pa yin te/ de ltar spang ba'i thabs rgyas par lan btab po/ /ji ltar legs par spong bar 'gyur ba de lus te/ rtog pa med pa'i bsam gtan pa rnam grangs gnyis pas ni legs par spong ba'i lan btab bo/ /de la legs par spong ba ni 'di yin te/ 'di lta ste/ gtan du spong ba dang / rgyang ring por spong ba dang / nyon mongs pa thams cad spong ba'o/ /de la chos kun du shes pas ni/ gtan du spong ba'i lan btab bo/ /rtog pa med pa'i bsam gtan pas ni rgyang ring por spong ba'o/ /'dod chags dang / zhe sdang dang / gti mug gi kun nas dkris pa dang / bag la nyal ba can du spangs pas ni nyon mongs pa thams cad spong ba'i lan btab ste/ de ni 'dir mdor bstan pa yin bar rig par bya'o/ /lha mo des kyang slob pa yid ma thob ba/ 'dod [(]ba [,]pa [)]rnams la 'dod chags dang ma bral ba dang / gong ma'i 'dod chags dang ma bral ba gnyis las brtsams te/ zhu ba zhus pa yin no/ /gnya' dag ces bya ba ni yid yin te/ dper na/ ngo tsha gshol mda' gnya' dag yid/ /ces gsungs pa lta bu ste/ gnya' dag de gang gis ma thob pa de las ni gnya' dag ma thob pa zhes bya'o/ /de yang gang zhe na/ kun du sbyor ba thams cad las sems shin tu rnam par grol ba gang yin pa'o/ /sdug bsngal dag ni ma skyes dang / /yang na skyes par gyur pa na/ /'jig rten 'di dag rtag tu 'jigs/ /skye dgu 'di dag rtag tu skyo/ /gal te 'jigs med 'ga' mchis na/ /zhus pa'i len ni bdag la gsungs/ /shes dang dka' thub ma gtogs dang / /dbang po bcil ba ma gtogs dang / /lha mo kun spangs ma gtogs par/ /thar par 'gyur ba ma mthong ngo / /bram ze mya ngan yongs 'das pa/ /khon dang 'jigs pa kun 'das shing / /'jig rten dag na sred rgal ba/ /kye ma yun rings gdod mthong ngo / /zhes bya ba ni tshigs su bcad pa yin te/ 'dod pa'i khams yan chad srid pa'i rtse mo man chad kyi 'jig tshogs thams cad la ni 'jig rten zhes bya'o/ /don gyi skabs 'dir ni/ 'dod pa'i khams kyi skyid pa dang / sdug pa thams cad sems can gyi 'jig rten du 'dod de/ sems can gang dag lus kyi yo byad rnam pa bcus yongs su zin cing phongs pa med pa dang / nad med pa dang / dar ma yol ba de dag ni sems can gyi 'jig rten skyid pa zhes bya'o/ /de las bzlog pa ni sems can gyi 'jig rten sdug pa yin par rig par bya'o/ /sems can gyi 'jig rten skyid pa gang yin pa de ni nyung la/ skye dgu sdug pa gang yin pa de ni mang ngo / /sems can gyi 'jig rten skyid pa gang yin pa de yang / bdag gi longs spyod du bya ba rnams rgyal pos mi 'phrogs grang zhes bya ba nas/ rgyas par mi rigs par sdug bsngal bar mi 'gyur grang zhes bya ba'i bar dang / bdag gi rlung ngam mkhris pa 'khrugs pa nas/ mi 'am mi ma yin pas bdag la gtse bar mi 'gyur grang zhes bya ba'i bar du ma 'ongs pa na longs spyod du bya ba 'gyur ba'i sdug bsngal dang / lus 'gyur ba'i sdug bsngal 'byung du dogs shing / bag tsha nas 'jigs shing skrag pa'i yid kyis gnas so/ /sdug pa'i sems can gyi 'jig rten gang yin pa de yang da ltar byung ba'i sdug bsngal nyid kyis lus dang sems gzir ba'i sdug bsngal zhing yid mi bde la/ mya ngan dang bcas/ zug rngu dang bcas pas gnas te/ de ltar na sdug bsngal ma skyes pa rnams dang / skyes pa rnams la 'jig rten rtag tu 'jigs shing skye dgu rtag tu skyo ba yin no/ /de nas lha mo des sems can gyi 'jig rten skyid pa'i bde ba la nges pa med par khong du chud nas bde ba yang yin la 'jigs pa yang med pa'i gnas de gang yin pa zhus nas/ bcom ldan 'das kyis kyang lha mo de la/ gnas de ni bstan pa 'di nyid la yod kyi/ 'di las phyi rol pa rnams la med par rnam grangs kyis ston par mdzad de/ 'di lta ste/ 'di las phyi rol pa'i dge sbyong ngam bram ze la la/ tshe 'di dang tshe phyi ma'i 'dod pa rnams kyi nyes dmigs yang dag pa ji lta ba bzhin du mi shes la/ des de ltar ma shes pas ma 'ongs pa'i 'dod pa'i khyad par 'dod pa'i phyir/ tshe 'di'i 'dod pa rnams spangs nas/ tshe phyi ma'i 'dod pa rnams kyi don du dka' thub dang brtul zhugs yang dag par blang ba yang dag par len to/ /de shes pa med par dka' thub dang brtul zhugs yang dag par blangs pa de la gnas te/ dbang po'i sgo mi srung bar gnas shing / dran pa mi srung ba dang / dran pa la rtag 'grus mi byed ces pa'i bar du rgyas par bya ste/ de de ltar dbang po rnams ma bcil bas rnyed pa dang / bkur sti chung ngu yang pha rol las nyams su myong bar byed cing / de la rjes su chags na/ mang po lta la ci smos te/ de ltar de'i dka' thub dang brtul zhugs yang dag par blangs pa de shes pa dang / dbang po bcil ba med pas tshe 'di'i 'dod pa yang spong bar mi 'gyur na/ tshe phyi ma'i lta ga la zhig spong / de nas dge sbyong dang bram ze de dag gi nang nas/ kha cig ni 'dod pa rnams kyi nyes dmigs rtogs nas/ tshe 'di dang tshe phyi ma'i 'dod pa rnams las yang dag par 'das nas/ 'dod chags dang bral ba'i gong ma 'dod de/ thar pa ma yin pa la thar par 'du shes shing 'dod pa rnams spangs te/ mngon par 'byung zhing rab tu dben pa la brten te/ de dag brtun pa'i rgyu dang / lan mang du byas pa'i rgyu dang / yang dag par yid la byas pa'i rgyus/ 'dod pa'i 'dod chags dang bral ba nas ci yang med pa'i skye mched kyi bar gyi 'dod chags dang bral ba thob tu zin kyang / gzhi de las 'og ma'i lus yongs su spangs nas/ gong ma'i lus la sbyor bar 'gyur ro/ /de dag de la sbyor bas phyi ma la 'og ma'i lus las kyang yongs su thar bar mi 'gyur na/ gong ma las lta ci smos te/ de ltar de dag gi longs spyad par bya ba dang / lus spang ba'i lam nor bas brtson 'grus brtsams pa la gnas su zin kyang gcig tu nges par bde zhing 'jigs pa med pa thob par mi 'gyur ro/ /de ci'i phyir zhe na/ 'di ltar de dag gi ston pa gang yin pa des kyang de'i gnas mi mthong na / slob ma rnams kyis lha rgyas par bstan par ga la nus te/ de ltar na ston pa dang slob mar bcas pa de dag gi tshig la ni sdug bsngal mthar phyin pa med pa kho na'o/ /de las bzlog pa la legs par gsungs pa'i chos 'dul ba la ni sdug bsngal gyi mthar phyin pa'i bar du thams cad yod pa kho nar rig par bya ste/ bcom ldan 'das kyis de las dgongs nas/ shes dang dka' thub ma rtogs dang / /dbang po bcil ba ma rtogs dang / /lha mo kun spangs ma rtogs par/ /thar par 'gyur ba ma mthong ngo / /zhes lha mo la lan btab bo/ /bshad pa 'di la mdor lan btab pa ni nyes par smras pa'i chos 'dul ba la ston pa log par zhugs pa dang / slong ma log par zhugs pa dang / legs par gsungs pa'i chos 'dul ba la ston pa phun sum tshogs pa dang / nyan thos phun sum tshogs pa dang / sdug bsngal thams cad mthar phyin par byed pa yod pa bstan te/ de ni 'dir mdor lan btab pa yin no/ /de nas lha mo des/ bcom ldan 'das la zhus pa'i lan gyis yi rangs nas/ sangs rgyas bcom ldan 'das la yang dag pa'i yon tan bla na med pa bzhis bstod de/ 'byung bar dka' ba dang / byung nas kyang gzhan la phan par zhugs pa dang / bdag la phan pa sgrub pa dang / 'di lta ste/ bdag la phan pa dang / gzhan la phan pa sgrub pa de la/ de la zang zing med pa'i thugs so/ /bram ze mya ngan yongs 'das pa/ /kye ma yun ring gdod mthong ngo / /zhes bya ba 'dis na/ 'byung bar dka' ba bstan to/ /'khor ba thams cad las 'das pas na gzhan la phan pa bsgrub pa bstan to/ /'jigs pa thams cad las 'das pas ni bdag la phan pa bsgrub pa bstan to/ /sred pa las rgal bas ni bdag dang gzhan la phan pa bsgrub pa la zang zing med pa'i thugs dang ldan par bstan to/ /rnam grangs bzhi po 'di dag gis ni rnam grangs gzhan gsum yang bstan par rig par bya ste/ 'byung bar dka' ba'i phyir mthong bar dka' ba dang / bdag dang gzhan la phan pa bsgrub pa'i phyir mthong ba don che ba dang / don che zhing zang zing med pa'i thugs dang ldan pa'i phyir/ skye bo kun la phan pa dang / kha na ma tho ba med pa ste/ rnam pa 'di dag ni sangs rgyas bcom ldan 'das rnams kyi bstod pa'i mchog yin no/ /gang gis rigs lhags skye bo bstan gyur cing / /lam dang nges par 'byung la btsud pa lags/ /gang la gnas shing gang la bslabs bgyis na/ /mi 'di 'jig rten pha rol 'jigs med 'gyur/ /gang zhig khrims ldan shes ldan bdag nyid bsgoms/ /mnyam gzhag dran ldan drang por song ba dang / gang gis mya ngan rims nad thams cad spangs/ /yang dag dran ldan sems ni rnam grol gang / /de yis rigs lhags skye bo bstan gyur cing / /lam dang nges par 'byung la'ang btsud pa yin/ / de la gnas shing de la bslabs pa na/ /mi 'di 'jig rten pha rol 'jigs med 'gyur/ /zhes bya ba ni tshigs su bcad pa yin te/ rigs bzhi po bram ze dang / rgyal rigs dang / rje'u rigs dang / dmangs rigs dang / mngon par lhags pa rnams chos dang mthun par 'dul zhing sbyong la/ yang dag par ston pa ni rigs bzhi'i skye bo bstan pa zhes bya ste/ skye bo de dag kyang sangs rgyas bcom ldan 'das kyis chos dang mthun pas btul zhing sbyangs la yang dag par bstan to/ /de bas na bcom ldan 'das kyis bdag nyid ston pa po yin par rnam grangs kyis lha mo de la bstan pa'i phyir 'di skad du/ gang zhig khrims ldan shes ldan bdag nyid bsgoms/ /zhes gsungs so/ /rigs bzhi po de dag sdug bsngal thams cad las nges par 'byung bar bya ba'i phyir yang / bcom ldan 'das kyis 'phags pa'i lam yan lag brgyad pa bstan te/ 'dir yang bcom ldan 'das kyis bdag nyid rnam grangs kyis bstan to/ /de la ji ltar na tshul khrims dang ldan pa yin zhe na/ bcom ldan 'das byang chub sems dpar gyur pa na/ 'dod pa mchog dang rab mchog tu gyur pa rnams spangs shing khyim yongs su btang nas/ lus dang ngag gi sdom pa yang dag par blang ba mdzad pa'o/ /ji ltar na ye shes dang ldan pa yin zhe na/ de lus dang ngag gi sdom pa yang dag par blangs pa de la gnas pa na/ bdag nyid la tshul bzhin du sems kyi yongs su rtog pa 'di lta bu skye ste/ kye ma 'jig rten 'di dag ni dka' ba la zhugs pa ste/ 'di lta ste/ skye bar yang 'gyur rga bar yang 'gyur ro zhes bya ba nas/ mdo las ji skad 'byung ba bzhin du sbyar par bya'o/ /ji ltar na bdag nyid bsgoms pa yin no zhe na/ sngon gyi tshe rabs gzhan du bskal pa grangs med pa gsum po dag tu des pha rol tu phyin pa drug bsgoms shing shin tu bsgoms te/ rgyu de dang rkyen des da ltar slob dpon med par mngon par 'byung ba'i sems skye zhing / 'du byed rnams kyi rten cing 'brel par 'byung ba la yang ye shes kyis 'jug pa'o/ /ji ltar mnyam par gzhag pa yin zhe na/ ci yang med pa'i skye mched kyi bar gyi 'dod chags dang bral bar gyur nas/ 'du shes med 'du shes med min skye mched thob pa'o/ /ji ltar na dran pa dang ldan pa yin zhe na/ de de ltar mnyam par gzhag nas mthong bas spang bar bya ba'i nyon mongs pa rnams spang ba'i phyir dran pa nye bar gzhag pa bzhi bsgom ste/ dran pa nye bar gzhag pa de dag nyid dang por byas nas byang chub kyi phyogs kyi chos sum cu rtsa bdun gyi bar du bsgom pa'o/ /ji ltar na drang por song ba yin zhe na/ rgyun las bzlog pa'i phyogs su 'gro ba'i 'phags pa'i lam yan lag brgyad pa skye zhing mthong bas spang bar bya ba'i nyon mongs pa rnams kyang spong la/ de rgyun las bzlog pa'i phyogs su 'gro ba'i lam der yang zhugs shing song ba'o/ /ji ltar na de'i mya ngan dang rims nad thams cad spangs pa yin zhe na/ bden pa mngon par rtogs ma thag tu tha ma'i cha dang mthun pa'i kun du sbyor ba lnga yang spangs pa yin te/ mya ngan lta bu'i gnod sems dang / rims nad lta bu'i 'dod pa'i 'dun pa spangs pa'o/ /ji ltar na yang dag pa'i dran pa dang ldan pa yin zhe na/ gong ma'i cha dang mthun pa'i kun du sbyor ba rnams spang ba'i phyir yang dran pa nye bar gzhag pa bzhi bsgom pa nas/ byang chub kyi phyogs kyi chos sum cu rtsa bdun gyi bar du bsgom pa'o/ /ji ltar na de'i sems rnam par grol ba yin zhe na/ gong ma'i cha dang mthun pa'i kun du sbyor ba de dag spangs pas nyon mongs pa'i sgrib pa dang / shes bya'i sgrib pa ste/ sgrib pa rnam pa gnyis las sems rnam par grol ba'o/ /de de ltar sems shin tu rnam par grol bas/ de bzhin gshegs pa dgra bcom pa yang dag par rdzogs pa'i sangs rgyas su 'gyur te/ rgyas par mdo las ji skad 'byung ba bzhin du sbyar te/ de yis rigs lhags skye bo bstan gyur cing / /lam dang nges par 'byung ba la'ang btsud pa yin/ /rigs bzhi'i nang nas gang yang rung ba la la zhig /de'i bstan pa dga' ste/ 'phags pa'i lam yan lag brgyad pa rtogs par bya ba'i phyir yang dag par sgrub cing / bslab pa gsum la legs par slob na/ de 'phags pa'i lam yan lag brgyad pa dang / de'i 'bras bu mya ngan las 'das pa yang thob par 'gyur te/ de thob pas phyi ma la na ba dang / rga ba dang / 'chi bas mi 'jigs so/ /bstan pa 'di mdor lan btab pa la ni / mdor bstan na bcom ldan 'das kyis rigs bzhi rnam par dag par bstan pa dang / de la zhugs pa de dag la slu ba med pas rang gi bstan pa legs par gsungs pa'i chos 'dul ba yin pa dang / ston pa bla na med pa yin par bstan te/ de ni 'dir mdor lan btab pa yin par rig par bya'o/ /ji ltar grags dang ldan par 'gyur/ /ji ltar longs spyod can du 'gyur/ /ji ltar snyan pa thob par 'gyur/ /ji ltar mdza' bo rnyed par 'gyur/ /tshul khrims kyis ni grags ldan 'gyur/ /sbyin pas longs spyod can du 'gyur/ /bden pas snyan pa thob par 'gyur/ /byin na mdza' bo rnyed par 'gyur/ /zhes bya ba ni tshigs su bcad pa yin te/ ji ltar na tshul khrims las grags pa dang ldan par 'gyur ba yin zhe na/ 'di ltar 'di na skyes pa'am bud med la la tshul khrims dang ldan zhing dge ba'i chos can yin te/ /ji srid 'tsho'i bar du srog gcod pa spangs nas/ srog gcod pa las phyir log pa nas/ mdo las 'byung ba bzhin du phyogs dang phyogs mtshams dag na/ dge sbyong dang bram ze 'khod pa rnams de'i bsngags pa brjod par 'gyur ba'i bar du rgyas par sbyar te/ de gzhi de las rgyal po rnams dang / blon po rnams dang / grong rdal ba dang / yul gyi mi rnams kyi mi dag gis bsnyen bkur byed par 'gyur ba lta bu'o/ /ji ltar sbyin pa las longs spyod can du 'gyur ba yin zhe na/ 'di ltar 'di na la la sngon gyi tshe rabs gzhan dag tu sbyin pa las byung ba'i bsod nams bya ba'i dngos po byas shing bsags par gyur te/ de da ltar phyug pa'i khyim dang / nor che ba nas mdzod dang / bang mdzod kyi tshogs mang ba'i bar gyi khyim du skye bar 'gyur ba lta bu'o/ /ji ltar na bden pa las snyan pa thob par 'gyur ba yin zhe na/ 'di ltar 'di na la la gzhal blugs la sgyu byed pa dang / srang la sgyu byed pa dang / gzhal ba la sgyu byed pa dang / g.yo sgyu dang / 'drid pa dang / sdig pa'i las dang / brdzun du smra ba las longs spyod mi tshol gyi / chos can gyi las kyi yon tan dang / chos dang mthun pa dang / gzu lums med pas longs spyod sgrub par byed de/ de la gzhan dag na re/ kye ma mi 'di ni dge ba yin te/ chos can gyi las kyi yon tan gyis longs spyod sgrub par byed de zhes zer ba lta bu'o/ /ji ltar na byin pas mdza' bo rnyed par 'gyur zhe na/ 'di ltar 'di na la la longs spyod yod cing bdog la/ dri ma dang / ser sna dang bral zhing yo byad yongs su 'dzin pa med pas/ bdag nyid yang dag pa'i bden pas yongs su tshim par byed pa nas mdza' bshes dang / blon po dang / nye du dang / rgan rabs kyi bar de dag de'i longs spyod pa bsgrub pa dang / bsrung ba dang / 'phel bar bya ba'i phyir de'i grogs byed pa lta bu'o/ /bshad pa 'di mdor lan btab pa ni/ mdor bsdu na bsnyen bkur gyi rgyu dang / rnyed pa'i rgyu de bstan te/ tshul khrims las grags pa dang ldan par 'gyur ba ni bsnyen bkur gyi rgyur bstan to/ /tshig lhag ma rnams ni rgyu'i stobs dang / skyes bu'i mthu stobs dang / grogs byed pa'i stobs las rnyed pa'i rgyur bstan te/ 'di ni 'dir mdor lan btab pa yin par rig par bya'o/ /mtsho ni gang las ldog par 'gyur/ /lam ni gang las ldog pa lags/ /gang du 'jig rten sdug bsngal dang / /bde ba ma lus 'gag par 'gyur/ /mig dang rna ba de bzhin sna/ /lce dang lus dang de bzhin yid/ /ming dang gzugs ni gang zhig tu/ /ma lus par ni 'gag 'gyur ba/ /de las mtsho ni ldog 'gyur zhing / /lam ni de las ldog pa yin/ /'dir ni 'jig rten sdug bsngal dang / /bde ba ma lus 'gag par 'gyur/ /mtsho gang zhe na/ reg pa'i skye mched drug ste/ de ci'i phyir zhe na/ dper na mtsho chu dang ldan zhing chu yod la reg na bde ba ni nan tan du yongs su zad par ma gyur cing / mthar thug par ma gyur gyi bar du skyes pa dang / bud med dang / khye'u dang bu mo man chad nas tha na ri dgas dang bya yan chad kyi nye bar 'tsho ba yin pa bzhin du reg pa'i skye mched drug kyang nam sred pa'i rlan gyi chu de dag gtan du yongs su zad par ma gyur cing / mthar thug par ma gyur gyi bar du byis pa rnams su yul drug gi reg pa reg na bde ba rnams kyis nye bar 'tsho'o/ /lam gang zhe na/ lam ni nyon mongs pa'i lam dang / las kyi lam rnam pa gnyis te/ don gyi skabs 'dir ni rgyu la lam zhes bya'o/ /bde ba dang sdug bsngal gang zhe na/ tshe 'di'i skye mched drug po la brten te skyes pa'i tshor ba'i rnam pa bde bar tshor ba dang / tshor ba'i rnam pa mi bde bar tshor ba'am/ tshe phyi ma'i nyon mongs par gtogs pa'i legs par spyod pa dang / nyes par spyod pa la brten te skyes pa'i tshor ba'i rnam pa bde bar tshor ba dang / tshor ba'i rnam pa mi bde bar tshor ba'o/ /skye mched drug ming dang gzugs dang bcas pa ma lus par gang du 'gag par 'gyur zhe na/ phung po lhag ma med pa'i mya ngan las 'das pa'i dbyings su'o/ /de la so so'i skye bo'i mtsho dang / lam dang / bde ba dang / sdug bsngal thams cad ni bri ba ma yin zhing zad pa ma yin no/ /slob pa'i ni bri bar gyur la zad pa ma yin no/ /mi slob pa'i tshe phyi ma'i lam dang / bde ba dang / sdug bsngal ba ni bri ba yang yin/ zad pa yang yin la kun du spyod pa yang ma yin no/ /tshe 'di'i mtsho dang bde ba dang / sdug bsngal ba yang bri zhing zad de/ lus kyi lhag ma tsam zhig yod pa'i phyir ni kun du spyod pa yod do/ /de bas na phung po'i lhag ma med pa'i mya ngan las 'das pa'i dbyings su de dag thams cad 'gag ces bya'o/ /bshad pa 'di'i mdor lan btab pa ni/ tshe 'di'i bde ba dang / sdug bsngal ba rgyu dang bcas pa dang / tshe phyi ma'i bde ba dang sdug bsngal ba rgyu dang bcas pa rnams phung po'i lhag ma med pa'i mya ngan las 'das pa'i dbyings su 'gag par 'gyur ba de bstan te/ de ni 'dir mdor lan btab pa yin par rig par bya'o/ /gang gis chu bo rgal bar 'gyur/ /gang gis rgya mtsho rgal bar 'gyur/ / gang gis sdug bsngal spong bar 'gyur/ /gang gis yongs su dag par 'gyur/ /dad pas chu bo rgal bar 'gyur/ /bag yod pas ni rgya mtsho rgal/ /brtson 'grus kyis ni sdug bsngal spong / /shes rab kyis ni yongs su dag /ces bya ba'i tshigs su bcad pa'o/ /ji ltar na dad pas chu bo rgal bar 'gyur ba yin zhe na/ 'di ltar 'di na kha cig 'dod pa rnams kyi nyes dmigs las brtsams nas/ nyan thos kyis bshad pa'am/ /sangs rgyas kyis gsungs pa'i chos nyan par byed de/ des chos de thos pas dad pa rnyed par 'gyur te/ dngos po'i 'dod pa spang ba'i phyir dang / nyon mongs pa'i 'dod pa spang ba'i phyir 'dun pa bskyed do/ /des khyim gyi 'dod pa rnams dngos po'i sgo nas spangs nas/ yang dag pa'i dad pas khyim nas khyim med par rab tu 'byung ngo / /de ltar rab tu byung nas kyang nyon mongs pa'i 'dod pa spang ba'i phyir rab tu dben pa la gnas par byed do/ /de brtun pa'i rgyu nas yang dag par yid la byed pa'i rgyu'i bar gyis nyon mongs pa'i 'dod pa rnams spangs nas/ 'dod chags dang bral ba'i sa mnyam par gzhag pa thob par 'gyur te/ de ltar na de dad pa la brten cing dad pa sngon du 'gro bar byas nas 'dod pa'i chu bo las rgal bar 'gyur ba lta bu'o/ /ji ltar na bag yod pas rgya mtsho las rgal bar 'gyur ba yin zhe na/ de gal te ting nge 'dzin de ro myong bar mi byed pa nas/ lhag par zhen cing mi 'dug gi /zag pa zad pa shes pa mngon sum du bya ba 'ba' zhig gi phyir sems gtad nas de ltar mnyam par gzhag pa'i sems yongs su dag cing yongs su byung la/ drang por gyur cing las su rung bas/ 'phags pa'i bden pa bzhi rtogs pa nas zag pa zad pa rjes su thob pa'i bar 'gyur te/ de ltar na des bag yod pa la brten cing bag yod pa sngon du 'gro bar byas nas gzugs su gtogs pa'i srid pa'i chu bo dang / gzugs med par gtogs pa'i srid pa'i chu bo dang / lta ba'i chu bo dang / ma rig pa'i chu bo ma lus par spangs nas rgya mtsho rgal bar 'gyur ro/ /ji ltar na brtson 'grus kyis sdug bsngal spong bar 'gyur ba yin zhe na/ 'di ltar 'di na slob pa bzhi mthong ba la khams gsum pa'i 'dod chags dang ma bral te/ de kun du sbyor ba thams cad ma lus par yongs su zad pa mngon sum du bya'o snyam nas/ rab tu dben pa la brten to / /brtson 'grus brtsams pa de la gnas pas 'dod pa la 'dun pa'i kun nas dkris pa'i sems kyis shas cher gnas par mi byed la/ 'dod pa'i 'dod chags kyis kun nas dkris pa byung na yang / nges par 'byung ba yang dag pa ji lta ba bzhin du shes te/ des 'dod pa la 'dun pa'i sgrib pa las sems yongs su dag par byas nas/ de'i 'dod pa la 'dun pa'i kun nas dkris pa'i rkyen de las skyes pa'i sems las byung ba'i sdug bsngal ba dang / yid mi bde ba gang yin pa de yang 'dod pa la 'dun pa'i kun nas dkris pa dang mgo mnyam du spong bar 'gyur ro/ /'dod pa la 'dun pa ji lta ba bzhin du the tshom gyi sgrib pa'i kun nas dkris pa'i rkyen de las bar du yang de dang 'dra bar rig par bya ste/ de ltar na brtson 'grus la brten cing / brtson 'grus sngon du 'gro bar byas nas sdug bsngal spong bar 'gyur ba lta bu'o/ /de la ji ltar na shes rab kyis yongs su dag par 'gyur ba yin zhe na/ des sgrib pa lnga po sems nye bar nyon mongs par byed pa nas/ mya ngan las 'das pa'i bar du mi 'gyur ba rnams spangs nas mi lcogs pa med pa 'ba' zhig la brten cing / mi lcogs pa med pa la gnas pas sdug bsngal ba dang / kun 'byung ba dang / 'gog pa dang / lam shes pa ji ltar thob pa des/ sdug bsngal la sdug bsngal ba nas/ lam la lam du yid la byed cing / zag pa thams cad zad pa khams gsum pa'i 'dod chags dang bral ba rjes su thob par 'gyur te/ de ltar na des sngar thob pa'i shes rab de nyid la brten cing shes rab sngon du 'gro bar byas nas yongs su dag par 'gyur ro/ /bshad pa 'di'i mdor lan btab pa ni mdor bsdu na bcom ldan 'das kyis so so'i skye bo'i ni 'dod chags dang bral ba sngar byas nas bden pa mngon par rtogs par rnam par dag par 'gyur la/ slob ba'i bden pa mngon par rtogs pa sngar byas nas 'dod chags dang bral ba rnam par dag par 'gyur bar bstan te/ de ni 'dir mdor lan btab pa yin par rig par bya'o/ /su zhig gdugs mtshan mi g.yel bar/ /chu bo 'di las rgal bar gyis / /mi dmigs mi gnas zab mo la/ /su zhig sgyid lug mi 'gyur lags/ /rnam pa kun dang tshul khrims ldan/ /shes rab ldan zhig mnyam gzhag la/ /nang du sems shing dran ldan pa/ /shin tu rgal dka' 'di las rgal/ /'dod pa'i 'du shes chags pa med/ /gzugs [(]gyi [,]kyi [)]kun du sbyor las 'das/ /mi dmigs mi gnas zab mo la/ /de ni sgyid lug mi 'gyur ro/ /zhes bya ba ni tshigs su bcad pa yin te/ chu bo gang zhe na/ chu bo ni bzhi ste/ 'dod pa'i chu bo nas ma rig pa'i chu bo'i bar rnams so/ /mi dmigs pa dang mi gnas pa gang zhe na/ sred pa zad par 'dod chags dang bral ba 'gog pa mya ngan las 'das pa dang / 'gog pa'i snyoms par 'jug pa'o/ /de ci'i phyir zhi na/ dmigs pa zhes bya ba ni nyon mongs pa'i kun nas dkris pa yin la/ gnas pa zhes bya ba ni nyon mongs pa'i bag la nyal ba yin te/ de gnyis ka gang la med pa de ni mi dmigs pa dang mi gnas pa zhes bya ste/ rnam grangs med na mya ngan las 'das pa la mi dmigs pa dang mi gnas pa zhes bya'o/ /gzhan yang dmigs pa zhes bya ba ni 'du shes yin la/ gnas pa zhes bya ba ni tshor ba yin te/ de gnyis gang la med pa de ni mi dmigs pa dang mi gnas pa yin te/ rnam grangs des na 'du shes dang tshor ba 'gog pa'i snyoms par 'jug pa la mi dmigs pa dang mi gnas pa zhes bya ste/ don gyi skabs 'dir ni 'du shes dang tshor ba 'gog pa'i snyoms par 'jug pa la bya bar dgongs so/ /ji ltar na rnam pa thams cad du tshul khrims dang ldan pa yin zhe na/ lus dang ngag gis bsdams pa dang / 'tsho ba yongs su dag par byed pa'o/ /ji ltar na shes rab dang ldan pa yin zhe na/ sdug bsngal 'phags pa'i bden pa nas/ 'phags pa'i lam gyi bden pa'i bar 'di dag yang dag pa ji lta ba bzhin du shes so/ /ji ltar na shin tu mnyam par gzhag pa yin zhe na/ 'dod pa rnams las dben pa nas/ bsam gtan bzhi pa'am/ srid pa'i rtse mo'i snyoms par 'jug pa'i bar du bsgrubs te gnas pa'o/ /ji ltar na nang du sems pa yin zhe na/ gnas nyi shu rtsa gnyis po rnams la rgyun mi 'chad par so sor rtog pa ste/ bdag ni khyim pa'i mtshan rtags bor bas mi sdug pa'o zhes bya ba nas/ rgyas par mdo las ji skad 'byung ba bzhin du sbyar bar bya'o/ /ji ltar na dran pa dang ldan pa yin zhe na/ gnas nyi shu rtsa gnyis po rnams la so sor rtogs pa de ni dge sbyong gi 'du shes la brten nas rtag tu byed cing rtag tu 'jug pas nye bar gnas te/ des kun du sbyor ba lhag ma spang bar bya ba'i phyir/ dran pa nye bar gzhag pa bzhi sgom pa'o/ /ji ltar na shin tu rgal bar dka' ba las rgal ba yin zhe na/ kun du sbyor ba ma lus pa spangs pas/ srid pa'i rtse mo shin tu rgal dka' ba las rgal ba ste/ de ni byis pa so so'i skye bo thams cad kyis rgal bar sla ba ma yin pa'i phyir ro/ /ji ltar na 'dod pa'i 'du shes rnams la chags pa dang bral ba yin zhe na/ de'i tha ma'i cha dang mthun pa'i kun du sbyor ba rnams yongs su shes nas spangs par gyur pa'i phyir ro/ /ji ltar na gzugs kyi kun du sbyor ba las 'das pa yin zhe na/ de'i gzugs dang ldan pa gong ma'i cha dang mthun pa'i kun du sbyor ba rnams yongs su shes nas spangs par gyur pa'i phyir ro/ /ji ltar na zab mo mi dmigs pa dang / mi gnas pa la sgyid lug par mi 'gyur ba yin zhe na/ gzugs med pa'i khams kyi 'dod chags dang bral ba'am/ yang na 'dod chags dang bral ba ma yin pa ste/ 'du shes med 'du shes med min skye mched thob pa 'gog pa'i snyoms par 'jug pa la snyoms par 'jug pa'i skal ba dang ldan zhing mthu yod pa ste/ 'di la ni slob pa yang yod la/ mi slob pa yang yod de/ gang gi phyir gzugs med pa'i kun du sbyor ba rnams las 'das pa zhes gcig tu nges par ma gsungs pa'i phyir ro/ /bshad pa 'di'i mdor lan btab pa ni/ mdor bsdu na bcom ldan 'das kyis/ mchog gi mthar thug pa'i rjes su thob par bya ba dang / mchog gi gnas pa rtogs par 'gyur ba'i lam bstan pa yin te/ de ni 'dir mdor lan btab pa yin par rig par bya'o// //bam po nyi shu gnyis pa/ bcom ldan byis pa ma ma dag la brten pa ltar/ /'dod chags zhe sdang gnyis kyi gzhi ni gang zhig lags/ /dga' dang mi dga' spu zing bgyid pa gang las byung / /yid kyi rtog pa rnams kyang gang las byung ba lags/ /n+ya gro d+ha yi sdong po ltar/ /rlan las skyes shing bdag las byung / /nags la ma lus 'khri shing ltar/ /'dod pa rnams la so sor 'phro/ /byis pa dag ni ma ma dag la brten pa ltar/ /'dod chags zhe sdang gnyis kyi gzhi ni de las byung / /dga' dang mi dga' spu zing byed pa de las byung / /yid kyi rtog pa rnams kyang de las byung ba yin/ /gnod sbyin de dag gang las byung ba'i gzhi shes pa'i/ /skye bo gang yin de rnams de dag