བོད་ཡིག

e-texts based on the ACIP/ALL Input

/rgya gar skad du/ Ar+ya san+d+hi gam+b+hI ra nirmo tsa sU tra TI kA/ bod skad du/ 'phags pa dgongs pa zab mo nges par 'grel pa'i mdo rgya cher 'grel pa/ bam po dang po/ gsung gi mnga' bdag 'phags pa byams pa dang / 'jam dpal gzhon nur gyur pa la phyag 'tshal lo/ /gang gis mdo sde 'di 'chad par 'dod pas sgo rnam pa bzhir phye nas bstan par bya'o/ /'di lta ste/ bstan pa gsungs pa'i dgongs pa dang mdo sde'i mtshan rnam par bshad pa bstan pa dang / mdo sde'i ngo bo nyid dang / gzhung yang dag par bstan pa dang / gnas dang gang gi ched du gsungs pa bstan pa dang / tshig gi don rnam par bshad pa bstan pa'o/ /de la dang po mdo sde gsungs pa'i dgongs pa dang / mdo sde'i mtshan rnam par bshad pa bstan pa zhes bya ba la/ yang dag pa'i ngo bo nyid ni shin tu zab cing gzugs kyi dngos po rnam pa sna tshogs las yongs su 'das kyang / gzugs kyi dngos por snang la yongs su rdzogs pa'i gsung gsang ba skye dgu'i rjes su gsung bar mdzad kyang gsung ba mi mnga' ste/ de ni 'di skad du/ gsung bar mdzad kyang / tshig las rab tu dben zhing gzugs ma yin pa yang gzugs su ston te/ gzugs ma yin par yang gzugs su ston pa'i tshul ni rab tu zhi ba yin mod kyi/ tshig tu brjod pa yang yod do zhes ston to/ /tshig tu brjod kyang tshig las rab tu dben la/ bstan pa rgya cher gsungs kyang tshig med de/ tshig med pa'i phyir dri ma med par grags pa'i gnas su cang mi smra bar gyur pa dang / gzhal med khang yongs su dag par ngo bo nyid gsum rnam par phye ba yin te/ de'i phyir 'phags pa byams pa las don dam pa dang / kun rdzob gnyi ga yod par rnam par gzhag la/ skyes bu chen po klu sgrub kyis ni stong pa dang / yod pa gnyis ka yang yongs su gsal ba yin no/ /de la rnam par gzhag pa yang yongs su gsal ba dang mi 'gal bas na rnam par rig pa tsam gyi don shin tu gsal bar 'gyur la/ yongs su gsal ba rnam par gzhag pa dang mi 'gal ba'i phyir ni mtshan ma med pa'i tshul rab tu bstan pa yin no/ /stong pa nyid kyang yin la yod pa yang yin pas/ bden pa gnyis kyi gzhung dang rjes su mthun pa dang / yod pa yang ma yin stong pa yang ma yin pas dbu ma'i lam gyi tshul dang mthun par gyur pa yin te/ de lta bas na rmongs shing nor ba dag gis stong par bshad pa thos na yod par yang dag par 'dzin la go zhing rtogs pa dag gis ni yod pa nyid stong pa nyid du rtogs so/ /sangs rgyas kyi chos shin tu zab pa'i tshul de lta yin mod kyi 'on kyang 'dren pa'i thabs dang 'jug pa'i tshul mang zhing gcig kho na nyid du ma zad pa'i phyir/ chos kyi mnga' bdag gis chos kyi 'khor lo rnam pa gsum du gsungs pa yin te/ de la dang po ni gang nyan thos kyi theg pa la gzhol ba dag la 'khor mor 'jig ri dwags rgyu ba'i tshal du 'khor ba dang / mya ngan las 'das pa'i rgyu dang 'bras bu yongs su bstan te/ 'di ni bden pa bzhi'i chos kyi 'khor lo zhes bya'o/ /gnyis pa ni gang byang chub sems dpa'i theg pa la gzhol ba dag la/ bya rgod phung po'i ri la sogs pa 'dus pa bcu drug dag tu 'phags pa shes rab kyi pha rol tu phyin pa rnams gsungs pa yin te/ 'di ni mtshan nyid med pa'i chos kyi 'khor lo zhes bya'o/ /gsum pa ni gang theg pa thams cad la gzhol ba dag la pad+ma'i snying po la sogs pa zhing yongs su dag pa dang / ma dag pa rnams su 'phags pa dgongs pa zab mo nges par 'grel pa la sogs pa gsungs pa ni nges pa'i don theg pa chen po'i chos kyi 'khor lo zhes bya ste/ 'di ni de bzhin gshegs pa'i bstan pa gsungs pa'i dgongs pa yin par rig par bya'o/ /dgongs pa zab mo nges par 'grel ba'i mdo zhes bya ba ni mdo sde gcig gi spyi'i ming ngo / /gleng gzhi'i le'u ste dang po'o zhes bya ba ni le'u nyid kyi nang na tha dad pa'i ming ngo / /dgongs pa zhes bya ba ni gsang ba'i tshul du gsungs so/ /zab mo zhes bya ba ni shin tu zab pa'o / /nges par 'grel pa zhes bya ba ni rnam par bshad pa ste/ theg pa gsum po thams cad kyis shin tu zab cing mkhyud pa'i dgongs pa rnam par dgrol bar dka' ba'i don mdo sde 'di las rnam par phye ste gsal bar ston par mdzad pas na/ dgongs pa zab mo nges par 'grel pa zhes bya'o/ /mdo zhes bya ba ni rgya gar skad du sU tra zhes bya ba'i sgra las drangs nas/ mdo dang brtag pa zhes bya bar 'dren te/ sngon dang da ltar gyi gsung rab kyi don brtag par nges pa'i phyir brtag pa zhes bya'o/ /yang rnam pa gcig tu na skud pa zhes bya ste de'i phyir 'dul ba dum bu bzhi pa las ji skad skud pas me tog brgyus nas 'thor bar mi 'gyur ba bzhin no zhes gsungs so/ /slob dpon h+yan tsang gis ni mthun pa'i mdo zhes bshad de/ de la mthun pa ni mthun par gyur pa ste/ rig pa dang mthun par gyur pa dang / sems can gyi dbang po dang 'tsham par gyur pa'o/ /mdo zhes bya ba ni don rnam pa gnyis kyi phyir te/ brgyus pa dang sdud pa'o/ /de la brgyus pa ni bshad par bya ba'i don to/ /sdud pa ni 'dul bar bya ba'i sems can te/ don rnam pa 'di gnyis dang ldan pa'i phyir mthun pa'i mdo zhes bya bar bshad do/ /de la ming 'thob par byed pa ni nges par 'grel pa dang / mdo zhes bya ba'i tshig gnyis kyis brjod pa dang gsung rab bstan pa yin te/ dgongs pa zab mo gsung gis brjod par bya ba'i tshul yongs su ston pas na rjod par byed pa dang brjod par bya ba'i don gyis mdo sde'i mtshan rnam par gzhag pa yin te/ 'dis ni dgongs pa zab mos mdo sde rnam par bshad pa bstan to/ /'di ni rnam par bshad pa rnam pa drug las bdag po'i dbang du mdzad nas rnam par bshad pa'o/ /gleng gzhi'i le'u ste dang po'o zhes bya ba la gleng gzhi ni gtan tshigs kyi gleng gzhi ste/ yang dag par bshad par 'byung ba'i gleng gzhi'o/ /le'u ni phyogs kyi rnam pa 'am/ yang na tha dad pa'i don te/ 'di ltar bdag gis thos pa la stsogs pa'i don gyi rnam pa mtshungs par gyur pa dang / don bsdus pa so so tha dad pa'i phyir le'u zhes bya'o/ /mdo sde 'di nyid las le'u brgyad 'byung ba'i dang por le'u 'di 'byung bas na dang po zhes bya ste/ de'i phyir dgongs pa zab mo nges par 'grel ba'i mdo gleng gzhi'i le'u ste dang po'o zhes gsungs so/ /de la mdo sde'i gzhung dang ngo bo nyid yang dag par bstan pa zhes bya ba la/ ngo bo nyid kyis ni brjod pa dang gsung rab kyi ngo bo nyid kyi ming bstan to/ /gzhung zhes bya bas ni so so'i bstan pas brjod par bya ba thun mong ma yin pa bstan to/ /'phags pas gsungs pa'i gsung rab rnam pa slob dpon h+yan tsang gis sgo rnam pa lngas mdo sde ngo bo nyid bstan pas/ de la dang po ni yang dag pa ma yin pa yang dag pa nyid du bsdu ba'i sgo ste/ 'di ltar 'phags pa'i gsung rab rnams kyi ming dang tshig dang yi ge'i tshogs dang sgra skad rnams ni de bzhin nyid kyi ngo bo nyid byed de/ de'i phyir 'phags pa dri ma med par grags pas bstan pa'i mdo la stsogs pa las sems can thams cad de bzhin nyid do/ /chos thams cad kyang de bzhin nyid do zhes gsungs so/ /gnyis pa ni rgyu mtshan rnam par rig pa nyid du bsdu ba'i sgo ste/ 'di yang mdor bsdu na don rnam pa gnyis so/ /dang po ni cha rnam pa gsum gyis don bstan te/ rang gi ngo bo nyid ni rnam par rig pa zhes bya'o/ /lta ba dang rgyu mtshan gyi rnam pa gnyis ni spyir rgyu mtshan zhes bya ste/ de'i phyir rnam par rig pa tsam du grub pa'i bstan bcos las gyur pa ni/ 'di lta ste/ rnam par shes pa'i ngo bo nyid cha gnyis lta bur gyur par snang ste/ lta ba dang rgyu mtshan gnyi ga yang rang gi ngo bo nyid la brten nas 'byung ba'i phyir ro zhes bya ba dang / gzhan yang de nyid las rnam par shes par gyur pa'i mtshan nyid rnam pa mang mod kyi/ rnam par shes pa gyur pa de yang rnam pa mi mtshungs pas rnam pa gsum yod do/ /zhes bstan pa yin te/ bshad pa 'di dang sbyar nas rgyu mtshan ni mtshan ma'i rnam pa ste/ lta ba dang rgyu mtshan rnams ni rang gi ngo bo nyid rnam par rig pa'i mtshan nyid yin pa'i phyir ro/ /gnyis pa ni cha rnam pa gnyis kyis don bstan te/ lta ba'i rnam pa ni rnam par rig pa zhes bya'o/ /rgyu mtshan gyi rnam pa ni rgyu mtshan zhes bya ste/ de'i phyir rnam par rig pa tsam du grub pa'i bstan bcos las nang gi rnam par shes pa nyid kyi phyi rol gyi yul lta bur gyur par snang ngo zhes bshad do/ /bshad pa 'di dang sbyar nas rgyu mtshan gyi rnam pa ni rgyu mtshan zhes bya ste/ rgyu mtshan ni lta ba'i rnam pa las gud na med pas rnam par rig pa tsam zhes bya'o/ /don mdor bsdu na ming dang tshig dang yi ge'i tshogs dang sgra skad rnams ni rnam par rig pa'i mtshan nyid yin pa'i phyir rnam par rig pa nyid ces bya'o zhes bstan to/ /gsum pa ni btags pa rnams rdzas su bsdus pa'i sgo ste ji ltar rnal 'byor spyod pa'i sa la sogs pa las/ ming la sogs pa ni btags pa yin no/ /sgra ni rdzas su yod pa yin pa'i phyir sgra las logs shig na ming la sogs pa gzhan med do zhes bshad pa lta bu'o/ rnam pa gzhan du na gong ma'i sgo gsum po re re la yang rnam pa gnyis gnyis su phye na sgo rnam pa drug tu 'gyur te/ de la sgo dang po'i rnam pa gnyis kyang / dang po ni yang dag pa ma yin pa yang dag pa nyid du bsdu ba ste/ yang dag pa nyid kho na yin gyi/ yang dag pa ma yin pa nyid ni ma yin pa'o/ /gnyis pa ni yang dag pa nyid dang yang dag pa ma yin pa nyid rnam par dbye ba ste/ yang dag pa ma yin pa nyid yin te / yang dag pa nyid ni ma yin te/ ming la sogs pa'i chos bzhi po dag yang dag pa'i ngo bo nyid ma yin pa'i phyir ro/ /de la sgo gnyis pa'i rnam pa gnyis kyang dang po ni rgyu mtshan rnam par rig pa nyid du bsdu ba ste/ rnam par rig pa tsam du zad kyi/ rgyu mtshan ni ma yin pa'o/ /gnyis pa ni rnam par rig pa dang / rgyu mtshan rnam par dbye ba ste/ ming la sogs pa'i chos bzhi po dag rgyu mtshan tsam du zad kyi/ rnam par rig pa nyid ni ma yin te/ ming la sogs pa ni rgyu mtshan gyi rnam pas bsdus pa'i phyir ro/ /sgo gsum pa'i rnam pa gnyis kyang dang po ni btags pa rnams rdzas su bsdu ba ste/ rdzas tsam du zad kyi btags pa ni ma yin no/ /gnyis ni btags pa dang rdzas su yod pa rnam par dbye ba ste/ sgo 'di ni btags pa dang rdzas su yod pa gnyis bstan pas ming la sogs pa ni btags pa yin la/ sgra ni rdzas su yod pa yin pa'i phyir ro/ /bzhi pa ni chos gsum gyi ngo bo nyid nges par bstan pa'i sgo ste/ chos gsum ni phung po dang skye mched dang khams kyi sgo gsum nyid yin te/ de'i phyir chos mngon pa sna tshogs kun las btus pa'i bstan bcos las chos gsum gyi le'u zhes 'byung ngo / /thams cad yod par smra ba'i gzhung dpyad pas bshad pa'i yang dag pa'i don las ni sgra la ngo bo nyid du 'dod pas chos gsum las gzugs kyi phung po dang / sgra'i skye mched dang sgra'i khams kyis bsdus so/ /mdo sde'i gzhung dang sbyar na btags pa dang rdzas su yod pa'i sgra gnyis la bstan pa'i ngo bo nyid du 'dod de/ phung po lnga las gzugs kyi phung pos bsdus so/ /skye mched dang khams kyi sgo nas ni sgra'i skye mched dang sgra'i khams dang chos kyi khams kyis bsdus te/ rgya cher ni chos kyi rnam grangs bstan pa las rig par bya'o/ /'dir theg pa chen po'i gzhung dang sbyar na/ sgra dang ming la sogs pa'i chos bzhi la ngo bo nyid du 'dod de/ phung po lnga las gzugs dang 'du byed kyi phung po dang / skye mched dang khams dang sgra'i skye mched dang chos kyi skye mched dang / sgra'i khams dang / chos kyi khams te/ ming la sogs pa'i chos gsum po dag ni yid kyi rnam par shes pa'i yul yang ma yin pa'i phyir ro/ /lnga pa ni chos kyi rnam grangs kyi ngo bo nyid bstan pa'i sgo ste/ 'di yang rnam pa bzhir dbye'o/ /'di lta ste chos kyi rnam grangs kyi ngo bo nyid bstan pa dang / rang gi ngo bo dang gzugs brnyan yod pa dang med pa bstan pa dang / bsags pa rnam par phye bas sems kyi khyad par bstan pa dang / gsung gcig pa dang tha dad pa rnam par dbye ba'o/ /de la chos kyi rnam grangs kyi ngo bo nyid bstan pa yang rnam pa gnyis te/ phyi rol pa dang 'dod do / /phyi rol pa'i gzhung yang rnam pa mang mod kyi/ 'dir re zhig rnam pa bzhi zhig bstan te/ mu stegs can grangs can ni sgra'i de kho na nyid la ngo bo nyid du 'dod do/ /mchog tu smra ba rnams ni sgra'i yon tan la ngo bo nyid du 'dod do/ /'jig rten rgyang 'phen pa rnams ni 'byung ba chen po bzhi la ngo bo nyid du 'dod de/ thams cad kyang 'byung ba chen po rnams kyis ngo bo nyid byed pa'i phyir ro zhe'o/ /sgrar smra ba rnams ni sgra la ngo bo nyid du 'dod de/ rigs pa'i bstan bcos las sgra ni rtag pas nges pa'i tshad ma byed de chos rnams brjod pa'i phyir ro/ /zhe'o/ /de la chos 'di gzhung dang sbyar na yang so so nas bshad pa mi mthun te thams cad yod par smra ba dag ni/ mdor na chos ni bdun cu rtsa lnga las med de don ni sngar bshad pa bzhin no/ /bstan pa'i ngo bo nyid de yang sems sna tshogs kyi bstan bcos dang / mdzod kyi bstan bcos dang / bye brag tu bshad pa chen po'i bstan bcos dag las rnam pa gnyis su bshad de/ kha cig de bzhin gshegs pa'i chos kyi phung po ni gzugs kyi phung pos ngo bo nyid byed de/ 'di ltar sgra yin pa'i phyir ro zhe'o/ /kha cig ni 'du byed kyi phung po nyid de/ ming dang tshig dang yi ge'i yin pa'i phyir ro zhe'o/ /don des na yul 'di pa nyid kyi slob dpon rnams go ba dag mi mthun pa rnam pa gsum du bshad do/ /kha cig ni sgra la yang dag pa'i don du 'dod de 'di ltar sgra ni dge ba yin gyi/ ming dang tshig dang yi ge'i tshogs ni lung du mi ston pa yin pa'i phyir ro/ /de lta bas na sems sna tshogs kyi bstan bcos las mdo sde dang 'dul ba dang / ma mo dag ni kun rdzob kyi yang dag pa'i chos so/ /byang chub kyi phyogs sum cu rtsa bdun ni don dam pa'i 'o zhes 'byung ste/ 'di nyid kyi 'grel pa las kun rdzob kyi yang dag pa'i chos zhes bya ba ni tshig gis bstan pa'i chos la bya'o zhes bshad do zhe'o/ /kha cig ni ming la sogs pa la yang dag pa'i don du 'dod de/ 'di ltar bstan par bya ba'i don brjod pa'i phyir ro/ /de'i phyir shes pa bskyed pa'i bstan bcos las/ gsung rab yan lag bcu gnyis ci zhig gis ngo bo nyid byed ce na smras pa ming gi tshogs dang tshig gi tshogs dang yi ge'i tshogs go rims bzhin du gnas pa'o zhes bya ba nas rgya cher bshad pa'i bar du zhe'o/ /kha cig ni sgra dang ming la sogs pa la ngo bo nyid du 'dod de/ 'di ltar sgra'i dbang gis don rnam pa gnyis ston pa'i phyir ro zhe'o/ /'dir mdzod kyi bstan bcos gsar 'gyur dang sbyar na de las bshad pa rnam pa 'di gnyis ka yang smos te/ 'di ltar sgra 'am yang na ming la sogs pa'o zhes 'byung gi / rnam pa gzhan du bshad pa ni med do/ /yang dag pa'i rigs pa'i bstan bcos las kyang / slob dpon 'di gnyis kyi bshad pa smos pa mdzod kyi bstan bcos las 'byung ba dang mthun te/ dris pa dang lan dag kyang yod pas de'i phyir bstan bcos de nyid las ngag dang bstan pa'i ming tha dad dam/ 'on te bstan pa dag kyang yin par 'dod/ ming dang bstan pa ngo bo nyid tha dad na/ bstan pa ji ltar ming yin zhes 'byung ste/ de las de skad du bshad pa ni ming yod pa'i dbang gis gdod bstan pa zhes bya bas na de'i phyir de bzhin gshegs pa'i bstan pa'i ngo bo nyid ni ming yin te/ de ci'i phyir zhe na/ yang dag pa ji lta ba bzhin du don brjod pa'i phyir/ ming ni de bzhin gshegs pa'i bstan pa yin no/ /ming gi don brjod pa'i phyir bstan pa ni ming yin te des na de bzhin gshegs pa'i bstan pa ni nges par ming gis ngo bo nyid byed de/ ming gtso bor smos pas na tshig dang yi ge'i tshogs kyang bsdus par rig par bya'o/ /gzhan yang gzhung rab tu bstan pa'i bstan bcos las kyang / yang dag pa'i rigs pa'i bstan bcos las bshad pa dang mthun par 'byung ngo / /sde snod gsum la mkhas pa'i slob dpon dag gis bshad pa las ni/ rgya gar yul pa'i slob dpon rnams brgyud de bshad pa las kyang 'di skad du ston te/ mdzod kyi bstan bcos dang des na yang dag pa'i rigs pa las so so rnam pa gnyis su bshad pa yang so so nas dmigs pa yod de/ ci'i phyir zhe na/ sems can mgu ba bskyed par ni sgra mchog tu gyur pa yin la/ chos brjod par ni ming la sogs pa mthu che ba'i phyir/ ltos pa mi mthun yang so so nas nges pa yod de/ des na rnam pa gnyis su bshad pa gnyi ga yang dag pa'i don yin no zhes zer ro/ /'dir bstan bcos rnams kyi dgongs pa brtags na yang dag pa'i rigs pa las ming la sogs pa la yang dag pa'i don du 'dod pas na / de'i phyir de'i mjug sdud pa las de'i phyir de bzhin gshegs pa'i bstan pa ni nges par ming nyid bstan pa yin la/ nges par ming nyid ngo bo nyid yin no zhes 'byung ba dang sbyar na mdzod kyi bstan bcos las kyang yang dag pa'i rigs pa'i bstan bcos dang mthun te/ 'di ltar de las de sun mi 'byin pa yang don 'gal ba med pa'i phyir ro/ /yang na slob dpon phyi ma rang gi rnam par gzhag pa pham par khas blangs pa yin gyi/ yang dag pa'i rigs pa mdzad pa'i slob dpon gyis pham rgyal rnam par phye ste bstan pa ni ma yin no bye brag tu bshad pa chen po las dpyad pa dag gis bshad pa'i yang dag pa'i don dang sbyar na ni sgra bshad pa yang dag pa'i don yin te/ de'i phyir bye brag tu bshad pa chen po las 'di ltar de bzhin gshegs pa'i bstan pa rnams ci zhig gis ngo bo nyid byed/ ci ngag gi las yin nam/ 'on te ming la sogs pa yin/ smras pa longs spyod rdzogs pa dang sprul pas gsungs pa rnams ni bshad pa dag yin pas ngag gi las ngo bo nyid yin no/ /gal te de lta na 'di'i 'og nas bshad pa rnam pa ji ltar rung ste/ ji skad du de bzhin gshegs pa'i bstan pa rnams chos ci zhes bya zhe na smras pa 'di lta ste/ ming gi tshogs dang tshig gi tshogs dang yi ge'i tshogs rnams go rims su bkod pa dang / go rims su rnam par gzhag pa dang / go rims su 'brel pa'o zhes 'byung ba lta bu'o zhe na/ yi ge 'og nas 'byung ba ni de bzhin gshegs pa'i bstan pa'i nus pa bstan pa yin gyi / sangs rgyas kyi bstan pa'i rang gi ngo bo nyid rnam par phye bar ni mi 'dod de/ 'di lta ste/ go rims su bkod pa dang / rnam par gzhag pa dang 'brel pa zhes bya ba ni ming dang tshig dang yi ge'i tshogs ni sangs rgyas kyi bstan pa'i nus pa yin pas so/ /kha cig na re de bzhin gshegs pa'i bstan pa ni ming la sogs pas ngo bo nyid byed do zhe'o/ /gal te de ltar na 'di skad du bshad pa ji ltar rung ste/ ji skad du sangs rgyas kyi bstan pa ji lta bu zhe na zhes smras pa 'di lta ste/ sangs rgyas kyi gsung dang brjod pa dang 'brel pa dang ngag gi lam dang ngag gi las dang / ngag gi rnam par rig byed ni sangs rgyas kyi bstan pa zhes bya'o zhes 'byung ba lta bu zhe na/ brgyud pa'i rgyu la brten nas de skad du bshad de/ 'jig rten na bu tsha rnams gcig gis gcig skyed pa'i chos byed pa ltar/ ngag gis ni ming skyed la ming gis don gsal bar byed pas so/ /dpyad pa dag gis bshad pa las 'byung ba de skad du bshad pa lta na/ ngag gi las kyi ngo bo nyid byed de/ de bzhin gshegs pas gsungs pa rnams pha rol gyis thos pa'i phyir ro zhes 'byung ste/ zhib tu ni de nyid las 'byung ba bzhin no/ /yang dag pa'i rigs pa dang / bye brag tu bshad pa chen po la sogs pa la brten pa ma yin nam zhe na ci'i phyir dpyad pa dag gis bshad pa'i yang dag pa'i don la rten par mi byed/ slob dpon 'dus bzang gis bshad pa'i rigs pa bzang zhing mchog tu gyur pa'i phyir/ ming la sogs pa la yang dag pa nyid do/ /zhes logs shig tu rigs pas bsgrubs so/ /'di nyid kyi 'grel pa las 'di'i gzhung gi sgra la ngo bo nyid du bshad pa ni chos kyi grangs kyi sgo nas sgra'i chos gcig 'ba' zhig la ngo bo nyid du 'dod de/ ming la sogs pa la ngo bo nyid du bstan pa ni/ ming la sogs pa ni chos gsum la ngo bo nyid du ston to/ /gal te gcig tu bsdus te bshad na ni chos bzhi bsdus pa la ngo bo nyid du 'dod de/ 'di lta ste/ sgra dang ming la sogs pa'o/ /dpyad pas bshad pa'i yang dag pa'i don gyis ni sgra'i chos gcig la ngo bo nyid do zhes zer ro/ /mdo sde pa dag ni sgra la ngo bo nyid do zhes bshad de/ de'i phyir yang dag pa'i rigs pa dang rjes su mthun pa'i bstan bcos las mdo sde pa sun 'byin pa'i skabs nas 'byung ba/ khyed ming dang tshig dang yi ge'i tshogs rnams sgras ngo bo nyid byed do/ /zhes smra ba'i mi rigs so zhes 'byung ngo / /slob dpon ngo bo nyid med kyis byas pa'i theg pa chen po bsdus pa'i 'grel pa las ni mdo sde rnams kyi tshig dag gis ngo bo nyid byed do zhes zer ba 'di yang rigs pa ma yin no zhes sun 'byin te/ gzhung 'di nyid la brten nas/ slob dpon gsum gyis 'di skad du ston to/ /kha cig ni skye mched bcu gnyis las sgra'i skye mched kyis ngo bo nyid byed de/ sgra las logs shig na ming dang tshig dang yi ge'i tshogs gzhan med pa'i phyir ro zhe'o/ /kha cig ni chos kyi skye mched las rgyun mi 'chad pa'i btags pa'i sgras ngo bo nyid byed de/ yid kyi rnam par shes pas dmigs par bya ba'i ngo bo nyid 'ba' zhig yin pa'i phyir ro zhe'o/ /kha cig ni btags pa dang rdzas su yod pa'i sgra gnyis kas ngo bo nyid byed de/ gong ma'i don gnyis kyi phyir ro zhes zer ro/ /ci'i phyir mdo sde pa dag rnam pa 'di gsum lta bur 'dod par gyur ce na/ slob dpon sde snod gsum dang ldan pa dag gis bshad pa las/ mdo sde tshad mar byas te/ don rnams rnam par bshad pa ni thams cad kyang mdo sde pa zhes bya bas/ de'i phyir mdo sde pa dag rnam pa gsum po 'di lta bur 'dod par 'gyur ro zhes 'byung ngo / /de dag gi gzhung gis chos kyi rnam grangs rnam par gzhag pa yang so so nas mi mthun te/ kha cig ni sems las logs shig na sems las byung ba med do zhes zer te/ slob dpon dpe can lta bu'o/ /btsun pa rtogs pa'i lhas kyang 'di dang mthun par bshad do/ /de dag gis gzhung dang sbyar na rnam pa bcu dgu yod do/ /'di ltar gzugs las bcu bzhi po 'di lta ste/ dbang po lnga dang yul lnga dang 'byung ba chen po bzhi'o/ /sems ni gcig kho na ste/ sems las byung ba med pa'i phyir ro/ /mtshungs par ldan pa ma yin pa'i chos ni grangs gcig kho na ste/ 'di lta ste mngon par 'du ma byas pa rnams so/ /'dus ma byas ni rnam pa gsum ste / nam mkha' dang / so sor brtags pa'i 'gog pa dang / so sor rtogs pa ma yin pa'i 'gog pa'o/ /sems las byung ba yod par 'dod pa yang bshad pa mi mthun pa rnam pa gnyis yod de/ kha cig ni sems las logs shig na sems las byung ba rnam pa gsum yod de/ 'di lta ste tshor ba dang / 'du shes dang / sems pa'o/ /zhes zer te/ shi ri ra lta bu'o/ /kha cig ni rnam pa bzhi yod do/ /zhes zer/ de yang reg pa bsnan na'o/ /bshad pa 'di dang sbyar na ni chos nyi shu rtsa gnyis sam/ yang na nyi shu rtsa gsum du 'gyur te/ 'di ltar snga ma bcu dgu'i steng du chos gsum mam/ yang na bzhi bsnan pa'i phyir ro/ /de ltar mang nyung mi mthun pa yod kyang sgra'i skye mched kyis ngo bo nyid byed par bzung ste/ rgyun mi 'chad pa'i btags pa'i sgra'i ngo bo nyid gud na med pa'i phyir ro/ /'dir theg pa chen po'i gzhung dang sbyar na/ de yang mi mthun par smra ba rnam pa gnyis yod do/ /dang po ni nA gardzu na'i gzhung ste/ chos kyi rnam grangs mang nyung nges par bstan pa'i bstan bcos med de/ shes rab kyi pha rol tu phyin pa'i 'grel pa las chos rnams kyi mtshan nyid rnam par bshad pa yang phal cher thams cad yod par smra bar 'dod pa dag dang mthun par chos ni mdor bsdu na bdun brgya drug cu rtsa gcig yod par bstan te/ de ltar bstan pa yang thams cad yod par smra ba'i gzhung gis chos bdun cu rtsa lngar 'dod pa dang / gnas pa bcu bshad pa'i bstan bcos las mtshungs par ldan pa ma yin pa'i chos bdun brgya yod par rnam par gzhag pa'i phyir mtshungs par ldan pa ma yin pa'i chos bcu bzhi ston te/ mtshungs par ldan pa ma yin pa'i bdun brgyas bsnan na/ chos bdun brgya drug cu rtsa gcig tu 'gyur ro/ /des na gzugs rnam pa bcu gcig las sgra ngo bo nyid byed de/ de'i phyir shes rab kyi pha rol tu phyin pa'i 'grel pa las 'di skad du mngon par shes pa drug thob pa'i dgra bcom pa dag de bzhin gshegs pa chos 'chad pa'i tshe 'khor 'dus pa nyid du ma 'dus kyang 'di ltar lha'i mig gis sangs rgyas mthong ngo / /lha'i rna bas chos thos so/ /mngon par shes pas ma khyab pa'i gnas der ni mthong zhing thos par mi nus so zhes 'byung ba des na de bzhin gshegs pa'i bstan pa ni sgras ngo bo nyid byed do/ /gnyis pa ni 'phags pa byams pas bstan pa'i gzhung ste/ des mdor bsdu na chos ni brgya yod par bshad de/ ji ltar chos brgya pa'i rab tu byed pa las bstan pa bzhin no/ /sangs rgyas kyi bstan pa'i ngo bo nyid ston pa de yang gsung rab de dag las mthun par mi 'byung ste/ kha cig las ni sgra 'ba' zhig go zhes gsungs te/ 'phags pa dri ma med par grags pas bstan pa la sogs pa las ji skad du/ sangs rgyas gsung gcig tu ni chos ston kyang / /sems can mos pa ji bzhin so sor go/ /zhes gsungs pa dang / gzhan yang de nyid las 'jig rten 'di'i sems can dag shin tu gdul bar dka' ba'i phyir / bcom ldan 'das kyis kyang tshig drag po'i chos kyis 'dul bar mdzad do zhes gsungs pa dang / gzhan yang khams chen po bstan pa'i mdo las/ de bzhin gshegs pas gsung gcig chos bstan las/ /dpag med mdo sde rgya mtsho rab tu gsungs/ /zhes gsungs pa dang / gzhan yang de nyid las de bzhin gshegs pa'i gsung ni mdor bsdu na/ rnam pa gsum yod de/ 'di lta ste mdo sde dang 'dul ba dang ma mo zhes gsungs pa lta bu ste/ 'di la sogs pa'i gsung rab gtan tshigs su rung ba mang po yod do zhes so/ /kha cig las ni ming la sogs pas ngo bo nyid byed do zhes gsungs te/ 'phags pa mi'i rgyal po'i mdo las ji skad du mdo sde 'di'i ming dang tshig ni sangs rgyas brgya stong du mas gsungs so zhes gsungs pa lta bu'o/ /rnam par rig pa tsam du grub pa'i bstan bcos las kyang / gal te ming dang tshig dang yi ge'i tshogs sgra dang tha mi dad na/ chos dang nges pa'i tshig so sor yang dag par rig pa'i yul tha dad med par 'gyur ba'i rigs so/ /zhes 'byung bas/ ming la sogs pa rang gi ngo bo nyid byed do/ /la la las ni gcig tu bsdus nas sgra dang ming la sogs pas rang gi ngo bo nyid byed do zhes gsungs te/ mi'i rgyal po'i mdo las ji skad du gsung rab yan lag bcu gnyis ni ming dang tshig dang yi ge dang sgra dri ma med pas bsdus so zhes gsungs pa dang / yang de nyid las sgra skad dang tshig dang yig 'bru dang yi ges kyang sangs rgyas kyi mdzad pa byed do zhes gsungs pa lta bu'o/ /'phags pa dri ma med par grags pas bstan pa las kyang de skad du gsungs so/ /gzhan yang mdo sde 'phags pa sa bcu pa'i 'grel pa las/ 'chad pa po yang dngos po 'di gnyis kyis 'chad do/ /nyan pa po yang dngos po 'di gnyis kyis nyan par byed do zhes 'byung ste/ de la dngos po gnyis zhes bya ba ni 'di lta ste/ sgra dang ming la sogs pa'o/ / la lar ni yi ge dang don gcig tu bsdus pa la ngo bo nyid do zhes ston te/ rnal 'byor spyod pa'i sa las ji skad du mdo sde'i lus ni mdor bsdu na rnam pa gnyis te/ yi ge dang don no/ /de la yi ge ni rten to/ /don ni brten pa'o/ /'di ltar rnam pa 'di gnyis po thams cad ni yongs su shes par bya ba'i yul lo/ /zhes 'byung ste/ bstan bcos rnam par bshad pa las kyang de skad du bstan to/ /'di ltar gsung rab rnams de ltar so so nas mi mthun par bstan pa 'di las/ slob dpon sde snod gsum dang ldan pa dag gis bshad pa/ yang dag pa'i don du na ming dang tshig dang yi ge'i tshogs sgra dang yi ge dang don gcig tu bsdus pa la ngo bo nyid ces bya ste/ 'phags pa'i gsung rab rnams so so nas don re re la dmigs te/ bstan pas na phan tshun 'gal ba med do/ /de ci'i phyir zhe na/ 'di ltar btags pa rdzas su bsdus pa'i tshe ni sgras ngo bo nyid byed do / /sgra las logs shig na ming dang tshig la sogs pa med pa'i phyir ro/ /'di ltar ngo bo nyid las kyi rdzas su bsdus pa'i tshe ni ming la sogs pas ngo bo nyid byed de/ chos rnams kyi rang gi ngo bo dang khyad par brjod pa dang / gnyi ga'i rten byed pa'i phyir/ btags pa dang rdzas su yod pa phan tshun ltos pas na gcig tu bsdus pa la ngo bo nyid ces bshad de/ gal te rnam pa gcig ma tshang na bshad pa mi 'grub pa'i phyir ro/ /shes pa bskyed pa mthar phyin pa ni nges par yi ge dang don gyi dbang gis 'grub pas na/ de'i phyir mi mthun pa mang por bshad kyang phan tshun 'gal ba med do/ /de la gnyis la rang gi ngo bo dang / gzugs brnyan yod pa dang med pa bstan pa yang rnam pa gnyis te/ rang gi ngo bo dang gzugs brnyan yod pa dang med pa bstan pa dang / chos ston pa'i khyad par ro/ /rang gi ngo bo dang gzugs brnyan yod pa dang med pa dang / bstan pa ni de bzhin gshegs pas gsungs pa'i bstan pa rnams chos bzhis ngo bo nyid byed de/ 'di lta ste sgra skad dang ming dang tshig dang yi ge'i tshogs so/ /'di ltar chos bzhi po 'di dag ni de bzhin gshegs pa nyid kyis rang gi ngo bo nyid do zhes gsungs la/ nyan pa po'i rnam par rig par gyur pa ni gzugs brnyan zhes bya ba'o zhes gsungs so/ /rang gi ngo bo dang gzugs brnyan yod pa dang / med pa'i rnam par dbye ba ni mdor bsdu na so so'i gzhung la brten nas mu rnam pa bzhir gyur te/ de la mu dang po ni rang gi ngo bo yod la gzugs brnyan med pa'o/ /'di yang so so nas bshad pa mi mthun te/ re zhig sde pa rnams la brten nas rnam pa gsum du bshad de/ de la dang po ni thams cad yod par smra ba ste/ de 'di skad du sangs rgyas thams cad kyi gsung gis gcig tu zag pa dang bcas pa'o/ /ming la sogs pa ni nges par lung mi ston pa'o zhes zer te/ rgya cher rnam par dbye ba ni bstan bcos bye brag tu bshad pa la sogs pa las 'byung ba bzhin du rig par bya'o/ /gnyis pa ni phal chen pa'i sde pa dang / lan cig brjod pa'i sde pa dang / 'jig rten 'das par smra ba'i sde pa dang / bya ba ngal ba'i sde pa la sogs pa ste/ de dag 'di skad du sangs rgyas bcom ldan 'das rnams ni thams cad kyang 'jig rten las 'das pas zag pa dang bcas pa'i chos mi mnga'o/ /de bzhin gshegs pa rnams kyi gsung ni chos kyi 'khor lo bskor ro/ /sangs rgyas ni gsung gcig gis chos thams cad gsung ngo zhes zer ro/ /gsum pa ni mang du thos pa'i sde pa ste/ de skad du sangs rgyas kyi gsung rnam pa lnga ni 'jig rten las 'das pa yin te/ 'di lta ste sdug bsngal ba dang / stong pa dang / mi rtag pa dang / bdag med pa dang / mya ngan las 'das pa ni zhi ba'o zhes bya ste/ 'phags pa'i lam 'dren pa'i phyir ro/ /de las gzhan pa'i sgra rnams ni thams cad kyang 'jig rten pa'o zhes zer ro/ /'di la sogs pa sde pa rnams thams cad kyang rang gi ngo bo kho na ste gzugs brnyan ni ma yin no zhes 'dod do / /de dag gis gzhung las rnam par rig pa tsam gyi don mi ston pa'i phyir ro/ /de la mu gnyis pa gzugs brnyan yod pa la rang gi ngo bo med par 'dod pa ni 'di lta ste/ klu'i sde'o/ /'di skad du sangs rgyas kyis ni de bzhin nyid dang / de bzhin nyid kyi ye shes kho na ste/ gzugs dang sgra la sogs pa'i yon tan rags pa'i mtshan ma med do zhes ston te/ slob dpon brtan pa'i blo gros dang rdo rje'i sde yang de skad du 'chad do/ /mu gsum pa rang gi ngo bo dang gzugs brnyan gnyis ka yod par 'dod pa ni 'di lta ste/ slob dpon zla ba'i snying po dang / nye ba'i 'od la sogs pa'o/ /de dag 'di skad du de bzhin gshegs pa thams cad ni sku gsum dang ldan zhing gzugs dang sgra la sogs pa'i yon tan mnga' bas/ 'phags pa gser 'od dam pa'i mdo las kyang / de bzhin gshegs pa ni chos kyi 'khor lo rnam pa gsum bskor bar spyod de/ 'di lta ste/ bskor ba dang rtogs pa dang 'dzin pa'o zhes gsungs te/ 'di la sogs pa'i gtan tshigs su rung ba'i gsung rab mang du yod do/ /yang na nyan pa po rnam par shes par gyur nas de 'dra bar snang ba'i phyir ro/ /rang gi ngo bo dang gzugs brnyan gnyi ga yod par shes par bya'o zhes zer ro/ /mu bzhi pa rang gi ngo bo dang gzugs brnyan gnyis ka med par 'dod pa ni slob dpon 'phags pa don dam pa'i bden pa la brten nas/ chos thams cad ngo bo nyid kyis stong ngo zhes rnam par gzhag pa'o/ /yang na slob dpon chos skyong gis rang gi ngo bo dang gzugs brnyan gnyi ga med do/ /don dam pa'i bden pa la tshig la sogs pa med pa'i phyir ro zhes ston pa'o/ /de ltar khyad par gyur pa'i chos rnam pa bzhi yod kyang slob dpon h+yan tsang dang chos skyong gis gzhung gi don rnam pa gnyis su bstan te/ de la dang po yang dag pa'i bstan pa la brten nas rang gi ngo bo kho na ste/ gzugs brnyan ni ma yin no/ /rang gi ngo bo ni de bzhin gshegs pa nyid kyis rnam par rig pa las rnam par 'gyur ba'i phyir ro/ /gnyis pa ni yang dag pa dang gnyis ka yod par bstan te/ rang gi ngo bo dang gzugs brnyan de yang de bzhin gshegs pa'i gsung gi mthu'i dbang gis byung ba'i phyir ro zhes bshad do/ /yang dag pa dang gnyi ga la brten nas rang gi ngo bo dang gzugs brnyan yod par bstan pa de ji ltar shes par bya zhe na/ slob dpon ngo bo nyid med kyis theg pa chen po bsdus pa'i 'grel pa byas pa las/ 'di ltar nyan pa po'i rnam par shes pa la bsags pa rab tu phye bar gyur pa gang yin pa des bstan pa'i ngo bo nyid byed do zhes bshad de/ slob dpon chos skyong ni bstan bcos de tshad mar mi byed pas klan kar mi rung ngo / /yang slob dpon ngo bo nyid med kyang slob dpon chos skyong dang mthun par ston te/ 'di ltar slob dpon ngo bo nyid med thabs kyi sku gsum gzugs dang sgra la sogs pa'i yon tan mnga' zhing chos ston par yang spyod do/ / zhes 'dod de de'i phyir 'grel pa de nyid las longs spyod rdzogs pa dang / sprul pa ni rjes la thob pa'i ye shes kyi khyad par yin no zhes 'byung ngo / /gal te de ltar na ci'i phyir nyan pa po'i rnam par shes pa la sogs pa rab tu phye ba gang yin pa des bstan pa'i ngo bo nyid byed do zhes bshad la mthong ba po'i rnam par rig pa la gzugs la sogs pa snang ba gang yin pa de la sprul pa'i sku zhes ma bstan/ phan tshun mdor bsdus nas bstan pa'i phyir te/ yang dag pa'i don du na sku dang bstan pa gnyis ka la rang gi ngo bo dang gzugs brnyan mnga' bar slob dpon chos skyong gis bshad pa bzhin du bstan dgos so/ /gal te sku yang gzugs brnyan yin na ci'i phyir mthong ba po'i rnam par rig pa'i gzugs brnyan gyi sku zhes ma bstan/ de ltar rung bar nges pa yang med de klan ka dang mi 'brel pa'i phyir ro/ /gzhan yang bstan pas shes pa bskyed pa la nyan pa po'i rnam par rig pa'i mtshan nyid shes pa bskyed par nye ba'i phyir sku las sangs rgyas kyi ngo bo 'byung ba des na re zhig gzugs dang / sems la sogs pa zhes bshad do/ /nyan pa po'i rnam par rig pa las rnam par gyur pa bstan pa'i ngo bo nyid de zag pa dang bcas pa zhig gam 'on te zag pa med pa zhig yin/ sde snod gsum po dag gis rgya gar yul pa dag rnam pa gnyis su bshad do zhes bstan te/ kha cig ni 'di skad du gang zag pa med pa'i sems rnam par gyur pa gang yin pa de ni nges par zag pa med do/ /zag pa dang bcas pa'i sems rnam par gyur pa ni rnam pa gnyis te/ yang dag pa'i don du na zag pa dang bcas pa zhes bya ste/ 'di ltar zag pa dang bcas pa'i sems nyid yul du rnam par gyur pa'i phyir ro/ /chos kyi dbyings las byung ba'i don gyi mtha' la ltos na ni zag pa med pa zhes bya ste/ slob dpon ngo bo nyid med kyis byas pa'i bstan bcos kyi gzhung yang phal cher 'di la brten nas rnam par bshad do zhe'o/ /kha cig ni 'di skad du zag pa dang bcas pa'i sems rnam par gyur pa ni nges par zag pa dang bcas pa'o/ /zag pa med pa'i sems las rnam par gyur pa ni nges par gcig tu zag pa med pa'o zhes ston te/ de ltar rnam pa gnyis su bshad pa yod mod kyi/ slob dpon h+yan tsang dang chos skyong ni bshad pa phyi ma ltar 'dod de/ de'i phyir rnam par rig pa tsam du grub pa'i bstan bcos las/ zag pa dang bcas pa dang zag pa med pa ni lta ba'i mtshan nyid nges par mtshungs la/ dge ba la sogs pa'i rnam par shes pa'i mtshan nyid ni mtshungs par nges pa yang med de/ 'di ltar rnam pa gsum gyi ngo bo nyid kyi rgyu dang rkyen gyis 'dren mar drangs nas bskyed pa'i phyir ro/ /zag pa dang bcas pa yang dag pa'i bstan pa nyid du rnam par gyur nas/ yang dag pa'i bstan bcos de las zag pa dang bcas pa mngon par 'grub par 'gyur ram/ zag pa med pa'i phyin ci log gi bstan pa nyid du rnam par gyur nas phyin ci log gi bstan pa des zag pa med pa mngon par 'grub par 'gyur ram zhe na/ de ltar bshad na yang nyes pa med na / zag pa med pas rnam par gyur pa'i phyir ro/ /bstan pa la phyin ci log dang yang dag pa tha dad pa yod pa'i phyir thams cad zag pa dang bcas pa dang zag pa med pa zhes bya ba'am/ 'on te gang zag la so so'i skye bo dang / 'phags pa'i bye brag yod pa'i phyir thams cad 'phags pa dang / 'phags pa ma yin zhes bya bar 'dod/ de ltar bstan na yang nyes pa med de/ 'di ltar rnam par gyur pa'i sems rnams gnyis su 'gyur bar rung ba'i phyir ro/ /de la chos ston pa'i khyad par zhes bya ba yang rnam pa gnyis te sku gsum la brten nas bstan pa dang zhing rnams la brten nas bstan pa'o/ /sku gsum la brten nas bstan pa zhes bya ba las brtsams nas dris pa sku gang la brten nas chos ston par mdzad ce na/ thams cad yod par smra ba'i gzhung gis sangs rgyas ni rnam pa gnyis te/ dang po ni sku 'khrungs pa'i sangs rgyas 'di lta ste/ yab yum las zag pa dang bcas pa'i sku 'khrungs so/ /gnyis pa ni chos kyi sku'i sangs rgyas 'di lta ste/ cha rnam pa lnga'i chos kyi sku'o/ /sku rnam pa gnyis las 'khrungs pa'i skus chos ston par mdzad kyi chos kyi skus ni ma yin te/ mnyam par gzhag pa'i gnas skabs na chos ston par mi mdzad pa'i phyir ro zhe'am / mdo sde pa'i gzhung las kyang sku rnam pa gnyis yod de/ de gnyi gas kyang chos ston par spyod do zhes zer te/ de dag gi gzhung gis zag pa med pas kyang sgra skad mngon par bskyed nas/ 'phags pa'i gsung rab mdzad pa'i phyir ro/ /zhe'o/ /'dir theg pa chen po'i gzhung dang sbyar na/ sku rnam pa gsum mnga' ste/ chos ston par mdzad pa dang mi mdzad pa de yang mu rnam pa bzhir dbye'o/ /de la dang po gcig ni ston par mdzad la/ gnyis ni ston par mi mdzad de/ 'di lta ste chos kyi sku ni nang gi mngon par rtogs pa'i spyod yul gyi phyir ro/ /de'i phyir 'phags pa shes rab kyi pha rol tu phyin pa rdo rje gcod pa'i 'grel pa las/ longs spyod sprul pa yang dag sangs rgyas min/ /de bzhin chos 'chad pa yang ma yin te/ /zhes 'byung bas/ sku gnyis ni chos ston pa ma yin par shes par bya'o/ /gnyis pa ni gnyis ni ston par mdzad la/ /gcig ni ston par mi mdzad de/ longs spyod rdzogs pa dang sprul pa la gsung mnga' ba'i phyir dang / de bzhin nyid kyi chos kyi sku ni tshig gi mtshan nyid dang bral ba'i phyir ro/ /gsum pa ni sum char yang chos ston par mdzad de/ 'phags pa lang kar gshegs pa bam po bcur byas pa las ji skad du/ de la chos kyi sku'i sangs rgyas chos ston par mdzad pa ni nang gi so sor rig pa 'phags pa'i spyod yul gyi phyir ro/ /longs spyod rdzogs pa'i sangs rgyas chos ston par mdzad pa ni chos thams cad kyi rang gi mtshan nyid mnyam pa nyid du ston pa'i phyir ro/ /sprul pa'i skus chos ston par mdzad pa ni pha rol tu phyin pa drug la sogs pa ston pa'i phyir ro/ /zhes bya ba nas rgya cher gsungs pa'i bar du'o/ /'phags pa lang kar gshegs pa bam po bzhir byas pa las kyang phal cher 'di dang mthun par 'byung ngo / /bzhi pa ni sum char yang chos ston par mi mdzad de/ de ci'i phyir zhe na/ de bzhin nyid kyi chos kyi sku ni gsung mi mnga' ba'i phyir dang / longs spyod rdzogs pa'i sangs rgyas ni mngon par 'du mdzad pa mi mnga' ba'i phyir dang / sprul pa'i de bzhin gshegs pa ni yang dag pa'i 'chad pa po ma yin pa'i phyir ro/ /sku rnam pa bzhi dang sbyar na mu rnam pa lnga yod de/ de la dang po ni gcig ston par mdzad la/ gsum ni 'chad par mi mdzad pa'i phyir/ 'di lta ste chos kyi sku ni ngag gi so sor rig pa'i spyod yul gyi phyir dang / nyid kyi brten pa yang ma yin te/ mngon par 'du mdzad pa mi mnga' ba'i phyir dang / sku gzhan yang ma yin te/ yang dag pa'i 'chad pa po ma yin pa'i phyir ro/ /gnyis pa ni gnyis 'chad par mdzad la/ gnyis 'chad par mi mdzad de/ 'di lta ste/ gzhan yang yongs su longs spyod pa dang / sprul pa dag yin gyis/ sku gzhan gnyis ni ma yin te/ tshig mi mnga' ba'i phyir dang / mngon par 'du mdzad pa mi mnga' ba'i phyir ro/ /gsum pa ni gsum 'chad par mdzad la gcig ni mi 'chad de/ de bzhin nyid kyi chos kyi sku ni tshig gi mtshan nyid dang bral ba'i phyir ro/ /bzhi pa ni bzhi char yang 'chad par mdzad de/ 'phags pa lang kar gshegs pa las/ ji skad du sku gsum char gyis chos 'chad do/ /zhes gsungs pa lta bu ste/ sprul pa'i sku las rnam pa gnyis su phye ba'i phyir ro/ /lnga pa ni bzhi char yang 'chad par yang mi mdzad de/ tshig mi mnga' ba'i phyir dang / mngon par 'du mdzad pa mi mnga' ba'i phyir dang / yang dag pa 'chad pa po ma yin pa'i phyir ro/ /de ltar mu tha dad pa mang po yod mod kyi/ slob dpon nye ba'i 'od la sogs pas gzhan yongs su longs spyod pa'i sku dang sprul pa'i skus chos 'chad do zhes bshad pa de yang dag pa'i don yin te/ de'i phyir 'phags pa sangs rgyas kyi sa'i 'grel pa las/ longs spyod rdzogs pa dang sprul pa'i sku'i sangs rgyas kyi zhing rnam pa gnyis las yongs su dag pa 'di zhing gang gis bsdus/ mdo sde 'di gsungs pa'i sangs rgyas ni sku gang zhig yin zhe na/ kha cig ni sprul pa'i zhing du sprul pa'i skus chos 'chad do zhes zer ro/ /kha cig ni longs spyod rdzogs pa'i skus chos bshad do zhes zer te/ yang dag pa'i don du na sangs rgyas shAkya thub pas mdo sde 'di gsungs pa'i tshe/ mos pas spyod pa'i sa man chad kyi 'khor rnams kyis ni sprul pa'i skus zhing yongs su ma dag pa 'dir chos 'chad par mthong la/ sa la gnas pa'i 'khor mang po rnams kyis ni longs spyod rdzogs pa'i skus sangs rgyas kyi zhing yongs su dag par chos 'chad pa mthong ste/ thos pa mtshungs kyang mthong ba ni so so tha dad do zhes 'byung ste/ zhib tu de nyid las 'byung ba bzhin no/ /gal te de de ltar sku rnam pa gnyis chos 'chad par mdzad na/ 'phags pa lang kar gshegs pa la sogs pa ji lta bu go zhing rnam par bshad par bya ste/ 'phags pa lang kar gshegs pa bam po bzhir byas pa las ji skad du des na de'i phyir ngas 'di skad du gang gi nub mo ngas mngon par rdzogs par sangs rgyas pa nas gang gi nub mo yongs su mya ngan las 'das par 'gyur ba de'i bar du yi ge gcig kyang ma bshad mi 'chad/ 'chad par mi 'gyur ro zhes gsungs pa dang / gzhan yang mdo sde nyid las gang bshad pa ni sangs rgyas kyis bshad pa'o zhes gsungs pa dang / gzhan yang 'phags pa shes rab kyi pha rol tu phyin pa las/ sems can rnams so so nas bcom ldan 'das ni bdag gcig pu'i phyir chos 'chad do snyam du sems kyang / de bzhin gshegs pa gdod ma nas 'chad dam/ bstan pa med do zhes gsungs pa dang / gzhan yang mdo sde de nyid las sangs rgyas dang byang chub sems dpa' rnams ni thog ma nas tha ma'i bar du yi ge 'bru gcig kyang ma bshad do zhes gsungs pa lta bu'o zhe na/ kun rdzob kyi dbang du mdzad pa'i phyir ni sangs rgyas kyis bshad do/ /zhes bstan pa yin la/ don dam pa la brten nas ni ma bshad do zhes brjod pa yin te/ de'i phyir bstan bcos shin tu rgyas pa brgya pa las don dam pa'i tshul la ni/ rnam par rtog pa'i spros pa thams cad chad pa'i phyir/ de bzhin gshegs pa rnams chos gang yang brjod du yod pa'am/ chos gang yang cung zad dmigs su yod pa ma yin yang kun rdzob kyi rjes su rnam par gzhag pas nyes pa med do zhes bshad do/ / yang na ma bshad do zhes gsungs pa yang don rnam pa gsum gyi phyir te/ de la dang po ni de bzhin nyid tshig gi brjod pa la sogs pa mtshan ma sna tshogs pa dang bral ba la dgongs pa'i phyir ma gsungs so zhes gsungs te/ de'i phyir lang kar gshegs pa bam po bzhir byas pa las ci'i rgyus bshad pa med pa ni/ sangs rgyas kyis bshad pa'o zhes gsungs/ bcom ldan 'das kyis bka' stsal pa/ blo gros chen po ngas chos rnam pa gnyis la dgongs nas de skad smras so/ /chos gnyis gang zhe na/ 'di lta ste rang gis mngon par rtogs pa'i chos dang / ngo bo nyid kyis gnas pa'i chos te zhes gsungs pa dang / gzhan yang mdo sde de nyid bam po bcur byas pa las/ rang gi lus nang gi so sor rig pa la brten pa'i chos dang / ngo bo nyid kyis gnas pa'i chos so zhes gsungs te/ rgya cher ni de nyid las 'byung ba bzhin no/ /mdo sde de'i dgongs pa ni 'di yin te/ de bzhin nyid kyi rnam pa gcig la don rnam pa gnyis yod de/ nang gi rang gis mngon par rtogs pa 'di dang de bzhin gshegs pa byung yang rung ma byung yang rung / ngo bo nyid kyi mtshan nyid ni rtag tu gnas pas de bzhin nyid de tshig gi brjod pa dang bral ba'i phyir ma bshad do zhes gsungs te/ de'i phyir 'phags pa lang kar gshegs pa bam po bzhir byas pa las/ gang gi nub mo mngon sangs rgyas/ /gang gi nub mo mya ngan 'das/ /de dag gnyis kyi bar du yang / /nga yis cung zad bshad pa med/ /rang gis mngon rtogs chos gnas pas/ /de phyir ngas ni 'di skad bshad/ /nga dang sangs rgyas de dag la/ /bye brag gyur pa ci yang med/ /ces gsungs pa dang / gzhan yang mi'i rgyal pos zhus pa'i mdo las/ /nyan pa med cing bshad med nam mkha' bzhin/ /chos ni chos nyid mtshungs shing nyan dang bshad pa 'dra/ /chos rnams kun dang gcig cing de bzhin nyid/ /ces gsungs pa dang / gzhan yang slob dpon dbyig gnyen gyis mdzad pa'i 'phags pa rdo rje gcod pa'i 'grel pa las gang la la zhig 'di skad du de bzhin gshegs pa rnams chos 'chad pa yod do zhes zer na/ de ni sangs rgyas la skur pa btab pa yin pas/ ngas bshad pa'i don mi shes so zhes gsungs pa 'di'i don ji lta bu zhe na/ tshigs su bcad pa las/ /sangs rgyas ji bzhin chos kyang de bzhin te/ /bstan pa gnyis po shin tu tha dad kyang / /chos kyi dbyings dang yongs su ma bral bas/ /chos bstan pa la rang gi mtshan nyid med/ /ces 'byung ste/ 'di nyid kyi 'grel pa las/ gnyis po shin tu tha dad pa/ /zhes bya ba ni bstan pa'i chos dang don to zhes bshad do/ /de la bstan bcos 'di'i dgongs pa ni 'di yin te/ sprul pa'i sku'i de bzhin gshegs pa ni de bzhin nyid las gud na rang gi mtshan nyid gzhan med de/ ji ltar sangs rgyas de bzhin nyid las gud na rang gi mtshan nyid gzhan med pa ste / de bzhin du bstan pa'i chos dang don kyang de bzhin no zhes ston to/ / gnyis pa ni de bzhin gshegs pa rnams kyi bstan pa tha dad pa med pa la dgongs nas ma bshad do zhes gsungs te/ de'i phyir 'phags pa rdo rje gcod pa'i 'grel pa las/ mdo las ji skad du rab 'byor de bzhin gshegs pa ni chos bshad pa med pa'i phyir zhes gsungs pa 'di'i don ji lta bu zhe na/ chos gang yang de bzhin gshegs pa nyag gcig gis ni gsungs la/ sangs rgyas gzhan gyis ni ma gsungs pa med pa'i phyir ro zhes bshad do/ /gsum pa ni yi ger lhung ba'i chos la dgongs nas ma bshad do zhes gsungs te/ de'i phyir 'phags pa lang kar gshegs pa bam po bzhir byas pa las/ de bzhin gshegs pa ni yi ger lhung ba'i chos mi ston te/ yi ge rnams kyi yod pa dang med pa mi dmigs pa'i phyir/ gzhan du ni yi ger ma lhung bas chos bstan to/ /gal te kha cig 'di skad du de bzhin gshegs pa ni yi ger lhung ba'i chos ston to/ /zhes zer na de ni brdzun du smra ba de chos nyid ni yi ge dang bral ba'i phyir ro/ /de lta bas na sangs rgyas dang byang chub sems dpa' rnams ni yi ge gcig kyang ma bshad 'chad par mi 'gyur ro/ /zhes bya ba la sogs pa rgya cher gsungs so/ /gzhan yang de nyid las blo gros chen po gal te chos thams cad ma bshad na ni bstan pa'i chos rnams 'jig par 'gyur ro/ /bstan pa'i chos zhig na ni sangs rgyas dang byang chub sems dpa' dang / rang sangs rgyas dang nyan thos rnams kyang med par 'gyur ro/ /de dag med na ni gang zhig su la ci zhig bshad de zhes gsungs pa yin no/ /gong du bstan pa'i mdo sde dgu dag las gsungs pa dang sbyar na yi ger lhung ba'i chos mi gsung mod kyi/ 'on kyang yi ger ma lhung ba'i sde snod gsum 'phags pa'i gsung rab mi 'chad pa yang ma yin te/ de'i phyir 'phags pa dri ma med par grags pas bstan pa'i mdo las/ de la chos 'chad pa po yang bshad pa dang / bstan pa med la/ nyan pa po yang thos pa med thob pa yang med de/ dper na sgyu ma'i skyes bus sgyu ma'i skyes bu la chos ston pa ltar de lta bu'i bsam pas chos bshad par bya'o zhes gsungs pas/ don des na gsungs pa dang ma gsungs pa zhes bya ba gnyi ga yang phan tshun 'gal ba med do/ /de la zhing la brten pa'i khyad par bstan pa zhes bya ba yang ji ltar 'phags pa lang kar gshegs pa'i mdo las sangs rgyas kyi zhing rnams kyi dbang du mdzad nas chos ston pa rnam pa bcu'i khyad par gsungs pa lta bu de / dang po tshig gis chos bstan pa nas/ tha ma lus bskyod pas chos ston pa'i bar du gsungs pa'o/ /mdo sde de nyid bam po bcur byas pa las kyang / byang chub sems dpa' blo gros chen pos yang gsol pa/ bcom ldan 'das brjod pa mchis na ni dngos po rnams kyang mchis par 'gyur la dngos po rnams ma mchis na ni brjod pa yang ma mchis par 'gyur ro/ /bcom ldan 'das kyis bka' stsal pa/ blo gros chen po dngos po med pa dag kyang brjod pa ni yod de/ 'di lta ste/ ri bong gi rwa la sogs pa'o/ /blo gros chen po ri bong gi rwa ni yod pa yang ma yin med pa yang ma yin yang brjod pa ni yod pa'i phyir ro / /khyod kyis smras pa'i don de ni nyams par 'gyur ro/ /blo gros chen po sangs rgyas kyi zhing thams cad na brjod pas chos ston pa ni ma yin te/ de ci'i phyir zhe na/ sangs rgyas kyi zhing la la na ni mig mi 'dzums shing tshig gi brjod pa med pa la chos ston pa zhes brjod do/ /sangs rgyas kyi zhing la la na ni mtshan ma bstan pa la chos bshad pa zhes brjod do/ /sangs rgyas kyi zhing la la na ni smin ma bskyod pa'i mtshan ma la chos bshad pa zhes brjod do/ /sangs rgyas kyi zhing la la na ni mig rig rig byas pa la chos bshad pa zhes brjod do/ /sangs rgyas kyi zhing la la na ni bgad pa la chos bshad pa zhes brjod do/ /sangs rgyas kyi zhing la la na ni glal ba la chos bshad pa zhes brjod do/ /sangs rgyas kyi zhing la la na ni se gol byas pa la chos bshad pa zhes brjod do/ /sangs rgyas kyi zhing la la na ni rjes su dran pa la chos bshad pa zhes brjod do/ /sangs rgyas kyi zhing la la na ni lus bskyod pa la chos bshad pa zhes brjod do zhes gsungs so/ /'phags pa dri ma med par grags pas bstan pa'i mdo la sogs pa dang sbyar na/ ji tsam du rnam pa sna tshogs kyis phan 'dogs pa thams cad ni chos ston pa zhes bya ste/ de'i phyir mdo sde de nyid las la la na ni 'od zer gyis sangs rgyas kyi mdzad pa byed do/ /de bzhin du la la na ni nam mkhas so/ /la la na ni sgra skad dang tshig gi brjod pa dang yi ges sangs rgyas kyi mdzad pa byed do/ /sangs rgyas kyi zhing la la na ni rab tu zhi zhing tshig med pa dang brjod pa yang med/ bstan pa yang med pa dang / rnam par rig pa med pa dang / mngon par 'dus byas pa med pa dang / 'dus ma byas kyis sangs rgyas kyi mdzad pa byed do/ /de bzhin du kun dga' bo sangs rgyas rnams kyi spyod lam dang / g.yo zhing bskyod pa thams cad ni sangs rgyas kyi mdzad pa ma yin pa gang yang med do/ /zhes gsungs te/ zhib tu ni de nyid las 'byung ba bzhin no/ /de ltar chos ston pa tha dad par gyur pas yang de bzhin gshegs pa rnams kyi thabs mkhas pas so so'i zhing gis 'dul ba'i rjes su rnam pa sna tshogs mi mthun pas phan 'dogs pa ni sangs rgyas kyi mdzad pa zhes bya ste/ de'i phyir de bzhin gshegs pa rnams phan tshun 'gal ba med do/ /gong du bstan pa lta bu chos ston pa de dag la ming la sogs pa yod dam zhe na/ nges pa med de zhing so so dag na chos ston pa yang nam mkha' la sogs pa shes pa bskyed pa'i phyir/ chos bshad pa zhes brjod pa nas/ ming la sogs pa med de/ 'dus ma byas kyi chos rnams la gnas skabs med pa'i phyir ro / /brjod pa yang med bstan pa yang med pa la sogs pa rab tu zhi zhing tshig med pa'i sems la brtags pa tsam du ming la sogs pa rnam par gzhag na yang 'gal ba med de/ 'dus byas kyi sems la sogs pa la gnas skabs yod pa'i phyir ro/ / //bam po gnyis pa/ de la gsum pa bsags pa rnam par phye bas sems kyi khyad par bstan pa zhes bya ba yang slob dpon ngo bo nyid med kyis theg pa chen po bsdus pa'i 'grel pa byas pa las ji skad du brgyus zhing 'brel pa'i phyir mdo zhes bya'o zhes 'byung ba lta bu ste/ de la 'dir dus brgyad kyi rjes su zhugs shing nyan pa po'i rnam par rig pa la drang po dang drang po ma yin par bshad pa dag bsags shing / rnam par phye ba gang yin pa de la ngo bo nyid ces bya'o/ /dus brgyad ces bya ba yang rnam pa gnyis su bshad do/ /kha cig na re dus brgyad ni bsgyur ba'i sgra brgyad nyid de 'di ltar bsgyur ba'i sgra bdun gyi steng du 'bod pa'i sgras bsnan pa ste/ ji skad du skyes bu zhes brjod pa lta bu'o/ /bsgyur ba'i sgra brgyad ni 'og nas rnam par dbye ba nyid de/ 'di ltar de bzhin gshegs pa rnams chos 'chad pa'i tshe bsgyur ba brgyad po las gang yang rung ba'i sgra cig brjod pas na de'i phyir dus brgyad kyi rjes su zhugs pa zhes bya'o zhe'o/ /kha cig ni sgra'i rig pa'i rab tu byed pa la brten nas/ nyin dang mtshan re re la dus bzhi bzhi yod pas gcig tu bsdus na/ dus brgyad du 'gyur te/ de bzhin gshegs pa rnams chos 'chad pa yang dus brgyad po las gang yang rung ba cig gi rjes su 'gro bas na/ de'i phyir dus brgyad kyi rjes su zhugs pa zhes bya'o zhe'o/ /de la drang po dang drang po ma yin par bshad pa zhes bya ba yang rnam pa gsum du bshad do/ /kha cig ni rang gi ngo bo nyid brjod pa'i phyir drang por bshad pa zhes bya'o/ /khyad par brjod pa'i phyir drang po ma yin par bshad pa zhes bya'o zhe'o/ /kha cig ni tshig rkang ni drang por bshad pa zhes bya'o/ /tshigs su bcad pa ni drang po ma yin par bshad pa zhes bya'o zhe'o/ /kha cig ni gsung rab yan lag bcu gnyis las mdo sde mdo'i sde ni drang por bshad pa zhes bya'o/ /gzhan bcu gcig po dag ni drang po ma yin par bshad pa'o/ /zhes bya'o zer te/ de'i don du na dus brgyad kyi rjes su zhugs shing nyan pa po'i rnam par rig pa la gsung rab yan lag bcu gnyis kyi ming dang yi ge dang tshig la sogs pa bsags shing rab tu phye bar gyur pa gang yin pa des bstan pa ngo bo nyid byed do zhes ston to/ /ji lta bu zhig la nyan pa po'i rnam par rig pa'i sems zhes bya/ ci'i phyir bsags pa rab tu phye ba zhes bstan zhe na/ rnal 'byor spyod pa'i sa dang sbyar na re zhig rnam par shes pa'i tshogs drug la brten nas sems rnam pa lnga rnam par 'byed par byed de/ de'i phyir bstan bcos de nyid las gzhan yang / mig gi rnam par shes pa byung ba na nye bar gnas pa las byung ba dang / tshol ba dang / nges pa'i sems rnam pa gsum dmigs par 'gyur te/ de la dang po ni mig gi rnam par shes pa nyid do/ /gnyis pa ni yid kyi rnam par shes pa'o/ /de la nges pa'i sems phan chad nas kun nas nyon mongs pa dang rnam par byang bar 'gyur bar blta'o/ /de nas de'i rgyu mthun pa'i mig gi rnam par shes pa'i yang dge ba dang mi dge bar yang 'byung bar 'gyur te/ rang gi rtog pa'i dbang gis ni ma yin no/ /ji srid du yid de gzhan la rnam par g.yengs par ma gyur pa de srid du yid kyi rnam par shes pa dang / mig gi rnam par shes pa gnyis ka dge ba'am/ nyon mongs pa can du rgyun mi 'chad par 'jug par 'gyur ro/ /mig gi rnam par shes pa byung ba na ji lta ba bzhin du lus kyi rnam par shes pa'i bar du yang de bzhin nyid du rig par bya'o zhes 'byung ste/ rnam pa lnga las dang po dang tha ma ni rnam pa drug dang ldan no/ /bar ma gsum ni yid 'ba' zhig go/ /gzhan yang dang po gsum ni lung du ma bstan pa yin la/ tha ma gnyis ni dge ba dang mi dge bar yang 'gyur ro/ /gzhan yang nye bar gnas pa las byung ba'i rnam par shes pa lnga'i 'og tu nges par tshol ba'i sems yod la/ tshol ba'i sems kyi 'og tu ni rnam par g.yengs pa'am/ rnam par g.yengs pa ma yin pa nyid du 'gyur te/ de'i 'og tu ni nye bar gnas pa las byung ba'i rnam par shes pa lnga nyid du 'byung bar 'gyur ro/ /rnam par g.yengs par ma gyur na ni gsum pa nges pa'i sems nas rgyu mthun pa'i bar du 'byung bar 'gyur ro/ /gzhan yang yid kyi rnam par shes pa'i nye bar gnas pa las byung ba ni rnam pa gnyis te/ rnam par shes pa lnga dang dus gcig pa'i nye bar gnas pa las byung ba'i yid kyi rnam par shes pa dang / yid gcig pu'i nye bar gnas pa las byung ba'i sems zhes brjod pa'o / /de'i phyir rnal 'byor spyod pa'i sa las/ de la yid kyi rnam par shes pa rtsol ba med cing rnam par g.yeng bar gyur pa dang ma 'dris pa'i dmigs pa la ni 'dun pa la sogs pa 'jug pa med do/ /yid kyi rnam par shes pa de ni nye bar gnas pa las 'byung bar zhes brjod par bya ste/ 'das pa la dmigs pa kho na'o/ /rnam par shes pa'i tshogs lnga po dag gi mjug thogs su byung ba'i yid tshol ba pa'am / nges pa ni gal te de'i yul de'i dmigs pa yin na/ da ltar gyi yul can kho na zhes bya'o zhes 'byung ngo / /gal te yul de nyid la dmigs nas skye'o zhe na/ 'grel pa dag gis rnam pa bzhir bshad de/ de la kha cig ni yid kyi rnam par shes pa rang gi ngang gis 'jug cing sems dang po gsum gyi go rims la mi brten pa ni rnam par g.yeng ba zhes bya ba'o / /rkyen drag po ma yin pa dang / ma goms pa'i yul la dmigs pa'i tshe ni lnga kun tu 'gro ba yod kyi/ lnga yul so sor nges pa ni med do/ /de'i tshe yid kyi rnam par shes pa de ni nye bar gnas pa las byung ba'i sems zhes brjod par bya'o/ /sngon myong ba'i yul 'das pa la dmigs pa dang rnam par shes pa'i tshogs lnga'i mjug thogs su byung ba'i yid kyi rnam par shes pa zhes brjod pa dang / tshol ba pa'i sems sam nges pa'i sems gang yin pa de dag ni snga ma'i rnam par shes pa'i tshogs lnga'i rnam pa'i yul mngon sum du gyur pa la dmigs pa kho na zhes brjod par bya'o/ /tshol ba po dang nges pa'i sems gnyis po gang yin pa de dag ni rnam par shes pa'i tshogs lnga po de dag gi rnam pa'i yul la dmigs nas skye'o zhes bshad de/ slob dpon gzhan gsum gyi bshad pa dag ni sems rnam pa lnga bstan pa las 'byung ba bzhin no/ /'dir re zhig sems rnam pa lnga dang sbyar nas/ bsags pa'i don rab tu bstan par bya ste/ de la bsags pa zhes bya ba ni mdo de dag las ji skad du/ 'du byed rnams ni mi rtag ste/ /byung nas zad pa'i chos can no/ /skyes nas nges par 'gag pa'i phyir/ /zhi ba de ni bde ba yin/ /zhes gsungs pa lta bu'o/ /mdo sde'i tshad ma 'dis rtag par 'dzin pa dag 'jig par mdzad de/ 'du byed rnams ni mi rtag ste/ /zhes bya ba ni dam bca' ba'o/ /byung nas zad pa'i chos can no/ /zhes bya ba ni chos mtshungs pa'i dpe ste/ mar me'i 'od la sogs pa smos pa'o/ /skyes nas nges par 'jig pa'i phyir/ /zhes bya ba ni gtan tshigs yin te/ rigs pa des na zhi ba'i mya ngan las 'das pa de ni mchog tu bde bar gyur pa yin no zhes bya'o/ /de la re zhig tshig dang po la brten nas bsags pa rnam par dbye bar bya ste/ 'di yang sgra rnam pa bzhi dang yi ge bzhi dang ming bzhi dang tshig bzhi dang brjod par bya ba'i don dang rab tu ldan no/ /don 'di la rgya gar yul pa'i slob dpon dag gis rnam pa gsum du bshad do / /kha cig tu 'di skad du rnam shes bya ba'i yi ge brjod pa'i tshe/ nye bar gnas pa las byung ba'i/ /rna ba'i rnam par shes pa las de dang dus gcig pa'i yid kyi rnam par shes pa dang / tshor ba pa'i sems la sgra'i mtshan nyid 'ba' zhig yod de/ de ci'i phyir zhe na/ lnga dang lhan cig pa'i yid kyi rnam par shes pa mngon sum gyi tshad ma yin pa'i phyir/ ming la sogs pa la dmigs par mi byed do/ /tshol ba'i sems rnam par shes pa'i tshogs lnga la sogs pa'i dmigs par bya ba'i yul yongs su tshol ba'i phyir ming la sogs pa la dmigs par mi byed do/ /rnam par shes pa gsum po 'di las rnam par gyur pa'i sgra la sogs pa yod kyang / skye ba la sogs pa'i mtshan nyid bzhin du dmigs pa mi byed pa'i phyir bsags pa zhes mi bshad do/ /nges pa'i sems kyi 'og tu mtshan nyid rnam pa gsum yod do/ / 'di lta ste/ sgra dang ming dang yi ge'o/ /'du byed ces brjod pa'i tshe ni nye bar gnas pa las byung ba'i rna ba'i rnam par shes pa dang / de dang lhan cig pa'i yid kyi rnam par shes pa dang / tshol ba'i sems ni 'du byed ces bya ba'i sgra 'ba' zhig dang ldan pa yin no / /snga ma bzhin du shes par bya'o/ /nges pa'i sems kyi 'og tu ni mtshan nyid rnam pa drug mngon sum du 'gyur te/ 'di lta ste/ rnam shes bya ba'i sgra dang ming dang yi ge dang / 'du byed ces bya ba'i sgra dang / ming dang yi ge'o/ /mi zhes brjod pa'i tshe ni nye bar gnas pa las byung ba'i sems la sogs/ mi zhes bya ba'i sgra 'ba' zhig thob par gyur te/ snga ma bzhin du rig par bya'o/ /nges pa'i sems kyi 'og tu ni mtshan nyid rnam pa gsum thob par 'gyur te/ 'di lta ste/ rnam shes bya ba'i sgra dang ming dang yi ge dang / 'du byed ces bya ba'i sgra dang / ming dang yi ge mi zhes bya ba'i sgra dang ming dang yi ge'o/ /rtag ces bya ba'i yi ge brjod pa'i tshe ni nye bar gnas pa la sogs pa'i sems rtag ces bya ba'i sgra 'ba' zhig thob par 'gyur te/ snga ma bzhin du rig par bya'o/ /nges pa'i sems kyi 'og tu ni mtshan nyid rnam pa bcu bzhi thob par 'gyur te/ 'di lta ste/ sgra bzhi dang yi ge bzhi dang ming bzhi dang tshig dang brjod par bya ba'i don to/ /des na rab tu nyung na yang rnam pa bcu drug dang ldan par gyur na/ gdod yongs su rdzogs par 'gyur te/ 'di ltar yi ge bzhi po de dag re re yang sems rnam pa bzhi dang ldan te/ 'di lta ste/ nye bar gnas pa las byung ba'i rna ba'i rnam par shes pa dang / de dang lhan cig pa'i yid kyi rnam par shes pa dang / tshol ba dang nges pa'i sems so/ /gal te rnam par g.yengs par ma gyur na ni kun nas nyon mongs pa dang / rnam par byang ba'i sems 'byung bar 'gyur te/ ci rigs su shes par bya'o/ /kha cig ni nye bar gnas pa las byung ba'i rna ba'i rnam par shes pa dang / de dang lhan cig pa'i yid kyi rnam par shes pa ming la sogs pa la dmigs par mi byed pa'i don yang yod pas/ snga ma bzhin du rig par bya ste/ mngon sum gyi tshad ma yin pa'i phyir ro/ /tshol ba pa phan chad ni mngon sum gyi tshad ma yin pas de ni sgra dang ming dang yi ge la sogs pa yongs su tshol ba'i sems rnam pa bzhi yang 'thob par 'gyur la/ go rims bzhin du gsum dang drug dang dgu dang bcu bzhi yang 'thob par 'gyur te/ snga ma bzhin du rig par bya'o zhe na/ rnam par bshad pa 'di dang sbyar na ni sems bcu gnyis dang ldan par gyur na gdod yongs su rdzogs par gyur te/ nges pa'i sems la sogs pas mang nyung ci tsam dang ldan par 'gyur ba yang ci rigs su shes par bya'o/ /kha cig ni rna ba'i rnam par shes pa dang lhan cig pa'i yid kyi rnam par shes pa ming la sogs pa la dmigs par byed pa'i don yang yod de/ de lta ma yin na tshol ba pa'i yid kyi rnam par shes pas ming ji lta bu zhig yongs su tshol bar byed de/ rigs pa des na rnam shes bya ba'i yi ge brjod pa'i tshe nye bar gnas pa las byung ba'i rna ba'i rnam par shes pa ni rnam shes bya ba'i sgra 'ba' zhig 'thob par 'gyur la/ /de dang lhan cig pa'i yid kyi rnam par shes pa'i ming la sogs pa la dmigs par byed pa'i don yang yod de/ de ltar ma yin na tshol ba pa'i yid kyi rnam par shes pas ming ji lta bu zhig yongs su tshol bar byed de/ rigs pa des na/ rnam shes bya ba'i yi ge brjod pa'i tshe/ nye bar gnas pa las byung ba'i rna ba'i rnam par shes pa ni rnam shes bya ba'i sgra 'ba' zhig thob par 'gyur la/ de dang lhan cig pa'i yid kyi rnam par shes pa ni sgra dang ming la sogs pa'i ldan par 'gyur ro zhe'o/ /don 'di yang rnam pa gnyis su phye nas rnam par bshad de/ kha cig ni 'di skad du nye bar gnas pa las byung ba'i sems rnam pa gsum kho na dang ldan te/ de ci'i phyir zhe na/ rtag ces bya ba'i sgra brjod pa'i tshe/ rnam shes bya ba la sogs pa'i sgra dang ming dang / yi ge la dmigs par mi byed de/ 'di ltar rnam par shes pa'i tshogs lnga dang lhan cig pa'i nye bar gnas pa nas byung ba'i sems zhes brjod pa ni mngon sum gyi tshad ma yin pa'i phyir ro/ /gal te dmigs so zhes bya bar 'dod na ni rnam par g.yengs pa'i sems kyi mngon sum gyi tshad ma yang 'das pa la dmigs par 'gyur ba'i phyir tshol ba pa'i sems kyi tshe gdod yongs su rdzogs par 'gyur te/ tshol ba pa la sogs pa'i sems kyis mang nyung ji tsam 'thob par 'gyur ba yang gnyis pas bshad pa bzhin no zhe'o/ /kha cig rnam par shes pa'i tshogs lnga dang lhan cig pa'i yid kyi rnam par shes pa mngon sum gyi tshad ma yin par yang 'dod pa'i phyir 'das pa'i ming la sogs pa la dmigs par yang byed do zhes zer te/ bshad pa 'di dang sbyar na ni sems rnam pa brgyad la yang bsags pa yongs su rdzogs par yod do/ /gal te gong du bshad pa ltar lnga dang lhan cig pa'i yid kyi rnam par shes pa nges par mngon sum gyi tshad ma yin na ci'i phyir ming la sogs pa la yang dmigs par byed ces bstan zhe na/ mngon sum gyi tshad mas kyang ming la sogs pa'i rang gi mtshan nyid la dmigs par byed do/ /rigs pa'i sgo'i bstan bcos la dmigs par mi byed do/ /zhes bshad pa yang ming la sogs pa la yang dmigs par mi byed de/ phan tshun 'ching ba'i 'bras bu yin pa'i phyir ro/ /yang na rgyu mthun pa'i rna ba'i rnam par shes pa'i dbang gis rab tu bskyed pa'i phyir/ rab tu phye ba zhes bya ba yang nye bar gnas pa las byung ba'i rna ba'i rnam par shes pa drangs te bskyed pa la ltos nas/ gdod bsags pa nyid du gyur par nges pa yang med do/ /de yan chad du ni re zhig gnas ma gyur pa'i gnas skabs la brten nas nye bar gnas pa las byung ba'i sems la sogs pa'i bsags pa rab tu phye ba bstan to/ /gnas gyur pa'i skabs na ni sems kyi skad cig ma gcig la rab tu phye ba rdzogs par yod de/ de yang ci rigs su rig par bya'o/ /sems rnam pa lnga rgya cher bshad pa ni mtshan nyid bstan pa las byung ba bzhin no/ /de la bzhi pa gsung gcig pa dang tha dad pa rnam par dbye ba zhes bya ba las brtsams nas dris pa/ de bzhin gshegs pas chos 'chad pa'i tshe/ gsung gcig tu gsung bar mdzad dam zhe na/ smras pa so so nas bshad pa mi mthun te/ theg pa chung ngu'i sde pa tha dad pa'i gzhung lugs kyi bstan bcos las/ sde pa tha dad pa nyi shu 'byung ba rnam pa gnyis su phye nas bstan te/ dang po ni thams cad yod par smra ba dang / mdo sde 'chad par byed pa la sogs pa'i sde pa rnams so/ /de dag 'di skad du zer te/ de bzhin gshegs pa'i gsung ma yin pa de dag gis kyang chos kyi 'khor lo bskor ro/ /de bzhin gshegs pa'i gsung gcig gis chos thams cad gsung ba yang ma yin no zhes bya ba nas/ rgya cher bshad pa'i bar du'o/ /gnyis pa ni phal chen pa'i sde pa dang / lan cig brjod pa'i sde pa dang / 'jig rten las 'das par smra ba'i sde pa dang / bya mngal ba'i sde pa la sogs pa rnams te/ de dag mthun par 'di skad du de bzhin gshegs pa rnams kyi gsung thams cad ni chos kyi 'khor lo bskor ro/ /de bzhin gshegs pa ni gsung gcig gis chos thams cad gsung bar byed do/ /zhes pa nas rgya cher bshad pa'i bar du'o/ /slob dpon yang dag bden pas 'phags pa gser 'od dam pa'i brjed byang byas pa las kyang / de bzhin gshegs pa'i gsung ni rnam pa gnyis te/ dang po ni gsung ngag las byung ste/ thams cad kyang chos kyi 'khor lo yin no/ /gnyis pa ni mthu'i yon tan gyis rab tu phye ba gsung ngag las ma byung ba 'khor lor ma gtogs pa ste/ ji ltar kun dga' bo la gang nas 'ongs so zhes dris pa la sogs pa dang / bcom ldan 'das chos 'chad pa'i tshe mdun dang rgyab na 'dug pa dag gis de bzhin gshegs pa zhal bstan nas chos 'chad par mthong ba lta bu ste/ 'di yang de bzhin du mthu'i yon tan gyis rab tu phye ba yin no zhes bshad do/ /slob dpon yang dag bden pas sde pa rnams kyi brjed byang byas pa las/ de bzhin gshegs pa'i gsung rnams ni sems can la phan 'dogs pas gang nas 'ongs zhes bya ba la sogs pa smras pa ni/ gzhan dag mgu ba dang / mos pa'i sems bskyed pa'i phyir te/ de yang chos kyi 'khor lo yin no zhes 'byung ngo / /bstan bcos bye brag tu bshad pa las kyang / gzhung lugs kyi 'khor lo'i bstan bcos dang mthun pa rnam pa gnyis su bshad de/ de'i phyir bstan bcos de nyid las bcom ldan 'das 'phags pa'i skad kyis 'phags pa'i bden pa bzhi bstan pas 'dul bar mdzad pa gang yin pa de dag go bar 'gyur ram zhe na/ de lta na nyes pa ci yod ce na/ gnyi ga la yang nyes pa yod de/ de ci'i phyir zhe na/ gal te spyod do zhe na 'dul ba las bshad pa de dag ji ltar bshad cing go bar rung ste/ ji skad du bcom ldan 'das kyis dus gcig gi tshe lha'i rgyal po bzhi la/ sngar 'phags pa'i skad kyis 'phags pa'i bden pa bzhi bstan pa na/ rgyal po bzhi las gnyis kyis ni go bar gyur la/ gnyis kyis ni go bar ma gyur to / /bcom ldan 'das kyis de dag la thugs brtse zhing phan gdags pa'i phyir/ lho phyogs kyi yul mtha' 'khob kyi skad kyis 'phags pa'i bden pa bzhi gsungs pa na/ rgyal po gnyis las gcig gis ni go bar gyur la/ gcig gis ni go bar ma gyur to/ /bcom ldan 'das kyis de la thugs brtse zhing phan gdags pa'i phyir yang / kla klo can gyi skad rnam pa gcig gis 'phags pa'i bden pa bzhi bshad pa na lha'i rgyal po bzhi po de dag thams cad kyis go bar gyur to/ /zhes gsungs so/ /gal te mi spyod do zhe na/ tshigs su bcad pa las gsungs pa de dag ji ltar rung ste/ tshigs su bcad pa las ji skad du/ sangs rgyas gsung gcig tu ni chos ston to / /sems can mos pa ji bzhin so sor go'o/ /bcom ldan gsung gcig tu ni bdag cag don rnam pa sna tshogs bshad par rab tu sems zhes gsungs te/ de la gsung gcig ces bya ba ni tshangs pa'i skad do zhes bya ba nas/ rgya cher bshad pa'i bar du'o/ /'di'i lan yang rnam pa gnyis su bshad de/ de la dang po ni 'di skad du bcom ldan 'das gsung gcig gis 'phags pa'i bden pa bzhi bstan pas thams cad mdzad par yang mi spyod do/ /bcom ldan 'das rang dbang dang rdzu 'phrul mnga' yang yul la dbang bsgyur bar mi spyod do/ /ji ltar rna bas gzugs mthong bar mi nus pa dang / mig gis sgra la sogs pa thos pa la sogs par mi nus pa bzhin no/ /gal te de lta na snga ma bzhin tshigs su bcad pa de ltar rung bar 'gyur rung bar bya dgos par nges pa yang med de/ sde snod gsum pa ma yin pa'i phyir ro/ /sangs rgyas la bstod pa'i tshigs su bcad pa rnams ni tshig la skyon yod pa phal che ste/ ji ltar bye brag tu smra ba dag bcom ldan 'das ni thugs rtag tu mnyam par gzhag pa'o/ / rtag par mnal ba mi mnga' zhes bstod pa ltar/ snga ma'i tshigs su bcad pa yang de bzhin te/ de'i phyir rnam par bshad mi dgos so/ /gzhan yang de bzhin gshegs pa'i gsung ni sgra rnams kyi yul la khyab pas ji ltar gsungs par bzhed pa bzhin du mdzad par spyad de/ 'di lta ste/ bcom ldan 'das kyis yul dbus kyi skad du gsung bar mdzad pa na/ yul dbus su skyes pa bas mchog tu gyur pa yin la/ yul gzhan dag gis yang de bzhin no zhes bya ba'i bar du ste/ 'di ltar bcom ldan 'das kyi gsung sgra'i yul rnams la khyab pa'i phyir tshigs su bcad pa de las de skad du bstan to/ /gzhan yang bcom ldan 'das kyi gsung yang zhing rno la myur du bsgyur ba'i phyir / rnam pa sna tshogs su gsung bar mdzad kyang thams cad kyis so so nas bcom ldan 'das kyis ni yul dbus kyi skad gsungs pa'i rjes la bar ma chad par yang shAkya'i yul gyi skad gsungs so/ /snyam pa nas/ de bzhin du ka ka'i ra'i skad du gsungs pa'i bar du ste/ 'di ltar myur bar bsgyur ba'i sa nas dus gcig go snyam du sems so/ /ji ltar mgal me'i 'khor lo ma yin yang 'khor lo'i mtshan nyid du snang ba ltar/ snga ma'i tshigs su bcad pa yang 'di la brten pa'i phyir 'gal ba med do/ /gzhan yang de bzhin gshegs pa ni skad mang po sna tshogs yod kyang / mi mthun par so sor lan 'debs pa'i phyir gsung gcig ces bshad do zhe'o/ / gnyis pa ni 'di skad du bcom ldan 'das ni 'phags pa'i skad kyis bden pa bzhi bstan pas thams cad go bar mdzad par spyod do/ /gal te de lta na ci'i phyir lha'i rgyal po phyi ma gnyis go bar ma gyur/ lha'i rgyal po bzhi po de dag mos pa tha dad pas de dag gi re ba yongs su skong ba'i phyir/ bcom ldan 'das tha dad par gsungs so/ /zhes bya ba nas rgya cher bshad pa'i bar du'o/ /gzhan yang bcom ldan 'das skad rnam pa sna tshogs rab tu mkhyen par bstan pa'i phyir/ de skad gsungs te/ 'di ltar kha cig bcom ldan 'das ni 'phags pa'i skad 'ba' zhig gis ston par mdzad kyi/ sgra skad thams cad la mnga' brnyes pa ni ma yin no snyam du the tshom za ba dag gi the tshom bcad pa'i phyir/ bcom ldan 'das kyis tha dad par gsungs so/ /gzhan yang gdul ba'i sems can kha cig ni bcom ldan 'das kyi sku dang gsung ma bsgyur bas 'dul bar 'gyur la/ gdul ba kha cig ni bcom ldan 'das kyi sku dang gsung bsgyur bas 'dul bar bya ba'i phyir/ bcom ldan 'das skad rnam pa gsum gyis lha'i rgyal po bzhi po dag la 'phags pa'i bden pa bzhi bstan to zhes bshad do/ /bye brag tu bshad pa chen po las go bar gyur te zhes bshad pa de ni gzhung lugs kyi bstan bcos las 'byung ba'i thams cad yod par smra ba la sogs pa'o/ /tshigs su bcad pa las go bar gyur to/ /zhes bshad pa ni nges par bshad mi dgos te/ sde snod gsum pa ma yin pa'i phyir dang / tshig gi skyon yod par bden pa'i phyir ro/ /gzhan yang gsung gcig ces bya ba ni rnam pa gsum yod de/ dang po ni sgra'i yul rnams la khyab cing gnas kyi rjes su mchog tu gyur pa'i phyir gcig ces bya'o/ /gnyis pa ni myur ba gcig pa lta bur gyur pa'i phyir gcig ces bya'o/ /gsum pa ni phan gdags par mtshungs pa'i phyir gcig ces bya'o/ /bye brag tu bshad pa chen po las go bar gyur to zhes bshad pa 'di ni gzhung lugs kyi bstan bcos las 'byung ba'i phal chen pa'i sde pa la sogs pa'o/ /de ltar rnam pa gsum du bshad pa yang dgongs pa rnam pa gsum yod de/ dang po ni de dag gi re ba yongs su rdzogs par mdzad pa'i phyir ro/ /gnyis pa ni de dag gi the tshom yongs su bsal ba'i phyir ro/ /gsum pa ni 'dul ba de dag bcom ldan 'das kyang sku dang gsung ma bsgyur ba dang / sku dang gsung bsgyur ba la brten pa gnyis kyi phyir ro zhe'o/ /'dir theg pa chen po dang sbyar na gsung gcig gis ston par byed do zhes phal chen pa'i sde pa la sogs pa dag dang mthun te/ de'i phyir tshad med pa'i don gyi mdo las/ gsung sgra gcig gis sgra skad mang po dang mthun par mdzad do/ /zhes gsungs so/ /gzhan yang 'phags pa sangs rgyas phal po che'i mdo las/ de bzhin gshegs pas gsung gcig gis chos ston pa las/ dpag med mdo sde rgya mtsho rab tu gsungs/ /zhes gsungs pa dang / gzhan yang 'phags pa dri ma med par grags pa'i mdo las/ sangs rgyas gsung gcig tu ni chos ston kyang / /sems can mos pa ji bzhin so sor go/ /zhes gsungs pa yin no/ /sangs rgyas kyi sa'i mdo'i 'grel pa las kyang / bya ba sgrub pa'i ye shes kyi mos pa can rnams kyi mos pa'i khyad par ji lta ba bzhin du gsung sprul pa'i phrin las des don rnam pa sna tshogs bstan pas the tshom rnams gcod par mdzad do zhes 'byung ngo / /yang na gcig bskyed pas don thams cad bstan nas sems can rnams kyi mos pa ji lta ba bzhin du phan pa thob par mdzad de / mdo de dag las ji skad du/ sangs rgyas gsung gcig tu ni bka' stsal na/ /sems can gsung gcig de dag so sor go/ /la la 'jigs skrag la la rab tu dga'/ /la la skyo zhing la la the tshom rab tu 'chad/ / ces gsungs pa lta bu ste/ 'di ni de bzhin gshegs pa'i sngon gyi smon lam gyis rab tu bskyed pa/ bsam gyis mi khyab pa'i mthu las byung ba'i gsung sprul pa yin pas gsung gcig gis sems can rnams kyi the tshom gcod par mdzad la/ sku sprul pa des kyang sems can rnams sku gcig la tha dad pa nyid du mthong bar mdzad pas kyang phan 'dogs pa'i dngos po rnams yongs su rdzogs par mdzad de/ 'di la sogs pa brjod kyis mi lang ngo / /de la gsung gcig ces bya ba yang mdor bsdu na rnam pa gsum ste/ dang po ni chos kyi rjes su gcig pa'i phyir gcig ces bya ste/ ji skad du gzugs zhes brjod pa'i tshe sems can dag so so nas thos pa tha dad pa lta bu'o/ /gnyis pa ni yul gyi rjes su gcig pa'i phyir gcig ces bya ste/ ji ltar dbus kyi yul gcig gi skad brjod pa'i tshe/ sems can dag so so nas rang gi yul gyi skad thos pa lta bu'o/ /gsum pa ni tshangs pa'i skad du gcig pa'i phyir gcig ces bya ste/ de'i phyir tshad med pa'i don gyi mdo las/ tshangs pa'i skad la spyi btud skyabs su mchi/ /zhes gsungs so/ /'phags pa shes rab kyi pha rol tu phyin pa'i 'grel pa las kyang / /'di ltar tshangs pa'i sgra skad kyis/ /sems can dag la chos ston to/ /zhes 'byung ngo / /bye brag tu bshad pa chen po las gsung gcig ces bya ba ni 'di lta ste/ tshangs pa'i skad de 'di ltar yul dbus kyi mi 'khor 'dus par 'ongs pa dag ni/ bcom ldan 'das bdag cag la yul dbus kyi skad du chos ston to snyam du sems la/ de bzhin du yul gzhan nas 'ongs pa dag ni bcom ldan 'das bdag gcig pu ni phyir rang gi yul gyi skad du ston to snyam du sems shing thos nas kyang ji lta ba bzhin du so so nas go bar gyur to/ /gzhan yang 'dod chags spyod pa dag ni mi gtsang ba bshad pa thos so/ /zhe sdang spyod pa gzhan dag ni byams pa bshad pa nyid du thos so/ /gti mug spyod pa dag ni rten cing 'brel par 'byung bar bshad pa nyid du thos so/ /nga rgyal spyod pa dag la sogs pa yang ci rigs su shes par bya'o zhes 'byung ngo / /de bzhin gshegs pas gsung gcig tu gsung ba 'di rang gi ngo bo yin nam 'on te gzugs brnyan nyid yin/ gal te rang gi ngo bo yin na ni ngo bo nyid med kyis byas pa'i theg pa chen po bsdus pa'i 'grel pa de ji ltar go zhing bshad par bya/ gal te gzugs brnyan yin na ni nyan pa po'i rjes su rnam pa mang po nyid du 'grub par 'gyur na/ ji ltar gcig ces brjod/ slob dpon chos skyong la sogs pa'i gzhung gis yang dag pa nyid kyi lung la brten nas rang gi ngo bo kho nar zad kyi/ gzugs brnyan ni ma yin no/ /zhes bshad de/ yang dag pa dang gnyis ka la brten nas bshad na ni rang gi ngo bo dang gzugs brnyan nyid du 'dod do/ /de gsung gcig ces bya ba yang tshangs pa'i skad du gcig pa'i gal yin te/ 'di ltar sgra la brten nas rjes su mthun pa dang / 'gal ba med par 'byed pa na rjes su mthun pa dang 'gal ba ni sgra gcig pa nyid du rung na/ gal te gzugs la brten nas/ sngon po dang ser po rnam par 'byed pa na sngon po dang ser po yang gcig pa nyid du 'gyur ram zhe na/ de ltar 'dod na yang nyes pa med de/ de bzhin gshegs pa'i rdzu 'phrul gyi mthu'i dbang gis gzugs la sogs pa'i dngos po gcig la so so nas tha dad par mthong ste/ de'i phyir sangs rgyas kyi sa'i 'grel pa las bya ba sgrub pa'i ye shes sku sprul pa des sems can rnams gzugs kyi dngos po gcig la tha dad par mthong bar mdzad pas kyang / phan 'dogs pa'i dngos po yongs su grub par 'gyur ro zhes bshad do/ /rdzu 'phrul gyi mthu la mnga' brnyes pa gzugs kyi dngos po gcig la tha dad par mthong du rung na/ rdzu 'phrul gyi mthu la mnga' brnyes pas gzugs kyi phung po tha dad pa yang gcig pa nyid du mthong bar 'gyur ram zhe'am / theg pa chen po'i gzhung gis mu bzhi yod de/ thams cad kyang 'grub pa nyid du bstan to/ /de la dang po ni gzugs la tha dad par mthong ba ste/ ji ltar sprul pa'i sku gcig la sems can rnams so so nas mi mthun par mthong ba lta bu'o/ /gnyis pa ni gzugs tha dad pa la mthong ba gcig pa ste/ ji ltar sprul pa'i sku gcig sangs rgyas rnams thun mong sprul pas sprul par mdzad pa la ltos nas mang po zhes brjod kyang / mthong ba ni gcig par gyur pa lta bu'o/ /gzugs la brten nas sngon po dang ser po 'byed na sngon po dang / ser po gcig pu 'grub pa ni rung na gal te sems la brten nas rnam par shes pa brgyad rnam par 'byed pa na/ rnam par shes pa brgyad kyang gcig tu 'gyur ram zhe na/ gzugs dang sgra ni chos rags pa yin te/ gzugs su mtshungs pa tha dad par mthong gi /sems kyi chos ni phra zhing shes par dka' bas gcig pa nyid do zhes brjod par mi bya'o/ /de yan chad du gsung gcig gis chos bshad pa zhes bya ba la gzugs mtshungs shing lta ba tha dad pa zhes bya ba la sogs pa bstan pa de dag thams cad ni de bzhin gshegs pa'i gsang ba rnam pa gsum las sku dang gsung gi gsang ba dag yin te/ gsang ba rnam pa gsum rgya cher bshad pa ni shes rab kyi pha rol tu phyin pa'i 'grel pa dang / gsang ba'i gnas bstan pa'i mdo las 'byung ba bzhin du rig par bya'o/ /de la gzhung brjod pa yang mdor bsdu na rnam pa gnyis te phyi rol pa dang chos 'di pa'o/ /de la phyi rol pa ni mu stegs can rnams te/ de dag kyang mang mod kyi/ gtso bo rnams kyi dbang du byas te brjod na rnam pa bzhi las med de rnam par rig pa tsam du grub pa'i bstan bcos las ji skad du/ dang po ni 'di yod pa la sogs pa'i rang bzhin dang / nges par ngo bo nyid gcig pa'i chos yod do zhes 'dzin pa ste/ grangs can la sogs pa lta bu'o/ /de dag gi 'dzin pa de yang rigs pa ma yin te/ chos thams cad yod pa'i rang bzhin yin pa'i phyir/ thams cad yod pa'i rang bzhin ltar ngo bo nyid bye brag med pa ni gang yang med do/ /gnyis pa ni yod pa la sogs pa'i rang bzhin dang / ngo bo nges par tha dad pa'i chos yod do/ /zhes 'dzin pa ste/ mchog tu smra ba la sogs pa lta bu'o/ /de dag gi 'dzin pa de yang rigs pa ma yin te/ chos thams cad yod pa'i rang bzhin ma yin pa'i phyir/ 'gags zin pa ltar ngo bo nyid med pa ni gang yang med de/ dmigs su med pa'i phyir ro/ /gsum pa ni yod pa la sogs pa'i rang bzhin dang / ngo bo nyid gcig pa yang yin/ tha dad pa yang yin pa'i chos yod do zhes 'dzin pa ste/ ngo tsha med pa la sogs pa lta bu'o/ /de dag gi 'dzin pa de yang rigs pa ma yin te/ gcig pa dang tha dad pa'i ni snga ma dang 'dra ste/ gcig pa dang tha dad pa'i skyon yod pa'i phyir ro/ /bzhi pa ni yod pa la sogs pa'i rang bzhin dang / gcig pa yang ma yin tha dad pa yang ma yin pa'i chos yod do zhes 'dzin pa ste/ log par 'tsho ba la sogs pa lta bu'o/ /de dag gi 'dzin pa de yang rigs pa ma yin te/ gcig pa dang tha dad pa ma yin pa'i skyon gcig pa dang tha dad pa dag dang mtshungs pa'i phyir te/ zhib tu ni de nyid las 'byung ba bzhin no/ /rgya cher rnam par 'byed pa ni bstan bcos shin tu rgyas pa brgya pa dang / slob dpon 'phags pa'i lhas gzhung rnam pa bzhi 'jigs pa'i bstan bcos mdzad pa las bstan pa bzhin no/ /de la chos 'di pa'i gzhung yang mdor bsdu na rnam pa gsum ste/ nad tha dad pas rjes su 'brang ba'i gzhung dang / sde tha dad pas rab tu phye ba'i gzhung dang / dus kyi dbang du mdzad nas rnam par bshad pa'i gzhung ngo / /de la nad tha dad pas rjes su 'brang ba'i gzhung ni 'di lta ste/ sems can rnams ma rig pa'i dbang gis nyon mongs pa brgyad khri bzhi stong 'byung ba na/ de bzhin gshegs pa rnams nad pa rnams kyi rjes su sman rnams rjes su rnam par bzhag pas des na re re nas gzhung rnams brjod pa yin te/ de'i phyir bstan bcos dri ma med pa bsdus pa las gzhan yang 'jig rten na bdud bzhi dang nyon mongs pa'i sgo brgyad khri bzhi stong yod pas/ sems can rnams de dag gis rab tu nyon mongs pa'i phyir/ de bzhin gshegs pa rnams chos 'di dag gis sems can rnams la sangs rgyas kyi mdzad pa mdzad do zhes 'byung bas de lta bas na de bzhin gshegs pa rnams nyon mongs pa'i nad kyi rjes su chos kyi sgo mo brgyad khri bzhi stong gnyen por gyur pa rgya cher gsungs par rig par bya'o/ /chos kyi sgo mo brgyad khri bzhi stong po de dag kyang so so'i bstan pa dag las mi mthun par ston pas/ thams cad yod par smra ba'i mdzod kyi bstan bcos las rnam pa gsum du bshad de/ de'i phyir tshig le'ur byas pa las/ thub pas gsungs pa'i chos kyi phung po grangs ni stong phrag brgyad cu yod/ de dag rang bzhin tshig gam yang na min / /de ni gzugs dang 'du byed phung pos bsdus / /kha cig dag ni chos kyi phung po'i tshad/ /bstan bcos dag nas de bzhin rab tu bshad/ /kha cig phung po la sogs tshig rjes su yang dag don du spyod pa rnams gnyen po'i zhes 'byung ste/ 'di nyid kyi 'grel pa las / slob dpon kha cig ni chos kyi phung po brgyad khri re re'i tshad kyang chos kyi phung po zhes bya ba'i bstan bcos kyi tshad tsam ste/ 'di ltar de dag re re la tshigs su bcad pa stong phrag drug yod pas so zhes zer ro/ /kha cig chos kyi phung po ni phung po la sogs pa'i tshig gi rjes su re re tha dad pas grangs stong phrag brgyad cu yod de/ 'di lta ste phung po dang skye mched dang khams la sogs pa'o zhes zer te/ yang dag pa'i don du gdul bar bya ba'i sems can 'dod chags dang zhe sdang la sogs pa dang ldan zhing spyod pa tha dad pa brgyad khri yod pas brgyad khri de dag gi gnyen po'i phyir/ bcom ldan 'das kyis chos kyi phung po brgyad khri gsungs so zhes 'byung ngo / /bstan bcos gzhung rab tu bstan pa las kyang mdzod kyi bstan bcos las 'byung ba dag dang mthun par bshad de/ de la slob dpon snga ma gnyis kyis don ni mdzod kyi bstan bcos las 'byung ba'i yang dag pa'i don gsum la 'jigs par byed de/ de'i phyir bstan bcos de nyid las 'dis ni phung po la sogs tshig rjes su zhes bya ba dang / phung po la sogs pa med ces bya ba dang / sems can gyi nad [(]gyi [,]kyi [)]spyod pa'i gnyen po'i phyir ma yin na/ bshad pa rnams don med par 'gyur ro/ /zhes bya ba'i rjes su mthun par 'grub pa yin no zhes 'byung ngo / /mdzod kyi bstan bcos las bshad pa rnam pa gsum tha dad par 'byung ba yang / slob dpon dang po ni de bzhin gshegs pas logs shig tu chos kyi sde brgyad khri gsungs te/ sde re re yang chos kyi phung po'i gnas zhes bya ba'i bstan bcos dang mnyam ste/ tshigs su bcad pa stong phrag drug yod do snyam du sems so/ /gnyis pa ni phung po dang skye mched la sogs pa nyid la brgyad khri zhes bya'o snyam du sems so/ /gsum pa ni nad kyi spyod pa'i tshad kyi rjes su stong phrag brgyad cu yod do snyam du sems so/ /bye brag tu bshad pa chen po las ni rnam pa drug yod de/ dang po gnyis dang drug pa ni mdzod kyi bstan bcos las bshad pa dang mthun no/ /de'i 'og tu bshad pa rnam pa gsum 'byung ba ni/ 'di lta ste/ btsun pa rab dbyangs na re chos kyi phung po re re la yang tshigs su bcad pa khri phrag lnga bcu dang / lnga stong lnga brgya lnga bcu yod do zhe'o/ /yang slob dpon gzhan dag na re chos kyi phung po re re la yang tshigs su bcad pa khri phrag bco lnga dang / lnga stong lnga brgya lnga bcu yod do zhe na/ gzhan kha cig ni chos kyi phung po re re la yang tshigs su bcad pa khri lnga stong lnga brgya lnga bcu yod do zhe na/ 'dir theg pa chen po slob dpon klu sgrub kyi dgongs pa dang sbyar na/ shes rab kyi pha rol tu phyin pa thabs kyi le'u'i 'grel pa las/ gzhan yang 'dod chags spyod pa'i gang zag gi dbang po nyi khri chig stong yod pas dbang po de dag gi phyir/ de bzhin gshegs pa rnams gnyen po'i chos brgyad khri bzhi stong gsungs te/ dang po ni de dag gi rjes su byang chub sems dpa' rnams gnyen po'i chos kyi go rims bstan par rab tu mos so/ /zhe sdang spyod pa'i gang zag gi dbang po nyi khri chig stong yod pas dang po de dag gi phyir/ de bzhin gshegs pa rnams gnyen po'i chos brgyad khri bzhi stong gsungs te/ dbang po de dag gi rjes su byang chub sems dpa' rnams gnyen po'i chos kyi go rims bstan par rab tu mos so/ /gti mug spyod pa'i gang zag gi dbang po nyi khri chig stong yod pas dbang po de dag gi phyir/ de bzhin gshegs pa rnams gnyen po'i chos brgyad khri bzhi stong gsungs te/ dbang po de dag gi rjes su byang chub sems dpa' rnams gnyen po'i chos kyi go rims bstan par rab tu mos so/ /cha mnyam pa'i gang zag gi dbang po nyi khri chig stong yod pas dbang po de dag gi phyir/ de bzhin gshegs pa rnams gnyen po'i chos brgyad khri bzhi stong gsungs te/ dbang po de dag gi rjes su byang chub sems dpa' rnams gnyen po'i chos kyi go rims bstan par rab tu mos te/ 'di ni byang chub sems dpa' rnams kyi spobs pa sgrib pa med pa'i ye shes zhes bya'o zhes 'byung ngo / /de la bstan bcos kyi dgongs pa ni 'di yin te/ de bzhin gshegs pa rnams gang zag rnam pa bzhi'i phyir mdor bsdus nas chos kyi sgo mo brgyad khri bzhi stong gsungs te/ de las byang chub sems dpa' rnams kyi gang zag re re'i phyir/ nyi khri chig stong rab tu bshad pas de'i phyir gcig tu bsdus nas brgyad khri bzhi stong yod par 'gyur te/ 'di ji ltar bskal pa bzang po'i mdo las/ sgo sum brgya lnga bcu re re la yang pha rol tu phyin pa drug yod pa des na/ pha rol tu phyin pa nyis stong chig brgya nyid du 'gyur te/ gnyen po de dag 'byung ba chen po bzhi dang zhe sdang drug gi nad rab tu sbyor bas nyi khri chig stong nyid du 'gyur la/ de bzhin du 'dod chags la sogs pa'i nad rnam pa bzhi'i gnyen po'i phyir/ brgyad khri bzhi stong nyid du 'gyur ro zhes gsungs pa lta bu'o/ /gzhan yang slob dpon yang dag bden pas shes rab kyi pha rol tu phyin pa'i 'grel pa rnam par bshad pa