བོད་ཡིག

e-texts based on the ACIP/ALL Input

/rgya gar skad du/ sU tra a laM ka ra br-it+ti b+hA Sh+yaM/ bod skad du/ mdo sde rgyan gyi 'grel bshad/ 'phags pa 'jam dpal la phyag 'tshal lo/ /dkon mchog gsum po rin chen gter gyur dang / /yang dag shAka thub sras kyi thu bo dang / /rgyal ba bdag nyid khyu mchog de de dang / /chags med sras kyi gcung la mos pa dang / /bstan bcos gsal bar 'gro la snang byed dang / /bla ma gtso bo gang las 'di thos pa/ /rtag par kun la bdag gis sar gtugs te/ /gus dang bcas pas spyi bos phyag 'tshal nas/ /don la bsam bya bdag blo blun pa dang / /bstan bcos 'di yi tshig don zab pa yang / /'grel ba'i bsam pa bdag la ma byung bas/ /de phyir bdag la phan phyir cung zad bya/ /theg pa chen po mdo sde'i rgyan gyi lus su bzhag pa ni/ mdor na rigs la gnas pa'i byang chub sems dpas bla na med pa yang dag par rdzogs pa'i byang chub tu sems bskyed nas/ byang chub sems dpa'i spyod pa la bslab par bya ba de ston to/ /de la rigs la gnas pa zhes bya ba la/ rigs ni bla na med pa'i byang chub tu 'tshang rgya ba'i sa bon la bya ste/ de la rigs zhes kyang bya/ gzhi zhes kyang bya/ nye bar rton pa zhes kyang bya/ rgyu zhes kyang bya/ brtan pa zhes kyang bya/ gnas zhes kyang bya/ sngon du 'gro ba zhes kyang bya ste/ 'di dag ni rigs kyi ming gi rnam grangs so/ /rigs de yang mdor bsdu na rnam pa gnyis te/ rang bzhin la gnas pa dang / yang dag par bsgrub pa'o/ /de la rang bzhin la gnas pa'i rigs ni byang chub sems dpa' rnams kyi skye mched kyi khyad par 'phral la rnyed pa ni ma yin gyi/ 'khor ba thog ma med pa nas gcig nas gcig tu brgyud de 'ongs pa/ chos nyid kyis rnyed pa ste/ de dang ldan pas byang chub sems dpa' rnams bla na med pa yang dag par rdzogs pa'i byang chub tu 'tshang rgya ba'i skal ba yod pa'o/ /yang dag par bsgrub pa'i rigs ni ma nges pa'i rigs can rnams dge ba'i bshes gnyen bsten pa dang / sngon dge ba'i rtsa ba la goms par byas pas las nges pa'i rigs su gyur pa ste/ skabs 'dir ni gnyi ga la bya bar rigs so/ /de la rang bzhin la gnas pa'i rigs ni 'bras bu ma grub cing ma byung ba'o/ /de la rigs kyi 'bras bu ni byang chub tu sems bskyed pa dang / pha rol tu phyin pa drug la spyod pa ste/ byang chub tu sems ma bskyed pa pha rol tu phyin par spyod pa la ma zhugs na rigs yod par mi rtog pas na phra ba yin no/ /yang dag par bsgrub pa'i rigs ni 'bras bu dang bcas pa rags pa zhes bya ste/ rang bzhin gyi rigs la ltos nas/ de tsam du zab pa dang phra ba ma yin pas rags pa zhes bya'o/ /rigs de dang ldan pa'i byang chub sems dpa' rnams nyan thos dang rang sangs rgyas las kyang 'phags pa yin na/ so so'i skye bo gzhan la lta ci smos te/ de bas na rigs de ni bla na med pa mchog khyad par can zhes bya'o/ /de ci'i phyir zhe na/ gnyis po 'di dag ni mdor na rnam par dag par bya ba ste/ nyon mongs pa'i sgrib pa las rnam par dag par bya ba dang / shes bya'i sgrib pa las rnam par dag par bya ba'o/ /de la nyan thos dang rang sangs rgyas kyi rigs can dag ni/ nyon mongs pa'i sgrib pa las rnam par dag pa tsam du zad de/ shes bya'i sgrib pa las rnam par dag pa ni ma yin no/ /byang chub sems dpa'i rigs can dag ni/ nyon mongs pa'i sgrib pa dang / shes bya'i sgrib pa gnyi ga las rnam par grol ba/ de bas na mchog khyad par can bla na med par rig par bya'o/ /yang rnam pa bzhis byang chub sems dpa' rnams nyan thos dang rang sangs rgyas las khyad par du 'phags par rig par bya ste/ bzhi po de gang zhe na/ dbang po dang / rab tu sgrub pa dang / mkhas pa dang / 'bras bu'o/ /de la dbang po'i khyad par ni byang chub sems dpa' rnams ni rang bzhin gyis dbang po rno'o/ /rang sangs rgyas rnams ni rang bzhin gyis dbang po 'bring ngo / /nyan thos rnams ni rang bzhin gyis dbang po tha ma'o/ /rab tu sgrub pa'i khyad par ni nyan thos dang rang sangs rgyas dag bdag la phan pa dang bde ba bya ba'i phyir zhugs shing sgrub pa'o/ /byang chub sems dpa' dag ni bdag la phan pa dang / gzhan la phan pa dang / 'gro ba mang po la phan pa dang / 'gro ba mang po la bde ba dang / 'jig rten la snying brtse ba dang / lha dang mi'i skye bo mang po'i don dang / bde ba dang / phan pa'i phyir rab tu zhugs pa yin pas na/ de dag la mkhas pa'i khyad par ni nyan thos dang rang sangs rgyas dag phung po dang khams dang skye mched dang / rten cing 'brel bar 'byung ba dang / gnas dang gnas ma yin pa dang / bden pa la mkhas par byed pa tsam du zad de/ byang chub sems dpa' rnams ni rig pa'i gnas lnga thams cad la mkhas par byed pas so/ /'bras bu'i khyad par ni nyan thos rnams nyan thos kyi byang chub khong du chud pa dang / rang sangs rgyas dag kyang rang sangs rgyas kyi byang chub khong du chud par zad de/ byang chub sems dpa' rnams kyis ni bla na med pa yang dag par rdzogs pa'i byang chub thob cing khong du chud pas na khyad zhugs par rig par bya'o/ /de la byang chub kyi rigs de ni thog mar byang chub tu sems bskyed pa dang / byang chub kyi phyogs thams cad dang / sa dang pha rol tu phyin pa rnams kyi gzhi dang rten yin par rig par bya'o/ /'di la byang chub sems dpa' dang po nyid du so so skye bo'i dus na/ byang chub tu sems bskyed pa ni nyan thos dang rang sangs rgyas rnams kyi yang dag pa'i smon lam thams cad kyi gtso bo yin la/ de phan chad kyi byang chub sems dpa'i yang dag pa'i smon lam thams cad kyang der 'dus shing bsdus pas na/ dang po de yang dag pa'i smon lam gyi rang bzhin no/ /yang byang chub sems dpa' byang chub tu sems bskyed pa na/ 'di ltar sems mngon par 'du byed cing tshig tu yang 'byin te/ e ma'o bdag bla na med pa yang dag par rdzogs pa'i byang chub tu mngon par rdzogs par sangs rgyas par byas la/ sems can nyan thos kyi rigs can dang / rang sangs rgyas kyi rigs can dag ni mthar thug pa'i mya ngan las 'das par gzhag/ /theg pa chen po'i rigs can dag ni/ de bzhin gshegs pa'i ye shes la gzhag par bya'o zhes sems skyed par byed do/ /de bas na sems bskyed pa de 'dod pa'i rnam pa'o/ /sems bskyed pa de yang byang chub dang sems can gyi don la dmigs nas/ de gnyis 'dod pa'i phyir sems skyed par byed kyi/ mi dmigs bar ni ma yin te/ de bas na sems bskyed pa de byang chub la dmigs pa dang / sems can gyi don la dmigs pa'o/ /gzhan yang brgya byin dang tshangs pa la sogs pa 'jig rten pa'i dge ba'i rtsa ba bskyed pa'i phyir smon lam btab pa dang / nyan thos dang rang sangs rgyas la sogs pa 'jig rten las 'das pa'i dge ba'i rtsa ba bskyed pa'i phyir/ yang dag pa'i smon lam btab pa de dag thams cad kyi nang na dang po byang chub tu sems bskyed pa 'di yang dag pa'i smon lam gyi mchog yin pas bla na med pa ste de ltar na sems bskyed pa 'di'i rang bzhin dang / rnam pa dang / dmigs pa dang / mchog tu gyur pa ste/ rnam pa bzhir rig par bya'o/ /yang sems bskyed pa de rnam pa gnyis su rig par bya ste/ 'byung ba dang 'byung ba ma yin pa'o/ /de la 'byung ba ni dang po sems bskyed nas shin tu de dag gi rjes su 'jug gi ldog par mi byed do/ /'byung ba ma yin pa ni shin tu de dag gi rjes su 'jug pa ma yin gyi slar yang ldog par byed pa'o/ /sems bskyed nas ldog pa de yang rnam pa gnyis te/ shin tu ldog pa dang / shin tu ldog pa ma yin pa'o/ /de la shin tu ldog pa ni gang lan cig phyir 'ong nas byang chub tu sems mi skye ba ste/ dper na nyan thos kyi rigs can dag theg pa chen por byang chub tu sems bskyed pa las nyan thos kyi rigs yod pa las lan cig byang chub kyi sems bor na phyis byang chub kyi sems mi skye'o/ /shin tu ldog pa ma yin pa ni lan cig log nas yang byang chub kyi sems skye ba ste/ byang chub kyi sems rgya cher rab tu dbye ba dang / skye ba'i rgyu dang / rkyen dang ldog pa'i rgyu dang / rkyen la sogs pa zhib tu rnal 'byor spyod pa'i sa las 'byung ste/ 'dir yang de bzhin du blta bar bya'o/ /da ni byang chub sems dpa'i spyod pa bstan par bya ba'o/ /de ltar byang chub tu sems bskyed pa'i byang chub sems dpa'i spyod pa gang zhe na/ de yang mdor na rnam pa gsum du rig par bya ste/ gang la bslab pa dang / ji ltar bslab pa dang / gang dag slob pa ste/ de rnams gcig tu bsdus nas byang chub sems dpa'i spyod pa zhes bya'o/ /de la gang byang chub sems dpa' bslab par bya zhe na/ gnas bdun la bslab par bya'o/ /gnas bdun po gang zhe na/ bdag gi don dang / gzhan gyi don dang / de kho na'i don dang / mthu dang / sems can yongs su smin pa dang / bdag nyid sangs rgyas kyi chos yongs su smin pa dang / bla na med pa yang dag par rdzogs pa'i byang chub pa ste gnas bdun no/ /bsdus pa'i don ni/ bdag dang gzhan gyi don de nyid/ /mthu dang sems can smin pa dang / /bdag nyid sangs rgyas chos rnams dang / /bdun pa mchog gi byang chub bo/ / gang du byang chub sems dpa' bslab par bya ba de bstan zin to/ /ji ltar bslab par bya ba de bstan par bya ste ji ltar bslab par bya zhe na/ 'di la dang po nyid du byang chub sems dpa' byang chub sems dpa' bslab pa la slob par 'dod pas theg pa chen po'i chos la mos pa mang bar bya ba dang / chos btsal bar bya ba dang / chos bshad par bya ba dang / chos kyi rjes su mthun pa'i chos bsgrub par bya ba dang / yang dag pa'i bstan pa dang gdams ngag bstan par bya ba dang / yang dag pa'i bstan pa dang gdams ngag la gnas par bya ba dang / thabs kyis yongs su zin pa'i lus dang / ngag gi las dang yid kyi las dang ldan par bya'o/ /bsdus pa'i don ni/ mos par bya ba mang ba dang / /chos btsal ba dang bshad pa dang / /de bzhin du ni bsgrub pa dang / /yang dag bstan dang gdams ngag dang / /thabs kyis yongs su zin pa yi/ /lus ngag yid la tha ma'o/ /ji ltar bslab par bya ba yang bstan zin to/ /da ni gang dag bslab par bya ba de bstan par bya'o/ /de la gang slob par byed ce na/ byang chub sems dpa' rnams slob par byed ce'o/ /byang chub sems dpa' de yang mdor bsdu na rnam pa bcur rig par bya ste/ /rigs la gnas pa dang / rab tu zhugs pa dang / bsam pa ma dag pa dang / bsam pa dag pa dang / bsam pa yongs su ma smin pa dang / bsam pa yongs su smin pa dang / nges pa ma yin par rtog pa dang / nges par rtog pa dang / skye ba gcig gis thogs pa dang / srid pa tha ma pa'o/ /byang chub sems dpa' de dag la spyir mi dbye bar ming du 'di skad ces bya ste/ byang chub sems dpa' sems dpa' che/ /blo ldan gzi brjid che ba dang / /thugs rje chen po bsod nams che/ /dbang phyug ded dpon chen po dang / /rgyal ba'i gnas dang chos chen po/ /zhes bya ba la sogs pa'o/ /de la rigs la gnas pa ni bla na med pa'i byang chub kyi sa bon tsam yod la byang chub tu sems bskyed pa'o/ /gang rigs la brten nas byang chub sems dpa'i bslab pa la bslab bar bya ba'i phyir byang chub tu sems bskyed nas byang chub sems dpa'i tshul khrims la gnas pa ni rab tu zhugs pa zhes bya'o/ /rab tu zhugs pa de srid du sa dang po la rab tu dga' ba'i sar ma zhugs te/ mos pas spyod pa'i sa la gnas pa de srid du bsam pa ma dag pa zhes bya'o/ /nam sa dang por zhugs pa nas sa bdun pa man chad kyi dus na ni bsam pa dag pa zhes bya'o/ /bsam pa dag pa de nyid ji srid du mthar thug pa'i sa brgyad pa dang / dgu pa la ma zhugs kyi bar bsam pa yongs su ma smin pa zhes bya ste/ rtsol ba dang 'bad pa yod pa'i phyir ro/ /nam sa brgyad pa dang dgu pa la zhugs pa'i dus na bsam pa yongs su smin pa zhes bya ste rtsol ba dang 'bad pa med pa'i phyir ro/ /yongs su smin pa de yang ji srid du rgyal tshab tu nges pa'i sa sa bcur ma zhugs kyi bar du nges pa ma yin par gtogs pa zhes bya'o/ /sa bcur zhugs nas na nges par gtogs pa zhes bya'o/ / sa bcu pa'i byang chub sems dpa' nges par gtogs pa de la yang rnam pa gnyis te/ skye ba gcig gis thogs pa dang / srid pa tha ma pa'o/ /skye ba gcig gis thogs pa ni tshe 'di nyid la bla na med par 'tshang mi rgya'o/ /skye ba de 'das nas tshe rabs gzhan dag tu bla na med pa'i byang chub tu 'tshang rgya ba ste/ dper na 'phags pa byams pa lta bu'o/ /srid pa tha ma pa ni tshe de nyid la bla na med pa'i byang chub tu 'tshang rgya ba ste/ dper na byang chub sems dpa' don thams cad grub pa lta bu'o/ /'di gsum ni bstan bcos 'di'i lugs te/ bstan bcos 'di 'og gzhug tu don gsum bshad par zad de/ gsum po gang zhe na/ byang chub sems dpa'i rigs dang / byang chub tu sems bskyed pa dang / byang chub sems dpa'i spyod pa la bslab par bya ba'o/ /bstan bcos 'di'i ming ni mdo sde'i rgyan zhes bya ste/ ci'i phyir mdo sde'i rgyan zhes bya zhe na/ bstan bcos 'di theg pa chen po'i mdo sde thams cad kyi tshig dang / don mdzes par byed pa'i rgyan du gyur pas na mdo sde'i rgyan zhes bya ste/ ji ltar rgyan du gyur pa ni gang brgyan par byed/ gang la brgyan par byed ces bya ba nas rgyan rnam pa du mas brgyan par byed ces bya ba la sogs pas ston to/ /de la bsdus te bshad pa ni/ /don shes pa dag don ston byed/ /ces bya ba nas brtsams te/ don rnams rab tu dbye bas na/ /mkhas pa rtag tu dga' mchog skye/ /zhes bya ba yan chad tshigs su bcad pa gsum gyi don rnam pa gnyis shig ston te ji ltar yod pa dang / ji snyed yod pa'o/ /de la ji ltar yod pa'i bshad pa ni gang brgyan par byed/ gang la brgyan par byed/ gang gis brgyan par byed/ gang gi phyir brgyan par byed/ gang la brgyan par byed/ gang gi rgyan du byed/ gang gi don du rgyan du byed pas bstan te/ de yang sgra'i gtsug lag gi tshig byed pa po dang / las dang / byed pa dang / de'i phyir dang / rgyu'i phyir dang / yan lag gi phyir dang / mtshan ma'i phyir te/ nges pa'i tshig bdun dang rim bzhin du sbyar ro/ / de yang don shes pa dag ces bya ba nas brtsams te/ rnam pa de phyir 'gro ba'i sems can la/ /zhes bya ba yan chad kyis bstan to/ /de la ji snyed pa'i bshad pa ni grangs kyi sgo nas bstan te/ grangs kyang du zhig ce na lnga'o/ /de yang 'byor pa'i don tshul bla med song ba lnga yi rang bzhin rab tu ston/ /zhes pa nas brtsams te/ chos rab de 'dir bshad pa dga' ba'i mchog skyed do/ /zhes bya ba yan chad kyis bstan te/ gzugs rgyan gyi dpe dang bcas par bstan pas kyang bstan bcos 'di mdo sde'i rgyan du gyur par ston te/ 'di ni thang cig bsdus te bshad pa yin no/ /de la gang brgyan par byed ce na/ de'i phyir don shes pa dag ces smos te/ theg pa chen po'i mdo sde'i nang nas phung po dang khams dang skye mched dang / sa dang pha rol tu phyin pa la sogs pa'i rang dang spyi'i mtshan nyid kyi don shes pa'i gang zag gis brgyan par byed de/ mdo sde brgyan par byed pa'i byed pa'o/ /don shes pa'i gang zag de yin pas na des ni byed pa po bstan to/ /gang la brgyan par byed ce na/ de'i phyir don ston byed ces smos te/ don ni theg pa chen po'i chos rang dang spyi'i mtshan nyid do/ /ston par byed pa ni don de 'chad pa'i tshig la bya ste/ don du na theg pa chen po'i mdo sde'i don dang / tshig la brgyan par byed ces bya ba'i tha tshig go/ /theg pa chen po'i mdo sde'i don dang tshig ni brgyan par bya ba'i yul yin pas na des ni las bstan to/ /gang gis brgyan par byed ce na/ /de'i phyir/ tshig dang rtsa ba'i dri ma med pa zhes smos te/ tshig ni 'dus byas mi rtag ces bya ba rkang pa mi tshang ba la bya ste/ de yang yan lag brgyad dang ldan pas na dri ma med pa zhes bya'o/ /yan lag brgyad ni phyis zhib tu bshad par bya'o/ /rtsa ba ni don rtogs par nus pa'i rkang pa tshang ba la bya ste/ dper na 'dus byas kun mi rtag /skye zhing 'jig pa'i chos can te/ /skye zhing 'jig par 'gyur ba la/ /de dag myur du zhi ba bde/ /zhes bya ba lta bu ste/ de yang yan lag brgyad dang ldan pas dri ma med pa zhes bya'o/ /yan lag brgyad kyang zhib tu phyis bshad do/ /theg pa chen po'i don dang / tshig la yang rin po che la sogs pas ni brgyan du mi rung gi / tshig dang ming dang yi ge bzang pos brgyan par byed de/ des ni byed pa bstan to/ gang gi phyir brgyan par byed ce na/ de'i phyir sdug bsngal bsgral phyir zhes smos te/ 'khor ba na gnas pa'i sems can sdug bsngal rnam pa brgyad la sogs pas sdug bsngal bar gyur pa'i sdug bsngal de las bsgral te/ mya ngan las 'das pa'i gnas thob par bya ba'i phyir brgyan par byed de/ des ni de'i phyir zhes bya ba bstan to/ / gang la brgyan/ rgyan de rgyu ci las byung zhe na/ de'i phyir/ sdug bsngal 'gro la snying rje de phyir de bdag nyid/ /ces bya ba smos te/ khams gsum na gnas pa'i sems can skye ba dang rga ba la sogs pas sdug bsngal bar gyur pa la snying rje ste/ de ltar snying rje ba'i phyir byang chub sems dpa' rnams snying rje'i bdag nyid du gyur pas de ltar na snying rje'i rgyus brgyan par byed do zhes bya ba'i don to/ /'dis ni rgyu'i phyir zhes bya ba bstan to/ /gang gi rgyan du theg pa gsum las theg pa gang gi rgyan du byed ce na/ de'i phyir/ chos kyi dam pa theg pa bstan/ /zhes smos te/ dam pa'i theg pa ni theg pa chen po la bya'o/ /chos dang gzhung gi nang nas theg pa chen po 'chad pa'i chos dang gzhung de'i rgyan du byed pa ste/ 'dis ni yan lag gi don bstan pa yin no/ /yan lag gi don zhes bya ba ni/ rgya gar skad du na sha sti zhes bya ste/ lhas byin gyi lag pa/ mchod sbyin gyi lag pa zhes pa lta bu ste/ 'dir yang bstan bcos 'di theg pa chung ngu'i gzhung gi rgyan du gyur pa ni ma yin gyi/ theg pa chen po'i mdo sde'i gzhung gi rgyan du gyur pa yin no zhes bya ba'i tha tshig go/ /gang gi don du brgyan par byed/ /de'i phyir/ rnam pa de'i phyir 'gro ba'i sems can la/ /zhes smos te/ rnam pa ni theg pa chen po'i don dang tshig la bya'o/ /de'i phyir 'gro ba'i sems can zhes bya ba ni theg pa chen po'i don rtogs par bya ba'i phyir zhugs pa'i sems can la bya ste/ don du na theg pa chung ngu la zhugs pa'i sems/ can gyi don du brgyan par byed pa ni ma yin gyi/ theg pa chen po la zhugs pa'i sems can gyi don dang ched du brgyan par byed do zhes bya ba'i don to/ /'dis ni mtshan ma'i phyir zhes bya ba bstan te/ mtshan ma'i phyir zhes bya ba ni sgra'i gtsug lag las ni/ mi ta ta sap+ta/ zhes bya ba 'byung ste/ de yang de'i don nam de'i ched ces bya ba lta bur 'dren no/ /ji ltar yod pa bshad zin to/ /da ni ji snyed pa bshad par bya'o/ /de ltar brgyan na rgyan du gyur pa'i chos du zhig gis brgyan par byed ce na/ de'i phyir/ 'byor pa'i don tshul bla med song ba lnga yi rang bzhin rab tu ston/ /zhes smos te 'byor pa'i don tshul ni yi ge dang tshig dang don du 'brel pa la bya'o/ /bla med song ba zhes bya ba ni yi ge dang tshig tu 'brel pa dang tshig dang don du 'brel pa de yang theg pa chen por gtogs pa'i yi ge dang tshig tu 'brel pa dang / tshig dang don du 'brel pa la bya ste/ don du na theg pa chen por gtogs pa'i yi ge dang tshig tu 'brel pa dang tshig dang don du 'brel pa'i chos lnga'i rang bzhin rab tu ston pa'i sgo nas brgyan par byed do zhes bya ba'i tha tshig go/ /chos lnga'i rang bzhin gang yin pa de ni gser las brdungs byas zhes bya ba la sogs pa dpe'i skabs su bshad par bya'o/ /de ni 'brel pa'i tshig rnams re re nas dbye bar bya ste/ don shes par byed pa dag /don ston par byed ces bya ba la sogs pa ni gang zhes bya ba rnams las brtsams te zhes bya ba la/ don shes byed ces bya ba la sogs pa'i tshigs su bcad pa dang pos ni gang brgyan par byed/ gang la brgyan par byed/ gang gis brgyan par byed/ gang gi phyir brgyan par byed/ gang las brgyan par byed/ gang gi rgyan du byed/ gang gi don du brgyan par byed/ rgyan rnam pa du mas brgyan par byed pa las brtsams te bstan pa yin no/ /sus brgyan par byed ce na/ don shes pa'o zhes bya ba la gang zag gis brgyan par byed/ gang zag sus brgyan par byed ce na/ theg pa chen po'i mdo sde rnams kyi rang dang spyi'i mtshan nyid kyi don shes pa'i gang zag mkhas pa des brgyan par byed ces bya ba'i don to/ / ci zhig brgyan zhe na/ don ston par byed pa'o zhes pa ci zhig la brgyan/ gang la brgyan par byed ce na/ theg pa chen po'i mdo sde'i don dang / tshig la brgyan par byed do/ /de la don ni rang dang spyi'i mtshan nyid do/ /ston pa zhes bya ba'i don de 'chad pa'i tshig la bya'o/ / cis brgyan zhe na/ tshig dang rtsa ba dri ma med pa ste/ /zhes pa la/ rgyan gang gis brgyan zhe na/ tshig dri ma med cing bzang ba dang / rtsa ba dri ma med cing bzang bas brgyan te tshig dang rtsa ba bzang po ni rgyan yin no/ /tshig dri ma med pa'i don bstan pa'i phyir/ dri ma med ces bya ba ni mya ngan las 'das pa'i grong khyer du 'gro ba la sogs pa'o zhes pa la/ tshig de mya ngan las 'das pa'i grong khyer du 'gro ba la sogs pa yan lag brgyad dang ldan pas na dri ma med pa zhes bya'o/ /yan lag brgyad ni grong khyer du 'gro ba dang / stobs dang yon tan du ldan pa dang / rnam par bsal ba dang / rnam par shes pa dang / mnyan par 'os pa dang / mi brten pa dang / rab tu mi mthun pa med pa dang / mi zad pa'o/ /tshig de mya ngan las 'das par 'gro ba'i chos ston par byed pa'i mya ngan las 'das pa thob par byed pa'i rgyu byed pas na grong khyer du 'gro ba zhes bya'o/ /tshig de mu stegs rnams 'joms pa'i stobs dang ldan pa dang / 'jam zhing snyan pa'i yon tan dang ldan pa zhes bya'o/ /nges pa'i tshig dang yi ge mdzes pa dag 'byung bas rnam par gsal ba zhes bya'o/ /tshig de mnyan pa'i dus na yang brda phrad par sla bas rnam par shes pa zhes bya'o/ /chos dang don du bcas pa ston pas mnyan par 'os pa zhes bya'o/ /khe dang bkur sti la ma chags pas mi brten pa zhes bya'o/ /smra ba na yang dran pa dang dgos pa nyi tshe ba smra bas rab tu mi mthun pa med pa zhes bya'o/ /spobs pa zhum pa med pa dang spobs pa zad mi shes pa'i thabs 'byung bas mi zad pa zhes bya'o/ /de ltar yan lag brgyad dang ldan pa'i tshig de mdor na yon tan gsum dang ldan par rig par bya'o/ /yon tan gsum ni/ dbang du byas pa dang / rang bzhin dang sbyor ba'o/ /de la grong khyer du 'gro zhes bya ba'i tshig gcig gi dbang du byas pa bstan te/ tshig de mya ngan las 'das pa thob pa'i dbang du byas nas gsungs pa'i phyir ro/ /stobs dang yon tan du ldan pa dang / rnam par gsal ba gnyis kyis ni rang bzhin bstan to/ /lhag ma rnams kyis ni sbyor ba bstan te/ /rtsa ba dri ma med pa ji lta bu yin pa bstan pa'i phyir/ dri ma med pa'i rtsa ba zhes bya ba ni tshig dang yi ger sbyor cing ldan pa la sogs pa rgya cher bya ste zhes bya ba smos te/ tshig dang yi ger 'byor pa la sogs pa yan lag brgyad dang ldan pas na rtsa ba dri ma med pa zhes bya'o/ /yan lag brgyad ni tshig dang yi ger 'byor pa dang bcas pa dang / lugs bzhin pa dang / rjes su bsal ba dang / so sor mthun pa dang / nye bar 'dren pa dang / gzung bar 'os ba dang / mkhas pa dang / rab tu byed pa'i yan lag gi tshogs so/ /de la tshig dang yi ge dang ming la sogs pa'i rim bzhin du steng 'og ma 'khrul par 'chad pas na tshig dang yi ger 'byor pa zhes bya'o/ /yang na 'byor pa zhes bya ba ni rigs pa la bya ste/ bya ba sgrub pa'i rigs pa dang / ltos pa'i rigs pa dang / gtan tshigs sgrub pa'i rigs pa dang / chos nyid kyi rigs pa ste/ rigs pa bzhi dang ldan pa'i tshig dang / yi ge ston pa'i phyir tshig dang yi ger 'byor pa zhes bya'o/ /bsgrub par bya ba dang / sgrub par byed pa rnam pa gnyis yod pa las/ sgrub par byed pas bsgrub par bya ba grub par 'gyur ba'i mtshan nyid ston te/ bsgrub par bya ba dang sgrub par byed pa 'brel pa 'chad pas na bcas pa zhes bya'o/ /bshad pa'i tshig rnams kyang sngar bshad par bya ba'i tshig phyis mi smra/ phyis smra bar bya ba'i tshig sngar mi smra ste/ bshad pa'i tshig rnams steng 'og 'brel par rim bzhin du 'chad pas na lugs bzhin pa zhes bya'o/ /tshig dang yi ge thams cad kyang brda phrad par sla ba gsal ba dag ston pas na rjes su gsal ba zhes bya'o/ /nyan thos kyi rigs can gyi gang zag la yang nyan thos kyi theg pa'i chos ston/ rang sangs rgyas kyi rigs can gyi gang zag la yang rang sangs rgyas kyi theg pa'i chos ston/ theg pa chen po'i rigs can gyi gang zag la yang theg pa chen po'i chos ston te/ 'khor ji lta ba bzhin du 'khor dang mthun pa kho nar ston pas na so sor mthun pa zhes bya'o/ /tshig rnams kyang yid du 'ong zhing yid sim pa dang / snying dga' bar 'gyur ba sha stag ston pas na nye bar 'dren pa zhes bya'o/ /chos bshad pa'i dus bzhin du ston pa dang / chos dang don du bcas par ston pas na gzung bar 'os pa zhes bya'o/ /mkhas pa dang rtag tu byed pa'i yan lag ces pa la/ mkhas par byed pa dang rtag tu byed pa zhes bya bar sbyar te/ slob ma rnams chos kyi mtshan nyid la mkhas par byed pa dang / chos rgyun du ston par byed pa'i phyir mkhas pa dang rtag tu byed pa zhes bya ste/ de'i yan lag ni yang dag pa'i lta ba la sogs pa 'phags pa'i lam gyi yan lag brgyad do/ /de lta bu'i chos dag 'chad pas na mkhas pa dang rtag tu byed pa'i yan lag gi tshogs zhes bya'o/ /theg pa chen po'i chos/ rnams la rin po che la sogs pas brgyan du mi rung snyam pa la/ mi rung ba bstan pa'i phyir gang gi phyir tshig dang rtsa ba dang / yi ge med par don bstan par mi nus pa'i phyir ro zhes ston te/ tshig bzang po dang rtsa ba bzang po dang / yi ge bzang po med par theg pa chen po'i don bstan par mi nus te/ theg pa chen po'i don bstan pa yang tshig dang rtsa ba dang yi ge bzang pos ston par byed do/ /gang gi phyir zhe na/ sdug bsngal bsgral ba'i phyir ro zhes pa la/ gang gi phyir brgyan par byed ce na/ khams gsum gyi sems can skye rga na 'chi la sogs pas sdug bsngal ba rnams kyi sdug bsngal bsal ba'i phyir brgyan par byed do zhes bya ba'i don to/ /ci'i phyir zhe na/ zhes bya ba ni/ ci'i phyir brgyan par byed/ rgyu gang gis brgyan par byed/ rgyu gang las rgyan de byung zhe na zhes bya ba'i don to/ /gang gi phyir sdug bsngal ba'i 'gro ba la snying rje ste/ de bas na snying rje ba'i phyir ro zhes pa la gang gi phyir byang chub sems dpa' rnams sdug bsngal gyis nyen pa'i 'gro ba la snying rje ste/ de bas na snying rje dang ldan pa'i rgyus brgyan par byed do zhes bya ba'i tha tshig go/ /bdag nyid ces bya ba ni snying rje'i bdag nyid de zhes bya ba la/ bdag nyid ces bya ba ni snying rje'i bdag nyid la bya ste/ byang chub sems dpa' rnams ni snying rje dang ldan pa'i rang bzhin can yin no zhes bya ba'i don to/ /ci'i rgyan du byed ce na zhes pa ni theg pa gsum las theg pa gang gi rgyan du byed ces bya ba'i don to/ /theg pa dam pa'i rnam pa bstan pa chos gang la yod pa chos de'i'o zhes pa la chos de'i gzhung dang mdo sde gang las theg pa dam pa'i rnam pa ste/ theg pa chen po'i chos kyi rang bzhin thabs dang shes rab kyi mtshan nyid chos gang las byung ba'i chos de'i rgyan du byed kyi/ theg pa chung ngu'i chos kyi rgyan du byed pa ni ma yin no zhes bya ba'i don to/ /su dag gi phyir brgyan zhe na zhes bya ba ni/ nyan thos kyi rigs can gyi gang zag dang / rang sangs rgyas kyi rigs can gyi gang zag dang / theg pa chen po'i rigs can gyi gang zag las gang gi don du brgyan par byed ces bya ba'i tha tshig go/ /de'i phyir 'gro ba'i sems can gyi phyir ro zhes bya ba ni de'i sgra theg pa chen po dang sbyar te/ theg pa chen po de rtogs par bya ba'i phyir zhugs pa'i sems can rnams kyi don dang ched du brgyan par byed do zhes bya ba'i tha tshig go/ /de ni mtshan ma bdun pa ste zhes bya bas de'i phyir zhes bya ba'i sgra sgra'i gtsug lag gi mtshan nyid dang sbyar na/ mtshan ma bdun pa zhes bya ste/ mtshan ma bdun pa'i don ni de'i phyir ram de'i don du'am/ de'i don du zhes bya ba'i tshul du 'dren no/ /rgyan rnam pa du mas brgyan zhe na zhes bya ba ni theg pa chen po'i chos dang don la brgyan na/ rgyan gyi grangs du zhig gis brgyan par byed ce na zhes bya ba'i don te/ de yang chos lngas brgyan par byed do/ /'byor pa ni ldan pa'o zhes pa la yi ge dang tshig tu 'brel pa dang / tshig dang don du 'brel pa la bya'o/ /bla med ni bla na med pa'i theg par song ba la bya'o zhes bya ba la bla na med par song ba zhes bya ba ni bla na med pa'i theg par song ba la bya ste/ don du na theg pa chen por gtogs pa'i chos lnga bstan pa'i sgo nas brgyan par byed ces pa'i don to/ /da ni don gyi tshul lnga'i rang bzhin de dag tshigs su bcad pa gnyis kyis bstan to zhes bya ba la/ gong du rgyan dus brgyan zhes bya ba la/ chos rnam pa lnga bstan pas brgyan to zhes de skad du glengs pa la/ da ni tshigs su bcad pa gnyis pos chos lnga po de dag gang dang gang yin pa ston to/ /de la theg pa chen po'i chos rnams ni don rnam pa lnga'i dbang du byas nas bshad de/ lnga gang zhe na/ bsgrub par bya ba dang / shes par bya ba dang / bsam pa dang / bsam gyis mi khyab pa dang / yongs su rdzogs par thugs su chud pa'i don so so rang gis rig pa byang chub kyi phyogs kyi rang bzhin no/ /chos de lnga'i 'grel pa ni rnam pa gsum ste/ theg pa chen po'i dngos po lnga dang / rang bzhin gsum dang / gang zag rnam par gzhag pa'o/ /de la theg pa chen po'i dngos po lnga ni/ ming dang / mtshan ma dang / rnam par rtog pa dang / de bzhin nyid dang / rnam par mi rtog pa'i ye shes so/ /de la ming zhes bya ba ni brda dang tha snyad dang / mngon par brjod pa'i rang bzhin te/ 'jig rten pa gang ming gi sgo nas phung po dang khams la sogs pa'i chos rnams la mngon par zhen to/ /ji ltar zhe na/ ji ltar ming gang dang gang gis chos gang dang gang dag la mngon par brjod cing btags pa de bzhin du chos de dag rang bzhin gyis yod do zhes chags so/ /de la ming gis brjod pa'i chos de dag ni ming dang chos su bcas te med pa yin no/ /de bas na bcom ldan 'das kyis kyang / ming ni gang dang gang dag gis/ /chos ni gang dang gang brjod pa/ /de ni de na med pa ste/ /de ni chos kyi chos nyid do/ /zhes gsungs so/ / de ltar 'jig rten pa'i ming gi sgo nas chos rnams la yod par mngon par zhen pa dag la/ gang ming gis brjod pa'i chos de dag ni rang bzhin gyis yod pa ma yin no zhes bya bar bya ba dka' bas na de ni gtan tshigs kyis bsgrub par bya ba'o/ /de dang chos 'dra ba'i dpe ni/ gser las brdungs byas 'dra zhing zhes bya ba la 'di ltar mgar ba mkhas pas brdungs pa dang bsregs pa dang / sbyangs pa la sogs pa'i 'bad pa dang rtsol ba chen pos las su rung bar byas te/ rna cha dang dpung rgyan la sogs pa'i rgyan du bsgrubs nas mdzes par brgyan na dga' ba'i mchog bskyed pa de bzhin du/ theg pa chen po 'di la yang ming gis dngos po 'di la mngon par chags pa rnams la ming gang gis brjod pa'i dngos po de dag rang bzhin gyis yod pa ma yin no zhes gtan tshigs kyis rang gi phyogs bsgrub pa dang gzhan gyi phyogs su ni dbyung ba la sogs pa'i sgo nas med par bsgrubs na/ gser las brdungs su byas pa bzhin du dga' ba'i mchog skye bar 'gyur te/ bsgrub par bya ba smras zin to/ /mtshan ma ni mngon par brjod pa'i bdag nyid kyi ming de nyid kyi dngos po rten du gyur pa sa bon dang myu gu la sogs pa phyi'i gzhan gyi dbang gi rang bzhin gzung ba'i cha la bya ste/ phyi'i dngos po gang la brten nas ming rnam pa sna tshogs 'jug par 'gyur ba'i phyir gzhan dbang la mtshan ma zhes bya'o/ /dngos po de yang rten cing 'brel te 'byung ba'i rang gi sems las snang ba tsam du zad pa bum pa dang snam bu la sogs par 'jig rten rang gis rig pa ste/ de ni rten 'brel yin no zhes bstan nas shes par bya ba tsam du zad do/ /ji ltar zhe na phyi'i rten cing 'brel te 'byung ba de mngon sum du gyur te/ rang gis rig pas na mngon sum du snang ba de la 'jig rten pa rnams gcig tu the tshom skye zhing yid gnyis zab med pas na sa bon las myu gu/ myu gu las 'dab ma zhes bya ba la sogs pa'i sgo nas shes par bya ba tsam du zad do/ /de dang chos 'dra ba'i dpe ni pad+mo rgyas pa bzhin zhes bya ste/ ji ltar nyi ma'i 'od zer gyis kha bye ba'i pad+ma kha bye ba mthong na dga' ba'i mchog skye ba de bzhin du/ phyi'i dngos po rnams rten cing 'brel te 'byung ba yin par 'bad rtsol chen po med pas bstan te/ shes par gyur na dga' ba'i mchog skye bar 'gyur te/ shes par bya ba bshad zin to/ /de la rnam par rtog pa ni rten cing 'brel te 'byung ba de nyid dngos po tsam du sems dang sems las byung ba'i rang bzhin 'dzin pa'i char gyur pa'i nang gi rten cing 'brel te 'byung ba la bya'o/ /de la ni theg pa chen po'i chos nyan pa dang / bsam pa la sogs pa'i sgo nas tshul bzhin du rnam par rtog pas phyi'i yul rnams ni sems las byung ba yin no zhes de ltar bsam par bya'o/ /ji ltar mngon pa'i chos bsdus pa las/ chos la rab tu zhugs pa'i chos rnams la dpyod pa ni rigs pa dus dpyod par byed ce na/ rigs pa bzhis dpyod par byed de/ rigs pa bzhi ni/ ltos pa'i rigs pa dang / bya ba byed pa'i rigs pa dang / gtan tshigs sgrub pa'i rigs pa dang / chos nyid sgrub pa'i rigs pa'o/ /da ltar rigs pa bzhis phyi'i dngos po rnams ni sems las snang ba yin no zhes tshul bzhin du rnam par brtags te bsams na kun nas nyon mongs pa spangs pa dang rnam par byang ba skye ba dang rjes su mthun par 'gyur ro/ /de dang chos mthun pa'i dpe ni/ bkres pas nyen pa g.yos legs kha zas za ba 'dra/ /zhes bya ste/ ji ltar kha zas legs par g.yos pa'i kha dog dang dri dang ro la sogs pa phun sum tshogs pa/ bkres pas nyen pa'i gang zag gis zos na dga' ba'i mchog skye ba de bzhin du theg pa chen po'i chos bdud rtsi'i zas dang 'dra ba 'di la yang sngon dam pa'i chos nyan pa dang / bsam pa la sogs pa ma byas pas bkres par gyur pa rnams kyis mnyan pa dang bsam pa la sogs pa'i sgo nas tshul bzhin yid la byed pas bsams te zos na don rtogs pas tshim pa thob na dga' ba'i mchog skye bar 'gyur te/ bsam pa bshad zin to/ /de bzhin nyid ni bsam gyis mi khyab pa zhes bya ste/ ci'i phyir zhe na/ so so'i skye bos bsam pa'i spyod yul las 'das pa dang / 'phags pa rnams kyis so so rang gis rig par bya ba yin pa'i phyir ro/ /de yang theg pa chen po bsdus pa'i bstan bcos las chos kyi sku ni bsam gyis mi khyab pa'i mtshan nyid do zhes bshad pa lta bu'o/ /de ltar na de bzhin nyid rnam par dag pa ni so so rang gis rig pa yin pa'i phyir dang / 'jig rten na de dang 'dra ba'i dpe med pa dang / rtog ge'i spyod yul las 'das pa'i phyir bsam gyis mi khyab pa'o/ /de dang chos 'dra ba'i dpe ni/ phrin yig snyan pa thos pa 'dra/ /zhes bya ste/ ji ltar don dang tshig tu 'brel pa don phun sum tshogs pa'i phrin yig snyan pa de don la p hyin ci log tu rnam par rtog pa spangs pa'i mkhas pa'i lag tu song ste mthong nas don rtogs nas dga' ba'i mchog skye ba de bzhin du de nyid de yang sangs rgyas dang byang chub sems dpa' rnams kyis sa dang po khong du chud pa nas brtsams te mngon sum du gyur pa na de bzhin nyid de so so rang gis rig pa dang / rtog ge'i spyod yul las 'das pa dang / zag pa med pa dang dpe med par gzigs nas dga' ba'i mchog skye ste/ de bas na sa dang po de rab tu dga' ba zhes btags so/ /de ltar na de bzhin nyid de 'phags pa rnams kyis so so rang gis rig na/ ci'i phyir bsam gyis mi khyab ces bya zhe na/ byis pa de kho na khong du ma chud pa rnams kyis bsam par mi nus te/ de dag gis bsam pa las 'das pas na bsam gyis mi khyab pa zhes bya ste/ bsam gyis mi khyab pa zhes bshad zin to/ /rnam par mi rtog pa'i ye shes ni yongs su rdzogs pa thugs su chud pa'i don byang chub kyi phyogs kyi rang bzhin zhes bya ste/ yongs su grub pa rnam pa gnyis las phyin ci ma log par yongs su grub pa'i rang bzhin yin pas yongs su grub pa zhes bya'o/ /rnam par mi rtog pa de ni bshad pa'i chos ma yin gyi rtogs shing khong du chud par bya ba'i chos yin pas na thugs su chud pa'i don zhes bya'o/ /sems dang sems las byung ba'i rang bzhin yin pas na byang chub kyi phyogs kyi rang bzhin zhes bya ste/ rnam par mi rtog pa'i ye shes de rtsig pa la sogs pa lta bur blun pa'i rang bzhin ma yin gyi 'phags pa rnams kyis so so rang gis rig par bya ba yin pas na byang chub kyi phyogs la rang bzhin du bshad pa de dang chos 'dra ba'i dpe ni rin chen sgrom phye ltar zhes bya ba ste/ dper na rin po che sna tshogs yod pa'i sgrom de kha phye nas kha dog dang 'od du ldan pa'i rin po che sna tshogs mthong na dga' ba'i mchog skye ba de bzhin du sangs rgyas dang byang chub sems dpa' rnams kyis nyon mongs pa dang shes bya'i sgrib pa spangs te/ byang chub kyi phyogs kyi chos rin po che de dag sems kyi rgyud la snang bar gyur na dga' ba'i mchog skye bar 'gyur ro/ /brgal ba yongs su grub pa rnam pa gnyis te/ mi 'gyur bar yongs su grub pa dang / phyin ci ma log par yongs su grub pa'o/ /de ltar de bzhin nyid dang rnam par mi rtog pa'i ye shes gnyis ka la yang yongs su grub par 'dra ba las ci'i phyir de nyid la bsam gyis mi khyab pa zhes bya la/ rnam par mi rtog pa'i ye shes la bsam gyis mi khyab pa zhes mi bya zhe na/ lan du de gnyis ka yongs su grub pa yin par bden mod kyi 'on kyang de bzhin nyid ni byis pa de kho na khong du ma chud pa rnams la nams kyang rang gis rig par ma gyur to/ /byang chub kyi phyogs ni sems dang sems las byung ba'i rang bzhin yin te/ de zag pa med pa'i ngo bo yin du zin kyang de kho na nyid ma rtogs pa rnams kyis de bzhin nyid ni so so rang gis rig par 'gyur ro/ /ji ltar zhe na/ 'di ltar chos kyi sku'i rgyu mthun pa las byung ba'i theg pa chen po'i chos mnyan pa dang / mnyan nas sems pa'i dus na de kho na khong du ma chud pa rnams la nams kyang rang gis rig par ma gyur to/ /byang chub kyi phyogs ni sems dang sems las byung ba'i rang bzhin yin te/ zag pa med pa'i ngo bo yin du zin kyang de kho na ma rtogs pa rnams kyis so so rang gis rig par 'gyur ro/ / ji ltar zhe na/ 'di ltar chos kyi sku'i rgyu mthun pa las byung ba'i theg pa chen po'i chos mnyan pa dang / mnyan nas sems pa'i dus ni de kho na ma rtogs pa rnams la yang tshul bzhin du sbyor ba'i tshe/ byang chub kyi phyogs kyi so so rang gis rig pa dang rjes su mthun pa'i sems skye bar 'gyur ro/ /so so rang gis rig pa dang rjes su mthun pa'i sems skye bar yang cis mngon zhe na/ ji ltar theg pa chen po bsdus pa'i bstan bcos las/ yongs su grub pa'i rang bzhin ji ltar rig par bya zhe na/ rnam par byang ba'i chos rnam pa bzhi bstan pas rig par bya ste/ rnam par byang ba'i chos rnam pa bzhi ni/ rang bzhin gyis rnam par byang ba dang / dri ma med par rnam par byang ba dang / de thob pa'i lam rnam par byang ba dang / de skyed pa la dmigs pa'i rnam par byang ba'o/ /de la rang bzhin gyis rnam par byang ba ni de bzhin nyid do/ /dri ma med par rnam par byang ba ni de bzhin nyid de nam nyon mongs pa dang / shes bya'i sgrib pa'i dri ma glo bur dang bral bar gyur pa'o/ /de thob pa'i lam rnam par byang ba ni byang chub kyi phyogs kyi chos thams cad do/ /de skyed pa la dmigs pa'i rnam par byang ba ni theg pa chen po'i chos bshad pa thams cad dang de nyan pa dang sems par byed pa'o zhes bshad do/ /de ltar nyan pa dang sems par byed pa'o zhes bshad do/ /rnam par byang ba 'thob pa'i rgyur gyur pas na kun brtags kyi rang bzhin zhes kyang mi bya/ shin tu rnam par dag pa'i chos kyi dbyings las byung ba'i chos la dmigs pas na gzhan dbang zhes kyang mi bya'o/ /rnam pa des kyang nyan pa dang sems pa la sogs pa'i dus kyi tshe na yang zag pa med pa'i byang chub kyi phyogs kyi chos rnams 'thob pa dang rjes su mthun pa yod pas na zag pa med pa zhes btags te/ rnam par mi rtog pa'i ye shes la bsam gyis mi khyab pa zhes ma btags pa ni khyad par de yod de/ de ltar na thang cig theg pa chen po'i chos lnga dngos po lnga sbyar te/ gser las brdungs byas pa la sogs pa shin tu rgyas pa dpe lnga ni de dang chos 'dra ba'i dper bstan nas bshad do/ /de la chos lnga po de rang bzhin gsum gyis ji ltar bshad ce na/ gang bsgrub bar bya ba zhes bya ba de'i bshad pa ni/ ji ltar theg pa chen po bsdus pa'i bstan bcos la/ sangs rgyas bcom ldan 'das rnams kyis theg pa chen po shin tu rgyas par bshad pa la bshad pa de las kun tu brtags pa'i rang bzhin ji ltar rig par bya zhe na/ med pa'i rnam grangs bshad pas rig par bya ste/ shes rab kyi pha rol tu phyin pa'i nang nas rab 'byor sangs rgyas med do/ /chos med do/ /dge 'dun med do zhes bya ba la sogs pa gsungs pa las rig par bya'o zhes bshad do/ /med do zhes bya ba'i tshig dang yi ge 'di dag ni kun tu skrag pa skyed par byed pa ste/ med pa thos nas 'jig rten pa dag skrag par 'gyur ro/ /de bas na kun brtags pa'i rang bzhin ni bsgrub par bya ba zhes bya ste/ ji ltar bsgrub ce na/ med ces bshad kyang chos 'di dag rnam pa thams cad nas thams cad du med pa ni ma yin gyi gzhan gyis byis pa'i skye bo rnams kyis gzung ba dang 'dzin par kun tu brtags pa'i bdag nyid rnam pa med pa la dgongs nas med do zhes bshad pa yin no zhes sgrub/ de bas na bcom ldan 'das kyis/ chos rnams thams cad med pa'i phyir/ /kun nas nyon mongs dag med pa/ /ji ltar mthong ba de ltar min/ /de bzhin du yang med pa min/ /zhes gsungs so/ /de dang chos 'dra ba'i dpe ni/ gser las brdungs byas 'dra zhing zhes bya ba ste/ ji ltar gser mgar mkhas pas bsregs pa dang brdungs pa la sogs pa byas pa'i sgo nas las su rung ba mnyen por byas te/ dpung rgyan dang rna cha la sogs pa'i rgyan du byas na dga' ba'i mchog skye ba de bzhin du gtan tshigs kyis kun tu brtags pa'i rang bzhin med par bsgrubs nas med pa kho nar yang dag pa ji lta ba bzhin du khong du chud nas mkhas pa rnams dga' ba'i mchog skye bar 'gyur te bsgrub par bya ba bshad zin to/ /gzhan gyi dbang gi rang bzhin ni rten cing 'brel te 'byung ba sems dang sems las byung ba'i mtshan nyid bde ba dang sdug bsngal la sogs pa so so rang gis myong ba'o/ /kun tu brtags pa'i ngo bo rang bzhin med par bsgrubs na theg pa chen po la gzhan gyi dbang gis bsdus pa'i chos rnams 'bad pa med par bde blag tu shes par 'gyur te/ de bas na de ni shes par bya ba bshad pa yin no/ /de dang chos 'dra ba'i dpe ni pad+mo rgyas pa bzhin zhes bya ba ste/ ji ltar 'bad pa med par nyi ma'i 'od zer gyis pad+mo kha phye ba mthong na dga' ba'i mchog skye ba de bzhin du kun tu brtags pa'i rang bzhin med par bsgrubs na 'bad pa chen po med par yang gzhan gyi dbang gi ngo bo bde blag tu rtogs par 'gyur te/ rtogs na mkhas pa rnams dga' ba'i mchog skye ste/ shes par bya ba bshad zin to/ /gzhan dbang gi ngo bo de nyid bsam par bya ste/ ci'i phyir zhe na/ gzhan dbang gis sems dang sems las byung ba'i rang bzhin med pas 'dod chags la sogs pa'i mi dge ba'i chos rnams spangs pa dang / dad pa la sogs pa'i dge ba'i chos rnams goms par bya ba'i tshul gyis tshul bzhin du bsam par bya'o/ /de dang chos 'dra ba'i dpe ni/ bkres pas nyen pa g.yos legs kha zas za ba 'dra/ /zhes bya ba ste/ ji ltar kha zas legs par g.yos pa'i dri dang kha dog dang ro phun sum tshogs pa de bkres pas nyen pas zos na dga' ba'i mchog skye ba de bzhin du gzhan gyi dbang gi chos la yang / 'dod chags la sogs pa'i mi dge ba'i chos spong ba dang / dad pa la sogs pa'i dge ba'i chos rnams goms par bsgom pa'i tshul du tshul bzhin du bsam na dga' ba'i mchog skye bar 'gyur te/ bsam pa bshad zin to/ /yongs su grub pa'i rang bzhin la rnam pa gnyis yod de/ de bzhin nyid kyi rang bzhin dang / rnam par mi rtog pa'i ye shes byang chub kyi phyogs kyi rang bzhin no/ /de la de bzhin nyid ni bsam gyis mi khyab pa zhes bya ste/ ji ltar bsam gyis mi khyab pa ni sngar bshad zin to/ /gzhan yang de bzhin nyid bsam gyis mi khyab pa yin par mdo sde las kyang 'byung ste/ 'phags pa dkon mchog sprin gyi mdo las/ sgrib pa thams cad rnam par sel ba'i byang chub sems dpas gsol pa/ bcom ldan 'das de kho na zhes bgyi ba ci lags/ bcom ldan 'das kyis bka' stsal ba/ rigs kyi bu yang dag pa'i don gyi tshig bla dgas so/ /gsol pa/ bcom ldan 'das yang dag pa zhes bgyi ba ci lags/ bcom ldan 'das kyis bka' stsal pa/ rigs kyi bu yang dag pa zhes bya ba de ni mi slu ba'i tshig bla dwags so/ /gsol pa/ bcom ldan 'das mi slu ba zhes bgyi ba ci lags/ bcom ldan 'das kyis bka' stsal pa/ gang de nyid ma nor ba de nyid phyin ci ma log pa nyid do/ / gsol pa/ bcom ldan 'das de nyid ces bgyi ba de ci lags/ bcom ldan 'das kyis bka' stsal pa/ rigs kyi bu chos de dag ni so so rang gis rig pa ste/ yi ges gdags par mi nus so/ /de ci'i phyir zhe na/ chos de ni yi ge thams cad las yang dag par 'das pa/ brjod pa thams cad las yang dag par 'das pa/ tshig gi spyod yul las yang dag par 'das pa/ tshig gi lam las yang dag par 'das pa/ spyod pa thams cad dang bral ba/ rtog ge thams cad dang bral ba/ brtag tu med pa rtog ge rnams mi 'jug pa/ rtog ge'i spyod yul las yang dag par 'das nas byis pa'i spyod yul las yang dag par 'das pa/ rnam par shes pa'i spyod yul las yang dag par 'das pa/ bsam gyis mi khyab pa'i dbyings yin no zhes gsungs so/ /de ltar na de bzhin nyid ces bya ba'i chos de spros pa dang / rtog ge dang / rnam par shes pa'i spyod yul las yang dag par 'das nas byis pa rnams kyis bsam par mi nus pas na bsam gyis mi khyab par bshad do/ /de dang chos 'dra ba'i dpe ni/ phrin yig snyan pa thos pa 'dra/ /zhes bya ba ste/ dper na phrin yig tshig dang don du ldan pa mkhas pa rnams kyis thos shing mthong na dga' ba'i mchog skye ba de bzhin du sa dang po yan chad de bzhin nyid chos kyi dbyings te/ byang chub sems dpa' rnams kyis mthong nas dga' ba'i mchog skye bar 'gyur te/ bsam gyis mi khyab pa bshad zin to/ /rnam par mi rtog pa'i ye shes byang chub kyi phyogs kyi rang bzhin ni phyin ci ma log par yongs su grub pa'i ngo bo 'phags pa rnams kyis thugs su chud par bya ba'i don so so rang gis rig par bya ba yin te/ de dang chos 'dra ba'i dpe ni rin chen sgrom phye ltar zhes bya ba ste/ ji ltar rin po che sna tshogs yod pa'i sgrom kha phye nas rin po che sna tshogs mthong na dga' ba'i mchog skye ba de bzhin du de kho na mthong ba'i byang chub sems dpa' rnams kyis sgrib pa gnyis spangs nas rnam par mi rtog pa byang chub kyi phyogs kyi chos rin po che sems kyi rgyud la snang bar gyur na dga' ba'i mchog skye bar 'gyur te/ de ltar rang bzhin gsum gyis bshad pa yin no/ /da ji ltar na chos rnam pa lnga gang zag rnam par gzhag pas bshad ce na/ 'dis gang zag rnam pa gsum snang ste/ mi shes pa'i gang zag dang / the tshom du gyur pa'i gang zag dang / phyin ci log tu mngon par zhen pa'i gang zag go/ /de la mi shes pa'i gang zag ni theg pa chen po'i don dang / tshig gang yin pa khong du ma chud pa'o/ /the tshom du gyur pa'i gang zag ni/ shes rab kyi pha rol tu phyin pa la sogs pa'i mdo sde de dag theg pa chen po yin nam/ 'on te ma yin snyam du blo gnyis 'jug pa'o/ /log par zhen pa'i gang zag ni theg pa chen po 'di theg pa chen po ma yin gyi nyan thos kyi theg pa la theg pa chen po yin zhes 'dzin pa'o/ /de la log par mngon par zhen pa dang the tshom du gyur pa'i gang zag gnyis la ni log par zhen pa dang / the tshom bsal bar bya ba'i phyir theg pa chen po'i chos 'di sgrub pa ste/ ji ltar sgrub ce na 'di nyid theg pa chen po yin gyi gzhan ni theg pa chen po ma yin no zhes bsgrubs te/ de dang chos 'dra ba'i dpe ni/ gser las brdungs byas 'dra zhing zhes bya ba ste/ de yang sngar bshad pa bzhin du sbyar ro/ /mi shes pa'i gang zag la ni theg pa chen po'i don dang tshig dang mtshan nyid 'di lta bu yin no zhes bstan nas theg pa chen po'i mtshan nyid gang yin pa shes par bya'o/ /de dang chos 'dra ba'i dpe ni/ pad+mo rgyas pa bzhin zhes bya ba ste/ dper na 'bad pa chen po med par nyi ma'i 'od zer gyis kha bye ba'i pad+mo mthong na dga' ba'i mchog skye ba bzhin du mi shes pa rnams la theg pa chen po bstan te/ mi shes pa dang phral nas theg pa chen po shes par gyur na dga' ba'i mchog skye bar 'gyur ro/ /de ltar log par zhen pa dang / the tshom can gyi gang zag theg pa chen po sgrub mi shes pa'i gang zag la yang theg pa chen po bstan pas shes par byas nas gang zag de gsum gyis da 'di ltar bya ste/ phung po dang / khams dang skye mched la sogs pa bsam par bya ba'i gnas rnams la bsam mo/ /bsam gyis mi khyab pa'i gnas rnams la bsam pa ni spang bar bya ste/ de la bsam gyis mi khyab pa'i gnas gang zhe na/ de yang bzhi ste/ ji skad du mdo las/ sangs rgyas kyi mdzad pa sgrub pa'i phrin las bsam gyis mi khyab pa dang / phyi'i dngos po rnam pa sna tshogs grub par byed pa'i las bsam gyis mi khyab pa dang / nor bu dang sngags dang sman dang 'khyud spyad kyi sbyor ba dang rab tu ldan pa'i las bsam gyis mi khyab pa dang / rnal 'byor pa'i rnal 'byor gyi spyod yul bsam gyis mi khyab pa'o zhes gsungs pa lta bu ste/ bsam gyis mi khyab pa'i gnas de dag la bsam par byas nas sems 'khrugs pa dang myos par 'gyur te/ de bas na de dag bsam gyis mi khyab par bshad do/ /de ltar bsam gyis mi khyab pa'i gnas ni spangs/ bsam pa'i gnas rnams la bsams na dga' ba'i mchog skye bar 'gyur ro/ /de dang chos mthun pa'i dpe ni/ bkres pas nyen pa g.yos legs kha zas za ba 'dra/ /phrin yig snyan po thos 'dra zhes bya ba ste/ ji ltar kha zas legs pa bkres pas zos na dga' ba'i mchog skye ba de bzhin du bsam pa'i gnas rnams la tshul bzhin du bsams na dga' ba'i mchog skye bar 'gyur ro/ /ji ltar phrin yig bzang po la log par rtogs pa spangs te/ legs par rtogs na dga' ba'i mchog skye ba bzhin du/ bsam gyis mi khyab pa'i gnas rnams la bsam pa spangs na yang dga' ba'i mchog skye bar 'gyur ro/ /de ltar gang zag de dag gis bsam gyis mi khyab pa'i gnas rnams ni spangs/ bsam gyis mi khyab pa'i gnas rnams la ni bsams te ma nor bar tshul bzhin du zhugs na yongs su rdzogs pa thugs su chud pa'i don so so rang gis rig pa byang chub kyi phyogs kyi chos rtogs par 'gyur ro/ /de dang chos 'dra ba'i dpe ni rin chen sgrom phye ltar zhes bya ste/ dper na rin po che'i sgrom kha phye nas rin po che snang na dga' ba'i mchog skye ba bzhin du byang chub kyi phyogs kyi chos rnams kyis gnyen po byas nas theg pa chen po'i chos dang pha rol tu phyin pa zhes bya ba'i mi mthun pa'i phyogs su gyur pa shes bya dang nyon mongs pa'i sgrib pa bsal na byang chub kyi phyogs kyi chos rnams sems la snang bar 'gyur bas na dga' ba'i mchog skye bar 'gyur te/ de ltar gang zag rnam par gzhag pas bshad pa yin no/ /de ltar thang cig 'dul ba'i 'gro ba la ltos nas sgrub pa la sogs pa chos lnga bstan pa yin te/ rang bzhin med pa la sogs pa'i don ni bsgrub par bya'o/ /gzhan dbang gi rang bzhin gyis bsdus pa sems dang sems las byung ba'i rang bzhin ni shes par bya'o/ /gzhan dbang de nyid la mi dge ba'i chos spang ba dang / dge ba'i chos bsgom pa la sogs pa'i tshul gyis bsam par bya'o/ /sangs rgyas kyi mdzad pa sgrub pa'i phrin las la sogs pa ni bsam gyis mi khyab par bshad do/ /rnam par mi rtog pa'i ye shes ni yongs su sgrub pa thugs su chud pa'i don so so rang gis rig pa byang chub kyi phyogs kyi rang bzhin du bstan te/ 'di ni bsdus te bshad pa'o/ /chos de 'dir bshad pa yang dga' ba'i mchog bskyed do zhes bya ba la chos kyi sgras ni bsgrub par bya ba la sogs pa lnga la bya ste/ chos lnga po de rnams mdo sde'i rgyan gyi bstan bcos 'dis phyin ci ma log par bshad pas na de thos pa'i sgo nas mkhas pa rnams dga' ba'i mchog skye bar 'gyur ro/ /gong du don shes pa'i gang zag dag gis tshig dang rtsa ba dri ma med pas mdo sde la brgyan par byed kyi rna cha dang dpung rgyan la sogs pas brgyan pa ni ma yin no zhes gleng ba las brgal ba/ 'di ltar chos de rang bzhin gyis yon tan dang ldan pa la ji ltar brgyan zhes brgal ba la lan gdab pa'i phyir zhes smos te/ gong du bshad pa ltar na sa dang pha rol tu phyin pa'i mtshan nyid theg pa chen po'i chos nyan thos dang rang sangs rgyas la sogs pa dang thun mong du ma gyur pa de rang bzhin gyis thog mar yang dge/ bar du yang dge/ tha mar yang dge/ don bzang po/ tshig 'bru bzang po/ yongs su rdzogs pa/ yongs su dkar ba ste/ yon tan dang ldan pa de la ji ltar brgyan/ brgyan ci dgos te/ kha ra mngar po la bu ram mngar pos bskus na yang mngar ma bskus na yang mngar bas/ bu ram gyis bsku mi dgos so zhes rgol ba la tshigs su bcad pa gsum pa rtsom mo/ /gzugs rnams rgyan dang rang bzhin legs ldan me long nang song na/ /mthong ba'i dbang gis mi rnams rab tu dga' ba'i mchog kyang skye/ /zhes bya ba la rang bzhin gyis legs shing mdzes pa'i lus kyi rang bzhin gyi gzugs la rin po che la sogs pa'i rgyan rnam pa sna tshogs kyis brgyan la me long la bltas te/ bzhin gyi gzugs brnyan mdzes pa rgyan dang bcas pa de me long la bltas te/ bzhin gyi gzugs brnyan mdzes pa de me long gi nang du song ba mthong na mthong ba'i dbang gis mi rnams sngun pas sems dga' ba'i khyad par lhag par skye bar 'gyur ro zhes bya ba'i don te 'di ni dpe'o/ /dpe de dang mthun pa'i don ni/ de bzhin chos kyang dger gsungs rang bzhin yon tan ldan pa yang / /rab tu phye bas mkhas pa rtag tu dga' mchog skye/ /zhes smos te/ de dang 'dra ba theg pa chen po'i chos sa dang pha rol tu phyin pa'i mtshan nyid 'di yang thog mar yang dge/ bar du yang dge/ tha mar yang dge ba yin pas dger gsungs pa bzhin bya'o/ /don bzang tshig bzang yongs su dkar ba/ yongs su dag pa yin pas rang bzhin gyis yon tan dang ldan pa yin pa zhes bya'o/ /de ltar rang bzhin gyis yon tan dang ldan pa de yang mdo sde'i rgyan lta bu bstan bcos mdo sde'i tshig dang don rnam par 'grel zhing rnam par 'byed par byed pa/ me long gi dkyil 'khor dri ma med pa lta bu'i nang du song ste/ 'grel ba'i nang nas don mthong bar gyur na mkhas pa blo dang ldan pa dag dga' ba'i mchog skye bar 'gyur ro zhes bya ba'i don to/ /'dis ni ci ston zhes bya ba ni dpe dang bcas pa'i tshigs su bcad pa 'dis ci ston zhe na zhes bya ba'i tha tshig go/ /de'i 'og tu tshigs su bcad pa gsum gyis ni chos de la ri mo bskyed pa'i phyir legs pa rnam pa gsum bstan to zhes bya ba la/ gong du theg pa chen po'i chos de rang bzhin gyis yon tan dang ldan no zhes bstan pa la yon tan yod par cis shes she na/ lan du tshigs su bcad pa gsum gyis dpe gsum dang sbyar te/ theg pa chen po'i chos la legs pa dang yon tan rnam pa gsum yod par ston to/ /yon tan rnam pa gsum ni/ sgrib pa spong ba'i rgyu dang / phun sum tshogs pa'i rgyu dang / 'phags pa'i nor la spyod pa'i rgyu'o/ /ji ltar bsnams na rab dku la/ /myangs na zhim pa'i sman bzhin du/ /chos kyang de bzhin gnyis kyis gzhag/ /don dang yi ger shes par bya/ /zhes bya ba ni dpe dang po'o/ /de la sman gyi rigs la la 'di lta bu dag yod de/ gang gi tshe sna'i dbang pos bsnams na/ dku bas sna'i dbang po gdung bar byed cing / sim par mi byed la/ rgyab kyis phyogs pa'i sems skye bar byed do/ /sman gyi rigs de nyid gang gi tshe lce'i dbang po la bzhag ste/ lce'i dbang pos myangs par gyur na ro phun sum tshogs pa las lce'i dbang po sim par byed cing dga' bar byed la/ mngon du phyogs pa'i sems skye bar byed do/ /de nas rim gyis mgrin pa nas mar song la lus kyi nang du phyin te/ zhu bar gyur pa na lus la yod pa'i nad mkhris pa dang bad kan dang / rlung las gyur pa'i nad thams cad sel bar byed do/ /de dang 'dra bar theg pa chen po'i chos 'di yang rnam pa gnyis su gzhag ste/ yi ger gzhag pa dang / don du gzhag pa'o/ /de la yi ge ni sman gyi dri dku ba ltar shes par bya'o/ / don ni sman gyi ro mngar ba ltar shes par bya'o/ /yi ge'i sman gyi dri dku ba lta bur shes par bya ba ni/ rab 'byor sangs rgyas med do/ /chos med do/ /dge 'dun med do/ /ma skyes so/ /ma byung ngo / /thams cad stong pa'o zhes bya ba la sogs pa'i ming dang tshig dang / yi ge rnams thos na sman dku ba bsnams pa bzhin du skrag cing rgyab kyis phyogs pa'i sems skyed par byed do/ /de nas nam zhig dge ba'i bshes gnyen la bsnyen pa las dge ba'i bshes gnyen rnams kyis/ kye rigs kyi bu med do zhes bya ba'i ming dang tshig dang yi ge 'di dag ni sgra ji b zhin gyi don ma yin gyi med ces bya ba ni so so'i skye bo rnams kyis gzung ba dang 'dzin pa kun tu brtags pa'i kun brtags kyi rang bzhin med par zad kyi gzhan gyi dbang dang yongs su grub pa'i rang bzhin ni med pa ma yin no zhes theg pa chen po'i don rnam pa de lta bu khong du chud na sman gyi ro dang po lce'i dbang pos myong ba bzhin du don mthong ba'i dus na dga' ba'i mchog skye bar 'gyur ro/ /chos de nyid la nam zhig na mnyan pa dang bsam pa dang bsgom pa la sogs pa'i rim pas ltor song ba ltar byas nas sems la yod pa'i nyon mongs pa'i sgrib pa dang / shes bya'i sgrib pa sel bar byed de de bas na tshigs bcad des sgrib pa spong ba'i rgyur bstan to/ /rgyal po bzhin du mnyes dka' ste/ /chos 'di rgya che dka' zhing zab/ /mnyes par byas na de bzhin du/ /yon tan mchog gi nor sbyin byed/ /ces bya ba ni dpe gnyis pa'o/ /'di ltar rgyal po de dag ni mnyes pa dang dga' ba dang / mgu bar bya ba dka' ste/ dpa' bo rnams kyis kyang dpa' ba'i lan grangs mang po drag pos byas na mgu bar 'gyur ba dang / mdzangs pa'i las kyis kyang mdzangs pa'i las rlabs cher byas na mgu bar 'gyur ba dang / mkhas pa rnams kyis kyang mkhas pa rgya cher byas na mgu bar 'gyur ba dang / gzhan yang legs zhes smras na ni bstod ces zer/ nyes zhes smras na ni smad ces zer te/ rgyal po rnams ni shin tu yang mnyes par bya dka' ba las/ bstod pa legs pas mnyes bar gyur na gter dang 'bru dang phyugs la sogs pa ci bsam pa phun sum tshogs par byed do/ /de yang yab dang sras mjal ba'i mdo las/ 'phags pa 'char kas rgyal po rnams ni brten par dka' ba yin te rab tu sdug bsngal bas mnyes par 'gyur ro/ /gang gi tshe mnyes par byas na de'i tshe ji ltar bsams pa'i don rnams sbyin par byed do zhes gsungs pa lta bu'o/ /de bzhin du theg pa chen po'i chos 'di yang rgya che la dka' zhing zab pas mnyes par bya dka' ba ste/ sa dang pha rol tu phyin pa la sogs pa 'chad pas rgya che ba'o/ /stong pa dang bdag med par ston pas na dka' zhing zab pa zhes bya ste/ stong pa zhes bya ba'i tshig kyang tshig gzhan la don gzhan 'byung bas brtag dka' ba'i phyir dka' ba'o/ /don rnams kyang rtogs par dka' bas na zab pa'o/ /mnyes par dka' ba ni chos de mngon sum du bya bar rab tu dka' bas na mnyes par bya ba dka' ba'o/ /de yang cis mngon zhe na/ ji ltar 'phags pa rgya mtsho blo gros kyi mdo las rgya mtsho blo gros sangs rgyas bsgrub bo zhes bya ba'i tshig 'dir sla mod kyis tshogs bsgrub par bya ba ni shin tu sgrub par dka' ba'o zhes gsungs pa lta bu'o/ /gang gi tshe go c ha'i brtson 'grus dang sbyor ba'i brtson 'grus la sogs pa brtsams te chos de mngon sum du byas te mnyes par byas na rgyal po mnyes par byas pa bzhin du de'i tshe khyad par can gyi yon tan mngon par shes pa la sogs pa dang stobs dang mi 'jigs pa la sogs pa yon tan dpag tu med pa'i phyug po thob par 'gyur te 'dis ni chos de phun sum tshogs pa rgyur gyur par ston to/ /rin thang med pa'i rin chen rigs/ /lta mi shes pa'i mi mi mgu/ /de bzhin mi mkhas chos 'di la/ /de las bzlog pas mgu bar 'gyur/ /zhes bya ba ni dpe gsum pa'o/ /ji ltar rin po che'i rigs phun sum tshogs pa rang bzhin gyis 'od gsal ba dang ldan pa dbyibs dang tshad phun sum tshogs pa de'i rin du 'dzam bu'i gling byin na yang rin gyi thang du mi 'gyur ba'i rin po che'i rigs rin thang med pa de shing thun dang / phyugs rdzi la sogs pa sngon chad rin po che 'chang ma myong ba rin po che lta mi shes pa rnams kyi lag tu song na gces pa yin par khong du ma chud pa'i phyir sems mgu bar mi 'gyur zhing dga' bar mi 'gyur ro/ /rin po che'i rigs de nyid sngon rin po che bdag la bdog par gyur pa rin po che'i mtshan nyid lta shes pa'i lag tu song na mchog tu dga' ba skye bar 'gyur zhing gzhan yang gser la sogs pa nor mang po skye ba'i rgyur yang 'gyur ro/ /de bzhin du theg pa chen po'i chos don dang tshig phun sum tshogs pa 'di yang don dang tshig lta mi shes pa'i skye bo'i lag tu glegs bam mam bshad pa'i tshig song yang dga' ba dang mgu ba skyed par mi 'gyur la/ de las bzlog ste theg pa chen po'i don dang / tshig khong du chud pa'i gang zag lta shes pa 'phags pa rnams kyi lag tu song na de'i tshe dga' ba'i mchog skyed par byed la dad pa dang / tshul khrims dang / thos pa dang / gtong ba dang / shes rab dang / ngo tsha shes pa dang / khrel yod pa ste/ 'phags pa'i nor bdun gyi longs spyod kyi rgyur yang 'gyur bas na/ chos de 'phags pa'i nor la spyod pa'i rgyur 'gyur bar yang bstan to/ /de la nyan thos dag ni theg pa chen po 'di sangs rgyas kyis gsungs par mi 'dod do/ /sangs rgyas kyis gsungs pa ma yin pa dang / theg pa chen po'i yon tan rnam pa gsum yod pa yang mi srid par brgal du dogs pa'i phyir theg pa chen po sangs rgyas kyi bka' yin par sgrub pa'i don du kha cig theg pa chen po 'di sangs rgyas kyi tshig kyang ma yin no/ /de la legs pa lta ga la yod ces log par 'dzin te de dag la sangs rgyas kyi tshig tu bsgrub pa'i phyir gtan tshigs rnam par dbye ba las brtsams te tshigs su bcad pa zhes smos te/ nyan thos kyi brgal ba nyan thos kyi sde snod gsum ni sangs rgyas kyi bka' yin par bsgrub ste/ gang gi phyir sangs rgyas kyi bka' yin pa rnams ni gong du bshad pa'i yon tan rnam pa gsum dag srid do/ /sangs rgyas kyi bka'i mtshan nyid nyan thos kyi theg pa dang theg pa chen por mtshan nyid mi mthun pas na/ theg pa chen po sangs rgyas kyi bka'i tshig ma yin te/ ji ltar nyan thos kyi mdo las phung po dang khams dang skye mched yod ces bshad na theg pa chen po las chos thams cad stong pa nyid du bshad pa dang / nyan thos kyi theg pa las skye zhing 'jig pa'i chos can zhes bshad na/ theg pa chen po las mi skye mi 'gag ces bshad pa dang / nyan thos kyi theg pa las mthong ba dang bsgom pas spang bar bya ba'i nyon mongs pa spangs na mya ngan las 'das par 'gyur ro zhes gsungs na theg pa chen po las rang bzhin gyis mya ngan las 'das pa'o zhes bshad pas na/ sangs rgyas kyi bka' dang mtshan nyid mi mthun pa'i phyir theg pa chen po sangs rgyas kyi bka' yang ma yin na de la yon tan rnam pa gsum lta ga la zhig yod de med do zhes log par 'dzin te/ de ltar log par 'dzin pa de dag la theg pa chen po sangs rgyas kyi bka' yin par bsgrub pa'i phyir sangs rgyas kyi bka' yin pa'i gtan tshigs rnam pa brgyad du dbye ba tshigs su bcad pa gcig gis ston to/ /gtan tshigs brgyad ni/ sngar lung ma bstan pa dang / lhan cig byung ba dang / spyod yul du ma yin pa dang / grub pa dang / yod pa dang / med pa dang / gnyen po dang / sgra gzhan phyir ro/ /gal te nyan thos dag na re theg pa chen po zhes bya ba'i chos 'di sangs rgyas mya ngan las 'das pa'i 'og tu dam pa'i chos nub cing med par bya ba'i phyir/ shes rab kyi pha rol tu phyin pa la sogs pa med do zhes bya ba'i chos phal cher byas te bzhag nas de sangs rgyas kyi bka' yin no zhes btags te bzhag pas na theg pa chen po sangs rgyas kyi tshig ma yin no zhes pa la lan du sngar lung ma bstan zhes bya ba smos te/ gal te sangs rgyas kyi chos nub par bya ba'i phyir gsung rab 'khrug par 'gyur ba/ shes rab kyi pha rol tu phyin pa la sogs pa la zhig gis byas na sangs rgyas kyi bka' yin no zhes btags na/ gsung rab 'khrug par 'gyur ba'i rgyu/ rgyal po kr-i kI'i rmi lam du rmi lam rnam pa bdun rmis pa lung bstan pa bzhin du mya ngan las 'das pa'i sngon rol du dam pa'i chos 'jig cing nub par 'gyur la/ shes rab kyi pha rol tu phyin pa la sogs pa'i chos stong par smra ba 'di lta bu dag kyang 'byung ste/ de sangs rgyas kyi bka' yin no zhes smra mod kyi de sangs rgyas kyi bka' ni ma yin gyi/ gsung rab 'jig par byed pa yin no zhes sngar bstan pa'i rigs na de lta bu lung ma bstan pas na theg pa chen po ni sangs rgyas kyi bka' yin no/ /gal te nyan thos dag gang gi tshe mnyan du yod pa la sogs par nyan thos kyi theg pa bcom ldan 'das kyis bshad pa de'i tshe theg pa chen po ma bshad kyi/ sangs rgyas mya ngan las 'das pa'i 'og tu theg pa chen po zhes bya ba'i chos 'byung bas na theg pa chen po sangs rgyas kyi chos ma yin no zhes smra ba la lan du lhan cig 'byung ba'i phyir zhes bya ba smos te/ gang gi tshe bcom ldan 'das kyis mnyan du yod pa la sogs pa'i gnas su theg pa chung ngu nyan thos kyi theg par bshad pa de'i tshe theg pa chen po yang gnas de dag tu bshad pas na theg pa chen po sangs rgyas kyi bka' yin par sgrub bo/ /yang nyan thos dag 'di snyam du rtog ge pa'am/ mu stegs pa la la zhig gis bdag mkhas par bsgrags shing 'jig rten pa rnams slu bar bya ba'i phyir shes rab kyi pha rol tu phyin pa la sogs pa'i gzhung mang po dag byas la/ mu stegs pa la sogs pa'i gtsug lag gi nang nas kyang sbyin pa dang tshul khrims dang dka' bar spyod pa dag 'byung bas na 'di rtog ge pa'am mu stegs pa 'ga' zhig gis byas par bdag cag dogs so zhes smra ba la/ de ni mi rigs par bstan pa'i phyir spyod yul ma yin zhes smos te/ sa dang pha rol tu phyin pa la sogs pa'i mtshan nyid zab cing rgya che ba bstan pa de dag kyang khong du mi chud na de dag gis rtogs pa lta ga la zhig srid de de ni mi srid pa dang mu stegs la sogs pa'i gtsug lag gi nang nas kyang sa dang pha rol tu phyin pa dang / ma byung ma skyes pa'i chos cung zad kyang mi 'byung ba dang / de dag la dngos po med pa la sogs pa'i rang bzhin bstan kyang dad par mi 'gyur te spyod yul du ma gyur pas mu stegs pa'am rtog ge pa dag gis byas zhes kyang byar mi rung ngo / /yang nyan thos dag 'di snyam du theg pa chen po 'di sangs rgyas kyis bshad pa ni ma yin no/ /gang zag la la zhig gis sa dang pha rol tu phyin pa dang skye ba dang 'gag pa med pa'i don mngon sum du byas te sangs rgyas nas bshad do zhes sems pa la/ de'i phyir len du grub pa dang zhes smos te/ de ltar na theg pa chen po 'di sangs rgyas kyi tshig yin par grub ste/ ji lta zhe na/ gang zag gis sa dang pha rol tu phyin pa dang skye ba dang 'gag pa med pa'i don khong du chud pa'i gang zag de nyid sangs rgyas zhes bya ste/ des bshad pa'i tshig thams cad kyang sangs rgyas kyi tshig yin pas theg pa chen po 'di sangs rgyas kyi tshig tu grub bo/ /yod dang med dang med pa dang / /zhes bya ba la tshig sbyar ba ni yod na yod la med na med do zhes sbyar ro/ /nyan thos la brtags na bcom ldan 'das kyis nyan thos kyi theg pa dang / rang sangs rgyas kyi theg pa dang / theg pa chen po gsum bshad dam ma bshad ce na/ lan du theg pa chen po bshad de yod do zhe na/ theg pa chen po zhig yod par gyur na ni de ltar na shes rab kyi pha rol tu phyin pa la sogs pa 'di nyid theg pa chen po yin pas sangs rgyas kyi tshig tu grub ste/ theg pa chen po ni 'di la ma gtogs par nyan thos dang rang sangs rgyas dang mu stegs pa la sogs pa'i chos rnams la theg pa chen po zhes bya bar mi rigs te/ ji ltar mi rigs pa ni 'og nas zhib tu 'chad do/ /gal te nyan thos pa dag na re/ theg pa gsum du med kyi theg pa ni gcig tu zad de nyan thos kyi theg pa nyid la shes rab rnon po rnams kyis bsgoms na ni sangs rgyas par 'gyur ro/ /shes rab 'bring rnams kyis bsgoms na ni rang sangs rgyas su 'gyur ro/ /shes rab chung ngu rnams kyis bsgoms na ni nyan thos su 'gyur ro/ /theg pa gcig tu zad de gsum du med do zhes smras pa'i lan du med pa dang med ces smras te/ gal te theg pa chen po med na nyan thos kyi theg pa yang med par 'gyur ro/ /ci'i phyir zhe na/ sangs rgyas su grub pa'i lam theg pa chen po med na sangs rgyas 'grub pa med do/ /sangs rgyas su ma grub na theg pa chung ngu yang ma bshad pas de ltar snang ba'i theg pa chung ngu 'di yang sangs rgyas kyi tshig ma yin par 'gyur ro/ /gal te nyan thos dag 'di snyam du gang gi tshig bsgoms na nyon mongs pa'i gnyen por 'gyur ba de sangs rgyas kyi bka' ste/ dper na nyan thos kyi theg pa bzhin no/ /theg pa chen po bsgoms na'ang nyon mongs pa'i gnyen por mi 'gyur bas sangs rgyas kyi tshig ma yin no zhes pa la/ lan du gnyen po dang zhes smos te/ theg pa chen po bsgoms na rnam par mi rtog pa'i ye shes skye ba'i rten du 'gyur ro/ /rnam par mi rtog pa'i ye shes skyes na nyon mongs pa spong ba'i gnyen por 'gyur bas sangs rgyas kyi bka' yin par mngon no/ /gal te nyan thos dag 'di snyam du sangs rgyas kyi bka' las ni phung po la sogs pa'i chos yod par bshad la/ shes rab kyi pha rol tu phyin pa la sogs pa'i nang nas thams cad med par bshad pas sangs rgyas kyi tshig ma yin no zhes sems pa la/ sgra gzhan phyir zhes smras te/ bcom ldan 'das kyis shes rab kyi pha rol tu phyin pa la sogs par med do zhes bshad pa de yang sgra ji bzhin gyi don ma yin te/ ji ltar byis pa rnams kyis gzung ba dang 'dzin par kun tu brtags pa'i rang bzhin med pa la dgongs nas med do zhes gsungs pa ste/ gzhan gyi dbang dang yongs su grub pa'i ngo bo ni med pa ma yin pa ste/ de bas na sgra ji bzhin du bzung ba'i sgo nas sangs rgyas kyi tshig ma yin no zhes bya bar mi rigs so/ /'di lta bu'i spyod pa zab mo ni rtog ge can gyi spyod yul yang ma yin la zhes bya ba ni sa dang pha rol tu phyin pa la sogs pa'i byang chub sems dpa'i spyod pa zab mo 'di lta bu dag ni rtog ge can dang mu stegs can rnams la bshad na yang khong du mi chud na de dag gis rtogs pa'i spyod yul du lta ga la 'gyur te mi 'gyur ro zhes bya ba'i don to/ /mu stegs can gyi gtsug lag las kyang 'di lta bu mi 'byung la zhes bya ba ni/ mu stegs can gyi gtsug lag gi nang na yang sa dang pha rol tu phyin pa dang ma skyes pa dang ma byung ba'i chos cung zad kyang mi 'byung bas na mu stegs pa dag gis byas zhes kyang byar mi rung ngo / /brjod du zin kyang mos pa med pa'i phyir zhes bya ba ni ma skyes pa dang bdag med pa la sogs pa'i don de dag la bshad na yang dad pa med de rgyab kyis phyogs pa'i phyir de dag gis byas zhes bya bar yang mi rigs so/ /chos pha rol tu phyin pa bstan pa 'di dag la ni 'phags pa btsun pa rnams dad par byed do/ /gzhan dag gis 'phags pa blo gros mi zad pa dang / rgya mtsho blo gros dang / dkon mchog sprin dang / dpung bzangs la sogs pa'i mdo sde las pha rol tu phyin pa la sogs pa'i bstan pa thos nas/ sems shes pa rnams chos de dag mu stegs pas byas so zhes sems par byed/ gang sngar lung ma bstan pa'i phyir zhes smras pa de la ma dgongs pas na/ bcom ldan 'das kyis lung ma bstan to zhes zer ba la btang snyoms su bzhag tu mi rung bar tshigs su bcad pa zhes bya ba la/ theg pa chen po'i chos gsung rab sangs rgyas kyi gsung ma yin par sngar lung ma bstan pas na sangs rgyas kyi tshig go zhes gang smras pa de ni theg pa chen po sangs rgyas kyi tshig ma yin yang / rnam pa gsum gyi phyir lung ma bstan te/ gang zhe na/ de bzhin gshegs pa rnams dam pa'i chos 'chad pa dang / sems can gyi don la thugs brel bar gyur pas na bstan pa nub par 'gyur ba'i 'jigs pa 'byung ba ma gzigs pas lung ma bstan pa dang / bstan pa bsrung ba la ched che bar mi mdzad pas lung ma bstan pa dang / ye shes 'das pa dang da ltar gyi dngos po la 'jug kyang ma 'ongs pa'i dngos po la mi 'jug pas lung ma bstan to zhes zer ba la/ ma 'ongs pa na bstan pa nub par 'gyur ba'i 'jigs pa 'byung ba rnams la/ lung ma bstan par btang snyoms su gzhag tu mi rung ba las brtsams te tshigs su bcad pa smras pa/ sangs rgyas rnams ni mngon sum spyan/ /zhes bya ba la de bzhin gshegs pa rnams ni dgongs shing 'bad mi dgos pas chos thams cad skyu ru ra lag mthil du bzhag pa bzhin du gsal bar mkhyen pas ma 'ongs pa na bstan pa la 'jigs pa 'byung ba rnams la btang snyoms su gzhag pa mi rung ste/ ci'i phyir zhe na/ sha'i spyan dang / rdzu 'phrul gyi spyan dang / shes rab kyi spyan mnga' bas chos thams cad mngon sum du gzigs pa'i phyir ro/ /bstan pa dag kyang srung mdzad cing / /zhes bya ba la/ de bzhin gshegs pas bskal pa grangs med gsum du dka' ba rnam pa sna tshogs spyad de/ mngon par sangs rgyas pa yang dam pa'i chos bstan par bya ba'i phyir/ sangs rgyas la sangs rgyas nas kyang phrin las su dam pa'i chos bstan par zad kyi dam pa'i chos bstan pa rnams kyang 'jig rten du ring du gnas par zad pas bstan pa rnams bsrung ba la ched cher 'dzin pas na btang snyoms su gzhag par mi rigs so zhes bya ba'i don to/ /dus la'ang ye shes bsgribs med pas/ /zhes bya ba la/ de bzhin gshegs pa'i ye shes ni 'das pa dang da ltar gyi dus 'ba' zhig mkhyen pa ma yin te/ chags pa dang thogs pa med par dus gsum gyi dngos po ci dang cir 'gyur ba thams cad thugs su chud pas na ma 'ongs pa na bstan pa la 'jigs pa 'byung ba rnams la lung mi bstan par btang snyoms su gzhag par mi rigs so zhes bya ba'i don to/ /gang yod dang med dang med pa zhes smras pa/ yang na nyan thos kyi theg pa 'di nyid theg pa chen po yin te/ 'di nyid kyis byang chub chen po 'thob po zhes la la dag de skad zer bas/ de'i phyir nyan thos kyi theg pa theg pa chen por mi rung bar tshigs su bcad pa zhes bya ba la/ gong du theg pa chen po yod na ni nyan thos kyi theg pa yang yod la theg pa chen po med na ni nyan thos kyi theg pa yang med de/ ci'i phyir zhe na/ theg pa chen po med na bla na med pa'i byang chub tu 'tshang rgya ba med/ bla na med pa'i byang chub tu sangs ma rgyas na nyan thos kyi theg pa sus kyang mi 'chad pas na med par 'gyur ro zhes bshad pa la/ nyan thos dag 'di skad du nyan thos kyi theg pa gang zag la bdag med pa dang / bdag gi don phun sum tshogs par bsgrub pa de nyid theg pa chen po yin te/ rgyu 'di nyid bsgrub pa las bla na med pa'i byang chub 'thob bo/ /ji ltar zhe na/ nyan thos kyi theg pa 'di la dbang po rnon pos bsgoms na ni sangs rgyas su 'gyur/ dbang po 'bring gis bsgoms na ni rang sangs rgyas su 'gyur/ dbang po tha mas bsgoms na ni nyan thos su 'gyur ro zhes de skad du rgol ba de dag la nyan thos kyi theg pa de bdag dang gzhan gyi don phun sum tshogs par byed pa'i theg pa chen po ma yin par rigs par bstan pa'i phyir tshigs su bcad pa rtsom mo/ /ma tshang ba dang zhes bya ba la theg pa chen po'i mtshan nyid bdag dang gzhan gyi don phun sum tshogs par sgrub pa yin na nyan thos kyi theg pa las pha rol gyi don du bstan pa mi 'byung ste/ bdag nyid skyo zhing 'dod chags dang bral ba dang / rnam par grol bar 'gyur ba rnams kyi thabs bstan pas na gzhan gyi don du bya ba ma tshang bas nyan thos kyi theg pa 'di theg pa chen po'i chos ma yin no zhes bya ba'i don to/ /gal te nyan thos dag 'di skad du/ bdag skyo zhing 'dod chags dang bral zhing rnam par grol bar 'gyur ba'i bdag gi don de nyid gzhan la bshad na gzhan dag kyang rnam par grol bar gzhan gyi don du 'gyur te/ de ltar na nyan thos kyi theg pa nyid theg pa chen po yin no zhes zer ba la lan du 'gal ba'i phyir zhes smos te/ nyan thos 'ga' zhig gis bdag gi don du 'gyur ba'i chos de gzhan dag la bstan te/ 'di ltar byas na bdag nyid rnam par grol bar 'gyur ro zhes bstan na/ gang nyan pa'i gang zag de dag kyang bdag nyid mya ngan las 'das pa'i phyir sbyor gyi/ sems can gyi don du 'gyur ba bla na med pa'i byang chub tu 'tshang rgya bar mi 'gyur bas gzhan gyi don du 'gyur bar 'gal lo/ /gal te nyan thos dag 'di snyam du nyan thos kyi theg pa 'di nyid la bskal pa grangs med pa gsum du bsgoms na ni sangs rgyas su 'gyur/ bskal pa brgyar bsgoms na ni rang sangs rgyas su 'gyur/ tshe gsum du bsgoms na ni nyan thos su 'gyur/ theg pa 'di nyid la dus ring por bsgoms na 'tshang rgya ba'i thabs su 'gyur ro snyam du sems pa la sangs rgyas kyis thabs ma yin par bstan pa'i phyir thabs min zhes bya ba smos te/ bla na med pa'i byang chub thob par byed pa'i thabs ni shes rab chen po dang snying rje chen po'o/ / shes rab chen po ni gang zag dang chos la bdag med par khong du chud pa'i ye shes so/ /snying rje chen po ni 'jig rten gyi khams kyi sems can thams cad sdug bsngal las sgrol bar sems pa'i bsam pa'o/ /nyan thos kyi theg pa las 'di gnyis mi 'byung bas na nyan thos kyi theg pa ni bla na med pa'i byang chub kyi thabs ma yin te/ thabs ma yin pa yun ring por bsgrubs na yang 'tshang rgya bar mi 'gyur te/ dper na rwa la yun ring por bzhos na yang zho mi 'byung ba dang / bye ma la yun ring por brdzis na yang mar mi 'byung ba bzhin te/ de bas na nyan thos kyi theg pa ni theg pa chen po'i chos ma yin no zhes bya ba'i don to/ /gal te nyan thos dag 'di snyam du 'di ltar byang chub sems dpa'i spyod pa dngos su nyan thos kyi theg pa'i nang nas gsal bar ma bshad kyang yi ge dang tshig gzhan gyis rnam pa gzhan du bshad de/ de bas na nyan thos kyi theg pa'i nang nas theg pa chen po yang yin pa'i phyir/ nyan thos kyi theg pa nyid theg pa chen po yin snyam pa la/ da ltar ma bstan pas zhes bya ba smos te/ ji ltar theg pa chen po'i nang nas sa bcu dang pha rol tu phyin pa la sogs pa bshad pa'i chos de dag nyan thos kyi theg pa las cung zad kyang mi 'byung bas na nyan thos kyi theg pa 'di theg pa chen po'i chos ma yin no zhes bya ba'i don to/ /skyo zhing zhes bya ba ni sdug bsngal gyi bden pa la mi rtag pa dang sdug bsngal ba dang stong pa dang / bdag med par mthong bas yid byung bar 'gyur ba'o/ /'dod chags dang bral ba dang zhes bya ba ni kun 'byung gi bden pa la kun 'byung dang / rgyu dang / rkyen dang / rab tu byung bar mthong nas nyon mongs pa thams cad spangs par 'gyur ba'o/ /rnam par grol ba zhes bya ba ni lam gyi bden pa bsgoms nas 'gog pa mngon sum du bya ba ni rnam par grol ba'o/ /pha rol bdag gi don la sbyor ba ni bdag gi don nyid la sbyor ba ste zhes bya ba la/ nyan thos 'ga' zhig gis bdag gi don du 'gyur ba'i chos skyo ba dang 'dod chags dang bral ba dang rnam par grol ba ste/ gzhan la bstan te/ 'di ltar bsgrubs na bdag gi don phun sum tshogs pa ni bdag gi don nyid la sbyor bar 'gyur ro zhes bshad na/ gang la bshad pa'i gang zag de yang bdag nyid mya ngan las 'das par 'gyur ba 'ba' zhig tu bsgrub kyi/ sems can gyi don du 'gyur ba'i bla na med pa'i byang chub tu 'tshang rgya ba mi 'thob pas na nyan thos kyi theg pa theg pa chen po yin par 'gal lo zhes bya ba'i don to/ /ji ltar sbyor bar bya ba 'dir rnam pa gzhan du bstan to zhes bya ba ni/ nyan thos dag 'di ltar theg pa chen po'i chos byang chub sems dpas spyad par bya ba 'di dag la nyan thos kyi theg pa'i nang nas dngos su ma smos kyang ming dang tshig la sogs pa gzhan du btags nas gsung rab gzhan gyis bstan pas na nyan thos kyi theg pa'i nang nas theg pa chen po yod do zhes zer ro/ /'di la de lta bu'i bstan pa mi dmigs so zhes bya ba ni/ theg pa chung ngu 'di'i nang nas theg pa chen po'i chos sa dang pha rol tu phyin pa bstan pa cung zad kyang mi 'byung mi snang bas na nyan thos kyi theg pa ni theg pa chen po'i chos ma yin no zhes bya ba'i don to/ /nyan thos kyi theg pa dang / theg pa chen po phan tshun du 'gal bas na mi mthun par tshigs su bcad pa zhes bya ba la/ gong du ma tshang ba dang 'gal ba'i phyir zhes smras pa de la ji ltar 'gal ba'i don te/ nyan thos kyi theg pa'i rgyu dang 'bras bu yang gzhan theg pa chen po'i rgyu dang 'bras bu yang gzhan te nang mi mthun pa las brtsams nas tshigs su bcad pas ston to/ /bsam pa dang ni bstan pa dang / /sbyor ba dang ni ston pa dang / /dus kyang rab tu 'gal ba'i phyir/ /gang chung de yang chung ba nyid/ /ces bya ba la/ 'gal ba rnam pa lngas theg pa chen po dang theg pa chung ngu gnyis nang du phan tshun 'gal te/ lnga po gang zhe na/ bsam pa 'gal ba dang / bstan pa 'gal ba dang / sbyor ba 'gal ba dang / ston pa 'gal ba dang / dus 'gal ba ste rnam pa lngas 'gal bas nyan thos kyi theg pa ni chung ngu yin te/ de bas na theg pa chung ngu zhes bya'i theg pa chen po zhes mi bya'o/ /de la theg pa chen po las ni bdag dang gzhan mya ngan las bzla bar sems na nyan thos kyi theg pa las ni bdag yongs su mya ngan las 'da' bar bya ba'i phyir sems pas na bsam pa 'gal lo/ /theg pa chen po'i gzhung las ni bdag dang gzhan gyi don bya ba'i chos bstan na nyan thos kyi theg pa las bdag gi don bya ba'i chos bstan pas na bstan pa 'gal lo/ /theg pa chen po la zhugs pa'i byang chub sems dpa' rnams ni bdag gi don dang / gzhan gyi don gnyi ga la sbyor na nyan thos kyi theg pa la zhugs pa'i gang zag dag ni bdag gi don 'ba' zhig la sbyor ba la zhugs pas na sbyor ba 'gal lo/ /byang chub sems dpa' rnams kyi ye shes kyi tshogs ni nam mkha' khams ltar kun tu khyab pa la bsod nams kyi tshogs ni phyogs bzhi'i rgya mtsho'i chu bzhin du bsams na/ nyan thos dag ni gang zag la bdag med pa tsam du khong du chud pas ye shes kyi tshogs yungs 'bru tsam srin bu'i zos pa'i nang gi nam mkha'i khyon tsam dang / kha zas spar pa gang tsam gtong bas bsod nams kyi tshogs pa glang gi rjes kyi rmig chu tsam zhig bsams pa'i phyir ston pa 'gal lo/ /theg pa chen po la zhugs pa rnams ni bskal pa grangs med pa gsum gyis bla na med pa'i byang chub tu 'tshang rgya na nyan thos dag ni tshe gsum tsam gyis dgra bcom pa'i 'bras bu thob pas na dus 'gal lo/ /de ltar theg pa chen po de sangs rgyas kyi bka' yin par bsgrub pa dang / nyan thos kyis slar bskyar ba'i phyir/ sangs rgyas kyi tshig gi mtshan nyid ni 'di yin te/ gang mdo sde las 'byung /'dul ba la yang snang / chos nyid dang yang 'gal bar mi byed pa yin na chos thams cad ngo bo nyid med par bstan pa theg pa chen po ni de lta ma yin te/ de bas na sangs rgyas kyi tshig ma yin no zhes la la dag de skad zer bas zhes bya ba smos te/ nyan thos dag na re/ sangs rgyas kyi tshig gi mtshan nyid ni dus bstan pa dang / chen po bstan pa'i mdo sde las/ gang mdo sde las kyang 'byung la/ 'dul ba las kyang snang zhing / chos nyid dang yang mi 'gal ba de sangs rgyas kyi bka' yin gyi de las gzhan dag ni bka' ma yin no zhes gsungs so/ /de la phung po dang khams dang skye mched la sogs pa yod do zhes bshad pa ni mdo sde'i mtshan nyid ni theg pa chen po las chos thams cad rang bzhin med do zhes bshad pas na mdo sde las kyang mi 'byung ste mdo sde dang mi mthun no/ /gzhung gang las ltung ba sde bdun 'chad pa'i gzhung de ni 'dul ba yin te/ 'dul ba las kyang sangs rgyas dang / chos dang / dge 'dun med do zhes smras na ltung bar 'gyur ro zhes bshad la/ theg pa chen po la sangs rgyas med/ chos med/ dge 'dun med do zhes 'byung bas 'dul ba la mi snang ste/ 'dul ba dang yang mi mthun te/ ma rig pa'i rkyen gyis 'du byed la sogs pa lugs bzhin du 'byung ba dang / ma rig pa 'gags pas 'du byed 'gag pa la sogs pa lugs las bzlog pa ste/ rten cing 'brel te 'byung ba rnams ni chos nyid yin par bshad na theg pa chen po las chos thams cad ma skyes ma byung zhes bshad pas chos nyid dang yang 'gal te/ de bas na theg pa chen po sangs rgyas kyi tshig ma yin no zhes rgol lo/ /de'i phyir mtshan nyid dang mi 'gal bar tshigs su bcad pa zhes bya ba la de ltar rgol ba rnams la theg pa chen po 'di sangs rgyas kyi bka'i mtshan nyid dang mi 'gal bar bstan pa'i phyir tshigs su bcad pa rtsom mo zhes bya ba'i don to/ /de skad du rgol ba'i nyan thos dag la 'di skad gang khyed kyis mdo sde las mi 'byung ba dang / 'dul ba la mi snang ba dang / chos nyid dang 'gal ba de sangs rgyas kyi bka' ma yin no zhes smras na/ ci nyan thos sde bco brgyad las thams cad yod par smra ba'i mdo sde dang 'dul ba'i chos nyid dang 'gal ba'i phyir sangs rgyas kyi tshig ma yin nam zhes smra'am/ 'on te 'phags pa sam byi ti'i mdo sde dang 'dul ba dang chos nyid dang 'gal ba'i phyir sangs rgyas kyi tshig ma yin no zhes bya ste/ ci phan tshun 'gal ba'i phyir sangs rgyas kyi tshig ma yin no zhes bya'am/ gal te theg pa chen po nyan thos kyi theg pa'i mdo sde dang 'dul ba dang chos nyid dang 'gal ba'i phyir sangs rgyas kyi tshig ma yin no zhes bya na ni/ de ltar nyan thos kyi gzhung sde bco brgyad rnams kyang phan tshun nang thams cad 'gal bas na thams cad sangs rgyas kyi tshig ma yin par 'gyur ro/ /ji ltar 'gal zhe na/ thams cad yod par smra ba'i gzhung las stong pa nyid dang yang dag par smra ba'i mdo sde bshad pa 'phags pa sam byi ti rnams sangs rgyas kyi bka' yin par khas mi len la/ thams cad yod par smra ba'i gzhung las srid pa bar ma do bshad la dge 'dun chen po pa rnams kyis sangs rgyas kyi bka' ma yin no zhes spong bar byed do/ /de ltar sde pa bco brgyad rnams kyi mdo sde yang nang phan tshun mi mthun pa dang / 'dul ba yang nang mi mthun pa dang / chos nyid kyang nang mi mthun pas thams cad sangs rgyas kyi bka' ma yin par 'gyur ro/ /'on te thams cad yod par smra ba'i gzhung las yang rang nyid kyi mdo sde rnams kyang phan tshun mthun pa dang / 'dul ba rnams kyang nang mthun pa dang / chos nyid kyang nang mi 'gal ba de sangs rgyas kyi bka' yin no zhe na ni de lta na/ bdag gi nyid las 'byung ba dang / /rang gi 'dul bas mthong ba'i phyir/ /zab cing rgya yang che bas na/ /chos nyid dang yang 'gal ba med/ /ces bya ba smos te/ theg pa chen po yang / lang kar gshegs pa dang pha rol tu phyin pa la sogs pa mdo sde nang mthun pas na bdag nyid kyi mdo sde las 'byung ba dang / nyon mongs pa 'dul bar byed pa la 'dul ba zhes bya la/ byang chub sems dpa' nyon mongs pa ni yod pa dang med pa la sogs par rtog pa'i rnam par rtog pa yin te/ rnam par rtog pa de spong ba'i gnyen po rnam par mi rtog pa'i ye shes kyang theg pa chen po'i gzhung la yod pas rang gi 'dul ba la yang snang ba dang / byang chub sems dpa'i chos nyid ni zab cing rgya che ba yin te/ zab cing rgya che ba yang theg pa chen po las 'byung bas na/ chos nyid dang yang mi 'gal ba'i phyir ro/ /theg pa chen po yang sangs rgyas kyi bka' yin no/ /de la gang zag dang chos la bdag med par ston pas na zab pa'o/ /sa dang pha rol tu phyin pa la sogs pa 'chad pas na rgya che ba'o/ /'on te nyan thos kyi sde pa thams cad kyi don gzhung gang du 'dus pa de sangs rgyas kyi bka' yin no zhe na ni/ de lta na nyan thos sde pa tha dad pa so so'i nang du ni gzhung thams cad ma 'dus kyi theg pa chen po 'ba' zhig gi nang du thams cad 'dus pas theg pa chen po nyid sangs rgyas kyi bka' yin par 'gyur ro/ /spyod yul ma yin pa'i phyir zhes smras pa la/ de'i phyir rtog ge pa'i spyod yul ma yin par tshigs su bcad pa zhes bya ba la gong du theg pa chen po bsgrub pa'i skabs su spyod yul ma yin par bsgrub pa'i phyir zhes smos pa la/ da theg pa chen po mu stegs dang rtog ge pa rnams kyi spyod yul ma yin par bstan pa'i phyir tshigs su bcad pa rtsom mo zhes bya ba'i don to/ /rten cing zhes bya ba la theg pa chen po gang gis gang zag dang / chos la bdag med pa dang / sa dang pha rol tu phyin pa khong du chud nas mngon sum du byas te bshad pa de theg pa chen po yin na rtog ge pa rnams ni bden pa ma mthong ba la gnas shing sngon gyi rtog ge'i gtsug lag 'ga' zhig la brten te/ gdod rtog ge'i gtsug lag byed pas na de'i phyir theg pa chen po la rtog ge'i spyod yul ma yin no zhes bya ba'i don to/ /ma nges zhes bya ba la theg pa chen po'i gzhung shes rab kyi pha rol tu phyin pa la sogs pa ni/ dang po bcom ldan 'das kyis ji ltar bshad pa bzhin du gzhung ma nyams par rtag tu de bzhin du gnas pa yin na rtog ge rnams kyi gtsug lag ni dus kyi khyad par gyis gzhung gzhan nas gzhan du 'gyur bas ma nges pa ste/ ji lta zhe na/ sngon dag ni tshad ma bdun du bzhag go/ /bar du yang tshad ma lngar bzhag go/ /de'i 'og tu yang tshad ma bzhir bzhag go/ /de nas tshad ma gsum du yang bzhag go/ /de nas tshad ma gnyis su yang bzhag go/ /de ltar ma nges pas na theg pa chen po rtog ge'i spyod yul ma yin no zhes bya ba'i don to/ /ma khyab pa zhes bya ba la theg pa chen po'i gzhung las ni phung po dang khams la sogs pa'i chos thams cad 'byung ste/ shes bya thams cad la khyab pa yin na rtog ge pa rnams kyi gzhung las ni mngon sum dang rjes su dpag par bya ba'i tshad ma'i yul nyi tshe zhig spyod de/ shes bya kun la khyab pas na theg pa chen po rtog ge'i spyod yul ma yin no zhes bya ba'i don to/ /kun rdzob dang zhes bya ba la theg pa chen po las ni kun rdzob dang don dam pa'i chos gnyis ston la rtog ge'i gtsug lag las ni kun rdzob kyi chos nyi tshe tsam zhig spyod kyi/ don dam pa'i chos mi dpyad pas theg pa chen po rtog ge'i spyod yul ma yin no zhes bya ba'i tha tshig go/ /skyo ba can zhes bya ba la theg pa chen po la ni shes rab kyi pha rol tu phyin pa 'bum la sogs pa 'bum phrag grangs med pa bshad pas tshig dang spobs pa zad par mi 'gyur la/ rtog ge rnams kyi gtsug lag ni nyung shas zhig yod pas de ston pa'i tshe/ shes rab dang spobs pa drag po gzhan dag gis tshar bcad na/ gtsug lag las ji tsam 'byung ba zhig smras nas/ de'i tshe tshig zad pa dang / de nas spobs pa zad pa dang / skyo bar 'gyur te/ de bas na theg pa chen po rtog ge'i spyod yul ma yin no zhes bya ba'i don to/ /rtog ge pa ni byis pa'i gnas/ /zhes bya ba ni/ theg pa chen po ni 'phags pa rnams kyis khong du chud par bya ba'i gnas yin la/ rtog ge'i chos rnams ni byis pa rnams kyis shes par bya ba yin pas theg pa chen po ni rtog ge pa rnams kyi spyod yul ma yin no zhes bya ba'i don to/ /thabs ma yin pa'i phyir zhes bya ba ni zhes pa la/ gong du/ thabs min de ltar ma bstan pa/ /zhes smos pa la/ nyan thos rgol te/ nyan thos kyi theg pa ni bla na med pa'i byang chub thob pa'i thabs ma yin pas/ theg pa de la yun ring du spyad kyang 'tshang rgya bar mi 'gyur ro zhes bshad na de ltar theg pa chen po 'di ji ltar na bla na med pa'i byang chub kyi thabs su 'gyur ro zhes brgal lo/ /lan du/ rgya che'i phyir dang zab pa'i phyir/ /yongs su smin dang rnam mi rtog /'di la de gnyis bstan pa'i phyir/ /de ni bla na med pa'i thabs/ /zhes bya ba smos te/ bla na med pa'i byang chub thob par bya ba'i thabs ni rnam pa gnyis te/ rgya che ba'i don dang / zab pa'i chos so/ /de la sa dang pha rol tu phyin pa dang / mngon par shes pa dang / stobs dang mi 'jigs pa la sogs pa ni rgya che ba'i chos so/ /gang zag dang chos la bdag med pa ni zab pa'i chos so/ / yang na bsod nams kyi tshogs ni rgya che ba'i chos so/ /ye shes kyi tshogs ni zab pa'i chos so/ /de la rgya che ba'i chos bstan pas ni sems can yongs su smin par 'gyur te/ de bzhin gshegs pa'i yon tan mthu chen po dag thos nas/ dad pa'i sgo nas sems can dge ba la 'jug par 'gyur ba'i phyir ro/ /zab pa'i chos bsgoms pas ni bdag nyid rnam par mi rtog pa'i ye shes 'thob par 'gyur te/ de ltar bdag gi don dang gzhan gyi don du 'gyur ba'i chos zab pa dang rgya che ba gnyis theg pa chen po 'di las bstan pa'i phyir/ theg pa chen po 'di bla na med pa'i byang chub 'thob par byed pa'i thabs yin no/ /gang 'di la skrag par 'gyur ba de'i phyir gnas ma yin pa la skrag par 'gyur ba'i nyes pa dang / rgyu la tshigs su bcad pa zhes bya ba dang / rigs med pa dang / nyan thos kyi rigs can dang / rang sangs rgyas kyi rigs can dag gi gang zag gang dag stong pa nyid 'chad pa'i theg pa chen po'i chos 'di la skrag ste 'di bdud kyis bshad pa yin no zhes bshad pa de dag la/ theg pa chen po 'di dga' bar bya ba'i gnas yin gyi skrag par bya ba'i gnas ma yin pa la skrag pas na gnas ma yin pa la skrag pa zhes bya ste/ gnas ma yin pa la skrag ste/ skur pa btab na ngan song du lhung ba la sogs pa'i nyes pa 'byung ba dang / skrag na yang rgyu gang gis skrag pa'i rgyu bstan pa'i phyir tshigs su bcad pa rtsom mo zhes bya ba'i don to/ /'gro ba gnas ma yin la skrag pa gdung byed pa/ /zhes bya ba la/ 'gro ba'i sgras ni rigs med pa dang / nyan thos kyi rigs can dang / rang sangs rgyas kyi rigs can la byas so/ /theg pa chen po ni dga' bar bya ba'i gnas yin gyi/ 'jigs par bya ba'i gnas ma yin pa la 'jigs nas skur pa btab na gnas ma yin pa la skrag pa zhes bya ste/ de ltar skrag ste skur pa btab ste/ ngan song gsum du sdug bsngal myong bar byed pas gdung bar 'gyur ba zhes bya'o/ /ci'i phyir ngan song gsum du gdung bar byed na de'i phyir/ bsod nams ma yin phung po cher 'phel ba/ /zhes smos te/ theg pa chen po la skur pa btab na bsod nams ma yin pa'i tshogs 'phel bar 'gyur bas ngan song du skye'o/ /dus ji srid cig tu ngan song du gnas snyam pa la yun ring du zhes smos te/ bskal pa grangs med par ngan song du gnas so zhes bya ba'i don to/ /de yan chad du don rnam pa gsum bstan te/ skur ba btab pa'i nyes pa dang / gang gi rgyus ngan song du skye bar 'gyur ba dang / dus ji srid cig tu ngan song du gnas pa dang gsum mo/ /'gro ba gnas ma yin la skrag pa gdung byed pa/ /zhes bya bas skur ba btab pa'i nyes pa bstan to/ /bsod nams ma yin phung po cher 'phel zhes bya bas ngan song gsum du skye ba'i rgyu gang yin pa bstan to/ /yun ring du zhes bya bas dus ji srid du ngan song du gnas pa bstan to/ /ci'i phyir gang zag de dag theg pa chen po la skrag par byed ce na/ de'i phyir/ rigs med grogs ngan dge sngon ma bsags blo ma sbyangs/ /zhes smos te/ de la rgyu rnam pa bzhis theg pa chen po la skrag par 'gyur te/ byang chub sems dpa'i rigs med na yang theg pa chen po la skrag ste/ 'di ni rgyu gcig go/ /nyan thos dang rang sangs rgyas kyi bshes gnyen ngan pas zin pa dang theg pa chen po la skrag par 'gyur te/ 'di ni rgyu gnyis pa'o/ /tshe rabs sngon gzhan na theg pa chen po rtogs par 'gyur ba'i bsod nams kyi tshogs ma bsags na yang skrag par 'gyur te/ 'di ni rgyu gsum pa'o/ /theg pa chen po'i chos mnyan pa dang bsam pa la sogs pas tshe snga phyi blo ma sbyangs na yang theg pa chen po la skrag par 'gyur te/ 'di ni rgyu bzhi pa'o/ /skrag pa'i rgyu smras nas mi skrag pa'i rgyu bshad par bya ste zhes bya ba la gong du theg pa chen po la skrag par 'gyur ba'i rgyu ni rigs med pa la sogs pa rnam pa bzhi yin no zhes bshad nas/ da ni rgyu gang la brten na theg pa chen po la mi skrag par 'gyur ba'i rgyu bstan te/ 'og nas tshigs su bcad pa las 'byung ba bzhin du yid la byas nas theg pa chen po la skrag par mi 'gyur te/ mi skrag pa'i rgyu bstan pa'i phyir tshigs su bcad pa rtsom mo/ /de las gzhan dang gzhan med ces bya ba la/ nyan thos rnams kyis kyang nyan thos kyi theg pa dang / rang sangs rgyas kyi theg pa dang / theg pa chen po ste theg pa gsum yod par 'dod pas/ theg pa chen po yod par khas blangs na de ltar na ni shes rab kyi pha rol tu phyin pa 'di las ma gtogs pa'i theg pa chen po gzhan med pas na theg pa chen po spong zhing skur pa 'debs pa dang skrag par bya ba'i gnas ma yin no zhes bya ba'i don to/ /gal te nyan thos dag na re/ nyan thos kyi theg pa nyid theg pa chen po yin te/ shes rab kyi pha rol tu phyin pa la sogs pa theg pa chen po ma yin no zhes smra na/ de lta na ni sangs rgyas las ma gtogs pa'i nyan thos dang rang sangs rgyas zhes bya ba gzhan med par 'gyur te/ ci'i phyir zhe na/ kun kyang theg pa chen po la zhugs pas kun sangs rgyas su gyur pa'i phyir/ nyan thos dang rang sangs rgyas med pa'i phyir skyon du 'gyur ro/ /zab cing zhes bya ba la/ thams cad mkhyen pa'i ye shes thob par byed pa'i lam sa dang pha rol tu phyin pa dang / gang zag dang chos la bdag med pa 'di ni shin tu zab pa ste/ 'phags pa rnams kyis thugs su chud par zad de/ so so'i skye bo rnams kyis khong du mi chud do zhes de ltar tshul bzhin du yid la byas nas theg pa chen po skrag pa'i gnas su mi 'gyur ro/ /rjes song phyir zhes bya ba ni gang gi tshe bcom ldan 'das kyis mnyan du yod pa la sogs par nyan thos kyi theg pa bshad pa de dang dus gcig tu theg pa chen po yang bshad de dus mnyam du byung bas dus mnyam du gsungs par 'dra ba la/ nyan thos kyi theg pa la skrag par mi bya na theg pa chen po la ci'i phyir skrag par bya ba'i rigs zhes de ltar tshul bzhin du yid la byas nas dpyad na theg pa chen po'i chos la skrag par mi 'gyur ro zhes bya ba'i don to/ /sna tshogs ston cing zhes bya ba la/ gal te theg pa chen po'i nang nas stong pa dang med pa 'ba' zhig bshad na ni skrag par bya ba'i gnas kyang yin no/ /stong pa 'ba' zhig bshad par ma zad kyi phung po dang khams dang skye mched dang sa dang pha rol tu phyin pa la sogs pa'i chos sna tshogs dang / lam sna tshogs kyang bshad pas na stong par bshad pa'i bka' 'di la yang dgongs pa 'ga' zhig yod do zhes ji ltar tshul bzhin du bsams na theg pa chen po la skrag par mi 'gyur ro zhes bya ba'i don to/ /mang po'i sgo nas rtag tu ston dang ldan/ /zhes bya ba la/ mang po ni lang kar gshegs pa dang / shes rab kyi pha rol tu phyin pa la sogs pa'i mdo sde mang po de dang de dag la bya'o/ /sgo zhes bya ba ni stong pa nyid ston pa'i rnam grangs la bya la/ stong pa khong du chud par bya ba'i phyir/ ma byung ba dang ma skyes pa dang rang bzhin gyis stong pa dang dngos po med pa zhes bya ba la sogs pa rnam grangs du mas bstan to/ /rtag tu zhes bya ba ni lan cig bstan par ma zad kyi rgyun ma chad par bstan te/ de ltar stong pa nyid de mdo sde thams cad kyi nang nas rnam grangs du mas rgyun ma 'chad par bstan pas na stong pa 'di dgos pa che zhing ched che bar mngon te/ ched mi che na bcom ldan 'das kyis lan cig tsam bshad de phyis mi gsung ba'i rigs so zhes/ ji ltar tshul bzhin du bsams na theg pa chen po la skrag par mi 'gyur ro zhes bya ba'i don to/ /ji ltar bshad pa bzhin ma yin zhes bya ba'i sangs rgyas med chos med ces bya ba la sogs pa bshad pa'i tshig 'di thams cad nas thams cad du kun med pa ni ma yin gyi/ gzung 'dzin du byis pa rnams kyis kun tu brtags pa'i kun brtags med pa la dgongs nas med ces gsungs kyi/ 'phags pa rnams kyi yul gzhan gyi dbang dang / yongs su grub pa'i rang bzhin med pa ma yin no zhes de ltar tshul bzhin yid la byas nas theg pa chen po la skrag par mi 'gyur ro zhes bya ba'i don to/ /bcom ldan 'das kyi dgongs pa zab ces bya ba la/ bcom ldan 'das kyi bka' thams cad ni zab cing phra ba ste ci la dgongs pa shin tu shes par dka' zhing rtogs par dka' ba'o/ /ji lta zhe na/ de bzhin gshegs pa chos 'chad pa ni bsam pa dang bag la nyal ba dang khams rnams mkhyen nas sems can so so'i sems dang mthun par kha cig la ni yod ces bshad/ kha cig la ni med ces bshad/ kha cig la yod pa yang ma yin med pa yang ma yin zhes bshad pa de dag ci las dgongs te bshad pa bdag gis mi rtog ste/ bdag gi spyod yul ma yin no zhes de ltar tshul bzhin du yid la bya ste/ bsams na yang skrag par mi 'gyur ro zhes bya ba'i don to/ /mkhas pas tshul bzhin brtags na chos la skrag par mi 'gyur ro zhes bya ba na blo dang ldan pa mkhas pa rnams kyis tshul bzhin du bsams nas bshad na theg pa chen po'i chos la skrag par mi 'gyur ro zhes bya ba'i don to/ /gzhan du na ni lan cig tsam zhig dgag pa mdzad par 'gyur ro zhes bya ba la/ stong pa nyid kyi don 'di ched che ba ma yin na ni med do zhes bya ba'i dgag pa'i tshig 'di lan 'ga' zhig bshad nas de nas mi gsung bar rigs na/ bcom ldan 'das kyis de nas rgyun mi 'chad par mdo sde kun las gsungs pas na gdon mi za bar stong pa nyid bshad pa 'di la don ched che ba yod do zhes bya ba'i don to/ /ring du zhugs pa'i ye shes kyi spyod yul nyid yin pas tshigs su bcad pa zhes bya ba la gang gi tshe 'di ni bzang ngo 'di ni ngan no zhes bya ba dang / 'di ni yin no 'di ni min no zhes bye brag dbye ba de dag kyang ring du zhugs pa'i ye shes thob par gyur na de'i tshe gdod yin pa dang ma yin pa dag de'i spyod yul du 'gyur gyi ring du zhugs pa'i ye shes kyi spyod yul ma yin pa thob pa rnams la ni dngos po thams cad mngon sum du ma gyur pas 'di sangs rgyas kyi tshig ma yin no zhes nges par gzhag tu mi rung ngo / /de la ring du zhugs pa'i ye shes zhes bya ba ni dus gsum dang phyogs bcu na gnas pa'i dngos po thams cad skyu ru ra lag mthil du blangs pa bzhin du/ thogs pa dang chags pa med par mngon du gyur pa'i thams cad mkhyen pa'i ye shes la bya'o/ /thos pa la gnas nas thog mar yid la byed pa 'byung bar 'gyur zhes bya ba la/ thams cad mkhyen pa'i ye shes thob par byed pa'i thabs ni/ dang po nyid du dge ba'i bshes gnyen la brten nas thog mar dge zhes bya ba la sogs pa theg pa chen po'i chos mnyan par bya'o/ /de nas mnyan pa de la brten nas de'i 'og tu mi rtag pa dang sdug bsngal ba dang stong pa dang bdag med par bsams te/ bsams pa de las ni mos par byed pa'i ting nge 'dzin drod la sogs pa tshul bzhin yid la byed pa'i mtshan nyid 'byung bar 'gyur ro zhes bya ba'i don to/ /tshul bzhin yid la byed pa las/ /yang dag don yul ye shes 'byung / /zhes bya ba ni de ltar mos pas spyod pa'i ting nge ' dzin tshul bzhin rang gi rang bzhin rnam pa bzhi la brten nas sa dang po mthong ba'i lam la 'jig rten las 'das pa'i yang dag pa'i lta bas chos dang gang zag la bdag med pa'i mtshan nyid chos kyi dbyings thams cad du 'gro ba mngon sum du yul du gyur pa'i ye shes rnam par mi rtog pa'i ye shes 'byung ngo zhes bya ba'i don to/ /de las chos la thob par 'gyur zhing zhes bya ba ni sa dang por rnam par mi rtog pa'i ye shes thob nas sa gnyis pa nas sa bcu pa'i bar du ye shes de nyid bsgoms pas nyon mongs pa dang shes bya'i sgrib pa thams cad spangs te/ sangs rgyas kyi sar sa bcur bsgoms pa'i 'bras bu rnam par grol ba zhes bya ba'i sku 'thob par 'gyur ro zhes bya ba'i don to/ /de las blo gros 'byung bar 'gyur/ /zhes bya ba ni de ltar rnam par grol ba thob na/ de'i 'og tu rnam par grol ba la rnam par grol ba nyid du yang dag pa ji lta ba bzhin du shes pa'i ye shes skye bar 'gyur te ye shes de'i mtshan nyid ji lta bu zhe na/ 'di ltar bdag gis bya ba ni byas/ khur ni bor/ tshangs par spyod pa ni spyad/ srid pa 'di las gzhan ni mi shes so zhes khong du chud pa'o/ /gang gi tshe na ye shes de rang gis rig par gyur pa de'i tshe na ni blang bar bya ba dang / spang bar bya ba dang / yin pa dang / ma yin pa dag mngon sum du gyur pas 'di ni yin 'di ni ma yin zhes bye brag dbye zhing gtan la dbab par bya ba la ni rigs so zhes bya ba'i don to/ /gang tshe rang rig de med par ni ji ltar rtogs par 'gyur/ /zhes bya ba la/ gang gi tshe sa bcu'i 'bras bu thams cad mkhyen pa'i ye shes de rang gis rig pa med par theg pa chen po 'di sangs rgyas kyi tshig ma yin par ji ltar rtogs par 'gyur zhes bya ba'i don to/ /skrag pa'i gnas ma yin par tshigs su bcad pa zhes bya ba la/ gong du theg pa chen po 'di skrag pa'i gnas ma yin no zhes mdo tsam smos pa de da ji ltar skrag pa'i gnas ma yin pa de bzhin du 'chad de/ theg pa chen po 'di dga' zhing dad par bya ba'i gnas yin gyi skrag par bya ba'i gnas ma yin no zhes bstan pa las brtsams nas tshigs su bcad pa bstan to/ /bdag gis mi shes zhes bya ba la/ nyan thos dag 'di skad du theg pa chen po las chos ma skyes pa ma byung zhes bya ba 'di dag bdag cag lta bu'i spyod yul du mi 'gyur te/ 'di dag bdag cag gis mi rtogs pas na/ bdag cag 'di la 'jug par mi nus so zhes de ltar bsams nas cang theg pa chen po la skrag pa'i gnas su bya ba mi rigs te/ ci'i phyir zhe na/ 'di ltar theg pa chen po rtogs par 'gyur ba'i dge ba'i rtsa ba ma bsags pa dang / theg pa chen po ston pa'i dge ba'i bshes gnyen la bsnyen bkur ma byas pa rnams kyis theg pa chen po'i don rtogs par mi nus te/ de bas na theg pa chen po'i don rtogs par 'dod na mgo'i thod la me 'bar ba bsad pa de bzhin du theg pa chen po ston pa'i dge ba'i bshes gnyen la bsnyen bkur bya ba'i phyir 'bad par bya ste/ 'bad na theg pa chen po'i don rtogs par 'gyur ro/ /'di'i skabs su tshigs su bcad pa ston pa/ thabs kyi cho ga mkhas la gal te blo sbyangs ma byas dang / /thabs la mkhas pa'i skye bo rnams kyi rjes su 'jug par gyis/ /sdug bsngal mang po 'dus la spyod pa yid ni chags gyur na/ /gal te de yang mi 'dod khyad par nyams na dga' bar gyis/ /zhes bya ba lta bu'o/ /sangs rgyas zab mo mkhyen pa ma yin zhes bya ba la/ gal te nyan thos dag ni 'di skad du/ /sangs rgyas zhes bya ba phung po dang khams dang skye mched dang rten cing 'brel te 'byung ba dang / bden pa la sogs pa'i chos yod par thugs su chud pas sangs rgyas zhes bya ste/ ma skyes pa dang ma byung ba la sogs pa zab mo 'di sangs rgyas kyis thugs su chud pa yang ma yin te/ sangs rgyas kyis thugs su chud ces bya ba yang brdzun na sangs rgyas kyis zab mo bshad pa lta ci zhig ga la yod de med do zhes de ltar bsams te yang skrag par bya bar mi rigs so zhes bya ba'i don to/ /ci'i phyir zhe na/ sangs rgyas zhes bya ba'i mtshan 'di yang 'dod dgur btags pa ma yin gyi don dang bcas par btags pa yin te/ gang gi phyir nyon mongs pa dang / shes bya'i sgrib pa gnyis dang 'dra ba bag la nyal tshun chad spangs pa dang / rnam par mi rtog pa'i ye shes kyis shes bya thams cad thugs su chud de blo kha bye bas na sangs rgyas zhes bya ste/ sems can gyi khyad par 'di lta bu dag gis kyang / zab mo thugs su ma chud na/ bdag cag la sogs pas lta ga la zhig ces khong du chud ces 'jigs pa'i gnas su bya ba mi rigs te/ 'di ltar dge ba'i bshes gnyen la bsnyen bkur dang brten pa la bsgrim par byas nas sangs rgyas kyis zab ma thugs su chud dam mi chud par 'gyur ba lta rang nyid kyis phyis rtogs par 'gyur ro/ /zab mo ci'i phyir na rtog ge'i spyod yul ma yin zhes bya ba ni ji tsam du tshad mas gzhal bar bya ba'i yul gtan la dbab pa'i dngos po rnams ni rtog ge pa rnams kyi mngon sum dang rjes su dpag pa'i tshad mas rtogs par 'gyur ba yin/ ma skyes pa dang ma byung ba la sogs pa'i tshad ma zab mo rtog ge pa rnams kyi tshad ma'i yul ma yin pas theg pa chen po la 'jug par bya ba'i yul ma yin no zhes de ltar yang skrag par bya bar mi rigs te/ ci'i phyir zhe na/ rtog ge'i sems bsal bar bya ba'i phyir bsgrim par bya'i theg pa la skrag par ni mi bya'o/ /ji lta zhe na/ theg pa chen po 'di rtog ge pa rnams kyi spyod yul ma yin pa'i phyir te/ de bas na bcom ldan 'das de la byang chub sems dpa' dang nyan thos dag gis bstod pa/ rtog ge rnams kyi yul min te/ /byis pa'i spyod yul ma yin dang / /sems dang sems las byung yongs 'das/ /thub pa gang dag bsgom mdzad do/ /zhes gsungs pa lta bu'o/ /A tsar+ya ma ti tsi tras kyang bdag ni don rtog ge pa ste/ gang de kho na khong du chud pa'i nyan thos dang / rang sangs rgyas dag gis kyang chos kyi sku dang / stobs dang mi 'jigs pa la sogs pa la ye shes thogs te mi 'jug go zhes nas bcom ldan 'das la bstod pa/ gal te klu chen de dag kyang / /khyod la nus pa thogs gyur na/ /srid pa mi gtsang 'bu lta bu'o/ / bdag la skabs lta ga la mchis/ /zhes bstod pa lta bu'o/ /ci'i phyir zab mo'i don rig pa dag thar bar 'gyur zhes bya ba la ma skyes pa dang ma byung ba'i zab mo rtogs pa de dag 'ba' zhig 'khor ba las 'das shing mya ngan 'das par 'gyur la/ mngon sum dang rjes su dpag pa'i tshad mas dngos po rnams la 'jal bar byed pa'i rtog ge pa rnams ci'i phyir 'khor ba las 'das shing mya ngan las 'das pa mi 'thob ces te/ de ltar bsams te yang theg pa chen po la yang skrag par bya bar mi rigs te/ ci'i phyir zhe na/ nyon mongs pa spangs nas mya ngan las 'das pa thob pa ni stong pa nyid mthong bas 'thob par 'gyur gyi kun rdzob tsam dpyod pa'i rtog ge'i sems kyis ni mya ngan las 'das pa thob par mi 'gyur ba'i phyir ro/ /mos pa med na yang de 'grub par tshigs su bcad pa zhes bya ba la/ rigs med pa dang nyan thos dang rang sangs rgyas kyi rigs can dag theg pa chen po la 'jug par mos pa med na de ltar na ni 'di theg pa chen po yin par grub ste/ ci'i phyir zhe na/ chung ngu rnams de la mos pa mi 'jug pa'i phyir ro zhes bstan pas tshigs su bcad pa bshad pa/ chung ngur mos shing rigs kyang shin tu ngan/ /grogs po ngan pa dag gis yongs bskor ba/ / zab cing rgya cher legs par gsungs pa yi/ /chos la gal te mos med grub pa yin/ /zhes bya ba la/ nyan thos dag ni bsod nams kyi tshogs kyang kha zas spar gang tsam gtong ba la mos pa dang / ye shes kyi tshogs kyang gang zag la bdag med pa tsam zhig mthong ba dang don yang bdag gi don tsam zhig byed par 'dod pas na chung ngu la mos pa'o/ /de ltar na bsod nams dang ye shes kyi tshogs kyang chung ngu la mos pas kun gzhi rnam par shes pas yang bsod nams dang ye shes kyi sa bon chung ngu bsags pas rigs kyang shin tu ngan pa zhes bya ste/ theg pa chung ngur mya ngan las 'das par 'gyur ba'i rigs tsam zhig yod par 'gyur ba'i phyir ro/ /dper na wa rnams kyang wa dang 'grogs par dga'i/ seng ge dang 'grogs par ma mos pa bzhin du mos pa yang chung / rigs kyang ngan pas na yang 'grogs na yang grogs ngan pa nyan thos kyi phyogs la brten pa'i grogs 'ba' zhig dang 'grogs pas na grogs ngan pas bskor ba zhes bya ste/ de ltar mos pa yang chung rigs kyang ngan grogs kyang ngan pas na/ zab cing rgya che ba legs par gsungs pa'i theg pa chen po'i chos la mos pa med na chung ngu ba rnams kyis ma mos pas de'i phyir chos 'di theg pa chen po yin par grub bo/ /mdo sde ma thos pa smad du mi rung bar tshigs su bcad pa zhes bya ba la/ 'di ni sangs rgyas kyi tshig yin 'di ni ma yin zhes bya ba dang / 'di ni ngan 'di ni bzang zhes bya ba dag kyang gzhung gi don dang tshig thos nas gdod bstod pa dang / smad par bya bar rigs kyi/ gzhung ma thos pa rnams ni bzang ngan ci yin gtol med pas ma yin no ngan to zhes smad du mi rung ba las brtsams nas tshigs su bcad pa ston to/ /thos pa'i rjes su 'brangs pas blo ldan thob/ /thos pa la ni su dag brnyas byed pa/ /thos pa sna tshogs dpag med lus pa la/ /gti mug pas ni ci'i phyir nges par bya/ /zhes bya ba la/ khyed nyan thos kyi mdo sde rnams kyi phung po dang khams dang skye mched dang spyi'i mtshan nyid shes pa'i blo byung ba yang / sngon dge ba'i bshes gnyen las chos thob pa'i rjes su 'brangs te/ thos pa la brten nas mkhas shing blo dang ldan pa thob pa yin na da thos pa la brnyas te/ theg pa chen po'i chos mi nyan par 'dor zhing skur pa 'debs pa de ni blun po gti mug pa zhes bya ste/ ci'i phyir zhe na/ bdag gis ma thos mi shes pa'i chos theg pa chen po'i gzhung sna tshogs pa dpag tu med pa dag ma thos te phyi la lus pa rnams don ci byung gtol med par 'di sangs rgyas kyi tshig ma yin no zhes ji ltar nges par byas te/ gtan la dbab ces bya ba'i don to/ /de thos pa la stobs gzhan med pas zhes bya bas bzang ba dang ngan par bye brag dbye ba dang / yin pa dang ma yin pa zhes bye brag dbye ba 'di yang thos pa'i stobs las ma gtogs par ma thos pa rnams kyis bye brag phyed par mi nus te/ de bas na thos pa la bsgrims pa dang ma thos pa'i chos la smad par mi bya'o zhes bya ba'i don to/ /gang thos pa de yang tshul bzhin du yid la bya ste/ tshul bzhin ma yin par ni ma yin no zhes tshul bzhin ma yin par yid la byed pa nyes pa yin par tshigs su bcad pa zhes bya ba la/ ma thos pa'i chos rnams la skur pa gdab tu mi rung ste/ de bas na chos rnams mnyan par bya'o zhes glengs so/ /da thos pa'i chos la yang gzhan dbang dang / yongs su grub pa yod kyi med ces bya ba yang kun brtags pa med do zhes de ltar tshul bzhin du yid la bya ste/ tshul bzhin ma yin par sangs rgyas med pa dang / chos med pa la sogs pa'i tshig thams cad nas thams cad du med do zhes bya ba'i don to/ /tshul bzhin ma yin par yid la byas nas/ sangs rgyas kyi tshig ma yin no zhes skur pa gdab par mi bya ste/ de ltar tshul bzhin ma yin pa yid la byas te/ skur pa btab na nyes pa dang skyon yod par bstan pa las brtsams nas tshigs su bcad pa bstan pa/ ji ltar sgra bzhin yongs brtags na/ /zhes bya ba ni sangs rgyas med chos med d ge 'dun med do zhes bya ba'i sgra 'di ni thams cad nas thams cad du med par ston pa ni ma yin gyi kun tu brtags pa'i mtshan nyid med pa la dgongs nas med ces gsungs pa yin pa las sgra ji bzhin du brtags na thams cad nas thams cad du med par gzung nas nyes pa rnam pa gsum thob par 'gyur ro zhes bya ba'i don to/ /bdag nyid bsnyems shing zhes bya bas ni sgra ji bzhin du gzung ba dang don ma rtogs pas bdag nyid kyi lta ba bsnyems pa la gnas pa yin te bdag gi lta ba bsnyems pa las gnas par gyur na/ theg pa chen po'i don la mkhas pa bdag med do zhes bya ba'i tshig gi don gang yin pas tshol zhing nyan par mi byed do zhes bya ba'i don to/ /blo nyams 'gyur zhes bya ba ni de ltar theg pa chen po'i don ma btsal nas gzhan gyi dbang dang yongs su grub pa'i rang bzhin ni yod kun brtags kyi rang bzhin ni med pa'i don du yang dag pa ji lta ba bzhin du shes par byed pa'i shes rab las ma thob par yongs su nyams par 'gyur te/ 'di ni nyes pa dang po'o/ /legs par gsungs la rab smad pas/ /brlag 'gyur zhes bya ba ni med ces bya ba sgra ji bzhin du gzung ste/ thams cad nas thams cad du med par bzung nas/ bcom ldan 'das kyi gsung rab thog mar yang dge bar du yang dge ba la/ sangs rgyas kyi tshig ma yin gyi bdud kyis smras pa yin no zhes smad pas na bsod nams dang ye shes kyi tshogs nyams te bsod nams ma yin pa'i phung po cher bsags pas sems can dmyal bar 'gro dgos pa'i phyir brlag par 'gyur te/ 'di ni nyes pa gnyis pa'o/ /khong khro sgrib ces bya ba ni theg pa chen po'i chos la sangs rgyas kyi bka' ma yin par bsams te/ zhe sdang skyed na chos kyis phongs par 'gyur ba'i las kyi sgrib pa skye ste/ 'di ni nyes pa gsum pa'o/ /de la chos kyis phongs par 'gyur ba'i las kyi sgrib pa ni gang nas gang du skyes kyang 'on pa dang glen pa dang lkugs par skye ba dang / dge ba'i bshes gnyen dang bskal pa'i gnas mtha' 'khob tu skye ba la sogs pa ste/ zhib tu ni rnal 'byor spyod pa'i sa las bstan pa bzhin du blta'o/ /sgra ji bzhin ma yin pa'i don du mi shes par khong khro bar mi rigs na zhes bya ba ni/ sangs rgyas med ces bya ba la sogs pa'i sgra 'di thams cad nas thams cad du med pa'i don du drangs te/ gzhan gyi dbang dang yongs su grub pa yod pa dang / kun tu brtags pa med par mi shes par theg pa chen po la khong khro zhing skur pa btab par mi rigs pa las brtsams nas tshigs su bcad pa ston to/ /yid kyi khro ba rang bzhin gdug pa ste/ /zhes bya ba la yid kyi khro ba zhes bya ba ni sems kyi zhe sdang ngo / /rang bzhin gdug pa zhes bya ba ni rang bzhin gyis kha na ma tho ba yin zhes bya ba'i don to/ /kha na ma tho ba ni rnam pa gnyis so/ /gang zhe na/ rang bzhin gyis kha na ma tho ba dang bcas pa'i kha na ma tho ba'o/ /de la rang bzhin gyis kha na ma tho ba ni sdig pa lci ba yin la bcas pa'i kha na ma tho ba ni sdig pa yang ba yin te/ sems kyi zhe sdang 'di ni rang bzhin gyis kha na ma tho ba ste/ rang bzhin gyis gdug pa'i mtshan nyid yin no zhes bya ba'i don to/ /mi rigs pa'i gzugs la'ang mi rigs na zhes bya ba la/ de ltar zhe sdang 'di rang bzhin gyis gdug pa yin pas na gang mi phan par sems pa'i dgra la sogs pa mi rigs pa'i gzugs la yang zhe sdang bskyed par mi rigs na gzhan lta la ci smos zhes bya ba'i don to/ /ci'i phyir zhe na/ ji ltar mngon pa'i chos bsdus pa las/ nyon mongs pa bstan pa'i dbang du byas nas nyon mongs pa'i mtshan nyid ji ltar blta zhe na/ gang chos skye ba'i tshe na ma zhi zhing gdug pa'i mtshan nyid du skye la gang skyes nas kyang sems kyi rgyud ma zhi zhing gdug par byed pa de nyon mongs pa'i mtshan nyid do zhes bshad do/ /de ltar na sems kyi zhe sdang de sems gdug pa can du byed pas na dgra la sogs pa mi rigs par byed pa'i gzugs la yang zhe sdang bskyed par mi rigs so zhes bya ba'i don to/ /bcom ldan 'das kyis kyang mdo sde de dang de dag las zhe sdang bskyed du mi rung bar bka' nan yang nas yang du bsnan te bkag go/ /shes rab kyi pha rol tu phyin pa bdun brgya pa las bshad pa/ 'jam dpal zhe sdang thang cig gis bskal pa du mar bsags pa'i dge ba'i rtsa ba sreg par byed do zhes gsungs so/ /nyan thos kyi sog le lta bu'i mdo las kyang dge slong dag mes tshig pa'i mgal dum la yang khong khro ba'i sems kyang bskyed par mi bya na/ sems dang bcas pa'i lus la lta ci smos zhes bcom ldan 'das kyis gsungs so/ /mkhas pa rnams kyis theg pa chen po la dga' bar mi nus na gzu bo lta bu dbus kyi tshul nyid gzung bar bya ste/ gzu bo lta bu'i tshul 'di ni mkhas pa'i skye bo rnams dga' bar byed pa'i rigs pa yin pas/ rigs pa de'i rjes su 'brangs nas theg pa chen po 'di zhe sdang bar byed pa'i gnas yin nam/ dad par bya ba'i gnas yin pa rang nyid kyis rtogs par 'gyur ro/ /gal te rtogs pa de yang khas/ len par mi byed na ni/ de ci'i phyir/ the tshom za ba'i chos la smos ci dgos/ /zhes bya ba smos te/ mi rigs pa'i gzugs la yang zhe sdang bskyed par mi rigs na sems shes pa rnams kyis theg pa chen po 'di sangs rgyas kyi tshig yin nam ma yin gtol med de/ the tshom du gyur pa'i gnas la zhe sdang bskyed par mi rigs pa lta smos kyang ci dgos te/ mi rigs ches so zhes bya ba'i don to/ /de bas na mkhas pa dag 'di skad du/ sbrul gyi gnas su lag brkyang dang / /gal te der ni sprul yod na/ /byis pa don med rnyed gyur pa'i/ /yon tan de ni ci zhig 'thob/ /ces bya ba lta bu'o/ /yang gzhan dag gis smras pa/ 'jig rten gzhan la the tshom dang / /mkhas pas mi dge spang bar bya/ /gal te med na'ang de cir 'gyur/ /gal te yod dang med ci brlag /ces bshad do/ /de phyir btang snyoms bzhag legs nyes pa med/ /ces bya ba la/ gong du bshad pa ltar na zhe sdang 'di yang rang bzhin gyis kha na ma tho ba yin pas/ rang bzhin gyis kha na ma tho ba des mi gos par 'dod pa rnams kyis zhe sdang mi sdang mi skyed par btang snyoms su bzhag pa nyid legs te/ btang snyoms su gzhag na zhe sdang gi nyes pas gos par mi 'gyur ro zhes bya ba'i don to/ /theg pa chen po bsgrub pa'i skabs bshad pa rdzogs so// //skyabs su 'gro ba'i khyad par bsdus pa tshigs su bcad pa zhes bya ba la/ skyabs su 'gro zhes bya ba dang / byang chub tu sems bskyed ces bya ba dang / smon lam btab ces bya ba dag ni don gcig ste/ de la nyan thos dang rang sangs rgyas rnams ni bdag yongs su mya ngan las 'da' bar bya ba'i phyir mchog gsum la skyabs su 'gro la brgya byin dang tshangs pa la sogs pa ni 'jig rten gyi longs spyod 'dod pa'i phyir skyabs su 'gro la/ mi rnams la yang 'jig rten gyi go 'phang dag 'dod pa'i phyir rgyal po la skyabs su 'gro ba dang / ri dwags la sogs pa rngon pas ded pa na srog las thar bar bya ba'i phyir ri dang phug la sogs par skyabs su 'gro ba yod mod kyi/ byang chub sems dpa' rnams ni dkon mchog gsum la skyabs su 'gro ba ni bdag dang gzhan gyi don gyi phyir skyabs su 'gro bas gzhan las khyad zhugs shing 'phags pa dang / skyabs su 'gro ba rgya cher rnal 'byor spyod pa'i sa las 'byung ba las/ 'dir don gces pa nyi tshe bsdus te bstan pas na bsdus pa zhes bya ba ste/ de las brtsams nas tshigs su bcad pa bstan to/ /theg pa sgrub pa'i skabs kyi 'og tu skyabs su 'gro ba'i khyad par gyi skabs bshad par 'brel ba ci yod ce na/ gong du don shes pa dag don ston pa'i sgo nas chos la brgyan par byed do zhes smras pa dang / brgal ba gal te chos de rang bzhin gyis yon tan dang ldan na/ de la rgyan ci dgos zhes pa dang / brgal ba de'i lan du/ gzugs rnams rgyan dang rang bzhin legs ldan me long nang song na/ /zhes bya ba la sogs pa'i tshigs su bcad pa gcig gis don de nyid kyi rgyan du gtsug lag 'di gyur par bstan nas kyang / de'i zhar la sman la sogs pa'i dpe gsum gyis chos 'di la yon tan rnam pa gsum yod par yang bstan to/ /de ltar bstan pa dang de'i rjes la theg pa chen po 'di yang sangs rgyas kyi tshig kyang ma yin na de la yon tan lta ga la zhig yod ces de ltar log par zhugs pa la 'di nyid theg pa chen po yin gyi/ gzhan ma yin no zhes theg pa chen po sangs rgyas kyi tshig tu bsgrubs so/ /de ltar theg pa chen po bsgrubs pa dang / the tshom du gyur pa dang / mi shes pa'i gang zag rnams dga' ba dang mgu ba'i khyad par thob nas theg pa chen po 'di nyid 'tshang rgya bar 'gyur ba'i lam yin gyi gzhan ni ma yin no zhes de dag sangs rgyas par 'gyur ba'i thabs tshol bar byed de rim pa gang gis 'tshang rgya bar 'gyur ba'i rim pa ston te/ de yang theg pa chen po bstan pa'i tshul gyis sangs rgyas la sogs pa dkon mchog gsum la skyabs su song ba'i rim pas/ bla na med pa'i byang chub btsal dgos pas na/ da skyabs su 'gro ba'i dbang du byas nas chos la ji ltar 'jug pa bstan te/ theg pa chen po'i tshul gyis skyabs su song ba ni bdag dang gzhan bde ba phun sum tshogs pa thob pa'i rgyu yin no/ /kun tu song dang khas blangs rtogs dang zil gyis gnon/ /dbye ba'i rang bzhin rnam bzhi'i don gyi khyad par ston/ /theg chen mchog phyir dkon mchog rnams la skyabs song bas/ /de nyid skyabs su song ba'i mchog tu rig par bya/ /zhes bya ba la/ sems bskyed pa'i rang bzhin rnam pa bzhir dbye ba'i don gyi khyad par gyis na theg pa chen po'i tshul gyis sangs rgyas la sogs pa dkon mchog gsum la/ byang chub sems dpa' rnams skyabs su song ba de 'jig rten pa dang 'jig rten las 'das pa'i skyabs su song ba las khyad par rnam pa bzhis khyad zhugs pas na/ skyabs su song ba gzhan pas mchog tu rig par bya'o/ /khyad par rnam pa bzhi ni kun du song ba'i khyad par dang / khas blangs pa'i khyad par dang / rtogs pa'i khyad par dang / zil gyis gnon pa'i khyad par ro/ /de la sems can thams cad bsgral bar bya ba'i phyir zhugs pas na kun du 'gro ba khyad zhugs so/ /sangs rgyas nyid thob par bya'o zhes khas len pas na khas len pa khyad zhugs so/ /bdag med pa nyid rtogs pas na rtogs pa khyad zhugs so/ /byang chub tu sems bskyed phan chad brgya byin la sogs pa 'jig rten pa dang / nyan thos la sogs pa 'jig rten las 'das pa thams cad zil gyis gnon pas na zil gyis gnon pa khyad zhugs te/ bzhi po 'di ni don zhib tu ni 'og nas 'chad do/ /de ltar skyabs su 'gro ba rnams kyi mchog 'di dka' ba mang pos bsgrub dgos na la la ni mi spro ba yod de skyabs su 'gro bar bya ba'i tshigs su bcad pa zhes bya ba la/ de ltar byang chub sems dpa' rnams bdag bla na med pa'i byang chub thob par bya ba dang / sems can yongs su bsgral bar bya ba'i phyir theg pa chen po'i tshul gyis dkon mchog gsum la skyabs su song ste/ byang chub tu sems bskyed pa phan chad bskal pa grangs med pa gsum du mgo dang rkang lag la sogs pa btang dgos pa bsgrub dka' ste/ de bas na la la dag de la mi 'jug cing sems zhum par gyur pa yod pas sems zhum pa'i dbang du mi btang zhing phan pa dang don chen po yod par bstan pa'i sgo nas dga' ba dang spro ba bskyed pa'i phyir tshigs su bcad pa rtsom mo/ /gang phyir thog mar re ba bya dka' ste/ /zhes bya ba la/ re ba zhes bya ba ni/ byang chub tu sems bskyed pa dang / smon lam 'debs pa la bya'o/ /de la dang po so so skye bo'i dus na bdag bla na med pa'i byang chub tu sangs rgyas nas sems can thams cad 'khor ba'i dgon pa las bsgral te/ mya ngan las 'das pa dang thams cad mkhyen pa'i ye shes la gzhag par bya'o zhes khas blangs shing smon lam gdab pa yang shin tu dka'o zhes bya ba'i don to/ /bskal pa stong phrag du mar de bsgrub dka'o/ /zhes bya ba la/ de ltar byang chub tu sems bskyed nas kyang bla na med pa'i byang chub thob par bya ba dang / sems can yongs su bsgral bar bya ba'i phyir bskal pa grangs med pa gsum du mgo dang rkang lag la sogs pa phyi nang gi dngos po la btang ba'i sgo nas mos pas spyod pa'i sa nas rim gyis sa bcu man chad du bsgrub pa yang shin tu dka'o zhes bya ba'i don to/ /gang phyir sems can phan bya don phyir bsgrub/ /ces bya ba la/ de ltar byang chub tu sems bskyed nas bskal pa grangs med pa gsum du dka' ba spyod pa'i sgo nas sa bcu man chad bsgrubs te/ sa bcu 'das nas/ sangs rgyas kyi sa thob pa dang ye shes gnyis su med pa mngon sum du gyur to/ /ye shes de ni sems can mya ngan las 'das par dgod pa dang / thams cad mkhyen pa'i ye shes la gzhag par bya ba'i thabs la mkhas pa yin te/ thabs des 'khor ba'i mtha'i bar du sems can sgrol bar byed pas na/ sems can phan bya don chen grub/ /ces bya'o/ /de phyir theg chen 'di la skyabs don mchog/ /ces bya ba la gong du bshad pa ltar theg pa chen po'i tshul gyis byang chub tu sems bskyed nas dka' ba spyad nas mjug tu sems can thams cad la phan 'dogs pa'i thabs sangs rgyas thob pas na theg pa chen po'i sgor skyabs su song bas na de 'jig rten dang 'jig rten las 'das pa'i skyabs song ba bas kyang mchog yin no/ /tshigs su bcad pa 'dis mdor na don rnam pa gsum bstan te/ smon lam gyi khyad par dang / bsgrub pa'i khyad par dang / 'bras bu thob pa'i khyad par ro/ /gang phyir thog mar re ba bya dka' ste/ /zhes bya bas smon lam gyi khyad par bstan to/ /bskal pa stong phrag du mar de bsgrub dka'/ /zhes bya bas sgrub pa'i khyad par bstan to/ /gang phyir sems can phan phyir don chen grub/ /ces bya bas 'bras bu thob pa'i khyad par bstan to/ /grags pa'i rgyur bstan to zhes bya ba ni dka' ba spyod pa rnam pa sna tshogs pa dang / sa dang pha rol tu phyin pa ni byang chub sems dpa'i spyod pa yin par grags te/ de nyid bla na med pa byang chub kyi rgyur bstan to zhes bya ba'i don to/ /sngar glengs pa'i thams cad du 'gro ba'i don gyi tshigs su bcad pa zhes bya ba la gong du kun tu 'gro ba la sogs pa'i khyad par bzhis theg pa chen po la skyabs su song ba ste/ 'jig rten dang 'jig rten las 'das pa'i skyabs su song bas 'phags so zhes glengs pa la kun tu 'gro ba'i don rgyas par bshad par bya ba'i tshigs su bcad pa rtsom mo zhes bya ba'i don to/ /sems can thams cad bsgral phyir gang bzhugs dang / /theg pa ye shes kun song mkhas par ldan/ /mya ngan 'das la 'khor zhing ro gcig pa/ /blo dang ldan pas kun 'gror 'di rig bya/ /zhes bya ba la kun tu 'gro ba rnam pa bzhi dang ldan pas kun tu 'gro ba khyad zhugs par rig par bya ste/ kun tu 'gro ba bzhi ni/ sems can kun tu 'gro ba dang / theg pa kun tu 'gro ba dang / ye shes kun tu 'gro ba dang / mya ngan las 'das pa kun tu 'gro ba'o/ /de la nyan thos rnams ni bdag yongs su mya ngan las 'da' bar bya ba'i phyir zhugs la/ byang chub sems dpa' rnams ni sems can thams cad 'khor ba'i sdug bsngal las bsgral nas mya ngan las 'da' bar bya ba'i phyir zhugs te/ 'dis ni sems can kun tu 'gro ba dang ldan par blta'o/ /nyan thos dag ni nyan thos kyi theg pa rtogs par bya ba'i phyir byang chub tu sems bskyed la/ byang chub sems dpa' rnams ni nyan thos dang rang sangs rgyas kyi theg pa dang / theg pa chen po la mkhas par bya ba'i phyir sems bskyed de/ 'dis ni theg pa kun tu 'gro ba dang ldan par bstan to/ /nyan thos dag ni gang zag la bdag med pa tsam rtogs par bya ba'i phyir sems bskyed la/ byang chub sems dpa' rnams ni gang zag dang chos la bdag med pa gnyis ka la mkhas par bya ba'i phyir sems bskyed de/ 'dis ni ye shes kun tu 'gro ba dang ldan par bstan to/ /nyan thos dag ni zhi ba phyogs gcig pa'i mya ngan las 'das pa thob par bya ba'i phyir sems bskyed la/ byang chub sems dpa' rnams kyi mya ngan las 'das pa ni kun tu 'gro ba ste/ 'khor bar yang 'gro/ mya ngan las 'das par yang 'gro'o/ /de la 'khor ba ni phung po lnga'i rang bzhin no/ /zhi ba ni phung po lnga spangs pa'i mtshan nyid mya ngan las 'das pa'o/ /ro gcig pa ni 'khor ba'i rang bzhin gang yin pa de nyid mya ngan las 'das pa'i rang bzhin yang de'o/ /mya ngan las 'das pa'i rang bzhin gang yin pa 'khor ba'i rang bzhin yang de yin no zhes/ shes rab kyis ni mya ngan las 'das pa mi gtong / snying rjes 'khor bar mi gtong ste gnyi ga 'jug pas na mya ngan las 'das pa kun tu 'gro ba zhes bya'o/ /de'i yon tan dang nyes pa la rnam par mi rtog pa'i phyir ro zhes bya ba la/ shes rab kyis 'khor ba stong par mthong bas 'khor ba'i nyes pa la mi rtog/ /snying rjes sems can gyi don bya ba la dga' bas na mya ngan las 'das pa la yang yon tan du mi lta zhes bya ba'i don to/ /khas blangs pa'i don du tshigs su bcad pa zhes bya ba la/ kun tu 'gro ba'i don bshad nas/ khas blangs pa'i don rgya cher bshad pa'i phyir tshigs su bcad pa rtsom mo zhes bya ba'i don to/ /khas blangs pa'i don de yang khyad par rnam pa gsum gyis rig par bya ste/ smon lam gyi khyad par dang / bsgrub pa'i khyad par dang / thob pa'i khyad par ro/ /dga' ba mang pos byang chub mchog tshol zhing / /zhes bya ba la/ nyan thos dag dkon mchog gsum la skyabs su song na bdag mya ngan las 'das pa thob par shog shig ces khas len na/ byang chub sems dpa' rnams dkon mchog gsum la skyabs su song ba ni sangs rgyas gang la skyabs su song ba'i sangs rgyas de nyid kyi rang bzhin thob par shog shig ces khas len cing byang chub tu sems bskyed de/ 'dis ni smon lam gyi khyad par bstan to/ /ci'i phyir sangs rgyas nyid thob par bya bar sems bskyed ce na dga' ba mang po'i phyir te/ sangs rgyas bcom ldan 'das rnams kyi stobs dang / mi 'jigs pa la sogs pa'i yon tan thos nas dga' ba dang dad pa skyes te/ yon tan de lta bu dang ldan pa'i sangs rgyas de bdag gis thob par bya'o snyam du sems pa'i phyir ro/ /gang rnams skyo ba med par dka' ba spyod/ /ces bya ba la/ sems bskyed nas kyang sangs rgyas de thob par bya ba'i phyir mgo dang rkang lag la sogs pa'i gtang bar bya ba dka' ba spyod pa'i sgo nas mos pas spyod pa'i sa yan chad sa bcu man chad skyo ba med par khas len te/ 'dis bsgrub pa'i khyad par bstan to/ /rim par sangs rgyas kun mtshungs 'gro/ /zhes bya ba la de ltar sa bcu man chad rim gyis bsgrubs nas/ sangs rgyas kyi sar sangs rgyas par gyur pa dang / sangs rgyas kun dang sku mnyam pa dang / gsung mnyam pa dang / thugs mnyam pa dang / tshogs mnyam pa thob par 'gyur te/ 'dis ni 'bras bu'i khyad par bstan to/ /sku gsum brnyes pas na sku mnyam mo/ /ye shes bzhi brnyes pas na thugs mnyam mo/ /tshangs pa dang bya ka la ping ka'i dbyangs kyis so sor yang dag par rig pa bzhis ston pas na gsung mnyam mo/ /bsod nams dang ye shes kyi tshogs yongs su rdzogs par brnyes pas na tshogs mnyam mo/ /khas blangs mchog tu blo ldan de rig bya/ /zhes bya ba la blo ldan ni byang chub sems dpa' la bya ste/ khyad par rnam pa gsum dang ldan pa las na byang chub sems dpa'i khas blangs pa las ni nyan thos kyi khas blangs pa dag pas mchog tu gyur par rig par bya'o zhes bya ba'i don to/ /yang khas blangs pa'i khyad par du sangs rgyas sras kyi mchog tu skyes pa'i tshigs su bcad pa gzhan gyis bstan to zhes bya ba la/ gong du yon tan rnam pa gsum gyis khyad par khas blangs pa khyad zhugs par bstan nas/ da yang tshigs su bcad pa gzhan gyis khas blangs pa de khyad zhugs par ston te/ de yang ji ltar zhe na/ nyan thos dang rang sangs rgyas kyi byang chub tu sems bskyed pa rnams kyang sangs rgyas kyi sras/ zhes bya mod kyi/ de dag gsung las skyes pa'i sras zhes bya'i thugs las skyes pa'i sras zhes mi bya'o/ /bla na med pa'i byang chub tu sems bskyed pa'i sras rnams ni thugs las skyes pa'i sras yin pas sras kyi mchog tu skyes pa zhes bya ste/ sangs rgyas kyi sras kyi mchog tu skyes pa'i sgo nas kyang khas blangs pa'i khyad zhugs par ston to/ /sangs rgyas rnams kyi sras mchog tu ni gang skyes pa/ /sems dang shes rab dang ni tshogs ldan snying rje dang / /sa bon ma dang mngal gnas ma ma mtshungs pa med/ /de ni khas blangs mchog tu blo ldan shes par bya/ / zhes bya ba la/ 'di ltar 'khor los sgyur ba'i rgyal po'i sras kyang yon tan rnam pa bzhi dang ldan pa dang / 'khor los sgyur ba'i rigs mi gcod par gnas pa yin te/ bzhi gang zhe na/ sa bon phun sum tshogs pa dang / ma phun sum tshogs pa dang / mngal phun sum tshogs pa dang / ma ma phun sum tshogs pa'o/ /de la sa bon phun sum tshogs pa ni 'khor los sgyur ba'i rgyal po nyid kyis sa bon dang khu ba gzhag gi gzhan gyis ni ma yin no/ /ma phun sum tshogs pa yang sa bon de yang btsun mo dam pa la gzhag gi bran mo ngan pa la sogs pa la mi bzhag pa'o/ /de ltar na pha phun sum tshogs pa dang / ma phun sum tshogs par 'gyur la/ mngal gyi gnas kyang rlung dang mkhris pa dang bad kan la sogs pas nyams par yang ma byas pa'o/ /de ltar na zhag dang zla ba la sogs pa tshang nas mngal yongs su rdzogs te/ bde bar skyes nas kyang gal te ma mas bkru ba dang / nu ma snun pa la sogs pa zhal ta legs par byed pa'i lag tu song ste/ rim gyis skyes nas 'khor los sgyur ba'i rigs mi gcod par gnas par 'gyur ro/ /de dang 'dra bar byang chub sems dpa' rnams mtshungs pa med pa rnam pa bzhi dang ldan par sangs rgyas kyi sras su skyes pa/ de nyan thos la sogs pa'i khas blangs pa pas khas blangs pa'i mchog tu rig par bya ste/ mtshungs pa med pa rnam pa bzhi ni/ sa bon mtshungs pa med pa dang / ma mtshungs pa med pa dang / mngal gyi gnas mtshungs pa med pa dang / ma ma mtshungs pa med pa'o/ /theg pa chen po la brten pa'i byang chub sems dpa' rnams kyi bla na med pa'i byang chub tu 'tshang rgya ba'i sa bon ni byang chub kyi sems te/ de yang byang chub sems dpa'i rigs la gnas pas byang chub tu sems bskyed nas sa bon du 'gyur te/ nyan thos dang rang sangs rgyas kyi rigs can nam/ rigs med pas sems bskyed na ni sa bon du mi 'gyur ro/ /sa bon de yang gal te pha rol tu phyin pa drug la/ shes rab kyi pha rol tu phyin pa mar 'gyur gyi pha rol tu phyin pa gzhan mar gyur na sangs rgyas kyi gdung mi gcod par 'gyur ro/ /de la yang bsod nams dang ye shes kyi tshogs mngal gyi gnas lta bu dang ldan na 'tshang rgya ste ci'i phyir zhe na/ bsod nams dang ye shes kyi tshogs ni bla na med pa'i byang chub tu 'tshang rgya ba'i rten du gyur pa yin pa'i phyir ro/ /bsod nams dang / ye shes kyi tshogs kyang de'i mi mthun pa'i phyogs su gyur pa ser sna la sogs pas dri ma can du ma byas na gdod 'tshang rgya ba'i rten du 'gyur gyi/ mi mthun pa'i phyogs kyi dri ma can du gyur pa'i rten du mi 'gyur ro/ /de ltar sangs rgyas kyi rigs su skyes nas kyang gal te snying rje chen pos ma ma byas te mya ngan las 'das pa'i mthar ma ltung bar 'khor ba nas byang chub sems dpa'i spyod pa rgyun ma bcad na 'tshang rgya bar 'gyur te/ de ltar yon tan rnam pa bzhi dang ldan par skyes pa dang / sangs rgyas kyi gdung mi gcod par gnas pa yin no/ /de ni mngon par skyes pa'i khyad par gyis/ /zhes bya ba la/ yon tan rnam pa bzhi dang ldan par skyes pa ni/ nyan thos dang rang sangs rgyas las 'phags par skyes pa yin pas mngon par skyes pa'i khyad par can yin no/ /legs par skyes pa de nyid/ lus kyi khyad par gyis khyad par can du byas pas khas len pa de nyid kyi khyad par tshigs su bcad pa gzhan gyis bstan to zhes bya ba la/ yon tan rnam pa bzhi dang ldan par skyes pa de nyid legs par skyes pa zhes bya ste/ legs par skyes pa'i byang chub sems dpa' de 'jig rten pa brgya byin la sogs pa dang 'jig rten las 'das pa nyan thos la sogs pa'i lus bas kyang lus khyad zhugs par 'thob pas khas len pa de khyad par du 'phags par bstan pa de'i tshe tshigs su bcad pa rtsom mo/ /sna tshogs mtshan rnams kun gyis lus brgyan cing / /sems can thams cad smin bya'i phyir ni de stobs thob/ /sangs rgyas rnams kyi zhi ba bde chen mtha' yas rnyed/ /sems can thams cad bskyab phyir thabs chen bshams pa shes/ /zhes bya ba la dper na 'khor los sgyur ba'i rgyal po'i sras su skyes na yon tan rnam pa bzhi dang ldan pa'i lus kyi khyad par 'thob ste/ bzhi gang zhe na/ mi phal pa dang mi 'dra ba'i mtshan gyis brgyan pa'i lus thob pa dang / rgyal phran gzhan tshar gcod pa'i ldan pa thob pa dang / rgyal po'i srid kyi longs spyod kyi bde ba thob pa dang / rgyal srid kyi gtsug lag dang / rig pa'i gnas thams cad la mkhas pa'i ye shes kyang thob bo/ /de dang 'dra bar sangs rgyas kyi sras su skyes pa byang chub sems dpa' rnams mtshan sum cu rtsa gnyis dang / dpe byad bzang po brgyad cus brgyan pa'i lus thob pas na gzugs bzang po'i khyad par dang ldan te/ sna tshogs smos pa ni 'khor los sgyur ba'i rgyal po la yang mtshan dang dpe byad yod mod kyi/ de bas 'phags par bstan pa'i phyir sna tshogs smos te/ ji ltar 'phags she na/ rnam pa gsum gyis 'phags te gnas na gnas pa dang / yongs su gsal ba dang / yongs su rdzogs pas 'phags so/ /dper na 'khor los sgyur ba'i rgyal po'i sras de dgra'i tshogs rnams gzhom par nus pa'i lus kyi rtsal dang ldan pa bzhin du/ byang chub sems dpa' de yang sems can ma dad pa rnams dad par bya ba dang / dad pa rnams sa bcu la bkod de/ yongs su smin par bya ba'i lus ngag yid gsum gyi mthu dang ldan te/ de bas na stobs khyad zhugs so/ /dper na 'khor los sgyur ba'i sras su skyes pa de longs spyod kyi bde ba phun sum tshogs pa bde ba myong bar 'gyur ba bzhin du sangs rgyas kyi sras su skyes pa'i byang chub sems dpas kyang / nyon mongs pa dang shes bya'i sgrib pa thams cad spangs pa'i mtshan nyid kyi bde ba ye shes dang / theg pa chen po'i ting nge 'dzin dpag tu med pa dang / stobs dang / mi 'jigs pa la sogs pa'i bde ba myong bar 'gyur te/ de bas na bde ba'i khyad par dang yang ldan no/ /de dper na 'khor los sgyur ba'i rgyal po'i sras rgyal srid kyi gtsug lag dang / rig pa'i gnas la mkhas pa bzhin du/ byang chub sems dpa' sangs rgyas kyi sras su skyes pa rnams kyang / sems can thams cad 'khor ba'i btson ra nas bsgral zhing mya ngan las 'das pa la 'khod par bya ba'i thabs gang yin pa mkhyen te/ de bas na ye shes kyi khyad par dang yang ldan no/ /thabs ni shes rab dang snying rje'o/ /de la shes rab dang ldan pas 'khor ba na gnas kyang 'khor ba'i nyes pas mi gos/ snying rje dang ldan pas nyan thos bzhin du mya ngan las 'das pa 'ba' zhig tu mi ltung ngo / /yang legs par skyes pa de nyid sangs rgyas kyi rigs mi gcod par tshigs su bcad pa gzhan gyis bstan to zhes bya ba la yon tan rnam pa bzhi dang ldan par skyes pa ni legs par skyes pa ste/ dper na 'khor los sgyur ba'i rgyal po'i sras yon tan rnam pa bzhi dang ldan na 'khor los sgyur ba'i rgyal po'i rigs rgyun mi gcod pa bzhin du byang chub sems dpa' yang yon tan rnam pa bzhi dang ldan na sangs rgyas kyi gdung mi gcod par gnas pa'i tshigs su bcad pa rtsom mo/ /yon tan rnam pa bzhi ni dbang bskur ba thob pa dang dbang thob pa med pa dang / lhag par bya ba brtags pa la mkhas pa dang / tshar bcad pa dang / phan 'dogs par byed pa'o/ /sangs rgyas kun gyi 'od zer chen pos dbang bskur byin/ /zhes bya ba la 'khor los sgyur ba'i sras su legs par skyes pa de rgyal tshab tu dbang bskur ba thob pa bzhin du/ byang chub sems dpa' sangs rgyas kyi sras su skyes pa de dag kyang sa bcu pa chos kyi sprin thob pa'i dus na phyogs bcu'i de bzhin gshegs pa thams cad phyogs bcu'i 'od zer gyis chos kyi rgyal po'i rgyal tshab tu dbang bskur ba thob par 'gyur te/ 'dis ni dbang bskur ba thob par bstan to/ /de ni chos la dbang ba kun dang shin tu ldan/ /zhes bya ba la/ dper na 'khor los sgyur ba'i rgyal po'i sras rgyal tshab tu dbang bskur phan chad 'bangs dkor kha cig la ni dbang ba kun la mi dbang zhes bya ba med par thams cad la dbang ba de bzhin du/ sa bcur byang chub sems dpa' dbang bskur ba thob phan chad ji snyed du shes par bya ba dang / spang bar bya ba dang / mngon du bya ba dang / bsgom par bya ba'i chos thams cad mngon du gyur pa'i ye shes dang ldan te/ 'di ni dbang thogs pa med par bstan to/ /sangs rgyas 'khor gyi dkyil 'khor ston pa'i rnam par shes pa zhes bya ba la/ dper na 'khor los sgyur ba'i rgyal po'i sras de 'bangs rnams la don ci dang ci lta ba la mkhas pa dang / rgyal po'i gtsug lag dang / bzo'i gnas la mkhas pa bzhin du/ dbang bskur ba thob pa'i byang chub sems dpa' rnams kyang sangs rgyas kyi 'khor dge slong pha dang / dge slong ma la sogs pa'i nang du chos dang ci bstan pa shes pa dang / 'khor de dag gdul bar bya ba'i thabs kyang shes par 'gyur te/ 'dis ni lhag par bya ba brtag pa la mkhas par bstan to/ /bslab pa bcas pas phan gdags pa dang tshar gcod byed/ /ces bya ba la/ bslab pa bcas pa ni mkhas pa'i lhag pa'i tshul khrims kyi bslab pa bstan pa'o/ /dper na dbang bskur ba thob pa'i 'khor los sgyur ba'i rgyal po'i sras nyes pa byed pa rnams tshar gcod cing chad pas gcod par yang nus la legs par byed pa rnams phan gdags shing bya dga' byin pa de bzhin du dbang bskur ba thob pa'i byang chub sems dpa' rnams kyang tshul khrims la gnas shing yon tan dang ldan pa rnams la phan 'dogs shing gzengs bstod par yang nus la bslab pa la mi gnas shing skyon dang ldan pa rnams la tshar gcod cing chad pas gcod par yang nus te/ 'dis ni tshar gcod cing phan 'dogs par byed pa bstan to/ /yang khyad par de blon po chen po lta bu'i tshigs su bcad pa gzhan gyis bstan te zhes bya ba la/ theg pa chen po'i tshul du khas blangs pa'i khyad par de blon po chen po'i tshul dang 'dra bas bstan te/ de la don rnam pa bzhi byed pa ni blon po chen po'o/ /bzhi gang zhe na/ nang na spyod pa dang / mdzod thams cad kyi spyan pa dang / blo gsang ba la yid brtan pa dang / bsgo ba la dbang ba'o/ /de dang 'dra bar theg pa chen po'i sgor sems bskyed pas yang don rnam pa de bzhi byed pas na blon po chen po dang 'dra bar bstan pa'i phyir tshigs su bcad pa rtsom mo/ / blon po chen po lta bur pha rol phyin la 'jug pa'i phyir/ /zhes bya ba la/ dpen na rgyal po'i blon po chen po rgyal pos thugs brtan par bya ba'i gnas yin pas zhal ta dag byed cing btsun mo dam pa'i nang du yang 'jug pa de bzhin du/ byang chub sems dpa' yang de bzhin gshegs pas thugs brtan pa'i gnas yin pas pha rol tu phyin pa bcu la sogs pa'i nang du 'jug cing spyod par byed do zhes bya ba'i don to/ /byang chub chen po'i phyogs rnams rgya chen rtag tu spyan yang byed/ /ces pa la/ dper na rgyal po'i blon po chen po nor rin po che rnam pa sna tshogs kyi bang mdzod rnams mi 'khyams pa dang / mi brlag par bya ba'i phyir rtag tu sbyin byed cing nyul bar byed pa de bzhin du/ byang chub sems dpa' rnams kyang bla na med pa'i byang chub thob par byed pa'i rgyu byang chub kyi phyogs sum cu rtsa bdun gyi chos rgya chen po lang kar gshegs pa la sogs pa'i mdo sde de dang de dag nas 'byung ba rnams la rtag tu spyan byed de/ mi brjed par sems la 'dzin par byed do/ /gsang ba'i gnas kyang rnam gsum rtag par shin tu 'dzin pa'i phyir/ /zhes bya ba la/ dper na rgyal po'i blon po chen po gsang ba la yid brtan pas bka' bgros pa gsang ba thams cad kyi nang du yang 'jug cing / rgyal po'i gsang ba thams cad kyang 'dzin pa de bzhin du byang chub sems dpa' chen po rnams kyang de bzhin gshegs pa'i gsang ba'i gnas gsum rtag tu 'dzin te/ gsang ba gsum ni/ sku gsang ba dang / gsung gsang ba dang / thugs gsang ba'o/ /de la sku gsang ba ni lo nyes chen po dag gi tshe/ byang chub sems dpa' chen po rnams kyis nya chen po'i lus bstan nas sems can gsos pa dang / nad kyi bskal pa dag gi dus na sman pa chen po lha'i lus lta bur bstan pa la sogs pa'o/ /gsung gsang ba ni byin gyis brlabs nas rtsig pa dang / shing dang nam mkha' la sogs pa las kyang dam pa'i chos 'chad pa'i sgra 'byung ba'o/ /thugs gsang ba ni byin gyis brlabs nas sems can blun po dag gis kyang chos zab mo'i don rtogs pa'o/ /sems can mang po'i don kyang rtag tu rgyun mi 'chad par byed/ / ces bya ba la/ dper na rgyal po'i blon po chen po rgyal po'i bya ba thams cad kyang byed cing 'bangs chab 'og tu gtogs pa rnams skyong zhing tshim par byed pa de bzhin du/ byang chub sems dpa' rnams kyang ji srid du khams gsum du sems can thams cad la snying rjes khyab par byas nas mi dge ba las bzlog cing dge ba la gzhag par bya ba'i don dang mya ngan las 'das par gzhag par bya ba'i don rtag tu rgyun mi 'chad par byed de/ tshe rabs gcig nas gcig tu gar skyes kyang las byed pas na rtag tu byed pa zhes bya'o/ /skad cig ma re re la yang breng ma chad par byed pas na rgyun ma chad par byed pa zhes bya'o/ /rtogs pa'i don du tshigs su bcad pa zhes bya ba la/ kun tu 'gro ba'i don dang khas len pa'i don bstan nas/ da ni rtogs pa'i don rgya cher bstan par bya ba'i phyir tshigs su bcad pa rtsom mo/ /theg pa chen po 'dir skyabs su song na don mdor na gang zag dang chos la bdag med par rtogs par 'gyur la zhib tu ni yon tan rnam pa brgyad rtogs par 'gyur ro zhes bya ba'i don to/ /bsod nams phung chen zhes bya ba la/ dang po nyid du zab cing rgya che ba'i theg pa chen po'i mdo sde la mos pa'i shugs kyis dad pa chen po byung ba'i tshe na ni nam mkha'i khams dang sems can gyi mtha' ji tsam pa'i bsod nams kyi tshogs kyang thob par 'gyur te/ 'di ni yon tan rnam pa gcig go/ /srid gsum bla na zhes bya ba ni de ltar mos nas bdag dang gzhan gyi don du bla na med pa'i byang chub tu sems bskyed pa'i dus na ni 'dod pa'i khams dang gzugs kyi khams dang / gzugs med pa'i khams kyi sems can kun las 'phags par 'gyur te/ 'di ni yon tan gnyis pa'o/ /srid pa'i bde ba dang zhes bya ba la bdag dang gzhan gyi don du las dang nyon mongs pa'i dbang gis skye ba ni ma yin gyi shes bzhin du ni srid par skye ba yongs su 'dzin pa'i dus na lha dang mi'i longs spyod phun sum tshogs pa myong bar 'gyur te/ 'di ni yon tan gsum pa'o/ /sdug bsngal phung po rab zhi zhes bya ba la gang gi phyir sa dang po khong du chud pa na chos kyi dbyings kun tu 'gro ba'i mtshan nyid du rtogs so/ /de ltar rtogs pas na bdag dang gzhan mnyam pa nyid kyi sems thob ste/ dga' ba'i mchog kyang rnyed do/ /de bas na sa dang po'i nges pa'i tshig tu'ang sa rab tu dga' ba zhes bya ste/ dang po nyid du bdag dang gzhan gyi don sgrub pa'i nyes pa rnyed pa'i phyir ro/ /de ltar chos kyi dbyings kun tu 'gro ba'i mtshan nyid du rtogs pa des bdag dang sems can thams cad kyi sdug bsngal gyi phung po zhi bar byed do/ /de'i tshe na bdag nyid 'jigs pa lnga las 'das pas na bdag gi sdug bsngal gyi phung po chen po zhi'o/ /bdag bzhin du sems can rnams kyi 'jigs pa lnga yang med par byed pas na sems can gyi sdug bsngal gyi phung po yang zhi bar byed/ 'jigs pa lnga ni 'tsho ba med pa'i 'jigs pa dang / tshigs su bcad pa med pa'i 'jigs pa dang / 'khor gyi 'jigs pa dang / ngan 'gror ltung ba'i 'jigs pa dang / 'chi 'pho'i 'jigs pa ste/ 'di ni yon tan bzhi pa'o/ /blo mchog bde ba dang zhes bya ba la/ sa brgyad la mi skye ba'i chos la bzod pa thob pa'i dus na lhun gyis grub pa rnam par mi rtog pa'i ye shes kyi snang ba chen po thob pas na/ chos mchog bde ba thob pa zhes bya ste/ 'di ni yon tan lnga pa'o/ /de la rnam par mi rtog pa'i ye shes la lhun gyis grub par gnas pa'i dpe yang rgya mtsho'i gru bo ches bstan pa lta bu'o/ /blo mchog bde ba dang zhes bya ba la/ chos chen phung po mchog rab rtag pa'i sku ste dge ba'i tshogs/ /bag chags las kyang bzlog cing srid zhi rnam par grol ba thob/ /ces bya ba la/ de nas sa bcu 'das nas sangs rgyas kyi sar chen