བོད་ཡིག

e-texts based on the ACIP/ALL Input

@/ /dgongs pa nges par 'grel pa'i mdo las 'phags pa byams pa'i le'u'i bshad pa bzhugs so/ /@##/ /'phags pa dgongs pa nges par 'grel pa'i mdo las/ 'phags pa byams pa'i le'u nyi tshe bshad pa/ bam po dang po/ 'phags pa byams pa la phyag 'tshal lo/ /chos gdags pa rnam par gzhag pa las brtsams nas/ rnal 'byor gyis yongs su bsdus pa'i zhi gnas dang lhag mthong gi lam gyi rab tu dbye ba rig par bya'o zhes bya bas ni/ ngo bo nyid dang / sbyor ba'i rgyu dang / 'thob pa dang / 'thob pa'i thabs dang / chud mi za bar bya ba'i phyir gdags pa gtan la dbab pas rnal 'byor gyi lam ston te/ de la rnal 'byor gyis yongs su bsdus pa nyid ni zhi gnas dang lhag mthong gi lam gyi ngo bo nyid do/ /'di rnal 'byor zhes bya ba ni tshul khrims kyi phung po yin par dgongs so/ /tshul khrims kyi phung pos yongs su bsdus pa ting nge 'dzin dang / shes rab kyi phung po'i ngo bo nyid kyis zhi gnas dang lhag mthong gi lam gyi rab tu dbye ba ni ngo bo nyid la sogs pa yin par rig par bya'o/ /yang na rnal 'byor ni rigs pa yin te/ rigs pa bzhis bsdus pa'i zhi gnas dang lhag mthong gi lam gyi yin par sbyar ro/ /dgongs pa nges par 'grel pa zhes bya ba ni dgongs pa zab mo nges par bkrol bas/ nyon mongs pa dang shes bya'i sgrib pa'i mdud pa gcod pa zhes bya ba'i don to/ /mdo zhes bya ba ni nges pa ma lus par smos pa nyid kyis so/ /bcom ldan 'das la byang chub sems dpa' byams pas zhu ba zhus pa ni/ zhi gnas dang lhag mthong gi lam 'di ni byang chub chen po dang nye ba'i rgyu yin la/ 'phags pa byams pa yang byang chub chen po dang nye ba yin pas/ bcom ldan 'das la zhu ba zhus so/ / de ltar zhi gnas dang lhag mthong gi lam gyi ngo bo nyid nges par byas nas/ bcom ldan 'das byang chub sems dpa' ci la gnas zhes bya ba la sogs pas sbyor ba'i rgyu zhus te/ sbyor ba'i rgyu ni gnas dang / rten dang / dmigs pas ston to/ /byams pa chos gdags pa rnam par gzhag pa dang / bla na med pa yang dag par rdzogs pa'i byang chub tu smon lam mi gtong ba la gnas shing brten nas so zhes bya bas ni zhi gnas dang lhag mthong gi gnas kyis sbyor ba'i rgyu dang / rkyen gyis sbyor ba'i rgyu ston te/ chos gdags pa rnam par gzhag pa ni bshad pa'i chos kyi tshogs yin pa'i phyir/ gnas kyi rgyu yin no/ /bla na med pa yang dag par rdzogs pa'i byang chub ni rtogs pa'i chos kyi sku yin pa'i phyir/ der smon pa ni rten gyi rgyu yin te/ smon lam ni byang chub chen po 'dren par byed pa'i chos thams cad kyi sngon du 'gro ba yin pa'i phyir ro/ /bcom ldan 'das kyi zhi gnas dang lhag mthong gi dmigs pa'i dngos po bzhi po 'di lta ste zhes bya ba la sogs pa yongs su zhus pas ni/ dmigs pas sbyor ba'i rgyu ston to/ /rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan dang dngos po'i mtha' dang / dgos pa yongs su grub pa zhes bya ba la/ gzugs brnyan zhes bya ba ni 'dra ba zhes bya ba'i tha tshig go/ /gang gi gzugs brnyan zhe na/ sems kyi ste/ snang ba thams cad ni de nyid yin pa'i phyir ro/ /dmigs pa la sngon du phyogs pa ni/ rnam par rtog pa dang bcas pa'i gzugs brnyan no/ /nang du bsdus pa ni rnam par mi rtog pa'i gzugs brnyan no/ /dngos po ni kun gzhi rnam par shes pa ste/ de la gnas dang dmigs pa dang bcas pa'i sems dang sems las byung ba dag rgyu dang 'bras bu'i dngos pos gnas pa'i phyir ro/ / de'i mtha' yongs su zad pas ni dngos po'i mtha' nyid de/ /gnas gyur pa chos kyi sku zhes bya ba'i tha tshig go/ /dgos pa yongs su grub pa yang bdag dang gzhan gyi bya ba grub pas/ shes bya thams cad la thogs pa med pa dang / chags pa med pa'i ye shes mthong ba 'jug pa ni dgos pa yongs su grub pa yin par bstan to/ /de la zhes bya ba la sogs pas ni dmigs pa bzhi po de dag lam gang gis dmigs pa du dag lags zhes zhus so/ /bka' stsal pa gcig ste/ 'di lta ste/ rnam par mi rtog pa'i gzugs brnyan no zhes bya ba ni zhi gnas kyi dmigs pa ste/ zhi gnas ni nang du lta ste/ 'jug pa'i phyir nang du bsdus pa yin no/ /du zhig lhag mthong gi dmigs pa lags zhes bya ba la sogs pas gcig kho na ste 'di lta ste/ rnam par rtog pa dang bcas pa'i gzugs brnyan no zhes gsungs pa ni/ lhag mthong gi ste/ dmigs pa la rnam par 'phro ba nyid mtshan mar 'dzin pa'i phyir ro/ /du zhig de gnyi ka'i dmigs pa lags/ bka' stsal pa gnyis te/ gnyis gang zhe na/ 'di lta ste/ dngos po'i mtha' dang / dgos pa yongs su grub pa'o zhes gsungs pa ni/ de gnyis spangs pa dang / ye shes kyi ngo bo nyid yin pa'i phyir/ zhi gnas dang lhag mthong zung du 'brel pa'i lam gyi dmigs pa nyid yin par gsungs te/ mthar thug pa'i 'bras bu yin pa'i phyir ro/ /zhi gnas dang lhag mthong gi lam gyi ngo bo nyid dang / sbyor ba'i rgyu nges par byas nas/ da ni byang chub sems dpa' zhi gnas yongs su btsal bar bya ba dang / ji ltar lhag mthong la mkhas par bya ba bstan pa'i phyir/ bcom ldan 'das byang chub sems dpa' zhi gnas dang lhag mthong gi dmigs pa'i dngos po bzhi po de dag la brten cing gnas nas/ ji ltar zhi gnas yongs su tshol bar bgyid pa dang / lhag mthong la mkhas pa lags zhes gsungs pas de gnyis kyi thob pa zhus so/ /zhi gnas ni sems kyi yongs su gdung bzhi ba'i ngo bo nyid yin pa'i phyir/ /byang chub sems dpa' yongs su btsal bar bya ba yin la/ lhag mthong ni chos rab tu rnam par 'byed pa'i ngo bo nyid yin pa'i phyir/ des de la mkhas par bya dgos par bstan pa'i phyir byams pa ngas zhes bya ba la sogs pa gsungs so/ /chos gdags pa rnam par gzhag pa zhes bya ba ni spyir bstan te/ ming gi tshogs dang / tshig gi tshogs dang / yi ge'i tshogs kyi gdags pas chos rnams spyir rnam par gzhag pa'o/ /mdo'i sde la sogs pa ni bye brag tu bstan pa'o/ /mdo'i sde la sogs pa spyi dang bye brag tu bstan pa de dag legs par thos pa dang legs par gzung ba dang kha ton byang bar byas pa dang / yid kyis legs par brtags pa dang / mthong bas shin tu rtogs par byas pa ji ltar zhi gnas kyi sbyor ba'i rgyur gyur ce na/ de gcig pu dben par 'dug ste zhes bya ba la sogs pa gsungs so/ /gcig pu zhes bya ba ni lus dben pa'i phyir ro/ /dben pa zhes bya ba ni sems dben pa'i phyir ro/ /sems gang gis chos de dag yid la byed pa'i sems de yang chos kyi ngo bo nyid yin la/ chos rnams kyang sems kyi ngo bo nyid yin par bstan pa'i phyir/ de ltar zhugs shing de la lan mang du gnas pa de la zhes bya ba la sogs pa gsungs so/ /lus shin tu sbyangs pa ni lus dben pa las skyes pa'o/ /sems shin tu sbyangs pa ni sems dben pa las skyes pa'o/ /yang na gnyen po chos yid la byed pa ji skad bstan pa thob pas bsgoms pas spang bar bya ba'i nyon mongs pa bsrabs pa'i phyir/ /lus shin tu sbyangs pa yin no/ /mthong bas sbyang bar bya ba'i nyon mongs pa bsrabs pa'i phyir/ sems shin tu sbyangs pa yin te/ lus ngal ba med pa'i phyir dang / sems yongs su gdung ba med pa'i phyir lus dang sems shin tu sbyangs pa ni zhi gnas zhes bya'o/ /de ltar na zhes bya ba la sogs pas ni byang chub sems dpa' chos yid la byed pa kho nas zhi gnas yongs su tshol bar byed pa yin gyi gzhan gyi ni ma yin no zhes nges par byed do/ /yang byang chub sems dpa' lhag mthong la mkhas pa yin par bstan pa'i phyir/ /de lus shin tu sbyangs pa dang zhes bya ba la sogs pa gsungs so/ /de zhes bya ba ni byang chub sems dpa' yin par sbyar te/ byang chub sems dpa' de lus shin tu sbyangs pa dang / sems shin tu sbyangs pa thob pa de la gnas shing brten nas so/ /ji ltar bsams pa'i chos zhes bya ba ni phyin ci ma log par yid la byas pa dag go/ /de dag nyid ces bya ba ni sngar bstan pa rnams so/ /nang du zhes bya ba ni phyi rol du ma gyur pa'o/ /ting nge 'dzin gyi spyod yul gzugs brnyan du mnyam par gzhag pa'i sems kyi gzugs brnyan du gyur pa'i chos rnams la/ /so sor rtog par byed pa ni rab tu rnam par 'byed par byed pa'o/ /mos par byed pa ni nges par byed pa'o/ /rtogs pa'i gnas skabs na rnam pa med pa'i chos rnams rnam pa dang bcas pa'i sems dang gcig tu byas te/ ji ltar so sor brtags pa dang mos par byar rung zhe na/ de'i phyir sems kyi rnam pa spangs nas zhes bya ba gsungs te/ sems kyi rnam pa ni log par snang ba yin pa'i phyir ro/ /'on ting nge 'dzin dang / shes rab ni sa mang po pa ma yin pa'i phyir/ rtag tu sems dang 'jug pa yin pas/ sems kyi rnam pa med na ci ltar de gnyis 'jug par 'gyur te/ 'di ltar zhi gnas ni ting nge 'dzin yin la lhag mthong ni shes rab yin pas/ de gnyis med na ci ltar/ chos rnams sems kyi gzugs brnyan du so sor brtag par rung zhe na/ 'dir rnal 'byor spyod pas smras pa/ sems gang yin pa dang ting nge 'dzin gang yin pa dang / shes rab gang yin pa dang / chos de dag gang dag yin pa de dag thams cad ni/ rtogs pa'i gnas skabs na/ sems las phyi rol du gyur pa ma yin pa'i phyir/ sems bzhin du ngo bo nyid med pa dag yin no/ /sems kyi ngo bo nyid med pa ni/ sems kyi sems med pa nyid yin te/ de skad du shes rab kyi pha rol tu phyin pa las kyang sems de ni sems med pa yin te/ sems kyi rang bzhin 'od gsal ba yin no zhes gsungs so/ /de'i phyir sems kyis rnam par spangs nas zhes bya ba gsungs so/ /ting nge 'dzin gyi spyod yul gzugs brnyan zhes bya ba ni sems las phyi rol du ma gyur pa rnams so/ /de dag la zhes bya ba ni de dag nyid la'o/ /shes bya'i don zhes bya ba ni gnyis med pa'i don to/ /rnam par 'byed pa zhes bya ba ni rtogs pa'o/ /rab tu rnam par 'byed ces bya ba la sogs pa ni de mchog tu bya ba'i rnam grangs kyi sgra yin no/ / bzod pa zhes bya ba ni brjod du med pa gnyis med pa'i don gyi chos la nges par sems pa'i mi mjed pa nyid do/ /de ni lhag mthong zhes bya ste zhes bya ba la lhag mthong zhes bya ba ni rang dang spyi'i mtshan nyid dang ldan pa'i chos rnams rnam par gzhig pa'i phyir/ /lta ba ni lhag mthong zhes bya'o/ / de ltar na zhes bya ba la sogs pas ni/ byang chub sems dpa' de lta bu nyid yin na/ lhag mthong la mkhas pa yin gyi gzhan du na ma yin no zhes nges par byed do/ /zhi gnas dang lhag mthong gi 'thob pa nges par byas nas/ 'thob pa'i thabs zhu ba'i phyir/ bcom ldan 'das byang chub sems dpa' de ji srid du zhes bya ba la sogs pa gsol to/ /sems la dmigs pa'i zhes bya ba des ni/ mtshan ma la dmigs pa zhes bya bar bstan to/ /nang du zhes bya ba ni phyi rol du gyur pa ma yin par yid la byed pa'o/ /lus dang sems shin tu sbyangs pa ma thob pa ni sbyor ba'i gnas skabs na'o/ /yid la byed pa de la ci zhes bya zhe na/ zhi gnas ni ma yin te zhes bya ba gsungs so/ /de ni zhi gnas dang rjes su mthun pa'i mos pa dang mtshungs par ldan pa yin par brjod par bya ste/ zhi gnas 'thob pa'i thabs yin pa'i phyir ro/ /bcom ldan 'das byang chub sems dpa' ji srid du zhes bya ba la sogs pa la/ /lus dang sems shin tu sbyangs pa ma thob ces bya ba ni/ /lus dang sems las su mi rung zhes bya ba'i phyir ro/ /ji ltar legs par bsams pa'i chos de dag la ting nge 'dzin gyi spyod yul gzugs brnyan nang du yid la bgyid pa zhes bya ba ni/ sbyor ba'i mthar ma phyin pa'i phyir ro/ /yid la byed pa de la ci zhes bya zhe na/ lhag mthong ni ma yin te zhes bya ba gsungs te/ lhag mthong 'thob pa'i thabs yin pa'i phyir ro/ /'di man chad ni chud mi za bar bya ba'i phyir gdags pa gtan la dbab pa rnam pa mang po shes par bya ste/ rnam par mi rtog pa'i ye shes la gnas pa'i ting nge 'dzin chud mi za bar bya ba'i phyir gdags pa gtan la dbab pa ni/ bcom ldan 'das zhi gnas kyi lam dang lhag mthong gi lam tha dad ces bgyi'am/ tha dad pa ma lags zhes bgyi zhes bya ba la sogs pa'o/ /de gnyis ci'i phyir tha dad pa ma yin zhe na/ de'i phyir lhag mthong gis dmigs pa'i sems la dmigs pa'i phyir ro zhes bya ba gsungs so/ /zhi gnas kyi lam lhag mthong gi lam dang tha dad pa ma yin te/ lhag mthong gis dmigs pa'i sems la dmigs pa'i phyir te/ zhi gnas kyi lam ni lhag mthong gis dmigs pa'i sems kho na la dmigs pas dmigs par bya ba dang / dmigs par byed pa gnyis ka sems kyi ngo bo nyid yin pa'i phyir tha dad pa ma yin pa nyid do/ /ci'i phyir tha dad pa ma yin pa ma yin zhe na zhes bya ba la sogs pas/ tha dad pa ma yin pa ma yin pa nyid bstan pa'i phyir/ rnam par rtog pa dang bcas pa'i gzugs brnyan la dmigs pa'i phyir ro zhes bya ba gsungs so/ /zhi gnas kyi lam dang lhag mthong gi lam tha dad pa yin te/ 'di ltar de ni rnam par rtog pa dang bcas pa mtshan ma dang bcas pa'i gzugs brnyan la dmigs pa'i phyir ro/ /'di skad bstan pa yin te/ de gnyis ni sems kyi ngo bo nyid yin pas ni/ /gcig pa nyid yin la/ rnam par rtog pa dang bcas pa dang / rnam par mi rtog pa nyid kyis ni tha dad pa nyid yin no zhes bstan to/ /rnam par mi rtog pa'i ye shes rtogs pa chud mi za bar bya ba ni/ bcom ldan 'das rnam par lta bar bgyid pa'i ting nge 'dzin gyi spyod yul gzugs brnyan gang lags pa de ci sems dang / tha dad pa zhes bgyi'am/ tha dad pa ma lags pa zhes bgyi zhes gsungs pa'o/ /dmigs par byed pa sems dang / dmigs par bya ba ting nge 'dzin gyi spyod yul gzugs brnyan de gnyis ci tha dad pa nyid ces bya'am zhes zhus pa dang / tha dad pa ma yin zhes bya'o zhes bya ba gsungs so/ /ci'i phyir zhes bri ba la gtan tshigs bstan pa'i phyir/ gzugs brnyan de rnam par rig pa tsam du zad pa'i phyir te zhes bya ba gsungs so/ /des 'di skad ston te/ sems nyid gzugs brnyan lta bur dmigs par snang ste/ sems dang tha dad pa ma yin no zhes ston to/ /rigs pa bstan pa'i phyir/ rnam par shes pa ni dmigs pa rnam par rig pa tsam gyis rab tu phye ba yin no zhes ngas bshad do zhes gsungs so/ /dmigs pa ni yul gyi rnam par sems snang ba yin la/ de yang rnam par rig pa dang tha dad pa ma yin te/ cig car dmigs pa'i phyir ro/ /ting nge 'dzin gyi spyod yul gzugs