spang gyur zhing / /de dag 'dir ni yang srid med par bya ba'i phyir/ /sngon chad ma rgal rgya mtsho chu bo rgal bar 'gyur/ /zhes bya ba ni tshigs su bcad pa yin te/ 'dod chags dang zhe sdang gang zhe na/ 'di ltar 'di na khyim na gnas pa kha cig / yul yid du 'ong ba rnams sam/ sems can yid du 'ong ba dang 'grogs na lhag par zhen pa skye bar 'gyur la/ yul la yid du mi 'ong ba rnams sam/ sems can yid du mi 'ong ba rnams dang 'grogs na khong khro ba skye bar 'gyur ba lta bu'o/ / mi dga' ba dang dga' ba gang zhe na/ 'di ltar 'di na kha cig de bzhin gshegs pas gsungs pa'i chos 'dul ba 'phral la skyes pa thang cig tsam gyis dad pa thob nas/ thog ma dang tha ma'i yon tan dang / nyes pa legs par ma brtags par gya tshom du nan gyis longs spyod spangs te rab tu byung la/ de ltar na rab tu byung nas khyim pa dang rab tu byung ba dag dang 'dre bar gnas te/ de 'das pa dang ma 'ongs pa'i longs spyod dang / sems can dang 'grogs pa rjes su dran nas gdung zhing yid mi bde la/ yid la gcags pa'i sems kyis yongs su 'dzin cing 'dug pa dang / kha cig ni dad pas rab tu byung ba yang ma yin/ gya tshom du rab tu byung ba yang ma yin mod kyi/ rgyal po'i bka' nan nam/ 'tsho ba med pa'i bar gyi 'jigs pas skrag pa'i phyir rab tu byung ste/ de de ltar rab tu byung nas bram ze dang / khyim bdag dad pa dag las dus dus su rnyed pa dang / bkur sti byung ba'i ro myong bar byed de/ kye ma zhing rmo yang mi dgos la/ tshong bya yang mi dgos par tshegs chung dus 'tsho ba 'grub pa 'di ni legs pa yin no/ /kye ma 'di ni rab yin no snyam ste/ des rnyed pa dang bkur sti de nyid rgyur byas nas mngon par dga' ba lta bu'o/ /spu zing zhes byed pa dang / rtog pa gang zhe na/ 'di ltar 'di na kha cig nan gyis rab tu byung ba nyid kyang ma yin la/ 'tsho ba'i phyir rab tu byung ba yang ma yin te/ de ltar de dad pas khyim nas khyim med par legs pa kho nar rab tu byung nas kyang / khyim pa dang / rab tu byung ba rnams dang 'dre zhing mi gnas par rab tu dben par gnas la/ de rab tu dben pa na gnas pa na mtshan mo mun nag lta bu mthong ngam/ 'brug sgra chen po'am ser ba drag po 'bab pa'i sgra'am/ seng ge'am/ stag gam/ gzig gi sgra thos sam/ g.yo can nam/ chom rkun nam/ mi ma yin pa byung ba mthong na/ 'jigs pa 'am/ bag tsha ba'am/ spu zing zhes byed pa 'byung ba dang / yang nyin par ni 'das pa dang / ma 'ongs pa'i 'dod pa rnams dang / 'das pa dang / ma 'ongs pa'i sems can la brten nas/ zhen pa la brten pa'i rtog pa 'di lta ste/ 'dod pa la rtog pa nas rgyas par khyim gyi 'byor pa dang ldan pa'i bar gyi rtog pa 'byung ba'o/ /de ltar 'dod chags dang zhe sdang la sogs pa ji ltar bstan pa de dag n+ya gro d+ha'i sdong po bzhin du rlan las skyes pa ni ji lta bu/ bdag las 'byung ba ji lta bu zhe na/ rlan pa zhes bya ba ni chu dang 'dra ba'i sred pa gang gi rkyen gyis len pa thams cad skye ba la bya ste/ de la yang 'dod chags dang zhe sdang la sogs pa nas/ rtog pa la thug pa yan chad thams cad kyi spyi'i rgyu yin no/ /bdag ces bya bas ni 'dod chags dang zhe sdang la sogs pa nas/ rtog pa la thug pa'i bar de dag nyid gyi rang rang gi sa bon dang / khams dang / rang bzhin no/ /'dod chags dang zhe sdang la sogs pa nas/ rtog pa la thug pa'i bar de dag nyid nags tshal la 'khri zhing ma lu pa rgyas pa bzhin du 'dod pa can rnams la ji ltar so sor 'phro zhe na/ mdor bsdu na/ so so'i 'dod pa ni rnam pa drug ste/ 'di lta ste/ gzhi gang dang / dmigs pa gang las khyim na gnas pa rnams kyi 'dod chags dang zhe sdang skye bar 'gyur ba da ltar byung ba'i dngos po'i 'dod pa rang gi zho shas bsgrubs pa rnams dang / 'di lta ste/ gzhi gang dang / dmigs pa gang las rab tu byung ba de dag gi 'tsho ba'i phyir dga' ba skye bar 'gyur ba/ da ltar nyid kyi dngos po'i 'dod pa pha rol las thob pa rnams dang / 'di lta ste/ gzhi gang dang / dmigs pa gang las nan gyis rab tu byung ba de dag mi dga' ba skye bar 'gyur ba 'das pa dang / ma 'ongs pa'i dngos po'i 'dod pa nyid dang / lhag ma rnams ni nyon mongs pa'i 'dod pa ste/ de dag kyang mdor bsdu na rnam pa gnyis te/ 'di lta ste/ dad pas rab tu byung nas dben par gnas pa dang / /mtshan mo gzhi gang dang / dmigs pa gang las de 'jigs pa'am/ bag tshaba'am/ spu zing zhes byed pa 'byung bar 'gyur ba 'dod pa na spyod pa bdag nyid kyi lus dang srog la kun du rtog pa'i 'dod chags ma spangs pa dang / yang na gzhi gang dang dmigs pa gang las nyin par de'i rtog pa 'byung bar 'gyur ba gang zag de nyid kyi phyi rol gyi gzugs dang / sgra dang / dri dang / ro dang / reg bya rnams la kun du rtog pa'i 'dod chags ma spangs pa'o/ /dge sbyong dang bram ze gang dag 'dod chags dang zhe sdang la sogs pa ji skad bstan pa de dag gzhi ci las byung ba yang dag pa ji lta ba bzhin du rab tu shes pa de dag ni rten cing 'brel bar 'byung ba dang / mi rtag pa nyid khong du chud pas/ skyes pa rnams ni dang du mi len cing spong la sel cing med par byed de/ spangs nas kyang gzugs dang gzugs med pa'i 'dod chags dang bral ba dang / 'dod pa'i 'dod chags dang bral bas srid pa'i rgya mtsho dang 'dod pa'i chu bo gang de dag gis sngon ma rgal ba yang rgal bar 'gyur la/ rgal ba de dag las kyang phyir yongs su nyams par mi 'gyur ro/ /bshad pa 'di mdor lan btab pa ni/ mdor bsdu na/ bcom ldan 'das kyis gnas skabs gsum ste/ khyim na gnas pa'i gnas skabs dang / rab tu byung ba'i gnas skabs dang / rab tu dben pa na gnas pa'i gnas skabs na/ thun mong ba dang / thun mong ma yin pa'i rgyus/ rjes su chags pa dang / khong khro ba grub pa dang / 'dod pa rnams la so sor 'phro ba'i spang ba'i thabs dang / spang ba'i phan yon bstan te/ de ni 'dir mdor lan btab pa yin par rig par bya'o/ /de la 'dod chags gang yin pa dang / dga' ba gang yin pa dang / zhen pa la brten pa'i rtog pa gang yin pa de dag ni/ 'dod chags kyi phyogs yin par rig par bya'o/ /zhe sdang gang yin pa dang / mi dga' ba gang yin pa dang / 'jigs pa gang yin pa de ni khong khro ba'i phyogs yin par rig par bya'o/ /de ni srid pa mi 'tshal bas/ /'dod pa rnams ni spangs slad du/ /bram ze ngal ba ma mchis pas/ /spang ba de ni bgyi ba lags/ /don byas bram ze 'dod pa'i phyir/ /bram ze la ni bya ba med/ /ji srid gting dang 'gram du ma phyin pa/ /de srid de ni lus rnams kun gyis rtsol/ /rgal nas de ni 'di na thang la gnas/ /rtsol ba med pa pha rol phyin ces bya/ /gang zhig zag zad rtag 'grus bsam gtan thob/ /de yis rims nad mya ngan kun spangs shing / /gang zhig yang dag dran sems grol pa yi/ /bram ze'i dper bya ba ni 'di yin lha/ /zhes bya ba ni tshigs su bcad pa 'di yin te/ lha mo des kun rdzob kyi bram ze las bsams nas/ rus dang ris smos pa'i bram ze gang dag ni bram ze'o snyam du 'dzin pa de dag ni tshangs pa'i 'jig rten gyi mthar thug par byed cing / tshangs pa'i 'jig rten 'dod pas gnas te/ brtson 'grus brtsams shing yid yongs su skyo ba med pa la/ rab tu dben par gnas pa de dag gis dngos po'i 'dod pa spangs pa dang / nyon mongs pa'i 'dod pa spangs pa'i phyir spong ba'i don la bsgrim par bya'o zhes/ bcom ldan 'das la gsol te/ 'di ltar de dag ni tshangs pa'i 'jig rten gyi mthar thug par byed cing / tshangs pa'i 'jig rten don gyi 'dod pa'i srid pa ni ma yin no/ /de bzhin gshegs pas ni don dam pa'i bram ze la dgongs pas lha mo la lan 'debs par mdzad de/ gang zhig byas zin kyang / yang dang yang du bya dgos pa dang / gong nas gong du bya dgos pa de ni bram ze ma yin gyi/ gang zhig bram zer byed pa dang / bram zer byed pa'i don rtogs pas 'jig rten thams cad kyi pha rol du rgal nas/ thang la gnas pa de ni bram ze yin te/ rnam grangs des na slob pa dang mi slob pa gnyis ka yang bram ze yin no/ /de la yang slob pa la rnam pa gnyis te/ 'dod pa rnams las 'dod chags dang ma bral ba dang / 'dod chags dang bral ba'o/ /de la 'dod chags dang ma bral ba gang yin pa de ni gting sleb pa ma yin la/ 'gram du phyin pa yang ma yin no/ /rnam pa gnyis dang mi ldan pa yang ma yin te/ nang gi sems kyi zhi gnas kyang ma thob la/ lhag pa'i shes rab chos kyi lhag mthong thob pa yang nang gi sems kyi zhi gnas med pas shin tu rnam par dag pa ma yin no / /lam gyi gru ji ltar thob pa la zhugs nas rkang pa lta bu'i nang gi sems kyi zhi gnas thob par bya ba'i phyir yang brtson 'grus brtsams pas 'bad par byed la/ lag pa lta bu'i lhag pa'i shes rab chos kyi lhag mthong rnam par dag par bya ba'i phyir yang brtson 'grus brtsams pas 'bad de 'bad par byed pa na/ gting lta bu'i 'dod pa'i 'dod chags dang bral ba dang / 'gram lta bu'i dgra bcom pa nyid kyang thob par 'gyur ro/ /slob pa 'dod pa'i 'dod chags dang bral ba ni/ nang gi zhi gnas kyang thob la/ rnam par dag pa'i lhag mthong yang 'thob ste/ de ni gong ma'i cha dang yang mthun pa kho na'i kun du sbyor ba rnams spang ba tsam gyi don du 'bad pa yin gyi/ lus thams cad kyi ni ma yin no/ /'gram du phyin pa ni dgra bcom pa bya ba byas pa/ 'bad pa med pa/ pha rol tu son nas gnas pa yin te/ rnam grangs des na gsum po 'di dag thams cad ni don dam pa'i bram ze yin te/ slob pa gnyis dang / mi slob pa'o/ /de la 'gram du son pa'i bram ze gang yin pa de ni zag pa zad pa'o/ /de la slob pa 'dod pa rnams las 'dod chags dang ma bral zhing lus thams cad kyis 'bad pa gang yin pa de ni rtag 'grus can no/ /de la slob pa 'dod chags dang bral ba gting sleb pa gang yin pa de ni bsam gtan thob pa yin no/ /bsam gtan thob pa gang yin pa de ni tha ma'i cha dang mthun pa'i kun du sbyor ba'i spangs pas ni 'dod pa'i 'dun pa dang / gnod sems kyi phyogs kyi mya ngan dang / rims nad thams cad spangs so/ /zag pa zad pa gang yin pa de ni bsgom pas spang bar bya ba'i nyon mongs pa rnams spang bar bya ba'i phyir dran pa nye bar gzhag pa bzhi bsgoms nas/ yang dag pa'i dran pa'i sems rnam par grol bar 'gyur te/ de ni bya ba byas nas yang dang yang du bya dgos pa yang med la/ gong nas gong du bya dgos pa yang med do/ /de bas na de ni don dam pa'i bram ze yin no/ /dge slong khyod chu bo las rgal tam/ lha mo de lta yin no/ /dmigs pa med pa dang / gnas pa med par chu bo las rgal tam/ lha mo de lta bu yin no/ /dge slong khyod ji lta bur dmigs pa med pa dang / gnas pa med pa chu bo las brgal/ lha mo nga ni ji lta ji ltar 'dzin pa de lta de ltar 'bying ngo / /ji lta ji ltar 'bying ba de lta de ltar 'dug go/ /ji lta ji ltar 'dug pa de lta de ltar khyer ro/ /lha mo nga ni ji lta ji ltar 'dzin pa med pa de lta de ltar 'bying ba med do zhes bya ba nas/ rgyas par dkar po'i phyogs kyang rig par bya'o/ /de la dmigs pa med pa dang gnas pa med pa zhes bya ba de ni mya ngan las 'das pa dang / 'gog pa'i snyoms par 'jug pa yin te/ snga ma bzhin no/ /byang chub sems dpa'i sngon gyi spyod pa dka' ba spyod pa na/ thabs ma yin pas yongs su zin pa'i brtson 'grus dang / byang chub kyi snying po la zhugs pa na/ thabs ma yin pas yongs su zin pa'i brtson 'grus rtsom pa spang ba yongs su shes pa la dgongs nas/ bcom ldan 'das kyis/ lha mo nga ni ji lta ji ltar 'dzin pa de lta de ltar 'bying ngo / /ji lta ji ltar 'bying ba de lta de ltar 'dug go/ /ji lta ji ltar 'dug pa de lta de ltar khyer ro zhes gsungs te/ de las bzlog pa ni dkar po'i phyogs su rig par bya'o/ /de la dka' ba spyod pa na/ thabs ma yin pas yongs su zin pa'i brtson 'grus gang yin pa de ni 'dzin pa zhes bya'o/ /log par brtson pa na dge ba'i chos yongs su nyams pa gang yin pa de ni 'bying ba zhes bya'o/ /dge ba'i chos yongs su nyams par shes bzhin du log par brtson pa las mi bzlogs pa gang yin pa de ni 'dug pa zhes bya'o/ /dka' ba spyod pa btang nas slob dpon yongs su tshol zhing / lhag spyod dang / ring 'phur la sogs pa mu stegs can gyi gnas rnams su rgyu ba ni khyer ba'o/ /byang chub kyi snying po la bzhugs pas kyang / thabs ma yin pas yongs su zin pa'i brtson 'grus spangs nas/ dge ba'i chos rnams kyis 'bogs la/ ji lta ji ltar 'bogs pa de lta de ltar dge ba'i chos la chog mi shes par gnas te/ spong ba las phyir mi nur zhing ches gong nas gong dang / ches bzang ba bas kyang bzang ba 'dod la/ de de ltar chog mi shes pas slob dpon gzhan mi tshol te/ slob dpon med par byang chub kyi phyogs kyi chos sum cu rtsa bdun bsgoms nas/ bla na med pa yang dag par rdzogs pa'i byang chub mngon par rdzogs par sangs rgyas te/ don rnam pa bzhi po 'di dag 'dzin pa med pa la sogs pa'i tshig bzhi dang go rims bzhin du sbyar bar rig par bya'o/ /mya ngan las 'das pa dmigs pa med pa gnas pa med pa las brtsams pa'i rnam grangs gzhan yang / bag la nyal ba dang bcas pa'i nyon mongs pa'i kun nas dkris pa chu bo lta bu mi rgal ba ji lta bu zhe na/ mdor bsdu na/ rnam pa bzhi ni rgal te/ rnam pa bzhi gang zhe na/ thog ma kho nar ni zhen pa la brten pa'i rtog pa'o/ /zhen pa la brten pa'i rtog pa la brten nas le lo 'byung ngo / /le lo la brten nas so so skye bo'i dngos po la gnas so/ /so so skye bo'i dngos po la gnas pa la brten nas 'khor ba'i rgyun gyi rjes su 'gro ba'i sred pas/ 'gro ba lnga'i 'khor ba'i rgyun phyogs su 'gro ba'o/ /de las bzlog pa rnam pa bzhis ni chu bo las brgal bar rig par bya'o/ /'du shes dang tshor ba 'gog pa'i snyoms par 'jug pa las brtsams pa'i rnam grangs gzhan yang / 'di ltar 'di na la la 'gog pa'i snyoms par 'jug pa dang por thob la/ de bag med par gnas shing 'du shes dang tshor ba de la shas cher gnas la/ 'du shes dang tshor ba 'gog pa de ni shas cher mi gnas te/ gzhi des 'gog pa'i snyoms par 'jug pa las yongs su nyams par 'gyur ro/ /nyams nas kyang sa 'og mar skye ba'i rgyu la gnas so/ /rgyu la gnas nas kyang de'i 'bras bu la sems gzhol bar 'gyur ro/ /de las bzlog pa ni dkar po'i phyogs su rig par bya'o/ /khyod ni gcig pu dgon par bsam gtan rtsom/ /nor med gyur tam 'on te sgrub pa yod/ /grong du nyes pa 'ba' zhig byas gyur tam/ /ci'i phyir skye bo dag dang bshes mi byed/ /khyod ni su dag dang yang bshes pa med/ /'di na dga' bde'i ngo bo'i sde btul nas/ /don thob pas na 'di na snying zhi gyur/ /nga ni gcig pu bsam gtan bde ba myong / /de phyir skye bo dag dang bshes mi byed/ /nga ni su dag dang yang bshes pa med/ /zhes bya ba ni gzhon nu mas zhus pa'i tshigs su bcad pa yin no/ /don thob pa ni rnam pa gnyis te/ dge sbyong gi tshul gyi don thob pa dang / 'phags pa'i rdzu 'phrul gyi don thob pa'o/ /de la don thob pa ni gcig ni sdug bsngal thams cad las yang dag par 'da' bar 'gyur ba yin no/ /cig shos ni rnam par thar pa brgyad bsam gtan du byed pas tshe 'di nyid la bde bar gnas par bya ba yin no/ /de la yang gcig ni dga' ba dang bde ba'i ngo bo'i bdud kyi sde pham par 'gyur ba yin no/ /cig shos ni gcig pu bsam gtan byed pas bde ba'i mchog la longs spyod par 'gyur ba yin te/ don gyi skabs 'dir 'phags pa'i rdzu 'phrul la bya bar bzhed do/ /de ci'i phyir zhe na/ 'di ltar 'di na kha cig 'phags pa'i rdzu 'phrul don du bsgrub pa'i phyir/ zad par gyi skye mched bcu la brten nas rnam par thar pa yongs su dag par bya ba la brtson par byed de/ 'di ltar zad par gyi skye mched kyi snyoms par 'jug pa yongs su rdzogs shing yongs su dag na rnam par thar pa yang yongs su dag cing yongs su byang bar 'gyur la/ 'phags pa'i rdzu 'phrul gyi don yang 'grub par 'gyur ba'i phyir ro/ /de ltar de yongs su grub par shes te/ bdag gi don ni yongs su grub po snyam du de ltar shes nas/ de dge sbyong tshul gyi don dang ldan pa'i dge sbyong du 'gyur te/ nor 'dod pa de dang / nyes pa de dag dang / yul gyi mi dang bshes pa'i thog ma yang shes/ nyes dmigs dang nges par 'byung ba dang / nges par 'byung bar 'gro ba'i lam yang shes so/ /de la thog ma zhes bya ba ni/ de dag skye ba'i gzhi yin no/ /nyes dmigs ni mi rtag pa dang / sdug bsngal ba dang / 'gyur ba'i chos can yin no/ /nges par byung ba ni 'dun pa'i 'dod chags 'dul ba dang / spong ba yang dag par 'da' ba yin no/ /nges par 'byung ba la 'gro ba'i lam ni 'phags pa'i lam yan lag brgyad pa yin no/ /de'i phyir thog ma mthong ba nas/ nges par 'byung bar 'gro ba'i lam gyi bar du mthong ba'i phyir/ sems can nor dang ldan pa gang yin pa de dag nyes pa med pa dang / yul gyi mi dang bshes par byed pa des snying zhi bar 'dzin cing / khyim na gnas pa las mngon par byung ba rnam par thar pa brgyad bsam gtan byed pa rnams kyi snying zhi ba la skur pa 'debs pa de dag gi snying zhi ba gang yin pa de legs par ma mthong ste/ legs par ma rig legs par ma brten/ legs par ma rtogs so/ /des ni yang dag par snying zhi ba gang yin pa de 'di las bzlog pa las legs par mthong bas na / legs par rtogs pa'i bar du sbyar ro/ /bshad pa 'di'i mdor lan btab pa ni/ mdor bsdu na/ bcom ldan 'das kyis 'dod pa la longs spyod cing / 'dre bar gnas pa rnams kyi snying ni yang dag par rab tu ma zhi ba rnam par thar pa brgyad la bsam gtan pa rnams kyi zang zing med pa'i snying ni yang dag par zhi bar bstan te/ 'di ni mdor lan btab pa yin par rig par bya'o/ /kye ma 'du byed rnams mi rtag /skye dang 'jig pa'i chos can yin/ /skyes nas 'gag par 'gyur ba ste/ /de dag nye bar zhi ba bde/ /zhes bya ba ni tshigs su bcad pa yin te/ phung po rnams dang / nye bar len pa'i phung po rnams ni 'du byed rnams zhes bya'o/ /don gyi skabs 'di ni nye bar len pa'i phung po rnams kho na la bya bar bzhed do/ /nye bar len pa'i phung po lnga po de dag kyang mdor bsdu na rnam pa gsum ste/ 'das pa rnams dang / ma 'ongs pa rnams dang / da ltar byung ba rnams so/ /de la 'du byed mi rtag pa ni 'du byed de dag nyid snga na med pa las 'byung ba dang / sngar 'byung ba las 'jig pa gang yin pa'o/ /de la 'das pa'i tshe rabs dag tu 'das pa'i lus thob pa rnams kyi phung po mngon par 'das shing 'gags pa gang yin pa de dag byung nas med par gyur pas na mi rtag pa'o/ /ma 'ongs pa'i tshe rabs dag tu ma 'ongs pa'i lus thob pa rnams kyi phung po ma skyes shing ma byung la/ med par ma gyur te/ skye bar 'gyur ba'i skal ba can gang yin pa de dag ni skye ba'i chos can yin no/ /da ltar byung ba'i tshe rabs dag tu da ltar byung ba'i lus thob pa rnams/ gnas shing 'tsho la sdod pa'i sems can rnams kyi phung po 'chi ba'i chos can 'chi 'pho ba'i 'gag pas 'gag par 'gyur ba'i skal ba can gang yin pa de dag ni 'jig pa'i chos can no/ /de la ma 'ongs pa dag na phung po'i lus 'thob par 'gyur ba skye ba'i chos can gang yin pa de dag la yang lus 'thob pa gang rtag pa dang / brtan pa nas/ yang dag pa de kho na bzhin du gnas pa'i bar de ni med kyi/ skyes shing skyes shing 'gag pa kho nar zad do/ /de la tshe 'di nyid la ma 'ongs pa'i phung po'i rgyu yongs su zad par gyur pa'i sems can rnams kyi ma 'ongs pa'i lus kyi phung po thams cad du mngon bar mi 'grub pa gang yin pa de ni de dag nye bar zhi ba'o/ /nye bar zhi ba de yang rnam pa gnyis kyi bde ba yin te/ sdug bsngal gyi rgyu thams cad 'gags pas gnas ngan len thams cad rgyun chad pa'i phyir tshe 'di nyid la bde bar gnas pas bde ba dang / phyi ma la yang skye ba dang / rga ba dang / na ba la sogs pa'i sdug bsngal las rnam par thar pa'i phyir bde ba'o/ /bshad pa 'di'i mdor bstan pa ni mdor bsdu na/ bcom ldan 'das kyis yang dag pa'i lta ba'i gnas dang / yang dag pa'i lta ba'i 'bras bu bstan to/ /rnam grangs gzhan yang yongs su shes pa'i gnas dang / spong ba yang bstan to/ /yang yongs su shes par bya ba'i chos rnams dang / yongs su shes pa yang ma yin no/ /yang dus gsum gyi 'du byed rnams kyi kun nas nyon mongs pa dang / de rnam par zhi bas rnam par byang ba yang bstan to/ /yang rten cing 'brel par 'byung ba'i 'gag pa yang bstan to/ /yang sdug bsngal gyi bden pa dang / 'gog pa'i bden pa yang bstan to/ /yang rnam par thar pa'i sgo stong pa nyid dang / smon pa med pa'i gnas dang / rnam par thar pa'i sgo mtshan ma med pa'i gnas kyang bstan to/ /yang bden pa mngon par rtogs pa dang / mi mthun pa'i chos gnyis te/ spros pa la 'jug pa dang / spros pa med pas skrag pa spong ba'i gnas kyang bstan to/ /yang 'di las phyi rol pa'i gnyen po'i chos 'di la phyi rol pa dag dang thun mong ma yin pa gnyis la 'di lta ste/ shes par bya ba phyin ci log pa dang / phyin ci ma log pa nyid kyang bstan te/ /bag yod pa ni 'chi me dag nas/ /bag med pa ni 'chi ba'i gnas/ /bag yod rnams ni 'chi ba med/ /bag med rnams ni rtag tu 'chi/ /zhes bya ba ni tshigs su bcad pa yin te/ bag yod pa ji ltar 'chi ba med pa'i gnas yin zhe na/ 'di ltar 'di na la la rten bzhi la brten nas kun du bsrung ba rnam pa bzhi la gnas te/ srog kun du bsrung ba dang / nyams stobs kun du bsrung ba dang / sems kyi kun nas nyon mongs pa kun du bsrung ba dang / yang dag pa'i sbyor ba kun du bsrung ba'o/ /'di ni bag yod pa zhes bya ste/ de bag yod pa de la rten cing gnas nas/ mya ngan las 'das pa'i tshogs yongs su ma rdzogs pa ni yongs su rdzogs par byed la/ mya ngan las 'da' ba'i tshogs yongs su rdzogs pa ni tshe 'di nyid la yongs su mya ngan las 'da' bar byed pa lta bu'o/ /bag med pa ji ltar 'chi ba'i gnas yin zhe na/ 'di ltar 'di na khyim pa gos dkar po can la la lhag par zhen pas 'dod pa la yongs su spyod cing / mi dge ba'i las dag kyang byed pa'am/ rab tu byung ba kun du bsrung ba rnam pa bzhi po yang dag pa'i sbyor ba kun du bsrung ba'i bar rnams la mi snang bar yang rung ste/ khyim pa'i phyogs su gtogs pa dang / rab tu byung ba'i phyogs su gtogs pa'i phyogs de gnyi ga ni bag med pa zhes bya ste/ des bag med pa de la brten cing gnas nas/ skye ba'i rtsa ba can gyi 'du byed rnams la mngon par dga' zhing / skye ba'i rtsa ba can gyi las rnams kyang byed do/ /de'i rgyus skye bar 'gyur ro/ /skyes nas kyang 'chi ba'i dus byed pa lta bu'o/ /bag yod pa rnams ni ji ltar mi 'chi la/ bag med pa rnams ni ji ltar rtag tu shi zhe na/ 'chi ba ni rnam pa lnga ste/ dul ba'i 'chi ba dang / ma dul ba'i 'chi ba ba dang / 'das pa dang / da ltar byung ba dang / ma 'ongs pa'i 'chi ba rnams so/ /de ltar bag yod pa shin tu bsgoms pa'i gang zag ni da ltar byung ba'i dus na dul bas 'chi bas 'chi ba na/ 'das pa la brten nas/ 'das pa'i 'chi bas shi ba yin zhing / ma dul ba'i 'chi bas shi ba yang yin no/ /da ltar byung ba'i dus na ni ma dul ba'i 'chi bas 'chi ba ma yin no/ /ma 'ongs pa'i dus na ni dul ba'i 'chi bas 'chi ba yang med/ ma dul ba'i 'chi bas 'chi ba yang med de/ de bas na 'chi ba med pa zhes bya ba'o / /bag med pa'i gang zag ni da ltar byung ba'i dus na ma dul ba'i 'chi bas 'chi ba na 'das ba'i dus na yang ma dul ba'i 'chi bas shi bar gyur la/ da ltar byung ba'i dus na yang ma dul ba'i 'chi ba nyid kyis 'chi zhing / ma 'ongs pa'i dus na yang ma dul ba'i 'chi ba nyid kyis 'chi bar 'gyur te/ de bas na rtag tu shi ba zhes bya'o/ /bshad pa 'di'i mdor bstan pa ni/ mdor bsdu na bcom ldan 'das kyis bag yod pa'i gang zag gi lam gyi bden pa dang / 'gog pa'i bden pa dang / bag med pa'i gang zag gi kun 'byung ba'i bden pa dang / sdug bsngal gyi bden pa bstan to/ /yang gnas dang gnas ma yin pa dang / las bdag gir bya ba bstan te / phyed gong mas ni gnas dang gnas ma yin pa bstan to/ /phyed 'og mas ni las bdag gir bya ba bstan to/ /yang phyed gong mas ni nyan pa rnams la ston pa'i bya ba bstan to/ /phyed 'og mas ni nyan pa rnams kyi rang gi don gyi bya ba bstan to/ / rtog pas rab tu bcom pa'i skye ba bo/ /'dod chags shas cher sdug par lta ba ni/ /sred pa phyir zhing rnam par 'phel 'gyur te/ /des ni de yi 'ching ba dam par byed/ /ces bya ba ni tshigs su bcad pa yin te/ ji ltar na rtog pas rab tu bcom pa yin zhe na/ 'di ltar 'di na la la sngon thob cing sngon yongs su spyad pa'i 'dod pa rnams la tshul bzhin ma yin pa yid la byed pa na mi dge ba'i rtog pa sdig pa can zhen pa la brten pa la rtog par byed pa lta bu'o/ /ji ltar na 'dod chags shas che ba yin zhe na/ 'di ltar 'di na la la sngon gyi tshe rabs gzhan dag tu 'dod pa'i 'dod chags kun du brten cing bsgoms te mang du byas pa de'i rgyus/ de da ltar sngon thos pa dang / sngon yongs su spyad pa'i 'dod pa rnams la tshul bzhin ma yin pa yid la byed pas/ 'dod pa'i 'dod chags kyis sems 'joms par byed pa lta bu'o/ /ji ltar na sdug par lta ba yin zhe na/ 'di ltar 'di na la la lus ma bsrungs shing dbang po yang dag par ma bsdams la dran pa nye bar ma bzhag pas grong du rgyu ba na/ bud med gzhon nu kha dog rgyas shing chags su rung ba mthong la tshul bzhin ma yin pa'i sdug pa'i mtshan ma 'dzin par byed cing / de'i rgyus yongs su gdung bar 'gyur te/ lus dang sems kyis yongs su gdung bar 'gyur ba lta bu'o/ /sred pa 'phel bar ji ltar rig par bya zhe na/ rtags dang mtshan ma rnam pa lngas sred pa 'phel bar rig par bya ste/ lnga gang zhe na/ 'di ltar 'di na la la 'dod pa'i dngos po ngan pa la yang 'dod pa'i 'dod chags drag po'i kun nas dkris pas lhag par zhen na bzang po lta la ci smos chos ma yin pas bab col du phal cher longs spyod sgrub par byed kyi/ chos kyis ni ma yin te/ yo byad kyang shas cher kun du 'dzin to/ /de dngos po mi gces shing mi 'khol ba yang yongs su gtong bar mi 'dod na/ gces pa lta ci smos/ longs spyod nyung ngu dang tha chad dag gi phyir yang lus dang ngag gi nyes par spyod pa mang po byed na mang po dang mchog rnams kyi phyir lta ci smos/ legs par spyad pa yang dag par blangs pa chung ngu la yang de'i sems mi 'jug cing mi dga' na/ mang po lta ci smos te/ mya ngan las 'das pa ni thos par yang mi 'dod na/ thob par lta ga la 'dod pa lta bu'o/ /'ching ba dam po gang zhe na/ rnam pa gsum gyis 'ching ba dam por 'gyur bar rig par bya ste/ brtan pa dang / sdug bsngal gyi 'dus te reg pa dang / yun ring por rjes su 'brel pa'o/ /de la tshe 'di'i nyes par spyod pa'i rtsa ba chags pa dang / zhe sdang dang / gti mug rnams kyis ni 'ching ba brtan par rig par bya'o/ /sems can dmyal ba dang / dud 'gro dang yi dags su skye bas ni/ sdug bsngal gyi 'dus te reg pa dang / rgyun mi 'chad par 'byung bas ni yun ring ba rjes su 'brel par rig par bya'o/ /bshad pa 'di'i mdor bstan pa ni rnam par 'jig pa'i rgyu rnam pa gnyis la brten nas 'jig pa rnam pa gnyis su rig par bya ste/ rnam par 'jig pa'i rgyu gnyis gang zhe na/ tshul bzhin ma yin pa yid la byed pa'i stobs dang / rgyu'i stobs so/ /rnam par 'jig pa'i rnam pa gnyis gang zhe na/ yongs su tshol ba rnam par 'jig pa dang / longs spyod rnam par 'jig pa'o/ /tshul bzhin ma yin pa yid la byed pa'i stobs gang zhe na/ spyad zin pa'i yul rjes su dran pa'i rgyu las byung ba rnam par rtog pa ngan pa dang / yul mngon sum du gyur pa'i rgyu las byung ba'i mtshan ma ngan pa 'dzin pa ste/ de yang gnas pa dang / rgyu zhing 'gro ba'i tshe'o/ /rgyu'i stobs gang zhe na/ chags su rung ba'i yul rnams la snga nas 'dod chags la goms pa'o/ /yongs su tshol ba'i rnam