po'i phung po mchog rab rtag pa'i sku dge ba'i tshogs kyang 'thob ste/ 'di ni yon tan drug pa'o/ /sangs rgyas kyi sar bag chags thams cad bzlog pa yang 'thob ste/ 'di ni yon tan bdun pa'o/ /srid zhi rnam par grol ba yang 'thob ste/ 'di ni yon tan brgyad pa'o/ /chos kyi sku de gsung rab yan lag bcu gnyis 'byung ba'i 'byung gnas yin pas chos chen phung po zhes bya'o/ /chos chen sku ste nyan thos kyi rnam par grol ba'i sku dang / 'jig rten dang 'jig rten las 'das pa'i chos thams cad kyi phul du gyur pas mchog rab ces bya'o/ /chos kyi sku de 'khor ba'i mtha' dang / sems can gyi mtha' dang nam mkha'i mtha'i bar du gnas pas rtag pa'i sku zhes bya'o/ /sangs rgyas kyi sa'i dus na gang zag la bdag med par rtogs pas ni nyon mongs pa'i bag chags spangs/ chos la bdag med par rtogs pas ni shes bya'i bag chags spangs pas bag chags thams cad las kyang bzlog pa'o/ /sangs rgyas kyi sa'i dus na mi gnas pa'i mya ngan las 'das pa thob pas srid zhi rnam par grol ba zhes bya ste/ srid pa ni 'khor ba ste/ 'khor ba las rnam par grol zhing 'khor ba la'ang mi gnas so/ /zhi ba ni mya ngan las 'das pa ste mya ngan las 'das pa las rnam par grol zhing mya ngan las 'das pa la yang mi gnas so zhes bya ba'i don to/ /de la shes rab dang ldan pas ni 'khor ba na gnas kyang 'khor ba'i nyes pas mi gos pas na 'khor ba na mi gnas so/ /snying rje dang ldan pas nyan thos bzhin mya ngan las 'das pa 'ba' zhig tu ma zhugs pa'i phyir mya ngan las 'das pa la mi gnas pas so/ /'di zhi bar byed pas na rab tu zhi ba'o zhes pa ni sa dang por chos kyi dbyings kun tu 'gro bar shes nas bdag dang gzhan mnyam pa nyid thob pa'i ye shes kyis bdag dang gzhan gyi 'jigs pa lnga rab tu zhi bar byed pas na ye shes la rab tu zhi ba zhes bya'o/ zil gyis gnon pa'i don du tshigs su bcad pa zhes bya ba la/ kun tu 'gro ba la sogs pa'i don gsum bshad nas zil gyis gnon pa'i don rgyas par bstan pa'i phyir tshigs su bcad pa rtsom ste/ theg pa chen po la skyabs su song na dge ba rnam pa bzhis nyan thos la sogs pa zil gyis gnon par byed do zhes bya ba'i don to/ /blo ldan dge ba rgya ches nyan thos mang po zil gyis gnon/ /don chen mtha' yas rtag tu rgyun mi 'chad cing mi zad pas/ /zhes bya ba'i tshigs bcad rkang pa phyed kyi bshad pas ni/ dge ba'i 'jig rten ma yin de yang smin par byed/ /phun sum tshogs pa rnyed pa phung po zhi bas mi zad pa/ /zhes bya ba'i tshigs su bcad pa phyed kyis bshad de/ blo dang ldan pa ni byang chub sems dpa' rnams la bya'o/ /byang chub sems dpa' rnams dang po byang chub tu sems bskyed pa'i dge ba nas mos pas spyod pa'i sa 'jig rten gyi chos mchog man chad kyi 'jig rten pa'i dge ba ni nyan thos kyi dge ba ltar mya ngan las 'das pa'i phyogs 'ba' zhig tu 'jug pa ma yin gyi sems can thams cad kyi don du 'khor bar 'jug pa'i rgyu yang byed pas rgya che ba'i phyir nyan thos thams cad zil gyis gnon to/ /sa dang po nas sa bdun man chad kyi 'jig rten las 'das pa'i dge ba ni bla na med pa'i byang chub par byed pa'i phyir don che ba ste/ don che ba'i phyir nyan thos thams cad zil gyis gnon to zhes bya ba'i don to/ /sa brgyad pa yan chad ni rnam par mi rtog pa'i ye shes lhun gyis grub pa la gnas pas na dge ba'i rtsa ba rnams yongs su smin par byed/ 'bru rnams yongs su smin par byed pa'i tshe mang du 'phel ba dang 'dra ba de yan chad dge ba'i rtsa ba smin pas stobs dang mi 'jigs pa dang / ma 'dres pa dang / sa dang pha rol tu phyin pa la sogs pa'i yon tan mtha' yas pa 'phel bar 'gyur te/ des na rtag tu sangs rgyas kyi mdzad pa rgyun mi 'chad par mdzad cing dam pa'i chos 'chad pa rgyun mi 'chad par mdzad pas kyang nyan thos rnams zil gyis gnon to zhes bya ba'i don to/ /de nas sangs rgyas kyi sar stobs dang mi 'jigs pa dang / ma 'dres pa la sogs pa'i yon tan phun sum tshogs pa rnyed pa yang phung po zhi ba ste/ phung po'i lhag ma ma lus par spangs pa'i mya ngan las 'das par zhugs kyang zad cing mthar thug par mi 'gyur te/ mi zad pa'i phyir yang nyan thos rnams zil gyis gnon to/ /skyabs su 'gro ba bstan pa'i tshigs su bcad pa zhes bya ba la/ gong du ni theg pa chen por skyabs su song ba de kun 'gro ba la sogs pa'i khyad par bzhi dang ldan pas 'jig rten dang 'jig rten las 'das pa'i skyabs su 'gro bas khyad zhugs so zhes bstan nas/ da ni skyabs su 'gro ba'i rang bzhin dang / rgyu dang 'bras bu dang las dang ldan pa dang / rab tu dbye ba bstan pa las brtsams nas tshigs su bcad pa rtsom mo/ /de ni de'i dngos 'dod phyir ni khas len zhes bya ba nyan thos dag dkon mchog gsum la skyabs su 'gro ba ni bdag 'khor ba'i sdug bsngal las thar bar gyur cig ces bdag yongs su bskyab par bya ba'i phyir skyabs su 'gro ba'o/ /byang chub sems dpa' rnams dkon mchog gsum la skyabs su 'gro ba ni/ sangs rgyas gang la skyabs su song ba'i sangs rgyas de'i rang bzhin nyid grub par bya ba'i phyir skyabs su 'gro bar khas len te/ sangs rgyas 'di sems can thams cad kyi skyabs su gyur pa de bzhin du bdag kyang sems can thams cad kyi sdug bsngal zhi bar bya ba'i phyir sangs rgyas nyid du gyur cig ces khas len te/ de ltar khas len pa ni rang bzhin no/ /snying rje'i phyir yang rig par bya/ /zhes bya ba la sangs rgyas grub par gyur cig ces khas len pa yang sems can sdug bsngal ba rnams la snying rje'i rgyus khas lan te/ snying rje ni skyabs su 'gro ba'i rgyu yin par rig par bya'o/ /de'i phyir thams cad mkhyen pa zhes bya ba la/ de ltar skyabs su 'gro ba'i rang bzhin dang rgyu bskyed nas sa bcu rim gyis bsgrubs nas sangs rgyas kyi sar ye shes bzhi'i bdag nyid thams cad mkhyen pa 'thob pa ste/ de ni skyabs su 'gro ba'i 'bras bu'o/ /phan pa byed cing dka' byed yongs mi skyo/ /zhes bya ba la/ sangs rgyas su grub nas sems can la phan par byed pa dang bde bar byed pa dang / dka' ba spyod pas yongs su mi skyo ba ni skyabs su 'gro ba'i lam yin no/ /tshe 'dir zang zing rnam pa sna tshogs kyis phan btags te/ mi dge ba las bzlog cing dge ba la bzhag pa ni phan par byed pa'o/ /tshe rabs gzhan du lha dang mi'i longs spyod dang mya ngan las 'das pa la bkod pa ni bde bar byed pa'o/ /sems can gyi don du lus dang srog la phangs pa med par mgo dang rkang lag la sogs pa gtong ba ni dka' ba byed pas mi skyo ba zhes bya'o/ /theg pa kun gyis 'byung zhing so sor 'brang zhing rtag tu yon tan ldan/ /zhes bya ba la/ theg pa gsum gyi thabs kyis sems can rnams khams gsum las bsgral bar bya ba'i sems can so so nas sdug cing phongs pa rnams kyi skyabs dang mgon rgyun mi 'chad par byed pa'i yon tan dang ldan te/ 'dis ni ldan pa bstan to/ /so sor 'brang zhes bya ba ni sems can rnams kyi skyabs dang mgon du gyur pa zhes bya ba'i don to/ /byang chub tu sems bskyed pa la phye na du yod pa bstan pa'i phyir/ brda dang chos nyid thob pa'i blo ldan rnams kyi skyabs su 'gro ba mchog/ /ces smos te/ byang chub sems dpa'i skyabs su 'gro ba phye na rnam pa gnyis te/ brdas thob pa dang / chos nyid kyis thob pa'o/ /de la mkhan po dang slob dpon las blangs pa'i byang chub kyi sems ni brdas thob pa zhes bya'o/ / byang chub sems dpas sa dang po thob nas chos kyi dbyings thams cad du 'gro ba'i mtshan nyid rtogs te dge ba'i bshes gnyen la ma brten par smon lam chen po bcu la sogs pa ni chos nyid kyis thob pa zhes bya ste/ des rab tu dbye ba bstan to/ /de la rnam pa gnyis su dbye ste/ chen po dang phra mo'i khyad par du'o/ /brdas thob pa ni mkhan po dang slob dpon las sgra'i sgo nas blangs pas chen po dang rags pa zhes bya'o/ /chos nyid kyis thob pa ni chos nyid kyi don rtogs pa las rnyed pas phra ba dang zab pa zhes bya'o/ /skyabs su 'gro ba sgrub pa'i khyad par gyis tshigs su bcad pa zhes bya ba la gong du skyabs su 'gro ba'i yon tan dang rang bzhin la sogs pa bshad nas/ da ni dkon mchog gsum la skyabs su song ste/ sa dang pha rol tu phyin pa la sogs pa sgrub pa de nyan thos dag kyang skyabs su song nas/ lhag pa'i tshul khrims dang / lhag pa'i sems dang / lhag pa'i shes rab bsgrub pa bas khyad zhugs par bstan pa'i phyir tshigs su bcad pa rtsom mo/ /skyabs su 'gro ba 'dir song don chen te/ /zhes bya ba la 'di zhes bye ba theg pa chen po dang sbyar te/ theg pa chen po 'dir theg pa chen po'i tshul gyis dkon mchog gsum la skyabs su song na bdag gi don phun sum tshogs pa dang / gzhan gyi don phun sum tshogs pa 'grub par 'gyur bas don che ba zhes bya'o/ /yon tan mang po dpag med 'phel bar 'gyur/ /zhes bya ba la de ltar byang chub tu sems bskyed nas sa rim pas bsgrubs nas sangs rgyas kyi sar mngon par sangs rgyas nas stobs dang / mi 'jigs pa dang ma 'dres pa dang byang chub kyi phyogs la sogs pa'i yon tan dpag tu med pa 'thob par 'gyur te/ de ltar bdag gi don phun sum tshogs pa grub par 'gyur ba'i phyir don che bar bstan no/ /theg pa chen por skyabs su song na gzhan gyi don phun sum tshogs pa yang 'grub pas don che ste/ gzhan gyi don phun sum tshogs pa bsgrub pa yang bsam pa phun sum tshogs pa dang / sbyor ba phun sum tshogs pas bsgrub pa bstan pa'i phyir/'gro ba 'di dag snying rje bsam mi khyab/ /mtshungs med 'phags chen chos kyang rgyas par byed/ / ces bya ba smos te/ snying rje chen po'i bsam pas sems can thams cad la bye brag med par 'khor ba'i sdug bsngal las bsgral bar bya'o snyam du sems te/ 'dis ni bsam pa phun sum tshogs pa bstan to/ /de ltar bsams nas byang chub sems dpa'i rigs kyi gang zag rnams la mtshungs pa med par 'phags pa chen po'i chos phyogs bcu thams cad du rgyas par ston cing 'chad par byed de/ 'dis ni sbyor ba phun sum tshogs pa bstan to/ /bdag dang gzhan gyi don phun sum tshogs pa 'byung ba'i theg pa chen po de nyan thos dang rang sangs rgyas kyi theg pa pas khyad zhugs par 'phags pas mtshungs pa med pa zhes bya'o/ /nyan thos la'ang 'phags pa zhes gdags/ rang sangs rgyas la'ang 'phags pa zhes gdags/ sangs rgyas dang byang chub sems dpa' la yang 'phags pa zhes bya la/ sangs rgyas dang byang chub sems dpa'i nyan thos dang rang sangs rgyas rnams las kyang 'phags pa yin pas 'phags pa chen po zhes bya ste theg pa chen po 'di 'phags pa de dag gi chos yin pas na theg pa chen po la 'phags pa chen po'i chos zhes bya'o/ /dpag tu med pa dang rtog ge dang grangs dang dus dpag tu med par rig par bya ste zhes bya ba la/ de bzhin gshegs pa'i yon tan ni rtog ge pa rnams kyi mngon sum dang rjes su dpag pa'i tshad mas 'di tsam zhig yod do zhes 'chad cing dpag par mi nus pa dang / grangs kyi sgo nas kyang grangs 'bum zhe'am bye ba yod ces dpyad par mi nus pa dang / dus kyi sgo nas kyang bskal pa grangs med par smras te brjod na yang mthar phyin par mi 'gyur bas na dpag tu med pa zhes bya'o/ /skyabs su 'gro ba'i skabs bshad pa rdzogs so// //skyabs su 'gro ba'i skabs kyi rjes la rigs kyi skabs bshad par 'brel ba ci yod ce na/ gong du skyabs su 'gro ba'i bshad pa'i mjug tu/ skyabs su 'gro ba 'dir song don chen te/ /yon tan mang po dpag med 'phel bar 'gyur/ /'gro ba 'di dag snying rje'i bsam pas khyab/ /mtshungs med 'phags chen chos kyang rgyas par byed/ /ces smras pa'i tshigs su bcad pas/ /theg pa chen po la skyabs su song bas ni bdag dang gzhan gyi don phun sum tshogs pa 'grub par byed pas don che ba bstan to/ /de ltar bdag dang gzhan gyi don phun sum tshogs pa 'grub par byed pa de yang nges pa med de/ sangs rgyas la sogs pa la nyan thos dang rang sangs rgyas kyi rigs can dang rigs med pa kun gyis theg pa chen po la skyabs su/ / song na thams cad kyis don chen po de 'thob pa'am/ 'on te nges pa yod de kun skyabs su song yang skyabs su song ba kha cig don chen po de 'grub kyi skyabs su song ba kun gyis mi 'grub ste/ nges pa yod dam zhe na/ lan du nges pa yod de/ sangs rgyas kyi rigs can rnams skyabs su song na ni bdag dang gzhan gyi don phun sum tshogs pa dang yon tan gyi tshogs rnams 'phel bar 'gyur gyi nyan thos dang rang sangs rgyas kyi rigs can dang / rigs med pa la sogs pas theg pa chen po'i tshul du skyabs su song yang yon tan de dag 'thob par mi 'gyur te/ de bas na skyabs su 'gro ba'i skabs kyi rjes la rigs kyi skabs bshad par 'brel to/ /yang na ma nges pa'i rigs can dag theg pa chen por skyabs su song na don chen po de 'thob ste/ ma nges pa'i rigs can la ni dge ba'i bshes gnyen gyi mthar phyin du bsgral na gdod don chen po de 'thob kyi/ byang chub sems dpa'i spyad pa spyod pa las nyan thos la sogs pa'i bshes gnyen gyis drangs nas theg pa gzhan du yang 'tshang rgya bas gcig tu nges pa ni med do/ /yang na rigs 'di ni byang chub tu sems bskyed pa dang / pha rol tu phyin pa la spyod pa dang mngon par 'tshang rgya bar 'gyur ba'i skal ba can zhes bya ste/ de bas na rigs ni chos de dag thams cad kyi sa bon yin no/ /sa bon med par 'bras bu 'byung bar ma mthong ste/ de bas na rigs ni gong du skyabs su 'gro ba dang 'og nas byang chub tu sems bskyed pa la sogs pa 'byung ba'i chos rnams kyi rgyu yin par bstan pa'i phyir skyabs kyi rjes la rigs kyi skabs bshad par 'brel to/ /rigs rab tu dbye ba'i tshigs su bcad pa zhes bya ba la/ nyan thos kyi rigs dang rang sangs rgyas kyi rigs dang / sangs rgyas kyi rigs yod par bstan pa las brtsams te/ dang por bsdus pa'i tshigs su bcad pa rtsom mo zhes bya ba'i don to/ /yod dang zhes bya ba ni nyan thos kyi rigs can yang yod/ rang sangs rgyas kyi rigs can yang yod/ sangs rgyas kyi rigs can yang yod par bstan to zhes bya ba'i tha tshig go/ /mchog dang zhes bya ba ni/ nyan thos dang rang sangs rgyas kyi rigs pas kyang bdag dang gzhan gyi don gyi rgyur gyur pas byang chub sems dpa'i rigs ni dam par gyur pa yin par yang bstan to/ /mtshan nyid dang zhes bya ba ni rigs rnam pa gsum las/ theg pa chen po'i rigs kyi mtshan nyid dang / rang bzhin yang ston to zhes bya ba'i tha tshig go/ /mtshan ma dang zhes bya ba ni sems can dag la theg pa chen po'i rigs yod par ci mngon zhe na/ dper na gang na du ba snang ba de na mtshan ma des me yod par brtag pa dang / gang na chu bya snang ba de na chu yod par brtag pa bzhin du mtshan ma dang rtags 'di lta bu dag snang na de la byang chub sems dpa'i rigs yod par mngon no zhes bya ba yang ston to zhes bya ba'i tha tshig go/ /rigs phye dang zhes bya ba ni/ byang chub sems dpa'i rigs la phye na gnyis sam gsum du yod pa yang ston to zhes bya ba'i tha tshig go/ /nyes pa dang ni zhes bya ba la byang chub sems dpa'i rigs yod kyang 'dod chags dang zhe sdang la sogs pa'i nyon mongs pas bsgribs na byang chub sems dpa'i spyod pa la mi 'jug cing bla na med pa'i byang chub ni myur du 'tshang rgyar mi btub par rigs la sgrib pa'i skyon yang ston to zhes bya ba'i tha tshig go/ /legs pa dang zhes bya ba ni byang chub sems dpa'i rigs dang ldan na 'khor ba na sems can phal pa byed kyang bde ba dang / yon tan 'di dang 'di dag thob par 'gyur ro zhes rigs kyi yon tan yang ston to zhes bya ba'i tha tshig go/ /rnam gnyis dpe dang zhes bya ba la byang chub sems dpa'i rigs te/ gter chen po'i rigs dang 'dra ba dang / rin po che chen po'i rigs dang 'dra bas nyan thos la sogs pa'i rigs pas kyang 'phags so zhes bya ba ston to zhes bya ba'i tha tshig go/ /rnam pa bzhi zhes bya ba ni yod pa la yang don rnam pa bzhis bstan pa las dpe rnam pa gnyis las re re zhing yang don rnam pa bzhi bzhir phye nas ston to zhes bya ba'i don to/ /'di ni rigs rab tu dbye ba bsdus pa'i don to/ /yod par rnam par dbye ba'i tshigs su bcad pa zhes bya ba la/ gong du yod pa zhes mdo tsam du smos pa de dang gtan tshigs rnam pa bzhis rigs pa rnam pa gsum ji ltar yod par bstan pa'i phyir tshigs su bcad par rtsom mo zhes bya ba'i tha tshig go/ khams rnams dang ni zhes bya ba la/ khams zhes bya ba dang / sa bon zhes bya ba dang / rigs zhes bya ba dag ni don gcig ste/ ming gi rnam grangs kyis tha dad pa tsam du zad do/ /'di ni sems can gyi khams na sems can gyi rang bzhin dang / sa bon tha dad de sems can gyi rang bzhin phye na dpag tu med pa zhig yod de ji ltar zhe na/ 'di ltar sems can kha cig ni 'dod chags la spyod pa'i rang bzhin can kha cig zhe sdang la spyod pa'i rang bzhin can kha cig gti mug la sogs pa'i rang bzhin can yin pa dang / kha cig nyan thos kyi rigs kyi rang bzhin can kha cig ni rang sangs rgyas kyi rigs kyi rang bzhin can/ kha cig theg pa chen po'i rigs kyi rang bzhin can te rang bzhin mi mthun pa tshad med pa zhig yod do/ /gal te sems can thams cad kyi rigs gcig tu zad na/ la la 'dod chags la dga' ba'i rang bzhin/ la la zhe sdang la sogs pa la dga' ba'i rang bzhin du tha dad par ci'i phyir 'gyur te sems can gyi rang bzhin tha dad par tshad med pa dag snang bas na rigs gcig tu ma zad kyi theg pa che chung gsum char gyi rigs so so na yod do zhes bya ba'i don to/ /mos pa dang zhes bya ba la/ sems can rnams kyi mos pa dang dad pa yang mi mthun zhing tha dad de/ dper na kha cig mngar ba la dad kyang sgyur ba la ma dad pa dang / kha cig sgyur ba la dad kyang kha ba la ma dad pa yod pa ltar/ dge ba'i bshes gnyen gyis bstan nam ma bstan kyang rung / kha cig nyan thos kyi theg pa nyid la dad kyi ji ltar byas kyang theg pa chen po la ma dad pa la sogs pa dad pa tha dad pa dag snang ngo / /gal te rigs gcig tu zad de rigs du mar med na ci'i phyir mos pa tha dad pa du mar 'gyur te/ mos pa tha dad par snang bas na rigs gcig tu ma zad kyi rigs rnam pa gsum du yod par mngon no zhes bya ba'i don to/ / 'di ni gtan tshigs gnyis pa'o/ /bsgrub pa tha dad dbye ba dang / /zhes bya ba la/ nyan thos kyi rigs can gyi gang zag kha cig theg pa chen po'i dge ba'i bshes gnyen gyi rkyen gyi dbang gis theg pa chen po'i rigs can dang 'dra bar theg pa chen po'i chos la mos pa dang dad pa skyes kyang sa dang pha rol tu phyin pa kha cig gis bsgrub nus la/ kha cig gis bsgrub mi nus te/ dper na 'phags pa shA ri'i sras po lta bu theg pa chen po'i dge ba'i bshes gnyen gyis bsgral nas bskal pa nyi shur theg pa chen po'i chos spyod pa las phyis mu stegs can gyis mig blangs pa dang / byang chub sems dpa'i spyod pa bsgrub ma nus nas btang ste nyan thos kyi theg par mya ngan las 'das pa lta bu'o/ /gal te rigs gcig tu zad na kha cig gis theg pa chen po bsgrub nus na kha cig gis mi nus pa ci'i phyir 'gyur te thams cad kyis bsgrub nus par 'gyur ba'i rigs so/ /de ltar na kha cig gis bsgrub nus/ kha cig gis bsgrub mi nus pas theg pa gsum gyi rigs so so na yod do zhes bya ba'i tha tshig ste/ 'di ni gtan tshigs gsum pa'o/ /'bras bu'i dbye ba dmigs pas na/ /zhes bya ba la/ 'di ltar 'bras bu bzang ngan rnam pa gsum yang yod par dmigs te/ gang zhe na/ nyan thos lta bu'i byang chub chung ngu dang / rang sangs rgyas lta bu'i byang chub 'bring dang / theg pa chen po lta bu'i byang chub mchog ste/ 'bras bu bzang ngan gsum dmigs pas de skyed par byed pa'i rgyu yang rnam pa gsum med du mi rung ngo / /'jig rten na yang 'bras dang nas la sogs pa dang shing tog rnam pa sna tshogs kyi 'bras bu tha dad pa snang ba de dag gi rgyu yang gcig tu ma zad kyi rgyu sna tshogs par yod pa bzhin du byang chub rnam pa gsum yod pas na de'i rgyu rigs kyang rnam pa gsum med du mi rung ngo / /gal te rigs gcig tu zad na 'bras bu rnam pa gsum du ci'i phyir 'gyur te/ 'di ni gtan tshigs bzhi pa'o/ /sems can gyi khams tha dad pa'i phyir khams kyi dbye ba dpag tu med de/ ri lu'i phung po'i mdo sde las gsungs pa bzhin zhes bya ba la/ ri lu'i phung po ni bru ra'i phung po la bya ste/ ji ltar ri lu'i phung po bstan pa'i mdo las/ bcom ldan 'das kyis 'di lta ste/ dge slong dag ri lu'i phung po 'phang du dpag tshad gcig tsam la/ chu zheng du dpag tshad gcig tsam yod pa'i ri lu'i phung po de las skyes bu la la zhig gis lo brgya'am lo brgya 'das nas ri lu gcig blangs te/ ri lu 'di ni nyan thos kyi khams su gtogs/ ri lu 'di ni rang sangs rgyas kyi khams su gtogs zhes smras na yang ri lu de myur du zad cing med par 'gyur gyi sems can gyi khams ni de ltar zad par mi 'gyur ro zhes gsungs pa lta bu'o/ /gsung rab 'di la khams zhes bya ba'i don gang zhe na/ khams mang po bstan pa'i mdo dang sbyar na ni mig la sogs pa'i khams tha dad par bstan pa'i sgo nas khams dpag tu med de 'on kyang 'di'i skabs su ni rigs la khams zhes bya ste/ khams zhes kyang bya/ rigs zhes kyang bya/ rgyu zhes kyang bya/ sa bon zhes kyang bya ste/ rnam grangs su gtogs so/ /de ltar sems can so so'i sems kyi rgyud la 'dod chags la sogs pa la spyod pa tha dad pa'i sgo nas rigs kyang tha dad de/ gang 'dod chags la sogs pa'i rigs yod pa de dag ni 'dod chags skyed pa nyid kyi rgyu byed kyi zhe sdang skyed pa'i rgyu mi byed pa bzhin du theg pa gsum gyi rigs tha dad pa rnam pa gsum yang med du mi rung ste/ rigs tha dad pa gsum med na ci'i phyir theg pa rnam pa gsum du 'gyur ba mi rigs so/ /mchog tu rnam par dbye ba'i tshigs su bcad pa zhes bya ba la/ gong du bsdus pa'i don las mchog ces smos pa de 'dir rnam pa bzhis ni theg pa chen po'i rigs mchog tu gyur pa bstan pa'i phyir tshigs su bcad pa rtsom mo zhes bya ba'i don to/ /khyad par 'phags dang thams cad dang / /rigs chen dang ni mi zad phyir/ /dge ba de ni rgyu yis byed/ /rigs kyi mchog ces bya ba yin/ /zhes bya ba la/ byang chub sems dpa'i rigs 'di ni dge ba rnam pa bzhi dag gi rgyu byed pas nyan thos la sogs pa'i rigs pas kyang mchog tu gyur par rig par bya'o/ /dge ba rnam pa bzhi po gang zhe na/ khyad par du 'phags pa'i rgyu byed pa dang / dge ba thams cad kyi rgyu byed pa dang / dge ba don chen po'i rgyu byed pa dang / dge ba mi zad pa'i rgyu byed pa'o/ /de la nyan thos rnams kyi rigs ni nyon mongs pa'i sgrib pa dang / shes bya'i sgrib pa gnyi ga dang bral ba'i dge ba gsal zhing 'bar ba'i rgyu mi byed la/ byang chub sems dpa'i rigs kyis ni nyon mongs pa dang / shes bya'i sgrib pa gnyi ga dang bral ba'i dge ba gsal zhing dag la khyad par du 'phags pa'i rgyu byed pas na nyan thos kyi rigs pas khyad par 'phags par rig par bya'o/ /khyad par du 'phags zhes bya ba ni gsal ba dang dag pa la bya'o/ /de la nyan thos kyi rigs kyis ni dge ba'i rtsa ba thams cad kyi rgyu mi byed de/ nyan thos rnams la stobs dang mi 'jigs pa dang ma 'dres pa la sogs pa'i dge ba med pa'i phyir ro/ /byang chub sems dpa'i rigs ni dge ba'i rtsa ba thams cad kyi rgyu byed de/ byang chub sems dpa'i rigs nas stobs dang mi 'jigs pa dang ma 'dres pa dang / sa dang pha rol tu phyin pa la sogs pa'i dge ba'i rtsa ba thams cad 'byung ba'i phyir te/ de bas na nyan thos kyi rigs pas khyad par 'phags par rig par bya'o/ /nyan thos kyi rigs kyis ni bdag gi don tsam sgrub par zad kyi gzhan gyi don mi sgrub pas dge ba don chen po'i rgyu mi byed la byang chub sems dpa'i rigs kyis ni bdag dang gzhan gnyi ga'i don sgrub pas dge ba'i don chen po'i rgyu byed pa'i phyir ro/ /nyan thos kyi rigs las byung ba'i dge ba'i rtsa ba ni phung po'i lhag ma dang bcas pa'i mya ngan las 'das pa'i bar du ni yod kyi phung po'i lhag ma ma lus par spangs pa'i mya ngan las 'das par gyur na dge ba'i rtsa ba thams cad rgyun chad de/ zad par 'gyur la byang chub sems dpa'i rigs kyis ni phung po'i lhag ma ma lus par spangs te/ mya ngan las 'das par gyur kyang stobs dang mi 'jigs pa la sogs pa'i dge ba'i rtsa ba 'khor ba'i mtha'i bar du yang zad par mi 'gyur ba'i rgyu byed pas na nyan thos kyi rigs pas khyad par 'phags par rig par bya'o/ /mtshan nyid rnam par dbye ba'i tshigs su bcad pa zhes bya ba la/ gong du bsdus pa'i don las mtshan nyid smos pa de la theg pa chen po'i rigs kyi mtshan nyid dang rang bzhin gang yin pa bstan te/ de yang mtshan nyid rnam pa bzhi yod de zhes bstan par bya ba'i phyir tshigs su bcad pa rtsom mo/ /rang bzhin dang ni rgyas pa dang / /gnas dang gnas pa'ang de yin te/ /zhes bya ba la theg pa chen po'i rigs kyi mtshan nyid rnam pa bzhi ste/ rang bzhin la gnas pa dang / yang dag par bsgrubs pa dang / gnas kyi rang bzhin dang / gnas pa'i rang bzhin no/ /de la rgyas pa zhes bya ba ni yang dag par bsgrubs pa'i rigs la bya bar rig par bya'o/ /de la rang bzhin la gnas pa ni 'khor ba thog ma med pa'i dus nas skye mched kyi khyad par sus kyang ma byas ma bcos par mngon par 'tshang rgya bar 'gyur ba'i sa bon dang ldan pa ste/ sa bon de dang ldan pas gdon mi za bar bla na med pa yang dag par rdzogs pa'i byang chub tu 'tshang rgya ba'i skal ba yod pa'o/ /yang dag par bsgrubs pa ni rang bzhin gyi rigs la gnas pa'i byang chub sems dpa' dan ma dge ba'i bshes gnyen gyis bla na med pa'i byang chub tu sems bskyed pa dang / byang chub sems dpa'i spyad pa spyod du bcug pa de'i tshe yang dag par bsgrubs pa'i rigs zhes bya'o/ /yang na nges pa'i rigs can rnams la ni rang bzhin la gnas pa zhes bya'o/ /ma nges pa'i rigs can rnams dge ba'i bshes gnyen gyis btang nas theg pa chen po'i rigs su nges par byed pa rnams la ni yang dag par bsgrubs pa zhes bya'o/ /yang na byang chub sems dpa'i rigs can rnams dang po nas byang chub sems dpa'i spyod pa 'ba' zhig la zhugs pa rnams la ni rang bzhin la gnas pa zhes bya'o/ /byang chub sems dpa'i rigs can nyan thos kyi spyad pa spyod pa las dge ba'i bshes gnyen gyi dbang gis byang chub sems dpa'i spyod pa byed du bcug pa la ni yang dag par bsgrubs pa zhes bya'o/ /dper na sa ni sems can rnams gnas pa'i gnas yin pas sems can ni de la gnas par byed pa yin pa bzhin du gang rang bzhin la gnas pa'i rigs de ni yang dag par bsgrubs pa'i rigs kyi gnas yin la yang dag par bsgrubs pa'i rigs ni de la gnas par byed pa yin te/ ci'i phyir zhe na/ rang bzhin gyi rigs la brten nas yang dag par bsgrubs pa'i rigs 'byung ba'i phyir ro/ /yod dang med par shes par bya/ /zhes bya ba la rang bzhin la gnas pa'i rigs ni rgyu yin la yang dag par bsgrubs pa'i rigs ni rgyu de'i 'bras bu yin pas rang bzhin la gnas pa'i dus na ni rgyu'i mtshan nyid du yod la 'bras bu'i mtshan nyid du med pa zhes bya ste/ rang bzhin la gnas pa tsam du byang chub tu sems bskyed pa la sogs pa'i 'bras bu med pa'i phyir ro/ /rgyur gyur pa'i rigs ni nam yang 'bras bu'i mtshan nyid du mi rigs te/ rgyu de la brten nas byang chub tu sems bskyed pa dang / stobs dang mi 'jigs pa la sogs pa'i yon tan gyi 'bras bu ni mi 'grub pa ma yin te 'grub bo/ /yang dag par bsgrubs pa'i rigs ni rgyu'i mtshan nyid du'ang yod/ 'bras bu'i mtshan nyid du yang yod pa zhes bya ste/ ci'i phyir zhe na/ rang bzhin gyis kyang de'i tshe yod pas rgyu'i mtshan nyid du yang yod la/ byang chub tu sems kyang bskyed pas 'bras bu'i mtshan nyid kyang yod do/ /yon tan ni sgrol ba'i don du'ang zhes bya ba la rigs zhes bya bas nges pa'i tshig ston te/ rgya gar skad du rigs la ni go tra zhes 'byung / yon tan la ni gu Na zhes 'byung ste/ go'i don ni gu Na zhes 'byung ba yon tan gyi don du ta ra'i don ni sgrol ba'i don du 'gro ste/ rigs 'dis byang chub tu sems bskyed pa dang / mos bas spyod pa'i sa'i rim pa dang / sa bcu'i rim pa nas sangs rgyas kyi sa'i bar gyi yon tan rnams mthar phyin cing sgrol bar byed la 'thob par byed pas na/ rigs la yon tan sgrol ba zhes bya ba'i don du 'dren to/ /mtshan ma rnam par dbye ba'i tshigs su bcad pa zhes bya ba la/ gong du bsdus pa'i don las mtshan ma zhes smos ba las/ mtshan ma'i don rgyas par 'chad de/ dper na dud pa snang ba'i mtshan mas me yod par brtags pa dang / chu bya snang ba'i mtshan mas chu yod par brtags pa bzhin du mtshan ma'am rtags rnam pa bzhi snang ba de la/ byang chub sems dpa'i rigs yod par bstan pa'i phyir tshigs su bcad pa rtsom mo zhes bya ba'i don to/ /snying rje dang ni zhes bya ba snga nas rab sbyor ba zhes bya ba gnyis su sbyar te/ rab sbyor zhes bya ba ni byang chub tu sems bskyed pa la sogs pa byed pa'o/ /byang chub tu sems bskyed pa'i sngon rol nas sems can gyi khams ni rtog pa rnam pa lngas sems can rtog ste/ sdug bsngal bar mthong nas/ sems can 'di dag gi rtog pa ji ltar bsam snyam du sems pa'i snying brtse ba yod na byang chub sems dpa'i rigs yod par rig par bya ste/ 'di ni mtshan ma dang po'o/ /mos pa dang zhes bya ba la theg pa chen po'i chos zab cing rgya che ba'i don ma rtogs kyang theg pa chen po'i chos zab cing rgya che ba thos pa tsam gyis spu ldang ba dang mchi ma dku ba'i mtshan nyid kyi dad pa dang / mos pa skye na byang chub sems dpa'i rigs yod par rig par bya ste/ 'di ni mtshan ma gnyis pa'o/ /bzod pa dang zhes bya ba la snying rje skyes nas sems can gyi don du mgo dang rkang lag gtong ba dang / grang ba dang tsha ba la sogs pa'i dka' ba spyod pa rnam pa sna tshogs bzod de/ dka' ba spyod pa rnams nyams su len na byang chub sems dpa'i rigs yod par rig par bya ste/ 'di ni mtshan ma gsum pa'o/ /dge ba dag kyang yang dag spyod/ /ces bya ba la/ dge ba'i sgras ni pha rol tu phyin pa drug la bya ste/ rang bzhin gyis sbyin pa byed pa la dga' ba dang / rang bzhin gyis tshul khrims bsrung bar dga' ba dang / rang bzhin gyis bzod pa la gnas par dga' ba dang / rang bzhin gyis brtson 'grus rtsom par dga' ba dang / rang bzhin gyis bsam gtan la gnas par dga' ba dang / rang bzhin gyis shes rab rno na byang chub sems dpa'i rigs yod par rig par bya ste/ 'di ni mtshan ma bzhi pa'o/ /rigs rab tu dbye ba'i tshigs su bcad pa zhes bya ba la gong du bsdus pa'i don las rab tu dbye ba zhes smos pa la/ byang chub sems dpa'i rigs la phye na du yod pa ston te/ byang chub sems dpa'i rigs la phye na rnam pa bzhi yod do zhes bstan pa'i phyir tshigs su bcad pa rtsom mo zhes bya ba'i don to/ /rigs ni nges dang ma nges pa/ /'phrog pa dang ni mi 'phrogs pa/ /rkyen gyis rigs kyi dbye ba ni/ /de ni mdor na rnam pa bzhi/ /zhes bya la mdor na byang chub sems dpa'i rigs la phye na rnam pa bzhi ste gang zhe na/ rigs nges pa dang rigs ma nges pa dang / rkyen gyis 'phrog pa dang / rkyen gyis mi 'phrogs pa'o/ /de la rigs nges pa ni gang nyan thos su rigs nges par gnas pa dang / rang sangs rgyas su rigs nges par gnas pa dang / sangs rgyas su rigs nges par gnas pa ste/ nyan thos su rigs nges par gnas pa yang rigs des nyan thos kyi byang chub nyid 'thob kyi ji ltar byas kyang nams kyang rang sangs rgyas kyi byang chub dang / sangs rgyas su 'thob pa'i rgyur mi 'gyur ro/ /rang sangs rgyas kyi rigs nges pa yang rigs des rang sangs rgyas kyi byang chub nyid thob kyi ji ltar byas kyang nams kyang nyan thos dang rang sangs rgyas kyi byang chub 'thob pa'i rgyur mi 'gyur ro/ /sangs rgyas kyi rigs can yang rigs des sangs rgyas kyi byang chub nyid 'thob kyi ji ltar byas kyang nams kyang nyan thos dang rang sangs rgyas kyi byang chub tu mi 'gyur ba'o/ /rigs ma nges pa ni rkyen gyi dbang gis nyan thos dang rang sangs rgyas dang sangs rgyas kyi rigs gang yang rung ba cig gi rgyur 'gyur te/ nyan thos kyi dge ba'i bshes gnyen dag gis bsgral na ni nyan thos kyi rigs can du yang 'gyur/ rang sangs rgyas kyi dge ba'i bshes gnyen gyis bsgral na ni/ rang sangs rgyas kyi rigs can du yang 'gyur/ byang chub sems dpa'i dge ba'i bshes gnyen gyis bsgral na ni sangs rgyas kyi rigs can du yang 'gyur ba'o/ /'di yang dpe bstan pa/ ri'i phyogs la la ni sa dang rdo la sogs pa yod pa gdon mi za bar gser nyid du 'gyur gyi/ dngul dang zangs la sogs par mi 'gyur ba yang yod/ ri'i phyogs la la na sa dang rdo la sogs pa yod pa dngul nyid du 'gyur gyi/ gser dang zangs la sogs par mi 'gyur ba yang yod/ ri'i phyogs la la na sa dang rdo la sogs pa yod pa zangs nyid du 'gyur gyi/ /gser dang dngul la sogs par mi 'gyur ba yod pa la ri'i phyogs la la ni sa dang rdo la sogs pa yod pa bzhu zhing sbyangs pa dang / sman gyi khyad par las ma nges te cir yang 'gyur ba yang yod de/ gal te gser mgar gyis sbyangs shing bzhu na ni gser du yang 'gyur/ dngul mgar gyis sbyangs shing bzhu na ni dngul du yang 'gyur/ zangs mgar gyis sbyangs shing bzhu na ni zangs su yang 'gyur ba lta bu'o/ /de bas na rigs nges pa rnams ni rkyen gyis mi 'phrogs pa zhes bya ste/ dge ba'i bshes gnyen gyis ji ltar byas kyang rang gi byang chub nyid len pa byang chub gzhan mi len pa'i phyir ro/ /rigs ma nges pa rnams ni rkyen gyis 'phrog pa zhes bya ste/ dge ba'i bshes gnyen gyis gar khrid pa de'i 'bras bu 'thob pa'i phyir ro/ /nyes pa rnam par dbye ba'i tshigs su bcad pa zhes bya ba la/ byang chub sems dpa'i rigs yod kyang nye ba'i nyon mongs pa bzhi'i skyon dang ldan na skyon des bsgribs pas sa dang pha rol tu phyin pa'i spyod pa la 'jug par mi nus par bstan pa'i phyir tshigs su bcad pa rtsom mo/ /nyon mongs goms dang zhes bya ba la/ byang chub sems dpa'i rigs yod kyang 'dod chags dang zhe sdang dang gti mug la sogs pa'i nyon mongs pa la goms shing 'dris par byas pas 'dod chags bdo ba dang zhe sdang bdo ba dang gti mug bdo bar 'gyur bas nyon mongs pa 'ba' zhig la 'jug gi pha rol tu phyin pa spyod pa la spyod mi nus par gyur pa 'di yang rigs kyi skyon te nyes pa dang po'o/ /grogs ngan dang zhes bya ba la/ byang chub sems dpa'i rigs yod kyang blun po sdig pa mi dge ba'i chos la dga' ba rnams kyis bstan te/ sdig pa'i las dag byed du bcug pas pha rol tu phyin pa spyod pa la 'jug par mi byed pa 'di yang rigs kyi skyon te 'di ni nyes pa gnyis pa'o/ /phongs pa dang zhes bya ba la dbul por gyur pas bza' ba dang bgo ba la sogs pa'i yo byad kyis phongs pa'i sbyin pa la sogs pa byed mi nus shing yo byad kyi don du sdig pa'i las dag byed pa yang rigs kyi skyon te 'di ni nyes pa gsum pa'o/ /gzhan gyi dbang zhes bya ba la rgyal po dang rkun po dang rje bo la sogs pa'i dbang du gyur nas srog gcod pa la sogs pa'i las mi byed du mi gnang ba dang / sbyin pa la sogs pa dge ba byed du mi ster ba yang rigs kyi skyon te 'di ni nyes pa bzhi pa'o/ /legs pa rnam par dbye ba'i tshigs su bcad pa zhes bya ba/ gong du bsdus pa'i don las legs pa zhes 'byung ba'i don rgyas par 'chad de/ byang chub sems dpa'i rigs yod na rigs gsum la yod pa de la 'khor ba na so so'i skye bo phal pa byed kyang yon tan rnam pa bzhi 'thob par bstan pa'i phyir tshigs su bcad pa rtsom mo zhes bya ba'i don to/ /ring nas ngan 'gror 'gro ba dang / /zhes bya ba la/ nyan thos dang rang sangs rgyas kyi rigs can dang / rigs med pa dag gis mtshams med pa lnga la sogs pa'i sdig pa'i las byas na ni shi 'phos ma thag tu sems can dmyal ba la sogs pa ngan song gsum du skye la/ byang chub sems dpa'i rigs can gyis mtshams med pa la sogs pa'i las byas na ni bskal pa'i lo mang po zhig gis bcad nas/ phyis nam zhig na ngan song gi 'bras bu myong bar 'gyur te/ 'di ni legs pa dang po'o/ /de nas kyang ni myur du thar/ /zhes bya ba la nyan thos dang rang sangs rgyas kyi rigs can dang / rigs med pa dag gis mtshams med pa la sogs pa'i las byas na ni sems can dmyal ba'i tshe'i tshad kyis bskal pa ma zad kyi bar du dmyal ba la sogs pa ngan song gi gnas na gnas par 'gyur la/ byang chub sems dpa'i rigs can rnams kyis mtshams med pa la sogs pa'i las byas na dmyal ba'i tshe'i tshad zad zad du mi 'dug gi dus cung zad cig 'dug nas de nas kyang sems can dmyal ba'i gnas nas myur du thar bar 'gyur te/ 'di ni legs pa gnyis pa'o/ /de yang dper na rgyal po ma skyes dgra lta bu mtshams med pa lnga byas kyang rigs kyi mthus sems can dmyal ba'i sdug bsngal dar gyi pho long bsdams pa tsam zhig myong ba lta bu'o/ /sdug bsngal myong ba yang chung ba ste zhes bya ba la nyan thos dang rang sangs rgyas kyi rigs can dang / rigs med pa dag gis mtshams med pa la sogs pa'i las byas na lus dang sems la gnod pa'i sdug bsngal sdug cing drag la mi bzad pa myong bar 'gyur na byang chub sems dpa'i rigs can rnams kyis mtshams med pa la sogs pa'i las byas na lus dang sems la gnod pa srab cing chung ba myong bar 'gyur te/ 'di ni legs pa gsum pa'o/ /skyo zhing sems can smin par byed/ /ces bya ba la nyan thos dang rang sangs rgyas kyi rigs can dang / rigs med pa dag gis mtshams med pa la sogs pa'i las byas na sems can dmyal bar skyes nas dmyal ba'i sdug bsngal myong bar 'gyur ba dang / phan tshun zhe sdang skye la byang chub sems dpa'i rigs can gyis mtshams med pa la sogs pa'i las byas na dmyal ba la sogs pa'i gnas su skye ba dang / dmyal ba'i sdug bsngal myong bar gyur nas mi dge ba'i las la skyo ba'i sems skye'o/ /skyo ba skyes nas dmyal ba'i sems can 'di dag kyang bdag dang 'dra bar sdug bsngal myong ngo zhes de dag la snying rje'o/ /snying rje skyes nas sems can de dag dge ba la 'jog cing yongs su smin par byed de/ 'di ni legs pa bzhi pa'o/ /gser chen po'i rigs kyi dpe'i tshigs su bcad pa zhes bya ba la gong du sdud pa'i don las byang chub sems dpa'i rigs ni gser chen po'i rigs dang rin po che'i rigs dang 'dra'o zhes smos pa la byang chub sems dpa'i rigs 'di gser chen po'i rigs dang 'dra bar ston te/ dper na gser rnam pa bzhi'i rten dang gzhi dang / sa bon byed pa'i gser la gser chen po'i rigs zhes bya ba de bzhin du/ byang chub sems dpa'i rigs 'di yang yon tan rnam pa bzhi'i gzhi dang rten byed pas gser chen po'i rigs dang 'dra bar bstan pa'i phyir tshigs su bcad pa rtsom mo zhes bya ba'i don to/ /gser gyi rigs bzhin shes par bya/ /dpag tu med pa dge ba'i gnas/ /ye shes dri med ldan pa'i gnas/ /mthun rnams kyi yang gnas yin no/ /zhes bya ba la dper na gser chen po'i rigs ni gser mang po'i gnas byed pa dang / gser 'od gsal ba'i gnas byed pa dang / gser dri ma med pa'i gnas byed pa dang / gser las su rung ba'i gnas byed do/ /de bzhin du byang chub sems dpa'i rigs kyang yon tan rnam pa bzhi'i gnas byed pas na gser chen po'i rigs bzhin du shes par bya'o/ /dper na gser chen po'i gser srang grangs 'bum phrag grangs med pa mang po 'byung ba'i gnas byed pa de bzhin du/ byang chub sems dpa'i rigs 'dis kyang pha rol tu phyin pa dang / sa dang byang chub kyi phyogs dang / stobs dang mi 'jigs pa la sogs pa'i dge ba dpag tu med pa'i gnas byed pas gser chen po'i rigs dang 'dra'o/ /dper na gser chen po'i rigs gser 'od 'bar zhing 'tsher ba'i gnas byed pa de bzhin du/ byang chub sems dpa'i rigs kyis kyang chos rnams la rang dang spyi'i mtshan nyid la phyin ci ma log par shes par byed pa rnam par mi rtog pa'i ye shes dang mnyam pa nyid kyi ye shes dang / so sor kun tu rtog pa'i ye shes dang / bya ba sgrub pa'i ye shes gsal zhing 'od dang bcas pa'i gnas su gyur pas na gser chen po dang 'dra'o/ /gser la yang kha cig 'tsher zhing 'od gsal ba dang dri ma cung zad yod kyang 'od gsal lo zhes smras te/ gser chen po'i rigs las byung ba'i gser de la ni dri ma cung zad kyang med pas na dri ma med pa zhes bya'o/ /yang gser kha cig ma bsregs pa'i tshe ser bar 'tsher mod kyi/ bsregs nas kha dog nag po dang skya bor 'gyur ba yod do/ /gser chen po'i rigs las skyes pa'i gser rnams la ni mer bsregs na yang kha dog 'gyur ba med pas dri ma med pa zhes bya'o/ /dper na gser chen po'i rigs dri ma med par byed pa de bzhin du byang chub sems dpa'i rigs 'di yang nyon mongs pa'i bag chags kyi dri ma thams cad spangs pa'i mya ngan las 'das pa'i gnas byed pas gser chen po'i rigs dang 'dra'o/ /dper na gser chen po'i rigs ni gser chen po'i rigs de las byung ba'i gser gyis mgo rgyan dang dpung rgyan la sogs par byas na yang 'gas pa khro med par gser las su rung ba'i gnas su gyur pa de bzhin du/ byang chub sems dpa'i rigs 'di yang rdzu 'phrul gyi mig la sogs pa mngon par shes pa'i gnas su 'gyur bas na gser chen po'i rigs dang 'dra'o/ /nyon mongs pa'i dri ma med par 'thob pa'i gnas dang zhes bya ba la/ nyon mongs pa'i gnas ngan len spangs na de dang bral ba dag thob pa'i gnas dang / rten du rig ste gyur zhes bya ba'i don to/ /yang na nyon mongs pa spangs na zag pa med cing dri ma med pa'i chos skye ste rigs de zag pa med pa'i chos mthong ba'i rten du gyur zhes bya ba'i don to/ /rin po che chen po'i rigs kyi dpe'i tshigs su bcad pa zhes bya ba la/ byang chub sems dpa'i rigs 'di ni rin po che chen po'i rigs dang 'dra ste/ dper na rin po che chen po'i rigs rin po che chen po'i gzhi'i gnas byed pa de bzhin du byang chub sems dpa'i rigs de yang yon tan rnam pa bzhi'i gnas byed pas rin po che chen po'i rigs dang 'dra bar bstan pa'i phyir tshigs su bcad pa rtsom mo/ /rin po che rnam pa bzhi ni rigs phun sum tshogs pa dang / kha dog phun sum tshogs pa dang / dbyibs phun sum tshogs pa dang / tshad phun sum tshogs pa'o/ / rin chen mchog rigs bzhir shes bya/ /byang chub chen po'i rgyu yi phyir/ /ye shes che dang ting 'dzin 'phags/ /sems can mang po'i gnas kyi phyir/ /zhes bya ba la/ dper na rin po che'i rigs ni lcags dang zangs dang mching bu la sogs pa 'byung ba'i gnas mi byed kyi mu tig la sogs pa'i rigs phun sum tshogs pa'i rin po che'i gnas su gyur pa de bzhin du/ byang chub sems dpa'i rigs de yang nyan thos dang rang sangs rgyas kyi byang chub kyi gnas su mi 'gyur gyi rdo rje lta bu'i ting nge 'dzin gyi rjes las byung ba nyon mongs pa'i sgrib pa thams cad spangs pa'i byang chub chen po'i gnas su gyur pas na rin po che chen po'i rigs dang 'dra'o/ /dper na rin po che chen po'i rigs de rin po che 'tsher zhing 'bar ba'i gnas su 'gyur ba de bzhin du byang chub sems dpa'i rigs de yang me long lta bu'i ye shes la sogs pa ye shes bzhi'i gnas su 'gyur bas rin po che chen po'i rigs dang 'dra'o/ /dper na rin po che chen po'i rigs de ni/ rin po che chen po de zad de zad de'am chag pa dbyibs mi sdug pa ma yin pa gru bzhi dang zlum po la sogs pa'i dbyibs kyang mdzes pa'i gnas su 'gyur ba de bzhin du/ byang chub sems dpa'i rigs 'di yang 'phags pa'i ting nge 'dzin dang / dpa' bar 'gro ba'i ting nge 'dzin dang / nam mkha'i mdzod kyi ting nge 'dzin la sogs pa'i gnas su gyur bas na rin po che chen po'i rigs dang 'dra'o/ /dper na rin po che chen po'i rigs chen por dbyibs che ba dang / rin po che mang po'i gnas su 'gyur ba de bzhin du byang chub sems dpa'i rigs 'di yang sems can mtha' yas pa mang po mya ngan las 'das pa dang / thams cad mkhyen pa'i ye shes la 'jug pa'i gnas su 'gyur bas na rin po che chen po'i rigs dang 'dra'o/ /rigs med pa la rnam par dbye ba'i tshigs su bcad pa zhes bya ba la/ gong du nyan thos kyi rigs dang / rang sangs rgyas kyi rigs dang / byang chub sems dpa'i rigs dang / rigs ma nges pa bshad nas/ da ni rigs med pa 'chad de/ rigs med pa zhes bya ba 'di yong ye mya ngan las mi 'da' ste/ nam yang mya ngan las mi 'da' ba'i phyir rigs zhes bya ba'am/ 'on kyang bskal pa dus thang cig zad cig tu mya ngan las mi 'da' la phyis mya ngan las 'da' ba la rigs med pa zhes bya zhe na/ de gnyis ka la rigs med pa zhes bstan pa'i phyir tshigs su bcad pa rtsom mo/ /la la gcig tu mi dge spyod/ /la la dge ba'i chos rnams bcom/ /la la mthar phyogs dge ba med/ dkar po chung yod rgyu dang bral/ zhes bya ba la/ rigs med pa zhes bya ba'i don ni theg pa gsum gyi mya ngan las 'das par yongs su mya ngan las 'da' zhing mya ngan las 'da' bar skal ba med pa'i rang bzhin can la bya ste/ yongs su mya ngan las mi 'da' ba'i chos can la yang rnam pa gnyis te/ de'i dus su yongs su mya ngan las mi 'da' ba'i chos can dang / de'i dus na mya ngan las mi 'da' ba'i chos can no/ /de'i dus su yongs su mya ngan las mi 'da' ba'i chos can rnam pa bzhi ste/ gang zhe na/ de'i phyir/ la la gcig tu mi dge spyod/ /ces smos te/ di'i las nges par byed pa'i dbang du byas nas gsungs pa yin no/ /de la gang zag kha cig la byang chub sems dpa'i rigs yod kyang las nges par byed par 'gyur ba'i dbang gis ma gsod pa la sogs pa mtshams med pa'i las gdon mi za bar byed par 'gyur te/ de'i dus na rigs yod kyang ma gsod pa'i las ngan pa byas pas rigs des mya ngan las 'das pa thob par mi 'gyur te/ de bas na de yang de'i dus na yongs su mya ngan las mi 'da' ba'i chos can yin pas rigs med pa zhes bya ba ste/ 'di ni rnam pa gcig go/ /la la dge ba'i chos rnams bcom/ /zhes bya ba la/ gang zag kha cig la byang chub sems dpa'i rigs yod kyang mi dge ba'i bshes gnyen gyi rkyen gyis chad pa'i lta ba la phyogs nas las dge ba med/ mi dge ba med/ 'bras bu bde ba med/ sdug bsngal med/ tshe 'di med/ tshe phyi ma med/ dkon mchog gsum med ces bya ba la sogs pa'i log pa'i lta ba la zhugs pas dge ba'i rtsa ba thams cad rtsa ba nas bcom ste/ bskal pa du ma zhig tu yongs su mya ngan las 'da' bar mi 'gyur ro/ /'di yang de'i dus na yongs su mya ngan las mi 'da' ba'i chos can yin pas rigs med pa zhes bya ste rnam pa gnyis pa'o/ /la la mthar phyogs dge ba med/ /ces bya ba la/ gang zag la la byang chub sems dpa'i rigs yod kyang mya ngan las 'das pa thob par 'gyur ba'i bsod nams dang ye shes kyi tshogs mi sogs kyi lha dang mi'i gnas la sogs par 'khor bar skye ba 'ba' zhig gi dge ba bsags pas 'khor ba 'ba' zhig tu skye ba'i bskal pa du mar yang mya ngan las 'da' ba mi 'thob po/ /'di yang de'i dus na yongs su mya ngan las mi 'da' ba'i chos can yin pas rigs med pa zhes bya ste/ 'di ni rnam pa gsum pa'o/ /dkar po chung yod ces bya ba la/ gang zag la la byang chub sems dpa'i rigs yod kyang bsod nams dang ye shes kyi tshogs rdzogs par mi sogs kyi dkar po'i chos mya ngan las mi 'da' ba'i rgyu cung zad tsam bsags pas bskal pa du mar yang yongs su mya ngan las mi 'da'o/ /'di yongs su mya ngan las mi 'da' ba'i chos can yin pas rigs med pa zhes bya ste/ 'di ni rnam pa bzhi pa'o/ /de'i dus na yongs su mya ngan las mi 'da' ba'i chos can zhes bya ba ni mtshams med pa byed pa rnams kyang mtshams med pa byed pa'i las ma btang gi bar du mya ngan las mi 'da' ba dang / log pa'i lta bas dge ba'i rtsa ba chad pa rnams log pa'i lta ba dang bral te/ dge ba'i rtsa ba ma skyes kyi bar du yongs su mya ngan las mi 'da' ba dang / phyogs thar pa'i phyogs kyi dge ba'i rtsa ba mi sogs pa rnams kyang thar pa'i phyogs kyi dge ba'i rtsa ba ma bsags kyi bar du mya ngan las mi 'da' ba dang / dkar po chung ba'i rnams kyang bsod nams dang ye shes kyi tshogs ma rdzogs kyi bar du mya ngan las mi 'da' bas de'i dus na yongs su mya ngan las mi 'da' ba'i chos can zhes bya'o/ /yongs su mya ngan las mi 'da' ba ni gcig yod de/ de bstan pa'i phyir rgyu dang bral zhes bya ba smos te/ rgyu zhes bya ba ni theg pa gsum du mya ngan las 'da' ba'i dge ba'i rtsa ba dang rigs med pa ste/ de ltar rigs med pas na gang zag de theg pa gsum gyi mya ngan las 'das pa rnams kyang mi 'thob pa'i phyir ro/ /yongs su mi 'da' ba'i chos can zhes bya ste/ dper na rdo dang shing la sogs pa'i rang bzhin 'di rnams kyang sems dang sems las byung ba lta bur shes pa'i rang bzhin can du mi 'gyur ba dang 'dra'o/ /'dir rigs med pa la gnas pa ni yongs su mya ngan las mi 'da' ba'i chos can du 'dod do zhes bya ba la/ rigs med ces smras pa/ med pa'i sgras 'di smad pa'i don du yang mthong ste/ bu ngan pa dang chung ma ngan pa la bu med chung ma med ces bya ba lta bu'o/ / chung ma'i don du yang mthong ste/ bu mo rked pa 'phra ba la rked pa med ces bya ba lta bu'o/ /yong med pa'i don du yang mthong ste rnyed pa med bskur sti med ces bya ba lta bu'o/ /'di'i skabs su ni med pa'i sgra smad pa'i don dang po de ye med pa'i don du blta ste/ de la gcig tu mi dge ba spyod pa nas brtsams te/ dge ba chung ba yan chad kyis de'i dus na yongs su mya ngan las mi 'da' bas rigs med par bshad pa'i don de smad pa'i don du blta ste/ bu ngan pa la bu med ces bya ba bzhin du rigs de yang de'i dus na ngan cing zhen par gyur pas rigs med pa zhes btags so/ /gang rgyu dang bral bas yongs su mya ngan las mi 'da' ba'i phyir rigs med par bshad pa'i rigs med pa'i sgra 'di ni yong ye med pa'i don du blta ste/ de ni gtan du mya ngan las 'das pa mi 'thob pa'i phyir ro/ /rang bzhin yongs su rgyas pa'i rigs kyi che ba nyid bsgrub pa tshigs su bcad pa zhes bya ba la/ nyan thos kyi rigs dang rang sangs rgyas kyi rigs dag gis ni byang chub chen po 'thob par mi nus pas shin tu rgya che ba dang / mthu che ba zhes mi bya'o/ /byang chub sems dpa'i rigs kyis ni byang chub chen po 'thob par byed pas na rang bzhin gyis rgya che ba dang / mthu che bar bsgrub pa'i phyir tshigs su bcad pa rtsom mo zhes bya ba'i don to/ /zab cing rgya cher smra ba gzhan la phan phyir bshad pa chos chen la/ /mi shes par ni dad 'gyur shin tu rgya che la/ /zhes bya ba la/ chos chen po ni theg pa chen po'i chos la bya'o/ /chos de'i nang nas gang zag dang chos la bdag med pa dang / ma skyes pa dang / mi 'gag pa la sogs pa 'byung bas zab pa'o/ /sa dang pha rol tu phyin pa dang / stobs dang mi 'jigs pa la sogs pa 'byung bas rgya che ba'o/ /yang na ye shes kyi tshogs 'byung bas zab pa'o/ /bsod nams kyi tshogs 'byung bas sgra che ba'o/ /de ltar zab cing rgya che ba 'byung ba'i chos de dang sems can rnams tshe 'di la bsod nams dang ye shes kyi tshogs la bzhag pa dang / tshe rabs gzhan du mya ngan las 'das pa thob par bya ba'i phyir bshad pas na gzhan la phan pa'i phyir bshad pa zhes bya'o/ /'di ltar byang chub sems dpa'i rigs kyi mthus zab cing rgya che ba'i theg pa chen po'i don ma rtogs shing mi shes par yang thos pa tsam gyi sgo nas dad pa dang mos pa rgya che zhing rlabs chen po 'byung bas na/ mi shes par ni dad 'gyur shin tu rgya che ba/ /zhes bya'o/ /legs par bsgrub la bzod ces bya ba la/ sems can gyi don du mgo dang rkang lag la sogs pa btang ba'i dka' ba spyad pa dang / sa dang pha rol tu phyin pa bsgrub pa ni legs par bsgrub pa zhes bya ste/ rigs kyi mthus de dag thams cad kyang bsgrub nus pas na legs par bsgrub bzod ces bya'o/ /phun sum tshogs pa'i mtha' dang zhes bya ba la/ de ltar theg pa chen po'i chos la yang mos/ legs par bsgrub pa la yang mi skyo bar bsgrub pas bsod nams dang ye shes kyi tshogs phun sum tshogs par bsgrubs pa'i mjug tu bla na med pa'i byang chub chen po'i phun sum tshogs pa rnam pa gnyis las khyad par du gyur pa thob par 'gyur te/ 'di yang rigs rgya che ba dang / mthu rgya che ba las 'thob bo zhes bya ba'i don to/ /bla na med pa'i byang chub kyi phun sum tshogs pa de ci 'dra ba zhig ce na/ de'i phyir rnam gnyis mchog ste zhes bya ba smos te/ bla na med pa'i byang chub kyi phun sum tshogs pa de'ang phun sum tshogs pa rnam pa gnyis las khyad par du gyur pa yin no zhes bya ba'i don to/ /phun sum tshogs pa gnyis ni brgya byin la sogs pa 'jig rten gyi phun sum tshogs pa dang / nyan thos la sogs pa 'jig rten las 'das pa'i phun sum tshogs pa'o/ /de dag de ltar 'gyur zhes byang chub sems dpa' de dag gi rigs de ni theg pa chen po'i chos la mos pa skye ba dang / bsgrub pa la skyo ba med pa dang / mthar byang chub chen po'i phun sum tshogs par 'gyur te/ de'i phyir mthu che'o zhes bya bar sbyar ro/ /de yi rang bzhin yon tan ldan pa byang chub chen po'i rigs rgyas shes par bya/ /zhes bya ba ni byang chub sems dpa'i rigs de ni gong du bshad pa'i tshul ltar na rang bzhin gyis yon tan dang ldan pa zhes bya ste/ de ltar rang bzhin gyis yon tan dang ldan pas rigs de shin tu rgya che ba dang / mthu che bar bya ba'i don to/ /rigs kyi 'bras bu'i khyad par du tshigs su bcad pa zhes bya ba la/ nyan thos kyi rigs dang rang sangs rgyas kyi rigs kyis rang rang gi 'bras bu thob pa bas byang chub sems dpa'i rigs kyis byang chub chen po'i 'bras bu thob pa khyad zhugs par bstan pa'i phyir tshigs su bcad pa rtsom mo zhes bya ba'i don to/ /shin tu yangs pa'i yon tan byang chub shing skyes pas/ /stug pos bde zhing sdug bsngal zhi bas dmigs pa'i phyir/ /bdag dang gzhan la phan bde bya ba 'bras bu bas/ /rtsa ba bzang po bzhin du rigs 'di mchog yin no/ /zhes bya ba la/ rtsa ba bzang po ni rtsa ba brtan pa dang / rtsa ba ma rul ba'o/ /dper na rtsa ba bzang po'i shing las sdong po dang / me tog la sogs pa brtan zhing bzang po 'byung ba dang / yal ga dang / 'dab ma la sogs pa sdug cing mdzes pa 'byung ba dang / de'i rgyus grib ma bsil ba yod pa dang / 'bras bu phun sum tshogs pas gzhan la phan pa byed pa bzhin du byang chub kyi rigs 'di las kyang de dang mthun pa'i yon tan dag 'byung bas byang chub kyi rigs 'di ni shing gi rtsa ba bzang po dang 'dra'o/ /dper na shing rtsa ba bzang po las sdong po sbom zhing bskams pa dang sungs ba med pa 'byung ba dang / me tog sna tshogs pa 'byung ba de bzhin du/ rigs de las kyang stobs dang mi 'jigs pa dang / ma 'dres pa la sogs pa'i yon tan rgya chen me tog dang 'dra bar 'byung ba dang / zad la mi skye ba'i ye shes kyang byang chub chen po cis kyang mi tshugs pa shing sdong lta bu skyes pas na shing gi rtsa ba ma zad par shes par bya'o/ /dper na shing rtsa ba bzang po las yal ga dang 'dab ma stug po yod pas grib ma'i bsil ba dang ldan pa'i phyir/ sems can rnams kyi tsha ba'i sdug bsngal ni sel/ bsil ba'i bde ba thob pa de bzhin du/ byang chub sems dpa'i rigs 'di las kyang sa dang pha rol tu phyin pa'i yal ga dang 'dab ma stug po byung bas sems can gyi bde ba stug po rgya che ba ni thob par byed pa mthong / sdug bsngal stug po mi bzad pa ni zhi bar byed par mthong bas rtsa ba bzang po dang 'dra'o/ /dper na rtsa ba bzang po'i shing la 'bras bu phun sum tshogs pa yod pas sems can gyi don phun sum tshogs par byed pa de bzhin du byang chub kyi rigs 'di las kyang bdag la phan pa la dang bde bar bya ba dang / gzhan la phan pa dang bde bar bya ba'i 'bras bu 'byung bas na rtsa ba bzang po dang 'dra'o/ /de la shing rtsa ba bzang na sdong po la sogs pa 'gyel bar mi 'gyur bas rtsa ba bzang po nyid bdag gi don to/ /yal ga dang 'dab ma dang me tog dang 'bras bu rgya che zhing stug pas ni gzhan la phan par byed pas gzhan gyi don to/ /de bzhin du byang chub kyi rigs la yang shin tu yangs pa'i yon tan gyi byang chub kyi shing skyes pa ni bdag gi don to/ /stug pos bde zhing sdug bsngal zhi ba dmigs pa ni gzhan gyi don to/ /bdag dang gzhan la phan pa'i 'bras bu zhes bya ba la sogs pa la/ byang chub kyi shing gi rtsa bar byang chub kyi rigs 'di gyur pas/ rigs de las bdag dang gzhan la phan pa'i 'bras bu 'byung bas na byang chub kyi rigs kyi yon tan bsngags pa yin no zhes bya ba'i don to/ /rigs kyi skabs bshad pa rdzogs so// //rigs kyi skabs kyi rjes la/ sems bskyed pa'i skabs bshad par cis 'brel zhe na/ gong du rigs bshad pa'i rjes la/ shin tu yangs pa'i yon tan byang chub shing skyes pas/ /stug po bde zhing sdug bsngal zhi ba dmigs pa'i phyir/ /bdag dang gzhan la phan bde bya bas 'bras bu bas/ /rtsa ba bzang po bzhin du rigs 'di mchog yin no/ /zhes bshad de ji ltar rtsa ba bzang po'i shing dang rtsa ba bzang po nyid rang gi don phun sum tshogs pa'o/ /de la yal ga dang 'dab ma dang me tog dang 'bras bu la sogs pa rgya chen po yod pas ni 'gro ba mang po'i longs spyod du gyur pas gzhan gyi don phun sum tshogs pa zhes bya'o/ /de bzhin du rang bzhin la gnas pa'i rigs yod na/ byang chub sems dpa' rnams kyis bdag dang gzhan gyi don gnyis 'grub par 'gyur ro/ / de la rnam pa gnyis 'grub pa yang rigs 'ba' zhig yod pa tsam gyis mi chog gi rigs la brten nas sems bskyed pa la sogs pa'i rim pas bsgrubs na 'dod pa 'grub kyi sems ma bskyed na ni mi 'grub bo/ /sems bskyed pa la sogs pa la yang rigs yod na 'dod pa 'byung ste gang la rigs yod pa de gdon mi za bar bla na med pa'i byang chub tu sems bskyed par 'gyur bas na rigs kyi skabs kyi rjes la sems bskyed par 'gyur ba'i skabs bshad par 'brel to/ /yang na sems bskyed pa'i rang bzhin ni 'di ltar gyur cig ces smon lam 'debs pa'i mtshan nyid do/ /smon lam 'debs pa de yang bdag nyid bla na med pa'i byang chub 'dod pa dang / sems can gyi don byed par 'dod pa'i phyir smon lam 'debs te/ sems can gyi don bya ba'i thabs ni bla na med pa'i byang chub tu sangs rgyas pa thob pa'o/ /de bas na sems can gyi thabs su gyur pas bla na med pa'i byang chub bsgrubs na byang chub tu sems bskyed pa la sogs pa'i rim pas bsgrub pa'o/ /de la yang rigs dang bcas pa'i stobs kyis byang chub tu sems bskyed na ni sems can de ldog pa med pa'i chos su 'gyur ro zhes bstan pa'i phyir rigs kyi rjes la sems bskyed pa'i skabs bshad par 'brel to/ /sems bskyed pa'i mtshan nyid du tshigs su bcad pa zhes bya ba la/ byang chub tu sems bskyed pa'i mtshan nyid du rang bzhin bstan par bya ba'i phyir tshigs su bcad pa rtsom mo zhes bya ba'i don to/ /spro ba che zhing rtsom pa che/ /don chen po dga' thob pa che/ /byang chub sems dpa' sems dpa' ste/ / don gnyis dang ni sems bskyed pa'o/ /zhes bya ba la/ byang chub kyi sems kyi mtshan nyid ni spro ba che ba'i mtshan nyid dang / rtsom pa che ba'i mtshan nyid dang / don che ba'i mtshan nyid dang / thob pa che ba'i mtshan nyid dang / don gnyis la dmigs pa'i mtshan nyid de/ gong du bshad pa rnams bsgrub par bya'o snyam du sems bskyed pa'i sems las byung bas sems dpa' zhes bya ba'i sems las g.yo ba'i rang bzhin la sems bskyed pa zhes bya'o/ /spro ba che ba ni go cha'i brtson 'grus kyis theg pa chen po'i chos la zab cing rgya che ba'i chos rnams mnyan pa dang / bsam pa la sogs pa'i sgo nas rtogs par bya'o zhes sems spro zhing mi ldog pa dang / sems can gyi don du bskal pa grangs med par mgo dang rkang lag la sogs pa gtong ba'i dka' ba spyod pa la spro zhing mi ldog pa'i sems bskyed pa dang po la spro ba che ba zhes bya'o/ /rtsom pa che ba ni de ltar go cha'i brtson 'grus brtsams nas go cha brtsams shing khas blangs pa bzhin du sbyor ba'i brtson 'grus kyi ji ltar go cha bgo zhing khas blangs pa bzhin du zab cing rgya che ba'i chos rtogs par bya ba'i phyir ni chos nyan pa dang / sems pa goms pa la 'jug /sems can gyi don du ni pha rol tu phyin pa drug la sogs pa dang dka' ba spyad pa rnam pa sna tshogs bsgrub pa'i phyir rtsom pa che ba zhes bya'o/ /sems bskyed pa de'ang bdag gi don phun sum tshogs pa bsgrub par bya ba dang / gzhan gyi don phun sum tshogs pa bsgrub par bya ba'i phyir sems bskyed pas na don che ba'o/ /de ltar sems bskyed nas mjug tu 'bras bu bla na med pa'i byang chub thob pas na thob pa che ba zhes bya'o/ /byang chub kyi sems de yang sems g.yo zhing 'gul bar byed pa'i mtshan nyid sems las byung bas sems pa zhes bya bas bskyod nas byang chub kyi sems bskyed pas na byang chub sems dpa'i sems zhes bya ste/ byang chub kyi sems de ni sems dpa' zhes bya ba'i sems bskyed do zhes bya ba'i don to/ /byang chub kyi sems de ci las dmigs nas sems skye zhe na/ de nyid don gnyis la dmigs nas sems skye ste/ don gnyis ni bdag nyid byang chub chen po thob par bya bar dmigs pa dang / sems can la phan pa dang bde ba'i don bya bar dmigs nas byang chub kyi sems bskyed do zhes bya ba'i don to/ /de yan chad kyis mdor na byang chub kyi sems de yon tan gsum dang ldan pa dang / don gnyis la dmigs pa yin par bstan to/ /de la yon tan rnam pa gsum ni/ skyes bu byed pa'i yon tan dang / don byed pa'i yon tan dang / 'bras bu yongs su 'dzin pa'i yon tan no/ /don gnyis ni byang chub kyi don la dmigs pa dang / sems can gyi don la dmigs pa'o/ /de la spro ba che zhing rtsom pa che/ /zhes bya ba'i tshig gnyis kyis skyes bu byed pa'i yon tan bstan te/ dang po sems bskyed pa na yang sems kyi shugs drag tu bskyed la phyis sgrub pa'i tshe na yang dka' ba spyod pa thams cad de bzhin du bsgrub pa'i phyir ro/ /don chen po zhes bya bas don chen po'i yon tan bstan te/ bdag dang gzhan gyi don byed pa'i phyir ro/ /thob pa che zhes bya bas 'bras bu yongs su 'dzin pa'i yon tan bstan te mthar bla na med pa'i byang chub len pa'i phyir ro/ /don gnyis zhes bya bas gnyis la dmigs pa bstan te/ byang chub dang sems can gyi don la dmigs pa'i phyir ro/ /sems bskyed pa rab tu dbye ba'i tshigs su bcad pa zhes bya ba la/ byang chub kyi sems kyi mtshan nyid nas byang chub kyi sems la phye na du yod pa'i rab tu dbye ba 'chad de/ byang chub kyi sems la phye na mos pa'i sems bskyed pa dang lhag pa'i bsam pa rnam par dag pa'i sems bskyed pa dang / rnam par smin pa'i sems bskyed pa dang / sgrib pa spangs pa'i sems bskyed pa dang phyen rnam pa bzhi yod do zhes bstan pa'i phyir tshigs su bcad pa rtsom mo/ /sems bskyed de ni mos pa dang / /zhes bya ba la/ mos pas spyod pa'i sa drod dang / spyi bo dang / bzod pa dang 'jig rten gyi chos kyi mchog gi tshe na sems bskyed pa ni theg pa chen po'i chos zab cing rgya che ba rtogs nas sems bskyed pa ni ma yin gyi theg pa chen po'i chos zab cing rgya che ba la dad pa'i sgo nas sems bskyed pas na/ mos pa'i sems bskyed pa zhes bya'o/ /lhag pa'i bsam pa dag pa gzhan/ /zhes bya ba la/ gzhan gyi sgra ni sa dang po yan chad sa bdun pa man chad kyi sa la bya ste/ sa bdun po de dag gi sems pa la ni lhag pa'i bsam pa dag pa'i sems bskyed pa zhes bya'o/ /ci'i phyir zhe na/ gang bdag yin pa de bzhin gzhan gang yin pa de bdag ces gzhan du mnyam pa nyid kyi sems thob pas bdag dang gzhan gyi don phun sum tshogs pa 'thob par bya ba'i phyir lhag pa'i bsam pa zhes bya'o/ /gzung ba dang 'dzin pa'i dri ma dang bral bar bya ba'i phyir dag pa zhes bya'o/ /rnam par smin pa'i sa 'dod de/ /zhes bya ba la/ sa brgyad pa dang / sa dgu pa dang / bcu par byang chub tu sems bskyed pa la rnam par smin pa'i byang chub kyi sems zhes bya ste/ ci'i phyir zhe na/ sa de dag la rnam par mi rtog pa'i ye shes lhun gyis grub pa thob pas/ sbyin pa la sogs pa'i pha rol tu phyin pa rnams la yang / brtsal 'bad med par lhun gyis grub par spyod pas na/ rnam par smin pa'i sems bskyed pa zhes bya'o/ /de bzhin sgrib ba spangs pa'o/ /zhes bya ba la/ sangs rgyas kyis kun tu 'od kyi dus na zad pa dang / mi skye ba'i mtshan nyid kyi byang chub kyi sems skyes pa la ni sgrib pa med pa'i sems skyes pa zhes bya ste/ ci'i phyir zhe na/ de'i tshe byang chub kyi sems de ni nyon mongs pa'i sgrib pa dang / shes bya'i sgrib pa ma lus par spangs pa'i mtshan nyid yin pa'i phyir ro/ /de bas na 'phags pa ga ya'i rtse mo'i mdo las kyang / lha'i bu gzhan yang sems bskyed pa dang po ni rgyu las yang dag par 'byung ba'o/ /sems bskyed pa gnyis pa ni ye shes las yang dag par 'byung ba'o/ /sems bskyed pa gsum pa ni spong ba las yang dag par 'byung ba'o/ /sems bskyed pa bzhi pa ni 'bras bu las yang dag par 'byung ba'o zhes gsungs so/ /sems bskyed pa rnam par dbye ba gdon mi za ba'i tshigs su bcad pa zhes bya ba la/ byang chub tu sems bskyed pa rnam pa bzhir phye ba la bzhi po de dag gi rtsa ba ni gang / bsam pa ni gang zhes don bcu gcig dris pa dang / de bzhin du lan btab pa la gdon mi za ba zhes bya ba ste/ de las brtsams nas tshigs su bcad pa ston to/ /de yi rtsa ba snying rjer 'dod/ /ces bya ba la/ byang chub kyi sems rnam pa bzhi'i rtsa ba gang zhe na zhes dris pa dang / de'i lan du byang chub kyi sems rnam pa bzhi'i rtsa ba ni snying rje yin par 'dod pa'i phyir ro zhes snying rjes sems can gyi sdug bsngal bsal bar bya'o snyam du sems pa ste/ des sems can thams cad bsdus nas gnas so/ /gal te snying rje rtsa bar gyur pa med na ni sems can rnams kyi don du byang chub kyi sems rnams kyang mi skyed kyi nyan thos bzhin du mya ngan las 'das par 'jug par 'gyur te/ de bas na rtsa ba ni snying rje'o/ /byang chub kyi sems de bzhi'i bsam pa gang ji ltar zhe na/ de'i phyir/ rtag tu sems can phan par sems/ /zhes bya ba smos te/ 'khor ba'i mtha'i bar du sems can thams cad zang zing rnam pa sna tshogs kyis phan btags te/ tshe 'dir mi dge ba las bzlog cing dge ba la gzhag pa dang / tshe rabs gzhan du mya ngan las 'das pa la 'god do snyam du sems pa ni byang chub kyi sems de dag gi bsam pa'o/ /byang chub kyi sems de dag ci la mos she na/ de'i phyir chos la mos zhes smos te/ byang chub kyi sems bzhi po de dag kyang nyan thos dang rang sangs rgyas kyi chos la ni ma dad kyi/ theg pa chen po'i chos zab cing rgya che ba la dad de/ de ni byang chub kyi sems de dag gi mos pa'o/ /byang chub kyi sems de dag ci la dmigs she na/ de'i phyir ye shes tshol bar dmigs pa de bzhin no zhes bya ba smos te/ de'i ye shes ni theg pa chen po'i ye shes te/ rnam par mi rtog pa'i ye shes la bya'o/ /rnam par mi rtog pa'i ye shes thob par bya ba'i phyir theg pa chen po'i chos nyan pa dang / sems pa dang / bsgom pa la sogs pa'i sgo nas tshol ba nyid byang chub kyi sems kyi dmigs pa zhes bya'o/ /byang chub kyi sems de dag gi theg pa gang zhe na/ de'i phyir/ gong du 'dod pa theg pa ste/ /zhes bya ba smos te/ mos pas spyod pa'i sa la gnas na sa dang po ji ltar thob par bya zhes bya ba dang / sa bcu pa thob pa dang / sangs rgyas kyi sa ji ltar thob par bya zhes 'dod pa ni byang chub kyi sems de dag gi theg pa yin te/ 'dod pa des sa gong nas gong du 'phar ba'i phyir ro/ /byang chub kyi sems de dag gi rten gang zhe na/ de'i phyir/ sdom pa rgya chen de yi rten/ /zhes bya ba smos te/ byang chub sems dpa'i sdom pa dang / sdom pa'i tshul khrims dang / sems can don byed pa'i tshul khrims dang / dge ba sdud pa'i tshul khrims ni byang chub kyi sems de dag gi rten yin no zhes bya ba'i don to/ /byang chub kyi sems de dag gi bar du gcod pa gang zhe na/ de'i phyir mi mthun pa'i phyogs rnams skye ba la bar du gcod pa'o zhes bya ba smos te/ byang chub kyi sems de ni bdag dang gzhan la phan par sems pa yin/ sems de dang mi mthun pa ni bdag 'ba' zhig mya ngan las 'das par 'gro bar sems pa'i sems nyan thos dang rang sangs rgyas kyi sems la bya ste/ theg pa chung ngu'i sems bskyed par gyur pa nyams su blangs te ma spangs na byang chub kyi sems mi 'byung bas de ni bar du gcod pa yin no zhes bya ba'i don to/ /byang chub de dag gi sems kyi rang bzhin gang zhe na/ de'i phyir/ bsod nams ye shes rang bzhin te/ /zhes bya ba smos te/ byang chub kyi sems ni rnam pa gnyis te/ snying rje'i mtshan nyid dang / shes rab kyi mtshan nyid do/ /de la snying rje'i mtshan nyid ni sems can thams cad mya ngan las 'da'o snyam du sems pa ste/ de ni bsod nams kyi rang bzhin no/ /shes rab kyi mtshan nyid ni chos thams cad stong pa yin pas sems can gang yang mya ngan las 'das pa med do snyam du sems pa ste/ de ni ye shes kyi rang bzhin no/ /byang chub kyi sems de dag gi legs pa gang zhe na/ de'i phyir/ dge ba 'phel ba legs pa'o/ /zhes bya ba smos te/ byang chub kyi sems bskyed pa las nam mkha'i khams ji tsam pa dang / sems can gyi khams ji tsam pa dang / 'jig rten gyi khams ji tsam pa de tsam gyi bsod nams 'phel bar 'gyur ro/ /de ni byang chub kyi sems kyi legs pa yin no zhes bya ba'i don to/ /byang chub kyi sems de dag gi 'khor ba las ji ltar 'byung zhe na/ de'i phyir/ rtag tu pha rol phyin pa sbyar/ / de ni 'byung bar brjod pa'o/ /zhes bya ba smos te/ khams gsum nas 'byung ba dang / bla na med pa'i byang chub thob par bya ba'i phyir pha rol tu phyin pa drug la spyad cing sbyor na 'khor ba las 'byung bar 'gyur bas na 'byung bar byed pa ni pha rol tu phyin pa drug yin no zhes bya ba'i don to/ /byang chub kyi sems de dag gi mthar thug pa gang zhe na/ de'i phyir/ so so rang gi sbyor ba yis/ /de ni sa yi mthar thug ste/ /zhes bya ba smos te/ sa bcu re re nas rdzogs par thob pa la sa'i mthar thug pa zhes bya'o/ /de ltar sa'i mthar thug par 'gyur ba yang sa dang po la sbyin pa'i pha rol tu phyin pa la sbyar te/ sbyin pa'i pha rol tu phyin pa rdzogs nas sa dang po mthar phyin pa zhes bya ba nas/ sa bcu pa ye shes kyi pha rol tu phyin pa la sbyar te/ ye shes kyi pha rol tu phyin pa rdzogs pa dang / sa bcu pa mthar phyin pa zhes bya'o/ /byang chub sems dpa'i sems bskyed pa gdon mi za bar rig par bya'o zhes bya ba la/ rnam pa bcu gcig dris pa las de bzhin du lan btab pa de ni byang chub sems dpa'i sems bskyed pa rnam pa bzhi gdon mi za ba yin no zhes bya ba'i don to/ /brda'i dam bca' bar sems bskyed pa tshigs su bcad pa zhes bya ba la/ byang chub tu sems bskyed pa rnam pa gnyis yod do/ /brda'i dam bca' bar sems bskyed pa dang / don dam pa'i byang chub kyi sems so/ /de la brda'i dam bca' bar byang chub tu sems bskyed pa ni so so'i skye bo'i dus na sems bskyed pas na mos pas spyod pa'i sa 'jig rten chos mchog man chad kyi tshe sems bskyed pa la bya ste/ de yang dge ba'i bshes gnyen gyis byang chub tu sems bskyed na bdag dang gzhan gyi don phun sum tshogs par 'gyur pas sems bskyed pa'i rigs zhes bskul ba'am/ bdag nyid kyi dge ba'i rtsa ba'i mthus byang chub tu sems bskyed pa ste/ de yang mkhan po dang slob dpon la sogs pas sems bskyed pa'i tshig ji skad brjod pa bzhin du tshig byung ba na sems bskyed pa ni brda'i dam bca' bar sems bskyed pa zhes bya'o/ /de la don dam pa'i byang chub kyi sems ni sa dang po yan chad kyi dus nas skye'o/ /grogs stobs rgyu stobs rtsa ba'i stobs/ /thos pa'i stobs dang thos goms stobs/ /brtan dang mi brtan skye bar gsungs/ /sems bskyed gzhan gyis bstan pa'o/ /zhes bya ba la/ grogs stobs zhes bya ba'i tshig dang / sems bskyed gzhan gyis bstan pa zhes bya ba'i tshig gnyis su sbyar te/ sems bskyed pa gang mkhan po'am slob dpon nam/ dge ba'i bshes gnyen la la zhig gis byang chub tu sems bskyed na phan pa dang legs pa rgya chen po 'byung bas sems bskyed pa'i rigs so zhes bya ba'i chos bstan pa las byang chub tu sems bskyed pa ni grogs kyi stobs kyis sems bskyed pa zhes bya'o/ /byang chub sems dpa'i rigs yod pas rigs kyi mthus shugs kyis bskul nas byang chub tu sems bskyed pa ni rgyu'i stobs kyis sems bskyed pa zhes bya'o/ /rgyu dang rigs dag ni don gcig go/ /tshe rabs snga ma la theg pa chen po'i chos don zab cing rgya che ba rtogs par 'gyur ba dang / byang chub tu sems bskyed par 'gyur ba'i dge ba'i rtsa ba dang / bsod nams kyi tshogs bsags pas rigs brtas par gyur nas byang chub tu sems bskyed pa ni rtsa ba'i stobs kyis sems bskyed pa zhes bya'o/ /tshe rabs snga ma la theg pa chen po'i chos nyan pa dang / bsam pa dang / bsgom pa bya ste/ ye shes kyi tshogs bsags pas tshe 'dir byang chub tu sems bskyed pa ni thos pa'i stobs kyis sems bskyed pa zhes bya ste/ yang na de bzhin gshegs pas lang kar gshegs pa la sogs pa'i mdo sde de dang de dag bshad pa na lha dang mi la sogs pa'i 'gro ba mang po byang chub tu sems bskyed pa ni thos pa'i stobs kyis sems bskyed pa zhes bya'o/ /tshe 'di la dge ba'i bshes gnyen mang po las chos thos pa yang lan grangs mang du mnyan te/ chos dang don shes kyis mthong nas sems bskyed pa ni thos pa goms pa'i stobs kyis sems bskyed pa zhes bya'o/ /de ltar brda'i dam bcas par sems bskyed pa rnam pa lnga las grogs kyis sems bskyed pa ni mi brtan pa'i mtshan nyid du skye bar gsungs pa ste/ phyi nas de la ldog pa yod pa'i phyir ro/ /rgyu'i stobs dang thos pa'i stobs dang thos pa goms pa'i stobs kyis sems bskyed pa ni brtan pa'i mtshan nyid du gsungs pa ste/ de dag la slar ldog pa med pa'i phyir ro/ /gzhan gyis bstan pa la sems bskyed pa ni gzhan gyis go bar byas pa las brdas yi dam 'dzin pa zhes bya'o zhes bya ba la/ mkhan po'am slob dpon nam dge ba'i bshes gnyen 'ba' zhig gis 'di snyam du sems la/ tshig tu 'di skad brjod cig ces bsgo ste/ go bar byas pas 'di bzhin du brjod na byang chub tu sems bskyed pa ni brdas yi dam 'dzin pa'i sems bskyed pa zhes bya'o/ /de'i rigs rgyas bas zhes bya ba la/ theg pa chen po rtogs pa'i dge ba'i rtsa ba dang bsod nams bsags pas byang chub kyi rigs brtas par gyur nas byang chub tu sems bskyed pa ni rtsa ba'i stobs kyis sems bskyed pa zhes bya'o/ /don dam pa'i sems bskyed tshigs su bcad pa zhes bya ba la/ gang gi tshe gang zag dang chos la bdag med par rtogs nas chos kyi dbyings thams cad du 'gro ba'i mtshan nyid du khong du chud de gzung ba dang 'dzin pa gnyis spangs nas gzung ba la yang mi rtog / 'dzin pa la yang rnam par mi rtog pa'i ye shes skyes pas na/ don dam pa'i byang chub tu sems bskyed pa zhes bya ste/ de yang sa dang po thob pa'i tshe na don dam pa'i byang chub kyi sems skye'o/ /don dam pa'i byang chub kyi sems de rgyu dang yon tan dang rang bzhin la sogs pa'i tshigs su bcad pa bdun pa bstan to zhes bya ba'i don to/ /rnam par mi rtog pa'i ye shes de la ci'i phyir don dam pa'i byang chub kyi sems zhes bya zhe na/ lung dam pa la mnos pa dang / rgyu dam pa bsgrub pa dang / rang bzhin dam pa khong du chud par bya ba'i phyir don dam pa'i byang chub kyi sems zhes bya'o zhes bstan par 'dod nas/ rdzogs pa'i sangs rgyas rab bsnyen byas/ /zhes bya ba la sogs pa tshigs su bcad pa gcig smos te/ shes bya thams cad thugs su chud pas na rdzogs zhes bya ba la de yang phyin ci ma log par thugs su chud nas sangs rgyas zhes bya'o/ /mos pas spyod pa'i sar bskal pa grangs med pa gcig tu de bzhin gshegs pa rnams la gdugs dang rgyal mtshan dang / me tog dang bdug pa la sogs pa'i mchod pa dang de bzhin gshegs pa de dag gi thad nas dam pa'i chos nyan pa rnams bsams pa rnams bsgoms par byas pa ni/ rdzogs pa'i sangs rgyas rab bsnyen bya/ /zhes smos te 'dis ni lung dam pa mnos par bstan to/ /bsod nams ye shes tshogs rab bsags/ /zhes bya ba la pha rol tu phyin pa drug las/ sbyin pa dang tshul khrims dang bzod pa gsum ni bsod nams kyi tshogs so/ /bsam gtan dang shes rab gnyis ni ye shes kyi tshogs la brtson 'grus gnyis ka'i tshogs te de gnyis kyang bsgrubs zhes bya ba'i don to/ /yang na de bzhin gshegs pa rnams la gdugs dang rgyal mtshan la sogs pas mchod pa ni bsod nams kyi tshogs la dam pa'i chos mnyan pa dang bsam pa la sogs pa byas pa ni ye shes kyi tshogs te de gnyis kyang bsgrubs zhes bya ba'i don to/ /'dis ni rgyu dam pa bsgrub pa bstan to/ /chos la mi rtog ye shes bskyed/ /de phyir de ni dam pa'o/ /zhes bya ba la/ de ltar rdzogs pa'i sangs rgyas la yang rab bsnyen byas bsod nams dang ye shes kyi tshogs bsags pas chos rnams la rnam par mi rtog pa'i ye shes te/ 'dis ni rang bzhin dam pa khong du chud par bstan to/ /de la chos ni phung po dang khams dang skye mched la sogs pa bstan pa dang gsung rab yan lag bcu gnyis la bya ste/ de dag la gzung ba'i mtshan nyid la yang mi rtog/ 'dzin pa'i mtshan nyid du yang mi rtog rtag par yang mi rtog mi rtag par yang mi rtog pa ni/ chos la mi rtog pa'i ye shes skyes ba zhes bya ste/ don du rnam par mi rtog pa'i ye shes thob pa la bya'o/ /de ltar lung dam pa dang rgyud dam par bsgrubs pas na rang bzhin dam pa rtogs pa'i phyir rnam par mi rtog pa'i ye shes de la don dam pa'i byang chub kyi sems zhes bya'o/ /don dam pa'i byang chub kyi sems de sa dang po'i tshe thob nas dga' ba'i mchog skye bar 'gyur te/ der dga' ba'i mchog skyes pas sa dang po yang ming du sa rab tu dga' ba zhes btags so/ /ci'i phyir de'i tshe dga' ba skye zhe na/ de'i phyir/ chos dang sems can rnams dang ni/ /de yi bya ba dam pa dang / /sangs rgyas dang yang sems mnyam nyid/ /de ni de yi dga' ba'i mchog/ /ces bshad de/ sa dang po rnam par mi rtog pa'i ye shes thob pa'i tshe/ chos thams cad la sems mnyam pa rnyed pa dang / sems can thams cad la sems mnyam pa rnyed pa dang / de'i bya ba dam pa la sems mnyam pa rnyed pa dang / sangs rgyas dang yang sems mnyam pa rnyed do/ /mnyam pa bzhi rnyed pas brgya byin dang tshangs pa la sogs pa 'jig rten gyi 'byor pa rnyed de dga' ba dang / 'phags pa nyan thos pas 'jig rten las 'das pa'i 'byor pa rnyed de dga' ba bas byang chub sems dpa'i dga' ba'i mchog rnyed pas na sa yang rab tu dga' ba zhes bya'o/ /de la phung po lnga ji ltar rang bzhin gyis stong pa yin pa de bzhin du khams dang skye mched rnams kyang rang bzhin gyis stong pa yin zhes chos la bdag med pa khong du chud pas sems mnyam pa nyid rnyed pa zhes bya'o/ /ji ltar bdag gang yin pa sems can gzhan yang de bzhin no/ /gzhan gang yin pa bdag kyang de yin zhes bdag dang gzhan mtshungs par khong du chud pas sems can rnams la sems mnyam pa nyid rnyed pa zhes bya'o/ /de'i bya ba zhes bya ba ni sems can rnams kyi don bya ba ste/ sems can gyi nyon mongs pa dang / sdug bsngal sel bar byed pa ni de'i bya ba dam pa zhes bya'o/ /ji ltar bdag gi kun 'byung gi mtshan nyid nyon mongs pa dang / sdug bsngal gyi mtshan nyid skye rga na 'chi spang bar bya ba de bzhin du sems can rnams kyi kun 'byung gi mtshan nyid nyon mongs pa dang / sdug bsngal gyi mtshan nyid skye rga na 'chi spang bar bya'o snyam du sems pas de'i bya ba dam pa la sems mnyam pa nyid rnyed pa zhes bya ste/ de'ang sa bcu'i sa dang po'i nang nas sems can gyi don rab tu thob par bya ba rjes su dran cing rab tu dga' ba yin zhes bya ba dang / bdag ni sems can thams cad kyi gnas su gyur to zhes rab tu dga' ba bskyed do zhes gsungs pa lta bu'o/ /sangs rgyas bcom ldan 'das rnams kyi chos kyi sku gang yin pa dang / bdag gis rtogs pa'i chos kyi dbyings kyi chos sku gang yin pa gnyis su tha dad pa med par khong du chud pas sangs rgyas dang sems mnyam pa rnyed pa zhes bya ste/ de bas na sa bcu'i mdo las kyang bdag ni sangs rgyas kyi sa dang nye bar gyur to zhes rab tu dga' ba bskyed do zhes bya ba dang / bdag gis de bzhin gshegs pa thams cad mthong bar 'gyur ba dang nye bar gyur to zhes rab tu dga' ba bskyed do/ /bdag ni de bzhin gshegs pa thams cad kyi yul la yang dag par 'byung ngo zhes rab tu dga' ba bskyed do zhes gsungs pa lta bu'o/ /don dam pa'i byang chub kyi sems de don rnam pa drug dang ldan par bstan pa'i phyir/ skye ba rgya che de la spro/ /bsam pa yang ni rnam par dag /lhag ma dag la mkhas pa dang / /'byung ba nyid du shes par bya/ /zhes bshad do/ /don rnam pa drug ni skye ba'i don dang / rgya che ba'i don dang / spro ba'i don dang / bsam pa rnam par dag pa'i don dang lhag ma la mkhas pa'i don dang / 'byung ba nyid kyi don to/ /byang chub kyi sems de gnas gang nas skye ba bstan pa ni skye ba'i don to/ /nyan thos dag ni bdag gi don du sems bskyed kyi byang chub sems dpa' rnams ni bdag dang gzhan gnyi ga'i don du sems bskyed pas rgya che ba'i don dang ldan no/ /nyan thos dag ni bdag gi don bya bar spro'o/ /byang chub sems dpa' rnams ni bdag gzhan gnyi ga'i don bya bar spro bas spro ba'i don dang ldan no/ /nyan thos rnams ni nyon mongs pa'i sgrib pa dag nas rang gi byang chub kyi 'bras bu thob pa tsam du zad kyi byang chub sems dpa' rnams kyi sa ni nyon mongs pa dang shes bya'i sgrib pa gnyis dag nas bla na med pa'i byang chub thob par shes pas na bsam pa rnam par dag pa'i don dang ldan no/ /nyan thos dag ni rgyun du zhugs pa thob pa dang / lan cig phyir 'ong ba dang / phyir mi 'ong ba dang / dgra bcom pa'i sa la mkhas pa tsam du zad de byang chub sems dpa' rnams kyis dang po thob pa dang / sa gnyis pa yan chad sa bcu pa man chad kyi sa'i rang bzhin dang yon tan la mkhas pa dang / sa gong ma rnams ji ltar thob par bya ba'i thabs la mkhas pas na lhag ma dag la mkhas pa'i don dang ldan no/ /sa dang po mthar phyin te bor nas sa gnyis pa la 'jug pa ni 'byung ba nyid kyi don dang ldan pa zhes bya ste/ sa dang po yang ji ltar 'dor bar 'gyur zhe na sa dang po la sbyin pa'i pha rol tu phyin pa yongs su rdzogs pa dang de bzhin gshegs pa brgya'i zhal lta ba la sogs pa yon tan brgya phrag brgya byed pa yang yid la byed la/ de dag thams cad kyang sems tsam du zad de rnam par rtog pa las skyes so zhes rtog cing sems tsam du rtog pa de yang spangs te rnam par mi rtog pa la gnas pas sa dang po bor nas sa gnyis pa la 'jug par 'gyur bar shes par bya'o/ /skye ba'i don rgya cher bstan pa'i phyir/ chos la mos pa sa bon dang / /zhes bya ba la sogs pa tshig gcig tsam du smos so/ /de la skye ba'i don kyang rnam pa bzhir rig par bya ste/ sa bon gyi bye brag dang / ma'i bye brag dang / mngal gyi bye brag dang / ma ma'i bye brag go/ /de la theg pa chen po'i chos zab cing rgya che ba la mos shing dad pa las byang chub kyi sems bskyed pas na chos la mos pa ni sa bon no/ /ma mchog pha rol phyin mchog skyes/ /zhes bya ba la/ pha rol tu phyin pa'i mchog ni shes rab kyi pha rol tu phyin pa ste/ chos thams cad stong par rtogs pa'i shes rab kyi pha rol tu phyin pa la don dam pa'i byang chub kyi sems skyes pas ma ni shes rab kyi pha rol tu phyin pa'o/ /de bas na 'phags pa dri ma med par grags pa'i mdo las kyang / byang chub sems dpa' rnams kyis ni/ /thabs la mkhas pa pha yin te/ /ma ni shes rab pha rol phyin/ /zhes gsungs so/ /ting nge 'dzin gyi rgyal po'i mdo las kyang / /mkha' mnyam rdul bral gzugs mchog 'chang / /sku med mtshan bral shes rab sras/ /rab zab yon tan rgya mtsho'i thugs rje can/ /dpe med bdag gi spyi bor phyag zhog cig /ces gsungs so/ /bsam gtan bde ba'i mngal du ste/ /zhes bya ba ste/ dper na mkhris pa dang bad kan la sogs pa'i nad med pa'i mngal de bde ba bzhin du rnam par rtog pa'i gnod pa thams cad spangs pa'i bsam gtan de yang byang chub sems kyi mngal bde ba yin te/ ci'i phyir zhe na/ sems rtse gcig pa'i mtshan nyid kyis bsam gtan yod pa dang yang dag pa ji lta ba bzhin du shes pa'i shes rab skyes pas bsam gtan ni mngal lta bur bshad do/ /snying rje skyed pa ma ma'o/ /zhes bya ba la dper na ma ma dam pas bu g.yang sa dang mi bde ba'i gnas su mi ltung bar srung bar byed pa bzhin du snying rje chen pos kyang byang chub kyi sems de nyan thos kyi mya ngan las 'das pa'i g.yang sar ltung bar byed pa srung bar byed pas na snying rje chen po ni ma ma'o/ /rgya che ba'i don zhib tu bstan pa'i phyir/ rgya cher shes par bya ba ni/ /smon lam chen po bcu bsgrub phyir/ /zhes bya ba smos te/ sa dang por bdag dang gzhan gyi don du smon lam chen po bcu bsgrubs te btab pas na byang chub kyi sems de rgya che bar rig par bya'o/ /smon lam bcu yang sa bcu'i sa dang po las de byang chub sems dpa' sa rab tu dga' ba de la shin tu gnas shing rnam pa 'di lta bu'i smon lam chen po dang brtson 'grus chen po dang / mngon par bsgrub pa chen po 'di dag mngon par bsgrubs te/ 'di ltar sangs rgyas thams cad ma lus par lhag ma med pa mtha' dag la mchod cing rim gro'i phyir rnam pa'i mchog thams cad dang ldan pa mos pa rgya chen pos rnam par dag pa zhes bya ba la sogs pa gsungs so/ /spro ba'i don rgya cher bstan pa'i phyir/ spro bar rig par bya ba ni/ /dka' byed rgyun rings mi skyo bar/ / zhes smos te/ bskal pa grangs med pa gsum gyi bar du sems can gyi don du mgo dang rkang lag la sogs pa gtong ba'i dka' ba'i spyod pa la skyo ba cung zad kyang med pa'i phyir don dam pa'i byang chub kyi sems de spro ba dang ldan par rig par bya'o/ /bsam pa rnam par dag pa'i don rgya cher bstan pa'i phyir/ byang chub bsnyen par rig pa dang / /de yi thabs shes rnyed pas kyang / /bsam pa dag par shes par bya/ /zhes bya ba smos te/ sa dang po thob pa nas sangs rgyas kyi sa thob tu nye bar khong du chud pas kyang bsam pa rnam par dag par khong du chud par rig par bya ste/ de'i phyir sa dang po las ni bdag ni sangs rgyas kyi sar nye bar gyur to zhes rab tu dga' ba skyed do zhes gsungs so/ /gzhan yang thabs gang gis sangs rgyas kyi sa de thob par bya ba'i rgyu dang thabs kyang rtogs te/ de'i phyir yang bsam pa rnam par dag par rig par bya'o/ /de bas na sa dang po las de bzhin gshegs pa thams cad kyi ye shes la 'jug pa'i thabs rjes su dran zhing rab tu dga' ba yin no zhes gsungs so/ /lhag ma la mkhas pa'i don bstan pa'i phyir/ sa gzhan la ni mkhas pa'o/ /zhes bya ba smos te/ sa dang po la gnas pa'i tshe sa gnyis pa yan chad sa bcu pa man chad kyi rang bzhin dang yon tan gang yin pa la yang mkhas/ sa gnyis pa yan chad ji ltar thob par bya ba'i thabs la mkhas pas na lhag ma la mkhas pa zhes bya'o/ /'byung ba'i don rgya cher bstan pa'i phyir/ 'byung bar shes par bya ba ni/ /mnyam par gzhag bzhin yid byed par/ /brtags pa tsam du de shes phyir/ /de yang rnam par mi rtog phyir/ /zhes smos te/ sa dang po las byung nas sa gnyis par 'jug par 'byung ba yang dang po'i rang bzhin sbyin pa'i pha rol tu phyin pa yongs su rdzogs pa yin pa dang / de'i yon tan sangs rgyas brgya'i zhal lta ba la sogs pa kun rdzob tu sa'i mtshan nyid ji ltar gzhag pa yang yid la byed la/ sa'i mtshan nyid de dag kyang sems tsam du zad de/ sems kyis brtags pa tsam du zad do zhes rtog cing sems tsam du rtogs pa de yang spangs te/ rnam par mi rtog pa'i ye shes la gnas nas sa dang po por nas sa gnyis pa la 'jug par 'gyur ro zhes bya ba'i don to/ /dpe'i mtshan nyid chen po la tshigs su bcad pa drug go zhes bya ba la gong du brda'i sems bskyed pa dang / don dam pa'i sems bskyed pa gnyis kyi rgyu dang / rang bzhin dang yon tan la sogs pa bshad nas da tshigs bcad drug gis dpe'i yon tan dang sbyar te sems bskyed pa rnam pa gnyis kyi bdag nyid che ba dang / yon tan che ba ston to zhes bya ba'i don to/ /sa dang mtshungs par bskyed pa ste/ /zhes bya ba la/ so so'i skye bo'i dus nas brtsams nas te mos pas spyod pa'i sa chos mchog man chad kyi dus na bskyed pa ni sa dang mtshungs par shes par bya ste/ dper na sa chen po la brten nas rtswa dang shing dang sman dang 'bru rnam pa sna tshogs skye ba de bzhin du dang por sems bskyed pa de la brten nas kyang bsam pa dang sbyor ba la sogs pa dang pha rol tu phyin pa dang / byang chub kyi phyogs dang / sangs rgyas kyi chos kyi stobs dang / mi 'jigs pa dang / ma 'dres pa la sogs pa 'byung bas na dang po sems bskyed pa ni sa dang mtshungs par rig par bya'o/ /gzhan yang gser gyi mchog dang 'dra/ /zhes bya ba la/ gzhan gyi sgras ni bsam pa la snyegs te bsam pa dang ldan pa'i byang chub kyi sems ni gser gyi mchog dang 'dra bar rig par bya ste/ ci'i phyir zhe na/ dper na gser gyi mchog bsregs pa dang / gcod pa dang ba dar ba la sogs pa rnam pa mang pos brtags na yang kha dog dang rang bzhin la 'gyur ba med pa de bzhin du/ sems can rnams la phan pa dang bde bar bya bar sems pa'i bsam pa dang ldan pa'i byang chub kyi sems la yang nam ji ltar yang 'gyur ba med pas na bsam pa dang ldan pa'i byang chub kyi sems ni gser mchog dang 'dra'o/ /yar gyi zla ba tshes pa bzhin/ /zhes bya ba la/ sbyor ba dang ldan pa'i byang chub kyi sems ni yar gyi zla ba tshes pa dang 'dra ste dper na zla ba tshes gcig nas nya'i bar du yang zheng je che je cher skye ba de bzhin du pha rol tu phyin pa la sbyor zhing spyod pa'i sbyor ba'i shugs kyis phul na bsod nams dang ye shes kyi tshogs dang pha rol tu phyin pa 'phel zhing rgyas par 'gyur bas na sbyor ba dang ldan pa'i byang chub kyi sems ni zla ba tshes pa dang 'dra'o/ /gzhan yang / me dang 'dra bar shes par bya/ /zhes bya ba la/ gzhan gyi sgras ni lhag pa'i bsam pa la snyegs te lhag pa'i bsam pa dang ldan pa'i byang chub kyi sems ni me dang 'dra bar shes par bya ste/ ci'i phyir zhe na/ dper na mer shing ji tsam ji tsam du bsnan pa me lce dang 'od kyang de tsam de tsam du cher 'gyur ba de bzhin du lhag pa'i bsam pa zhes bya ba ni mos pas spyod pa'i sa drod la gnas na gong ma'i rtse mo thob par bya'o snyam du sems nas sa bcu la gnas nas sangs rgyas kyi sa thob par bya'o snyam du sems pa la bya ste/ sems des yon tan gong ma khyad par can rnams mngon sum du byed pas na lhag pa'i bsam pa dang ldan pa'i byang chub kyi sems ni me dang 'dra bar shes par bya'o/ /gter bzhin du shes par bya ste zhes bya ba la/ sbyin pa'i pha rol tu phyin pa dang ldan pa'i sems ni gter chen po dang 'dra bar shes par bya ste/ gter chen po ni mdo las dung dang pad+mo dang / pad+mo chen po la sogs pa rnam pa bzhi yod do zhes gsungs so/ /gter de dag nas yo byad phyung ste bza' ba dang bgo ba la sogs pa sems can la byin na sems can rnams tshim par byed la/ yo byad ji snyed cig phyung na yang gter de zad par mi 'gyur ba de bzhin du sbyin pa'i pha rol tu phyin pas chos dang zang zing la sogs pa'i longs spyod kyis byang chub sems dpa' rnams sems can mtha' med pa rnams tshim par byed la/ byang chub sems dpa'i sbyin pa de phung po lhag ma ma lus pa'i mya ngan las 'das pa'i dbyings su yang zad par mi 'gyur bas na sbyin pa'i pha rol tu phyin pa dang ldan pa'i sems bskyed pa ni gter chen po dang 'dra'o/ /gzhan ni rin chen 'byung gnas bzhin/ /zhes bya ba la/ gzhan gyi sgras ni tshul khrims kyi pha rol tu phyin pa la snyegs te/ tshul khrims kyi pha rol tu phyin pa dang ldan pa'i byang chub kyi sems ni rin po che'i 'byung gnas dang 'dra ste/ dper na rin po che rnam pa sna tshogs 'byung ba'i 'byung khungs nas rin po che dpag tu med pa sna tshogs 'byung ba de bzhin du/ byang chub sems dpa'i tshul khrims dang ldan pa'i sems bskyed pa la yang sa dang pha rol tu phyin pa dang byang chub kyi phyogs dang stobs dang mi 'jigs pa la sogs pa'i chos rin po che dpag tu med pa 'byung bas na tshul khrims dang ldan pa'i byang chub kyi sems ni rin po che'i 'byung gnas dang 'dra'o/ /gzhan dag rgya mtsho 'dra ba ste/ /zhes bya ba la/ gzhan gyi sgras ni bzod pa'i pha rol tu phyin pa la bya ste/ bzod pa'i pha rol tu phyin pa dang ldan pa'i byang chub kyi sems ni rgya mtsho dang 'dra bar shes par bya ste/ dper na rgya mtsho gru dang / nya dang / chu srin la sogs pas dkrugs na yang rnyog ma can du mi 'gyur ba de bzhin du byang chub sems dpa'i bzod pa dang ldan pa'i sems la yang grang ba dang tsha ba dang bkres pa dang skom pa gzhan gyis gnod par bya ba la sogs pas dkrugs kyang zhe sdang gi rnyog ma mi ldang bas na bzod pa dang ldan pa'i byang chub kyi sems ni rgya mtsho dang 'dra'o/ /rdo rje dang 'dra zhes bya ba la brtson 'grus dang ldan pa'i byang chub kyi sems ni rdo rje dang 'dra ste ji ltar zhe na/ dper na rdo rje la cis kyang mi tshugs pa de bzhin du byang chub sems dpa'i brtson 'grus dang ldan pa'i sems la yang le lo'i mtshon gyis mi tshugs pas na brtson 'grus dang ldan pa'i byang chub kyi sems ni rdo rje dang 'dra ba'o/ /ri rab dang 'dra zhes bya ba la bsam gtan dang ldan pa'i byang chub kyi sems ni ri rab dang 'dra bar shes par bya ste/ ji ltar zhe na/ ri'i rgyal bo ri rab phyogs bzhi'i rlung gang gis kyang mi bskyod pa de bzhin du byang chub sems dpa'i ting nge 'dzin rtse gcig pa'i ting nge 'dzin dang ldan pa'i sems la g.yeng ba'i rnam par rtog pa'i rlung gis mi bskyod pas na bsam gtan dang ldan pa'i sems bskyed pa ni ri rab dang 'dra ba'o/ /rtsi yi rgyal po 'dra ba dang / /zhes bya ba la/ shes rab kyi pha rol tu phyin pa dang ldan pa'i byang chub kyi sems ni rtsi'i rgyal po dang 'dra bar shes par bya ste/ ji ltar zhe na/ dper na rtsi'i rgyal po mthong ba dang / bsnams pa dang myangs pa dang reg pas kyang / bad kan dang / mkhris pa dang / rlung las gyur pa'i nad thams cad zhi bar byed pa de bzhin du/ shes rab kyi pha rol tu phyin pa yang mnyan pa dang bsam pa dang / bsgoms pa'i sgo nas nyon mongs pa dang / shes bya'i sgrib pa'i nad thams cad zhi bar byed pas na/ shes rab kyi pha rol tu phyin pa dang ldan pa'i sems ni sman gyi rgyal po dang 'dra'o/ /mdza' chen bzhin du gzhan rig bya/ /zhes bya ba la/ tshad med pa bzhi dang ldan pa'i byang chub kyi sems ni mdza' bo chen po dang 'dra bar rig par bya ste/ ji ltar zhe na/ dper na mdza' bo chen po dus gsum du yang grogs byed de/ bde ba'i tshe yang grogs byed la/ sdug bsngal gyi tshe yang grogs byed de/ bde ba yang ma yin sdug bsngal yang ma yin pa'i tshe na yang grogs byed pa de bzhin du tshad med pa bzhi dang ldan pa'i byang chub kyi sems kyis kyang dus thams cad du sems can yal bar mi 'dor te bde ba'i dus na yang sems can mi 'dor/ sdug bsngal gyi dus na yang sems can mi 'dor/ bde ba dang sdug bsngal gnyi ga'i dus na yang sems can mi 'dor ro/ /ji ltar zhe na/ snying rjes ni sdug bsngal gyi dus na sems mi 'dor te/ sems can sdug bsngal las 'byin par byed pa'i phyir ro/ /byams pas ni bde ba'i dus na yang sems can mi 'dor te sems can bde ba la 'jog par byed pa'i phyir ro/ /dga' bas ni gang bde ba'i dus na sems can mi 'dor te/ sems can rnams rtag tu bde ba dang ldan par dga' ba'i phyir ro/ /btang snyoms kyis ni bde ba dang sdug bsngal gnyi ga'i dus na sems can mi 'dor te/ ji ltar zhe na/ sems can bde ba byung ba rnams 'dod chags dang ldan par ma gyur cig ces sems pa dang / sdug bsngal gyi dus na zhe sdang dang ldan par ma gyur cig ces sems pa'i phyir ro/ /yid bzhin nor bu 'dra ba dang / /zhes bya ba la/ mngon par shes pa lnga dang ldan pa'i byang chub kyi sems ni yid bzhin gyi nor bu dang 'dra bar shes par bya ste/ dper na yid bzhin gyi nor bu las bza' ba dang bgo ba la sogs pa'i yo byad ci bsam pa rnams 'byung ba de bzhin du 'grub pa dang 'dra bar rdzu 'phrul mngon par shes pa dang / rdzu 'phrul gyi mig dang / rdzu 'phrul gyi rna ba dang / gzhan gyi sems shes pa dang / sngon gyi gnas rjes su dran pa dang / 'chi 'pho shes pas kyang lus rnam pa sna tshogs su sprul pa dang / sems can gyi gzugs mthong bar byas pa dang / sgra thos par bya ba dang / sems shes par bya ba dang / sngon gyi dus shes par bya ba dang / phyi ma'i dus shes par bya ba la sogs pa ci dang ci bsam pa de bzhin du 'grub pas mngon par shes pa lnga dang ldan pa'i byang chub kyi sems ni yid bzhin gyi nor bu dang 'dra'o/ /nyi ma 'dra bar gzhan rig bya/ / zhes bya ba la/ gzhan gyi sgra bsdu ba'i dngos po bzhi dang sbyar te/ bsdu ba'i dngos po bzhi dang ldan pa'i byang chub kyi sems ni nyi ma dang 'dra bar rig par bya ste/ dper na nyi mas lo tog rnam pa sna tshogs smin par byed pa de bzhin du/ sbyin pa dang / ngag snyan pa dang / don spyod pa dang / don mthun pas kyang sems can rnams bsdus nas smin par byed de/ ji ltar zhe na/ ser sna can rnams ni sbyin pas bsdus nas dge ba la bkod/ zhe sdang can rnams ni ngag snyan pas bsdus nas dge ba la bkod/ gti mug can rnams ni don spyod pas bsdus nas dge ba la bkod/ nga rgyal can rnams ni don mthun pas bsdus nas dge ba la bkod pas na bsdu ba'i dngos po dang 'dra ba'i byang chub kyi sems ni nyi ma dang 'dra ba'o/ /dri za'i dbyangs dang 'dra ba dang / /zhes bya ba la/ dper na dri za dbyangs snyan pa snyan cing 'jam pa sems can rnams kyis thos na sems dga' ba dang bde ba skye ba de bzhin du chos so so yang dag par rig pa dang / don so so yang dag par rig pa dang / nges pa'i tshig so so yang dag par rig pa dang / spobs pa so so yang dag par rig pa bzhis sems can rnams la chos dang don gang 'dod pa de dag so so'i skad kyis chos bshad nas dga' ba dang sim par 'gyur bas na so so yang dag par rig pa bzhi dang ldan pa'i sems ni dri za'i dbyangs dang 'dra'o/ /rgyal po lta bur gzhan zhes bya ba la/ gzhan gyi sgras ni so sor brten pa bzhi la bya ste/ so sor brten pa bzhi dang ldan pa'i byang chub kyi sems ni rgyal po lta bur shes par bya ste/ ji ltar zhe na/ rgyal po ni chud za ba'i rgyu yang byed/ chud mi za ba'i rgyu yang byed de/ gal te bsten legs na ni srid dang longs spyod la sogs pa sbyin par byed pas chud mi za ba'i rgyu byed do/ /bsten nyes na ni srid dang srog la babs pas chud za ba'i rgyu byed do/ /de bzhin du gang zag dang / yi ge dang / drang ba'i don gyi mdo dang / rnam par shes pa la brten na ni chud za ba'i rgyur 'gyur/ chos dang don dang nges pa'i don gyi mdo dang ye shes la brten na ni chud mi za ba'i rgyur 'gyur bas so/ /bang mdzod dang 'dra zhes bya ba la/ bsod nams dang ye shes kyi tshogs dang 'dra ba'i byang chub kyi sems ni bang mdzod dang 'dra ste/ ji ltar zhe na/ bang mdzod kyi nang na 'bru dang nor la sogs pa rnam pa mang po yod pa de bzhin du bsod nams kyi tshogs dang ldan pa'i byang chub kyi sems la yang bsod nams kyi tshogs dpag tu med pa yod pa dang / ye shes kyi tshogs dang ldan pa'i byang chub kyi sems/ la yang ye shes kyi tshogs dpag tu med pa yod pa'i phyir bang mdzod dang 'dra ba'o/ /lam po che zhes bya ba la/ byang chub kyi phyogs kyi chos sum cu rtsa bdun dang ldan pa'i byang chub kyi sems ni lam chen po dang 'dra ste/ ji ltar zhe na/ lam po cher dus gsum gyi sems can rnams kyang 'gro la rgyal po dang blon po dang 'bangs la sogs pa yang 'gro'o/ /de bzhin du 'das pa'i de bzhin gshegs pa dang nyan thos dang rang sangs rgyas rnams kyang lam 'di nas mya ngan las 'das par gshegs/ da ltar gyi de bzhin gshegs pa dang nyan thos dang rang sangs rgyas rnams kyang lam 'di nas mya ngan las 'das par gshegs/ ma 'ongs pa'i de bzhin gshegs pa dang nyan thos dang rang sangs rgyas rnams kyang lam 'di nas mya ngan las 'das pa'i gnas su gshegs par 'gyur bas na lam po che dang 'dra ba'o/ /de dang 'dra bar de bzhin gzhan/ /zhes bya ba la/ gong du skyes pa dag dpe dang sbyar te bshad pa de dang 'dra bar de bzhin du 'og nas 'byung ba'i sems bskyed pa rnams kyang dpe dang sbyar te bshad do zhes bya ba'i don to/ /theg pa 'dra bar rnam rig bya/ /zhes bya ba la/ zhi gnas dang lhag mthong dang ldan pa'i byang chub kyi sems ni theg pa dang 'dra bar rig par bya ste/ dper na rta dang glang po dang shing rta la sogs pa'i theg pas khur khal rnams khyer nas gang la 'gro bar bya ba'i gnas su phyin par 'gro ba de bzhin du zhi gnas dang lhag mthong zung du 'brel ba dang ldan pa'i sems kyis kyang bdag dang gzhan gyi don gyi khur bde bar khyer nas mya ngan las 'das pa'i gnas su 'gro bar byed pa'i phyir theg pa dang 'dra'o/ /bkod ma 'dra bar sems skyes nas/ /zhes bya ba la/ bkod ma ni chu mig gi khyad par la bya ste/ gzungs dang spobs pa dang ldan pa'i byang chub kyi sems ni chu mig khyad par can dang 'dra ste/ ji ltar zhe na/ dper na chu mig khyad par can gyis sngon 'byung ba'i chu dag kyang lteng ka nas 'dzin cing / sngon ma byung ba'i chu yang rgyun mi 'chad par 'byung bar byed pa de bzhin du gzungs kyis ni sngon thos pa'i chos dang don mi brjed par byed la/ spobs pas ni sngon ma thos pa'i chos dang don rtogs par byed cing bskal par bshad na yang spobs pa zad par mi 'gyur bas bkod ma dang 'dra'o/ /dga' ba'i sgra dang mtshungs pa dang / /zhes bya ba la/ chos kyi mdo bzhi dang ldan pa'i byang chub kyi sems ni dga' ba'i sgra dang 'dra ste/ ji ltar zhe na/ sems can la la zhig nye du dang nor rdzas la sogs pa dang bral ba mi dga' zhing gnas pa las/ 'ga' zhig gis nye du dang nor rdzas la sogs pa dang phrad par 'gyur ro zhes gtam snyan pa smras nas sems dga' ba skye ba de bzhin du mya ngan las 'das pa dang thar pa thob par 'dod pa rnams kyis 'dus byas thams cad mi rtag pa dang / zag pa dang bcas pa thams cad sdug bsngal ba dang / chos thams cad bdag med pa dang / zhi ba dang mya ngan las 'das pa'o zhes bya ba'i sgra thos nas bdud rtsis tshim par byas pa de bzhin du sems dga' ba skye bas na chos kyi mdo bzhi ni dga' ba'i sgra dang mtshungs so/ /klung chen rgyun dang 'dra ba'o/ /zhes bya ba la/ bgrod pa gcig pa'i lam dang ldan pa'i byang chub kyi sems ni chu bo'i rgyun dang 'dra ste/ ji ltar zhe na/ dper na chu bo yang 'bad rtsol med par rang bzhin gyis lhun gyis grub pa bzhin du sa brgyad pa'i dus na mi skye ba'i chos la bzod pa thob ste/ rnam par mi rtog pa'i ye shes lhun gyis grub pas bdag nyid kyis sangs rgyas kyi chos yongs su smin par bya ba dang / sems can yongs su smin par bya ba la 'bad rtsol med par rang bzhin gyis lhun gyis grub par byed pas na chu bo'i klung dang 'dra'o/ /rgyal sras rnams kyis sems bskyed pa/ /sprin dang 'dra bar rab bstan te/ /zhes bya ba la/ thabs dang ldan pa'i sras rnams kyi byang chub kyi sems ni sprin dang 'dra bar bstan te/ dper na sprin chen po las sa gzhi dang lo tog la sogs pa'i 'jig rten gyi 'byor pa sna tshogs 'byung ba de bzhin du thabs dang shes rab zung du 'brel ba'i thabs dang ldan pa'i byang chub kyi sems las kyang dga' ldan gyi pho brang nas 'chi 'pho ba bstan pa dang lhums su gshegs pa nas mya ngan las 'das pa bstan pa'i bar dag 'byung ba dang / 'jig rten dang 'jig rten las 'das pa dang mtho ris dang / mya ngan las 'das par 'gyur ba'i chos rnam pa sna tshogs 'byung bas sprin dang 'dra'o/ /de'i phyir de ltar yon tan phyug/ /ces bshad pa la/ gong du bshad pa ltar dpe rnam pa nyi shu rtsa gnyis kyi tshul gyis na byang chub sems dpa' rnams kyi byang chub kyi sems de yon tan gyis phyug pa yin te de bas na dad pa dang dga' ba'i sems kyis byang chub kyi sems de bskyed par bya'o zhes bya ba'i don to/ /sangs rgyas kyi chos rnams kyi tshogs zhes bya ba la/ sangs rgyas kyi chos ni stobs dang mi 'jigs pa dang ma 'dres pa la sogs pa'i sangs rgyas kyi sar gtogs pa'i yon tan la bya'o/ /tshogs kyi sgras ni sa bcu dang pha rol tu phyin pa bcu la sogs pa la bya'o/ /rang gi rgyun gyis 'bab pa'i phyir/ /zhes bya ba la/ dper na chu klung 'bad rtsol med par rang gi ngang gis 'bab pa de bzhin du bgrod pa gcig pa'i dus na yang rnam par mi rtog pa lhun gyis grub pas bdag dang gzhan gyi don la 'bad rtsol med par byed do zhes bya ba'i don to/ /bgrod pa gcig pa'i lam gang gi tshe na rtogs she na/ de'i phyir mi skye ba'i chos la bzod pa thob na bgrod pa gcig ste zhes smos te/ sa brgyad pa thob pa'i tshe chos thams cad ma skyes pa'o zhes mi skye ba'i chos la bzod pa thob ste/ de'i tshe rnam par mi rtog pa'i ye shes lhun gyis grub pa rnyed pas bgrod pa gcig pa zhes bya'o/ /bgrod pa gcig pa'i don bstan pa'i phyir sa der song ba'i byang chub sems dpa' rnams bya ba byed pa tha mi dad pa'i phyir ro zhes smos te/ sa brgyad pa la zhugs pa'i byang chub sems dpa' rnams rnam par mi rtog pa lhun gyis grub pas sangs rgyas kyi chos yongs su smin par bya ba dang / sems can yongs su smin par bya ba la lhun gyis grub pa nyid du byed par 'dra ste/ tha dad pa med pas na bgrod pa gcig pa'o zhes bya'o/ /sems ma bskyed pa la smad par tshigs su bcad pa zhes bya ba la/ gong du byang chub kyi rgyu dang rang bzhin la sogs pa yang bshad/ dpe'i sgo nas yon tan che bar yang brjod nas byang chub kyi sems dam pa de ma bskyed na skyon yod pa dang bden pa bzhi ma thob par bstan pa'i phyir tshigs su bcad pa rtsom mo zhes bya ba'i don to/ /pha rol don sems de thabs rnyed/ /dgongs chen don mchog de nyid thob/ /cher 'os sems bskyed spangs pa yis/ /skye bos bde spangs zhi bar 'gro/ /zhes bya ba la/ theg pa chen po byang chub kyi sems de byang chub sems dpa' dang de bzhin gshegs pas bskyed par 'os pas cher 'os sems bskyed pa zhes bya ste/ nyan thos dang rang sangs rgyas gang gis byang chub kyi sems de spangs nas yang skyes na de dag gis bde ba bzhi spangs shing / bde ba bzhi dang bral nas/ zhi ba mya ngan las 'das pa 'ba' zhig tu 'gro bar 'gyur ro zhes bya ba'i don to/ /de la pha rol gyi don ni pha rol la phan par bya ba ste/ de'ang spangs pa phun sum tshogs pa dang / ye shes phun sum tshogs pa la bzhag pa'o/ /de la spangs pa la yang rnam pa gnyis te/ nyon mongs pa'i sgrib pa spangs pa dang / shes bya'i sgrib pa spangs pa'o/ /ye shes kyang rnam pa gnyis te/ gang zag pa la bdag med par khong du chud pa'i ye shes dang / chos la bdag med par khong du chud pa'i ye shes so/ /byang chub sems dpa' dag pha rol gyi don la sems pa las bde ba mchog skye ste/ byang chub kyi sems dang bral ba de ni bde ba de yang mi 'thob bo zhes bya ba'i don to/ /de thabs rnyed ces bya ba la/ de'i sgras ni pha rol gyi don dang sbyar te/ pha rol gyi don bsgrub par bya ba'i thabs rnyed pa las byang chub sems dpa' bde ba mchog skye ste pha rol gyi don gyi thabs dang shes rab bo/ /gang gi byang chub kyi sems de spangs pa des bde ba yang mi 'thob bo zhes bya ba'i don to/ /dgongs chen don mchog ces bya ba ni theg pa chen po'i chos zab mo ma skyes pa dang ma byung ba dang / pha bsad pa dang ma bsad pa dang zhes bya ba la sogs pa dgongs pa zab mo ci las dgongs nas bshad pa'i don rtogs pa las byang chub sems dpa' rnams bde ba mchog skye ste/ byang chub kyi sems ma bskyed pa de ni bde ba de yang mi 'thob bo zhes bya ba'i don to/ /de nyid mthong zhes bya ba la/ de nyid ni chos la bdag med pa la bya ste/ chos la bdag med pa mthong ba las byang chub sems dpa' rnams bde ba skye ste/ byang chub kyi sems spangs pas ni bde ba de yang mi 'thob bo zhes bya ba'i don to/ /sems bskyed pa dang bsngags pas ngan 'gro dang yongs su skyo bas mi 'jigs pa'i phyir tshigs su bcad pa zhes bya ba la/ don dam pa'i byang chub kyi sems de yang yon tan dang legs pa brjod pa dang / yon tan legs pa yod pas don dam pa'i byang chub kyi sems bskyed nas ngan song gsum du skye ba'i 'jigs pa yang med/ sems can gyi don gyi phyir dka' ba rnam pa sna tshogs spyod pas/ skyo ba'i 'jigs pa med par bstan pa'i phyir tshigs su bcad pa rtsom mo/ /blo ldan sems mchog skyes ma thag tu yang / /mtha' yas nyes pa byed las sems rab bsdams/ /bde dang sdug bsngal la yang rtag tu dga'/ / dge ldan snying rje gnyis ni rtag par 'phel/ /zhes bya ba la/ blo ldan ni byang chub sems dpa' la bya ste/ bdag med pa gnyis khong du chud pa'i ye shes yod pas so/ /sems mchog ni don dam pa'i byang chub kyi sems la bya ste/ sa dang por don dam pa'i byang chub kyi sems de skyes nas/ chos kyi dbyings thams cad du 'gro ba'i mtshan nyid du mthong ma thag tu nam mkha'i mthas gtugs pa'i sems can mtha' yas pa rnams la lus dang ngag dang yid gsum gyi sgo nas srog gcod pa dang / ma byin par len pa la sogs pa nyes par byed pa las sems bsdams te/ de phan chad mi byed pa'i sdom pa thob pa'o/ /ji ltar sdig pa mi byed pa'i sdom pa thob pas na byang chub sems dpa' de ngan song gsum du skye ba'i 'jigs pa med do/ /byang chub sems dpa' rnams lha dang mi la sogs pa'i longs spyod kyi bde ba myong ba'i tshe na yang yid bde ba la/ ngan song la sogs pa dang / sems can gyi don du mgo dang rkang lag la sogs gtong ba sdug bsngal myong ba'i dus na yang yid bde ste/ ci'i phyir zhe na/ rtag tu dge ba'i chos 'phel bar byas pa dang / rtag tu snying rje nyid 'phel bar bya ba'i phyir/ bde ba dang sdug bsngal gnyi ga'i dus na bde ba'o/ /de la dge ba 'phel bar byas pas lha dang mi la sogs pa'i bde ba myong ba'i dus na yang longs spyod la gnas pa'i phyir bde ba'o/ /snying rje 'phel bar bya ba'i phyir sems can gyi don du ngan song gsum du grang ba dang tsha ba la sogs pa mang po myong yang skyo ba med pas na sdug bsngal gyi dus na yang bde'o/ /mi bya bar bsdams par tshigs su bcad pa zhes bya ba la/ mi bya ba ni mi dge bcu mi bya ba ste/ gang du don dam pa byang chub kyi sems skyes ma thag tu mtha' yas pa'i nyes pa byed pa las sems bsdams so zhes mdo tsam du bstan pa de ji ltar bsdams pa tshigs su bcad pa gcig gis zhib tu bshad do zhes bya ba'i don to/ /nam zhig lus dang srog la mi lta zhing / /zhes bya ba la/ byang chub sems dpa' rnams ni bdag pas ches sems can pha rol po gces shing phongs par 'dzin te/ sems can gyi don zhib tu gyur nas lus la yang mi lta ste lus gtong ba dang srog la yang mi lta ste srog kyang 'dor ro zhes bya ba'i don to/ /gzhan gyi don phyir rab tu ngal med na/ /zhes bya ba la/ gzhan yang sems can mi dge ba las bzlog cing dge ba la gnas pa dang / bla na med pa'i byang chub thob par bya ba'i phyir/ bskal pa grangs med par mgo dang rkang lag la sogs pa gtong ba'i dus su sdug bsngal gyis kyang skyo ba med do zhes bya ba'i don to/ /de lta bu dag gzhan gyis gnod byas pas/ /nyes pa byas pa'i las la ga la 'jug/ /ces bya ba la/ de ltar gzhan gyi don du lus dang srog la yang mi lta zhing sdug bsngal rnam pa sna tshogs nyams su len pa de sems can gzhan gyis byang chub sems dpa' de la srog gcod pa la sogs pa'i nyes pa byas pas de'i lan du srog gcod pa la sogs pa'i nyes pa byed pa dang / bdag gi don dang sems can gzhan la srog gcod pa la sogs pa'i nyes pa byed pa la gang zhig 'jug ste/ cung zad kyang mi 'jug go zhes bya ba'i don to/ /sems mi ldog par tshigs su bcad pa gnyis so zhes bya ba la/ gal te byang chub sems dpa' de lus dang srog la yang mi lta bar sems can gyi don byed du zin kyang skabs su byang chub kyi sems las bzlog go snyam du sems pa la/ byang chub sems dpa' rnams ni ye shes kyi tshogs dang / bsod nams kyi tshogs kyis brtan pas byang chub kyi sems las bzlog mi srid do zhes bstan pa'i phyir tshigs su bcad pa gnyis smos so/ /des ni chos kun sgyu ma lta bur brtags/ /zhes bya ba la/ byang chub sems dpa'i ye shes kyi tshogs kyis phyi dang nang gi chos thams cad sgyu ma dang smig rgyu dang / rmi lam lta bur rang bzhin gyis stong par mthong ngo zhes bya ba'i don to/ /skye ba skyed mos tshal du 'gro ba bzhin/ /zhes bya ba la/ dper na skyed mos tshal ngan pa nas bzang por 'gro bas na/ mngon par lhag par dga' ba skye ba de bzhin du/ byang chub sems dpa' rnams bsod nams kyi tshogs dang ldan pas mi la sogs pa'i gnas nas shi 'phos te mi'i longs spyod btang nas lha la sogs pa'i gnas len pas na skyed mos tshal ngan pa bor nas bzang po len pa bzhin du dga' ba'i mchog skye'o zhes bya ba'i don to/ /'byor pa'i dus dang zhes bya ba la/ byang chub sems dpa' lha'i gnas su skyes na brgya byin dang tshangs pa la sogs pa lha'i bdag por 'gyur ba dang / mi'i nang du skyes na 'khor los sgyur ba'i rgyal po la sogs pa mi'i bdag por 'gyur ba ni 'byor pa'i dus zhes bya'o/ /rgud pa'i dus na yang zhes bya ba la/ longs spyod btang nas 'chi ba'i dus la bab pa ni rgud pa'i dus zhes bya'o/ /nyon mongs sdug bsngal dag gis mi 'jigs so/ /zhes bya ba la/ byang chub kyi sems ldog pa ni yang na 'dod chags la sogs pa'i nyon mongs pas bcings par dogs pas byang chub kyi sems bor nas mya ngan las 'da' ba'am/ yang na skye ba dang rgas pa la sogs pa'i sdug bsngal gyis 'jigs nas byang chub kyi sems 'dor grang na/ byang chub sems dpa'i ye shes kyi tshogs kyis sgyu ma la sogs pa lta bur mthong bas lha dang mi la sogs pa'i 'byor pa'i dus na yang 'dod chags la sogs pa'i nyon mongs pas mi gos pa'i phyir/ nyon mongs pas mi 'jigs la/ byang chub sems dpa'i bsod nams kyi tshogs kyis tshe gcig tu 'chi zhing skye ba len pas na skyed mos tshal gcig nas gcig tu 'pho ba 'dra bar mthong bas skye ba dang rga ba'i sdug bsngal gyi 'jigs pa med pas byang chub kyi sems ga la ldog ste mi ldog go zhes bya ba'i don to/ /skye bas na skyed mos tshal dang 'dra'o zhes bstan pa'i don rgyas par bshad pa'i phyir/ rang gi yon tan sems can phan par dga'/ /bsam bzhin skye dang rdzu 'phrul rnam par 'phrul/ /rgyan dang zas dang sa mchog rnam bzhi ste/ /rtsed mo dga' ba'i snying rje med la med/ /ces smos te/ sems can dag skyed mos tshal du 'gro bas na rnam pa bzhi byed de/ lus bkrus nas rgyan la sogs pas brgyan par byed pa dang / sa gzhi bde ba dag tu gnas par byed pa dang / glu gar la sogs pa rtsed mo rnam pa sna tshogs byed pa ste/ de lta bu skyed mos tshal du ni sems 'jug cing ldog pa med do/ /de bzhin du byang chub sems dpa' tshe gcig nas gcig gis skyed mos tshal du rgyu bas na sbyin pa dang tshul khrims dang ting nge 'dzin dang gzungs dang shes rab kyi rgyan la sogs pa rang gi yon tan gyi rgyan yin no/ /sems can thams cad la phan pa dang bde bar byas pa dga' ba'i sems ni kha zas bzang po lta bu'o/ /sems can gyi don du lha dang mi la sogs pa'i gnas de dang de dag tu skye bar bya'o zhes bsam bzhin du skye ba ni skyed mos tshal gyi mchog dang 'dra'o/ /sems can gyi don du mngon par shes pa lngas rdzu 'phrul rnam pa sna tshogs mdzad pa ni byang chub sems dpa' rnams kyi rtsed mo ste yon tan de bzhi dang ldan na byang chub sems las ga la ldog ste mi ldog go zhes bya ba'i don to/ /yon tan de bzhi yang bdag dang gzhan gyi don spangs pa snying rje med pa'i nyan thos dang rang sangs rgyas la mi srid de de med do zhes bya ba'i don to/ /sdug bsngal gyi 'jigs pa bzlog par tshigs su bcad pa zhes bya ba la/ de ltar byang chub sems dpa' nyon mongs pas 'jigs pa yang med 'chi ba'i sdug bsngal gyi 'jigs pa med du zin kyang 'khor ba na sems can gyi don du mgo dang rkang lag la sogs pa gtong ba'i sdug bsngal gyis 'jigs par 'gyur ro snyam pa la/ sdug bsngal de yang med par bstan pa'i phyir tshigs su bcad pa rtsom mo zhes bya ba'i don to/ /gzhan phyir brtson ldan snying rje can dag ni/ /de dag mnar med pa yang dga' 'dzin na/ /gzhan la brten pa'i sdug bsngal 'byung ba yis/ /srid pa dag na de 'dra ga la skrag/ / ces bya ba la/ gzhan gyi phyir zhes bya ba ni sems can gzhan tshe 'dir mi dge ba las bzlog cing dge ba la bzhag pa dang / tshe rabs gzhan du mya ngan las 'das pa dang / thams cad mkhyen pa'i ye shes la bzhag pa ni gzhan gyi phyir zhes bya'o/ /de'i ched du pha rol tu phyin pa drug la spyod pa ni brtson pa dang ldan pa zhes bya'o/ /sems can gzhan sdug bsngal bas bdag kyang sdug bsngal bar 'gyur bas na snying rje can zhes bya ste/ byang chub sems dpa' de dag ni sems can gyi don du 'gyur na mnar med pa'i sems can dmyal ba na gnas na yang dga' zhing bde ba ste/ skyo ba med na sems can gyi don du 'khor ba na mgo dang rkang lag la sogs pa btang ba tsam gyi sdug bsngal gyis ga la skrag ste mi skrag go zhes bya ba'i don to/ /sems can yal bar 'dor du mi rung bar tshigs su bcad pa zhes bya ba la/ de ltar byang chub kyi sems las kyang mi ldog pa sdug bsngal gyis mi skrag tu zin kyang byang chub kyi sems dang ldan pa dag sems can gyi don mi byed de yal bar 'dor ro snyam pa la/ byang chub kyi sems dang ldan pa rnams kyis sems can gyi don 'dor du mi rung bar bstan pa'i phyir tshigs su bcad pa rtsom mo zhes bya ba'i don to/ /slob dpon thugs rje chen pos rtag tu rten/ /zhes bya ba la/ 'jig rten na bdag gi don bya ba rnams la gzhan gyis ma bskul bar ma byas na yang ngo tsha zhing khrel ba yin na gzhan gyis bdag gi don byas la gzhan gyis bskul te ma byas na ha cang khrel zhes pa'o/ /de lta bu yin pa las slob dpon dang mkhan po mdzangs pa la brten pa rnams ni gdon mi za bar gzhan gyis bskul mi dgos par bdag don byed par 'gyur ro/ /de dang 'dra bar byang chub sems dpa' rnams ni sems can sdug bsngal ba rnams la rtag tu don gyis shig ces bskul ba'i snying rje chen po'i slob dpon gyis rgyun du bsten te/ sems can gyi don bya bar bskul ma 'debs so zhes bya ba'i don to/ /pha rol sdug bsngal bas ni sems gdungs na/ /zhes bya ba la/ gzhan yang byang chub sems dpa' rnams la slob dpon snying rje chen pos bsten par ma zad kyi/ sems can gzhan gyi sdug bsngal ba mthong na shin tu bdag nyid sdug bsngal bar 'gyur ba'i rang bzhin can yin no zhes bya ba'i don to/ /gzhan gyi bya ba nye bar gnas pa la/ /gzhan gyis bskul ba shin tu ngo yang tsha/ /zhes bya ba la/ de ltar slob dpon snying rje chen pos kyang bsten gzhan sdug bsngal bas kyang bdag sdug bsngal ba'i rang bzhin can yang yin pas de sems can pha rol tu phyin pa drug la gzhag pa'i skabs su bab la/ sems can gyi don byed pa rnams dge ba'i bshes gnyen gyis bskul nas don byed par 'gyur la/ byang chub sems dpa' lhag par ngo tsha bar bya ba yin no zhes bya ba'i don to/ /le lo la yang yongs su smin pa'i tshigs su bcad pa zhes bya ba la/ byang chub sems dpa' bdag dang gzhan gyi don du byang chub tu sems bskyed nas brtson 'grus smyur te bya dgos kyi/ le lo byar mi rung bar bstan pa'i phyir tshigs su bcad pa rtsom mo zhes bya ba'i don to/ /sems can dag gis khur chen mgos khyer la/ /sems can mchog ni dal gyis 'gro mi mdzes/ /bdag dang gzhan gyi rnam mang bcing bas bcings/ /brgya 'gyur du yang brtson 'grus bya bar rigs/ /zhes bya ba la/ 'jig rten na yang khur chen po khyer ba la lam ring por 'gro ba rnams ma bsgyur bar dal gyis song na gnas der phyin par mi 'gyur ba de bzhin du/ byang chub sems dpa' sems can thams cad bla na med pa'i byang chub tu bsgral lo zhes bya ba'i khur mgos khyer te gces par byas nas byang chub kyi sems bskyed de sangs rgyas kyi sar 'gro dgos pa de pha rol tu phyin pa drug spyod pa la brtson 'grus dal gyis 'jug par mi rigs te/ ci'i phyir zhe na/ dper na 'phags pa nyan thos lta bu bdag 'ba' zhig gi don du byed la/ bdag nyid kyis las dang nyon mongs pa dang 'tshe ba'i bcing ba gcod par rtsom pa yang gtsub shing las me 'byung ba bzhin du brtson 'grus bsgyur nas tshe gsum mam/ bdun gyis rang gi 'bras bu thob par byed na byang chub sems dpa' bdag dang gzhan gnyi ga'i rgyud la yod pa'i las dang / nyon mongs pa dang 'tshe ba'i bcing bas bcings pa de bsal bar bya ba'i phyir/ le lo bya bar mi rigs kyi nyan thos pas bskal ba brgya stong du mas bslabs te/ brtson 'grus rtsom pa'i rigs so zhes bya ba'i don to/ /bcing ba gsum ni mngon pa'i chos mdzod la/ /mtshams med pa yi las rnams dang / /nyon mongs mi bzad ngan 'gro dang / /sgra mi snyan dang 'du shes med/ /sgrib pa dag ni gsum du 'dod/ /de la mtshams med pa lnga ni las kyis bcings pa'o/ /'dod chags dang zhe sdang chen po ni nyon mongs pas bcings pa'o/ /ngan song gsum dang byang gi sgra mi snyan dang 'du shes med pa'i lhar skyes pa ni tshe'i 'ching ba'o/ /byang chub tu sems bskyed pa lhag par bya ba'i skabs rdzogs so/ / //sems bskyed pa'i skabs kyi rjes la sgrub pa'i skabs bshad par cis 'brel zhe na/ gong du/ sems can dag gi khur ni mgos khyer la/ /sems can mchog ni dal gyis 'gro mi mdzes/ / bdag dang gzhan gyi rnam mang bcing bas bcings/ /brgya 'gyur du ni brtson 'grus bya ba'i rigs/ /zhes bya ba smos te/ pha rol tu phyin pa la bsgrub pa med na/ sems bskyed pa tsam gyis bla na med pa yang dag par rdzogs pa'i byang chub mi 'thob ste/ de las na sems bskyed pa la gdon mi za bar sgrub pa brtsams dgos so/ /de'i phyir byang chub sems dpa'i sgrub pa ni gnas chen po ste/ byang chub kyi sems la gnas pa'i phyir ro zhes 'og nas kyang bshad do/ /de lta bas na bla na med pa'i byang chub tu sems bskyed pa la brtan nas sgrub pa la 'jug par bya ste/ sems kyang bskyed/ sgrub pa la gnas nas gdod bdag dang gzhan gyi don 'grub kyi sgrub pa med na mi 'grub pas sems bskyed pa'i rjes la sgrub pa'i skabs bshad par 'brel to/ /yang na gong du rigs la gnas pas byang chub tu sems bskyed nas byang chub sems dpa'i bslab pa la bslab par bya'o zhes bshad pa las/ da ci la dmigs nas byang chub sems dpa'i bslab pa la slob par byed pa'i bslab pa'i dmigs pa'i khyad par ston to/ /bslab pa'i dmigs pa'i khyad par yang rnam pa lnga ste/ bdag dang gzhan gyi don dang / de kho na'i don dang / mthu dang / yongs su smin pa dang / bla na med pa'i byang chub bo/ /de lnga yang nyan thos la sogs pa las khyad zhugs te/ ji ltar zhe na/ nyan thos rnams kyi bslab pa ni bdag gi don la dmigs pa dang / gang zag la bdag med pa'i de kho na'i don yin pa dang / stong gsum gyi stong chen po'i 'jig rten gyi khams gcig tsam gyi nang du rdzu 'phrul byed nus pas mthu chung ba dang / bdag yongs su smin par byed pa dang / nyan thos kyi byang chub len pa tsam du zad kyi byang chub sems dpa' ni de las kun bzlog pa ste/ bdag dang gzhan gyi don la dmigs pa dang / gang zag dang chos la bdag med pa de kho na'i don yin pa dang / rdzu 'phrul yang phyogs bcu'i 'jig rten gyi khams thams cad du 'jug pa dang / bdag dang sems can gnyi ga smin par byed pa dang / bla na med pa'i byang chub len pas khyad zhugs te/ de la yang bdag dang gzhan gyi don dang / de kho na'i don dang / mthu dang / yongs su smin par byed pa dang / bzhi la ni rgyu'i mtshan nyid lta bur dmigs la/ bla na med pa'i byang chub la ni 'bras bu'i mtshan nyid lta bur dmigs pas/ sems bskyed pa'i rjes la bsgrub pa'i skabs bshad par 'brel to/ /yang na gong du rigs la gnas pas byang chub tu sems bskyed nas byang chub sems dpa'i bslab pa la bslab par bya ste/ byang chub sems dpa'i bslab pa yang gang la bslab par bya ba dang / ji ltar bslab par bya ba dang / gang gis bslab par bya ba dang rnam pa gsum mo zhes smos pa las/ da gang la bslab par bya ba de ston te/ gang la bslab par bya zhe na/ bdag dang gzhan gyi don la sogs pa rnam pa lnga la bslab par bya ste/ rnam pa lnga po de yang sgrub pa la gnas pa rnams kyis 'grub par nus kyi sgrub pa med pa rnams kyis 'grub par mi nus par bstan pa'i phyir sems bskyed pa'i rjes la sgrub pa'i skabs bshad bar 'brel to/ /gnas rtsom 'bras bu skye ba che bdag nyid/ /rgyal sras rnams kyi sgrub pa yin par 'dod/ /ces bya ba la/ rgyal ba ni rnam par mi rtog pa'i ye shes dang / chos kyi dbyings la ste/ de gnyis rtogs pa las skyes pa rnams ni rgyal ba'i sras zhes bya ste/ dngos su byang chub sems dpa' la bya'o/ /byang chub sems dpa' rnams kyi sgrub pa ni bslab pa gsum lta bu'i mtshan nyid yin par 'dod de/ gang zhe na/ gnas che ba'i bdag nyid dang / rtsom pa che ba'i bdag nyid dang / 'bras bu che ba'i bdag nyid du 'dod do/ /de la dang po byang chub tu sems bskyed pa na sems can thams cad bla na med pa'i byang chub tu bsgral bar bya'o zhes sems bskyed pa de las sgrub pa 'byung bas na/ sgrub pa de gnas che ba'i bdag nyid do/ /de ltar sems bskyed nas mos pas spyod pa'i sa yan chad/ sa bcu man chad kyi dus na bdag dang gzhan gyi don dag byed pa rtsom pa che ba'i bdag nyid du 'dod do/ /de nas sangs rgyas kyi sa kun tu 'od bla na med pa'i byang chub kyi 'bras bu len pas 'bras bu che ba'i bdag nyid de/ de'i phyir na byang chub sems dpa'i spyod pa ni thog mar yang dge/ bar du yang dge/ tha mar yang dge ba zhes bya'o/ /de la gnas che bas thog mar dge'o/ /rtsom pa che bas bar du dge ba'o/ /'bras bu che bas tha mar dge ba'o/ /de ltar che ba rnam pa gsum dang ldan pa yin pas na/ rtag tu len pa chen po bzod pa che/ /don chen yang dag bsgrub pa'i bya ba byed/ /ces smos so/ /dang po byang chub tu sems bskyed pa na sems can thams cad bla na med pa'i byang chub tu bsgral bar bya'o zhes khas blangs pas na len pa che'o/ /de nas mos pas spyod pa'i sa yan chad sa bcu man chad kyi dus na bdag dang gzhan gyi don du dka' ba spyod pa rnam pa sna tshogs kyi mi skyo bas na bzod pa che ba'o/ /mjug tu sangs rgyas kyi sa de'i tshe bla na med pa'i byang chub tu sangs rgyas nas bdag dang gzhan gyi don phun sum tshogs pa bsgrubs pas na/ don chen po yang dag par bsgrub pa'i bya ba byed pa zhes bya'o/ /bdag dang gzhan gyi don la khyad par med pa'i tshigs su bcad pa zhes bya ba la/ sems bskyed nas sgrub pa la gnas par bya'o zhes smos te/ de yang bdag gi don bsgrub pa dang / gzhan gyi don bsgrub par bya'o/ /de la bdag gi don ni nyon mongs pa dang sdug bsngal spangs pa dang / 'jig rten dang 'jig rten las 'das pa'i bde ba thob par bya ste/ ji ltar bdag la de ltar sgrub pa de bzhin du sems can gzhan la yang de dang 'dra bar sgrub par byed do zhes bstan pa'i phyir tshigs su bcad pa rtsom mo zhes bya ba'i don to/ /gzhan yang bdag tu mnyam pa'i sems bskyed pa/ /zhes bya ba la/ de kho na mngon sum du ma gyur kyang bdag gi sems bskyed pas mos pas spyod pa'i sa na mnyam pa dang / sems pa la sogs pa'i sgo nas ye shes kyi tshogs kyis bdag gang yin pa sems can gzhan yang de yin/ gzhan gang yin pa bdag kyang de yin no zhes bdag dang sems can gzhan du sems mnyam pa rnyed pa dang / sa dang po thob pa'i dus na chos kyi dbyings thams cad du 'gro ba'i mtshan nyid du rtogs pas bdag dang gzhan du sems mnyam pa nyid rnyed do zhes bya ba'i don to/ /yang na bdag pas gzhan mchog sdug byed pa/ /zhes bya ba la/ ye shes kyis bdag dang gzhan mnyam pa nyid du rtogs pa yang ma zad kyi/ snying rje chen pos bdag pas kyang lhag par gzhan la sdug pa dang gces pa dang phongs par byed do zhes bya ba'i don to/ /de ltar bdag pas gzhan don mchog tu shes/ /bdag gi don dang gzhan gyi don kyang gang / /zhes bya ba la/ gong du bshad pa ltar ye shes kyis ni bdag dang gzhan mnyam pa nyid du rtogs/ snying rjes bdag pas sems can gzhan la gces par 'dzin te gzhan gyi don bya ba la mchog tu sems bskyed pa'i byang chub sems dpa' de dag la 'di ni bdag gi don/ 'di ni gzhan gyi don zhes tha dad par dbye ba ci yang med kyi don byas pa gang gzhan gyi don byas pa de nyid bdag gi don yang de yin no zhes bya ba'i tha tshig go/ /gzhan gyi don khyad par du bya ba'i tshigs su bcad pa zhes bya ba la/ gong du byang chub sems dpa' rnams ni bdag pas gzhan la gces par byed do zhes bshad pa ji ltar na bdag pas gzhan la gces par byed do zhes bstan pa'i phyir tshigs su bcad pa rtsom mo zhes bya ba'i don to/ /de ltar snying rje'i bdag nyid gzhan don phyir/ /bdag la sdug bsngal gdung bar byed pa ltar/ /ji ltar 'jig rten pa dag dgra dag la/ /gdung bar bya ba'i snying rje yod ma yin/ /zhes bya ba la/ dper na snying rje chen po'i rang bzhin can byang chub sems dpa' rnams sems can gzhan bde ba dang / legs pa la gzhag pa'i phyir sems can gzhan gyi don du longs spyod dang / srid gtong ba dang / mgo rkang lag la sogs pa bcad pa'i sdug bsngal gyis byang chub sems dpa' rang nyid la mi bde ba dang gnod pa byed pa lta bu 'jig rten na dgra dang gshed po la sogs pa las gnod par bya'o zhes bsad pa dang bcad pa la sogs pa gnod pa sna tshogs kyis gnod par byed du bcug kyang gzhan gyi don du byang chub sems dpa' bdag la gnod par byed ba'i gnod pa de tsam mi nus so zhes bya ba'i don to/ /gzhan gyi don sgrub pa'i dbye ba'i tshigs su bcad pa gnyis te zhes bya ba la gong du sgrub pa'i gnas dang / rtsom pa dang / 'bras bu yang bshad/ bdag dang gzhan gyi don la bye brag med pa yang bstan/ bdag bas gzhan pa'i don gces par byed pa yang bstan nas da ni tshigs su bcad pa gnyis kyis sems can rnam pa gsum la don rnam pa bcu gsum gyis byed do zhes bstan pa'i phyir tshigs su bcad pa rtsom mo zhes bya ba'i don to/ /chung 'bring dam pa'i chos nyid gnas pa dag/ /ces bya ba la/ sems can gsum zhes ston te/ nyan thos kyi theg pa'i rigs can rnams ni chung ngu'i chos nyid la gnas pa zhes bya'o/ /rang sangs rgyas kyi theg pa la gnas pa'i rigs can rnams ni 'bring gi chos nyid la gnas pa zhes bya'o/ /byang chub sems dpa'i rigs can gyi gang zag rnams ni dam pa'i chos nyid la gnas pa zhes bya'o/ /legs par bstan dang zhes bya ba la/ /cho 'phrul rnam pa gsum yod de/ rjes su bstan pa'i cho 'phrul dang / bshad pa'i cho 'phrul dang / rdzu 'phrul gyi cho 'phrul lo/ /de gang zag rigs can gsum rnams so so'i sems brtags na/ khyod kyi sems 'dod chags dang bcas so zhe'am/ zhe sdang dang bcas so zhe'am/ gti mug dang bcas so zhes ston pa ni rjes su bstan pa'i cho 'phrul zhes bya'o/ /de nas de'i gnyen por mi gtsang ba dang byams pa la sogs pa 'chad pa ni bshad pa'i cho 'phrul zhes bya ste/ bstan pa la dad pa rnams la cho 'phrul rnam pa gnyis bshad pa ni legs par bshad pa zhes bya ste/ 'di ni don gcig pa rnam pa gcig go/ /mgu byed ces bya ba la/ bstan pa la ma dad pa'i mu stegs la sogs pa la rdzu 'phrul gyi cho 'phrul gyis gcig las du mar sprul pa'i cho 'phrul bstan pas dad par byas nas/ sangs rgyas kyi bstan pa la btsud pa ni mgu bar byed pa zhes bya ste/ 'di ni don byed pa rnam pa gnyis so/ /'jug pa zhes bya ba la/ dkon mchog gsum la skyabs su btang nas khrims 'dzin du bcug pa na 'jug pa zhes bya ste/ 'di ni don gsum pa'o/ /don la nges pa zhes bya ba la/ theg pa gsum gyi rigs can so so'i theg pa'i chos la the tshom du gyur pa'i the tshom sel ba'i don la nges pa zhes bya ste/ 'di ni don byed pa bzhi pa'o/ /dge bar yongs su smin byed ces bya ba la/ the tshom bsal ba rnams pha rol tu phyin pa drug spyod du bcug pa ni yongs su smin par byed pa zhes bya ste/ 'di ni don byed pa lnga pa'o/ /de ltar lung bsgo'o zhes bya ba la/ bsam gtan gyi man ngag med pa rnams la/ bsam gtan gyi man ngag sbyin pa'i lung bsgo ba zhes bya ste/ 'di ni don byed pa drug pa'o/ /gnas dang zhes bya ba la/ bsam gtan gyi man ngag thob pa rnams la/ sems rtse gcig pa'i ting nge 'dzin thob par byas pa ni gnas pa rnams kyis bya zhes bya ste/ 'di ni don byed pa bdun pa'o/ /blo gros byed ces bya ba la/ shes rab bskyed nas theg pa so so'i mya ngan las 'das pa dang thar pa thob par byed pa'i blo gros byed ces bya ste/ 'di ni don byed pa brgyad pa'o/ /yon tan ldan pa thob dang zhes bya ba la/ thar pa thob pa rnams kyis mngon par shes pa dang / byang chub kyi phyogs dang / mtha' dag skye mched ces pa la sogs pa'i yon tan thob par byas pa'i yon tan dang ldan pa thob pa zhes bya ste/ 'di ni don byed pa dgu pa'o/ /de bzhin du rigs su skyes dang zhes bya ba la/ 'di yan chad du ni theg pa gsum gyi rigs la gnas pa gang zag rnams la spyir thun mong du don ji ltar byed pa bstan nas/ da ni theg pa chen po'i rigs can 'ba' zhig gi don thun mong ma yin par byed pa ston te/ mos pas spyod pa'i sa'i rim pa nas sa dang po thob par bya ba ni rigs su skyes pa zhes bya ste/ sa bcu las kyang sa dang po thob par byas na sangs rgyas kyi rigs su skyes so zhes gsungs so/ /'di ni don byed pa bcu pa'o/ /lung bstan zhes bya ba las brgyad pa'i dus na lung bstan pa thob pa zhes bya ste/ ci'i phyir zhe na/ sa brgyad pa thob pa'i byang chub sems dpa' rnams de bzhin gshegs pas sangs rgyas kyi zhing che ge mo zhig tu sangs rgyas kyi mtshan 'di zhes bya bar 'gyur ro zhes lung ston pa'i phyir te/ 'di ni don byed pa bcu gcig pa'o/ /dbang bskur dang zhes bya ba la sa bcu pa'i dus na ni phyogs bcu'i de bzhin gshegs pa thams cad kyi 'od zer gyis chos kyi rgyal po'i rgyal tshab tu dbang bskur bar mdzad de/ 'di ni don byed pa bcu gnyis pa'o/ /de bzhin gshegs mkhyen bla med go 'phang dang / /zhes bya ba la/ sangs rgyas kyi sa kun du 'od du me long lta bu'i ye shes la sogs pa ye shes bzhi thob par byas pa ni de bzhin gshegs pa'i mkhyen pa/ bla na med pa'i go 'phang la gzhag pa zhes bya ste/ 'di ni don byed pa bcu gsum pa'o/ /gzhan don de gsum bcu gsum bdag nyid do/ /zhes byang chub sems dpa' gzhan gyi don byed pa ni/ sems can rnam pa gsum la don rnam pa gsum byed do zhes bya ba'i don to/ /gzhan gyi don sgrub pa la tshigs su bcad pa zhes bya ba la/ gzhan gyi sgras ni nyan thos kyi rigs can dang / rang sangs rgyas kyi rigs can dang / theg pa chen po'i rigs can rnams la bya ste/ sems can de dag gi don sgrub pa la/ sems can de dag gi bsam pa che chung dang snod che chung las chos kyang de dang 'tsham par so so'i theg pa 'chad pa ni ci rigs don byed pa ste/ de bstan pa'i phyir tshigs su bcad pa rtsom mo zhes bya ba'i don to/ /skye bo mthun pa zhes bya ba la/ nyan thos kyi rigs can gyi gang zag rnams ni dbang po rtul zhing snod chung ba yin pas nyan thos kyi theg pa'i chos nyid bshad kyi theg pa chen po'i chos ma bshad pa dang / rang sangs rgyas kyi rigs can gyi skye bo rnams ni shes rab 'bring la snod 'bring yin pas rang sangs rgyas kyi chos nyid bshad kyi theg pa chen po mi bshad pa dang / theg pa chen po'i rigs can gyi skye bo rnams ni shes rab rno ba snod chen po yin pas theg pa chen po'i chos nyid bshad kyi/ nyan thos dang rang sangs rgyas kyi theg pa'i chos mi bshad pa ste/ de bas na 'phags pa dkon mchog brtsegs pa las kyang / nyan thos dang rang sangs rgyas kyi theg pa rnams la zab cing rgya che ba'i chos 'chad pa ni/ byang chub sems dpa'i 'khrul pa'o zhes gsungs so/ /phyin ci ma log 'chad pa dang / /zhes bya ba la/ nyan thos dang rang sangs rgyas dang theg pa chen po'i rigs can rnams la yang rnam pa gsum yod de/ 'dod chags kyi shas che ba dang / zhe sdang gi shas che ba dang / gti mug gi shas che ba ste/ de dag la yang rjes su bstan pa'i cho 'phrul gyis sems brtags nas bshad pa'i cho 'phrul gyis 'dod chags can la mi gtsang ba bsgom pa ston/ zhe sdang can la byams pa bsgom pa ste/ gti mug can la rten cing 'brel bar 'byung ba bsgom pa ston pa ni phyin ci ma log par 'chad pa zhes bya'o// //mi 'gying ba dang zhes bya ba la/ rdzu 'phrul gyi cho 'phrul gyis 'bar ba dang / 'phur ba la sogs pa bstan nas sems can mgu bar bya ste/ bstan pa la dad pa bskyed kyang byang chub sems dpa' 'di lta bu zhig gis sems can gyi don byas so zhes lus dang ngag dang yid kyi sgo nas 'gying ba med de/ lus kyi sgo nas mi 'gying ba ni lus mi 'chos pa'o/ /ngag gi sgo nas mi 'gying ba ni ngoms spyod mi byed pa'o/ /sems kyi sgo nas mi 'gying ba ni nga rgyal che bar mi sems pa'o/ /nga rgyal med cing ces bya ba/ rdzu 'phrul gyi cho 'phrul gyis sems can mgu bar byas nas skyabs su btang ste/ bslab pa 'dzin du bcug pa rnams la yang 'di ni bdag gis btul te bdag gi slob ma yin no snyam du sems pas nga rgyal med pa zhes bya'o/ /mkhas dang zhes bya ba la theg pa gsum gyi rang dang spyi'i mtshan nyid la mkhas pas sems can mi shes pa rnams kyi mi shes pa sel ba dang / log par shes pa rnams kyi log par shes pa med par byed pa dang / the tshom du gyur pa rnams kyi the tshom gcod par byed pas na mkhas pa zhes bya'o/ /bzod can zhes bya ba la/ byang chub sems dpa' sems can sa bcu dang pha rol tu phyin pa bcu la dgod pa'i phyir sems can gyi don du grang ba dang / tsha ba la sogs pa nyams su len cing skyo ba med pas na bzod pa can zhes bya'o/ /dul zhes bya ba la lus bsdams pa dang / ngag bsdams pa dang / yid bsdams pas dul ba zhes bya ste/ bdag de ltar dul na sems can gzhan yang byang chub sems dpas dul bar nus so/ /ci'i phyir zhe na/ mdo dag las kyang bdag ma grol na sems can grol bar mi nus/ bdag ma zhi na sems can zhi bar bya bar mi nus/ bdag ma dul na sems can gzhan dul bar bya bar mi nus so zhes gsungs pa'i phyir te/ 'di yan chad du byang chub sems dpa' sems can sa la zhugs pa rnams la don ji ltar byed pa bstan to/ / shin tu ring song zhes bya bas sa la zhugs pa'i byang chub sems dpa' rnams kyis gzhan yang sa la 'jog pa'i sgo nas sems can gyi don byed pa ston to/ /sa dang po thob pa nas sangs rgyas kyi sa man chad sa bcu gcig la zhugs pa'i dus na ni ring du song ba zhes bya ste/ ci'i phyir zhe na/ sa de dag la nyan thos dang rang sangs rgyas dang so so'i skye bo rnams kyis 'jug par mi nus pa'i phyir ro/ /de la sa dang po'i dus na ni byang chub sems dpa' de bzhin gshegs pa'i rigs su skyes pa zhes bya ste/ de thob dang sems can gzhan dag sa dang po thob par bya ba dang / de bzhin gshegs pa'i rigs su skye bar byed pa'i don byed nus so/ /sa brgyad pa'i dus na ni lung bstan pa thob ces bya ste/ rnam par mi rtog pa lhun gyis grub pa thob pas bdag de la gnas na sems can gzhan yang de la 'jog par nus so/ /sa bcu pa'i dus na ni rgyal tshab tu dbang bskur ba thob pa zhes bya ste/ bdag de la gnas na sems can gzhan yang gnas te thob par bya bar nus so/ /sangs rgyas kyi sa'i dus na ni ye shes bzhi la gnas pa ste/ bdag gis de thob pas sems can gzhan yang de la dgod par bya bar nus so/ /mi zad pa zhes bya ba la/ byang chub sems dpa'i sgrub pa ni mi zad pa ste/ ci'i phyir zhe na/ rnam pa bzhis mi zad pa'i phyir ro/ /rnam pa bzhi ni byang chub kyi sems kyis bsgral bar bya ba'i sems can mi zad pas sems can gyi don du bskyed pa'i byang chub kyi sems mi zad pa dang / byang chub kyi sems mi zad pas bsam pa mi zad pa dang / bsam pa mi zad pas bsam pa las byung ba'i snying rje mi zad pa dang / snying rje mi zad pas thabs dang shes rab kyang mi zad pa ste de bas na mi zad pa zhes bya'o/ /rgyal sras rnams kyi sgrub pa mchog yin no/ /zhes bya ba la/ gong du bshad pa lta bu'i tshul du byang chub sems dpa' rnams sems can gyi don byed pas byang chub sems dpa' rnams kyi sgrub pa ni mchog dam pa ma nor ba yin no zhes bya ba'i don to/ /'gying ba med pas mgu bar byed pa yi/ /zhes bya ba la/ byang chub sems dpa'i rdzu 'phrul gyi cho 'phrul gyis sems can dad pa bskyed de mgu bar byas na yang 'gying ba med de/ nga rgyal skyed pa med do zhes bya ba'i don to/ /nga rgyal med pas ni 'jug pa ste zhes bya ba la/ rdzu 'phrul gyi cho 'phrul gyis sems can dad pa bskyed nas skyabs su btang ste/ bstan pa la 'dzud kyi rdzu 'phrul byas so snyam du sems pa yang med la/ 'di dag ni bdag gi bstan pa la 'jug ste/ bdag gi slob ma yin no snyam du sems pa'i nga rgyal yang med do zhes bya ba'i don to/ /mkhas pas ni don la nges par 'gyur ro zhes bya ba la/ theg pa gsum gyi rang dang spyi'i mtshan nyid la mkhas pas na bdag gis kyang de ni phyin ci ma log par rtogs la/ sems can gzhan gyi yang mi shes pa dang log par shes pa dang / the tshom gcod par byed pas na don la nges pa zhes bya'o/ /bzod pas ni dge ba la yongs su smin par byed pa'i sgrub pa zhes bya ba la/ sems can rnams pha rol tu phyin pa bcu dang / sa bcu'i dge ba la bkod nas/ yongs su smin par bya ba'i don du grang ba dang / tsha ba la sogs pa'i sdug bsngal gyis mi skyo ba ni bzod pa zhes bya ba'i don to/ /dul bas ni lung bsgo ba la sogs pa'i sgrub pa ste// zhes bya ba la/ bdag nyid lus dang ngag dang yid gsum gyi sdom pa la gnas pa ni sems can mi dge ba las bzlog ste/ dge ba la sogs pa la bzhag pa'i phyir lung bsgo bas gdul bar nus te/ ci'i phyir zhe na/ bdag ma dul bar gzhan gdul bar mi nus pa'i phyir ro/ /shin tu ring du song bas ni rigs su skye ba la sogs pa sgrub ste zhes bya ba la/ sa bcu gcig thob pas ni sems can rnams de bzhin gshegs pa'i rigs su skye ba bsgrub pa dang / lung bstan pa bsgrub pa dang / thams cad mkhyen pa'i ye shes sgrub par nus kyi ring du song ba'i sa ma thob par ni mi nus zhes bya ba'i don to/ /sgrub pa'i khyad par tshigs su bcad pa zhes bya ba la/ 'dod khams kyi lha dang mi ni 'dod pa'i yon tan lnga tsam sgrub/ gzugs dang gzugs med pa'i khams kyi lha dag ni bsam gtan gyi bde ba tsam sgrub/ nyan thos dang rang sangs rgyas rnams ni bdag gi don du zhi ba phyogs gcig pa'i mya ngan las 'das pa tsam sgrub kyi de dag las byang chub sems dpa'i sgrub pa 'phags so zhes bstan pa'i phyir tshigs su bcad pa rtsom zhes bya ba'i don to/ /'dod pa'i skye ba'i 'jigs pa chen po yin/ /zhes bya ba la/ 'dod pa'i khams su skyes pa'i sems can rnams ni rtag tu gzugs la sogs pa 'dod pa l nga'i yon tan la spyod pas de'i rgyu dang rkyen gyis tshe 'dir yang bcing ba dang gsad pa la sogs pa'i lus kyi sdug bsngal dang sems la mi bde ba la sogs pa sems kyi sdug bsngal 'byung zhing de'i rgyus tshe rabs gzhan du yang ngan song gsum du skye bar 'gyur bas na 'jigs pa chen po dang ldan pa yin no zhes bya ba'i don to/ /srid pa'i bde dga' mi brtan phyin ci log /ces bya ba la/ srid pa'i sgras ni gzugs dang gzugs med pa'i khams la bya ste/ gzugs dang gzugs med pa'i khams kyi ting nge 'dzin bde ba la chags pa'i ting nge 'dzin la bya ste/ bde ba ni mi brtan pa yang yin la phyin ci log kyang yin no zhes bya ba'i don to/ /ci'i phyir zhe na/ mi rtag pa yod pa dang / don dam pa'i sdug bsngal yod pa'i phyir ro/ /de la mi rtag pa yod pa ni bde ba dang 'grogs su med kyi shi 'phos nas ngan song la sogs par skye bar 'gyur te/ de ltar mi rtag pa yod pas mi brtan pa'o/ /gnas de dag na bde ba yang ma yin/ sdug bsngal yang ma yin pa'i 'du byed kyi sdug bsngal gyis khyab pa dang / don dam pa'i sdug bsngal yod do/ /des sdug bsngal yin par ma mthong bas na phyin ci log yod pa zhes bya'o/ /so so rang gis skyed par bzhi dga'/ /zhes bya ba la/ 'phags pa nyan thos dang rang sangs rgyas dag ni so so rang gi rgyud la yod pa'i skye ba dang / gnas sogs pa'i sdug bsngal skyed par byed pa'i rgyu las dang nyon mongs pa srangs nyan snying rje med pa'i phyir sems [(]gyi [,]kyi [)]ngon la bya ba spangs te/ /zhib phyogs gcig pa'i mya ngan las 'das par dga' bar byed do zhes bya ba'i don to/ /rtag tu kun gyis skyed pa zhi ba snying rje bdag/ /ces bya ba la/ byang chub sems dpa' ni shes rab dang yang ldan/ snying rje dang yang ldan pa yin te/ shes rab dang ldan pas 'khor pa'i mtha'i bar du sems can kun gyi don la yod pa'i skye ba dang / rga ba la sogs pa'i sdug bsngal skyed par byed pa'i rgyu nyon mongs pa zhi bar byas nas snying rje dang ldan pas nyan thos bzhin du mya ngan las 'das pa'i dbyings 'ba' zhig tu ma zhugs kyi sems can gyi don du 'khor ba na bzhugs so zhes bya ba'i don to/ /tshigs bcad 'dis ni byang chub sems dpa'i sgrub pa 'jig rten gyi sgrub pa dang / 'jig rten las 'das pa'i sgrub pa las kyang 'phags par ston te/ shes rab dang ldan pas ni bdag dang gzhan gyi rgyud la yod pa'i nyon mongs pa sel bas 'jig rten gyi sgrub pas kyang 'phags so/ /snying rje yod pas mya ngan las 'das pa'i phyir nyan thos la sogs pa'i 'jig rten las 'das pa'i sgrub pa las kyang 'phags so/ /da ni tshigs su bcad pa gcig gis 'jig rten gyi bsgrub pa bas byang chub sems dpa'i bsgrub pa ches khyad zhugs te 'phags so zhes bstan pa'i phyir/ skye bo rmongs pa bdag gi bde don brtson/ /rtag tu de rnyed mi 'gyur sdug bsngal 'gyur/ /zhes bya ba la sogs pa tshigs su bcad pa gcig smos te/ skye bo'i sgras ni so so'i skye bo la bya'o/ /rmongs pa shes rab bral te gti mug gis khebs pa'i phyir ro/ /so so'i skye bo gti mug gis khebs pa dag bdag bde ba dang skyid par bya'o zhes de'i ched du zhing rmo ba dang / tshong bya ba dang / khang khyim brtsig pa dang / bu smad btsal ba la sogs pa la brtson par byed de/ rtag tu sha thang chad kyang bde ba dang skyid pa ma rnyed kyi de'i rgyus tshe 'dir yang grang ba dang / tsha ba dang bkres pa la sogs pa'i sdug bsngal myong la/ tshe rabs gzhan du yang ngan song gsum la sogs pa'i sdug bsngal myong bar 'gyur ro zhes bya ba'i don to/ /brtan pa rtag tu pha rol don brtson pa/ /gnyi ga'i don bsgrubs mya ngan 'das par 'gyur/ /zhes bya ba la/ bstan pa ni byang chub sems dpa' la bya ste/ shes rab dang brtson 'grus su ldan pa'am/ bsam gtan dang brtson 'grus su ldan pa'i phyir bstan pa zhes bya'o/ /rtag tu zhes bya ba ni 'khor ba'i mtha'i bar du'o/ /pha rol gyi don la brtson zhes bya ba ni gzhan la phan pa dang bde ba la gzhag pa'i phyir/ bdag nyid pha rol tu phyin pa drug la spyod ces bya ba'i don to/ / de ltar mdzad pa'i byang chub sems dpa' des gzhan gyi ched du bsgrubs kyang bdag dang gzhan gnyi ga'i don bsgrubs nas/ mjug tu bdag nyid mi gnas pa'i mya ngan las 'das pa thob par gyur to zhes bya ba'i don to/ /spyod yul yongs su bsngo bar tshigs su bcad pa zhes bya ba la/ byang chub sems dpa' rnams lus dang ngag dang yid kyi sgo nas pha rol tu phyin pa drug bsgrubs pas sems can gyi don byed par yang ma zad kyi/ spyod yul yongs su bsngo ba'i sgo nas kyang sems can gyi don byed par ston te/ spyod yul ni lus kyi sgo nas spyod lam bzhi la spyod pa dang / mig gi dbang po nas yid kyi dbang po'i bar du dbang po drug gis so so'i yul mthong ba dang thos pa la sogs pa byas pa rnams sems can gyi don du bsngo bar bstan pa'i phyir tshigs su bcad pa rtsom mo zhes bya ba'i don to/ /ji lta ji ltar rgyal sras spyod pa'i tshe/ /zhes bya ba la ji lta ji ltar zhes bya ba ni gang dang gang gi tshe na zhes bya ba'i don to/ /rgyal sras spyod pa zhes bya ba ni don gyis grong la sogs par 'jug pa'am/ spyod lam bzhis gnas pa la bya'o/ /dbang po'i spyod yul sna tshogs 'jug gyur pa/ /zhes bya ba ni mig gi dbang po nas yid kyi dbang po'i bar du drug go/ / de'i spyod yul ni gzugs nas chos kyi bar du drug go/ /'jug pa ni mig gis gzugs mthong ba dang / rna bas sgra thos pa nas yid kyis chos shes pa'i bar du'o/ /de lta de ltar rigs pa'i mthun tshig gis/ /zhes bya ba la/ de lta de ltar zhes bya ba ni de dang de'i tshe na zhes bya ba'i don to/ /rigs pa zhes bya ba ni bdag dang gzhan gyi don du 'gyur ba'i tshig smra ba'i phyir ro/ /mthun pa'i tshig ni bdag gis ci dang ci mthong ba dang / sems can gyi don du bsngo ba'i tshig 'brel pa ste/ ci dang ci mthong ba dang ci thos pa rnams bdag dang gzhan gyi don byas nas sems can gyi don du bsngo bas na/ sems can la phan pa'i phyir mngon par 'du byed ces bya'o/ /sems can rnams la mi bzod pa dgag pa'i phyir tshigs su bcad pa zhes bya ba byang chub sems dpa' 'khor ba na sems can gyi don byed pa'i tshe phan brtags na yang slar gnod pa byed pa dang / byang chub sems dpa' la brdeg pa dang / btsog pa pa la sogs pa'i gnod pa byed par sems pa rnams la mi bzod par bya bar mi rigs kyi/ dang du blang ba rigs par bstan pa'i phyir tshigs su bcad pa rtsom mo zhes bya ba'i don to/ /rtag tu rang dbang med pa'i skyon sems kyis/ /skye bos nyes pa blo ldan mi sems te/ /zhes bya ba la/ byang chub sems dpa' shes rab dang snying rjer ldan pa yin te/ de la shes rab kyis ni sems can gyis byang chub sems dpa' la gnod par byas na yang sems can de dag 'dod chags dang / zhe sdang dang / gti mug gi dbang du song ste/ rtag tu yang rang dbang med par byang chub sems dpa' la brdeg pa dang / bcing ba la sogs pa'i nyes pa byed par sems kyi dbang yod bzhin du nyes pa byed pa ni ma yin no zhes te de ltar thugs su chud pas na nyon mongs pa rnams kyi nyes par dgongs kyi sems can rnams kyi nyes par mi/ dgongs so zhes bya ba'i don to/ /mi 'dod bzhin du shes par byed pa'i skye bo yin pas snying rje 'phel phyir ro/ /zhes bya ba la/ byang chub sems dpa' rnams ni thugs rje 'phel te/ de bas na dper na g.yul dag tu bdag dang gzhan gnyi ga la gnod par 'gyur ba'i 'thab mo la 'gro ba dag/ /jo bo dang rgyal po la sogs pa'i dbang gis mi 'dod bzhin du 'gro ba de dang 'dra bar skye bo 'di dag gnod pa byed pa yang / 'dod chags dang / gti mug dang / zhe sdang gi dbang du gyur pas mi 'dod bzhin du nyes pa byed pa yin no zhes thugs su chud nas de dag la thugs rje'i gnas su dgongs kyi/ gnod pa'i lan glan par mi dgongs so zhes bya ba'i don to/ /'di yan chad du byang chub sems dpa'i sgrub pa rgya cher bstan to/ /sgrub pa'i che ba nyid kyi tshigs su bcad pa zhes bya ba la/ da ni tshigs bcad gcig gis sgrub pa'i don mdor bsdus nas kyang ston/ byang chub sems dpa'i