brnyan de gal te zhes bya ba la sogs pas ni/ gzhan rgol ba'i skabs kyi gnas zhus te/ rtogs par byed pa'i mtshan ma ni byed pa por gyur pa yin la/ brtag par bya ba gzugs brnyan ni las su gyur pa yin na/ ji ltar de gnyis tha dad pa ma yin par rung ste 'jig rten na byed pa po dang / las ni tha dad par snang ba'i phyir ro zhe na/ yang dag par na tha dad pa ma yin pa nyid du sgrub pa'i phyir/ byams pa de la zhes bya ba la sogs pa gsungs te/ gang yang zhes bya ba ni byed pa po bstan pa yin la/ gang la yang zhes bya ba ni las bstan pa yin te/ gang gi phyir chos gcig pu ni 'ga' yang med pas de'i phyir gang rtogs par byed pa dang / brtag par bya ba byed pa po dang / las su gyur pa gang yin/ yang dag par na/ sems dang sems las byung ba dag la/ rdul phra rab re re ni mi snang ba'i phyir byed pa po dang / las kyi tha snyad kyang med la/ 'dus pa dag la yang kun rdzob yin pa'i phyir dang / ltos pa dang bcas pa'i phyir dang / mthu med pa'i phyir ro/ /yang dngos po rang dbang can ni 'ga' yang med pa yin na/ byed pa po la mngon par zhen pas bya ba dag 'jug par byed par zad de/ byed pa po mi rigs pa'i phyir/ byed pa po dang las dang bya ba yang mi rigs so/ /'on ji ltar gzung ba dang 'dzin pa'i rnam par shes pa'i sems snang bar 'gyur zhe na/ 'on kyang de ltar skyes pa'i sems gang yin pa de ni de ltar snang ngo zhes bya ba gsungs so/ /des 'di skad bstan pa yin te/ thog ma med pa'i dus can gzung ba dang / 'dzin par mngon par brjod pa'i bag chags kyis yongs su bsgos pa'i rnam par shes pa'i sa bon las skyes pa'i rnam par shes pa de ltar gzung ba dang 'dzin pa'i rnam par snang ngo zhes bstan to/ /don de gsal bar bya ba'i phyir/ 'di lta ste dper na zhes bya ba la sogs pas dpe ston to/ /des 'di skad bstan pa yin te/ me long gi dkyil 'khor la gzugs brnyan 'byung ba med mod kyi/ 'on kyang gzugs nyid 'khrul pa'i gzugs brnyan skyed par byed de des na gzugs brnyan mthong ngo snyam du sems so zhes bstan to/ /'di la smra ba po dag gzhi me long gi dkyil 'khor nyid dang / mtshan ma gzugs la brten nas gzugs brnyan rdzas gzhan kho na zhig 'byung ste/ rten de byung ba gang yin pa de dag thams cad ni yod pa ma yin na/ dpe 'di ji ltar rung bar 'gyur zhes zer ba dag kyang yod de/ 'dir de dag la 'di skad brjod par bya ste/ gzugs dang gzugs brnyan gyi rnam pa'i rnam par shes pa las gzhan pa'i don med pa'i phyir ro/ /ji ltar don med ce na/ don med kyang rnam par shes pa skye ba snang ba'i phyir te/ 'das pa dang ma 'ongs pa dang / rmi lam la sogs pa la don med par yang de'i rnam par shes pa skye ba mthong ba lta bu'o/ /yang don mtshungs pa la mos pa'i dbang gis rnam par rig pa tha dad par dmigs pas kyang sems nyid gzugs brnyan du snang bar nges pa yin te/ dper na chu klung la sogs pa'i dngos po gcig la/ dud 'gro rnams kyis ni gnas kyi rnam par mthong / yi dwags rnams kyis ni rnag la sogs pa'i rnam par mthong / mi rnams kyis ni chu'i rnam par mthong ba lta bu dang / lha rnams kyis sa gzhi be+e DUr+ya'i rang bzhin du mthong ba lta bu'o/ /de bzhin du zhes bya ba la sogs pas ni ji ltar gzugs dang gzugs brnyan gnyis tha dad pa med kyang tha dad par snang ba bzhin du/ nges par cig car snang ba'i phyir/ dmigs par bya ba dang / dmigs par byed pa gnyis tha mi dad pa nyid du grub po zhes nges par byed do/ /bcom ldan 'das sems can rnams kyi zhes bya ba la sogs pa la/ gzugs la sogs pa zhes bya ba ni sngon po la sogs pa'i rdzas so/ /sems kyi gzugs brnyan zhes bya ba ni sems la snang bar gyur pa'o/ / rang bzhin du gnas par zhes bya ba ni ngo bo nyid du gnas pa'o/ /de yang zhes bya ba ni phyi rol gyi dngos po'o/ /sems dang tha dad pa ma lags pa ni las dang nyon mongs pa zhes bya ba la sogs pa/ gang las shes pa ni las dang nyon mongs pa dang bdud kyi yang ngo / /lam de yang bye brag tu ma byas pa'i phyir dge ba dang / mi dge ba dang / mi g.yo ba'i bye brag gis gsum char yang bzung ngo / /de la mi dge ba'i las dang nyon mongs pa zhes bgyi'am zhes zhus pa dang / byams pa tha dad pa ma yin zhes bya ste zhes gsungs so/ /'o na ci'i phyir tha dad par snang zhe na/ byis pa phyin ci log gi blo can rnams ni gzugs brnyan de dag la rnam par rig pa tsam de nyid yang dag pa ji lta ba bzhin du mi shes pas phyin ci log tu sems so zhes bya ba gsungs so/ /des 'di skad bstan pa yin te/ byis pa de kho na ma mthong ba lta bu rab rib kyis nyams par byas pa rnams ni/ phyi rol gyi don med pa bzhin du yod par mthong ba yin no zhes bstan to/ /byang chub sems dpa' ji tsam gyis na gcig tu lhag mthong bsgom pa lags zhes zhus pa'i lan du gang gi tshe rgyun chags su yid la byed pas zhes bya ba la sogs pa gsungs so/ /bar chad med pa'i sems bya ba la bar chad ni bar du chod pa yin la/ bar du chod pa med pa ni bar chad med pa yin te/ dmigs pa la mngon du phyogs pa zhes bya ba'i tha tshig go/ /ji tsam gyis na zhi gnas dang lhag mthong gnyis zhes bya ba la/ lhag mthong ni dmigs pa la sems rtse gcig pa nyid do/ /zhi gnas ni nang du sems rtse gcig pa nyid yin no/ /sems kyi mtshan ma zhu ba'i phyir/ sems kyi mtshan ma gang lags zhes bya ba gsol to/ /byams pa lhag mthong gi dmigs pa zhes bya ba la sogs pas ston te/ ting nge 'dzin gyi spyod yul rnam par rtog pa dang bcas pa'i sems kyi gzugs brnyan lhag mthong gi dmigs par bya ba gang yin pa de ni sems kyi mtshan ma yin te/ dmigs pa'i rnam pa bye brag 'dzin pa'i phyir ro/ /bar chad ma mchis pa'i sems gang lags zhes zhus pa de'i lan du byams pa zhi gnas kyi dmigs pa zhes bya ba la sogs pa gsungs te/ gzugs brnyan la dmigs pa'i zhi gnas kyi dmigs pa nang du 'jug pa gang yin pa de ni bar chad med pa'i sems zhes bya ste/ dmigs pa thams cad nang du bsdus pa'i phyir ro/ /sems rtse gcig pa nyid gang lags zhes gsol ba'i lan du/ ting nge 'dzin gyi spyod yul gzugs brnyan de la zhes bya ba la sogs pa gsungs so/ /des 'di skad bstan te/ chos gang dag ting nge 'dzin la sems kyi gzugs brnyan gyis rnam par snang ba de dag ni sems dang tha dad pa ma yin te/ de dag gi ngo bo nyid ma grub pa'i phyir ro/ /de'i phyir 'di ni rnam par rig pa tsam yin no zhes bya bar yang dag pa'i mtha' rtogs pa yin no zhes bstan to/ /rtogs pa zhes bya ba ni so sor rang rig pa'o/ /de rtogs nas kyang de bzhin nyid du yid la byed pa zhes bya ba la/ de rtogs zhes bya ba ni rnam par rig pa tsam nyid du rtogs pa'o/ /de rtogs nas de bzhin nyid rtogs pa ni rnam par rig pa tsam yang rnam par bshigs pas sems rtse gcig pa nyid yongs su 'grub par 'gyur te/ sems kyi de bzhin nyid ni rang gi khams nyid la gnas pa'i phyir ro/ /lhag mthong gi rab tu dbye ba zhu ba ni/ bcom ldan 'das lhag mthong rnam pa du mchis zhes gsol pa ste/ zhus pa'i lan du rnam pa gsum ste zhes bya ba gsungs so/ /gsum gang yin snyam pa la mtshan ma las byung ba dang yongs su tshol ba las byung ba dang / so sor rtog pa las byung ba'o zhes bya ba gsungs te/ mtshan ma las byung ba ni thos pa las byung ba'o/ /yongs su tshol ba las byung ba ni bsams pa las byung ba'o/ /so sor rtog pa las byung ba ni bsgoms pa las byung ba'o/ / yang na rnam par dag pa bzhi po dmigs pa rnam par dag pa dang / lam rnam par dag pa dang / dri rnam par dag pa dang / rang bzhin rnam par dag pa zhes rnam par bshad pa de dag las/ /dmigs pa rnam par dag pas rab tu phye ba ni mtshan ma las byung ba yin no/ /las rnam par dag pas rab tu phye ba ni yongs su tshol ba las byung ba yin no/ /dri ma med pa rnam par dag pas rab tu phye ba dang / rang bzhin rnam par dag pas rab tu phye ba ni so sor rtog pa las byung ba yin no/ /yang na rigs pa bzhi po ltos pa'i rigs pa dang / bya ba byed pa'i rigs pa dang / 'thad pas bsgrubs pa'i rigs pa dang / chos nyid kyi rigs pa zhes bya ba de dag la ltos pa'i rigs pa'i mtshan nyid can dang / bya ba byed pa'i rigs pa'i rgyu mtshan la brten te 'jug pa gang yin pa de ni mtshan ma las byung ba yin no/ /'thad pas bsgrubs pa'i rigs pas yongs su tshol ba la 'jug pa gang yin pa de ni/ yongs su tshol ba las byung ba yin no/ /chos nyid kyi rigs pas chos nyid so sor rtog pa las byung ba gang yin pa de ni so sor rtog pa las byung ba yin no/ /mtshan ma las byung ba gang yin zhe na zhes 'dri ba la ting nge 'dzin gyi spyod yul rnam par rtog pa dang bcas pa'i gzugs brnyan 'ba' zhig yid la byed pa'i lhag mthong gang yin pa'o zhes bya ba gsungs so/ /des 'di skad bstan te/ rtog pa dang bcas dpyod pa dang bcas pa'i ting nge 'dzin gyi yul thos pa la sogs pa'i chos la dmigs pa rnam par dag pa'i mtshan ma'i gzugs brnyan gang yin pa de yid la byed pa'i lhag mthong gang yin pa de ni mtshan ma las byung ba yin no zhes bstan to/ /yongs su tshol ba las byung ba gang yin zhe na zhes 'dri ba la de dang der zhes bya ba la sogs pa gsungs te/ de dang der zhes bya ba ni sems kyi gzugs brnyan gyi ngo bo nyid dag la'o/ /shes rab kyis shin tu legs par ma rtogs pa zhes bya ba la/ shes rab ni lam rnam par dag pa'o/ /des shin tu ma dmigs pa dag la'o/ /gang dag la zhe na chos zhes bya ba gsungs so/ /de dag nyid ces bya ba ni sems kyi gzugs brnyan nyid do/ /shin tu legs par rtogs pas bya ba'i phyir yid la byed pa'i byang chub sems dpa'i lhag mthong gang yin pa de ni yongs su tshol ba las byung ba yin no/ /so sor rtog pa las byung ba gang zhe na zhes 'dri ba la de dang der zhes bya ba la sogs pa gsungs te/ de dang der zhes bya ba ni rnam par rig pa tsam nyid kyis rab tu phye ba dag la'o/ /shes rab kyis zhes bya ba ni 'jig rten las 'das pa'i shes rab kyis so/ /shin tu nges par legs par kun du rtog pa rnam par bsgom pa'i chos rnams la/ rnam par grol ba'i shes bya dri ma med pa rnam par dag pa dang / rang bzhin rnam par dag pa nyon mongs pa'i sgrib pa spangs pas/ sems rnam par grol ba'i phyir/ dri ma med pa rnam par dag pa dang / shes bya'i sgrib pa spangs pas shes rab rnam par grol ba'i phyir/ rang bzhin rnam par dag pa des shin tu yongs su rdzogs par legs par yang dag par bde ba la reg par bya ba'i phyir/ yid la byed pa'i lhag mthong gang yin pa de ni so sor rtog pa las byung ba zhes bya'o/ /zhi gnas la rnam pa du mchis zhes zhus pa la/ bar chad med pa'i sems de'i rjes su 'brang bas zhes pa la sogs pa gsungs te/ mnyam par gzhag pa'i sems gang las bar chad med par lhag mthong 'byung ba de ni bar chad med pa'i sems zhes bya'o/ /de yang rnam pa gsum du brjod par bya'o zhes bya ba yang mtshan ma las byung ba dang yongs su tshol ba las byung ba dang / so sor rtog pa las byung ba ste/ lhag mthong rnam pa gsum yod pa'i phyir/ zhi gnas kyang rnam pa gsum du rig par bya'o/ /nang du 'jug pa'i phyir dang / cha phra ba'i phyir mtshan nyid ni bka' ma stsal to/ /yang zhi gnas ni rnam pa brgyad de zhes bya ba la sogs pas ni rab tu dbye ba bstan to/ /bsam gtan dang gzugs med pa'i rab tu dbye bas nang du bsdus pa rnam pa brgyad kyi dbye ba yod pa'i phyir/ zhi gnas kyang rnam pa brgyad du rnam par bshad do/ /yang rnam pa bzhi ste zhes bya ba ni byams pa tshad med pa dang / snying rje dang / dga' ba dang / btang snyoms tshad med pa rnams ni sems nang du 'jug pa yin pa'i phyir te/ gnod sems la sogs pa sems yongs su gdung ba zhi ba'i ngo bo nyid yin pa'i phyir zhi gnas su rnam par bshad do/ /yang zhi gnas dang lhag mthong gnyis kyi chos la gnas pa dang mi gnas pa'i dbye ba zhu ba'i phyir/ bcom ldan 'das zhi gnas dang lhag mthong gi chos la gnas pa zhes kyang bgyi zhes bya ba gsol to/ /mdo'i sde la sogs pa ji ltar bzung ba dang bsams pa'i chos kyi mtshan ma'i rjes su 'brang bas zhes bya ba la/ chos kyi mtshan ma ni tshig dang yi ge la sogs pa'o/ /don la zhes bya ba ni don gyi rgyu mtshan la'o/ /des 'di skad bstan te/ mdo'i sde la sogs pa'i chos bzung spub dang bsams pa'i mtshan ma'i rjes su 'brang nas don la zhi gnas dang lhag mthong gang yin pa de ni chos la gnas pa yin te/ chos la mos pa don gyi rjes su 'brang ba'i phyir ro zhes bstan to/ /bzung ba dang bsams pa'i chos la mi ltos par zhes bya ba la sogs pa ni mdo'i sde la sogs pa'i chos gzung ba med pa'o/ /gzhan gyis zhes bya ba ni gzhan gyi rkyen las yin gyi/ rang gi rkyen gyi stobs kyis ma yin pa'o/ /gdams ngag dang rjes su bstan pa zhes bya ba la rtogs par bya ba'i ngag ni gdams ngag go/ /'o na gzhan las thos pa yang chos la gnas pa kho na yin te/ gzhan gyis smras pa'i chos kyi rjes su 'brang ba'i phyir ro zhe na/ mdo'i sde la sogs pa'i chos bzung ba'i stobs kyis 'jug pa ma yin gyi/ dad pas gzhan gyi rkyen gyis 'jug pa yin te/ chos rnams la nges pa med pas de'i phyir/ chos la gnas pa nyid ma yin no/ /'di lta ste/ rnam par bsngos pa'am zhes bya ba la sogs pa yang dad pas gzhan las lung ma mnos te/ mi sdug pa la sogs pa bsgom pa'i zhi gnas dang / lhag mthong ni sbyor bas rjes su 'brang ba yin pa'i phyir chos la gnas pa ma yin no/ /byams pa de la nga ni zhes bya ba la sogs pas ni 'di skad bstan te/ byang chub sems dpa' dbang po rnon po ji ltar thos pa dang / gzung ba'i chos rnams kyi rjes su 'brang ba ni rang gi blo'i stobs kyis chos la gnas pa'i zhi gnas dang lhag mthong bstan par skyes pa la sgom par byed pa yin pas/ de'i phyir de ni phyir mi ldog pa yin no zhes bstan to/ /chos la mi gnas pa la brten nas zhes bya ba la sogs pas ni 'di skad bstan te/ byang chub sems dpa' dang po nyid nas mdo'i sde la sogs pa'i chos nyan pa dang 'dzin par mi nus shing / dad pas gzhan gyi rkyen gyis 'jug pa ni dbang po rtul po yin pas de'i phyir de ni gzhan dag gis bskyod du rung ba'i phyir/ bstan pa ma yin no zhes bstan