par 'jig pa gang zhe na/ 'di ltar 'di na la la rnam par 'jig pa'i rgyu 'di gnyis dang ldan pas chos ma yin pas bab col du log pa'i longs spyod rnams la sogs pa'i phyir yongs su tshol bar byed pa lta bu'o/ / longs spyod rnam par 'jig pa gang zhe na/ 'di ltar 'di na la la bde ba dang mthun pa dang / sdug bsngal ba dang mthun pa dang / bde ba yang ma yin sdug bsngal ba yang ma yin pa dang mthun pa'i yul thob pa rnams las/ kha cig la ni chags pa dang zhen par 'gyur ba nas/ rgyas par nges par 'byung ba mi shes pas longs spyod pa'i bar du sbyar ro/ /kha cig la ni zhe sdang zhing / zhe sdang gis zil gyis non par 'gyur ro/ /kha cig la ni rmongs shing gti mug gis zil gyis non par 'gyur ro/ /de de ltar chags shing 'dod chags kyis zil gyis non pa nas/ gti mug gi bar gyis zil gyis non pa dang / lus dang ngag dang / yid kyis nyes par spyad pa spyod de/ des ni 'dod chags kyi 'ching ba yang dam por byed la/ zhe sdang gi 'ching ba dang / gti mug gi 'ching ba dang / sems can dmyal ba dang / dud 'gro dang / yi dags kyi 'ching ba yang dam por byed do/ /rnam grangs gzhan yang sred pa'i kun du sbyor ba dang ldan pa'i skyes bu'i gang zag la ni mdor bsdu na/ kun nas nyon mongs pa rnam pa bdun ni sred par bya bar rig par bya ste/ rjes su dran pa'i kun nas nyon mongs pa dang / rang dbang med pa'i kun nas nyon mongs pa dang / yul gyi kun nas nyon mongs pa dang / yongs su gdung ba'i kun nas nyon mongs pa dang / bde 'gro dang ldan pa'i kun nas nyon mongs pa dang / ngan 'gro dang ldan pa'i kun nas nyon mongs pa dang / lta ba'i kun nas nyon mongs pa'o/ /rjes su dran pa'i kun nas nyon mongs pa gang zhe na/ 'di ltar 'di na la la sngon longs spyod cing chags su rung ba rnams tshul bzhin ma yin pa yid la dran pas/ 'dod pa dang / sred pa dang / don du gnyer bas sems 'joms par byed pa lta bu'o/ /rang dbang med pa'i kun nas nyon mongs pa gang zhe na/ 'di ltar 'di na la la sngon 'dod chags kyi chos kun du bsten pas/ da ltar rang bzhin gyis 'dod chags shas che ba yin te/ chags su rung ba'i yul la tshul bzhin du rjes su dran zhing yid la byed du zin kyang / 'dod pa nas sems 'joms par byed pa'i bar du ste/ 'di ltar 'dod chags shas che ba des sems rang dbang med par byas pa lta bu'o/ /yul gyi kun nas nyon mongs pa gang zhe na/ 'di ltar 'di na la la grong ngam grong rdal du rgyu ba na/ kha dog rgyas shing chags su rung ba'i yul mngon sum du gyur pa'i tshe/ yul rgyas pa'i phyir de'i rnam par shes pa yul gyi sdug pa'i mtshan ma'i rjes su 'brang bas sems kun nas dkris shing 'dug ste/ de'i rgyus de'i 'dod pa dang / sred pa dang / don du gnyer ba skye bar 'gyur ba lta bu'o/ /yongs su gdung ba'i kun nas nyon mongs pa gang zhe na/ 'di ltar 'di na la la sred pa 'phel bar byed pa'i kun nas nyon mongs pa gsum po de dag gis bdag gi sred pa bskyed nas longs spyad zin pa'i yul rnams la yang lta ba dang / ma 'ongs pa rnams kyi ched dang / da ltar byung ba rnams longs spyad par bya ba'i phyir yongs su gdung bar 'gyur te/ lus dang sems kyis yongs su gdung bar 'gyur ba lta bu'o/ /bde 'gro dang ldan pa'i kun nas nyon mongs pa gang zhe na/ 'di ltar 'di na la la sred pa de nyid kyi kun 'byung ba'i bden pa'i dbang du byas nas/ gal te lus kyis legs par spyod pa spyad cing / ngag dang yid kyis legs par spyod pa spyad nas/ lha rnams sam mi rnams kyi nang du bde 'gror skyes nas/ de bde ba'i tshor ba la mngon par zhen nas shin tu bag med par gnas shing shin tu bag med par zhugs pa'o/ /ngan 'gro dang ldan pa'i kun nas nyon mongs pa gang zhe na/ de sred pa de nyid ces bya ba nas/ rgyas par gal te lus dang ngag dang yid kyis nyes par spyod pa spyad nas/ de bde ba'i tshor ba lus zhig pa'i 'og tu ngan song ngan 'gro log par ltung ba sems can dmyal ba rnams su skye bar 'gyur te/ de der skyes nas shin tu sdug cing yid mi bde ba dang / sdang ba'i sems su 'gyur te/ sems nyams par 'gyur ro/ /lta ba'i kun nas nyon mongs pa gang zhe na/ de sred pa de nyid kyi kun 'byung ba'i bden pa'i dbang du byas nas/ gal te kun nas nyon mongs pa la rnam par thar pa 'dod pa de la/ kun nas nyon mongs pa las rnam par thar pa'i chos phyin ci log tu ston pa'i sdig pa'i grogs po gang yin pa la brten na de phyin ci log gi chos bstan pa de la brten nas/ thar ba yang nyams su mi len la/ lta bar gyur pa drug cu rtsa gnyis las gang yang rung ba'i lta ba rnam par 'phel bar byed de/ de rten cing 'brel bar 'byung ba la rmongs pa'i dbang du byas nas/ de lta bu'i kun du sbyor ba dang de dang ldan pas 'gro ba lnga'i 'khor ba nas yongs su grol bar mi 'gyur ba'o/ /chos la gnas shing tshul khrims ldan/ /ngo tsha shes ldan bden par smra/ /bdag nyid kyang ni dga' bar byed/ /de la skye bo dga' bar 'dzin/ /zhes bya ba ni tshigs su bcad pa yin no/ /ji ltar na chos la gnas pa yin zhe na/ de bzhin gshegs pas gsungs pa legs par gsungs pa'i chos 'dul ba la rab tu byung nas dga' bzhin du tshangs par spyad pa spyod pa'o/ /ji ltar na tshul khrims dang ldan pa yin zhe na/ de ltar rab tu byung zhing de ltar dga' bzhin du tshul khrims rnams la ma nyams par byed pa nas/ 'dren mar mi byed pa dang / rtag tu byed pa dang / rtag tu gnas pa dang / bslab pa'i gzhi rnams yang dag par blangs te slob pa'o/ /ji ltar na ngo tsha shes pa dang ldan pa yin zhe na/ gdags par bya bas 'dogs pa ste/ sdig pa mi dge ba'i chos 'di lta ste/ 'chal ba'i tshul khrims dang mthun pa rnams dang / tshul khrims nyams par 'gyur ba'i gzhi rnams dang / 'di lta ste/ mtshan ma ngan pa rnams dang / rtog pa ngan pa rnams dang / nyon mongs pa rnams dang / nye ba'i nyon mongs pa rnams 'byung bas 'dogs pa'o/ /ji ltar na bden pa smra ba yin zhe na/ sdig pa sgrogs shing sdig pa mi 'chab pa yin te/ nyes pa byung na tshangs pa mtshungs par spyod pa mkhas pa rnams la yang dag pa ji lta ba bzhin du bdag nyid 'chags par byed cing / chos bzhin du phyir yang gso bar byed pa'o/ /bshad pa 'di'i mdor bstan pa ni mdor bsdu na/ bcom ldan 'das kyis rnam pa bzhis yongs su zin pa'i tshul khrims rnam par dag pa yongs su bstan te/ legs par yang dag par blangs pa dang / yang dag par blangs nas kyang nyams par mi 'gyur bar bya ba dang / nyams par 'gyur ba'i rgyu yongs su spang ba dang / ma shes pa dang bag med pas nyams par gyur na yang chos bzhin du phyir gso bar byed pa ste/ de ni mdor bstan pa yin par rig par bya'o/ /'di na gzhan gyi sdig pa'i las/ /mthong nas nges par sems byed pa/ /las kyi 'ching ba sdig yin te/ /de ni bdag gis yong mi bya/ /zhes bya ba ni tshigs su bcad pa yin no/ /ji ltar na gzhan dag gi sdig pa'i las mthong nas nges par sems pa yin zhe na/ 'di ltar 'di ni rigs kyi bu'am/ rigs kyi bu mo shes rab can tshul bzhin du chos la rtog nus pa las/ pha rol nyes par spyod pa kun du spyod pa'i phyir sun par gyur pa gnod pa byed pa zhig rgyal po la zho shas 'tsho ba rnams kyis bzung nas/ rgyal po la phul ba nas/ rgyas par mdo las 'byung ba bzhin du bsad pa'i bar du mthong la/ mthong nas kyang de 'di snyam du sems te/ 'di ltar tshe 'di'i sdig pa mi dge ba'i las kyis tshe 'di nyid la mi bzad pa'i 'bras bu rnam par smin pa nyams su myong ba dag snang ba las na/ sdig pa mi dge ba'i las ni ma byas shing mi byed la/ ma brtsams shing ma spyad na legs so snyam mo/ /yang de nyid kyis lug gsod pa'am/ bya gag gsod pa'am/ phag gsod pa nas/ rgyas par sdom pa ma yin pa'i tshogs kyi bar du rig par bya ste/ de las de dang / bzo de dang / 'tsho ba des glang po che la zhon pa'am/ rta'am/ shing rta'am/ khyogs la zhon pa yang med la/ rgyu des nor gyi phung po chen po bsgrubs te gnas pa yang med na/ 'jig rten na yang rnam par smad pa dang / rnam par bshad pa yin la/ 'jig rten pa rnams kyis kyang / lus kyi reg pa'i longs spyod tsam gyi slar yang mi 'dod na/ dam pa rnams kyis lta smos kyang ci dgos pa dag kyang mthong na/ mthong nas kyang de 'di snyam du sems te zhes bya ba nas snga ma bzhin du sbyar ro/ /yang de nyid kyis pha rol phyug la nor mang zhing longs spyod che la/ de yang le lo can bag med par gnas te/ de de ltar gnas pas nyin mtshan de dang de dag 'das shing longs spyod rnams yongs su nyams pa dang / 'khor dang las kyi mtha' rnams dang / dge ba'i chos rnams kyang yongs su nyams pa dag mthong la/ mthong nas kyang zhes bya ba nas snga ma bzhin du sbyar ro/ /yang de nyid kyis sems can gyi lus kyi bye brag rnam pa sna tshogs mthong ste/ sems can kha cig ni dmus long dang / btsas nas 'on pa dang / btsas nas lkugs pa dang / zhar ba dang / lag rdum dang / shu ba can nam/ mdze can nam/ tshe thung ba'am/ mdog ngan pa'am/ gnod pa mang ba'am/ rigs ngan nam/ dbul po'i khyim du skyes pa'am/ dbang chung bar grags pa'am/ shes rab 'chal ba'am/ ma ning dang / za ma dang / byad mi sdug par 'dug la/ kha cig ni de lta bu ma yin par mthong ste/ mthong nas kyang de 'di snyam du sems te/ sngon gyi sdig pa mi dge ba'i las kyis tshe 'di la sdig pa mi bzad pa'i 'bras bu rnam par smin pa nyams su myong ba yang snang ba las/ sdig pa ni btang na legs so snyam pa'i bar du snga ma bzhin du sbyar ro/ /yang de nyid kyis pha rol bshes gnyen can le lo med cing bsgrub phod pa 'di lta ste/ zhing las dang / tshong byed pa dang / gru spyod pa'i las dang / 'phral du spyad pa'i las kyi mtha' rnams legs par byed pa ste/ de ltar bsgrub phod du zin kyang / las su bya ba de dag byas shing rab tu 'jig la mi grub par mthong ste/ mthong nas kyang zhes bya ba nas snga ma bzhin du sbyar ro/ /yang de nyid kyis kha cig ni 'dir rab tu byung ste/ khyim gyi gnas las nges par 'byung la/ tshul dang yang dag par spyod pa mtshungs su zin kyang / 'di lta ste/ chos gos dang / bsod snyoms la sogs pa'i rnyed pas phongs pa dag mthong la/ kha cig ni de ltar mi 'dug pa dag mthong nas kyang de 'di snyam du snga ma bzhin du sbyar ro/ /yang de nyid kyis rgyal po'am/ blon pos chen po'i steng du mngon par brtul te/ 'dug pa de la yang bdag gi lus gcig pu tsam gyi phyir dang / tshe 'di'i bde ba chung ngu phran tshegs tsam gyi phyir tshe rabs mang po'i lus ma rung bar byed pa dang / sdug bsngal mang po 'byung bar 'gyur ba'i lus dang ngag dang yid kyi nyes par spyod pa mang po kun du spyod pa mthong la/ mthong nas kyang de 'di snyam du sems te/ kye ma rgyal po'am blon po gang / tshe gcig gi lus la ni gces su 'dzin la/ tshe rabs du ma'i lus la gces su mi 'dzin pa dang / tshe 'di'i bde ba phran tshegs la gces su 'dzin la/ tshe rabs du ma'i sdug bsngal drag po la ni mi dga' bar mi 'dzin pa de ni byis pa yin no snyam pa nas/ sdig pa mi dge ba'i las ni ma byas na legs pa nas/ ma spyad na legs pa'i bar du sbyar ro/ /gzhan yang rigs kyi bu'am/ rigs kyi bu mo shes rab can des lha'i mig thob par gyur la/ des lha'i mig des sems can 'chi 'pho ba dang / skye ba dag mthong ba nas/ rgyas par mdo las ji skad 'byung ba bzhin du sbyar te/ sems can dmyal ba rnams su skye ba'i bar du mthong nas de 'di snyam du sems te/ tshe 'di'i sdig pa mi dge ba'i las kyis tshe phyi ma'i sdig pa mi bzad pa'i rnam par smin pa nyams su myong ba dag snang ba nas/ sdig pa'i las ni btang na legs so zhes bya ba'i bar du snga ma bzhin du sbyar ro/ /de ltar rigs kyi bu'am/ rigs kyi bu mo des pha rol dag gi sdig pa'i las mthong nas/ rnam pa bzhi'i tshul gyis nges par sems shing shin tu nges par sems te/ bzhi gang zhe na/ 'gal ba'am/ log par 'tsho ba'am/ bag med cing le lo byed pa la brten nas/ tshe 'di'i sdig pa mi dge ba'i las kyis tshe 'di nyid kyi mi sdug pa'i 'bras bu rnam par smin pa yang dag par mthong ba dang / sems can rnams kyi lus kyi bye brag gam/ brtsams pa don med pa'am/ yongs su tshol ba don med pa la brten nas/ sngon sdig pa mi dge ba'i las byas pas tshe 'di la mi sdug pa'i 'bras bu rnam par smin pa yang dag par mthong ba dang / rgyal po dang / blon po rnams kyis bsgrub pa sna tshogs la brten nas/ tshe 'di'i sdig pa'i las kyis/ tshe phyi ma'i mi sdug pa'i 'bras bu rnam par smin pa rjes su dpag pa dang / sems can rnams kyi 'chi 'pho dang skye ba la brten nas/ tshe 'di'i sdig pa'i las kyis tshe phyi ma'i mi sdug pa'i 'bras bu rnam par smin pa mngon sum du gyur pa ste/ des de ltar yang dag pa ji lta ba bzhin du shes nas/ bdag nyid kyis mi byed pa lta bu'o/ /las kyi 'ching ba gang zhe na/ las la kun du dga' ba dang / las lci ba dang / las kyi 'bras bu rnam par smin pa la rang dbang med pa gang yin pa'o/ /de la las la kun du dga' ba ni/ 'di ltar 'di na la la sdig pa la goms pas sdig pa la mngon par dga' ba ste/ des de'i sems dge ba'i chos la 'jug par mi 'gyur ba lta bu ste/ 'di ni las kyi 'ching ba dang po yin no/ /de la las lci ba ni 'di ltar 'di na la las mtshams med pa'i las rnams ril gyis byas sam/ kha cig byas nas gzhi des legs par gsungs pa'i chos 'dul ba la rab tu byung bar 'dod du zin kyang / thob par mi 'gyur na dge sbyong gi tshul gyi 'bras bu thob par 'gyur ba lta ga la 'gyur ba lta bu ste/ de ni las kyi 'ching ba gnyis pa yin no/ /de la las kyi rnam par smin pa la rang dbang med pa ni/ 'di ltar 'di na lus dang ngag dang yid kyis nyes par spyod pa'i rgyus ngan song dag tu skyes la/ de der rang dbang med pa dang / dbang med par yun ring por sdug bsngal nyams su myong bar gyur pa'am/ gang na 'khor bzhi po dge slong rnams nas dge bsnyen ma rnams kyi bar dag 'gro ba med pa'i yul mtha' 'khob dag tu skyes pa ste/ de ni las kyi 'ching ba gsum pa yin no/ /bshad pa 'di'i mdor bstan pa ni mdor bsdu na/ bcom ldan 'das kyis sems can rnams kyi las kyi rnam par smin pa las brtsams te/ tshul bzhin yid la byed pa dang / tshul bzhin yid la byed pa sngon du 'gro ba'i chos dang mthun pa'i chos sgrub pa bstan te/ de ni 'dir mdor bstan pa yin par rig par bya'o/ / //bam po nyi shu gsum pa/ 'phags pa rnams ni legs par smras pa mchog ces gsung / /snyan smra mi snyan ma yin de ni gnyis pa yin/ /bden smra mi brten ma yin de ni gsum pa yin/ chos smra chos min ma yin de ni bzhi pa yin/ /zhes bya ba 'di ni tshigs su bcad pa yin te/ legs par smras pa zhes bya ba ni/ legs par brjod pa dang / legs par bsnyad pa dang / legs par bshad pa'o/ /de'i mtshan nyid ni rnam pa gsum du rig par bya ste/ yid du 'ong ba dang / nyon mongs pa can ma yin pa dang / dge ba'o/ /de la dang pos ni pha rol kun du dga' bar byed pa'o/ /gnyis pas ni rang gi tshul khrims mi nyams par byed do/ /gsum pas ni pha rol mi dge ba'i gnas las bslang ste/ dge ba'i gnas su 'jog cing phan pa dang bde ba sgrub par byed pa'o/ /de la tshig snyan pa bden pa yang ma yin chos dang ldan pa ma yin pa yang yod de/ 'di ltar 'di na la la yod pa ma yin pa'i yon tan rnams kyis tshig 'jam por pha rol spro ba skyed pa lta bu'o/ /tshig bden pa la snyan pa yang ma yin/ chos dang ldan pa yang ma yin pa yang yod de/ 'di ltar 'di na la la yang dag pa'i skyon dag gis tshig rtsub pos nyon mongs pa can gyi sems kyis pha rol la smod pa lta bu'o/ /chos dang ldan pa'i tshig yin la/ snyan pa dang bde ba yang yod de/ 'di ltar 'di na la la spro ba bskyed pa dang / smod pa yang shes la/ spro ba bskyed pa dang / smod pa shes bzhin du spro ba skyed par yang mi byed/ smod pa yang mi byed par/ mi dge ba'i gnas las bslang ste/ dge ba'i gnas su gzhag pa'i phyir chos kho na 'chad pa lta bu'o/ /bshad pa 'di'i mdor bstan pa ni/ mdor bsdu na/ bcom ldan 'das kyis legs par smras pa'i bstan pa dang / bshad pa bstan te/ de ni mdor bstan pa yin par rig par bya'o/ /dad dang ngo tsha shes dang tshul khrims sbyin/ /chos 'di dag ni skyes bu dam pas bsngags/ /lam 'di lta yul 'gro ba yin zhes gsungs/ / 'dis ni lha yi 'jig rten 'gro bar 'gyur/ /zhes bya ba 'di ni tshigs su bcad pa yin te/ 'di ltar 'di na gang zag la la de bzhin gshegs pas gsungs pa'i chos 'dul ba la dad pa rnyed nas/ khyim na gnas pas 'dzems te/ tshul khrims yang dag par len par byed la/ yang dag par blangs nas kyang / chos gos dang / bsod snyoms dang / mal cha dang / stan ngan don tsam gyis chog par 'dzin cing / snod byad nyung la yo byad nyung ste/ chos dang ldan pa'i rnyed pa rnams tshangs pa mtshungs par spyod pa mkhas pa rnams dang thun mong du spyod kyi/ sbed cing mi spyod la/ chos tshangs par spyod pa thog ma dang / bar dang / tha mas dge ba gang yin pa de dag gis smra bas smra bar byed de/ 'di lta ste/ mdo'i sde dang dbyangs kyis bsnyad pa'i sde nas / rmad du byung ba'i chos kyi sde dang / gtan la phab par bstan pa'i sde'i bar de dag bzung zhing kun chub par byas nas/ pha rol dag la lung 'bogs shing rgya cher yang dag par ston to/ /dge ba'i chos de dag dang ldan pa de la phan yon gsum yod par rig par bya ste/ skyes bu dam pa rnams dang / sangs rgyas rnams dang / sangs rgyas kyi nyan thos rnams kyis bsngags par 'gyur ba dang / gal te tshul khrims dang / zang zing gi sbyin pas bsdus pa'i bsod nams kyi tshogs dang / chos kyi sbyin pas bsdus pa'i ye shes kyi tshogs kyis/ tshogs legs par bsags pa zhig yin na ni/ de rnam par grol ba'i skye ba'i gnas de nyid la brten nas/ rnam par dag pa'i lha rnams dang skal ba mnyam par gtogs par 'gyur ba dang / gal te tshogs legs par bsags pa ma yin na yang / de phyin chad bsod nams kyi tshogs dang / ye shes kyi tshogs yongs su rdzogs par byed de/ lus zhig nas kyang bde 'gro mtho ris kyi 'jig rten lha rnams kyi nang du skye bar 'gyur ba'o/ /rnam grangs gzhan yang 'di ltar 'di na la la de bzhin gshegs pas gsungs pa'i chos 'dul ba la dad pa rnyed nas 'chal pa'i tshul khrims kyis phyi ma la ngan 'gror 'gro bar 'gyur ba dang / ser snas dbul por 'gyur ba'i 'bras bu la mngon par yid ches pa ste / mngon par yid ches pas/ tshe 'di la 'chal pa'i tshul khrims dang / ser snas 'dzems te/ 'dzems pas 'chal ba'i tshul khrims spangs nas/ tshul khrims yang dag par len pa dang / ser sna yang spangs nas/ dri ma dang ser sna dang bral ba'i sems kyis khyim na gnas pa'i nas/ rgyas par sbyin pa'i bgo bsha' la dga' bas/ tshe 'di nyid la yang 'phags pas bsngags par 'gyur la/ lus zhig nas kyang gzhi des lha rnams kyi nang gi bar du skye bar 'gyur ba lta bu'o/ /bshad pa 'di'i mdor bstan pa ni/ mdor bsdu na/ bcom ldan 'das kyis khyim pa dang / rab tu byung ba'i yang dag par bsgrub pa dang / yang dag par bsgrubs pa'i 'bras bu'i phan yon bstan te/ de ni 'di ltar mdor bstan pa yin par rig par bya'o/ /thos pas chos rnams shes par 'gyur/ /thos pas sdig las ldog par 'gyur/ /thos pas gnod pa spong bar 'gyur/ /thos pas mya ngan 'das pa thob/ /ces bya ba ni tshigs su bcad pa yin te/ 'di ltar 'di na la la snga logs su bya ba sbyin pa'i gtam dang / mtho ris kyi gtam las brtsams nas phyin ci ma log pa'i chos bstan pa nyan cing thos nas kyang / don gyis kyang 'di lta ste/ tshe 'di nyid la sdig pa nyes par spyad pa ni phyi ma la ngan song gi sdug bsngal gyi gnod pa'i rgyu yin la/ sdig pa nyes par spyod pa las ldog pa ni bde 'gror 'gro zhing skye bas ngan song gi sdug bsngal gyi gnod pa yongs su spong ba'i rgyu yin par shes pa lta bu ste/ de de ltar don gyis chos shes nas chos dang mthun pa'i chos sgrub cing / sdug bsngal gyi rgyu las ni ldog /bde ba'i rgyu ni yang dag par blangs nas gnas te/ de gzhi des bde ba thob pas sdug bsngal gyi gnod pa spang bar 'gyur ro/ /gal te 'phags pa'i bden pa bzhi dang ldan pa'i chos kyi gtam yang dag phul nyan cing des thos nas kyang de ltar don gyis srid pa mngon par 'grub pa thams cad ni sdug bsngal yin pa dang / zhi ba ni mya ngan las 'das pa yin par shes te/ de ltar don gyis chos shes nas/ gal te dbang po yang yongs su smin la/ tshogs kyang yongs su rdzogs pa zhig yin na ni/ bsam pa dag pa'i des de'i rgyu las byung ba'i don shes par 'thob bo/ /chos ji ltar thos pa kho na tsam gyis bden pa dag mngon par rtogs pas na bden pa mngon par rtogs par 'gyur ro/ /bden pa mngon par rtogs pa ni zag pa zad pa thob par 'gyur ro/ /gal te dbang po yongs su smin pa yang ma yin la/ tshogs yongs su rdzogs pa yang ma yin na ni/ de [(]sdag [,]sdig [)]pa de nyid las ldog cing lhag pa'i tshul khrims la brten te/ lhag pa'i sems skyed par byed do/ /lhag pa'i sems la brten nas/ lhag pa'i shes rab skyed par byed do / /des sdug bsngal gyi rtsa ba nyon mongs pa'i gnod pa thams cad yongs su spong zhing / mya ngan las 'das pa yang 'thob par 'gyur ro/ /bshad pa 'di'i mdor bstan pa ni/ mdor bsdu na/ bcom ldan 'das kyis dam pa'i chos mnyan pa sngon du 'gro ba'i tshul bzhin yid la byed pa dang / tshul bzhin yid la byed pa sngon du 'gro ba'i chos kyi rjes su mthun pa'i chos sgrub pa dang / chos kyi rjes su mthun pa'i chos sgrub pa'i sngon du 'gro ba de'i 'bras bu'i phan yon bstan te/ de ni 'dir mdor bstan pa yin par rig par bya'o/ /nam mkha' 'dra ba gos pa med/ /them pa 'dra ba g.yo mi 'gyur/ /mtsho bran 'dam rdzab ldan 'dra ba'i/ /'khor ba la ni mkhas mi dga'/ /zhes bya ba ni tshigs su bcad pa yin te/ dge slong dgra bcom pa sems shin tu rnam par grol ba/ spros pa thams cad las yang dag par 'das pa ni nam mkha' dang mtshungs pa zhes bya ste/ dper na nam mkha' la ni spros pa med de/ gtsang bas kyang mi gos la/ mi gtsang bas kyang mi gos so/ /de bzhin du nam mkha' dang mtshungs pa'i dgra bcom pa yang / 'jig rten gyi chos mthun pa dang / mi mthun pa 'di lta ste/ rnyed pa'am ma rnyed pa nas bde ba'am/ sdug bsngal gyi bar thams cad kyis mi gos so/ /slob par 'dod pa'i 'dod chags dang bral ba/ dgra bcom pa nyid la zhugs pa / dran pa nye bar gzhag pa bzhi po dag la sems gnas pa/ mtshan ma med pa'i sems kyis ting nge 'dzin la kun du brten pa ni/ g.yo bar byed pa dang / rlom sems su byed pa dang / spros pa dang / mngon par 'du byed thams cad kyis sred par 'gyur ba skye bar smon pa dang ldan pa rnams kyis sgo'i them pa bzhin du g.yo bar mi 'gyur ro/ /slob par 'dod pa 'dod chags dang bral ba nyid/ gong ma'i rnam par thar pa la 'dun [(]ba [,]pa [)]skyes pa de ni phyir mi 'ong ba'i 'bras bu bsil bar gyur pa/ mtsho dang 'dra ba'i nang du zhugs nas snyoms par 'jug pa'i ro myang ba dang / gong ma'i cha dang mthun pa'i kun du sbyor ba 'dam rdzab lta bu la mi dga' ste/ de la mngon par mi dga' pas 'khor ba la mngon par mi dga' bar 'gyur ro/ /rnam grangs gzhan yang dgra bcom pa kha zas dang / tha snyad kyi rgyu ba dang / mtshan ma med par gnas pa dang / phung po'i lhag ma'i sdug bsngal dang rjes su 'brel pa ni/ gnas gsum po 'di dag dang / go rims bzhin du sbyar bar rig par bya'o/ /rnam grangs gzhan yang / dgra bcom pa shes rab kyis rnam par grol ba/ slob pa lus kyis mngon sum du byed pa dang / dgra bcom pa gnyi ga'i cha las rnam par grol ba ni gnas 'di gsum dang go rims bzhin du sbyar bar rig par bya'o/ / bshad pa 'di'i mdor bstan pa ni/ mdor bsdu na/ bcom ldan 'das kyis khams gsum pa'i 'dod chags dang bral bas kun shes pa dang phung po'i lhag ma dang bcas pa dang / 'dod pa'i 'dod chags dang bral bas khyad par dang bcas pa'i lam gyis bsdus pa'i phyir mi 'ong ba nyid bstan to/ /gzhan yang rnam par grol ba'i phan yon dang / ting nge 'dzin gyi phan yon dang / shes pa'i phan yon bstan to/ /gzhan yang lhag pa'i sems dang / lhag pa'i shes rab kyi 'bras bu dang / lhag pa'i sems dang / lhag pa'i shes rab bstan te/ de ni 'dir mdor bstan pa yin par rig par bya'o/ /gang dag gzugs kyis nges par 'dzin/ /nga la sgra yis rjes su 'brang / /'dun pa'i 'dod chags dbang gyur pa/ /skye bo de dag nga mi shes/ /nang ni rnam par shes gyur la/ /pha rol mthong ba ma yin zhing / /nang gi 'bras bu mthong ba gang / /de ni sgra yis bkri ba yin/ /nang ni shes pa ma yin la/ /phyi rol mthong bar gyur pa la/ /phyi rol 'bras bu mthong ba gang / /de yang sgra yis bkri ba yin/ /nang yang shes pa ma yin la/ /phyi rol mthong ba'ang ma yin zhing / /byis pa kun nas bsgribs gyur ba/ /de yang sgra yis bkri ba yin/ /nang yang rnam par shes gyur la / /phyi rol yang ni mthong gyur cing / /bstan pa nges par 'byung shes pa/ /de ni sgra yis bkri ba yin/ /zhes bya ba ni tshigs su bcad pa yin te/ 'di ltar 'di na so so'i skye bo'i 'dun pa'i 'dod chags ril gyis ma spangs pa la las de bzhin gshegs pa'i skyes bu chen po'i mtshan sum cu rtsa gnyis dang ldan pa mthong ba na/ kye ma bcom ldan 'das de ni yang dag par rdzogs pa'i sangs rgyas yin no/ /de'i chos ni legs par gsungs pa yin no/ /nyan thos kyi dge 'dun ni legs par zhugs pa yin no snyam du nges par 'dzin te/ de phyis skyes bu dam pa ma yin pa bsten pa dang / dam pa'i chos ma yin pa thos pa la brten nas pha rol smra ba dang / pha rol gyi sgra las gzhan gyi dring 'jog cing gzhan gyis bkri bar gyur la/ de bzhin gyis khrid pas sangs rgyas dang / chos dang / dge 'dun la yang skur pa 'debs te/ 'di ltar de bzhin gshegs pa chos kyi skur yang dag pa ji lta ba bzhin du ma shes pa'i phyir de ltar mi 'gyur ro/ /de la so so'i skye bos nang gi bsam gtan gyi 'bras bu lha'i mig gis rgyang nas mthong nas/ kye ma bcom ldan 'das de ni yang dag par rdzogs pa'i sangs rgyas yin no snyam du 'dzin ces bya ba gang yin pa yang snga ma bzhin no/ /phyi rol gyi 'dod pa dang ldan pa'i las kyi rnam par smin pa'i 'bras bu sha'i mig gis mthong nas/ nges par 'dzin pa gang yin pa de yang gzhan gyi sgra dang / gzhan gyis smras pas gzhan gyi dring 'jog cing gzhan gyis bkri ba yin no/ /so so'i skye bo de tsam mthong ba yang med pa gang yin pa de ni kun nas bsgribs shing yun ring po nas sgras khrid pa kho na yin no/ /'phags pa 'dun pa'i 'dod chags spang ba dang / 'dul ba dang yang dag par 'da' bar bya ba'i phyir/ 'phags pa'i shes rab kyi mig thob par gyur pa gang yin pa de ni/ 'phags pa'i shes rab kyi mig des/ de bzhin gshegs pa nang gi chos kyi sku nyid du rnam par shes shing dmigs la/ de yang gzugs kyi sku'am/ yang na mchod rten du gyur pa'am/ yang na ri mo bris pa phyi rol gyur pa mthong na / kye ma 'di ni don dam par yang dag par rdzogs pa'i sangs rgyas ma yin no snyam ste/ des de ltar nang yang rnam par shes shing / phyi rol yang mthong bas/ sangs rgyas dang / chos dang / dge 'dun rnams la gcig tu nges par gyur pa'i phyir/ pha rol gyi sgra dang / pha rol gyi smra ba dag las gzhan gyi dring mi 'jog cing gzhan gyi bkri ba med de/ 'di ltar de bzhin gshegs pa chos kyi skur yang dag pa ji lta ba bzhin du rab tu shes pa'i phyir de lta bur 'gyur ro/ /bshad pa 'di'i mdor bstan pa ni mdor bsdu na/ bcom ldan 'das kyis brda las byung ba'i de bzhin gshegs pa mthong ba la nges pa med pa dang / don dam pa las byung ba'i de bzhin gshegs pa mthong ba la nges pa yod par bstan te/ de ni 'dir mdor bstan pa yin par rig par bya'o/ /drug pa bdag po rgyal po ni/ /chags par gyur na chags can yin/ /chags pa med na chags med 'gyur/ /chags pa byis pa zhes bya'o/ /zhes bya ba ni tshigs su bcad pa yin no/ /drug pa bdag po ni sems yin te/ yid kyi rnam par shes pa zhes bya'o/ /de la gang la la chu bo lnga ni rgal la/ drug pa ste yid kyi chu bo ni ma rgal ba de'i sems te/ snyoms par 'jug pa'i ro myang ba'i rjes su 'brang ba la ni chags par gyur pa zhes bya'o/ /gang zag gang yun ring po nas chags pa bdag gir byas la/ chags su rung ba'i chos rnams la 'chums pa ni chags pa can zhes bya'o/ /de la 'dod chags kyang chags pa yin la/ 'dod chags kyi rgyu las byung ba khyim pa'i sdug bsngal yang chags pa yin te/ gal te chags pa can des gnyen po yid la byed pa la brten nas/ chags pa'i sems de'i skabs mi 'byed cing / yid phyir 'jil la / zlog par byed na ni de lta bus sems de/ tshe 'di nyid la chags pa med par 'gyur te/ sems chags pa med par gyur pas / chags pa can de yang phyi ma la/ de'i rgyu las byung ba'i de'i sdug bsngal gyis chags pa med pa zhes bya'o/ /gal te skabs 'byed par byed cing gnyen po yid la byed pa la brten nas/ yid phyir 'jil bar mi byed cing zlog par mi byed na ni/ sdug bsngal gyi rgyu des yun ring po nas sdug bsngal nyams su myong bar gyur pa'i sdug bsngal gyi rgyu de yongs su mi spong ba ni byis pa zhes bya'o/ /bshad pa 'di'i mdor bstan pa ni/ mdor bsdu na/ bcom ldan 'das kyis sdug bsngal gyi rgyu bsal ba byas pa'i phan yon dang / byis pa sdug bsngal gyi rgyus bdag nyid kyi sdug bsngal mngon par 'grub par byed pa bstan te/ de ni 'dir mdor bstan pa yin par rig par bya'o/ /grong khyer rus pa'i ra ba can/ /rgyus dang sha yi zhal zhal can/ /de ni 'dod chags zhe sdang dang / /nga rgyal dang ni 'chab pa 'jug /ces bya ba ni tshigs su bcad pa yin no/ /grong khyer zhes bya ba ni sems yin te/ yid kyi rnam par shes pa'o/ / grong khyer de yang rdo lta bu'i rus pa rnams dang / gres ma lta bu'i rgyus pa rnams dang / zhal zhal lta bu'i sha'i zhal zhal khog pa'i ra bas yongs su bskor ba'o/ /de yang legs par gsungs pa'i chos 'dul ba las brtsams te/ dge ba'i chos dang mi mthun zhing phyir rgol ba'i chos bzhi gnas te/ chags pa can khyim na gnas pa rnams kyi 'di lta ste/ 'dod chags dang / zhe sdang gnyis dang / nyes par bshad pa'i chos 'dul ba la rab tu byung ba rnams kyi 'di lta ste/ nga rgyal dang / 'chab pa gnyis gnas so/ /de la 'dod pa la mngon par zhen pa chags pa can bsod snyoms dang / nga rgyal gyi spyod pa dang mi mthun pa ni legs par gsungs pa'i chos 'dul ba yang khong du mi chud na/ dge ba bsgom par lta ga la 'gyur/ nga rgyal gyis khengs pa nyes par bshad pa'i chos can ni/ bdag nyid kyang sangs rgyas sam/ sangs rgyas kyi nyan thos kyi thad du mi 'gro la/ sangs rgyas sam/ sangs rgyas kyi nyan thos nyid thugs brtse bas byon na yang / 'chab pa'i nye ba'i nyon mongs pas snyon rmongs pa'i sems kyis bdag nyid kyang yang dag pa ji lta ba bzhin du rjod par mi byed na/ khong du chud pa'am/ dge ba bsgom pa lta ga la 'gyur te/ de ltar legs par gsungs pa'i chos 'dul ba dang ldan pa'i dge ba'i chos de dag ni sems kyi grong khyer rnam pa gnyis la 'jug par yang mi 'gyur na/ bdag gir byed pa lta ga la 'gyur/ bshad pa 'di'i mdor bstan pa ni/ mdor bsdu na/ bcom ldan 'das kyis kun nas nyon mongs pa'i gzhi rnam pa bzhis/ khyim pa dang / rab tu byung ba'i rnams legs par gsungs pa'i chos 'dul ba las chud za bar bstan te/ de ni 'dir mdor bstan pa yin par rig par bya'o/ /rus sbal bdag lus khog par sbas pa ltar/ /dge slong yid kyi rtog rnams sbas nas ni/ /rten pa med cing gzhan la mi 'tshe na/ /mya ngan 'das shing gang la'ang skur pa med/ /ces bya ba ni tshigs su bcad pa yin te/ 'di ltar 'di na la la bsam gtan dang po la brten nas sdig pa can gyi rtog pa gsum po 'dod pa dang / gnod sems dang / rnam par 'tshe ba'i rtog pa spong zhing bsam gtan dang po'i sa pa'i dge ba'i rtog pa rnams kyang spangs nas/ lus lta bu'i rtog pa rnams rtog pa med cing dpyod pa med pa'i ting nge 'dzin/ rus sbal gyi khog pa lta bu'i nang du sdud cing 'jug par byed do/ /de'i rtog pa med cing dpyod pa med pa'i ting nge 'dzin de yang de yan chad srid pa'i rtse mo la thug pa'i bar du yin par rig par bya'o/ /de snyoms par zhugs pa dang langs pa na yang ting nge 'dzin de'i ro myong bar mi byed la/ yang dag par dga' bar 'gyur ba'i chos rnams kyis nges pa yin te/ rnam par 'tshe ba med pa'i rang bzhin can yin pas tshangs pa mtshungs par spyod pa mkhas pa rnams dang 'grogs na bde ba yin te/ tshangs pa mtshungs par spyod pa mkhas pa dag kyang de dang lhan cig 'khod par dga'o/ /rtsod par mi byed pa'i chos rnams dang yang ldan pa yin te/ de de ltar yang dag pa'i sbyor ba la brten nas/ bden pa rnams mngon par rtogs par byed cing zag pa zad pa yang thob par 'gyur ro/ /de chos rnams la gzhan gyi dring mi 'jog cing ye shes mthong ba shin tu rnam par dag pa yang thob nas/ chos la yang chos su 'dul ba la yang 'dul bar yang dag pa ji lta ba bzhin du rab tu shes so/ /de de ltar rab tu shes pas lta ba phyin ci log la brten te/ chos la chos kyi sgo nas skur pa mi 'debs/ chos ma yin pa la yang chos ma yin pa'i sgo nas skur pa mi 'debs/ chos ma yin pa la yang chos su mi ston/ chos la yang chos ma yin par mi ston/ 'dul ba ma yin pa la yang 'dul bar mi ston/ 'dul ba la yang 'dul ba ma yin par mi ston to/ / bshad pa 'di'i mdor bstan pa ni mdor bsdu na/ bcom ldan 'das kyis legs par gsungs pa'i chos can rnams kyi kun du 'khrug pa rnam pa bzhi po nyon mongs pa can dang / nyon mongs pa can ma yin pa'i rtog pa'i kun du 'khrug pa dang / ro myang ba'i kun du 'khrug pa dang / rtsod pa smra ba'i kun du 'khrug pa dang / lam la skur pa 'debs pa'i kun du 'khrug pa spang ba'i lam bstan te/ /de ni 'dir mdor bstan pa yin par rig par bya'o/ /mtshungs dang mtshungs pa ma yin 'byung ba dang / /nang du dgyes par mdzad cing mnyam gzhag nas/ /thub pas srid pa'i 'du byed spangs mdzad do/ /sgo ngar skyes pas sbubs ni brtol ba bzhin/ /zhes bya ba ni tshigs su bcad pa yin te/ de bzhin gshegs pa srid pa tha ma pa'i byang chub sems dpar gyur pa na/ skyes bu chen po'i mtshan sum cu rtsa gnyis dang / dpe byad bzang po brgyad cu dag gis brgyan pa'i gzugs kyi sku 'byung ba brnyes pa de ni/ phyis bla na med pa yang dag par rdzogs pa'i byang chub mngon par rdzogs par sangs rgyas te/ de bzhin gshegs par gyur pa na yang / de'i gzugs kyi sku byung ba de ni mtshungs so/ /ming gi sku byung ba de dag ni zag pa med pas mi 'dra ba'i phyir mtshungs pa ma yin no/ /gang gi tshe de bzhin gshegs pa nang du dgyes par mdzad cing dge sbyong du 'gyur ba la brten nas/ ting nge 'dzin de la mnga' brnyes pas na/ ji ltar thugs mnyam par gzhag pa yin bzhin du/ sku tshe'i 'du byed rnams zhes bya ba srid pa'i 'du byed rnams spangs te/ de dag spangs pas mtshungs pa'i gzugs kyi sku 'byung ba de dag mtshungs pa ma yin pa'i ming gi sku 'byung ba bshig ste/ dper na bya gag sgo nga las skye ba'i phru gu cher skyes pa'i rgyus sgo nga gang la brten te skyes shing byung ba de nyid brtol nas phyir 'byung ba bzhin du de bzhin gshegs pas gzugs kyi sku dang / ming gi sku bshig pa yang de dang 'dra bar rig par bya'o/ /de la bshig pa ni 'di lta bu yin te/ de bzhin gshegs pa sku tshe'i 'du byed rnams ma spangs par sku tshe'i mthar phyin nas/ mya ngan las 'da' ba'i dus mdzad pa gang yin pa de/ sku tshe'i mthar ma phyin par spangs te/ ting nge 'dzin gyi stobs bskyed pas yongs su mya ngan las 'das pa'o/ /bshad pa 'di'i mdor bstan pa ni/ mdor bsdu na/ bcom ldan 'das kyis nyid kyi sku tshe'i 'du byed spangs pas/ spong ba'i rgyu bzhi dang bcas pa la brten nas/ gzugs kyi sku dang / ming gi sku bshig pa bstan te/ de ni 'dir mdor bstan pa yin par rig par bya'o/ /'dod pa lta bu'i 'dam med de/ /zhe sdang 'dra ba'i gdon yang med/ /gti mug 'dra ba'i dra ba med/ / sred pa 'dra ba'i chu klung med/ /ces pa ni tshigs su bcad pa yin te/ rang dbang med par byed pa'i chos bzhi po 'di dag ni/ brdar btags pas 'jig rten na yod pa dag ste/ de dag ni sems can rnams rang dbang med par byed pa ste/ 'dam du thogs pa dang / 'byung bo'i gdon babs pa dang / dra bar zhugs pa dang / chu klung gi rgyun drag pos rgyun phyogs su khyer ba'o/ /de bzhin du sems can rnams rang dbang med par byed pa'i chos yang dag pa ma yin pa bzhi po 'di dag ni rang la dbang med par byed pa yin par rig par bya'o/ /bzhi gang zhe na/ 'di ltar 'di na 'dod pa'i khams su skyes pa la la 'dod pa'i mi gtsang la dri ma zhim la dri nga ba 'dam lta bu dag la chags pa ni/ dge ba'i chos rnams bsgrub pa dang / bsrung ba dang / rnam par 'phel bar bya ba la rang dbang med pa yin no/ /gzhan yang la la 'di na 'dod pa rnams spangs nas legs par gsungs pa'i chos 'dul ba la rab tu byung na yang de khro zhing khro ba'i bsam pa can bka' blo mi bde ba'i rang bzhin can yin te/ rgyu des khro bas rang dbang med par bslab pa las 'gal ba yang grangs su mi rtsi bas/ tshangs pa mtshungs par spyod pa rnams la tshig gi smyung bu dag gis 'dzugs shing zher 'debs la/ rnam par 'tshe zhing sun 'byin par byed do/ /gzhan yang 'di na la la 'dod pa rnams spangs nas/ nyes par bshad pa'i chos 'dul ba la rab tu byung nas/ de bdud sdig can gyi gti mug chen po ston pa'i lta ba'i dra bar zhugs pa yin te/ de de ltar zhugs pas 'khor ba las nges par 'byung ba la rang dbang med par 'gyur ro/ /gzhan yang 'di na la la 'dod chags dang bral ba'i sa gong ma dag tu skyes shing byung la/ des sred pa'i kun du sbyor ba ma sbangs shing yongs su ma shes pas yang 'og ma'i khams su 'bab pa'i phyir der gtan du gnas pa'i rang dbang med par 'gyur ro/ /bshad pa 'di'i mdor bstan pa ni/ mdor bsdu na/ bcom ldan 'das kyis byis pa'i 'ching ba khams thams cad dang / phyogs thams cad du gtogs pa bstan to/ / rnam grangs gzhan yang 'di ltar 'di na la la 'dod pa'i 'dam du thogs pas/ legs par gsungs pa'i chos 'dul ba la rab tu 'byung mi nus so/ /gzhan yang la la ni khro zhing khro ba'i zil gyis non la/ sems yongs su zin pas bdag nyid la yang rnam par 'tshe zhing gsod par byed na/ gzhan dag la lta ci smos/ gzhan yang la la ni gti mug gi phyogs kyi log par lta ba dang ldan te/ pha med do ma med do zhes pha ma la skur pa btab nas/ de gnyis kyi bsnyen bkur dang / g.yog bya bar 'dod kyi phyir te pha ma la lta ga la zhig byed/ gzhan yang la la ni 'dod pa la sogs pa'i sred pas bdas nas bdag nyid kyang spyod par mi byed na/ gzhan la ster ba lta ci smos te/ chos bzhi po de dag ni mkhas pas rtogs pa'i chos bzhi po legs par gsungs pa'i chos 'dul ba la rab tu byung ba dang / mi 'tshe ba dang / pha ma la bsnyen bkur bya ba dang / sbyin pa bgegs byed pa yin par rig par bya'o/ /nam mkha' la ni gnas med ltar/ /phyi rol pa la dge sbyong med/ /byis pa rnams ni spros la dga'/ /de bzhin gshegs rnams spros mi mnga'/ /zhes bya ba ni tshigs su bcad pa yin te/ sems can gang dag 'dod pa khyad par can 'dod nas 'dod pa tshol bar byed pa dag kyang yod/ gang dag lus khyad par can 'dod na srid pa tshol bar byed pa dag kyang yod/ gang dag dge spyod du 'gyur ba dang / tshangs par 'gyur ba'i thar pa 'dod nas tshangs par spyod pa tshol ba dag kyang yod do/ /de la 'dod pa tshol ba dang / srid pa tshol bar byed pa gang yin pa de dag ni sbyin pa las byung ba chung ngu dang / tshul khrims las byung ba chung ngus/ bdag phyi ma las bde 'gro mtho ris kyi 'jig rten du lha rnams kyi nang du skyes te/ 'dod pa'i yon tan lnga po dag la 'byor cing ldan par gyur la rtse yang ci ma rung snyam ste/ de ltar smon lam btab nas 'dod pa khyad par can rnams dang / lus khyad par can rnams thob par 'gyur te/ de dag ni dper na bya rnams nam mkha' la rgyu mod kyi/ nam mkha' la gnas par mi 'gyur ba de bzhin du/ de dag kyang 'dod pa dang lus thob pa mi rtag pa thams cad la de bzhin du gnas par mi 'gyur ro/ /de la gang dag dge sbyong du 'gyur bar 'dod pas tshangs par spyod pa tshol bar byed pa de dag ni legs par gsungs pa'i chos can rnams dang / nyes par bshad pa'i chos can rnams so/ /de las nyes par bshad pa'i chos can phyi rol pa rnams la ni gcig tu nges par dge sbyong med do/ /legs par gsungs pa'i chos can rnams la ni gang dag log par tshangs par spyod pa tshol bar byed pa de dag la med do/ /gang dag yang dag par byed pa de dag la ni yod do/ /'di dag thams cad kyang sgo gsum gyis spros pa la dga' bar 'gyur te/ 'dod pa tshol ba'i sgo dang / srid pa tshol ba'i sgo dang / log par tshangs par spyod pa tshol ba'i sgo'o/ /tshol ba thams cad yang dag par spangs pa'i de bzhin gshegs pa rnams ni spros pa med pa yin par rig par bya'o/ /de bzhin gshegs pa'i nyan thos yang dag par tshangs par spyod pa tshol bar byed pa gang yin pa de dag kyang don gyis spros pa med pa yin par nges so/ /bshad pa 'di'i mdor bstan pa ni/ mdor bsdu na/ bcom ldan 'das kyis legs par gsungs pa'i chos 'dul ba med pa rnams kyi brtsams pa thams cad don med par bstan te/ de ni 'dir mdor bstan pa yin par rig par bya'o/ /gang la gnas pa dang ni spros med cing / /gang zhig 'ching dang 'obs las 'das gyur pa/ /thub pa sred dang bral ba rgyu ba de/ /lhar bcas 'jig rten dag gis yongs mi shes/ /zhes bya ba ni tshigs su bcad pa yin te/ dge slong dgra bcom pa sred pa med pa ni rnam pa bzhis bdud phyir rgol ba byis pa thams cad kyi rje bo lta bur gyur pa las rnam par grol nas rang dbang thob par gyur te/ de grong ngam dgon pa na rgyu ba mthong na byis pa kha cig / dgra bcom [(]ba [,]pa [)]de'i shin tu mthar phyin pa de dang / rang dbang thob ba de yang dag pa ji lta ba bzhin du mi shes nas gnas gnyis kyis brnyas par byed de/ rigs kyi bu 'di ci'i phyir rang la dbang yod pa'i spyod pas 'tsho ba yongs su spangs nas/ gzhan la rag lus pa'i spyod pas 'tsho ba khas blangs zhes bya ba dang / mtho ris kyi 'jig rten du sbyor ba yongs su spangs nas/ srid pa chad par bya ba'i phyir brtson par byed ces brnyas par byed do/ /de la byis pa mtho ris kyi 'jig rten dang / khyim gyi spyod pa la yon tan du lta ba gang yin pa de dag ni thub pa de la brnyas par byed do/ /lha gang dag la de dag 'dod pa'i tshul gyis gnas pa'i lha de dag gis kyang thub pa de'i che ba nyid ni mi shes na/ de dag gis lta ga la shes/ dgra bcom pa sred pa med pa rnam pa bzhis bdud phyir rgol ba byis pa'i skye bo thams cad kyi rje bo lta bur gyur pa las ji ltar rnam par grol zhing rang dbang du gyur ce na/ 'di ltar rnam par shes pa'i gnas bzhis bdud phyir rgol ba rje bo lta bur gyur pa'i byis pa de dag 'gro ba lnga'i 'khor bar 'ong ba dang 'gror 'jug par byed kyi/ dgra bcom pa ni de lta ma yin no/ /'di ltar byis pa bran nyes pa rngams po che byung ba ltar sgro btags pa'am/ skur pa 'debs pa'i lta ba ngan pa dang / dbyig pa thogs pa dang / mtshon cha thogs pa la sogs pa sdig pa mi dge ba'i chos rnams kyis spros par ltung ba ngan song gi 'gro ba dag tu skyes pa de dag la ni bdud phyir rgol ba rje bo lta bus las kyi gnod pa rnam pa sna tshogs kyis gnod pa byed de/ dgra bcom pa ni de lta ma yin no/ /'di ltar byis pa bran nyes pa 'bring byung ba ltar/ bdud phyir rgol brje bo lta bur gyur pas/ 'dod pa'i sred pa'i 'ching bas bcings pa rnams ni 'dod pa'i khams na skyes pa'i sdug bsngal las nges par 'byung ba mi 'thob kyi dgra bcom pa ni de lta ma yin no/ 'di ltar byis pa bran nyes pa chung ngu byung ba lta bur gzugs dang gzugs med pa'i khams su skyes pa bdud phyir rgol ba jo bo lta bur gyur pas/ ma rig pa'i 'obs kyis bskor zhing 'khor ba'i btson rar chud pa rnams ni skye ba la sogs pa'i sdug bsngal las nges par 'byung ba mi 'thob kyi/ dgra bcom pa ni de lta ma yin no/ /bshad pa 'di'i mdor bstan pa ni/ mdor bsdu na/ bcom ldan 'das kyis byis pa rnams ngo tsha bar bya ba ma yin pas ni ngo tsha la/ ngo tsha bar bya bas ni ngo mi tsha ba dang / 'jigs par bya ba ma yin pas ni 'jigs par lta la/ 'jigs par bya ba la ni 'jigs par mi lta bar bstan te/ de ni 'dir mdor bstan pa yin par rig par bya'o/ /gang gi rtog pa bsal ba dang / / nang gi ma lus rtog med pa/ /de chags gzugs kyi 'du shes 'das/ /sbyor bzhi bral ba skye mi 'gyur/ /zhes bya ba ni tshigs su bcad pa yin te/ 'di ltar 'di na slob par 'dod pa rnams las 'dod chags dang ma bral ba la la bsam gtan dang po la brten nas 'dod pa na spyod pa'i sdig pa'i rtog pa rnams spangs te bsal la bsam gtan gnyis pa la brten nas/ nang yongs su dang zhing sems kyi rgyud gcig tu gyur pas/ bsam gtan dang po'i sa pa'i rnam par rtog pa ma lus pa rnams la rnam par mi rtog go/ /bsam gtan gsum pa la brten nas/ yang bsam gtan gnyis pa'i sa pa'i dga' ba la chags pa las yang dag par 'da' par byed do/ /bsam gtan bzhi pa la brten nas yang bsam gtan gsum pa'i sa pa'i bde ba la chags pa las yang dag par 'da' bar byed do/ /gzugs med pa'i snyoms par 'jug pa la brten nas/ gzugs kyi 'du shes las yang dag par 'da' bar byed do / /de de ltar rim gyis snyoms par 'jug pa la brten nas/ srid pa'i rtse mo'i par du snyoms par zhugs pa'am/ skyes pa sbyor ba bzhi dang bral ba/ nyon mongs pa can gyi rtog pa'i sbyor ba dang bral ba nyon mongs pa can ma yin pa'i rtog pa'i sbyor ba dang bral ba dga' ba dang / bde ba'i sbyor ba dang bral ba gzugs kyi 'du shes kyi sbyor ba dang bral ba ni phyin chad sa 'og ma rnams su skye bar mi 'gyur ro/ /so so'i skye bo sbyor ba bzhi dang ldan pa/ srid pa'i rtse mor snyoms par zhugs pa'am/ skyes pa ni sa 'og ma rnams su skye bar 'gyur bar rig par bya'o/ /bshad pa 'di'i mdor bstan pa ni/ mdor bsdu na/ bcom ldan 'das kyis srid pa'i mtha' la gnas pa'i slob pa dang / so so'i skye bo'i bye brag bstan te/ de ni 'dir mdor bstan pa yin par rig par bya'o/ /byin pa'i bsod nams rab tu 'phel/ /yang dag sdom la khon mi skye/ /dge ldan sdig pa rab tu spang / /nyon mongs rnams zad mya ngan 'das/ /zhes bya ba ni tshigs su bcad pa yin te/ 'di ltar 'di na la la de bzhin gshegs pas gsungs pa'i chos 'dul ba la dad pa rnyed nas/ ser sna'i dri ma'i kun nas dkris pa dang bral ba'i sems kyis khyim na gnas shing rdzas las byung ba'i bsod nams bya ba'i dngos po bdun yang dag par blangs te/ gnas na de dag gis de'i 'gro yang rung / 'dug kyang rung ba nas rgyas par mdo las ji skad 'byung ba bzhin du bsod nams kho na 'phel bar 'gyur ba'i bar du sbyar ro/ /gal te legs par gsungs pa'i chos 'dul ba la rab tu byung na/ de rab tu byung ba rnams ni bzod pa'i stobs can yin no snyam pa dang / tshul khrims rjes su bsrung bas gzhan dag gis smad kyang rung / spyos kyang rung / lag pa dang / bong ba dang / dbyug pa dang mtshon cha'i reg pa rnams kyis bsnun kyang rung ste/ bdag la bar chad du gyur na mi rung ngo snyam nas/ sems sdang bar mi byed cing sdig pa'i tshig mi 'byin te/ de nyid la dmigs nas byams pa dang ldan pa'i sems kyis phyogs thams cad du khyab par byas te gnas so/ /de gzhi des tshe 'di la bdag dang gzhan gyi rgyud la yod pa'i khon rab tu zhi bar 'gyur ro/ / phyi ma la yang gnod pa med pa'i 'jig rten du skye bar 'gyur la/ khon mang bar mi 'gyur zhing dgra zla mang bar mi 'gyur te/ 'jig rten gyis mthong na dga' ba dang / mngon par dga' bar 'gyur ro/ /de ltar yang dag par brtson pa de/ lhag pa'i tshul khrims la brten nas lhag pa'i sems skyed par byed cing / lhag pa'i sems la brten nas/ lhag pa'i shes rab bskyed de/ bden pa mngon par rtogs pa'i mdo las yang ngan song du 'gro ba'i sdig pa'i las dang / ngan song du 'gro ba'i sdig pa spong bar 'gyur ro/ /de ltar thob pa'i lam la yang bsgom zhing / kun tu sbyor ba thams cad yongs su gtugs pas phung po'i lhag ma dang bcas pa dang / phung po'i lhag ma med pa'i mya ngan las 'das pa'i dbyings su yongs su mya ngan las 'da' bar 'gyur ro/ /bshad pa 'di'i mdor bstan pa ni/ mdor bsdu na/ bcom ldan 'das kyis dad pa can gyi lam rnam pa bzhi bstan pa ste / longs spyod du 'gyur ba dang / bde 'gror 'gyur ba dang / ngan song gi sdug bsngal bzlog pas rab tu phye ba dang / sdug bsngal thams cad bzlog pas rab tu phye ba ste/ de ni 'di'i mdor bstan pa yin par rig par bya'o/ /sdig pa thams cad mi bya ste/ /dge ba phun sum tshogs par bya/ /rang gi sems ni yongs su gdul/ /'di ni sangs rgyas bstan pa yin/ /zhes bya ba ni tshigs su bcad pa yin te/ 'di ltar 'di na la la de bzhin gshegs pas gsungs pa'i chos 'dul ba la dad pa rnyed nas/ rnam pa thams cad dang / gzhi thams cad dang / gnas thams cad du nyes par spyod pa spangs te/ legs par bshad pa'i chos 'dul ba la tshul khrims kyi sdom pa yang dag par len par byed la/ de rnam pa gsum gyis dge ba rdzogs par byed de/ tshul khrims dang ldan par gnas shing / so sor thar pa'i sdom pas bsdams pa nas/ bslab pa'i gzhi rnams yang dag par blangs te slob pa dang / lhag pa'i tshul khrims kyi bslab pa de la brten nas kyang / lhag pa'i sems kyi bslab pa mngon par bsgrub pa dang / lhag pa'i sems kyi bslab pa la brten nas/ lhag pa'i shes rab kyi bslab pa mngon par bsgrub pa'o/ /de des yang dag pa ji lta ba bzhin du shes par bya ba shes shing / mthong bar bya ba mthong ngo / /de ltar dge ba phun sum tshogs pa de rnam pa gzhan gsum gyis bdag gi sems dul bar byed de/ yang dag pa ji lta ba bzhin du shes nas skyo bar 'gyur ba dang / skyo ba mi chags pa dang / ma chags pas rnam par grol bar 'gyur ro/ /bshad pa 'di'i mdor bstan pa ni/ mdor bsdu na/ bcom ldan 'das kyis bslab pa gsum dang / bslab pa'i 'bras bus rang gi bstan pa gzhan dag dang thun mong ma yin par bstan te/ de ni 'dir mdor bstan pa yin par rig par bya'o/ /tshar gcad dka' zhing myur ba dang / /gang du 'dod par ltung ba yin / /sems dul ba ni legs pa ste/ /sems dul bde ba bsgrub pa yin/ /zhes bya ba ni tshigs su bcad pa yin te/ sems zhes bya ba'am/ yid ces bya ba'am/ rnam par shes pa zhes bya ba gang yin pa de ni yun ring po nas 'du 'dzi la dga' la/ 'di ltar 'du 'dzi las bral bar dka' zhing tshar gcad pa dka' ba yin te/ dge ba'i chos rnams bsgom pa rgyun du chud par bya ba la/ sbyor du bcug na/ gcig tu nges par 'dod chags dang bral ba dang / zhe sdang dang bral ba dang / gti mug dang bral ba yang ma yin/ gcig tu nges par rab tu gzung ba dang / rgod pa med pa dang / rnam par zhi bar gnas pa yang ma yin gyi/ myur ba myur bar ldog cing 'dod chags dang bcas/ zhe sdang dang bcas/ gti mug dang bcas/ zhum pa dang / rgod pa dang / rnam par ma zhi ba dang bcas par skye'o/ /rtse gcig tu nang du yang dag 'jog pa la sbyor du bcug na yang / yun ring po nas gzugs dang / sgra dang / dri dang / ro dang / reg bya la mngon par dga' ba'i phyir/ gzugs dang / sgra dang / dri dang / ro dang / reg bya rnams la rnam par rgyug cing 'phro la ltung bar 'gyur ro/ /de la 'phags pa nyan thos ni de lta bu'i kun nas nyon mongs pa la mngon par dga' ba'i sems sdug bsngal bskyed pa'i dbang du mi 'gyur zhing / rjes su mi sgrub kyi/ brtags shing brtags shing rab tu dben par bya ba dang / dge ba'i chos rnams rgyun du bsgom pa dang / sems rtse gcig tu bya ba sgrub par byed / de de ltar sems mnyam par gzhag pas/ yang dag pa ji lta ba bzhin du rab tu shes nas skyo bar 'gyur ro/ /skyo ba ni mi 'chags par 'gyur ro/ /mi 'chags pa ni rnam par grol bar 'gyur ro/ /de de ltar sems dul ba dang / sdug bsngal gyi rgyu zad pas tshe 'di la yang bde bar gnas la phyi ma la yang sdug bsngal thams cad zad pa thob par 'gyur ro/ /bshad pa 'di'i mdor bstan pa ni/ mdor bsdu na/ bcom ldan 'das kyis yun ring po nas log par 'jug pa'i sems kyi rjes su mi sgrub pa dang / rjes su mi sgrub pa byas pa'i phan yon bstan te/ de ni 'dir mdor bstan pa yin par rig par bya'o/ /sems kyi mtshan ma mkhas pa dang / /rab tu dben pa'i nyams thob dang / /rtag 'grus dran ldan bsam gtan pa/ /dga' bde zang zing med pa spyod/ /ces bya ba ni tshigs su bcad pa yin te/ 'di ltar 'di na slob pa gzhi mthong ba la la zhi gnas kyi mtshan ma dang / rab tu 'dzin pa dang / btang snyoms kyi mtshan ma la mkhas pa yin la/ gzhi de las de'i phan yon bzhir 'gyur te/ sems rtse gcig tu 'gyur ba dang / gnas ngan len rnams dang bral bar 'gyur ba dang / lus dang sems shin tu sbyangs pa'i bde ba nyams su myong bar 'gyur ba 'di ni phan yon dang po yin no/ /gzhan yang sems mnyam par gzhag ste/ ji snyed yod pa dang / ji ltar yod pa'i yang dag pa'i chos brtags nas/ nang gi chos kyi lhag mthong thob pa 'di ni phan yon gnyis pa yin no/ /de de ltar zhi gnas dang / lhag mthong rnam par dag pa la brten nas/ byang chub kyi phyogs kyi chos rnams la brtson pa dang / rtag tu byed pa dang / rgyun du byed pa dang / mkhas par byed pas yongs su skyo bar mi 'gyur zhing / yongs su yi 'chad par mi 'gyur ba 'di ni phan yon gsum pa yin no/ /de de ltar yid yongs su mi skyo bas dran pa dang shes bzhin dam pa thob nas/ sems shin tu rnam par grol ba dang / rnam par grol ba'i dga' ba dang / bde ba myong ste/ zang zing med pa'i bde bas tshe 'di la bde ba la reg par gnas pa 'di ni phan yon bzhi pa yin no/ /bshad pa 'di'i mdor bstan pa ni/ mdor bsdu na/ bcom ldan 'das kyis mtshan ma la mkhas pa'i phan yon bzhi bstan te/ zhi gnas kyis byas pa dang / lhag mthong gis byas pa dang / mi skyo bas byas pa dang / mthar phyin pas byas pa ste/ de ni 'dir mdor bstan pa yin par rig par bya'o/ / //bam po nyi shu rtsa bzhi pa/ bzos mi 'tsho dang yang dang bdag la legs 'dod dang / /dbang po thul dang kun las rnam par grol ba dang / /khyim na mi gnas bdag gir mi 'dzin re ba med/ /'dod spangs gcig pu rgyu ba de ni dge slong yin/ /zhes bya ba ni tshigs su bcad pa yin te/ yan lag lnga dang ldan la/ yan lag lnga spangs pa ni dge slong yang dag pa yin par rig par bya ste/ lnga gang zhe na/ tshul 'chos pa la sogs pa log par 'tsho bar byed pa'i chos rnams la mi brten pa ste/ khyim rnams su spyi rtol gyi khar 'dor ba'am/ zhal ta byed pa'am/ ming dang / rus nas smos pa'am/ nyan thos kyi bshad pa yang rung / sangs rgyas kyi bshad pa yang rung ba'i bzo'i gnas la brten nas/ chos ma yin pas chos gos dang kha zas la sogs pa tshol bar mi byed pa 'di ni yan lag dang po yin no/ /gzhan yang snod spyad nyung ba dang / yo byad nyung ba dang / shin tu yo byad bsnyungs pa'i tshul can dang / lus la bgo ba'i gos dang / lto dgang ba'i zas la chog shes shing yongs su chog shes te/ gang dang gang du 'gro bar lhung bzed dang / chos gos dang chas pa 'di ni yan lag gnyis pa yin no/ / dge sbyong du 'gyur ba la gus shing / dge sbyong du 'gyur ba la mngon par dga' la/ bslab pa 'dod cing bslab pa la mngon par dga' nas/ srog gi phyir yang bslab pa las 'gal bar mi shes na/ zang zing chung zad tsam gyi phyir lta ci smos te/ 'di ni yan lag gsum pa yin