sgrub pa che ba'i bdag nyid kyang 'chad de/ che ba'i bdag nyid ni zil gyis gnon pa'i che ba dang / mya ngan las 'das pa dang / yon tan 'phel ba che ba dang / yongs su mi gtong ba che ba'o/ /srid rgyud mtha' dag zil gnon 'gro ba dang / /zhes bya bas zil gyis gnon pa'i che ba bstan te/ srid pa ni khams gsum la bya'o/ / rgyud kyi sgras ni 'gro ba sdug bsngal ba la bya ste/ byang chub sems dpas gnas che ba dang / rtsom pa che ba dang / 'bras bu che ba'i sgrub pa dang / gnas pa dang / khams gsum dang 'gro ba'i sems lnga'i rgyud can thams cad zil gyis gnon na mi gnas pa'i mya ngan las 'das pa'i grong khyer du byed do zhes bya ba'i don to/ /ci'i phyir sems can rnams ni khams gsum na 'dod chags la sogs pa'i nyon mongs pas gsol/ byang chub sems dpa' ni khams gsum na gnas kyang / chos thams cad stong par thugs su chud pas khams gsum gyi nyes pas mi gos pa'i phyir/ khams gsum zil gyis gnon to zhes bya ba'i don to/ /sgrub pa 'di ni zhi ba'i mchog tu 'gro/ /zhes bya ba la/ mya ngan las 'das pa'i che ba bstan te/ sgrub pa 'di zhes bya ba'i sgras ni gnas che ba dang / rtsom pa che ba dang / 'bras bu che ba'i sgrub pa la bya bar snyegs te/ sgrub ba de la gnas na ni mi gnas pa'i mya ngan las 'das par 'gro bas na zhi ba'i mchog tu 'gro ba zhes bya'o/ /yon tan rnam pa mang po 'phel byed cing / /zhes bya bas yon tan 'phel ba'i che ba bstan te/ sgrub pa de la gnas na stobs dang / mi 'jigs pa dang / ma 'dres pa la sogs pa'i yon tan thos pas yon tan mang po 'phel bar byed pas zhes bya'o/ /snying rje'i bsam pas skye ba rtag tu sdud/ /ces bya ba la/ sems can yongs su mi btang ba'i che ba bstan te/ sgrub pa de la gnas na snying rje dang ldan pa'i byang chub sems dpa' rnams snying rje'i sems kyis 'khor ba'i mtha'i bar du yang sems can yongs su mi gtong ngo zhes bya ba'i don to/ /ji skad du shes rab kyi pha rol tu phyin pa las/ rab 'byor ci ste gzugs dngos por 'gyur zhing dngos po med pa yang ma yin na ni/ theg pa chen po 'dis lha dang mi dang lha ma yin du bcas pa'i 'jig rten zil gyis mnan nas 'byung bar mi 'gyur ro zhes bya bas don ni 'di skad ston pa yin te/ gal te gzugs la sogs pa'i chos 'di dag ji ltar byis pa'i skye bo rnams kyis brjod cing dbang pos bzung ba de bzhin du yang dag par grub par 'gyur na ni 'di dag yod pa yin gya med pa ma yin par 'gyur ro/ /de ltar na ni theg pa chen po rnam par mi rtog pa'i ye shes 'dis lha dang bcas pa'i 'jig rten zil gyis mnan cing khams gsum las 'byung bar mi 'gyur ro/ /ci'i phyir zhe na/ byis pa dang mkhas pa gnyis la khyad par med pa'i phyir ro/ /gnyi gas kyang de kho na mthong ba'i phyir ro/ /de bas na bcom ldan 'das kyis kyang ji ltar byis pa rnams brtags bzhin du dngos po yod par 'gyur ba dang / ji ltar mthong bzhin yod na ni/ /thams cad de nyid mthong bar 'gyur/ /zhes gsungs pa lta bu'o/ /gang gi phyir gzugs la sogs pa'i chos 'di dag byis pa kun du brtags pa'i bdag nyid du rang bzhin yod pa ma yin te/ de bas na byang chub sems dpa' rnams de ltar tshul bzhin du zhugs na/ yon tan mi rtog pa'i ye shes skye bar 'gyur ro/ /rnam par mi rtog pa'i ye shes ni theg pa chen po ste/ ye shes des lha dang bcas pa'i 'jig rten zil gyis mnan nas khams gsum las 'byung bar 'gyur ba'i don to/ /sgrub pa'i skabs bshad pa rdzogs so/ /bam po dang po'i 'grel pa rdzogs so// //sgrub pa'i skabs bshad pa'i rjes la/ de kho na'i skabs bshad pa cir 'brel ce na/ gong du bsgrub pa'i rjes la/ srid rgyu mtha' dag zil gnon 'gro ba dang / /sgrub pa 'di ni zhi ba'i mchog tu 'gro/ /zhes bya ba'i tshigs su bcad pa gcig gis byang chub sems dpa'i sgrub pa la gnas pa rnams bdag nyid chen po bzhi 'thob bo zhes bshad de/ bdag nyid chen po bzhi po de yang sgrub pa la yang gnas la de kho na yang mthong bar 'gyur na gdod 'thob kyi/ sgrub pa yod kyang de kho na ma mthong ba rnams kyis ni mi 'thob bo/ /gong du bdag dang gzhan gyi don bsgrub par bya'o zhes bshad do/ /bdag dang gzhan gyi don la zhugs pa des kyang bdag nyid nyon mongs pas ma bcings par bya ste/ bdag bcings nas gzhan grol bar mi nus pa'i phyir ro/ /de la nyon mongs pa las thar bar bya ba'i thabs ni de kho na mthong ba ste/ de bas na bsgrub pa'i skabs kyi rjes la/ nyon mongs pas mi gos pa'i thabs des/ de kho na'i skabs bshad par 'brel lo/ /yang na dang po nyid du gtsug gi lus su gzhag pa ni rigs la gnas pa'i byang chub sems dpas byang chub tu sems bskyed nas byang chub sems dpa'i bslab pa la bslab par bya'o zhes glengs pa la byang chub sems dpa'i bslab pa gang zhe na/ de'ang rnam pa gsum ste/ gang la bslab par bya ba dang / ji ltar bslab par bya ba dang / gang gis bslab par bya ba'o/ /gang la bslab par bya ba rnam pa bdun te/ bdag gi don sgrub pa dang / gzhan gyi don sgrub pa dang / de kho na'i don dang / mthu'i don dang / sangs rgyas kyi chos yongs su smin par bya ba dang / sems can yongs su smin par bya ba dang / bla na med pa'i byang chub bo zhes smos pa las/ bdag dang gzhan gyi don sgrub pa'i 'og tu de kho na'i don smos pas na sgrub pa'i rjes la de kho na'i don bshad par 'brel to/ /don dam pa'i mtshan nyid kyi tshigs su bcad pa zhes bya ba la/ don dam pa rnam pa gnyis te/ de bzhin nyid chos kyi dbyings rnam par dag pa dang gnyis su med pa'i rnam par mi rtog pa'i ye shes so/ /de bzhin nyid la ci'i phyir don dam pa zhes bya zhe na/ 'phags pa'i lam bsgoms pa'i 'bras bu yin pas don zhes bya la/ chos thams cad du gyur pas dam pa zhes bya'o/ / yang na don dam pa zhes bya ba ni yul la bya ste/ rnam par mi rtog pa'i ye shes dam pa'i yul yin pas don dam pa zhes bya'o/ /de bzhin nyid kyi mtshan nyid kyi don dam pa'i mtshan nyid bshad pa'i phyir/ yod min med min de bzhin gzhan ma yin/ /zhes bya ba la sogs pa smos so/ / rnam par mi rtog pa'i ye shes gnyis su med pa'i ye shes ni phyis 'chad do/ /de la gnyis dang bral zhing gnyis su med pa'i don ni don dam pa'i mtshan nyid de yang gnyis su med pa rnam pa lngas don dam pa'i mtshan nyid bstan to/ /de la don dam pa yongs su grub pa'i mtshan nyid de kun du brtags pa dang / gzhan gyi dbang gi mtshan nyid lta bur yod pa ma yin pas na yod min zhes bya'o/ /don dam pa de yongs su grub pa'i ngo bo ni med pa ma yin pas na med min zhes bya'o/ /'dis ni gnyis su med pa'i don gcig bstan to/ /de bzhin gzhan ma yin zhes bya bar sbyar te/ gcig pa ma yin pas de bzhin ma yin la/ tha dad pa ma yin pas gzhan med pa'o/ /de la yongs su grub pa dang / kun brtags dang gzhan gyi dbang du mtshan nyid gcig pa ma yin pas de bzhin ma yin pa zhes bya ba'i don to/ /ji ltar zhe na/ yongs su brtags pa'i rang bzhin ni yod pa ma yin pa phyin ci log tu snang ba yin la/ yongs su grub pa'i rang bzhin ni bden pa yang dag pa phyin ci ma log pa yin pas kun brtags dang rang bzhin gcig pa ma yin no/ /gzhan gyi dbang gi rang bzhin yang kun brtags kyi chos kyi rten du gyur pa ste/ rten cing 'brel bar 'byung ba'i kun nas nyon mongs pa'i ngo bo yin la yongs su grub pa kun brtags kyi chos kyi rten du ma gyur la/ rten 'brel te byung ba ma yin pa rnam par byang ba'i chos yin pas gzhan dbang dang yang rang bzhin gcig pa ma yin no/ /kun du brtags pa dang / gzhan gyi dbang gnyis dang yongs su grub pa tha dad pa yang ma yin pas na gzhan ma yin pa zhes bya ste/ ji ltar zhe na/ gzhan gyi dbang gi rang bzhin la gzung 'dzin du kun du brtags pa dang bral ba nyid la yongs su grub pa'i rang bzhin zhes bya bar zad kyi de la ma gtogs par yongs su grub pa'i rang bzhin logs shig na med pa'i phyir ro/ /de'i dpe ni 'dus byas dang / 'dus ma byas kyi mtshan nyid mi rtag pa la sogs pa bzhin te/ gal te 'dus byas dang mi rtag pa gcig tu gyur na ni mi rtag pa bzhin du 'dus byas rtag tu zhi bas mi snang ba'i skyon du 'gyur ro/ /gal te 'dus byas dang mi rtag pa tha dad par gyur na ni mi rtag pa logs shig tu 'dus byas la mi rtag pa med pa'i phyir 'dus byas la mi rtag par 'gyur ba bzhin te/ 'di ni gnyis su med pa'i don gnyis pa'o/ /mi skye mi 'jig ces bya ba la yongs su grub pa de las dang nyon mongs pa'i rgyu rkyen gyis ma skyed pas na mi skye'o/ /ma skyes pa'i chos la 'gag pa med pas na mi 'jig pa ste 'dus ma byas kyi rang bzhin te zhes bya ba'i don to/ /'di ni gnyis su med pa'i don gsum pa'o/ /'bri bar mi 'gyur te/ 'phel ba med cing zhes bya ba la/ 'khor ba'i dus dang mya ngan las 'das pa'i dus na yang yongs su grub pa de la 'bri ba yang med/ 'phel ba yang med de nam mkha' bzhin no/ /dper na nam mkha' la gnas pa'i sprin la sogs pa bri bar gyur kyang nam mkha' la bri ba med pa dang / nam mkha' la sngon med pa'i sprin la sogs pa byung na yang nam mkha' gsar du byung ba med pa de bzhin du 'phags pa'i lam bsgom pa'i dus na 'khor ba'i chos nyon mongs pa bri yang stong pa nyid la bri ba med de/ rnam par byang ba'i phyogs byang chub kyi phyogs 'phel na yang stong pa nyid la 'phel ba med de 'di ni gnyis su med pa'i don bzhi pa'o/ /rnam par dag pa med la rnam par dag 'gyur ba/ /zhes bya ba la/ don dam pa stong pa nyid do/ /de ni nam mkha' dang gser dang chu'i khams dang shel la sogs pa rang bzhin gyis dag pa bzhin du stong pa nyid kyi rang bzhin gyis dag pa ste/ nam mkha'i rang bzhin gyis dag pa la chu la sogs pas bkrus te dag par byar med pa bzhin du/ stong pa nyid kyi rang bzhin la yang dri ma dag par byar med bas rnam par dag pa med pa zhes bya'o/ /rang bzhin la dri ma bsal du med kyang dper na nam mkha' la glo bur gyi sprin bsal ba dang / gser la glo bur gyis rdo bsal ba bzhin du stong pa nyid la nyon mongs ba'i sgrib pa dang / shes bya'i sgrib pa dri ma glo bur yod pa bsal bar mi bya ba yang ma yin te/ bsal zhing dag par bya dgos par rnam par dag par 'gyur ba zhes kyang bya ste/ 'di ni gnyis su med pa'i don lnga pa'o/ /de ni don mtshan zhes bya ba la/ gnyis su med pa'i mtshan nyid lnga po de ni don dam pa'i mtshan nyid yin no zhes bya ba'i don to/ /bdag tu lta ba'i phyin ci log dgag pa'i phyir tshigs su bcad pa zhes bya ba la du ma dang mi rtag pa'i mtshan nyid phung po lnga la bdag gir lta ba'i 'jig tshogs su lta ba la bdag gir lta ba'i zhes bya ste/ bdag dang bdag gi med pa la bdag dang bdag gir lta bas na phyin ci log go/ /phyin ci log de skyon yin pas spang dgos par bstan pa'i phyir tshigs su bcad pa rtsom mo zhes bya ba'i don to/ /don dam pa bshad pa'i skabs su bdag tu lta ba phyin ci log bshad pa'i skabs ma yin no bdag tu lta ba skabs 'dir bshad pa cir 'brel zhe na/ don dam pa zhes bya ba ni gang zag la bdag med pa'i stong pa nyid chos la bdag med pa'i stong pa nyid la bya'o/ /de la bdag tu lta ba ni gang zag la bdag med pa'i stong pa nyid du mi mthun pa ste/ de bas na ji tsam bdag tu lta ba yod pa de tsam du gang zag la bdag med pa ma rtogs pas/ gang zag bdag med par rtogs par 'dod pas bdag tu 'dod pa spongs shig ces bstan pa dang / gang zag la bdag med pa'i don gtan la dbab pa'i phyir/ 'dir bdag tu lta ba'i skabs bshad par 'brel to/ /mu stegs can rnams bdag tu lta ba yang yang na ni bdag yod do zhes de ltar sems pa'i 'jig tshogs la lta ba nyid rang bdag gi rang bzhin yin grang / yang na 'jig tshogs la lta ba'i gnas nye bar len pa'i phung po lnga po bdag gi rang bzhin yin grang / yang na de gnyis la ma gtogs par bdag bya ba zhig logs shig na yod par brtag grang na/ de gsum char ltar mi rigs pas gang zag la bdag med do/ /de la bdag tu lta ba'i rang nyid bdag gi rang bzhin yin par mi rigs par bstan pa'i phyir/ bdag tu lta ba rang nyid bdag mtshan min/ /zhes bya ba smos te/ bdag tu lta ba'i sgras ni 'jig tshogs la lta ba la bya ste/ 'jig tshogs la lta ba de nyid mu stegs can gyis brtags pa'i bdag rtag pa'i mtshan nyid ma yin te/ ci'i phyir zhe na/ de yi mtshan nyid mi 'dra phyir/ /zhes bya ba smos so/ /'di ltar 'jig tshogs la lta ba'i mtshan nyid kyang gzhan mu stegs can gyis brtags pa'i bdag nyid de'i mtshan nyid kyang gzhan te/ de gnyis mtshan nyid mi 'dra bas na 'jig tshogs la lta ba nyid bdag gi mtshan nyid ma yin no/ /ji ltar mtshan nyid mi 'dra ba zhe na/ mu stegs pas ni bdag de 'dus ma byas pa dang / rtag pa dang khyab pa dang / las mi byed pa'i mtshan nyid du brtags so/ /'jig tshogs la lta ba ni sems kyi chos yin te/ sems ni 'dus byas dang mi rtag pa dang / ma khyab pa dang las rnam pa gsum byed pa yin pas mtshan nyid mi 'dra'o/ /'jig tshogs la lta ba'i rten du gyur pa phung po lnga yang bdag gi mtshan nyid du gyur pa mi rigs par bstan pa'i phyir/ ngan pa'i gnas min zhes bya ba smos te/ ngan pa'i sgras ni 'jig tshogs la lta ba la snyegs te/ phung po lnga po 'di 'jig tshogs su lta ba 'di rten du gyur pa dang / nyon mongs pa'i gnas ngan len gyis bskyed pas na ngan pa'i gnas zhes bya ba ste/ ngan pa'i gnas kyi phung po lnga yang bdag gi mtshan nyid ma yin no/ /ci'i phyir zhe na/ de'i phyir mtshan nyid mi 'dra ba'i phyir zhes bya ba smos te/ mu stegs pas brtags pa'i mtshan nyid kyang gzhan phung po lnga'i mtshan nyid kyang gzhan te/ mtshan nyid mi 'dra bas na phung po lnga nyid bdag ma yin no/ /ci'i phyir zhe na/ bdag ni 'dus ma byas pa dang / rtag pa dang khyab pa dang / las mi byed par 'dod la/ phung po lnga ni 'dus byas dang / mi rtag pa dang / ma khyab pa dang / las byed pa yin pas mtshan nyid mi 'dra'o/ /de nyid ma gtogs par bdag logs na yod par yang mi rigs par bstan pa'i phyir gnyis ma yin zhes smos te/ 'jig tshogs la lta ba dang / phung po lnga las ma gtogs par bdag bya ba de logs shig na yod pa yang ma yin te/ de ci'i phyir zhe na/ mngon sum gyi tshad ma'i yul du yang ma gyur/ rjes su dpag pa'i tshad ma'i yul du yang ma gyur pa'i phyir ro/ /'di ltar dngos po yod pa rnams ni yang na mngon sum gyi tshad ma'i yul du 'gyur te gzugs la sogs pa yin no/ /yang na rjes su dpag pa'i tshad ma'i yul du 'gyur te/ dper na mig gi dbang po ba ltar mi snang yang / mig gi rnam par shes pa skyed pa'i rgyu byed pa'i sgo nas mig gi dbang po yod par brtags na bdag 'di ni tshad ma gnyi gas brtags na yang yod par ma mthong bas na logs shig na med do/ /gal te bdag med na/ ci'i phyir sems can rnams bdag bdag ces rtog snyam pa la de'i phyir/ 'di ni nor tsam skyes zhes smos te/ dper na thag pa la sbrul du 'khrul pa'i thag pa de yod pa ma yin gyi sbrul lta bur nor bar mthong ba dang / rmi lam na gzugs rnam pa sna tshogs mthong ba yod pa ma yin gyi nor bar mthong ba de bzhin du/ bdag bdag ces rtog pa 'di yang phyin ci log dang / 'khrul pa'i sems skyed par zad kyi dngos po yod pa'i rtog pa ni ma yin pa'i don to/ /'di ltar bdag yod pa ni bdag tu nyon mongs pas bcings par gyur la/ nyon mongs pa'i bcings pa bcad na thar par 'gyur ba yin na/ bdag med na su zhig thar par 'gyur snyam pa la de'i phyir/ thar pa nor tsam zad pa'o/ /zhes smos te/ dper na thag pa la sbrul du 'khrul pa de sbrul gyi 'khrul pa dang bral te/ thag par shes par gyur pa na lus bde ba dang / sems bde ba thob par 'gyur ro/ /de bzhin du bdag med pa la bdag tu 'khrul pa zad de/ de spangs pa nyid thar pa dang mya ngan las 'das pa zhes bya bar zad kyi thar pa thob par byed pa'i bdag ni gang yang yod pa ma yin no zhes ston te/ de bas na tsam gyi sgras ni bdag yod pa yin pa 'gog go/ /phyin ci log kun tu smad pa'i tshigs su bcad pa gnyis so zhes bya ba la/ ji tsam du sems can spyod cing gnas pa thams cad phyin ci log yin la/ phyin ci log gi rgyus ni skye ba dang rga ba la sogs pa'i sdug bsngal rtag tu myong ste/ de ltar sems can rnams 'khrul pa la yang gnas sdug bsngal ba yang yin na 'khrul pa la gnas pa dang / sdug bsngal yin par ci'i phyir ma rtogs she na/ phyin ci log la gnas pa dang / ma rig pas khebs pas ma rtogs te/ de bas na phyin ci log la smad pa'i phyir tshigs su bcad pa gnyis rtsom mo zhes bya ba'i don to/ /'khrul tsam gnas zhing rang bzhin sdug bsngal ba/ /skyo bos rtag 'khrul ci phyir rtogs ma gyur/ /zhes bya ba la/ 'jig rten pa dag bdag yod do zhes bdag tu yod pa dang / chos yod do zhes rtogs pa yod pa yang nor ba yin pas na 'khrul pa tsam la gnas pa zhes bya'o/ /de'i rgyus skye ba dang rga ba la sogs pa'i sdug bsngal rnam pa sna tshogs 'byung bas na rang bzhin gyis sdug bsngal ba zhes bya'o/ /de ltar skye bo rnams ni rtag tu 'khrul pa la yang gnas la sdug bsngal ba yang yin la de 'dra ba'i mtshan nyid du ci'i phyir rtogs par ma gyur ce na/ 'og nas 'byung ba'i tshul du mun pa chen pos khebs par ma gyur to zhes bya ba'i don to/ /rig pa med cing zhes bya ba la dngos po 'di dag 'khrul pa yin pa dang / sdug bsngal yin par khong du chud pa'i yang dag pa'i ye shes zag pa med pa'i rang bzhin med pas na/ rig pa med pa zhes bya'o/ /rig nyid ces bya ba la yang dag pa'i ye shes kyi rig pas kyang zag pa dang bcas pa'i shes pas tshor ba bde ba dang sdug bsngal ba dang / bde ba yang ma yin sdug bsngal ba yang ma yin pa myong ba yod pas rig pa yod ces bya'o/ /sdug bsngal nyid ces bya ba la/ tshor ba rnam pa gsum myong yang gsum char yang sdug bsngal ba'i mtshan nyid yin te/ tshor ba gsum char la yang sdug bsngal gyi rang bzhin spangs pa'i phyir ro/ /ji ltar zhe na/ sdug bsngal gyi tshor bas ni rang bzhin gyi sdug bsngal ma spangs/ bde ba'i tshor bas ni 'gyur ba'i sdug bsngal ma spangs/ bde ba yang ma yin sdug bsngal ba yang ma yin pa'i tshor bas ni 'du byed kyi sdug bsngal ma spangs te/ de bas na tshor ba gsum char sdug bsngal ba nyid do/ /sdug bsngal ba med pa zhes bya ba la/ mu stegs pa dag gis ni sdug bsngal de dag bdag gis myong ngo zhes smras te/ sdug bsngal rnam pa gsum yod kyang sdug bsngal rnam pa gsum dang ldan zhing de myong bar byed pa'i bdag med pas na sdug bsngal med pa zhes bya'o/ /chos dngos zhes bya ba la/ de ltar bdag ni kun rdzob tu yang med kyi phung po dang khams la sogs pa'i chos ni kun rdzob tu sgyu ma dang / smig rgyu ba tsam du yod pas chos dngos zhes bya ste/ 'di yan chad kyi tshig gis gang zag la bdag med pa bstan to/ /de dngos min zhes bya ba la don dam par ni chos de yang rang bzhin dang bdag med de stong pa yin pas de dngos min zhes bya ste/ tshig 'dis ni chos la bdag med pa bstan to/ /dngos po rten 'byung mngon sum 'jug pa la/ /'gro ba ji ltar gzhan dag byed la brten/ /zhes bya ba la/ dngos po'i sgras ni phyi'i dngos po dang nang gi dngos po la bya ste/ gnyi ga la yang rten cing 'brel te 'byung ba yin pa 'jig rten pa kun gyi mngon sum du snang ngo / /ji ltar zhe na/ phyi'i dngos po rnams kyang sa bon dang sa gzhi dang chu dang me dang rlung la sogs pa'i rgyu rkyen las 'byung bar snang la/ nang gi dngos po lnga yang ma rig pa dang 'du byed la sogs pa dang / pha ma'i khrag dang / khu ba las byung ba'i rgyu rkyen snang na/ chos 'di dag rten cing 'brel te 'byung ba ma yin gyi/ bdag dang byed pa po la sogs pa gzhan dag gis byas so zhes ci'i phyir dang de ltar lta zhing rtog ces bya ba'i don to/ /gang phyir yod pa ma yin med mthong bas/ /de 'dra'i mun nag rnam pa de gang zhig / ces bya ba la/ 'jig rten la grags pa'i mun pas ni dngos po yod pa mi mthong bar byed de/ yod pa ni mi mthong gi med pa ni mthong bar byed pa mun pa ni mi srid do/ /sems can rnams kyi sems kyi rgyud la yod pa'i ma rig pa'i mun pa de ni phyi nang gi chos rten cing 'brel te 'byung ba'i mtshan nyid du yod pa de ni mi mthong bar byed la mu stegs kyis brtags pa'i bdag ces bya ba med pa de mthong bar byed pa'i de'i mun nag de 'jig rten gyi mun pa dang 'dra ba ma yin pa ngo mtshar du gyur pa'i mun pa zhig skyes so zhes bya ba'i don to/ /bdag med par zhi ba dang skye bar rung bar tshigs su bcad pa zhes bya ba la/ bdag gi sgra 'di mu stegs kyis brtags pa'i bdag dang gang zag gi rnam grangs su yang 'gro ste/ 'di ltar sems can dang srog dang gang zag dang shed can dang shed bu zhes bya ba la sogs pa'o/ /bdag gi sgra chos la bya bar yang mthong ste rang bzhin dang bcas pa'i chos zhes bshad na bdag dang bcas pa'i chos zhes bya ba'i don to/ /de la gong du bdag ni med kyi chos tsam du zad la don dam par chos de'ang med do zhes bshad pa la mu stegs pa dang nyan thos pa dag 'di skad du yod do zhes rgol lo/ /'di las phyi rol tu gyur pa'i mu stegs pa dag ni phyin ci log tu gyur pas bdag med pa yang bdag/ /tu mngon par zhen to/ /chos 'di dag nyan thos pa dag ni chos la phyin ci log tu 'dzin to/ /gzugs la sogs pa'i chos 'di dag byis pa'i skye bos ji ltar brtags pa de bzhin du ngo bo nyid du yod do zhes 'dzin to/ /de gnyi ga yang phyin ci log tu gyur pas bdag tu lta ba dang chos su lta ba la gnas na bdag kyang yod par mthong chos kyang yod par mthong ngo / /de bas na mu stegs pa dag ni bdag tu bcings pa dang thar par 'dod/ nyan thos dag ni chos bcings pa dang thar par 'dod de/ gal te bdag dang chos med na ji ltar thar pa dang gang thar par 'gyur pa ji ltar bcings pa dang su bcings par 'gyur te/ de bas na bdag dang chos yin no zhes rgol lo/ /de bas na bdag dang chos med par yang mya ngan las 'das pa thob pa dang / 'khor bar skye rung bar bstan pa'i phyir tshigs su bcad pa rtsom mo zhes bya ba'i don to/ /zhi dang skye ba don mchog tshul gyis ni/ /de gnyis la yang bye brag cung zad med/ /ces bya ba la ni zhi ba ni ma rig pa 'gags pas ni rga shi 'gag pa'i bar gyi mya ngan las 'das pa la bya'o/ /skye ba ni ma rig pa'i rkyen gyis 'du byed pas na skye ba'i rkyen gyis rga shi'i bar gyi 'khor ba'i mtshan nyid la bya ste/ 'khor ba dang mya ngan las 'das pa gnyis kyang don dam pa'i tshul du na bdag med pa'i rang bzhin du mnyam mo/ /ji ltar zhe na/ ji ltar 'khor ba byis pas brtags pa'i bdag dang chos kyi rang bzhin gyis stong pa de bzhin du mya ngan las 'das pa yang byis pas brtags pa'i bdag dang chos kyi rang bzhin gyis stong ste/ de ltar bdag dang chos kyi rang bzhin gyis stong pas 'khor ba dang mya ngan las 'das pa gnyi ga mnyam pa yin te/ de bas na 'khor ba gang yin pa de nyid mya ngan las 'das pa yin te/ tshul de lta bu yin pas na 'khor ba dang mya ngan las 'das pa gnyis la bye brag tu khyad par mi 'dra bar gzhag pa cung zad kyang gzhag pa med do zhes bya ba'i don to/ /gal te de lta na so so'i skye bo rnams ni 'khor ba na gnas/ 'phags pa rnams ni mya ngan las 'das pa thob ces ci'i phyir brjod ce na/ de'i phyir/ 'on kyang dge ba'i las rnams byed pa dag /skye ba zad pas zhi ba thob par bshad/ /ces smos te/ skye ba ni 'khor ba la bya ste/ 'khor ba ni mi rtag pa la rtag pa la sogs par tshul bzhin ma yin pa'i yid la byas pa'i phyin ci log las byung ba yin no/ /mya ngan las 'das pa ni mi rtag pa dang / sdug bsngal la sogs pa tshul bzhin yid la byas pas phyin ci log spangs pa las thob pa yin te/ bdag dang chos zhes bya ba mya ngan las 'das par 'gyur ba med kyang mi rtag pa la sogs pa tshul bzhin yid la byed pa la brten nas byang chub kyi phyogs sum cu rtsa bdun gyi lam bsgom pa'i dge ba byed pa rnams kyis phyin ci log gi mtshan nyid kyi skye ba zad par byas pa nyid mya ngan las 'das pa thob par bshad de/ de las ma gtogs par mya ngan las 'das pa logs shig na med do zhes bya ba'i don to/ /tshigs su bcad pa 'dis theg pa chen po dang theg pa chung ngu gnyi ga'i thun mong gi mya ngan las 'das pa thob par bstan to/ /da 'di man chad ni thun mong ma yin pa byang chub sems dpa' rnams kyis mya ngan las 'das pa ji ltar thob par bya ba'i thabs bstan to/ /phyin ci log las smad pa byas nas de'i gnyen po don dam pa'i ye shes la 'jug pa'i phyir tshigs su bcad pa bzhi'o zhes bya ba la don dam pa rnam pa gnyis las 'di yan chad du de kho na nyid kyi don dam pa bstan nas/ da ni rnam par mi rtog pa'i ye shes kyi mtshan nyid kyi don dam pa ston te/ gong du sems can 'khrul pa la gnas pa dang / sdug bsngal bas nyon mongs par gyur kyang phyin ci log gis non pas 'khrul pa dang / sdug bsngal bar khong du ma chud kyang zhes phyin ci log la smad nas da de'i gnyen por thun mong ma yin pa'i rnam par mi rtog pa'i ye shes kyi dbang du byas te/ rnam par mi rtog pa'i ye shes des byang chub sems dpa' rnams ji ltar chos la bdag med par rtogs nas sangs rgyas kyi sa thob par bstan pa'i phyir tshigs su bcad pa bzhi rtsom mo zhes bya ba'i don to/ /'di man chad tshigs su bcad pa lnga zhig 'byung ba la tshigs su bcad pa bzhis ni tshogs kyi lam dang / sbyor ba'i lam dang / mthong ba'i lam dang / bsgom pa'i lam ston to/ /tshigs su bcad pa lnga pas ni mthar thug pa'i lam ston to/ /byang chub sems dpa' bsod nams ye shes kyi/ /mtha' yas pha rol tshogs rnams bsags nas su/ /zhes bya ba la sogs pa tshigs su bcad pa dang po gcig gis bsdus pa'i don ni tshogs chen po bsags pa dang / ting nge 'dzin la brtan te chos la nges pa na sems 'thob pa dang / yid kyi rtog pa las chos rnams snang ba khong du chud pa de ston to/ /de la byang chub sems dpa' bsod nams kyi tshogs dang / ye shes kyi tshogs mtha' yas pa ste/ bskal pa grangs med pa gcig gi bar du bsags nas mthong ba'i lam dang / sa dang po thob pa nas pha rol du son pa zhes bya ste/ pha rol gyi sgra ni sa dang po thob pa la bya'o/ / 'dis ni tshogs chen po bsags pa bstan te/ bskal pa grangs med pa gcig tu de bzhin gshegs pa la rgyal mtshan dang gdugs la sogs pas bsnyen bkur byas pa ni bsod nams kyi tshogs so de bzhin gshegs pa de dag las dam pa'i chos nyan pa dang / bsam pa dang bsgom pa byas pa ni ye shes kyi tshogs so/ /yang na bskal pa grangs med pa gcig tu sbyin pa dang / tshul khrims dang / bzod pa bsgrubs pa ni bsod nams kyi tshogs so/ /bsam gtan dang shes rab bsgoms pa ni ye shes kyi tshogs so/ /brtson 'grus ni gnyis ka'i tshogs so/ /yang na sbyin pa nas bsam gtan gyi pha rol tu phyin pa lnga bsgrubs pa ni bsod nams kyi tshogs so/ /shes rab kyi pha rol tu phyin pa bsgoms pa ni ye shes kyi tshogs so/ /chos la sems pa shin tu nges pa ni/ /zhes bya ba la/ ji ltar bsod nams dang ye shes kyi tshogs bsags pa de mi rtag pa dang / sdug bsngal ba dang stong ba dang bdag med par bsgoms pa'i ting nge 'dzin la brten nas gsung rab yan lag bcu gnyis kyi chos rnams la mi rtag pa dang / stong pa dang / bdag med par bsam ste/ gtan la phab nas mi rtag pa dang / stong pa la sogs pa'i don la the tshom med par gyur pa ni chos la sems pa shin tu nges pa zhes bya ste/ 'dis ni ting nge 'dzin la brten nas chos la nges par sems pa thob pa bstan te/ 'di yan chad tshigs bcad rkang pa gsum gyis tshogs kyi lam bshad do/ /rtogs pa'i rgyu can don gyi rnam par rtog /ces bya ba la/ phyi'i dngos po'i gzugs dang sgra la sogs pa dang / snam bu la sogs pa ni don gyi rnam pa zhes bya ste/ bsod nams dang ye shes kyi tshogs bsags/ chos la nges par sems pa thob pa des/ /de'i rjes la bum pa dang snam bu la sogs pa 'di dag thams cad kyi rgyu las byung ba yin te/ sems las ma gtogs par logs shig na yod pa ma yin no zhes rtogs pa ni rtogs pa'i rgyu can don gyi rnam par rtog pa zhes bya ste/ 'dis yid kyi rtog pa las don du snang bar khong du chud pa de ston to/ /de ltar rtogs pa yang mos pas spyod pa'i sa drod kyi dus snang ba thob pa'i ting nge 'dzin gyi dus na rtog pa ston to/ /rtog pa tsam du don rnams des rig nas/ /des snang sems tsam la ni rab tu gnas/ /zhes bya ba'i rkang pa gnyis kyis bsdus pa'i don ni/ don rnams sems las snang ba mthong ba dang / /de nas sems tsam la gnas pa de ston to/ /don rnams zhes bya ba ni gzugs dang sgra la sogs pa gzung ba'i chos rnams la bya ste/ gzung ba'i chos rnams sems las ji ltar byung zhing skye ba mngon sum du gyur pa ni rtog pa tsam du don rnams des rig byas te/ tshig des don rnams la snang ba mthong bar bstan to/ /'di ni nges par 'byed pa'i phyogs spyi bo'i dus de snang ba mched pa'i ting nge 'dzin to/ /de snang ba zhes bya ba'i rnam par shes pa la snang ba'i gzung ba'i chos rnams la bya ste/ gzung ba'i cha spangs nas gzung ba dang bral ba'i sems tsam gyi chos la gnas pa ni sems tsam la rab tu gnas par bya ste/ 'dis ni sems tsam la gnas pa bstan to/ /'dis ni nges par 'byed pa'i phyogs bzod pa'i dus te de kho na'i phyogs gcig la zhugs pa'i ting nge 'dzin to/ /'di yan chad sbyor ba'i lam bstan to/ /chos kyi dbyings kyang shin tu mngon sum du gyur ces bya ba la/ de nas nges par 'byed pa'i ting nge 'dzin gyi cha'i 'og tu sa dang po mthong ba'i lam bskyed nas/ mthong ba'i lam rnam par mi rtog pa'i ye shes kyis chos kyi dbyings mngon sum du byed do zhes bya ba'i don to/ /de nas gnyis kyi mtshan dang rnam par bral/ /zhes bya ba la/ mthong ba'i lam la chos kyi dbyings mngon sum du gyur pa dang / de nas gzung ba'i sgrib pa'i mtshan nyid dang yang bral 'dzin pa'i sgrib pa'i mtshan nyid dang yang bral te/ gnyis su med pa'i chos kyi dbyings la gnas so zhes bya ba'i don to/ /'dis ni mthong ba'i lam bstan to/ /da ni tshigs su bcad pa gsum pas mthong ba'i lam na chos kyi dbyings ji ltar mngon sum du 'gyur ba'i rgyu dang thabs bstan to/ /de bas na/ sems la gzhan med par ni blos rig nas/ /de phyir sems kyang med par shin tu rtogs/ /zhes bya ba la sogs pa'i tshigs su bcad pa gcig smos so/ /'di ltar bzod pa'i dus na gzung ba'i sgrib pa spangs pa dang / 'jig rten gyi chos mchog gi tshe gzung ba med na 'dzin pa med do zhes rtogs te/ ji ltar zhe na/ bum pa dang snam bu la sogs pa 'di dag ni sems las logs shig na yod pa ma yin no zhes khong du chud do/ /de ltar phyi'i yul med pas 'di la dmigs pa'i sems kyang med do zhes rtogs te gzung ba med na 'dzin pa yod par mi rigs pa'i phyir ro/ /blo dang ldan pas gnyis po med rig nas/ /zhes bya ba la/ blo dang ldan pa ni byang chub sems dpa' zhes bya ste/ 'jig rten gyi chos mchog gi tshe gzung ba dang 'dzin pa gnyis med par khong du chud nas gzung 'dzin gyi sgrib pa spangs pa dang de ma thag tu mthong ba'i lam bskyed nas chos kyi dbyings mngon sum du byed do zhes bya ba'i don to/ /'di 'jig rten gyi chos mchog gi dus te/ de ma thag pa'i ting nge 'dzin zhes bya'o/ /de mi ldan pa'i chos kyi dbyings la gnas/ /zhes bya ba la/ de ltar 'jig rten gyi chos mchog gi rjes la mthong ba'i lam skyes nas mthong ba'i mthong lam na gzung ba dang 'dzin pa gnyis dang mi ldan pa'i chos kyi dbyings la gnas te/ mthong bas spang bar bya ba'i nyon mongs pa spangs so zhes bya ba'i don to/ /blo dang ldan pa rtag par thams cad du/ /mnyam song mi rtog ye shes rtogs dag gis/ /zhes bya ba la sogs pa'i tshigs su bcad pa bzhi pas bsgom pa'i lam ston te/ blo dang ldan pa ni byang chub sems dpa'o/ / byang chub sems dpa'i rnam par mi rtog pa'i ye shes kyi stobs kyis dug sman chen po ltar sgrib pa'i dug sel to zhes bya bar sbyar ro/ /rtag par ni sa gnyis nas sa bcu man chad rgyun du sgrib pa spong ngo zhes bya ba'i don to/ /thams cad du zhes bya ba ni phyi'i dngos po thams cad dang nang gi dngos po thams cad la zhes bya ba'i don to/ /mnyam par song ba zhes bya ba ni phyi'i dngos po la stong par mthong ba de bzhin du nang gi dngos po la yang stong par mthong ngo zhes bya ba'i don to/ /gzung ba la yang mi rtog /'dzin pa la yang mi rtog pas mi rtog pa'i ye shes zhes bya ste/ ye shes de'i mthus na zhes bya ba'i tha tshig go/ /de gnas nyes pa bsags pas khrod stug po/ /dug sman chen po lta bur dug sel to/ /zhes bya ba la/ de'i sgras ni bsgom pa'i lam la gnas pa'i byang chub sems dpa' la bya'o/ /gnas ni byang chub sems dpa'i sems kun gzhi rnam par shes pa gzhan gyi dbang gi mtshan nyid la bya'o/ /nyes pa ni kun gzhi la yod pa'i nyon mongs pa'i sgrib pa dang gzung 'dzin gyi bag chags la bya'o/ /bsags pa ni 'khor ba thog ma med pa'i dus nas bag chags sems la zhen par byas pa'o/ /bag chags de yang shes par bya ba dka' zhing spang bar bya ba dka' ste/ phra bas na khrod stug po zhes bya'o/ /dug sman chen po sman gang thigs pa 'ga' tsam dug gi bum par lhung na dug thams cad sman du 'gyur ba dang / bsnams pa tsam gyis kyang dug sel bar byed pa ste/ dper na dug sman chen po bsnams pa dang / myangs pas dug thams cad med par byed pa de bzhin du bsgom pa'i lam gyi rnam par mi rtog pa'i ye shes bsgom pas spang bar bya ba'i nyon mongs pa phra mo la sogs pa dug dang 'dra bar bsal nas gzhan du 'gyur te/ sangs rgyas kyi sa la rnam par mi rtog pa'i ye shes mngon du byed do zhes bya ba'i don to/ /yid kyi rtog pas chos de dag gi don rab tu snang bas zhes bya ba la sogs pa la sems las bum pa dang snam bu la sogs pa de dag snang bar zad kyi sems las ma gtogs par logs shig na yod pa ma yin no zhes khong du chud cing yid ches pa'i don to/ /'di ni drod kyi dus dang sbyar ro/ /grangs med pa rab dbye'i dus kyis de'i pha rol yongs su rdzogs pas na mtha' yas pas pha rol to zhes bya ba la/ mtha' yas pa'i sgra ni bskal pa'i grangs rab tu dbye ba'i dus dang sbyar te/ bskal pa grangs med pa gcig gi bar du bsgrubs pas na mtha' yas pa zhes bya'o/ /de'i rjes la sa dang po thob pa na pha rol tu phyin pa zhes bya'o/ /don rnams yid kyi rtogs pa tsam rig nas/ /zhes bya ba la/ gzung ba la sogs pa dngos po gzung ba'i cha rnams sems las 'byung bar mngon sum du mthong zhes bya ba'i don to/ /'di ni spyi bo'i dus so/ /'di lta bur snang ba'i sems tsam la gnas te zhes bya ba la/ gzung ba dang 'dzin pa lta bur snang ba las gzung ba'i cha spangs nas 'dzin pa'i cha tsam la gnas pa ste/ 'di ni bzod pa'i dus so/ /de yan chad chos kyi dbyings mngon sum du 'gyur ro zhes bya ba dang / drod dang rtse mo dang / bzod pa skyes pa'i dus la mthong ba'i lam skyes nas chos kyi dbyings mngon sum du byed do zhes bya ba'i don to/ /gsum pas ni ji ltar chos kyi dbyings de mngon sum du rig pa ston to zhes bya ba la/ tshigs su bcad pa gsum pas ni thabs gang dang rgyu gang gis mthong ba'i lam skyes na chos kyi dbyings mngon sum du byed pa'i rgyu ston te/ de yang 'jig rten gyi chos mchog gi ting nge 'dzin yin no zhes bya ba'i don to/ /bzhi pas ni bsgom pa'i lam ni gnas yongs su rjes pas don dam pa'i ye shes la 'jug par ston to zhes bya ba la/ tshigs su bcad pa bzhi pas ni bsgom pa'i lam ste sa gnyis pa nas sa bcu man chad bsgom pas spang bar bya ba'i nyon mongs pa spong ste/ gnas gzhan du gyur nas sangs rgyas kyi sa la rnam par mi rtog pa'i ye shes thob par 'gyur ro zhes bya ba'i don to/ /rtag par zhes bya ba ni sa gnyis pa nas sa bcu man chad rgyun du sgrib pa spong zhes bya ba'i don to/ /gzhan gyi dbang gi ngo bo nyid de la mnyam du song ste zhes bya ba ni nyon mongs pa'i bag chags dang / gzung 'dzin gyi bag chags kyis kun gzhi la khyab par gnas zhes bya ba'i don to/ /ring du zhugs pa zhes bya ba ni bag chags de dag thams cad kyang 'khor ba thog ma med pa nas bsags bsags pa yang spongs shing bsal dka' zhes bya ba'i tha tshig go/ /don dam pa'i ye shes kyi che ba'i phyir tshigs su bcad pa zhes bya ba la/ don dam pa'i ye shes ni rnam par mi rtog pa'i ye shes te/ ye shes de'i che ba'i bdag nyid bstan pa dang / che ba'i bdag nyid bstan pa'i sgo nas mthar thug pa'i lam yang bstan pa'i phyir tshigs su bcad pa rtsom mo zhes bya ba'i don to/ /thub pas gsungs pa'i chos legs par gzhag pa zhes bya ba de la/ thub pa ni sangs rgyas bcom ldan 'das te/ lus dang ngag yid gsum gyi sgo nas/ sdig pa mi dge ba mi mdzad pas thub par thub pa'o/ /thub pa des gsungs pa ni thub pa des bshad ces bya ba'i don to/ /chos ni gsung rab yan lag bcu gnyis te chos de dag ni thog mar yang dge/ /bar du yang dge/ /tha mar yang dge/ /tshig bzang po/ /don bzang po/ /legs par gzhag pa zhes bya ste/ chos de dag gi don dam pa la blo gros gzhag par bya'o zhes bya bar sbyar ro/ /rtsa ba'i chos kyi dbyings la blo gros gzhag /ces bya ba la/ don dam pa'i ye shes la zhugs pa'i byang chub sems dpa' theg pa chen po mdo sde thams cad kyi don gcig tu bsdus nas dmigs par byed pa'i sems ni rtsa ba'i sems zhes bya'o/ /sems de la rtsa ba'i sems zhes bya bar ci mngon zhe na/ mdo sde rgyan gyi gtsug lag nyid las 'byung bar mngon te/ 'di'i rjes su bstan pa dang / bshad pa'i skabs las/ de bas mdo sde la sogs pa'i/ /chos gnyis ston pa de la ni/ /dang po nyid du brtul zhugs pas/ /mdo sogs ming la sems gzhag bya/ /zhes bya ba la sogs pa'i tshigs su bcad pa gsum gyis sems rnam pa drug bshad de/ drug gang zhe na/ rtsa ba'i sems dang / rjes su dpyod pa'i sems dang / rnam par dpyod pa'i sems dang / rjes su 'dzin pa'i sems dang / kun du bsdus pa'i sems dang / rjes su ston pa'i sems so zhes bshad do/ /de la rtsa ba'i sems gang zhe na/ gang mdo sde la sogs pa'i ming la dmigs pa ste/ mdo dang lung du bstan pa'i sde la sogs pa'i chos la/ mdo sde 'di'i ming ni lang kar gshegs pa zhes bya ste/ mdo sde 'di'i ming ni sa bcu pa zhes bya zhes bya ba la sogs pa mdo sde rnams kyi ming la dmigs pa ni rtsa ba'i sems zhes bya'o/ /yang na theg pa chen po'i mdo sde rnams kyi ming dang / tshig dang yi ge rnams la so sor mi dmigs par theg pa chen po'i chos thams cad kyi don thams cad gcig tu bzlums pa nas de la dmigs par byed pa'i sems la rtsa ba'i sems zhes bya'o/ /blo gros zhes bya ba ni shes rab la bya ste/ rtsa ba'i sems dang 'brel pa'i shes rab kyis chos kyi dbyings la dmigs shing chos kyi dbyings la bsgom pa dang / chos kyi dbyings la sems par byed pa ni chos kyi dbyings blos gzhag pa zhes bya ste/ dran rgyud rtog pa tsam rig brtan pa dag / ces bya ba la/ rtsa ba'i sems dang 'brel pa'i shes rab kyis chos kyi dbyings la dmigs pa'i dus na/ sems kyi rgyud las dang po phul du phyin pa dang / byang chub kyi phyogs la sogs pa'i chos la sems shing dran pa yang dag sems las byung ba dang sems tsam du rig nas sems tsam mo snyam du rtog pa de yang spangs te/ de la yang mi rtog pa ni brtan pa zhes bya ste/ de ltar du sems dpa' byang chub sems dpa' de mthar 'di ltar 'gyur ro zhes bya ba'i don to/ /myur du yon tan rgya mtsho'i pha rol 'gro/ /zhes bya ba la/ yon tan de lta bu dang ldan pa'i byang chub sems dpa' de myur du stobs dang mi 'jigs pa la sogs pa'i yon tan rgya mtsho'i pha rol 'gro ste/ myur du bla na med pa'i byang chub tu 'tshang rgya bar 'gyur te zhes bya ba'i don to/ /de kho na'i skabs bshad pa rdzogs so/ / //de kho na'i skabs bshad pa'i rjes la/ mthu'i mtshan nyid kyi skabs bshad par cis 'brel zhe na/ byang chub sems dpa' rnams kyis ni rnam pa gnyis bya ba yin te/ bdag gi don dang gzhan gyi don to/ /de la rang nyid kyis sangs rgyas kyi chos yongs su rdzogs par bya ba ni bdag gi don to/ /sems can yongs su smin par bya ba ni gzhan gyi don to/ /de la bdag gi don de kho na khong du chud par gyur na sangs rgyas kyi chos yongs su rdzogs par 'gyur ro/ /de nas de kho na khong du chud pa'i 'og tu sems can yongs su smin par bya ba'i phyir 'phrul gyi mig la sogs pa'i yon tan khyad par can bsgrubs pas ni sems can yongs su smin par 'gyur te/ 'phrul gyi mig la sogs pa'i yon tan khyad par can de yang skabs kyi mngon par rtogs pa dang mthar thug pa'i mngon par rtogs pa gnyis kyis 'grub ste/ de bas na de kho na'i rjes la mthu'i skabs bshad par 'brel to/ /yang na bdag nyid kun nas nyon mongs pa med pa'i thabs ni de kho na'i don yin par bshad/ bdag nyid kun nas nyon mongs pa med pas kyang dbang po ma thob pa dang sems can rnams gdug cing dgug par mi nus par byang chub sems dpa' skyo ba skyes te/ de bas na sems can yongs su smin par bya ba skyo bar mi 'gyur bar thabs bstan pa'i phyir/ de kho na'i rjes la mthu'i skabs bshad par 'brel to/ /yang na gang la bslab par bya ba la rnam pa bdun du gzhag pa las de kho na'i skabs kyi rjes la mthu smos pa bzhin te bshad dgos pa'i phyir/ de kho na'i 'og tu mthu'i skabs bshad par 'brel to/ /mthu'i skabs 'di la don rnam pa drug 'byung ste/ mthu'i mtshan nyid rab tu dbye ba dang / mthu'i rgyu dang / mthu'i 'bras bu dang / mthu'i las dang / mthu'i ldan pa dang / mthu'i rab tu dbye ba'o/ /mthu'i mtshan nyid rab tu dbye ba'i tshigs su bcad pa zhes bya ba la/ mthu ni 'phrul gyi mig nas zag pa zad pa mngon par shes pa'i bar du mngon par shes pa drug la bya ste/ mngon par shes pa drug gi mtshan nyid dang rang bzhin gang yin pa las brtsams te/ tshigs su bcad pa rtsom mo zhes bya ba'i don to/ /skye ba zhes bya ba la/ 'dir 'chi ba ma smos su zin kyang / gang na dud pa yod pa de na me yod par gdon mi za ba bzhin du skye ba yod na 'chi ba gdon mi za bar 'byung la/ 'chi ba yod na yang skye ba gdon mi za bar 'byung bas don gyi shugs kyis 'chi ba yang bstan pa yin par rig par bya'o/ /de la sems can thams cad 'di nas shi nas gnas che ge mo zhig tu skye ste/ de nas shi nas kyang gnas che ge mo zhig tu skye zhes bya ba nas/ sangs ma rgyas pa dang mya ngan las ma 'das pa'i bar du sems can gyi skye ba dang / 'chi ba shes te/ 'di ni 'chi ba dang skye ba shes pa'i mngon par shes pa'o/ /ngag ces bya ba la sems can shi 'phos nas lha dang mi dang / sems can dmyal ba dang / byol song la sogs pa'i lam rgyud lnga de dang de dag tu skye ba'i tshig ci dang ci smras pa shes shing thos te/ 'di ni lha'i rna ba'i mngon par shes pa'o/ /sems shes bya ba la/ sems 'di ni 'dod chags dang bcas/ 'di ni 'dod chags dang bral/ 'di ni zhe sdang dang bcas/ 'di ni zhe sdang dang bral zhes bya ba la sogs pa sems can gyi spyod pa brgyad khri bzhi stong shes pa ni sems shes pa zhes bya ste/ 'di ni sems kyi rnam grangs mngon par shes pa'o/ /dge ba dang mi dge ba skyed ces bya ba la/ sems can thams cad kyis 'khor ba thog ma med pa nas dge ba ci byas pa dang / mi dge ba ci byas pa shes te/ sems can 'dis tshe rabs snga ma 'di'i tshe na ni sbyin pa byas pas sbyin pa'i bag chags dang ldan/ tshe rabs snga ma 'di'i tshe na ni tshul khrims bsrungs pas tshul khrims kyi bag chags dang ldan pa zhes bya ba la sogs pa tshe rabs snga ma la ci dang ci byas pa'i bag chags shes pa dang / de bzhin du sems can 'dis tshe snga ma 'di'i tshe na ni srog bcad pa byas pas srog gcod pa'i bag chags dang ldan zhes bya ba la sogs pa tshe rabs snga ma la mi dge ba ci dang ci byas pa'i bag chags shes pa ni dge ba dang mi dge ba skyed pa zhes bya ste/ 'di ni sngon gyi gnas mngon par shes pa'o/ /de'i gnas dang zhes bya ba la/ de'i gnas ni de bzhin gshegs pa rnams bzhugs pa'i sangs rgyas kyi zhing dang / sems can rnams gnas pa'i 'jig rten gyi khams la bya ste/ de bzhin gshegs pa la mchod pa'i phyir rdzu 'phrul gyis sangs rgyas kyi zhing du 'gro bar bya ba shes pa dang / sems can 'dul bar bya ba'i phyir 'jig rten gyi khams de dang de dag tu rdzu 'phrul gyis 'gro bar bya ba shes pa ni de'i gnas shes pa zhes bya ste/ 'di ni rdzu 'phrul gyi yul mngon par shes pa'o/ /'byung ba zhes bya ba la/ 'byung ba ni thabs gang gis bdag dang sems can gzhan 'khor ba las thar par bya ste/ de shes pa ni 'byung ba shes pa ste/ de ni zag pa zad pa mngon par shes pa zhes bya'o/ /mngon sum gang zhes bya ba ni mngon par shes pa drug po de dag kyang / skyu ru ra lag mthil du bzhag pa bzhin du gsal bar mngon sum du shes so zhes bya ba'i don to/ /kun 'gro zhes bya ba ni byang chub sems dpa'i mngon par shes pa drug 'jig rten gyi khams kun du yang 'jug la dus gsum kun du yang 'byung bas na kun du 'gro ba zhes bya'o/ /rab tu thar pa zhes bya ba ni mngon par shes pa re re zhing yang sems can gyi don du rnam pa du mar bya ba la thogs pa med ces bya ba'i don to/ /bstan pa thob pa'i dus ni thog ma med/ /ces bya ba la/ bstan pa thob pa ni byang chub sems dpa'o/ /mthu ni byang chub sems dpa'i de dag gi mngon par shes pa drug la bya'o/ /thogs pa med pa ni mngon par shes pa de dag 'jig rten gyi khams kun du 'jug pa dang / dus thams cad du 'byung bas thogs pa med pa ste/ 'di ni nyan thos dang rang sangs rgyas dang / 'jig rten gyi drang srong gi mngon par shes pas kyang 'phags pa ston to/ /ci'i phyir zhe na/ de dag gi mngon par shes pa ni 'jig rten gyi khams thams cad du mi 'jug pa dang / dus thams cad du mi 'byung bas thogs pa dang bcas pa'o/ /'jig rten gyi khams thams cad du zhes bya ba ni/ byang chub sems dpa'i mngon par shes pa rnams phyogs bcu'i 'jig rten gyi khams thams cad du 'jug go zhes bya ba'i don to/ /don drug po de dag rab tu dbye ba dang bcas pa zhes bya ba ni mngon par shes pa drug po de dag gcig la yang du mar spel bar mngon sum du bya ba la/ byang chub sems dpa' rnams thogs pa med do zhes bya ba'i don to/ /de ni byang chub sems dpa' rnams kyis mthu mngon par shes pas bsdus pa'o zhes bya ba la/ mngon par shes pa drug po de ni/ byang chub sems dpa'i mthu zhes bya ste mngon par shes pa drug tu rtogs pa nyid la byang chub sems dpa'i zhes bya ba'o zhes bya ba'i don to/ /mthu'i mtshan nyid rnam par dbye ba'i rang bzhin gyi don gsungs so zhes bya ba la/ byang chub sems dpa'i mthu'i mtshan nyid rnam pa drug tu dbye ba'i sgo nas byang chub sems dpa'i mthu'i rang bzhin ston to zhes bya ba'i don to/ /rgyu'i don las brtsams te tshigs su bcad pa zhes bya ba la/ mngon par shes pa drug gi mtshan nyid dang dbye ba bshad nas/ rgyu gang gis mngon par shes pa drug thob par 'gyur ba'i rgyu bstan pa'i phyir tshigs su bcad pa rtsom ste/ rgyu rnam pa gsum gang zhe na bsam gtan bzhi pa la gnas pa dang / rnam par mi rtog pa'i ye shes la gnas pa dang / ji ltar rnam par gzhag pa yid la byed pa'o/ /bsam gtan bzhi pa shin tu dag thob nas/ /zhes bya ba la/ gzugs kyi khams kyi bsam gtan bzhi pa ste/ bsam gtan dang po dang / bsam gtan gnyis pa dang / bsam gtan gsum pa dang / bsam gtan bzhi pa'o/ /shin tu dag pa ni sred pa shas cher bsgoms pa dang / nga rgyal shas cher bsgoms pa dang / the tshom shas cher bsgoms pa med pa'o/ / yang na thod rgal dang / lugs su bsgoms pa dang / lugs su mi bsgoms pa thob pa ni dag pa zhes bya'o/ /yang na nyes pa brgyad spangs pa ni dag pa ste/ nyes pa brgyad po gang zhe na/ dbugs rngub pa dang / 'byung ba dang / rtog pa dang / dpyod pa dang / bde ba dang / sdug bsngal ba dang / yid bde ba dang / mi bde ba'o/ /thob nas zhes bya ba ni bsam gtan bzhi pa dag gnas de la brten nas zhes bya ba'i don to/ /mi rtog ye shes yongs su gzung ba dang / /zhes bya ba ni bsam gtan bzhi pa la gnas pa'i tshe/ gzung 'dzin la mi rtog pa'i rnam par mi rtog pa'i ye shes dang 'brel des kyang yongs su zin zhes bya ba'i don to/ /rnam par gzhag bzhin yid la byed pa las/ /zhes bya ba ni de'i tshe ci zhig yid la byed ce na/ rgyu gang dang gang gis mngon par shes pa gang dang gang thob par 'gyur ba'i rgyu mdo sde las bshad de rnam par gzhag pa de yid la byed pa bas mngon par shes pa thob par 'gyur te/ de'i rgyu yang mdo sde las 'phrul gyi mig gis mngon par shes pa thob par 'dod pas phyogs thams cad snang bas khyab par mos shing yid la gyis shig /de gsungs pa dang / rdzu 'phrul mngon par shes pa thob par 'dod pas lus yang par mos shing yid la gyis shig ces gsungs pa lta bu'o/ /mthu grub pa yi dam pa thob par 'gyur ba dang / /zhes bya ba la/ byang chub sems dpa'i mngon par shes pa drug ni nyan thos dang rang sangs rgyas dang / 'jig rten pa'i mngon par shes pa bas 'phags pas na dam pa zhes bya ba ste/ bsam gtan bzhi pa la ni gnas/ rnam par mi rtog pa'i ye shes dang mi ldan/ ji ltar rnam par gzhag pa'i chos yid la byas nas mthu rnam pa drug thob pa 'grub par 'gyur ro zhes bya ba'i don to/ / 'bras bu'i don las brtsams te tshigs su bcad pa zhes bya ba la mngon par shes pa drug gi rgyu bshad nas/ mngon par shes pa drug gi 'bras bu bstan pa'i phyir tshigs su bcad pa rtsom mo/ /mngon par shes pa drug gi 'bras bu yang rnam pa gsum ste/ dpe med cing rgya che ba'i spyod pa shin tu gnas pa dang / sangs rgyas la mchod pa byed pa dang / sems can 'dren par byed pa'o/ /gang gis 'phags dang 'phrul dang tshangs pa yi/ /dpe med rgya chen spyad pa shin tu gnas/ /zhes bya bas dpe med pa rgya chen po spyod pas gnas pa bstan te/ de la 'phags pa'i gnas pa ni stong pa nyid dang mtshan ma med pa dang smon pa med pas gnas pa'i bden pa bzhis gnas pa'am sa dang pha rol tu phyin pas gnas pa'o/ /'phrul gyi gnas pa ni gzugs kyi khams bsam gtan bzhi pa la gnas pa'am/ gzugs med pa'i snyoms par 'jug pa bzhi la gnas pa'o/ /tshangs pa'i gnas pa ni byams pa dang / snying rje dang / dga' ba dang / btang snyoms la gnas pa'o/ /de la yang rnam par thar pa gsum las stong pa nyid kyi ting nge 'dzin las 'phags pa dag phal cher gnas so/ / bden pa bzhi las kyang 'gog pa'i snyoms par 'jug pa la 'phags pa dag phal cher gnas so/ /gzugs dang gzugs med pa'i ting nge 'dzin las kyang 'phags pas bsam gtan bzhi pa la gnas pa dag phal cher gnas so/ /tshad med pa bzhi las kyang snying rje chen po la 'phags pa dag phal cher gnas so/ /phyogs su de song sangs rgyas sems can dag /yang dag mchod cing rnam dag 'gugs par byed/ /ces bya ba la/ mngon par shes pa dang ldan pa'i byang chub sems dpa' de rdzu 'phrul gyis phyogs bcu'i sangs rgyas kyi zhing dag tu song nas sangs rgyas bcom ldan 'das la mchod pa byed de/ 'dis ni sangs rgyas mchod pa'i 'bras bu bstan to/ /gzhan yang rdzu 'phrul gyis phyogs bcu'i sangs rgyas kyi zhing dag tu song nas 'phur ba dang 'bar ba la sogs pa'i sgo nas sems can 'gugs te/ dge ba la 'jog par byed de 'dis ni sems can 'dren pa'i 'bras bu bstan to/ /las rnam pa drug gi don las brtsams te tshigs su bcad pa bzhi'o zhes bya ba la/ mngon par shes pa'i 'bras bu bstan nas da tshigs su bcad pa bzhis mngon par shes pa drug gi las 'chad de/ las rnam pa drug go/ /mthong ba'i las dang / ston pa'i las las brtsams te tshigs su bcad pa zhes bya ba la/ mngon par shes pa drug dang ldan pa'i byang chub sems dpa' rnams kyis sems can gyi 'jig rten dang / snod kyi 'jig rten gnyis sgyu ma lta bur khong du chud pa ni mthong ba'i las so/ /dbang bcu dang ldan pas sems can rnams la 'phur ba dang / 'bar ba la sogs pa dang / 'jig rten gyi khams su 'jig pa dang / chags pa ston pa ni ston pa'i las zhes bya ste/ las de gnyis bstan par bya ba'i phyir tshigs sa bcad pa rtsom mo zhes bya ba'i don to/ /sems can bcas pa skye dang 'jig pa yi/ /'jig rten khams kun sgyu ma 'dra bar mthong / /zhes bya ba la/ mngon par shes pa dang ldan pa'i byang chub sems dpa' des snod kyi 'jig rten dang sems can du bcas pa skyes te/ 'jig rten gyi khams 'chags pa dang / 'jig ste bskal pa'i sa sbyong ba na sgyu ma dang 'dra bar mthong ngo / /ji ltar zhe na/ dper na sgyu ma dang / smig rgyu dang / rmi lam la sogs pa rang bzhin gyis stong zhing med kyang skye bar yang snang ba de bzhin du snod kyi 'jig rten dang / sems can gyi 'jig rten gnyi ga yang rang bzhin gyis stong ste/ med kyang skye bar snang 'jig par yang snang bas sgyu ma dang 'dra'o zhes mthong ngo / /'di ni mthong ba'i las te las rnam pa gcig go/ /dbang ldan rnam pa sna tshogs bcas par yang / ji bzhin 'dod par de dag yang dag ston/ /zhes bya ba la/ mngon par shes pa thob pa'i byang chub sems dpa' ni dbang dang ldan pas rdzu 'phrul rnam pa sna tshogs kyis sems can gang la rdzu 'phrul gang bstan na 'dul zhing dga' bar 'gyur ba sems can gang la rdzu 'phrul de ston te 'bar ba ston pas 'dul ba'i sems can rnams la 'bar bar ston/ 'phur bas 'dul ba'i sems can rnams la 'phur ba ston pa la sogs pa'o/ /'di ni ston pa'i las te las gnyis pa'o/ /'od zer gyi las las brtsams te tshigs su bcad pa zhes bya ba la byang chub sems dpa' sems can gyi don du phyogs bcur 'od zer ston pa las brtsams nas tshigs su bcad pa rtsom ste/ de yang don rnam pa gnyis kyi phyir 'od zer gtong ngo / /gang zhe na/ ngan song du skyes pa'i sems can sdug bsngal ba rnams mtho ris su dgod par bya ba'i phyir 'od zer btang ba dang / bdud kyi gnas dang bdud rnams bskyod cing skrag par byed pa'i phyir 'od zer gtong ngo / /'od zer btang bas mi bzad sdug bsngal dang / /ngan song ba rnams mtho ris 'gro bar byed/ /ces bya ba la/ byang chub sems dpa' mngon par shes pa drug dang dbang bcu dang ldan pas phyogs bcur 'od zer btang bas sems can dmyal ba'i gnas na btso zhing gtubs pa la sogs pa'i sdug bsngal dang / yi dags kyi gnas na bkres pa la sogs pa'i sdug bsngal dang / byol song gi gnas na gcig gis gcig gsod pa la sogs pa'i sdug bsngal rnams 'od zer des reg pa dang / dad pa skye zhing 'phral du yang sdug bsngal zhi bar byed pa dang / de nas shi 'phos nas lha dang mi'i gnas bde 'gror skye bar byed de/ 'di ni las gsum pa'o/ /bdud gnas gzhal med khang mtho mdzes pa dag/ /bdud bcas rab tu bskyod cing skrag par byed/ /ces bya ba la/ bdud kyi gnas ni bdud de dag 'khod pa'i khang khyim ste/ mtho ba ni rtseg ma dang rim pa du ma 'dug pa'o/ /mdzes pa ni rin po che las byas pa'o/ /bdud bcas zhes bya ba ni bdud 'khor dang bcas pa ste/ 'od zer btang ste/ bdud kyi gnas rnams ni bskyod/ bdud kyi gnas g.yos pas bdud rnams kyang skrag par byed de/ 'di ni las bzhi pa'o/ /rnam par rol pa'i las dang sprul pa'i las las brtsams te tshigs su bcad pa zhes bya ba la/ rnam par rol pa ni nam mkha' mdzod kyi ting nge 'dzin zhes bya ba la sogs pa theg pa chen po'i ting nge 'dzin dpag tu med pa la 'jug pa'o/ /sprul pa'i las ni sems can gyi don du rnam pa gsum du sprul par byed do/ /bzo'i gnas sprul nas sems can 'dul ba dang / skye ba sprul nas sems can 'dul ba dang / dga' ldan gyi pho brang nas 'chi ba bstan nas mya ngan las 'das pa'i bar dag sprul pa bstan nas/ sprul pa'i mchog bstan nas sems can 'dul bar byed pa'o/ /ting 'dzin dpag tu med la rnam rol cing / /mchog rnams 'dus ba'i 'og tu yang dag ston/ / ces bya ba la/ sangs rgyas dang byang chub sems dpa'i 'khor tshogs pa ni tshogs rnams 'dus pa zhes bya ste/ de bzhin gshegs pa dang byang chub sems dpa' gtso bo tshogs pa'i dbus su theg pa chen po'i ting nge 'dzin dpag tu med pa la snyoms par 'jug pa ston pa ni ting nge 'dzin gyis rnam par rol pa zhes bya ste/ dper na 'phags pa 'jam dpal de bzhin gshegs pa dang / byang chub sems dpa'i 'khor gyi dbus su ting nge 'dzin la snyoms par zhugs pa dang / sus kyang ting nge 'dzin de las bslang bar ma nus pa dang / bu mo legs pa'i blo gros kyis bslang ngo zhes bya ba la sogs pa lta bu'o/ /'di ni rnam par rol pa'i las de las rnam pa lnga'o/ /las dang skye ba dang ni mchog gi sprul pas kyang / /thams cad dus su sems can don byed do/ /zhes bya bas sprul pa'i las bstan te/ las sprul pas kyang dus thams cad du sems can gyi don byed/ skye ba sprul pas kyang dus thams cad du sems can gyi don byed/ mchog gi sprul pas kyang dus thams cad du sems can gyi don byed do zhes bya ba'i don to/ /'di las drug dang / de la rdza mkhan dang / pi wang mkhan la sogs pa'i bzo'i gnas rnam pa sna tshogs byed par sprul pa ni las sprul pa zhes bya ste/ lha dang klu dang gnod sbyin nas byol song la sogs pa'i gnas su skyes nas// de dag gi lus 'dra bar bstan pa ni skye ba sprul pa zhes bya'o/ /'og min gyi pho brang nas mya ngan las 'das pa'i bar dag bstan pa ni mchog gi sprul pa zhes bya'o/ /zhing yongs su dag par byed pa las brtsams te tshigs su bcad pa zhes bya ba las/ mngon par shes pa'i las drug bstan nas/ da ni mngon par shes pa drug dang ldan pa rnams sangs rgyas kyi zhing rnam pa gnyis dag par byed do zhes bstan pa'i phyir tshigs su bcad pa rtsom mo zhes bya ba'i don to/ /zhing rnam pa gnyis ni snod kyi 'jig rten dang / sems can gyi 'jig rten no/ /zhing rnams 'dod pa bzhin du bstan pa'i phyir/ /ye shes la yang dbang bas dag pa thob/ /ces bya ba 'di snod kyi 'jig rten dag par byed pa ston te/ de yang gang gis dag par byed pa dang / gang dag par byed pa ste rnam pa gnyis so/ /byang chub sems dpa' dbang bcu thob pa ste/ dbang bcu la ye shes kyi dbang gis sangs rgyas kyi zhing rnams dang shel gyi kha dog tu bstan na dga' ba rnams la shel gyi kha dog tu ston pa dang / gser gyi kha dog tu bstan na dga' ba rnams la gser la sogs pa'i kha dog tu ston/ de dag thob ces bya ba ni de ltar ston nus zhes bya ba'i tha tshig go/ /sangs rgyas mtshan dag med par sangs rgyas mtshan/ /yang dag bsgrags pas dad pas khams gzhan 'gyed/ /ces bya bas/ sems can gyi 'jig rten dag par byed par ston te/ byang chub sems dpa' mngon par shes pa drug dang ldan pa des/ 'jig rten gyi khams gang na yang sangs rgyas dang chos dang dge 'dun gyi mtshan mi grag cing med pa'i 'jig rten gyi khams der dkon mchog gsum gyi mtshan grag par bya ste/ dad pa skyes nas 'jig rten gyi khams gang na dkon mchog gsum yod pa'i 'jig rten gyi khams der skye ba la 'jog par byed do zhes bya ba'i don to/ /ldan pa'i don las brtsams te tshigs su bcad pa zhes bya ba la/ mngon par shes pa drug gi las dang / mngon par shes pa drug gi sangs rgyas kyi zhing dag par byed pa bstan nas/ /da ni mngon par shes pa drug yod pa de yon tan dang ldan pa bstan pa'i don te/ de yang sems can smin par byed nus par byed pa dang ldan pa dang / rab tu bsngags pa dang ldan pa dang / tshig gzung bar 'os pa dang ldan pa ste rnam pa gsum dang ldan no zhes bya ba'i don to/ /sems can smin byed nus par 'gyur ba ni/ /ji ltar 'dab ma rgyas pa'i bya bzhin du/ /zhes bya ba la/ sems can smin par byed nus pa dang ldan pa bstan te/ dper na bya 'dab gshog rdzogs shing rgyas pa nam mkha' la 'gro ba na chen po 'bad pa med par dga' mgur 'gro z hing nam 'phang gcod pa de bzhin du mngon par shes pa drug dang ldan pa gcig tu 'bad pa med par bsdu ba'i dngos po bzhis sems can bsdus nas mi dge ba las bzlog pas dge ba la gzhag pa la sogs pa'i dge ba'i sgo nas sems can smin par byed nus so zhes bya ba'i don to/ /sangs rgyas las kyang shin tu bsngags pa thob/ /ces bya bas rab tu bsngags pa dang ldan pa bstan te/ mngon par shes pa dang ldan na sems can smin par byed la de bzhin gshegs pa la 'dri zhing zhu ba rnams kyang phyin ci ma log par 'dri bas ji skad du mdo sde dag las rigs kyi bu khyod kyis mdo zhu ba zhus pa dang dri ba dris pa legs so legs so zhes bya ba la sogs pa'i bsngags pa yang thob par 'gyur ro zhes bya ba'i don to/ /skye dgu rnams la tshig gzung 'os par 'gyur/ /zhes bya bas/ tshig gzung bar 'os pa dang ldan pa bstan te/ mngon par shes pa dang ldan na gzhan gyi sems dang mthun par tshig smra ba dang / rdzu 'phrul rnam pa sna tshogs bstan nas sems can mgu bar byas pa'i phyir byang chub sems dpa' de'i tshig sems can thams cad kyis mi gcog cing ji skad bsgo ba bzhin du nyan du btub par 'gyur ro zhes bya ba'i don to/ /'jug pa'i don las brtsams te tshigs su bcad pa zhes bya ba la/ ldan pa'i don bstan nas mngon par shes pa drug dang ldan pa'i sems can byang chub sems dpa' rnams mthu rnam pa drug gis sems can gyi don la ji skad 'jug pa bstan pa'i phyir tshigs su bcad pa rtsom mo zhes bya ba'i don to/ /mngon shes drug dang zhes bya ba la/ mngon par shes pa drug ni 'phrul gyi mig gi mngon par shes pa nas zag pa zad pa mngon par shes pa'i bar du drug ste/ 'di ni mthu rnam pa gcig go/ /rig pa gsum zhes bya ba la/ rig pa gsum ni sngon gyi gnas rjes su dran pa'i rig pa dang / 'chi 'pho rig pa dang / zag pa zad pa'i rig pa ste/ sngon gyi gnas rjes su dran pa'i rig pas ni sngon gyi dus la mkhas so/ /'chi 'pho'i rig pas ni phyi ma'i dus la mkhas so/ /zag pa zad pa'i rig pas ni da ltar gyi dus la mkhas pa ste/ 'di ni mthu rnam pa gnyis so/ /rnam thar brgyad dang zhes bya ba la/ rnam par thar pa brgyad ni gzugs can gzugs la lta ba ste/ rnam par thar pa dang po'o/ / nang gzugs med pa'i 'du shes la phyi'i gzugs la lta ba ste/ rnam par thar pa gnyis so/ /bzang po'i rnam par thar pa lus kyi mngon sum du byas nas gnas te rnam par thar ba gsum pa'o/ /nam mkha' mtha' yas skye mched dang / rnam shes mtha' yas skye mched dang / cung zad med pa'i skye mched dang / cung zad med min skye mched dang / 'gog pa'i snyoms par 'jug pa dang brgyad de/ 'di ni rnam pa gsum mo/ /de bzhin zil gnon brgyad ces bya ba la/ zil gyis gnon pa'i skye mched kyang brgyad de gang zhe na/ nang gzugs kyi 'du shes la/ phyi'i gzugs rnams la/ chung ba dang / kha dog bzang po dang / kha dog ngan pa dang / gya nom par mthong ste/ gzugs de dag kyang zil gyis mnan nas mngon par shes pa zil gyis mnan nas mthong ste/ 'di ni zil gyis gnon pa'i skye mched dang po'o/ /de bzhin du nang gzugs kyi 'du shes la/ phyi'i gzugs rnams la chen por mthong ste/ 'di ni zil gyis gnon pa'i skye mched gnyis pa'o/ /nang gzugs med pa'i 'du shes la phyi'i gzugs rnams la lta ste/ chung ngu'o zhes bya ba ni zil gyis gnon pa'i skye mched gsum pa'o/ /nang gzugs med pa'i 'du shes la phyi'i gzugs rnams la lta ste/ chen po'o zhes bya ba 'di ni zil gyis gnon pa'i skye mched bzhi pa'o/ /de'i steng du sngon po dang / ser po dang / dmar po dang / dkar po bsnan te brgyad de 'di ni mthu rnam pa bzhi'o/ /thams cad skye mched bcu dang zhes bya ba la/ thams cad skye mched bcu ni sa dang / chu dang / me dang / rlung ste 'byung ba chen po bzhi dang / sngon po dang / ser po dang / dmar po dang / dkar po ste kha dog bzhi dang / nam mkha' mtha' yas skye mched dang / rnam shes mtha' yas skye mched gnyis kyis bsnan te bcu'o/ /'di ni mthu rnam pa lnga'o/ /dpag tu med pa'i ting nge 'dzin rnams ni/ /zhes bya ba la/ theg pa chen po'i ting nge 'dzin dpag tu med pa rnams kyang byang chub sems dpa'i mthu yin te/ de yang dpa' bar 'gro ba'i ting nge 'dzin dang / nam mkha' mdzod kyi ting nge 'dzin la sogs pa ste/ 'di ni mthu rnam pa drug go/ /brtan pa thob pa'i mthu zhes bya ba la/ gong du bshad pa drug po de dag ni/ byang chub sems dpa' rnams kyis sems can yongs su smin par byed pa'i mthu yin no zhes bya ba'i don to/ /don rnam par dbye ba'i mtshan nyid kyi don drug gi mthu bshad nas/ de'i che ba bstan pa'i phyir tshigs su bcad pa zhes bya ba la/ mthu rnam pa drug tu phye ba'i sgo nas mthu rnam pa drug gis byang chub sems dpa'i mthu ni drug yin no zhes bshad nas/ da mngon par shes pa drug gi yon tan che ba bstan pa'i phyir tshigs su bcad pa rtsom ste/ che ba yang rnam pa gsum mo/ /gang zhe na/ dbang gi che ba dang / dga' ba'i che ba dang / srid pa ni mi 'jigs pa'i che ba'o/ /de ni dbang gi mchog rnams thob pa'i blo/ /'gro ba dbang med rang dbang bkod rtag tu/ /zhes bya ba la/ dbang gi che ba bstan te/ mngon par shes pa drug pa'i byang chub sems dpa' de zhes bya ba'i don to/ /mthu rnam pa drug thob pa'am dbang rnam pa bcu thob pa'am ye shes rnam par dag pa la dbang thob pas na dbang gi mchog thob pa'i blo zhes bya ba de/ blo ni shes rab la bya'o/ /sems can rnams las dang nyon mongs pa'i dbang du song nas tshe 'dir yang las dang nyon mongs pas gar drangs par 'jug pas na rang dbang med pa dang / tshe rabs gzhan du yang las dang nyon mongs pas gang du 'phangs par mi 'dod bzhin du 'gro dgos pas na rang dbang med pa ste/ rang dbang med pa'i sems can de dag rdzu 'phrul bstan te/ dad pa skyes nas dge ba la bkod pas na rang dbang bkod pa zhes bya ste/ byang chub sems dpa' nyid kyi dbang du byas/ /zhes bya ba'i don to/ /rtag tu gzhan la phan bya gcig tu mngon par dga'/ /zhes bya bas dga' ba'i che ba bstan te/ bdag gi don du mi sems par dus thams cad du yang sems can gzhan la phan pa dang bde bar bya ba 'ba' zhig la mos shing de 'ba' zhig sems pas na gzhan la phan par bya bar rnam par dga' ba zhes bya'o/ /seng ge bzhin du rab brtan srid na spyod/ /ces bya bas srid pa na mi 'jigs pa'i che ba bstan te/ dper na seng ge nags dang nags kyi 'dab na phug dang ri la sogs pa na gnas shing rgyu ba'i tshe/ ri dgas gang gis kyang mi 'jigs par gnas pa de bzhin du byang chub sems dpa' brtan pa thob pa rnams sems can gyi don du khams gsum la gnas pa'i tshe yang bdud dang mu stegs la sogs pa gang gis kyang mi 'jigs shing / 'dod chags dang zhe sdang la sogs pa'i nyon mongs pas gos su dogs pa'i 'jigs pa yang med par yod do zhes bya ba'i don to/ /mthu'i skabs bshad pa rdzogs so// //mthu'i skabs bshad pa'i rjes la/ yongs su smin pa'i skabs bshad par 'brel pa ci yod ce na/ gong du theg pa sgrub pa'i skabs su/ rgya che'i phyir dang zab pa'i phyir/ /yongs su smin dang rnam mi rtog /'di la gnyis ni bstan pa'i phyir/ /de ni bla na med pa'i thabs/ /zhes bshad de/ mthu rgya chen po bshad pa mthong bas ni sems can yongs su smin par 'gyur te/ byang chub sems dpa'i sgo nas mthu mthong ba dang / de la tshogs pa skyes nas thob par bya ba'i phyir 'bad par byed de/ de ni mthu nyid kyi skabs su bshad zin to/ /zab pa bshad pas ni rnam par mi rtog pa'i ye shes skyes pa'i sgo nas bdag nyid sangs rgyas kyi chos yongs su smin par 'gyur te/ de'i phyir yongs su smin pa'i skabs bshad pas ni mthu'i rjes la yongs su smin pa'i skabs bshad par 'brel to/ /yang na byang chub sems dpa' sems can gyi don la skyo ba med pa'i thabs yin par bshad/ 'khor ba na gnod pa dang / sdug bsngal rnam pa sna tshogs kyis skyo ba med par dus ring por byang chub sems dpa' sangs rgyas kyi chos yongs su smin par byed pa dang / sems can yongs su smin par byed pas na/ dge ba'i chos rnams rgya cher 'phel bar 'gyur te/ de bas na dge ba'i chos rgya cher 'phel bar byed pa'i thabs yongs su smin par byed pa'i skabs bshad de/ de'i phyir mthu'i 'og tu yongs su smin par byed pa'i skabs bshad par 'brel to/ /yang na gang la bslab par bya ba'i rnam pa bdun bshad pa las mthu'i rjes la bdag yongs su smin pa dang / sems can yongs su smin par bya ba smos pas na de bshad pa'i skabs su bab pa'i phyir/ mthu'i rjes la yongs su smin pa'i skabs bshad par 'brel to/ /byang chub sems dpa' yongs su smin par bsdu ba'i tshigs su bcad pa zhes bya ba la/ yongs su smin pa rnam pa gnyis la bdag yongs su smin pa 'chad de yongs su smin zhes bya ba ni/ dper na nam shing tog bza' bar rung ba'i dus na yongs su smin pa zhes bya ba dang / kha zas bza' bar rung ba'i dus na yongs su smin pa zhes bya ba/ de bzhin du byang chub sems dpa' yang nam dga' ba dang dad pa la sogs pa yon tan du shes pa chen po dang ldan na byang chub sems dpa'i yongs su smin par 'gyur ba zhes bya'o/ /de la yang dang po'i tshigs bcad gcig gis ni yongs su smin pa'i don mdor bstan pa'o/ /grogs mchog ces bya ba la sogs pa tshigs bcad lhag mas ni gong ma'i don gnyis zhib tu 'chad pas na tshigs bcad dang po ni bsdus pa'i tshigs su bcad pa zhes bya'o/ /dga' zhing zhes bya ba la/ theg pa chen po'i chos zab cing rgya chen po 'byung ba bdag dang gzhan gyi don du bstan pa de 'ba' zhig la dga' zhing de la 'dod pa yod kyi nyan thos dang / rang sangs rgyas kyi chos la 'dod pa med na byang chub sems dpa' de yongs su smin pa yin par rig par bya'o zhes bya ba'i don to/ /dad pa/ zhes bya ba la theg pa chen po'i gang zag dge ba'i bshes gnyen rnams la 'di ni bla na med pa'i byang chub kyi lam ston par byed pa yin pas na dge ba'i bshes gnyen yin no snyam du sems pa ni dad pa zhes bya ste/ de lta bu'i sems yod na yongs su smin pa'i mtshan nyid do/ /rab zhi zhes bya ba la nam rang bzhin gyis 'dod chags dang zhe sdang dang gti mug shas chung bar gyur la nyon mongs pa dang nye ba'i nyon mongs pa spong nus pa'i mthu dang ldan pa ni rab tu zhi ba zhes bya ste/ de lta bu'i mthu yod na yongs su smin pa'i mtshan nyid du gyur par rig par bya'o/ /snying brtse ba zhes bya ba la/ sems can sdug bsngal ba mthong nas sems can de dag gi sdug bsngal ji ltar bsal bar bya snyam du sems pa ni snying brtse ba zhes bya ste/ snying rje de lta bu yod na yongs su smin pa'i mtshan nyid du rig par bya'o/ /bzod pa dang ni zhes bya ba la/ bdag nyid sangs rgyas kyi chos yongs su smin par bya ba dang / sems can yongs su smin par bya ba'i tshe/ mgo dang rkang lag la sogs pa gtong ba dang / grang ba dang tsha ba la sogs pa'i sdug bsngal byung yang nyams su len nus na ni bzod pa zhes bya ste/ bzod pa de lta bu yod na ni byang chub sems dpa' yongs su smin par 'gyur bar rig par bya'o/ /yid rno ba zhes bya ba la/ chos rnams bshad pa'i dus na yang / dang po nyan pa'i dus na yang don dang tshig 'dzin nus la/ de'i 'og tu tshig rnams ni mi brjed par tshig 'dzin nus/ don rnams ni ma nor bar rtogs nus pa ni yid rno ba zhes bya ste/ de lta bu dang ldan na byang chub sems dpa' rnams yongs su smin par 'gyur bar rig par bya'o/ /mthu yod pa dang zhes bya ba la/ bsod nams dang ye shes kyi tshogs shas cher bsags pas nyon mongs pa rnams kyis zil gyis mi non cing stong pa nyid kyi don rtogs pa ni mthu yod pa zhes bya ste/ de 'dra ba dang ldan pa yang yongs su smin par 'gyur ba'i mtshan nyid do/ /mi 'phrogs pa dang zhes bya ba la/ byang chub sems dpa' de byang chub sems dpa'i spyod pa la gnas pa'i dus na bdud la sogs pa sangs rgyas kyi gzugs su sprul te/ byang chub sems dpa' spyod pa 'dor du bcug kyang spyod pa mi gtong ba dang / mu stegs pas rnam pa sna tshogs bshad de gzhan du bsgyur bar brtsams kyang lta ba mi 'gyur ba ni mi 'phrogs pa zhes bya ste/ de lta bur gyur na yongs su smin pa'i mtshan nyid yin no/ /yan lag dang ldan pa zhes bya ba la/ nam yongs su smin par gyur pa de ni spong ba'i yan lag lnga dang ldan te/ spong ba'i yan lag lnga ni dad pa dang / g.yo med pa dang / sgyu med pa dang / nad med pa dang / gnas mthu dang ldan pa ste/ de lnga'i don zhib tu ni 'og nas 'chad do/ /rab ces bya ba ni gang du bshad pa'i chos dgu po kun kyang shas chen po dang ldan pa zhes bya ba'i don to/ /de ni rgyal sras yongs su smin pa'i mtshan/ /zhes bya ba ni gong du bshad pa'i chos dgu po de dag ni byang chub sems dpa' rnams kyi yongs su smin pa'i mtshan nyid de/ de dgu dang ldan na byang chub sems dpa' de yongs su smin pa'i mtshan nyid dang ldan pa yin no zhes bya ba'i don to/ /dga' ba yongs su smin pa las brtsams te tshigs su bcad pa zhes bya ba la/ gong du chos rnam pa dgu zhig glengs pa las dga' ba'i sems ji tsam zhig thob na/ dga' ba smin par gyur pa bstan pa'i phyir tshigs su bcad pa rtsom mo zhes bya ba'i don to/ /de yang don rnam pa gsum gyis bstan te/ dga' ba yongs su smin par byed pa'i rgyu dang / dga' ba yongs su smin pa'i rang bzhin dang / dga' ba yongs su smin pa'i las dang gsum mo/ /grogs mchog la sogs gsum dang zhes bya ba la/ grogs ni dge ba'i bshes gnyen la bya ste/ dge ba'i bshes gnyen la brten pa dang / dam pa'i chos nyan pa dang / mnyan nas chos kyi don phyin ci ma log par yid la byed pa ni grogs mchog la sogs pa gsum zhes bya ste/ 'di ni dga' ba yongs su smin pa'i rgyu yin no/ /brtson 'grus che zhes bya ba la/ theg pa chen po'i chos nyan pa dang / sems pa dang / bsgom pa la res 'ga' 'jug la res 'ga' mi 'jug pa ma yin gyi/ rgyun mi 'chad par 'jug pas na brtson 'grus che ba zhes bya'o/ /dam pa'i mthar phyin zhes bya ba la/ bsam gyis mi khyab pa'i gnas bzhi la the tshom dang som nyi med pa ni dam pa'i chos mthar phyin pa zhes bya ste/ bsam gyis mi khyab pa'i gnas bzhi ni/ sems can gyi las rnam pa sna tshogs bsam gyis mi khyab pa dang / sman dang sngags kyi mthu bsam gyis mi khyab pa dang / de bzhin gshegs pa'i ye shes bsam gyis mi khyab pa dang / rnal 'byor pa'i spyod yul bsam gyis mi khyab pa ste/ brtson 'grus che ba dang / dam pa'i mthar phyin pa dang / gnyis kyis dga' ba yongs su smin pa'i rang bzhin bstan to/ /mchog gi chos kyang sdud ces bya ba la/ mchog gi chos ni theg pa chen po'i chos te/ sdud ces bya ba ni theg pa chen po'i chos 'jig rten la ring du gnas shing mi nub par bya ba'i phyir srung bar byed de/ de yang ji ltar srung bar byed ce na/ ji tsam du theg pa chen po'i chos 'chad pa'i gang zag dang / nyan pa'i gang zag yod pa de tsam du theg pa chen po'i chos ma nub pa yin par khong du chud pas theg pa chen po'i chos 'chad pa yin pa dang / nyan pa'i gang zag rnams la 'tshe ba dang gnod pa byed pa rnams kyi skyabs byed cing yo byad rnam pa sna tshogs kyis ston par byed pa'o/ /'dis ni yongs su smin pa'i las bstan to/ /dam chos cher gsung phyir ni snying rje can/ /yang dag yongs su smin pa'i mtshan nyid 'dod/ /ces bya ba ni dga' ba yongs su smin pa bstan pa de yang / snying rje dang ldan pa'i byang chub sems dpa' rnams theg pa chen po'i chos gzung zhing 'jig rten du ring du gnas par bya ba'i phyir dga' ba yongs su smin par bya ba la 'jug ste/ gong du bshad pa de dag ni dga' ba yongs su smin pa'i mtshan nyid yin no zhes bya ba'i don to/ /byang chub sems dpa'i mos pa yongs su smin pa'i mtshan nyid de ni theg pa chen po'i chos gzungs su gzung ba'i dbang du byas par rig par bya'o/ /byang chub sems dpa' dga' ba yongs su smin pa yang theg pa chen po'i chos 'jig rten du yun ring du gnas pa'i don du smin par byed do zhes bya ba'i tha tshig go/ /dad pa yongs su smin pa las brtsams te tshigs su bcad pa zhes bya ba la/ dad pa'i cha ji tsam zhig sems la skyes na dad pa yongs su smin pa zhes bya ba bstan pa'i phyir tshigs su bcad pa rtsom ste/ de yang don du na/ dad pa'i rgyu yang bsags/ dad pa'i rang bzhin yang phun sum tshogs/ dad pa'i las dang yang ldan na/ dad pa yongs su smin to zhes bstan pa'i phyir tshigs su bcad pa rtsom mo zhes bya ba'i don to/ /yon tan/ shes dang zhes bya ba la/ yon tan shes pa ni sangs rgyas bcom ldan 'das rnams kyi yon tan khong du chud pa ste/ de yang ji ltar khong du chud ce na/ ji ltar bcom ldan 'das de ni de bzhin gshegs pa dgra bcom pa yang dag par rdzogs pa'i sangs rgyas zhes bya ba la sogs pa'i yon tan dang ldan par khong du chud pa'o/ /de ltar khong du chud pa las dad pa skye bar 'gyur bas na 'di ni rgyu yin no/ /yid kyang mi phyed na zhes bya ba la/ sa dang por chos kyi dbyings thams cad du 'gro ba'i mtshan nyid du khong du chud nas de phan chad sangs rgyas la sems mi phyed pa dang / chos dang dge 'dun la sems mi phyed pa ste/ 'di ni dad pa yongs su smin pa'i rang bzhin no/ /ting 'dzin myur thob dang zhes bya ba la/ dad pa yongs su smin par gyur na theg pa chen po'i ting nge 'dzin dang nam mkha' mdzod kyi ting nge 'dzin dang dpa' bar 'gro ba'i ting nge 'dzin la sogs pa'i dpag tu med pa rnams myur du thob par gyur to zhes bya ba'i don to/ /'bras bu myong dang zhes bya ba la/ 'bras bu ni rdzu 'phrul gyi mig la sogs pa'i mngon par shes pa drug la bya ste/ dad pa yongs su smin na mngon par shes pa drug kyang 'thob par 'gyur ro zhes bya ba'i don to/ /ting nge 'dzin thob pa dang 'bras bu myong ba gnyis ni las yin par rig par bya'o/ /rgyal sras rnams ni ston la mos pa'i phyir/ /yang dag yongs su smin pa'i sangs rgyas 'dod/ /ces bya ba la/ byang chub sems dpa' rnams sangs rgyas bcom ldan 'das la mos shing dad par bya ba'i phyir/ rgyu dang rang bzhin dang / las gsum dang ldan pa'i dad pa yongs su smin pa'i mtshan nyid yin no zhes bya ba'i don to/ /rab tu zhi ba yongs su smin pa las brtsams te tshigs su bcad pa zhes bya ba la/ zhi ba ni nyon mongs pa spongs te nyon mongs pa ji tsam zhig spangs na rab tu zhi ba smin par 'gyur ba bstan pa'i phyir tshigs su bcad pa rtsom ste de yang rgyu dang / rang bzhin dang / las gsum dang ldan na rab tu zhi ba yongs su smin pa yin no zhes ston to/ /shin tu bsdams shing zhes bya ba la/ shin tu bsdams pa ni dran pa dang shes bzhin gyis zin pas mig gi dbang po nas yid kyi dbang bo'i bar du dbang po rnams yul la mi 'jug par bkag pa ni shin tu bsdams pa zhes bya ste/ dang po sdom pa len pa nas brtsams te/ zas la tshod rig pa dang / srod dang tho rangs la mi nyal ba dang / dbang po bsdams pa la sogs pa'i tshogs kyi lam dang / sbyor ba'i lam dang / mthong ba'i lam dang / bsgom pa'i lam dang / mthar thug pa'i lam ste/ lam 'di dag ni rab tu zhi ba smin pa'i rgyu yin no zhes bya ba'i don to/ /nyon mongs rtog pa spangs zhes bya ba la/ byang chub sems dpa'i nyon mongs pa ni rnam par rtog pa yin te/ de yang 'dod chags la rtog pa dang / zhe sdang la rtog pa dang / yod par rtog pa dang / med par rtog pa dang / rtag par rtog pa dang / mi rtag par rtog pa la sogs pa ste/ rtog pa de dag spangs pa ni rab tu zhi ba yongs su smin pa'i rang bzhin no/ /bar chad med cing zhes bya ba la/ 'dod chags kyi gnyen por mi gtsang ba bsgom pa dang / zhe sdang gi gnyen por byams pa bsgom pa dang / gti mug gi gnyen por rten cing 'brel par 'byung ba bsgom pa la bar chad med do/ /rgyun du sgom par byed pa ni rab tu zhi ba yongs su smin pa'i lam rnam pa gcig go/ /dge ba la mngon par dga' zhes bya ba ni sbyin pa nas shes rab kyi pha rol tu phyin pa'i bar drug la spyod de bsgom pa la rang bzhin gyis dga' ba ste/ 'di ni yongs su smin pa'i lam rnam pa gnyis so/ /rgyal ba'i sras kyi nyon mongs bsal ba'i phyir/ /yang dag yongs su smin pa'i mtshan nyid 'dod/ /ces bya ba la/ byang chub sems dpa' rnams kyi rnam par rtog pa'i nyon mongs pa bsal ba'i phyir yongs su smin pa'i rgyu dang / rang bzhin dang / las gsum ni byang chub sems dpa'i nyon mongs pa rab tu zhi ba'i mtshan ma yongs su smin pa'i mtshan nyid yin par 'dod ces bya ba'i don to/ /snying rje yongs su smin pa'i mtshan nyid kyi dbang du byas te tshigs su bcad pa zhes bya ba la/ sems can sdug bsngal ba mthong na sems can sdug bsngal bsal ba'i phyir 'jug pa ni snying rje ste sems kyi brtse ba ji tsam zhig skyes na snying rje yongs su smin pa yin pa bstan pa'i phyir tshigs su bcad pa rtsom mo zhes bya ba'i don to/ /de yang snying rje'i rgyu dang / rang bzhin dang / las gsum dang ldan na snying rje yongs su smin pa ston to/ /snying rje rang bzhin dang ni zhes bya ba la/ rang bzhin gyi sgra ni rigs la bya ste/ snying rje'i rigs can zhes bya ba'i don to/ /de'ang rnal 'byor spyod pa'i sa las/ rigs dang khams dang sa bon dang / / rang bzhin dag ni don gcig ste/ /ming gi rnam grangs tsam du zad/ /ces bya ba bshad do/ /gzhan sdug mthong ba zhes bya ba la/ sems can gzhan dag skye ba dang / rga ba dang / 'dod pa mi rnyed pa la sogs pa'i sdug bsngal gyis sdug bsngal bar gyur pa mthong nas/ de dag gi sdug bsngal bsal bar bya'o snyam du sems pa ni snying rje yin no zhes bya ba'i don to/ /chung ngu'i sems kyang yang dag rab tu spong / /zhes bya ba la/ chung ngu'i sems ni nyan thos dang / rang sangs rgyas sems can gzhan gyi don btang nas mya ngan las 'das par 'jug pa ste/ sems de spangs nas sems can gyi don du 'khor bar 'gro bar sems pa ni chung ngu'i sems spong ba zhes bya ste/ snying rje'i rang bzhin dang / gzhan sdug bsngal ba mthong nas snying rje ba dang / chung ngu'i sems spong ba dang gsum ni snying rje'i yongs su smin pa'i rgyu yin no/ / khyad par 'gro dang zhes bya ba la/ gong du smos pa'i rgyu gsum gyis rgyu byas nas snying rje yang je cher 'gro ste/ sa dang po'i dus bas sa gnyis pa'i dus na snying rje che ba las/ sa dgu pa'i snying rje bas sa bcu pa'i snying rje che bar gyur pa ni khyad par du 'gro ba zhes bya ste/ 'di ni snying rje yongs su smin pa'i rang bzhin no/ /'gro ba'i mchog 'gyur ba zhes bya ba la/ de lta bu'i snying rje dang ldan pa'i byang chub sems dpa' de sa dang po'i dus na chos kyi dbyings kun du 'gro bar rtogs pa de'i tshe/ sems can kun las 'phags pa'i lus mtshan dang dpe byad kyis brgyan pa thob pa ni 'gro ba'i mchog tu gyur pa zhes bya ste/ 'dis ni las bstan to/ /bzod pa yongs su smin pa'i mtshan nyid las brtsams te tshigs su bcad pa zhes bya ba la/ sangs rgyas kyi chos yongs su smin par bya ba dang / sems can yongs su smin par bya ba'i dus na grang ba dang tsha ba la sogs pa'i sdug bsngal rnams nyams su len pa ni bzod pa zhes bya ste/ sdug bsngal ci tsam zhig nyams su len par nus na bzod pa yongs su smin par gyur pa yin no zhes bya ba'i tshigs su bcad pa rtsom mo zhes bya ba'i don to/ /de yang bzod pa yongs su smin pa'i rgyu dang rang bzhin dang / las gsum dang ldan na yongs su smin pa yin par bstan to/ /rang bzhin brtan pa zhes bya ba la/ brtan pa dang / bzod pa dang / mi brjed pa dang / zhe sdang med pa la sogs pa ni bzod pa'i ming gi rnam grangs so/ /rang bzhin yang 'di'i skabs su rigs la bya ste/ rang bzhin gyis bzod pa'i rigs yod ces bya ba'i don to/ /gang gi phyir bzod pa'i rigs yod pas na/ bzod pa phun sum tshogs pa 'chad pa'i mdo sde ma thos kyang gzhan gyis gnod par byas pa la sogs pa'i sdug bsngal rnams nyams su len cing zhe sdang mi skye'o zhes bya ba'i don to/ /so sor brtags pa bsgom pa zhes bya ba la/ so sor brtags pa ni shes rab la bya ste/ bzod pa phun sum tshogs pa dang ldan pa'i mdo sde dag thos nas chos thams cad sgyu ma dang / rmi lam dang / smig rgyu lta bur khong du chud pa dang / sdug bsngal ba dang / gnod pa byas pa dag la bzod cing nyams su len to/ /so sor brtags pas bsgom pa'i don dag ni de lta bu'o/ /yang na gzhan dag gis bdag la gnod pa byas pa dang / bdag gis grang ba dang tsha ba la sogs pa'i sdug bsngal myong ba 'di dag kyang tshe snga ma la bdag gis gzhan la gnod pa byas pa'i rgyus tshe 'dir bdag sdug bsngal myong bar 'gyur ba yin te/ de yang bdag gis gnod pa byas na ni tshe rabs gzhan du yang sdug bsngal myong bar 'gyur bas gnod pa ci tsam byung yang bzod par bya'o snyam du sems pa ni so sor brtags pa bsgoms pa zhes bya ste/ rang bzhin brtan pa dang / so sor brtags pa gnyis ni bzod pa yongs su smin pa'i rgyu yin no/ /sdug bsngal grang la sogs pa rtag mi mjed/ /ces bya ba la/ sems can yongs su smin par bya ba dang / sangs rgyas kyi chos yongs su smin par bya ba'i phyir grang ba dang / tsha ba dang /sbrang bu dang / sha sbrang dang / bkres pa dang skom pa la sogs pa'i sdug bsngal rnams byung yang nyams su len cing sems mi ldog pa ni mi mjed pa zhes bya ste/ 'di ni bzod pa'i rang bzhin no/ /khyad par 'gro dang zhes bya ba la/ sa bcu gong nas gong du bzod pa spangs shing shas je che je cher gyur pa ni khyad par 'gro ba zhes bya ste/ 'di bzod pa'i las rnam pa gcig go/ /de la dge ba la mngon par dga' ba zhes bya ba la/ bzod pa dang ldan pa rnams ni pha rol tu phyin pa drug spyod pa la dga' ste/ 'di ni bzod pa'i las rnam pa gnyis so/ /bzod pa yongs su smin pa'i mtshan nyid 'dod ces bya ba la/ gong du bshad pa lta bur bzod pa'i rgyu dang / rang bzhin dang / las gsum dang ldan na bzod pa yongs su smin no zhes bya ba'i don to/ /yid rno ba yongs su smin pa las brtsams te tshigs su bcad pa zhes bya ba la/ dran pa dang shes rab gnyis po yid rno ba zhes bya ba'o/ /yang na yid rno ba zhes bya ba ni shes rab kyi rnam grangs kyi ming ste/ yid rno ba zhes kyang bya/ shes rab ces kyang bya ste/ de bas na mdo sde de dag las/ bcom ldan 'das kyis shes rab kyi dbang du byas nas shes rab can yid rno ba mkhas pa'o zhes gsungs so/ /don du na de kho na khong du ma chud pa bskal pa grangs med pa gcig gi bar du nyan pa dang sems pa la sogs pa'i dge ba la zhugs pa'i gang zag mos pas spyod pa rnams kyi shes rab la yid rno ba zhes bya ste/ de yang yid rno ba zhes bya ba'i rgyu dang / rang bzhin dang / las gsum dang ldan na yid rno ba yongs su smin pa yin no zhes bstan pa'i phyir tshigs su bcad pa rtsom mo zhes bya ba'i don to/ /rnam smin dag cing zhes bya ba la tshe rabs snga ma la dam pa'i chos nyan pa dang / sems pa la sogs pa'i dge ba byas pas gar skyes kyang mig la sogs pa'i dbang po thams cad tshang ba dang rang bzhin gyis shes rab rno ba'i mtshan nyid dang ldan pa'i phung po lnga thob pa ni rnam par smin pa dag pa zhes bya ste/ 'dis ni yid rno ba rnam par smin pa'i rgyu bstan to/ /thos pa la sogs mi brjed ces bya ba la/ gong du dran pa dang shes rab gnyis la yid rno ba zhes bya'o zhes bstan te/ dran pa dang ldan pa'i phyir dam pa'i chos thos pa dang bsam pa dang bsgom pa la sogs pa dang / sngon lus kyi sgo nas las ci byas pa dang ngag gi sgo nas tshig ci smras pa rnams dran zhing mi brjed do zhes bya ba'i don to/ /de bzhin legs smras nyes smras rab tu chud/ /ces bya ba la/ shes rab dang ldan pas na bdag dang gzhan gyis legs par smras pa dang / nyes par smras pa ngos zin cing rtogs te/ 'dis tshig 'di smras pa ni ma nor te legs par smras pa yin no zhes rtogs/ 'dis ni tshig 'di smras pa ni nor te nyes par smras pa yin no zhes rtogs te/ mnyan pa la sogs mi brjed pa dang / legs par smras pa dang / nyes par smras pa khong du chud pa ni yid rno ba'i rang bzhin no/ /dran pa yin te zhes bya ba ni mnyan pa la sogs pa mi brjed par ni dran par byed do zhes bya ba'i don to/ /blo chen skye ba rung zhes bya ba la/ ji ltar byas pa mi brjed pa dang / legs nyes kyang ngos zin te bye brag byed pa'i shes rab des 'jig rten las 'das pa'i ye shes bskyed pa bas blo chen skye ba rung zhes bya ba ste/ 'di ni las so/ /de la 'jig rten las 'das pa'i ye shes ni sa dang por chos kyi dbyings thams cad du 'gro ba'i mtshan nyid du rtogs pa'i gnyis su med pa'i ye shes la bya'o/ /stobs dang ldan pa bskyed pa yongs su smin pa las brtsams te tshigs su bcad pa zhes bya ba la stobs zhes bya ba dang / mthu zhes bya ba don gcig ste/ bsod nams dang ye shes kyi tshogs bsags nas sgrib pa gnyis spangs te/ chos kyi dbyings rtogs par nus pa ni stobs zhes bya'o/ /de'i stobs kyi rgyu dang / rang bzhin dang / las gsum dang ldan na stobs yongs su smin pa yin no zhes bya ba'i phyir tshigs su bcad pa rtsom mo zhes bya ba'i don to/ /dge ba gnyis kyis khams gnyis rgyas pa dang / /zhes bya ba la/ dge ba gnyis ni bsod nams kyi tshogs kyi dge ba dang / ye shes kyi tshogs kyi dge ba'o/ /khams kyi sgras ni tshogs de gnyis kyi sa bon la bya ste/ bsod nams kyi tshogs kyis bsod nams kyi sa bon rtas par byed/ ye shes kyi tshogs kyis kyang ye shes kyi sa bon rtas par byed ces bya ba'i don to/ /'dis ni stobs yongs su smin pa'i rgyu bstan to/ /'bras bu skye ba'i rten du rung ba'i mchog/ /ces bya ba'i rten zhes bya ba ni lus la bya ste/ bsod nams dang ye shes kyi tshogs bsags pas gzung 'dzin spangs nas stong pa nyid khong du chud de/ sangs rgyas kyi sa thob pa ni 'bras bu skye ba zhes bya ste/ de lta bu nus pa'i lus thob par gyur na/ 'bras bu skye ba'i rten du rung ba'i mchog/ /ces bya ste/ 'dis ni stobs kyi rang bzhin bstan to/ /mchog gi sgras ni lus de nyan thos dang rang sangs rgyas la sogs pa las 'phags par bstan to/ /bsam pa grub cing zhes bya ba la bsod nams dang ye shes kyi tshogs dang ldan pa de dag nyid ci bsams pa rnams kyang de bzhin du 'grub la/ sems can gyi bsam pa yang yongs su khengs par byed ces bya ba'i don to/ /'di ni stobs kyi las rnam pa gcig go/ /'gro ba'i mchog tu gyur zhes bya ba la bsod nams dang ye shes kyi tshogs dang ldan pa de ye shes kyi tshogs dang ldan pa ni sems can kun las shes pas 'phags bsod nams kyi tshogs dang ldan pa ni sems can kun las lus mdzes pa dang longs spyod kyis 'phags zhes bya ba'i don to/ /'di ni stobs yongs su smin pa'i las gnyis pa'o/ /stobs rnyed pa yongs su smin pa'i mtshan nyid do zhes bya ba ni stobs kyi rgyu dang / rang bzhin dang / las gsum dang ldan na stobs yongs su smin pa rnyed do zhes bya ba'i don to/ /mi 'phrogs pa yongs su smin pa las brtsams te tshigs su bcad pa zhes bya ba la/ byang chub sems dpa' ni bsod nams kyi mthu dang / ye shes kyi tshogs kyi mthu dang ldan pas bdud la sogs pas ni spyod pa bsgyur bar mi nus pa la/ mu stegs pa la sogs pas kyang lta ba bsgyur bar mi nus pa bstan pa'i phyir tshigs su bcad pa rtsom mo zhes bya ba'i don to/ /de yang mi 'phrogs pa'i rgyu dang / rang bzhin dang / las gsum dang ldan na mi 'phrogs pa yongs su smin pa yin par bstan to/ /chos bzang rigs pa rnam par dpyod pa'i sems/ /zhes bya ba la/ chos bzang po ni theg pa chen po'i chos te/ theg pa chen po'i chos la rigs pa rnam pa bzhis dpyad cing bsam pa las/ chos kyi don gtan la phab cing the tshom med pa'i sems rnyed pa ni rigs pas rnam par dpyod pa'i sems zhes bya ste/ 'di ni mi 'phrogs pa'i rgyu'o/ /de la rigs pa bzhi ni ltos pa'i rigs pa dang / bya ba byed pa'i rigs pa dang / gtan tshigs bsgrub pa'i rigs pa dang / chos nyid kyi rigs pa'o/ /de la rgyu las brten nas 'bras bu skye ba'i rim pa la ltos pa'i rigs pa zhes bya ste/ dper na gzugs dang mig gi dbang po la brten nas/ mig gi rnam par shes pa skye ba ni ltos pa'i rigs pa zhes bya'o/ /rgyu rkyen gyi mthu las mig gi rnam par shes pa skyes nas gzugs la lta ba la sogs pa rang gi las byed pa ni bya ba byed pa'i rigs pa zhes bya'o/ /gtan tshigs sgrub pa'i rigs pa ni gsum ste/ 'bras bu'i rgyu dang / rang bzhin gyi rgyu dang / mi dmigs pa'i rgyu'o/ /de la 'bras bu'i rgyu ni gang na du ba yod pa de na me yod do zhes bya ba lta bu'o/ /rang bzhin gyi rgyu ni shing zhes bya bas shing sha pa dang thang shing la sogs pa kun la khyab pas na 'di ni shing yin te/ ci'i phyir zhe na/ shing sha pa yin pa'i phyir ro zhes bya ba lta bu'o/ /mi dmigs pa'i rgyu ni sa phyogs 'di na dmigs su rung ba'i mtshan nyid kyi bum pa mi snang ba ni bum pa med do zhes bya ba lta bu'o/ /chos nyid kyi rigs pa ni de bzhin gshegs pa rnams byung yang rung / ma byung yang rung / ma rig pa'i rkyen gyis 'du byed la sogs pa'i chos nyid 'di ni ye nas gnas pa'o zhes bya ba lta bu'o/ /rtag tu bdud kyis bar chad byed pa med/ /ces bya ba la/ nam byang chub sems dpa' byang chub sems dpa'i spyod pa'i tshe bdud la sogs pas sangs rgyas kyi gzugs su sprul te/ byang chub sems dpa'i spyod pa 'dor du bcug kyang 'dor du mi btub pa dang / mu stegs pa la sogs pas gtan tshigs rnam pa sna tshogs kyis lta ba sun phyung nas lta ba gzhan sun phyung bar brtsams kyang lta ba 'dor du mi btub pa ni/ /rtag tu bdud kyis bar chad byed pa med/ /ces bya ba ste/ 'di ni mi 'phrogs pa la yongs su smin pa'i rang bzhin no/ /khyad par rnyed dang zhes bya ba la/ rigs pas rnam par dpyod pa'i sems des rim par gnas pa la yang zhing shas je che je cher gyur pa ni khyad par rnyed pa zhes bya'o/ /de yang dper na sa dang po'i rigs pas rnam par dpyod pa'i sems pas/ sa gnyis pa'i rigs pas rnam par dpyod pa'i sems shas che bas na khyad zhugs pa yin te/ 'di ni mi 'phrogs pa rnam par smin pa'i las rnam pa gcig go/ /gzhan gyi phyogs sun 'byin zhes bya ba la/ gzhan gyi phyogs ni mu stegs pa rnams kyi gtsug lag dang ldan pa la bya ste/ rigs pas rnam par dpyod pa'i sems dang ldan pas mu stegs pa la sogs pa'i phyogs ni sun 'byin par nus/ bdag gis sangs rgyas kyi gzhung nyid ni gzugs par nus zhes bya ba'i don to/ /'di ni mi 'phrogs pa'i las yongs su smin pa'i las rnam pa gnyis pa'o/ /mi 'phrogs pa yongs su smin par byed pa'i mtshan nyid do zhes bya ba la/ mi 'phrogs pa'i rgyu dang / rang bzhin dang / las gsum dang ldan na mi 'phrogs pa yongs su smin par 'gyur ba yin no zhes bya ba'i don to/ /spong ba'i yan lag dang ldan pa yongs su smin pa las brtsams te tshigs su bcad pa zhes bya ba la/ spong ba ni sa dang po'i chos kyi dbyings rtogs nas gzung ba dang 'dzin pa gnyis spangs pa las spong ba zhes bya ste/ de'i grogs su gyur pa'i chos rnam pa lnga ni spong ba'i yan lag dang ldan pa zhes bya'o/ /lnga po yang gang zhe na/ dad pa dang / g.yo med pa dang / sgyu med pa dang / lus la nad med pa dang / shes rab bo/ /de yang spong ba'i yan lag gi rgyu dang / rang bzhin dang / las gsum dang ldan na spong ba'i yan lag yongs su smin pa yin no zhes bstan pa'i phyir tshigs su bcad pa rtsom mo zhes bya ba'i don to/ /dge ba stsogs dang zhes bya ba la/ dge ba'i sgras ni bsod nams kyi tshogs dang / ye shes kyi tshogs la bya ste/ de gnyis brtsams zhes bya ba'i don to/ /de ni spong ba'i yan lag gi rgyu'o/ /yan lag lnga las 'di ni dad pa dang sbyar ro/ /gnas kyang brtson par rung zhes bya ba dang / gnas kyi sgras ni lus la bya ste/ nyan pa dang sems pa dang bsgom pa la sogs pa dge ba byed pa na lus la gnod pa dang / mi bde ba med cing brtson 'grus rgyun du rtsom par gnas pa'i lus la ni gnas kyang brtson par rung ba zhes bya ste/ 'di ni spang ba'i yan lag gi rang bzhin no/ /yan lag lnga las 'di ni lus la nad med par sbyar ro/ /dben la dga' dang zhes bya ba la/ 'du 'dzi thams cad spangs nas shing drung brag phug la sogs pa'i gnas dben pa dag na gnas par dga' ba ni dben pa mchog la dga' ba zhes bya ste/ 'di ni spong ba'i yan lag gi las rnam pa gcig ste/ g.yo med pa dang sgyu med pa dang sbyar ro/ /dge ba la mngon par dga'o zhes bya ba la/ dge ba'i sgra theg pa chen po'i chos la bya ste/ chos de dag nyan pa dang / sems pa dang / bsgom pa la dga' ba ni dge ba la mngon par dga'o zhes bya'o/ /'di ni spong ba'i yan lag gi las rnam pa gnyis pa ste/ 'di ni shes rab dang sbyar ro/ /rgyal ba'i sras kyi yan lag ldan pa yis/ /yang dag yongs su smin pa'i mtshan nyid 'dod/ /ces bya ba la/ byang chub sems dpa' rnams kyi spong ba'i yan lag rnam pa lnga rnam pa rgyu dang / rang bzhin dang / las dang ldan na spong ba'i yan lag yongs su smin pa'i mtshan nyid du 'dod do/ /bdag yongs su smin pa'i rnam pa dgu'i che ba las brtsams te tshigs su bcad pa zhes bya ba la/ byang chub sems dpa' rnams dad pa nas spong ba'i yan lag gi bar du chos dgu dang ldan na bdag nyid sangs rgyas kyi chos yongs su smin pa zhes bya ste/ dgu pos bdag sangs rgyas kyi chos yongs su smin par 'gyur ba'i chos dgu po de nyid yon tan dang / bdag nyid chen po bstan pa'i phyir tshigs su bcad pa rtsom mo zhes bya ba'i don to/ /che ba yang rnam pa gnyis so/ /gang zhe na/ gzhan yongs su smin pa'i bya ba'i rten du gyur pa dang / chos kyi lus 'phel bar 'gyur ba'o/ /de ltar dngos po rnam pa dgu smin pa'i gzhi zhes bya ba la/ de ltar zhes bya ba ni gong du bshad pa lta bu'o/ /dngos po rnam pa dgu ni dad pa nas spong ba'i yan lag gi bar du dgu ste/ gang du bshad pa ltar na byang chub sems dpa' de chos rnam pa dgu'i gzhi'am rten tam gnas de lta bur gyur zhes bya ba'i don to/ /pha rol yongs su smin byed rung dang ldan/ /zhes bya bas gzhan yongs su smin par bya ba'i rten du gyur par bstan te/ byang chub sems dpa' de chos rnam pa dgu'i rten du gyur pas sems can yongs su smin par byed par nus shing sems can yongs su smin pa'i mthu yod la sems can yongs su smin par byed pa'i gnas su yang gyur zhes bya ba'i don to/ /dge ba rtag tu rab tu 'phel ba'i dngos po zhes bya bas rtag tu chos kyi lus 'phel ba bstan te/ byang chub sems dpa' chos dgu'i rten du gyur pas na sems can yongs su smin par byed par nus par yang ma zad kyi/ dus thams cad du pha rol tu phyin pa drug gi chos rnams 'phel bar 'gyur te bdag gi rgyud la dge ba bskyed pa'i gzhi dang rten du yang gyur ces bya ba'i don to/ /rtag tu 'gro ba rnams kyi gnyen mchog 'gyur/ /zhes bya ba la/ de ltar byang chub sems dpa' de chos rnam pa dgu dang yang ldan/ sems can yongs su smin par byed pa'i mthu yang yod/ rtag tu dge ba'i chos kyang 'phel bas na/ sems can rnams tshe 'dir zang zing gis phan btags nas dge ba la bkod de phan par byed pa dang / tshe rabs gzhan du bde 'gro dang mya ngan las 'das pa la bkod de bde bar byas pas na 'gro ba rnams kyi gnyen mchog gyur pa zhes bya ste/ pha ma dang nye du gnyen bshes pas sems can la phan pa lhag par mdzad pas na gnyen mchog tu gyur pa'o/ /ci'i phyir zhe na/ pha mas ni 'dir zang zing gis phran tshegs tsam gyi phan 'dogs par nus kyi/ tshe rabs gzhan du mtho ris dang mya ngan las 'das par 'jog par mi nus pa'i phyir ro/ /sems can yongs su smin pa'i rnam par dbye ba las brtsams te tshigs su bcad pa bcu gcig go zhes bya ba la gong du gang la bslab par bya ba la rnam pa bdun du gzhag pa las 'di yan chad bdag yongs su smin pas brtsams pa'i bar du rnam pa lnga bshad nas/ da sems can yongs su smin par byed pa las brtsams te/ ji ltar byang chub sems dpa' sems can yongs su smin par byed pa tshigs su bcad pa bcu gcig gis ston to zhes bya ba'i don to/ /de la bdag yongs su smin par byed pa'i rjes la sems can yongs su smin par byed par bstan pa la 'brel bar lta ba ci yod ce na/ ji ltar bdag ma smin bdag ma grol bdag thar par ma gyur pa'i sems can grol ba dang thar par bya bar mi rung ste/ de bas na bdag yongs su smin par byed pa'i rjes la sems can yongs su smin par byed pa bshad par 'brel to/ / tshigs su bcad pa bcu gcig gis bsdus pa'i don ni rnam pa bzhi ste/ yongs su smin pa'i rang bzhin dang / rab tu dbye ba dang / bsam pa dang / sbyor ba'o/ /ji ltar rma rnams dang ni kha zas dag /gzag cing spyad du rung bar smin 'dod ltar/ /zhes bya ba la sogs pa tshigs su bcad pa gcig gis ni yongs su smin pa'i rang bzhin ston te/ 'di ni 'bras dang phol mig la sogs pa'i rma rnams nam dbug pa'i dus la bab cing rnag 'dzag pa de'i dus na yongs su smin pa yin pa dang / nam kha zas la sogs pa spyad du rung ste/ bzar rung bar gyur pa na yongs su smin pa zhes bya ste/ 'di ni dpe'o/ /don bstan pa'i phyir de bzhin gnas la phyogs gnyis zhi ba dang / de bzhin spyad cing smin par brjod cing bya ba smos te/ gnas kyi sgra ni phung po lnga la bya'o/ /phyogs gnyis ni 'dod chags la sogs pa nyon mongs pa'i phyogs dang / dad pa la sogs pa gnyen po'i phyogs so/ /dper na rma nang na rnag 'dzag pa'i dus na smin pa zhes bya ba bzhin du nam bdag gi phung po la 'dod chags la sogs pa'i nyon mongs pa yod pa zhi bar bya nus shing spong nus pa'i lus thob pa dang / dper na kha zas bzar rung bar gyur na smin pa zhes bya ba de bzhin du nam bdag gi lus la yod pa'i dge ba'i phyogs rnams rgyun du spyad cing sgom par nus pa'i lus thob na gang zag de yongs su smin par byas pa zhes bya'o/ /tshigs su bcad pa gnyis pa zhes bya bas yongs su smin pa'i rab tu dbye ba ston te/ de rnam pa brgyad kyis ni byang chub sems dpa' sems can yongs su smin par byed do zhes bya ba'i don to/ /bral bar smin byed ces bya ba la/ sems can rnams 'dod chags dang bral bar byas zhe sdang dang bral bar byas nas nyon mongs pa kun dang bral bar byas pa ni bral bar smin byed ces bya'o/ /yongs su smin byed ces gsungs zhes bya ba la/ theg pa gsum gyi thabs kyis theg pa gsum gyi rigs can gyi gang zag kun smin par byas pa ni yongs su smin byed ces bya'o/ /de bzhin rab tu smin byed ces bya bas mu stegs la sogs pa'i grogs dag gis kyang chos bstan pa'i sgo nas gzugs dang gzugs med pa'i khams dag tu smin par byed pa yod mod kyi slar ldog par 'gyur bas na rab tu smin par byed ces mi bya'o/ /byang chub sems dpa' rnams kyi theg pa gsum gyi mya ngan las 'das pa'i 'bras bu la bkod de smin par byas pa rnams la slar ldog pa med pas na rab tu smin byed ces bya'o/ /rjes smin gzhan zhes bya ba la/ gdul ba dang mthun par chos bstan pa'i sgo nas smin par byas pa ni rjes smin zhes bya ste/ 'dod chags can la mi gtsang ba bsgom pa 'chad pa dang / zhe sdang can la byams pa bsgom pa dang / gti mug can la rten cing 'brel te 'byung ba 'chad pa'o/ /legs par smin byed ces bya ba la/ mtho dman dang byams sdang med par snyoms par sems can kun smin par byed cing sems can smin par byed pa'i dus na yang bsgrims te nan tan gyis bsti stang dang gus pa dang bcas par smin par byed pa ni legs par smin byed ces bya'o/ /lhag par smin byed ces bya ba la/ bdag nyid kyis sa dang po thob nas chos kyi dbyings rtogs par byas te/ gzhan dag kyang sa dang po thob par byas nas chos kyi dbyings rtogs par byas pa ni lhag par smin byed ces bya'o/ /rtag smin byed dang ces bya ba la/ gang 'das pa dang da ltar gyi sangs rgyas bcom ldan 'das rnams kyis ming gi tshogs dang / tshig gi tshogs dang / yi ge'i tshogs kyi sgo nas chos phyin ci ma log par bshad pa la/ sems can gyi don du ming gi tshogs dang / tshig gi tshogs dang / yi ge'i tshogs rnams kyi sgo nas chos de dag gi don rtag tu phyin ci ma log par 'chad pa ni rtag tu smin byed ces bya'o/ /yang na mi rtag pa dang / sdug bsngal ba dang / stong pa dang / bdag med pa'i rang bzhin du rtag par yang de ltar phyin ci ma log par 'chad kyi rtag pa la sogs pa'i mtshan nyid du nams kyang mi 'chad pas na rtag smin byed ces bya'o/ /lus can steng smin byed ces bya ba ni lus can ni sems can la bya ste/ sems can rnams mos pas spyod pa'i sa drod la gnas na sa gong ma spyi bo thob par byas pas na sa dgu pa la gnas na sa bcu thob par byas pa ni steng smin byed ces bya ste/ don du nyan thos rgyun du zhugs pa dag smin par byas na ni dgra bcom pa'i 'bras bu thob par 'gyur/ sa dang po'i byang chub sems dpa' smin par byas na ni 'tshang rgya ba thob par 'gyur ba lta bu dag la steng smin byed ces bya'o/ / tshigs su bcad pa gsum pa dang bzhi zhes bya ba la/ da ni tshigs su bcad pa gsum pa dang bzhi pas byang chub sems dpa' rnams dgongs pa gang dang bsam pa gang gis sems can yongs su smin par byed pa'i dgongs pa'i khyad par ston te/ de yang pha ma gnyen bshes kyi bsam pa las bye brag tu 'phags pa dang / 'jig rten bdag la byams pa'i bsam pas bye brag tu 'phags pa des ston te/ ji ltar rgyal sras phan par bsam pa yis/ /'gro ba thams cad rnam par smin byed gnas/ /zhes bya ba la/ ji ltar b yang chub sems dpa' rnams sems can tshe 'di la phan pa la gzhag par bya'o snyam du dgongs pa dang tshe rabs gzhan du bde ba la dgod par bya'o snyam du dgongs pa'i sgo nas sems can la phan par bya ba'i dgongs pas sems can rnams tshe 'di la yo byad rnam pa sna tshogs kyis phongs pa med par byas nas/ mi dge ba las bzlog cing dge ba la bkod de smin par byed pa dang / tshe rabs gzhan du lha dang mi'i mtho ris dang mya ngan las 'das pa la bkod de smin par byas pa ltar 'jig rten pa pha ma la sogs pa bu tsha la de lta bu'i bsam pa mi 'byung ngo zhes bya bar sbyar ro/ /de bzhin pha dang ma dang bshes rnams dang / /bu dang gnyen pa rnams la mi gnas so/ /zhes bya ba la/ ji ltar byang chub sems dpa' sems can la phan pa dang / bde bar bya'o snyam du dgongs pa lta bu pha ma bu la phan pa'i bsam pa de lta bu mi 'byung ba dang / gnyen bshes dag gnyen rnams la phan pa'i bsam pa de lta bu mi 'byung ngo zhes bya ba'i don to/ /ci'i phyir zhe na/ pha ma dang gnyen bshes dag ji ltar bu tsha dang gnyen pa rnams la phan pa dang / bde bar bya'o snyam du bsams kyang tshe 'dir zang zing tsam zhig la gzhag par nus su zad kyi dge ba la 'jog par mi nus pa dang / tshe rabs gzhan du mtho ris dang mya ngan las 'das pa la 'jog par mi nus pa'i phyir te/ 'dis ni pha ma dang gnyen bshes kyi bsam pa las bye brag tu 'phags par bstan to/ /ji ltar snying brtse bde dang phan 'god phyir/ /sems can gzhan la byams par 'dod pa ltar/ /zhes bya ba la/ ji ltar byang chub sems dpa' snying rje dang ldan pa rnams sems can la tshe 'dir zang zing sna tshogs kyis phan btags nas dge ba la 'god pas bde ba la bkod pa dang tshe rabs gzhan du mtho ris dang mya ngan las 'das pa thob par byas pas phan pa la bkod de sems can la byams par dgongs pa'i dgongs pa mnga' ba ltar/ 'jig rten pa rnams rang la phan pa'i bsam pa de tsam mi 'byung ngo zhes bya bar sbyar ro/ /de bzhin 'jig rten pa bdag byams min na/ /shin tu mdza' ba'i 'gro ba gzhan ci smos/ /zhes bya ba la ji ltar byang chub sems dpa' rnams sems can la phan pa dang bde ba'i dgongs pa mnga' ba ltar sems can rnams bdag la phan par bya na ji ltar byas na phan par 'gyur zhes rnam pa du mar bsams kyang phan pa'i bsam pa de lta bu mi 'byung ste/ ci'i phyir zhe na/ bdag la phan par bya bar bsams su zin kyang phan pa ma yin pa dang bde ba ma yin pa la 'god par byed pa'i phyir ro/ /ji ltar zhe na/ bdag la bde bar bya'o zhes ma byin par len pa la sogs pa dang / byas pa dang de'i rkyen gyis tshe 'dir bcing ba dang bsad pa la sogs pa myong bar 'gyur bas phan pa ma yin pa la bkod do/ /de'i rkyen gyis tshe rabs gzhan du sems can dmyal ba la sogs pa ngan song gsum du skye ba yin pas bde ba ma yin pa la bkod do/ /yang mu stegs pa la sogs pa bdag tshe 'di dang phyi mar bde bar bya'o zhes tshe 'dir thal ba'i nang na nyal ba dang / khyi dang ba lang gi dka' thub dang brag kha nas mchong ba la sogs pa byas pas tshe 'dir phan pa ma yin pa la bkod do/ /de'i rgyus tshe rabs gzhan du ngan song gsum du skye bar 'gyur bas na bde ba ma yin pa la bkod do/ /'dis ni 'jig rten pa bdag la byams pa'i bsam pa bas lhag par ston to/ /'jig rten pa dag la bdag phan par bya'o snyam du bsams na yang byang chub sems dpa' sems can gzhan phan pa dang bde bar bya bar dgongs pa'i bsam pa lta bu mi 'byung na/ 'jig rten na grogs dag gis grogs la phan par bya'o snyam du sems pa'i bsam pa la byang chub sems dpa'i dgongs pa lta ga la zhig 'byung ste mi 'byung ngo zhes bya ba'i don to/ /tshigs su bcad pa lhag ma rnams kyis ni/ sbyor ba gang gis sems can rnams yongs su smin par byed pas pha rol tu phyin pa rnams sgrub pa ston to zhes bya ba la/ tshigs su bcad pa bcu gcig gis sems can yongs su smin par byed pa bstan pa las 'di yan chad tshigs su bcad pa bzhi ni bstan zin to/ /da ni phyi nas tshigs su bcad pa bdun zhig 'dus te/ bdun las kyang tshigs su bcad pa drug gis ni sbyor ba dang phrin las gang gis yongs su smin par byed pa bstan/ tha ma'i tshigs su bcad pa bdun pas ni sems can yongs su smin par byed pa'i bdag nyid chen po bstan to/ /de la sbyor ba gang gis sems can yongs su smin par mdzad ce na/ sbyin pa nas shes rab kyi pha rol tu phyin pa drug bsgrub pa'i sbyor bas sems can yongs su smin par byed do zhes bya ba'i don to/ /sbyin pa ci 'dra bas sems can ji ltar smin par byed pa de las brtsams nas tshigs su bcad pa zhes bya ba la/ pha rol tu phyin pa drug las kyang sbyin pa'i pha rol tu phyin pas sems can smin par byed pa bshad de/ de yang sbyin pa ji lta bu btang nas sems can rnams ji ltar smin par byed pa bstan pa'i phyir/ tshigs su bcad pa rtsom mo zhes bya ba'i don to/ /de la sbyin pa ci 'dra bas sems can yongs su smin par byed ce na/ sbyin pa rnam pa gsum gyis sems can yongs su smin par byed de/ sbyin pa gsum ni bdag gi lus dang longs spyod thams cad sbyin pa dang / mi mtshungs pa med pa'i sbyin pa dang / mi ngoms pa'i sbyin pa'o/ / byang chub sems dpa'i lus dang longs spyod dag /gzhan la mi sbyin pa ni gang yang med/ /ces bya bas bdag gi lus dang longs spyod thams cad sbyin pa btang ste/ byang chub sems dpa' rnams sems can gyi don du bdag gi dngos po la yang mi sbyin zhing phongs te phyi na gzhag pa gang yang med de/ slong ba rnams la mgo dang / mig dang / rkang lag dang / khrag dang / sha dang / rkang dang / tshil la sogs pa mi gtong ba gang yang med do/ /longs spyod la yang mi gtong zhing gces te phyi na gzhag pa gang yang med de/ gser dang / dngul dang / 'bru dang / bang ba dang / bu dang / chung ma dang / bran dang / phyugs la sogs pa kun gtong bar byed pa'i phyir ro/ /mtshungs par sbyin pa zhes bya bas mi mtshungs pa med pa'i sbyin pa bstan te/ byang chub sems dpa' rnams ni mthon po la sbyin gyi dma' ba la mi sbyin pa dang / mdza' ba la sbyin gyi mi mdza' ba la mi sbyin pa'am/ mkhas pa la sbyin gyi mi mkhas pa la mi sbyin zhes bya ba med de/ 'dra ba kho nar sems can kun la gtong zhing sbyin par byed pa'i phyir ro/ /yon tan ngoms mi 'gyur zhes bya bas mi ngoms pa'i sbyin pa bstan te/ byang chub sems dpa'i sbyin pa ni/ lo'am bskal pa 'di snyed cig tu byas pas mchog /ces bya ba med kyi/ skad cig ma re re yang breng ma chad par 'khor ba'i mtha'i bar du byin yang chog pa med pas na yon tan ngoms par mi 'gyur ba zhes bya'o/ /sbyin pa de gsum gyis ji ltar sems can yongs su smin par byed ce na/ de'i phyir/ phan 'dogs rnam pa gnyis kyis gzhan smin byed/ /ces smos te/ ji ltar yongs su smin par byed ce na/ tshe 'dir phan btags te/ phan pa la bkod pa dang / tshe rabs gzhan du phan btags te bde ba la bkod pas sems can yongs su smin par byed do zhes bya ba'i don to/ /de la tshe 'dir phan btags pa ni zang zing rnam pa sna tshogs byin nas yo byad kyis phongs pa'i gnod pa med par bya ste/ longs spyod dang ldan par byas pa'o/ /tshe rabs gzhan du phan btags pa ni tshe 'dir dge ba byed du bcug pas tshe rabs gzhan du lha dang mi'i bde 'gro dang / mya ngan las 'das pa thob par byas pa'i phyir ro/ /de lta bu'i tshul khrims kyis sems can yongs su smin par byed pa de las brtsams te tshigs su bcad pa zhes bya ba la/ tshul khrims kyis sems can yongs su smin pa ston te/ de yang tshul khrims ci 'dra bas sems can ji ltar smin par byed pa bstan pa'i phyir tshigs su bcad pa rtsom mo zhes bya ba'i don to/ /de la ji lta bu'i tshul khrims kyis sems can yongs su smin par byed na/ tshul khrims rnam pa lngas sems can yongs su smin par byed de/ tshul khrims rnam pa lnga ni/ rtag pa'i tshul khrims dang / rang bzhin gyi tshul khrims dang / yongs su rdzogs pa'i tshul khrims dang / lhag par rtogs pa'i tshul khrims dang / 'khrul pa med pa'i tshul khrims so/ /rtag tu zhes bya bas lhag pa'i tshul khrims bstan te/ 'phags pa nyan thos dag ni sdom pa mnos nas ji srid 'tsho'i bar du yod kyi/ byang chub sems dpa' rnams ni sdom pa mnos pa nas brtsams te/ byang chub kyi snying po la 'dug gi bar du tshul khrims yod pas na rtag pa'i tshul khrims zhes bya'o/ /yang na dang po sdom pa mnos nas bar 'ga' bsrung / bar 'ga' mi bsrung ma yin gyi/ /nam 'tsho'i bar du bsrung bas na rtag pa'i tshul khrims zhes bya'o/ /rang bzhin zhes bya bas rang bzhin gyi tshul khrims bstan te/ tshul khrims bsrung ba la sngon shin tu goms par byas pas phyis 'bad pa dang rtsol ba chen po med par tshul khrims la rang gi ngang gis gnas pas na rang bzhin gyi tshul khrims zhes bya'o/ /yang na sdom pa mnos te tshe 'dir ma ral na tshe rabs gar skye gar skyes kyang dge ba'i bshes gnyen las tshul khrims kyi rang bzhin dang / yon tan ma thos par yang ngang gis kha na ma tho ba'i chos rnams mi byed par 'dzem pa yod pa dang / dge ba'i chos byed pa la dga' ba yod pa ni rang bzhin gyi tshul khrims zhes bya'o/ /lhag par 'tshe ba med ces bya bas yongs su rdzogs pa'i tshul khrims bstan te/ 'tshe ba med pa ni mi dge ba bcu mi spyod pa ste/ mi dge ba bcu rmi lam na yang spyod par mi 'byung ba ni lhag par 'tshe ba med pa zhes bya'o/ /de ltar gyur na tshul khrims yongs su rdzogs pa zhes bya ste/ de yang sa bcu'i sa gnyis su phyin pa'i dus na byang chub sems dpa'i dge ba bcu yongs su rdzogs par lhag par 'tshe bar byed pa'i chos mi dge ba bcu rmi lam na yang spyod pa mi 'byung bas yongs su rdzogs pa'i tshul khrims zhes bya'o/ /bdag dga' zhes bya bas lhag par rtogs pa'i tshul khrims bstan te/ byang chub sems dpa' sa dang por chos kyi dbyings kun du 'gro ba'i mtshan nyid du rtogs nas bden pa mthong ba dang 'phags pa dgyes pa'i tshul khrims thob ste/ ngang gis mi dge ba bcu spangs pa dang / dge ba bcu la gnas par dga' ba ni bdag dga' ba zhes bya'o/ /bag yod ces bya bas rtag tu 'khrul pa med pa'i tshul khrims bstan te/ ngag gi sgo nas smra bar bya ba ma yin pa dag smra ba dang / lus kyi sgo nas 'gro bar bya ba ma yin pa dag gi gnas su 'gro ba dang / yid kyi sgo nas bsam par bya ba ma yin pa'i chos dag sems pa ni bag med pa zhes bya ste/ de las ni ltung ba dang nyes byas dag gis 'khrul pa 'byung bar 'gyur ro/ /ngag gi sgo nas smra bar bya ba ma yin pa mi smra ba dang / lus kyi sgo nas 'gro bar bya ba ma yin pa'i gnas dag tu mi 'gro ba dang / yid kyi sgo nas bsam par bya ba ma yin pa'i chos dag mi sems pa ni bag yod pa zhes bya ste/ byang chub sems dpa' bag yod pa de la rtag tu gnas nas spyod lam thams cad du yang ltung ba dang nyes byas dag gis 'khrul pa mi 'byung bas 'khrul pa med pa'i tshul khrims zhes bya'o/ /yang na rgyu rnam pa gsum las 'khrul pa 'byung ste/ gsum gang zhe na/ le lo dang / bag med pa dang / brjed ngas pa'o/ /byang chub sems dpa' ni spyod lam thams cad du yang nan tan du bcas par gnas pas le lo dang / bag med pa dang / brjed ngas pa med pa'i phyir ltung ba dang nyes byas la sogs pa mi 'byung ba'i phyir 'khrul pa med pa'i tshul khrims zhes bya'o/ /ji ltar sems can yongs su smin par byed ce na/ de'i phyir/ gzhan yang 'di la 'god ces smos te/ bdag nyid tshul khrims rnam pa lnga la gnas pa bzhin du sems can gzhan yang tshul khrims rnam pa lnga la bkod de de dang ldan par byas pas yongs su smin par byed do/ /ji ltar yongs su smin par byed pa yang de ltar yang cung zad kyi gzhan yang yod par bstan pa'i phyir/ pha rol gcig nas gcig tu phan gnyis 'dogs/ /zhes bya ba smos te/ phan gnyis 'dogs pa ni tshe 'dir phan 'dogs pa dang / tshe rabs gzhan du phan 'dogs pa'o/ /de la tshe 'dir phan 'dogs pa ni sems can rnams tshul khrims la bkod pa ni/ dge ba byed cing mi dge ba mi byed pa'i phyir mi dge ba byas pa las gyur pa'i bcing ba dang / bsad pa la sogs pa mi 'byung bas tshe 'dir phan btags so/ /tshe rabs gzhan du phan btags pa yang rnam pa gnyis te/ tshe gcig nas gcig tu rnam par smin pa rgyun ma chad par byas pa dang / tshe gcig nas gcig tu rgyu mthun pa'i 'bras bu rgyun ma chad par byas pa'o/ /de la pha rol gcig nas gcig tu zhes bya ba ni sems can gzhan tshe rabs gcig nas gcig tu brgyud mar zhes bya ba'i don to/ /tshe rabs gzhan du phan pa rnam pa gnyis 'dogs pa bstan pa'i phyir/ rnam smin rgyu mthun legs par smin par byed/ /ces bya ba smos te/ tshe 'dir tshul khrims bsrungs pas tshe rabs gzhan du lha dang mi'i bde 'gro thob pa ni rnam par smin pa'i 'bras bu'o/ /lha dang mi'i gnas su skye ba na tshul khrims bsrung ba la dga' bar gyur pa ni rgyu mthun pa'i 'bras bu'o/ /rgyu mthun pa'i 'bras bu de las lha dang mi'i bde 'gro thob pa ni rnam par smin pa'i 'bras bu'o/ /de na yang tshul khrims bsrung ba la dga' ba ni rgyu mthun pa'i 'bras bu ste/ de ltar rnam par smin pa dang / rgyu mthun pa'i 'bras bu gnyis ni gcig gis gcig bskyed de rgyun mi 'chad par 'byung ba ni tshe rabs gzhan du phan btags pa zhes bya'o/ /yongs su rdzogs pa'i tshul khrims ni lhag par 'tshe ba med pa'i phyir ro zhes bya ba la/ mi dge ba bcu mi byed pa ni 'tshe ba med pa zhes bya ste/ rmi lam du yang mi dge ba bcu mi spyod pa ni lhag par 'tshe ba med pa zhes bya ste/ de ltar na yongs su rdzogs pa'i tshul khrims yin no zhes bya ba'i don to/ /'tshe ba med pa'i rdzogs pa ni lhag par mi 'tshe ba'o zhes bya ba la/ /lhag par mi 'tshe ba'i don 'chad de/ mi dge ba bcu rmi lam na yang mi byed par rdzogs na lhag par mi 'tshe ba zhes bya ba'i don to/ /ji ltar na yongs su rdzogs pa'i tshul khrims su 'gyur zhe na/ de'i phyir/ dge ba bcu'i las rmi lam na yongs su rdzogs pa'i phyir zhes bya ba smos te/ dge ba bcu'i las kyi lam yongs su rdzogs nas mi dge ba bcu rmi lam na yang byed par mi rmi na yongs su rdzogs pa'i tshul khrims yin no zhes bya ba'i don to/ /rmi lam na yang mi dge ba bcu mi byed pa ni sa bcu las sa gnyis kyi tshe na mi 'byung ste/ de bas na sa bcu pa'i sa gnyis las kyang kye rgyal ba'i sras byang chub sems dpa' sa gnyis pa 'di la gnas pa rnams ni dbyig pa spangs mtshon cha spangs zhes bya ba la sogs pa gsungs so/ /bdag nyid de la dga' bas lhag par rtogs pa'i tshul khrims zhes bya ba la/ sa dang po'i chos kyi dbyings kun du 'gro ba'i mtshan nyid rtogs pa na bden pa mthong bas mi dge ba mi byed pa dang dge ba byed pa la rang gi ngang gis dga' zhes bya ba'i don to/ /bag yod pa'i phyir zhes bya ba la/ ngag gi sgo nas smra bar bya ba ma yin pa mi smra ba dang / lus kyi sgo nas 'gro bar bya ba ma yin pa dag tu mi 'gro ba dang / sems kyi sgo nas bsam par bya ba ma yin pa dag mi bsam pa ni bag yod pa zhes bya'o/ /bag yod pa rnams las rtag tu ltung ba dang nyes byas mi 'byung bas de nyid la 'khrul pa med pa'i tshul khrims zhes bya'o/ /bzod pa ji lta bus sems can yongs su smin par byed pa de las brtsams te tshigs su bcad pa zhes bya ba la/ da ni bzod pa'i pha rol tu phyin pas sems can yongs su smin par byed pa bstan te/ de yang bzod pa 'di 'dra bas sems can 'di ltar smin par byed do zhes bstan pa'i phyir tshigs su bcad pa rtsom mo zhes bya ba'i don to/ /bzod pa ci 'dra bas sems can yongs su smin par byed ce na/ de'i phyir/ pha rol gnod par byed pa phan byed blo/ /nyes pa byas pa drag po rab tu bzod/ /ces bya ba smos te/ sems can gzhan gyi srog dang srid dang longs spyod la sogs pa med par byed pa ni pha rol gnod pa byed pa zhes bya ste/ gnod par byed pa de dag la byang chub sems dpa' gnod pa la klan kar snyad mi dgos te gnod par byas pa 'di dag la bzod par byas na bzod pa'i pha rol tu phyin pa yongs su rdzogs par 'gyur ro/ /bzod pa'i pha rol tu phyin pa yongs su rdzogs par gyur na/ bla na med pa'i byang chub thob pas 'di ni dge ba'i bshes gnyen yin no snyam du sems shing smra ba ni/ pha rol gnod par byed pa phan byed blo/ /zhes bya ba'o/ /srog dang srid la 'bab pa'i nyes pa byas na yang zhe sdang mi ldang zhing nyams su mi len na/ slar gnod pa'i len mi ldon pa ni nyes par byed pa drag po bzod pa zhes bya'o/ /ji ltar yongs su smin par byed ce na/ de'i phyir/ thabs shes gnod par byed pa'i bzod pa yis/ /gnod par byed pa dag ni dge la bkod/ /ces bya ba smos te/ gnod par byed pa rnams la/ 'di ni phan 'dogs pa yin no snyam du sems shing tshig tu de skad smras pa nyid thabs shes pa zhes bya'o/ /phan 'dogs pa yang rnam pa gnyis te/ tshe 'dir phan 'dogs pa dang / tshe rabs gzhan du phan 'dogs pa'o/ /tshe 'dir phan 'dogs pa ni nyes pa drag po byas pa rnams la yang gnod pa drag po dag bzod do/ /slar gnod pa'i lan ma glan pas na tshe 'dir phan 'dogs so/ /tshe rabs gzhan du phan 'dogs pa'i thabs shes pa'i sems kyis gnod par byed pa rnams la phan 'dogs so snyam du sems shing khyod kyis phan 'dogs so zhes smras pas gzhan dag 'di snyam du sems te/ bdag gis gnod par byas na yang slar phan 'dogs so zhes smras pa dang sbyar na sems can 'di ni sems can chen po zhig ste snyam nas de la dad pa skye zhing de'i dbang du gyur pa dang / tshe 'dir dge ba byed pa la bkod de tshe rabs gzhan du mtho ris dang mya ngan las 'das pa thob par byas pa ni tshe gzhan du phan 'degs pa'o/ /brtson 'grus ji lta bus ji ltar yongs su smin par byed pa de las brtsams te/ tshigs su bcad pa zhes bya ba la/ da ni brtson 'grus kyi pha rol tu phyin pas sems can smin par byed pa ston te/ de yang brtson 'grus ji lta bus sems can 'di 'dra bar yongs su smin par byed do zhes bstan pa'i phyir tshigs su bcad pa rtsom mo zhes bya ba'i don to/ /brtson 'grus ji lta bus sems can yongs su smin par byed pa'i phyir/ de yang nan tan mchog la gnas nas su/ /rgyal sras sems can mang po smin par byed/ /ces bya ba smos te/ de yang zhes bya ba ni byang chub sems dpa' dang sbyar te/ brtson 'grus kyi pha rol tu phyin pa dang ldan par 'gyur te byang chub sems dpa' de yang zhes bya ba'i don to/ /go cha'i brtson 'grus dang / sbyor ba'i brtson 'grus dang / ma zhum pa'i brtson 'grus dang / ma 'khrugs pa'i brtson 'grus dang / chog mi shes pa'i brtson 'grus la gnas shing brtson 'grus de dag kyang 'khor ba'i mtha'i bar du gtong bar mi byed pa ni nan tan mchog la gnas pa zhes bya'o/ /brtson 'grus de lta bu la brten nas byang chub sems dpa' sems can mtha' yas pa rnams yongs su smin par byed do zhes bya ba'i don to/ /da ji ltar yongs su smin par byed pa bstan pa'i phyir ro/ /pha rol dge ba'i sems gcig phyir yang ni/ /bskal pa bye ba stong du skyo mi 'gyur/ /zhes smos te/ sems can gcig gi sems kyi rgyud kyi skad cig ma gcig la sbyin pa la sogs pa'i dge ba gcig bskyed pa'i phyir/ dge ba bskyed par nus pa'i skabs gzigs na 'jig rten gyi khams thams cad du yang gshegs shing bskal pa bye ba brgya stong grangs med par yang sems can gyi don mdzad cing gshegs pa la skyo ba mi mnga'o zhes bya ba'i don to/ /de ni 'di skad du bstan pa yin te/ byang chub sems dpa'i brtson 'grus kyis sems can rnams la tshe 'dir phan btags pa dang tshe rabs gzhan du phan btags pas sems can yongs su smin par byed do zhes bya ba'i don to/ /de la brtson 'grus kyis tshe 'dir dge ba'i sems gcig la bkod pa ni tshe 'dir phan btags pa'o/ /de'i rgyus tshe rabs gzhan du mtho ris dang mya ngan las 'das pa thob par byas pa ni tshe rabs gzhan du phan btags pa'o/ /bsam gtan ji lta bus ji ltar yongs su smin par byed pa las brtsams te tshigs su bcad pa zhes bya ba la/ bsam gtan gyi pha rol tu phyin pas sems can yongs su smin par byed pa ston te/ bsam gtan ci 'dra bas sems can yongs su smin par byed pa bstan pa'i phyir tshigs su bcad pa rtsom mo zhes bya ba'i don to/ /bsam gtan ji lta bus sems can yongs su smin par byed ce na de'i phyir/ yid kyis bla na med pa'i dbang bskur nas/ /zhes bya ba smos te/ yid ni sems la bya ste/ sems kyang rnam par shes pa kun la mi bya'i yid kyi rnam par shes pa la bya'o/ /dbang ni ting nge 'dzin la bya ste/ ci'i phyir zhe na/ ting nge 'dzin gyis sems mi g.yeng bar rtse gcig tu 'jog par byed pas na ting nge 'dzin la dbang zhes bya ste/ theg pa chen po'i ting nge 'dzin dpa' bar 'gro ba'i ting nge 'dzin la sogs pa yid kyi rnam par shes pa thob par byas pa la/ yid kyis bla na med pa'i dbang bkur nas/ /zhes bya'o/ /de ltar ting nge 'dzin bsgrubs nas ting nge 'dzin gyi mthus 'phrul gyi mig dang / rna ba la sogs pa rdzu 'phrul rnams kyang sems can gyi don du byed do zhes bya ba'i tha tshig go/ /gzhan gyis mchod 'dod thams cad bcom nas su/ /zhes bya ba la/ ting nge 'dzin thams cad bsgrubs pa dang / rdzu 'phrul bsgrubs pa dag kyang sems can gzhan gyis mchod pa dang / bkur sti'i phyir bsgrubs pa ni ma yin gyi zang zing med pa'i sems can gyis mchod pa dang bkur sti byed par 'gyur ba la chags pa spangs nas sems can yongs su smin par byed do zhes bya ba'i don to/ /ji ltar yongs su smin par byed ce na/ de'i phyir/ gzhan yang mchog gi bstan la 'jug par byed/ /ces smos te/ rdzu 'phrul gyi mthus 'bar ba dang 'phur ba la sogs pa bstan nas/ sems can gzhan de bzhin gshegs pa'i bstan pa la dga' ba dang / mgu pa dang / dad pa skyed par byed ces bya ba'i don to/ /der yang ma zad kyi gzhan yang byed par bstan pa'i phyir/ de dag dge ba yang dag 'phel bar byed/ /ces bya ba smos te/ sangs rgyas kyi bstan pa la dad pa bskyed pa tsam du ma zad kyi dad pa yang bskyed pa pha rol tu phyin pa drug spyod du yang bcug pas dge ba yang 'phel bar byed pa yin no/ /shes rab ji lta bus ji ltar yongs su smin par byed pa de las brtsams te tshigs su bcad pa zhes bya ba la/ da ni shes rab kyis sems can yongs su smin par byed pa ston te/ de yang shes rab ji lta bus sems can ji ltar yongs su smin par byed pa bstan pa'i phyir tshigs su bcad pa rtsom mo zhes bya ba'i don to/ /shes rab ji lta bus sems can ji ltar yongs su smin par byed ce na/ de'i phyir/ de nyid dgongs pa'i tshul la de nges pas/ /zhes bya ba smos te/ de nyid kyi tshul la nges pa dang dgongs tshul la nges pa zhes bya bar sbyar ro/ /de la gang zag la bdag med pa dang / chos la bdag med pa gnyis ni de nyid kyi tshul zhes bya ste/ byang chub sems dpa' de'i shes rab kyis chos de la the tshom med par byas shing gtan la phab par byas pa ni de nyid kyi tshul la nges par byed pa zhes bya'o/ /don gzhan la dgongs pa dang dus gzhan la dgongs pa la sogs pa dgongs pa bzhi dang ldem por dgongs pa bzhi la ni dgongs pa'i tshul zhes bya'o/ /chos de dag la the tshom med par byas pa ni dgongs pa'i tshul la nges pa zhes bya'o/ /tshig 'dis bdag nyid kyi ye shes kyi tshogs kyi yon tan la gnas par bstan to/ /ji ltar sems can the tshom bsal nas yongs su smin par byed ce na/ de'i phyir/ sems can the tshom shin tu sel bar byed/ /ces bya ba smos te/ de ltar bdag nyid the tshom med par byas nas sems can rnams de kho na'i tshig dang / dgongs pa'i tshul la the tshom du gyur pa rnams kyi the tshom bsal nas the tshom med pa la dgod par byed kyi/ de lta bu'i tshul gyis sems can yongs su smin par byed do/ /'dis ni sems can gzhan dag ye shes kyi tshogs la bkod pa bstan to/ /tshig de dag ni mjug bsdu ba'i phyir/ de'i phyir rgyal ba'i bstan la de gus pas/ /bdag dang pha rol dge ba'i yon tan 'phel/ /zhes bya ba smos te/ sems can rnams de nyid kyi tshul dang / dgongs pa'i tshul la the tshom med par byas pas sangs rgyas bcom ldan 'das kyi bstan pa la gus pa dang dad pa dang rim gro bskyed do/ /de bas na byang chub sems dpa' des bdag gi dge ba'i yon tan yang 'phel bar byas pha rol gyi dge ba'i yon tan yang 'phel bar byas so/ /ji ltar zhe na/ de nyid dang dgongs pa'i tshul la the tshom med pas na bdag dge ba'i yon tan 'phel bar byas so/ /de nyid dang dgongs pa'i tshul la sems can gzhan the tshom bsal bas pha rol kyang dge ba'i yon tan la 'phel bar byas so/ /mjug bsdu ba'i tshigs su bcad pa zhes bya ba la/ sems can yongs su smin par byed pa'i skabs su pha rol tu phyin pa drug gis sems can yongs su smin par byed do zhes rgya cher bstan nas da don de nyid mjug bsdu zhing ji ltar sems can yongs su smin par byas pa'i don mdor bsdus te bstan pa'i tshigs su bcad pa rtsom mo zhes bya ba'i don to/ /sems can gang du 'dul zhing smin par byed ce na/ de'i phyir/ ji ltar bde 'gror 'gro ba dge gsum mam/ /zhes bya ba smos te/ ji ltar zhes bya ba ni gong du bshad pa ltar na gong du byang chub sems dpa' sems can yongs su smin par byed do zhes bya ba'i don to/ /gang zag rigs med pa rnams ni dge ba bcu spyod du bcug cing lha dang mi'i bde 'gro'i gnas su bkod cing yongs su smin par byed do zhes bya ba'i don to/ / gang zag nyan thos kyi rigs can nam rang sangs rgyas kyi rigs can nam/ sangs rgyas kyi rigs can dag ni dge ba la bkod par byed de dge ba gsum ni theg pa gsum la bya ste/ de la nyan thos kyi rigs can ni nyan thos kyi theg par bkod cing yongs su smin par byed/ rang sangs rgyas kyi rigs can ni rang sangs rgyas kyi theg pa la bkod cing yongs su smin par byed/ sangs rgyas kyi rigs can ni theg pa chen po la yongs su smin par byed do zhes bya ba'i don to/ /su dag yongs su smin par byed ce na/ de'i phyir/ 'gro ba ma lus zhes bya ba smos te/ rigs med pa dang / nyan thos kyi rigs can dang / rang sangs rgyas kyi rigs can la sogs pa sems can thams cad yongs su smin par byed do zhes bya ba'i don to/ /rgyu gang gis yongs su smin par byed ce na/ de'i phyir/ snying rje zhes bya ba smos te/ sems can la thugs brtse ba'i rgyus sems can yongs su smin par byed do zhes bya ba'i don to/ /sus yongs su smin par byed ce na/ de'i phyir/ byang chub sems dpas de zhes bya ba smos te/ yongs su smin par byed pa ni byang chub sems dpa' yin te/ byang chub sems dpas yongs su smin par byed ces bya ba'i don to/ /rnam pa du dang ji lta bus yongs su smin par byed ce na/ de'i phyir/ chung dang mchog dang 'bring gi rnam pa yis/ /zhes bya ba smos te/ mos pas spyod pa'i sa la gnas pa'i byang chub sems dpa' rnams ni gzung 'dzin ma spangs pa dang bsod nams dang ye shes kyi tshogs shas chung bas bdag nyid kyang chung ba zhes bya bas/ gzhan mos pas spyod pa'i sar bkod nas gzung 'dzin ma spangs pa dang bsod nams dang ye shes kyi tshogs chung ngu la bzhag pas chung ngu'i rnam pas yongs su smin par byed pa zhes bya'o/ /byang chub sems dpa' rnams sa brgyad pa dang dgu pa dang bcu pa la gnas pa la gnas pa'i dus na bdag nyid kyang rnam par mi rtog pa'i lhun gyis grub pa rnyed nas/ bsod nams dang ye shes kyi tshogs chen po la gnas la gzhan yang sa de gsum la bkod na/ rnam par mi rtog pa lhun gyis grub pa thob par byas pa dang / bsod nams dang ye shes kyi tshogs chen po la bzhag pas mchog gi rnam pas yongs su smin pa zhes bya'o/ /nam byang chub sems dpa' sa dang po nas bdun pa man chad la gnas pa'i dus na bdag nyid kyang 'bad rtsol dang bcas pa'i rnam par mi rtog pa'i ye shes dang bsod nams dang ye shes kyi tshogs la gnas la/ sems can gzhan dag kyang sa de dag la bkod na 'bad rtsol dang bcas pa'i rnam par mi rtog pa'i ye shes dang bsod nams dang ye shes kyi tshogs la bkod pa 'bring gi rnam pas sems can yongs su smin pa zhes bya'o/ /dus ji srid cig tu sems can yongs su smin par byed ce na/ de'i phyir/ 'jig rten yod dang mnyam par 'jug pas 'dul/ /zhes bya ba smos te/ nam mkha'i mtha' ji srid du yod par sems can gyi khams kyang de srid du yod do/ /'jig rten gyi khams ji srid du yod par sems can gyi khams kyang de srid du yod de/ sems can gyi khams yod kyi bar du sems can yongs su smin par byed pas na/ 'jig rten yod dang mnyam par 'jug pas 'dul/ /zhes bya'o/ / yongs su smin pa'i skabs bshad pa rdzogs so// //yongs su smin pa'i skabs bshad pa'i rjes la/ rnam pa thams cad mkhyen pa'i skabs bshad par 'brel pa ci yod ce na/ de ltar byang chub sems dpas sems can gyi rgyud la'ang dge ba'i rtsa ba yongs su smin par byas/ bdag gi sems kyi rgyud la'ang dge ba'i rtsa ba yongs su smin par byas pa de/ myur du bla na med pa'i byang chub thob par byas pa des na yongs su smin pa'i skabs kyi 'og tu rnam pa thams cad mkhyen pa'i skabs bshad par 'brel to/ /yang na bdag dang gzhan gyi don dang de kho na'i don dang / mthu dang / yongs su smin pa dang / bla na med pa'i byang chub ste/ dngos po lnga ni byang chub sems dpa'i bslab pa'i dmigs par byas pa yin no/ /de la byang chub kyi sems kyis bla na med pa'i byang chub thob par 'dod cing smon lam 'debs so/ /byang chub thob par bya ba yang ci dgos she na/ bdag dang gzhan gyi don yongs su rdzogs par dgos te/ de bas na de'i rjes la bdag dang gzhan gyi don gyi skabs bshad do/ /bdag dang gzhan gyi don la zhugs pa des kyang bdag nyid kun nas nyon mongs pas ma gos par byas pa yin te/ de bas na kun nas nyon mongs pas mi gos pa'i thabs de kho na'i skabs bshad do/ /kun nas nyon mongs pas kyang ma gos kyang mthu med na sems can gyi don la skyo bar 'gyur te/ de bas na sems can gdul bar bya ba'i don la mi skyo ba'i thabs mthu'i skabs bshad do/ /de ltar de kho na'i dang / mthu gnyis kyis byang chub sems dpa' sangs rgyas kyi chos yongs su smin pa dang / sems can yongs su smin par byed de/ ji lta zhe na/ gang gi phyir/ byang chub sems dpa' de kho na khong du chud na bdag nyid kyi rgyud la dga' ba la sogs pa'i chos dgu shas cher myur du 'grub cing thob par 'gyur gyi de kho na'i khong du ma chud na ni mi 'gyur te/ de bas na de kho na khong du chud pa las bdag sangs rgyas kyi chos yongs su smin par 'gyur te/ mthu dang ldan skyo ba dang gnod pa med par sems can yongs su smin par byed nus te/ mthu med pas ni mi nus te/ de bas na mi skyo ba'i thabs ni mthu dang ldan pa'i thabs kyis bshad do/ /de ltar bdag dang sems can yongs su smin pa dang ldan pa rnams ni sha thang dang mi bde ba med par tshogs yongs su rdzogs nas bla na med pa'i byang chub tu 'tshang rgya bar 'gyur te/ de'i rjes la yongs su smin pa'i skabs kyi rjes la/ rnam pa thams cad mkhyen pa'i skabs bshad par 'brel to/ /de la bdag dang gzhan gyi don dang / de kho na'i don dang / mthu dang / yongs su smin pa bzhi ni rgyu lta bur dmigs so/ /bla na med pa'i byang chub ni 'bras bur dmigs so/ /rnam pa thams cad mkhyen pa la tshigs su bcad pa gnyis te/ gsum pa ni bshad pa'o zhes bya ba la/ me long lta bu'i ye shes dang / mnyam pa nyid kyi ye shes dang / so sor rtog pa'i ye shes dang / bya ba grub pa'i ye shes dang / chos kyi dbyings dang lnga las sangs rgyas zhes bya ste/ sangs rgyas de nyid la rnam pa thams cad mkhyen pa zhes bya'o/ /sangs rgyas de'i don tshigs su bcad pa gnyis kyis ni mdo tsam du bstan pa de tshigs su bcad pa gsum pa bzlas te zhib tu 'chad do zhes bya ba'i don to/ /de la tshigs su bcad pa gnyis kyis bsdus pa'i don ni rnam pa gsum ste/ yang dag par 'thob pa dang / rang bzhin dang dpe'o/ /yang dag par thob pa la rnam pa bzhi ste/ dga' ba spyod pa brgya phrag ji snyed pa dang / dge ba'i tshogs ji snyed pa dang / dus ji srid cig dang / nyon mongs pa dang / shes bya'i sgrib pa ji tsam spangs pas sangs rgyas thob pa ni yang dag par thob pa zhes bya'o/ /dpag med dka' spyod brgya rnams dang / /zhes bya bas dka' ba spyod pa brgya phrag ji snyed cig bstan te/ sems can gyi don du mgo dang rkang lag la sogs pa dang bu smad btang ba dang / 'jig rten gyi khams me ma mur gyis gang bar yang 'bog cing 'gro ba la sogs pa'i dka' ba spyod pa dpag tu med pa brgya phrag grangs med pa zhig kyang spyad ces bya ba'i don to/ /brgya smos pas ni mtshon pa tsam du zad kyi grangs stong phrag la sogs pa tshad med pa rnams kyi'ang bsdu'o/ / dpag med dge ba bsags pa dang / /zhes bya bas/ dge ba'i tshogs ji snyed pa bstan te/ sa dang pha rol tu phyin pa dang / byang chub kyi phyogs la sogs pa dge ba dpag tu med pa yang bsags zhes bya ba'i don to/ /dpag tu med pa'i dus dang ni/ /zhes bya bas/ dus ji srid cig bstan te/ dus kyang bskal pa grangs med pa gsum gyi bar du spyod ces bya ba'i don to/ /dpag med sgrib pa zad pa'i phyir/ /zhes bya bas/ nyon mongs pa dang / shes bya'i sgrib pa ji tsam spangs pa bstan te/ 'khor ba thog ma med pa nas ma spangs pa'i nyon mongs pa'i sgrib pa yang spangs/ shes bya'i sgrib pa yang spangs zhes bya ba'i don to/ /'di yan chad yang dag par thob pa bstan to/ /rang bzhin yang rnam pa gnyis te/ spangs pa phun sum tshogs pa bstan pa dang / ye shes phun sum tshogs pa'o/ /sgrib pa kun gyi dri med pa/ /zhes bya bas spangs pa phan sum tshogs pa bstan te/ sangs rgyas kyi dus na sa bcur gtogs pa'i nyon mongs pa'i sgrib pa dang / shes bya'i sgrib pa'i bag chags kyang ma lus par spangs pas/ sgrib pa kun gyi dri med ces bya'o/ /rnam pa thams cad mkhyen pa thob/ /ces bya bas/ ye shes phun sum tshogs pa bstan te/ de yang rnam pa thams cad mkhyen ces bya bar sbyar ro/ /de la mi rtag pa dang / sdug bsngal ba dang / stong pa dang / bdag med par de lta bur phyin ci ma log par shes pas ni rnam pa thams cad mkhyen pa zhes bya'o/ /phung po dang khams la sogs pa'i chos kun ma lus par mkhyen pas na thams cad mkhyen pa zhes bya ste/ 'dis ni rang bzhin bstan to/ /rin chen snod ni phye ba ltar/ /sangs rgyas par ni shin tu bstan/ /zhes bya ba la/ dper na rin po che'i sgrom kha phyen kha dog dang dbyibs su ldan pa'i rin po che sna tshogs snang ba de bzhin du nyon mongs pa dang shes bya'i sgrib pa gnyis spangs te/ sangs rgyas kyi sa thob pa'i dus na stobs dang mi 'jigs pa dang ma 'dres pa la sogs pa sangs rgyas kyi chos rin po che sna tshogs dag de'i tshe na snang ngo zhes bya ba'i don to/ /dpag med dka' spyod brgya rnams dang / /zhes bya ba la/ rgyas par bstan pa'i phyir/ ngal brgyas rmad 'byung dka' spyad ces smos te/ 'bad pa dang / bsgrub pa dang / brtsal ba drag po grangs med pas mgo dang rkang lag dang / bu smad la sogs pas gtang bar spyad pa ni ngal brgyas rmad 'byung ba'i dka' ba spyad pa zhes bya ste/ de lta bur dka' ba spyad pa 'jig rten dang / nyan thos dang rang sangs rgyas la med pas na rmad du byung ba zhes bya'o/ /de yang mdo dag las sems can gyi don du ngas mig yongs su btang ba bsags na ni ri rab bas kyang mtho la khrag yongs su btang ba bsags na ni phyogs bzhi'i rgya mtsho bas kyang mang ngo zhes bya ba'i don to/ /dpag med dge ba bsags pa dang / /zhes bya ba'i don rgyas par bstan pa'i phyir/ dge ba bsags kun zhes smos te/ pha rol tu phyin pa dang / sa bcu dang / byang chub kyi phyogs la sogs pa'i dge ba kun kyang bsags zhes bya ba'i don to/ /dpag tu med pa'i dus dang ni/ /zhes bya ba'i don rgyas par bstan pa'i phyir/ dus ring bskal pa mchog 'gro zhes smos te/ dus ring gi sgras ni bskal pa chung ngu dang / bar gyi bskal pa tsam du bsgrub pa ma yin gyi bskal pa chen por bsgrub par ston to/ /mchog gi sgras ni bskal pa grangs med pa gsum gyi bar du bsgrub par ston to/ /dpag med sgrib pa zad pa'i phyir/ /sgrib pa zad ces smos te/ 'khor ba thog ma med pa nas bsags pa'i nyon mongs pa'i sgrib pa dang / shes bya'i sgrib pa kun spangs zhes bya ba'i don to/ /sgrib pa kun gyi dri med pa/ /zhes bya ba'i don rgya cher bstan pa'i phyir/ sar gtogs sgrib pa phra bcom zhes bya ba smos te/ sangs rgyas pa'i dus na sa dang po nas sa bcu yan chad na yod pa'i sgrib pa phra mo dang / shes bya'i sgrib pa phra mo dang yang zhes bya ba'i don to/ /rnam pa thams cad mkhyen pa thob/ /zhes bya ba'i don rgya cher bstan pa'i phyir/ sangs rgyas de zhes bya ba smos te/ nam sangs rgyas pa'i dus na chos thams cad phyin ci ma log par thugs su chud pas sangs rgyas zhes bya'o/ /rin po chen snod nyid phye ba ltar/ /zhes bya ba'i don rgya cher bstan pa'i phyir/ de ni mthu chen rin chen snod phye bzhin/ /zhes bya ba smos te/ rin po che gang sems can gzhan gyi bsam pa yongs su rdzogs par byed pa'i rin po che ni mthu chen po'i rin po che zhes bya ste/ mthu chen po'i rin po che'i snod kha phye na rin po che chen po sna tshogs snang zhing bdag dang gzhan gyi bsam pa yongs su rdzogs par byed pa de bzhin du sangs rgyas kyi sa'i dus na nyon mongs pa dang / shes bya'i sgrib pa ma lus par spangs nas bdag dang gzhan gyi bsam pa yongs su rdzogs par byed pa'i chos stobs dang / mi 'jigs pa la sogs pa'i rnam pa sna tshogs snang zhing bdag dang gzhan gyi bsam pa yongs su rdzogs par byed do zhes bya ba'i don to/ /sangs rgyas de'i gnyis su med pa'i mtshan nyid mthu dang bcas pa la gnyis te/ gsum pa ni bshad par gyur pa'o zhes bya ba la/ sangs rgyas ni gnyis su med pa'i mtshan nyid yin te/ ci'i phyir zhe na/ gzung ba dang 'dzin pa ni gnyis zhes bya la/ sangs rgyas pa'i dus na gzung ba dang 'dzin pa gnyis spangs pas gnyis su med pa zhes bya'o/ /yang na yod pa dang med pa gnyis la gnyis su zhes bya ste/ sangs rgyas pa na yod pa yang ma yin med pa yang ma yin pas gnyis su med pa zhes bya'o/ /ci zhig yod pa ma yin zhe na/ sangs rgyas pa'i tshe gzung ba dang 'dzin pa kun du brtags pa'i kun brtags kyi mtshan nyid yod pa ma yin pa'o/ /ci zhig med pa ma yin nam zhe na/ yongs su grub pa yod pa'i mtshan nyid yod pa'i phyir ro/ /mthu ni gnyis med pa'i mtshan nyid kyi yon tan la bya ste/ tshigs su bcad pa gnyis kyis ni gnyis su med pa'i mtshan nyid dang / mthu mdo tsam du bstan/ tshigs su bcad pa gsum pas ni de nyid kyi don bzlas nas rgya cher 'chad do zhes bya ba'i don to/ /thams cad chos ni sangs rgyas te/ / zhes bya ba la/ sangs rgyas zhes bya ba ni gang zag la bdag med pa dang / chos la bdag med pa dang / skye ba dang 'gag pa med pa'i chos la sangs rgyas zhes bya la/ chos thams cad la bdag med pa gnyis dang / skye 'gag med par ma khyab pa med cing sangs rgyas kyi chos kyi sku bdag med pa gnyis kyi rang bzhin skye 'gag med pa'i rang bzhin dang / chos thams cad kyi bdag med pa gnyis dang / skye 'gag med pa'i rang bzhin du mi 'dra ba cung zad kyang med pas na chos thams cad la sangs rgyas zhes bya'o/ /de bas na 'phags pa rdo rje gcod pa'i mdo las kyang / gang zhig nga la gzugs su blta/ /gang zhig nga la dgra ru rtogs/ /log par zhugs pa song bas te/ /skye bo de ni nga mi mthong / /de bzhin nyid du sangs rgyas blta/ /'dren pa rnams ni chos kyi sku/ /chos nyid shes par mi rung ste/ /de dag rnam par rig mi 'gyur/ /zhes gsungs so/ / 'phags pa ye shes snang ba'i rgyan gyi mdo las kyang / mi skye chos ni rtag tu de bzhin gshegs/ /thams cad chos kyang bde bar gshegs dang 'dra/ /zhes gsungs so/ /smas pa/ gal te chos thams cad sangs rgyas yin na sangs rgyas kyi yod pa'i rang bzhin yin pas/ sangs rgyas bzhin du chos yang yod pa'i rang bzhin du 'gyur ram snyam pa la/ chos ni gang yang yod ma yin/ /zhes smos te/ byis pa so so'i skye bo rnams kyis gzung ba dang 'dzin pa kun du brtags pa'i mtshan nyid dang bum pa dang snam bu la sogs pa kun brtags pa'i mtshan nyid kyi chos ni gang yang yod pa ma yin no zhes bya ba'i don to/ /dkar po'i chos kyi rang bzhin te/ /zhes bya ba la/ sangs rgyas ni dang po nyid kyang sa dang pha rol tu phyin pa dang / byang chub kyi phyogs kyi chos bsgrub pa las grub la/ /sangs rgyas kyi dus na yang sa dang pha rol tu phyin pa dang / byang chub kyi phyogs dang / stobs dang mi 'jigs pa la sogs pa'i rang bzhin du gnas pas na dkar po'i chos kyi rang bzhin zhes bya'o/ /de ltar na sangs rgyas de pha rol tu phyin pa de dag nyid kyi rang bzhin kho na yin no zhes brjod dam zhe na/ de'i phyir/ des kyang de ni bstan ma yin/ / zhes smos te/ gtong ba po dang / len pa dang / rdzas la sogs pa lta bur rnam pa gsum du dmigs pa'i kun brtags kyi mtshan nyid kyi pha rol tu phyin pa rnams ni rang bzhin gyis yod pa ma yin pas na kun brtags pa'i mtshan nyid kyi pha rol tu phyin pa des sangs rgyas de'i rang bzhin yin no zhes kyang mi brjod de/ ci'i phyir sangs rgyas ni kun brtags kyi chos ma yin pa'i phyir ro/ /de yan chad kyis gnyis su med pa'i mtshan nyid bshad de/ rin chen chos kyi rgyu yin pas/ /de ni rin chen 'byung gnas bzhin/ /zhes bya ba la/ dper na rin po che 'byung gnas nas rin po che rnam pa sna tshogs 'byung ba bzhin du/ sangs rgyas de las kyang bshad par bya ba'i chos rin po che dpag tu med pa dang / stobs dang mi 'jigs pa la sogs pa'i chos rin po che dpag tu med pa 'byung ste/ chos rin po che rnams 'byung ba'i rgyu dang rkyen dang gzhi byed pas na sangs rgyas ni rin po che'i 'byung gnas dang 'dra'o zhes bya ba'i don to/ /dge ba'i lo tog rgyu yi phyir/ /de ni sprin dang 'dra bar 'dod/ /ces bya ba la/ dper na sprin las char 'bab cing 'char 'bab pa'i rkyen gyis nas dang 'bras la sogs pa'i lo tog sna tshogs smin cing rgyas par 'gyur ba de bzhin du/ sangs rgyas de las kyang chos bshad pa'i char rnam pa sna tshogs phab nas sems can gyi sems kyi rgyud zhing dang 'dra ba la sbyin pa la sogs pa pha rol tu phyin pa dge ba'i lo tog bskyed pa'i rgyu sangs rgyas byed pas na/ de bas na sangs rgyas ni sprin dang 'dra bar 'dod do zhes bya ba'i don to/ /'dis ni mthu che ba bstan to/ /de bzhin nyid dang tha dad pa ma yin pas chos thams cad ni sangs rgyas te zhes bya ba la/ bum pa dang snam bu la yod pa'i gang zag dang chos bdag med pa dang skye 'gag med pa'i de bzhin nyid dang / chos kyi sku'i bdag med pa gnyis dang / skye 'gag med pa'i de bzhin nyid du mi 'dra ba med nas chos thams cad la sangs rgyas zhes bya'o zhes bya ba'i don to/ /thams cad chos ni sangs rgyas te/ /zhes bya ba'i don dang / dkar po'i chos kyi rang bzhin te/ / zhes bya ba'i don bstan pa'i phyir/ sangs rgyas chos kun tshogs pa 'am/ /zhes bya ba smos so/ /bdag med pa gnyis dang / skye 'gag med pa'i chos la ni sangs rgyas zhes bya la/ stong pa nyid kyi chos kyi nang du ma 'dus pa'i chos gang yang med pas na sangs rgyas chos kun tshogs pa zhes bya'o/ /yang na sangs rgyas nyid dang po yang sa dang / pha rol tu phyin pa dang / byang chub kyi phyogs bsgrub pa las grub la/ sangs rgyas grub pa na yang sa dang pha rol tu phyin pa dang / byang chub kyi phyogs dang / stobs dang mi 'jigs pa la sogs pa'i chos thams cad tshogs par yod pas na sangs rgyas chos kun tshogs pa zhes bya'o/ /chos ni gang yang yod ma yin/ /zhes bya ba dang / des kyang de ni bstan ma yin/ /zhes bya ba'i don bstan pa'i phyir/ yang na chos kun bral ba ste/ /zhes smos te/ sangs rgyas pa'i dus na gzung ba dang 'dzin pas kun du brtags pa'i chos gang yang med pas na chos kun dang bral ba zhes bya'o/ /yang na gzung 'dzin gyi mtshan nyid kyi pha rol tu phyin pa rnams de'i dus na med pas na chos kun dang bral ba zhes bya'o/ /rin chen chos kyi rgyu yin pas/ /de ni rin chen 'byung gnas bzhin/ /zhes bya ba'i don bstan pa'i phyir/ rin chen mchog rab che yangs 'byung phyir rin chen chos kyi 'byung gnas bzhin/ /zhes bya ba smos te/ dper na rin po che 'byung gnas nas rin po che sna tshogs 'byung ba bzhin du/ sangs rgyas de las kyang bshad par bya ba'i chos rin po che rnams 'byung ba dang / yangs shing rgya che ba'i chos sa dang / pha rol tu phyin pa dang / stobs dang mi 'jigs pa la sogs pa 'byung ba'i rgyu byed pas na sangs rgyas ni rin po che'i 'byung gnas dang 'dra'o zhes bya ba'i don to/ /dge ba'i lo tog rgyu yi phyir/ /de ni sprin dang 'dra bar 'dod/ /ces bya ba'i don bstan pa'i phyir/ 'byung po dge ba'i lo tog cher 'phel rgyu phyir sprin dang 'dra/ /zhes smos te/ dper na sprin las char phab nas lo tog rnam pa sna tshogs 'phel zhing rgyas par byed pa de bzhin du 'byung po ni sems can la bya ste/ de bzhin gshegs pas kyang chos kyi char phab nas sems can gyi sems kyi rgyud zhing dang 'dra ba la pha rol tu phyin pa'i dge ba'i lo tog rgya cher 'phel zhing rgyas par byed pas na sangs rgyas ni sprin dang 'dra'o zhes bya ba'i don to/ /ji ltar chos kyi char 'bebs pa bstan pa'i phyir/ skye dgu dag la chos kyi char chen legs bshad mi zad rab tu 'bebs/ /zhes smos so/ /de la char chen legs bshad mi zad pa zhes bya ba'i tshig phyis 'byung la/ skye dgu dag la chos kyi char zhes bya ba'i tshig sngar byung mod kyi/ tshig 'di ltar sbyar te chos chen po legs par bshad pa mi zad pa skye dgu dag gi sems kyi rgyud la 'bebs pas na sprin dang 'dra'o zhes sbyar ro/ /chen po zhes bya ba ni sa dang pha rol tu phyin pa'i mtshan nyid theg pa chen po'i chos la bya'o/ /chos de yang thog mar yang dge/ bar du yang dge/ tha mar yang dge/ don bzang tshig bzang bas na legs par bshad pa zhes bya'o/ /chos de lan cig rtogs na 'khor ba mtha'i bar du yang med par mi 'gyur bas na mi zad pa zhes bya'o/ /'bebs zhes bya ba ni 'dul ba'i sems can rnams la bshad ces bya ba'i don to/ /sangs rgyas pa de nyid skyabs bla na med pa la tshigs su bcad pa lnga'o zhes bya