to/ /ma 'dres pa dang 'dres pa'i chos la dmigs pa'i dbye ba zhu ba'i phyir/ bcom ldan 'das zhi gnas dang lhag mthong ni ma 'dres pa'i chos la dmigs pa zhes kyang bgyi zhes bya ba la sogs pa gsol to/ /ji ltar bzung ba dang bsams pa'i chos rnams las zhes bya ba ni/ stong pa nyid la sogs pa'i rnam pa gang gis mdo'i sde la sogs pa'i chos bzung ba dang bsams pa de dag la zhi gnas dang lhag mthong sgom par byed pa de ni ma 'dres pa'i chos la dmigs pa'i zhi gnas dang lhag mthong zhes bya'o zhes bstan to/ /mdo'i sde la sogs pa'i chos so so la dmigs pa zhes bya ba ni mdo'i sde la sogs pa'i chos tha dad par rnam par gnas pa la dmigs pa zhes bya ba'i tha tshig go/ /gal te mdo'i sde la sogs pa'i chos de nyid ces bya ba la sogs pa la/ chos 'di dag thams cad ni zhes bya ba ni mdo'i sde la sogs pa sngar bstan pa dag go/ /de bzhin nyid la gzhol ba zhes bya ba ni de bzhin nyid la 'dud pa'o/ /de bzhin nyid la 'bab pa zhes bya ba ni de bzhin nyid gtso bor byed pa'o/ /de bzhin nyid la bab pa zhes bya ba ni de bzhin nyid la zhugs pa zhes bya ba'i tha tshig go/ /de dag gis ni 'di skad ces/ /chos 'di dag thams cad ni de bzhin nyid du ro gcig pa yin no zhes bstan to/ /de bzhin nyid ces bya ba ni chos kyi dbyings rang bzhin gyis rnam par dag pa zhes bya ba'i tha tshig go/ /byang chub la gzhol ba zhes bya ba la sogs pa la byang chub ni 'jig rten las 'das pa rnam par rtog pa'i ye shes so/ /gnas gyur pa la gzhol ba zhes bya ba la sogs pa la gnas ni/ sangs rgyas kyi chos rnams kyi ste/ sa dang pha rol tu phyin pa'i stobs so/ /gnas gyur pa ni chos kyi sku zhes bya'o/ /mdo'i sde la sogs pa'i chos 'di dag thams cad gcig tu gyur pa ni dge ba'i chos zhes bya ba la sogs pa la dge ba'i chos zhes bya ba ni/ rtogs pa'i gnas skabs na mya ngan las 'das pa'i ngo bo nyid kyis don dam par dge ba dang / lung gi gnas skabs na lam gyi ngo bo nyid kyis ngo bo nyid dge ba dag go/ /dpag tu med pa zhes bya ba ni tshad med pa ste/ zag pa med pa'i chos kyi dbyings ni yongs su gcad du med pa'i phyir ro/ /grangs med pa zhes bya ba ni dpag tu med pa de nyid kyi phyir te/ grangs las yang dag par 'das pa'i phyir ro/ /mngon par brjod pas mngon par brjod pa zhes bya ba ni de ltar zag pa med pa'i chos mngon sum du brjod pas rjod par byed pa'o/ /de ni 'dres pa'i chos la dmigs pa'i zhi gnas dang lhag mthong yin no zhes bya ba ni bsdus pa'i chos la dmigs pa'i zhi gnas dang lhag mthong yin pa'o/ /'dres pa'i chos la dmigs pa rnams kyis chung ngu dang chen por gyur pa dang tshad med pa'i dbye ba zhu ba'i phyir/ bcom ldan 'das zhi gnas dang lhag mthong ni 'dres pa chung ngu'i chos la dmigs pa zhes kyang bgyi zhes bya ba la sogs pa gsol to/ /byams pa mdo'i sde nas zhes bya ba la sogs pas ni 'di skad bstan to/ /mdo'i sde la sogs pa'i chos gang yang rung ba dag gzung ba rnams kyi dang po dang bar dang tha ma gcig tu bzlums te/ yid la byed pa'i zhi gnas dang lhag mthong ni 'dres pa chung ngu'i chos la dmigs pa yin par rig par bya ste/ chos mtha' dag la dmigs pa ma yin pa'i phyir ro zhes bstan to/ /mdo'i sde la sogs pa de dag ji snyed gzung ba dang zhes bya ba la sogs pas ni/ mdo'i sde la sogs pa de dag thams cad so sor gcig tu bzlums te/ yid la byed pa ni 'dres pa chen por gyur pa'i chos la dmigs pa'i zhi gnas dang lhag mthong yin par rig par bya ste/ mdo'i sde la sogs pa'i chos mtha' dag la dmigs pa'i phyir ro zhes bstan to/ /de bzhin gshegs pa rnams kyi chos bstan pa tshad med pa rnams dang zhes bya ba la sogs pas ni 'di skad bstan te/ de bzhin gshegs pa'i bstan pa dmigs pa thams cad kyi phyir/ thams cad dang dus thams cad du gdul ba'i skye bo thams cad kyi bsam pa yang dag par mgu bar byed pas/ 'jug pa gang yin pa la ni tshad med do zhes bstan to/ /chos kyi tshig dang yi ge tshad med pa rnams dang / gong nas gong du shes rab dang spobs pa tshad med pa rnams kyang de bzhin no/ /gcig tu bzlums te zhes bya ba ni chos rnams kyi chos nyid dmigs su med pa nyid kyis/ ro gcig par byed pa'i zhi gnas dang lhag mthong ni/ 'dres pa tshad med pa'i chos la dmigs pa yin par rig par bya'o zhes bya ba'i tha tshig go/ /bcom ldan 'das byang chub sems dpa' ji tsam gyis na zhes bya ba la sogs pas ni de'i 'thob pa'i rgyu zhus pa yin no/ /byams pa de ni rgyu lngas 'thob par rig par 'gyur bar bya ste zhes bya ba la sogs pas ni 'thob pa'i rgyu ston to/ /yid la byed pa'i tshe skad cig skad cig la gnas ngan len gyi rten thams cad 'jig par byed pa zhes bya ba la gnas ngan len ni rnam pa gnyis te/ 'dod chags la sogs pa'i nyon mongs pa'i gnas ngan len dang / lta ba'i rnam pa'i nyon mongs pa'i gnas ngan len to/ /de'i rten ni kun gzhi rnam par shes pa ste/ 'dris pa'i chos la dmigs pa'i zhi gnas dang lhag mthong ni gnas ngan len de gnyis kyi gnyen po yin pa'i phyir de'i gnas 'jig par byed pa yin no/ /'du shes sna tshogs rnam par spangs te/ chos kyi kun dga' la dga' ba thob pa zhes bya ba ni gnas ngan len gyi sgrib pa dang bral ba de'i phyir/ lus dang sems shin tu sbyangs pas/ 'du shes sna tshogs dang bral ba'i chos kyi kun dga' la dga' ba 'thob pa'o/ /chos snang ba phyogs bcur tshad med cing rnam pa yongs sum chad pa yang dag par shes pa zhes bya ba ni chos dpag tu med pa la shin tu legs par reg pa'i phyir ro/ /dgos pa yongs su grub pa dang ldan pa rnam par dag pa'i cha dang mthun pa'i mtshan ma rnam par ma brtags pa rnams de la kun du 'byung ba zhes bya ba ni/ gang zag dang chos kyi rnam pa'i lta ba yongs su dag pa'i phyir te/ rnam pa thams cad mkhyen pa nyid ni bdag dang gzhan gyi don phun sum tshogs par byed pa'i rgyu yin pa'i phyir/ dgos pa yongs su grub pa dag yin no/ /de'i cha ni rtogs pa ste/ de dang mthun pa'i mtshan ma rnam pa ma brtags pa dag rang gi dang gis kun du 'byung ba'o/ /chos kyi sku thob pa dang yongs su rdzogs pa dang yongs su grub par bya ba'i phyir/ rgyu gong ma bas ches gong ma bzang po bas ches bzang po yang dag par yongs su 'dzin par byed pa zhes bya ba la sa dang po la ni chos kyi sku rtogs pa yin no/ /sa gsum pa la ni 'thob po/ /sa bcu pa la ni yongs su rdzogs so/ /de bzhin gshegs pa'i sa la ni yongs su 'grub ste/ mthar thug par gyur pa'i phyir ro/ /rgyu zhes bya ba ni sa dang pha rol tu phyin pa bsgoms pas nges par 'byung ba'o/ /gong ma bas ches gong ma bzang po bas ches bzang po zhes bya ba ni/ rtog pa bas 'thob pa dang 'thob pa bas yongs su rdzogs pa dang / yongs su rdzogs pas yongs su grub pa ches gong ma bas gong ma dang / ches bzang po bas ches bzang po yin pa'o/ /yang de gnyis kyi dbye ba zhu ba'i phyir/ bcom ldan 'das ji ltar na zhes bya ba la sogs pa gsol to/ /rtog pa dang bcas shing dpyod pa dang bcas pa'i ting nge 'dzin zhes bya ba la sems rags pa nyid ni rtog pa'o/ /zhib ba nyid ni dpyod pa'o/ /ji ltar gzung zhing zhes bya ba la sogs pa la de dag gi mtshan ma zhes bya ba ni/ mdo sde la sogs pa'i chos ji ltar gzung zhing brtag pa dang dpyad pa dag gi mtshan ma dmigs par gyur pa/ gsal zhing rags par myong ba'i rjes su dpyod pa'i zhi gnas dang lhag mthong gang yin pa de ni rtog pa dang bcas shing dpyod pa dang bcas pa'i ting nge 'dzin yin no zhes bstan pa'o/ /de dag nyid kyi mtshan ma zhes bya ba la sogs pa la/ de dag nyid ces bya ba des ni mdo'i sde la sogs pa'i chos ji ltar bzung zhing brtag pa dang / dpyad pa dag gi mtshan ma bzung ngo / /de la ni rtog pa med pa'i phyir gsal zhing rags pa'i mtshan ma med de/ de snang ba 'ol phyir dran pa tsam phra mo myong ba'i rjes su dpyod pa'i zhi gnas dang lhag mthong gang yin pa de ni rtog pa med cing dpyod pa tsam gyi ting nge 'dzin yin no zhes ston to/ /de dag gi mtshan ma la thams cad kyi thams cad du zhes bya ba la sogs pa la de dag gi mtshan ma la thams cad kyi thams cad du lhun gyis grub par zhes bya ba ni/ sems kyi rgyud gcig tu gyur pa'i phyir dang / rtog pa dang dpyod pa nye bar zhi ba'i phyir/ mdo'i sde la sogs pa'i chos kyi mtshan ma gzung ba med par lhun gyis grub par chos myong ba'i yid la byed pas rnam par dpyod pas zhi gnas dang lhag mthong gang yin pa de ni/ rtog pa med pa dang dpyod pa med pa'i ting nge 'dzin yin no zhes bstan to/ /yang yongs su tshol ba las byung ba'i zhes bya ba la sogs pas ni/ rtog pa dang bcas shing dpyod pa dang bcas pa'i sa la/ chos rnams kyi kun rdzob dang don dam pa'i bden pa yongs su tshol ba las byung ba'i zhi gnas dang lhag mthong gang yin pa de ni rtog pa dang bcas shing dpyod pa dang bcas pa'i ting nge 'dzin yin no zhes bstan to/ /so sor rtog pa las byung ba gang yin pa de ni rtog pa med cing dpyod pa tsam gyi ting nge 'dzin yin no zhes bya ba ni mdo'i sde la sogs pa'i chos la zhib tu so sor rtog pa'i phyir ro/ / 'dres pa'i chos la dmigs pa'i zhi gnas dang lhag mthong gang yin pa de ni rtog pa med pa dang / dpyod pa med pa'i ting nge 'dzin yin no zhes bya ba ni chos thams cad de bzhin nyid du ro gcig pas/ lhun gyis grub par 'jug pa'i phyir ro/ /bcom ldan 'das zhi gnas kyi rgyu mtshan ni gang lags zhes bya ba la sogs pas ni zhi gnas dang lhag mthong rab tu 'dzin pa dang / btang snyoms kyi rgyu mtshan zhus so/ /byams pa sems rgod pa'am zhes bya ba la sogs pa la rgod pa zhes bya ba ni nye bar ma zhi ba'o/ /rgod du dogs pa zhes bya ba ni 'phro ba'i bsam pa'o/ /kun du skyo bar 'gyur ba dang mthun pa'i chos rnams zhes bya ba ni sdug bsngal dang kun 'byung ba'i rnam pa dag go/ /bar chad med pa'i sems de zhes bya ba ni sems yul rnams la mi dmigs pa'o/ /byams pa sems bying ngam zhes bya ba la sogs pa la/ sems bying zhes bya ba ni rmugs pa dang gnyid kyis nyams par byas pa'o/ /bying du dogs pa zhes bya ba ni bying ba'i rjes su mthun pa'o/ /mngon par dga' ba dang mthun pa'i chos rnams zhes bya ba ni 'gog pa dang lam gyi rnam pa dag go/ /sems kyi mtshan ma de zhes bya ba ni/ mngon par dga' bar 'gyur ba dang mthun pa'i chos rnams la dmigs pa'i sems kyi mtshan ma zhes bya ba'i tha tshig go/ /zhi gnas kyi rgyu mtshan dang rab tu 'dzin pa'i rgyu mtshan rnam par bshad nas/ byams pa'i zhi gnas la gcig tu nges pa'am/ lhag mthong la gcig tu nges pa'am/ zung du 'brel pa'i lam yang rung ste zhes bya bas btang snyoms kyi rgyu mtshan ston to/ /de gnyi ga'i nye ba'i nyon mongs pas nye bar nyon mongs pa med pa zhes bya bas ni lam rnam pa gsum po de dag gi bye brag bstan te/ rgod pa dang 'gyod pa dang rmugs pa dang gnyid kyis nyams par ma byas pa'i lam la/ sems rang gi ngang gis 'jug pa na yid la byed pa lhun gyis grub pa gang yin pa de ni btang snyoms kyi rgyu mtshan zhes bya'o zhes bstan to/ /bcom ldan 'das byang chub sems dpa' zhi gnas dang lhag mthong bsgom pa chos so so yang dag par rig pa dang / don so so yang dag par rig pa lags na/ ji ltar chos so so yang dag par rig pa lags/ ji ltar don so so yang dag par rig pa lags zhes zhus pas de ni/ chos dang don gyi ngo bo nyid kyi rab tu dbye ba zhus so/ /chos ni gnas yin la/ don ni gnas yin pa de'i phyir/ byams pa rnam pa lngas chos so so yang dag par rig pa yin te zhes bya ba la sogs pas gnas su gyur pa'i chos kyi rab tu dbye ba dang por bka' stsal to/ /chos kyi ngo bo nyid kyang rnam pa gnyis te/ bshad pa'i chos dang rtogs pa'i chos so/ /bshad pa'i chos ni rtogs pa'i chos kyi rtsa ba yin pa'i phyir dang / bshad pa'i chos kyang ming dang tshig 'bru dang / so so ba dang / bsdus pa'i ngo bo nyid yin pa'i phyir/ ming dang zhes bya ba la sogs pa bstan to/ /ming gang zhe na/ kun nas nyon mongs pa dang rnam par byang ba'i chos rnams la ngo bo nyid dang bye brag gi ming du bya bar btags pa gang yin pa'o zhes bya ba la kun nas nyon mongs pa ni 'dod chags la sogs pa'o/ / rnam par byang ba pa ni dad pa la sogs pa'o/ /de dag la 'dod chags zhes bya ba dang / dad pa zhes bya ba ni ngo bo nyid kyi ming du bya bar btags pa yin no/ /'dod chags de yang yongs su shes par bya ba zhe'am/ spang bar bya ba zhes bya ba ni bye brag gi ming du bya bar btags pa yin no/ /de bzhin du dad pa yang bsgom par bya ba zhe'am/ lan mang du bya ba zhes bya ba ni bye brag gi ming du bya bar btags pa yin te/ de ni ming yin no/ /tshig gang zhe na/ kun nas nyon mongs pa dang rnam par byang ba pa'i don rjes su tha snyad btags pa'i phyir/ gnas dang rten ming de dag nyid kyi tshogs la brten pa gang yin pa'o zhes bya ba la 'di lta ste/ 'dod pa dang gzugs dang gzugs med pa'i 'dod chags spang bar bya ba zhes bya ba ni ming rnams kyi tshogs so/ /rnam par byang ba pa'i ming gi tshogs kyang de bzhin du bstan par bya ste/ 'di lta ste sems can med pa'i las dang 'bras bur 'brel ba la/ dad pa ni dge ba yin no zhes bya ba lta bu'o/ /yi ge gang zhe na de gnyi ga'i gnas kyi yi ge'i 'bru gang yin pa'o zhes bya ba ni ming dang tshig gi gnas su gyur pa ni yi ge'i 'bru yin no zhes bya ba'i tha tshig go/ /de dag so so las so so yang dag par rig pa gang zhe na/ ma 'dres pa la dmigs pa'i yid la byed pas so so yang dag par rig pa gang yin pa'o zhes bya bas ni 'di skad bstan te/ ming dang tshig dang yi ge bkod pa khyad par du 'phags pa'i mdo sde la sogs pa'i chos kyi tshig so sor nges par 'dzin par byed pa yin no zhes bstan to/ /bsdus pa las so so yang dag par rig pa gang zhe na/ 'dres pa la dmigs pa'i yid la byed pas so so yang dag par rig pa gang yin pa'o zhes bya bas ni mdo'i sde la sogs pa'i chos bsdus pa de dag nyid gcig tu byas te nges par 'dzin par byed pa yin no zhes bstan to/ / byang chub sems dpa' zhi gnas dang lhag mthong bsgom pa ji ltar chos so so yang dag