no/ /de de ltar yang dag pa la brtson zhing 'tsho ba yongs su dag la chog shes shing bslab pa 'dod pa bden pa mngon par ma rtogs pa rnams mngon par rtogs par 'gyur zhing lta ba rnam par dag pa thob par 'gyur la/ de gal te brgya la brjed ngas pas sdig pa mi dge ba'i rtog pa 'dun pa dang / zhe sdang dang / gti mug dang ldan pa dag skye zhing / de brjed ngas pa dang / yid rtul bar gyur na yang slar myur ba kho nar med par 'gyur ba 'di ni yan lag bzhi pa yin no/ /des lam ji ltar thob pa nyid sgom pas kun du sbyor ba dang / 'ching ba dang / bag la nyal dang / nye ba'i nyon mongs pa dang / kun nas dkris pa thams cad las sems rnam par grol bar 'gyur ba 'di ni yan lag lnga pa ste/ de ltar na yan lag lnga dang ldan pa yin no/ /yan lag lnga rnam par spangs pa ji lta bu zhe na/ gnas lnga ni dge slong dgra bcom pas byas pa'i cha ma yin te/ bslab pa phul nas nyams par bya ba la 'jug pa'i cha ma yin pa dang / bdag gir yongs su 'dzin pas sogs shing yongs su spyod pas 'dod pa rnams yongs su longs spyod pa'i cha ma yin pa dang / gnag gi rnyed pa'i phyir ram srog gi phyir yang shes bzhin du brdzun du smra ba'i cha ma yin pa dang / 'dod pa rnams spangs pa las yang ma byin par len pa'i cha ma yin pa dang / srad pa med pas gcig pu gnas shing gcig pu rgyu la/ gnyis kyis gnyis sprod pa mi tshangs par spyod pa 'khrig pa'i chos la brten pa dang / bde ba dang / sdug bsngal ba bdag gis byas pa'am/ pha rol gyis byas par 'dzin pa dang / bdag dang gzhan gnyi gas byas pa'am/ bdag gis kyang ma byas/ gzhan gyis kyang ma byas pa bde ba dang / sdug bsngal rgyu med par 'byung ngo snyam du 'dzin pa'i cha ma yin pa ste/ de ltar yan lag lnga rnam par spangs pa yin no/ /ring du 'gro zhing gcig pu rgyu/ /lus yongs ma yin phug gnas pa/ /gdul dka'i sems ni 'dul ba de/ /bram ze yin zhes nga smra'o/ /zhes bya ba ni tshigs su bcad pa yin te/ gang 'di skad du byis pa rnams kyi sems zhes bya ba'am / yid ces bya ba'am/ rnam par shes pa zhes bya ba de ni 'das pa'i dus nas bzung ste/ lus sna tshogs gcig nas gcig tu brgyud pa dang / rgyu gcig nas gcig tu brgyud pas/ byed pa po med par ring du byis pa rnams kyi ring du song ba zhes bya ste/ de ni 'khor ba'i phyir sngon gyi mtha' mi mngon no/ /de yang da ltar gyi dus la brten te/ sems kyi zla gnyis pa med pa dang / sems thams cad cig car du mi 'byung ba'i phyir re re nas 'jug go/ /de yang da ltar gyi dus kho na la brten te/ 'dod chags kyi bdag nyid dam/ zhe sdang gi bdag nyid dam/ gti mug gi bdag nyid dam/ nyon mongs pa dang nye ba'i nyon mongs pa gang yang rung ba'i bdag nyid du yang rung ste/ gang gi ngo bo nyid du nye bar gnas pa de'i ngo bo nyid du gtan du rjes su 'jug pa ni ma yin te/ dper na dbang po gzugs can lnga po dag mthun pa dang / mi mthun pa dang / ngan pa dang / bzang por ngo bo nyid ji lta ba bzhin du nye bar gnas te/ de kho na bzhin du gtan du rjes su 'jug go/ /sems ni de lta ma yin te/ sems ni nyin mtshan dang / skad cig thang cig yud tsam de dang de dag 'das pa rnam pa du ma mang po sna tshogs gzhan skye ba ni skye la/ gzhan 'gag pa ni 'gag ste/ de ltar na sems kyi ngo bo nyid kyi lus ni nyon mongs pa can gyi bdag nyid yin pas yongs su grub pa ma yin no/ /de yang ma 'ongs pa'i dus la brten nas bag la nyal dang bcas par rnam par shes pa'i gnas bzhi po de dag la gnas te/ yang skye zhing 'gro ba dang / phyir 'ong ba'i skal ba can yin no/ /de la gal te mkhas pa mtshan nyid bzhi po 'di dag gis 'das pa dang / da ltar byung ba dang / ma 'ongs pa'i dus la brten te/ sems yang dag pa ci lta ba bzhin du yongs su shes nas/ skyo bar bya ba dang / 'dod chags dang bral bar bya ba dang / dgag par bya ba'i phyir sgrub cing / sems kyang grol bar byed pa de ni 'jig tshogs thams cad las rgal te/ pha rol du son nas thang la gnas pa'i bram ze yin no/ /bshad pa 'di'i mdor bstan pa ni/ mdor bsdu na/ bcom ldan 'das kyis 'das pa'i dus yun ring po nas sems can kun nas nyon mongs pa can byed pa po med pa yin par bstan pa dang / da ltar byung ba'i dus na skad cig pa dang / rang bzhin gyis 'od gsal ba yin la/ ma 'ongs pa'i dus na bag med pa dang / bag yod pas byas pa'i kun nas nyon mongs pa dang / rnam par byang ba bstan te/ de ni 'dir mdor bstan pa yin par rig par bya'o/ /'jig rten 'di ni gang gis bsgribs / /'di ni gang gis mi gsal bgyis/ /bsgos zhes bgyis ba ci la bgyi/ /de yi 'jigs chen gang zhig lags/ /ma rig pas ni 'jig rten bsgribs/ /bag med phyir ni gsal ma yin/ / rtog pas bsgos zhes nga smra ste/ /de yi 'jig rten sdug bsngal yin/ /rgyun rnams kun nas 'dzag pa yi/ /rgyun rnams bzlog pa gang zhig lags/ /rgyun rnams sdom pa bka' stsol cig /rgyun ni gang gis dgag par bgyi/ /'jig rten rgyun ni gang yin pa/ /de dag bzlog par dran pa ste/ /rgyun rnams sdom par bshad bya na/ /shes rab kyis ni dgag par bya/ /shes rab dang ni dran pa dang / /ming dang gzugs ni rnam kun du/ /de ni gang du 'gag 'gyur ba/ /zhu na de ni bdag la gsungs/ /shes rab dang ni dran pa dang / /ming dang gzugs ni rnam kun du/ /rnam par shes pa 'gags gyur na/ /der ni de yang 'gag par 'gyur/ /dran pa spyod pa'i rnam par shes/ /ji ltar 'jug 'gyur zhu lags na/ /ji bzhin the tshom ma mchis par/ /de ni bdag la bshad du gsol/ /nang dang phyi yi tshor ba la/ /mngon par dga' bar mi byed na/ /de ltar dran pa spyod pa yi/ /rnam par shes pa 'jug par 'gyur/ /gang dag legs gsungs chos can dang / /gang dag slob pa tha dad pa/ /de dag nang nas 'grus pa'i spyod/ /zhu na bzod ldan bdag la gsungs/ / 'dod pa rnams la chags med cing / /yid kyis rnyog pa med par byed/ /chos rnams kun la mkhas pa dang / /dran pas dge slong kun du rgyu/ /zhes bya ba ni pha rol du sgrol ba las ma pham pas zhus pa yin no/ /'jig rten ni gsum ste/ 'dod pa'i 'jig rten dang / gzugs kyi 'jig rten dang / gzugs med pa'i 'jig rten no/ /don gyi skabs 'di ni rab tu byung ba'i 'jig rten dang / khyim pa'i 'jig rten las dgongs so/ /de la rab tu byung ba'i 'jig rten la yang rnam pa gnyis te/ nyes par bshad pa'i chos can rnams dang / legs par gsungs pa'i chos can rnams so/ /de la nyes par bshad pa'i chos can gang yin pa de dag ni ma rig pas bsgribs so/ /legs par gsungs pa'i chos can gang yin pa de dag ni rig pa'i gsal ba'i skabs yod mod kyi bag med pas mi gsal lo/ /khyim pa gos dkar po gyon pa tha dad pa rnams ni rtog pas bsgos pa yin no/ /rtog pa de yang rnam pa gsum du rig par bya ste/ bsnyad pa'i gzhi gsum po dag la yang rtog pa zhes bya'o/ /tha snyad bzhi brjod pa la yang rtog pa zhes bya'o/ /tshig 'byung bar byed pa'i rtog pa la yang rtog pa zhes bya'o/ /de la 'das pa dang / ma 'ongs pa dang / da ltar byung ba'i bsnyad pa'i gzhi rnams las/ tha snyad gzhi las brtsams te/ rnam par rtog pa tha dad pa dag la rnam par rtog pa rnams kyi mthun pa'am mi mthun par 'gyur te/ de ni de dag gi sgo bar byed pa zhes bya'o/ /de ltar snga ma'i rtog pa dang / phyi ma'i bsgo ba ni phal cher khyim pa rnams la snang ste/ de lta bas na de dag ni rtog pas bsgos pa zhes bya'o/ /de la nyes par bshad pa'i chos can ma rig pas bsgribs pa gang dag yin pa dang / legs par gsungs pa'i chos can bag med pa gang dag yin pa dang / khyim pa rtog pas bsgos pa gang dag yin pa de dag ni tshe 'di la sdug bsngal gyi rgyu yin bzhin du/ sdug bsngal gyi rgyu las sdug bsngal gyi rgyur yang dag pa ji lta ba bzhin du ci yang mi shes pas sdug bsngal gyi rgyu la mngon par dga' ba'i ngo bor gnas te/ rgyu des phyi ma la de dag gi sdug bsngal skye ba gang yin pa de ni/ shin tu 'jigs pa chen po mi bzad pa yin no/ /de la sems can nyes par bshad pa'i chos can rnams kyi skye mched drug gi rgyun ni ma rig pa'i sgrib pa'i srol nas sdug bsngal gyi phyir 'bab po/ /khyim pa rnams kyi ni rtog pa'i srol nas so/ /legs par gsungs pa'i chos can rnams kyi skye mched drug gi rgyu ni bag med pa'i srol nas sdug bsngal gyi phyir 'bab ste/ ma rig pa'i sgrib pa dang / rtog pa dang / bag med pa'i srol gyi rgyun de dag gi rgyun 'jug pa de zlog pa ni/ gzhan gyi sgra'i rgyun las byung ba dang / so so rang gi tshul bzhin yid la byed pa'i rgyu las byung bas/ 'du byed thams cad la nyes dmigs su 'dzin pa dang ldan pa'i dran pa yin te/ rnam par gnon pa'i gnyen po'i tshul gyis so/ / 'jig rten las 'das pa'i yang dag pa'i lta bas bsdus pa'i shes rab kyis ni rgyun de dag gsum char yang 'jug pa'i rgyun gcod pa'i tshul gyis thams cad kyi thams cad du gcod par byed de/ rgyun de rnam par gnon pas spong ba yang sdom pa yin la/ gtan spong ba yang sdom pa yin par rig par bya'o/ /de la nyes par bshad pa'i chos can rnams dang / khyim pa rnams ni gcig tu nges par kun nas nyon mongs pa'i phyogs su gtogs pa yin no/ /legs par gsungs pa'i chos 'dul ba la ni gnyis dmigs te/ bag med pa rnams ni kun nas nyon mongs pa can yin no/ /bag yod pa rnams ni rnam par byang ba'i gsal ba can yin no/ /de la gsal bar byas pa gang yin pa dag dang / gsal bar byed pa gang yin pa de dag kyang bag yod pa yin par rig par bya'o/ /de la dgra bcom pa gsal bar byas pa de dag ni dran pa nye bar gzhag pa bzhi po de dag la dran pa dang shes rab shin tu bsgoms pa'i phyir dang / shes bzhin du rnam par dag pa thob pa'i phyir bag yod pa la bag yod par byed pa med kyi/ phung po'i lhag ma med pa'i mya ngan las 'das pa'i dbyings su shes pa shin tu rnam par dag pa de 'gags pas de'i dran pa dang / shes rab kyang 'gag par 'gyur ba ni med pa ma yin no/ /de'i de las gzhan pa sngon gyi las kyis 'phangs pa'i ming dang gzugs kyi lhag ma chen por gtogs pa gang yin pa de dag thams cad kyang 'gag par 'gyur ro/ /ji srid du 'gag par ma gyur pa de srid du yang rtag tu gnas par bya ba drug gis gnas shing nang gi 'dod chags dang bral ba'i sa pa'i tshor ba dang / phyi rol gyi 'dod par gtogs pa'i tshor ba la yang mngon par dga' ba med de / de ltar dran pa dang ldan pa'i dgra bcom pa ni tshe ji srid par rnam par rgyu ba na rnam par shes pa de 'jug par 'gyur ro/ /de la slob pa gang yin pa de dag la ni bag yod par byed pa yod de/ de dag la ni gsal bar byed pa'o/ /bag yod pa la bag yod par byed pa de dag kyang rnam pa gnyis su rig par bya ste/ slob pa tha dad pa re ltar thogs na lan bdun pa dang / rigs nas rigs su skye ba dang / lan cig phyir 'ong ba la sogs pa dag gi nang nas gang rtag tu byed cing byang bar byed pa'i slob pa/ gang tshe 'di la yongs su mya ngan las 'das pa'i skal ba yod pa'i 'og ma'i cha dang mthun pa dang / gong ma'i cha dang mthun pa'i kun du sbyor ba rnams kyi kun nas nyon mongs pa can du mi 'gyur ba dang / de dag nyid spang ba'i phyir gnyen po sgom par byed pa'o/ /de la 'dod pa rnams la mngon par zhen pa med pas ni 'og ma'i cha dang mthun pa'i kun du sbyor ba rnams kyis kun nas nyon mongs pa can du mi 'gyur la/ yid kyi rnyog pa med par byed pas ni gong ma'i cha dang mthun pa'i kun du sbyor ba rnams kyis kun nas nyon mongs pa can du mi 'gyur ro/ /sdug bsngal gyi chos thams cad dang / kun 'byung ba nas nges par 'byung ba'i bar du yang dag pa ji lta ba bzhin du rab tu shes la/ dran pa nye bar gzhag pa bzhi la shin tu gnas pa'i sems kyis gnas na mthar phyin par bya ba'i phyir/ lam ji ltar thob pa nyid kyi rjes su 'gro bar 'gyur te/ de ltar gnyen po sgom par byed do/ /de tsam gyis na de'i bag yod la/ bag yod par byed pa thams cad yongs su rdzogs pa yin no/ /bshad pa 'di'i mdor bstan pa ni/ mdor bsdu na/ bcom ldan 'das kyis khyim pa rnams dang / 'di las phyi rol pa rnams ni gcig tu nges par kun nas nyon mongs par 'gyur ba dang / chos 'di pa rnams las kyang bag med pa rnams ni kun nas nyon mongs par 'gyur ba dang / bag yod pa rnams ni rnam par byang bar 'gyur bar bstan te/ de ni 'dir mdor bstan pa yin par rig par bya'o/ /'dod pa rnams ni 'dod pa dang / /gal te de yi de grub cing / /ming ni ci dgar thob gyur na/ /yid ni mchog tu dga' bar 'gyur/ / skye bo 'dun pa skyes gyur la/ /tshor ba de yi 'dod de dag /gal te yongs su nyams gyur na/ /zug rngu zug bzhin gnod par 'gyur/ /sbrul mgo las ni rkang pa bzhin/ /'dod rnams spong ba gang yin de/ /'jig rten dag na sred 'di las/ /dran bzhin du ni 'da' bar 'gyur/ /zhing dngos dbyig dang ba lang dang / /rta dang nor bu rna cha dang / /bud med bran gyi 'dod rgyas la/ /mi ni mngon par zhen pa gang / /stobs chen nyam chung bab pa bzhin/ /de ni nyes 'dzag rnams kyis bcom/ /de phyir chur ni gru zhig ltar/ /de ltar sdug bsngal 'byung bar 'gyur/ /ta la gtan nas gcad pa ltar/ /gang gis de ni bcad byas pa/ /de ni mya ngan ldog 'gyur te / /pad+ma la ni chu thigs bzhin/ /zhes bya ba ni don gyi sde tshan las 'dod pa rnams las brtsams pa'i tshigs su bcad pa yin te/ 'di ltar 'di na la la ma 'ongs pa'i 'dod pa rnams thob par bya ba'i phyir don du gnyer ba dang / thob pa rnams la da ltar so sor rten par byed de/ de de ltar don du gnyer bar gyur cing so sor rten par byed pa dang / rnyed pa dang longs spyod de 'grub par 'gyur te/ gzhi des de'i bde ba yang skye bar 'gyur la/ yid bde ba yang skye bar 'gyur ba 'di ni 'dod pa rnams kyi ro myang ba zhes bya'o/ /gal te de don du gnyer bar gyur cing / 'dod pa de dag rnyed pa dang longs spyod las yongs su nyams par gyur na/ de 'dod pa'i ro myong ba dang ldan pa'i sred pa zug rngu sems la zhugs pa des/ mi zug rngus zug pa bzhin du shin tu sdug bsngal ba dang / yid mi bde ba dang phrad par 'gyur te/ 'di ni 'dod pa rnams kyi nyes dmigs zhes bya'o/ /de la 'dod pa rnams ni sprul lta bu yin la/ 'dod pa rnams kyi ro myang ba ni sprul gyi mgo bo lta bu yin te/ 'dod pa'i sbrul gyis 'dod pa'i ro myang ba la kun du chags shing mngon par zhen pa'i dug des byis pa rnams zin to/ /'phags pa nyan thos thos pa dang ldan pa de ni sbrul mgo log nas song ba bzhin du 'dod pa rnams kyi ro myang ba la kun du chags pa spangs nas/ chags pa med pa nas rgyas par mngon par zhen pa med par gyur pa'i bar gyis longs spyod par byed de/ de gzugs rnams la chags pa nas/ reg bya rnams la 'dod pa'i sred pa'i bar gang yin pa'i chags pa de las/ 'dun pa'i 'dod chags 'dul zhing spong la/ yang dag par 'da' bas rgal bar 'gyur ba 'di ni 'dod pa rnams las nges par 'byung ba'o/ /mdor bsdu na/ 'dod pa rnams ni ngo bo nyid rnam pa gnyis te/ dngos po'i 'dod pa rnams dang / nyon mongs pa'i 'dod pa rnams so/ /de la dngos po'i 'dod pa rnams ni gang gi gzhi zhing gi dngos po yin pa'i 'bru dang / gang gi gzhi dbyig gi dngos po yin pa'i nor yin te/ 'di ltar 'bru ni zhing las btsal bar bya ba yin la/ dbyig ni rgyal po la zho shas 'tsho ba dang / tshong gnyis las btsal bar bya ba'i phyir ro/ /zhing las 'bru btsal ba'i thabs ni ba lang ngo / /rgyal po la zho shas 'tsho ba las dbyig btsal pa'i thabs ni rta'o/ /tshong las dbyig btsal ba'i thabs ni dbyig dang nor bus spras pa tha dad pa dag dang / dbyig gis spras pa'i rna cha gdub 'khor la sogs pa'o/ /'di ltar thabs kyi mchog 'di dag la sogs pa dang / 'di lta ste/ nyo tshong bya ba'i phyir tshong 'phrul gyi thabs gzhan dag kyang rig par bya'o/ /nor dang 'bru bsags nas rtse zhing dga' la/ longs spyod pa'i grogs ni bud med rnams so/ /ma bsags pa'i tshe bsgrub pa dang / bsrung ba dang / spel ba'i grogs ni bran rnams so/ /nor dang 'bru'i phung po mang po bsags nas/ rgud pa bsal ba'i phyir gter du sbed de/ de dag ni dngos po'i 'dod pa'i rnam pa thams cad ces bya'o/ /nyon mongs pa'i 'dod pa rnams gang zhe na/ dngos po'i 'dod pa'i ro myang ba'i rjes su 'brang ba'i rnam par shes pa la mngon par zhen pa gang yin pa dang / kun du rtog pa'i 'dod chags gang yin pa ste/ de dngos po'i 'dod pa de dag la nyon mongs pa'i 'dod pas sems nyams smad nas/ dngos po'i 'dod pa de dag 'gyur zhing gzhan du 'gyur bas/ nyes 'dzag dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams skye bar 'gyur te/ skyes nas kyang sems kun tu brdung ste gnas so/ /de ltar tshe 'di la nyes 'dzag gis zil gyis non te/ gnyen po med par gyur pa de ni chu'i nang du gru zhig pa dang 'dra bar phyi ma la skye ba dang / rga ba dang / na ba la sogs pa'i sdug bsngal gyi bye brag rnams rjes su 'ong bar 'gyur ro/ /'dod pa rnams las nges par 'byung ba gang yin pa de'i 'dod pa'i ro myang ba'i rjes su 'brang ba'i rnam par shes pa zhen pa dang ldan pa de ni ta la gtan nas drung nas bcad na mi skye ba'i chos can yin pa bzhin du thams cad kyi thams cad du chad par 'gyur te/ de'i dngos po'i 'dod pa sdug pa nas yid du 'ong ba'i bar de dag 'gyur zhing gzhan du 'gyur bas/ pad+ma'i 'dab ma la chu'i thigs pa mi chags pa bzhin du/ rnam par shes pa rnam par dag pa de la mya ngan la sogs pas gnas mi thod do/ /bshad pa 'di'i mdor bstan pa ni/ mdor bsdu na/ bcom ldan 'das kyis 'dod pa rnams kyi ro myang ba dang / nyes dmigs dang / nges par 'byung ba dang / ngo bo nyid dang / ro myang bas byas pa'i nyes dmigs dang / nges par 'byung bas byas pa'i phan yon bstan te/ de ni 'dir mdor bstan pa yin par rig par bya'o/ /'das la rjes su 'gro mi byed/ /ma 'ongs pa la re ba med/ /da ltar byung chos gang yin pa/ /de dang de la rnam lta la/ /mi 'phrogs kun du mi 'khrugs pa/ /de ni mkhas pas 'phel bar byed/ /ces bya ba ni mtshan mo bzang po'i tshigs su bcad pa yin te/ 'di na la la de bzhin gshegs pas gsungs pa'i chos 'dul ba la dad pa rnyed nas/ dad pas khyim nas khyim med par legs pa kho nar rab tu byung la/ de rnam pa lngas tshangs par spyod pa shin tu yongs su dag par spyod de/ des khyim gyi 'du byed gang dag yongs su btang ba de dag la mi lta zhing / de dag skyed par yang mi sems/ phyir len par yang mi byed pa 'di ni rnam pa dang po'o/ /gzhan yang tshe 'di la rnyed pa dang / bkur sti dang ldan pa'i ma 'ongs pa'i 'du byed rnams kyang mi 'dod la/ phyi ma'i lha dang mi rnams kyi 'du byed rnams kyi phyir yang smon lam 'debs shing tshangs par spyod par mi byed pa 'di ni rnam pa gnyis pa'o/ /gzhan yang gang de'i nye bar len pa'i phung por gtogs pa gzugs la sogs pa'i chos da ltar byung ba gang dag yin pa de dag la de gnas nas 'di ltar yang dag par rnam par lta ba por 'gyur te/ lus kyis nyes par spyod pa ni tshe 'di dang phyi ma la yang sdig pa'i rnam par smin par 'gyur bas/ gal te bdag gi lus kyis nyes par spyod pa spyad na ni zhes bya ba nas/ lus kyis nyes par spyod pa spangs nas/ lus kyis legs par spyod pa bsgom pa'i bar du rgyas par mdo las byung ba bzhin du sbyar te/ ngag dang / yid kyis legs par spyod pa yang de dang 'dra bar rig par bya ba dang / gzugs la sogs pa'i phung po 'das pa dang / ma 'ongs pa dang / da ltar byung ba rnams mi rtag par yang dag par mthong ste/ gang mi rtag pa de ni sdug bsngal ba'o/ /gang sdug bsngal ba de ni bdag med pa'o/ /gang la bdag med pa de dag thams cad ni bdag gi ma yin pa dang / de ni bdag ma yin pa dang / de ni bdag gi bdag ma yin par de de ltar yang dag pa ji lta ba bzhin du yang dag pa'i shes rab kyis mthong ba 'di ni rnam pa gsum pa'o/ /gzhan yang chos la rnam par lta ba dang po la brten nas/ phyi ma la mngon par skyo bar bya ba'i phyir/ dbang po yongs su smin pas/ rgyal po la sogs pas dbrog tu med pa'i bsod nams kyi tshogs dang / ye shes kyi tshogs 'phel bar byed pa de ni rnam pa bzhi pa'o/ /gzhan yang de chos la rnam par lta ba cig shos la brten nas tshe 'di nyid la nyon mongs pa dang / nye ba'i nyon mongs pa thams cad kyis kun du mi 'khrugs pa'i mya ngan las 'das pa 'phel bar byed pa 'di ni rnam pa lnga pa ste/ de rnam pa lngas shin tu yongs su dag pa'i tshangs par spyod pa la gnas pa de ni/ mtshan gcig tsam gnas na yang bzang zhing mchog tu bzang ba yin te/ tshangs par spyod pa la gnas pa thams cad las yang dag par 'phags par rig par bya'o/ /bshad pa 'di'i mdor bstan pa ni/ mdor bsdu na/ bcom ldan 'das kyis legs par gsungs pa'i chos 'dul ba la tshangs par spyod pa la gnas pa thun mong ma yin pa rnam pa thams cad dang ldan pa/ shin tu yongs su dag pa bstan te/ de ni 'dir mdor bstan pa yin par rig par bya'o/ /sdom la/ sdig dang brjod bya 'dod chags dang / /chu bo dang ni 'jigs dang rigs/ /grags ldan mtsho dang chu bo gnyis/ /'dod chags zhe sdang bya ba dang / /'dzin pa dang ni don thob dang / /mi rtag pa dang bag yod dang / /'dod chags shas che chos la gnas/ /nges rtag legs par smras pa dang / /dad pa dang ni thos pa dang / /nam mkha' mtshungs dang gzugs dang rgyal/ /rus pa'i ra ba rus sbal dang / / mtshungs dang 'dam dang gnas gnyis dang / /brtsal gyur dang ni byin pa dang / /sdig pa kun dang ltung ba dang / /mkhas dang bzo dang ring du 'gro/ /bsgribs dang 'dod dang bzang po yin/ /rnal 'byor spyod pa'i sa las/ bsams pa las byung ba'i sa rdzogs so// // bsgoms pa las byung ba'i sa gang zhe na/ mdor bsdu na/ bsgoms pa las byung ba'i sa ni gnas bzhis bsdus par rig par bya ste/ gnas bzhi gang zhe na/ bsgom pa'i gzhi dang / bsgom pa'i rgyu dang / rnal 'byor du bsgom pa nyid dang / bsgoms pa'i 'bras bu'o/ /gnas bzhi po 'di dag kyang yan lag bdun gyis bsdus par rig par bya ste/ yan lag bdun gang zhe na/ mngon par 'grub pa phun sum tshogs pa dang / dam pa'i chos nyan pa phun sum tshogs pa dang / mya ngan las 'das pa gtso bor byed pa dang / rnam par grol ba yongs su smin par byed pa'i shes rab yongs su smin pa dang / gnyen po bsgom pa dang / rnam pa thams cad du 'jig rten pa rnam par dag pa dang / rnam pa thams cad du 'jig rten las 'das pa rnam par dag pa ste/ yan lag bdun gyis bsdus pa'i gnas bzhi po 'di dag gis ni legs par gsungs pa'i chos 'dul ba 'di la bslab pa'i gzhi thams cad yongs su rdzogs par bya ba las brtsams te/ bstan pa'i don mtha' dag rgyas par byed par rig par bya'o/ /de la mngon par 'grub pa phun sum tshogs pa gang zhe na/ de ni mdor bsdu na/ rnam pa bcur blta bar bya ste/ nang la brten te rnam pa lnga dang / phyi rol la brten te rnam pa lnga ste/ nang dang phyi rol la brten nas rnam pa bcur 'gyur ro/ /nang la brten te mngon par 'grub pa phun sum tshogs pa rnam pa lnga po gang zhe na/ ris mthun pa phun sum tshogs pa dang / yul phun sum tshogs pa dang / lus phun sum tshogs pa dang / las kyi sgrib pa med pa phun sum tshogs pa dang / mos pa sgrib pa med pa phun sum tshogs pa'o/ /ris mthun pa phun sum tshogs pa gang zhe na/ 'di ltar 'di na la la mi rnams kyi nang du skyes par 'gyur te/ skyes pa yang yin la/ skyes pa'i dbang po dang yang ldan pa'o/ /yul phun sum tshogs pa gang zhe na/ 'di ltar 'di na la la mi rnams kyi nang du skyes la/ dbus kyi yul du yang skyes par 'gyur te/ mtha' 'khob gang du 'khor bzhi po dge slong dang / dge slong ma dang / dge bsnyen dang / dge bsnyen ma mi 'gro ba der ni mi skye'i/ gang du 'khor bzhi po rnams 'gro ba dang / rkun ma ma yin pa dang / kla klo ma yin pa dang / gang du 'phags pa rnams dang / yang dag par song ba rnams dang / yang dag par zhugs pa rnams dang / skyes bu dam pa rnams 'gro ba de dang der skyes pa yin no/ /lus phun sum tshogs pa gang zhe na/ 'di ltar 'di na la la dbus kyi yul du yang skyes la/ mig ma tshang ba yang med/ rna ba ma tshang ba yang med/ yan lag dang nying lag gang yang rung ba ma tshang ba yang med/ blun po yang ma yin/ dig pa dang / lkugs pa yang ma yin zhing / legs par bshad pa dang / nyes par bshad pa'i chos rnams kyi don rtogs par bya ba'i mthu yang yod pa'o/ /las kyi sgrib pa med pa phun sum tshogs pa gang zhe na/ 'di ltar 'di na la la lus phun sum tshogs par yang 'gyur la/ mtshams med pa lnga las mtshams med pa gang yang rung ba gang byas na de phung po 'di dag nyid kyis 'phags pa'i chos 'thob pa'i snod du mi rung ba kho nar 'gyur ba ma byas la byed du yang ma bcug pa'o/ /mos pa sgrib pa med pa phun sum tshogs pa gang zhe na/ 'di ltar 'di na la la mtshams med pa'i las rnams dang yang mi ldan la/ 'di lta ste/ lha'i gnas rnam pa sna tshogs dang / mu stegs can gyi gnas rnam pa sna tshogs kyi gnas ngan par mos pa med cing gnas ngan par mngon par dad pa med kyi/ de bzhin gshegs pa'i bstan pa gnas bzang po la dad pas sngon gyi tshe rabs nas de'i rgyus yongs su bsgos pas/ rgyu de dang rkyen des da ltar de'i mos pa dang ba dang ldan pa 'phags pa'i gnas de nyid la gnas pa'o/ /phyi rol la brten te/ mngon par 'grub pa phun sum tshogs pa rnam pa lnga po gang zhe na/ ston pa phun sum tshogs pa dang / brda las byung ba'i chos gdags pa phun sum tshogs pa dang / don dam pa'i chos kyi rjes su 'jug pa phun sum tshogs pa dang / bsgrub pa med par mi 'gyur ba phun sum tshogs pa dang / mthun pa'i yo byad phun sum tshogs pa'o/ /de la ston pa phun sum tshogs pa gang zhe na/ 'di ltar gang zag de de ltar nang la brten te/ mngon par 'grub pa phun sum tshogs pa rnam pa lnga la yang gnas la/ ston pa de bzhin gshegs pa dgra bcom pa yang dag par rdzogs pa'i sangs rgyas/ thams cad mkhyen pa/ thams cad gzigs pa/ shes bya thams cad la sgrib pa mi mnga' ba'i mkhyen pa brnyes pa yang 'jig rten du byung ba'o/ /brda las byung ba'i chos gdags pa phun sum tshogs pa gang zhe na/ 'di ltar de bzhin gshegs pa de nyid 'jig rten du byung ba de nyid kyis/ dge ba dang mi dge ba'i chos rnams dang / kha na ma tho ba dang bcas pa dang / kha na ma tho ba med pa rnams nas rgyas par rten cing 'brel par 'byung ba rnams kyi bar du gnyen po dang bcas pa yang dag bar rab tu ston te/ 'di lta ste/ mdo'i sde dang / dbyangs kyis bsnyad pa'i sde dang / lung bstan pa'i sde dang / tshigs su bcad pa'i sde dang / ched du brjod pa'i sde dang / gleng gzhi'i sde dang / rtogs pa brjod pa'i sde dang / de lta bu byung ba'i sde dang / skyes pa rabs kyi sde dang / shin tu rgyas pa'i sde dang / rmad du byung ba'i chos kyi sde dang / gtan la phab pa bstan pa'i sde'i chos dge ba dang / mi dge ba dang / kha na ma tho ba dang bcas pa dang / kha na ma tho ba med pa rnams nas/ rgyas par rten cing 'brel par 'byung ba cha dang bcas pa rnams kyi bar du yang dag par ston pa'o/ /don dam pa'i chos kyi rjes su 'jug pa gang zhe na/ ston pas de ltar brda las byung ba'i dam pa'i chos legs par gsungs pa la nyan pa pos brda las byung ba'i dam pa'i chos de nyid la yang brten/ gzhan gyi gdams ngag rjes su bstan pa dang mthun pa la yang brten nas/ byang chub kyi phyogs kyi chos sum cu rtsa bdun bsgoms te/ dge sbyong gi 'bras bu dang / dge sbyong gi 'bras bu yongs su rdzogs par yang 'thob par 'gyur la/ de'i 'og tu gong nas gong du rtogs pa rgya che zhing 'phel la spangs pa yang yod pa'o/ / bsgrub pa med par mi 'gyur ba gang zhe na/ de bzhin gshegs pa yongs su mya ngan las 'das kyang rung / bzhugs kyang rung ste/ brda las byung ba'i dam pa'i chos la/ don dam pa'i chos med par mi 'gyur zhing rgyun mi 'chad