ba la/ sangs rgyas kyi mthu'i skabs kyi rjes la skyabs bla na med pa'i khyad par bshad pa'i 'brel pa ci yod ce na/ lan du 'jig rten pa dag ri la sogs pa la skyabs tshol ba dang / nyan thos dag mya ngan las 'das pa la skyabs tshol bas ni rin po che'i 'byung gnas lta bu dang / sprin lta bu'i mthu dang ldan pa'i sangs rgyas su grub na skyabs su song ba thams cad kyi skyabs pas skyabs bla na med pa yin no zhes bstan pa'i phyir/ mthu'i rjes la skyabs bla na med pa'i khyad par bshad par 'brel to/ /rgal ba dang / sngar skyabs kyi skabs bshad pa dang 'dir skyabs kyi skabs bshad par gnyis su khyad par ci yod nas/ lan gnyis su bzlas te bshad ce na/ sngar ni gang zag gi khyad par gyi dbang du byas nas theg chen mchog phyir dkon mchog rnams la skyabs song bas/ de nyid skyabs su song ba'i mchog tu rig par bya'o zhes smos la/ 'dir ni 'jig rten pa dag rgyal po dang rkun po la sogs pas 'jigs nas ri la sogs pa la skyabs su 'gro ba dang / nyan thos pa dag 'khor ba'i skye rga na 'chi la sogs pas 'jigs nas bdag bskyab pa'i phyir dkon m chog gsum la skyabs su 'gro ba'i gang zag de dag pas gang zag gang sangs rgyas gang la skyabs su song ba'i sangs rgyas de nyid thob par byas nas bdag nyid sems can kun gyi skyabs su gyur cig ces dkon mchog gsum la skyabs su 'gro ba'i byang chub sems dpa' de skyabs gzhan pas mchog tu gyur pa yin te/ bdag dang gzhan gnyi ga gnod pa thams cad las bskyab pa'i phyir skyabs su song bas so/ /de'i skabs su ni gang zag gi dbang du byas nas skyabs su 'gro ba'i skabs bshad kyi byang chub kyi dbang du byas pas ni ma yin no/ / skyabs su 'gro ba'i khyad par 'di ni byang chub tu byas pas te/ sus bla na med pa'i byang chub thob pa de ni bdag dang gzhan gyi skyabs su gyur pas skyabs bla na med pa yin no zhes ston te/ de bas na khyad par ni de yod do/ /sangs rgyas pa ni skyabs yin la/ /zhes bya ba la/ nyon mongs pa dang shes bya'i sgrib pa spangs nas chos thams cad thugs su chud de/ sangs rgyas pa nyid skyabs zhes bya ste/ ci las skyob che na/ nyon mongs pa dang las dang tshe gsum las skyob pas sangs rgyas pa nyid skyabs zhes bya'o/ /rtag tu nyon mongs tshogs kun dang / / zhes bya ba la/ nyon mongs pa'i nyon mongs pa las skyob par 'gyur te/ sangs rgyas par gyur na 'khor ba'i mtha'i bar du yang mthong ba dang bsgom pas spang bar bya ba'i nyon mongs pa'i tshogs kun sems la mi 'byung zhing nyon mongs pas mi gos par gyur pa na nyon mongs pa las skyob bo zhes bya ba'i don to/ /nyes spyod dag ni thams cad dang / /zhes bya bas/ las kyi kun nas nyon mongs pa las skyob par bstan te/ mtshams med pa lnga dang / mi dge ba bcu la sogs pa ni nyes par spyod pa zhes bya ste/ sangs rgyas par gyur na mtshams med pa lnga dang mi dge ba bcu la sogs pa mi mdzad pa las kyi kun nas nyon mongs pa las skyob pa yin no zhes bya ba'i don to/ /rga dang shi ba dag las kyang / /zhes bya bas tshe'i kun nas nyon mongs pa las skyob par ston te/ 'dir skye ba zhes bya ba smos su zin gyis kyang / ma skyes par rga ba dang 'chi ba mi srid pas skye ba yang don gyi shugs kyis bstan par rig par bya'o/ /sangs rgyas par gyur na skye ba dang rga ba dang na ba dang 'chi ba la sogs pa mi 'byung bas tshe'i kun nas nyon mongs pa las kyang skyob pa yin no zhes bya ba'i don to/ /tshigs su bcad pa 'dis ni bdag gi skyabs su bdag gyur par ston te/ de bas na sangs rgyas pa nyid skyabs yin par ston to/ /da ni sangs rgyas na sems gzhan la yang skyabs rnam pa lnga byed pas skyabs bla na med pa yin pa'i phyir ro/ /'tshe ba dag ni 'tshe ba thams cad dang / /zhes bya ba la sogs pa tshigs su bcad pa gcig smos so/ /de la 'tshe ba thams cad las skyob pa ni de bzhin gshegs pa'i byin gyi rlabs kyis long bas ni mig rnyed/ 'on pas ni sgra thos/ smyon pas ni dran pa rnyed/ nad rnam pa sna tshogs dang lo nyes ni zhi bar byas zhes bya ba la sogs te/ 'di ni gzhan gyi skyob pa rnam pa gcig go/ /ngan song dang ni zhes bya bas ngan song las skyob pa ston to/ /de yang de bzhin gshegs pa'i 'od btang bas/ sems can dmyal ba la sogs pa ngan song rnams kyi lus la reg nas ngan song gi sdug bsngal thams cad zhi bar byas te/ mtho ris su skye bar byas pa dang / ngan song du skye bar 'dod pa rnams la 'od des reg nas ngan song du mi skye bar byas te/ 'di ni gzhan skyob pa rnam pa gnyis so/ /thabs min dang zhes bya ba thabs ma yin pa las skyob pa bstan te/ mu stegs can gyi lta ba rnam pa sna tshogs thal ba la nyal bas thar pa dang mtho ris tshol ba dang / tsher ma na nyal bas thar pa dang mtho ris tshol ba dang brag kha nas mchong bas thar pa dang mtho ris tshol ba dag ni de las thar pa dang mtho ris thob par mi 'gyur bas na thabs ma yin pa zhes bya'o/ /thabs ma yin pa la zhugs pa'i mu stegs pa de dag lam ngan pa dor du bcug nas/ mtho ris kyi lam dang / dge ba bcu dang thar pa'i lam 'phags pa'i lam gyi yan lag brgyad la 'god de 'di ni gzhan skyob pa rnam pa gsum mo/ /'jig tshogs ni zhes bya bas 'jig tshogs la skyab pa ston te/ bdag dang bdag gi med pa'i phung po lnga la bdag dang bdag gir lta ba ni 'jig tshogs la lta ba'i sems can de dag la nyan thos dang / rang sangs rgyas kyi chos gang zag la bdag med pa bstan nas/ nyan thos kyi mya ngan las 'das pa la bkod pa ni 'jig tshogs las skyob pa zhes bya ste/ 'di ni gzhan skyob pa rnam pa bzhi pa'o/ /theg chung las zhes bya bas theg pa chung ngu las skyob pa bstan te/ ma nges pa'i rigs can dag nyan thos kyi theg par zhugs pa'am/ 'jug tu 'dod pa rnams de las bzlog nas theg pa chen po la 'god par byed pa ni theg pa las skyob pa zhes bya ste/ 'di ni gnas gzhan skyob pa rnam pa lnga'o/ /de'i phyir skyabs ni dam pa'o zhes bya ba ni sems can gzhan la yang skyabs rnam pa lnga byed pas na de'i phyir sangs rgyas su grub pas ni skyabs dam pa skyabs bla na med do zhes bya ba'i don to/ /de ni tshigs su bcad pa gsum pas skyabs de nyid dpe med pa dang / mchog tu gyur pa'i phyir 'jig rten dang 'jig rten las 'das pa'i phyir skyabs pas kyang skyabs bla na med pa yin no zhes gong du tshigs su bcad pa dang po dang gnyis par bstan pa'i don gnyis kyis bla na med pa'i don du bstan pa'i phyir/ sangs rgyas skyabs ni dpe med mchog yin te/ /zhes bya ba la sogs pa tshigs su bcad pa gcig smos so/ /sangs rgyas par gyur pa nyid bdag dang gzhan gyi gnas su gyur pas sangs rgyas kyi skyabs yin te/ sangs rgyas kyi skyabs dang skyabs 'di gnyis su 'dra'o zhes de dang bstun cing 'dra bar gzhal du rung ba 'jig rten gang na yang med pas na dpe med pa zhes bya'o/ /'jig rten pa dag ri la sogs pa la skyabs su 'gro ba dang / nyan thos dag mya ngan las 'das pa la skyabs su 'gro ba bas/ skyabs 'di dam pa yin pas na mchog ces bya ste/ de'i phyir na skyabs bla na med pa'o/ /ji ltar na bla na med pa'i phyir skye 'chi zhes bya ba smos te/ sangs rgyas par gyur na skye 'chi kun las srung bar byed do/ /de ci'i phyir zhe na/ sangs rgyas phan chad skye ba dang rga ba dang na ba la sogs pa mi 'byung ba'i phyir te/ 'dis ni tshe'i kun nas nyon mongs pa las skyob par bstan to/ /nyon mongs ba zhes bya ba ni/ sangs rgyas par gyur na nyon mongs pa las srung bar byed do/ /ngan song kun las zhes bya ba ni/ las kyi kun nas nyon mongs pa las srung bar byed do/ /ci'i phyir zhe na/ sangs rgyas phan chad mtshams med pa lnga dang mi dge ba bcu la sogs pa'i las mi byed pa'i phyir te/ 'dis ni las kyi kun nas nyon mongs pa las skyob pa bstan to/ /tshig de dag gis sangs rgyas nas bdag gi skyabs su bdag 'gyur bar bstan pa yin no/ /nga sangs rgyas na gzhan gyi skyabs su gyur pa yang yin par bstan pa'i phyir/ sna tshogs 'jigs 'gyur zhes bya ba la sogs pa smos te/ sangs rgyas 'jigs pa sna tshogs las kyang srung bar byed/ ci'i phyir zhe na/ de bzhin gshegs pa'i mthus/ long bas mig rnyed pa dang / 'on pas rna bas sgra thos pa la sogs pa bya ba'i phyir ro/ /'jig tshogs thams cad dang zhes bya ba la/ sangs rgyas na 'jig tshogs thams cad las srung bar byed do/ /ji lta zhe na/ lha dang mi la sogs pa bdag med pa bdag gir chags pa rnams la nyan thos dang rang sangs rgyas kyi theg pa chos gang zag la bdag med pa bstan nas mya ngan las 'das pa la bkod pa'i phyir ro/ /theg pa zhes bya ba la/ sangs rgyas par gyur na theg pa chung ngu las srung bar byed do/ /ji lta zhe na/ ma nges pa'i rigs can rnams theg pa rnam pa gnyis su zhugs pa dang / 'jug par 'dod pa rnams de las bzlog nas theg pa chen por bkod pa'i phyir ro/ /rnam mang sdug bsngal zhes bya ba la/ sangs rgyas par gyur na sdug bsngal rnam pa mang po las srung bar byed de/ ji lta zhe na/ de bzhin gshegs pas 'od bkye ba'i sgo nas sems can dmyal ba la sogs pa'i sdug bsngal zhi bar byas te/ mtho ris su skye bar byed pa dang / sems can dmyal bar skye bar 'gyur ba rnams la 'od kyis reg pas der skye bar mi 'gyur bar byas pa'i phyir ro/ /thabs med song zhes bya ba la/ sangs rgyas na thabs med par song ba rnams srung bar byed de/ ji lta zhe na/ thabs med pa ni mu stegs pa thal ba dang tsher ma la sogs pa la nyal ba'i sgo nas thar pa dang / mtho ris tshol bar byed pa ste/ de dag la thar pa'i lam byang chub kyi phyogs ston par byed pa dang / mtho ris kyi lam dge ba bcu ston par byed pa'i phyir ro/ /tshigs su bcad pa bzhi pas ni rgyu gang gis na sangs rgyas su grub pa de skyabs bla na med pa'i rgyu gang yin pa ston te/ skyabs bla na med pa'i rgyu yang rnam pa gnyis so/ /gang zhe na/ bdag gi don mthar thug pa dang / gzhan gyi don mthar thug pa'o/ /de ltar bdag dang gzhan gyi don mthar thug pas na rgyu des skyabs bla na med pa'i mthu dang ldan par 'gyur ba ston to/ /de la bdag gi don mthar thug pa'i dbang du byas nas/ sangs rgyas chos kyis yongs su rdzogs pa'i lus/ /zhes smos te/ nam sangs rgyas pa'i dus na sangs rgyas kyi chos stobs dang / mi 'jigs pa dang / ma 'dres pa dang / byang chub kyi phyogs la sogs pas sangs rgyas kyi chos ma 'dres pa dang ldan pa'i chos kyi sku dang / longs spyod rdzogs pa'i sku dang / sprul pa'i sku thob ste/ de bas na bdag gi don mthar phyin to/ /gzhan gyi don mthar thug pa la yang rnam pa gnyis te/ chos la sems can 'dul bar rig pa dang / snying rje mthar phyin pa'o/ /dam pa'i chos la sems can 'dul bar rig /ces bya bas chos la sems can 'dul bar rig pa bstan te/ dam pa'i chos la legs par bshad pa gsung rab yan lag bcu gnyis la sems can 'god cing 'dul bar bya ba'i thabs thugs su chud de/ 'dod chags can la ni/ mi gtsang ba bstan pas 'dul/ zhe sdang can la ni byams pa bstan pas 'dul/ gti mug can la ni rten cing 'brel te 'byung ba bstan pas 'dul ba thugs su chud pa'i phyir ro/ /'dis ni shes rab dang ldan par bstan to/ /'gro ba kun la snying brtses pha rol song / /zhes bya bas/ snying rje mthar phyin pa bstan te/ khams gsum pa'i sems can dus gsum gyis bsdus pa skye ba rnam pa bzhi nas skye ba rnams ni 'gro ba zhes bya ste/ de dag gi sdug bsngal bsal bar bya'o snyam du sems pa'i snying rje mthar phyin cing yongs su rdzogs par 'gyur ba ni/ snying rjes pha rol song zhes bya'o/ /yang na snying rje'i shugs kyis yon tan thams cad rdzogs par thob pa la snying brtses pha rol song zhes bya'o/ /yang na sems can la snying rje ba'i mthus mthar thug pa'i gnas sangs rgyas su grub pa'i snying rjes pha rol song zhes bya ste/ 'dis ni thabs dang ldan pa bstan to/ /de ltar byang chub sems dpa' thabs dang shes rab dang ni bdag gzhan gnyi ga skyob par nus pa thabs dang shes rab gnyis ni skyabs bla na med pa 'byung ba'i rgyu yin no zhes bya ba'i don to/ /sangs rgyas de 'dir skyabs kyi mchog tu dgongs/ /zhes bya ba la/ de ltar sangs rgyas par gyur na bdag gi don yang mthar thug gzhan gyi don yang mthar thug pas na sangs rgyas pa ni 'jig rten dang 'jig rten las 'das pa'i skyabs gzhan las kyang mchog tu gyur cing bla na med par byed pa yin no zhes bya ba'i don to/ /tshigs su bcad pa lnga pas ni dus ji srid cig tu sems can gyi skyabs byed pa dang / sems can ji snyed cig gi skyabs byed pa dang / gang gi phyir skyabs byed pa de don rnam pa gsum gyis bstan to/ /dus ji srid cig tu sems can gyi skyabs byed pa bstan pa'i phyir/ 'jig rten bar du zhes bya ba smos te/ nam mkha'i khams kyi mthar thug pa 'jig rten gyi khams kyi mtha' yang der thug go/ /'jig rten gyi khams kyi mthar thug pa sems can gyi khams kyi mtha' yang der thug go/ /sems can gyi khams kyi mtha' gar thug pa sangs rgyas bcom ldan 'das rnams kyi sems can gyi skyabs mdzad pa'i mtha' yang der thug go/ /don du nam mkha'i khams kyi mtha' yang thug pa med pa de bzhin du 'jig rten gyi khams kyi mtha' la yang thug pa med do/ /'jig rten gyi khams kyi mtha' la thug pa med pa de bzhin du sems can gyi khams kyi mtha' la yang thug pa med do/ /sems can gyi khams kyi mtha' la thug pa med pa bzhin du sangs rgyas bcom ldan 'das rnams kyi sems can bskyab pa'i mtha' yang thug pa med do/ /'khor ba'i mtha'i bar du skyabs mdzad ces bya ba'i don to/ /ji snyed cig gi skyabs mdzad ce na/ de'i phyir/ 'gro ba kun gyi zhes bya ba smos te/ rigs yod pa dang / rigs med pa dang / rigs ma nges pa la sems can kun gyi skyabs mdzad do zhes bya ba'i don to/ /sangs rgyas skyabs ni chen po ste/ /zhes bya ba la/ de ltar 'khor ba'i mtha'i bar du sems can kun gyi skyabs byed pas na sangs rgyas kyis sems can skyob pa ni 'jig rten pa'i skyabs dang nyan thos la sogs pa'i skyabs pas kyang skyabs mchog tu gyur pa dang / chen por gyur pa yin no zhes bya ba'i don to/ /gang gi phyir skyob ce na/ de'i phyir/ sdug bsngal 'byor pa thams cad ni/ /bzlog pa dang ni 'phel bar rig /ces bya ba smos te/ sems can rnams kyi sdug bsngal skye rga na 'chi la sogs pa'i sdug bsngal bzlog par bya ba dang / 'jig rten dang 'jig rten las 'das pa'i 'byor pa thams cad 'phel bar bya ba'i phyir skyabs mdzad do zhes bya ba'i don to/ /gnas yongs su gyur pa'i tshigs su bcad pa drug ste zhes bya ba la/ skyabs bla na med pa'i don bstan nas/ da ni gnas yongs su gyur pa'i don bstan pa'i phyir tshigs su bcad pa drug rtsom mo zhes bya ba'i don to/ /de la gnas zhes bya ba ni gzugs kyi phung po nas rnam par shes pa'i bar du phung po lnga la bya ste/ phung po de dag la yod pa'i nyon mongs pa dang / shes bya'i sgrib pa spangs nas chos kyi dbyings rnam par dag par gyur pa dang / rnam par mi rtog pa'i ye shes su gyur pa la gnas gzhan du gyur pa zhes bya'o/ /de la gzugs dang tshor ba dang 'du shes dang 'du byed de phung po bzhi dang / rnam par shes pa'i phung po las mig gi rnam par shes pa nas nyon mongs pa'i yid kyi bar du dag na chos kyi dbyings rnam par dag par 'gyur ro/ /kun gzhi rnam par shes pa dag na rnam par mi rtog pa'i ye shes su 'gyur ro/ /yang na gzugs dang / tshor ba dang / 'du shes dang / 'du byed dag dang / rnam par shes pa brgyad la yod pa'i stong pa nyid dag na chos kyi dbyings rnam par dag par 'gyur ro/ /rnam par shes pa brgyad las kun gzhi dag na me long lta bu'i ye shes su gyur to/ /nyon mongs pa'i yid dag na mnyam pa nyid kyi ye shes su 'gyur ro/ /yid kyi rnam par shes pa dag na so sor kun du rtog pa'i ye shes su 'gyur ro/ /mig nas lus kyi bar du rnam par shes pa lnga dag na bya ba grub pa'i ye shes su 'gyur te/ ye shes bzhi dang chos kyi dbyings rnam par dag pa lnga thob pa la gnas gzhan du gyur pa lnga zhes bya'o/ /gnas gzhan du gyur pa la tshigs su bcad pa drug gis bstan pa la tshigs su bcad pa dang po'i bsdus pa'i don ni mi mthun pa'i phyogs kyi sa bon dang bral ba dang / gnyen po'i phun sum tshogs pa dang ldan pas gnas gzhan du gyur pa ste/ mdor na don de bstan to/ /nyon mongs shes bya'i sgrib pa'i sa bon dus ring rtag ldan pa/ /zhes bya ba dang / gang la byang 'gyur zhes bya ba'i tshig gnyis su sbyar te/ sa bon ni bag chags la bya'o/ /nyon mongs pa'i sgrib pa'i sa bon ni nyon mongs pa'i sgrib pa'i bag chags so/ /shes bya'i sgrib pa'i sa bon ni shes bya'i sgrib pa'i bag chags so/ /dus ring zhes bya ba ni bag chags de dag kyang 'khor ba thog ma med pa'i dus nas bsags pa zhes bya ba'i don to/ /rtag ldan zhes bya ba ni bag chags de dag kyang sngon so so'i skye bo'i dus na 'ga' yang 'phags pa'i lam gyis ma spangs ma bcom zhes bya ba'i don to/ /'dis ni mi mthun pa'i phyogs kyi sa bon dang bral ba bstan to/ /bag chags de dag gnyen po gang gis spangs she na/ de'i phyir/ spong ba rgya che rnam pa kun gyis byang gyur pa/ /zhes bya ba smos te/ spong ba zhes bya ba ston to/ /de dag ji ltar spong bar byed ce na zhes bya ba ston te/ rgya che ba zhes bya ba ni sa dang po nas sa bcu pa man chad kyi 'jig rten las 'das pa'i ye shes kyi lam la rgya che ba zhes bya ste/ ye shes des spong bar byed ces bya ba'i don to/ /rnam pa kun gyis zhes bya ba ni sa re re la yang ye shes chen po'i chen po la sogs pa dgu dgu yod pas spong ngo zhes bya ba'i don to/ /gang la byang 'gyur ba zhes bya ba ye shes de dag gi gnyen po byas nas gang gi sems la nyon mongs pa dang / shes bya'i sgrib pa byang bar gyur na gnas gzhan du gyur pa thob par 'gyur na zhes bya ba'i don to/ /'dis ni gnyen po phun sum tshogs pa dang ldan pa bstan to/ /gnas gyur thob pa zhes bya ba la/ de ltar sgrib pa gnyis spangs pas ye shes bzhi dang chos kyi dbyings rnam par dag pa lnga thob pa ni gnas gyur pa thob pa zhes bya'o/ /sangs rgyas dkar po'i chos mchog yon tan ldan/ /zhes bya ba la/ de ltar sangs rgyas kyi sar chos lnga thob pa dang / stobs dang / mi 'jigs pa dang / ma 'dres pa la sogs pa'i yon tan phun sum tshogs pa rnyed par 'gyur bas na dkar po'i chos mchog gi yon tan ldan zhes bya ste/ nyan thos la sogs pa la yon tan de med pas na mchog ces bya'o/ /gong du sgrib pa gnyis spong bar byed pa ni 'jig rten las 'das pa'i ye shes kyi lam gyis spang ngo zhes bshad pa la ye shes kyi lam gnyis yod par bstan pa'i phyir/ rnam par mi rtog ye shes lam dag de thob phyir/ /zhes bya ba smos te/ shin tu rnam par dag pa'i rnam par mi rtog pa'i ye shes kyi lam thob pa dang /de'i phyis nas thob par shes bya mtha' dag yul du gyur pa'i dag pa 'jig rten pa'i ye shes kyi lam thob pas lam de gnyis kyi sgrib pa gnyis ma lus par spangs so zhes bya ba'i don to/ /de la shin tu rnam par dag pa rnam par mi rtog pa'i ye shes kyis chos thams cad nam mkha'i ngos bzhin du stong par mthong ngo / /de'i phyis nas thob pa shes bya mtha' yas pa yul du gyur pa/ dag pa 'jig rten pa'i ye shes kyis ni dus gsum gyis bsdus pa'i 'jig rten gyi khams kyi dngos po thams cad sgyu ma dang smig rgyu lta bur mthong ngo / /da ni tshigs su bcad pa gnyis la nyan thos dang rang sangs rgyas la yang gnas gzhan du gyur pa yod mod kyi de bzhin gshegs pa'i gnas gzhan du gyur pa ni de dag las kyang 'phags shing khyad zhugs par ston to/ /de bas na de bzhin gshegs pa de ni der bzhugs nas zhes bya ba la sogs pa'i tshigs su bcad pa gcig smos so/ /de la chos kyi dbyings ji ltar gnas pa de bzhin du thugs su chud pas de bzhin gshegs pa zhes bya ste/ de bzhin gshegs pa der zhugs zhes bya ba ni gnas gzhan du gyur pa'i zag pa med pa'i dbyings de brnyes thugs su chud nas zhes bya ba'i don to/ /ri dbang mtho steng bzhugs bzhin 'gro la gzigs/ /zhes bya ba ni ri'i dbang po ni ri rab ste/ sems can la la zhig ri rab kyi steng na gnas nas phyogs bcur bltas na nye ba yang mthong ngo / /ring ba yang mthong / bzang ba yang mthong / ngan pa yang mthong ba de bzhin du de bzhin gshegs pa rnams kyang nyan thos dang rang sangs rgyas rnams kyi gnas gzhan du gyur pa las 'phags pa de bzhin gshegs pa'i gnas gzhan du gyur pa mthon po de brnyes nas/ thugs rje chen pos sems can thams cad la gzigs so zhes bya ba'i don to/ /zhi bar mngon dga'i 'gro la'ang thugs rje can/ /srid la mngon dga'i 'gro la ci zhig smos/ /zhes bya ba la/ de ltar thugs rjes kun la gzigs nas nyan thos snying rje chen po med pas sems can gyi don spangs te bdag 'ba' zhig gi don du zhi ba mya ngan las 'das par zhugs pa de dag 'khor ba thog ma med pa nas nye bar gnyen du gyur pa'i sems can gyi don ma byas pa dang / shes b ya'i sgrib pa spangs pa thams cad mkhyen pa'i ye shes ma thob bo zhes de dag la yang thugs rje dgongs nas sems can phal pa 'jig rten gyi khams chos la mngon par dga' ba bdag gi don tsam yang byed mi nus pa sdug bsngal rnam pa mang pos rtag tu gzir cing 'dod pa lnga'i yon tan gyis 'khor ba'i sems can rnams la thugs brtse bar gyur pa lta smos kyang ci dgos te/ thugs rje 'byung zhes bya ba'i don to/ /khyad par ring ba'i 'jig rten ngan pa rnams la zhes bya ba la/ khyad par ring ba'i 'jig rten ni nyan thos dang rang sangs rgyas rnams de bzhin gshegs pa dang gnyis kyi bar na yon tan khyad zhugs par 'phags pa'i phyir ro/ /'jig rten ngan pa ni so so skye bo rnams te/ 'khor ba las 'das pa'i phyir ro/ /da ni tshigs su bcad pa gsum pas gnas gzhan du gyur pa ni yon tan phye na du yod pa'i yon tan gyi rab tu dbye ba ston to/ /de bas na/ 'jug dang rab 'jug mi 'jug gnas mi 'jug /ces bya ba la sogs pa tshigs su bcad pa gcig smos so/ /de bzhin gshegs pa'i gnas gzhan du gyur pa ni/ rtag tu'ang sems can gyi don 'ba' zhig mdzad de gzhan gyi don du 'jug pas na 'jug pa zhes bya'o/ /gnas gzhan du gyur pa de chos thams cad kyi mchog yin te/ mchog tu 'jug pas na rab tu 'jug ces bya ste/ 'jig rten pa'i chos thams cad bas kyang mchog tu gyur la nyan thos pa 'jig rten las 'das pa rnams kyi gnas gzhan du gyur pa bas kyang mchog tu gyur pa'i phyir ro/ /gnas mi 'jug ces bya ba la gnas ni gnas gzhan du gyur pa la bya ste/ kun nas nyon mongs pa'i rgyu rnam pa gsum la mi 'jug pas na gnas mi 'jug ces bya'o/ /kun nas nyon mongs pa'i rgyu rnam pa gsum ni yul nye bar gyur pa dang tshul bzhin ma yin pa la yid la byed pa dang / bag la nyal ma spangs pa'o/ /ldog dang zhes bya ba la/ gnas gzhan du gyur pa de kun nas nyon mongs pa rnams la yang mi 'jug /sdig pa mi dge ba rnams la yang mi 'jug ste/ bdag spyod pa la log pas na ldog pa zhes bya'o/ /kun la 'jug ces bya ba la/ dus kun du 'jug pas na kun 'jug ste/ lan cig gnas gzhan du gyur pa thob nas 'khor ba'i mtha'i bar du yang nyams par mi 'gyur ba'i phyir ro/ /yang na kun nas nyon mongs pa'i gnyen po'i chos kun la yang 'jug pas na kun 'jug ces bya'o/ /gnyis zhes bya ba la/ dang po nyid du mngon par byang chub pa ston pa la 'jug /mjug tu mya ngan las 'das pa ston pa la 'jug ste/ rnam pa gnyis ston pa la 'jug pas na gnyis 'jug ces bya'o/ /mi gnyis zhes bya ba la don du gnyis su mi 'jug ces bya ba'i don to/ /gnyis su mi 'jug pa ni 'khor bar yang mi 'jug /mya ngan las 'das par yang mi 'jug pa'i phyir ro/ /de la shes rab dang ldan pas 'dus byas kyi mtha' spangs pa'i phyir 'khor bar mi 'jug go/ /snying rjes 'dus ma byas spangs pas na mya ngan las 'das par yang mi 'jug go/ /mnyam dang zhes bya ba la/ nyon mongs pa thams cad spangs pa'i rnam par grol ba la ni nyan thos dang rang sangs rgyas dang sangs rgyas su tha dad pa med pas na mnyam du 'jug pa zhes bya'o/ /bye brag ces bya ba la/ shes bya'i sgrib pa spangs pa dang / stobs dang mi 'jigs pa la sogs pa'i yon tan rnams kyis ni nyan thos kyi gnas gzhan du gyur pa bas 'phags pas bye brag tu 'jug pa zhes bya'o/ /kun 'gro nyid ces bya ba la sogs sems can rnams la theg pa rnam pa gsum kun 'gro 'jug ces bya'o/ /de bzhin gshegs pa yongs su gyur pa 'dod/ /ces bya ba ni/ de bzhin gshegs pa'i gnas gzhan du gyur pa gong du bshad pa'i yon tan gyi bye brag dang ldan par 'dod do zhes bya ba'i don to/ /rab dang ldan pa'i phyir rgya cher 'jug pas na kun 'jug pa'o zhes bya ba la/ zag pa med pa'i chos dang ldan pas rab dang ldan pa zhes bya ba'am/ nyon mongs pa'i gnyen po thams cad kyi chos dang ldan pas rab dang ldan pa zhes bya ste/ de bas na gnyen po'i chos thams cad la 'jug pa'i rgya cher 'jug pa zhes bya'o/ /tshigs su bcad pa bzhi pas ni snga ma'i phyed kyi sangs rgyas kyi rang bzhin kun du song ba'i don mdor bstan/ phyi ma'i phyed kyis ni don de nyid bzlas te rgya cher bshad pa'i sgo nas kun du 'gro ba'i don nam mkha' dang mthun pas sangs rgyas kyi rang bzhin kun du song ste khyab par ston te/ de bas na/ ji ltar nam mkha' rtag tu kun song 'dod/ /de bzhin de yang rtag tu kun song 'dod/ /ces bya ba la sogs pa smos so/ /dper na nam mkha' 'di dus gsum du'ang bum pa dang snam bu la sogs pa dngos po kun du 'gro bar 'dod pa de bzhin du/ chos kyi dbyings zag pa med pa de'ang sems can kun gyi sems kyi rgyud la yod pa dang khyab par 'dod de zhes bya ba'i don to/ /'dir ni kun du khyab pa'i don mdor bstan pa'o/ /ji ltar nam mkha' rtag tu kun song 'dod/ /ces bya ba'i don de nyid rgyas par bstan pa'i phyir/ ji ltar nam mkha' gzugs yul kun du song / /zhes bya ba smos te/ dper na nam mkha' 'di gzugs kyi rnam pa ring po dang / thung ngu dang / dkar po dang / dmar po la sogs pa kun la khyab pa de bzhin du/ chos kyi dbyings kyis kyang kun la khyab bo zhes bya ba'i don to/ /de bzhin de yang rtag tu kun song 'dod/ /ces bya ba'i don de nyid rgya cher bstan pa'i phyir/ de bzhin de yang sems can tshogs kun song / /zhes bya ba smos te/ nam mkha' dang 'dra bar zag pa med pa'i chos kyi dbyings des kyang sems can thams cad kyi sems kyi rgyud la khyab bo zhes bya ba'i don to/ /sangs rgyas la sems can thams cad bdag nyid du nye bar 'gro ba yongs su rdzogs pa las rig par bya'o zhes bya ba la sems can gyi tshogs kun song ba zhes bya ba'i don to/ /sangs rgyas ni chos kyi dbyings kyi rang bzhin yin la/ sa dang por chos kyi dbyings thams cad du 'gro ba'i mtshan nyid rtog pa na bdag dang sems can du sems mnyam pa nyid thob pa dang / bdag gang yin pa sems can yang de yin la/ sems can gang yin pa bdag kyang de yin no zhes khong du chud do/ /mnyam pa nyid khong du chud pa de sa bcu rim gyis bsgoms nas sangs rgyas kyi sa'i dus na sems can thams cad dang bdag nyid khong du chud pa yongs su rdzogs pa sems can gyi tshogs thams cad du song zhes bya'o/ /nye bar 'gro ba zhes bya ba'i don ni mnyam pa nyid du khong du chud ces bya ba'i don to/ /brgal ba/ gal te chos kyi dbyings de rtag tu yod la sems can kun la yang khyab na sems can rnams kyis ci'i phyir chos kyi dbyings ma rtogs shing sangs rgyas ma mthong ngo zhe na/ de'i lan du tshigs su bcad pa lnga pa rtsom ste/ tshigs su bcad pa lnga pa'i bsdus pa'i don ni chos kyi dbyings de thams cad du song yang snod du ma gyur pa'i sems can rnams kyis sangs rgyas mi mthong bar dpe dang bcas par ston te/ dpe bstan pa'i phyir/ ji ltar chu yi snod chag na/ /zla ba'i gzugs brnyan mi snang bzhin/ /zhes bya ba smos te/ dper na chu med pa'i snod du yang zla ba'i gzugs brnyan mi 'byung la snod chag pa'i nang du yang zla ba'i gzugs brnyan mi 'byung ste 'di ni dpe'o/ /don bstan pa'i phyir/ de bzhin sems can ngan pa la/ /sangs rgyas gzugs ni mi snang ngo / /zhes bya ba smos te/ de dang 'dra bar sems can gang gi sems kyi rgyud chu'i snod dang 'dra ba la bsod nams dang ye shes kyi chus ma bkang ba dang / /'dod chags dang zhe sdang la sogs pa'i nyon mongs pa'i tshogs dang / sdig pa mi dge ba'i las byas pas sems kyi rgyud snod dang 'dra ba snod chag pa lta bur sems nyams par byas la/ snod chag pa lta bu'i sems can ngan pas bdag la sangs rgyas kyi rang bzhin yod kyang mi mthong ngo zhes bya ba'i don to/ /tshigs su bcad pa drug pa'i bsdus pa'i don ni sangs rgyas mthong bar gyur pa'i bsod nams dang ye shes kyi tshogs 'di bsags pa/ sangs rgyas kyis 'dul ba'i gdul bya yod na/ sangs rgyas 'jig rten du skye bas na de dag gis mthong bar 'gyur la/ sangs rgyas kyis gdul ba'i skal ba can rnams btul nas dka' ba med par gyur na mya ngan las 'da' bas de dag gis mi mthong ba dpe dang bcas par bstan pa'i phyir tshigs su bcad pa rtsom ste/ dpe bstan pa'i phyir smras pa/ ji ltar me ni gzhan du 'bar/ /gzhan du yang ni zhi bar 'gyur/ /zhes bya ba smos te/ gzhan du na zhes bya ba ni/ me dang shing yod pa'i gnas la snyegs te/ dper na me 'di dag gang na me dang shing yod pa'i gnas na ni 'bar gyi/ gnas gang na me dang shing med par ni mi 'bar bas gzhan du yang zhi bar 'gyur zhes te 'di ni dpe'o/ /don bstan pa'i phyir/ snang ba dang ni mi snang ba/ /sangs rgyas la yang de bzhin shes/ /zhes bya ba smos te/ dper na me shing yod pa'i gnas ni 'bar/ shing med pa'i gnas ni mi 'bar ba de bzhin du sangs rgyas kyang de dang 'dra bar shes par bya ste/ ji lta zhe na/ sems can gang gi sems kyi rgyud la bsod nams dang ye shes kyi tshogs kyi shing spungs pa de dag ni sangs rgyas kyis gdul bar bya ba'i sems can yin pas gnas der sangs rgyas mngon par sangs rgyas par ston pas sems can gyis mthong ba'i phyir snang ba zhes bya'o/ /sangs rgyas kyis gdul bar bya ba'i skal ba can rnams ni btul nas sangs rgyas mthong ba'i skal ba med na sangs rgyas yongs su mya ngan las 'da' bas na de dag gis mi mthong ba'i phyir mi snang ba zhes bya'o/ /sangs rgyas bya ba lhun gyis grub pas rgyun mi 'chad pa la tshigs su bcad pa bzhi ste zhes bya ba la/ zag pa med pa'i dbyings kyi mtshan nyid bshad nas/ da ni sangs rgyas rnams kyi phrin las kyi mtshan nyid tshigs su bcad pa bzhi bstan to/ /de la 'phags pa nyan thos dag bdag gi don gyi las byed pa na yang 'di ltar bya'o snyam du sems na brtsams pa dang 'bad pa med pas na lhun gyis grub pa ma yin no/ /phung po lhag ma ma lus pa'i mya ngan las 'das pa'i dbyings su zhugs pas na/ bya ba thams cad rgyun chad pas na rgyun mi chad pa ma yin no/ /de bzhin gshegs pa'i phrin las de las khyad zhugs pa ste/ dgongs pa dang btsal ba dang 'bad pa med par 'gyur bas na lhun gyis grub pa'o/ /bdag dang sems can gyi don du 'khor ba'i mtha' dang sems can gyi mtha' bar du mdzad pas rgyun mi 'chad pa'o/ /de la tshigs su bcad pa dang po dang gnyis pa'i bsdus pa'i don ni rnga ma brdungs pa'i sgra dang / nor bu'i mthu dang mthun pas sangs rgyas kyi phrin las lhun gyis grub par mdzad pas de dpe bstan to/ /rnga'i dpe bstan pa'i phyir/ ji ltar rnga dag ma brdungs par/ /sgra ni kun du 'byung ba ltar/ /zhes bya ba smos te/ dper na sems can gyi bsod nams las byung ba'i rnga dang shing bu dang lag pas ma brdungs par yang 'dus byas thams cad ni mi rtag pa'o/ /zag pa dang bcas pa thams cad ni sdug bsngal ba'o/ /chos thams cad ni bdag med pa'o/ /zhi ba ni mya ngan las 'das pa'o zhes bya ba la sogs pa'i sgra 'byung ba ltar zhes bya ba'i don to/ /brgya byin lha'i dbang po'i gnas nas brgya byin gyi bsod nams las byung ba'i rnga ni de nam brgya byin 'dod pa lnga'i yon tan la 'jug pa na sus kyang ma brdungs par 'dod pa lnga la dga' bar 'gyur ba dang / rjes su mthun par sgra 'byung ngo / /nam brgya byin 'dod pa lnga'i yon tan la ldog par gyur pa na sus kyang ma brdungs par 'dod pa'i yon tan lnga las phyir ldog par 'dod pa dang rjes su mthun pa'i sgra 'byung ste/ dpe dang 'dra bar zhes bya ba'i don to/ /don bstan pa'i phyir/ de bzhin rgyal ba zag med par/ /bshad pa dag ni 'byung bar 'gyur/ / zhes bya ba smos te/ dpe de dang 'dra bar de bzhin gshegs pa rnams zag pa med pa'i dbyings la bzhugs shing sems can gyi don du chos bshad pa rnam pa sna tshogs mdzad pa yang chos bshad par bya'o snyam dgongs pa mi mnga' zhing 'bad pa dang btsal ba med par yang lhun gyis grub pa nyid du chos bshad pa 'byung ngo zhes bya ba'i don to/ /lhun gyis grub par sems can gyi don mdzad pa nor bu'i dpe bstan pa'i phyir/ ji ltar nor bu 'bad med par/ /rang gi 'od ni bstan pa ltar/ /zhes bya ba smos te/ dper na nor bu rin po che la sogs pa nor bu rnams las 'od byung bas na nor bu 'di ltar bdag gis 'od 'byung bar bya'o snyam du bsam pa dang / 'bad rtsol med par yang 'od snang ba de bzhin du zhes bya ba'i don to/ /don de bstan pa'i phyir/ de bzhin sangs rgyas rtog med par/ / mdzad pa dag ni rnam par ston/ /zhes bya ba smos te/ de dang 'dra bar de bzhin gshegs pa rnams sems can gyi don du sku dang gsung dang thugs kyi sprul pa ston pa na bdag gis sprul pa 'di lta bu dag bya'o snyam du dgongs pa dang / 'bad rtsol med par lhun gyis grub pa nyid du sku dang gsung dang thugs kyi sprul pa dag 'byung ba ston te/ 'dis ni sangs rgyas kyi bya ba lhun gyis grub par bstan to/ /tshigs su bcad pa gsum pa dang bzhi pas ni sangs rgyas kyi mdzad pa mi 'chad par nam mkha'i dpe bstan te/ dpe bstan pa'i phyir smras pa/ ji lta bur na nam mkha' la/ /'jig rten byed pa mi 'chad snang / /zhes bya ba smos te/ 'jig rten gyi byed pa ni 'gro ba dang 'dug pa dang nyal ba la sogs pa'o/ /dper na nam mkha'i dbyings de la kha cig tu ni 'jig rten 'gro bar snang / kha cig tu 'jig rten gnas par snang ba la sogs pa 'jig rten gyi bya ba rgyun mi 'chad par 'byung ngo zhes bya ba'i don to/ /don de bstan pa'i phyir smras pa/ de bzhin zag med dbyings na yang / /rgyal ba'i bye brag rgyun mi 'chad/ /ces bya ba smos te/ de dang 'dra bar de bzhin gshegs pa rnams zag pa med pa'i chos kyi dbyings rnam par dag pa la gnas na yang sems can gyi don du sku dang gsung dang thugs sprul pa'i phrin las rgyun mi 'chad par 'byung ngo zhes bya ba'i don to/ /nam mkha' la ni bya ba dag/ /rtag tu 'bri zhing mngon par 'byung / /zhes bya ba la/ dper na nam mkha'i dbyings 'di la sems can sems can ma yin pa'i bya ba rtag tu 'bri ba dang / rtag tu mngon par 'byung ste/ kha cig tu ni phyi'i dngos po nags tshal la sogs pa mes tshig cing med par gyur pa dang / nang gi dngos po sems can la sogs pa 'chi bar yang snang bas na 'bri bar 'byung ngo / /nam mkha'i phyogs kha cig tu phyi'i dngos po nags la sogs pa skye ba dang / nang gi dngos po sems can dag kyang skye bas na mngon par snang ngo zhes bya ba'i don to/ /de bzhin zag med dbyings na yang / /sangs rgyas phrin las skye zhing 'bri/ /zhes bya ba la/ de 'dra bar de bzhin gshegs pa rnams zag pa med pa'i dbyings na bzhugs pa na/ sangs rgyas kyi skye bar 'gyur ba yang snang / 'bri bar 'gyur ba yang snang ste/ ji ltar zhe na/ nam sems can skal ba yod pa'i dus na ni sprul pa'i skus mngon par sangs rgyas pa la sogs pa ston pas na skye bar snang ngo / /skal ba med par gyur pa la mya ngan las 'das pas na 'bri bar yang snang ngo / /'dis ni sangs rgyas kyi mdzad pa mi snang bar 'chad pa bstan to/ /zag pa med pa'i dbyings zab pa'i tshigs su bcad pa bcu drug go zhes bya ba la/ sangs rgyas kyi phrin las lhun gyis grub pa dang rgyun mi 'chad par bstan nas/ da zag pa med pa'i dbyings zab pa bstan pa'i phyir tshigs su bcad pa bcu drug rtsom mo zhes bya ba'i don to/ /de zag pa med pa'i dbyings zab pa yang rnam pa gsum ste/ mtshan nyid zab pa dang / gnas pa zab ba dang / las zab pa'o/ /mtshan nyid zab pa la yang rnam pa bzhi ste/ rnam par dag pa'i mtshan nyid dang / bdag gi mchog tu gyur pa'i mtshan nyid dang / /lung du ma bstan pa'i dngos po'i mtshan nyid dang / rnam par grol ba'i mtshan nyid do/ /snga ma phyi mar khyad med kyang / /sgrib pa thams cad dri ma med/ /dag pa ma yin yang dag min/ /sangs rgyas de bzhin nyid du 'dod/ /ces bya bas rnam par dag pa'i mtshan nyid bstan te/ sngon kun nas nyon mongs pa'i rang bzhin yin pa las phyis lam bsgoms te/ dri ma med par gyur pa ni dag pa zhes bya'o/ /snga ma ni so so'i skye bo'i dus so/ /phyi ma ni mngon par sangs rgyas pa'i dus la bya ste/ sangs rgyas kyi chos kyi sku ni de bzhin nyid stong pa nyid kyi rang bzhin yin par 'dod de/ stong pa nyid ni so so'i skye bo'i dus na yang stong pa nyid dang rang bzhin gyis 'od gsal ba'i rang bzhin yin/ phyi ma ste mngon par sangs rgyas pa'i dus na yang stong pa dang rang bzhin gyis 'od gsal ba'i rang bzhin yin pas dag pa'i rang bzhin du khyad par med de de la sbyang du med pas na dag pa med pa yin no/ / 'on kyang mngon par rdzogs par sangs rgyas pa'i dus na lam bsgoms pa'i mthus nyon mongs pa'i sgrib pa dang / shes bya'i sgrib pa glo bur gyi dri ma med par gyur te/ phyis dag par 'gyur bas na ma dag par yang ma yin no zhes bya ba'i don to/ /tshigs su bcad pa gnyis pas ni zag pa med pa'i dbyings na sangs rgyas rnams bdag gi mchog tu gyur pa ston te/ ci'i phyir bdag gi mchog tu gyur to zhe na/ de'i phyir/ bdag med pa'i mchog thob pa'i phyir zhes bya ba smos te/ bdag med pa'i mchog ni gang zag la bdag med pa dang / /chos la bdag med pa ste/ zag pa med pa'i dbyings na sangs rgyas rnams bdag med pa gnyis kyi mchog gi bdag nyid dang / rang bzhin du gyur pas na bdag gi mchog tu gyur par rnam par gzhag go/ /de la bdag ces bya ba'i sgra 'di ni skabs kha cig tu mu stegs pas yongs su brtags pa'i bdag nyid la yang bya bar 'dren te/ 'di ltar bdag dang sems can dang srog ces bya ba la sogs pa'o/ /bdag ces bya ba'i sgra 'di ni skabs kha cig tu chos kyi rang bzhin la yang bya bar 'dren te/ me ni dro ba'i mtshan nyid ces bya ste/ dro ba'i rang bzhin zhes bya ba'i don to/ /sa sra ba'i bdag nyid ces bya ba bshad na/ sra ba'i rang bzhin zhes bya ba'i don to/ /'di'i skabs bdag ces bya ba'i sgra rang bzhin gyi don du drang ste/ sangs rgyas rnams ni bdag med pa'i rang bzhin du gyur pas bdag gi mchog thob pa zhes bya'o/ /de la bdag med pa'i mchog gang yin zhe na/ de'i phyir/ stong pa nyid ni rnam par dag pa zhes bya ba smos te/ nam gang zag med pa'i stong pa dang / chos dngos po med pa'i stong pa gzung 'dzin gyi dri ma las dag par gyur te/ stong pa dag par de thob na bdag med pa'i mchog thob pa zhes bya'o/ /don de nyid bstan pa'i phyir/ sangs rgyas dag pa'i bdag thob pas/ /bdag nyid chen po bdag tu gyur/ /ces bya ba smos te/ zag pa med pa'i dbyings na stong pa nyid rnam par dag pa thob nas/ sangs rgyas rnams kyis bdag med pa'i mchog thob par gyur pas/ de'i tshe na sangs rgyas rnams bdag nyid chen po'i bdag nyid du gyur pa zhes bya'o/ /de ltar bdag nyid chen po'i bdag tu gyur pas na zag pa med pa'i dbyings las bdag gi mchog tu gyur par rnam par gzhag ste/ 'dis ni bdag gi mchog gi mtshan nyid bstan to/ /bdag gi dpe med pa'i mchog gi bdag nyid kyi phyir ro zhes bya ba la gang zag la bdag med pa dang chos la bdag med pa gnyis ni bdag med pa'i chos mchog ces bya'o/ /de'ang nam gzung 'dzin gyi dri ma las dag par gyur na bdag med pa'i mchog tu gzhag go zhes bya ba'i don to/ /de yang ngo bo nyid kyi don du sangs rgyas rnams kyi bdag go zhes bya ba'i don to/ /bdag gi mchog thob bdag med pa'i/ /zhes bya ba'i bdag gi sgra ni 'di'i skabs su ngo bo nyid kyi don la bya ste/ sangs rgyas rnams bdag med pa'i ngo bo nyid du gyur pas bdag gi mchog thob pa yin no zhes bya ba'i don to/ /de rnam par dag pas bdag med pa'i bdag gi mchog dag pa/ sangs rgyas rnams kyis thob par 'gyur/ /zhes bya ba la/ zag pa med pa'i dbyings na bdag med pa gnyis rnam par bdag nyid du sangs rgyas rnams gyur pas na bdag med pa'i bdag gi mchog dam pa sangs rgyas kyis thob bo zhes bya ba'i don to/ /da sangs rgyas shi nas 'byung bar 'gyur ram sangs rgyas shi nas 'byung bar mi 'gyur ro zhes dri ba la lung bstan du med par bstan pa'i phyir/ dngos min dngos po med min te/ /zhes bya ba la sogs pa tshigs su bcad pa gsum pa smos te/ de la zag pa med pa'i dbyings nas sangs rgyas rnams ni dngos po yod pa yang ma yin dngos po med pa yang ma yin te/ ci'i phyir zhe na/ sangs rgyas ni chos kyi sku yin la/ chos kyi sku ni stong pa nyid yin pas stong pa nyid la ni kun du brtags pa'i gang zag gi dngos po yang med/ kun du brtags pa'i chos kyi dngos po yang med pa'i phyir dngos po yod pa ma yin pa'o/ /yongs su grub pa'i rang bzhin ni yod pa ma yin la/ kun brtags kyi chos dang gang zag gi ri bong gi rwa bzhin du med pas na de'i tshe na yod par mi gzhag go/ /dngos po med pa yang ma yin te/ de bzhin nyid yongs su grub pa'i mtshan nyid de'i tshe yod pa'i phyir ro/ /de'i phyir sangs rgyas nyid ces brjod/ /zhes bya ba la gong du bshad pa ltar na sangs rgyas de dngos po yod pa yang ma yin pa dngos po med pa yang ma yin par brjod do zhes bya ba'i don to/ /de'i phyir sangs rgyas de bzhin 'dri/ /lung du mi bstan tshul du rig /ces bya ba la/ de ltar sangs rgyas yod pa yang ma yin med pa yang ma yin pas sangs rgyas shi nas 'byung bar 'gyur ram/ sangs rgyas shi nas mi 'byung ngo zhes 'dri ba la/ sangs rgyas shi nas 'byung bar 'gyur ba yin/ sangs rgyas shi nas mi 'byung bar 'gyur ba yang ma yin zhes lung du mi bstan pa'i tshul du rig par bya'o/ /ji lta zhe na/ sangs rgyas shi nas 'byung bar 'gyur ba ma yin te/ kun brtags kyi bdag dang / chos kyi mtshan nyid du mi 'byung ba'i phyir ro/ /sangs rgyas shi nas 'byung bar 'gyur ba yang ma yin te/ yongs su grub pa'i mtshan nyid du 'byung ba'i phyir ro/ /'dis ni lung du ma bstan pa'i nyon mongs pa'i mtshan nyid du bstan to/ /ji ltar mig la rab rib dang / /lcags la tsha ba zhi ba ltar/ /sangs rgyas sems dang shes rab la/ /yod dang med pa mi brjod do/ /zhes bya ba la/ dper na mig la rab rib zhi ba de yod pa/ /zhes kyang mi brjod/ med pa zhes kyang mi brjod/ ji ltar yod pa zhes kyang mi brjod ce na/ rab rib zhi ba dang med pa dang 'gag par gyur pa de rab rib kyi dngos por gyur pa ma yin pa'i phyir te/ dper na rims nad kyi tsha ba dang bral na/ nam bral ba'i dus na rkang lag na bar byed pa'i tsha ba de'i dus na med pa'i phyir ro/ /med pa zhes kyang brjod de/ gang gi phyir mig dag pa yod pas mig gi las gzugs la blta ba'i bya ba byed pa'i phyir te/ gal te de'i tshe thams cad du med par gyur na ni rab rib bzhin du mig kyang med par gyur pas mig gi bya ba gzugs la blta ba la sogs pa'i bya ba byed mi nus par 'gyur ro/ /de yang rims nad byang ba dang 'dra ste/ rims nad byang ba ni rims kyi tsha ba med kyang tsha ba dang bral ba'i lus bde ba phyi na yod pa bzhin no/ /de bzhin du lcags la tsha ba zhi ba yang yod pa zhes kyang mi brjod/ med pa zhes kyang mi brjod de/ ci'i phyir yod pa ces mi brjod ce na/ lcags bsil bar gyur pa na tsha ba'i dngos po med pa'i phyir te/ rims kyi tsha ba med pa bzhin no/ /med pa zhes kyang mi brjod de/ lcags kyi bsil ba phyi na yod pas gang gi phyir bya ba rnam pa sna tshogs byed pa'i phyir ro/ /gal te de'i tshe thams cad du med par gyur na ni lcags kyang med par gyur pas lcags kyi bya ba byed pa yang med par mi 'gyur te/ de yang rims med kyang rims dang bral ba'i lus bde ba phyi na yod pa bzhin no/ /de bzhin du sangs rgyas kyi sems lcags dang 'dra ba la/ 'dod chags kyi me tsha ba dang 'dra ba zhi ba dang / sangs rgyas kyi ye shes mig dang 'dra ba yang ma rig pa rab rib dang 'dra ba zhi ba ni yod pa zhes kyang mi brjod/ med pa zhes kyang mi brjod do/ / ci'i phyir yod pa zhes kyang mi brjod ce na/ nam sems rnam par grol ba dang / shes rab rnam par grol ba'i dus na 'dod chags kyi tsha ba dang / ma rig pa'i rab rib med pa'i phyir ro/ /med pa zhes kyang mi brjod de/ sems rnam par grol ba dang / shes rab rnam par grol ba phyin yod pa'i phyir ro/ /de la 'dod chags dang bral na ni sems rnam par grol bar 'gyur te/ mya ngan las 'das pa thob ces bya ba'i don to/ /ma rig pa dang bral na ni shes rab rnam par grol bar 'gyur te/ thams cad mkhyen pa'i ye shes thob ces bya ba'i don to/ /de med pas skyed pa yin pa'i phyir ro/ /med pa ma yin pa ste zhes bya ba la/ 'dod chags med pa las byung ba ni sems rnam par grol ba ma rig pa med pa las byung ba ni shes rab rnam par grol ba ste/ de gnyis dang bral ba'i bde ba'i mtshan nyid ni med pa ma yin no zhes bya ba'i don to/ /de la rnam par grol ba'i mtshan nyid ni 'di lta ste/ mthong ba dang bsgom pas spang bar bya ba'i nyon mongs pa dang bral ba ni sems rnam par grol ba'o/ /rnam par grol ba la rnam par grol ba nyid du yang dag pa ji lta ba bzhin du shes pa ni shes rab rnam par grol ba'o/ /'dis ni rnam par grol ba'i mtshan nyid bstan to/ /de la 'di yan chad zab pa bstan pa la mtshan nyid zab pa la tshigs su bcad pa bzhis bstan te/ 'di yan chad kyi tshigs su bcad pa gsum gyis ni de bzhin gnas gzhan du gyur pa bstan to/ /ji ltar mig la rab rib dang / /zhes bya ba'i tshigs bcad gcig gis ni gnas ngan len gyi lam gnas bzhin du gyur pa bstan te/ sems gnas gzhan du gyur te zhes bya ba'i don to/ /de la de bzhin gshegs pa rnams zag pa med pa'i dbyings la bzhugs pa'i tshe/ sku gcig pa zhes bya ba'am/ tha dad pa zhes bya zhe na/ de'i phyir/ sangs rgyas rnams kyi dri med dbyings/ /gcig min rnam mang ma yin te/ /zhes bya ba la tshigs su bcad pa gcig smos so/ /de bzhin gshegs pa rnams zag pa med pa'i dbyings chos kyi dbyings la bzhugs pa'i dus la sku gcig pa zhes kyang mi bya/ sku rnam pa mang ba ste tha dad pa du ma zhes kyang mi bya'o zhes bya ba'i don to/ /ji ltar tha dad pa zhes kyang mi bya zhe na/ de'i phyir/ nam mkha' lta bur lus med cing / /zhes bya ba smos te/ gang la lus med pa dang / bdag tu 'dzin pa med pa de dag la ni lus tha dad pa gzhag par mi nus kyi/ gang la lus yod pa dang / bdag tu 'dzin pa yod pa de la ni lha sbyin gyi lus 'di ni mchod sbyin gyi lus tha dad par gzhag par nus so/ /dper na nam mkha' lus med pa la bdag tu 'dzin pa med pas nam mkha' la tha dad par gzhag par mi nus pa de bzhin du chos kyi dbyings la bzhugs pa'i dus na yang de bzhin gshegs pa'i chos kyi sku la lus med pa dang / bdag tu 'dzin pa med pas na tha dad pa du mar gzhag ste/ thams cad chos kyi dbyings kyi mtshan nyid du ro gcig par gnas pa'i phyir ro/ /ji ltar gcig pa ma yin zhe na/ de'i phyir/ sngon gyi lus rjes su 'brang ba'i phyir zhes bya ba smos te/ chos kyi dbyings la bzhugs pa'i tshe na sku rnam pa du mar gzhag pa med mod kyi/ mos pas spyod pa'i sa nas sa bcu dag la/ byang chub sems dpa'i spyod pa la 'jug cing spyod pa na byang chub sems dpa'i so so'i sku du ma yod pas na sku gcig pa kho nar yang mi gzhag go/ /'dis ni gnas pa zab pa bstan te/ gcig dang du ma ma yin pa'i mtshan nyid du gnas pa'i phyir ro/ /las zab pa ni byang chub kyi phyogs la sogs pa rin po che'i gnas kyi las dang / sems can yongs su smin par byed pa'i las dang / mthar thug par 'gro ba'i las dang / chos bstan pa'i las dang / sprul pa la sogs pa zhes bya ba'i las dang / ye shes 'jug pa'i las dang / rnam par mi rtog pa'i las dang / sna tshogs kyi rnam pa'i ye shes kyi las dang / ye shes mi 'jug pa'i las dang / rnam par grol ba mtshungs pa la ye shes kyi bye brag gi las dang / las de rnams bstan te/ stobs sogs sangs rgyas chos rnams kyis/ /byang chub rin chen 'byung gnas 'dra/ /zhes bya ba la/ nyon mongs pa dang shes bya'i sgrib pa spangs nas/ mngon par byang chub pa ni rin po che'i 'byung gnas dang 'dra ste/ ji ltar zhe na/ dper na rin po che'i 'byung gnas nas/ rin po che rnam pa sna tshogs 'byung ba de bzhin du/ mngon par byang chub pa las kyang stobs dang mi 'jigs pa dang / ma 'dres pa dang / byang chub kyi phyogs kyi chos rin po che 'byung ba'i phyir te/ 'di ni byang chub kyi phyogs la sogs pa rin po che'i gnas kyi las bstan to/ /'gro ba'i dge ba'i lo tog gi/ /sprin chen dang yang 'dra bar rig /ces bya ba la/ sprin chen po las char bab nas 'bru rnam pa sna tshogs smin par byed pa de bzhin du sems can rnams kyi sems kyi rgyud la pha rol tu phyin pa rnams kyis dge ba'i lo tog skye ba'i rgyu byed pas na/ zag pa med pa'i dbyings ni sprin chen po dang 'dra bar rig par bya ste/ 'dis ni sems can yongs su smin pa'i las bstan to/ /bsod nams ye shes rab rdzogs pas/ /zla ba nya ba 'dra bar rig ces bya ba la/ zla ba nya ba'i dus na/ zla ba cha shas rdzogs pas da rdzogs par bya ba cung zad kyang med de/ rnam pa thams cad du rdzogs pa de bzhin du mngon par sangs rgyas pa'i dus na yang bsod nams dang ye shes kyi tshogs ma rdzogs pa cung zad kyang med de/ bsod nams kyi tshogs thams cad rdzogs ye shes kyi tshogs thams cad rdzogs pas zla ba nya ba dang 'dra ste/ 'dis ni mthar 'gro ba'i las bstan to/ /ye shes snang ba byed pa'i phyir/ /nyi ma chen po 'dra bar rig /ces bya ba la/ de la nyi ma la ni che chung med de/ thams cad kyang gling bzhi snang ba tsam du zad do/ /de la nyi ma chen po zhes bya ba yang ni yod par mi srid mod kyi/ 'on kyang sgro btags nas thams cad du byas te/ gang stong gsum gyi stong chen po'i 'jig rten gyi khams thams cad du snang bar byed pa la nyi ma chen po zhes bya ba ste/ dper na nyi ma chen pos stong gsum kun du snang bar byed pa de bzhin du/ de bzhin gshegs pa rnams kyi ye shes las kyang dam pa'i chos bshad pa'i 'od zer byung nas phyogs bcu'i sems can thams cad kyi sems kyi rgyud la snang bar byed pas na nyi ma chen po dang 'dra ste/ 'dis ni chos bstan pa'i las bshad do/ /nyi ma'i dkyil 'khor 'od zer ni/ /zhes bya ba la/ nyi ma'i dkyil 'khor las byung ba'i 'od zer la nyi ma'i dkyil 'khor gyi 'od zer zhes bya ba ste/ 'od zer rnam pa gnyis su 'jug ste/ 'dres pa gcig tu 'jug pa dang bya ba gcig tu 'jug pa'o zhes bya ba'i don to/ /'dres pa tshad med pa de bzhin du zhes bya bas 'dres pa gcig tu 'jug pa bstan te/ 'dres pa gcig ces bya ba'i don to/ /'od zer de dag dang po yang nyi ma'i dkyil 'khor las byung ba la/ byung ba'i tshe na yang dus gcig tu byung zhing tha dad pa mi 'dra ba med par 'byung la/ rten kyang nyi ma'i dkyil 'khor la brten cing 'od zer thams cad snang bar byed par 'od zer gcig gis snang ba'i las byas pa na 'od zer tshad med pa gzhan thams cad kyi snang ba'i las kyang 'od zer gcig po des byas pa yin te/ 'dres pa'i las byas pa'i don ni de'o/ /rtag tu bya ba gcig 'jug cing / /zhes bya ba la/ bya ba gcig tu 'jug par bstan te/ bya ba gcig tu 'jug pa'i don ni 'od zer gcig gis 'dam la sogs pa skems par byed pa dang / lo tog la sogs pa smin par byed pa'i las byed pa de bzhin du/ 'od zer gnyis pa dang gsum pa la sogs pa yang gzhan mi byed kyi/ skems pa dang smin par byed pa'i las byed par zad pas na bya ba gcig go/ /de bzhin zag pa med dbyings na/ / zhes bya ba la/ de dang 'dra bar sangs rgyas bcom ldan 'das rnams ni zag pa med pa'i dbyings na bzhugs pa'i tshe na yang de bzhin gshegs pa rnams 'dres pa gcig tu 'jug pa dang / bya ba gcig tu 'jug go zhes bya ba'i don to/ /sangs rgyas rnams kyi tshad med 'dres pa gcig tu 'jug pa ston te/ de bzhin du de bzhin gshegs pa'i phrin las ni tshad med pa mdzad na yang nam yang de bzhin gshegs pa gcig gis sems can gcig yongs su smin par mdzad pa na chos kyi sku la tha dad pa med de/ chos kyi sku rang bzhin gcig pas na/ de'i tshe de bzhin gshegs pa thams cad kyis kyang sems can yongs su smin par mdzad pa yin te/ 'di ni 'dres pa gcig pa'i don to/ /bya ba dag la byed gcig cing / /zhes bya bas byed pa gcig pa'i don bstan to/ /byed pa gcig pa ni ji ltar de bzhin gshegs pa gcig gis sprul pa mdzad cing sems can gyi sems kyi rgyud la nyon mongs pa 'dam dang 'dra ba skems par byed pa dang / dge ba'i lo tog smin par mdzad pa de bzhin du de bzhin gshegs pa gzhan gyis kyang phrin las de kho na mdzad par zad kyi phrin las gzhan ma mdzad pas na bya ba gcig go/ /ye shes snang ba byed par 'dod/ /ces bya ba la/ ji ltar nyi ma'i 'od zer gcig gis 'jig rten gyi khams snang bar bya ba kun du byed pa de bzhin du 'od zer gnyis pa la sogs pas kyang gcig gis khyab pa'i gnas kun du khyab cing snang bar byed pa de dang 'dra bar de bzhin gshegs pa gcig gi ye shes kyis shes bya kun la khyab cing snang ba dang / sprul pa'i las kyis sems can yongs su smin par byed pa de bzhin du/ de bzhin gshegs pa gzhan gyis kyang ye shes bya kun la snang zhing khyab par byed la/ sprul pas sems can smin par byed la yongs su smin par byed do zhes bya ba'i don to/ /'dis ni sprul pa la sogs pa'i bya ba'i las bstan to/ /nyi ma'i 'od zer gcig byung na/ /'od zer thams cad 'byung ba bzhin/ /zhes bya ba la/ dper na nyi ma'i 'od zer gcig 'byung ba'i dus na 'od zer gzhan ma byung yang ma yin pa dang / snga phyir byung ba yang ma yin gyi/ thams cad dus gcig tu 'byung ba de bzhin du zhes bya ba'i don to/ /de bzhin sangs rgyas rnams kyi yang / /ye shes 'byung bar shes par bya/ /zhes bya ba la/ de dang 'dra bar sangs rgyas kyi ye shes shes bya la 'jug pa na shes bya kha cig ni mkhyen kha cig ni mi mkhyen ce'am/ kha cig ni sngar mkhyen kha cig ni phyis mkhyen zhes bya ba med par dus gcig tu phung po dang khams la sogs pa'i shes bya rnam pa sna tshogs ma lus pa mkhyen to zhes bya ba'i don to/ /'dis ni ye shes 'jug pa'i las bstan to/ /ji ltar nyi ma'i 'od zer ni/ /'jug pa bdag gir bya ba med/ /ces bya ba la/ dper na nyi ma'i 'od zer 'dis snang bar bya ba'i gnas sems can dang gling dag tu snang bar byed pa la 'jug cing / gnas 'di dag tu ni bdag gis snang bar bya/ 'di dag tu ni mi bya zhes rtog pa dang / 'od zer de dag ni bdag gi 'od zer yin te/ 'od zer 'dis kun du snang bar bya'o snyam du mi rtog go zhes bya ba'i don to/ / de bzhin sangs rgyas ye shes kyang / /'jug pa bdag gir bya ba med/ /ces bya ba la/ de bzhin du gang zag dang chos la bdag med par thugs su chud nas nyon mongs pa dang / shes bya'i sgrib pa spangs pa'i me long lta bu'i ye shes la sogs pa ye shes bzhis sems can rnams la phan pa dang / bde ba dag la 'jug pa nang dang bdag tu rtog pa med do zhes bya ba'i don to/ /'dis ni rnam par mi rtog pa'i las bstan to/ /nyi ma'i 'od zer gcig btang bas/ /ji ltar 'jig rten snang byed bzhin/ /zhes bya ba la/ nyi ma'i 'od zer stong dang ldan par 'dod de/ de las kyang 'od gcig gis 'jig rten gyi khams dang gling thams cad du snang bar byed do zhes bya ba'i don to/ /de bzhin shes bya thams cad la/ /sangs rgyas ye shes cig car snang / /zhes bya ba la/ dper na me long gi dkyil 'khor du de dang nye ba'i gzugs rnams ji snyed yod pa thams cad dus gcig tu snang ba de bzhin du shes par bya ba'i chos phung po dang khams la sogs pa ji snyed yod pa thams cad la ye shes cig car 'jug ste/ thogs pa med par dus gcig tu thams cad thugs su chud ces bya ba'i don to/ /'dis ni sna tshogs kyi rnam pa ye shes kyi las bstan to/ /ji ltar nyi ma'i 'od zer la/ / sprin la sogs pas bsgrib par 'dod/ /zhes bya ba la/ dper na nyi ma'i 'od zer kun du snang ba bkye yang / sprin dang khang khyim dang skyabs la sogs pas bsgribs na 'od zer mi snang ste/ nyi ma'i 'od zer gyis bsgribs te mi snang bar byas pa ni ma yin no zhes bya ba'i don to/ /de bzhin sangs rgyas ye shes la/ /sgrib pa sems can nyes ldan pas/ /zhes bya ba la/ de dang 'dra bar sangs rgyas bcom ldan 'das rnams kyis sems can gyi don du ye shes kyi 'od zer kun du btang yang sems can gyis sprul pa'i sku la sogs pa mi mthong ba ni sems can rnams kyi rgyud la snod du mi 'gyur ba'i sgrib pa rtog pa lnga la sogs pa'i nyes pa dang ldan pas na ma mthong ngo zhes bya ba'i don to/ /'dis ni ye shes mi 'jug pa'i las bstan to/ /ji ltar mdud pa'i dbang gis na/ /gos la mtshon bkra ri mo bzhin/ /zhes bya ba la/ dper na gos dkar po'i mtshan nyid rang bzhin gcig kyang mdud pa bor nas tshon du bcos na gang du mdud pa ma bor bar ni tshon gyis zhen la/ gang du mdud pa bor bar ri mo bkra ba de bzhin du zhes bya ba'i don to/ /de bzhin 'phen pa'i dbang gis ni/ /grol ba'i ye shes ri mo bkra/ /zhes bya ba la/ de dang 'dra ba'i zag pa med pa'i dbyings stong pa nyid du ro gcig mod kyi/ sngon byang chub sems dpa'i dus na smon lam btab pa dang / bsod nams dang ye shes kyi tshogs bsags pa'i shugs kyis na de bzhin gshegs pa rnams kyi rnam par grol ba'i ye shes ri mo bkra ste/ ye shes rnam pa bzhi mnga' ba dang / ye shes des kyang shes bya thams cad thugs su chud pa dang / sku dang gsung dang thugs sprul pa la sogs pa rnam pa sna tshogs 'byung ba'i phyir te/ 'dis ni rnam par grol ba mtshungs pa la ye shes kyi bye brag gi las bstan to/ /ji lta zhe na/ nyon mongs pa spangs pa'i mtshan nyid du ni nyan thos dang / rang sangs rgyas dang / de bzhin gshegs pa 'dra mod kyi nyan thos la sogs pas shes bya'i sgrib pa ma spangs pa dang / bsod nams dang ye shes kyi tshogs chen po ma bsags pas ye shes bzhi dang / sprul pa rnam pa sna tshogs 'gyed par mi nus pas na rnam par grol ba bkra ba ma yin no/ /zag pa med pa'i dbyings ni zab pa rgya che bar bshad nas/ don de nyid bsdus te bstan pa'i phyir/ dri med dbyings kyang zab pa ni/ /mtshan dang gnas dang las rnams dang / /sangs rgyas rnams kyis de bshad pa/ /tshon gyis nam mkhar ri mo 'dri/ /zhes bya ba smos te/ dri ma med pa'i dbyings ni zag pa med pa'i dbyings so/ /zag pa med pa'i dbyings de ni gzung 'dzin gyi spros pa thams cad las 'das pas na nam mkha' ltar zab pa ste/ de yang zab pa rnam pa gsum mo/ /gang zhe na/ mtshan nyid zab pa dang / gnas zab pa dang / las zab pa'o/ /de gsum sangs rgyas kyis bshad pa ni tshon gyis nam mkha' la ri mo 'dri ba dang 'dra ste/ dper na skyes bu la la zhig gis tshon gyis nam mkha' la ri mo 'dri bar byed na de ni shin tu dka' ba spyod pa yin no/ /'on kyang skyes bu mkhas pa des tshon gyis nam mkha' la ri mo 'dri bar byed do/ /de ni shin tu ngo mtshar du bya'o/ /de dang 'dra bar zag pa med pa'i dbyings ni 'phags pa rnams kyi ye shes kyis so so rang gis rig par bya ba'i chos yin te/ tshig tu brjod pa mi nus na de bzhin gshegs pa rnams kyis mtshan nyid zab pa dang / gnas zab pa dang / las zab pa'i sgo nas tshigs su bcad pa ni kun du dka' bar spyod pa ste/ ngo mtshar du bya ba yin no/ /zhes bya ba'i don to/ /spros pa med pa'i phyir zhes bya ba ni gzung ba dang 'dzin pa gnyis med pa'i phyir zhes bya ba'i don to/ /chos kyi dbyings de sems can la yod par bstan pa'i phyir/ thams cad bye brag med par zhes bya ba la sogs pa tshigs su bcad pa gcig smos so/ /de bzhin nyid ni gang zag dang chos la bdag med pa'i rang bzhin yin te/ bdag med pa gnyis kyis ni dngos po kun la khyab po/ /de las kyang so so'i skye bo rnams la yod pa'i gang zag dang chos la bdag med pa dang / 'phags pa rnams la yod pa'i gang zag dang chos la bdag med pa gnyis su tha dad pa med pas na bye brag med pa zhes bya'o/ /de bzhin nyid ni dag gyur pas/ /de bzhin gshegs pa zhes bya ba la/ de bzhin nyid ni kun la yod mod kyi/ nam bdag med pa gnyis nyon mongs pa dang shes bya'i sgrib pa glo bur dang bral te/ dag par gyur pa de ni de bzhin gshegs pa zhes bya'o zhes bya ba'i don to/ /de'i phyir/ de yi stong pa lus can kun/ /zhes bya ba la/ de ltar de bzhin nyid sems can la yod pas na de'i phyir sems can thams cad ni de bzhin gshegs pa'i snying po can yin no zhes bya ba'i don to/ /'byor pa rnam par dbye ba tshigs su bcad pa bcu gcig go zhes bya ba la/ zag pa med pa'i dbyings zab pa bshad nas/ da tshigs su bcad pa bcu gcig gis zag pa med pa'i dbyings de 'byor pa dang / bde ba dang / skyid pa dang longs spyod phun sum tshogs pa lnga pa dang ldan par ston to zhes bya ba'i don to/ /nyan thos rnams kyi 'byor pas ni/ /'jig rten pa yi zil gyis gnon/ /ces bya ba la sogs pa tshigs su bcad pa gnyis kyi bsdus pa'i don ni zag pa med pa'i dbyings na mthu'i mchog gi khyad par ldan pas sangs rgyas rnams kyi 'byor pa'i khyad bstan pa yin te/ nyan thos rnams kyi bsod nams dang ye shes kyi tshogs dang / mngon par shes pa rnams kyis ni 'jig rten pa'i bsod nams dang / ye shes kyi tshogs dang / drang srong gi mngon par shes pa la sogs pa 'byor pa zil gyis gnon te/ ci'i phyir zhe na/ 'jig rten pa'i 'byor pa bas ni nyan thos kyi 'byor pa khyad zhugs zhing rgya che ba'i phyir ro/ /rang sangs rgyas kyi sa yis ni/ /nyan thos kyi ni zil gyis gnon/ /ces bya ba la/ rang sangs rgyas kyi sa'i bsod nams dang ye shes kyi tshogs dang / mngon par shes pa la sogs pa'i yon tan gyis nyan thos kyi 'byor pa zil gyis gnon te/ de bas 'phags shing rgya che ba'i phyir ro/ /byang chub sems dpa'i 'byor pa yi/ /de yi char yang nyer mi 'gro/ /zhes bya ba la/ byang chub sems dpa' rnams kyi bsod nams dang ye shes kyi tshogs dang / mngon par shes pa la sogs pa'i yon tan gyi thad nas sangs rgyas kyi yon tan brgya'i cha stong gi cha/ bye ba'i char yang mi 'gro zhes bya bas na/ grangs dang bgrang ba dang / dpe la sogs par yang mi rung ngo zhes bya ba'i don to/ /de bzhin gshegs pa'i 'byor pa yi/ /de yi char yang nyer mi 'gro/ /zhes bya ba la/ de bzhin gshegs pa rnams kyi bsod nams dang ye shes kyi tshogs dang / mngon par shes pa dang / stobs dang mi 'jigs pa la sogs pa'i yon tan gyi thad nas byang chub sems dpa'i 'byor pa dang / yon tan brgya'i cha dang / stong dang / bye ba'i char yang nye bar mi 'gro zhes bya ba'i don to/ /sa bcu'i sa bcu pa las kyang / kye rgyal ba'i sras byang chub sems dpa' rnams kyi spyod pa'i yul dang byin gyi rlabs 'di yang de ltar tshad med pa de bzhin gshegs pa rnams kyi spyod yul dang yul 'jug pa ci 'dra/ byang chub sems dpa' rdo rje snying pos smras pa/ kye rgyal ba'i sras 'di lta ste/ dper na mi la la zhig gis 'jig rten gling bzhi pa'i 'jig rten gyi khams nas rde'u rgya shug gi tshi gu tsam gnyis sam gsum blangs te/ 'di skad du/ 'jig rten gyi khams mtha' yas pa dag na sa'i khams ji snyed cig yod/ rde'u 'di las ji tsam zhig gis lhag par 'phags shing lhag par tshad med ces zer ba zhig yod na/ kye rgyal ba'i sras de ltar khyod de bzhin gshegs pa dgra bcom pa yang dag par rdzogs pa'i ye shes tshad med pa mnga' ba rnams kyi chos nyid la byang chub sems dpa'i chos nyid kyis 'jal ba ni khyod kyis tshig 'di dang 'dra bar bdag gi dpags so zhes bya ba la sogs pa gsungs so/ /tshigs su bcad pa gsum pa'i bsdus pa'i don ni rnam par rab tu dbye ba'i khyad par dang / zab pa'i khyad par nyid kyis sangs rgyas kyi 'byor pa tshad med pa dang / bsam gyis mi khyab par ston te/ rab tu dbye ba'i khyad par gyis na tshad med pa zhes bya ste/ tshig gi sgo nas de bzhin gshegs pa'i 'byor pa la grangs kyis 'di snyed cig yod ces bcad par mi nus pas na tshad med pa zhes bya'o/ /zab pa'i khyad par gyis na bsam gyis mi khyab pa'o zhes bya ste/ de bzhin gshegs pa'i 'byor pa ni nyan thos dang rang sangs rgyas la sogs pa'i sems kyi spyod yul las 'das pa'i phyir ro/ /sangs rgyas rnams kyi 'byor ba ni/ /bsam yas dpag tu med par 'dod/ /ces bya ba la/ de bzhin gshegs pa rnams kyi 'byor pa dang longs spyod ni bsam gyis mi khyab par 'dod pa dang / dpag tu med par 'dod de zhes bya ba'i don to/ /ji ltar zhe na/ 'byor pa zab pas nyan thos dang rang sangs rgyas kyi sems kyi yul las 'das pas na bsam gyis mi khyab pa'o/ /rab tu dbye ba mtha' yas te/ /grangs kyis 'di snyed cig yod do/ /zhes tshig gis bcad par mi nus pas na dpag tu med pa'o/ /ji ltar tshad med pa dang / ji ltar na bsam gyis mi khyab pa yin zhe na/ de'i phyir/ gang gis gang du ji lta dang / /ji tsam gang du 'jug pa'o/ /zhes bya ba smos te/ gang zag gi don du 'jug pa nyid kyang tshad med cing bsam gyis mi khyab ste/ gang zag gcig gnyis kyi don du zhugs pa ma yin gyi sems can tshad med pa'i don du zhugs pa'i phyir ro/ /gang du 'jug pa yang bsam yas shing dpag tu med de/ 'jig rten gyi khams gnyis su med pa'i sems can gyi don la zhugs pa ma yin gyi/ 'jig rten gyi khams dpag tu med par zhugs pa'i phyir ro/ /ji ltar zhugs pa yang bsam yas shing dpag tu med de/ rnam pa'am thabs sam rgyu gcig gnyis kyis 'byor pa bsgrub pa ma yin gyi rgyu dang thabs kyi rnam pa dpag tu med pas bsgrubs pa'i phyir ro/ /ji tsam du 'jug pa yang bsam yas shing dpag tu med de/ sems can la la la phan pa dang / bde ba mang po byas pa phan mang po btags pa yang grangs med la/ sems can la la la phan pa dang / bde ba kun du phan btags pa'i nyung ngus phan btags pa yang grangs med pa'i phyir ro/ /dus ji srid cig tu 'jug pa bsam yas shing dpag tu med de/ bskal pa grangs med pa'i bar 'jug cing sgrub par byed pa'i phyir ro/ /tshigs su bcad pa lhag ma rnams kyis ni gzhan du 'gyur ba'i khyad par gyis 'byor pa'i khyab par bstan to/ /'byor pa'i khyad par bstan pa la tshigs su bcad pa bcu gcig gis 'byung ba las/ tshigs su bcad pa gsum gyi don bshad nas phyi nas tshigs su bcad pa lhag ma brgyad kyis ni phung po lnga gnas gzhan du gyur pa tha dad pa'i sgo nas sangs rgyas kyi 'byor pa dang / longs spyod kyang tha dad pa mang po yod do zhes ston to/ /chos 'di'i gnas gyur na 'byor pa 'di thob par 'gyur ro zhes pa la sogs par ston to zhes bya ba'i don to/ /dbang po lnga rnams gzhan gyur na/ /'byor pa'i mchog kyang thob par 'gyur/ /zhes bya ba la/ dbang po drug las yid kyi dbang po bzhag ste mig gi dbang po nas lus kyi dbang po'i bar du dbang po lnga gzhan du gyur te dag par gyur na 'byor pa'i mchog dam pa rnam pa gnyis thob par 'gyur ro zhes bya ba'i don to/ /kun gyi don kun 'jug pa dang / /zhes bya ba la/ kun ni mig gi dbang po nas lus kyi dbang po'i bar du dbang po lnga la bya'o/ /don kun ni gzugs nas reg bya'i bar yul lnga la bya ste/ sngon dbang po ma dag pa'i dus na ni mig gi dbang pos kyang gzugs 'ba' zhig la 'jug par nus kyi/ sgra la sogs pa'i yul lhag ma la 'jug par mi nus pa las gnas gzhan du gyur te dag par gyur na mig gi dbang po 'ba' zhig gis gzugs la blta bar nus pa nas/ sgra la nyan pa dang / reg bya la shes par nus pa'i bar du dbang po lhag ma rnams kyi las kun kyang byed par nus te/ 'di ni 'byor pa mchog thob pa rnam pa gcig go/ /brgya rtsa bcu gnyis yon tan 'byung / /zhes bya ba la/ dbang po gcig cing yang yon tan brgya rtsa bcu gnyis bcu gnyis dang ldan par 'gyur te/ dbang po gcig cing yon tan de snyed dang ldan pa'i yon tan no/ /'phags pa gzungs kyi dbang phyug chen po'i rgyal po dang / /dam pa'i chos puN+Da rI ka la sogs pa'i mdo sde las 'byung ba bzhin du blta'o/ /'di 'byor pa mchog thob pa rnam pa gnyis pa'o/ /rgal ba gal te gnyis la sogs pa phyi'i yul med de/ ri bong gi rwa bzhin du yin na dbang po lnga ji ltar gnas gzhan du 'gyur/ lan du/ rang gi sa bon gang dag la/ /rnam rig snang ba gang 'byung ba/ /skye mched rnam pa gnyis so zhes/ /de dang de dag thub pas gsungs/ /zhes rnam par shes pa tsam du ston pa'i bstan bcos las 'byung ste/ de'i don ni kun gzhi rnam par shes pa las gzung ba dang 'dzin pa'i bag chags dang / sa bon yod pa nas mig gi rnam par shes pa nas yid kyi rnam par shes pa'i bar du rnam par shes pa drug 'byung ba la ni nang gi skye mched drug du bshad/ rnam par shes pa de dag las kyang mig gi rnam par shes pa las kyang gzugs su snang ba 'byung ba las yid kyi rnam par shes pa las chos su snang ba 'byung ba ni phyi'i skye mched du bshad de/ de bas na rnam par rig pa tsam du smra ba la yang phyi nang gi skye mched du dbye ba yod do/ /gang gi tshe byang chub sems dpas khams g sum thams cad ni sems tsam mo zhes bya ba la sogs pa nyon mongs pa dang bsam pa dang bsgom pa la sogs pa'i rim pas gzugs kyi 'du shes bsal nas gzugs la sogs pa'i phyin ci log spong bar byed pa na gang sngon gyi nang gi skye mched so so'i nang gi mngon par chags pa'i phyin ci log spangs na/ gnas gzhan du gyur pa zhes bya ste/ de las 'byor pa mchog rnam pa gnyis thob par gyur pas na yul med par yang gnas gzhan du gyur par rung ste/ 'gal ba med do/ /yid kyang gzhan du gyur na ni/ /'byor pa dam pa thob par 'gyur/ /zhes bya ba la/ nyan thos kyi lta ba'i tshul gyis ni rnam par shes pa drug 'das ma thag pa la yid kyi dbang po zhes zer te/ theg pa chen po'i tshul gyis ni yid kyi de la mi bya'i/ nyon mongs pa'i yid la bya ste/ nyon mongs pa'i yid de gnas gzhan du gyur na zhes bya ba'i don to/ /de la rnam par mi rtog pa'i ye shes ni yid kyi rnam par shes pa yang yang dag par ldan zhing byung ste/ yid kyi rnam par shes pa'i rten ni nyon mongs pa'i yid yin te/ dper na mig gi rnam par shes pa'i rten mig gi dbang po yin pa lta bu'o/ /de la ji srid du so so'i skye bo'i dus na nyon mongs pa'i yid gnas gzhan du ma gyur pa'i tshe bdag tu lta ba dang / bdag tu chags pa dang / bdag tu nga rgyal dang / bdag tu gti mug pa la sogs pa'i nye ba'i nyon mongs pa bzhi dang ldan zhing kun gzhi rnam par shes pa las bdag dang bdag gi zhes phyin ci log gi rnam par 'jug go/ /ji ltar nyon mongs pa'i yid phyin ci log gi rnam par zhugs pas de la brten pa'i yid kyi rnam par shes pa la yang gzugs la sogs pa'i yul la phyin ci log tu 'jug ste/ gzugs la sogs pa'i yul med par yang yod do snyam du mngon par chags par byed do/ /nam nyon mongs pa'i yid de bdag dang bdag gir lta ba spangs nas gnas gzhan du gyur te/ mnyam pa nyid kyi ye shes su gyur na 'byor pa dam pa mchog thob par gyur to zhes bya ba'i don to/ /chos gang la 'byor pa thob ce na/ de'i phyir/ 'byor pa'i rjes su ye shes ni/ /rnam par mi rtog dri ma med/ /ces smos te/ 'byor pa'i sgras ni dbang po lnga gnas gzhan du gyur nas yul thams cad la 'jug par nus pa dang gcig yang yon tan brgya rtsa bcu gnyis thob pa la bya ste/ rjes su 'jug pa ni 'byor pa de dang lhan cig 'grogs pa'am/ 'byor pa de dang mthun par gnas pa la bya ste/ 'byor pa dang lhan cig gnas pa gang zhe na/ rnam par mi rtog pa'i ye shes dri ma med pa'o/ /de la kun gzhi rnam par shes pa gnas gzhan du gyur na rnam par mi rtog pa'i ye shes su 'gyur te/ gzung ba dang 'dzin par rtog pa med pas na rnam par mi rtog pa'o/ /nyon mongs pa dang shes bya'i sgrib pa spangs pas na dri ma med pa'o/ /nyon mongs pa'i yid ma dag pa'i dus na yang kun gzhi la bdag dang bdag gir dmigs pa dag ste/ mnyam pa nyid kyi ye shes su gyur pa na rnam par mi rtog pa'i ye shes la bdag dang bdag gir med par mnyam pa nyid du dmigs te/ de bas na nyon mongs pa'i yid gnas gzhan du gyur na rnam par mi rtog pa'i ye shes la dmigs pa'i 'byor pa'i dam pa thob par 'gyur ro zhes bya ba'i don to/ /yang na nyon mongs pa'i yid gnas gzhan du gyur pa dang / dbang po gcig kyang kun gyi don la 'jug pa dang / yon tan brgya rtsa bcu gnyis 'thob pa'i 'byor pa dang lhan cig 'byung zhing 'grogs pa'i mnyam pa nyid kyi ye shes rnam par mi rtog pa'i dri ma med par 'gyur te/ mnyam pa nyid kyi ye shes su gyur pa nyid 'byor ba'i mchog rnyed pa zhes bya'o/ /mnyam pa nyid kyi ye shes su gyur pa na bdag dang bdag gir rtog pa med pas na rnam par mi rtog pa zhes bya'o/ /bdag tu lta ba dang / bdag tu gti mug la sogs nye ba'i nyon mongs pa bzhi dang bral bas na dri ma med pa zhes bya'o/ /de dang lhan cig tu 'byor pa'i ye shes thams cad du 'jug go zhes bya ba la/ de dang lhan cig ces bya ba ni dbang po gcig cing yang yul kun la 'jug pa dang / yon tan brgya rtsa bcu gnyis kyis 'byor pa dang / rnam par rtog pa'i ye shes dang / de'i rgyab nas thob pa dag pa 'jig rten pa'i ye shes dang rnam par mi rtog pa'i ye shes la dmigs pa mnyam pa nyid kyi ye shes dang bcas pas rtag par yang sems can gyi don la 'jug go zhes bya ba'i don to/ /don bcas 'dzin pa gzhan gyur pas/ /'byor pa dam pa thob par 'gyur/ /zhes bya ba la/ don gyi sgra ni gzugs nas chos kyi bar du yul drug la bya'o/ /'dzin pa'i sgras ni mig gi rnam par shes pa nas lus kyi rnam par shes pa'i bar du rnam par shes pa lnga'i tshogs la bya ste/ yul drug dang rnam par shes pa'i tshogs dag ste/ gnas gzhan du gyur na/ 'byor pa dam pa rnam pa gnyis 'thob par 'gyur ro zhes bya ba'i don to/ /zhing yang 'dod bzhin dag pa dang / /longs spyod shin tu ston par ro/ /zhes bya ba la/ phyi'i yul rnams gzhan du ma gyur pa'i dus na ni ngam grog dang / tsher ma dang / gseg ma dang / gyo mo la sogs pa lta bur ma dag pa snang la/ nam dag par gyur pa'i dus na ji ltar 'dod pa bzhin du bai DUr+ya dang / shel dang gser la sogs pa'i kha dog gi sa gzhi lta bur dag par snang bar 'gyur te/ don dag ni 'byor pa de 'thob bo/ /rnam par shes pa lnga'i tshogs ma dag pa'i dus na ni mig gi rnam par shes pas kyang gzugs la dmigs shing gzugs la longs spyod byed pa tsam las mi nus te/ so so'i yul nyi tshe la 'jug pa tsam las lhag par mi nus pa las nam dag ste gnas gyur pa na rnam par shes pa lnga la sangs rgyas kyi zhing de dag na bdud rtsi'i rdzing dang / dpag bsam gyi shing la sogs pa'i longs spyod rnam pa sna tshogs ston te/ 'dzin pa gzhan du gyur pa las ni 'byor pa'i mchog thob par 'gyur ro/ /rnam rtog gzhan du gyur na ni/ /'byor pa dam pa thob par 'gyur/ /zhes bya ba la/ rnam par rtog pa'i sgras ni yid kyi rnam par shes pa la bya ste/ yid kyi rnam par shes pa ma dag pa'i dus na gzugs dang sgra la sogs pa chos rnam pa sna tshogs la rtog pa de dag ste gnas gyur na 'byor pa dam pa rnam pa gnyis 'thob par 'gyur ro zhes bya ba'i don to/ /ye shes dang ni las kun kyang / /rtag tu thogs pa med pa'o/ /zhes bya ba la/ 'byor pa gnyis ni ye shes rtag tu thogs pa med pa dang / las kun la rtag tu thogs pa med pa'o/ /de la ye shes kyi sgras ni me long lta bu'i ye shes dang / mnyam pa nyid kyi ye shes dang / bya ba sgrub pa'i ye shes dang / so sor kun du rtog pa'i ye shes la bya ste/ ye shes de dag gis dngos po kha cig shes kha cig mi shes pa ma yin te/ dngos po kun shes pa dang / dus kha cig du shes kha cig du mi shes pa ma yin gyi dus thams cad du shes pa ni ye shes rtag tu thogs pa med ces bya'o/ /las kyi sgras ni sprul pa'i phrin las mdzad pa la bya ste/ 'og min gyi pho brang nas 'chi 'pho ba dang / mngon par byang chub pa la sogs pa sprul pa rnam pa sna tshogs rtag tu rgyun mi 'chad par mdzad pas na/ las kun la rtag tu thogs pa med pa zhes bya'o/ /rten kyang gzhan du gyur na ni/ /'byor pa dam pa thob par 'gyur ro/ /zhes bya ba la/ rten gyi sgras ni kun gzhi rnam par shes pa dang / de'i dmigs pa'i bya ba'i yul snod kyi 'jig rten sa gzhi chen po la bya ste/ kun gzhi rnam par shes pa yang las dge ba dang mi dge ba'i bag chags kyi gnas su gyur pa dang / lus dang longs spyod dang / gnas lta bur yang kun gzhi nyid de ltar snang bas na kun gzhi la brten te zhes bya'o/ /snod kyi 'jig rten sa gzhi chen po yang sems can gyi 'jig rten gyi gnas su gyur pa dang / rtswa shing rnam pa sna tshogs skye ba'i rten du gyur pas na rten ces bya ste/ snod kyi 'jig rten kun gzhi'i dmigs pa'i yul yin par ci mngon zhe na/ sum cu pa'i rab tu dbye ba las/ gang phyir kun gzhi rnam shes las/ /rnam smin sa bon thams cad la/ /len pa dag dang de yi gnas/ /rnam par rig pa ma rig pa'o/ /zhes gsungs pa'i phyir te/ kun gzhi rnam par shes pa dmigs pa'i yul dang bcas te/ gnas gzhan du gyur na 'byor pa'i dam pa mchog thob par 'gyur ro zhes bya ba'i don to/ /'byor pa gang 'thob ce na/ de'i phyir/ mi gnas pa yi mya ngan 'das/ /sangs rgyas rnams kyi mi g.yo gnas/ /zhes smos te/ kun gzhi dmigs pa dang bcas te gnas gzhan du gyur na de bzhin gshegs pa rnams zag pa med pa'i dbyings na bzhugs pa'i tshe/ mi gnas pa'i mya ngan las 'das pa'i 'byor pa thob par 'gyur te/ mi gnas pa ni 'khor ba na yang mi gnas mya ngan las 'das pa la yang mi gnas pa'o/ /'khrig pa gzhan du gyur na ni/ /'byor pa dam pa thob par 'gyur/ /zhes bya ba la/ 'khrig pa ni lus kyi dbang po'i phyogs gcig ste/ bud med dang skyes pa'i dbang po gnyis phan tshun sbyor ba la 'khrig pa zhes bya'o/ /'khrig pa la gnas gzhan du gyur te/ mi tshangs par spyod pa'i 'dod chags dang bral bar gyur na 'byor pa dam pa rnam pa gnyis 'thob par 'gyur ro zhes bya ba'i don to/ /sangs rgyas bde bar gnas pa zhes bya ba la/ mi tshangs par spyod pa'i 'dod chags dang bral na sangs rgyas rnams kyi spros pa thams cad dang bral ba'i ting nge 'dzin gyi bde ba thob par 'gyur te/ 'di ni 'byor pa dam pa thob pa rnam pa gcig go/ /bud med nyon mongs med pa lta/ /zhes bya ba 'am/ mi tshangs par spyod pa'i 'dod chags dang bral na 'gro ba bzang mo dag mthong du zin kyang nyon mongs pa mi skye ste/ 'dod chags mi skye'o zhes bya ba'i don to/ /'dis ni 'byor pa dam pa thob pa rnam pa gnyis so/ /nam mkhar 'du shes rnam gyur na/ /'byor pa dam pa rnyed par 'gyur/ /zhes bya ba la/ gang thogs pa med pa de ni nam mkha' bzhin no zhes rtog na/ gang du thogs pa dang bcas pa de dag ni gzugs yin no zhes rtog pa ni nam mkha'i 'du shes zhes bya ste/ 'du shes de spangs nas 'byor pa dam pa rnam pa gsum thob par 'gyur ro zhes bya ba'i don to/ /bsam pa'i don ni 'grub pa dang / /zhes bya ba la/ bsam pa'i don 'grub pa ni nam mkha' mdzod kyi ting nge 'dzin thob pas ci bsam pa yo byad thams cad nam mkha' las 'byung bar 'gyur te/ 'di ni 'byor pa dam pa thob pa rnam pa gcig go/ /'gro dang gzugs ni gcig pa'o/ /zhes bya ba la 'gro ba thogs pa med pa 'thob ste/ rtsig pa dang ri la sogs pa la thogs pa med pa'i phyir ro/ /'di ni 'byor pa dam pa thob pa rnam pa gnyis so/ /gzugs 'jig pa ni thams cad nam mkhar bya bar bsams na dngos po thams cad nam mkha'i ngos bzhin du 'gyur te/ 'di ni 'byor pa dam pa thob pa rnam pa gsum mo/ /gong du sangs rgyas kyi 'byor pa bshad pa rnams kyi don rgya cher bshad pa bsdus te bstan pa'i phyir/ de ltar gzhan gyur dpag med de/ /'byor pa dpag tu med par 'dod/ /bsam yas bya ba sgrub pa rnams/ /zhes bya ba la sogs pa tshigs su bcad pa gcig smos te/ de ltar zhes bya ba ni gong du bshad pa'i tshul ltar ro/ /gong du bshad pa'i tshul ltar bshad na/ gzugs kyi phung po la grangs du yod pa gnas gzhan du gyur pa dang / tshor ba'i phung po la du yod pa gnas gzhan du gyur pa dang / 'du shes kyi phung po la du yod pa gnas gzhan du gyur pa dang / 'du byed kyi phung po la 'du byed kyi sems dang ldan pa dang mi ldan pa du yod pa'i gnas gzhan du gyur pa'i tshul gyis phye ste bshad na/ gnas gzhan du gyur pa dpag tu med par gyur pa dang / gnas gzhan du gyur pa dpag tu med pa rnams ni mdo sde de dang de dag gi nang nas ji skad du 'byung ba bzhin du blta bar bya'o/ /de ltar tshul gzhan du gyur pa dpag tu med pas na gnas gzhan du gyur pa las byung ba'i 'byor pa dang yon tan yang dpag tu med par yod par 'dod do/ /ji ltar 'byor pa dpag tu med pa de bzhin du 'byor pa las byung ba'i sprul pa'i sku la sogs pa sems can gyi don du phrin las bsgrub pa yang mtha' yas dpag tu med par 'dod de/ /'byor pa re re zhing yang sprul pa dang phrin las mtha' yas par 'byung ba'i phyir ro/ /'byor pa dang phrin las de dag gang gi dus nas gang dang gang du gnas 'thob ce na/ de'i phyir/ sangs rgyas dri med gnas na'o/ /zhes smos te/ de dag kyang sangs rgyas kyi dri ma med pa'i gnas zag pa med pa'i gnas na bzhugs pa'i tshe thob cing de'i tshe 'byung ngo zhes bya ba'i don to/ /sangs rgyas pa de'i tshe sems can yongs su smin par byed pa'i rgyu la tshigs su bcad pa bdun no zhes bya ba la/ 'byor pa'i rjes la yongs su smin pa'i rgyu'i skabs bshad par 'brel pa ci yod ce na/ de ltar sangs rgyas kyi sa'i dus na 'byor pa phun sum tshogs pa 'thob ste/ de rang gi dus kyi mthar thug pa'i sangs rgyas bcom ldan 'das de lhun gyis grub par mi rtog bzhin du sems can yongs su smin par mdzad de/ de'i phyir 'byor pa'i rjes la yongs su smin pa'i skabs bshad par 'brel to/ /de la gong du yang sems can yongs su smin par byed pa'i skabs bshad/ 'dir yang sems can yongs su smin par byed pa'i skabs bshad de/ lan gnyis su bshad na de gnyis la khyad par ci yod ce na/ sngar ni byang chub sems dpa'i spyod pa la gnas pa'i tshe/ de ltar sems can yongs su smin par byed pa de bstan to/ /da ni mthar thug pa sangs rgyas kyi sa brnyes nas sems can ji ltar yongs su smin par byed pa de ston te/ khyad par ni de yod de/ de yang sangs rgyas par gyur pa de ni sems can yongs su smin par byed pa'i rgyu dang gnas dang rten yin no zhes tshigs su bcad pa bdun gyis ston to zhes bya ba'i don to/ /tshigs su bcad pa dang po bsdus pa'i don ni yongs su smin pa ci 'dra ba'i rgyur sangs rgyas par gyur pa de ston to/ /dge ba 'phel ba'i 'jig rten rnam dag mchog tu 'gro/ /zhes bya ba la/ dang po byang chub tu sems bskyed pa dang / bslab pa mnos pa dang / srod dang tho rangs la mi nyal ba dang / zas la tshod rig pa la sogs pa'i rim pas mos pas spyod pa'i sa dang sa bcu la sogs par rim gyis zhugs pa ni dge ba 'phel ba'i 'jig rten zhes bya ste/ de dag sku dang ye shes kyis bsdus pa sangs rgyas kyi sar mi gnas pa'i mya ngan las 'das pa thob pa ni rnam dag mchog tu 'gro ba zhes bya'o/ /dge ba ma bsags dge ba 'phel ba'i mchog tu 'gro/ /zhes bya ba la byang chub sems ma bskyed pas na/ sa bcu dag tu ma zhugs pa ni dge ba ma bsags pa zhes bya ste/ de dag byang chub tu sems bskyed pa ni/ sa bcu dag tu zhugs par gyur pa ni dge ba 'phel bar mchog tu 'gro ba zhes bya'o/ /de ltar 'jig rten phyogs phyogs rgyal bas rab bshad pas/ /zhes bya ba la/ de ltar zhes bya ba ni gong du bshad do/ /dge ba 'phel ba rnams rnam par grol bar bzhag pa dang / dge ba ma bsags pa rnams dge ba 'phel ba la bkod pa yang 'jig rten gyi khams gcig tu de ltar byas pa ma yin gyi/ phyogs phyogs te phyogs bcu'i 'jig rten kun du yongs su smin pa dang grol bar mdzad do zhes bya ba'i don to/ /sus de ltar mdzad ce na/ rgyal bas te sangs rgyas bcom ldan 'das kyis mdzad do/ /rgyu gang gis mdzad ce na/ rab tu bshad pa ste/ gsung rab yan lag bcu gnyis bshad pa'i thabs kyis mdzad do/ /de ltar bshad pas na/ yongs smin smin pa ltar 'gyur ba/ /zhes bya ba smos te/ de ltar bshad pas dge ba'i rtsa ba ma smin pa rnams ni dge ba'i rtsa ba mchog tu 'phel ba la bkod pas yongs su smin par byas so/ /dge ba'i rtsa ba smin pa rnams ni mya ngan las 'das pa la bkod pas rnam par dag pa mchog thob par byas so/ /yongs su smin par mdzad pa de yang skabs 'ga' tsam lan 'ga' tsam mdzad pa ni ma yin gyi rgyun ma chad par 'khor ba'i mtha'i bar du mdzad pas rtag tu 'gyur ba zhes bya'o/ /de ltar rgyun du sems can yongs su smin par mdzad na 'khor ba'i sems can zad par mi 'gyur ram snyam pa la/ de'i phyir/ ma lus 'dir ma yin zhes smos te/ de ltar rtag tu smin par mdzad kyang 'khor ba'i gnas 'di nas sems can ma lus par zad par mi 'gyur te/ ci'i phyir zhe na/ sems can gyi khams mtha' yas mu med pa'i phyir ro/ /mya ngan las 'das par gnas su yang 'phel ba dang lhag pa med de/ chos kyi dbyings la skye 'gag med pa'i phyir ro/ /tshigs su bcad pa gnyis pa'i bsdus pa'i don ni sems can yongs su smin par byed pa la/ ngo mtshar che ba yin pa dang / ngo mtshar che ba ma yin pa'i mtshan nyid de ston to/ /de ltar rnyed dka' zhes bya ba la/ de ltar na zhes bya ba ni gong du bshad pa la bya ste/ gong du bshad pa ltar na byang chub de rnyed par dka' ba yin no/ /ji lta zhe na/ bdag med dka' spyod brgya rnams dang / /dpag med dge ba bsags pa dang / /dpag med pa yi dus dang ni/ /dpag med sgrib pa zad pa'i phyir/ /sgrib pa kun gyi dri med pa/ /rnam pa thams cad mkhyen pa 'thob/ /ces bshad pa ltar na/ byang chub de rnyed par dka' ba yin no/ /rnyed par dka' ba'i byang chub chen po de bstan pas rtag tu thob bo zhes bya ba'i don to/ /de thob na bdag gi don kyang phun sum tshogs par 'gyur gzhan gyi don kyang phun sum tshogs par mdzad do/ /yon tan mchog ldan rmad 'byung ba/ /zhes bya bas/ bdag gi don phun sum tshogs pa bstan te/ byang chub chen po de thob na stobs dang mi 'jigs pa dang / ma 'dres pa la sogs pa'i yon tan nyan thos dang so so'i skye bo la med pa rnams dang ldan par 'gyur bas na/ yon tan mchog ldan rmad 'byung ba/ /zhes bya ste/ yon tan de dag nyan thos la sogs pa la yod par mi srid pas na rmad du byung ba zhes bya'o/ /byang chub chen po rtag ldan zhes bya ba la/ bla na med pa'i byang chub de nyan thos dang rang sangs rgyas pa'i byang chub pas 'phags pas byang chub chen po zhes bya'o/ /byang chub de 'khor ba'i mtha'i bar du yod pas rtag pa zhes bya'o/ /nams kyang nyams shing 'gyur ba med pas na brtan pa zhes bya'o/ /skyabs med rnams kyi skyabs zhes bya bas gzhan gyi don mdzad pa bstan te/ sems can rnams 'khor ba'i sdug bsngal las bsgral zhing mya ngan las 'das pa la 'jog par byed pa med pas na skyabs med pa zhes bya ste/ sems can de dag 'khor ba'i sdug bsngal las bsgral nas mya ngan las 'das pa'i gnas su 'jog par byed pas na skyabs med pa rnams kyi skyabs zhes bya'o/ /phyogs phyogs su ni zhes bya ba la/ byang chub sems dpa' de yang 'jig rten gyi khams 'ga'am phyogs 'ga' thob pa ma yin phyogs bcu'i 'jig rten gyi khams thams cad du 'thob bo zhes bya ba'i don to/ /brtan pa zhes bya ba de'ang sus 'thob ce na/ byang chub sems dpa' rnams kyis 'thob/ /ces bya ba'i don to/ /dus kun du zhes bya ba ni nyi ma re re la'ang thob ces bya ba'i don to/ /rtag tu 'thob ces bya ba ni skad cig ma re re la'ang 'thob ces bya ba'i don to/ /de ni 'jig rten ngo mtshar mchog /ces bya ba la/ de ltar shin tu rnyed dka' byang chub de/ /byang chub sems dpa' rnams kyi phyogs bcu'i 'jig rten gyi khams kun du nyi ma re re dang skad cig ma re re la yang len cing thob par byed pa ni 'jig rten ngo mtshar mchog tu bya ba yin no zhes bya ba'i don to/ /tshul spyod pas rmad 'byung med ces bya ba la/ rnam pa gnyis su na ngo mtshar che ba yang ma yin te/ ci'i phyir zhe na/ rgyu 'bras sA lu btab pa la/ 'bras bu yang sA lu 'byung ba ngo mtshar mi che ba bzhin du tshul ni byang chub thob pa dang mthun pa'i lam la bya ste/ bla na med pa'i byang chub thob pa'i lam sa dang pha rol tu phyin pa dang / byang chub kyi phyogs kyi chos spyad nas de'i 'bras bu bla na med pa'i byang chub nyid thob pa ni ngo mtshar chen por bya ba ma yin no zhes bya ba'i don to/ /tshigs su bcad pa gsum pa'i bsdus pa'i don ni dus gcig sgo mang po nas yongs su smin par bya ba'i thabs kyi rgyud du ma yod par ston to/ /de yang mdor na ji ltar yongs su smin par byed pa dang / gang la gnas pa'i sems can yongs su smin par byed pa'i rgyu mdor na de gnyis ston to/ /la lar chos kyi 'khor lo bskor ba sgo mang brgya dag nas kyang ston/ /zhes bya ba la/ 'jig rten gyi khams kha cig tu ni phung po dang khams dang skye mched dang sa dang pha rol tu phyin pa chos kyi rnam grangs kyi sgo mang po las brtsams te chos kyi 'khor lo bskor zhing 'chad par yang ston to zhes bya ba'i don to/ /la lar skye ba zhes bya ba la gang gi tshe chos kyi 'khor lo bskor ba de nyid kyi dus na 'jig rten gyi khams la lar ni dga' ldan nas shi 'phos nas 'dzam bu'i gling du yum gyi lhums su skye ba la sogs pa ston to zhes bya ba'i don to/ /mi snang ba zhes bya ba'i don ni de nyid kyi dus na 'jig rten gyi khams la lar mi snang ba ston te/ byang chub sems dpa'i sku las ni 'phro ba ston to zhes bya ba'i don to/ /la lar sna tshogs skye ba spyod/ /ces bya ba la/ sna tshogs skye ba spyod pa ni byang chub sems dpa'i skyes pa'i rabs kyi spyod pa mdzad pa la bya ste/ de nyid kyi dus na 'jig rten gyi khams kha cig tu skyes pa rabs kyi spyod pa sbyin pa'i pha rol tu phyin pa mdzad nas/ lus dang longs spyod la sogs pa sems can gzhan la btang ba dang / sems can gyi don du tshul khrims kyi pha rol tu phyin pa spyad nas kha na ma mtho ba rdul tsam la yang bag bya ba dang / bzod pa'i pha rol tu phyin pa spyad nas/ ka ling ka'i rgyal pos drang srong bzod pa smra ba yan lag dang nying lag bcad na yang nyams su len pa la sogs pa bstan to zhes bya ba'i don to/ /la lar byang chub thams cad ces bya ba la/ de nyid kyis na 'jig rten gyi khams kha cig tu ni rdo rje gdan la rdo rje lta bu'i ting nge 'dzin gyis nyon mongs pa'i sgrib pa dang shes bya'i sgrib pa spangs nas mngon par byang chub pa lta bur yang ston to zhes bya ba'i don to/ /la lar mya ngan las 'da' bar yang / /zhes bya ba la/ de nyid kyi tshe na 'jig rten gyi khams kha cig tu mya ngan las 'da' bar bstan nas/ sems can yongs su smin par yang byed do zhes bya ba'i don to/ /lan gcig ma yin zhes bya ba la/ gong du bshad pa lta bur yang khams rnam pa sna tshogs kyang lan gcig cig car mdzad nas rgyun gcod pa ma yin gyi 'khor ba'i mtha'i bar du rgyun mi 'chad par mdzad ces bya ba'i don to/ /'dis ni ji ltar sems can yongs su smin par mdzad pa de ston to/ /de yi gnas nas mi g.yo thams cad byed/ /ces bya ba la/ de'i gnas zhes bya ba ni/ chos kyi dbyings zag pa med pa la bya ste/ thabs rnam pa sna tshogs kyi phrin las mdzad de/ nga zag pa med pa'i dbyings las mi g.yo/ mi 'gul/ mi nyams la g.yo ba'i mtshan nyid kyi phrin las de dag thams cad kyang mdzad do zhes bya ba'i don to/ /tshigs su bcad pa bzhi pa'i bsdus pa'i don ni sems can smin par sbyor zhing mdzad pa'i rgyu zag pa med pa'i dbyings rtog pa dang mngon par 'du byed pa med pa de ston te/ de bas na/ nga yis smin par byas she 'am/ /zhes bya ba la sogs pa tshigs bcad gcig smos te/ sems can 'di dag byang chub sems dpa'i sa rnyed pa dang / sangs rgyas su gyur pa 'di dag sngon ngas smin par byas pa yin no zhes de ltar mi dgongs mi rtog go zhes bya ba'i don to/ /lus can 'di ni smin bya dang / /zhes bya ba la/ sems can 'di dag ni da ltar smin par bya dus la ma bab pas phyis la dgod cing 'tshang rgya bar bya'o zhes de ltar mi rtog mi dgos so zhes bya ba'i don to/ /da ltar smin par byed do zhes sangs rgyas rnams ni mi dgongs te sems can 'di dag ni da ltar gyi dus na yang sa la yang mi bkod 'tshang rgya bar bya ba'i dus na yang bzhag go zhes de ltar mi dgongs mi rtog zhes bya ba'i don to/ /'dis ni rnam par mi rtog mi mnga' ba bstan te/ mngon par 'du byed med par zhes bya ba la/ rtog pa mi mnga' bar mi zad kyi sems can smin par mdzad pa na brtsal ba dang / 'bad pa yang med de/ lhun gyis grub par mdzad do zhes bya ba'i don to/ /phyogs phyogs kun la zhes bya ba la/ de ltar smin par mdzad pa yang phyogs 'ga' 'am/ 'jig rten gyi khams 'gar mdzad pa ma yin gyi phyogs bcu'i 'jig rten gyi khams thams cad du mdzad do zhes bya ba'i don to/ /sgo gsum nas zhes bya ba la/ sems can smin par mdzad pa yang thabs 'ga'am theg pa 'gas mdzad pa ma yin gyi sgo gsum ste theg pa gsum char bstan pa'i sgo nas smin par mdzad do zhes bya ba'i don to/ /skye bo'i tshogs ni zhes bya ba la/ smin par mdzad pa yang sems can 'ga' zhig smin par mdzad pa ma yin gyi skye bo'i tshogs kyi sems can thams cad smin par mdzad do zhes bya ba'i don to/ /rtag tu zhes bya ba la/ smin par mdzad pa'ang lo'am bskal pa 'gar mdzad pa ma yin gyi rtag tu ste 'khor ba'i mtha'i bar du mdzad do zhes bya ba'i don to/ /dge ba'i chos rnams 'phel bar 'gyur/ /zhes bya ba la/ theg pa gsum gyi sgo nas chos rnams bshad cing bstan pas sems can gyi sems la byang chub kyi phyogs dang / pha rol tu phyin pa la sogs pa dge ba'i chos 'phel ba dang / brtas pa dang / smin par 'gyur ro zhes bya ba'i don to/ /tshigs su bcad pa lnga'i bsdus pa'i don ni mngon par 'du byed pa med par sems can yongs su smin par byed pa nyi ma'i dpe bstan pa de bas na/ ji ltar nyi ma'i 'od zer rgya cher yongs btang bas/ /phyogs phyogs kun la lo tog smin par mdzad/ /ces bya ba smos te/ nyi ma de las 'od zer gcig gnyis 'byung bar ma zad kyi 'od zer brgya stong grangs med par 'byung bas na rgya che ba zhes bya'o/ /ji tsam snang bar byas pa'i gnas 'dzam bu'i gling dang / 'jig rten gyi khams kun du snang bar byed pas na spangs pa zhes bya ste/ dper na nyi ma'i 'od zer btang la lo tog smin par bya'o snyam du rtog pa dang mngon par 'du byed pa med pas kyang / 'od zer rgya chen po btang nas phyogs bcu kun du nas 'bras la sogs pa lo tog smin par byed pa'i don to/ /'dis ni smin par byed pa'i dpe bstan to/ /chos kyi nyi ma rab zhi chos tshul 'od btang bas/ /phyogs phyogs kun du sems can smin par byed/ /ces bya ba la/ zag pa med pa'i dbyings ni gsung rab yan lag bcu gnyis 'od zer 'dra bar 'byung ba'i rgyu yin pas nyi ma'i dkyil 'khor 'dra ba'i phyir chos kyi nyi ma zhes bya'o/ /rang bzhin ni mya ngan las 'das pa zhes bya ste/ kun 'byung dang sdug bsngal spangs pa'i phyir ro/ /chos tshul ni mya ngan las 'das pa ste thob par byed pa'i rgyu dang thabs la bya ste/ de'i rgyu dang gsung rab yan lag bcu gnyis bshad pa'o/ /'od gtong ba zhes bya ba ni chos bshad pa'i zhes bya ba'i don te chos bshad pas ni phyogs bcu kun du sems can yongs su smin par mdzad do zhes bya ba'i don to/ /tshigs su bcad pa drug pa'i bsdus pa'i don ni gcig nas gcig tu smin par byed pa mi zad pa ston to/ /de bas na/ ji ltar mar me gcig la mar me'i tshogs mang 'byung / /grangs med dpag tu med kyang zad par mi 'gyur te/ /zhes bya ba smos te/ dper na mar me gcig la mar me grangs med dpag tu med pa rnams bsregs te/ so sor lus kyang dang po'i mar me gcig po de la zad pa dang 'grib pa med do zhes bya ba'i don to/ /de bzhin smin pa gcig las sems can tshogs mang po/ / grangs med dpag tu med pa 'byung yang zad mi 'gyur/ /zhes bya ba la/ de dang 'dra bar de bzhin gshegs pas sems can gcig smin par byas te/ sangs rgyas par byas pa dang / sangs rgyas pa des sems can gyi tshogs mang po grangs med dpag tu med pa rnams 'tshang rgya bar byas te/ smin par byas kyang yongs su smin par byed pa'i de bzhin gshegs pa'i ye shes dang / chos bshad pa la zad pa dang 'grib par mi 'gyur ro zhes bya ba'i don to/ /don 'di'ang 'phags pa dri ma med par grags pa'i mdo las gsungs te/ ji lta zhe na/ khyim bdag ji ltar bdag cag bdud kyi gnas nas gnas par bgyi/ smras pa/ sring mo dag mi zad pa'i chos kyi sgron ma zhes bya ba'i chos kyi sgo yod do/ /de la nan tan gyis shig /de'ang gang zhe na/ 'di lta ste sring mo dag sgron ma gcig las sgron ma brgya stong 'bar bar byas kyang sgron ma de 'bri bar mi 'gyur ba de bzhin du sring mo dag kyang byang chub sems dpa' gcig gis sems can brgya stong mang po rnams byang chub la bkod kyang byang chub sems dpa' de'i sems kyi dran pa mi 'bri yongs su mi 'bri ste phyir zhing skye zhes gsungs pa lta bu'o/ /tshigs su bcad pa bdun pa'i bsdus pa'i don ni theg pa gsum gyi sgo nas yongs su smin par byas pa rnams rnam par grol ba'i dbyings su 'jug pa na yongs su smin pa thams cad kyi go skabs 'byed pa'i phyir chos kyi dbyings mi ngoms pa dang / chos kyi dbyings su smin pa dpag tu med pa lus kyang lhag ma med pa'i phyir 'phel ba med pa rgya chen po'i dpe ston to/ /rgya mtsho chen po chu yis ngoms mi 'gyur/ /zhes bya ba la/ dper na rgya mtsho chen por phyogs bcu'i chu bran dang chu bo mang po der bsdus kyang 'di snyed cig bab pas da chog go bya ba med kyi chu bo mang po der 'jug pa'i go skabs 'byed pa'i phyir ngoms pa med do zhes bya ba'i don to/ /chu chen mang po rab tu 'bab pas 'phel mi 'gyur/ /zhes bya ba la/ rgya mtshor phyogs bcu'i chu bo dang chu bran mang po der 'dus te rtag tu 'bab kyang / rgya mtsho la lud pa dang lhag pa med pas 'phel bar mi 'gyur zhes bya ba'i don to/ /de bzhin sangs rgyas dbyings kyang rnam dag rtag 'bab pas/ /ngoms shing 'phel bar mi 'gyur ngo mtshar che/ /zhes bya ba la/ de bzhin zhes bya ba ni de dang 'dra bar zhes bya ba'i don to/ /sangs rgyas dbyings zhes bya ba ni/ /sangs rgyas rnams ni zag pa med pa'i dbyings su zhes bya ba'i tha tshig go/ /rnam dag rtag 'bab pa zhes bya ba ni nyan thos dpag tu med pa dang / rang sangs rgyas dpag tu med pa dang / byang chub sems dpa' dpag tu med pa rnams kyang mya ngan las 'das par gyur pa thams cad zag pa med pa'i dbyings su 'jug kyang rnam par grol ba 'di snyed cig zhugs kyis da chog go zhes 'gog pa med kyi rnam par grol ba thams cad der 'jug pa'i skabs med pas ngoms par mi 'gyur ba zhes bya'o/ /yongs su smin pa dpag tu med pa zhig der zhugs kyang chos kyi dbyings la skyes pa dang lud par gyur pa med pas na 'phel bar 'gyur ba ste/ de ni ngo mtshar du bya ba yin no zhes bya ba'i don to/ /chos kyi dbyings rnam par dag pa la tshigs su bcad pa bzhi'o zhes bya ba la sems can yongs su smin par byed pa'i skabs kyi rjes la chos kyi dbyings rnam par dag pa'i skabs bshad par 'brel ba ci yod ce na/ 'di ni byang chub bshad pa'i skabs yin te/ sngar byang chub bshad pa'i skabs su/ /ngal brgyas rmad 'byung dka' spyad dge bsags kun/ /dus ring bskal pa mchog 'gro sgrib kun zad/ /sar gtogs sgrib pa phra bcom sangs rgyas te/ /de ni mthu chen rin chen snod phye bzhin/ /zhes bya ba byang chub kyi mtshan nyid spyi tsam du bshad nas sangs rgyas par gyur na yongs su smin par byed do zhes de tsam du zad do/ /da ni byang chub kyi rang bzhin dang / 'bras bu dang / las dang / ldan pa dang 'jug par phye nas khyad par du bstan pa'i phyir chos kyi dbyings rnam par dag pa'i skabs bshad do/ /yang na 'di ni byang chub bshad pa'i skabs yin te/ sngar gong du byang chub sems dpa' rnams kyi bslab par bya ba ni bdag dang gzhan gyi don la brtsams te/ byang chub kyi bar du don rnam pa bdun bslab par bya'o zhes bshad pa las mdo sde de dag gi nang nas byang chub rnam pa du ma bshad de/ de las kyang sngar ni gzungs kyi dbang phyug gi rgyal po dang / dam pa'i chos puN+Da rI ka la sogs pa'i nang nas byang chub kyi mtshan nyid ji ltar 'byung ba de gtan la phab ste bshad do/ /da ni de ma yin pa'i mdo sde gzhan dag gi nang nas byang chub kyi mtshan nyid 'byung ba gtan la dbab par bya ba'i phyir/ chos kyi dbyings rnam par dag pa'i skabs bshad pa bstan te/ de la sangs rgyas kyi sa'i mdo las chos lngas sangs rgyas kyi sa bsdus pa yin te/ chos lnga gang zhe na/ chos kyi dbyings rnam par dag pa dang / me long lta bu'i ye shes dang / mnyam pa nyid kyi ye shes dang / so sor kun du rtog pa'i ye shes dang / bya ba sgrub pa'i ye shes so/ /de la sangs rgyas kyi sa'i mdo las 'byung ba'i chos lnga'i dbang du byas nas/ chos lnga po de 'dir mdo tsam du gtan la 'bebs te/ chos lnga po de rnams kyi rab tu dbye ba rgya cher gtan la dbab pa ni/ sangs rgyas kyis theg pa chen po'i mdo sde nyid kyi nang nas 'byung ba bzhin du blta bar bya'o/ /sangs rgyas kyis las kyang chos kyi dbyings dang por smos pas/ 'dir yang chos kyi dbyings kyi skabs tshigs su bcad pa bzhi dang por 'chad de/ ye shes bzhi rnams rim bzhin du phyis 'chad do zhes bya ba'i don 'chad de thams cad chos kyi de bzhin ces bya ba la/ chos thams cad ni 'dus byas dang / 'dus ma byas so/ /zag pa dang bcas pa'am/ zag pa med pa ste/ chos de rnams kyi de bzhin nyid ni stong pa nyid la bya'o/ /sangs rgyas kyi sa'i stong pa nyid dus kyi stong pa nyid de bzhin nyid de'i mtshan nyid dang rang bzhin ci 'dra zhe na/ sgrib pa gnyis dag pa'i mtshan nyid de zhes bya ba smos te/ sangs rgyas kyi dus kyi de bzhin nyid ni nyon mongs pa'i sgrib pa dang / shes bya'i sgrib pa gnyis dang bral ba'i mtshan nyid dang rang bzhin yin no zhes bya ba'i don to/ /'dis ni de bzhin nyid gnas gzhan du gyur pa bstan to/ /dngos po shes pa de la dmigs/ /zhes bya ba la/ dngos po shes pa ni de'i rgyab nas thob pa dag pa 'jig rten pa'i ye shes la bya ste/ dngos po'i sgras kun gzhi rnam par shes pa gzhan gyi dbang gi mtshan nyid gnas gzhan du gyur pa'i mtshan nyid rnam par mi rtog pa'i ye shes la bya'o/ /rnam par mi rtog pa'i ye shes de yang de'i rgyab nas thob pa dang / dag pa 'jig rten pa'i ye shes kyis phyin ci ma log par shes par byed kyi ye shes gzhan gyis ni ma yin te/ de bas na de'i rgyab nas thob pa dag pa 'jig rten pa'i ye shes la dngos por shes pa zhes bya ste 'dir 'dis ni gnas ngan len gyi rten kun gzhi gnas gzhan du gyur par bstan to/ /de zhes bya ba'i sgras ni chos kyi dbyings la snyegs te/ chos kyi dbyings la ni rnam par mi rtog pa'i ye shes kyis dmigs so zhes bya ba'i don to/ /'dis ni lam gyi gnas gzhan du gyur pa bstan to/ /mi zad dbang gis mtshan nyid do/ /zhes bya ba la de'i rgyab nas thob pa dag pa 'jig rten pa'i ye shes kyis rnam par mi rtog pa'i ye shes la dmigs nas dbang mi zad pa thob ste/ ji lta zhe na/ dag pa 'jig rten pa'i ye shes kyis rnam par mi rtog pa'i rang bzhin phyin ci ma log par rtogs pa'i phyir ro/ /rnam par mi rtog pa'i ye shes kyis kyang chos kyi dbyings de bzhin nyid la dbang mi zad pa ste/ ji lta zhe na/ rnam par mi rtog pa'i ye shes kyis thams cad du chos kyi dbyings la rtse gcig tu 'jog pa'i phyir te/ 'dis ni chos kyi dbyings kyi rang bzhin bstan to/ /kun nas de bzhin nyid shes nas/ /bsgom pa yang dag 'byung ba ste/ / zhes bya ba la sogs pa'i tshe tshigs bcad gcig gis rgyu'i don dang 'bras bu'i don to/ /kun nas bya ba ni theg pa chen po'i mdo sde de dag gi nang nas chos kyi dbyings ston pa'i ming gi rnam grangs ma skyes pa dang / ma byung ba la sogs pa 'byung ba mnyan pa dang / sems pa dang bsgoms pa la sogs pa'i rim pa sbyor ba'i sa na bsgoms pa las mthong ba'i lam na de bzhin nyid shes pa'i ye shes skyes te/ chos kyi dbyings thams cad du 'gro ba'i mtshan nyid du rtog pa rnam par mi rtog pa'i ye shes skyes so zhes bya ba'i don to/ /rnam par mi rtog pa'i ye shes kyang sa dang po'i dus su thob bo/ / de nas sa gnyis nas sa bcu man chad ye shes de nyid bsgoms pas yang dag pa 'byung ste/ sangs rgyas kyi sar chos kyi dbyings rnam par dag pa mngon sum du byas so zhes bya ba'i don to/ /'dis ni rgyu'i don bstan to/ /rnam pa kun du sems can don/ /gnyis bskyed mi zad 'bras bu'o/ /zhes bya ba la/ rnam pa kun du dus thams cad du'am/ phan pa dang bde ba'i rnam pa thams cad kyis zhes bya ba'i don to/ /sems can kun zhes bya ba ni sems can thams cad la zhes bya ba'i don to/ /gnyis bskyed pa ni sems can la phan pa dang / bskyed pa dang / bde ba bskyed pa ste/ tshe rabs gzhan du mtho ris dang mya ngan 'das pa la bkod pa ni phan pa'o/ /tshe 'dir zang zing gis phan btags na dge ba byed du bcug pa ni phan pa ste/ 'dis ni 'bras bu'i don bstan pa'o/ /mi zad par zhes bya ba ni 'khor ba'i mtha'i bar du yang bde ba dang bde ba rgyun mi gcod ces bya ba'i don to/ /lus dang ngag dang sems sprul pa'i/ /sbyor ba'i thabs kyi las can no/ /zhes bya ba la sogs pa tshigs bcad gcig gis las kyi don dang ldan pa'i don bstan te/ lus sprul pa'i sbyor ba'i thabs kyi las can dang / ngag sprul pa'i sbyor ba'i thabs kyi las can dang / sems sprul pa'i sbyor ba'i thabs kyi las can no zhes bya bar sbyar ro/ /de la brgya byin dang tshangs pa dang / lha dang klu la sogs pa'i lus su bstan pa ni lus sprul pa'i sbyor ba'i thabs kyi las can zhes bya'o/ /byin gyi rlabs kyis nam mkha' dang / rtsig pa dang / shing la sogs pa las kyang dam pa'i chos 'chad pa'i sgra 'byung ba ni ngag sprul pa'i thabs kyi las can zhes bya'o/ /byin gyis brlabs nas blun po rnams kyang zab mo rtogs pa'i sems dang ldan par bya ste/ chos bshad nas chos kyi don rtogs par byas pa dang / 'phags pa shA ri'i sras po dang / rab 'byor la sogs pa byin gyis brlabs nas shes rab kyi pha rol tu phyin pa la sogs pa 'chad du bcug pa ni sems sprul pa'i sbyor ba'i thabs kyi las can zhes bya ste/ sbyor ba zhes bya ba ni las la bya'o/ /sprul pa ni las gsum gyis sems can yongs su smin par byed pa'i las dang las de nyid thabs yin te/ thabs de lta bu dag mdzad pa thugs su chud pas na las can zhes bya ste/ 'dis ni las kyi don bstan to/ /de la lus sprul pa la yang rnam pa gnyis te/ bdag dang 'brel pa dang / gzhan dang 'brel ba'o/ /de la bdag dang 'brel ba ni bdag nyid brgya byin dang tshangs pa la sogs pa'i lus su sprul pa'o/ /gzhan dang 'brel pa ni sems can gzhan dang rtsi shing la sogs pa yang byin gyis brlabs nas sangs rgyas dang byang chub sems dpa'i skye ba lta bur ston pa'o/ /ngag sprul pa la yang rnam pa gnyis te/ bdag dang 'brel pa dang / gzhan dang 'brel pa'o/ /de la bdag dang 'brel pa ni de bzhin gshegs pa nyid gsung yan lag dbyangs drug cu rtsa gnyis dang ldan par sprul nas dam pa'i chos 'chad pa'o/ /gzhan dang yang 'brel ba ni rtsig pa dang shing dang nam mkha' la sogs pa las kyang dam pa'i chos 'chad pa'i sgra 'byung ba'o/ /sems sprul pa la yang rnam pa gnyis te/ bdag dang 'brel pa dang / gzhan dang 'brel pa'o/ /bdag dang 'brel pa ni ye shes kyi byin gyi rlabs kyis chos kyi don zab mo dag thugs su chud pa'o/ /gzhan dang 'brel ba ni byin gyis brlabs nas blun po rnams kyang dam pa'i chos zab mo rtogs par byas pa dang 'phags pa nyan thos dag kyang dam pa'i chos zab mo 'chad du bcug pa'o/ /ting nge 'dzin dang gzungs kyi sgo/ /gnyis po dpag tu med dang ldan/ /zhes bya ba la/ chos kyi dbyings te/ ting nge 'dzin gyi sgo dang ldan pa dang / gzungs kyi sgo dang ldan pa dang / gnyis po dpag tu med pa dang ldan te/ des ni ldan pa'i don bstan pa'o/ /de la ting nge 'dzin ni theg pa chen po'i ting nge 'dzin dang / nam mkha' mdzod kyi ting nge 'dzin dang / dpa' bar 'gro ba'i ting nge 'dzin la sogs pa'o/ /gzungs kyi sgo ni mi zad pa'i zam tog gi gzungs dang / sgo mtha' yas pa'i gzungs zhes bya ba la sogs pa'o/ /gnyis po dpag tu med pa ni bsod nams kyi tshogs dpag tu med pa dang / ye shes kyi tshogs dpag tu med pa'o/ /rang bzhin chos dang rdzogs longs spyod/ /sprul pa dag gis tha dad 'jug /ces bya ba la/ de bzhin gshegs pa'i sku ni chos kyi sku 'ba' zhig tu ma zad kyi rang bzhin gyi sku dang / chos la rdzogs par longs spyod pa'i sku dang / sprul pa'i sku dang tha dad pa mi mthun pa rnam pa gsum gyis sems can gyi don la 'jug go zhes bya ba'i don to/ /de la rang bzhin gyi sku ni chos kyi sku'o/ /chos la rdzogs par longs spyod pa'i sku'o/ /sprul pa ni sprul pa'i sku ste/ 'dis ni 'jug pa'i don bstan to/ /chos kyi dbyings rnam par dag pa'i don gong du rgya cher bshad pa rnams kyang mjug bsdus pa'i phyir te/ 'di ni sangs rgyas rnams kyi yang / /chos dbyings rnam par dag pa bshad/ /ces smos te/ gong du rang bzhin dang / rgyu dang / 'bras bu dang / las dang ldan pa dang / 'jug pa bshad pa de ni sangs rgyas rnams kyi chos kyi dbyings rnam par dag pa de lta bu yin no zhes bshad pa'i don to/ /sangs rgyas kyi sku rnam par dbye ba'i tshigs su bcad pa bdun te zhes bya ba la/ gong du sku gsum tha dad du 'jug pa mdo tsam du bstan nas/ da tshigs su bcad pa bdun gyis sku gsum tha dad du 'jug pa rgya cher zhib tu 'chad do zhes bya ba'i don to/ /rang bzhin dang ni zhes bya ba ni/ rang bzhin ni chos kyi sku la bya ste/ nam kun gzhi rnam par shes pa la yod pa'i gzung ba dang 'dzin pa'i dri ma spangs nas chos kyi dbyings me long lta bu'i ye shes su gyur pa na chos kyi sku zhes bya'o/ /rdzogs longs spyod ces bya bas rdzogs par longs spyod pa'i sku bstan te/ nam nyon mongs pa'i gnas gzhan du gyur nas mnyam pa nyid kyi ye shes su gyur pa dang / yid kyi rnam par shes pa gnas gzhan du gyur nas so sor kun du rtog pa'i ye shes su gyur te/ sar zhugs pa'i byang chub sems dpa' rnams la chos kyi longs spyod chen po mdzad pa ni longs spyod rdzogs pa'i sku zhes bya'o/ /sprul pa'i sku yang gzhan yin te/ /zhes bya ba la/ gzhan gyi sgras ni chos kyi sku dang longs spyod rdzogs pa'i sku 'ba' zhig tu ma zad kyi sprul pa'i sku yang yod do/ /nam mig gi rnam par shes pa nas lus kyi rnam par shes pa'i bar du gnas gzhan du gyur nas dga' ldan gyi pho brang du 'chi 'pho bstan pa dang / mya ngan las 'das pa'i bar dag bstan pa'i sgo nas 'dzam bu'i gling gi sems can yongs su smin par byed pa ni sprul pa'i sku yin no zhes bya ba'i don to/ /sangs rgyas rnams kyi sku dbye ba/ /zhes bya ba la/ de bzhin gshegs pa rnams la ni sku gcig tu ma zad kyi phye na rnam pa gsum yod do zhes bya ba'i don to/ /thog ma gnyis po'i gnas yin no/ /zhes bya ba la thog ma ni chos kyi sku la bya ste/ chos kyi sku ni rdzogs longs spyod pa'i sku dang sprul sku gnyis kyi gnas dang rten yin no zhes bya ba'i don to/ /de bas na sangs rgyas kyi sa'i ting nge 'dzin las kyang de la chos kyi rnam grangs mtha' dag thos pa'i bag chags yongs su smin pas ma lus par bsgoms pa rgyur gyur pa'i rtag tu sems can thams cad la phan pa dang bde ba skye ba'i phyir nye bar gnas pa'i ting nge 'dzin dang / gzungs kyi sgo dpag tu med pa dang / bsod nams dang ye shes kyi tshogs dang ldan pa shes bya dang nyon mongs pa'i sgrib pa thams cad las dben pa ni chos kyi dbyings rnam par dag pa ste/ chos thams cad kyi de bzhin nyid do/ /phyin ci ma log pa'i rang bzhin no/ /'phags pa'i chos thams cad kyi skye ba'i rgyu'o/ /de bzhin gshegs pa thams cad kyi bdag nyid do zhes bshad do/ /rdzogs longs spyod pa'i sku cher bshad pa'i phyir/ /rdzogs pa'i khams rnams thams cad du/ /mang po yongs sdud tha dad do/ /zhing dang ming du sku rnams dang / /chos la rdzogs longs spyod byed pas/ /ces bya ba smos te/ rdzogs par longs spyod pa'i sku ni 'jig rten gyi khams dang sangs rgyas kyi zhing thams cad na mang po yongs su sdud pa thams cad dang / zhing tha dad pa dang / sku tha dad pa dang / chos la rdzogs par longs spyod pa tha dad par rig par bya'o zhes bya ba'i don to/ /de la mang po yongs su sdud pa zhes bya ba ni 'khor sdud pa la bya ste/ rdzogs longs spyod pa'i 'khor mang po yang tha dad do/ /ji lta zhe na/ rdzogs longs spyod pa'i 'khor kha cig ni byang chub sems dpa' blo gros mi zad pa zhes bya ba la sogs pas bskor la/ rdzogs longs spyod pa'i 'khor kha cig tu ni byang chub sems dpa' kun du bzang po dang / spyan ras gzigs kyi dbang po zhes bya ba la sogs pa byang chub sems dpa'i 'khor gzhan gyis bskor ba'i phyir ro/ /zhing tha dad pa ni sangs rgyas kyi zhing gi sa gzhi kha cig shel gyi kha dog tu gnas/ kha cig gser dang be+e DUr+ya la sogs pa'i kha dog tu gnas pa'i phyir ro/ /ming tha dad pa ni rdzogs longs spyod pa'i sku kha cig gi mtshan rnam par snang mdzad ces bya/ kha cig snang ba mtha' yas zhes bya/ kha cig kun du bzang po zhes bya ba la sogs pa mtshan tha dad pa'i phyir ro/ /sku tha dad pa ni kha cig sku mdog gser du snang ba dang / kha cig shel dang / kha cig dngul du snang ba dang / kha cig ni sku tshad che/ kha cig ni sku tshad chung ba'i phyir ro/ /chos la rdzogs par longs spyod pa tha dad pa ni kha cig gi rdzogs longs spyod pa'i 'khor nas bcu'i theg pa chen po 'chad/ kha cig ni lang kar gshegs pa 'chad/ kha cig ni shes rab kyi pha rol tu phyin pa 'chad pa'i phyir ro/ /chos kyi sku rgya cher bstan pa'i phyir/ mnyam nyid phra ba de dang 'brel/ /rang bzhin skur ni 'dod pa'o/ /zhes bya ba smos te/ chos kyi sku thams cad mnyam par 'dod de/ sangs rgyas rnams kyi chos kyi dbyings la tha dad pa ni mi mthun pa med pa'i phyir ro/ / chos kyi sku ni phra bar 'dod de/ nyan thos dang rang sangs rgyas la sogs pa'i spyod yul du ma gyur pa'i phyir ro/ /chos kyi sku ni rdzogs longs spyod pa'i sku dang 'brel bar 'dod de/ rdzogs longs spyod pa'i sku'i rgyur gyur pa bstan pa'i phyir ro/ /ji ltar rgyur 'gyur zhe na/ chos kyi sku'i rgyu mthun pa las rdzogs longs spyod pa'i sku byung nas sar zhugs pa'i byang chub sems dpa' chen po rnams dang thun mong ma yin pa'i theg pa chen po'i chos rnams kyi longs spyod rdzogs par mdzad pa'i phyir ro/ /yang na rnam par mi rtogs pa'i ye shes kyi rjes las thob pa dag la 'jig rten pa'i ye shes la rdzogs longs spyod pa'i sku zhes bya ste/ dag pa 'jig rten pa'i ye shes ni rnam par mi rtog pa'i ye shes las 'byung bas chos kyi sku dang 'brel pa zhes bya'o/ /ji ltar 'brel pa'i don bstan pa'i phyir/ longs spyod rdzogs pa 'brel pa'i rgyu/ /'dod bzhin longs spyod ston pa'o/ /zhes smos te/ bsam pa bzhin phyi'i longs spyod sa gzhi shel dang / gser la sogs pa bstan par bya ba'i phyir dang / ci dgar nang gi longs spyod theg pa chen po'i chos zab mo bstan par bya ba'i phyir rdzogs longs spyod pa 'byor pa dang bcas pa'i sku 'byung ba'i rgyu ni chos kyi sku yin no zhes bya ba'i don to/ /de bas na rdzogs longs spyod pa'i sku dang 'brel to/ /sprul pa'i sku rgya cher bshad pa'i phyir/ sprul pa'i sku ni rig pa ste/ /zhes bya ba smos te/ dga' ldan gyi pho brang nas 'chi 'pho bstan pa la sogs 'ba' zhig la sprul pa'i sku zhes bya bar ma zad kyi/ brgya byin dang / tshangs pa dang / yi dwags dang byol song la sogs pa'i lus su sprul pa thams cad la sprul pa'i sku zhes bya bas/ sprul pa'i sku ni dpag tu med par rig par bya ste/ byol song la sogs pa sprul pa kun yang sprul pa'i sku yin pa'i phyir ro/ /rdzogs longs spyod pa'i sku dang sprul ba'i sku'i don mdor bsdus te bstan pa'i phyir/ gnyis la don gnyis phun sum tshogs/ /rnam pa kun du rab tu gnas/ /zhes bya ba smos te/ gnyis ni rdzogs longs spyod pa'i sku dang sprul pa'i sku gnyis la bya ste/ sku de gnyis la don gnyis zhes bya'am sku de gnyis kyis don gnyis mdzad do zhes bya ba'i don to/ /de la don gnyis ni bdag gi don phun sum tshogs pa dang / gzhan gyi don phun sum tshogs pa ste/ de longs spyod rdzogs pa'i sku la ni bdag gi don phun sum tshogs pa rnam pa thams cad du gnas te/ ci'i phyir zhe na/ rdzogs longs spyod pa'i skus ni sar zhugs pa'i byang chub sems dpa'i 'khor gyi nang du thun mong ma yin pa'i theg pa chen po'i chos kyi longs spyod so sor myong ba'i phyir ro/ /sprul pa'i sku la ni gzhan gyi don phun sum tshogs pa rnam pa thams cad du gnas te/ 'dzam bu'i gling la sogs par chos kyi 'khor lo bskor ba'i sgo nas gzhan gyi don 'ba' zhig mdzad pa'i phyir ro/ /sprul pa'i sku la rnam pa thams cad du gzhan gyi don phun sum tshogs pa ji ltar nye bar gnas she na/ de'i phyir/ bzo dang skye dang byang chub che/ /rtag tu mya ngan 'das ston pa/ /sangs rgyas sprul pa'i sku 'di ni/ /rnam par grol ba'i thabs chen po/ /zhes smos te/ sprul pa'i sku 'dis rtag tu bzo ston pa dang / skye ba ston pa dang / byang chub chen po ston pa dang / mya ngan las 'das pa ston pa'i sgo nas sems can rnams mya ngan las 'das pa la 'jog par byed pa'i thabs chen po yin pas na sprul pa'i sku la gzhan gyi don phun sum tshogs pa rnam pa thams cad du gnas pa yin no/ /de la bzo ston pa ni shing mkhan dang rdza mkhan dang pi wang mkhan la sogs pa rnam pa sna tshogs ston pa'o/ /skye ba ston pa ni dga' ldan nas shi 'phos shing mngal du gshegs pa dang / rgyal rigs dang bram ze'i rigs la sogs pa sna tshogs su skye ba ston pa'o/ /byang chub chen po ston pa ni rdo rje gdan du mngon par byang chub cing bdud 'joms par ston pa'o/ /mya ngan las 'das pa ston pa ni mya ngan las 'das pa ston pas 'dul ba rnams la phung po 'dor ba lta bur ston pa'o/ /sangs rgyas sku yang bsdu ba ni/ / sku gsum du yang shes par bya/ /zhes bya ba la/ de bzhin gshegs pa'i chos kyi sku dang / rdzogs par longs spyod pa'i sku dpag tu med pa rnams dang / sprul pa'i sku dpag tu med pa rnams kyang sku gsum du 'dus par rig par bya ste/ chos kyi sku rnams chos kyi skur bsdu/ rdzogs par longs spyod pa'i sku dpag tu med pa yang rdzogs longs spyod pa'i skur bsdu/ sprul pa'i sku dpag tu med pa rnams la sprul pa'i skur bsdu bar rig par bya'o zhes bya ba'i don to/ /bdag dang gzhan don gnas bcas pa/ /sku gsum dag gis shin tu gnas/ /zhes bya ba la/ de ltar sku gsum bstan pa des kyang rnam pa gsum bstan te/ gsum po ni bdag gi don dang bcas pa bstan pa dang gzhan gyi don dang bcas pa bstan pa dang / gnas dang bcas pa bstan pa ni rdzogs longs spyod pa'i sku ste sku des sgrib pa gnyis dang bral ba ni ye shes gnyis su med pa rang gis myong ba'i phyir ro/ /gzhan gyi don dang bcas pa'i sprul pa ni sprul pa'i sku ste/ des 'dzam bu'i gling du chos kyi 'khor lo bskor ba la sogs pa'i sgo nas sems can gyi don byed pa'i phyir ro/ /de'i gnas dang bcas pa ni chos kyi sku ste/ chos kyi sku ni rdzogs longs spyod pa'i sku dang / sprul pa'i rten dang gnas yin pa'i phyir ro/ /mdo sde las/ de bzhin gshegs pa thams cad mnyam pa'o zhes gsungs pa dang / de bzhin gshegs pa thams cad kyi sku rtag pa'o zhes gsungs pa'i don bstan pa'i phyir/ gnas dang bsam pa rnams dang ni/ /las kyang de dang mtshungs par 'dod/ /ces bya ba la sogs pa tshigs su bcad pa gcig smos te/ mnyam pa rnam pa gsum gyis de bzhin gshegs pa thams cad mtshungs te tha mi dad pa'i phyir sangs rgyas thams cad ni mnyam pa zhes bya'o/ /mnyam pa rnam pa gsum ni gnas mnyam pa dang / bsam pa mnyam pa dang / las mnyam pa'o/ /de la gnas mnyam pa ni chos kyi sku ste/ sku gnyis ni rten du gyur pa'i rang bzhin chos kyi dbyings rnam par dag pa la tha dad pa ni 'dra ba med pa'i phyir ro/ /bsam pa mnyam pa ni rdzogs longs spyod pa'i sku ste/ rdzogs longs spyod pa'i sku thams cad la bsam pa che chung dang bzang ngan med kyi/ thams cad kyang sems can la phan pa dang bde bar bya ba dgongs pa gcig pa'i phyir ro/ /las gcig pa ni sprul pa'i sku ste/ sprul pa'i sku thams cad kyang sprul pa sprul nas sprul pa'i phrin las kyis sems can 'dul bar mdzad par 'dra ba dang / de bzhin gshegs pa gcig gis sprul pa sprul na de bzhin gshegs pa gzhan gyis kyang sprul pa de sprul pa yin par phrin las thun mong bas na las gcig go/ /rtag pa'i don bstan pa'i phyir/ rang bzhin dang ni rgyun mi 'chad/ /rgyun gyis de dag rtag pa'o/ /zhes smos te/ de la rtag pa rnam pa gsum gyis na de bzhin gshegs pa thams cad kyi sku rtog pa zhes bya ste/ rtag pa gsum ni rang bzhin rtag pa dang / rgyun mi 'chad par rtag pa dang / rgyun rtag pa'o/ /de la rang bzhin rtag pa ni chos kyi sku ste/ chos kyi sku ni rang bzhin gyis skye 'gag med pa'i rang bzhin yin pa'i phyir ro/ /rgyun mi 'chad par rtag pa ni rdzogs longs spyod pa'i sku ste/ byang chub sems dpa' sar zhugs pa'i nang na theg pa chen po'i chos kyi longs spyod rgyun mi 'chad par mdzad pa'i phyir ro/ /rgyun gyis rtag pa ni sprul pa'i sku ste/ 'jig rten gyi khams la lar mya ngan las 'das pa bstan nas mi snang bar byas kyang 'jig rten gyi khams gzhan dag tu skye ba dang / mngon par sangs rgyas pa bstan nas sems can gyi don mdzad pa 'khor ba'i mtha'i bar du yang rgyun mi 'chad pa'i phyir ro/ /sangs rgyas kyi ye shes rnam par dbye ba'i tshigs su bcad pa bcu ste zhes bya ba la/ sku gsum gyi skabs bshad pa'i rjes la ye shes kyi skabs bshad par 'brel pa ci yod ce na/ skabs 'di ni byang chub bshad pa'i skabs yin la sangs rgyas kyi sa yang chos lngas bsdus te/ chos kyi dbyings rnam par dag pa dang / me long lta bu'i ye shes dang / mnyam pa nyid kyi ye shes dang / so sor kun du rtog pa'i ye shes dang / bya ba sgrub pa'i ye shes so zhes bshad pa las chos kyi dbyings bshad pa'i zla la chos kyi dbyings ni rang bzhin dang / rdzogs pa'i longs spyod pa dang / sprul pa'i sku ste rnam pa gsum du 'jug go zhes sku gsum gyi rab tu dbye ba bshad do/ /da ni ye shes kyi dbang du byas nas ye shes bzhi'i rang bzhin bshad par bya ste/ de yang tshigs su bcad pa bcus ston to zhes bya ba'i don to/ /ye shes bzhi las kyang me long lta bu'i ye shes lngar byung bas nas de dpyad pa'i phyir/ me long ye shes mi g.yo ste/ /ye shes gsum ni de la gnas/ /zhes smos te/ me long lta bu'i ye shes ni g.yo ba med pa'i rang bzhin chos kyi dbyings rnam par dag pa la rtag tu gnas shing 'khor ba'i mtha'i bar du yang 'byung 'jug med par rgyun mi 'chad par 'jug par 'byung ba'i phyir mi g.yo ba zhes bya ba la ye shes gsum ni 'byung 'jug yod pas na g.yo ba zhes bya ste/ g.yo ba'i ye shes gsum ni me long lta bu'i ye shes la gnas shing brten to zhes bya ba'i don to/ /de bas na sangs rgyas kyi sa'i mdo las kyang 'di lta ste/ bsod nams 'dod pa'i skyes bu la las ji tsam 'gro ba dang 'ong zhing lhags pa rnams bdag gi lus kyi yon tan dang nyes pa so sor blta ba'i phyir nyes pa zhig pa dang / yon tan bskyed pa'i phyir me long gi dkyil 'khor rgya chen por gnas bzang por mi g.yo bar gzhag pa de bzhin du/ de bzhin gshegs pa rnams kyi me long lta bu'i ye shes kyi dkyil 'khor kyang grangs med dpag tu med pa'i sems can rnams kyi kun nas nyon mongs pa dang rnam par byang ba dor ba dang bskyed pa'i phyir chos kyi dbyings rnam par dag pa'i gnas su rgyun mi 'chad pa'i phyir mi g.yo bar gzhag go zhes gsungs pa lta bu'o/ /ye shes gsum gang zhe na/ de'i phyir/ mnyam pa nyid dang so sor rtog / bya ba grub pa dag kyang ngo / /zhes smos te/ me long lta bu'i ye shes la gnas pa'i ye shes gsum ni mnyam pa nyid kyi ye shes dang / so sor kun du rtog pa'i ye shes dang / bya ba sgrub pa'i ye shes so/ /me long ye shes nga yir med/ /ces bya ba la/ me long lta bu'i ye shes la gzung ba dang 'dzin par rtog pa dang / nga dang bdag tu rtog pa dang / btsal ba 'bad pa med pas nga'i med pa zhes bya ste/ de bas na sangs rgyas kyi sa'i mdo las kyang / 'di lta ste/ me long gi dkyil 'khor du gzugs brnyan rnam pa du mar rnam pa mang po skye ba yang me long gi dkyil 'khor de la de dag med de/ me long gi dkyil 'khor de la ched du 'jug pa med cing mngon par 'du byed pa med pa de bzhin du de bzhin gshegs pa rnams kyi me long lta bu'i ye shes kyi gzugs brnyan rnam pa du mar rnam pa mang po snang ste/ me long lta bu'i ye shes la gzugs brnyan med de/ me long lta bu'i ye shes la gzugs brnyan de la ched du 'jug pa med cing mngon par 'du byed pa med do zhes gsungs so/ /yongs su ma chad ces bya ba la/ me long lta bu'i ye shes la ni yul dang phyogs su ma chad pa ste/ yul dang phyogs kha cig tu 'jug cing kha cig tu mi 'jug pa ma yin par yul dang phyogs thams cad du 'jug cing 'byung ba'i phyir ro/ /rtag tu ldan zhes bya ba ni dus ma chad par bstan te dus kha cig tu mi 'byung ba ma yin gyi dus gsum thams cad du 'byung ba'i phyir ro/ /de bas na sangs rgyas kyi mdo las kyang / 'di lta ste/ me long gi dkyil 'khor ngos thams cad shin tu phyis pa ni mdun dang logs dang / rgyab thams cad kyang gzugs brnyan skye ba'i rgyur gyur pa de bzhin du/ de bzhin gshegs pa rnams me long lta bu'i ye shes yongs su chad pa med pa'i rnam pa shin tu phyis na thams cad kyang gzugs brnyan skye ba'i rgyur gyur zhes gsungs pa lta bu'o/ /shes bya kun la ma rmongs te/ /zhes bya ba la/ me long lta bu'i ye shes la ni nyon mongs pa dang shes bya'i sgrib pa med pas me long dag pa'i ngos su gzugs brnyan rnam pa sna tshogs pa snang ba dang 'dra bar shes bya'i rnam pa thams cad ye shes de la snang zhing ye shes thugs su chud pa nas shes bya thams cad la ma rmongs pa zhes bya'o/ /de bas na sangs rgyas sa'i mdo las kyang de 'di lta ste/ me long gi dkyil 'khor shin tu phyis pa dang zhing gsal ba dri ma med pa kun nas lham me lhag ge lhang nger snang bde bzhin du de bzhin gshegs pa rnams kyi me long lta bu'i ye shes kyang sangs rgyas kyi ye shes kyis nyon mongs pa dang / shes bya'i sgrib pa sbyangs shing shin tu phyis pa sems can thams cad kyi bya ba sgrub pa'i phyir de la gnas pa'i ting nge 'dzin yongs su bzung bas dang zhing gsal te/ kun nas lham me lhag ge lhang nger snang ngo zhes gsungs so/ /de dag la yang rtag mngon med/ /ces bya ba la/ mig gi rnam par shes pas gzugs la dmigs pa na sngon po dang ser po la sogs pa rnam pa dang / dmigs pa so sor gcod kyang tha snyad med pa de bzhin du ye shes kyi dkyil 'khor der shes bya'i gzugs brnyan rnams snang yang 'di ni sngon po 'di ni ser po zhes rnam pa dang dmigs pa dang dmigs pa mi gcod cing rtog pa med pas de dag la rtag mngon med ces bya'o/ /rnam par mi rtog pa'i ye shes kyis ni rtag mngon med ces bya ba dang / dmigs par byed pa mnyam par dmigs te/ ci'i phyir zhe na/ chos kyi dbyings de bzhin nyid la dmigs pa'i phyir ro/ /de bas na sangs rgyas kyi sa'i mdo las kyang de 'di lta ste/ me long gi dkyil 'khor ni rnam pa gzugs brnyan rnam pa du ma rnam pa mang po de dag dang nye bar phrad cing de'i mtshan ma'i phyir ldan pa yang ma yin mi ldan pa yang ma yin pa de bzhin du/ de bzhin gshegs pa rnams kyi me long lta bu'i ye shes kyang / ye shes kyi gzugs brnyan rnam pa du ma rnam pa mang po de dag nye bar mi phrad cing mi brjod pa'i chos kyi phyir ldan pa yang ma yin/ mi ldan pa yang ma yin no zhes gsungs so/ /ye shes kun gyi rgyu yin pas/ /ye shes 'byung gnas chen po 'dra/ /zhes bya ba la/ ye shes kyi 'byung gnas ye shes mang po 'byung ba ltar me long lta bu'i ye shes las kyang mnyam pa nyid kyi ye shes dang / so sor kun du rtog pa'i ye shes dang / bya ba sgrub pa'i ye shes rnams 'byung ste/ ye shes gzhan 'byung ba'i rgyu byed pas na ye shes kyi 'byung gnas chen po zhes bya'o/ /de bas na de bzhin gshegs pa skye ba 'byung ba bstan pa'i mdo las/ sangs rgyas bcom ldan 'das rnams ni ye shes kyi 'byung gnas rnam pa thams cad du ye shes kyi rten du gyur pa'i ye shes dang ldan pa'i phyir ro zhes gsungs so/ /sangs rgyas kyi sa las 'di lta ste/ me long gi dkyil 'khor gzugs kyi rkyen sdud pas gzugs brnyan mang po skye ba'i rgyur gyur pa de bzhin du/ de bzhin gshegs pa rnams kyi me long lta bu'i ye shes kyang sems can gyi dus kyi rkyen sdud pas sems ye shes kyi gzugs brnyan sna tshogs skye ba'i rgyur 'gyur ro zhes gsungs so/ /rdzogs longs spyod pa'i sangs rgyas de/ /zhes bya ba la me long lta bu'i ye shes de la rdzogs longs spyod pa'i sangs rgyas zhes kyang bya ste/ ci'i phyir zhe na/ rdzogs longs spyod pa'i sku 'byung ba'i rgyur gyur pa dang / gzung 'dzin gnyis dang bral ba'i gnyis su med pa'i ye shes kyi bde ba rang gis myong ba'i phyir ro/ /ye shes gzugs brnyan 'byung phyir te/ /zhes bya ba la/ rnam par mi rtog pa'i ye shes de la ci'i phyir me long lta bu'i ye shes zhes bya zhe na/ dper na me long gi nang du gzugs brnyan rnam pa sna tshogs 'byung ba de bzhin du rnam par mi rtog pa'i ye shes de la yang mnyam pa nyid dang / so sor kun du rtog pa dang / bya ba sgrub pa'i ye shes kyi gzugs brnyan 'byung bas na me long lta bu'i ye shes zhes bya'o/ /mnyam pa nyid kyi ye shes kyi rang bzhin bstan pa'i phyir/ sems can mnyam pa nyid kyi ye shes ni/ /zhes bya ba la sogs pa tshigs su bcad pa gcig smos te/ sa dang po'i dus na bdag gang yin pa sems can gzhan yang de yin/ gzhan gang yin pa bdag kyang de yin no zhes sems can dang bdag gnyis su mnyam pa nyid dang sa dang po'i dus na rtogs so zhes bya ba'i don to/ /bsgom pa dag phyir 'dod pa ste/ /zhes bya ba la/ sa dang por mnyam pa nyid rtogs pa'i ye shes las gnyis nas sa bcu'i bar du bsgom pa dang / sa bcu man chad nang dang bdag tu rtog pa'i bag chags phra mo yang spangs nas dag par gyur pa dang / sangs rgyas kyi sar mnyam pa nyid kyi ye shes su gyur pa 'dod do zhes bya ba'i don to/ /mnyam pa nyid kyi ye shes kyi rang bzhin bstan pa'i phyir/ mi gnas zhi bar zhugs pa ni/ /mnyam nyid ye shes su yang 'dod/ /ces smos te/ sangs rgyas kyi sar mi gnas pa'i mya ngan las 'das par zhugs nas/ 'khor ba dang mya ngan las 'das pa gnyis ka la tha dad pa med cing ro gcig par dmigs pa ni mnyam pa nyid kyi ye shes yin par 'dod do zhes bya ba'i don to/ /de bas na sangs rgyas kyi sa'i mdo las kyang / 'jig rten dang zhi bar bya ba ro gcig pa bya ba mnyam pa nyid yongs su rdzogs pa dang zhes gsungs so/ /mnyam pa nyid kyi ye shes kyi ldan pa'i don bstan pa'i phyir/ byams dang snying rje chen po dang / /thams cad dus su ldan par rig/ /ces smos te/ mnyam pa nyid kyi ye shes de ni dus thams cad du tshad med pa bzhi las byams pa chen po dang snying rje chen po dang ldan par rig par bya'o zhes bya ba'i don to/ /de la sems can thams cad bde ba la 'jog par byed pa ni byams pa chen po'o/ /sems can thams cad kyi sdug bsngal sel bar byed pa ni snying rje chen po'o/ /de ltar mnyam pa nyid kyi ye shes byams pa dang snying rjer ldan pa'i phyir/ de bzhin gshegs pa'i skye ba 'byung bar bstan pa'i mdo las kyang / sangs rgyas bcom ldan 'das rnams ni ye shes kyi zla ba chen po yin te/ sems can thams cad zhi ba nye bar ston pa'i phyir ro zhes gsungs so/ /sangs rgyas kyi sa las kyang / skyabs kyi rnam pa byams pa chen po mnyam pa nyid yongs su rdzogs pa dang / btang snyoms tshad med pa rnams snying rje chen po mnyam pa nyid yongs su rdzogs pa dang zhes gsungs so/ /sems can rnams kyi mos bzhin du/ /sangs rgyas gzugs ni shin tu ston/ /zhes bya ba la/ gzhan yang mnyam pa nyid kyi ye shes ni sems can so so'i mos pa dang / tha dad pa dang / bsam pa bzhin du sku ston par byed do/ /kha cig la sku'i kha dog sngon por ston/ kha cig la ser por ston pa la sogs pa'o/ /de bas na de bzhin gshegs pa gsang ba bstan pa'i mdo las kyang / sems can la la las ni de bzhin gshegs pa'i kha dog sngon por/ la la las ni ser por mthong ba la sogs pa gsungs so/ /sangs rgyas kyi sa'i mdo las kyang / ji ltar mos pa'i sems can thams cad la de bzhin gshegs pa'i gzugs kyi sku ston pa mnyam pa nyid kyi ye shes yongs su rdzogs pa dang zhes gsungs so/ /so sor kun du rtog pa'i ye shes kyi rang bzhin bstan pa'i phyir/ so sor rtog pa'i ye shes ni/ /rtag tu shes byar mi thogs te/ /zhes bya ba la sogs pa smos te/ so so'i skye bo'i dus na yid kyi rnam par shes pa ser po dang / sngon po la sogs pa la dpyod cing rtog pa de gnas gyur na so sor rtog pa'i ye shes zhes bya ste/ de yang chos rnams kyi mtshan nyid ji lta ba bzhin du rtogs shing thugs su chud pa'i rang bzhin yin pas so sor rtog pa'i ye shes zhes bya'o/ /de bas na sangs rgyas kyi sa'i mdo las kyang / de 'di lta ste/ 'jig rten gyi khams khor yug dang khor yug chen pos kun du bskor ba de bzhin du de bzhin gshegs pa rnams kyi so sor rtog pa'i ye shes kyang rnam pa thams cad du/ chos thams cad kyi rang gi mtshan nyid dang spyi'i mtshan nyid la ma rmongs pas kun du bskor ro zhes gsungs so/ /de yang chos kha cig gi rang dang spyi'i mtshan nyid khong du chud pa ma yin gyi chos thams cad kyi rang dang spyi'i mtshan nyid khong du chud pa ni/ rtag tu shes bya la mi thogs pa zhes bya ste/ de bas na sangs rgyas kyi sa'i mdo las kyang de 'di lta ste/ 'jig rten gyi khams ni lan cig tu rnam pa sna tshogs shes par 'gyur bde bzhin du de bzhin gshegs pa rnams kyi so sor rtog pa'i ye shes kyang shes par bya ba thams cad la mi chags pa'i ye shes rnam pa sna tshogs shes par byed pa'i rgyur 'gyur ro zhes gsungs so/ /de bas na de bzhin gshegs pa'i skye ba 'byung bar bstan pa'i mdo las kyang / sangs rgyas bcom ldan 'das ni ye shes kyi nyi ma chen po yin te/ shes bya thams cad la ye shes kyis snang bar byed pa'i phyir ro zhes gsungs so/ /ting nge 'dzin dang gzungs rnams kyi/ /gter lta bu ni de nyid do/ /zhes bya ba la/ so sor kun du rtog pa'i ye shes las dpa' bar 'gro ba'i ting nge 'dzin la sogs pa ting nge 'dzin dpag tu med pa 'byung ba dang / mi zad pa'i za ma tog la sogs pa gzungs dpag tu med pa 'byung bas na de dag gi gter du gyur pa nyid ces bya ste/ de bas na sangs rgyas kyi sa'i mdo las kyang / yang shin tu yang dag par rtog pa'i ye shes ni de 'di lta ste/ 'jig rten gyi khams sems can gyi rten du gyur pa de bzhin du de bzhin gshegs pa rnams kyi so sor rtog pa'i ye shes kyang ting nge 'dzin dang / gzungs kyi sgo dang / so so yang dag par rig pa dang / spobs pa ston pa dang / sangs rgyas kyi chos rnams kyi rten du 'gyur ro zhes gsungs so/ /'khor gyi dkyil 'khor rnams su yang / /'byor pa thams cad rab tu ston/ /zhes bya ba la so sor rtog pa'i ye shes kyis byang chub sems dpa'i sar zhugs pa'i 'khor gyi dkyil 'khor du phyi'i longs spyod kyi 'byor pa rin po che'i sa gzhi dang / rin po che'i shing dang / lda ldi rnam pa sna tshogs ston par byed de/ de bas na sangs rgyas kyi sa'i mdo las kyang / de 'di lta ste/ 'jig rten gyi khams ni sems can rnams kyis yongs su longs spyod par 'gyur ba de bzhin du/ de bzhin gshegs pa rnams kyi so sor rtog pa'i ye shes kyang rnam pa thams cad du phun sum tshogs pa sangs rgyas kyi dkyil 'khor thams cad du ston cing chos rin po che rdzogs par longs spyod par 'gyur ro zhes gsungs so/ /the tshom thams cad gcod pa ste/ /zhes bya ba la/ so sor rtog pa'i ye shes des theg pa chen po'i chos kyi rang bzhin dang spyi'i mtshan nyid la the tshom du gyur pa'i the tshom gcod par byed do zhes bya ba'i don to/ /chos chen char ni shin tu 'bebs/ /zhes bya ba la/ so sor rtog pa'i ye shes des byang chub sems dpa' sar zhugs pa rnams la theg pa chen po'i chos zab cing rgya che ba rnams kyang ston par mdzad de zhes bya ba'i don to/ /de bas na sangs rgyas kyi sa'i mdo las kyang / de 'di lta ste/ 'jig rten gyi khams ni ri rab la sogs pa rin po che'i ri snang bas nye bar dmigs pa de bzhin du/ de bzhin gshegs pa rnams kyi so sor rtog pa'i ye shes la sangs rgyas dang byang chub sems dpa' mthu dang ldan pa chos rgya chen po bstan pa rab tu snang ngo zhes gsungs so/ /bya ba sgrub pa'i ye shes kyi rang bzhin bstan pa'i phyir/ bya ba sgrub pa'i ye shes ni/ /thams cad khams su sprul pa dang / /sna tshogs dpag med bsam yas pas/ /sems can kun gyi don sgrub pa'o/ /zhes bya ba smos te/ bya ba sgrub pa'i ye shes kyis ni phyogs bcu'i 'jig rten gyi khams thams cad du/ sku sprul pa dang / thugs sprul pa dang / gsung sprul pas 'phags pa dang / 'phags pa ma yin pa'i sems can kun gyi don sgrub par mdzad do zhes bya ba'i don to/ /sprul pa de yang sna tshogs kyis sems can gyi don sgrub pa dang / bsam gyis mi khyab pa'i sems can gyi don sgrub pa'o/ /de la lha dang klu dang gnod sbyin dang dri za la sogs pa sems can sna tshogs kyi skur sprul pas na sna tshogs kyis sems can gyi don sgrub pa'o/ /de yang grangs kyis gcig gnyis sam brgya stong zhes grangs bcad par mi nus pa zhig sprul par mdzad pas na/ dpag tu med pa sems can gyi don sgrub pa'o/ /sprul pa mang po sprul pa de dag kyang sems can sprul pa las 'das pa ji snyed cig sprul par mdzad pas na/ bsam gyis mi khyab pa'i sems can sgrub pa'o/ /de la sna tshogs dang dpag tu med pa dang bsam gyis mi khyab pa gsum gyis don rim bzhin du bstan pa'i phyir/ bya ba sgrub pa'i bye brag dang / /grangs dang zhing gis rtag tu ste/ /sangs rgyas sprul pa bsam mi khyab/ /de yang rnam pa kun rig bya/ /zhes smos te/ spyir na sangs rgyas kyi sprul pa ni rtag pa'ang bsam gyis mi khyab pa'i rnam pas sems can gyi don byed par rig par bya ste/ ji ltar bsam gyis mi khyab ce na/ bya ba sgrub pa'i bye brag bsam gyis mi khyab pa dang / grangs bsam gyis ma khyab pa dang / zhing bsam gyis mi khyab pa'i phyir ro/ /de la lha dang mi'i lus su sprul par ma zad kyi sems can thams cad kyi lus su sprul nas sems can gyi don mdzad pas na bya ba sgrub pa'i bye brag bsam gyis mi khyab pa ste/ 'dis ni sna tshogs kyi don bstan to/ /sprul pa yang gcig gnyis gcig sprul par ma zad kyi tshig gi sgo nas grangs mi chod pa zhig sprul nas sems can gyi don mdzad pas na grangs bsam gyis mi khyab pa ste/ 'dis ni dpag tu med pa'i don bstan to/ /de'ang sangs rgyas kyi zhing gcig gnyis su 'jug pa ma yin gyi phyogs bcu'i sangs rgyas kyi zhing rab 'byam mtha' yas par 'jug pas na zhing bsam gyis mi khyab pa 'dis ni mtha' yas pa'i don bstan to/ /de bas na de bzhin gshegs pa skye ba 'byung ba bstan pa'i mdo las/ sangs rgyas bcom ldan 'das rnams ni ye shes kyi spyan chen po dang ldan pa sems can thams cad kyi nyon mongs pa'i nad zhi bar byed pa'i phyir ro zhes gsungs so/ /da ni ye shes bzhi'i rgyu bstan te/ de'ang me long lta bu'i ye shes kyi rgyu bstan pa'i phyir/ 'dzin dang zhes smos te/ dang po so so'i skye bo'i dus na dge ba'i bshes gnyen la brten nas/ dam pa'i chos mnyan pa dang / mnyan nas tshig dang don gzung ba dang / gzung ba rnams bsam zhing bsgoms te sgrib pa gnyis spangs nas kun gzhi gnas gyur pa la me long lta bu'i ye shes 'thob par 'gyur ro zhes bya ba'i don to/ /mnyam pa nyid kyi ye shes kyi rgyu bstan pa'i phyir/ sems kyang mnyam pa dang zhes smos te/ so so'i skye bo'i dus na byams pa chen po'i sems kyis bdag gi don ji ltar sgrub cing bya ba bzhin du sems can gzhan gyi don kyang de bzhin du bsgrub par bya'o zhes bdag dang gzhan gyi don sgrub pa la tha dad pa med par bsgrub par sems pa las mnyam pa nyid kyi ye shes 'byung bar 'gyur ro zhes bya ba'i don to/ /so sor kun du rtog pa'i ye shes kyi rgyu bstan pa'i phyir/ yang dag chos kyang rab bstan dang / /zhes bya ba la/ ji ltar thos pa'i chos dang don rnams phyin ci ma log par gzhan la bstan pa las/ so sor kun du rtog pa'i ye shes 'byung bar 'gyur ro zhes bya ba'i don to/ /bya ba sgrub pa'i ye shes kyi rgyu bstan pa'i phyir/ bya ba dag ni sgrub pa la/ /zhes smos te/ so so'i skye bo'i dus na sems can gyi bya ba zhing rmo ba dang tshong bya ba la sogs pa'i grogs byas nas bya ba sgrub pa'i ye shes 'byung ngo zhes bya ba'i don to/ /sangs rgyas gcig ma yin pa dang tha dad pa ma yin pa'i tshigs su bcad pa de la kha cig 'jig rten gyi khams gcig tu sangs rgyas gcig mngon par rdzogs par sangs rgyas na phyogs bcu'i 'jig rten gyi khams gzhan dag tu sangs rgyas gzhan mi 'byung mi skye zhes zer ro/ /la la dag ni 'khor ba thog ma med pa'i dus nas sangs rgyas gcig cig tu zad de des sangs rgyas kyi zhing khams thams cad du sems can gyi don mdzad cing sangs rgyas kyi phrin las mdzad do zhes smra'o/ /kha cig ni sangs rgyas mang du yod de/ chos kyi sku la gnas pa'i tshe yang nga dang bdag tu rtog pa spangs pa dang shes bya dang nyon mongs pa'i sgrib pa dang bral ba'i chos kyi sku mang du yod do zhes zer te/ de la sangs rgyas gcig tu yang ma zad du mar yang med par bstan pa'i phyir tshigs su bcad pa gcig rtsom mo zhes bya ba'i don to/ /tha dad rig dang zhes bya ba la/ sangs rgyas ni gcig kho nar zad par mi rung ste/ ci'i phyir zhe na/ sangs rgyas kyi rigs tha dad pa'i phyir te/ tha dad ces bya ba'i don ni sems can gyi khams na sangs rgyas kyi rigs dang ldan pa'i sems can mtha' yas zhes bya ba'i don to/ /de la dper na sa bon gyi phung po chen po las sa bon 'bru gcig gis myu gu skyed kyi/ gzhan gyis mi bskyed do zhes bya bar mi rigs pa de bzhin du sems can gyi khams nas 'tshang rgya bar 'gyur ba'i rigs can bsam gyis mi khyab pa dag cig yod pa las gcig cig 'tshang rgya'i gzhan ci'i phyir 'tshang rgya bar mi 'gyur te/ 'tshang rgya bar mi 'gyur bas smra bar mi rigs so/ /don med dang zhes bya ba la/ dper na gnas gcig tu kha zas la sogs pa g.yos pas 'grangs pa dang phan par 'gyur ba de bzhin du gzhan dag g.yos pa dang 'grangs pa dang phan par 'gyur ba dang 'dra bar bsod nams dang ye shes kyi tshogs sus bsags pa de dag thams cad 'tshang rgya bar 'gyur ba yin gyi/ chud mi za ba las gal te gcig cig 'tshang rgya'i gzhan 'tshang mi rgyan ni phyogs bcu'i 'jig rten gyi khams na byang chub sems dpa' bsod nams dang ye shes kyi tshogs bsags pa rnams don med par 'gyur te/ don med pa ma yin pas na sangs rgyas gcig tu zad par mi rung ngo / /rdzogs dang zhes bya ba la de bzhin gshegs pa rnams dang po byang chub tu sems bskyed pa na sems c an thams cad bla na med pa'i byang chub la bzhag go zhes sems bskyed pa la mngon par sangs rgyas pa'i dus na sems can 'tshang rgya ba la 'jog par zad na gal te gcig cig 'tshang rgya'i gzhan 'tshang mi rgya na ni sangs rgyas kyi dus na yang sems can su yang sangs rgyas su ma bkod pas de bzhin gshegs pas sems can gyi don bya ba rdzogs par ma gyur pa ste/ de lta bu yang mi rigs pas ni sangs rgyas gcig tu mi rung ste/ de bas na tshig 'di yan chad kyis 'jig rten gyi khams gcig tu sems can gcig mngon par sangs rgyas pa'i dus na gzhan sangs mi rgya'o zhes bshad pa de mi rigs par bstan to/ /thog ma med pa'i phyir zhes bya ba la/ dang po nas sangs rgyas gcig cig tu zad de/ sangs rgyas du ma med do zhes thog ma'i sangs rgyas zhes bya ba gang yang med de/ ci'i phyir zhe na/ bsod nams dang ye shes kyi tshogs ma bsags par 'tshang rgya bar ni mi rigs la bsod nams dang ye shes kyi tshogs kyang de'i lung 'bogs pa'i sangs rgyas gzhan med du mi rung bas sangs rgyas de'i lung 'bogs pa'i sangs rgyas gzhan yang dgos la/ de la yang sangs rgyas gzhan dag kyang dgos te/ de ltar brgyud nas sangs rgyas gcig tu mi rung bas 'dis ni thog ma med pa nas sangs rgyas gcig tu zad do zhes zer ba bkag go/ /sangs rgyas gcig min zhes bya ba la/ gong du bshad pa ltar na sangs rgyas ni gcig tu ma zad kyi grangs med dpag tu med do zhes bya ba'i don to/ /tha dad med/ dri med gnas la mang po med/ /ces bya ba'i don la/ dri med gnas ni chos kyi dbyings zag pa med pa'i dbyings la bya ste/ chos kyi dbyings la zhugs pa'i dus na sangs rgyas rnams kyi chos kyi sku la mi mthun pa du mar med pas na chos kyi sku ni mang por yod pa yang mi 'dod de 'dis ni chos kyi sku mang du yod par smra ba bkag go/ /sangs rgyas su 'gyur ba'i thabs kyi tshigs su bcad pa bzhi'o zhes bya ba la chos kyi dbyings rnam par dag pa dang / ye shes bzhi la sangs rgyas zhes bya ste/sbyin pa'i pha rol tu phyin pa nas bsam gtan gyi pha rol tu phyin pa'i bar pha rol tu phyin pa lnga ni sangs rgyas su 'gyur ba zhes bya'o/ /pha rol tu phyin pa lnga dag par byed pa ni shes rab kyi pha rol tu phyin pa yin pas/ shes rab kyi pha rol tu phyin pa bstan pa'i phyir tshigs su bcad pa bzhi rtsom mo zhes bya ba'i don to/ /gang rnams med pa de nyid ni/ /yod pa yi ni dam pa'o/ /zhes bya ba la/ sa dang po'i dus na kun brtags kyi rang bzhin med par khong du chud do/ /gzung ba dang 'dzin pa'i rang bzhin kun brtags pa dang por med par gyur pa de nyid yod pa'i mchog ces gdags te/ ci'i phyir zhe na/ gzung 'dzin dang bral ba'i yongs su grub pa'i mtshan nyid yod pa'i phyir/ rnam pa kun du mi dmigs pa/ /dmigs pa yi ni mchog tu 'dod/ /ces bya ba la/ sa dang po'i dus na kun brtags pa'i rang bzhin dang bdag dang bdag gir rtog pa dang / chos su rtog pa mi dmigs te ma mthong ba nyid dmigs pa'i mchog ces bya/ ci'i phyir zhe na/ gzung 'dzin dang bral ba'i yongs su grub pa'i mtshan nyid de de'i tshe dmigs te/ mthong ba'i phyir ro/ /sgom pa dag ni mi mthong ste/ /sgom pa yi ni mchog tu 'dod/ /ces bya ba la/ sa gnyis nas sa bcu man chad kyi tshe gzung ba dang 'dzin pa dang nga dang bdag gir rtog pa spangs te/ sgom par byed pa dang sgom par byed pa gnyis mi mthong bar sgom pa gnyis sgom pa'i mchog tu 'dod de/ ci'i phyir zhe na/ dmigs su med pa'i mtshan nyid bsgom pa'i phyir/ /rnyed pa dag ni ma mthong na/ /rnyed pa yang ni mchog tu 'dod/ /ces bya ba la/ sangs rgyas kyi sa'i dus na rdzogs longs spyod pa'i sku dang / sprul pa'i sku dang / stobs dang mi 'jigs pa la sogs pa'i chos rnyed par ma mthong ba nyid rnyed pa'i mchog ces bya ste/ ci'i phyir zhe na/ chos kun gyi mchog chos kyi sku rnyed pa'i mchog go/ /de ltar dmigs su med pa'i mtshan nyid du bsgoms pa na 'tshang rgya ba'i thabs su 'gyur bar bstan nas dmigs pa dang bcas pa rnams la 'tshang rgya ba med par bstan pa'i phyir/ lci ba dang ni ring ba dang / /mtshan ma dag gis brtson 'grus mthong / /byang chub sems dpa' nga rgyal can/ /byang chub las ni ring zhes bya/ /zhes smos te/ la la dag 'di snyam du bla na med pa'i byang chub ni stobs dang mi 'jigs pa la sogs pa rmad du byung ba'i chos dang ldan zhing de yang bsgrub dka' bar mthong bas lci bar yang mthong la/ bskal pa grangs med pa gsum gyi bar du bsgrub dgos pas ring por mthong ba dang / bsgom par bya ba'i yul 'ga' zhig mthong bas mtshan ma mthong ba dang / bla na med pa'i byang chub ni brtson 'grus brtsams pas 'thob la/ bdag kyang brtson 'grus brtsams pa yin te/ sangs rgyas 'thob par 'gyur gyi/ gzhan dag ni brtson 'grus med de bdag de bas lhag go snyam du nga rgyal byed cing dngos por dmigs pa dang bcas pa rnams la bla na med pa'i byang chub thob pas ni byang chub las ring ba zhes bya'o/ /dmigs su med pa'i sgom pa ni/ /sangs rgyas kyi thabs su gyur la dmigs pa can ni thabs ma yin par bstan pa mjug bsdu ba'i phyir/ ji ltar smras pa de thams cad/ /btags pa tsam du mthong na ni/ /mi rtog byang chub sems dpa' rnams/ /byang chub nyid ni thob ces bya/ /zhes smos te/ gong du bshad pa'i lci ba dang ring ba dang / mtshan ma dang brtson 'grus brtsams par bshad pa rnams btags pa tsam/ sems tsam du zad pa mthong la/ sems tsam po de la yang mi rtog na byang chub sems dpa' chos la mi skye ba'i bzod pa thob pas rnam par mi rtog pa'i ye shes lhun gyis grub pa'i phyir de thob pa nyid byang chub thob pa zhes bya'o/ /sangs rgyas rnams phan tshun du bya ba gcig bsdu ba'i tshigs su bcad pa bzhi ste zhes bya ba la/ chos kyi dbyings rnam par dag pa dang / ye shes bzhi la'ang sangs rgyas zhes bya ste/ sangs rgyas de thob pan de bzhin gshegs pa'i phrin las gcig par bstan pa'i phyir tshigs su bcad pa bzhi brtsams zhes bya ba'i don to/ /klung dag sa'i 'og tu song na zhes bya ba la/ klung gi sgras ni phyogs phyogs nas 'bab pa'i chu bran dang chu bo rnams la bya ste/ de dag ji srid du sa'i 'og tu ma song rgya mtshor ma zhugs ma 'dus kyi bar du zhes bya ba'i don to/ /gnas rnams tha dad ces bya ba ni chu bran dang chu bo de dag shar dang / lho la sogs pa'i gnas nas 'bab pa dang / ri dang gshongs la sogs pa nas 'bab pas gnas tha dad pa zhes bya'o/ /chu bo dag kyang kha cig dmar/ /la la sngo la la la skya bas na/ chu yang tha dad pa zhes bya'o/ /rgya mtsho la ltos nas chu bo de dag chu zheng dang gting dpag tu med pa yod pas yang chung ba zhes bya'o/ /chu bo de dag la las ni bad kan skyed par byed/ la las ni mkhris pa skyed par byed/ la la mngar/ la la skyur bas na/ tha dad bya ba byed ces smos te/ las tha dad par byed ces bya ba'i don to/ /chu gnas srog chags phra mo nyer spyod 'gyur/ /zhes bya ba la/ rgya mtshor ma 'dus pa'i chu bo de dag ji srid du rgya mtshor ma 'dus kyi bar du chu bo la brten pa'i srog chags grangs nyung ba dang / bong chung ba rnams kyi gnas dang longs spyod tsam byed pas/ chu gnas srog chags phra mo nyer spyod 'gyur/ /zhes bya'o/ /thams cad rgya mtshor song bar gyur na ni/ /zhes bya ba la/ phyogs phyogs kyi chu bo de dag rgya mtsho chen por zhugs shing 'dus na ni zhes bya ba'i don to/ /rgya mtshor zhugs pa thams cad kyang gser gyi dkyil 'khor la brten pas na/ gnas rnams gcig pa zhes bya'i rgya mtsho la chu zheng gi kha tshon dang gting