par rig pa yin pa de ltar rnam par bshad nas rnam pa du dag gis don so so yang dag par rig pa bstan pa'i phyir/ byang chub sems dpa' rnam pa bcus don so so yang dag par rig pa yin te/ ji snyed yod pa nyid dang zhes bya ba la sogs pa rgya cher gsungs so/ /byams pa de la kun nas nyon mongs pa dang rnam par byang ba pa'i chos rnams la rnam pa rab tu dbye ba thams cad kyi mthar thug pa gang yin pa de ni ji snyed yod pa nyid yin te zhes bya ba la kun nas nyon mongs pa la ni 'dod chags la sogs pa'o/ /rnam par byang ba pas ni dad pa la sogs pa ste/ kun nas nyon mongs pa dang / rnam par byang ba pa de dag gi grangs kyi rnam pa ji snyed yod pa de dag gi rnam par rab tu dbye ba'i mthar thug par gyur pa de ni ji snyed yod pa nyid yin no/ /'di lta ste zhes bya ba la sogs pas ni/ phung po rnams kyi ni phung po lnga po dag gis kun nas nyon mongs pa dang / rnam par byang ba'i phung po rnams lhag chad med par bsdus pa'i phyir ro/ /nang gi skye mched drug po dag gis ni zab po bstan to/ /phyi rol gyi skye mched drug po dag gis ni longs spyod pa bstan to zhes bya ba la sogs pa'o zhes bya ba ni dbang po la sogs pa grangs lngas bsdus pa dag kyang gzung bar bya'o/ /ji snyed yod pa nyid ces bya ba ni chos ji snyed yod pa gang dag gis kun nas nyon mongs pa'am/ rnam par byang ba pa yod par srid pa nyid ni ji snyed pa nyid ces bya'o/ /byams pa de la kun nas nyon mongs pa dang rnam par byang ba pa'i chos de dag nyid kyi de bzhin nyid gang yin pa de ni ji lta ba bzhin du yod pa nyid yin te zhes bya bas ni 'di skad bstan te/ kun nas nyon mongs pa dang rnam par byang ba pa'i chos gang dag la rnam par dpyad pa'i gnas skabs na ji lta ba bzhin du phyin ci ma log pa yod par srid pa nyid ni ji lta ba bzhin du yod pa nyid yin no zhes bstan to/ /de yang rnam pa bdun te zhes bya bas ni yang rab tu dbye ba bstan to/ /'byung ba'i de bzhin nyid ni zhes bya ba la nyon mongs pa dang las dang skye ba'i rgyun gyis 'jug pa ni 'byung ba yin no/ /de bzhin nyid ces bya ba ni rnam pa des gzhan du ma yin te/ phyin ci ma log pa'i ngo bo nyid bstan pa'o/ /'du byed rnams kyi thog ma dang tha ma med pa nyid gang yin pa'o zhes bya bas ni/ sngon gyi mtha' dang phyi ma'i mtha' med pa ston to/ /mtshan nyid kyi de bzhin nyid ni chos thams cad kyi gang zag la bdag med pa dang / chos la bdag med pa gang yin pa'o zhes bya ba la/ chos thams cad ces bya ba ni 'dus byas dang 'dus ma byas so/ /de la re zhig 'dus byas rnams la ni rdul phra rab re re dang sems dang sems las byung ba mtha' dag la gang zag med do/ /'dus ma byas nam mkha' dang so sor brtags te 'gog pa dang / so sor brtags pa ma yin pa'i 'gog pa dag la yang gang zag med pas/ de'i phyir chos rnams kyi mtshan nyid ni gang zag la bdag med pa yin no/ /rnam par rig pa'i de bzhin nyid ni 'du byed rnams kyi rnam par rig pa tsam nyid gang yin pa'o zhes bya ba ni nang dang phyi rol gyi dngos po rnams rnam par rig pa tsam gyis rab tu phye ba yin pa'i phyir ro/ /gnas pa'i de bzhin nyid ni ngas sdug bsngal gyi bden pa bstan pa gang yin pa'o zhes bya ba la gnas pa zhes bya ba ni bdag po med pa'i chos rnams dus la sogs par gnas pa'o/ /de dag thams cad ni 'phags pa rnams la sdug bsngal bar bden te mi mthun pa'i phyir ro/ /log par bsgrub pa'i de bzhin nyid ni ngas kun 'byung ba'i bden pa bstan pa gang yin pa'o zhes bya ba la log par bsgrub pa ni bdag med pa la bdag tu rmongs pa la sogs pa'i ngo bo nyid yin pa'i phyir mngon par 'grub pa dang skye ba'i sdug bsngal gyi rgyu yin pa'o/ /rnam par dag pa'i de bzhin nyid ni ngas 'gog pa'i bden pa bstan pa gang yin pa'o zhes bya ba ni de yang dag pa ma yin pa'i kun rtog pa glo bur 'gags pa yin pas rnam par dag pa yin no/ /yang dag par grub pa'i de bzhin nyid ni las lam gyi bden pa bstan pa gang yin pa'o zhes bya ba la yang dag par bsgrubs pa ni log par bsgrub pa'i gnyen po yin pa'i phyir/ bdag tu rmongs pa la sogs pa nye bar zhi ba'i lam rnam par dag pa yin no/ /byams pa de la zhes bya ba la sogs pas ni de bzhin nyid de dag gi khyad par gyi tshul bstan te/ 'byung ba'i de bzhin nyid gang yin pa dang zhes bya ba la sogs pas rgya cher gsungs pa ni/ sems can thams cad ni 'jig tshogs la lta ba'i bag chags brtas pa'i phyir/ 'byung ba'i de bzhin nyid la sogs pas/ mtshungs shing mnyam mo zhes bstan to/ /mtshan nyid kyi de bzhin nyid gang yin pa dang rnam par rig pa'i de bzhin nyid gang yin bde ni chos thams cad mtshungs shing mnyam mo zhes bya ba ni chos thams cad ni gang zag la bdag med pa'i mtshan nyid yin pa'i phyir dang / rnam par rig pa tsam gyis rab tu phye ba yin pa'i phyir ro/ /byams pa de la zhes bya ba la sogs pas ni byang chub gsum po dag go/ /rnam par dag pa'i de bzhin nyid kyis mtshungs shing mnyam par ston te/ de dag gi 'gog pa'i ngo bo nyid kyis mtshungs pa'i phyir ro/ /de dag mtshungs na ci'i phyir/ sangs rgyas kyi rnam par grol bas ni chos kyi sku'i mtshan nyid kyis sems can gyi don la 'jug par 'gyur la nyan thos dang rang sangs rgyas kyi rnam par grol bas ma yin zhe na/ sangs rgyas kyis rnam par grol ba ni sngon gyi smon lam gyi shugs kyi dbang gis sna tshogs yin la/ nyan thos la sogs pa'i rnam par grol ba ni ma yin te/ dper na gos mdud pa dang ma mdud pa dag mtshungs par tshon gyi snod du bcug kyang / shugs kyi dbang gis na mdud pa rnams la ni tshon bkra bar snang la ma mdud pa rnams la ni ma yin no/ /de bzhin du mya ngan las 'das pa'i tshon rtsi'i snod lta bur mtshungs par bcug kyang sangs rgyas kyi mya ngan las 'das pa ni shugs kyi dbang gis na sna tshogs kho na yin la/ nyan thos la sogs pa'i mya ngan las 'das pa ni ma yin te/ de bas na de dag gi rnam par dag pa mnyam pa nyid ni rnam par grol ba la thun mong ba'i dbang du byas pa kho na yin gyi chos kyi skus ni ma yin no/ /byams pa de la yang dag par sgrub pa'i de bzhin nyid des ni zhes bya ba la sogs pas ni thos pa 'dres pa la dmigs pa'i zhi gnas dang lhag mthong gis bsdus pa'i shes rab mtshungs shing mnyam ste/ shes rab ni gti mug thams cad kyi gnyen po yin pa'i phyir/ yang dag par sgrub pa'i de bzhin nyid kyis ji lta ba bzhin du yod pa nyid mtshungs shing mnyam mo zhes bstan to/ /'dzin pa'i don gyi dbang du mdzad nas byams pa de la/ 'dzin pa'i don ni skye mched gzugs can lnga dang zhes bya ba la sogs pa gsungs te/ gzugs can lnga ni mig la sogs pa lnga ste gzugs kyi phung pos bsdus pa yin pa'i phyir ro/ /sems dang yid dang rnam par shes pa dang sems las byung ba'i chos rnams kyang 'dzin pa'i don gyi dbang du byas pa kho na yin te/ sems ni kun gzhi rnam par shes pas so/ /yid ni nyon mongs pa can no/ /rnam par shes pa ni 'jug pa'i rnam par shes pa drug go/ /sems las byung ba ni tshor ba la sogs pa'o/ /de dag ni 'dzin pa yin te/ dmigs pa dang bcas pa'i rnam pa yin pa'i phyir ro/ /'dzin pa'i don bshad nas gzung ba'i don gyi dbang du mdzad nas/ byams pa de la gzung ba'i don ni zhes bya ba la sogs pa gsungs so/ /phyi rol gyi skye mched drug po dag ces bya ba ni/ gzugs dang / sgra dang / dri dang / ro dang / reg bya dang chos rnams te gzung ba yin no/ /chos thams cad yid kyis rnam par shes pa'i gzung ba yin par bstan pa'i phyir/ byams pa yang 'dzin pa'i don gang yin pa de ni gzung ba'i don kyang yin no zhes gsungs so/ /gzung ba'i don bstan nas/ gnas kyi don bstan pa'i phyir byams pa de la gnas kyi don ni zhes bya ba la sogs pa rgya cher gsungs so/ /grong tshigs dang grong tshigs rgya zhes bya ba la sogs pa bstan pa ni 'jig rten gyi khams dpag tu med pa mngon par bsgrub pa'i rgyu yin no/ /gnas kyi don rnam par bshad nas longs spyod kyi don bstan pa'i phyir/ byams pa de la longs spyod kyi don ni zhes bya ba la sogs pa gsungs so/ /yongs su spyod par bya ba'i phyir zhes bya ba ni skyes pa dang bud med kyi bsnyen bkur la sogs pa'i longs spyod pa'i phyir ro/ /yo byad ces bya ba ni gos la sogs pa ste/ byang chub sems dpa' don so so yang dag par rig pas ni thams cad rab tu dbye bar bya dgos pa'i phyir ro/ /longs spyod kyi don rnam par bshad pa'i 'og tu phyin ci log gi don bstan pa'i phyir/ byams pa de la phyin ci log gi don ni zhes bya ba la sogs pa gsungs so/ /'dzin pa la sogs pa'i don de dag nyid la zhes bya ba ni sngar bstan pa dag la'o/ /phyin ci log ces bya ba dag ni bden pa dag la log pa'i rnam par lta ba'o/ /rten cing 'brel par 'byung ba gzung ba dang / 'dzin pa'i mi rtag pa la sogs pa'i ngo bo nyid dag la/ rtag pa la sogs par sgro 'dogs pa ni 'du shes phyin ci log yin no/ /'du shes dang sems phyin ci log gnyis kyis lta ba'i phyin ci log kun nas slong ba'i phyir/ yang dag pa'i lta bas de dag spong ngo / /phyin ci log gi don rnam par bshad nas phyin ci ma log pa'i don bstan pa'i phyir/ byams pa de la phyin ci ma log pa'i don ni zhes bya ba la sogs pa gsungs so/ /de las bzlog pa ste/ de'i gnyen po yin par rig par bya'o zhes bya ba ni 'dzin pa la sogs pa'i don mi rtag pa dag la mi rtag par lta ba dang / 'phags pa dang mi mthun pa sdug bsngal ba'i ngo bo nyid dag la sdug bsngal bar lta ba dang / mi gtsang ba'i ngo bo nyid dag la mi gtsang bar lta ba dang / bdag med pa rkyen la rag las pa dag la bdag med par lta ba ste/ gnyen po thob pas lta ba phyin ci log dang bral na 'du shes dang sems phyin ci log dag dang yang bral bar 'gyur ro/ /phyin ci ma log pa'i don gyi 'og tu kun nas nyon mongs pa'i don bstan pa'i phyir/ byams pa de la kun nas nyon mongs pa'i don ni rnam pa gsum ste zhes bya ba la sogs pa gsungs so/ /gang zhe na khams gsum pa'i zhes bya ba gsungs so/ /gsum gang zhe na nyon mongs pa'i kun nas nyon mongs pa dang las kyi kun nas nyon mongs pa dang skye ba'i kun nas nyon mongs pa'o zhes bya ba gsungs te/ srid pa'i yan lag rnams las ma rig pa dang sred pa dang len pa ni nyon mongs pa'i kun nas nyon mongs pa'o/ /'du byed dang srid pa ni las kyi kun nas nyon mongs pa'o/ /rnam par shes pa dang / ming dang / gzugs dang / skye mched drug dang / reg pa dang / tshor ba dang / skye ba dang / rga shi ni skye ba'i kun nas nyon mongs pa yin no/ / de ltar kun nas nyon mongs pa'i don rnam par bshad nas/ rnam par byang ba'i don bstan pa'i phyir/ byams pa de la rnam par byang ba'i don ni kun nas nyon mongs pa rnam pa gsum po de dang bral bar bya ba'i phyir/ byang chub kyi phyogs dang mthun pa'i chos gang yin pa rnams te/ zhes bya ba gsungs te/ dran pa nye bar gzhag pa la sogs pa yin par shes par bya'o/ /byams pa rnam pa bcu po dag gis don thams cad bsdus par rig par bya'o zhes bya ba ni byang chub sems dpa' ji snyed yod pa nyid la sogs pa bcu po de dag gis don so sor yang dag par rig pa'i phyir/ don so sor yang dag par rig pa zhes bstan to// //bam po gnyis pa ste tha ma'o/ /yang rnam pa lnga'i dbye ba bstan pa'i phyir/ byams pa yang byang chub sems dpas rnam pa lngas don so so yang dag par rig pa yin te zhes bya ba la sogs pa gsungs so/ /don rnam pa lnga gang zhe na zhes 'dri ba la lan du/ yongs su shes par bya ba'i dngos po dang / yongs su shes par bya ba'i don dang / yongs su shes pa dang / yongs su shes pa'i 'bras bu 'thob pa dang de rab tu rig par byed pa'o zhes gsungs te rnam pa de lngas kun bsdus pa'i phyir ro/ /byams pa de la yongs su shes par bya ba'i dngos po de ni shes bya thams cad yin par blta bar bya ste/ 'di lta ste phung po rnams zhes bya ba'am zhes bya ba la sogs pa la/ phung po la sogs pas ni yongs su shes par bya ba'i dngos po thams cad bsdus pa'i phyir ro/ /byams pa de la yongs su shes par bya ba'i don ni rnam pa ji snyed kyi shes bya de ji lta ba bzhin shes par bya ba ste zhes bya bas ni de rnam pa ji snyed cig gis yongs su shes par bya zhing ji ltar yongs su shes par bya zhes yongs su shes par bya ba'i don to/ /'di lta ste/ kun rdzob dang zhes bya ba la sogs pa rgya cher gsungs pa la/ kun rdzob dang don dam pa zhes bya ba ni sangs rgyas rnams ni bden pa gnyis la brten te ston par mdzad pa'i phyir ro/ /skyon zhes bya ba ni kun nas nyon mongs pa'i skyon brjod pa'i phyir ro/ /yon tan zhes bya ba ni rnam par byang ba'i yon tan brjod pa'i phyir ro/ /rkyen zhes bya ba ni kun nas nyon mongs pa dang / rnam par byang ba de dag rang gi rgyu kho na las byung gi/ dbang phyug la sogs pa las ma yin pa'o/ /dus zhes bya ba ni de dag kyang 'das pa dang ma 'ongs pa dang da ltar byung ba'i dus su gtogs pa'o/ /skye ba dang gnas pa dang 'jig pa'i mtshan nyid ces bya ba ni yongs su shes par bya ba'i don la sogs pa 'dus byas kyi mtshan nyid kyi rkyen rnams kyis rab tu phye ba'o/ /nad la sogs pa zhes bya ba ni sdug bsngal bar ro/ /sdug bsngal dang kun 'byung la sogs pa zhes bya ba ni nyan thos kyi theg pa la'o/ /de bzhin nyid ces bya ba la sogs pa ni theg pa chen po la'o/ /bsdu ba dang dbye ba zhes bya ba ni de dag kyang mdor bsdu ba dang / rgya cher bya ba gnyis kyis ston par mdzad pa pa'o/ /de dag gi lan 'debs na yang / mgo gcig tu lan gdab pa la sogs pas lan 'debs par mdzad de/ ci nas sems can thams cad 'chi bar 'gyur ram zhes dris na/ 'chi bar 'gyur ro zhes mgo gcig tu lan gdab par bya'o/ /rnam par dbye zhing lan gdab pa ni shi ba thams cad skye bar 'gyur zhes dris na/ sems can gang dag nyon mongs pa dang bcas pa de dag ni skye bar 'gyur la/ nyon mongs pa med pa rnams ni skye bar mi 'gyur ro zhes rnam par dbye zhing lan gdab par bya'o/ /dris te lan gdab pa ni ci mi rnams khyad par du 'phags pa yin nam 'on te dman pa yin zhes dris na/ de dag gang la ltos te 'dri/ gal te ngan song bdag