pa gang yin pa'o/ /mthun pa'i yo byad phun sum tshogs pa gang zhe na/ 'di ltar chos kyi longs spyod kyi rgyur nye bar gnas pa bzhi po 'di dag gis chos kyi longs spyod la zhugs par bram ze dang / khyim bdag dad pa rnams kyis rtogs nas/ chos kyi longs spyod la brtson pa 'di/ zang zing gi longs spyod dang mi ldan pas/ chos kyi longs spyod nyams par gyur na mi rung ngo snyam nas de dag la chos gos dang / bsod snyoms dang / mal stan dang / na ba'i gsos sman dang / yo byad rnams kyis shin tu stobs par byed pa ste/ 'di ni nang dang phyi rol la brten te/ mngon par grub pa phun sum tshogs pa rnam pa bcu zhes bya'o/ /mngon par grub pa phun sum tshogs pa bcu po de dag la ni rnal 'byor bsgom pa'i gzhi dang / rten dang / gnas zhes bya ste/ de la brten cing gnas na/ de bzhin gshegs pa'i nyan thos kyi 'phags pa'i chos rnams thob par 'gyur ro/ /de la 'phags pa'i chos rnams ni mdor bsdu na/ slob pa'i chos rnams dang / mi slob pa'i chos rnams te/ don gyi skabs 'dir ni mi slob pa'i chos rnams la 'phags pa'i chos rnams zhes bya bar dgongs te/ 'di lta ste/ mi slob pa'i yang dag par lta ba nas / rgyas par yang dag pa'i shes pa'i bar du'o/ /de ci'i phyir zhe na/ 'di ltar slob pa'i chos rnams kyang 'phags pa'i chos rnams yin mod kyi/ 'phags pa'i ma yin pa'i nyon mongs pa dang yang 'brel par rnam par snang ba'i phyir ro/ /'di lta ste/ yan lag dang po mngon par 'grub pa phun sum tshogs pa 'di ni bstan pa'i don du gyur pa/ rgyas par byed pa yin par rig par bya ste/ 'di lta ste/ rnam pa bcu'o/ /mngon par 'grub pa phun sum tshogs pa ni 'di las gong na yang med/ 'di las lhag pa yang med do/ /dam pa'i chos nyan pa phun sum tshogs pa gang zhe na/ yang dag par bstan pa gang yin pa dang / yang dag par mnyan pa de gnyis gcig tu bsdus pa la ni dam pa'i chos nyan pa zhes bya'o/ /yang dag par bstan pa yang mdor bsdu na rnam pa gnyis te/ mthun pa dang / kun nas nyon mongs pa can ma yin pa'o/ /de yang rgyas par ni rnam pa nyi shur rig par bya ste/ 'di lta ste/ byang chub sems dpa'i sa las 'byung ngo / /yang dag par nyan pa yang rnam pa bzhi ste/ 'di lta ste/ khengs pa med pa dang / brnyas pa med pa dang / bag 'khums pa med pa dang / rnam par g.yeng ba med pa ste/ nyes pa rnam pa bzhi po 'di dag spangs nas nyan pa gang yin pa de ni/ yang dag par nyan pa zhes bya'o/ /de yang rgyas par ni rnam pa bcu drug tu rig par bya ste/ 'di lta ste/ byang chub sems dpa'i sa de nyid las 'byung ngo / /mya ngan las 'das pa'i gtso bor byed pa gang zhe na/ 'di ltar de bzhin gshegs pa'i nyan thos de mngon par 'grub pa phun sum tshogs pa de la gnas pa na/ ji skad du bstan pa'i rnam pa lta bur chos nyan te/ mya ngan las 'das pa kho nar gtso bor byas shing / mya ngan las 'das pa kho na don du gnyer la/ mya ngan las 'das pa kho na las dmigs pa byas nas nyan par byed kyi/ pha rol 'dun par bya ba dang / dga' bar bya ba dang / rnyed pa dang / bkur sti dang / grags pa dang / sgra dang / tshigs su bcad pa'i phyir ni ma yin no/ /de mya ngan las 'das pa 'di lta ste/ phung po'i lhag ma dang bcas pa dang / phung po'i lhag ma med pa'i mya ngan las 'das pa las brtsams te/ dmigs pa dang bcas pas chos nyan na/ mya ngan las 'das pa gtso bor byed pa'i phyi'i chos bcu 'byung bar 'gyur te/ phung po'i lhag ma dang bcas pa'i mya ngan las 'das pa brtsams nas ni/ mya ngan las 'das pa'i gtso bor byed pa'i chos dgur rig par bya'o/ /phung po'i lhag ma med pa'i mya ngan las 'das pa las brtsams nas ni/ mya ngan las 'das pa gtso bor byed pa'i chos gcig tu rig par bya ste/ thos pa las byung ba'i shes rab de nyid la brten nas/ lam dang lam gyi 'bras bu mya ngan las 'das pa las mngon par yid ches pa rnam pa gsum 'byung bar 'gyur te/ yod pa nyid du yid ches pa dang / yon tan can yin par yid ches pa dang / bdag gis thob par nus pa dang thabs sla ba yin par yid ches par 'gyur ro/ /bsams pa las byung ba'i shes pa yongs su bsgrub pa'i phyir de ltar yid ches par gyur pa ni/ lus dang sems dben par gnas shing sgrib pa dang / rtog pa las dben par 'gyur ro/ /de la brten nas kyang don shin tu rnam par nges pa dang / bsams pa las byung ba'i shes pa'i rjes su 'grub par 'gyur ro/ /de la brten nas kyang sgom pa rtag tu byed pa dang / gus par byed pa'i sbyor ba la 'jug par 'gyur te/ go rims 'dis bsgoms pa las byung ba'i shes pa'i bar du thob la/ de la brten nas kyang 'khor ba la yang nyes par lta ba'i mos pa rtsom la mya ngan las 'das pa la yang yon tan du lta ba'i mos pa rtsom mo/ /de la goms nas kyang bden pa mngon par rtogs pa mngon du 'gro ba'i mthong ba'i lam slob pa'i rnam par grol ba 'thob cing gzhi mthong bar 'gyur la/ de'i gong du bsgom pa'i lam goms pas mi slob pa'i rnam par grol ba thob pas/ rnam par grol ba yongs su rdzogs par 'gyur ro/ /de la rnam par grol ba yongs su rdzogs pa ni 'di yin te/ phung po lhag ma dang bcas pa'i mya ngan las 'das pa'i dbyings kho na'o/ /de la dang po'i chos dgu ni mya ngan las 'das pa de bsgrub pa'i phyir gtso bor go rims bzhin du 'byung ngo / /rnam par grol ba yongs su rdzogs pa gang yin pa de ni phung po'i lhag ma med pa'i mya ngan las 'das pa de'i gtso bo yin par rig par bya'o/ /de ltar mya ngan las 'das pa gtso bor byed pa'i chos nyan pa de la phan yon rnam pa lnga yod par rig par bya ste/ lnga gang zhe na/ nyan pa'i tshe pha rol la phan 'dogs pa dang / bdag la phan 'dogs pa dang / sgrub pa'i tshe pha rol la phan 'dogs pa dang / bdag la phan 'dogs pa dang / sdug bsngal thams cad mthar byed pa 'thob pa'o/ /chos smra ba pos gang gi don du chos ston pa de nyid kyi bsam pas nyan par byed pa ni/ nyan pa'i tshe pha rol la phan 'dogs pa yin la/ dge ba'i bsam pas nyan pas ni brjod pa'i chos kyi don rgya chen po rtogs par 'gyur te/ des na dga' ba dang / mchog tu dga' ba rgya chen po dge zhing nges par 'byung ba dang ldan pa thob par 'gyur te/ de ltar na nyan pa'i tshe bdag la phan 'dogs pa yin no/ /chos kyi rjes su mthun pa'i chos sgrub pa'i sbyor ba gang gi ched du ston pas chos bshad cing yang dag par bstan la/ mngon par rdzogs par sangs rgyas pa'i yang dag par sgrub pa de la gnas na/ bsgrub pa'i tshe chos nyid kyis ston pa la bsnyen bkur byed pas pha rol la phan 'dogs so/ / yang dag par bsgrub pa de nyid la brten nas/ phung po lhag ma dang bcas pa'i mya ngan las 'das pa mchog tu bsil bar gyur pa thob pa ni sgrub pa'i tshe bdag nyid la phan 'dogs so/ /phung po lhag ma med pa'i mya ngan las 'das pa'i dbyings su yongs su mya ngan las 'das pa'i sdug bsngal thams cad kyi mthar phyin pa thob par 'gyur te/ 'di ni mya ngan las 'das pa gtso bor byed pa phan yon dang bcas pa zhes bya'o/ /'di ni mya ngan las 'das pa gtso bor byed pa'i don rgyas pa yin te/ 'di las gong na yang med do/ /'di las lhag pa yang med do/ /rnam par grol ba yongs su smin par byed pa'i shes rab yongs su smin pa gang zhe na/ lhag mthong gi yan lag yongs su smin pas kyang shes rab yongs su smin par 'gyur la/ zhi gnas kyi yan lag yongs su smin pas kyang shes rab yongs su smin par 'gyur te/ 'di ltar sems mnyam par gzhag na shes rab shes bya la 'jug pa rnam par dag par 'gyur ba'i phyir ro/ /de la lhag mthong gi yan lag ni thog ma kho nar bshes gnyen dam pa la yang dag par brten pa'o/ /zhi gnas kyi yan lag ni tshul khrims phun sum tshogs pa yongs su 'dzin pa'o/ /de la bshes gnyen dam pa yongs su 'dzin pa brtsams pas ni shes bya'i de kho na rtogs par bya ba la 'dun par 'gyur ba'o/ /tshul khrims phun sum tshogs pa yongs su 'dzin pa brtsams pas ni lhag pa'i tshul khrims las tshul khrims nyams pa dang / de bzhin du cho ga las cho ga nyams pa tshangs pa mtshungs par spyod pa shes pa rnams kyis mthong ba dang / thos pa dang / dogs pa las gleng ba'am/ dran par byed pa'am/ rjes su slob par byed pa'i tshig bzod pa'o/ /shes bya'i de kho na rtogs par bya ba la 'dun pa de la brten pas ni nyan 'dod par 'gyur ro/ /nyan 'dod pa de la brten pas ni 'dri bar 'gyur ro/ /'dri ba de la brten pas ni sngon ma thos pa'i don nyan par 'gyur ro/ /yang dang yang du rtag tu mnyan pas ni de nyid rnam par byang ba dang / the tshom skyes pa las ldog par 'gyur ro/ /de ltar blo rnam par byang bas ni 'jig rten gyi phun sum tshogs pa thams cad kyi nyes dmigs mthong nas sems skyo bar 'gyur ro/ /de ltar sems skyo zhing dge ba yid la byed pa ni phun sum tshogs pa de dag thams cad la smon par mi 'gyur ro/ /de de ltar 'jig rten pa'i mngon par mthong ba'i lam thams cad la yid kyis smon pa med pas/ ngan song ba'i chos thams cad spang ba'i phyir yang sems kyis smon par byed la/ de'i gnyen po dge ba'i chos yang dag par blangs pa dang / nyon mongs pa thams cad kyi gnyen po dge ba'i chos yang dag par blang ba dang / de'i gnyen po'i 'bras bu thob pas rang gi sems rnam par byang bar bya ba'i phyir yang sems kyis smon par byed do / /rnam pa bcu po 'di dag gis rnam par grol ba yongs su smin par byed pa'i shes rab yongs su smin par gyur pa nas/ ji ltar bstan pa'i go rims bzhin du rnam par grol ba yongs su rdzogs par 'gyur ro/ /yan lag gsum po go rims bzhin du bstan pa gang yin pa 'di lta ste/ dam pa'i chos nyan pa phun sum tshogs pa dang / mya ngan las 'das pa gtso bor byed pa dang / rnam par grol ba yongs su smin par byed pa'i shes rab yongs su smin par byed pa'i yan lag gsum po bstan pa'i don du gyur pa 'di dag rgyas par byed pa ni 'di lta ste/ rnam pa bcu po de dag yin par rig par bya ste/ 'di las gong na yang med do/ / 'di las lhag pa yang med do/ /yan lag gsum po 'di dag nyid ni bsgom pa'i rgyu zhes bya'o/ /de ci'i phyir zhe na/ 'di ltar go rims la brten nas rgyu de dang rkyen des rnal 'byor bsgom par 'grub par 'gyur ba'i phyir te/ 'di lta ste/ dam pa'i chos nyan pa phun sum tshogs pa dang / mya ngan las 'das pa gtso bor byed pa dang / rnam par grol ba yongs su smin par byed pa'i shes rab yongs su smin par byed pa'o// //bam po nyi shu rtsa lnga pa/ gnyen po bsgom pa gang zhe na/ mdor bsdu na gnas skabs gsum la rnal 'byor bsgom pa'i mi mthun pa'i phyogs rnam pa bcu po 'di yod par rig par bya ste/ gnas skabs gsum gang zhe na/ khyim pa'i gnas skabs dang rab tu byung ba'i gnas skabs dang / rab tu dben par nang du yang dag par 'jog pa'i rnal 'byor bsgom pa'i gnas skabs so/ /rnal 'byor bsgom pa'i mi mthun pa'i phyogs bcu po gang zhe na/ khyim pa'i gnas skabs su bdag gi chung ma la 'khrig pa'i rtog pa dang ldan pa'i 'dod chags dang / de ma yin pa'i g.yog 'khor gyi longs spyod dang ldan pa'i chags pa 'di ni/ khyim pa'i gnas skabs su gtogs pa'i mi mthun pa'i phyogs yin te/ mngon par 'byung ba la thams cad kyi thams cad du gegs byed pa'o/ /khyim gyi gnas nas mngon par 'byung ba yang rtog pa'i kun du 'khrug pa'i mngon par dga' ba'i gegs byed de/ de ltar mi mthun pa'i phyogs 'di gnyis kyi gnyen po bsgom pa ni go rims bzhin du/ mi sdug pa'i 'du shes bsgom pa dang / mi rtag pa'i 'du shes bsgom pa yin par rig par bya'o/ /rab tu byung ba ni rab tu byung ba'i gnas skabs la gnas pa na/ mdor bsdu na/ dus dus su bya ba rnam pa bzhi yod de/ ci bdag dge ba'i chos bsgom pa la rtag tu brtson pa la brten nas/ rnam par shes pa bde ba'i ro myang ba rjes su 'brang ba'i las ldog cing / sdug bsngal nyid yang dag pa ji lta ba bzhin du mngon par rtogs par 'gyur ram zhes dge ba'i chos bsgom pa la rtag tu brtson par bya ba dang / ci bdag yongs su yi chad pa'i phyir mya ngan las 'das pa spros pa med pa las bdag gi yid phyir ldog par mi 'gyur zhing / bdag gi bdag gang yang med do zhes mya ngan las 'das pa spros pa med pa la mos shing mngon par dga' bar bya ba dang / ci nas kyang bdag bsod snyoms yongs su spyod pa la brten nas lus gnas pa dang / nyams stobs skye ba dang / dge ba'i chos bsgom pa la rtag tu brtson par bya ba la nyams bde bar 'gyur bar bya'o zhes dus dus su grong dang grong rdal dag tu bsod snyoms kyi phyir rgyu bar bya ba dang / ci nas kyang bdag khyim pa dang / rab tu byung ba'i 'du 'dzi sna tshogs la mngon par dga' ba dang / 'jig rten sna tshogs dang ldan pa'i nyan pa dang / lta ba dang / bkur sti bya ba rnams kyis yang dag par nges par rtog pa'i sems rtse gcig gi gnas skabs kyi bar chad byed par mi 'gyur bar bya'o zhes rab tu dben pa'i gnas su gnas pa ni de'i bya ba bzhi pa yin no/ /bya ba rnam pa bzhi po 'di dag gi mi mthun pa'i phyogs su gyur pa'i chos kyang rnam pa bzhi kho nar rig par bya ste/ bya ba dang po'i snyom las dang le lo'o/ /bya ba gnyis pa'i ni 'jig tshogs la lta ba'o/ /bya ba gsum pa ni rol 'dod chags pa'o/ /bya ba bzhi pa ni 'jig rten pa rnam pa sna tshogs la 'dun pa'i 'dod chags dang rjes su chags pa'o/ /mi mthun pa'i phyogs rnam pa bzhi po de dag gi go rims bzhin du gnyen po bsgom pa yang rnam pa bzhir rig par bya ste/ mi rtag pa la sdug bsngal ba'i 'du shes bsgom pa dang / sdug bsngal ba la bdag med pa'i 'du shes bsgom pa dang / zas la mi mthun pa'i 'du shes bsgom pa dang / 'jig rten thams cad la mngon par mi dga' ba'i 'du shes bsgom par bya'o/ / de la rab tu dben par nang du yang dag par 'jog pa'i rnal 'byor yid la 'jog pa'i gnas skabs la ni mdor bsdu na/ mi mthun pa'i phyogs su gyur pa'i chos rnam pa bzhi yod par rig par bya ste/ bzhi gang zhe na/ zhi gnas dang lhag mthong gi phyogs la sems mun par gyur pa dang / snyoms par 'jug pa la ro myang ba'i rjes su 'brang ba'i sred pa dang / skye ba la g.yo ba'i mtshan ma'i rjes su 'brang ba'i sems dang / sang nas sang du bshol te dus gzhan la ltos shing mi 'chi ba'i rtog pa dang ldan pa'i brtun par sbyor bar mi byed pa'o/ /mi mthun pa'i phyogs bzhi po de dag la yang gnyen po bsgom pa rnam pa bzhi yod par rig par bya ste/ snang ba'i 'du shes bsgom pa dang / 'dod chags dang bral ba'i 'du shes bsgom pa dang / 'gog pa'i 'du shes bsgom pa dang / 'chi ba'i 'du shes bsgom pa'o/ /de la mi sdug pa'i 'du shes ni mdor bsdu na rnam pa gnyis te/ so sor brtags pa'i stobs kyis bsdus pa dang / bsgom pa'i stobs kyis bsdus pa'o/ /de la so sor brtags pa'i stobs kyis bsdus pa'i mi sdug ba'i 'du shes ni mi mthun pa'i phyogs su gyur pa'i chos ni rnam pa lngar rig par bya ste/ lnga gang zhe na/ ngon mthon du bud med dang nye bar gnas pa dang / brjed ngas pa dang / lkog tu bag med par gnas pa dang / lkog tu yang rung / ngon mthon du yang rung ste/ sngon goms pa'i stobs dang / mi sdug pa bsgom pa la brtson na yang yid la byed pa 'khrul pa'o/ /de la yid la byed pa 'khrul pa ni 'di yin te/ mi sdug pa de la so sor ma brtags pas sdug pa'i mtshan ma'i rjes su 'brang ngo / /bsgom pa'i stobs kyis bsdus pa'i mi sdug pa bsgom pa'i mi mthun pa'i phyogs kyi chos ni rnam pa bdun du rig par bya ste/ bdun gang zhe na/ bya ba ngan pas sems rnam par g.yengs pa dang / bya ba ngan pa byed pa la 'jug pa dang / sri zhu med cing 'dri ba med pa la brten pas/ rnal 'byor yid la byed pa la mi mkhas pa dang / dbang po'i sgo ma bsdams pa la brten pas dben pa na gnas kyang nyon mongs pa can gyi rtog pas sems dkrugs pa dang / kha zas kyi tshod ma zin pa la brten pas lus las su mi rung ba dang / rtog pas dkrugs pa de nyid la brten pas nang gi sems kyi zhi gnas rab tu dben pa la mngon par mi dga' ba dang / lus las su mi rung ba de nyid la brten pas lhag mthong la nyams bde ba med pa'i phyir/ shes bya la yang dag pa ji lta ba bzhin du so sor rtog mi nus pa'o/ /mi mthun pa'i phyogs kyi chos de dag thams cad bsdus nas/ rnam grangs bcu gnyis su yang 'gyur ro/ /rnam grangs bcu bzhir yang 'gyur ro/ /mi mthun pa'i phyogs kyi chos de dag gi gnyen por dkar po'i phyogs kyi chos kyang de kho na rnyed yod de/ mi sdug pa'i 'du shes bsgom pa rnam pa gnyis pa'i gces spras byed pa yin par rig par bya'o/ /de la mi rtag pa la sdug bsngal ba'i 'du shes kyi mi mthun pa'i phyogs su gyur pa'i chos rnams ni rnam pa drug tu rig par bya ste/ drug gang zhe na/ dge ba'i chos ma skyes pa rnams thog ma bskyed pa la snyom las byed pa dang / dge ba'i chos skyes pa rnam pa gnas par bya ba dang / nyams par mi 'gyur ba dang / bsgom pa yongs su rdzogs par bya ba dang / phyir zhing 'phel bar bya ba dang / rgyas par bya ba la le lo byed pa dang / bla ma la sri zhu byed du 'gro ba dang / yongs su dri ba dag la rtag 'grus su mi byed pa dang / dge ba'i chos rtag tu bsgom pa la rtag 'grus mi byed pa dang / bla ma la yid mi ches shing yid mi ches pa de la brten pas rtag 'grus mi byed pa dang / nang la bag med cing bag med pa de la brten pas dge ba'i chos rtag tu bsgom pa la rtag 'grus su mi byed pa'o/ /mi mthun pa'i phyogs su gyur ba'i chos de dag gi gnyen por de dag las bzlog pa nyid kyi chos drug ni gces spras byed pa yin par rig par bya'o/ /snang ba'i 'du shes ni/ snang ba rnam pa du ma la dmigs pa ste / 'di lta ste/ mnyam par gzhag pa'i sa las 'byung ba bzhin no/ /don gyi skabs 'dir ni chos snang ba la dmigs pa la snang ba'i 'du shes zhes bya bar dgongs so/ /de la ji ltar thos pa dang / kun chub par byas pa dang / khong du chud pa rnams la brjed ngas pa med pa ni chos rnams kyi chos kyi snang ba zhes bya'o/ /de dang 'grogs pa dang / de dang ldan pa'i 'du shes gang yin pa de ni snang ba'i 'du shes yin par rig par bya'o/ /de ci'i phyir zhe na/ 'di lta ste/ zhi gnas kyi phyogs la brtson pa'am/ lhag mthong gi phyogs la brtson pa'i chos kyi rgyu las byung ba'i dran pa nyams pa de ni sems kyi mun pa yang dag pa yin la/ de las bzlog pa ni mi snang ba yang dag pa yin par rig par bya ba'i phyir ro/ /de la bsams pa las byung ba dang / bsgoms pa las byung ba'i shes rab dang ldan pa'i snang ba'i 'du shes de'i mi mthun pa'i phyogs su gyur pa'i chos ni rnam pa bcu gcig ste/ bcu gcig gang zhe na/ bsams pa las byung ba'i shes rab dang ldan pa'i snang ba'i 'du shes kyi ni bzhi'o/ /bsgoms pa las byung ba'i shes rab dang ldan pa'i snang ba'i 'du shes kyi mi mthun pa'i phyogs su gyur pa'i chos ni bdun te/ bsam pa'i ni shin tu ma brtags pa dang / gtan la ma phab pa'i phyir the tshom dang 'brel pa dang / mtshan mo gnas par khas 'ches la/ snyom las dang le los ha kyang gnyid la brten pas dus dus su bya ba don med par 'gyur ba dang / nyin par gnas par khas 'ches la/ kha zas la brten nyes pas chos la nges par rtog pa dang mi mthun pa lus las su mi rung ba dang / khyim pa dang rab tu byung ba dag dang 'dres par gyur pas/ ji ltar gnas pa dang / kun chub par byas pa dang / khong du chud pa'i chos rnams yid la mi byed pa ste/ de ltar the tshom dang 'brel pa dang the tshom bsal ba'i rgyu la bgegs byed pa'i phyir ro/ /mi mthun pa'i phyogs su gyur pa'i chos bzhi pa 'di dag ni bsams pa las byung ba'i shes rab dang ldan pa'i snang ba'i 'du shes de las byung ba'i ye shes mthong ba rnam par ma dag par byed pa'o/ /rab tu 'dzin pa'i mtshan ma bsgoms pa las brtsams te/ ha cang brtson 'grus brtsams pa mi mthun pa'i phyogs su gyur pa dang / zhi gnas kyi mchan mal bsgoms pa las brtsams te/ brtson 'grus ha cang zhum pa'i mi mthun pa'i phyogs su gyur pa dang / btang snyoms kyi mtshan ma bsgoms pa las brtsams te snyoms par 'jug pa'i ro myang ba'i ros phrogs pas rjes su chags pa dang ldan pa'i shin tu dga' ba dang / mya ngan las 'das pas skrag pa'i yid kyis de la gnod pa dang ldan pa'i sems bag tsha ba'i mi mthun pa'i phyogs su gyur pa'i chos gnyis dang / rnal 'byor yid la byed pa de nyid las brtsams te/ 'bel ba'i chos kyi gtam gtan la 'bebs pa la zhugs pa'i rtsod pa dang / rgyun du ha cang smra ba mangs pa de yang nang du yang dag par 'jog pa'i tshe bgegs byed pa dang / rtog pa ngan pa dag gis gzugs dang / sgra dang / dri dang / ro dang / reg bya rnams la tshul bzhin ma yin pa mtshan ma dang mngon rtags su 'dzin cing / sems rnam par g.yeng bar byed pa dang / bsam gyis mi khyab pa'i gnas la rtog pas chos rnams la ha cang brtags pa ste/ chos bdun po 'di dag ni bsgoms pa las byung ba'i shes rab dang ldan pa'i snang ba'i 'du shes kyi bgegs su gyur pa yin te/ mi mthun pa'i phyogs su gyur pa'i chos de dag gis bsgoms pa las byung ba'i shes rab dang ldan pa'i snang ba'i 'du shes de las byung ba'i ye shes mthong ba rnam par ma dag par byed do/ /mi mthun pa'i phyogs de dag gi gnyen por de las bzlog pa mi mthun pa'i phyogs spong ba'i chos kyang bcu gcig kho na yod de/ de las byung ba'i ye shes mthong ba rnam par dag par byed pa yin par rig par bya'o/ /'du shes thams cad bsgom pa la zhugs pa la ni mi mthun pa'i phyogs spang ba la 'dun pa dang / mi mthun pa'i phyogs kun du spyod pa dang du mi len cing spong ba dang / mi mthun pa'i phyogs yang dag par gzhom pa'i phyir de'i gnyen po la shas cher gnas pa ste/ chos gsum po 'di dag ni gnyen po bsgom pa thams cad dang mthun pa'i phyir gces spras byed pa zhes bya ste/ 'di ni gnyen po bsgom pa zhes bya'o/ /gnyen por bsgom pa gang yin pa de nyid rnal 'byor bsgom pa yang yin par blta bar bya ste/ yan lag lnga pa 'di lta ste/ gnyen po bsgom pa bstan pa'i don du gyur pa de'i rgyas pa ni 'di yin te/ 'di lta ste/ rnam pa bcu ste/ 'di las gong na yang med do/ /'di las lhag pa yang med do/ /rnam pa thams cad du 'jig rten pa rnam par dag pa gang zhe na/ de ni mdor bsdu na rnam pa gsum du blta bar bya ste/ 'di lta ste/ ting nge 'dzin thob pa dang / ting nge 'dzin yongs su rdzogs pa dang / ting nge 'dzin la dbang ba'o/ /de la thog ma kho nar ting nge 'dzin gyi mi mthun pa'i phyogs su gyur pa'i chos rnam pa nyi shu po 'di dag ni ting nge 'dzin mi 'thob par byed pa yin te/ nyi shu gang zhe na/ slong ba las 'dun pa zlog par byed pa tshangs pa mtshungs par spyod pa grogs po'i nyes pa dang / grogs po'i yon tan yod du zin kyang / ting nge 'dzin gyi thabs ston pa'i slob dpon gyi nyes pa gang de la ting nge 'dzin gyi thabs log par ston pa dang / slob dpon gyi yon tan yod du zin kyang ting nge 'dzin gyi thabs 'dod pa las brtsams te/ 'dun pa chung ba'i sems rnam par g.yeng bar byed pas 'dzin mi nus pa'i nyes pa dang / nyan pa la rna ba blags pa yod du zin kyang / blun zhing blo zhan pa'i phyir 'dzin mi nus pa'i nyes pa dang / shes pa'i yon tan yod du zin kyang ser sna spyod pas/ rnyed pa dang bkur sti 'dod pa'i shas che ba'i nyes pa dang / mya ngan du bya ba mang ba gso dka' zhing dgang dka' bas chog mi shes pa'i nyes pa dang / de nyid dbang du byas te/ bya ba rnam pa sna tshogs kyi nyes pa dang / nyes pa de med du zin kyang snyom las dang le los sbyor ba khyad du gsod pa'i nyes pa dang / nyes pa de med du zin kyang / gzhan las bgegs rnam pa sna tshogs 'byung ba'i nyes pa dang / nyes pa med du zin kyang grang ba dang tsha ba la sogs pa'i sdug bsngal mi bzod pa'i nyes pa dang / nyes pa med du zin kyang nga rgyal dang kun nas mnar sems kyi nyes pas man ngag nod par mi byed pa'i nyes pa dang / nyes pa de med du zin kyang man ngag la log par rtog pa'i nyes pa dang / nyes pa de med de man ngag mnos su zin kyang brjed pa'i nyes pa dang / nyes pa de med du zin kyang / khyim pa dang / rab tu byung ba'i dag dang 'dre bar gnas pa'i nyes pa dang / nyes pa de med du zin kyang nyes pa lnga dang ldan pa'i gnas mal na gnas pa'i nyes pa ste/ gnas mal gyi nyes pa lnga ni 'di lta ste/ nyan thos kyi sa las 'byung ba bzhin du rig par bya'o/ /nyes pa med de rab tu dben pa na gnas su zin kyang dbang po ma brtags pa la brten nas rtog pa ngan pa 'byung ba'i nyes pa dang / nyes pa de med du zin kyang zas mi mthun pa'i rgyu las byung ba lus lci zhing las su mi rung ba'i nyes pa dang / nyes pa de med du zin kyang rang bzhin gyis gnyid che bas dus ma yin par gnyid kyi nyes pa'i nyon mongs pa shes cher kun du spyod pa'i nyes pa dang / nyes pa de med du zin kyang sngon zhi gnas ma yin pa'i phyogs spyod spyod pas/ nang gi sems zhi gnas rab tu dben pa la mngon par mi dga' ba'i nyes pa dang / nyes pa de med du zin kyang sngon lhag mthong ma yin par spyod spyod pas/ lhag pa'i shes rab chos la rnam par lta ba las brtsams te/ chos la yang dag pa ji lta ba bzhin du so sor brtag pa la mngon par mi dga' ba'i nyes pa ste/ chos nyi shu po 'di dag ni zhi gnas dang lhag mthong gi phyogs kyi sems rtse gcig pa 'thob pa'i mi mthun pa'i phyogs su gyur pa yin no/ /mi mthun pa'i phyogs su gyur pa'i chos rnam pa nyi shu po 'di dag kyang mdor bsdu na/ rnam pa bzhis ting nge 'dzin skye ba la bar du gcod par byed de/ bzhi gang zhe na/ ting nge 'dzin gyi thabs mi mkhas pa dang / thams cad kyi thams cad du sbyor bar mi byed pa dang / log par sbyor bar byed pa dang / sbyor ba lhod pa'o/ /ting nge 'dzin gyi mi mthun pa'i phyogs kyi chos 'di dag gi gnyen por gyur pa'i chos kyang nyi shu kho na yod de/ de la bzlog pa las dkar po'i phyogs su rig par bya ste/ de dag ni mi mthun pa'i phyogs spong pa la gces spras byed pa'i phyir myur ba myur bar yang dag par sems gnas pa'i ting nge 'dzin thob par byed pa'o/ /ting nge 'dzin thob pa ni bsam gtan dang po'i nyer bsdogs thob pa la bya ste/ mi lcogs pa med pa'i gnas skabs kyis bsdus par rig par bya'o/ /ting nge 'dzin 'thob pa dang mi mthun pa dang / ting nge 'dzin 'thob pa dang mthun pa'i don 'di'i rgyas pa ni 'di yin te/ 'di lta ste/ rnam pa nyi shu yin par rig par bya ste/ 'di las gong na yang med do/ /'di las lhag pa yang med do/ /'dis ni thog mar 'jig rten pa'i rnam pa thams cad rnam par dag pa las brtsams te/ chos 'di pa'i gang zag gi ting nge 'dzin thob pa kun bshad cing legs par bstan pa yin no/ /des de ltar ting nge 'dzin thob nas bye brag chung ngu ngan don tsam gyis chog par mi 'dzin te/ gong du ting nge 'dzin yongs su rdzogs par byed 'dod pa dang / de nyid la yon tan du lta ba dang / gang don du gnyer ba dang / gang la yon tan du lta zhing 'dod pa de'i don du brtson 'grus brtsams te gnas pa dang / gzugs dang ldan pa'i ro myang ba dang ldan pa'i nyon mongs pa de dag rnam pa thams cad kyi thams cad du spyod pas pham par byas pa ma yin pa dang / dge ba la mngon par brtson pa'i phyir de dag gi phyir pham par byed mi nus pa dang / rnam par dag pa'i lhar skye ba'i gnas rgya chen po rnams la kun du sbyor ba mi byed pa dang / dman pa la mos pa'i dbang du byas te/ bdag gis mi nus so snyam du 'dzin pa'i zhum pa med cing / de de ltar ting nge 'dzin gyis dmigs pa'i chos rnams la sems zhum pa med pas/ sngon thos pa'i zhi gnas kyi mtshan ma dang / rab tu 'dzin pa'i mtshan ma dang / btang snyoms kyi mtshan ma de nyid rtag tu byed cing gus par byed pa'i sbyor ba des rjes su 'jug par 'gyur ba dang / de de ltar chos kyi mtshan ma'i rjes su 'jug pas snyoms par 'jug pa dang ldan zhing ldang ba na mngon par shes pa