dpag par dka' bas na chu zheng che la gcig pa zhes bya'o/ /rgya mtsho'i chu thams cad ni lan tshwa'i ror ro gcig pas bya ba gcig pa zhes bya/ rgya mtsho na gnas pa'i sems can grangs mang ba dang bong chen po rnams kyi gnas dang longs spyod du gyur pas na chu la gnas pa'i srog chags mang po rtag tu nyer spyod che zhes bya ste 'di ni dpe'o/ /de'i don bstan pa'i phyir/ sangs rgyas nyid du rab tu ma zhugs par/ /zhes bya ba smos te/ byang chub sems dpa' rnams mngon par sangs rgyas nas chos kyi dbyings rnam par dag pa ma mthong gi bar du zhes bya ba'i don to/ /byang chub sems dpa'i dus nas so so'i phung po lnga la brten nas gnas rnams tha dad pa zhes bya'o/ /sangs rgyas ma thob kyi bar du byang chub sems dpa' rnams la shes rab che chung yod pas brtan pa'i blo mi mthun pa zhes bya'o/ /mngon par sangs ma rgyas pa'i bar du shes bya thams cad mngon sum du 'gyur ba'i ye shes thams cad mkhyen pa'i ye shes med pas na rtog pa chung ba zhes bya'o/ /sangs rgyas kyi bar du byang chub sems dpa' kha cig ni sbyin pa'i pha rol tu phyin pa la spyod/ kha cig tshul khrims kyi pha rol tu phyin pa la spyod pa la sogs pa la spyod pa tha dad pas na bdag byed tha dad de zhes bya ste/ phrin las tha dad ces bya ba'i don to/ / sems can grangs kyis dpag tu yod pa dag gi don mdzad pas ni sems can don chung rtag tu nyer spyod ces bya'o/ /thams cad sangs rgyas nyid du zhugs pas na/ /zhes bya ba la/ byang chub sems dpa' de dag thams cad sangs rgyas kyi sa thob ste/ mngon par sangs rgyas nas chos kyi dbyings rnam par dag par zhugs shing mngon sum du byas nas zhes bya ba'i don to/ /mngon par sangs rgyas pa'i tshe thams cad kyang chos kyi dbyings rnam par dag pa'i gnas la gnas shing rton pas na/ gnas kyang gcig pa zhes bya'o/ /sangs rgyas kyi sa'i tshe yang shes bya thams cad mngon sum du gyur pa'i thams cad mkhyen pa'i ye shes thob pas na rtogs pa chen po gcig ces bya'o/ /sangs rgyas pa'i tshe sangs rgyas gcig phrin las sprul pa sprul pa mdzad pa bzhin du sangs rgyas gzhan yang phrin las de kho nar mdzad par zad la/ sangs rgyas gcig gis sprul pa sprul pa na chos kyi skur sangs rgyas thams cad sku gcig pas gzhan gyis kyang sprul pa yin pa'i phyir bya ba gcig tu 'dres pa zhes bya'o/ /mngon par sangs rgyas phan chad sems can grangs med dpag tu med pa rnams skad cig ma gcig la 'dug cing smin par byed pas na/ rtag par yang de dag / sems can tshogs che longs spyod che/ /zhes bya'o/ /sangs rgyas nyid la spro bar bya ba'i tshigs su bcad pa zhes bya ba la/ chos lnga la sogs pa dang ldan pa ni sangs rgyas te/ sangs rgyas de ni gong du bshad pa lta bu'i yon tan dpag tu med pa'i yon tan dang ldan pas na sangs rgyas thob par bya ba dka' ba bskyed pa'i phyir tshigs su bcad pa rtsom mo zhes bya ba'i don to/ /rnam pa thams cad mkhyen pa bstan pa'i don mdor bsdus te 'chad pa'i tshigs su bcad pa tha ma'i bsdus pa'i don ni rnam pa gsum ste/ bdag gi don phun sum tshogs pa dang / gzhan gyi don phun sum tshogs pa dang / bde ba'i 'byung gnas su gyur pa'o/ /de ltar/ sangs rgyas sa ni dpe med kyi/ /dkar po'i chos dang ldan zhes bya/ /zhes bya ba la/ de ltar zhes bya ba ni gong du bshad pa'i tshul lam rim pa ltar na zhes bya ba'i don to/ /chos kyi dbyings rnam par dag pa dang / ye shes bzhi las sangs rgyas kyi sa zhes bya ste/ sangs rgyas kyi sa'i yon tan stobs dang mi 'jigs pa la sogs pa yon tan bla na med pa ni nyan thos la sogs pa gzhan la med pas dpe med pa zhes bya ste/ de lta bu'i yon tan dpe med pa stobs dang mi 'jigs pa la sogs pa dkar po'i chos dpag tu med pa dang ldan pas na bdag gi don phun sum tshogs so zhes bya ba'i don to/ /sems can sangs rgyas pa ni sems can rnams tshe 'dir zang zing sna tshogs kyis phan btags pas bde bar byas pa dang / tshe rabs gzhan du mtho ris dang thar pa la bkod pas phan par byas pa'i phyir phan pa dang bde ba'i rgyu zhes bya ste/ 'dis ni gzhan gyi don phun sum tshogs pa bstan to/ /dge mchog bde ba mi zad 'byung gnas phyir/ /zhes bya ba la/ so so'i skye bo brgya byin dang tshangs pa la sogs pa la bde ba yod kyang zag pa dang bcas pa'i bde ba yin pas dge ba'i mchog ces mi bya'i/ mngon par sangs rgyas pa na zag pa med pa'i bde ba dang ldan pas dge ba'i mchog gi 'byung gnas zhes bya'o/ /'phags pa nyan thos la sogs pa la zag pa med pa'i bde ba yod kyang phung po'i lhag ma ma lus par spangs pa'i mya ngan las 'das par zhugs pa'i tshe/ med par gyur pas na bde ba zad pa zhes bya ba la/ sangs rgyas kyi sa'i dus na bde ba ji snyed pa thams cad 'khor ba'i mtha'i bar du yang med par mi 'gyur ba'i phyir bde ba mi zad pa'i 'byung gnas zhes bya ste/ 'dis bde ba'i 'byung gnas su 'gyur ba bstan to/ /dge ba'i blo gros byang chub sems bskyed rigs/ /zhes bya ba la/ pha rol tu phyin pa drug spyod pa'i shes rab dang ldan pas byang chub sems dpa' rnams la dge ba'i blo gros zhes bya ste/ bla na med pa'i byang chub ni gong du bshad pa lta bur bdag gi don phun sum tshogs pa dang / gzhan gyi don phun sum tshogs pa dang bde ba'i 'byung gnas su gyur pas na bla na med pa'i byang chub thob par bya ba'i phyir byang chub tu sems bskyed do zhes bya ba'i don to/ /mdor gzung ba ni zhes bya ba la/ mdo sde'i rgyan dang po nas brtsams te 'di yan chad du don ci 'byung ba bsdus te bstan na zhes bya ba'i don to/ /mdor bsdus dang po zhes bya ba la/ mdor bsdus na 'di yan chad du don bcu bzhi bstan te/ de la dang po bstan bcos 'di ci'i phyir mdo sde'i rgyan zhes bya ste zhes dris pa la/ 'di'i phyir mdo sde'i rgyan zhes bya'o/ /tshigs bcad lnga bstan te/ grub ces bya ba la/ de'i rjes la tshigs bcad bco lngas theg pa chen po grub pa bstan to/ /skyabs zhes bya ba la/ de'i rjes la theg pa chen po la skyabs su 'gro ba tshigs bcad bcu gnyis kyis bstan to/ /rigs zhes bya ba la rigs kyi skabs kyang tshigs bcad bcu gsum gyis bstan to zhes bya ba'i don to/ /de bzhin byang chub sems bskyed dang / /zhes bya ba la/ gong ma dang 'dra bar byang chub tu sems bskyed pa'i skabs kyang tshigs bcad nyi shu bdun gyis bstan te zhes bya ba'i don to/ /bdag dang zhes bya ba la bdag gi skabs kyang tshigs bcad gsum gyis bstan to zhes bya ba'i don to/ /gzhan don zhes bya ba la gzhan gyi don sgrub pa yang tshigs bcad drug gis bstan to zhes bya ba'i don to/ /yang dag don zhes bya ba la/ /de kho na'i don kyang tshigs bcad bcus bshad do zhes bya ba'i don to/ /mthu zhes bya ba la/ mthu'i don kyang tshigs bcad bcus bstan to zhes bya ba'i don to/ /yongs smin zhes bya ba la bdag yongs su smin pa dang / sems can yongs su smin pa nyi shus bstan to zhes bya ba'i don to/ /byang chub de zhes bya ba la/ byang chub kyi skabs kyang tshigs su bcad pa brgyad cu bdun gyis bstan to zhes bya ba'i don to/ /byang chub kyi skabs 'di dang po nas brtsams te byang chub kyi le'u dang sbyar bar rig par bya'o zhes bya ba la/ dang po'i skabs nas brtsams te byang chub kyi skabs kyi bar du bshad pa 'di dag rnal 'byor spyod pa'i sa byang chub sems dpa'i sa las rim pa ji skad du 'byung ba de bzhin du 'dir yang sbyar bar bya'o zhes bya ba'i don to/ /mdo sde'i rgyan bam po gnyis pa'i bshad pa rdzogs so/ / //mos pa'i mtshan nyid rnam par dbye ba la/ /tshigs su bcad pa gnyis te zhes bya ba la/ byang chub kyi skabs kyi rjes la mos pa'i skabs bshad par 'brel pa ci yod ce na/ 'di yan chad du bdag dang gzhan gyi don byas nas byang chub kyi skabs kyi bar du byang chub sems dpa'i bslab pa dmigs pa'i khyad par bshad nas/ da ni dmigs pa'i yul de la ji ltar bslab par bya ba de ston to/ /de la ji ltar bslab par bya zhe na/ rnam pa gnyis la bslab par bya ste/ bsam pa'i khyad par dang sbyor ba'i khyad par gyis so/ / de la sbyor ba'i khyad par la yang rnam pa bzhi ste/ chos yongs su tshol ba dang / bdag dang gzhan la phan pa bsgrub pa dang / bdag dang gzhan la phan pa rnam par dag pa dang / bdag dang gzhan la phan pa mthar byung ba'o/ /de la bsam pa'i khyad par gyis bslab pa ni dam pa'i chos la mos pa dang / dad pa bskyed par bya ba ste/ yang bdag dang gzhan gyi don la brtsams nas byang chub kyi don gyi bar du rgyu dang 'bras bur gyur pa phyin ci ma log pa chos lnga rnams kyi rang bzhin gang yin pa mthong ba rnams kyis zab cing rgya che ba'i chos de dag la dang po nyid du dad pa dang mos pa mang bar bya ste/ de bas na byang chub kyi skabs kyi rjes la mos pa'i skabs bshad par 'brel to/ /yang na gong du rigs la gnas pa'i byang chub sems dpa' byang chub tu sems bskyed nas/ byang chub sems dpa'i bslab pa la bslab par bya'o zhes glengs so/ /de la byang chub sems dpa'i bslab pa gsum ste/ gang la bslab par bya ba dang / ji ltar bslab par bya ba dang / gang gis bslab par bya ba las bdag dang gzhan gyi don bsgrubs nas byang chub kyi bar du bslab par bya ba ni bstan zin to/ /da ni ji ltar bslab par bya ba de ston to/ /de la yang ji ltar bslab par bya zhe na/ chos la mos pa mang ba dang / chos btsal ba dang / chos bshad pa dang / chos kyi rjes su mthun pa'i chos bsgrub pa dang / bstan pa dang / gdams ngag 'chad pa dang / gdams ngag la gnas par bya ba dang / thabs kyis yongs su zin pa'i lus dang / ngag dang yid kyi las dang ldan par bya ba'i rim pas bslab par bya ste/ de bas na byang chub kyi skabs kyi rjes la mos pa'i skabs bshad par 'brel to/ /de la mos pa dang dad pa dang yid ches pa zhes bya ba dag ni don gcig ste tshig gi rnam grangs tsam du zad do/ /de la gzugs la sogs pa'i phung po la sogs pa brtsams nas phung po'i don gang zhe na/ gang cung zad gzugs 'das pa dang / ma 'ongs pa dang / da ltar gyi dang / rags pa dang / phra ba dang / dang pa dang / bzang po dang / nye ba dang / ring ba de dag thams cad gcig tu bsdus nas gzugs kyi phung po'i grangs su 'gro'o zhes bya ba bzhin du mdo sde las mos pa la yang 'das pa dang / da ltar dang / ma 'ongs pa dang / nang dang / phyi dang / rags pa dang / phra ba dang / ngan pa dang / bzang po dang / nye ba dang ring ba zhes phye nas bstan te/ de ltar mos pa'i mtshan nyid kyi dpe bstan pa'i phyir tshigs su bcad pa gnyis rtsom mo zhes bya ba'i don to/ /skyes dang zhes bya ba la/ las dang / 'bras bu dang / bden pa dang / dkon mchog la sogs pa la yid ches pa 'das pa'i dus su byung ba dang / da ltar gyi dus su 'byung ba la skyes pa'i mos pa zhes bya'o/ /las dang 'bras bu la sogs pa la yid ches pa'i dad pa ma 'ongs pa nas 'byung bar 'gyur ba la ma skyes pa'i mos pa zhes bya'o/ /mos pa ni sems las byung ba'i chos yin te/ sems las byung ba'i chos ches mos pa ni theg pa chen po'i chos mos dmigs nas 'di ni de bzhin du bden no zhes dad cing yid ches par 'gyur ba'i 'dzin pa zhes bya'o/ /'di ni nang gi mos pas so/ /las dang 'bras bu la sogs pa la yid ches pa ni mos pa dang 'das pa'i dus su byung ba la dmigs nas dga' ba skyes te/ mos pa sngon du byung ba ni legs so zhes ro myang ba dang / rjes su yi rang ba dang / mngon par dga' bar byed pa ni gzung bar 'gyur ba'i mos pa zhes bya ste/ 'dis ni phyi rol gyi mos pa bstan to/ /nam dge ba'i bshes gnyen gyis bstan pa'i bslab pa las mos pa dang / dad pa skyes pa ni grogs las blangs pa'i mos pa zhes bya ste/ de ni mos pa rags pa'o/ /bdag nyid la mos pa dang / dad pa'i sa bon dang / rigs yod pa las mos pa skyes pa ni bdag nyid kyi mos pa zhes bya ste/ mos pa 'di ni phra ba'o/ /mu stegs pa'i chos bdag dang sems can yod par bshad pa la yid ches shing dad pa'i mos pa ni nor ba'i mos pa zhes bya ste/ 'di ni mos pa ngan pa'o/ /de bzhin gshegs pa'i gsung rab mi rtag pa dang sdug bsngal bar 'chad pa la yid ches pa'i mos pa ni gzhan du ma nor ba'i mos pa zhes bya ste/ mos pa de ni bzang po'o/ /mos pa skye ba'i rgyu rkyen kun tshogs nas mos pa skyes par gyur pa dang mngon du mos pa zhes bya ste/ 'di ni mos pa nye ba'o/ /mos pa skye ba'i rgyu rkyen ma tshogs pas/ mos pa mngon du ma skyes pa de ni gzhan zhes bya ste/ 'di ni mos pa ring ba'o/ /dge ba'i bshes gnyen la brten nas dam pa'i chos nyan pa las mos pa 'byung ba ni sgra spyod pa'i mos pa zhes bya'o/ /ji ltar thos pa'i chos rnams rig pa bzhis sems dang sems las byung ba'i mos pa la ni tshol ba'i mos pa zhes bya'o/ /sgom sgom ste chos kyi don rtogs pa las byung ba'i mos pa la ni lta ba'i mos pa zhes bya'o/ /mos pa skyes kyang bdud dang mu stegs la sogs pas drangs nas mos pa gyur na ni 'phrog pa'i mos pa zhes bya ste/ 'di ni mos pa chung ngu'o/ /skabs su dad pa yang 'byung la ma dad pa yang 'byung ba la ni mos pa yang rnam par 'dres pa'i mos pa zhes bya ste/ 'di ni mos pa 'bring ngo / /dad pa 'ba' zhig rgyun du 'byung gi ma dad pa ni mi 'byung ba'i mos pa la ni mi mthun phyogs ma 'dres pa'i mos pa zhes bya ste/ de ni mos pa chen po'o/ /skabs su dad pa yang 'byung / nyan thos dang rang sangs rgyas kyi chos la mos pa ni chung ngu'i mos pa zhes bya'o/ /theg pa chen po'i chos tha dad pa ni rgya che ba'i mos pa zhes bya'o/ /mos pa spyod pa'i sa drod nas sa bcu man chad yon tan khyad par can gong ma thob par mos pa las 'dod chags la sogs pa'i nyon mongs pa las bar du gcod pa yod pa'i mos pa ni bsgribs pa'i mos pa zhes bya'o/ /yon tan gong ma thob par bya ba la/ bar du gcod pa med pa'i mos pa ni ma bsgribs pa'i mos pa zhes bya'o/ /mos pa gus pa dang bcas pa dang / rgyun mi 'chad par 'byung ba'i mos pa ni ldan pa'i mos pa zhes bya'o/ /mos pa gus pa dang bcas pa dang / rgyun 'chad pa la ni mi ldan pa'i mos pa zhes bya'o/ /sa dang por chos kyi dbyings rtogs pa'i rgyur 'gyur ba'i mos pa spyod pa'i sar bskal pa grangs med pa gcig tu bsod nams dang ye shes kyi tshogs bsags pa dang ldan pa la ni tshogs bsags pa'i mos pa zhes bya'o/ /chos kyi dbyings rtogs par 'gyur ba'i rgyu bskal pa grangs med pa gcig tu bsod nams dang / ye shes kyi tshogs bsags pa dang ldan pa'i mos pa med pa ni tshogs med pa'i mos pa zhes bya'o/ /sa dang po nas sa bdun man chad kyi byang chub sems dpa'i mos pa ni brtan par zhugs pa'i mos pa zhes bya ste/ mos pa la bri ba dang nyams pa med pa'i phyir ro/ /sa brgyad nas sa bcu'i bar gyi byang chub sems dpa'i mos pa la ni ring du song ba'i mos pa zhes bya ste/ rnam par mi rtog pa lhun gyis grub pa dang ldan pa'i mos pa yod pa'i phyir ro/ /mos pa'i bar du gcod pa la tshigs su bcad pa gsum mo zhes bya ba la/ tshigs su bcad pa gnyis kyis mos pa'i mtshan nyid dang rab tu dbye ba bstan nas tshigs su bcad pa gsum gyis mos pa phye ste bshad pa de dag gis bgegs dang bar du gcod pa ston to zhes bya ba'i don to/ /yid la mi byed pa mang po dang zhes bya ba la/ skyes pa'i mos pa la ni yid la mi byed pa mang bar bar du gcod de/ ci'i phyir zhe na/ 'das pa dang da ltar gyi dus su mos pa 'byung ba la yang de nyid la mngon sum du ma byas na med par 'gyur ba'i phyir ro/ /le lo zhes bya ba la ma skyes pa'i mos pa la ni le lo bar du gcod de bskyed par bya ba'i phyir brtson 'grus brtsams te/ gzhan na skye bar mi 'gyur ba'i phyir ro/ /rnal 'byor 'khrugs pa dang zhes bya ba la/ gzung ba dang 'dzin par 'gyur ba'i mos pa la ni rnal 'byor 'khrugs pa bar du gcod de rnal 'byor 'khrugs pa zhes bya ba ni 'das pa'i sems bskyed pa la gzung ba'i dngos po la chags pa dang da ltar gyi mos pa'i sems bskyed pa la ni 'dzin pa'i dngos por chags pa ni rnal 'byor 'khrugs pa zhes bya ste/ de ltar gyur na gzung 'dzin dang bral ba'i ting nge 'dzin gyis thob pas bar du gcod pa yin no/ /grogs po ngan dang zhes bya ba la/ grogs las blangs pa'i mos pa la ni grogs po ngan pas bar du gcod de/ sngon dge ba'i bshes gnyen gyis yang dag par 'dzin du bcug kyang phyis sdig pa'i grogs pos blangs pa'i chos 'dzin du bcug pas sngar gzung ba chud zos pa'i phyir ro/ /dge gzhan zhes bya ba la/ bdag nyid las byung ba'i mos pa la ni dge ba gzhan la bar du gcod de/ bdag la mos pa'i sa bon dang rigs yod kyang de ldang zhing skye bar 'gyur ba'i dge ba cher ma bsags na rigs yod pas kyang skye bar mi 'gyur bas na bar du gcod do/ /tshul bzhin ma yin pa yid la byed ces bya ba la/ ma nor ba'i mos pa la ni tshul bzhin ma yin pas yid la byed pa bar du gcod de/ rtag pa dang / bde ba dang / gtsang ba dang / bdag tu yid la byas na bdag med pa dang mi rtag pa la sogs par yid la byed pa med par 'gyur ba'i phyir ro/ /bag med pa dang zhes bya ba la/ mngon du ba'i mos pa la ni bag med pas bar du gcod de/ ci'i phyir zhe na/ mngon du ba'i mos pa ni 'dod ma chags pa dang / zhe mi sdang ba dang / gti mug pa dang / brtson 'grus kyi rkyen las skye la/ 'dod chags dang zhe sdang dang gti mug dang le lo bzhi ni bag med pa yin te/ bag med pa de byung na mngon du ba'i mos pa de mi 'byung bas bar du gcod pa yin no/ /thos nyung ba zhes bya ba la/ sgra spyod pa'i mos pa la ni thos pa nyung bas bar du gcod do/ /ci'i phyir zhe na/ bkri ba'i don gyi mdo sde tsam thos kyi nges pa'i don gyi mdo sde ma thos na stong pa dang bdag med par bshad pa thos pa dang / skrag par 'gyur ba'i phyir ro/ /thos dang bsam pa nyung ngus dga'/ /zhes bya ba la/ tshol ba'i mos pa la ni thos pa tsam gyis chog par 'dzin pa dang / thos pa la yang cung zad tsam gyis bsam pa chog par 'dzin pa bar du gcod do/ /thos pa de la ma bsams pa dang / bsams pa la yang bsam pa rgya cher ma byas na ni bsams pa'i don kun rtogs par mi 'gyur bas bar du gcod do/ /zhi ba tsam gyis nga rgyal dang / /zhes bya ba la lta ba'i mos pa la ni bsams pa tsam gyis chog par 'dzin pa dang / zhi gnas bsgoms pa tsam gyis chog par 'dzin cing nga rgyal byas te/ lhag mthong mi bsgom par bar du gcod de/ bsams pa tsam gyis chog par 'dzin pa la ma bsgoms na bsgom pas mthong bar bya ba'i don mi thob pa dang / zhi gnas tsam bsgoms te lhag mthong ma bsgoms na bden pa rtogs par mi 'gyur ba'i phyir bar du gcod do/ /ma 'dres pa yang de bzhin rigs/ /zhes bya ba la/ de bzhin du 'phrogs pa dang rnam par 'dres pa'i rigs pa la ni 'dres par ma byas pas bar du gcod de/ yang nas yang du goms par byas shing 'dris par ma byas na mos pa gzhan gyis 'phrogs par yang 'gyur la ma dad pa dang dad par 'dres pa'i mtshan ma 'byung bas ma 'dres pa la yang bar du gcod do/ /mi skyo ba dang zhes bya ba la theg pa chung ngu'i mos pa la ni 'khor ba'i mtha'i rkyen gyis mi skyo bar bar du gcod de 'khor ba'i chos kyis mi skyo ba med de 'khor bar dga' nas 'khor ba las 'das pa'i mya ngan las 'das pa mi 'thob pa'i phyir ro/ /de bzhin du skye zhes bya ba la/ rgya chen po theg pa chen po'i chos la mos pa la ni 'khor bar skyo bar bar du gcod de/ 'khor bar skyo bar gyur pa na 'khor ba na bdag dang gzhan gyi don mi byed cing mya ngan las 'das pa'i phyir ro/ /ma bsgribs pa'i mos pa ni bsgribs pa'i mos pas bar du gcod de/ mos pa spyod pa'i sa drod nas sa bcu man chad du khyad par du 'gro ba'i mos pa la 'dod chags dang zhe sdang dang bcas pa'i mos pa yod par gyur na sgrib pa med pa'i mos pa mi 'byung ba'i phyir ro/ /mi ldan pa zhes bya ba la ldan pa'i mos pa la ni mi ldan pa'i mos pa bar du gcod de/ gus par byed pa med pa dang / rtag par byed pa med pa'i mos pa byung na gus pa dang bcas pa dang / rtag pa dang bcas pa'i mos pa mi 'byung ba'i phyir ro/ /tshogs rnams bsags pa dag kyang zhes bya ba la sogs pa'i mos pa ni tshogs ma bsags pas bar du gcod de/ sa dang po thob par 'gyur ba'i rgyu bskal ba grangs med pa gcig tu bsod nams dang ye shes bsags pa med na sa dang por chos kyi dbyings rtogs par 'gyur ba'i bsod nams dang ye shes kyi tshogs bskal pa grangs med pa gcig tu bsags pa'i tshogs dang mi ldan pa'i phyir ro/ /mos pa'i bar du gcod par bya/ /zhes bya ba la yid mi bde ba mang po nas brtsams te/ tshogs ma bsags pa'i bar du ni 'di dag mos pa'i rab tu dbye ba'i bar du gcod pa yin par rig par bya'o zhes bya ba'i don to/ /mos pa'i yon tan la tshigs su bcad pa lnga ste zhes bya ba la tshigs su bcad pa gnyis kyis mos pa'i rab tu dbye ba bstan/ tshigs su bcad pa gsum gyis mos pa'i bar du gcod pa bstan te/ da ni tshigs su bcad pa lngas mos pa'i yon tan rab tu phye ba la bar chad de dag gis bar du gcod par ma byas na mos pa yon tan dang ldan par 'gyur ro zhes bya ba ston to zhes bya ba'i yon tan no/ /bsod nams che zhing zhes bya ba la skyes pa'i mos pa rnam pa gnyis te/ da ltar gyi mos pa dang 'das pa'i mos pa gnyis las/ da ltar gyi mos pa la ni bsod nams che ba'i yon tan 'thob ste/ da ltar gyi dus na theg pa chen po'i chos la mos pa skyes ma thag tu bsod nams kyi tshogs dpag tu med pa 'phel bar 'gyur ba'i phyir ro/ /'gyod pa med pa'i bya ba la/ /'das pa'i mos pa ni 'gyod pa med pa'i yon tan 'thob ste/ ci'i phyir zhe na/ sngon theg pa chen po'i chos la mos pa byung ba mthong na dga' ba'i khyad par skye ba'i sems gdung ba mi skye ba'i phyir ro/ /yid bde ba chen po ste zhes bya ba la gzung ba'i mos pa dang / 'dzin pa'i mos pa gnyis la ni yid bde ba dang bde ba chen po'i yon tan 'thob ste/ ji lta zhe na/ gzung ba'i dngos po la dngos por ma chags pa de kho na phyogs gcig pa'i ting nge 'dzin gyi bde ba thob pas yid bde ba'i yon tan 'thob bo/ /'dzin pa la dngos po la chags pa spangs na de ma thag pa'i ting nge 'dzin gyi bde ba 'thob ste/ de bas na bde ba chen po'i yon tan 'thob bo/ /chud mi za dang zhes bya ba la grogs las blangs pa'i mos pa la bar du gcod pa rnams kyis bar chad ma byas pa chud mi za ba'i yon tan 'thob ste/ 'gyur ba med pa dang / nyams par mi 'gyur ba'i phyir ro/ /brtan pa dang zhes bya ba la bdag nyid kyi mos pa la bar du gcod pa rnams kyis bar chad ma byas na brtan pa'i yon tan 'thob bo/ /nyams pa dang med par mi 'gyur ba'i phyir ro/ /khyad par 'gro dang de bzhin du/ /zhes bya ba la nor ba med pa dang / mngon du ba dang / sgra spyod pa dang / tshol ba dang / lta ba dang / 'phrogs pa dang / ma 'dres pa'i mos pa rnams la gal te de dag gi mi mthun pa'i phyogs kyis bar du ma bcad na khyad par du 'gro ba'i yon tan 'thob ste/ nor ba med pa'i mos pa la ni nor bas bar chad ma byas na nor ba med pa 'bring las nor ba med pa chen po skye bar 'gyur ba dang / mngon du ba la bag med par bar chad ma byas na mngon du ba 'bring las mngon du ba chen po skye bar 'gyur ba dang / de bzhin lhag ma rnams la yang bar du gcod pas bar chad ma byas na 'bring las chen po skye bar 'gyur ro/ /chos rnams mngon par rtogs pa dang / /zhes bya ba la/ mi mthun pa'i phyogs kyis ma 'dres pa'i mos pa la bar du gcod pa'i chos kyis bar chad ma byas na chos rnams mngon par rtogs par 'gyur te/ sa dang por 'thob par 'gyur ro zhes bya ba'i don to/ /bdag dang gzhan don thob pa'i mchog /ces bya ba la/ nyan thos kyi theg pa la mos pa la bar du gcod pas bar chad ma byas na bdag gis don mchog thob par 'gyur te zhes bya ba'i don to/ /theg pa chen po mos pa la bar du gcod pas bar chad ma byas na bdag dang gzhan gyi don mchog 'thob par 'gyur te mi gnas pa'i mya ngan las 'das pa thob par 'gyur ro zhes bya ba'i don to/ /mngon par shes pa zhes bya ba la sgrib pa med pa'i mos pa dang ldan pa'i mos pa dang / tshogs bsags pa'i mos pa dang / brtan par zhugs pa'i mos pa dang / ring du song ba'i mos pa rnams la bar du gcod pa'i chos kyis bar chad ma byas na mngon par shes pa myur ba'i yon tan 'thob ste/ sgrib pa med pa dang ldan pa dang tshogs bsags pa gsum gyis dang po rno ba'i mchog thob/ brtan par zhugs pa dang / ring du song ba nyid kyis myur du thams cad mkhyen pa'i ye shes thob bo zhes bya ba'i don to/ /de dag ni mos par mi 'gyur ba'i yon tan no zhes bya ba la bsod nams che ba nas mngon par shes pa myur ba'i bar dag gi yon tan bshad pa de dag ni mos pa rab tu dbye ba'i yon tan yin no zhes bya ba'i don to/ /de yan chad du mos pa'i mtshan nyid rab tu dbye ba dang / mos pa'i bar du gcod pa dang / mos pa'i yon tan bstan nas de tshigs su bcad pa gsum dang rkang pa gcig gis 'jig rten pa'i mos pa dang / 'jig rten las 'das pa'i mos pa pas byang chub sems dpa'i mos pa khyad zhugs par bstan nas de nas theg pa chen po'i mos pa sgrub dgos pa ston te/ de la yang dang po'i tshigs bcad gcig gis ni don mdo tsam du bstan/ de'i lhag ma rnams kyis don de nyid zhib tu 'chad do/ /de la 'dod pa'i khams kyi mos pa dang gzugs kyi khams kyi sems can gyi mos pa dang / gzugs med pa'i khams kyi sems can gyi mos pa ni 'jig rten pa'i mos pa zhes bya'o/ /'phags pa nyan thos kyi mos pa dang rang sangs rgyas kyi mos pa ni 'jig rten las 'das pa'i mos pa zhes bya'o/ /'dod pa can ni de khyi 'dra/ /zhes bya ba la/ 'dod pa'i yon tan lnga la chags pa dang ldan pa rnams ni 'dod pa can zhes bya ste/ don du 'dod pa'i khams kyi mos pa ni khyi'i mos pa dang sems dang 'dra'o zhes bya ba'i don to/ /ting nge 'dzin pa'i rus sbal bzhin/ /zhes bya ba la gzugs kyi khams kyi bsam gtan bzhi dang / gzugs med pa'i khams kyi snyoms par 'jug pa bzhi la chags pa'i sems can rnams kyi mos pa ni rus sbal gyi sems dang mos pa dang 'dra'o zhes bya ba'i don to/ /bdag gi don byed bran lta bu/ /zhes bya ba la/ bdag gi don la zhugs pa'i 'phags pa nyan thos dang rang sangs rgyas kyi mos pa ni bran gyi sems dang mos pa lta bu yin no zhes bya ba'i don to/ /de gzhan don byed rgyal po 'dra/ /zhes bya ba la/ gzhan don byed pa byang chub sems dpa' rnams kyi mos pa ni rgyal po'i sems dang mos pa 'dra'o zhes bya ba'i don to/ /'dis ni khyad zhugs pa'i don mdor bstan to/ /'di nyid man chad de nyid zhib tu 'chad de/ 'dod pa can gyi khyi dang ji lta bu 'dra zhe na/ de'i phyir ji ltar du/ khyi ni sdug bsngal dag gis nyen/ /zhes smos te/ de bzhin g.yem dang zhes bya bar sbyar te/ dper na khyi ni dus thams cad du kha zas 'ba' zhig la sems shing kha zas kyi phyir sems 'jug pas sdug bsngal gyis nyen pa de dang 'dra bar g.yem ste 'dod pa'i khams na gnas pa'i sems can 'dod pa lnga'i yul la chags pa rnams kyang rtag tu de 'ba' zhig la sems 'jug pas sdug bsngal las nyen pa zhes bya'o/ /rtag tu ltogs pas chog mi shes/ /zhes bya ba la/ gzhan yang khyi ni rtag tu yang bkres pa'i rang bzhin can te kha zas kyis chog mi shes pa de bzhin du 'dod pa lnga'i yon tan la chags pa rnams kyang rtag tu 'dod pa lnga'i yon tan la sems la 'dod pa lnga'i yon tan la spyad na yang / tshwa chu 'thung ba bzhin du ngoms pa'i mtha' med pas na khyi'i sems dang 'dra'o zhes bya ba'i don to/ /ting nge 'dzin pa ji ltar rus sbal 'dra zhe na/ de'i phyir ji ltar/ rus sbal de ni chu yi nang na bskum zhing 'dug /ces bya ba smos te/ gnas dang zhes bya bar sbyar ro/ /dper na rus sbal de ni rgya mtsho chen po'i nang na gnas kyang rkang lag brkyang ste mi 'dug gi [(]bgur [,]gur [)]dang gsab gseb dang phug dag na rkang lag bskum nas rang gi khog pa nyid kyi nang du bsdus te 'dug pa de bzhin du gzugs kyi bsam gtan pa dang / gzugs med pa'i snyoms par 'jug pa la gnas pa'i bsam gtan pa rnams kyang sems dang sems las byung ba nang du bsdus nas gang zag la bdag med pa dang shes bya rnams kyi rang dang spyi'i mtshan nyid rgya mtsho snyed yod pa la shes rab kyis 'jug pa med pas na rus sbal gyi sems dang 'dra'o zhes bya ba'i don to/ /yang na sems can de dag ni bsam gtan dang ting nge 'dzin dang snyoms par 'jug pa thob pa tsam gyis chog par 'dzin gyi yon tan khyad par can ma thob pa dang / bden pa bzhi kho na ma rtogs pas na rus sbal gyi sems dang 'dra'o/ /bdag gi don byed pa ji ltar bran lta bu yin zhe na/ de'i phyir/ ji ltar bran ni rtag tu 'jigs shing skrag pas lus kyis zhes bya ba smos te/ bdag gi don zhes bya ba dang sbyar ro/ /dper na bran ni rje bo'i sems sam tshig dang 'gal ba byas na chad pas gcod pa dang gnod pa byed du 'ong zhes rtag tu 'jigs pa dang bcas pas gnas pa dang / lus kyis rje bo la sri zhu byed cing rje bo'i 'khor na rgyu zhing gnas pa dang 'dra bar nyan thos dang rang sangs rgyas rnams gang zag la bdag med par khong du chud pa dang / chos rnams k yi rang dang spyi'i mtshan nyid khong du chud pas rus sbal gyi mos pa lta bu med du zin kyang bdag gi don lhur byed pas na 'khor ba'i chos kyis rtag tu 'jigs par gnas shing de bzhin gshegs pa'i bslab pa bcas pa las cung zad cig nyams par byas na yang bka' dang 'gal bar 'gyur ba dang brlag par 'gyur ro zhes rtag tu yang srung ba byed pa tsam du zad kyi gzhan gyi don mi byed pas na bran gyi sems dang 'dra'o zhes bya ba'i don to/ /gzhan gyi don byed pa ji ltar rgyal po dang 'dra zhe na/ de'i phyir/ rgyal po yang ni ji ltar/ bka' yis yul dang dbang byed gnas pa ltar/ /zhes smos te/ skye bo gzhan dag la zhes bya bar sbyar ro/ /dper na rgyal po bsod nams dang ye shes kyi tshogs che bas dbang dang bkas chab 'og tu dbang ba'i 'bangs dang / dkor la ci dgar byed pa bzhin du gzhan gyi don byed pa'i byang chub sems dpa' rnams kyang shes rab dang snying rje dang ldan pa'i phyir chos gnyis la dbang byed de 'khor ba la dbang byed pa dang mya ngan las 'das pa la dbang byed pa'o/ /de la shes rab dang ldan pas ni 'khor ba la dbang byed de ji lta zhe na/ shes rab dang ldan pas 'khor ba na gnas kyang 'khor ba'i nyon mongs pa rnams kyis mi gos pa'i phyir ro/ /snying rje dang ldan pas ni mya ngan las 'das pa la dbang byed de/ ji lta zhe na/ snying rje dang ldan pas mya ngan las 'das pa 'ba' zhig la mi gnas kyi/ sems can gyi don du 'khor bar 'jug pa'i phyir te/ de bas na rgyal po'i sems dang 'dra'o zhes bya ba'i don to/ /de ltar theg pa chen po'i mos pa ni 'jig rten dang 'jig rten las 'das pa'i mos pa bas khyad zhugs par bstan nas/ da ni tshigs bcad rkang pa gsum gyis theg pa chen po'i mos pa bsgrub par rigs par bstan pa'i phyir/ rtag tu mos pa mang po'i khyad par shes par bya/ /zhes bya ba la sogs pa smos so/ /rtag tu zhes bya ba ni dus thams cad du mos pa khyad zhugs zhes bya ba'i don to/ /mos pa mang po ni 'dod pa'i khams kyi sems can gyi mos pa dang / gzugs dang gzugs med pa'i khams kyi sems can gyi mos pa dang nyan thos dang rang sangs rgyas kyi mos pa khyad zhugs par shes par bya'o/ /theg pa chen po mchog tshul de bzhin rig nas ni/ /de la brten la de lta rtag tu de nyid tshol/ /zhes bya ba/ la/ gong du bshad pa ltar na theg pa chen po'i chos la mos pa ni mos pa'i mchog yin pa dang tshul bzhin gyi mos pa yin par rig nas theg pa chen po'i chos de la brten pa byang chub sems dpa' rnams dus thams cad du yang theg pa chen po'i chos la mos pa de nyid tshol zhing de nyid sgrub par byed do zhes bya ba'i don to/ /theg pa chen po'i chos la mos pa ni 'jig rten dang 'jig rten las 'das pa'i mos pa bas khyad zhugs pa yin pas mchog ces bya'o/ /bdag dang gzhan gyi don gyi thabs 'byung bas tshul bzhin zhes bya'o/ /don de nyid ces bya ba la/ 'dod pa can gyi de khyi 'dra/ /zhes bya ba la/ gzhan don byed pa rgyal po 'dra/ /zhes bya ba yan chad kyis rgyal po khyad zhugs pa'i don de nyid bstan to zhes bya ba'i don to/ /gzhan gyis bsgrubs nas zhes bya ba la/ ji ltar khyi ni zhes bya ba nas brtsams te/ gzhan gyi don ston skye ba gzhan dag ces bya ba yan chad kyis sngar bshad pa'i don nyid phyi mas zhib tu 'chad de bstan to zhes bya ba'i don to/ /theg pa chen po la yang dag par 'dzud do zhes bya ba la/ rtag tu mos pa zhes bya ba nas brtsams te/ rtag tu de nyid tshol zhes bya ba yan chad kyis theg pa chen po'i mos pa la 'dzud par byed pa'i don ston to zhes bya ba'i don to/ /mos la zhum pa la dgag pa/ /zhes bya ba'i tshigs su bcad pa zhes bya ba la/ kha cig 'di snyam du bla na med pa'i byang chub ni lha 'phags pas thob par 'gyur gyi/ mis thob par mi 'gyur ro snyam nas zhum pa dang mis thob na yang bskal pa grangs med pa gsum gyis thob pas sgrub dka'o snyam nas zhum pa dang / de ltar dus ring du bsgoms kyang la las thob kyi kun gyis mi thob bo snyam nas zhum pa de dag la rgyu rnam pa gsum gyis na zhum par mi rigs par bstan pa'i phyir tshigs su bcad pa rtsom mo zhes bya ba'i don to/ /rgyu dang po bstan pa'i phyir mir gyur pa las zhes bya ba smos te/ bla na med pa'i byang chub ni mir gyur pa las thob kyi lha la sogs pa'i gnas nas thob pa ma yin pas ni zhum par bya ba mi rigs so zhes bya ba'i don to/ /rgyu gnyis pa bstan pa'i phyir/ byang chub ni skad cig ma re rer 'thob par 'gyur zhes smos te/ byang chub de yang dus ring por bstan mi dgos kyi phyogs bcu'i 'jig rten gyi khams dag na skad cig ma re re la yang 'thob pas na zhum par mi rigs so zhes bya ba'i don to/ /rgyu gsum pa bstan pa'i phyir/ sems can tshad med ces smos te/ /de la'ang sems can la las thob/ /la las mi thob pa ma yin gyi sems can tshad med grangs med dpag tu med pa gang gA'i klung gi bye ma snyed kyis byang chub thob pas na zhum par byar mi rigs so zhes bya ba'i don to/ /de'i phyir/ zhum pa la ni bzod mi bya/ /zhes bya ba la/ de ltar rgyu rnam pa gsum gyi phyir na zhum pa'i sems skyes par gyur pa dang / bzod par mi bya dngang bar mi bya ba'i rigs so zhes bya ba'i don to/ /mos pa bsod nams kyi khyad par la tshigs su bcad pa gnyis so zhes bya ba la/ 'di yan chad du mos pa'i mtshan nyid dbye ba nas/ mos pa la zhum pa dgag pa'i bar du bstan nas/ da tshigs su bcad pa gnyis kyis nyan thos dang rang sangs rgyas dag theg pa chung ngu la mos pa'i bsod nams pas byang chub sems dpa' rnams theg pa chen po'i chos la mos pa lhag par bsod nams dpag tu med pa je bstan pa'i phyir tshigs su bcad pa smos so zhes bya ba'i don to/ /ji ltar bsod nams 'phel ba ni/ /gzhan la bza' ba byin pas so/ /de ltar de dag zos pa ni/ /bsod nams chen po 'byung ma yin/ /zhes bya ba la/ 'di ltar kha zas kyi ro la chags pa dang / lus mdzes par 'dod pa dang / rgyags pa'i phyir kha zas zos na ni kha zas de nyid bsod nams ma yin par 'gyur ro/ /'grangs par bya ba tsam gyi bsam pas zos na ni bsod nams su yang mi 'gyur/ bsod nams ma yin par yang mi 'gyur ro/ /gang gi tshe rgyags pa la sogs pa'i bsam pas za ba ni ma yin gyi/ dper na shing rta khal dgal ba'i phyir mig dang srog shing mar gyis bskus pa de bzhin du/ bdag gi don du dge ba spyad pa'i ched du lus brtan par bya ba'i phyir bdag nyid zos na bsod nams su 'gyur yang bsod nams chen por mi 'gyur te/ kha zas de nyid sems can la phan par bya ba'i phyir gzhan la byin na bsod nams che zhing dpag tu med par 'gyur ro zhes bya ba'i don to/ /'di ni dpe'o/ /de'i don bstan pa'i phyir/ pha rol don gnas bstan pas ni/ / mdo las gsungs pa'i chos thob 'gyur/ /zhes bya ba smos te/ theg pa chen po'i mdo sde'i nang nas ni pha rol gyi don bya ba'i thabs ston pas khyad par theg pa chen po'i chos la mos par gyur pa dang / theg pa chen po'i mdo sde de dang de dag gi nang nas theg pa chen po'i chos bklags shing mnyan nas rjes su bsngags pa bcu thob par 'gyur ro zhes bya ba la sogs pa'i yon tan de dang de dag thob par 'gyur ro zhes bya ba'i don to/ /rang don gnas pa'i chos bstan pas 'thob par 'gyur ba ma yin no zhes bya ba la nyan thos kyi theg pa'i nang nas ni bdag gi don du 'gyur ba tsam gyi thabs shig ston par zad pas na theg pa chen po'i chos la mos pa tsam gyis bsod nams dang yon tan thob par 'gyur ba ma yin no zhes bya ba'i don to/ /mos pa'i 'bras bu bsdu bar tshigs su bcad pa zhes bya ba la/ de ltar theg pa chen po'i chos la mos pa bsod nams che bar bstan nas spyir ni theg pa chen po'i chos la mos pa'i 'bras bu dpag tu med pas 'khor ba'i mtha'i bar du brjod kyang zad par mi 'gyur mod kyi mdor bsdus na 'di dag 'thob po zhes bstan pa'i phyir tshigs su bcad pa rtsom mo zhes bya ba'i don to/ /tshigs su bcad pa 'di'i bsdus pa'i don ni gang du mos pa dang / gang gis mos pa dang / ji lta bus mos pa dang / mos pa'i 'bras bus gang yongs su 'dzin pa de ston to/ /de ltar/ 'phags pa chen po'i chos ni yang 'gyur bas/ /zhes bya bas de ltar zhes bya ba ni gang du bshad pa ltar na zhes bya ba'i don to/ /nyan thos dang rang sangs rgyas kyang 'phags pa yin mod kyi byang chub sems dpa' dang de bzhin gshegs pa dag ni de dag las kyang khyad zhugs pa yin pas 'phags pa chen po zhes bya'o/ /de dag gi chos ni theg pa chen po la bya ste/ theg pa chen po de'i nang nas kyang nyan thos dang rang sangs rgyas la med pa'i sa dang pha rol tu phyin pas yang 'gyur ba zhes bya ba ste/ 'dis ni gang du mos pa bstan to/ /blo dang ldan pas zhes bya ba la blo dang ldan pa ni byang chub sems dpa' la bya ste/ thabs dang shes rab zung du 'brel ba'i shes rab dang ldan pa'i phyir te/ 'dis ni gang gis mos pa bstan to/ /rtag tu mos pa che bskyed nas/ /zhes bya ba la/ theg pa chen po'i chos la byang chub sems dpa' rnams kyis rgyun ma chad par zhum pa dang / spa bkong ba med pa'i sems kyis mos pa dang dad pa cher bskyed nas zhes bya ba'i don to/ /'dis ni ji ltar mos pa bstan to/ /de ltar mos pa byas na 'bras bu rnam pa gsum thob pa'i phyir ro/ /bsod nams rgya chen dag ni rtag tu rnam 'phel dang / /mtshungs med yon tan dag gis bdag nyid chen por 'gyur/ /zhes smos te/ 'bras bu gsum ni bsod nams rgya cher 'phel ba dang / /de nyid 'phel ba dang sangs rgyas pa'o/ /de la theg pa chen po'i chos la dang po mos shing dad pa skyes na bsod nams dpag tu med pa skye bar 'gyur bas bsod nams rgya cher 'phel ba zhes bya'o/ /de nas kyang sangs rgyas su ma grub kyi bar du sa bcu man chad kyi dus na yang mos pa yang sbar zhing je che je cher 'phel ba la bsod nams kyi tshogs kyang cher 'phel bar 'gyur bas na de ni rtag tu rnam par 'phel zhes bya'o/ /de nas sangs rgyas kyi sa'i dus na/ nyan thos dang rang sangs rgyas la med pa'i yon tan stobs dang mi 'jigs pa la sogs pa'i yon tan thob pas na bdag nyid 'tshang rgya bar 'gyur ba'i phyir/ mtshungs med yon tan dag gis bdag nyid chen por 'gyur/ /zhes bya ste/ tshig de dag gis ni mos pa'i 'bras bus gang yongs su 'dzin pa bstan to/ /mos pa'i skabs bshad pa rdzogs so// //chos yongs su tshol ba'i skabs las zhes bya ba la/ mos pa'i skabs bshad pa'i rjes la/ chos yongs su tshol ba'i skabs bshad par 'brel pa ci yod ce na/ theg pa chen po'i chos la mos pa dang dran pa mang ba'i byang chub sems dpa'i chos la mos par bya ba tsam gyis chog par bya ba ma yin gyi chos btsal bar yang bya dgos te/ de bas mos pa'i rjes la chos btsal ba'i skabs bshad par 'brel to/ /dmigs pa'ang yongs su tshol ba tshigs su bcad pa bzhi'o zhes bya ba la/ chos btsal ba la yang rnam pa gsum btsal bar bya ste/ dmigs pa yongs su btsal ba dang / dmigs pa rnyed pa yongs su btsal ba dang / yid la byed pa yongs su btsal ba'o/ /de las nyan pa'i shes rab dang / bsam pa'i shes rab dang / bsgom pa'i shes rab kyis yul gang la dmigs par bya ba'i dmigs pa ji btsal te/ yul 'di ni dmigs par bya'o zhes shes rab rnam pa gsum gyis dmigs par bya ba'i yul btsal ba bstan pa'i phyir tshigs su bcad pa bzhi rtsom mo zhes bya ba'i don to/ /sde snod dag ni gsum mam gnyis kyang rung / / zhes bya ba la/ shes rab rnam gsum gyis dmigs par bya ba'i yul ni rgya cher bshad na sde snod gsum gyi chos dag ste/ sde snod gsum ni mdo sde'i sde snod dang / 'dul ba'i sde snod dang / mngon pa'i sde snod do/ /dmigs par bya ba'i yul mdor bstan na ni theg pa chung ru dang / theg pa mchog gi bye brag dang / sde snod rnam pa gnyis su gzhag ste/ nyan thos kyi sde snod dang / byang chub sems dpa'i sde snod do/ /de la gsung rab yan lag bcu gnyis la shin tu rgyas pa dang / skyes pa rabs kyi sde snod ni byang chub sems dpa'i sde snod ces bya'o/ /lhag ma rnams las phal cher ni nyan thos kyi sde snod de/ phal cher smos pa ni lhag ma la theg pa chen po dang / nyan thos kyi theg pa'i chos can thun mong du gyur pa'ang yod par ston to/ /ci'i phyir gsum po dang / gnyis po de dag la sde snod ces bya zhe na/ de'i phyir bsdu ba'i phyir te/ dper na snod gang du 'bru bre bcu shong zhing 'dus pa'i snod de la snod ces bya ba dang 'dra bar gsum po dang gnyis po 'dir yang gsung rab yan lag bcu gnyis kyi don dang tshig thams cad 'dus pas sde snod ces bya'o/ /yang na phung po dang khams dang skye mched kyi chos nas sku dang ye shes la sogs pa'i bar du shes par bya ba'i don thams cad 'dus pas ni de'i phyir sde snod ces bya'o/ /ci'i phyir sde snod gsum du gzhag ce na/ de'i phyir rgyu yang dgur 'dod do/ /zhes smos te/ sde snod gsum du bzhag na ni rgyu rnam pa dgu'i phyir sde snod gsum du gzhag par 'dod do zhes bya ba'i don to/ /sde snod gsum du gzhag pa la dgos pa ci yod ce na/ de'i phyir rnam par grol zhes smos te/ sde snod gsum du gzhag pa ni sems can rnams 'khor ba las 'byung zhing mya ngan las 'das pa thob par bya ba dang / sangs rgyas thob par bya ba'i phyir sde snod gsum du gzhag go zhes bya ba'i don to/ /ji ltar grol bar 'gyur zhe na/ de'i phyir/ bag chags shes byed zhi bar byed pa dang / /rab tu rtogs par zhes bya ba smos te/ rnam par grol bar byed pa ni sde snod gsum mnyan pa dang / bsams pa dang / bsgoms pa'i shes rab kyis rnam par grol bar byed do zhes bya ba'i don to/ /de la mnyan pa'i shes rab kyis ni bag chags su byed/ nam thos pa'i dus na chos kyi dbyings rnam par dag pa'i rgyu mthun pa las byung ba'i mos pa'i bag chags 'jog par byed pa'i phyir ro/ /bsam pa'i shes rab kyis ni shes par byed/ de ji lta ji ltar bsam pa de lta de ltar de dag gi don rtogs par 'gyur ba'i phyir ro/ / chos rtogs pa dang ldan pa'i shes rab can ni bsgom pa la 'jug ste/ bsgom pa la zhugs pa'i ting nge 'dzin gyi mtshan nyid zhi gnas 'thob par 'gyur ro/ /zhi gnas kyi stobs kyis ni nyon mongs pa zhi bar byed de nyon mongs pa rnams 'jil bar byed ces bya ba'i don to/ /ting nge 'dzin thob pas sems rtse gcig tu gyur na lhag mthong gi mtshan nyid kyi shes rab skye bar 'gyur te/ shes rab kyis ni bden pa yang dag pa ji lta ba bzhin du rtogs par byed de/ bden pa rtogs na mthong ba dang bsgom pas spangs bar bya ba'i nyon mongs pa rtsa ba nas 'byin pas na de ltar rnam par grol bar 'gyur ro/ rgyu dgu'i phyir te zhes bya ba la nyon mongs pa rnam pa gsum ste/ the tshom nye ba'i nyon mongs pa dang / 'dod pa la chags pas rjes su sbyor ba'i mtha' dang / bdag ngal ba la rjes su sbyor ba mtha'i nye ba'i nyon mongs pa dang / bdag nyid lta ba'i nye ba'i nyon mongs pa dang lnga ste/ nyon mongs pa de dag spangs pa'i phyir sde snod gsum bshad de zhes bya ba'i don to/ /the tshom gyi gnyen po ni mdo yin te zhes bya ba la/ phung po dang khams dang skye mched la sogs pa'i chos rnams la the tshom gyur pa'i nyon mongs pa'i gnyen por ni mdo sde'i sde snod bshad pa yin no zhes bya ba'i don to/ / ji ltar the tshom gyi gnyen por 'gyur ro zhe na/ de'i phyir/ gang don gang la the tshom za ba de la rnam par gdon mi za bar bya ba'i phung po bshad pas so zhes bya ba smos te/ gang zhes bya ba ni gang zag gang zhes bya ba'i don to/ /don gang la zhes bya ba ni phung po dang khams dang skye mched de/ rten cing 'brel te 'byung ba dang / bden pa dang sa dang pha rol tu phyin pa'i rang dang spyi'i mtshan nyid kyi don gang la zhes bya ba'i don to/ /the tshom za ba ni yin nam ma yin snyam du yid gnyis za ba'o/ /gdon mi za bar bya ba'i don ni the tshom za ba de dag gi the tshom med par byas nas/ chos kyi mtshan nyid gtan la phab par shes par bya ba'i phyir/ mdo sde bshad do zhes bya ba'i don to/ /'dul ba ni mtha' gnyis rjes su sbyor ba'i nyes pa gnyen po gnyis po ste zhes bya ba la/ 'dul ba'i sde snod ni 'dod pa la chags pas rjes su sbyor ba'i mtha' dang bdag ngal ba la rjes su sbyor ba la mtha'i nye ba'i nyon mongs pa'i gnyen por bshad do zhes bya ba'i don to/ /ji ltar mtha' gnyis rjes su sbyor ba'i nyes pa'i gnyen por 'gyur zhe na/ 'dod pa la chags pas rjes su sbyor ba'i mtha'i gnyen por 'gyur bar bstan pa'i phyir kha na ma tho dang bcas pa la kun du spyod pa dgag pa'i phyir 'dod pa la chags pas rjes su sbyor ba'i mtha' dang zhes smos te/ 'dod pa la chags pa ni gang bcom ldan 'das kyis spyod du mi gnang bar bslab pa tshigs su bcad pa las 'das nas yo byad sna tshogs la sogs pa'i tshul gyis bdag chags pa dang rgyags par bya ba'i don du kun du longs spyod par byed pa ste/ dper na 'dod pa la zhen pa'i khyim na gnas pa la sogs pa lta bu'o/ / de'i gnyen po ni kha na ma tho ba dang bcas pa la kun du spyod pa spyod du mi gnang bar bkag ste/ de la spyod pa gang gis phas pham pa dang / ltung ba dang nyes byas la sogs pa 'byung bar 'gyur ba'i spyod pa ni kha na ma tho ba dang bcas pa'i spyod pa zhes bya ste/ de bkag pa yang 'di dang 'di rnams ni spyod pa mi gnang ngo zhes bkag pa dang / bslab pa tshigs su bcad pa rnams la ni bag dang bcas pa dang gus pa dang bcas pa dang / bsgrims te srungs shig ces bka' stsal pa'o/ /bdag ngal ba la rjes su sbyor ba'i mtha' gnyen por gyur pa'i phyir/ kha na ma tho ba med pa la kun du spyod par rjes su gnang ba'i phyir/ bdag ngal ba la rjes su sbyor ba'i mtha'o zhes bya ba smos te/ kha na ma tho ba med pa la kun du spyod par gnang ba ni gang / bcom ldan 'das kyis lhung bzed dang / chos gos la sogs pa'i yo byad spyod du gnang ba rnams la bya ste/ de yang mu stegs can gyi dka' thub thal ba dang tsher mar nyal ba dang / zas spyod pa khyi dang ba lang la sogs pa'i dka' thub kyis bdag gi lus sdug bsngal bar byed pa'i gnyen por gsungs te/ de bas na 'dul ba las kyang / bcom ldan 'das kyis tshul khrims dang ldan pa dang / yon tan dang ldan pa'i dge slong ni kha zas ro brgya dang ldan pa dang / brgya stong ri ba'i gos dang / khang pa gtsang ma dag kyang spyod du gnang ngo zhes gsungs so/ /mdor na/ kha zas ro brgya pa zos nas kyang / chags pa dang rgyags pa med na de nyid kha na ma tho ba med par spyod pa yin la/ sngo rngad kyi bag zos nas/ chags pa dang rgyags pa yod na de nyid kha na ma tho ba dang bcas par spyod pa'o/ /brgya stong ri ba'i gos gyon nas kyang chags pa dang rgyags pa med par spyod na de nyid kha na ma tho ba med par spyod la/ phyag dar khrod pa rnams la spyod de/ gal te chags pa dang rgyags pa yod na de nyid kha na ma tho ba dang bcas par spyod pa yin no/ /mngon pa'i chos ni bdag nyid lta ba bsnyems pa'i gnyen por te zhes bya ba la/ nyung zad tsam thos la mang du thos pa med par cung zad tsam shes pa'i chos kyis nga rgyal byed cing lta ba dang / tshul khrims phyin ci log la chags nas dge ba'i bshes gnyen dag gi thad nas mang du thos pa mi tshol ba ni bdag nyid lta ba bsnyems pa zhes bya ste/ de'i gnyen por mngon pa'i chos bshad do zhes bya ba'i don to/ /ji ltar lta ba bsnyems pa'i gnyen por 'gyur zhe na/ de'i phyir/ chos kyi mtshan nyid ma log par bstan pa'i phyir zhes smos te/ mngon pa'i chos kyi nang nas ni chos rnams kyi rang dang spyi'i mtshan nyid phyin ci ma log par bshad la/ de thob par gyur na chos kyi mtshan nyid phyin ci ma log par khong du chud par 'gyur bas lta ba dang / tshul khrims la phyin ci log tu 'dzin pa spong bar byed pa'i phyir te/ 'di yan chad rgyu rnam pa gsum 'chad do/ /yang mdo sde ni bslab pa gsum bshad do zhes bya ba la/ bslab pa gsum ni/ lhag pa'i tshul khrims kyi bslab pa dang / lhag pa'i sems kyi bslab pa dang / lhag pa'i shes rab kyi bslab pa'o/ /de la nyan thos kyi tshul khrims kyis ni/ lhag pa'i tshul khrims kyi bslab pa ni tshul dang ldan pa yin/ so sor thar pa'i sdom pas bsdams pa spyod yul dang spyod pa phun sum tshogs pa kha na ma tho ba phra mo la yang 'jigs par lta ba ste/ yang dag par blangs pa'i gnas rnams la slob bo zhes gsungs pa'o/ /lhag pa'i sems kyi bslab pa ni gzugs kyi khams kyi bsam gtan bzhi dang / gzugs med pa'i khams kyi snyoms par 'jug pa bzhi'o/ /lhag pa'i shes rab kyi bslab pa ni/ 'phags pa'i bden pa bzhi yang dag pa ji lta ba bzhin du shes par bya'o/ /theg pa chen po'i tshul gyis na/ sdom pa'i tshul khrims dang / dge ba sdud pa'i tshul khrims dang / sems can gyi don byed pa'i tshul khrims gsum la ni lhag pa'i tshul khrims kyi bslab pa zhes bya'o/ /nam mkha' mdzod dang dpa' bar 'gro ba'i ting nge 'dzin la sogs pa ni lhag pa'i sems kyi bslab pa zhes bya'o/ /rnam par mi rtog pa'i ye shes la ni lhag pa'i shes rab kyi bslab pa zhes bya ste/ nyan thos dang theg pa chen po'i mdo sde'i nang nas bslab pa gsum 'chad do zhes bya ba'i don to/ /'dul bas ni lhag pa'i tshul khrims dang / lhag pa'i sems bsgrub pa yin te zhes bya ba la/ 'dul bas ni lhag pa'i tshul khrims dag par byed pa dang / lhag pa'i sems mngon sum du byed pa yin te/ lhag pa'i tshul khrims dag par byed pa ni 'dul ba las 'byung ba bzhin du spyad na tshul khrims la skyon med pa'i phyir ro/ /tshul khrims dang ldan pa ni 'gyod pa med pa la sogs pa'i rim gyis ting nge 'dzin thob pa'i phyir ro zhes bya ba la tshul khrims dang ldan na 'gyod pa med par 'gyur ro/ /'gyod pa med na lus bag yangs thob bo/ /lus bag yangs thob na bde ba so sor myong bar 'gyur ro/ /bde ba so sor myong na sems rtse gcig tu 'gyur te/ de bas na ting nge 'dzin mngon sum du 'gyur ro/ /mngon pa'i chos ni lhag pa'i shes rab tu sgrub pa yin te zhes bya ba la/ mngon pa'i chos kyis ni chos rnams kyi rang dang spyi'i mtshan nyid ma nor bar shes pa'i lhag pa'i shes rab sgrub cing mngon sum du byed pa yin te zhes bya ba'i don to/ /ji ltar lhag pa'i shes rab sgrub ce na/ de'i phyir/ ma nor ba rnam par rab tu snang bar byed pa'i phyir ro zhes smos te/ mngon pa'i chos kyi nang nas ni chos rnams kyi rang dang spyi'i mtshan nyid ma nor bar phye ste bshad pas na de thos pa'i sgo nas chos kyi mtshan nyid la ma nor bar shes pa'i shes rab skye bar 'gyur te/ 'di yan chad kyis rgyu drug bstan to/ /yang mdo sdes ni chos dang don bshad do zhes bya ba la/ ming dang tshig dang yi ge rnams la ni chos zhes bya'o/ /des brjod par bya ba phung po dang khams dang skye mched rnams la ni don zhes bya'o/ /yang na phung po dang khams dang skye mched la sogs pa la ni chos zhes bya'o/ /dgongs pa bzhi dang ldem po ngag bzhi la ni don zhes bya'o/ /yang na mtho ris thob par byed pa'i rgyu dge ba bcu la ni chos zhes bya'o/ /mya ngan las 'das pa thob par byed pa'i rgyu byang chub kyi phyogs kyi chos sum cu rtsa bdun la sogs pa la ni don zhes bya ste/ mdo sde'i nang nas ni chos dang don gnyis 'chad do zhes bya ba'i don to/ 'dul bas ni chos dang don sgrub pa ste zhes bya ba la/ 'dul bas ni chos dang don mngon sum du byed do zhes bya ba'i don to/ /ji ltar mngon sum du byed ce na/ de'i phyir/ nyon mongs pa 'dul ba la brtson pas de gnyis rab tu rtogs pa'i phyir zhes bya ba smos te/ 'dul ba la brten nas mi gtsang b a bsgom pa la sogs pa'i sgo nas nyon mongs pa 'dul ba la brtson pas na tshig dang yi ge'i mtshan nyid kyi chos dang phung po dang khams la sogs pa'i mtshan nyid kyi don nam mtho ris kyi mtshan nyid kyi chos dang mya ngan las 'das pa'i mtshan nyid kyi don rnams rtogs par 'gyur bas na 'dul bas ni chos dang don mngon sum du byed do/ /mngon pa'i chos kyis ni chos dang don yang dag par brjod pa rnam par gdon mi za ba la mkhas pa'o zhes bya ba la chos dang don yang dag par brjod pa ni chos dang don gzhan la bshad do/ /rnam par gdon mi za ba la mkhas pa ni gtan la dbab pa las phyin ci ma log par mkhas pa la bya ste/ mngon pa'i chos kyi mtshan nyid la mkhas par gyur na chos dang don rnams gzhan la ma nor bar bshad pa la mkhas par 'gyur ro zhes bya ba'i don to/ /de la mdo sde'i nang nas mdor bsdus na don du zhig 'byung / 'dul ba'i nang nas don mdor bsdus na don du zhig 'byung / mngon pa'i chos kyi nang nas don mdor bsdus na don du zhig 'byung ba dang / ci'i phyir zhe na/ mdo sde zhes bya/ ci'i phyir na 'dul ba zhes bya/ ci'i phyir na mngon pa'i chos zhes bya zhe na/ de'i phyir/ mdo sde 'dul ba mngon pa'i chos/ /mdor na rnam pa bzhi'i don 'dod/ /ces bya ba smos te/ mdo sde yang mdor na don rnam pa bzhi 'byung ba'i phyir mdo sde zhes bya bar 'dod la/ 'dul ba yang mdor na don rnam pa bzhi 'byung bas 'dul bar 'dod la/ mngon pa'i chos kyang mdor na don rnam pa bzhi 'byung bas mngon pa'i chos su 'dod do zhes bya ba'i don to/ /blo ldan pas ni de shes pas/ /rnam pa thams cad mkhyen pa 'thob/ /ces bya ba la/ blo ldan pa ni byang chub sems dpa'o/ /de zhes bya ba ni sde snod gsum la bya ste/ byang chub sems dpa' rnams kyis sde snod gsum shes na thams cad mkhyen pa'i ye shes 'thob par 'gyur ro zhes bya ba'i don to/ /nyan thos rnams ni zad la mi skye ba'i ye shes tshol ba tsam du zad de/ rnam pa thams cad mkhyen pa mi tshol bas na sde snod gsum ma shes kyang zad la mi skye ba'i ye shes 'thob ste/ rgyu gang gis 'thob ce na/ tshigs su bcad pa gcig tsam gyi don shes pas kyang zad la mi skye ba'i ye shes 'thob par 'gyur ro/ / gnas rnams dang ni mtshan nyid dang / /chos don ston phyir mdo yin no/ /zhes bya ba la/ gnas dang mtshan nyid dang chos kyi don to/ /rnam pa bzhi ston pa'i phyir mdo sde zhes bya'o/ /de la gnas la rnam pa gsum ste/ yul gang du bshad pa dang / gang gis bshad pa dang / gang gi don du bshad pa'o/ /de yang mdo sde de dag las/ 'di skad bdag gis thos pa'i dus gcig na bcom ldan 'das rgyal po'i khab na dge slong dang / byang chub sems dpa' mang po dang thabs cig tu bzhugs so zhes bya ba gsungs so/ /de ltar na rgyal po'i khab la sogs pa yul gang du bshad pa de yang gnas yin par bstan to/ /bcom ldan 'das gang gis bshad pa'i don bstan pa'i bcom ldan 'das kyang gnas yin par bstan to/ /gang zag gang gi don du chos bshad pa'i gang zag de yang gnas yin par bstan to/ /mtshan nyid la rnam pa gnyis te/ kun rdzob kyi bden pa'i mtshan nyid dang / don dam pa'i bden pa'i mtshan nyid de/ de la bum pa dang snam bu dang gang zag ces bya ba la sogs pa tshig tu brjod cing bsam du rung ba rnams ni kun rdzob kyi bden pa'i mtshan nyid do/ /brjod du mi rung zhing bsam du mi rung ba rnams ni don dam pa'i bden pa'i mtshan nyid do/ /yang brjod pa dang brjod pa las gzhan pa'i dbang po spyod yul du gyur pa ni kun rdzob kyi bden pa zhes bya'o/ /brjod pa las gzhan pa la mi ltos pa ni dbang po spyod yul du ma gyur pa ni don dam pa'i bden pa zhes bya'o/ /yang na kun nas nyon mongs pa ni dmigs pa'i yul du gyur pa rnams ni kun rdzob kyi bden pa zhes bya'o/ /chos kyi dbyings dang rnam par mi rtog pa'i ye shes ni don dam pa'i bden pa zhes bya'o/ /phung po dang khams dang skye mched dang zas bzhi dang / rten cing 'brel te 'byung ba la sogs pa ni chos zhes bya ste/ zas bzhi ni kham gyi zas dang / re ba dang / yid la byed pa dang / rnam par shes pa'i zas so/ /dgongs pa bzhi pa ni don zhes bya'o/ /mngon du ni rgyun mi 'chad/ zil gnon rtogs phyir mngon pa'i chos/ /zhes bya ba la/ mngon pa'i chos ston pa dang / rgyun mi 'chad par ston pa dang zil gyis gnon pa dang / rtogs par byed pas mngon pa'i chos zhes bya'o zhes bya ba'i don to/ /de la bden pa bzhi dang / byang chub kyi phyogs sum cu rtsa bdun dang / rnam par thar pa'i sgo gsum la sogs pa mya ngan las 'das pa'i lam bstan pas chos rnams kyi rang dang spyi'i mtshan nyid dang / mya ngan las 'das pa'i chos mngon du byed pas na mngon pa'i chos zhes bya'o/ /rgyun mi 'chad pa ni rnam pa mang po'i don te/ chos gcig pa yang gzugs yod pa dang / gzugs med pa dang / bstan du yod pa dang / bstan du med pa dang / bltar yod pa dang / bltar med pa la sogs pa'i bye brag gis rnam pa mang du 'chad pa'i phyir mngon pa'i chos zhes bya'o/ /mngon pa'i chos la mkhas na rtsod pa dang rtsod pa'i gzhi la sogs pa la mkhas pas rtsod pa thams cad zhi bar byed do/ /phas kyi rgol ba zil gyis gnon pas na mngon pa'i chos zhes bya'o/ /mngon pa'i chos la mkhas na mdo sde rnams kyi don rtogs par 'gyur te/ mdo sde'i don rtogs par byed pa'i phyir mngon pa'i chos zhes bya'o/ /ltung ba skye dang bslang ba dang / /dbyung ba'i chos ni 'dul ba ste/ /zhes bya ba la/ gang na ltung bas dang ltung ba skye ba dang / bslang ba dang dbyung ba ste/ chos rnam pa bzhi 'byung ba de la 'dul ba zhes bya ba'i don to/ /gang zag dang ni bcas pa dang / /rab tu dbye ba nges pa'i phyir/ /zhes bya ba la/ rnam pa gzhan du yang gang zag dang bcas pa dang / rnam par dbye ba yang nges pa ste/ chos rnam pa bzhi 'byung ba la 'dul ba zhes bya ba'i don to/ /de la ltung ba ni ltung ba'i sde lnga'o zhes bya ba la/ ltung ba sde lnga ni phas pham pa dang / dge 'dun gyi lhag ma dang / nyes pa sbom po dang / so sor bshags pa dang / ltung ba'o/ /ltung ba skye ba ni mi shes pa dang / bag med pa dang nyon mongs pa mang ba dang / ma gus pa'i phyir ro zhes bya ba la/ rgyu bzhi las ltung ba skye bar 'gyur te/ rgyu bzhi ni mi shes pa la sogs pa'o/ /de la mi shes pa ni ci tsam gyis ni phas pham par 'gyur/ ci tsam gyis ni ltung bar 'gyur/ phas pham pa ni gang ltung ba ni gang yin pa mi shes pas ltung ba skye bar 'gyur ba'o/ /bag med pa ni byis pa dang bu mo dang khyim na gnas pa dag dang / bya ba ngan pa dag la zhugs pas ltung ba 'byung bar 'gyur ro/ /nyon mongs pa mang ba ni 'dod chags dang zhe sdang la sogs pa shas che bas nyon mongs pa'i dbang du gyur nas ltung ba byung ba'o/ /ma gus pa ni dang po nyid tshangs par spyod pa nyid 'dod pa'i phyir rab tu byung ba ni ma yin gyi rgyal po'am rkun po la sogs pa'i 'jigs pa'am 'tsho ba tsam gyi don du rab tu byung bas bslab pa blangs nas yang tshul khrims la ma gus te/ tshod yod par 'dzin pa dang le lo byed pas ltung ba byung bar gyur pa'o/ /bslang ba ni bsam pa ste/ chad pa'i las kyis ni ma yin no zhes bya ba la/ chad pa'i las kyis nyes pa las thar bar byed pa las ni 'byung bar zhes bya ba'i ltung ba dang nyes pa la sogs pa gang byung na sems kyis 'gyod pa bskyed cing phyin chad mi bya bar bsdams pas nyes pa las thar bar gyur pa la ming du bslab pa zhes bya'o/ /dbyung ba ni rnam pa bdun te zhes bya ba la/ ltung ba sde lnga las gang yang rung ba de las byung ba'i thabs rnam pa bdun yod de/ rnam pa bdun ni so sor bshags pa dang / chad pa las khas len pa dang / bsgyur ba dang / dgrol ba dang / gnas yongs su gyur pa dang / yang dag par so sor rtog pa dang chos nyid thob pa'o/ /de la so sor bshags pa dang zhes bya ba la/ ltung ba la sogs pa'i nyes pa byung ba na dge slong gcig gam gnyis sam gsum mam bzhi la sogs pa'i mdun du mthol nas nyes pa las thar bar byed pa ni so sor bshags pa zhes bya'o/ /bslab pa byin pa la sogs pa la chad pa'i las khas len pa dang zhes bya ba la dge slong ' ga' zhig gis 'dod chags kyi dbang gis rab tu gzir nas sems 'khrugs par 'gyur bzhin du mi tshangs par spyod pa'i chos byas pa las phyis 'gyod pa chen po skyes nas sems la gcags par gyur te nyes pa gcig tsam yang mi 'chab pa'i sems thob nas nyes pa kun bshags nas de chad pa'i las khas len du bcug la de nas bslab pa slar sbyin par bya ste/ de la chad pa'i las ni bsnyen par rdzogs pa thams cad kyi tha mar bzhag cing tha mar za ba sbyin pa dang / dge sbyong thams cad kyi dang por bzhag cing dang por bza' ba sbyin pa la sogs pa 'chad pa'i las byed du gzhug pa'o/ /bslab pa las rnam grangs kyi gnang ba'i phyir bsgyur ba dang zhes bya ba la/ bsgyur bas dbyung ba ni bcom ldan 'das kyis phyi dro'i kha zas bza' bar mi gnang ngo zhes bslab par byed pa las rnam grangs gzhan gyis bza' bar gnang ba yang yod de lam du son pa la dus zhes 'byung ba la sogs pa'o/ /dge 'dun tshogs pa bslab pa'i gnas dgrol ba'i phyir dgrol ba dang zhes bya ba la/ bcom ldan 'das kyis 'phags pa dga' bo la bka' stsal pa/ yongs su mya ngan las 'das pa'i dus na dran par gyis shig dang / bslab pa bcas pa rnams la bslab pa'i tshig phran tshegs rnams dgrol bar bya zhes gsungs pa las mya ngan las 'das pa'i tshe 'phags pa dga' bo mya ngan gyis non nas bcom ldan 'das la bskul te/ dgongs par bya ba ma gsol to/ /de nas phyis mya ngan las 'das pa'i 'og tu ci'i phyir bcom ldan 'das la dgongs par ma gsol ces 'phags pa 'od srungs chen po la sogs pa yang dag par sdud par byed pa rnams kyis 'phags pa dga' bo chad pas gcad do/ /de ltar mya ngan las 'das pa'i dus na bslab tshig phran tshegs rnams dgrol bar bya'o zhes gsungs pa de la brten nas thams cad yod par smra ba'i gzhung gi sde las dge 'dun tshogs pas bslab tshig phra mo rnams dgrol bar bya ba yod do zhes grags so/ /de'ang grag pa tsam du zad de bslab tshig las dge 'dun gyis sngon yang dgrol ba med/ da ltar yang dgrol ba med do/ /dge slong pha dang dge slong ma pho mos kyi mtshan gyur nas thun mong ma yin pa'i ltung ba ni gnas yongs su gyur pa dang zhes bya ba la/ gnas yongs su gyur pa'i sgo nas nyes pa las byung ba ni dge slong pha la phas pham pa bzhi yod la/ dge slong ma la phas pham pa brgyad yod pa la sogs pa'i pham pa dang / ltung ba rnam pa mang nyung du gyur te/ mi mthun pas na dge slong pho mo gnyis ka ltung ba thun mong ma yin pa zhes bya'o/ /de ltar dge slong zhig gal te mtshan gyur nas bud med kyi mtshan skyes par gyur na dge slong gi tshe ltung ba byung yang ltung ba de thun mong ma yin te/ dge slong nyid kyis bshags par bya ba yin pas bud med du mtshan gyur na nyes pa bshags pa la sogs pa'i cho ga ma byas kyang nyes pa las 'byung bar 'gyur ro/ /gal te dge slong ma zhig mtshan gyur te phor gyur na dge slong ma'i ltung ba yang dge slong ma nyid kyis bshags par bya ba yin te/ ltung ba thun mong ma yin pas skyes pa'i mtshan byung bar gyur na bshags pa la sogs pa'i cho ga ma byas par yang nyes pa las 'byung bar 'gyur ro/ /chos kyi mdo'i rnams so sor rtog pa'i bye brag ste yang dag par so sor rtog pa dang zhes bya ba la/ yang dag par so sor rtog pa'i sgo nas 'byung bar 'gyur ba ni 'dus byas thams cad mi rtag pa dang / chos thams cad bdag med pa dang / zag pa dang bcas pa sdug bsngal ba dang / zhi ba mya ngan las 'das pa'o zhes chos kyi mdo gsungs pa la so sor brtags te/ don shes kyis mthong nas nyes pa phran tshegs phran tshegs las 'byung bar 'gyur ro zhes bya ba'i don to/ /bden pa mthong bas phra mo'i ltung ba med pa'i chos nyid thob pa'i phyir chos nyid thob pa'o zhes bya ba la/ chos nyid thob pa'i sgo nas 'byung bar 'gyur ba ni ba dan pa bzhi mthong na sngon nyes pa phran tshegs byas pa las kyang thar bar 'gyur la/ phyis kyang nyes pa phran tshegs mi byed pa'i chos nyid thob pas na ltung ba las 'byung bar 'gyur ro zhes bya ba'i don to/ /gang zag las ni de la brten nas bcas pa dang zhes bya ba la/ gang zag gi sgo nas 'dul bar gzhag pa ni nyes pa byed pa'i gang zag gang la brten nas bslab tshig bcas pas te/ dper na tshe dbang ldan pa bzang byin la brten nas bslab pa'i gnas dang po mi tshangs par spyod pa mi gnang ba'i bslab tshig bcas pa lta bu'o/ /bcas pa la ni gang zag gi nyes pa gsol na ston pas dge 'dun la sogs te bslab pa bcas pa'o zhes bya ba la/ bcas pa'i sgo nas 'dul bar gzhag pa ni gang zag gang gis nyes pa byas pa'i nyes pa'i dmigs dge slong rnams kyis sangs rgyas la gsol nas sangs rgyas kyis dge 'dun la sogs te/ dge slong dag dang phyin chad dge slong rnams kyis chos 'di lta bu byed du mi gnang ngo zhes bslab pa bcas pa'o/ /rnam par dbye ba las ni gang bslab pa'i gnas bcas pa la mdor bstan pa ni rnam par dbye ba'o zhes bya ba la/ rnam par dbye ba'i sgo nas 'dul bar gzhag pa ni ji ltar bcom ldan 'das kyis rtswa dang chu sngon po'i gnas dag tu bshang ba dang gci ba mi bya'o zhes bslab pa'i tshig bcas te/ mdor bstan pa las rgyas par phye nas bshad pa ste/ ji lta zhe na/ rgyal po'i kun dga' ra bar song la drug sde rnams kyis rtswa sngon po la sogs pa rtsed mo'i gnas dag na bshang gci byas pa las bslab pa'i gnas bcas so zhes zhib tu bshad pa lta bu'o/ /rnam par gdon mi za ba'i phyir te/ de la ltung ba dang ltung ba ma yin pa dang ji ltar rab tu nges par byed pa'i phyir ro zhes bya ba la/ rnam par gdon mi za ba'i sgo nas 'dul bar gzhag pa ni ltung ba sde lnga las 'di ni ltung ba yin/ 'di ni phas pham pa yin/ 'di ni nyes pa sbom po yin/ 'di tsam gyis ni ltung bar 'gyur/ 'di tsam gyis ni ltung bar mi 'gyur ro zhes gtan la phab ste bstan pa'o/ /dmigs pa btsal ba'i skabs bshad pa rdzogs so// //dmigs pa rnyed pa yongs su tshol ba la tshigs su bcad pa gsum ste zhes bya ba la/ dmigs pa rnyed pa ni dmigs pa mngon sum du gyur pa ste/ dmigs pa yongs su tshol ba'i skabs kyi rjes la dmigs pa rnyed pa'i skabs bshad par 'brel pa ci yod ce na/ gong du bshad pa ltar dmigs pa'i yul btsal te yul rnyed na gtan la phab na de'i 'og tu dmigs pa'i yul mngon sum du gyur pas na dmigs pa yongs su tshol ba'i skabs kyi rjes la/ dmigs pa rnyed pa yongs su tshol ba'i skabs bshad par 'brel to/ /de la dmigs pa'i yul yang rnam pa bzhi ste/ chos la dmigs pa dang / nang la dmigs pa dang / phyi la dmigs pa dang / phyi nang gnyis thams cad kyi de bzhin nyid la dmigs pa'o/ /chos la dmigs par 'dod pa ste/ /zhes bya ba la/ de la chos zhes bya ba'i sgra ni gsung rab yan lag bcu gnyis la bya ste/ de dag kyang shes rab rnam pa gsum gyi dmigs par bya ba'i yul du 'dod do zhes bya ba'i don to/ /yang na chos zhes bya ba ni theg pa chen po'i mdo sde rnams la bya ste/ de'ang byang chub sems dpa' dbang po rnon po rnams kyi dmigs par bya ba yin par 'dod kyi thams cad kyi dmigs par bya ba'i yul ni ma yin no/ /yang na chos ni kun nas nyon mongs pa dang / rnam par byang ba'i chos gnyis la bya ste/ chos de dag nyid skye zhing 'jig pa'i rang bzhin can du zad kyi de las ma gtogs pa'i bdag dang nang na byed pa skyes bu gang yang med do zhes bya ba'i don to/ /nang dang zhes bya ba la/ gzugs kyi phung po dang tshor ba dang 'du shes dang 'du byed dang rnam par shes pa'i phung po la nang zhes bya'o/ /yang na 'dzin par gyur pa mig gi skye mched nas yid kyi skye mched kyi bar la 'dzin pa zhes bya'o/ /phyi dang zhes bya ba la gzugs nas chos kyi skye mched kyi bar gyi yul drug bzung bar gyur pa la phyi zhes bya'o/ /de la chos la dmigs pa dang por bstan kyang chos la dmigs pa rnyed pa bshad pa mang bas na phyis tshigs bcad gnyis pa dang / gsum pas rgyas par 'chad kyi nang gi dmigs pa rnyed pa dang / phyi'i dmigs pa rnyed pa des/ phyi nang thams cad kyi de bzhin nyid kyi dmigs pa rnyed pa bshad pa nyung bas na de dag gi dmigs pa rnyed pa dang por bshad par bya ste/ de bas na gnyis ka'i zhes bya ba la sogs pa smos te/ phyi nang gnyis kyi de bzhin nyid rnam pa gnyis la/ gnyis ka zhes bya ste/ nam phyi'i de bzhin nyid mngon sum du gyur na phyi'i dmigs pa rnyed pa dang / nam nang gi de bzhin nyid mngon sum du gyur na nang gi dmigs pa rnyed pa zhes bya'o/ /rgyu gang gis phyi nang gi de bzhin nyid mngon sum du 'gyur zhe na/ de'i phyir/ don gnyis kyis ni gnyis ka'i rnyed/ /ces bya ba smos te/ don gnyis kyis ni phyi nang gnyis kyi de bzhin nyid kyi dmigs pa rnyed par 'gyur te/ don gnyis kyis ni gzung ba'i don dang 'dzin pa'i don tha dad pa ma yin par mthong ba dang / 'dzin pa'i don las gzung ba'i don tha dad pa ma yin par mthong ba'o/ /de la gal te 'dzin pa ste sems las/ gzung ba ste phyi'i yul rnams logs shig na yod pa ma yin par mthong nas sems tsam du mthong nas gzung ba'i g.yeng ba spangs pas phyi'i dmigs pa rnyed pa zhes bya ste/ 'di ni bzod pa'i dus na'o/ /gal te gzung ba ste/ phyi'i yul la 'dzin pa ste/ nang gi sems tha dad pa ma yin pa mthong ste/ phyi'i yul med pa bzhin du nang gi sems kyang med do zhes khong du chud nas 'dzin pa la g.yeng ba spangs pas nang gi dmigs pa rnyed pa zhes bya ste/ 'di ni 'jig rten gyi chos mchog gi dus na'o/ /phyi dang nang gnyis ka'i de bzhin nyid rnyed par ji ltar 'gyur zhe na/ de'i phyir/ gnyis po dag ni mi dmigs pa/ /zhes bya ba smos te/ nang gi chos kyi dbyings thams cad du 'gro ba'i mtshan nyid du rtogs nas snang ba gzung ba yang mi dmigs 'dzin pa yang mi dmigs par 'gyur te/ gnyis su med pa'i ye shes la gnas par gyur na phyi nang thams cad kyi de bzhin nyid kyi dmigs pa rnyed pa zhes bya ste/ 'di ni sa dang po'i dus na'o/ /drod dang spyi bo'i tshe na ni phyi nang gi de bzhin nyid mngon sum du ma gyur pas dmigs pa rnyed par mi bshad do/ /lus la sogs pa ni phyi nang ste zhes bya ba la/ lus te phung po lnga la ni nang zhes bya/ gzugs la sogs pa'i yul drug la ni phyi zhes bya'o/ /de gnyis kyi de bzhin nyid la de gnyis so zhes bya ba la/ phyi nang gnyis kyi de bzhin nyid rnam pa gnyis la gnyis ka'i zhes bya ste/ phyi'i de bzhin nyid dang nang gi de bzhin nyid do/ /smras pa de stong pa nyid ni ro gcig par zad na ni ci'i phyir rnam pa gnyis su gzhag ce na/ lan du de bzhin nyid rnam pa gnyis su dbye ba med mod kyi/ phyi nang gi chos chos can rnam pa gnyis su tha dad pas chos nyid kyang rnam pa gnyis su gzhag ste/ dper na bum pa'i nam mkha' dang / gnas khang gi nam mkha' zhes bya ba la sogs pa bzhin no/ /gzung ba'i don nas 'dzin pa'i don tha dad pa ma yin par mthong ba dang zhes bya ba la/ rnam par shes pa nyid gnyis lta bur rnam par snang ste/ gzung ba'i phyi'i yul la ma gtogs par 'dzin pa zhes bya ba mig la sogs pa nang gi skye mched byis pas btags pa lta bur logs shig na yod pa ma yin te/ yul dang 'dra bar sems kyang med par mthong na nang gi dmigs pa rnyed pa zhes bya ste/ 'di ni 'jig rten gyi chos kyi mchog gi dus na'o/ /'jig rten pa'i don las gzung ba'i don tha dad pa ma yin par mthong ba'o zhes bya ba la/ sems nyid gzugs la sogs pa'i don du snang bar zad kyi sems las ma gtogs pa'i don gzhan yod pa ma yin no zhes mthong na phyi'i dmigs pa rnyed pa zhes bya ste/ 'di bzod pa'i dus na'o/ /phyi dang nang dang phyi nang thams cad kyi de bzhin nyid dmigs pa rnyed pa bstan nas da ni ji ltar na chos la dmigs pa rnyed par 'gyur ba de bstan te/ de'i phyir/ chos la dmigs pa rnyed pa ni/ /thos pa la sogs pa shes rab gsum gyis zhes bya ba la sogs pa smos te/ chos ni gsung rab yan lag bcu gnyis la sogs pa'o/ /chos de dag la dmigs pa rnyed de/ don mngon du 'gyur ba yang don rnam pa gsum gyis 'gyur te/ thos pa'i shes rab dang / bsam pa'i shes rab dang / bsgom pa'i shes rab gsum gyis mngon sum du 'gyur ro/ /thos pa'i shes rab kyis ji ltar mngon sum du 'gyur ba bstan pa'i phyir/ yid kyi rtog pas bshad pa bzhin/ /dad pa la ni rab 'dzin phyir/ /zhes smos te/ rna ba'i rnam par shes pa ni rnam par mi rtog pa yin pas des don rtogs par mi nus pas na yid kyi rtog pa zhes bya bas rna ba'i rnam par shes pa'i rjes las byung ba rnam par rtog pa dang bcas pa'i yid kyi rnam par shes pa la yid kyi rtog pa zhes bya'o/ /gang gi tshe sems g.yengs pa med par chos nyan pa dang / sems rtse gcig pas chos nyan pa dang rna blags te chos nyan pa dang / mnyam par gzhag pa'i sems kyis chos nyan pa na/ mkhan po dang slob dpon gyis chos thams cad sems las byung ngo zhes bshad pa bzhin du dad pa dang mos pas de bzhin du 'dzin te/ ming dang tshig dang yi ge la sogs pa 'di de dag thams cad sems las snang bar zad do zhes nyan pa'i bye brag byed cing yid ches par gyur na thos pa'i shes rab kyis chos la dmigs pa rnyed pa zhes bya'o/ /sems kyi shes rab kyis ji ltar dmigs pa bstan pa'i phyir/ rtog pa las ni don snang dang / /zhes bya ba smos te/ gang gi tshe sems pa la zhugs pa ni yid kyi rtog pa nyid las don gyi dngos po 'di dag snang bar zad kyi yid kyi rtog pa ma rtogs par don 'di dag tha dad pas logs na yod pa ma yin no zhes mthong ba de'i tshe thos pa'i shes rab kyis chos la dmigs pa rnyed pa zhes bya ste/ gong du phyi dang nang gi dmigs pa rnyed pa'i skabs su bshad pa ltar na gzung ba'i don las 'dzin pa'i don tha dad pa ma yin par mthong ba dang / 'dzin pa'i don las gzung ba'i don tha dad pa ma yin par mthong na/ sems pa'i shes rab kyis chos la dmigs pa rnyed pa gzhag go/ /bsgom pa'i shes rab kyis chos la dmigs pa ji ltar rnyed pa bstan pa'i phyir/ sems kyis ming la gnas pas so/ /zhes smos te/ sems kyis zhes bya ba ni bsgom pa'i shes rab kyis zhes bya ba'i don to/ /ming gi sgras ni tshor ba la sogs pa gzugs med pa'i phung po la bya ste/ gang gi tshe gzung ba dang 'dzin pa gnyis mi dmigs par gyur nas dmigs su med pa'i de bzhin nyid tsam las gnas par gyur na ming la gnas pa zhes bya ste/ de ltar gyur na bsgom pa'i shes rab kyis chos la dmigs pa rnyed pa zhes bya'o/ /de yang gong du phyi nang thams cad kyi de bzhin nyid rtogs pa'i gnyis su med pa'i dmigs pa rnyed pa ltar rnyed na bsgom pa'i shes rab kyis chos la dmigs pa rnyed par gzhag go/ /dmigs pa rnam pa gsum rnyed par sngar smras pa de la gnas pa'o zhes bya ba la/ chos la dmigs pa rnyed pa dang / nang gi dmigs pa rnyed pa dang / phyi'i dmigs pa rnyed pa dang / phyi nang thams cad kyi de bzhin nyid kyi dmigs pa rnyed pa 'byung bas na sngar smras pa'i phyi nang gi dmigs pa rnyed pa la sogs pa rnyed pa rnam gsum bshad pa yang chos la dmigs pa rnyed pa kho na las 'byung bas na de dag kyang chos la dmigs pa rnyed pa la gnas shing brten to zhes bya ba'i don to/ /yid la byed pa yongs su tshol ba la tshigs su bcad pa lnga ste zhes bya ba la/ dmigs pa rnyed pa'i skabs kyi rjes la yid la byed pa yongs su tshol ba'i skabs bshad par 'brel pa ci yod ce na/ gong du bshad pa ltar dmigs pa rnyed par gyur na de ni yid la byed par rnyed pa dang ting nge 'dzin rnyed pa zhes bya ste/ de bas na dmigs pa rnyed pa'i rjes la yid la byed pa yongs su tshol ba'i skabs bshad par 'brel to/ /yang na yid la byed pa'i khyad par gang dang ldan na gong du bshad pa'i dmigs pa de rnyed par gyur pa'i yid la byed pa'i khyad par te gtan la dbab dgos te/ de bas na dmigs pa rnyed pa'i rjes la yid la byed pa'i skabs bshad par 'brel to/ /de la rnal 'byor pa'i yid la byed pa ni rnam pa bco brgyad yod de/ de la yang spyir bstan pa dang / khyad par du bstan pa ste/ rnam pa gnyis su bstan to/ /de la rigs gsum zhes bya ba ni spyir bstan/ bya ba byed pa la sogs pa man chad kyis ni khyad par du bstan to/ /yang na mdor bstan pa dang / rgyas par bstan te/ rigs gsum zhes bya bas ni mdor bstan to/ /bya ba byed pa la sogs pas ni rgyas par bstan to/ /yid la byed pa bco brgyad la/ rigs gsum yid la byed pa dang / bya ba byed pa'i yid la byed pa dang / gnod pa dang mi gnod bcas zhes bya ba la de gnyis gcig tu bsdus te/ de gnyis la gnas rnam par 'byed pa la yid la byed pa zhes bya ba dang / mos pa la shin tu 'jigs pa'i yid la byed pa dang / rab tu 'dod byed gzhan zhes bya ba ni gzhan yang rab tu 'dod pa'i yid la byed pa dang / chung ngu dang ni rdzogs pa'i gnas/ /rtog bcas rtog med rnam gnyis te/ /zhes bya ba 'di rnam pa gcig tu sdom na de rnams ni ting nge 'dzin la gnas par byed pa zhes bya ba dang / ye shes dang ni yang dag ldan/ /rnal 'byor rgyu yi rang bzhin no/ /zhes bya ba 'di gnyis gcig tu bsdoms nas/ shes pa dang ldan pa yid la byed pa dang de ni 'dres par dmigs pa/ dmigs pa yid la byed pa dang / de'ang tha dad pa dmigs pa yid la byed pa dang / de'ang rnam pa lnga zhes bya ba ni 'dres par dmigs pa yid la byed pa la rnam pa lnga yod do zhes bya ba'i don to/ /rnam pa bdun te zhes bya ba la tha dad par dmigs pa yid la byed pa la rnam pa bdun yod pa dang / yongs su shes pa'i yid la byed pa'i rnam pa lnga yod pa dang / bsgoms pa'i rnam pa lnga yid la byed pa ni bzhi dang sum cu rtsa bdun yod pa dang / gong du bshad pa'i yid la byed pa de dag thams cad kyang zhi gnas dang / lhag mthong gi rang bzhin yin te/ de bas na lam gnyis rang bzhin gyis yid la byed pa dang / legs pa gnyis yid la byed pa dang / gnod pa gnyis yid la byed pa dang / sbyor ba yid la byed pa dang / dbang byed pa yid la byed pa dang / chung ngu'i yid la byed pa dang / rgya chen po yid la byed pa dang / 'di dag ni yid la byed pa rnam pa bco brgyad do zhes bya ba'i don to/ /rnal 'byor rnams kyi yid la byed/ /de ltar thams cad rang bzhin 'dod/ ces bya ba la/ rnal 'byor pa rnams kyi yid la byed pa ni gong du bshad pa ltar mdor bsdus pa dang / rgyas par bshad pa thams cad kyang rnam pa bco brgyad kyi rang bzhin du zad par 'dod ces bya ba'i don to/ /de la rigs nges pa ni nyan thos la sogs pa'i rigs su nges pa'o zhes bya ba la/ nyan thos kyi rigs nges pas nyan thos kyi chos bden pa bzhi la dmigs pa dang / rang sangs rgyas kyi rigs nges pas rang sangs rgyas kyi chos rten cing 'brel te 'byung ba la dmigs pa dang / byang chub sems dpa'i rigs nges pas gang zag dang chos la bdag med pa la dmigs pa ni rigs nges pa yid la byed pa zhes bya'o/ /bya ba byed pa ni gang tshogs bsags pa'o zhes bya ba la/ sa dang po na chos kyi dbyings rtogs par 'gyur ba'i rgyu mos pas spyod pa'i sar bskal pa grangs med pa gcig tu bsod nams dang ye shes kyi tshogs bsags pa rnams kyi yid la byed pa la ni bya ba byed pa'i yid la byed pa zhes bya'o/ / gnas rnam par dbye ba ni zhes bya ba la/ gnas rnam par dbye ba'i yid la byed pa ni rnam pa gnyis te/ gnod pa dang bcas pa'i gnas dang gnod pa med pa'i gnas so/ /gang gnod pa dang bcas pa'i gnas ni khyim na gnas pa'i gnas so zhes bya ba la/ gnod pa dang bcas pa'i gnas ni khyim na gnas pa rnams la bya ste/ de dag gi yid la byed pa bu smad gso ba dang so nam gyi bya ba mang pos rtag tu dkrugs pas na gnod pa dang bcas pa'i gnas zhes bya'o/ /rab tu byung ba'i gnas ni gnod pa med pa'o zhes bya ba la rab tu byung ba rnams la bu smad gso ba dang so nam bya ba'i 'khrugs pa med pas na gnod pa med pa'i gnas zhes bya'o/ /mos pa la 'jog pa ni gang sangs rgyas rjes su dran pa dang ldan pa'o zhes bya ba la/ gang sangs rgyas rjes su dran pa dang / yid la byed pa ni mos pa la 'jog pa yid la byed pa zhes bya ste/ sangs rgyas rjes su dran par bya ba la yang theg pa chen po bsdus pa'i bstan bcos kyi nang nas rnam pa dus sangs rgyas rjes su dran par bya zhe na/ mdor na rnam pa bdun lta bur sangs rgyas rjes su dran pa bsgoms te/ rnam pa bdun ni sangs rgyas rnams chos thams cad la dbang bsgyur ba yin te/ 'jig rten gyi khams thams cad du thogs pa med par 'jug pa'i 'jig rten gyi mngon par shes pa dang ldan pa yin no zhes rjes su dran par bya'o/ /de bzhin gshegs pa ni rtag pa'i sku ste de bzhin nyid rtag tu dri ma med par gyur pa dang ldan no zhes rjes su dran par bya'o/ /de bzhin gshegs pa ni mchog tu kha na ma tho ba med pa yin te/ nyon mongs pa dang shes bya'i sgrib pa spangs pa yin no zhes rjes su dran par bya'o/ /de bzhin gshegs pa ni lhun gyis grub pa yin te/ sangs rgyas kyi mdzad pa thams cad lhun gyis grub cing rgyun mi 'chad par mdzad do zhes rjes su dran par bya'o/ /de bzhin gshegs pa ni longs spyod chen po yin te/ sangs rgyas kyi zhing rab tu rnam par dag pa'i longs spyod dang ldan pa yin no rjes su dran par bya'o/ /de bzhin gshegs pa ni gos pa med pa yin te/ 'jig rten gyi chos brgyad kyis ma gos pa'o zhes rjes su dran par bya'o/ /de bzhin gshegs pa ni don chen po yin te/ mngon par sangs rgyas pa nas mya ngan las 'das pa chen po bstan pa'i thabs kyis sems can smin pa dang grol bar mdzad pa yin no zhes rjes su dran par bya'o/ /'dod pa bskyed pa na gang de la yid ches pa dang ldan pa'o zhes bya ba la/ de ltar sangs rgyas bcom ldan 'das ni de bzhin gshegs pa dgra bcom pa zhes yid ches pa dang / de'i chos ni legs par bshad pa yin no zhes yid ches pa la 'dod pa bskyed pa'i yid la byed pa zhes bya'o/ /yang na sangs rgyas bcom ldan 'das ni nyon mongs pa dang shes bya'i sgrib pa spangs pa stobs la sogs pa'i yon tan dang ldan pa sku gsum gyi ngo bo yin no zhes yid ches pa dang / chos la yang bshad pa'i chos ni sgrub par byed pa'i chos dang mya ngan las 'das pa'i chos gsal bar ston par byed pa yin te sgrub par byed pa'i chos kyang mya ngan las 'das pa thob par byed pa'i lam du gyur pa yin/ mya ngan las 'das pa yang nyon mongs pa dang sdug bsngal spangs pa'i rang bzhin yin no zhes yid ches pa dang / dge 'dun yang 'khor ba'i 'dam las rgal ba dang / 'khor ba'i 'dam las rgal bar gyur pa'i lam la gnas pa yin no zhes yid ches pa ni 'dod pa bskyed pa'i yid la byed pa zhes bya'o/ /ting nge 'dzin la gnas pa ni gang nye bar gyur pa dang / ngo bo'i ting nge 'dzin dang ldan te zhes bya ba la/ bsam gtan dang po la 'jug pa'i ting nge 'dzin nyer bsdogs su gyur pa dang rtsa ba'i ting nge 'dzin bsam gtan dang po nas bzhi pa man chad ngo bo nyid ting nge 'dzin dang ldan pa rnams la ting nge 'dzin la gnas pa'i yid la byed pa zhes bya'o/ /de la nye bar gyur pa'i ting nge 'dzin la ni chung ngu'i gnas zhes bya'o/ /ngo bo'i ting nge 'dzin la rdzogs pa'i gnas zhes bya'o/ /ting nge 'dzin de dag nyid la rnam pa gsum gzhag ste/ de'i phyir rtog pa dang bcas dpyod pa dang bcas pa dang zhes bya ba la sogs pa smos te/ nyer bsdogs dang bsam gtan dang po la ni rtog pa dang bcas dpyod pa dang bcas pa'i ting nge 'dzin zhes bya'o/ /bsam gtan gnyis pa dang bar gyi bsam gtan rnams la rnam par mi rtog cing dpyod pa tsam gyi ting nge 'dzin zhes bya'o/ /bsam gtan gsum pa dang bzhi pa la ni rnam par mi rtog mi dpyod pa'i ting nge 'dzin dang ldan pas zhes bya'o/ /shes pa dang ldan pas ni rnal 'byor gyi rgyu dang rnal 'byor gyi shes pa dang ldan pa ste zhes bya ba la rnal 'byor gyi rgyu dang rnal 'byor gyi shes pa dang ldan pa gnyis la shes pa dang ldan pa'i yid la byed pa zhes bya'o/ /de'ang rim bzhin thos pa dang bsam pa dang bsgom pa'o zhes bya ba la thos pa'i shes rab dang / bsam pa'i shes rab gnyis la ni rnal 'byor gyi rgyu zhes bya ste/ zhi gnas dang lhag mthong gi rgyur gyur pa'i phyir ro/ /shes rab la ni rnal 'byor gyi shes rab dang ldan pa zhes bya ste/ zhi gnas dang lhag mthong gi rgyur gyur bsgom pa'i shes rab la ni rnal 'byor gyi shes rab dang ldan pa zhes bya ste/ zhi gnas dang lhag mthong bsgom pa'i phyir ro/ /ma 'dres par dmigs pa rnam pa lnga ste zhes bya ba la/ 'dres par dmigs pa yid la byed pa lnga yod de/ mdo sde la 'dres par dmigs pa dang / ched du brjod pa la 'dres par dmigs pa dang / gleng gzhi la 'dres par dmigs pa dang / 'dzin pa la 'dres par dmigs pa dang / 'chad pa la 'dres par dmigs pa'o/ /mdo sde dang zhes bya ba la/ ji snyed du mdo sde 'byung ba thams cad kyi don gcig tu bsdus nas mdo sde 'byung ba thams cad kyi don 'di tsam du 'byung bar zad do zhe'am/ ston par zad do zhes dmigs pa ni mdo sde la dmigs pa zhes bya'o/ /ched du brjod pa dang zhes bya ba la ji snyed du ched du brjod pa rgya cher bshad par bya ba rnams kyis don gcig tu bsdus na 'di skad du ston par zad ce'am/ thams cad kyang stong pa'i don zhes dmigs pa ni ched du brjod pa la 'dres par dmigs pa'o/ /gleng gzhi rnams zhes bya ba la ji snyed gleng gzhi rgya cher bshad pa thams cad kyi don bsdus na 'di skad du 'chad par zad ce'am/ thams cad kyi don yang ston par zad do zhes dmigs pa ni gleng gzhi la 'dres par dmigs pa zhes bya'o/ /'dzin gnas zhes bya ba la/ ji tsam du mkhan po dang slob dpon gyi thad nas chos dang don gzung ba de dag thams cad mdor bsdus na 'di skad du ston par zad do zhes dmigs pa ni 'dzin pa la 'dres par dmigs pa zhes bya'o/ /zad pa'i bar du dmigs pa 'dres par dmigs pa'o zhes bya ba la/ ji tsam du bdag gis gzhan la bshad pa dang / sangs rgyas dang byang chub sems dpa' dang 'phags pa dag gis bshad pa thams cad kyang don mdor bsdus na thams cad kyang 'di skad du 'byung bar zad do zhe'am/ thams cad kyang ston par zad do zhes dmigs pa ni 'chad pa 'dres par dmigs pa'o zhes bya'o/ /ming la dmigs pa dang zhes bya ba la/ ming ni lha sbyin dang mchod sbyin zhes bya/ gzugs dang sgra zhes bya ba ste/ chos 'di la 'di skad ces bya zhes dmigs pa ni ming la dmigs pa zhes bya'o/ /tshig la dmigs pa dang zhes bya ba la/ ming mang po 'dus pa la tshig ces bya ste/ dper na 'dus byas thams cad mi rtag pa'o zhes bya ba lta bu'o/ /mdo sde 'di'i nang nas tshig 'di snyed cig 'byung zhe'am/ tshig 'di'i don ni 'di yin no zhes dmigs pa zhes bya'o/ /yi ge la dmigs pa dang zhes bya ba la/ a dang ka la sogs pa la dmigs pa la yi ge la dmigs pa zhes bya'o/ /gang zag la bdag med pa la dmigs pa dang zhes bya ba la/ phung po lnga tsam du zad kyi phung po lnga'i nang nas mu stegs kyis brtags pa'i bdag dang sems can med do zhes dmigs pa ni gang zag la bdag med pa'i dmigs pa zhes bya'o/ /chos la bdag med pa la dmigs pa dang zhes bya ba la/ phung po la sogs pa'i kun brtags kyi chos rnams kyang rmi lam gyi gzugs dang 'dra ste/ rang bzhin med do zhes dmigs pa ni chos bdag med pa la dmigs pa zhes bya'o/ /gzugs can gyi chos la dmigs pa dang zhes bya ba la/ bdag dang gzhan dang gnyis ka'i lus la mi gtsang ba la sogs pa'i rnam par dmigs pa ni gzugs can gyi chos la dmigs pa zhes bya'o/ /gzugs med pa'i chos la dmigs pa zhes bya ba la/ tshor ba thams cad sdug bsngal bar dmigs pa dang / sems mi rtag par dmigs pa dang / chos la bdag med par dmigs pa ni gzugs med pa'i chos la dmigs pa zhes bya'o/ /yongs su shes pa'i nges pa ni/ rnam pa lnga ltar shes na/ yongs su shes pa'i nges pa yid la byed pa zhes bya'o zhes pa'i don to/ /de la yongs su shes par byed pa'i dngos po ni sdug bsngal lo zhes bya ba la/ yongs su shes pa'i dngos po zhes bya ba ni shes par bya ba'i yul la bya'o/ /de yang nye bar len pa'i phung po lnga sdug bsngal gyi bden pas bsdus pa la bya'o/ /yongs su shes par byed pa'i don ni de nyid mi rtag pa dang / sdug bsngal ba dang / stong pa nyid dang / bdag med pa'o zhes bya ba la/ phung po lnga la ji ltar yongs su shes par bya ba ni don zhes bya ste/ /de yang mi rtag pa la sogs pa rnam pa bzhi ltar shes par bya'o/ /de la skad cig ma re re la 'jig pas na mi rtag pa'o/ /sdug bsngal rnam pa gsum dang ldan pas na sdug bsngal ba'o/ /phung po'i nang na mu stegs kyis brtags pa'i bdag med rtag pa med pas na stong pa'o/ /phung po nyid mu stegs kyis brtags pa'i bdag rtag pa'i rang bzhin med pas na bdag med pa'o/ /yongs su shes par byed pa ni lam mo zhes bya ba la/ nye bar len pa'i phung po lnga la mi rtag pa la sogs pa lta bur shes par byed pa ni 'phags pa'i lam gyi yan lag brgyad de/ de la yang yang dag pa'i lta bas mi rtag pa la sogs pa lta bur shes par byed do zhes bya ba'i don to/ /yongs su shes par byed pa'i 'bras bu ni rnam par grol ba'o zhes bya ba la/ yang dag pa'i lta bas phung po lnga la mi rtag pa la sogs pa lta bur shes par byas/ 'dod chags la sogs pa'i nyon mongs pa las rnam par grol bar 'gyur te/ sems rnam par grol ba ni yongs su shes par byed pa'i 'bras bu yin no/ /de rab tu rig pa ni rnam par grol ba'i ye shes mthong ba'o zhes bya ba la/ 'dod chags la sogs pa'i sems rnam par grol nas de'i 'og tu sems rnam par grol lo zhes sems rnam par grol ba'i ye shes mthong ba skyes pa la ni de rab tu rig pa zhes bya'o zhes bya ba'i don to/ /bsgom pa'i rnam pa la zhugs pa yid la byed pa la bsgom pa'i rnam pa bzhi dang / bsgom pa'i rnam pa sum cu rtsa bdun yod pas las bsgom pa'i rnam pa bzhi po bstan pa'i phyir/ gang la bdag med pa'i rnam pa la bsgom pa dang zhes bya ba la sogs pa smos te/ nyan thos rnams ni mos pas spyod pa'i sa nas gang zag la bdag med pa'i rnam pa bsgom ste/ phung po lnga tsam du zad de/ mu stegs kyis brtags pa'i bdag ni med la phung po lnga nyid la yang mi rtag pa dang sdug bsngal ba dang / stong pa dang / bdag med pa bsgom pa'i phyir ro/ /chos la bdag med pa'i rnam pa la bsgom pa dang zhes bya ba la/ byang chub sems dpa' rnams ni mos pas spyod pa'i sa nas chos la bdag med pa'i rnam par bsgoms te/ gzugs la sogs pa'i chos 'di dag kyang rmi lam gyi gzugs la sogs pa bzhin du sems las byung bar zad do zhes bsgom pa'i phyir ro/ /mthong ba'i rnam pa la bsgom pa dang zhes bya ba la/ nyan thos mthong ba'i lam skyes te/ /rgyun du zhugs pa thob pa dang / /byang chub sems dpa' mthong ba'i lam skyes te/ sa dang po thob pa'i tshe na sdug bsngal la chos shes pa'i bzod pa la sogs pa bzod pa brgyad la gnas pa ni mthong ba'i rnam pa la bsgom pa zhes bya'o/ /ye shes kyi rnam pa la bsgom pa zhes bya ba la mthong ba'i lam de nyid kyi dus na ye shes rnam pa brgyad la gnas pa'i tshe na ni ye shes kyi rnam pa la bsgom pa zhes bya'o/ /yang na zhi gnas bsgom pa la gnas pa'i tshe na ni mthong ba'i rnam pa la bsgom pa zhes bya'o/ /lhag mthong bsgom pa'i dus na ni ye shes kyi rnam pa la bsgom pa zhes bya'o/ /de las bsgom pa'i rnam pa sum cu rtsa bdun no zhes bya ba la/ byang chub kyi phyogs sum cu rtsa bdun bsgom pa la/ bsgom pa'i rnam pa sum cu rtsa bdun zhes bya ste/ byang chub kyi phyogs sum cu rtsa bdun yang dran pa nye bar gzhag pa bzhi nas brtsams te/ 'phags pa'i lam gyi yan lag brgyad kyi bar du'o/ /mi sdug pa'i rnam pa la bsgom pa dang zhes bya ba la/ nang gi lus dang phyi'i lus dang / phyi nang gnyis ka'i lus la klad pa'i rgyas nas rkang pa'i mthil gyi bar du khrag dang rnag la sogs pas gang bar dmigs pa dang / rnam par bsngos pa dang / bam pa la sogs pa bsgom pa ni mi sdug pa'i rnam pa la bsgom pa zhes bya ste/ 'dis ni lus dran pa nye bar gzhag pa bstan to/ /sdug bsngal gyi rnam pa bsgom pa dang zhes bya ba la/ tshor ba bde ba dang / tshor ba sdug bsngal ba dang / tshor ba bde ba yang ma yin sdug bsngal ba yang ma yin pa rnams rtag tu sdug bsngal ba yin no zhes bsgom pa ni sdug bsngal gyi rnam pa la bsgom pa zhes bya'o/ /de la tshor ba bde ba yang nam zhig na sdug bsngal gyi rgyur 'gyur bas 'gyur ba'i sdug bsngal dang ldan pa dang / tshor ba sdug bsngal ba dang / sdug bsngal gyi sdug bsngal dang ldan pa dang / tshor ba bde ba yang ma yin sdug bsngal ba yang ma yin pa ni 'du byed kyi sdug bsngal dang ldan pas tshor ba thams cad sdug bsngal ba zhes bya ste/ 'dis ni tshor ba dran pa nye bar gzhag pa bstan to/ /mi rtag pa'i rnam pa la bsgom pa dang zhes bya ba la/ rnam par shes pa brgyad dang / sems las byung ba rnams ni skad cig tu 'dod chags dang bcas pa dang / 'dod chags med par 'gyur ba dang / skad cig tu zhe sdang dang bcas pa dang / zhe sdang med par 'gyur ba dang / skad cig tu gti mug dang bcas pa dang / gti mug med par 'gyur ba dang / zhi ba dang / ma zhi bar 'gyur ro zhes bsgom pa ni mi rtag pa'i rnam pa la bsgom pa zhes bya ste/ 'dis ni sems dran pa nya bar gzhag pa bstan to/ /bdag med pa'i rnam pa la bsgom pa dang zhes bya ba la/ chos rnam pa gnyis te/ kun nas nyon mongs pa'i chos dang rnam par byang ba'i chos so/ /'khor ba'i dus na ni 'dod chags la sogs pa'i kun nas nyon mongs pa'i chos dang ldan par zad/ mya ngan las 'das pa'i dus na ni dad pa la sogs pa rnam par byang ba'i chos dang ldan par zad kyi kun nas nyon mongs pa dang / rnam par byang bar 'gyur ba'i bdag rtag pa gang yang med do zhes bsgom pa ni bdag med pa'i rnam pa la bsgom pa zhes bya ste/ 'dis ni chos dran pa nye bar gzhag pa bstan to/ /'dis ni dran pa nye bar gzhag pa bzhi bstan to/ /rab tu thob pa'i rnam pa la bsgom pa dang zhes bya ba la/ lhag pa'i tshul khrims dang sems dang / lhag pa'i shes rab kyi mtshan nyid dge ba ma skyes pa rnams bskyed par bya ba'i phyir/ mos pa bskyed 'bad brtson 'grus rtsom pa ni rab tu thob pa'i rnam pa la bsgom pa zhes bya ste/ 'dis ni yang dag par spong ba'i rnam pa gcig go/ /brten pa'i rnam pa la bsgom pa dang zhes bya ba la/ bslab pa gsum gyi mtshan nyid dbye ba'i chos skye ba rnams 'phel ba dang / rgyas pa dang rgya cher 'gyur bar bya ba'i phyir yang nas yang du de la bsgom pa ni bstan pa'i rnam pa la bsgom pa zhes bya ste/ 'dis ni yang dag pa'i spong ba gnyis pa'o/ /gdon pa'i rnam pa la bsgom pa dang zhes bya ba la/ bslab pa gsum gyis mi mthun pa'i phyogs su gyur pa sdig pa mi dge ba'i chos skyes pa rnams spang bar bya ba'i phyir/ mos pa bskyed 'bad brtson 'grus rtsom pa ni 'don pa'i rnam pa la bsgom pa zhes bya ste/ 'dis ni yang dag pa'i spong ba gsum pa'o/ /sdig pa mi dge ba'i chos spangs pa yang sdig pa mi dge ba'i chos de dag rgyun du skye ba las skye ba'i rgyun gcad pa'o/ /yang sdig pa'i chos de dag gi sa bon spangs pa nyid kyis spangs pa zhes bya ste/ gzhan du na sdig pa'i chos skyes zin pa rnams ni spang du med de/ rang nyid skyes ma thag tu 'gag par 'gyur bas so/ /gnyen po rnam pa la bsgom pa zhes bya ba la/ sdig pa mi dge ba'i chos ma skyes pa rnams mi skyed pa'i phyir de'i gnyen po 'dod chags kyi gnyen por mi gtsang ba bsgom pa dang / zhe sdang gi gnyen por byams pa bsgom pa dang gti mug gi gnyen por rten cing 'brel par 'byung ba bsgom pa ni gnyen po'i rnam pa la bsgom pa zhes bya ste/ 'dis ni yang dag pa'i spong ba bzhi pa bstan to/ /de la gnyen po la bsgom na bag chags bcom par 'gyur ro/ /bag chags bcom na sdig pa mi dge ba'i chos ma skyes pa rnams mi skye bar 'gyur te/ ma skyes pa spong ba'i thabs kyang de lta bu'o/ /'di yan chad yang dag pa'i spong ba bzhi bstan to/ /bshad do/ /chog par 'dzin pa'i gnyen po yid la byed pa'i bsgom pa ni dad pa bskyed pa'o zhes bya ba la/ yang dag pa'i spong ba bzhi tsam gyi dge bas chog par 'dzin cing dge ba rgya chen po dang ting nge 'dzin la sogs pa mi tshol la de'i gnyen po yid la byed pa bsgoms te/ de'i gnyen po yid la byed pa yang gang yin zhe na/ dad pa skyes pa'o/ /dad pa skyes pa ni ting nge 'dzin dang / dge ba'i rtsa ba rgya chen po bskyed pa'i phyir/ mos pa dang dga' ba dang spro ba bskyed pa ste/ 'dis ni mos pa rdzu 'phrul gyi rkang pa bstan to/ /g.yeng ba dang the tshom gyi gnyen po yid la byed pa bsgom pa ni nam 'bad pa dang brtson 'grus rtsom pa na rim bzhin no zhes bya ba la/ ting nge 'dzin du zhugs pa na 'dod pa lnga'i yon tan la sems g.yeng bas g.yengs pa zhes bya'o/ /bsgom pa'i yul dang shes bya'i dngos po yin nam ma yin no snyam du yid gnyis za ba ni the tshom zhes bya ste/ g.yeng ba'i gnyen por ni 'bad pa yid la bya'o/ /the tshom gyi gnyen por ni brtson 'grus yid la bya ste/ rim bzhin no/ /ji ltar gnyen por 'gyur zhe na/ ting nge 'dzin gyi dus na phyi'i yul la sems g.yengs shing phyad par gyur pa dang / mi g.yengs par gyur pa'i phyir 'bad par bya'o/ /nam the tshom du gyur pa na ma btsal te/ le lo'i dbang du byas na ni the tshom las thar bar mi 'gyur te/ brtson 'grus bskyed pa la yang nas yang du gzig cing brtags te dpyad na the tshom med par 'gyur bas/ the tshom gyi gnyen por ni brtson 'grus rtsom mo/ /rgod pa'i gnyen por ting nge 'dzin bsgom pa ni nam sems rab tu 'dzin pa'o zhes bya ba la/ sngon rtsed mo byas pa dang / bgod pa la sogs pa dran nas sems 'phros par gyur pa ni rgod pa zhes bya ste/ de'i gnyen por ni zhi gnas kyi ting nge 'dzin bsgom mo zhi gnas kyi ting nge 'dzin bsgom pa na sems rab tu 'dzin pa zhes bya ste/ sems g.yengs pa las zhi gnas kyis brlan nas/ ting nge 'dzin gyi yul las brlan nas bzhag pa'i phyir ro/ /zhum pa'i gnyen por ting nge 'dzin gyi rnam par bsgom pa ni nam sems rab tu gzengs bstod do zhes bya ba la/ zhum pa ni le lo'i dbang du gyur nas sems spro ba med pa dang gnyid dang / rmugs pa dang non pa ste/ de'i gnyen por ni lhag mthong gi ting nge 'dzin bsgom mo/ /nam lhag mthong gi ting nge 'dzin bsgom pa ni sems rab tu gzengs bstod pa zhes bya ste/ rmugs par gyur pa dang lhag mthong gis de bzhin gshegs pa pa'i yon tan nam ting nge 'dzin gyi 'bras bur bsams nas/ sems spro ba dang gsal ba'i mtshan nyid bskyed par bya ba zhes bya ba'i don to/ /de dag rdzu 'phrul gyi rkang pa bzhi dang rim bzhin du sbyar ro zhes bya ba la/ chog par 'dzin zhes bya ba la sogs pas ni mi mos pa rdzu 'phrul gyi rkang pa bstan to/ /g.yeng ba zhes bya ba la sogs pas ni brtson 'grus rdzu 'phrul gyi rkang pa bstan to/ /rgod pa'i gnyen por zhes bya ba la sogs pas ni sems rdzu 'phrul gyi rkang pa bstan to/ /zhum pa'i gnyen por zhes bya ba la sogs pas ni spyod pa rdzu 'phrul gyi rkang pa bstan to/ /rim bzhin du sbyar ro/ /sems gnas pas 'jig rten las 'das pa'i phun sum tshogs pa la yid ches pa'i rnam pa bsgom pa dang zhes bya ba la/ rdzu 'phrul gyi rkang pa bzhi thob ste/ 'jig rten pa'i ting nge 'dzin thob pa la sems gnas pa zhes bya ba'am/ mos pa spyod pa'i ting nge 'dzin bzhi thob pa la sems gnas pa zhes bya'o/ /sa dang por gnyis su med pa'i ye shes thob pa la ni 'jig rten las 'das pa zhes bya ste/ de'i tshe bsod nams dang ye shes kyi tshogs ni phun sum tshogs pa zhes bya ste/ 'jig rten gyi ting nge 'dzin thob pas 'jig rten las 'das pa'i phun sum tshogs pa thob par bya ba'i phyir bsgom par bya'o/ /ji ltar bsgom zhe na/ yid ches pa'i rnam par bsgoms te/ sa dang po'i dus na bsod nams dang ye shes kyi tshogs phun sum tshogs pa yin la/ bsod nams dang ye shes kyi tshogs de dag sgrub cing thob par byar rung ngo zhes sems pa ni yid ches pa'i rnam pa bsgom pa zhes bya ste/ 'dis ni dad pa'i dbang po bstan to/ /ji ltar yid ches pa'i rnam pa la bsgom pa de bzhin du 'bad pa'i rnam pa la bsgom pa dang zhes bya ba la dad pa'i dbang pos 'jig rten las 'das pa'i phun sum tshogs pa la yod pa'i mtshan nyid du yid ches pa'i rnam pas bsgom pa de bzhin du brtson 'grus kyis kyang 'jig rten las 'das pa'i phun sum tshogs pa de la rtog pa dang / mngon sum du bya ba'i phyir yang nas yang du goms par byed pa ni 'bad pa'i rnam pa la bsgom pa zhes bya ste/ 'dis ni brtson 'grus kyi dbang po bstan te/ chos mi brjed pa'i rnam pa bsgom pa dang zhes bya ba la dad pa'i dbang pos yid ches par byas pa dang / brtson 'grus kyi dbang pos mngon sum du byas pa'i chos de sems la ma rmugs shing sems la gsal bar snang ba'i mtshan nyid du bsgom pa ni sems mi brjed pa'i rnam pa la bsgom pa zhes bya ste/ /'di ni dran pa'i dbang po bstan to/ /sems gnas pa'i rnam pa la bsgom pa dang zhes bya ba la/ dran pa'i dbang pos ma brjed par byas pa'i chos de nyid la sems gzhag ste/ rtse gcig tu bsgom pa ni sems gnas pa'i rnam pa la bsgom pa zhes bya ste/ 'dis ni ting nge 'dzin gyi dbang po bstan to/ /rab tu 'byed pa'i rnam pa la bsgom pa zhes bya ba la/ de ltar sems rtse gcig tu bzhag na chos de dag gi rang dang spyi'i mtshan nyid phyin ci ma log par shes pa'i shes rab skye bar 'gyur te/ de ni rab tu 'byed pa'i rnam pa la bsgom pa zhes bya ste/ 'dis ni shes rab kyi dbang po bstan to/ 'di yan chad du dbang po lnga bstan to/ /dbang po de dag ni mi mthun pa'i phyogs bcom pa'i yid la byed pa ni stobs rnams la'o zhes bya ba la dad pa'i dbang po nas shes rab kyi dbang po'i bar du dbang po lnga po nyid la nam mi mthun pa'i phyogs kyis mi 'phrogs shing de dag gi dbang du ma gyur la mi mthun pa'i phyogs choms pa'i tshul du yid la byed pa la ni stobs lnga zhes bya'o/ /de la mi mthun pa'i phyogs ni ma dad pa dang / le lo dang dran pa nyams pa dang / g.yeng ba dang 'chal ba'i shes rab ste/ nam ma dad pas mi 'phrogs pa'i dus na ni dad pa'i stobs zhes bya'o/ /nam le los mi 'phrogs pa'i dus na ni brtson 'grus kyi stobs zhes bya'o/ /nam dran pa nyams pas mi 'phrogs pa'i dus na ni dran pa'i stobs zhes bya'o/ / nam g.yeng bas mi 'phrogs pa'i dus na ni ting nge 'dzin gyi stobs zhes bya'o/ /nam 'chal ba'i shes rab kyis mi 'phrogs pa'i dus na ni shes rab kyi stobs zhes bya ste/ 'di yan chad stobs lnga bshad do/ /dbang po lnga dang stobs lnga la khyad par ci yod ce na/ gang gis ma dad pa la sogs pa mi mthun pa'i phyogs dang / dad pa la sogs pa gnyen po gnyis su 'dres mar 'byung ba na ni dbang po zhes bya'o/ /mi mthun pa'i phyogs kyis ma 'dres par gnyen po 'ba' zhig 'byung ba na ni stobs zhes bya ste bye brag ni de yod do/ /yang dag byang chub rab tu snang ba rnam pa la bsgom pa dang zhes bya ba la/ zad pa mi skye ba'i ye shes la yang dag byang chub ces bya ste/ mthong ba dang bsgom pas spang bar bya ba'i nyon mongs pa sngar spangs pa la ni bzod pa zhes bya'o/ /de phyin chad sems kyi rgyud la nyon mongs pa mi 'byung ba ni mi skye ba zhes bya'o/ /yang na sa dang por chos kyi dbyings kun du 'gro ba'i mtshan nyid du rtogs nas gzung 'dzin gnyis spangs te/ gnyis su med pa'i ye shes thob pa la yang dag byang chub ces bya ste/ de sems la gsal zhing ma brjed par bsgom pa la ni yang dag byang chub snang ba'i rnam pa la bsgom pa zhes bya'o/ /de yang dran par byed pas na 'dis dran pa yang dag byang chub kyi yan lag bstan to/ /de nyid la rnam par 'byed pa dang zhes bya ba la/ de nyid la zhes bya ba ni zad la mi skye ba'i ye shes sam/ gnyis su med pa'i ye shes la bya ste/ ye shes de'i mtshan nyid mi brjed par byas pa nyid phyin ci ma log par shes pa ni rnam par 'byed pa zhes bya'o/ /de yang gang gi dus na shes she na sa dang po'i dus na shes te/ de'i tshe chos kyi dbyings thams cad du 'gro ba'i mtshan nyid du rtogs pa'i phyir te/ 'dis ni chos rab tu 'byed pa byang chub kyi yan lag bstan to/ /spro ba dang zhes bya bas chos kyi dbyings rtogs pa de nyid la/ yang nas yang du goms par byed pa ni spro ba zhes bya ste/ de yang brtson 'grus kyis byed pas na 'dis ni brtson 'grus yang dag byang chub kyi yan lag bstan to/ /yid bde ba dang zhes bya ba la/ sa dang por chos kyi dbyings rtogs nas/ dga' ba'i khyad par skye ba la ni yid bde ba zhes bya ste/ 'di yang sa dang po'i tshe rtogs nas dga' ba skyes pas na/ sa dang po'i ming yang sa rab tu dga' ba zhes btags te/ des ni dga' ba yang dag byang chub kyi yan lag bstan to/ /las su rung ba dang zhes bya ba la/ lus shin tu byang ba dang sems shin tu byang ba las su rung ba zhes bya'o/ /de la lus las su rung ba ni bdag gi dgos pa sgrub pa la lus yang zhing zo mdog bde ba'o/ /sems las su rung ba ni zhum rgod med cing ting nge 'dzin gyi yul la 'jug pa dang / sems gsal ba ste 'dis ni shin tu sbyangs pa byang chub kyi yan lag bstan to/ /sems gnas pa dang zhes bya ba la/ zad pa mi skye ba'i ye shes sam/ de bzhin nyid ma brjed par byas pa la sems gnas pa'i rnam pa bsgom pa zhes bya ste/ 'dis ni ting nge 'dzin byang chub kyi yan lag bstan to/ /mnyam pa nyid kyi rnam pa la bsgom par bya zhes bya ba la/ de ltar sems rtse gcig tu bzhag pa las zhum pa dang rgod pa gnyis med par bsgom pa ni mnyam pa nyid kyi rnam pa la bsgom pa zhes bya ste/ 'dis ni btang snyoms yang dag byang chub kyi yan lag bstan to/ /de la btang snyoms rnam pa gsum ste/ btang snyoms kyi thog ma'i dus dang / rab kyi dus dang / tha ma'i dus so/ /de la btang snyoms kyi thog ma'i dus kyi ni zhum rgod gnyis sems mi mnyam par byed pa yin/ zhum rgod spangs pa'i sems dang por thob pa la btang snyoms kyi thog ma'i dus zhes bya'o/ /de nas phan chad zhum rgod spangs pa'i sems mnyam pa nyid la sems dang gis gnas pa ni bar gyi dus zhes bya'o/ /de'i dus na ring du ma bsgoms pas zhum rgod 'byung ba'i dogs pa yod pa la rnal 'byor pas yun ring du bsgoms nas zhum rgod 'byung ba'i dogs pa yang med par bsgom pa ni btang snyoms kyi tha ma'i dus zhes bya ste/ 'di yan chad du byang chub kyi yan lag bdun bstan to/ / thog mas gdon mi za ba'i rnam pa bsgom pa dang zhes bya ba la/ sa dang por chos kyi dbyings kun du 'gro ba'i mtshan nyid du rtogs pa ni thob pa gdon mi za ba zhes bya'o/ /de ltar sa dang por chos kyi dbyings rtogs nas sa bcu man chad de nyid la bsgom pa ni thob pa gdon mi za ba'i rnam pa la bsgom pa zhes bya ste/ de ltar yang yang dag pa'i lta bas bsgoms pas na 'dis ni yang dag pa'i lta ba bstan to/ /yongs su sbyangs pa'i sa rtogs pa'i rnam pa bsgom pa dang zhes bya ba la/ mos pa spyod pa'i sa nas rnal 'byor pas mnyan pa dang bsams pa'o/ /bsgom pa la sogs pa'i rim pas chos kyi dbyings rtogs shing sa dang po thob par byas pa'i sa dang po la yongs su sbyangs pa'i sa zhes bya'o/ /de nas rnal 'byor pa zhes ting nge 'dzin las langs nas bdag gis chos kyi dbyings ji ltar rtogs zhes brtags nas mnyan pa dang bsam pa dang bsgom pa'i rim pas rtogs so zhes khong du chud pas yongs su sbyangs pa'i sa rtogs pa'i rnam pa la bsgom pa zhes bya ste/ de ltar yang yang dag pa'i rtog pas na 'dis ni yang dag pa'i rtog pa bstan to/ /pha rol la yang dag par rig par byed pa'i rnam pa la bsgom pa dang zhes bya ba la/ de ltar rnal 'byor pas yang dag pa'i lta ba dang / yang dag pa'i rtog pas sa dang por chos kyi dbyings ji ltar rtogs pa de kho na khong du ma chud pa rnams la tshig gis 'chad cing go bar byed pa ni pha rol la yang dag par rig par byed pa'i rnam pa la bsgom pa zhes bya ste/ de ltar yang yang dag pa'i ngag gis byed pas na 'dis ni yang dag pa'i ngag bstan to/ / 'phags pa 'dun par byed pa'i tshul khrims la bzhugs pa'i rnam pa la bsgoms pa dang zhes bya ba la/ 'phags pa rnams dgyes pa'i tshul khrims la ni 'phags pa 'dun par byed pa'i tshul khrims zhes bya ste/ de yang srog gcod pa nas log par lta ba'i bar dag mi dge ba bcu spangs shing rang bzhin gyis dge ba bcu la gnas pa ni 'phags pa 'dun par byed pa'i tshul khrims zhes bya ste/ tshul khrims de la gnas par zhugs pa'i rnam pa la bsgom pa zhes bya'o/ /de ltar yang dag pa'i las kyi mthas byed pas na 'dis ni yang dag pa'i las kyi mtha' bstan to/ / bsnyungs pa'i tshul kun du spyod pa'i rnam pa la bsgom pa dang zhes bya ba la/ lhung bzed dang chos gos la sogs pa lung las ji skad 'byung ba las lhag par mi tshol zhing bsnyungs pa dang / g.yo dang / sgyus mi 'tsho ba ni bsnyungs pa'i tshul du kun du spyod pa'i rnam pa la bsgom pa zhes bya ste/ de yang yang dag pa'i 'tsho bas byed pas na 'dis ni yang dag pa'i 'tsho ba bstan to/ /sngon yongs su bsgoms pas thob pa'i lam la goms pa'i rnam pa la bsgom pa dang zhes bya ba la/ mos pa spyod pa'i sa nas sa dang po'i bar du bsgoms pas sa dang po'i tshe brtson 'grus khyad zhugs pa ni sngon yongs su bsgoms pas thob pa'i lam zhes bya'o/ /de nas sa gnyis nas sa bcu man chad brtson 'grus khyad zhugs pa de nyid la goms par byed pa la ni goms pa'i rnam pa la bsgom pa zhes bya ste/ de ltar yang yang dag pa'i rtsol bas byed pas na 'dis ni yang dag pa'i rtsol ba bstan to/ /chos gnas pa'i mtshan ma mi brjed pa'i rnam pa la bsgom pa dang zhes bya ba la/ chos ni chos kyi dbyings rnam par dag pa'o/ /chos de nyid la rtse gcig tu 'jog pa ni gnas pa zhes bya ste/ chos kyi dbyings la sems rtse gcig tu 'jog pa'i tshe zhum pa dang rgod pa'i tshe gnyen po mtshan ma rnam pa gsum mi rjed par byed pa ni mtshan ma mi brjed pa'i rnam pa la bsgom pa zhes bya ste/ de yang yang dag pas byed pas na 'dis ni yang dag pa'i dran pa bstan to/ /mtshan ma rnam pa gsum ni zhi gnas kyi mtshan ma dang gzengs ba stong pa'i mtshan ma dang / btang snyoms kyi mtshan ma'o/ /de la nam sems rgod par gyur pa'i dus na ni zhi gnas kyi mtshan ma bsgoms te rgod pa zhi bar bya'o/ /nam sems zhum par gyur pa'i dus na ni gzengs bstod pa'i mtshan ma yid la byas shing sems spro ba bskyed par bya'o/ /nam zhum rgod spangs te sems mnyam par gyur pa'i dus na ni btang snyoms kyi mtshan ma yid la bya zhing sems mi bskyod par bzhag go/ /sems gnas pa mtshan ma med pa gnas yongs su gyur pa'i rnam pa la bsgom pa zhes bya ba la/ de ltar sems rtse gcig tu gyur pas zhum rgod mi 'byung ba'i phyir/ de'i gnyen po mtshan ma rnam pa gsum la yang mi dmigs mi gnas pa la sems gnas pa mtshan ma med pa zhes bya'o/ /de ltar mtshan ma med pa bsgoms pa nyid gnas gyur pa'i rnam pa la bsgom pa zhes bya ste/ sngon zhum rgod dang bcas pa'i gnas dang bral nas zhum rgod mi 'byung zhing sems rnal du 'dug pa'i gnas thob pa'i phyir gnas par gyur pa zhes bya ste/ de ltar yang yang dag pa'i ting nge 'dzin gyis byed pas na 'dis ni yang dag pa'i ting nge 'dzin bstan te/ 'di yan chad 'phags pa'i lam gyi yan lag brgyad bshad zin to/ /zhi gnas dang lhag mthong bsgom pa'i lam gyi rang bzhin bshad pa gang yang med do zhes bya ba la/ da ni zhi gnas dang lhag mthong bsgom pa'i lam gyi rang bzhin bshad pa'i skabs su bab ste/ de gnyis kyi bshad pa ni gang yang med de/ bshad mi dgos so zhes bya ba'i tha tshig go/ /ci'i phyir zhe na/ gong du yid la byed pa bshad pa dang / 'og nas yid la byed pa 'chad par 'gyur ba rnams kyang zhi gnas dang lhag mthong gi char gtogs par zad de/ zhi gnas dang lhag mthong du 'dus pas logs shig tu bshad mi dgos so/ /legs par yid la byed pa ni rnam pa gnyis te/ gnas ngan len bsal ba dang / lta ba'i mtshan ma bsal ba'o zhes bya ba la/ yid la byed pa gang gis gnas ngan len sel bar byed pa dang / lta ba'i mtshan ma sel bar byed pa de la legs par yid la byed pa zhes bya ste/ de'ang gnas ngan len sel ba dang / lta ba sel ba'i sgo nas rnam pa gnyis su bzhag go/ /de la gnas ngan len rnam pa gnyis te/ lus kyi gnas ngan len dang / sems kyi gnas ngan len to/ /de la lus kyi gnas ngan len ni srog gcod pa dang / ma byin par len pa dang / mi tshangs par spyod pa la sogs pa'i mi dge ba byed pa'o/ /sems kyi gnas ngan len ni ma lus mi dge ba spyod pa'i rgyu 'dod chags dang / zhe sdang la sogs pa sems la g.yo ba ste/ chos la bdag med par khong du chud pas ni gnas ngan len sel bar byed pa'o/ /'jig tshogs su lta ba dang / mthar 'dzin par lta ba dang / log par lta ba dang / lta ba bsnyems pa dang / tshul khrims dang brtul zhugs bsnyems pa'i bag chags la lta ba'i mtshan ma sel ba zhes bya ste/ gang zag la bdag med par khong du chud pas ni lta ba'i mtshan ma sel bar byed do/ /yang dag par gnod pa ni gang chos kyi rgyun las sangs rgyas dang byang chub sems dpa' las gdams pa 'dzin pa'o zhes bya ba la/ theg pa chen po'i rigs la gnas pas byang chub tu sems bskyed nas mos pa spyod pa'i ting nge 'dzin bzhi thob pa la chos kyi rgyun zhes bya ste/ chos kyi rgyun la gnas pa des sa dang po thob par bya ba'i phyir/ sa dang po thob par 'gyur ba'i ting nge 'dzin gyi man ngag sangs rgyas dang byang chub sems dpa' rnams las len cing 'dzin pa la yang dag par nod pa yid la byed pa zhes bya ba'i don to/ /sbyor ba can gyi yid la byed pa dang po bstan pa'i phyir/ ting nge 'dzin gyi spyod yul grangs nye bar rtogs pa'i sbyor ba can no zhes bya ba la sogs pa smos te/ ting nge 'dzin gyi spyod yul ni mdo sde la sogs pa gsung rab yan lag bcu gnyis so/ /gsung rab de dag gi ming dang tshig dang yi ge'i grangs su yod pa rtogs pa ni ting nge 'dzin spyod yul grangs nye bar rtogs pa'i sbyor ba can zhes bya'o/ /de nyid kyi don bstan pa'i phyir/ gang gis mdo sde la sogs pa'i ming dang tshig dang yi ge'i grangs nye bar rtogs pa'o zhes bya ba smos te/ gang gis zhes bya ba ni yid la byed pa gang gis zhes bya ba'i don to/ /yid la byed cing rtogs pa'i khyad par gang gis mdo sde la sogs pa gsung rab yan lag bcu gnyis la gsung rab 'di'i nang nas ming gi grangs ni 'di snyed cig 'byung / tshig gi grangs ni 'di snyed cig 'byung / yi ge'i grangs ni 'di snyed cig 'byung zhes rtogs pa ni grangs nye bar rtogs pa'i sbyor ba can zhes bya'o/ /sbyor ba can gyi yid la byed pa gnyis las bstan pa'i phyir/ 'jug pa nye bar rtogs pa'i sbyor ba can ni gang gis rnam pa gnyis la 'jug pa nye bar rtogs pa ste zhes bya ba la sogs pa smos te/ gang gis chos gnyis kyi tshad khong du chud par bya ba'i phyir sbyor ba ni 'jug pa nye bar rtogs pa'i sbyor ba can zhes bya'o/ /de la gang gis zhes bya ba ni yid la byed pa gang gis she'am/ gang zag gang gis zhes bya ba'i tha tshig go/ /rnam pa gnyis la 'jug pa nye bar rtogs zhes bya ba ni yi ge rnams kyi tshad la 'jug pa nye bar rtogs pa dang / ming dang tshig gnyis kyi tshad la 'jug pa nye bar rtogs pa'o/ /don de nyid bstan pa'i phyir/ yi ge rnams kyi tshad la 'jug pa dang / ming dang tshig gi tshad med pa la 'jug pa'o zhes smos te/ yi ge rnams kyi tshad yod par shes pa ni yi ge rnams kyi tshad la 'jug pa zhes bya ste/ de yi ge'i phyi mo ni a nas ka'i bar du bzhi bcu rtsa brgyad las med pa'i phyir ro/ /lha sbyin dang mchod sbyin zhes ming du btags ba dang / 'dus byas mi rtag ces tshig tu btags pa rnams la tshad med par khong du chud pa ni ming dang tshig gi tshad med pa la 'jug pa zhes bya ste/ shes rab kyi pha rol tu phyin pa stong phrag brgya pa la sogs pa'i mdo sde de dag gi nang nas ming dang tshig dpag tu med par 'byung ba'i phyir ro/ /sbyor ba can gyi yid la byed pa gsum pa bstan pa'i phyir kun rtog pa nye bar rtogs pa'i sbyor ba can ni/ gang gis gnyis bzung nas kun rtog pa gnyis nye bar rtogs pa ste zhes bya ba la sogs pa smos te/ gang gis zhes bya ba ni/ gang zag gang gis she'am/ yid la byed pa gang gis zhes bya ba'i don to/ /ming gzung ba dang don gzung ba'i sgo nas ming dang don gnyis rtogs na de gnyi ga nyid kyis don rtogs par 'gyur ba ni kun rtog pa nye bar rtogs pa'i sbyor ba can zhes bya'o/ /don de nyid rtogs pa'i phyir ming la kun rtog pa gzung ste/ don la kun rtog pa gzung ba dang zhes bya ba smos te/ bum pa dang snam bu dang / lha sbyin dang mchod sbyin zhes bya ba'i ming shes pa ni ming la kun rtog pas gzung ba zhes bya'o/ /de ltar ming shes nas bum pa'i zhes bya ba'i ming la de'i don gang yin zhe na/ lto zlum po ske dang sdeng sdeng po chu blugs su rung ba ste/ rtogs pa ni ming gi sgo nas don la kun rtog pa gzung ba zhes bya'o/ /de kun rtog pa gzung ste/ kun rtog pa'o zhes bya ba la/ bum pa zhes bya ba'i don lto zlum po ske dang sdeng sdeng po chu blugs su rung ba de la ming du ji skad bya zhe na/ de la ni bum pa zhes bya'o zhes rtogs pa ni don gyi sgo nas ming du btags pa yin no/ /yi ge ni kun brtags pa ma yin no zhes bya ba ni yi ge ka dang a la sogs pa gug skyed med pa rnams la ni kun brtags pa zhes bya bar mi bzhag ste/ de ci'i phyir zhe na/ yi ge 'bru gcig la ni ming med do/ /ming med pas ni de don rtag tu mi rung ba'i phyir ro/ /sbyor ba can gyi yid la byed pa bzhi pa bstan pa'i phyir/ rim pa nye bar rtogs pa'i sbyor ba can ni/ gang gis ming kun 'dzin pa sngon byas pa'i don 'dzin pa la 'jug pa nye bar rtogs pa'o zhes bya ba smos te/ sngar ming btags shing shes par byas nas de nas ming shes zin pa'i 'og tu don shes par byed pa ni rim pa nye bar rtogs pa'i sbyor ba can zhes bya ste/ de yang 'jig rten pa dag tha snyad la mkhas par bya ba'i phyir bum pa dang snam bu dang lha sbyin dang mchod sbyin zhes bya ba la sogs pa ming ji ltar shes par byed do/ /de ltar ming ji ltar shes par byas nas/ de nas don gyi dngos po 'di la ming du ji skad ces bya zhe'am ming 'di skad ces bya ba'i don ni 'di lta bu yin no/ /ma zhes ming la brten nas don la rtogs so/ /sbyor ba can gyi yid la byed pa lnga pas bstan pa'i phyir/ rab tu rtogs pa'i sbyor ba de yang rnam pa bcu gcig tu rig par bya ste zhes bya ba la sogs pa smos te/ 'og nas 'byung ba'i chos bcu gcig rtogs pa ni rab tu rtogs pa'i sbyor ba zhes bya'o/ /glo bur du byung ba rab tu rtogs pa dang zhes bya ba la/ ming du btags pa dang don du btags pa'i chos 'di dag ni gyi na brnyan mar btags par zad do zhes khong du chud pa na glo bur du byung ba rab tu rtogs pa zhes bya ste/ gang gi phyir don la ming btags pa rnams kyang gyi na glo bur btags pa yin la ming la don du btags pa rnams kyang gyi na glo bur btags par khong du chud pa ste/ de ni mos pa spyod pa'i sa drod kyi dus na khong du chud do/ /yang dag par snang ba'i mtshan ma rab tu rtogs pa dang zhes bya ba la/ gzung ba dang 'dzin pa'i chos de dag yod pa ma yin pa las yod pa lta bur snang ba ni yang dag par snang ba zhes bya ste/ 'di ltar snang bar byed pa'i rgyu la mtshan ma zhes bya'o/ /de ltar snang bar byed pa'i rgyu ni sems dang sems las byung ba yin te/ gzung ba dang 'dzin pa 'di dag sems dang sems las byung ba la snang bar khong du chud pa ni yang dag par snang ba'i mtshan ma rab tu rtogs pa zhes bya ste/ de yang mos pa spyod pa'i sa rtse mo'i dus na de ltar rtogs so/ /don mi dmigs pa rab tu rtogs pa dang zhes bya ba la/ gzugs nas chos kyi bar du yul drug la bya ste yul drug po de dag la mi rtog cing de dag sems la snang ba thams cad spangs nas mi snang bar gyur nas don mi dmigs pa rab tu rtogs pa zhes bya'o/ /de yang mos pa spyod pa'i sa bzod pa'i dus na rtogs so/ /dmigs pa mi dmigs pa rab tu rtogs pa dang zhes bya ba la/ yul drug la dmigs par byed pa'i sems mig gi rnam par shes pa nas yid kyi rnam par shes pa'i bar du med par khong du chud pa ni dmigs pa mi dmigs pa rab tu rtogs pa zhes bya'o/ /de ci'i phyir zhe na/ gzung ba med pa dang de la 'dzin par byed pa'i sems kyang yod pa ma yin no zhes khong du chud pa'i phyir te/ de ni mos pa spyod pa'i sa'i 'jig rten gyi chos mchog gi dus na khong du chud do/ /chos kyi dbyings rab tu rtogs pa dang zhes bya ba la/ de ltar gzung ba dang 'dzin pa gnyis spangs nas mthong ba'i lam nas chos kyi dbyings thams cad du 'gro ba'i mtshan nyid du mthong ba ni chos kyi dbyings rab tu rtogs pa zhes bya ste/ de'ang sa dang po'i tshe'i khong du chud do/ /gang zag la bdag med pa rab tu rtogs pa dang zhes bya ba la mthong ba'i lam na nyan thos rgyun du zhugs pa la sogs pas ni gang zag la bdag med pa la rab tu rtogs te/ phung po lnga tsam du zad kyi mu stegs kyis brtags pa'i bdag ni yod pa ma yin no zhes khong du chud pa'i phyir ro/ /chos la bdag med par rab tu rtogs pa dang zhes bya ba la/ byang chub sems dpa' rnams kyis ni mthong ba'i lam la chos la bdag med par rab tu rtogs te/ phung po lnga nyid kyang rmi lam gyi gzugs bzhin du med do zhes khong du chud pa'i phyir ro/ /bsam pa chung ngu rab tu rtogs pa dang zhes bya ba la/ nyan thos rgyun du zhugs pa dang / lan cig phyir 'ong ba dang phyir mi 'ong ba dang / dgra bcom pa dang / rang sangs rgyas rnams ni bsam pa chung dus rab tu rtogs pa zhes bya ste/ bdag gi don tsam du bya ba dang / gang zag la bdag med pa tsam las ma rtogs pa'i phyir ro/ /rgya chen por bdag nyid chen po'i bsam pa rab tu rtogs pa dang zhes bya ba la/ sa bcu pa'i byang chub sems dpa' rnams dang / de bzhin gshegs pa rnams ni rgya chen po'i bdag nyid chen po'i bsam pa rab tu rtogs pa zhes bya ste/ bdag dang sems can thams cad kyi don bya ba rtogs pa dang / gang zag dang chos la bdag med par rtogs pa'i phyir ro/ /ji ltar chos khong du chud pa'i chos rnam par gzhag pa'i rab tu rtogs pa dang zhes bya ba la/ mthong ba'i lam sa dang po'i dus na chos kyi dbyings rtogs pa ni ji ltar chos khong du chud pa zhes bya'o/ /de ltar chos kyi dbyings khong du chud nas de khong du chud pa'i yon tan skad cig ma gcig la de bzhin gshegs pa brgya'i zhal lta ba la sogs pa rnams rtogs pa ni chos rnam par gzhag pa rab tu rtogs pa zhes bya ste/ de yang sa dang po'i dus na yang dag pa'i lta bas rtogs so/ /rnam par gzhag pa'i chos rab tu rtogs pa dang zhes bya ba la/ sa gnyis nas sa bcu man chad na bsgom par bya ba'i chos rnams kyang rab tu rtogs shing de'i yon tan skad cig gcig la de bzhin gshegs pa stong gi zhal mthong ba la sogs pa ni rnam par gzhag pa'i chos rab tu rtogs pa zhes bya ste/ 'di ni bsgom pa'i lam na yang dag pa'i rtog pas rtogs so/ /dbang byed pa yid la byed pa ni rnam pa gsum ste zhes bya ba la/ dbang byed pa'i yid la byed pa la rnam pa gsum yod de/ nyon mongs pa'i sgrib pa dag la dbang byed pa dang / nyon mongs pa dang shes bya'i sgrib pa dag la dbang byed pa dang / da ltar mngon par bsgrub pa la dbang byed pa'o/ /nyon mongs pa'i sgrib pa shin tu rnam par dag pa dang zhes bya ba la/ 'dod chags la sogs pa mthong ba dang bsgom pas spang bar bya ba'i nyon mongs pa rnams la bya ste/ nyon mongs pa de dag nyid rnam par thar pa dang mya ngan las 'das pa thob par bya ba la bar du gcod pa na sgrib pa zhes bya'o/ /sgrib pa de dag spangs nas phyis sems kyi rgyud la mi skye bar byas pa ni nyon mongs pa'i sgrib pa shin tu rnam par dag pa zhes bya ste/ 'dis ni nyon mongs pa'i sgrib pa dag pa la dbang byed pa bstan to/ /nyon mongs pa dang shes bya'i sgrib pa shin tu rnam par dag pa dang zhes bya ba la/ nyon mongs pa'i sgrib pa ni gong du bshad par zad do/ / gzung ba dang 'dzin pa'i chos la yod par chags pa ni shes bya'i sgrib pa zhes bya ste/ de yang thams cad mkhyen pa'i ye shes thob par bya ba la bar du gcod pas na sgrib pa'o/ /sgrib pa de spangs nas phyis mi skye bar byas pa la shes bya'i sgrib pa shin tu rnam par dag pa zhes bya ste/ 'dis ni nyon mongs pa dang shes bya'i sgrib pa dag pa la dbang byed pa bstan to/ /yon tan mngon par sgrub pa shin tu rnam par dag pa zhes bya ba la/ yon tan ni mngon par shes pa drug dang / stobs dang mi 'jigs pa la sogs pa la bya'o/ /yon tan de dag thob par bya ba la bar du gcod pa spangs nas yon tan de dag mngon sum du byas pa la yon tan mngon par bsgrub pa shin tu rnam par dag pa zhes bya ste/ 'dis ni yon tan mngon par bsgrub pa la dbang byed pa bstan to/ /chos la da kho na nyid kyi don yongs su tshol ba la tshigs su bcad pa gnyis so zhes bya ba la chos ni rnam pa gnyis te/ kun nas nyon mongs pa'i chos dang / rnam par byang ba'i chos so/ /chos de dag gi de kho na nyid ni chos de dag gi mtshan nyid phyin ci ma log pa'i rang bzhin te/ de yang kun btags kyi rang bzhin dang / gzhan dbang gi rang bzhin dang / yongs su grub pa'i rang bzhin no/ /chos de dag kyang 'jig rten las 'das pa'i ye shes thob pas ni khong du chud do/ /yid la byed pa'i tshol ba'i skabs bshad pa'i rjes la chos la de kho na nyid kyi don yongs su tshol ba'i skabs bshad par 'brel pa ci yod ce na/ yid la byed pa zhes bya ba la/ rtse gcig pa zhes bya ba dang / ting nge 'dzin ces bya ba dang / mnyam par gzhag pa rnams ni don gcig ste/ mdo las sems mnyam par gzhag pa thob na de kho na nyid khong du chud par 'gyur ro zhes 'byung bas yid la byed pa'i skabs kyi rjes la de kho na'i skabs bshad par 'brel to/ /de nyid gang ni gnyis kyis rtag tu spangs/ /zhes bya ba la/ gang zag dang chos la bdag med pa'i rang bzhin stong pa nyid la de nyid ces bya'o/ /stong pa nyid so so'i skye bo nas 'phags pa'i dus na/ yang gzung ba dang 'dzin pa dang bral ba yin pas rtag tu gnyis kyis spangs zhes bya ste/ de ltar rtag tu gzung 'dzin dang bral yang / gzung 'dzin lta bur snang ba 'di ni kun brtags kyi mtshan nyid do zhes bya ba'i don to/ /nor ba'i gnas zhes bya ba la nor ba'i gnas ni gzhan gyi dbang gi mtshan nyid de thag pa la sprul du rtogs pa bzhin du gzhan dbang ste/ gzung ba dang 'dzin pa lta bur rtogs pa'i rgyu byed pa'i phyir nor ba'i gnas zhes bya'o/ gzhan dbang gis gzung 'dzin lta bur rtogs pas so/ /spros pa med par rnam pa kun du spyod mi nus zhes bya ba la spros pa med cing brjod par mi nus pa ni yongs su grub pa'i rang bzhin te/ yongs su grub pa gzung 'dzin gyi chos med pas na spros pa med pa'o/ /yongs su grub pa de ming dang tshig dang yi ges 'di 'dra'o zhes tha snyad du mi rung bas na rnam pa kun du brjod mi nus zhes bya'o/ /shes bya zhes bya ba la/ dang po kun brtags kyi mtshan nyid ni shes par bya ba yin te/ ji ltar shes par bya zhe na/ kun brtags kyi chos 'di dag ni ri bong gi rwa bzhin du yod pa ma yin no zhes shes par bya'o/ /spangs pa zhes bya ba la/ gnyis pa gzhan dbang gi mtshan nyid ni spang bar bya ba ma yin te/ gzhan dbang la yod pa'i gzung 'dzin gyi dri ma sbyang dgos pa'i phyir ro/ /rnam sbyangs rang bzhin dri ma med par rig /ces bya ba la/ gsum pa yongs su grub pa'i mtshan nyid ni rnam par sbyangs pa yin par rig par bya ste/ yongs su grub pa nyid kyi rang bzhin nyid rnam par dag cing dri ma med pa yin yang glo bur gyi dri ma sbyang bar mi bya ba ma yin te/ sbyang dgos pa'i phyir ro/ /de ltar yongs su grub pa'i rang bzhin gyis rnam par dag pa yin yang glo bur gyi dri ma sbyang dgos pa'i rnam pa gsum bstan pa'i phyir/ de ni nam mkha' gser dang chu 'dra nyon mongs rnam dag 'dod/ /ces bya ba smos te/ dper na nam mkha' dang gser dang chu rnams rang bzhin gyis dag kyang glo bur gyi dri ma sprin dang sa rdo dang rnyog pa bsal dgos pa de bzhin du yongs su grub pa'i rang bzhin yang rang bzhin gyis rnam par dag pa yin mod kyi glo bur gyi dri ma sbyang dgos so zhes bya ba'i tha tshig go/ /de las gzhan ni 'jig rten dag na ci yang med/ /ces bya ba la/ de'i sgras ni chos kyi dbyings stong pa nyid la bya ste/ stong pa nyid las gzhan pa'i chos stong par ma 'dus pa'i chos ni 'jig rten na gzugs la sogs pa gang yang yod pa ma yin te/ ci'i phyir zhe na/ phyi nang gi chos thams cad stong pas khyab pa'i phyir ro/ /'gro ba ma lus pa yang de la rmongs pa'i blo zhes bya ba la/ de ltar stong pa'i mtshan nyid kyis chos thams cad la khyab pa la/ stong pa'i chos tsam zhig yod par zad kyi/ de las lhag pa gzhan med na sems can thams cad kyang stong pa'i chos de la mgo rmongs te/ stong pa'i chos ma rtogs ma mthong ngo zhes bya ba'i don to/ /ji ltar 'jig rten gti mug rnam pa ni mngon 'phel zhes bya ba la 'di ni 'jig rten du ngo mtshar du bya ba ste/ stong pas kun du khyab tu zin kyang stong pa mi mthong ba'i gti mug dang ma rig pa 'di 'khor ba thog ma med pa nas ji ltar rnyed cing bskyed nas 'phel ba zhes bya ba'i don to/ /yod pa kun du rnam spangs med la mngon par chags/ /zhes bya ba la/ de ltar stong pas kun du khyab ste/ stong par ma 'dus pa med na yod pa'i chos stong pa ni ma spangs te/ ma mthong ba med pa'i chos gzugs la sogs pa ri bong gi rwa bzhin med pa yin mngon par chags shing yod par 'dzin par byed do/ /de ni ngo mtshar du bya ba yin no zhes bya ba'i don to/ /yang na mtshan nyid gsum las gzhan pa'i chos ni 'jig rten na ci yang med de/ kun nas nyon mongs pa dang / rnam par byang ba'i chos thams cad kyang mtshan nyid gsum du 'dus pa'i phyir ro/ /de ltar mtshan nyid gsum tsam du zad na sems can thams cad kyang de la rmongs te/ mtshan nyid gsum ma mthong ba'i gti mug 'di lta bur ji ltar spel te bskyed na yod pa'i chos mtshan nyid gsum ni ma mthong la med pa'i chos gzung ba dang 'dzin pa la ni chags par byed ces bya ba'i don to/ /chos kyi dbyings de lta bu'i mtshan nyid las/ 'jig rten na gzhan ci yang med de zhes bya ba la/ chos kyi dbyings gzung 'dzin dang bral ba la ni stong pa nyid las ma gtogs pa'i chos gzugs dang sgra la sogs pa ci yang med de/ thams cad stong pas khyab pa'i phyir ro/ /chos nyid las chos tha dad pa ma yin pa'i phyir ro zhes bya ba la/ ci'i phyir stong pas khyab ce na/ chos nyid de stong pa las chos te/ gzugs la sogs pa logs shig na tha snyad tha dad par yod pa ma yin pas na thams cad stong pas khyab ces bya ba'i don to/ /de kho na nyid la sgyu ma lta bur yongs su tshol ba'i tshigs su bcad pa bco lnga'o zhes bya ba la/ de kho na tshol ba'i skabs kyi rjes la de kho na la sgyu ma lta bur yongs su tshol ba'i skabs bshad par 'brel ba ci yod ce na/ de kho na zhes bya ba la/ phyin ci ma log pa zhes bya ba dang / ma nor ba zhes bya ba dag don gcig ste/ de yang yang dag pa ma yin pa dang / yang dag pa ste rnam pa gnyis so/ /de la yang dag pa ma yin pa la yang yang dag pa ma yin pa nyid du mthong ba dang yang dag pa la yang yang dag pa nyid du mthong ba na de nyid la kho na shes pa zhes bya'o/ /'di ltar gong du/ de nyid gang ni rtag tu gnyis kyis spangs dang nor pa'i gnas/ /spros pa med pa rnam pa kun du brjod mi nus/ /zhes bya'o/ /kun pa rtags dang gzhan dbang dang yongs su grub pa'i rang bzhin gsum rim bzhin du gnyis dang bral ba dang / 'khrul pa'i gnas dang / brjod du med cing spros pa med pa'i bdag nyid du bshad/ de kho na rnam pa gsum po de la rnam pa gang gis na sgyu ma lta bur yin par brtag cing btsal dgos te/ de'i phyir de kho na nyid tshol ba'i skabs kyi rjes la de kho na nyid la sgyu ma lta bur yongs su tshol ba'i skabs bshad par 'brel to/ /yang na theg pa chen po'i mdo sde de dang de dag gi nang nas chos thams cad ni sgyu ma lta bu'o zhes bshad de/ ji ltar na chos thams cad sgyu ma lta bu yin par brtag cing btsal ba'i phyir tshigs su bcad pa bco lnga rtsom mo zhes bya ba'i don to/ /ji ltar sgyu ma de bzhin du/ /yang dag ma yin kun rtog ste/ /zhes bya ba la/ dper na sgyu ma mkhan gyis sngags dang sman gyis yongs su zin pa'i mthu las sgyu ma'i rta dang glang po la sogs pa snang ba'i rgyu rdo dang shing la sogs pa lta bur ni yang dag pa ma yin pa kun du brtags te/ sems dang sems las byung ba rten cing 'brel te 'gyur ba gzhan dbang gi mtshan nyid yin par 'dod de/ ci'i phyir zhe na/ sngags dang sman gyis zin pa'i rdo dang shing bus yang rta dang glang por snang ba'i rgyu byed pa de bzhin du gzhan dbang yang gzung ba dang / 'dzin pa lta bur snang ba'i rgyu byed pas na rdo shing gi tshul lta bur blta'o/ /ji ltar sgyu ma byas pa ltar/ / nor ba gnyis zhes bya ba la/ /dper na sgyu ma mkhan gyi sman dang sngags kyi mthus rdo dang shing la sogs pa las sgyu ma'i gzugs rta dang glang po la sogs pa sgyu ma'i dbyibs sna tshogs snang ba ltar ni gzhan dbang la kun brtags kyi mtshan nyid nor ba gnyis su snang bar bltas te/ nor ba gnyis ni gzung ba lta bur snang ba dang / 'dzin pa lta bur snang ba'o/ /yang dag pa ma yin pa'i kun du rtog pa la nor ba gnyis te zhes bya ba la/ yang dag ma yin kun rtog ni gzhan gyi dbang gi mtshan nyid de/ de la nor ba gnyis snang ba ni kun brtags kyi mtshan nyid do zhes bya ba'i don to/ /ji ltar de la de med bzhin/ / de ltar dam pa'i don du 'dod/ /ces bya ba la/ mdo sde dag gis nang nas don dam pa'i bden pa dang / kun rdzob kyi bden pa zhes 'byung ba bden pa gnyis kyi mtshan nyid spyod de/ dper na sgyu ma'i rta dang glang po la sogs pa'i dbyibs rdo dang shing la sogs rgyu las rta dang glang por snang mod kyi/ rdo dang shing de la rta dang glang po'i rang bzhin med pa de ltar gzhan gyi dbang gi mtshan nyid la kun du rtog pa'i rang bzhin gzung ba dang 'dzin pa gnyis med de/ gzung 'dzin dang bral nas yongs su grub pa'i mtshan nyid du gyur pa ni don dam pa'i bden pa ma yin par 'dod do zhes bya ba'i don te/ 'dis ni don dam pa'i bden pa'i mtshan nyid bshad do/ /ji ltar de dag dmigs pa bzhin/ /de dag kun rdzob bden pa'o/ /zhes bya ba la/ dper na sgyu ma'i shing dang / rdo ba las rta dang glang po la sogs pa'i dbyibs sna tshogs snang ba ltar gzhan gyi dbang gi mtshan nyid las/ kun brtags kyi mtshan nyid gzung ba dang / 'dzin par snang ba thams cad ni kun rdzob kyi bden pa yin no zhes bya ba'i don to/ /'dis ni kun rdzob kyi bden pa'i mtshan nyid bstan to/ /ji lta bur ni de med na/ /de yi rgyu yang snang bar byed/ /ces bya ba la/ dper na sgyu ma mkhan gyi sngags dang sman gyi mthus rdo dang shing las rta dang glang po la sogs pa snang ba dang sngags dang sman gyi mthu tshad nas rta dang glang po'i dbyibs med de mi snang bar gyur na glang po la sogs pa'i dbyibs kyi rgyu las snang ba rnyed de rta dang glang po ni mi mthong gi rdo dang shing bu mthong bar 'gyur ro zhes bya ba'i don to/ /de bzhin shin tu gnas gyur na/ /med par rtogs pa dmigs par 'gyur/ /zhes bya ba la/ de bzhin du nam gzung ba dang / 'dzin pa gnyis med par rtogs na kun gzhi rnam par shes pa gzhan dbang gi mtshan nyid gnas gyur na gnyis dang bral ba'i rnam par yongs su grub pa'i mtshan nyid dmigs par 'gyur te/ dper na thag pa la sbrul du mthong ba dang bral na thag pa mthong ba bzhin no/ /gnas gyur na yang dag pa ma yin pa'i kun du rtog pa'i don yang dag par dmigs so zhes bya ba la/ nam kun gzhi gnas gyur na gzhan dbang la gzung ba dang 'dzin pa'i nor ba gnyis med par 'gyur te/ gzung 'dzin dang bral nas de'i tshe dag pa 'jig rten pa'i ye shes rgyab nas thob pas yang dag pa ma yin par kun du rtog pa gzhan gyi dbang gi don ma nor bar rtogs par 'gyur te/ ji ltar rtogs she na/ gnyis dang bral ba'i mtshan nyid du rtogs shing mthong bar 'gyur ro zhes bya ba'i don to/ /de yi rgyu las ji lta bur/ /'jig rten ma nor 'dod bzhin spyod/ /ces bya ba la/ de'i sgras ni rta dang glang po'i byad gzugs su snang ba la bya ste/ de'i rgyu ni rdo dang shing bu la sogs pa'o/ /dper na rdo dang shing bu las rta dang glang po'i byad gzugs su snang ba'i byad gzugs rnams mi snang bar gyur na de'i rgyu rdo dang shing bu la 'jig rten pa rnams ma nor bar spyod pa dang / 'dod bzhin spyod do ma nor bar spyod pa ni rta dang glang po lta bur nor ba ma mthong gi rdo dang shing nyid du ma nor bar mthong ba'i phyir ro/ /'dod bzhin spyod pa ni de dag la chags pa dang 'jigs par spyod pa'i phyir ro/ /de bzhin shin tu gyur na yang / /ma log rnal 'byor 'dod bzhin spyod/ /ces bya ba la/ de dang 'dra bar gzhan dbang gnas gyur te/ /gzung 'dzin gnyis spangs na phyin ci ma log pa la gnas pa'i rnal 'byor pa rnams ma log par spyod pa dang de bzhin spyod do/ /ji ltar ma log par spyod ce na/ gzung ba dang 'dzin pa'i 'khrul pa ma mthong bas na ma nor bar spyod do/ /ji ltar 'dod bzhin spyod ce na/ de phan chad chags pa dang 'jigs pa med par spyod pa'i phyir ro/ /de yi snang ba de la yod/ /de yi dngos po med pa ste/ /de phyir sgra la sogs pa la/ /yod dang med par brjod pa yin/ /zhes bya ba la/ de'i sgra ni sgyu ma'i rta dang glang po'i dbyibs su snang ba'i rgyu rdo dang shing bu la bya ste/ rdo dang shing bu de la rta dang glang po la sogs pa'i byad gzugs su 'khrul pa snang ba tsam ni med pa ma yin pas sgyu ma la sogs pa la yod pa zhes kyang mi brjod de/ de ltar 'khrul par snang ba tsam yod kyang rta dang glang po'i dngos po nyid yod kyang ma yin pas med pa zhes brjod pa ma yin no zhes bya ba'i don to/ /dngos po de la dngos med min/ /zhes bya ba la/ dngos po'i sgras ni rta dang glang po snang bar byed pa'i rgyu rdo dang shing bu la bya ste/ rdo dang shing bu las rta dang glang po'i dbyibs su snang ba 'khrul pa tsam du med pa ma yin pas na dngos med min zhes bya'o/ /dngos med dngos po nyid ma yin/ /zhes bya ba la/ de ltar 'khrul pa tsam du ni snang yang rta dang glang po'i dngos po nyid med de/ de bas na rta dang glang po'i dngos po nyid du yod pa ma yin no zhes bya ba'i don to/ /dngos dang dngos med bye brag med/ /rgyu la sogs pa brjod pa yin/ /zhes bya ba la/ de ltar 'khrul pa tsam du ni yod kyi dngos po nyid med pas na dngos po dang dngos po med pa gnyis bye brag med cing don gcig par sgyu ma la sogs pa brjod pa yin te/ ji lta zhe na/ gang 'khrul pa'i dngos po tsam du yod pa de nyid la brtags na don dam par ba lang la sogs pa'i rang bzhin du med pa yin pas yod pa dang med pa gnyis bye brag med de don gcig par brjod pa dang / gang ba lang la sogs pa'i dngos po med pa nyid la 'khrul pa tsam du snang ba'i dngos po med pa ma yin te/ yod pas na dngos po med pa dang dngos po gnyis su yang bye brag med de don gcig go/ /dngos med ma yin de ma yin/ /zhes bya ba la/ dngos po med pa ma yin pa ni 'khrul pa tsam du yod pa'i phyir te/ 'khrul pa tsam du yod pa de la yang ba lang la sogs pa'i rang bzhin nyid med pas de ma yin pa zhes bya ste/ de dngos por yod pa ma yin no zhes bya ba'i don to/ /de la de lta bur snang ba la sogs pa yod pa gang yin pa de nyid ba lang la sogs pa'i dngos po med pa nyid do zhes bya ba'i dngos po dang dngos po med pa gnyis bye brag med par ston to/ /rta dang glang po la sogs par 'khrul pa tsam du snang bar yod pa gang yin pa de nyid la ba lang la sogs pa'i rang bzhin med pas na/ dngos po dang dngos po med pa gnyis don gcig go zhes bya ba'i don to/ /ba lang la sogs pa med pa ste yin pa de nyid de lta bu'i snang bar yod pa'o zhes bya ba la don dam par ba lang la sogs par snang yang ba lang la sogs pa'i dngos po med pa de nyid la 'khrul pa tsam du snang ba'i dngos po yod pas na de dngos po med pa dang dngos po gnyis su don gcig go zhes bya ba'i don to/ /de bzhin gnyis snang de la yod/ /de yi dngos po med pa ste/ /de phyir yod dang med par ni/ /gzugs la sogs pa brjod pa'o/ /zhes bya ba la/ dper na sgyu ma'i rgyu shing dang rdo ba la rta dang glang po tsam du 'khrul par snang ba yod pas de bzhin du yang yang dag pa ma yin pa'i kun rtog pa gzhan gyi dbang gi mtshan nyid de la gzung ba la sogs pa'i gzung ba dang 'dzin pa gnyis su snang ba 'khrul pa tsam dang kun rdzob tu yod pa zhes bya ste/ de bas na gzugs la sogs pa la yang yod par yang brjod do/ /de'i phyir dbus dang mtha' rnam par 'byed pa las kyang / yang dag ma yin kun rtogs yod/ /ces bshad de/ gzung ba dang 'dzin pa gnyis su kun rdzob tu yod ces bya ba'i don to/ /de ltar gzung 'dzin gnyis 'khrul par snang ba tsam du kun rdzob tu yod kyang don dam par na gzung ba'i dngos po dang 'dzin pa'i dngos po nyid med de/ de bas na gzugs la sogs pa la med pa zhes brjod do/ /de bas na dbus dang mtha' rnam par 'byed pa las kyang / gnyis po de na yod ma yin/ /zhes bshad do/ /don dam par na gzung 'dzin gnyis med do zhes bya ba'i don to/ /yang na ni mi mthun pa'i phyogs thams cad bsal ba spros pa thams cad dang bral ba rnam par mi rtog pa'i ye shes thob pa'i dus na byis pas yongs su brtags pa'i gzugs la sogs pa'i chos med par mthong ste/ de bas na de'i dngos po med pa zhes brjod do/ /dngos po de la dngos med min/ /zhes bya ba la/ dngos po'i sgra ni gzhan dbang la bya ste/ gzhan dbang la gzung ba dang 'dzin pa lta bur snang ba 'khrul pa tsam du med pa ma yin pas na dngos med min zhes bya'o/ /dngos med dngos po nyid ma yin/ /zhes bya ba la/ gzung ba dang 'khrul pa tsam du snang bar yod pa de yang gzung 'dzin gyi rang bzhin du grub pa med pas dngos med ces bya ste/ de ltar dngos po med pas na gzung ba dang 'dzin pa gnyis dngos po nyid du yod pa ni ma yin no zhes bya ba'i don to/ /dngos dang dngos med bye brag med/ /gzugs la sogs pa brjod pa yin/ /zhes bya ba la/ de ltar snang ba tsam du ni yod pa dang rang bzhin ni med pas na gzugs la sogs pa'i dngos po dang dngos po med pa gnyis bye brag med cing don gcig par brjod de/ ji lta zhe na/ kun rdzob pa'i dngos po tsam du yod pa de nyid don dam par rang bzhin med pa dang don dam par rang bzhin med pa nyid la yang kun rdzob tu grub pa tsam du dngos po yod pas na dngos po dang dngos po med pa don gcig go/ /gnyis por snang bar yod pa gang yin pa de nyid gnyis po med pa'o zhes bya ba la/ gnyis por snang ba ni yang dag pa ma yin pa'i kun du rtog pa ste/ gzung 'dzin gnyis su spangs ba'i phyir ro/ /yang dag pa ma yin pa'i kun du rtog pa de la gang gi tshe na ming dang gzugs la sogs pa gnyis dang bral ba'i sems dang sems las byung ba'i rang bzhin tsam du shes pa de'i tshe na gnyis su 'dzin pa las log par gyur nas gnyis med pa'i sems dang sems las mthong ba tsam du 'gyur te/ de ltar na gnyis por snang ba yod pa gang yin pa de nyid gnyis po med pa zhes bya'o/ /ci'i phyir na gcig tu yod pa kho nar yang chad par mi bshad med pa kho nar yang chad par mi bshad de gnyis bye brag med par yang ci'i phyir mi bshad ce na/ de'i phyir/ sgro btags pa dang skur 'debs mtha'/ /dgag pa'i phyir ni 'dod pa yin/ /theg pa chung bas 'gro ba yang / /dgag pa'i phyir ni de nyid do/ /zhes bya ba smos te/ yod pa dang med pa gcig tu chad par bshad pa dang / bye brag med par bshad pa ni go rims bzhin du rnam pa gsum dgag pa'i phyir bshad de/ sgro 'dogs pa'i mtha' dgag pa dang / skur pa 'debs pa'i mtha' dgag pa dang / theg pa chung ngus dbyung ba dgag pa'i phyir ro/ /de la mos pa spyod pa'i sa bzod pa'i dus na rnam par shes pa nyid rnam pa gnyis su snang bar zad kyi rnam par shes pa las ma gtogs pa'i phyi'i don med par khong du chud de/ de'i tshe dngos po med pa la dngos po med par rig nas sgro mi 'dogs pa'i mtha' bkag go/ /mos pa spyod pa'i sa drod dang rtse mo'i dus na gzung ba dang 'dzin pa gnyis 'khrul bar snang ba tsam du yod par khong du chud pas kun rdzob kyi dngos po la kun rdzob tsam du yod par rig ste med do zhes skur pa mi 'debs pa'i mtha' bkag go/ /yod pa dang med pa gnyis khyad par med par khong du chud pas nyan thos kyi mya ngan las 'das par mi 'jug ste/ de bas na nyan thos kyi theg pa 'byung ba bkag go/ /ji lta zhe na/ nyan thos rnams ni gzugs la sogs pa'i dngos po yod par rtog cing de'i sgo nas sdug bsngal gyis skrag pas/ skye ba dang 'jig pa'i rnam par bsgoms pa'i sgo nas skyo bar byed do/ /skyo nas 'dod chags dang bral bar byed do/ /de nas 'khor ba las 'byung ste/ mya ngan las 'das pa la 'jug par byed do/ /byang chub sems dpa' rnams kyis ni gang gzhan gyi dbang gi mtshan nyid las rnam pa gnyis su snang ba tsam du yod par bshad pa de nyid rnam par shes pa las ma gtogs par gzugs la sogs pa kun brtags kyi chos yod pa ma yin par khong du chud pa la gang kun brtags kyi mtshan nyid du yod pa ma yin par bshad pa de nyid la kun rdzob tu 'khrul bar snang ba tsam du yod par khong du chud pas 'khor bar skyo ba med do/ /'khor bar mi skyo na nyan thos ltar mgo'i thod la me bsad pa'i tshul du brtson 'grus myur nas mya ngan 'das pa la mi 'jug ste/ de bas na gnyis khyad par med par rtogs pas ni nyan thos kyi theg pas 'byung ba las bkag pa yin no/ /nor ba'i rgyu ni nor ba dang / /gzugs kyi rnam par rig par 'dod/ /gzugs med pa yi rnam par rig /ces bya ba la/ byis pa rnams kyi rnam par rig pa ni rnam pa gnyis su 'jug par 'dod de/ nor ba'i rgyu dang nor ba'o/ /de la nor ba'i rgyu ni mig gi dbang po nas lus kyi dbang po'i bar du dbang po lnga dang / gzugs nas reg bya'i bar du yul lnga la bya'o/ /de dag thams cad dang po yang rnam par shes pa 'khrul pa la snang la/ phyis kyang sems 'khrul pa'i rgyu byed pa'i phyir te/ nor ba'i rgyu la ni gzugs kyi rnam par rig pa zhes bya bar 'dod do/ /nor ba ni dbang po dang yul de dag la 'di dang 'di 'dra zhes gcod par byed pa'i mig la sogs pa'i rnam par shes pa la bya ste/ nor ba la ni gzugs med pa'i rnam par rig pa yin par 'dod do zhes bya ba'i don to/ /dngos po med phyir gzhan med 'gyur/ /zhes bya ba la/ de ltar dbang po lnga dang yul lnga'i dbang po med par gyur na gzhan yang med par 'gyur te/ dbang po dang yul la brten cing dmigs pa'i rnam par shes pa rnams kyang med par 'gyur ro/ /ci'i phyir zhe na/ gzung ba med pa dang 'dzin pa med pa mi rigs pa'i phyir ro/ /gzugs su nor ba'i rgyu rnam par rig pa de ni gzugs kyi rnam par rig pa gzugs zhes bya bar 'dod do zhes bya ba la/ gzugs kyi sgras ni dbang po lnga dang yul lnga la bya ste/ de dag kyang rnam par shes pa las byung bas na gzugs su nor ba'i rgyur ni rnam pa lngar rig par bya'o/ /rnam par rig pa las dbang po lnga dang yul lngar snang ba la ni gzugs kyi rnam par rig pa zhes bya bar 'dod do zhes bya ba'i don to/ /gzugs su nor ba de yang rnam par rig pa gzugs med pa de nyid ces bya ba la/ gzugs su nor ba 'di ni sngon po 'di ni ser po zhes rtogs pa'i mig la sogs pa'i rnam par shes pa la bya ste/ de ni rnam par rig pa gzugs med do zhes bya ba'i don to/ /rgyu med pa'i phyir ro zhes bya ba la/ sa bon med na 'bras bu mi skye ba bzhin du rnam par shes pa rnams skye ba'i rgyu ni yul lnga dang dbang po lnga yin te/ yul lnga dang dbang po lnga med par gyur na rnam par shes pa rnams kyang mi 'byung ngo zhes bya ba'i don to/ /gal te mig la sogs pa dbang po yang med/ gzugs la sogs pa'i yul yang med/ /de dag med pas rnam par shes pa rnams kyang med pa yin na/ ci'i phyir yul dang dbang po dang rnam par shes pa lta bur snang ba mnyam pa la gzung ba dang 'dzin pa'i dbang po med kyang gzung ba dang 'dzin pa lta bur snang ba srid pa 'jig rten du grags pa'i dpe dang gsung rab las 'byung ba'i dpe bstan te/ 'jig rten du grags pa'i dpe bstan pa'i phyir/ sgyu ma'i glang po'i byad gzugs 'dzin pa yi/ /nor ba'i phyir ni gnyis su bshad pa yin/ /zhes bya ba la sogs pa smos te/ sgyu ma'i shing dang rdo ba las sgyu ma'i glang po dang rta la sogs pa'i byad gzugs snang ba glang po dang rta la sogs pa'i rang bzhin du yod pa ma yin pa las snang bas na nor ba zhes bya ste/ de ltar nor ba'i phyir na gnyis su bshad de/ gzung bar bshad pa dang / 'dzin par bshad pa'o/ /ji ltar gzung bar bshad ce na/ /de'i phyir/ ji ltar gnyis po de na med pa la/ /gnyis po de dag nye bar dmigs pa yin/ /zhes bya ba smos te/ dper na rta dang glang po de snang ba'i rgyu rdo dang shing la gzung ba dang 'dzin pa gnyis med kyang gzung ba dang 'dzin par dmigs shing snang ste/ de na rta dang glang po la sogs par snang ba ni gzung ba'o/ /ma rig pas khebs pa'i byis pa rnams bdag cag gis rta dang glang po 'di dag mthong ngo snyam du sems pa ni 'dzin pa'o/ /gsung rab kyi dpe bstan pa'i phyir/ keng rus gzugs brnyan 'dzin pa ni/ /nor phyir gnyis su bshad pa ste/ /zhes bya ba la sogs pa smos te/ las dang po pa'i rnal 'byor pas dur khrod la sogs par song nas keng rus la brtags pa'o/ /de ltar ji ltar brtags pa bzhin du bsgoms pa dang ting nge 'dzin gyi dus na/ keng rus la sogs pa sems kyi gzugs brnyan sems la snang ngo / /keng rus kyi gzugs brnyan yod pa ma yin pa la snang bas na nor ba zhes bya ste/ de ltar nor ba yin pa'i phyir gnyis su bshad de/ gzung bar bshad pa dang 'dzin pa'o/ /ji ltar gnyis su bshad ce na/ /de'i phyir/ ji ltar de na gnyis med la/ /gnyis su nye bar dmigs pa bzhin/ /zhes bya ba smos te/ dper na keng rus kyi gzugs brnyan snang ba'i gnas nas gzung ba dang 'dzin pa gnyis med kyang gzung ba dang 'dzin pa gnyis su nye bar dmigs shing snang ste/ keng rus kyi gzugs brnyan ni gzung ba'o/ /de la dmigs par byed pa'i rnam par shes pa ni 'dzin pa'o/ /de dang 'dra bar gzhan dbang la gzung ba dang 'dzin pa gnyis snang ba gzung 'dzin gyi dngos por yod pa ma yin yang gzung ba dang 'dzin pa gnyis su snang ngo zhes bya ba'i don to/ /chos gang nor pa'i mtshan nyid ni/ /de bzhin yod dang med pa'i phyir/ /yod med bye brag med pas na/ /yod dang med pa sgyu ma 'dra/ /zhes bya ba la/ chos