la ltos te 'dri na ni de dag pas khyad par du 'phags pa yin no zhes brjod par bya dgos la/ 'on te lha rnams la ltos te 'dri na ni dman pa yin no zhes brjod par bya dgos pas dris te lan gdab par bya'o/ /gzhag pa zhes bya ba ni ci phung po rnams dang bdag gcig gam tha dad ces 'dri na/ de ni gzhag par bya ste/ bdag rdzas su med pa'i phyir ro/ /gsang ba zhes bya ba ni sems can yongs su ma smin pa dag la chos zab mo gsang bar bya ba'i phyir ro/ /bsgrags pa zhes bya ba ni/ de las bzlog pa'i phyir ro/ /de lta bu dang mthun pa zhes bya ba ni/ gang zag gdags pa la sogs pa gzhan dag kyang yongs su shes par bya ba'i don yin par rig par bya'o/ /ji snyed kyis zhes bya ba ni kun rdzob la sogs pa'i rnam pa dag gis so/ /ji lta ba bzhin zhes bya ba ni nyan thos kyi theg pa la ni sdug bsngal la sogs pa'i bden pa dag gis so/ /theg pa chen po la ni de bzhin nyid la sogs pa dag gis shes par bya'o/ /byams pa de la yongs su shes pa ni de gnyi ga 'dzin par byed pa zhes bya ba ni yongs su shes par bya ba'i dngos po phung po la sogs pa dang / yongs su shes par bya ba'i don ji snyed yod pa nyid dang ji lta ba bzhin du yod pa nyid la dmigs pa nyid kyis 'dzin par byed pa byang chub kyi phyogs dang mthun pa'i chos dran pa nye bar gzhag pa la sogs pa ni yongs su shes pa yin te/ shes pa'i ngo bo nyid yin pa'i phyir ro/ /yongs su shes pa rnam par bshad nas yongs su shes pa'i 'bras bu 'thob pa bstan pa'i phyir/ byams pa de la yongs su shes pa'i 'bras bu 'thob pa ni zhes bya ba la sogs pa gsungs so/ /'di lta ste 'dod chags dang zhe sdang dang gti mug 'dul ba zhes bya ba ni bdag dang gnyi ga'i lus dang / tshor ba dang sems dang chos dran pa nye bar gzhag pa la sogs pas/ 'dod chags la sogs pa 'dul ba'o/ /ma lus par spong ba zhes bya ba ni yongs su gtugs te spong ba'o/ /dge sbyong nyid kyi 'bras bu rnams zhes bya ba ni rgyun du zhugs pa la sogs pa bzhi'o/ /nyan thos dang de bzhin gshegs pa'i yon tan 'jig rten pa zhes bya ba ni bsam gtan dang / tshad med pa la sogs pa'o/ /'jig rten las 'das pa zhes bya ba ni zad pa dang mi skye ba shes pa la sogs pa'o/ /thun mong zhes bya ba ni nyon mongs pa med pa dang / smon nas shes pa la sogs pa'o/ /de dag mngon du bya ba gang yin pa ni/ yongs su shes pa'i 'bras bu thob pa yin no/ /yongs su shes pa'i 'bras bu thob pa bstan nas/ yongs su shes pa'i 'bras bu thob pa de rab tu rig par byed pa bstan pa'i phyir/ byams pa de rab tu rig par byed pa ni zhes bya ba la sogs pa gsungs so/ /mngon sum du byas pa'i chos de dag nyid la zhes bya ba ni bstan ma thag pa dag la'o/ /rnam par grol bar shes pa zhes bya ba ni rang gi rig pa'o/ /gzhan dag la yang rgya cher ston pa dang / yang dag par ston pa zhes bya ba ni de bzhin gshegs pa dang / thun mong la sogs pa'i yon tan rang gis mngon sum du byas pa dag gzhan gyi rgyud la go bar byed pa zhes bya ba'i tha tshig go/ /byams pa don lnga po de dag gis kyang don thams cad bsdus par rig par bya'o zhes bya ba bstan nas byams pa yang byang chub sems dpa' zhes bya ba la sogs pas ji ltar rnam pa lngas don thams cad so so yang dag par rig pa de bzhin du/ rnam pa bzhis don so so yang dag par rig pa yin te zhes bya bar ston to/ /don rnam pa bzhi gang zhe na zhes 'dri ba la sems kyis len pa'i don dang / myong ba'i don dang rnam par rig pa'i don dang kun nas nyon mongs pa dang / rnam par byang ba'i don gyis te zhes bya ba la sogs pas/ ji ltar rnam pa lngas don thams cad so so yang dag par rig pa de bzhin du rnam pa bzhis don so so yang dag par rig pa yin te zhes bya ba bstan te/ bzhi gang zhe na zhes 'dri ba la sems kyis len pa'i don dang / myong ba'i don dang / rnam par rig pa'i don dang / kun nas nyon mongs pa dang / rnam par byang ba'i don gyis te zhes bya ba gsungs so/ /sems kyis len pa'i don ni/ kun gzhi rnam par shes pa'i bag chags te/ rgyu nyid yin pa'i phyir ro/ /myong ba'i don dang ni sems de nyid kyis bdag tu rmongs pa dang / bdag tu lta ba dang / bdag tu nga rgyal dang / bdag la chags pa dang / myong ba'i don yin pa'i phyir ro/ /rnam par rig pa'i don ni phyi rol du dmigs pa'i 'jug pa'i rnam par shes pa rnams kyis rnam par rig pa tsam nyid kyis gnas dang gnas pa dang / dmigs pa'i rnam par gyur pa tha dad pa'i dngos po yin par ston to/ /kun nas nyon mongs pa dang / rnam par byang ba'i don ni sems de nyid kyi sems dang sems las byung ba de dag gi gnas dang gnas pa dang / dmigs pa'i rnam pa dag ma rtogs pa dang rtogs pa'o/ /byams pa don rnam pa bzhi po de dag gis kyang don thams cad bsdus par rig par bya'o zhes bya bas don thams cad bsdus pa bstan nas/ byams pa yang zhes bya ba la sogs pas/ byang chub sems dpa' rnam pa gsum gyis don so so yang dag par rig pa yin te zhes bya bar ston to/ /tshig 'bru'i don dang / don gyi don dang / khams kyi don gyis so zhes bya ba la tshig 'bru'i don ni gnas so/ /don gyi don ni gnas pa yin no/ /khams kyi don ni gnyi ga'i don to/ /byams pa de la don gyi don ni rnam pa bcur rig par bya ste zhes bya ba la sogs pa la/ de kho na'i mtshan nyid ces bya ba ni gzung ba nyid kyis so/ /yongs su shes pa'i mtshan nyid ces bya ni 'dzin pa nyid kyis so/ /spang ba'i mtshan nyid ces bya ba ni bral ba nyid kyis so/ /mngon du bya ba'i mtshan nyid ces bya ba ni 'thob pa nyid kyis so/ /bsgom pa'i mtshan nyid ces bya ba ni chud mi za ba'i tshul gyis so/ /de kho na'i mtshan nyid la sogs pa de dag nyid kyi rnam pa rab tu dbye ba'am mtshan nyid ces bya ba ni me long gi de kho na dang / snang ba'i de kho na zhes bya ba la sogs pa'i rnam pa rab tu dbye bas so/ /gnas dang gnas par 'brel pa'i mtshan nyid ces bya ba la gnas ni de kho na la sogs pa'i chos so/ /gnas pa ni don to/ /yongs su shes pa la sogs pa'i bar du gcod pa'i mtshan nyid ces bya ba ni sgrib pa la sogs pa'o/ /rjes su mthun pa'i mtshan nyid ces bya ba ni legs par thob pa la sogs pa'o/ /yongs su mi shes pa la sogs pa'i nyes dmigs ni bdag dang gzhan gyi don yongs su nyams pa'o/ /yongs su shes pa la sogs pa'i phan yon ni bdag dang gzhan gyi don phun sum tshogs pa'o/ /byams pa de la khams kyi don ni khams lnga ste zhes bya ba la/ 'jig rten gyi khams ni snod kyi 'jig rten gyis bsdus pa ste/ de ni byang chub sems dpa' rnam par sbyang bar bya ba yin pa'i phyir ro/ /sems can gyi khams ni yongs su smin par bya ba yin pa'i phyir ro/ /chos kyi khams ni rtogs par bya ba yin pa'i phyir ro/ /gdul ba'i khams ni yongs su smin par byar rung ba'i phyir ro/ /gdul ba'i thabs kyi khams ni legs par bstan pa'i dngos po yin pa'i phyir ro/ /byams pa don rnam pa gsum po de dag gis kyang don thams cad bsdus par rig par bya'o zhes bya ba ni drang ba'i don dang / nges pa'i don ma lus par bsdus par blta bar bya'o/ /bcom ldan 'das kyis thos pa las byung ba'i shes rab kyis don so so yang dag par rig pa gang lags pa dang zhes bya ba la sogs pas ni thos pa dang / bsams pa dang bsgoms pa las byung ba rnams la tha dad du bgyi ba ci mchis lags zhes zhus pa yin no/ /byams pa byang chub sems dpa' thos pa las byung ba'i shes rab kyis ni zhes bya ba la thos pa las byung ba'i shes rab ni tshig 'bru la gnas te/ 'byung ba kho na yin gyi don las ni ma yin no/ /sgra ji bzhin pa dang dgongs pa med pa kho na 'dzin par byed pa ni/ chos zab mo dag la nges par ma bsams pa'i phyir ro/ /mngon du ma gyur pa ni mngon sum du ma byas pa'i phyir ro/ /rnam par thar pa'i rjes su mthun pa zhes bya ba ni rnam par thar pa'i rgyur gyur pa ste/ brgyud pas don so so yang dag par rig pa'i phyir ro/ /rnam par thar par byed pa ni ma yin no/ /byams pa bsams pa las byung ba'i shes rab kyis ni zhes bya ba la/ bsams pa las byung ba zhes bya ba ni rigs pas bsams pa las byung ba ste/ des tshig 'bru la gnas pa kho na dang / sgra ji bzhin ma yin pa dang / dgongs pa can gyi don 'dzin pa ni/ thos pa yongs su 'dris pa'i phyir ro/ /mngon du ma gyur pa dang rnam par thar pa dang ches rjes su mthun pa/ rnam par thar pa'i rkyen nyid yin pa'i phyir ro/ /rnam par thar par byed pa ma yin pa'i don so so yang dag par rig par byed pa ni/ /rnam par thar pa mngon sum du ma byas pa'i phyir ro/ /byams pa byang chub sems dpas bsgoms pa las byung ba'i shes rab kyis ni zhes bya ba la bsgoms pa las byung ba'i shes rab ni chos nges pa las byung ba yin te/ des tshig 'bru la gnas pa dang tshig 'bru la gnas pa ma yin pa/ /'dzin par byed pa ni shin tu 'dris pa'i phyir/ sgra ji bzhin pa dang dgongs pa can 'dzin pa ni thos pa'i bag chags yongs su smin pa'i phyir ro/ / shes bya'i dngos po dang cha mthun pa zhes bya ba ni/ rnam pa ji snyed kyis ji lta ba bzhin shes par bya ba'i dngos po gang yin pa'i dngos po de dang cha mthun pa'o/ /ci 'dra ba zhig ce na/ ting nge 'dzin gyi spyod yul gzugs brnyan gyis zhes gsungs pa ste/ thos pa dang bsams pa'i brjod pa'i spyod yul gyis so so yang dag par rig par byed pa ma yin no/ /mngon du gyur pa ni so so rang rig pa'i phyir ro/ /rnam par thar pa dang ches shin tu rjes su mthun pa zhes bya ba ni/ de dang nye bar gyur pa yin pa'i phyir ro/ /rnam par thar par byed pa'i don kyang so so yang dag par rig par byed pa ni mngon sum du gyur pa'i phyir ro/ /de dag gi tha dad du bya ba ni de yin te zhes bya ba ni thos pa dang bsams pa dang bsgoms pa las byung ba'i shes rab rnams kyi'o/ /bcom ldan 'das byang chub sems dpa' zhi gnas dang lhag mthong sgom pa zhes bya ba la sogs pa rgya cher gsungs pa la/ 'dres pa'i chos la dmigs pa'i zhi gnas dang lhag mthong la shes rab gang yin pa de ni shes pa yin no zhes bya ba ni rnam pa sna tshogs ma yin pa'i phyir ro/ /ma 'dres pa'i chos la dmigs pa'i zhi gnas dang lhag mthong la shes rab gang yin pa de ni mthong ba yin no zhes bya ba ni rnam pa sna tshogs yin pa'i phyir ro/ /bcom ldan 'das byang chub sems dpa' zhi gnas dang lhag mthong bsgom pas zhes bya ba la sogs pa la yid la bgyid pa gang gis mtshan ma gang ji ltar rnam par sel bar bgyid pa lags zhes bya bas ni byang chub sems dpa' chos dang don so so yang dag par rig pas yid la byed pa gang gis mtshan ma gang ji ltar rnam par sel bar byed ces zhu ba rnam pa gsum bstan to/ /de bzhin nyid la byed pas zhes bya ba ni/ gnyis med pa yid la byed pa zhes bya ba'i tha tshig go/ /chos kyi mtshan ma dang don gyi mtshan ma yang rnam par sel bar byed la zhes bya ba ni mtshan ma rnam pa gnyis so/ /chos kyi mtshan ma dang / don gyi mtshan ma rnam par sel bar byed de/ mtshan ma zhes bya ba ni dmigs pa zhes bya ba'i tha tshig go/ /ji ltar rnam par sel bar byed ces/ ming la ming gi ngo bo nyid kyang mi dmigs shing zhes bya ba la sogs pa gsungs te/ chos kyi mtshan ma ni ming dang tshig dang yi ge'i ngo bo nyid yin pa'i phyir ro/ /de'i gnas kyis chos kyang mi mthong ngo / /ming gi chos kyi gnas ji lta ba bzhin du tshig dang yi ge'i chos kyi mtshan ma yang rnam par sel ba na/ yang dag par rjes su mi mthong ngo / /don thams cad la yang de bzhin du rig par bya'o zhes bya ba ni rnam pa bcu dang / rnam pa lnga dang / rnam pa bzhi dang / rnam pa gsum po gang dag bstan pa de dag kyang yang dag par rjes su mi mthong ba'o/ /khams kyi bar la khams kyi ngo bo nyid kyang mi dmigs shing zhes bya ba ni/ khams lnga po gang dag bstan pa de dag gi ngo bo nyid kyang rnam par sel bar byed pa na yang dag par rjes su mi mthong ba'o/ /de'i gnas kyi mtshan ma yang zhes bya ba ni don gyi gnas kyi mtshan ma ste/ don gyi gnas ni chos yin pas mtshan ma de yang rnam par sel bar byed pa na/ yang dag par rjes su mi mthong bas rnam par sel to/ /de bzhin nyid yid la byed pa ni gnyis med pa nyid yin pa'i phyir/ chos kyi mtshan ma ming dang tshig dang yi ge gang yin pa dang / 'dzin pa la sogs pa don gang dag yin pa de dag gi de bzhin nyid bsgom pa la gnyis med pa'i rnam pa yin pas mtshan ma de dag yang dag par rjes su mi mthong ngo zhes bya ba'i tha tshig go/ /bcom ldan 'das ci lags zhes bya ba la sogs pas/ de bzhin nyid kyi don so so yang dag par rig pa'i mtshan ma zhes bya ba la/ de bzhin nyid so so yang dag par rig pa ni rnam pa thams cad mkhyen pa nyid de/ de'i dmigs pa ni dngos po med pa'o/ /de skad du shes rab kyi pha rol tu phyin pa las kyang / rab 'byor rnam pa thams cad mkhyen pa nyid kyi dmigs pa ni/ dngos po med pa yin/ rnam pa ni zhi ba yin/ bdag po ni dran pa yin/ mtshan nyid ni med pa yin no zhes gsungs so/ /byams pa de bzhin nyid kyi don so so yang dag par rig pas ni chos dang chos kyi mtshan ma thams cad zil gyis gnon gyi zhes bya ba ni/ chos dang don gyi mtshan ma thams cad ni yang dag pa ma yin pa'i kun du rtog pa yin la/ de'i gnyen po ni de bzhin nyid kyi don so sor yang dag par rig pa yin pas/ des de zil gyis gnon to/ /de ni gang gis kyang zil gyis mnan par bya ba yin par nga mi smra'o zhes bya ba ni der lta ba'i mtshan ma thams cad kyi gnyen po yin pa'i phyir dang / dmigs pa dang rnam pa yongs su ma chad pa yin pa'i phyir gang gis kyang zil gyis mi non to/ /bcom ldan 'das/ bcom 'das kyis chab rnyog pa can mchis pa'i snod kyi dpe dang zhes bya ba la sogs pa la rgya cher gsungs pa la/ sems la so sor brtag pa ni gang lags/ de bzhin nyid ni gang las dgongs te/ bka' stsal lags zhes bya ba ni so sor brtags pa rnam pa gsum dang / de bzhin nyid rnam pa bdun yod pas de'i phyir zhus so/ /byams pa sems la so sor brtags pa gsum gyi phyir te zhes bya ba la sogs pas ni 'di skad bstan te/ thos pa las byung ba dang / bsams pa las byung ba dang / bsgoms pa las byung ba'i sems la so sor brtags pa