myur bar bya ba'i phyir ting nge 'dzin yongs su rdzogs par bya ba las brtsams te dam pa'i chos nyan par 'dod pa dang / de la brten nas dus dus su 'dri zhing yongs su 'dri bar byed pa dang / de ltar ting nge 'dzin yongs su rdzogs par bya ba las brtsams te/ yang dag par brtson pas dngos gzhi'i ting nge 'dzin du rtogs pa'i nang gi sems kyi zhi gnas rab tu dben pa la mngon par dga' ba thob pa dang / chos kyi lhag mthong gis yang dag pa ji lta ba bzhin du so sor brtags pas gsal zhing ches 'od gsal ba thob par 'gyur te/ de tsam gyis na dngos gzhi'i bsam gtan la snyoms par zhugs pa yin par rig par bya ste/ 'di ni ting nge 'dzin yongs su rdzogs pa zhes bya'o/ /ting nge 'dzin yongs su rdzogs pa'i don 'di'i rgyas pa ni 'di lta ste/ rnam pa bcu gcig po 'di dag yin par rig par bya ste/ 'di las gong na yang med do/ /'di las lhag pa yang med do/ /de'i dngos gzhi'i ting nge 'dzin thob ste/ ting nge 'dzin yongs su rdzogs su zin kyang de'i sems de ting nge 'dzin skye ba'i ro myang ba'i sred pa dang / nga rgyal dang / lta ba dang / the tshom dang / ma rig pa'i nye ba'i nyon mongs pa rnams kyi nye ba'i nyon mongs pa can du gyur cing yongs su ma dag yongs su ma byang ste/ de nye ba'i nyon mongs pa de dag kun du spyad par mi bya ba'i phyir sems tshar gcad pa dang / sems yongs su gdul ba'i don du sems la dbang yod pa dang / ting nge 'dzin la dbang thob par bya'o snyam nas gnas bzhi la rnam pa nyi shu rtsa gnyis kyis so sor rtog ste/ cha lugs dang / spyod lam dang / tshul ngan pa khas len pa dang / tshul khrims dang / tshul khrims dam po khas len pa dang / dge ba bsgom pa la rtag tu brtson par bya bar khas len pa dang / sdug bsngal gang spang ba'i phyir/ gnas gsum po 'di dag khas len pa'i sdug bsngal de nyid 'brel par so sor rtog pa ste/ skra dang kha spu bregs shing skra la sogs pa khyim pa'i mtshan ma rnams spangs pa dang / bdag nyid kyi gos kha dog bsgyur ba bgos pa'i phyir gzugs ngan par so sor rtog pa gang yin pa 'di ni cha lugs ngan pa khas len pa la so sor rtog pa'o/ /'gro ba dang / 'greng ba dang / 'dug pa dang / nyal ba dang / smra ba rnams la dga' dgur spyod du med pa dang / nga rgyal bcom pa dang / gzhan gyi khyim du bsod snyoms kyi phyir rgyu ba la so sor rtog pa 'di ni spyod lam ngan pa khas len pa la so sor rtog pa'o/ /pha rol las rnyed pa la sogs par mi byed pas srog gzungs la so sor rtog pa 'di ni/ tshul khrims ngan pa khas len pa la so sor rtog pa ste/ rnam pa lnga po de dag gis ni gnas dang po la so sor rtog par rig par bya'o/ /legs par gsungs pa'i chos 'dul ba la rab tu byung ba'i tshul khrims yang dag par blang ba 'di ni mdor bsdu na dngos po rnam pa gnyis yongs su btang bas rab tu phye ba ste/ pha ma dang / bu dang / chung ma dang / bran dang / bran mo dang / las byed pa dang / zho shas 'tsho ba dang / mdza' bshes dang / blon po dang / nye du dang / rgan rabs dang / nor dang / 'bru dang / dbyig la sogs pa 'dod pa rnams yongs su gtang bas rab tu phye ba dang / gar dang / glu dang / rol mo'i sgra dang / bgad pa dang / rtses pa dang / dga' dgur spyad pa dang / dgod pa dang / 'phyas 'dogs pa dang / lus bsgyur ba dang / kun du rtses pa dang / kun du ca co bton pa dang / rtsed mo'i dga' ba rnam pa sna tshogs yongs su btang bas rab tu phye ba'o/ /de de ltar tshul khrims kyi sdom pa la gnas pa na/ tshul khrims nyams pa las brtsams te/ lkog tu bdag nyid la smod pa med pa / tshangs pa mtshungs par spyod pa rnams kyis kyang 'di ltar 'di ni tshul khrims nyams pa yin no zhes chos nyid kyis rnam par smod par mi byed cing de la gleng bar yang mi byed do/ /gal te des tshul khrims nyams par byas na yang gzhi de las de bdag nyid kyang smod par byed la/ tshangs pa mtshungs par spyod pa rnams kyis kyang chos nyid kyis rnam par smod par byed do/ /de nas nyes pa de las chos bzhin du gnyen po bya ba dang / tshangs pa mtshungs par spyod pa gleng bar byed pa de dag la yang kun nas mnar sems med pas bdag nyid ma snad ma smas par yongs su 'dren par byed do/ /rnam pa lnga po 'di dag gis ni gnas gnyis pa la so sor rtog go/ /de de ltar tshul khrims dang ldan par gyur na/ dge ba'i phyogs kyi sbyor ba rnam pa lnga kho na la brtson par rig par bya ste/ dus dus su man ngag nod pa dang / kha thon byed pa dang / 'bel ba'i gtam gtan la 'bebs pa'i dge ba'i phyogs la brtson pas pha rol dad pas byin pa la longs spyod par byed ba dang / rab tu dben pa la mngon par dga' zhing rnal 'byor yid la byed pa la goms pa dang nyin mtshan du nyams par 'gyur ba'i cha dang mthun pa dang / khyad par du 'gyur ba'i cha dang mthun pa'i chos gnyis yongs su shes nas spong zhing so sor bsten pa dang / 'khor ba la nyes par lta ba dang / mya ngan las 'das pa la yon tan du lta ba ste/ rnam pa lnga po 'di dag gis ni gnas gsum pa la so sor rtog go/ /gal te de ltar brtson du zin kyang / mdor bsdu na/ sdug bsngal rnam pa bzhi dang 'brel te/ dge sbyong gi 'bras bu bzhi las gang yang rung ba ma thob pas ngan song gi sdug bsngal dang 'brel pa dang / skye ba dang / rga ba dang / na ba dang / 'chi ba'i chos can yin pas/ nang rnam par 'gyur ba'i sdug bsngal dang 'brel pa dang / sdug pa thams cad dang bral ba'i chos can yin pas sdug pa rnam par 'gyur ba'i sdug bsngal dang 'brel pa dang / las bdag gir bya ba yin par sdug bsngal thams cad kyi rgyu dang 'brel pa ste/ de de ltar sdug bsngal rnam pa bzhi dang 'brel pa la / rnam pa bdun gyis so sor rtog ste/ rnam pa bdun po 'di dag gis gnas bzhi pa de la so sor rtog go/ /de gnas bzhi po de dag la rnam pa nyi shu rtsa gnyis po de dag gis so sor rtog pa na/ tshul bzhin yid la byed pa 'di ltar skye bar 'gyur te/ ji ltar na bdag sdug bsngal rnam pa bzhi po 'di dag las yongs su thar bar 'gyur zhig gu snyam ste/ de'i phyir bdag gi cha byad dang / spyod lam dang tshul ngan pa yang khas blangs la/ tshul khrims dang / tshul dang po yang khas blangs/ dge ba'i chos bsgoms pa la rtag tu brtson par bya ba la yang khas blangs na/ bdag gis so sor brtags shing brtags shing gnas gsum po 'di dag khas blangs bzhin du sdug bsngal rnam pa bzhi po 'di dag dang 'brel pa kho nar 'gyur la/ yongs su ma grol te/ bdag 'di ltar ting nge 'dzin la dbang ma thob pas sdug bsngal dang 'brel pa kho nar 'gyur te/ bar ma dor zhum pa gang yin pa 'di ni bdag gi cha ma yin no snyam ste/ de ltar tshul bzhin du yid la byed pa la brtson pa de'i rab tu byung ba'i 'du shes gang yin pa de ni dge sbyong gi 'du shes zhes bya ste/ de'i 'du shes de ni bsgom pa shas cher byed pa'i tshul gyis yongs su rdzogs par 'gyur ro/ /de de la brten nas des 'jig rten pa'i lam gyis ting nge 'dzin yongs su rdzogs pa thob pa des/ nyon mongs pa spong ba mngon sum du ma byas pa de la/ spong ba la kun du dga' ba las brtsams nas rtag tu byed par 'gyur ro/ /ting nge 'dzin la dbang thob par bya ba'i phyir bsgom pa la kun du dga' ba las brtsams te/ 'jig rten pa'i lam dge ba thob pa de nyid la yang dang yang rtag tu 'jug par 'gyur ro/ /bram ze dang khyim bdag dad pa rnams kyis bsnyen bkur byed cing / rnyed pa chen po dag bstabs na yang / rnyed pa dang / bkur sti de dag las brtsams te/ brnab sems mi bskyed la/ gzhan dag gi rnyed pa dang bkur sti la yang brnab sems mi bskyed do/ /pha rol ma dad pa rnams kyis mngon sum du yang rung / lkog tu yang rung ste/ lus kyi las mi sdug pa dang / ngag gi las mi sdug pa kun du spyad pa na yang / sems kyis sdang bar mi byed cing / sems kyi gnod sems dang ldan par mi byed do/ /sred pa dang / nga rgyal dang / lta ba dang / ma rig pa dang / the tshom dang / snyoms par 'jug pa'i nye ba'i nyon mongs pa rnam pa sna tshogs kun du mi spyad par bya ba'i phyir yang dran pa shin tu brtan par gnas so/ /zhi gnas rgya chen po thob tu zin kyang / zhi gnas de kho na tsam gyis bdag nyid bya ba byas par mi 'dzin la pha rol dag la yang shes pa brda sprod par mi byed do/ /de de ltar spong ba la dga' zhing bsgom pa la dga' bas/ brnab sems med cing sems gnod sems dang ldan pa med de/ yang dag pa'i dran pa dang ldan zhing nga rgyal med la/ chos gos ngan ngon [(]cam [,]tsam [)]gyis chog shes te/ chos gos la ji lta ba bzhin du bsod snyoms dang / mal cha dang / stan la yang de dang 'dra'o/ /de ltar mgu zhing chog shes pa de 'di ltar yang dag par zhugs pas ting nge 'dzin la 'tsho ba'i yo byad 'di dag ni lus gnas par bya ba dang / srog gzungs dang / bkres pa zhi bar bya ba dang / tshangs par spyod pa la phan par 'gyur ba'i bar gyi phyir shes bzhin du longs spyad pa nas/ rgyas par 'di lta ste/ kha zas kyi tshod rig pa'i skabs nas 'byung ba bzhin no/ /de de ltar yang dag par zhugs pas ting nge 'dzin la dbang thob par 'gyur te/ de la gnas pas de bzhin du sems yongs su dag pa dang / yongs su byang ba dang / skyon med pa dang / nye ba'i nyon mongs pa dang bral ba nas rgyas par mi g.yo ba'i bar du thob na/ de ma thag tu mngon par shes pa lnga bsgrub pa dang / zag pa zad pa bsgrub pa la mthu yod par 'gyur te/ 'di ni ting nge 'dzin la dbang ba zhes bya'o/ /ting nge 'dzin la dbang ba'i don 'di'i rgyas par ni 'di lta ste/ ji skad bstan pa'i rnam pa kho na yin par rig par bya ste/ 'di las gong na yang med do/ / 'di las lhag pa yang med do/ /dang po'i ting nge 'dzin thob pa gang yin pa dang / bar gyi ting nge 'dzin yongs su rdzogs pa gang yin pa dang / ting nge 'dzin la dbang ba gang yin pa de la ni/ rnam pa thams cad du 'jig rten pa'i dag pa bla na med pa zhes bya ste/ de yang chos 'di pa'i yin par blta'i/ 'di las phyi rol pa rnams kyi ni ma yin no/ /rnam pa thams cad du 'jig rten las 'das pa rnam par dag pa gang zhe na/ de ni mdor bsdu na/ rnam pa lngar rig par bya ste/ rnam pa lnga gang zhe na/ bden pa mngon par rtogs par bya ba dang / bden pa mngon par rtogs pa'i don du spyod pa rnam par spang ba dang / mngon par shes pa myur bar bya ba'i phyir/ mchog tu dga' ba'i dngos po yid la bya ba dang / bsgom pa'i lam bstan pa dang / shin tu rnam par dag pa'i lam 'bras bu dang phan yon du bcas pa 'thob pa'o/ /de la bden pa mngon par rtogs par bya ba gang zhe na/ de bzhin gshegs pa'i nyan thos 'jig rten pa'i rnam pa dag la brtson zhing / yun ring po nas 'dod pa lnga'i yon tan gyi kha zas kyis nye bar ston pa'i tshul du sems gsos la/ de dag nyid la mngon par dga' ba'i tshul gyis bltas par byas pa las 'dod pa rnams la nyes dmigs su lta zhing / gong du zhi bar lta bas 'di lta ste/ rnam pa thams cad du 'jig rten pa'i rnam par dag pa la spro ba dang bcas pa'i khams su rnam par gzhag pa ni sla'i / /'jig rten las 'das pa spros pa med pa'i khams su rnam par gzhag pa ni dka'o/ /de yang skyo bzhin du gnas kyi/ skyo ba med pas ni ma yin te/ de la chos 'di pa mya ngan las 'das pa spros pa med pa la sems rnam par gzhag par 'dod cing / mos par 'dod pa de ni/ dge sbyong gi 'bras bu thob pa med pa'i dbang du byas nas/ bdag nyid kyi kun nas nyon mongs pa dang ldan pa'i phyir yang sems skyo ba skye zhing / rnam par byang ba dang bral ba'i phyir yang sems skyo ba skye la/ kun nas nyon mongs pa dang ldan pa'i nyes dmigs dang / rnam par byang ba dang bral ba'i nyes dmigs dang / rnam par byang ba bsgrub pa dka' bar mthong ba'i phyir yang skyo ba skye bar 'gyur ro/ /de la kun nas nyon mongs pa dang ldan pa ni mdor bsdu na rnam pa gsum ste/ ma byang ba dang / ma dul ba 'chi ba'i kun nas nyon mongs pa dang ldan pa dang / de bzhin du shi nas kyang phyi ma la yang nyon mongs pa'i g.yang sa chen por ltung ba'i kun nas nyon mongs pa dang / de bzhin du nyon mongs pa'i dbang du gyur pas ni mi dge ba'i chos kun du spyod pa'i phyir/ 'jigs pa dang bcas pa'i phyogs su 'gro ba'i kun nas nyon mongs pa'o/ /bdag nyid dge sbyong gi 'bras bu thob pa med par yang dag par mthong la/ de med pas kun nas nyon mongs pa dang ldan pa rnam pa de gsum yang dag par mthong bas yid skyo bar 'gyur ro/ /de la rnam par byang ba dang bral ba ni rnam pa gsum kho nar rig par bya ste/ nyon mongs pa spong ba'i mya ngan las 'das pa 'jigs pa med pa'i phyogs zhes bya ba gang yin pa dang / de thob par bya ba'i phyir lhag pa'i sems kyi bslab pa las brtsams te dge ba'i sems kyi ting nge 'dzin dang / lhag pa'i shes rab kyi bslab pa las brtsams nas yang dag pa'i lta bar gtogs pa'i lam gyi mchog ste/ de ltar bdag nyid rnam par byang ba rnam pa de gsum dang bral bar yang dag par mthong nas yid skye bar 'gyur ro/ /kun nas nyon mongs pa dang ldan pa'i nyes dmigs kyang rnam pa gsum du rig par bya ste/ skye ba ni rga ba dang na ba'i sdug bsngal gyi rtsa ba yin pa'i phyir rang bzhin gyis sdug bsngal ba dang / mi khom par skye ba dang / skye ba thams cad kyang mi rtag pa nyid dang 'brel pa ste/ kun nas nyon mongs pa dang ldan pa'i nyes pa rigs gsum po 'di dag gis bdag nyid yid skyo bar 'gyur ro/ /rnam par byang ba dang bral ba'i nyes dmigs ni rnam pa lngar rig par bya ste/ yul mtha' 'khob tu skye ba'i sgrib pa dang / ngan song du skye ba'i sgrib pa dang / khyim pa'i phyogs kyi mtshams med pa'i las kyi chu lon mi byed pa dang / rab tu byung ba'i phyogs kyi lta bar gyur pa tshad med pa dang ma bral ba dang / 'jig rten pa'i lam gyis srid pa'i rtse mo man chad du snyoms par zhugs shing skyes kyang thog ma med pa'i skye ba'i 'khor ba'i mthar thug par byed mi nus pa ste/ rnam par byang ba dang bral ba'i nyes dmigs rnam pa lnga po 'di dag lta bur yang dag par mthong nas bdag nyid yid skyo bar 'gyur ro/ /de la rnam par byang ba bsgrub par dka' ba ni rnam pa lngar rig par bya ste/ mi byed cing yal bar bor bas byed mi nus pa dang / gzhan gyi don la gzhan gyis gzhan la bcol ba la brten pas bsgrub tu mi rung ba dang / gang gi phyir de ma byas kyi bar du bdag gi sems kyi rnam par byang ba de la sdug bsngal las grol bar 'gyur ba'i bde legs kyi rang bzhin med pa'i phyir de mi byar mi rung ba dang / sdig pa'i las rnams tshe 'di la ma byas pa gang yin pa de tsam gyis rnam par byang ba de byas par mi chud de/ tshe 'di la de'i gnyen po'i lam rims nad med pa thob par ma gyur gyi bar du sngon byas pa'i mi dge ba'i las rnam par byang bar mi 'gyur ba dang / rnam par byang ba ni slob pa dang mi slob pa'i lam thob pas rab tu phye ba yin te/ des rnam pa lnga po 'di dag lta bur rnam par byang ba bsgrub dka' bar yang dag par mthong nas yid skyo ba skye zhing yang dag par bsgrub pa'i phyir brtson 'grus brtan por rtsom par byed do/ /des kun nas nyon mongs pa dang / rnam par byang ba dang ldan pa dang bral ba mthong bas yid de skyo bar byed cing / kun nas nyon mongs pa dang / rnam par byang ba dang bral ba'i nyes dmigs mthong bas skrag la/ rnam par byang ba yang dag par bsgrub pa dang / kun nas nyon mongs pa spang ba la snyom las dang le lo las phyir ldog par byed do / /yid la byed pa'i rnam pa des ni yid de skyo bar byed la rnam par byas pa de lan mang du byas pas ni shin tu skyo bar byed do/ /skyo bar byed pa dang / shin tu skyo bar byed pa ji lta ba bzhin du/ skrag pa dang / shin tu skrag pa dang / phyir ldog pa dang / shin tu phyir ldog pa yang de dang 'dra'o/ /de ltar de'i sems de skyo ba dang ldan pa'i 'du shes yid la byed pa'i gnas lngar gtogs pa dang / rnam pa nyi shu po de dag gis shin tu yongs su sbyang ba byas nas/ rnam pa nyi shus yongs su zin pa'i rgyu rnam pa lnga po gzhan dag gis sred pa zad pa 'gog pa mya ngan las 'das pa la myur ba myur bar sems yang dag par gnas shing yongs su yi chad pa'i phyir yid phyir ldog par mi 'gyur la/ bdag gi bdag gang yang med do snyam du sems so/ /rgyu rnam pa lnga po gang zhe na/ yid la byed pa rtogs pa ste/ yid la byed pa rtogs pa de'i mjug thogs su yang dag pa nyid du skyon med par 'jug cing / bden pa rnams mngon par rtogs la/ 'phags pa'i ye shes mthong ba la reg pa dang bzhi ste/ gzhi de la brten pa'i mjug thogs su zhes bya ba ni snga ma bzhin no/ /dmigs pa la 'jug pa'i sgo ste/ dmigs pa la 'jug pa'i sgo de la dmigs na yang dag pa nyid du skyon med pa la 'jug ces bya ba ni snga ma bzhin no/ /tshogs yongs su 'dzin pa ste/ tshogs yongs su bzung ba de la brten nas/ yang dag pa'i skyon med pa la 'jug ces bya ba ni snga ma bzhin no/ /thabs yongs su bzung ba ste/ thabs yongs su bzung ba de la brten nas/ yang dag pa nyid du skyon med pa la 'jug cing zhes bya ba yang rgyas par snga ma bzhin no/ /rgyu lnga po 'di dag ni bden pa mngon par rtogs pa dang / rjes su mthun pa ma yin pa'i rgyu las brtsams par rig par bya'i/ rjes su mthun pa'i rgyu las brtsams pa ni ma yin te/ rgyu de'i gtso bo ji lta ba bzhin du sngar bstan pa'i phyir rjes su mthun pa ma yin pa'i rgyu mthun par blta bar bya'o/ /stong pa nyid dang / smon pa med pa dang / mtshan ma med pa la sbyor ba'i yid la byed pa'i rjes su zhugs pa/ cha phra mo kun du sbyor ba / bar chad dang bcas pa dang / bar chad med par 'byung ba nga'o snyam pa'i nga rgyal dang ldan pa'i sems kyi mtshan ma mngon par rtogs pa'i bar chad byed pa yang dag par rtogs par yid la byed do / /rtogs nas kyang yid la byed pa de dang ldan pa'i sems rang gi ngang gis 'jug pa legs par spangs nas/ sems 'gags ma thag go cog la gsar du skyes so cog gis yang dag pa ji lta ba bzhin du mi rtag pa la sogs pa'i rnam par yid la byed de/ /yid la byed pa de la kun du bsten pa'i rgyu dang / bsgoms pa'i rgyu dang / lan mang du byas pa'i rgyus dmigs par bya ba dang / dmigs pa med pa mtshungs pa'i shes pa skye bar 'gyur la/ mngon par rtogs pa'i bgegs byed pa nga'o snyam pa'i nga rgyal sems rnam par g.yeng bar byed pa de spangs pas sems rtse gcig pa la reg par 'gyur te/ bdag ni sems rtse gcig pa la reg go snyam du yang dag pa ji lta ba bzhin du rab tu shes shing yid la byed de/ de ltar na 'di ni bden pa mngon par rtogs par bya ba'i yid la byed pa rtogs pa yin par rig par bya'o/ /gal te sngar 'jig rten pa'i lam gyis ting nge 'dzin yang thob par gyur la/ ting nge 'dzin yongs su rdzogs pa dang / ting nge 'dzin la dbang yang thob par gyur na ni/ de'i ting nge 'dzin gyi mtshan ma gang gis snyoms par 'jug pa dang / ting nge 'dzin la gnas pa'i mtshan ma gang gis snyoms par zhugs nas gnas pa dang / ting nge 'dzin las ldang ba'i mtshan ma gang gis ting nge 'dzin las ldang bar 'gyur ba'i mtshan ma de dag yid la byed cing de'i sems gnas la/ bden pa rnams kyang mngon par rtogs par 'gyur ro/ /gal te ting nge 'dzin thob la ting nge 'dzin yongs su rdzogs pa yang ma yin/ ting nge 'dzin la dbang thob pa yang ma yin na ni/ de zhi gnas kyi mtshan ma yid la byed pa'am/ rab tu 'dzin pa'i mtshan ma'am/ btang snyoms kyi mtshan ma yid la byed cing / sems legs par gnas la/ bden pa rnams kyang mngon par rtogs par 'gyur te / de ltar na gzhi'i sgo nas sems gnas pa yin par rig par bya'o/ /chos 'di gnyis ni bden pa mngon par rtogs pa la brtson pa la shin tu bar chad byed pa yin te/ gnyis gang zhe na/ rtog pa ngan pas sems dkrugs shing sems ma zhi ba dang / shes bya'i dngos po la phyin ci log pa'o/ /bar chad byed pa de'i gnyen por sems kyi dmigs pa la legs par 'jug pa yang rnam pa gnyis kho nar rig par bya ste/ dang po'i gnyen po ni dbugs 'byung ba dang dbugs rngub pa dran pa'o/ /cig shos kyi gnyen po ni dran pa nye bar gzhag pa bsgom pa ste/ de ltar na dmigs pa la bkur sti gnas par rig par bya'o/ /'phags pa'i chos 'dul ba la de ltar brtson pa la ni/ 'dod pa'i yon tan lnga spyod yul du mi 'gyur te/ gal te chos gos dang / bsod snyoms dang / mal cha dang / stan ngan ngon tsam gyis chog shes shing / rnyed pa dang bkur sti byung ngo cog zil gyis gnon cing 'di lta ste/ 'dod pa'i yon tan lnga la brten nas rnyed pa dang / bkur sti byung bas/ de'i sems kun nas zin cing 'dug par mi 'gyur te/ de tsam gyis na spyod yul ma yin pa yongs su spangs pa yin no/ de ltar spyod yul ma yin pa spangs nas/ dran pa nye bar gzhag pa de dag nyid las brtsams te/ nyin mtshan su spong ba la dga' ba dang / bsgom pa la dga' bar byed pa dang / sems kun du skyo ba bskyed pa'i phyir dus dus su bdag nyid la sogs pa'i rgud pa dang / 'byor pa yid la byed pa dang / sems mngon par dga' bar bya ba'i phyir sangs rgyas rjes su dran pa la sogs par byed pa ste/ de ltar na 'phags pa'i rigs la gnas pa yin te/ 'di ni sems gnas pa'i gtso bo'i tshogs kyi lam gyi skabs las tshogs pa yin par rig par bya'o/ / //bam po nyi shu rtsa drug pa/ de ltar de tshogs la gnas pa na/ rnal 'byor yid la byed pa la spyod pa'i sbyor ba'i thabs gnyis yod de/ gnyis gang zhe na/ bdag nyid mdo sde la sogs pa'i chos kyi lung mnod pa la brten nas/ yang dag par yid la byed pa'i rgyus/ phung po la sogs pa'i dngos po la mkhas pa dang / pha rol bla ma 'di lta ste/ ston pa'am/ slob dpon nam/ mkhan po'i man ngag la brten nas/ dus dus su gdams ngag dang rjes su bstan pa yongs su blang ba'i phyir/ bla ma la brten pa'o/ / yang dag pa'i sbyor ba yid la byed pa yang thabs gsum pa yin par rig par bya'o/ /de la yang dag pa'i sbyor ba yid la byed pa ni 'di yin te/ yang dag pa'i sbyor ba zhes bya ba ni don gyi skabs 'dir tshul khrims rnam par dag pa la bya ste/ de yid la byed pa ni yang dag pa'i sbyor ba yid la byed pa yin no/ /de bdag gi tshul khrims rnam par dag pa yid la byed pa na 'gyod pa med do/ /'gyod pa med pas mchog tu dga' bar 'gyur ba nas/ rgyas par sems kyi ting nge 'dzin gyi bar du sbyar te/ de bas na yang dag par sbyor ba yid la byed pa yang sems gnas par byed pa'i thabs zhes bya ste/ thabs de lta bus myur du sems gnas par 'gyur bar rig par bya'o/ /gang gi tshe de rgyu rnam pa lnga po/ rnam pa nyi shus bsdus pa de dag gi sred pa zad pa/ 'gog pa mya ngan las 'das pa la sems legs par gnas par gyur pa na/ yongs su yi chad pa'i phyir/ de'i yid phyir ldog par mi 'gyur zhing / bdag gi bdag gang yang med do zhes/ sems gnas par gyur pa'i mod la bden pa rtogs pa zhes bya ste/ 'di ni bden pa rtogs pa zhes bya'o/ /bden pa rtogs pa'i don 'di'i rgyas pa ni 'di lta ste/ sems skyo bar bya ba'i rnam pa nyi shu dang / sems gnas pa'i rnam pa nyi shu po 'di dag yin par rig par bya ste/ 'di las gong na yang med do/ /'di las lhag pa yang med do/ /de la bar du gcod pa yongs su spong ba gang zhe na/ mdor bsdu na/ bar du gcod pa rnam pa gnyis su rig par bya ste/ rgyu ba dang gnas pa'o/ /de la rgyu ba'i bar du gcod pa ni/ 'di ltar 'phags pa nyan thos kyi tshogs kyi nang na gnas shing / dge 'dun gyi bya ba byung ngo cog la dge ba'i phyogs 'dor zhing rgyun du tshogs kyi nang du 'du ba dang / bsod snyoms pa nyid du gnas shing kha zas la gces par 'dzin pa dang / gnyi gar yang chos gos dang lhung bzed la sogs pa 'phral gyi bya ba'i las la brtson zhing de la dga' ba dang / kha ton la brtson pa'i smra ba la dga' ba dang / mtshan mo gnas pa na gnyid la dga' ba dang / nyin par gnas pa na rgyal po dang chom rkun la sogs pa'i gtam kun nas nyon mongs pa can la dga' ba dang / yul gang na nye du dang / phebs par smra ba dang / grogs bshes dang / smon 'grin dang / byams pa rnams gnas pa'i yul de dang mi 'bral bar dga' zhing / 'di lta ste/ de dag dang 'grogs pa 'ga' zhig gi dbang du byas nas yun ring po nas goms pa'i shugs kyis zla dang bcas par gnas par dga' ba ste/ 'di ni rgyu'i bar du gcod pa zhes bya'o/ /gnas pa'i bar du gcod pa gang zhe na/ mdor bsdu na/ dben pa na 'dug cing zhi gnas dang lhag mthong bsgom pa la ni gnas pa zhes bya'o/ /de la zhi gnas dang lhag mthong la brtsams nas/ bar du gcod pa rnam pa bzhi yod par rig par bya ste/ lhag mthong gi yan lag dang mi mthun pa dang / zhi gnas kyi yan lag dang mi mthun pa dang / de gnyi ga'i phyogs kyi dran pa dang mi mthun pa dang / gnas dang mi mthun pa'o/ /bdag nyid mkhas par 'dzin pas gzhan la lhag mthong dang mthun pa'i dam pa'i chos mi nyan pa ni lhag mthong gi yan lag mi mthun pa'o/ /lus dang / ngag dang / yid kyi spyod pa mi brtan zhing g.yo bas/ yang dang yang du tshul khrims nyams par byed pa'i phyir/ 'gyod pa la sogs pas sems gnas pa'i bar du thob par mi 'gyur ba ni zhi gnas kyi yan lag dang mi mthun pa yin par rig par bya'o/ /brjed ngas pa'i dbang du byas nas rgod pa dang / bying ba la sogs pa'i nye ba'i nyon mongs pa rnams las sems kun du mi srung ba ni de gnyi ga'i phyogs kyi dran pa dang mi mthun pa yin par rig par bya'o/ /nyes pa rnam pa lnga dang ldan pa'i gnas mal la brten pa ni gnas dang mi mthun pa yin par rig par bya ste/ nyin par ljan ljin mang ba dang / mtshan mo sha sbrang dang / sbrang bu la sogs pa'i sdug bsngal gyis gtse ba dang / 'jigs pa mang zhing gnod pa mang ba dang / yo byad med cing nyams mi dga' ba dang / sdig pa'i grogs pos yongs su zin cing dge ba'i bshes gnyen med pa ste/ 'di ni gnas pa'i bar du gcod pa zhes bya'o/ /bar du gcod pa rnam pa 'di gnyis kyang mdor bsdu na/ rgyu rnam [(]ba [,]pa [)]gnyis kyis yongs su spong bar rig par bya ste/ ting nge 'dzin la dga' ba mang du byed pa dang / so sor brtags pa mang du byed pa'o/ /de la ting nge 'dzin la dga' ba mang du byed pa ni mdor bsdu na rnam pa drug tu rig par bya ste/ gal te ting nge 'dzin yongs su thob la ting nge 'dzin yongs su rdzogs pa ma yin ting nge 'dzin la dbang thob pa yang ma yin na ni de zhi gnas la mkhas pa dang / rab tu 'dzin pa la mkhas pa dang / btang snyoms la mkhas par byed cing ting nge 'dzin la dga' ba shas cher skye bar 'gyur ro/ /gal te ting nge 'dzin yongs su rdzogs la/ ting nge 'dzin la dbang thob na ni ting nge 'dzin la mkhas pa dang / ting nge 'dzin la gnas pa la mkhas pa dang / ting nge 'dzin las ldang ba la mkhas par byed cing ting nge 'dzin la dga' ba shas cher skye bar 'gyur ro/ /de la so sor brtags pa mang du byed pa gang zhe na/ shes rab dge ba la ni so sor brtags pa zhes bya ste/ de shes rab des nyin mtshan du bdag gi dge ba'i chos mngon par 'phel ba yang dag pa ji lta ba bzhin du rab tu shes la/ mi dge ba'i chos mngon par 'phel ba yang yang dag pa ji lta ba bzhin du rab tu shes pa dang / dge ba'i chos 'bri ba yang yang dag pa ji lta ba bzhin du rab tu shes la/ mi dge ba'i chos 'bri ba yang yang dag pa ji lta ba bzhin du rab tu shes pa dang / nyin mtshan du rgyu ba dang gnas pa na/ chos gos dang bsod snyoms la sogs pa 'tsho ba bsgrub pa rnams la sa sor brten pa na/ mi dge ba'i chos rnams ni mngon par 'phel bar 'gyur la/ dge ba'i chos rnams ni yongs su nyams par 'gyur ba'am/ yang na dge ba'i chos rnams ni mngon par 'phel bar 'gyur la/ mi dge ba'i chos rnams ni yongs su nyams par 'gyur ba de yang yang dag pa ji lta ba bzhin du rab tu shes pa dang / so sor brtags pa de nyid la brten na mi dge ba'i chos de