dang sbyar na yang / don la 'gal ba med do/ /'phags pa byams pa'i gzhung dang sbyar na yang sangs rgyas kyi sa'i 'grel pa las sems kyi spyod pa brgyad khri bzhi stong gang zhe na/ 'di lta ste/ sems can rnams kyi spyod pa'i dri ma'i bye brag brgyad khri bzhi stong de dag pha rol tu phyin pa brgyad khri bzhi stong dang / gzungs kyi sgo dang / ting nge 'dzin gyi sgo la sogs pa'i bgegs byed do zhes 'byung ngo / /bskal pa bzang po'i mdo las de dag gi mtshan nyid rgya cher bshad pa 'dir brjod par bya ste/ de las ji skad du 'di lta ste/ thog ma kho nar spyod pa'i chos kyi pha rol tu phyin pa yongs su bsgom par bya'o/ /de bzhin du tha mar ni sangs rgyas kyi sku rnam par dgod pa'i pha rol tu phyin pa ste/ sum brgya lnga bcu po re re yang pha rol tu phyin pa drug dang ldan te/ de ltar thams cad bsdus na nyis stong chig brgya yod par 'gyur ro/ /'dod chags dang zhe sdang dang gti mug dang cha mnyam pa'i sems can rnams kyi spyod pa'i gnyen por brgyad stong bzhi brgya'o/ /'byung ba chen po bzhi dang don med pa drug gis bskyed pa'i don rnams bton te/ lan bcur bsgyur ba gcig tu bgrangs na brgyad khri bzhi stong nyid du 'gyur te/ 'di yongs su bsgom pa'i phyir/ gzhan yang gzungs kyi sgo dang ting nge 'dzin la sogs pa brgyad khri bzhi stong yongs su rdzogs par 'gyur ro/ /'di ni mdor bstan pa yin te/ rgyas par byed na dpag tu med do zhes gsungs so/ /de lta bas na mdor bsdus te bstan na ni brgyad khri bzhi stong ngo / rgya cher bstan na ni dpag tu med de / brgyad khri bzhi stong zhib tu bshad pa ni/ bskal pa bzang po'i mdo la sogs pa las 'byung ba bzhin du rig par bya'o/ /de la sde tha dad pas rab tu phye ba'i gzhung zhes bya ba ni de ltar chos kyi sgo mo brgyad khri yod mod kyi/ sde rnam pa tha dad pa'i dbang gis so so nas brjod pa'i gzhung yang tha dad de/ ji ltar 'phags pa dam pa'i chos puN+Da rI ka'i mdo ni theg pa gcig gzhung du gsungs pa dang / 'phags pa dri ma med pas bstan pa ni bsam gyis mi khyab pa'i rnam par grol ba gzhung du gsungs pa dang / sangs rgyas phal po che'i mdo ni 'phags pa bzhi bcu rtsa gnyis kyi rnal 'byor spyod pa gzhung du gsungs pa dang / mya ngan las 'das pa chen po'i mdo ni sangs rgyas kyi rang bzhin bsnan pa gzhung du gsungs pa ste/ 'di la sogs pa'i mdo la brjod kyis mi lang ngo / /de la dus kyi dbang du mdzad nas rnam par bshad pa'i gzhung zhes bya ba ni sde rnams kyi rjes su so so'i gzhung tha dad mod kyi dus la brten te brjod na rnam pa gsum las med de/ dang po ni bden pa bzhi'i chos kyi 'khor lo ste/ ji ltar lung rnam pa bzhi la sogs pa sde mang po yod kyang bden pa bzhi gzhung du gyur pa lta bu'o/ /gnyis pa ni mtshan ma med pa'i gzhung ste/ 'phags pa shes rab kyi pha rol tu phyin pa la sogs pa lta bu'o/ /gsum pa ni nges pa'i don gyi gzhung ste/ mdo 'di nyid la sogs pa'o/ /de'i phyir 'og nas mdo las so/ / de nas bcom ldan 'das la byang chub sems dpa' don dam yang dag 'phags kyis 'di skad ces gsol to/ /bcom ldan 'das kyis dang po yul bA rA Na sI drang srong lhung ba'i gnas/ ri dwags 'byin pa'i nags su nyan thos kyi theg pa la yang dag par zhugs pa rnams la/ 'phags pa'i bden pa bzhi'i rnam pa bstan pas yang dag pa'i chos kyi 'khor lo bskor ba de ngo mtshar rmad du byung ba lags mod kyi de'i tshe yongs su bskor ba'i chos kyi 'khor lo de ni bla na mchis pa/ skabs mchis pa/ drang ba'i don/ rtsod pa'i gzhi'i gnas su gyur pa lags so/ /bcom ldan 'das kyis sngon dus gnyis pa'i tshe theg pa chen po la yang dag par zhugs pa rnams la chos rnams kyi ngo bo nyid ma mchis pa dang / skye ba ma mchis pa dang / 'gag pa ma mchis pa dang / gzod ma nas zhi ba dang / rang bzhin gyis yongs su mya ngan las 'das pa nyid las brtsams nas/ 'di ltar mi mngon pa'i rnam pas yang dag pa'i chos kyi 'khor lo bskor ba chos ngo mtshar rmad du byung ba lags mod kyi/ de'i tshe yongs su bskor ba'i chos kyi 'khor lo de yang bla na mchis pa/ skabs mchis pa/ drang ba'i don/ rtsod pa'i gzhi'i gnas su gyur pa lags so/ /bcom ldan 'das kyis deng dus gsum pa 'dir theg pa chen po de la yang dag par zhugs pa rnams la chos thams cad kyi ngo bo nyid ma mchis pa dang / skye ba ma mchis pa dang / 'gag pa ma mchis pa dang / gzod ma nas zhi ba dang / rang bzhin gyis yongs su mya ngan las 'das pa nyid las brtsams nas 'di ltar rab tu phye ba'i rnam pas yang dag pa'i chos kyi 'khor lo bskor ba 'di ni shin tu ngo mtshar rmad du byung ba lags te/ deng 'dir bcom ldan 'das kyis yongs su bskor ba'i chos kyi 'khor lo 'di ni bla na ma mchis pa/ skabs ma mchis pa/ nges pa'i don lags te/ rtsod pa rnams kyi gzhi'i gnas su gyur pa ma lags so/ /bstan pa 'di gsum gyi dgongs pa rtogs par dka' ba'i phyir/ sangs rgyas mya ngan las 'das pa'i 'og tu lo brgya lhag lon nas gnas brtan pa'i sde la sogs pa nyi shu pa'i slob dpon rnams so so nas rang gi gzhung gis 'phags pa'i bden pa bzhi'i chos kyi 'khor lo rnam par bshad de/ yul 'dir 'phags pa'i gsung rab bzhugs pa yang / sde pa gnyis las med de/ /thams cad yod par smra ba dang / mdo sde tshad mar byed pa'i sde'o/ /de'i phyir 'dir sde pa gnyis kyi brjod pa mdo tsam du bshad de/ de la thams cad yod par smra ba'i sde pa dag ni chos thams cad la rang bzhin yod pas/ dus gsum gyi chos rnams yang dag par ngo bo nyid yod do zhes zer te/ gzhung 'di yang bshad pa mi mthun pa rnam pa bzhi yod do/ /dang po ni dngos po 'gyur ba'o/ /gnyis pa ni mtshan nyid du 'gyur ba'o/ /gsum pa ni gnas skabs 'gyur ba'o/ /bzhi pa ni dus 'gyur ba ste/ de'i phyir mdzod kyi bstan bcos las btsun pa chos skyong gis 'di ltar dngos po mi mtshungs pa'i phyir/ dus gsum tha dad do zhes bshad de/ 'di lta ste/ chos rnams 'jig rten na 'jug pa'i tshe/ dngos po la bye brag yod kyang ngo bo nyid tha dad pa ni ma yin te / ji ltar gser gyi snod bcag ste dngos po gzhan du byas na/ dbyibs la bye brag yod kyang ngo bo nyid la ni 'gyur ba med pa de bzhin du chos rnams 'jig rten na 'jug pa na/ ma 'ongs pa nas ni da ltar gyi dus su 'jug la da ltar gyi dus 'di nas ni 'das pa'i dus su 'jug ste/ thob pa'i dngos po dang bral bar zad kyi/ thob pa'i ngo bo nyid dang ni bral ba ni ma yin no zhe'o/ /gnyis pa ni btsun pa rab dbyangs kyis 'di ltar mtshan nyid mi mtshungs pas dus gsum tha dad do zhes bshad de/ de 'di lta ste/ chos rnams 'jig rten na 'jug pa'i tshe/ 'das pa ni 'das pa'i mtshan nyid dang bral ba zhes mi brjod de/ da ltar dang ma 'ongs pa'i mtshan nyid dus gnyis par sbyar ba yang de bzhin te/ ji ltar skyes bu bud med cig la 'dod chags spyod pa'i tshe/ gzhan khyad par can dag la 'dod chags dang bral ba zhes mi brjod pa bzhin no zhe'o/ /gsum pa ni btsun pa dbyig gi bshes gnyen gyis 'di ltar gnas skabs mi mtshungs pas dus gsum tha dad do zhes bshad de/ 'di lta ste/ chos rnams 'jig rten na 'jug pa'i tshe/ gnas skabs nas gnas skabs su gyur pa la/ gzhan dang gzhan du zhes ston te/ gnas skabs la bye brag yod pa'i phyir/ ngo bo nyid tha dad pa ni ma yin te/ ji ltar shod cig bskyod nas grangs gcig gi gnas su bzhag pa'i tshe ni gcig ces bya ba dang / brgya'i steng du bzhag pa'i tshe ni brgya zhes bya ba dang / stong gi tshe'i steng du bzhag pa'i tshe ni stong zhes brjod pa bzhin no zhe'o/ /bzhi pa ni btsun pa rtogs pa'i lhas 'di ltar dus mi mtshungs pa'i phyir/ dus gsum tha dad do zhes bshad de/ 'di lta ste/ chos rnams 'jig rten na 'jug pa'i tshe/ snga phyi phan tshun sdod pas/ ming tha dad par rnam par gzhag ste/ ji ltar bud med gcig la ma zhes kyang bya/ bu mo zhes kyang bya zhes brjod do zhe'o/ /de ltar rnam pa bzhis bshad pa yod kyang gsum pa bzang ste de'i phyir mdzod kyi bstan bcos tshig le'ur byas pa las/ de dag la ni tshig rnam pa bzhi yod de/ dngos po mtshan nyid gnas skabs sdod 'gyur te/ /gsum la byed pa la ni brten nas su/ /dus su rnam par gzhag pas mchog tu bzang / /zhes 'byung ste/ 'di nyid kyi 'grel pa gzhan rnam pa gsum pa dag sun 'byin pa las/ thams cad yod par smra ba rnam pa bzhi po de dag las/ dang po ni chos rnams rnam par 'dzin par 'gyur ba'i tshe/ mu stegs grangs can gyi rigs nyid du rnam par gzhag go /gnyis pa ni dus kyi mtshan nyid 'dren pa nyid du rnam par gzhag pas dus gsum po kun la yang / dus gsum gyi mtshan nyid yod pa bzhin du 'dzin pa'i phyir ro/ /bzhi pa ni snga phyi phan tshun sdod pa nyid du rnam par gzhag pas dus gcig gi chos la dus gsum yod pa nyid du 'gyur te/ 'di lta ste/ 'das pa'i dus kyi snga phyi'i skad cig ma dag ni 'das pa dang ma 'ongs pa zhes bya bar 'gyur la/ bar ma ni da ltar zhes bya ba nyid du 'gyur ba'i rigs te/ ma 'ongs pa dang da ltar yang de dang 'dra ba nyid du 'gyur ba'i phyir/ rnam pa bzhi las gsungs pa mchog tu bzang ste/ 'di ltar byed pa'i dbang gis gnas skabs tha dad la/ gnas skabs mi mtshungs pa'i phyir/ dus rnam par gzhag pa yang tha dad de/ 'di lta ste/ chos rnams gang gi tshe bya ba mi byed pa de'i tshe ni ma 'ongs pa zhes bya'o/ /gang gi tshe byed pa de'i tshe ni da ltar byung ba zhes bya'o/ /gang gi tshe byas nas 'gags pa de'i tshe ni 'das pa zhes bya ste/ ngo bo nyid tha dad par gyur pa ni ma yin no zhes 'dod pa'i phyir ro/ /gal te de ltar na da ltar yod pa'i mig la sogs pa'i dbang po yod pa de dag kyang skal ba mtshungs pas bsdus pa yin na/ de dag la byed pa ji lta bu zhig yod ce na/ ci de dag 'bras bu len cing 'bras bu 'byin nus pa ma yin zhes 'byung ste/ bstan bcos gzhung rab tu bstan pa dang / yang dag pa'i rigs pa las kyang mdzod kyi bstan bcos las 'byung ba dang mthun par bshad do/ /gnyis pa mdo sde tshad mar byed pa'i sde pa rnams ni 'di skad du chos thams cad la rang bzhin med do/ /da ltar gyi dus ni yod do/ /dus gnyis ni med do zhes rnam par 'jog ste/ ku ma ra ta dang / shi ri ra ta la sogs pa lta bu'o/ /slob dpon mang po gzhan mi mthun par smra ba dag ni bstan bcos yang dag pa'i rigs pa dang mthun pa las 'byung ba bzhin du rig par bya'o/ / //bam po gsum pa/ de la gnyis pa mtshan nyid med pa dang / gsum pa nges pa'i don ces bya ba 'di gnyis kyi mtshan nyid tha dad pa yang rnal 'byor spyod pa'i sa'i 'grel pa las ji skad du 'byung ba bzhin te/ de las ji skad du sangs rgyas mya ngan las 'das pa'i 'og tu bdud kyi las cher g.yos/ sde pa rnams kyis 'dzin pa rnams so so nas rab tu langs te/ phal cher g.yos pa nyid du lta ba la mngon par zhen pas byang chub sems dpa' klu sgrub sa rab tu dga' ba brnyes pas theg pa chen po mtshan ma med pa stong pa nyid kyi gsung rab la brten nas bstan bcos dbu ma la sogs pa mdzad de/ yang dag pa nyid kyi don rgya cher bstan nas yod par lta ba de dag rab tu bsal to/ /'phags pa'i lha la sogs pa bstan bcos kyi mkhan po chen por grags pa rnams kyis bstan bcos shin tu rgyas pa brgya pa la sogs pa byas nas don chen po rgya cher bstan te/ des na sems can rnams stong pa nyid du lta ba la mngon par zhen pas/ byang chub sems dpa' thogs med sa dang po brnyes pas chos kyi 'od kyi ting nge 'dzin mngon par rtogs pa rdzu 'phrul chen po dang ldan pa/ 'phags pa byams pa'i zhal mngon sum du mthong ba/ rnal 'byor spyod pa'i sa bshad par gsol te/ 'dir rig pa mthar ma gtugs pa ci yang med do/ / dngos po mi zad pa ci yang med do/ /tshig 'bru rnam par ma bshad pa ci yang med do/ /don ma brjod pa ci yang med do/ /the tshom ma bsal ba ci yang med do/ /so so'i 'dzin pa rnam par ma gzhig pa ci yang med do/ /spyod pa rnams ma spyad pa ci yang med do/ / 'bras bu mngon sum mi byed pa ci yang med do / /byang chub sems dpa' dang / theg pa gzhan rnams kyi phyir rgya cher bshad pa'i bar du'o zhes 'byung ste/ de ltar 'grel pa de las gzhung rnam pa gnyis bshad zin mod kyi/ gzhung rnam pa gnyis po de dag re re la yang bshad pa rnam pa gsum yod de/ de la mtshan nyid med pa'i gzhung la slob dpon gsum gyis 'di skad du bstan te/ kha cig ni ngo bo nyid rnam pa gsum las ngo bo nyid rnam pa gsum zhib tu bshad dgos so zhes zer te/ b+ha bya la sogs pa'o/ /de'i phyir bstan bcos lag na rin po che tshig le'ur byas pa las/ yang dag ngo bo nyid du 'dus byas stong / /sgyu ma ji bzhin rkyen las skyes pa'i phyir/ /'dus ma byas kyang yang dag yod ma yin/ /ma byung nam mkha'i me tog rab tu 'dra/ /zhes 'byung ngo / /kha cig ni ngo bo nyid rnam pa gnyis yongs su btsal bar zad kyi/ yongs su grub pa'i ngo bo nyid ni mi btsal te/ de'i phyir mdo sde dag la brtags pa'i btsal ba yin gyi/ chos yongs su btsal bar bya ba ni ma yin no zhe'o/ /kha cig ni rnam pa gsum la kun brtags pa nyi tshe btsal bar bya ba yin te/ ji ltar mdo 'di las 'og nas ngo bo nyid med pa rnam pa gsum bstan pas/ kun brtags yongs su btsal ba gsungs pa lta bu'o zhe'o/ /de ltar rnam pa gsum du bshad pa yod mod kyi/ slob dpon h+yan tsang gi dgongs pa ni rnam par bshad pa phyi ma yin par dgongs so/ /byang chub sems dpa' byams pa'i nges pa'i don la yang bshad pa rnam pa gsum yod de/ de la dang po ni slob dpon yang dag bden pa na re/ ngo bo nyid rnam pa gsum rab tu btsal nas/ ngo bo nyid med pa gsum rnam par gzhag go/ /'di lta ste/ kun tu rtog pa'i ngo bo nyid btsal nas/ kun tu rtog pa'i mtshan nyid med par rnam par gzhag go/ /gzhan gyi dbang gi ngo bo nyid yongs su btsal nas/ gzhan gyi dbang gi ngo bo nyid skye ba med pa rnam par gzhag go/ / yongs su grub pa'i ngo bo nyid btsal nas/ yongs su grub pa'i ngo bo nyid/ ngo bo nyid med par rnam par gzhag go zhes bshad de/ slob dpon b+ha bya dang / bye brag yod pa yang ngo bo nyid rnam pa gsum ni bden pa rnam par gzhag pa'i sgo yin la/ ngo bo nyid med pa rnam pa gsum gyi don ni rnam par gzhag pa ma yin pas/ slob dpon b+ha bya ltar yongs su btsal nas/ rnam par gzhag pa ni ma yin no/ /gnyis pa ni ngo bo nyid rnam pa gnyis btsal bar zad kyi/ yongs su grub pa'i ngo bo nyid ni mi btsal te/ rgyu dang rkyen las skyes pa dag ni stong pa nyid yin pa'i phyir ro zhe'o/ /gsum pa ni kun brtags pa btsal bar zad kyi/ ngo bo nyid rnam pa gnyis btsal ba ni ma yin te/ rnal 'byor spyod pa'i sa la sogs pa lta bu'o zhe'o/ /de ltar rnam pa gsum du bshad pa yod kyang / bshad pa phyi ma yang dag pa ma yin te/ mdo sde 'di nyid la yi ge dang mthun zhing don 'gal ba med pa'i phyir ro/ /chos kyi 'khor lo rnam pa gsum la zab pa dang / mi zab pa ltar yod dam zhe na/ bshad pa rnam pa gnyis te/ dang po ni slob dpon b+ha bya la sogs pas 'di skad du bden pa bzhi'i chos kyi 'khor lo dang po ni nyan thos kyi gsung rab yin te/ sems can stong pa 'ba' zhig ston cing chos stong pa nyid ston pa ma yin pa'i phyir zab pa ma yin no/ /gnyis pa mtshan ma dang bcas pa'i theg pa chen po 'di lta ste/ 'phags pa dgongs pa nges par 'grel pa la sogs pa las ngo bo nyid gsum la sogs pa ston cing dmigs pa dang bcas pa'i phyir/ shin tu zab pa ma yin no/ /gsum pa mtshan ma med pa'i theg pa chen po 'di lta ste/ shes rab kyi pha rol tu phyin pa rnams las chos rnams stong pa nyid du ston cing dmigs pa med pa'i phyir/ shin tu zab pa yin no zhe'o/ /gnyis pa ni slob dpon chos skyong la sogs pas mdo sde la brten nas/ 'di skad du dang po ni 'phags pa'i bden pa bzhi bstan to/ /de'i 'og tu mtshan nyid med pa bstan to/ /tha mar ni nges pa'i don bstan te/ bden pa bzhi'i chos kyi 'khor lo'i don ni sngar bshad pa bzhin no/ /chos kyi 'khor lo phyi ma gnyis ni mtshan nyid med pa ston pas don la zab mi zab ces bstan du med do/ /gsung rab rnam pa gnyis la nges pa ma yin pa zhes brjod pa yang ngo bo nyid med pa yang rnam pa gsum yod pa dang / med pa'i rigs pa gsal bar rab tu phye nas bstan pa'i phyir ni nges pa'i don ces brjod la/ gsang ba'i rnam pas chos thams cad ngo bo nyid med pa la sogs par bstan pa'i phyir ni ma nges pa'i don zhes bshad de/ don la zab pa dang / zab pa ma yin pa'i phyir nges pa dang ma nges pa zhes brjod pa ni ma yin no zhe'o/ /ngo bo nyid rnam pa gsum las ngo bo nyid gang btsal ba'i phyir/ mtshan nyid med pa zhes bya zhe na/ bshad pa rnam pa gnyis yod de/ slob dpon chos skyong gi bshad pa dang sbyar na ni kun brtags pa 'ba' zhig btsal bas so/ /slob dpon b+ha byas bshad pa dang sbyar na ni/ gzhan gyi dbang gi ngo bo nyid 'ba' zhig btsal ba'i phyir te / bstan bcos shin tu rgyas pa brgya pa las 'byung ba bzhin no/ /slob dpon chos skyong gis gzhung rnam par gzhag ste/ bshad pa las 'byung ba kun tu brtags pa'i chos kyi ngo bo nyid ni med pa yin no/ /rgyu dang rkyen las 'byung ba'i ngo bo nyid ni yod pa yin te/ don 'di bsgrub pa'i phyir mdo sde las 'byung ba'i khungs bstan pa/ kun tu rtog pa dag ni med pa yin/ /gzhan gyi dbang ni ngo bo nyid yod do/ /yang dag ma yin kun rtog stong 'jig na/ /sgro 'dogs skur 'debs mtha' gnyis lhung bar 'gyur/ /zhes gsungs so/ /zhes bshad do/ /slob dpon b+ha byas dpyad de bshad pa/ mdo sde 'di las ming ni kun tu brtags pa'o/ /don ni gzhan gyi dbang gi ngo bo nyid do/ /ming de ni don la yod pa ma yin pa'i phyir med pa'o/ /don ni 'jig rten pa'i rjes su med pa ma yin pa'i phyir yod pa'o zhes gsungs pa yin pas/ gtan tshigs 'dis gzhan gyi dbang gi ngo bo nyid yod par bsdus pa 'di mi rung ngo zhes slob dpon chos skyong gis ni 'di skad du/ rnam par bshad pa 'di mi rung ste/ don 'gal ba'i phyir ro/ /gal te ming don la yod pa ma yin pa'i phyir med pa yin na/ don yang ming la med pa yin na ji ltar yod par 'gyur/ gal te yang dag pa ma yin pa'i rnam par brtags pa rjod par byed pa'i ngo bo nyid med na/ yang dag pa ma yin pa rnam par brtags pa brjod par bya ba'i ngo bo nyid de/ ci yod par 'gyur ram/ kun rdzob tu brtags pa tsam du rjod par byed pa dang / brjod par bya ba med na yang 'dra ba med na / yod na yang mnyam du yod pa yin la ci'i phyir/ mdo sde las gcig ni yod la gcig ni med ces gsungs te/ de'i phyir khyod kyi smra ba 'di mdo sde'i don dang rjes su mthun pa ma yin pas/ kun brtags kyi ngo bo nyid med par yid ches par byas te/ 'jig rten pa rnams kyi brdzun du rnam par gzhag pa yin pa'i phyir ro/ /gzhan gyi dbang gi ngo bo nyid ni rgyu dang rkyen las skyes te/ yang dag pa ma yin pa'i sems kyis byas pa ma yin pas yod pa nyid du yid ches par bya'o zhes sun 'byin to/ /slob dpon b+ha byas gzhan gyi dbang gi ngo bo nyid med par bsgrub pa'i phyir/ mdo sde las 'byung ba'i khungs bstan pa/ cung zad skye ba'i chos ni gang yang med/ /cung zad 'gag par 'gyur ba'i chos kyang med/ /rnam dag lta bas chos rnams rab brtags na/ /yod pa'ang ma yin med pa'ang ma yin no/ /zhes gsungs so zhe'o/ /slob dpon chos skyong gi bshad pa 'dis kyang gzhan gyi dbang gi ngo bo nyid yod pa ma yin par bsgrub mi nus te/ de ci'i phyir zhe na/ tshigs su bcad pa 'di'i dgongs pa ni kun tu brtags pa'i rang bzhin gyi khyad par rjod par byed pa dang / brjod par bya ba de dag gis ngo bo nyid kyi stong pa dang / skye ba med pa dang 'gag pa med par rnam par brtags pa dang bral ba'i lta ba rnam par dag pas 'jig rten rnams rab tu brtags na/ rgyu dang rkyen las skyes pas yod pa yang ma yin med pa yang ma yin par mthong ngo zhes ston pas/ de'i phyir 'di gzhan gyi dbang gi ngo bo nyid med par bsgrub pa ma yin no zhe'o/ /slob dpon b+ha byas gal te tshig tu smras pa/ gal te gzhan gyi dbang gi ngo bo nyid yod pa yin na/ ci'i phyir mdo sde las chos thams cad mi stong pa gang yang med do zhes gsungs so / /gzhan yang mdo sde las gzugs la sogs pa'i chos rnams ni rang bzhin gyis med do zhes bya ba dang / chos thams cad kyi ngo bo nyid skye ba gang yang med pas/ sngon yod pa dang / sngon med pa zhes bya ba'i ming yang mi dmigs pa'i phyir ro zhes gsungs so zhe na/ slob dpon chos skyong gis bshad pa 'di la yang dgongs pa yin te/ dgongs pa de yang ji lta bu zhig ce na/ 'di lta ste/ mdo sde 'di rnams las kun tu brtags pa'i rang gi ngo bo nyid 'jig par mdzad kyi/ thams cad med do zhes gsungs pa ni ma yin no/ /dgongs pa 'di lta bu yod par ji ltar shes she na/ mdo sde gzhan las gsal bar gsungs pa'i phyir ro/ /'di lta ste/ bcom ldan 'das kyis 'di skad du gsungs te/ ngas mtshungs par ldan pa'i rang bzhin la dgongs nas/ chos thams cad rang bzhin med do zhes bshad de/ gal te la la zhig sgra ji bzhin du mngon par zhen nas/ kun nas nyon mongs pa dang / rnam par byang ba'i chos rang bzhin gyis med do zhes zer na/ stong pa nyid nyes par bzung ba de ni log par lta ba zhes bya ba zhes gsungs te/ de la mtshungs par ldan pa'i rang bzhin zhes bya ba ni 'jig rten pa rnams kyi kun tu brtags pa rjod par byed pa dang / brjod par bya ba'i mtshungs par ldan pa'i rang bzhin no/ /kun nas nyon mongs pa dang rnam par byang ba'i chos rnams ni gzhan gyi dbang gi ngo bo nyid yin te/ de'i phyir 'phags pa rnams la dgongs pa 'di lta bu yod par shes so/ /gzhan yang 'phags pa shes rab kyi pha rol tu phyin pa'i mdo las/ bcom ldan 'das nyid kyis yod pa dang med pa'i don gsal bar bcad de/ kun tu brtags pa'i ngo bo nyid ni thams cad du med pa zhes bya'o/ /rgyu dang rkyen gyis bskyed pa rnams ni yod do zhes brjod do zhes gsungs so/ /gzhan yang mdo sde gzhan dag las kun tu brtags pa'i rang bzhin gyis ma skyes pa'o/ /gzhan gyi dbang gi ngo bo nyid kyis bsdus pa'i chos rnams ni rgyu dang rkyen las skyes pa'o zhes gsungs pa dang / gzhan yang mdo sde mang po las chos rnams ni ngo bo nyid med pa/ skye ba dang 'gag pa la sogs pa med kyang thams cad du rab tu dbye bar bya'i/ sgra ji bzhin du mngon par zhen nas/ nges pa'i don yin no zhes bzung du mi rung ste/ kun rdzob kyi bden pa tsam du yang chos rnams med do zhes stong pa nyid du nyes par bzung nas/ log par lta ba chen po bsgrub par mi bya'o zhes gsungs so zhe'o/ /slob dpon b+ha byas yang gtan tshigs kyis bsgrubs te smras pa/ smra ba 'di yang rigs pa ma yin te/ de ci'i phyir zhe na/ nges pa'i don gyi mdo las gzhan dang gzhan du rnam par 'byed pa'i phyir ro/ /bcom ldan 'das nyid kyis 'di skad du/ mdo sde gang du stong pa nyid dang / mtshan ma med pa dang / smon pa med pa dang / mngon par 'du byed pa med pa dang / skye ba med pa dang / 'gag pa med pa dang / rang bzhin med pa dang / sems can med pa dang / srog med pa dang / bdag po med pa dang / gang zag med pa dang / rnam par grol ba'i sgo la sogs pa bstan pa gang yin pa de dag ni nges pa'i don gyi mdo sde zhes bya'o zhes gsungs so zhe'o/ /slob dpon chos skyong gis bshad pa/ bdag gis smras pa 'di rigs pa dang shin tu mthun te/ 'di ltar mdo sde gzhan dag las bcom ldan 'das nyid kyis bcad de bka' stsal pa/ ngas kun tu brtags pa'i rang gi ngo bo nyid la dgongs nas mdo sde gzhan dag las chos thams cad rang bzhin med pa dang / skye ba med pa dang / 'gag pa med pa dang / gzod ma nas zhi ba dang / rang bzhin gyis mya ngan las 'das pa'o zhes ston to/ /gzhan gyi dbang gi ngo bo nyid la dgongs nas ni sems can rnams kyi sems skye ba dang / 'gag pa dang / 'khor bar 'jug pa la sogs pa'o zhes bstan to zhes gsungs so/ /gzhan yang mdo sde gzhan dag las bcom ldan 'das kyis bka' stsal pa/ sha ra dwa ti'i bu gzugs ni rang bzhin gyis stong ste/ rang bzhin gyis stong pa'i phyir/ skye ba med pa 'gag pa med pa'o/ /skye ba dang 'gag pa med pa'i phyir/ rnam par 'gyur ba med pa'o/ /tshor ba dang / 'du shes dang / 'du byed rnams dang rnam par shes pa yang de bzhin no zhes gsungs te/ 'di ni kun tu brtags pa'i ngo bo nyid la dgongs nas rang bzhin gyis stong pa dang / skye ba dang 'gag pa med pa la sogs pa gsungs so/ /gzhan gyi dbang gi ngo bo nyid la kun brtags kyi ngo bo nyid med pa'i phyir stong pa nyid gsungs te / rang bzhin gyis stong pa dang skye ba dang / 'gag pa med pa la sogs pa ni ma yin no/ /de bzhin gshegs pas de dang de dag ngo bo nyid rnam pa gsum las/ kun brtags pa'i ngo bo nyid stong pa nyid do/ /gzhan gyi dbang gi ngo bo nyid dang / yongs su grub pa'i ngo bo nyid gnyis ni yod pa nyid do zhes gsungs te/ de lta bas na/ stong pa nyid du bstan pa gsung rab dag la dgongs pa yod pas sgra ji bzhin du chos rnams med do zhes skur bar mi bya ste/ sgra ji bzhin du don 'dzin pa gang yin pa de dag ni theg pa chen po la skur pa 'debs pa yin par shes par bya'o/ /gzhan yang mdo sde las rab 'byor gzugs zhes bya ba'i gzugs rnams ni ngo bo nyid med pa'i ngo bo nyid du shes par bya ste/ tshor ba dang / 'du shes dang / 'du byed la sogs pa rgya cher bshad pa'i bar du yang de bzhin no zhes gsungs te/ mdo sde'i dgongs pa ni gzhan gyi dbang gi ngo bo nyid ni kun tu brtags pa'i gzugs la sogs pa'i ngo bo nyid med pas rab tu phye ba tshig dang bral ba'i chos kyi ngo bo nyid kyis ngo bo nyid med pa'i phyir/ ngo bo nyid med pa'i ngo bo nyid ces bya ba gsungs so zhes ston to/ /slob dpon b+ha byas gal te tshigs su bcad de smras pa/ gzhan gyi dbang gi ngo bo nyid gal te yang dag par yod pa ma yin na/ 'o na ni mdo sde las gsungs pa dang 'gal bar 'gyur te/ mdo sde las ni/ chos rnams rkyen las byung ba ste/ /rkyen dang chos gnyis med pa'o/ /gang gis de ltar rab shes na/ /rten 'brel rtogs pa zhes bya'o/ /gal te chos ni rkyen las skyes/ /chos de yong gis rang bzhin med/ /gal te chos ni rang bzhin med/ /chos ni rkyen las byung ba min/ /zhes gsungs so zhe'o/ /slob dpon chos skyong gis bshad pa/ de ltar mdo sde gnyis las rten cing 'brel par 'byung ba'i chos rang bzhin med do zhes bshad kyang 'gal ba med do/ /'di ltar rten cing 'brel bar 'byung ba'i chos ni rnam pa gnyis te/ kun tu brtags pa dang gzhan gyi dbang gi ngo bo nyid do/ /'dir dgongs pas kun tu brtags pa'i ngo bo nyid yod pa ma yin par ston cing gzhan gyi dbang gi ngo bo nyid bstan pa ni ma yin no/ /gal te gzhan gyi dbang gi ngo bo nyid gzod ma nas rang bzhin med do zhes bshad pa ni rnam par byang ba dang / kun nas nyon mongs pa'i chos gnyis kyang med par skur bar 'gyur bas/ stong pa nyid nyes par zin pa zhes bya ste/ bdag dang gzhan gnyi ga la gnod par 'gyur ro zhe'o/ /slob dpon b+ha byas yang smras pa/ /yang dag pa ma yin pa'i rtog pa 'di su zhig bzlog par nus te/ yang dag pa'i lta ba thob par gyur pa'i tshe rang nyid kyis bsal bar 'gyur ro zhe'o/ /slob dpon chos skyong gis bshad pa/ gal te rkyen las 'byung ba'i sems dang sems las byung ba'i chos de dag kyang kun brtags dang 'dra bar thams cad rang bzhin gyis stong pa yin na/ 'o na ni nam mkha'i me tog 'dra bas/ ji ltar srid pa gsum gyi sems can 'chi zhing skye shi'i 'khor ba byed par nus/ de lta bas na gzhan gyi dbang gi ngo bo nyid rang gi ngo bo nyid med pa ma yin no/ /bstan bcos mdzad pa'i dang po'i dgongs pa yang nges par de 'dra'o/ /gal te de lta ma yin na ci'i phyir yang dag pa ma yin pa rnam par rtog pa'i 'ching ba dag ni stong pa nyid mngon par rtogs pas rab tu sel te zhes bshad/ rus sbal gyi spus 'ching ba'i bya ba byed pa dang / ri bong gi rwa mngon sum du rtogs pa dang / yongs su bsal bar byed nus par sus mthong ste/ de nas sems dang sems las byung ba'i chos ni yod la sems las logs shig na yul yod par yongs su bzung ba de dag ni med par shes par bya ste/ zhib tu bshad pa ni de nyid las 'byung ba bzhin no zhe'o/ /sde snod gsum pa dag gis bshad pa las 'byung ba/ chos kyi 'khor lo rnam pa gsum po de yang / sangs rgyas mya ngan las 'das nas lo brgya lhag tsam lon pa na/ sde pa nyi shu'i slob dpon rnams so so nas rang gi rig pas chos kyi 'khor lo dang po'i rnam par bshad pa dag byas so/ /de nas sangs rgyas mya ngan las 'das nas lo nyis brgya lon pa'i 'og tu byang chub sems dpa' klu sgrub kyis mdo sde shes rab kyi pha rol tu phyin pa la brten nas/ bstan bcos rnams mdzad de/ 'di lta ste/ shes rab kyi pha rol tu phyin pa'i 'grel pa dang / dbu ma la sogs pa'o/ /de dag las rnam par brtags pa'i ngo bo nyid spangs pas mtshan nyid med pa'i tshul rab tu bstan to/ /de nas 'phags pa'i lha la sogs pas gzhung de yang dag par blangs te/ gcig nas gcig tu brgyud cing spel to/ /sangs rgyas mya ngan las 'das pa'i lo dgu brgya lon pa na byang chub sems dpa' byams pas mdo sde dgongs pa zab mo nges par 'grel pa la sogs pa la brten nas/ bstan bcos mdzad de 'di lta ste/ rnal 'byor spyod pa'i sa dang dbus dang mtha' rnam par 'byed pa la sogs pa'o/ /slob dpon thogs med dang dbyig gnyen gyis gzhung de yang dag par blangs nas rab tu spel te/ de'i tshe sangs rgyas kyi chos ro gcig pas stong pa dang yod par smra bas de dag la rtsod par gyur pa med do/ /de'i phyir slob dpon nye ba'i 'od na re/ lo stong gi mdun rol du ni sangs rgyas kyi chos ro gcig go/ /de tshun chad nas ni dran pa dang shes rab khad kyis 'gags pas stong pa dang yod pa'i rtsod par smra ba rnams 'jig rten na rgyas par gyur to zhes bshad do zhe'o/ /'dir byang chub sems dpa' rnams kyis rtsod par gyur pa rnam par bshad pa yang / de bzhin gshegs pa'i gsung rab shin tu zab pas de dag phan tshun brag ca lta bu'i tshul du sangs rgyas kyi chos rab tu bstan pa yin par bstan pa'i phyir ro/ /mu stegs grangs can dag kyang de bzhin gshegs pas rnam par grol ba'i byang chub sems dpa' yin no zhes bstan pa yin no/ /skyes bu chen po gnyis nang gi chos kyi gang zag shes rab dang dbang po shin tu rno ba rang gis 'phags pa'i gsung rab dang 'grel par mi mdzad pa dang lta ci smos te de lta bas na de dag gis de ltar bshad pa yang / bstan pa rgya cher spel ba'i phyir yin par rig par bya'o/ /mdo sde 'di nad tha dad pas rjes su 'brang ba'i gzhung las ni bden pa gnyis dang ngo bo nyid gsum dang zhi gnas dang / lhag mthong la sogs pa rnam par gzhag pa'i gzhung ngo / /sde tha dad pas rab tu phye ba'i gzhung las ni mtshungs pa med pa rnam pa gsum brjod par bya ba'i gzhung du ston to/ /dus kyi dbang du mdzad nas rnam par bshad pa'i gzhung las ni nges pa'i don bstan pa'i gzhung yin no/ / de la gsum pa gnas dang gang gi ched du gsungs pa bstan pa zhes bya ba yang rnam pa gnyis te/ bstan pa'i gnas bstan pa dang / bstan pa gang gi phyir gsungs pa bstan pa'o/ /bstan pa'i gnas bstan pa ni 'di lta ste/ 'phags pa'i gsung rab la sgo mang du yod mod kyi/ de dag kyang mdor bsdu na/ sde snod gsum dang sde snod gnyis dang gsung rab yan lag bcu gnyis so/ /de la sde snod gsum zhes bya ba yang dang po ni mdo sde'i sde snod de/ sU tra zhes bya ba'i sgra las drangs nas mthun pa'i mdo sde zhes 'dren te/ mthun pa'i rigs pa dang / sems can mos pa dang 'tsham par gyur pa'o/ /mdo zhes bya ba ni brgyus pa dang bsdus pa ste/ don rnams brgyus shing sems can bsdus pas don 'di gnyis dang ldan pa'i phyir mdo sde zhes bya'o/ /gnyis pa ni 'dul ba'i sde snod de lus dang ngag gi las mi dge ba yan lag bdun 'dul bar byed pa'am/ yang na las rnam pa gsum 'dul zhing mi dge ba las log pa'i phyir 'dul ba zhes bya'o/ /gsum pa ni chos mngon pa'i sde snod de/ 'dis yul mngon du byed pa dang 'bras bu mngon du byed pa'i phyir ro/ /ma mo zhes kyang bya ste/ shes rab kyi rtsa ba skyed par byed pa'i phyir ro/ /de ltar rnam pa gsum po thams cad kyis yongs su shes par bya ba'i don sdud cing sbed pas na sde snod ces bya'o/ /de la sde snod gnyis zhes bya ba ni 'di ltar sde snod gsum po de dag nyid la theg pa 'og ma dang gong ma'i bye brag yod pa'i phyir te / des na sde snod gnyis su 'gyur te/ nyan thos kyi sde snod dang / byang chub sems dpa'i sde snod do/ /sde snod rnam pa 'di gnyis kyi mtshan nyid ni 'og nas mdo 'di nyid las rgya cher rnam par 'byed do/ /de la gsung rab yan lag bcu gnyis zhes bya ba ni 'di lta ste/ mdo'i sde dang / dbyangs kyis bsnyad pa'i sde dang / lung du bstan pa'i sde dang / tshigs su bcad pa'i sde dang / ched du brjod pa'i sde dang / gleng gzhi'i sde dang / rtogs pa brjod pa'i sde dang / de lta bu byung ba'i sde dang / skyes pa rabs kyi sde dang / shin tu rgyas pa'i sde dang / rmad du byung ba'i sde dang / gtan la phab par bstan pa'i sde rnams te/ de dag gi mtshan nyid kyang mdo 'di nyid las 'og nas rgya cher rnam par 'byed do/ /de bzhin gshegs pa shAkya thub pa rang gcig gi gsung rab de dag kyang / rgya gar yul pa'i slob dpon rnams so so nas bshad pa mi mthun pas chos kyi kha cig bstan pa ni rnam pa gcig ste/ 'di lta ste/ gsung gcig go zhes zer te/ la shi ba la sogs pa lta bu'o/ /kha cig bstan pa ni rnam pa gnyis te 'di lta ste/ yongs su ma rdzogs pa dang / yongs su rdzogs pa'o zhes bshad de/ tham bu chim lta bu'o/ /kha cig bstan pa ni rnam pa gsum ste/ ji ltar slob dpon sde snod gsum pa h+yan tsang gis 'phags pa dgongs pa nges par 'grel pa la sogs pa la brten nas 'phags pa'i bden pa bzhi dang / mtshan nyid med pa dang / nges pa'i don zhes bya ba gong du bshad pa lta bu'o/ /kha cig bstan pa ni rnam pa bzhi ste dang po ni 'phags pa'i bden pa bzhi'i bstan pa 'di lta ste/ lung la sogs pa'o/ /gnyis pa ni mtshan nyid med pa'i bstan pa 'di lta ste/ shes rab kyi pha rol tu phyin pa rnams so/ /gsum pa ni chos kyi mtshan nyid bstan pa ste/ 'phags pa lang kar gshegs pa la sogs pa lta bu'o/ /bzhi pa ni rnal 'byor spyod pa'i bstan pa ste/ 'phags pa sangs rgyas phal po che la sogs pa lta bu'o / /slob dpon yang dag bden pa ni 'di skad du/ kha cig bstan pa ni rnam pa lnga'o zhes zer te/ dang po ni bden pa bzhi'o/ /gnyis pa ni mtshan nyid med pa'o/ /gsum pa ni rnal 'byor spyod pa ste/ don sngar bshad pa bzhin no/ /bzhi pa ni shin tu bde ba'i theg pa chen po'i ste/ ji ltar 'phags pa mya ngan las 'das pa'i mdo las shin tu bde ba mya ngan las 'das pa'i 'bras bu bshad pa lta bu'o/ /lnga pa ni theg pa chen po yongs su srung ba ste/ ji ltar 'phags pa gser 'od dam pa la sogs pa las lha'i rgyal po rnams yul yongs su bsrung bar bshad pa lta bu'o zhe'o/ /slob dpon sde snod gsum pa pas mdo sde 'di ni sde snod rnam pa gnyis las byang chub sems dpa'i sde snod kyis bsdus so/ /sde snod gsum las ni mdo sde'i sde snod kyis bsdus so/ /yang na chos mngon pa'i sde snod kyis bsdus te/ chos rnams kyi mtshan nyid rnam par 'byed cing / shes pa rab tu bskyed pa'i phyir ro/ /gsung rab yan lag bcu gnyis pa ni gtan la phab par bstan pa'i sdes bsdus so/ /yang na mdo'i sdes bsdus par blta'o zhes bshad do/ /de la bstan pa gang gi phyir gsungs pa bstan pa zhes bya ba yang rnam pa gnyis te/ gsung rab thams cad kyi gang gi phyir gsungs pa spyir bstan pa dang / mdo sde 'di nyid kyi gang gi phyir gsungs pa bstan pa'o/ /gsung rab thams cad kyi gang gi phyir gsungs pa yang tshad med mod kyi/ mdor bsdu na rnam pa bzhi kho na'o/ /de la dang po yang rnam pa gnyis te/ mya ngan las 'da' ba'i chos can ma yin pa dang / mya ngan las 'da' ba'i chos can dag go/ / de'i phyir bstan bcos rnal 'byor spyod pa'i sa las yongs su mya ngan las 'da' ba'i chos can dag ni/ sa bon yongs su tshang ba yin no/ /yongs su mya ngan las 'da' ba'i chos can ma yin pa dag ni byang chub sems dpa' gsum gyi sa bon med pa yin no zhes bstan to/ /gnyis pa ni kha cig las rnam pa gsum mo zhes bshad de/ 'di lta ste/ yang dag pa nyid du nges pa dang / log pa nyid du nges pa dang / ma nges pa'i phung po'o/ /sangs rgyas kyi sa'i 'grel pa las yang dag pa nyid du nges pa'i phung po ni 'di lta ste/ mya ngan las 'das pa'i chos can dag go/ /log pa nyid du nges pa'i phung po ni mya ngan las 'das pa nyid kyi chos can ma yin pa dag go zhes bshad do/ /gsum pa ni kha cig las rnam pa bzhi'o zhes bshad de / ji ltar legs pa'i tshul khrims bstan pa'i mdo las/ 'dul bar bya ba'i sems can ni rnam pa bzhi yod de/ nyan thos kyi rigs can dag nyan thos kyi lam 'thob par 'gyur ba dang / rang sangs rgyas kyi rigs can dag rang sangs rgyas kyi lam 'thob par 'gyur ba dang / sangs rgyas kyi rigs can dag sangs rgyas kyi lam 'thob par 'gyur ba dang / lha dang mi'i rigs can dag lha dang mi'i bde ba 'thob par 'gyur ba'o zhes gsungs te/ bstan bcos yongs su 'dzin pa las kyang 'di dang mthun par bshad do/ /gsum pa gang zag de dag yongs su smin par bya ba dang / mdor bsdu na rnam pa bzhi yod do/ / nyan thos kyi rigs can dag ni nyan thos kyi theg pas yongs su smin par bya ba dang / rang sangs rgyas kyi rigs can dag ni rang sangs rgyas kyi theg pas yongs su smin par bya ba dang / sangs rgyas kyi rigs can dag ni bla na med pa'i theg pas yongs su smin par bya ba dang / rigs med pa dag ni bde 'gro'i lam gyis yongs su smin par bya ba ste/ 'di ltar gang zag bzhi po de dag ni de bzhin gshegs pa dang / byang chub sems dpa' rnams chos bzhi po 'di dag gis yongs su smin par mdzad de/ rnal 'byor spyod pa'i sa las kyang bstan bcos yongs su 'dzin pa las 'byung ba dang mthun par bshad do/ /ma nges pa'i rigs can dag ni theg pa gsum gyi rigs can las gud na med de/ byang chub sems dpa'i rigs kyis bsdus pa'i phyir logs shig tu ma bshad do/ /bzhi pa ni kha cig las rnam pa lnga'o zhes bshad de/ 'di lta ste/ snga ma bzhi'i steng du yang rigs ma nges pa bsnan na rigs rnam pa lngar 'gyur ba'i phyir ro/ /gzhan yang 'phags pa lang kar gshegs pa'i mdo las/ rigs ni rnam pa lnga yod de/ nyan thos kyi theg pa'i rigs can dang / rang sangs rgyas kyi theg pa'i rigs can dang / byang chub sems dpa'i theg pa'i rigs can dang / theg pa ma nges pa'i rigs dang / rigs med pa'o zhes gsungs so/ /gal te theg pa gsum gyi sa bon ma tshang ba la rigs med pa zhes bya ba nas/ 'phags pa lang kar gshegs pa'i mdo las gsungs pa'i rigs med pa ste/ ji ltar brda sprod cing rnam par bshad par byas te/ de'i phyir mdo de nyid bam po bzhir byas pa las/ blo gros chen pos bcom ldan 'das la gsol pa/ bcom ldan 'das 'di la gtan du mya ngan las mi 'da' ba gang lags/ bcom ldan 'das kyis bka' stsal pa/ blo gros chen po 'dod chen pa ni rnam pa gnyis yod de/ byang chub sems dpa' dang / 'dod chen pa nyid do/ /de la byang chub sems dpa'i 'dod chen pa ni chos thams cad gzod ma nas mya ngan las 'das par shes nas gtan du mya ngan las mi 'da' ste/ dge ba'i rtsa ba thams cad spangs pa'i 'dod chen pa ni ma yin no/ /blo gros chen po dge ba'i rtsa ba thams cad spangs pa'i 'dod chen pa yang de bzhin gshegs pa'i byin gyi rlabs kyis brgya la gal te na dge ba'i rtsa ba bskyed par 'gyur ro/ /de ci'i phyir zhe na/ 'di ltar de bzhin gshegs pa rnams sems can thams cad yongs su mi gtong ba'i phyir ro/ /de ltar de'i phyir byang chub sems dpa' 'dod chen pa rnams yongs su mya ngan las mi 'da'o zhes gsungs so zhe na/ rigs med pa ni rnam pa gnyis te/ dus kyi mtha' la ltos pa dang / gtan du ba'o/ /de'i phyir bstan bcos mdo sde'i rgyan las mya ngan las mi 'da' ba'i chos can ni rnam pa gnyis te / dus kyi mtha' la ltos pa dang / gtan du ba'o zhes 'byung ste/ 'phags pa lang kar gshegs pa ni dang po las dgongs te gsungs la/ rnal 'byor spyod pa'i sa las phyi ma la bsams te bstan pa ni 'gal ba med do/ /gzhan yang 'phags pa lang kar gshegs pa'i mdo las rigs can rnam pa gnyis su phye ste/ dang po ni dge ba'i rtsa ba spangs pa ste/ de dus kyi mtha' la ltos pa'o/ /gnyis pa ni gtan du ba ste/ de ni byang chub sems dpa'i snying rje can yin par bstan pas/ mdo sde'i rgyan las gtan du rigs med par bshad pa lta bu ni ma yin no/ /rigs nges pa'i theg pa gnyis po de dag lhag ma med pa'i dbyings su zhugs pa'i tshe/ sems can yin nam/ 'on te sems can ma yin pa zhes brjod/ sems can gyis bsdus pa ma yin te/ mngon sum gyi rnam par shes pa med pa'i phyir ro/ /gal te de lta na 'o na ni sems can 'grib pa'i skyon dang ldan par 'gyur te/ de ci'i phyir zhe na/ thog ma med pa'i phyir ni 'phel ba med la/ tha ma med pa'i phyir ni 'grib pa med do/ /gal te 'phel ba yod par gyur na ni 'grib pa yang yod par 'gyur ro/ /gal te 'grib pa yod na ci'i phyir mdo las sems can thams cad ni 'phel ba med pa dang / 'grib pa med pa'o zhes gsungs/ sngar 'phel ba dang 'grib pa yod do zhes smras na ni phyis gdod klan kar bya ba yin na yang 'phel ba dang 'grib pa zhes brjod pa ni bshad pa rnam pa gnyis yod pa yod de/ de la dang po ni slob dpon yang dag bden pa la sogs pas so so'i gzhung rnams la brten nas mu rnam pa bzhir bstan te/ dang po ni thog ma yod la tha ma med par 'dod pa ste/ ji ltar 'dul ba phyogs lnga pa'i gzhung las mya ngan las 'da' ba'i chos can ma yin pa zhes bshad pa lta bu'o/ /gnyis pa ni thog ma med pa dang tha ma yod par 'dod pa ste/ thams cad yod par smra ba dang / mdo sde tshad mar byed pa sde pa'i gzhung lta bu'o/ /gsum pa ni thog ma dang tha ma yod par 'dod pa ste/ 'dul ba phyogs lnga pa'i sde pa dag mya ngan las 'da' ba'i chos can zhes bshad pa lta bu'o/ /bzhi pa ni thog ma dang tha ma med par 'dod pa ste/ mdo sde tshad mar byed pa'i sde pa'i gzhung gi mya ngan las 'da' ba'i chos can ma yin pa zhes bstan pa dang / theg pa chen po'i gzhung las sems can thams cad ni thog ma dang tha ma med pa'o zhes bstan pa lta bu ste/ de lta bas na gzhung gzhan dag la ni 'phel ba dang 'grib pa yod pa'i skyon yod kyi / theg pa chen po'i gzhung dang sbyar na ni 'phel ba dang 'grib pa'i skyon med do/ /yang na theg pa chung ngu'i gzhung gis mu dang po bkol ba la'o/ /gnyis pa ni slob dpon h+yan tsang gis theg pa chung ngu'i gzhung la brten nas bshad pa'i don ni sngar bshad pa bzhin no/ /theg pa chen po'i gzhung la brten nas ni mu rnam pa gnyis te/ dang po ni thog ma med pa la tha ma yod pa 'di lta ste/ rigs nges pa'i theg pa pa gnyis so/ /gnyis pa ni thog ma dang tha ma med pa ni 'di lta ste/ rigs med pa'i sems can dang / gzhan rigs nges pa dang / rigs nges pa'i byang chub sems dpa' rnams so/ /mdo'i sde las 'phel ba dang / 'grib pa med par gsungs pa ni don gyi ngo bo nyid la dgongs te/ bstan pa'i phyir nyes pa med do/ /bstan bcos rnal 'byor spyod pa'i sa dang rnam par bshad pa dang sbyar na de dag las 'di ltar skyon rnam pa lngas rigs yod pa dang med pa'i sems can rnam par gzhag par bsgrubs la/ sangs rgyas kyi ngo bo nyid bstan pa'i bstan bcos las ni 'di ltar skyon rnam pa lngas rigs med pa'i sems can rnam par gzhag par sgrub na ji ltar brda sprod cing rnam par bshad par bya zhe na/ slob dpon h+yan tsang gis 'di skad du/ sangs rgyas kyi ngo bo nyid bstan pa'i bstan bcos de las rigs med pa'i rnam pa gsum la sogs pa ston pa de phal cher gzhung dang mthun pa ma yin pa'i phyir/ tshad mar bzung du mi rung ngo zhes bshad de/ rgya cher rnam par 'byed pa ni rigs lnga bstan pa las 'byung ba bzhin no/ /de la mdo sde 'di nyid kyi gang gi phyir gsungs pa bstan pa zhes bya ba yang rigs lnga las ni byang chub sems dpa' dang / rigs ma nges pa dag gi phyir gsungs pa yin te/ de'i phyir 'og nas mdo las/ /len pa'i rnam par shes pa zab cing phra/ /sa bon thams cad chu bo'i klung bzhin 'bab/ /bdag tu rtog par gyur na mi rung zhes/ /de ni byis pa rnams la ngas ma bstan/ /zhes gsungs pa bzhin bshad pa'i rnam grangs gzhan du na/ mdo sde 'di ni rigs rnam pa bzhi'i ched du gsungs pas/ rigs med pa ma gtogs te/ 'og nas mdo las rigs nges pa'i theg pa pa gsum dang / rigs ma nges pa'i theg pa pa 'ba' zhig bstan pa'i phyir ro/ /gzhan yang theg pa thams cad la gzhol ba dag gi phyir/ gsum pa nges pa'i don gyi mdo 'di gsungs pa'am/ yang na mdo sde 'di ni rigs lnga po thams cad kyi ched du yang gsungs pa yin te/ theg pa pa thams cad la rnam par phye ba myong ba'i phyir ro/ /de ltar rnam pa gsum du bshad pa yod kyang gnyis pa ni yang dag pa yin no/ / //bam po bzhi pa/ 'di skad bdag gis thos pa zhes bya ba 'di man chad ni bzhi pa tshig gi don rnam par bshad pa zhes bya ba ston te/ 'di yang rnam pa gnyis su dbye ste/ mdo sde rnam par 'byed pa dang / tshig gi don yang dag par bshad do/ /de la mdo sde rnam par 'byed pa ni mdo sde 'di la dpe rnam pa gnyis bzhugs pas/ dang po ni dpe rgyas pa ste/ shu lo ka 'bum bzhugs so/ /gnyis pa ni bsdus pa ste/ shu lo ka stong lnga brgya bzhugs te/ mdo sde 'di'i dpe bsdus pa rgya gar la rnam pa gcig las mi bzhugs kyang / snga phyis bsgyur ba tha dad pa'i phyir/ dpe mi mthun pa bzhir gyur te/ dang po ni rgya rje song gi tshe/ rgya gar gyi mkhan po yon tan bzang pos mtshams sbyor ba'i rnam par dgrol ba'i mdo zhes bya bar bsgyur ba bam po gnyis bzhugs te/ dgongs pa zab mo nges par 'grel pa'i mdo 'di'i tha mar byung ba'i le'u gnyis po dag nyid yin no/ /gnyis pa ni rgya rje 'gris phyi ma'i tshe rgya gar mkhan po bo de le'u cis zab mo rnam par grol ba'i mdo zhes bya ba rnam pa gcig bsgyur ba le'u bcu gcig bzhugs te/ dgongs pa zab mo nges par 'grel ba'i mdo 'di las don dam pa'i bden pa bstan pa'i le'u la/ le'u bzhir phye ba'i phyir bcu gcig tu gyur te/ gzhan ni bdun no/ /gsum pa ni rgya rje tshin gyi tshe rgya gar mkhan po yang dag bden pas tshig nges par 'grel pa zhes bya ba'i mdo bam po gcig bsgyur ba'i le'u bzhi bzhugs te/ don dam pa'i bden pa bstan pa'i le'u la rnam pa bzhi phye ba'i phyir te/ dgongs pa zab mo nges par 'grel ba'i mdo 'di las 'byung ba'i don dam pa'i bden pa bstan pa'i le'u zhes bya ba nyid yin no/ /bzhi pa ni rgya rje thang gi tshe/ slob dpon sde snod gsum pa h+yan tsang gis dgongs pa zab mo nges par 'grel pa zhes bya ba'i mdo bam po lnga pa ste gcig tu bsgyur te/ le'u brgyad bzhugs so/ /mdo sde 'di'i dpe de ltar mang nyung mi mthun par gyur pa yang / tshig nges par 'grel ba'i mdo las/ don dam pa'i bden pa bstan pa'i le'u nyi tshe 'byung gi/ gzhan bdun ma tshang ba dang mtshams sbyor ba rnam par 'grel ba'i mdo las ni tha ma'i le'u gnyis 'byung gi/ /gzhan drug ma tshang ba dang / dgongs pa zab mo nges par 'grel pa'i mdo las ni le'u brgyad yongs su rdzogs pa dang / zab mo rnam par 'grel ba'i mdo las ni le'u bcu gcig 'byung ba'i phyir te/ don dam pa'i bden pa bstan pa'i le'u la/ le'u bzhir phye bas na dpe 'di gnyis ni tshig dang don yongs su rdzogs pa yin no/ /mdo sde 'di rgya gar gyi dpe dang po gcig pa yin na ci'i phyir mtshan tha dad pa'i bye brag spyod pa yod pas gsungs pas/ de lta bas na snga ma'i phyogs gnyis yod pa kho na'o zhe'o/ /de ltar rnam pa gsum du bshad pa yod mod kyi/ re zhig bshad pa phyi ma la brten nas bshad par bya'o/ /de la rgyu dang rkyen bstan pa'i phyogs la yang rnam pa gnyis su dbye ste/ yid ches par byed pa'i phyogs dang / gleng bslang ba'i phyogs so/ /phyogs 'di gnyis la bye brag yod pa yang mdor bsdu na rnam pa gsum yod do/ / dang po ni ming tha dad pa 'di lta ste/ yid ches par byed pa dang / gleng bslang ba'i gleng gzhi zhes bya'o/ /thun mong gi gleng gzhi dang mthun pa yin pa'i gleng gzhi zhes kyang bya ste/ 'di skad bdag gis thos pa zhes kyang bya ba la sogs pa bstan pas/ gzhan dag yid ches pa bskyed pas yid ches par byed pa'i [(]gling [,]gleng [)]gzhi zhes bya'o/ /mdo kun las mthun par 'byung ba'i phyir/ thun mong gi gleng gzhi zhes bya'o/ /'od zer gtong ba la sogs pas yang dag pa'i gzhung nyid gleng slong bar byed pa'i phyir/ gleng bslang ba zhes bya'o/ /mdo sde'i rjes su so so nas ming mthun pas thun mong ma yin pa'i gleng gzhi zhes bya'o/ /gnyis pa ni dus tha dad pa ste/ de bzhin gshegs pas gleng bslang ba ni mdo sde'i mdun rol gyi gleng gzhi zhes bya'o/ /kun dga' bos gsol ba btab pa ni mdo sde'i 'og gi gleng gzhi zhes bya'o / /gleng gzhi de gnyis gsungs pa'i dus kyi bye brag tha dad pa'i phyir ro/ /gsum pa ni gang zag tha dad pa ste/ dang po de bzhin gshegs pa'i gleng gzhi ni mdo sde las/ de bzhin gshegs pas gleng bslang ba'o/ / gnyis pa kun dga' bo'i gleng gzhi ni kun dga' bos gsol ba btab nas/ gleng gzhi 'di gsungs pa'i phyir ro zhe'o/ /mdo sde 'di dang sangs rgyas kyi sa la sogs pa yid ches par byed pa nyid kyang gleng bslang ba ni med de yid ches par byed pa la don gyis gleng ba zhes bshad kyang 'gal ba med do/ /de la yid ches par byed pa la yang don rnam pa gsum yod de/ dngos po mang nyung rnam par 'byed pa dang / dngos po bshad pa'i dgongs pa bstan pa dang / dngos po'i rjes su rnam par phye ste bshad pa'o/ /dngos po mang nyung rnam par 'byed pa la yang rnam pa gsum du bshad de/ dang po ni slob dpon yang dag bden pas/ mdo sde shes rab kyi pha rol tu phyin pa'i brjed byang byas pa las/ dngos po rnam pa bdun du phye ste/ de la 'di skad ces bya ba ni thos pa'i chos smos pa ste/ mdo sde sde gcig gi yi ge dang / don la nges pa kho nar yid ches par gyur pa'o/ /bdag gis zhes bya ba ni don nges par nus pa'i gang zag bstan pa dang / kun dga' bo la sogs pa'o/ /thos pa zhes bya ba ni gsung mngon sum du mnos pa'o/ /dus gcig na zhes bya ba ni thos pa'i chos de shin tu dus dang mtshan mar gyur par bstan pa'o/ /bcom ldan 'das zhes bya ba ni bshad pa'i ston pa bstan pa'o/ /rin po che mchog tu 'bar ba la sogs pas ni gsungs pa'i gnas yod par bstan to/ /nyan thos kyi dge 'dun chen po tshad med pa zhes bya ba la sogs pas ni gcig pus thos pa ma yin par bstan to/ /dngos po bdun po de dag kyang mdor bsdu na dgos pa rnam pa bzhi'i phyir te/ de la dang po 'di skad ces bya bas ni thos pa'i chos rab tu bstan to/ /de'i 'og ma dag gis thos pa zhes bya ba ni thos par nus pa'i gang zag rnam par 'byed do/ /de'i 'og ma gnyis kyis ni thos pa'i chos de sgrub par byed do/ /tha ma gnyis kyis ni thos pa'i gang zag sgrub par byed do zhes bshad de/ rgya cher ni slob dpon yang dag bden pas dngos po bdun gyi brjed byang byas pa las 'byung ba bzhin no/ /gnyis pa ni slob dpon klu sgrub kyis mdzad pa'i shes rab kyi pha rol tu phyin pa dang sbyar na de de las gleng gzhi'i phyogs la don rnam pa drug tu phye nas bstan te/ yid ches pa dang / thos pa dang / dus dang / bdag po dang / gnas dang / 'khor phun sum tshogs pa'o/ /slob dpon dbyig gnyen gyis bstan bcos sgrol ma zhes bya ba mdzad pa las kyang / don rnam pa drug tu yod par 'gyur zhe na/ rgya gar skad du/ san d+hi nir mo tsa na zhes bya ba la/ san d+hi zhes bya ba ni don rnam pa gsum dang ldan te/ dang po ni rgya gar yul pa dag dngos po gnyis mtshams sbyor ba la yang san d+hi zhes 'bod do/ /gnyis pa ni rus pa'i tshigs 'brel pa la yang san d+hi zhes zer ro/ /gsum pa ni lam zab mo la yang san d+hi zhes zer bas/ de nas lo tsA ba rnams so so nas don re re la brten nas bsgyur ba yin te/ mdo sde 'di'i mtshan ni yang dag par na dgongs pa zab mo zhes bya ba yin no/ /gzhan du na mdo sde 'di ni dpe las mtshan du btags pas tshigs zhes bya ba dang / mtshams sbyor ba zhes kyang bya ste/ 'di ltar don gyi tshigs dang / dngos po 'brel pa ji ltar rus pa'i tshigs phan tshun 'brel ba lta bur gyur pa'i phyir ro/ /nir mo tsa na zhes bya ba ni rnam par 'grel pa la bya ste/ rnam par bshad pa zhes bya ba'i tha tshig go/ de'i phyir slob dpon yang dag bden pas tshigs nges par 'grel pa'i mdo'i brjed byang byas pa las/ nges par 'grel pa ni rnam par bshad pa'o/ /tshigs ni sra ba dang mdud pa ste/ de la sra ba ni brtan pa'o/ /mdud pa ni 'ching ba ste/ ji ltar shing dang mi'i rus pa'i tshigs dag las sra zhing brten pa'i dngos po dang / mdud pa'i 'ching ba dag yod pa bzhin du/ mdo sde 'di las bstan pa'i dgongs pa zab mo yang shin tu rtogs par dka' zhing shin tu dgrol bar dka' bas so so'i skye bo dang spyod pa dang po'i byang chub sems dpa' rnams kyis rtogs shing shes par bya ba ma yin pa'i phyir don 'di sra ba dang mdud pa zhes bya ste/ mdo sde 'dis 'grol bar mdzad pa'i phyir tshigs nges par 'grel pa zhes bya'o/ /gzhan yang theg pa chen po'i bstan bcos thams cad las shin tu phra zhing rtogs par dka' ba'i don 'byung ba de dag mdo sde 'dir bsdus nas/ gsal bar rnam par bshad pa'i phyir/ mdo sde 'dis tshigs nges par 'grel pa zhes bya'o zhes bshad de/ rgya cher bshad pa ni de nyid las 'byung ba bzhin no/ /de la mtshams sbyor ba rnam par grol ba zhes bya ba ni mtshams sbyor ba'i don so sor 'thor ba rnam par bshad pa'i phyir/ mtshams sbyor ba rnam par dgrol ba'i mdo zhes bya ste/ zab mo rnam par dgrol ba zhes bya ba yang de bzhin du rig par bya'o/ /de ni tshig gi don yang dag par bshad pa zhes bya ba ni mdo sde 'di rnam par bshad pa yang mdor bsdu na bshad pa rnam pa gsum yod de/ kha cig ni mdo sde 'di las phyogs rnam pa lnga yod te/ dang po ni bstan pa 'byung ba'i rgyu rkyen gyi phyogs de/ gleng gzhi'i le'u dang po nyid do/ /gnyis pa ni mtshungs pa med pa'i spyod yul gyi phyogs te/ de'i 'og ma le'u bzhi po dag go/ /gsum pa ni mtshungs pa med pa'i spyod pa'i phyogs te/ de'i 'og ma le'u gnyis po dag go/ /bzhi pa ni mtshungs pa med pa'i 'bras bu'i phyogs te/ tha ma'i le'u gcig go/ /lnga pa ni bstan pa bzhin du yang dag par spyod pa'i phyogs te/ mdo sde'i mjug tu mngon par bstod do zhes gsungs pa dag go zhe'o/ /kha cig ni bstan pa 'di gcig la phyogs rnam pa gsum yod de/ dang po ni gleng gzhi'i phyogs te/ gleng gzhi'i le'u dang po nyid do/ /gnyis pa ni yang dag pa'i gzhung nyid kyi phyogs te/ le'u phyi ma bdun po dag go/ /gsum pa ni bstan pa gnas pa'i phyogs te/ mdo sde'i mjug tu mngon par bstod do zhes pa dag yin no zhe'o/ /kha cig ni mdo sde 'di gcig la phyogs rnam pa gnyis yod de/ dang po ni le'u gcig gis bstan pa 'byung ba'i rgyu dang rkyen bstan pa'i phyogs so/ /le'u phyi ma bdun ni 'phags pa'i gsung rab yang dag par bshad pa'i phyogs so/ /mdo sde'i mjug tu bstan pa bzhin du yang dag par spyod pa gsungs pa yod mod kyi le'u rnams kyi nang na bka' bzhin du yang dag par spyod pa smos pa gcig kho nar ma zad de/ sde gcig gi nang du kun la yang bka' bzhin du bstan te/ de'i phyir tshig le'ur byas pa las/ dang po gsum po dag gis slob ma bstan/ /'og ma gsum ni ston pas gsungs par sgrub / /mdo sde gsung rab dag ni thams cad kyis/ /dngos po de dag thams cad de bzhin no/ /zhes 'byung ngo / / gsum pa slob dpon nye ba'i 'od kyis sangs rgyas kyi sa'i 'grel pa byas pa las ni rnam pa lngar bsdus te/ thams cad bdag nyid kyis thos pa dang / mdo sde gsungs pa'i dus/ gsungs pa'i bdag po dang / gsungs pa'i gnas dang / nyan pa'i 'khor bstan pa zhes 'byung ngo / /de la dngos po bshad pa'i dgongs pa bstan pa zhes bya ba yang rnam pa gnyis te/ the tshom rnam pa gsum bcad pa'i phyir dang / sangs rgyas kyi bstan pa brtan par bya ba'i phyir ro/ /de la the tshom rnam pa gsum bcad pa ni slob dpon yang dag bden pas dngos po bdun gyi brjed byang byas pa las 'di skad du/ 'dul ba phra mo las dge slong kun dga' bo seng ge'i khri la 'dug nas chos kyi sde snod 'don pa'i tshe/ de'i lus sangs rgyas ji lta ba bzhin du mtshan dang dpe byad dang ldan par gyur to/ /seng ge'i khri las babs nas ni snga ma bzhin du gyur pas/ 'khor rnams mtshan ma de mthong nas the tshom rnam pa gsum skyes par gyur te/ ston pa chen po sangs rgyas shAkya thub pa thugs rje'i dbang gis mya ngan las 'das pa las bzhengs nas yang chos zab mo gsung ba ma yin snyam du the tshom za ba dang / de bzhin gshegs pa 'jig rten gyi khams gzhan nas 'dir de bzhin gshegs pa ma yin snyam du the tshom za ba dang / kun dga' bo sangs rgyas gcung yin te/ gcen gyi tshab mar 'os pa yin pas lus gyur nas mngon par sangs rgyas pa zhig ma yin nam snyam du the tshom za ba ste/ the tshom za ba gsum bcad par dgongs pa'i phyir 'di skad bdag gis thos zhes bya ba la sogs pa'i tshig gsungs te/ des kun dga' bo nyid kyis bcom ldan 'das las mngon sum du thos pa yin gyi/ thugs rje chen pos mya ngan las 'das pa las bzhengs pa ma yin pa dang / de bzhin gshegs pa gzhan 'jig rten gyi khams gzhan nas [(]gshags [,]gshegs [)]pa ma yin pa dang / kun dga' bo lus gyur te mngon par sangs rgyas nas bstan pa yang ma yin par bstan to zhes 'byung ba lta bu'o/ /gang gzhan yang shes rab kyi pha rol tu phyin pa'i 'grel pa las dus dang / phyogs dang gang zag bstan pa ni sems can rnams yid ches pa bskyed pa'i phyir ro zhes bshad do/ /de la sangs rgyas kyi bstan pa brtan par bya ba'i phyir zhes bya ba ni shes rab kyi pha rol tu phyin pa'i 'grel pa las ji skad du/ bcom ldan 'das mya ngan las 'das pa'i tshe grong khyer rtswa can shing sA la zung cig gi drung du dbu byang phyogs su bstan te gzims nas mya ngan las 'das par bzhugs so/ /de'i tshe kun dga' bo gnyen bshes la sred pa ma spangs 'dod chags dang ma bral ba'i phyir sems mya ngan gyi mtshor bying bas rang gis 'byung bar ma nus so/ /de nas tshe dang ldan pa ma 'gags pas kun dga' bo la smras pa/ sangs rgyas kyi chos kyi sde snod 'dzin pa gang yin pa de dag ni so so'i [#(]skya [,]skye [)]bo bzhin du bdag nyid mya ngan gyi mtshor bying bar mi rigs te/ 'dus byas kyi chos rnams ni thams cad kyang mi rtag pa yin na ci'i phyir mya ngan byed/ gzhan yang bcom ldan 'das phyag gi chos rnams khyod la gtad na deng khyod mya ngan gyis gzir bas yang dag par blangs pa'i dngos po stor bar gyur to/ /khyod kyis bcom ldan 'das la bcom ldan 'das mya ngan las 'das pa'i 'og tu ji ltar [(]rnam [,]rnal [)]'byor bsgom par bgyi/ /ston pa ni gang gis bgyi/ mos pa can dka' blo mi bde ba dang ji ltar gnas par bgyi / de bzhin gshegs pa rnams kyi mdo sde'i mgo bor tshig ji lta bu zhig bzhag par bgyi zhes zhus shig ces smras pa dang / des kyang dngos po de dag bcom ldan 'das la zhus so/ /bcom ldan 'das kyis bka' stsal pa/ kun dga' bo dran pa nye bar gzhag pa bzhi la gnas par bya'o/ /so sor thar pa'i mdo ni ston par ltos shig / dge slong mos pa can ni tshangs pa'i smra ba lta bus chad pas gcad do/ /de bzhin gshegs pa'i mdo sde rnams kyi mgor ni 'di skad bdag gis thos pa zhes bya ba la sogs pa'i tshig rnams gzhag par bya'o zhes gsungs so zhes bshad do/ /chos bsdus pa'i mdo dang mya ngan las 'das pa chen po'i mdo las kyang phal cher shes rab kyi pha rol tu phyin pa'i 'grel pa las bstan pa dang mthun par 'byung ste/ mangs kyis dogs nas 'dir ma brjod do/ /snying rje chen po'i mdo las ni nye bar 'khor gyis kun dga' bo la bcol zhes gsungs te/ de ltar mdo sde dang bstan bcos las bshad pa mi mthun par gyur pa yang / gang zag gnyis kas kyang bcol bas so so nas don re re la brten pa'i phyir phan tshun 'gal ba med do/ /dngos po'i rjes su rnam par phye ste bshad pa yang de la 'di skad bdag gis thos pa zhes bya ba ni dngos po bdun las thos par bya ba dang / thos par nus pa dang / gsung mngon sum du mnos pa zhes bya ba'i dngos po gsum dag go/ /don rnam pa drug las ni yid ches pa dang / thos pa'i dngos po gnyis po dag go/ /rnam pa lnga las ni thams cad bdag nyid kyis thos pa zhes bya'o/ /de ltar rnam pa gsum du bshad pa yod mod kyi re zhig sangs rgyas kyi sa'i 'grel pa dang sbyar na / 'di skad bdag gis thos pa zhes bya ba rnam par bshad pa la don rnam pa gsum yod de/ 'di skad bdag gis thos pa spyi'i rnam par bshad pa dang / 'di skad bdag gis thos pa rnam par phye ste bshad pa dang / de dag bshad pa'i dgongs pa bstan pa'o/ /de la spyi'i rnam par bshad pa zhes bya ba ni 'di lta ste/ sangs rgyas kyi bstan pa brgyud pa 'phags pa 'jam dpal dang kun dga' bo la sogs pa de dag 'di skad du zab mo la sogs pa'i don 'di dag sngon 'di skad bdag gis thos pa'i zhes 'byung ba'o/ /rnam par phye ste bshad pa zhes bya ba de yang / sngar ni 'di skad ces bya ba bshad la phyis ni bdag gis thos pa zhes bya ba rnam par bshad par bya ste/ de la 'di skad ces bya ba yang so so nas bshad pa mi mthun pas/ yul 'di pa'i slob dpon rnams kyis bshad pa yang mdor bsdu na rnam pa brgyad de/ de la kha cig ni yid ches pa dang mthun par byed pa la brten nas/ rnam par bshad de/ de la 'di skad ces bya ba ni yid ches pa dang rjes su mthun par byed pa'i tshig ste yang yid ches pa yod na ni tshig dang don gyi rjes su 'jug par 'gyur la/ rjes su 'jug pa yod na ni/ slob dpon dang slob ma'i tshul gyis lam mngon par 'grub par 'gyur te/ mdo sde yang yid ches pa ma yin na/ brgyud par mi byed pa'i phyir 'di skad ces bya ba tshig rnam par gzhag pa yin no zhe'o/ /kha cig ni yi ge dang don la brten nas bshad de/ de la yi ge ni 'di zhes bya bar 'gyur la/ don ni 'di bzhin zhes bya bar 'gyur te/ 'di ltar yi ge ni legs pa brjod pas 'di zhes bya bar 'gyur la don ni skyon med pas bzhin zhes bya bar 'gyur ro zhe'o/ /kha cig ni don dam pa dang kun rdzob la brten nas bshad de/ don dam pa kun rdzob dang mi mthun pa med pas 'di zhes brjod la/ kun rdzob don dam pa dang rjes su mthun pa'i phyir ni bzhin zhes brjod do zhe'o/ /kha cig ni slob ma la brten nas bshad de/ 'phags pa kun dga' bo la sogs pas bshad pa de dag sangs rgyas kyi gsung ji lta ba bzhin pa'i phyir ni 'di zhes pa la 'dra ba'i de bzhin nyid las rnam par dbye ba'i phyir ni de bzhin zhes brjod do zhe'o / /kha cig ni de bzhin gshegs pa la brten nas bshad de/ 'phags pa kun dga' bo la sogs pa sangs rgyas kyis gsungs pa'i chos rnams zlos pa de dag ni 'das pa'i sangs rgyas rnams kyis gsungs pa dang tha dad pa med pa'i phyir 'di zhes bstan la/ de bzhin gshegs pa rnams ji lta ba de bzhin du bshad pas yang dag pa yin te/ log pa ma yin pa'i phyir tshig phyi ma las bzhin zhes bya ba gsungs so zhe'o/ /kha cig ni ston pa dang slob ma la brten nas bshad de/ de la 'di skad ces bya ba ni skal ba dang ldan pa dang rjes su mthun pa'i tshig yin te/ 'di zhes bya ba dbang po'i rjes su mthun pas mi blang ba yin la/ bzhin zhes bya ba ni skyon med pa'i phyir ming du rnam par gzhag pa yin te/ 'di ltar sems can skyon med pas ni skal ba dang ldan la/ de bzhin gshegs pa ni mos pa ji lta ba bzhin du mdzad pas rjes su mthun par gyur pa yin te/ brgyud pa dang nyan pa po'i ming la skal ba dang ldan pa dang rjes su mthun pa zhes bya ba 'byung ba'i phyir 'di skad ces bya ba'i tshig gsungs so zhe'o/ /kha cig na re 'di skad ces bya ba ni mdo sde 'di gcig bdag gis ston pa las mngon sum du thos pas des na 'di skad bdag gis thos pa zhes gsungs so zhe'o/ /kha cig na re 'di skad ces bya ba ni gsung 'di lta bu 'di ni de bzhin gshegs pas gsungs so zhes bstan pa'i phyir 'di skad ces bya ba gsungs so zhe'o/ /rgya gar yul pa'i slob dpon rnams kyis bshad pa yang mdor bsdu na rnam pa gsum yod de/ dang po ni slob dpon bo de le'u cis slob dpon rdo rje drang srong gis byas pa rdo rje gcod pa'i 'grel pa'i brjed byang byas pa las/ kun rdzob kyi dbang du byas te brjod na rnam pa mang du yod mod kyi/ 'dir bsdu na rnam pa bzhi yod do / /sems bskyed pa de bzhin pa dang / gzhan la gdams pa dang / dpe dang rnam par nges pa'o/ /de la sems bskyed pa de bzhin pa ni bdag nyid 'di snyam du bdag gis de bzhin du byang chub tu sems bskyed la/ dge ba rnams spyad par bya'o zhes bya ba lta bu'o/ /gzhan la gdams pa de bzhin pa ni gzhan dag la 'di snyam du khyod kyi 'di bzhin byang chub tu sems bskyed la/ legs pa'i spyod pa rnam par spyod par bya'o/ /zhes 'doms par byed pa lta bu'o/ /dpe de bzhin pa ni gang zag 'di gzi byin shin tu rgyas pa ni nyi ma'i 'od bzhin no/ /shes rab zab cing yangs pa ni rgya mtsho bzhin no/ /byad bzhin sdug pa ni zla ba nya ba bzhin no zhes zer ba lta bu'o/ /rnam par nges pa de bzhin pa ni bdag gis 'di bzhin du mthong ngo thos so zhes bya ba la sogs pa lta bu'o/ /'dir 'di skad ces bya ba ni bzhi pa dang sbyar te/ rnam par nges pa de bzhin pa 'dis ni rab 'byor gyis de bzhin gshegs pa las bstan pa'i tshul thos pa dang / bdag gis 'dir bshad pa 'di las mang nyung dang nor pa med de/ nges par de kho na bzhin du bshad pa yin no zhes bstan pa'i phyir 'di skad ces bya ba gsungs so zhes 'byung ngo / /gnyis pa ni slob dpon sde snod gsum pa rna rings kyis don rnam pa gsum du bshad de/ dang po ni sangs rgyas kyi dbang du byas nas/ dus gsum gyi sangs rgyas rnams kyi gsung la tha dad pa med pa'i phyir ni 'di zhes gsungs la/ de ltar gsungs pa mtshungs pa'i phyir ni bzhin zhes gsungs pa yin no zhes bshad do/ /gnyis pa ni chos kyi dbang du byas nas / chos rnams kyi yang dag pa'i ngo bo nyid kyi phyir ni 'di zhes gsungs la/ de bzhin nyid ji lta ba bzhin du bshad pa'i phyir ni bzhin zhes gsungs so zhes bshad do/ /gsum pa ni dge 'dun gyi dbang du byas nas 'phags pa kun dga' bos bshad de/ sangs rgyas kyis gsungs pa dang tha dad pa med pa'i phyir ni 'di zhes gsungs la/ skyon rnams dang gtan du bral ba'i phyir ni bzhin zhes gsungs so zhes bshad do/ /gsum pa ni slob dpon yang dag bden pas 'di skad ces bya ba ni rnam par nges pa'i don yin te/ de yang rnam pa gnyis so/ /'di lta ste tshig 'bru dang don to/ /de la tshig 'bru ni brjod par bya ste/ 'phags pa kun dga' bos brjod pa'i tshig 'bru dang / don rnam par nges pa ni sangs rgyas kyis gsungs pa ji lta ba bzhin pa'i phyir 'di skad ces bya ba gsungs so zhes bshad do/ /gzhan yang mngon sum du thos pa la ni 'di skad bdag gis thos pa zhes bya la/ brgyud de thos pa la ni 'di skad thos pa zhes bya'o/ /gzhan yang sde pa rnams kyi brjed byang las/ mngon sum du thos pa la ni bdag gis thos pa zhes brjod la/ thos pa gtams pa la ni 'di skad thos pa zhes brjod do zhe'o/ /bstan bcos rnams las kyang rnam pa gsum du bshad de/ dang po ni shes rab kyi pha rol tu phyin pa'i 'grel pa las 'di skad ces bya ba'i don ni yid ches par byed pa yin te/ 'di ltar sangs rgyas kyi chos kyi rgya mtsho chen por yid ches pas 'jug par nus pas/ gang yid ches shing rjes su 'brang ba dag ni dngos po 'di de bzhin no zhes zer la gang yid ma ches pa de dag ni dngos po 'di de lta bu ma yin no zer ro zhes bshad de/ rgya cher ni de nyid las byung ba bzhin no/ /gnyis pa ni slob dpon yon tan byin gyis 'phags pa shes rab kyi pha rol tu phyin pa rdo rje gcod pa'i 'grel pa byas pa las/ de la 'di skad bdag gis thos pa zhes bya ba ni mdo sde 'di bcom ldan 'das blo mngon sum du gyur pas gsungs pa yin gyis/ bdag nyid kyis byas pa ni ma yin par ston to zhes 'byung ngo / /gsum pa ni 'phags pa sangs rgyas kyi sa'i 'grel pa las rnam pa bzhir bshad de/ de las 'di skad ces bya ba ni don rnam pa bzhi'i rjes su 'jug pas de la dpe ni 'di lta ste/ da ltar bshad pa'i tshig 'bru 'di dag gis bdag gis sngon thos pa bzhin no zhes bya ba'o/ /lung 'bogs pa ni 'di lta ste/ 'khor rnams la 'di bzhin du bdag gis sngon thos pa rnams nyon cig ces bya ba lta bu'o/ /dris pa rnam par nges pa ni 'di lta ste/ kha cig 'di skad du khyod kyis de ltar bshad pa'i don 'di nges par sngon thos pa yin nam zhes dris na/ de'i phyir lan du 'di bzhin du bdag gis thos so zhes bya ba lta bu'o/ /tshig gi lan ni 'di lta ste/ yang dag par sdud pa'i tshe/ byang chub sems dpa'i 'khor rnams kyis khyod kyis ji ltar thos pa bzhin du/ de bzhin du bshad par gsol zhes gsol ba btab pa dang / byang chub sems dpa' chos brgyud pas de dag la gnang ba'i tshig tu de bzhin du bshad par bya ste/ ji ltar bdag gis thos pa bzhin no zhes bya ba'o/ /don rnam pa 'di bzhi la slob dpon gsum gyis 'di skad du bshad de/ kha cig ni rnam pa bzhi las tha ma dang sbyar ro zhe'o / /kha cig ni rnam pa gnyis dang sbyar ro zhe'o/ /kha cig ni don bzhi char dang sbyar te bshad par bya'o zhes 'byung ste/ zhib tu de nyid las bshad pa bzhin no/ /de la bdag gis thos pa rnam par phye ste bshad pa yang chos brgyud pa'i byang chub sems dpa' dang kun dga' bo la sogs pa phung po lnga'i lus la btags pa tsam du bdag ces rnam par gzhag ste/ rna ba'i dbang pos rnam par shes pa bskyed nas/ bshad pa nyan pa'i phyir bdag gis thos pa zhes brjod de/ de'i phyir sangs rgyas kyi sa'i 'grel pa las bdag ces bya ba ni 'di lta ste/ phung po rnams la kun rdzob tu btags pa'o/ /thos pa ni 'di lta ste rna ba'i dbang pos rnam par shes pa bskyed nas nyan par byed pa'o/ /gzhan spangs pas spyi'i dbang du mdzad pa'i phyir bdag gis thos pa zhes gsungs so zhes 'byung ngo / /sangs rgyas kyi chos la gang zag med do/ /bdag med do zhes gsungs na ci'i phyir mdo sde kun las bdag gis thos pa zhes gsungs / don 'di yang so so nas bshad pa mi mthun te/ slob dpon klu sgrub kyi gzhung gis ni grub pa'i mtha' rnam pa bzhi la brten nas bdag gis thos pa zhes bya ba rnam par bshad de/ grub pa'i mtha' rnam pa bzhi'i don kyang shes rab kyi pha rol tu phyin pa'i 'grel pa las ji skad du/ dang po ni 'jig rten pa'i grub pa'i mtha' ste/ ji ltar phung po rnams kyi gang zag mngon par 'grub par byed pa de bzhin du bdag gis thos pa zhes bya ba yang 'jig rten pa'i phyir ni yod pa'o / / don dam pa'i phyir ni med pa'o zhes bshad pa dag go/ /gnyis pa ni gang zag so so'i grub pa'i mtha' ste/ gang zag gi sems kyi spyod pa so sor brtags nas/ chos bshad pa'i tshe dngos po gcig la kha cig ni nyan par byed/ kha cig ni nyan par mi byed pas chad par lta ba dag gi phyir ni mtshams sbyor ba'i sems can yod do zhes bshad la/ rtag par lta ba dag gi phyir ni gang zag med do zhes bshad pa dag go/ /gsum pa ni gnyen po grub pa'i mtha' ste/ ji ltar mi gtsang bar bsgom pa 'dod chags spyod pa dag gis ni gnyen por gyur pa la/ zhe sdang spyod pa dag la ni ma yin pa lta bu'o/ /bzhi pa ni don dam pa'i grub pa'i mtha' ste/ 'di ltar chos rnams kyi de kho na'i mtshan nyid ni tshig gi lam chad pa/ sems kyi spyod yul 'gags pa'o zhes bshad do / /tshigs su bcad pa las kyang / thams cad yang dag nyid yin te/ /yang dag nyid kyang yang dag min/ /thams cad yang dag ma yin pa'ang min/ /de ni chos rnams yang dag mtshan nyid do/ /zhes 'byung ngo / /yang bstan bcos de nyid las gzhan yang 'jig rten gyi tha snyad ni gsum yod de/ 'di lta ste log pa dang nga rgyal dang ming ngo / /gnyis pa'i dbang du byas pa'i phyir bdag ces bya'o zhes 'byung ste/ 'di ni rnal 'byor spyod pa'i sa las btags pa tsam du bdag ces bshad do zhes bstan pa nyid do/ /dbu ma'i bstan bcos las/ de kho na'i mtshan nyid kyi sgo nas bdag kyang ma yin/ bdag med pa yang ma yin no zhes bstan nam zhe na/ ci'i phyir shes rab kyi pha rol tu phyin pa'i 'grel pa las bdag med do zhes bshad la/ 'gal ba med de 'jig rten pa'i grub pa'i dbang du byas na ni bdag ces bshad la/ don dam pa'i dbang du byas na ni bdag med ces bshad do/ /gang zag so so'i dbang du byas na ni bdag yod pa'am/ yang na bdag med pa zhes bshad de/ 'dzin pa gnyi ga cig car yongs su bsal ba'i phyir bdag kyang ma yin bdag med pa yang ma yin no zhes kyang bstan te/ de'i phyir bstan bcos dbu ma'i tshig le'ur byas pa las/ sangs rgyas rnams kyis res 'ga' bdag /res 'ga' bdag med par yang gsungs/ /chos rnams yang dag mtshan nyid la/ /bdag med bdag med pa'ang min/ /zhes 'byung ste/ gal te phyogs gcig tu bdag tu 'dzin pa la ltos na ni/ bdag med par bshad pa ste/ de kho na'i mtshan nyid yin la/ gal te 'dzin pa cig car yongs su bsal na ni bdag kyang ma yin bdag med pa yang ma yin par bstan pa ste/ de kho na'i mtshan nyid yin te/ so so nas don re re'i dbang du byed pas 'gal ba med do/ /mya ngan las 'das pa chen po'i mdo dang sbyar nas/ yang dag pa'i bdag nyid ni de kho na'i mtshan nyid do zhes gsungs so/ /'phags pa byams pa'i gzhung dang sbyar na don rnam pa bzhi'i phyir phung po rnams la btags pa tsam du bdag ces brjod pa yin no zhes 'byung ste/ de'i phyir rnal 'byor spyod pa'i sa las 'di ltar bcom ldan 'das kyis dge slong dag rgyu rnam pa bzhi'i phyir 'du byed rnams la sems can dogs par rig par bya ste/ tha snyad la bde bar bya ba dang / 'jig rten pa dang mthun par bya ba dang / sems can gyi dngos po rnam pa thams cad kyis med do snyam pa'i skrag pa bsal ba dang / bdag dang pha rol la tha snyad kyis yon tan dang ldan pa dang / skyon dang ldan par yid ches pa bskyed pa'i phyir ro zhes 'byung ste/ bstan bcos rnam par bshad pa dang / chos mngon pa las kyang 'di dang mthun par bshad de/ de la thos pa zhes bya ba ni so so nas bshad pa mi mthun te/ thams cad yod par smra ba'i gzhung gis ni rna bas thos pa yin gyis/ rnam par shes pa ni ma yin no zhes bshad do/ /slob dpon chos skyong gis rnam par shes pas thos kyis/ rna bas ni ma yin no zhes zer te/ bye brag tu bshad pa chen po bam po bcu gsum pa las bshad pa bzhin no/ /mdo sde'i gzhung gis kyang / rnam par shes pas thos kyis rna bas ni ma yin no zhes zer te/ bstan bcos de kho na nyid grub pa las bshad pa bzhin no/ /slob dpon dpe can gyis 'dus pa las thos so zhes zer te/ bye brag tu bshad pa chen po bam po bcu gsum pa las bshad pa bzhin no/ /'dir theg pa chen po dag gis bshad pa dang sbyar na byang chub sems dpa' klu sgrub kyis bshad pa yang rnam pa gnyis yod de/ dang po ni rna bas thos kyis/ rnam par shes pas ni ma yin no zhes bshad de/ shes rab kyi pha rol tu phyin pa'i 'grel pa las ji skad du lha'i mig gis sangs rgyas mthong ngo / /lha'i rna bas chos thos so zhes bstan pa lta bu'o/ /gnyis pa ni 'dus pa las thos so zhes bshad de/ shes rab kyi pha rol tu phyin pa'i 'grel pa las ji skad du rnam pa gnyis su bshad pa yod kyang 'dus pa ni yang dag pa yin te/ thos pa yang dag pa'i don du rnam par bshad pa las 'dus pa las thos so zhes bshad pa'i phyir ro zhes bstan pa lta bu'o/ /'phags pa byams pa'i gzhung dang sbyar na bshad pa gsum yod de/ kha cig las ni rna bas thos kyis rnam par shes pas ni ma yin no zhes bshad de/ chos mngon pa sna tshogs kun las btus pa las/ rna ba'i khams kyi mtshan nyid ji lta bu zhe na/ 'di lta ste sgra thos pa'o zhes 'byung ba dang / rnal 'byor spyod pa'i sa las 'di la grag pa rnams dmigs shing / 'di la grag pa rnams dmigs pas na rna ba'o zhes 'byung ba lta bu'o/ /kha cig las ni rnam par shes pas thos kyis rna bas ni ma yin no zhes bshad de/ rnal 'byor spyod pa'i sa las ji skad du thos pa ni 'di lta ste/ mnyan nas thos pa'o zhes 'byung ba lta bu ste/ de ni rna ba'i dbang pos rna ba'i rnam par shes pa bskyed nas tshig gis bstan pa thos pa'i phyir ro/ /gzhan yang sangs rgyas kyi sa'i 'grel pa las thos pa ni 'di lta ste/ rna ba'i dbang pos rnam par shes pa bskyed nas nyan par byed pa'o zhes 'byung ngo / /bstan bcos rnam pa gnyis las rna bas thos kyis/ rnam par shes pas ni ma yin no zhes bstan pa yang rnam par shes pa bskyed pa'i rna ba'i dbang po thob pa'i ngo bo nyid yin pa'i phyir ro/ /kha cig las ni 'dus pa las nus par thos so zhes bshad do / chos mngon pa sna tshogs kun las btus pa las ji skad du mig gis gzugs mthong ngam/ 'on te rnam par shes pa la sogs pa yin na / mig gis gzugs mthong ba yang ma yin/ rnam par shes pa la sogs pas kyang ma yin te/ 'di ltar chos thams cad la byed pa med pa'i phyir ro/ /'dus pa yod pa'i dbang gis btags pa yod pa tsam du mthong ba zhes 'dogs par zad de/ rna ba la sogs pa yang de bzhin no zhes 'byung ba lta bu ste/ rgya cher ni de nyid las bshad pa bzhin no/ /de ltar bstan bcos rnams las tha dad par gyur pa yang sgra nyan pa dang rten khyad par can du gyur pa'i phyir/ rnal 'byor spyod pa'i sa las rna bas thos so zhes bshad la/ don rnam par 'byed pa'i dbang du byas pa'i phyir ni sangs rgyas kyi sa'i 'grel pa la sogs pa las rnam par shes pas thos so zhes bshad do/ /chos rnams la yang dag par byed pa med pa'i phyir ni shes rab kyi pha rol tu phyin pa'i 'grel pa dang / chos mngon pa sna tshogs kun las btus pa las thos so zhes bshad de/ so so nas don re re'i dbang du byas pa'i phyir phan tshun 'gal ba med do/ /rnam par rig pa tsam gyis rigs pas thos pa bya ba rnam par 'byed pa yang / sangs rgyas kyi sa'i 'grel pa las slob dpon gnyis kyis bshad pa'i don 'byung ste/ de la dang pos ni 'di skad du de bzhin gshegs pa'i thugs rje dang / sngon gyi smon lam dang / rkyen gyi mthu can gyi dbang gis nyan pa po'i rnam par rig pa la yi ge dang don gyi rnam par skye ste/ yi ge dang don gyi rnam pa de yang rang gi dge ba'i rtsa ba'i mthu las mngon du byung ba yin yang / rkyen mthu can gyi dbang du mdzad nas sangs rgyas kyis gsungs so zhes bshad la/ rna ba'i dbang po dang rang gi sems gyur pa las snang ba'i phyir na bdag gis thos pa zhes bshad do zhe'o/ /gnyis pa ni 'di skad du nyan pa po'i dge ba'i rtsa ba dang / smon lam chen po dang / rkyen mthu can gyi dbang gis de bzhin gshegs pa'i rnam par rig pa la/ yi ge dang don gyi rnam pa skye ste/ yi ge dang don gyi rnam pa de yang de bzhin gshegs pas gzhan la phan btags pa'i dge ba'i rtsa ba las byung bas/ sangs rgyas kyis gsungs pa zhes pa bstan la/ nyan pa po'i rnam par rig pa'i sems kyis blangs nas thob pa ma yin mod kyi/ rnam pa de dang 'dra bar gsal bar gnang ba'i dbang du mdzad nas/ bdag gis thos pa zhes gsungs so zhe'o/ /sangs rgyas kyi sa'i 'grel pa las slob dpon gnyis kyis bshad pa de yang / dang po ni slob dpon klu'i sde sangs rgyas kyi sa'i gnas skabs su gzugs dang sgra la sogs pa yod par mi 'dod do/ /slob dpon gnyis pa ni don gyi sangs rgyas kyi sa'i gnas skabs su yang gzugs dang sgra la sogs pa dang ldan par 'dod do/ /slob dpon h+yan tsang dang / chos skyong yang dag bstan pa'i phyi ma ltar bshad de/ gong du ngo bo nyid dang gzugs brnyan yod med bstan pa'i skabs su bshad pa bzhin no/ /'phags pa kun dga' bo ni de bzhin gshegs pa mngon par rdzogs par sangs rgyas pa'i nyin par btsas pas lo nyi shu lon nas gdod zham ring ba byas te/ sngar gsungs pa'i mdo sde rnams mngon sum du thos pa med na ci'i phyir mdo sde thams cad las bdag gis thos pa zhes gsungs/ 'phags pa drin lan gyi mdo'i 'grel pa las don rnam pa gsum du bshad de/ brgyud de thos pa dang / de bzhin gshegs pa'i 'jig rten pa'i thugs bskyed pa shes pa dang / bcom ldan 'das kyis yang bzlas te bshad pa'o/ /de'i phyir de nyid las bcom ldan 'das kyis lo bcu gnyis kyi bar du gsungs pa'i phyir chos rnams kun dga' bos ma thos na/ ci'i phyir bdag gis thos zhes brjod/ smras pa/ lha rnams kyis kun dga' bo la smras pas so/ /yang na dge slong rnams las thos pas so/ /yang na bcom ldan 'das 'jig rten pa'i thugs bskyed pas kun dga' bos shes par gyur pa'i phyir ro/ / yang na kun dga' bos bcom ldan 'das la lo bcu gnyis kyi bar du gsungs pa'i chos rnams ma lus par bdag la yang bshad par gsol ba btab pa'i phyir ro/ /yang na bcom ldan 'das thabs legs par thugs su chud pas chos kyi tshig las chos tshad med pa gsungs pa dang / chos tshad med pa chos kyi tshig gcig tu gsungs par mdzad pas/ bcom ldan 'das kyis mdo tsam du smos pa kun dga' bos ma lus par khong du chud de/ myur zhing rno ba dang / 'dzin pa'i mthu che ba'i phyir ro zhes bshad do/ /gzhan yang rdo rje gcod pa la sogs pa'i 'grel pa las/ dge slong kun dga' bo ni chos kyi ngo bo nyid blo dbang phyug gi rgyal po zhes bya ba'i ting nge 'dzin thob pas/ ting nge 'dzin gyi mthus sngar gsungs pa rnams ma lus par 'dzin par nus pas mngon sum du thos pa dang tha dad pa med de/ ji ltar mngon par shes pa dag gis 'das pa'i dngos po rnams gsal bar rtogs pa dang / kA t+yA ya na'i bu chen po smos nas shes pa'i mthu thob pa'i phyir de bzhin gshegs pas gsungs pa'i mdo sde rnams ma lus par 'dzin nus pa bzhin du/ kun dga' bo yang de bzhin no zhes 'byung ngo / / 'phags pa kun dga' bo nyan thos yin na ji ltar theg pa chen po'i mdo sde rnams yongs su 'dzin par nus/ theg pa chen po'i chos bsdus pa la sogs pa mdo sde mang po las/ kun dga' bo ni rnam pa gsum yod de/ dang po ni kun dga' bo ste nyan thos kyi chos yongs su 'dzin pa'o/ /gnyis pa ni dga' bo bzang po ste/ rang sangs rgyas kyi chos yongs su 'dzin pa'o/ /gsum pa ni dga' bo rgya mtsho ste/ theg pa chen po'i chos yongs su 'dzin pa'o zhes gsungs te/ 'phags pa rdo rje gcod pa'i 'grel pa drang srong rdo rjes byas pa las kyang 'di dang mthun par 'byung ngo / /slob dpon yang dag bden pas byas pa rdo rje gcod pa'i 'grel pa las/ rgyal po ma skyes dgras sdig pa bshags pa'i mdo khungs bstan pa las gsungs pa dga' bo rnam pa gsum las/ dga' bo gsum pa ni theg pa chen po'i mdo sde yongs su 'dzin pa'o zhes gsungs pa'i phyir 'gal ba med do/ /de la gsum pa de dag bshad pa'i dgongs pa bstan pa zhes bya ba yang / sangs rgyas kyi sa'i 'grel pa las 'di skad bdag gis thos pa zhes bya ba 'dis ni yan lag gzhan gyis sgro 'dogs pa dang / skur pa 'debs pa'i nyes pa dang bral bar bstan te zhes 'byung yongs su spongs par rigs par bya ste/ 'di ltar chos 'di ni bdag gis bcom ldan 'das las mngon sum du thos kyis gud nas gcig nas gcig tu brgyud pa ma yin te/ nyan pa po nus pa dang ldan pas thos pa rnams kyang yan lag gzhan gyis sgro 'dogs pa dang / skur pa 'debs pa'i nyes pa dang bral bar bstan to zhes 'byung ste/ zhib tu de nyid las bshad pa bzhin no/ /dus gcig na zhes bya bas ni rnam pa lngar phye ba las gnyis pa 'byung ba'i dus kyi phyogs zhes bya ba ston te/ dus gcig na zhes bya ba 'di yang yul 'di pa'i slob dpon rnams kyis rnam pa bzhir bstan te/ de bzhin gshegs pa ring gcig gis lo lnga bcu'i bar du bstan pa gsungs pa'i dus dang mdo sde gcig gsungs pa'i dus dang / 'khor lo yongs su smin pa'i dus dang / 'chad pa dang / nyan pa phan tshun phrad par gyur pa'i dus so/ /rgya gar yul pa'i slob dpon gyis bshad pa yang mi mthun pa rnam pa gsum yod de/ de la dang po ni slob dpon bo de le'u cis 'di skad du dus gcig na zhes bya ba yang / rnam pa mang bas 'di lta ste/ skad cig ma'i dus kyang yod/ nyin mtshan gyi dus kyang yod/ lo brgya'i dus kyang yod/ thams cad kyi dus kyang yod/ dpyid dang ston dang / dgun dang / dbyar gyi dus kyang yod de / 'dir dus gcig na zhes bya ba ni 'di lta bu la sogs pa'i dus ma yin gyi / de bzhin gshegs pas ldan par mdo 'di gsungs pa'i dus so zhes bshad do/ /gnyis pa ni slob dpon rna rings kyis 'di skad du dus gcig ces bya ba yang rnam pa gnyis yod de/ dang po ni yongs su ma rdzogs pa'i dus te/ dmigs pa ma khyab pa la ltos nas so/ /gnyis pa ni gsung yongs su rdzogs pa'i dus te/ dmigs pa khyab pa la ltos nas so/ /dang po mngon par rdzogs par sangs rgyas pa nas/ tha ma shing sA la zung cig gi drung du mya ngan las 'das pa'i bar du gsung rnam pa gnyis su gsungs pas yongs su ma rdzogs pa dang yongs su rdzogs pa gnyis ka yang gsungs te / chung ngu'i phyogs can gzigs pa la ni yongs su ma rdzogs pa'i gsung gi dus zhes bya'o/ /yongs su rdzogs pa'i phyogs can gzigs pa la ni yongs su rdzogs pa'i gsung gi dus zhes bya'o/ /gzhan yang dus ni rnam pa gsum yod de / dngos po can 'khor bar 'jug pa'i dus dang / bsam gyis mi khyab pa'i rnam par gyur pa'i dus dang / btags pa tsam du gdags pa'i dus te/ snga ma gnyis ni skye shi rnam pa gnyis kyi dus so/ /btags pa'i dus de yang rnam pa gsum ste/ snga ma gnyis ni shes par gyur pa'i dus dang / log par lta ba 'jig pa'i dus dang / 'jig rten na gnas pa'i dus so/ /de la shes par gyur pa'i dus ni de bzhin gshegs pa'i 'dul ba rnams bsnyen par rdzogs pa'i tshe ni thos su gnang la/ bsnyen par ma rdzogs pa'i tshe thos su mi gnang ba dang / rab tu byung ba'i tshe ni thos su gnang la/ khyim pa'i tshe thos su mi gnang ba dang / rgyal po ni thos su gnang la/ gzhan rnams thos su mi gnang ba'o/ /log par lta ba 'jig pa'i dus ni 'di lta ste/ lung sde lnga dang / chos mngon pa yan lag dgu po dag nag po dang dkar po'i phyogs mi dbye bar thams cad thos su gnang ba'o/ /'jig rten na gnas pa'i dus ni ji skad du bcom ldan 'das dus gcig na chu bo gang gA'i 'gram na bzhugs so/ /dus gcig na tshal 'jigs su rung ba na bzhugs so zhes gsungs pa lta bu ste/ 'di dus gcig na zhes bya ba'i ri zhig phyi ma gnyis dang sbyar ro zhe'o/ /gsum pa ni slob dpon yang dag bden pas 'di skad du dus zhes bya ba'i don ni rnam pa bcu yod do zhes bshad de/ /zhib tu dngos po bdun gyi brjed byang byas pa las 'byung ste/ mangs kyis dogs nas 'dir ma brjod do/ /'dir bstan bcos rnams dang sbyar na bshad pa rnam pa gsum yod de/ de la dang po ni slob dpon yon tan byin gyis shes rab kyi pha rol tu phyin pa rdo rje gcod pa'i 'grel pa byas pa las dus gcig na zhes bya ba ni mdo sde 'di gsungs pa'i dus gcig gi tshe ste/ dus gzhan na ni mdo sde tshad med pa gzhan gsungs pa'i phyir ro zhes bshad do/ /gnyis pa ni slob dpon klu sgrub kyis bshad pa dang sbyar na/ dus ni rnam pa gnyis yod de/ dang po ni shes pa'i dus te/ btags pa dang rdzas su yod pa'i phyi nang gnyis ka dang sbyar ba'o/ /gnyis pa ni log par lta ba 'jig pa'i dus te/ btags pa kho na yin gyi/ rdzas su ni ma yin no zhes chos 'di pa'i gzhung gis 'di la brten nas bshad pa yin no zhes 'byung ste/ de'i phyir shes rab kyi pha rol tu phyin pa'i 'grel pa las dris pa/ rgya gar yul pa rnams dus ni rnam pa gnyis yod de/ shes pa'i dus dang / log par lta ba 'jig pa'i dus so zhes bshad na/ bcom ldan 'das ci'i phyir shes pa'i dus kyi cha mi gsung bar/ log par lta ba 'jig pa'i dus 'ba' zhig gsung ba mdzad/ smras pa/ gal te shes pa dang gnyi ga gsung na yang the tshom yod par 'gyur ro/ /yang dris pa/ 'dir shes pa zhes gsungs pa'i rigs te/ 'di ltar yi ge gnyis po de yang zhing bshad sla ba'i phyir/ log par lta ba 'jig pa'i dus zhes thad kar gsung ba'i mi rigs te / 'di ltar yi ge gsum po de lci zhing smra dka' ba'i phyir ro zhe na/ smras pa 'dir log par lta ba bsal ba'i phyir/ log par lta ba 'jig par gsungs kyi shes pa ni ma gsungs so zhes 'byung ste/ zhib tu de nyid las 'byung ba bzhin no/ /gsum pa ni slob dpon nye ba'i yid kyis dus ni rnam pa gsum yod de/ dang po ni bshad pa dang nyan pa mthar phyin pa la dus gcig ces bya'o zhes bshad de/ de'i phyir sangs rgyas kyi sa'i 'grel pa las/ dus gcig ces bya ba ni 'di lta ste/ bshad pa dang nyan pa'i dus te/ 'di ni skad cig ma gcig la rgyun chags su bar chad med par bshad pa dang nyan pa mthar phyin pa'i dbang du mdzad nas spyir dus gcig ces bstan to/ /de lta ma yin na yi ge dang ming dang tshig la sogs pa nyan pa dang / bshad pa'i dus dang tha dad pas ji ltar gcig tu 'gyur zhes bshad do/ /gnyis pa ni skad cig ma gcig la 'dzin pa dang bshad pa dang go ba dang / yongs su bzung bar nus pa'i phyir/ dus gcig ces bya'o zhes bshad de/ de'i phyir 'grel pa de nyid las/ yang na nyan pa po gzungs thob pas yi ge 'bru gcig la/ skad cig ma gcig gis chos kyi rnam grangs thams cad yang dag par 'dzin pa'i phyir/ yang na nyan pa po'i rna ba'i dbang po rnam par dag pa thob pas skad cig ma gcig la yi ge 'bru gcig yongs su bcad pa na gzhan thams cad la thogs pa med par yang dag par 'dzin pa'i phyir dus gcig ces bya'o zhes 'byung ngo / /gsum pa ni phan tshun tshogs shing phrad par gyur pa la dus gcig ces bya'o zhes bshad de/ de'i phyir 'grel pa de nyid las/ yang na phan tshun tshogs shing phrad par gyur nas/ dus kyi cha tha dad pa med pa'i phyir dus gcig ces bya'o zhes 'byung ste/ 'di ni 'chad pa dang nyan pa phan tshun tshogs shing dus mtshungs par gyur pa'i don to/ /dus dang gcig ces bya ba'i ngo bo nyid ji lta bu yin/ de la dus ni dus kyi cha'o/ /gcig ni grangs so/ /thams cad yod par smra ba dang / mdo sde pa dag ni gud na chos med kyi phung po lnga nyid kyi ngo bo nyid byed do/ /khams dang skye mched kyi sgo nas ni 'dus byas kyi ngo bo nyid byed do zhes bshad do/ /'dir theg pa chen po'i gzhung dang sbyar na bshad pa rnam pa gnyis yod de/ dang po ni slob dpon klu sgrub kyi gzhung gis grangs dang dus la sogs pa la rang gi ngo bo nyid med pas phung po dang khams dang skye mched dag gis bsdus pa ma yin no zhes bshad de/ de'i phyir shes rab kyi pha rol tu phyin pa'i 'grel pa las/ grangs dang dus la sogs pa'i chos ni yang dag par yod pa ma yin pas/ phung po dang skye mched dang / 'dzin