dang rnam par rig pa'i de bzhin nyid ni gnyis su med pa yin pas/ de'i phyir de las dgongs te/ yongs su bstan pa yin no zhes bya ba'i tha tshig go/ /byams pa'i le'u'i kA ri ka/ /bcom ldan 'das byang chub sems dpa' de ltar chos dang don so so yang dag par rig pa dang mtshan ma rnam par sel ba/ chos dang don gyi mtshan ma zil gyis gnon pa la zhugs pa'i mtshan ma du ma zhig ni/ rnam par bsal dka' ba dag lags/ gang gis ni de dag rnam par sel lags zhes zhus pa dang / bcu ste zhes bya ba la sogs pa gsungs so/ /chos dang don so so yang dag par rig par byed pa'i tshig dang / yi ge'i mtshan ma sna tshogs gang yin pa de ni chos thams cad stong pa nyid kyis rnam par sel to zhes bya ba ni/ chos thams cad stong pa nyid las ma gtogs pa'i tshig dang yi ge'i mtshan ma sna tshogs zhes bya ba'i chos gzhan med pa'i phyir ro/ /gnas pa'i de bzhin nyid kyi don so so yang dag par rig par byed pa'i skye ba dang / 'jig pa dang / gnas pa dang / gzhan du gyur pa nyid kyi rgyun gyi rjes su 'jug pa'i mtshan ma gang yin pa de ni mtshan nyid stong pa nyid thog ma dang tha ma med pa stong pa nyid kyis rnam par sel to zhes bya ba la gnas pa zhes bya ba ni/ 'du byed dus gsum du gtogs pa rnams kyi skye ba dang / gnas pa dang / rga ba dang / mi rtag pa'i mtshan nyid do/ /de yang mtshan gzhi med pa'i phyir/ mtshan nyid stong pa dang / mtshan gzhi med pa'i phyir/ mtshan gzhi'i mtshan nyid kyang stong pa yin te/ mtshan gzhi dang mtshan nyid gcig dang / tha dad pa bral ba'i phyir ro/ /de skad du/ gal te mtshan nyid mtshan gzhi las/ /gzhan na mtshan gzhi mtshan med 'gyur/ /gcig na gnyi ga'i dngos med ces/ /yang dag gsung ba khyod kyis gsungs/ /zhes smras pa lta bu'o/ /thog ma dang tha ma med pa ni sngon dang phyi ma'i mtha' med pa ste/ sngon dang phyi ma'i mtha' med pa la ni yang dag par gnas pa med pa'i phyir ro/ /'dzin pa'i don so so yang dag par rig par byed pa'i 'jig tshogs la lta ba'i mtshan ma dang / nga'o snyam pa'i mtshan ma gang yin pa de ni nang stong pa nyid dang mi dmigs pa stong pa nyid kyis rnam par sel to zhes bya ba la 'dzin pa ni mig la sogs pa dang / sems dang sems las byung ba rnams te/ de la bdag dang bdag gir 'dzin pa'i mtshan ma gang zag tu snang ba gang yin pa de ni nang stong pa nyid kyis stong pa dang / mi dmigs pa stong pa nyid kyis stong ste/ ngo bo nyid mi dmigs pa'i phyir ro/ /gzung ba'i don so so yang dag par rig par byed pa'i longs spyod la lta ba'i mtshan ma gang yin pa de ni phyi stong pa nyid kyis rnam par sel to zhes bya ba la gzung ba ni gzugs la sogs pa'i phyi rol na snang ba dag ste/ de dag ni rdul phra rab re re dang / bsdus pa dag la stong pa yin te/ kha dog dang dbyibs yul du snang ba'i ngo bo nyid kyi rang gi ngo bor byed pa mi rigs pa'i phyir ro/ /yongs su longs spyod pa'i don du skyes pa dang bud med kyi bsnyen bkur dang yo byad ldan pa so so yang dag par rig par byed pa'i nang gi bde ba'i mtshan ma dang / phyi rol gyi sdug pa'i mtshan ma gang yin pa de ni phyi nang stong pa nyid dang / rang bzhin gyis stong pa nyid kyis rnam par sel to zhes bya ba la nang gi bde ba'i mtshan ma zhes bya ba ni log pa'i tshor ba la mos pa'o/ /phyi rol gyi sdug pa'i mtshan ma zhes bya ba ni/ skyes pa dang bud med kyi lus la log par mos pa ste/ de ni rmi lam la sogs pa log par mos pa bzhin du stong pa yin te/ nang dang phyi rol la mos pa de'i rang bzhin de ni stong pa yin te/ gzod ma nas ma skyes pa'i phyir ro/ /gnas kyi don so so yang dag par rig par byed pa'i tshad med pa'i mtshan ma gang yin pa de ni chen po stong pa nyid kyis rnam par sel to zhes bya ba la 'jig rten gyi khams tshad med pa mngon par bsgrub pa ni nam mkha'i khams dang 'dra bar chen po stong pa nyid kyis stong pa'i phyir ro/ /de ltar gzugs med pa la brten te/ nang gi zhi ba rnam par thar pa'i mtshan ma gang yin pa de ni/ 'dus byas stong pa nyid kyis rnam par sel to zhes bya ba ni 'dus byas gang yin pa ci yang rung ba de ni stong pa nyid yin te/ rgyu dang rkyen la rag las pa'i phyir ro/ /mtshan nyid kyi de bzhin nyid kyi don so so yang dag par rig par byed pa'i gang zag la bdag med pa'i mtshan ma dang / chos la bdag med pa'i mtshan ma dang / rnam par rig pa'i mtshan ma dang / don dam pa'i mtshan ma gang yin pa de ni mtha' las 'das pa stong pa nyid dang / dngos po med pa'i ngo bo nyid dang / dngos po med pa'i ngo bo nyid stong pa nyid dang / don dam pa'i stong pa nyid kyis rnam par sel to zhes bya ba la/ gang zag la bdag med pa'i mtshan ma gang yin pa de ni mtha' las 'das pa stong pa nyid kyis stong ste/ gang zag yod na ni gang zag dgag pa yang rigs par 'gyur ro/ /chos la bdag med pa'i mtshan ma ni dngos po med pa stong pa nyid kyis stong ste/ chos rnams yod na ni chos dgag pa yang yod do/ /rnam par rig pa com gyi mtshan ma ni dngos po med pa'i ngo bo nyid stong pa nyid kyis stong ste/ 'khrul pa'i rang bzhin gyi rnam par rig pa ni/ dngos po med pa'i ngo bo nyid kho na yin te/ gnyis ma grub pa'i phyir ro/ /don dam pa'i mtshan ma ni don dam pa stong pa nyid kyis stong ste/ dgag par bya ba dang 'gog par byed pa gnyis don dam pa ma yin pa'i phyir dang / dgag par bya ba med pa'i phyir dang / 'gog par byed pa nam yang gsal bar byed pa yod pa ma yin pas/ de'i phyir stong pa nyid rtogs pa las gzhan pa don dam pa 'ga' yang med pa'i phyir ro/ / rnam par dag pa'i de bzhin nyid kyi don so so yang dag par rig par byed pa'i 'dus ma byas kyi mtshan ma dang / 'gyur ba med pa'i mtshan ma gang yin pa de ni/ 'dus ma byas stong pa nyid dang / dor ba med pa stong pa nyid kyis rnam par sel to zhes bya ba la rnam par dag pa'i de bzhin nyid ces bya ba ni/ 'gog pa'i bden pa ste/ de ni 'dus ma byas pa dang 'gyur ba med pa yin la/ 'dus ma byas pa dang / 'gyur ba med pa de gnyis kyi mtshan ma gzung ba de ni 'dus ma byas stong pa nyid dang / dor ba med pa stong pa nyid kyis rnam par sel bar byed do/ / mtshan ma de'i gnyen po stong pa nyid de nyid la byed pa'i stong pa nyid kyi mtshan ma gang yin pa de ni stong pa nyid stong pa nyid kyis rnam par sel to zhes bya ba ni stong pa nyid shes pa gang gis mtshan ma thams cad rnam par sel bar byed pa de yang stong pa'i phyir ro/ /bcom ldan 'das mtshan ma rnam pa bcu rnam par sel bar bgyid pa na zhes bya ba la sogs pa rgya cher gsungs pa la/ ting nge 'dzin gyi spyod yul gzugs brnyan gyi mtshan ma rnam par sel bar byed pa ni gnyen po yin la/ kun nas nyon mongs pa'i chos kyi mtshan ma ni mi mthun pa'i phyogs yin pa'i phyir ro/ / byams pa stong pa nyid de dag ni zhes bya ba la sogs pa ni don re re yang mtshan ma thams cad kyi gnyen por mi 'gyur ba ni ma yin no zhes bya ba ni de dag thams cad kyang rnam par dag pa la dmigs pa yin no zhes bya ba'i tha tshig go/ /bcom ldan 'das theg pa chen po la zhes bya ba la sogs pas ni chud mi za bar bya ba'i phyir/ gdags pa zhus te/ stong pa nyid ni byang chub sems dpa' rnams kyi chud mi za ba'i rgyu mngon pa'i nga rgyal gyi gnyen po yin pa'i phyir/ byang chub sems dpa' de'i mtshan nyid yongs su shes na theg pa chen po la chud za bar mi 'gyur ro/ / legs so legs so bya ba la sogs pa la/ stong pa nyid las rab tu nyams pa zhes bya ba ni/ stong pa nyid kyi mtshan nyid yongs su mi shes pa zhes bya ba'i tha tshig go/ /theg pa chen po mtha' dag las kyang rab tu nyams par 'gyur ba'i phyir ro zhes bya ba ni stong pa nyid kyis skrag pa'i phyir ro/ /byams pa de'i phyir nyon cig dang zhes bya ba la sogs pa la/ gzhan gyi dbang gi mtshan nyid ces bya ba ni rgyu dang rkyen la rag las pa'o/ /yongs su grub pa'i mtshan nyid ces bya ba ni gnyis med pa'i mtshan nyid do/ /rnam pa thams cad kun nas nyon mongs pa dang rnam par byang ba pa'i kun brtags pa'i mtshan nyid dang / shin tu bral ba nyid dang zhes bya ba de la chos gang dag rgyu dang rkyen la rag las pa de dag ni gzhan gyi dbang gi mtshan nyid de/ skye ba ngo bo nyid med pa nyid kyis stong pa'i ngo bo nyid yin no/ /de nyid kyis rnam par byang ba rnam par dag pa ni yongs su grub pa'i mtshan nyid de/ don dam par stong pa nyid kyis stong pa yin no/ /gzhan gyi dbang gi mtshan nyid la kun nas nyon mongs pa'o snyam pa dang yongs su grub pa'i mtshan nyid la rnam par byang ba'i snyam du rnam par rtog pa gang yin pa de ni kun brtags pa'i mtshan nyid de ni mtshan nyid stong pa nyid kyis stong pa yin no/ /de la mi dmigs pa zhes bya ba ni gzhan gyi dbang gi ngo bo nyid la kun brtags pa'i ngo bo nyid de/ mi dmigs pa ste/ kun nas nyon mongs pa dang / rnam par byang ba'i ngo bo nyid du yongs su ma grub pa'i phyir ro/ /stong pa nyid du yongs su grub pa nyid kyis ni yongs su grub pa'i ngo bo nyid yin te/ rang gi ngang gis gcig pa yang ma yin tha dad pa yang ma yin te/ mtshan gzhi dang mtshan nyid bzhin no/ /de ni theg pa chen po la stong pa nyid kyi mtshan nyid bsdus pa zhes bya'o zhes bya ba ni kun rdzob dang don dam pa'i bden pas bsdus pa'i ngo bo nyid gsum stong pa'i phyir stong pa nyid kyi mtshan nyid bsdus pa yin no/ /bcom ldan 'das zhi gnas dang lhag mthong dag gis ting nge 'dzin du zhig bsdus lags zhes bya ba la sogs pa la bcom ldan 'das zhi gnas dang lhag mthong gi rgyu gang las byung ba lags zhes zhus pa las/ tshul khrims rnam par dag pa'i rgyu las byung ba zhes bya bar gsungs pa ni/ tshul khrims rnam par dag pa na mnyam par gzhag par 'gyur ba'o/ /thos pa dang bsams pa las byung ba'i lta ba rnam par dag pa'i rgyu las byung ba yin no zhes bya ba ni mnyam par gzhag pa'i thos pa dang / bsams pa las byung ba'i lta ba de rnam par dag par 'gyur ba'o/ /zhi gnas dang lhag mthong gi rgyu rtogs par byas nas 'bras bu zhu ba'i phyir/ bcom ldan 'das de dag gi 'bras bu gang lags par brjod par bgyi zhes bya ba gsol to/ /sems rnam par dag pa ni 'bras bu yin/ shes rab rnam par dag pa ni 'bras bu yin no zhes bya ba des ni 'di skad bstan te 'bras bu ni sems rnam par grol ba dang / shes rab rnam par grol ba yin no zhes bstan to/ / byams pa yang zhes bya ba la sogs pa rgya cher gsungs pas zhi gnas dang lhag mthong gi 'bras bu nges par byas nas/ las zhu ba'i phyir/ las ci lags zhes bya ba gsol to/ /byams pa 'ching ba rnam pa gnyis po las rnam par thar bar byed pa yin no zhes gsungs pa la 'ching ba rnam pa gnyis po de gang dag las mnyam pa la/ mtshan ma'i 'ching ba dang / gnas ngan len gyi 'ching ba las zhes bya ba gsungs te/ chags par 'gyur ba la sogs pa'i yul gyi mtshan ma gzung ba las 'dod chags la sogs pa nyon mongs pa skye ba'i mtshan ma'i 'ching ba'o/ / phung po rnams la bdag dang bdag gi dngos po mngon par zhen pa ni gnas ngan len gyi 'ching ba ste/ 'ching ba rnam pa gnyis po de dag las/ rnam par thar par byed pa ni zhi gnas dang lhag mthong gi las yin no/ /bcom ldan 'das bcom ldan 'das kyis gags rnam pa lnga gsungs pa gang dag lags pa de dag las zhes bya ba la sogs pa la lus dang longs spyod la lta ba zhes bya ba ni/ nang dang phyi rol gyi skye mched rnams la chags pa'o/ /'phags pa'i gtam zhes bya ba ni dam pa'i chos mnyan pa'i gtam mo/ /'brel par gnas pa zhes bya ba ni lus mi dben pa'o/ /cung zad tsam gyis chog par 'dzin pa zhes bya ba ni/ 'jig rten pa'i bsam gtan tsam gyis so/ /gcig gis ni sbyor bar mi byed do zhes bya ba ni lus mi dben pas te/ zhi gnas dang lhag mthong la sbyor bar mi byed pa'o/ /cig shos kyis ni sbyor ba mthar thug par mi 'gyur ro zhes bya ba ni cung zad tsam gyis chog par 'dzin pas te/ sbyor ba mthar thug par mi 'gyur ro/ /bcom ldan 'das sgrib pa lnga po gang dag lags pa de dag las zhes bya ba la sogs pa la/ rgod pa dang 'gyod pa zhes bya ba la rgod pa ni dbang po ma zhi ba'o/ /'gyod pa ni ngan pa byas pa'i dngos po ste/ dge ba'i las ma byas la mi dge ba'i las byas pa ni yid la chags pa'o/ /rmugs pa zhes bya ba ni lus dang sems las su mi rung ba'o/ /gnyid ces bya ba ni gnyid bro ba'o/ /the tshom zhes bya ba ni dkon mchog dang / bden pa dang / las dang 'bras bu dag las 'khrul pa'o/ /'dod pa la 'dun pa zhes bya ba ni 'dod pa'i yon tan lnga po dag la chags pa'o/ /gnod sems zhes bya ba ni/ sems can la rnam par sdang ba'o/ /bcom ldan 'das ji tsam gyis na zhi gnas kyi lam yongs su dag pa lags zhes bya ba la sogs pa la/ rmugs pa dang gnyid ni nang du zhum par byed pa yin pa'i phyir ro/ /rgod pa dang 'gyod pa ni phyi rol du rnam par g.yeng ba yin pa'i phyir ro/ /zhi gnas dang lhag mthong gis ting nge 'dzin thams cad bsdus pa yin la/ ting nge 'dzin de dag gi bar du gcod par byed pa'i chos ni sems rnam par g.yeng ba yin pas de ni yongs su shes par bya ste/ spang bar bya dgos pas de'i phyir/ bcom ldan 'das kyi zhi gnas dang lhag mthong la zhugs pas rnam pa du dag gis sems rnam par g.yeng ba yongs su 'tshal bar lags zhes bya ba gsol to/ /yid la byed pa'i rnam par g.yeng ba dang phyi rol du sems rnam par g.yeng ba zhes bya ba la sogs pas ni/ theg pa chen po la yang dag par zhugs pa'i byang chub sems dpas theg pa dman pa yid la byed pa'i rnam par g.yeng ba la sogs pa ni/ 'jig rten las 'das pa rnam par mi rtog pa'i ye shes kyi rten du gyur pa'i ting nge 'dzin gyi bar du gcod par byed pa yin pa'i phyir/ yongs su spang bar bya'o zhes ston to/ /snyoms par 'jug pa'i ro myang ba zhes bya ba ni bsam gtan dang gzugs med pa dang / snyoms par 'jug pa'i ro myong bar byed pa ni/ lha tshe ring po rnams su skye ba skyed par byed pa yin pas/ de'i phyir sems can gyi don bya ba nyams par 'gyur pa yin pa'i phyir ro/ /gal te phyi rol gyi mtshan ma la brten