ni rnam pa gnyis te mi mthun pa'i phyogs 'dod chags la sogs pa kun nas nyon mongs pa'i chos dang / gnyen po'i phyogs tha dad pa la sogs pa rnam par byang ba'i chos so/ /'dod chags la sogs pa kun nas nyon mongs pa'i chos kyang gzung ba dang 'dzin pa'i ngo bor yod pa ma yin par yod pa lta bur snang bas na nor ba'i mtshan nyid ces bya ste/ mi mthun pa'i phyogs kyi chos de dag ni yod par yang sgyu ma'i yod pa dang 'dra ste/ med pa yang sgyu ma'i med pa dang 'dra la/ yod med bye brag med pa yang sgyu ma'i yod med bye brag med pa dang 'dra bas na yod pa dang med pa sgyu ma dang 'dra ba'i phyir chos de thams cad sgyu ma dang 'dra zhes bya'o/ /ji ltar yod pa sgyu ma dang 'dra zhe na/ dper na sgyu ma rta dang glang por 'dra bar snang ba tsam med pa ma yin te/ yod bzhin du gzung ba dang 'dzin par snang ba de dag kyang snang ba tsam du 'khrul par med pa ma yin te/ yod pas na yod pa yang sgyu ma dang 'dra ba yin no/ /ji ltar med pa sgyu ma dang 'dra zhe na/ ji ltar sgyu ma'i rta dang glang po 'dra bar snang yang rta nyid kyi rang bzhin dang glang po nyid kyi rang bzhin dang med pa de bzhin du gzung ba dang 'dzin pa lta bur snang ba de dag snang yang gzung ba'i rang bzhin dang 'dzin pa'i rang bzhin nyid du grub par med pas na med pa yang sgyu ma lta bu'o/ /yod med bye brag med pa ji ltar sgyu ma lta bur zhe na/ dper na sgyu ma'i rta dang glang por snang ba tsam du zad kyang rta dang glang po'i rang bzhin nyid med pas yod pa dang med pa bye brag med pa dang / gang na glang po rta'i rang bzhin med pa de na rta dang glang por snang ba tsam yod pas yod pa dang med par bye brag med do/ /de dang 'dra bar gzung ba dang 'dzin pa snang ba tsam du yod pas na gzung 'dzin gyi rang bzhin med pas yod pa dang med pa bye brag med pa dang / gzung 'dzin rang bzhin med pa la/ snang ba tsam yod pas med pa yod pa bye brag med de/ de bas na yod pa dang med pa bye brag med pa yang sgyu ma lta bur rig par bya'o zhes bya ba'i don to/ /yod pa dang med pa de gnyis kyi bye brag med pas na med pa yang ma yin yod pa yang ma yin no zhes bya ba la/ snang ba tsam du yod kyang rang bzhin med pa'i phyir yod pa yang ma yin no/ /rang bzhin med kyang snang ba tsam du yod pas na med pa yang ma yin no zhes bya ba'i don to/ /de ltar mi mthun pa'i phyogs rnams sgyu ma lta bur bstan nas gnyen po'i chos rnams kyang sgyu ma lta bur bstan pa'i phyir/ gnyen po'i chos ni gang yin pa/ /de bzhin med dang med pa'i phyir/ /de bzhin med pas mtshan ma med/ /sgyu ma 'dra bar bstan pa yin/ /zhes bya ba la sogs pa smos te/ de'i gnyen po'i chos ni rnam pa gsum ste/ bsgrub par bya ba'i chos dran pa nye bar gzhag pa la sogs pa byang chub kyi phyogs sum cu rtsa bdun dang / bshad par bya ba'i chos gsung rab yan lag bcu gnyis dang 'thob par bya ba'i chos mngal du 'jug pa la sogs pa ste/ chos de dag kyang mtshan nyid med cing sgyu ma dang 'dra bar bstan to zhes bya ba'i don to/ /ci'i phyir zhe na/ bsgrub par bya ba'i byang chub kyi phyogs kyi chos sum cu rtsa bdun yang ji ltar byis pas gzung ba dang 'dzin pa lta bur brtags pa ltar yod pa ma yin pa'i phyir sgyu ma lta bu ste/ de bzhin med dang zhes bya ba dang sbyar ro/ /bshad par bya ba'i chos gsung rab yan lag bcu gnyis kyang ji ltar bcom ldan 'das kyis ming dang tshig dang yi ge'i tshul du bshad pa ltar yod pa ma yin pas sgyu ma lta bu ste/ de ni med pa'i phyir zhes bya ba dang sbyar ro/ /'thob par bya ba'i chos sangs rgyas kyi mngal du 'jug pa dang / mngon par rdzogs par byang chub pa dang / mya ngan las 'das pa la sogs pa bstan pa yang ji ltar bstan pa bzhin du yod pa ma yin pas na sgyu ma lta bu ste/ de ni de bzhin med pas zhes bya ba dang sbyar te/ de chos de dag mtshan nyid med cing rang bzhin yod pa yang ma yin par snang bas na sgyu ma lta bu ma yin no zhes bya ba'i don to/ /gal te kun nas nyon mongs pa'i phyogs kyang sgyu ma lta bu yin la/ rnam par byang ba'i phyogs kyang sgyu ma lta bu yin na rnam par byang ba'i phyogs sgyu ma lta bus kun nas nyon mongs pa'i phyogs sgyu ma lta bur ji ltar spang snyam pa la/ de'i phyir/ dpe'i don du tshigs su bcad pa zhes bya ba smos te/ kun nas nyon mongs pa'i phyogs sgyu ma lta bu yin yang rnam par byang ba'i phyogs sgyu ma lta bus spang du rung bar dpe bstan to zhes bya ba'i don to/ /ji ltar sgyu ma'i rgyal po dag /sgyu ma'i rgyal po gzhan gyis pham/ /gang gis chos kun mthong ba yi/ /rgyal sras de dag nga rgyal med/ /zhes bya ba la/ dper na sgyu ma'i rgyal po'i mthu chung ngu la la zhig 'khor dang bcas te gnas 'ga' zhig na 'dug pa las sgyu ma'i rgyal po mthu dang ldan pa 'khor dang bcas pa la la zhig gis gnas 'ga' zhig na 'dug pas sgyu ma'i rgyal po mthu chung ngu pham ste/ pham par byas nas gnas nas bton pa de bzhin du kun gzhi rnam par shes pa ni gnas lta bu ste/ de na mig la sogs pa'i rnam par shes pa nyon mongs pa dang bcas pa na gnas pa ni sgyu ma'i rgyal po lta bu ste/ ci'i phyir zhe na/ rgyal po dbang dang ldan pa de bzhin du de dag kyang kun nas nyon mongs pa'i chos gzhan skye ba la dbang bas na rgyal po lta bu'o/ /kun nas nyon mongs pa dang ldan pa'i sems las byung ba ni sgyu ma'i rgyal po'i 'khor lta bu'o/ /kun gzhi rnam par shes pa la dad pa la sogs pa'i dge ba dang ldan pa'i rnam par shes pa rnams sgyu ma'i rgyal po lta bu la/ de'i 'khor gyi sems las byung ba rnams ni sgyu ma'i rgyal po'i 'khor lta bu ste/ kun gzhi la yod pa'i nyon mongs pa rnams dge ba'i phyogs spangs pa ni sgyu ma'i rgyal po gcig gis gcig pham par byas pa lta bu yin no zhes byang chub sems dpa' gang gis khong du chud pa'i byang chub sems dpa' de ni chos gnyis la nga rgyal med de/ kun nas nyon mongs pa'i phyogs la yang nga rgyal med la/ rnam par byang ba'i phyogs la yang nga rgyal med do/ /ji ltar nga rgyal med ce na/ /bdag gis rnam par byang ba'i phyogs 'di bsgoms pas kun nas nyon mongs pa'i phyogs 'di spangs so zhes mi sems pa'i phyir ro/ /sgyu ma'i rmi lam smig rgyu gzugs brnyan mig yor brag ca bzhin/ /chu yi zla ba'i gzugs 'dra sbrul dang mtshungs par shes par bya/ /drug dang drug dang gnyis dang drug gnyis gsum yang re rer 'dod/ /mkhyen mchog sangs rgyas rnams kyis 'du byed de dag gsungs/ /zhes bya ba la/ 'jig rten pa'i mkhas pa dang nyan thos dang rang sangs rgyas rnams kyi shes pa bas/ de bzhin gshegs pa mkhyen pa 'phags pas na sangs rgyas ni mkhyen mchog ces bya ste/ mkhyen mchog sangs rgyas rnams kyis nang gi skye mched drug dang / phyi'i skye mched drug dang / sems dang sems las byung ba gnyis dang / drug gnyis te/ nang gi skye mched drug dang / phyi'i skye mched drug dang gsum ni bshad pa'i chos dang / ting nge 'dzin la gnas pa'i chos dang / bsams bzhin du srid pa 'dzin pa gsum ste/ 'du byed de dag ni sgyu ma lta bu yin no zhes bya ba nas sprul pa dang mtshungs pa yin no zhes bshad do/ /de yang 'du byed de dag dang dpe re res sbyar te bstan to zhes bya ba'i don to/ /de la mig gi skye mched nas yid kyi skye mched kyi bar du yang nang gi skye mched drug ni sgyu ma lta bu ste/ ci'i phyir zhe na/ sgyu ma'i glang po dang mig la sogs pa la bdag dang sems can dang srog med kyang bdag dang sems can srog lta bur snang ba de bzhin du nang gi skye mched drug la yang bdag dang sems can srog med mod kyi bdag sems can dang srog lta bur snang bas na sgyu ma lta bu'o/ /gzugs nas chos kyi bar du phyi'i skye mched drug ni rmi lam lta bu ste/ ci'i phyir zhe na/ rmi lam na snang ba'i gzugs dang sgra dang bud med dang skyes pa la sogs pa rnam par shes par kun du longs spyod pa'i yul lta bur snang yang yod pa ma yin pa de bzhin du da ltar dngos su gzugs dang sgra la sogs pa rnam par shes pa'i yul du snang yang yod pa ma yin pa'i phyir/ rmi lam lta bu'o/ /sems dang sems las byung ba gnyis ni smig rgyu lta bu ste/ ji lta zhe na/ smig rgyu chur med kyang chu lta bur nor bar byed pa de bzhin du sngon po dang ser po la sogs pa'i dngos po 'di dag yod pa ma yin kyang sngon po ser po lta bur nor bar 'dzin pa'i phyir smig rgyu lta bu'o/ /yang mig gi skye mched nas yid kyi skye mched kyi bar du nang gi skye mched drug ni gzugs brnyan lta bu ste/ ci'i phyir zhe na/ me long gi nang gi gzugs brnyan yod pa ma yin yang gzugs kyi dbang gis me long gi nang du'ang gzugs brnyan snang ba de bzhin du da ltar gyi nang gi skye mched drug po de dag kyang tshe snga ma'i las kyi dbang gis snang bas na gzugs brnyan lta bu'o/ /yang gzugs nas chos kyi bar du phyi'i skye mched drug ni mig yor lta bu ste/ mig yor zhes bya ba ni skabs 'dir grib ma la bya'o/ /ji lta zhe na/ gdugs dang lus la sogs pa'i dbang gis grib ma byung ba de bzhin du phyi'i skye mched kyang nang gi skye mched kyi grib ma yin te/ kun gzhi rnam par shes pas ni mig la sogs pa nang gi skye mched drug 'byung ngo / /de las ni phyi'i skye mched drug snang zhing 'byung bas na phyi'i skye mched drug ni mig yor lta bu'o/ /bshad pa'i chos thams cad ni brag ca lta bu ste/ ci'i phyir zhe na/ brag ca yang sgra'i rang bzhin du med mod kyi rna ba'i spyod yul du 'gyur zhing rna bas mnyan du yod pa dang 'dra bar ji snyed du de bzhin gshegs pas chos thams cad ji ltar bshad pa bzhin du yod pa ma yin yang rna ba'i spyod yul du 'gyur zhing rna bas mnyan du rung ba'i phyir brag ca lta bu'o/ /ting nge 'dzin la gnas pa'i chos rnams ni chu zla'i gzugs brnyan lta bu ste/ ci'i phyir zhe na/ chu dang sa pa'i nang du zla ba'i gzugs brnyan snang ba dang 'dra bar ting nge 'dzin rtse gcig pa ni chu dang sa pa lta bu ste/ de las mtha' dag skye mched dang zil gyis gnon pa'i skye mched rnams snang bas chu'i zla ba lta bu'o/ / bsams bzhin du srid par 'dzin pa ni sprul pa lta bu ste/ ci'i phyir zhe na/ dper na sprul pa gnas gcig nas gcig tu yang chags pa dang zhe sdang mi bskyed pa de bzhin du byang chub sems dpa' sems can gyi don du tshe gcig nas gcig tu len cing 'dzin kyang chags pa dang zhe sdang mi skye bas na sprul pa lta bu'o/ /shes bya'i yongs su tshol ba'i tshigs su bcad pa ste zhes bya ba la/ shes bya'i rnam pa gnyis te/ 'jig rten gyi chos dang 'jig rten las 'das pa'i chos te/ chos gang dag ni 'jig rten gyi chos/ chos gang dag ni 'jig rten las 'das pa'i chos yin pa brtags pa la tshigs su bcad pa gnyis kyis bstan to zhes bya ba'i don to/ /yang dag min rtog zhes bya ba la/ yang dag pa ma yin la kun du rtog pa ni gang chos kyi dbyings dang rnam par mi rtog pa'i ye shes 'thob pa'i rjes su mthun pa ma yin pa'i rtog pa ste/ 'dod pa'i khams nas srid pa'i rtse mo man chad kyi sems can rnams kyi gzung ba dang 'dzin par kun du rtog pa ni yang dag pa ma yin par kun du rtog pa zhes bya'o/ /yang dag min yang yang dag min/ /zhes bya ba la/ yang dag pa yang ma yin yang dag pa ma yin pa yang ma yin pa'i rtog pa ni so so'i skye bo'i dus na dam pa'i chos nyan pa dang sems pa la sogs pa nas brtsams te mos pa spyod pa'i sa 'jig rten gyi chos mchog man chad kyi rtog pa la bya ste/ de'i tshe na gzung ba dang 'dzin pa'i rtog pa yod pas na yang dag pa ma yin pa zhes bya'o/ /chos kyi dbyings dang 'jig rten las 'das pa'i ye shes rtogs par bya ba dang rjes su mthun zhing de'i rgyu lta bur gnas pas na yang dag pa ma yin pa yang ma yin pa zhes bya'o/ /mi rtog ces bya ba la mi rtog pa ni chos kyi dbyings de bzhin nyid dang / 'jig rten las 'das pa'i ye shes rnam par mi rtog pa'i ye shes la bya ste/ ci'i phyir zhe na/ de gnyis la gzung ba dang 'dzin pa la sogs pa'i rtog pa med pas na mi rtog pa zhes bya'o/ /rtog min mi rtog pa ma yin/ /zhes bya ba la/ rtog pa yang ma yin mi rtog pa yang ma yin pa ni rnam par mi rtog pa'i rjes las thob pa'i dag pa'i 'jig rten pa'i ye shes la bya ste/ ye shes de la gzung ba dang 'dzin pa lta bur rtog pa med pas na mi rtog pa zhes bya ste/ ci'i phyir zhe na/ rnam par mi rtog pa'i ye shes kyis ni chos kyi dbyings la rtogs te/ rnam par mi rtog pa'i ye shes la ni dag pa'i 'jig rten pa'i ye shes kyis dmigs pas na gzung 'dzin du rtog pa med do/ /mi rtog pa yang ma yin pa ni chos rnams kyi rang dang spyi'i mtshan nyid ni chos thams cad la sgyu ma dang smig rgyu lta bur rtog pa yod pa'i phyir/ thams cad shes par bya ste brjod/ /ces bya ba la/ bzhi po 'di thams cad ni shes par bya ba'i yul yin zhes brjod de/ shes par bya ba yang de tsam las lhag pa med pa'i phyir ro/ /de yang dag pa ma yin par shes par bya'o/ /kun nas nyon mongs pa dang rnam par byang ba yongs su tshol ba la tshigs su bcad pa gnyis te zhes bya ba la/ nyon mongs pa dang las dang tshe gsum ni kun nas nyon mongs pa ste/ ji ltar na kun nas nyon mongs par 'gyur/ kun nas nyon mongs pa'i mtshan nyid gang yin pa brtag pa ni kun nas nyon mongs pa tshol ba zhes bya'o/ /'phags pa'i lam dang mya ngan las 'das pa na rnam par byang ba ste/ ji ltar na rnam par byang ba'i mtshan nyid gang yin pa brtag pa ni rnam par byang ba yongs su tshol ba zhes bya ste/ de gnyis btsal ba la tshigs su bcad pa gnyis kyis ston to zhes bya ba'i don to/ /rang gi khams las gnyis su snang / /zhes bya ba la/ khams sa bon dang rgyu zhes bya ba ni don gcig ste/ kun gzhi rnam par shes pa gzung ba dang 'dzin pa'i bag chags dang bcas pa ni 'u rang gi khams zhes bya'o/ /gzung 'dzin gyi bag chags las gzung bar yang snang 'dzin par yang snang bas na gnyis su snang ba'o/ /ma rig nyon mongs lhan cig 'jug /ces bya ba la/ gzung ba dang 'dzin par snang bar yang ma zad kyi/ gzung ba dang 'dzin par snang ba'i dus na ma rig pa dang nyon mongs pa lhan cig 'byung zhing snang ngo zhes bya ba'i don to/ /'jug ces bya ba'i don ni de ltar snang ba las 'khor bar skyes zhes bya ba'i tha tshig go/ /de la ma rig pa ni ma rig pa nyid do/ /nyon mongs pa'i sgras ni 'dod chags dang / khong khro ba dang / nga rgyal dang / ma rig pa dang / lta ba dang / the tshom ste/ nyon mongs pa drug la bya ba'am/ 'dod chags dang / khong khro ba dang / nga rgyal dang / ma rig pa dang / 'jig tshogs su lta ba dang / mthar 'dzin par lta ba dang / log par lta ba dang / lta ba bsnyems pa dang / tshul khrims dang brtul zhugs bsnyems pa dang / the tshom ste nyon mongs pa bcu la bya'o/ / 'dir nyon mongs pa smos kyi nye ba'i nyon mongs pa dang dngos sum smos kyang nye ba'i nyon mongs pa khro ba dang / khon du 'dzin pa la sogs pa yang smos pa lta bur bstan to/ /nyon mongs pa drug dang / bcu'i nang du ma rig pa yang 'dus mod kyi ma rig pa bkar te logs shig tu smos pa ni nyon mongs pa thams cad la dbang byed par bstan pa'i phyir te/ rmongs pa med pa la ni nyon mongs pa mi skye rmongs pa las nyon mongs pa 'byung ba'i phyir ro/ /rnam par rtog pa rab tu 'byung / /zhes bya ba la/ gzugs dang sgra la sogs pa lta bur gzung ba dang 'dzin par rtog pa na ma rig pa dang / nyon mongs pa dang / nye ba'i nyon mongs pa dang / lhan cig tu rtog pa 'byung ba la rnam par rtog pa rab tu 'byung ba zhes bya ste/ rang gi khams las gnyis su snang ba zhes bya bas ni shes bya'i sgrib pa la rtog pa bstan to/ /ma rig nyon mongs lhan cig 'jug /ces bya bas ni nyon mongs pa'i sgrib pa la rtog pa bstan to/ /rdzas gnyis dag ni rnam par spangs/ /zhes bya ba la/ de ltar gzung ba dang 'dzin par snang yang rdzas gnyis rnam par spangs pa yin te/ gzung ba'i rang bzhin yang med 'dzin pa'i rang bzhin yang med do zhes bya ba'i don to/ /de ltar shes na kun nas nyon mongs pa'i mtshan nyid yongs su btsal ba yin no/ /dmigs pa'i khyad par thob pa yi/ /zhes bya ba la/ gang gong du chos kyi dmigs pa thob pa bshad pa nyid dmigs pa'i khyad par thob pa zhes bya ste/ de yang so so'i skye bo'i dus nas nyan pa dang sems pa byed pa nas brtsams te/ mos pa spyod pa'i sa chos mchog man chad nas chos thams cad ni sems las gyur pa yin no zhes shes pa ni dmigs pa'i khyad par thob pa zhes bya ste/ dmigs pa'i khyad par thob pa'i gang zag gis zhes bya ba'i tha tshig go/ /rang gi khams nas zhes bya ba ni sa dang po thob pa'i las bstan te rnam par rtog pa'i ye shes kyi rang gi khams dang rgyu'i chos kyi dbyings de bzhin nyid de/ chos kyi dbyings ni sangs rgyas kyi chos thams cad skye ba'i rgyu byed pa'i phyir khams zhes bya'o/ /de bas na dbus dang mtha' rnam par 'byed pa dang mngon pa'i chos bsdu ba las kyang / nyan thos dang rang sangs rgyas dang / sangs rgyas kyi chos kyi rgyu thams cad 'byung ba'i rgyu byed pas na khams zhes bya'o zhes bshad do/ /gnas pa ni ming gi phung po bzhi la gnas pa ste/ gzung ba dang 'dzin pa gnyis spangs nas/ chos kyi dbyings kyi rang bzhin du gnyis su med par gnas pa ni ming la gnas pa zhes bya'o/ /don du rnam par mi rtog pa'i ye shes rnyed nas ming la gnas par gzhag go/ /rnal 'byor phyir zhes pa la rnal 'byor ni goms par byed pa la bya ste/ sa dang por rnam par mi rtog pa'i ye shes rnyed nas sa gnyis nas sa bcu man chad bsgom pa'i lam na rnam par mi rtog pa'i ye shes de nyid la bsgom pa'am zhi gnas dang lhag mthong zung du 'brel pa la bsgom pa ni rnal 'byor pa zhes bya'o/ /de nyid gnyis med snang 'jug pa/ /zhes bya ba la/ de nas sangs rgyas kyi sa'i dus na gnas gzhan du gyur nas rnam par mi rtog pa'i sems de nyid rnam par mi rtog pa dang bral te rnam par mi rtog par gyur nas gnyis su med pa mngon sum du byas pa ni gnyis med snang 'jug pa zhes bya'o/ /des na sems rnam par grol ba dang shes rab rnam par grol ba 'thob ste/ de phan chad nams kyang gnyis su snang ba la mi 'jug go/ /dper na ci dang 'dra zhe na/ dpe bstan pa'i phyir/ mda' dang pags pa bzhin du'o/ /zhes bya ba smos te/ dper na mda' mes bsregs na drod la bab par byas te/ drang por bsrang ba de nams kyang phyis yon por 'gyur ba dang / pags pa khengs pa/ chu dang mar la sogs pas bskus nas rtsis zhen par byas te/ 'jam por byas na phyis khengs shing rtsub por mi 'gyur ba de bzhin du zhi gnas ni chu dang snum lta bu/ sngon 'dod chags dang zhe sdang la sogs pa la tshul bzhin ma yin par rtogs pas sems rtsub por byas pa bsgom pa'i lam na zhi gnas chu dang snum lta bur bsgom pas sems gnyen por byas te/ sangs rgyas kyi sar sems rnam par grol ba thob na slar tshul bzhin ma yin pa yid la byed pa'i rtog pa la zhugs na sems khengs pa dang rtsub po rnams su nams kyang mi 'gyur ro/ /sngon las dang po'i tshe na yod pa dang med pa dang rtag pa dang mi rtag pa la sogs pa lta ba ngan pas lta ba yon por byas pa bsgom pa'i lam gyi dus na lhag mthong bsgom pa'i mes lta ba ngan pa bsal te/ lta ba drang por byas nas sangs rgyas kyi sar shes rab rnam par grol ba thob pa na de phan chad nams kyang lta ba ngan pa la 'jug par mi 'gyur ro zhes bya ba'i don to/ /rnam par byang ba'i mtshan nyid de ltar btsal lo zhes bya ba'i don to/ /rnam par rig pa tsam yongs su btsal ba la tshigs su bcad pa gnyis te zhes bya ba la/ rnam par rig pa tsam gyi sgras ni sems las byung ba rnams kyang gzung ste/ tsam gyi sgras ni sems las byung ba tsam du zad kyi/ phyi'i gzugs la sogs pa'i gzugs yod pa ma yin par 'gog go/ /sems tsam du smra ba kha cig ni rnam par rig pa tsam zhes bya bas sems tsam du zad kyi/ sems las ma gtogs par sems las byung ba'i chos dang phyi'i yul rnams med kyang med par 'dod do/ /'di'i skabs su de gnyi ga la bya bar 'dod do/ /khams gsum thams cad ni sems dang sems las byung ba tsam du zad kyi phyi'i chos med do zhes brtag cing shes par bya ba la tshigs su bcad pa gnyis kyis bstan to zhes bya ba'i don to/ /sems ni gnyis su rab tu snang / /zhes bya ba la/ sems kyi sgras ni kun gzhi la sogs pa rnam par shes pa dang sems las byung ba rnams la bya ste/ sems dang sems las byung ba las gzung ba dang 'dzin pa gnyis su snang bar zad kyi sems las logs shig na med do zhes bya ba'i don to/ /yang na sems nyid gzung 'dzin du snang bar zad kyi/ de las ma gtogs par sems las byung ba dang / gzung 'dzin med do zhes bya ba'i don to/ /de bzhin chags la sogs pa snang bar 'dod/ /ces bya ba la/ ji ltar gzung ba dang 'dzin pa sems las snang ba de bzhin du 'dod chags la sogs pa nyon mongs pa'i chos kyang sems nyid la snang bar 'dod do zhes bya ba'i don to/ /dad pa la sogs par snang yang / /zhes bya ba la/ dad pa la sogs pa dge ba'i chos rnams kyang sems nyid la snang bar 'dod do zhes bya ba'i don to/ /nyon mongs dge chos yod ma yin/ /zhes bya ba la/ sems nyid las 'dod chags la sogs pa'i nyon mongs pa dang / dad pa la sogs pa dge ba'i chos kyang sems la snang bar zad kyi sems ma gtogs pa logs shig na dmigs pa'i yul lta bur yod pa ma yin no zhes bya ba'i don to/ /sems las byung ba rnams dang ldan pa'i mtshan nyid du ni sems las byung ba rnams med pa ma yin par 'dod do/ /rnam par rig pa tsam du smra ba gnyis pa ltar na ni sems nyid las nyon mongs pa dang / dge ba la sogs pa sems las byung ba lta bur snang gi sems las ma gtogs par sems las byung ba yod par mi 'dod do zhes bya ba'i don to/ /sems nyid sna tshogs snang ba ste/ /zhes bya ba la kun gzhi nyid rnam pa sna tshogs su snang ste/ 'dod chags su snang ba dang / gti mug tu snang ba dang / zhe sdang du snang ba dang / mi dge ba dang / lung du ma bstan pa'i chos su snang ngo zhes bya ba'i don to/ / sna tshogs pa yi rnam par 'jug /ces bya ba la/ sems nyid dus gcig tu dad pa dang / brtson 'grus dang / shes rab dang ting nge 'dzin la sogs ting nge 'dzin lta bur snang ngo zhes bya ba'i don to/ /snang ba dngos dang zhes bya ba la/ sems las 'dod chags la sogs par snang ba dang / dad pa la sogs par snang ba yang snang ba tsam du yod pas na snang ba tsam gyi dngos por ni yod pa zhes bya'o/ /dngos po med pa zhes bya ba la/ snang ba tsam du yod kyang 'dod chags dang dad pa la sogs pa'i rang bzhin yod pa ma yin pas na dngos po med pa zhes bya'o/ /de'i phyir/ de la chos kyi min zhes bya ba la/ de ltar 'dod chags la sogs pa dang / dad pa la sogs pa snang ba tsam du yod kyi dngos po med pas na gzhan dbang de la chos de dag gi rang bzhin yod pa ma yin pa'am/ snang ba tsam de la snang yang chos kyi rang bzhin yod pa ma yin no zhes bya ba'i tha tshig go/ /mtshan nyid yongs su tshol ba la tshigs su bcad pa brgyad de zhes bya ba la/ 'dus byas dang 'dus ma byas kyi chos rnams kyi mtshan nyid dang / zag pa dang bcas pa dang / zag pa med pa'i chos rnams kyi mtshan nyid gang yin pa de brtag pa'i phyir tshigs su bcad pa brgyad kyis ston te/ /chos de dag gi mtshan nyid kyang mdor na mtshon bya dang mtshan nyid dang mtshon byed dang gsum mo/ /gcig gis ni mdor bstan to/ /lhag mas ni bshad do zhes bya ba la/ tshigs bcad brgyad las tshigs bcad dang pos ni chos rnams kyi mtshan nyid mdor bstan to/ /tshigs bcad lhag ma bdun gyis ni mdor bstan pa'i don de nyid rgyas par zhib du 'chad do zhes bya ba'i don to/ /mtshon bya dang ni mtshan nyid dang / /mtshon byed rab tu dbye bas ni/ /sems can rnams la phan gdags phyir/ /sangs rgyas rnams kyis rab tu bshad/ /ces bya ba la/ mtshon cha rnam pa lnga ste/ gzugs dang / sems dang sems las byung ba dang /sems dang mi ldan pa'i 'du byed dang / 'dus ma byas te 'di ni mtshan nyid gsum gyi gzhi yin no/ /mtshan nyid rnam pa gsum ste/ kun brtags pa dang / gzhan dbang dang / yongs su grub pa'i mtshan nyid do/ /mtshan nyid rnam pa lnga ste/ gzhi dang / 'jog pa dang / snang ba dang / me long dang / gnas so/ /de gsum phye ste bstan na ni mtha' yas te mdo tsam du na rnam pa gsum du gzhag go/ /de la mtshon bya dang / mtshan nyid gnyis ni shes par bya ba'i yul lta bu'o/ /mtshon byed ni shes par bya ba'i ye shes te/ de bas na 'og nas kyang mtshon bya dang mtshan nyid gnyis mtshon par byed cing shes par byed pas na mtshon byed ces bya'o zhes bshad do/ /mtshon bya dang mtshan nyid dang mtshon byed gsum ni ci'i phyir bshad ce na/ de gsum yang sems can la phan gdags par bya ba'i phyir/ sangs rgyas kyis bshad de zhes bya ba'i tha tshig go/ /mtshon bya bstan pa'i phyir/ sems gang lta bar bcas pa dang / /zhes bya ba la sogs pa smos te/ sems kyi sgras ni rnam par shes pa dang / gzugs bstan pa yin no/ /ci'i phyir zhe na/ sems 'di rnam pa gnyis su snang ste/ gzung bar snang ba dang / 'dzin par snang ba'o/ /de la dbang po lnga dang yul lnga lta bur snang ba ni gzung bar snang ba ste/ des ni gzugs bstan to/ /'dzin par snang ba ni mig gi rnam par shes pa nas yid kyi rnam par shes pa'i bar du rnam par shes pa drug tu snang ste/ des ni sems bstan to/ /lta bar bcas zhes bya ba'i lta ba'i sgras ni sems las byung ba rnams la bya ste/ sems las byung ba rnams la ci'i phyir lta ba zhes bya ba zhe na/ sems las byung ba thams cad ni gsal zhing rgod pa'i rang bzhin yin pas lta ba zhes bya ste/ 'dis ni sems las byung ba'i chos bstan to/ /de'i gnas dang zhes bya ba la/ de'i gnas zhes bya ba la sems dang mi ldan pa'i 'du byed bstan te/ sems dang mi ldan pa'i 'du byed rnams kyang sems dang gzugs dang sems las byung ba'i gnas skabs las byung bas na de'i gnas zhes bya'o/ /ji lta zhe na/ nam gzugs dang sems las byung ba gsum 'dus nas bsgribs te/ sems dang sems las byung ba'i 'gog pa'i gzugs las 'gog pa'i snyoms par 'jug pa zhes bya ba dang / phung po lnga skyes pa la skye ba zhes bya ba dang / gzugs kyi phung po skra dkar la sogs pa'i mtshan nyid du gzhan du gyur pa la rga ba zhes bya ste/ de ltar na de gsum gyi gnas la 'du byed sems dang mi ldan par gdags par zad do/ /mi 'gyur ba zhes bya ba la/ mi 'gyur ba ni 'dus ma byas nam mkha' dang so sor brtags pa'i 'gog pa dang / ma brtags par 'gog pa dang / de bzhin nyid la bya ste/ 'dus ma byas la ci'i phyir mi 'gyur zhes bya zhe na/ rnam par rig pa 'di las nam mkha' la sogs pa'i 'dus ma byas su snang la/ sems la snang ba'i nam mkha' la sogs pa mi skye ba dang 'jig pa'i mtshan nyid du 'gyur ba med pas na 'dus ma byas la 'gyur ba med pa zhes bya'o/ /de ni mdor na mtshon bya yin/ / rab tu dbye ba tshad med do/ /zhes bya ba la/ mdo tsam du na gzugs dang sems dang sems las byung ba'i chos dang / sems dang mi ldan pa'i 'du byed dang / 'dus ma byas lnga ni mtshon bya zhes bya ste/ lnga po de'i mtshan nyid re re nas phye nas ni dpag tu med pas tshad med pa zhes bya ste/ lnga po de ni mtshan nyid rnam pa gsum gnas dang / rten yin pas na mtshon bya zhes bya'o/ /mtshan nyid bstan pa'i phyir/ smra don ji bzhin 'du shes kyi mtshan ma zhes bya ba la sogs pa smos so/ /de la mtshan nyid rnam pa gsum ste/ kun brtags kyi mtshan nyid dang / gzhan dbang gi mtshan nyid dang / yongs su grub pa'i mtshan nyid do/ /kun brtags kyi mtshan nyid kyang rnam pa gsum mo/ /de bum pa dang snam bu zhes brjod pa ni smra ba'o/ /bum pa dang snam bu ni don to/ /ji bzhin gyi 'du shes ni sems las byung ba'i chos te/ 'di ni bum pa nyid yin gyi 'di ni snam bu ma yin pa dang / 'di ni sngon po nyid yin gyi ser po ma yin zhes rtog pa'o/ /mtshan ma'i 'du shes pa'i yul du gyur pa bum pa dang snam bu dang ser po dang sngon po la sogs pa ste/ yul gang la brten nas 'du shes 'jug pa'o/ /don du na tha snyad la mkhas pa rnams snam bu dang bum pa dang / snam bu la sogs pa la 'di ni bum pa 'di ni snam bu zhes rtog pa dang / rtog pa de'i yul bum pa dang snam bu la sogs pa la kun brtags kyi mtshan nyid ces bya ste/ 'di ni kun brtags kyi mtshan nyid rnam pa gcig go/ /de'i bag chags zhes bya ba la/ smra don ji bzhin gyi 'du shes kyi mtshan ma la de zhes rtog ste/ de'i bag chags kun gzhi la rlan pa yang nam zhig na smra don ji bzhin gyi 'du shes 'byung ba'i rgyu byed pas na bag chags la yang kun brtags kyi mtshan nyid ces bya ste/ 'di ni kun brtags kyi mtshan nyid rnam pa gnyis so/ /de las kyang ni don snang ba/ /kun du brtags pa'i mtshan nyid do/ /zhes bya ba la/ bag chags las nam tha snyad la mi mkhas pa byis pa rnams la ske dang sdeng sdeng po lto zlum po 'di la ming du bum pa zhes bya'o zhes smra ba ji bzhin pa'i don gyi 'du shes med par yang sems las bum pa lta bur snang la/ bum pa nyid yin par ni mi shes kyi bum pa mthong na ni 'di ci zhig yin no snyam par rtog pa 'byung na yang kun brtags kyi mtshan nyid do/ /'di ni kun brtags kyi mtshan nyid rnam pa gsum pa'o/ /de tshigs bcad de'i don mdor bsdus na/ gang kun du rtog pa dang / rgyu gang las kun du rtog pa gnyis ka kun brtags kyi mtshan nyid yin par ston to/ /gang kun du rtog ce na tha snyad la mkhas pas 'di bum pa yin no zhes rtog pa dang / tha snyad la mi mkhas pas bum pa mthong ba na 'di ci zhig yin zhes rtog pa'o/ /rgyu gang las kun du rtog pa de ni de'i bag chags las kun du rtog pa'o/ / smra ba ji bzhin pa'i don gyi 'du shes pa'i mtshan ma dang zhes bya ba la/ smra ba ni bum pa dang snam bu zhes brjod pa'o/ /ji bzhin pa'i don gyi 'du shes ni bum pa zhes bya ba'i ming gi don ni lto zlum po ske sdeng sdeng po yin no zhes ming dang don du 'brel par shes shing rtog ste/ de'i mtshan ma ni 'du shes de'i yul bum pa dang snam bu la sogs pa ste/ 'di ni kun brtags kyi mtshan nyid rnam pa gcig go/ /smra ba de yi bag chags dang / /zhes bya ba la/ smra ba'i sa bon kun gzhi la bsags te yod pa de yang nam zhig na rnam par rtog pa'i rgyu yin pas na kun brtags zhes bya ste/ 'di ni kun brtags kyi mtshan nyid rnam pa gnyis so/ /bag chags de las don gang zhes bya ba la/ smra ba'i bag chags kun gzhi la bsags pa de las tha snyad mi mkhas pa rnams la bum pa dang snam bu lta bur snang ba yang kun brtags zhes bya'o zhes bya ba'i don to/ /gang tha snyad la mi mkhas pa rnams las zhes bya ba las/ bum pa'i sgra ni lto dang zlum po la bya'o zhes bum pa'i ming dang don du 'brel pa ni mi shes pa'i byis pa shed ma bye ba rnams ni tha snyad la mi mkhas pa'o zhes bya'o/ /smra ba ji bzhin pa'i don gyi 'du shes med par yang snang bar 'gyur ro zhes bya ba la/ tha snyad la mi mkhas pa rnams la bum pa mthong ba na 'di ni bum pa nyid yin gyi gzhan ma yin no zhes brjod pa med par yang bum pa mthong ba na'ang ci zhig yin no snyam du rtog pas yang kun brtags kyi mtshan nyid do zhes bya ba'i don to/ /de la ji ltar brjod pa'i don gyi 'du shes ni sems las byung ba ste zhes bya ba la/ smra ba ji bzhin pa'i don gyi 'du shes zhes bya ba'i don 'chad de bum pa dang snam bu la sogs par brjod pa'i bum pa dang snam bu'i dngos po mthong nas 'di ni bum pa yin gyi snam bu ma yin no zhes rtog pa ni sems las byung ba'i chos yin te/ de ltar rtog pa ni sems las byung ba'i chos smra ba ji bzhin pa'i don gyi 'du shes zhes bya'o/ /de'i dmigs pa gang yin pa ni de'i mtshan ma'o zhes bya ba la/ sems las byung ba de dag gi yul bum pa dang / snam bu dang / ser po dang / sngon po la sogs pa la de'i mtshan ma zhes bya'o zhes bya ba'i don to/ /de ltar rgyu bag chags las gang yongs su brtags pa de gnyi ga kun du brtags pa'i mtshan nyid du dgongs so zhes bya ba la/ rgyu bag chags la yang kun brtags zhes bya ste/ kun brtags kyi chos snang ba'i rgyu byed pa'i phyir/ gang tha snyad la mkhas pa rnams kyis bum pa'o zhes btags pa dang / tha snyad la mi mkhas pa rnams kyis bum pa mthong ba 'di ni ci zhig yin snyam du rtog pa yang kun brtags zhes bya ste/ gzung 'dzin du rtog pa yod pa'i phyir te/ de ltar na rgyu bag chags dang / yongs su brtags pa dang gnyi ga la kun brtags zhes bya'o/ /kun brtags kyi rnam grangs gzhan yang bstan pa ni/ ming bzhin du ni don rnams dang / /zhes bya ba la sogs pa smos te/ bum pa dang snam bu la sogs pa'i ming ji ltar brjod pa bzhin du bum pa dang snam bu la sogs pa'i don kyang de bzhin du yod do zhes rtog pa ni kun brtags kyi mtshan nyid do zhes bya ba'i don to/ /don bzhin ming ni rab tu snang / / zhes bya ba la/ bum pa dang snam bu la sogs pa'i don ji ltar gzhag pa bzhin du bum pa dang snam bu'i ming yang yod do zhes rtog pa ni/ don bzhin ming ni rab tu snang / /zhes bya ste/ 'di yang kun brtags kyi mtshan nyid do zhes bya ba'i don to/ /yang dag ma yin rtog pa'i rgyu/ /kun du brtags pa'i mtshan nyid do/ /zhes bya ba la/ nam ming gi sgo nas don yod par rtog pa na ni ming yang dag pa ma yin pa'i kun du rtog pa'i rgyu yin no/ /nam don gyi sgo nas ming yod par rtog na ni don yang dag pa ma yin par kun du rtog pa'i rgyu yin te/ de ltar ming yod par rtog pa dang / don yod par rtog pa ni kun brtags pa'i mtshan nyid yin no zhes bya ba'i don to/ /ming dang don ji lta ba bzhin du rtogs pa ni ming dang don ji lta ba bzhin pa'o zhes bya ba la ming don ji lta ba bzhin pa'i don ston to/ /ming ji bzhin par don yang de ltar yod par 'dzin pa ni ming ji bzhin pa dang / don ji 'dra bar ming yang de ltar yod par 'dzin pa ni don ci bzhin zhes bya'o/ /don dang ming du rab tu snang ba ni ming don ji bzhin par snang ba yin te zhes bya ba la/ bum pa la sogs pa'i don ji ltar yod pa bzhin du ming yang de ltar yod par rtog pa dang / ming ji ltar yod pa bzhin du don yang de ltar yod do zhes rtog pa ni ming dang don bzhin du snang ba zhes bya'o/ /kun du brtags pa'i mtshan nyid ni 'di tsam zhig yongs su rtogs pa ste/ de ni don to zhes bya ba la/ kun brtags kyi chos kyang mdor na 'di tsam zhig tu zad de/ yang na ni ming yod par rtog ming ni don yod par rtog pa ste/ so so'i skye bo rnams rtog na yang dag pa gnyis la rtog pa tsam du zad kyi de las gzhan du brtag tu med pas na ming dang don gnyis la kun brtags kyi mtshan nyid ces bya'o zhes bya ba'i don to/ /gzhan gyi dbang gi mtshan nyid bstan pa'i phyir/ rnam gsum rnam gsum snang ba ni/ /gzung dang 'dzin pa'i mtshan nyid de/ /yang dag ma yin kun rtog ni/ /gzhan gyi dbang gi mtshan nyid do/ /zhes bya ba smos te/ rnam pa gsum du snang ba dang / yang rnam pa gsum du snang ba ni rnam gsum rnam gsum snang ba zhes bya'o/ /de la rnam gsum du snang ba ni gnas su snang ba dang / don du snang ba dang / lus su snang ba'o/ /gnas su snang ba ni kun gzhi rnam par shes pa snod lta bur snang ba ste/ sa gzhi chen por snang ba'o/ /don du snang ba ni gzugs nas chos kyi bar du yul drug tu snang ba'o/ /lus su snang ba ni mig gi dbang po nas yid kyi dbang po'i bar du dbang po drug tu snang ba ste/ de bas na lang kar gshegs pa las kyang / lus dang longs spyod gnas 'dra ba/ /sems tsam du ni ngas bshad do/ /zhes gsungs so/ /yang rnam pa gsum du snang ba ni yid du snang ba dang / 'dzin par snang ba dang / rnam par rtog par snang ba'o/ /de la yid ni nyon mongs pa'i yid la bya ste/ gang nyon mongs pa'i gzhi dang rtag tu ldan pas kun gzhi la bdag tu dmigs par byed pa'o/ /'dzin pa ni mig gi rnam par shes pa nas lus kyi rnam par shes pa'i bar du rnam par shes pa lnga'i tshogs la bya ste/ so so'i yul 'dzin cing dmigs par byed pa'i phyir 'dzin pa zhes bya'o/ /rtog pa ni yid kyi rnam par shes pa la bya ste/ 'di ni sngon po yin gyi ser po ma yin no zhes gcod par byed pa'i phyir ro/ /de la gnas dang don dang lus snang ba ni gzung ba'i mtshan nyid do/ /yid dang 'dzin pa dang rtog par snang ba ni 'dzin pa'i mtshan nyid de de ltar gzung ba dang 'dzin par yang dag pa ma yin pa kun du rtog pa ni kun gzhi rnam par shes pa la 'khor ba dang bcas pa la gzhan gyi dbang gi mtshan nyid ces bya'o/ /yongs su grub pa'i mtshan nyid bstan pa'i phyir/ dngos po med dang dngos po yod/ /ces bya ba la sogs pa smos te/ chos kyi dbyings stong pa nyid de bzhin nyid kyi mtshan nyid la yongs su grub pa zhes bya ste/ yongs su grub pa de la gzung ba dang 'dzin pa'i dngos po yod pa ma yin pas dngos po med pa zhes bya'o/ /gzung 'dzin dang bral ba'i stong pa nyid med pa ma yin pas de dngos po yod pa zhes bya ste/ de bas na dbus dang mtha' rnam par 'byed pa las kyang / gnyis po de na yod pa ma yin/ stong pa nyid ni de na yod/ /ces bshad do/ /dngos dang dngos med mnyam pa nyid/ /ces bya ba la/ stong pa nyid kyi dngos po yod pa la gzung 'dzin gyi dngos po med pa yang de na gnas la/ gzung 'dzin gyi dngos po med pa la stong pa nyid yod pa de na gnas pas dngos po dang / dngos po med pa mnyam pa zhes bya ste/ dbus dang mtha' las kyang / stong pa nyid ni de na yod/ /de na yang ni de yod do/ /zhes bshad do/ /mdo sde rgyan 'di nyid kyi sangs rgyas kyi thabs la 'jug pa'i skabs las kyang / gang gzung ba dang 'dzin pa gnyis med pa de nyid yod pa'i mchog ste/ yongs su grub pa'i mtshan nyid du yod pa'i phyir ro zhes bshad do/ /ma zhi ba dang zhi ba dang / /zhes bya ba la/ stong pa nyid glo bur gyi dri ma dang 'dres pas na ma zhi ba'o/ /rang bzhin gyis 'od gsal zhing dag pa'i rang bzhin yin pas na zhi ba'o/ / rnam par mi rtog yongs grub mtshan/ /zhes bya ba la/ yongs su grub pa de gzung 'dzin gyi spros pa kun dang bral ba yin pas rtog ge pa rnams kyi yul du ma gyur pa'i phyir/ rnam par mi rtog pa zhes bya ste/ yongs su grub pa'i mtshan nyid ni gong du bshad pa lta bu yin no zhes bya ba'i don to/ / mdor na yongs su grub pa'i mtshan nyid rnam pa gsum du bshad de/ rang gi mtshan nyid dang / kun nas nyon mongs pa dang / rnam par byang ba'i mtshan nyid dang / rnam par mi rtog pa'i mtshan nyid do/ /de la/ dngos po med dang dngos po yod/ /dngos dang dngos med mnyam pa nyid/ /ces bya bas rang gi mtshan nyid bstan to/ /ma zhi ba dang zhi ba dang / /zhes bya bas/ kun nas nyon mongs pa dang / rnam par byang ba'i mtshan nyid bstan te/ ma zhi bas ni kun nas nyon mongs pa'i mtshan nyid bshad zhi bas ni rnam par byang ba'i mtshan nyid bshad do/ /rnam par mi rtog ces bya bas rnam par mi rtog pa'i mtshan nyid bstan to/ /da ni mtshon byed bshad par bya ste/ de yang gzhi dang gzhag pa dang me long dang snang ba dang gnas so/ /de la/ rgyu mthun chos la dmigs na ni/ /zhes bya ba la/ gzhi ni rgyu mthun pa'i chos la dmigs pa ste/ de la sangs rgyas rnams kyis gang zag dang chos la bdag med par thugs su chud nas bshad pa'i chos gsung rab yan lag bcu gnyis ni rgyu mthun pa'i chos zhes bya'o/ /so so'i skye bo'i dus na gsung rab yan lag bcu gnyis la nyan pa dang sems pa dang sgom par byed pa ni rgyu mthun pa'i chos la dmigs pa'o/ /tshul bzhin yid la byed pa'o zhes bya ba la gzhag pa ni mos pa spyod pa'i sa gzhi dang rigs rnam pa gsum pa dang rnam pa bzhis drod kyi tshe na ni ming rnam pa rgyu ma yin par khong du chud/ rtse mo'i tshe na ni don rnams sgyu ma yin par khong du chud bzod pa'i dus na ni gzung ba spangs 'jig rten gyi chos mchog gi dus na ni 'dzin pa spangs pa'i tshul bzhin yid la byed pa la gzhag pa zhes bya ste/ des 'jig rten las 'das pa'i chos rtogs pa'i bag chags sems la 'jog par byed pa'i phyir ro/ /sems kyi khams la gnas pa dang / /zhes bya ba la me long ni sems kyi khams la gnas pa ste/ sa dang po'i dus na khams gsum sems tsam du rtog pa la gnas pa nyid sems kyi khams la gnas pa zhes bya'o/ /de yang gong du ming la gnas par bshad pa nyid la sems kyi khams la gnas pa zhes bya ste/ sems kyi khams ni stong pa nyid do/ /gzung 'dzin spangs pa'i ming ni phung po bzhi gnyis su med pa'i mtshan nyid la gnas pa ni sems kyi khams la gnas pa zhes bya'o/ /de la ci'i phyir me long zhes bya zhe na/ me long gi nang du gzugs brnyan 'byung ba dang 'dra bar ye shes des shes bya thams cad phyin ci ma log par khong du chud pas me long zhes bya'o/ /yod med don du mthong ba'o/ /zhes bya ba la/ /snang ba ni sa gnyis nas sa bcu man chad kyi 'jig rten las 'das pa'i ye shes la bya ste/ ye shes gang gis yod pa'i chos la yang yod par mthong / med pa'i chos la med par mthong ba la snang ba zhes bya'o/ /de la gzhan dbang dang yongs su grub pa ni yod par mthong / kun brtags ni med par mthong ngo / /gnas ni sangs rgyas kyi sar gnas pa gzhan du gyur par 'thob ste/ gnas gyur pa'i mtshan nyid kyang gong du gnas gzhan du gyur pa bshad pa'i skabs su yul dang / dbang po la sogs pa gnas gyur na yon tan 'di lta bu dag 'thob par 'gyur ro zhes bshad pa lta bur blta'o/ /de la gzhi dang gzhag pa dang / /me long dang snang ba ni rgyu'i mtshan nyid do/ /gnas ni 'bras bu'i mtshan nyid do/ /mdor na tshig de dag gis lam rnam pa lnga bstan pa yin te/ tshogs kyi lam dang / sbyor ba'i lam dang / mthong ba'i lam dang / bsgom pa'i lam dang / mthar thug pa'i lam mo/ /de la rgyu mthun pa'i chos la dmigs pas ni tshogs kyi lam bstan to/ /tshul bzhin yid la byed pas ni sbyor ba'i lam bstan to/ /sems kyi khams la gnas pas ni mthong ba'i lam bstan to/ /yod med don du mthong bas ni bsgom pa'i lam bstan to/ /gnas kyis mthar thug pa'i lam bstan to/ /mtshan nyid rnam pa lnga'i rnal 'byor gyi sa ste zhes bya ba la/ zhi gnas dang lhag mthong zung du 'brel par bsgom pa ni rnal 'byor ces bya ste/ chos rnam pa lnga rnal 'byor bsgom pa'i rten dang gzhir gyur pas na rnal 'byor gyis zhes bya'o/ /de'i thugs su chud pa'i rgyu 'dra ba'o zhes bya ba la/ sangs rgyas kyis gang zag dang chos la bdag med par thugs su chud pa ni rgyu'o/ /gsung rab yan lag bcu gnyis ni 'bras bu ste/ thugs su chud pa dang gsung rab yan lag bcu gnyis bshad pa dang gnyis su don mi mthun pa med pas na bshad pa'i chos thams cad la rgyu mthun pa'i chos zhes bya'o/ /sangs rgyas kyi sar gnas gzhan du gyur pa bshad pa'i don spyod pa'i phyir/ de bas mnyam pa nyid du gyur/ /'phags rigs shin tu dri med pa/ /mtshungs dang khyad par 'bri dub med/ /lhag pa ma yin mtshan nyid 'dod/ /ces smos te/ zag pa med pa'i chos kyi dbyings rnam par dag pa la 'phags pa'i rigs zhes bya ste/ zag pa med pa'i dbyings su zhugs pa na sangs rgyas thams cad dang sku dang gsung dang thugs mnyam pa nyid thob pas na mnyam pa nyid du gyur pa zhes bya'o/ / de'i tshe nyon mongs pa dang shes bya'i sgrib pa spangs pas na dri ma med pa zhes bya'o/ /nyan thos dang rang sangs rgyas dang rang sangs rgyas rnams kyi rnam par grol ba'i sku la mi 'dra ba tha dad pa med pas na mtshungs pa zhes bya'o/ /khyad par rnam pa lngas nyan thos dag pas 'phags pas na khyad par du gyur pa zhes bya'o/ /khyad par rnam pa lnga ni rnam par dag pa'i khyad par dang / yongs su dag pa'i khyad par dang / chos kyi sku'i khyad par dang / longs spyod kyi khyad par dang / las kyi khyad par ro/ /kun nas nyon mongs pa spangs pa na chos kyi dbyings la 'grib pa med pas na 'bri ba med pa zhes bya'o/ /rnam par byang ba'i phyogs skye ba na chos kyi dbyings la skye ba med pas na lhag pa ma yin pa zhes bya ste/ zag pa med pa'i dbyings ni de lta bu'i mtshan nyid yin par 'dod do zhes bya ba'i don to/ /yang na mnyam pa nyid du gyur pa na dmigs par bya ba dang / dmigs par byed pa gnyis mnyam pa nyid du gyur te/ gzung 'dzin gyi chos thams cad stong par rtogs pa'i phyir ro/ /bag chags dang bcas pa'i nyon mongs pa rnam par sbyangs pas/ rnam par dag pa'i khyad par dang zhes bya ba la/ rnam par dag pa nyan thos pas khyad zhugs te/ 'phags pa nyan thos rnams ni bag chags phra mo yang ma spangs pas gang gi phyir dgra bcom pa thob kyang spre'u mchongs byed dang / sngon smad 'tshong ma byed pa las phyis dgra bcom pa thob pa'i dus na yang lhung bzed kyis ngos la lta bu ste/ de bzhin gshegs pas ni nyon mongs pa'i bag chags phra mo'i yang phra mo spangs pas na rnam par dag pa khyad zhugs pa'o/ /sangs rgyas kyi zhing yongs su sbyangs pas yongs su dag pa'i khyad par rnams dang zhes bya ba la/ nyan thos rnams kyis ni sangs rgyas kyi zhing ma sbyangs pa'i phyir sa gzhi shel dang be+e DUr+ya la sogs pa lta bur ston mi nus kyi/ de bzhin gshegs pa rnams kyis ni sangs rgyas kyi zhing sbyangs pas shel dang baiDUr+ya la sogs pa lta bur ston nus pa'i phyir yongs su dag pa khyad zhugs so/ /chos kyi sku yi khyad par dang / /zhes bya ba la/ nyan thos rnams kyis chos la bdag med pa ma rtogs pas rnam par grol ba'i sku tsam yod par zad kyi chos kyi sku med do/ /de bzhin gshegs pa rnams kyis ni chos la bdag med par rtogs pas na chos kyi sku mnga' ste/ de bas na chos kyi sku rnyed par khyad par zhugs so/ /'khor gyi dkyil 'khor du rgyun mi 'chad par chos kyi longs spyod la 'jug par byed pas longs spyod kyi khyad par dang zhes bya ba la/ nyan thos rnams kyis ni rdzogs longs spyod pa'i skus byang chub sems dpa' rnams kyi 'khor gyi dkyil 'khor du theg pa chen po'i chos kyi longs spyod rgyun mi 'chad par byed par mi nus kyi/ de bzhin gshegs pas ni byang chub sems dpa'i 'khor gyi dkyil 'khor du theg pa chen po'i chos kyi longs spyod rgyun mi 'chad par byed pas na longs spyod kyis khyad zhugs so/ /dga' ldan gyi gnas na gnas pa la sogs pa sems can gyi don bya ba sgrub pas na las kyi khyad par rnams so zhes bya ba la 'phags pa nyan thos dag gis sprul pa'i skus dga' ldan gyi pho brang na gnas pa dang / shi 'pho bstan pa dang / mngon par sangs rgyas pa la sogs pa bstan cing sems can gyi don sgrub mi nus kyi de bzhin gshegs pa rnams kyis dga' ldan na bzhugs pa dang / lhums su gshegs pa dang mngon par sangs rgyas pa la sogs pa sprul pa sna tshogs bstan pas las kyi khyad par gyis khyad zhugs so/ /des ni mtshon bya dang mtshan nyid rtogs par 'gyur ro zhes bya ba la/ rnal 'byor pa'i chos lnga po de dag la mtshon byed ces bya ste/ ci'i phyir mtshon byed ces bya zhe na/ shes rab kyi mtshan nyid lnga po des mtshon bya rnam pa lnga dang / mtshan nyid rnam pa gsum shes par byed pas na mtshon byed ces bya'o/ /rnam par grol ba yongs su tshol ba la tshigs su bcad pa drug ste zhes bya ba la/ 'phags pa'i lam bsgoms nas nyon mongs pa dang sdug bsngal spangs te mya ngan las 'das pa mngon sum du byas pa ni rnam par grol ba zhes bya'o/ /thabs gang ji ltar byas na mya ngan las 'das pa 'thob par 'gyur zhes brtags pa ni rnam par grol ba yongs su tshol ba zhes bya ste/ rnam par grol ba tsam la tshigs su bcad pa drug gis ston to zhes bya ba'i don to/ /gnas don lus ni snang ba dag /shin tu gyur pa zag med pa'i/ /dbyings dang sa bon rab gyur phyir/ /de yang kun du 'gro ba'i gnas/ /zhes bya ba la/ sa bon rab tu gyur ces bya ba'i tshigs bcad rkang pa gsum gyis 'jug nas/ 'byung bar sngar smos la je bshad par bya ste/ nyon mongs pa dang shes bya'i sgrib pa'i bag chags dang bcas pa'am/ gzung ba dang 'dzin pa'i bag chags dang bcas pa'i kun gzhi la sa bon zhes bya ste/ kun gzhi gzung 'dzin gyi dri ma dang bral bas gnas gzhan du gyur na chos rnam pa gsum du yang gnas gzhan du gyur te/ gsum po gang zhe na/ gnas su snang ba dang / don du snang ba dang / lus su snang ba'o/ /de la gnas ni snod kyi 'jig rten sa gzhi chen po ste/ de gnas gzhan du gyur na ngom grog gam g.yang sa la sogs pa thag thug tu snang gi shel dang bai DUr+ya la sogs pa'i sa gzhi snang bar 'gyur ro/ /don ni gzugs nas chos kyi bar du yul drug la bya ste/ de rnams gzhan du gyur nas sangs rgyas kyi sa'i dus kyi tshe dpag bsam gyi shing la sogs pa'i longs spyod sna tshogs su snang bar 'gyur ro/ /lus ni mig gi dbang po nas yid kyi dbang po'i bar du dbang po drug la bya ste/ dbang po drug gnas gzhan du gyur na dbang po gcig gis kyang dbang po thams cad kyi don byed nus pa dang / yon tan brgya rtsa bcu gnyis 'thob pa dang / sangs rgyas kyi sku lta bur snang bar 'gyur ba dang / de ltar chos rnam pa gsum gnas gzhan du gyur pa'i zag pa med pa'i dbyings la rnam par grol ba zhes bya ste/ rnam par grol ba'i gnas der ni 'phags pa nyan thos kyang 'jug la rang sangs rgyas kyang 'jug /byang chub sems dpa' rnams kyang 'jug pas na de'ang kun du 'gro ba'i gnas zhes bya ste/ rnam par grol ba'i gnas su ni theg pa gsum gyi gang zag thams cad 'jug pa'i phyir ro/ /rnam par grol ba rnam grangs gzhan yang bstan pa'i phyir/ yid dang shin tu 'dzin pa dang / /rnam par rtog pa bzlog pa ni/ /dbang yang rnam pa bzhir gyur te/ /mi rtog bzhi dang ye shes las/ /zhes smos so/ /de la yid ni nyon mongs pa can gyi sems las byung ba bzhi dang ldan pa rtag tu kun gzhi rnam par shes pa la bdag tu lta ba nyon mongs pa'i yid la bya'o/ /shin tu 'dzin pa ni gzugs reg bya la dmigs par byed pa mig gi rnam par shes pa nas lus kyi rnam par shes pa'i bar du rnam par shes pa'i tshogs lnga la bya ste/ rnam par rtog pa 'di ni sngon po yin ser po ma yin no zhes dpyod par byed pa yid kyi rnam par shes pa la bya ste/ rnam par shes pa de bdun bzlog nas gnas gzhan du gyur na dbang rnam pa bzhi dang ldan zhing dbang rnam pa bzhi 'thob par 'gyur te/ dbang rnam pa bzhi gang zhe na/ mi rtog pa la dbang ba dang / zhing la dbang ba dang / ye shes la dbang ba dang / las la dbang ba ste rim bzhin du sbyar ro/ /de la yang gnas gzhan du gyur na/ mi rtog pa la dbang bar 'gyur te/ ci'i phyir zhe na/ nyon mongs pa'i yid ma dag pa'i dus na yang kun gzhi la dmigs la dag pa na yang rnam par mi rtog pa'i ye shes kho na la dmigs pa'i phyir ro/ /de bas na gong nas kyang / yid kyang gzhan du gyur nas ni/ /'byor pa dam pa thob par 'gyur/ /'byor pa'i rjes 'jug ye shes ni/ /rnam par rtog pa dri ma med/ /ces bshad do/ /'dzin pa gnas gzhan du gyur na zhing la dbang ba 'thob ste/ ci dgar sangs rgyas kyi zhing shel dang bai DUr+ya la sogs pa'i kha dog du ston pa'i phyir ro/ /de bas na gong nas kyang / don bcas 'dzin pa gzhan gyur pas/ /'byor pa dam pa thob par 'gyur/ /zhing yang 'dod bzhin dag pa dang / /longs spyod shin tu ston par 'gyur/ /zhes bshad do/ /rnam par rtog pa gnas gzhan du gyur na ye shes dang las gnyis la dbang thob par 'gyur te/ so so yang dag par rig pa bzhi dang ldan pas ye shes la dbang 'thob bo/ /mngon par shes pa lnga'i las la thogs pa med par 'jug pas las la dbang thob bo/ /de bas na gong du yang / rnam rtog gzhan du gyur na ni/ /'byor pa dam pa thob par 'gyur/ /ye shes dang ni las kun kyang / /rtag tu thogs pa med pa'o/ /zhes bshad do/ /de ltar rnam par shes pa bdun las rnam par shes pa gnas gyur na/ dbang gang 'thob par 'gyur ba bstan nas/ da ni sa gang la dbang gang dang ldan pa bstan pa'i phyir/ mi g.yo la sogs pa gsum la/ dbang ni rnam pa de bzhi ste/ /zhes bya ba smos te/ sa brgyad pa mi g.yo ba dang / sa dgu pa legs pa'i blo gros dang / sa bcu pa chos kyi sprin gsum la dbang rnam pa bzhi dang ldan pa yin te zhes bya ba'i don to/ /gcig la rnam gnyis de las gzhan/ /dbang ni re re 'dod pa yin/ /zhes bya ba la/ sa mi g.yo ba la ni mi rtog pa la dbang ba dang / sangs rgyas kyi zhing la dbang ba ste/ dbang gnyis dang ldan par 'dod la/ sa legs pa'i blo gros dang / chos kyi sprin gnyis la dbang re re dang ldan par 'dod de/ legs pa'i blo gros la ni ye shes la dbang bar 'dod/ chos kyi sprin la ni las la dbang bar 'dod do/ /ji lta zhe na/ sa brgyad kyi dus na rnam par mi rtog pa lhun gyis grub pa dang ldan pas mi rtog pa la dbang ba dang / ci dgar sangs rgyas kyi zhing shel dang bai DUr+ya la sogs pa'i kha dog tu ston pas sangs rgyas kyi zhing la dbang ngo / /sa dgu pa legs pa'i blo gros la ni so so yang dag par rig pa bzhi'i khyad par thob pa'i phyir/ ye shes la dbang 'thob ste so so yang dag par rig pa bzhi ni/ chos so so yang dag par rig pa dang / don so so yang dag par rig pa dang / nges pa'i tshig so so yang dag par rig pa dang / spobs pa so so yang dag par rig pa'o/ /de la phung po dang khams dang skye mched la sogs pa'i chos rnams kyi ming thams cad phyin ci ma log par shes pa ni chos so so yang dag par rig pa'o/ /chos rnams kyi rang dang spyi'i mtshan nyid shes pa ni don so so yang dag par rig pa zhes bya'o/ /sems can thams cad kyi sgra dang skad shes pa ni nges pa'i tshig so so yang dag par rig pa zhes bya'o/ /chos gcig gi don bshad par brtsams te/ stan gcig la 'dug nas 'khor ba'i mtha'i bar du ming dang tshig sna tshogs kyis bshad kyang shes rab la zad pa med pa ni spobs pa so so yang dag par rig pa zhes bya'o/ /sa bcu pa chos kyi sprin la ni las la dbang 'thob ste/ 'phrul gyi mig dang rna ba la sogs pa mngon par shes pa'i las byed pa la bar du gcod pa med cing thogs pa med par 'jug pa'i phyir ro/ /rnam par grol ba'i rnam grangs gzhan yang bstan pa'i phyir/ 'di la blo ldan srid song bdag med rnam gnyis rig nas ni/ /zhes bya ba la sogs pa smos te/ bdag ces bya ba'i sgra kun du brtags pa'i gang zag la yang bya bar 'dren te/ bdag dang sems can dang srog dang gang zag ces 'dogs pa'i phyir ro/ /chos rnams kyi rang bzhin yang yang dag gi sgrar 'dogs te me ni dro ba'i rang bzhin zhes bshad na dro ba'i bdag nyid ces bya ba'i don to/ /'di la zhes bya ba ni 'khor ba na du yod pa'i phung po dang skyed mched kyi don 'di la zhes bya ba'i don to/ /blo ldan ni shes rab dang ldan pa'i byang chub sems dpa' la bya'o/ /srid song zhes bya ba ni khams gsum du gtogs pa'am khams gsum na yod pa zhes bya ba'i don to/ /bdag med pa gnyis rig ces bya ba ni khams gsum du gtogs pa'i chos rnams la ji ltar kun brtags pa'i gang zag gi rang bzhin du/ rang bzhin dang bdag med pa'i de bzhin du kun du brtags pa'i chos la yang rang bzhin dang bdag med par khong du chud nas zhes bya ba'i don to/ /'dis ni sgro 'dogs pa'i mtha' la ma zhen par bstan to/ /de dang mtshungs par shes nas zhes bya ba la/ bdag med pa gnyis su rtog pa yang de dang mtshungs par rtogs te/ mtshungs pa zhes bya ba ni mtha' gnyis dang bral ba'i lam rtogs zhes bya ba'i don to/ dbu ma'i lam rtogs so zhes bya ba'i don to/ /ji ltar zhe na/ kun du brtags pa'i gang zag med pa dang / kun du brtags pa'i chos rnams med cing stong pa zhes bya bar zad kyi rnam pa thams cad du med pa ni ma yin par shes te/ gzhan yang yongs su grub pa ni med pa ma yin par shes par bya ste/ 'dis ni skur pa'i mtha' ltung ba dang bral bar bstan to/ /de ltar sgro 'dogs pa'i mtha' dang bral nas de nyid rab 'jug ces bya ste/ /kun brtags kyi gang zag dang kun brtags kyi chos med pa'i sems tsam po mthong ba ni de nyid la rab tu 'jug pa zhes bya ste/ 'di yang mos pa spyod pa'i sa bzhi las bzod pa'i dus na rtogs te/ de'i tshe na bzod pa rang bzhin med par khong du chud par byed pa'i phyir ro/ /de ltar bzod pa'i dus na gzung ba med par khong du chud pas de kho na'i phyogs gcig la zhugs pa'i ting nge 'dzin thob pas na de nyid la rab tu 'jug pa zhes btags so/ /'dzin par te zhes bya ba la bzod pa'i dus na gzugs la sogs pa spyi'i dngos po ni med kyi 'dzin pa'i mtshan nyid sems tsam du zad do zhes khong du chud pas na 'dzin pa tsam sems so/ /de'i phyir de la yid gnas phyir/ /zhes bya ba la ni gong du bshad pa lta bur na bzod pa'i dus na phyi'i yul mi dmigs kyi sems tsam la gnas pas de la yid gnas pa zhes bya'o/ /de la de mi snang zhes bya ba la/ bzod pa'i dus na gzung ba'i chos phyi'i yul med par khong du chud pa dang / 'jig rten gyi chos mchog gi dus na gzung ba med na de la 'dzin par byed pa'i sems kyang med do zhes sems tsam du 'dzin pa dang yang bral te/ de bas na de la mi snang zhes bya'o/ /de snang med pa grol ba mchog tu dmigs pa dang bral ba'o zhes bya ba la/ de nas sa dang po'i dus na gzung ba yang mi snang 'dzin pa yang mi snang ste/ gzung 'dzin mi dmigs pa'i ye shes la gnas pa nyid grol ba zhes bya ste/ ci'i phyir zhe na/ mchog tu dmigs pa gang zag tu dmigs pa dang / chos su dmigs pa gnyis dang bral ba'i phyir grol ba yin no/ /de yang mtshungs par shes pa ni/ /zhes bya ba la/ bdag med pa gnyis su rtogs pa yang thams cad nas thams cad du med par rtogs par ma zad kyi/ mtha' gnyis dang bral ba'i dbu ma'i lam rtogs pa ni mtshungs par shes pa zhes bya'o/ /'dzin pa ni 'di ni 'dzin pa tsam mo snyam pa'i zhes bya ba la tsam gyi sgras ni gzugs la sogs pa'i don yod pa ma yin par 'gog ste/ sems dang sems las byung ba tsam du zad kyi/ de las gzhan pa'i gzugs la sogs pa'i yul yod pa ma yin no zhes rtogs pa ni 'dzin pa tsam du zad kyi/ de'ang bzod pa'i dus na rtogs so/ /rnam par grol ba'i rnam grangs gzhan yang bstan pa'i phyir/ gzhi dang tshogs dang gzhag yod na/ /zhes bya ba la sogs smos te/ gzhi yod pa dang / tshogs yod pa dang / gzhag pa yod pa zhes bya ba'i don to/ /de la tshe 'dir dge ba'i bshes gnyen la brten nas/ dam pa'i chos nyan pa dang / sems pa la sogs pa byed pa ni gzhi'o/ /tshe rabs snga mar mos pa spyod pa'i sar bskal pa grangs med pa gcig tu bsod nams kyi tshogs bsags pa ni tshogs so/ /mos pa spyod pa'i sa dag tu chos thams cad mi rtag pa dang / sdug bsngal ba dang / stong pa dang / bdag med par tshul bzhin yid la byas pa ni gzhag pa zhes bya ste/ de gsum dang ldan pa zhes bya ba'i don to/ /ming tsam du yang mthong bar 'gyur/ /zhes bya ba la/ de gsum dang ldan na drod dang rtse mo'i tshe na chos thams cad ming tsam du mthong bar 'gyur te/ tshig tsam brjod pa tsam tha snyad tsam rnam par rtog pa tsam du zad par mthong ba'i chos rnams kyi rang bzhin yod pa ma yin par mthong ngo zhes bya ba'i don to/ /ming tsam du ni mthong ba ste/ /zhes bya ba la/ de'i 'og tu bzod pa'i dus na chos thams cad sems tsam du mthong ste/ mig gi phung po bzhi tsam du zad kyi de las ma gtogs pa'i gzugs la sogs pa'i chos gang yang ma mthong bas na ming tsam du mthong ba zhes bya ste/ gzung ba rnams de'i tshe spangs pa'i phyir ro/ /de mthong de yang mthong mi 'gyur/ / zhes bya ba la/ de nas 'jig rten gyi chos mchog gi dus na bzod pa'i tshe ming tsam du mthong ba de yang ma mthong ste/ sems tsam du yod par 'dzin pa yang de'i tshe spangs pa'i phyir te/ gzung ba med pa yang yod par mi rigs par khong du chud pa'i phyir ro/ /de ltar gzung 'dzin gnyis spangs nas sa dang po'i tshe gzung ba dang 'dzin pa gnyis mi dmigs pa'i dmigs su med pa'i ye shes la gnas pa nyid rnam par grol ba yin te/ rnam par grol ba'i rnam grangs gzhan yang bstan pa'i phyir/ sems 'di gnas ngan len dang bcas/ /bdag tu lta ba'i zhags pas zin/ /'jug par 'gyur te ldog pa ni/ /de ni nang du gnas par 'dod/ /ces bya ba smos te/ sems 'di gnas ngan len dang bcas pas na 'jug par 'gyur te zhes bya ba dang sbyar ro/ /de la sems kyi sgras ni kun gzhi rnam par shes pa la sogs pa sems dang sems las byung ba'i chos la bya'o/ /gnas ngan len dang bcas pa zhes bya ba la gnas ngan len rnam pa gnyis te/ lus kyi gnas ngan len dang / sems kyi gnas ngan len to/ /de la lus kyi gnas ngan len ni srog gcod pa dang / ma byin par len pa la sogs pa'o/ /sems kyi gnas ngan len ni chags sems dang / gnod sems dang / yod med du rtog pa la sogs pa'o/ /yang na gnas ngan len rnam pa gnyis te/ nyon mongs pa'i sgrib pa'i bag chags dang / shes bya'i sgrib pa'i bag chags so/ /bcas zhes bya ba ni bag chags de gnyis dang ldan zhing 'brel bas zhes bya ba'i don to/ /bdag tu lta ba'i zhags pas zin/ /zhes bya bas gnas ngan len gyi rgyu bstan te/ bdag tu lta ba ni gang zag la bdag tu lta ba dang / chos la bdag tu lta ba'o/ /ci tsam ci tsam gang zag la bdag yod pa dang / chos la bdag yod pa phyin ci log tu bltas pa de tsam du sems la nyon mongs pa'i sgrib pa dang shes bya'i sgrib pa'i bag chags kyi gnas ngan len sogs par 'gyur ro/ /ji srid du gnas ngan len gnyis dang ma bral ba de srid du 'khor bar 'jug par 'gyur te/ rgyun du 'khor bar skye bar 'gyur te zhes bya ba'i don to/ /'khor ba las log ste 'khor bar mi skye ba ni rnam par grol ba zhes bya'o/ /ji ltar 'khor ba las ldog par 'gyur zhe na/ da ni nam sems nang du gnas par gyur pa na 'khor ba las ldog par 'dod do/ /sems nang du gnas pa yang gzung ba dang 'dzin pa gnyis su rtogs pa spangs nas gnyis su med pa'i sems tsam la sems gnas te gzung ba yang mi dmigs 'dzin pa yang mi dmigs par 'gyur ba na rnam par grol ba yin par 'dod de/ de ni sa dang po'i dus na'o/ /dngos po med 'dod yongs su tshol ba la tshigs su bcad pa gnyis so zhes bya ba la/ mdo sde de dag gi nang nas chos thams cad ni dngos po med pa dang / rang bzhin gyis mya ngan las 'das pa zhes bshad de/ ji ltar dngos po med pa dang / /rang bzhin gyis mya ngan las 'das pa yin par brtags pa la yongs su tshol ba zhes bya'o/ /de la chos rnam pa gsum ste/ kun brtags dang / gzhan dbang dang / yongs su grub pa'o/ /gzhan gyi dbang gi chos la ni skye ba dang 'jig pa dang gnas pa ste/ 'du byed kyi mtshan nyid gsum yod par rang bzhin med pas na dngos po med pa zhes bya'o/ /kun brtags kyi chos ni ji ltar gzung ba bzhin du med pas na rang bzhin med pa zhes bya ste/ de brtag pa la tshigs su bcad pa gnyis kyis bstan to zhes bya ba'i don to/ / rang dang rang gi bdag nyid med/ /bdag gi dngos la mi gnas phyir/ /zhes bya ba la/ rang zhes bya ba'i don ni rang nyid dngos po med pa'i phyir ngo bo nyid med pa zhes bya ste/ ci'i phyir zhe na/ gzhan gyi dbang gi chos rnams skye ba'i tshe rgyu dang rkyen gzhan gyis bskyed par zad kyi rang nyid kyis rang nyid bskyed par mi nus pa'i phyir te/ 'dis ni skye ba rang bzhin med par bstan to/ /yang na chos rnams ni ma 'ongs pa'i dus na med pa las byung ba la skye ba zhes bya ba las mu stegs pa grangs can rnams kyi gtso bo zhes bya ba yod pa las chos rnams skye zhe'am/ sa bon la myu gu yod bzhin du rgyu rkyen gyis bskyed do zhes rang nyid kyi dngos po yod pas skye ba med pa'i phyir ngo bo nyid med pa zhes bya'o/ /rang gi bdag nyid du dngos po med pa'i phyir ngo bo nyid med pa zhes bya ste/ ci'i phyir zhe na/ dngos po rnams 'gags te zhes pa rnams slar yang bzlas nas sngon gyi rang bzhin du skye ba med pa'i phyir te/ 'dis ni zhig pa rang bzhin med pa bstan to/ /yang na mu stegs pa grangs can pa rnams kyis zhig pa rnams kyang thams cad nas thams cad du med par song ba ma yin gyi mngon par gnas so zhes smras pa ltar gnas pa'i rang bzhin med pas na ngo bo nyid med pa zhes bya'o/ /bdag gi dngos po la mi gnas pa'i phyir/ ngo bo nyid med pa zhes bya ste/ ci'i phyir zhe na/ da ltar gyi chos skyes pa rnams kyang skad cig ma yin pas skad cig ma skyes ma thag tu 'gag go/ /skad cig ma gnyis dang gsum la sogs par mi gnas pa'i phyir te/ 'dis ni gnas pa rang bzhin med par bstan to/ /yang na mu stegs pa grangs can pa rnams kyis/ chos rnams skye nas tha gi zang gcig tu gnas te/ 'gog go zhes btags pa zhes yod pa ma yin pas na rang bzhin med pa zhes bya'o/ /'dzin pa bzhin du de med par/ /ngo bo nyid ni med par 'dod/ /ces bya ba la/ ji ltar byis pa so so'i skye bo rnams kyis rtag pa dang / bde ba dang / bdag dang / gtsang ba dang bdag zhe'am/ gzhan zhe'am/ gzugs she'am/ sgra zhes kun du brtags te/ gzung ba'i chos kun brtags kyi mtshan nyid la ji ltar rtag pa la sogs pa lta bu gzung ba ste/ de ltar rang bzhin yod pa ma yin pas na ngo bo nyid med pa zhes bya'o/ /de ltar skye ba rang bzhin med pa dang / /zhi ba rang bzhin med pa dang / /gnas pa rang bzhin med pa dang / /ji ltar gzung ba rang bzhin med pas na chos thams cad rang bzhin med par 'dod do zhes bya ba'i don to/ /rang bzhin rnam pa gsum po 'di dag ni 'dus byas kyi mtshan nyid rnam pa gsum dang ldan par rig par bya'o zhes bya ba la/ rang nyid dngos po med pa dang / /rang gi bdag nyid du dngos po med pa dang / /bdag gi dngos po la mi gnas pa gsum po 'di dag ni 'dus byas kyi mtshan nyid rnam pa gsum dang ldan te/ da rang nyid dngos po med pas skye ba rang bzhin med par bstan pas rang gi bdag nyid du dngos po med pa med pas ni 'jig pa rang bzhin med pa bstan/ bdag gi dngos po la mi gnas pas ni gnas pa rang bzhin med pa bstan to zhes bya ba'i don to/ /'dzin pa bzhin du de med pa'i phyir ngo bo nyid med pa ste/ de med pas ni rang bzhin med pa'o zhes bya ba la/ /so so'i skye bo rnams kyis gtsang ba dang rtag pa la sogs brtags pa bzhin du bde ba dang gtsang ba'i rang bzhin med pa'i phyir ngo bo nyid med pa zhes bya ste/ 'di'i skabs su yang bde ba dang gtsang bar kun du brtags pa'i kun brtags kyi mtshan nyid med pa nyid rang bzhin med pa zhes bya'o/ /de ltar dngos po med pa'i don du bstan nas/ rang bzhin gyis mya ngan las 'das pa'i don bstan pa'i phyir/ rang bzhin med pas grub pa ni/ /gong nas gong du brten pa yis/ /skye med 'gog med thog ma nas/ /zhi dang rang bzhin mya ngan 'das/ /chos rnams zhes bya ba smos te/ chos rnams kyi rang bzhin med par gyur pas na skye ba med pas na rang bzhin gyis mya ngan las 'das par grub ste/ de'ang ci ltar grub ce na snga ma snga ma la brten nas/ phyi ma phyi ma 'grub pa'o/ /'di la rang bzhin med pa la brten nas skye ba med par 'grub bo/ /skye ba med pa la brten nas 'gag pa med pa 'grub bo/ /de gnyis la brten nas thog ma nas zhi ba 'grub bo/ /thog ma nas zhi ba la'ang brten nas/ rang bzhin gyis mya ngan las 'das par 'grub bo/ /de la rang gi ngo bo med pa dang / rang gi bdag nyid du dngos po med pa dang / bdag gi dngos po la mi gnas pa dang / 'dzin pa bzhin du med pas na rang bzhin med pa ste/ de ltar rang bzhin med pa'i chos ni nam mkha' lta bu yin pa'i phyir de la skye ba med do/ /skye ba med pa la 'jig pa med pas ni 'gag pa med do/ /gang skye ba dang 'gag par kun du brtags pa'i chos de nyid la thog ma nas zhi ba zhes bya'o/ /'di ltar skye ba dang 'jig pas dkrugs shing sog le rnon pos dras pa'i 'du byed rnams la ni 'phags pa rnams skyo bar mdzad kyi skye ba dang 'gag pa spongs pa'i bdud rtsi'i dbyings la ni 'phags pa rnams dgyes par mdzad pa'i phyir ro/ /gang thog ma nas zhi ba'i chos de nyid la rang bzhin gyis mya ngan las 'das pa zhes kyang de la bya ste/ de nyid la yongs su grub pa'i mtshan nyid ces bya ba'i don to/ /yongs su grub pa'i mtshan nyid de rang bzhin gyis ye nas gnas kyi lam bsgoms pas bskyed pa ma yin pas na rang bzhin gyis mya ngan las 'das pa zhes bya'o/ /mi skye ba'i chos kyi bzod pa yongs su tshol ba las brtsams te tshigs su bcad pa'o zhes bya ba la/ mdo sde de dang de dag gi nang nas mi skye ba'i chos la bzod pa thob pa'o zhes gsungs pa la/ mi skye ba'i chos la bzod pa thob pa'i mtshan nyid ji lta bur yin pa brtag par bya ba'i phyir tshigs su bcad pa rtsom mo zhes bya ba'i don to/ /thog ma de nyid gzhan rang mtshan/ /rang dang gzhan du gyur pa dang / /kun nas nyon mongs bye brag rnams/ /mi skye chos la bzod par gsungs/ /zhes bya ba la/ skye ba med pa'i chos brgyad la/ /bzod pa ni mi skye ba'i chos la bzod pa zhes bya bar gsungs te/ brgyad po gang zhe na/ thog ma skye ba med pa dang / de nyid skye ba med pa dang / gzhan skye ba med pa dang / rang gi mtshan nyid skye ba med pa dang / rang skye ba med pa dang / gzhan du 'gyur ba skye ba med pa dang / kun nas nyon mongs pa skye ba med pa dang / bye brag tu skye ba med pa'o/ /thog ma ni 'khor ba ste de la thog ma skye ba med do zhes bya ba la la la dag/ 'khor ba la thog ma yod par rtog ste 'khor ba la thog ma yod par brtags pa'i 'khor ba la thog mar skye ba med par mthong ba ni mi skye ba'i chos la bzod pa zhes bya'o/ /de'ang 'di skad 'khor ba ni ma rig pa la sogs pa yan lag bcu gnyis gcig gis gcig bskyed pas na thog ma med pa dbang phyug dang tshangs pa la sogs pa gang gis kyang 'khor ba'i thog ma bskyed pa med do zhes bzod na mi skye ba'i chos la bzod pa thob pa zhes bya'o/ /de nyid dang gzhan ni snga ma dang phyi ma la zhes bya ba la sngar skyes pa de ni slar mi skye la/ phyi ma grags ba'i skye ba rnams kyang ji ltar grags pa'i chos la gzhan mi skye zhes bya ba'i don to/ /de nyid mi skye ba'i don rgyas par bshad pa'i phyir/ gang sngar skyes pa'i chos de dag skye ba med de de'i dngos por mi skye ba'i phyir ro zhes bya ba smos te/ 'khor ba na gang sngar skyes nas 'gags zin pa'i chos de dag slar yang mi skye ste/ ci'i phyir zhe na/ 'gag pa'i chos ni med pa yin pas med pa ste/ slar yod pa'i dngos por mi skye ba'i phyir te/ ji ltar bzod pa yang mi skye ba'i chos la bzod pa zhes bya ba'i don to/ /gzhan mi skye ba'i don rgyas par bshad pa'i phyir gzhan dag kyang ma yin te/ snga ma med pa'i rnam par mi skye ba'i phyir ro zhes smos te/ 'khor ba na phyis skye ba'i chos rnams kyang gzhan yang skye ba ma yin te/ ci'i phyir zhe na/ ji ltar grags pa'i chos phung po dang khams dang skye mched la sogs pa nyid skye bar zad kyi/ sngon med pa'i sems can gsar du 'byung ba med pa'i phyir te/ de ltar bzod pa yang mi skye ba'i chos la bzod pa bya ba'i don to/ /rang gi mtshan nyid ni kun du brtags pa'i rang bzhin gyis te/ de la nam yang skye ba med do zhes bya ba la/ rang gi mtshan nyid ni mi skye ba ni kun du brtags pa'i rang bzhin rnams la skye ba med pa'i phyir te/ ci'i phyir zhe na/ gang zag dang chos su brtags pa thams cad ni ri bong gi rwa bzhin du thams cad nas thams cad du med na de nam yang skye ba dang 'byung ba med pa'i phyir te/ de ltar bzod pa yang mi skye ba'i chos la bzod pa zhes bya'o zhes bya ba'i don to/ /rang nyid mi skye ba ni gzhan gyi dbang gi'o zhes bya ba la/ rang nyid mi skye ba na gzhan gyi dbang gi mtshan nyid de/ ci'i phyir zhe na/ gzhan gyi dbang gi chos rnams ni/ /rgyu dang rkyen gyi mthu las skyes pa'i rang nyid skye bar mi rung ba'i phyir te/ de ltar bzod pa yang mi skye ba'i chos la bzod pa zhes bya ba'i don to/ /gzhan du 'gyur ba ni yongs su grub pa ste/ de ni gzhan du 'gyur ba skye ba med do zhes bya ba la/ gzhan du 'gyur ba skye ba med pa ni yongs su grub pa'i mtshan nyid de/ ci'i phyir zhe na/ yongs su grub pa ni nam mkha' bzhin du rtag cing ro gcig pa yin pas de la nams kyang gzhan nas gzhan du 'gyur ba med pa'i phyir te/ de ltar bzod pa yang mi skye ba'i chos la bzod pa yin no zhes pa'i don to/ /nyon mongs pa spangs pa'i zab pa'i ye shes thob pa rnams la kun nas nyon mongs pa skye bar mi mthong zhes bya ba la/ kun nas nyon mongs pa skye ba med pa ni 'di ltar 'phags pa dgra bcom pa la sogs pa mthong ba dang / bsgom pas spang bar bya ba'i nyon mongs pa spangs nas zad pa'i ye shes thob pa rnams phyis sems kyi rgyud la kun nas nyon mongs pa skye bar mi mthong ste/ 'phags pa de dag kun nas nyon mongs pa skye bar mi mthong ba yang mi skye ba'i chos la bzod pa'o zhes bya ba'i don to/ /bye brag ni sangs rgyas kyi chos kyi sku rnams te/ bdag la bye brag tu skye ba med do zhes bya ba la/ bye brag tu skye ba med pa ni sangs rgyas bcom ldan 'das rnams kyi chos kyi sku yin te/ sangs rgyas thams cad kyi chos kyi sku ni rang bzhin gcig pa yin la/ sangs rgyas kha cig ni chos kyi sku ci 'dra bar skyes kha cig ni ci 'dra bar skye ba lta bur mi mthun par skye ba med pa'i phyir te/ de ltar bzod pa yang mi skye ba'i chos la bzod pa zhes bya ba'i don to/ /theg pa gcig yongs su tshol ba la yang tshigs su bcad pa bdun no zhes bya ba la/ mdo sde kha cig las ni theg pa gcig tu bshad de gsum du med do zhes bshad do/ /mdo sde kha cig las ni gsum mo zhes bshad pa ni ci la dgongs she na/ gsung rab la sde rnam pa gnyis te/ bkri ba'i don gyi mdo sde dang / /nges pa'i don gyi mdo sde'o/ /de la theg pa gcig go zhes bshad pa ni sems can gyi don du dgongs pa'i dbang gis gsungs pas ni bkri ba'i don zhes bya ba la/ theg pa gsum du gsungs pa ni nges pa'i don yin te/ theg pa gsum yod pa las theg pa gcig tu bshad pa/ ci las dgongs te bshad pa'i dgongs pa brtags pa'i phyir tshigs su bcad pa bdun rtsom mo zhes bya ba'i don to/ /chos dang bdag med grol ba mtshungs/ /tha dad rigs dang bsam gnyis thob/ /sprul pa dang ni mthar thug phyir/ /theg pa gcig pa nyid yin no/ /zhes bya ba la/ theg pa gcig tu bshad pa'i dgongs pa ni chos mtshungs pa dang / bdag med pa mtshungs pa dang / grol ba mtshungs pa dang / rigs tha dad pa theg pa mtshungs pa dang / bsam pa gnyis thob pa dang / sprul pa'i phyir/ dang mthar thug pa'i phyir/ don rnam pa bdun la dgongs nas theg pa gcig nyid yin no zhes gsungs so/ /chos mtshungs pa'i phyir theg pa gcig ste/ nyan thos la sogs pa'i chos kyi dbyings dang tha mi dad pa'i phyir zhes bya ba la/ chos mtshungs pa'i phyir theg pa gcig tu gsungs te/ ji lta zhe na/ 'di ltar nyan thos la sogs pa'i chos kyi dbyings dang / rang sangs rgyas la sogs pa'i chos kyi dbyings dang / de bzhin gshegs pa'i chos kyi dbyings su tha mi dad de nam mkha' bzhin no/ /ji ltar nam mkha' la tha dad pa rnam pa sna tshogs su med pa ltar nyan thos la sogs pa'i chos kyi dbyings la yang tha dad pa med de/ rang bzhin gcig pas na theg pa gcig pa zhes bya'o/ /chos kyi dbyings la ci'i phyir theg pa zhes bya zhe na/ de'i phyir bgrod pa nyid theg pa yin pa'i phyir zhes smos te/ 'dir chos kyi dbyings la theg pa chen po zhes gzhag pa ni/ bgrod par bya ba shes par bya ba'i yul chos kyi dbyings nyid theg pa yin te/ 'di ltar chos kyi dbyings khong du chud cing rtogs na nyan thos dang rang sangs rgyas dang de bzhin gshegs pa'i chos rnams 'byung bar 'gyur bas na chos kyi dbyings la theg par gzhag go/ /bdag med pa mtshungs pa'i phyir theg pa gcig ste/ nyan thos la sogs pa dang bdag med par mtshungs pa'i phyir zhes bya ba la/ bdag med par mtshungs pa ni theg pa gcig tu bshad do/ /ji lta zhe na/ ji ltar nyan thos la sogs pa 'gro ba po'i gang zag la bdag med pa ltar sangs rgyas bcom ldan 'das gshegs pa po yang bdag med de/ 'gro ba po'i gang zag bdag med par 'gro bas na de la dgongs nas theg pa gcig go zhes gsungs pa'i don to/ /gang zag la ci'i phyir theg pa zhes btags she na/ de'i phyir bgrod par byed pa de ni theg pa yin pa'i phyir ro zhes bya ba smos te/ 'dir gang zag la theg par btags pa'i rnam par grol ba'i gnas te/ gang zag der bgrod par byed/ des phyin par byed pas na gang zag la theg pa zhes btags te/ 'gro ba po gang zag kun la yang bdag med par 'dra ba'i phyir theg pa gcig ces bshad do zhes bya ba'i don to/ /rnam par grol ba mtshungs pa'i phyir theg pa/ gcig pa nyid ni zhes bya ba la/ /rnam par grol ba mtshungs pa la dgongs nas theg pa gcig tu gsungs te/ ci'i phyir zhe na/ nyan thos kyi rnam par grol ba dang rang sangs rgyas kyi rnam par grol ba dang / sangs rgyas kyi rnam par grol ba tha dad pa med pa'i phyir te/ mdo sde dag las kyang / rnam par grol ba dang / rnam par grol ba dag la mi 'dra ba med do zhes gsungs so/ /rnam par grol ba ci'i phyir theg pa zhes bya zhe na/ de'i phyir bgrod pa gcig pa yin pa'i phyir ro zhes smos te/ theg pa'i mtshan nyid kyang gang gis bgrod par byed pa'i rgyu yang theg pa zhes bya/ gang du bgrod par byed pa'i gnas la yang theg pa zhes bya ba las rnam par grol ba'i gnas bgrod par bya ba'i gnas dang / thob par bya ba'i chos yin pas na de la theg pa zhes bya'o/ /rigs tha dad pa theg pa mtshungs pa ni nyan thos kyi rigs ma nges pa rnams theg pa chen po 'byung ba'i phyir zhes bya ba la/ rigs tha dad pa dag theg pa gcig gi sgo nas sangs rgyas par 'gyur bas lam gcig pas na theg pa gcig tu bshad de/ ji ltar byang chub sems dpa'i rigs nges pa dang / byang chub sems dpa'i rigs ma nges pa dag theg pa chen po la zhugs nas 'tshang rgya ba 'thob pa bzhin du/ nyan thos kyi rigs ma nges pa rnams sngon nyan thos kyi spyad pa spyod pa las sangs rgyas sam/ byang chub sems dpa'i dge ba'i bshes gnyen dang phrad nas nyan thos kyi spyod pa btang ste/ theg pa chen po'i chos spyad nas sangs rgyas par 'gyur te/ theg pa chen po nyid kyi lam gyis byang chub pas na de las dgongs te/ theg pa gcig tu gsungs so zhes bya ba'i don to/ /rigs pa ci'i phyir theg pa zhes bya zhe na/ de'i phyir/ 'dis bgrod pa ni theg pa yin pa'i phyir zhes smos te/ rigs 'di ni byang chub tu sems bskyed cing byang chub sems dpa'i spyod pa la spyad nas sangs rgyas par byed pas na rigs la theg par btags/ bsam pa gnyis thob pa theg pa gcig pa ni zhes bya ba la/ bsam pa gnyis thob pas na theg pa gcig tu gsungs te/ bsam pa gnyis thob pa ni de bzhin gshegs pa'i dgongs pas brnyes pa dang / nyan thos kyi bsam pa rnyed pa'o sangs rgyas kyis sems can thams cad la bdag nyid du bsam pa thob pa dang zhes bya ba la 'di ltar sa dang po'i dus na byang chub sems dpa' gang zag dang chos la bdag med pa khong du chud pas bdag dang sems can gnyis su mnyam pa nyid kyi bsam pa rnyed do/ /mnyam pa nyid kyi bsam pa de sa gnyis nas sa bcu'i bar du bsgoms pas sangs rgyas kyi sa'i dus na rnam par dag pa ste/ bdag gang yin pas sems can gzhan yang de yin/ sems can gzhan yin pa bdag kyang de yin no zhes sems can dang bdag tu rang bzhin gcig pa'i dgongs pa brnyes pas na theg pa gcig tu bshad do zhes bya ba'i don to/ /nyan thos dag gi rigs su nges pa rnams sngon byang chub sems dpa'i tshogs la spyad pa rnams kyang sangs rgyas kyi bsam par 'gyur te zhes bya ba la/ nyan thos de yi rigs su nges/ /zhes bya ba ni/ nyan thos nyid ni rigs nges pa'o/ /nyan thos kyi rigs su nges pa rnams sngon byang chub sems dpa'i spyad pa spyod pa las nyan thos kyi rigs nges pa yod pas na byang chub sems dpa'i spyod pa btang nas nyan thos kyi theg par zhugs te nyan thos kyi mya ngan las 'das par mya ngan las 'das so/ /de dag la de bzhin gshegs pas sangs rgyas kyi dgongs pa la sbyar bar mdzad de/ de ltar mdzad pas na de bzhin gshegs pa rnams kyis sngon bdag gis byang chub sems dpa'i spyod pa spyad pas sangs rgyas so zhes dgongs pa bzhin du nyan thos de dag kyang bdag cag sngon byang chub sems dpa'i spyad pa spyod pas 'tshang rgya bar 'gyur ro zhes sangs rgyas kyi bsam pa 'thob par 'gyur te/ de la dgongs nas kyang theg pa gcig tu gsungs so zhes bya ba'i don to/ /rgyu gang gis sangs rgyas kyi bsam pa thob ce na/ de'i phyir sangs rgyas kyi mthus zhes bya ba smos te/ sangs rgyas kyi bsam pa thob pa yang de bzhin gshegs pa'i byin gyi rlabs kyi rgyus thob bo zhes bya ba'i don to/ /bsam pa ji tsam zhig thob ce na/ de'i phyir/ de bzhin gshegs pas rjes su gzung ba'i bye brag gi phyogs thob pa'i phyir zhes bya ba smos te/ de bzhin gshegs pa la mnga' ba'i/ de bzhin gshegs pa dang ldan pa'i dgongs pa'i khyad par la de bzhin gshegs pas gzung ba'i bye brag ces bya ste/ nyan thos de dag gis sangs rgyas kyi bsam pa rnyed pa yang thang cig gcig rnyed kyi gtan du bsam pa de dang mi ldan pas na phyogs tsam thob pa zhes bya'o/ /rnam pa ji lta bus thob pas sangs rgyas kyi bsam pa thob pa ni/ de'i phyir/ rgyud tha dad pa ma yin pas thob pa'i phyir ro zhes bya ba smos te/ nyan thos dang byang chub sems dpa'i spyad pa spyod pa dang / sangs rgyas gnyis su sngon byang chub sems dpa'i spyad pa spyod pas 'tshang rgya bar 'gyur ro snyam du sems pa'i sems kyi rgyud tha dad pa ma yin pa thob pa'i phyir/ sangs rgyas kyi bsam pa'i phyogs tsam zhig thob bo zhes bya ba'i don to/ /de ltar gcig pa'i bsam pa thob pas sangs rgyas dang nyan thos rnams gcig pa'i phyir theg pa gcig go zhes bya ba la gong du bshad pa ltar na/ sangs rgyas rnams kyang sems can dang bdag tu mnyam pa'i bsam pa thob/ nyan thos rnams kyang sangs rgyas kyi dgongs pa dang mthun pa'i bsam pa thob pas/ de la dgongs nas theg pa gcig tu bshad do zhes bya ba'i don to/ /sprul pa'i phyir yang theg pa gcig pa ni 'di lta ste/ nga ni lan brgya phrag du mar nyan thos kyi theg pas yongs su mya ngan las 'das so zhes gsungs pa ste/ 'dul ba rnams kyi don du de bzhin du sprul pa bstan pa'i phyir ro zhes bya ba la/ sprul pa'i phyir yang theg pa gcig tu bshad de/ ji lta zhe na/ ji ltar nyan thos rnams rang gi theg pas mya ngan las 'das pa de bzhin du de bzhin gshegs pa'i sprul pas kyang nyan thos kyi theg pa la zhugs nas yongs su mya ngan las 'das par bstan te/ nyan thos dang sprul pa gnyis nyan thos kyi theg pas mya ngan las 'das par theg pa gcig pas na theg pa gcig tu bshad do zhes bya ba'i don to/ /de'i phyir mdo sde de dang de dag las kyang ni lan brgya stong du mar nyan thos kyi theg par yongs su mya ngan las 'das so zhes gsungs te/ de'ang de bzhin gshegs pa nyid nyan thos kyi theg pas yongs su mya ngan las 'das pa ni ma yin gyi de bzhin gshegs pa'i sprul pa'i nyan thos kyi theg par mya ngan las 'das par bstan na/ 'dul bar 'gyur ba'i sems can rnams kyi don du sprul pas mya ngan las 'das par bstan to/ /mthar thug pa'i phyir theg pa gcig pa ni phan chad bgrod par bya ba med par ni theg pa gcig yin pa'i phyir/ sangs rgyas nyid theg pa gcig go zhes bya ba la/ mthar thug pa'i phyir theg pa gcig tu bshad de mthar thug pa zhes bya ba dang / mchog tu gyur pa zhes bya ba dang / phul du phyin pa zhes bya ba dag don gcig ste/ dper na 'jig rten na yang gang dpa' ba dang mdzangs pa phul du phyin pa rnams la mi 'di gcig pur zad kyi mi gzhan med de zhes smra ba ltar/ rgyu'i chos theg pa chen po nyid kyang theg pa gzhan la khyad zhugs te/ phul du phyin pa dang 'bras bu'i chos sangs rgyas su gyur pa nyid sangs rgyas thob pa yang phul du phyin pa yin te/ sangs rgyas phyin chad de las lhag par bgrod cing thob par bya ba'i chos khyad par can gzhan med pas na sangs rgyas nyid la theg pa zhes btags te/ mchog tu phyin pa ni de gcig pur zad pa'i theg pa chen po gcig tu bshad do zhes bya ba'i don to/ /de ltar mdo sde de dang de la dgongs pa de dang des theg pa gcig tu rig par bya ste/ theg pa gsum med pa ni ma yin no zhes bya ba la/ gong du bshad pa ltar na theg pa gsum yod mod kyi lang kar gshegs pa la sogs pa'i mdo sde de dang de dag gi nang nas theg pa gcig tu zad de/ gsum du med do zhes bshad pa las yang chos gcig las dgongs pa de dang de dag la dgongs nas theg pa gcig tu bshad par rig par bya ste/ nges pa'i don du na theg pa gsum med pa ni ma yin no zhes bya ba'i don to/ /ci'i phyir dgongs pa de dang des theg pa gcig tu sangs rgyas bshad ce na zhes bya ba la/ de ltar theg pa gsum yod kyang dgongs pa rnam pa bdun po de dang de dag la dgongs nas theg pa gcig tu bshad pa la don dang dgongs pa ci yod ces bya ba'i don to/ / kha cig dag ni drang ba'i phyir/ /gzhan dag kyang ni gzung ba'i phyir/ /ma nges pa la sangs rgyas kyis/ /theg pa gcig tu bstan pa yin/ /zhes bya ba la/ ma nges pa'i rigs can rnams kyi don du dgongs nas sangs rgyas kyis theg pa gcig go zhes gsungs te/ ma nges pa'i rigs can ni nyan thos kyi rigs ma nges pa dang / rang sangs rgyas kyi rigs ma nges pa dang / byang chub sems dpa'i rigs ma nges pa'o/ /nyan thos dang rang sangs rgyas kyi rigs ma nges pa dag theg pa chen po'i spyod pa la btsud nas sangs rgyas par bya ba'i phyir yang theg pa gcig tu bshad pa dang / byang chub sems dpa'i rigs ma nges pa dag 'khor ba na phan btags kyang gnod par byed pa'i sems can dang / gnod par ma byas kyang gnod par byed pa dang / dgos pa med par yang gnod pa byed pa dag mthong nas 'khor bar skyo ste/ nyan thos kyi mya ngan las 'das par 'jug par 'dod pa rnams nyan thos kyi mya ngan las 'das par mi btang zhing gzung bar bya ba'i phyir theg pa gcig tu bshad do zhes bya ba'i don to/ /theg pa gcig tu bshad pas ji ltar drang zhing gzung bar 'gyur zhe na/ ji ltar theg pa ni gcig par zad do zhes bshad pa dang de dag 'di snyam du sems te/ mthar bskor na yang theg pa chen po nyid kyis mya ngan las 'das par 'gyur bas/ dang por nyan thos kyi theg par spyad de nas theg pa chen po la spyad de/ gnyis las spyad pas ci zhig byas dang po nyid nas theg pa chen po la 'jug par bya'o snyam du sems shing theg pa chen po la dang po nas spyod par byed pa nas de'i phyir theg pa chen po gcig tu bshad do/ /nyan thos kyi rigs ma nges pa zhes smos pa la/ gal te nyan thos kyi rigs ma nges pa yin na ji ltar na nges par 'gyur zhe na/ lan du de dag ni nyan thos nyid ma yin gyi gzhan du na rigs ma nges pa yin te/ sngon nyan thos kyi spyod pa la spyad pas nyan thos kyi rigs zhes bya bar zad do/ /de bzhin du byang chub sems dpa'i rigs ma nges pa'i tshul yang de dang 'dra bar blta bar bya'o/ /ci'i phyir zhe na/ nyan thos kyi rigs ma nges pa de dag dang po nas theg pa chen po'i spyod pa la spyod du 'jug ste sangs rgyas dang byang chub sems dpa' rnams kyis byang chub sems dpa'i spyod pa la ma bzhag par btang snyoms su bkod ce na/ lan du gnas skabs nges pa la ltos nas btang snyoms su bzhag ste/ de dag sngar nyan thos kyi spyod pa ma spyad par theg pa chen po'i spyod pa la dgod du mi rung bas na de'i phyir btang snyoms su bkod pa lta bur blta'o/ /gong du nyan thos kyi rigs ma nges pa rnams drang ba'i phyir theg pa gcig tu bshad do zhes glengs pa las/ nyan thos kyi rigs ma nges pa theg pa chen por 'jug pa phyi nang du yod pa bstan pa'i phyir/ nyan thos ma nges rnam gnyis te/ /theg pa'i don mthong ma mthong ba'o/ /zhes smos te/ nyan thos rigs ma nges pa theg pa chen po'i sgor zhugs nas mngon par 'tshang rgya bar 'gyur ba rnam pa gnyis te/ theg pa'i don mthong ba dang / theg pa'i don ma mthong ba'o/ /de la theg pa zhes bya ba ni bden pa bzhi la bya ste/ bden pa bzhi mthong ba ni theg pa'i don mthong ba zhes bya'o/ /de'ang gang zhe na/ rgyun du zhugs pa dang / lan cig phyir 'ong ba dang / phyir mi 'ong ba'i gang zag go/ /theg pa'i don ma mthong ba ni bden pa bzhi ma mthong ba ste/ so so'i skye bo dang / mos pa spyod pa'i gang zag rnams so/ /nyan thos rigs ma nges pa'i theg pa'i don mthong ba la phyen rnam pa du yod pa bstan pa'i phyir/ don mthong 'dod chags bral ba dang / /'dod chags ma bral gnyis gzhan la/ /zhes bya ba smos te/ theg pa'i don mthong ba la yang rnam pa gnyis yod de/ 'dod pa'i 'dod chags dang bral ba dang 'dod pa'i 'dod chags dang ma bral ba'o/ /de la 'dod pa'i 'dod chags dang bral ba ni/ 'dod pa'i khams kyi 'dod chags dang mthong ba dang bsgom pas spang bar bya ba'i nyon mongs pa ma lus par spong ba ste/ 'phags pa phyir mi 'ong ba rnams te/ 'dod pa'i 'dod chags dang ma bral ba ni 'dod pa'i khams kyis mthong bas spang bar bya ba'i nyon mongs pa ni spangs kyi bsgom pas spang bar bya ba'i nyon mongs pa rnams ni ma spangs te/ 'phags pa rgyun du zhugs pa dang / lan cig phyir 'ong ba rnams so/ /'dod chags dang bral ba dang ma bral ba gnyis kyang dbang po rtul po dang / dus ring po zhig gis mya ngan las 'das pa thob par 'gyur bas na zhan pa zhes bya'o/ /theg pa chen pos nges 'byung yin/ /zhes bya ba la/ nyan thos rigs ma nges pa theg pa'i don mthong ba dang / ma mthong ba gnyis theg pa chen po'i spyod pa spyad nas mngon par 'tshang rgya bar 'gyur ba ni theg pa chen po 'byung ba zhes bya'o/ /nyan thos don mthong ba theg pa chen pos 'byung ba yang khams gsum du skyes la/ sems can don byas nas gdod theg pa chen por 'byung bas na ji ltar khams gsum du skye ba bstan pa'i phyir/ de gnyis 'phags pa'i lam thob nas/ / srid par yongs su bsngo ba'i phyir/ /bsam gyis mi khyab 'gyur ba yi/ /skye ba dang ni ldan pa'o/ /zhes smos te/ bden pa'i don mthong ba 'dod chags dang bral ba dang ma bral ba de gnyis 'khor bar skye bar yang sngon 'phags pa'i lam bsgoms shing khong du chud cing 'thob pa ste/ 'khor bar skye ba'i rgyur gyur cig ces bsngos nas 'khor bar skye ba'i phyir de dag 'khor ba gcig nas gcig tu skye ba ni bsam gyis mi khyab par 'gyur ba'i skye ba dang ldan pa zhes bya'o/ /smras pa 'phags pa'i lam ni 'khor ba la zhe sdang ba ste/ 'khor bar rgyab kyis lta ba yin na/ 'phags pa'i lam nyid 'khor bar skyes nas 'khor bar ji ltar 'gyur zhe na/ de ni bden te 'phags pa'i lam 'ba' zhig gis 'khor bar skye bar mi 'gyur gyi/ 'dod pa'i 'dod chags dang bral ba phyir mi 'ong ba rnams la yang gzugs dang gzugs med pa'i khams kyi nyon mongs pa ma spangs pa lhag ma y od pa dang 'dod pa'i 'dod chags dang ma bral ba rgyun du zhugs pa dang lan cig phyir 'ong ba la yang 'dod pa'i khams kyi bsgom pas spang bar bya ba'i nyon mongs pa ma spangs pa dang khams gnyis kyi nyon mongs pa ma spangs pa yod pas nyon mongs pa de dag 'phags pa'i lam 'khor bar skyes par bsngos pa'i mthus phul nas nyon mongs pas rgyu byas te/ 'khor bar skye bar 'gyur te/ de yang 'di ltar bsngos pa bzhin skyes te/ sangs rgyas bcom ldan 'das rnams kyis nyan thos kyi rigs ma nges pa 'dod pa'i 'dod chags dang bral ba dang ma bral ba rnams la/ ji ltar lhag mthong gtsor bsgoms shing mya ngan las 'das pa dang rjes su mthun pa'i lam ni gtong du btsud la/ 'khor ba las mngon du lta ba'i snying rje chen po bsgoms pa'i lam la sbyor bar mdzad do/ /de la snying rje chen po'i lam bsgoms pas 'khor ba la zhe sdang zhing mya ngan las 'das pa la mngon du bltas pas lhag mthong gi lam 'dul bar byed la/ 'khor ba la mngon du lta bar byed de/ yang nas yang du 'khor ba yongs su 'dzin pa ni srid par yongs su bsngos pas zhes bya'o/ /de ltar snying rje chen po'i dbang gis 'khor bar skye ba'i phyir/ de dag gi skye ba ni bsam gyis mi khyab par gzhag go/ /bsam gyis mi khyab pa skye ba'i phyir de'i 'phags pa'i lam 'gyur bas na zhes bya ba la/ 'phags pa de dag gi skye ba bsam gyis mi khyab par bshad pa yang las dang nyon mongs pa'i dbang gis skye ba ni ma yin gyi 'phags pa'i lam nyid 'khor bar skye ba'i rgyur gyur pa na de dag gi skye ba bsam gyis mi khyab par 'gyur ro zhes bya ba'i don to/ /de ltar 'dod pa'i 'dod chags dang bral ba dang ma bral ba gnyis 'khor bar skye ba bsam gyis mi khyab pa'i mtshan nyid yin par bshad nas/ da ni 'dod pa'i 'dod chags dang ma bral ba'i sems can gyi don du 'khor bar ji ltar skye ba bstan pa'i phyir/ gcig ni smon lam dbang dag gis/ /skye bar kyang ni rab tu 'gyur/ /zhes bya ba smos te/ gcig ces bya ba'i sgras 'dod pa'i 'dod chags dang ma bral bar rgyun du zhugs pa dang lan cig phyir 'ong ba la bya ste/ de dag 'khor bar ji ltar skye zhe na/ smon lam gyi dbang gis skye ste/ de yang 'di ltar khams gsum gyi sems can sdug bsngal ba mthong nas gang dang gang du sems can gyi don bya bar 'dod par mthong ba de bzhin de dag tu skye bar gyur cig ces smon lam btab pa dang / smon lam gyi dbang gis de dang de dag tu skye bar 'gyur te/ skyes nas sems can la phan pa dang / bde bar byas te/ bsod nams dang ye shes kyi tshogs bsags nas 'tshang rgya bar 'gyur ro zhes bya ba'i don to/ /'dod pa'i 'dod chags dang bral ba 'khor bar ji ltar skye ba bstan pa'i phyir/ cig shos phyir mi 'ong ba ni/ /rnal 'byor gyi ni sprul pas sgrub/ /ces bya ba smos te/ cig shos zhes bya ba ni 'dod pa'i 'dod chags dang bral ba la bya ste/ de dag ni rang nyid 'khor bar mi skye ba'i ting nge 'dzin bsgoms nas ting nge 'dzin gyi sprul pas sprul te/ sprul pa 'khor bar skyes nas sems can gyi don bsgrubs nas bsod nams dang ye shes kyi tshogs bsags nas mngon par 'tshang rgya bar byed do zhes bya ba'i don to/ /'dod bzhin skye ba 'dzin to zhes bya ba la/ las dang nyon mongs pas skye ba ni ma yin gyi smon lam gyi dbang gis skye zhes bya ba'i don to/ /gong du 'dod pa'i 'dod chags dang bral ba dang ma bral ba gnyis zhan pa'o zhes bshad pa la/ ji ltar de gnyis zhan pa bstan pa'i phyir/ mya ngan las 'das pa la dga' ba'i phyir/ de gnyis rmongs pa zhugs par dgongs/ /zhes bya ba smos te/ don mthong ba'i gang zag de gnyis kyang / nyan thos kyi spyod pa 'khor ba la skyo ba dang / mya ngan las 'das pa la mngon sum du lta ba la dga' bas na/ shes rab rtul ba dang dus ring por bla na med pa'i byang chub 'tshang rgya bar rmongs par zhugs pa yin no zhes bya ba'i don to/ /ji ltar mya ngan las 'das pa la dga' zhe na/ de'i phyir/ phyi phyir bdag gi sems la ni/ /kun du spyod pa sbyor bas so/ /zhes bya ba smos te/ bdag gi sems ni nyon mongs pa dang nyan thos kyi sems so/ /phyi phyir zhes bya ba ni yang nas yang du zhes bya ba'i don to/ /don mthong ba'i nyan thos de dag yang nas yang du nyan thos kyi sems nyon mongs pa dang / 'khor bas skyo ba dang / mya ngan las 'das pa la mngon par dga' ba yang nas yang du 'byung zhing de la kun du spyod cing sbyor la sems can gyi don mi byed pas mya ngan las 'das pa la mngon du dga' ba zhes bya ste/ de ltar gyur dang dang po nyan thos kyi theg pa la yang bshad/ de nas bskal pa grangs med pa gsum du theg pa chen por zhugs nas 'tshang rgya bas yun ring por 'tshang rgya ba'i phyir zhan pa zhes bya'o/ /nyan thos rigs ma nges pa rnam pa gnyis las don mthong ba dang ma mthong ba rnam pa gnyis su bshad do/ /don mthong ba la yang rnam pa gnyis te/ 'dod pa'i 'dod chags dang bral ba dang / ma bral ba rnam pa gnyis su phye ba las de gnyis 'khor bar skyes te/ sems can gyi don byas nas bsod nams dang ye shes kyi tshogs bsags te/ ji ltar mngon par 'tshang rgya bar 'gyur ba ni bshad zin to/ /da ni rigs ma nges pa theg pa chen po'i don ma mthong ba ste/ de ji ltar mngon par 'tshang rgya bar bstan pa'i phyir/ gang phyir don ma byas pa de/ /sangs rgyas med 'byung bsam gtan don/ /brtson zhing sprul pa sprul don du/ /de la brten nas byang chub thob/ /ces bya ba smos so/ /'di ltar 'dod pa'i khams kyi 'dod chags dang yang ma bral/ bden pa yang ma mthong ba'i nyan thos kyi rigs ma nges pa de dag ni don ma byas pa ste/ so so'i skye bo'am/ mos pa spyod pa'i sa la gnas pa rnams so/ /don ma byas pa de dag 'dod pa'i khams nas shi 'phos nas 'dod pa'i khams kyi lha tshe ring po'i nang du skye'o/ /de ltar lha tshe ring po'i nang du 'dug 'dug pa las/ nam 'jig chen na ston pa sangs rgyas dang / de'i bstan pa la chos rnams nub ste med par gyur pa dang / slar 'dod pa'i khams su skye bar byed do/ /'dod pa'i khams su skyes nas/ gzugs kyi khams kyi bsam gtan thob par bya ba'i phyir brtson zhing 'bad par byed do/ /de'ang ci'i phyir bsam gtan la brtson zhe na/ sprul pa sprul pa/ 'dod pa'i don du bsam gtan la brtson par byed do/ /des sprul pa sprul nas/ sprul pa de la brten nas de sprul pas khams gsum du sems can gyi don byas nas bsod nams dang ye shes kyi tshogs bskangs te/ mjug tu mngon par 'tshang rgya bar byed do zhes bya ba'i don to/ /'di'i don zhes bya ba nyan thos kyi rigs ma nges pa ni bden pa'i don ma mthong ba'i gang zag 'di zhes bya ba'i don to/ /slob par gyur nas zhes bya ba ni so so'i skye bo'am/ mos pa spyod pa'i sa pa na de bzhin gshegs pa'i nyan thos su gyur nas shi 'phos te/ 'dod pa'i khams kyi lha tshe ring po'i nang du skyes so zhes bya ba'i don to/ /sangs rgyas med pa'i dus na skyes te zhes bya ba ni lha tshe ring po'i nang nas kyang 'dod pa'i khams nas de bzhin gshegs pa mi bzhugs pa'i tshe skyes nas zhes bya ba'i don to/ /bsam gtan gyi don las brtson zhing sprul pa 'dod de/ sprul pa de dag la brten nas rim gyis byang chub mchog thob po zhes bya ba la/ 'dod pa'i khams su skyes nas kyang / /gzugs kyi khams kyi bsam gtan thob par bya ba'i phyir brtson zhing 'bad par byed do/ /bsam gtan la yang ci'i phyir brtson zhing sprul pa 'dod pa'i phyir brtson par byed de/ de bsam gtan gyis sprul pa sprul nas/ sprul pas rdzu 'phrul sna tshogs kyis 'dod pa'i khams skyed par byed do/ /de'i don ni 'di lta ste/ don ma byas pa'i nyan thos rigs ma nges pa rnams lha tshe ring po'i nang nas 'dod pa'i khams su skyes pa na yul la sems mngon par mi dga' ba dang / gsung goms pa'i stobs kyis slob dpon med par 'phags pa'i lam mngon sum du byed do/ /de nas bsam gtan bsgrubs nas bsam gtan gyi sprul pa bkye ste/ sprul pas bsod nams dang ye shes kyi tshogs rdzogs par byed de/ de ni rang sangs rgyas kyi dus so/ /de nas mjug tu rim gyis bla na med pa'i byang chub 'thob ste/ des ni sangs rgyas kyi dus so/ /gnas de gsum la dgongs nas zhes bya ba ni nyan thos kyi gnas dang / rang sangs rgyas kyi gnas dang / sangs rgyas kyi gnas gsum la dgongs pa zhes bya ba'i don to/ /bcom ldan 'das kyis dpal gyi phreng ba'i mdo las me'i dpes zhes bya ba la de ltar gnas de gsum la dgongs nas bcom ldan 'das kyis kyang dang por me lci ba la mched do/ /de nas yul 'khor la mched do zhes gsungs pa'i dpes nyan thos su gyur nas rang sangs rgyas su 'gyur ro/ /rang sangs rgyas su gyur nas sangs rgyas su gyur to zhes gsungs te/ de'ang 'dod pa'i 'dod chags dang ma bral bden pa ma mthong ba ste/ 'dod pa'i khams kyi lha tshe ring po'i nang du skyes kyi bar du ni nyan thos su 'gyur ba zhes bya'o/ /de nas lha tshe ring po nas shi 'phos te sangs rgyas med pa'i dus su byung ba la bsam gtan gyis sprul pa bsgrubs te bsod nams dang ye shes kyi tshogs bsags pa na ni rang sangs rgyas su 'gyur ba zhes bya'o/ /de nas mjug tu byang chub mchog thob ba ni sangs rgyas su 'gyur ba zhes bya'o/ /tshe'i lus btang nas sprul pa'i lus 'dzin pa zhes bya ba la/ de bsam gtan gyi mtshan nyid rdzu 'phrul gyi rkang pa bzhi bsgoms pa yang bdag gi tshe 'di srid cig tu gnas par gyur cig ces ni byin gyis mi rlob kyi bdag gi bsam gtan 'di'i mthus sprul pa grub par gyur cig ces sprul pa sgrub par byed pas na sprul pa'i lus yongs su 'dzin pa zhes bya'o/ /rig pa'i gnas yongs su tshol ba tshigs su bcad pa zhes bya ba la/ yul zhes bya ba ni don gcig ste/ shes par bya ba'i yul gang dang gang yin pa brtag pa la tshigs su bcad pa gcig gis bstan to zhes bya ba'i don to/ /rig pa'i gnas thams cad la mkhas par ma byas na thams cad mkhyen pa mi 'thob pas na/ de'i phyir rig pa'i gnas btsal lo/ /de yang rig pa'i gnas la grangs du yod pa dang / don gang gi phyir btsal ba ste/ rnam pa gnyis so/ /don gang gi phyir btsal ba la yang rnam pa gnyis te/ bye brag med pa'i don thams cad mkhyen pa'i ye shes thob par bya ba'i phyir btsal ba dang / bye brag tu na gzhan tshar gcad pa dang / gzhan rjes su gzung ba dang / bdag nyid shes par bya ba'i phyir btsal lo/ /rig pa'i gnas lnga dag la brtson par ma byas na/ / 'phags pa'i dam pa thams cad mkhyen pa ga la thob/ /ces bya ba la/ rig pa'i gnas ni lnga ste/ nang rig pa dang / rgyu rig pa dang / sgra rig pa dang / gso ba rig pa dang / bzo'i las kyi gnas rig pa'o/ /de la de bzhin gshegs pa'i gsung rab yan lag bcu gnyis la mkhas pa ni nang rig pa zhes bya'o/ /mngon sum dang rjes su dpag pa tshad mas ni zin pa'i tar ka'i gzhung la mkhas pa ni rgyu rig pa zhes bya'o/ /sgra'i gtsug lag bya ka ra Na la mkhas pa ni sgra rig pa zhes bya'o/ /rlung dang bad kan la sogs pa nad gso ba'i gtsug lag la mkhas pa ni gso ba rig pa zhes bya'o/ /glu dang gar dang spos la sogs pa'i gtsug lag la mkhas pa ni bzo'i las kyi gnas rig pa zhes bya'o/ /rig pa'i gnas lnga po dag la nyan pa dang / bsam pa la sogs pa'i sgo nas shes pa dang rtog par ma byas par byang chub sems dpa' rnams kyis thams cad mkhyen pa'i ye shes ga la thob ste/ de bas na bye brag med pa thams cad mkhyen pa'i ye shes thob par bya ba'i phyir rig pa'i gnas lnga la brtson par byed do zhes bya ba'i don to/ /de la 'phags pa'i nyan thos dang rang sangs rgyas te/ de dag la sogs mchog tu gyur pas 'phags pa dam pa'i byang chub sems dpa'o/ /ji ltar yod pa ma lus pa dang / phyin ci ma log par shes pa ni thams cad mkhyen pa zhes bya'o/ /de ltar gzhan dag tshar gcad pa dang rjes su gzung ba'i phyir/ bdag nyid shes bya'i phyir ni de la brtson byed ces bya ba la/ bye brag tu rgyu rig pa dang / sgra rig pa la byang chub sems dpa' brtson par byed do/ /ci'i phyir zhe na/ mu stegs rgyu rig pa'i gtsug lag shes par rlom pa dang / sgra rig pa'i gtsug lag shes par rlom pa de dag tshar gcad par bya ba'i phyir brtson par byed do/ /gso ba rig pa dang / bzo'i las kyi gnas rig pa la byang chub sems dpa' brtson par byed de/ ci'i phyir zhe na/ nad kyis btab pa'i nad zhi bar 'dod pa rnams dang / bzo slob par 'dod cing longs spyod 'dod pa rnams la rjes su bzung zhing phan gdags pa'i phyir brtson par byed do/ /nang rig pa la byang chub sems dpa' brtson par byed de/ ci'i phyir zhe na/ bdag nyid 'phags pa'i lam de kho na nyid kyi mtshan nyid gang yin pa phyin ci ma log par shes par bya ba'i phyir brtson par byed do/ /de dag ces bya ba ni rig pa'i gnas lnga po de dag ces bya ba'i don to/ /gang gi phyir zhes bya ba ni 'bras bu gang gi phyir rig pa'i gnas lnga la brtson par byed pa de bstan to zhes bya ba'i don to/ /rgyu rig pa dang sgra rig pa tshol ba ni gzhan de la ma mos pa dag tshar bcad pa'i phyir ro zhes bya ba la rgyu rig pa byang chub sems dpa' tshol bar byed de/ 'di ltar legs par smras pa dang / nyes par smras pa rnams kyi don phyin ci ma log par shes par bya ba dang / rgyu rig pa'i gtsug lag shes pas rnam pa'i mu stegs pa dag tshar bcad pa dang bstan pa 'di la ma dad pa rnams dad pa bskyed pa dang / dad pa bskyed pa rnams dad pa phyir zhing 'phel bar bya ba'i phyir brtson par byed do/ /sgra rig pa byang chub sems dpa' tshol bar byed de/ bdag nyid saM skr-i ta'i skad la mkhas pa'i sgo nas bdag la mkhas pa gzhan dag yid ches par bya ba dang / sgra'i gtsug lag shes par rlom pa'i mu stegs pa dag tshar gcad par bya ba dang / don gcig la nges pa'i tshig mang po bstan cing bshad pa'i chos tha snyad la mkhas par bya ba'i phyir tshol bar byed do zhes bya ba'i don to/ /gso ba rig pa dang / bzo'i las kyi gnas rig pa ni gzhan de 'dod pa dag rjes su gzung ba'i phyir zhes bya ba la/ gso ba rig pa byang chub sems dpa' tshol bar byed do/ /ci'i phyir zhe na/ nad dang nad kyi gleng gzhi dang nad med pa dang nad med pa'i thabs shes par bya ba dang / sems can gyi nad rnam pa sna tshogs zhi bar bya ba'i phyir tshol bar byed do/ /bzo'i las kyi gnas rig pa byang chub sems dpa' tshol bar byed de/ ci'i phyir zhe na/ tshegs chung ngu sha thang ba med par longs spyod bsgrub par bya ba dang / longs spyod dang ldan zhing bzo'i gnas la mkhas pas 'jig rten pa rnams kyis bdag la bkur bar bya ba dang / longs spyod kyi sgo nas 'jig rten pa rnams la phan par bya ba'i phyir tshol bar byed do/ /nang rig pa ni bdag nyid shes par byed do zhes bya ba la/ nang rig pa byang chub sems dpa' tshol bar byed de/ ci'i phyir zhe na/ bdag nyid kyis 'phags pa'i lam dang / de kho na phyin ci ma log par shes pas nyon mongs pa spang bar bya ba dang / byas pa chud zos pa dang / ma byas pa 'ong ba med pa phyin ci ma log par shes par bya ba dang / gzhan la'ang mngon par rgya cher bstan pa'i phyir tshol bar byed do/ /khams rgyas pa btsal ba la tshigs su bcad pa gsum ste zhes bya ba la/ bla na med pa'i rigs la byang chub tu 'tshang rgya ba'i rigs dang / sa bon nam/ pha rol tu phyin pa drug gi rigs dang / sa bon la khams zhes bya ste/ khams de dag ji ltar rgyas shing brtas par 'gyur ba bstan pa la tshigs su bcad pa bcu gsum gyis bstan to zhes bya ba'i don to/ /pha rol tu phyin pa rnams yongs su bskang ba'i phyir/ pha rol tu phyin pa rnams dang ldan pa'i yid la byed pa gang yin pa de nyid khams rgyas par 'gyur ro zhes bya ba la/ ji ltar na pha rol tu phyin pa'i khams rgyas par 'gyur zhe na/ pha rol tu phyin pa drug yongs su rdzogs par bya ba'i phyir pha rol tu phyin pa drug dang ldan par yid la byed pa logs nas 'byung ba rnams ltar yid la byas na de nyid kyis pha rol tu phyin pa'i khams dang / sa bon rgyas shing brtas par 'gyur ro zhes bya ba'i don to/ /de ni tshigs su bcad pa 'di dag gis bstan pa zhes bya ba la/ pha rol tu phyin pa'i khams rgyas par 'gyur ba yid la byed pa yang tshigs su bcad pa bcu gsum gyis bstan to zhes bya ba'i don to/ /rgyu dmigs nas ni dga' ba dang / / gnas la de yi rjes dran dang / /'bras bu thun mong 'dod pa dang / /ji ltar byang chub mos pa'o/ /zhes bya ba la/ rgyu dmigs nas dga' ba yid la byed pa dang / gnas la de'i rjes su dran pa yid la byed pa dang / 'bras bu'i thun mong 'dod pa yid la byed pa dang / ji ltar byang chub tu mos pa yid la byed pa ste/ de ltar yid la byed pa nas pha rol tu phyin pa rnams kyi khams rgyas par 'gyur ro zhes bya ba'i don to/ /de yang rgyu rtogs pas dga' ba yid la byed pa nas/ bdag mchog tu 'dzin pa yid la byed pa'i bar du ste zhes bya ba la/ pha rol tu phyin pa'i khams rgyas par 'gyur ba'i yid la byed pa yang / rgyu rtogs pas dga' ba yid la byed pa nas brtsams te/ bdag tu mchog tu 'dzin pa yid la byed pa 'jug pa'i gnas 'byung ba'i bar dag ltar yid la byas nas pha rol tu phyin pa'i khams rgyas par 'gyur ro zhes bya ba'i don to/ /rigs la gnas pa'i byang chub sems dpa' dang por bdag nyid pha rol tu phyin pa rnams kyi rigs su mthong nas rgyu rtogs pa'i dga' bas pha rol tu phyin pa'i khams rgyas par byed do zhes bya ba la/ bla na med pa'i byang chub tu 'tshang rgya ba'i rigs dang / sa bon nam pha rol tu phyin pa'i rigs dang / sa bon dang ldan pa'i byang chub sems dpa' des dang por bdag nyid la mngon par 'tshang rgya ba'i skal ba yod dam med pa dang / pha rol tu phyin pa drug gi rigs dang / sa bon yod dam med ces brtags na rigs dang sa bon yod par mthong ngo / /de ltar rgyu yod par mthong nas/ yang nas yang du dga' ba skyes te/ de ni rgyu dmigs nas dga' ba yid la byed pa zhes bya'o/ /de ltar rgyu yod par rtogs shing rgyu yod par mthong nas dga' ba skyes nas kyang pha rol tu phyin pa'i khams rgyas par byed do zhes bya ba'i don to/ /rigs la gnas nas bla na med pa yang dag par rdzogs pa'i byang chub tu sems bskyed pas de bas na de'i 'og tu gnas pa de'i rjes su dran pa yid la byed pa'o zhes bya ba la/ bla na med pa'i byang chub tu 'tshang rgya ba'i sa bon dang / pha rol tu phyin pa drug gi sa bon yod par mthong ba ni rigs la gnas pa zhes bya'o/ /sa bon dang rigs yod par mthong nas de'i 'og tu bdag dang gzhan gyi phyir byang chub kyi sems skyed par byed do/ /byang chub tu sems bskyed pa ni gnas la rjes su dran pas yid la byed pa zhes bya ste/ rjes su dran pa'i sgra ni dran pa dang shes rab gnyis la bya'o/ /de la dran pas ni gong du bshad ma thag pa'i rigs yod pa ma brjed/ shes rab kyis ni byang chub du sems bskyed pa mthong ngo / /de yang thabs ji ltar nyid la byed ce na/ de'i phyir byang chub sems dpa' de bdag la pha rol tu phyin pa rnams kyi gnas su gyur pa ni zhes bya ba la sogs pa smos te/ byang chub tu sems bskyed pa byang chub sems dpa' de 'di snyam du sems te byang chub kyi sems kyi gnas ni rigs yin la/ pha rol tu phyin pa rnams kyi gnas dang rten ni byang chub kyi sems yin par mthong nas yang 'di snyam du yid la byed pa de pha rol tu phyin pa'i gnas su gyur pa byang chub kyi sems bdag gis bskyed de bdag la yod pas na gdon mi za bar bdag gis pha rol tu phyin pa 'di dag rgyas shing brtas pa dang / rdzogs par 'gyur ro snyam du yid la byed do/ /yid la byed pa des kyang khams rgyas par 'gyur ro zhes bya ba'i don du sems bskyed nas pha rol tu phyin pa drug po rnams bdag dang pha rol gyi don du sbyor bas/ 'bras bu mtshungs par 'dod pa yid la byed pa ste zhes bya ba la/ rigs la gnas pas byang chub tu sems bskyed nas pha rol tu phyin pa drug la spyod cing spyod par byed de/ de'ang gang gi don du sbyor bar byed ce na bdag dang pha rol gyi don du sbyor bar byed do/ /ji ltar bdag dang pha rol gyi don du sbyor bar byed pa ni 'bras bu mtshungs par 'dod pa yid la byed pa zhes bya ste/ des kyang pha rol tu phyin pa'i khams rgyas par 'gyur ro zhes bya ba'i don to/ /'bras bu mtshungs par 'dod pa ji ltar yid la byed ce na/ de'i phyir/ pha rol tu phyin pa 'di dag gzhan dang thun mong du gyur cig /gzhan du ma gyur cig ces mngon par 'du byed do zhes bya ba smos te/ bdag gis pha rol tu phyin pa drug po 'di dag spyad pa dang / pha rol tu phyin pa drug po spyad pa'i 'bras bu longs spyod chen po la sogs pa yang sems can dang bdag thun mong du spyod par gyur cig /gzhan du bdag 'ba' zhig spyod par ma gyur cig ces sems la sems shing mngon par 'du byed do/ /de bas na 'bras bu mtshungs par 'dod pa'i yid la byed par 'dod pa zhes bya'o/ /bdag gang gzhan gyi don la rab tu zhugs nas/ nyon mongs pa med pa'i thabs de kho na nyid kyi don rtag tu rtogs par bya ba'i phyir/ de'i 'og tu ji ltar byang chub la mos pa yid la byed pa ste zhes bya ba la/ bdag dang gzhan gyi don du pha rol tu phyin pa drug la zhugs pas kyang nyon mongs pas bcings nas bdag dang gzhan gyi don spyod mi nus pas de bas na nyon mongs pa med par 'gyur ba'i thabs de kho na'i don rtag tu rtogs par bya dgos so/ /ji ltar na de kho na'i don rtag tu rtogs par bya zhe na/ ji ltar pha rol tu phyin pa spyad pa rnams bla na med pa'i byang chub du bsngos te/ de thob par bya ba'i phyir mos pa yid la byas nas de rtogs par 'gyur ro/ /de bas na de'i 'og tu ji ltar byang chub la mos pa yid la byed pa ni bshad de/ yid la byed pa des kyang pha rol tu phyin pa'i khams rgyas par byed do zhes bya ba'i don to/ /de bzhin du thams cad rim bzhin du shes par byed do zhes bya ba la/ ji ltar gong du rigs la gnas pas byang chub du sems bskyed par bya'o zhes bshad do/ /byang chub tu sems bskyed nas bdag dang gzhan gyi don du pha rol tu phyin pa drug sbyor zhing 'bras bu thun mong du 'dod par yid la bya'o zhes bshad do/ /bdag dang gzhan gyi don la zhugs pas kyang de'i 'og tu kun nas nyon mongs pa med pa'i thabs de kho na rtogs par bya ba'i phyir byang chub la mos pa yid la bya'o zhes bshad de/ rim pa de ltar bshad pa bzhin du yid la byed pa 'og nas 'byung ba thams cad la yang 'di'i 'og tu 'di bshad par rigs zhes sngar bshad pa bzhin du rim par sbyor bar bya'o zhes bya ba'i don to/ /ji ltar byang chub la mos pa yid la byed pa don rgyas par bstan pa'i phyir/ ji ltar sangs rgyas bcom ldan 'das kyis pha rol tu phyin pa mngon par sangs rgyas pa zhes bya ba la sogs pa smos so/ /ji ltar 'das pa'i de bzhin gshegs pa rnams kyis pha rol tu phyin pa drug spyad nas bla na med pa'i byang chub tu mngon par sangs rgyas par 'gyur ba dang zhes bya ba'i don to/ /mngon par sangs rgyas par 'gyur ba dang zhes bya ba ni ji ltar da ltar gyi sangs rgyas bcom ldan 'das kyis pha rol tu phyin pa drug spyad nas bla na med pa'i byang chub du mngon par sangs rgyas pa dang zhes bya ba'i don to/ /mngon par sangs rgyas par 'byung ba zhes bya ba ni ji ltar ma 'ongs pa'i de bzhin gshegs pa rnams kyis pha rol tu phyin pa drug spyad nas bla na med pa'i byang chub tu mngon par 'tshang rgya bar 'gyur ro zhes bya ba'i don to/ /de ltar bdag kyang mos so zhes mngon par 'du byed pa'i phyir ro zhes bya ba la/ ji ltar dus gsum gyi de bzhin gshegs pas pha rol tu phyin pa drug spyad nas mngon par sangs rgyas pa de bzhin du bdag gis kyang pha rol tu phyin pa drug spyod pas mngon par sangs rgyas par gyur cig ces bsngo zhing sems la mngon par 'du byed de/ de ni ji ltar byang chub la mos pa yid la byed pa zhes bya'o/ /rnam pa bzhi pa'i mthu 'di yis/ /bdag dang mi skyo nges pa des/ /mi mthun dang ni gnyen po la/ / sgrub pa dag ni rnam bzhi'o/ /zhes bya ba la/ gzhan yang mthu'i dga' ba yid la byed pa dang / bdag dang sems can smin par bya ba la nges par mi skyo ba yid la bya ba mi mthun pa dang gnyen po sgrub pa yid la byed pa rnam pa bzhi ste/ yid la byed pa de dag gis kyang pha rol tu phyin pa'i khams rgyas par byed do zhes bya ba'i don to/ /gong du bdag dang gzhan gyi don la zhugs pas kun nas nyon mongs pa med par bya ba'i thabs de kho na nyid kyi don rtogs par bya ba'i phyir byang chub tu mos par bya'o zhes bshad do/ /de la byang chub tu mos pa'i rjes la mthu'i dga' ba yid la byed pa'i skabs bshad cing 'brel bas na/ de ltar kun nas nyon mongs pa med kyang mthu dang mi ldan na ni bdag dang gzhan gyi don sgrub mi nus kyi mthu dang ldan na gdod sgrub nus pas na byang chub la mos pa'i 'og tu mthu'i dga' ba yid la byed pa bstan par 'brel to/ / de la pha rol tu phyin pa drug spyod pa'i dus na bdag la mthu rnam pa bzhi yod par mthong nas dga' ba ni mthu'i dga' ba yid la byed pa zhes bya ste mthu rnam pa bzhi ni 'og nas 'byung ngo / /de ltar mthu dang ldan na bdag sangs rgyas kyi chos yongs su smin par bya ba dang / sems can yongs su smin pa la skyo ba med de/ de bas na de'i 'og tu nges par mi skyo ba'i yid la byed pa bshad do/ /de ltar skyo ba med na bla na med pa'i byang chub thob par bya ba'i phyir/ pha rol tu phyin pa'i mi mthun pa'i phyogs ser sna la sogs pa spang ba dang / gnyen po sbyin pa la sogs pa sgrub pa yid la byed pa rnam pa bzhi yid la byed do/ /de bas na nges par mi skyo ba yid la byed pa'i rjes la mi mthun pa dang / gnyen po sgrub pa yid la byed pa bzhi bstan to/ /mthu rnam pa bzhi bstan pas dga' bas na/ mthu'i dga' ba yid la byed pa dang zhes bya ba la pha rol tu phyin pa drug po spyod pa'i tshe/ bdag nyid la mthu rnam pa bzhi yod par mthong nas dga' ba ni mthu'i dga' ba yid la byed pa zhes bya'o zhes bya ba'i don to/ /mthu rnam pa bzhi ni mi mthun pa'i phyogs spangs pa dang zhes bya ba la pha rol tu phyin pa drug gi mi mthun pa'i phyogs ni ser sna dang / ngan pa'i ngang tshul dang / khong khro ba la sogs pa ste/ sbyin pas ni ser sna sel nus par mthong / tshul khrims kyis ni ngan pa'i ngang tshul gyi dri ma sel nus par mthong / bzod pas ni khong khro ba sel nus par mthong / brtson 'grus kyis ni le lo sel nus par mthong / bsam gtan gyis ni sems g.yeng ba sel nus par mthong / shes rab kyis ni rtag pa dang chad par 'dzin pa la sogs 'chal ba'i shes rab sel nus par mthong ste/ 'di ni mthu rnam pa gcig go/ /tshogs smin pa dang zhes bya ba la/ pha rol tu phyin pa drug spyod pa ni bsod nams dang ye shes kyi tshogs bsags shing smin par mthong ste/ ji lta zhe na/ sbyin pa dang / tshul khrims dang / bzod pa dang gsum spyad pas ni bsod nams kyi tshogs sogs par mthong / bsam gtan dang shes rab gnyis spyad pas ni ye shes kyi tshogs sogs par mthong / brtson 'grus spyad pas ni gnyis ka'i tshogs bsags pa mthong ba ste/ 'di ni mthu rnam pa gnyis so/ /bdag dang pha rol la phan btags pa dang zhes bya ba la sogs pa pha rol tu phyin pa drug spyod pa na/ bdag dang gzhan la phan 'dogs par mthong ste/ ji lta zhe na/ nam sbyin pa gtong ba'i dus na/ sbyin pa btang bar dga' ba dang / sbyin pa btang ba dang / btang nas 'gyod pa med de/ dus gsum du yang dga' bas ni bdag la phan btags so/ /bza' ba dang bgo ba la sogs pa'i zang zing gis phan btags te phongs pa med par byas pas ni gzhan la phan btags so/ /tshul khrims kyi pha rol tu phyin pa la yang ngan pa'i ngang tshul gyis ma byin par len pa dang / mi tshangs par spyod pa la sogs pa'i rgyu las byung ba'i brdeg pa dang bcing ba la sogs pa med par gyur pas bdag la phan btags so/ /gzhan gyi srog dang nor dang chung ma la gnod pa ma byas pas gzhan la phan btags so/ /bzod pa'i pha rol tu phyin pa la yang bzod pa la gnas na zhe sdang gi mes sems ma dkrugs pas na sems bde ba'o/ /sems bde na sems kyi rjes su lus 'brang ba'i phyir lus kyang bde bas bdag la phan btags so/ /gnod pa byed pa la lan ma byas pas gzhan la phan btags so/ /brtson 'grus la nyan pa dang / bsam pa la sogs pa'i brtson 'grus spyad pas tshe 'dir dge ba rgyun du 'phel ba'i phyir bdag la phan btags so/ /sems can rnams kyi las su bya ba rnams kyi grogs byas pas gzhan la phan btags so/ /bsam gtan la yang rtog pa dang dpyod pa'i ting nge 'dzin la gnas pa nyon mongs pa zhi bar byed pa'i phyir bdag la phan btags so/ /bsam gtan gyi mthus lo nyes dang nad la sogs pa zhi bar byed pas gzhan la phan btags so/ /shes rab kyis kyang shes bya'i chos thams cad ji lta ba bzhin du shes te sems kyi rgyud la ma rig pa'i mun pa bsal bas na bdag la phan btags so/ /shes rab kyi chos phyin ci ma log par bshad cing sems can gyi the tshom bsal nas gzhan la phan btags te/ 'di ni mthu rnam pa gsum pa'o/ /ma 'ongs pa'i tshe rnam par smin pa'i 'bras bu dang rgyu 'dra ba'i 'bras bu smin pa'o zhes bya ba la pha rol tu phyin pa drug la spyad na/ sbyin pa'i pha rol tu phyin pa la spyad pas na ma 'ongs pa na longs spyod chen por 'gyur/ tshul khrims kyis ni lha dang mi'i lus thob par 'gyur/ bzod pas ni 'khor g.yog phun sum tshogs par 'gyur/ brtson 'grus kyis ni las kyi mtha' thams cad 'grub par 'gyur/ bsam gtan gyis ni nad med par 'gyur/ shes rab kyis ni rig pa'i gnas thams cad la mkhas par 'gyur te/ 'di ni rnam par smin pa'i 'bras bu'o/ /tshe rabs gang dang gang du skyes par smin par byed pa la dga' bas na shes rab sgrub pa la dga' bas ni rgyu 'dra ba'i 'bras bu ste/ 'di ni mthu rnam pa bzhi pa'o/ /nges par mi skyo ba yid la byed pa ni/ sems can thams cad dang bdag sangs rgyas kyi chos sbyin pa las brtsams nas zhes bya ba la/ bsdu ba'i dngos pos sems can yongs su smin par bya ba dang / dge ba'i bshes gnyen la bsten nas dam pa'i chos nyan pa dang / bsam pa la sogs pa'i sgo nas bdag nyid sangs rgyas kyi chos yongs su smin par byas pa las brtsams te/ sems la skyo ba med pa ni nges par mi skyo ba yid la byed pa zhes bya'o/ /ci'i phyir nges par mi skyo ba yid la byed ce na/ de'i phyir/ sems can gyi log par spyod pa thams cad dang / sdug bsngal thams cad byung yang nges par mi skyo bar mngon par byed pa'i phyir ro zhes smos te/ sems can yongs su smin par byed pas na/ yang sems can la phan btags pa dag gnod par byed pa dang / nyes pa med par yang nyes par byed la/ sems can gyi log par spyod pa thams cad kyis skyo ba med cing sems can mi gtong ba dang / bdag nyid sangs rgyas kyi mos pa yongs su smin par bya ba'i phyir dge ba'i bshes gnyen las dam pa'i chos nyan pa dang / sems pa la sogs pa byed pa'i tshe na phyi'i gnod pa grang ba dang / tsha ba la sogs pa byung ba dang / nang gi gnod pa bkres pa dang / skom pa la sogs pa byung yang mnyan pa la sogs pa mi btang ngo snyam du sems la mngon par 'du byed pas ni nges par mi skyo ba yid la byed pa zhes bya'o/ /byang chub mchog thob par bya ba'i phyir mi mthun pa dang / gnyen po sgrub pa yid la byed pa rnam pa bzhi ste zhes bya ba la/ bla na med pa'i byang chub thob par bya ba'i phyir sbyin pa'i mi mthun pa ser sna nas/ shes rab kyi mi mthun pa 'chal ba'i shes rab kyi bar spangs pa dang / gnyen po sbyin pa nas shes rab kyi bar dag sgrub par yid la bya ba rnam pa bzhi yod do zhes bya ba'i don to/ /sbyin pa la sogs pa mi mthun pa ser sna la sogs pa bshags pa dang zhes bya ba la/ sbyin pa'i mi mthun pa'i phyogs ser sna nas shes rab kyi mi mthun pa'i phyogs 'chal ba'i shes rab kyi bar dag ni sdig pa mi dge ba'i chos zhes bya ste/ de dag byung na yang so sor bshags par bya'o zhes bya ba'i don to/ /gnyen po sbyin pa la sogs pa la rjes su yi rang zhes bya ba la ser sna la sogs pa'i gnyen po ni sbyin pa nas shes rab kyi bar du ste/ de dag bdag dang gzhan gyi don spyad pa mthong nas dga' zhing mos pa skyes pa ni rjes su yi rang bar byed pa zhes bya'o/ /de'i ched kyis chos bstan pa'i phyir sangs rgyas rnams la gsol ba gdab pa dang zhes bya ba la/ pha rol tu phyin pa drug gi dbang du byas nas bshad pa'i chos ni de'i ched kyi chos zhes bya ste/ pha rol tu phyin pa drug gi chos mnyan cing bshad pa'i phyir/ de bzhin gshegs pa chos kyi 'khor lo bskor bar gsol ba 'debs pa ni sangs rgyas rnams la gsol ba gdab pa zhes bya'o zhes bya ba'i don to/ /de dag kyang byang chub tu bsngo ba zhes bya ba la/ sdig pa bshags pa dang / rjes su yi rang bar bya ba'am/ gsol ba gdab pa dag gis bla na med pa'i byang chub thob par gyur cig ces bsngo ba ni de dag kyang byang chub tu bsngo ba zhes bya ste/ tshig de rnams kyang mdo sde dag las sdig pa thams cad slar bshags pa dang / dge ba thams cad la rjes su yi rang ba dang / sangs rgyas thams cad la gsol ba 'debs pa dang / bdag bla na med pa'i byang chub tu sangs rgyas par shog shig ces gsungs pa'i tshigs bcad dang rim pa bzhin du sbyar ro/ /dang ba yang dag blangs pa dang / /sbyin sred dag ni gzhan dag la/ /go cha smon lam dang ba ni/ /mngon par dga' ba yid la byed/ /ces bya ba la/ gzhan la dbang ba yid la byed pa dang / yang dag par blang ba yid la byed pa dang / gzhan dag la sbyin pa sred pa yid la byed pa dang / go cha yid la byed pa dang / smon lam yid la byed pa dang / mngon par dga' ba yid la byed pa ste/ yid la byed pa de dag gis kyang pha rol tu phyin pa'i khams rgyas par byed do zhes bya ba'i don to/ /dad pa'i mthu las brtsams nas pha rol tu phyin pa'i ched kyi don la dang bar yid la byed pa'o zhes bya ba la/ pha rol tu phyin pa la rgyur gyur pa la ni chos zhes bya'o/ /pha rol tu phyin pa drug gi 'bras bu la ni don zhes bya'o/ /yang na pha rol tu phyin pa drug 'chad pa la ni chos zhes bya'o/ /des mtshon par bya ba'i dngos po la ni don zhes bya ste/ dang ba dang dang bas rgyu byas nas pha rol tu phyin pa drug po 'di dag rgyur gyur pa spyad na ni de'i 'bras bu gdon mi za bar 'thob par 'gyur ro zhes yid ches pa ni dang ba'i yid la byed pa zhes bya'o/ /chos tshol ba las brtsams nas yang dag par len par byed pa ste zhes bya ba la/ chos tshol ba'i dbang du byas nas dge ba'i bshes gnyen la brten te/ pha rol tu phyin pa'i don dang / chos la sogs pa nyan cing bsams pa ni yang dag par len pa yid la byed pa zhes bya ba'i don to/ /ji ltar yang dag par len ce na/ de'i phyir chos de'i de dag nyid mi spong ba'i tshul gyis gzung bas so zhes bya ba la/ pha rol tu phyin pa'i chos de dag nyid la skur pa mi 'debs shing nyan pa dang / sems pa la sogs pa mi 'dor ba ni mi spong ba'i tshul gyis gzung ba zhes bya ste/ de dag yang dag par len pa yid la byed pa'o/ /bshad pa las brtsams nas sbyin pa la sred pa yid la byed pa ste/ gzhan la chos dang don rab tu bsgrags pa'i phyir ro zhes bya ba la bshad pa'i don du byas nas sems can gzhan la pha rol tu phyin pa drug 'chad par 'dod pa ni sbyin pa la sred pa yid la byed pa zhes bya ste/ ji ltar 'chad ce na/ sems can gzhan dag la pha rol tu phyin pa drug gi chos dang don phyin ci ma log par sgrogs shing 'chad pa'i phyir ro/ /bsgrubs pa las brtsams nas go cha'i yid la byed pa ste/ sbyin pa la sogs pa yongs su rdzogs par bya ba'i phyir go cha bgos pa'i phyir ro zhes bya ba la pha rol tu phyin pa drug bsgrub pa'i ched du byas nas de drug bsgrub pa ni go cha yid la byed pa zhes bya ste/ ji ltar sgrub ce na/ pha rol tu phyin pa drug rdzogs shing mthar phyin par bya ba'i phyir sbyin pa gtong zhing go gyon nas shes rab sgrub cing go gyon par byed pa'i phyir ro/ /smon lam yid la byed pa ni de rdzogs pa'i rkyen dang ldan pa'i phyir ro zhes bya ba la/ pha rol tu phyin pa drug rdzogs par bya ba'i phyir tshe rabs gar skyes gar skyes kyang pha rol tu phyin pa drug rdzogs par byed pa'i dge ba'i bshes gnyen dang / nye du gnyen bshes dang lus dang longs spyod la sogs pa'i rgyu rkyen dang ldan par gyur cig ces smon lam 'debs pa ni smon lam yid la byed pa zhes bya ste/ mngon par dga' ba yid la byed pa ni kye ma sbyin pa la sogs pa sgrub pa dang / yang dag par sgrub par shog shig ces smon par dga' ba'o zhes bya ba la/ pha rol tu phyin pa ma bsgrubs par ni mngon par 'tshang rgya bar mi 'gyur bas na gar skyes gar skyes kyang pha rol tu phyin pa drug sgrub dgos pa'i phyir/ e ma tshe rabs de dang de dag tu pha rol tu phyin pa drug sgrub nus pa'i rang bzhin du gyur na legs so snyam du sems pa ni mngon par dga' ba yid la byed pa zhes bya'o/ /de ltar yid la byed pa de gsum gdams pa dang rjes su bstan pa la sbyar bar bya'o zhes bya ba la/ bsgrub pa'i rjes la gdams pa dang / rjes su bstan pa bshad de/ 'og nas kyang / de bzhin rab tu bsgrubs pa dang / /yang dag gdams dang bstan pa'o/ /zhes 'byung ba'i phyir ro/ /de la go cha dang / smon lam dang / mngon par dga' ba'i yid la byed pa gsum ni gdams pa dang bstan pa'i skabs dang sbyar te/ ji lta zhe na/ gdams pa dang bstan pa thob pa'i phyir go cha gyon par byed do/ /smon lam 'debs so/ /mngon par dga' bar byed do/ /e ma'o 'di ltar bdag la ni sangs rgyas dang byang chub sems dpa' rnams kyis gdams pa dang bstan pa ston par gyur cig ces smon lam 'debs shing de ltar dga' bar byed pa'i phyir ro/ /thabs dang ldan pa'i las yid la byed pa ni rtog pa dag gis rnam pa thams cad sbyin pa la sogs pa la sbyor zhing yid la byed pas so zhes bya ba la/ gdams pa dang bstan pa'i 'og tu thabs dang ldan pa'i yid la byed pa bshad do/ /de la thabs dang ldan pa'i yid la byed pa zhes bya ba ni bdag gis lag nas sbyin pa la sogs pa ma byas su zin kyang pha rol tu phyin pa drug spyod pa dag mthong na yid kyi rtogs pas rjes su yi rang ba dang / mngon par dga' ba dang / ro myong bar byed pa'i sgo nas pha rol tu phyin pa rnams rdzogs par bya ba la sbyor zhing yid la rtog pa ni thabs dang ldan pa'i las yid la byed pa zhes bya'o/ /mthu thob pas ni spro ba ste/ /sbyin pa la sogs drug stug po/ /yongs su sbyin dang mchod pa ste/ /brten pa dang ni snying brtse ba'o/ /zhes bya'o/ /thabs dang ldan pa'i las yid la byed pa'i 'og tu spro ba yid la byed pa bshad pa'i skabs yin pas de bshad do/ /spro ba yid la byed pa la yang rnam pa bzhi yod de/ de la sbyin pa la yang sbyin pa'i sbyin pa nas shes rab kyi sbyin pa'i bar du drug yod pa dang / shes rab la yang shes rab kyi sbyin pa nas shes rab kyi shes rab kyi bar du drug drug yod do/ /pha rol tu phyin pa gcig cing yang pha rol tu phyin pa drug drug yod pas na sbyin pa la sogs pa drug drug stug po zhes bya ste/ gcig pa drug yod pa'i mthu thob pa ni spro ba yid la byed pa dang po'o/ /pha rol tu phyin pa drug nyid bsdu ba'i dngos po'i tshul du bzhag nas sems can yongs su smin par byed pa ni spro ba yid la byed pa gnyis pa'o/ /pha rol tu phyin pa drug las sbyin pa'i pha rol tu phyin pas ni rnyed pa dang bkur sti de bzhin gshegs pa la mchod pa byed/ pha rol tu phyin pa lhag ma lngas ni sgrub pas de bzhin gshegs pa la mchod pa byed pa 'di ni spro ba yid la byed pa gsum pa'o/ /pha rol tu phyin pa phyin ci ma log par ston pa'i dge ba'i bshes gnyen btsal ba'i phyir dge ba'i bshes gnyen la brten pa ni spro ba yid la byed pa bzhi pa'o/ /snying brtse ba yid la byed pa rnam pa bzhi ste/ byams pa dang snying rje dang dga' ba dang btang snyoms te/ de dag gi mtshan nyid zhib tu ni 'og nas bshad par bya'o/ /sbyin pa la sogs pa drug sbyin pa'i sbyin pa nas shes rab kyi bar du mthu rnyed pa'o zhes bya ba la/ sbyin pa la yang drug ste/ sbyin pa'i sbyin pa nas shes rab kyi sbyin pa'i bar du'o/ /de ltar drug yod pas na sdug pa zhes bya ste/ de lta bu'i mthu rnyed pa ni spro ba yid la byed pa dang po'o/ /de ltar sbyin pa la ji ltar drug yod ce na/ 'di ltar dge ba'i rang bzhin gyi phung po lngas ni sbyin pa zhes bya'o/ /sbyin pa'i rang bzhin gyi phung po lngas ni phyi dang nang gi dngos po sbyin par 'dod pa ni sbyin pa'i sbyin pa zhes bya'o/ /yang na nor dang 'bru la sogs pa la sbyin pa zhes bya ste/ de nam gzhan la gtong zhing sbyin pa'i sbyin pa zhes bya'o/ /sbyin pa'i tshul khrims ji lta bu zhe na nam sems can rnams tshul khrims la bkod pa'am/ gzhan yang tshul khrims bshad pa'i tshul khrims sbyin pa zhes bya ste/ de bzhin du tshul khrims la sogs pa rnam pa drug la yang sbyar ro zhes bya ba la/ sbyin pa la drug yod pa de bzhin du tshul khrims nas shes rab kyi bar du re re la yang drug drug yod par sbyar ro zhes bya ba'i don to/ /ji lta zhe na/ tshul khrims kyi sbyin pa dang zhes bya ba nas tshul khrims kyi shes rab ces bya ba'i bar du sbyar ro/ /de la gzhan gyi nor dang srog dang chung ma la gnod pa ma byas te/ mi 'jigs pa sbyin pa ni tshul khrims kyi sbyin pa'o/ /srog gcod pa dang ma byin par len pa la sogs pa bsdams te/ tshul khrims bsrungs pa ni tshul khrims zhes bya'o/ /tshul khrims la gnas pa rnams gshe ba las slar mi gshe ba dang / brdeg pa las slar mi brdeg pa la sogs pa byed pa ni tshul khrims kyi bzod pa zhes bya'o/ /tshul khrims rgyun du bsrungs pa ni tshul khrims kyi brtson 'grus zhes bya'o/ /rtag tu tshul khrims la sems rtse gcig tu 'jog pa ni tshul khrims kyi bsam gtan zhes bya'o/ /ltung ba mi ltung ba'i bye brag phyed pa ni tshul khrims kyi shes rab ces bya'o/ /bzod pa la yang bzod pa la gnas pa rnams brdeg pa la slar mi brdeg pa la sogs pa mi 'jigs pa sbyin par byed pa ni bzod pa'i sbyin pa zhes bya'o/ /bzod pa la gnas pa rnams srog gcod pa la sogs pa'i las mi byed pa ni bzod pa'i tshul khrims so/ /gzhan gyis gnod pa byas kyang zhe mi sdang ba ni bzod pa'i bzod pa'o/ /rtag tu bzod pa'i sems 'ba' zhig 'byung ba ni bzod pa'i brtson 'grus so/ /zha sdang gi sems ma g.yengs pa ni bzod pa'i bsam gtan no/ /sems can gzhan la gnod pa byas na ma 'ongs pa na sdug bsngal myong bar mthong ba ni bzod pa'i shes rab bo/ /brtson 'grus la yang sems can gzhan gyi grogs byas shing btang ba ni brtson 'grus kyi sbyin pa'o/ /dge ba la brtson 'grus rtsom pa mi dge ba la mi 'jug pa ni brtson 'grus kyi tshul khrims so/ /brtson 'grus rtsom pa'i dus na grang ba dang tsha ba la sogs pa'i nyams su len pa ni brtson 'grus kyi bzod pa'o/ /dge ba la sems spro ba ni brtson 'grus kyi brtson 'grus so/ /le los sems ma g.yengs pa ni brtson 'grus kyi bsam gtan zhes bya'o/ /brtson 'grus brtsams pa rnams dge ba dang mi dge ba'i mtshan nyid phyed par shes par 'gyur te/ de ni brtson 'grus kyi shes rab bo/ /bsam gtan la yang bsam gtan gyi mthu lo nyes dang nad la sogs pa med par byas te/ gnod pa bsal nas phan pa sbyin pa ni bsam gtan gyi sbyin pa'o/ /sems rtse gcig pa'i tshe srog gcod pa la mi rtog pa ni bsam gtan gyi tshul khrims so/ /bsam gtan pa rnams ni rtag tu sems 'jam pa ste/ zhe sdang gi 'khrug pa mi 'byung ba ni bsam gtan gyi bzod pa'o/ / sems rtse gcig pa rgyun du mi gtong ba ni bsam gtan gyi brtson 'grus so/ /dmigs par bya ba la sems rtse gcig pa ni bsam gtan gyi bsam gtan no/ /bsgom par bya ba'i chos sems la gsal ba ni bsam gtan gyi shes rab bo/ /shes rab la yang gzhan chos rnams phyin ci ma log par bshad pa ni shes rab kyi sbyin pa'o/ /shes rab can rnams blang ba dang spang bar bya ba rnams ngo shes pas spang bar bya ba la mi 'jug pa ni shes rab kyi tshul khrims so/ /chos kyi mtshan nyid ma nor ba la sems dga' ba ni shes rab kyi bzod pa'o/ /mnyan pa dang sems pa la sogs pa spro ba ni shes rab kyi brtson 'grus so/ /chos kyi mtshan nyid phyin ci ma log pa rnams la ma nor ba yin no snyam du sems g.yengs pa med pa ni shes rab kyi bsam gtan no/ /chos rnams kyi rang dang spyi'i mtshan nyid phyin ci ma log par shes pa ni shes rab kyi shes rab po/ /pha rol tu phyin pa rnams bsdu ba'i dngos po rnams kyis sems can yongs su smin pa'o zhes bya ba la/ pha rol tu phyin pa drug sbyin pa dang ngag snyan pa dang / don mthun pa dang don spyod bar spyod pa'i mtshan nyid du bzhag ste/ de dag gis sems can yongs su smin par byed pa ni spro ba yid la byed pa gnyis pa'o/ /pha rol tu phyin pa rnams ji ltar bsdu ba'i dngos po'i tshul du bzhag ce na/ pha rol tu phyin pa drug las sbyin pa ni sbyin pa nyid do/ /pha rol tu phyin pa drug nam gzhan la 'chad pa ni ngag snyan pa'o/ /pha rol tu phyin pa drug la sems can gzhan spyod du bkod pa ni don spyod pa'o/ /pha rol tu phyin pa drug po gang la sems can bkod pa'i pha rol tu phyin pa drug po de nyid la bdag nyid kyang spyod pa ni don mthun pa spyod pa'o/ /mchod pa ni sbyin pas ni rnyed pa dang bkur sti spyod pa'o/ /lhag ma rnams kyis ni sgrub pa'i mchod pa'o zhes bya ba la/ de bzhin gshegs pa la mchod pa rnam pa gnyis te/ zang zing gi mchod pa dang / sgrub pas mchod pa'o/ /zang zing gi mchod pa la yang rnam pa gnyis te/ rnyed pas mchod pa dang / bkur stis mchod pa'o/ /de la chos gos dang / lhung bzed 'bul ba ni rnyed pas mchod pa'o/ /phyag 'tshal ba dang bskor ba la sogs pa byed pa ni bkur stis mchod pa ste/ sbyin pas ni rnyed pa dang / bkur stis mchod pa byed do/ /tshul khrims nas shes rab kyi bar du lnga sgrub pas mchod pa ste/ 'di ni spro ba yid la byed pa gsum pa'o/ /phyin ci ma log pa'i pha rol tu phyin pa ston pa btsal ba'i phyir dge ba'i bshes gnyen la brten pa ste zhes bya ba la/ phyin ci ma log pa ni sbyin pa'i pha rol tu phyin pa phyin ci ma log pa nas shes rab kyi pha rol tu phyin pa phyin ci ma log pa'o/ /de la kha cig sbyin pa yin yang phyin ci log yod de/ shan pa la mtshon cha sbyin pa dang / smad 'tshong ma la nor sbyin pa lta bu'o/ /kha cig shes rab yin yang phyin ci log yod de/ mu stegs pa bdag dang rtag pa la sogs pa lta bu'o/ /de ltar na sbyin pa phyin ci ma log pa dang / shes rab phyin ci ma log par ston pa'i dge ba'i bshes gnyen btsal ba'i phyir de ston pa'i dge ba'i bshes gnyen gyi drung du 'gro ba dang / phyag 'tshal ba dang bskor ba la sogs pa'i bsnyen bkur byed pa ni bsten pa zhes bya ste/ 'di ni spro ba yid la byed pa bzhi pa'o/ /snying brtse ba yid la byed pa ni tshad med pa bzhi ste zhes bya ba la tshad med pa bzhi dang ldan pa'i sems la ni snying brtse ba yid la byed pa zhes bya'o zhes bya ba'i don to/ /sbyin pa la sogs pa'i stobs dang byams par byed pa dang zhes bya ba la/ byams pa ni sems can rnams bde ba dang ldan par gyur cig ces sems pa dang / byang chub sems dpa' rnams ni bde bar gyur cig ces sems par ma zad kyi bde ba la yang 'jog par mdzad do/ /de la sbyin pa la sogs pa'i pha rol tu phyin pa drug ni longs spyod la sogs pa 'grub par byed pa yin pas sbyin pa la sogs pa yang pha rol tu phyin pa drug bstabs te pha rol tu phyin pa drug la bkod pa ni sems can la byams par byed pa yin no zhes bya ba'i don to/ /ser sna la sogs pa dang ldan pa la snying brtse ba dang zhes bya ba la sems can rnams sdug bsngal ba dang bral bar gyur cig ces sems pa ni snying rje'o/ /ser sna la sogs pa pha rol tu phyin pa drug gi mi mthun pa'i phyogs ni dbul po la sogs pa'i sdug bsngal bar 'gyur ba'i rgyu yin pas ser sna la sogs pa dang ldan pa la byang chub sems dpa' snying rje skye ba'o/ / byang chub sems dpa' ni snying rje ba tsam du yang ma zad kyi/ ser sna la sogs pa'i chos 'dor du 'jug ste 'di ni snying rje'o/ /sbyin pa dang ldan pa la sogs pa'i sems can rnams la dga' bar byed pa dang zhes bya ba la/ sems can bde ba mthong nas sems la mos pa skyes pa la ni dga' ba zhes bya ste/ sems can rnams sbyin pa la sogs pa'i pha rol tu phyin pa drug spyod pa mthong nas dga' bar gyur pa ni dga' ba'o/ /de la nyon mongs pa med pa mos pa ni btang snyoms so zhes bya ba la/ btang snyoms kyi rang bzhin ni gang la yang chags pa dang zhe sdang med pa dang / sbyin pa la sogs pa longs spyod dang ldan nam/ bde bar gyur pa'i sems can rnams la yang 'dod chags skye bar ma gyur cig ces smon pa dang / longs spyod rnams phrogs nas sdug bsngal bar gyur ba'i sems can rnams la yang zhe sdang bar ma gyur cig ces sems pa ni btang snyoms so zhes bya ba'i don to/ /ma byas smad dang ngo tsha dang / /bgyid dang yul la dga' ba dang / /mi skyo ba dang 'god pa dang / /brjod pa yi ni blo gros te/ /zhes bya ba la/ gzhan yang ngo tsha ba yid la byed pa dang / dga' ba yid la byed pa dang / mi skyo ba yid la byed pa dang / 'god pa yid la byed pa dang / brjod pa yid la byed pa ste/ yid la byed pa de dag gis kyang pha rol tu phyin pa'i khams rgyas par 'gyur ro zhes bya ba'i don to/ /de la pha rol tu phyin pa ye ma byas pa dang / rdzogs par ma byas pa ni ma byas pa zhes bya'o/ /pha rol tu phyin pa la phyin ci log tu byas pa la ni smad pa byas pa zhes bya ste/ de ltar ye ma byas pa dang / rdzogs par ma byas pa dang / smad par byas na mtshar byas zhes ngo tsha zhing 'gyod pa ni ngo tsha ba yid la byed pa zhes bya'o/ /pha rol tu phyin pa drug la rgyun du spyad par bya'o snyam du sems spro ba'i dbang du byas nas sbyin pa la sogs pa pha rol tu phyin pa drug la rgyun du dmigs shing de 'ba' zhig la sems rtse gcig tu 'jog gi/ sems gzhan du ma g.yengs pa ni dga' ba yid la byed pa zhes bya'o/ /sbyin pa la sogs pa pha rol tu phyin pa drug la sbyor ba'i tshe/ spyod par mi 'dod pa'i sems skyo ba skyes na sems 'di ni bla na med pa'i byang chub thob par bya ba'i bar du gcod pa yin pas dgra yin no snyam pa'i 'du shes skye ba ni mi skyo ba yid la byed pa zhes bya'o/ /sems can gyi don du pha rol tu phyin pa drug dang 'brel pa'i chos ston pas skyob par bya'o snyam du sems shing pha rol tu phyin pa drug gi gtsug lag dang gzhung du 'dri zhing 'jog pa ni 'god pa yid la byed pa zhes bya ste/ dper na mdo sde'i rgyan 'di nyid kyi nang nas grangs dang mtshan nyid go rims dang zhes bya ba la sogs pa'i tshul du gtsug lag tu 'god pa'o/ /sems can so so'i snod dang sbyar nas sems can gang la pha rol tu phyin pa gang bshad par 'os pa'i sems can de la pha rol tu phyin pa de 'chad pa ni brjod pa yid la byed pa zhes bya'o/ /ngo tsha ba'i chos las brtsams nas zhes bya ba ni ngo tsha bas rgyu byas nas she'am/ ngo tsha ba'i dbang du byas nas zhes bya ba'i don to/ /ma byas pa'am zhes bya ba la/ /pha rol tu phyin pa drug thams cad nas thams cad du cung zad kyang ma byas pa'o/ /yongs su ma rdzogs pa'am zhes bya ba la/ sbyin pa ni rnam pa gsum ste/ zang zing dang mi 'jigs pa dang chos sbyin pa gsum las gnyis tsam byed kyi gsum char tshang bar mi byed pa'am/ zang zing sbyin pa las kyang cung zad tsam gtong gi kun mi gtong ba dang / mi 'jigs pa sbyin pa la yang snying nas skyabs mi byed kyi tshig tsam du byed pa dang / chos kyi sbyin pa la yang kha cig 'chad kyi kha cig mi 'chad de/ slob dpon bcabs pa ni yongs su ma rdzogs pa zhes bya'o/ /log par spyod pa zhes bya ba la/ sbyin pa'i bsngags pa tsam smra ba'i dngos po mi gtong ba dang / shan pa la mtshon sbyin par byed pa dang / smad 'tshong ma la nor sbyin pa dang / brkus nas sbyin pa dang g.yo dang sgyus byin pa ni log par sbyin pa zhes bya'o/ /ngo tsha nas zhes bya ba la/ de ltar ma byas pa dang / yongs su rdzogs par ma byas pa dang / smad par byas par mthong nas sems la gnod pa ni ngo tsha ba zhes bya'o/ /'jug pa dang zhes bya ba la/ de ltar ngo tsha nas ma byas pa dang / yongs su rdzogs par ma byas pa de spangs te/ byed pa dang yongs su rdzogs par byed pa la 'jug par byed do zhes bya ba'i don to/ /ldog pa'i phyir zhes bya ba la/ smad pa dang log par bya ba las ni ldog par bya ba'i phyir zhes bya ba'i don to/ /yun mi ring bar 'gyod par byed do zhes bya ba la/ gal te 'gyod pa zhig bskyed na yang rgyun du 'gyod pa bskyed par mi bya ste zhes bya ba'i don to/ /'gyod pa dang rgyun du ldan na dge ba nyid la 'jug par mi nus pas de bas na sbyin pa la sogs pa ma byas pa dang / smad pa byas pa na bdag gis sems can rnams la sbyin pa la sogs pa ma byas pa dang / smad pa byas pa ni mtshar byas so snyam thang cig gcig 'gyod pa bskyed nas 'gyod pa spong ngo / /de la de bas 'di ltar 'gyur te/ sbyin pa la sogs pa ye ma byas pa dang / rdzogs par ma byas nas 'gyod par gyur na 'gyod pa de bzlog ste/ sbyin pa la sogs pa byas pa dang / rdzogs par bya ba'i phyir gus par bya ba dang / rgyun du bsgrub pa la 'jug par bya'o/ /sbyin pa la sogs pa smad pa dang / log par byas pa la phyis log pa la 'jug par mi bya'o zhes ldog par bya ste/ de ltar na yang the tshom yang ldog par 'gyur ro/ /'jig rten rig par byas pa las brtsams nas brjod pa yid la byed pa ste zhes bya ba la/ sems can so so'i sems dang sbyar bas sems can gang la pha rol tu phyin pa gang bshad pa'i rig pa'i sems can de dag la pha rol tu phyin pa de 'chad pa ni brjod pa yid la byed pa zhes bya'o/ /don de nyid bstan pa'i phyir/ ston skyob de nyid ji ltar snod du gyur pa'i phyir 'jig rten la brjod par 'du byed pa'o zhes bya ba smos te/ pha rol tu phyin pa drug dang ldan pa'i gtsug lag byas pa de dag so so'i snod dang sbyar nas sems can gang la pha rol tu phyin pa gang bshad par 'os shing snod du gyur pa de la pha rol tu phyin pa 'chad de/ dper na sbyin pa'i pha rol tu phyin pa 'chad pa'i snod du gyur pa la sbyin pa'i pha rol tu phyin pa 'chad pa nas shes rab kyi pha rol tu phyin pa 'chad pa'o/ /sbyin pa la sogs brten nas su/ /byang chub 'gyur gyis dbang phyug min/ /zhes bya ba la brten pa'i yid la byed pa ni sbyin pa la sogs pa'i pha rol tu phyin pa drug la brten nas bla na med pa'i byang chub thob par 'gyur gyi/ dbang phyug dang gtso bo'ang tshangs pa la sogs pa la brten nas ni bla na med pa'i byang chub thob pa ma yin par khong du chud pa ni brten pa yid la byed pa zhes bya'o/ /skyon dang yon tan dag la yang / /gnyis po de ni rtog par 'gyur/ /zhes bya ba la/ rtog pa yid la byed pa ni ser sna la sogs pa la mi mthun pa'i phyogs la ni skyon du rtogs te/ dbul po la sogs par gyur par mthong sbyin pa la sogs pa gnyen po'i phyogs la ni yon tan du rtogs te/ phyug po la sogs par 'gyur bar mthong ba ni rtog pa yid la byed pa zhes bya'o/ /bsags pa dga' ba dran pa dang / /che ba'i don ni mthong ba dang / /rnal 'byor 'dod dang mi rtog pa/ /de 'dzin pa dang rkyen thob pa/ /zhes bya ba la/ zhes yang bsags pa dran nas dga' ba yid la byed pa dang / don chen po mthong ba yid la byed pa dang / 'dod pa yid la byed pa ste/ yid la byed pa de dag gis kyang pha rol tu phyin pa'i khams rgyas par byed do zhes bya ba'i don to/ /'dod pa yid la byed pa yang rnam pa bzhi ste/ rnal 'byor 'dod pa yid la byed pa dang / mi rtog pa 'dod pa yid la byed pa dang / de 'dzin pa yid la byed pa dang / rkyen thob pa yid la byed pa'o/ /bsags pa dran pas dga' ba yid la byed pa ni sbyin pa la sogs pa bsags nas bsod nams dang ye shes kyi tshogs bsags par mthong ba'i phyir ro zhes bya ba la/ sbyin pa nas shes rab kyi pha rol tu phyin pa'i bar drug bsags nas bsod nams dang ye shes kyi tshogs bsags pa mthong ba ni bsags pa mthong nas dga' ba yid la byed pa zhes bya'o/ /de la sbyin pa dang tshul khrims dang bzod pa gsum bsags pas ni bsod nams kyi tshogs su 'gyur/ bsam gtan dang shes rab ni ye shes kyi tshogs su 'gyur/ brtson 'grus ni gnyis ga'i tshogs su 'gyur ro/ /don mthong ba yid la byed pa ni sbyin pa la sogs pa byang chub kyi phyogs kyi dngos po'i don gyis byang chub chen po thob par mthong ba'i phyir ro zhes bya ba la/ rnam par mi rtog pa'i ye shes la ni byang chub chen po zhes bya'o/ /sbyin pa la sogs pa spyad nas bla na med pa'i byang chub kyi rgyu'i tshul gyis mjug tu bla na med pa'i byang chub thob par mthong ba ni don chen po mthong ba yid la byed pa zhes bya'o/ /rnal 'byor 'dod pa yid la byed pa ni lhag mthong dang zhi gnas sbyor ba bsgom par 'dod pa'i phyir ro zhes bya ba la/ pha rol tu phyin pa drug rdzogs par bya ba'i phyir/ zhi gnas dang lhag mthong zung du 'brel ba bsgom par 'dod pa ni rnal 'byor 'dod pa yid la byed pa zhes bya'o/ /mi rtog par 'dod pa yid la byed pa ni pha rol tu phyin pa yongs su rdzogs pa'i phyir thabs mkhas pa la 'dod pa'i phyir zhes bya ba la/ rnam par mi rtog pa'i ye shes ni pha rol tu phyin pa yongs su rdzogs par byed pa'i thabs yin no/ /de bas na pha rol tu phyin pa drug rdzogs par bya ba'i phyir rnam par mi rtog pa'i ye shes dang ldan par bya ba ni mi rtog par 'dod pa yid la byed pa zhes bya'o/ /yang na dang po sbyor ba'i dus na 'di snyam du sems te/ mi rtog rnam par mi rtog par pha rol tu phyin pa la 'jug par gyur cig ces smon lam btab sems la mngon par 'dus byas pa las mngon par sangs rgyas te/ rnam par mi rtog pa'i ye shes thob pa na mi rtog rnam par mi rtog par pha rol tu phyin pa rnams la 'jug par 'gyur te/ de ni mi rtog par 'dod pa yid la byed pa zhes bya'o/ /'dzin pa yid la byed pa ni pha rol tu phyin pa rnams kyi ched kyi chos dang don 'dzin pa'i phyir ro zhes bya ba dang / pha rol tu phyin pa drug 'chad pa'i chos dang / don sems la mi brjed par 'dzin pa ni yid la byed pa zhes bya'o/ /de la pha rol tu phyin pa rgyur gyur pa ni chos zhes bya'o/ /'bras bur gyur pa la ni don zhes bya'o/ /rkyen thob pa yid la byed pa ni pha rol tu phyin pa yongs su rdzogs pa dang / rjes su mthun pa'i yang dag pa'i smon lam mngon par 'du byed pa'i phyir ro zhes bya ba la/ tshe rabs gar skyes gar skyes kyang pha rol tu phyin pa drug rdzogs par 'gyur ba dang mthun pa'i dge ba'i bshes gnyen dang / nye du gnyen bshes dang / lus dang longs spyod dang ldan par gyur cig ces smon lam 'debs pa ni rkyen thob pa yid la byed pa zhes bya'o/ /rnam bdun phyin ci log 'dzin dang / /spangs pa'i mthu ni shes pa dang / /ngo mtshar dang ni ngo mtshar min/ /'du shes de bzhin rnam bzhi'o/ / zhes bya ba la/ pha rol tu phyin pa drug rnams bsgom pa cha phyin ci log tu 'dzin pa rnam pa bdun spong ba'i mthu mthong ba yid la byed pa dang / /ngo mtshar gyi 'du shes yid la byed pa bzhi dang / de bzhin du ngo mtshar ma yin pa'i 'du shes yid la byed pas kyang khams rgyas par 'gyur ro zhes bya ba'i don to/ /med pa la yod par 'dzin pa dang zhes bya ba la kun brtags kyi gang zag dang / kun brtags kyi chos ni med pa yin na de la dngos po yod par lta ba ni med pa la yod par 'dzin pa zhes bya ste/ 'di ni phyin ci log gcig go/ /nyes pa can la yon tan can du 'dzin pa dang zhes bya ba la/ 'khor ba'i chos ni nyes pa can yin te/ mi rtag pa dang sdug bsngal ba dang / mi gtsang ba dang bdag med pa'i phyir ro/ /de la rtag pa dang bde ba dang gtsang bar 'dzin pa ni yon tan du 'dzin pa ste/ 'di ni phyin ci log gnyis so/ /yon tan can la yon tan can ma yin par 'dzin pa dang zhes bya ba la/ mya ngan las 'das pa na nyon mongs pa dang / sdug bsngal thams cad spangs pas zhi ba dang / bde ba yin pa'i phyir yon tan can yin na de la byis pa rnams chad pa dang g.yang sar lta ba ni yon tan can ma yin pa zhes bya ste/ de ni phyin ci log gsum mo/ /'du byed thams cad la rtag pa dang bde bar 'dzin pa gnyis dang zhes bya ba la/ thams cad kyi sgra 'dir phyogs gcig tu drangs te 'dus ma byas bkol nas zag pa dang bcas pa'i 'du byed thams cad dang / zag pa med pa'i 'dus byas 'phags pa'i lam la sogs pa thams cad ni 'di skad cig ma 'jig pas mi rtag pa yin na de la brtan par 'du shes pa ni 'du byed thams cad la rtag par 'dzin pa zhes bya ste/ 'di ni phyin ci log bzhi'o/ /zag pa dang bcas pa'i 'dus byas thams cad ni sdug bsngal rnam pa gsum