pa dag gis ma bsdus pa'i phyir ro zhes 'byung ngo / /gzhan yang bstan bcos de nyid las 'di lta ste/ dus dang phyogs la bral ba dang 'dus pa dang / gcig pa dang tha dad pa dang / ring po dang thung ngu'i ming dang yi ge yod pas so so'i skye bo rnams sems kyis mngon par zhen nas yang dag pa nyid du sems so zhes 'byung ste/ rgya cher de nyid las bshad pa bzhin no/ /gnyis pa ni 'phags pa byams pa'i gzhung gis dus dang gcig ces bya ba ni 'dus byas yin te/ yid ches pa'i gnas skabs btags pa tsam du rnam par gzhag pa ste/ 'di ni mtshungs par ldan pa ma yin pa nyi shu rtsa bzhi las grangs dang dus zhes bya ba nyid yin no/ /phung po lnga las ni 'du byed kyi phung pos bsdus so/ / khams dang skye mched las ni chos kyi khams dang chos kyi skye mched kyis bsdus te/ yid kyi rnam par shes pa'i yul yin pa'i phyir ro zhes bshad do/ /'phags pa sangs rgyas kyi sa'i 'grel pa las ni yang na sems kyi gnas skabs kyi gzugs brnyan yin te/ 'di ni mtshungs par ldan pa ma yin pa'o zhes 'byung ste/ 'di ni rnam par rig pa tsam gyi dbang du byas nas bshad pa'o/ /ci'i phyir gzhung gnyis yod pa dang med pa mi mthun par gyur/ slob dpon klu sgrub ni chos stong pa nyid du bstan cing mu stegs can la sogs pa ni grangs dang dus rdzas su yod par 'dod pa gzhig pa'i phyir ngo bo nyid med par bshad la 'phags pa byams pa ni theg pa chen po'i chos kyi mtshan nyid kyi rigs pa bstan pa'i phyir/ logs shig tu mtshungs par ldan pa ma yin pa rnam par gzhag pa yin no/ /yang slob dpon klu sgrub kyis chos lnga'i nang du mtshungs par ldan pa ma yin pa bdun brgya bsdus te/ shes rab kyi pha rol tu phyin pa'i 'grel pa las/ sems la sogs pa'i chos lnga zhes bshad la/ gnas pa bcu'i bshad pa las ni mtshungs par ldan pa ma yin pa bdun brgya rnam par gzhag pa'i phyir ci'i phyir nyi ma dang po shar ba'i dus dang / de bzhin du nam gyi gung thun gyi dus la mdo sde 'di gsungs zhes ma bstan pa'i gnas pa la sogs pa ni logs shig tu gnas khyad par can dag tu bstan la/ mdo sde 'di las ni dus gcig na zhes bya ba 'ba' zhig gsungs/ sangs rgyas kyi sa'i 'grel pa las nyin mtshan dang dus tshod kyi yul so so nas nges pa med pas logs shig na bshad du mi rung ngo zhes 'byung ngo // // bam po lnga pa/ bcom ldan 'das zhes bya ba 'dis ni rnam pa lnga las gsum pa bstan pa gsungs pa'i bdag po zhes bya ba bstan to/ /shes rab kyi pha rol tu phyin pa'i 'grel pa dang sbyar na/ sangs rgyas kyi chos 'chad pa'i gang zag ni rnam pa lnga yod do zhes bshad de/ de'i phyir de nyid las bshad pa las chos bshad pa ni rnam pa lnga yod de/ sangs rgyas nyid kyis gsungs pa dang / slob mas bshad pa dang / drang srong gis bshad pa dang / lha rnams kyis bshad pa dang / sprul pas bshad pa ste gzhan rnam pa bzhi bkod pa'i phyir bcom ldan 'das zhes bya ba gsungs so zhes 'byung ngo / /mdo sde 'di dang po kho nar byang chub sems dpa' don zab mo dgongs pa nges par 'grel pas kyang gnyis su med pa'i don bshad na/ ci'i phyir bcom ldan 'das zhes bya ba 'ba' zhig gsungs/ don rnam pa gsum gyi phyir te/ nyung ngu mang po'i rjes su 'jug pa'i phyir dang / mchog tu gyur pa'i dbang du mdzad nas bshad pa'i phyir dang / sangs rgyas kyis byin gyis brlabs pa'i phyir ro/ /mdo sde rnams kyi mgor mtshan smos pa yang mi mthun pa rnam pa bzhi yod de/ kha cig las ni sangs rgyas zhes bya ba 'ba' zhig smos te/ mya ngan las 'das pa chen po la sogs pa lta bu'o/ /kha cig las ni bcom ldan 'das zhes bya ba nyi tshe smos te/ le'u chen po la sogs pa lta bu'o/ /kha cig las ni sangs rgyas bcom ldan 'das zhes mtshan gnyi ga smos pa yang yod de/ bla na med pa'i gnas bstan pa'i mdo la sogs pa lta bu'o/ /kha cig las ni gnyi ga smos pa yang yod de/ mtshams sbyor ba rnam par grol ba'i mdo dang / shes rab kyi pha rol tu phyin pa'i snying po la sogs pa lta bu'o/ /de ltar mdo sde rnams kyi dpe mi mthun par gyur pa yang mtshams rnam par dgrol ba ni sde gcig gi nang na tha ma'i le'u gnyis yin pa'i phyir mtshan ma smos so/ /shes rab kyi pha rol tu phyin pa'i snying po ni dpe rgyas pa las sdud pa po dag gis bsdus pa'i phyir mtshan ma smos so/ /tshig gzhan gsum pa dag ni rgya gar yul pa'i slob dpon rnams kyis bshad pa rnam pa gsum yod de/ de la dang po ni slob dpon yang dag bden pas dngos po bdun gyi brjed byang byas pa las rnam pa gnyis su bshad de/ dang po ni bstan bcos de kho na nyid bstan pa las/ sangs rgyas ni don rnam pa bcu dang ldan pa'i phyir mdo sde rnams kyi mgor mtshan rnam pa bcu las sangs rgyas zhes bya ba nyi tshe rnam par gzhag pa yin no zhes bshad de/ de'i phyir dngos po bdun gyi brjed byang nyid las ston pa chen po la mtshan rnam pa bcu mnga' na mdo sde las ci'i phyir gzhan dgu po dag mi smos par sangs rgyas zhes bya ba 'ba' zhig brjod ce na/ don rnam pa bcu las de sad par mdzad pa lha'i rnga las mchog tu gyur pa dang / gzhan gyi dbang gis rtogs pa ma yin pa dang / mi shes pa gnyis dang bral ba dang / gnyis las shin tu 'das pa dang / pad+ma lta bur gyur pa dang / rang bzhin gyi mngon par zhen pa mi mnga' ba dang / don rnam pa gsum phun sum tshogs pa dang / yon tan gsum dang ldan pa dang / dkon mchog gsum gyi ngo bo nyid dang ldan pa dang / bdag nyid thugs su chud cing gzhan dag kyang khong du chud par mdzad pa'o zhes 'byung ste rgya cher de nyid las bshad pa gnyis pa ni slob dpon yang dag bden pa nyid kyis dbu ma'i rig pa mu rnam pa bzhir phye nas/ mdo sde thams cad kyi mgor mtshan rnam pa gnyis cig car smos pa yin no zhes bshad de/ de'i phyir dngos po bdun gyi brjed byang las/ sangs rgyas bcom ldan 'das zhes bya ba la mu rnam pa bzhi yod de/ sangs rgyas yin la/ bcom ldan 'das ma yin pa yod de/ de ni theg pa 'og ma pa gnyis po dag bden pa bzhi bsgoms pas/ lhag ma med pa'i mya ngan las 'das pa mngon sum du byas nas rang gi gnas pa la/ bdag kyang sangs rgyas zhes bya ba'i ming thob ste/ spyad pa mi spyod pa'i phyir bcom ldan 'das ni ma yin pa'o/ /bcom ldan 'das yin la sangs rgyas ma yin pa yang yod de/ de ni byang chub sems dpa' rnams yon tan gyi spyod pa spyad pa'i phyir/ bcom ldan 'das zhes bya la/ rgyu'i gnas skabs gnas shing shes rab yongs su ma rdzogs pas sangs rgyas zhes bya ba'i ming mi thob pa'o/ /sangs rgyas kyang ma yin la bcom ldan 'das kyang ma yin pa yang yod de/ de ni so so'i skye bo rnams yon tan mi 'grub pa'i phyir ni bcom ldan 'das ma yin la/ shes rab mi bsgom pa'i phyir ni sangs rgyas zhes mi brjod pa'o/ /sangs rgyas kyang yin la bcom ldan 'das kyang yin pa yang yod de/ de ni sangs rgyas bcom ldan 'das rnams mkhyen pa yongs su rdzogs pa'i phyir ni sangs rgyas zhes brjod la/ yon tan phun sum tshogs pa'i phyir ni bcom ldan 'das kyang yin zhes 'byung ste/ de bzhin du de nyid las gal te sangs rgyas zhes bya ba nyi tshe smos na ni/ theg pa 'og ma pa gnyis kyang der bsdu bar 'gyur la/ bcom ldan 'das zhes bya ba 'ba' zhig smos na yang / byang chub sems dpa' dang 'khor los sgyur ba'i rgyal po dag kyang bsdu bar 'gyur ba'i phyir/ gcig tu bsdus pa la de bzhin gshegs pa zhes bya ste/ de'i phyir bla na med pa'i gnas bstan pa dang / tshig nges par 'grel pa'i mdo la sogs pa las/ sangs rgyas bcom ldan 'das zhes smos pa yin no zhes 'byung ngo / /sde pa rnams kyi lta ba bshad pa'i brjed byang las kyang dngos po bdun gyi brjed byang las 'byung ba dang mthun par bshad do/ /gnyis pa ni slob dpon bo de le'u ci dang drang srong rdo rjes byas pa'i bstan bcos las/ rgya gar yul pa'i dpe ma nor ba dang gtugs nas mdo thams cad kyi mgor bcom ldan 'das 'byung ngo / /yul 'di pa'i mdo sde rnams kha cig las sangs rgyas zhes smos/ kha cig las bcom ldan 'das smos/ kha cig las sangs rgyas bcom ldan 'das zhes smos pa ni lo tsA dag gis de ltar byas so zhes bshad do/ /gsum pa ni slob dpon nye ba'i 'od kyis sangs rgyas kyi sa'i 'grel pa byas pa las/ sangs rgyas ni yon tan rnam pa bcu dang ldan pa'i mtshan mnga' na/ ci'i phyir de bzhin gshegs pa'i bstan pa brgyud pa dag gis mdo sde thams cad kyi mgor 'di ltar bcom ldan 'das zhes bya ba smos/ 'di ltar mtshan 'di 'jig rten kun gyis bkur ba'i phyir ro/ / mu stegs can rnams kyang so so nas rang gi ston pa la bcom ldan 'das zhes brjod pas so/ /gzhan yang mtshan 'di gcig gis yon tan thams cad bsdus pa yin gyi/ mtshan gzhan dag na de lta ma yin pas/ de'i phyir mdo sde thams cad kyi mgor mtshan 'di smos pa yin no zhes bshad do/ /shes rab kyi pha rol tu phyin pa'i 'grel pa las kyang / sangs rgyas kyi sa'i 'grel pa dang don mthun par 'byung ste/ de'i phyir bam po gnyis pa las/ bcom ldan 'das la mtshan 'di gcig mnga' bar zad dam/ mtshan gzhan yang mnga'/ smras pa/ sangs rgyas kyi yon tan tshad med pas mtshan yang tshad med do/ /mtshan 'di phal cher smos pa ni mang po kun gyis shes pa'i phyir ro zhes 'byung ngo / /mya ngan las 'das pa chen po'i mdo dang sbyar na/ bshad pa rnam pa gnyis yod de/ sdig pa 'joms pa dang / yon tan drug dang ldan pa'o/ /de dag gcig tu bsdus nas don rnam pa bdun du 'gyur te/ de'i phyir mdo sde de nyid las bcom ldan 'das zhes bya ba la/ bcom pa ni 'jig pa'o/ /ldan pa ni nyon mongs pa ste/ nyon mongs pa ni 'jig pa'i phyir bcom ldan 'das zhes bya'o/ /gzhan yang dge ba'i chos mngon par grub par mdzad pa'i phyir dang / chos rnams kyi don legs par thugs su chud pa'i phyir dang / yon tan chen po mnga' bas dpe zla med pa'i phyir dang / grags pa chen po dang ldan pas phyogs bcu kun du khyab pa'i phyir dang / gtong ba chen pos rnam pa sna tshogs yongs su btang ba'i phyir dang / bskal pa tshad dang grangs med pa nas bud med kyi dbang po bor ba bsgrubs pa'i phyir ro zhes gsungs so/ /yon tan drug po 'di dag kyang shes rab kyi pha rol tu phyin pa'i 'grel pa dang sbyar na don rnam pa bzhi dang ldan te/ de'i phyir de nyid las b+ha ga ni yon tan zhes bya ba na ni yod pa zhes bya ste/ 'di ni yon tan mnga' ba zhes bya'o/ /gzhan yang b+ha ga ni rnam par 'byed pa'o/ /ban ni legs par spyod pa ste/ spyi'i mtshan nyid dang / bye brag gi mtshan nyid legs par rnam par 'byed pa'i phyir ro/ /gzhan yang b+ha ga ni sgra la bya'o/ /ban ni yod pa la bya ste/ 'di ni sgra dang grags pa dang ldan pa'o/ /gzhan yang b+ha ga ni bcom pa'o/ /ban ni nus pa ste/ dus gsum bcom par spyod pas na / bcom ldan 'das zhes bya'o/ /theg pa 'og ma dag spangs pa yin par bag chags dang bcas pas/ de'i phyir bcom ldan 'das zhes mi bya'o zhes 'byung ngo / /sangs rgyas kyi sa'i 'grel pa las bcom ldan 'das zhes bya ba'i mtshan nyid 'di ni don rnam pa gnyis dang ldan te/ yon tan drug dang ldan pa dang bdud bzhi bcom pa'o/ /de la yon tan drug dang ldan pa ni de nyid las bcom ldan 'das zhes bya ba'i sgra ni don rnam pa drug gi rjes su 'jug ste/ dang po ni rang dbang dang ldan pa'i don te/ nyon mongs pa rnams kyi dbang du ma gyur pa'i phyir ro/ /gnyis pa ni rab tu sbyangs pa'i don te/ ye shes me'i gdung bas yongs su sbyangs pa'i phyir ro/ /gsum pa ni shin tu mdzes pa'i don te/ skyes bu chen po'i mtshan mchog sum cu rtsa gnyis la sogs pas rab tu brgyan pa'i phyir ro/ /bzhi pa ni grags pa'i don te/ yon tan gyi khyad par thams cad phun sum tshogs pas kun gyis shes pa'i phyir ro/ /lnga pa ni dpal gyi don te/ 'jig rten thams cad kyis bsnyen bkur byed cing bsngags pa brjod pa'i phyir ro/ /drug pa ni bdag nyid chen po'i don te/ yon tan thams cad dang ldan pas sems can thams cad la rnam pa thams cad du phan pa dang / bde ba mdzad pa'i sbyor ba nyams pa mi mnga' ba'i phyir te/ tshigs su bcad pa las ji skad du/ rang dbang rab dbyangs mdzes pa dang / /grags dang dpal dang bdag nyid che/ /'di ltar don drug khyad par la/ /bcom ldan zhes ni rig par bya/ /zhes gang bshad pa'o zhes 'byung ngo / /de la bdud bzhi bcom pa zhes bya ba la/ nyon mongs pa'i bdud ni rtsa ba'i nyon mongs pa dang / nye ba'i nyon mongs pa brgya nyi shu rtsa brgyad la/ nyon mongs pa'i bdud ces bya'o/ /zag pa dang bcas pa'i phung po lnga ni phung po'i bdud ces bya'o/ /zag pa dang bcas pa'i phung po lnga mi rtag pa'i mtshan nyid rnams ni 'chi bdag gi bdud ces bya'o/ /gzhan 'phrul dbang byed kyi gnas na lha'i bu dbang phyug la dbang thob pa dag ni lha'i bu'i bdud ces bya'o/ /'di ltar bzhi po de dag dge ba'i chos nyams par byed pa'i phyir bdud ces bya'o/ /bdud bzhi dang bral ba'i phyir bcom ldan 'das zhes bya ste/ bdud bzhi bcom pa'i don phyis rnam par 'byed do/ /'dir rgya gar yul pa'i sde snod gsum pa rnams kyi dgongs pa brtags na/ slob dpon tham bu chim la sogs pa ni bstan bcos de kho na nyid bstan pa la brten nas/ sangs rgyas zhes bya ba'i mtshan nyi tshe smos so/ /sde snod gsum pa yang dag bden pa ni bstan bcos de kho na nyid bstan pa dang / mu bzhi pa'i don la brten nas mtshan rnam pa gnyis smos so/ /sde snod gsum pa h+yan tsang dang po de le'u ci gnyis ni so so nas bstan bcos re re la brten nas/ bcom ldan 'das zhes bya ba smos pa yin no/ /de ltar so so nas bshad pa yod kyang 'dir re zhig bcom ldan 'das zhes bya ba las brtsams nas/ brjod pa yod par gyur pa yin no/ /rin po che sna bdun mchog tu 'bar ba bkod pa zhes bya ba la sogs pas ni rnam pa lnga las bzhi pa mdo sde gsungs pa'i gnas brtan pa zhes bya ba ston to/ /'di yang rnam pa gnyis te/ de bzhin gshegs pa bzhugs pa'i gnas kyi bkod pa bstan pa dang bcom ldan 'das kyi yon tan gyi spyi dang khyad par rab tu bstan pa'o/ /gnas pa bstan pa la yang rnam pa gnyis te/ bzhugs pa'i gnas gcig pa dang / tha dad pa'i bshad pa dang / mdo sde'i tshig gi don yang dag par bshad pa'o/ /de la bzhugs pa'i gnas gcig pa dang / tha dad pa'i bshad pa zhes bya ba dang / tshig nges par 'grel pa'i mdo dang sbyar na sprul pa'i sku'i de bzhin gshegs pas zhing yongs su ma dag par 'di gsungs pa yin te/ de'i phyir tshig nges par 'grel pa'i mdo las/ 'di skad bdag gis thos pa dus gcig na/ sangs rgyas bcom ldan 'das rgyal po'i khab bya rgod phung po'i ri la bzhugs te zhes 'byung ngo / /zab mo rnam par grol ba'i mdo dang sbyar na zhing yongs su dag par bzhugs par 'byung bas dgongs pa zab mo nges par 'grel pa'i mdo las mthun no/ /li yul gyi sde gsum pa'i dpe las ni sangs rgyas kyi spyod yul zhes 'byung gi / yongs su dag pa dang yongs su ma dag pa rnam par phye ba med pas gsung rab 'di dang sbyar na / gcig tu nges par dpyad du yang mi rung ngo / /tshig nges par 'grel pa'i mdo dang / slob dpon yang dag bden pas byas pa'i 'grel pa'i dpe gnyis phan tshun 'gal ba'i phyir tshad mar mi rung ste/ de ci'i phyir zhe na/ tshig nges par 'grel pa'i mdo las ni/ rgyal po'i khab bya rgod kyi phung po'i ri la bzhugs te zhes bya ba 'byung ste/ 'grel pa de las ni yangs pa can gyi grong khyer ri dwags kyi rgyal po'i pho brang na bzhugs te/ byang chub sems dpa' yang dag 'phags la bshad pa 'byung ba'i phyir ro/ /gzhan yang tshig nges par 'grel pa'i mdo las ni gleng gzhi dang yang dag pa'i gzhung nyid dang / bstan pa gnas pa'i phyogs rdzogs par 'byung la/ 'grel pa de nyid las ni bar gyi le'u bzhi nyi tshe rnam par bshad pa'i phyir ro/ /slob dpon yang dag bden pas mdo sde rnams kyi mtshan gyi brjed byang byas pa yang / mdo sde'i 'grel pa dang mthun pa'i dang po dang tha ma'i phyogs gnyis rgya gar gyi dpe yang dag pa ni yin no/ /sangs rgyas sa'i 'grel pa las ni rnam pa gsum yod de/ de'i phyir bam po dang po las bcom ldan 'das 'di ltar gzhal med khang chen po na bzhugs te/ mdo sde 'di gsungs na longs spyod rdzogs pa dang / sprul pa'i sangs rgyas gnyis kyi zhing las zhing yongs su dag pa ni 'di gang gis yongs su bsdus/ mdo sde 'di gsungs pa'i sangs rgyas ni sku gang dag gis bsdus she na/ kha cig las zhing 'di ni sprul pa'i zhing gis bsdus so/ /mdo sde 'di gsungs pa'i sangs rgyas kyang sprul pa'i sku yin te/ nyan thos la sogs pa'i 'khor rnams zhing 'dir gnas nas/ de bzhin gshegs pa las mngon sum du mdo sde 'di thos pas rab tu dga' zhing mngon par yid ches nas gus pas nyams su blangs pa'i phyir ro/ /sangs rgyas kyi thugs las snang ba'i phyir khams gsum las 'das pa shin tu rnam par dag pa'i rnam par rig pa'i mtshan nyid de/ chos khyad par can gsungs pa dag gis sa'i mdun rol gyi sems can gyi rnam pa rnams btul nas mos pa bskyed de/ de'i rgyu sgrub tu gzhug par mdzad pa'i phyir/ re zhig sangs rgyas kyi zhing yongs su dag pa dang / sprul pa'i sku'i khyad par can sprul nas byin gyi rlabs kyis de dag re zhig mthong ba nyid du mdzad do/ /de lta ma yin na nyan thos la sogs pa'i 'khor thams cad kyis mthong bar gyur pa mi rigs so zhe'o/ /kha cig las zhing 'di ni longs spyod rdzogs pa'i zhing gis bsdus so/ /mdo sde 'di gsungs pa'i sangs rgyas kyang longs spyod rdzogs pa'i sku yin te/ zhing yongs su dag pa'i de'i tshad dang mtha' med pa'i phyir dang lam dang bzhon pa dang / sgo la sogs pa yang dag pa'i yon tan yin pa'i phyir dang sangs rgyas kyi zhing yongs su dag pa 'di lta bu la/ yongs su longs spyod pa ni gcig tu gya nom pa dang / gcig tu bde ba dang / gcig tu kha na ma tho ba med pa dang / gcig tu dbang thob pa dang / gzhan las bshad pa'i phyir dang / dgongs pa zab mo nges par 'grel pa'i mdo las sa gsum pa yan chad kyis der skye bar 'gyur ro zhes gsungs pa'i phyir dang / mdo sde 'di gsungs pa'i sangs rgyas 'og nas bshad pa'i yon tan yang dag pa nyi shu rtsa gcig dang ldan pa'i phyir dang / mdo sde gzhan gsungs pa'i tshe sangs rgyas kyi yon tan 'di lta bu ma bkod pa'i phyir ro/ /gal te re zhig 'di lta bu'i zhing yongs su dag pa dang / 'di lta bu'i sku gya nom pa sprul nas 'khor rnams byin gyis brlabs te/ mthong bar mdzad pa yin na/ mdo sde gzhan dag bzhin du gsal bar rab tu dbye bar rigs na/ bshad pa de lta bu yang med pa'i phyir / longs spyod rdzogs pa'i zhing dang longs spyod rdzogs pa'i sku yin par mngon no/ /nyan thos la sogs pa'i 'khor ni sangs rgyas kyi sprul pa yin no/ /yang na byang chub sems dpa' rnams lus de lta bur bsgyur nas sangs rgyas kyi zhing dang chos bshad pa'i 'khor mdzes par bya ba'i phyir ro/ /gal te de ltar na 'di ni sa la gnas pa'i byang chub sems dpa' rnams kyis mthong zhing thos par 'gyur ba yin na/ ci'i phyir sprul pa'i sangs rgyas kyi zhing 'dir bsdus shing gnas par 'gyur zhe na/ chos brgyud pa'i byang chub sems dpa' rnams kyis thams cad mkhyen pa dang / de bzhugs nas 'jig rten pa'i chos thams cad las 'das par rab tu bstan pa'i phyir ro/ /de ltar bstan pa yang gdul bar bya ba rnams la mos pa bskyed pa'i phyir dang / sangs rgyas kyi zhing yongs su dag pa de lta bur skyes nas/ sangs rgyas de lta bur mthong ba dang / chos de lta bu thos par smon lam 'debs shing / de'i rgyu bsgrub tu gzhug pa'i phyir dang / rgya chen po la mos pa'i sems can dang byang chub sems dpa' rnams mgu ba khyad par can rab tu bskyed pa'i phyir dang / lhag pa'i bsam pa la mos pa rnams lhag pa'i bsam pa'o/ /khams bstan par bya ba'i phyir 'dir bsdus shing gnas par gyur pa yin no/ /gzhan yang chos khyad par can yin pas 'dir thos par 'os te/ 'on kyang gnas mchog tu gyur pa ni ma yin no/ /sprul pa'i sku'i mtshan nyid ni rags pas der gsung bar mi rung ba'i phyir ro/ /longs spyod rdzogs pa'i sku longs spyod rdzogs pa'i zhing du bzhugs nas/ sa dang po yan chad kyi byang chub sems dpa' rnams la gsungs pas 'dir chos brgyud pa dag gis bsdus shing gnas par gyur pa yin no/ /gal te de lta na ci'i phyir der gsungs pa'i chos zhes ma bstan/ gal te gnas dang 'chad pa po ma bstan na/ chos 'di gang du gang gis bshad pa mi shes pas thams cad the tshom skye ba'i phyir zhib tu bshad dgos she na/ yang dag pa'i don du de bzhin gshegs pa shAkya thub pas mdo sde 'di gsungs pa'i tshe/ sa'i mdun rol gyi 'khor rnams kyis sprul pa'i sku zhing yongs su ma dag pa 'dir bzhugs nas/ de dag la chos bshad par mthong la/ sa la gnas pa'i 'khor rnams kyis ni longs spyod rdzogs pa'i sku sangs rgyas kyi zhing yongs su dag par bzhugs nas de dag la chos bshad par mthong ste/ thos par mtshungs kyang lta ba tha dad do/ /thams cad dga' ba dang / mngon par yid ches pa dang / len cing spyod par 'dra yang shes pa zab mi zab dang / spyod pa ni tha dad do/ /chos brgyud pa dag gis sems can mchog thos pas brtson 'grus kyis de'i rgyu spyad nas/ sangs rgyas kyi zhing yongs su dag par skye bar smon lam 'debs pa dang / sangs rgyas kyi yon tan du ma mngon du bya ba'i phyir khyad par can dag gis mthong ba'i dbang du mdzad nas bsdus pas na/ bcom ldan 'das gzhal med khang chen po na bzhugs te zhes bya ba nas/ de bzhin du de bzhin gshegs pa'i yon tan rgya cher bstan pa'i bar du gsungs so zhes 'byung ste/ 'dir mdo sde 'di yang dag pa'i don dang sbyar te bshad na yang 'gal ba med do/ /mdo sde 'di'i dpe rnams mthun mi mthun pa'i bshad pa ni gong du bshad pa bzhin no/ /da ni gnas kyi don yang dag par bshad pa ston te/ gnas kyi don bstan pa de yang / dam pa'i chos pad+ma dkar po'i mdo las/ chos khyad par can du bstan pa'i phyir bcom ldan 'das gnas khyad par can na bzhugs so zhes gsungs so/ /dkon mchog brtsegs pa'i mdo las kyang / sems can bsod nams can dag 'dir smos par bya ba'i phyir dang / dge ba'i rtsa ba 'phel bar bya ba'i phyir sngar bzhugs pa'i gnas bstan pa yin no zhes gsungs te/ yon tan byin gyis rdo rje gcod pa'i 'grel pa byas pa las kyang 'di dang mthun par bshad do/ /shes rab kyi pha rol tu phyin pa'i 'grel pa las dus dang phyogs dang gang zag smos pa ni sems can rab tu dang ba bskyed pa'i phyir zhes 'byung bas gnas bstan pa yin no/ /de la dus ni mdo sde gsungs pa'i dus so/ /phyogs ni 'di lta ste/ mdo sde gsungs pa'i gnas so/ /gang zag ni chos nyan pa'i phyir te/ nyan thos la sogs pa'o zhes 'byung ngo / /gzhan yang de nyid las rnam pa gsum gyis bzhugs pa'i don bstan te/ spyod lam gyis bzhugs pa dang / 'phags pa'i gnas pas bzhugs pa dang / sangs rgyas kyi gnas pas bzhugs pa ste/ de'i phyir de nyid las bzhugs pa ji lta bu zhe na/ sku'i lam rnam pa bzhi ste/ bzhugs pa dang gzims pa dang / gshegs pa dang / bzhengs pa'i phyir yang bzhugs pa zhes bya'o/ /gzhan yang gnas pa rnam pa gsum mo/ /dang po ni lha'i gnas pa 'di lta ste/ 'dod pa'i khams kyi lha drug po dag ni gnas pa'i chos so/ /gnyis pa ni tshangs pa'i gnas pa 'di lta ste/ gzugs dang gzugs med pa'i lha rnams kyi gnas pa'i chos so/ /gsum pa ni 'phags pa'i gnas pa 'di lta ste/ sangs rgyas dang rang sangs rgyas dang / dgra bcom pa rnams kyi gnas pa'i chos te/ gnas pa rnam pa gsum las de bzhin gshegs pa rnams ni 'phags pa'i gnas pa la bzhugs so/ /gzhan yang sbyin pa dang / tshul khrims dang dge ba'i sems kyi dngos po gsum ni lha'i gnas pa zhes bya'o/ /tshad med pa'i sems bzhi ni tshangs pa'i gnas pa zhes bya'o/ /stong pa dang mtshan ma med pa dang / smon pa med pa'i ting nge 'dzin ni 'phags pa'i gnas pa zhes bya'o/ /gnas pa las sangs rgyas kyi gnas pa rnam pa bzhir 'gyur te/ lha dang tshangs pa dang / 'phags pa dang sangs rgyas kyi gnas pa ste/ gnas pa gsum ni snga ma bzhin no/ /de la sangs rgyas kyi gnas pa ni dpa' bar 'gro ba la sogs pa sangs rgyas rnams kyi ting nge 'dzin tshad med pa dang / stobs bcu dang mi 'jigs pa bzhi dang / ma 'dres pa'i chos bco brgyad dang / rnam pa thams cad mkhyen pa nyid la sogs pa shes rab sna tshogs pa dang chos kyi sde snod brgyad khri bzhi stong sems can sgrol ba'i sgo rnams dang 'di la sogs pa yon tan rnam pa sna tshogs ni sangs rgyas gnas par bya ba yin pas/ sangs rgyas der bzhugs pa'i phyir sangs rgyas kyi gnas pa zhes bya'o zhes 'byung ba'o / /slob dpon yang dag bden pas dngos po bdun gyi brjed byang byas pa la ni don rnam pa brgyad kyis bzhugs par bshad de/ de la spyod yul la bzhugs pa ni 'di lta ste/ yul chen po bcu drug pa thams cad kyis yo byad rnam pa bzhis mchod pa byas pa'i gnas rnams ni de bzhin gshegs pas bgrod pa'i yul yin pa'i phyir spyod yul zhes bya'o/ /rten gyi gnas su bzhugs pa ni 'di lta ste/ dge 'dun gyi kun dga' ra ba thams cad dang / bya rgod phung po'i ri dang / ka lan da ka'i tshal la sogs pa'i gnas na bzhugs pa'o/ /spyod lam gyis bzhugs pa ni 'di lta ste/ gshegs pa dang / bzhengs pa dang / bzhugs pa dang / gzims pa'i spyod lam gyis bzhugs so/ /sku tshe ma spangs pa'i bzhugs pa ni 'di lta ste/ mngon sum du bzhugs shing mya ngan las ma 'das pa dang / tshul khrims dang / ting nge 'dzin pa la sogs pa cha rnam pa lnga'i chos kyi sku la gnas pa'o/ /tshangs pa'i bzhugs pa ni 'di lta ste/ tshad med pa rnam pa bzhi'i sems te/ de bzhin gshegs pa ni thugs rje chen po'i sems la gnas pa'i phyir/ tshangs pa'i gnas pa zhes bya'o/ /lha'i bzhugs pa ni 'di lta ste/ bsam gtan bzhi po rnams te/ bsam gtan bzhi po mchog tu gyur pa'i de bzhin gshegs pa ni de la gnas so/ /'phags pa'i bzhugs pa ni 'di lta ste/ rnam par thar pa'o/ /rnam par thar pa yang rnam pa bzhi yod do / dang po ni sems med pa'i ting nge 'dzin du bzhugs pa ste/ re zhig sdug bsngal bkag pa'o/ /gnyis pa ni stong pa nyid ting nge 'dzin du bzhugs pa ste / lta ba rnams bkag pa'o/ /gsum pa smon pa med pa'i ting nge 'dzin du bzhugs pa ste/ 'dod chags bkag pa'o/ /bzhi pa ni mtshan ma med pa'i ting nge 'dzin du bzhugs pa ste/ skur pa rnam pa bzhi bkag pa'o/ /bcom ldan 'das ni mtshan ma med pa'i ting nge 'dzin la gnas pa / sems kyi nyon mongs pa gtan nas zad pa'o/ /sangs rgyas kyi bzhugs pa ni 'di lta ste/ sangs rgyas ni skye ba med pa 'gag pa med pa gnas pa med pa'i chos la gnas pa'i phyir sangs rgyas kyi gnas pa zhes bya'o/ /sku gsum dang sbyar te rnam par dbye na/ gnas pa snga ma gsum ni sprul pa'i sku'o/ /bar ma gsum ni longs spyod rdzogs pa'i sku'o/ /tha ma gnyis ni chos kyi sku'o/ /de la sku snga ma gnyis ni gnas pa'o/ /phyi ma chos kyi sku ni gnas par bya ba ste/ mdo sde thams cad phal cher gnas pa brgyad po de dag las snga ma gnyis po spyod yul la bzhugs pas ni khyim pa rnams 'dul bar mdzad do/ /rten gyi gnas su bzhugs pas ni rab tu byung ba rnams 'dul bar mdzad do zhes gsungs te/ spyi dang bye brag gi gnas gnyis smos pa yin no zhes 'byung ngo / /de la gnas kyi tshig ni don rnam par bshad pa yang tshig bcu dgur zhing yongs su dag pa de'i phun sum tshogs pa rnam pa bco brgyad ston par mdzad de/ phun sum tshogs pa bco brgyad po de dag nyid kyis rnam pa bco brgyad du dbye'o/ /rnam pa bco brgyad ni sangs rgyas sa'i 'grel pa las ji skad du 'dis ni de bzhin gshegs pa'i gnas phun sum tshogs pa bstan te/ 'di lta ste sangs rgyas kyi zhing yongs su dag pa'o/ /'di ltar zhing yongs su dag pa 'di yang phun sum tshogs pa'i dngos po bco brgyad kyi dbang gis na phun sum tshogs pa zhes bya'o/ /'di lta ste kha dog phun sum tshogs pa dang / dbyibs phun sum tshogs pa dang / tshad phun sum tshogs pa dang / yul phun sum tshogs pa dang / rgyu phun sum tshogs pa dang / 'bras bu phun sum tshogs pa dang / bdag po phun sum tshogs pa dang / phyogs phun sum tshogs pa dang / zhabs 'bring ba phun sum tshogs pa dang / ston pa phun sum tshogs pa dang / phrin las phun sum tshogs pa dang / phan 'dogs pa phun sum tshogs pa dang / mi 'jigs pa phun sum tshogs pa dang / gnas phun sum tshogs pa dang / lam phun sum tshogs pa dang / bzhon pa phun sum tshogs pa dang / sgo phun sum tshogs pa dang / gzhi phun sum tshogs pa dang / de yang tshig bcu dgu go rims bzhin du phun sum tshogs pa bco brgyad yongs su ston to/ 'di ni yul phun sum tshogs pa'o/ /rab tu brgyan pa ni gzhal med khang gang yin pa de ni sangs rgyas kyi zhing yongs su dag pa zhes bya ste/ bcom ldan 'das de lta bu'i gzhal med khang chen po na bzhugs nas mdo sde 'di gsungs so/ /bstan bcos rnams las kyang slob dpon dbyig gnyen dang / ngo bo nyid med kyis theg pa chen po bsdus pa'i 'grel pa mdzad pa las/ mdo sde las 'byung ba'i phun sum tshogs pa bco brgyad rnam par bshad de/ yi ge thad kar bab pa'i tshe bshad par bya'o/ /de la phun sum tshogs pa dang po yang mdo tshig gnyis kyis bstan te/ dang po kha dog gi gzugs bstan pa ni/ rin po che sna bdun bkod pa zhes gsungs pa'o/ /gnyis pa 'od zer 'byung ba ni 'jig rten gyi khams rgyas par 'gengs pa'o zhes gsungs pa'o/ /de la tshig ces bya ba ni don yongs su rdzogs par bstan pa la tshig bya'i yi ge'i grangs la tshig ces bya ba ni ma yin te/ tshig gzhan bco brgyad po dag la yang de bzhin du sbyar bar rig par bya'o/ /mdo'i tshig dang po de yang slob dpon nye ba'i 'od kyis rnam pa gnyis su bshad de/ de'i phyir sangs rgyas kyi sa'i 'grel pa las/ 'di ltar gzhal med khang chen po de mchog tu 'bar ba'i rin po che sna bdun dag gis bkad pa brgyan pa'o/ /yang na gzhal med khang chen po'i khyad par rin po che sna bdun po de dag mchog tu 'bar ba'o zhes 'byung ste/ ngo bo nyid med kyis byas pa'i 'grel pa las kyang 'di dang mthun par bshad do/ /slob dpon dbyig gnyen rnam par ma bshad pa ni go sla ba'i phyir ro/ /de la rin po che sna bdun ni sangs rgyas kyis yongs su dag pa'i bsngags pa brjod pa'i mdo las ji skad du/ gser dang / dngul dang / bai DUr+ya dang / spug dang / mu tig dmar po dang / rdo'i snying po dang / ke ke ru zhes gsungs te/ shes rab kyi pha rol tu phyin pa'i 'grel pa las kyang mdo 'di dang mthun par 'byung ngo / /slob dpon yang dag bden pa'i bshad pa las gser ni rin po che kha dog ser po'o/ /dngul ni rin po che kha dog dkar po'o/ /bai DUr+ya ni rin po che kha dog sngon po'o/ /bsregs na yang mi 'jig ste/ lha ma srin mthu dang ldan pa dag gis gdod bzhu nas snod spyad dag tu byed par nus so/ /yang na bya gser 'dab can gyi sgo nga bzhi yin no/ /spug ni rin po che kha dog ljang ser can no zhes bshad do/ /shes rab kyi pha rol tu phyin pa'i 'grel pa las kyang lo stong 'das pa'i chab rom ni spug tu 'gyur ro zhes bshad do/ /mu tig dmar po ni sangs rgyas kyi sa'i 'grel pa las srog chags dmar po las byung ba'i phyir/ mu tig dmar po zhes bya ste/ ngo bo nyid dmar ba'i phyir mu tig dmar po zhes bshad do / slob dpon ngo bo nyid med kyis bshad pa las kyang 'di dang mthun par 'byung ngo / /slob dpon yang dag bden pas bshad pa las ni nor bu rin po che rin thang med pa zhes 'byung ngo / /rdo'i snying po ni slob dpon yang dag bden pas rin po che kha dog dmar zhes bshad do/ /slob dpon ngo bo nyid med kyis theg pa chen po bsdus pa'i 'grel pa byas pa las/ rdo'i snying po ni an+da rnyil dang / mthon ka chen po la sogs pa'o zhes 'byung ste/ de la an+da rnyil ni lha'i dbang po'i rin po che kha dog sngon po'o/ /mthon ka chen po ni lha'i dbang po'i rin po che kha dog sngon po mchog tu gyur pa'o/ /ke ke ru ni slob dpon yang dag bden pas rin po che ljang sngon no zhes bshad do/ / gzhan yang shes rab kyi pha rol tu phyin pa'i 'grel pa las/ rin po che rnam pa gsum yod de/ 'di lta ste/ mi'i rin po che dang / lha'i rin po che dang / byang chub sems dpa'i rin po che'o/ /de la mi'i rin po che ni mthu chung ste/ yongs su dag pa'i kha dog dang ldan pas/ dug dang gdon dang mun pa dang bkres pa dang / skom pa dang grang ba dang tsha ba la sogs pa'i sdug bsngal sel bar byed do/ /lha'i rin po che ni chen po yang yin/ mchog kyang yin pas rtag par lha'i lus kyi rjes su 'brang ba dang / mngags pa dang / smrar rung ba dang / yang zhing mi lci ba'o/ /byang chub sems dpa'i rin po che mi'i rin po che las mchog tu gyur pa dang / gzhan yang lha'i rin po che las mchog tu gyur pa dang / gzhan yang lha'i dang mi'i rin po che ni gnyis kyis nus pa dang ldan pa dang / gzhan yang sems can dag 'chi bar 'gyur ba rtogs shing 'di de'i rgyu dang rkyen gyi thog ma dang tha ma'o zhes shes par byed pa dang / gzhan yang chos kyi sgra skad rnam pa sna tshogs 'byung ngo zhes bya ba nas rgya cher bshad pa'i bar du'o/ /gzhan yang de nyid las rin po che de dag gang nas byung zhe na/ smras pa gser ni ri dang rdo dang bye ma dang zangs dmar po las 'byung ngo / /mu tig ni nya'i khog pa dang / rgyu ma dang sbrul gyi glad pa'i nang nas 'byung ngo / /klu'i nor bu ni klu'i glad pa'i nang nas 'byung ngo / /byi ru ni rgya mtsho'i nang nas 'byung ngo / /dngul ni rdo bsregs pa las 'byung ngo / /bai DUr+ya dang spug la sogs pa gzhan dag ni/ ri'i phug nas 'byung ngo / /yid bzhin gyi nor bu ni de bzhin gshegs pa'i ring bsrel las 'byung ste/ nam chos nub par gyur pa'i tshe/ ring bsrel rnams yid bzhin gyi nor bur 'gyur te/ ji ltar lo stong 'das pa'i chab rom spug tu 'gyur ba bzhin no/ /'di lta bu la sogs pa'i rin po che rnams ni mi'i rin po che phal che ba'o/ /'dir yongs su brgyan pa dag ni shin tu khyad par can du gyur pa dag yin pas/ lha rnams kyis thob par mi nus so/ /de ci'i phyir zhe na/ yon tan chen po las rab tu byung ba'i phyir ro zhes 'byung ngo / /theg pa chen po bsdus pa'i 'grel pa'i dpe mi mthun pa kha cig las rin po che sna bdun po thams cad ni rdo'i rigs su gtogs pa yin no zhes bshad do/ /'jig rten gyi khams dpag tu med pa rgyas par 'gengs pa'i 'od zer chen po rab tu 'byung ba zhes bya bas ni tshig gnyis po 'od zer rgyas par 'gengs pa bstan to/ /slob dpon nye ba'i 'od kyis 'grel pa las/ gzhan yang longs spyod pa'i zhing ni rang gi ngo bo nyid kun du khyab pa ma yin yang / 'dir 'od zer gyis kun du 'gengs par byed la/ nyid kyis longs spyod pa'i zhing ni rang gi ngo bo kun du khyab pa'i phyir/ 'od zer gyis kun du gsal bar byed do zhes 'byung ngo / /slob dpon dbyig gnyen gyis 'grel pa las ni 'di ltar sngar bstan pa'i rin po che sna bdun las 'od zer 'byung bas kun du gsal bar gyur pa yin no zhes 'byung ngo / /slob dpon ngo bo nyid med kyis 'grel pa las kyang gong ma'i rnam par bshad pa gsum char dang ldan no/ /gnas tha dad pa shin tu rnam par phye ba mtha' yas par rnam par gnas pa zhes bya bas ni gnyis pa dbyibs phun sum tshogs pa bstan to/ /de la gnas tha dad pa zhes bya ba ni zab dar gyi gur la sogs pa lta bu'o/ /shin tu rnam par phye ba zhes bya ba ni me tog gi ri mo'i rnam pa la sogs pa lta bu'o/ / slob dpon nye ba'i 'od kyis 'grel pa las/ 'di ltar gzhal med khang chen po'i shin tu rnam par phye ba dag gis gnas tha dad pa tshad med par phye ba'am/ yang na gzhal med khang chen po shin tu rnam par phye ba tshad med pa dag gnas tha dad pa rab tu dbye ba'o/ /tshad med pa zhes bya ba ni grangs tshad med pa mnga'/ yang na gnas tshad med pa'o zhes bshad de/ 'dir grangs tshad med pa zhes bya bas ni snga ma bzhin du rnam par phye ba tshad med pa bzlas te bshad pa'o/ /gnas tshad med pa zhes bya bas ni snga ma'i gnas tshad med pa tha dad pa bzlas te bshad pa'o/ /slob dpon ngo bo nyid med kyis kyang nye ba'i 'od dang mthun par bshad do / /de yan chad du kha dog dang dbyibs rnam pa sna gnyis bshad zin te/ gzugs 'di gnyis la bye brag yod pa yang mdzod kyi bstan bcos la sogs pa las sgo rnam pa gnyis kyis rnam par 'byed de/ gzugs rnam pa nyi shu rtsa gcig dang sbyar nas/ kha dog dang dbyibs phan tshun ltos pa'i mu bzhis rnam par dbye ba'o/ /de la gzugs rnam pa nyi shu kha dog dang dbyibs bstan pa ni mdzod kyi bstan bcos tshig le'ur byas pa las ji skad du/ gzugs rnam gnyis dang rnam pa nyi shu zhes 'byung ba ste/ de nyid kyi 'grel pa las/ de la gzugs rnam pa gnyis zhes bya ba ni 'di lta ste/ kha dog dang dbyibs rnam pa gnyis so/ /kha dog dang gzugs kyang rnam pa bzhi yod de/ sngon po dang / ser po dang / dmar po dang / dkar po'o/ / kha dog bzhi ni gzugs 'di bzhi'i dbye ba las so/ /dbyibs ni rnam pa brgyad de/ 'di lta ste/ ring po dang / thung ngu dang / lham pa dang / zlum po dang / mtho ba dang / dma' ba dang / phya le ba dang / phya le ba ma yin pa'o/ /gzhan yang rnam pa nyi shu 'di lta ste/ sngon po dang / ser po dang / dmar po dang / dkar po dang / 'od dang / grib ma dang / snang ba dang / mun pa dang / sprin dang / du ba dang / rdul dang / khug rna dang / ring po dang thung ngu dang / lham pa dang / zlum po dang / mtho ba dang / dma' ba dang / phya le ba dang / phya le ba ma yin pa'o zhes bshad do/ /slob dpon kha cig ni nam mkha' kha dog gcig pa'i gzugs so zhes kyang bshad do/ /bam po nyi shu rtsa gcig pa las gzugs rnams kyi mtshan nyid rgya cher rnam par bshad de/ de nyid las 'byung ba bzhin du rig par bya'o/ /de la mu bzhis bstan pa ni bstan bcos de nyid las ji skad du gzugs kyi skye mched kha cig ni kha dog yod la/ dbyibs med pa yang yod de/ 'di lta ste/ sngon po dang / ser po dang / dmar po dang / dkar po dang / grib ma dang / 'od dang / snang ba dang mun pa rnams so/ /gzugs kyi skye mched kha cig ni dbyibs yod la kha dog med pa yang yod de/ 'di lta ste ring ba la sogs pa dang / lus kyi rnam par rig byed kyi las kyi ngo bo nyid kyi phyogs gcig go/ /gzugs kyi skye mched kha cig ni kha dog dang dbyibs gnyi ga yod pa yang yod de / 'di lta ste/ de las gzhan pa'i gzugs rnams so/ /mu bzhi po 'di yang so so nas bshad pa mi mthun te/ de la dang po ni slob dpon yang dag bden pas 'di skad du kha dog yin la dbyibs ma yin pa ni ri rab kyi ngos bzhi'i nam mkha' kha dog sngon po la sogs pa'i kha dog gi gzugs rnams so/ /dbyibs yin la kha dog ma yin pa ni 'di lta ste/ lus kyi rnam par rig byed kyi gzugs so/ /kha dog kyang yin la dbyibs kyang yin pa ni rtsig pa la sogs pa'i sngon po dang ser po la sogs pa'i gzugs rnams so/ /kha dog kyang ma yin dbyibs kyang ma yin pa ni rnam par rig byed ma yin pa'i gzugs so zhes bshad do/ /gnyis pa ni slob dpon h+yan tsang gis shes pa skye ba'i dbang du byas nas mu bzhir rnam par 'byed de ji ltar ras dkar po yug gcig sngon por 'jer ba'i tshe/ dbyibs las gyur pa med pas/ kha dog gi shes pa bskyed mod kyi dbyibs kyi shes pa yang skye ste/ 'di lta bu ni kha dog yin la dbyibs ma yin pa zhes bya'o/ /gal te drangs nas 'tsher bar mi byed na ni dbyibs kho na'i shes pa skye'i/ kha dog gi shes pa ni mi skye ste/ 'di lta bu'i dbyibs yin la kha dog ma yin pa'o/ /gal te kha dog bsgyur te 'dra bar yang byed na ni dbyibs dang kha dog gnyi ga'i shes pa skyes te/ bstan bcos yang dag pa'i rigs pa las ji skad du/ rgyang nas rtsig pa nag po mthong nas 'di snyam du 'di ni bya rog yin gyi/ rtsig pa ni ma yin te/ rtsig pa ni bya rog la sogs pa ma yin no snyam du sems so zhes bshad pa 'di lta bu ni kha dog kyang yin dbyibs kyang yin pa'o zhes bya'o/ /kha dog kyang ma yin dbyibs kyang ma yin pa ni nam mkha'i khams kyi gzugs la sogs pa'o zhes bshad do/ /mu bzhi po de dag kyang so so nas bshad pa mi mthun pas bstan bcos bye brag tu bshad pa chen po las bshad pa rnam pa gnyis yod do / /kha cig ni 'di skad du nam mkha'i khams kyi gzugs ni mu bzhi pa yin no zhes zer ro/ /kha cig ni kha dog kyang ma yin pa dbyibs kyang ma yin pa ni med do zhes bshad do/ /bstan bcos yang dag pa'i rigs pa dang sbyar na/ sgra dang dri dang ro dang reg bya dang / rnam par rig byed ma yin pa'i gzugs ni mu bzhi pa yin no zhes bshad do/ /bstan bcos rnam par shes pa'i chos kyi gnas zhes bya ba las/ dbang po lnga dang yul rnam pa bzhi dang / rnam par rig byed ma yin pa'i gzugs ni mu bzhi pa yin no zhes bshad do/ / gzhan yang mdzod kyi bstan bcos las slob dpon kha cig 'di skad du/ 'od dang snang ba'i gzugs kho na 'ba' zhig la kha dog yod kyi dbyibs ni med de/ 'di ltar 'jig rten na sngon po la sogs pa'i gzugs la ring po la sogs pa'i mngon sum du dmigs pa'i phyir ro zhes bshad do/ /thams cad yod par smra ba dbyibs dang kha dog gi ngo bo nyid rnam par bshad pa las kha dog kyang yin dbyibs kyang yin zhes bya ba des ji ltar bshad/ mdzod kyi bstan bcos las 'di'i dris pa dang ldan pa yod de/ de'i phyir bstan bcos de las ji ltar dngos po gcig pa kha dog dang dbyibs gnyi ga dang ldan pa yod/ 'di gnyi ga dmigs pa'i phyir te/ de la yod ces bya ba yang shes pa yod pa'i don gyis yin gyi/ yul yod pa'i don gyis ni ma yin no zhes 'byung ste/ thams cad yod par smra ba las lan du gnas gcig tu shes par 'dren mar skye ba'i phyir/ kha dog dang dbyibs zhes bya'i/ dngos po gcig la yul gnyis yod pa'i don gyis ni ma yin no zhes bshad de/ slob dpon h+yan tsang gis kyang 'di la brten nas 'di skad du bshad pa yin no/ /mu bzhi zhib tu bshad pa ni bye brag tu bshad pa chen po las 'byung ba bzhin no/ /'dir theg pa chen po'i gzhung dang sbyar na grangs mang nyung gis bstan pa yang bstan bcos rnams las mi mthun te/ rnal 'byor spyod pa'i sa las ni gzugs rnam pa nyi shu rtsa bzhi yod do zhes bshad de / de'i phyir de nyid las de yang rnam pa du mar yod de/ mdor na kha dog dang dbyibs dang rnam par rig byed do/ /kha dog ni 'di lta ste/ sngon po dang / ser po dang / dmar po dang / dkar po dang / grib ma dang / nyi ma dang / snang ba dang / mun pa dang / sprin dang / du ba dang / rdul dang / khug rna dang / nam mkha' kha dog gcig pa'o/ /dbyibs ni 'di lta ste/ ring po dang / thung ngu dang / lham pa dang / zlum po dang / rdul phra mo dang / rags pa dang / phya le ba dang / phya le ba ma yin pa dang / mthon po dang / dma' ba'o/ /rnam par rig byed ni 'di lta ste/ len pa dang / 'jog pa dang / bskum pa dang / brkyang ba dang / 'greng ba dang / 'dug pa dang / nyal ba dang / 'gro ba dang / ldog pa dang / de la sogs pa'o zhes 'byung ste/ de ltar nyi shu rtsa bzhi yod mod kyi mu rnam pa bzhir rnam par dbye na/ mu rnam pa gsum kho nar 'gyur te/ kha dog la dbyibs ma yin pa yang bcu gsum po dag go/ /dbyibs yin la kha dog ma yin pa ni bcu po dag go/ /kha dog kyang ma yin la dbyibs kyang ma yin pa ni 'di lta ste/ rnam par rig byed do/ /bstan bcos rnam par bshad pa las kyang rnam pa nyi shu rtsa bzhi'o zhes bshad do/ /de'i phyir de nyid las kha dog gam/ dbyibs sam rnam par rig byed do/ /de yang gang zhe na/ 'di lta ste/ sngon po dang ser po dang / dmar po dang / dkar po'o/ /de lta bu la sogs pa 'di lta ste/ ring po dang thung ngu dang / lham pa dang / zlum po dang / rags pa dang / phra ba dang / mtho ba dang / dma' ba dang / phya le ba dang / phya le ba ma yin pa dang / du ba dang sprin dang / rdul dang / khug rna dang / 'od dang / grib ma dang / snang ba dang / mun pa dang / nam mkha' kha dog gcig pa 'am/ gzugs brnyan gyi gzugs so zhes 'byung ste/ rnam par bshad pa las tshig tha dad pa 'dra yang don rnal 'byor spyod pa'i sa dang mthun te/ de'i phyir de las 'di lta bu la sogs pa zhes bya ba'i tshig smos te/ stsogs pa zhes bya bas ni phyi ma du ba dang sprin la sogs pa'i tshig bsdus pa'o/ /gzugs brnyan gyi gzugs ni rnam par rig byed kyi gzugs so/ /bstan bcos chos mngon pa sna tshogs kun las btus pa las/ gzugs ni nyi shu rtsa lnga yod do zhes bshad de/ mngon par skabs yod pas bsnan na'o/ /gzhan ni rnal 'byor spyod pa'i sa dang mthun te/ mu rnam pa bzhir dbye ba med pa yang / rnal 'byor spyod pa'i sa dang mthun pas don la 'gal ba med do/ /rgya yongs su ma chad pas de'i tshad shin tu dpag par dka' ba zhes bya ba 'dis ni gsum pa tshad phun sum tshogs pa yongs su bstan to/ /slob dpon nye ba'i 'od kyis sngar don rnam pa gsum gyis de'i tshad shin tu dpag par dka' bar bshad la/ phyis ni zhing rnam pa gnyis kyi dbang du byas nas dpag par dka' ba rnam par 'byed de/ de la don rnam pa gsum zhes bya ba yang kha cig ni de'i tshad kyi rgya mtha' med pa'i phyir dpag par dka'o zhes zer ro/ /kha cig ni de'i tshad kyi mtha' med pas rgya yang shin tu dpag par dka'o zhes zer ro/ /don gsum pa ni phyogs bcu la brten nas dpag par dka' bar bshad de/ de'i phyir sangs rgyas sa'i 'grel pa las 'di lta ste/ gzhal med khang de'i tshad kyi rgya mtha' med pas dpag par dka' ba'am/ yang na gzhal med khang chen po de'i tshad kyi mtha' med pas/ rgya yang shin tu dpag par dka'o/ /gzhan yang shar phyogs la sogs pa'i phyogs cha med pa'i phyir/ ring po dang thung ngu la sogs pa'i mtshan nyid kyang dpag par dka'o zhes 'byung ngo / /de la zhing rnam pa gnyis kyi dbang du byas nas dpag par dka' bar bstan pa yang / slob dpon gsum gyis bshad pa yang yod de/ de'i phyir sangs rgyas sa'i 'grel pa las kha cig ni 'di skad du/ de bzhin gshegs pa longs spyod rdzogs pa'i sku'i zhing ni gdul ba'i sems can gyi mos pa ji lta ba bzhin du/ res 'ga' rgya chen po res 'ga' rgya chung ngu ston par mdzad pas de'i tshad nges pa yang med do/ / yangs shing rgya chen po ston par mdzad kyang / mtha' med pa ma yin gyi/ 'on kyang sa'i mdun rol gyi byang chub sems dpa' rnams kyi shes pa la sogs pa'i dbang du mdzad nas/ mtha' med pa dang / de'i tshad dpag par dka'o zhes gsungs pa yin no zhe'o/ /yang kha cig na re de bzhin gshegs pa longs spyod rdzogs pa'i sku'i zhing ni bskal pa grangs med pa gsum du dge ba'i rtsa ba mtha' med pa bsgrub pa las mngon par bsgrubs pas na/ chos kyi dbyings dang mnyam ste/ sa la gnas pa'i byang chub sems dpa' dang / de bzhin gshegs pa rnams kyis kyang de'i tshad dpag par mi spyod do / /'di ltar mtha' med pa'i phyir thog ma med pa'i dus ji lta ba bzhin no/ /yang dag pa'i don du na longs spyod rdzogs pa'i sku'i zhing yang mdor bsdu na rnam pa gnyis yod de/ /dang po ni nyid kyi longs spyod rdzogs pa'i zhing 'di lta ste/ de bzhin gshegs pa rnams bskal pa grangs med pa gsum du dge ba'i rtsa ba mtha' med pa yongs su bsgoms pa las mngon par grub pas na/ chos kyi dbyings kun tu khyab ste/ nyid kyi chos kyi dgyes pa chen po bstan pa'i phyir/ dang por mngon par rdzogs par sangs rgyas pa nas phyi ma'i mtha' ji srid par rgyun mi 'chad cing 'gyur ba med de/ yon tan rnams ji lta ba bzhin no/ /byang chub sems dpa' sems dpa' chen po rnams kyis kyang mthong bar mi nus kyi/ thos pa tsam du zad do/ /'di ltar zhing yongs su dag pa de tshad med pa'i phyir ro/ /de bzhin gshegs pa rnams kyis gzigs mod kyi / de'i tshad mtha' ni dpag par mi spyod do/ /gnyis pa ni gzhan longs spyod rdzogs pa'i zhing ni 'di lta ste/ de bzhin gshegs pa rnams la gnas pa'i byang chub sems dpa'i 'khor rnams kyis chos kyi dga' ba chen po la longs spyod cing spyod pa khyad par can sgrub tu gzhug pa'i phyir/ mos pa ji lta ba bzhin du res 'ga' khyad par can dang / res 'ga' dman pa dang res 'ga' rgya chen po dang / res 'ga' rgya chung ngu ston par mdzad de/ 'gyur zhing nges pa med pas sprul pa'i zhing ji lta ba bzhin no/ /'di ltar zhing yongs su dag pa de mtha' med pa'i phyir/ sa la gnas pa'i byang chub sems dpa' dang / de bzhin gshegs pa rnams kyis kyang de'i tshad dpag par mi spyod do/ /sa'i mdun rol pa rnam pa gnyis kyi dbang du mdzad nas ni dpag par mi nus so zhes gsungs so/ /de ltar rnam pa gnyis kyi bye brag gi phyir rgya yongs su ma chad pas de'i tshad shin tu dpag par dka'o zhes gsungs pa yin no zhes 'byung ngo / /slob dpon ngo bo nyid med kyis kyang / sangs rgyas sa'i 'grel pa las 'byung ba'i rnam pa gsum las rnam grangs dang po'i gnyis dang mthun par bshad do / /slob dpon dbyig gnyen gyis ni bshad pa ma mdzad de/ don go sla ba'i phyir ro/ /khams gsum pa las yang dag par 'das pa'i spyod yul zhes bya ba 'dis ni bzhi pa yul phun sum tshogs pa bstan to/ /slob dpon nye ba'i 'od kyis byas pa'i 'grel pa las 'di ltar gzhal med khang chen po de'i gnas dang / phyogs dang yul khams gsum po'i spyod yul las shin tu 'das pas ji ltar khams gsum pa dag pa ltar rang gi sa'i srid pa dag gir byas pa dang / dmigs pa dang mtshungs par ldan pas 'ching ba gnyis brtas par byed pa dang / de'i rnam par smin par byed pa dang / dbang gi 'bras bu gyur pa lta bu ni ma yin te/ 'di ltar yongs su dag pa de khams gsum pa'i sred pa'i dbang gis yongs su bzung ba ma yin pa'i phyir dang / 'ching ba gnyis dang bral ba'i phyir dang / de'i rnam par smin pa dang / dbang gi 'bras bu ma yin pa'i phyir/ mya ngan las 'das pa la sogs pa bzhin du/ khams gsum pa'i rnam par smin pa'i sa las shin tu 'das pa yin no zhes bshad de/ khams bco brgyad dang sbyar nas phan tshun 'dri zhing rnam par dbye ba dang / ldan mi ldan pa la sogs pa ni sangs rgyas kyi sa'i 'grel pa dang / zhing yongs su dag pa bstan pa las rgya cher bshad pa bzhin du rig par bya'o/ /'jig rten las 'das pa bla ma'i dge ba'i rtsa ba las byung ba zhes bya ba 'dis ni lnga pa rgyu phun sum tshogs pa bstan to/ /slob dpon nye ba'i 'od kyis byas pa'i 'grel pa las/ 'di lta ste/ gzhal med khang chen po de 'jig rten las 'das pa rnam par mi rtog pa'i ye shes kyi rjes la thob pa'i ye shes kyi dge ba'i rtsa ba las rgyu byas pa las mngon par byung bas rgyu med pa yang ma yin/ dbang phyug chen po la sogs pa'i rgyu las kyang ma yin no/ /ji ltar na zhing yongs su dag pa khams gsum pa las shin tu dag pa/ 'jig rten las 'das pa rnam par mi rtog pa'i ye shes kyi rjes la thob pa dag pa 'jig rten pa'i chos kyi rnam par smin pa'i rgyu byed ce na/ de'i rnam par smin pa'i rgyu byed do zhes ni mi brjod do/ /rgyu gzhan las de 'byung bar bstan te/ ji ltar sdug bsngal la chos shes pa'i bzod pa'i phyogs 'jig rten pa'i chos kyi mchog gi rgyu byed pa bzhin no/ /'di ni rang bzhin gyis rnam par mi rtog pa'i ye shes kyi rjes la thob pa zag pa med pa'i dge ba'i chos kyi sa bon bskal pa grangs med pa gsum du mngon par bsgrubs nas 'phel zhing rgya chen por gyur pas zhing yongs su dag pa 'di mngon du snang bar 'gyur ba'i rgyu byed do/ /de la rnam par mi rtog pa'i ye shes ni 'jig rten las 'das pa zhes bya'o/ /rjes las thob pa'i snga ma las 'das pa'i phyir bla ma zhes brjod de/ 'jig rten las 'das pa'i bla ma'i gang zag pa med pa'i dge ba'i rtsa bas 'dir 'byung ba'i rgyu byed do zhes bya ba'i tha tshig go/ /yang rnam pa gcig tu na nyan thos dang rang sangs rgyas rnams kyis 'phags pa'i lam ni 'jig rten las 'das pa zhes bya la/ de bzhin gshegs pa'i dge ba'i rtsa ba ni de dag las 'das pa'i phyir bla ma zhes bya ste/ sangs rgyas rnams kyi zhing yongs su dag pa 'di ni de bzhin gshegs pa'i rnam par rig pa la mnga' ba'i zag pa med pa'i dge ba'i rtsa ba'i rgyu byas nas rab tu skye'o/ /kha cig ni bdag po'i rkyen las 'byung ste/ 'di ltar phyi rol gyi chos can gyi phyir ro zhe'o/ /kha cig ni rgyu'i rkyen gyis 'byung ste/ nye bar bskyed pa'i phyir ro/ /gal te de lta ma yin na rgyu dang rkyen med pa nyid du 'gyur te/ phyi rol gyi chos ma yin pa rnams phan tshun ltos na/ rgyu dang rkyen ma yin pa'i phyir/ phyi rol gyi chos thams cad ni nang gi chos yongs su bsgos pas rgyu byed de/ gal te de ltar phyi rol gyi chos rnams thun mong du yod pa yin na/ ji ltar sems can so so'i sa bon gyis lhan cig tu rgyu dang rkyen byas nas thun mong du 'bras bu gcig skyed par byed ce na/ 'di ltar sems can rgyu chung ngus chos rgya chen po dpag par mi nus te/ ci'i phyir phyi rol gyi dngos po rnams rdul phra rab la sogs pa las mngon par grub cing yang dag pa'i ngo bo nyid yod pa ma yin na / de ni rgyu mang po las thun mong du mngon par 'grub pa yin te/ sems can gyi rnam par rig pa tha dad pa so so nas gnas gcig pa lta bur gyur nas gcig la gcig sgrib par mi byed de/ ji ltar mar me mang po'i 'od dang / skye bo mang po'i rmi lam lta bur rgyu'i rnam pa mtshungs pas 'bras bu'i mtshan nyid dang 'dra yang gnas ni tha dad de/ btags pa tsam du thun mong ngo zhes brjod kyang yang dag par so so tha dad do/ /de bzhin gshegs pa rnams kyi zhing yongs su dag pa yang de bzhin te/ so so'i rnam par rig pa gyur nas chos kyi dbyings kun tu khyab cing gnas gcig 'dra bar snang bas thun mong zhes brjod pa yin no zhes 'byung ngo / /shin tu rnam par dag cing dbang bsgyur ba'i rnam par rig pa'i mtshan nyid ces bya ba 'dis ni drug pa 'bras bu phun sum tshogs pa bstan te/ slob dpon nye ba'i 'od kyis byas pa'i 'grel pa las 'di ltar gzhal med khang chen po de ni shin tu rnam par dag cing dbang bsgyur ba/ de bzhin gshegs pa'i zag pa med pa'i thugs kyi ngo bo nyid kyi mtshan nyid byed de/ rnam par rig pa tsam du zad pa'i phyir rnam par rig pa las ma gtogs par rin po che la sogs pa yod pa ma yin te/ de ni de bzhin gshegs pa rnams kyi thugs yongs su dag pa'o/ /de ltar rin po che la sogs pa lta bur snang ba yang / de bzhin gshegs pa'i me long lta bu'i ye shes dang / mtshungs par ldan pa'i rnam par rig pa yongs su dag pa sngon bdag la phan 'dogs pa'i zag pa med pa'i zhing yongs su dag pa'i sa bon mngon par bsgrub pa'i rgyu dang rkyen gyi mthu'i phyir/ dus thams cad dang / gnas thams cad du mngon par 'du mdzad pa la mi ltos par rang gi ngang gis rin po che sna tshogs kyi bkod pa/ longs spyod rdzogs pa'i sangs rgyas kyi zhing dang nyid kyi longs spyod rdzogs pa'i sku'i gnas byed pa lta bur gyur par snang ngo / /gzhan la phan btags pa'i zag pa med pa'i zhing yongs su dag pa'i sa bon gyi rgyu dang rkyen gyi stobs kyi phyir ni sa la gnas pa'i byang chub sems dpa' rnams kyi ched du ji ltar 'os pa bzhin du zhing yongs su dag pa rgya chen po 'am/ rgya chung ngu'am/ khyad par can nam khyad par can ma yin pa dag ston par mdzad pas kyang gzhan longs spyod rdzogs pa'i sku'i gnas byed pa lta bur snang ngo / /'di ltar sa dang po'i byang chub sems dpa' rnams kyi ched du ni ji ltar 'os pa bzhin du rgya chung ngu dang / dman pa dag ston par mdzad la/ de bzhin du gong nas gong du sa bcu pa dag la ni rgya chen po dang khyad par can dag ston te/ sa de'i dang po dang bar ma dang / tha ma la sogs pa yang de bzhin du zhes 'byung ngo / /slob dpon dbyig gnyen dang ngo bo nyid med kyis kyang / de las rnam pa gzhan du bshad pa med do/ /de bzhin gshegs pa'i gnas zhes bya ba 'dis ni bdun pa bdag po phun sum tshogs pa bstan to/ /slob dpon nye ba'i 'od kyis byas pa'i 'grel pa las 'di ltar gzhal med khang chen po de sangs rgyas bcom ldan 'das mnga' bdag yin gyis gzhan ni ma yin te/ khyad par du gyur pa'i phyir bcom ldan 'das nyag gcig mnga' ba yin no/ /yang na bcom ldan 'das nyag gcig gis byin gyis brlabs nas bzhes pa yin gyis gzhan gyis ni ma yin no/ /nyid kyis longs spyod pa'i zhing chos kyi dbyings kun du khyab pa yin mod kyi/ rang rang gis sprul pa yin pas so so nas mnga' bdag mdzad de/ gcig la gcig sgrib pa yang med do/ /gzhan longs spyod pa'i zhing de bzhin gshegs pa rnams kyi sprul pa yin yang / mtshan nyid gcig tu gyur pas mtshan nyid kyi sku gcig gis yongs su bzhengs nas mnga' bdag mdzad de/ phan tshun sgrib pa yang med do zhes 'byung ste/ slob dpon dbyig gnyen dang ngo bo nyid med kyis rnam pa gzhan du bshad pa ni med do/ /byang chub sems dpa' chen po'i dge 'dun yongs su 'dus pa zhes bya ba 'dis ni brgyad pa phyogs phun sum tshogs pa bstan to/ /slob dpon nye ba'i 'od kyis byas pa'i 'grel pa las 'di ltar gzhal med khang chen po de na rtag par rgyun du byang chub sems dpa' chen po'i dge 'dun tshad med pa dag lhan cig tu 'dus nas 'gro bar 'os pa gang yin pa de dag ni phyogs zhes bya'o/ /de ltar byang chub sems dpa' chen po'i dge 'dun grangs med pa rtag par 'ong zhing phyogs byed pa nyid kyi phyir/ dgra bo rnams kyis gnod par byed pa'ang mi mnga' ste/ nyan thos la sogs pa la ni de lta bu med do/ /'di ltar sa dang po'i byang chub sems dpa'i 'khor rnams de bzhin gshegs pa rnams kyis bdag la phan 'dogs pa'i longs spyod pa'i zhing yongs su dag par mi nus mod kyi/ de bzhin gshegs pa rnams kyi thugs rje'i dbang gis rang gi rnam par rig pa las byang chub sems dpa' de dag la ji lta ba bzhin du/ zhing rags pa gya nom pa byang chub sems dpa' rang gi dge ba'i rtsa ba dang / smon lam gyi stobs ji lta ba bzhin du rang gi rnam par rig pa la/ de bzhin gshegs pa rnams kyis bskyed pa 'dra ba'i zhing yongs su dag pa'i rgyu mtshan rab tu snang ngo / /so so nas rang gi sems de ltar snang yang gnas gcig tu dbyibs kyi mtshan nyid mtshungs pa dang zhing gcig tu lhan cig tu 'dus par gyur to snyam du sems so zhes 'byung ste/ 'di ltar sa la gnas pa'i byang chub sems dpa' rnams kyi zhing yongs su dag pa de zag pa dang bcas pa dang / 'on te zag pa med pa zhig yin zhes bya ba la sogs pa'i don ni zhib tu de nyid las bshad pa bzhin no/ /slob dpon dbyig gnyen dang ngo bo nyid med kyis de las rnam pa gzhan du bshad pa ni med do// //bam po drug pa/ lha dang klu dang gnod sbyin dang dri za dang lha ma yin dang nam mkha' lding dang / mi 'am ci dang lto 'phye chen po dang mi dang mi ma yin pa la sogs pa tshad med pa rtag par rnam par rgyu ba zhes pa 'dis ni dgu pa zhabs 'bring ba phun sum tshogs pa bstan to/ /shes rab kyi pha rol tu phyin pa'i 'grel pa dang sbyar na/ lha ni rnam pa gsum yod do zhes bshad de/ de la ming gi lha ni 'di lta ste/ 'khor los sgyur ba'i rgyal po la sogs pa'o/ /skye ba'i lha ni 'di lta ste/ rgyal chen rigs bzhi'i lha nas srid pa'i rtse mo'i bar gyi lha rnams so/ /rnam par dag pa'i lha ni 'di lta ste/ sangs rgyas kyi chos kyi sku dang / byang chub sems dpa' dang / rang sangs rgyas dang / dgra bcom pa rnams so zhes bshad do/ /gzhan yang de nyid las lha ni rnam pa bzhi yod de/ ming gi lha ni ji ltar da ltar gyi mi'i rgyal po la lha'i bu zhes brjod pa lta bu'o/ /skye ba'i lha ni rgyal chen ris bzhi'i lha nas 'du shes med 'du shes med min gyi bar gyi lha rnams so/ /rnam par dag pa'i lha ni 'di lta ste/ mi'i gnas 'dir 'phags pa rnams 'byung ba gang yin pa'o/ /skye ba yongs su dag pa'i lha ni khams gsum pa'i lha'i nang nas 'phags pa rnams 'byung ba gang yin pa'o zhes 'byung ngo / /lha rnam pa gsum dang rnam pa bzhi las mi dang skye ba'i lha rnams ni lha zhes bya ste/ de'i phyir dam pa'i chos pad+ma dkar po'i mdo las/ nga yi zhing 'di shin tu bde/ /lha rnams kyis ni rtag tu gang / /zhes gsungs pa dang / gzhan yang sngon gyi las bstan pa'i mdo las/ gzugs med pa'i lha rnams 'khor 'dus par song ba'i phyir yang lha'i 'khor zhes bya'o zhes gsungs pa dang / gzhan yang shA ri'i bus zhus pa'i mdo las lha rnams bsrung ba'i lha la yang lha zhes gsungs so/ /klu ni rnam pa bzhi ste/ lha'i klu ni lha'i gzhal med rnams 'dzin cing lhung bar mi byed pa'o/ /mi'i klu ni sprin 'byin cing char 'bebs pa'o/ /sbrul gyi klu ni sa dang rgya mtsho yongs su 'dzin pa'o/ /rgyal po'i klu ni rgyal po'i rin po che'i bang mdzod bsrung ba'o/ /gnod sbyin zhes bya ba ni khro gtum che ba 'am/ dpa' ba 'am/ 'jigs su rung ba zhes bya'o/ /de yang rnam pa gsum ste/ sa la gnas pa dang / nam mkha' la gnas pa dang / lha'i nang na gnas shing lha'i g.yog byed pa'o/ /dri za zhes bya ba ni rol mo byed pa ste/ dris 'tsho ba'i phyir dri za zhes bya ste / shes rab kyi pha rol tu phyin pa'i 'grel pa las 'di ni lha'i rol mo mkhan rnams kyi rjes su 'brang ba/ sems mnyen des shing bsod nams lha rnam pas chung ba ste/ rin po che sna bdun gyi ri'i bar na gnas pa'o/ /lha ma yin ni sgyu che zhing lha'i yang dag pa'i spyod pa med pa'i phyir lha ma yin zhes bya ste/ ji ltar mi 'ga' zhig nyes par spyod pa la mi ma yin pa zhes bya ba yin te/ de'i phyir rnal 'byor spyod pa'i sa las lha ma yin rnams kyang lha'i 'gro bas bsdus par blta bar bya'o/ /'on kyang de dag ni sgyu can 'drid pa'i bsam pa dang ldan pa sgyu dang g.yo'i spyod pa shas che ba yin te/ de bas na 'di lta ste/ lha rnams bzhin du dkar po'i chos rnams kyi snod du gyur pa ma yin te/ de'i phyir ched 'ga' zhig mdo gzhan dag las 'gro ba tha dad pa'i bstan pas bstan to/ /de dag lha nyid yin na lha'i chos yang dag par blangs te/ gnas pa ma yin pas de'i phyir lha ma yin rnams zhes bya'o zhes 'byung ngo / /yang na the tshom skye ba'i lha zhes bya ste/ de'i phyir shes rab kyi pha rol tu phyin pa'i 'grel pa las lha ma yin ni lha'i bde ba nyams su myong ba mi nyams pa lha rnams kyis byin gyis brlabs pas sprul pa rnams dga' mgur byed pas/ de'i phyir mi rnams the tshom za ba'i tshig tu 'di lha yin nam ma yin zhes zer ba'i phyir ro zhes bshad do/ /yang na lus po che zhes kyang bya ste/ de'i phyir shes rab kyi pha rol tu phyin pa'i 'grel pa las lha ma yin rgya mtsho'i nang du 'greng ba'i tshe/ pus mo mi nub par sum cu rtsa gsum pa'i lha rnams la blta'o zhes 'byung ngo / /gzhan yang de nyid las mi sdug pa zhes kyang bya ste/ bu mo sha tsi 'ba' zhig byad bzhin bzang gi pha ming dang nye bshes bzhin mi sdug go/ /yang na skyes pa mi sdug la bud med byad bzhin bzang ba'i phyir yang mi sdug pa zhes bya'o zhes 'byung ngo / /rnal 'byor spyod pa'i sa dang shes rab kyi pha rol tu phyin pa'i 'grel pa dang sbyar na lha ma yin ni lha'i 'gro bas bsdus par bshad do/ /bstan bcos chos mngon pa'i ma mo las ni yi dags kyis bsdus par 'byung ngo / /chos yang dag par dran pa'i mdo las ni yi dags dang dud 'gro'i 'gro bas bsdus par gsungs so/ /ga ya'i mdo las ni lha dang yi dags dang dud 'gro rnam pa gsum gyis bsdus par bshad do/ /lha ma yin de yang gnas kyi bye brag gis rnam pa lnga yod de/ gnas bstan pa'i mdo las ji skad du/ de la dang po'i sa'i steng du gnas pa ste/ mtshan ma sna tshogs kyi ri la lag na mtshon thogs nang gi 'og na gnas so/ /gnyis pa ni ri rab kyi byang phyogs rgya mtsho'i 'og dpag tshad stong 'das pa na/ lha ma yin gyi rgyal po sgra gcan zin gnas so/ /gsum pa ni sgra gcan gyi 'og dpag tshad nyi khri chig stong 'das pa na lha ma yin gyi rgyal po rab brtan zhes bya ba gnas so zhes gsungs pa lta bu'o/ /rab brtan gyi ma ni dang po lha las byung ba yin pa'i phyir lha dman pa zhes bya ste/ bskal pa dang po chags pa'i tshe lha'i bu mo rnams rgya mtsho'i nang du lus bkrus pa las/ chus de dag gi lus la reg pa dang / khu chu shor nas chu'i nang du lhung ba sha'i sgo nga gcig tu gyur to/ /de lo brgya stong lon pa dang de las bu mo zhig byung ste/ mgo dgu brgya dgu bcu rtsa dgu yod do/ /mgo la mig stong dang / kha dgu brgya dgu bcu rtsa dgu yod do/ /kha la ni so bzhi yod so'i steng du me byung ba ni lce 'bab pa 'dra'o/ /lag pa ni nyi shu rtsa bzhi'o/ /rkang pa ni dgu brgya dgu bcu rtsa dgu yod do/ /bu mo de dus gzhan zhig na rgya mtsho'i nang du zhugs te/ rtsed mo byas pa las chu [(]dngas [,]dwangs [)]ma de khung du zhugs pas/ sha'i sgo nga gcig btsas so/ /lo brgya stong lon pa dang / rab brtan zhes bya ba byung ste/ mgo ni dgu yod do/ /mgo la mig ni dgu stong yod do/ /kha nas ni me 'bar ro/ /lag pa ni dgu brgya dgu bcu'o/ /rkang pa ni brgyad yod do/ /lus kyi tshad ni ri rab pas phyed kyis ring ste/ zas su sa zhag dang pad+ma'i rtsa ba za'o/ /phal cher ni lha rnams rtsod do zhes bshad de/ zhib tu ni chos yang dag par dran pa'i mdo las gsungs pa bzhin du rig par bya'o/ /de la nam mkha' lding ni bya gser 'dab ces kyang bya/ bya 'dab bzangs zhes kyang bya ste/ bya de'i 'dab ma rin po che sna tshogs kyi bkod pa dang ldan pas gcig tu gser yin par nges pa ma yin no/ /sangs rgyas phal po che'i mdo las chos kyi sku gser 'dab can ni dran pa nye bar gzhag pa bzhi'i rkang pa dang / byams pa dang / snying rje dang / rig pa yongs su dag pa'i mig dang ldan te/ rnam pa thams cad mkhyen pa'i ye shes kyi shing la gnas so/ /byang chub sems dpa' gser 'dab can ni 'khor ba'i rgya mtsho chen po'i nang du lha dang mi'i klu rnams spar mos blangs nas/ mya ngan las 'das pa'i 'gram du 'jog par byed pa/ 'di ni phyir mi ldog pa'i ting nge 'dzin gyi gser 'dab can gyi chos kyi sgo mo zhes gsungs so/ /yang mdo gzhan dag las 'dab ma gnyis kyi bar du dpag tshad khri phrag sum brgya sum cu rtsa drug yod de/ 'dzam bu'i gling du de'i rkang pa gcig las mi shong ngo / /de'i 'gram pa na yid bzhin gyi nor bu rin po che yod pas de'i phyir yid bzhin zhes kyang bya'o zhes kyang bshad do/ /yang kha cig las de ni bya'i rgyal po yin pas/ bya'i nang na gser 'dab can zhes bya ba klu 'ba' zhig zas su za ba yod de/ de yang skye ba rnam pa bzhi'i bye brag gis tha dad do/ /de la rdzus te skye ba ni rnam pa bzhi'i klu dag za bar byed do/ /mngal nas skye ba ni skye ba rnam pa gsum gyi klu dag za bar byed de/ rdzus te skyes pa ma gtogs so/ /sgo nga las skye ba ni skye ba rnam pa gnyis kyi klu dag za bar byed de/ rdzus te skye ba dang mngal nas skye ba ma gtogs so/ /drod gsher las skye ba ni drod gsher las skye ba 'ba' zhig za bar byed do/ /gling bzhi po 'dir rdzus te skye ba'i nam mkha' lding gi rgyal po yang dag dbyangs zhes bya ba tshe lo brgyad stong thub pa nyin re zhing klu'i rgyal po chen po gcig dang klu phra mo lnga brgya za bar nus pa cig yod de/ gling bzhi po rnams su rim gyis mthar chags su za bar byed do/ /'chi ka'i dus kyi tshe klu rnams bzung zhing bzar mi btub ste/ bkres pa'i gdung bas bsregs pas 'dab ma'i shugs kyis rlung gi dkyil 'khor la thug pa'i bar du babs pa las rlung gis bus pas slar yang gyen du thug go/ /de ltar lan bdun yan man 'das pas rkang pa bzhag pa'i gnas kyang mi rnyed de/ de nas rdo rje'i 'khor lo'i ri'i rtse mor phyin nas der tshe 'da'o/ /klu mang po'i sha zos pa'i dug gdug pa'i dbang gis lus la me rab tu 'bar ba 'byung ngo / /klu'i rgyal po dga' bo dang / nye dga' bo gnyis rin po che'i ri rab rnams tshig tu dogs nas/ char chen po'i rgyun thigs pa shing rta'i 'phang lo tsam phab nas me gsod par byed do/ /de'i lus kyi sha gzhan zhig zhu nas snying 'ba' zhig lus pa tshad mi'i brla tsam bai DUr+ya sngon po nyid du 'gyur te/ 'khor los sgyur ba'i rgyal po thob na ni nor bu rin po cher byed do/ /brgya byin lha'i dbang po thob na ni gtsug gi nor bu byed do zhes bshad do/ /de la mi'am ci zhes bya ba ni lha glu mkhan zhes bya ba ste/ glu la mkhas zhing dri za rnams dang lhan cig tu lha rnams kyi g.yog byed do/ / lha rnams nam dgos pa na res kyis 'gro bar byed do/ /yang the tshom skye ba'i lha zhes bya ste/ lus dud 'gro yin la dbyibs mi 'dra zhing byad bzhin bzang ba dang / mgo bo la rwa gcig yod pas mis mthong ba'i tshe/ the tshom skyes nas ci 'di mi yin nam 'on te yi dags dang dud 'gro gang yin pa mi shes so zhes zer ba'i phyir/ the tshom skye ba'i lha zhes bya'o/ /lto 'phye chen po ni sbrul chen po'o/ /rkang pa med de ltos 'phye zhing 'gro ba'i phyir lto 'phye zhes bya'o/ /yang gcig tu na sbrul klu zhes kyang bya ste/ 'di ni 'jig rten pa'i chab khung sa'i lha mi rnams kyis sha chang len cing za ba'o/ /lto'i nang na klu dang sbrul yod de ngo shes par dka' zhing cung zad klu 'dra ba'i phyir logs shig tu smos pa yin no/ /mi 'am ci zhes bya ba ni mi'i gzugs su bsgyur nas chos nyan du 'ongs pa'i phyir mi 'am ci zhes bya'o/ /shA ri'i bus zhus pa'i mdo las/ lha 'dre sde brgyad ni thams cad kyang mi'am ci zhes gsungs so/ /de la mi zhes bya ba ni mi thams cad bsdu ba'o/ /mi ma yin pa zhes bya ba ni mi ma yin pa thams cad bsdu ba'o/ /yang na mi dang mi ma yin pa zhes bya ba ni the tshom za ba'i tshig tu ci 'di mi yin nam/ 'on te mi ma yin zhes smra ba'i phyir ro zhe'o/ /shA ri'i bus zhus pa'i mdo las sde brgyad kyi rgyu zhus pa 'byung ste/ de'i phyir de la shA ri'i bus bcom ldan 'das la gsol pa bcom ldan 'das lha 'dre sde brgyad rnams rkyen gang gis las ngan par skyes kyang rtag par chos yang dag par thos par gyur lags/ bcom ldan 'das kyis bka' stsal pa/ las rnam pa gnyis kyis te 'di ltar las ngan par skyes so/ /'di ltar las dge bas ni bde ba cher myong bar 'gyur ba yin te/ sde brgyad po 'di dag thams cad kyang mi dang mi ma yin pa zhes bya'o/ /de la lha ni tshe rabs snga ma la shing rta dang khyogs la sogs pas dkon mchog gsum dang pha ma dang / skyes bu dam pa rnams mchod pa byas mod kyi/ 'on kyang ser sna dang sgyu dang phrag dog dang bcas pa'i phyir lus 'di blangs pa yin te/ lha'i bu kun tu 'od dang gtsang mchog la sogs pa lta bu'o/ /klu ni tshe snga ma la yon tan rnams kyi rgyu bsags pa dang / sbyin pa rgya cher btang yang yang dag pa'i dran pa la mi gnas shing spro thung ba dang khro ba la dga' ba'i phyir lus 'di blangs pa yin te/ klu'i rgyal po yid bzhin gyi nor bu la sogs pa lta bu'o/ /gnod sbyin ni tshe snga ma la sbyin pa chen po legs par btang ba 'am/ yang na sngar gnod pa byas la de'i 'og tu phan btags pa las mtho dman gyi dbang gis lus blangs pa yin no/ /dri za ni tshe rabs snga ma la zhe sdang cung zad dang bcas la rtag par sbyin pa'i legs par bstab pa dang / pad+ma sngon pos bdag nyid brgyan te/ rol mo rnam pa sna tshogs mang po byas pa'i phyir/ lus 'di blangs pa yin no/ /lha ma yin ni sems khengs shing dge ba'i bshes gnyen gyi rjes su yongs su dag pa'i bsod nams byed du mi btub la/ gang zag g.yo sgyu can gyi rjes su 'brang zhing bsod nams yang dag pa ma yin pa la dga' ba dang / log par ston pa'i mkhan po la brten cing sbyin pa yang legs par btang ba dang / gzhan yang gzhan dag 'thab mo byed pa la lta bar mos pa'i phyir lus 'di blangs pa yin no/ /nam mkha' lding ni tshe rabs snga ma la sbyin pa chen po btang ba dang / sems mtho zhing gzhan dag la brnyas pa'i phyir lus 'di blangs pa yin no/ /mi 'am ci ni tshe rabs snga ma la gzhan dag legs par byang chub tu sems bskyed du bcug pa las/ de sems yang dag pa nyid du ma gyur par log par ston pa rnams kyi rjes su 'brang ba'i phyir lus 'di blangs pa yin no/ / lto 'phye chen po ni sbyin pa yang btang / dam pa'i chos kyang bsdus mod kyi/ khong khro ba la dga' ba'i phyir lus 'di blangs pa yin no zhes gsungs so/ /sangs rgyas kyi sa'i 'grel pa las zhing yongs su dag pa 'di khams gsum pa las yang dag par 'das pa'i spyod yul yin na/ lha la sogs pa'i zham ring ba ji ltar srid de lha la sogs pa de dag thams cad ni khams gsum pas bsdus pa'i phyir ro zhe na/ yongs su dag pa'i rnam par rig pas bzung nas zhing yongs su dag pa brgyan pa'i phyir snang bas 'gal ba med do/ /yang na 'dul bar bya ba'i sems can yongs su smin par bya ba'i phyir/ sprul pa'i rnam pa'i rnam pa de lta bu ston te/ ji ltar rgyal po bka' byin na 'dul ba'i phyir/ 'khor los sgyur ba'i rgyal po 'khor stong dang byas pa sprul nas bstan pa bzhin no zhes 'byung ste/ 'di ni gleng gzhi zhib tu ni sangs rgyas kyi sa'i brjed byang las bshad pa bzhin no/ /gzhan yang sangs rgyas kyi sa'i 'grel pa las/ yang na byang chub sems dpa' rnams lha dang klu la sogs pa'i lus tshad med pa dag tu sprul nas/ zhing yongs su dag pa der gnas shing sangs rgyas rnams la mchod pa byed pa 'am/ yang na bdag nyid kyi lus lha dang klu la sogs pa'i lus su sprul nas de bzhin gshegs pa'i zham ring byed pa yin pa'i phyir 'gal ba med do zhes bshad do/ /theg pa chen po bsdus pa'i 'grel pa mi mthun pa'i rnam pa gcig las zhing yongs su dag pa der yang dag par lha dang klu la sogs pa 'di lta bu med mod kyi/ stong pa nyid du mi 'dzin pa'i phyir de bzhin gshegs pa nyid kyis 'di lta bu'i rnam pa 'dren pa sna tshogs sprul pa yin no zhes bshad do/ /chos rgya chen po ro'i dga' ba dang bde ba bsten pa zhes bya ba 'dis ni bcu pa rtogs pa phun sum tshogs pa bstan to/ /slob dpon nye ba'i 'od kyis byas pa'i 'grel pa las 'di ltar de na theg pa chen po'i chos kyi dga' ba dang bde ba'i zas kyis bsten nas gnas par byed pa ni ston pa'i don yin no/ /khams gsum pa las yang dag par 'das pa'i spyod yul zhes bshad na/ ji ltar zas yod par 'gyur/ zag pa med pa'i chos ni zas zhes brjod par mi rigs te/ zas ni srid pa gsum gyi sems can gso bar byed pa yin la/ 'di ni srid pa gcod pa yin pa'i phyir zas brjod pa ni mi rigs so zhe na/ zag pa med pa yin yang ston pa'i rgyu yin pa'i phyir yang zas zhes brjod de/ ji ltar khyed kyi gzhung las gzugs med pa la sogs par skyes pa rnams zag pa med pa'i ting nge 'dzin la snyoms par zhugs pa la yang zas zhes brjod pa dang 'dra'o/ /'das pa'i zas la zas zhes brjod pa yang ma yin te/ 'das pa med pa'i phyir ro/ /'di yang don bzhin te ston pa'i rgyu yin pa'i phyir zas zhes brjod do/ /ji ltar zag pa dang bcas pa'i chos zag pa med pa la sgrib pa yin mod kyi 'on kyang zag pa dang bcas pa yongs su 'dzin pas zas zhes bya'o zhes brjod pa de bzhin du zag pa med pa yang de bzhin no / /zag pa dang bcas pa spangs mod kyi/ 'on kyang zag pa med pa yongs su 'dzin pas ci'i phyir zas ma yin te zhing yongs su dag pa der/ sangs rgyas dang byang chub sems dpa' rnams rjes la brnyes pa'i zag pa med pa'i theg pa chen [(]pa'i [,]po'i [)]chos kyi ro'i dga' ba 'chad pa yang spyod/ bstar ba yang spyod pas dgyes pa chen po skye la/ gzhan yang yang dag pa'i ngo bo nyid kyi ye shes kyis de bzhin nyid kyi ro bstar zhing dgyes pa chen po skye ba dang / sku yongs su 'dzin cing 'jig par mi 'gyur ba dang / dge ba'i chos rnams gso ba'i phyir zas zhes brjod do zhes 'byung ngo / /slob dpon dbyig gnyen dang ngo bo nyid med kyis rnam pa gzhan du bshad pa ni med do/ /gzhan yang dam pa'i chos pad+ma dkar po'i mdo las/ zhing de'i sems can ni rtag par zas rnam pa gnyis kyis gnas par byed de / chos kyi dga' ba'i zas dang / bsam gtan gyi dga' ba'i zas so zhes gsungs te/ de nyid kyi 'grel pa las/ /chos dang bsam gtan dga' ba'i zas/ /zas gzhan 'du shes ci yang med/ /ces gsungs so/ /sems can gyi don dang phan pa thams cad byed par gnas pa zhes bya ba 'dis ni bcu gcig pa phrin las phun sum tshogs pa bstan to/ /slob dpon nye ba'i 'od kyis byas pa'i 'grel pa las/ 'di ltar de na de nyid kyis mngon sum du sems can thams cad kyi don dang phan pa thams cad mdzad pa 'am/ yang na sems can thams cad rang nyid kyi don dang phan pa thams cad byed par 'gyur ba'o/ /de la tshe 'di la phan 'dogs pa'i don to/ /tshe phyi ma la phan 'dogs par 'gyur ba ni phan pa'o/ /gzhan yang 'jig rten pa ni don zhes bya'o/ /'jig rten las 'das pa ni phan pa zhes bya'o/ /gzhan yang sdig pa dang bral ba ni don zhes bya'o/ / dge ba sdud pa ni phan pa zhes bya'o/ / gzhan yang bsod nams dang yon tan ni don zhes bya'o/ /ye shes dang shes rab ni phan pa zhes bya ste/ 'di lta bu la sogs pa tha dad do/ /ting nge 'dzin rab tu zhi ba la bzhugs kyang sngon sbyor ba mngon par bsgrubs pa dang / smon lam gyi mthu'i dbang gis sems can thams cad kyi phan par mdzad par spyod do zhes 'byung ste/ slob dpon dbyig gnyen dang ngo bo nyid med kyis rnam pa gzhan du bshad pa ni med do/ /nyon mongs pa 'ching ba dang dri ma thams cad rab tu bsal ba zhes bya ba 'dis ni bcu gnyis pa phan 'dogs pa phun sum tshogs pa bstan to/ /sangs rgyas kyi sa'i 'grel pa las/ nyon mongs pa'i 'ching ba'i dri ma yang rnam pa gnyis kyis tha dad do zhes rnam grangs gsum gyis bshad de/ de'i phyir de nyid 'grel pa de nyid las nyon mongs pa de dag nyid la 'ching ba dang dri ma zhes bya'o/ /yang na nyon mongs pa ni 'di lta ste/ rtsa ba'i nyon mongs pa brgya nyi shu rtsa brgyad do/ /'ching ba ni ngo tsha med pa dang khrel med pa la sogs pa'o/ /dri ma ni g.yo dang sgyu la sogs pa'o/ /gzhan yang shes bya'i sgrib pa dang bag la nyal rnams ni nyon mongs pa zhes bya'o/ / de nyid mngon sum du byung ba ni 'ching ba dang dri ma zhes brjod de/ de la rtsa ba'i nyon mongs pa rnams ni 'ching ba zhes bya'o/ /nye ba'i nyon mongs pa rnams ni dri ma zhes bya ste/ de ltar nyon mongs pa'i 'ching ba dang dri ma yongs su spangs pa ni phan 'dogs pa zhes bya'o zhes 'byung ngo / /mdo'i tshig 'di yang mi mthun pa rnam pa gsum yod de/ bstan bcos theg pa chen po bsdus pa las mdo sde'i tshig khungs su bstan pa las gnod pa zhes 'byung gis/ 'ching ba dang dri ma zhes mi 'byung ste/ de'i phyir bstan bcos de nyid las nyon mongs pa'i gnod pa thams cad rab tu bsal ba zhes 'byung ba yin no/ /mdo sde 'di las ni 'ching ba dang dri ma zhes 'byung gi /gnod pa zhes bya'i tshig ni ma gsungs so/ /sangs rgyas kyi sa'i mdo las ni gnyi ga smos te/ de'i phyir mdo de nyid las nyon mongs pa'i gnod pa dang 'ching ba dang dri ma thams cad dang bral ba zhes gsungs pa yin te/ gnod pa'i don ni 'og nas byang chub sems dpa'i yon tan brjod pa'i skabs nas bshad pa bzhin no/ /bdud thams cad yongs su spangs pa zhes bya ba 'dis ni bcu gsum pa mi 'jigs pa phun sum tshogs pa bstan to/ /de la bdud thams cad ces bya ba ni/ sngar gong du nyon mongs pa dang phung po dang 'chi bdag dang lha'i bu'i bdud do zhes bstan pa nyid do / /slob dpon nye ba'i 'od kyis 'grel pa las ji skad du 'di ltar rnam pa bzhi po 'di dag dge ba'i chos rnams la gnod pa byed pa'i phyir bdud ces bya'o zhes bshad pa lta bu'o/ /bdud bzhi spangs pa'i bye brag kyang thams cad yod par smra ba dang / theg pa chen po'i gzhung dang sbyar na byang chub kyi shing drung mngon par rdzogs par sangs rgyas pa'i tshe/ bar chad med pa'i lam gyis ni nyon mongs pa'i bdud bcom mo/ /lhag ma med pa'i mya ngan las 'das par zhugs nas mya ngan las 'das pa'i dbyings su zhugs pa'i tshe ni phung po'i bdud bcom mo/ /zla ba gsum du sku tshe slar bsring ba ni 'chi bdag gi bdud bcom pa yin no/ /byams pa'i ting nge 'dzin la gnas pa'i tshe ni lha'i bu'i bdud bcom pa yin no zhes bshad do/ /shes rab kyi pha rol tu phyin pa'i 'grel pa las ni bshad pa 'di dang cung zad tha dad de/ de'i phyir de nyid las bdud thams cad spangs pa zhes bya ba ni 'di lta ste/ nyon mongs pa dang phung po dang / 'chi bdag dang lha'i bu'i bdud dang bral ba'o/ /de la byang chub sems dpa' rnams kyis mya ngan las 'das pa'i lam thob pa'i phyir ni nyon mongs pa'i bdud bcom mo/ /chos kyi ngo bo nyid kyi sku thob pa'i phyir ni phung po'i bdud bcom mo/ /lam dang chos kyi ngo bo nyid kyi sku thob pa'i phyir ni 'chi bdag gi bdud bcom mo/ /sems rtse gcig pa'i phyir thams cad du sems mngon par zhen pa med pa'i phyir dang mi g.yo ba'i ting nge 'dzin las rab tu zhugs pa'i phyir ni gzhan 'phrul dbang byed kyi lha'i bu'i bdud bcom pa'o/ /shes rab kyi srog 'phrog pa dang / lam gyi chos dang yon tan dang dge ba'i rtsa ba rnams 'jig par byed pa'i phyir bdud ces bya ba'o zhes bshad de/ rgya cher de nyid las 'byung ba bzhin no/ /theg pa chen po yang dag pa'i don dang sbyar na/ sangs rgyas kyi sa'i 'grel pa las ji skad du sa dang po yan chad ni bdud rags pa rnam pa bzhi spangs pa'o/ /sangs rgyas sa'i tshe ni gtan du spangs pa'o zhes bshad pa lta bu'o/ /don gyi rjes su rnam par dbye na dad pa bcu la gnas pa yan chad kyang sa rnams su rim gyis yongs su spong bar byed de ci rigs su sbyar ro/ /thams cad kyi bkod pa las lhag pa de bzhin gshegs pa'i bkod pa'i gnas zhes bya ba 'dis ni bcu bzhi pa gnas phun sum tshogs pa bstan to/ /slob dpon nye ba'i 'od kyis byas pa'i 'grel pa las 'di ltar de ni sangs rgyas bzhugs pa'i gnas yin pas byang chub sems dpa' thams cad dang / gzhan dag gis bkod pa'i gnas gang yin pa de dag pas lhag cing de bzhin gshegs pa 'ba' zhig gis bkod pa khyad par can gyis brgyan pa'i gnas su gyur pa des na thams cad kyis bkod pa'i gnas las mchog tu gyur pa'i phyir/ gnas phun sum tshogs pa zhes bshad do zhes 'byung ngo / /dran pa dang blo gros dang spyod pa chen po rnam par rgyu ba'i lam du gyur pa zhes bya ba 'dis ni bco lnga pa lam phun sum tshogs pa bstan to/ /slob dpon nye ba'i 'od kyis 'grel pa las 'di ltar de ni dran pa chen po dang blo gros chen po dang spyod pa chen po rnams rnam par rgyu ba'i lam du gyur pa yin te/ bgrod par bya ba yin pa'i phyir rnam par rgyu ba'i lam zhes bya ste/ lam gyi rnam grangs so/ /thos pa las byung ba'i shes rab kyi dran pa chen po zhes bya ste/ 'di ltar thos nas mi brjed par 'dzin par byed do/ /don phyin ci ma log par 'dzin pa'i phyir ro/ /bsams pa las byung ba'i shes rab ni blo gros chen po zhes bya ste/ don ji lta ba bzhin du legs par bsams nas nges par thob pa'i phyir ro/ /bsgoms pa las byung ba'i shes rab ni spyod pa chen po zhes bya ste/ bsgoms pa'i stobs kyis de kho na nyid rtogs pa'i phyir ro/ /de la chen po ni dran pa la sogs pa theg pa chen po'i chos la dmigs pa las byung ba'i phyir dang / de'i 'bras bu yin pa'i phyir dang de bsdus pa'i phyir ro/ /shes rab gya nom pa rnam pa gsum gyis zhing yongs su dag par phan tshun du bgrod pa'i phyir rnam par rgyu ba'i lam zhes bya'o/ /'dis ni byang chub sems dpa' rnams shes rab gya nom pa gsum gyi rgyus zhing yongs su dag par 'jug pa'i phyir/ rnam par rgyu ba'i lam zhes bya'o zhes bstan to/ /de bzhin gshegs pa rnams kyi dran pa chen po ni rnam par mi rtog pa'i ye shes yin te/ dran pa'i dbang gis de kho na nyid kyi don la rab tu gnas pa'i phyir ro/ /blo gros chen po ni rjes las thob pa'i ye shes yin te/ chos rnams kyi don dam pa dang kun rdzob kyi mtshan nyid rnam par 'byed pa'i phyir ro/ /'di gnyi ga yang zhing yongs su dag pa'i mngon par 'du byed pa'i las khyad par can dang ldan pa'i phyir gnyi ga yang spyod pa zhes bya'o/ /shes pa 'di gnyis kyi dbang gis zhing yongs su dag par skye bar 'gyur ba'i phyir rnam par rgyu ba'i lam zhes bya'o/ /yang ni dran pa chen po'i spyod pa ni bdag la phan 'dogs pa'i spyod pa yin te/ nang du bsdus nas mngon par rdzogs pa'i phyir ro/ /blo gros chen po'i spyod pa ni gzhan la phan 'dogs pa'i spyod pa yin te/ phyi rol du rnam par 'byed pa'i phyir ro/ /go rims bzhin du de bzhin gshegs pa'i zhing yongs su dag pa rnam pa gnyis su skye bar 'gyur ba'i phyir rnam par rgyu ba'i lam zhes bya'o zhes 'byung ngo / /slob dpon dbyig gnyen gyis mdzad pa'i 'grel pa las ni thos pa dang bsams pa dang / bsgoms pa'i shes rab ni go rims bzhin du dran pa dang blo gros dang spyod pa chen pos bgrod pa'i lam byed do zhes bshad do/ /slob dpon ngo bo nyid med kyis byas pa'i 'grel pa las bsams pa las byung ba'i shes rab ni dran pa chen po zhes bya'o/ / thos pa las byung ba'i shes rab ni blo gros chen po zhes bya'o/ /bsgoms pa las byung ba'i shes rab ni spyod pa chen po zhes bya ste/ bgrod par bya ba'i lam du gyur pa ni lam gyi grangs so zhes bshad do/ /zhi gnas dang lhag mthong chen po'i bzhon pa yin pa zhes bya ba 'dis ni bcu drug pa bzhon pa phun sum tshogs pa bstan to/ /slob dpon nye ba'i 'od kyis byas pa'i 'grel pa las zhi gnas ni ting nge 'dzin to/ /lhag mthong ni shes rab bo/ /chen po'i don ni snga ma bzhin no/ /de nyid rang gi ngang gis 'jug pa ni bzhon pa ste/ zhi gnas dang lhag mthong la zhon nas/ ci rigs par mdun gyi lam du 'gro ba'o/ /de la lam ni spyi'i gnas yin la gnas las zhi gnas dang lhag mthong bye brag tu bzhon pa zhes bstan pa yin no zhes 'byung ngo / /slob dpon dbyig gnyen gyis mdzad pa'i 'grel pa las ni zhi gnas dang lhag mthong la zhon nas rnam par rgyu zhing 'gro ba'i phyir ro zhes bshad do/ /ngo bo nyid med kyis byas pa'i 'grel pa las ni zhi gnas dang lhag mthong la zhon nas shes rab rnam gsum gyis lam du rgyu zhing bgrod par bya ba'i lam du 'gro ba'o/ /nyan thos dang rang sangs rgyas dang byang chub sems dpa' rnams kyi bzhon pa'i zhi gnas dang lhag mthong las mchog tu gyur pa'i phyir chen po zhes bya'o zhes bshad do/ /rnam par thar pa chen po'i stong pa nyid dang mtshan ma med pa dang smon pa med par 'jug pa'i sgor gyur pa zhes bya ba 'dis ni bcu bdun pa sgo phun sum tshogs pa bstan to/ /slob dpon nye ba'i 'od kyis byas pa'i 'grel pa las 'di ltar gzhal med khang chen po rnam par thar pa'i sgo gsum gyis 'jug pa'i gnas byed de/ de la rnam par thar pa ni nges par 'byung ba mya ngan las 'das pa'o/ /stong pa la sogs pa ni rnam par thar pa'i sgo yin te/ sgo mo de la brten nas zhing yongs su dag par 'jug pa'o/ /kun brtags pa'i sems can dang chos bdag med pa ni stong pa zhes bya'o/ /de la dmigs pa'i ting nge 'dzin ni rnam par thar pa'i sgo stong pa nyid yin no/ /mtshan ma ni 'di lta ste/ mtshan ma bcu po rnams te/ gzugs dang sgra dang dri dang ro dang reg bya dang / skyes pa dang bud med dang skye ba dang rga ba dang 'chi ba ste/ mya ngan las 'das pa 'di la mtshan ma ni bdag med pa'i phyir mtshan ma med pa zhes bya'o/ /de la dmigs pa'i ting nge 'dzin ni rnam par thar pa'i sgo mtshan ma med pa yin no/ /smon pa ni smon cing rtsol ba ste/ khams sdug bsngal nyid du lta na smon cing rtsol bar bya ba med pa'i phyir smon pa med pa zhes bya'o/ /de la dmigs pa'i ting nge 'dzin ni rnam par thar pa'i sgo smon pa med pa yin no/ /stong pa nyid la sogs pa'i rnam par thar pa'i sgo'i dbang gis zhing yongs su dag par 'jug pa thob pa'i phyir sgo zhes bya'o/ /chen po ni snga ma bzhin du bshad par bya'o/ /zhing yongs su dag pa der don gnyer ba yod pas lam dang bzhon pa dang sgo la sogs pa bstan pa ni sems can rnams yang dag pa'i yon tan la rab tu dang ba bskyed pa'i phyir spyod pa'i dbang du mdzad nas gsungs pa yin no zhes 'byung ngo / /yon tan gyi tshogs mtha' yas par rab tu brgyan pa rin po che pad+ma'i rgyal po chen po rnams kyis rnam par gzhag pa'i gzhal med khang chen po na bzhugs te zhes bya ba 'dis ni bco brgyad pa gzhi phun sum tshogs pa bstan to/ /slob dpon nye ba'i 'od kyis 'grel pa las 'di lta ste/ ji ltar sa la sogs pa rlung gi dkyil 'khor la sogs pa la brten pa bzhin du'am/ yang na 'jig rten pa'i gzhal med khang sa la brten pa de bzhin du/ zhing yongs su dag pa de yang yon tan gyi tshogs tshad med pas rab tu brgyan pa rin po che le brgan gyi pad+ma'i rgyal po chen po rnams kyis rnam par gzhag pa yin no zhes 'byung ste/ de la don rnam pa gsum gyis chen po dang rgyal po zhes bya ba'i don to/ /dang po ni 'di ltar pad+ma le brgan de rin po che chen po las mngon par grub pa yin la/ rin po che chen po de yang yon tan dang dge ba'i tshogs tshad med pa las byung bas/ rin po che rnams kyi nang na mchog tu gyur pa'i phyir chen po zhes bya'o/ /rin po che'i pad+ma le brgan de pad+ma rnams kyi nang na mchog dang khyad par du gyur pa'i phyir pad+ma'i rgyal po zhes bya'o/ /gnyis pa ni yang na rin po che'i pad+ma de byang chub sems dpa' rnams kyi dge ba'i rtsa ba las byung ba las ltos na pad+ma le brgan de dag mchog tu gyur pa'i phyir chen po zhes bya'o/ /de bzhin gshegs pa ni chos kyi rgyal po yin la de bzhin gshegs pa'i dge ba'i rtsa ba mchog las byung ba'i phyir/ pad+ma'i rgyal po zhes bya'o/ /gsum pa ni rin po che'i pad+ma de shin tu rnyed par dka' ba'i phyir na rin po che chen po zhes bya la/ pad+ma'i nang na mchog tu gyur pa'i phyir/ pad+ma'i rgyal po zhes bya'o/ /pad+ma de gcig kho na ma yin pa 'am/ yang na pad+ma'i 'dab ma mnga' ba'i phyir rnam shes gsungs so zhes bshad do/ /slob dpon dbyig gnyen gyis mdzad pa'i 'grel pa las tshig 'di gcig gis gzhi phun sum tshogs pa bstan te/ ji ltar sa chen po la sogs rlung gi dkyil 'khor la sogs pa la brten cing gnas pa bzhin du sangs rgyas kyi zhing yongs su dag pa 'dir yang ci zhig gzhi byed ce na/ yon tan gyi tshogs tshad med pas rab tu brgyan pa pad+ma le brgan gyi rgyal po chen pos rnam par gzhag pa zhes gsungs pa yin no zhes bshad do/ /slob dpon ngo bo nyid med kyis 'grel pa las ni pad+ma le brgan 'di pad+ma rnams kyi nang na 'di mchog dang khyad par can du gyur pa'i phyir/ rin po che'i pad+ma'i rgyal po zhes gsungs so/ /yang na de bzhin gshegs pa ni rgyal po chen po zhes brjod la/ pad+ma le brgan 'di ni de bzhin gshegs pa'i rten pa'i gnas yin/ bdag po'i dbang du mdzad nas ming 'di skad ces bya'o/ /rnam par gzhag ces bya ba ni 'di lta ste/ sangs rgyas kyi zhing yongs su dag pa de pad+ma'i rgyal po 'di la brten nas rtag par rgyun du bar chad med pa ste/ tshig 'dis ni gzhi phun sum tshogs pa bsten to zhes 'byung ngo / /gzhan