na zhes bya ba la sogs pas ni 'di skad bstan te/ rgyu'i gnas skabs na phyi rol gyi mtshan ma sdug pa dang mi sdug pa gzung ba gang yin pa de la brten nas gnas khang na gnas te nang du mtshan mar yid la byed pa ni mtshan ma med pa'i ting nge 'dzin gyi mi mthun pa'i phyogs yin pa'i phyir yongs su shes par bya ste/ spang bar bya'o zhes bstan to/ /gal te nang gi yid la byed pa la brten nas zhes bya ba la sogs pas ni/ gnas ngan len dang ldan pa'i lus ni nyon mongs pa thams cad kyi gnas yin pa'i phyir/ rnam par g.yeng bar byed pa yin par ston to/ /nang gi yid la byed pa la brten nas byung ba'i tshor ba la zhes bya ba ni 'jig tshogs la lta ba la brten pa'i yid la byed pa la brten nas/ byung ba'i tshor ba zag pa dang bcas pa ste/ srid pa dang rjes su mthun pa'i phyir dang / 'phags pa'i lam thams cad dang mi mthun pa'i phyir gnas ngan len gyi rnam par g.yeng ba'o zhes bya'o/ /zhi gnas dang lhag mthong ni ting nge 'dzin dang / shes rab kyi ngo bo nyid yin pa'i phyir sa thams cad na yang yod par bstan pa'i phyir/ bcom ldan 'das zhi gnas dang lhag mthong dag byang chub sems dpa'i sa dang po nas bzung nas/ de bzhin gshegs pa'i sa'i bar la gang gi gnyen po lags zhes bya ba zhus so/ /byams pa zhi gnas dang lhag mthong sa dang po la ni ngan song ba'i nyon mongs pa dang / las dang skye ba'i kun nas nyon mongs pa'i gnyen po yin no zhes bya ba ni gang zag dang chos su lta ba'i gnyen po ye shes thob pa'i phyir ro/ /gnyis pa la ni ltung ba phra mo'i 'khrul pa kun du 'byung ba rnams kyi gnyen po yin te/ tshul khrims rnam par dag pa'i phyir ro/ /gsum pa la ni 'dod pa'i 'dod chags kyi gnyen po yin te/ mi nyams pa'i bsam gtan dang / snyoms par 'jug pa thob pa'i phyir ro/ /bzhi pa la ni snyoms par 'jug pa la sred pa dang chos la sred pa'i gnyen po yin te byang chub kyi phyogs dang mthun la lan mang du gnas pa'i phyir dang / mdo sde la sogs pa'i chos sna tshogs kyi nga rgyal rnam par bshig pa'i phyir ro/ /lnga po la ni 'khor ba dang mya ngan las 'das pa dag la gcig tu mi phyogs pa nyid dang / mngon du phyogs pa nyid kyi gnyen po yin te/ 'phags pa'i bden pa bzhi bsgom pa na kun nas nyon mongs pa dang rnam par byang ba'i gnas mi dmigs pa'i phyir ro/ /drug pa la ni mtshan ma mang po kun du 'byung ba'i gnyen po yin te/ zhi gnas dang lhag mthong gi rnal 'byor gyis rten cing 'brel par 'byung ba'i de bzhin nyid la lan mang du gnas pa nyid kyis kun nas nyon mongs pa dang / rnam par byang ba'i mtshan ma nag po dang dkar po'i phyogs kyi de bzhin nyid mi mthong ba'i phyir ro/ /bdun pa la ni mtshan ma phra mo kun du 'byung ba'i gnyen po yin te/ bgrod pa gcig pa dang 'brel pas mtshan ma med pa'i gnas pa thob pa'i phyir ro/ /brgyad pa la ni mtshan ma med pa la sogs pa dang mtshan ma la dbang du ma gyur pa'i gnyen po yin te/ mngon par 'du byed pa med cing mtshan ma med pa la gnas pa'i phyir dang / sangs rgyas kyi zhing rnam par sbyong ba'i phyir ro/ /dgu pa la ni rnam pa thams cad du chos ston pa la dbang du ma gyur pa'i gnyen po yin te/ so so yang dag par rig pa dang sems can yongs su smin par bya ba yongs su grub pa'i phyir/ rnam pa thams cad du yongs su smin par bya ba'i mthu yod pa'i phyir ro/ /bcu pa la ni chos kyi sku yongs su rdzogs pa so so yang dag par rig pa mi thob pa'i gnyen po yin te/ ting nge 'dzin gyi sgo dang gzungs kyi sgo rnam par dag pa'i phyir ro/ /de bzhin gshegs pa'i sa la ni nyon mongs pa dang / shes bya'i sgrib pa shin tu phra ba mchog tu ches shin tu phra ba'i gnyen po yin te zhes bya ba ni/ ting nge 'dzin dang gzungs kyi sgo dpag tu med pas khyab pa'i phyir sangs rgyas thams cad kyis/ sangs rgyas nyid du dbang bskur ba'i byang chub sems dpa'i nyon mongs pa dang / shes bya'i sgrib pa'i bag chags phra mo dang / mchog tu phra ba gang yin pa de ni sangs rgyas kyi sa la spangs pa'i phyir ro/ /de legs par bcom pas thams cad la chags pa med pa dang / thogs pa med pa'i shes pa dang / mthong ba thob cing zhes bya ba ni/ shes bya thams cad la mngon du mi phyogs pa'i phyir chags pa med pa dang / gang la nyan thos la sogs pa'i shes pa thogs par 'gyur ba de la thogs pa med pa'i phyir/ thogs pa med pa'i shes rab dang / mthong ba brnyes pa'o/ /dgongs pa yongs su sgrub pa'i dmigs pa la zhes bya ba ni bdag dang gzhan gyi don mthar phyin pa thob pa'i phyir ro/ /chos kyi sku shin tu rnam par dag pa zhes bya ba ni nyon mongs pa dang shes bya'i sgrib pa gtan spangs pa'i phyir ro/ /chos kyi sku shin tu rnam par dag pa la gnas pa yin no zhes bya ba ni gnas thams cad gyur pa'i phyir ro/ /'thob pa'i thabs zhu ba'i phyir/ bcom ldan 'das byang chub sems dpa' zhi gnas dang lhag mthong la ji ltar sgrub na zhes bya ba la sogs pa gsol to/ /zhi gnas dang lhag mthong ni nyan thos la sogs pa'i byang chub rnams kyi byed rgyu thun mong yin pa'i phyir/ ji ltar bla na med pa yang dag par rdzogs pa'i byang chub mngon par rdzogs par sangs rgyas par 'gyur lags zhes bya ba zhus so/ /bcom ldan 'das kyis bka' stsal pa zhes bya ba la sogs pa la/ de bzhin nyid rnam pa bdun las brtsams te zhes bya ba ni 'byung ba'i de bzhin nyid dang / mtshan nyid kyi de bzhin nyid dang / rnam par rig pa'i de bzhin nyid dang / gnas pa'i de bzhin nyid dang / log par sgrub pa'i de bzhin nyid dang / rnam par dag pa'i de bzhin nyid dang / yang dag par sgrub pa'i de bzhin nyid de/ de bzhin nyid rnam pa bdun po de dag las brtsams te'o/ /ji ltar thos pa dang bsams pa'i chos rnams la zhes bya ba ni zhi gnas dang lhag mthong dang de bzhin nyid rnam pa bdun gyi dmigs par gyur pa'i chos rnams la'o/ /chos de dag las sems ji lta bur sems par byed ce na/ mnyam par gzhag pa'i sems kyis zhes bya ba gsungs te/ chos de dag la mnyam par gzhag pa'i sems kyis dmigs par byed pa na sems kyi gzugs brnyan du gyur pa yin pas de'i phyir/ /de dag sems kyi de bzhin nyid las bzlog par 'gyur ro/ /legs par gzung ba dang legs par bsams pa dang legs par rnam par gzhag pa nyid kyis ni de bzhin nyid de nang du yid la byar rung bar ston to/ /de nyid ces bya ba ni de bzhin nyid do/ /de de ltar de bzhin nyid yid la byed pa na zhes bya ba la/ de zhes bya ba ni byang chub sems dpa'o/ /mtshan ma phra mo kun du 'byung ba thams cad la yang re zhig sems lhag par btang snyoms 'jog na zhes bya ba ni/ de bzhin nyid yid la byed pa ni mtshan ma thams cad kyi gnyen po yin pa'i phyir/ de yid la byed pa'i byang chub sems dpa' la ni mtshan ma phra mo dag kyang kun du mi 'byung na/ mtshan mar rags pa kun du 'byung ba lta smos kyang ci dgos zhes bstan to/ /mtshan ma phra mo dag ni/ sems kyis len pa'i mtshan ma zhes bya ba nas/ chos la bdag med pa'i mtshan ma zhes bya ba'i bar dag go/ /de ltar zhugs shing zhes bya ba ni mtshan ma thams cad rnam par brtsal ba'i phyir de bzhin nyid la zhugs pa'o/ /de la mang du gnas pa zhes bya ba ni de bzhin nyid yid la bya ba sgom pa la lan mang du gnas pa'o/ /dus dus su zhes bya ba ni/ 'di ni zhi gnas kyi don yin te lhag mthong gi ma yin no/ /'di ni lhag mthong gi dus yin gyi/ zhi gnas kyi dus ma yin no/ /'di ni zung du 'brel ba'i lam gyi dus yin no zhes bya ba'o/ /de ltar dus ji ltar bya ba bzhin gnas pa'i byang chub sems dpa' gags dang sgrib pa dang rnam par g.yeng ba dag las sems rnam par sbyong bar byed pa de la/ ci zhig 'byung bar 'gyur zhe na/ nang gi so so bdag nyid la so so rang gis rig pa de bzhin nyid rnam pa bdun so sor rtog pa shes pa bdun skye bar 'gyur te zhes bya ba gsungs te/ de bzhin nyid rnam pa bdun gyis chos thams cad bsdus pa'i phyir ro/ /so so rang rig pa'i shes pa rnam pa bdun ni byang chub sems dpa'i mthong ba'i lam yin pas de'i phyir/ de ni de'i mthong ba'i lam yin no zhes bya ba gsungs so/ /de thob pas zhes bya ba la sogs pa la yang dag pa nyid kyi skyon med pa zhes bya ba ni dang po kho nar de kho na mthong ba'o/ / sa de'i phan yon yang nyams su myong ba yin no zhes bya ba ni byang chub sems dpa' sa dang po la phan yon gang dag bstan pa de dag nyams su myong ba zhes bya ba'i tha tshig go/ /des sngar zhes bya ba ni/ byang chub sems dpa' sa mthong ba'i lam 'thob pa'i snga rol te/ mos pas spyod pa'i sa la'o/ /rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan gyi dmigs pa thob pa ni rnam pa gnyis 'thob pa zhes bya ba'o/ /de ltar ni mthong ba'i lam thob pas dngos po'i mtha'i dmigs pa thob pa yin te zhes bya ba ni thams cad du 'gro ba'i don gyis chos kyi dbyings rab tu rtogs pa'i phyir dang / kun nas nyon mongs pa dang / rnam par byang ba'i gnas kyi dngos po mi dmigs pa'i phyir dang rtogs par bya ba'i mthar thug par gyur pa'i phyir dngos po'i mtha' ni rtogs pa'i chos kyi sku yin/ byang chub sems dpa' mthong ba'i lam la gnas pa ni zung du 'brel ba'i lam gyi dmigs pa chos kyi sku'i ngo bo nyid dngos po'i mtha'i dmigs pa de thob pa yin no/ /des gong ma rnams su bsgom pa'i lam la zhugs shing zhes bya ba ni sa gnyis pa la sogs pa'o/ /dmigs pa rnam pa gsum po de dag nyid yid la byed pa na zhes bya bas ni/ rnam par rtog pa dang bcas pa'i gzugs brnyan dang / rnam par mi rtog pa'i gzugs brnyan dang / dngos po'i mtha' nyid do/ /mtshan ma phra mo de gsum nang du yid la byed pa dang / 'di lta ste/ dper na la la zhig khye'u ches phra mos khye'u ches sbom po 'byin par byed pa de bzhin du yang / khye'us khye'u dbyung ba'i tshul du nang gi mtshan ma rnams rnam par sel ba ni rim gyis kun nas nyon mongs pa'i cha dang mthun pa'i mtshan ma thams cad rnam par sel bar byed de/ /mtshan ma rnams rnam par sel ba na/ gnas ngan len rnams kyang rnam par sel bar byed do zhes bya ba la 'dod chags la sogs pa'i skyon dag ni mtshan ma rnams so/ /lta ba dag ni gnas ngan len rnams so/ /mtshan ma dang gnas ngan len thams cad legs par bcom pas/ rim gyis gong ma gong ma rnams su gser lta bur sems rnam par sbyong la zhes bya ba ni/ dper na gser gser mgar gyis gong nas gong du sbyong ba'i las kyis yongs su sbyong bar byed pa na/ ches 'od gsal bar 'gyur zhing de las gzhan pa'i sa le sbram dag gis mi 'phrogs pa de bzhin du sa gong ma gong ma rnams su bsgom pa'i lam la/ glo bur gyi dri ma thams cad dang bral bas sems las su rung bas ches 'od gsal bar 'gyur ro/ /de ltar tshul des bla na med pa yang dag par rdzogs pa'i byang chub kyi bar du mngon par rdzogs par 'tshang rgya zhing dgos pa yongs su grub pa'i dmigs pa yang thob ste zhes bya ba la dgongs pa yongs su grub pa ni bdag dang gzhan gyi don bya ba'i rjes su song bas chags pa med pa dang / thogs pa med pa'i shes pa dang / mthong ba brnyes pa'o/ /byang chub sems dpa' ji ltar sgrub par bgyid na zhes bya ba la sogs pa zhus pa la/ byams pa byang chub sems dpa' gnas drug la mkhas pa ni/ byang chub sems dpa'i mthu chen po mngon par bsgrub pa yin te zhes bya ba la sogs pa gsungs te/ byang chub sems dpa' sems kyi skye ba dang / gnas pa dang / bslang ba dang / 'phel ba dang / 'grib pa dang / thabs la mkhas pas ni/ byang chub sems dpa'i mthu chen po mngon par bsgrub par 'gyur te/ byang chub sems dpa'i mthu chen po mngon par bsgrub pa ni/ sems kyi skye ba la sogs pa la rag las pa'i phyir ro zhes ston to/ /ji ltar na sems kyi skye ba la mkhas pa yin zhe na/ sems kyi skye ba rnam pa bcu drug shes na/ sems kyi skye ba la yang dag pa ji lta ba bzhin du mkhas pa yin te zhes bya ba gsungs so/ /brtan pa dang snod rnam par rig pa ni zhes bya ba la brtan pa rnam par rig pa zhes bya ba ni sa bon thams cad pa/ kun gzhi rnam par shes pa ste/ de ni kun nas nyon mongs pa dang rnam par byang ba'i chos rnams kyi bag chags bsgo bar bya ba yin pas brtan pa yin no/ /'jug pa'i rnam par shes pa rnams ni g.yo ba'i phyir bag chags bsgo bar bya ba ma yin gyi bag chags bsgo bar byed pa kho na yin te/ de dag ni dge ba la sogs pa'i ngo bo nyid yin pa'i phyir ro/ /snod rnam par rig pa ni gnas te/ brtan pa rnam par rig pa dang / snod rnam par rig pa de gnyis ni/ rnam pa dang dmigs pa yongs su ma chad pa nyid yin pa'i phyir ma rig pa yin no/ /sems de'i skye ba gang yin pa de ni brtan pa dang snod rnam par rig pa mi rig pa'i sems skye ba yin no/ /byang chub sems dpa' de la mkhas pa ni chos thams cad 'dres pa la dmigs pa'i kun gzhi rnam par shes pa'i sgrib pa dang gnas ngan len thams cad bsal ba'i phyir/ byang chub sems dpa'i mthu chen po mngon par sgrub par byed do/ /dmigs pa rnam pa sna tshogs rnam par rig pa ni zhes bya ba la sogs pa la/ gzugs la sogs pa yul cig car 'dzin pa'i phyir/ dmigs pa rnam pa sna tshogs rnam par rig pa yin no/ /nges par rtogs pa dang rjes su dran par nus pa'i phyir rnam par rtog pa yin no/ /'jug pa'i rnam par shes pa rnams shes par byed pa'i bdag nyid yin pa'i phyir yid kyi rnam par shes pa yin no/ /byang chub sems dpa' de la mkhas pa ni zhes bya ba ni thams cad la yang sbyar bar shes par bya'o/ /phyi rol dang nang gi yul cig car 'dzin pa zhes bya ba la/ phyi rol gyi yul ni gzugs la sogs pa'o/ /nang gi yul ni dmigs pa la sogs pa'o/ /de dag thams cad dus gcig tu 'dzin pa gang yin pa de ni yid kyi rnam par shes pa rnam par rtog pa can te/ de'i skye ba la mkhas pa yang snga ma bzhin no/ /skad cig thang cig yud tsam cig la zhes bya ba la sogs pa rgya cher gsungs pa la/ byang chub sems dpa' zhi gnas dang lhag mthong bsgom pa'i yid kyi rnam par shes pas skad cig gcig la cig car ting nge 'dzin mang po la snyoms par 'jug pa ni re zhig rung ste/ ting nge 'dzin ni nang du 'jug pa yin pa'i phyir ro/ /skad cig gcig la phyogs tha dad pa na