dang brgyad kyis gzar bas sdug bsngal ba yin na de la gya nom par 'dzin pa ni bde bar 'dzin pa zhes bya ste/ 'di ni phyin ci log lnga pa'o/ /chos thams cad la bdag tu 'dzin pa dang zhes bya ba la/ thams cad kyi sgra 'di'i skabs sum lus pa'i don drangs te/ 'dus byas dang 'dus ma byas dang / zag pa dang bcas pa dang zag pa med pa'i chos thams cad ni gang zag pa dang chos kyi dbyings nyid du bdag med pa yin no/ /de la ngo bo yod par 'dzin pa ni chos thams cad la bdag tu 'dzin pa zhes bya ste/ 'di ni phyin ci log drug go/ /mya ngan las 'das pa ma zhi bar log par 'dzin pa ste zhes bya ba la/ mya ngan las 'das pa ni 'khrug pas nyon mongs pa'i 'khrug pa dang / sdug bsngal thams cad spangs pas zhi ba yin na de la mi bde ba'i gnas su 'dzin pa yin na ni mya ngan las 'das pa ma zhi bar log par 'dzin pa zhes bya ste/ 'di ni log par 'dzin pa bdun no/ /de dag gi gnyen por stong pa nyid la sogs pa'i ting nge 'dzin gsum dang / chos bsdu bas yang dag par 'dzin par 'gyur ro zhes bya ba la/ med pa la yod par 'dzin pa dang / nyes pa can la yon tan du 'dzin pa dang / yon tan can la yon tan can ma yin par 'dzin pa'i gnyen por stong pa nyid kyi ting nge 'dzin dang / smon pa med pa'i ting nge 'dzin dang / mtshan ma med pa'i ting nge 'dzin gsum bshad do/ /'dus byas la rtag pa dang / bde bar 'dzin pa dang / chos thams cad la bdag tu 'dzin pa dang / mya ngan las 'das pa la ma zhi bar log pa'i gnyen por chos bsdu ba bzhi po bstan to/ /ji lta zhe na/ med pa la yod par 'dzin pa'i gnyen por ni stong pa nyid kyi ting nge 'dzin bshad de/ stong pa nyid kyi ting nge 'dzin ni stong pa dang bdag med par 'dzin pa'i rnam pa yin pas gang zag dang chos la bdag tu 'dzin pa'i gnyen por 'gyur ro/ /nyes pa can la yon tan du 'dzin pa'i gnyen por ni smon pa med pa'i ting nge 'dzin bshad de smon pa med pa'i ting nge 'dzin ni kun 'byung ba'i rnam pa bzhi dang / lam gyi rnam pa bzhi'i steng du sdug bsngal gyi rnam pa mi rtag pa dang sdug bsngal ba gnyis kyis bsnan te/ rnam pa bcu yin pas rnam pa bcu ltar khong du chud na nyes pa can la yon tan du 'dzin pa med par 'gyur ro/ /ji lta zhe na/ dang po mi rtag pa dang sdug bsngal mthong nas skyo bar 'gyur ro/ /de nas de'i rgyu gang yin zhes brtags na kun 'byung gi rnam pa bzhi yin par mthong ngo / /kun 'byung de'ang gang gis spang / /zhes brtags na lam gyi rnam pa bzhis spong bar mthong ste/ lam yang dgos pa'i don grub nas yang dgos par mthong ste/ de dag thams cad la mi smon pa ni smon pa med pa'i ting nge 'dzin ces bya'o/ /yon tan can la yon tan can ma yin par 'dzin pa'i gnyen por mtshan ma med pa'i ting nge 'dzin bshad de/ mtshan ma med pa'i ting nge 'dzin ni 'gog par rnam pa bzhi lta bu'i mtshan nyid yin pas rnam pa bzhi ltar rtogs nas yon tan can la yon tan can ma yin par rtog go / 'du byed thams cad la rtag par 'dzin pa'i gnyen por ni 'du byed thams cad ni mi rtag ces bya ba'i chos kyi mdo gsungs so/ /bde bar 'dzin pa'i gnyen por ni zag pa dang bcas pa thams cad sdug bsngal ba zhes bya ba'i don gsungs so/ /chos thams cad la bdag tu 'dzin pa'i gnyen por ni chos thams cad bdag med pa zhes bya ba'i chos kyi mdo gsungs so/ /mya ngan las 'das pa ma zhi bar 'dzin pa'i gnyen por ni zhi ba mya ngan las 'das pa zhes bya ba'i chos kyi mdo gsungs so/ /pha rol tu phyin pa rnams la spangs pa'i 'du shes dang zhes bya ba la/ ngo mtshar gyi 'du shes bzhi 'chad de/ pha rol tu phyin pa rnams la spangs pa'i 'du shes 'jug pa yang ngo mtshar gyi 'du shes yin no ci zhig ngo mtshar zhe na/ thang cig sbyin pa'i pha rol tu phyin pa la phyi'i dngos po dngos por gtong bar ma zad kyi bdag gi lus kyang yongs su gtong ba ni ngo mtshar du bya'o/ /tshul khrims kyi pha rol tu phyin pa la yang / tshul khrims yang dag par blangs pa'i phyir nye du gnyen bshes dang / longs spyod yongs su gtong ba ni ngo mtshar du bya'o/ /bzod pa'i pha rol tu phyin pa la yang gdol bu dang / rigs ngan pa la sogs pas gnod pa byas kyang mi khro zhing nyams su len pa ni ngo mtshar du bya'o/ /brtson 'grus kyi pha rol tu phyin pa la yang lus dang srog la yang mi lta bar brtson 'grus rtsom pa ni ngo mtshar du bya'o/ /bsam gtan gyi pha rol tu phyin pa yang bsam gtan gyi ro la ma chags pa ngo mtshar du bya ba'o/ /shes rab kyi pha rol tu phyin pa la yang chos thams cad stong par rtogs pa ni ngo mtshar du bya ba'o/ /yun ring po'i 'du shes dang zhes bya ba la de ltar pha rol tu phyin pa rgya chen po la spyad kyang 'bras bu myur du mi 'thob kyi bskal pa grangs med pa gsum gyi bar du 'du shes pa yang ngo mtshar du bya ba yin no/ /lan re ba med pa'i 'du shes dang zhes bya ba la/ byang chub sems dpa' pha rol tu phyin pa drug la sems can bkod de/ sems can de la phan btags kyang tshe 'di la phan btags pa'i lan la re ba med pa yang ngo mtshar du bya ba yin no zhes bya ba'i don to/ /rnam par smin pa la mi re ba'i 'du shes so zhes bya ba la/ las su bya ba thams cad la ni 'bras bu'i don du byed pa yin na/ tshe 'dir pha rol tu phyin pa drug la spyad kyi tshe phyi mar longs spyod chen po la sogs pa'i rnam par smin pa'i 'bras bu la mi re ba bzhin du spyod pa yang ngo mtshar du bya ba yin no zhes bya ba'i don to/ /pha rol tu phyin pa spangs pa dang / yun ring bor gyur nas sangs rgyas pa'i 'bras bur 'byung ba dang zhes bya ba la ngo mtshar du bya ba ma yin pa'i 'du shes bzhi 'chad de/ sa bon du 'bras btab la 'bras bu yang 'bras skye ba ni ngo mtshar mi che ste/ de bzhin du pha rol tu phyin pa rgya chen po la yang spyad yun ring por yang spyad nas mjug 'bras bu bla na med pa'i byang chub thob pa ni ngo mtshar du bya ba ma yin te/ rgyu tshad med pa la spyad nas 'bras bu tshad med pa thob pa ni ngo mtshar du mi che'o zhes bya ba'i don to/ /gnyis po de yod na bdag dang pha rol la sems mnyam pa dang zhes bya ba la spangs pa dang yun ring po dang mi ldan pa rnams la bdag bzhin du gzhan la phan 'dogs par byed pa ni ngo mtshar du bya ba yin gyi/ spangs pa dang yun ring po'i 'du shes dang ldan pa rnams bdag dang pha rol sems mnyam ste/ bdag bzhin du sems can gzhan la phan par byed pa ni ngo mtshar du mi che'o zhes bya ba'i don to/ /de dag pas mchog brgya byin la sogs pa mchod pa la sogs pa rnyed du zin kyang slar lan re ba med pa dang zhes bya ba la/ de dag gi sgras ni phan btags pa'i sems can phal pa la snyegs so/ /'di ltar byang chub sems dpa' brgya byin dang tshangs pa la sogs pa la phan btags nas brgya byin dang tshangs pas lan du mchod pa phul ba'i rnyed pa dang bkur sti la yang lan re ba med de/ mchil ma'i rdog gu tsam du sems na sems can phal pas phan btags pa'i rnyed pa dang bkur sti ngan pa la lan re ba med pa lta ci zhig ngo mtshar che ste mi che'o zhes bya ba'i don to/ /bdag gi dngos po dang longs spyod 'jig rten las 'phags pa thob par rnam par smin pa mi 'dod do zhes bya ba la/ byang chub sems dpas pha rol tu phyin pa drug spyad na ma 'ongs pa las bdag gi lus sku gsum gyi mtshan nyid thob pa dang longs spyod kyang 'jig rten kun las 'phags te/ khyad zhugs pa thob pas lha'i lus tsam dang / longs spyod can gyis rnam par smin pa la mi re ba ni ngo mtshar mi che'o zhes bya ba'i don to/ /sems can dag ni snyoms pa dang / /chen po'i bdag nyid dmigs pa dang / /gzhan gyi yon tan lan re dang / /gsum du re zhing rgyun du'o/ /zhes bya ba la/ gzhan yang snyoms pa yid la byed pa dang chen po'i bdag nyid dmigs pa yid la byed pa dang / lan 'dod pa'i yid la byed pa dang / re ba yid la byed pa dang / rgyun du yid la byed pa ste/ yid la byed pa de dag gis kyang khams rgyas par 'gyur ro zhes bya ba'i don to/ /sems can la la ni pha rol tu phyin pa la 'jog la la mi 'jog pa ma yin gyi sems can thams cad pha rol tu phyin pa la 'jog pa ni snyoms pa yid la byed pa zhes bya'o/ /pha rol tu phyin pa drug la spyad na bde ba dang phan pa 'ba' zhig du 'gyur gyi gnod pa'i dngos po ni cung zad mi 'gyur ro zhes bya ba mthong ba ni bdag nyid chen po dmigs pa yid la byed pa zhes bya'o/ /sems can pha rol tu phyin pa spyod du bcug pa las pha rol tu phyin pa drug gi yon tan dang ldan pa mthong na sems can 'di dag gis ni bdag la phan btags so snyam du sems pa ni lan 'dod pa yid la byed pa'o zhes bya'o/ /pha rol tu phyin pa drug la spyod pa'i sems can rnams gnas gsum thob par shog shig ces re ba ni yid la byed pa zhes bya ste/ gnas gsum ni byang chub sems dpa'i sa'i mthar thug par re ba dang / sangs rgyas kyi sa'i mthar thug par re ba dang / sems can gyi don re ba'o/ /de la byang chub sems dpa'i sa'i mthar thug par re ba ni sbyin pas sa dang mthar thug par re ba nas ye shes kyi sa bcu'i mthar thug par re ba'o/ /sangs rgyas kyi sa'i mthar thug par reb ni sa bcu 'das nas sangs rgyas kyi sa thob par shog shig ces re ba'o/ /sems can don re ba ni sangs rgyas nas sems can thams cad la phan pa dang bde ba byed par shog shig ces zer ba'o/ /bar 'ga' pha rol tu phyin pa la spyod par 'ga' mi spyod pa lta bu ma yin gyi chu'i rgyun bzhin du rgyun mi 'chad par spyod pa ni rgyun du yid la byed pa zhes bya'o/ /sangs rgyas bstan pa sgrub tshun chad/ /mi gnas pa yi sems pa ste/ /de 'grib 'phel ba'i sems can la/ /mi dga' dang ni dga' ba'o/ /zhes bya ba la/ gzhan yang yang dag par sbyor ba yid la byed pa dang / mi dga' ba yid la byed pa dang / dga' ba yid la byed pa ste/ des kyang khams rgyas par 'gyur ro zhes bya ba'i don to/ /de la yang dag pa'i sbyor ba yid la byed pa ni dang po byang chub tu sems bskyed nas/ mnyan pa dang sems par byed pa las brtsams te/ mthar sangs rgyas pa ma thob kyi bar du bar ma dor brtson 'grus mi 'dor ba ni yang dag par sbyor ba yid la byed pa zhes bya'o/ /sems can rnams pha rol tu phyin pa drug la spyod pa las pha rol tu phyin pa nyams par mthong na/ sems la ma mos pa ni mi dga' ba yid la byed pa zhes bya'o/ /sbyin pa la sogs pa pha rol tu phyin pa spyod pa 'phel zhing rgya che bar gyur pa mthong nas sems la mos pa ni dga' ba yid la byed pa zhes bya'o/ /gzugs brnyan dang ni yang dag la/ /bsgom pa dang ni mos pa spyod/ /dang du mi len yid la byed/ /lung bstan pa dang nges par 'dod/ /ces bya ba la/ gzhan yang mi mos pa yid la byed pa dang / mos pa yid la byed pa dang / dang du mi len pa yid la byed pa dang / 'dod pa yid la byed pas pha rol tu phyin pa'i khams rgyas par byed do zhes bya ba'i don to/ /de la pha rol tu phyin pa'i gzugs brnyan bsgom pa la ma dad pa ni mi mos pa yid la byed pa zhes bya ste/ pha rol tu phyin pa'i gzugs brnyan ni dper na sbyin pa'i pha rol tu phyin pa la yang mtshon cha dang dug la sogs pa sbyin pa yin yang pha rol tu phyin pa ma yin pa dang shes rab kyi pha rol tu phyin pa la'ang / bdag dang rtag pa la sogs pa yod par lta ba shes rab yin yang shes rab kyi pha rol tu phyin pa ma yin pa lta bu ni pha rol tu phyin pa'i gzugs brnyan zhes bya'o/ /yang dag pa'i pha rol tu phyin pa bsgom pa la dga' ba ni mos pa yid la byed pa zhes bya ste/ yang dag pa'i pha rol tu phyin pa ni sbyin pa'i pha rol tu phyin pa la yang phyi dang nang gi dngos po kun gtong ba dang / shes rab kyi pha rol tu phyin pa la yang chos rnams kyi rang dang spyi'i mtshan nyid phyin ci ma log par shes pa'o/ /dang du mi len pa yid la byed pa ni sbyin pa la sogs pa'i mi mthun pa'i phyogs ser sna la sogs pa byung na sbyin pas 'dul bar byed pas na 'chal pa'i shes rab byung na shes rab kyis 'dul bar byed pa'o/ / 'dod pa yid la byed pa rnam pa gnyis te/ lung bstan pa 'dod pa dang / nges pa'i sa la gnas pa thob par 'dod pa'o/ /lung bstan pa 'dod pa ni de bzhin gshegs pa rnams kyis rigs kyi bu khyod dus ji srid cig nas pha rol tu phyin pa rdzogs pa nas bla na med pa'i byang chub tu 'tshang rgya bar 'gyur ro zhes lung bstan par 'dod pa'o/ /yang na sa brgyad pa'i dus na de bzhin gshegs pa rnams kyis bla na med pa'i byang chub tu lung bstan to/ /bdag gis pha rol tu phyin pa spyad pas sa brgyad pa ji ltar 'thob par 'gyur zhes 'dod pa ni lung bstan par 'dod pa zhes bya'o/ /nges pa'i sa la 'thob pa rnam pa gnyis te/ longs spyod nges par 'dod pa dang / skye ba nges par 'dod pa'o/ /de la longs spyod nges par 'dod pa ni sbyin pa'i pha rol tu phyin pas sa dang po thob pa nas/ skad cig ma gcig pa 'jig rten gyi khams brgya g.yo bar nus pa ni mthu la 'dod pa dang / 'jig rten las 'das pa'i longs spyod chen po thob par 'dod pas na ye shes kyi pha rol tu phyin pas kyang sa bcu thob nas 'jig rten gyi khams gang gA'i bye ma'i klung snyed g.yo bar byed nus pa'i mthu dang ldan par 'dod pas na rig pa'i gnas thams cad la mkhas par 'dod pa'o/ /skye ba nges par 'dod pa ni sa bcu thob nas skye ba gcig gis thogs pa'i byang chub sems dpa' thob par 'dod pa'o/ /ma nges dus na mjug mthong ba/ /yid byed dang ni mnyam rtog pa/ /mchog gi chos la 'jug pa na/ /bdag nyid mchog tu 'dzin pa'o/ /zhes bya ba la/ gzhan yang ma 'ongs pa'i dus na mthong bas 'jug pa yid la byed pa dang / mnyam par rtog pa yid la byed pa dang / mchog tu 'dzin pa yid la byed pa ste/ yid la byed pa de dag gis kyang khams rgyas par 'gyur ro zhes bya ba'i don to/ /de la byang chub sems dpa' 'di snyam du sems te/ byang chub tu sems bskyed nas bla na med pa'i byang chub 'dod na lha dang mi la sogs pa'i rgyud gar skyes gar skyes kyang pha rol tu phyin pa drug spyad dogs par mthong nas 'di snyam du yun bsrings te/ ji zhig byas tshe 'di kho na nas pha rol tu phyin pa drug la spyad par bya'o snyam du sems pa ni ma 'ongs pa'i dus mthong bas 'jug pa yid la byed pa zhes bya'o/ /bdag gis pha rol tu phyin pa rnams la gus par spyad pa dang / rgyun du spyad na byang chub sems dpa' gzhan dag dang lus dang ngag dang yid gsum mnyam pa yin no/ /bdag gis kyang pha rol tu phyin pa drug la spyad pa dang / rgyun du spyad pas na byang chub sems dpa' rnams dang / lus dang ngag dang yid gsum mnyam mo snyam du rtog pa ni mnyam par rtog pa yid la byed pa zhes bya'o/ /bdag ni spyod pa'i mchog pha rol tu phyin pa'i spyod pa la spyod pas/'jig rten kun las 'phags pa'i lus/ /lus dang longs spyod thob par 'dod pa ni bdag mchog tu 'dzin pa yid la byed pa zhes bya'o/ /yid la byed pa gong du bshad pa rnams kyi mjug bsdu ba'i phyir/ dge ba yid byed de dag ni/ /rgyu ni pha rol phyin pa bcu/ /mdor na byang chub sems dpa' yi/ /khams ni rgyas par 'gyur ba'o/ /zhes bya ba smos so/ /rgyu mthong nas dga' ba yid la byed pa nas brtsams te/ bdag mchog tu 'dzin pa yid la byed pa'i bar du yid la byed pa 'di dag ni bsod nams dang ye shes kyi tshogs rdzogs par 'gyur ba'i yid la byed pa yin pas/ dge ba yid la byed pa zhes bya ste/ /yid la byed pa de dag kyang / /pha rol tu phyin pa bcu la dmigs shing brten nas yid la byed pas/ rgyu ni pha rol tu phyin pa bcu yin no/ /de ltar yid la byed pa de dag gis pha rol tu phyin pa'i sa bon dang rigs rgyas shing brtas par 'gyur bas na khams rgyas par 'gyur ba zhes bya'o/ /chos tshol ba'i bye brag la tshigs su bcad pa gnyis te zhes bya ba la chos la rnam pa gnyis te/ bshad pa'i chos dang / khong du chud par bya ba'i chos so/ /de la bshad par bya ba'i chos ni ji ltar btsal/ khong du chud par bya ba'i chos ni ji ltar btsal brtag pa la tshigs su bcad pa gnyis kyis bstan to zhes bya ba'i don to/ /rgyas dang lhag pa'i bsam dad che/ /brtan pa rnams kyis btsal bar 'dod/ /bar chad bcas dang bar chad yin/ /de bzhin 'byor pa de dag gis/ /lus med lus bcas lus rnyed lus rdzogs pa/ /byang chub sems dpa' rnams kyis te/ /nga rgyal med dang nga rgyal phra/ /nga rgyal med pa rnams su dgongs/ /zhes bya ba la/ byang chub sems dpa' chos btsal ba ni rnam pa bcu gsum mo/ /de la chos kyi sgras ni bshad par bya ba'i gsung rab yan lag bcu gnyis dang / khong du chud par bya ba'i chos chos kyi sku la bya'o/ /de la so so'i skye bo'i dus na dam pa'i chos nyan pa dang / sems pa nas brtsams te/ mos pa spyod pa'i sa 'jig rten gyi chos mchog man chad na nyan pa dang sems pa la sogs pa ni rgyas pa zhes bya'o/ /mos pa spyod pa'i sa 'jig rten gyi chos mchog gi tshe chos kyi sgo'i rgyun gyi ting nge 'dzin rnyed nas sa dang po'i dus nas brtsams te/ sa bdun man chad kyi tsha na ni lhag pa'i bsam pa dang ldan pa zhes bya'o/ /gang zag dang chos la bdag med par khong du chud pa dang / bdag dang gzhan du mnyam pa nyid kyi tshe sems rnyed pa'i phyir ro/ /sa brgyad nas sa bcu man chad kyi chos rtogs pa la che ba zhes bya ste/ ci'i phyir zhe na/ rnam par mi rtog pa lhun gyis grub pa'i ye shes thob pa'i phyir che ba zhes bya'o/ /byang chub sems dpa' rnams kyis chos btsal ba'i mtshan nyid ni de lta bu yin par 'dod do zhes bya ba'i don to/ /so so'i skye bo'i dus nas brtsams te/ 'jig rten gyi chos mchog man chad kyi tshe chos mthong ba ni bar chad dang bcas pa zhes bya ste/ bsam pa mi brtan pa dang / mi dge ba'i bshes gnyen gyis bslur zug pa dang / dge ba'i bshes gnyen gyis gar drangs pa der 'jug pa dang / nyon mongs pa dang shes bya'i sgrib pa ma spangs pa'i phyir bar chad dang bcas pa zhes bya'o/ /sa dang po nas sa bcu man chad kyi tshe chos rtogs pa la ni bar chad med pa zhes bya ste/ de phan chad bsam pa brtan pa dang mi dge ba'i bshes gnyen gyis bslur mi zug pa dang / dge ba'i bshes gnyen gyis gar drangs par mi 'jug pa dang / mthong bas spang bar bya ba'i nyon mongs pa rim gyis spangs pa dang / bsgom pas spang bar bya ba shas kyis spangs pa'i phyir ro/ /sa brgyad nas sa bcu man chad kyi tshe/ chos rtogs pa ni 'byor pa zhes bya ste/ rnam par mi rtog pa dang / mngon par shes pa la dang / sangs rgyas kyi zhing yongs su sbyang bar bya ba lhun gyis grub pa thob pa'i phyir ro/ /so so'i skye bo'i dus na nyan pa dang / sems pa la sogs pa'i dus na ni lus med pa zhes bya ste/ chos kyi sku mngon sum du ma byas pa'i phyir ro/ /mos pa spyod pa'i sa 'jig rten gyi chos mchog gi dus na ni lus dang bcas pa zhes bya ste/ gzung 'dzin spangs pa'i chos kyi sku shas kyis rnyed pa'i phyir ro/ /sa dang po nas sa bdun man chad kyi tshe na ni lus rnyed pa zhes bya ste/ 'jig tshogs su lta ba spangs pa dang / gzung ba dang 'dzin pa gnyis spangs pa'i rnam par mi rtog pa'i ye shes btsal 'bad pa dang bcas pa dang ldan pa'i phyir ro/ /sa brgyad nas sa bcu man chad kyi tshe na ni lus rdzogs pa zhes bya ste/ rnam par mi rtog pa lhun gyis grub pa'i phyir ro/ /so so'i skye bo'i dus nas mos pa spyod pa'i 'jig rten gyi chos mchog man chad kyi tshe na ni nga rgyal mang ba zhes bya ste/ nga dang bdag tu yid la yod cing gzung ba dang 'dzin pa'i dri ma ma spangs pa'i phyir ro/ /sa dang po nas sa bdun man chad kyi nang na ni nga rgyal phra ba zhes bya ste/ rnam par mi rtog pa'i ye shes lhun gyis grub pa ma thob cing btsal 'bad pa dang rnam par mi rtog pa'i ye shes la gnas pa'i phyir ro/ /sa brgyad nas sa bcu man chad kyi tshe na ni nga rgyal med pa zhes bya ste/ rnam par mi rtog pa'i ye shes lhun gyis grub pa la gnas pa'i phyir ro/ /chos kyi rgyu'i ngo bo brtag pa'i tshigs su bcad pa'i zhes bya ba la/ chos ni gzugs can dang gzugs med pa dang / dbang phyug dang mi zad pa la bya ste/ chos de dag gi rgyu 'di dang 'di 'dra yin no zhes shes par bya zhing brtag pa la tshigs su bcad pa gcig gis bstan to zhes bya ba'i don to/ /gzugs dang gzugs min mtshan nyid rgyu/ /chos te de bzhin nad med pa/ /zhes bya ba'i/ gzugs kyi phung po las mtshan sum cu rtsa gnyis dang / dpe byad bzang po brgyad cu 'grub par byed pa'i rgyu chos yin te/ ci'i phyir zhe na/ dam pa'i chos gsung rab yan lag bcu gnyis nyan pa dang bsgom pa la sogs pa'i sgo nas mtshan sum cu rtsa gnyis la sogs pa 'grub par 'gyur ba'i phyir ro/ /gzugs med pa tshor ba'i phung po dang / 'du shes kyi phung po dang / 'du byed kyi phung po dang / rnam par shes pa'i phung po la 'dod chags dang zhe sdang la sogs pa'i nyon mongs pa la nad med par byed pa'i rgyu yang chos yin te/ ci'i phyir zhe na/ gsung rab yan lag bcu gnyis kyi chos nyan pa dang / bsam pa dang bsgom pa la sogs pas 'dod chags la sogs pa mthong ba dang bsgom pas spang bar bya ba thams cad zhi bar byed pa'i phyir ro/ /dbang phyug ni mngon shes rnams zhes bya ba la/ dbang phyug chen po thob par byed pa'i rgyu ni 'phrul gyi mig dang rna ba la sogs pa mngon par shes pa lnga rnams te/ ci'i phyir zhe na/ mngon par shes pa de dang ldan pa ci bsam pa thams cad 'grub par 'gyur ba'i phyir ro/ /mi zad pa de brtan rnams kyi/ /zhes bya ba la/ brtan pa ni sangs rgyas dang byang chub sems dpa' rnams la bya ste/ de dag gi gzugs la mtshan sum cu rtsa gnyis dang gzugs med pa la nad med pa dang / mngon par shes pa la sogs pa sdug pa dang mi zad pa'i rgyu ni mya ngan las 'das pa ste/ sangs rgyas dang byang chub sems dpa' rnams phung po lhag ma ma lus pa'i mya ngan las 'das pa'i dus na yang chos de rnams la zad par 'gyur ba med pa'i phyir ro/ /gzugs med pa la nad med pa'i rgyu ste/ nyon mongs pa'i nad zhi ba'i phyir ro zhes bya ba la/ tshor ba la sogs pa gzugs med pa'i chos la 'dod chags la sogs pa nad med pa'i rgyu yang chos yin te/ ci'i phyir zhe na/ gsung rab yan lag bcu gnyis kyi chos mnyan pa la sogs pa byas pas/ sems la yod pa'i nyon mongs pa'i nad zhi bar 'gyur ba'i phyir ro zhes bya ba'i don to/ /mi zad pa'i rgyu ni lhag ma ma lus pa'i mya ngan las 'das par yongs su mi 'chad pa'i phyir ro zhes bya ba la/ gzugs la mtshan dang / gzugs med pa la nad med pa dang / dbang phyug rnams dang mi zad par byed pa'i rgyu ni mya ngan las 'das pa ste/ ci'i phyir zhe na/ sangs rgyas dang byang chub sems dpa'i lhag ma ma lus pa'i mya ngan las 'das pa'i dus na yang chos de dag rgyun mi 'chad par 'byung ba'i phyir ro/ /de bas na tshangs pas dris pa'i mdo las/ chos bzhi dang ldan na byang chub sems dpa'i chos tshol bar 'gyur ro zhes bya ba la/ gzugs la mtshan sum cu rtsa gnyis dang / gzugs med pa'i chos la nad med pa'i rgyu ni chos yin pa dang / dbang phyug gi rgyu mngon par shes pa yin pa dang / mi zad pa'i rgyu mya ngan las 'das pa yin pas na tshangs pas dris pa'i mdo las kyang chos bzhi dang ldan na byang chub sems dpa' chos bzhi tshol bar 'gyur ro zhes bshad do/ /chos bzhin ni dkon pa'i phyir rin po cher 'du shes pa la sogs pa 'og nas 'byung bas so/ /dkon pa'i phyir rin po cher 'du shes pa dang zhes bya ba la/ dper na rin po che dus thams cad du med cing dkon pa ltar dam pa'i chos 'di'ang bar 'ga' thos kyi/ dus thams cad du mi thos pas dkon pa dang / de'i 'bras bu mtshan sum cu rtsa gnyis la sogs pa yang bar 'ga' thob kyi dus thams cad du mi 'thob pas na dkon pa ste/ de lta bu'i 'du shes kyis chos nyan pa dang / dkon pa'i phyir rin po cher 'du shes pa zhes bya'o/ /nyon mongs pa'i nad zhi ba'i phyir sman du 'du shes pa dang zhes bya ba la/ dper na sman gyis nad zhi bar byed pa dang / dam pa'i chos kyis kyang 'dod chags la sogs pa'i nad zhi bar byed pas na nyon mongs pa'i nad zhi bar byed pa'o snyam du sems pa ni nyon mongs pa'i nad zhi ba'i phyir sman du 'du shes pa zhes bya'o/ /mi 'jigs pa'i phyir nor du 'du shes pa dang zhes bya ba la/ 'jig rten na nor zad pas 'jigs pa dang mi bde bar 'gyur ro/ /dam pa'i chos kyis kyang mngon par shes pa la sogs pa'i nor dang longs spyod mi zad pa'i rgyu byed pas na/ mi 'jigs pa'i rgyu byed pa'i phyir dam pa'i chos la nor du 'du shes pa zhes bya'o/ / sdug bsngal thams cad rab tu zhi ba'i phyir mya ngan las 'das pa'o zhes gsungs so zhes bya ba la/ dper na mya ngan las 'das pa dang nyon mongs pa kun spangs pas skye ba dang rga ba la sogs pa'i sdug bsngal thams cad zhi bar 'gyur ba bzhin du dam pa'i chos mnyan pa dang bsams pa la sogs pa byas na yang skye ba dang rga ba la sogs pa'i sdug bsngal thams cad zhi bar 'gyur bas na/ dam pa'i chos la mya ngan las 'das pa'i sems bskyed do zhes bya ba'i don to/ /de gong du A tsar+ya sa'i rtsa lag gis/ gzugs la mtshan grub pa'i chos rgyu yin pa la sogs pa'i rnam pa bzhi bshad pa dang / tshangs pas dris pa'i mdo las dkon pa'i phyir rin po cher 'du shes pa la sogs pa'i rnam pa bzhir bshad pa dang / don sel te don gcig tu bstan pa'i phyir/ mdzes par byed pa'i phyir mtshan nyid ni rin po che dang 'dra ste zhes bya ba la sogs pa smos te/ dper na rin po ches lus mdzes par byed pa dang 'dra bar mtshan sum cu rtsa gnyis dang / dpe byad bzang po brgyad cus kyang mdzes par byed pas na mtshan nyid rin po che dang 'dra'o zhes bya ba'i don to/ /de bas na de'i rgyu'i phyir chos la rin po cher 'du shes pa'o zhes bya ba la/ de ltar mtshan sum cu rtsa gnyis dang / dpe byad brgyad cu thob par byed pa'i rgyu yin pas na chos la rin po cher 'du shes bskyed do zhes bya ba'i don to/ /nad med pa'i rgyu'i phyir sman du 'du shes pa'o zhes bya ba la/ dper na sman gyis gzugs can gyi lus la nad med pa'i rgyu byed pa ltar/ chos kyis kyang tshor ba la sogs pa gzugs med pa'i chos la 'dod chags la sogs pa'i nyon mongs pa'i nad sel ba'i rgyu byed pas na chos la sman du 'du shes bskyed do zhes bya ba'i don to/ /mngon par shes pa phyug pa'i phyir nor du 'du shes pa'o zhes bya ba la/ dper na nor gyis phyug pa dang / skyed par byed pa bzhin dam pa'i chos kyis kyang sangs rgyas dang byang chub sems dpa' rnams mngon par shes pa'i nor gyis phyug pa'i rgyu byed pas na dam pa'i chos la nor du 'du shes bskyed do zhes bya ba'i don to/ /mi zad pa'i rgyu'i phyir mya ngan las 'das par 'du shes pa ni zad pa'i 'jigs pa med pa'i phyir ro zhes bya ba la/ dam pa'i chos 'dis mngon par shes pa drug rnams mi zad pa'i rgyu byed pa'i phyir mya ngan las 'das pa'i 'du shes bskyed par bya'o zhes bya ba'i tha tshig go/ /ci'i phyir zhe na/ sangs rgyas dang byang chub sems dpa' rnams kyis mya ngan las 'das pa la zad pa dang med pa'i 'jigs par 'gyur ba med pa de bzhin du byang chub sems dpa' rnams kyi mngon par shes pa drug dang / med par 'gyur ba'i 'jigs pa med pa'i rgyu yang dam pa'i chos gsung rab yan lag bcu gnyis kyis byed pas na dam pa'i chos la mya ngan las 'das pa'i 'du shes bskyed do zhes bya ba'i don to/ / rnam par rtog pa btsal ba la tshigs su bcad pa zhes bya ba la/ ji tsam du byang chub sems dpa' sems la rnam par rtog pa byung ba de tsam du shes rab kyi pha rol tu phyin pa'i don rtogs par bya ba la bar du gcod pa yin te/ de bas na rnam par rtog pa 'di dang 'di dag ni shes rab kyi pha rol tu phyin pa'i don rtogs par bya ba la bar du gcod pa yin no zhes brtag par bya ba dang / tshigs su bcad pa gcig gis bstan to zhes bya ba'i don to/ /med yod sgro 'dogs skur 'debs rnam rtog pa/ /gcig dang tha dad bdag dang khyad par rtog /ji ltar ming dang don la mngon chags rtog /rgyal ba'i sras kyis yongs su spang bar bya/ /zhes bya ba la/ shes rab kyi pha rol tu phyin pa'i don rtogs par bya ba la bar du gcod pa'i rnam par rtog pa ni bcu ste/ bcu gang zhe na/ med par rnam par rtog pa dang / yod par rnam par rtog pa dang / sgro 'dogs par rnam par rtog pa dang / skur pa 'debs par rnam par rtog pa dang / gcig par rnam par rtog pa dang / tha dad par rnam par rtog pa dang / bdag tu rnam par rtog pa dang / khyad par du rnam par rtog pa dang / ji ltar ming bzhin du don la mngon par rtogs nas rnam par rtog pa dang / ji ltar don bzhin du ming la mngon par chags nas rnam par rtog pa ste/ rnam par rtog pa de dag byang chub sems dpas spang bar bya'o zhes bya ba'i don to/ /med pa la rnam par rtog pa'i gnyen po shes rab kyi pha rol tu phyin pa las/ 'di la byang chub sems dpa' sems dpa' nyid kyi yod pa'o zhes gsungs pa'o zhes bya ba la/ kun brtags kyi gang zag dang bral ba'i stong pa nyid dang yongs su grub pa ni yod pa yin la de'ang thams cad du med do zhes bya ba la rnam par rtog pa'i gnyen por shes rab kyi pha rol tu phyin pa 'bum las byang chub sems dpa' bos nas/ byang chub sems dpa' nyid kyis yod pa'o zhes bka' stsal to/ /kun brtags kyi gang zag dang bral ba'i stong pa nyid dang / yongs su grub pa'i mtshan nyid ni med pa ma yin no zhes bya ba'i don to/ /dngos po la rnam par rtog pa'i gnyen por byang chub sems dpa' ni mi dmigs pa'o zhes bya ba la sogs pa gsungs so zhes bya ba la/ kun brtags kyi gang zag dngos po dang / rang bzhin yod do zhes rnam par rtog pa'i gnyen por shes rab kyi pha rol tu phyin pa 'bum las kyang byang chub sems dpa' ni mi dmigs pa'o zhes bka' stsal te/ kun brtags kyi gang zag gi mtshan nyid du ni byang chub sems dpa' yod pa ma yin na zhes bya ba'i don to/ /'di yan chad du tshig gnyis kyis gang zag yod par rnam par rtog pa'i gnyen por gang zag la bdag med par bstan to/ /sgro 'dogs par rnam par rtog pa'i gnyen por shA ri'i bu gzugs ni rang bzhin gyis stong pa'o zhes gsungs so zhes bya ba la/ kun brtags kyi gzugs dang sgra la sogs pa yod par rtog pa ni sgro 'dogs pa'i rnam par rtog pa zhes bya ste/ de'i gnyen por shes rab kyi pha rol tu phyin pa 'bum las gzugs ni rang bzhin gyis stong pa'o zhes bka' stsal to/ /kun brtags kyi gzugs dang sgra la sogs pa yod pa ma yin no zhes bya ba'i don to/ /skur pa 'debs pa rnam par rtog pa de'i gnyen por stong pa yang ma yin no zhes gsungs so zhes bya ba la/ kun brtags kyi chos dang bral ba'i yongs su grub pa ni yod pa ma yin no/ /de'ang thams cad nas thams cad du med do zhes rtog pa ni skur pa 'debs par rnam par rtog pa'o zhes bya ste/ de'i gnyen por shes rab kyi pha rol tu phyin pa 'bum la sogs par med pa yang ma yin no zhes bka' stsal to/ /don du na gzung 'dzin dang bral ba'i stong pa yongs su grub pa'i mtshan nyid ni thams cad nas thams cad du med pa ma yin no zhes bya ba'i don to/ / gcig la rnam par rtog pa'i gnyen por gzugs kyi stong pa gang yin pa de gzugs ma yin no zhes gsungs so zhes bya ba la/ chos can gzugs dang chos nyid stong pa nyid dang / kun brtags kyi chos dang / yongs su grub pa gnyis su rang bzhin gcig go zhes rnam par rtog pa'i gnyen por shes rab kyi pha rol tu phyin pa 'bum las gzugs kyi stong pa nyid gang yin pa de gzugs ma yin/ gzugs gang yin pa de stong pa nyid ma yin no zhes bka' stsal te/ /don du kun brtags kyi gzugs dang / yongs su grub pa'i rang bzhin gcig pa ma yin no zhes bya ba'i don to/ /ci'i phyir zhe na/ gzugs ni 'khrul pa'i rang bzhin la yongs su grub pa ni ma 'khrul pa'i rang bzhin yin pa'i phyir ro/ /tha dad pa'i rnam par rtog pa'i gnyen por stong pa nyid las gzugs gzhan ma yin te/ stong pa nyid gzugs so zhes gsungs so zhes bya ba la/ gzugs kyang logs shig na yod stong pa nyid logs shig na yod ces gzugs dang stong pa nyid tha dad pa rnam par rtog pa'i gnyen por shes rab kyi pha rol tu phyin pa 'bum las stong pa nyid las gzugs gzhan ma yin/ gzugs las stong pa nyid gzhan ma yin te/ gang gzugs de stong pa stong pa de gzugs te zhes bka' stsal te/ gzugs las ma gtogs par gzugs kyi stong pa logs shig na med do zhes bya ba'i don to/ /bdag gi mtshan nyid la rnam par rtog pa'i gnyen por gzugs ni ming tsam mo zhes gsungs so zhes bya ba la/ gzugs kyi mtshan nyid ni thogs pa dang bcas pa dang / tshor ba'i mtshan nyid myong ba can dang / sa'i mtshan nyid sra ba la sogs pa de bzhin du yod do zhes rnam par rtog pa'i gnyen por shes rab kyi pha rol tu phyin pa 'bum las gzugs ni ming tsam mo zhes bka' stsal te/ gzugs la sogs pa sra ba dang / gsher ba'i mtshan nyid thams cad kyang ming tsam brda tsam tha snyad tsam du zad kyi mtshan nyid yod pa ma yin no zhes bya ba'i don to/ /khyad par du rnam par rtog pa de'i gnyen por gzugs ni skye ba yang ma yin 'gag pa yang ma yin/ nyon mongs pa yang ma yin/ rnam par byang ba yang ma yin no zhes gsungs so zhes bya ba la/ gzugs la skye ba yod do zhes bya ba la 'gag pa yod do zhes rtog pa dang / gzugs nyon mongs par rtog pa dang / gzugs rnam par byang bar rtog pa ni khyad par du rnam par rtog pa zhes bya ste/ de'i gnyen por shes rab kyi pha rol tu phyin pa 'bum las gzugs ni skye ba yang ma yin 'gag pa yang ma yin no zhes bya ba la sogs pa gsungs te don dam par ni gzugs la skye ba dang / 'gag pa dang / kun nas nyon mongs pa dang / rnam par byang bar 'gyur ba med do zhes bya ba'i don to/ /ming ji lta ba bzhin du don yin no mngon par chags pas rnam par rtog pa de'i gnyen por ming ni brdzun pa'o zhes bya ba la sogs pa gsungs so zhes bya ba la/ bum pa dang snam bu la sogs pa'i ming ni rang bzhin yod pa yin la/ ming rang bzhin yod pa bzhin du des mtshon par bya ba'i bum pa dang / snam bu la sogs pa'i dngos po yang de bzhin du yod do zhes rtog pa ni ming ji lta ba bzhin du don la mngon par chags nas rnam par rtog pa zhes bya ste/ de'i gnyen por shes rab kyi pha rol tu phyin pa 'bum pa las ming ni brdzun pa'o zhes bka' stsal te/ bum pa dang snam bu la sogs pa'i ming du btags pa rnams brdzun pa sgyu ma rang bzhin yod pa ma yin no zhes bya ba'i don to/ /don ji ltar ming la chags pa'i gnyen por ming de dag thams cad pa byang chub sems dpa' mi dmigs te/ mi dmigs pas na mngon par m i chags so zhes bya ba la bum pa dang snam bu la sogs pa'i don gyi rang bzhin yod pa bzhin du de'i ming la yang rang bzhin yod do zhes mngon par chags shing yod par rtog pa'i gnyen por shes rab kyi pha rol tu phyin pa 'bum las ming de dag thams cad la byang chub sems dpa' mi dmigs so mi dmigs pas na mngon par mi chags so zhes bka' stsal to/ /don du na chos rnams kyi rang bzhin la yod par byang chub sems dpas mthong ste/ de ltar ming la rang bzhin yod par ma mthong bas na don la yang rang bzhin yod par mi chags mi 'dod do zhes bya ba'i don to/ /da ni chos btsal ba'i mjug sdud pa dang / chos tshol ba la gnas pa'i byang chub sems dpa'i yon tan yang bstan pa'i phyir/ mjug sdud pa'i tshigs su bcad pa bstan to/ /tshigs su bcad pa de'i bsdus pa'i don yang thabs che ba'i bdag nyid dang / gzhan gyi don che ba dang / bdag gi don che ba'o/ /dge ba'i blo gros brtson 'grus mchog thob blo/ /zhes bya ba la/ chos tshol ba'i yon tan dang ldan pas na chos tshol ba la gnas pa'i byang chub sems dpa' ni dge ba'i blo gros zhes bya'o/ /chos tshol ba'i tshe 'bad pa dang rtsol ba dang zhum pa dang / 'khrug pa med pa'i brtson 'grus la gnas pas na brtson 'grus mchog thob pa zhes bya ste/ nan dang mthus byas pa'i brtson 'grus can ni ma yin gyi thabs dang ldan pa'i brtson 'grus thob ces bya ba'i don to/ /bden pa gnyis ldan chos nyid dmigs pas na/ /zhes bya ba la/ de ltar brtson 'grus mchog thob pas na bden pa gnyis dang ldan pa zhes bya ste/ don dam pa'i bden pa dang ldan pa dang / kun rdzob kyi bden pa dang ldan pa'o/ /de ltar bden pa gnyis dang ldan pas na chos nyid dmigs pa zhes bya ste/ don dam pa'i bden par mthong ba dang / kun rdzob kyi bden par mthong ba'o zhes bya ba'i don to/ /brtson 'grus mchog thob pa dang / kun rdzob dang don dam pa'i bden pa la dmigs pa thabs che ba'i bdag nyid bstan to/ /de'i phyir 'gro ba dag gi skyabs 'gyur te/ /zhes bya ba la/ brtson 'grus mchog thob pa dang / bden pa gnyis la dmigs pa shes rab dang ldan pas na de'i phyir byang chub sems dpa' de sems can thams cad sdug bsngal las sgrol ba'i skyabs su 'gyur te 'dis ni gzhan gyi don che ba bstan to/ /yon tan dag ni rgya mtsho 'dra bar rdzogs/ /zhes bya ba la/ byang chub sems dpa' de'i 'gro ba'i skyabs su 'gyur bar yang ma zad kyi/ dper na rgya mtsho chus rdzogs shing bya ba bzhin du byang chub sems dpa' de'i sems kyi rgyud la yang stobs dang mi 'jigs pa la sogs pa'i yon tan gyi chus rgyas shing rdzogs par 'gyur te zhes bya ba'i don to/ /'dis ni bdag gi don chen po bstan to/ /mdo sde'i rgyan bam po gsum pa'i bshad pa rdzogs so// //chos btsal ba'i rjes la chos bstan pa'i skabs bshad par ji ltar 'brel ce na/ sngar gang la bslab pa dang / ji ltar bslab pa dang / gang gis bslab pa ni byang chub sems dpa'i bslab pa'o zhes bshad pa las ji ltar bslab pa yang chos la mos pa mang ba dang / chos btsal ba dang / chos bstan pa'i rnam pas bslab par bya'o zhes gleng ba na sbyor ba'i sa nas bslab pa'i rnam pa'i khyad par la bslab pa yin no/ /bslab pa'i rnam pa'i khyad par yang bsam pa'i khyad par dang / sbyor ba'i khyad par dang / bdag la phan pa'i khyad par dang / gzhan la phan pa'i khyad par la sogs pa ste/ de la bsam pa'i khyad par mos pa mang ba'i skabs su bshad zin to/ /sbyor ba'i khyad par dang / bdag la phan pa'i khyad par yang chos btsal ba'i skabs su bshad zin te/ da ni gzhan la phan pa'i khyad par bshad par skabs su bab ste/ gzhan la phan par bya ba yang bdag gis ji ltar chos btsal ba gzhan la phyin ci ma log par bshad pas gzhan la phan par gyur te/ de bas na chos btsal ba'i skabs kyi rjes la/ chos bstan pa'i skabs bshad par 'brel to/ /yang na byang chub sems dpa' chos btsal ba bdag gi sems kyi rgyud la gsal bar bya ba 'ba' zhig tu ma zad kyi/ sems can gzhan gyi sems kyi rgyud la gsal bar bya ba'i phyir yang tshol te/ chos gsal ba ni bdag gi sems kyi rgyud gsal bar byas so/ /chos bshad pas ni gzhan gyi sems kyi rgyud gsal bar byed de/ de bas na chos btsal ba'i rjes la chos bstan pa'i skabs bshad par 'brel to/ /chos bstan pa la ser sna spangs ba'i tshigs su bcad pa zhes bya ba la/ byang chub sems dpa' chos ston pa na ser sna 'byung ba'i skabs cung zad kyang med do zhes bstan pa'i phyir tshigs su bcad pa rtsom mo zhes bya ba'i don to/ /lus dang longs spyod dka' bas rnyed/ /ces bya ba la/ gzugs la sogs pa'i phung po lnga ni lus so/ /'bru dang gter la sogs pa ni longs spyod do/ /lus kyang sdug bsngal bas rnyed pas na dka' bas rnyed pa zhes bya'o/ /ji ltar na lus sdug bsngal bas rnyed ce na/ 'di ltar dge ba'i rtsa ba sgrub par dka' ba brgya stong du mas byas pas lus rnyed de/ de bas na mdo las kyang rgya mtsho'i nang na gnas pa'i rus sbal zhar ba lo brgya zhing lan cig khar byung bas gnya' shing mig gcig pa phyogs bzhi'i rlung gis phyogs bcur bdas pa'i mig tu mgo chud par sla'i mi'i lus thob pa ni shin tu dka'o zhes gsungs pa lta bu'o/ /longs spyod ji ltar rnyed par dka' zhe na/ rin po che la sogs pa'i nor gyi phyir rgya mtsho la sogs par 'jug pa na/ grang ba'i dus na ni grang bas nyen/ tsha ba'i dus na ni tsha bas nyen/ bar 'ga' ni bkres pas nyen/ bar 'ga' ni skom pas nyen pa la sogs pa lus dang srog la gnod pa'i sdug bsngal gyis btsal dgos pas ni rnyed par dka' ba zhes bya'o/ /de ltar rnyed par dka' ba de'ang btang ma thag tu 'jig cing med par 'gyur bas na snying po med pa zhes bya ste/ longs spyod btang ste zad na ni phongs pa dang brel ba la sogs pa dbul ba'i sdug bsngal myong bar 'gyur la/ lus btang na ni 'chi bar 'gyur bas na snying po med pa zhes bya'o/ /de la 'jig rten pa rnams ni lus dang longs spyod gtong bar dka' bas na sems can gzhan la sbyin par bya bar mi rigs pa rnyed par dka' ba de'ang btang na zad par mi 'gyur ba ni btang ba'i yang rigs na/ btang na yang zad par yang 'gyur bas btang bar mi rigs so snyam du sems so/ /de las bzlog ste byang chub sems dpa' rnams ni brtan pas dga' ba yid kyis su/ rtag tu sdug bsngal sems can rnams la sbyin pa rnam mang rgya che sbyin byas nas/ /zhes bya ba smos te/ brtan pa ni byang chub sems dpa'o/ /dga' ba'i yid ni lus dang longs spyod gtong ba ni mos pa dang rang dang bcas pa'i sems kyis gtong ba'o/ /rtag tu lan cig gtong bar ma zad kyi 'khor ba'i mtha'i bar du dus thams cad du gtong ba'o/ /sdug bsngal ba'i sems can ni brel ba dang / phongs pa'i sems can rnams so/ /sbyin pa rnam pa mang po ni nor dang 'bru la sogs pa phyi'i dngos po gtong ba'o/ /rgya chen po sbyin pa ni mgo dang rkang lag la sogs pa nang gi dngos po gtong ba'o/ /rnam pa kun gyis 'gro la phan byed ces bya ba la/ don dam pa dang kun rdzob kyi chos dang / chos rnams kyi rang dang spyi'i mtshan nyid ni nyan pa'i tshe na yang sems can la phan par byed/ sems pa na yang phan par byed/ bsgom pa na yang phan par byed pas na rnam pa kun gyis 'gro la phan byed ces bya'o/ /rgya chen zhes bya ba ni sa dang pha rol tu phyin pa la sogs pa la theg pa chen po'i chos so/ /rnyed dka' bas ma rnyed pa/ /zhes bya bas ni yang dka' ba mang pos sgrub mi dgos te/ tshegs chung dus sgrub po zhes bya ba'i don to/ /rab tu sbyin yang mi 'bri 'phel 'gyur chos lta smos kyang ci dgos te/ /zhes bya ba la/ lus dang longs spyod rnyed par dka' ba ni sbyin na zad par 'gyur gyi/ 'phel bar ni mi 'gyur gyi/ dam pa'i chos gzhan la byin te bstan na 'bri bar ni mi 'gyur gyi 'phel ba 'ba' zhig tu 'gyur te/ dper na mar me gcig las mar me mang po bus na dang po'i mar me la 'bri ba med cing mar me gzhan mang po yang 'phel bar 'gyur ba bzhin du chos bshad na yang sems can gzhan gyis thos pa dag shes pa mang du 'byung bar 'gyur la 'chad pa po'i shes pa la nyams pa med pas na mi 'bri ba'i 'phel bar 'gyur ba zhes bya'o/ /'di ltar byang chub sems dpa' rnams ni lus dang longs spyod rnyed par dka' la/ btang na yang med par 'gyur ba de rgyun ma chad par sems can sdug bsngal ba rnams la snying rje ba'i dbang gis dga' bzhin du sbyin par byed na dam pa'i chos btsal bar sla la btang yang 'phel bar 'gyur gyi/ 'bri bar mi 'gyur ba sems can la gtong ba lta ci smos te/ gtong ches so zhes bya ba'i don to/ /rgal ba srog dang longs spyod pas/ /chos ces btsal dka' ste/ 'di ltar tshigs su bcad pa gcig tsam gyi phyir yang byang chub sems dpa' lus rnams yongs su gtong bas so/ /de bas na mdo dag las/ legs smras tshigs bcad gcig tsam phyir/ /thub pa sku'i rin gyis btsal lo/ /zhes bshad do/ /sa bcu'i mdo las kyang / tshig gcig gi don du me mdag gis yongs su gang ba'i dong du yang bdag nyid 'dor bar spro'o zhes bshad de/ de ltar na shin tu sdug bsngal bas rnyed pa ji ltar na dka' ba med pas rnyed pa yin no zhes bya ba zhe na/ de'i don lan du don 'di ni de ltar gzung ba ma yin te sangs rgyas 'jig rten du byung ba nas brtsams nas bstan pa ma nub kyi bar du chos ni tshegs chung dus rnyed pa yin no/ /ci'i phyir zhe na/ sangs rgyas bcom ldan 'das rnams yul dang dus kyi khyad par dag la ltos nas 'dul ba'i skye bo dag gi thad nas gshegs nas mi 'dod bzhin du yang dam pa'i chos 'chad pa yang mdzad pa'i phyir ro/ /de la kha cig 'di snyam du byang chub sems dpa' rnams chos la ser sna med do chos 'chad pa mdzad du zin kyang chos rnams kyi don dam par ni tshig gi spyod yul ma yin pas don dam pa ma bshad pa'i phyir chos bshad pa'i don rnams don med do snyam du sems pa la de'i phyir chos la don yod pa dang don med pa'i tshigs su bcad pa gnyis te zhes bya ba smos te/ tshigs su bcad pa'i chos rnams la don yod par yang ma yin/ don med par yang ma yin par yang tshigs su bcad pa gnyis kyis bstan to zhes bya ba'i don to/ /rang rig chos rnams bcom ldan 'das kyis ma gsungs te zhes bya ba la chos kyi dbyings dang / rnam par mi rtog pa'i ye shes dang byang chub kyi phyogs kyi chos sum cu rtsa bdun la sogs pa ni de bzhin gshegs pa'i ye shes kyis thugs su chud de/ ye shes kyi rang gi rig par zad do/ /rang gi rig pa'i chos te tshig dang yi ge bstan du yang med pas gzhan la bstan du mi rung ba'i phyir te/ bcom ldan 'das kyis kyang ma gsungs te tshig tu bshad pa'i chos kyi nang na don dam pa la sogs pa chos kyi don med pas na chos bshad pa don med pa zhes bya'o/ /gal te tshig gi nang na chos kyi rang bzhin yod la chos kyi rang bzhin tshig tu brjod du rung na ni me zhes brjod pa tsam gyis kha tshig pa'i skyon du 'gyur ro/ /mdo las kyang don dam pa ni brjod du rung bar gang nas kyang ma gsungs te/ 'phags pa rdo rje gcod pa las kyang ngas de bzhin gshegs pa mar me mdzad kyi thad nas chos blangs pa cung zad kyang med do zhes bka' stsal to/ /'phags pa blo gros mi zad pa las kyang don dam pa ni sems kyi yul las kyang 'das nas tshig dang yi ge lta smos kyang ci dgos zhes gsungs so/ /A tsar+ya ma ti tsi tras don dam pa ni blo'i yul yang ma yin na bdag gis tshig gis brjod pas ga la thog tu phebs zhes bcom ldan 'das la ltos pa'i nang nas 'byung ngo / /de ltar don dam par tshig gis brjod par mi nus pas don dam pa rtog par 'gyur ba dang / rjes su mthun pa'i gtam mdzad pa'i sgo nas sangs rgyas bcom ldan 'das rnams kyis so so rang gi rig pa las sems can 'jog par mdzad de/ de bas na/ rig pas chos bstan 'gro ba dag ni chos la drangs/ /zhes bya ba smos te/ gtan tshigs bsgrub pa la sogs pa'i rigs pa bzhi dang mi 'gal ba'i chos bstan pas sangs rgyas bcom ldan 'das kyis rang gi chos la 'gro ba rnams drangs shing bkod de/ de bas na chos bstan pa don med pa ma yin no zhes bya ba'i don to/ /yang na dang po'i rigs pa'i chos bstan/ de nas bsam/ de nas bsgom pa'i rigs pas chos kyi sku dang / rnam par mi rtog pa'i ye shes la 'gro ba rnams drangs shing bkod de/ de phyir yang chos bstan pa don med pa ma yin no zhes bya ba'i don to/ /da ni gtan tshigs dang dpes 'gro ba rnams rang gi chos nyid la ji ltar bkod pa bstan pa'i phyir/ rnam dag spangs shing thun mong mi zad rang zhi kha snod du/ /snying rje'i bdag nyid sbrul 'dra kha chu bzhin du kun drangs so/ /zhes bya ba smos te/ dper na sbrul chen po a za gar zhes bya ba rgyab tu zhing rmo zhing chu bo yang 'bab ces bya ba de rang gi kha nas kha chu byung nas thag ring du gtsang po tsam du 'bab pa dang / ri dwags dang ba lang la sogs pas chu yin no snyam nas der 'thungs pa dang / kha chu gdug pas sems can zin cing shi bar gyur pa dang drangs nas rang gi khar 'dzud pa bzhin du thugs rje'i bdag nyid sangs rgyas bcom ldan 'das ni sbrul 'dra la/ de'i zhal nas byung ba'i gsung rab yan lag bcu gnyis ni kha chu 'dra ste/ kha chu 'dra ba'i gsung rab yan lag bcu gnyis kyis sems can drangs nas rang gi zhi ba'i kha snod du bcug ste don du chos kyi sku dang / mya ngan las 'das pa la bkod do zhes bya ba'i don to/ /chos kyi sku de'ang nyon mongs pa dang shes bya'i sgrib pa dang bral ba yin pas rnam dag ces bya'o/ /nyan thos la sogs pa dang thun mong du gyur pa stobs dang mi 'jigs pa la sogs pa'i yon tan dang ldan pas spangs pa zhes bya'o/ /yang nyan thos dag nyon mongs pa'i sgrib pa spangs pas rnam par dag pa yin yang shes bya'i sgrib pa mi spangs pas spangs pa ma yin no/ /de bzhin gshegs pa rnams kyis ni nyon mongs pa'i sgrib pa spangs pas rnam par dag pa'o/ /shes bya'i sgrib pa spangs pas spangs pa'o/ /chos kyi sku de de bzhin gshegs pa kun la mnga' bas na thun mong zhes bya'o/ /chos kyi sku de rtag ste 'khor ba'i mtha'i bar du yang med par mi 'gyur bas na mi zad pa zhes bya'o/ /da ni ji ltar bsgom pa rnams don med pa ma yin pa bstan pa'i phyir/ gang dag rnal 'byor bsgom pa de ni de bas don med mi 'gyur ro/ /zhes bya ba smos te/ 'di ltar dam pa'i chos mnyan nas bsams te zhi gnas dang lhag mthong gi rnal 'byor bsgoms na chos kyi sku mya ngan las 'das pa 'thob par 'gyur ro zhes bstan te/ de bas rnal 'byor bsgom pa rnams kyang don med par mi 'gyur ro zhes bya ba'i don to/ /ji ltar na bshad pa don med par mi 'gyur bar bstan pa'i phyir/ bde bar gshegs pas bstan gang de bas 'di ni don med mi 'gyur ro/ /zhes bya ba smos te/ 'di ltar rigs pas chos bstan pa rang gi chos ni chos kyi sku la drangs pa'i phyir bde bar gshegs pa rnams kyis gsung rab yan lag bcu gnyis bshad pa yang don med pa ma yin no zhes bya ba'i don to/ /ji ltar bsgoms pa don med pa ma yin pa gtan tshigs gzhan gyis bstan pa'i phyir/ ji ste thos pa tsam gyis don mthong 'gyur na bsgom bar bya ba don med 'gyur/ /zhes bya ba smos te/ gal te chos thos pa tsam kho nas chos kyi sku thob cing 'bras bu thob par gyur na ni bsgom pa don med par 'gyur na de lta ma yin gyi de bzhin gshegs pa dang byang chub sems dpa' dang / dge ba'i bshes gnyen las dam pa'i chos mnyan pa de bzhin du zhi gnas dang lhag mthong bsgoms na gdod don mthong bar 'gyur bas na bsgom pa yang don med par 'gyur ba yang ma yin no zhes bya ba'i don to/ /mnyan pa don med pa ma yin de bsnan te bstan pa'i phyir/ ji ste thos pa med kyang bsgom pa 'jug 'gyur bshad pa yang ni don med 'gyur/ /zhes bya ba smos te/ ji ste chos thos pa med par yang zhi gnas dang lhag mthong bsgom pa la 'jug par rung na ni chos bshad pa rnams kyang don med par 'gyur na de lta ma yin gyi dge ba'i bshes gnyen gyis bshad pas lung la brten nas gdod bsgom dgos pa'i phyir bshad pa yang don med par mi 'gyur ro zhes bya ba'i don to/ /rang gis rig pa'i chos de'i dbang gis thob pa'i phyir zhes bya ba ni chos kyi sku dang rnam par mi rtog pa'i ye shes kyang zhi gnas dang lhag mthong bsgoms pa'i mthus thos pas na rnal 'byor bsgom pa rnams don med pa ma yin no zhes bya ba'i don to/ /rang g i chos nyid la 'gro ba sdud pa'i phyir zhes pa la sogs pa la rigs pa'i chos bshad pas de bzhin gshegs pa'i bstan pa la sems can btsud cing chos kyi don rtogs par 'gyur gyi chos ma bstan par ni chos rtogs par mi 'gyur bas na rigs par bshad pa'i chos kyang don med par mi 'gyur ro zhes bya ba'i don to/ /bshad pa rnam par dbye ba'i tshigs su bcad pa zhes bya ba la/ chos bshad pa la don yod pa dang med par bstan nas/ de bzhin gshegs pa dang byang chub sems dpa' rnams chos 'chad pa la phye na/ rnam pa dus 'chad pa bstan pa'i phyir tshigs su bcad pa rtsom mo zhes bya ba'i don to/ mchog gi sems can dag gis bshad pa ni/ /lung dang chud dang rnam par 'byor pa las/ /zhes bya ba la/ mchog gi sems can ni byang chub sems dpa'o/ /byang chub sems dpa' de dag gis chos 'chad pa phye na rnam pa gsum ltar 'chad pa dang / lung gi dbye bas 'chad pa dang / chud pa'i dbye bas 'chad pa dang / rnal 'byor pa'i che bas 'chad pa'o/ /de la de bzhin gshegs pa dang / byang chub sems dpa'i dge ba'i bshes gnyen las dam pa'i chos thos nas/ ji ltar thos pa gzhan la 'chad pa ni lung gi dbye bas 'chad pa zhes bya'o/ /sa dang po nas sa bdun pa man chad na chos kyi dbyings rtogs pa'i mthus 'chad pa ni chud pa'i dbye bas 'chad pa'o/ /sa brgyad dang sa dgu dang sa bcu'i dus na rnam par mi rtog pa'i ye shes dang / mngon par shes pa lhun gyis grub pa thob nas chos 'chad pa ni rnam par 'byor pa dbye bas chos 'chad pa'o zhes bya'o/ /rnam par sbyor bas chos 'chad pa la rnam pa gsum yod par bstan pa'i phyir/ nam mkha' las kyang sgra 'byung zhing / /kha dang thams cad gzugs las so/ /zhes bya ba smos te/ sa brgyad/ pa la sogs pa'i byang chub sems dpas byin gyis brlabs nas/ nam mkha' la sogs pas kyang 'du byed mi rtag go zhes bya ba la sogs pa'i sgra 'byung ba ni chos 'chad pa rnam pa gcig go/ /kha dang glu'i dbyangs dag las chos 'chad pa'i sgra 'byung ba ni chos 'chad pa rnam pa gnyis so/ /byin gyis brlabs nas shing dang rtsig pa dang / rol mo'i cha byad dag las kyang chos 'chad pa'i sgra 'byung ba ni chos 'chad pa rnam pa gsum mo/ /bshad pa phun sum tshogs pa'i tshigs su bcad pa gnyis te zhes bya ba la/ chos 'chad pa'i rab tu dbye ba bstan nas/ da ni chos 'chad pa'i yon tan 'chad de/ yon tan bzhi dang ldan brgyad dang ldan na bshad pa phun sum tshogs pa yin no zhes bstan pa'i phyir tshigs su bcad pa gnyis pa rtsom mo zhes bya ba'i tha tshig go/ /gsal dang zhes bya ba la/ sangs rgyas dang byang chub sems dpa'am/ dge ba'i bshes gnyen las chos mang du thos nas gzhan dag las dang chos dang don du 'brel pa ston pa ni gsal ba zhes bya ste/ 'di ni yon tan rnam pa gcig go/ /yid gnyis spong ba dang zhes bya ba la/ chos thos pa rnams bsams nas shes rab chung ngu rnams shes rab 'bring du byas/ shes rab 'bring las shes rab chen por byas te/ bdag nyid kyang chos rnams kyi mtshan nyid la the tshom med par gyur cing gzhan yang chos kyi mtshan nyid la the tshom za ba gcod par byed pa ni yid gnyis spong ba zhes bya ste/ 'di ni yon tan rnam pa gnyis pa'o/ /'jebs shing zhes bya ba la/ bdag srog mi gcod pa la sogs pa'i yang dag pa'i las la gnas pas gzhan la chos bshad na de bzhin du nyan du btub pa ni 'jebs pa zhes bya ste 'di ni yon tan rnam pa gsum pa'o/ /de nyid gnyis ston pa ni zhes bya ba la/ de nyid gnyis ni kun nas nyon mongs pa'i de nyid dang / rnam par byang ba'i de nyid de de nyid ston pas na de nyid ston pa zhes bya ste/ 'di ni yon tan rnam pa bzhi pa'o/ /'di ni byang chub sems dpa'i bshad pa phun sum tshogs pa yin no zhes bya ba la/ yon tan rnam pa bzhi dang ldan pas chos ston pa ni/ byang chub sems dpa' rnams kyis bshad pa phun sum tshogs pa yin no zhes bya ba'i don to/ /dam pa'i chos yongs su gzung ba dang zhes bya ba la/ byang chub sems dpa' gsung rab 'jig rten du yun ring du gnas par bya ba'i phyir/ de bzhin gshegs pa dang byang chub sems dpa' las dam pa'i chos mnyan nas ji ltar mnyan pa'i chos gzhan la don dang tshig tu 'brel par 'chad pa ni dam pa'i chos yongs su gzung ba zhes bya'o/ /bdag gi shes rab rnon por byed pa dang zhes bya ba la/ chos thos pa rnams rig pas bsams nas bsams pa las shes rab chung ngu las shes rab 'bring du byas/ shes rab 'bring las ni shes rab chen por byas nas chos rnams kyi rang dang spyi'i mtshan nyid la yid gnyis za ba med par gyur pa ni bdag gi shes rab rnon po zhes bya'o/ /skyes bu dam pa'i las byed pa dang zhes bya ba la/ bdag nyid yang dag pa'i tshul khrims dang / yang dag pa'i nan tan la gnas shing / tshul khrims nyams pa dang / kha na ma tho ba med pa'i chos med par byas nas dam pa'i chos 'chad pa ni skyes bu dam pa'i las byed pa zhes bya'o/ /nyon mongs pa dang rnam par byang bas ston pa'o zhes bya ba la/ kun rdzob kyi chos ston pa ni nyon mongs pas ston pa zhes bya'o/ /don dam pa'i chos ston pa ni rnam par byang ba ston pa zhes bya'o/ /yang na sdug bsngal dang kun 'byung gi bden pa ston pa ni nyon mongs pa ston pa zhes bya'o/ /'gog pa dang lam gyi bden pa ston pa ni rnam par byang ba ston pa zhes bya'o/ / da ni ston skyob las bshad pa phun sum tshogs pa rnam pa bzhi bshad pa dang / tshangs pas zhus pa'i mdo las/ chos kyi sbyin pa chen po ston pa rnam pa bzhi 'byung ba dang don gcig tu sbyar ba'i phyir/ de la dang pos ni mang du thos pa'i phyir gsal bar ston par 'gyur ro zhes bya ba la/ dang por ni dam pa'i chos yongs su gzung ba ste/ dam pa'i chos yongs su gzung bas ni mkhan po dang slob dpon la sogs pa las dam pa'i chos gsung rab yan lag bcu gnyis thos te/ mang du thos pas gsal bar ston par 'gyur te/ mang du thos pa rnams la 'khrul par ston pa dang / mi gsal bar ston pa mi srid par ston pa'i phyir ro/ /gnyis pas ni shes rab che ba'i phyir the tshom spong ba ste/ gzhan gyi the tshom gcod pa'i phyir ro zhes bya ba la/ gnyis pas ni bdag gi shes rab rnon por byed pa ste/ bdag gi shes rab rnon por byed pas ni shes rab che zhing bdag nyid chos rnams kyi rang dang spyi'i mtshan nyid la the tshom med pas gzhan gyi the tshom yang gcod par byed de/ shes rab rnon po ni bdag la yang the tshom mi 'byung zhing gzhan gyi the tshom yang sel nus pa'i phyir ro/ /gsum pas ni kha na ma tho ba'i las mi byed pa'i phyir 'jebs pa'o zhes bya ba la/ gsum pas ni skyes bu dam pa'i las byed pa ste/ skyes bu dam pa'i las byed pas ni bdag nyid yang dag pa'i yon tan la gnas shing / tshul khrims nyams pa med pas bdag gis ji skad thos pa rnams gzhan la bshad cing bsgo na yang nyan du btub cing tshig btsun pas na 'jebs pa zhes bya'o/ /bzhi pas ni de kho na nyid gnyis ston te/ nyon mongs pa'i mtshan nyid kyi mtshan nyid dang rnam par byang ba'i mtshan nyid de/ bden pa gnyis la bden pa gnyis gnyis so zhes bya ba la/ bzhi pa ni nyon mongs pa dang rnam par byang ba ston pa ste/ nyon mongs pa dang rnam par byang ba ston pas ni de kho na nyid gnyis ston pa ste/ nyon mongs pa'i mtshan nyid kyi de kho na nyid dang / rnam par byang ba'i mtshan nyid kyi de kho na nyid do/ /de la kun rdzob kyi bden pa ni nyon mongs pa'i mtshan nyid kyi de kho na nyid do/ /don dam pa'i bden pa ni rnam par byang ba'i mtshan nyid kyi de kho na nyid do/ /yang bden pa bzhi las sdug bsngal dang / kun 'byung gi bden pa gnyis ni nyon mongs pa'i mtshan nyid kyi de kho na zhes bya'o/ /'gog pa dang lam gyi bden pa gnyis ni rnam par byang ba'i mtshan nyid kyi de kho na zhes bya'o/ /gong du bshad pa phun sum tshogs pa tshigs su bcad pa gnyis kyis bstan to zhes glengs pa las bshad pa phun sum tshogs pa tshigs su bcad pa gcig gis bstan pa ni bshad zin to/ /de bshad pa phun sum tshogs pa tshigs su bcad pa gnyis pa ston pa de 'chad de de'i phyir/ sems dpa' mchog gi ston pa ni/ /'jam zhing rgyags bral mi skyo yi/ /gsal zhing sna tshogs rigs go byed/ /zang zing med cing kun du 'gro/ /zhes bya ba smos te/ gzhan yang byang chub sems dpa' rnams kyi bshad pa yon tan dgu dang ldan pas na bshad pa phun sum tshogs pa ste/ yon tan dgu gang zhe na/ 'jam pa dang / rgyags pa dang / bral ba dang / mi skyo ba dang / gsal ba dang / sna tshogs dang / rigs pa dang / go bar byed pa dang / zang zing med pa dang / kun du 'gro ba dang / gzhan gyis brgal kyang tshig rtsub po mi 'byin pas na 'jam pa'o zhes bya ba la/ chos 'chad pa'i dus sam chos kyi don la brtson pa'i dus na gzhan dag gis nor ba dang 'khrul pa dang mi rung ngo zhes tshig rtsub po dang mi snyen pa smras kyang sngar lan tshig rtsub po dang brlang pos lan mi ldon pas na 'jam pa zhes bya'o/ /grub pa dang ba ste dpa'i tshe rgyags pa la mi gnas pas na/ rgyags pa dang bral ba'o zhes bya ba la/ chos kyi don dka' ba dag khong du chud cing ji ltar khong du chud pa de gzhan la ston cing sgrub pa na/ bdag gi phyogs grub par gyur kyang / byang chub sems dpa' 'di snyam du bdag gis khong du chud par dka' ba'i don dag bsgrubs so snyam du mi byed sems kyis rgyags pa dang / nga rgyal mi byed pa dang / gang gi tshe gzhan dag la chos zab mo bshad nas gzhan dag dga' bar 'gyur te khyod ni mkhas pa'o shin tu gsal zhing legs par smra ba'o zhes bstod pa dang / sems khengs shing nga rgyal mi skye bas na rgyags pa dang bral ba zhes bya'o/ /ngal ba med pa'i phyir mi skye ba'o zhes bya ba la/ ngal ba ni sems zhum zhing yi chad pa dang / chos 'chad pa'i tshe lus na zhing mi bde ba ste/ byang chub sems dpa' chos 'chad pa na/ de lta bu med pas na mi skyo ba zhes bya'o/ /slob dpon gyis 'chab pa med par shin tu ston pa'i phyir gsal ba'o zhes bya ba la/ kha cig 'chad/ kha cig mi 'chad pa dang / phyed tsam 'chad kyi rdzogs par mi 'chad pa dang / tshig tsam 'chad kyi don mi 'chad pa ni slob dpon la 'chab pa'o zhes bya'o/ /byang chub sems dpa' chos kun 'chad pa dang / tshig 'ba' zhig 'chad par ma zad kyi don kyang 'chad de slob dpon 'chab pa med par ston pas na gsal ba zhes bya'o/ /yang dang yang du zlos pa med pa'i phyir na sna tshogs so zhes bya ba la/ chos 'chad pa'i dus na yang sngar 'das pa'i tshig sngar mi zlos pa dang / chos 'ga' zhig gzhan la bstan pa brtsams te/ tshig gcig smras nas tshig des gzhan dag gis chos kyi don go bar ma gyur na/ tshig de nyid slar mi zlos kyi tshig gi rnam grangs gzhan dang / gzhan dag gis ston par byed pas na sna tshogs zhes bya'o/ /tshad ma dang mi 'gal ba'i phyir rigs pa'o zhes bya ba la/ chos 'chad pa'i mngon sum dang rjes su dpag pa dang lung gi tshad ma dang mi 'gal bar 'chad pas na rigs pa zhes bya'o/ /tshig dang yi ge grags pa'i phyir go bar byed pa'o zhes bya ba la/ 'jig rten du ma grags pa'i tshig dang yi ge dag smras pa ni 'jig rten pas go bar mi 'gyur na chos 'chad pa'i tshe'ang 'jig rten du grags pa'i tshig dang yi ge dag smras pa ni 'jig rten pas go bar 'gyur na chos 'chad pa'i tshe'ang 'jig rten na grags pa'i tshig dang yi ge ston pas na go bar byed pa zhes bya'o/ /dad pa'i mchod pa mi 'dod pa'i zang zing med pa'o zhes bya ba la/ byang chub sems dpa' chos 'chad pa ni/ 'di snyam du bdag gis chos bshad pa dang / 'jig rten pa rnams bdag la dang ba dang dad pa skyes nas rnyed pa dang bkur stis mchod par 'gyur ro snyam du bsams nas chos 'chad pa ma yin gyi/ rnyed pa dang bkur sti la re ba med pa byas nas snying rje'i sems kyis chos 'chad par byed pa ni zang zing med pa zhes bya'o/ /theg pa gsum du 'gro ba'i phyir thams cad du 'gro ba'o zhes bya ba la/ nyan thos dang rang sangs rgyas dang / theg pa chen po gsum char la zhugs nas theg pa gsum char 'chad par byed pas na thams cad du 'gro ba zhes bya'o/ /tshig phun sum tshogs pa'i tshigs su bcad pa zhes bya ba la bshad pa phun sum tshogs pa bstan nas/ da ni tshig phun sum tshogs pa bstan te/ de la tshig ces bya ba ni 'dus byas mi rtag ces sam/ chos thams cad bdag med ces ston pa la tshig ces bya ste/ byang chub sems dpas tshig kyang yan lag brgyad dang ldan pas na phun sum tshogs pa yin no zhes bstan pa'i phyir tshigs su bcad pa rtsom mo zhes bya ba'i don to/ /yan lag brgyad pa gang zhe na/ de'i phyir/ rgyal sras tshig gi grags pa ste/ /mi dma' 'jam par mdzes gsungs pa/ /ji ltar rigs dang zang zing med/ /de bzhin ran cing yangs pa'o/ /zhes bya ba smos te/ de la rgyal ba ni sangs rgyas bcom ldan 'das so/ / de'i sras ni chos kyi dbyings las skyes pa'i byang chub sems dpa' dag ste/ byang chub sems dpa' rnams kyi tshig dang ni yan lag brgyad dang ldan pa yin no zhes bya ba'i don to/ /yan lag brgyad ni mi dma' ba dang / 'jam pa dang mdzes par gsungs pa dang / grags pa dang ji ltar rigs pa dang / zang zing med pa de bzhin du ran pa dang yangs pa'o/ /de'ang mdo sde las tshig gi yon tan brgyad bshad pa dang rim bzhin du sbyar bar bya ste/ rim bzhin du ji ltar sbyar ba ni 'grel pa'i nang nas sbyar ba bzhin du rig par bya'o/ /mdo sde las byung ba ni khyab pa dang bzang ba dang / gsal ba dang shes par byed pa dang rnar 'ong ba dang mi brten pa dang / mthun pa dang mi zad pa'o/ /'khor rnams la yongs su khyab pa'i phyir mi dma' ba'o zhes bya ba la khyab pa dang / mi dma' ba don gcig par ston te/ ji ltar na mi dma' ba zhes bya zhe na/ byang chub sems dpa'i tshig de 'khor gcig gis thos kyi/ 'khor gcig gis mi thos pa ma yin gyi/ 'khor ji snyed cig tshogs pa thams cad kyis thos te/ 'khor kun la khyab pas na mi dma' ba zhes bya'o/ /'jam pa ni bzang po'o zhes bya ba la/ 'jam pa dang bzang po don gcig tu ston te/ tshig gang rnar 'ong ba dang / yid du 'ong ba'i tshig de ni bzang po zhes bya'o/ /byang chub sems dpa' chos 'chad pa ni tshig rnar 'ong ba dang yid du 'ong ba dang 'byung bas bzang ba ste/ de ltar bzang bas na 'jam pa zhes bya'o/ /gsal zhing nges pa'i yi ge'i phyir/ /mdzes par gsungs pa'o zhes bya ba la/ gsal ba dang mdzes par gsungs pa gnyis don gcig par 'chad de/ gang gi phyir tshig gsal bas na de'i phyir mdzes par gsungs pa zhes bya'o/ /ji ltar gsal zhe na/ 'di ltar thogs pa dang bcas pa'i phyir gzugs myong bar byed pa'i phyir tshor ba zhes pa'i yi ge ston pa'i phyir gsal ba ste/ de'i phyir na mdzes par gsungs pa'o/ /grags pa brjod pa'i phyir grags pa yin pas shes par byed pa'o zhes bya ba la grags pa dang shes par byed pa gnyis don gcig tu ston te/ 'jig rten du grags pa'i tshig dang yi ge ston pas na shes par byed pa zhes bya ste/ ci'i phyir zhe na/ 'jig rten du ma grags pa'i tshig dag smras pa na 'jig rten pa dag gis don shes par mi byed kyis 'jig rten du grags pa'i tshig dang yi ge smras pas 'jig rten pa rnams kyis don shes par byed de/ de bas na grags pas ni shes par byed par 'gyur ro/ /ji ltar rigs pa ni 'dul ba dang mthun pa'i phyir rnar 'ong ba zhes bya ba la/ ji ltar rigs pa dang rnar 'ong ba don gcig par ston to/ /'dul ba'i sems can 'di la chos 'di bstan pa'i rigs zhes 'dul ba'i sems can gang la chos gang bstan par rigs pa'i chos de ston pa ni ji ltar rigs pa zhes bya'o/ /de la 'dul ba dang mthun par 'dod chags can la mi gtsang ba dang / zhe sdang can la byams pa dang / gti mug can la rten cing 'brel te 'byung ba bstan pa dang / 'dul ba so so'i sems dang mthun pas na tshig de ni de dag gi rnar 'ong ste/ rnar 'ong ba'i tshig la ji ltar rigs pa zhes bya'o/ /zang zing med pa dang rnyed pa dang bkur sti dang / bstod pa la mi brten pa'o zhes bya ba la/ zang zing med pa dang mi brten pa don gcig par ston te/ chos gos dang lhung bzed la sogs pa ni rnyed pa zhes bya ste/ phyag 'tshal ba dang bskor ba la sogs pa ni bkur sti zhes bya'o/ /tshig gis snyan par brjod pa ni bstod pa zhes bya ste/ de dag la mi brten cing ma chags pas na zang zing med pa yin no/ /ran pa ni mthun pa ste ran pa la mi skyo ba'i phyir ro zhes bya ba la/ ran pa dang mthun pa gnyis don gcig par ston te/ tshig cal col mang du smras na ni 'jig rten pa dang mi mthun par 'gyur ro/ /mi mthun par gyur na skyo ba skye'o/ /de bas na ran pa la mi skyo ba'i phyir zhes smos te/ yi ge nyung ngu'i bshad pa las ni 'jig rten pa dag dga' bar byed pas na skyo ba mi skye ste/ 'jig rten pa dang mthun pa'i nyung ngu smras pa la ran pa zhes bya'o/ /yangs pa ni mi zad pa'o zhes bya ba la/ yangs pa dang mi zad pa don gcig par ston te/ bskal pa'am bskal pa'i mtha'i stan gcig la 'dug nas chos bshad na yang byang chub sems dpa'i tshig la zad pa med de de ltar mi zad pas na yangs pa zhes bya'o/ /yi ge phun sum tshogs pa'i tshigs su bcad pa gnyis te zhes bya ba la/ tshig phun sum tshogs pa bshad nas/ yi ge phun sum tshogs pa bshad de/ yi ge ni a dang ka la sogs pa'o/ /byang chub sems dpa'i yi ge thams cad yan lag brgyad dang ldan pa sha stag 'byung bas na yi ge phun sum tshogs pa zhes bya ste/ de tshigs su bcad pa gnyis kyis bstan to zhes bya ba'i don to/ /yan lag brgyad po gang zhe na/ de'i phyir/ bstan dang bshad pas de bzhin du/ /theg dang mthun zhing bshad pa las/ / grags dang ji ltar rigs pa las/ /'byung dang rjes su mthun pa'o/ /zhes bya ba smos te/ yan lag brgyad ni bstan pa dang bshad pa dang / de bzhin du theg pa dang mthun pa dang / 'jam pa dang / grags pa dang / ji ltar rigs pa dang / 'byung ba dang / rjes su mthun pa'o/ /de la chos ston pa ni dang por bcu'am lnga'am gsum zhes mdor bsdus te ston pa las bstan pa zhes bya'o/ /de nas mdor bsdus te bstan pa de nyid kyi phyir zhib tu rgyas par bshad pa las bshad pa zhes bya'o/ /nyan thos kyi theg pas 'dul ba rnams la nyan thos kyi theg pa 'chad pa dang / rang sangs rgyas kyi theg pas 'dul ba rnams la rang sangs rgyas kyi theg pa 'chad pa dang / theg pa chen pos 'dul ba rnams la theg pa chen po 'chad pa ni theg pa dang mthun pa zhes bya'o/ /yi ge rnams mi snyan pa rna ba la gnod cing / sems la gnod pa ma yin gyi rnar 'ong zhing sems la phan par 'chad pa ni 'jam pa zhes bya'o/ 'jig rten du grags pa'i yi ge ston pa ni grags pa zhes bya'o/ /'dul ba gang la chos gang bstan pa'i rigs pas 'dul ba de la/ chos de ston pa ni ji ltar rigs pa zhes bya'o/ /khams gsum las 'byung bar 'gyur ba'i rgyu 'phags pa'i lam ston pa ni 'byung ba zhes bya'o/ /'phags pa'i lam gyi yan lag brgyad dang mthun pa'i chos ston pa ni/ rjes su mthun pa zhes bya'o/ /yi ge'i yan lag brgyad po de dag kyang mdo sde las yi ge'i yon tan brgyad bshad pa dang rim bzhin du sbyar te/ brgyad pa gang zhe na/ rigs pa'i tshig dang yi ge dang ldan pa dang / rjes su 'brang ba dang / rjes su mthun pa dang / khas len pa dang / mthun pa dang / rjes su mthun pa dang / mkhas par sbyor ba'i tshig rdzogs pa ste/ de dag rim bzhin du sbyar ba ni 'grel pa las ji ltar sbyar ba bzhin du rig par bya'o/ /tshad ma dang mi 'gal bar rigs pa'i tshig dang yi ges ston pas so zhes bya ba la/ bstan pa zhes bya ba dang / rigs pa ni tshig dang yi ge zhes bya bar don gcig par sdud de/ de la byang chub sems dpa' dang po chos rnams mdor bsdus nas/ bcu zhe'am/ lnga zhe'am/ gsum zhes ston pa na mngon sum la sogs pa'i tshad ma gsum dang mi 'gal bar rigs pa'i tshig dang / yi ges mdor bsdus nas ston par byed pas na de la bstan pa zhes bya'o/ /bstan pa dang mi 'gal bar bshad pas na ldan pa'o zhes bya ba la/ bshad pa dang ldan pa gnyis don gcig tu sdud de/ dang por mdor bsdus te bshad nas/ mdor bsdus te bstan pa de phyis rgyas par 'chad nas yang sngar mdor bsdus te bstan pa de dang / phyis rgyas par 'chad pa don mi 'gal bar 'chad pas na ldan zhes bya ba ste/ sngar mdor bsdus te bstan pa dang / phyis rgyas par 'chad pa gnyis mthun par 'chad ces bya ba'i don to/ /de'ang dper na sngar phung po lnga zhes mdor bsdus te bstan pa la/ phyis zhib tu 'chad pa'i tshe phung po drug tu mi 'chad kyi lnga nyid du 'chad pa lta bu'o/ /theg pa'i rjes su 'brang ba'i phyir rjes su 'brangs te/ theg pa gsum dang mi 'gal bas so zhes bya ba la/ theg pa'i rjes su 'brang ba dang / rjes su 'brangs pa gnyis don gcig tu sdud de/ theg pa gsum gyis 'dul ba'i sems can rnams la so so dang mthun par theg pa gsum 'chad pas na rjes su 'brangs pa zhes bya'o/ /don de nyid bstan pa'i phyir ni theg pa gsum dang mi 'gal ba'i tshig smos te/ nyan thos kyi theg pas 'dul ba'i sems can la de dang mi 'gal bar nyan thos kyi theg pa nyid ston gyi/ theg pa chen po mi ston pa dang rang sangs rgyas kyis 'dul ba'i sems can la/ rang sangs rgyas kyi theg pa nyid ston gyi theg pa chen po mi ston pa dang / theg pa chen pos 'dul ba'i sems can rnams la de dang mi 'gal bar theg pa chen po nyid ston gyi/ nyan thos kyi theg pa mi ston pas na theg pa'i rjes su 'brang ba zhes bya'o/ /mi dga' ba'i phyir rjes su mthun pa ste/ 'jam pa'o zhes bya ba la/ rjes su mthun pa dang / 'jam pa gnyis don gcig tu sdud de/ de la chos 'chad pa'i dus na yi ge rna ba la gzan cing sems la gnod pa gzung dka' zhing khrog khrog po mi ston pa'i phyir/ rjes su mthun pa zhes bya'o/ /de ltar rna ba dang sems la mi gnod pa'i yi ge gzung sla ba ston pas 'jam pa zhes bya'o/ /grags pa'i phyir khas len pa ni don grags pas khas blangs pa'i phyir ro zhes bya ba la/ grags pa dang khas len pa don gcig tu sdud de/ 'jig rten du grags pa'i tshig dang / yi ge smra bar byed pas na khas len pa zhes bya'o/ /ci'i phyir zhe na/ 'jig rten du ma grags pa'i tshig dang / yi ge dag smras na ni 'jig rten pas don rtogs par mi nus shing de de bzhin du yin no zhes khas len du mi btub kyi/ 'jig rten du grags pa'i tshig dang yi ge smras na 'jig rten pa dag gis myur du tshig dang don khong du chud cing de de bzhin du bden no zhes khas len par byed pas na grags pas ni khas len par 'gyur ro/ /ji ltar rigs pa'i phyir mthun pa ste/ 'dul ba la 'os pa'o zhes bya ba la/ ji ltar rigs pa dang mthun pa gnyis don gcig tu sdud de/ 'dul ba'i snod gang la chos gang bshad pa rigs pa ci rigs su chos ston par byed pa ni mthun pa zhes bya'o/ /de la 'dod chags can la mi gtsang ba bstan par 'os zhe sdang can la byams pa bstan par 'os/ gti mug can la rten cing 'brel par 'byung ba bstan par 'os/ nga rgyal can la phung po'i rab tu dbye ba bstan par 'os/ rnam par rtog pa can la dbugs phyi nang du rgyu ba bstan par 'os te/ ci rigs su ston pa ni mthun pa zhes bya'o/ /'byung ba'i phyir rjes su mthun pa ste/ mya ngan las 'das pa'i phyed kyi phyir ro zhes bya ba la/ 'byung ba dang rjes su mthun pa don gcig tu sdud de/ khams gsum las 'byung bar byed pa ni 'phags pa'i lam ston pas na rjes su mthun pa zhes bya ste/ lam de gang dang rjes su mthun zhe na/ mya ngan las 'das pa dang rjes su mthun no/ /ji ltar mya ngan las 'das pa dang rjes su mthun zhe na/ /khams gsum las 'byung bar bya ba'i lam de/ de mya ngan las 'das pa thob par bya ba'i ched du bshad par bya bas na mya ngan las 'das pa dang rjes su mthun no/ /rjes su mthun pa dang / mkhas pa sbyor ba'i tshogs rdzogs pa ste/ slob pa'i 'phags pa'i lam yan lag brgyad dang ldan pa mthun pa'i phyir ro zhes bya ba la/ rjes su mthun pa dang /mkhas pa sbyor ba'i tshogs rdzogs pa gnyis don gcig tu sdud de/ de la mkhas pa sbyor ba ni rgyun du zhugs pa nas dgra bcom pa la 'jug pa'i bar du slob pa'i gang zag bdun la bya ste/ de dag gis mthong ba dang / bsgom pa'i lam la tshogs rdzogs pa zhes bya'o/ /tshogs rdzogs pa de la rjes su mu thun pa zhes bya ste/ lam de dag gang dang rjes su mthun zhe na/ mthong ba dang bsgom pa'i lam de dag ni slob pa'i gang zag bdun gyi 'phags pa'i lam yan lag brgyad dang rjes su mthun te/ de bas na mkhas ba sbyor ba'i tshogs rdzogs pa la rjes su mthun pa zhes bya'o/ /de ltar byang chub sems dpa' rnams kyi yi ge phun sum tshogs pa bshad nas/ mjug bsdu ba'i phyir/ mdor na sems can mchog rnams kyi/ /de ltar yi ge phun sum tshogs/ /zhes smos te/ de ltar zhes bya ba ni gong du bshad pa ltar na'o/ /sems can mchog ni byang chub sems dpa' la bya'o/ /gong du bshad pa ltar na byang chub sems dpa' rnams kyi yi ge ni yan lag brgyad dang ldan pas na yi ge phun sum tshogs pa yin no zhes bya ba'i don to/ /de ltar byang chub sems dpa' yi ge dang tshig phun sum tshogs pa'i yi ge dang / tshig grangs ni du zhig yod/ spyir ni ci 'dra snyam pa la/ de'i phyir/ bde gshegs dbyangs ni mtha' yas te/ /yan lag drug cu bsam mi khyab/ /ces bya ba smos te/ de bzhin gshegs pa rnams kyi dbyangs ni mtha' yas so/ /de ltar mtha' yas mod kyi mdor bsdu na du zhig yod ce na/ de ni drug cu yod de/ ji ltar mtha' yas she na/ yan lag drug cu po de re re zhing yang gsung dbyangs bsam gyis mi khyab pa 'byung bas na mtha' yas so/ /yan lag drug cu po de mdo gang las 'byung zhe na/ de'i phyir/ gang gsang ba'i bdag pos bstan pa zhes bya ba la sogs pa smos te gsang ba'i bdag po ni 'phags pa lag na rdo rje'o/ /des bstan pa ni des bshad pa'i mdo sde gsang ba gsum bstan pa'i mdo'o/ /de la snum pa ni sems can gyi khams dge ba'i rtsa bar gtogs pa'i phyir ro zhes bya ba la dper na chu rab tu snum pas shing dang rtswa dang / sman dang nags tshal stug po la sogs pa brlan par byas nas/ sngon ma skyes pa rnams ni skye bar byed/ skyes pa rnams ni phyir zhing 'phel ba dang rgyas par byed pa de bzhin du de bzhin gshegs pa'i gsung gis kyang sems can gyi sems kyi khams la sngon dge ba'i rtsa ba ma skyes pa rnams ni skye bar byed/ skyes pa rnams ni phyir zhing 'phel ba dang rgyas par byed pas na spyir snum ba zhes bya'o/ /'jam pa ni tshe 'di nyid la bde bar reg pa'i phyir ro zhes bya ba la/ dper na lha'i gos ka tsa li dang / dar dang srin bal la sogs pa 'jam pa la lus kyis reg na lus kyi dbang po bde bar byed pa bzhin du de bzhin gshegs pa'i gsung yang 'jam zhing mnyen pas na thos pa'i dus na'am/ tshe 'di la yid kyi dbang po bde bar byed pas na 'jam pa zhes bya'o/ /don bzang po'i phyir yid du 'ong ba'o zhes bya ba la/ de bzhin gshegs pa'i gsung ni sems can dang bdag yod par mi rtog gi bden pa gnyis dang rten cing 'brel par 'byung ba dang byang chub kyi phyogs kyi chos la sogs pa'i don 'chad de/ don bzang bas na yid du 'ong ba zhes bya'o/ /yid smos pas ni gang gi phyir don ni yid kyi rnam par shes pas shes par nus kyi rna ba'i rnam par shes pas ni don dpyod par mi nus pas yid smos so/ /yi ge bzang po'i phyir yid dga' ba'o zhes bya ba la/ de bzhin gshegs pa'i gsung ni ba lang rdzi dang / phyugs rdzi la sogs pa'i tshig dang / yi ge lta bu cal col mi gsung gi lha dang 'phags pa'i tshig dang / yi ge gsungs te/ yi ge bzang ba'i phyir yid dga' ba zhes bya'o/ /'jig rten las 'das pa bla na med pa phyi nas thob pa'i phyir rnam par dag pa'o zhes bya ba la/ nyan thos dang rang sangs rgyas la sogs pa 'jig rten las 'das pa yin te/ ci'i phyir zhe na/ nyon mongs pa'i sgrib pa spangs pa'i phyir ro/ /de dag 'jig rten las 'das pa yin yang / bla na med pa ma yin te/ shes bya'i sgrib pa spangs pa'i rnam par mi rtog pa'i ye shes ma thob pa'i phyir ro/ /byang chub sems dpa' rnams kyis ni nyon mongs pa dang / shes bya'i sgrib pa thams cad spangs pa'i rnam par mi rtog pa'i ye shes thob ste/ nyan thos las gong du gyur pas na bla na med pa zhes bya'o/ /rnam par mi rtog pa'i ye shes kyi rjes la dag pa 'jig rten pa'i ye shes 'byung ste/ dag pa 'jig rten pa'i ye shes de las gsung de 'byung bas na rnam par dag pa zhes bya'o/ /nyon mongs pa'i bag chags bag la nyal dang bral ba'i phyir dri ma dang bral ba'o zhes bya ba la/ 'dod chags la sogs pa nyon mongs pa drug gi sa bon la ni nyon mongs pa'i bag chags zhes bya'o/ /nye ba'i nyon mongs pa'i sa bon la ni bag la nyal zhes bya ste/ dri ma de dag spangs nas gsungs pa'i phyir dri ma dang bral ba zhes bya'o/ /grags pa'i tshig dang yi ge'i phyir/ /rab tu gsal ba'o zhes bya ba la/ 'jig rten du ma grags pa'i tshig dang yi ge gsung gi / 'jig rten du grags pa'i tshig dang yi ge gsungs pa'i phyir rab tu gsal ba zhes bya'o/ /mu stegs can thams cad kyi lta ba ngan pa'i blo 'joms pa'i stobs kyi yon tan dang ldan pa'i phyir stobs dang ldan pa'o zhes bya ba la/ gsung de ni mu stegs pa bdag dang sems can la sogs pa yod par lta ba'i lta ba ngan pa'i blo can rnams 'joms shing med par byed pa'i stobs kyi yon tan dang ldan pas na stobs dang ldan pa zhes bya'o/ /bsgrubs na 'byung ba'i nyan 'dod pa'o zhes bya ba la/ de bzhin gshegs pa'i gsung mnyan nas bsgrubs na khams gsum las 'byung bar 'gyur te/ de bas na nyan 'dod pa zhes bya ste nyan par 'os pa zhes bya ba'i don to/ /pha rol gyi rgol ba thams cad kyis mi choms pa'i phyir mi tshugs pa'o zhes bya ba la/ de bzhin gshegs pa chos 'chad pa ni mu stegs pa la sogs pa pha rol rgol ba rnams kyis de bzhin gshegs pa'i gsung la zil gyis mi non cing sun mi phyin pas na mi tshugs pa zhes bya'o/ /'dod chags la sogs pa gnyen po'i phyir 'dul ba'o zhes bya ba la/ gsung de 'dod chags kyi gnyen por 'gyur bas na/ zhe sdang la sogs pa nyon mongs pa kun gyi gnyen por 'gyur bas na nyon mongs pa 'dul ba'i phyir 'dul ba zhes bya'o/ /bslab pa bcas pa'i bde ba'i thabs kyi phyir mi rtsub pa'o zhes bya ba la/ mu stegs pa rnams kyi bslab pa bcas pa ni me lngas mtha' bskor ba dang / skra 'thog pa dang / ri ka nas mchong ba dang / thal bar 'gre ba la sogs pa tshe 'di dang / tshe rabs gzhan du gnod pa bslab pa 'cha' bas na rtsub po yin no zhes de bzhin gshegs pa'i 'dul ba bcas pa ni tshe 'dir yang mi grang mi bkres pa'i bza' ba dang / bgo ba spyod du gnang la/ tshe rabs gzhan du'ang don khong du chud par 'gyur ba'i thabs sla ba yin pas na mi rtsub pa zhes bya'o/ /yang na dang po'i tshig gis bslab pa 'cha' bas na dge slong dag 'di ni khyed la phan pa dang bde bar 'gyur ba yin no zhes gsungs pas na mi rtsub pa'o/ /de las 'das nas yang dag par 'byung bas thabs ston pa'i phyir mi brlang ba'o zhes bya ba la/ gal te bslab pa las 'das na yang de las 'das phan chad sgo gzhan la 'jug cing 'byung bar bya ba'i thabs ye med pa ma yin gyi/ bslab tshig las 'das te bslab pa nyams na yang bshags pa dang phyis mi bya bar bsdams pa dang / bsod nams kyi rjes su yi rang ba la sogs pa rnam grangs kyi sgo gzhan la 'jug cing khams gsum las 'byung bar bya ba'i thabs ston pas na mi brlang ba zhes bya'o/ /theg pa gsum ston pa'i phyir shin tu 'dul ba'o zhes bya ba la/ nyan thos kyi theg pas 'dul ba rnams la nyan thos kyi theg pa ston/ rang sangs rgyas kyi theg pas 'dul ba rnams la rang sangs rgyas kyi theg pa ston/ theg pa chen pos 'dul ba rnams la theg pa chen po ston pas na shin tu 'dul ba zhes bya'o/ /g.yeng ba'i gnyen po'i phyir rnar snyan pa'o zhes bya ba la/ de bzhin gshegs pa'i gsung ni shin tu 'jam zhing snyan pa yin pas nyan pa'i sems g.yeng ba med pa dang / rna blags te nyan par byed pas na rna bar snyan pa zhes bya'o/ /ting nge 'dzin bskyed pa'i phyir lus sim par byed pa'o zhes bya ba la/ de bzhin gshegs pa'i gsung de thos na sems mnyam par 'jog pa 'byung ngo / /sems mnyam par gzhag pa las zhi gnas kyi mtshan nyid kyi ting nge 'dzin skye'o/ /ting nge 'dzin skyes na lus la bde ba skye bar byed do/ /de bas na lus sim par byed pa zhes bya'o/ /lhag mthong gi dga' ba skyed par byed pa'i phyir sems dga' bar byed pa'o zhes bya ba la/ gsung des shes rab kyi mtshan nyid chos rnams kyi rang dang spyi'i mtshan nyid la mkhas shing mi shes pa'i mun pa dang bral ba'i lhag mthong gi dga' ba skyed par byed pa'i phyir/ sems dga' bar byed pa zhes bya'o/ /the tshom gcod par byed pa'i phyir sems dga' bar byed pa'o zhes bya ba la/ ji tsam du the tshom gyi zug rngu zug pa de tsam du yid mi bde ba yin pa las de bzhin gshegs pa'i gsung gis ni de bzhin du the tshom gyi zug rngu 'byin par byed pas na snying dga' bar byed pa zhes bya'o/ /log par 'dzin pa spong ba'i phyir dga' ba dang bde ba skyed pa'o zhes bya ba la log par 'dzin pa rnam pa gnyis te/ mi shes pa dang log par shes pa'o/ /de la mi shes pa ni chos rnams kyi rang dang spyi'i mtshan nyid thams cad nas thams cad du khong du ma chud pa ste/ de dag gi mi shes pa spong zhing shes pa la 'jog par mdzad pas na dga' ba skyed pa zhes bya'o/ /log par shes pas ni bdag dang rtag pa dang bde ba la sogs pa yod par shes pa ste/ de dag gi log pa'i shes pa spong zhing yang dag pa'i shes pa la 'god pas ni bde ba skyed pa zhes bya'o/ /sgrub pa 'gyod pa med pa'i phyir mi 'gyod pa'o zhes bya ba la/ de bzhin gshegs pa'i gsung thos nas mnyan pa dang bsams pa la sogs pa'i sgo nas bsgrubs na/ mthar 'bras bu 'thob cing de kho na mngon sum du rtogs par gyur pas bdag gis gsung de mnyan pa ni don med par byas so snyam pa'i mi dga' ba dang / 'gyod pa med pa'i phyir mi 'gyod pa zhes bya'o/ /thos pa'i ye shes phun sum tshogs pa'i gnas kyi phyir kun shes par bya'o zhes bya ba la/ de bzhin gshegs pa'i gsung de mnyan cing thos na thos pa'i shes rab phun sum tshogs pa skye bar 'gyur te/ thos pa'i shes rab phun sum tshogs pa skye ba'i rgyu dang gnas su gyur pa'i phyir kun shes par bya ba zhes bya'o/ /bsam pa'i ye shes phun sum tshogs pa'i gnas kyi phyir rnam par shes pa'o zhes bya ba la/ ji ltar mnyan pa'i chos de rig pa'i sgo nas bsams pas na bsam pa'i shes rab phun sum tshogs pa skye ste/ bsam pa'i shes rab phun sum tshogs pa skye ba'i rgyu dang gnas su gyur pa'i phyir rnam par shes par bya ba yin no/ /slob dpon gyis 'chab pa med pa'i chos ston pa'i phyir rnam par gsal ba'o zhes bya ba la/ de bzhin gshegs pa ni chos kha cig 'chad kha cig mi 'chad ces bya ba ma yin gyi/ chos thams cad 'chad pa dang / tshig 'chad don mi 'chad pa ma yin gyi/ tshig dang don du bcas te 'chad pas slob dpon 'chab pa med par ston pa'i phyir rnam par gsal ba zhes bya'o/ /bdag gi don rjes su thob pa dag dga' bar byed pa'i phyir dga' ba'o zhes bya ba la/ 'phags pa rgyun du zhugs pa nas/ dgra bcom pa man chad gang zag brgyad dang sa bcu pa'i byang chub sems dpa' dang de bzhin gshegs pa dag ni bdag gi don rjes su thob pa zhes bya ste/ ci'i phyir zhe na/ rgyun du zhugs pa la sogs pa'i gang zag brgyad kyis kyang nyon mongs pa'i nyon mongs pa dang / las kyi nyon mongs pa dang / tshe'i nyon mongs pa spangs pa'i mtshan nyid mya ngan las 'das pa mngon sum du byas na ni bdag gi don rjes su thob pa zhes bya'o/ /sa bcu'i byang chub sems dpa' dang / de bzhin gshegs pas kyang bsod nams dang ye shes kyi tshogs rdzogs nas bdag dang gzhan gyi don phun sum tshogs pa rnyed pas na bdag gi don rjes su thob pa zhes bya ste/ bdag de bzhin gshegs pa'i gsung gi sgo nas 'bras bu thob par mthong ste/ dga' ba skyed par byed pas na dga' ba zhes bya'o/ /bdag gi don ma thob pa rnams sred pa'i phyir mngon par 'dod pa'o zhes bya ba la/ bdag gi don ma thob pas ni so so'i skye bo yan chad mos pa spyod pa'i sa yan chad 'jig rten gyi chos mchog ma thob pa man chad pa ni bdag gi don ma thob pa zhes bya ste/ de dag kyang bdag gi don rjes su thob par bya ba'i phyir/ de bzhin gshegs pa'i gsung la 'jug par 'dod pa skyed par byed pas na mngon par 'dod pa zhes bya'o/ /bsam du med pa'i chos yang dag par ston pa'i phyir kun shes par byed pa'o zhes bya ba la/ so so rang gis rig par bya ba chos kyi dbyings dang rnam par mi rtog pa'i ye shes dang byang chub kyi phyogs rnams ni bsam du med pa'i chos zhes bya ste/ chos de dag yang dag par ston par byed pas na kun shes par byed pa zhes bya'o/ /yang na chos gang bsams na khrag tu skyug cing smyo bar 'gyur ba'i chos de dag ni bsam du med pa'i chos zhes bya ste/ de yang gang zhe na/ phyi'i dngos po rnam pa sna tshogs pa 'grub par byed pa'i las bsam gyis mi khyab pa dang / rnal 'byor pa'i ting nge 'dzin gyi spyod yul bsam gyis mi khyab pa dang / de bzhin gshegs pa'i ye shes kyi spyod yul bsam gyis mi khyab pa dang / sman dang sngags kyi mthu bsam gyis mi khyab pa ste/ chos de dag yang dag par bstan pas nyan pa po rnams gnas de dag spong bar byed pas na/ kun shes par byed pa zhes bya'o/ /bsam pa'i chos yang dag par ston pa'i phyir rnam par shes par byed pa'o zhes bya ba la/ phung po dang khams dang skye mched dang / sa dang pha rol tu phyin pa bsam pa'i chos zhes bya ste/ chos de dag phyin ci ma log par bstan pa'i phyir rnam par shes par byed pa zhes bya'o/ /tshad ma dang mi 'gal ba'i phyir rigs pa'o zhes bya ba la/ gsung de mngon sum dang rjes su dpag pa dang / lung gi tshad ma gsum dang yang mi 'gal bar gsungs pas na rigs pa zhes bya'o/ /'dul ba la ji ltar rigs par ston pa'i phyir mthun pa'o zhes bya ba la/ nyan thos kyi theg pa rnams la theg pa chen po mi ston/ theg pa chen po rnams la nyan thos kyi theg pa mi ston te/ snod dang chos su mi 'tsham pa mi ston gyi sems can gang la chos gang bstan par rigs pa'i sems can de la chos de ston te/ snod dang chos su 'tsham par ston pas na mthun pa zhes bya'o/ /dgos pa dang bcas pa'i phyir zlog pa'i nyes pa spangs pa'o zhes bya ba la/ ma rig pa dang mun pa dang mun nag dang / gti mug ces bya ba la sogs pa rnam grangs kyi tshig smos pa rnams la zlos pa'i nyes par mi 'gyur te/ ci'i phyir zhe na/ dgos pa dang bcas don dang bcas pa'i phyir ro/ /ci dgos she na/ chos 'chad pa'i 'khor du 'gro ba mang po tshogs pa la/ la la la ni tshig gi rnam grangs gang gis go/ /la la la gang gis go ba de kun gyis go ba'i phyir dang / gzhan dag so so yang dag par rig pa'i sa bon bskyed par bya ba'i phyir te/ rnam grangs kyi tshigs bcad dgos pa ni rgyas par bshad par rigs pa'i bstan bcos las 'byung ba bzhin du blta bar bya'o/ /mu stegs thams cad skrag par byed pa'i phyir seng ge'i sgra'i shugs lta bu'o zhes bya ba la/ dper na seng ge'i sgra'i dbyangs kyi shugs kyis ri dwags phra mo rnams skrag par byed pa de bzhin du/ de bzhin gshegs pa'i stobs dang bdag med par gsungs pa'i gsung dbyangs kyi sgra bsgrags pas mu stegs ri dwags rnams dang 'dra ba rnams skrag par byed pas na seng ge'i sgra'i shugs lta bu zhes bya'o/ /spangs pa'i phyir glang po che'i sgra dbyangs lta bu'o zhes bya ba la/ glang po che ni mi'i yul na gnas pa'i glang po che la mi bya'i/ lha'i glang po che e'i ba ra na la sogs pa la bya'o/ /glang po che'i sgra dbyangs ni sub sub bo dang 'dzer 'dzer po ma yin pas spangs par 'gyur ro/ /de bzhin du de bzhin gshegs pa'i gsung dbyangs kyang / 'dzer 'dzer po dang sub sub po med pas na spangs pa zhes bya'o/ /zab pa'i phyir sprin gyi sgra dbyangs lta bu'o zhes bya ba la/ sprin ni 'brug la bya ste/ dper na 'brug gi sgra drung nas nyan na yang lhag par drag tu thos pa med thag ring po nas mnyan na yang lhag par sgra chung bar grags pa med de/ nye ring kun 'dra bar snyoms pa kho nar thos pas zab pa yin pa de bzhin du de bzhin gshegs pa'i gsung yang nye ring du kun la drag dal med par grags pas na sprin gyi sgra dbyangs lta bu zhes bya'o/ /'jebs pa'i phyir klu'i dbang po'i dbyangs lta bu'o zhes bya ba la/ dper na klu'i gnas na klu'i dbang po tshig 'jebs shing tshig btsun la klu kun nyan du btub pa de bzhin du/ de bzhin gshegs pa'i bka' yang 'jibs shing btsun la/ lha dang lha ma yin la sogs pa thams cad kyis bka' nyan par byed pas na klu'i dbang po'i dbyangs lta bu'o zhes bya'o/ /snyan pa'i phyir mi'am ci'i dbyangs lta bu'o zhes bya ba la/ dper na sems can gyi sgra skad kyi nang na mi'am ci'i skad las mchog med de snyan cing 'jam pa de bzhin du de bzhin gshegs pa'i gsung yang snyan cing 'jam pas na mi'am ci'i dbyangs lta bu'o zhes bya'o/ /phyir zhing mi gcod pa'i phyir ka la ping ka'i sgra lta bu'o zhes bya ba la/ dper na ka la ping ka'i sgra phyir zhing gzhan nas gzhan du gyur la rjes kyang mi gcod de dper na 'phan rings rlung gis btab pa na 'chad pa yang med cing gzhan nas gzhan du ldog par byed do/ /de bzhin gshegs pa'i chos 'chad pa na yang gsung dbyangs kyi rgyun mi gcod la/ dbyangs snyan pa yang snga ma dang mi 'dra bar phyi ma snyan pa gzhan dang gzhan dag 'byung bas na ka la ping ka'i sgra lta bu'o/ /kha cig las phyir zhing gcod ces 'byung ste/ de'i don kyang dper na bya ka la ping ka'i sgra phyung ba na sems can gyi sems su zhugs nas sgra de'i rgyun gcod par byed do/ /sgra'i rgyun 'chad na yang de snyan pas na yang nyan par 'dod pa'i sems skye bar byed pa de bzhin du sangs rgyas bcom ldan 'das kyi gsung yang nyan pa po'i sems kyi rgyud la 'jug par byed cing gsung rgyun bcad na yang nyan par 'dod pa'i bsam pa skye bas na ka la ping ka'i sgra lta bu'o/ /ring du song ba'i phyir tshangs pa'i sgra dbyangs lta bu'o zhes bya ba la/ dper na tshangs pa'i dbyangs ni mnyen pas na ring du song ba ste/ ring du chad dum dum por chad pa ma yin pa de bzhin du de bzhin gshegs pa'i gsung yang ring du 'dren te/ rngub rngub por chad pa ma yin pas na tshangs pa'i sgra dbyangs lta bu'o zhes bya'o/ /'grub pa thams cad kyi sngon du 'gro zhing bkra shis pa'i phyir dzi ba dzi ba ka'i sgra 'byin pa lta bu'o zhes bya ba la/ dper na sems can dag don gnyer du 'gro ba la/ bya dzi ba dzi ba ka'i skad thos na don thams cad gdon mi za bar 'grub pa'i phyir ro/ /de'i skad ni don 'grub pa'i bkra shis kyi sngon du 'gro ba ltar de bzhin gshegs pa'i gsung de yang 'jig rten dang 'jig rten las 'das pa'i don thams cad 'grub pa'i bkra shis pa'i snga ltas yin pas na/ dzi ba dzi ba ka'i sgra 'byin pa lta bu'o zhes bya ste/ de bzhin gshegs pa'i gsung sngar thos pa las phyis 'jig rten pa dang 'jig rten las 'das pa'i don thams cad 'grub par 'gyur ba'i phyir ro/ /mi 'da' bar bya ba'i phyir lha'i dbang po'i dbyangs lta bu'o zhes bya ba la/ dper na brgya byin lha'i dbang po'i dbyangs dang tshig lha gzhan gyis cung zad kyang 'da' bar bya zhing bkag par bya bar mi nus pa de bzhin du de bzhin gshegs pa'i bka' yang lha dang klu dang gnod sbyin la sogs pas 'da' bar bya zhing bka' bcag par mi nus pas na lha'i dbang po'i dbyangs snyan pa lta bu zhes bya ste/ dper na tshe dang ldan pa dga' bo lta bu rab tu 'byung bar ma dad kyang rab tu mi 'byung ngam zhes bka' stsal pa las/ bka' las 'da' bar bya ba ma nus nas rab tu 'byung bar 'tshal lo zhes khas blangs pa lta bu'o/ /bdud thams cad kyis phyir rgol ba las kyang rgol zhing sngon du 'gro ba'i phyir rnga'i dbyangs lta bu'o zhes bya ba la/ dper na g.yul n gor 'thab mo bkye ba las gzhan dag pham nas rgyal bar 'gyur na rgyal ba'i mtshan mar dang por rnga'i sgra 'byin pa lta bur de bzhin gshegs pas kyang bdud dang mu stegs la sogs pa las rgyal bar byas nas dang po nyid du chos kyi 'khor lo bskor ba'i sgra phyung bas na rnga sgra'i dbyangs snyan lta bu zhes bya'o/ /bstod kyang nyon mongs pa med pa'i phyir mi bgyid pa'o zhes bya ba la/ de bzhin gshegs pa chos ston par mdzad pa na gzhan dag gis bde bar gshegs pa chos bstan pa ni dge bar gsungs pa'o/ /legs par bshad pa'o zhes bstod du zin kyang mthos so snyam du dgongs pa'i nga rgyal gyi nyon mongs pa med pas na mi bgyid pa zhes bya'o/ /smad kyang nyon mongs pa med pa'i phyir ma zhum pa'o zhes bya ba la/ khyod kyis chos bstan pa de ni nyes so zhes gzhan dag gis smad kyang dmas so snyam pa'i nyon mongs pa med pas ma zhum pa zhes bya'o/ /brda sprad pa thams cad kyi mtshan nyid la rnam pa thams cad du zhugs pa'i phyir sgra thams cad la rab tu zhugs pa'o zhes bya ba la/ brda sprad pa ni lung bstan pa ste/ nyan thos dang byang chub sems dpa' dang / rgyal po chen po dag ma 'ongs pa na 'di ltar 'byung bar 'gyur ro zhes lung ston pa na brda sprad pa zhes bya'o/ /dus gsum du nyan thos la sogs pa ji ltar 'byung ba thams cad lung ston pa na brda sprad pa thams cad kyi mtshan nyid la rnam pa thams cad du rab tu zhugs pa zhes bya ste de ltar dus gsum gyi dngos po thams cad lung ston pas na sgra thams cad la rab tu zhugs pa zhes bya'o/ /yang na rig pa'i gnas lnga la sgra rig pa'i rig pa thams cad la mkhas pa ni brda sprad pa thams cad kyi mtshan nyid la rnam pa thams cad du zhugs pa zhes bya ste/ de bas na sgra thams cad la rab tu zhugs pa zhes bya'o/ /brjod de mi smra ba med pa'i phyir dang / zur chag pa med pa'o zhes bya ba la/ de bzhin gshegs pa ni dus thams cad du dgongs pa rtse gcig tu 'jog pa yin pas/ chos 'di 'dra ba zhig brjod pas bshad du med do bsnyel ba med pas na zur chag pa med pa zhes bya'o/ /yang na chos 'di 'dra ba zhig bshad par bya'o zhes dgongs pa la bshad pa'i dus na bsnyel nas ma bshad pa mi mnga' bas na zur chag pa med pa zhes bya'o/ /'dul ba'i bya ba la dus thams cad du gnas pa'i phyir tshang ba'o zhes bya ba la/ 'dul ba'i bya ba ni sems can dge ba'i rtsa ba ma bskyed pa rnams bskyed pa dang / bskyed pa rnams 'phel zhing brtas par bya ba dang / 'phel zhing brtas pa rnams rnam par grol bar bya ba ni 'dul ba'i bya ba zhes bya ste/ 'dul ba'i bya ba rnams la skad cig kyang mi yol bar de dag gi don ji ltar bya zhes dus thams cad du dgongs pa nye bar gzhag pas na tshang ba zhes bya'o/ /rnyed pa dang bkur sti la mi brten pa'i phyir ma chags pa'o zhes bya ba la/ rnyed pa ni chos gos la sogs pa'o/ /bkur sti ni bstod pa dang phyag bya ba la sogs pa ste/ de dag la ma chags ma zhen pas na ma chags pa zhes bya'o/ /'jigs pa med pa'i phyir ma zhum pa'o zhes bya ba la/ chos 'chad pa'i dus na mu stegs pas brgal na mi thub pa'o snyam pa'i 'jigs pa mi mnga' bas na mi zhum pa zhes bya'o/ /mi skyo ba'i phyir dga' ba'o zhes bya ba la/ chos 'chad pa mdzad kyang thugs skyo ba dang sku la mi bde ba mi mnga' bas na dga' ba zhes bya'o/ / rig pa'i gnas thams cad la mkhas par zhugs pa'i phyir rgyas pa'o zhes bya ba la/ rig pa'i gnas lnga thams cad la mkhas pa dang ldan pa'i sems can rnams la chos 'chad pa mdzad pas na rgyas pa zhes bya'o/ /sems can la don de thams cad bsgrubs pa'i phyir tha ba dang bcas pa'o zhes bya ba la/ sems can gang dge ba'i rtsa ba bskyed pa de dag thams cad ni tha ba med pa zhes bya ste/ bcas pa'i sgras ni tha ba med pa yang bsdu'o/ /sems can tha ba dang bcas pa rnams la ni dge ba'i rtsa ba bskyed pa'i don sgrub par byed do/ /dge ba'i rtsa ba bskyed pa rnams la ni dge ba'i rtsa ba brtas pa dang / 'phel bar byed de/ de bas na tha ba dang bcas pa zhes bya'o/ /rgyun ma chad pa'i phyir zhugs pa'o zhes bya ba la/ de bzhin gshegs pa chos 'chad pa na bar 'ga' ni sems can la chos bshad par bya'o/ /bar 'ga' ni mi bshad do snyam du dgongs pa med par rgyun du 'chad par mdzad pas na zhugs pa zhes bya'o/ /yang na chos 'chad pa'i tshe lan cig bshad nas rgyun bcad de thag gi tsam gzhes nas yang 'chad par mdzad pa med kyi tshig dang gsung gi rgyun ma 'chad par mdzad pas zhugs pa zhes bya'o/ /rnam pa sna tshogs la nye bar sbyor ba'i phyir rol pa'o zhes bya ba la/ de bzhin gshegs pa chos 'chad pa ni tshig dang yi ge dang ming gcig gi sgo nas 'chad par mdzad pa ma yin gyi/ tshig dang ming dang yi ge sna tshogs mang po'i sgo nas 'chad par mdzad pas na rol pa zhes bya'o/ /gsung gcig la sgra mang po'i rig pa nye bar gnas pa'i phyir dbyangs thams cad rdzogs pa'o zhes bya ba la/ de bzhin gshegs pas gsung gcig phyung ste gsung gi rang bzhin gcig kho nar zad mod kyi gcig po de las lha dang klu dang gnod sbyin dang / mi dang byol song dang / yi dwags la sogs pa so so'i sgra dang skad gang yin pa de dang mthun mthun du so sor thos pas na/ dbyangs thams cad rdzogs pa zhes bya'o/ /gcig gis don mang po chud pa nye bar gnas pa'i phyir/ dbang po thams cad mgu ba'o zhes bya ba la/ de bzhin gshegs pas mi rtag pa la sogs pa'i chos kyi don gcig bstan na sems can rnams kyis ni so so'i sems kyi chos kyi don gang dang gang la dad pa de bzhin du khong du chud par 'gyur bas na sems can rnams kyi dad pa la sogs pa'i dbang po tshim par byed pa'i phyir dbang po thams cad mgu ba zhes bya'o/ /ji ltar dam bcas ba'i phyir mi smad pa'o zhes bya ba la/ de bzhin gshegs pa ni dang po ji ltar dam bcas pa las gzhan du 'gyur ba mi mdzad pas na dam pa las nyams so zhes gzhan gyis smad du med pas na mi smad pa zhes bya'o/ /yang na bcom ldan 'das kyis nga'i chos mnyan te bsgrubs na de bzhin du 'bras bu 'grub par 'gyur ro zhes dam bcas pa la sems can rnams kyis kyang bcom ldan 'das kyi bka' mnyan te bsgrub na dam bcas pa bzhin du 'bras bu 'gyur bas na mi smad pa zhes bya'o/ /thob pa'i dus la bab pa dang ldan pa'i phyir mi g.yo ba zhes bya ba la/ gnas gang du dus gang gi tshe sems can gang yongs su smin par bya ba'i dus la bab na rgya mtsho'i rlabs bzhin du skad cig kyang mi g.yo bar smin par mdzad pas na mi g.yo ba zhes bya ste/ de bas na mdo gzhan dag las kyang dris kyang kha cig ma bshad pa las ma dris kyang kha cig ched du gsungs zhes bshad pa lta bu'o/ /mi rigs par ston pa'i phyir brtan pa'o zhes bya ba la/ de bzhin gshegs pa chos 'chad pa ni rings pa dang / rtab por 'chad pa mi mnga' bas na brtan pa zhes bya'o/ /ring ba dang nye ba'i 'khor thams cad kyis mtshungs par thos pa'i phyir 'khor thams cad la gsungs pa'o zhes bya ba la/ de bzhin gshegs pa'i chos 'chad pa'i g sung phyung ba na 'khor nye ba 'ba' zhig gis thos kyang 'khor thag ring po na gnas pas mi thos pa ma yin gyi de ji ltar drung na gnas pa rnams kyis thos pa de bzhin du 'jig rten gyi khams du ma'i pha rol na gnas pa thams cad kyis kyang 'di dang 'dra bar thos pas na 'khor thams cad la gsungs pa zhes bya'o/ /'jig rten gyi don thams cad dpe'i sgo nas bsngos pa'i phyir rnam pa thams cad dang ldan pa'o zhes bya ba la/ dam pa'i chos 'chad pa'i dus na yang chos kyi don khong du chud par bya ba'i phyir 'jig rten gyi chos rgya mtsho dang ri rab dang nyi ma dang zla ba la sogs pa dper bzhag nas de dang sbyor zhing 'chad pa'i phyir rnam pa thams cad dang ldan pa zhes bya'o/ /bshad pa'i bdag nyid che ba la tshigs su bcad pa bzhi ste zhes bya ba la/ de bzhin gshegs pa chos 'chad pa ni 'bras bu che yon tan che bar tshigs su bcad pa bzhis bstan to zhes bya ba'i don to/ /tshig dang rtsa ba rab ldan bstan pa dang / / rnam dbye the tshom gcod pas so/ /rnam pa mang po'i rjes 'gro ba/ /brjod pa spros pas shes pa la'o/ /zhes bya ba la/ de bzhin gshegs pa rnams ni rnam pa brgyad ltar chos 'chad de/ tshig gis 'chad pa dang / rtsa ba dang rab tu ldan pas 'chad pa dang / bstan pas 'chad pa dang / rnam par dbye bas 'chad pa dang / the tshom gcod pa dang / rnam pa mang po'i rjes su 'gro ba dang / brjod pa shes pa la 'chad pa dang / spros pas shes pa la 'chad pa ste/ de yang mdo sde dag las 'chad par byed do/ /bcas par byed pa'o/ /rnam par 'jog go rnam par 'byed do/ /rnam par 'grel to/ /gsal bar byed do/ /bshad do/ /rab tu grags so zhes 'byung ba dang rim bzhin du sbyar te/ de ni 'grel ba las ji ltar sbyar ba bzhin du rig par bya'o/ /tshig ni brjod pa'o zhes bya ba la/ dad pa'i rjes su 'brang ba'i gang zag la rigs pa dang ma sbyar ba tshig dang yi ges 'dus byas thams cad mi rtag go zhes bya ba la/ 'chad pa ni brjod pa zhes bya'o/ /rtsa ba rab tu ldan pa ni bcas pa byed pa'o zhes bya ba la/ rab tu ldan pa'i sgra ni rigs pa la bya ste/ chos kyi rjes su 'brang ba'i gang zag rnams la mngon sum dang rjes su dpag pa la sogs pa'i rigs pa dang ldan pa'i rtsa ba ston cing 'chad par byed pa ni bcas pa byed pa zhes bya'o/ /rab tu 'jog pa dang rnam par dbye ba dang / 'grol ba ni bstan pa dang / rnam par dbye ba dang / the tshom bcad pa dang rim bzhin no zhes bya ba la/ dang po nyid du mdo tsam du dgod cing mdor bsdus nas bstan pa ni rab tu 'jog pa zhes bya'o/ /de nas zhib tu phye ste rgyas par bshad pa la ni rnam par dbye ba zhes bya'o/ /chos gang dang gang la the tshom du gyur pa rnams kyi the tshom bcad cing gsal ba la ni rnam par grol ba zhes bya'o/ /gsal bar byed pa ste zhes bya ba la/ de bzhin gshegs pa chos 'chad pa na don dang tshig gsal bar 'chad par mdzad ces bya ba'i don to/ /ji ltar gsal bar mdzad ce na/ de'i phyir gsal bar byed de/ nges pa'i mthu'i don gyi phyir rnam pa mang po dang ldan pas ston pa'o zhes bya ba smos te/ nges pa'i mthu zhes bya ba ni phyin ci ma log pa la bya ste/ chos rnams kyi don phyin ci ma log par rtogs par bya ba'i phyir chos 'chad pa rnam grangs du mar spros te/ yang nas yang du bsnan cing ston pa ni gsal bar byed pa zhes bya'o/ /bshad pa ni brjod pa shes pa la'o zhes bya ba la/ brjod pa shes pa ni glengs pa shes pa'i gang zag la bya ste/ glengs pa shes pa'i gang zag rnams la chos kyi don mdor bsdus nas ston par byed pa ni bshad pa zhes bya'o/ /rab tu bsgrags pa ni spros pas shes pa la'o zhes bya ba la/ rnam grangs du mar rgyas par bshad na khong du chud par 'gyur ba'i gang zag rnams la ni spros pas shes pa zhes bya ste/ de dag la zhib tu spros te bshad pa ni rab tu bsgrags pa zhes bya'o/ /sangs rgyas rnams kyis bshad pa 'di/ /gang phyir 'khor gsum dag pas so/ /zhes bya ba la/ gong du bshad pa'i bshad pa brgyad po 'di dag ni sangs rgyas rnams kyis bshad pa zhes bya ste/ bshad pa de dag kyang rnam par dag par 'dod do/ /ji ltar rnam par dag ce na/ 'khor gsum yongs su dag pas rnam par dag pa'o/ /'khor gsum ni gang gis ston pa dang / ji ltar ston pa dang / gang la ston pa'o/ /nyes pa dag dang bral ba ni rnam pa brgyad nyid du shes par bya zhes bya ba la/ 'khor gsum yongs su dag pa la yang nyes pa dang bral zhing spangs pas na 'khor gsum yongs su dag par shes par bya'o/ /nyes pa yang rnam pa brgyad yod par rig par bya'o/ / gang gis ston ce na/ tshig dang rtsa ba dang zhes bya ba la/ de bzhin gshegs pa gang gis chos ston par mdzad ce na/ tshig dang rtsa bas chos ston par mdzad de/ de yang rnam par dag pa yin par rig par bya'o zhes bya ba'i don to/ /ji ltar zhe na/ bstan pa la sogs pa'i rnam pa dang zhes bya ba la/ ji ltar ston ce na/ bstan pa dang rnam par dbye ba dang / the tshom gcod pa dang rnam pa mang po'i rjes su 'gro ba ste/ de'ang rnam par dag go zhes bya ba'i don to/ /gang la zhe na/ brjod pa dang / rnam par spros pas shes pa la'o zhes bya ba la/ gang dag la ston ce na/ mdo tsam du glengs pas shes pa'i gang zag dang / zhib tu spros pas shes pa'i gang zag gnyis la bshad do zhes bya ba'i don to/ /de'ang rnam par dag go zhes bya ba'i tha tshig go/ /bshad pa de nyid kyang zhes bya ba la/ gang gis bshad pa dang / ji ltar bshad pa dang / gang la bshad pa gsum yang nyes pa brgyad spangs pas 'khor gsum yongs su dag go zhes bya ba'i don to/ /le lo dang ni zhes bya ba la/ nyal ba dang 'khris pa la sogs pa la dga' bas chos 'chad par mi spro ba ni le lo'o/ /de ni nyes pa gcig ste/ de bzhin gshegs pa la mi mnga' ba'o zhes bya ba'i don to/ /mi rtogs pa zhes bya ba la/ chos rnams kyi rang dang spyi'i mtshan nyid khong du ma chud pa ni mi rtogs pa zhes bya'o/ /de ni nyes pa gnyis pa ste/ de de bzhin gshegs pa la mi mnga'o zhes bya ba'i don to/ /skabs mi 'byed ces bya ba la/ le lo dang mi rtogs pa med kyang slob ma la chos 'chad du mi btub cing gzhan la chos 'chad par mi bya mi tshol ba ni skabs mi 'byed pa zhes bya'o/ /'di ni nyes pa gsum pa ste/ de de bzhin gshegs pa la mi mnga'o zhes bya ba'i don to/ /des don min zhes bya ba la/ bkri ba'i don gyi mdo sde ni 'chad kyi/ nges pa'i don gyi mdo sde mi 'chad kyi nges pa'i don gyi mdo sde mi 'chad pa ni nyes pa bzhi pa ste/ de bzhin gshegs pa la mi mnga'o zhes bya ba'i don to/ /the tshom dag ni mi gcod cing / /zhes bya ba la/ chos 'chad pa na chos rnams kyi mtshan nyid las 'khor rnams the tshom du gyur pa'i the tshom mi gcod pa ni nyes pa lnga pa ste/ de de bzhin gshegs pa la mi mnga'o zhes bya ba'i don to/ /de bral na yang bstan mi byed/ /ces bya ba la/ the tshom dang bral bar byas kyang slob ma rnams la chos kyi mtshan nyid phyin ci ma log pa la rtog pa rgya chen po la 'jog par mi byed pa zhes bya ste/ de ni nyes pa drug pa ste/ de de bzhin gshegs pa la mi mnga'o zhes bya ba'i don to/ /nges par mi byed pa'i don to zhes bya ba la/ chos kyi mtshan nyid phyin ci ma log par rtog pa la 'jog par mi byed pa ni nges par mi byed pa zhes bya ste/ de nyid la bstan par mi byed pa zhes bya'o/ /skyo dang ser sna nges pa ste/ / de dag gtam la nyes pa dgongs/ /zhes bya ba la/ bar 'ga' 'chad/ bar 'ga' mi 'chad pa ni skyo ba zhes bya'o/ /de ni nyes pa bdun pa ste/ de bzhin gshegs pa ni chos rgyun du 'chad par mdzad pas na nyes pa de de bzhin gshegs pa la mi mnga'o/ /kha cig la 'chad kha cig la mi 'chad pa ni ser sna zhes bya'o/ /de ni nyes pa brgyad pa ste/ /de bzhin gshegs pa ni chos kun la 'chad la/ sems can kun la mi 'chad pa de de bzhin gshegs pa la mi mnga'o zhes bya ba'i don to/ /brgyad po de dag ni chos 'chad pa'i gtam gyi skabs su skyon dang bar du gcod pa dang / nyes pa yin par 'dod do zhes bya ba'i don to/ /de ltar med na sangs rgyas kyis bshad pa bla na med par 'gyur zhes bya ba la/ gong du bshad pa'i nyes pa brgyad med par chos bshad na/ sangs rgyas kyis bshad pa'i chos thams cad bla na med pa yin no zhes bya ba'i don to/ /don phun sum tshogs pa'i tshigs su bcad pa gnyis te zhes bya ba la/ byang chub sems dpa' dang sangs rgyas kyis bshad pa rnams la/ tshig phun sum tshogs pa dang / yi ge phun sum tshogs par ma zad kyi don yang phun sum tshogs so zhes bstan pa'i phyir/ tshigs su bcad pa gnyis rtsom mo zhes bya ba'i don to/ /dad dang dga' dang blo rgyu bas/ /de ni dge ba'i chos yin no/ /zhes bya ba la/ chos rnam pa gnyis te/ bshad par bya ba'i chos dang / khong du chud par bya ba'i chos so/ /de dag mdo las kyang chos de gnyis kyi dbang du byas nas/ thog mar yang dge / bar du yang dge / tha mar yang dge /don bzang yi ge bzang / gcig tu yongs su rdzogs pa/ rnam par dag pa yongs su dag pa tshangs par spyod pa yang dag par ston to zhes 'byung ba de dag gi don bshad pa de/ de la nyan pa'i dus na dad pa bskyed pa'i rgyu byed pas na thog mar yang dge ba zhes bya'o/ /bsam pa'i dus na dga' ba skye ba'i rgyu byed pas na bar du dge ba zhes bya'o/ /bsgom pa'i dus na blo dang shes rab skye ba'i rgyu byed pas na tha mar dge ba zhes bya ste/ de ltar dus gsum du yang dge bas na chos 'di ni dge ba'i chos yin no zhes bya ba'i don to/ /don gnyis dang ni rab gzung ba/ /zhes bya ba la/ kun rdzob kyi don dang don dam pa gnyis ston pas na don bzang po zhes bya'o/ /rab gzung ba ni gzung sla ba la bya ste/ tshig dang yi ge rnams kyang gzung sla ba dang 'jig rten du grags pa'i tshig dang / yi ge ston pas na yi ge bzang po zhes bya ste/ 'dis ni bshad pa'i chos kyi yon tan bstan to/ /tshangs spyod yon tan bzhi smra'o/ /zhes bya ba la/ tshangs pa ni mya ngan las 'das pa la bya ste/ mdo dag las kyang tshangs par gyur bsil bar gyur/ mya ngan las 'das par gyur ces gsungs pa'i phyir ro/ /mya ngan las 'das pa thob par byed pa'i 'phags pa'i lam la tshangs par spyod pa zhes bya'o/ / 'phags pa'i lam de yang yon tan rnam pa bzhi dang ldan pa ste/ chos 'di tshangs par spyod pa'i yon tan bzhi ston par byed pa yin no zhes bya ba'i don to/ /gzhan yang mi mtshungs par gcig pu ste zhes bya ba la/ gzhan dang mi mtshungs bya ba'i don ni gzhan dang thun mong du ma gyur cig ces bya ba'i don to/ /'phags pa'i lam de'ang chos 'di 'ba' zhig las yod kyi/ 'di las phyi rol du gyur pa mu stegs pa rnams la med pas na gcig pu zhes bya'o/ /khams gsum nyon mongs spong bas rdzogs/ /zhes bya ba la 'jig rten pa'i lam gyis nyon mongs pa spong yang srid pa'i rtse mo'i nyon mongs pa spong bar mi nus pas na rdzogs pa zhes mi bya'o/ /'phags pa'i lam 'dis ni srid pa'i rtse mo man chad khams gsum gyi nyon mongs pa thams cad ma lus par spong bar byed pas na yongs su rdzogs pa zhes bya'o/ /rang bzhin rnam dag ces bya ba la/ 'phags pa'i lam de rang bzhin gyis rnam par dag pa ste/ shel dang nam mkha' rang bzhin gyis rnam par dag cing zag pa med pa'i rang bzhin yin pas na rnam par dag pa zhes bya'o/ /dri ma dag ces bya ba la/ 'phags pa'i lam des sems kyi rgyud la glo bur gyi dri ma yod pa bsal nas sems dri ma med par byed cing zag pa sems kyi rgyud la ni mi skye'i zag pa med pa'i sems kyi rgyud la skye bas na yongs su dag pa zhes bya'o/ /tshangs spyod yon tan rnam bzhi 'dod/ /ces bya ba la/ 'phags pa'i lam de ni yon tan rnam pa bzhi dang ldan par 'dod de/ yon tan rnam pa bzhi ni gcig pu dang yongs su rdzogs pa dang / rnam par dag pa dang / yongs su dag pa'o/ /de la dad pa ni mos pa yid ches pa'o zhes bya ba la/ las dang bden pa la sogs pa la mos shing yid ches pa la ni dad pa zhes bya ste/ nyan pa'i tshe dad pa skyed pa'i rgyu byed pas na thog mar dge ba yin no zhes bya ba'i don to/ / mgu ba ni dga' ba ste//thos par nus shing rig pa'o zhes bya ba la chos kyi don mthong nas sems la mgu ba skyes pa la ni dga' ba zhes bya'o/ /'di ltar sems pa'i shes rab kyis ni bla na med pa'i 'bras bu thob cing chos kyi don mthong bar nus te/ sems pa'i dus na chos kyi don mthong nas dga' ba skye ba'i rgyu byed pas na bar du dge ba yin no zhes bya ba'i don to/ /blo ni mnyam par gzhag pa'i sems kyis ni ji lta bur shes pa'o zhes bya ba la/ bsgom pa'i dus na blo dang shes rab skye ba'i rgyu byed pas na tha mar dge ba zhes bya ste/ ci'i phyir zhe na/ sems rtse gcig tu mnyam par gzhag pa las yang dag pa ji lta ba bzhin du bden pa bzhi shes pa'i shes pa skye ba'i phyir ro/ /dgongs pa dbye ba'i tshigs su bcad pa gnyis te zhes bya ba la/ de bzhin gshegs pa'i dgongs pa dang ldem po dag la phyi nang du yod bstan pa'i phyir tshigs su bcad pa gnyis rtsom mo zhes bya ba'i don to/ /mi skrag par bstan pas 'jug par bya ba'i phyir gzugs la sogs pa yod par bshad pa'i phyir ro zhes bya ba la/ gal te gang zag kyang med gzugs la sogs pa'i chos kyang med do zhes bshad na ni 'phags pa nyan thos dag skrag par 'gyur ro/ /skrag par gyur na de bzhin gshegs pa'i bstan pa la mi 'jug ste/ de bas na nyan thos dag mi skrag cing bstan pa la gzud pa dang / chos yod par bshad pa'i sgo nas gang zag bdag med par rtogs par bya ba'i phyir gzugs la sogs pa'i chos yod do zhes bshad pas ni rjes su 'jug pa'i dgongs pa zhes bya'o/ /kun brtags la sogs pa'i rang bzhin gsum la rig par bya ste/ ngo bo nyid med pa dang ma skyes pa la sogs par chos thams cad bstan pa'i phyir ro zhes bya ba la/ kun brtags kyi rang bzhin dang gzhan dbang gi rang bzhin dang /yongs su grub pa'i rang bzhin gsum la dgongs nas mtshan nyid la bshad de/ de la kun brtags kyi rang bzhin la dgongs nas ngo bo nyid med do zhes gsungs te/ kun brtags kyi chos rnams ni ri bong gi rwa la sogs pa bzhin du thams cad nas thams cad du med pa'i rang bzhin yin pa'i phyir ro/ /gzhan dbang gi rang bzhin la dgongs nas ma skyes pa dang ma 'gags pa zhes gsungs te/ sems dang sems las byung ba'i chos gzhan dbang rnams ni rgyu dang rkyen gzhan gyi mthu las skye zhing 'gag par zad kyi/ rang nyid kyis skya zhing rang nyid kyis 'gag pa med pas na mi skye mi 'gag pa zhes gsungs so/ /yongs su grub pa'i rang bzhin ni nam mkha' lta bu yin pas yongs su grub pa'i rang bzhin la dgongs nas chos thams cad ni rang bzhin gyis mya ngan las 'das pa zhes gsungs so/ /yang na gang du med pa dang stong pa zhes bshad pa de dag ni kun brtags kyi rang bzhin la dgongs pa'o/ /gang du sgyu ma dang / smig sgyu dang / gzugs brnyan lta bu'o zhes bshad pa de dag kun ni gzhan dbang gi rang bzhin la dgongs pa te/ sgyu ma la sogs pa rang bzhin du 'khrul pa skye ba'i rgyu byed pa'i phyir ro/ /gang du sa dang pha rol du phyin pa dang / byang chub kyi phyogs dang / stobs dang mi 'jigs pa la sogs pa bshad pa de dag ni yongs su grub pa'i rang bzhin la dgongs pa'o gnyen po la dgongs pa ni nyes pa 'dul ba'i phyir rig par bya ste zhes bya ba la/ mi gtsang ba bsgom pa bshad pa ni 'dod chags kyi nyes pa 'dul ba'i phyir gsungs pa dang / byams pa bsgom pa bshad pa ni zhe sdang gi nyes pa 'dul bar bya ba la dgongs te gsungs pa dang / rten cing 'brel te 'byung bar gsungs pa ni gti mug gi nyes pa 'dul bar bya ba la dgongs nas gsungs pa ste/ 'di dag nyes pa 'dul ba la dgongs zhes bya'o/ /de nyid kyi don bstan pa'i phyir ji ltar sgrib pa rnam pa brgyad kyi gnyen por mchog gi theg pa rnams gsungs pa ni 'og nas 'chad de/ bsngags pa dang bcas pa'i tshigs su bcad pa rnams pa gnyis 'chad pa'o zhes bya ba la/ dper na sgribs pa rnam pa brgyad kyi gnyen por theg pa chen po bshad pa lta bu'i gnyen po la dgongs pa zhes bya ste/ sgrib pa rnam pa brgyad kyi gnyen por theg pa chen po gsungs pa ni phyis 'og nas 'chad de/ de yang theg pa chen po shin tu rgyas pa zhes bya ba'i mdo las bsngags pa dang bcas pa'i tshigs su bcad pa gnyis shig 'byung ba'o/ /bsngo ba la dgongs pa ni zab mor brjod pa las rig par bya ste zhes bya ba la tshig zab ste/ tshig kyang gzhan du 'byung don kyang gzhan du ston pa la ni bsngo ba la dgongs pa zhes bya'o/ /de nyid bstan pa'i phyir/ ji ltar/ snying po med la snying por rtog /phyin ci log la rab tu gnas/ /nyon mongs pas ni rab nyon mongs/ /byang chub dam pa thob par 'gyur/ /zhes smos te/ tshig de'i thad kar ni phung po lnga dang / 'dod pa lnga'i yon tan ni snying po zhes bya ste/ de la dam pa dang gtso bor 'dzin pa ni snying po med pa la snying por rtog pa zhes bya'o/ / rtag pa dang bde ba dang / gtsang ba dang bdag tu 'dzin pa ni phyin ci log la rab tu gnas pa zhes bya'o/ /'dod chags dang zhe sdang la sogs pa ni nyon mongs pa zhes bya ba ste/ nyon mongs pa de dag la rtag tu spyod pas sems dri ma can du byas pa ni nyon mongs pas ni nyon mongs pa zhes bya ste/ de ltar byas na byang chub dam pa thob par 'gyur te/ bla na med pa'i byang chub dam pa thob par 'gyur ro zhes bya ba'i don to/ /de la 'di ltar dgongs pa'o zhes bya ba ni tshigs bcad de de snyed 'byung mod kyi de ni don gzhan du dgongs shing 'chad pa ste/ de'ang ci dgongs she na/ de ni 'di ltar dgongs so zhes bya ba'i don to/ /snying po med pa la snying por rtog pa ni gang gis mi g.yeng ba la gtso bo'i blo dang mchog gi blo zhes bya ba la/ snying po med pa la rgya gar skad du a sa ra zhes 'byung ste/ sa ra ni sems yul la 'jug cing / phyir g.yengs pa la bya'o/ /a sa ra ni sems mi g.yengs shing rtse gcig tu gnas pa la bya ste/ gang zag gang gis mos pa spyod pa'i ting nge 'dzin drod dang spyi bo dang bzod pa dang / 'jig rten chos mchog la 'di dag ni sa dang po thob par byed pa'i rgyu yin pas mchog dang dam pa dang gtso bo yin no snyam du blo 'jog pa ni snying po med la snying por rtog pa zhes bya ste/ 'dis ni mos pa spyod pa'i sa bzhi bstan to/ /g.yeng ba ni 'byung ba'i sems so zhes bya ba la/ sems gzugs la sogs pa'i yul la phyir 'byung zhing zhugs par 'gyur ba la g.yeng ba zhes bya'o zhes bya ba'i don to/ /phyin ci log la rab tu gnas pa ni rtag pa dang bde ba dang / gtsang ba dang bdag tu 'dzin pa las phyin ci log pa ste/ mi rtag pa la sogs pa phyin ci log pa la rab tu gnas pa ste/ mi nyams pa'i phyir ro zhes bya ba la/ rtag pa las phyin ci log pa ni mi rtag pa'o/ /bde ba las phyin ci log pa ni sdug bsngal ba'o/ /gtsang ba las phyin ci log pa ni mi gtsang ba'o/ /bdag tu 'dzin pa las phyin ci log pa ni bdag med pa ste/ rtag pa la sogs pa las phyin ci log tu gyur pa/ mi rtag pa la sogs pa'i don rtogs pa ni phyin ci log la rab tu gnas pa zhes bya ste/ de ltar yang sa dang po mthong ba'i lam ni rtogs pas 'di ni mthong ba'i lam bstan to/ /rab tu gnas pa zhes bya ba ni de ltar mi rtag pa dang / sdug bsngal la sogs pa mthong nas slar rtag pa la blo ldog cing nyams pa med pas na rab tu gnas pa zhes bya ste/ sa dang por mi rtag pa la sogs pa mthong nas de las nyams pa'i sems mi 'byung ba'i phyir ro/ /nyon mongs pas rab tu nyon mongs pa ni yun ring por dka' ba spyod pa dang / brtson 'grus dang 'bad pas nyon mongs pa'o zhes bya ba la/ sa gnyis nas sa bcu man chad bsgom pa'i lam na mthong ba dang bsgom pas spang bar bya ba'i nyon mongs pa rnams spang bar bya ba'i phyir 'bad pa dang brtsal ba dang / dka' ba spyod pa du mas bdag nyid sha thang bar byas pa ni nyon mongs pas nyon mongs pa zhes bya ste/ 'dis ni bsgom pa'i lam bstan to/ /de ltar mos par spyod pa'i ting nge 'dzin la mchog dang dam pa'i blo yang bskyed/ mthong ba'i lam du rtag pa la sogs pa las phyin ci log tu gyur pa'i chos mi rtag pa la sogs pa'i don yang rtogs/ bsgom pa'i lam du dka' ba spyod pa du mas nyon mongs na yang sangs rgyas kyi sar bla na med pa'i byang chub thob par 'gyur ro zhes bya ba'i don to/ /ldem por ngag rnam par dbye ba zhes bya ba'i tshigs su bcad pa zhes bya ba la/ de bzhin gshegs pa sems can la chos 'chad pa na ldem po ngag tu chos 'chad pa bstan pa'i phyir tshigs su bcad pa rtsom mo zhes bya ba'i don to/ /chos kyi sku la khyad par med pa'i phyir ro zhes bya ba la/ mnyam pa nyid kyi ldem po ngag ni sangs rgyas shAkya thub pas 'khor gyi nang du nga nyid de'i tshe lhag mthong yang dag par rdzogs pa'i sangs rgyas su 'gyur ro zhe'am/ nga nyid de yin no zhes bka' stsal to/ /de'ang sangs rgyas shAkya thub pa nyid ma yin gyi de bzhin gshegs pa rnams kyi chos kyi sku ni cung zad kyang khyad par dang bye brag med do/ /chos kyi sku 'dra ba la dgongs nas nga nyid de yin no zhes bka' stsal to/ /don gzhan gyi ldem po'i ngag gi gang chos thams cad la ngo bo nyid med pa ma skyes pa'o zhes gsungs pa la sogs pa ste/ sgra ji bzhin ma yin pa'i phyir ro zhes bya ba la/ don gzhan gyi ldem po ngag ni mdo dag las chos thams cad ngo bo nyid med pa dang ma skyes pa dang / ma 'gags pa dang / rang bzhin gyis mya ngan las 'das pa'o zhes gsungs pa yang thams cad nas thams cad du med pa'i don du lta ba ma yin gyi kun brtags kyi rang bzhin la dgongs nas chos thams cad ngo bo nyid med par bshad/ gzhan dbang la dgongs nas ni ma skyes pa dang ma 'gags pa zhes bshad/ yongs su grub pa la dgongs nas ni chos thams cad rang bzhin gyis mya ngan las 'das pa'o zhes bshad do/ /dus gzhan gyi ldem po ngag ni zhes bya ba la sems can gang dag le lo can dge ba cung zad kyang med du mi btub pa de dag dge ba'i rtsa ba cung zad bskyed pa'i phyir dus gzhan la dgongs nas sems can gang gis de bzhin gshegs pa snang ba mtha' yas kyi sangs rgyas kyi zhing bde ba can du skye bar smon lam btab pa de der skye bar 'gyur ro zhes gsungs pa/ smon lam btab ma thag tu tshe 'di nyid la der skye bar 'gyur ba'am/ tshe brjes ma thag tu skye bar 'gyur pa ma yin gyi/ de ltar smon lam btab pa dang / de'i rgyus nam zhig na skye bar 'gyur ba la dgongs nas de skad du bka' stsal ba'o/ /gang zag gi bsam pa la ldem po ngag ni gang dge ba'i rtsa ba de nyid kha cig la bstod nyung ngus mgu ba kha cig la ni smod pa'o zhes bya ba la/ de bzhin gshegs pa chos ston pa ni sems can gyi snod du sbyar zhing ston pa ste/ de la gang zag kha cig dge ba'i rtsa ba rlabs po che la dad pa zhig na/ de la sbyin pa la sogs pa pha rol tu phyin pa rnams kyi yon tan bsngags pa cher bstod de bshad do/ /gang zag la spyod pa zhan pa zhig ste/ dge ba'i rtsa ba chung ngu tsam gyis chog par 'dzin pa la ni sbyin pa la sogs pa'i yon tan smad nas bstan pa ste/ de ltar dge ba'i rtsa ba la cher dad pa la ni cher bstod de bstan par 'gyur/ dge ba'i rtsa ba chung ngu la mos pa rnams la ni chung ngu bsngags shing bstan pa ste/ 'di ni gang zag gi sems la dgongs pa'i ldem po'i ngag go/ /rgyas par bsdus pa theg pa chen po'i mdo sde las shes zhes bya ba la sogs pa la/ gong du gnyen po'i ldem po'i ngag gi skabs su nyes pa'i gnyen por gang bshad pa ni gnyen po'i ldem po'i ngag go zhes bshad pa la sgrib pa brgyad kyi gnyen por theg pa chen po bshad pa yang gnyen po'i ldem po gang yin pa'o zhes glengs pa la sgrib pa brgyad kyi gnyen por theg pa chen po bshad pa gang zhe na/ rgyas par bsdus pa zhes bya ba'i theg pa chen po'i mdo sde la bsngags pa dang bcas pa'i tshigs su bcad pa gnyis shig glengs pa ste/ de la tshigs su bcad pa gnyis kyis ni sgrib pa brgyad bstan to/ /tshigs su bcad pa gsum gyis ni de'i bsngags pa bstan pa yin te/ spyir ni tshigs su bcad pa lnga zhig 'byung ngo / /sangs rgyas chos la smod pa dang / /le lo nyung ngus dga' ba dang / /nga rgyal 'dod chags spyod pa dang / /'gyod dang ma nges 'byed pa'o/ /zhes bya ba la/ sgrib pa brgyad ni sangs rgyas la smod pa dang / chos la smod pa dang / le lo dang nyung ngus dga' ba dang / nga rgyal la spyod pa dang / 'dod chags la spyod pa dang / 'gyod pa dang / ma nges pa 'byed pa'o/ /sems can rnams kyi sgrib pa de'i gnyen por mchog gi theg pa gsungs zhes bya ba la/ brgyad po de dag ni sems can gyi sgrib pa yin te/ sgrib pa de'i gnyen por bcom ldan 'das kyis theg pa chen po gsungs so zhes bya ba'i don to/ /gang gis bar du gcod pa yi/ /nyes pa thams cad spangs pa'i phyir/ /zhes bya ba la/ gang zag gang gis mtho ris dang thar pa thob par bya ba la bar du gcod pa'i nyes pa spang bar bya ba'i phyir theg pa mchog bshad do zhes bya bar sbyar ro/ /tshigs bcad gnyis bsngags pa dang bcas par bstan to zhes glengs pa las tshigs bcad kyi bsngags pa tshigs bcad gsum gyis bstan to/ /de'i phyir/ gang gis tshigs bcad gnyis po 'di/ /don dang tshig dang 'dzin zhugs na/ /zhes bya ba la sogs pa smos so/ /de'i don ni gang zag gang gis sangs rgyas chos la smod pa dang zhes bya ba la sogs pa'i don rtogs par bya ba la zhugs pa dang / tshig dang don blangs shing mi brjed par bya ba la zhugs na zhes bya ba'i don to/ /sems can mchog gi blo ldan zhing / bsngags pa rnam bcu thob pa ste/ /zhes bya ba la/ de ltar don dang tshig 'dzin pa la zhugs nas bsngags pa rnam pa bcu 'thob pa ste bsngags pa rnam pa bcu ni sems can gyi mchog tu 'gyur zhing blo dang ldan par 'gyur te/ 'di ni bsngags rnam pa gcig go/ /blo dang ldan pa zhes bya ba ni dgongs pa dang ldem po dag la mkhas pa'i shes rab dang ldan par 'gyur ro zhes bya ba'i don to/ /khams rnams rab tu rgyas pa dang / /zhes bya ba la/ khams 'di'i skabs su rigs dang sa bon la bya ste/ theg pa chen po'i rigs smin cing brtas par 'gyur te 'di ni rjes su bsngags pa gnyis pa'o/ /'chi ba'i tshe ni dga' mchog skye/ /zhes bya ba la/ 'chi ba'i tshe yang lus sdug bsngal ba dang / /sems 'khrugs bzhin pas 'chi bar mi 'gyur gyi lus bde ba dang sems dga' bzhin du 'chi bar 'gyur te/ 'di ni rjes su bsngags pa gsum pa'o/ /ji ltar 'dod pa'i tshe dang ni/ /zhes bya ba la/ tshe rabs gzhan du yang lha dang mi la sogs pa'i gnas gang dang gang du yang skye bar 'dod pa de dang der skye bar 'gyur te/ de ni rjes su bsngags pa rnam pa bzhi pa'o/ /skye ba thams cad dran pa dang / /zhes bya ba la/ tshe rabs de dang de dag tu skyes nas kyang tshe rabs snga ma la ci dang ci byas thams cad kyang dran par byas te/ 'di ni rjes su bsngags pa lnga pa'o/ /sangs rgyas dang ni lhan cig cing / /zhes bya ba la/ de yang ma zad kyi tshe rabs de dang de dag tu mi dge ba'i bshes gnyen dang phrad par ni mi 'gyur gyi rtag tu yang sangs rgyas dang 'grogs shing phrad par 'gyur te/ 'di ni rjes su bsngags pa drug pa'o/ / theg pa mchog dag de las nyan/ /zhes bya ba la/ sangs rgyas dang phrad nas kyang theg pa chen po'i chos dag de bzhin gshegs pa las nyan par byed de/ 'di ni rjes su bsngags pa bdun pa'o/ /blo dang ldan pas mos pa dang / /zhes bya ba la/ de ltar sgrib pa dang bral te blo dang ldan par gyur nas/ theg pa chen po'i chos la dga' ba dang / dad pa dang mos pa mang bar 'gyur te/ 'di ni rjes su bsngags pa brgyad pa'o/ /sgo gnyis myur du byang chub 'thob/ /zhes bya ba la/ gzhan yang ting nge 'dzin gyi sgo dang gzungs kyi sgo gnyis 'thob par 'gyur te/ 'di ni rjes su bsngags pa dgu pa'o/ /de ni bskal pa grangs med pa gsum du ni mi thogs kyi bla na med pa'i byang chub tu 'tshang rgya bar 'gyur te/ 'di ni rjes su bsngags pa bcu pa'o/ /de la ma nges pa dbye ba ni byang chub sems dpa' ma nges pa rnams theg pa chen po las 'byed pa'o/ /zhes bya ba la/ sgrib pa brgyad las/ gang dka' ba de bshad do/ /ma nges par dbye ba zhes bya ba ni byang chub sems dpa'i rigs ma nges pa dag sngon byang chub sems dpa'i spyad pa spyod pa las phyis nyan thos la sogs pa'i bshes gnyen dang phrad nas bla na med pa'i byang chub ni bskal pa grangs med pa gsum du bsgrub dgos pas/ dus rang gi tshe gsum tsam gyis sgrub la/ nyan thos kyi 'bras bu blang ngo snyam nas byang chub sems dpa'i spyod pa btang ste/ nyan thos kyi spyod pa la zhugs pa ni ma nges pa zhes bya ste/ ma nges pa'i rigs can dag theg pa chen po spyod pa dang dbye bar 'gyur zhes bya ba'i don to/ /theg pa'i mchog bshad pa ni theg pa chen po bstan pa'o zhes bya ba la/ de ltar sgrib pa rnam pa brgyad kyi gnyen por nyan thos dang rang sangs rgyas kyi theg pa bshad pa ni ma yin gyi theg pa chen po bshad pas na theg pa mchog bshad pa zhes bya'o/ /sangs rgyas la smod pa'i sgrib pa'i gnyen por rang nyid de'i tshe de'i dus na lhag mthong yang dag par rdzogs pa'i sangs rgyas so zhes bya ba gsungs so zhes bya ba la/ sems can kha cig 'di snyam du sngon gyi de bzhin gshegs pa lhag mthong la sogs pa'i bskal pa bzang po dang dus bzang po'i tshe byung ba dang sangs rgyas kyi zhing shel gyi kha dog la sogs pa rnam par dag pa sems can la rtog pa med pa de bzhin gshegs pa'i sku tshe yang ring la sku lus kyi tshad kyang che ba yin na/ de bzhin gshegs pa sangs rgyas shAkya thub pa 'di ni sku skal chung ba ste/ snod kyi 'jig rten dang sems can gyi 'jig rten yang ma dag pa'o/ /ji lta zhe na/ snod kyi 'jig rten yang rdo dang tsher ma dag dang ngam grogs la sogs pas gang ba/ sems can yang ma dag pa ste snyigs ma lnga'i rang bzhin no/ /de bzhin gshegs pa yang sku tshe thung zhing sku tshad chung ba yin no zhes smad cing brnyas par byed de/ de ltar brnyas pa de ni bsod nams dang ye shes kyi zhing sems can thams cad kyi mchog gnas la brnyas pa ni ngan song du lhung ba'i rgyur 'gyur zhing thar pa dang mtho ris thob pa la bar du gcod pas na sgrib pa yin no/ /sgrib pa de'i gnyen por de nyid de'i tshe de'i dus na lhag mthong yang dag par rdzogs pa'i sangs rgyas su gyur to zhes bya ba gsungs te/ de skad du bka' stsal pa dang / sngon gyi de bzhin gshegs pa sku skal chen por gyur pa yang sangs rgyas shAkya thub pa yin no snyam nas de bzhin gshegs pa la dga' ba dang mgu ba'i sems skye bar 'gyur gyi brnyas pa'i sems ldog par 'gyur ro/ /chos la smod pa sgrib par 'gyur ba'i gnyen por gang gA'i klung gi bye ma snyed kyi sangs rgyas la bsnyen bkur byas nas gzod theg pa chen po'i don khong du chud par 'gyur ro zhes gsungs so zhes bya ba la sems can kha cig 'di snyam du sangs rgyas kyi chos 'di dag ni ma rabs gdol pa dang gdol bu dang bud med dang byis pa dang / phyugs rdzi la sogs pas kyang spyod du rung gi zhing kun gyis kyang brda sprad par nus pas rung ba ma yin zhing sla ba yin no snyam nas chos la smod par byed de/ de yang nyon mongs pa thams cad kyi sman du gyur pa/ bla na med pa'i byang chub lam ston par byed pa la smad na ngan song du ltung ba'i rgyur 'gyur zhing thar pa dang mtho ris thob pa la bar du gcod pas na sgrib pa zhes bya'o/ /de'i gnyen por gang gA'i klung gi bye ma snyed kyi sangs rgyas la bsnyen bkur byas nas gzod theg pa chen po bla na med pa'i don khong du chud par 'gyur ro zhes gsungs te/ gang gA'i klung gi bye ma snyed kyi sangs rgyas la bsnyen bkur ma byas na ni rgyal rigs la sogs pas kyang theg pa chen po'i don rtogs par mi 'gyur gyi gang gA'i klung gi bye ma snyed kyi de bzhin gshegs pa la bsnyen bkur byas na gzod theg pa chen po'i don rtogs par bshad de/ de ltar bshad pa dang chos 'di dka' ba mang pos rtogs par 'gyur bas brnyas pa'i gnas ma yin no snyam nas brnyas pa'i sems ldog cing dga' ba'i sems skye bar 'gyur ro/ /le lo'i sgrib pa'i gnyen por ni gang bde ba can du smon lam btab na de nyid du skye bar 'gyur zhing dri ma med pa'i zla ba de bzhin gshegs pa'i mtshan bzung ba tsam gyis kyang bla na med pa yang dag par rdzogs pa'i byang chub tu 'gyur ro zhes gsungs pa'o zhes bya ba la/ sems can le lo can la la dag glegs bam bklag pa dang bsgom pa la sogs pa'i dge ba lta ga la byed kyi smon lam tsam yang mi 'debs de bzhin gshegs pa'i mtshan tsam yang mi brjod de/ de yang dge ba'i rtsa ba chen po skye bar bya ba dang / thar pa dang mtho ris thob par bya ba dang / bar du gcod pas na sgrib pa'o/ /de'i gnyen por gang gis sangs rgyas snang ba mtha' yas kyi 'jig rten gyi khams bde ba can du skye bar smon lam btab pa ste/ der skye bar 'gyur ro zhes gsungs pa dang / gzhan yang gang gis dri ma med pa'i zla ba de bzhin gshegs pa'i mtshan bzung ba tsam gyis kyang bla na med pa yang dag par rdzogs pa'i byang chub tu 'gyur ro zhes gsungs pa dang / gzhan yang gang gis gzungs 'di bklags na mtshams med pa la sogs pa'i las byed pa yang dag par 'gyur ro zhes gsungs te de skad du bshad pa dang le lo can dag smon lam 'debs par byed pa dang / de bzhin gshegs pa'i mtshan 'dzin pa dang / gzungs dag klog par byed de/ de'i sgo nas dge ba'i rtsa ba sogs pa'o/ /dge ba'i rtsa ba la gnas na nam zhig na 'tshang rgya bar 'gyur ba dang gzhan yang 'di snyam du smon lam btab cing mtshan bzung ba tsam gyis kyang / sangs rgyas kyi zhing du skye zhing 'tshang rgya na nyan pa dang bsam pa la sogs pa'i sgo nas dge ba rgya chen po spyad na lta gdon mi za bar 'tshang rgya zhes nyan pa dang sems pa la sogs pa la yang 'jug par byed de/ de bas na le lo'i gnyen por 'gyur ro/ /nyung ngus mgu ba'i sgrib pa'i gnyen por gang kha cig tu bcom ldan 'das kyis sbyin pa la sogs pas smad kha cig bsngags pa'o zhes bya ba la/ sems can la la dag dge ba'i rtsa ba cung zad tsam gyis chog par 'dzin pa ste/ sbyin pa tsam gyis chog par 'dzin cing tshul khrims dang mnyan pa dang bsam pa la sogs pa dge ba chen po la mi 'jug ste/ de dag dge ba'i rtsa ba rgya chen po la gzung bar bya ba'i phyir/ skabs kha cig tu ni bcom ldan 'das kyis sbyin pa las ni longs spyod tsam yang mi nus te/ bla na med pa'i byang chub mi 'thob po zhes smad do/ /skabs kha cig tu ni gang zag ser sna can rnams gtong ba la chung zad kyang mi 'jug pa rnams kyi ser sna dang bral ba'i phyir sbyin pa ni longs spyod phun sum tshogs pa la sogs pa/ thob par byed pa yin no zhes bya ba'i bsngags pa'o/ /'dod chags spyod pa'i sgrib pa'i gnyen por bcom ldan 'das kyis sangs rgyas kyi zhing phun sum tshogs pa lhag par bsngags pa gsungs so zhes bya ba la/ 'jig rten gyi 'dod pa lnga'i longs spyod la chags shing gtong mi phod pa ni 'dod chags la spyod pa zhes bya la/ khams gsum gyi longs spyod dang 'byor pa la mchog dang dam par 'dzin pa nyid 'jig rten 'das pa'i 'byor ba dang longs spyod 'thob par bya ba la/ bar du gcod pas na sgrib pa'o/ /de'i gnyen por sangs rgyas kyi zhing gi yon tan phun sum tshogs pa lhag par bshad do/ /'di ltar sangs rgyas kyi zhing ni sa gzhi yang rin po che las byas pa/ lha'i na bza' ka tsa lin da la sogs pa reg na 'jam pa dang ldan pa dag yod de/ dpag bsam shing gi phreng bas brgyan pa bdud rtsi'i rdzing rnam pa sna tshogs dang ldan pa kha zas ro brgya dang ldan pa dag za ste/ stong gsum gyi stong chen pa'i 'jig rten gyi khams kyi sems can kun gyis bskal pa'i mthar zos na yang zad par mi 'gyur ro zhes gsungs te/ de lta bu dag thos nas 'jig rten gyi longs spyod la ngan skyugs tsam du 'dzin par 'gyur te/ de bas na 'dod chags kyi gnyen por 'gyur ro/ /nga rgyal spyod pa'i sgrib pa'i gnyen por bcom ldan 'das kyis gang sangs rgyas gzhan dag gi phun sum tshogs pa lhag par bsngags pa gsungs pa'o zhes bya ba la/ sems can la la dag longs spyod dang tshe dang mdog la sogs pas rgyags pa ste/ don du nye bar len pa'i phung po lnga la dam pa dang mchog tu 'dzin to/ /de'ang dper na lha dang klu dang gnod sbyin la sogs pa gzugs dang mthu rgya chen po dang / phyug po la sogs pas snyems shing bdag ni gzugs bzang po'o/ /blta na sdug pa'o/ /mthu chen po'o snyam nas kyang bdag las lhag pa gzhan med do snyam du sems so/ /de snyam du sems pa de de'ang de bzhin gshegs pa'i sku dang / ye shes phun sum tshogs pa thob par bya ba la bar du gcod pas na sgrib pa zhes bya'o/ /de'i gnyen por ni de bzhin gshegs pas sangs rgyas gzhan dag gi yon tan lhag par bsngags te/ de bzhin gshegs pa'i sku ni zla ba'i dkyil 'khor dang 'dra ba mtshan sum cu rtsa gnyis dang dpe byad bzang po brgyad cus brgyan pa longs spyod yang phun sum tshogs pa dang ldan pa'i sku'i mthu yang phyag gi tshigs gcig la spos kyi glang po du ma'i mthu dang ldan pa'o zhes bsngags te/ de ltar bsngags pa thob pa dang / bdag cag so so'i mthu dang gzugs la sogs pa chen po tsam ma yin par mthong nas nga rgyal med par 'gyur ro/ /'gyod pas sgrib pa'i gnyen por gang sangs rgyas dang byang chub sems dpa' la gnod pa byed na de thams cad mtho ris su 'gro'o zhes gsungs pa'o zhes bya ba la/ la la zhig gis mi shes pa'i dbang gis sangs rgyas dang byang chub sems dpa' la gnod pa byas pa dang / phyis de ltar byas pa de sdig pa dran nas de ltar bdag gis sdig pa byas pa ni mi rigs pa dag byas te/ bdag ngan song du 'gro bar 'gyur ro snyam nas 'gyod pa skye'o/ / de ltar 'gyod pa dang mya ngan gyis sems dkrugs pas na dge ba la yang mi 'jug cing / 'gyod pa'i gnyen po la yang brten par ma byas pas na de ni sgrib pa'o/ /de'i gnyen por sangs rgyas dang byang chub sems dpa' la gnod pa byas na yang mtho ris su 'gro zhes gsungs te/ de skad thos pa dang 'gyod pa dang bral zhing 'gyod pa gtong bar byed de/ ji lta zhe na/ 'di ltar de dag la gnod pa byas na yang mtho ris su skye na/ cung zad de dag la phan pa byas na lta ci smos zhes cung zad de dag la phan pa byas na sangs rgyas dang byang chub sems dpa' la dad pa skye zhing dge ba la yang 'jug par 'gyur ba'i phyir ro/ /ma nges par dbye ba'i sgrib pa'i gnyen por nyan thos chen po rnams sangs rgyas su lung bstan par bshad pa dang / theg pa gcig tu bshad pa'o zhes bya ba la/ gang byang chub sems dpa'i rigs ma nges pa dag sngon byang chub sems dpa'i spyad pa spyod pa las phyis nyan thos la sogs pa'i bshes gnyen gyis nyan thos kyi theg pa la spyod du bcug nas byang chub sems dpa'i spyod pa btang ba ni ma nges pa'i dbye ba zhes bya'o/ /theg pa chen po'i spyod pa btang ba nyid bla na med pa'i byang chub thob par bya ba la bar du gcod pas na sgrib pa'o/ /de'i gnyen por nyan thos chen po rnams sangs rgyas su lung bstan pa dang / theg pa gcig tu zad par bshad do/ /de la bcom ldan 'das kyis dam pa'i chos puN+Da rI ka las theg pa ni gcig tu zad kyi gsum du med do zhes bshad pa dang / nyan thos la sogs pa 'tshang rgya ba ma yin yang 'phags pa kA t+yA ya na theg pa chen po la 'tshang rgya bar 'gyur bar lung bstan te/ de ltar bshad pas ma nges pa'i rigs can rnams 'di snyam du sems te/ de ltar theg pa gcig tu zad la nyan thos chen po rnams kyang 'tshang rgya na nyan thos kyi theg pa la zhugs pas ci zhig byas dang po nas theg pa chen por zhugs par bya'o zhes theg pa chen po la 'jug par 'gyur ro/ /khams thams cad rgyas par 'gyur ba ni theg pa chen po'i gnas su khams rgyas pa'o zhes bya ba la/ theg pa chen po'i rigs la khams zhes bya ste/ theg pa chen po'i chos thams cad la mos pa dang dad par 'gyur ba'i rigs brtas shing smin par 'gyur ba la khams rgyas pa zhes bya'o/ /sgrib pa de dang bral bas theg pa chen po thams cad la mos pa'ang 'thob po zhes sgrib pa brgyad dang bral na theg pa chen po'i chos thams cad la dga' ba dang rangs pa dang mos pa skye ba'i sems 'thob par 'gyur ro zhes bya ba'i don to/ /sgo gnyis ni ting nge 'dzin gyi sgo dang gzungs kyi sgo'o zhes bya ba la/ ting nge 'dzin gyi sgo nas nam mkha' mdzod kyi ting nge 'dzin dang / dpa' bar 'gro ba la sogs pa'i ting nge 'dzin to/ /gzungs kyi sgo ni mi zad pa'i za ma tog gi gzungs la sogs pa'o/ /tshe 'di nyid la bsngags pa rnam pa gnyis so zhes bya ba la/ tshe 'di nyid la bsngags pa rnam pa gnyis 'thob ste/ khams rgyas pa dang 'chi ba'i tshe dga' ba mchog dang ldan par 'gyur ro/ /phyi ma la rnam pa brgyad de rim gyis khyad par gyi bye brag 'thob par rig par bya'o zhes bya ba la/ tshe rabs phyi ma la rjes su bsngags pa brgyad 'thob ste/ de la dus gcig tu cig car mi 'thob kyi yon tan khyad par can rnams 'thob bo zhes bya ba'i don to/ /yang ji ltar na dang po la tshe 'dir khams rgyas par 'gyur ro/ /de nas 'chi ba'i tshe na dga' ba dang ldan par 'gyur ro/ /de nas gar skye bar 'dod pa der skye bar 'gyur ro/ /de nas skye ba dran par 'gyur ro/ /de nas sangs rgyas dang phrad par 'gyur ro/ /de nas de las chos nyan par 'gyur ro/ /de nas de las chos nyan pas blo dang ldan pa'i sgo nas mos pa dang ldan par 'gyur ro/ /de nas sgo gnyis thob pas mjug tu mngon par 'tshang rgya bar 'gyur ro/ /yang na rjes su bsngags pa de dag rim gyis thob par nges pa med kyi 'chol bar 'thob par 'gyur ro zhes bya ba'i don to/ /bshad pa bsngags pa'i tshigs su bcad pa ste zhes bya ba la/ 'di yan chad du chos btsal ba dang / chos bshad pa dang / chos bshad pa la yi ge phun sum tshogs pa dang / tshig phun sum tshogs pa dang / dgongs pa dang ldem po ngag la sogs pa bshad nas da ni de dag gi mjug bsdus te chos bshad pa'i bsngags pa dang / yon tan ston to zhes bya ba'i don to/ /rab tu blo gros mi skyo snying rje can/ /grags par bsgrags dang cho ga shes rab ldan/ /byang chub sems dpa' mdzes par smra ba yin/ /zhes bya ba la/ chos rnams kyi mtshan nyid phyin ci ma log par 'chad par nus pa'i shes rab dang ldan pas na rab tu blo gros dang ldan pa zhes bya'o/ /bar 'ga' 'chad par 'ga' mi 'chad pa med kyi byang chub rgyun du 'chad pas na mi skyo ba zhes bya'o/ /khe dang bkur sti 'dod pa'i phyir 'chad pa ma yin pas na snying rje can zhes bya'o/ /pha rol tu phyin pa drug dang ldan zhing mkhas par grags pas tshig 'jebs shing btsun pas na legs par bsgrags pa zhes bya'o/ /sems can gang la chos gang bstan par rigs pa'i sems can de la chos ston pas chos gang rab tu shes pa dang ldan pa zhes bya ste/ de ltar rnam pa lnga ltar chos 'chad pas na mdzes par gsungs pa zhes bya ste/ ma nor bar bzang po sgrub pa yin no zhes bya ba'i don to/ /dpe ci dang 'dra zhe na/ de'i phyir/ 'jig rten dag na brjod pa phan pa nyi ma bzhin/ /zhes bya ba smos te/ dper na nyi ma 'jig rten dag la phan pa dang dro ba dang snang bar byed pa de bzhin du byang chub sems dpa'i chos bstan pa nyi mas kyang 'jig rten la phan pa dang snang bar byed do zhes bya ba'i don to/ /rgyu lngas mdzes par smra ba nyi ma lta bu ldan pa'i bsngags pa ni zhes bya ba la/ rgyu rnam pa lnga lta bur chos ston pas na byang chub sems dpa' chos smra ba ni mdzes par smra ba yin pas nyi ma dang 'dra bar bsngags te/ dper na nyi ma shar na 'jig rten rnams la phan pa dang / dro ba dang snang bar byed pa de bzhin du byang chub sems dpa'i chos bstan pa'i nyi mas kyang 'jig rten la phan pa dang bde ba dang snang bar byed pas na 'jig rten pa dag byang chub sems dpa' la gus pa mang du bskyed do zhes bya ba'i don to/ /phyin ci ma log par smra ba dang zhes bya ba la/ byang chub sems dpa' de blo gros rab dang ldan pas na 'khrul pa dang phyin ci log tu 'chad par mi 'gyur te/ chos rnams kyi rang dang spyi'i mtshan nyid phyin ci ma log par 'chad pa byed pas na blo gros rab dang ldan pa zhes bya'o/ /rgyun tu dang zhes bya ba la/ byang chub sems dpa' chos 'chad pa yang bar 'ga' 'chad par 'ga' mi 'chad pa ma yin gyi rgyun tu 'chad par byed de de bas na mi skyo ba zhes bya'o/ /zang zing med pa'i sems dang zhes bya ba la/ chos 'chad pa yang sems can gyi sdug bsngal bsal ba'i phyir chos 'chad kyi/ khe dang bkur sti la sogs pa'i zang zing la sogs pas 'chad pa ma yin pas na snying rje can zhes bya'o/ /'jebs pa'i tshig dang zhes bya ba la/ byang chub sems dpa' de yon tan phun sum tshogs pa dang ldan par phyogs bcu kun du grags te/ /de'i tshig kun gyis mnyan cing tshig 'jebs par 'gyur bas na grags pa zhes bya'o/ /'dul ba dang mthun pa'o zhes bya ba la 'dul ba'i sems can gang la chos gang bshad par rigs pa'i sems can de la chos 'chad de dper na 'dod chags can la mi gtsang ba la sogs pa 'chad pas na cho ga rab dang ldan pa zhes bya'o/ /chos bshad pa'i skabs bshad pa rdzogs so// //bshad pa'i skabs kyi rjes la/ bsgrub pa'i skabs bshad par ci 'brel zhe na/ bdag gis ji ltar btsal ba'i chos gzhan la bshad na ni gzhan la phan pa bsgrub pa yin la/ ji ltar btsal ba'i chos de nyid kyi don/ bdag gis bsgrubs na ni bdag la phan pa bsgrub pa yin te/ de bas na thos pa mang po dang ldan pa rnams kyis nyan pa nyid kyi chos gzhan la bshad par bya'o/ /bdag nyid la phan par bya ba'i phyir bdag nyid kyis kyang bsgrub par bya dgos te/ de bas na bshad pa'i skabs kyi rjes la bsgrub pa'i skabs bshad par 'brel to/ /yang mig yod par mar me lag na thogs pa ni bdag dang gzhan gnyi gas kyang lam mthong bar 'gyur la long ba mar me thogs pa ni gzhan gyis lam mthong bar zad kyi bdag gis mthong ba la mi phan no/ /de dang 'dra ba ji ltar btsal bas chos gzhan la bstan te/ bdag gis ma bsgrubs na ni gzhan la phan par zad kyi/ bdag la phan pa med do/ /de bas na ji ltar btsal ba'i chos gzhan la phan par bya ba'i chos bshad par bya'o/ /bdag la phan par bya ba'i phyir ni bsgrub par bya ste/ de bas na bshad pa'i skabs kyi rjes la bsgrub pa'i skabs bshad par 'brel to/ /sgrub pa rnam par dbye ba'i tshigs su bcad pa drug go zhes bya ba mdo sde las sgrub pa rnam par dbye ba bshad pa ni ji ltar don shes pa dang chos la chos kyi rjes su sgrub par 'gyur ba dang / mtshungs par sgrub pa dang chos la rjes su spyod pa zhes 'byung ba ste/ tshig lnga pa de dag gi don tshigs su bcad pa drug gis bstan to/ /de la yang don shes pa dang / chos shes pa gnyis ni tshigs su bcad pa dang po dang gnyis pas bstan to/ /chos la chos kyi rjes su sgrub par 'gyur ba dang / mtshungs par 'gyur ba gnyis ni tshigs su bcad pa gsum pa dang bzhi pas bstan to/ /chos la rjes su spyod pa tshigs su bcad pa lnga pa dang drug pas bstan to/ /gang zag chos la blo ldan gyis/ /bdag med gnyis su shes pa dang / /zhes bya ba la/ blo dang ldan pa ni shes rab ldan pa'i byang chub sems dpa' la bya ste/ byang chub sems dpa' des gang zag la yang bdag med pa gnyis su shes so chos la yang bdag med pa gnyis su shes so zhes bya ba'i don to/ /ji lta zhe na/ gang zag dang srog dang bdag tu brtag pa'i kun brtags kyi gang zag kyang gzung ba'i ngo bor med pa dang / 'dzin pa'i ngo bor med pas bdag med par shes/ kun brtags kyi chos gzugs dang sgra la sogs pa la yang gzung ba'i ngo bor med pa dang / 'dzin pa'i ngo bor med pas bdag med par shes so/ /gnyis la log dang ma log pa/ /rnam par spangs pa gsum pas so/ /zhes bya ba la/ gnyis ni med pa'i don dang yod pa'i don to/ /log pa'i rang bzhin yang spangs ma log pa'i rang bzhin yang spangs pa'i stong pa nyid dang smon pa med pa dang / mtshan ma med pa'i ting nge 'dzin gsum gyis med pa'i don dang / yod pa'i don gnyis shes so zhes bya ba'i don to/ /de la gnyis ni gzung ba dang / 'dzin pa med pas chos dang gang zag la bdag med par shes so/ /zhes bya ba la/ gnyis ni gzung ba dang 'dzin pa gnyis la bya ste/ gzugs dang sgra la sogs pa'i kun brtags kyi chos kyang gzung ba dang 'dzin pa'i rang bzhin med pas bdag dang gang zag la sogs pa'i kun du brtags pa'i bdag kyang gzung ba dang 'dzin pa'i ngo bo med pas na bdag med par shes so zhes bya ba'i don to/ /log pa dang yang dag par spangs pa gsum gyis ni gnyis te zhes bya ba la/ log pa dang yang dag par spangs pa'i rang bzhin stong pa nyid dang / mtshan ma med pa la sogs pa'i ting nge 'dzin gsum gyis ni med pa dang yod pa'i don shes so zhes bya ba'i don to/ /kun brtags rang bzhin gnyis med pa la stong pa'i ting nge 'dzin gyis so zhes bya ba la kun brtags kyi chos dang gang zag gi rang bzhin med de/ ci'i phyir zhe na/ ming dang mtshan ma dang tha snyad dang / brdar kun du brtags pa thams cad ni ri bong gi rwa bzhin du yod pa ma yin pa'i phyir ro/ /kun brtags rang bzhin med pa ni stong pa nyid kyis ting nge 'dzin gyis shes so/ /ci'i phyir zhe na/ stong pa nyid kyi ting nge 'dzin ni kun brtags kyi chos dang gang zag la bdag med pa dang / stong par bsgom pa'i rnam pa yin pa'i phyir ro/ /gzhan gyi dbang dang yongs su grub pa gnyis kyi rang bzhin yod pa la smon pa med pa dang / mtshan ma med pas so zhes bya ba la/ gzhan gyi dbang dang yongs su grub pa gnyis yod pa de gnyis ni smon pa med pa dang / mtshan ma med pa'i ting nge 'dzin gnyis kyis rim bzhin du shes so/ /ji lta zhe na/ gzhan gyi dbang de