yang theg pa chen po bsdus pa las yang sangs rgyas kyi zhing yongs su dag pa'i longs spyod ni shin tu dag pa dang / shin tu kha na ma tho ba med pa dang / shin tu dbang bsgyur ba can no zhes 'byung ste/ 'di nyid kyi 'grel pa las/ de la shin tu dag pa zhes bya ba ni ma dag pa med pa'i phyir dang / gcin rkyag dang bral ba'i phyir ro/ /shin tu bde ba ni sdug bsngal gyi tshor ba dang / tshor ba bar med pa'i phyir ro/ /shin tu kha na ma tho ba med pa ni mi dge ba dang lung ma bstan pa med pa'i phyir ro/ /shin tu dbang bsgyur ba can ni phyi rol gyi rkyen la mi ltos pa'i phyir dang / sems bskyed pa tsam gyis bya ba rnams 'byor pa'i phyir ro zhes 'byung ngo / /bcom ldan 'das shin tu rnam par dag pa'i blo dang ldan pa zhes bya ba la sogs pas ni de yan chad du gnas kyi bkod pa rnam par bshad nas/ 'di man chad gnyis pa yon tan gyi spyi dang khyad par rab tu bstan pa zhes bya ba bstan to/ /'dir ci'i phyir gnas sngar bstan la/ yon tan phyis bstan zhe na/ slob dpon nye ba'i 'od kyis 'grel pa las/ bcom ldan 'das sangs rgyas kyi zhing yongs su dag pa na bzhugs shing yon tan 'di lta bu dang ldan pas mdo sde 'di gsungs so zhes bstan pa'i phyir ro zhes bshad do/ /de la yon tan rnam par bshad pa la yang rnam pa gnyis su dbye ste/ yon tan gyi spyi'i rnam par bshad pa dang / yon tan gyi khyad par rnam par bshad pa'o/ /yon tan 'di gnyis bstan pa la don ci yod ce na sangs rgyas kyi sa'i 'grel pa las don rnam pa gnyis kyi phyir zhes bshad de/ de bzhin gshegs pa rnams ston pa gzhan las khyad par du 'phags par bstan pa'i phyir/ bcom ldan 'das kyi yon tan khyad par can gsungs pa dang / gzhan dag rab tu dang ba bskyed pa'i phyir de bzhin gshegs pa'i yon tan phun sum tshogs pa bstan to zhes 'byung ngo / /slob dpon ngo bo nyid med kyis 'grel pa las/ bcom ldan 'das nyan thos dang rang sangs rgyas dang byang chub sems dpa' rnams kyi blo las mchog tu gyur par bstan pa'i phyir bcom ldan 'das zhes bya bas gang zag yon tan can yin par bstan la/ shin tu rnam par dag pa'i blo dang ldan pa zhes bya bas ni yon tan mchog tu gyur par yang dag par bstan to zhes bshad do/ /yon tan mchog tu gyur pa de yang sangs rgyas kyi sa'i 'grel pa dang sbyar na don rnam pa gsum du bshad de/ 'dus byas dang 'dus ma byas thugs su chud par bya ba ji snyed pa yod pa thams cad yang dag par thugs su chud pa'i blo mnga' ba'i phyir dang / thugs su chud par bya ba thams cad legs par rdzogs par yang dag par thugs su chud pa'i blo mnga' ba'i phyir dang / ji lta ba bzhin du yod pa dang ji snyed yod pa thams cad yang dag par thugs su chud pa'i blo mnga' ba'i phyir ro zhes 'byung ngo / /rnam pa gsum du bshad pa la bye brag yod par bstan pa yang so so nas bshad pa mi mthun te/ kha cig na re dang po ni chos kyi rnam grangs kyi dbang du byas nas shin tu rnam par dag pa'i blo bstan te/ 'dus byas dang 'dus ma byas kyi shes bya mtha' dag ma lus par bsdus pa'i phyir ro/ /gnyis pa ni legs par rdzogs pa'i dbang du byas nas shin tu rnam par dag pa'i blo bstan te/ sgrib pa spangs pa shin tu gya nom pa yang yongs su rdzogs pa'i phyir ro/ /gsum pa ni rang gi ngo bo nyid dang bye brag gi dbang du byas nas shin tu rnam par dag pa'i blo bstan te/ rang gi ngo bo nyid thugs su chud pa ni ji snyed yod pa zhes bya'o/ /bye brag tu thugs su chud pa ni ji lta ba bzhin du yod pa zhes bya'o/ /kha cig na re dang po ni chos kyi rnam grangs kyi dbang du byas nas shin tu rnam par dag pa'i blo bstan pa yin no zhes bshad de snga ma dang mthun no/ /gnyis pa ni mkhyen pa gnyis kyi dbang du byas nas shin tu rnam par dag pa'i blo bstan te/ 'di ltar sems can stong pa nyid du mkhyen pa ni yongs su dag pa gya nom pa'i blo zhes bya ba la chos stong pa nyid mkhyen pa ni yongs su rdzogs pa'i blo zhes bya'o/ /gsum pa ni don dam pa dang kun rdzob kyi shes bya'i dbang du byas nas shin tu rnam par dag pa'i blo bstan te/ kun rdzob kyi yul la dmigs pa ni ji snyed yod pa zhes bya'o/ /don dam pa'i yul la dmigs pa ni ji lta ba bzhin du yod pa zhes bya ste/ de'i phyir 'og nas mdo las ji snyed yod pa nyid ni nye bar len pa'i phung po lnga la sogs pa'o/ /ji lta ba bzhin du yod pa ni de bzhin nyid bdun la sogs pa'o zhes gsungs pa yin no zhe'o/ /tshig gnyis kyi bshad pa ni yi ge thad kar bab pa na bshad par bya'o/ /kun tu spyod pa gnyis mi mnga' ba zhes bya ba la sogs pas ni gnyis pa yon tan gyi khyad par bstan to/ /yon tan 'di dag rnam par bshad pa yang rnam pa gnyis te/ grangs kyi rnam pa mang nyung dang dpe gsar rnying mthun mi mthun bstan pa dang / bstan bcos rnams dang sbyar nas mdo sde'i tshig rnam par dgrol ba'o/ /de la mthun mi mthun zhes bya ba yang theg pa chen po bsdus pa'i dpe mi mthun pa gzhan kha cig las mdo sde'i tshig nyi shu las med do / /mdo tshig phyi ma'i mtha'i mur thug pa zhes bya ba ma tshang ba dang bye brag med par yon tan nyi shu rtsa gcig gi ming tsam zhig smos pa kho nar zad do/ /de'i 'grel pa las kyang mgor ni rigs pa rnam pa nyi shu'i dbang gis de bzhin gshegs pa'i blo shin tu rnam par dag par mngon par 'grub pa'i phyir ro zhes 'byung ngo / /mjug tu ni tshig dang po ni mdor rnam par gzhag pa'o/ /gzhan nyi shu rtsa gcig gis ni de sgrub par byed do zhes 'byung ngo / /dpe rnying 'gyur de la skyon rnam pa gnyis yod de/ mdo'i tshig phyi ma'i mtha'i mur thug pa zhes bya ba ma tshang ba dang / 'grel pa las rigs pa rnam pa nyi shu zhes 'byung ste/ 'og nas tshig nyi shu rtsa gcig ces 'byung ba dang mi mthun pa'i phyir/ slob dpon de dag gis bsgyur cing bshad pa la nor ba yod do/ /slob dpon yang dag bden pas ni yon tan gyi khyad par bstan pa la tshig nyi shu yod de mjug bsdus pa'i tshig kyang der bsdu na nyi shu rtsa gcig tu 'gyur ro zhes bshad do/ /de la gnyis pa bstan bcos rnams dang sbyar nas mdo sde'i tshig rnam par dgrol ba yang yon tan gyi khyad par 'di rnam par bshad pa bstan bcos las mi mthun te/ slob dpon thogs med kyis mdzad pa bstan bcos theg pa chen po bsdus pa las sngar ni mdo sde las gsungs pa'i tshig nyi shu rtsa gcig bkod pa de'i 'og tu ni rigs pa dang sbyar nas mdo sde'i tshig gi go rims bzhin du yon tan gyi ming rnam par gzhag go/ /de dag gi rnam par bshad pa ni med do/ /yon tan de dag gi ming yang theg pa chen po bsdus pa las ji skad du shes bya la shin tu sgrib pa med par 'jug pa'i yon tan dang / yod pa dang med pa'i de bzhin nyid mchog tu rnam par dag par 'jug par mdzad pa'i yon tan dang / sangs rgyas kyi mdzad pa lhun gyis grub pa rgyun mi 'chad par gnas pa'i yon tan dang / chos kyi sku la gnas pa dang / dgongs pa dang / phrin las mdzad pa tha dad pa mi mnga' ba'i yon tan dang sgrib pa thams cad kyi gnyen po bsgoms pa'i yon tan dang mu stegs can thams cad btul ba'i yon tan dang / 'jig rten du skyes kyang 'jig rten gyi chos kyis mi 'phrogs pa'i yon tan dang / chos yang dag pa rnam par gzhag pa'i yon tan dang / lung ston pa'i yon tan dang / 'jig rten gyi khams thams cad du longs spyod rdzogs pa dang / sprul pa'i sku ston pa'i yon tan dang / the tshom gcod pa'i yon tan dang spyod pa sna tshogs kyis 'jug par mdzad pa'i yon tan dang / phyi ma la chos 'byung ba rab tu mkhyen pa'i yon tan dang / mos pa ji lta ba bzhin ston pa'i yon tan dang / rten tshad med pas sems can 'dul bar sbyor ba'i yon tan dang / chos kyi sku mnyam pa la pha rol tu phyin pa rnams yongs su grub pa'i yon tan dang / mos pa ji lta ba bzhin du sangs rgyas kyi zhing tha dad pa ston pa'i yon tan dang / sangs rgyas kyi sku gsum gyi yul yongs su ma chad pa'i yon tan dang / 'khor ba'i mtha' ji snyam par sems can thams cad la phan pa dang bde ba nye bar gnas pa'i yon tan dang / mi zad pa'i yon tan la sogs pa'o zhes bstan pa'o/ /slob dpon dbyig gnyen gyis mdzad pa'i 'grel pa las/ yon tan nyi shu rtsa gcig po 'di dag mdo tsam du rnam par 'grel to/ /slob dpon ngo bo nyid med kyis 'grel pa las ni yon tan nyi shu rtsa gcig po 'di dag rgya cher 'chad de/ yon tan rnams mtshams sbyor ba'i go rims kyang ston to/ /slob dpon nye ba'i 'od kyis byas pa'i sangs rgyas kyi sa'i 'grel pa las ni rnam grangs gnyis kyis yon tan nyi shu rtsa gcig rnam par bshad de/ de rnam grangs dang po las ni rang nyid kyi yon tan gyi ming rnam par gzhag nas mdo'i tshig rnam par 'chad do/ /rnam grangs gnyis pa las ni slob dpon thogs med kyis mdzad pa'i 'grel pa las 'byung ba'i yon tan gyi ming rnam par gzhag pa la brten nas mdo'i tshig rnam par 'chad de/ bstan bcos gzhan dang mthun no/ /tshig gi don rnam par bshad pa yang yon tan nyi shu rtsa gcig yod pa de nyid kyis rnam pa nyi shu rtsa gcig tu rnam par dbye ste/ rnam pa re re yang sngar ni smos pa bstan la/ phyis ni yon tan dang sbyar bas bstan par rig par bya'o/ /de la kun tu spyod pa gnyis mi mnga' ba zhes bya bas ni yon tan dang po bstan te/ 'di ni shes bya la shin tu sgrib pa med par 'jug pa'i yon tan zhes bya ba nyid do/ /slob dpon dbyig gnyen gyis mdzad pa'i 'grel pa las ni nyan thos dang / rang sangs rgyas kyi shes pa ltar kha cig tu ni thogs pa dang bcas la/ kha cig tu ni thogs pa med pa lta bu ma yin pa'i phyir ro zhes bshad de / ngo bo nyid med kyis 'grel pa las kyang 'di dang mthun par bshad do/ /'di ltar theg pa gnyis kyi ye shes kyis thag nye ba ni shes la/ thag ring po mi shes pa'i phyir thogs pa dang bcas pa'i kun tu spyod pa gnyis dang ldan no/ /de bzhin gshegs pa ni thag ring po dang nye ba kun mkhyen cing gcig tu thogs pa mi mnga' ba'i phyir kun tu spyod pa gnyis mi mnga'o/ /gzhan yang ngo bo nyid med kyis 'grel pa las/ yang na gnas gnyis kyi kun tu spyod pa 'di la mi mnga' bas/ kun tu spyod pa gnyis mi mnga' ba zhes bya'o zhes 'byung ste/ ji ltar mngon par shes pa ma thob pa'i gang zag ni thag nye ba dang thag ring ba gnas gnyis la thogs pa dang bcas pa'i kun tu spyod pa yod mod kyi/ bcom ldan 'das ni thag nye ba dang ring ba thams cad la thogs pa mi mnga' bas kun tu spyod pa gnyis mi mnga' ba zhes bya ba'o/ /slob dpon nye ba'i 'od kyis 'grel pa las/ 'di ltar nyan thos la sogs pa ni spyod yul rnams la shes pa thogs pa dang bcas pas shin tu thag ring ba'i dus dang phyogs dang rnam pa tshad med pa'i sangs rgyas kyi chos rnams la shes pa 'jug pa med pa'i phyir ro/ / de bzhin gshegs pa ni de lta ma yin te/ dus dang phyogs thams cad dang rnam pa tshad med pa'i sangs rgyas kyi yul rnams la rnam pa thams cad mkhyen pa'i ye shes kyis thogs pa mi mnga' bar 'jug pas chos rnams kyi mtshan nyid la mkhyen pa dang mi mkhyen pa'i kun tu spyod pa gnyis mi mnga' ba'i phyir/ kun tu spyod pa gnyis mi mnga' ba zhes bya'o zhes 'byung ngo / /gzhan yang de nyid las 'di ni bcom ldan 'das kyis shin tu sgrib pa mi mnga' bas khyad par du 'phags pa'i yon tan bstan te/ 'di ltar byis pa so so'i skye bo rnams ni 'khor ba las rab tu chags la/ theg pa gnyis kyis 'phags pa dag ni mya ngan las 'das pa la mngon par zhen te/ de lta bu'i sgrib pa gnyis bcom ldan 'das la mi mnga' ba'i phyir zhes bshad do/ /bstan bcos rnams las bshad pa yang mdor bsdu na rnam pa gsum du 'gyur te/ dang pos ni thogs pa dang bcas pa dang thogs pa med pas kun tu spyod pa gnyis bstan to/ /gnyis pas ni gnas gnyis la thogs pa spyod par kun tu spyod pa gnyis bstan to/ /gsum pas ni 'khor ba dang mya ngan las 'das pa la gnas pas kun tu spyod pa gnyis bstan te/ bcom ldan 'das la 'di lta bu'i kun tu spyod pa rnam pa gsum mi mnga' ba'i phyir kun tu spyod pa gnyis mi mnga' ba zhes bya'o/ /mtshan nyid med pa'i chos la mchog tu gzhol bar mdzad pa zhes bya bas ni yon tan gnyis bstan te/ 'di ni yod pa dang med pa gnyis su med pa'i mtshan nyid de bzhin nyid mchog tu rnam par dag par 'jug par mdzad pa'i yon tan zhes bya ba nyid do/ /slob dpon dbyig gnyen gyis mdzad pa'i 'grel pa las yongs su dag pa'i de bzhin nyid ni mtshan nyid med pa'i chos zhes bya'o/ /gzhol ba ni 'jug par gzhol ba'o/ /'di ltar de bzhin nyid ni mtshan nyid yod pa ma yin te/ chos rnams kyi ngo bo nyid med pas mtshan nyid byed pa'i phyir ro/ /mtshan nyid med pa yang ma yin te/ rang gi mtshan nyid byed pa'i phyir ro zhes bshad do/ /ngo bo nyid med kyis 'grel pa las ni 'di ltar de bzhin nyid de la ni yongs su grub pa kho na'i mtshan nyid kho na yod kyis/ kun brtags pa'i mtshan nyid ni med de/ rigs pa des ni gnyis su med pa'i mtshan nyid ces bya'o/ /mtshan nyid med pa yang ma yin te/ yang dag par yod pa ma yin pa'i phyir ro/ /mtshan nyid yod pa yang ma yin te/ brtags pa dag med pa'i phyir ro/ /de bzhin nyid de ni mchog tu gyur par dag pa zhes bya ste/ chos thams cad kyi nang na mchog tu gyur pa'i phyir dang / glo bur gyi dri ma thams cad yongs su spangs pa'i phyir ro/ /de bzhin nyid de la nyid kyi 'jug pa mdzad pa de bzhin du gzhan dag kyang 'jug par mdzad pa'i phyir de bzhin nyid mchog tu rnam par dag par 'jug par mdzad pa'i yon tan zhes gsungs so zhes 'byung ste/ nye ba'i 'od kyis 'grel pa las kyang don 'di dang mthun par bshad do/ /gzhan yang de nyid las 'dis ni bcom ldan 'das kyis gdul ba'i thabs kyis yon tan khyad par du 'phags pa bstan te/ mtshan nyid med pa'i chos ni mya ngan las 'das pa yin par bzhed la/ bcom ldan 'das theg pa gsum gyis gang zag gi skal ba ji lta ba bzhin du 'dul ba'i thabs yongs su mkhyen pas yang dag pa ji lta ba bzhin du bstan nas de dag mtshan nyid med pa'i chos la mchog tu 'gro bar mdzad pa'i phyir ro zhes bshad do/ /de dag kyang mdor bsdu na bshad pa gnyis su 'gyur te/ dang pos ni de bzhin nyid la mtshan nyid med pa zhes bya ba bstan te/ yod pa dang med pa la sogs pa'i mtshan ma thams cad dang bral ba'i phyir ro/ /gnyis pas ni mya ngan las 'das pa la mtshan ma med pa zhes bya ste/ gzugs la sogs pa'i mtshan ma rnam pa bcu med pa'i phyir ro/ / //bam po bdun pa/ sangs rgyas kyi gnas pas gnas pa zhes bya bas ni yon tan gsum pa bstan te/ 'dis ni sangs rgyas kyi mdzad pa lhun gyis grub pa rgyun mi 'chad par gnas pa'i yon tan zhes bya ba nyid do/ /slob dpon dbyig gnyen gyis mdzad pa'i 'grel pa las/ sangs rgyas kyi gnas pa zhes bya ba ni gnas pa med pa ste/ 'di ltar gnas 'dir rtag par sangs rgyas kyi mdzad pa rgyun ma chad pa'o zhes bshad do/ /de la gnas pa med pa zhes bya ba ni mi gnas pa'i mya ngan las 'das pa'o/ /de'i phyir theg pa chen po bsdus pa'i 'grel pa las/ sangs rgyas kyi gnas pa med pa ni mya ngan las 'das par byon nas/ gnas pa med par gnas pa'o zhes 'byung bas/ de nyid mi gnas pa'i mya ngan las 'das pa la gnas pa'o/ /mdzad pa lhun gyis grub pa'o zhes bya ba ni mngon par 'du mdzad pa la mi ltos par mdzad pa thams cad mdzad pa ste/ dper na 'jig rten pa'i yid bzhin gyi nor bu dang lha'i rnga lta bu'o/ /slob dpon ngo bo nyid med kyis 'grel pa las/ 'di ltar sgrim mi dgos par sangs rgyas kyi mdzad pa rnams dang / sems can gyi don la sogs pa la / 'phags pa dang lha dang tshangs pa'i gnas pa rnams kyis rgyun mi 'chad par ji ltar mthun mthun du gnas pas nyan thos ltar bsgrims te gnas pa ma yin pa dang / mu stegs can ltar gnas pa yod pas/ khyad par du 'phags pa ma yin pa ni ma yin no zhes 'byung ste/ slob dpon nye ba'i 'od kyis 'grel pa las kyang 'di dang mthun par bshad do/ /gzhan yang slob dpon nye ba'i 'od kyis 'grel pa las/ 'dis ni bcom ldan 'das kyis gdul bya la so sor rtog pa khyad par du 'phags pa'i yon tan bstan te/ thugs rje chen pos nyin mtshan lan drug tu 'jig rten la gzigs pa'i phyir ro zhes bshad do/ /de dag kyang mdor bsdu na bshad pa rnam pa gsum du 'gyur te/ dang po ni mi gnas pa'i mya ngan las 'das pa las gnas pas so/ /gnyis pa ni 'phags pa dang lha dang tshangs pa'i gnas pas so/ /gsum pa ni thugs rje chen po la gnas pas so/ /sangs rgyas thams cad dang mnyam pa nyid brnyes pa zhes bya bas ni yon tan bzhi pa bstan te/ 'di ni chos kyi sku la gnas pa dang / dgongs pa dang / phrin las mdzad pa tha dad pa mi mnga' ba'i yon tan zhes bya ba nyid do/ /theg pa chen po bsdus pa'i 'grel pa'i dpe mi mthun pa rnam pa gcig las de la gnas pa zhes bya ba ni chos kyi sku'o/ /dgongs pa zhes bya ba ni longs spyod rdzogs pa'i sku'o/ /phrin las mdzad pa zhes bya ba ni sprul pa'i sku'o/ /'di ltar gsum po de dag ni phyogs bcu dus gsum gyi de bzhin gshegs pa thams cad mtshungs shing tha dad pa med pas de dag brnyes par gyur pa'o zhes bshad do/ /slob dpon ngo bo nyid med kyis 'grel pa las gnas tha dad pa mi mnga' ba ni thams cad kyang ye shes rnam par dag pa'i bdag nyid yin pa'i phyir ro/ /dgongs pa tha dad pa mi mnga' ba thams cad kyang sems can thams cad la phan pa dang bde ba mdzad par shin tu dgongs pa'i phyir ro/ /phrin las tha dad pa mi mnga' ba ni thams cad kyang longs spyod rdzogs pa dang sprul pa gnyis kyis gzhan gyi don sgrub pa'i phyir te/ nyan thos la sogs pa ltar bsams pa tsam 'ba' zhig ni ma yin no zhes 'byung ngo / /slob dpon nye ba'i 'od kyis 'grel pa las kyang 'di dang mthun par bshad do/ /gzhan yang nye ba'i 'od kyis 'grel pa las 'di ni bcom ldan 'das kyis sangs rgyas thams cad dang / phrin las mdzad pa 'dra ba khyad par du 'phags pa'i yon tan bstan te/ 'di ltar sangs rgyas thams cad dang phrin las 'dra bar mdzad pa'i mnyam pa nyid brnyes pa'i phyir ro zhes bshad de/ sangs rgyas rnams kyi sprul pa'i sku'i phrin las 'dra ba'i phyir mnyam pa nyid ces bya'o/ /brnyes par gyur pa'i phyir brnyes pa zhes bya'o/ /de dag kyang mdor bsdu na bshad pa rnam pa gsum du 'gyur te/ dang po ni sangs rgyas rnams kyi sku gsum mnyam pa nyid kyis so/ /gnyis pa ni sangs rgyas kyi rnam par dag pa'i ye shes dang / thugs rje chen po dang / longs spyod rdzogs pa dang / sprul pa'i sku gnyis mnyam pa nyid kyis so/ /gsum pa ni sangs rgyas rnams kyi sprul pa'i sku'i phrin las 'dra ba mnyam pa nyid kyis so/ /sgrib pa mi mnga' ba'i gnas su byon pa zhes bya ba ni yon tan lnga pa bstan te/ 'di ni sgrib pa thams cad kyi gnyen po bsgoms pa'i yon tan zhes bya ba nyid do/ /slob dpon dbyig gnyen gyis mdzad pa'i 'grel pa las 'di ltar dus thams cad du shes rab yongs su sbyangs pas sgrib pa thams cad kyi gnyen por gyur pa'i phyir ro zhes bshad do/ /slob dpon ngo bo nyid med kyis 'grel pa las 'di ltar nyon mongs pa dang / shes bya'i sgrib pa thams cad kyi gnyen po 'phags pa'i lam rnam pa thams cad mkhyen pa nyid dang ting nge 'dzin la dbang ba'i bdag nyid goms par byas pas bag chags thams cad dang gtan du bral ba'i gnas su byon pa'o zhes 'byung ste/ slob dpon nye ba'i 'od kyis 'grel pa las kyang 'di dang mthun par bshad do/ /gzhan yang de nyid las 'di ni bcom ldan 'das kyis mi mthun pa'i phyogs yongs su spangs pa khyad par du 'phags pa'i yon tan bstan te/ nyon mongs pa dang / shes bya'i sgrib pa thams cad las rnam par grol ba'i ye shes mngon du mdzad pa'i phyir dang / sgrib pa thams cad ma lus par spangs pa'i phyir ro zhes 'byung ngo / /de dag kyang mdor bsdu na 'di skad du sgrib pa gnyis las dben pa'i ye shes bsgoms te/ sgrib pa thams cad spangs pas mya ngan las 'das pa sgrib pa med pa'i gnas su byon pa yin no zhes bstan par 'gyur ro/ /phyir mi ldog pa'i chos dang ldan pa zhes bya bas ni yon tan drug pa bstan te/ 'di ni mu stegs can thams cad btul ba'i yon tan zhes bya ba nyid do/ /theg pa chen po bsdus pa'i 'grel pa mi mthun pa rnam pa gcig las lha'i bu'i bdud dang mu stegs can gang gis kyang de bzhin gshegs pas yang dag par gsungs pa'i chos 'jig par nus pa med pa'o zhes bshad do/ /slob dpon ngo bo nyid med kyis 'grel pa las/ bstan pa dang thugs su chud pa'i chos gnyis gzhan gyis phyir bzlog mi nus pa ste/ de la ches khyad par du 'phags pa'i chos gzhan med pa'i phyir ro zhes 'byung ste/ slob dpon nye ba'i 'od kyis 'grel pa las kyang 'di dang mthun par bshad do/ /gzhan yang slob dpon nye ba'i 'od kyis 'grel pa las 'dis ni bcom ldan 'das mu stegs can zil gyis gnon pa khyad par du 'phags pa'i yon tan te/ 'di ltar sangs rgyas kyis gsungs pa'i chos yang dag pa mu stegs thams cad kyis phyir bzlog mi nus te de dag zil gyis mnan nas yang dag pa'i lam rab tu ston pa'i phyir ro zhes 'byung ste/ de ni 'di skad du de bzhin gshegs pas gsungs pa'i yang dag pa'i chos rnams ni lha'i bu'i bdud dang / mu stegs can dag gis phyir mi bzlog go zhes 'byung ba'i tha tshig go/ /spyod yul gyis mi 'phrogs pa zhes bya bas ni yon tan bdun pa bstan te/ 'di ni 'jig rten du skyes kyang 'jig rten pa'i chos kyis mi 'phrogs pa'i yon tan zhes bya ba nyid do/ /slob dpon ngo bo nyid med kyis 'grel pa las/ gang la su spyod pa de ni de'i spyod yul zhes bya ste/ 'jig rten na rnam par rgyu yang 'dir rnyed pa dang ma rnyed pa la sogs pa la rjes su chags pa dang / khong khro ba'i 'jig rten pa'i chos kyis 'phrogs par nus pa ma yin te ji skad du/ sangs rgyas rtag par 'jig rten rnam rgyu zhing / /sems can rnam pa thams cad phan 'dogs kyang / /chos brgyad rtsa rlung log par rtogs dag gis/ /bskyod par mi nus 'grogs par nus ma yin/ /zhes bshad pa lta bu'o zhes 'byung ste/ slob dpon dbyig gnyen dang / nye ba'i 'od kyis 'grel pa las kyang don 'di dang mthun par bshad do/ /gzhan yang slob dpon nye ba'i 'od kyis 'grel pa las/ 'dis ni bcom ldan 'das kyis bdud zil gyis gnon pa khyad par du 'phags pa'i yon tan bstan te/ de la spyod yul ni gzugs la sogs pa'i yul te/ spyod yul de nyid sems 'khrul par byed pa'i phyir dang / dge ba'i bar chad byed pa nyid kyi phyir bdud ces bya'o/ /sangs rgyas bcom ldan 'das rnams ni thugs legs par ting nge 'dzin la gzhag pas yul shin tu yid du 'ong bas kyang bar chad bya bar mi nus la/ yon tan ji snyed pa de dag legs par yongs su rdzogs pas spyod yul ngan pa thams cad kyis kyang 'phrog par mi nus te/ spyod yul thams cad zil gyis gnon pa dang / spyod yul thams cad kyis 'phrog par mi nus pa'i phyir/ spyod yul gyis mi 'phrogs pa zhes bya'o zhes bshad do/ /bshad pa de dag kyang rnam pa gnyis su 'gyur te/ dang po ni chos brgyad kyi rlung gis mi bskyod pas so/ /gnyis pa ni bdud kyi spyod yul gyis mi 'phrogs pas so/ /rnam par gzhag pa bsam gyis mi khyab pa zhes bya bas ni yon tan brgyad pa bstan te/ 'di ni chos yang dag par rnam par gzhag pa'i yon tan zhes bya ba nyid do/ /slob dpon dbyig gnyen gyis mdzad pa'i 'grel pa las/ 'di ltar mdo la sogs pa yang dag pa'i chos tshad med cing bsam gyis mi khyab pa de dag so so'i skye bo rnams kyis shes par bya ba ma yin pa'i phyir ro zhes 'byung ste/ bstan pa'i chos rnams sangs rgyas la ltos pas rnam par gzhag pa zhes bya la/ byis pa rnams kyis shes par bya ba ma yin pas na/ bsam gyis mi khyab pa zhes bya'o/ /theg pa chen po bsdus pa'i 'grel pa dpe mi mthun pa rnam pa gcig las gsung rab yan lag bcu gnyis po bsam gyis mi khyab pas so so'i skye bo rnams kyis shes par bya ba ma yin la/ de bzhin gshegs pa chos 'di rnam par gzhag pas/ de bzhin du byis pa chung ngu la sogs pas kyang khong du chud par 'gyur ba'o zhes 'byung ngo / /slob dpon ngo bo nyid med kyis 'grel pa las/ mdo la sogs pa gsung rab yan lag bcu gnyis po dag ni rnam par gzhag pa zhes bya ste/ de dang de dag gis rang dang spyi'i mtshan nyid rnam par 'jog pa'i phyir ro/ /de ltar rnam par gzhag pa de yang byis pa so so'i skye bo rnams kyi blo'i spyod yul ma yin pa'i phyir dang / 'jig rten las 'das pa'i phyir bsam gyis mi khyab pa'o zhes 'byung ste/ gsung rab yan lag bcu gnyis po de 'di dag de bzhin gshegs pa la ltos pas rnam par gzhag pa zhes bya ste/ gsung rab kyi chos de dag gis rang dang spyi'i mtshan nyid rnam par 'jog pa'i phyir rnam par gzhag pa zhes bya'o/ /slob dpon nye ba'i 'od kyis 'grel pa las/ 'dis ni bcom ldan 'das kyis chos bstan pa rnam par gzhag pa khyad par du 'phags pa'i yon tan bstan te/ 'di ltar bcom ldan 'das kyis bstan pa'i chos thams cad rnam par gzhag pa de rtog ge'i spyod yul las shin tu 'das pa'i phyir ro zhes 'byung ngo / /de dag kyang mdor bsdu na bcom ldan 'das kyis gsung rab yan lag bcu gnyis rnam par gzhag pa bsam gyis mi khyab pas so so'i skye bo rnams kyis shes pa ma yin no zhes bstan par 'gyur ro/ /dus gsum mnyam pa'i chos nyid la gshegs pa zhes bya bas ni yon tan dgu pa bstan te/ 'di ni lung ston pa'i yon tan zhes bya ba nyid do/ /slob dpon ngo bo nyid med kyis 'grel pa las/ 'di ltar dus gsum mnyam pa'i chos nyid du kun du khyab par bgrod cing gshegs pa 'am/ dus gsum mnyam pa'i chos nyid ji lta ba bzhin du thugs su chud pas 'das pa dang / ma 'ongs pa'i don rnams 'byung ngo / /'byung bar 'gyur ro zhes bya ba la sogs pa da ltar gyi bzhin du lung ston pa'i phyir ro zhes 'byung ste/ slob dpon nye ba'i 'od kyis 'grel pa las kyang 'di dang mthun par bshad do/ / de la chos nyid ces bya ba ni de bzhin nyid do/ /de ltar dus gsum gyi chos rnams kyi mnyam pa de bzhin nyid thugs su chud pa'i phyir 'das pa la sogs pa yang da ltar gyi bzhin du thugs su chud par gyur pa'o/ /yang na dus gsum gyi chos nyid ces bya ste/ de dag gsal bar thugs su chud cing dbyer med pa'i phyir mnyam pa nyid ces bya'o/ /gzhan yang slob dpon nye ba'i 'od kyis 'grel pa las 'dis ni bcom ldan 'das kyis dus gsum lung ston pa khyad par du 'phags pa'i yon tan bstan te/ da ltar byung ba'i dus bzhin du 'das pa dang ma 'ongs pa'i dus lung ston pa thogs pa mi mnga' ba'i phyir ro zhes 'byung ngo / /de ni 'di skad du mkhyen pas dus gsum lung ston par yul gyi chos nyid gang yin pa de nyid mnyam pa'i de bzhin nyid yin pa 'am/ yang na dus gsum nyid chos nyid ces bya ste/ bye brag med par thugs su chud pa'i phyir mnyam pa nyid ces bya'o zhes bstan par 'gyur ro/ /'jig rten gyi khams thams cad du zhugs pa'i sku dang ldan pa zhes bya bas ni yon tan bcu pa bstan te/ 'di ni 'jig rten gyi khams thams cad du longs spyod rdzogs pa dang / sprul pa'i sku ston pa'i yon tan zhes bya ba nyid do/ /slob dpon ngo bo nyid med kyis 'grel pa las 'di ltar gdul bya ji lta ba bzhin du 'jig rten gyi khams kun tu khyab par sku gnyis ston pas de dag la phan 'dogs pa'i phyir ro zhes 'byung ngo / /nye ba'i 'od kyis 'grel pa las kyang 'di dang mthun par bshad do/ / gzhan yang de nyid las/ 'dis ni bcom ldan 'das dga' ldan gyi gnas nas gshegs pa kun tu ston pa khyad par du 'phags pa'i yon tan bstan te/ 'di sprul pa'i sku gling bzhi pa'i 'jig rten gyi khams thams cad du yum gyi lhums su 'jug pa kun tu cig car ston pa'i phyir ro zhes 'byung ngo / /de dag kyang mdor bsdu na bshad pa rnam pa gnyis su 'gyur te/ dang po ni sku gnyis kyi dbang du byas so/ /gnyis pa ni sprul pa'i sku'i dbang du byas nas 'jig rten gyi khams thams cad du zhugs par bstan to/ /chos thams cad la mkhyen pa the tshom mi mnga' ba zhes bya bas ni yon tan bcu gcig pa bstan te/ 'di ni the tshom gcod pa'i yon tan zhes bya ba nyid do/ /slob dpon ngo bo nyid med kyis 'grel pa las yul thams cad la nges par legs par brnyes pa'i phyir dang / chos rnams la bdag nyid kyis gtan la phebs pa med pa gzhan gyi the tshom chod par 'gyur ba yang ma yin pa nges pa dang bral bas the tshom gcod pa yang ma yin pa'i phyir ro zhes 'byung ste/ nye ba'i 'od kyis 'grel pa las 'di dang don mthun par bshad do/ /gzhan yang slob dpon nye ba'i 'od kyis 'grel pa las 'dis ni bcom ldan 'das the tshom gyi rnam pa thams cad gcod pa khyad par du 'phags pa'i yon tan bstan te/ chos thams cad la the tshom ma lus par bsal ba'i ye shes nges par brnyes pa'i phyir ro zhes bshad do/ /de ni 'di skad du de bzhin gshegs pa chos thams cad la the tshom mi mnga' ba'i phyir/ gzhan gyi the tshom gcod pa yin no zhes bstan par 'gyur ro/ /gzhan yang mi 'jigs pa bzhi brnyes pa'i phyir bdag nyid nges par the tshom mi mnga' ba dang / so so yang dag par rig pa bzhi brnyes pa'i phyir/ gzhan gyi the tshom gcod par byed pas de'i phyir yon tan zhes bya'o/ /spyod pa thams cad kyi blo chen po yongs su grub pa zhes bya bas ni yon tan bcu gnyis pa bstan te/ 'di ni spyod pa sna tshogs kyis 'jug par mdzad pa'i yon tan zhes bya ba nyid do/ /slob dpon nye ba'i 'od kyis 'grel pa las 'di ltar 'dul ba'i sems can gyi rjes su ji ltar 'os pa bzhin du skal ba mnyam pa'i lus bstan pas de dag 'jug par mdzad pa'i phyir ro/ /'dis ni bcom ldan 'das theg pa thams cad kyis 'dul ba'i sems can dag la de dang 'dra ba'i sku kun tu ston pa khyad par du 'phags pa'i yon tan bstan te/ sems can thams cad kyi rang bzhin dang / spyod pa tha dad pa yongs su mkhyen pas ji lta ba bzhin du nyid kyi sku yang kun tu ston pa'i phyir ro zhes 'byung ste/ de ni 'di skad du bcom ldan 'das theg pa gsum mam/ yang na theg pa lngas rang bzhin dang spyod pa tha dad pa rnams la de dang 'dra ba'i sku kun tu ston pas/ blo bye ba mngon par bsgrub cing so so nas 'jug par mdzad pa theg pa gzhan gnyis po dag la khyad par du gyur pa'i phyir/ spyod pa thams cad kyi blo chen po yongs su grub pa zhes bya'o/ /chos mkhyen pa la nem nur mi mnga' ba zhes bya bas ni yon tan bcu gsum pa bstan te/ 'di ni phyi ma la chos 'byung ba rab tu mkhyen pa zhes bya ba nyid do/ /slob dpon dbyig gnyen gyis mdzad pa'i 'grel pa las/ ma 'ongs pa'i dus na chos 'di lta bus de bzhin gshegs pa'i gya nom pa'i ye shes skye bar 'gyur ro zhes mkhyen pa'o zhes bshad do/ /ngo bo nyid med kyis 'grel pa las/ 'di ltar 'phags pa nyan thos rnams kyis gang la 'di ni gcig tu dge ba'i rtsa ba cung zad kyang med pa'o zhes spangs pa gang yin pa de la sangs rgyas bcom ldan 'das kyis ma 'ongs pa'i dus na dge ba'i chos skye bar 'gyur ba yang rab tu mkhyen la/ de'i tshe rabs gzhan dang 'brel pa'i sa bon dge ba'i rtsa ba shin tu phra mo yang mngon sum du mkhyen pa'i phyir zhes 'byung ste/ slob dpon nye ba'i 'od kyis 'grel pa las 'di dang don mthun par bshad do/ /mdo las ji skad du bcom ldan 'das rgyal bu rgyal byed kyi tshal na bzhugs pa'i tshe/ sprang po zhig dge slong gi thad du phyin nas rab tu 'byung bar gsol ba btab pa dang / dge slong dag gis sngon gyi gnas dran pa'i shes pas brtags na/ bskal pa brgyad khri tshun chad du dge ba'i rtsa ba la phyogs pa'i sems cung zad kyang med par mthong ba'i phyir gang gis kyang rab tu ma byung ngo / /mi de ngu zhing phyir byung ba bcom ldan 'das kyis gzigs nas slar khrid de dge slong rnams la ci'i phyir 'di rab tu ma phyung zhes bka' stsal pa dang / dge slong dag gis zhib tu gsol to/ /de nas dus gzhan zhig na bcom ldan 'das kyis de rab tu phyung ste/ chos bstan pas rgyun du zhugs pa'i 'bras bu thob par gyur to/ /dge slong rnams the tshom skyes nas bcom ldan 'das la gsol pa dang / bcom ldan 'das kyis bka' stsal pa/ 'di sngon sangs rgyas mar me mdzad kyi tshe shing thun zhig tu gyur te/ grong khyer gyi sgor mi mang po rnams lam 'phyag cing sangs rgyas mar me mdzad la sdod pa shing thun des mthong nas mang po rnams la lam 'phyag pa 'di ci'i phyir zhes dris so/ /mi mang po rnams kyis deng sangs rgyas mar me mdzad grong khyer 'dir gshegs pa'i phyir lam 'phyag cing sdod pa yin no zhes smras pa dang / de sangs rgyas zhes bya ba'i mtshan thos pas lus kyi spu zing zhes byed nas mchi ma blags te ngus so/ /bcom ldan 'das gshegs pa las bsdad du yang gos zas dag gis phongs pas mthar gyis ri la song ba las/ lam du stag cig dang phrad nas des bzung ste khar bcug pa'i tshe sangs rgyas zhes bya ba'i mtshan brjod nas grong khyer gyi sgo'i mi zhes tshig tu brjod pa las stag gis bsad de zos so/ /mi 'di la sangs rgyas zhes brjod pa'i dge ba'i rtsa ba 'di 'ba' zhig yod pas so zhes gsungs pa lta bu ste/ de bzhin gshegs pa mar me mdzad ni sangs rgyas 'di'i bskal pa grangs med pa gnyis pa na byung ste de'i tshe sangs rgyas rjes su dran pa'i dge ba'i rtsa ba 'di bskyed de/ phyis bskal pa grangs med pa gsum pa yang rdzogs/ bskal pa bcu dgu yang 'das nas gdod dge ba'i rtsa ba yongs su smin pa'i phyir bcom ldan 'das kyis dge ba'i rtsa ba 'di la brten nas rab tu phyung ste/ chos bshad pas rgyun du zhugs pa'i 'bras bu thob par gyur pa 'di lta bu'i sa bon shin tu phra ba theg pa 'og ma gnyis kyis mi shes kyi de bzhin gshegs pa nyag gcig gis thugs su chud pa'o/ /gzhan yang slob dpon nye ba'i 'od kyis 'grel pa las/ 'dis ni bcom ldan 'das chos thams cad shin tu mkhyen pa'i ye shes kyis ci rigs par gdams ngag yang dag par sbyin pa khyad par du 'phags pa'i yon tan bstan te/ 'di ltar chos rnams la nem nur dang ldan pas ni ci rigs par gdams ngag sbyin par mi nus kyi/ sangs rgyas bcom ldan 'das 'ba' zhig gis chos rnams thugs su chud cing mkhyen pas shin tu rnam par nges pas ci rigs su phyin ci ma log par gdams ngag sbyin pa la rgyun chad pa mi mnga'o zhes 'byung ngo / / bshad pa de dag kyang mdor bsdu na rnam pa gnyis su 'gyur te dang pos ni sems can rnams kyis yun ring por lon pa'i rgyu shin tu phra bas ma 'ongs pa'i dus na/ chos rnams thob par 'byung ba rab tu mkhyen pa'i nem nur mi mnga' bar bstan to/ /gnyis pas ni sems can rnams kyi rgyu dang 'bras bu'i chos rab tu mkhyen pa'i phyir ci rigs su gdams ngag sbyin pas nem nur mi mnga' bar bstan to/ /rnam par ma brtags pa'i sku mnga' ba zhes bya bas ni yon tan bcu bzhi pa bstan to/ /'di ni mos pa ji lta ba bzhin du ston pa'i yon tan zhes bya ba nyid do/ /slob dpon ngo bo nyid med kyis mdzad pa'i 'grel pa las/ sems can gyi mos pa ji lta ba bzhin du gser la sogs pa'i rang bzhin du snang yang sku la rnam par rtog pa mi mnga' ste/ nor bu dang sil snyan la sogs pa lta bu'o zhes 'byung ngo / /rnam par rtog pa mi mnga' yang sku ston par mdzad pa'i phyir rnam par ma brtags pa zhes bya'o/ /yang na sku snang ba de yang rnam par mi rtog pa'i dbang las byung ba'i phyir gzhan dag gis rnam par ma brtags pa'o/ /slob dpon nye ba'i 'od kyis 'grel pa las/ yang na de dag dang 'dra ba nyid du ston pas rnam par brtag tu med pa'i zhes bshad do/ /gzhan ni ngo bo nyid med kyis bshad pa dang mthun no/ /de la de dag dang 'dra ba nyid du zhes bya ba ni gdul bar bya ba'i sems can gyi log par spyod pa dang yang dag par spyod pa dang / gnyi ga'i spyod pa mtshungs shing yongs su bstan pa'i mtshan ma de dag dbyer med pa'o/ /yang na 'gro ba drug po'i rnam pa dang mtshungs pa nyid du 'gro ba drug po dag gi lus ston kyang 'di ni 'gro ba drug po dag gi nang na 'di yin no zhes dbyer med pa'o/ /theg pa chen po bsdus pa'i 'grel pa mi mthun pa rnam pa gcig las sprul pa'i sku bstan pa de'i grangs dang tshad dang / rnam pa dang dus dang dus tshigs dang gnas rnam par brtag tu med pa'o zhes bshad do/ /gzhan yang slob dpon nye ba'i 'od kyis 'grel pa las 'dis ni bcom ldan 'das kyis kun nas nyon mongs pa mi mnga' ba'i sku yongs su 'dzin pa khyad par du 'phags pa'i yon tan bstan te/ 'di ltar de bzhin gshegs pa'i sku ni yang dag pa ma yin pa kun tu rtog pa las 'khrungs pa ni ma yin te/ nyon mongs pa dang las dang skye ba'i nyon mongs pa mi mnga' ba'i phyir ro/ /de bzhin gshegs pa'i sku ni kun nas nyon mongs pa rnams kyis rnam par brtags pa ma yin pa'i phyir ro / /rnam par ma brtags pa'o zhes 'byung ste/ ji tsam du sku ston pa de dag yang dag pa ma yin pa kun tu rtog pa las ma 'khrungs pa'i phyir rnam par ma brtags pa'o/ /yang sku bstan pa de dag yang dag pa yin pa rnam par rtog pa las 'khrungs pa ma yin pa'i phyir gzhan dag gis rnam par brtag tu med pa'o/ /de dag kyang mdor bsdu na bshad pa rnam pa bzhir 'gyur te/ dang pos ni sku ston par mdzad kyang rnam par rtog pa mi mnga' ba'i phyir rnam par ma brtags pa nyid du ston to/ /gnyis pas ni de dang 'dra ba nyid du ston par mdzad pas shes par mi nus pa'i phyir rnam par ma brtags pa nyid du bstan to/ /gsum pas ni sprul pa'i sku'i grangs dang / tshad la sogs pa shes par mi nus pa'i phyir rnam par ma brtags pa nyid du bstan to/ /bzhi pas ni ji tsam du sku ston pa dag yang dag pa ma yin pa rnam par rtog pa las 'khrungs pa ma yin pa'i phyir rnam par ma brtags pa nyid du bstan to/ /byang chub sems dpa' thams cad kyis yang dag par gnyer ba mkhyen pa mnga' ba zhes bya bas ni yon tan bco lnga pa ston te/ 'di ni rten tshad med pas sems can gdul bar sbyor ba'i yon tan zhes bya ba nyid do/ /slob dpon dbyig gnyen gyis mdzad pa'i 'grel pa las/ 'di ltar byang chub sems dpa' tshad med pa'i rten du gyur pas sems can gdul ba'i bya ba mdzad pa yin gyi/ de bzhin gshegs pa rnams bdag dang gzhan mnyam pa nyid brnyes pas/ yang ye shes 'di yongs su tshol ba ni ma yin te/ de bzhin gshegs pas de lta bu'i gdul ba'i bya ba mchog sngar mdzad pas so zhes bshad de/ de ni 'di skad du de bzhin gshegs pa'i gdul ba'i mkhyen pa ni byang chub sems dpa' tshad med pa rnams kyi rten du gyur pas byang chub sems dpa' rnams sbyor ba'i rim gyis thob par bya ba yin gyi/ de bzhin gshegs pa gnyer bar mdzad pa ma yin te/ sems can gdul ba'i mkhyen pa'i mchog brnyes par gyur pa'i phyir ro zhes bstan par 'gyur ro/ /yang na rten tshad med pa'i ye shes kyis sems can gdul ba'i thabs kyi bya ba mdzad pas de'i phyir byang chub sems dpa' rnams ye shes 'di yongs su gnyer ba'o/ /slob dpon ngo bo nyid med kyis 'grel pa las/ 'di ltar byang chub sems dpa'i rten dpag tu med pas sems can gdul ba'i phyir sbyor ba bskyed pa de sangs rgyas kyi dbang gis chos mnyen pa sngon du btang bas ye shes gya nom pa 'thob ste/ rnam pa tha dad pa'i byang chub sems dpa' rnam pa rjes su gzung zhing yongs su gtad pas gcig nas gcig tu rgyun mi 'chad par 'jug pa des byang chub sems dpa' thams cad kyis mtshungs par gnyer ba'i ye shes thob par 'gyur ba'o zhes 'byung ngo / /slob dpon nye ba'i 'od kyis kyang don 'di dang mthun par bshad do/ /'grel pa 'di las sngar ni yon tan bshad la/ de'i 'og tu ni mdo'i tshig rnam par bshad de/ de la byang chub sems dpa'i rten dpag tu med pa zhes bya bas ni gong ma'i rten tshad med pa zhes bya ba'i bshad pa yin te/ rten med pa ni sangs rgyas kyi 'bras bu rtog pa'i ye shes so/ /kha cig na re de ni byang chub sems dpa' rnams kyi rnam par mi rtog pa'i ye shes yin te/ sems can rnams kyis yongs su 'dzin pa'i sems gdul ba'i phyir sbyor ba'i shes pa bskyed nas sangs rgyas kyi ye shes yongs su tshol ba'o/ /yang na byang chub sems dpa'i shes rab po zhes bshad do/ /de ltar rnam pa gnyis su bshad pa yod kyang / sangs rgyas kyi ye shes yongs su tshol ba zhes bshad pa de bzang ngo / /sems can gdul ba'i sbyor ba'i yon tan zhes bya ba man chad kyis mdo'i tshig rnam par bshad pa yin te/ sangs rgyas kyi dbang gi stobs kyis byang chub sems dpa' chos mnyan pa yod par gyur nas/ sa dang po'i ye shes gya nom pa 'thob pa'o/ /yang na sangs rgyas kyi ye shes gya nom pa 'thob par 'gyur ro/ /dper na mar me gcig gis mar me brgya stong 'bar bar byed pa de bzhin du sa'i mdun rol gyi rnam pa tha dad pa'i byang chub sems dpa' dang / rigs ma nges pa'i nyan thos dang / rang sangs rgyas rnams sangs rgyas nyid kyis rjes su gzung ba dang / yongs su mya ngan las 'da' ba'i tshe/ de bzhin gshegs pa gzhan dang byang chub sems dpa' chen po dag la yongs su gtad pas dge ba spyod pa'i gang zag thams cad kyis rim gyis thos pa dang / bsams pa dang / bsgoms pa'i shes rab thob par mdzad pas de'i dbang gis byang chub sems dpa' thams cad kyis mtshungs par gnyer ba'i ye shes thob nas sangs rgyas kyi mkhyen pa'i ye shes yongs su tshol ba'o/ /gzhan yang slob dpon nye ba'i 'od kyis 'grel pa las/ 'dis ni bcom ldan 'das kyi sangs rgyas kyi gdung rgyun mi 'chad par sbyor ba khyad par du 'phags pa'i yon tan bstan te/ byang chub sems dpa' rnams sangs rgyas kyi rigs rgyun mi 'chad par bya ba'i phyir/ sbyor ba la brtson par byed kyi nyan thos la sogs pa ni ma yin te/ de'i phyir sangs rgyas kyi ye shes ni byang chub sems dpa' rnams kho na yang dag par yongs su btsal bar bya ba yin no/ / bshad de sangs rgyas kyi ye shes 'di 'ba' zhig yongs su gnyer bar bya ba yin gyi/ byang chub sems dpa' rnams kyi shes pa ni gnyer bar bya ba ma yin pa'o/ /de dag kyang mdor bsdu na bshad pa rnam pa gnyis su 'gyur te/ dang pos ni sangs rgyas rnams las tha dad par dgar ba ste/ byang chub sems dpa' rnams kho nas gnyer bar byed kyi/ sangs rgyas rnams kyis gnyer bar mdzad pa ni ma yin pa'o/ /gnyis pas ni theg pa 'og ma gnyis las dgar ba ste/ theg pa gnyis kyis gnyer bar bya ba'i ye shes ma yin no zhes bya ba'i tha tshig go/ /sangs rgyas kyis gnas pa gnyis su med pa brnyes pas dam pa'i pha rol tu byon pa'o zhes bya bas ni yon tan bcu drug pa bsten te/ 'di ni chos kyi sku mnyam pa la pha rol tu phyin pa rnams yongs su grub pa'i yon tan zhes bya ba nyid do/ /slob dpon dbyig gnyen gyis mdzad pa'i 'grel pa las/ 'di ltar gnyis su med pa'i chos kyi sku ni mnyam pas mnyam pa zhes bya ste/ gnyis su med pa'i chos kyi sku 'di las shin tu rnam par dag pa'i pha rol tu phyin pa rnams brnyes par gyur pa'o zhes 'byung ste/ theg pa chen po bsdus pa'i 'grel pa mi mthun pa rnam pa gcig dang sbyar na yongs su grub pa'i chos dang / yon tan bzhi'i pha rol tu phyin pa rnams kyi yon tan gyi ngo bo nyid byed pa'i phyir ro zhes bshad do/ /de'i phyir bstan bcos de nyid las de bzhin gshegs pa'i chos kyi sku ni gnas pa zhes bya'o/ /yon tan bzhi mthar phyin pa ni pha rol tu byon pa zhes bya'o zhes bshad do/ /slob dpon ngo bo nyid med kyis 'grel pa las chos kyi sku la gnyis su med pa'i phyir mnyam pa zhes bya'o/ /chos kyi sku mnyam pa la brten nas/ pha rol tu phyin pa'i 'bras bu yon tan mngon par 'grub pa'i phyir ro zhes 'byung ste/ sangs rgyas kyi chos kyi sku gnyis su med pa'i phyir mnyam pa zhes bya'o/ /yongs su mnyam pa'i chos kyi sku 'di la brten nas/ rtag pa dang bde ba dang de dang yongs su btsal ba'i pha rol tu byon pa rnams sangs rgyas kyi gnas skabs kyi tshe gdod mngon par 'grub pa'o/ /yang na chos kyi sku mnyam pa la brten nas pha rol tu phyin pa drug yongs su rdzogs par 'gyur la/ pha rol tu phyin pa ni sangs rgyas kyi gnas skabs kyi tshe gdod mngon par 'grub pa'o/ /slob dpon nye ba'i 'od kyis 'grel pa las/ 'di ltar sangs rgyas kyi sa gnyis su med pa chos kyi sku las sbyin pa la sogs pa pha rol tu phyin pa thams cad mnyam pa nyid du yongs su rdzogs par 'gyur ro zhes 'byung ngo / /gzhan yang de nyid las 'dis ni bcom ldan 'das kyi rang bzhin gyi sku'i phyogs khyad par du 'phags pa'i yon tan bstan te/ de bzhin gshegs pa'i chos kyi sku la tha dad pa'i mtshan nyid mi mnga' ba'i phyir gnyis su med pa zhes bya'o/ /sangs rgyas kyi gnas pa gnyis su med pa ni chos kyi sku ste/ de bzhin nyid kyi ngo bo nyid byed do/ /mtshan nyid tha dad pa med pas der gnyis su rnam par rtog pa thams cad mngon du mi 'byung ste/ de la dmigs pa'i ting nge 'dzin khyad par can rtag tu gnas pa'i phyir gnas pa zhes bya ste/ gnyis su med pa'i gnas pa de nyid ni dam pa'i pha rol tu byon pa zhes bya'o/ /de bzhin gshegs pas de'i phyi rol du byon pa'i phyir brnyes pa zhes bya'o zhes 'byung ngo / /slob dpon nye ba'i 'od kyis bshad pa 'di la mi mthun pa rnam pa gsum du bshad de/ /kha cig ni ting nge 'dzin la gnas pa'i dbang du byas nas gnas par bya ba'i yul chos kyi sku mnyam pa bstan pa yin no zhe'o/ /kha cig ni de ltar gnas par bya ba'i yul smos kyang / don gyis na ting nge 'dzin la gnas pa zhes bzung ngo zhe'o/ /kha cig ni gnas par bya ba dang gnas pa las yon tan gyi ming rnam par gzhag pa yin no zhe'o/ /de dag kyang mdor bsdu na bshad pa rnam pa gnyis su 'gyur te/ dang po ni chos kyi sku gcig pa'i phyir gnyis su med pa zhes bya'o zhes bstan to/ /gnyis pas ni chos kyi sku la rnam pa sna tshogs kyi gnyis med pa'i phyir gnyis su med pa'o zhes bstan to/ /don gzhan ni brda phrad par zad do/ /yongs su ma 'dres pas de bzhin gshegs pa'i rnam par thar pa'i ye shes dam pa mthar phyin pa zhes bya bas ni yon tan bcu bdun pa bstan te/ 'di ni mos pa ji lta ba bzhin du sangs rgyas kyi zhing tha dad pa ston pa'i yon tan zhes bya ba nyid do/ /de la yongs su ma 'dres pa zhes bya ba ni de bzhin gshegs pa'i mos pas sangs rgyas kyi zhing bstan pa rnams yongs su ma 'dres pa'o/ /de bzhin gshegs pa'i rnam par thar pa zhes bya ba ni de bzhin gshegs pas sangs rgyas kyi zhing yongs su bstan pa'i mos pa nyid do/ /yongs su bstan par mdzad pa la mi mkhyen pa ci yang med pa'i phyir ye shes dam pa mthar phyin pa zhes bya ste/ 'di ni mdo'i tshig gi don rnam par bshad pa'o/ /'di nyid dang sbyar te yon tan gyi ming bshad na de bzhin gshegs pa'i mos pa ji lta ba bzhin du sems can dang / sangs rgyas kyi zhing tha dad par bstan pa rnams yongs su ma 'dres par gyur pa'o/ /slob dpon dbyig gnyen gyis mdzad pa'i 'grel pa las/ yongs su ma 'dres pa de bzhin gshegs pa'i ye shes las mos pa mthar phyin pa ste/ de la 'dir smos pa ni rnam par thar pa zhes bya'o zhes 'byung ste/ yongs su ma 'dres pa de bzhin gshegs pa'i ye shes las sems can la phan 'dogs pa'i mos pa mthar phyin pa'i phyir/ sems can gyi mos pa ji lta ba bzhin du sangs rgyas kyi zhing tha dad pa rnam pa sna tshogs bstan pa yang yongs su ma 'dres pa yin te/ mkhyen pa la 'dres pa mi mnga' ba'i dbang gis sangs rgyas kyi zhing yongs su bstan pa rnams kyang yongs su ma 'dres par gyur pa'o/ /slob dpon ngo bo nyid med kyis 'grel pa las sems can rnams kyi mos pa tha dad pa la ltos nas/ gser dang dngul la sogs pa'i sangs rgyas kyi zhing rnam pa sna tshogs yongs su ma 'dres par ston te/ bcom ldan 'das kyis mos pa mngon du gyur pas na 'khor rnams kyi mos pa ji lta ba bzhin ston par mdzad de mi mkhyen pa mi mnga' bas/ de'i phyir de bzhin gshegs pa'i rnam par thar pa ye shes dam pa mthar phyin pa zhes gsungs so/ /de la 'dir mos pa la rnam par thar pa zhes bya bar bzhed do zhes bya bar bshad do/ /slob dpon nye ba'i 'od kyis kyang don ming dang mthun par bshad do/ /gzhan yang slob dpon nye ba'i 'od kyis 'grel pa las/ 'dis ni bcom ldan 'das kyi longs spyod rdzogs pa'i sku phyogs khyad par du 'phags pa'i yon tan bstan te/ 'dir longs spyod rdzogs pa'i sku ni ma 'dres pa ste/ de bzhin gshegs pa thams cad kyi longs spyod rdzogs pa'i sku'i ngo bo nyid so so tha dad pa'i phyir ro/ /de bzhin gshegs pa'i ye shes dam pas sems can thams cad rnam par thar par mdzad pa'i phyir ro / /de bzhin gshegs pa'i rnam par thar pa ye shes dam pa zhes bya'o/ /de bzhin gshegs pas ye shes 'di'i mthar phyin pa brnyes pas 'di nyid de bzhin gshegs pa'i ye shes dam pa ma 'dres pa yin no/ /sangs rgyas kyi zhing yongs su dag par longs spyod pa'i sku ston par mdzad kyang / phan tshun 'dres par mi 'gyur la/ /'khor gyi dkyil 'khor rnams su sku rnam pa sna tshogs bstan nas/ byang chub sems dpa' rnams dang chos kyi dgyes pa bstar bar mdzad kyang / phan tshun 'dres par mi 'gyur te/ de bzhin gshegs pa ye shes las snang ba'i sku 'di'i mthar yang byon pa'o zhes 'byung ngo / /'dir bstan bcos de dag las bshad pa'i don yang mdor bsdu na bshad pa rnam pa lngar 'gyur te/ dang pos ni de bzhin gshegs pa'i ye shes dam pa ma 'dres par bstan to/ /gnyis pas ni sangs rgyas kyi zhing bstan pa rnams kyis ma 'dres par bstan to/ /gsum pas ni nyid kyi longs spyod pa'i sku ma 'dres par bstan to/ /bzhi pas ni gzhan longs spyod pa'i sku ma 'dres par bstan to/ /lnga pas ni chos kyi sku dgyes pa bstar ba ma 'dres par bstan to/ /dbus dang mtha' med pa'i sangs rgyas kyi sa mnyam pa nyid thugs su chud pa zhes bya bas ni yon tan bco brgyad pa bstan te/ 'di ni sangs rgyas kyi sku gsum gyi yul yongs su ma chad pa yon tan zhes bya ba nyid do/ /slob dpon dbyig gnyen gyis mdzad pa'i 'grel pa las/ 'di ltar sangs rgyas kyi chos kyi sku'i yul dang / phyogs kyi khyon ni 'di tsam mo zhes bya bar yongs su chad pa med la/ longs spyod rdzogs pa dang / sprul pa'i sku'i 'jig rten gyi khams kyang 'di tsam mo zhes brjod par mi nus so zhes 'byung ngo / /theg pa chen po bsdus pa'i 'grel pa rnam pa gcig las de bzhin gshegs pa'i sku rnam pa gsum las/ chos kyi sku yul la brten nas tshad dpag par yang mi nus so/ /longs spyod rdzogs pa dang / sprul pa'i sku rnam pa gnyis kyang 'jig rten gyi khams 'di na ni yod la 'di na ni med do zhes brjod par yang mi nus te/ chos 'ga' yang chos kyi sku las gud na med la/ sems can gang yang longs spyod rdzogs pa dang / sprul pa'i sku las gud na med do zhes 'byung ngo / /slob dpon ngo bo nyid med kyis 'grel pa las ji ltar 'jig rten gyi khams la dbus dang mtha' med pa de bzhin du sangs rgyas kyi sa'i yon tan yang de bzhin te/ yul dang phyogs kyi tshad yongs su ma chad pa'o/ /yang na 'jig rten gyi khams kyi phyogs mtha' med pas de bzhin gshegs pa'i sku rnam pa gsum der 'jig rten gyi tshad dang 'tsham pa mnyam par kun tu khyab cing gang ba ste/ 'di ltar chos kyi sku la sogs pas 'jig rten gyi khams de lta bu dag tu zhugs kyi/ gzhan dag tu ni ma yin pa'i phyir ro/ /yang na chos kyi sku la sogs pa sangs rgyas kyi sar mnyam par kun tu khyab cing gang bas dbus dang mtha' med cing tshad yongs su chad pa med pa'o/ /chos kyi sku la sogs pa de dag thams cad kun tu khyab cing sems can gyi ched du phan 'dogs pa mngon sum du mdzad kyang rang gi ngo bo nyid la dbus dang mtha' med pa ni ma yin no zhes 'byung ste/ slob dpon nye ba'i 'od kyis 'grel pa las kyang don 'di dang mthun par bshad do/ /slob dpon ngo bo nyid med kyis dbus dang mtha' med par bshad pa de yang rnam pa bzhir 'gyur te/ dang po ni dpe'i chos can la brten nas dbus dang mtha' med par bstan to/ /gnyis pa ni yang na 'jig rten gyi khams zhes bya ba man chad kyis brten par bya ba dang / rten pa'i dbang du byas nas dbus dang mtha' med pa bstan to/ /gsum pa ni yang na chos kyi sku la sogs pa zhes bya ba la sogs pas sangs rgyas kyi sa'i dbang du byas nas/ dbus dang mtha' med pa bstan to / /bzhi pa ni chos kyi sku la sogs pa de dag ces bya ba man chad kyis sems can gyi ched du sku ston par mdzad pas/ dbus dang mtha' med pa bstan te/ 'on kyang rang gi ngo bo nyid la dbus dang mtha'i sku med pa ni ma yin te/ sems can la phan 'dogs pa ma yin pa'i phyir ro/ /gzhan yang slob dpon nye ba'i 'od kyis 'grel pa las/ 'dis ni bcom ldan 'das de bzhin nyid thugs su chud pa'i mtshan nyid khyad par du 'phags pa'i yon tan bstan te/ 'di ltar de bzhin nyid mtshan nyid la mtha' dang dbus med de / 'dus byas dang 'dus ma byas kyi dbus dang mtha'i mtshan nyid thams cad yongs su spangs pa'i phyir dang / yul gyi dbus dang mtha'i mtshan nyid yongs su spangs pa'i phyir ro/ /de bzhin nyid de ni sangs rgyas kyi sa'i mnyam pa'i chos nyid yin te/ sangs rgyas kyi sa'i mnyam pa'i ngo bo nyid 'di thugs su chud pa'i phyir/ 'dus byas dang 'dus ma byas la sogs pa thams cad kun tu khyab cing der yang mngon par zhen pa mi mnga' ba yin no zhes 'byung ngo / /de la 'dus byas dang 'dus ma byas kyi dbus dang mtha'i mtshan nyid thams cad yongs su spangs pa'i phyir zhes bya ba ni/ gang 'dus byas la nges par yod do zhes 'dzin pa ni rtag pa'i mtha'o/ /stong pa nyid med pa'o zhes 'dzin pa ni chad pa'i mtha'o/ /yod pa yang ma yin med pa yang ma yin pa ni dbu ma'i lam mo/ /dbu ma'i don de yang mtha' la ltos nas rnam par gzhag pa yin te/ mtha'i ngo bo nyid kyang rang nyid kyis bral ba yin na/ dbus la ltos te dbus zhes bya/ /de'i phyir de bzhin gshegs pa ni mnyam pa nyid thugs su chud pas dbus dang mtha' gnyi ga yang spangs pa yin te/ 'dus byas ji lta ba bzhin du 'dus ma byas la yang de bzhin no/ /kun rdzob kyi dbang du byas te brjod na yul dang phyogs la dbus dang mtha' yod de/ ji ltar dbus kyi yul la ni dbus zhes brjod la yul gzhan la ni mtha' zhes brjod pa lta bu ste/ de bzhin gshegs pa'i mnyam pa nyid thugs su chud de/ yul dang phyogs mi mnga' ba'i phyir/ yul dang phyogs kyi dbus dang mtha'i mtshan nyid yongs su spangs pa'o/ / yang na 'dus byas dang 'dus ma byas ni mtha' gnyis yin la/ yod pa yang ma yin med pa yang ma yin pa ni dbus yin te/ mtha' yang yod pa ma yin/ dbus kyang ci la dbus zhes bya ste/ yul gyi dbus dang mtha' yang de kho na bzhin du bshad par bya'o/ /chos kyi dbyings kyis klas pa zhes bya bas ni yon tan bcu dgu pa bstan te/ 'di ni 'khor ba'i mtha' ji tsam par sems can thams cad la phan pa dang / bde ba nye bar gnas pa zhes bya ba'i yon tan nyid do/ /slob dpon dbyig gnyen gyis mdzad pa'i 'grel pa las/ 'di ltar rnam par dag pa'i chos kyi dbyings kyis klas pa ni chos kyi dbyings kyis klas pa'o zhes 'byung ngo / /slob dpon ngo bo nyid med kyis 'grel pa las/ 'di ltar chos kyi dbyings de shin tu rnam par dag pa'i phyir/ rgyu mthun par mdo la sogs pa'i chos rnams kyis chos dbyings de las klas pas/ ma 'ongs pa na sems can thams cad la ji ltar 'os pa bzhin du rtag par phan pa dang bde ba nye bar gnas pa'o zhes 'byung ste/ slob dpon nye ba'i 'od kyis kyang 'di dang mthun par bshad do/ /chos kyi dbyings shin tu rnam par dag pa las ni yang dag par ye shes 'byung ngo / / yang dag pa'i ye shes kyi dbang gis ni rjes la brnyes pa'i ye shes 'byung ngo / /rjes la brnyes pa'i ye shes kyi dbang gis ni thugs rje chen po skye'o/ /thugs rje chen po'i dbang gis ni mdo la sogs pa'i gsung rab yan lag bcu gnyis gsung bar 'gyur ro/ /chos kyi dbyings 'di rtag par gnas pa'i dbang gis ni ma 'ongs pa na phan 'dogs pa nye bar gnas so/ /gzhan yang slob dpon nye ba'i 'od kyis 'grel pa las/ 'dis ni bcom ldan 'das 'bras bu'i mtshan nyid brnyes pa khyad par du 'phags pa'i yon tan bstan te/ 'di ltar chos kyi dbyings shin tu rnam par dag pa brnyes pa'o/ /chos kyi dbyings de ni lam bsgoms pa'i 'bras bu yin no zhes 'byung ngo / /nam mkha'i khams kyi mtha' gtugs pa zhes bya bas ni yon tan nyi shu pa bstan te/ 'di ni mi zad pa'i yon tan zhes bya ba nyid do/ /slob dpon dbyig gnyen gyis mdzad pa'i 'grel pa las 'di ltar de bzhin gshegs pa'i ye shes ni zad pa med de/ nam mkha' dang mtshungs pa'i phyir ro zhes 'byung ngo / /slob dpon ngo bo nyid med kyis 'grel pa las ni ji ltar nam mkha' de mtha' med pa/ mu med pa/ zad pa med pa/ 'grib pa med pa/ skye ba med pa/ 'gag pa med pa/ 'gyur ba med pa/ dus thams cad du gzugs can thams cad la skabs dbye ba de bzhin du/ chos kyi sku yang rtag par sems can thams cad la phan pa dang bde ba mdzad pa nye bar gnas pa'i mtshan nyid de/ sems can gyi khams ji srid par 'gro ba thams cad kyi don mdzad pa rgyun chad med do zhes 'byung ste/ zhib tu de nyid las bshad pa bzhin no/ /phyi ma'i mtha'i mur thug pa zhes bya bas ni yon tan nyi shu rtsa gcig pa bstan te/ 'di ni mthar byon pa'i yon tan zhes bya ba nyid do/ /slob dpon dbyig gnyen gyis mdzad pa'i 'grel pa las/ de bzhin gshegs pa'i mkhyen pas phyi ma'i mtha' mu mthar byon pa la rgyun chad pa mi mnga' ba'o zhes 'byung ngo / /ngo bo nyid med kyis 'grel pa las/ yon tan 'di dag phyi ma'i mtha'i bar du rtag par rgyun mi 'chad pa'o/ /phyi ma'i mtha'i mur thug pa zhes pas ni de bzhin gshegs pa'i yon tan mi zad par bstan te/ gdul bar bya ba'i sems can gtan du mi zad pa'i phyir ro zhes 'byung ngo / /slob dpon nye ba'i 'od kyis 'grel pa las ni bshad pa phyi ma 'di gnyis gcig tu bsdus nas ston te/ de'i phyir 'grel pa de nyid las 'dis ni bcom ldan 'das kyi zad pa mi mnga' ba'i phyir byon pa khyad par du 'phags pa'i yon tan bstan te/ 'di lta ste/ ji ltar nam mkha' rtag par gtan du mi zad pa de bzhin du sangs rgyas rnams kyi dbyings las 'byung ba'i yon tan rnams kyang de bzhin te/ gtan du mi zad pa nyid kyi phyir dang / ji ltar phyi ma'i mtha' zad pa'i dus med pa de bzhin du sems can thams cad la phan 'dogs pa'i sbyor ba yang rgyun chad pa mi mnga' ba'i phyir ro zhes 'byung ngo / /gzhan yang slob dpon nye ba'i 'od kyis 'grel pa las/ 'dis ni bcom ldan 'das bdag dang gzhan la phan 'dogs pa'i yon tan rnam pa gnyis zad pa mi mnga' ba khyad du 'phags pa'i yon tan bstan te/ ji ltar nam mkha' bskal pa 'jig pa dang 'chags pa dag ni ngo bo nyid rtag par mi zad pa de bzhin du/ de bzhin gshegs pa'i yang dag pa'i yon tan thams cad kyang de bzhin de rtag par zad pa mi mnga' ba'o/ /ji ltar phyi ma'i mtha' zad pa med pa de bzhin du gzhan la phan 'dogs pa'i yon tan rnams kyang de bzhin te/ phyi ma'i mtha'i mur thug pa'i bar du sems can thams cad la phan 'dogs pa'i phan pa dang / bde ba'i dngos po rtag par mdzad pa'i phyir ro zhes 'byung ngo / /theg pa chen po bsdus pa'i 'grel pa mi mthun pa rnam pa gsum las/ yon tan rnams bstan pa yang don phal cher mthun te/ gong du bshad pa rnams ni slob dpon dbyig gnyen dang / ngo bo nyid med dang / sangs rgyas kyi sa'i 'grel pa dang sbyar nas bstan pa yin te/ 'chad par 'dod pa rnams kyis 'phral la blang ba dang dor ba ci dgar byos shig/ // bam po brgyad pa/ de nyan thos chen po'i dge 'dun tshad med pa zhes bya ba la sogs pas ni lnga pa gsung rab nyan pa'i 'khor bstan pa zhes bya ba ston te/ rnam pa drug las ni drug pa 'khor phun sum tshogs pa'o/ /'di yang rnam pa gnyis su dbye ste/ nyan thos kyi 'khor bstan pa dang / byang chub sems dpa'i 'khor bstan pa'o/ /'khor rnam pa 'di gnyis kyang sngar sgo rnam pa bzhis rnam par phye nas/ de'i 'og tu tshig gi don bshad par bya'o/ /de la sgo rnam pa bzhi ni yod pa dang med pa rnam par 'byed pa dang / snga phyi'i rnam par bshad pa dang / re zhig pa dang / gtan du ba bstan pa dang / 'khor gzhan yod pa dang / med pa bstan pa'o/ /de la yod pa dang med pa rnam par 'byed pa ni mu rnam pa bzhi yod de/ dang po ni mdo sde la sogs pa las dman pa kho na smos la/ chen po smos pa ma yin pa ste/ 'phags pa rdo rje gcod pa dang / lung ring po la sogs pa las bshad pa lta bu'o/ /gnyis pa ni chen po kho na smos la dman pa mi smos pa ste/ 'phags pa sangs rgyas phal po che dang / tshul brgya lnga bcu pa'i mdo la sogs pa lta bu'o/ /gsum pa ni che chung gnyis ka smos pa ste/ 'phags pa dam pa'i chos pad+ma dkar po'i mdo dang / dri ma med par grags pas bstan pa'i mdo la sogs pa lta bu'o/ /bzhi pa ni che chung gnyi ga mi smos pa ste/ 'phags pa phreng ldan ma'i mdo la sogs pa lta bu'o/ /gal te mu rnam pa bzhi yod na/ shes rab kyi pha rol tu phyin pa'i 'grel pa las byung ba ji ltar brda sprod cing bshad par bya ste/ de las nyan thos kyi sde snod las ni nyan thos kho na smos so/ /byang chub sems dpa'i sde snod las ni nyan thos dang byang chub sems dpa'i 'khor gnyi ga tshang bar smos pa yin no zhes 'byung ngo zhe na/ 'di la bshad pa rnam pa gnyis yod de/ kha cig ni yang dag pa'i don du na shes rab kyi pha rol tu phyin pa'i 'grel pa las bshad pa kho na bzhin te/ mu bzhi smos pa ni mdo sde sdud pa dag gi mos pa tha dad pa'i phyir ro zhe'o/ /kha cig ni yang dag pa'i don du na mu bzhi tshang bar smos pa nyid yin te/ shes rab kyi pha rol tu phyin pa'i 'grel pa las/ sde snod gnyis kyi mchog dang dman pa tha dad par bstan pa'i phyir/ re zhig mu gnyis bstan pa yin te/ sngon brgyud pa'i bshad pa las/ yang dag par yod pa dang / med pa'i phyir dang / yang na rgyas pa dang bsdus pa'i phyir ro zhe'o/ /de la snga phyi'i rnam par bshad pa yang nges pa med de/ mdo sde kha cig las sngar chen po smos la/ de'i 'og tu dman pa smos pa yod de 'phags pa snyigs ma lnga bstan pa'i mdo lta bu'o/ /kha cig las ni sngar dman pa smos la/ de'i 'og tu chen po smos pa yang yod de/ mdo sde 'di nyid la sogs pa lta bu'o/ /gal te de lta na ci'i phyir sangs rgyas kyi sa'i 'grel pa dang / shes rab kyi pha rol tu phyin pa'i 'grel pa las/ nyan thos sngar smos pa bshad ce na/ shes rab kyi pha rol tu phyin pa'i 'grel pa las 'di skad du/ sangs rgyas kyi chos ni rnam pa gnyis te/ shin tu gsang ba dang / bstan par bya ba'o zhes bshad pa lta bu ste/ bstan par bya ba'i sgo nas sngar nyan thos smos pa yin te/ 'di ltar de dag nyon mongs pa spangs pas lus pa med pa'i phyir ro/ /shin tu gsang ba'i sgo nas ni byang chub sems dpa' sngar smos pa yin te/ mi skye ba'i chos la bzod pa thob nas nyon mongs pa spangs pa'i phyir ro/ /de nas mdo sde rnam pa gnyis so so nas don re re'i dbang du mdzad pas phan tshun 'gal ba med do/ /nyan thos sngar smos pa de yang sangs rgyas kyi sa'i 'grel pa las/ don rnam pa brgyad kyi phyir ro zhes bshad de/ theg pa chen po la the tshom za ba dag gi the tshom rab tu bsal ba'i phyir dang / rigs ma nges pa'i byang chub sems dpa' rnams nges pa'i dang ba rab tu bskyed par dran pa'i phyir dang / yongs su dag pa'i nyan thos chen po rnams bdag cag gi lus ni btsun pa yin no snyam pa'i nga rgyal spang bar bya ba'i phyir dang / gzhan yang nyan thos rnams rtag par de bzhin gshegs pa'i zham ring ba byed pa'i phyir dang / cha byad mtshungs pa'i phyir dang / nang gi 'khor yin pa'i phyir dang / byang chub sems dpa' rnams nyan thos kyi 'khor la gus pa bskyed pa'i phyir dang / gzhan dag kyang nyan thos kyi 'khor rnams la rab tu dang ba bskyed pa'i phyir ro zhes 'byung ngo / /shes rab kyi pha rol tu phyin pa'i 'grel pa las ni rnam grangs kyis ston te/ de'i phyir de las gal te yas bgrang na ni sngar byang chub sems dpa' smos par rigs so/ /gal te mas bgrang na ni sngar dge bsnyen ma smos pa'i rigs na/ ci'i phyir sngar nyan thos kyi 'khor rnam pa bzhi bstan pa'i 'og tu byang chub sems dpa' smos she na/ smras pa byang chub sems dpa' shes pa che mod kyi/ sangs rgyas kyis de'i 'og tu gsungs te/ 'di ltar nyon mongs pa da dung ma zad pas de'i phyir 'og tu smos so/ /dgra bcom pa rnams shes pa chung yang nyon mongs pa zad pas de'i phyir gong du smos so/ /gzhan yang byang chub sems dpa' ni thabs kyi stobs kyis 'gro ba lnga po dag tu 'dod pa lnga nyams su len cing sems can 'dren par byed la/ gal te dgra bcom pas de ltar byas na lha dang mi rnams the tshom skye zhing ya mtshan du 'dzin pas/ de'i phyir 'og tu bstan pa yin no zhes 'byung ste/ zhib tu de nyid las bshad pa bzhin no/ /de la re zhig pa dang / gtan du ba bstan pa ni mdo sde 'di yang sngar gong du bshad pa bzhin du yang dag pa'i don du na gnas gnyis su gsungs pa yin te/ zhing yongs su dag pa dang / zhing yongs su ma dag pa'o/ /mdo sde 'di gal te zhing yongs su dag par gsungs pa yin na ni/ byang chub sems dpa' rnams ni gtan du ba yin la/ theg pa gnyis ni re zhig pa yin te/ de'i phyir rnal 'byor spyod pa'i sa las/ sems can ji lta bu dag zhing yongs su dag par skye bar mi 'gyur ro zhe na/ so so'i skye bo dang theg pa gnyis dang / sa'i mdun rol gyi byang chub sems dpa' rnams so zhes bshad pas de'i phyir theg pa gnyis ni sprul pa yin pas/ gtan du ba ma yin no/ /gal te zhing yongs su ma dag par gsungs pa yin na ni theg pa gnyis ni gtan du ba yin la/ byang chub sems dpa' dag ni re zhig pa yin te/ 'gyur ba'i lus len pas mthong bar mi nus pa'i phyir dang / sa bdun pa man chad dngos po can len pa'i phyir dang yang dag pa'i lus kyi don dang ldan pas nyes pa med pa'i phyir te/ shes rab kyi pha rol tu phyin pa'i 'grel pa las sa bdun pa man chad da dung srin bu dang bcas pa'i lus dang sha'i lus ma spangs pa yin no zhes bshad do/ /de la 'khor gzhan yod pa dang / med pa bstan pa ni gal te zhing yongs su ma dag pa'i dbang du byas nas ni yang dag pa'i klu la sogs pa yang yod de/ de'i phyir sangs rgyas kyi sa'i 'grel pa las/ 'khor 'dus pa der 'khor gzhan yang yod mod kyi/ sdud pa po rnams kyis mdor bsdus nas rnam pa gnyis bstan pa ni de dag mchog tu gyur pa'i phyir te/ 'og nas mdo la ji skad du lha dang mi dang lha ma yin la sogs pa'i 'jig rten yi rangs te/ bcom ldan 'das kyis gsungs pa la mngon par bstod do zhes gsungs pa lta bu zhes 'byung ngo / /gal te zhing yongs su dag par bzhugs pa yin na ni/ sprul pa'i klu la sogs pa yod de/ de'i phyir sangs rgyas kyi sa'i 'grel pa las sprul pa yin na yang nyes pa med de/ chos bshad pa'i dkyil 'khor rab tu brgyan pa'i phyir ro/ /yang na sangs rgyas kyi sprul pa 'am/ byang chub sems dpa' dag gi sprul pa yin no zhes 'byung ste/ slob dpon dbyig gnyen dang ngo bo nyid med kyis mdzad pa theg pa chen po bsdus pa'i 'grel pa las kyang 'di dang mthun par bshad do/ /de la tshig gi don rnam par bshad pa yang rnam pa gnyis su dbye ste/ nyan thos kyi 'khor bstan pa dang / byang chub sems dpa'i 'khor bstan pa'o/ /nyan thos kyi 'khor bstan pa la yang rnam pa gsum du dbye ste/ dang po ni grangs smos shing rnam pa rnam par 'byed pa'o/ /gnyis pa ni thams cad kyang zhes bya ba man chad kyis yon tan rnams rgya cher rnam par bshad pa'o/ /gsum pa ni de bzhin gshegs pa'i bka' zhes bya ba man chad kyis bka' bzhin byed pa bstan pa ste/ 'di ni grangs smos shing rnam par 'byed pa'o/ /'di ltar 'khor rnam pa gnyis las/ byang chub sems dpa' las tha dad pa dbye ba'i phyir nyan thos zhes bya ba gsungs so/ /'di yang rnam pa lngas bstan te/ thabs cig tu bzhugs pa rnam par 'byed pa dang / tshad med pa rnam par bshad pa dang / chen po rnam par bshad pa dang / nyan thos kyi don bstan pa dang / dge 'dun gyi don bstan pa'o/ /de la thabs cig ces bya ba ni 'khor dang bdag nyid mngon sum du gyur pa'i phyir de dag dang lhan cig pa'i don to/ /shes rab kyi pha rol tu phyin pa'i le'u chen po las ni dge 'dun chen po dang lhan cig ces gsungs so/ /shes rab kyi pha rol tu phyin pa'i 'grel pa las/ gnas gcig pa dang / dus gcig pa dang / sems gcig tu gyur pa'am/ yang na lta ba gcig pa dang / lam gcig pa dang / rnam par grol ba gcig tu gyur pa ni lhan cig pa zhes bya'o zhes 'byung ste/ mdo sde 'di las thabs cig ces gsungs pa dang don gcig go/ /de la tshad med pa zhes bya ba ni slob dpon nye ba'i 'od kyis 'grel pa las/ de'i grangs shin tu mang ste/ bgrang bar dka' ba'i phyir tshad med pa zhes bya'o zhes 'byung ngo / /de la chen po zhes bya ba ni shes rab kyi pha rol tu phyin pa'i 'grel pa las/ don rnam pa gsum gyi phyir te/ che ba dang mang ba dang mchog tu gyur pa'o/ /mang po'i nang na gtso bor gyur pa'i phyir dang / sgrib pa rnams spangs pa'i phyir dang / rgyal po la sogs pas shin tu bkur ba'i phyir che ba zhes bya'o/ /grangs shin tu mang ba'i phyir mang ba zhes bya'o/ /mu stegs can dgu bcu rtsa drug gi smra ba rnams 'jig pa'i phyir mchog tu gyur pa'o zhes 'byung ngo / /sangs rgyas kyi sa'i 'grel pa las ni rnam pa bzhir bstan te/ dbang po rno ba dang / mi slob pa dang / ma nges pa dang / 'khor mang po'o zhes bshad de/ de'i phyir 'grel pa de nyid las thams cad kyang dbang po shin tu rno ba pha rol tu phyin pa'i rigs can gyi nyan thos yin pa'i phyir chen po zhes bya'o/ /gzhan yang mi slob pa'i 'bras bu'i gnas skabs la gnas pa'i phyir chen po zhes bya'o/ /yang dag pa'i don du na thams cad kyang ma nges pa'i rigs can gyi nyan thos yin pas/ 'bras bu chung ngu thob nas byang chub chen por gzhol ba'i phyir chen po zhes bya'o/ /yang na 'khor grangs mang ba'i phyir chen po zhes bya ste/ da ltar gyi 'khor mang po bzhin no zhes 'byung ngo / /slob dpon yang dag bden pas byas pa'i brjed byang las/ chen po zhes bya ba ni don rnam pa gsum yod do / /dang po ni grangs mang ba ste/ ji ltar dmag chen po zhes brjod pa lta bu grangs mang ba'i phyir chen po zhes bya'o/ /gnyis pa ni tshad che ba ste ji ltar rin po che zhes brjod pa ltar grangs mang ba'i phyir chen po zhes bya ba ma yin gyi dbyibs kyi tshad mtho zhing rgya che ba'i phyir chen po zhes brjod pa'o/ /gsum pa ni mchog tu gyur pas che ba ste/ rgyal po chen po zhes brjod pa lta bu grangs mang ba dang / dbyibs kyi tshad mtho zhing rgya che ba la bya ba ma yin gyi/ yon tan mchog tu gyur pa'i phyir chen po zhes bya'o/ /nyan thos rnams kyang de bzhin te grangs gcig kho na ma yin pa'i phyir de ni grangs chen po zhes bya'o/ /sangs rgyas kyi 'bras bu tshol bar sems gyur nas byang chub kyi lam bsgrub ste/ shin tu mtho zhing bla na med par gyur pa ni mchog tu che ba yin no/ /rgya che zhing gting med de dpag par mi nus pa ni tshad med pa zhes bya'o zhes bshad do/ /de la nyan thos zhes bya ba ni bstan bcos de kho na nyid grub pa bstan pa las/ chos thos pas go bar gyur pa'i phyir nyan thos zhes bya'o zhes 'byung ngo / /sangs rgyas kyi sa'i 'grel pa las/ sangs rgyas kyi gsung gi sgra thos pas 'phags pa'i lam la 'jug pa'i phyir nyan thos zhes bya'o zhes 'byung ngo / /gzhan yang rnal 'byor spyod pa'i sa las gzhan dag las yang dag pa'i chos kyi gsung gi sgra thos pa dang / gzhan dag yang dag pa'i chos kyi sgra thos par byed pa'i phyir nyan thos zhes bya'o zhes bshad do/ /nyan thos kyi sgra rgya cher bshad pa ni sangs rgyas kyi sa'i 'grel pa dang / gnas pa bcu'i bshad pa dang / mdo sde shes rab kyi pha rol tu phyin pa dang / 'dus pa chen po la sogs pa las 'byung ba bzhin du rig par bya'o/ /de la dge 'dun zhes bya ba ni saM g+ha'i sgra las drangs nas mthun pa'i 'khor zhes bya bar 'dren te/ don dang dngos po gnyis mthun par gyur pa'i phyir dge 'dun zhes bya'o/ /sangs rgyas kyi sa'i 'grel pa las thams cad kyang rab tu byung ba'i dge 'dun yin pa'i phyir dge 'dun zhes bya'o zhes bshad do/ /shes rab kyi pha rol tu phyin pa'i 'grel pa las ni/ dge slong mang po gcig tu 'dus nas mthun par gyur pa ni dge 'dun zhes bya'o zhes 'byung ste/ zhib tu de nyid las bshad pa bzhin no/ /thams cad kyang shin tu dul ba zhes bya ba la sogs pas ni gnyis pa yon tan rnams rgya cher bshad pa zhes bya ba bstan to/ /'di yang yon tan rnam pa bcu gsum yod pa nyid kyis sgo rnam pa bcu gsum du dbye ste/ 'dis ni dang po shin tu dul ba'i yon tan bstan to/ /'di yang sangs rgyas kyi sa'i 'grel pa las/ bshad pa rnam pa gsum yod de/ de'i phyir de nyid las thams cad kyang shin tu dul ba zhes bya ba ni/ kha cig na re slob pa dang bcas pa dag gis mthong bas spang bar bya ba'i nyon mongs pa'i gnas ngan len kun du brtags pa brgya rtsa bcu gnyis kyi rnam pa dang bral ba dmu rgod ma yin pa'i phyir rta cang shes bzhin pas na shin tu dul ba zhes bya'o zhe'o/ /kha cig ni mi slob pa dag gis mthong ba dang / bsgoms pas spang bar bya ba'i nyon mongs pa'i rnam pa brgya nyi shu rtsa brgyad dang bral bas ma dul ba ma yin pa'i phyir/ gser btso ma bzhin pas na dul ba zhes bya'o/ /yang dag pa'i don du kun kyang byang chub chen por yongs su bsngos pa'i rigs can dag yin pas thams cad kyang 'bras bu chen po la gzhol ba dang / de bzhin gshegs pa'i thugs ji lta ba bzhin du 'gyur zhing / glang po che cang shes bzhin pas na shin tu dul ba zhes bya ste/ shin tu dul ba rgya cher bshad pa ni shes rab kyi pha rol tu phyin pa'i 'grel pa las 'byung ba bzhin du rig par bya'o/ /sangs rgyas kyi sras zhes bya bas ni gnyis pa sangs rgyas kyi gdung gsob pa'i yon tan bstan to/ /sangs rgyas kyi sras zhes bya ba 'di yang rnam pa gsum gyis bstan te/ dang po ni nyan thos kyi dbang du mdzad nas sangs rgyas kyi sras zhes bshad de/ mdo sde 'di nyid dang / sangs rgyas kyi sa la sogs pa las gsungs pa nyid do/ /slob dpon nye ba'i 'od kyis 'grel pa las/ de bzhin gshegs pa'i lung gi stobs kyis 'phags pa'i lam las skyes pa'i phyir/ sangs rgyas kyi sras zhes bya ste/ ji skad du thams cad kyang bcom ldan 'das kyi gsung ngag las skyes pa ste/ yang dag pa'i chos las skyes pa'i phyir ro zhes bshad pa lta bu'o/ /kha cig ni thams cad kyang theg pa chen po la gzhol ba'i nyan thos yin pas/ de bzhin gshegs pa'i gdung 'tshob cing rgyun mi gcod pa'i phyir sangs rgyas kyi sras zhes bya'o zhes 'byung ngo / /gnyis pa ni byang chub sems dpa'i dbang du mdzad nas/ sangs rgyas kyi sras zhes bshad de/ theg pa chen po bsdus pa'i 'grel pa mi mthun pa rnam pa gcig las/ ji skad du sangs rgyas kyi sras zhes bya ba yang don rnam pa lnga yod de/ bla na med pa'i theg pa la shin tu mos pas ni sa bon byed do/ /shes rab kyis ni mi byed do/ /ting nge 'dzin gyis ni mngal byed do/ /snying rje chen pos ni ma ma byed do/ /sangs rgyas rnams kyis ni yab mdzad do zhes bshad pa lta bu'o/ /slob dpon yang dag bden pa'i 'grel pa las/ sems can gyi lus mngon par grub pa las gdon mi za bar dngos po lnga phun sum tshogs par bya dgos te/ pha dang / sa bon dang / ma dang / mngal gyi gnas dang / ma ma'o/ /pha ni bu skyed pa'i gzhi yin pas sngar bstan pa'o/ /pha'i khu chu las lus kyi sa bon du 'gyur ba'i phyir gnyis pa sa bon bstan to/ /ma med na 'dzin par mi nus pas lus mi 'grub pa'i phyir gsum pa ma bstan to / /mas yongs su bzung yang gal te mngal gyis ma bkris na lus mi 'grub ste/ mngal ni lus gnas pa'i rten yin pas bzhi pa mngal gyi gnas bstan to/ /btsas nas ma mas ma gsos na lus mi 'grub pa'i phyir lnga pa ma ma bstan to/ /sangs rgyas kyi sras zhes bya ba yang de bzhin du rkyen khyad par can rnam pa lnga dgos te/ dang po ni yab mchog tu gyur pa ste/ sangs rgyas bcom ldan 'das rnams yab mdzad pa'i phyir ro/ /gnyis pa ni sa bon mchog tu gyur pa ste/ 'di ltar byang chub kyi sems kyis sa bon byed pa'o/ /gsum pa ni skyed pa'i yum mchog tu gyur pa ste/ shes rab kyis bskyed pa'i ma byed pa'i phyir ro/ / bzhi pa ni mngal gyi snying po mchog tu gyur pa ste/ bsod nams dang ye shes kyis yongs su bzung nas mngal gyi snying po byed pa'i phyir ro/ /lnga pa ni ma ma mchog tu gyur pa ste/ snying rje chen po rnams kyis gso zhing ma ma byed pa'i phyir ro zhes 'byung ngo / /gsum pa ni byang chub sems dpa' dang / nyan thos gnyi ga'i dbang du mdzad nas/ sangs rgyas kyi sras zhes bshad de/ shes rab kyi pha rol tu phyin pa'i 'grel pa las/ ji skad du sangs rgyas kyi sras ni rnam pa lnga ste/ thams cad kyang gsung las skyes pa/ chos las skyes pa/ 'di lta ste/ rgyun tu zhugs pa nas dgra bcom pa'i bar dang / yang dag pa'i gnas skabs su zhugs pa'i byang chub sems dpa'o/ /rang sangs rgyas ni sangs rgyas kyi chos kyi nang du rgyu rkyen btab pa yin mod kyi/ sangs rgyas mi 'byung ba'i tshe rang nyid kyis lam rtogs pa'i phyir/ gsung las skyes pa zhes mi brjod de/ rgyu'i rkyen ring du gyur pa'i phyir ro zhes 'byung ste/ sangs rgyas kyi sras kyi don rgya cher bshad pa ni bstan bcos mdo sde rgyan dang / sangs rgyas kyi rang bzhin bstan pa dang theg pa chen po bsdus pa dang / gnas pa bcu bshad pa dang / shes rab kyi pha rol tu phyin pa'i 'grel pa dang / rnal 'byor spyod pa'i sa las 'byung ste/ mangs kyis dogs nas 'dir ma bstan to/ /sems shin tu rnam par grol ba shes rab shin tu rnam par grol ba zhes bya bas ni gsum pa sems dang shes rab rnam par grol ba'i yon tan bstan te/ mdo las ji skad du 'di ltar 'dod chags dang bral ba'i phyir sems rnam par grol ba thob par 'gyur ro/ /ma rig pa dang bral ba'i phyir shes rab rnam par grol ba thob par 'gyur ro zhes gsungs pa lta bu'o/ / mdo'i tshig 'di yang so so nas bshad pa mi mthun te/ bye brag tu smra ba dag ni 'di skad du sems ni rang bzhin gyis rnam par dag pa ste/ glo bur gyis nyon mongs pas ma gos pa'i phyir ro/ /rnam par ma dag pa zhes bshad de/ yang dag pa'i don du na sems dang shes rab rang bzhin gyis rnam par grol ba yin no zhe'o/ /thams cad yod par smra ba dag ni sems 'dod chags dang bral ba'i tshe sems dang mtshungs par ldan pa'i mos pa 'dod chags las rnam par grol ba'i phyir mos pa de nyid las sems rnam par grol ba zhes bshad do/ / shes rab ma rig pa dang bral ba'i tshe shes rab dang mtshungs par ldan pa'i mos pa ma rig pa las rnam par grol ba'i phyir mos pa de nyid shes rab rnam par grol ba zhes bshad de/ 'dus ma byas dang mya ngan las 'das pa la rnam par grol ba zhes bya ba ni ma yin no zhe'o/ / mdo sde pa dag ni bstan bcos de kho na nyid grub pa'i nang nas 'du shes bcu bshad pa las 'byung ba bzhin du ma rig pa dang bral ba'i phyir/ shes rab rnam par grol ba thob par 'gyur ro/ /sred pa dang bral ba'i phyir sems rnam par grol ba thob par 'gyur ro zhe'o/ /'dir theg pa chen po'i bstan bcos dang sbyar na/ sangs rgyas kyi sa'i 'grel pa las/ sems shin tu rnam par grol ba ni khams gsum pa'i 'dod chags las rnam par grol ba'i phyir te/ ji skad du 'dod chags dang bral ba'i sems rnam par grol ba 'thob par 'gyur ro zhes bshad pa lta bu'o/ /shes rab shin tu rnam par grol ba ni nyon mongs pa can gyi ma rig pa thams cad las rnam par grol ba'i phyir te/ ji skad du ma rig pa 'gags pas shes rab rnam par grol ba 'thob par 'gyur ro zhes bshad pa lta bu'o zhes 'byung ste/ de la bshad pa lta bu'i zhes bya ba ni mdo las gsungs pa dag la snyegs so/ /sangs rgyas kyi sa'i 'grel pa'i dgongs pa ni sems dang shes rab kyi dbang gis 'dod chags dang bral ba dang / gti mug dang bral ba 'thob par 'gyur la/ des 'thob pa'i 'dus ma byas ni rnam par grol ba'i ngo bo nyid byed pas rigs pa dang 'gal ba med de/ bstan bcos las rnam par ma phye ba'i phyir ro zhes bstan par 'gyur ro/ /shes rab kyi pha rol tu phyin pa'i 'grel pa las/ nyon mongs pa rnams ni sred par gtogs pa dang / lta bar gtogs pa yin te sred par gtogs pa'i nyon mongs pa rnams kyis ni sems la sgrib par byed do/ /lta bar gtogs pa'i nyon mongs pa rnams kyis ni shes rab la sgrib par byed do/ /'di ltar sred pa dang bral ba'i phyir sred par gtogs pa'i nyon mongs pa rnams dang bral nas/ ma rig pa dang bral ba'i phyir lta bar gtogs pa'i nyon mongs pa rnams dang bral bas shes rab rnam par grol ba 'thob par 'gyur ro zhes 'byung ste/ rgya cher de nyid las bshad pa bzhin no/ /'phags pa mya ngan las 'das pa chen po'i mdo las/ 'dod chags dang zhe sdang dang / gti mug gi sems gtan 'gags pa'i phyir/ sems shin tu rnam par grol bar 'gyur ro/ /chos thams cad la thogs pa med pas shes rab shin tu rnam par grol bar 'gyur ro zhes gsungs so/ /shes rab kyi pha rol tu phyin pa'i 'grel pa las/ shin tu zhes bya ba ni bzang po zhes bya bar bsgyur te/ bzang po'i rnam par grol ba de yang rnam pa gsum ste/ dang po ni mu stegs can gyi 'dod chags dang bral ba'i phyir gang zag las rnam par dbye ste/ de dag gnas gcig pa dang / lam gcig pas sems rnam par grol ba yin gyi thams cad las ma yin pa'i phyir bzang po zhes mi bya'o/ /gnyis pa ni chos 'di pa'i slob pa dang bcas pa'i gang zag las rnam par dbye ba ste/ de dag rnam par grol bas thob pa yin mod kyi/ nyon mongs pa'i lhag ma lus pa'i phyir rnam par grol ba ma yin no/ /gsum pa ni mi slob pa las ldog pa'i chos can gyi dgra bcom pa dang dus kyi rnam par grol ba thob pa las rnam par dbye ba ste/ de dag bzang po rnam par grol ba ma yin pas/ de'i phyir dgra bcom pa dbang po rnon po'i dbang du mdzad nas/ bzang po rnam par grol zhes gsungs pa yin no zhes 'byung ngo / /tshul khrims shin tu rnam par dag pa zhes bya bas ni bzhi pa tshul khrims shin tu rnam par dag pa'i yon tan bstan te/ 'di yang slob dpon nye ba'i 'od kyis rnam grangs gsum gyis rnam par bshad de dang po ni yan lag drug la brten nas so/ /gnyis pa ni zag pa med pa la brten nas so/ /gsum pa ni theg pa chen po la brten nas so/ /de la yan lag drug la brten nas bshad pa ni sangs rgyas kyi sa'i 'grel pa las/ tshul khrims shin tu rnam par dag pa ni mdo las ji skad du/ yan lag drug dang ldan pa ni tshul khrims rnam par dag pa zhes bya ste/ tshul khrims rnam par dag pa la gnas pa dang / so sor thar pa'i sdom pas bdag nyid bsdams pa dang / cho ga phun sum tshogs pa dang / spyod yul phun sum tshogs pa dang / kha na ma tho ba shin tu phra ba dag la yang 'jigs par lta ba dang / bslab pa'i gzhi rnams yang dag par blangs te slob pa'o zhes gsungs pa lta bu'o/ /de la zag pa med pa la brten pa ni sangs rgyas kyi sa'i 'grel pa las yang na thams cad kyis zag pa med pa'i tshul khrims thob pa'i phyir shin tu rnam par dag pa zhes 'byung ngo / /de la theg pa chen po la brten nas bshad pa ni sangs rgyas kyi sa'i 'grel pa las/ yang dag pa'i don du ni mi slob pa'i sa la gnas pa dag theg pa chen por yongs su bsngos pas rang gi phyogs kyi tshul khrims rnam par dag pa dang / byang chub sems dpa'i tshul khrims bsgrub pa'i phyir/ shin tu rnam par dag pa zhes bya'o zhes 'byung ngo / /chos kyi bde ba la gzhol zhing yongs su tshol ba zhes bya bas ni lnga pa chos kyi bde ba gnyer ba'i yon tan bstan to/ /'di yang slob dpon nye ba'i 'od kyis rnam pa gsum du bshad de/ de'i phyir sangs rgyas kyi sa'i 'grel pa las/ chos kyi bde ba la gzhol zhing yongs su tshol ba zhes bya ba ni chos yang dag par yongs su tshol ba na bde ba chen po 'di lta ste/ sangs rgyas kyi byang chub la gzhol bar byed kyi/ don gzhan mi tshol ba'o/ /yang na chos tshol ba'i tshe gzhan bde bar bya ba'i phyir te klan ka tshol ba'i bsam pa med pa dang / spyod lam ngan pa yongs su spangs pa'o/ /yang dag pa'i don du na nyan thos chen po 'di dag rtse gcig tu chos kyi bde ba tshol bar byed pa grags pa dang rnyed pa dang / bkur sti tshol ba ni ma yin pa'o zhes 'byung ngo / / mang du thos pa thos pa 'dzin pa thos pa bsags pa zhes bya bas ni drug pa thos pa'i shes rab phun sum tshogs pa'i yon tan bstan te/ 'di ltar tshig gsum po de dag kyang thos pa'i shes rab kyis dang po dang bar ma dang gnas skabs khyad par can dang / khyad par can ma yin pa'i bye brag gi dbang du mdzad nas tshig rnam pa gsum rnam par 'byed pa yin no/ /thams cad yod par smra ba'i gzhung dang sbyar na mang du thos pa rjes su dran pa dang / yongs su 'dzin pa dang / byang bar byed pa ni tshig gsum po bye brag yin no zhes zer te/ de'i phyir bstan bcos rnam grangs bsdu ba las/ mang du thos pa thos pa 'dzin pa thos pa bsags pa zhes bya ba ni 'di ltar thog mar dge ba/ bar du dge ba/ tha mar dge ba/ tshig 'bru dang don bzang po/ ma 'dres pa/ yongs su rdzogs pa/ yongs su dag pa/ yongs su byang ba/ tshangs par spyod pa'i chos bshad pa na/ chos de dag mang du thos pa phun sum tshogs pa dang / thos pa 'dzin pa dang / bstan pa'i tshig byang bar byed pa'o zhes 'byung ngo / /rnal 'byor spyod pa'i sa las thog mar dge ba ni 'di lta ste/ nyan pa na rab tu dga' ba bskyed pa'i phyir ro/ / bar du dge ba ni 'di lta ste/ bar du sbyor ba na tshegs chung ngus mtha' gnyis rnam par spangs nas/ dbu ma'i lam du 'gro ba'i phyir ro/ /tha mar dge ba ni 'di lta ste/ shin tu mthar phyin nas dri ma rnams dang bral ba'i phyir dang / thams cad las 'dod chags dang bral ba dang / shin tu 'dod chags dang bral ba'i mthar phyin par gyur pa'i phyir ro/ /don bzang po ni phan pa dang bde ba rab tu 'dren pa'i phyir ro/ /tshig 'bru bzang po ni 'di lta ste/ ming gi tshogs la sogs pa legs par sbyar ba dang tshig tu 'don pa zur phyin pa'i phyir ro/ / ma 'dres pa ni 'di lta ste/ 'di las phyi rol pa rnams dang thun mong du ma gyur pa'i phyir ro/ /yongs su rdzogs pa ni tshad med pa'i phyir dang / thams cad kyi mchog tu gyur pa'i phyir ro/ /yongs su dag pa ni 'di lta ste/ rang bzhin gyis rnam par grol ba'i phyir ro/ /yongs su byang ba ni 'di lta ste/ rnam par grol ba mtshams sbyor ba'i phyir ro/ /tshangs par spyod pa 'di lta ste/ 'phags pa'i lam yan lag brgyad de/ lam 'di ni ma 'dres pa'i rnam pa la sogs pa mtshan nyid bzang po rnam pa bzhis bstan to zhes 'byung ngo / /'di ltar theg pa chen po'i gzhung dang sbyar na/ sangs rgyas kyi sa'i 'grel pa las mdo sde tshad ma rnams kyi dang po dang / bar ma dang / tha ma'i yan lag rnams thams cad thos shing gzung ba'i phyir mang du thos pa zhes bya'o/ /thos pa'i don gyi rjes su thams cad dran zhing mi brjed pa'i phyir thos pa 'dzin pa zhes bya'o/ /tshig 'bru dang don goms par bya ste/ brtan por gnas par byed pas/ de'i phyir thos pa la sogs pas zhes bya'o zhes 'byung ngo / /legs par bsam pa sems pa legs par smra ba brjod pa/ legs par bya ba'i las byed pa zhes bya bas ni/ bdun pa las rnam pa gsum ye shes kyi rjes su 'brang ba'i yon tan bstan to/ /slob dpon nye ba'i 'od kyis 'grel pa las/ 'jig rten pa byis pa dag ni nyes par bsam pa sems pa nyes par smra ba brjod pa/ nyes par brjod pa'i las byed pa dag yin gyi 'jig rten las 'das pa'i 'phags pa dag ni de dag gi chos las 'das shing de dag dang mi mthun pas/ de'i phyir legs par bsam pa sems pa/ legs par smra ba brjod pa/ legs par brjod pa'i las byed pa/ las rnam pa gsum rnam par dag pa ye shes kyi rjes su 'brang ba zhes gsungs so zhes 'byung ngo / /gzhan yang rnal 'byor spyod pa'i sa las/ ji ltar mkhas pa'i rtags dang ldan pa yin zhe na/ 'di lta ste las kyi mtshan nyid kyis byis pa yin par shes la/ las kyi mtshan nyid kyis mkhas pa yin par shes te / de yang ji lta bu zhe na/ 'di lta ste/ byis pa rnams nyes par bsam pa sems pa dang / nyes par smra ba brjod pa dang / nyes par byed pa'i las byed pa yin gyi/ mkhas pa ni legs par bsam pa sems pa dang / legs par smra ba brjod pa dang / legs par bya ba'i las byed pa yin te/ de ltar mkhas pa'i rtags dang ldan pa yin no zhes 'byung ste/ de la legs par sems pa zhes bya ba la sogs pa ni yid dang ngag dang lus kyi las yongs su dag pa rnam pa gsum dang go rims bzhin no/ /nyes par bsam pa zhes bya ba la sogs pa ni nyon mongs pa can gyi las rnam pa gsum ste/ de'i phyir rnal 'byor spyod pa'i sa las nyes par bsam pa sems pa dang / nyes par smra ba brjod pa dang / nyes par bya ba'i las byed pa ji tsam du mngon sum du spyod pa'i lus dang / ngag dang yid kyi las rnams ni thams cad kyang rnam par ma dag pa yin no zhes bshad do/ /shes rab myur ba/ shes rab mgyogs pa/ shes rab rno ba/ nges par 'byung ba'i shes rab can/ nges par rtogs pa'i shes rab can/ shes rab che ba/ shes rab yangs pa/ shes rab zab pa/ shes rab mnyam pa med pa/ shes rab rin po cher yongs su grub pa zhes bya ba ni brgyad pa shes rab khyad par can gyi yon tan bstan te/ shes rab 'di dag la yang bshad pa rnam pa gsum yod de/ kha cig ni mdo sde 'di las shes rab rnam pa brgyad kyi ming ston te/ mdo las shes rab rin po che yongs su grub pa zhes bya bas gong ma'i shes rab brgyad po dag shes rab rin po che yin par sdud pa yin gyi/ logs shig tu shes rab rnam par gzhag pa ma yin no/ /de'i phyir rnal 'byor spyod pa'i sa las/ shes rab rin po che zhes 'byung gi rin po che'i shes rab ces mi brjod do zhe'o/ /kha cig ni shes rab rnam pa dgu ste/ de'i phyir shes rab kyi pha rol tu phyin pa nyi khri lnga stong pa dang / shes rab kyi pha rol tu phyin pa'i 'grel pa las/ rin po che'i shes rab ces 'byung ba'i phyir/ shes rab gzhan yin par shes par bya'o zhe'o / /kha cig ni mdo sde 'di la shes rab bcu bstan te/ shes rab shin tu zab pas bsnan na'o/ /de'i phyir sangs rgyas kyi sa'i mdo dpe mi mthun pa rnam pa gcig las/ shes rab shin tu zab pa zhes 'byung ste/ gzhan dag gis gting dpag dka' ba'i phyir ro/ /'di ni re zhig rnam pa dgu dang sbyar nas rnam par 'byed de/ de'i phyir sangs rgyas kyi sa'i 'grel pa las/ de bzhin gshegs pas gsungs pa'i chos 'dul ba'i don la myur du 'jug pa'i phyir shes rab myur ba zhes bya'o/ /de nyid kyi don mang po la 'jug pa'i phyir/ shes rab mgyogs pa zhes bya ste/ mang po la 'gro ba ni shes rab mgyogs pa zhes bya ba'i phyir ro/ /don phra ba la 'jug pa'i phyir shes rab rno ba zhes bya'o/ /'khor ba las nges par 'byung ba'i shes rab thob pa'i phyir/ nges par 'byung ba'i shes rab can zhes bya'o/ /nges par 'byung ba'i shes rab 'di nyid