rnam par gnas pa'i sangs rgyas kyi zhing mang po mthong ba dang de bzhin gshegs pa mang po mthong ba ji ltar yid kyi rnam par shes pa de nyid kyis mthong bar rung ste/ phyi rol gyi gzugs snang ba rnams ni mig gi rnam par shes pa'i yul yin pa'i phyir ro zhe na rung ste/ 'jug pa'i rnam par shes pa thams cad ni yid kyi rnam par shes pa'i yul yin pa'i phyir yid kyi rnam par shes pa rnam pa sna tshogs pa rnam par rtog pa dang bcas pa/ de nyid gnas de dang de nas 'jug pa na de dang de'i ming 'thob ste/ dper na sems pa lus dang ngag gi las bzhin te/ sems pa nyid bsod nams dang bsod nams ma yin pa dang / mi g.yo ba'i 'du byed kyi mtshan nyid lus dang ngag gi las shes par bya ba de bzhin du/ yid kyi rnam par shes pa zhi gnas dang lhag mthong gi yongs su dag pa de nyid kyis/ skad cig gcig la mig gi rnam par shes pa'i gzung ba sangs rgyas kyi zhing mang po dang / sangs rgyas bcom ldan 'das mang po mthong ba'i byang chub sems dpa' ni sems kyi skye ba rnam pa sna tshogs la mkhas pa yin par rig par bya'o/ /dmigs pa'i mtshan ma chung ngu rnam par rig pa'i yang sems skye ba'i dbang du mdzad pa kho na'o/ /'di lta ste/ 'dod pa dang ldan pa'i'o zhes bya ba ni 'dod pa'i khams dang ldan pa'i sems skye ba ni mnyam par ma bzhag pa'i sa pa yin pa'i phyir/ dmigs pa'i mtshan ma chung ngu yin no/ /dmigs pa'i mtshan ma chen por gyur pa rnam par rig pa'i ni 'di lta ste/ gzugs dang ldan pa'i'o zhes bya ba ni gzugs kyi khams dang ldan pa'i sems skye ba ni shin tu mnyam par gzhag pa'i sa pa yin pa'i phyir/ dmigs pa'i mtshan ma chen por gyur pa yin no/ /dmigs pa'i mtshan ma chad med pa rnam par rig pa'i ni/ 'di lta ste/ nam mkha' dang rnam shes mtha' yas skye mched dang ldan pa'o zhes bya ba ni nam mkha' mtha' yas so/ /rnam shes mtha' yas so snyam du snyoms par 'jug pa dang / skye ba las sems skye ba gang yin pa de ni nam mkha' dang rnam par shes pa mtha' yas pa dang ldan pa yin pa'i phyir dmigs pa'i mtshan ma tshad med pa yin no/ /dmigs pa'i mtshan ma phra mo rnam par rig pa'i ni 'di lta ste/ ci yang med pa'i skye mched dang ldan pa'i'o zhes bya ba ni 'jig tshogs la lta ba dang ldan pa'i sems kyis ci yang med do snyam du mtshan ma phra mo la dmigs pa las sems skye ba gang yin pa de ni dmigs pa'i mtshan ma phra mo rnam par rig pa yin no/ /dmigs pa'i mtshan ma mthar thug pa rnam par rig pa'i ni 'di lta ste/ 'du shes med 'du shes med min skye mched dang ldan pa'i'o zhes bya ba ni/ khams dang gnas dang 'jig rten pa'i snyoms par 'jug pa'i mthar thug pa las/ dmigs pa'i mtshan ma mthar thug pa rnam par rig pa'i sems skye bar 'gyur ba'o/ /mtshan ma med pa rnam par rig pa'i ni 'di lta ste/ 'jig rten las 'das pa dang 'gog pa la dmigs pa'i'o zhes bya ba ni 'jig rten las 'das pa'i sems skye ba ni mtshan ma thams cad kyi gnyen po yin pa'i phyir mtshan ma med pa rnam par rig pa yin no/ /'gog pa la dmigs pa'i sems skye ba yang de bzhin no/ /sdug bsngal dang ldan pa'i ni 'di lta ste/ sems can dmyal ba'i 'o zhes bya ba ni sems can dmyal ba pa'i sems skye ba ni bde ba dang ma 'dres pa'i phyir sdug bsngal dang ldan pa yin no/ /tshor ba 'dren ma dang ldan pa'i ni/ 'di lta ste/ 'dod pa na spyod pa'i'o zhes bya ba ni bde ba dang sdug bsngal dang btang snyoms kyi tshor ba 'dren ma'i sems skye ba zhes bya ba'i tha tshig ste/ 'dod pa'i khams ni las kyi rnam par smin pa sna tshogs dang ldan pa yin pa'i phyir ro/ /dga' ba dang ldan pa ni 'di lta ste/ bsam gtan dang po dang bsam gtan gnyis pa'i'o zhes bya ba ni bsam gtan dang po dang gnyis pa gnyis la ni/ dben pa las skyes pa'i dga' ba dang ldan pa'i sems skye ba'i phyir ro/ /bde ba dang ldan pa'i ni 'di lta ste/ bsam gtan gsum pa'i'o zhes bya ba ni bsam gtan gsum pa la ni nang yongs su dang ba las/ sems las byung ba bde ba skye ba'i phyir ro/ /sdug bsngal ba yang ma yin bde ba yang ma yin pa dang ldan pa ni 'di lta ste/ bsam gtan bzhi pa dang / 'du shes med 'du shes med min skye mched kyi bar gyi'o zhes bya ba ni bsam gtan bzhi pa yan chad ni skyon rnam pa brgyad dang bral ba'i phyir/ btang snyoms dang ldan pa'i sems skye'o/ /skyon rnam pa brgyad ni rtog pa dang dpyod pa dang / dbugs rngub pa dang / dbugs 'byung ba dang / bde ba dang / sdug bsngal dang / yid bde ba dang / yid mi bde ba'o/ /nyon mongs pa can dang ldan pa'i ni 'di lta ste/ nyon mongs pa dang nye ba'i nyon mongs pa dang ldan pa'i'o zhes bya ba ni/ nyon mongs pa ni 'dod chags la sogs pa'o/ /nye ba'i nyon mongs pa ni khro ba la sogs pa'o/ /dge ba dang ldan pa'i ni 'di lta ste dad pa la sogs pa dang ldan pa'i'o zhes bya ba ni dkon mchog dang / bden pa dang / las dang 'bras bu la mngon par yid ches pa la sogs pa dang ldan pa'i sems skye ba zhes bya ba'i tha tshig go/ /lung du ma bstan pa dang ldan pa'i ni/ 'di lta ste/ de gnyi ga dang mi ldan pa'i'o zhes bya ba ni rnam par smin pa las skyes pa dang / spyod lam las byung ba dang / bzo'i gnas las byung ba dang / sprul pa byed pa'i sems skye ba zhes bya ba'i tha tshig go/ /de ltar sems kyi skye ba la mkhas pa rnam par bshad nas ji ltar gnas pa la mkhas pa yin zhe na zhes bya ba la sogs pas/ sems kyi gnas pa la mkhas pa la 'jug par byed de/ gal te rnam par rig pa'i de bzhin nyid yang dag pa ji lta ba bzhin rab tu shes pa'o zhes bya ba ni byang chub sems dpa' 'du byed rnam par rig pa tsam du rab tu shes pa ni sems kyi gnas pa la mkhas pa yin te/ sems kyi gnas pa la mkhas pa na/ byang chub sems dpa'i mthu chen po mngon par sgrub par byed do zhes ston to/ /rnam par rig pa'i de bzhin nyid ji lta bu zhe na/ rnam par rig pa thams cad kyi de tsam nyid de/ don dang bral ba'i phyir ro/ /rmi lam la sogs pa'i sems kyi gnas pa ni rnam par rig pa tsam nyid yin par rung na/ mig gi rnam par shes pa la sogs pa'i rnam par rig pa rnams dang / mig la sogs pa'i rnam par rig pa gzugs can rnams ji ltar rnam par rig pa tsam du rung zhe na/ rnam par rig pa mtshan ma dang bcas pa'i lta ba thams cad ni/ don med par yang gnyis nyid du snang ste/ mig gi rnam par rig pa la sogs pa ni/ gzugs la sogs pa'i mtshan ma dang / de'i rnam par shes pa'i lta ba dang lus kyi rnam par shes pa'i bar gyi lta bas so/ / yid kyi rnam par rig pa ni mig la sogs pa chos kyi mthar thug pa'i rnam par rig pa thams cad kyi mtshan ma dang bcas pa dang / yid kyi rnam par shes pa'i rnam par rig pas lta ba dang bcas pa dag yin te/ mtshan ma dang lta ba ni phyin ci log la sogs pa kun nas nyon mongs pa'i gzhi'i gnas yin no/ /de lta ma yin na ni don med pa la don du phyin ci log med par 'gyur ba dang / de med na nyon mongs pa dang shes bya'i sgrib pa kun nas nyon mongs pa yang med par 'gyur ba dang / de med na rnam par byang ba yang med pa'i skyon du 'gyur te/ rnam par rig pa'i de bzhin nyid/ de tsam nyid yin par rigs pa dang lung gis rig par bya'o/ /sems kyi gnas pa rnam par bshad nas/ ji ltar na bslang ba la mkhas pa yin zhe na zhes bya ba la sogs pas sems kyi bslang ba ston to/ /byang chub sems dpa' sems kyi bslang ba la mkhas pa ni 'dod chags la sogs pa nyon mongs pa'i mtshan ma'i 'ching ba dang / 'jig tshogs la sogs pa nyon mongs pa'i gnas ngan len gyi 'ching ba las sems 'di ni 'di las bslang bar bya'o zhes yang dag pa ji lta ba bzhin rab tu shes pas/ byang chub sems dpa'i mthu chen po mngon par sgrub par byed do/ /sems kyi bslang ba rnam par bshad nas/ ji ltar 'phel ba la mkhas pa yin zhe na zhes bya ba la sogs pas sems kyi 'phel ba ston to/ /gal te mtshan ma dang / gnas ngan len gyi gnyen po'i sems gang yin pa de skye ba dang / 'phel ba'i tshe skye'o 'phel lo zhes bya ba la mkhas pa yin no zhes bya ba ni gnas ngan len gyi 'ching ba'i gnyen por gyur ba zhi gnas dang lhag mthong zung du 'brel bas/ 'jug pa'i mtshan ma 'phel ba na/ 'phel lo zhes 'phel ba la mkhas pa yin no/ /sems kyi 'phel ba rnam par bshad nas/ ji ltar na 'grib pa la mkhas pa yin zhe na zhes bya ba la sogs pas sems kyi 'grib pa ston to/ /gal te de dang mi mthun pa'i phyogs su gyur pa mtshan ma dang / gnas ngan len gyis kun nas nyon mongs pa can du gyur pa'i sems de 'grib cing / 'bri bar gyur pa na 'grib cing 'bri'o zhes 'grib pa la mkhas pa yin no zhes bya ba la mi mthun pa'i phyogs su gyur pa zhes bya ba ni/ gags dang sgrib pa dang rnam par g.yeng ba dang ldan pa'i sems zhes bya ba'i tha tshig go/ / sems kyi 'grib pa rnam par bshad nas ji ltar na thabs la mkhas pa yin zhe na zhes bya ba la sogs pas sems kyi thabs ston to/ /gal te rnam par thar pa dang zil gyis gnon pa'i skye mched dang / zad par gyi skye mched dag sgom par byed pa ste zhes bya ba ni byang chub sems dpa' rnam par thar pa dang / zil gyis gnon pa dang zad par gyi skye mched dag sgom par byed pa ni/ sems rnam par dag pa'i thabs yin no/ /byams pa de ltar na zhes bya ba la sogs pas ni/ byang chub sems dpa' de ltar gnas drug la mkhas pa rnams ni byang chub sems dpa'i mthu chen po mngon par bsgrubs pa dang / mngon par bsgrub par 'gyur ba dang / mngon par sgrub par byed pa yin no zhes mjug sdud par byed do/ /bcom ldan 'das kyis phung po'i lhag ma med pa'i mya ngan las 'das pa'i dbyings su tshor ba thams cad ma lus par 'gog go zhes gang gsungs pa la zhes bya ba la sogs pa rgya cher gsungs pa la/ byams pa mdor bsdu na tshor ba rnam pa gnyis te/ gnas kyi gnas ngan len rig pa dang de'i 'bras bu yul rig pa'o/ /de la gnas kyi gnas ngan len rig pa ni rnam pa bzhir rig par bya ste/ gzugs kyi gnas rig pa dang zhes bya ba ni/ gzugs kyi phung po gnas gyur pa'i phyir zhing dang / sku dang / mtshan dang / dpe byad bzang po dang / gsung dbyangs mtha' yas pa dang / spyi gtsug bltar mi mthong ba nyid rig pa'o/ /gzugs med pa'i gnas rig pa zhes bya ba ni/ phung po gzugs can ma yin pa rnam pa bzhi gnas gyur pa'i mtshan nyid de/ de la tshor ba'i phung po gnas gyur pa'i phyir bde ba kha na ma tho ba med pa tshad med pa rgya chen po la gnas pa rig pa dang / 'du shes kyi phung po gnas gyur pa'i tshe/ ming gi tshogs dang / tshig gi tshogs dang / yi ge'i tshogs thams cad kyis ston pa la dbang 'byor pa rig pa dang / 'du byed kyi phung po gnas gyur pa'i phyir sprul pa dang / bsgyur ba dang / 'khor bsdu ba dang / dkar po'i chos can dgug pa rig pa dang / rnam par shes pa'i phung po gnas gyur pa'i phyir/ me long lta bu dang mnyam pa nyid dang so sor rtog pa dang / bya ba grub pa'i ye shes rig pa'o/ /de la 'bras bu grub pa ni da ltar gyi gang yin pa'o zhes bya ba ni gzugs dang / gzugs med pa'i gnas rig pa de dag nyid skad cig de la 'byung ba'o/ /'bras bu ma grub pa ni ma 'ongs pa'i rgyur gyur pa gang yin pa'o zhes bya ba ni de dag nyid kyi 'bras bu ma 'ongs pa'o/ /yul rig pa yang rnam pa bzhir rig par bya ste/ bzhi gang zhe na/ gnas rig pa ni de bzhin gshegs pa'i gnas gzhal med khang chen po kha dog dang / dbyibs dang / tshad la sogs pa thun mong ma yin pa yongs su grub pa'o/ /yo byad rig pa ni lha dang mi'i las yang dag par 'das pa yo byad tshad med pa sna tshogs snang ba'o/ /longs spyod rig pa ni longs spyod rdzogs pa dang / sprul pa'i sku gnyis kyis bdag dang / gzhan theg pa chen po'i chos kyi longs spyod myong bar mdzad pa'o/ /ltos pa rig pa ni/ yul rig pa'i rgyu gang dag dang rkyen gang dag yin pa de dag yongs su ma gtugs pa'o/ /de yang phung po'i lhag ma dang bcas pa'i mya ngan las 'das pa'i dbyings na'o zhes bya ba la de yang zhes bya ba ni gnas rig pa dang / de'i 'bras bu yul rig pa ste/ de bzhin gshegs pa'i phung po lhag ma dang bcas pa'i mya ngan las 'das pa'i dbyings la yod pa'o/ /'bras bu ma grub pa zhes bya ba ni ma 'ongs pa'i rgyur gyur pa'o/ /rig pa'i 'dus te reg pa las byung ba'i tshor ba myong ba ni zhes bya ba ni nyon mongs pa can dang / nyon mongs pa can ma yin pa'i rig pa ma spangs pa'i phyir ro/ /de'i mi mthun pa'i phyogs thams cad kyi thams cad du 'gags pa ma yin te zhes bya ba ni/ rig pa'i 'dus te reg pa las byung ba gnas rig pa rnyed pa'i phyir/ de'i mi mthun pa'i phyogs su gyur pa nyon mongs pa can dang / nyon mongs pa can ma yin pa'i ma rig pa'i 'dus te reg pa las byung ba'i tshor ba rang gi rnam par rtog pas kun du gzung ba thun mong ma yin pa'i tshor ba skye ba'i sa bon 'gags pa dang / rig pa'i 'dus te reg pa las byung ba de'i 'bras bu yul rig pa brnyes pa'i phyir yang gzhan gyi rnam par rtog pas kun du gzung ba thun mong ba'i tshor ba skye ba'i sa bon dmigs pa thams cad la/ sgrib pa ma 'gags pa'i phyir ro/ /phung po'i lhag ma med pa'i mya ngan las 'das pa'i dbyings su yongs su mya ngan las 'da' ba na/ de yang 'gags par 'gyur te zhes bya ba ni/ de bzhin gshegs pa'i rig pa'i 'dus te reg pa las byung ba gnas dang / yul rig pa da ltar byung ba na/ 'thob pa de yang 'gog par mdzad pa ste/ tshor ba dang / tshor ba med pa'i skye ba'i sa bon kun gzhi'i lus yongs su zad pa'i phyir ro/ /de'i phyir zhes bya ba la sogs pas ni/ de nyid kyis mjug sdud par byed do/ /gal te de bzhin gshegs pa phung po'i lhag ma med pa'i mya ngan las 'das pa'i dbyings su yongs su mya ngan las 'da' na/ ji ltar 'khor ba'i bar du gzhan gyi don mdzad pa grub par 'gyur zhe na/ sngon gyi smon lam gyi shugs kyis na/ de bzhin gshegs pa ni yongs su mya ngan las 'das kyang / sems can gyi don mdzad pa 'grub ste/ de bzhin gshegs pa'i rnam par rol pa ni sna tshogs yin pa'i phyir ro/ /'phags pa dgongs pa nges par 'grel ba'i mdo las/ 'phags pa byams pa'i le'u'i bshad pa/ slob dpon ye shes snying pos mdzad pa rdzogs so// //

CLOSE WINDOW