ni yang dag pa ma yin pa'i kun du rtog pa'i sdug bsngal rnam pa sna tshogs dang ldan pa 'dod chags la sogs pa'i nyon mongs pa skyon can du byas pa yin pas rang bzhin yod du zin kyang smon pa bya ba'i gnas ma yin zhes smon pa med pa'i ting nge 'dzin gyis rtogs so/ /yongs su grub pa ni rang bzhin yod la smra ba dang bsam pa dang spro ba'i mtshan nyid kyi rtog pa dang bral bas 'di 'dra'o zhes mtshan ma brtag tu rung ba ma yin par mtshan ma med pa'i ting nge 'dzin gyis shes so/ /ting nge 'dzin de gsum 'jig rten gyis te zhes bya ba la/ stong pa nyid la sogs pa'i ting nge 'dzin gsum ni mos pa spyod pa'i sa bzhi'i tshe na/ bsgom pas 'jig rten pa zhes bya ste/ 'jig rten dang 'jig rten las 'das pa'i lam la ltos nas ni log pa dang ma log par bzhag go/ /de la mos pa spyod pa'i sar ma zhugs pa 'jig rten pa la ltos nas ni ma log pa zhes bya'o/ /'jig rten las 'das pa'i lam la ltos nas ni log pa zhes bya'o/ /'jig rten las 'das pa'i ye shes bskyed pas na phyin ci ma log pa'o zhes bya ba la/ log pa spangs pa zhes 'chad de/ mos pa spyod pa'i sa na de ting nge 'dzin de gsum bsgoms te/ de gsum la bsgoms pa'i rgyus sa dang po thob cing 'jig rten las 'das pa'i ye shes khong du chud de/ rnam par mi rtog pa'i ye shes kyi rgyu byed pas na phyin ci ma log pa zhes bya'o/ /'jig rten las 'das pa ma yin pa'i phyir yang dag pa ma yin no zhes bya ba la/ ma log pa spangs pa 'chad de/ ting nge 'dzin de gsum yang 'jig rten las 'das pa'i ye shes nyid du ma gyur cing / rnam par mi rtog pa'i rang bzhin ma yin pas na yang dag pa ma yin no/ /zhes bya ba'i don to/ /don shes pa ni chos kun la/ /gzings dang 'dra bar rtogs pa'o/ /zhes bya ba la/ gong du bshad pa ltar nyan pa'i shes rab kyis gang zag dang chos la bdag med pa gnyis rtogs pa ni don shes pa zhes bya'o/ /don shes pa de ni 'phags pa rdo rje gcod pa las gsungs pa bzhin du chos thams cad gzings dang 'dra bar rtogs te/ dper na chu bo las bsgral bar bya ba'i phyir/ gzings bca' zhing gru la sogs pa'i gzings la brten te chu bo brgal nas gzings dor ba de bzhin du chos kyi don rtogs par bya ba dang / nyon mongs pa spang bar bya ba'i phyir dam pa'i chos nyan cing / bsam pa la sogs pa bya ba yin la don rtogs nas ni de dag kyang 'dor bar bya ba yin par khong du chud pas na gzings dang 'dra bar rtogs so zhes bya bar rtogs te/ de yan chad du don shes pa bstan to/ /thos pas dga' ba spangs pa'i phyir/ /chos shes pas ni des brjod do/ /zhes bya ba la/ de ltar thos pa tsam gyis kyang chog par mi bya'i ji ltar thos pa'i chos de dag ma nor bar rig par bsam dgos te/ de bas na thos pas 'dzin pa spangs nas bsam pa'i shes rab la gus pa bskyed cing / sems pa la 'jug par byed pa ni chos shes pa zhes bya'o zhes bya ba'i don to/ / so sor 'gro ba'i shes pa yis/ /de bzhin gnyis por rab rtogs na/ /de yi shes pa rdzogs bya'i phyir/ /chos kyi rjes su bsgrub pa'o/ /zhes bya ba la so sor 'gro ba ni so so'i skye bo la bya ste/ so so'i skye bo phal pa'i dus na mnyan pa'i shes rab kyis don shes pa dang / bsam pa'i dus na chos shes pa gnyis la brten nas/ gang zag dang chos la bdag med pa gnyis rtogs pa'i ye shes de nyid rdzogs shing dag pa dang / 'jig rten las 'das pa'i ye shes kyi mtshan nyid du 'gyur bar bya ba'i phyir/ mos pa spyod pa'i sa drod la sogs pa la bsgom par 'jug pa ni chos la chos kyi rjes su bsgrub par 'gyur ro zhes bya ba'i don to/ /de nas ye shes 'thob pa ni/ /bla med 'jig rten 'das pa ste/ /dang po yi ste mnyam pa ni/ /byang chub sems dpa' kun dang ngo / /zhes bya ba la/ de nas zhes bya ba ni mos pa spyod pa'i sar bsgom pa la zhugs pa'i 'og tu zhes bya ba'i don to/ /de'i 'og tu ye shes thob par 'gyur ro zhes bya ba'i don to/ /ye shes ci 'dra ba zhig yod ce na/ 'jig rten las 'das pa bla na med pa'i ye shes 'thob ste/ rnam par mi rtog pa'i ye shes 'thob bo zhes bya ba'i don to/ /ye shes de 'jig rten pa rnams la med pas na 'jig rten las 'das pa zhes bya'o/ /ye shes de las khyad zhugs pa gzhan nyan thos dang rang sangs rgyas la sogs pa su la yang med pas na bla na med pa zhes bya'o/ /de'ang gang gi tshe 'thob ce na sa dang po la 'thob ste/ sa rab tu dga' ba'i dus na 'thob po zhes bya ba'i don to/ /de'i tshe sa dang por zhugs pa'i byang chub sems dpa' kun dang mnyam pa nyid du 'gyur ro/ /de bas na bsgrub pa mtshungs par bsgrub pa zhes bya ste/ sa dang por zhugs pa'i byang chub sems dpa' rnams dang sku dang gsung dang thugs mnyam zhing mtshungs pa thob pa'i phyir ro/ /mthong bas spang bya'i nyon mongs dag / thams cad zad par byas nas su/ /shes bya'i sgrib pa spang ba'i phyir/ /bsgom pa la ni 'jug par bya/ /zhes bya ba la/ der sa dang por rnam par mi rtog pa'i ye shes thob nas mthong bas spang bar bya ba'i nyon mongs pa thams cad ma lus par spangs te/ zad par byas nas de'i 'og tu shes bya'i sgrib pa spang bar bya ba'i phyir/ sa gnyis nas sa bcu'i bar du bsgom pa 'jug par byed do zhes bya ba'i don to/ /de la bsgom pa'i lam ni ye shes gang la bsgom pa dang / ye shes gang gis shes bya'i sgrib pa spong bar 'gyur ba'i ye shes bstan pa'i phyir/ rnam par rtog dang rnam mi rtog / ye shes kyis te lhan cig spyod/ /de bzhin chos kyi rjes su spyod/ /lhag ma dag gis sa la'o/ /zhes bya ba smos te/ de la rnam par rtog pa'i ye shes ni dag pa 'jig rten pa'i ye shes te/ ye shes gang gis so so'i spang bar bya ba'i chos ni 'di yin bsgrub par bya ba'i chos ni 'di yin/ so so'i mtshan nyid ni 'di yin no zhes rnam par rtog par byed do/ /rnam par mi rtog pa'i ye shes ni gang gis sa thams cad nam mkha' ltar khong du chud pas so so'i dri ma sbyang zhing / ma thob pa rnams kyang thob par byed pa'o/ /ye shes de gnyis kyang lhan cig spyod de/ rnam par mi rtog pa'i ye shes la dag pa 'jig rten pa'i ye shes 'byung ba dang dag pa 'jig rten pa'i ye shes kyi rjes la rnam par mi rtog pa'i ye shes 'byung ste/ de ltar phan tshun rim gyis 'byung bas na lhan cig spyod pa zhes bya'o/ /de ltar na sa gnyis nas sa bcu'i bar du ye shes de gnyis kyis shes bya'i sgrib pa spong bar byed pa ni chos kyi rjes su spyod pa zhes bya'o/ /lhan cig spyod pa ni rjes su 'brel bar spyod pa ste/ phan tshun du rgyun du'o zhes bya ba la/ ye shes gcig gi rjes la gcig 'byung zhing rjes su 'brel bar 'byung ba la/ lhan cig spyod pa zhes bya ste/ de yang ye shes de gnyis phan tshun du rgyun du 'byung ste/ rnam par mi rtog pa'i ye shes kyi rjes la dag pa 'jig rten pa'i ye shes 'byung ste/ de'i rjes la yang rnam par mi rtog pa'i ye shes 'byung ba lta bur rgyun mi gcod pa'o/ /bsgrub pa la bag yod pa'i tshigs su bcad pa bzhi ste zhes bya ba la/ byang chub sems dpa' rnal 'byor bsgom pa yang bag yod par byas pa dang / bsgrub pa mthar phyin par 'gyur gyi/ bag med pa'i gnas skye bo mi srung pa dang / mtsho ba'i yo byad dkon pa dang stag gzig la sogs pa'i sems can gdug pa yod pa'i gnas su bsgrubs na srog la 'bab par 'gyur gyi/ sgrub pa mthar phyin par mi 'gyur te/ de bas na ji nas bag yod pa'i gnas su bsgrubs na legs pas bag yod pa'i chos rnam pa bzhi bshad do/ /de yang gang zhe na/ mthun pa'i yul na gnas pa dang / /skyes bu dam pa brten pa dang / /yang dag pa'i smon lam dang / /sngon bsod nams byas pa'o/ /legs par rnyed dang legs par gnas/ /sa rab dang ni grogs po rab/ /'byor rab yon tan can gyi yul/ /gang na blo ldan spyod pa'o/ /zhes bya ba'i tshigs bcad 'dis mthun pa'i yul dang gnas bstan to/ /de la bsod snyoms dang chos gos la sogs pa rnyed sla pa'i yul la ni legs par rnyed pa zhes bya'o/ /skye bo mi srun pa dang gcan gzan la sogs pa gdug pa med pa'i gnas la ni legs par gnas pa zhes bya'o/ /shu ba dang mdze la sogs pa med pa'i sa la ni sa rab ces bya'o/ /tshul khrims dang lta bas mtshungs pa'i grogs po la ni grogs po rab ces bya'o/ /nyin par skye bo'i 'grul nyung ba dang / mtshan mo ca co nyung ba ni 'byor pa rab ces bya'o/ /yon tan de lnga dang ldan pa'i yul ni yon tan gyi yul zhes bya ste/ rjes su mthun pa'i yul dang gnas yin no zhes bya ba'i don to/ /gnas de lta bur rnal 'byor pa byang chub sems dpa' gnas shing bsgom par bya'o zhes bya ba'i don to/ /'khor lo rnam pa bzhis bag byed pa bstan te zhes bya ba la dper na shing rta'i 'khor lo bzhi tshang bar yod na bag byed de/ gang du bgrod par bya ba'i gnas su bde bar phyin par 'gyur ba de bzhin du 'dir yang rjes su mthun pa'i yul la gnas pa la sogs pa'i chos bzhi dang ldan na bag yod pa zhes bya ste/ rnal 'byor pas gang du bgrod par bya ba'i gnas su bde bar phyin par 'gyur ro zhes bya ba'i don to/ /legs par thob pa ni chos gos dang bsod snyoms la sogs pa'o zhes bya ba la sogs pa la/ rnal 'byor pa gang na gnas pa'i gnas de ni 'bad rtsol chen po bya mi dgos par chos gos dang lhung bzed dang bsod snyoms dang na ba'i rkyen gyi sman la sogs pa rnyed par 'gyur zhing gzhan dag kyang ched du 'bul bar byed pa'i gnas ni legs par thob pa zhes bya'o/ /ma rungs pa zhes bya ba ni skye bo mi srun pa dang / mi rgod pa la sogs pa la bya'o/ /mi srun pa zhes bya ba ni gcan gzan dang sbrul gdug pa dang / sbrang bu gdug pa la sogs pa la bya'o/ /sa rab ni nad med pa'i phyir ro zhes bya ba la/ gnas gang na shu ba dang / mdze dang grum bu la sogs pa'i nad 'go ba med pa'i sa de la sa rab ces bya'o zhes bya ba'i don to/ /grogs rab ldan ni tshul khrims dang ldan pa mthun pa'i grogs po'i phyir ro zhes bya ba la/ tshul khrims mi mthun pa ni sar pa sti pa dang ma hA saM kri ta lta bu ste/ de lta bu dag dang 'grogs na dge 'dun gyi bya ba dag mi 'grub kyi/ tshul khrims mthun pa dang 'grogs na bya ba 'grub par 'gyur ro/ /lta ba mi mthun pa ni nyan thos dang mu stegs pa'i lta ba la phyogs pa lta bu ste/ de lta bu dag dang 'grogs na rtsod par 'gyur gyi bde bar gnas par mi 'gyur ro/ /nyin par 'du ba nyung ba dang zhes bya ba la/ nyin par yang skyes pa dang bud med dang byis pa la sogs pa skye bo 'grul zag nyung ba'o/ /zang zing nyung ba dang zhes bya ba la/ gang na gnas pa'i gnas de na phyag dar la sogs pa'i lcag lcig med pa'i 'jig rten pa'i yo byad bar bur med pa'o/ /mtshan mo sgra chung ba'i phyir ro zhes bya ba dang / mtshan mor rnal 'byor sgom par byed pa na yang / mi dang phyugs la sogs pa'i sgra mi grag pa ste/ mdo las kyang sgra ni bsam gtan gyi tsher ma yin no zhes gsungs so/ /de bas na sbrang bu la sogs pa'i sgra yang mi grag pa'i gnas su gnas par bya na sgra chen po grag pa'i gnas su gnas par bya ba lta ci smos te/ de bas na sgra med pa'i gnas su gnas par bya'o zhes bya ba'i don to/ /rab tu thos shing bden pa mthong / /smra dang ldan zhing snying rje can/ /mi skyo byang chub sems dpa' ste/ /skyes bu chen por shes par bya/ /zhes bya ba'i tshigs bcad gnyis po 'dis gang la brten par bya ba'i skyes bu dam pa'i mtshan nyid ston te/ lung gi chos sde snod gsum ma lus par thos pa ni mang du thos pa zhes bya'o/ /rtogs pa'i chos bden pa bzhi khong du chud pas na bden pa mthong ba zhes bya'o/ /chos ston pa'i dus na mi dal mi myur bar tshig 'debs shing bzang po ston pas na smra ba dang ldan pa zhes bya'o/ /sems can gyi sdug bsngal bsal bar bya ba'i phyir chos ston gyi/ khe dang bkur sti la chags pa med pas na snying rje can zhes bya'o/ /bar 'ga' 'chad par 'ga' mi 'chad pa ma yin gyi rgyun du 'chad pas na mi skyo ba zhes bya ste/ de lta bu ni byang chub sems dpa' yin pas skyes bu dam pa yin par shes par bya'o zhes bya ba'i don to/ /da ni tshigs bcad gsum pas bdag gi yang dag pa'i smon lam tshul bzhin yid la byed pas zin pa bstan pa'i phyir/ rab tu dmigs dang rab bstan pa/ /thabs rab de dag bstan pa ni/ /rab tu 'jug dang rab 'byor pa/ /bdag gi yang dag smon lam mo/ /zhes bya ba smos te/ yang dag pa'i smon lam zhes bya ba dang bdag yongs su sbyangs pa zhes bya ba dang / bdag las su rung ste ci bsams pa bzhin du 'grub ces bya ba don gcig go/ /de la dam pa'i chos shes rab kyi pha rol tu phyin pa 'bum la sogs pa'i theg pa chen po'i sde snod gsum la dmigs pa zhes bya'o/ /tshe rabs snga mar bsod nams dang ye shes kyi tshogs bsags pa la brten pas na rab tu brten pa zhes bya'o/ /ting nge 'dzin bsgom pa'i tshe dus dus su zhi gnas kyi mtshan ma dang / lhag mthong gi mtshan ma dang / btang snyoms kyi mtshan ma bsgom pas na thabs rab ces bya ste/ de gsum bstan pa ni bdag gi yang dag pa'i smon lam yin no zhes bya ba'i don to/ /gzhan yang dge ba'i rtsa ba cung zad tsam gyis chog par mi 'dzin te mnyan par byas nas sems par 'dod pa dang / bsams nas bsgom par 'dod pa nas sa gong ma gong ma dang yon tan gong ma gong ma rnams sgrub par byed pa ni rab tu 'jug pa zhes bya'o/ /zhi gnas dang lhag mthong bsgom pa la rgyun du bsgom pa dang gus par bsgom pa ni rab tu sbyor ba zhes bya ste/ gong du bshad pa de dag dang ldan pa ni bdag gi yang dag pa'i smon lam yin te/ bdag sbyang ba byas pa dang / bdag gis bsams pa bzhin du bsgrub ste/ bdag las su rung ba byas pa yin no zhes bya ba'i don to/ /zhi gnas la sogs pa'i mtshan ma dus su bsgom pa dang zhes bya ba la/ nam gzugs dang sgra la sogs pa phyi'i yul la sems g.yengs par gyur na zhi gnas kyi mtshan ma bsgoms te 'khor ba'i skye rga na 'chi la sogs pa'i skyon bsams nas sems g.yengs pa las blon pa ni zhi gnas kyi mtshan ma bsgom pa zhes bya'o/ /nam sems rmugs pa dang / zhum par gyur pa na lhag mthong gi bsam pa bsgoms te/ de bzhin gshegs pa'i yon tan dang / /ting nge 'dzin gyi 'bras bu dang / chos rnams kyi rang dang spyi'i mtshan nyid bsams pas sems gzengs bstod pa ni lhag mthong gi mtshan ma bsgom pa zhes bya'o/ /nam zhum rgod spangs nas sems mnyam pa nyid du gyur pa'i tshe na ni btang snyoms kyi mtshan ma bsgoms te/ sems mi bskyod par gzhag pa nyid btang snyoms kyi mtshan ma bsgom pa'o/ /bya ba gzhan yod na chung ngus mi mgu bar zhes bya ba la/ bsgrub par bya ba'i dge ba'i rtsa ba dang / thob par bya ba gzhan dag yod na dge ba chung ngu tsam gyis chog par mi 'dzin ces bya ba'i don to/ /gus par rgyun du 'jug pa'i phyir ro zhes bya ba la/ rab tu sbyor ba 'chad de zhi gnas dang lhag mthong la bsgrims te bsgom pa ni gus par 'jug pa zhes bya'o/ /bar 'ga' bsgom bar 'ga' mi bsgom pa ma yin gyi dus thams cad du bsgom pa ni rgyun du 'jug pa'o zhes bya'o/ /dga' dang ldan par skyes pa ni/ /zhes bya ba la sogs pa tshigs su bcad pa bzhi pas tshe rabs snga ma la bsod nams byas pa'i rgyus chos rnam pa lnga'i rgyur gyur pa ston to/ /gang gi phyir tshe rabs snga mar dge ba byas pa'i rgyus na tshe 'dir mthun pa'i yul dang gnas na 'dug cing gnas par dga' ba skye'o/ /gang gi phyir tshe rabs snga mar dge ba byas pa de'i rgyus tshe 'dir mi khom pa brgyad spangs nas dal bar skyes te/ dal bar skyes pa na skyes bu dam pa la brten pa 'thob po/ / nad med pa yi rgyu dag dang / /ting 'dzin rnam par byed pa yang / sngon du bsod nams byas pa'o/ /zhes bya ba la/ gang gi phyir tshe rabs snga mar bsod nams byas pa de'i rgyus na tshe 'dir nad med pa dang ting nge 'dzin dang / rab tu 'byed pa ste shes rab gsum 'phel bar 'gyur te/ de gsum 'phel bas tshe 'dir ci bsams shing smon lam btab pa de bzhin du 'grub pa ste/ de bas na de dag 'grub pa yang tshe rabs snga ma la bsod nams byas pa'i rgyu las grub po zhes bya ba'i don to/ /bzhi pa 'dis ni bsod nams byas pa rnam pa lnga'i rgyur ston te zhes bya ba la/ tshigs bcad bzhi pa 'dis ni tshe rabs snga mar bsod nams byas par tshe 'dir chos rnam pa lnga 'thob pa'i rgyur 'gyur ba ston te/ chos rnam pa lnga ni dga' ba dang / dal bar skye ba dang / nad med pa dang / ting nge 'dzin dang shes rab bo/ /gang gi phyir dge ba'i rgyus mthun pa'i yul dang / gnas la mngon par dga' ba'o zhes bya ba la/ tshe rabs snga mar bsod nams byas pa'i rgyus na tshe 'dir gong du bshad pa lta bu'i mthun pa'i gnas dang yul na gnas par mngon par dga' ste/ mthun pa'i yul na gnas par mngon par dga' ba yang tshe rabs snga ma la bsod nams byas pa'i rgyu las gyur to zhes bya ba'i don to/ /gang gi rgyus dal ba'i rgyus na skyes bu dam pa la brten pa 'thob po zhes bya ba la gang gi phyir tshe rabs snga ma la bsod nams byas pa de'i rgyus na tshe 'dir mtha' 'khob tu skye ba dang / 'on lkugs la sogs par 'gyur ba'i mi khom pa brgyad spangs nas dal ba bskyed de dal ba rnyed pa na skyes bu dam pa rnams dang brten pa 'thob bo/ /de ltar skyes bu dam pa dang brten pa 'thob pa yang tshe rabs snga ma la bsod nams byas pa'i rgyu las gyur to zhes bya ba'i don to/ /gang gi phyir nad med pa dang ting nge 'dzin dang shes rab kyi rgyus na bdag gis yang dag pa'i smon lam 'grub po zhes bya ba la/ sngon bsod nams bsags pa'i rgyus na tshe 'dir nad nyung ba dang ting nge 'dzin dang shes rab 'phel bar 'gyur te/ de gsum 'phel bas na byang chub sems dpa' yang dag pa'i smon lam ji ltar btab pa bzhin du 'grub par 'gyur ro/ /de ltar smon lam 'grub par 'gyur ba yang tshe rabs snga ma la bsod nams bsags pa'i rgyu las gyur to zhes bya ba'i don to/ /nyon mongs pa nyid kyis nyon mongs pa las ji ltar byung ba'i tshigs su bcad pa gsum ste zhes bya ba la/ 'dod chags la sogs pa'i nyon mongs pa nyid la brten nas 'dod chags la sogs pa'i nyon mongs pa las thar bar 'gyur ba'i thabs gzhan na med par tshigs su bcad pa gsum gyis bstan to/ /chos kyi dbyings ni ma gtogs par/ /gang phyir chos ni med pa ste/ /zhes bya ba la/ shes rab kyi pha rol tu phyin pa 'bum las 'dod chags kyis 'dod chags 'byin pa gzhan par mi smra ste zhes gsungs pa de ci la dgongs nas de skad gsungs she na/ 'di ltar 'dod chags la sogs pa'i nyon mongs pa thams cad las thar bar byed pa'i thabs ni chos kyi dbyings yin pa la chos kyi dbyings kyi nang du ma khyab chos kyi dbyings kyi nang du ma 'dus pa'i chos ni gang gi phyir rdul tsam yang yod pa ma yin te/ chos thams cad la chos kyi dbyings kyis khyab po zhes bya ba'i don to/ /de bas 'dod chags la sogs pa'i/ /de dag 'byung bar sangs rgyas dgongs/ /zhes bya ba la/ de ltar chos kyi dbyings kyis chos thams cad la khyab pas na 'dod chags la sogs pa la yang chos kyi dbyings kyis khyab ste/ 'dod chags la yang chos kyi dbyings yod de 'di ltar 'dod chags la yod pa'i chos kyi dbyings de la ma skyes ma byung ba'i mtshan nyid du tshul bzhin du yid la byas na 'dod chags la sogs pa las thar bar 'gyur te/ de bas na de la dgongs nas 'dod chags kyis 'dod chags 'byin pa gzhan par nga mi smra'o zhes bka' stsal to/ /gang bcom ldan 'das kyis gsungs zhes bya ba la/ shes rab kyi pha rol tu phyin pa 'bum la sogs pa'o/ /'dod chags kyis 'dod chags 'byin par gzhan pa nga mi smra ste zhes bya ba la/ 'dod chags nyid kyis 'dod chags las 'byin par byed kyi 'dod chags las ma gtogs par 'dod chags las thar bar byed pa'i thabs logs shig tu gud na yod par nga mi 'chad do zhes bya ba'i don to/ /de bzhin du gti mug la sogs pa la zhes bya ba la/ 'dod chags dang 'dra bar gti mug la sogs pa yang gti mug gis gti mug 'byin pa yang gzhan par nga mi smra'o zhes bya ba'i 'dod chags la gsungs pa bzhin du sbyar ro/ /de la dgongs par bstan can pa zhes bya ba ni de skad du bka' stsal pa de/ ji lta dgongs te de skad gsungs she na zhes bya ba'i don to/ /gang gi phyir chos kyi dbyings ma gtogs par chos med pa ni chos nyid las gud na chos med pa'i phyir ro zhes bya ba la/ bcom ldan 'das kyis 'dod chags 'byin to zhes gsungs pa de yang don du na chos kyi dbyings la dgongs nas gsungs pa yin no/ /ji lta zhe na/ 'di ltar chos kyi dbyings stong pa'i mtshan nyid ma skyes ma byung ba'i rang bzhin las ma gtogs pa des ma khyab pa'i chos gang yang med de ci'i phyir zhe na/ chos nyid chos kyi dbyings las chos zhes bya ba'i 'dod chags la sogs pa gud du med de/ 'di ltar 'dod chags nyid la'ang chos kyi dbyings kyis khyab cing chos kyi dbyings kyi rang bzhin yod pa'i phyir ro/ /de bas na 'dod chags la sogs pa'i chos nyid la 'dod chags kyi ming 'thob ste zhes bya ba la/ de ltar 'dod chags la yang chos kyi dbyings yod pas 'dod chags yod pa'i chos kyi dbyings la 'dod chags kyi ming btags so zhes bya ba'i don to/ /'byung ba de ni 'dod chags la sogs pa ste zhes bya ba la sogs pa la yod pa'i chos kyi dbyings la ma skyes ma byung ba'i chos nyid du bsgoms na 'dod chags la sogs pa las 'byung bar 'gyur ro/ /de la dgongs nas 'dod chags kyis 'dod chags 'byin pa gzhan par mi smra'o zhes bka' stsal to/ /gzhan yang shes rab kyi pha rol tu phyin pa 'bum las ma rig pa dang byang chub gcig ste gang ma rig pa de byang chub gang byang chub de ma rig pa ste/ de gnyis su med cing gnyis su byar med pa zhes gsungs pa de ji la dgongs te de skad gsungs pa bstan pa'i phyir/ chos kyi dbyings ni ma gtogs pa/ /gang phyir chos ni med pa ste/ /zhes bya ba la sogs pa smos te/ /ma rig pa dang nyon mongs pa la sogs pa'i chos gang yang rung chos kyi dbyings stong pas ma khyab pa'i chos ni rdul tsam yang med pa yin no zhes bya ba'i don to/ /de bas nyon mongs bshad pa las/ /blo can gyis ni dgongs so zhes bya ba la/ de ltar chos kyi dbyings kyis kun du khyab pas na gong du nyon mongs pa bshad pa'i skabs su 'dod chags kyis 'dod chags 'byin to zhes spyod pa yang 'dod chags dang chos kyi dbyings gcig par bshad pa dang 'dra bar blo can te/ bcom ldan 'das kyis ma rig pa dang byang chub gcig par bshad pa yang byang chub ni chos kyi dbyings kyi rang bzhin yin la/ ma rig pa la yang chos kyi dbyings kyis khyab ste/ byang chub kyi chos kyi dbyings kyi rang bzhin dang ma rig pa la spyod pa'i chos kyi dbyings gnyis su rang bzhin gcig pa la dgongs nas ma rig pa dang byang chub gcig go zhes bka' stsal to dgongs pa ni de'o/ /de la nyon mongs pa bstan pa ni de nyid yin par dgongs pa ste zhes bya ba la/ gong du 'dod chags kyis 'dod chags 'byin par byed do zhes 'dod chags dang chos kyi dbyings kyi rang bzhin gcig par bstan pa de bzhin du/ 'dir yang ma rig pa'i chos nyid dang byang chub kyi chos nyid rang bzhin gcig par dgongs so zhes bya ba'i don to/ /ma rig pa zhes bya ba ni byang chub kyi chos nyid la brtags pa'i phyir ro zhes bya ba la/ ma rig pa dang / 'du byed gcig par bshad pa yang ma rig pa 'gags nas gang zhig na ma rig pa'i mtshan nyid byang chub tu 'gyur ba dang / ma rig pa la yang stong pa'i chos nyid yod/ byang chub la yang stong pa'i chos nyid yod de/ stong pa'i chos nyid la mi 'dra ba med pas na chos nyid 'dra ba la dgongs nas ma rig pa dang byang chub gcig go zhes dgongs so/ /'dod chags kyis 'dod chags 'byung bar bshad pa'i dgongs pa bstan pa'i phyir/ gang phyir 'dod chags la sogs mang / /tshul bzhin grub par gyur na ni/ /de dag de las grol bar 'gyur/ / de phyir de las 'byung ba yin/ /zhes bya ba smos te/ kun rdzob tu na 'dod chags la sogs pa'i kun nas nyon mongs pa'i chos rnams ni mi dge ba sdug bsngal mang po dang ldan pa/ rims dang bcas pa/ 'khrul pa dang bcas pa ste/ 'dod chags la sogs pa'i nyon mongs pa sems las byung na skye ba la sogs pa'i sdug bsngal rnam pa sna tshogs skye bar 'gyur zhing / 'dod chags la sogs pa'i nyon mongs pa 'di dag ni dge ba'i chos kyi mi mthun pa'i phyogs yin pas spang bar bya ba yin no zhes de ltar tshul bzhin yid la byas pa la tshul bzhin yid la byed pa grub par 'gyur te 'dod chags la sogs pa'i rang bzhin skyon can du rtogs na 'dod chags la sogs pa'i nyon mongs pa de dag las grol bar 'gyur te/ de bas na 'dod chags kyis 'dod chags 'byung ba yin pas de las dgongs nas 'dod chags kyis 'dod chags 'byin pa gzhan par yang nga mi smra ste/ yang na gang gi phyir 'dod chags la sogs pa'i nyon mongs pa'i chos rnams stong pa dang ma skyes pa dang ma byung ba'i mtshan nyid du don dam pa'i tshul du tshul bzhin du yid la bya ste/ bsgom pa las grub par gyur na 'dod chags pa'i nyon mongs pa las grol bar 'gyur te/ de bas na de la dgongs nas 'dod chags kyis 'dod chags 'byin to zhes bka' stsal to/ /nyan thos dang rang sangs rgyas kyi yid la byed pa spong bar tshigs su bcad pa gnyis te zhes bya ba la/ byang chub sems dpa'i yid la byed pa ni mya ngan las 'das pa la rgyab kyis lta zhing 'khor ba la mngon du phyogs par byed pa yin no/ /nyan thos kyi yid la byed pa ni mya ngan las 'das pa la mngon du phyogs shing / 'khor ba la rgyab tu lta ba yin te de bas na byang chub sems dpa' nyan thos kyi yid la byed pa mya ngan las 'das pa la mngon du phyogs shing 'khor ba la rgyab kyis phyogs pa spang ba'i phyir tshigs su bcad pa gnyis kyis bstan to zhes bya ba'i don to/ /ji ste 'jig rten phyir ni dmyal ba'i gnas 'jug kyang / sdug bsngal drag pos rgyal ba'i sras la gnod mi 'gyur/ /zhes bya ba la/ gal te byang chub sems dpa' sems can gyi don dang phan pa'i ched du sems can dmyal ba'i gnas su 'jug cing dmyal bar gnas kyang dmyal ba'i sdug bsngal bar ma dang tha mas gnod par mi 'gyur ba lta smos kyang ci dgos kyi dmyal ba'i sdug bsngal shin tu drag pos kyang de'i lus dang sems la gnod par mi 'gyur zhing bla na med pa'i bar du gcod par mi 'gyur ro zhes bya ba'i don to/ /zhi ba'i yon tan srid skyon thog mar bsam pa yi/ /dge ba rtog pa sna tshogs blo ldan rnams la gnod/ /zhes bya ba la/ theg dman 'phangs zhes bya ba dang por bshad de theg dman 'phangs pa ni nyan thos kyi yid la byed pa dang / rang sangs rgyas kyi yid la byed pa la bya ste/ de yang mya ngan las 'das pa zhi ba la/ bde ba dang gya nom par yon tan du lta ba dang / srid pa ste/ 'khor ba la sdug bsngal ba'o zhes rtog pa'i yid la byed pa gnyis ni blo ldan byang chub sems dpa' pha rol tu phyin pa dang / sa la sogs pa la bya bar rtog pa la gnod cing / bla na med pa'i byang chub thob par bya ba la bar du gcod pa yin pas yid la byed pa de ni spang bar bya ba yin no zhes bya ba'i don to/ /de'i don tshigs su bcad pa gnyis pas bstan pa'i phyir/ blo ldan dag ni dri med rnam dag sangs rgyas byang chub la/ /dmyal bar gnas pa thams cad dus su bgegs mi byed/ /ces bya ba la sogs pa smos te blo ldan dag ni zhes bya ba ni byang chub sems dpa' rnams kyis zhes bya ba'i don to/ /byang chub sems dpa' rnams kyis thob par bya ba'i byang chub de nyon mongs pa dang shes bya'i sgrib pa thams cad spangs pas dri ma med pa zhes bya'o/ /shes bya thams cad la chags pa dang thogs pa med pa'i shes pa thams cad mkhyen pa'i ye shes la rnam par rgyas pa zhes bya ste/ dri ma med pa zhes bya bas ni spangs pa phun sum tshogs pa bstan/ rnam rgyas zhes bya bas ni ye shes phun sum tshogs pa bstan to/ /de lta bu'i byang chub thob par bya ba la/ sems can dmyal ba na dus thams cad du gnas pa'i sdug bsngal gyis kyang mngon par 'tshang rgya bar bya ba la bar chad du mi 'gyur gyi bgegs su mi 'gyur ro zhes bya ba'i don to/ /theg pa gzhan la rtog par bdag phan mchog bsil ba/ /bde ba'i mchog la gnas pa la yang bgegs su 'gyur/ /zhes bya ba la byang chub sems dpa' rnams byang chub thob par bya ba la bgegs su 'gyur ba 'di yin te/ gang nyan thos dang rang sangs rgyas kyi yid la byed pa bdag la phan pa dang bde bar byed pa dang / bdag nyid bsil ba ste/ bdag 'ba' zhig mya ngan las 'das par bya ba la rtog pa de ni bgegs su 'gyur te/ gang gi bgegs su 'gyur zhe na/ bde ba'i mchog la gnas pa ste/ mi gnas pa'i mya ngan las 'das pa'i bde ba thob par bya ba la bgegs su 'gyur ro zhes bya ba'i don to/ /ngo bo med dang rang bzhin gyis rnam par dag pa la skrag pa spang ba'i tshigs su bcad pa bzhi ste zhes bya ba la/ chos rnams ngo bo med pa zhes bshad pa snang zhing dmigs su rung ngo zhes bshad pa yang / byis pa rnams skrag par 'gyur ba'i gnas yin la/ chos kyi dbyings rang bzhin gyis rnam par dag go zhes bshad la/ dri ma yang dag go zhes bshad pa yang byis pa rnams skrag pa'i gnas te/ skrag pa de spang ba'i phyir tshigs su bcad pa bzhin rtsom mo zhes bya ba'i don to/ /yang na byis pa rnams skrag pa'i gnas ni gsum ste/ chos rnams thams cad nas thams cad du med do zhes bshad na yang skrag pa'i gnas so/ /chos thams cad yod de dmigs su rung ngo zhes smra na yang skrag pa'i gnas so/ /chos thams cad rang bzhin gyis rnam par dag mod kyi phyis kyang dag par bya dgos so zhes bshad pa yang skrag pa'i gnas te/ skrag pa de spang ba'i phyir tshigs su bcad pa bzhi rtsom mo zhes bya ba'i don to/ /chos kyi dngos med dmigs pa dang / /nyon mongs mi rtag rnam dag la/ /zhes bya ba la/ chos rnams kyi dngos po med cing stong ngo zhes bya ba la snang zhing dmigs su rung ngo zhes bshad pa 'di skrag pa'i gnas te/ byis pa dag 'di snyam du ri bong gi rwa dngos po med kyang / dmigs su mi rung ba bzhin du chos rnams kyang dngos po med na ni dmigs su mi rung la/ de bas na dngos po med pa dmigs su rung ngo zhes bshad pa 'di 'gal bar 'gyur ro zhes gsungs pa'i phyir ro/ /chos kyi dbyings rang bzhin gyis rnam par dag la phyis kyang nyon mongs pa rnam par dag par bya dgos so zhes bshad pa 'di yang skrag pa'i gnas te/ ci'i phyir zhe na/ byis pa rnams 'di snyam du gal te chos rnams rang bzhin gyis rnam par dag pa yin na/ nyon mongs pa bsal ci dgos pa'i phyir ro/ /sgyu ma 'dra bar shes bya ste/ /de bzhin nam mkha' bzhin du'o/ /zhes bya ba la/ chos dngos po med kyang dmigs su rung ba ni rgyu dang 'dra bar shes par bya ste/ dper na sgyu ma dmigs su med kyang rta dang glang po lta bur dmigs su rung ba de bzhin du chos 'di dag dngos po med kyang gzugs dang sgra la sogs pa lta bur dmigs su rung ngo zhes bya ba'i don to/ /rang bzhin gyis rnam par dag kyang / phyis rnam par dag par 'gyur ba ni nam mkha' bzhin te/ dper na nam mkha' rang bzhin gyis dag pa la glo bur gyi sprin gyis rnyog nas dri ma can du byas pa de sprin dang bral na dag par 'gyur ba de bzhin du/ chos kyi dbyings kyang rang bzhin gyis dag pa yin pa la 'dod chags la sogs pa glo bur gyi nyon mongs pas dri ma can du byas pa de sbyang dgos pas na rang bzhin gyis rnam par dag pa la phyis dag par 'gyur ba 'gal ba med do/ /chos kyi dngos po med kyang dmigs su rung ba'i ri mo'i dpe bstan pa'i phyir/ ji ltar ri mo cho ga bzhin bris pa/ /mthon dman med de 'on kyang snang bar 'gyur/ /de bzhin yang dag ma yin kun rtog kyang / /mdor na gnyis po med de snang bar 'gyur/ /zhes bya ba smos te/ dper na ras la ri mo mkhan gyis sa tshon rnam pa sna tshogs kyis gzugs rnam pa mang po cho ga bzhin du bris pa la/ lag pas byugs na mthon dman dang 'bar 'bur med kyang mig gis bltas na mgo dang rkang lag la sogs pa mthon dman dang 'bar 'bur du snang ba de dang 'dra ba yang dag pa ma yin pa kun rtog kyang ste/ gzhan gyi dbang gi mtshan nyid la gzung ba dang / 'dzin pa gnyis med kyang gzung ba dang 'dzin pa lta bur snang ste/ de bas na med kyang snang ba ni ri mo'i dpe dang 'dra'o/ /de ni tshigs su bcad pa gsum pa dang bzhi pas sems chu'i rang bzhin dang 'dra bar 'gyur ba'i phyir ro/ /ji ltar rnyog pa'i chu ni dang nas kyang / de las de ni dang bar mi 'gyur ro/ /zhes bya ba la sogs pa smos te/ ji ltar rang bzhin gyis dang ba de/ glo bur gyi srin dang sbal lcong gis rnyog pa can du byas pa las/ phyis rnyog pa dang bral te dang bar gyur nas rang bzhin gyis dang ba de kun nas 'phral bar skyes nas dang bar 'gyur ba ma yin gyi ye nas gnas pa la glo bur rnyog ma dang bral bar gyur pa dang / snga na yod pa'i dang bar snang bar gyur pa tsam du zad do zhes bya ba'i don to/ /de la dri ma bsal ba gcig pu ste/ /de bzhin gang phyir gang gis sems dag pa'o/ /zhes bya ba la chu rang bzhin gyis dag pa glo bur gyi dri ma bsal bar bya ba tsam du zad de/ glo bur gyi dri ma dang bral na dag par gyur pa de bzhin du 'dir yang rang bzhin gyis rnam par dag pa glo bur gyi dri ma dang bral na phyis dag par 'gyur ro zhes bya ba'i don to/ /sems ni rang bzhin dag par dgongs/ /rtag tu glo bur nyes pas rnyog /ces bya ba la/ sems 'di rang bzhin gyis rnam par dag pa 'od gsal ba'i mtshan nyid du dgongs te/ shel bzhin du dag pa yin par 'dod de/ de ltar sems rang bzhin gyis rnam par dag pa yin na rang bzhin gyis rnam par dag pa ci'i phyir mi snang ma mthong zhe na/ dper na shel rang bzhin gyis rnam par dag par 'jim pa'i gong bus g.yogs na dag pa'i rang bzhin mi snang ba dang / chu rang bzhin gyis dang ba yin yang rnyog pas rnyog na rang bzhin gyis dang ba mi snang ba yin no/ /sems rang bzhin gyis dag pa de sems gang la bya zhe na/ de'i phyir/ sems kyi chos nyid de las gzhan dag ni/ /rang bzhin rnam par dag pa'i sems mi bshad/ /ces bya ba smos te/ de la sems kyi chos nyid gnyis su med pa yongs su grub pa'i mtshan nyid de nyid rang bzhin gyis rnam par dag par bshad kyi yongs su grub pa'i mtshan nyid la ma gtogs pa gzhan gyi dbang gi sems la ni rnam par dag pa'i sems su mi bshad do zhes bya ba'i don to/ /ci'i phyir zhe na/ gzhan gyi dbang gi sems ni zag pa dang bcas pa 'dod chags dang dad pa la sogs pas rtag tu rnyog cing skad cig ma re re la lhan cig skye lhan cig 'gag ste dri ma can du gnas pas rang bzhin gyis 'od gsal ba'i sems su mi rigs kyi yongs su grub pa'i mtshan nyid ni zag pa can 'khor ba'i rnams dang lhan cig skye zhing 'gag pas dri ma can du byed pa ma yin pa'i phyir rang bzhin gyis 'od gsal ba zhes bya'o/ /chos med pa dang zhes bya ba la/ chos rnams kun rdzob tu yod par zad kyi don dam par ni thams cad nas thams cad du med do zhes lta ba dang / chad par gyur pas skur ba btab pa'i phyir skrag par 'gyur ba'i gnas so zhes bya ba'i don to/ /chos dmigs pa zhes bya ba la/ don dam par na sgyu ma dang rmi lam la sogs pa 'phral du snang ba'i chos 'di dag thams cad yod de bshad pa yang skrag pa'i gnas te/ ci'i phyir zhe na/ gal te dngos po bzhin du rmi lam la sogs pa yang yod na ni rmi lam gyi dngos pos kyang bya ba byed nus pa'i rigs so snyam du sems pa'i phyir ro/ /de sgyu ma dang 'dra ba zhes bya ba la/ med kyang dmigs pa ni sgyu ma dang 'dra bar khong du chud na skrag pa las ldog par 'gyur ro zhes bya ba'i don to/ /nam mkha' dang 'dra ba zhes bya ba la/ rang bzhin gyis rnam par dag kyang glo bur gyi dri ma dag par 'gyur ba/ nam mkha' dang 'dra bar khong du chud na skrag pa las ldog go zhes bya ba'i don to/ /de bzhin du ri mo la mthon dman dang 'dra ba dang zhes bya ba la/ med kyang dmigs pa ni ri mo'i mthon dman dang 'dra'o zhes bya ba'i don to/ /chu rnyog pa dang 'dra ba zhes bya ba la/ rang bzhin gyis rnam par dag kyang glo bur gyi dri ma dag par 'gyur ba ni chu rang bzhin gyis dang yang 'phral gyi dri ma can du byas pa dang 'dra'o zhes bya ba'i don to/ /ji ltar chu rang bzhin gyis dang ba la glo bur gyi rnyog pas rnyog pa bzhin du zhes bya ba la/ dper na chu ni rnyog pa'i rang bzhin ma yin gyi/ rang bzhin gyis dang ba dang gsal ba'i mtshan nyid yin na/ glo bur gyi sbal lcong la sogs pas glongs dang / rnyog pa can du 'gyur ba dang 'dra bar sems rang bzhin gyis dri ma can gyi mtshan nyid ma yin te/ rnam par dag pa'i rang bzhin yin mod kyi glo bur gyi nyon mongs pa la sogs pas dri ma can du byas so zhes bya ba'i don to/ /de bas na 'dir sems kyi de bzhin nyid la sems yin par rig par bya'o zhes bya ba la/ sems rang bzhin gyis rnam par dag ces bshad pa yang sems kun la mi bya'i sems kyi de bzhin nyid yongs su grub pa'i mtshan nyid la sems rang bzhin gyis rnam par dag pa zhes bya ste/ de bas na sems kyi sgra ni sems kyi de bzhin nyid la bya bar rig par bya'o/ /'dod chags las nyes pa skye ba dag la tshigs su bcad pa bzhi ste zhes bya ba la/ byang chub sems dpa' sems can gyi don byed pa na zhe sdang gi sgo nas byas pa rnams ni nyes pa dang ltung bar 'gyur gyi 'dod chags kyi sgo nas byas pa rnams ni nyes pa dang ltung bar mi 'gyur bar bstan pa'i phyir tshigs su bcad pa rtsom mo zhes bya ba'i don to/ /byang chub sems dpa' sems can la/ /rkang gi khong nas byams pa che/ /zhes bya ba la/ byang chub sems dpa' sems can gyi don byed pa na/ sems can la byams pa dang sdug pa'i sems 'byung ba na rus pa'i nang na rkang gi snying po la bab cing phog pa tsam du byams shing sdug par byed do zhes bya ba'i don to/ /gang phyir rtag tu phan byed pa/ /ji ltar bu gcig pa la bya ba bzhin/ /zhes bya ba la/ de ltar byams pa de yang dper na pha ma gnyis la bu gcig yod pa de la pha ma gnyis byams shing gdung ba lhag par skye ba dang 'dra bar byang chub sems dpa' sems can la byams shing sdug pa lhag par byed pa rkang gi khong du song ba tsam du byams pa byed do zhes bya ba'i don to/ /sems can la ni phan byed na/ /chags bcas nyes par mi 'gyur ro/ /zhes bya ba la/ 'di'i skabs su 'dod chags zhes bya ba ni sems can brtse bar 'dzin pa'i byams pa'i sems la 'dod chags bya bar dgongs te/ de lta bu'i byams pa'i sems las ni sems can la phan pa dang bde ba sha stag 'byung bas byams pa'i sems las sems can gyi don byas pa'i sgo nas nyes pa byung ba yang / nyes par mi 'gyur te ltung bar mi gzhag go zhes bya ba'i don to/ /de ltar thang cig rab tu byung ba'i phyogs la 'dod chags las skyes pa'i nyes pa'i ltung bar mi 'gyur bar bzhag go/ /khyim na gnas pa'i byang chub sems dpa' la yang bu dang chung ma la sogs pa la byams pa'i mtshan nyid kyi 'dod chags kyang nyes par mi 'gyur te/ ci'i phyir zhe na/ 'dod chags kyis sems can mi gtong zhing sdud par byed la zhe sdang ni sems can gtong ba'i mtshan nyid yin pa'i phyir ro/ /'o na byang chub sems dpa' nyes pa dang ltung bar 'gyur ba gang zhe na/ de'i phyir/ mdor na sems can thams cad la/ /de yi zhe sdang mi mthun no/ /zhes bya ba smos te/ byang chub sems dpa' ni sems can thams cad la bu gcig pa bzhin du bzung dgos pa yin pa las gal te sems can la zhe sdang gi sems cung zad cig byung bar gyur na byams pa'i sems dang mi mthun te/ byang chub sems dpa' la nyes pa dang ltung bar 'gyur ro zhes bya ba'i don to/ /gzhan yang byang chub sems dpa' byams pa ni phug ron gyi dpe dang sbyar te bstan pa'i phyir/ ji ltar phug ron bdag gi bu la byams/ /bdag gi bu de sbas nas 'dug pa na/ /de lta bu la zhe sdang 'gal ba ste/ /rang bzhin snying rje can gyi lus can la/ /zhes bya ba smos te/ byang chub sems dpa' sems can la byams pa dang bu dang 'dra bar 'dzin pa ni dpe phug ron dang 'dra ste dpe phug ron bya gzhan pas lhag par 'dod chags che bas bu la byams te/ nam sgo nga byung ba'i dus nas brtsams nas sgo gshog ma rdzogs kyi bar du brang dang lus dang gshog pas g.yogs nas 'dug ste/ de lta bu'i sems yod pa de lta bu la zhe sdang ba'am mi dran pa'i sems cung zad byung na yang de ni mi mthun zhing 'gal ba yin no zhes de dang 'dra bar byang chub sems dpa' rang bzhin gyis snying rje dang ldan pa/ byams pa'i bdag nyid can sems can thams cad la bu gcig pa dang 'dra bar dgongs pa ste/ gal te sems can la zhe sdang ba'i sems cung zad cig byung na de ni byams pa'i sems dang 'gal lo zhes bya ba'i don to/ /gang phyir byams pa de phyir khong khro 'gal/ /zhes bya ba la/ zhe sdang gi sems byung na ji ltar 'gal ba ston te/ gang gi phyir byang chub sems dpa' ni rang bzhin gyis sems can la byams pa'i bdag nyid du gnas pa yin na sems can la khong khro ba'i sems byung na 'ga' zhig mi mthun pa yin no zhes bya ba'i don to/ /gang phyir zhi bas de phyir sdug bsngal 'gal/ /zhes bya ba la/ gang gi phyir byang chub sems dpa' ni sems can gyi 'dod chags dang zhe sdang la sogs pa'i nyon mongs pa byung na thams cad zhi bar byed pa yin na/ byang chub sems dpa' de nyid sdug bsngal thams cad skyed par byed pa'i rgyu 'dod chags dang zhe sdang la sogs pa la sems can 'jog na de'i 'gal ba yin no zhes bya ba'i don to/ /gang phyir don byed de phyir rgyu sems 'gal/ /zhes bya ba la/ byang chub sems dpa' ni sems can gyi don du bdag lus dang longs spyod kyang yongs su btang nas sems can la phan par byed pa yin na sems can slu bar byed pa'i rgyu'i sems kyis bdag gi don du sems can gyi longs spyod dag len par byed na 'gal lo zhes bya ba'i don to/ /gang phyir bde byed de phyir 'jigs byed 'gal/ /zhes bya ba la/ byang chub sems dpa' ni sems can thams cad kyi 'jigs pa bsal nas bde ba la 'jog par byed pa ma yin te/ sems can la dgra dang me la sogs pa'i 'jigs pa 'byung ba thams cad las skyob par byed pa yin te/ byang chub sems dpa'i lus mthong ngam sgra thos na yang sems can gyi 'jigs pa sel bar byed pa yin na/ de lta bu'i sems can de nyid brdeg btsog la sogs pa byed pa'i sgo nas 'jigs shing dngang bar byed na ni de ni 'gal bar byed do zhes bya ba'i don to/ /gang sems can la byang chub sems dpa' byams pa ni 'dir 'dod chags su dgongs pa ste zhes bya ba la/ gang sems can thams cad la byang chub sems dpa' sdug pa dang phangs par sems pa'i byams pa la sems can gyi don byed pa'i skabs 'dir chags pa yin par dgongs pa'o zhes bya ba'i don to/ /de dag gi de las skyes pa'i nyes pa ni 'gag pa ste zhes bya ba la/ byang chub sems dpa'i byams pa las skyes pa'i sems can la sdug par sems dpa'i 'dod chags de ni ltung ba dang nyes par mi 'gyur bar bzhag ste zhes bya ba'i don to/ /ci'i phyir nyes par mi 'gyur zhe na/ byams pa las byung ba'i 'dod chags las sems can la phan pa dang bde bar 'gyur ba'i rgyur 'gyur ba'i phyir nyes par mi gzhag go/ /byang chub sems dpa' sems can la byams pa dang / sdug bsngal zhi ba dang / don sbyin pa dang / bde ba skyed pa'i phyir bde bar 'gyur ba dang zhes bya ba la/ gang gi phyir byang chub sems dpa' sems can la byams par byed pa yin pas khong khro ba'i sems 'gal ba dang / sems can gyi sdug bsngal zhi bar byed pa yin pas sdug bsngal gyi rgyu nyon mongs pa la 'jog par byed pa la 'gal ba dang / don byed pa yin pas rgyu sems 'byung ba 'gal ba dang / bde ba skyed pa yin pas byang chub sems dpa'i gzugs mthong ba dang / sgra thos pas kyang bde bar 'gyur ba yin na/ 'jigs pa skye ba 'gal lo/ /de'i rgyus sdug bsngal gyi sems la sogs pa dang 'gal lo zhes bya ba la/ khong khro ba dang nyon mongs pa la 'jog pa dang / rgyu sems la sogs pa'i rgyus sems can rnams la sdug bsngal skye bar 'gyur bas na khong khro ba la sogs pa'i sems 'gal ba zhes bya'o/ /sgrub pa dbye ba'i tshigs su bcad pa lnga ste zhes bya ba la/ sgrub pa bshad pa'i skabs su yin pas na/ byang chub sems dpa'i sgrub pa'i phyir na grangs kyis du yod pa dang / rnam pa du yod pa la/ tshigs su bcad pa lnga bstan to zhes bya ba'i don to/ /'khor ba rab tu 'jug pa ni/ /ji ltar nad pa sman la bzhin/ /zhes bya ba la/ dper na nad pa nad la phan par bya ba'i phyir sman la 'jug ste/ sman kha ba dang dku ba dang tsha ba la sogs pa yin par sems kyang nad la phan par bya ba'i phyir 'thung ngo / /de bzhin du byang chub sems dpa' sems can gyi don du shes bzhin du 'khor bar 'jug pa na 'khor ba'i nyes pa sdug bsngal ba dang mi bzad pa la sogs pa mi bde bar shes mod kyi mthar 'tshang rgya bar bya ba'i phyir 'khor bar 'jug par byed do zhes bya ba'i don to/ /sems can la ni rab 'jug pa/ /ji ltar sman pas nad pa la'o/ /zhes bya ba la/ dper na sman pa snying rje can dge ba nad pa'i nad de la phan pa'i phyir nad pa la 'jug ste/ nad kyi gzhi dang sbyar nas sman gtong bar byed pa de bzhin du byang chub sems dpa'i sems can 'dod chags la sogs pa'i nyon mongs pa'i nad kyis nad par gyur pa rnams la nyon mongs pa'i nad zhi bar bya ba'i phyir so so'i snod dang sbyar nas dam pa'i chos kyi sman gtong zhing ston par byed de/ bdag la rab tu 'jug pa ni/ /ji ltar ma smin bral ba'o/ /zhes bya ba la/ dper na bran mi srun pa la smin cing ma dul ba la 'dul zhing legs par gcod pa'i phyir/ rje bo 'jug ste/ brdeg pa dang btsog pa la sogs nan thur gyis tshar gcod par byed do/ /de bzhin du byang chub sems dpa' bdag gi sems nyon mongs pa'i dbang du gyur nas ma dul zhing dmu rgod du gyur nas sems de 'dul zhing zhi bar bya ba'i phyir tshul bzhin yid la byed pas tshar gcod cing 'dul bar byed de/ de la 'phags pa dkon mchog brtsegs pa las/ rta 'dul sbyong gi dpes gsungs pa lta ba'o/ /'dod pa rab tu 'jug pa ni/ /ji ltar tshong pa nor la'o/ /zhes bya ba la/ 'di man chad pha rol tu phyin pa drug sgrub pa ston te/ dper na tshong pa bu tsha gso ba'i phyir zong chung ngu zhig gis nor mang po rnyed par khe spogs byed pa de bzhin du byang chub sems dpas kyang sbyin pa'i pha rol tu phyin pa'i zong gis 'dod pa lnga'i yon tan dang longs spyod phun sum tshogs pa bsgrubs nas sems can la yongs su gtong bar byed do/ /'dis ni sbyin pa'i pha rol tu phyin pa bstan to/ /las la rab tu 'jug pa ni/ /ji ltar tshon gyis gos la'o/ / zhes bya ba la/ dper na tshon gyis btsos pa'i gos tshon gyis zhen par bya ba'i phyir/ gzung ba dang bkru ba'i las kyis gos kyi dri ma byang bar byed pa de bzhin du byang chub sems dpa' la yang lus dang ngag dang yid kyi las gsum byang zhing dag par bya ba'i phyir/ srog mi gcod pa dang / ma byin par mi len pa la sogs pa'i las la 'jug par byed do/ /'dis ni tshul khrims kyi pha rol tu phyin pa bstan to/ /sems can mi 'tshe rab 'jug pa'i/ /ji ltar phas ni bus bzhin la'o/ /zhes bya ba la/ ji ltar pha de bu gzhon nu shed ma bye ba yod pas/ bzeg pa dang brad pa la sogs pa'i s go nas gnod pa byas kyang zhe sdang mi skye'i snying rje'i sems skye ba de bzhin du byang chub sems dpa' sems can gyi don byed pa na sems can nyon mongs pa'i dbang du gyur nas shed ma bye ba rnams kyis gnod pa sna tshogs byas kyang byang chub sems dpa' la gnod pa dang zhe sdang gi sems mi skye'i snying rje ba'i sems skye ste/ 'dis ni bzod pa'i pha rol tu phyin pa bstan to/ /rgyun bcad rab tu 'jug pa ni/ /me 'dod gtsub gtan gtsub shing la'o/ /zhes bya ba la/ dper na me 'dod pa'i mi me'i don du gtsub gtan la gtsub shing me ma phyin gyi bar du ngal ba med par gtsubs par byed do/ /de dang 'dra bar byang chub sems dpa' dge ba la bsgom pa mthar phyin par bya ba'i phyir/ ngal ba med par dge ba la rgyun du 'jug pa'i phyir/ 'dis brtson 'grus kyi pha rol tu phyin pa bstan to/ /lhag pa'i sems la rab 'jug pa/ /yid gcugs rdzogs par gyur pa la'o/ /zhes bya ba la/ de la dkor dang bang mdzod la sogs pa'i dbang dang spyod du bcug kyang / rnam pa gang gis kyang srid pa mi skye zhing bdag gir mi byed pa de ni yid gcugs pa la rdzogs pa zhes bya'o/ /de la yid gcugs rdzogs pa de rgyal po'i bang mdzod dang dkor la dbang yod kyang cung zad tsam yang sred pa dang chags pa mi skye ba de bzhin du/ byang chub sems dpa' bsam gtan gyi pha rol tu phyin pa la dbang yod de/ bsam gtan thob kyang bsam gtan gyi ro'i bde ba la cung zad tsam yang chags pa mi skyed do zhes bya ba'i don to/ /yang na yid gcugs pa'i mi de la/ phyi nang gi gtam kun yang ma lus par smra zhing ji ltar gyur kyang yid gcugs pa'i mi de bar ma dor mi gtong ba de bzhin du/ byang chub sems dpa' yang bsam gtan gyi spyod pa na zhugs pa nam bsam gtan gyis mthar ma phyin cing 'bras bu ma thob kyi bar du bar ma dor mi gtong zhing 'jigs par mi byed de/ 'dis ni bsam gtan gyi pha rol tu phyin pa bstan to/ /shes rab la ni rab 'jug pa/ /sgyu ma byed bzhin shes par bya'o/ /zhes bya ba la/ dper na sgyu ma mkhan sgyu ma'i cho ga dang thabs shes pa des gdod sgyu ma byed pa'i sgyu ma'i rta dang glang po byas nas kyang 'di ni sgyu ma yin gyi rta dang glang po yang dag pa ma yin no snyam du sems pa de bzhin du byang chub sems dpas kyang pha rol tu phyin pa bsgrubs nas/ shes rab kyi pha rol tu phyin pas chos thams cad sgyu ma lta bur phyin ci ma log par shes par byed de/ 'dis ni shes rab kyi pha rol tu phyin pa bstan to/ /gang la ji ltar sgrub pa de/ /de ni byang chub sems dpar dgongs/ / zhes bya ba la/ gong du bstan pa'i don bsdus nas bstan te gong ma rnams kyi don mdor bsdus na rnam pa gnyis shig ston te/ gang la sgrub cing 'jug pa dang / ji ltar sgrub cing 'jug pa ste/ de ltar sgrub pa ni byang chub sems dpa' yin par dgongs so zhes bya ba'i don to/ /de la gang la 'jug ce na/ nad pa sman la 'jug pa de bzhin du byang chub sems dpa' sems can gyi don la 'khor bar 'jug go/ /ji ltar 'jug ce na/ sems can la ni rab 'jug pa/ /zhes bya ba nas brtsams te/ sgyu ma byed bzhin shes par bya ba yan chad kyi tshul ltar 'jug go zhes bya ba yan chad kyi don to/ /ji ltar zhes bya ba ni nad pa la sogs pa la 'jug pa'o zhes bya ba la/ ji ltar 'jug par bya zhe na/ nad pa nad la phan par bya ba'i phyir sman dku yang 'thung bar byed pa dang / sman pa nad pa la sman gtong bar byed pa dang / lus la sogs pa'i lus las yongs su sbyong bar byed pa'i tshul du 'jug par bya'o zhes bya ba'i don to/ /gang la zhes bya ba ni 'khor ba las sor sor brtags nas 'khor ba la gnas pas so zhes bya ba la/ gang gang la 'jug ce na/ sems can gyi don du khams gsum du 'jug par byed de/ de yang 'khor ba'i nyes pa dang skyon ji lta bu yin pa so sor brtags te shes par bya ba nas 'khor ba'i skyon gyis ma gos par bya ste 'jug go/ /yang na gong du gang la bslab par bya ba dang / ji ltar bslab par bya ba dang / gang gis bslab par bya ba rnam pa gsum glengs pa las/ 'khor bar 'jug pas ni gang la bslab par bya ba bstan/ sman pa la sogs pa man chad kyis ji ltar bslab par bya ba bstan to/ /snying rje bas sems can nad pa la sogs pa mi gtong ba'i phyir ro zhes bya ba la/ sman pa'i dpes ni snying rje dang ldan pas nyon mongs pa'i nad kyis btab pa'i sems can rnams mi gtong bar bstan to/ /rang gi sems rab tu legs par bcos pa dang zhes bya ba la/ ma smin pa'i bran gyi dpes ni bdag gi sems ma dul ba dang / ma zhi ba legs par 'chos par byed pa bstan to/ /sbyin pa la sogs pa pha rol tu phyin pa ji ltar go rims bzhin du longs spyod 'phel ba'i phyir ro zhes bya ba la/ 'di man chad ni pha rol tu phyin pa drug bsgrub pa rim bzhin du ston te/ tshong pa'i dpes ni sbyin pa'i pha rol tu phyin pa bsgrub pa bstan te/ sbyin pas longs spyod bsgrubs nas longs spyod sems can la gtong bar byed pa'i phyir ro/ /lus la sogs pa'i las sbyangs pa'i phyir ro zhes bya ba la/ tshon mkhan gyi dpes ni tshul khrims kyi pha rol tu phyin pa bstan to/ /ci'i phyir zhe na/ lus dang ngag dang yid gsum gyi las yongs su dag par gyur pa'i phyir ro/ /sems kyi gnod pa bzod pa'i phyir ro zhes bya ba la/ pha dang bu'i dpes bzod pa'i pha rol tu phyin pa bstan te/ sems can gyis gnod pa byas kyang bzod de slar gnod pa mi byed pa'i phyir ro/ /dge ba bsgom pa la rgyun tu brtson par bya'o zhes bya ba la/ gtsub shing gi dpes ni brtson 'grus kyi pha rol tu phyin pa bstan to/ /dge ba bsgom pa la rgyun mi 'chad par brtson 'grus rtsom pa'i phyir ro/ /ting nge 'dzin la mi chags pa'i phyir ro zhes bya ba la yid gcugs pa'i dpes ni bsam gtan gyi pha rol tu phyin pa bstan te/ bsam gtan gyi dbang thob kyang bsam gtan gyi bde ba la ma chags pa'i phyir ro/ /shes bya la phyin ci ma log pa'i phyir ro zhes bya ba la/ sgyu ma'i dpes ni shes rab kyi pha rol tu phyin pa bstan te/ shes bya thams cad sgyu ma lta bu phyin ci ma log par shes pa'i phyir ro/ /'khor gsum yongs su dag pa'i tshigs su bcad pa zhes bya ba la/ sgrub pa rnams kyang 'khor gsum yongs su dag pa'i tshul du bsgrub dgos te/ de bas na 'khor gsum yongs su dag pa bstan pa'i phyir tshigs bcad gcig brtsams so zhes bya ba'i don to/ /de ltar brtson 'grus rtag par rgya chen ldan/ /zhes bya ba la/ de ltar zhes bya ba ni gong du bshad pa ltar ro/ /brtson 'grus rnam pa gnyis te/ rtag pa'i brtson 'grus dang rgya che ba'i brtson 'grus so/ /de la rtag pa'i brtson 'grus ni gang dge ba rgyun du byed pa'o/ /rgya che ba'i brtson 'grus ni gang theg pa chen po dang ldan pa dang pha rol tu phyin pa bsgrub pa'i brtson 'grus so/ /gnyis po yongs smin sbyangs la grub/ /ces bya ba la/ de ltar rtag pa'i brtson 'grus dang / rgya che ba'i brtson 'grus gnyis kyis gnyis po yongs su smin pa dang / sbyang bar bya ba la 'grub ste/ gnyis po ni bsod nams kyi tshogs sam/ ye shes kyi tshogs sam bdag gi don tam gzhan gyi don te/ bsod nams kyi tshogs kyis ni bdag gi don yongs su smin par byed la/ ye shes kyi tshogs kyis ni bdag dang gzhan yongs su sbyong bar byed do/ /mi rtog dri med blo mchog gis/ /'grub dang mchog ni rim gyis des thob 'gyur/ /zhes bya ba la/ chos dang gang zag la bdag med par khong du chud pa'i ye shes la mi rtog pa'i ye shes zhes bya ste/ ji la mi rtog ce na/ sgrub par byed pa'i byang chub sems dpa' dang / bsgrub par bya ba'i sems can dang / sgrub pa'i chos gsum yod par mi rtog pa'i phyir ro/ /ye shes de la nyon mongs pa dang shes bya'i sgrib pa'i dri ma med pas na dri ma med pa zhes bya'o/ /de'i phyir 'khor gsum yongs su dag par rig par bya ste/ de ltar 'khor gsum yongs su dag pa'i rnam par mi rtog pa'i ye shes la blo mchog ces bya ste/ ye shes des sgrub par byed pa dang / bsgrub par bya ba dang / sgrub pa gsum la mi rtog pa'i tshul du bsgrubs nas sa bcu rim gyis mnan nas sangs rgyas kyi sar byang chub sems dpa' des sgrub pa mchog thob par 'gyur te/ bla na med pa'i byang chub tu 'tshang rgya bar 'gyur zhes bya ba'i don to/ /bsgrub pa'i skabs bshad pa rdzogs so// //gdams shing bstan par bya ba'i tshigs su bcad pa lnga bcu rtsa gcig ste zhes bya ba la/ sgrub pa'i skabs kyi 'og tu gdams shing bstan par bya ba'i skabs bshad par 'brel pa ci yod ce na/ 'dir bslab pa'i rnam par bshad pa'i skabs yin te/ bslab pa'i rnam pa'i khyad par yang bsam pa'i khyad par dang / bdag la phan pa'i khyad par dang / gzhan la phan pa'i khyad par dang / mthar phyin pa la sogs pa'i khyad par la chos la mos pa mang ba'i skabs su bsam pa'i khyad par bstan/ chos 'tshol ba'i skabs su sbyor ba'i khyad par bstan/ sgrub pa'i skabs su bdag la phan pa'i khyad par bstan/ chos 'chad pa'i skabs su gzhan la phan pa'i khyad par bstan nas da ni mthar thug pa'i khyad par ston te/ de'ang sgrub pa dang ldan pa'i byang chub sems dpa' mthong ba dang bsgom pa'i lam gnyis rnam par dag cing mthar thug par bya ba'i phyir bdag nyid kyis kyang gdams pa dang bstan par brtsal bar bya la/ gzhan yang gdams pa dang bstan pa la bzhag dgos te/ de bas na sgrub pa'i skabs kyi 'og tu gdams pa dang bstan pa'i skabs bshad par 'brel to/ /bskal pa grangs med 'byung ba ni/ /zhes bya ba la/ bskal pa grangs med pa gsum la mos pa spyod pa'i sar bskal pa grangs med pa gcig du byang chub sems dpa'i spyod pa'i spyad pas sa dang po 'byung bar 'gyur ro zhes bya ba'i don to/ /ji ltar byang chub sems dpa'i spyod pa la spyad ce na/ de'i phyir/ chos spyod rnam par 'phel byed cing / /dge ba'i chos ni rab rdzogs pa/ /ji ltar rgya mtsho'i chu bzhin no/ /zhes bya ba smos te/ mos pa dang dad pa zhes bya ba don gcig ste/ mos pa spyod pa'i sar mos pa dang / dad pa shas je che je cher byas nas 'jig rten gyi chos mchog tu dad pa shas cher byas pa la mos spyod rnam par 'phel ba zhes bya'o/ /yang na mos pa spyod pa'i sa gong ma gong ma thob par byas pa ni mos spyod 'phel bar byed pa zhes bya ste/ mos pa spyod pa'i sa drod kyi dus na ni ming sgyu ma lta bur rtogs/ rtse mo'i dus na ni don sgyu ma lta bur rtogs/ bzod pa'i dus na ni gzung ba mi dmigs par rtogs/ 'jig rten gyi chos mchog gi dus na ni 'dzin pa yang mi dmigs par rtogs pa'o/ /de ltar mos pa 'phel bar 'gyur bas bsod nams dang ye shes kyi tshogs rdzogs par 'gyur te/ de'ang dper na rgya mtsho chus gang zhing rgyas pa dang 'dra bar de'i sems la yang bsod nams dang ye shes kyi tshogs ji tsam gyis sa dang po khong du chud par 'gyur ba'i bsod nams dang ye shes kyi tshogs rdzogs shing rgyas par 'gyur ro/ /zhes bya ba'i don to/ /sngun nas dag pa'i rgyal ba'i sras/ /zhes bya ba la/ de ltar bskal pa grangs med par zhugs pa dang / mos pa 'phel ba dang / chos rdzogs pa ni sdu na nas dag pa'i rgyal ba'i sras zhes bya ste/ mos pa spyod pa'i sar byang chub sems dpa'i tshul khrims rnam pa gsum char dag ces bya ba'i don to/ /tshul khrims rnam pa gsum ni sdom pa'i tshul khrims dang / dge ba'i tshul khrims dang / sems can gyi don byed pa'i tshul khrims so/ /de ltar tshogs ni bsags pa dang / /zhes bya ba la/ gong du bshad pa ltar na bsod nams dang ye shes kyi tshogs bsags pas theg pa chen po'i chos phyin ci ma log par rtogs shing sems la 'dzin pas na theg pa chen po lta ba drang ba ste/ nyan thos la sogs pa'i lta bar ma ltung ba ni/ tshogs bsags pa zhes bya'o/ /rab shes zhes bya ba la/ mos pa spyod pa'i sar theg pa chen pa'i chos mang du thos pa la rab tu shes pa zhes bya'o/ /sems ni dge ba dang zhes bya ba la/ mos pa spyod pa'i sa'i dus na sa dang po thob par bya ba la bar du gcod pa'i sgrib pa spangs pas na/ sems dge ba zhes bya'o/ /de ltar bsgom pa rnam par dag par byas pa dang / lta ba drang por byas pa dang / mang du thos pa dang / sgrib pa spangs pa la sogs pa'i 'og tu 'og nas 'byung ba'i tshul du bsgom par byas pas na/ bsgom pa la ni brtson pa'o zhes bya ba ste/ 'og nas 'byung ba'i tshul ni de nas mdo la sogs pa'i chos zhes bya ba la sogs pa'o/ /chos kyi rgyun las sangs rgyas las/ /zhi gnas rnam par rgyas pa dang / /ye shes rgyas par 'gyur ba'i phyir/ / de tshe lung bstan thob par 'gyur/ /zhes bya ba la/ gong du bshad pa ltar mos pa spyod pa'i sar mos pa dang dad pa 'phel ba dang / bsod nams dang ye shes kyi tshogs bsags pa dang / sdom pa rnam par dag pa dang / theg pa chen po la lta ba drang ba dang / thos pa mang ba dang / sgrib pa spangs pa ste/ lus dang sems las su rung bar byas pa'i byang chub sems dpa'i chos kyi rgyun gyi ting nge 'dzin la gnas nas sangs rgyas rnams las sa dang po thob par bya ba'i don du bstan pa dang gdams pa'i lung thob par 'gyur te/ lung de yang zhi gnas rnam par rgyas par bya ba dang / lhag mthong rnam par rgyas par bya ba'i phyir lung nod par byed de/ ye shes kyi sgras ni lhag mthong la bya'o/ /sa dang po thob par 'gyur ba'i lam 'jig rten gyi chos mchog gi ting nge 'dzin la chos kyi rgyun gyi ting nge 'dzin zhes bya'o/ /de nas mdo la sogs pa'i chos zhes bya ba la/ de nas zhes bya ba ni de bzhin gshegs pa las bstan pa dang / gdams pa las thob nas de'i 'og tu zhes bya ba'i don to/ /mdo la sogs pa'i chos zhes bya ba la/ sogs pa'i sgras ni mdo'i sde dang lung du bstan pa la sogs pa gsung rab yan lag bcu gnyis la bya'o/ /gsung rab de dag kyang ji 'dra ba zhig ce na/ de'i phyir/ mi gnyis don dag gsal byed pa/ /zhes bya ba smos te/ mdo la sogs pa'i chos de dag kyang gzung ba dang 'dzin pa gnyis dang bral ba dang / yod pa dang med pa gnyis dang bral ba'i don phyin ci ma log par 'chad pas na gsal bar byed pa zhes bya'o/ /thog mar dka' thub can gyis ni/ /mdo ming la sogs sems gzhag ste/ /zhes bya ba la/ dka' thub can ni byang chub sems dpa' rnal 'byor pa la bya'o/ /rnal 'byor pa des dang po nyid du mdo sde la sogs pa gsung rab yan lag bcu gnyis kyi ming la sems 'jog par byed do/ /ji ltar zhe na/ mdo sde 'di'i ming sa bcu pa zhes bya/ 'di ni lang kar gshegs pa zhes bya/ zhes mdo sde rnams kyi ming shes par byed do zhes bya ba'i don to/ /de nas tshig tu spros pa las/ /rim gyis rnam par brtags nas su/ /zhes bya ba la/ de ltar ming la sems bzhag nas de'i 'og tu mdo sde dag gi tshig la sems 'jog ste/ 'di skad bdag gis thos pa'i dus gcig na zhes bya ba nas rdzogs kyi bar du mdo sde gcig gi nang nas tshig ji nas ji 'byung ba dang / tshig ji snyed cig 'byung ba dang / kun shes par byed do zhes bya ba'i don to/ /de yang rim gyis shes par byed de/ dang por ming brtags nas shes par byed de/ de bas tshig rnams brtags nas tshig shes par byed do/ /des na rang rig tshul bzhin gyis/ /de yi don la rnam par brtags/ /zhes bya ba la/ rang gis rig pa zhes bya ba ni sems kyi nang du tshul bzhin du rtogs pa zhes bya ba'i don to/ /de ltar tshig shes pa'i 'og tu rnal 'byor pas/ mdo sde re re'i tshig so so'i tshig re re la don ci yod pa la brtags shing dpyad na/ tshig re re'i don yang phyin ci ma log par shes par byed do zhes bya ba'i don to/ /de'i don dag bzung nas su/ /zhes bya ba la/ de ltar tshig re re'i don rtogs par byas nas de'i 'og tu mdo sde'i tshig gi don ni 'di kho na yin gyi gnas ma yin no zhes gtan la 'bebs shing shes par byed do zhes bya ba'i don to/ /chos rnams yang dag bsdu bar bya/ /zhes bya ba la/ de nas de'i 'og tu mdo sde de dag gi don gcig tu bsdus nas chos la sdud par byed de/ ji ltar zhe na/ gsung rab yan lag bcu gnyis dag gi don bsdus na yang mdo sde'i nang du 'dus pa'am/ /mdo sde gcig la mdo sde 'di yig mgo nas mjug tu don mdor bsdus nas 'di skad 'byung bar zad pa'am/ mdo sde thams cad kyi don bsdus na yang mdo ston par zad ces sdud pa ni chos la yang dag par bsdu ba zhes bya'o/ /des ni de'i don rtogs bya'i phyir/ /de nas yang dag re bar bya/ /zhes bya ba la/ des zhes bya ba ni rnal 'byor pa'i sems pa des so/ / don rtogs par bya ba'i phyir zhes bya ba ni mdo sde la sogs pa de dag gi don rtogs par bya ba'i phyir chos la bsdus pa'i 'og tu bdag nyid kyis bsam gtan thob par bya ba'i phyir zhugs sam/ dge sbyong gi 'bras bu thob par bya ba'i phyir zhugs sam/ sa dang pha rol tu phyin pa rtogs par bya ba'i phyir zhugs kyang rung ste/ 'bras bu gang gi phyir zhugs pa'i 'bras bu de ji ltar thob par bya zhes re ba dang bcas pa'i sems bskyed par bya ste/ de bas na/ de nas yang dag re bar bya/ /zhes smos so/ /tshigs su bcad pa de gsum gyis ni sems drug bstan te zhes bya ba la tshigs su bcad pa gsum gyis ni de bas mdo la sogs pa'i chos la sogs pa ni tshigs bcad gcig go/ /de nas tshig tu spros pa la/ /zhes bya ba la sogs ni tshigs bcad gnyis pa'o/ /de yi don dag bzung nas su/ /zhes bya ba la sogs pa ni tshigs bcad gsum pa ste/ tshigs su bcad pa de gsum gyis ni rnal 'byor pa'i sems drug bstan to zhes bya ba'i don to/ /rtsa ba'i sems ni mdo sde'i chos rnams kyi ming la dmigs pa gdams pa thob nas sam zhes bya ba la/ rtsa ba'i sems zhes bya ba la ji ltar ni slob dpon nam mkhan po'am/ de bzhin gshegs pa la sogs pa las sa thob pa'i gdams pa dang / bstan pa thob nas de nas dang po nyid du mdo sde la sogs pa'i ming la sems dmigs par byed pa la ni rtsa ba'i sems zhes bya'o/ /bdag nyid kyis 'di ltar mi rtag pa dang / sdug bsngal ba zhes bya ba la sogs pa la/ yang na mkhan po dang slob dpon nam/ sangs rgyas dang byang chub sems dpa' las gdams pa dang / bstan pa ma thob par yang / bdag nyid kyi blos dang po nyid du chos rnams la rtog pa'i tshe mi rtag pa dang sdug bsngal ba dang stong pa dang bdag med pa'i tshul du tshul bzhin yid la byed pa la/ /rtsa ba'i sems zhes bya'o/ /rjes su dpyod pa'i sems ni gang gis mdo sde la sogs pa'i ming la dmigs nas tshig rab tu dbye ba'i phyir rjes su 'gro ba'i zhes bya ba la/ rjes su dpyad pa'i sems ji lta bu zhe na/ byang chub sems dpa' gang gis sa dang po nyid du mdo sde'i ming ni 'di skad ces bya zhes mdo sde'i ming la dmigs nas de'i 'og tu mdo sde de dag so so'i tshig la dmigs par byed de/ mdo sde'i tshig gi nang nas tshig ji skad 'byung ba dang tshig grangs kyis du zhig 'byung bar shes par byed pa la rjes su 'gro ba'i sems zhes bya'o/ /rnam par rtog pa'i sems ni gang gis don dang yi ge la rnam par rtog pa ste zhes bya ba la/ rnam par rtog pa'i sems ji lta bu zhe na/ de yang rnam pa gnyis te/ don la rnam par rtog pa dang / yi ge la rnam par rtog pa'o/ /de la bgrang ba la sogs pa'i don rnam pa bzhi lta bu'i tshul du rtog pa ni don la rnam par rtog pa zhes bya'o/ /de'i bgrang ba ni grangs 'dzin pa ste/ 'di ltar gzugs ni skye mched bcu dang phyogs gcig go zhes bya ba la/ bgrang ba la rnam par rtog pa ni lnga zhe'am/ bcu gcig zhe'am/ drug ces grangs sems la 'dzin pa ste/ de yang 'di ltar gzugs ni dbang po lnga dang yul lnga dang bcu/ chos kyi khams kyi phyogs gcig ste/ rnam par rig byed ma yin pa'i gzugs dang bcu gcig kho nar zad kyi mi mang mi nyung ngo zhes grangs 'dzin pa ni bgrang ba la rtog pa zhes bya'o/ /tshor ba ni tshor ba drug gi tshogs so zhes bya ba la sogs pa zhes bya ba la/ tshor ba la yang / mig gis kun du reg ste/ tshor ba nas yid kyis kun du reg ste tshor ba'i bar du tshor ba'i tshogs drug po kho nar zad kyi mi mang mi nyung ngo zhes rtog pa yang bgrang ba la rtog pa zhes bya'o/ /gzhal ba ni bgrang ba'i chos la skur pa mi 'debs shing sgro mi 'dogs par mtshungs par rtog cing 'dzin pa'o zhes bya ba la/ gzhal ba la rtog pa ni gong du gzugs bcu gcig tu bgrang ba dang / tshor ba'i tshogs drug tu bgrang ba dang / gzugs ni bcur zad kyi/ tshor ba la yang ldar zad ces skur pa yang mi 'debs so/ gzugs la bcu gnyis yod cing tshor ba la yang bdun yod ces sgo yang mi 'dogs par bskyed pa skur pa yang med pa'i tshul du grangs ci tsam du gzhag pa kho na yang mtshungs par rtog pa ni gzhal ba la rtog pa zhes bya'o/ /dpyod pa la ni tshad mas rtog pa'o zhes bya ba la/ mngon sum dang rjes su dpag pa dang lung gi tshad ma dang gsum gyis chos de dag yin du'ang mi rung zhes rtog cing / ci'i phyir na gzugs la bcu gcig gzhag la bcu gnyis la sogs par mang du yang ma bzhag bcu la sogs pa nyung ngu yang ma bzhag ces rtog pa ni dpyod pa dang rtog pa zhes bya'o/ /rtag pa ni bgrang ba dang gzhal ba dang dpyad pa'i don la lta ba'o zhes bya ba la bgrang bas bcu gnyis la sogs pa'i grangs bgrangs pa dang / gzhal bas skyed skur ma byas pa dang / dpyad pas rigs par gtan la phab pa'i chos de dag gi rang dang spyi'i mtshan nyid kyi don lta ba ni rtog pa zhes bya'o/ /yi ge la rnam pa gnyis su brtag ste zhes bya ba la/ yi ge la rnam pa gnyis su brtag ste/ don yod par brtag pa dang / don med par brtag ba'o/ /yi ge mang po la don dang bcas pa dang / gcig pa don med pa'o zhes bya ba la/ 'dus byas mi rtag ces bya ba la sogs pa yi ge mang po la ni don yod par brtag par bya ste/ ji ltar don yod ce na/ mi rtag pa la sogs pa'i don ston pa'i phyir ro/ /a dang ka la sogs pa'i yi ge gcig pa ni don med par brtag ste/ yi ge gcig gi don gang yang mi ston pa'i phyir ro/ /'dzin pa'i sems ni gang gis ji ltar rjes su brtag pa'am zhes bya ba la/ 'dzin pa'i sems ji lta bu zhe na/ byang chub sems dpa'i shes rab gang gis rjes su dpyod pa'i sems kyi skabs su mdo sde rnams tshig re re nas ji skad 'byung ba'i tshig rnams kyi mtshan ma 'dzin te/ ji ltar mtshan ma 'dzin ce na/ mdo sde 'di'i tshig ni 'di kho na yin gyi gzhan ma yin no zhes gtan la 'bebs pa ni 'dzin pa'i sems zhes bya'o/ /rnam par brtag pa'i mtshan ma 'dzin pa'o zhes bya ba la/ yang rnam par brtag pa'i sems kyi skabs su don la rnam par rtog pa la/ grangs la sogs pa la rtog pa la sogs pa rnam pa bzhir bshad pa dang / yi ge la rnam par rtog pa rnam pa gnyis su bshad pa la/ de dag gi mtshan ma 'dzin te ji ltar 'dzin ce na/ 'di dag ni 'di kho na lta bu yin gyi/ gzhan du ma yin no zhes gtan la 'bebs pa ni 'dzin pa'i sems zhes bya'o/ /bsdu ba'i sems ni gang gis ji ltar rnam par brtags pa'i don rtsa ba'i sems su bsdus nas bsdu ba'i tshul du 'jug pa zhes bya ba la/ bsdu ba'i sems ji lta bu zhe na/ byang chub sems dpa'i shes rab gang gis gong du rnam par brtags pa'i chos don la rnam par brtag pa la yang / bgrang ba dang gzhal ba la sogs pa rnam pa bzhir brtag pa dang / yi ge la yang don yod pa dang / med pa rnam pa gnyis su brtags pa de dag la bsdu ba'i tshul du 'jug ste/ ji lta zhe na/ ji snyed du mdo sde yan lag bcu gnyis bshad pa de dag kyang / mdo sde'i nang du 'dus par zad do zhes rtsa ba'i sems su sdud pa'am/ mdo sde 'di'i nang nas tshig dang yi ge mang po 'byung ba thams cad kyang nang bsdus na/ 'di tsam zhig ston par mdzad do zhes bya ba'i sems sdud pa la bsdu ba'i sems zhes bya'o/ /re ba'i sems ni ting nge 'dzin gyi phyir ram zhes bya ba la/ re ba'i sems ji lta bu zhe na/ bdag nyid kyis ting nge 'dzin thob par bya ba'i phyir zhugs kyang rung / de ma yin pa gzhan 'bras bu gang gi phyir zhugs kyang rung ste/ de dag thos par bya ba'i phyir 'jug par bya'o snyam du sems gzhan du bsgom pa'am/ 'bras bu de dag gis ji ltar thob par bya'o snyam du sems bzhin du bsgom pa ni re ba yid la byed pa zhes bya'o/ /de yongs su rdzogs pa'i phyir ram zhes bya ba ni ting nge 'dzin rnams yongs su rdzogs shing mthar phyin par bya ba'i phyir zhugs kyang rung zhes bya ba'i don to/ /dge sbyong gi 'bras bu 'thob par bya ba'i phyir zhes bya ba ni rgyun du zhugs pa la sogs pa dge sbyong gi 'bras bu thob par bya ba'i phyir zhugs kyang rung zhes bya ba'i don to/ /sa la 'jug pa'i phyir ram zhes bya ba ni bdag nyid kyis sa bcu rim gyis thob par bya ba'i phyir zhugs kyang rung zhes bya ba'i don to/ /khyad par thob pa'i phyir ram zhes bya ba la/ yang na bdag gis mngon par shes pa lnga la sogs pa'i yon tan gyi khyad par thob par bya ba'i phyir zhugs kyang rung zhes bya ba'i don to/ /gang gi phyir 'jug pa na zhes bya ba'i don ni gzhan yang de la ma gtogs pa'i yon tan stobs dang mi 'jigs pa la sogs pa'i yon tan gang gi phyir zhugs kyang rung / de dag thob par bya'o snyam du sems shing bsgom pa ni re ba'i sems zhes bya'o/ /sems nyid dmigs par snang ba ste/ sems las gzhan dmigs pa med de/ /zhes bya ba la/ gong du sems drug bshad pa'i skabs su sems drug gi dmigs pa'i yul bshad pa de dag kyang / sems nyid dmigs pa'i yul rnam pa drug snang ba lta bur zad kyi/ sems las ma gtogs par sems kyi dmigs par bya ba'i yul sems las logs shig na gzhan med do zhes bya ba'i don to/ /sems tsam du shes kyang rung mi shes kyang rung zhes bya ba la sogs pa la/ sems rnam pa drug po de dag gi yul rnams sems tsam du zad pa'i bsam pa'i shes rab kyis khong du chud de/ sems tsam du shes kyang sems drug po la bsgom pa na/ drug po de dag sems tsam du mi shes kyang rung zhe'am/ bsam pa'i shes rab kyis sems tsam du shes pa med kyi/ thos pa'i shes rab kyis 'di ltar sems tsam du zad kyi sems las logs shig na yul gzhan med do zhes kyang rung ste/ don du na sems nyid sems rnam pa drug gi dmigs pa lta bur snang ba zad de/ sems las gzhan ma yin pas sems drug po yang sems tsam par rnam par bzhag go/ /de ltar rnal 'byor pa sems drug la bsgom pa bsgom pa des/ yid la byed pa bcu gcig bsgom zhing yid la bya ste/ de bas na/ tshol dang so sor rtog pa dang / /yid kyi rtog pa rgyun du bya/ /zhes bya ba la sogs pa smos so/ /de la yid la byed pa bcu gcig ni rtog pa dang bcas dpyod pa dang bcas pa la sogs pa ste/ yid la byed pa bcu gcig kyang tshigs su bcad pa bzhis bstan to/ /de la tshol ba yid kyis rtog pa rgyun du bya ba dang / so sor rtog pa yid kyis rtog pa rgyun du bya'o zhes tshig de lta bu'o/ /de la tshol ba yid kyis rtog pa zhes bya ba la/ rtog pa dang bcas dpyod pa dang bcas pa'i yid la byed pa bstan te/ de'ang mi lcogs pa med pa dang / bsam gtan dang po'o/ /de la tshol ba la rtog par ci mngon zhe na/ gtsug lag las rtog pa'i mtshan nyid bshad pa'i skabs su rtog pa gang zhe na/ tshol ba yid kyi 'jog pa'o zhes bstan pas na tshol ba la rtog pa zhes bya bar mngon no/ /so sor rtog pa yid kyis rtog pa zhes bya bas mi rtog cing dpyod pa tsam gyis yid la byed pa bstan te/ de yang bar gyi bsam gtan dang bsam gtan gnyis pa la bya'o/ / so sor rtog pa la dpyod pa zhes bya bar ci mngon zhe na/ gtsug lag las dpyod pa'i mtshan nyid bshad pa'i skabs su dpyod pa gang zhe na/ so sor rtog pa yid kyis 'jog pa'o zhes bshad pa'i phyir dpyod pa la so sor rtog pa zhes bya par mngon no/ /rnam par mi rtog ro gcig pa'i/ /yid la byed pa brtag par bya'o/ /zhes bya ba la/ rnam par mi rtog ro gcig pa zhes bya bas mi rtog mi dpyod pa'i yid la byed pa bstan te/ de'ang bsam gtan gsum pa dang bzhi pa ste/ de'i tshe rtog dpyod dang bral ba'i mtshan nyid du nang gcig par bsgom pa'i phyir te/ rtog dpyod dang bral ba rnam par mi rtog pa'i ro gcig pa de la rtag tu yid la byed pa'o zhes bya ba'i tha tshig go/ /zhi gnas lam du shes bya ste/ /des na chos dang ming bsdus pa/ /zhes bya ba la/ ming gang chos rnams kyi don dang tshig bsdus pa la ming bsdus zhes bya ste/ dper na shes rab kyi pha rol tu phyin pa zhes bya ba'i ming gis/ shes rab kyi kyi pha rol tu phyin pa'i don dang tshig mang po bsdus pa'o/ /dang gi sgras ni rjes su 'gro ba'i sems kyis mdo sde'i tshig so sor shes par bya ba'i tshig la bsnyegs te/ don du mdo sde'i ming dang tshig la dmigs par byed pa ni zhi gnas kyi lam du shes par bya ste/ 'dis ni zhi gnas yid la byed pa bstan to/ /de'i don dag rnam brtags phyir/ /lhag mthong du ni shes par bya/ /zhes bya ba la/ de'i don zhes bya ba ni mdo sde rnams kyi ming dang tshig rnams kyi don te/ de yang bgrang ba dang gzhal ba dang dpyad pa dang rtog pa ste chos de dag gi rang dang spyi'i mtshan nyid la rtog cing / phyin ci ma log par shes par byed pa ni lhag mthong gi lam du shes par bya ste/ 'dis ni lhag mthong yid la byed pa bstan to/ /de dag bsdus pa'i lam de ni/ /zung du 'brel bar shes par bya/ /zhes bya ba la/ zhig gnas dang lhag mthong zung du ma 'brel pa'i dus na ni so sor dmigs te/ zhi gnas kyis ni ming dang tshig la dmigs/ lhag mthong gis ni don la dmigs par byed do/ /nam zhi gnas dang lhag mthong zung du 'brel na ni ming dang don la so sor mi dmigs kyi/ de gnyis gcig tu bsdus nas zhi gnas lhag mthong mgo mnyam du 'brel te dmigs par byed pa'i lam de ni zhi gnas dang lhag mthong zung ngu 'brel ba'i lam du shes par bya ste/ 'dis ni zung du 'brel pa yid la byed pa bstan to/ /zhum pa'i sems ni rab tu gzung / /zhes bya ba la/ rnal 'byor ba ting nge 'dzin bsgom pa'i dus na sems nyid kyis mi gsal te zhum par gyur na/ lhag mthong mtshan ma yid la byed pas sems gzung zhing gzengs bstod par bya ste/ ji ltar gzengs bstod ce na/ lhag mthong gis de bzhin gshegs pa dang / ting nge 'dzin gyi yon tan dang / chos rnams kyi rang dang spyi'i mtshan nyid yid la bya bas sems gzengs bstod par bya ste/ 'dis ni 'dzin pa'i mtshan ma yid la byed pa bstan to/ /rgod pa yang ni zhi bar bya/ /zhes bya ba la/ sngon mthong ba dang thos pa la sogs pa dran nas phyi'i yul la sems 'phros par gyur na zhi gnas kyi mtshan ma yid la byed pas rgod pa zhi bar bya ste/ ji ltar yid la bya zhe na/ 'khor ba'i skyon skye ba dang rga ba la sogs pa bsams nas sems g.yeng ba spang bar bya ste/ 'dis ni zhi gnas kyi mtshan ma yid la byed pa bstan to/ /gang du dmigs pa de la yang / / mnyam pa thob nas btang snyoms te/ /zhes bya ba la/ rnal 'byor pas de ltar zhum pa'i sems ni lhag mthong gis spangs/ rgod pa'i sems ni zhi gnas kyis spangs te/ dmigs par bya ba'i yul la zhum rgod med par gyur nas sems mnyam pa nyid du gyur na mi bskyod par btang snyoms su bzhag ste/ zhi gnas kyi mtshan ma yang yid la mi bya lhag mthong gi mtshan ma yang yid la mi bya ste/ gal te 'ga' zhig yid la byas pa na/ mnyam pa nyid kyi sems las nyams par 'gyur te/ 'dis ni btang snyoms kyi mtshan ma yid la byed pa bstan to/ /rtag tu dang ni gus pa byas/ /thams cad dang yang sbyar bar bya/ /zhes bya ba la/ rnal 'byor pa de bar 'ga' yid la byed/ bar 'ga' yid la mi byed pa ma yin gyi dus thams cad du yid la byed pa ni rtag tu zhes bya ste/ 'dis ni rtag pa yid la byed pa bstan to/ /le lo dang btang snyoms las yid la byed par nan tan dang bsgrims te yid la byed pa ni gus pa zhes bya ste/ 'dis ni gus pa yid la byed pa bstan to/ /de ltar rtag tu yid la byed pa dang / gus par yid la byed pa gnyis ni gong du bshad pa'i yid la byed pa thams cad la yang sbyar te/ gong du bshad pa'i yid la byed pa'i dus na yang rtag par yid la byed pa dang / gus par yid la byed pa'i tshul gyis yid la bya'o zhes bya ba'i don to/ /de ni yid la byed pa rnam pa bcu gcig yid la byed pa'i rnal 'byor pa mos pa spyod pa'i sa la 'jug par bya ba'i phyir sems gnas pa dgu yid la bya ste/ sems gnas pa dgu'i don ni tshigs su bcad pa bzhis bstan to/ / dmigs pa la ni sems bzhag na/ /zhes bya ba la/ dang po rnal 'byor pas ting nge 'dzin gyis dmigs par bya ba'i yul la sems rtse gcig tu bzhag ste/ ji ltar bzhag ce na/ ting nge 'dzin gyis dmigs par bya ba'i yul dang / sems gnyis su sbrel bar bya ste/ dang po yul dang sems gnyis su 'brel bar byed pa la ni sems gnas pa zhes bya'o/ /de ni rgyun du mi g.yeng phyir/ /zhes bya ba la/ de ltar dmigs pa'i yul la sems rtse gcig tu bzhag pa'i 'og tu phyi'i yul la sems g.yengs pa bstan nas mi g.yeng bar bya ba'i phyir/ yang nas yang du rgyun du sems rtse gcig par bzhag pa ste/ des ni yang dag par gnas pa bstan to/ /rnam par g.yeng ba shes nas kyang / /myur ba de ni slar blan no/ /zhes bya ba la/ de ltar rnal 'byor pa'i ting nge 'dzin la sems rtse gcig tu 'jog pa na/ sems phyi'i yul la g.yengs par gyur na bdag gi sems 'di ni yul la g.yengs par gyur to zhes shes par byas nas/ de ma thag tu g.yeng ba'i sems spangs nas slar blon te/ rtse gcig pa la 'jog par byed de ni kun du gnas pa zhes bya'o/ /yang nas yang du blo ldan gyi/ /sems ni nang du blan par bya/ /zhes bya ba la/ de ltar sems g.yengs pa las slar blan pa'i byang chub sems dpa' blo ldan des/ sems phyi'i yul la mi gtong zhing yang nas yang du sems nang du blon par byed de ting nge 'dzin rtse gcig pa la sems yang nas yang du sems blon par byed/ gtong bar byed 'jog par byed de de ni nye bar gnas pa zhes bya'o/ /ting 'dzin yon tan mthong bas na/ /de bas sems ni dga' bar 'gyur/ /zhes bya ba la/ gang gi tshe rnal 'byor pa'i ting nge 'dzin la rtse gcig tu 'jog pa la de'i tshe yul la sems 'phros par gyur na/ yul la sems dga' bar 'gyur gyi ting nge 'dzin la sems mi dga' bar 'gyur te/ de'i dus na des ting nge 'dzin gyi yon tan la brtag par bya'o/ / des ting nge 'dzin gyi yon tan la brtags na ting nge 'dzin gyi yon tan mthong bar 'gyur ro/ /ting nge 'dzin gyi yon tan mthong na sems mi dga' ba zhi zhing dul bar gyur nas sems dga' ba skye bar 'gyur te des ni dul bar byed pa bstan to/ /rnam par g.yengs la skyon mthong bas/ /mi dga' ba ni zhi bar 'gyur/ /zhes bya ba la/ nam rnal 'byor pa sems g.yengs sam zhum pa dang / rmugs par gyur na 'di ltar bdag gis sems g.yengs pas rtse gcig pa la nyams shing sems zhum pa dang rmugs par gyur na/ bsam gtan dang mngon par shes pa la sogs pa'i 'bras bu mi 'thob ste/ de bas na g.yengs ba'i sems byung na g.yengs pa'i sems la mi dga' bar blta zhing skyon du mthong ste/ g.yengs pa'i sems dang mi dga' ba spang ba'i phyir gnyen po la rten par byed de/ des gnyen po la brten pas mi dga' ba'i sems spong bar byed do/ /de ltar mi dga' ba'i sems spong bar byed pa de la ni zhi bar byed pa zhes bya'o/ /chags pa dang ni dkrugs pa'i sems/ /skyes pa de tshe zhi bar byed/ /ces bya ba la/ gal te rnal 'byor pa 'dod pa la sogs pas longs spyod kyi yul la sems chags pa zhig skyes sam/ 'khrugs pa ste zhe sdang zhig skyes na byams pa bsgom pa'am/ mi dga' ba bsgom pas spong bar byed do/ /des ni rnam par zhi bar byed pa bstan to/ /de bas mngon par 'du byed bcas/ /sems ni rgyun du 'jug pa dang / /zhes bya ba la/ gong du bshad pa ltar rnal 'byor pas ting nge 'dzin gyi skyon rnams spangs na de'i 'og tu brtsams pa dang bcas/ /sems chags pa zhig skyes sam/ 'khrug pa ste zhe sdang zhig skyes na/ 'bad pa dang bcas pa'i mtshan nyid du ting nge 'dzin rtse gcig pa la/ sems rgyun du 'jug cing gnas par 'gyur te/ des ni gcig tu byed pa bstan te/ dka' thub can gyis de bsgoms pas/ /'du mi byed pa 'thob 'gyur te/ /zhes bya ba la/ dka' thub can ni rnal 'byor pa la bya ste/ rnal 'byor pas brtsal 'bad dang bcas/ /'bad pa dang bcas pa'i ting nge 'dzin la goms par byas pas/ de'i 'og tu brtsal ba dang 'bad mi dgos par mngon par 'du mi byed cing / lhun gyis grub par gnas pa'i ting nge 'dzin 'thob par 'gyur te/ de ni mnyam par 'jog pa zhes bya'o/ /de nas de ni lus sems kyis/ /shin tu sbyangs pa chung ngu 'thob/ /ces bya ba la/ de nas zhes bya ba ni sems gnas pa dgu 'thob pa'i 'og tu zhes bya ba'i don to/ /des zhes bya ba ni rnal 'byor pa'i byang chub sems dpa' de'ang de zhes bya ba'i don to/ /lus sems kyis shin tu sbyangs pa chung ngu 'thob ces bya ba ni lus las su rung ba dang / sems las su rung ba shas 'bring po dang shas chen po thob pa ni ma yin gyi las su rung ba shas chung ngu 'thob ces bya ba'i don to/ /lus las su rung ba dang ni dge ba dang ting nge 'dzin bsgom pa ni lus mi bde ba dang lci ba med pa'o/ /sems las su rung ba ni sems gsal zhing ting nge 'dzin la myur du 'jug pa'o/ /yid la byed pa shes par bya/ /zhes bya ba ni/ lus dang sems las su rung ba shas chung ngu 'thob pa de'i dus na rnal 'byor pa yid la byed pa 'thob po zhes shes par bya ba'i don to/ /de ni yang dang yang du 'phel/ /ring du song zhing 'phel bas na/ /zhes bya ba la/ de ltar rnal 'byor pas yid la byed pas thob po zhes shes pa'i 'og tu yid la byed pa de dang lus dang sems las su rung ba/ gong nas gong du phyi phyir zhing 'phel bar bya ba'i phyir de nyid la bsgom par byas pas lus dang sems las su rung ba/ shas chen po 'thob par 'gyur te/ shas chen po thob pa la ring du song ba zhes bya'o/ /de ni ngo bo'i gnas thob po/ /zhes bya ba la/ lus dang sems las su rung ba la shas chen po thob pa'i 'og tu gzugs kyi khams kyi rtsa ba'i bsam gtan bzhi thob par 'gyur te/ de bas na ngo bo'i gnas thob pa zhes bya'o/ /mngon shes phyir ni de sbyangs na/ /las su rung ba'i mchog thob pa'o/ /zhes bya ba la/ de bas na rtsa ba'i bsam gtan thob pa'i rnal 'byor pas/ mngon par shes pa'i 'bras bu thob par bya ba'i phyir/ rtsa ba'i bsam gtan bzhi sbyangs te/ ji ltar sbyangs she na/ srid pa'i shas che ba dang / lta ba'i shas che ba dang / the tshom gyi shas che ba med par bya ste/ sbyangs na lus las su rung ba'i mchog 'thob ste/ bsam gtan las su rung ba'i mchog thob pa dang / mngon par shes pa las su rung ba'i mchog thob pa zhes bya ba'i don to/ /de la bsam gtan las su rung ba'i mchog thob pa ni gzugs kyi khams su bsam gtan bzhi la lugs bzhin du 'jug pa/ lugs las bzlog ste 'jug pa dang / thod rgal du 'jug pa'o/ /mngon par shes pa las su rang ba'i mchog thob pa ni/ 'phrul gyi mig la sogs pa'i mngon par shes pa'i las bya ba la thogs pa med par 'jug pa'o/ / bsam gtan mngon shes rdzogs pas na/ /sangs rgyas rnams las mnyan pa dang / /dpag tu med par mchod pa'i phyir/ /'jig rten khams su de 'gro'o/ /zhes bya ba la/ de ltar bsam gtan mchog thob ste/ bsam gtan rdzogs pa dang / mngon par shes pa mchog thob ste/ mngon par shes pa'i rdzogs pa'i byang chub sems dpa' rdzu 'phrul can te/ rdzu 'phrul gyis 'jig rten gyi khams su 'gro'o zhes bya bar sbyar te ci'i phyir de 'gro zhe na/ phyogs bcu'i 'jig rten gyi khams na bzhugs pa'i de bzhin gshegs pa las dam pa'i chos nyan pa'i sgo nas/ ye shes kyi tshogs rdzogs par bya ba dang / de bzhin gshegs pa de dag la bsod snyoms dang chos gos la sogs pa zang zing gis mchod par byas pa'i sgo nas bsod nams kyi tshogs bsags par bya ba'i phyir/ 'jig rten gyi khams kun du 'gro'o zhes bya ba'i don to/ /sangs rgyas dpag tu med pa la/ /bskal pa grangs med de snyed na/ /las su rung ba'i mchog thob na/ /de las bsnyen pa'i sems kyis so/ /zhes bya ba la/ de las zhes bya ba ni de bzhin gshegs pa de dag la zhes bya ba'i don to/ /bsnyen pa'i sems kyis zhes bya ba ni/ sangs rgyas la bkur sti dang mchod pa bya'o snyam du bsam pa'i sems kyis zhes bya ba'i don to/ /'di lta bu'i sems kyis phyogs bcu'i sangs rgyas dpag tu med pa la bskal pa grangs med pa gcig tu dam pa'i chos mnyam pa dang / lhung bzed dang chos gos la sogs pa 'bul ba'i sgo nas bsnyen bkur byas nas las su rung ba'i mchog thob par 'gyur te/ de'ang gang zhe na/ phyogs bcu thams cad du rdzu 'phrul gyis de bzhin gshegs pa la mchod pa bya ba dang / thogs pa med par nus pa'i mngon par shes pa la bskyed nus pa'i bsam gtan las su rung ba'i mchog thob po zhes bya ba'i don to/ /bskal pa grangs med pa zhes bya ba ni bgrang ba dpag tu med pa'o zhes bya ba la/ 'di'i skabs su bskal pa grangs med pa 'byung ba zhes 'byung ba grangs med pa gsum la ni mi bya'i/ /bgrang ba las 'das pa'i bskal pa grangs med pa gcig la bya'o zhes bya ba'i don to/ /de nas de dag sngon rol du/ /yon tan lnga ni 'thob 'gyur te/ /zhes bya ba la/ lus dang sems las su rung ba thob pa dang / bsam gtan mngon par shes pa rdzogs pa thob pa dang / de bzhin gshegs pa la mchod pa dpag tu med pa thob pa'i 'og tu de lta bu dang ldan pa'i byang chub sems dpa' des bsam pa rnam par dag pa ste/ sa dang po ma thob pa'i snga rol du/ sa dang po thob par 'gyur ba'i mtshan ma yon tan lnga thob par 'gyur ro zhes bya ba'i don to/ /rnam par dag pa'i snod 'gyur zhing / /de nas bla na med par 'gyur/ /zhes bya ba la/ yon tan rnam pa lnga thob nas kyang rnam par dag pa ste/ sa rab tu dga' ba dang chos kyi sku rdzogs pa dang / dag par 'gyur ba'i snod dang / gzhi bla na med par 'gyur te/ bla na med pa zhes smos pas ni/ nyan thos dang rang sangs rgyas kyi theg pa'i sgo nas zhugs pa ni ma yin gyi sa dang po thob par bya ba'i phyir/ theg pa chen po'i sgo nas zhugs pas na snod bla na med pa zhes bya'o/ / gang phyir lus kyi gnas ngan len/ /skad cig re rer kun spyod dang / /zhes bya ba la/ yon tan rnam pa lnga ston to/ /lus kyi gnas ngan len gyi sgras ni lus las su mi rung ba dang / sems las su mi rung ba gnyis la bya ste/ lus las su mi rung ba ni lus lci ba dang / mi bde ba'o/ / sems las su mi rung ba ni sems mi bde zhing dge ba la mi 'jog pa'o/ /dper na khrus mkhan gyis khrus rtsi dang chos gos dang ras la sogs pa'i dri ma skad cig ma re re la 'dag cing sbyong bar byed pa de bzhin du de dag kyang zhi gnas chu dang 'dra bas lus las su mi rung ba skad cig ma re re la 'dag cing sbyong bar byed do/ /'di ni yon tan rnam pa gcig go/ /lus dang sems kyis kun du yang / /shin tu sbyangs pas gang bar 'gyur/ /zhes bya ba la/ shin tu sbyangs pa'i sgras ni las su rung ba la bya ste/ don du na lus las su rung bar bya zhing lus kyi bde bas kyang lus kun du khyab cing dang bar 'gyur ba dang / sems las su rung zhing sems bde bas kyang sems kun du khyab par 'gyur zhes bya ba'i don to/ /lus shin tu sbyangs pa dang / sems shin tu sbyangs pa gnyis so sor phye ste/ yon tan gsum du bzhag go/ /de la lus kyi gnas ngan len sbyang ba dang / lus las su rung ba dang / sems las su rung ba gsum ni zhi gnas kyi phyogs so/ /thams cad chos dag shes pa ni/ /yongs su ma chad snang bar ro/ /zhes bya ba la/ chos kyi sgras ni mdo sde la sogs pa gsung rab yan lag bcu gnyis la bya'o/ /des kha cig shes/ kha cig mi shes pa dang / bar 'ga' shes par 'ga' mi shes pa ni ma yin gyi dus thams cad du thams cad shes pa ni yongs su ma chad pa snang ba zhes bya ste/ de ltar lus dang sems las su rung bar gyur pa dang / gsung rab yan lag bcu gnyis ni chos thams cad la yongs su ma chad pa'i tshul du shes pa'i snang ba 'byung ste/ 'di ni yon tan rnam pa bzhi pa'o/ /rnam par dag pa'i mtshan ma yang / /ma brtags par ni rab tu mthong / /zhes bya ba la/ rnam par dag pa'i sgras ni sa dang po la bya ste/ sa dang po 'thob par 'gyur ba'i mtshan ma dang / rtags dag kyang ma brtags ma bsams par rmi lam du lus las srin bu 'dzag pa dang / mi gtsang bas lus bskus pa las khrus byed pa la sogs pa lus kyi skyon dang bral ba dag rmi lam du mthong bar 'gyur te/ 'di ni yon tan lnga pa'o//de ltar chos thams cad la yongs su ma chad pa'i snang ba thob pa dang / rnam par dag pa'i mtshan ma ma brtags par mthong ba gnyis ni lhag mthong gi phyogs so/ /rtag tu blo ldan byed pa ni/ /rab tu rdzogs dang rnam dag pa'i/ /mdor na chos kyi sku yi ste/ /rgyu ni de bzhin yongs su 'dzin/ /zhes bya ba la/ de'i 'og tu byang chub sems dpa' blo dang ldan pas rnam pa yongs su 'dzin par byed de/ gang zhe na chos kyi sku yongs su rdzogs pa'i sku rgyu dang / rnam par dag pa'i rgyu ste/ rgyu ni de bzhin gshegs pa grangs med pa las bsod nams dang ye shes kyi tshogs bsags pa'am/ zhi gnas dang lhag mthong ni phyogs la gnas pa ste/ de bas na rnam par dag pa'i snod bla na med par 'gyur ba zhes bya'o/ /'di ni zhi gnas dang lhag mthong gnyi ga'i phyogs so/ /sa bcu'i dus na ni chos kyi sku yongs su rdzogs pa zhes bya ste/ byang chub sems dpa'i chos kyi sku ni sa bcu par rdzogs pa'i phyir ro/ /sangs rgyas kyi sa'i dus na ni chos kyi sku rnam par dag pa zhes bya ste/ dar la tsam gyis chod pa'i sgrib pa yang spangs pa'i chos kyi sku thob pa'i phyir ro/ /de'i bar du ni 'jig rten gyi chos dang yon tan thob po zhes bya ba la/ gdams pa bstan pa'i mgo nas brtsams te/ yon tan lnga thob pa yan chad kyi bar du ni mos pa spyod pa'i sa la zhugs pa'i so so'i skye bo'i chos dang yon tan ji ltar bstan pa thob pa'i zhes bya ba'i don to/ /de nas de ltar gyur pa yis/ /byang chub sems dpa' mnyam gzhag pas/ /zhes bya ba la sogs pa la da 'di man chad ni nges par 'byed pa'i phyogs bzhi la 'jug pa ston te/ de nas zhes bya ba ni de'i 'og tu zhes bya ba'i don to/ /de 'dra bar gyur pa zhes bya ba ni bsam gtan dang mngon par shes pa la sogs pa sbyang bar byas pa dang / yon tan lnga thob pa dang / bla na med pa'i snod du gyur pa la sogs pa'i yon tan dang ldan par gyur pa'i byang chub sems dpa'i ting nge 'dzin la sems rtse gcig tu gzhag pa de 'di snyam du yid la rtog go zhes bya bar sbyar ro/ /yid kyi rnam rtog ma gtogs par/ /thams cad don ni mi mthong ngo / /zhes bya ba la/ de 'di snyam du brtags te/ gzugs la sogs pa'i dngos po 'di dag thams cad ni yid kyi rnam par rtog pa kho na las snang bar zad kyi yid kyi rnam par rtog pa las ma gtogs par sems la sogs pa las logs shig na yod par ma mthong zhing don med do zhes khong du chud de 'di ni chos la snang ba thob pa zhes bya ste/ 'di ni drod kyi dus so/ /chos kyi snang ba 'phel ba'i phyir/ /brtan pa'i brtson 'grus rtsom pa ste/ /zhes bya ba la/ de ltar drod kyi dus na chos kyi snang ba thob pa de nyid je che je cher 'phel zhing rgyas par bya ba'i phyir/ brtan pa byang chub sems dpas brtson 'grus rgyun du rtsom zhes brtson 'grus je che je cher rtsom par byed de/ 'di ni snang ba 'phel ba zhes bya ste/ spyi bo'i dus so/ /chos kyi snang ba 'phel na ni/ /sems tsam la ni gnas par 'gyur/ /zhes bya ba la/ de ltar brtson 'grus brtsams nas chos kyi snang ba shas cher 'phel bar 'gyur na/ de'i yul du phyi'i yul la sogs par snang ba kun dang bral ba'i sems tsam la gnas par 'gyur ro zhes bya ba'i don to/ /ji ltar sems tsam la gnas par 'gyur zhe na/ de'i phyir/ thams cad don dag snang ba ni/ /sems la rab tu snang ba ste/ / zhes bya ba la sogs pa smos te/ 'di ltar phyi'i yul dngos por snang zhing dmigs pa 'di dag thams cad sems nyid de ltar snang bar zad do zhes khong du chud nas phyi'i dngos po gang yang mi snang ba la gnas te/ de bas na sems tsam la gnas pa zhes bya'o/ /'di dag bzung ba'i g.yeng ba ni/ /de yi dus na spong bar 'gyur/ /de nas lhag ma ma lus pa'i/ /'dzin pa g.yeng ba gcig pu'o/ /zhes bya ba la/ 'di dag gi sgras ni phyi'i yul dngos por snang ba la bya ste/ phyi'i dngos por snang ba rnams la yod par 'dzin cing phyi'i dngos po sems la snang ba ni gzung ba'i g.yeng ba zhes bya ste/ gang gi tshe de la gnas nas yul lta bur sems la snang ba thams cad spangs te/ mi snang bar gyur pa de'i dus na gzung ba'i g.yeng ba ni spangs nas gzung ba'i g.yeng ba spangs pa'i 'og tu phyin na ci zhig lus she na/ 'dzin pa'i g.yeng ba phyin lus te/ sems la yod par 'dzin pa'i g.yeng ba ma spangs zhes bya ba'i don to/ /des ni de kho na'i phyogs gcig pa'i ting nge 'dzin bstan te/ chos kyi snang ba 'phel na ni/ /zhes bya ba nas brtsams te/ 'dzin pa'i g.yeng ba gcig pu 'o/ /zhes bya ba yan chad kyis bzod pa'i dus bstan to/ /de tshe de ma thag pa yi/ /ting 'dzin myur du thob par 'gyur/ /zhes bya ba la/ gzung ba'i g.yeng ba spangs na 'dzin pa'i g.yeng ba ma spangs pa'i rnal 'byor pa de'i 'og tu gzung ba med na de 'dzin pa'i sems kyang ga la yod ces 'dzin pa'i g.yeng ba myur du spong bar byed do/ /de spangs pa'i de ma thag pa'i ting nge 'dzin myur du thob par byed de/ 'di ni 'jig rten gyi chos mchog gi dus so/ /de'i 'og tu nges par 'byed pa'i phyogs/ zhes bya ba la/ bsam gtan dang mngon par shes pa las su rung ba thob pa dang / yon tan lnga thob pa'i 'og tu nges par 'byed pa'i phyogs bzhi la 'jug go zhes bya ba'i don to/ /gang gi tshe de lta bur gyur pa'i zhes bya ba la/ gang gi dus na bsam gtan pa rnal 'byor pas bsam gtan dang mngon par shes pa la sogs pa sbyang ba byas pa dang / yon tan lnga thob par bya ste/ yon tan de lta bu dang ldan par gyur pa de'i tshe 'og nas 'byung ba lta bu'i don rtogs par 'gyur ro zhes bya ba'i don to/ /bdag dang spyi'i mtshan nyid gnyis yid kyi rtog pa tsam du mthong ba de ni drod la bab ste zhes bya ba la/ chos rnams kyi rang gi mtshan nyid ni gzugs kyi rang gi mtshan nyid thob pa dang bcas pa dang / tshor ba'i rang gi mtshan nyid myong ba'i bdag nyid dang zhes bya ba nas/ gang zag pa dang bcas pa dang / zag pa med pa dang / 'dus byas dang / 'dus ma byas dang / bltar snang ba dang / bltar mi snang ba dang / thogs pa dang bcas pa dang / thogs pa med pa zhes bya ba la sogs pa'o/ /spyi'i mtshan nyid ni mi rtag pa dang / sdug bsngal ba dang / stong pa dang / bdag med pa ste/ de dag thams cad yid kyi rtog pa tsam du zad kyi yid kyi rtog pa las logs shig na yod pa ma yin par mthong ba de'i dus na drod kyi gnas thob pa zhes bya ste/ drod ces kyang bya/ chos la snang ba thob pa zhes kyang bya/ chos la rtog pa bzod pa zhes kyang bya'o zhes bya ba'i don to/ /drod dang chos la snang ba thob pa de la chos la rtog pa bzod pa zhes bya bar ci mngon zhe na/ de'i phyir/ snang ba'i dbang du byas nas chu lan tshwa can gyi snang ba'o zhes gsungs pa de ni chos la rtog pa bzod pa'i tshig bla dgas so zhes smos te/ chos la snang ba thob pa de la chos la rtog pa'i bzod pa thob po zhes bya bar mngon pa ni gang ba tshwa'i 'bab chu bshad pa zhes bya ba'i mdo las/ chu bo lan tshwa can gyi dpes bstan nas chos la snang ba thob pa de ni chos la rtog pa'i bzod pa thob pa'i tshig bla dgas so zhes gsungs so/ /de la ba tsha'i chu bo ni khams gsum du rgyun du 'khor ba la bya'o/ /ba tshwa'i chu bo'i tha ma ba tshwa'i skye bo la nyi ma'i zer bab na dkar ba dang skya bar snang ba de bzhin du/ gang gi tshe chos thams cad sems las snang bar zad kyi/ sems las logs shig na yod pa ma yin no zhes khong du chud pa de'i tshe nyi ma dang zla ba'i 'od lta bur snang ba zhes ni mi bya'o/ /chos la snang ba thob pa zhes bya'o zhes bya ba'i don to/ /de chos kyi snang ba de nyid 'phel ba'i phyir te zhes bya ba la/ byang chub sems dpa' de nyid kyi rtog pa las ma gtogs par don gyi dngos po gzhan med do zhes chos kyi snang ba thob pa de nyid shes cher spel zhing snang ba cher bskyed par bya ba'i phyir cung zad kyang mi gnas mi 'dug par brtson 'grus rtsom par byed do/ /de ni rtse mo'i dus so zhes bya'o/ /chos kyi snang ba 'phel nas 'di dag kun sems tsam mo zhes rtog pa'i phyir zhes bya ba la sogs pa la/ de ltar sems tsam du rtogs pa'i chos kyi snang ba thob nas snang ba de nyid shas cher 'phel ba'i brtson 'grus brtsams pa las sems tsam du rtog pa'i snang ba shas cher 'phel ba'i 'og tu phyi'i gzung ba snang ba'i gzung ba thams cad dang bral nas sems tsam du rtog shing sems la gnas par 'gyur te/ gang gi tshe bzung ba'i g.yeng ba spangs nas 'dzin pa'i g.yeng ba tsam la gnas pa thob pa'i tshe bzod pa thob pa'i dus zhes bya'o/ /de'i tshe myur du de ma thag pa'i ting nge 'dzin la reg par 'gyur te zhes bya ba la sogs pa la de ltar sems tsam la gnas te gzung ba'i g.yeng ba spangs nas 'dzin pa'i g.yeng ba tsam la gnas pa de yang 'di snyam du rtog ste/ de ltar gzung ba med na 'dzin pa yang yod par mi rigs so zhes 'dzin pa'i g.yeng ba la mngon par chags pa yang de ma thag tu spangs nas/ de ma thag pa'i ting nge 'dzin la rig par byed de/ /de 'jig rten chos mchog gi dus so/ /ci'i phyir zhe na/ de ma thag pa zhes brjod ce na/ gang phyir 'dzin pa'i g.yeng ba ni/ /de ma thag tu spong bas so/ /zhes bya ba la/ ci'i phyir 'jig rten gyi chos mchog la de ma thag pa'i ting nge 'dzin zhes bya zhe na/ gang gi phyir rnal 'byor pas gzung ba'i g.yeng ba spangs pa dang / de ma thag tu 'dzin pa'i g.yeng ba yang spong bar byed cing de ma thag pa'i sa dang por 'jug par byed pas na/ de'i phyir de ma thag pa'i ting nge 'dzin zhes bya'o zhes bya ba'i don to/ /drod la sogs pa zhes bya ba la/ gang phyir de dag rim bzhin no/ /zhes bya ba la/ drod la sogs pa nges par 'byed pa'i phyogs bzhi'i rim pa yang 'di ltar shes par bya ste/ dang po drod do/ /de nas spyi bo'o/ /de nas bzod pa'o/ /de nas 'jig rten chos mchog ste/ rim pa de ltar shes par bya'o zhes bya ba'i don to/ /'di man chad mthong ba'i lam ston to/ /de'i phyir/ 'dzin pa gnyis las rnam grol ba'i/ /'jig rten 'das pa bla na med/ /dri ma bral ba rnam mi rtog /ye shes de nas de thob po/ /zhes smos te/ de nas zhes bya ba ni mos pa spyod pa'i sa 'jig rten gyi chos mchog gi 'og tu byang chub sems dpa' des ye shes thob po zhes bya bar sbyar te/ ye shes de yang ci 'dra ba zhig ce na/ 'dzin pa gnyis las rnam par grol ba/ 'jig rten las 'das pa bla na med pa dri ma dang bral ba rnam par mi rtog pa'i ye shes thob po zhes bya ba'i don to/ /de la gzung pa dang 'dzin pa gnyis spangs pas na 'dzin pa gnyis las rnam par grol ba'o/ /ye shes de 'jig rten pa rnams la med cing 'jig rten pa'i spyod yul du ma gyur pas na 'jig rten las 'das pa zhes bya'o/ /ye shes de las khyad zhugs pa'i ye shes de las gzhan med de nyan thos dang rang sangs rgyas kyi ye shes las 'phags pas na bla na med pa zhes bya'o/ /mthong bas spang bar bya ba'i nyon mongs pa dang bral bas na dri ma dang bral ba zhes bya'o/ /gzung bar rtog pa dang 'dzin par rtog pa dang bral bas na rnam par mi rtog pa zhes bya'o/ /de bas na dri ma med pas dri ma dang bral bas gsungs so/ /zhes bya ba la/ de ltar mthong ba'i lam gyi ye shes kyi dbang du byas nas mdo las kyang / rdul med cing rdul dang bral bas chos la chos kyi mig rnam par dag pa'o zhes gsungs te/ gzung ba dang 'dzin pa'i rdul spangs pas na rdul med pa'o/ /mthong bas spang bar bya ba'i nyon mongs pa'i dri ma spangs pas na rdul dang bral ba zhes bya'o/ /yang na bzod pa'i dus na rdul med pa/ zhes bya ste/ bzod pas nyon mongs pa thams cad spong bar byed pa'i phyir ro/ /ye shes kyi dus na ni dri ma med pa zhes bya ste/ rnam par grol ba'i rang bzhin du skyes pa'i phyir ro/ /de ni de yi gnas 'phos la/ /sa yi dang po yin par 'dod/ /ces bya ba la/ sa dang po thob nas mthong ba'i lam skyes pas na/ byang chub sems dpa' des gzung ba dang / 'dzin pa spangs shing mthong bas spang bar bya ba'i nyon mongs pa spangs pa de ni byang chub sems dpa' de'i kun gzhi gnas 'phos pa zhes bya ste/ kun gzhi gnas 'phos pa nyid las sa dang po zhes bya ba yang de nyid la bya bar 'dod do/ /kun gzhi gnas 'phos pa de dus ji srid cig gis 'thob ce na/ de'i phyir/ de ni bskal pa dpag med pas/ /shin du rnam par dag par 'gyur/ /zhes smos te/ de ni zhes bya ba ni kun gzhi gnas 'phos pa/ sa dang po'i mtshan nyid de ni bskal pa grangs med pa gsum las bskal pa grangs med pa gcig gi bar du byang chub sems dpa'i spyod pa la spyad spyad pas shin tu rnam par dag pa'i mtshan nyid sa dang po rab tu dga' ba 'thob par 'gyur ro zhes bya ba'i don to/ /chos kyi dbyings la mnyam pa nyid/ /de tshe rab tu rtogs nas kyang / /zhes bya ba la/ gzhan yangs dang po thob pa'i byang chub sems dpa' des/ so so'i skye bo'i de bzhin nyid chos kyi dbyings dang / 'phags pa rnams kyi de bzhin nyid chos kyi dbyings su tha dad pa med cing ro gcig pa'i de bzhin nyid de'i tshe rtogs so zhes bya ba'i don to/ /chos kyi dbyings mnyam pa nyid rtogs pas mnyam pa nyid rnam pa lnga yang rtogs par 'gyur ro zhes bya ba'i don to/ /de tshe sems can thams cad la/ /bdag dang mtshungs pa'i sems thob po/ /zhes bya ba la/ sa dang po'i tshe mnyam pa nyid rnam pa lnga thob pas na/ sems can thams cad dang bdag tu mtshungs pa'i sems kyang thob ste/ bdag gang yin pa sems can yang de yin la sems can gang yin pa bdag kyang de yin no zhes rtogs pa'i sems thob po/ /mnyam pa rnam pa lnga gang zhe na/ de'i phyir/ bdag ched dang ni sdug bsngal don/ /bya ba dang ni re ba med/ /sems can la ste de ltar rgyal ba'i sras/ /gzhan dag dang ni sems mnyam pa'o/ /zhes smos te/ mnyam pa rnam pa lnga ni/ bdag med pa mnyam pa dang / sdug bsngal mnyam pa dang / don bya ba mnyam pa dang / sems can la lan re ba med pa mnyam pa dang / rgyal ba'i sras gzhan dang sems mnyam pa'o/ /bdag med pa'i chos mtshungs pa rtogs pas na bdag dang sems can mnyam pa'i sems rtag tu thob pa ni mnyam pa rnam pa lnga ste zhes bya ba la/ bdag med pa zhes bya ba ni gang zag dang chos kyi rang bzhin med pa chos kyi dbyings la bya ste/ chos thams cad chos kyi dbyings kyi rang bzhin yin pas chos mtshungs par rtogs te/ sa dang por chos kyi dbyings rtogs nas/ mnyam pa rnam pa lnga thob pa rtogs par 'gyur ro/ /mnyam pa rnam pa lnga thob pa rtogs pa dang / de'i tshe bdag dang sems can du sems mnyam pa yang thob par 'gyur ro zhes bya ba'i don to/ /bdag dang pha rol la bdag med pa dang / bdag dang gzhan gyi rgyud la bdag med pa zhes bya ba la/ ji ltar bdag gi nye bar len pa'i phung po la bdag med pa ltar sems can gyi nye bar len pa'i phung po la yang bdag med de/ bdag med par khyad par med pas na bdag med pa'i mtshan nyid du 'dra'o zhes rtogs pa ni bdag med pa mnyam pa nyid rtogs pa zhes bya'o/ /sdug bsngal la khyad par med par rtogs pa'i phyir/ sdug bsngal la mnyam pa nyid dang / zhes bya ba la/ ji ltar mig gi nye bar len pa'i phung po lnga sdug bsngal gyi rang bzhin yin pa ltar sems can gzhan gyi nye bar len pa'i phung po lnga yang sdug bsngal gyi rang bzhin yin pa ste/ sdug bsngal gyi rang bzhin du khyad par med do zhes rtogs pas na sdug bsngal mnyam pa nyid rtogs pa zhes bya ste/ bdag med pa mnyam pa nyid rtogs pa dang / sdug bsngal mnyam pa nyid rtogs pa gnyis kyis ni sdug bsngal gyi bden pa rtogs pa bstan to/ /de la sdug bsngal gyi bden pa ni mi rtag pa dang / sdug bsngal ba ba dang / stong pa dang / bdag med pa'i rnam pa ste/ rnam pa bzhi ltar rtogs na sdug bsngal gyi bden pa rtogs pa yin na rnam pa gnyis ltar rtogs pas ji ltar sdug bsngal gyi bden pa rtogs par 'gyur zhe na/ 'di ltar gang mi rtag pa de sdug bsngal yin pas sdug bsngal ba'i nang du mi rtag pa'i rnam pa bsdus pa yin par blta'o/ /gang bdag med pa de stong pa yin pas bdag med pa'i rnam pa'i nang du stong pa'i rnam pa yang bsdus par blta ste/ de ltar na bden pa'i rnam pa bzhi char rtogs par zhar gyis bstan to/ /bdag dang pha rol gyi sdug bsngal mnyam par 'dod pa mtshungs pa'i phyir byed pa mnyam pa dang zhes bya ba la/ ji ltar bdag gi sdug bsngal gyi phung po dang / sdug bsngal bskyed pa'i rgyu kun 'byung gi bden pa spong bar byed par 'dod cing / byed pa de bzhin du sems can gyi sdug bsngal gyi phung po dang / de skyed par byed pa'i rgyu kun 'byung gi bden pa yang spong bar byed cing 'dod de/ de bas na byed pa mnyam pa zhes bya ste/ 'dis ni kun 'byung gi bden pa spong bar byed pa bstan to/ /bdag la ji lta ba bzhin du/ gzhan la lan mi re ba'i phyir lan re ba med pa mnyam pa dang zhes bya ba la/ ji ltar byang chub sems dpa' bdag nyid kyis lam gyi bden pa dang / 'gog pa'i bden pa la bkod de/ phan pa dam pas phan btags kyang bdag la phan btags pa'i lan re ba med pa bzhin du sems can gzhan lam gyi bden pa dang 'gog pa'i bden pa la bkod de/ phan pa dam pas phan btags kyang phan btags so snyam du mi dgongs shing phan btags pa'i lan la mi re ba ste/ de bas na lan re ba med pa mnyam pa zhes bya'o/ /'dis ni lam gyi bden pa bsgom pa dang 'gog pa'i bden pa mngon du byed pa bstan to/ /ji ltar de dag gis mngon par rtogs pa de bzhin du mngon par rtogs pas gzhan dang mnyam pa'o zhes bya ba la/ ji ltar sa dang por zhugs pa'i byang chub sems dpa' de dag gis chos kyi dbyings rtogs shing bdag dang gzhan du mnyam pa nyid kyi sems rtogs pa de bzhin du sa dang por zhugs pa byang chub sems dpa' des kyang / chos kyi dbyings rtogs shing bdag dang gzhan du mnyam pa nyid kyi sems rtogs te/ sa dang por zhugs pa'i byang chub sems dpa' gzhan dang rtogs pa 'dra bas na byang chub sems dpa' gzhan dang mnyam pa zhes bya'o/ /des ni khams gsum 'dus byas rnams/ /yang dag ma yin kun rtog par/ /zhes bya ba la/ des zhes bya ba ni sa dang po thob cing mnyam pa nyid rnam pa lnga thob pa'i byang chub sems dpa' de zhes bya ba'i don to/ /khams gsum gyi 'dus byas zhes bya ba ni 'dod pa'i khams kyi phung po lnga dang gzugs kyi khams kyi phung po lnga dang / gzugs med pa'i khams kyi phung po bzhi la sogs pa khams gsum pa'i chos thams cad yang dag pa ma yin pa'i kun du rtog pa tsam du mthong ste/ sems las byung ba zad pa tsam du mthong gi/ sems dang sems las byung ba las ma gtogs pa'i chos gang yang yod pa ma yin par mthong ste/ de bas na sa bcu'i mdo las kyang / kye rgyal ba'i sras dag khams gsum 'di dag ni sems tsam mo zhes gsungs so/ /sems tsam du ye shes gang gis mthong zhe na de'i phyir/ ye shes rab tu rnam dag pa/ /mi gnyis don gyis mthong bar 'gyur/ /zhes smos te/ 'dus byas sems tsam du yang rnam par mi rtog pa'i ye shes shin tu rnam par dag pa mi gnyis pas mthong ngo / /de la ye shes de 'jig rten las 'das pa rnam par mi rtog pa yin pas na/ shin tu rnam par dag pa zhes bya'o/ /ye shes des gzung ba dang 'dzin pa med pa'i don mthong zhing gzung 'dzin gnyis ye shes de la med pas na mi gnyis pa'i don zhes bya'o/ /don du rnam par mi rtog pa'i ye shes kyis ni khams gsum gyi chos thams cad nam mkha'i ngos bzhin du mthong ngo / /dag pa 'jig rten pa'i ye shes kyis ni khams gsum pa'i 'dus byas thams cad sems dang sems las byung ba tsam du zad par mthong ngo / / de med pa yi yod pa de/ /mthong ba'i spangs pas rnam par dag /ces bya ba la/ de med pa ni gzung ba dang 'dzin pa gnyis med pa'o/ /yod pa ni gzung 'dzin spangs pa'i stong pa nyid phyi nas yod pa ste/ sa dang po mthong ba'i lam skyes pa'i dus na gzung ba dang 'dzin pa gnyis dang bral ba'i stong pa yongs su grub pa'i mtshan nyid mthong bas spang bar bya ba'i nyon mongs pa thams cad spangs te/ rnam par dag pa yin par de'i tshe na mthong ngo zhes bya ba'i don to/ /des ni mthong ba'i lam thob ces/ /gang phyir de tshe brjod pa'o/ /zhes bya ba la/ gang gi tshe gzung 'dzin dang bral ba'i stong pa nyid mthong bas spang bar bya ba'i nyon mongs pa spangs par mthong ba de'i tshe mthong ba'i lam thob pa yin no zhes bya ba'i don to/ /gzhan yang sa dang po thob pa'i tshe stong pa shes pa brjod de/ ci'i phyir zhe na/ stong pa rnam gsum shes pa'i phyir te/ de bstan pa'i phyir smras pa/ dngos po med pa'i stong pa shes/ /zhes bya ba la sogs pa smos so/ /de la dag pa 'jig rten pa'i ye shes kyi kun brtags kyi mtshan nyid 'di dag ni ji ltar byis pa rnams kyis sa'i mtshan nyid sra ba la sogs par brtags pa de ltar med cing stong par shes te/ /de bas na dngos po med pa'i stong pa shes pa zhes bya'o/ /de ltar med pa'i stong pa dang / /zhes bya ba la/ shes zhes bya bar sbyar te/ gzhan gyi dbang gi mtshan nyid ni ji ltar so so'i skye bo byis pa rnams kyis gzung ba'i mtshan nyid ji ltar brtags pa de ltar ni med kyi/ gzhan gyi dbang gi mtshan nyid ni yod do zhes bshad de/ de bas na de ltar med pa'i stong pa zhes bya'o/ /rang bzhin stong pa shes nas ni/ /zhes bya ba la/ yongs su grub pa'i mtshan nyid ni thog ma nas kyang nam mkha'i ngos bzhin du gzung ba dang 'dzin pa'i rang bzhin gyis stong pa yin te/ yongs su grub pa'i rang bzhin thog ma nas stong par shes pa ni rang bzhin stong par shes pa zhes bya'o/ /stong pa shes pa brjod pa'o zhes bya ba la/ gong du bshad pa ltar sa dang po'i tshe stong pa rnam pa gsum shes pas na stong pa shes pa zhes brjod do zhes bya ba'i don to/ /rang gi mtshan nyid kyis med pa'i phyir zhes bya ba la sogs pa la/ ji ltar ri bong gi rwa dang mo gsham gyi pu la sogs pa la rang gi mtshan nyid med pa de ltar byis pa de kho na ma mthong ba phyin ci log gi blo can rnams kyis sa'i mtshan nyid sra ba la sogs par kun brtags pa dang / gzung ba dang 'dzin pa lta bur brtags pa de dag mtshan nyid med pa'i phyir/ kun brtags kyi rang bzhin stong par shes pa ni ngo bo med pa'i ngo bo stong pa shes pa'o zhes bya ba'i don to/ /de ltar med pa'i stong pa ni gzhan gyi dbang gis stong pa ste zhes bya ba la sogs pa la/ de ltar med pa'i stong pa ni gzhan gyi dbang gis stong pa la bya ste/ dper na sgyu ma'i rta dang glang po la sogs pa rta dang glang po'i rang bzhin du med pas stong yang / rdo ba dang shing gi ngo bor yod pa bzhin du gzhan gyi dbang gi rang bzhin la ji ltar byis pa so so'i skye bo rnams kyis gzung ba dang 'dzin pa'i mtshan nyid du brtags pa ltar med kyi gzhan dbang rang gi mtshan nyid du yod pa ste/ de ltar shes pa ni de ltar stong pa med pa'i shes pa zhes bya'o/ /stong pa'i rang bzhin gyis phyir yongs su rdzogs pa'i ngo bo nyid ni rang bzhin gyis stong pa'o zhes bya ba la/ yongs su grub pa'i mtshan nyid ni thog ma nas kyang gzung 'dzin gyi dri ma dang bral zhing rang bzhin gyis stong pa yin te/ de la stong pa nyid kyi rang bzhin ni de bzhin nyid kyi mtshan nyid de/ de yang kun du brtags pa'i rang bzhin dang bral ba'i ngo bo yin pas gnyis dang bral ba'i rang bzhin stong pa nyid de ni sangs rgyas dang byang chub sems dpa' rnams kyis so sor rang gis rig par bya ba bstan du med pa bsam gyis mi khyab pa/ rtog ge pa'i spyod yul las 'das pa'i rang bzhin te/ de ltar khong du chud pa ni rang bzhin gyis stong par shes pa zhes bya'o/ /de bas na theg pa chen po bsdus pa'i bstan bcos las kyang / chos kyi sku ni bsam gyis mi khyab pa'i mtshan nyid de/ de yang rang bzhin nyid kyi mtshan nyid do/ /de bzhin nyid de ni so so rang gis rig pa dang / 'jig rten na dpe med pa dang / rtog ge'i spyod yul las 'das nas bsam gyis mi khyab par rig par bya'o zhes bshad do/ /gzhan yang 'phags pa dkon mchog sprin la sogs pa'i mdo sde las don dam pa'i bstan pa'i dbang du mdzad nas bshad pa'i tshul bzhin du yongs su grub pa'i mtshan nyid de ltar khong du chud par bya'o/ /rnam par rtog pa zad pa yi/ /dngos po mtshan ma med pas shes/ /zhes bya ba la/ gzhan yang sa dang po'i tshe/ 'di ltar khong du chud do zhes bya ba'i don to/ /de la rnam par rtog pa ni yod pa dang med pa dang / gzugs dang / sgra la sogs pa'i rnam par rtog pa nas mya ngan las 'das pa'i bar du rnam par rtog pa ste/ rnam par rtog pa thams cad zad pa'i rnam par rtog pa kun dang bral ba'i de bzhin nyid 'gog pa'i bden pa la bya/ dngos po'i sgras ni dmigs par bya ba'i yul la bya ste/ de bzhin nyid 'gog pa'i bden pa ni mtshan ma med pa'i ting nge 'dzin gyis dmigs shing de shes par byed do zhes bya ba'i don to/ /de'ang mtshan ma med pa'i ting nge 'dzin gyis ni stong pa nyid 'gog pa'i bden pa ste gzugs dang sgra la sogs pa'i mtshan ma thams cad dang bral bar shes so/ /de bas na mngon pa'i chos bsdus pa'i bstan bcos las kyang / 'gog pa'i bden pa'i mtshan nyid ji ltar shes par bya zhe na/ de ni gang du 'gags pa dang / gang gis 'gags pa dang / ji ltar 'gags pa shes par bya ste/ gyang du 'gags she na de bzhin du 'gags so/ /gang gis 'gags she na lam gyi bden pas 'gags so/ /gang 'gags she na rnam par rtog pa la sogs pa'i nyon mongs pa 'gags so zhes bshad do/ /yang dag ma yin kun rtog pa/ /de ni smon pa med pas so/ /zhes bya ba la/ yang dag ma yin kun rtog ni/ /gzhan gyi dbang gi mtshan nyid ni/ /de la ni smon pa med pa'i ting nge 'dzin gyis dmigs shing shes so zhes bya bar sbyar ro/ /ji ltar dmigs she na/ gzhan gyi dbang gi mtshan nyid ni nyon mongs pa dang shes bya'i sgrib pa'i sa bon gyi rten du gyur pa/ skye ba dang rga ba la sogs pa sdug bsngal sna tshogs kyi rgyu yin pas smon par bya ba'i gnas ma yin no zhes de ltar dmigs so/ /rgyal ba'i sras kyis sna tshogs pa'i/ /byang chub phyogs ni thams cad dag /mthong ba'i lam dang lhan cig tu/ /rtag tu thob par dgongs pa'o/ /zhes bya ba la/ gang gi tshe sa dang po thob nas/ bzod pa brgyad dang ye shes brgyad de/ mthong ba'i lam gyi mtshan nyid skad cig ma bcu drug skyes pas na de ltar lhan cig dus gcig dran pa nye bar gzhag pa la sogs pa byang chub kyi phyogs sum cu rtsa bdun gyi chos rnam pa sna tshogs kyang dus gcig tu mthong bar dgongs te/ dus gcig tu thob par shes par bya'o zhes pa'i don to/ /da 'di man chad tshigs su bcad pa lngas sa dang po mthong ba'i lam skyes pa'i byang chub sems dpa' rnams kyi bdag nyid chen po dang / ngo mtshar chen po ston te de bas na/ bdag med sdug bsngal skye ba tsam du yang / /'gro ba 'dus byas tsam du blos chud nas/ / zhes bya ba la sogs pa smos te/ 'gro ba'i sgras ni khams gsum gyi chos thams cad la bya'o/ /'dus byas tsam du blos chud ces bya bas ni sems dang / sems las byung ba tsam du zad kyi/ bdag ces bya ba med par shes rab kyis rtogs nas zhes bya ba'i don to/ /de ltar rtogs pa na khams gsum gyi chos thams cad gang zag gi dngos por yang bdag med chos kyi dngos por yang bdag med kyi/ ma rig pa'i rkyen gyis 'du byed ces bya ba nas/ skye ba'i rkyen gyis rga shi dang sdug bsngal gyi phung po chen po 'ba' zhig 'byung bar 'gyur ro bar khong du chud do zhes bya ba'i don to/ /don med rang bzhin lta ba yongs spangs nas/ /lta chen don po che la rten par byed/ /ces bya ba la/ de ltar khong du chud pa na byang chub sems dpa' de don med pa'i rang bzhin gyi lta ba spangs pa zhes kyang bya/ lta ba chen po la gnas pa zhes kyang bya'o/ /de la sems can rnams ma rungs pa dang / rlag par byed pa'i lta ba la don med pa zhes bya'o/ /rang bzhin gyi sgras gzungs dang 'dzin pa la bya ste/ lta ba'i gzung 'dzin gyi rgyu 'jig tshogs kyi lta ba la bya'o/ /sa dang po thob pa'i byang chub sems dpa' 'jig tshogs su lta ba gzung ba dang 'dzin pa'i rgyur gyur pa 'gro ba rnams ma rungs par byed pa'i lta ba ngan pa spangs pas na don med pa'i rang bzhin gyi lta ba spangs pa zhes bya'o/ /sa dang po thob pa'i dus na bdag dang gzhan du mnyam pa nyid du shes pa'i lta ba thob pas na lta ba chen po zhes bya ste/ de ltar mthong ba de nyid kyis mtha' yas pa'i sems can gyi don byed pas na lta ba chen po zhes bya ste/ de'i tshe na de lta bu'i lta ba la gnas pas na/ lta ba chen po la gnas pa yin te/ de yang 'jig rten na ngo mtshar du bya ba yin no zhes bya ba'i don to/ /bdag lta med kyang gang de bdag tu lta/ /zhes bya ba la/ sa dang po thob pa'i dus na bdag tu lta ba zhes kyang bya/ bdag tu lta ba med pa zhes kyang bya'o/ ci'i phyir bdag tu lta ba med pa zhes kyang bya zhe na/ sa dang po thob pa'i dus na 'jig tshogs su lta ba spangs pa'i phyir bdag tu lta ba med pa zhes kyang bya'o/ /ci'i phyir bdag tu lta ba zhes bya zhe na/ bdag gang yin pa de nyid sems can yang de yin no zhes bdag dang sems can du mnyam pa nyid du mthong bas na bdag tu lta ba zhes bya'o/ /sdug bsngal med kyang rab tu sdug bsngal zhes bya ba la/ sa dang po thob pa'i byang chub sems dpa' de sdug bsngal med pa zhes kyang bya/ rab tu sdug bsngal ba zhes kyang bya'o/ /ci'i phyir sdug bsngal ba med pa zhes bya zhe na/ bdag gi rgyud la yod pa'i sdug bsngal gsum dang brgyad la sogs pa spangs pas na sdug bsngal med pa zhes bya ste/ de'i phyir sa bcu'i sa dang po'i mdo las kyang / sa dang po la zhugs pa'i byang chub sems dpa' rnams ni 'jigs pa lnga las 'das pa yin no zhes bshad do/ /'jigs pa lnga ni/ 'tsho ba med pa'i 'jigs pa dang / tshigs bcad med pa'i 'jigs ba dang / 'khor gyi 'jigs pa dang / ngan song du skye ba'i 'jigs pa dang / 'chi ba'i 'jigs pa ste de lnga las 'das pa'o/ /de lta mod kyi byang chub sems dpa' sems can mtha' yas pa'i sdug bsngal spangs dgos te/ sems can gyi sdug bsngal ma spangs kyi bar du snying rje'i dbang gis sems can sdug bsngal bas bdag sdug bsngal bar gyur pas na rab tu sdug bsngal ba zhes bya'o/ /ji ltar bdag la bdag gis phan byed bzhin/ /thams cad don byas lan ni re ba med/ /ces bya ba la/ sa dang po thob pa'i byang chub sems dpa' de phan par byed pa zhes kyang bya/ phan par mi byed pa zhes kyang bya'o/ /ji ltar phan par byed pa zhes bya zhe na/ sems can thams cad la phan pa dang bde ba'i don sgrub par byed pas phan par byed pa zhes bya'o/ /'on kyang phan par mi byed pa zhes kyang bya ste/ ji ltar zhe na/ ji ltar bdag la phan btags te/ /lan re ba med pa ltar sems can thams cad la phan btags na yang bdag gis sems can thams cad la phan btags te/ legs par byas so zhes mi dgongs shing phan btags pa'i lan la re ba med pas na phan par mi byed pa zhes kyang bya'o/ /de bas na 'phags pa rdo rje gcod pa'i mdo las kyang / sems can thams cad phung po'i lhag ma ma lus pa las kyang mya ngan las 'das par yongs su mya ngan las 'das kyang sems can gang yang yongs su mya ngan las 'das pa med do zhes sems bskyed par bya'o zhes gsungs pa lta bu'o/ /mchog gi grol bas rang sems grol ba yang / /yun ring dam po'i bcing bas bcings pa'o/ /zhes bya ba la/ byang chub sems dpa' de mchog gi grol bas grol ba zhes kyang bya/ yun ring po'i bcing bas bcings pa zhes kyang bya'o/ /ji ltar na mchog gi grol bas grol ba zhes bya zhe na/ bdag gi rgyud la yod pa'i mthong bas spang bar bya ba'i nyon mongs pa spangs pas na mchog gi grol bas grol ba zhes bya'o/ /ji ltar yun ring po'i bcing bas bcings pa zhes bya zhe na/ byang chub sems dpa' des sems can mtha' yas pa'i sems kyi rgyud la yod pa'i nyon mongs pa'i bcing ba bcad dgos te/ sems can gyi nyon mongs pa'i bcing bam bcad kyi bar du byang chub sems dpa' mngon par 'tshang mi rgya zhing 'khor ba'i mthar yang 'khor ba na gnas par byed pa na bcing ba dam pos bcings pa zhes kyang bya'o/ /sdug bsngal mtha' ni ma mthong yang / /de bzhin rab 'jug de bzhin byed pa'o/ /zhes bya ba la/ sa dang po thob pa'i byang chub sems dpa' de sdug bsngal gyi mthar byed pa zhes kyang bya/ mthar mi byed pa zhes kyang bya'o/ /ji ltar na sdug bsngal gyi mthar byed pa zhes bya zhe na/ bdag gi rgyud la yod pa'i sdug bsngal thams cad zad par byed pas na sdug bsngal gyi mthar byed pa zhes bya'o/ /ji ltar na sdug bsngal gyi mthar mi byed pa zhes bya zhe na/ nam mkha' mtha' thug pa med pa bzhin du sems can yang mtha' thug pa med do/ /sems can mtha' thug pa med pa bzhin du sdug bsngal yang mtha' thug par ma mthong ste/ ji ltar byas kyang sdug bsngal gyi mtha' zad par mi 'gyur bar mthong bas na mthar mi byed pa zhes bya'o/ /de ltar sdug bsngal gyi mtha' med mod kyi/ byang chub sems dpa' sems can yal bar 'dor shing sems can gyi sdug bsngal mi sel ba ma yin gyi/ sems can gyi sdug bsngal bsal bar bya ba'i phyir de bzhin du 'khor bar yang 'jug cing sdug bsngal bsal bar bya ba'i don du sems can yang pha rol tu phyin pa la sogs pa'i chos la 'jog / bdag nyid kyang pha rol tu phyin pa la sogs pa'i chos byed do/ /tshe gcig rang gi sdug bsngal bzod mthu med/ /'jig rten yod kyi bar du gzhan sdug bsngal/ /bsdus la bsam pa smas ci dgos/ /zhes bya ba la/ rang gi sdug bsngal zhes bya ba dang / bsdus pa zhes bya bar sbyar te/ 'jig rten pa rnams ni rang gi don du rang gi sdug bsngal nyid la nyams su len cing bzod pa'i mthu med pa ni sems can gzhan gyi sdug bsngal bsdus pa dpag tu med pa nyams su len cing bzod pa lta ga la nus so zhes bya ba'i don to/ /'jig rten pa rnams ni rang gi don du tshe gcig gi rang gi lus sdug bsngal tsam yang nyams su len pa'i bzod pa'i mthu med na sems can gyi don du 'khor ba thog ma med pa nas tha ma med pa'i bar du sems can thams cad kyi sdug bsngal nyams su blang zhing bzod pa bya ba lta ga la sems te mi sems so zhes bya ba'i don to/ /byang chub sems dpa' de las bzlog pa'o zhes bya ba la/ byang chub sems dpa' ni 'jig rten pa las bzlog pa ste/ bdag gi don du bdag gi sdug bsngal nyams su mi len gyi sems can gyi don du sems can gyi sdug bsngal dpag tu med pa nyams su len cing bzod pa'i mthu yod pa dang / 'khor ba'i mtha'i bar du sems can thams cad kyi sdug bsngal nyams su len par sems so zhes bya ba'i don to/ /gang mdza' gang phan 'dod pa'i sbyor ba dang / /rgyal ba'i sras kyis sems can mi skyo ba/ /de dag 'jig rten dag na ngo mtshar che/ /zhes bya ba la/ dper na ba be'u la byams pas be'u la phan pa dang bde ba sbyor ba skyo ba med pa de bzhin du byang chub sems dpa' yang sems can thams cad la mdza' ba dang / dga' ba dang byams pa'i sems dang / phan pa dang bde ba la sbyor zhing zhugs pas na sems can rnams kyis gnod par byas kyang sems can gyis mi skyo zhing sems can mi gtong ste/ de bas na don med pa'i lta ba gnas pa nas brtsams te/ mi skyo ba'i bar dag 'di dag ni 'jig rten na byang chub sems dpa'i mdzad pa la ngo mtshar du bya ba yin no zhes bya ba'i don to/ /sems can bdag mtshungs thob pas de la ni/ /zhes bya ba la/ 'dis ni ngo mtshar mi che ba bstan te/ gang la bdag dang gzhan du mnyam pa nyid kyi sems ma thob pa de dag la gong du bshad pa lta bu dag byung na ngo mtshar du bya ba yin no/ /dper na bdag la phan 'dogs shing bde ba la sbyor bar byed pa la ngo mtshar du mi che ba de bzhin du 'dir yang byang chub sems dpas bdag dang sems can du mnyam pa nyid kyi sems thob ste/ sems can thams cad bdag nyid yin par khong du chud de sems can thams cad la phan pa dang bde ba byed cing re ba lta ci zhig ngo mtshar du che ste ngo mtshar du mi che'o zhes bya ba'i don to/ /byang chub sems dpa' che ba'i bdag nyid che ba brjod da zhes bya ba la/ sa dang po thob pa'i byang chub sems dpa'i yon tan dang phrin las su mdzad pa la ngo mtshar chen por bya ba'i chos bstan to zhes bya ba'i don to/ /gang nyon mongs pa'i bdag tu lta ba ni zhes bya ba la sogs pa la/ 'dod chags la sogs pa'i nyon mongs pa thams cad 'byung bar byed pa'i rgyu 'jig tshogs kyi lta ba la don med pa'i rang bzhin gyi lta ba zhes bya ste/ ci'i phyir don med pa zhes bya zhe na/ 'jig tshogs su lta ba dang khams gsum dang ngan song du skye ba'i rgyu byed pa'i byang chub thob par bya ba bar du gcod pas na don med pa zhes bya'o/ / lta ba chen po'i don chen po ni zhes bya ba la sogs pa la lta ba chen po ji bshad de/ bdag gang yin pa sems can thams cad kyang de yin sems can thams cad gang yin pa bdag kyang de yin no zhes sems can dang bdag tu dbyer med cing mnyam pa nyid du lta ba ni lta ba chen po don chen po la gnas pa zhes bya'o/ /ji ltar lta ba la ni ci'i phyir don chen po zhes bya zhe na/ de'i phyir sems can thams cad kyi don bya ba'i rgyu'i phyir don chen po'o zhes bya ba smos te/ nyan thos dang rang sangs rgyas kyi lta ba ni sems can thams cad kyi don byed pa'i rgyu mi byed pas na don chen po ma yin gyi/ byang chub sems dpa' bdag dang gzhan du mnyam pa nyid du lta ba ni sems can thams cad la phan pa dang / bde ba byed pa'i rgyu byed pas na don chen po zhes bya'o/ /bdag tu lta ba med pa ni don med pa'i rang bzhin gyi'o zhes bya ba la/ don med par 'gyur ba'i rgyu 'jig tshogs su lta ba sngangs pas na bdag tu lta ba med pa zhes bya ba'i don to/ /bdag tu lta ba ni don chen po'o zhes bya ba la/ bdag dang sems can du mnyam par lta ste/ sems de nyid bdag yin no zhes don chen po'i lta ba la gnas pas na bdag tu lta ba zhes bya'o/ /sdug bsngal med pa ni bdag gi rgyud las skyes pa'o zhes bya ba la/ sa dang po la zhugs pa'i byang chub sems dpa' de sdug bsngal med pa zhes kyang bya ste/ de ci'i phyir zhe na/ bdag gi rgyud la yod pa'i sdug bsngal gsum dang brgyad la sogs pa spangs pa'i phyir ro/ /sems can thams cad kyi rgyud las skyes pa ni rab tu sdug bsngal ba'o zhes bya ba la/ byang chub sems dpa' de rab tu sdug bsngal zhes kyang bya ste/ ji ltar zhe na/ byang chub sems dpa' ni sems can thams cad kyi sdug bsngal bsal dgos la sems can sdug bsngal bar mthong na snying rje'i dbang gis byang chub sems dpa' nyid sems gdung zhing sdug bsngal bar 'gyur bas na rab tu sdug bsngal ba zhes kyang bya'o/ /sems grol ba ni mthong ba'i lam gyis zhes bya ba la sogs pa la/ byang chub sems dpa' de sems grol ba zhes kyang bya ste/ ji ltar zhe na/ bdag gi rgyud la yod pa'i mthong bas spang bar bya ba'i nyon mongs pas bcings pa rnams mthong ba'i lam gyis spangs pas na grol ba mchog gis grol ba zhes bya'o/ /grol ba mchog gis ni bla na med pa'i theg pas so zhes bya ba la/ grol ba de yang theg ba chung ngu'i mthong ba'i lam gang zag la bdag med pas grol ba ni ma yin gyi/ theg pa chen po'i lam mthong ba'i lam gang zag dang chos la bdag med par rtogs pas grol bas na grol ba'i mchog ces bya'o/ /yun ring por dam du bcings pas zhes bya ba la sogs pa la/ byang chub sems dpa' de yun ring por 'ching ba dam pos bcings pa zhes kyang bya ste/ ci'i phyir zhe na/ sems can rnams ni 'dod chags la sogs pa'i nyon mongs pa dang / 'dod pa'i yon tan la chags pa'i bcing bas bcings te/ sems can rnams bcings pa de las ma grol ma thar gyi bar du byang chub sems dpa' bdag nyid grol ba dang / thar bar mi byed de rtag tu khams gsum du gnas pas na/ yun ring por dam du bcing bas bcings zhes bya'o/ /de la grol ba'i mchog gis grol zhes bya ba ni/ 'khor ba na mi gnas pa bstan/ yun ring por dam du bcing bas bcings zhes bya ba ni/ mya ngan las 'das pa la mi gnas pa bstan te/ don du mi gnas pa'i mya ngan las 'das pa bstan pa yin no/ /nam mkha' dang 'dra bar sems can gyi khams zhes bya ba la sogs pa la/ byang chub sems dpa' de sdug bsngal gyi mthar mi byed pa zhes kyang bya ste/ ji ltar zhe na/ ji ltar nam mkha'i khams mtha' med pa de bzhin du sems can gyi khams kyang mtha' med do/ /sems can gyi khams mtha' med pa de bzhin du sdug bsngal yang mtha' med par mthong ste/ nam yang sems can gyi sdug bsngal mthar byed par mi 'gyur bas na ba sdug bsngal gyi mthar mi byed pa zhes kyang bya'o/ /'jug pa'i sems can gyi zhes bya ba la sogs pa la/ de ltar sdug bsngal gyi mtha' mi mthong yang sems can rnams kyi sdug bsngal mthar mi 'byen pa yin nam zhe na/ ma yin te/ sems can rnams kyi sdug bsngal mthar dbyung bar bya ba'i phyir 'khor bar yang 'jug go zhes bya ba'i don to/ /de bzhin byed pa ni sems can rnams kyi mtha' med pa'o zhes bya ba la/ sems can ni nam mkha' bzhin du mtha' med de/ sems can mtha' med pa bzhin du sems can gyi sdug bsngal mthar dbyung bar bya ba'i phyir byang chub sems dpa' sems can gyi don la yang mtha' med par sbyor zhing byed do zhes bya ba'i don to/ /byang chub sems dpa' de las bzlog pa ni zhes bya ba la sogs pa la/ 'jig rten pa rnams ni tshe gcig tsam gyi sdug bsngal dang / rang gi sdug bsngal yang nyams su len cing bzod pa'i mthu med na 'khor ba'i mtha'i bar gyi sdug bsngal dang / sems can dpag tu med pa'i sdug bsngal nyams su len pa lta ga la nus te mi nus so/ /byang chub sems dpa' ni de las bzlog pa ste/ ji ltar bzlog ce na/ sems can thams cad kyi sdug bsngal gyi phung po nyams su len cing bzod pa dang / 'khor ba ji srid yod kyi bar du sems can gyi don las byung ba'i sdug bsngal nyams su len cing bzod do zhes bya ba'i don to/ /gang sems can byang chub sems dpa' dga' ba dang zhes bya ba la sogs pa la/ dper na ba be'u la byams pa dang / phan par sbyor ba la skyo ba med pa de bzhin du byang chub sems dpa' sems can la dga' ba dang / phan par 'dod pa dang / de'i don la sbyor ba'i tshul gyis rnam pa gsum lta bur sems can gyi don la zhugs pa na sems can gyis gnod pa byas na yang mi skyo ste/ gong du bshad pa'i byang chub sems dpa'i phrin las 'di dag ni 'jig rten na ngo mtshar mchog tu bya ba yin no zhes bya ba'i don to/ /de la sems can dang bral bar mi 'dod pa'i byams pa'i sems la dga' ba zhes bya'o/ /sems can gyi mi bde ba sel bar byed pa ni phan par 'dod pa zhes bya'o/ / sems can sbyin pa la sogs pa'i pha rol tu phyin pa spyod du bcug pa ni don la sbyar ba zhes bya'o/ /ngo mtshar che ba ma yin pa ni sems can dang bdag tu mtshungs pa'i phyir ro zhes bya ba la/ de lta mod kyi 'on kyang ngo mtshar che bar yang bzhag ste/ ji ltar zhe na/ dper na bdag la bdag phan par byed pa dang / bdag gi don bdag byed pa ngo mtshar mi che ba bzhin du sa dang po thob pa'i byang chub sems dpas kyang bdag dang sems can du mnyam pa'i sems thob ste/ sems can thams cad bdag nyid yin par khong du chud pa des sems can la phan 'dogs pa ci zhig ngo mtshar che ste/ bdag la bdag phan 'dogs pa ngo mtshar mi che ba dang 'dra'o zhes bya ba'i don to/ /de ltar mthong ba'i lam bshad nas/ /da ni bsgom pa'i lam bshad de/ /de'i phyir de nas lhag ma'i sa la ste/ /des ni bsgom pa'i lam dag la/ /ye shes rnam pa 'di gnyis kyis/ /bsgom pa'i phyir na rab 'jug go/ /zhes bya ba la sogs pa smos te/ de nas zhes bya ba ni sa dang po thob pa'i lam thob nas de'i 'og tu zhes bya ba'i don to/ /lhag ma'i sa ni sa gnyis yan chad sa bcu man chad la bya ste/ sa de dgu ni bsgom pa'i lam zhes bya'o/ /bsgom pa'i lam de dag na/ byang chub sems dpa' des bsgom pas spang bar bya ba'i nyon mongs pa'i sgrib pa dang / shes bya'i sgrib pa spang bar bya ba'i phyir/ bsgom pa la rab tu 'jug ste/ de'i tshe ci la bsgom zhe na/ de nas 'byung ba'i ye shes gnyis la bsgom mo/ /ye shes gnyis po gang zhe na/ /de'i phyir/ ye shes de ni rnam mi rtog /sangs rgyas chos ni sbyong ba'o/ /zhes bya ba la sogs pa smos te/ ye shes gcig pa ni rnam par mi rtog pa'i ye shes te/ ye shes des thams cad nam mkha'i rang bzhin du khong du chud pas bdag gi rgyud la stobs dang mi 'jigs pa la sogs pa'i sangs rgyas kyi chos rnams sbyong bar byed pas bdag yongs su smin par byed pa'o/ /gzhan ni ji ltar rnam bzhag pas/ /sems can rnam par smin byed pa/ /zhes bya ba la/ gzhan ni zhes bya ba la ye shes gnyis pa ni zhes bya ba'i don to/ /ye shes gnyis pa ni ji ltar rnam par 'jog pa'i ye shes te/ ye shes des sa bcu so so'i mtshan nyid dang yon tan la sogs pa so sor ma 'dres pa kho nar so sor 'jog bye brag 'byed pa'o/ / de'ang gang zhe na/ 'jig rten las 'das pa rnam par mi rtog pa'i ye shes kyi rjes las thob pa dag la 'jig rten pa'i ye shes te/ des ni sems can la chos bstan pa dang / mngon par 'tshang rgya ba la sogs pa bstan pa'i sgo nas/ sems can rnam par smin par byed do/ /bsgom pa yi ni mthar thug pa/ / grangs med gnyis kyis rdzogs par 'gyur/ /zhes bya ba la/ sa bcu'i dus na bsgom pa'i mthar thug pa zhes bya ste/ de yang bskal pa grangs med pa gnyis kyis bsgom pa mthar thug cing rdzogs par 'gyur ro/ /de la sa gnyis nas sa bdun gyi bar du ni mngon par 'du byed pa dang bcas pas bsgom pa zhes bya ste/ de'i bar du bskal pa grangs med pa gcig thogs so/ /sa brgyad nas sa bcu'i bar du/ mngon par 'du byed pa med par bsgom pa zhes bya ste/ de'i bar du yang bskal pa grangs med pa gcig thogs so/ /de yi bsgom pa thob nas su/ /byang chub sems kyi dbang bskur ro/ / zhes bya ba la/ phyi ma'i bsgom pa ni sa brgyad nas sa bcu'i bar du bskal pa grangs med pa gcig tu mngon par 'du byed pa med pa la bsgom pa thob nas sa bcur phyin pa dang / byang chub sems dpa' de phyogs bcu'i de bzhin gshegs pa rnams kyi 'od zer gyis chos kyi rgyal po'i rgyal tshab tu dbang bskur ba thob po zhes bya ba'i don to/ /rdo rje 'dra ba'i mnyam gzhag pa/ /zhes bya ba la/ sa bcur dbang bskur ba thob pa de'i tshe rdo rje lta bu'i ting nge 'dzin kyang thob ste/ de'ang gang la bya zhe na/ nyon mongs pa phra mo'i yang phra mo'i gnyen por gyur pa ye shes chen po'i yang chen po la/ rdo rje lta bu'i ting nge 'dzin/ / zhes bya'o/ /ye shes de la ci'i phyir rdo rje lta bu zhes bya zhe na/ de'i phyir/ rnam par rtog pa mi byed thob/ /ces smos te/ ye shes de la gang zag dang chos su rnam par rtog pa mi phyed cing mi shigs la/ ye shes des ni gang zag dang chos su rnam par rtog pa'i bag la nyal phra mo yang shigs par byed pas na de'i phyir rdo rje lta bu'i ting nge 'dzin zhes bya'o/ /da ni sangs rgyas kyi sa bshad de de bas na mthar thug pa na gnas 'phos shing zhes bya ba la sogs pa smos te/ rdo rje lta bu'i ting nge 'dzin bag la nyal phra mo spangs pa dang / de'i 'og tu sangs rgyas kyi sar kun gzhi rnam par shes pa sgrib pa gnyis dang bral ba gnas 'phos pa mthar thug pa thob par 'gyur ro zhes bya ba'i don to/ /sa dang po la yang gnas 'phos pa yod mod kyi gnas 'phos pa mthar thug pa zhes mi bya ste/ ci'i phyir zhe na/ mthong bas spang bar bya ba'i nyon mongs pa dang bral ba tsam gyi gnas 'phos pa thob pa'i phyir ro/ /sangs rgyas kyi sa'i dus na ni sgrib pa gnyis kyi bag la nyal phra mo yang spangs pa'i mtshan nyid kyi gnas 'phos pa thob pas na gnas 'phos pa mthar thug pa zhes bya'o/ /gnas 'phos pa mthar thug pa de'ang ci 'dra ba zhig ce na/ de'i phyir/ sgrib pa kun gyi dri med pa/ /zhes bya ba smos te/ gnas 'phos pa de yang nyon mongs pa'i sgrib pa dang shes bya'i sgrib pa'i dri ma kun dang bral bas na sgrib pa kun gyi dri ma med pa zhes bya ste/ 'dis ni spangs pa phun sum tshogs pa bstan to/ /rnam pa kun gyi ye shes nyid/ /bla na med pa'i gnas thob nas/ /zhes bya ba la/ gzhan yang sangs rgyas kyi sa'i dus na rnam pa thams cad mkhyen pa'i ye shes bla na med pa'i ye shes kyi go 'phang yang thob ste/ des ye shes phun sum tshogs pa bstan nas bdag gi don phun sum tshogs pa bstan to/ /gang la gnas nas sems can kun/ /bde phyir rab tu 'jug par 'gyur/ /zhes bya ba la/ gang la gnas nas zhes bya ba ni rnam par mi rtog pa'i ye shes la gnas nas zhes bya ba'i don to/ /de la gnas nas sems can thams cad la phan pa dang bde bar bya ba'i phyir/ dag pa 'jig rten pa'i ye shes kyi mngon par byang chub pa dang / bdud 'dul ba dang / chos kyi 'khor lo bskor ba dang / mya ngan las 'das pa bstan pa la sogs pa la 'jug par byed do/ /'dis ni gzhan gyi don phun sum tshogs pa bstan to/ /da tshigs su bcad pa gsum zhig gis bstan pa dang gdams pa'i che ba'i bdag nyid chen po bstan te/ de bas na/ de ltar thub pa'i lta ba dkon pa la/ /gang phyir don chen por ni cir mi 'gyur/ /mi mtshungs mnyam las skyes pa dang mtshungs kyis/ /rtag par shin tu dga' bar byas pa'i sems/ /zhes bya ba la sogs pa smos so/ /de ltar zhes bya ba ni gong du bshad pa ltar ro/ /mi mtshungs mnyam las skyes pa dang mtshungs kyis/ /zhes bya ba gong du phyung ste/ mos pa spyod pa'i sa la gnas pa'i byang chub sems dpa' de bzhin gshegs pa'i thad nas mi mtshungs pa'i chos theg pa chen po'i chos mnyan pa las byung zhing skyes pa'i dad pa dang mos pa'i shugs chen po mtshungs pa med pa sems kyi rgyud las bsgoms pas na de bzhin gshegs pa dang / de'i gsung rab la dga' ba dang mgu bas sems kyi rgyud brtas par bya ba de rtag tu de bzhin gshegs pa'i gsung rab mnyan pa las lta ba drang ba dang / rtag par de bzhin gshegs pa'i zhal lta bar sbyar ro/ /de bzhin gshegs pa'i gsung rab mnyan pa dang / zhal lta ba yang sla ba ma yin pas na dkon pa zhes bya ste/ de 'dra ba'i gsung rab mnyan pa dang / zhal lta ba'i byang chub sems dpa' de ci'i phyir don chen por mi 'gyur te/ gdon mi za bar byang chub chen po thob par 'gyur ro zhes bya ba'i don to/ /chos kyi sgo la rnam gnas de bzhin gshegs pa yis/ /rtag par mngon sum du ni gdams shing gnas par bya/ /zhes bya ba la/ mos pa spyod pa'i sa 'jig rten gyi chos mchog gi ting nge 'dzin la gnas pa ni chos kyi sgo la gnas pa zhes bya ste/ chos kyi sgo la gnas pa'i byang chub sems dpa' de ni rtag tu de bzhin gshegs pa'i mngon sum sbyangs na gnas shing de bzhin gshegs pas kyang de la bstan pa dang gdams ngag ston pa mdzad do zhes bya ba'i don to/ /sgra las bzung ba bzhin du nyes pa stug po las/ /de ni rab tu drangs nas byang chub mchog la bzhag /ces bya ba la/ de bzhin gshegs pas bstan pa dang / gdams ngag ston par mdzad pa yang ma zad kyi gzhan yang 'di dag kyang mdzad de/ dper na mi 'dam chur lhung zhing bying ba la snying rje can 'ga' zhig gis skra las bzung zhing drangs nas skam sar phyin pa de bzhin du byang chub sems dpa' de la de bzhin gshegs pa rnams kyis chos bstan pa'i las btang nas 'dod chags dang zhe sdang la sogs pa 'khor ba'i nyon mongs pa'i nyes pa'i 'dam stug po las drangs te/ byang chub mchog gi skam sar 'jug par mdzad de/ don du sa dang po sbyin par mdzad ce'am/ bla na med pa'i byang chub tu 'jog par mdzad do zhes bya ba'i don to/ /bstan pa dang gdams pa'i don rgyas par bshad pa bsdus nas ston to/ /rtag par bdag gi don du rab zhugs la/ /sangs rgyas dag gis bsngags par mdzad/ /ces bya ba la sogs pa smos te/ de'ang bslab pa gsum gyi dbang du byas nas bstan pa dang gdams pa mdor bsdus nas ston te/ de la byang chub sems dpa' sdom pa'i tshul khrims dang / sems can gyi don byed pa'i tshul khrims dang / dge ba sdud pa'i tshul khrims dang / gsum ni lhag pa'i tshul khrims zhes bya'o/ /byang chub sems dpa' lhag pa'i tshul khrims la zhugs nas tshul khrims ma zhig ma ral bar gyur pa de ni rtag par bdag gi don la zhugs pa zhes bya ste/ de dag la ni de bzhin gshegs pas legs so zhes brjod cing gzengs bstod par mdzad do zhes bya ba'i don to/ /log par zhugs la smad pa yang mdzad ces bya bar sbyar te/ tshul khrims zhig ral du gyur pa ni log par zhugs pa zhes bya ste/ de dag la ni de bzhin gshegs pas ma legs so zhes smod cing tshar gcod par mdzad ces bya ba'i don to/ /rab tu gnas dang rab 'byed pa/ /zhes bya ba la/ rab tu gnas pa zhes bya bas ni lhag pa'i sems kyi bslab pa bstan te/ rab tu gnas zhes bya ba la/ lhag pa'i sems kyi bslab pa zhes bya ba dang / ting nge 'dzin ces bya ba dang / zhig gnas zhes bya ba dag ni don gcig ste/ 'di ni rnam grangs su zad do/ /rab tu 'byed ces bya bas lhag pa'i shes rab kyi bslab pa bstan to/ /rab tu 'byed ces bya ba dang / lhag pa'i shes rab kyi bslab pa zhes bya ba dang / lhag mthong zhes bya ba don gcig ste/ ming gi rnam grangs su zad do/ /bar chad mthun zhes bya ba la/ /lhag pa'i sems kyi bslab pa dang / lhag pa'i shes rab kyi gegs su 'gyur ba'i chos la bar chad ces bya ste/ lhag pa'i sems kyi gegs su 'gyur ba'i chos ni 'du 'dzi mang po'i nang na gnas pa dang / 'jig rten gyi bya ba mang po la dga' ba la sogs pa'o/ /lhag pa'i shes rab kyi bar du gcod pa ni dam pa'i chos mi nyan mi sems pa dang / lhag pa'i shes rab kyi gegs su 'gyur pa'i chos mu stegs la sogs pa'i gtsug lag nyan pa'o/ /mthun pa ni lhag pa'i sems dang shes rab skye ba'i rgyu la bya ste/ de la lhag pa'i sems kyi rgyu ni 'du 'dzi mang po spangs pa dang / 'jig rten gyi bya ba mang po la mi 'jug pa dang / lhag pa'i shes rab kyi rgyu ni dam pa'i chos nyan pa dang / sems pa la sogs pa byed pa'o/ /sems can mchog la cho ga bzhin/ /rnam pa thams cad rgyal bas ston/ /ces bya ba la/ sems can mchog ni mos pa spyod pa'i sa la gnas pa'i byang chub sems dpa' la bya'o/ /byang chub sems dpa' de la rgyal ba ste/ sangs rgyas bcom ldan 'das rnams kyi go cha bzhin no/ /tshul bzhin du lhag pa'i sems dang lhag pa'i shes rab dang / de gnyis kyi bar du gcod pa dang / de gnyis dang rjes su mthun pa rnams phyin ci ma log par 'chad de ji ltar zhe na/ lhag pa'i sems dang shes rab kyi mtshan nyid ni 'di lta bu yin/ de dag gi gegs dang bar du gcod pa ni 'di dag yin/ de dang rjes su mthun pa'i chos ni 'di dag yin no zhes phyin ci ma log par ston cing 'chad par mdzad do/ /gang yang kun du bsnyen nas ni/ /de gshegs bstan la rgyas pa'i rnal 'byor 'gyur/ /zhes bya ba de la/ de ltar chos bstan pa thos nas zhi gnas dang lhag mthong dang mi mthun pa'i chos ni spangs/ de dang mthun pa'i chos la bsnyen na byang chub sems dpa' de rgyas pa'i rnal 'byor te/ theg pa chen po'i zhi gnas dang lhag mthong bsgom pa'i ting nge 'dzin thob par 'gyur ro zhes bya ba'i don to/ /de gdams pa thob pa'i chos kyi sgo'i rgyun la gnas pa'o zhes bya ba la/ mos pa spyod pa'i sa 'jig rten gyi chos mchog gi tshe na chos kyi sgo'i rgyun la gnas pa zhes bya ste/ de'i tshe de bzhin gshegs pa'i thad nas bstan pa dang gdams pa thob po zhes bya ba'i don to/ /rtag par sangs rgyas mthong ba dang / /zhes pa sogs pa la chos kyi rgyun la gnas pa byang chub sems dpa' dus thams cad du byang chub sems dpa'i zhal mthong ba dang / zhal mthong nas mi mnyam pa'i chos de theg pa chen po'i chos thos par 'gyur ba dang / theg pa chen po'i chos thos nas chos thos pa la dad pa skyes te/ dad pa'i shugs las byung ba'i dga' bas sems tshim par byas pas de byang chub kyi don chen po ci'i phyir thob par mi 'gyur zhes bya ba'i don to/ /bstan pa rnam pa bzhi ni tshigs su bcad pa gcig gis bstan te zhes bya ba la/ tshigs su bcad pa gcig gis bslab pa gsum gyi dbang du byas nas bstan nas bstan pa rnam pa bzhi ston to zhes bya ba'i don to/ /bstan pa bzhi ni lhag pa'i tshul khrims kyi dbang du byas zhes bya ba nas/ stod par byed pa dang zhes bya ba'i bar du bstan pa gcig go/ /log par zhes bya ba nas smad par byed pa dang zhes bya ba'i bar du bstan pa gnyis so/ /lhag pa'i sems dang zhes bya ba nas rnam par 'byed pa dang zhes bya ba'i bar du bstan pa gsum ste/ rab tu gnas pa ni lhag pa'i sems so/ /rnam par 'byed pa ni lhag pa'i shes rab po/ /de'i bar chad byed pa dang zhes bya ba nas thams cad du ston to zhes bya ba'i bar du ston pa bzhi pa'o/ /gang la spangs pa dang bsnyen pas zhes bya ba la/ bar chad byed pa'i chos ni spangs pa rjes su mthun pa'i chos ni bsnyen zhes rim bzhin du sbyar ro/ /rnal 'byor ni zhi gnas dang lhag mthong bsgom pa'o zhes bya ba la/ zhi gnas dang lhag mthong gi lam bsgom pa la rnal 'byor zhes bya zhes bya ba'i don to/ /de ltar mos pa spyod pa'i sa'i bdag nyid chen po bstan nas/ sa dang po'i bdag nyid chen po bstan pa'i phyir/ /rab tu rnam par mi rtog lta ba yi/ /des ni mdor na 'jig rten zil gnon cing / /mun pa chen po bsal nas snang ba ni/ /'gro ba nyi ma chen po bzhin du 'char/ /zhes bya ba smos te/ mos pa spyod pa'i sa las 'das nas sa dang po thob pa'i byang chub sems dpa' de nyan thos dang rang sangs rgyas dang / 'jig rten pa rnams zil gyis mnan nas gnas pa zhes bya ba'i don to/ /gang gis zil gyis mnan ce na/ rab tu rnam par mi rtog pa'i lta bas zil gyis mnan te/ rnam par mi rtog pa'i me long lta bu'i ye shes kyis zil gyis gnon to zhes bya ba'i don to/ /de la nyi ma chen po bya ba yong mi srid mod kyi/ 'on kyang thang cig btang nas brjod do/ /gang stong gsum gyi stong chen po'i 'jig rten gyi khams thams cad snang bar byed pa'i nyi ma la nyi ma chen po zhes bya'o/ /dper na nyi ma chen po ri mthon po'i kha nas shar na mun pa chen po thams cad bsal te/ zil gyis mnan nas skye bo rnams la snang bar byed pa de bzhin du byang chub sems dpa' mos pa spyod pa'i sa 'jig rten chos mchog gi ri kha nas 'das te/ sa dang po rnam par mi rtog pa me long lta bu'i ye shes kyi nyi ma shar nas nyon mongs pa dang shes bya'i sgrib pa chen po bsal nas dag pa 'jig rten pa'i ye shes kyi chos bstan pa'i sgo nas 'jig rten kun la chos 'chad pa'i sgo nas snang ba chen pos khyab par byed do zhes bya ba'i don to/ /da ni mos pa spyod pa'i sa la gnas pa dang / sa dang po la gnas pa dang / sa gnyis la sogs pa bsgom pa'i sa la gnas pa'i 'bras bu'i tshigs su bcad pa gcig gis bstan te/ de bas na/ de ltar rtag tu dge ba dag ni 'phel rdzogs shing / /rab tu rgyas pa'i ting nge 'dzin gyis sems 'thob cing / /thub pa las ni rtag tu gdams pa che thob nas/ /sems dpa' mchog gi yon tan rgyal mtsho'i pha rol 'gro/ /zhes bya ba smos te/ sa dang po mos pa'i sar bskal pa grangs med pa gcig gi bar du bsod nams kyi tshogs rtag tu bsags pa dang / de nas sa gnyis nas sa bdun gyi bar du bsod nams kyi tshogs rtag tu bsags pa dang / sa brgyad nas sa bcu pa'i bar du bskal pa grangs med pa gcig tu bsod nams kyi tshogs rtag tu bsags pas bsod nams kyi tshogs rdzogs par byas pas na dge ba dag 'phel zhing rdzogs par byas te/ 'dis ni bsod nams kyi tshogs rdzogs par bstan to/ /rab tu rgyas pa'i ting nge 'dzin ni thob pa zhes bya ba ni theg pa chen po'i zhi gnas dang lhag mthong gi ting nge 'dzin kyang thob ces bya ba'i don to/ /der yang ma zad kyis de dag la gnas pa'i tshe theg pa chen po'i gtams pa dang gdams pa yang 'thob ste/ des ni ye shes kyi tshogs rdzogs par bstan to/ /de ltar bsod nams dang ye shes kyi tshogs rdzogs pa'i sems dpa'i mchog byang chub sems dpa' des sangs kyi sar yon tan rgya mtsho'i pha rol du 'gro ste/ don du na stobs dang mi 'jigs pa la sogs pa'i yon tan dang ldan pa 'tshang rgya ba 'thob par 'gyur ro zhes bya ba'i don to/ /bsdu ba ste zhes bya ba la/ gang la bslab pa dang / ji ltar bslab pa dang / gang gis bslab pa gsum las/ ji ltar bslab pa'i don bsdus na 'di rnams ston to zhes bya ba'i don to/ /mos pa dang ni mang po dang / /chos tshol ba dang bshad pa dang / /de bzhin du ni sgrub pa dang / /yang dag gdams shing rjes su bstan/ /zhes bya ba la/ ji ltar bslab par bya ba'i skabs las 'di yan chad du mos pa mang ba dang / chos tshol ba dang / chos bshad pa dang / de bzhin du bsgrub pa dang / yang dag par gtams shing rjes su bstan pa ste/ de rnams bstan to zhes bya ba'i don to/ /gdams shing rjes su bstan pa'i skabs bshad pa rdzogs so// //

CLOSE WINDOW