kyis mya ngan las 'da' ba rtogs pa'i rgyu byed pas de'i phyir nges par rtogs pa'i shes rab can zhes bya ste/ mchog tu gtan la 'bebs pa'i phyir nges par rtogs pa zhes bya ste/ de ni mya ngan las 'das pa'o/ /shes rab 'dis de rtogs pa'i rgyu byed pa'i phyir/ de la brten nas ming rnam par gzhag pa yin no/ /dris pa rnams rnam par gtan la 'bebs pa la yongs su gtugs pa med pa'i phyir shes rab che ba zhes bya'o/ /zab cing rgya che ba dang shin tu rtogs pa'i phyir shes rab yangs pa zhes bya'o/ /nyan thos dbang po rtul po rnams las shes rab khyad par du 'phags pa'i phyir/ shes rab mnyam pa med pa zhes bya'o/ /shes rab 'dis ni don gyi mchog thob par byed pas/ shes rab rin po che zhes bya ste/ nyan thos rnams shes rab rin po che de lta bu dag dang ldan pa'i phyir shes rab ni rin po che yongs su grub pa zhes gsungs pa yin no zhes 'byung ngo / /de la don gyi mchog ces bya ba ni mya ngan las 'das pa la bya'o/ /rnal 'byor spyod pa'i sa dang sbyar na de dag cung zad mi mthun te/ de'i phyir de nyid las rkyen rab tu shes pa'i phyir shes rab myur ba zhes bya'o/ /thogs pa med pa'i phyir shes rab mgyogs pa zhes bya'o/ /ji tsam pa dang ji lta ba bzhin du rab tu shes par bya ba'i phyir shes rab rno ba zhes bya'o/ /nges par 'byung ba'i chos rnams dang / 'jig rten pa'i 'dod chags dang bral ba yang rab tu shes pa'i phyir nges par 'byung ba'i shes rab can zhes bya'o/ /'jig rten las 'das pa'i 'dod chags dang bral ba rab tu shes pa'i phyir nges par rtogs pa'i shes rab can zhes bya'o/ /shes rab de nyid dus yun ring po nas yongs su goms par bya ba'i phyir shes rab che ba zhes bya'o/ /shes rab de nyid tshad med pa dang mtha' yas pa'i spyod yul gyi phyir shes rab yangs pa zhes bya'o/ /gzhan dag gi shes rab kyis mtshungs pa med pa'i phyir mnyam pa med pa'i shes rab can zhes bya'o/ /dbang po thams cad kyi nang na shes rab gtso bor gyur pa'i phyir te/ ji ltar yid bzhin gyi nor bus 'khor los sgyur ba'i rgyal po'i rin po che bai DUr+ya 'od kyis snang bar byed pa bzhin du gyur pa'i phyir dang / de dang mtshungs par ldan pa'i phyir shes rab rin po che yongs su grub pa zhes bya'o zhes 'byung ngo / /shes rab kyi pha rol tu phyin pa'i 'grel pa las ni shes rab bcu gcig bstan to/ /'phags pa 'dus pa chen po'i mdo las ni shes rab bcu gnyis gsungs so/ /rnal 'byor spyod pa'i sa las ni shes rab bcu drug ces bya ste/ mangs kyis dogs pas 'dir ma brjod do/ /rig pa gsum dang ldan pa zhes bya ba ni dgu pa rig pa gsum dang ldan pa'i yon tan bstan te/ mdo dag las ji skad du/ rig pa ni rnam pa gsum yod de/ sngon gyi gnas rjes su dran pa shes pa mngon sum du byed pa'i mngon par shes pa'i rig pa dang / 'chi 'pho dang skye ba shes pa mngon sum du byed pa mngon par shes pa'i rig pa dang / zag pa zad pa shes pa mngon sum du byed pa'i mngon par shes pa'i rig pa zhes gsungs so/ /rig pa gsum po 'di yang thams cad yod par smra ba dag mdzod kyi bstan bcos las 'byung ba bzhin du sgo rnam pa bzhis rnam par 'byed de/ dang po ngo bo nyid bstan pa ste/ shes rab kyis ngo bo nyid byed do/ /de yang go rims bzhin du mngon par shes pa drug las lnga pa sngon gyi gnas rjes su dran pa dang / gnyis pa lha'i mig dang / drug pa zag pa zad pa gsum gyi ngo bo nyid do/ /gnyis pa ni gsum rnam par gzhag pa'i dgos pa bstan pa ste go rims bzhin du sngon dang ma 'ongs pa dang / da ltar gyi mtha'i kun tu gti mug pa rnam pa gsum gyi gnyen po'i phyir ro/ /gsum pa ni yang dag pa dang / brtags pa rnam par 'byed pa ste/ zag pa zad pa'i shes pa'i rig pa ni/ brtags pa dang / yang dag pa'i gnyi gar btags te/ zag pa med par rtogs pa'i phyir ro/ /gzhan gnyis pa ni btags pa yin te/ gcig tu zag pa dang bcas pa'i phyir ro/ /zag pa dang bcas pa dang / zag pa med pa'i shes pa dag ni kun kyang zag pa zad pa zhes bya ste/ gnyi ga yang zag pa zad pa'i lus las skye ba'i phyir ro/ /yang dag pa ni zag pa med pa zhes bya'o/ / btags pa ni zag pa dang bcas pa zhes bya ste/ mchog dang dman pa phan tshun ltos pa'i phyir/ yang dag pa dang / btags pa bstan pa yin no/ /bzhi pa ni slob pa dang / mi slob pa rnam par 'byed pa ste/ gcig tu mi slob par gtogs pa yin te/ slob pa dag ni mun pa dang bcas pa'i phyir ro/ /bye brag tu bshad pa chen po las rnam pa gsum rnam par gzhag pa'i dgos pa bstan pa ni mdzod kyi bstan bcos las bshad pa dang cung zad tha dad de/ de'i phyir de nyid las mngon par shes pa drug las ci'i phyir rnam pa gsum rig pa zhes bstan ce na/ smras pa rdzu 'phrul gyi yul shes pa'i mngon par shes pa ni/ bzo'i gnas rnams la 'jug go/ /lha'i rna ba'i shes pa'i mngon par shes pa ni gcig tu sgra yongs su 'dzin pa'o/ /gzhan gyi sems shes pa'i mngon par shes pa ni gcig tu rang gi mtshan nyid 'dzin te / khyad par can gyi nus pa med pa'i phyir rig pa rnam par mi gzhag go/ /mngon par shes pa phyi ma gsum gyi khyad par can gyi nus pa dang ldan pa'i phyir rig pa rnam par gzhag go/ /de la nus pa khyad par can 'di lta ste/ 'khor ba las yongs su skyo ba'i rjes su mthun pa dang / thams cad kyang yon tan khyad par can rab tu 'dren pa dang / thams cad kyang mya ngan las 'das pa'i rjes su gzhol ba'o/ /ci'i phyir phyi ma gsum po dag nus pa khyad par can dang ldan zhe na/ bzhi pa sngon gyi gnas rjes su dran pa'i shes pa mngon sum du byed pa'i mngon par shes pa ni sngon gyi mtha'i dngos po rnams mthong bas shin tu skyo ba skye bar 'gyur ro/ /lnga pa ni 'chi 'pho dang skye ba shes pa mngon sum du byed pa'i mngon par shes pa ni/ phyi ma'i mtha'i dngos po rnams mthong bas shin tu skyo ba skye bar 'gyur ro/ /drug pa zag pa zad pa shes pa mngon sum du byed pa'i mngon par shes pa de ltar skyo bar gyur nas/ mya ngan las 'das pa la shin tu mos par 'gyur ro zhes 'byung ste/ rgya cher bshad pa ni de nyid las 'byung ba bzhin no/ /lung sna tshogs dang / lung bar ma dang / bstan bcos yang dag par rig pa dang / bye brag tu bshad pa chen po las rig pa gsum gyi mtshan nyid rgya cher 'chad de/ mangs kyis dogs nas 'dir ma bstan to/ /'dir theg pa chen po'i gzhung dang sbyar na/ sangs rgyas kyi sa'i 'grel pa dang / rnal 'byor spyod pa'i sa las kyang phal cher mdzod kyi bstan bcos las bstan pa dang mthun par bshad de/ de'i phyir sangs rgyas kyi sa'i 'grel pa las mi slob pa dbang po rno bas thob pa'i mngon par shes pa gsum po dag ni kun nas nyon mongs pa dang / kun nas nyon mongs pa ma yin pa mtha' gsum gyi kun tu gti mug pa rab tu sel ba'i phyir/ rig pa gsum yod par gsungs so/ /kha cig rig pa 'di ni 'di ltar shes rab kyis ngo bo nyid byed de/ shes rab kyis mun pa sel bas rig pa zhes bshad do zhe'o/ /kha cig ni gti mug med pa'i dge ba'i rtsa bas ngo bo nyid byed de/ ma rig pa bzlog par nus pa'i phyir ro zhes 'byung ngo / /theg pa chen po dag ni thams cad zag pa med pa'o zhes bshad kyang 'gal ba med do zhes ston te/ rjes la thob pa'i ye shes zag pa med pa yin no zhes 'dod pa'i phyir ro/ /gzhan yang rnal 'byor spyod pa'i sa las mngon par shes pa drug las snga ma gsum ni mngon par shes pa yin gyi/ rig pa ni ma yin no/ /phyi ma gsum ni mngon par shes pa yang yin no/ /rig pa yang yin te/ 'di ltar dus gsum la rmongs pa'i gnyen por gyur pa'i phyir ro zhes 'byung ngo / /shes rab kyi pha rol tu phyin pa'i 'grel pa las/ sngon gyi gnas rjes su dran pa dang / lha'i mig dang / zag pa zad pa ni rig pa gsum zhes bya'o zhes 'byung ngo / /mngon par shes pa dang rig pa la bye brag ci yod ce na/ 'das pa'i sngon gyi gnas kyi dngos po shes pa ni mngon par shes pa zhes bya'o/ /'das pa'i rgyu dang rkyen dang mngon par 'du byed par 'du byed pa'i las shes pa ni rig pa'i shes rab ces bya'o/ /'dir shi 'phos nas der skye bar shes pa ni lha'i mig 'thob pa'i mngon par shes pa zhes bya'o/ /mngon par 'du byed pa dang / rgyu dang rkyen gyi mtha' phrad cing mi stor bar shes pa ni rig pa'i shes rab ces bya'o/ /nyon mongs pa'i mtshams sbyor ba yang skye ba dang mi skye ba shes pa ni zag pa zad pa'i mngon par shes pa yin no/ /zag pa zad nas yang mi skye bar shes pa ni rig pa zhes bya ste/ de lta bu'i rig pa gsum po dag ni dgra bcom pa chen po dang / rang sangs rgyas dag gis 'thob bo/ /mthong ba'i chos la bde bar gnas pa thams cad 'thob pa zhes bya bas ni bcu pa tshe 'di la bde bar gnas pa'i yon tan bstan te/ 'di ltar nyan thos rnams bsam gtan bzhi'i dngos gzhi'i ting nge 'dzin thob pas/ tshe 'di la lus dang sems bde bar gnas pa'i phyir/ mthong ba'i chos la bde bar gnas pa zhes bya'o/ /bde bar gnas pa 'di yang / thams cad yod par smra ba'i gzhung bye brag tu bshad pa chen po las/ bcom ldan 'das ci'i phyir bsam gtan bzhi pa bde bar gnas pa zhes gsungs / smras pa bsam gtan kho na la bde ba rnam pa gnyis yod pa'i phyir/ bde bar gnas pa zhes bya ste/ tshor ba'i bde ba dang / shin tu sbyangs pa'i bde ba'o/ /bsam gtan snga ma gsum po dag ni bde ba gnyis dang ldan la/ bsam gtan bzhi po dag ni tshor ba'i bde ba med kyang / shin tu sbyangs pa'i mthu dang las rgya che ste/ snga ma dag gi bde ba gnyis las khyad par du gyur pa yin no/ /nyer bsdogs dang gzugs med pa dag la shin tu sbyangs pa yod kyang / rgya mi che ba'i phyir bde ba zhes mi bya'o/ /gzhan yang dngos gzhi'i bsam gtan mngon sum du gyur pa na/ 'byung ba chen po rnams 'phel zhing brtas pas/ lus thams cad du khyad par skyes nas/ lus dang bar byed pa'i phyir bde bar gnas pa zhes bya'o/ /nyer bsdogs kyi ting nge 'dzin la sogs pa mngon sum du gyur pa na 'byung ba chen po rnams 'phel zhing brtas pas/ sems 'ba' zhig tu khyad par skye'i/ shin tu dang bar byed pa ma yin pa'i phyir bde bar gnas pa ma yin no zhes 'byung ste/ rgya cher ni bstan bcos de nyid las rnam grangs rnam pa dgus bshad pa bzhin du rig par bya'o/ /'dir theg pa chen po'i gzhung dang sbyar na/ phal cher bye brag tu bshad pa chen po las 'byung ba dag dang mthun te/ de'i phyir sangs rgyas kyi sa'i 'grel pa las/ mthong ba'i chos la bde bar gnas pa zhes bya ba ni/ yongs su nyams par mi 'gyur ba'i bsam gtan thob pa'i phyir ro zhes 'byung ba bzhin no/ /gzhan yang bstan bcos rnam par bshad pa las/ bsam gtan rnams kho na mthong ba'i chos la bde bar gnas pa'i ngo bo nyid yin te/ lus dang sems rnam pa gnyis kyi shin tu sbyangs pa dang ldan pa'i phyir ro/ /gzugs med pa'i ting nge 'dzin dag ma yin te/ lus shin tu sbyangs pa med pa'i phyir ro zhes 'byung ngo / /gzhan yang rnal 'byor spyod pa'i sa las/ bsam gtan de dag ni bde ba la gnas pa zhes kyang bya ste/ 'di ltar de dag tu bde ba yongs su rdzogs par myong ba'i phyir ro/ /de ci'i phyir zhe na/ bsam gtan rnams la brten nas dga' ba'i bde ba dang / shin tu sbyangs pa'i bde ba dang / btang snyoms kyi bde ba lus dang sems kyis myong ba'i phyir ro/ /gzugs med pa rnams la ni de lta bu'i myong ba med pas/ de'i phyir de la bde bar gnas pa zhes ma gsungs so zhes 'byung ste/ zhib tu de nyid las bshad pa bzhin no/ /ci'i phyir ma 'ongs pa'i chos la bde ba zhes bya ba ma gsungs she na/ mdzod kyi bstan bcos las ma 'ongs pa'i chos la bde bar gnas pa zhes ma gsungs pa ni 'di ltar ma 'ongs pa'i chos kyi bde ba nges par gnas pa ma yin pa'i phyir dang / yang na log pa 'am/ yang na gong mar skye ba 'am/ yang na mya ngan las 'das nas mi gnas pa'i phyir ro zhes 'byung ste/ bstan bcos yang dag par rig pa dang / gzhung rab tu bstan pa las kyang 'di dang mthun par bshad do/ /rgya cher rnam par 'byed pa ni bstan bcos de kho na nyid grub pa'i nang nas/ ting nge 'dzin bsgom pa rnam pa bzhi bstan pa'i le'u las rnam grangs rnam pa drug gis ma 'ongs pa'i chos la mi gnas pa ston te/ mangs kyis dogs nas 'dir ma brjod do/ /bsod nams kyi zhing yongs su sbyong ba chen po zhes bya ba ni bcu gcig pa bsod nams kyi zhing yongs su dag pa chen po'i yon tan bstan te/ 'di ltar nyan thos de dag thams cad kyang mi slob pa dag yin pa'i phyir/ bsod nams kyi zhing yongs su sbyong ba chen po zhes bya'o/ /bstan bcos de kho na nyid grub pa'i nang nas/ bsod nams kyi zhing gi le'u las 'phags pa rnams 'dod chags dang zhe sdang la sogs pa'i nyon mongs pa rnams spangs nas zad pa'i phyir bsod nams kyi zhing zhes bya ste/ ji ltar yug po rnams ma bsal na/ lo thog bzang po la gnod par 'gyur ba bzhin no/ /de lta bas na 'dod chags spangs pa'i gang zag la yon phul ba rnam par smin pa'i phan pa che ba'i phyir/ bsod nams kyi zhing zhes bya'o zhes 'byung ste/ zhib tu de nyid las bshad pa bzhin no/ /gzhan yang sangs rgyas kyi sa'i 'grel pa las bsod nams kyi zhing yongs su sbyong ba chen po zhes bya ba ni nyon mongs pa rnams gtan du spangs nas/ ji ltar 'jig rten pa'i zhing gshin pa bzhin du yun ring por 'bras bu rgya che ba skye zhing 'phel bar 'gyur ba'i phyir ro zhes 'byung ngo / /spyod lam rab tu zhi ba phun sum tshogs pa zhes bya ba ni bcu gnyis pa spyod lam rab tu zhi ba'i yon tan bstan te/ slob dpon nye ba'i 'od kyis 'grel pa las/ spyod lam thams cad du shes bzhin du gnas pa'i phyir ro zhes 'byung ngo / /rnal 'byor spyod pa'i sa las dbang po rnams rab tu zhi ba dang / rgod pa med pa dang / mi mthong ba dang / yan lag dang nying lag mi g.yo bas gtam zer ba ni spyod lam rab tu zhi ba dang / spyod lam nyams pa med pa'i phyir phun sum tshogs pa zhes bya'o zhes 'byung ngo / /bzod pa dang des pa chen po phun sum tshogs pas nyams pa med pa zhes bya bas ni bcu gsum pa bzod pa dang des pa'i yon tan bstan te/ sangs rgyas kyi sa'i 'grel pa las/ sdug bsngal bzod pa nyid kyis 'grogs na bde ba'i phyir ro zhes 'byung ngo / /rnal 'byor spyod pa'i sa las/ bzod pa ni 'di lta ste/ dgra bo rnams la lan ldon pa'i bsam pa med pa'o/ /des pa ni 'di lta ste/ sems la khong khro ba med pas gzhan la rnam par mi 'tshe ba'i phyir ro zhes bshad do/ / gzhan yang rnal 'byor spyod pa'i sa las bzod pa gang zhe na/ de'i mtshan nyid ni rnam pa gsum du blta bar bya ste/ mi 'khrugs pa dang / phyir gnod pa mi byed pa dang / khon gyi bsam pa mi 'dzin pa'o/ /des pa gang zhe na/ 'di lta ste/ gzhan gyis gnod pa byas pa la lus dang / ngag dang yid kyi rjes su bsrung ba'i ngang tshul can nyid yin te/ de la bzod pa ni gzhan gyis gnod pa byas pa bzod par byed do/ /des pas ni gzhan dag la gnod pa mi byed do zhes 'byung ste/ zhib tu de nyid las bshad pa bzhin no/ /de bzhin gshegs pa'i bka' la shin tu zhugs pa zhes bya bas ni gsum pa bka' bzhin du byed pa zhes bya ba bstan to/ /slob dpon nye ba'i 'od kyis 'grel pa las/ gdul bar bya ba rnams yongs su rdzogs pa'i phyir dang / de bzhin gshegs pa'i gsung rab ni sems can rnams la 'khor ba'i sdug bsngal las bzla ba'i phyir gsungs pa yin la/ nyan thos de dag ni mi slob pa'i gnas su phyin nas 'khor ba las 'das pa'i phyir/ de bzhin gshegs pa'i bka' la shin tu zhugs pa yin no zhes 'byung ngo / /dris lan dag gi rgya cher rnam par 'byed pa ni de nyid las bshad pa bzhin no/ / //bam po dgu pa/ gzhan yang byang chub sems dpa' sems dpa' chen po'i tshogs dpag tu med pa sangs rgyas kyi zhing tha dad pa nas 'dus pa zhes bya ba la sogs pas ni gnyis pa byang chub sems dpa'i 'khor bstan to/ /'di yang rnam pa gsum du dbye ste/ grangs smos shing rnam par 'byed pa dang / thams cad kyang zhes bya ba man chad kyis byang chub sems dpa'i yon tan brjod pa dang / 'di lta ste 'di ltar zhes bya ba man chad gtso bo'i dbang du mdzad nas ming smos pa ste 'di ni dang po'o/ /'di ltar 'khor rnam pa gnyis las nyan thos kyi 'khor bshad zin pa'i phyir/ 'dir byang chub sems dpa'i 'khor bstan pa yin no/ /dang po 'di yang rnam pa gsum ste/ dpag tu med pa rnam par bshad pa dang / byang chub sems dpa' la sogs pa rnam par bshad pa dang / 'ongs pa'i gnas bstan pa'o/ /de la dpag tu med pa zhes bya ba ni grangs shin tu mang ste/ tshad dpag par dka' ba'i phyir ro/ /bstan bcos sangs rgyas kyi rang bzhin bstan pa las/ de'i grangs mtha' med de/ gang gA'i klung gi bye ma'i grangs las 'das pa'i phyir tshad med pa zhes bya'o zhes 'byung ngo / /de la byang chub sems dpa' zhes bya ba la sogs pa yang / theg pa chen po bsdus pa'i 'grel pa slob dpon ngo bo nyid med kyis byas pa las/ byang chub sems dpa' zhes bya ba ni byang chub dmigs pa'i yul du gyur pa'i phyir/ byang chub sems dpa' zhes bya ste/ 'di'i yul las ming du btags pas/ mi gtsang ba bsgom pa zhes bya ba la sogs pa lta bu'o/ /yang na de'i sems byang chub yongs su tshol bas sran dang bcas shing nus pa dang ldan pa'i phyir/ byang chub sems dpa' zhes bya'o zhes 'byung ngo / /slob dpon nye ba'i 'od kyis ni rnam pa gsum du bshad de/ de'i phyir sangs rgyas kyi sa'i 'grel pa las/ de la byang chub sems dpa' sems dpa' chen po zhes bya bas ni 'di ltar sems can rnams byang chub yongs su tshol ba'i phyir te/ 'di ni theg pa chen po gsum char bsdu ba yin pas chen po nyi tshe bstan pa'i phyir/ phyi ma sems dpa' chen po zhes smos so/ /gzhan yang byang chub la dmigs pa'i sems yul du gyur pa'i phyir byang chub sems dpa' zhes bya ste/ bdag dang gzhan la phan 'dogs pa'i smon lam chen pos byang chub chen po yongs su tshol bas sems can la phan 'dogs pa'i phyir ro/ /gzhan yang satwa zhes bya ba ni dpa' bo'i don yin te/ brtson 'grus kyi rtul bas byang chub chen po yongs su gnyer ba'i phyir/ byang chub sems dpa' zhes bya ste/ 'di ni gnas skabs kun dang sbyar ro/ /'di ni sa la gnas pa'i byang chub sems dpa' chen po rnams la bya bar bstan pa'i phyir/ phyi ma sems dpa' chen po zhes bya ba bstan to/ /byang chub sems dpa'i bsngags pa brjod pa'i gnas skabs 'dir byang chub sems dpa' rnams che ba'i dngos po gsum dang ldan pas sems dpa' chen po zhes bya'o/ /dang po ni grangs che ba ste tshad med pa'i phyir ro/ /gnyis pa ni yon tan che ba ste/ 'di ltar theg pa chen po la gnas shing theg pa chen po la sogs pa la rnam par rgyu ba'i phyir ro/ /gsum pa ni las che ba ste/ 'di ltar sems can thams cad kyi gnod pa thams cad rab tu zhi bar byed pa'i phyir te/ sems can la phan 'dogs pa ni byang chub sems dpa'i las yin pas so zhes 'byung ngo / /gzhan yang sa bcu pa'i 'grel pa las/ chen po rnam pa gsum dang ldan pa'i phyir/ sems dpa' chen po zhes bya ste / smon lam chen po dang / spyod pa chen po dang / sems can la phan 'dogs pa chen po zhes 'byung ngo / /de la 'ongs pa'i gnas skabs bstan pa ni sangs rgyas kyi sa'i 'grel pa las/ sangs rgyas kyi zhing tha dad pa nas 'dus pa zhes bya ba ni 'di ltar phyogs bcu'i sangs rgyas kyi zhing rnam pa sna tshogs nas chos nyan pa'i phyir gcig tu 'dus pa yin no/ /mi mjed kyi 'jig rten gyi khams nas 'dus pa'i byang chub sems dpa' yang yod mod kyi/ yang dag par sdud pa po dag gis phyogs gzhan nas 'ongs pa'i byang chub sems dpa' 'dus par bstan pa ni le lo dang nga rgyal gyi dbang gis chos nyan du mi 'gro ba de'i gnyen por bya ba'i phyir te/ byang chub sems dpa' de dag phyogs de dang de dag nas bdag nyid chos don du gnyer ba'i phyir 'ongs pa yin mod kyi/ gzhan gyi ngo mi chod pa ma yin te/ de dag ni thams cad mthu chen po dang ldan la / mthu chen po dang ldan pa dag kyang zhing khams gzhan shin tu thag ring po nas 'ongs nas/ gzhan dag ji ltar nye bar 'gro bar mi bya ba lta smos kyang ci dgos snyam pa'o/ /sngar gong du nyan pa'i 'khor gzhan nas 'dus par ma bstan pa ni gnas 'di nyid du 'dus pa'i phyir ro/ /'dir phyogs gzhan nas gcig tu 'dus par gsungs pas/ de'i phyir gnas 'di nyid kyi byang chub sems dpa' yang yod mod kyi/ mdor bsdus pas ma bshad par rig par bya'o zhes 'byung ngo / /thams cad kyang theg pa chen po la gnas pa zhes bya ba la sogs pa ni gnyis pa byang chub sems dpa'i yon tan brjod pa zhes bya ba ston te/ sangs rgyas kyi sa'i 'grel pa las/ ci'i phyir byang chub sems dpa' rnams kyi yon tan brjod ce na/ sems can dag gi ma gus pa dang / nga rgyal gyi sems yongs su spang bar bya ba'i phyir ro/ /kha cig na re nyan thos kyi 'khor rnams ni yun ring po nas tshangs par spyod pa yin pas/ byang chub sems dpa' rnams kyis btsun par bya zhing phyag 'tshal bar rigs so zhe'o/ / gzhan yang sems can rnams rab tu dang ba bskyed pa'i phyir te/ byang chub sems dpa' yang yon tan 'di lta bu dang ldan na/ de bzhin gshegs pa lta smos kyang ci dgos snyam pa'o zhes 'byung ngo / /yon tan gyi tshig bcu mdo las gsungs pa de yang slob dpon nye ba'i 'od kyis rnam pa bzhir bshad de/ chen po rnam pa bcu dang / sa bcu dang / pha rol tu phyin pa bcu dang / smon lam bcu dang sbyar nas rnam par bshad pa'o/ /'di ni chen po bcu dang sbyar nas bstan pa ste/ mdo'i tshig bcu po nyid kyis don rnam pa bcur dbye'o/ /de la thams cad kyang theg pa chen po la gnas pa zhes pas ni brtson 'grus chen po'i bsngags pa brjod pa bstan te/ slob dpon nye ba'i 'od kyis 'grel pa las/ brtson 'grus kyi stobs kyis theg pa chen po la gnas shing / sems can 'khor ba las 'dren pa dang / bdag nyid bla na med pa'i byang chub la gzhol ba'o zhes 'byung ste/ de la theg pa chen po zhes bya ba ni sems can yongs su smin par byed pa dang / byang chub yongs su tshol ba la theg pa chen po zhes bya bas so/ /kha cig na re chos kyi ngo bo nyid kyi de bzhin nyid la theg pa chen po zhes bya'o zhe'o/ / 'dir ni 'phags pa rdo rje gcod pa'i 'grel pa las/ rgya che ba la sogs pa'i sems zhes bshad pa de la theg pa chen po la gnas pa zhes bstan to/ /theg pa chen po'i chos bgrod pa zhes bya ba ni gnyis pa rgyu chen po'i bsngags pa brjod pa bstan te/ slob dpon nye ba'i 'od kyis 'grel pa las/ sa bcu la sogs pa nyan pa dang / bsam pa dang / bsgom pa la sogs pa'i rim gyis bgrod pa zhes 'byung ngo / /de la sa bcu la sogs pa la zhes bya ba la sogs pa zhes bya bas ni mnyam pa nyid du byang chub pa dang / gya nom par mngon par sangs rgyas pa bsdu ste/ 'di nyid theg pa chen po yang yin/ bgrod par bya ba'i gnas kyang yin no/ /thos pa dang / bsam pa dang / bsgom pa la sogs pa zhes bya ba ni/ 'jig rten pa'i shes rab rnam pa gsum mo/ /sogs pa zhes bya ba ni zag pa med pa'i bsgom pa'i shes rab bsdu ste/ 'dis ni shes rab rnam pa gsum sa bcu'i yul rim gyis 'byung zhing sangs rgyas kyi sa bskyed pa'i phyir/ rgyu chen po zhes bya'o zhes bstan to/ /yang na theg pa chen po'i chos nyid kyi de bzhin nyid de/ sa bcu'i byang chub sems dpa' rnams shes rab rnam pa gsum dang / de dang mtshungs par ldan pa'i chos kyis rim gyis de bzhin nyid kyi ting nge 'dzin gyi yul khong du chud nas sangs rgyas kyi sa bskyed pa'i phyir/ rgyu chen po zhes bya'o/ /sems can thams cad la sems mnyam pa zhes bya bas ni gsum pa dmigs pa chen po bsngags pa brjod pa bstan te/ slob dpon nye ba'i 'od kyi 'grel pa las/ sems can thams cad la bdag dang gzhan mnyam pa nyid thob pas byams pa la sogs pas mnyam par sbyor ba'i phyir ro zhes 'byung ngo / /yon tan 'di ni byams pa la sogs pas ngo bo nyid byed de/ sems can thams cad ni dmigs par bya ba'i yul yin pas dmigs pa chen po zhes bya'o/ /yon tan snga ma ni ye shes kyi ngo bo nyid byed pa'i phyir/ de bzhin nyid kyi yul byed la/ 'di ni byams pa la sogs pa ngo bo nyid byed pa'i phyir/ sems can yul du gyur pa yin te/ 'di nyid 'phags pa rdo rje gcod pa'i 'grel pa las bstan pa'i ngo bo nyid gcig pa'i snying rje chen po la bya ba'i phyir mnyam par sbyor ba zhes bya'o/ /rnam par rtog pa dang / rnam par mi rtog pa'i rnam par rtog pa rnam pa sna tshogs dang bral ba zhes bya bas ni bzhi pa dus chen po bstan te/ nye ba'i 'od kyis 'grel pa las/ dus thams cad la skad cig ma gcig bzhin du mnyam par 'jug pa ste/ de la bskal pa ni rnam par rtog pa zhes bya'o/ /bskal pa dang bskal pa ma yin pa thams cad la rnam par rtog pa spangs pa'i phyir dang / de ltar bskal pa dang bskal pa ma yin par mi rtog pa'i phyir/ dus yun ring por spyod pa spyad pa la skyo ba med par gyur pa yin no zhes 'byung ngo / /rgya gar skad du kalpa zhes bya ba bsgyur na rnam par rtog pa zhes zer te/ 'dus byas kyi chos ni dus dang bskal pas bsdus te/ cha tha dad pas rnam par rtog pa zhes bya'o/ /'dus ma byas kyi chos ni dus dang / bskal pas bsdus pa ma yin te/ dus dang bskal pa'i cha tha dad pa med pa'i phyir rnam par mi rtog pa zhes bya ste/ 'di gnyis ni yongs su shes par bya ba'i yul lo/ /rnam par rtog pa rnam pa sna tshogs zhes bya ba ni rnam par rtog pa'i sems yin te/ snga ma'i rnam par rtog pa dang / rnam par mi rtog pa'i yul la dmigs pa'i phyir rnam par rtog pa rnam pa sna tshogs zhes bya'o/ /de ni 'di skad du gal te rnam par rtog pa'i sems kyis 'di ni dus dang bskal pa 'di ni dus dang bskal pa ma yin pa'o zhes dus dang bskal pa ring ba lta na/ rnal 'byor bsgom pa la yongs su skyo bar 'gyur te/ byang chub sems dpa' la sogs pa ni 'di ltar bskal pa dang / bskal pa ma yin pa thams cad la rnam par rtog pa spangs te/ bskal pa dang bskal pa ma yin par mi rtog pa'i phyir/ dus yun ring po rnam par bsgom pa la yongs su skyo ba med de/ bskal pa grangs med pa gsum dang / dus yun ring po thams cad la yang skad cig ma gcig bzhin du mnyam par 'jug go zhes bstan te/ ji ltar skyes bu gnyid ma log pa dag nyin mtshan la yun ring por rnam par rtog gi/ gal te gnyid log par gyur na/ nyin mtshan la rnam par rtog pa med pa'i phyir/ nam ring yang nam ring bar mi tshor ba bzhin du bskal pa grangs med par lon pa dag kyang de bzhin te/ de'i phyir theg pa chen po bsdus pa'i 'grel pa slob dpon ngo bo nyid med kyis byas pa las/ bskal pa grangs med pa nas/ gdod bla na med pa byang chub kyi 'bras bu 'grub pas/ dus shin tu yun ring na ci'i phyir myur du 'grub ces bshad/ de ni de lta ma yin te/ dus dang bskal pa yun ring po dag ni rnam par rtog pa kho na'i phyir te/ tshigs su bcad pa las ji skad du/ /gnyid log pa na lo 'das snyam/ /sad na de ni yud tsam ste/ /de phyir dus ni dpag med kyang / /se gol gtogs pa gcig gis bsdus/ /zhes bstan pa lta bu'o/ /gzhan yang de bzhin gshegs pa rnams brtson 'grus shin tu sbyangs pa'i phyir/ dus shin tu yun ring yang yun ring por ma lon no snyam du dgongs te/ ji skad du/ byis pa spyod pa dus thung yang / / le lo sems la ring lon snyam/ /sangs rgyas bskal pa dpag med du/ /brtson 'grus mdzad kyang skad cig dgongs/ /zhes bshad pa lta bu'o zhes 'byung ngo / /'di yang de bzhin te de'i phyir dus thams cad la skad cig ma bzhin du zhes bya ba 'di smos pa yin no/ /bdud phyir rgol ba thams cad bcom pa zhes bya bas ni lnga pa 'dod pa med pa chen po nyid bstan te/ slob dpon nye ba'i 'od kyis 'grel pa las/ yongs su gzung ba thams cad gtong ba'i phyir/ bdud phyir rgol ba bcom par nus pa yin no zhes 'byung ngo / /'di ltar yongs su gzung ba 'dod pa'i yon tan lnga gtong ba'i phyir/ nyon mongs pa'i bdud phyir rgol ba bcom pa'o/ /yang na 'dis ni gzhi byas nas bdud bzhi char dang bral ba'o/ /gzhan yang slob dpon nye ba'i 'od kyis 'grel pa las/ ji skad du byang chub sems dpa' yongs su gzung ba thams cad mi brtan pa nyid du rig nas sems kyis mngon par zhen cing don du gnyer bar byed na/ bdud phyir rgol ba bcom pa yin no zhes bshad pa lta bu'o zhes 'byung ste/ 'di ni slob dpon nye ba'i 'od kyis mdo sde khungs su bstan nas sgrub pa'o/ /mdo sde shes rab kyi pha rol tu phyin pa las kyang ji skad du/ chos rnams kun ni mi rtag pas/ /rtag tu sems dpa' dran gzhag na/ /zhes gsungs te/ 'dis ni stong pa nyid du mthong ba la mngon rtags su 'dzin pa med pas/ bdud bcom pa'i don mthar phyin pa yin no zhes bstan to/ /'di la brten nas 'phags pa mya ngan las 'das pa chen po'i mdo las/ bdud rnam pa brgyad rnam par gzhag ste/ 'di lta ste/ 'dus byas kyi phyin ci log bzhi'i steng du/ 'dus ma byas kyi phyin ci log bzhi bsnan nas thams cad la bdud ces gsungs te/ theg pa chung ngu'i gzhung gis 'di la skyon du mi sgrub bo/ /yang na theg pa chen po ltar nyon mongs pa'i bdud kyis bsdus pa'i phyir/ 'phags pa'i gsung rab las/ mdor bsdus nas ma bstan to/ /bdud bzhi rgya cher bshad pa ni phun sum tshogs pa bco brgyad bstan pa'i skabs nas bstan pa bzhin no/ /nyan thos dang / rang sangs rgyas kyi yid la byed pa thams cad las ring du gyur pa zhes bya bas ni drug pa yid la byed pa chen po nyid bstan te/ slob dpon nye ba'i 'od kyis 'grel pa las/ 'di ni theg pa gnyis kyi yid la byed pa rgyangs bcad de spangs pa'o zhes bshad do/ /slob dpon dbyig gnyen dang / ngo bo nyid med kyis mdzad pa'i 'grel pa las kyang de bzhin du bshad do/ /theg pa chen po bsdus pa'i 'grel pa mi mthun pa rnam pa gcig las/ nyan thos dang rang sangs rgyas kyi yid la byed pa yongs su spangs pa'i phyir ro/ /theg pa gnyis kyi yid la byed pa ni 'di lta ste/ sdug bsngal la sogs pa la mi rtag pa la sogs pa'i nyes dmigs su goms par lta ba dang / mya ngan las 'das pa la zhi ba'i yon tan du goms par lta ba ste/ bsgom pa 'di ni rang gi lus la sred cing sems can la phan 'dogs pa'i bya ba spong ba'i phyir yang dgos pa'o zhes 'byung ngo / /chos rgya chen po'i ro'i dga' ba dang / bde ba brten pa zhes bya bas ni sdud pa nye bar ston pa chen po nyid bstan te/ slob dpon nye ba'i 'od kyis 'grel pa las/ theg pa chen po'i chos kyi dga' ba dang / bde ba nyid zas su gyur pa'o zhes 'byung ngo / /theg pa chen po bsdus pa'i 'grel pa rnam pa gcig las ni theg pa chen po gsung rab yan lag bcu gnyis ni chos rgya chen po zhes bya ste/ de bzhin nyid dang rnam par grol ba la sogs pa ni ro'i ngo bo nyid de/ de la dmigs te/ dga' ba dang / bde ba rnams skyes nas byang chub sems dpa'i yan lag lnga'i chos kyi sku gso zhing 'phel bar byed pa'o zhes 'byung ngo / /'jigs pa lnga las yang dag par 'das pa zhes bya bas ni brgyad pa yongs su dag pa chen po nyid bstan te/ slob dpon nye ba'i 'od kyis 'grel pa las/ las rnam pa gsum yongs su dag pas 'jigs pa rnams las nges par 'byung ba ste/ ngan 'gro'i 'jigs pa la sogs pa'i rgyu 'chal ba'i tshul khrims la sogs pa med pa'i phyir ro/ /'jigs pa lnga ni 'tsho ba med pa'i 'jigs pa dang / tshigs su bcad pa med pa'i 'jigs pa dang / 'chi ba'i 'jigs pa dang / ngan song gi 'jigs pa dang / 'khor gyi nang du bag tsha ba'i 'jigs pa ste/ 'jigs pa lnga po de dag ni lhag pa'i bsam pa rnam par dag pa'i sa thob pa na yongs su spang ngo zhes 'byung ngo / /'jigs pa lnga rgya cher bshad pa ni 'phags pa sa bcu pa'i 'grel pa dang / bstan bcos gnas pa bcus bshad pa dang / sangs rgyas kyi ngo bo nyid bstan pa dang / legs par tshul khrims bstan pa'i mdo dang / bstan bcos yang dag pa'i rigs pa'i rjes su mthun pa dang / bye brag tu bshad pa chen po dang / gzhan dag nas kyang bstan pa las 'byung ba bzhin du rig par bya'o/ /gcig tu phyir mi ldog pa'i sa bgrod par gyur pa zhes bya bas ni dgu pa rtogs pa chen po nyid bstan te/ slob dpon nye ba'i 'od kyis 'grel pa las/ thams cad mkhyen pa nyid du lung bstan pa'i sa thob pa na/ gcig tu phyir mi ldog pa nyid du 'gyur te/ snga ma'i sa bdun po dag la da dung mngon par 'du byed pa dang bcas par 'jug pas/ phyir mi ldog pa'i mngon par 'du byed pa med pa'i lam mi thob bo/ /de las gzhan pa'i sa la ni mngon par 'du byed pa med par rang gi ngang gis 'jug pa thob pas/ gcig tu bgrod par zhugs pa'i phyir/ gcig tu phyir mi ldog pa'i sa bgrod par gyur pa zhes gsungs pa yin no zhes 'byung ste/ de la sbyor ba dang bcas pa'i shes pa ni gcig tu zag pa dang bcas pas sa brgyad pa man chad mi spyod do/ /sa brgyad pa yan chad mngon par 'du byed pa thams cad dang / nyon mongs pa thams cad mngon du mi spyod pas phyir mi ldog pa'i sa zhes bya'o/ /phyir mi ldog pa de yang bstan bcos mdo sde rgyan las rnam pa gsum du bshad de/ de'i phyir de nyid las/ phyir mi ldog pa'i byang chub sems dpa'i phyogs kyang rnam pa gsum yod de/ dang po da dung yongs su ma rdzogs pa'i phyir mi ldog pa ni 'di lta ste/ mos pas spyod pa'i sa rnams so/ /gnyis pa yongs su rdzogs pa'i phyir mi ldog pa ni 'di lta ste/ sa dang po nas sa bdun pa'i bar rnams so/ / gsum pa shin tu yongs su rdzogs pa'i phyir mi ldog pa ni 'di lta ste/ sa brgyad pa yan chad do zhes 'byung ngo / /sems can thams cad kyi gnod pa thams cad rab tu zhi bar byed pa'i sa mngon sum du gyur pa zhes bya bas ni sa bcu pa las chen po nyid bstan te/ slob dpon nye ba'i 'od kyis 'grel pa las/ 'di ltar byang chub sems dpa' rnams sems can thams cad kyi phyi nang gi sdug bsngal gyi gnod pa dang / phongs pa rab tu zhi bar byed pa'i las mngon sum du gyur pa ste/ sa de ni snying rje chen po dang / byams pa chen po dang ldan pas/ de nyid kyis phyi nang gi nad la sogs pa'i sdug bsngal dang / phyi rol gyi dbul ba la sogs pa'i gnod pas gzir ba thams cad rab tu zhi bar byed pa'o/ /de gnyis kyis phal cher sems can gyi don dang / phan pa dang bde ba'i bya ba byed pa'i phyir de thob pa ni las chen po zhes bya'o zhes 'byung ngo / /gzhan yang slob dpon nye ba'i 'od kyis 'grel pa las/ gnod pa zhes bya ba ni yongs su blangs pa'i las sam 'bras bu thob pa gang yin pa'o zhes bshad do/ /theg pa chen po bsdus pa'i 'grel pa rnam pa gcig las ni khams gsum gyi sdug bsngal gyi bden pa ni gnod pa thams cad ces bya'o zhes 'byung ngo / / de yan chad ni chen po rnam pa bcu sbyar nas mdo'i tshig bcu bshad zin to/ /da ni gnyis pa sa bcu dang sbyar nas mdo'i tshig rnam par bshad de/ de'i phyir slob dpon nye ba'i 'od kyis 'grel pa las/ gzhan yang thams cad kyang theg pa chen po la gnas pa zhes bya ba ni 'di lta ste/ sa dang po la gnas nas chos kyi dbyings yang dag par kun tu khyab pa thob pa na dang po kho nar de kho na nyid yang dag par theg pa chen po'i chos thob pa'i phyir/ theg pa chen po la gnas pa zhes bya'o/ /theg pa chen po'i chos bgrod pa zhes bya ba ni 'di lta ste/ sa gnyis pa'i tshe/ byang chub sems dpa'i tshul khrims kyi phung po rnam pa gsum mngon par bsgrub pa'i phyir/ theg pa chen po'i spyod pa'i chos nyid tshul khrims kyi phung po rnam pa gsum yin no/ /sems can thams cad la sems mnyam pa zhes bya ba ni 'di lta ste/ sa gsum pas ting nge 'dzin khyad par can rnams thob pa na/ tshad med pa bzhi bskyed nas sems can rnams la mnyam par phan 'dogs pa'i phyir/ rnam par rtog pa la sogs pa dang bral ba zhes bya ba ni 'di lta ste/ sa bzhi pas byang chub kyi phyogs sum cu rtsa bdun gyi chos thob nas rnam par rtog pa dang / rnam par mi rtog pa'i rnam par rtog pa rnam pa sna tshogs dang bral ba ste/ de la rnam par rtog pa dang bral ba zhes bya ba ni/ mthong bas spang bar bya ba ste/ kun brtags pa'i 'jig tshogs la lta bas dang po pas spangs pa'o/ /rnam par mi rtog pa dang bral ba zhes bya ba ni bsgom pas spang ba ste/ lhan cig skyes pa'i 'jig tshogs la lta bas 'di pa spangs pa'o/ /rnam pa 'di gnyis dang mtshungs par ldan pa'i chos rnams ni/ rnam par rtog pa rnam pa sna tshogs zhes bya ste/ spyod pa dang shes pa tha dad pa'i phyir ro/ /'di snga phyi spangs pa yin mod kyi / zad pa'i mtha' la ltos nas spyir bstan pa yin te/ ji ltar bsam gtan bzhi la sdug bsngal ba dang / bde ba spangs so zhes bya ba dang / 'bras bu gsum pa 'og ma'i cha dang mthun pa rnam pa lnga spangs so zhes bshad pa lta bu'o/ /kha cig ni sa 'dir rnam par shes pa bdun pa la yod pa lhan cig skyes pa'i nyon mongs pa thams cad yongs su spangs so zhe'o/ /kha cig ni sa 'dir yid kyi rnam par shes pa la yod pa'i lhan cig skyes pa'i 'jig tshogs la lta ba thams cad yongs su spangs pa yin gyi/ nyon mongs pa can gyi yid ni ma yin te/ 'di ltar sa bdun pa man chad ni da dung nyon mongs pa phra mo'i mngon du spyod pa dang bcas pas/ gal te nyon mongs pa can gyi yid med na/ kun nas nyon mongs pa'i rten yang med par 'gyur la/ lnga pa dang yang mi 'dra ba'i rigs so/ /nyon mongs pa can gyi yid kyi nyon mongs pa phra mo gal te spangs zin na/ sa lnga pa dang / drug pa dang / bdun pa'i nyon mongs pa rags pa yang mngon du snang bar 'gyur ba mi rigs te/ 'o na ni rnal 'byor spyod pa'i sa dang / 'phags pa dgongs pa nges par 'grel pa'i mdo las bshad pa dag dang 'gal bar 'gyur ro/ /gzhan yang ji ltar theg pa 'og ma pa gnyis kyis rdo rje lta bu'i ting nge 'dzin gyi nyon mongs pa can gyi yid kyi nyon mongs pa dang / yid kyi rnam par shes pa'i nyon mongs pa shin tu phra mo cig car spong ba lta bur 'gyur te/ ci'i phyir 'dir sngar nyon mongs pa can gyi yid kyi nyon mongs pa shin tu phra mo spangs nas/ phyis yid kyi rnam par shes pa'i nyon mongs pa rags pa spong ba zhes bstan/ de lta bas na sa bzhi pa dag tu bdag med pa'i shes pa thob pas yid kyi rnam par shes pa la yod pa'i lhan cig skyes pa'i bdag tu lta ba spangs pa yin gyi/ da dung nyon mongs pa can gyi yid kyi nyon mongs pa shin tu phra mo dang / yid kyi rnam par shes pa'i bsgom pas spang bar bya ba'i nyon mongs pa lhag ma spangs pa ni ma yin no/ /'di yang zil gyis gnon pa'i bral ba la bya'i gtan du 'gags pa ni ma yin te/ sa bdun par phyin nas rdo rje lta bu'i sems kyi tshe/ gdod cig car spong ste bsgoms pas sa bon bcom pa'i phyir ro zhe'o/ /bdud phyir rgol ba thams cad bcom pa zhes bya ba ni 'di lta ste/ sa lnga par 'phags pa'i bden pa bzhi po dag mnyam pa nyid du bsgoms pas/ 'khor ba dang mya ngan las 'das pa tha dad par yongs su 'dzin pa'i bdud kyi phyir rgol ba bcom pa'o/ /nyan thos dang / rang sangs rgyas kyi yid la byed pa thams cad las ring du gyur pa zhes bya ba ni 'di lta ste/ sa drug par rten cing 'brel par 'byung ba'i yan lag bcu gnyis kyis kun nas nyon mongs pa dang / rnam par byang ba dag mnyam pa nyid du bsgoms pas theg pa 'og ma gnyis kyis kun nas nyon mongs pa la shin tu skyo ba dang / mya ngan las 'das pa la mos pa'i yid la byed pa'i rnam par rtog pa yongs su spangs pa'o/ /chos rgya chen po'i ro'i dga' ba dang / bde bas bstan pa zhes bya ba 'di lta ste/ sa bdun pas mtshan ma med pa'i don rtogs pas stong pa nyid kyi ye shes las spyod pa mchog bskyed nas/ chos chen po'i dga' ba nyams su myong ba'o/ /'jigs pa lnga las yang dag par 'das pa zhes bya ba ni 'di ltar sa brgyad pa la nyon mongs pa thams cad mngon du mi snang ste/ 'jigs pa lnga'i rgyud dang bral bas/ 'jigs pa lnga las yang dag par 'das pa zhes bya ste/ 'jigs pa lnga'i 'bras bu ni sa dang po thob pa'i tshe spangs pa nyid do/ /gcig tu phyir mi ldog pa'i sa bgrod par gyur pa zhes bya ba ni 'di lta ste/ sa dgu pas nges par sa bcu'i byang chub sems dpa'i spyod pa sna tshogs yongs su rdzogs pa/ phyir mi [(]ldag [,]ldog [)]pa'i sa bgrod par gyur pa'o/ /sems can thams cad kyi zhes bya ba la sogs pa ni 'di lta ste/ bcu pas chos kyi sku chen po thob pas/ snying rje chen po'i sprin bskyed de/ chos kyi char chen po phab nas/ sems can thams cad kyi sdug bsngal gyi gnod pas gzir ba'i dngos po rab tu zhi bar byed pa'o zhes 'byung ste/ de yan chad du sa bcu dang sbyar nas bstan pa bshad zin to/ /'di man chad ni pha rol tu phyin pa bcu dang / smon lam bcu dang sbyar nas mdo'i tshig bcu rnam par 'byed de/ de'i phyir sangs rgyas kyi sa'i 'grel pa las/ gzhan yang 'di ltar mdo'i tshig bcu po de dag pha rol tu phyin pa bcu dang / smon lam chen po bcu la sogs pa dang yang sbyar nas bshad par bya ste/ sa dang po yan chad sa re re la yang sa rnams kyi spyod pa thams cad ma lus par sdud pa yod pa'i phyir ro zhes 'byung ngo / /pha rol tu phyin pa bcu ni 'og nas mdo las pha rol tu phyin pa bstan pa'i skabs nas rgya cher ston to/ /smon lam chen po bcu ni rnal 'byor spyod pa'i sa dang / legs pa'i tshul khrims bstan pa'i mdo dang / bstan bcos sa yongs su 'dzin pa dang / sa bcu'i 'grel pa las 'byung ba bzhin du rig par bya'o/ /'di lta ste/ byang chub sems dpa' sems dpa' chen po don zab mo dgongs pa nges par 'grel pa dang / byang chub sems dpa' sems dpa' chen po tshul bzhin kun tu 'dri ba dang / byang chub sems dpa' sems dpa' chen po chos 'phags dang / byang chub sems dpa' sems dpa' chen po blo gros shin tu rnam par dag pa dang / byang chub sems dpa' sems dpa' chen po yangs pa'i blo gros dang / byang chub sems dpa' sems dpa' chen po yon tan 'byung gnas dang / byang chub sems dpa' sems dpa' chen po don dam yang dag 'phags dang / byang chub sems dpa' sems dpa' chen po spyan ras gzigs dbang phyug dang / byang chub sems dpa' sems dpa' chen po byams pa dang / byang chub sems dpa' sems dpa' chen po 'jam dpal la sogs pa ni gtso bor gyur te zhes bya bas ni gsum pa gtso bo'i dbang du mdzad nas ming smos pa zhes bya ba bstan te/ 'dir yang mdor bsdu na don rnam pa gsum gyis bstan te/ ming rnam par bshad pa dang / de dag smos pa'i dgos pa bstan pa dang / dris lan dag gis skye ba gcig gis thogs pa rnam par 'byed pa'o/ /de la ming rnam par bshad pa yang rnam pa gnyis te/ spyi dang bye brag go /de la spyi'i ming ni rnal 'byor spyod pa'i sa las ji skad du/ byang chub sems dpa'i ming dbyer med pa 'di lta bu dag ni yon tan las btags par rig par bya ste/ 'di lta ste/ byang chub sems dpa' sems dpa' chen po zhes bya ba nas bcu drug pa de bzhin chos dang ldan pa zhes bya ba'i bar du bstan pa lta bu'o/ /bstan bcos rnam par bshad pa dang / mdo sde rgyan las kyang rnal 'byor spyod pa'i sa las 'byung ba dang mthun par bshad do/ /gzhan yang mdo sde rgyan las kyang mi bcu drug po 'di dag ni thams cad kyang don las btags pa yin te/ byang chub sems dpa' thams cad kyang ming 'di dang ldan pas/ gang la la zhig gang la ming 'di lta bu dag dang ldan par shes nas de ni byang chub sems dpa' yin par rig par bya'o zhes 'byung ste/ de la byang chub sems dpa' sems dpa' chen po zhes bya ba ni spyi'i ming las ming dang po gnyis yin te/ don bshad pa ni sngar bstan pa bzhin no/ /de la ming bcu drug kyang dang po ni byang chub sems dpa'o/ /gnyis pa ni byang chub sems dpa' che zhes bya'o/ /gsum pa ni blo gros dang ldan pa'o/ /bzhi pa ni gsal ba'i mchog go/ /lnga pa ni rgyal ba'i sras so/ /drug pa ni rgyal ba'i gzhi'o/ /bdun pa ni rgyal ba'i myu gu'o/ /brgyad pa ni rnam par rgyal bar byed pa'o/ /dgu pa ni rtsal dang ldan pa'o/ /bcu pa ni 'phags pa'i mchog go/ /bcu gcig pa ni ded dpon no/ /bcu gnyis pa ni grags pa chen po'o/ /bcu gsum pa ni snying rje can no/ /bcu bzhi pa ni bsod nams che bas so/ /bco lnga pa ni dbang phyug go/ /bcu drug pa ni chos dang ldan pa'o/ /de la ming bye brag can ni 'og nas rgya cher ston to/ /sogs pa zhes bya bas ni byang chub sems dpa' gzhan tshad med pa rnams bsdu'o/ /gtso bor gyur zhes bya ba ni byang chub sems dpa' bcu po de dag 'khor 'dus pa'i nang na gtso bor gyur pa'i phyir gtso bor gyur pa zhes bya ste/ sangs rgyas kyi sa'i 'grel pa las ji skad du/ byang chub sems dpa' shin tu 'dus pa 'khor 'di'i nang na mchog tu gyur pa'i phyir/ gtso bor gyur pa zhes bya'o zhes bshad pa lta bu'o/ /de la bcu po dag smos pa'i dgos pa bstan pa yang don rnam pa gsum yod do / /dang po ni byang chub sems dpa' dang po gcig gis don zab mo rnam par bshad pa'i phyir dang / de'i 'og ma byang chub sems dpa' gsum gyis don dam pa gcig pa'i mtshan nyid zhus pa'i phyir dang tha ma'i byang chub sems dpa' drug gis so so nas le'u re re tha dad pa'i don zhus pa'i phyir bcu kho na smos pa yin no/ /gzhan yang mdor bsdus pa'i phyir bcu kho na smos pa yin te/ de'i phyir sangs rgyas kyi sa'i 'grel pa las/ mdo 'di las bsdus pa'i phyir ming gcig kho na smos pa yin te/ 'khor gzhan rnams ni grangs 'ba' zhig smos pa yang / yang dag par sdud pa po dag gis mdor bsdu bar bsams pa'i phyir ro zhes bshad do/ /gzhan yang shes rab kyi pha rol tu phyin pa'i 'grel pa las/ byang chub sems dpa' shin tu mang na ci'i phyir mang po ma smos/ smras pa/ byang chub sems dpa' dpag tu med pas brjod kyis mi lang ste/ gal te kun smos par gyur na tshig 'bru dang yi ge dpyad par dka' bas so/ /gzhan yang byang chub sems dpa' ni rnam pa gnyis las med de/ 'di lta ste/ khyim pa dang rab tu byung ba la gnas 'di nyid kyi phyir dang / phyogs gzhan gyi'o/ /khyim pa ni 'di lta ste/ kun tu bzang po la sogs pa'o/ /rab tu byung ba ni 'di lta ste 'jam dpal la sogs pa'o/ /gnas 'di nyid kyi sa ni 'di lta ste/ byams pa la sogs pa'o/ /phyogs gzhan gyi ni 'di lta ste/ spyan ras gzigs dbang phyug la sogs pa'o/ /'di gnyis smos pa nyid kyis gzhan thams cad kyang ma lus par bsdus par rig par bya'o zhes 'byung ste/ 'di yang de bzhin no/ /de la dris lan dag gis rnam par 'byed pa zhes bya ba ni/ 'phags pa'i tshig nges par 'grel pa'i mdo las byams pa la sogs pa ni skye ba gcig gis thogs pa'i byang chub sems dpa' yin no zhes gsungs na/ skye ba gcig gis thogs pa dang / lus tha ma pa zhes bya ba gnyis la bye brag tu gyur pa ci yod/ smras pa/ thams cad yod par smra ba'i gzhung gis byams pa la sogs pa dga' ldan na gnas pa'i lus la sogs pa ni skye ba gcig gis thogs pa zhes bya ba ste/ yang skye ba gcig blangs nas gdod mngon par rdzogs par sangs rgyas pa'i phyir ro/ /mi'i nang du skyes nas da dung mngon par rdzogs par sangs ma rgyas pa'i mdun rol ni tha ma'i skye ba zhes bya ste/ skye ba gcig gi nang na nangs kyi tha ma yin pa'i phyir ro zhe'o/ /'dir theg pa chen po'i gzhung dang sbyar nas so so nas bshad pa mi mthun te/ kha cig na re mi'i lus thob pa gang yin pa de ni skye ba gcig pa zhes bya ste/ tshig nges par 'grel pa'i mdo las ji skad du/ byams pa la sogs pa ni skye ba gcig pa zhes bya ba'i phyir ro zhes gsungs so/ /kha cig na re lha'i lus gang yin pa de ni skye ba gcig pa zhes bya ste/ 'phags pa shes rab kyi pha rol tu phyin pa las ji skad du/ skye ba gcig gis thogs pa ni dga' ldan gyi lha'i byang chub sems dpa'o zhes gsungs pa lta bu'o zhe'o/ /kha cig na re mi'i lus thob pa gang yin pa de ni lus tha ma pa zhes bya ste/ rnal 'byor spyod pa'i sa las skye ba tha ma pa ni 'di lta ste/ byang chub sems dpa' rnams skye ba 'di nyid la mngon par rdzogs par byang chub pa'o zhes bstan pa lta bu'o zhe'o/ /kha cig na re lha'i lus gang yin pa de ni skye ba tha ma pa zhes bya ste/ sangs rgyas kyi sa'i 'grel pa las ji skad du/ dga' ldan lha'i gnas su lus tha ma pa'i byang chub sems dpa' sems can gyi don byed do zhes bshad pa lta bu'o zhe'o/ /kha cig na re mi'i lus ni skye ba gcig pa dang / lus tha ma pa zhes bya ste/ shes rab kyi pha rol tu phyin pa'i 'grel pa las ji skad du/ skye ba gcig gis thogs pa zhes bya ba ni/ yang na mtshan ma las shes pa ste/ ji ltar drang srong a si tas sku'i mtshan brtags pa las tshe 'di nyid la mngon par rdzogs par sangs rgya bar shes pa dang / 'o thug gsol ba las de nyid du 'tshang rgya bar shes pa dang / lus tha ma pa'i byang chub sems dpa' ni thabs mkhas pa'i stobs kyis mi dge ba'i las kyi rnam par smin pa myong ba dang / bdud kyis 'tshe ba sngon du snang ba ston to zhes 'byung ba lta bu'o/ /kha cig na re lha'i lus ni skye ba gcig pa dang / lus tha ma pa zhes bya ste/ bstan bcos byang chub kyi phyogs bstan pa las/ ji skad du skye ba gcig gis thogs pa'i byang chub sems dpa' ni dga' ldan gyi gnas su 'jug go/ /lus tha ma pa'i byang chub sems dpa' ni dga' ldan gyi gnas su gnas so zhes bshad pa lta bu'o zhe'o/ /de la mi'i lus la skye ba gcig pa dang / lus tha ma pa zhes bshad pa ni da ltar mi nyid kyi nang du skye ba gcig len pa'i phyir dang / lus thams cad kyi nang na tha ma pa yin pa'i phyir ro/ /gzhan yang lha'i lus la skye ba gcig pa dang / lus tha ma pa zhes bshad pa ni lha'i skye ba gcig blangs nas mngon par 'tshang rgya ba'i phyir dang / lha'i lus de skye ba'i nang na tha ma yin pa'i phyir te/ mi'i skye ba de ni sangs rgyas kyi skus bsdus pa yin pas/ de'i phyir skye ba gcig pa dang skye ba tha ma pa zhes mi bya ste des bstan pa rnams so so nas don re re la brten pa'i phyir phan tshun 'gal ba med do/ /yang dag pa'i don du na lha'i lus ni skye ba gcig pa zhes bya la mi'i lus ni skye ba tha ma pa zhes bya'o/ /rnal 'byor spyod pa'i sa las/ skye ba gcig gis thogs pa ni 'di lta ste/ skye ba 'di nyid kyi mjug thogs su bla na med pa yang dag par rdzogs pa'i byang chub mngon par 'tshang rgya'o/ /srid pa tha ma pa ni 'di lta ste/ skye ba 'di nyid la bla na med pa yang dag par rdzogs pa'i byang chub mngon par rdzogs par 'tshang rgya ba'o zhes 'byung ste/ bstan bcos rnam par bshad pa las kyang 'di dang mthun par bstan to/ /lha la sogs pa'i lus la skye ba gcig pa zhes bya ba yang sngon gyi brgyud pa dag las rnam pa gsum du bshad de / kha cig ni lha'i lus ni skye ba gcig pa zhes bya ste/ mi'i lus ni lus tha mas bsdus pa'i phyir ro zhe'o/ /kha cig na re mi'i lus de ni skye ba gcig pa zhes bya ste/ yang mi'i skye ba blangs nas gdod mngon par 'tshang rgya ba'i phyir ro zhe'o/ /kha cig na re lha'i lus bsdus pa las skye ba gcig pa zhes bya'o zhes bshad do/ /ji ltar skye ba lan bdun pa'i rgyun du zhugs pa'i 'bras bu la sogs pa'o zhes bshad pa lta bu ste/ skye ba gnyis gcig tu bsdus nas skye ba gcig tu bshad pa'i phyir ro zhe'o/ /gal te lha'i lus la skye ba gcig pa zhes bya na/ shes rab kyi pha rol tu phyin pa'i 'grel pa las bshad pa de ji ltar brda sprad par bya ste/ de'i phyir de nyid las skye ba gsum pa'i byang chub sems dpa' ni dga' ldan kho na'o zhes 'byung ngo zhe na/ yang dag pa'i don du na skye ba gsum pa zhes bya ba ni 'di lta ste/ mi'i skye ba dang / lha'i skye ba dang / skye ba tha ma pa'o/ /lha'i lus la skye ba gsum pa zhes bshad pa ni gsum gyi nang na gcig gi grangs yin pa'i phyir skye ba gsum pa zhes bshad do/ /mi'i lus ni blangs zin pa'i phyir yang lus tha ma pa ni mngon par sangs rgyas pa'i phyir de bas na mir skye ba dang / skye ba tha ma pa la skye ba gsum pa zhes ma bshad de/ skye ba gcig gis thogs pa'i byang chub sems dpa' la skye shi yod dam med/ gal te skye shi yod na ci'i phyir mdzod kyi bstan bcos las/ dga' ldan gyi lha ni skye ba gcig gis thogs pa dang / lus tha ma yin pas gdon mi za bar bar ma dor 'chi ba med do zhes bstan/ slob dpon yang dag bden pa'i 'grel pa las/ dga' ldan gyi lha'i gnas na skye shi yod kyang bar ma dor 'chi ba ma yin te/ lo bzhi stong tshang nas gdod 'chi ba'i phyir ro/ /'phags pa byams pa ni dus 'di nas 'das pa'i bskal pa dgu pa'i tha ma'i tshe lo brgya pa'i tshe/ dga' ldan gyi gnas su skyes so/ /gnas pa'i bskal pa bcu pa la lo brgyad khri dang po 'grib pa'i tshe gdod 'dir skye ste/ brtsis na bskal pa phyed la de'i tshe lo brgyad khri yod pa'i phyir/ skye shi mang po yod pa'i phyir ro/ /gzhan yang thams cad yod par smra ba dag ni/ de na byang chub sems dpa' lnga brgya yod do zhe'o/ /yang dag pa'i tshad ma'i sde pa dag ni byang chub sems dpa' stong lha'i gnas de na yod de rim gyis sangs rgyas su 'grub ste/ de dag thams cad ni skye ba gcig gis thogs pa zhes bya'o zhes 'chad de/ de ni skye shi mang po yod par shes par bya'o/ /de dag thams cad la skye ba gcig pa zhes bya ba ni so so nas mi'i nang du skye ba gcig yod pa'i phyir/ skye ba gcig ces bya ba'i lha'i nang du skye ba gcig ces bstan pa ni ma yin no/ /byang chub sems dpa' lnga brgya po la sogs pa de dag bskal pa 'di chags pa dang / 'jig pa yod kyang lha'i gnas der skyes pa dag ni nams kyang 'dzam bu'i gling 'dir skye bar mi 'gyur te/ nam sangs rgyas de 'jig rten du 'byung ba'i tshe/ rdzu 'phrul gyi mthus 'dzam bu'i gling 'dir 'ong bar zad do/ /dga' ldan gyi lha skye ba mang po myong ba na/ shes rab kyi pha rol tu phyin pa'i 'grel pa las bshad pa de ji ltar brda sprad par bya ste/ de'i phyir de nyid las lha 'og ma dag ni tshe thung ste/ sangs rgyas ma byung bar tshe zad pa'i phyir ro/ /lha gong ma dag ni tshe ring ste/ sangs rgyas mya ngan las 'das nas gdod tshe zad pa'i phyir ro/ /dga' ldan gyi lha dag ni ring ba yang ma yin/ thung ba yang ma yin te/ sangs rgyas 'jig rten du byung ba'i tshe/ thad kar phrad par 'gyur bas tshe gcig gis thogs pa'i byang chub sems dpa' rnams rtag par der skye'o zhes 'byung ste/ bye brag tu bshad pa chen po las kyang 'di dang mthun par bshad do zhe na/ dga' ldan gyi lha rnams dang / skye ba gcig gis thogs pa'i byang chub sems dpa' tshe tshad thams cad kyang 'dra bas tha mar shi 'phos pa'i tshe/ dus gcig tu mi'i nang du skye zhing / sangs rgyas mthong bar 'gyur ba'i phyir/ ring ba yang ma yin thung ba yang ma yin zhes bshad do/ /lha gzhan dag ni de lta ma yin pa'i phyir phan tshun 'gal ba med do/ /byang chub sems dpa' byams pa la skye ba gcig gis thogs pa zhes bshad pa ni rung na/ ci'i phyir gzhan dag la yang / skye ba gcig gis thogs pa zhes brjod/ shes rab kyi pha rol tu phyin pa'i 'grel pa las/ 'phags pa byams pa ma gtogs pa byang chub sems dpa' gzhan rnams gnas 'di'i rgyal tshab tu dbang bskur ba ma yin mod kyi/ phyogs bcu'i zhing khams rnams su rgyal tshab mdzad pa'i phyir skye ba gcig gis thogs pa zhes brjod pa yin no zhes bshad pa yin no/ /skye ba gcig gis thogs pa dang / lus tha ma pa zhes bstan pa de sku rnam pa gsum las gang la brten te bshad/ sku rnam pa gsum las chos kyi sku la skye ba gcig gis thogs pa zhes bya ba'i don mi mnga' ste/ dang po med pa'i phyir ro/ /gal te longs spyod rdzogs pa'i sku'o zhe na/ de yang rnam pa gnyis te/ dang po ni nyid kyis longs spyod rdzogs pa ste/ mya ngan las 'das pa dang / skye ba gcig gis thogs pa zhes bya ba'i don mi mnga' yang / 'og min gyi gnas su rgyal tshab mdzad pa dang / mngon par 'tshang rgya ba'i don mnga' ste/ des na mi slob pa dang rim gyis go ba'i byang chub sems dpa' rnams kyi 'dod pa'i khams kyi lus la skye ba gcig gis thogs pa dang / lus tha ma pa zhes bya ste/ nyon mongs pa spangs pa yang mi skye ba'i phyir ro/ /slob ma dang bcas pa'i rim gyis go ba dang / cig car go ba'i byang chub sems dpa'i bsam gtan bzhi pa'i lus la yang skye ba gcig gis thogs pa dang / lus tha ma zhes bya ste/ tha ma kho nar gdon mi za bar bsam gtan bzhi pa'i rnam par smin pa'i 'bras bu myong ba'i phyir ro/ /gnyis ni gzhan longs spyod rdzogs pa'i sku dang / sprul pa'i sku ste/ de dag la mya ngan las 'das pa'i dbyings su 'jug pa dang / rgyal tshab mdzad pa'i don mnga' ste/ ji ltar sangs rgyas 'od dpag med kyi rgyal tshab spyan ras gzigs dbang phyug gis mdzad pa lta bu'o/ /sangs rgyas 'od dpag med de yang rnam pa gnyis te/ dang po ni sa'i mdun rol gyi byang chub sems dpa' dang / theg pa pa gnyis dang / so so'i skye bo rnams kyi ched du yab yum gyis bskyed pa'i sku ston par mdzad de/ de ni sprul pa'i skus bsdus te/ 'phags pa rang dbyangs kyi mdo las/ de bzhin gshegs pa 'od dpag med la yang yab yum mnga' bar gsungs pa'i phyir ro/ /gnyis pa ni sa la gnas pa rnams kyi ched du yab yum mi mnga' ba'i sku ston par mdzad de/ de ni gzhan longs spyod pas bsdus te/ bstan bcos skye ba len pa bstan pa las/ theg pa 'og ma pa gnyis dang / bud med kyis der skye ba mi thob pa'i phyir ro zhes bshad do/ / don dam pa'i mtshan nyid kyi le'u ste gnyis pa'o/ / //bam po bcu pa/ le'u 'di gcig bstan pa yang mdor bsdu na don rnam pa gnyis su dbye ste/ le'u'i ming rnam par bshad pa dang / mdo'i tshig gi don rnam par bshad pa'o/ /de la don dam pa'i bden pa'i mtshan nyid kyi le'u zhes bya ba ni bden pa'i nang na mchog tu gyur pa'i ming dang / mchog gi don to/ /bden pa yang rnam pa gnyis te/ kun rdzob dang don dam pa'o/ /de la kun rdzob ces bya ba mi mngon par sgrib pa dang / rags par snang ba'i don te/ 'di lta ste/ bum pa snam bu la sogs pas don dam par bsgribs nas mi gsal ba dang / dngos po rags par ston pa'i phyir kun rdzob ces bya'o/ /don dam pa zhes bya ba yang dam pa ni ye shes dam pa'o/ /don ni yul gyi don te/ de bzhin nyid kyi don to/ /ye shes dam pa'i yul gyi don yin pa'i phyir/ don dam pa zhes bya ste/ rnam par bshad pa rnam pa drug las bdag po'i dbang du byas nas bshad pa'o/ /yang na don zhes bya ba ni phan pa'i don te/ 'di lta ste/ mya ngan las 'das pa'i 'bras bu'o/ /'di ni phan pa dam pa'i don la don dam pa'i zhes bya ste/ rnam par bshad pa rnam pa drug las las yongs su 'dzin pa'i dbang du byas nas rnam par bshad pa'o/ /yang na 'phags pa'i lam ni dam pas don byed pa'i phyir don dam pa zhes bya ste/ 'di ni rdzas dang bcas pa'i dbang du byas nas rnam par bshad pa'o/ /'dir ni re zhig don dang po'i dbang du byas nas/ bden pa la don rnam pa gnyis yod par bshad de/ rnal 'byor spyod pa'i sa las ji skad du/ bden pa'i don gang zhe na/ smras pa bstan pa dang mi mthun pa med pa'i mtshan nyid kyi don dang / 'di bsgoms pas shin tu rnam par dag par phyin pa'i don ni bden pa'i don to zhes bshad pa lta bu'o/ /de la mtshan nyid ces bya ba ni ngo bo nyid kyi mtshan nyid do/ /yang na dbyings kyi mtshan nyid de/ brjod du med pa la sogs pa lnga po dag de bzhin nyid kyi rang gi ngo bo nyid kyi mtshan nyid yin pa'i phyir ro/ /yang na de bzhin nyid gcig la/ brjod du med pa la sogs pa'i rnam pa'i mtshan nyid lnga yod pa'i phyir ro/ /le'u 'di'i nang du don dam pa'i bden pa'i mtshan nyid kyi don rnam pa lnga ston pa'i phyir don dam pa'i mtshan nyid kyi le'u gnyis pa zhes gsungs so/ /de nas byang chub sems dpa' sems dpa' chen po tshul bzhin kun 'dris bcom ldan 'das kyi spyan sngar/ byang chub sems dpa' sems dpa' chen po don zab dgongs pa nges par 'grel pa la dri ba dris pa zhes bya ba la sogs pas ni gnyis pa mdo'i tshig gi don yang dag par rnam par bshad pa zhes bya ba bstan te/ de yan chod du bstan pa 'byung ba'i rgyu dang rkyen gyi phyogs zhes bya ba bshad zin nas 'di man chad ni gnyis pa 'phags pa'i gsung rab yang dag par bstan pa'i phyogs bstan pa zhes bya ba ston to/ /phyogs 'di la le'u bdun yod de/ de dag kyang rnam pa gsum du bsdu'o/ /de la dang po'i le'u bzhis ni rnal 'byor spyod pa'i sa yongs su brtag par bya ba'i yul bstan te/ don dam pa'i bden pa'i mtshan nyid kyi le'u dang / sems dang yid dang / rnam par shes pa'i mtshan nyid kyi le'u dang / chos thams cad kyi mtshan nyid kyi le'u dang / rang gi ngo bo nyid med pa'i mtshan nyid kyi le'u'o/ /de'i 'og ma le'u gnyis kyis ni rnal 'byor pa'i lam bstan te/ rnal 'byor rnam par 'byed pa'i le'u dang / sa dang pha rol tu phyin pa'i le'u 'o/ /tha ma gcig gis ni thob par bya ba'i 'bras bu bstan te/ de bzhin gshegs pa'i bya ba sgrub pa'i le'u'o/ /de ltar phyogs rnam pa gsum du bstan pa yang / 'di ltar rnal 'byor pa rnams yul dam pa la ltos nas ni spyod pa slong bar 'gyur la spyod pa'i dbang gis ni 'bras bu thob par 'gyur te/ de'i phyir bcom ldan 'das kyis chos mngon pa mdzod theg pa chen po'i mdo las/ gsung rab khyad par du 'phags pa rnam pa bcu gsungs so/ /de yang dang po gnyis ni yul ston te/ 'di lta ste shes bya'i gnas dang / shes bya'i mtshan nyid do/ /bar ma drug ni spyod pa yin te/ shes bya'i mtshan nyid la 'jug pa dang / rgyu dang 'bras bu la 'jug pa dang / bsgom pa'i rab tu dbye ba dang / lhag pa'i tshul khrims kyi bslab pa dang / lhag pa ting nge 'dzin gyi bslab pa dang / lhag pa shes rab kyi bslab pa'o/ /tha ma gnyis ni 'bras bu yin te/ 'bras bu de'i spong ba dang / de'i 'bras bu'o/ /de'i phyir slob dpon ngo bo nyid med kyis theg pa chen po bsdus pa'i 'grel pa byas pa las/ mtshungs pa med pa rnam pa gsum la brten nas/ gsung khyad par du 'phags pa rnam pa bcu bstan pa yin no/ /'phags pa byams pas sa bcu bdun pa bstan pa dag gis kyang 'di gsum rnam par 'byed de/ dang po'i sa ni rgyu'i yul bstan pa yin te/ rnam par shes pa tshogs lnga dang ldan pa'i sa dang / yid kyi sa dang / rtog pa dang bcas shing dpyod pa dang bcas pa'i sa dang / rtog pa med pa dpyod pa dang bcas pa'i sa dang / rtog pa yang med dpyod pa yang med pa'i sa dang / mnyam par gzhag pa'i sa dang / mnyam par gzhag pa ma yin pa'i sa dang / sems yod pa'i sa dang sems med pa'i sa'o/ /bar ma drug gis ni spyod pa'i sa bstan te/ thos pa las byung ba'i sa dang / bsams pa las byung ba'i sa dang / bsgoms pa las byung ba'i sa dang / nyan thos kyi sa dang / rang sangs rgyas kyi sa dang / byang chub sems dpa'i sa'o/ /tha ma gnyis kyis ni 'bras bu bstan te lhag ma dang bcas pa'i sa dang / lhag ma med pa'i sa'o/ /mdo sde 'dir yang de bzhin du mtshungs pa med pa rnam pa gsum la phyogs rnam pa gsum du bstan to/ /de la rnal 'byor spyod pas yongs su brtag pa'i yul bstan pa yang rnam pa gnyis su dbye'o/ /le'u dang po gnyis kyis ni don dam pa dang / kun rdzob kyi yul bstan te/ de yang don dam pa'i bden pa'i mtshan nyid kyi le'u las ni don dam pa'i bden pa ston to/ /sems dang yid dang rnam par shes pa'i mtshan nyid kyi le'u las ni kun rdzob kyi bden pa ston to/ /le'u phyi ma gnyis kyis ni yod pa dang / med pa'i ngo bo nyid kyi yul ston te/ de yang le'u dang pos ni ngo bo nyid gsum gyi yul ston to/ /le'u phyi mas ni ngo bo nyid med pa gsum gyi yul bstan to/ /bden pa gnyis bstan pa la yang rtsa ba dang yan lag gi go rims kyis sngar ni don dam pa bstan la/ de'i 'og tu ni kun rdzob bstan pas/ de'i phyir 'dir don dam pa'i bden pa bshad pa yin no/ /rnal 'byor spyod pa'i sa dang sbyar na/ de las le'u 'di gcig la mtshan rnam pa lngar bstan te/ de'i phyir de nyid las gzhan yang don dam pa'i bden pa ni/ mtshan nyid rnam pa lnga dang ldan te/ brjod du med pa'i mtshan nyid dang / gnyis su med pa'i mtshan nyid dang / rtog ge'i spyod yul las yang dag par 'das pa'i mtshan nyid dang / chos rnams tha dad pa dang tha dad pa ma yin pa nyid las yang dag par 'das pa'i mtshan nyid dang / thams cad du ro gcig pa'i mtshan nyid do zhes bstan to/ /'dir mdo'i tshig de dag kyang rnam pa bzhir bsdus te/ brjod du med pa dang / gnyis su med pa bstan pa dang / de nas byang chub sems dpa' chos 'phags zhes bya ba man chad kyis rtog ge'i spyod yul las yang dag par 'das pa'i mtshan nyid bstan pa dang / de nas byang chub sems dpa' blo gros shin tu rnam dag ces bya ba man chad kyis tha dad pa dang / tha dad pa ma yin pa'i mtshan nyid bstan pa dang / de nas bcom ldan 'das zhes bya ba man chad kyis thams cad du ro gcig pa'i mtshan nyid bstan pa'o/ /rnam pa lnga las brjod du med pa ni rnam pa bzhi char kun tu khyab pa yin te/ mtshan nyid bzhi po kun la brjod du med pa'i mtshan nyid yod pa'i phyir/ gnyis med pa dang / gcig tu bsdus nas bstan te/ zlas khong du chud par gyur pa'i phyir ro/ /gzhan rnam pa gsum po 'di dag gis mdor bsdus pas ma bshad do/ /snga ma'i mtshan nyid rnam pa gnyis bstan pa yang rnam pa gnyis te/ tshig rkyang pa rgya cher bshad pa dang / tshigs su bcad pas mdor bshad pa'o/ /rgya cher bshad pa yang rnam pa drug tu dbye ste/ dri ba dris pa dang / dris pa bzhin du lan mdor bstan pa dang / gang gis dri ba dris pa dang / rgya cher bshad pa dang / bzlas te dris pa dang / dpes bstan pa'o/ /slob dpon yang dag bden pas bshad pa dang sbyar na rnam pa bzhir phye ba ni sngar bstan pa bzhin no/ /dang po la rnam pa lngar bstan te/ brjod du med pa dang / gnyis su med pa mdor bstan pa dang / rgya cher rnam par bshad pa dang / dpes bstan pa dang / spyi'i mjug bsdu ba dang / tshigs su bcad pas bstan pa'o zhes bshad do/ /'di ni dang po byang chub sems dpas dri ba dris par bstan te/ 'di yang gnyis su dbye'o/ /dri ba dris pas gleng bslang ba dang / bstan pa bzhin du dri ba dris pa ste/ 'di ni dang po'o/ /'di yang rnam pa bzhi ste/ de la dang po de nas zhes bya ba ni dri ba dris pa'i tshe'o/ /gnyis pa byang chub sems dpa' tshul bzhin kun 'dris zhes bya ba ni dri ba 'dri bar nus pa bstan pa ste/ don ji lta ba bzhin du dri ba 'dri ba'i phyir/ byang chub sems dpa' tshul bzhin kun tu 'dris zhes bya'o/ /gsum pa bcom ldan 'das kyi spyan sngar zhes bya ba ni dri ba dris pa'i gnas bstan pa'o/ /slob dpon dbyig gnyen gyis theg pa chen po bsdus pa'i 'grel pa mdzad pa las ji skad du/ shin tu zhugs pa'i byang chub sems dpa' bcom ldan 'das kyi spyan sngar zhes bya ba ni gnas yod pa dang / tha dad pa'i tshig med par bstan pa'o zhes bshad pa lta bu'o/ /slob dpon ngo bo nyid med kyis 'grel pa las ni bcom ldan 'das kyis gnang ba dang / bstan pa de rgya cher spel du rung ba dang / bcom ldan 'das mngon sum du bzhugs pas tshig tha dad pa med par bstan pa'i phyir zhes 'byung ngo / /bzhi pa byang chub sems dpa' chen po don zab dgongs pa nges par 'grel pa la dri ba dris pa zhes bya ba ni dri bar bya ba'i gang zag bstan pa'o/ /byang chub sems dpa' des so so yang dag par rig pa bzhis don zab mo'i tshul gyis rnam par 'grel pa'i phyir ming de skad du btags pa yin te/ rnal 'byor spyod pa'i sa las bstan pa bzhin no/ /tshig nges par 'grel ba'i mdo las ni byang chub sems dpa' don zab mo'i tshig nges par 'grel pa zhes 'byung ste/ slob dpon yang dag bden pas de la tshig ces bya ba ni mdud pa dam po'i don to/ /nges par 'grel pa zhes bya ba ni rnam par bshad pa'i don to/ /don zab mo'i tshig gi mdud pa dam po rnam par bshad pa'i phyir byang chub sems dpa' don zab mo'i tshig nges par 'grel pa zhes bya'o/ /yang gcig tu na rin po che'i dbu rgyan gyi gtsug ces bya'o/ /rin po che'i dbu rgyan gyi gtsug ces bya ba ni dang po sangs rgyas kyi mtshan yin te/ byang chub sems dpa' 'di de'i slob ma yin pas/ mkhan po las ming du btags pa bzhin no zhes bshad de/ rgya cher ni de nyid las bstan pa bzhin no/ /kye rgyal ba'i sras chos thams cad gnyis su med pa / chos thams cad gnyis su med pa'i zhes bya ba ni chos thams cad ni gang / ji ltar na gnyis su med pa yin zhes bya ba ni gnyis pa bstan pa bzhin du dri ba dris pa zhes bya ba ston te/ 'di yang rnam pa gnyis te/ dang po chos thams cad gnyis su med pa zhes bya ba ni dri bar bya ba'i bstan pa smos so/ /gnyis pa chos thams cad gnyis su med pa zhes bya zhe na zhes bya ba la sogs pa ni bstan pa bzhin du dri ba dris pa'o/ /rgyal ba'i sras zhes bya ba de yang dgongs pa zab mo rnam par 'grel pa'i mdo dang / tshig nges par 'grel pa'i mdo las ni sangs rgyas kyi sras zhes 'byung ste/ slob dpon yang dag bden pa'i brjed byang las/ sangs rgyas kyi sras zhes bya ba la don rnam pa lnga yod de/ sa bon gyi don ni 'di lta ste/ theg pa chen po la mos pas sangs rgyas kyi sa bon thob par nus pa'o/ /yum gyi don ni 'di lta ste/ shes rab kyi pha rol tu phyin pa sangs rgyas kyi chos bskyed pa'i phyir yum zhes bya'o/ /mngal gyi gnas kyi don ni 'di lta ste/ byang chub sems dpa'i bsam gtan dang / ting nge 'dzin ni gnas pa yin pa'i phyir mngal gyi gnas zhes bya'o/ /ma ma'i don ni 'di lta ste/ byang chub sems dpa' dag gsos nas/ lam mngon par 'grub par byed pa'i phyir/ byams pa dang snying rje la ma ma zhes bya ba bshad do/ /yab dang 'dra ba'i don ni 'di lta ste/ sa dang po nas sangs rgyas kyi sa'i bar du gnas gyur pa/ sangs rgyas dang 'dra ba'i phyir/ yab dang 'dra ba zhes bya ste/ des na sras byang chub sems dpa' rnams la sangs rgyas kyi sras zhes bos pa yin no zhes bshad de/ rgya cher ni sngar gong du bstan pa bzhin no/ /gnas pa bcu'i bstan bcos las/ byang chub sems dpa' ni de bzhin gshegs pa'i sras yang dag pa yin pas/ de'i phyir byang chub sems dpa' la sangs rgyas kyi sras zhes bya'o zhes 'byung ngo / /'dir rgyal ba'i sras zhes gsungs pa la/ bshad pa rnam pa gnyis yod de/ kha cig na re rgyal ba zhes bya ba ni byang chub sems dpa'i ming ste/ theg pa gsum gyi sras kyi nang na mchog tu gyur pa'i phyir dang / sangs rgyas kyi gdung bsab par nus pa'i phyir sras zhes bya'o zhes bshad de/ 'di ni las yongs su 'dzin pa'i dbang du byas te/ rnam par bshad pa'o/ /kha cig na re rgyal ba zhes bya ba ni sangs rgyas kyi theg pa gnyis kyi mchog tu gyur par bstan pa'i phyir ro zhe'o/ /gzhan yang rnal 'byor spyod pa'i sa las/ sangs rgyas ni rgyal ba yin te/ mu stegs can dang nyon mongs pa'i bdud la sogs pa las rgyal bar gyur pa'i phyir dang / skye gnas dang gdung rgyud la sogs pas mang po zil gyis gnon pa'i phyir ro zhes 'byung ste/ bshad pa 'di dang sbyar na/ rgyal ba'i sras la rgyal ba'i sras zhes bshad de/ de'i phyir bstan bcos rnam par bshad pa las kyang byang chub sems dpa' la yang rgyal ba'i sras zhes bya'o zhes 'byung bas/ gzhan yang sangs rgyas kyi sras zhes smos pa yin no/ /de la zhes bya ba ni bstan pa'i tshig la bya ste/ de ni chos thams cad gnyis su med pa'i tshig go zhes bya ba'i tha tshig go/ /'di la yang bshad pa rnam pa gnyis yod de/ kha cig ni byang chub sems dpa' dag gis bstan pa'i tha tshig go zhe'o/ /kha cig na re 'di ni bcom ldan 'das kyis gsungs pa'i tshig la bya ste/ 'di ltar bstan bcos brgya pa las 'di ltar bcom ldan 'das kyis chos thams cad bdag med pa zhes gsungs pa de la zhes 'byung ba lta bu'o/ /gzhan yang 'og nas mdo las/ sangs rgyas brjod bral gnyis med don/ /zhes gsungs pa lta bu'o zhe'o/ /chos thams cad gnyis su med pa zhes bya ba ni / mdo las gsungs pa'i tshig gnyis smos te/ chos thams cad ces bya ba dang / gnyis su med pa zhes bya ba'o/ /chos thams cad gnyis su med pa zhes bya ba na / chos thams cad ni gang / ji ltar gnyis su med pa yin zhes bya ba ni/ gnyis pa bstan pa bzhin du dri ba dris pa zhes bya ba nyid yin no/ /'di yang gnyis su dbye ste/ dri ba dri bar bya ba'i phyir cig car tshig gnyis smos pa dang / tshig de nyid la brten nas gal so sor dris pa'o/ / des na dris tshig gnyis su 'gyur te/ chos thams cad ni gang zhes dris pa dang / ji ltar na gnyis su med pa yin zhes dris pa'o/ /rnal 'byor spyod pa'i sa'i 'grel pa las/ tshig mdor bzhag nas gal te dris pa ni rnam pa lnga zhes bshad de/ de'i phyir de nyid las/ ma rtogs pa'i phyir dri ba dang / the tshom du gyur pa'i phyir dri ba dang / phan gdags pa'i phyir dri ba dang / shes pa bzlog pa'i phyir dri ba dang / brnyas pa'i phyir dri ba'o zhes 'byung ste/ byang chub sems dpa' ni gsum pa la brten nas/ dri ba dris pa yin te/ sems can rnams la phan gdags pa'i phyir ro/ /yang na rnam pa gsum dang sbyar te/ mi shes pa dang / the tshom du gyur pa'i don yod pa'i phyir ro/ /phyi ma gnyis la brten nas ni ma yin te/ bla na med pa'i chos kyi rgyal po la brnyas pa dang / mkhyen pa bzlog tu mi rung ba'i phyir ro/ /tshig nges par 'grel pa'i mdo las ni chos thams cad gnyis su med pa zhes bya na chos thams cad gnyis su med pa zhes bya ba'i don ji lta bu zhe na zhes 'byung ste/ slob dpon yang dag bden pa'i brjed byang las/ 'di ni mdo khungs su bzhag nas/ dri ba dris pa yin te/ tshig zlos bur chos thams cad gnyis su med pa zhes gsungs pa ni/ don rnam pa lnga'i phyir te/ mdo sde de dang / de dag nas gsungs pa'i phyir dang / 'dus byas dang / 'dus ma byas med pa'i phyir dang / nang gi dbang po drug dang / phyi rol gyi yul drug med pa'i phyir dang / so so'i skye bo dang / 'phags pa dag med pa'i phyir dang / rgyu dang 'bras bu med pa nyid kyi phyir de skad du gsungs pa'i tshig 'bru'i don ji lta bu zhes bya ba'i tha tshig go/ /de'i phyir byang chub sems dpas 'di ltar byas pa dang / byas pa ma yin pas lan btab pa yin no zhes 'byung ngo / /byang chub sems dpa' don zab dgongs pa nges par 'grel pas/ byang chub sems dpa' tshul bzhin kun tu 'dri la 'di skad ces smras so/ /bya ba 'di man chad ni gsum pa dris pa bzhin du lan mdor bstan pa zhes bya ba'i don bstan to/ /'di yang rnam pa gnyis te/ dris pa dang lan 'debs pa bstan pa dang / dris pa bzhin du lan yang yang dag par btab pa ste/ 'di ni dang po'o/ /rigs kyi bu chos thams cad ces bya ba ni mdor bsdu na rnam pa gnyis te/ 'di lta ste/ 'dus byas dang 'dus ma byas so zhes bya ba ni gnyis pa dris pa bzhin du lan yang dag par btab pa zhes bya ba ston to/ /'di yang rnam pa gnyis te/ dang po rigs kyi bu zhes bya bas ni dri ba la bsngags pa'o/ /gnyis pa chos thams cad ces bya ba man chad kyis ni dris pa bzhin du lan yang dag par bstan pa ste/ 'di ni dang po'o/ /shes rab kyi pha rol tu phyin pa'i 'grel pa las/ rigs kyi bu zhes bya bas ni skyes pa ma yin pa la sogs pa gdams ngag bzhin du mi rung ba rnams las rnam par 'byed do/ /de la rigs kyi bu zhes bya ba ni dge ba'i rtags dang ldan pa ste/ 'di ltar byams pa dang / snying rje dang ldan zhing / las rnam pa gsum la skyon med pa dang / dge ba'i gang zag gi rjes su mos shing / rang gi yon tan mi ston pa dang / mang po'i rjes su 'jug cing gzhan gyi skyon nas mi brjod pa dang / 'jig rten gyi grags pa la sogs pa'i bde ba mi tshol bar lam gyi yon tan kho na la rab tu mos pa dang / rang gi las yongs su dag pas sems kyi de kho na nyid la btsun par lta zhing / 'jig rten pa'i bya ba dag la smod pa ste/ 'di lta bu la sogs pa dge ba'i chos tshad med pa rnams kyi mtshan ma phal cher skyes pa'i lus la yod pas/ de'i bsngags pa'i tshig tu rigs kyi bu zhes brjod pa yin no zhes 'byung ngo / /ci'i phyir 'dus byas dang / 'dus ma byas kyi chos rnam pa gnyis kho na gsungs she na/ bye brag tu bshad pa chen po las de la dgongs pa rnam pa gnyis yod do zhes bshad de/ de'i phyir de nyid las gang zag dgag cing bsal ba'i phyir dang / shes pa khyad par du 'phags pa rab tu bstan pa'i phyir/ 'dus byas dang / 'dus ma byas kyi chos rnam pa gnyis po 'di dag gsungs pa yin no/ /de la gang zag dgag cing bsal ba zhes bya ba ni 'di lta ste/ 'dus byas dang 'dus ma byas zhes chos kho nar zad kyi/ don dam par na gang zag yang dag pa ni med do zhes ston pa'i phyir ro/ /shes pa khyad par du 'phags pa rab tu ston pa zhes bya ba ni 'di lta ste/ 'di ltar mkhas pa shes pa khyad par du 'phags pa dang ldan pa dag chos 'di gnyis kyi dbang gis thams cad khong du chud par gyur te/ 'di gnyis kyis chos thams cad bsdus pa'i phyir ro zhes 'byung ngo / /de la chos thams cad ces bya ba la sogs pa ni dris pa bzhin du yang dag par lan btab pa bstan to/ /'di yang rnam pa gnyis te/ sngar ni chos thams cad ces bya ba'i lan btab la/ de'i 'og tu gnyis su med pa'i mtshan nyid bshad pa'o/ /thams cad ces bya ba'i lan btab pa la yang rnam pa gnyis te/ dang po chos thams cad ces bya ba ni mdor bsdu na rnam pa gnyis so zhes bya ba ni sgo bstan cing grangs smos pa'o/ /gnyis pa 'dus byas dang 'dus ma byas so zhes bya ba ni grangs bzhin du ming smos pa'o/ /yang thams cad ces bya ba brjod na rnam pa gsum yod de/ dang po ni mdor bstan na gnyis kho na ste/ 'dus byas dang 'dus ma byas so/ /gnyis pa ni rgyas pa yang ma yin/ bsdus pa yang ma yin par bstan na lnga kho na ste/ sems kyi chos dang / sems las byung ba'i chos dang / gzugs kyi chos dang / sems dang mtshungs par ldan pa ma yin pa'i 'du byed kyi chos dang / 'dus ma byas kyi chos so/ /shes rab kyi pha rol tu phyin pa'i 'grel pa dang / 'phags pa stug po bkod pa'i mdo las lnga kho na'i ming smos kyi/ gzhan du bshad pa ni med do/ /gsum pa ni rgyas par bstan na chos brgyad kho na'o/ /'dir ni bar ma dang rgyas pa las/ rnam par dbye ba'i phyir mdor bsdu na zhes gsungs pa yin no/ /de la 'dus byas dang 'dus ma byas zhes pa yang / bstan pa rnams las so so nas mi mthun te/ bstan bcos yang dag par rig pa dang / rjes su mthun pa las rkyen mang po bsags pa las skyes pa'i phyir 'dus byas zhes pa'o/ /de las bzlog pas ni 'dus ma byas su rig par bya'o zhes bshad do/ /bye brag tu bshad pa chen po las/ chos gang rgyu dang rkyen gyis 'dus pa'i bya ba la gnas shing de dang 'brel par gyur pa ni 'dus byas zhes bya'o/ /chos gang rgyu dang rkyen gyis 'dus pa'i bya ba la mi gnas shing 'brel par ma gyur pa gang yin pa de ni 'dus ma byas zhes bya'o zhes 'byung ngo / /bstan bcos lag na rin po che las/ rkyen mang po 'dus pa las mngon par 'grub pa dang / mngon par 'dus byas pa dang ldan pa'i phyir 'dus byas zhes bya'o/ /byas pa ma yin pa'i phyir 'dus ma byas zhes bya ste/ 'dus byas bzlog pa la ltos pa ni 'dus ma byas kyi don yin pas so zhes bshad do/ /slob dpon thogs med kyis mdzad pa rdo rje gcod pa'i 'grel pa las/ 'dus ma byas zhes bya ba ni rnam par mi rtog pa yin no zhes bshad pas/ des na 'dus byas ni rnam par rtog pa dang bcas pa'o/ /gzhan yang bstan bcos mngon pa kun las btus pa las/ gang la skye ba dang / 'jig pa dang / gnas pa dang / gzhan du 'gyur bar yang snang ba de ni 'dus byas zhes bya'o/ /skye ba dang / 'jig pa dang / gnas pa dang / gzhan du 'gyur ba med pa de ni 'dus ma byas zhes bya'o zhes bshad do/ /gzhan yang rnal 'byor spyod pa'i sa las/ de la 'dus ma byas zhes bya ba ni 'di lta ste/ skye ba dang 'gag pa dang bcas shing / rgyu dang rkyen dang 'grel pa'o/ /de las bzlog pa ni 'dus ma byas su rig par bya'o zhes bshad do/ /gzhan yang shes rab kyi pha rol tu phyin pa'i 'grel pa las gang dmigs su yod pa ni 'dus byas zhes bya'o/ /gang dmigs su med pa ni 'dus ma byas so zhes 'byung ste/ slob dpon yon tan byin gyis byas pa'i rdo rje gcod pa'i 'grel pa las kyang de skad du bshad do/ /gzhan yang shes rab kyi pha rol tu phyin pa'i 'grel pa las/ mtshan mar 'dzin pa gang yin pa de ni 'dus byas so/ /mtshan mar mi 'dzin pa gang yin pa de ni 'dus ma byas so zhes bshad do / /rgya cher rnam par 'byed pa ni gzhan dag las bstan pa bzhin du rig par bya'o/ /'dir 'dus byas dang 'dus ma byas bshad pa yang mi mthun pa rnam pa gsum yod de/ kha cig na re 'dir bshad pa kun tu rtog pa ni 'dus byas dang / 'dus ma byas zhes bya ste/ de'i phyir 'og nas mdo las 'di snyam du sems te/ 'dus byas dang 'dus ma byas snang ba gang yin pa 'di yod do snyam du sems shing de dag ji ltar mthong ba dang / thos pa bzhin du de la nan gyis mchog tu bzung zhing mngon par zhen nas rjes su tha snyad 'dogs par byed do zhes gsungs so zhe'o/ /kha cig ni gzhan gyi dbang gi ngo bo nyid la brten nas/ 'dus byas dang 'dus ma byas rnam par 'byed do/ /'og nas mdo las 'dus byas dang 'dus ma byas snang ba gang yin pa 'di ni med mod kyi/ 'on kyang rnam par rtog pa las byung ba'i rnam pa de'i mtshan nyid ni yod do zhes gsungs pas so zhe'o/ /kha cig na re 'dus byas ni gzhan gyi dbang gi ngo bo nyid do/ /'dus ma byas ni yongs su grub pa'i ngo bo nyid do zhes bshad de/ de ltar rnam pa gsum du bshad pa yod mod kyi/ gsum pa ni yang dag pa'i don yin te/ de ci'i phyir zhe na/ 'dir don gyis gzhan gyi dbang gi ngo bo nyid kyi 'dus byas dang / yongs su grub pa'i ngo bo nyid kyi 'dus ma byas kyi chos gnyis la mngon par zhen pa med pa'i ngo bo nyid la 'dus byas dang 'dus ma byas su ston pa'i phyir ro/ /gnyis su med pa zhes bya ba ni 'og nas rnam par 'byed do/ /de la 'dus byas ni 'dus byas kyang ma yin 'dus ma byas kyang ma yin no/ /'dus ma byas ni 'dus ma byas kyang ma yin/ 'dus byas kyang ma yin no zhes bya ba ni gnyis pa gnyis su med pa'i mtshan nyid bshad pa zhes bya ba ston te/ 'di ni rnam pa lnga las brjod du med pa'i mtshan nyid dang / gnyis su med pa'i mtshan nyid ces bya ba nyid do / /de ci'i phyir zhe na/ 'dus byas dang 'dus ma byas zhes brjod du med pa'i phyir dang / 'dus byas dang 'dus ma byas rnam pa gnyis kyi mtshan nyid kyang ma yin pa'i phyir ro/ /mdo'i tshig bshad pa yang so so nas mi mthun te/ tshig nges par 'grel pa'i mdo las ni byas pa ni byas pa yang ma yin/ byas pa ma yin pa yang ma yin no zhes 'byung ste/ slob dpon yang dag bden pa'i 'grel pa las/ 'di man chad tshig gnyis kyis ni 'dus byas kyi chos rab tu sel to/ /tshig gnyis kyis ni 'dus ma byas rab tu sel to/ /de la zhes bya ba ni 'dus byas kyi chos te/ 'di ltar 'dus byas kyi chos ni rgyu dang rkyen bsags pas ma byas pa'i phyir byas pa zhes pa'o/ /byas pa ma yin pa zhes bya ba ni 'dus ma byas kyi chos te/ 'di ltar 'dus ma byas kyi chos ni rang bzhin gyis yod cing rtag pa yin pas/ rgyu dang rkyen bsags pas ma byas pa'i phyir/ byas pa ma yin pa'i zhes bya'o/ /'dir sngar don rnam pa gsum la brten nas/ 'dus byas rab tu sel te/ dang po ni nor bu'i rnam par shes pa rnam par rtog pa'i phyir/ byas pa yod par gyur pas/ byas pa ni yang dag par med kyi/ rnam par rtog pa kho nar zad pa'o/ /gzung ba de'i dbang gis ni 'dzin pa yod par gyur pa yin te/ gzung ba nyid yod pa ma yin pa'i phyir/ 'dzin pa yang med par byas pa ma yin pa'o/ /gnyis pa ni 'dus ma byas kyi rtsa ba yin te/ 'dus byas kyi chos rnams kyi rtsa ba ni yang dag pa ma yin par sems pa las skyes pa yin la/ yang dag pa ma yin par sems pas ni nyon mongs pa rnam par skyed do/ /nyon mongs pas ni las rnams skyed do/ /las kyis ni rnam par smin pa skyed do/ /yang dag pa ma yin par sems pa ni yul 'dzin pa las 'byung ste/ yul nyid yang dag par yod pa ma yin na/ nor pas yod pa nyid du mngon par zhen to/ /yul nyid med pa'i phyir/ yang dag pa ma yin pa'i sems pa yang med pa nyid do/ /yang dag pa yin pa'i sems pa yang med pa nyid kyis nyon mongs pa rnams kyang med pa nyid do/ /nyon mongs pa rnams med pa'i phyir las rnams kyang med pa nyid do/ /las rnams med pa'i phyir rnam par smin pa yang med pa nyid do/ /rtsa ba nyid yang dag pa ma yin pa'i phyir/ 'dus byas thams cad kyang yang dag pa ma yin pa nyid do/ /gsum pa ni mtshan nyid med pa dang / skye ba med pa'i dbang gis byas pa'i chos rnams kyang / kun brtags dang / gzhan gyi dbang gi ngo bo nyid las gud na med de/ ngo bo nyid ni 'di gnyis rang bzhin gyis mtshan nyid dang / skye ba med na byas pa'i don lta ga la yod de/ de'i phyir byas pa yang ma yin byas pa ma yin pa yang ma yin no zhes bya ba ni tshig gnyis pas byas pa rab tu sel ba ste/ byas pa de ltar 'dus byas yin par gyur na/ byas pa ma yin pa ni 'dus ma byas pa nyid du 'gyur ro/ /'dir yang rnam pa gsum gyis 'dus ma byas rab tu sel te/ dang po ni 'di ltar 'dus ma byas zhes byas pa yang nor pa'i rnam par shes pas rnam par rtog pa las skyes pa'i phyir/ byas pa ma yin pa ni 'di yod par gyur pa yin te/ nor pa'i rnam par shes pa med pa nyid kyis byas pa ma yin pa yang yod pa nyid du mi 'gyur ro/ /nor pa'i rnam par shes pas rnam par rtog pa'i phyir byas pa zhes bya ba'i ming yod par gyur to/ /ngo bo nyid yang dag par yod pa ma yin pa'i phyir 'grub par mi 'gyur ro/ /byas pa'i chos med pa nyid kyis byas pa ma yin pa yang yod pa nyid du mi 'gyur ro/ /'di ltar yod pa ni med pa la ltos pa yin no/ /med pa nyid med pas yod pa ni rang nyid kyis med par 'gyur ro/ /gnyis pa ni rtsa ba med pa nyid yin pas byas pa nyid rtsa ba yin te/ gal te byas pa yang dag par yod par gyur na ni/ byas pa ma yin pa'i ming yang brjod du yod par 'gyur te/ ji ltar sngar nad yod na phyis nad byang ba zhes brjod du yod kyi/ nad nyid dang po nas yod pa ma yin na byang ba zhes bya ba ji ltar 'gyur/ gsum pa ni chos rnams gzod ma nas mtshan nyid med pa dang / skye ba med pa dang / yod pa dang bral ba dang / med pa dang bral ba yin pas rang bzhin gyis byas pa ma yin/ byas pa ma yin pa yang ma yin pa'o/ /byas pa ma yin pa yang zhes bya ba ni 'og ma'i tshig gnyis kyis 'dus ma byas kyi chos rab tu sel te/ de yang tshig dang po gcig ni don rnam pa gsum la brten nas 'dus ma byas rab tu sel bas de'i phyir byas pa ma yin pa yang ma yin zhes gsungs so/ /de'i 'og ma gcig ni don rnam pa gsum la brten nas/ 'dus byas rab tu sel ba'i phyir byas pa yang ma yin no zhes gsungs so/ /don rnam pa gsum yang gong ma las tha mi dad de/ 'dus byas dang 'dus ma byas las gud na med pa'i phyir/ snga ma las tha dad du bshad pa med de/ 'di ni brjod du med pa dang gnyis su med pa'i don bstan to/ /de ltar mdor bsdus na lan btab pa yang / dang po ni gang zag dbang po rnon po nyung ngu thos ma thag tu go bar 'gyur ba'i ched du rgya cher bshad mi dgos so snyam du dgongs pa'o/ /gnyis pa ni gang zag sems mtho ba dag gdul ba'i ched du ste/ lan cig thos pas da dung ma go ste/ yang gsol ba btab nas gdod bshad par dgongs pa'o zhes 'byung ste/ de yan chad du slob dpon yang dag bden pas bshad pa'i gzhung dang sbyar nas/ mdo sde'i don bstan te/ yul 'di'i slob dpon rnams kyang phal cher slob dpon yang dag bden pas bshad pa dag dang mthun par ston to/ /da ltar gyi mdo 'di las/ de la 'dus byas ni 'dus byas kyang ma yin/ 'dus ma byas kyang ma yin no/ /'dus ma byas kyang 'dus ma byas kyang ma yin/ 'dus byas kyang ma yin no zhes gsungs pa'i mdo'i tshig 'di la bshad pa yang so so nas mi mthun te/ kha cig na re de la 'dus zhes bya ba ni kun brtags pa yin te/ des brtags pa'i chos yang dag par yod pa ma yin pa'i phyir brjod du med pa dang / gnyis su med pa'i mtshan nyid ces bya'o/ /'dus byas nyid 'dus byas ma yin pa nyid kyis 'dus ma byas 'dus ma byas ma yin par yang de bzhin te/ 'di ltar brtags pa'i phyir 'dus byas dang 'dus ma byas zhes brjod du med de/ de'i phyir 'og nas ni mdo las nan gyis mchog tu bzung nas 'dus byas dang 'dus ma byas gang yin pa 'di ni yod do snyam du sems so zhes gsungs pas 'dus byas dang 'dus ma byas gang yin pa de dag ni brtags pa yin par mngon no zhe'o/ /kha cig na re 'dir 'dus byas dang / 'dus ma byas zhes gsungs pa de dag ni gzhan gyi dbang gi 'dus byas dang 'dus ma byas yin no/ /de'i phyir 'og nas ni mdo las/ rnam par rtog pa las byung ba 'du byed kyi mtshan ma zhes gsungs pa yin te/ kun brtags pa'i 'dus byas dang / 'dus ma byas rab tu bsal ba'i phyir/ de la 'dus byas ni 'dus byas kyang ma yin/ 'dus ma byas kyang ma yin no/ /'dus ma byas kyang 'dus ma byas ma yin/ 'dus byas kyang ma yin no zhes gsungs pa yin no zhe'o/ /kha cig na re de la 'dus byas zhes bya ba ni gzhan gyi dbang gi ngo bo nyid dang 'dus byas kyi chos rnams so/ /'dus byas kyang ma yin 'dus ma byas kyang ma yin no zhes bya ba ni kun tu brtags pa'i 'dus byas dang 'dus ma byas te/ 'dir don du gzhan gyi dbang la kun brtags yongs su bsal ba'i 'dus byas dang / 'dus ma byas kyis rab tu phye ba'i de bzhin nyid gang yin pa de ni don dam pa'i bden pa zhes bya ste/ gzhan gyi dbang la kun brtags pa'i ngo bo nyid med pa la yongs su grub pa zhes bya ba'i gzhan gyi dbang nyid la yongs su grub pa zhes bshad pa ni ma yin no zhes ston to/ /de la 'dus ma byas zhes bya ba ni yongs su grub pa'i ngo bo nyid tshig dang bral ba'i de bzhin nyid do/ /'dus ma byas kyang ma yin/ 'dus byas kyang ma yin zhes bya ba ni kun brtags pa ma yin pa'i 'dus ma byas dang 'dus byas te/ don du na yongs su grub pa'i ngo bo nyid la kun brtags kyi ngo bo nyid yongs su bsal ba'i 'dus ma byas dang / 'dus byas kyis rab tu phye ba'i de bzhin nyid gang yin pa de ni/ don dam pa'i bden pa zhes ston to zhe'o/ /de ltar rnam pa gsum du bshad pa yod mod kyi/ 'dir ni re zhig gsum dang sbyar ro/ /gnyis su med pa'i mtshan nyid de yang rnam pa mang bas brjod kyis mi lang ste/ 'dir re zhig 'dus byas dang 'dus ma byas gnyis su med pa'i mtshan nyid kyi dbang du byas te brjod na/ so so nas bshad pa mi mthun te/ bstan bcos chos mngon pa kun las btus pa las ni nye bar len pa'i phung po med pa'i dbang du byas nas/ gnyis su med pa zhes bshad de/ las dang nyon mongs pa las skyes pa ma yin pa'i phyir/ 'dus byas zhes bya ba yang mi rung la/ ji ltar mos pa bzhin du mngon du snang ba dang / mngon du mi snang ba'i phyir 'dus ma byas yang mi rung ngo zhes ston to/ /bstan bcos theg pa chen po bsdus pa dang sbyar na/ de las chos kyi sku'i mtshan nyid rnam pa lnga ston te/ gnas gyur pa'i mtshan nyid dang / chos dkar po'i mtshan nyid dang / gnyis su med pa'i mtshan nyid dang / brtags pa'i mtshan nyid dang / bsam gyis mi