dag skyes so cog ni dang du mi len pa'i tshul gyis sel zhing nyams smod cing nges par spong bar byed la/ dge ba'i chos rnams ni sgom par byed pa ste/ gnas gnyis su gtogs pa'i mkhas pa rnam pa bcu po de dag gis gnas gnyis su gtogs pa'i bar du gcod pa rnam pa bcu gcig po spong zhing / byung ngo cog yongs su spong bar byed pa gang yin pa 'di ni bar du gcod pa yongs su spong bzhes bya'o/ /bar du gcod pa yongs su spang ba'i don 'di'i rgyas par ni 'di yin te/ 'di lta ste/ ji skad bstan pa'i rnam pa dag tu rig par bya ste/ 'di las gong na yang med do/ /'di las lhag pa yang med do/ /mngon par rtogs par gyur pa'i mngon par shes pa myur bar bya ba'i phyir mchog tu dga' ba'i dngos po yid la byed pa gang zhe na/ de ltar 'phags pa nyan thos bden pa mthong ba des shes nas dad pa thob par gyur cing de shes nas dad pa de nyid la brten nas sangs rgyas dang / chos dang / dge 'dun yon tan gyi zhing yin par yid la byed pa'i sgo nas kyang mchog tu dga' ba bskyed pa dang / bdag nyid mngon par mtho ba dang / nges par legs pa la brten nas/ lus dang / longs spyod pa dang / rtogs pa'i phun sum tshogs pa yid la byed pas kyang mchog tu dga' ba bskyed pa dang / phrag dog med pa la brten nas/ bdag la ji lta ba bzhin du gzhan dag gi 'byor pa la yang mchog tu dga' ba bskyed pa dang / byas pa gzo ba la brten nas 'di lta ste/ sdug bsngal rgyu dang bcas pa bsal ba dang / bde ba rgyu dang bcas par bsgrub pa las brtsams te/ ston pa phan 'dogs pa'i phan btags pa rjes su dran zhing yid la byed pas kyang mchog tu dga' ba bskyed pa ste/ de ltar 'di ni bsgom pa'i lam dang mthun pas mchog tu dga' bar byed pa'i dngos po yid la byed pa mngon par shes pa myur bar 'gyur ba yin no/ /bsgom pa'i lam dang mthun pa mchog tu dga' ba'i dngos po yid la byed par don 'di'i rgyas par ni 'di yin par rig par bya ste/ 'di las gong na yang med do/ /'di las lhag pa yang med do/ /ji ltar thob pa'i lam bsgom pa gang zhe na/ de de ltar mchog tu dga' ba rgya chen po kha na ma tho ba med pas sems brlan pa mthar thug par 'gro ba las brtsams nas/ tshe 'di la sems kyis shin tu dga' bar 'gyur te/ de ltar dga' ba dang ldan pa de bdag nam zhig 'phags pa dgra bcom pas bsgrubs te/ gnas pa gang yin pa'i gnas de la bsgrubs te gnas par 'gyur zhig gu snyam nas/ nges par 'byung ba la 'dun pa rgyun mi 'chad par yang dag par spyod pa dang / de ltar 'dun pa skyes na rtag tu 'grub par byed pa la brtson par 'gyur te/ byang chub kyi phyogs kyi chos sum cu rtsa bdun bsgom pa'i sbyor ba la brtson par byed pa dang / de de ltar brtson 'grus brtsams shing khyim pa dang rab tu byung ba rnams dang mi 'dre bar gnas la/ bas mtha'i gnas mal dag la brten cing dben par 'dug pa dang / de de ltar 'dun pa skyes shing brtson 'grus brtsams la/ rab tu dben par gyur nas/ khyad par thob pa chung ngu tsam gyis chog mi shes shing / dge [(]pa'i [,]ba'i [)]chos rnams kyis chog mi shes pas/ gong nas gong du bzang ba bas kyang ches bzang ba'i gnas 'dod pa pa'i tshul gyis gnas te/ de'i bsgom pa'i lam ni chos bzhi po 'di dag gis bsdus shing legs par bsdus so/ /de bsgom pa'i lam rnam pa bzhi po de dag nyid la brten nas ji skad bstan pa'i mchog tu dga' ba'i dngos po bskyed pa gang yin pa'i mchog tu dga' ba de la de'i tshe khyad zhugs par 'gro ba'i tshul gyis de'i bsgom pa yongs su rdzogs par 'gyur ba dang / nyon mongs pa spang ba'i thob pa'i khyad par rtogs pas kyang de'i dga' ba bsgom pa yongs su rdzogs par 'gyur ba dang / bsgom pas spang bar bya ba'i nyon mongs pa'i phyogs kyi gnas ngan len dang bral bas kyang de'i shin tu sbyangs pa dang / shin tu sbyangs pas bskyed pa'i lus dang sems kyi phan pa bsil bar gyur pa bsgom pa yongs su rdzogs par 'gyur ba dang / de'i slob pa'i ting nge 'dzin gang yin pa de rdo rje lta bu'i mthar thug par 'gro bas kyang bsgom pa yongs su rdzogs par 'gyur ba ste/ 'di ni ji ltar thob pa'i lam bsgom pa zhes bya'o/ /ji ltar thob pa'i lam bsgom pa'i don 'di'i rgyas pa ni 'di yin te/ 'di lta ste chos bzhi la brten nas chos lnga bsgom pa yongs su rdzogs pa yin par rig par bya ste/ /'di las gong na yang med do/ /'di las lhag pa yang med do/ /shin tu rnam par dag pa'i lam thob pa 'bras bu dang phan yon dang bcas pa gang zhe na/ gnas skabs gsum po bde ba dang / sdug bsngal dang / sdug bsngal yang ma yin bde ba yang ma yin pa'i gnas skabs rnams su nyon mongs pa bag la nyal gang zag gnyis po 'di lta ste/ so so skye bo dang / slab pa gnyis la shas cher 'byung bar 'gyur ba/ kun nas nyon mongs pa'i phyogs gnyis po 'di lta ste/ len pa'i kun nas nyon mongs pa'i phyogs dang / 'du byed kyi kun nas nyon mongs pa'i phyogs kun nas slong bar byed pa kun nas nyon mongs pa'i phyogs rnam pa de gnyis spong bar bya ba dang / chos 'dul ba 'di la 'jug pa'i gegs byed pa'i nyon mongs pa yid la shin tu ring du zhugs shing bag la nyal du 'dug la/ sdug bsngal rnam pa sna tshogs skyed par byed pa'i nyon mongs pa gang yin pa de dag ma lus par spong ba gang yin pa de dag shin tu rnam par dag pa'i lam gyi 'bras bu zhes bya'o/ /mi slob pa'i yan lag bcus bsdus pa'i mi slob pa'i phung po lnga po tshul khrims dang / ting nge 'dzin dang / shes rab dang / rnam par grol ba dang / rnam par grol ba'i ye shes mthong ba'i phung po rnams ni shin tu rnam par dag pa'i lam zhes bya'o/ / shin tu rnam par dag pa'i lam de thob na/ nyes pa rnam pa bcu dang bral ba'i 'phags pa'i gnas la gnas par 'gyur te/ nyes pa rnam pa bcu gang zhe na/ phyi rol gyi 'dod pa rnams la brten te/ mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa dang / sdug bsngal gyi sdug bsngal dang phrad pa'i nyes pa dang / nang la brten nas dbang po ma bsdams pa'i nyes pa ste/ de ltar dbang po ma bsdams na mya ngan la sogs pa de dag skye bar 'gyur ba dang / bde bar gnas pa'i ro myang ba'i nyes pa dang / rgyu ba dang / gnas pa la bag med pa'i nyes pa dang / phyi rol pa'i mu stegs can rnams kyi lta ba ngan pas kun nas bskyed pa thun mong ma yin pa de dag nyid kyi yin pa ma 'dres pa/ ngag dang / rtog pa dang / tshol ba'i nyes pa dang / bsam gtan la brten pa gsum gyi mthar gyur pa'i nyes pa dang / rten cing 'brel par 'byung bar gtogs pa'i len pa'i kun nas nyon mongs pa'i phyogs skyed par byed pa'i nyes pa dang / 'du byed kyi kun nas nyon mongs pa'i phyogs skyed par byed pa'i nyes pa ste/ de ltar nyes pa rnam pa bcu po 'di dag dang bral na tha ma'i lus 'dzin cing / phyi ma'i lus gzhan mngon par 'grub pa med la/ mchog tu rab tu zhi pa'i mya ngan las 'das pa la gtan du yang dag par gnas shing / srid pa'i rtse mo man chad du skyes pa'i sems can thams cad la brten te/ sems can thams cad kyi gtso bo nyid thob par 'gyur ro/ /de lta bas na 'phags pa'i gnas la gnas pa zhes bya'o/ /nyes pa bcu dang bral ba'i 'phags pa'i gnas la gnas pa gang yin pa de la ni lam gyi phan yon zhes bya ste/ 'bras bu gang yin pa dang / shin tu rnam par dag pa'i lam gang yin pa de dang / phan yon gang yin pa de dag thams cad gcig tu bsdus pa ni shin tu rnam par dag pa'i lam thob pa 'bras bu dang phan yon du bcas pa zhes bya'o/ /shin tu rnam par dag par lam 'bras bu dang phan yon du bcas pa'i don 'di'i rgyas pa ni 'di yin te/ 'di lta ste/ ji skad bstan pa kho na bzhin du rig par bya ste/ 'di las gong na yang med do/ /'di las lhag pa yang med do/ /de ltar mi slob pa'i 'phags pa'i chos dam pa thob par gyur pa de'i 'phags pa'i chos dang mtshungs par ldan pa'i sems gang yin pa de ni/ 'dod pa'i yon tan lnga la shin tu mi phyogs la/ de'i sems kyi rnam par smin pa med pa'i phyir/ phyi ma la nying mtshams sbyor ba med do/ /'jig rten pa'i sems spangs kyang kun du spyod pa gang yin pa de ni rang gi ngang nyid kyis 'gag par 'gyur ro/ /de'i nyon mongs pa'i lam dang / yang srid par skye ba'i las kyi lam yang tshe 'di nyid la rgyun chad par 'gyur te/ de chad pas sdug bsngal gyi lam yang rgyu 'gags pa dang / 'bras bu 'gags pa'i phyir/ phyi ma la 'byung bar mi 'gyur te/ sdug bsngal gyi mtha' de ni 'di las gud na yang med do/ /'di las gong na yang med do/ /'di las lhag pa yang med do/ /de la bden pa mngon par rtogs pa gang yin pa dang / bar du gcod pa rnam par spangs pa gang yin pa dang / mngon par rtogs par gyur ba'i mngon par shes pa myur ba mchog tu dga' ba'i dngos po yid la byed pa gang yin pa dang / ji ltar thob pa'i lam bsgom pa gang yin pa dang / shin tu rnam par dag pa'i lam thob pa 'bras bu dang phan yon dang bcas pa 'di ni 'jig rten las 'das pa'i rnam pa thams cad rnam par dag pa zhes bya'o/ /'jig rten las 'das pa'i rnam pa thams cad rnam par dag pa'i don 'di'i rgyas pa ni 'di yin te/ 'di lta ste/ ji skad bstan pa'i rnam pa de dag tu rig par bya ste/ 'di las gong na yang med do/ /'di las lhag pa yang med do/ /de ltar na sngar bstan pa'i 'jig rten pa'i rnam pa thams cad rnam par dag pa gang yin pa de dang / 'jig rten las 'das pa'i rnam pa thams cad du rnam par dag pa gang yin pa de gnyis gcig tu bsdus pa ni bsgoms pa'i 'bras bu zhes bya'o/ /de ltar na ji skad bstan pa'i bsgom pa'i gzhi gang yin pa de dang / ji skad bstan pa'i bsgom pa'i rgyu gang yin pa de dang / ji skad bstan pa'i rnal 'byor du bsgom pa nyid gang yin pa de dang / ji skad bstan pa'i bsgoms pa'i 'bras bu gang yin pa de ni bsgoms pa las byung ba'i sa zhes bya'o/ /rnal 'byor spyod pa'i sa las bsgoms pa las byung ba'i sa rdzogs so// //de'i 'og ma nyan thos kyi sa ni glegs bam logs shig na yod do/ /rang sangs rgyas kyi sa gang zhe na/ de ni rnam pa lngar rig par bya'o/ /rigs dang / lam dang / yang dag par 'grub pa dang / gnas pa dang / rgyu ba'o/ /rang sangs rgyas kyi rigs gang zhe na/ de ni mtshan nyid gsum du rig par bya ste/ rang sangs rgyas rnams ni mngon par byang chub pa'i snga rol nyid nas/ rang bzhin gyis nyon mongs pa chung ba'i rigs yin te/ des na de dag gi sems 'du 'dzi la mi 'jug gi /gcig pu dga' ba la 'jug go/ /rang sangs rgyas rnams ni mngon par rdzogs par byang chub pa'i snga rol nyid nas/ rang bzhin gyis snying rje chung ba yin te/ des na de dag gi sems chos ston pa dang / sems can gyi don bya ba la sems mi 'jug gi /sems las chung ngur gnas pa la sems 'jug go/ /rang sangs rgyas rnams ni mngon par rdzogs par byang chub pa'i snga rol nyid nas/ rang bzhin gyis dbang po 'bring dang / nga rgyal spyad pa'i rang bzhin can yin te/ des na slob dpon med pa dang / 'gran zla med par mngon par rdzogs par byang chub par 'dod do/ /de ltar rang sangs rgyas kyi lam yang mtshan nyid gsum du rig par bya ste/ 'di ltar 'di na la la rang sangs rgyas kyi rigs la gnas la/ bskal pa brgyar sangs rgyas 'byung ba mnyes par byed de/ der yang 'di lta ste/ rang byang chub tu rgyud yongs su smin par byed cing / 'di ltar phyis rang byang chub par bya ba'i phyir/ phung po la mkhas pa dang / skye mched la mkhas pa dang / khams la mkhas pa dang / rten cing 'brel par 'byung ba la mkhas pa dang / gnas dang gnas ma yin pa la mkhas pa dang / bden pa la mkhas par byed de/ de ni rang sangs rgyas kyi lam dang po'o/ /gzhan yang 'di na la la sangs rgyas 'byung ba mnyes par byas nas/ skyes bu dam pa la yang dag par brten pa dang / dam pa'i chos nyan pa dang / tshul bzhin yid la byed pa la brten nas nges par 'byed pa'i cha dang mthun pa'i dge ba'i rtsa ba sngon ma bskyed pa 'di lta ste/ dro bar gyur pa dang rtse mo dang bzod pa rnams bskyed cing mngon par bsgrub la tshe de nyid la chos mngon par rtogs par byas pa'am/ dge sbyong gi 'bras bu thob par byed ni mi nus te/ 'di ltar phyis mngon par rtogs par bya ba dang / dge sbyong gi 'bras bu thob par bya ba'i phyir phung po la mkhas pa dang skye mched la mkhas pa dang / khams la mkhas pa dang / rten cing 'brel par 'byung ba la mkhas pa dang / gnas dang gnas ma yin pa la mkhas pa dang / bden pa la mkhas pa yin te/ de ni rang sangs rgyas kyi lam gnyis pa'o/ /gzhan yang 'di na la la sangs rgyas 'byung ba mnyes par byas nas skyes bu dam pa la yang dag par brten pa dang / dam pa'i chos nyan pa dang / tshul bzhin du yid la byed pa la brten nas chos mngon par rtogs par byed cing dge sbyong gi 'bras bu 'thob par 'gyur la thams cad kyi thams cad du shin tu mthar phyin pa dang / shin tu dri ma med pa dang shin tu tshangs par spyod pa'i mthar gyur pa'i dgra bcom pa nyid thob par ni mi nus te/ 'di lta ste/ 'jig rten las 'das pa'i lam gyis phyis shin tu mthar phyin pa dang / shin tu dri ma med pa dang shin tu tshangs par spyod pa'i mthar gyur pa'i dgra bcom pa'i 'bras bu thob par bya ba'i phyir phung po la mkhas pa dang / skye mched la mkhas pa dang / khams la mkhas pa dang / rten cing 'brel par 'byung ba la mkhas pa dang / gnas dang gnas ma yin pa la mkhas pa dang / bden pa la mkhas pa yin te/ de ni rang sangs rgyas kyi lam gsum pa'o/ /de la yang dag par 'grub pa ni 'di ltar 'di na la la rang sangs rgyas kyi lam dang pos bskal pa brgya t shang bar tshogs bsags nas bskal pa brgya 'das pa'i 'og tu sangs rgyas rnams 'byung ba med pa na slob dpon med par byang chub kyi phyogs kyi chos sum cu rtsa bdun bsgoms nas rang byang chub mngon par rdzogs par sangs rgyas te nyon mongs pa thams cad spong ba'i dgra bcom pa nyid mngon sum du byed do/ /'di ltar 'di na la la rang sangs rgyas kyi lam gnyis pa dang / gsum pas rgyu de dang rkyen des sangs rgyas rnams 'byung ba med pa kho na'i tshe slob dpon med par byang chub kyi phyogs kyi chos sum cu rtsa bdun bsgoms nas chos mngon par rtogs par byed cing dgra bcom pa'i 'bras bu'i bar du yang thob par 'gyur ro/ /yang na ni dge sbyong gi 'bras bu thob nas shin tu mthar phyin pa dang / shin tu dri ma med pa dang shin tu tshangs par spyod pa'i mthar gyur pa'i 'bras bu'i mchog dgra bcom pa nyid thob par 'gyur ro/ /de la yang dge bar 'grub pa dang pos ni bse ru ltar spyod pa'i rang sangs rgyas su 'gyur ro/ /yang dag par 'grub pa gnyis pa dang gsum pas ni tshogs dang spyod pa'i rang rgyal bar 'gyur te/ bse ru lta bu spyod par mi 'gyur ro/ /de la yang gnas pa ni bse ru ltar spyod pa'i rang sangs rgyas gang yin pa de ni gcig pu 'dug pa dga' zhing gcig pu gnas la zab mo la mos pa dang / rten cing 'brel par 'byung ba zab mo la so sor rtog pa lhur len pa dang / stong pa nyid dang / mtshan ma med pa dang / smon pa med pa yid la byed cing gnas par 'gyur ro/ /de la yang dag par 'grub pa gnyis pa dang gsum pas ni gcig tu nges par gcig pu 'dug pa la dga' zhing gcig pu gnas pa'i rang rgyal bar 'gyur ba ma yin gyi tshogs dang gnas par 'gyur ro/ /gnas pa lhag ma ni de yang bse ru ltar spyad pa ji lta ba bzhin no/ /de la rgyu ba ni de dag thams cad grong ngam grong rdal gang du rten cing gnas kyang ste de dag lus shin tu bsrungs pa dang dbang po rnams shin tu bsdams pa dang / dran pa la shin tu gnas pas grong ngam grong rdal de nyid du bsod snyoms la 'jug ste/ pha rol dma' ba dang sman pa rnams la snying brtse bar byed pas yang lus kyis snying brtse bar byed kyi ngag gis ni ma yin te/ 'di ltar de dag ni lus kyis chos ston pa yin gyi ngag gis ni ma yin pa'i phyir te / 'di lta ste/ zhe 'gras pa rnams bzlog pa'i phyir rdzu 'phrul gyi yul rnam pa du ma ston par byed do/ /de dag thams cad ni nyon mongs pa zhi bar byed pa'i bgrod pa gcig pu pa yin par rig par bya'o/ rnal 'byor spyod pa'i sa las rang sangs rgyas kyis rdzogs so// //de'i 'og ma byang chub sems dpa'i sa ni glegs bam logs shig na yod do/ /phung po dang bcas pa'i sa gang zhe na/ de ni rnam pa gsum du blta bar bya ste/ sar gdags pa rnam par gzhag pa dang / nye bar zhi bar gdags pa rnam par gzhag pa dang / phung por gdags pa rnam par gzhag pa'o/ /sar gdags pa rnam par gzhag pa gang zhe na/ phung po dang bcas pa'i sa ni sa lnga po 'di lta ste/ sems med pa'i sa dang bsgoms pa las byung ba'i sa dang / nyan thos kyis dang / byang chub sems dpa'i sa rnams las phyogs gcig ma gtogs pa dang 'di lta ste/ phung po med pa'i sa gcig ril gyis ma gtogs pa'i sa lhag ma rnams ni phung po dang bcas pa'i sa zhes bya ste/ 'di ni sar gdags pa rnam par gzhag pa zhes bya'o/ /nye bar zhi bar gdags pa rnam par gzhag pa gang zhe na/ phung po dang bcas pa'i sa ni nye bar zhi ba rnam pa bzhis rnam par gzhag ste/ sdug bsngal nye bar zhi ba dang / nyon mongs la nye bar zhi ba dang / sems can rnams la rnam par 'tshe ba nye bar zhi ba dang / btang snyoms nye bar zhi ba'o/ /de la dge slong dgra bcom pa zag pa zad pa'i phyi ma srid pa 'byung bar byed pa'i sdug bsngal la gang yin pa de ta la'i mgo bcad pa bzhin du yongs su shes nas spangs shing rtsa nas bcad de phyi ma la mi skye ba'i chos nyid kyis mi snang bar gyur pa de ni de'i sdug bsngal nye bar zhi ba'o/ /dge slong dgra bcom pa'i gtan mi skye ba'i chos nyid kyis 'dod chags ma lus par spangs pa dang / zhe sdang ma lus pa dang / gti mug ma lus pa dang / nyon mongs pa thams cad ma lus par spangs pa de ni de'i nyon mongs pa nye bar zhi ba'o/ /de ni 'dod chags zad pa dang / zhe sdang zad pa dang / gti mug zad pa dang / nyon mongs pa thams cad zad pas / sdig pa gang yin pa de mi byed la/ dge ba la rten par byed pa de ni nyon mongs la rnam par 'tshe ba nye bar zhi ba'o/ /dge slong dgra bcom pa zag pa zad pa ni bde bar gnas pa rnam pa drug po 'di dag gis rtag par rgyun du shas cher gnas te/ de mig gis gzugs rnams mthong na/ yid bde bar yang mi 'gyur/ yid mi bde bar yang mi 'gyur bar dran pa dang shes bzhin gyis btang snyoms su gnas pa dang / de rna bas sgra rnams thos pa dang / snas dri rnams bsnams pa dang / lces ro rnams myangs pa dang / lus kyis reg bya rnams la reg pa dang / yid kyis chos rnams rnam par shes pa na yid bde bar yang mi 'gyur/ yid mi bde bar yang mi 'gyur bar dran pa dang shes bzhin gyis btang snyoms su gnas pa de ni de'i btang snyoms nye bar zhi ba'o/ /nye bar zhi ba rnam pa bzhi pa de dag las brtsams nas phung po dang bcas pa'i sa la mchog tu zhi ba dang mchog tu bsil bar gyur pa zhes bya ste/ de ni nye bar zhi ba gdags pa rnam par gzhag pa zhes bya'o/ /phung po gdags pa rnam par gzhag pa gang zhe na/ phung po ni brgyad po 'di dag yin te/ gdags pa'i phung po dang / yongs su gzung ba'i phung po dang / gnas pa'i phung po dang / 'jug pa'i phung po dang / bar du gcod pa'i phung po dang / sdug bsngal gyi phung po dang / dga' ba'i phung po dang / tha ma'i phung po'o/ /gdags pa'i phung po gang zhe na/ nye bar len pa'i phung po lnga po rnams te/ gang la brten na bdag ces bya ba'am/ sems can nam/ srog gam/ skye ba'am/ gso ba'am/ skyes bu'am/ gang zag gam/ shed las skyes sam / shed bu zhes bya bar ming dang brda dang / gdags pa dang / tha snyad du 'dogs pa dang / gang la brten nas ming ni 'di zhes bya/ rigs ni 'di zhes bya/ rus ni 'di zhes bya/ kha zas ni 'di lta bu zhig za za/ bde ba dang sdug bsngal ni 'di lta bu zhig myong / tshe ni 'di ltar ring / yun ni 'di srid cig gnas gnas/ tshe ni 'di tsam zhig thub ces bya bar ming dang / brda dang / gdags pa dang tha snyad du 'dogs pa'o/ /yongs su gzung ba'i phung po gang zhe na/ yongs su gzung ba'i dngos po bdun te/ bdag dang / pha ma dang / bu dang / chung ma dang / zan dang / bran mo dang / las byed pa dang / zho shas 'tsho ba dang / mdza' bshes dang / grogs po dang / blon po dang / nye du dang / snag gi gnyen mtshams nas rgyas par yongs su gzung ba'i dngos po bdun po 'di lta ste/ yid kyis las 'byung ba bzhin te/ gang dag la brten nas sems can rnams yongs su 'dzin pa dang ldan par shes pa'o/ /gnas pa'i phung po gang zhe na/ zas bzhi ste/ kham dang / reg pa dang / yid la sems pa dang / rnam par shes pa'i zas te/ gang la brten na sems can byung ba rnams gnas shing 'tsho bar 'gyur ba dang / 'byung bar 'dod pa rnams la phan 'dogs pa'o/ /'jug pa'i phung po gang zhe na/ rnam par shes pa'i gnas bzhi dang / rten cing 'brel par 'byung ba'i yan lag bcu gnyis te/ 'di lta ste/ gzugs su gtogs pa'i rnam par shes pa'i gnas dang / tshor bar gtogs pa dang / 'du shes su gtogs pa dang / 'du byed du gtogs pa'i rnam par shes pa'i gnas dang / 'di lta ste/ ma rig pa'i rkyen gyis 'du byed rnams dang / 'du byed kyi rkyen gyis rnam par shes pa nas rgyas par skye ba'i rkyen gyis rga shi'i bar du sbyar te/ gang la brten na sems rnams 'gro ba lnga'i 'khor bar rjes su 'jug pa'o/ /bar du gcod pa'i phung po lnga gang zhe na/ 'di lta ste/ lha'i bu'i bdud de dge ba de dang de dag la brtson pa rnams pa bgegs byed pa'i phyir nye bar gnas pa gang yin pa'o/ /sdug bsngal gyi phung po gang zhe na/ 'dod pa'i khams thams cad ni sdug bsngal gyi phung po zhes bya ste/ gang la brten na sems can rnams kyi sdug bsngal ba dang / yid mi bde ba nyams su myong bar 'gyur ba'o/ /dga' ba'i phung po gang zhe na/ bsam gtan la snyoms par 'jug pa'i bde ba la ni dga' ba'i phung po zhes bya ste/ gang la brten na sems rnams 'dir yang snyoms par zhugs shing / der yang skyes nas yun ring por bsam gtan la snyoms par 'jug pa'i dga' ba so sor nyams su myong bar 'gyur ba'o/ /tha ma'i phung po gang zhe na/ dgra bcom pa'i rgyun gyi phung po rnams te/ gang la brten na dgra bcom pa la tha ma'i lus 'dzin pa zhes bya'o/ /de la dge slong dgra bcom pa zag pa zad pa phung po dang bcas pa'i sa la gnas pa/ phung po du dang ni ldan zhes bya/ du dang ni mi ldan zhes bya zhe na/ 'di lta ste/ tha ma'i phung po gcig dang ni gcig tu nges par ldan no/ /yongs su gzung ba'i dngos po drug dang ni gcig tu nges par mi ldan no/ /'jug pa'i dngos po thams cad ni gcig tu nges par mi ldan no/ /bar du gcod pa'i phung po thams cad dang yang gcig tu nges par mi ldan no/ /phung po lhag ma rnams dang ldan pa yang ma yin mi ldan pa yang ma yin zhes bya ste/ 'di ni phung por gdags pa rnam par gzhag pa zhes bya'o/ /rnal 'byor spyod pa'i sa las phung po dang bcas pa'i sa rdzogs so// //phung po med pa'i sa gang zhe na/ de yang rnam pa gsum du blta bar bya ste/ sar gdags pa rnam par gzhag pa dang / mya ngan las 'das par gdags pa rnam par gzhag pa dang / mya ngan las 'das pa'i rnam grangs su gdags pa rnam par gzhag pa'o/ /sar gdags pa rnam par gzhag pa gang zhe na/ phung po med pa'i sa ni sa lnga po 'di lta ste/ sems med pa'i sa dang bsgoms pa las byung ba'i sa dang / nyan thos kyis dang / rang sangs rgyas kyis dang / byang chub sems dpa'i sa rnams kyi cha re re gzhag pa bsdus par blta bar bya'o/ /mya ngan las 'das par gdags pa rnam par gzhag pa gang zhe na/ phung po med pa'i sa ni mya ngan las 'das pa rnam pa gnyis po nye bar zhi ba'i mya ngan las 'das pa dang / gnod pa med pa'i mya ngan las 'das pas rnam par gzhag ste/ nye bar zhi ba'i mya ngan las 'das pa gang zhe na/ des sngon phung po dang bcas pa'i sa la nye bar zhi ba rnam pa bzhi rtogs shing thob la reg cing mngon sum du byas pas/ da ltar de'i phung po'i lhag ma med pa'i mya ngan las 'das pa'i dbyings la yang nye bar zhi ba rnam pa bzhi po rnam grangs su 'gro ba'i nye bar zhi ba dang / phung po thams cad nye bar zhi ba dang / phung po la brten pa'i sdug bsngal nye bar zhi ba dang / phung po la brten pa'i sdug bsngal skyer dogs pa nye bar zhi ba ste/ ji skad du/ zhum pa med pa'i sems kyis ni/ /tshor ba dang du len pa na/ /mar me shi bar gyur pa ltar/ /de yi sems ni rnam par grol/ /zhes gsungs pa lta bu ste/ 'di ni nye bar zhi ba'i mya ngan las 'das pa zhes bya'o/ /gnod pa med pa'i mya ngan las 'das pa gang zhe na/ phung po thams cad dang mi ldan pa dang / nyon mongs pa dang / sdug bsngal 'jug pa thams cad dang mi mthun pa dang / gnas yongs su gyur pas phye ba dang / zag pa med pa'i dbyings gang yin pa ste/ ji skad du/ dge slong bde ba la gnas pa ni mya ngan las 'das pa zhes bya'o zhes gsungs pa lta bu'o/ /yang ji skad du ma skyes pa dang / ma byung ba dang / ma byas pa dang / 'dus ma byas pa dang / yang dag par ma byung ba ni yod do/ /skyes pa dang / byung ba dang / byas pa dang / 'dus byas pa dang / yang dag par 'byung ba ni yod do/ /gal te ma skyes pa dang / ma byung ba dang / ma byas pa dang / 'dus ma byas pa dang / yang dag par ma byung ba med du zin na/ skyes pa dang / byung ba dang / byas pa dang / 'dus byas pa dang / yang dag par 'byung ba las nges par 'byung ba yod do zhes nga mi zer ba zhig na/ gang gi phyir ma skyes pa dang / ma byung ba dang / ma byas pa dang / 'dus ma byas pa dang / yang dag par ma byung ba de yod pas de'i phyir skyes pa dang / byung ba dang / byas pa dang / 'dus byas pa dang / yang dag par 'byung ba las nges par 'byung ba yod do zhes nga zer ro zhes gsungs pa lta bu'o/ /zab cing rgya che la dpag tu med pa mya ngan las 'das pa ni grangs su gtogs pa med do zhes bya ba de yang bcom ldan 'das kyis dgongs te gsungs pa yin no/ /de la rtogs par dka' bas na zab po/ /yon tan dang ldan zhing spangs pas na rgya che ba'o/ / zad mi shes pas na dpag tu med do/ /grangs su gtogs pa med do zhes bya ba ni gnyis su bstan du med pa'i phyir grangs su gtogs pa med do / /ji ltar grangs su gtogs pa med ce na/ yod ce'am/ med ces bstan du med pa'i phyir dang / gzugs sam/ gzugs las tha dad pa'am/ tshor ba dang / 'du shes dang / 'du byed rnams dang / rnam par shes pa'am/ rnam par shes pa las tha dad pa bstan du med pa'i phyir ro/ /de ci'i phyir zhe na/ 'di ltar de ni de bzhin nyid rnam par dag pas phye zhing gcig tu nges par dri ma med pa'i phyir te/ de ni gnod pa med pa'i mya ngan las 'das pa zhes bya'o/ /de gnyis gcig tu bsdus pa la ni mya ngan las 'das par gdags pa rnam par gzhag pa zhes bya'o/ /mya ngan las 'das pa'i rnam grangs su gdags pa rnam par gzhag pa gang zhe na/ de la mya ngan las 'das pa'i rnam grangs ni 'di rnams yin par rig par bya ste/ 'di lta ste/ rtag pa dang / brtan pa dang / ther zug pa dang / mi 'gyur ba'i chos can dang / gnas dang / gling dang / skyob pa dang / skyabs dang / dpung gnyen dang / bde ba dang / zhi ba dang / legs ba'i gzhi dang / bde legs su 'gyur ba dang / mi g.yo ba dang / mi gzhol ba dang / blta dka' ba dang / 'chi ba med pa dang / mya ngan med pa dang / 'chi 'pho med pa dang / rims nad med pa dang / yongs su gdung ba med pa dang / nad med pa dang / g.yo ba med pa dang / mya ngan las 'das pa dang / spros pa med pa zhes bya ste/ de lta bu dang mthun pa rnams ni mya ngan las 'das pa'i rnam grangs su rig par bya ste/ de ni mya ngan las 'das pa'i rnam grangs su gdags pa rnam par gzhag pa zhes bya'o/ /'di ni rnal 'byor spyod pa'i sa las phur po med pa'i sa rdzogs te sa mang po rdzogs so// //'di la sh+lo ka ni brgyad stong dgu brgya brgyad cu rtsa bzhi yod do// //

CLOSE WINDOW