khyab pa'i mtshan nyid do/ /gsum pa gnyis su med pa'i mtshan nyid la rnam pa gsum du bstan te/ yod pa dang med pa'i mtshan nyid dang / 'dus byas dang 'dus ma byas gnyis su med pa'i mtshan nyid dang / gcig pa dang tha dad pa gnyis su med pa'i mtshan nyid do/ /de la 'dus byas dang / 'dus ma byas gnyis su med pa'i mtshan nyid ni las dang nyon mongs pa rnams kyis byas pa ma yin pa nyid kyi phyir dang / 'dus byas su snang ba'i mtshan nyid kun tu ston pa la dbang 'byor pa nyid kyi phyir ro zhes bshad do/ / 'dir bshad pa ni kun tu brtags pa'i skye ba dang / 'gag pa la sogs pa'i 'dus byas kyang yin/ kun tu brtags pa'i skye ba dang 'gag pa la sogs pa'i 'dus ma byas kyang ma yin pas de'i phyir 'dus byas kyang ma yin 'dus ma byas kyang ma yin zhes gsungs so/ /brjod du med pa dang / gnyis su med pa'i ngo bo 'di nyid de/ de bzhin nyid yin pas/ de'i phyir 'phags pa bla na med pa'i gnas bstan pa'i mdo las/ de bzhin gshegs pa'i khams ni yon tan rnam pa lnga ste/ tshig gis brjod du med pa'i mtshan nyid dang / gnyis su med pa'i mtshan nyid dang / rtog ge thams cad las 'das pa'i mtshan nyid dang / gcig pa dang tha dad pa'i mtshan nyid dang / thams cad du ro gcig pa'i mtshan nyid do zhes bya ba dang / gzhan yang de nyid las chos kyi snying po thams cad rnam par grol bar 'gyur ba med pa'i phyir de bzhin nyid ces bya'o/ /phyin ci log med pa'i phyir yang dag pa'i mtha' zhes bya'o/ /mtshan ma thams cad yang dag par 'das pa'i phyir zhi ba zhes bya'o/ /'phags pa'i gang zag gis bgrod par bya ba rnam par mi rtog pa'i spyod yul yin pa'i phyir don dam pa zhes bya'o/ /kun dga' bo de bzhin gshegs pa'i khams 'di ni yod pa yang ma yin/ med pa yang ma yin/ kun nas nyon mongs pa yang ma yin/ rnam par byang ba yang ma yin te/ rang bzhin gyis rnam par dag pa'o zhes gsungs so/ /mdo 'di nyid las kyang 'og nas/ sangs rgyas brjod bral gnyis med don gsung ba/ /shin tu zab pas byis pa'i spyod yul min/ /zhes gsungs pas/ de'i phyir brjod du med pa ni de bzhin nyid kyi ngo bo nyid byed par rig par bya'o/ /gal te de ltar na shes rab kyi pha rol tu phyin pa'i le'u chen po las gsungs pa de ji ltar 'thad do/ /de'i phyir de nyid las/ rab 'byor gyis bcom ldan 'das la gsol pa/ bcom ldan 'das ji lta bu ni mchis pa'i chos lags/ bcom ldan 'das kyis bka' stsal pa/ gnyis su yod pa ni yod pa'i chos so/ /gnyis su med pa ni med pa'i chos so zhes gsungs so/ /shes rab kyi pha rol tu phyin pa'i 'grel pa las kyang / gnyis su yod pa'i chos ni so so tha dad pa'i mtshan nyid do/ /gnyis su med pa'i chos ni ston pa nyid gcig pa'i mtshan nyid de stong pa nyid gcig pa'i mtshan nyid kyis so so tha dad pa'i mtshan nyid 'jig par byed do zhes 'byung ngo / /gzhan yang shes rab kyi pha rol tu phyin pa le'u chen po las chos rnams kyi mnyam pa nyid ni 'di lta ste/ mtshan nyid med pa'o/ /rab 'byor gyis gsol pa/ bcom ldan 'das chos mnyam pa nyid de 'dus byas shig lags sam/ 'on te 'dus ma byas shig lags sam/ bcom ldan 'das kyis bka' stsal pa / 'dus byas kyi chos kyang ma yin/ 'dus ma byas kyi chos kyang ma yin no/ /de ci'i phyir zhe na/ 'dus byas kyi chos las gud na 'dus ma byas kyi chos kyang mi dmigs la/ 'dus ma byas kyi chos las gud na 'dus byas kyi chos kyang mi dmigs so/ /rab 'byor 'dus byas kyi ngo bo nyid dang 'dus ma byas kyi ngo bo nyid kyi chos de nyid ni 'du ba ma yin/ 'bral ba ma yin/ gzugs med pa/ dbyibs med pa/ mtshan nyid gcig pa/ 'di lta ste/ mtshan ma med pa'o/ /'di yang sangs rgyas rnams kyis kun rdzob kyi bden pa nyid kyi phyir gsungs kyi/ don dam pa'i bden pa nyid kyi phyir gsungs pa ni ma yin no zhes gsungs te/ zhib tu de nyid las gsungs pa bzhin no zhe'o/ /don dam pa'i bden pa 'di ni de bzhin nyid kyi ngo bo nyid byed do/ /med do zhes gsungs pa ni kun brtags pa yongs su bsal ba'i phyir med do zhes gsungs kyi/ yang dag pa'i don du na med pa nyid ma yin no/ /de'i phyir 'og nas mdo las/ chos thams cad rang bzhin med do zhes gsungs pa yang / ngo bo nyid rnam pa gsum gyi dgongs pa'i dbang du mdzad nas med do zhes gsungs kyis/ thams cad kyi thams cad du med pa ni ma yin no/ /chos thams cad gnyis su med par bsgoms pa'i sgo nyid ni rnam par rig pa tsam du bsgom pa'o/ /yang na ngo bo nyid rnam pa gsum las yongs su grub pa tsam du bsgom pa'o/ /ngo bo nyid rnam pa gsum las ni don dam pa ngo bo nyid med par bsgom pa'o/ /slob dpon yang dag bden pas 'di ni rnam par mi rtog pa dang / mtshan ma med pa'i rnal 'byor ro/ /yang na gzhan gyi dbang gi ngo bo nyid skye ba med par bsgom pa'o zhes bshad do/ /'dir gnyis su med pa'i chos kyi sgo bshad par bya ste/ rnam pa brgyad kyi dbu mar mi 'gyur ba'i don ni gzhan nas bstan pa bzhin du rig par bya'o/ /byang chub sems dpa' tshul bzhin kun 'dris kyis byang chub sems dpa' don zab dgongs pa nges par 'grel pa la smras pa zhes bya ba la sogs pas ni gsum pa gal gyis dri ba dris pa zhes bya ba bstan to/ 'di yang rnam pa gnyis te/ dris pa dang lan 'debs pa bsten pa dang / snga ma las brtsams nas dri ba dris pa ste/ 'di ni dang po'o/ /kye rgyal ba'i sras ji ltar na 'dus byas ni 'dus byas kyang ma yin/ 'dus ma byas kyang ma yin la/ 'dus ma byas kyang 'dus ma byas kyang ma yin/ 'dus byas kyang ma yin zhes bya ba ni gnyis pa lnga pa las brtsams nas dri ba dris pa bstan to/ /sngar 'dus byas dang 'dus ma byas zhes smras pas/ 'dir don gang la brten nas 'dus byas ni 'dus byas kyang ma yin/ 'dus ma byas kyang ma yin no/ /'dus ma byas kyang 'dus ma byas kyang ma yin/ 'dus byas kyang ma yin no zhes smras/ 'di la don ci yod ces bya ba'i tha tshig go /byang chub sems dpa' don zab dgongs pa nges par 'grel gyis/ byang chub sems dpa' tshul bzhin kun 'dris la smras pa zhes bya ba la sogs pa ni bzhi pa rgya cher rnam par bshad pa zhes bya ba ston to/ /'di yang rnam pa gnyis su dbye ste/ bshad pa 'byung ba'i gleng gzhi dang / dris pa bzhin du lan yang dag par bstan pa ste/ 'di ni dang po'o/ /rigs kyi bu 'dus byas zhes bya ba de ni ston pas btags pa'i tshig yin te zhes bya ba man chad ni gnyis pa dris pa bzhin du lan yang dag par bstan pa zhes bya ba ston to/ /'di yang rnam pa gnyis te/ 'dus byas gnyis su med pa'i mtshan nyid bstan pa dang / rigs kyi bu 'dus ma byas zhes bya ba de yang ston pas zhes bya ba man chad kyis 'dus ma byas gnyis su med pa'i mtshan nyid bstan pa'o/ /dang po yang rnam pa gnyis kyis bstan te/ mtshan nyid rnam pa gsum dgag pa dang / 'on kyang dngos po med pa las zhes bya ba man chad kyis pha rol gyis brgal ba'i lan rnam par bshad cing yang dag pa'i rigs pa bstan pa'o/ /mtshan nyid rnam pa gsum dgag pa yang rnam pa gsum du dbye ste/ 'dus byas dgag pa dang / rigs kyi bu zhes bya ba man chad kyis 'dus ma byas dgag pa dang / 'dus byas dang 'dus ma byas ma gtogs pa zhes bya ba man chad kyis 'dus byas kyang ma yin/ 'dus ma byas kyang ma yin pa dgag pa ste/ 'di ni dang po 'dus byas kyi mtshan nyid dgag pa'o/ /mdo'i tshig 'di yang rgya gar yul pa'i slob dpon rnams so so nas mi mthun par bshad pa rnam pa gsum yod de/ kha cig na re mdo'i tshig 'di ni mu stegs can kho na'i dbang du mdzad nas ston pa zhes gsungs pa yin te/ 'di ltar bskal pa dang po chags pa'i tshe mu stegs can gyi ston pa dag gis btags pa tsam du 'dus byas kyi chos rnams zhes rnam par gzhag pa'o/ /mu stegs can gyis btags pa tsam du rnam par gzhag pa gang yin pa de ni kun tu rtog pa las byung ba tha snyad du brjod pa dag yin no/ / kun tu rtog pa las byung ba tha snyad du brjod pa yin par gyur na/ de ni kun tu rtog pa las byung ba gtan du yang dag par yod pa ma yin pa'i phyir/ 'dus byas kyang ma yin no zhe'o/ /kha cig na re mdo'i tshig 'di sangs rgyas kyis gsungs pa'i dbang du mdzad nas gsungs pa yin te 'di ltar chos thams cad ni brjod pa dang bral ba yin na/ ston pa bcom ldan 'das kyi thugs rje chen po'i stobs kyis btags pa tsam du 'dus byas zhes gsungs te/ 'di ni de bzhin gshegs pa'i rjes la brnyes pa'i mkhyen pa'i kun tu rtog pa las byung ba tha snyad du brjod pa yin pas phyis thos pa'i kun tu rtog pa'i tha snyad du 'gyur te/ btags pa tsam du brjod pa yin pa'i phyir/ rdzas su yod pa'i 'dus byas nyid ma yin pas/ de'i phyir 'dus byas ni 'dus byas kyang ma yin zhes bya ba gsungs so zhes zer te/ slob dpon yang dag bden pas phal cher 'di dang mthun par bshad do/ /kha cig ni mdo'i tshig 'di la gsum yod de/ dang po 'dus byas zhes bya ba des ni de bzhin gshegs pas btags pa tsam du gsungs pa yin par ston to/ /gnyis pa ston pas zhes bya ba la sogs pa ni so so'i skye bo la sogs pas btags pa tsam du rdzas su mngon par zhen par gyur pa ston to/ /gsum pa kun tu rtog pa las byung ba zhes bya ba la sogs pas ni rdzas su yod pa ma yin pa bzlas te bshad pa dang / 'dus ma byas yin par bshad pa'i mjug bsdu ba ston to zhe'o/ /de ltar rnam pa gsum du bshad pa yod mod kyi/ bshad pa ni tha ma bzang ngo / /de bzhin gshegs pa la ston pa zhes bya ste/ dgongs pa zab mo rnam par dgrol ba'i mdo las ni/ 'dus byas zhes bya ba de las ni de bzhin gshegs pas ming dang / yi ge brjod pa'i chos kho na yin te zhes 'byung ngo / /tshig nges par 'grel pa'i mdo las ni/ 'di ston pa chen po'i yang dag pa'i bstan pas brjod pa'i tshig go zhes 'byung ngo / /gzhan yang chos mngon pa las/ bcom ldan 'das kyis chos thams cad ni mdor bsdu na rnam pa gnyis yod ces gsungs te/ 'di lta ste/ 'dus byas pas btags pa'i tshig yin te zhes bya ba 'di man chad ni gnyis pa 'dus ma byas gnyis su med pa'i mtshan nyid bstan pa zhes bya ba ston to/ /'di yang rnam pa gnyis su dbye ste/ mtshan nyid rnam pa gsum dgag pa dang / 'on kyang dngos po med pa la zhes bya ba man chad kyis rgol ba'i lan bshad nas/ yang dag pa'i rigs pa'i rigs pa bstan pa'o/ /mtshan nyid rnam pa gsum dgag pa yang rnam pa gsum du dbye ste/ 'dus ma byas kyi mtshan nyid dgag pa dang / rigs kyi bu zhes bya ba man chad kyis 'dus byas kyi mtshan nyid dgag pa dang / 'dus byas dang 'dus ma byas ma gtogs pa zhes bya ba man chad kyis 'dus ma byas dang / 'dus ma byas kyang ma yin pa'i mtshan nyid bshad pa dang / 'di ni dang po 'dus ma byas kyi mtshan nyid dgag pa'o/ /'di yang rnam pa gsum du dbye ste/ 'dus ma byas te de bzhin gshegs pas btags pa tsam du gsum pa yin par bstan pa dang / de bzhin gshegs pas btags pa tsam du gsum pa la brten nas/ rdzas su yod pa kho nar 'dzin par gyur par bstan pa dang / rdzas su yod pa ma yin pa dang / 'dus ma byas ma yin par bshad pa'i mjug bsdu ba ste/ 'di ni dang po'o/ /'di la bshad pa rnam pa gsum yod pa ni gong ma bzhin du rig par bya'o/ /ston pas btags pa'i tshig gang yin pa de ni kun tu rtog pa las byung ba tha snyad du brjod pa yin te kun tu rtog pa las byung ba tha snyad du brjod pa gang yin pa de ni kun tu rtog pa sna tshogs kyis tha snyad du brjod pa gtan yongs su ma grub pa'i phyir 'dus byas ma yin no zhes bya ba ni gsum pa rdzas su yod pa ma yin pa dang / 'dus ma byas ma yin par bshad pa'i mjug bsdu ba'o/ /rigs kyi bu 'dus ma byas zhes bya ba de yang tha snyad kyi khongs su gtogs pa yin la zhes bya ba ni gnyis pa 'dus byas kyi mtshan nyid dgag pa ste/ gong ma bzhin du rig par bya'o/ /'dus byas dang 'dus ma byas ma gtogs pa gang ci brjod kyang rung mtshan nyid de yang de dang 'dra ba nyid du 'gyur te zhes bya ba ni gsum pa 'dus ma byas dang 'dus byas kyang ma yin pa'i mtshan nyid dgag pa'o/ /'on kyang dngos po med pa las/ brjod pa yod par gyur pa ni ma yin no zhes bya ba la sogs pas ni gnyis pa rgos pa'i lan bshad pa nas yang dag pa'i rigs pa ston pa zhes bya ba bstan to/ /'di yang rnam pa gsum du dbye ste/ rang gi gzhung bstan pa nas lan phyir btab pa dang / slar brtag pa dang / yang dag par bshad pa ste/ 'di ni dang po'o/ /dngos po de yang gang zhe na zhes bya ba ni gnyis pa slar brtag pa'o/ /'di lta ste/ 'phags pa rnams kyi 'phags pa'i shes pa dang / 'phags pa'i mthong ba'i ming dang brjod pa dang bral ba'i phyir mngon par rdzogs par sangs rgyas pa ste/ brjod du med pa'i chos nyid de nyid gzhan dag mngon par rdzogs par rtogs par bya ba'i phyir/ btags pa'i ming 'du shes kyi 'dus ma byas zhes brjod do zhes bya ba ni gsum pa byang chub sems dpa' yang dag par bshad pa'o/ /mdo'i tshig 'di yang rnam pa gnyis su dbye ste/ dang po ni 'phags pa rnams ming dang / brjod pa dang bral ba'i phyir mngon par rdzogs par sangs rgyas pa'o/ /gnyis pa ni gzhan gyi ched du btags pa tsam du ming dang 'du shes kyis bstan pa ste/ zhib tu rnam par dbye ba ni snga ma bzhin du rig par bya'o/ /de nas byang chub sems dpa' sems dpa' chen po tshul bzhin kun 'dris/ byang chub sems dpa' don zab dgongs pa nges par 'grel pa la dri ba dris pa zhes bya ba 'di man chad ni sngar bzlas te dris pa zhes bya ba ston to/ /'di yang rnam pa gnyis su dbye ste/ dri ba dris pa'i gleng bslang ba dang / dri ba yang dag par dris pa'o/ /'di ni dang po dri ba 'dri ba'i gleng bslang ba nyid do/ /rgyal ba'i sras ji ltar na dngos po de 'phags pa rnams kyi 'phags pa'i shes pa dang / 'phags pa'i mthong ba ming dang / brjod pa dang bral ba'i phyir mngon par rdzogs par sangs rgyas shing brjod du med pa'i chos nyid de nyid gzhan dag mngon par rdzogs par rtogs par bya ba'i phyir/ btags pa'i ming dang 'du shes kyi 'dus byas zhes bya ba dang / 'dus ma byas zhes bya bar brjod par gyur pa yin zhes bya ba ni gnyis pa dri ba yang dag par dris pa zhes bya ba ston to/ / rgya cher bshad mod kyi da dung khong du ma chud na/ de'i dpe ni ji lta bu zhes bya ba'i tha tshig go/ /tshig nges par 'grel pa'i mdo las/ mdo'i tshig 'di chad de mi 'byung ba ni/ mdor bsdu bar bsam pa'i phyir ro / /byang chub sems dpa' don zab dgongs pa nges par 'grel gyis / byang chub sems dpa' tshul bzhin kun 'dris la smras pa zhes bya ba 'di man chad ni drug pa dpe smos nas bstan pa zhes bya ba ston to / /'di yang rnam pa gnyis su dbye ste/ 'dus byas dang 'dus ma byas zhes 'byung bas de'i phyir ston pa zhes bya ba ni de bzhin gshegs pa la bya bar mngon no/ /yang dag pa'i don du rdzas su gyur pa zhes bya ba'i chos med de/ sgyu ma la sogs pa bzhin du yod pa ma yin pa yod pa lta bur snang bas/ de'i phyir ston pas brjod du med pa la btags pa tsam du 'dus byas zhes gsungs so/ /ston pas btags pa'i tshig gang yin pa de ni kun tu rtog pa las byung ba tha snyad du brjod pa yin la zhes bya bas ni gnyis pa btags pa tsam la rjes su mngon par zhen pa ston te/ gal te de bzhin gshegs pas btags pa'i tshig yin par gyur na de ni sems can rnams kyi kun tu rtog pa las byung ba tha snyad du brjod pa ming gi rjes su spyod pa yin te/ yang dag pa ma yin pa'i phyir 'dus byas ma yin no zhes bya ba'i tha tshig go/ /kun tu rtog pa las byung ba tha snyad du brjod pa gang yin pa de ni kun tu rtog pa sna tshogs kyi tha snyad du brjod pa gtan yongs su ma grub pa'i phyir/ 'dus byas kyang ma yin no zhes bya bas ni gsum pa rdzas su yod pa ma yin pa bzlas te bshad pa dang / 'dus ma byas ma yin par bshad pa'i mjug bsdu ba ston te/ 'dis ni sems can gyi kun tu rtog pa rnam pa sna tshogs kyis sems kyi tha snyad du brjod pa yang dag par yod par 'dzin pa rnams su yongs su ma grub pa'i phyir/ 'dus byas kyang ma yin no zhes bstan to/ /rnam pa gsum las dang po ste/ 'dus byas bshad zin to/ /rigs kyi bu 'dus ma byas zhes bya ba de yang tha snyad kyi khongs su gtogs pa yin la zhes bya ba ni/ gnyis pa 'dus ma byas dgag pa zhes bya ba ston to/ /'di ltar 'dus ma byas kyi chos kyang ston pas btags pa'i tshig gi grangs su song zhing de bzhin du rdzas su ma grub pa'i phyir/ 'dus ma byas ma yin no zhes bya ba'i don to/ /rnam pa 'dus byas dang 'dus ma byas zhes bya ba gtogs pa gang ci brjod kyang rung mtshan nyid de yang de 'dra ba nyid du 'gyur te zhes bya ba ni gsum pa 'dus byas kyang ma yin 'dus ma byas kyang ma yin pa'i mtshan nyid dgag pa ston to/ /'di ltar 'dus ma byas kyi da ltar 'dus ma byas 'di ni be'u'i sde pa rnams kyis btags pa bkag pa yin te/ de dag gis chos kyi sde snod rnam pa lnga rnam par gzhag pa'i don 'di lta ste/ dus gsum gyi 'dus ma byas dang / brjod du med pa'i chos kyi sde snod dang / de dag gis rnam par gzhag pa'i bdag dang / brjod du med pa'i 'dus byas kyi dus gsum dang / 'dus ma byas dus gsum du gtogs pa ma yin pa'o/ /de'i phyir 'dus byas kyang ma yin 'dus ma byas kyang ma yin pa zhes bya ba ste/ 'di ni gang ci brjod kyang rung ba zhes bya'o/ /'dir de dag gis btags pa rnam par gzhig pa'i phyir/ 'dus byas dang 'dus ma byas ma gtogs pa gang ci brjod kyang rung ba'i bdag rtag par gnas par 'dod pa de'i mtshan nyid kyang ming dang / yi ge'i grangs su lhung ba'i phyir rdzas su yod pa ma yin no zhes gsungs so zhes bya ba'i tha tshig go/ /yang na mdo'i tshig 'di de dag gi brgyud pa'i btags pa dgag pa yin gyi/ mngon par zhen pa yod par nges pa ni med do/ /gzhan yang shes rab kyi pha rol tu phyin pa'i 'grel pa las/ de la chos rnam pa thams cad ces bya ba ni mdor bsdu na rnam pa gsum yod de/ 'dus byas kyi chos dang / 'dus ma byas kyi chos dang / brjod du med pa'i chos so zhes bshad do/ /'on kyang dngos po med pa'i las brjod pa yod par gyur pa ni ma yin no zhes bya ba 'di man chad ni gnyis pa pha rol gyis brgal ba'i lan rnam par bshad cing yang dag pa'i rigs pa bstan pa zhes bya ba ston to / /pha rol pa rnams 'di skad du gal te 'dus byas kyi chos rnams 'dus byas kyang ma yin/ 'dus ma byas kyang ma yin/ de bzhin gshegs pas 'dus byas dang / 'dus ma byas zhes gsungs pa 'di la yang dngos po med par 'gyur ro zhes the tshom za nas rgol ba'o/ /de la dngos po zhes bya ba ni ngo bo nyid kyi dngos po'o/ /tshig nges par 'grel pa'i mdo las/ ston pas bstan pa gsungs pa la ci don med dam zhes 'byung ngo / /dgongs pa zab mo rnam par 'grel ba'i mdo las/ ming stong pas dngos po bshad do zhes 'byung ngo / /'di yang rnam pa gsum du dbye ste/ rang gi gzhung smos nas lan spyir btab pa dang / byang chub sems dpas slar brtag pa dang / byang chub sems dpas lan yang dag par bstan pa'o/ /'di dang po rang gi gzhung smos nas lan spyir btab pa ste/ 'di ltar bcom ldan 'das kyis 'dus byas dang / 'dus ma byas zhes gsungs pa la yang dag par rdzas su gyur pa 'dus byas kyi chos med mod kyi/ 'on kyang dngos po med pa las/ brjod pa yod par gyur pa ni ma yin no zhes bya ba'i don to/ /dngos po de yang gang zhe na zhes bya ba 'di ni gnyis pa byang chub sems dpas slar brtag pa'o/ /'di lta ste/ 'phags pa rnams kyi 'phags pa'i shes rab dang / 'phags pa'i mthong ba ming dang / brjod pa dang bral ba'i phyir/ mngon par rdzogs par sangs rgyas pa gang yin pa de/ brjod du med pa'i chos nyid de de nyid gzhan dag mngon par rdzogs par rtogs par bya ba'i phyir/ btags pa'i ming dang / 'du shes kyis 'du byed zhes brjod do zhes bya ba 'di ni gsum pa byang chub sems dpas lan yang dag par bstan pa zhes bya ba ston te/ dngos po med pa las brjod pa yod par 'gyur ba ni ma yin no/ /de la 'phags pa zhes bya ba ni brjod kyi/ bstan bcos las 'di lta ste/ zag pa med pa 'phags pa'i lam dang yang dag par ldan pas/ sdig pa'i chos rnams las ring du gyur pas 'phags pa zhes bya'o zhes bshad do/ /bstan bcos yang dag pa'i rigs pa las kyang / 'phags pa ni 'di lta ste/ 'ching ba dang bral te/ sdig pa rnams las ring du gyur pa dang / yang na dge ba las gzhol ba'i phyir/ 'phags pa zhes bya'o zhes 'byung ngo / /bstan bcos de kho na nyid grub pa las kyang / mya ngan las 'das par phyin pa'i phyir / 'phags pa zhes bya'o zhes bshad do/ /rnal 'byor spyod pa'i sa las/ dge ba zad pa med pa yin pa'i phyir/ 'phags pa zhes bshad do/ /de la shes pa dang mthong ba zhes bya ba la shes pa ni rab tu 'byed pa'i don to/ /mthong ba ni yongs su tshol ba'i don te/ 'di ltar zag pa med pa 'phags pa'i shes rab kyis rab tu 'byed cing yongs su tshol ba'i phyir/ 'phags pa'i shes pa dang / mthong ba zhes bya ba'o/ /shes pa dang mthong ba rnam pa gnyis gcig tu bsdus te gsungs pa'i dgongs pa ni shes rab kyi pha rol tu phyin pa'i 'grel pa las rnam par grol ba'i shes pa dang / mthong ba zhes bya ba la shes pa zhes bya ba smos pas chog gam zhe na/ ci'i phyir mthong ba zhes bya ba ni phyi ma yang smos/ smras pa shes pa dang mthong ba gcig tu bshad nas dngos po brtan par 'gyur te/ ji ltar thag pa gnyis gcig tu byas nas/ thag pa de sra zhing brtan par 'gyur ba yin no zhes bshad do/ /rgya cher de nyid las bstan pa bzhin no/ /slob dpon dbyig gnyen gyis mdzad pa'i shes rab kyi pha rol tu phyin pa'i rdo rje gcod pa'i 'grel pa las bshad pa'i dgongs pa dang sbyar nas / mngon sum gyi tshad ma'i 'phags pa'i shes pa ni shes pa dang mthong ba zhes bya'o/ /shes pa 'ba' zhig bstan pa gang yin pa de ni 'di lta ste/ shes pa 'dis shes par 'gyur ro/ /mthong ba kho na bstan pa gang yin pa de ni 'di lta ste/ sha'i mig la sogs pas mthong bar 'gyur ro/ /de la shes pa zhes bya bas ni mig gis lta ba las rnam par 'byed do/ /mthong ba zhes bya bas ni rjes su dpag pa'i shes pa las rnam par 'byed pas/ de'i phyir shes pa dang / mthong ba gcig tu shes pas zhes bya ba bshad pa yin no zhes bshad do / /'dir shes pa dang mthong ba bshad pa yang slob dpon dbyig gnyen gyis bshad pa dang mthun no/ /'dir 'on kyang dngos po med pa las brjod pa yod par gyur pa ni ma yin no zhes gsungs pa de rnam par bshad pa yang so so nas mi mthun te/ slob dpon yang dag bden pa'i brjed byang las ni/ gal te thams cad yang dag par yod pa ma yin no zhes bshad na/ ston pas gsungs pa thams cad kyang don med pa zhig tu mi 'gyur ram zhe na/ smras pa ngo bo nyid yang dag par yod do zhes brjod du med pa dang / ngo bo nyid brjod do zhes brjod du med pa'i dbang gis de nyid de kho na'i don to/ /don rnam pa bzhi dang ldan pa'i phyir brjod du med pa yin te/ dang po ni de kho na'i rnal 'byor rnam par mi rtog pa'i ye shes la gnas pa na/ de kho na'i don rjes su sems pas/ de'i tshe rnam par rtog pa med pa'i phyir brjod du med pa'o/ /gnyis pa ni yang dag pa'i rnal 'byor las langs pa'i sems kyi tha snyad shes kyang de kho na'i yul la mi gnas pa'i phyir brjod du med pa'o/ /gsum pa ni gal te tha snyad nges par gyur na/ gang zag dang chos dang / gzung ba dang 'dzin pa dang / 'dus byas dang 'dus ma byas dang bral bar mi 'gyur la/ de kho na'i don 'di dag las 'das pa'i phyir brjod du med pa'o/ /bzhi pa ni de kho na'i don khong du chud pa dang / mthar phyin pa'i tshad ma gnyis kyi spyod yul yin gyis / rjes su dpag pa dang / tshig gi tshad ma gnyis kyi spyod yul ma yin pa'i phyir brjod du med pa'o/ /'di dag gis ni don du na yang dag pa'i don dngos po med pa ma yin no zhes bstan to/ /de la yang dag pa'i dngos po ni tshig dang bral ba'i chos nyid dang / de bzhin nyid la yang dag pa'i dngos po zhes bya ste/ bdag dang gzhan du rnam par mi rtog pa'i ye shes kyi de bzhin nyid kyi yul rtogs par bya ba'i ched du de'i phyir btags pa tsam du 'dus byas zhes bshad nas/ yang dag par dngos po bstan pa yin no zhes bshad do/ /kha cig ni phyi rol pa dag 'di skad du/ gal te snga na 'dus byas dang 'dus ma byas ma yin na/ 'o na ni dngos po med pa nyid du gyur pas/ ci'i phyir 'dus byas dang 'dus ma byas zhes brjod ces the tshom za ba dang / gzhan yang chos rnams thams cad ming dang brjod pa dang bral ba yin na go btags pa tsam du yang bshad ci dgos snyam du the tshom za bas de'i phyir 'on kyang dngos po med pa las brjod pa yod par gyur pa ni ma yin no zhes bya bas 'di gsungs te/ brjod pa dang bral bas rten cing 'brel bar 'byung ba'i chos 'di rang gi rig pa 'di la brten pa'i phyir/ dngos po med pa yang ma yin la / gzhan dag rtogs par bya ba'i phyir btags pa tsam du bshad pa yang dgos so zhes bshad do/ /kha cig ni phyi rol pa dag /gal te 'dus byas dang 'dus ma byas yod pa ma yin nam/ 'o na ni chos med par gyur pas phan yon gyi dngos po ci zhig mthong nas 'dus byas bshad snyam du dgongs pas de'i phyir lan du 'di gsungs pa yin te/ dngos po med pa ma yin no zhes bya ba'i tha tshig go/ /dngos po yang mdor bsdu na rnam pa gsum ste/ rang gis rtogs pa'i dngos po dang gzhan rtogs par bya ba'i dngos po dang / gzhan dag rtogs par bya ba'i ched du tha snyad blang ba'i dngos po'o/ /dngos po re re yang don mang po dang ldan pas bshad kyis mi rdzogs zhes so// //bam po bcu gcig pa/ rigs kyi bu 'dus ma byas zhes bya ba de yang ston pas bshad pa gleng ba dang / dris pa bzhin du rgya cher bshad pa ste/ 'di ni dang po'o/ /rigs kyi bu dper na sgyu ma mkhan nam/ sgyu ma mkhan gyi slob ma mkhas pa zhig lam po che'i bzhi mdor 'dug ste/ rtswa dang lo ma dang shing dang gseg ma dang gyo dum la sogs pa gcig tu bsdus nas sgyu ma'i las sna tshogs zhes bya ba 'di man chad ni dris pa bzhin du rgya cher bstan pa zhes bya ba ston to/ /'di yang rnam pa gsum du dbye ste/ dpe smos nas bzlas te bshad pa dang / de bzhin du sems can gang dag ces bya ba man chad kyis chos dpe dang mtshungs pa nyid du bstan pa dang / rigs kyi bu de ltar zhes bya ba man chad mjug bsdu zhing pha rol gyis brgal ba'i lan btab pa'o/ /dang po la yang rnam pa gsum du dbye ste/ sgyu ma'i dngos po'i dpe dang de la sems can gang dag ces bya ba man chad kyis rmongs pa dag pa nyid du 'dzin pa'i dpe bstan pa dang / sems can gang dag ces bya ba man chad kyis khong du chud pa dag gis yang dag pa ma yin pa rtogs pa'i dpe bstan pa'o/ /dang po sgyu ma'i dngos po'i dpe bstan pa yang rnam pa gnyis su bstan te/ sgyu ma'i dngos po mdor bstan pa dang / 'di lta ste zhes bya ba man chad kyis sgyu ma'i dngos po rnam par phye ste bstan pa'o/ /sgyu ma'i dngos po mdor bstan pa yang rnam pa bzhis bstan te/ sgyu ma mkhan bstan pa dang / sgyu ma'i gnas bstan pa dang / sgyu ma'i dngos po'i dpes bstan pa dang / sgyu ma'i dngos po spyir bstan pa'o/ /mdo'i tshig dper bstan pa 'di dag gi dgongs pa khong du chud par dka' ba'i phyir sngar slob dpon yang dag bden pas bshad pa bstan nas/ de'i 'og tu bstan pa rnams dang sbyar te/ mdo'i tshig 'di dag bshad par bya'o/ /slob dpon yang dag bden pa'i brjed byang las/ 'dir dpes bstan pa'i dgongs pa ni sems can rnams yang dag pa ma yin pa'i phyin ci log gis rnam pa sna tshogs su rnam par rtog pa'i dbang gis yun ring por 'khor ba na gnas shing / sdug bsngal gyis rnam par smin pa myong bar gyur pas/ sgyu ma'i gzhi dang / brjod du med pa dang / gnyis su med pa'i de bzhin nyid khong du ma chud nas yang dag par yod pa nyid du 'dzin gyis / 'phags pa rnams ni 'di yang dag par yod pa ma yin par gsal bar khong du chud pa dpe bstan pa yin te/ 'di ltar byis pa so so'i skye bo rnams ni sgyu ma'i gzhi khong du ma chud pa dang / mi shes pa dang bcas pas 'phags pa'i shes rab da dung ma thob pa'i phyir dang / 'phags pa rnams ni sgyu ma'i gzhi dang / gnyis su med pa dang / brjod du med pa'i ngo bo nyid khong du chud pa dang / mi shes pa spangs nas 'phags pa'i lam thob pa'i phyir ro/ /de la sgyu ma mkhan ni so so'i skye bo dbang po rnon po'i dpe ste/ mu stegs can rnams so/ /sgyu ma mkhan gyi slob ma ni so so'i skye bo blun po'i dpe ste/ 'dod chen pa rnams so/ /gzhan yang sgyu ma mkhan ni nyon mongs pa'i dpe'o/ /slob ma ni las kyi dpe ste/ nyon mongs pa'i dbang gis las byung ba'i phyir ro/ /gzhan yang sgyu ma mkhan ni rgyu'i dpe'o/ /slob ma ni 'bras bu'i dpe'o/ /lam po che'i bzhi mdo zhes bya ba ni khams gsum dang / zag pa med pa'i dbyings dang / skye shi rnam pa bzhi'i dpe'o/ /yang na spyod yul rnam pa bzhi'o/ /dang po yul dang bdag dang rnam par shes pa rnams kyi dpe'o zhes bshad do/ /gzhan yang slob dpon yang dag bden pas 'phags pa gser 'od dam pa'i brjed byang byas pa las/ de la sgyu ma mkhan ni kun gzhi rnam par shes pa'i dpe ste/ thog ma med pa'i dus na yang dag pa ma yin pa byed pa'o/ /sgyu ma mkhan gyi slob ma ni rnam par shes pa bdun po rnams kyi dpe'o/ /yang dag pa ma yin pa'i chos phra mo ni kun gzhi rnam par shes pas mngon par 'du byed do/ /'bring ni nyon mongs pa can gyi yid kyis so/ /rags pa ni 'jug pa'i rnam par shes pa drug po dag mngon par 'du byed do/ /gzhan yang lta ba'i nyon mongs pa dag ni mkhan po'o/ /sred pa'i nyon mongs pa ni slob ma'o/ /gzhan yang sems kyi nyon mongs pa ni mkhan po'o/ /pags pa dang sha'i nyon mongs pa ni slob ma'o/ /lam gyi bzhi mdo zhes bya ba ni skur pa rnam pa bzhi dang bral ba'i don gyi dpe zhes bshad do/ /de la bstan pa rnams dang sbyar nas bshad pa yang sgyu ma mkhan zhes bya ba ni/ bshad pa rnam pa bzhi yod de dang po ni bstan bcos gnas pa bcu'i bshad pa las 'di ltar las ni sgyu ma mkhan zhes bya'o zhes bshad do/ /gnyis pa ni rnal 'byor spyod pa'i sa las nyon mongs pa dang / las ni sgyu ma mkhan zhes bshad do/ /gsum pa ni bstan bcos theg pa chen po bsdus pa dang / 'phags pa shes rab kyi pha rol tu phyin pa'i le'u chen po las/ byang chub sems dpa' ni sgyu ma mkhan lta bu'o zhes bshad do/ /bzhi pa ni rnal 'byor spyod pa'i sa las rnam par shes pa brgyad ni sgyu ma mkhan lta bu'o zhes bshad do/ /lam gyi bzhi mdo zhes bya ba la yang rnam pa gsum yod do / /dang po ni lung gcig las 'phros pa dang / lung sna tshogs las 'phags pa'i bden pa bzhi pa ni lam gyi bzhi mdo lta bu zhes bshad do/ /gnyis pa ni lung sna tshogs la sogs pa las dran pa nye bar gzhag pa bzhi ni lam gyi bzhi mdo zhes bya'o zhes bshad do/ /gsum pa ni rnal 'byor spyod pa'i sa las rnam par shes pa'i gnas bzhi ni lam gyi bzhi mdo zhes bya'o zhes bshad do/ /rtswa dang lo ma dang shing dang gseg ma dang gyo dum la sogs pa gcig tu bsdus nas zhes bya bas ni/ rten bstan te 'di ltar kun gzhi rnam par shes pa la sa bon rnams bsags pa gnas pa'i dpe bstan pa'o/ /yang na yongs su bsgos pa rnam pa gsum kun gzhi la yod pa ste/ de la rtswa dang lo ma rags pa ma yin pa rnams ni dge ba bsags pa'i dpe bstan pa'o/ / shing dang gseg ma la sogs par bsags pa'i rnam pa ni mi dge ba'i sa bon gyi dpe bstan pa'o/ /sgyu ma'i las sna tshogs zhes bya ba ni sgyu ma'i dngos po spyir bstan pa ste/ ji ltar rtswa dang lo ma la sogs pa'i dbang gis sgyu ma rnams 'byung ba de bzhin du/ dge ba dang mi dge ba'i sa bon gyi dbang gis kyang 'bras bu rnams skye ba'o/ /'di lta ste/ glang po che'i tshogs dang / rta'i tshogs dang / shing rta'i tshogs dang / rkang thang gi tshogs dang / nor bu dang / mu tig dang / be+e DUr+ya dang / dung dang / man shel dang / byi ru dang / nor dang / 'bru sna tshogs dang / bang ba dang / mdzod la sogs pa bstan na zhes bya ba ni gnyis pa sgyu ma'i dngos po rnams phye ste bstan pa zhes bya ba ston te/ gong du sgyu ma'i las sna tshogs zhes mdor bstan pa kho nar zad kyi / rnam par phye ste ma bstan pa'i phyir 'dir rnam par phye ste bshad pa ni yod pa ma yin no/ /slob dpon yang dag bden pa'i 'grel pa las/ dmag rnam pa bzhi ni rgyu dang / rkyen gyi dper ston pa'o/ /nor bu la sogs pa ni 'bras bu'i dper bstan pa ste/ dmag rnam pa bzhi'i dbang gis nor bu la sogs pa mngon par grub pa'i phyir ro/ /yang na dmag rnam pa bzhi ni sems can gyi rnam pa'i dpe'o/ /nor bu la sogs pa ni sems can ma yin pa'i dpe'o/ /de ni 'di skad du kun gzhi rnam par shes pa'i mkhan po dang / rnam par shes pa bdun gyi slob ma rnams rnam par shes pa'i gnas bzhi la gnas te/ ming dang tha snyad la sogs pa'i sa bon bsags pas/ khams gsum dang / 'gro ba lnga dang / skye ba rnam pa bzhi'i sems can dang / sems can ma yin pa la sogs pa rnam pa sna tshogs kyi tshogs pa skye bar 'gyur te/ sa'i mdun rol gyi rmongs pa dag ni yang dag par 'dus byas dang 'dus ma byas kyi chos sna tshogs yod pa nyid du mngon par zhen to/ /sa la gnas pa khong du chud pa dag ni de dag sgyu ma lta bur rtogs pas chos rnams yang dag par yod pa ma yin par shes so zhes bstan par 'gyur ro/ /bstan pa las ni sgyu mas bsdus so/ /'phags pa'i bden pa bzhi la sogs pa ni lam gyi bzhi mdor zhes gsungs pa ni sgyu ma mkhan po zhes bya ba yang rnam pa gsum yod de/ dang po ni sgyu ma mngon par 'du byed pa'i phyir sgyu ma mkhan zhes bya ste/ de nyid nyon mongs pa dang las la sogs pa'o/ /gnyis pa ni sgyu ma lta bur shes pa'i phyir sgyu ma mkhan zhes bya ste/ de ni byang chub sems dpa' rnams so/ /gsum pa ni sgyu ma byed pa'i bdag por gyur pa'i phyir/ sgyu ma mkhan zhes bya ste/ de ni rnam par shes pa brgyad po dag go/ /'dir ni gsum pa dang sbyar ro/ / yang na nyon mongs pa dang las nyi tshe dang sbyar ro/ /yang na gsum char dang sbyar na yang don 'gal ba med do/ /de la lam gyi bzhi mdor zhes bya ba yang don rnam pa gsum gyis bstan te/ dang po ni nyon mongs pa spong ba'i lam gyi bzhi mdo ste/ 'phags pa'i bden pa bzhi'o/ /gnyis pa ni las dang po pas rnam par brtag par bya ba'i lam ste/ de nyid dran pa nye bar gzhag pa'i gnas bzhi'o/ /gsum pa ni sgyu ma'i bdag po'i gnas pa'i lam ste/ de ni rnam par shes pa'i gnas bzhi'o/ /'dir ni gsum pa dang sbyar ro/ / yang na gsum char dang sbyar na yang 'gal ba med do/ /de la sems can gang dag byis pa dang rmongs pa dang / shes rab 'chal pa'i rang bzhin can shes pa med pa de dag ces bya ba la sogs pas ni gnyis pa rmongs pa dag yang dag pa nyid du 'dzin pa'i dpe bstan pa zhes bya ba ston to/ /'di yang rnam pa lngas dbye ste/ mngon par zhen pa'i gang zag bstan pa dang / mngon par zhen pa'i yul bstan pa dang / mngon par zhen pa 'byung bar yang dag par bstan pa dang / mngon par zhen pa'i rgyus tha snyad du brjod pa bstan pa dang / de dag la yang dag par bskul ba'o/ /'dir ni mngon par zhen pa'i gang zag bstan pa ste/ byis pa so so'i skye bo phung po lnga la ming du btags pa'o/ /slob dpon yang dag bden pa'i brjed byang las/ byis pa so so'i skye bo zhes bya ba ni byis pa chung ngu lta bu'i so so'i skye bo ste/ 'dod chen pa rnams so/ /shes rab 'chal pa'i rang bzhin can zhes bya ba ni so so'i skye bo shes rab rnon po ste/ mu stegs can lta ba bskyed par nus pa rnams so zhes 'byung ngo / /'dir byis pa zhes bya ba ni ma rig pa'i ngo bo nyid bstan pa'o/ /rmongs pa zhes bya ba ni gti mug gi nus pa bstan pa ste/ 'di ni mngon par zhen pa bskyed pa'i gzhi'o/ /shes rab 'chal pa zhes bya ba ni mngon par zhen pa'i ngo bo nyid kyi rang bzhin bstan pa ste lta ba mang po rnams so/ /shes pa med pa de dag ces bya ba ni shes rab 'chal pa'i nus pa ste/ 'dis ni gti mug gi dbang gis yang dag pa'i 'dus byas dang 'dus ma byas yod pa nyid du mngon par zhen pa bstan to/ /rtswa dang lo ma dang shing dang gseg ma dang / gyo dum la sogs pa la sgyu ma dang sprul pa'i dngos po dag ces bya ba ni gnyis pa mngon par zhen pa'i yul bstan pa ste/ rtswa dang lo ma la sogs pas ni dge ba dang mi dge ba'i las kyi dper bstan pa'o/ /sprul pa dang sgyu ma'i dngos po dag ni las kyi rnam par smin pa'i dpe bstan pa'o/ /yang na rnam par shes pa las gyur pa'i dngos po rnam pa sna tshogs [(]gyi'o[,]kyi'o[)]/ /mthong ngam thos na 'di snyam du sems te/ glang po che'i tshogs snang ba gang yin pa 'di ni yang dag par yod do/ /rta pa'i tshogs dang / shing rta'i tshogs dang / rkang thang gi tshogs dang / nor bu dang / mu tig dang / be+e DUr+ya dang / dung dang / man shel dang / byi ru dang / nor dang / 'bru sna tshogs dang / bang ba dang / mdzod la sogs pa snang ba gang yin pa 'di ni yang dag par yod do snyam du sems shing zhes bya ba ni gsum pa mngon par zhen pa 'byung ba yang dag par bstan pa ston te/ 'di ltar ma rig pas rnam par rtog pa'i lta ba bskyed pa'i dbang gis glang po che la sogs pa yang dag par yod pa nyid du 'dzin pa'o/ /slob dpon yang dag bden pa'i brjed byang las/ mthong ba zhes bya ba ni 'di lta ste/ bdag nyid kyis mthong ba 'di ni sgyu ma mkhan gyi dper bstan pa ste/ so so'i skye bo shes rab rnon po rnams so/ /thos pa zhes bya ba ni 'di lta ste/ gzhan las thos pa'o/ /'di ni slob ma'i dper bstan pa ste/ so so'i skye bo rmongs pa rnams so/ /de dag ji ltar mthong ba dang / ji ltar thos pa bzhin du de la nan gyis mchog tu bzung zhing mngon par zhen nas/ 'di ni bden gyi gzhan ni gti mug cing brdzun pa'o zhes rjes su tha snyad 'dogs par byed de zhes bya ba ni bzhi pa mngon par zhen pa'i rgyus tha snyad du brjod pa 'byung ba zhes bya ba ston to/ /'di ltar sgyu ma ma shes pa'i phyir yang dag par yod pa nyid du 'dzin cing mngon par zhen pa'o/ /gal te gzhan 'ga' zhig gis 'di skad du 'di ni yang dag par yod pa ma yin no zhes bstan na/ de dag la 'di dag ni blun pa brdzun du smra ba'o zhes zer ba'o/ /de ni de dag gis phyir brtag par bya dgos pa yin no zhes bya bas ni lnga pa de dag la yang dag par bskul ba ste/ de dag rmongs pa'i dbang gis sgyu mar ma shes pas yang dag par yod par 'dzin te/ phyis sgyu ma de dag med par gyur na yang legs par brtags nas gdod yang dag pa ma yin par shes par 'gyur ba'o/ /de la sems can byis pa ma yin pa rmongs pa ma yin pa/ shes rab dge ba'i rang bzhin can ni shes pa de dang ldan pa de dag ces bya ba la sogs pas ni gsum pa khong du chud pa dag gis yang dag pa ma yin par rtogs pa'i dpe bstan pa zhes bya ba ston to/ /'di yang rnam pa lngar dbye bas gong ma las bzlog pa las rig par bya ste/ khong du chud pa'i gang zag bstan pa dang / khong du chud par bya ba'i yul bstan pa dang / khong du chud pa nyid yang dag par bstan pa dang / khong du chud pa'i rgyus tha snyad 'byung ba bstan pa dang / yang brtag mi dgos par bskul ba'o/ /'di ni khong du chud pa'i gang zag bstan pa ste/ 'di yang rnam pa gsum gyis bstan to/ /dang po la sems can gang zhe na bya bas ni khong du chud pa'i gang zag bstan te/ de ni sa'i mdun rol gyi byang chub sems dpa' 'am/ yang na sa la gnas pa'i byang chub sems dpa' ste/ phung po lnga la btags pa tsam mo/ /gnyis pa byis pa ma yin pa/ rmongs pa ma yin pa zhes bya ba ni khong du chud pa bskyed pa'i nye ba'i rkyen te/ gti mug med pa'i dge ba'i rtsa ba'o/ /gsum pa shes rab dge ba'i rang bzhin can dang ldan pa de dag ces bya ba ni khong du chud pa'i ngo bo nyid yang dag par bstan pa ste/ shes rab kyi ngo bo nyid do/ /'di ni sa'i mdun rol sbyor ba'i lam gyi gnas skabs na gzung ba dang / 'dzin pa stong pa nyid rim gyis khong du chud pa'i dper bstan pa'o/ /yang na sa la gnas pa dag don dam pa gnyis su med pa'i tshul khong du chud pa las shes pa dang ldan pa zhes bya'o/ /rtswa dang lo ma dang / shing dang gseg ma dang / gyo dum la sogs pa la/ sgyu ma dang / sprul pa'i dngos po dag ces bya bas ni gnyis pa khong du chud par bya ba'i yul bstan te/ mdo'i tshig las 'byung ba bzhin du rig par bya'o/ /mthong ba dang thos pa na 'di snyam du sems te/ glang po che'i tshogs sna tshogs gang yin pa 'di ni yang dag par med do/ /rta'i tshogs dang / shing rta'i tshogs dang / rkang thang gi tshogs dang / nor bu dang / mu tig dang / be+e DUr+ya dang / dung dang / man shel dang / byi ru dang / nor dang / 'bru sna tshogs dang / bang ba dang / mdzod la sogs pa'i tshogs sna tshogs gang yin pa 'di ni yang dag par med kyi zhes bya bas ni gsum pa khong du chud pa nyid yang dag par bstan pa ston to/ /'di yang rnam pa gnyis su dbye ste/ yang dag pa'i yul yod pa ma yin par bstan pa dang / 'on kyang yul bya ba man chad kyis btags pa'i yul med pa ma yin par bstan pa'o/ /'di ni yang dag pa'i yul yod pa ma yin par bstan pa ste/ mdo las 'byung ba bzhin du rig par bya'o/ /'on kyang sgyu ma'i gzugs mig slu bar byed pa'i dngos po gang la glang po che'i tshogs kyi 'du shes dang / glang po che'i tshogs kyi bye brag gi 'du shes 'byung ba nas/ nor dang 'bru sna tshogs dang / bang ba dang / mdzod la sogs pa'i bar gyi 'du shes dang / de dag gi rnam pa'i bye brag gi 'du shes 'byung ba 'di ni yod do snyam du sems shing zhes bya bas ni gnyis pa btags pa'i yul med pa ma yin par bstan pa'o/ /mdo'i tshig 'di yang rnam pa gnyis kyis bstan te/ dang po ni 'on kyang sgyu ma'i gzugs mig slu bar byed pa'i dngos po zhes bya bas ni/ 'dra ba tsam gyi yul med pa ma yin par yang dag par ston to/ /gnyis pa gang zhes bya ba man chad kyis ni nor pa'i mtshan nyid bstan te/ 'di ni dang po'o/ /sgyu ma'i gzugs zhes bya ba 'di yang / so so'i gzhung gi bshad pa mi mthun te/ thams cad yod par smra ba'i gzhung gi bstan bcos yang dag par rig pa dang rjes su mthun pa la sprul pa'i gzugs lta bu'o zhes bshad de/ ting nge 'dzin gyi mthu'i phyir ro/ /sprul pa'i gzugs 'dra ba yang dag pa'i gzugs yin pas mig gi rnam par shes pa'i yul yin te/ 'di ltar sgyu ma sngags kyi stobs kyis sgyu ma lta bu'i mtshan ma byung nas mig gi rnam par shes pa bskyed pas so/ /de dag gi gzhung nyid kyis sems thams cad ni yul dang bcas pa la dmigs so zhes zer ro/ /mdo sde pa dag gis sgyu ma'i glang po che dang / rta la sogs pa la ngo bo nyid med par sgyu ma dmigs pa'i sems ni yul med pa la dmigs nas skye'o zhes zer bas/ de'i phyir de dag gi gzhung gis med pa la dmigs pa las kyang sems skye bar 'dod par rig par bya'o/ /'dir theg pa chen po bstan pa dang sbyar na bshad pa rnam pa gnyis yod de/ dang po ni slob dpon klu sgrub kyi gzhung yang don mdo sde pa dang mthun te/ don med pa la dmigs pa las kyang sems skye bar bshad pas/ de'i phyir 'phags pa shes rab kyi pha rol tu phyin pa'i 'grel pa las/ mig la sogs pa'i rnam par shes pa lnga ni gang yang bslur mi rung ngo zhes byung bas/ de'i phyir de'i gzhung gis mig la sogs pa rnam par shes pa lnga ni yul yang dag pa kho na la dmigs la/ yid kyi rnam par shes pa ni med pa yang dmigs par 'dod par shes par bya'o/ /'phags pa byams pa'i gzhung dang sbyar na/ yang dag pa'i glang po che la sogs pa med kyang / glang po che dang 'dra ba'i mtshan ma'i rnam pa snang ba ni yod de/ gzugs brnyan gyi gzugs 'dis dmigs pa'i yul byed do zhes ston to/ /sgyu ma'i glang po che'i dpe 'di la yang don rnam pa gnyis yod de/ dang po ni 'phags pa shes rab kyi pha rol tu phyin pa la sogs pa las/ sgyu ma la sogs pa'i dpe bcu gsungs pa ni stong pa nyid kyi don gyi dpe bstan pa yin no/ /gnyis pa ni chos mngon pa'i mdo dang / bstan bcos theg pa chen po bsdus pa la sogs pa las/ dpe brgyad bstan pa ni gzhan gyi dbang gi ngo bo nyid 'dra ba tsam du yod kyi/ yang dag par yod pa ma yin par ston te mdo sde 'di yang de bzhin du 'dra ba'i don gyis gzhan gyi dbang gi ngo bo nyid kyis dpe gsungs pa yin no/ /gang la glang po che'i tshogs kyi 'du shes zhes bya ba la sogs pas ni mtshan nyid la rmongs pa med pa bstan to/ /'di yang rnam pa gnyis te/ de la glang po che'i tshogs kyi 'du shes zhes bya ba ni/ glang po che'i rang gi ngo bo nyid la rmongs pa ste/ glang po che'i ngo bo nyid kyi spyi rnam par 'byed pa ni rang gi mtshan nyid ces bya'o/ /de'i che chung ngam sngo ba'am dkar ba la sogs pa bye brag phyed pa ni bye brag gi 'du shes zhes bya ste/ des na rmongs pa dag 'du shes rnam pa gnyis skyed par byed do/ /'byung ba na zhes bya ba ni zlas rta la sogs pa'i spyi dang bye brag gi mtshan nyid rnam pa gnyis kyang gong ma bzhin du rig par bya'o zhes bstan pa'o/ /de dag ji ltar mthong ba dang ji ltar thos pa bzhin du/ nan gyis mchog tu bzung zhing mngon par zhen nas 'di ni bden gyi gzhan ni gti mug cing brdzun pa'o zhes rjes su tha snyad mi 'dogs kyi/ 'di ltar don rnam par rig par bya ba'i phyir de dag la rjes su tha snyad 'dogs par yang byed de zhes bya bas ni bzhi pa khong du chud pa'i rgyus tha snyad 'byung ba'i rgyus so/ /'di yang don rnam pa gnyis kyis bstan te/ dang po ni shes rab kyi stobs kyis yul rnams yang dag pa ma yin par rtogs pas yang dag pa nyid du tha snyad mi skyed pa'o/ /gnyis pa 'di ltar don rnam par rig par bya ba'i phyir zhes bya ba man chad ni/ shes rab kyi mthu'i dbang gis yul med pa nyid du rtogs pas/ btags pa tsam du tha snyad bskyed pa'o/ /de ni de dag gis phyis nye bar gnas brtag par bya mi dgos pa yin no zhes bya ba ni/ lnga pa yang brtag mi dgos par bskul ba ste/ 'di ltar shes rab kyi stobs kyis yang dag pa ji lta ba bzhin du khong du chud pa'i phyir ro/ /de bzhin du sems can gang dag byis pa'i rang bzhin can gyi so so'i skye bor gyur pa/ 'phags pa rnams kyis 'jig rten las 'das pa'i shes pa ma thob pa zhes bya ba la sogs pas ni gnyis pa chos dpe dang mtshungs pa nyid du bstan pa zhes bya ba ston to/ /'di yang rnam pa gnyis su dbye ste/ rmongs pa dag yang dag pa nyid du 'dzin par bstan pa dang / de la sems can gang dag ces bya ba dag gis khong du chud pa dag yul yang dag pa ma yin par rtogs par bstan pa'o/ /dang po la yang rnam pa lngar dbye ste/ mngon par zhen pa'i gang zag bstan pa dang / yul khong du ma chud par bstan pa dang / mngon par zhen pa bskyed pa'i yang dag par bstan pa dang / mngon par zhen pa'i rjes su tha snyad 'byung bar bstan pa dang / de dag la yang dag par bskul ba'o/ /'di ni dang po mngon par zhen pa'i gang zag bstan pa dang sbyar ba'o/ /de la de bzhin du zhes bya ba ni chos dpe dang mtshungs par bsgrub pa'i phyir de bzhin du zhes bya ba gsungs so/ /mngon par zhen pa'i gang zag de yang ming rnam pa gsum yod de/ sems can dang / byis pa dang / so so'i skye bo zhes bya'o/ /de la sems can zhes bya ba yang mdor bsdu na don rnam pa gnyis yod de/ dang po ni chos rnam pa sna tshogs mang po bskyed pa'i phyir sems can zhes bya ste/ de ni shes rab kyi pha rol tu phyin pa'i 'grel pa las/ sems can zhes bya ba ni phung po lnga dang / skye mched bcu gnyis dang / khams bco brgyad dang / khams drug dang / rten cing 'brel par 'byung ba'i yan lag bcu gnyis la sogs pa chos mang po bskyed pa'i phyir sems can zhes bya'o zhes 'byung ste/ theg pa chen po'i mdo sde rang bzhin mtshungs pa nyid du bstan pa dang / bstan bcos theg pa chen po bsdus pa'i 'grel pa mi mthun pa rnam pa gcig las kyang don phal cher 'di dang mthun par bshad do/ /gnyis pa ni skye ba mang po len pa'i phyir sems can zhes bya ste/ de'i phyir bstan bcos shes rab sgron ma'i rab tu byed pa las 'di lta ste/ sems can zhes bya ba ni yang nas yang du skye ba len pa'i phyir sems can zhes bya'o zhes bshad do/ /gzhan yang slob dpon yang dag bden pas 'phags pa rdo rje gcod pa'i 'grel pa byas pa las skye ba snga ma dang / skye ba phyi ma skye ba rgyun mi 'chad pa'i phyir sems can zhes bya'o/ / gal te de ltar na snga phyi 'gag pa'i don dang bcas pas sna tshogs 'gag pa zhes bya bar 'gyur ro zhe na/ phyogs gnyis su skye ba kho nas sems can mngon par 'grub pa yang ma yin la/ 'gag pa mi 'grub pa yang ma yin pa'i phyir ro zhes 'byung ste/ rgya cher de nyid las bshad pa bzhin no/ /byis pa zhes bya ba ni 'di lta ste/ gti mug pa'o/ /so so'i skye bo zhes bya ba ni 'di lta ste/ rmongs pa dang bcas pa'i phyir so so'i skye bo zhes bya ba'o / /bstan bcos shin tu rgyas pa brgya pa dang sbyar na byis pa so so'i skye bo zhes bya ba ni tha dad par skyes pa'o zhes bshad de/ de'i phyir bstan bcos de nyid las so so'i skye bo rnams la byis pa so so'i skye bo zhes bya'o zhes 'byung ngo / /gzhan yang de nyid las ji tsam du lta ba dang bcas pa de dag thams cad yang dag pa nyid du med cing shes pa shin tu mi gsal ba'i phyir byis pa so so'i skye bo zhes 'byung ngo / /de la so so'i skye bor gyur pa zhes bya ba ni bye brag tu bshad pa chen po las ci'i phyir so so'i skye bo zhes bya zhe na/ 'phags pa thams cad ni skye ba mtshungs pa yin la/ 'di ni de dang tha dad pa'i phyir so so'i skye bo zhes bya'o/ /gal te de ltar na 'phags pa dag kyang so so tha dad par skye ba'i phyir so so'i skye bo zhes bya bar 'gyur ro zhe na/ 'phags pa thams cad ni de kho na nyid kyi don mtshungs par go zhing lta ba dang 'dun pa mthun pa'i phyir mtshungs pa zhes bya'o/ /so so'i skye bo ni de lta ma yin te/ shin tu skyo zhing smad par bya bar 'os pa'i phyir/ so so'i skye bo zhes bya bas klan ka btsal ba ni mi rigs so/ /btsun pa na re yang dag pa'i chos dang 'dul ba dang tha dad par gyur nas skye ba len pa'i phyir/ so so'i skye bo zhes bya ste zhes bshad do / /rgya cher de nyid las 'byung ba bzhin no/ /de ni 'di skad du so so'i skye bo'i rang bzhin can theg pa gsum gyi zag pa med pa'i 'phags pa'i lam thob pa'am/ yang na sa dang po la sogs pa'i 'phags pa'i lam ma thob pa'i phyir yang dag pa nyid du yod par mngon par zhen par bstan par 'gyur ro/ /chos thams cad kyi brjod du med pa'i chos nyid mngon par mi shes pa zhes bya ba ni gnyis pa yul khong du ma chud par bstan pa zhes bya ba ston to / /chos thams cad kyi brjod du med pa'i chos nyid ces bya ba ni 'dus byas dang 'dus ma byas kyi chos rnams thams cad kyi rang gi mtshan nyid ming dang brjod pa dang bral ba'i phyir ro/ /yang na 'dus byas dang 'dus ma byas kyi gnyis su med pa'i de bzhin nyid la brjod du med pa zhes bya ste/ chos nyid mngon par ma shes pa'o/ /de dag ni 'dus byas dang 'dus ma byas te mthong ngam thos nas 'di snyam du sems te/ 'dus byas dang / 'dus ma byas snang ba gang yin pa 'di ni gdon mi za bar yang dag par yod do snyam du sems shing zhes bya ba ni gsum pa mngon par zhen pa bskyed pa yang bstan pa zhes bya ba ston to/ /'di ltar byis pa so so'i skye bo rnams chos nyid kyi tshul khong du ma chud pa'i phyir 'dus byas la sogs pa dag la yang dag par yod pa nyid du mngon par zhen pa ste/ ji ltar sgyu ma'i glang po che la sogs pa la yang dag pa'i glang po che la sogs par 'dzin pa lta bur gyur pa'o/ /de dag ji ltar mthong ba dang ji ltar thos pa bzhin du nan gyis mchog tu bzung zhing mngon par zhen nas/ 'di kho na bden gyi gzhan ni gti mug cing brdzun pa'o zhes rjes su tha snyad 'dogs par byed de zhes bya ba ni bzhi pa mngon par zhen pa'i rjes su tha snyad 'byung ba zhes bya ba ston te/ gong ma bzhin du rig par bya'o/ /de ni de dag gi phyir sa nye bar brtag par bya dgos pa yin no zhes bya ba ni lnga pa de dag la yang dag par bskul ba zhes bya ba ston te/ 'di ltar yang dag pa'i don ma yin pa nyid khong du ma chud pa'i phyir ro/ /de la sems can gang dag byis pa'i rang bzhin can ma yin pa/ 'phags pa'i bden pa mthong ba/ 'phags pa rnams kyi 'jig rten las 'das pa'i shes rab thob pa zhes bya ba 'di man chad ni gnyis pa khong du chud pa dag yul yang dag pa ma yin par rtogs pa zhes bya ba ston to/ /'di yang rnam par lngar dbye ste/ khong du chud pa'i gang zag bstan pa dang / yang dag pa ji lta ba bzhin du yul rtogs pa bstan pa dang / rtogs pa'i mtshan nyid bstan pa dang / yul la brten nas tha snyad 'byung ba bstan pa dang / yang brtag mi dgos par bskul ba ste/ 'di ni dang po khong du chud pa'i gang zag bstan pa'o/ /de la sems can gang dag byis pa'i rang bzhin can ma yin pa zhes bya ba ni sa'i mdun rol gyi byis pa so so'i skye bo las rnam par dbye ba'o/ /'phags pa'i bden pa mthong ba 'phags pa rnams kyis 'jig rten las 'das pa'i shes rab thob pa zhes bya bas ni rtogs pa'i ngo bo nyid yang dag par bstan to/ /don dam pa de bzhin nyid kyi 'phags pa'i bden pa mthong ba'o/ /yang na bden pa bzhi'i de bzhin nyid mthong ba'o/ /'phags pa rnams kyi 'jig rten las 'das pa'i shes rab thob pa zhes bya ba ni yang dag pa'i ngo bo nyid dang / rjes la thob pa zag pa med pa'i 'phags pa'i ye shes so/ /rnam par rig pa tsam du grub pa'i bstan bcos dang sbyar na/ de las rnam grangs rnam pa gnyis kyis 'jig rten las 'das pa'i ye shes yang dag pa'i ngo bo nyid kho na yin par ston to / dang po ni gcig gi dbang du byas nas ston to/ /gnyis pa ni don rnam pa gnyis kyi dbang du byas nas ston te/ de'i phyir de nyid las/ 'jig rten pa spangs pa'i phyir 'jig rten las 'das pa zhes bya ste/ 'dzin pa gnyis kyis bag la nyal ba ni 'jig rten pa'i rtsa ba yin la 'di kho nas spong bar nus pas 'di gcig pu 'jig rten las 'das pa'i ming thob pa yin no/ /yang na 'jig rten las 'das pa zhes bya ba ni don rnam pa gnyis la brten nas rnam par gzhag pa yin te/ 'di lta ste/ ngo bo nyid zag pa med pa dang / de bzhin nyid mngon par rtogs pas so/ /ye shes 'di don rnam pa gnyis dang ldan pa'i phyir 'jig rten las 'das pa zhes bya ba'i ye shes gzhan ni de lta ma yin no zhes 'byung ba ste/ 'di ni sa bcu pa'i rnam par mi rtog pa'i ye shes nyid do/ /chos thams cad kyi brjod du med pa'i chos nyid ji lta ba bzhin du khong du chud cing shes pa zhes bya bas ni gnyis pa yang dag pa ji lta ba bzhin du yul rtogs pa zhes bya ba bstan te/ 'jig rten las 'das nas zag pa med pa'i ye shes thob pa'i phyir ro/ /de dag ni 'dus byas dang 'dus ma byas te/ mthong ngam thos na 'di snyam du sems te/ 'dus byas dang 'dus ma byas thob pa gang yin pa 'di ni gdon mi za bar yang dag par mad mod kyi zhes bya ba la sogs pas ni gsum pa rtogs pa'i mtshan nyid ston to/ /'di yang rnam pa gnyis su dbye ste/ rdzas su yod pa'i yul yod pa ma yin par rtogs pa bstan pa dang / 'on kyang zhes bya ba man chad kyis btags pa tsam gyi yul med pa ma yin par khong du chud par bstan pa ste/ 'di ni dang po'o/ /slob dpon yang dag bden pas bshad pa dang sbyar na/ sngar gong du bshad pa ltar don rnam pa gsum gyi phyir 'dus byas dang / 'dus ma byas kyi chos thams cad yang dag par yod pa ma yin pa'o/ /slob dpon h+yan tsang gis bshad pa dang sbyar na/ kun brtags pa'i ngo bo nyid kyi dbang du byas nas yang dag par yod pa ma yin par ston to/ /'on kyang rnam par rtog pa las byung ba 'du byed kyi mtshan nyid sgyu ma lta bu'i dngos po/ /blo rmongs par byed pa de las 'dus byas dang / 'dus ma byas kyi 'du shes dang / 'dus byas dang / 'dus ma byas kyi bye brag gi 'du shes 'byung ba 'di ni yod do snyam du sems shing zhes bya bas ni gnyis pa btags pa tsam gyi yul med pa ma yin par khong du chud par zhes bya ba ston to/ /mdo'i tshig 'di yang rnam pa gnyis su dbye ste/ dang po ni btags pa'i yul med pa ma yin par bstan pa'o/ /gnyis pa de las zhes bya ba man chad kyis ni btags pa'i yul de dag gi rang gi ngo bo nyid dang bye brag bstan pa'o/ / 'du byed kyi mtshan nyid bya ba la/ 'du byed ni 'di lta ste/ lta ba'i rnam pa dmigs par byed pa'i shes pa'o/ /mtshan nyid ni rgyu mtshan gyi rnam pa'o/ /'dus byas dang 'dus ma byas zhes bya ba ni gzhan gyi dbang gi ngo bo nyid bstan pa ste/ rgyu mtshan gyi rnam pas bsdus pa'o/ /'dus byas dang 'dus ma byas ni btags pa tsam du med pa yin pas sgyu ma'i dngos po lta bu'o/ /de las zhes bya ba la sogs pas ni btags pa'i yul gyi rang gi ngo bo nyid dang bye brag gi mtshan nyid rnam pa gnyis bstan te/ 'dus byas dang 'dus ma byas kyi 'du shes zhes bya ba ni rang gi ngo bo nyid kyi 'du shes bstan pa ste/ rang gi ngo bo nyid la dmigs pa'i phyir ro/ /'dus byas dang 'dus ma byas kyi bye brag gi 'du shes zhes bya ba ni bye brag gi 'du shes bstan pa ste bye brag gi mtshan nyid la dmigs pa'i phyir ro/ /de dag ji ltar mthong ba dang / ji ltar thos pa bzhin du nan t an gyis mchog tu bzung zhing mngon par zhen nas 'di kho na bden gyi gzhan ni gti mug cing brdzun pa'o zhes tha snyad mi 'dogs kyi 'di ltar don rnam par rig par bya ba'i phyir de dag la rjes su tha snyad 'dogs par yang byed de zhes bya ba ni bzhi pa yul la brten nas tha snyad 'byung ba zhes bya ste/ gong du bstan pa bzhin du rig par bya'o/ /de ni de dag gi phyir nye bar brtag par bya mi dgos pa yin no zhes bya ba ni lta ba la yang brtag mi dgos par bskul ba zhes bya ba bstan te/ 'di ltar khong du chud zin pa'i phyir ro/ /rigs kyi bu de ltar na 'phags pa rnams kyi dngos po de dag la 'phags pa'i shes pa dang / mthong bas ming dang / brjod pa dang bral ba'i phyir mngon par rdzogs par sangs rgyas shing brjod du med pa'i chos nyid de nyid gzhan dag mngon par rdzogs par rtogs par bya ba'i phyir/ btags pa'i ming dang / 'du shes kyis/ 'dus byas dang / 'dus ma byas zhes brjod pa yin no zhes bya bas ni gsum pa mjug bsdu zhing / pha rol gyis brgal ba'i lan gdab pa bstan te/ brgal ba'i lan gdab pa'i don ni gong du bstan pa dag brtags na shes par 'gyur ro/ /de nas byang chub sems dpa' sems dpa' chen po don zab dgongs pa nges par 'grel gyis don de nyid yang dag par bstan pa'i phyir tshigs su bcad pa 'di dag smras so zhes bya ba la sogs pas ni gong du gnyis su med pa la sogs pa'i mtshan nyid bstan pa la/ tshig rkyang pas rgya cher rnam par bshad pa dang / tshigs su bcad pas mdor bstan pa'o zhes gnyis su phye ba las/ tshig rkyang pas rgya cher rnam par bshad pa bshad zin te/ da ni tshigs su bcad pas mdor bstan pa gsungs pa yin no/ /'di yang rnam pa gnyis su dbye ste/ tshigs su bcad pas bstan pa'i dgongs pa smos pa dang / tshigs su bcad pas yang dag par bshad pa ste/ 'di ni dang po'o/ /'di yang byang chub sems dpa' don zab dgongs pa nges par 'grel gyis gnyis su med pa la sogs pa'i don yang bzlas te bstan pa'i phyir tshigs su bcad pa 'di dag bstan to/ /de nyid yang bstan pa'i phyir zhes bya ba ni slob dpon yang dag bden pa'i 'grel pa las mu rnam pa bzhir 'byung ste/ dang po ni tshig 'bru zlos bur gyur la don zlos bur ma gyur pa ste/ ji ltar gau zhes bya ba la mig la sogs pa'i don rnam pa dgur 'dren pa la sogs pa'o/ /gnyis pa ni don zlos bur gyur la tshig 'bru zlos bur ma gyur pa ste/ ji ltar brgya byin la mig stong yod par brjod pa la sogs pa'o/ /gsum pa ni tshig 'bru dang don gnyis ka zlos bur ma gyur pa ste/ ji ltar lha dang mi zhes brjod pa la sogs pa'o/ /bzhi pa ni tshig 'bru dang don gnyis ka zlos bur gyur pa ste/ ji ltar tshigs su bcad pas don snga ma sdud pa lta bu ste/ 'dir ni bzhi pa dang sbyar ba tsam gyi phyir tshig zlos bur bstan pa yin no/ /sngon gyi brgyud pa las ni mu gsum kho na'o zer te/ mdor bsdus pas mu gsum pa 'di mi 'chad do/ /gsung rab yan lag bcu gnyis las 'byung ba'i tshigs su bcad pa yang rnam pa gnyis te/ dbyangs kyis bsnyad pa'i tshigs su bcad pa dang / tshigs su bcad pa ste/ de'i phyir bstan bcos chos mngon pa sna tshogs kun las btus pa las/ dbyangs kyis bsnyad pa'i tshigs su bcad pa ni/ mdo sde de nyid du dbus dang tha mar tshigs su bcad de dbyangs kyis bsnyad pa'o/ /yang na drang ba'i mdo sde rtogs par bya ba'i phyir dbyangs kyis bsnyad pa'o/ /tshigs su bcad pa ni 'di lta ste/ mdo sde rnams las tshigs su sbyar nas/ tshig gnyis pa dang / tshig gsum pa dang / tshig bzhi pa dang / tshig lnga pa dang / tshig drug pa'o zhes bshad do/ /'dir ni dbyangs kyis bsnyad pa'i tshigs su bcad pa dang sbyar ba'i phyir/ de nyid yang bstan pa'i phyir zhes bya ba gsungs so/ /tshigs su bcad pa de bstan pa'i dgos pa yang slob dpon yang dag bden pas bshad pa dang sbyar na mdor bsdu na rnam pa drug gi phyir te brjed ngas pa'i phyir dang / phyis 'ongs pa rnams kyi phyir dang / len pa dang / gzung sla ba'i phyir dang / shes rab rno ba dang / rtul ba mi mtshungs pa'i phyir dang / sems can mos pa mi mthun pa nyid kyi phyir dang / gang zag 'chad pa po'i thabs mkhas pa rab tu bstan pa'i phyir ro/ /de'i phyir slob dpon yang dag bden pa'i 'grel pa las nyan pa'i 'khor rnam par g.yeng ba dang / rkyen gzhan gyis don snga ma brjed pa rnams yang thob pa'i phyir tshigs su bcad pa de gsungs so/ /gzhan yang phyis 'ongs pa rnams snga ma ma thos pa thos par bya ba'i phyir tshigs su bcad de gsungs so/ /gzhan yang len pa dang gzung sla bar bya ba'i phyir mdo'i tshig rkyang pa dang / tshigs su bcad pa gsungs pa yin te/ gal te tshigs su bcad pa 'ba' zhig gsungs la/ mdo'i tshig rkyang pa ma gsungs na don phra bas len dka' bar 'gyur ro/ /gal te mdo'i tshig rkyang pa 'ba' zhig gsungs la/ tshigs su bcad pa ma gsungs na ni don sil bur 'gyur te/ gzung bar dka' bas len pa dang / gzung sla bar bya ba'i phyir mdo dang tshigs su bcad pa rdzogs par gsungs pa yin no/ /gzhan yang gang zag rnam pa gnyis la phan gdags pa'i ched du mdo dang tshigs su bcad pa rdzogs par gsungs pa yin te/ 'di ltar gang zag kha cig ni dbang po rtul la kha cig ni dbang po rno ste/ gal te dbang po rtul po la mdor bsdus te bstan la rgya cher rnam par ma phye na don rtogs par mi 'gyur bas/ gang zag 'di lta bu la phan gdags pa'i phyir ni mdo sde rgya cher gsungs la gang zag dbang po rnon po la shes pa bskyed cing phan gdags pa'i phyir ni don gyi mtshan nyid mdor bsdus pas de dag rang nyid kyis rnam par 'byed cing shes pa yongs su rdzogs par gyur te/ ji ltar 'phags pa shA ri'i bu don gcig yang dag par thos pa rnam pa bcur rnam par 'byed nus par gyur pa lta bu ste/ gal te rgyas par bshad par gyur na gang zag 'di lta bu la phan par mi 'gyur bas/ gang zag dbang po rno ba dang / rtul ba rnam pa gnyis la phan gdags pa'i ched du mdo dang / tshigs su bcad pa rdzogs par gsungs pa yin no/ /gzhan yang sems can ni rnam pa gnyis yod pas/ kha cig ni 'chad pa la mos te/ byams pa dang snying rje'i stobs shin tu che ba'i phyir ro/ /kha cig ni spyod pa la mos te sems rab tu dben zhing zhi ba'i phyir ro/ /gang zag 'di lta bu gnyis la phan gdags pa'i phyir/ mdo dang tshigs su bcad pa gsungs so/ /gzhan yang gang zag 'chad pa po'i thabs mkhas pa rab tu bstan pa'i phyir te 'di ltar rgyas pa las bsdus pa dang bsdus pa las rgya cher rnam par 'byed pa'i phyir/ des chos yang dag par bstan pa rnams shin tu thog tu phebs par gyur pas/ rgyas pa dang bsdus pa gang ci rjes su bshad kyang rung ste/ gzhan la phan 'dogs shing rjes su mthun par gyur pa'i phyir mdo dang tshigs su bcad pa gsungs pa yin no zhes 'byung ngo / /bstan bcos de kho na nyid drug pa las tshigs su bcad de gsungs pa la dgongs pa rnam pa drug yod do zhes 'byung ba dang / gnas pa bcu'i bshad pa las tshigs su bcad de gsungs pa ni don rnam pa gcig gi phyir ro zhes 'byung ba ni mangs kyis dogs nas 'dir ma bstan to/ /sangs rgyas brjod bral gnyis med don gsungs pa/ /shin tu zab pas byis pa'i spyod yul min/ /byis pa 'di la gti mug rmongs pas na/ /gnas gnyis smra ba'i spros la shin tu dga'/ /de dag ma nges yang na log par nges/ /'khor bar yun ring shin tu 'khor bar 'gyur/ /yang dag shes dang smra dang 'gal bas na/ /ba lang lug la sogs pa'i rigs su skye/ /zhes bya ba ni gnyis pa tshigs su bcad pas yang dag par bshad pa zhes bya ba ston to / /tshigs su bcad pa 'di nyid kyang rnam pa gnyis su dbye ste/ de yang tshigs su bcad pa phyed dang pos ni don gyi tshul shin tu zab par bsngags pa ste / 'di ltar de bzhin gshegs pas brjod pa dang / gnyis su med pa'i de bzhin nyid rnam pa gnyis gsungs pa shin tu zab pa'i phyir byis pa'i spyod yul ma yin pa'o/ /tshigs su bcad pa 'og ma phyed dang gnyis kyis ni mngon par zhen pa'i nyes dmigs ston to/ /'di yang rnam pa gsum gyis ston te/ de yang dang po'i tshig gnyis kyis ni rnam par spros pa bskyed pa'i nyes dmigs ston to/ /bar ma'i tshig gnyis kyis ni 'khor ba na 'khor ba'i nyes dmigs bstan to / /tha ma'i tshig gnyis kyis ni ngan 'gror skye bar 'gyur ba'i nyes dmigs bstan to/ /de la / byis pa 'di la gti mug rmongs pas na/ /gnas gnyis smra ba'i spros la shin tu dga'/ /zhes bya ba ni spros pa'i nyes dmigs bstan pa ste/ gnas gnyis zhes bya ba ni 'dus byas dang 'dus ma byas nyid de/ spros pa rnam pa brgyad kyi gnas su gyur pa'i phyir ro/ /smra ba'i spros pa zhes bya ba ni yang dag pa ma yin pa'i rnam par rtog pa rnam pa brgyad do/ /de ni 'di skad du byis pa rnams gnyis su dbye ba dang / brjod du med pa'i spyod yul la gti mug gis rmongs par gyur pa'i phyir 'dus byas dang / 'dus ma byas kyi chos rnam pa gnyis dang / spros pa rnam pa brgyad la shin tu dga' zhing mngon par zhen par gyur to zhes bstan par 'gyur ro/ /spros pa rnam pa brgyad ni rnal 'byor spyod pa'i sa las ji skad du/ gzhan yang byis pa rnams de bzhin nyid de ltar yongs su ma shes pa'i phyir gzhi de las rnam par rtog pa brgyad 'byung bas dngos po gsum bskyed pa dang / sems can dang / snod kyi 'jig rten thams cad skyed par byed do/ /rnam par rtog pa brgyad kyang dang po ni ngo bo nyid du rnam par rtog pa ste/ /chos thams cad kyi rang gi ngo bo nyid rnam par 'byed cing ji ltar gzugs zhes bya ba la sogs par rnam par rtog pa gang yin pa'o/ /gnyis pa ni bye brag tu rnam par rtog pa ste/ gzugs la sogs par ming btags pa'i dngos po de nyid la 'di ni bstan du yod do/ /'di ni bstan du med pa'o zhes bya ba la sogs pa rnam par rtog pa'o/ /gsum pa ni ril por 'dzin pa'i rnam par rtog pa ste/ gzugs la sogs par ming du btags pa'i dngos po de nyid la bdag dang / sems can dang / khyim dang / dmag dang / nags la sogs par 'dzin pa'o/ /bzhi pa ni bdag go snyam pa'i rnam par rtog pa'o/ /lnga pa ni bdag gi'o snyam pa'i rnam par rtog pa ste/ dngos po gang zag pa dang bcas pa dang / nye bar len pa dang bcas pa'i chos la bdag dang bdag gir 'dzin pa'o/ /drug pa ni sdug par rnam par rtog pa'o/ /bdun pa ni sdug pa ma yin par rnam par rtog pa'o/ /brgyad pa ni gnyi ga las bzlog pa'i rnam par rtog pa ste/ go rims bzhin du mdzes pa dang / mdzes pa ma yin pa dang / gnyi ga las bzlog pa'i dngos po las byung ba'i rnam par rtog pa gang yin pa'o zhes bshad do/ /slob dpon h+yan tsang na re rnam par rtog pa brgyad po de dag thams cad kyang ma bsgribs la lung du ma bstan pa'i rnam par smin pa skye ba'i shes rab kyi rang bzhin no/ /yang na rtog pa dang dpyod pa'i rang bzhin no zhes pa'o / /dngos po gsum bskyed pa zhes bya ba yang rnam par rtog pa dang po gsum gyis ni rnam par rtog pa spros pa'i gnas dang / dmigs pa'i dngos po dbang po drug dang yul drug po dag skyed pa'i byed do/ /rnam par rtog pa bar ma gnyis kyis ni 'jig tshogs la lta ba dang / bdag gi'o snyam pa'i nga rgyal skyed par byed do/ /rnam par rtog pa tha ma gsum gyis ni go rims bzhin du 'dod chags dang zhe sdang dang gti mug skyed par byed do/ /de la gnas dang dmigs pa'i dbang pos rten byas pa'i phyir ni 'jig tshogs la lta ba dang / nga'o snyam pa'i nga rgyal bskyed la/ 'jig tshogs la lta ba dang nga'o snyam pa'i nga rgyal gyis rten byas pas ni 'dod chags dang zhe sdang dang / gti mug bskyed de/ des na dngos po gsum po 'di dag gis sems can dang / snod kyi 'jig rten thams cad kyi 'jug pa'i phyogs ma lus par bstan pa yin par shes par bya'o/ /de dag ma nges yang na log par nges/ /'khor bar shin tu yun ring 'khor bar 'gyur / /zhes bya bas ni 'khor bar 'khor ba'i nyes dmigs bstan pa ste/ 'di ltar byis pa so so'i skye bo rnams gti mug gi stobs kyi dbang gis sems can gyi tshogs rnams gsum las yang na ni ma nges pa'i tshogs la gnas par 'gyur la/ yang na ni log par nges pa'i tshogs la gnas pas 'khor bar shin tu yun ring por dngos po'i 'chi 'pho len cing tshogs rnam pa gnyis la gnas par 'gyur ba'o/ /tshogs rnam pa gsum po de yang so so nas bshad pa mi mthun pas thams cad yod par smra ba'i gzhung gi bshad pa rnam pa gnyis yod do/ /dang po ni bstan bcos rnam grangs bsdus pa la brten nas bshad pa ste/ de la sems can gyi phung po ni rnam pa gsum yod do/ /log pa nyid du nges pa'i phung po ni 'di lta ste/ mtshams med pa lnga'i las yongs su grub pa gang yin pa'o/ /yang dag pa nyid du nges pa'i phung po ni 'di lta ste/ slob pa dang mi slob pa'i chos yongs su grub pa gang yin pa'o/ /ma nges pa'i phung po ni 'di lta ste/ de las gzhan pa'i zag pa dang bcas pa'i chos dang 'dus ma byas kyi chos yongs su ma sgrub pa gang yin pa ste/ 'di ni phung po rnam pa gsum gyi ngo bo nyid ces bya'o/ /khams las kyang log pa nyid du nges pa'i phung po ni khams gcig gi phyogs gcig ste/ 'di lta ste/ 'dod pa'i khams kyi'o/ /yang dag pa nyid du nges pa'i phung po ni khams gsum char gyi phyogs gcig go/ /ma nges pa'i phung po ni khams gcig gi phyogs gcig ste/ 'di lta ste/ 'dod pa'i khams kyi'o/ /yang dag pa nyid du nges pa'i phung po yang de bzhin no/ /'gro ba las kyang log pa nyid du nges pa'i phung po ni 'gro ba gcig gi phyogs gcig ste/ 'di lta ste mi'i'o/ /yang dag pa nyid du nges pa'i phung po ni 'gro ba gnyis kyi phyogs gcig ste 'di lta ste lha dang mi'i'o/ /ma nges pa'i phung po ni 'gro ba gsum char tshang ba ste/ 'di lta ste/ sems can dmyal ba dang / dud 'gro dang yi dwags rnams kyi'o/ /'gro ba gnyis kyi phyogs gcig ste/ 'di lta ste/ lha dang mi'i'o zhes bshad do/ /gnyis pa ni bstan bcos gnas gdags pa la brten nas bshad pa ste/ de las log pa nyid du nges pa'i phung po ni 'di lta ste/ mtshams med pa lnga'i las dang / de'i rgyu dang / de'i 'bras bu dang / de'i rgyu mthun pa dang / de'i 'bras bu rnam par smin pa dang / de'i chos dang gang zag yongs su grub pa gang yin pa'o/ /yang dag pa nyid du nges pa'i phung po ni 'di lta ste/ slob pa dang / mi slob pa'i chos dang / de dag gi rgyu dang / de dag gi 'bras bu dang / de dag gi rgyu mthun pa dang / de dag gi gang zag yongs su grub pa gang yin pa'o/ /ma nges pa'i phung po ni 'di lta ste/ de las gzhan pa'i chos rnams dang / de dag gi rgyu dang / de dag gi 'bras bu dang / de dag gi rgyu mthun pa dang / rnam par smin pa dang / gang zag yongs su grub pa gang yin pa ste/ 'di ni phung po rnam pa gsum gyi ngo bo nyid ces bya'o/ /khams las ni snga ma bzhin no/ /'gro ba las kyang log pa nyid du nges pa'i phung po ni 'gro ba gnyis kyi phyogs gcig ste/ sems can dmyal ba dang mi'o/ /yang dag pa nyid du nges pa'i phung po de yang de bzhin du 'gro ba gnyis kyi phyogs gcig ste/ 'di lta ste lha dang mi'i'o/ /ma nges pa'i phung po ni 'gro ba gnyis po dud 'gro dang / yi dags dang / 'gro ba gsum gyi phyogs gcig ste/ 'di lta ste/ sems can dmyal ba dang / lha dang mi rnams kyi'o zhes bshad do/ /de la mdo sde pa'i gzhung ni bye brag tu bshad pa chen po las ji skad du dpe can dag mnar med pa'i sems can dmyal ba nas srid pa'i rtse mo'i bar der phung po rnam pa gsum yod do zhes bshad do/ de dag las gang mya ngan las 'das pa'i chos can gang yin pa de ni yang dag pa nyid du nges pa'i phung po zhes bya'o/ /mya ngan las mi 'da' ba'i chos can gang yin pa de ni log pa nyid du nges pa'i phung po zhes bya'o/ /ma nges pa gang yin pa de ni ma nges pa'i phung po zhes bya'o zhes zer ro zhes 'byung ste/ rgya cher rnam par 'byed pa ni bye brag tu bshad pa chen po bam po brgya brgyad cu rtsa drug pa la sogs pa las 'byung ba bzhin du rig par bya'o/ /'dir theg pa chen po'i bstan pa dang sbyar na/ mdor bsdu na sgo rnam pa bcu yod de/ re zhig sa bcu la brten nas sa bcu'i mdo las/ sgo rnam pa lngas tshogs rnam pa gsum bstan pa dang sbyar nas bshad par bya ste/ de'i phyir mdo sde de nyid las byang chub sems dpa' de sems can gyi phung po rnam pa gsum po yang dag pa nyid du nges pa dang / log pa nyid du nges pa dang / gnyi ga la ma nges pa rnams kyang yang dag pa ji lta ba bzhin du rab tu shes te/ yang dag pa'i lta ba ni yang dag par nges pa'i mtshan nyid do/ /log pa'i lta ba ni log par nges pa'i mtshan nyid do/ /gnyi ga dang bral ba ni ma nges pa'i mtshan nyid do/ /mtshams med pa lnga las gang yang rung ba ni log pa la nges pa'i mtshan nyid do/ /dbang po lnga ni yang dag pa la nges pa'i mtshan nyid do/ /gnyi ga dang bral ba ni ma nges pa'i mtshan nyid do/ /log pa brgyad ni log pa la nges pa'i mtshan nyid do/ /yang dag pa'i gnas skabs ni yang dag pa la nges pa'i mtshan nyid do/ /yang byar med pa'i phyir dang / gnyi ga dang bral bas ma nges pa'i mtshan nyid do/ /phrag dog dang / ser sna dang / nyes par spyod pa las mi zlog pa ni log pa las nges pa'i mtshan nyid do/ /bla na med pa'i 'phags pa'i lam bsgom pa nges par bsgrub pa ni yang dag pa la nges pa'i mtshan nyid do/ /gnyi ga dang bral ba ni ma nges pa'i mtshan nyid de/ de dag thams cad kyang yang dag pa ji lta ba bzhin du shes so/ /kye rgyal ba'i sras byang chub sems dpa' ye shes de lta bu'i rjes su 'brang ba ni byang chub sems dpa'i sa legs pa'i blo gros la gnas pa zhes bya'o zhes gsungs te/ 'di nyid kyi 'grel pa las/ sems can gyi phung po rnam pa gsum gyis spyod pa'i thibs po'i rab tu dbye ba ni rnam pa lnga yod do/ /dang po mya ngan las 'das pa'i chos can dang / mya ngan las 'das pa ma yin pa dang / theg pa gsum la gcig tu ma nges pa'i tha dad pa'i mdo las ji skad du byang chub sems dpa' de sems can gyi phung po rnam pa gsum po yang dag pa nyid du nges pa dang / log pa nyid du nges pa dang / gcig la ma nges pa rnams kyang yang dag pa ji lta ba bzhin du rab tu shes te zhes gsungs pa'o/ /gnyis pa legs par spyod pa dang / nyes par spyad pa'i rgyu tha dad pa ni mdo las ji skad du/ yang dag pa'i lta ba ni yang dag pa la nges pa'i mtshan nyid do/ /log pa'i lta ba ni log pa la nges pa'i mtshan nyid do/ /gnyi ga dang bral ba ni ma nges pa'i mtshan nyid do zhes gsungs so/ /gsum pa ngan 'gro dang / bde 'gro'i rgyu tha dad pa ni mdo las ji skad du/ mtshams med pa lnga las gang yang rung ba ni log pa la nges pa'i mtshan nyid do/ /dbang po lnga ni yang dag pa la nges pa'i mtshan nyid do/ /gnyi ga dang bral ba ni ma nges pa'i mtshan nyid do zhes gsungs so/ /bzhi pa mu stegs can dang / 'phags pa nyan thos kyi rgyu tha dad pa ni mdo las ji skad du/ log pa brgyad ni log pa la nges pa'i mtshan nyid do/ /yang dag pa'i gnas skabs ni yang dag pa la nges pa'i mtshan nyid do/ /yang byar med pa'i phyir gnyi ga dang bral bas ma nges pa'i mtshan nyid do zhes gsungs so/ /lnga pa ni byang chub sems dpa' tha dad pas kyang ston te/ mdo las ji skad du/ phrag dog dang / ser sna dang / nyes par spyod pa las mi zlog pa ni log par nges pa'i mtshan nyid do/ /bla na med pa'i 'phags pa'i lam nye bar bsgrub pa ni yang dag pa la nges pa'i mtshan nyid do/ /gnyi ga dang bral ba'i mtshan nyid ni ma nges pa'i mtshan nyid de/ de dag thams cad kyang yang dag pa ji lta ba bzhin du rab tu shes so zhes gsungs so/ /sems can gdul bar 'os pa yal bar bor ba ni phrag dog go/ /gzhan gyi phun sum tshogs pa la mi dga' ba ni ser sna'i nyes pa'o/ /gzhan la sdug bsngal bskyed cing nyes par spyod pa las mi bzlog pas pha rol tu phyin pa dang mi mthun pa'i phyir byang chub sems dpa' log par nges par 'gyur ba yin te/ de ni chos smra ba chen po thabs kyi shes pa yongs su rdzogs pa'o zhes bya'o zhes 'byung ngo / /gzhan yang sgo rnam pa lnga yod de/ dang po ni las dang / nyon mongs pa dang / zhi ba gzhol ba'i sgo ste/ rnal 'byor spyod pa'i sa las ji skad du/ log pa nyid du nges pa'i chos kyi phung po ni 'di lta ste/ mtshams med pa lnga'i las byas pa dang / dge ba'i rtsa ba bcad pa gang yin pa'o/ /yang dag pa nyid du nges pa'i chos can gyi phung po ni 'di lta ste/ slob pa dang mi slob pa la yod pa'i chos rnams so/ /ma nges pa'i chos kyi phung po ni 'di lta ste/ de las gzhan pa slob pa yang ma yin mi slob pa yang ma yin pa'i chos rnams so zhes bstan pa lta bu'o/ /shes rab kyi pha rol tu phyin pa'i 'grel pa las kyang 'di dang mthun par bshad do/ /gnyis pa ni spangs pa dang / ma spangs pa bstan pa'i sgo ste/ shes rab kyi pha rol tu phyin pa'i 'grel pa las ji skad du/ phyin ci log bcom pa las rnam pa gsum du dbye ste phyin ci log bcom pa las gyur pa gang yin pa de ni yang dag pa nyid du nges pa'o/ /bcom par mi nus pa gang yin pa de ni log pa nyid du nges pa'o/ /rkyen dang ldan na ni 'jig par nus la/ rkyen dang mi ldan na ni 'jig par mi nus pa gang yin pa de ni ma nges pa'o zhes bshad pa lta bu ste/ zhib tu de nyid las 'byung ba bzhin no/ /gsum pa ni 'os su rung ba dang / 'os su mi rung ba bstan pa'i sgo ste/ 'phags pa byang chub sems dpa'i sde snod kyi mdo las ji skad du/ yang dag pa nyid du nges pa ji lta bu zhe na/ 'di lta ste/ rgyu'i stobs tshe rabs snga ma'i sbyor ba dang / blo rnam par phye ba dbang po rnon po las byung ba'i phyir de bzhin gshegs pa rnams kyis chos kyi snod du rung bar gsungs pa'am/ gal te chos bstan par gyur na rnam par grol ba 'thob par 'gyur ba dag yin no/ /ma nges pa'i rigs can ji lta bu zhe na/ phyi rol gyi rkyen gyi stobs kyis chos bzhin du gdams ngag sbyin na ni rnam par grol ba 'thob par 'gyur la/ chos bzhin du gdams ngag dang rjes su bstan pa med na ni rnam par grol ba 'thob par mi 'gyur te/ 'di lta bu la sogs pa la phan gdags pa'i phyir sangs rgyas bcom ldan 'das rnams ni 'jig rten du 'byung ba yin no/ /log pa nyid du nges pa'i phung po ji lta bu zhe na/ 'di lta ste/ sems can gang dag ngo bo nyid kyi nyon mongs pas bsgribs pa las yongs su dag pa mi 'grub pa/ sems rtsal zhan pa/ gti mug shin tu stug pa/ log par lta ba'i dra bas glags pa/ yang dag pa'i chos kyi snod ma yin no/ / de bzhin gshegs pa rnams kyis chos bstan kyang rung ma bstan kyang rung ste nams kyang rnam par grol ba mngon sum du dbye ba'i 'os su mi 'gyur ba dag yin no zhes gsungs pa lta bu ste/ zhib tu de nyid las 'byung ba bzhin no/ /bzhi pa ni yod pa dang / med pa la mngon par zhen pa'i sgo ste/ bla na med pa'i gnas bstan pa'i mdo las ji skad du/ 'jig rten na sems can gyi phyogs ni rnam pa gsum yod de/ yod pa la mngon par zhen pa dang / med pa la mngon par zhen pa dang / yod pa dang med pa la mngon par zhen pa med pa'o/ /yod pa la mngon par zhen pa yang rnam pa gnyis te/ dang po ni mya ngan las 'das pa'i lam la rgyab kyis phyogs pa/ mya ngan las 'das pa'i rigs med pa/ mya ngan las 'das pa mi tshol ba/ 'khor ba la smon cing mos pa'o/ /gnyis pa ni nga'i chos la gus pa mi bskyed pa dang / theg pa chen po la skur pa 'debs pa zhes bya ba nas rgya cher bshad pa'i bar du'o/ /med pa la mngon par zhen pa yang rnam pa gnyis te/ thabs med pa'i spyod pa dang / thabs dang bcas pa'i spyod pa'o/ /thabs med pa'i spyod pa yang gang zag rnam pa gnyis yod de/ /dang po ni/ sangs rgyas kyi chos las phyi rol du gyur pa mu stegs can bslab pa tha dad par gyur pa dgu bcu rtsa drug po rnams so/ /gnyis pa ni sangs rgyas kyi chos la gnas shing mngon par yid ches pa skyes kyang 'jig tshogs la lta ba la sems shin tu mngon par zhen nas/ yang dag pa'i don gyi tshul mi len pa ste/ ngas gang zag 'di ni mu stegs can dag dang mtshungs par ston to/ /gzhan yang gang zag mngon pa'i nga rgyal can kha cig yang dag pa'i chos la gnas shing stong pa nyid du bsgom pa dang / yod pa dang / med pa'i lta ba gnyis bskyed nas/ 'di ni de kho na nyid kyi stong pa bla na med pa'i byang chub la phyogs gcig pa'i lam rnam par thar pa'i sgo yang dag pa de bzhin gshegs pas rab tu phye nas yang dag par bstan pa yin no zhes de la rtog pa nyid du lta ba bskyed pa de ni ngas gsor mi rung ba zhes bshad do/ /gzhan yang de nyid las kun dga' bo gal te gang la la zhig bdag tu mngon par zhen pa ri rab tsam du gyur kyang ngas de la mtshar du 'dzin pa yang med de/ smon par yang mi byed kyi mngon pa'i nga rgyal can gang / stong pa nyid du lta ba la mngon par zhen nas ji ltar skra nyag ma gcig la/ cha drug cur gses pa tsam du lta na yang ngas mi snang ngo / /thabs dang bcas par spyod pa'i gang zag kyang rnam pa gnyis te/ nyan thos kyi theg pa dang / rang sangs rgyas kyi theg pa pa'o/ /yod pa dang / med pa la mngon par zhen pa med pa ni dbang po shin tu rnon pos gang theg pa chen po bsgom pa ste/ gang zag de 'dod chen pa dag ltar 'khor ba la mngon par chags pa med kyi/ mu stegs can ltar thabs med pa spyod pa yang ma yin/ theg pa gnyis ltar thabs dang bcas par spyod pa yang ma yin no zhes gsungs te/ zhib tu de nyid las 'byung ba bzhin no/ /gzhan yang de nyid las bcom ldan 'das kyis kun dga' bo la bka' stsal pa/ gang la la srid pa gsum la mngon par zhen cing theg pa chen po la skur pa 'debs pa gang yin pa de ni 'dod chen pa zhes bya ste/ log pa nyid du nges pa'i phung por gtogs pa yin no/ /gang la la med pa la mngon par zhen cing thabs med pa la spyod pa gang yin pa de ni ma nges pa'i phung por gtogs pa yin no/ /gzhan yang med pa la mngon par zhen pa la thabs dang bcas pa/ spyod pa dang / yod pa dang med pa la mngon par zhen pa med pa mnyam pa nyid kyi lam sgom pa gang yin pa yang dag pa nyid du nges pa'i phung po zhes bya'o zhes gsungs pa lta bu'o/ /lnga pa ni gnyen pos bcos su mi rung ba'i sgo ste/ 'phags pa sor mo phreng gi mdo las ji skad du/ de nas tshe dang ldan pa maud gal gyi bu chen pos tshigs su bcad de dri ba dris pa/ ci yi phyir na 'jig rten nad/ /rnam par phye nas gsum du bshad/ /kha cig sman pas gsos na 'tsho/ /kha cig sman pas gsos mi 'gyur / /gzhan yang nad pa kha cig ni/ /sman pa yod kyang gsor mi rung / /de lta bas na nad pa rnams rnam par phye na gsum yod do/ /de nas sor mo phreng bas tshigs su bcad de smras pa/ don de de ltar ma yin pas/ /rnam pa gsum du bshad mi rigs/ /gsor rung ba dang gsor mi rung / /gsum du bshad kyang gsum du med/ / gal te gsum du rnam rtog na/ /de ni nyan thos theg pa yin/ /nyan thos theg pa gang yin pa/ /sangs rgyas sbrang bu'i theg par gsungs/ /de dag shes pa med pa'i phyir/ /rnam par rtog pa gsum du gyur/ /zhes gsungs pa lta bu'o/ /de la log par nges pa zhes bya ba ni 'di lta ste/ 'dod chen pa dag go/ /yang dag pa nyid du nges pa ni 'di lta ste/ de bzhin gshegs pa dang / byang chub sems dpa' dang / theg pa gnyis po dag go/ /don gyi bye brag bshad pa dag ni mtshan nyid bstan pa dag las 'byung ba bzhin du rig par bya'o/ /yang dag shes dang smra dang 'gal bas na/ /ba lang lug la sogs pa'i rigs su skye/ /zhes bya ba'i tshig gnyis kyis ni ngan 'gror skye bar 'gyur ba'i nyes dmigs bstan te/ 'di ltar byis pa so so'i skye bo de dag bla na med pa de kho na'i don 'ba' zhig dang 'gal ba ma yin gyi/ yang dag pa'i ye shes dang smra ba dag dang yang 'gal bar 'gyur ba'o/ /de la yang dag pa'i ye shes ni gnyis su med pa mngon par rtogs pa'i ye shes so/ /smra ba ni brjod pa ste/ gnyis su med pa ston pa/ 'phags pa'i gsung rab kyi gtam mo/ /yang dag pa'i ye shes dang / smra ba la sogs pa dang 'gal bar 'gyur ba'i dbang gis ba lang la sogs pa 'gro ba ngan pa rnams su skye bar 'gyur ba'o// //bam po bcu gnyis pa/ de nas bcom ldan 'das la byang chub sems dpa' sems dpa' chen po chos 'phags kyis 'di skad ces gsol to zhes bya ba 'di man chad ni gnyis pa rtog ge'i spyod yul las yang dag par 'das pa'i mtshan nyid ces bya ba bstan to/ /'di yang rnam pa gnyis su dbye ste/ tshig rkyang pas rgya cher rnam par bshad pa dang / tshigs su bcad pas mdor bstan pa'o/ /tshig rkyang pas rgya cher bshad pa la yang rnam pa drug tu dbye ste/ byang chub sems dpas zhu ba gsol ba dang / lan mdor gsungs pa bstan pa dang / byang chub sems dpa' slar brtag pa dang / bcom ldan 'das kyis rgya cher rnam par bshad pa dang / dpes bstan pa dang / dpe dang don du sbyar ba dang / yang na mjug bsdu zhing lan gdab pa'o/ /gzhan yang rnam pa drug tu dbye ste/ zhu ba gsol ba dang / lan du gsungs pa dang / brtag pa dang / rnam par bshad pa dang / dpes bstan pa dang / dpe dang don du sbyar ba'o/ /slob dpon yang dag bden pa'i brjed byang las ni byang chub sems dpa' zhu ba gsol ba dang / de bzhin gshegs pas yang dag par bshad pa dang / dpes bstan pa dang / dpe dang don du sbyar zhing mjug bsdu ba dang / tshigs su bcad pas bstan pa'o zhes 'byung ngo / /dang po zhu ba gsol ba yang rnam pa gsum du dbye ste/ zhu ba yod pa nyid smos pa dang / gang zhu ba'i dngos po bstan pa dang / rang gi sems kyi bsam pa yang dag par bstan pa ste/ 'di ni dang po'o/ /de na zhes bya ba ni zhu ba gsol ba'i tshe na'o/ /byang chub sems dpa' chos 'phags zhes bya ba la sogs pas ni zhu ba gsol ba'i gang zag dang / lan 'debs pa bstan to/ /chos 'phags zhes bya ba ni shes rab kyi pha rol tu phyin pa'i 'grel pa las byang chub sems dpa' 'di grong khyer spos sna tshogs zhes bya ba na mos pa ji lta ba bzhin du chos ston pas sems can rnams dge ba'i rtsa ba rgya cher 'phel bar bya ba'i phyir chos 'phags zhes bya'o zhes bshad do/ /slob dpon yang dag bden pa'i brjed byang las kyang / byang chub sems dpa' 'dis brgyad pa la gnas shing chos kyi sku las byung ba'i phyir chos 'phags zhes bya'o zhes bshad do/ /slob dpon h+yan tsang gis chos 'phags zhes bya ba ni byang chub sems dpa' 'di'i chos kyi spobs pa chu bo bzhin du gtugs pa med do/ /chos dang dpe gnyis ka cig car smos pa'i phyir chos 'phags zhes bya'o zhe'o/ /bcom ldan 'das 'di nas shar phyogs su 'jig rten gyi khams gang gA'i klung bdun cu rtsa gnyis kyi bye ma snyed 'das pa na/ 'jig rten gyi khams grags pa can zhes bgyi ba mchis te/ de na de bzhin gshegs pa'i mtshan ni rgya cher grags pa zhes bgyi'o/ /bdag sngon gyi gdugs snga mo zhig nas sangs rgyas kyi zhing de nas 'dir mchis lags te zhes bya ba la sogs pas ni gnyis pa ni gang zhu ba'i dngos po bstan pa zhes bya ba ston te/ de ni 'di skad du mu stegs can rnams gcig tu 'dus te/ don dam pa'i bden pa glengs pa las gang gis kyang the tshom bcad mi nus pa'i phyir don dam pa'i bden pa ni rtog ge'i spyod yul las yang dag par 'das par shes par bya'o zhes bstan par 'gyur ro/ /'di yang rnam pa bzhir dbye ste/ bgrod pa dang 'ong ba'i gnas skabs bstan pa dang / de dag gcig tu 'dus par mthong bar bstan pa dang / rtsod pa smra ba'i rgyu bstan pa dang / ma rtogs pa'i mtshan nyid bstan pa ste/ 'di ni dang po bgrod pa dang 'ongs pa'i gnas bstan pa'o/ /mdo'i tshig 'di yang gnyis su dbye ste/ de la 'di nas zhes bya ba la sogs pas ni bgrod pa'i gnas bstan pa'o/ /bdag sngon zhes bya ba la sogs pas ni 'ongs pa'i gnas bstan pa ste/ 'dis ni 'phags pa chos 'phags 'jig rten gyi khams 'di nas 'jig rten gyi khams grags pa can du phyin nas sems can yongs su smin par bya ba'i phyir grogs su gyur pa bstan to/ /'di nas zhes bya ba nas 'dir mchis lags te zhes bya ba'i bar du gsungs pa de la gnas ji lta bu zhig la 'di nas zhes brjod ce na/ 'di la bshad pa rnam pa gsum yod de/ kha cig 'di zhes bya ba ni mi mjed kyi 'jig rten gyi khams 'di'o zhes bshad de/ de'i phyir tshig nges par 'grel pa'i mdo las mi mjed kyi 'jig rten gyi khams 'di nas shar phyogs shin tu thag ring po nas zhes 'byung ste/ slob dpon yang dag bden pa'i brjed byang las/ mi mjed kyi 'jig rten gyi khams zhes bya ba la/ mi mjed ces bya ba ni tshangs pa'i rgyal po'i ming ste/ 'dis gzhan kyang khyad par du 'phags pa'i dngos po mthong na rtag par rjes su dga' zhing phrag dog dang ser sna mi skyed de/ gzhan gyi yon tan khyad par can gyi dngos po la ji snyam pa bzod pa'i phyir mi mjed ces bya ba'i bzod pa la mi mjed ces bshad pa ni ma yin te/ mi mjed de 'jig rten gyi khams stong la dbang byed pas stong gi 'jig rten gyi khams kyi bdag por gyur pa yin te/ bdag po'i ming las ming du btags pa'i phyir ming mi mjed ces bya'o/ /kha cig na re 'di nas zhes bya ba ni sangs rgyas kyi zhing yongs su dag pa phun sum tshogs pa bco brgyad dang ldan pa 'di nas te / de'i phyir dpe rnam pa gnyis las mi mjed kyi 'jig rten zhes bya ba'i ming smos so/ /gal te de ltar na zhing yongs su dag pa na ni nyi ma dang zla ba yang med na/ ci'i phyir bdag sngon gyi gdugs snga ma zhig nas sangs rgyas kyi zhing de nas 'dir mchis lags zhes gsungs/ 'jig rten gyi khams gzhan na nyi ma dang zla ba yod pa'i dbang du mdzad nas gsungs pa yin no zhe'o/ /kha cig na re sangs rgyas kyi sa'i 'grel pa las ji skad du/ yang dag pa'i don du gnas 'di nas zhes bya ba ni rnam pa gnyis yod do / /zhing yongs su dag pa dang zhing yongs su ma dag pa ste/ don de'i phyir gnas gnyis spyir bstan pa 'di nas zhes bya'o zhes bshad pa lta bu'o zhe'o/ /dpe rnams de ltar tha dad par gyur pa yang lo tsA ba rnams kyi bsam pa tha dad pa'i phyir dang / yang na rgya gar gyi dpe nyid las bye brag 'di lta bu yod pa'i phyir ro/ /de la gang gA'i klung zhes bya ba la/ gang gA ni lha'i ming ngo / /ci'i phyir mdo sde rnams las gang gA'i klung zhes smos la/ klung gzhan dag ma smos zhe na/ shes rab kyi pha rol tu phyin pa'i 'grel pa las ji skad du 'dzam bu'i gling na klung chen po sna tshogs yod de/ gang gA'i klung bas lhag pa yang yod na ci'i phyir thams cad du gang gA'i klung nyi tshe smos / /smras pa gang gA'i klung ni bye ma mang la gzhan ni de lta ma yin pas so/ /gzhan yang gang gA'i klung ni sangs rgyas 'khrungs pa'i gnas dang / rnam par rgyu ba'i gnas yin pas/ slob ma rnams kyis dmigs kyis mngon sum du mthong ba'i phyir dper smos pa yin no/ /gzhan yang 'dzam bu'i gling gi gangs ri'i bar na rgya mtsho ma dros pa zhes bya ba klung chen po bzhi 'byung ba yod de/ de'i shar phyogs kyi ngos glang po che'i kha nas chu bo gang gA byung nas shar phyogs kyi rgya mtsho'i nang du 'bab bo/ /lho'i ngos ba lang gi kha nas chu bo sin d+hu byung nas lho phyogs kyi rgya mtshor 'bab bo/ / nub phyogs kyi ngos rta'i kha nas chu bo pag shu byung nas nub phyogs kyi rgya mtshor 'bab bo/ /byang gi ngos seng ge'i kha nas chu bo si ta byung nas byang phyogs kyi rgya mtshor 'bab ste/ chu bo rnam pa bzhi las chu bo gang gA mchog tu che bas phyogs bzhi thag ring po'i mi rnams dang / gtsug lag thams cad las/ chu bo gang gA ni bsod nams dang bkra shis kyi klung ste/ gang gis der zhugs te khrus byas na sdig pa dang / dri ma rnams byang bar 'gyur ro zhes mang po kun gyis bsngags shing kun gyis shes pa'i phyir ro/ /chu bo gang gA'i dper bstan pa yin no/ /gzhan yang klung gzhan gyi ming ni kun gyis rtag tu brjod la/ gang gA'i klung ni thams cad du brjod pa ma yin pas/ de'i phyir gang gA'i klung dper smos kyi klung gzhan ni ma blangs so/ /gang gA'i klung gi nang nas bye ma ji snyed cig yod ce na/ rtsis mkhan dang bgrang ba thams cad kyis shes par mi nus kyi sangs rgyas dang chos kyi sku'i byang chub sems dpa' rnams kyis de'i grangs thugs su chud cing shes te/ sangs rgyas dang byang chub sems dpa' rnams ni 'dzam bu'i gling thams cad kyi rdul phra rab rnams kyi 'phel ba dang 'grib pa mang nyung ji snyed yod pa yang thugs su chud cing shes na gang gA'i klung lta ci smos te/ ji skad du bcom ldan 'das rgyal byed kyi tshal gyi phyi rol shing drung zhig na bzhugs pa las/ bram ze zhig bcom ldan 'das kyi thad du 'ongs nas bcom ldan 'das la zhus pa tshal 'di la lo ma ji snyed cig mchis lags/ bcom ldan 'das kyis lan du grangs 'di snyed cig yod do zhes bka' stsal pa dang / bram ze the tshom skyes nas su zhig yid ches par 'gyur ro zhes bram ze de shing drung zhig tu song nas shing gi lo ma nyung shas cig blangs te slar 'ongs nas/ bcom ldan 'das la nges par lo ma ji snyed cig mchis zhes gsol ba dang bcom ldan 'das kyis de ji tsam blangs pa bzhin du 'di tsam cig chog go zhes bka' stsal pas/ bram zes de bzhin du shes par gyur nas rab tu dad pa skyes te/ bcom ldan 'das la rab tu 'byung bar gsol bas phyis dgra bcom pa'i 'bras bu thob par gyur to zhes gsungs pas de'i phyir bcom ldan 'das gang gA'i klung gi bye ma'i grangs mkhyen par mngon no/ /gzhan yang drang srong rdo rje 'phags pas rdo rje gcod pa'i 'grel pa byas pa las/ gang gA'i klung gi bye ma zhes bya ba ni mtsho rab tu bsil ba nas 'byung ste/ shar phyogs kyi rgya mtshor 'bab bo/ / srid du ni dpag tshad brgyad khri bzhi stong ngo / /zheng du ni dpag tshad gnyis so/ /zheng kha cig tu ni rgyang grags gnyis yod pa yang yod do/ /de bye ma'i ri'i steng nas 'bab pa'i phyir bye ma'i kha dog dkar po 'bab pas chu yang 'o ma'i kha dog lta bur dkar por 'bab ste/ chu klung de las phyir byung ba'i tshe ni slar sngon por 'gyur ro/ /bye ma de shin tu zab pas glang po che dang rta la sogs pa der zhugs na nub par 'gyur ro zhes bshad do/ /gzhan yang rgya gar yul pa rnams kun gyis klung de mthong bas 'di dpe bstan pa yin no/ /de ltar 'jig rten thag ring por phyin pa yang / slob dpon yang dag bden pa'i brjed byang las/ rdzu 'phrul gyi mngon par shes pa ni rnam pa gsum yod de/ dang po ni lus 'phar ba ste/ bya 'dab chags ltar nam mkha' la 'phur ba'o/ /de yang ting nge 'dzin gyi mthus lus bskyod nas thag ring por 'gro bar nus par rtag par rgyun du rdzu 'phrul gyi mngon par shes pa dang / gzugs dam pa dang ldan par bya dgos so/ /gal te brjed par gyur tam/ dam par ma gyur na lus slar yang lhung ba'i phyir/ lus 'phar ba zhes bya ste/ rnam pa gsum las 'di ni phyogs tha ma'o/ /gnyis pa ni yid bzhin gyi rdzu 'phrul gyi mngon par shes pa ste/ 'phags pa rnams sems can gyi mos pa ji lta ba bzhin du thag ring po las nye bar bsgyur ba dang nye ba las ring por bsgyur ba dang nang ngam phyi rol yang rung ste/ nang gi sgyur ba gang yin pa de ni 'bras bu yun mi thung bas/ lus thag ring por phyin par byed do/ /phyi rol gyi sgyur ba gang yin pa de ni lus thag ring por phyin par mi 'gyur bas thag ring po dang / thung ngur byed pa de 'bras bu la yod de 'di ni phyogs bar ma'o/ /gsum pa ni sems myur ba'i mngon par shes pa ste/ mngon par shes pa 'di ni mchog yin pas sa brgyad pa yan chad kyis gdod thob par nus te/ lus yang zhing myur bas der phyin nas yongs su rdzogs par byed do/ /sems rtse gcig pa de nyid kyis der phyin par gyur pa'i phyir/ 'dir byang chub sems dpa' yang sems myur ba'i mngon par shes pas 'jig rten gyi khams der phyin pa yin no zhes 'byung ngo / /mdzod kyi bstan bcos dang yang dag pa'i rigs pa las 'das pa las yid kyi shugs kyi rdzu 'phrul gyi mngon par shes pa ni sangs rgyas nyag gcig la mnga'o zhes bshad de / de'i phyir yang dag pa'i rigs pa las 'gro ba ni rnam pa gsum ste/ dang po lus bskyod pa ni 'di lta ste/ bya 'dab chags bzhin du nam mkha' la 'gro ba'o/ /gnyis pa mos pas ni 'di lta ste/ shin tu thag ring po dag kyang nye ba nyid du bsams pa tsam gyis phyin par 'gyur ba'o/ /dang po nas 'gro ba dang 'ong ba med na ci la thag ring por 'gro ba zhes bya/ 'di yang dag par 'gro ba yin mod kyi nye ba nyid du mos pa'i dbang gis shin tu thag ring por 'gro ba'i phyir mos pa zhes bya ba'i ming 'thob pa yin no/ /yang na bcom ldan 'das kyis bsam gtan gyi spyod yul bsam gyis mi khyab po zhes gsungs pa'i phyir de bzhin gshegs pa kho nas thugs su chud pa nyid do/ /gsum pa yid kyi shugs kyis ni 'di lta ste/ shin tu thag ring po'i phyogs dag kyang sems bskyed nas dmigs pa tsam gyis kyang phyin par 'gyur ba'o/ /'di'i shugs yid dang 'dra bas yid kyi shugs kyi ming 'thob pa yin te/ ji ltar sems can gyi yul dmigs pa bzhin du 'og min gyi bar du 'gro ba'i phyir ro/ /rnam pa gsum las yid kyi shugs ni sangs rgyas nyag gcig la'o/ /lus bskyod pa dang mos pa'i theg pa gzhan dag kyang gtogs te/ 'di ltar bcom ldan 'das kyi rdzu 'phrul gyi mngon par mkhyen pa myur bas/ phyogs nye ring ji lta ba bzhin thugs bskyed pa tsam gyis byon par 'gyur ba des na bcom ldan 'das kyis 'di skad du sangs rgyas rnams kyi spyod yul ni bsam gyis mi khyab pa'o zhes gsungs te/ ji ltar nyi ma'i 'od zer gtong ba ltar phung po skyed pa yang de bzhin te/ ji ltar bzhed pa bzhin du thag ring por byon pa'i phyir de bzhin gshegs pa zhes bshad do/ /gal te de ltar ma yin no zhe na/ 'di nas mi snang bar der 'byung ba zhes bya ba yang bar du chad pa med pas 'gro ba zhes bya ba'i don med par 'gyur ba'i rigs so/ /yang na de bzhin gshegs pa'i mthu bsam gyis mi khyab pa'i phyir thugs bskyod pa tsam gyis byon par gyur pa dang / dpag par dka' ba'i phyir/ yid kyi shugs kyis 'gro ba ni bcom ldan 'das nyag gcig la mnga'o/ /mos pa ni 'phags pa gzhan dag kyang gtogs so/ /lus bskyod pa ni so so'i skye bo dag kyang gtogs so/ /'dir theg pa chen po'i bstan bcos shes rab kyi pha rol tu phyin pa'i 'grel pa dang sbyar na/ las rnams cung zad tha dad de/ de'i phyir de nyid las yid bzhin du 'gyur ba ni rnam pa gsum ste/ phyin par gyur pa dang / yongs su bsgyur ba la dbang thob pa dang / 'phags pa yid bzhin du gyur pa'o / /phyin par 'gyur ba yang rnam pa bzhi ste/ bya 'dab chags bzhin du thogs pa med par nam mkha' la lus 'phur ba dang / thag ring po thag nye bar bsgyur zhing ma song bar phyin par 'gyur ba dang / 'di nas mi snang bar gyur nas der 'byung ba dang / skad cig ma gcig gis phyin par 'gyur ba'o/ /yongs su bsgyur ba la dbang thob pa ni chen po la chung ngu chung ngu la chen por byed pa dang / gcig la mang por byed pa dang / mang po la gcig tu bya ba dang / dngos po rnam pa sna tshogs yongs su sgyur bar byed pa'o/ /mu stegs can rnams kyis yongs su bsgyur ba ni de ltar thogs nas zhag bdun las mi 'da'o/ /sangs rgyas de'i slob ma rnams ni dbang bsgyur ba la mnga' brnyes pas yun ring thung zhes bya ba med do/ /'phags pa yid bzhin du 'gyur ba ni phyi rol gyi yul drug po las dngos po gang yid du mi 'ong ba dang / mi gtsang ba de dag la yongs su gtsang ba nyid du lta ba dang / yid du 'ong ba dang / yongs su gtsang ba de dag la mi gtsang ba nyid du lta ba ste/ dbang thob pa'i chos 'di ni sangs rgyas nyag gcig la mnga'o zhes 'byung ngo / /gzhan yang shes rab kyi pha rol tu phyin pa'i 'grel pa las/ mdo dag las ni se gol gtogs pa gcig la skad cig ma bcu drug yod do zhes gsungs pas gal te skad cig ma gcig la phyogs gcig gi gang gA'i klung gi bye ma snyed la sogs pa'i 'jig rten gyi khams su phyin par 'gyur ro zhes bshad na yang shin tu yid ches par dka' na/ phyogs bcu'i gang gA'i klung gi bye ma snyed la sogs pa'i 'jig rten gyi khams su dus yun thung ngus gnas mang por phyin par 'gyur ba lta smos kyang ci dgos/ smras pa mdo dag las dngos po lnga ni bsam gyis mi khyab pa'o zhes gsungs te 'di lta ste/ sems can rnams kyi grangs mang nyung dang / las kyi rnam par smin pa dang / rnal 'byor pa rnams kyi mthu dang klu rnams kyi mthu dang / sangs rgyas rnams kyi mthu'o/ /bsam gyis mi khyab pa rnam pa lnga las sangs rgyas kyi mthu ni mchog tu bsam gyis mi khyab bo/ /byang chub sems dpa' rnams ting nge 'dzin zab mo la zhugs pa na bsam gyis mi khyab pa skye ba'i phyir/ skad cig ma gcig la phyogs bcur sangs rgyas kyi zhing rnams su phyin par nus te/ ji ltar mngon par shes pa rnam pa bzhi las/ sangs rgyas dang byang chub sems dpa' kho na la yid bzhin du myur zhing kun du khyab pa'i rdzu 'phrul gyi mngon par shes pa 'di mnga'o zhes bstan pa lta bu'o zhes 'byung ngo / /bdag gi zhing de'i sa phyogs zhig na mu stegs can rang rang gi ston pa la sogs pa bdun khri bdun stong gcig tu 'dus nas zhes bya ba ni gnyis pa gcig tu 'dus par mthong ba bstan pa ste/ de dag chos spyod pa'i phyir gcig tu 'dus par bstan pa'o/ /chos rnams kyi don dam pa'i bden pa'i mtshan nyid bsam pa las brtsams te/ de dag chos rnams kyi don dam pa'i bden pa'i mtshan nyid sems par bgyid/ 'jal bar bgyid/ nye bar ston par bgyid/ yongs su tshol bar bgyid kyang ma rtogs zhes bya ba ni gsum pa rtsod pa smra ba'i rgyu bstan pa'o/ /slob dpon yang dag bden pa'i brjed byang las/ de la smra ba'i don rnam par bzhag pa yang rnam pa gsum yod de/ de la mngon sum gyi tshad ma dang / rjes su dpag pa'i tshad ma la brten pa dang / 'phags pa'i lung gi tshad ma ste/ de la don dam pa'i bden pa'i tshad ma nyid bsam pa las brtsams te/ sems par bgyid ces bya ba ni mu stegs can dag gis bshad pa'i mngon sum gyi tshad ma'o/ /'jal bar bgyid ces bya ba ni rjes su dpag pa'i tshad ma'o/ /nye bar ston par bgyid ces bya ba ni lung gi tshad ma ste/ smrang gzhi la sogs pa'i gtsug lag rnams so/ /tshad ma 'di gsum la brten nas yongs su tshol ba'i tshe don dam pa'i bden pa'i mtshan nyid rtogs par ma gyur pa'o/ /gzhan yang don rnam par bzhag pa ni rnam pa gsum yod de/ dang po ni don rnam par bzhag pa ste/ 'di ni dam bcas pa'o/ /gnyis pa ni don bsgrubs pa ste/ 'di ni gtan tshigs bstan pa'o/ /gsum pa ni dpe rnam par gzhag pa'o/ /'di chos mtshungs pa'i dpe bstan pa'o/ /de la sems par bgyid ces bya ba ni dam bcas pa'o / /'jal bar bgyid ces bya ba ni gtan tshigs rnam par gzhag pa'o/ /nye bar ston par bgyid ces bya ba ni dpe bstan pa ste/ rnam pa 'di gsum la brten nas yongs su tshol ba na don dam pa ma rtogs pa'o zhes 'byung ste/ rgya cher ni de nyid las bstan pa bzhin no/ /gzhan du na rnam pa sna tshogs kyi mos pa can dang / tha dad pa'i mos pa can dang / rnam par 'gyur ba'i mos pa can du gyur pas/ gcig la gcig rgyab kyis phyogs shing rtsod pa'i smra ba bskyed nas kha'i mdung thung gis phan tshun 'debs par bgyid/ gnod par bgyid de so sor mchis pa dag mthong nas zhes bya ba ni bzhi pa ma rtogs pa'i mtshan nyid bstan pa'o/ /mdo'i tshig 'di yang rnam pa gsum du dbye ste/ yid kyi las mi mthun par gyur par bstan pa dang / rtsod pa'i smra ba man chad kyis ngag gi las mi mthun par gyur par bstan pa dang / gnod par bgyid ces bya ba la sogs pas lus kyi las mi mthun par gyur pa bstan pa'o/ /de la gzhan du rnam pa sna tshogs zhes bya ba la sogs pa ni yid kyi las kyi mtshan nyid yin te/ yid 'di ltar mu stegs can rnams rnam pa sna tshogs kyis yongs su btsal kyang de kho na nyid kyi don dam pa khong du ma chud pas gzhan du na nor bas mos pa ni gsum du 'dzin par gyur te/ /rnam pa sna tshogs kyi mos pa can dang / tha dad pa'i mos pa can rnam par 'gyur ba'i mos pa can du gyur pa'o/ /tshig nges par 'grel pa'i mdo las ni 'dzin pa sna tshogs bskyed ces 'byung ngo / /rnam pa gsum du dbye ba ni med do/ /dgongs pa zab mo rnam par 'grel pa'i mdo las ni tha dad pa'i lta ba dang / tha dad pa'i mngon par zhen pa bskyed nas tha dad pa'i sder gyur ces 'byung ngo / /mos pa rnam pa gsum pa yang so so nas bshad pa mi mthun te/ kha cig na re rnam pa sna tshogs kyis mos pa can du gyur ces bya ba ni chos rnam pa sna tshogs la don dam pa'i mtshan nyid med pa'i de bzhin 'dod pa'i phyir rnam pa sna tshogs kyi mos pa zhes bya'o / /tha dad pa'i mos pa can du gyur ces bya ba ni chos rnams las logs shig na don dam pa yod de/ nges par chos thams cad dang tha dad ces 'dod pa'i phyir tha dad pa'i mos pa can zhes bya'o/ /rnam par 'gyur ba'i mos pa can du gyur ces bya ba ni yang dag pa'i tshul du na don dam pa ni rnam par gyur pa med pa yin na/ rnam par 'gyur zhing rtag par gnas pa ma yin no zhes zer ba'i phyir rnam par 'gyur ba'i mos pa can du gyur pa zhes bya'o zhe'o/ /kha cig na re tshig dang po ni spyi'o/ /tshig phyi ma gnyis ni bye brag go zhes zer te/ tshig gi don bshad pa ni snga ma bzhin no/ /kha cig na re rnam pa gsum char yang don la bye brag tu gyur pa med de/ mang po rnams kyis brtags kha cig kho na ma yin pa'i phyir sna tshogs zhes bya ba gsungs so/ /bsam pa tha dad pa'i phyir tha dad pa zhes bya ba gsungs so/ / gcig nas gcig tu brtags pa tha dad par gyur cing nges pa med pa'i phyir rnam par 'gyur ba zhes bya ba gsungs so/ /yid kyi las dang ngag gi las la mi mthun par gyur pa ni gong du bshad pa bzhin no/ /bar mas ni ngag gi chos gsum gyi las kha'i mdung thung du bstan pa'o / /tha mas ni lus kyi las gcig la gcig gnod pa byas pa bstan te/ de'i phyir tshig nges par 'grel pa'i mdo las/ kha'i ral gri dang dbyug pas gcig la gcig smas par byas pa las so sor gyes par gyur to zhes gsungs so/ /gzhan yang rnal 'byor spyod pa'i sa las/ 'di las phyi rol pa de dag ni 'jig tshogs la lta ba'i rtsa ba las 'byung ba'i lta bar gyur pa rnam pa sna tshogs blo tha dad par gyur pa'i phyir gzhan dag ni gzhan dag dang mi mthun la/ de dag kyang de dag dang phyir mi mthun pas de dag la ni 'phags pa'i bden pa bzhi bstan pa yang thams cad kyi thams cad du med na rtogs pa lta ga la yod ces bstan to zhe'o/ /bcom ldan 'das dag de'i tshe 'di snyam du sems te/ kye ma de bzhin gshegs pa 'jig rten du byung zhing / 'jig rten du byung ba'i dbang gis don dam pa'i bden pa'i mtshan nyid rtog dpyod kyi spyod yul thams cad las yang dag par 'das pa 'di lta bu rtogs pa dang / mngon sum du bgyi ba mchis pa ni ngo mtshar rmad du byung ba lags so snyam bgyid pa lags so zhes bya ba ni gsum pa rang gi sems kyi bsam pa yang dag par bstan te/ 'di ltar byang chub sems dpa' de mu stegs mang po rnams dpyad cing yongs su btsal kyang ma rtogs par mthong nas don dam pa ni rtog dpyod kyi yul las shin tu 'das pa yin no snyam du yang sems la de bzhin gshegs pa 'jig rten du byung nas thabs shin tu legs par gsungs pa'i dbang gis/ gzhan dag mngon par rtogs pa yang yod par gyur to zhes bsngags pa'o/ /de nas bcom ldan 'das kyis byang chub sems dpa' sems dpa' chen po chos 'phags la 'di skad bka' stsal to/ /rigs kyi bu de de bzhin no de de bzhin te/ khyod kyis ji skad smras pa de bzhin no/ /ngas ni rtog pa dang dpyod pa thams cad las yang dag par 'das pa don dam pa'i mtshan nyid mngon par rdzogs par sangs rgyas pa ste/ mngon par rdzogs par sangs rgyas nas kyang gzhan dag la bsnyad cing rab tu bstan/ rnam par bshad/ gdags par byas/ gsal bar byas so zhes bya ba ni gnyis pa lan mdor gsungs pa zhes bya ba bstan to/ /mdo'i tshig 'di yang rnam pa gsum du dbye ste/ dang po de nas zhes bya ba la sogs pas ni bshad pa'i gleng gzhi bstan to/ /gnyis pa rigs kyi bu zhes bya ba la sogs pas ni bshad par gsol ba btab pa rigs pa dang mthun par gyur cing / tshig 'bru dang / don gnyis ka yang rjes su mthun par gyur par bsngags pa'o/ /yang na gnyi ga yang bdag dang gzhan la phan 'dogs pa dang / rjes su mthun par gyur pa de'i phyir tshig zlos bur de de bzhin no/ /de de bzhin te zhes bya ba gsungs so/ /le'u chen po'i mdo dang sbyar na/ de las brgya byin lha'i dbang pos shes rab kyi pha rol tu phyin pa la mchod pa byas pa'i bsod nams ni tshad med do zhes bsngags pa brjod pa dang / bcom ldan 'das kyis de de bzhin no/ /de de bzhin te zhes gsungs te/ mdo'i tshig 'di nyid kyi 'grel pa slob dpon klu sgrub kyis mdzad pa las/ brgya byin lha'i dbang pos 'di ni thams cad mkhyen pa ma yin no zhes the tshom za ba dang / nor par 'dzin du dogs pa'i phyir bcom ldan 'das kyis tshig zlos bur de de bzhin no/ /de de bzhin te zhes gsungs so / /mdo sde 'di yang de bzhin te/ 'og nas 'byung ba'i tshig rnams la yang de de bzhin du rig par bya'o/ /gsum pa ngas ni zhes bya ba la sogs pas ni dris pa bzhin du lan mdor gsungs pa bstan te/ don dam pa'i bden pa la brten nas mngon par rdzogs par sangs rgyas nas gzhan dag la yang de bzhin du bstan par 'gyur ba'o/ /de ci'i phyir zhe na zhes bya ba ni gsum pa byang chub sems dpas slar brtags pa zhes bya ba ste/ don gang gi phyir rtog dpyod kyi spyod yul las shin tu 'das par gyur ces bya ba'i tha tshig go/ /ngas don dam pa ni 'phags pa rnams kyi nang gi so so rang gis rig pa yin par bshad la rtog pa dang dpyod pa'i spyod pa ni so so'i skye bo rnams kyis phan tshun rig par bya ba yin pas zhes bya ba 'di man chad ni bzhi pa zhus pa bzhin du bcom ldan 'das kyis rgya cher rnam par bshad pa zhes bya ba ston to / /'di ltar mtshan nyid rnam pa lngas rtog ge'i spyod yul las yang dag par 'das pa'i mtshan nyid ston pas de nyid las rnam pa lngar dbye'o/ /'di lta ste/ nang gi so so rang gis rig par bya ba dang / mtshan ma med pa'i spyod yul dang / brjod du med pa dang / tha snyad thams cad yang dag par chad pa dang / rtsod pa thams cad nye bar zhi ba'i mtshan nyid do/ /thams cad la yang rnam pa gnyis su dbye ste/ rnam par bshad pa dang mjug bsdu ba'o/ /'di ni dang po ste/ 'di ltar 'phags pa rnams kyi rnam par mi rtog pa'i ye shes kyis de bzhin nyid kyi yul la dmigs pas/ nang gi rang gi ngo bo nyid mngon par rtogs pa'o/ /nang gi so so rang gis rig pa 'di yang so so nas bshad pa mi mthun te/ kha cig na re rtsa ba dang / rjes las thob pa thams cad kyis nang gi rig pa'i de bzhin nyid thob pas/ gzugs brnyan snang bar mi byed do/ /'di ltar zag pa med pa'i ye shes kyis de bzhin nyid la dmigs pa'i phyir ro zhe'o/ /kha cig ni rtsa ba dang rjes la thob pa gnyi gas gzugs brnyan ston par byed pas/ mngon sum du rig pa ma yin te/ gal te de lta ma yin te/ rnam par rig pa tsam gyis don mi 'grub pa'i phyir ro zhe'o/ /kha cig na re yang dag pa'i ye shes ni rang gi ngo bo nyid mngon sum du rtogs pas ma bsgyur bar yang dmigs par byed de/ ji ltar rang gi rtogs pa'i rnam pa las rgyu mtshan gyi rnam pa gzhan med pa bzhin no/ /rjes las thob pa'i ye shes ni gzugs brnyan du gyur pa las dmigs par byed de/ 'di ltar rnam par rtog pa'i phyir ro/ /gal te de ltar ma yin na me long lta bu'i ye shes la sogs pa de bzhin nyid kyi yul la dmigs pas yang dag pa'i ngo bo nyid kyi ye shes dang / rjes la thob par bye brag med par 'gyur ro zhe'o/ /de ltar rnam pa gsum du bshad pa yod mod kyi/ slob dpon h+yan tsang dang chos skyong gi gzhung gis 'og nas ston pa ni yang dag pa yin no/ /rgya cher bshad pa ni rnam par rig pa tsam du grub pa'i bstan bcos kyi 'grel pa dang / sangs rgyas kyi sa'i 'grel pa las bstan pa bzhin no/ /rtog dpyod kyi spyod pa ni so so'i skye bo'i gzhan gyi dbang gi tha snyad de / nang gi so so rang gis rig par bya ba ma yin par gsungs pa'i phyir phan tshun zhes bya ba gsungs so/ /tshig nges par 'grel pa'i mdo dang / dgongs pa zab mo nges par 'grel pa'i mdo las ni rtog ge'i spyod yul zhes 'byung la mdo 'di las ni rtog dpyod kyi spyod yul las 'das pa zhes 'byung ba de ji ltar brda sprad par bya zhe na/ 'di la bshad pa rnam pa gnyis yod de/ dang po ni kha cig na re mdo sde dang / bstan bcos rnying 'gyur rnams las ni rtog ge zhes 'byung ngo / /slob dpon h+yan tsang gis ni rtog dpyod ces par bsgyur te/ de la rtog pa ni 'di lta ste/ kun tu tshol ba'o/ /dpyod pa ni so sor rtog pa ste/ rnal 'byor spyod pa'i sa la sogs pa las ji skad du thams cad kyang sems pa dang / shes rab kyi ngo bo nyid yin no zhes bshad pa lta bu'o/ /mdo sde 'di las rtog dpyod ces gsungs pa ni rtog pa dang dpyod pa la spyir rtog dpyod ces bshad de/ thams cad la yang yongs su tshol ba dang / don sems pa yod pa'i phyir ro/ /rtog dpyod ces bya ba 'di yang / so so nas bshad pa mi mthun te/ thams cad yod par smra ba dag ni sems las logs shig na sems las byung ba yang dag pa'i ngo bo nyid du yod de/ 'dod pa'i khams nas bsam gtan dang po'i bar gyi sems can thams cad ni rtog pa dang bcas shing dpyod pa dang bcas pa'o/ /bsam gtan khyad par can rnams ni rtog pa med la dpyod pa dang bcas pa'o/ /bsam gtan gnyis pa yan chad kyi sa rnams ni thams cad kyang rtog pa yang med dpyod pa yang med pa zhes bya'o / / de yang rnam par shes pa drug po zag pa dang bcas pa dang zag pa med pa la bsdu'o zhes zer te/ rgya cher rnam par 'byed pa ni mdzod kyi bstan bcos la sogs pa las bstan pa bzhin du rig par bya'o/ /mdo sde pa dag ni sems las logs shig na rang gi ngo bor gyur pa yang med la/ sems dang gcig pa ma yin par yang rtog pa dang / dpyod pa 'byung ngo zhes zer te/ de'i phyir bstan bcos de kho na nyid grub pa'i nang nas/ rtog pa dang dpyod pa'i le'u'i nang nas kha cig rtog pa dang dpyod pa sems gcig la yod do zhes zer ba de ni mi rung ngo zhes 'byung ngo / /mdo sde pa yang phal cher theg pa chen po dang mthun te/ de la bye brag yod pa yang bstan bcos de kho na nyid grub pa'i gzhung gis ni sems kyi ngo bo nyid byed do zhes ston la theg pa chen po'i gzhung gis ni sems pa dang / shes rab kyi ngo bo nyid byed do zhes ston pas so/ /gzhan yang mdo sde pa'i gzhung gis sa gsum tha dad pa 'dod pa yang bstan bcos bye brag tu bshad pa chen po las ji skad du 'dod pa'i khams nas srid pa'i rtse mo'i sa'i bar du kun kyang rtog pa dang dpyod pa dang bcas pa ste/ sa gsum po dag bye brag yod par bshad pa yang 'dod pa'i khams dang / bsam gtan dang po'i dge ba nyon mongs pa dang bcas pa dang / ma bsgribs la lung du mi ston pa'i sems la sogs pa thams cad ni rtog pa dang bcas shing dpyod pa dang bcas pa'i sa zhes bya'o/ /bsam gtan khyad par can gyi dge ba dang lung du mi ston pa'i sems la sogs pa ni rtog pa med la dpyod pa tsam gyi sa zhes bya'o/ /bsam gtan gnyis pa nas srid pa'i rtse mo'i bar gyi dge ba dang / ma bsgribs la lung du mi ston pa'i sems la sogs pa ni rtog pa yang med la dpyod pa yang med pa'i sa zhes bya'o zhes bshad pa lta bu'o/ /'dir theg pa chen po'i gzhung dang sbyar na/ rnam par rig pa tsam du grub pa'i bstan bcos las ji skad du/ rtog pa ni kun du tshol ba'i yid kyis brjod pa ste/ rtsing bar 'jug pa'i ngo bo nyid do/ /dpyod pa ni so sor rtog pa'i yid kyis brjod pa nyid de/ zhib par 'jug pa'i ngo bo nyid do/ / 'di gnyis ka yang lus dang sems reg par gnas pa dang / reg par mi gnas pa'i rten byed pa'i las can te/ sems pa dang shes rab kyi phyogs gcig gi ngo bo nyid do/ /skad cig ma gcig la chos gnyis mtshungs par ldan pa yang ma yin te/ rtsing pa dang zhib pa'i rnam pas snga phyi tha dad pa'i phyir ro zhes bshad pa lta bu ste/ rgya cher ni rnam par 'byed pa ni rnal 'byor spyod pa'i sa dang / rnam par bshad pa'i rigs pa dang / rnam par rig pa tsam du grub pa'i bstan bcos la sogs pa las bstan pa bzhin du rig par bya'o/ /sa gsum tha dad par gyur pa yang slob dpon h+yan tsang gis 'di skad du bstan bcos rnal 'byor spyod pa'i sa ni rang gi ngo bo nyid kyi 'dod chags dang bral ba la dgongs nas sa gsum rnam par gzhag pa yin te/ 'di ltar 'dod pa'i khams nas bsam gtan dang po'i bar gyi 'dus byas kyi chos rnams ni rang gi ngo bo nyid kyi 'dod chags yongs su ma spangs pa'i phyir rtog pa dang bcas shing dpyod pa dang bcas pa zhes bya'o/ /bsam gtan khyad par can gyi 'dus byas kyi chos rnams ni sa 'og ma'i 'dod chags dang bral ba'i phyir rtog pa med la dpyod pa tsam zhes bya'o/ / bsam gtan gnyis pa nas 'du shes med 'du shes med min gyi bar gyi 'dus byas kyi chos rnams ni rang gi ngo bo nyid kyi 'dod chags rtog pa dang dpyod pa dang bral ba'i phyir rtog pa yang med la dpyod pa yang med pa'i sa zhes bya ste/ rgya cher rnam par 'byed pa ni rnal 'byor spyod pa'i sa'i 'grel pa las bstan pa bzhin no zhes bshad de 'dir rtog dpyod las 'das pa zhes gsungs pa yang rtog dpyod 'di la dgongs nas gsungs pa yin no zhe'o/ /gnyis pa ni kha cig na re 'dir rtog dpyod ces gsungs pa ni khams gsum pa'i zag pa dang bcas pa'i sems dang sems las byung ba'i chos la rtog dpyod ces bya ste/ 'di ni chos lnga las rnam par rtog pas bsdus so/ /rtog dpyod ces bya ba yang rnam pa gnyis te/ dang po ni 'dod pa'i khams kyi rtog dpyod rnam pa bzhi ste/ shes pa dag gi ngo bo nyid byed do zhes bshad de/ ming la sogs pa kun du tshol zhing da dung ma nges pa'i phyir ro/ /gnyis pa ni 'dir gsungs pa'i rtog dpyod nyid de/ khams gsum pa'i zag pa dang bcas pa'i sems la sogs pa la bya bas de'i phyir rtog dpyod ces gsungs pa yin no zhe'o/ /de'i phyir chos 'phags rigs pa des na don dam pa ni rtog pa dang / dpyod pa thams cad kyi spyod yul gyi mtshan nyid thams cad las yang dag par 'das pa yin par rig par bya'o zhes bya ba ni gnyis pa mjug bsdu ba ste brda phrad par zad do/ /gzhan yang chos 'phags ngas don dam pa ni mtshan ma med pa'i spyod yul yin par bshad la rtog pa dang dpyod pa ni mtshan ma dang bcas pa'i spyod yul la spyod par zhes bya ba la sogs pas ni gnyis pa mtshan ma med pa'i spyod yul zhes bya ba ston to/ /'di yang rnam par bshad pa dang mjug bsdu ba ste/ 'di ni rnam par bshad pa'o/ /tshig nges par 'grel pa'i mdo las ngas de kho na ni mtshan ma'i spyod pa ma yin par bshad la zhes 'byung ste/ slob dpon yang dag bden pa'i brjed byang las mtshan ma'i spyod pa zhes bya ba ni 'di lta ste/ khams bco brgyad pa'i mtshan nyid yul drug gi spyod pa dang / rnam par shes pa drug gi skye mched dang / dbang po drug go/ /dbang po dang yul dang rnam par shes pa 'di dag ni rtog pa dang / dpyod pa'i spyod yul yin la/ de bzhin nyid ni rtog pa dang dpyod pa'i spyod yul ma yin no/ /de'i phyir khams bco brgyad kyis bsdus pa ma yin no zhes bshad do/ /'dir dpe gsar 'gyur las ni mtshan ma med pa'i spyod yul yin zhes 'byung ste/ mtshan ma med pa'i spyod yul 'di yang so so nas bshad pa mi mthun te/ kha cig na re rnam par mi rtog pa'i yul la dmigs pas mtshan ma med pa zhes bya ste gzung ba dang 'dzin pa'i mtshan ma yongs su spang ba'i phyir ro zhe'o/ /bshad pa 'di dang sbyar na mtshan ma med pas dmigs pa'i yul gyi spyod pa yin pa'i phyir mtshan ma med pa'i spyod yul zhes 'byung ste/ 'di ni bdag po'i dbang du byas te bshad pa'o/ /kha cig na re mtshan ma med pa ni de bzhin nyid kyi mya ngan las 'das pa ste/ 'di ni mtshan ma med pa'i ting nge 'dzin gyi spyod pa'o zhe'o/ /mdzod kyi bstan bcos dang sangs rgyas kyi sa'i 'grel pa las kyang mtshan ma bcu med pa'i phyir mtshan ma med pa zhes bya'o zhes bshad de 'di lta ste/ yul lnga dang skyes pa dang bud med dang / skye ba dang rgas pa dang mi rtag pa med pas so/ /bshad pa 'di dang sbyar na mtshan ma med pa ni ye shes kyi spyod pa yin pa'i phyir mtshan ma med pa'i spyod yul zhes bya ste/ 'di ni rnam par bshad pa drug las yongs su 'dzin pa'i dbang du byas te bshad pa'o/ /kha cig na re mnyam pa nyid kyi de bzhin nyid kyi chos nyid ni mtshan ma dang bral ba'i phyir mtshan ma med pa zhes bya ste/ don tshad med pa'i mdo las ji skad du don tshad med pa zhes bya ba ni chos gcig las chos gcig 'byung ba ni mtshan ma med pa'o/ /mtshan ma med pa de ni mtshan ma med pas mtshan ma med pa'o/ /mtshan ma med pa'i mtshan ma med pa gang yin pa de ni de kho na nyid kyi mtshan nyid ces bya'o/ /gang de bzhin nyid kyi mtshan nyid med pa gsungs pa gang yin pa de dag kyang 'di bzhin du bshad pa'o zhes gsungs so/ /gzhan yang bstan bcos shin tu rgyas pa brgya pa las gzhan yang de kho na nyid kyi stong pa'i don ni yod pa dang med pa la sogs pa chos thams cad kyi mtshan ma dang bral ba'i phyir mtshan ma med pa zhes bya'o zhes bshad do/ /gzhan yang rnal 'byor spyod pa'i sa las dngos po lnga po de dag las rnam pa du zhig ni 'dzin pa'i spyod yul gyi don yin par blta bar bya zhe na/ smras pa mdor bsdu na rnam pa gsum [(]te[,]ste[)]/ brjod pa dang bcas shing mtshan ma dang bcas pa 'dzin pa'i spyod yul dang brjod du med pa la mtshan ma dang bcas pa 'dzin pa'i spyod yul dang / brjod du med pa la mtshan ma med pa 'dzin pa'i spyod yul lo/ /de la dang po ni tha snyad rjes su sad pa'i 'dzin pa'i spyod yul lo/ /gnyis pa ni tha snyad bag la nyal ba 'dzin pa'i spyod yul lo/ /gsum pa ni tha snyad bag la nyal bral ba'i 'dzin pa'i spyod yul lo/ /gzhan yang dang po gnyis ni kun rdzob kyi bden pa 'dzin pa yin no/ /tha ma ni don dam pa'i bden pa yin no zhes bshad do/ /gzhan yang bstan bcos shin tu rgyas pa brgya pa'i 'grel pa las/ de la dang po ni tha snyad sad par byed pa dang bcas pa'o/ /bar ma ni tha snyad kyi bag la nyal dang bcas shing sad pa med pa'o/ /tha ma ni tha snyad kyi bag la nyal sad pas thams cad du gtan du med pa'o/ /gzhan yang dang po gnyis ni kun rdzob la dmigs pa'o/ /tha ma gcig ni don dam pa la dmigs pa'o/ /gzhan yang phyi ma ni tha snyad dang gtan du bral ba dang bcas pa dang / dmigs pa dang bcas pa'i sems kyis bden pa gnyis spyir bshad pa yin no zhes bshad do/ /shes rab kyi pha rol tu phyin pa'i mdo la sogs pa las/ phung po dang / khams dang skye mched la sogs pa nas bla na med pa'i byang chub kyi bar du thams cad kyang dmigs su med pa gang yin pa de ni mtshan ma med pa'o zhes gsungs pa des don ci zhig ston ce na/ mdo sde'i dgongs pa rnams ni so so nas bshad pa mi mthun te/ slob dpon b+ha bya'i gzhung dang sbyar na ngo bo nyid rnam pa gsum spyi'i dbang du byas nas dmigs su med pa zhes ston to/ /slob dpon chos skyong la sogs pa'i gzhung gis ni kun brtags pa kho na spang ba'o zhes ston to/ /'og nas ngo bo nyid med pa bstan pa'i le'u las rgya cher rnam par 'byed do/ /rtog pa dang dpyod pa'i mtshan ma dang bcas pa'i spyod yul la spyod pa zhes bya ba la/ rtog pa dang dpyod pa ni rnam par rtog pa'i ngo bo nyid yin pas de'i mtshan ma med pa'i de bzhin nyid khong du mi chud do zhes bya ba'i tha tshig go/ /de'i phyir chos 'phags rigs pa des na/ don dam pa ni rtog pa dang dpyod pa'i spyod yul gyi mtshan nyid las yang dag par 'das pa yin par rig par bya'o zhes bya ba ni gnyis pa mjug bsdu ba ste brda phrad par zad do/ /gzhan yang chos 'phags ngas don dam pa ni brjod du med pa yin par bshad la/ rtog pa dang dpyod pa ni brjod pa'i spyod yul la spyod pas zhes bya ba la sogs pas ni gsum pa brjod du med pa'i mtshan nyid ces bya ba bstan te/ 'di ltar de bzhin nyid kyi don dam pa ni 'dus byas dang / 'dus ma byas la sogs pa yongs su spang ba'i phyir ro/ /brjod du med pa de yang 'phags pa rnams kyi gsung rab dang sbyar na/ rnam pa mang bas dang po ni sde snod bzhi pa ma yin pa'i phyir brjod du med pa zhes bya ste/ ji ltar be'u'i sde pa rnams chos kyi sde snod rnam pa lnga rnam par gzhag pa 'di lta ste/ dus gsum dang 'dus ma byas dang brjod du med pa dang / brjod du med pa'i chos dang / brjod du med pa'i chos kyi sde snod do/ /sde snod ces bya ba ni yang dag pa'i bdag go zhes zer ba ltar dus gsum dang 'dus ma byas la brjod du med pa zhes bshad du yang mi rung ngo / /gnyis pa ni sgro 'dogs pa dang skur pa 'debs pa la sogs pa dang bral bas/ brjod du med pa zhes bya ste/ ji ltar thams cad yod par smra ba'i gzhung gi bstan bcos bye brag tu bshad pa chen po las gal te brjod pa yod pa yin no / /me zhes brjod pa na lce tshig par 'gyur ba dang / zas zhes brjod pa tsam gyis 'grangs pa'i bya ba byed par 'gyur ba'i rigs so zhes bshad pa lta bu ste/ rgya cher ni de nyid las bshad pa bzhin no/ /gsum pa ni theg pa chen po'i gzhung dang sbyar na/ mdor bsdu na don rnam pa bzhis bstan to/ /dang po ni sgro 'dogs pa dang skur pa la sogs pa dang bral bas brjod du med pa zhes bya ste/ ji ltar shes rab kyi pha rol tu phyin pa'i 'grel pa las me zhes brjod pas lce tshig par 'gyur ba'i rigs so zhes bshad pa yang / thams cad yod par smra ba dag 'dod pa dang mthun no/ /gnyis pa ni mngon sum gyi tshad mas spyod yul gyi phyir brjod du med pa zhes bya ste/ ji ltar rigs pa'i sgo'i bstan bcos las/ chos rnams thams cad la ni mtshan nyid rnam pa gnyis yod de/ rang gi mtshan nyid mngon sum gyi tshad mas dmigs su yod pas brjod du med pa dang / spyi'i mtshan nyid rjes su dpag pa'i tshad mas dmigs su yod pas brjod du yod pa ste/ rigs pa des na 'phags pa rnams kyi gsung gi tshad ma ni rjes su dpag pa'i tshad mas bsdus pas chos rnams kyi rang gi mtshan nyid ni brjod du med pa yin no zhes bstan pa lta bu'o/ /chos rnams zhes gsungs pa des brjod pa ston pa zhig yin nam/ 'on te brjod pa dpag pa yin/ slob dpon h+yan tsang gis mtshan nyid spyir bsdus te bshad pa las/ sde pa rnams thams cad kyang / chos rnams zhes bstan pa de ni yang phal cher brjod pa bstan pa yin no zhes ston kyang rjes su dpag pa'i tshad mas chos tha dad pa'i dpe can dag gis brjod pa dgag pa yin no zhes zer bar zad do/ /theg pa chen po yang de bzhin te/ de'i phyir bstan bcos yang dag pa'i rigs pa la 'jug pa las chos mtshungs pa'i dpe can dag ni 'di lta ste/ gang byas pa de dag ni mi rtag par snang ste/ dper na bum pa la sogs pa lta bu'o zhes zer ro/ /chos tha dad pa'i dpe can dag ni 'di lta ste/ rtag pa gang yin pa de dag ni byas pa ma yin par snang ste/ nam mkha' la sogs pa lta bu'o zhes zer te/ de la 'di ltar rtag pa zhes bya ba des ni mi rtag pa ma yin par ston to/ / byas pa ma yin zhes bya ba des ni byed pa med par bstan te/ de'i phyir mi mtshungs pa'i dpe rnams ni brjod pa dgag par bya ba yin par rig par bya'o zhes 'byung ngo / /gzhan yang bstan bcos lag na rin po che las/ tha dad pa'i phyogs dgag pa'i ched du ni chos mi mtshungs pa'i dpe rnam par bzhag pa yin te/ tha dad pa'i phyogs med pa'i phyir dgag pa'i don yongs su grub pa yin no zhes bshad do/ /gzhan yang de nyid las gzhan yang brjod pa dgag pa'i tshig ni dgag par bya ba bkag pas mchog tu gyur pa yin te/ gang dgag par bya ba bkag nas nus pa yang der zad pas yang brjod par bya ba'i bye brag ston par mi nus so zhes bshad do/ /'dir theg pa chen po'i bstan pa dang sbyar na brjod pa thams cad ni brjod pa dgag pa yin te/ de'i phyir rigs pa'i sgo'i bstan bcos las dpe ni rnam pa gnyis yod de/ chos mtshungs pa dang chos mi mtshungs pa'o/ /de la snga ma ni brjod pa dgag pa'o/ /phyi ma ni bkag pa sdud pa kho na'o zhes bshad de zhib tu de nyid las 'byung ba bzhin no/ /'di ni dpe rnam pa gnyis kyi bye brag tu dbye ba yin te/ snga ma ni mtshungs pa'i dpe'o/ /phyi ma ni mi mtshungs pa'i dpe ste/ chos rnams kyi rang gi mtshan nyid ni brjod du med pa'o/ /gal te spyi'i mtshan nyid brjod na ni chos gzhan yang dgag pa ste/ ji ltar sngon po zhes brjod pa na sngon po ma yin pa la sogs pa bkag pa lta bu'o/ /gzhan yang bstan bcos shin tu rgyas pa brgya pa las ngas bshad pa rnams ni thams cad kyang dgag pa'i tshig gzhung smos pa dag yin te/ de la dgag pa ni gzhan dag gi skye ba dang 'gag pa la sogs par 'dzin par dgag pa ste / skye ba med pa ni dgag par 'gyur ba ma yin pas/ skye ba kho na dgag pa'o/ /'gag pa med pa ni skye bar 'gyur ba ma yin pas/ 'gag pa de kho na dgag pa'o/ /chad pa dang rtag pa ma yin pa la sogs pa de yang de bzhin du rig par bya'o/ /mya ngan las 'das pa'i tshe skye shi chad cing 'gag pa yin mod kyi de ni thabs kyi bshad pa yin pas btags pa yin gyi yang dag pa ni ma yin te/ ji ltar lha'i gnas na rtag tu bde ba la sogs pa yod do zhes bstan pa lta bu ni kun rdzob kyi dbang du bshad pa yin gyi yang dag pa nyid dang mthun pa'i tshig ni ma yin no/ /sngar gong du bstan pa'i tshig 'bru dag gis ci rigs par kun du brtags pa'i 'dzin pa rnams gzhig par bya ste/ bdag la sogs pa yang dag pa ma yin na su zhig yang dag pa nyid du 'gyur/ 'di ltar mthar phyin pa'i snying po nyid ni sems dang brjod pa'i lam chad pa rnam par dag pa'i spros pa thams cad yongs su mi rgyu bas/ 'phags pa rnams kyi nang gi shes pa so sor rig pa kho na'o zhes bshad do/ /gsum pa ni ming dang don gcig la gcig ltos nas phan tshun glo bur yin pa'i phyir brjod du med pa zhes bya ste/ bstan bcos theg pa chen po bsdus pa las ji skad du gzhan yang gzhan gyi dbang gi ngo bo nyid kun brtags pa'i ngo bo nyid du ji ltar snang ba de'i bdag nyid ma yin par ci mngon zhe na/ ming gi snga rol na blo med pas bdag nyid du 'gal ba'i phyir dang / ming mang pos bdag nyid mang por 'gal ba'i phyir dang / ming nges pa med pas bdag nyid 'dres par 'gal ba'i phyir ro zhes 'byung ste/ rgya cher rnam par 'byed pa ni slob dpon dbyig gnyen dang / ngo bo nyid med kyis 'grel pa dang / ngo bo nyid med cing rnam pa gsum bstan pa'i bstan bcos dang / rnal 'byor spyod pa'i sa dang / byang chub sems dpa'i sa las bstan pa bzhin du rig par bya'o/ /bzhi pa ni chos thams cad dmigs su med pa'i phyir brjod du med pa zhes bya ste/ de'i phyir 'phags pa rdo rje gcod pa la sogs pa las de bzhin gshegs pas chos gang bstan pa de ni gzung du ma mchis te/ de ci'i slad du zhe na/ 'phags pa'i gang zag rnams ni 'dus ma byas kyi chos kyis rab tu phye ba'o zhes gsungs so/ /gzhan yang 'phags pa dri ma med par grags pas brten pa'i mdo gnyis su med par 'jug pa'i le'u las/ byang chub sems dpa' mang po rnams rang gis rtogs pa dag so so nas bshad nas dus gcig tu byang chub sems dpa' 'jam dpal la ji ltar na byang chub sems dpa'i gnyis su med pa'i chos kyi sgor 'jug pa khong du chud pa yin/ de nas 'jam dpal gyis byang chub sems dpa' rnams la smras pa ni/ khyed la sogs pas gang smras pa de dag thams cad gnyis su med pa yin mod kyi/ ji ltar bdag gis shes pa ltar khyed kyis gang smras pa de dag ni da dung gnyis su gyur pa yin te/ gal te byang chub sems dpa' gang gis chos thams cad la tshig mang ba brjod du med pa'o / /bstan du med pa tha snyad med pa/ spros pa rnams dang bral ba/ rnam par rtog pa yongs su chad par gyur na/ de ni gnyis su med pa'i sgor 'jug pa khong du chud pa zhes bya'o/ / de'i tshe 'jam dpal gyis dri ma med par grags pa la bdag la sogs pas ni ji ltar khong du chud pa bzhin du so so nas bshad zin pas khyod kyis smros shig ces smras pa dang / dri ma med par grags pa cang mi smra bar gyur to zhes gsungs te/ zhib tu de nyid las bstan pa bzhin no/ / gong du bstan pa'i don rnam pa bzhi las kha cig na re mdo sde 'di ni don bzhi pa dang sbyar nas gsungs pa yin te/ chos thams cad dmigs su med pa'i phyir ro zhe'o/ /kha cig na re theg pa chen po bsdus pa las bstan pa bzhin du ming dang don phan tshun glo bur yin pa'i phyir brjod du med pa zhes bya ste/ de'i phyir rnal 'byor spyod pa'i sa las ci dngos po lnga po de dag gis thams cad gsungs pa yin nam/ 'on te ma yin zhe na/ smras pa yin no/ /chos de dag thams cad kyi ngo bo nyid gang yin pa brjod par bya zhe na/ smras pa chos rnams kyi ngo bo nyid yin no/ /chos de dag gi mtshan nyid ji lta ba bzhin yin par blta bar bya zhe na/ smras pa/ sgyu ma lta bu'i mtshan nyid yin gyi gtan med pa nyid ni ma yin te/ dper na sgyu ma'i las nyid kyis ni yod la/ glang po che la sogs pa'i ngo bo'i yod pa ma yin pa de bzhin du/ ngo bo nyid kyang ming dang / mtshan ma tsam nyid du ni yod la/ ngo bo nyid dang bye brag tu gdags pa gnang ba'i dngos por yod pa ni ma yin no/ /gang gi phyir brjod du med pa brjod pa yang / brjod du med pa zhes bya bar brjod par smras pas chos rnams brjod du med pa zhes bya bar mi rung ngo zhe na/ smras pa brjod du med pa de brjod du med do zhes dam bcas pa'i tshe kho na dgag pa byas zin pas de'i nyes pa med de/ don de nyid rtogs par bya ba'i phyir sbyor ba byed de dpe mtshungs pa'i phyir ro zhes bshad do/ /chos thams cad brjod du med pa yin na/ bcom ldan 'das kyis gzhan dag la ji ltar ston par mdzad ce na/ smras pa/ rnal 'byor spyod pa'i sa las gal te brjod pa ma bskyed na/ gzhan dag la chos thams cad brjod du med pa'i ngo bo nyid ston par yang mi 'gyur la gzhan dag kyang thos par mi 'gyur ro/ /gal te thos pa med na chos 'di dag thams cad brjod du med pa'i ngo bo nyid yin par yang mi shes pas gzhan dag chos rnams kyi brjod du med pa nyid thos shing khong du chud par bya ba'i ched du/ de'i phyir brjod du med pa'i ngo bo nyid 'di la brjod pa bskyed pa yin no zhes bshad do/ /brjod pa thams cad rtog pa dang dpyod pa la brten pa yin nam zhe na/ smras pa so so nas bshad pa mi mthun te/ slob dpon nye ba'i 'od ni sa brgyad pa yan chad rtog dpyod la mi brten par brjod pa 'byung ste/ 'di ltar rtog pa dang dpyod pa dag ni thogs pa dang bcas pa'i phyir ro zhes bshad do/ /slob dpon chos skyong ni byang chub sems dpa' sa bcu pa la yang rtog pa dang dpyod pa la ltos nas brjod pa 'byung ngo zhes bshad do/ /des na rtog pa dang dpyod pa yod kyang thogs pa med par bshad de/ rjes las thob pa'i ye shes dang lhan cig pa'i phyir ro zhe'o/ /rnam par mi rtog pa'i ye shes mngon sum du gyur pas na chos 'chad par nus sam zhe na/ smras pa 'chad na yang mi rung ba med de/ skad cig ma gcig la ye shes gnyi ga mngon sum du gyur pas/ de la rnam par mi rtog pa'i ye shes ni rtog dpyod dang ldan pa ma yin la rjes las thob pa'i ye shes ni rtog dpyod dang bcas pas brjod pa 'byung ba'i phyir ro/ /de'i phyir shes rab kyi pha rol tu phyin pa'i 'grel pa las/ byang chub sems dpa' rnams ni rtag par bsam gtan dang / ting nge 'dzin la 'jug cing sems rtse gcig tu bsdus te/ mi g.yo bas rtog pa dang dpyod pa mi skye bar yang chos 'chad do zhes 'byung ste/ rgya cher de nyid las bshad pa bzhin no/ /de'i phyir chos 'phags rigs pa des na don dam pa ni rtog pa dang dpyod pa'i spyod yul gyi mtshan nyid thams cad las yang dag par 'das pa yin par rig par bya'o zhes bya ba ni gnyis pa mjug bsdu ba ste/ don de ni brda phrad par zad do// //bam po bcu gsum pa/ gzhan yang chos 'phags ngas don dam pa ni tha snyad rnams yang dag par chad pa yin par bshad la/ rtog pa dang dpyod pa ni tha snyad kyi spyod yul la spyod pas zhes bya ba la sogs pas ni bzhi pa dngos po thams cad yang dag par chad pa zhes bya ba ston to/ /'di yang rnam par bshad pa dang / mjug bsdu ba dang gnyis kyis bstan te 'di ni dang po'o/ /tshig nges par 'grel pa'i mdo las ni gzhan yang chos 'phags ngas de kho na nyid ni dngos po rnam pa bzhi po 'di lta ste/ mthong ba dang / thos pa dang / bye brag phyed pa dang / rnam par shes pa thams cad yang dag par chad pa yin par bshad la/ rtog pa dang dpyod pa ni dngos po rnam pa bzhi la dmigs pa la 'byung bas na zhes 'byung ste/ dngos po rnam pa bzhi ni mthong ba la sogs pa nyid do/ /dgongs pa zab mo rnam par dgrol ba'i mdo las ni tha snyad rnams chad pa zhes 'byung gi dngos po rnam pa bzhi zhes ni mi 'byung ngo / /'dis ni don dam pa ni ming la sogs pa dang bral ba'i phyir mthong ba la sogs pa'i spyod yul rnam pa bzhis bstan par bya ba ma yin par bstan te/ de ci'i phyir zhe na/ mthong ba dang thos pa dang / bye brag phyed pa dang / rnam par shes pa dag ni zag pa dang bcas shing spros pa dag gis bcings pa yin la/ don dam pa'i bden pa'i tshul ni mthong ba la sogs pas gzung bar bya ba'i phyir spyod yul ma yin pas/ de'i phyir mthong ba la sogs pa'i dngos po dag gis don dam pa bstan par mi nus so/ /tha snyad dang bstan par bya ba la bye brag ci yod ce na smras pa tha snyad dag gis brjod par bya ba ma yin pa dang / mthong ba la sogs pa bstan par bya ba'i yul ma yin pas/ de'i phyir bye brag tu gyur pa yin no/ /mthong ba dang thos pa dang / bye brag phyed pa dang rnam par shes pa dag gis bshad pa zhib tu ni mtshan nyid bstan pa dag las 'byung ba bzhin no/ /mthong ba dang thos pa dang / bye brag phyed pa dang / rnam par shes pa de yang so so nas bshad pa mi mthun pas/ thams cad yod par smra ba'i gzhung gis dbang po drug dang sbyar nas bshad de mig gi dbang po gang yin pa de ni mthong ba'o / /rna ba'i dbang po gang yin pa de ni thos pa'o/ /dbang po gsum gyi grangs gang yin pa de ni bye brag phyed pa'o/ /yid kyi dbang po gang yin pa de ni rnam par shes pa'o zhes bshad de/ de'i phyir bstan bcos sems sna tshogs bstan pa las/ mig gi rjes su mthong ba skye/ /rna khams rjes su thos pa skye/ /khams gsum rjes su bye brag phyed/ /yid khams rjes su rnam shes skye/ /zhes bstan pa yin no/ /de la dbang po drug la rjes su skye ba zhes bya ba yang 'di lta ste/ mig la sogs pa'i dbang po dag la dbang po'i rjes su rnam par shes pa skye ba'i cha mtshungs pas bsdus pa yin pas/ cha mtshungs pa'i dbang po la brten nas bdag po la sogs pa'i bdag nyid du ston pas/ de'i phyir rjes su skyes pa la mthong ba la sogs par bshad do/ /mdzod kyi bstan bcos las kyang 'di dang mthun par bshad do/ /de'i phyir de nyid las mthong ba la sogs pa'i mtshan nyid ji lta bu zhe na/ tshig le'ur byas pa las/ mig dang rna ba yid rnam shes/ /gzhan yang rnam par shes pa gsungs/ /de dag go rims bzhin du ni/ /mthong thos rnam shes bye brag phyed/ /ces gsungs te rgya cher ni de nyid las bshad pa bzhin no/ /gzhan yang bstan bcos bye brag tu bshad pa chen po las/ de la mig gi rnam par shes pas myong ba gang yin pa de ni mthong ba'o/ /rna ba'i rnam par shes pas myong ba gang yin pa de ni thos pa'o/ /rnam par shes pa gsum gyis myong ba gang yin pa de ni bye brag phyed pa'o/ /yid kyi rnam par shes pas myong ba gang yin pa de ni rnam par shes pa'o zhes 'byung ngo / / yul rnam pa bzhi bstan pa'i phyir mthong ba dang / thos pa dang / bye brag phyed pa dang / rnam par shes pa ni dbang po yin gyi rnam par shes pa ni ma yin no/ /rnam par shes pa smos pa yang mig la sogs pa'i dbang po gdon mi za bar rnam par shes pas grogs byas nas gdod yul 'dzin nus par bstan pa'i phyir te/ 'di ltar rnam par mtshungs pa'i dbang po dag la ni bya ba'i nus pa yod kyi de dag dang rnam pa mi mtshungs pa ni ma yin pa'i phyir ro/ /ci'i phyir mig dang rna ba dang / yid kyi dbang po gsum po so so re rer rnam par gzhag ce na/ bstan bcos sems sna tshogs bstan pa las/ khams gsum po 'di dag gis sbyor bar 'dod pas 'dod chags dang bral ba dang rnal 'byor bsgom pa dang / mngon par shes pa nyid dang yan lag bzhi dang / yan lag lnga pa'i bsam gtan gyi 'bras bu 'thob pas/ de'i phyir de dag gi rjes su skyes pa so sor rnam par gzhag pa yin la/ gzhan gsum gyi rjes su skyes pa dag la ni de dag gi mtshan nyid kyi rnam pa med pa'i phyir gcig tu rnam par gzhag pa yin te/ rgya cher ni bye brag tu bshad pa chen po las bstan pa bzhin no/ /ci'i phyir sna la sogs pa'i dbang po gsum po dag la gcig tu bsdus nas bye brag phyed pa zhes bstan zhe na smras pa/ bstan bcos sems sna tshogs bstan pa'i tshig le'ur byas pa las/ lung du mi ston spyod yul la/ /bye brag phyed sems der 'jug ste/ /rjes su rnam shes gsum skye bas/ /de ni bye brag phyed ces bya/ /zhes 'byung ngo / /gzhan yang mdzod kyi bstan bcos las dri dang ro dang reg bya gsum ni lung du mi ston pa'i ngo bo nyid yin pa'i phyir dang / shi ba bzhin du shes pa med pa'i phyir mngon par rtogs pa dag gis logs shig tu bye brag phyed pa'i ming rnam par gzhag pa yin no/ /drug pa yid kyi dbang po ni rnam par shes pa mi skye na yang rnam pa mtshungs pa nyid du 'grub pa dang / shes pa nyid du yang dag par 'grub pa nyid du 'gyur bas so/ /gal te de ltar ma yin na dgra bcom pa tha ma'i dran pa'i yid kyi rnam par shes pa nyid du grub par mi 'gyur ro zhes bstan to/ /gzhan yang bstan bcos sems sna tshogs bstan pa las/ yid kyi khams kyi rjes su skyes pa'i rnam par shes pa zhes bya ba yang / rnam par shes pa dang bcas pa'i dbang po bstan par 'dod pa'i phyir re zhig rjes su skyes pa zhes bshad pa yin no zhes 'byung ngo / /mdo sde pa dag gis rnam pa gsum du bshad de/ de yang de kho na nyid grub pa'i bstan bcos dang sbyar na de las tshad ma gsum la sogs pa brten nas mthong ba la sogs pa la rnam par 'byed de/ de'i phyir de nyid kyi tha snyad brgyad bstan pa'i le'u las mthong ba dang / thos pa dang / bye brag phyed pa dang / rnam par shes pa la bye brag ci yod ce na/ smras pa rnam pa gsum ste/ mthong ba la yid ches pa gang yin pa de ni mngon sum mo/ /thos pa la yid ches pa gang yin pa de ni 'phags pa'i lung ngo / /rnam par shes pa ni rjes su dpag pa'i shes pa gang yin pa'o/ /bye brag phyed pa ni rnam par rtog pa gang yin pa'o/ /yid ches pa'i shes rab rnam pa gsum po 'di yang res 'ga' ni yang dag pa nyid du 'gyur ro/ /res 'ga' ni phyin ci log tu yang 'gyur ro zhes 'byung ste/ zhib tu de nyid las bshad pa bzhin du rig par bya'o/ /de la rnam par shes pa'i tshogs drug gis sems kyi yul mthong ba thos pa gang yin pa de ni mngon sum yin pas de'i phyir gang gis mthong ngo zhes zer ba la yid ches pa gang yin pa de ni mngon sum gyi yid ches pa zhes bya'o/ /yul la mi brten par lung la brten nas shes pa gang yin pa de ni thos pa zhes bya bas/ de'i phyir thos so zhes zer ba la yid ches pa gang yin pa de ni 'phags pa'i gsung la yid ches pa zhes bya'o/ /ma mthong ba dang / ma thos pa'i yul de dag la snga ma'i mthong ba dang thos pa la brten nas rjes su dpag pas shes pa gang yin pa de ni rjes su dpag pa'i shes pa zhes bya'o/ /sems snga ma'i gsum pa'i rjes la yang nas yang du rnam par rtog pa'i sems gang yin pa de ni bye brag phyed pa zhes bya'o/ /de yang ji ltar rnam par rtog ce na/ sngar mthong ba'i rgyus yang nas yang du bsams nas lta ba'i 'du shes 'byung ba'am/ yang na snga ma'i lta ba las 'byung ba med pa gang yin pa de ni lta ba'i 'og tu bye brag phyed pa zhes bya'o/ /thos pa dang rnam par shes pa'i 'og tu byung ba'i bye brag phyed pa bstan pa ni brda phrad par zad do/ /bye brag phyed pa'i sems de yang mthong ba dang thos pa dang / rnam par shes pa'i sems rnam pa gsum gyi 'og tu 'byung ngo / /ma mthong ba dang ma thos pa dang / rnam par shes pa'i 'og tu yang skye ste/ dper na sngar ma mthong ba las phyis mthong ba brjod nas mthong ba'i 'du shes 'byung ba lta bu gang yin pa de ni ma mthong ba'i 'og tu 'byung ba zhes bya ste/ ma thos pa dang rnam par ma shes pa'i bye brag phyed pa yang de bzhin no/ /mdzod kyi bstan bcos dang sbyar na/ de las ni slob dpon gnyis kyi bshad pa yod de/ slob dpon kha cig na re dbang po lnga po dag gis yul mngon sum du byas pa'i sems gang yin pa de ni mthong ba zhes bya'o/ /gzhan yang brgyud de thos pa gang yin pa de ni thos pa zhes bya'o/ /rang gi sems bskyod de rigs pa rnam pa sna tshogs kyi rjes su dpag pas snang ba gang yin pa de ni bye brag phyed pa zhes bya'o/ /yid kyis mngon sum du byas pa gang yin pa de ni rnam par shes pa zhes bya'o/ /yul lnga po re re la mthong ba dang / thos pa dang bye brag phyed pa dang rnam par shes pa'i tha dad rnam pa bzhi 'byung ste/ yid kyi yul la ni mthong ba ma gtogs pa gsum yod do zhes bshad de/ zhib tu de nyid las bstan pa bzhin no/ /slob dpon 'di'i dgongs pa ni dbang po lnga po dag gis mngon sum gyi tshad mas thob pa gang yin pa de ni yul lnga po dag gsal ba'i phyir mthong ba zhes bya'o/ /lung gi tshad ma la brten nas brgyud de thos pa'i bye brag yul rnam pa bcu drug po gang yin pa de ni thos pa zhes bya'o/ /rjes su dpag pa'i tshad ma la brten nas rang gi sems bskyod de rigs pa sna tshogs kyi rjes su dpag pas snang ba'i yul drug po gang yin pa de ni bye brag phyed pa zhes bya'o/ /yid kyi rnam par shes pas mngon sum gyi tshad ma la brten nas yul drug po dag mngon sum du byas pa gang yin pa de ni rnam par shes pa zhes bya ste/ 'di ltar yid kyi rnam par shes pa lnga po de dag gi rjes la mngon sum gyi tshad mas yul lnga po dag mngon sum du rtogs pa'am/ rnam par shes pa mngon sum gyi tshad ma la gnas nas chos mngon sum du rtogs pa'am/ yang na ting nge 'dzin la gnas pa'i yid mngon sum gyi tshad mas yul drug po dag mngon sum du byas pa'o snyam du sems so/ /sngon gyi slob dpon dag ni 'di skad du ston te/ mig gis mngon sum du mthong ba ni mthong ba zhes bya'o/ /gzhan las brgyud de thos pa ni thos pa zhes bya'o/ /rang gi sems bskyod nas sna tshogs su bsams pas gzhal ba ni bye brag phyed pa zhes bya'o/ /bdag nyid kyi nang gi myong ba dang / bdag nyid kyi mngon sum du byas pa ni rnam par shes pa zhes bya'o zhes bshad do/ /'di'i dgongs pa ni 'di skad du ston te/ mig gi mngon sum gyi tshad mas mthong ba gang yin pa de ni mthong ba zhes bya ste/ mig 'ba' zhig la mthong ba zhes bya ba yang 'das pa'i gzugs kyi yul mchog tu gsal bar snang bas/ de'i phyir mig 'ba' zhig mthong ba zhes bya'o/ /lung gi tshad ma la brten nas gzhan las brgyud de thos pa'i yul drug po gang yin pa de ni thos pa zhes bya'o/ /rjes su dpag pa'i tshad ma la brten nas rang gi sems bskyod de/ sna tshogs su bsams pa dang / gzhal ba gang yin pa de ni bye brag phyed pa zhes bya'o/ /gzhan yang mngon sum gyi tshad mar gyur pa'i rna ba dang / sna dang / lce dang / lus la brten nas bdag nyid kyis myong ba'i yul rnam pa bzhi dang / yid kyi dbang po'i mngon sum gyi tshad mas bdag nyid kyis mngon sum du byas pa'i yul drug po gang yin pa de dag thams cad ni rnam par shes pa zhes ston to/ /bshad pa 'di dang sbyar na mthong ba ni mig 'ba' zhig go/ /thos pa dang bye brag phyed pa ni yid kho na'o/ /rnam par shes pa ni rna ba dang / sna dang / lce dang / lus dang / yid kyi dbang po yang ngo / /yul rnam pa drug las gzugs ni rnam pa bzhi char skyed par byed do/ /sgra la sogs pa yul lnga po dag ni gzhan gyi thos pa dang bye brag phyed pa dang / rnam par shes pa gsum po dag skyed par byed do/ /'dir theg pa chen po'i bstan bcos rnams kyang so so nas mi mthun te/ shes rab kyi pha rol tu phyin pa'i 'grel pa las/ mig gi rnam par shes pas shes pa gang yin pa de ni mthong ba zhes bya'o/ /rna ba'i rnam par shes pas shes pa gang yin pa de ni thos pa zhes bya'o/ /sna dang / lce dang lus kyi rnam par shes pa gsum po dag gis shes pa gang yin pa de ni bye brag phyed pa zhes bya'o/ /yid kyi rnam par shes pas thob pa gang yin pa de ni rnam par shes pa zhes bya'o zhes 'byung ste/ zhib tu de nyid las bshad pa bzhin no/ /bstan bcos chos mngon pa sna tshogs kun las btus pa las ni de la mthong ba dang thos pa dang / bye brag phyed pa dang / rnam par shes pa'i don ni 'di lta ste/ mig gis myong ba gang yin pa de ni mthong ba'i don to/ /rna bas myong ba gang yin pa de ni thos pa'i don to/ /bdag nyid kyis 'di dang 'di lta bu'o zhes sems shing gzhal ba gang yin pa de ni bye brag phyed pa'i don to/ /bdag nyid kyi nang gi myong ba gang yin pa de ni rnam par shes pa'i don to zhes ston to/ /rnal 'byor spyod pa'i sa las ni tha snyad bzhi gang zhe na/ mthong ba'i tha snyad dang / thos pa'i tha snyad dang / bye brag phyed pa'i tha snyad dang / rnam par shes pa la brten pa'i tha snyad do/ /mthong ba la brten pa'i tha snyad ni 'di lta ste/ gang des mig la brten te/ phyi rol gyi gzugs mngon sum du byas nas de la brten te gzhan dag la tha snyad du brjod pa gang yin pa de ni mthong ba'i tha snyad ces bya'o/ / thos pa la brten pa'i tha snyad ni 'di lta ste/ gang gzhan las thos nas de la brten te/ gzhan dag la tha snyad du brjod pa gang yin pa'o/ /bye brag phyed pa la brten pa'i tha snyad ni 'di lta ste/ gang des ma mthong ma thos par bdag nyid kyis bsams shing gzhal la nye bar brtags nas de la brten te gzhan dag la tha snyad du brjod pa gang yin pa'o/ /rnam par shes pa la brten pa'i tha snyad ni 'di lta ste/ gang des nang so sor rang gis rig pa dang / rtogs pa dang reg pa dang mngon sum du byas nas de la brten te/ gzhan dag la tha snyad du brjod pa gang yin pa'o zhes bshad do/ /de la mthong ba zhes bya ba yang bshad pa rnam pa gsum yod de/ kha cig na re mig gi dbang po la mthong ba zhes bya ste/ de'i phyir mig gis myong ba gang yin pa de ni mthong ba'i don to zhes bshad pa yin no zhe'o/ /kha cig na re mig gi rnam par shes pa la mthong ba zhes bya ste/ de'i phyir rnal 'byor spyod pa'i sa las 'di lta ste/ mig la brten te phyi rol gyi gzugs mngon sum du byas nas shes zhes bstan pa yin te/ mig gis myong ba gang yin pa de ni mthong ba'i don to zhes bstan pa yang rnam par shes pa mig la brten pa'i phyir ro zhe'o/ / kha cig na re mig gi dbang po dang rnam par shes pa la mthong ba zhes bya ste/ de'i bstan bcos chos mngon pa sna tshogs kun las btus pa las/ mig gis myong ba gang yin pa de ni mthong ba'i don to zhes bstan to/ /gzhan yang rnal 'byor spyod pa'i sa las/ mig la brten te phyi rol gyi gzugs mngon sum du byas nas zhes bshad pa de'i phyir mig gi dbang po dang / rnam par shes pa ni mthong ba'i bdag nyid yin no zhe'o/ /gal te de lta na ci'i phyir chos mngon pa sna tshogs kun las btus pa las/ mig gis gzugs mthong ngam/ 'on te rnam par shes pa la sogs pas yin zhes bshad/ smras pa/ mig gis phyi rol gyi gzugs mthong ba yang ma yin la/ rnam par shes pa la sogs pas kyang ma yin te/ 'di ltar chos thams cad la byed pa med pa'i phyir ro/ /'dus pa'i dbang gis btags pa tsam la mthong ba zhes brjod do/ /gzhan yang dbang po drug las mig gis gzugs mthong ba la gtso bor gyur te/ rnam par shes pa la sogs pa ni ma yin pa'i phyir mig gis gzugs rnams mthong ngo zhes bshad do/ /rnal 'byor spyod pa'i sa las ni don dam pa'i rigs pa la brten nas mig la sogs pa yang ma yin/ de dag gi rnam par shes pa yang ma yin no/ /de ci'i phyir zhe na/ chos rnams ni rang gi ngo bo nyid kyis rkyen mang po las skye ba'i phyir dang / skad cig mar 'dzin pa'i phyir dang / byed pa med pa'i phyir dang / kun rdzob kyi rig pa'i dbang du byas nas mig la sogs pa ni gtso bor gyur pa'i phyir/ de dag la brtags pa tsam du mthong ba zhes bshad do zhes zhib tu de nyid las 'byung na/ ci'i phyir mig gi dbang po dang / rnam par shes pa gnyi ga la mthong ba bshad/ smras pa mig gi dbang po dang rnam par shes pa la so sor mthong bar 'dod pa dgag pa'i phyir mthong ba ni mig gi dbang po yang ma yin/ rnam par shes pa yang ma yin zhes bshad kyi dbang po dang rnam par shes pa'i 'dus pa dgag pa ni ma yin te/ mthong ba ni dbang po dang / rnam par shes pa gnyi ga'i ming la mthong ba zhes bya bas so/ /gzhan yang mthong ba dang thos pa dang bye brag phyed pa dang / rnam par shes pas lta ba dang / gzugs mthong ba mi mtshungs pa'i phyir 'gal ba med do/ /shes rab kyi pha rol tu phyin pa'i 'grel pa dang sbyar na/ de las ni chos bzhi 'dus pa 'di lta ste/ rna ba'i dbang po dang / rnam par shes pa dang / yid kyi rnam par shes dang / sgra 'dus pa las thos pa zhes bya'o zhes bshad de/ zhib tu de nyid las 'byung ba bzhin no/ /de la thos pa zhes bya ba ni gzhan dag la thos pa dang / bsams pa'i shes rab la sogs pa'i ngo bo nyid de/ 'di ni yid kyi rnam par shes pa dang mtshungs par ldan pa'i sems kyi ngo bo nyid do/ /gal te de lta na ci'i phyir rnal 'byor spyod pa'i sa las thos pa ni 'phags pa'i lung gi tshad ma'o zhes bstan/ smras pa/ 'phags pa'i lung gi tshad ma yang rnam pa gnyis yod de/ dang po ni 'phags pa'i bstan pa rnams la 'phags pa'i lung gi tshad ma zhes bya ste/ 'di ni 'phags pa'i gsung nyid tshad ma yin pas/ 'phags pa'i lung gi tshad ma zhes bya ste/ 'di ni las yongs su 'dzin pa'i dbang du byas nas rnam par bshad pa'o/ /gnyis pa ni thos pa'i shes rab la sogs pa la 'phags pa'i lung gi tshad ma zhes bya ste/ 'di ni 'phags pa'i gsung nyid tshad ma yin pa'i phyir ro/ /'phags pa'i lung gi tshad ma zhes bya ba 'di ni bdag po'i dbang du byas te bshad pa ste/ rnal 'byor spyod pa'i sa yang 'di la brten nas/ de'i phyir thos pa'i shes rab la sogs pa la 'phags pa'i lung gi tshad ma zhes bstan to/ /bdag nyid kyis bsams shing gzhal nas rjes su dpag pa'i yid kyi rnam par shes pa gang yin pa de ni bye brag phyed pa'i ngo bo nyid do/ / rna ba la sogs pa'i rnam par shes pa bzhi dang / mngon sum gyi tshad ma'i yid kyi rnam par shes pa gang yin pa de rnam par shes pa yin pa'i phyir ro/ /rnal 'byor spyod pa'i sa las rnam par shes pa la brten pa'i tha snyad 'di lta ste/ gang des na so sor rang gis rig pa dang / rtogs pa dang / reg pa dang / mngon sum du byas pa zhes bstan pa de la/ rna ba'i rnam par shes pa gang yin pa de ni rig pa zhes bya'o/ /sna dang lce'i rnam par shes pa gnyis po gang yin pa de ni rtogs pa zhes bya'o/ /lus kyi rnam par shes pa gang yin pa de ni rig pa zhes bya'o/ / mngon sum gyi tshad ma'i yid kyi rnam par shes pa gang yin pa de ni mngon sum du byas pa zhes bya'o/ /yang na rna ba'i rnam par shes pa la sogs pa de dag thams cad ni dbang po kho na gzung ste/ bstan bcos chos mngon pa sna tshogs kun las btus pa la sogs pa las/ bdag nyid kyi nang gi myong ba gang yin pa de ni rnam par shes pa'i don to zhes bstan pa de yang dbang pos rtogs pa la sogs pa thams cad ni nang gi myong ba zhes bya ste/ thams cad kyang nang gi tshad ma yin pa dang / myong ba'i yul mtshungs pa'i phyir ro/ /kun gzhi rnam par shes pa de mthong ba la sogs pa zhes bya ba'am zhe na/ smras pa/ yang dag pa'i don du na nyon mongs pa can gyi yid ni tshad mas bsdus pa ma yin pa'i phyir/ mthong ba la sogs pa rnam par mi gzhag go/ /kun gzhi rnam par shes pa ni mngon sum gyi tshad ma yin pa'i phyir ro/ /rnam par shes pa'i nang du bsdus te/ ma mo chen mo'i mdo la sogs pa las ni re zhig rnam par shes pa drug po dag gi dbang du mdzad pa'i phyir ma bstan to/ /rnal 'byor spyod pa'i sa dang sbyar na ni tshad ma gsum gyi don la brten nas mthong ba la sogs pa rnam par 'byed de/ de'i phyir de nyid la yang tha dad bzhi la brten pa'i tshad ma gsum la brten nas dpyad pa yin te/ de la mthong ba gang yin pa dang / rnam par shes pa gang yin pa'i tha snyad 'di mngon sum gyi tshad ma'o/ /bye brag phyed pa'i tha snyad gang yin pa 'di ni rjes su dpag pa'i tshad ma'o/ /thos pa'i tha snyad gang yin pa 'di ni yid ches pa'i lung gi tshad ma'o zhes bstan pa yin no/ /mig la sogs pa'i dbang po mngon sum gyi tshad ma yin nam/ gal te mngon sum gyi tshad ma yin na/ ci'i phyir bstan bcos chos rigs pa'i sgo las/ de la 'dir mngon sum gyi tshad ma ni 'di lta ste/ rnam par mi rtog pa'i ye shes de yang dag pa'i ye shes de gang gis gzugs la sogs pa'i don la ming dang rnam pa la sogs pa spong ba'o zhes bstan/ gal te mngon sum gyi tshad ma ma yin na/ ci'i phyir bstan bcos chos mngon pa sna tshogs kun las btus pa las/ mig gi dbang pos mthong ba gang yin pa 'di ni mthong ba'i don to zhes bya ba dang / rnal 'byor spyod pa'i sa las mthong ba ni mngon sum gyi tshad ma'o zhes bstan/ smras pa 'di la bshad pa rnam pa gnyis yod de/ kha cig na re dbang po ni mngon sum gyi tshad ma yin te/ de'i phyir rnal 'byor spyod pa'i sa la sogs pa las gzugs kyi mtshan nyid mngon sum gyi tshad ma'o zhes bstan pa yin no zhe'o/ /kha cig na re rnam pa gnyis yod pas/ dang po ni dbang po gzugs can te/ rnal 'byor spyod pa'i sa las ji skad du dbang po gzugs can gyi mngon sum gyi tshad ma ni 'di lta ste/ dbang po gzugs can lnga'i spyod yul lo zhes bstan pa lta bu'o/ /gnyis pa ni sems la sogs pa ste/ bstan bcos rigs pa'i sgo las ji skad du/ mig la sogs pa yang mngon sum gyi tshad ma'o zhes bya'o zhes bshad pa lta bu'o zhe'o/ /sa brgyad pa yan chad kyis 'phags pa'i gsung rab thos pas yid kyi rnam par shes pa de nyid ni ting nge 'dzin gyi sems yin na ci'i phyir mngon sum gyi tshad ma yin par bstan/ smras pa/ 'di la don rnam pa gnyis yod de/ mngon sum gyi tshad ma ni rang gi mtshan nyid mngon sum du byas pa'i phyir ro/ /'phags pa'i lung gi tshad ma ni 'phags pa'i gsung gzhal ba'i phyir ro/ /gal te de ltar na ci'i phyir slob dpon dzi nas tshad ma gnyis po 'di lta ste/ mngon sum gyi tshad ma dang / rjes su dpag pa'i tshad ma kho na'o zhes bstan la/ 'phags pa'i lung gi tshad ma ni rjes su dpag pa'i tshad mas bsdus par bshad ce na/ smras pa/ slob dpon gnyis kyi gzhung gi don mi mthun pas de'i phyir brda sprad mi dgos so/ /gzhan yang slob dpon dzi nas 'phags pa'i lung gi tshad ma ni rjes su dpag pa'i tshad ma'o zhes bshad pa yang 'phags pa'i gsung rab la brten nas de bshad pa'i phyir 'gal ba med do/ /bstan bcos rnam par bshad pa las bstan pa dang sbyar na/ tha snyad dang bye brag tu gyur pa ni khams la brten nas rnam par 'byed pa 'di lta ste/ 'dod pa'i khams na ni tha snyad bzhi dang ldan no/ /gzugs kyi khams na ni bye brag phyed pa med de/ kun du tshol zhing gzhal ba med pa'i phyir ro/ /gzugs med pa'i khams na ni thams cad med do zhes bshad de/ 'dod pa'i khams na ni mthong ba la sogs pa'i tha snyad bzhi dang ldan pas so/ /gzugs kyi khams na yang yang dag pa'i phung po dang sbyar na kun du tshol zhing gzhal ba phra mo yod de/ med do zhes bstan pa ni mtshan nyid rags pa'i dbang du byas nas bshad pa yin no/ /gzugs med pa'i khams na snga ma'i rnam pa gsum med pa ni brda phrad par zad do/ /rnam par shes pa ni bdag nyid las yang dag par shin tu phra ba'i phyir mdor bsdus nas bshad do/ /des na tha snyad med pa'i don ni brda phrad par byed do/ /de'i phyir chos 'phags rigs pa des don dam pa ni rtog pa dang dpyod pa'i spyod yul gyi mtshan nyid thams cad las yang dag par 'das pa yin par rig par bya'o zhes bya ba ni gnyis pa mjug bsdu ba'o/ /brda phrad par zad do/ /gzhan yang chos 'phags ngas don dam pa ni rtsod pa'i smra ba rnams yang dag par chad pa yin par bshad la/ rtog pa dang dpyod pa ni rtsod par smra ba'i spyod yul la spyod pas zhes bya ba 'di man chad kyis ni lnga pa rtsod pa thams cad nye bar zhi ba'i mtshan nyid ces bya ba ston to/ /'di yang rnam par bshad pa dang mjug bsdu ba gnyis kyis bstan te/ 'di ni rnam par bshad pa'o/ /de la rtsod pa'i smra ba zhes bya ba ni 'di lta ste/ bdag dang bdag gir lta bas phung po lnga po dag la bdag yang dag par yod par 'dzin pa'o/ /de bzhin nyid ni bdag dang bdag gir 'dzin pa dang bral ba bdag tu lta ba la sogs pa'i nyon mongs pa'i spyod yul ma yin pa'i phyir ro/ /rtsod pa'i smra ba rnams yang dag par chad pa zhes bya'o/ /slob dpon yang dag bden pa'i 'grel pa las rtsod pa ni rnam pa gnyis te/ dang po ni khyim pa rnams yul lnga po rnams sems pa'i phyir rtsod par gyur pa'o/ /gnyis pa ni rab tu byung ba rnams phan tshun mi mthun pas lta ba rnams bskyed pa'i phyir rtsod par gyur pa'o zhes bstan to/ /mdzod kyi bstan bcos dang sbyar na/ tshig le'ur byas pa las/ zag bcas nye bar len pa'i phung po zhes bya/ 'thab pa dang bcas pa zhes kyang bshad ces 'byung ste/ 'di nyid kyi 'grel pa las/ nyon mongs pa ni nye bar len pa'i phung po zhes bya'o/ /nye bar len pa las byung ba'i phyir nye bar len pa'i phung po zhes bya ste/ dper na rtswa dang sog ma'i me zhes bya ba bzhin no/ /yang na phung po nye bar len pa la rag lus pa'i phyir nye bar len pa'i phung po zhes bya ste/ rgyal po'i blon po zhes bya ba bzhin no/ /yang na phung po lngas nye bar len pa 'byung ba'i phyir nye bar len pa'i phung po zhes bya ste/ me tog dang 'bras bu'i ljon shing bzhin no zhes 'byung ste/ 'dir chos shin tu gya nom pa yod pa yang 'thab pa dang bcas pa zhes bya'o/ /nyon mongs pa ni rtsod pa zhes bya ste/ dge ba'i phyogs 'khrug cing g.yo bar byed pa'i phyir dang / bdag dang gzhan la gnod par byed pa'i phyir dang / rtsod pa rjes su 'phel bar byed pa'i phyir 'thab pa dang bcas pa zhes bya ste/ zag pa dang bcas pa ji lta ba bzhin no/ /bstan bcos bye brag tu bshad pa chen po las/ rtsod pa rnam pa gsum ste/ nyon mongs pa'i rtsod pa dang / phung po'i rtsod pa dang / 'thab pa'i rtsod pa'o/ /nyon mongs pa'i rtsod pa ni 'di lta ste/ nyon mongs pa brgya rtsa brgyad do/ /phung po'i rtsod pa ni 'di lta ste/ 'chi ba'o/ /'thab pa'i rtsod pa ni 'di lta ste/ sems can rnams phan tshun gcig la gcig sma 'bebs shing tshig mi mthun par gyur pa'o zhes 'byung ste/ bstan bcos sems sna tshogs bstan pa las kyang don 'di dang mthun par bshad do/ /bstan bcos mngon pa sna tshogs kun las btus pa la sogs pa las ni 'dod chags dang zhe sdang dang gti mug gi rtsod pa'i ngo bo nyid do zhes bshad do/ /de'i phyir de nyid las/ ji ltar na 'thab pa dang bcas pa yin/ 'thab pa dang bcas pa rnams ni du zhig ci'i phyir 'thab pa dang bcas par brtag ce na/ 'dod chags dang zhe sdang dang / gti mug gi ngo bo nyid la brten nas mtshon cha len pa dang / chad pas gcod pa dang / 'thab rtsod dang / mtshang 'dru ba dang / rtsod pa dang / 'gyed pa rnams 'byung ba de'i bdag nyid kyi phyir dang de dang 'brel pa nyid kyi phyir dang des bcings pa'i phyir dang / de'i rjes su 'brel pa'i phyir dang / de'i rjes su mthun pa'i phyir dang / de'i rgyu las 'byung ba'i phyir 'thab pa dang bcas par lta'o/ /zag pa dang bcas pa ji snyed pa 'thab pa dang bcas pa yang de snyed do zhes 'byung ste/ chos mngon pa sna tshogs kun las btus pa las kyang 'di dang mthun par bstan to/ /de las de'i bdag nyid ces bya ba la sogs pa'i bshad pa yang / zag pa dang bcas pa'i skabs su bshad pa bzhin du rig par bya'o zhes bshad do / /de'i phyir de nyid las de zag pa dang bcas pa'i bdag nyid ces bya ba ni zag pa rnams kyi rang gi ngo bo nyid zag pa nyid dang mthun pa'i phyir zag pa dang bcas pa zhes bya'o/ /zag pa dang 'brel pa zhes bya ba ni 'di lta ste/ zag pa dang bcas pa'i sems dang sems las byung ba'i chos dang / mig la sogs pa zag pa dang / mtshungs par ldan pa'i phyir dang / zag pa'i rten du gyur pa'i phyir go rims bzhin du zag pa dang bcas pa zhes bya'o/ /zag pas bcings pa zhes bya ba ni 'di lta ste/ dge ba zag pa dang bcas pa dag zag pa'i shugs dang mthun pa'i dbang gis yang srid pa phyi ma mngon par 'grub pa'i phyir ro/ /zag pa'i rjes su 'brel pa zhes bya ba ni 'di lta ste/ sa gzhan gyi chos sa gzhan gyi zag pa rnams kyi gnas ngan len dang rjes su 'brel ba'i phyir ro/ /rjes su mthun pa zhes bya ba ni 'di lta ste/ nges par 'byed pa'i cha dang mthun pa dang nyon mongs pa'i gnas ngan len dang rjes su 'brel par gyur kyang zag pa med pa'i ngo bo nyid rnam par 'jog pas thams cad la rgyab kyis phyogs shing de'i gnyen po dang rjes su mthun pa'i phyir ro/ /zag pa'i rgyu las 'byung ba zhes bya ba ni 'di lta ste/ dgra bcom pa'i zag pa dang bcas pa'i phung po rnams sngon gyi nyon mongs pa las byung ba'i phyir nye bar len pa'i phung por rnam par gzhag go/ / khams bco lnga dang / skye mched bcu dang / khams gsum dang / skye mched gnyis kyi phyogs te/ 'phags pa'i lam gyi phyogs dang 'dus ma byas ni 'dus byas kyang ma yin/ zag pa dang bcas pa'i phyogs kyang ma yin no zhes bshad do/ /rnal 'byor spyod pa'i sa dang sbyar na/ nyon mongs pa thams cad ni 'thab pa dang bcas pa zhes bshad de/ de'i phyir de nyid las nyon mongs pa rnams kyi rnam grangs gang zhe na/ rnam grangs mang po 'di lta ste/ kun du sbyar ba rnams dang 'ching ba rnams dang / bag la nyal rnams zhes bya ba dang / 'thab pa rnams zhes bya ba'i bar du bstan pa yin no/ /de'i phyir chos 'phags rigs pa des na don dam pa'i rtog pa dang / dpyod pa'i spyod yul gyi mtshan nyid thams cad las yang dag par 'das pa yin par rig par bya'o zhes bya ba ni gnyis pa mjug bsdu ba ste/ brda phrad par zad do/ /chos 'phags 'di ltar shes par bya ste/ dper na skyes bu gang zag ji srid 'tsho'i bar du tsha ba dang kha ba'i ro la brten pas ni sbrang rtsi'i ro'am/ sha kha ra'i ro khong du chud pa'am/ rjes su dpag pa'am/ mos par mi nus so zhes bya ba 'di man chad ni lnga pa dpe smos nas bzlas te/ rnam par bshad pa zhes bya ba ston to/ /'dir chos rnam pa lnga 'byung ba de/ slob dpon yang dag bden pas bde ba rnam pa lnga dang sbyar nas/ dpe rnam pa lnga bstan pa des gong ma'i chos rnam pa lnga rnam par bshad pa yin no/ / de la bde ba rnam pa lnga ni rab tu byung ba'i bde ba dang / yongs su spangs pa'i bde ba dang / rab tu dben pa'i bde ba dang / mngon par rdzogs par 'tshang rgya ba'i bde ba dang / mya ngan las 'das pa'i bde ba'o/ /bde ba rnam pa lnga'i go rims kyang mya ngan las 'das pa'i bde ba ni mchog yang dag pa yin la/ bde ba gzhan bzhi po dag ni sbyor ba las rnam pa bzhi yod par gyur pa yin no/ /de la rab tu byung ba'i bde ba ni mya ngan las 'das pa'i rkyen yin te/ dad pa'i dbang po'i dbang gis mngon par 'grub par 'gyur ro/ /yongs su spangs pa'i bde ba ni mya ngan las 'das pa'i tshogs yin te brtson 'grus kyi dbang po'i dbang gis mngon par 'grub par 'gyur ro/ /rab tu dben pa'i bde ba ni mya ngan las 'das pa'i lam gyi gnas yin te/ de nyid mya ngan las 'das pa'i rkyen yin pas ting nge 'dzin gyi dbang po'i dbang gis mngon par 'grub par 'gyur ro/ /mngon par rdzogs par 'tshang rgya ba'i bde ba ni mya ngan las 'das pa'i yang dag pa'i lam yin te/ shes rab kyi dbang po'i dbang gis mngon par 'grub par 'gyur ro/ /dran pa'i dbang po ni bzhi po kun du rtog pa ste/ thams cad kyang yid ches nas mngon par dran pa'i phyir ro/ /de ltar sbyor ba rnam pa bzhi po go rims kyi dbang gis mya ngan las 'das pa'i rtag pa dang / bde ba dang bdag dang yongs su gtsang ba 'thob par 'gyur ba yin no/ /'dir mdo sde 'di ni rnal 'byor spyod pa'i sa la sogs pa las bstan pa'i gnod pa med pa'i bde bas bsdus pa'i bde ba rnam pa bzhi la bde ba rnam pa lngar phye nas mdo sde 'di bshad par bya'o/ /de la bde ba rnam pa bzhi ni rab tu byung ba'i bde ba dang / yongs su spangs pa'i bde ba dang / rab tu dben pa'i bde ba dang / byang chub kyi bde ba'o/ /byang chub kyi bde ba la gnyis su dbye ste/ byang chub kyi bde ba dang / mya ngan las 'das pa'i bde ba'o/ /de'i phyir rnal 'byor spyod pa'i sa las ye shes gnyis dang / spangs pa rnam pa gnyis po dag ni byang chub ces bya'o zhes bshad do / /legs pa'i tshul khrims bstan pa'i mdo dang / bstan bcos yongs su zin pa las kyang 'di dang mthun par bstan to/ /gzhan yang mya ngan las 'das pa chen po'i mdo las sangs rgyas bcom ldan 'das rnams la bde ba rnam pa gnyis mnga' ste/ rab tu zhi ba'i bde ba dang / yongs su mkhyen pa'i bde ba'o zhes gsungs te/ de'i phyir 'dir sngar bde ba rnam pa lnga'i don bstan la de'i 'og tu ni mdo'i rnam par bshad par bya ste/ bde ba rnam pa lnga'i don zhib tu bshad pa ni mtshan nyid bstan pa dag las 'byung ba bzhin du rig par bya'o/ /de la tshig gi don rnam par bshad pa yang bde ba rnam pa lnga la brten nas gong ma'i mtshan nyid rnam pa lnga'i dpe bstan pa yin pas de nyid las rnam pa lngar dbye'o/ /'di lta ste/ rab tu byung ba'i ro mchog tu shin tu bde ba'i dpe dang / 'dod pa'i yon tan lnga'i bde ba yongs su spangs pa'i dpe dang / 'phags pa'i mi smra ba bshad pa'i dpe dang tha snyad dang bral ba rab tu dben pa'i dpe dang / rtsod pa'i smra ba yongs su spangs pa'i mngon par rdzogs par 'tshang rgya ba'i bde ba'i dpe'o/ /'di ni dang po rab tu byung ba'i ro mchog tu bde ba'i dpe bstan pa'o/ /de la dper na skyes bu gang zag ces bya ba la sogs pa ni ji ltar gang zag gang la la tshe gcig tu rtag par kha ba'i ro la brten pa rnams sbrang rtsi'i ro khong du chud pa dang / rjes su dpag pa dang / mos par mi nus pa de bzhin du khyim pa rnams kyang yun ring por 'khor ba la gnas shing rtag par 'jig rten pa'i 'khrug pa dang / sdug bsngal rags pa'i ro la brten pas rab tu byung ba'i bde ba tshangs par spyod pa shin tu gya nom pa'i ro khong du chud pa'am/ rjes su dpag pa'am/ mos par mi nus te de'i phyir rnal 'byor spyod pa'i sa las yang dag pa'i dad pas khyim nas khyim med par rab tu byung na gnyen bshes kyi nyon mongs pa'i bgegs dang / khyim na gnas pa'i phongs pa dang / sdug bsngal chen po rnam pa sna tshogs bkrol ba'i phyir nges par 'byung ba'i bde ba zhes bya'o zhes bshad pa yin no/ /gzhan yang mya ngan las 'das pa chen po'i mdo las/ khyim na gnas pa ni shin tu phongs shing nyam nga bas btson ra dang 'dra ste/ nyon mongs pa thams cad ni de'i dbang gis 'byung ngo / /rab tu byung ba ni yangs shing rgya che bas nam mkha' dang mtshungs te/ dge ba'i chos thams cad de'i dbang gis 'phel bar 'gyur ro/ /gal te khyim na gnas par gyur na nam 'tsho'i bar du tshangs par spyod pa yongs su dag pa spyad par mi nus pas/ deng bdag gi skra dang kha spu bregs te rab tu byung nas bla na med pa'i byang chub bsgrub par bya'o zhes gsungs so/ /rab tu byung ba de yang rnam pa gnyis te/ dang po ni lus rab tu byung ba ste/ gong du bshad pa bzhin no/ /gnyis pa ni sems rab tu byung ba ste/ 'phags pa dri ma med par grags pas bstan pa'i mdo las ji skad du/ khyim pa gos dkar po gyon par gnas mod kyi dge sbyong gi tshul khrims kyi spyod pa rnam par dag pa rnams srung bar byed do/ /khyim na gnas kyang khams gsum la mngon par zhen par mi byed do/ /chung ma yod par ston kyang rtag par shin tu rnam par dag pa'i spyad pa spyod do zhes gsungs te/ gzhan yang de nyid las bla na med pa yang dag par rdzogs pa'i byang chub tu sems bskyed pa gang yin pa de nyid rab tu byung ba'o/ /de nyid bsnyen par rdzogs pa'o zhes gsungs pa lta bu'o/ /bstan bcos de kho na nyid grub pa las ni tshul rnam pa bzhis bshad de/ 'di lta ste/ dge slong gi spyod lam dang ldan la dge slong gi yon tan med pa dang / dge slong gi spyod lam med la dge slong gi yon tan dang yang ldan pa dang / dge slong gi spyod lam dang yang ldan la dge slong gi yon tan dang yang ldan pa dang / dge slong gi spyod lam yang med la dge slong gi yon tan yang med pa'o zhes 'byung ngo / / dpe 'di gsungs pa'i don ni 'di ltar 'jig rten pa'i khong du chud pa dang / rjes su dpag pa dang / mos pa'i shes pa gsum gyis zag pa dang bcas pa'i spyod yul rags pa'i ro kho na thob par zad kyi 'jig rten las 'das pa zag pa med pa'i dbang gsum po'i bdag nyid kyang nang gi so sor rig pa de bzhin nyid kyi ro gya nom pa ni 'thob par mi 'gyur ro zhes bstan to/ /slob dpon yang dag bden pa yang 'di dang don mthun par bshad do/ /yun ring po nas 'dod pa'i 'dod chags la mos pa dang / 'dod pa rnams kyis yongs su gdung ba'i me dag gis yongs su gdung bas ni nang gi gzugs dang / sgra dang dri dang / ro dang reg bya'i mtshan nyid dang bral ba rab tu dben pa'i bde ba brtag pa 'am rjes su dpag pa 'am/ mos par mi nus so zhes bya ba ni gnyis pa 'dod pa'i yon tan lnga'i bde ba yongs su spangs pa'i dpe bstan pa'o/ /'di ni bde ba rnam pa bzhi las rab tu dben pa'i bde ba ste/ de'i phyir rnal 'byor spyod pa'i sa las/ 'dod pa dag las dben pa/ sdig pa mi dge ba'i chos rnams las dben pas bsam gtan dang po rdzogs par byas te/ dben pa las skyes pa'i dga' ba dang bde ba ni rab tu dben pa'i bde ba zhes bshad do/ /dang po dang tha ma las ni dper na zhes bya ba smos la/ bar ma gsum mdor bsdus pa 'di ni de bzhin gshegs pa'i tshig rab tu mkhyen pas so/ /yang na mdor bsdus pa rnam par gzhag pa'i phyir ro/ /dpe gzhan gnyis las tshangs pa smos pa ni lo tsA ba dag gi bsam pa tha dad pa'i phyir ro/ /yang na rgya gar gyi dpe nyid las mi mthun pa yod pa'i phyir ro/ /de la yun ring po zhes bya ba ni 'di lta ste/ 'khor bar yun ring por gyur pa'o/ /'dod pa'i 'dod chags zhes bya ba ni 'dod pa la mos pa'i ngo bo nyid do/ /mos pa zhes bya ba ni lnga so sor nges pa las mos pa'i ngo bo nyid do/ /'dir 'dod pa smos pa ni don gyis mos pa gzung ngo / /'dod pa'i yongs su gdung ba dag gis yongs su gdung ba zhes bya ba la/ bshad pa rnam pa gnyis yod de/ kha cig na re 'dod pa rnams zhes bya ba ni gzugs la sogs pa'i yul lnga po rnams so/ /yul lnga po de dag kyang gcig kho na ma yin te/ 'dod pa'i 'dod chags bskyed pa'i phyir yul lnga po de dag la 'dod pa rnams zhes bshad do/ /yongs su gdung ba'i me ni yul lnga po dag la yod pa'i 'dod chags nyid de rab tu byung ba la gnod pa'i phyir yongs su gdung ba'i me zhes bya ste/ de'i phyir shes rab kyi pha rol tu phyin pa'i 'grel pa las/ gang la la zhig yul lnga po dag la mngon par chags par gyur na kun du sbyor ba'i nyon mongs pa'i mes thams cad rab tu gdung zhing lus la gnod pa dang sreg par byed pas ji ltar mes lus sreg par byed pa bzhin no zhes bshad do/ /gzhan yang de nyid las nya pa tu pa ka zhes bya ba zhig 'dod pa yongs su btsal bas bsam pa bzhin du ma grub pas shin tu mya ngan gyis non cing yid la gcags par gyur te/ 'dod chags kyi me'i gdung bas rang nyid bsregs nas 'chi ba'i dus byas so zhes rgya cher de nyid las bshad pa bzhin no/ /bshad pa 'di dang sbyar na 'dod pa rnams ni me'i gdung ba yin pas/ de'i phyir 'dod pa'i me'i gdung ba zhes gsungs te/ 'di ni bdag po'i dbang du mdzad nas rnam par bshad pa'o/ /kha cig na re 'dod pa rnams zhes bya ba ni yul lnga po dag la 'dod chags pa yin pas/ /'dod chags lnga po nyid la yongs su gdung ba'i me zhes bshad de/ de'i phyir rnal 'byor spyod pa'i sa las/ 'dod pa lnga po dag sreg par byed pa ni ji ltar rlung khar rtswa'i sgron ma thogs pa bzhin no zhes bshad de/ 'di ni rnam par shes pa drug las yongs su 'dzin pa'i rnam par bshad pa'o/ /nang gi gzugs la sogs pa zhes bya ba la/ 'di ni nang gi ting nge 'dzin te/ phyi rol gyi rnam pa g.yeng ba las rnam par dbye ba'i phyir nang zhes bya'o/ /nang gi gzugs dang sgra dang dri dang ro dang reg bya'i mtshan nyid dang bral ba rab tu dben pa'i bde ba zhes bya ba 'dis ni bsam gtan dang po'i ting nge 'dzin dang mtshungs par ldan pa'i bde ba'i tshor ba bstan te/ 'dod pa'i khams kyi yul lnga po dag la 'dod chags pa yongs su spongs pas lus kun du khyab par kun du bde bar gyur pa'i phyir/ rab tu dben pa'i bde ba zhes bya'o/ /yang dag pa'i don du na bsam gtan dang po'i ting nge 'dzin gyis sgrib pa lnga po dag tshang bar spangs pa yin mod kyang / 'dod pa'i sgrib pa ni dang po yin te/ dang po smos pa nyid kyis phyi ma yang bstan par 'gyur bas so/ /sgrib pa lnga po dag gi nyes dmigs rgya cher bshad pa ni/ shes rab kyi pha rol tu phyin pa'i 'grel pa las bstan pa bzhin du rig par bya'o/ /thams cad yod par smra ba'i gzhung dang sbyar na/ bsam gtan dngos gzhi la zhugs pa gang yin pa de ni dga' ba kho na yin gyi bde ba ni ma yin no zhes zer ro/ /'dir theg pa chen po'i bstan pa dang sbyar na/ skad cig tsam du sems bde ba gang yin pa de ni dga' ba zhes bya'o/ /lus zo mdog bde ba gang yin pa de ni bde ba zhes bya'o zhes bshad do/ /de phyir bstan bcos rnam par bshad pa las/ bsam gtan dang po yang bde ba zhes bya'o zhes bshad de/ dpe 'di'i don 'di skad du/ ji ltar 'dod pa'i 'dod chags la mos pa'i stobs bskyed pa'i dbang gis 'dod pa'i yul lnga po dag la 'dod chags kyi gdung ba bskyed pa'i phyir 'dod pa'i yon tan lnga dang bral ba/ bsam gtan dang po'i bde ba mi thob pa de bzhin du gang rtog pa dang dpyod pa dang bcas pa de dag kyang gzugs la sogs pa'i mtshan nyid dang bral ba mtshan ma med pa'i de bzhin nyid khong du chud par mi nus so zhes bstan par 'gyur ro/ /yun ring po nas kun du smra ba la mos pa dang / 'jig rten pa'i kun du smra ba la dga' zhing mngon par zhen pas ni/ nang gi rab tu dben pa 'phags pa'i mi smra ba'i bde ba la brtag pa'am/ rjes su dpag pa'am/ mos par mi nus so zhes bya ba ni gsum pa 'phags pa mi smra ba'i rab tu dben pa'i dpe zhes bya ste/ 'di ni rnam pa bzhi las rab tu dben pa'i bde ba zhes bya ba nyid de/ de'i phyir rnal 'byor spyod pa'i sa las bsam gtan gnyis pa yan chad kyi ting nge 'dzin rtog pa dang / dpyod pa nye bar zhi ba gang yin pa de ni rab tu dben pa'i bde ba zhes bya'o zhes bshad de/ 'di ltar gsung rab rnams las 'du byed rnam pa gsum mngon par 'grub par byed do zhes gsungs te/ de la dang po lus kyi 'du byed ni 'di lta ste/ phyi nang gi dbugs rgyu bas lus kyi 'du byed mngon par 'grub par byed pa'i phyir/ lus kyi 'du byed ces bya ste/ bsam gtan bzhi pa la zhugs pa na rab tu sel to/ / gnyis pa ngag gi 'du byed ni 'di lta ste/ rtog pa dang dpyod pa ni ngag gi 'du byed slong bas ngag gi 'du byed ces bya ste/ bsam gtan gnyis pas rab tu sel bar byed do zhes theg pa che chung gi bstan pa dag las de skad bshad de/ bsam gtan gnyis pa yan chad kyi sa pa rnams la rtog pa dang / dpyod pa med pa'i phyir ro/ /ji tsam du ngag slong ba dag ni sa 'og ma la brten nas bshad pa yin pas so/ /gsum pa sems kyi 'du byed ni 'di lta ste/ tshor ba dang 'du shes la sogs pa sems kyi 'du byed kyi grogs su gyur pa gang yin pa de ni sems kyi 'du byed ces bya ste/ gal te sems las byung ba med na/ sems mngon par 'du mi byed pa'i phyir ro/ /'gog pa la snyoms par zhugs pa na sems kyi 'du byed 'gog par byed do/ /de la 'dir ni ngag gi 'du byed kyi dbang du mdzad nas bsam gtan gnyis pa yan chad la rtog pa dang / dpyod pa med pa'i phyir ro/ /ngag slong bar mi byed la ngag mi slong ba'i phyir rab tu dben pa 'phags pa'i mi smra ba'i bde ba zhes bya'o zhes gsungs pa yin te de ni 'di skad du/ ji ltar rtog pa dang bcas pa dag 'jig rten pa'i kun du smra ba la dga' zhing mngon par zhen pa'i phyir/ bsam gtan gnyis pa yan chad kyi 'phags pa'i mi smra ba'i bde ba khong du chud par nus pa de bzhin du/ rtog pa dang dpyod pa dang bcas pa dag kyang rtog pa dang dpyod pa'i stobs kyi tha snyad kyi spyod yul la spyod pas na brjod pa dang bral ba'i chos nyid rab tu dben pa'i de bzhin nyid ston par mi nus so zhes bstan par 'gyur ro/ /yun ring po nas mthong ba dang / thos pa dang / bye brag phyed pa dang / rnam par shes pa'i tha snyad la mos pa dang / 'jig rten pa'i tha snyad rnams la dga' zhing mngon par zhen pas ni / tha snyad thams cad yang dag par chad pa/ 'jig tshogs 'gog pa/ gtan du mya ngan las 'das pa 'am/ rjes su dpag pa'am mos par mi nus so zhes bya ba ni bzhi pa tha snyad rnams dang bral ba/ rab tu dben pa'i bde ba'i dpe zhes bya ste/ 'di ni bde ba rnam pa bzhi las byang chub kyi bde ba zhes bya ba nyid do/ /de'i phyir rnal 'byor spyod pa'i sa las/ nyon mongs pa thams cad dang gtan du bral zhing yongs su shes par bya ba'i dngos po dag la yang dag pa ji lta ba bzhin du mngon par rdzogs par sangs rgyas pa ni byang chub kyi bde ba zhes bya'o zhes bshad do/ /gzhan yang bstan bcos de nyid las gnod pa med pa'i bde bas ni tha ma'i yang dag par rdzogs pa'i byang chub kyi bde ba bsdus te/ ma 'ongs pa na don dam par sdug bsngal 'di gtan du zhi ba'i phyir dang / mthong ba'i chos la 'jig rten pa dang mthun pa'i nyon mongs pa'i phyogs kyi gnas ngan len thams cad gtan du nye bar zhi ba'i phyir bde ba zhes bya'o zhes bstan to/ /rnal 'byor spyod pa'i sa dang sbyar na byang chub kyi bde ba bstan pa de yang rnam pa gnyis te/ dang po ni shes pa kho na yin la 'gog pa ni ma yin pa ste/ khungs su bstan pa snga ma las bshad pa lta bu'o/ /gnyis pa ni 'gog pa kho na yin la shes pa ni ma yin pa ste/ khungs su bstan pa phyi ma las bshad pa lta bu'o/ /'dir mdo sde 'di dang sbyar na 'gog par gzung gi shes pa ma yin pas slob dpon yang dag bden pas bshad pa ltar/ 'gog pa smos la shes pa gzung ba ni ma yin no/ /tha snyad ces bya ba ni gong du bshad pa'i mthong ba dang / thos pa dang / bye brag phyed pa dang / rnam par shes pa'i tha snyad bzhi po dag nyid do/ /'jig tshogs zhes bya ba ni phung po lnga'i rab tu byed pa'i 'grel pa las 'jig pa'i don dang / bsags pa'i don to zhes bshad de/ rgya cher bshad pa ni bstan bcos sems sna tshogs bstan pa dang / mdzod kyi bstan bcos dang / yang dag pa'i rigs pa dang rjes su mthun pa dang / de kho na grub pa dang / lung gcig las 'phros pa dang / rnal 'byor spyod pa'i sa dang / rnam par bshad pa dang / theg pa chen po bsdus pa'i 'grel pa mi mthun pa rnam pa gcig dang 'phags pa mya ngan las 'das pa chen po'i mdo las bstan pa bzhin no/ /de la mya ngan las 'das pa zhes bya ba ni/ rab tu dben pa yongs su rdzogs pa'i don to/ /mya ngan las 'das pa 'di yang don rnam pa gnyis dang ldan te/ dang po ni mthong ba la sogs pa'i tha snyad thams cad gtan du spangs pa'o/ /gnyis pa ni 'jig tshogs 'gog pa gtan du mya ngan las 'das pa 'di ni mya ngan las 'das pa ste/ 'di ni lhag ma med pa'i mya ngan las 'das pa'o/ /phung po lnga'i lus gtan du 'gog pa'i phyir gtan du mya ngan las 'das pa zhes bya'o/ / mya ngan las 'das pa 'di theg pa gang gi dbang du mdzad nas gsungs she na/ 'phags pa byams pas bstan pa'i gzhung dang sbyar na/ theg pa gsum char la yang lhag ma med pa'i mya ngan las 'das pa yod par bshad de/ phyis 'og nas rnam par 'byed do/ /'di'i don ni 'di skad du/ ji ltar yun ring por 'khor ba'i tha snyad la mos shing 'jig rten pa'i tha snyad la dga' ba dang / mngon par zhen pa dag gis gtan du zhi ba'i bde ba khong du chud par mi 'gyur ba de bzhin du/ / gang rtog pa dang dpyod pa dang bcas pa de dag kyang tha snyad kyi spyod yul la spyod pas don dam pa'i mtshan nyid tha snyad yang dag par chad pa'i yul khong du chud par mi nus so zhes bstan par 'gyur ro/ /chos 'phags 'di ltar shes par bya ste/ dper na gang zag la la zhig yun ring po nas bdag gir yongs su 'dzin pa rnam pa sna tshogs dang bcas pa rtsod pa'i smra ba la mos pa 'jig rten pa'i rtsod pa'i smra ba rnams la dga' zhing mngon par zhen pas ni/ byang gi sgra mi snyan dag gis bdag gir 'dzin pa med pa nyid dang / rtsod pa'i smra ba dang / bral bar brtag pa 'am/ rjes su dpag pa 'am/ mos par mi nus so zhes bya ba ni lnga pa rtsod pa'i smra ba yongs su spangs shing mngon par rdzogs par 'tshang rgya ba'i bde ba'i dpe bstan pa'o/ /'di ni bde ba rnam pa lnga las byang chub kyi bde ba nyid do/ /de'i phyir rnal 'byor spyod pa'i sa las nyon mongs pa thams cad dang gtan du bral ba yin te/ yongs su shes par bya ba'i dngos po la yang dag pa ji lta ba bzhin du mngon par rdzogs par thugs su chud pa ni byang chub kyi bde ba zhes bya'o zhes bstan te 'di shes pa gzung gi 'gog pa ni ma yin pas slob dpon yang dag bden pas bshad pa ltar 'gog pa gzung zhing shes pa ma yin no zhes bstan pa ni ma yin te / 'di ltar rtsod pa'i smra ba la mos pa dag ni 'jig rten pa'i bdag gir yongs su gzung ba pha ma dang / chung ma dang / bu dang / phu nu dang / gros grogs rnams dang / bang mdzod la sogs pa yongs su gzung ba'i dngos po dag la dga' zhing mngon par zhen pa'i phyir byang gi sgra mi snyan pa'i sems can gyi chung ma la sogs pa la yongs su 'dzin pa'i rtsod pa dag khong du chud par mi 'gyur la/ de bzhin du rtog pa dang dpyod pa dang bcas pa dag gis kyang nyon mongs pa'i rtsod pa'i smra ba la sogs pa'i spyod yul la spyod pas/ don dam pa'i bden pa'i mtshan nyid nyon mongs pa la sogs pa med pa'i rtsod pa'i yul dang bral ba la brtag par mi nus so zhes bya ba'i tha tshig go/ /de bzhin du chos 'phags rtog ge pa dag gis kyang rtog pa dang dpyod pa thams cad kyi spyod pa las yang dag par 'das pa don dam pa'i bden pa'i mtshan nyid brtag pa'am rjes su dpag pa'am/ mos par mi nus so zhes bya ba ni drug pa dpe dang don du sbyar ba'i don to/ /'di ltar rtog pa dang dpyod pa dag gi mtshan nyid rtsing ba'i phyir don dam pa'i bden pa'i mtshan nyid khong du chud par mi 'gyur te/ dpe dang don sbyar ba ni gong du bstan pa bzhin du rig par bya'o/ /de nas bcom ldan 'das [(]gyis [,]kyis [)]don de nyid yang dag par bstan pa'i phyir tshigs su bcad pa 'di gsungs so zhes bya ba 'di man chad ni rtog ge'i spyod yul las yang dag par 'das pa'i mtshan nyid bstan pa la tshig rkyang pas rgya cher rnam par bshad pa dang / tshigs su bcad pas mdor bstan pa gnyis su phye ba las/ de yan chad tshig rkyang pas rgya cher rnam par bshad pa rdzogs nas/ da ni tshigs su bcad pas mdor bstan pa ston to/ /'di yang rnam pa gnyis su dbye ste tshigs su bcad pa gsungs pa'i dgongs pa bstan pa dang / tshigs su bcad pa yang dag par bshad pa ste/ 'di ni dang po'o/ /so so rang rig mtshan med spyod yul te/ /brjod du med cing tha snyad yongs chad pa/ /rtsod pa'i smra ba nyer zhi don dam bden/ /rtog ge thams cad kun las 'das mtshan nyid/ /ces bya ba ni gnyis pa tshigs su bcad pas yang dag par bshad pa'o/ /'di yang rnam pa gnyis su dbye ste/ dang po tshig gsum gyis ni mtshan nyid lnga rnam par phye ste bstan to/ /tha ma'i tshig gcig gis ni mtshan nyid rnam pa lnga spyir bstan to/ /de la so so rang rig ces bya ba ni mtshan nyid dang po zlos pa'o/ /mtshan med spyod yul zhes bya ba ni mtshan nyid gnyis pa zlos pa'o/ /brjod du med pa zhes bya ba ni mtshan nyid gsum pa zlos pa'o/ /tha snyad yongs su chad pa zhes bya ba ni mtshan nyid bzhi pa zlos pa'o/ /rtsod pa'i smra ba nyer zhi zhes bya ba ni mtshan nyid lnga pa zlos pa'o/ /don dam bden zhes bya ba la sogs pas mtshan nyid rnam pa lnga spyir bstan pa'i don ni brda phrad par zad do// //bam po bcu bzhi pa/ de nas byang chub sems dpa' sems dpa' chen po blo gros shin tu rnam dag gis bcom ldan 'das la 'di skad ces gsol to/ /bcom ldan 'das ngo mtshar lags so/ /bcom ldan 'das [(]gyis [,]kyis [)]legs par gsungs pa zhes bya ba 'di man chad ni gsum pa chos rnams tha dad pa dang tha dad pa ma yin pa nyid las yang dag par 'das pa'i mtshan nyid ces bya ba ston to/ /'di yang rnam pa gnyis kyis bstan te/ tshig rkyang pas rgya cher rnam par bshad pa dang / tshigs su bcad pas mdor bstan pa'o/ /tshig rkyang pas rgya cher rnam par bshad pa yang rnam pa lngar dbye ste/ byang chub sems dpas zhu ba gsol ba dang / de nas zhes bya ba man chad kyis de bzhin gshegs pas lan yang dag par gsungs pa bstan pa dang / dpes bstan pa dang dpe dang don du sbyar ba dang / mjug bsdu ba ste/ 'di ni zhu ba gsol ba nyid do/ /'di yang rnam pa gsum gyis bstan te/ de bzhin gshegs pa legs par gsungs pa yin par bsngags pa dang / rtsod pa mang po bstan pa dang / bdag nyid kyi the tshom gang yin pa nyid gsol ba'o/ /de bzhin gshegs pa legs par gsungs pa yin par bsngags pa yang / legs par gsungs pa yin par bsngags pa dang / legs par gsungs pa mdor bstan pa dang gnyis kyis bstan te/ 'di ni dang po'o/ /de la de nas zhes bya ba ni zhu ba gsol ba'i tshe'o/ /byang chub sems dpa' blo gros shin tu rnam par dag ces bya ba ni yon tan las ming du btags pa ste/ yang dag pa'i ye shes dang / rjes las thob pa ni zag pa med pa'i dge ba kun nas nyon mongs pa dang bral ba yin pa'i phyir blo gros shin tu rnam par dag ces bya'o/ /dgongs pa zab mo rnam par dgrol ba'i mdo las kyang 'di dang mthun par 'byung ngo / /tshig nges par 'grel pa'i mdo las ni byang chub sems dpa' rnam dag blo gros zhes 'byung ste/ slob dpon yang dag bden pa'i 'grel pa las/ byang chub sems dpa' 'di sa dgu pa la gnas pa yin pas/ gzhan dag gis dris pa lan legs par 'debs shing rtag par chos kyi 'khor lo bskor bas rnam par dag pa'i blo gros kyis gnas skabs la gnas pa dang / gzhan yang shin tu rnam par dag pa'i blo dang ldan zhing / gzhan dag gi blo rnam par dag pa bskyed pa'i phyir/ rnam dag blo gros zhes bya'o zhes bshad de zhib tu de nyid las bstan pa bzhin no / /'di ltar sangs rgyas bcom ldan 'das rnams ni yon tan rnam pa gnyis dang ldan te 'di lta ste/ bdag la phan 'dogs pa dang / gzhan la phan 'dogs pa'o/ /de yang bdag la phan 'dogs pa'i bsngags pa brjod pa'i phyir ni bcom ldan 'das ngo mtshar lags so zhes bya ba gsungs so/ /gzhan la phan 'dogs pa'i bsngags pa brjod pa'i phyir ni bcom ldan 'das kyis legs par gsungs pa zhes bya ba gsungs so/ /rnal 'byor spyod pa'i sa dang sbyar na ngo mtshar dang legs par gsungs pa zhes bya ba ni bdag dang gzhan la phan 'dogs pa gnyis ka dang spyir sbyar bar bshad de/ de'i phyir de nyid las lnga po 'di dag ni ngo mtshar rmad du byung ba'i chos yin par rig par bya ste/ rgyu med pa'i sems can rnams la mnyes gshin pa dang / sems can rnams kho na'i don du 'khor ba na sdug bsngal dpag tu med pa bzod pa dang / sems can nyon mongs pa shas che zhing gdul dka' ba rnams gdul ba'i thabs legs par khong du chud pa dang / mchog tu rtogs par dka' ba de kho na'i don khong du chud pas de'i rjes su 'jug pa dang / mthu bsam gyis mi khyab pa dang ldan pa'o zhes bshad do/ /byang chub sems dpa' de dag gis yon tan nyid kyis sangs rgyas kyi yon tan rnam par bshad pa yin pas 'gal ba med do/ /btags pa khong du chud par 'gyur ro/ /de la legs par gsungs zhes bya ba ni/ rnal 'byor spyod pa'i sa las ji skad du/ bcom ldan 'das kyis chos ni rgyu gnyis kyis legs par gsungs pa yin te/ tshig 'bru legs par rnam par phye ba nyid kyi phyir dang rtogs par sla ba nyid kyi phyir ro zhes bshad pa lta bu ste/ rtogs par dka' ba'i chos de dag bcom ldan 'das kyis bshad pa nyid kyis khong du chud sla bar gyur pa'o/ /gzhan yang de nyid las legs par gsungs pa zhes bya ba ni rigs pa dang mthun par gyur pa nyid kyi phyir dang / yon tan khyad par can yongs su 'dzin pa'i phyir ro zhes bshad do/ /gzhan yang de nyid las mtshan nyid rnam pa bzhi'i phyir/ de bzhin gshegs pas gsungs pa'i bstan pa rnams ni legs par gsungs pa zhes bya'o zhes 'byung ste/ zhib tu de nyid las bshad pa bzhin no/ /'di lta ste/ bcom ldan 'das kyis don dam pa'i bden pa'i mtshan nyid ni shin tu phra ba shin tu zab pa chos rnams kyi gcig pa dang / tha dad pa nyid las yang dag par 'das pa'i mtshan nyid rtogs par dka' ba yin no zhes bka' stsal to zhes bya ba 'di ni gnyis pa legs par gsungs pa mdor bstan pa nyid do/ /'di ltar bcom ldan 'das kyis bla na med pa'i gnas bstan pa'i mdo la sogs pa las/ don dam pa'i bden pa'i mtshan nyid ces bya ba nas/ rtogs par dka' ba yin no zhes bka' stsal to zhes bya ba'i bar du gsungs pas so/ /slob dpon yang dag bden pa'i 'grel pa las/ yang na shes rab rnam pa gsum gyi dbang du byas nas so so'i skye bo rnams kyis shes par bya ba ma yin pa'i phyir shin tu phra ba zhes bya'o/ /theg pa gnyis kyis shes par bya ba ma yin pa'i phyir shin tu zab pa zhes bya'o/ /sa'i mdun rol gyi byang chub sems dpa' rnams kyis mngon sum du mthong bar mi nus pa'i phyir rtogs par dka' ba'o zhes bya'o/ /yang na shes rab gsum dang sbyar na/ de bzhin nyid dang spyod pa gcig pa ma yin pa'i phyir shin tu phra ba'o/ /tha dad pa ma yin pa'i phyir shin tu zab pa'o/ /gcig pa dang tha dad pa gnyis kar rtogs pa'i phyir rtogs par dka' ba'o/ /gzhan yang thos pa las byung ba'i shes rab kyi yul ma yin pa'i phyir shin tu phra ba zhes bya'o/ /bsam pa'i shes rab kyi yul ma yin pa'i phyir shin tu zab pa zhes bya'o/ /so so'i skye bo'i yang theg pa gnyis dang las dang po pa'i byang chub sems dpa' rnams kyis bsgom pa'i shes rab kyi yul ma yin pa'i phyir rtogs par dka' ba zhes bya'o zhes bshad do/ /slob dpon yang dag bden pa'i bshad pa dang sbyar na rnam pa gsum las gsum pa mchog tu bzang ste de'i phyir shes rab kyi pha rol tu phyin pa'i mdo las/ de bzhin nyid dang chos kyi dbyings ni 'jig rten las 'das pa'i shes rab dang rjes la thob pa dang / rnam par mi rtog pa'i ye shes kyi yul yin pas shes rab rnam pa gsum gyi yul ma yin te/ ci'i phyir zhe na/ de kho na nyid kyi mtshan nyid kyi shes rab ni shin tu zab cing shin tu phra ba yin la thos pa'i shes rab ni rtsing zhing zab pa ma yin pa'i phyir mthong bar mi nus so/ /don dam pa yin pa'i phyir bsam pas gzhal bar mi nus so/ /'jig rten las 'das pa'i chos yin pa'i phyir bsgom pas kyang bgrod par mi nus so zhes gsungs pa'o/ /bcom ldan 'das 'di na bdag gis sa phyogs zhig na byang chub sems dpa' mang po mos pas spyod pa'i sa la yang dag par zhugs pa dag gcig tu 'dus nas don dam pa'i bden pa'i mtshan nyid dang / 'du byed rnams kyi mtshan nyid gcig pa dang / tha dad pa nyid bsam zhing spyod pa dag mthong lags te zhes bya ba la sogs pas ni gnyis pa rtsod pa mang po bstan pa zhes bya ba ston to/ /'di yang rnam pa gnyis su dbye ste/ gcig tu 'dus nas rtsod par gyur pa spyir bstan pa dang / brtag pa rnam pa gsum rnam par phye ste bstan pa las/ 'di ni dang po'o/ /'di na bdag gis zhes bya ba ni 'jig rten gyi khams mi mjed 'di 'am yang na 'dzam bu'i gling 'dir ro/ /dpe gzhan gnyis las ni tshig 'di ma tshang ngo / /sa phyogs zhig na zhes bya ba ni/ rgyal po'i khab la sogs pa yin gyi zhing yongs su dag pa ni ma yin te/ mos pa spyod pa'i byang chub sems dpa' rnams kyi 'dul ba'i gnas yin pa'i phyir ro/ /mos pas spyod pa'i sa ni sa'i mdun rol bskal pa grangs med pa dang po'i gnas skabs la gnas pa dag yin te/ de'i phyir bstan bcos theg pa chen po bsdus pa las/ mos par spyod pa'i gang zag ni bskal pa dang grangs med pa dang por rdzogs par 'gyur ro zhes bshad pa yin no/ /gzhan yang theg pa chen po'i bsdus pa mi mthun pa rnam pa gcig las/ mos pa spyod pa'i gang zag la ming rnam pa bzhi yod de/ 'di lta ste/ dad pa rnam pa bcu dang / shes pa rnam pa bcu dang / spyod pa rnam pa bcu dang / yongs su bsngo ba rnam pa bcu'o/ /byang chub sems dpa' rnams kyi 'phags pa'i lam la sbyor ba rnam pa bzhi yod pa'i phyir gang zag rnam pa bzhi yod par gyur pa yin te/ ji ltar rgyun du zhugs pa'i lam gyi mdun rol na sbyor ba rnam pa bzhi yod pa bzhin no/ /'di bzhi'i sa bon gang yin pa de ni mos pas spyod pa'i sa zhes bya ste/ bskal pa grangs med pa dang pos bsgoms pa yongs su rdzogs par 'gyur ro zhes 'byung ngo / /sa 'di'i ming yang mdor bsdu na rnam pa bzhi ste/ dang po ni smon pas mos pa'i sa zhes bya ste/ bstan bcos theg pa chen po bsdus pa mi mthun pa rnam pa gcig dang / tshig nges par 'grel pa'i mdo las bshad pa lta bu'o/ /gnyis pa ni dad pas spyod pa'i sa zhes bya ste/ dgongs pa zab mo nges par 'grel pa'i mdo las bshad pa lta bu'o/ /gsum pa ni mos pas spyod pa'i sa zhes bshad de/ bstan bcos theg pa chen po bsdus pa dang / rnal 'byor spyod pa'i sa dang / sa yongs su 'dzin pa dang / legs pa'i tshul khrims bstan pa'i mdo las bshad pa lta bu'o/ /bzhi pa ni yid kyis mos pa'i sa zhes bya ste/ rnal 'byor spyod pa'i sa las 'byung ba'i bsam pa rnam par dag pa'i le'u la sogs pa lta bu'o/ /ci'i phyir sa 'di'i ming gi rnam grangs mang por 'gyur zhe na/ 'di ltar 'di'i ming yang mdor bsdu na rnam pa gnyis te/ dang po ni spyi'i ming yid kyis mos pa zhes bya ste/ 'dun pa dang / dad pa dang / mos pa rnams las chos gcig gi ngo bo nyid de/ de'i phyir rnal 'byor spyod pa'i sa la sogs pa las yid kyi mos pa zhes bstan pa yin no/ /gnyis pa ni bye brag gi ming ste/ 'di yang rnam pa gsum mo/ /dang po ni smon cing mos pa ste/ mos pa dang mthun pa'i rnam grangs so/ /lnga yul so sor nges pa las 'dun pa'i ngo bo nyid de/ de'i phyir rnam par rig pa tsam du grub pa'i bstan bcos las mos pa ni 'di lta ste/ 'dun pa zhes bshad pa bzhin no/ /gnyis pa ni dad pas spyod pa zhes bya ste/ bcu gcig dge ba la dad pa'i bdag nyid de/ de'i phyir shes rab kyi pha rol tu phyin pa'i 'grel pa las/ sangs rgyas kyi chos kyi rgya mtshor ni dad pas 'jug par nus so/ /shes rab kyis sgrol bar nus so zhes bshad pa yin no/ /gsum pa ni mos pas spyod pa zhes bya ste/ lnga yul so sor nges pa las mos pa'i ngo bo nyid de/ de'i phyir slob dpon ngo bo nyid med kyis mdzad pa theg pa chen po bsdus pa'i 'grel pa byas pa las/ mos pas spyod pa zhes bya ba ni de bzhin nyid mngon sum du ma byas pas/ mos pa la brten nas brtson 'grus kyis spyod pa rnams spyod do zhes bshad pa yin no/ /gzhan yang de nyid las dang po mos pa thob pa ni 'di lta ste/ sa rnams las shin tu mos pa thob par 'gyur ba gang yin pa des gzhan gyis bstan pa rnams la 'di ni yang dag pa ji lta ba bzhin no zhes nges pa nyid du 'dzin to zhes bshad do/ /sa 'di la da dung de bzhin nyid mngon sum du ma byas pas rtsod pa 'di lta bu yod par gyur to zhes bya ba'i tha tshig go/ /'khor de na byang chub sems dpa' kha cig ni 'di skad ces don dam pa'i bden pa'i mtshan nyid dang / 'du byed rnams kyi mtshan nyid tha dad pa ma mchis so zhes mchi zhes bya ba la sogs pas ni gnyis pa brtags pa rnam pa gsum rnam par 'byed de bstan pa ston to/ /de nyid la rnam pa gsum du dbye ste/ 'di ni dang po'o/ /chos rnams las logs shig na don dam pa ye shes dam pas dmigs pa'i phyir don dam pa zhes bya ba dang / kun rdzob kyi ye shes kyi dmigs pas kun rdzob ces bya ba med pas so/ /byang chub sems dpa' kha cig ni yang 'di skad ces don dam pa'i bden pa'i mtshan nyid dang / 'du byed rnams kyi mtshan nyid tha dad pa ma mchis pa ma lags kyi/ don dam pa'i bden pa'i mtshan nyid ni 'du byed rnams kyi mtshan nyid las tha dad do zhes mchi zhes bya ba 'di ni ston pa gnyis pas brtags pa ste/ chos rnams las gud na don dam pa'i bdag nyid yod do zhes zer ba'o/ /byang chub sems dpa' gzhan the tshom dang yid gnyis su gyur pa kha cig 'di skad du/ byang chub sems dpa' de rnams las gang ni med par mchi ba lags/ gang ni sho be mchi ba lags/ /gang ni tshul bzhin du spyod pa lags/ gang ni tshul bzhin du mi bgyid pa lags zhes mchi ba dang / kha cig ni 'di skad ces don dam pa'i bden pa'i mtshan nyid ni/ 'du byed rnams kyi mtshan nyid la tha dad pa ma mchis so zhes mchi/ kha cig ni 'di skad ces don dam pa'i bden pa'i mtshan nyid ni 'du byed rnams kyi mtshan nyid las tha dad pa ma mchis so zhes mchi ste zhes bya ba 'di ni ston pa gsum pas brtags pa ste/ gong du bshad pa rnam pa gnyis la yid gnyis su gyur pa kho nar zad pas logs shig tu brtags pa yod pa ma yin no/ / 'dir brtags pa rnam pa bzhi yod pa'i rigs te/ 'di lta ste/ gcig pa dang / tha dad pa dang gnyi ga ma yin no/ /de ci'i phyir zhe na/ gcig pa yang ma yin tha dad pa yang ma yin zhes zer ba ni/ mi mthun pas skur pa yin la gcig pa yang ma yin tha dad pa yang ma yin zhes zer ba ni spros pa yin pa'i phyir ro/ /mdo sde 'di'i dgongs pa ni/ mdor bsdu ba gzhag pa'i phyir dang / zlas khong du chud par 'gyur ba'i phyir ro/ /re zhig gcig pa dang tha dad pa gzhig par bya ste/ 'dir gsungs pa'i gcig pa dang / tha dad par 'dzin pa gnyis po 'di ni rnam par g.yeng ba bcu las gcig pa dang tha dad par 'dzin pa zhes bya ba nyid do/ /'di ltar gcig pa dang tha dad pa nyid du rnam par rtog pa 'di'i gnyen po yang bstan bcos rnams so so nas bshad pa mi mthun te/ slob dpon dbyig gnyen gyis theg pa chen po bsdus pa'i 'grel pa mdzad pa las/ gcig pa nyid du rnam par g.yeng ba'i gnyen po'i phyir mdo sde las/ gzugs dang stong pa nyid ni tha dad pa ma yin te/ de ci'i phyir zhe na/ gal te gzhan gyi dbang gi ngo bo nyid yongs su grub pa'i ngo bo nyid dang gcig pa nyid du gyur pa zhig yin na ni gzhan gyi dbang gi ngo bo nyid 'di yongs su grub pa'i ngo bo nyid bzhin du rnam par dag pa'i yul yin par 'gyur ba'i rigs so zhes bya ba gsungs so/ /tha dad pa nyid du rnam par g.yeng ba'i gnyen po'i phyir mdo sde las gzugs ni stong pa nyid las gud na med de/ de ci'i phyir zhe na/ 'di gnyis so so tha dad par gyur na chos dang chos nyid kyang tha dad pa nyid du 'gyur bar rigs so/ /gal te tha dad pa nyid du gyur pa yod do zhe na/ 'di yang rigs pa dang mthun pa ma yin te/ mi rtag pa'i chos dang mi rtag pa nyid ji lta ba bzhin no zhes bya ba gsungs so/ /kun du brtags pa'i ngo bo nyid dang sbyar na ni gzugs kyang stong pa nyid yin la stong pa nyid kyang gzugs yin te/ ci'i phyir zhe na/ kun brtags pa'i gzugs dmigs su med pa gang yin pa de nyid ni stong pa nyid kyang yin la/ de dmigs su med pa yang yin gyi/ ji ltar gzhan gyi dbang gi ngo bo nyid yongs su grub pa'i ngo bo nyid las brjod du med pa lta bu ni ma yin no zhes bshad do/ /bstan bcos theg pa chen po bsdus pa'i 'grel pa mi mthun pa rnam pa gcig las kyang 'di dang mthun par bshad do/ /slob dpon ngo bo nyid med kyis theg pa bsdus pa'i 'grel pa byas pa dang sbyar na ni de la gzugs dang stong pa nyid ni tha dad pa ma yin te zhes bya ba ni/ slob dpon dbyig gnyen gyis mdzad pa'i 'grel pa las 'byung ba dang mthun par bshad de/ 'di ltar gzhan gyi dbang gi gzugs yongs su grub pa'i stong pa nyid la ltos nas gcig pa nyid du 'dzin pa 'jig par mdzad pas so/ /gzugs ni stong pa nyid las gud na med de zhes bya ba la sogs pas ni kun brtags kyi dbang du mdzad de/ yongs su grub pa'i stong pa nyid las dgongs nas gcig pa nyid du 'dzin pa gzhig pa yin no/ /gzhan yang gzugs ni stong pa nyid las gud na med de zhes bya ba la sogs pas ni kun brtags kyi gzugs kyi dbang du mdzad de/ kun brtags stong pa nyid las dgongs nas tha dad par 'dzin pa de de dag gzhig pa yin no zhes bshad do/ /bstan bcos mdo sde'i rgyan las ni mdo sde'i tshig dang sbyar bar zad kyi rnam par bshad pa ni med do/ /'dir mdo sde'i dgongs pa ni gzhan gyi dbang gi ngo bo nyid la brten te/ yongs su grub pa'i ngo bo nyid la ltos nas gcig pa dang tha dad pa nyid du 'dzin pa 'jig par mdzad de/ de yang slob dpon dbyig gnyen gyis bshad pa dang po dang mthun pas de'i phyir bstan bcos rnam par rig pa tsam du grub pa las yongs su grub pa 'di ni gzhan gyi dbang gi ngo bo nyid dang tha dad pa yang ma yin tha mi dad pa yang ma yin no/ /tha dad pa ni de bzhin nyid de'i de kho na nyid ma yin par 'gyur ba'i rigs so/ /tha dad pa ma yin na ni ngo bo nyid 'di mi rtag par 'gyur ba'i rigs te/ de dang 'di gnyis ka yang yongs su dag pa 'am yongs su dag pa ma yin pa'i yul nyid du gyur la/ rtsa ba dang rjes las thob pa'i ye shes kyi nus pa yang tha dad pa med pa nyid du 'gyur ba'i rigs so/ /ci'i phyir ngo bo nyid gnyis tha dad pa yang ma yin gcig pa nyid kyang ma yin zhe na/ mi rtag pa dang bdag med pa nyid la sogs pa de dag ji lta ba bzhin te/ 'di ltar mi rtag pa nyid la sogs pa gal te 'du byed la sogs pas chos dang tha dad par gyur na/ chos de dag ni mi rtag pa la sogs pa ma yin pa nyid du 'gyur ba'i rigs so/ /tha mi dad na ni 'di dag de dag gi spyi'i mtshan nyid ma yin par 'gyur ba'i rigs te/ des na dpe 'dis yongs su grub pa'i ngo bo nyid dang / gzhan gyi dbang gi ngo bo nyid gcig pa yang ma yin tha dad pa yang ma yin pa nyid du bstan pa yin no zhes 'byung ste/ gcig pa dang tha dad pa rgya cher rnam par 'byed pa ni 'og nas ston to/ /bcom 'das bdag gis de dag mthong nas 'di snyam du bgyid de/ rigs kyi bu 'di dag thams cad ni byis pa rmongs pa mi gsal ba mi mkhas pa tshul bzhin ma lags par spyod pa sha stag lags pas don dam pa'i bden pa'i mtshan nyid shin tu phra ba shin tu zab pa 'du byed rnams dang / gcig pa dang tha dad pa nyid yang dag par 'das pa'i mtshan nyid ma 'tshal bar gyur to snyam bgyid lags so/ /de skad ces gsol pa dang zhes bya ba ni gsum pa bdag nyid kyi the tshom gang yin pa de nyid gsol ba zhes bya ba nyid do/ /de la byis pa zhes bya ba ni ma rig pa'i bdag nyid bstan pa'o/ /rmongs pa zhes bya ba ni ma rig pa las rnam par 'byed pa'o/ /byang chub sems dpa' blo gros shin tu rnam par dag pa 'di snyam du dgongs te/ rigs kyi bu 'di dag ni ma rig pa'i dbang gi phyir dang / rmongs pa'i phyir las rnam pa gsum yod par gyur te/ dang po mi gsal ba zhes bya ba ni da dung mi shes pa kun shes pa'i dbang po ma thob pa'i phyir ro/ /gnyis pa mi mkhas pa zhes bya ba ni da dung kun shes pa'i dbang po ma thob pa'i phyir ro/ /gsum pa tshul bzhin ma lags pa zhes bya ba ni da dung kun shes pa dang ldan pa'i dbang po ma thob pa'i phyir te/ des na gcig pa dang tha dad pa ma yin pa'i mtshan nyid don dam par de bzhin nyid kyi tshul mngon du ma gyur pa yin no zhes 'byung ba'i tha tshig go/ /de nas bcom ldan 'das kyis byang chub sems dpa' sems dpa' chen po blo gros shin tu rnam par dag pa la 'di skad ces bka' stsal to/ /rigs kyi bu de de bzhin te/ khyod kyis ji skad smras pa de bzhin du/ rigs kyi bu de dag thams cad ni byis pa rmongs pa mi gsal ba mi mkhas pa tshul bzhin ma yin par spyod pa sha stag yin pas don dam pa'i bden pa shin tu phra ba shin tu zab pa 'du byed rnams dang gcig pa tha dad pa nyid las yang dag par 'das pa'i mtshan nyid rtogs par khong du mi chud do zhes bya ba 'di man chad ni gnyis pa de bzhin gshegs pas lan yang dag par gsungs pa zhes bya bar ston to/ /'di yang rnam pa lngar dbye ste/ de bzhin gshegs pas rung ba nyid du phyag rgyas btab pa dang / slar brtag pa dang / de bzhin gshegs pas lan mdor gsungs pa dang / yang bsnan te brtag pa dang / de bzhin gshegs pas rgya cher rnam par bshad pa'o/ /'di ni dang po de bzhin gshegs pas rung ba nyid du phyag rgyas btab pa ste/ tshig zlos bur de de bzhin no zhes bya ba la sogs pa'i bshad pa ni sngar gong du bstan pa bzhin du rig par bya'o/ /de ci'i phyir zhe na zhes bya ba ni gnyis pa slar brtag pa ste/ ci'i slad du chud par ma gyur ces bya ba'i don to/ /blo gros shin tu rnam dag 'du byed rnams la de ltar spyod pa dag ni don dam pa'i bden pa'i mtshan nyid rtogs pa'am/ don dam pa'i bden pa mngon sum du byas pa zhes bya ba ma yin te zhes bya ba ni gsum pa de bzhin gshegs pas lan mdor gsungs pa zhes bya ba ston to/ /lan 'di gsungs pa'i dgongs pa ni 'di yin te/ 'du byed rnams dang don dam pa'i bden pa gcig go zhes bya ba'am/ tha dad do zhes mngon par zhen pa gang yin pa de dag gis ni de rtogs pa'am/ mngon sum du byas pa ma yin te/ skyon mang po dang ldan pa'i phyir ro zhes ston to/ /skyon mang po'i mtshan nyid ni phyis 'og nas bshad pa bzhin no/ /de la rtogs pa dang mngon sum du byas pa bye brag yod pa yang don dam pa khong du chud pa gang yin pa de ni rtogs pa zhes bya'o/ /mya ngan las 'das pa dang byang chub kyi 'bras bu thob pa gang yin pa de ni mngon sum du thob pa zhes bya'o/ /gzhan yang bar chad med pa'i lam ni rtogs pa zhes bya'o/ /rnam par grol ba'i lam de ni rtogs pa zhes kyang bya'o/ /mngon sum du byas pa zhes kyang bya ste/ 'dus ma byas mngon sum du byas pa'i phyir ro/ /gzhan yang rjes las thob pa'i ye shes ni rtogs pa zhes bya'o/ /yang dag pa'i bdag nyid kyi ye shes ni mngon sum du byas pa zhes bya ste/ de'i phyir 'phags pa shes rab kyi pha rol tu phyin pa'i mdo las/ bcom ldan 'das ji ltar na chos kyi dbyings de lta bu mngon sum du bgyid pa dang / 'thob par bgyid pa lags/ bcom ldan 'das kyis bka' stsal pa/ 'jig rten las 'das pa'i shes rab dang rjes las thob pa dang / rnam par mi rtog pa'i ye shes kyis mngon sum du byed do/ / thob par byed do/ /bcom ldan 'das mngon sum du bgyis pa dang / 'thob pa'i don la tha dad du bgyi ba ci mchis/ bcom ldan 'das kyis bka' stsal pa/ 'jig rten las 'das pa'i shes rab kyis yang dag pa ji lta ba bzhin du mthong ba'i phyir mngon sum du byas pa zhes bya'o/ /rjes las thob pa'i ye shes kyis rtogs pa'i phyir 'thob pa zhes bya'o zhes gsungs so/ /mngon sum du byas pa de yang re zhig thams cad yod par smra ba'i gzhung dang sbyar na/ 'phags pa'i lam de 'dus ma byas kyi chos la ltos na mu bzhi pa rnam pa gnyis yod de/ skad cig ma mang po'i mu bzhi dang / skad cig ma gcig gi mu bzhi'o/ /de la skad cig ma mang po'i mu bzhi yang dang po lus kyis mngon sum du byas la/ shes rab kyis mngon sum du ma byas pa ni 'di lta ste/ bden pa rnam pa gsum las dmigs pa'i rnam par dgrol ba'i lam gyi tshe 'dus ma byas mngon sum du byed pa'i phyir lus kyis mngon sum du byas pa zhes bya'o/ /'gog pa la mi dmigs pa'i shes rab kyis mngon sum du ma byas pa zhes bya'o/ /gnyis pa shes rab kyis mngon sum du byas la lus kyis mngon sum du ma byas pa ni 'di lta ste/ 'gog pa'i bden pa'i bar chad med pa'i lam gyi tshe 'dus ma byas la dmigs pa'i phyir shes rab kyis mngon sum du byas pa zhes bya'o/ /'gog pa ma thob pa'i phyir lus kyis mngon sum du ma byas pa zhes bya'o/ /gsum pa lus dang shes rab gnyis kas mngon sum du byas pa ni 'di lta ste/ 'gog pa'i bden pa rnam par grol ba'i lam la dmigs pa'i tshe shes rab 'dus ma byas la dmigs shing 'gog pa yang thob pa'i phyir ro/ /bzhi pa lus dang shes rab gnyis kas mngon sum du ma byas pa ni 'di lta ste/ bden pa rnam pa gsum gyi bar chad med pa'i lam la dmigs pa'i tshe shes rab 'gog pa la dmigs shing 'gog pa ma thob pa'i phyir ro/ /de la skad cig ma gcig gi mu bzhi ni re zhig ji ltar 'gog pa la chos shes pas lan cig phyir 'ong ba'i 'bras bu thob pa'i tshe skad cig ma gcig la mu rnam pa bzhi yod pa lta bu ste/ dang po lus kyis mngon sum du byas la shes rab kyis mngon sum du ma byas pa ni 'di lta ste/ khams gong ma gnyis ni mthong bas spang bar bya'i nyon mongs pa spangs pas 'thob pa'i 'dus ma byas yin te/ 'di ltar 'bras bu thob pa'i tshe cig car de thob pa'i phyir ro/ /gnyis pa shes rab kyis mngon sum du ma byas pa ni 'di lta ste/ 'dod pa'i khams kyi rnam pa dgu las phyi ma'i rnam pa gsum gyi bsgom pas spang bar bya ba'i nyon mongs pa spangs pas thob pa'i 'dus ma byas yin te/ shes rab kyis dmigs par byed kyang da dung ma thob pa'i phyir ro/ /gsum pa lus dang shes rab gnyis kas mngon sum du byas pa ni 'di lta ste/ 'dod pa'i khams kyi bsgom pas spang bar bya ba las snga ma'i rnam pa drug dang / 'dod pa'i khams kyi bden pa bzhi'i mthong bas spang bar bya ba'i nyon mongs pa rnams spangs pas thob pa'i 'dus ma byas gang yin pa'o/ /bzhi pa lus dang shes rab gnyis kas mngon sum du ma byas pa ni 'di lta ste/ khams gong ma gnyis kyi bsgom pas spang bar bya ba'i nyon mongs pa spangs pas thob pa'i 'dus ma byas gang yin pa'o/ / de ci'i phyir zhe na zhes bya ba ni bzhi pa bsnan te brtag pa zhes bya ba nyid de/ ci'i phyir zab par gyur pa gtan tshigs brtag pa'o/ /blo gros shin tu rnam dag gal te don dam pa'i bden pa'i mtshan nyid dang / 'du byed rnams kyi mtshan nyid tha dad pa med par gyur na ni zhes bya ba 'di man chad ni lnga pa de bzhin gshegs pas rgya cher rnam par bshad pa zhes bya bas ston te / 'di yang rnam grangs rnam pa gsum gyis ston pas de nyid las rnam pa gsum du dbye'o/ /de yang dang po ni skyon rnam pa gsum dang lnga la brten nas gcig pa dang tha dad pa nyid du 'dzin pa 'jig par mdzad do/ /gnyis pa ni blo gros shin tu rnam dag gal te don dam pa'i bden pa'i mtshan nyid dang / 'du byed rnams kyi mtshan nyid tha dad pa med par gyur na ni zhes bya ba man chad kyis spyi'i mtshan nyid de rnam par dag pa la brten nas gcig pa dang tha dad pa nyid du 'dzin pa 'jig par mdzad do/ /gsum pa ni blo gros shin tu rnam dag gal te don dam pa'i bden pa'i mtshan nyid dang 'du byed rnams kyi mtshan nyid tha dad pa med par gyur na ni zhes bya ba man chad 'du byed tha dad pa med pa dang bdag med pa la sogs pa la brten nas gcig pa dang tha dad pa nyid du 'dzin pa 'jig par mdzad do/ /rnam grangs dang po de yang rnam pa gnyis su dbye ste/ mi mthun par bshad pas 'dzin pa'i 'jig pa dang / rjes su mthun par bshad pas 'dzin pa'i 'jig pa'o/ /mi mthun par bshad pas rnam par 'jig pa yang rnam pa gnyis su dbye ste/ skyon rnam pa gsum la brten nas gcig pa nyid du 'dzin pa 'jig par mdzad pa dang / skyon rnam pa lnga la brten nas tha dad pa nyid du mi 'dzin pa 'jig par mdzad pa'o/ /gcig pa nyid du 'dzin pa'i 'jig pa yang rnam pa gnyis kyis bstan te smos pa dang / yang dag par gzhig pa ste/ 'di ni gcig pa nyid du 'dzin pa smos pa nyid do/ /'dir so so'i skye bo thams cad bden pa mthong ba yin par yang 'gyur zhes bya ba la sogs pa ni/ gnyis pa skyon rnam pa gsum gyis gcig pa nyid du 'dzin pa yang dag par gzhig pa'o/ /de la skyon rnam pa gsum ni so so'i skye bo rnams bden pa'i tshul mthong bar gyur pa'i skyon dang / mya ngan las 'das pa thob pa'i skyon dang / bla na med pa'i byang chub thob pa'i skyon no/ /'di ni so so'i skye bo rnams bden pa'i tshul mthong ba'i skyon bstan pa nyid do/ /'di lta ste/ gal te 'du byed rnams nyid yang dag pa'i tshul yin no zhes 'dod na 'o na ni so so'i skye bo'i gzugs mthong ba rnams kyang bden pa mthong bar 'gyur ba'i rigs te/ gzugs nyid yang dag pa'i don yin pa'i phyir ro/ /gzhan yang so so'i skye bo rnams bla na med pa'i thabs kyi shin tu bde ba'i mya ngan las 'das pa 'thob par 'gyur zhes bya ba ni/ gnyis pa so so'i skye bo yang mya ngan las 'das pa thob pa'i skyon bstan pa nyid do/ /bla na med pa'i thabs zhes bya ba ni lam gyi bden pa ste/ zag pa med pa'i 'phags pa'i lam mo/ /mya ngan las 'das pa zhes bya ba ni rnam pa bzhi ste/ rang bzhin gyis ngo bo nyid rnam par dag pa dang / lhag ma dang bcas pa dang / lhag ma med pa dang / mi gnas pa ste/ phyis rnam par 'byed do/ 'dir ni lhag ma dang bcas pa dang mi gnas pa dang / rang bzhin gyis rnam par dag pa dang sbyar te gzod ma nas yod pa'i phyir ro/ /lhag ma med pa ni lus 'gags zin pa'i phyir ro/ /yang na 'dir lhag ma med pa dang sbyar te/ lhag ma dang bcas pa bkag nas lhag ma med pa thob pa'i phyir ro/ /thabs kyi lam smos pas ni mya ngan las 'das pa'i 'bras bu bstan to/ /de'i phyir bla na med pa'i thabs kyi shin tu bde ba'i mya ngan las 'das pa zhes bya ba gsungs pa yin no/ /bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ro zhes bya ba ni gsum pa so so'i skye bo yang bla na med pa'i byang chub thob pa'i skyon bstan pa'o/ /gal te tha dad pa ma yin na so so'i skye bo rnams gzugs la sogs pa'i 'du byed kyi mtshan nyid khong du chud pa don dam pa'i bden pa'i mtshan nyid kyang khong du chud par 'gyur ba'i rigs te gzhan du 'du byed rnams kyi mtshan nyid dang tha dad par 'gyur ba med pa'i phyir ro/ /des na bla na med pa yang dag pa'i byang chub mngon sum du byed pa'i skyon du 'gyur te/ mngon sum du byed cing thob par byed pa'i phyir gcig pa nyid ma yin par rig par bya'o zhes bya ba'i tha tshig go/ /gal te don dam pa'i bden pa'i mtshan nyid dang / 'du byed rnams kyi mtshan nyid tha dad pa yin par 'gyur ba ni zhes bya ba 'di man chad ni gnyis pa skyon rnam pa lnga la brten nas tha dad pa nyid du 'dzin pa 'jig par mdzad de/ 'di yang rnam pa gnyis te/ smos pa dang rnam par gzhig pa'o/ /'dir ni rnam par gzhig par dgongs nas sngar tha dad pa nyid du 'dzin pa smos pa yin te/ 'di lta ste/ don dam pa'i bden pa'i 'du byed rnams kyi mtshan nyid dang / gal te ma 'dres par tha dad par gyur pa zhig yin na ni skyon rnam pa lnga dang ldan par 'gyur ro zhes bya ba'i don to/ /bden pa mthong ba rnams kyang 'du byed rnams kyi mtshan ma yongs su gsal bar mi 'gyur zhes bya ba 'di man chad ni gnyis pa skyon rnam pa lnga rnam par phye nas ston to/ /skyon rnam pa lnga ni bden pa mthong ba rnams 'du byed kyi mtshan ma mi spong ba'i skyon dang / mtshan ma'i 'ching ba las rnam par mi 'grol ba'i skyon dang / gnas ngan len gyi 'ching ba las rnam par mi 'grol ba'i skyon dang / mya ngan las 'das pa mngon du byed pa'i skyon dang / bla na med pa'i byang chub mngon du mi byed pa'i skyon to/ /'di ni dang po 'du byed kyi mtshan ma mi spong ba'i skyon bstan pa'o/ /'du byed kyi mtshan ma zhes bya ba la/ 'du byed ni 'di lta ste/ lta ba'i rnam pa dmigs par byed pa'i rnam par shes pa'o/ /mtshan ma ni mtshan ma'i rnam pa ste 'di ni 'du byed rnams kyi mtshan ma zhes bya'o/ /'di ni bdag po'i dbang du byas te rnam par bshad pa'o/ /yang na 'du byed kyi mtshan ma zhes bya ba la 'du byed ni/ 'di lta ste/ skye 'gag dang bcas pa rnam par 'gyur zhing mi gnas pa'o/ /mtshan ma ni ngo bo nyid kyi mtshan nyid do/ /rnam par gzhig pa ni 'di skad du gal te don dam pa'i bden pa'i mtshan nyid dang 'du byed rnams kyi mtshan gcig tu tha dad par gyur pa zhig yin na 'o na ni bden pa mthong ba rnams kyang 'du byed rnams kyi mtshan ma yongs su spong bar 'gyur te/ 'di ltar don dam pa'i bden pa 'du byed rnams dang tha dad par 'gyur ba'i phyir ro/ /'on kyang spong bar yang byed pas de'i phyir tha dad pa yang ma yin no zhes bstan par 'gyur ro/ /don dam pa'i bden pa mthong ba'i tshe gzhan gyi dbang gi mtshan nyid ji ltar spong zhe na/ de bzhin nyid bsgom pa dang / mtshan ma sna tshogs mngon du mi snang ba'i phyir yongs su bsal ba zhes bshad kyi ji ltar kun brtags pa ltar rang gi ngo bo nyid med pa'i phyir yongs su gsal ba zhes bya ba ni ma yin no/ /de ltar ci mngon zhe na/ rnam par rig pa tsam du grub pa'i bstan bcos las / dge ba'i rtsa ba rnam pa bzhi bstan pa'i skabs na sbyor ba'i gnas skabs kyi tshig le'ur byas pa las ji skad du/ 'di dag rnam rig tsam nyid ces/ /de snyam du ni dmigs nas su/ /ci yang rung ste mdun 'jog na/ /de ni tsam la mi gnas so/ /zhes bstan pa yin te/ 'di nyid kyi 'grel pa las/ 'di ltar de stong pa dang yod pa'i mtshan ma rnam pa gnyis da dung ma spangs te/ mtshan ma dang bcas pas sems tsam du rtog pa dang dmigs pa dang bcas pa'i phyir ro zhes 'byung ste/ zhib tu de nyid las bshad pa bzhin no/ /gzhan yang rnal 'byor spyod pa'i sa las/ sems shin tu mnyam par gzhag pa'i bsam gtan bzhi pa nges par 'byed pa'i cha dang mthun pa dag chos kyi mtshan ma ma spangs shing 'ching ba gnyis las ma grol bas zhes bshad pas de'i phyir 'dir mtshan ma'i yongs su bsal ba zhes gsungs pa ni stong pa dang / yod pa'i mtshan ma'i rnam pa la spyir mtshan ma zhes gsungs par rig par bya'o/ /gal te 'du byed rnams kyi mtshan ma yongs su sel bar mi byed na ni mtshan ma'i 'ching ba las rnam par grol bar yang mi 'gyur ro zhes bya ba ni gnyis pa'i mtshan ma'i 'ching ba las rnam par mi grol ba'i skyon bstan pa nyid do/ /'dir sgyu ma lta bu'i dngos po khong du ma chud pa'i phyir dang / sems dang sems las byung ba'i dmigs pa'i mtshan ma la rang dbang ma thob pa'i phyir / mtshan ma'i rnam pa la mtshan ma'i 'ching ba zhes gsungs so/ /bden pa mthong ba de dag mtshan ma'i 'ching ba rnams las rnam par ma grol ba'i phyir gnas ngan len gyi 'ching ba las ma grol bar 'gyur zhes bya ba ni/ gsum la gnas ngan len gyi 'ching ba las rnam par mi grol ba'i skyon bstan pa nyid de/ 'di ltar mtshan ma'i 'ching ba la rang dbang ma thob pa'i phyir gnas ngan len rnams kyi 'ching ba las rnam par grol bar mi 'gyur ba'o/ /'ching ba rnam pa 'di gnyis kyang so so nas bshad pa mi mthun te/ slob dpon h+yan tsang na re 'di la rgya gar yul pa'i slob dpon dag gis bshad pa rnam pa gnyis yod de/ kha cig na re thams cad yod par smra ba dag ni mtshan ma'i rnam pa la mtshan ma'i 'ching ba zhes 'byung zhes zer te/ 'di ltar zag pa dang bcas pa'i chos kyi rgyu mtshan gyi rnam pa'i stobs kyi dbang gi phyir lta ba'i rnam pa'i sems la sogs pas zag pa dang bcas pa'i chos rnams sgyu ma la sogs pa ltar yod pa ma yin pa yang yod par 'dra bar gyur par khong du mi chud la ma rig pa'i dbang gi phyir ni gzugs dang / sems la sogs pa'i chos rnams yang dag par yod pa nyid du 'dzin to zhes zer ro / /bshad pa nyid dang sbyar na mtshan ma nyid 'ching ba yin pa'i phyir mtshan ma'i 'ching ba zhes bya ste/ rnam par bshad pa drug las 'di ni las yongs su 'dzin pa'i dbang du byas te rnam par bshad pa'o/ /rgyu mtshan gyi rnam pa de nyid las 'ching bar byed pa'i nyon mongs pa yod pa gang yin pa de ni gnas ngan len gyi 'ching ba zhes bya ste/ rnam par rags pa'i phyir ro/ /'di yang las yongs su 'dzin pa'i rnam par bshad pa ste/ snga ma bzhin du rig par bya'o/ /'di'i don mdor bsdus pa ni dmigs par byas pa'i rgyu mtshan gyi rnam pa gang yin pa de ni mtshan ma'i 'ching ba zhes bya'o/ /dmigs par byed pa lta ba'i rnam pa dang / 'dod chags la sogs pa'i nyon mongs pa rnams gnas ngan len gyi 'ching ba zhes bya'o zhes ston to / /de'i phyir rnal 'byor spyod pa'i sa las/ kun gzhi rnam par shes pa yang rtogs par byed de/ phyi rol gyi mtshan ma'i 'ching bas 'ching ba dang / nang gi gnas ngan len gyi 'ching bas bcings par rtogs par byed do zhes bshad de zhib tu de nyid las bshad pa bzhin no/ /kha cig na re mtshan ma'i 'ching ba ni nyon mongs pa can gyi yid kyi bdag nyid do zhes zer ba de ni 'di skad d u nyon mongs pa'i yid dang mtshungs par ldan pa ni nyon mongs pa bzhi po dag gi mthu'i phyir rnam par shes pa drug po dang mtshungs par ldan pa'i nyon mongs pa rnams kyi mtshan ma rnams sgyu ma'i dngos po lta bur khong du ma chud pa'i phyir nyon mongs pa can gyi yid la mtshan ma'i 'ching ba zhes bshad do zhes ston te / bshad pa 'di dang sbyar na mtshan ma ni/ 'di lta ste/ rgyu mtshan gyi rnam pa nyon mongs pa can gyi yid kyis 'ching bar byed pa'i mtshan nyid de/ mtshan ma'i 'ching ba yin pa'i phyir/ mtshan ma'i 'ching ba zhes bya ste/ rnam par bshad pa rnam pa drug las bdag po'i dbang du byas te/ rnam par bshad par bya'o/ /gnas ngan len gyi 'ching ba yang rnam pa gnyis te/ dang po rnam par shes pa drug dang mtshungs par ldan pa'i nyon mongs pa ni gnas ngan len zhes bya ste/ don 'di ni gong du bshad pa bzhin no/ /gnyis pa ni nyon mongs pa dang shes bya'i sgrib pa gnyis kyi mthus zag pa dang bcas pa'i phung po lnga la sogs pa'i chos las su mi rung bar byed pas/ 'di nyid la gnas ngan len gyi 'ching ba zhes bya'o zhes zer te/ 'dir ni snga ma gzung gi phyi ma ni ma yin no zhe'o/ /kha cig na re gnas ngan len zhes bya ba ni nyon mongs pa rnams kyi lta ba'i rnam pa'i sa bon dang dbang po'o/ /'ching ba ni nyon mongs pa'i mtshan ma'i rnam pa'i sa bon no/ /gzhan yang mngon du byung ba'i mtshan ma dang ldan pa yang 'ching ba gnyis yin no zhe'o/ /ngo bo nyid med pa rnam pa gsum bstan pa'i bstan bcos dang sbyar na/ de las 'di skad du/ srid pa las grol ba'i mdo las kun du rtog pa'i ngo bo nyid ni mtshan ma'i nyon mongs pa zhes bya'o/ /gzhan gyi dbang gi ngo bo nyid ni gnas ngan len gyi nyon mongs pa zhes bya'o zhes gsungs pa dang / gzhan yang de nyid las mtshan ma'i nyon mongs pa dang gnas ngan len gyi nyon mongs pa rnam par 'byed pa'i skabs nas / kun du rtog pa'i ngo bo nyid 'byung ba na/ nyon mongs pa rnam pa gnyis kyis sems can rnams 'ching bar byed de/ mtshan ma'i nyon mongs pa dang gnas ngan len gyi nyon mongs pa'o/ /de la mtshan ma'i nyon mongs pa ni kun du rtog pa'i ngo bo nyid do/ /gnas ngan len gyi nyon mongs pa ni gzhan gyi dbang gi ngo bo nyid do/ /nyon mongs pa 'di nyid de ltar rnam par gzhag pa yang gzhan gyi dbang gi ngo bo nyid la kun brtags pa nyid du 'dzin pa'i phyir rnam par gzhag pa yin no zhes gsungs so zhes 'byung ste/ 'di nyid kyi 'grel pa las/ kun du rtog pa la mtshan ma'i nyon mongs pa zhes gsungs pa yang mtshan ma ni dbyibs kyi mtshan ma la dbyibs kyi mtshan ma'i nyon mongs pa zhes bshad pas/ rkyen byed pa'i nyon mongs pa zhes bya ste/ gzhan gyi dbang gi ngo bo nyid ni nyon mongs pa yang dag pa yin no/ /de la lci yang bstan pa yang kun du rtog pa'i ngo bo nyid ni nyon mongs pa kho na'i rkyen yin pas nyon mongs pa zhes bshad de/ de'i phyir yang ba zhes bya'o/ /gzhan gyi dbang gi ngo bo nyid ni nyon mongs pa'i bdag nyid yang dag pa yin pas de'i phyir lci ba zhes bshad do zhes 'byung ngo / /bstan bcos rnam par bshad pa las 'di dang mthun par bshad de/ de'i phyir de nyid las gzhan gyi dbang gi ngo bo nyid de ni mtshan ma dang / /gnas ngan len gyi bdag nyid do/ /ci'i phyir gzhan gyi dbang gi ngo bo nyid ces bshad ce na/ rnam pa 'di gnyis kyi dbang gis phan tshun rkyen byas na skye ba'i phyir te/ 'di ltar mtshan mas rkyen byas nas ni gnas ngan len bskyed la/ gnas ngan len gyi rkyen byas nas ni yang mtshan ma skyed par byed do zhes bshad do/ /gzhan yang theg pa chen po bsdus pa'i 'grel pa rnam pa gcig dang sbyar na de las mdud pa ni rnam pa gnyis te/ mtshan ma'i mdud pa dang / gnas ngan len gyi mdud pa'o/ /de la mtshan ma'i mdud pa ni dgrol bar dka' ba'o/ /gnas ngan len gyi mdud pa ni dgag par dka' ba'o/ /sems kyis chos kyi yul rnam par rtog pa ni mtshan ma'i mdud pa zhes bya'o/ /rnam par rtog pa 'di'i dbang gis 'dod chags dang zhe sdang la sogs pa'i nyon mongs pa 'byung ba ni gnas ngan len gyi mdud pa zhes bya'o/ /nam rnam par mi rtog pa'i ye shes thob pa na mtshan ma'i mdud pa gdod grol bar gyur te/ mtshan ma'i mdud pa mi 'byung ba nyid kyis gnas ngan len gyi mdud pa yang de'i zla la 'gag par 'gyur ro zhes bshad do/ /slob dpon yang dag bden pa'i 'grel pa las/ mtshan ma'i mdud pa ni rnam par rtog pa'i rnam par shes pa'i 'dzin pa ste/ 'di ltar rnam par shes pa drug po thams cad kyis sems kyis dmigs par bya ba'i phyi rol gyi yul rnams yod pa nyid du 'dzin cing thams cad rang gi sems kyis byas par khong du ma chud pa'i phyir/ lta ba dang mtshan ma mngon par zhen to/ /thams cad kun du rtog par byas pas 'dod chags dang zhe sdang la sogs pa ni med pa las skyes pa yin no zhes bshad do/ /theg pa chen po bsdus pa'i 'grel pa gsar 'gyur dang / slob dpon dbyig gnyen gyis mdzad pa las ni tshig 'di mi 'byung ngo / /tshig nges par 'grel pa'i mdo las ni mtshan ma sna tshogs kyi 'ching ba dang / gnas ngan len gyi 'ching ba zhes 'byung ngo / /gzhan yang de nyid las mtshan ma'i mdud pa dang / gnas ngan len gyi mdud pa zhes 'byung ngo / /slob dpon yang dag bden pa'i brjed byang las rnam par shes pa lnga po dag gi yul gang yin pa de ni mtshan ma'i 'ching ba zhes bya'o/ /yid kyi rnam par shes pa'i yul gang yin pa de ni gnas ngan len gyi 'ching ba zhes bya'o/ /gzhan yang mtshan ma sna tshogs kyi 'ching ba ni kun du rtog pa'i ngo bo nyid do/ /gnas ngan len gyi 'ching ba ni/ 'di lta ste/ gzhan gyi dbang gi ngo bo nyid do/ /gzhan yang sdug bsngal gyi bden pa thams cad ni mtshan ma sna tshogs kyi 'ching ba zhes bya ste/ rnam par grol ba'i dbang gis spong ba'i phyir ro/ /kun 'byung gi bden pa sarba ni gnas ngan len gyi 'ching ba zhes bya ste/ lam gyi 'gog pa'i phyir ro zhes bshad de/ rgya cher ni de nyid las bstan pa bzhin no/ /dgongs pa zab mo rnams par dgrol ba'i mdo las ni mtshan ma'i 'ching ba dang / nyon mongs pa'i 'ching ba zhes 'byung ste/ don rgya cher rnam par 'byed pa ni gzhan nas bstan pa las 'byung ba bzhin du rig par bya'o/ /'ching ba gnyis las rnam par ma grol ba'i phyir bden pa mthong bas bla na med pa'i thabs kyi shin tu bde ba'i mya ngan las 'das pa thob par mi 'gyur zhes bya ba ni bzhi pa mya ngan las 'das pa mi thob pa'i skyon bstan pa nyid de/ gong ma bzhin du rig par bya'o/ /bla na med pa yang dag par rdzogs pa'i byang chub mngon par rdzogs par 'tshang rgya bar yang mi 'gyur ro zhes bya ba ni lnga pa bla na med pa'i byang chub mi thob pa'i skyon bstan pa ste gong ma bzhin du rig par bya'o/ / //bam po bco lnga pa/ blo gros shin tu rnam dag 'dis so so'i skye bo rnams bden pa mthong ba yang ma yin no zhes bya ba 'di man chad ni gnyis pa rjes su mthun par bshad pa'i rigs pas gcig pa dang / tha dad pa nyid du 'dzin pa 'jig par mdzad do/ /'di yang rnam pa gnyis su dbye ste/ skyon rnam pa gsum med pa smos pas gcig pa nyid du 'dzin pa de rnam par gzhig pa dang / blo gros shin tu rnam dag ces bya ba man chad kyis skyon rnam pa lnga med pa la brten nas/ tha dad pa nyid du 'dzin pa de rnam par gzhig pa'o/ /rnam pa 'di gnyis kyang gong du bshad pa bzlog pa las rig par bya'o/ /skyon rnam pa gsum med par bstan pa yang rnam par bshad pa dang / mjug bsdu ba dang rnam pa gnyis kyis bstan te/ 'di rnam par bshad pa'o/ /skyon rnam pa gsum med par rnam par bshad pa yang rnam pa gsum du dbye ste/ 'di ni dang po bden pa mthong ba ma yin par bshad pa yin te/ 'di'i don ni brda phrad par zad do/ /so so'i skye bo kho nar gyur bzhin du bla na med pa'i thabs kyi shin tu bde ba'i mya ngan las 'das pa 'thob pa ma yin zhes bya ba ni gnyis pa mya ngan las 'das pa 'thob par 'gyur ba ma yin par bstan pa ste / mdo nyid kyis brda phrad par zad do/ /bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba yang ma yin pas zhes bya ba ni gsum pa bla na med pa'i byang chub 'thob par 'gyur ba ma yin pas gcig pa nyid du 'dzin pa gzhig pa ste/ brda phrad par zad do/ /de'i phyir don dam pa'i bden pa'i mtshan nyid dang / 'du byed rnams kyi mtshan nyid tha dad pa mtshan nyid med do zhes zer ba ni rigs pa ma yin te zhes bya ba la sogs pas ni gnyis pa mjug bsdu bas/ gcig pa nyid du 'dzin pa gzhig pa'o/ /'di yang rnam pa gnyis te/ spyi'i mjug bsdu ba dang / brtags pa smos nas bzlas te mjug bsdu ba'o/ /'di ni dang po ste/ 'di ltar gong du mi mthun pa dang / rjes su mthun par bshad pa nyid kyi phyir gcig pa nyid du 'dzin pa ste/ rigs pa ma yin no zhes bya ba'i tha tshig go/ /gal te de la 'di skad ces don dam pa'i bden pa'i mtshan nyid dang / 'du byed rnams kyi mtshan nyid tha dad pa med do zhes zer na/ rigs pa des thams cad tshul bzhin du spyod pa ma yin pas yang dag pa'i tshul ji lta ba bzhin du byed pa yin pas rig par bya'o zhes bya ba ni gnyis pa brtags pa smos nas bzlas te mjug bsdu ba'o/ /'di ltar gong du mi mthun pa dang / rjes su mthun pa'i bshad pa gnyis kyi phyir gcig pa nyid du 'dzin pa dang / 'dzin pa'i don de dag ni yang dag pa'i spyod pa dang / yang dag pa'i tshul dang mthun pa ma yin no zhes bya ba'i don to/ /blo gros shin tu rnam dag 'dir bden pa mthong ba de dag 'du byed rnams kyi mtshan ma yongs su ma bsal ba ma yin gyi yongs su bsal ba kho na yin pa zhes bya ba 'di man chad ni/ gnyis pa skyon med pa rnam pa lnga la brten nas rjes su mthun par bshad pa'i rigs pas tha dad pa nyid du 'dzin pa'i skyon rnam par gzhig par mdzad do/ /'di yang rnam pa gnyis te/ rnam par bshad pa dang / mjug bsdu ba ste/ 'di rnam par bshad pa'o/ /rnam par bshad pa yang skyon med pa rnam pa lnga nyid kyis rnam par lngar dbye ste/ 'di ni dang po mtshan ma yongs su sel ba bstan pa nyid kyis tha dad par 'dzin pa rnams par gzhig pa'o/ /'di ltar 'phags pa rnams yang dag pa ji lta ba bzhin du dngos po rnams sgyu ma la sogs pa lta bur yang dag pa'i ngo bo nyid med par khong du chud pa'i phyir ro/ /bden pa mthong ba'i mtshan ma'i 'ching ba rnams las rnam par ma grol ba yin gyi/ /rnam par grol ba ma yin par zhes bya ba ni gnyis pa mtshan ma med pa'i 'ching ba bsal bar 'gyur bar bstan pa ste/ yang dag pa ji lta ba bzhin du tha dad pa med pa'i mtshan nyid khong du chud pa'i phyir ro/ /bden pa mthong ba gnas ngan len gyi 'ching ba las rnam par ma grol ba ma yin gyi/ rnam par grol ba yin pa zhes bya ba ni gsum pa gnas ngan len gyi 'ching ba las rnam par grol ba ste mtshan ma'i 'ching ba yongs su spangs pa'i phyir ro/ /sgrib pa gnyis rnam par grol ba'i phyir ro/ /bla na med pa'i thabs kyi shin tu bde ba'i mya ngan las 'das pa yang mthong bar 'gyur ba zhes bya ba ni bzhi pa mya ngan las 'das pa mngon du byed par 'gyur ba bstan te/ 'ching ba gnyis kyi bar du spangs pa'i phyir ro/ /bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba zhes bya ba ni/ lnga pa bla na med pa'i byang chub 'thob par 'gyur bar bstan pa ste/ sgrib pa spangs nas zad pa'i phyir ro/ /de'i phyir don dam pa'i bden pa'i mtshan nyid dang / 'du byed rnams kyi mtshan nyid gcig tu tha dad pa'i mtshan nyid do zhes zer ba yang rigs pa ma yin te zhes bya ba la sogs pas ni gnyis pa tha dad pa'i skyon bstan pa'i mjug bsdu ba'o/ /'di yang rnam pa gnyis te rigs pas spyi'i mjug bsdu ba dang / /brtags pa smos nas bzlas te mjug bsdu ba ste/ 'di ni dang po'o/ /gal te de la 'di skad ces don dam pa'i bden pa'i mtshan nyid dang / 'du byed rnams kyi mtshan nyid gcig tu tha dad do zhes zer ba na/ rigs pa des sarba tshul bzhin du spyod pa ma yin pas yang dag pa'i tshul ji lta ba bzhin byed pa ma yin par rig par bya'o zhes bya ba ni gnyis pa brtags pa smos nas bzlas te/ mjug bsdu ba ste/ 'di ltar sngar gong du bstan pa lta bu'i skyon rnam pa lnga'i phyir/ don dam pa'i bden pa'i mtshan nyid tha dad ces byar mi rung ngo zhes bya ba'i tha tshig go/ /blo gros shin tu rnam dag gal te don dam pa'i bden pa'i mtshan nyid dang / 'du byed rnams kyi mtshan nyid tha dad pa med par gyur na ni/ ji ltar 'du byed rnams kyi mtshan nyid kun nas nyon mongs pa'i mtshan nyid du gtogs pa de bzhin du/ don dam pa'i mtshan nyid 'di yang kun nas nyon mongs pa'i mtshan nyid du gtogs par 'gyur ro zhes bya ba 'di man chad ni rnam grangs rnam pa gsum las rnam grangs gnyis pa rnam par dag pa'i spyi'i mtshan nyid la brten nas gcig pa dang / tha dad pa nyid du 'dzin pa'i 'jig par mdzad pa ston to/ /'di yang rnam pa gnyis te/ rnam par bshad pa dang / mjug bsdu ba'o/ /rnam par bshad pa yang rnam pa gnyis te/ mi mthun pas rnam par bshad pa dang / rjes su mthun pa'i rnam par bshad pa'o/ /dang po yang rnam pa gnyis te/ kun nas nyon mongs pa'i mtshan nyid du gtogs pa la brten nas gcig pa nyid du 'dzin pa rnam par gzhig pa dang / spyi'i mtshan nyid la brten nas tha dad pa nyid du 'dzin pa rnam par gzhig pa'o/ /'di ni dang po ste/ 'di ltar don dam pa'i bden pa kun nas nyon mongs pa nyid du lta bar 'gyur te/ 'du byed rnams kyi mtshan nyid las tha dad du gyur pa med pa'i phyir kun nas nyon mongs pa bzhin du 'gyur ro zhes bya ba'i tha tshig go/ /blo gros shin tu rnam dag gal te don dam pa'i bden pa'i mtshan nyid dang / 'du byed rnams kyi mtshan nyid gcig tu tha dad pa yin par gyur na mtshan nyid thams cad kyi spyi'i mtshan nyid la don dam pa'i bden pa'i mtshan nyid ces bya ba ma yin pa nyid du 'gyur ro zhes bya ba ni gnyis pa spyi'i mtshan nyid kyis don dam pa la brten nas tha dad pa nyid du 'dzin pa rnam par gzhig pa'o/ /chos thams cad ni mtshan nyid rnam pa gnyis dang ldan te / dang po ni rang gi mtshan nyid de/ ji ltar gzugs ni mthong ba'i mtshan nyid do zhes bya ba nas rnam par shes pa ni rnam par rig pa'i mtshan nyid do zhes bshad pa lta bu'o/ /'di ltar kun du khyab pa ma yin pa'i phyir rang gi mtshan nyid ces bya'o/ /gnyis pa ni spyi'i mtshan nyid de/ 'di lta ste/ chos thams cad kyi bdag med pa nyid la sogs pa'o/ /'di ltar de bzhin nyid kyis don dam pa'i chos rnams kun la khyab pa'i phyir spyi'i mtshan nyid ces bya'o/ /tha dad pa nyid du 'dzin pa gzhig pa 'dir gal te don dam pa'i bden pa'i 'du byed rnams kyi mtshan nyid las tha dad par gyur pa zhig yin na 'o na ni 'du byed rnams kyi spyi'i mtshan nyid ma yin par 'gyur te/ 'du byed de dag dang shin tu tha dad pa nyid du gyur pa'i phyir ro/ /blo gros shin tu rnam dag 'dir don dam pa'i mtshan nyid kun nas nyon mongs pa'i mtshan nyid du gtogs pa ma yin pa dang / 'du byed rnams kyi spyi'i mtshan nyid la don dam pa'i bden pa'i mtshan nyid zhes bya ba nyid du 'gyur bas zhes bya ba ni/ gnyis pa rjes su mthun par rnam par bshad pa'i rigs gcig pa dang / tha dad pa nyid du 'dzin pa rnam par gzhig pa ste/ mdo las 'byung ba bzhin du rig par bya'o/ /de'i phyir don dam pa'i bden pa'i mtshan n yid 'du byed rnams kyi mtshan nyid las tha dad pa'i mtshan nyid med do zhes zer ba yang rigs pa ma yin la don dam pa'i bden pa'i mtshan nyid dang 'du byed rnams kyi mtshan nyid gcig tu tha dad pa'i mtshan nyid do zhes zer ba yang rigs pa ma yin te zhes bya ba la sogs pa ni gnyis pa gcig pa dang / tha dad pa nyid du 'dzin pa'i bstan pa'i mjug bsdu ba'o/ /'di yang rnam pa gnyis te/ rigs pas gnyis ka'i mjug cig car bsdu ba dang / brtags pa smos nas bzlas te/ mjug bsdu ba ste/ 'di ni gnyis ka'i mjug cig car bsdu ba'o/ /gal te de la de dag 'di skad ces don dam pa'i bden pa'i mtshan nyid dang 'du byed rnams kyi mtshan nyid tha dad pa med do zhes zer ba dang / don dam pa'i bden pa'i mtshan nyid dang / 'du byed rnams kyi mtshan nyid gcig tu tha dad do zhes zer na/ rigs pa de thams cad tshul bzhin du spyod pa ma yin pas/ yang dag pa'i tshul ji lta ba bzhin du byed pa ma yin par rig par bya'o zhes bya ba ni gnyis pa brtags pa smos nas gcig pa dang / tha dad pa nyid du 'dzin pa bshad pa bzlas te/ mjug bsdu ba'o/ /blo gros shin tu rnam dag gal te don dam pa'i bden pa'i mtshan nyid dang / 'du byed rnams kyi mtshan nyid tha dad pa med par gyur na ni ji ltar don dam pa'i bden pa'i mtshan nyid dang / 'du byed rnams kyi mtshan nyid la bye brag med pa de bzhin du 'du byed kyi mtshan nyid thams cad kyang bye brag med par 'gyur zhes bya ba 'di man chad ni rnam grangs gsum pa 'du byed tha dad pa med pa dang / bdag med pa la sogs pa la brten nas/ gcig pa dang / tha dad pa nyid du 'dzin pa 'jig par mdzad pa ston to/ /'di yang rnam pa gnyis su dbye ste/ rnam par gzhig pa dang / mjug bsdu ba'o/ /rnam par gzhig pa yang rnam pa gnyis bstan te/ mi mthun par bshad pas skyon bstan pa dang / blo gros shin tu rnam dag ces bya ba man chad kyis rjes su mthun par bshad pas skyon bstan pa'o/ /dang po yang rnam pa gnyis su dbye ste/ mtshan nyid rnam pa gnyis la brten nas tha dad pa med par 'dod pa'i skyon rnam par gzhig pa dang / mtshan nyid rnam pa gnyis la brten nas tha dad par 'dod pa'i skyon rnam par gzhig pa'o/ /tha dad pa med par 'dod pa'i skyon rnam par gzhig pa bstan pa yang rnam pa gnyis kyis bstan te/ 'du byed rnams bye brag tu gyur pa la brten nas tha dad pa med par 'dod pa'i skyon rnam par gzhig pa dang / yang don dam pa yongs su tshol ba la brten nas tha dad pa med par 'dzin pa rnam par gzhig pa'o/ /'di ni dang po ste/ 'di ltar gal te don dam pa'i bden pa dang phung po dang skye mched la sogs pa bye brag tu gyur pa med par gyur pa zhig yin na ni/ /phung po la sogs pa yang phung po la sogs pa'i bye brag tha dad par gyur pa med par 'gyur zhes bya ba'i tha tshig go/ /rnal 'byor spyod pa dag 'du byed rnams la ji ltar mthong ba dang ji ltar thos pa dang ji ltar bye brag phyed pa dang / ji ltar rnam par shes pa las dus gzhan du yang don dam pa yongs su tshol bar yang mi 'gyur ro zhes bya ba ni/ gnyis pa yang don dam pa yongs su tshol ba la brten nas tha dad pa med par 'dod pa'i skyon rnam par gzhig pa ston te/ 'di ltar gal te don dam pa'i bden pa dang / 'du byed rnams kyi mtshan nyid tha dad pa ma yin par 'gyur ba zhig yin na ni/ mthong ba la sogs pa'i yul de dag ji ltar mthong ba bzhin du de dag gi don khong du chud zin pas phyis don dam pa yongs su tshol ba mi rigs na/ yang don dam pa yongs su tshol ba yang yod pa'i phyir gcig pa nyid ma yin par rig par bya'o/ /mthong ba dang thos pa dang bye brag phyed pa dang / rnam par shes pa'i don ni sngar bshad pa bzhin no/ /gal te don dam pa'i bden pa'i mtshan nyid dang / 'du byed rnams kyi mtshan nyid tha dad pa yin par gyur na ni/ 'du byed rnams kyi bdag med pa tsam dang / ngo bo nyid med pa tsam gyis rab tu phye ba gang yin pa de don dam pa'i bden pa'i mtshan nyid ma yin par gyur na zhes bya ba 'di man chad ni/ gnyis pa bdag med pa la sogs pa la brten nas gcig pa dang tha dad par 'dzin pa rnam par gzhig pa ston to/ /'di yang rnam pa gnyis te/ bdag med pa tsam la sogs pa la brten nas tha dad par 'dzin pa rnam par gzhig pa dang / bye brag gi mtshan nyid grub pa ma yin pas tha dad par 'dod pa rnam par gzhig pa'o/ / 'di ni dang po ste/ 'di ltar bcom ldan 'das kyis chos rnams thams cad bdag med pa tsam mo/ /chos rnams thams cad ni ngo bo nyid med pa tsam mo zhes gsungs pas/ de'i phyir don dam pa ni 'du byed thams cad dang tha dad pa yang ma yin no/ /tha dad par gyur na ni 'du byed rnams kyi bdag med pa tsam dang / rang gi ngo bo nyid med pa tsam gyis rab tu phye ba ma yin par 'gyur ro zhes bya ba'i tha tshig go/ /gzhan yang dus gcig tu bye brag gi mtshan nyid grub pa nyid du 'gyur te/ 'di lta ste/ kun nas nyon mongs pa'i mtshan nyid dang / rnam par byang ba'i mtshan nyid do zhes bya ba ni gnyis pa bye brag gi mtshan nyid grub pa ma yin pas tha dad pa'i 'dod pa'i rnam par gzhig pa'o/ /mdo'i tshig 'di yang so so nas bshad pa mi mthun te/ kha cig na re gzhan yang dus gcig tu bye brag gi mtshan nyid grub pa nyid du 'gyur te zhes bya ba la sogs pa ni ming la sogs pa'i dngos po'i gzugs brnyan yongs su bsal bas mtshan ma med pa'i de bzhin nyid mngon du gyur pa ste/ de'i phyir mtshan ma med pa mngon du gyur pa na mtshan ma rnams mngon du snang bar mi 'gyur la mtshan ma rnams mngon du gyur pa'i tshe ni mtshan ma med pa mngon du snang bar ma gyur pas/ de'i phyir dus gcig tu grub pa nyid du rnam par gzhag par mi bya'o/ /gal te 'og nas bshad pa ltar gcig tu tha dad par gyur pa zhig yin na ni dus gcig tu bye brag gi mtshan nyid grub pa nyid du 'gyur ba'i rigs te/ mtshan nyid so so tha dad pa'i phyir gzugs dang sgra la sogs pa'i ji lta ba bzhin no zhe'o/ /kha cig na re gzhan yang dus gcig tu bye brag gi mtshan nyid kun nas nyon mongs pa dang / rnam par byang ba'i chos gnyis 'grub par 'gyur ba'i rigs te/ de ci'i phyir zhe na/ don dam pa dang / 'du byed yongs kyis tha dad pa'i phyir des na rnam par byang ba'i mchog tu gyur pa mthong ba'i tshe yang kun nas nyon mongs pa spong bar 'gyur ba'i mi rigs la/ kun nas nyon mongs pa mthong ba'i tshe yang rnam par byang ba la sgrib par mi 'gyur ba'i rigs so zhe'o/ /kha cig na re don dam pa dang / 'du byed tha dad par gyur na ni/ dus gcig tu bye brag gi mtshan nyid chos rnams thams cad gzod ma nas kun nas nyon mongs pa dang / gzod ma nas rnam par byang ba nyid du 'grub par 'gyur ba'i rigs na/ 'on kyang mdo sde dag las de dag gi ngo bo nyid rang bzhin gyis rnam par dag pa'o zhes gsungs pas/ de'i phyir 'du byed rnams dang / don dam pa'i bden pa tha dad pa ma yin par rig par bya'o/ /yang na kun rdzob ni don dam pa'o/ /don dam pa ni kun rdzob bo zhes brjod par mi bya ste/ yongs kyis so so tha dad pa'i phyir ro zhe'o/ /slob dpon yang dag bden pa'i rnam par bshad pa yod pa ni mangs kyis dogs nas 'dir ma bstan to/ /blo gros shin tu rnam dag 'di 'du byed kyi mtshan nyid thams cad bye brag yod pa yin gyi bye brag med pa ma yin pa zhes bya ba 'di man chad ni gnyis pa rjes su mthun par rnam par bshad pa'i rigs pas/ gcig pa dang tha dad par 'dzin pa rnam par gzhig par mdzad do/ /'di yang rnam pa gnyis te/ mtshan nyid rnam pa gnyis la brten nas tha dad pa ma yin par 'dzin pa de rnam par gzhig pa dang / mtshan nyid rnam pa gnyis la brten nas tha dad par 'dzin pa de rnam par gzhig pa'o/ /dang po'i mtshan nyid de rnam pa gnyis po de nyid las rnam pa gnyis su dbye bas rnam pa gnyis su 'gyur te/ 'di ni dang po bdag nyid bye brag tu gyur pa la brten nas tha dad pa ma yin par 'dzin pa de 'jig par mdzad pa'o/ /rnal 'byor pa dag 'du byed rnams la ji ltar mthong ba dang / ji ltar thos pa dang / ji ltar bye brag phyed pa dang / ji ltar rnam par shes pa las dus gzhan du don dam pa yongs su tshol bar byed pa zhes bya ba gnyis pa yang don dam pa yongs su tshol bar byed pas tha dad pa ma yin par 'dzin pa 'jig par mdzad pa ste/ mdo nyid kyis brda phrad par zad do/ /gzhan yang 'du byed rnams kyi bdag med pa tsam dang / ngo bo nyid med pa tsam gyis rab tu phye ba gang yin pa la don dam pa'i mtshan nyid ces bya ba 'di man chad ni gnyis pa mtshan nyid rnam pa gnyis la brten nas tha dad par 'dzin pa rnam par gzhig par mdzad pa ston te/ 'di ni dang po bdag med pa tsam gyis rab tu phye ba'i don gyis tha dad par 'dzin pa rnam par gzhig pa'o/ /gzhan yang dus gcig tu kun nas nyon mongs pa dang rnam par byang ba gnyis kyi mtshan nyid kyi bye brag gi mtshan nyid grub pa ma yin pas zhes bya ba ni/ gnyis pa bye brag gi mtshan nyid ma yin pa la brten nas tha dad par 'dzin pa 'jig par mdzad pa ste/ mdo dag las ji skad du chos rnams thams cad ni rang bzhin gyis rnam par dag pa tsam yin pa'i phyir ro zhes gsungs pa lta bu'o/ /de'i phyir don dam pa'i bden pa'i mtshan nyid dang / 'du byed rnams kyi mtshan nyid tha dad pa med do zhes zer ba dang / tha dad do zhes zer ba de ni rigs pa ma yin te zhes bya ba 'di man chad ni skyon rnam pa gnyis bstan pa'i mjug bsdu ba'o/ / 'di yang rnam pa gnyis te/ rigs pas spyi'i mjug bsdu ba dang / brtags pa smos nas bzlas te mjug bsdu ba'o/ /'di ni dang po rigs pas gcig pa dang tha dad pa nyid du 'dzin pa rnam par gzhig pa'i mjug spyir bsdu ba'o/ /gal te de la 'di skad ces don dam pa'i bden pa'i mtshan nyid dang 'du byed rnams kyi mtshan nyid tha dad pa med do zhe'am/ tha dad do zhes zer na rigs pa des thams cad tshul bzhin du spyod pa ma yin pas/ yang dag pa'i tshul ji lta ba bzhin byed pa ma yin par rig par bya'o zhes bya ba ni gnyis pa brtags pa smos nas bzlas te 'jug pa gcig pa dang / tha dad par 'dzin pa 'jig par mdzad pa ste/ mdo nyid kyis brda phrad par zad do/ /bstan bcos sangs rgyas kyi rang bzhin bstan pa dang / ngo bo nyid med pa rnam pa gsum bstan pa dang / rnal 'byor spyod pa'i sa las de bzhin nyid dang mtshan nyid gcig pa'am tha dad par gyur na skyon rnam pa gsum du 'gyur ro zhes bstan pa dang / gzhan yang bstan bcos sangs rgyas kyi rang bzhin bstan pa las chos dang gang zag la brten nas/ don dam pa dang kun rdzob gcig pa dang tha dad pa nyid du 'dzin pa 'jig pa dag ston te/ mangs kyis dogs nas 'dir ma brjod do/ /blo gros shin tu rnam dag dper na dung gi dkar ba nyid ni dung dkar ba gcig pa'am/ tha dad pa'i mtshan nyid du gdags par sla ba ma yin no zhes bya ba 'di man chad ni gsum pa dpe smos nas bzlas te rnam par bshad pa ston te/ dpe rnam pa bcus ston pas de nyid las rnam pa bcur dbye'o/ /de ltar rnam pa bcu yod kyang go rims bzhin du yul rnam pa drug dang sbyar nas bshad par bya ste/ de yang dang po gnyis ni gzugs kyi dbang du mdzad nas so/ /de'i 'og ma gcig ni sgra'i dbang du mdzad nas so/ /de'i 'og ma gcig ni dri'i dbang du mdzad nas so/ /de'i 'og ma gnyis ni ro'i dbang du mdzad nas so/ /de'i 'og ma gnyis ni reg bya'i dbang du mdzad nas so/ /tha ma gnyis ni chos kyi dbang du mdzad nas so/ /'di ni dang po dung gi dkar ba gcig pa dang / tha dad pa'i dper bstan pa'o/ /dung ni 'du byed rnams kyi mtshan nyid kyi dper bstan te/ yul bzhi po dag tha dad pa'i phyir ro/ /dkar ba nyid ni don dam pa'i bden pa'i dper bstan te/ gzugs kyi ngo bo nyid kun la khyab pa'i phyir ro/ /ji ltar dung dang dkar ba nyid gcig ces byar mi rung ba bzhin du yul bzhi po'i gzugs kyi ngo bo nyid kyang spyi dang bye brag tha dad pa'i phyir ro/ /yang na spyi dang bye brag tha dad pa'i phyir tha dad ces byar yang mi rung ste/ tha dad pa'i bdag nyid med pa'i phyir ro/ /slob dpon yang dag bden pa'i brjed byang las gsum pa dpe brjod pa ni/ dbang po rnon po dang rtul po dag gi thabs yongs su bstan pa yin te/ gal te don 'ba' zhig bshad pa la/ dpe rnam pa ma bzhag na dbang po rnon po nyi tshe 'jug par nus kyi dbang po rtul po dag gis 'jug par mi nus so/ /gal te dpe dang don gnyis ka phun sum tshogs par bstan na dbang po rnon po dang / rtul po gnyis kas 'jug par 'gyur ba'i phyir dngos po zab pa ma yin pa la ltos nas tshul zab mo mtshon pa yin no/ /'dir yul drug po dag dper bstan pa yang / gal te rnam pa gcig khong du chud na gzhan ni zlas shes par 'gyur bas so/ /gal te dkar ba nyid dang dung ni gcig pa nyid do zhe na/ 'o na ni gzugs nyi tshe dung yin par 'gyur gyi yul gzhan gsum po dag gi 'byung ba chen po bzhi po dag ni dung ma yin par 'gyur ba'i rigs so/ /gzhan yang ji ltar dkar ba nyid mig nyi tshe'i yul yin pa ltar dung yang de bzhin du 'gyur ba'i rigs so/ /yang na ji ltar dkar ba de dngos po gzhan dag la khyab pa ltar dung yang de bzhin du 'gyur ba'i rigs na/ dung ni de lta ma yin pas dkar ba nyid kyang de bzhin du dngos po dag la khyab par mi 'gyur ro/ /de lta bu'i don ni med pa'i phyir gcig ces byar yang mi rung ngo / /gal te tha dad do zhe na de yang don du mi rung ste/ dkar ba nyid mthong ba na dung yin par shes pa'i rigs te/ bdag nyid tha dad pa'i phyir ro/ /gzhan yang dkar ba nyid kyi gnas med par 'gyur te/ dung dang 'brel pa med pa'i phyir ro/ /ser po nyid gser dang / de bzhin du reg bya'i bar du yang de bzhin no zhes 'byung ste/ zhib tu de nyid las bshad pa bzhin no/ /dung gi dkar ba nyid ji lta ba bzhin du gser gyi ser po nyid kyang de bzhin no zhes bya ba ni gnyis pa gser dang ser po nyid gcig pa nyid dang tha dad pa'i dpe ste/ snga ma bzhin du rig par bya'o/ /rgyu'o rgyud mangs kyi sgra'i snyan pa nyid kyang rgyu'o rgyud mangs kyi sgra dang gcig pa'i mtshan nyid dam tha dad pa'i mtshan nyid ces gdags par sla ba ma yin no zhes bya ba ni gsum pa rgyu'o rgyud mangs kyi sgra dang / gcig pa dang tha dad pa gnyis ka ma yin pa'i dpe ste/ 'di ltar sgra dang snyan pa nyid gcig ces byar mi rung ste/ spyi dang bye brag tha dad pa'i phyir ro/ /de la sgra ni spyi'o/ /snyan pa nyid bye brag go/ /yang na sgra dang snyan pa tha mi dad pa'i phyir ro/ /tha dad ces byar yang mi rung ste/ tha dad pa'i bdag nyid med pa'i phyir ro/ /dgongs pa zab mo rnam par dgrol ba'i mdo dang sbyar na de las ni rgyu'o rgyud mangs dang sgra las gcig pa dang / tha dad pa ma yin par rnam par 'byed de mdo de dang sbyar na rgyu'o / /rgyud mangs ni spyi'i yin te/ yul rnam pa lnga dang ldan pa'i phyir ro/ /sgra ni bye brag yin te/ de'i phyogs gcig yin pa'i phyir ro/ /tshig nges par 'grel pa'i mdo las kyang 'di dag don mthun par bshad de/ de las ni pi wang dang / sgra zhes 'byung ngo / /a ka ru nag po'i dri zhim pa nyid kyang a ka ru nag po de dang gcig pa'i mtshan nyid dam tha dad pa'i mtshan nyid ces gdags par sla ba ma yin no zhes bya ba ni bzhi pa a ka ru dang dri zhim pa gcig pa dang / tha dad pa ma yin pa'i dpe ste/ a ka ru dang dri zhim pa ni gcig ces byar mi rung ste/ spyi dang bye brag tha dad pa'i phyir ro/ /tha dad ces byar yang mi rung ste/ tha dad pa'i bdag nyid med pa'i phyir ro/ /na le sham gyi tsha ba nyid kyang na le sham de dang gcig pa'i mtshan nyid dam tha dad pa'i mtshan nyid ces gdags par sla ba ma yin no zhes bya ba ni lnga pa na le sham dang tsha ba nyid gcig pa dang tha dad pa ma yin pa'i dpe ste/ na le sham dang tsha ba nyid gcig ces byar mi rung ste/ spyi dang bye brag tha dad pa'i phyir ro/ /tha dad ces byar yang mi rung ste/ tha dad pa'i bdag nyid med pa'i phyir ro/ /dgongs pa zab mo rnam par dgrol ba'i mdo las pi pi ling dang tsha ba nyid ces 'byung ngo / /na le sham dang tsha ba nyid ji lta ba bzhin du a ru ra'i bska ba nyid kyang de bzhin no zhes bya ba ni drug pa a ru ra dang bska ba gcig pa dang tha dad pa ma yin pa'i dpe ste gong ma bzhin du rig par bya'o/ /dper na shing bal gyi 'dab ma'i 'jam pa nyid kyang shing bal gyi 'dab ma dang gcig pa'i mtshan nyid de/ tha dad pa'i mtshan nyid ces gdags par sla ba ma yin no zhes bya ba ni bdun pa shing bal dang 'jam pa nyid gcig pa dang tha dad pa ma yin pa'i dpe ste/ de la shing bal zhes bya ba ni rgyud de bshad pa las shu dag dang / lcang ma'i me tog la bya'o zhe'o/ /'dab ma dang 'jam pa nyid gcig ces byar mi rung ste/ spyi dang bye brag tha dad pa'i phyir ro/ /tha dad ces byar yang mi rung ste/ tha dad pa'i bdag nyid med pa'i phyir ro/ /dper na mar la mar gyi snying khu yang mar dang gcig pa'i mtshan nyid dam tha dad pa'i mtshan nyid ces gdags par sla ba ma yin no zhes bya ba ni/ brgyad pa mar dang snying khu gcig pa dang tha dad pa ma yin pa'i dpe ste/ 'dir snying khu nyi tshe smos pa ni reg bya 'jam pa nyid bzung bar dgongs pa'o/ /mar dang snying khu nyid gcig ces byar mi rung ste/ spyi dang bye brag tha dad pa'i phyir ro/ /tha dad ces byar yang mi rung ste/ tha dad pa'i bdag nyid med pa'i phyir ro/ /slob dpon yang dag bden pa'i brjed byang las/ mar dang snying khu zhes gsungs pa ni reg bya smos pa yin te/ ro brjod pa ni ma yin no zhe'o/ /dgongs pa zab mo rnam par dgrol ba'i mdo dang / tshig nges par 'grel pa'i mdo las kyang mdo 'di dang mthun par 'byung ngo / /gzhan yang dper na 'du byed thams cad la mi rtag pa nyid dang / zag pa dang bcas pa'i chos thams cad la sdug bsngal ba nyid dang / chos thams cad la gang zag gi bdag med pa nyid kyang 'du byed la sogs pa de dag dang gcig pa'i mtshan nyid dam tha dad pa'i mtshan nyid ces gdags par sla ba ma yin no zhes bya ba ni/ dgu pa don dang dngos po gcig pa dang tha dad pa ma yin pa'i dpe ste/ de la 'du byed thams cad la mi rtag pa nyid ces bya ba la 'du byed ni zag pa dang bcas pa thams cad de mtshan nyid bzhi po de dag gis rnam par 'gyur bar byed pa'i phyir mi rtag pa zhes bya ste/ de'i phyir mya ngan las 'das pa chen po'i mdo las 'du byed rnams ni mi rtag ste/ de ni skye zhing 'gag pa nyid/ /ces gsungs so/ /zag pa dang bcas pa'i chos thams cad la sdug bsngal ba nyid ces bya ba ni zag pa dang bcas pa'i chos rnams gnas ngan len dang 'brel bas sdug bsngal ba zhes bshad de/ bstan bcos mngon pa las ji skad bstan pa bzhin no/ /chos thams cad la gang zag gi bdag med pa nyid ces bya ba la chos thams cad ces bya ba ni 'dus byas dang 'dus ma byas kyi chos rnams sdud pa'o/ /gang zag ces bya bas ni yang sbyor zhes bya ste/ 'di ltar sems can rnams las dge ba dang / mi dge ba'i dbang gis yang nas yang du 'gro ba len pas yang sbyor zhes bya'o/ /bdag med pa'i don yang rnam pa gnyis yod de sems can stong pa nyid dang / chos stong pa nyid do/ /'dir ni snga ma bstan pa yin gyi phyi ma ma yin pas de'i phyir gang zag gi bdag med pa zhes gsungs pa yin no/ /don gyis rnam pa bzhi yod pa yin te/ stong pa nyid ci'i phyir ma gsungs/ smras pa 'dir chos kyi phyag rgya rnam pa gsum gyi dbang gis te/ 'di lta ste/ zag pa dang bcas pa dag ni thams cad kyang sdug bsngal ba dang / 'dus byas rnams ni mi rtag pa yin pa dang / chos rnams thams cad ni bdag med pas khyab pa yin la/ stong pa nyid ni de ltar btab pa med pa'i phyir 'dir ma gsungs so/ /de la mi rtag pa la sogs pa'i ngo bo nyid 'du byed la sogs pa'i chos dang gcig ces byar mi rung ste/ dngos po dang don tha mi dad pa'i phyir ro/ /tha dad ces byar yang mi rung ste/ tha dad pa'i bdag nyid med pa'i phyir ro/ /de'i phyir slob dpon dbyig gnyen gyis mdzad pa'i tshig le'ur byas pa sum cu pa las/ gzhan gyi dbang gi ngo bo nyid/ /rnam rtog yin te rkyen las byung / /grub pa de la snga ma'o/ /rtag tu med par gyur te yin/ /de'i phyir de nyid gzhan dbang las/ /gzhan min gzhan ma yin pa min/ /mi rtag la sogs bzhin du brjod/ /de ma mthong bar de mi mthong / /zhes bshad do/ /'di nyid kyi 'grel pa las yongs su grub pa ni gzhan gyi dbang dang tha dad pa yang ma yin tha mi dad pa yang ma yin no/ /gal te tha dad pa zhig yin na/ de bzhin nyid de'i yang dag pa'i ngo bo nyid ma yin pa nyid du 'gyur ro/ /tha dad pa ma yin na ni ngo bo nyid 'di mi rtag par yang 'gyur ro/ /de gnyis ka yang yongs su dag pa'am yongs su dag pa ma yin pa'i dmigs par 'gyur te/ 'o na ni rtsa ba dang rjes las thob pa'i ye shes kyi nus pa yang bye brag med par 'gyur ro/ /ji ltar ngo bo nyid gnyis tha dad pa yang ma yin/ gcig pa yang ma yin zhe na/ mi rtag pa dang bdag med pa nyid la sogs pa ji lta ba bzhin te/ mi rtag pa nyid la sogs pa 'du byed la sogs pa'i chos dang tha dad par gyur pa zhig yin na ni chos de dag mi rtag pa la sogs pa ma yin par 'gyur ba'i rigs so/ /tha dad pa ma yin na ni de dag spyi'i mtshan nyid ma yin par 'gyur te/ des na dpe 'dis yongs su grub pa gzhan gyi dbang de dang gcig pa yang ma yin tha dad pa yang ma yin pa bstan pa yin no/ /chos dang chos nyid ni gdon mi za bar tshul de ltar yin te/ don dam pa dang kun rdzob ni phan tshun ltos pa las yod pa'i phyir ro zhes 'byung ngo / /gzhan yang dper na 'dod chags kyi ma zhi ba'i mtshan nyid dang / kun nas nyon mongs pa'i mtshan nyid kyang 'dod chags de dang gcig pa'i mtshan nyid dam/ tha dad pa'i mtshan nyid ces gdags par sla ba ma yin no/ /'dod chags kyi ji lta ba bzhin du zhe sdang dang gti mug gi yang de yang rig par bya'o zhes bya ba ni bcu pa nyon mongs pa nyid dang mtshan nyid gcig pa dang / tha dad pa ma yin pa'i dpe bstan pa'o/ /'dod chags dang / zhe sdang dang / gti mug dag ni mtshan nyid gnyis dang ldan te/ dang po rang gi mtshan nyid ni 'di lta ste/ 'dod chags dang / zhe sdang la sogs pa so so tha dad pa'i phyir ro/ /gnyis pa spyi'i mtshan nyid ni 'di lta ste/ kun nas nyon mongs pa la sogs pa de dag thun mong du yod pa'i phyir ro/ /spyi'i mtshan nyid kyang rnam pa gnyis te/ ma zhi ba'i mtshan nyid ni 'di ltar g.yo ba'i phyir ro/ /kun nas nyon mongs pa'i mtshan nyid ni mtshungs par ldan pa dang / dmigs par bya ba'i 'ching ba gnyis 'dres pa'i phyir ro/ /'di ltar 'dod chags la sogs pa de dag gi ngo bo nyid dang mtshan nyid tha dad pa'i phyir gcig ces byar yang mi rung ngo / /'dres pa'i 'dod chags la sogs pa tha dad pa'i phyir tha dad ces brjod du mi rung ngo / /'dod chags dang zhe sdang la sogs pa re re la yang ma zhi ba'i mtshan nyid kun nas nyon mongs pa'i mtshan nyid yod de/ sde pa rnams kyi gzhung lugs kun las kyang chos kyi skye mched kyis bsdus par 'dod la/ 'dir 'du byed la sogs pa thams cad ni mi rtag pa nyid la sogs pa'i spyi'i mtshan nyid byed do zhes bshad pa'i rigs pa dang sbyar na skye mched bcu gnyis kun rtogs par 'dra na/ ci'i phyir mod 'di las chos kyi skye mched nyid ces bsdus par gsungs she na/ smras pa/ thams cad yod par smra ba dag ni/ 'du byed thams cad dang mi rtag pa la sogs pa thams cad kyang / skye mched bcu gnyis kyis bsdus par bshad ce na chos kyi skye mched de yang bye brag kho na'i yin gyi spyi'i ni ma yin no/ /'di ltar tshor ba dang / 'du shes dang / 'du byed dang / 'dus ma byas rnam pa gsum dang / rnam par rig byed ma yin pa'i gzugs dang bdun po 'di dag ni gzhan skye mched bcu gnyis po dag tu ma 'dus so zhes zer ba'i phyir ro/ /mdo sde pa'i gzhung gis chos kyi skye mched ni rnam pa gnyis te/ bye brag dang / spyi'i zhes bshad de / bye brag gi chos kyi skye mched ni phal cher thams cad yod par smra ba dag 'dod pa dang mthun no/ /de la bye brag ni de dag gzhung gis byas pa ma yin pa ni gzugs kyang ma yin sems kyang ma yin no zhes zer ro/ /spyi'i chos kyi skye mched ni/ de dag gi gzhung gis bcu gnyis po thams cad ni chos kyi skye mched ces bya ste/ yid kyi rnam par shes pas dmigs par bya ba'i yul ma yin pa'i phyir ro zhe'o/ /'dir theg pa chen po'i bstan pa dang sbyar na phal cher mdo sde pa 'dod pa dang mthun par spyi dang bye brag gnyis ka yang chos kyi skye mched ces bya'o zhes bshad de/ de'i phyir rnam par rig pa tsam du grub pa'i bstan bcos las/ gzugs la sogs pa'i rnam par shes pa lnga po de dag ni/ gzugs la sogs pa kho na rnam par rig pas/ gzugs la sogs pa'i rnam par shes pa zhes bya'o/ /chos kyi rnam par shes pa ni spyi dang bye brag tu chos thams cad rnam par rig pa'i phyir chos kyi rnam par shes pa zhes bya'o/ /yang chos kyi reg bya rnam par rig pa'i phyir chos kyi rnam par shes pa'i ming 'thob pa yin no zhes bshad de/ 'di dang sbyar na theg pa chen po'i bstan bcos las/ chos kyi skye mched rnam pa gnyis dang ldan par mngon no/ /'dir yang dag pa'i don du na 'du byed thams cad ces bya ba la sogs pa gsungs pa dag ni skye mched bcu gnyis su gtogs pa yin te/ mdo sde 'di las re zhig yid kyi rnam par shes pas dmigs par bya ba dang chos kyi skye mched du gtogs pa'i don rnam pa gnyis kyi dbang du mdzad pa'i phyir 'du byed la sogs pa de dag thams cad la chos kyi skye mched ces gsungs pa yin no/ /de bzhin du blo gros shin tu rnam dag don dam pa'i bden pa'i mtshan nyid dang / 'du byed rnams kyi mtshan nyid gcig pa'i mtshan nyid dam tha dad pa'i mtshan nyid ces gdags par mi nus so zhes bya ba ni bzhi pa dpe dang don du sbyar ba ste/ mdo nyid kyis brda phrad par zad do/ /blo gros shin tu rnam dag ngas ni ji ltar phra ba mchog tu phra ba/ zab pa mchog tu zab pa/ rtogs par dka' ba mchog tu rtogs par dka' ba gcig pa dang tha dad pa nyid kyi mtshan nyid las yang dag par 'das pa'i don dam pa'i bden pa'i mtshan nyid mngon par rdzogs par sangs rgyas te/ mngon par rdzogs par sangs rgyas nas kyang gzhan dag la bsnyad cing rab tu bstan/ rnam par bshad/ rnam par gdags par byas/ gsal bar byas so zhes bya ba ni lnga pa mjug bsdu ba ste/ pha rol gyi the tshom gcod pa yin pa de bzhin gshegs pas bstan dgos so/ /shin tu zab pa'i don dam pa de ji ltar khong du chud par bya snyam pa la/ de'i phyir yang de ltar gcig pa dang / tha dad pa nyid las yang dag par 'das pa'i mtshan nyid mngon par rdzogs par sangs rgyas nas gzhan dag la bsnyad do zhes gsungs pa yin no/ /don dam pa de yang dad pa bcu'i mdun rol gyi phyi rol pa'i so so'i skye bo rnams kyi spyod yul las 'das pas de dag gis bsnyad par bya ba ma yin pa dang / de dag gis rig par bya ba ma yin pa'i phyir phra ba mchog tu phra ba zhes gsungs pa yin no/ /sa'i mdun rol gyi 'di pa'i so so'i skye bo'i sa las 'das pas/ tshig gis brjod par bya ba ma yin pa dang / bsam pas reg par 'gyur ba ma yin pa'i phyir zab pa mchog tu zab pa zhes gsungs so/ /mnyam pa nyid du byang chub pa man chad kyi byang chub sems dpa' rnams kyi sa las 'das pas tshig gis brjod pa ma yin pa dang / bsam pas reg par bya ba ma yin pa'i phyir rtogs par dka' ba mchog tu rtogs par dka' ba zhes gsungs te/ bskal pa grangs med pa gsum gyi brjod pa dang / bsam pa yang bsdu ba'i phyir tshig drug gsungs pa yin pas ci rigs su shes par bya'o/ /de nas bcom ldan 'das kyis don de nyid yang dag par bstan pa'i phyir tshigs su bcad pa 'di dag gsungs so zhes bya ba 'di man chad ni gnyis pa tshigs su bcad pas mdor bstan pa zhes bya ba ston to/ /'di yang rnam pa gnyis te/ tshigs su bcad pa gleng bslang ba dang / tshigs su bcad pa smos nas mdor bstan pa ste/ 'di ni dang po'o/ /'du byed khams dang don dam mtshan nyid ni/ /gcig dang tha dad bral ba'i mtshan nyid de/ /gcig dang tha dad nyid du gang rtogs pa/ /de dag tshul bzhin du ni bzhugs ma yin/ /sems can mtshan mas bcings pa gang dag dang / /gnas ngan len gyis bcings pa gang yin pa/ /zhi gnas lhag mthong dag ni goms byas na/ /de nas rnam par grol ba 'thob par 'gyur/ /zhes bya ba ni gnyis pa tshigs su bcad pa smos nas mdor bstan pa nyid do/ /'di yang rnam pa gsum du dbye ste/ dang po tshig gnyis kyis ni don zab pa nyid du bsngags pa nyid do/ /tshig bar ma bzhis ni mngon par zhen pa dag skyon dang bcas par bstan to/ /tha ma'i tshig gnyis kyis ni gang rnal 'byor bsgom pa de dag 'bras bu thob pa nyid du bstan to/ /de la 'du byed khams zhes bya ba la 'du byed ni 'di lta ste/ rnam par gyur pa 'dus byas kyi 'du byed rnams so/ /khams ni ngo bo nyid kyi don to/ /'di yang bshad pa rnam pa gnyis yod de/ kha cig na re 'dus byas kyi rang gi ngo bo nyid ni khams zhes bya'o zhe'o/ /kha cig na re 'du byed rnams ni de bzhin nyid kyis ngo bo nyid byed pas/ de'i phyir 'du byed kyi khams zhes bya'o zhes bshad de/ des ni 'du byed kyi khams don dam pa yin par bstan to/ /tshig bar ma bzhis mngon par zhen pa dag la skyon yod par bstan pa yang 'di lta ste/ gcig pa dang tha dad pa nyid du 'dzin pa de dag ni thams cad tshul bzhin ma yin pa'i phyir/ 'ching ba gnyis po dag gis bcings par gyur pa yin te/ 'ching ba gnyis kyi don ni gong du bstan pa bzhin no/ /tha ma'i tshig gnyis kyis rnal 'byor pa bsgom pa dag 'bras bu thob par bstan pa yang 'di lta ste/ rmongs pa ma yin pa gang yin pa de dag zhi gnas dang lhag mthong bsgoms na gdod rnam par grol ba thob par 'gyur ba'o/ /zhi gnas ni ting nge 'dzin gyi bdag nyid de/ rnam par g.yeng ba zhi bar byed pas zhi gnas zhes bya'o/ /lhag mthong ni shes rab kyi bdag nyid de chos rnams so sor rtogs par byed pas lhag mthong zhes bya ste/ 'og nas rnal 'byor rnam par 'byed pa'i skabs nas rgya cher rnam par 'byed do/ /rnam par grol ba zhes bya ba ni 'dus byas dang 'dus ma byas kyi rnam par grol ba rnam pa gnyis te/ 'dus byas kyi rnam par grol ba ni sems dang shes rab rnam par grol ba rnam pa gnyis so/ /'dus ma byas kyi rnam par grol ba ni 'dus ma byas kyi mya ngan las 'das pa rnam pa bzhi'o/ /de ni 'di skad du gal te 'ching ba rnam pa gnyis yongs su spang bar 'dod na bskal pa grangs med pa gsum du zhi gnas dang lhag mthong shin tu goms par byas na gdod 'ching ba rnam pa gnyis las grol bar 'gyur ro zhes bstan par 'gyur ro/ /rnal 'byor spyod pa'i sa las kyang mdo sde 'di dang don mthun par ston te/ de'i phyir de nyid las gzhan yang nyon mongs pa rnams ni ji ltar spong bar 'gyur/ ji tsam gyis ni nyon mongs pa thams cad spong bar brjod par bya zhe na/ 'di lta ste/ zhi gnas la goms pa'i phyir dang / lhag mthong la goms par bya ba'i phyir nyon mongs pa spong bar byed de/ mtshan ma'i 'ching ba las nges par grol na/ gnas ngan len gyi 'ching ba las kyang rnam par grol bar 'gyur ba ni nyon mongs pa thams cad spangs par brjod par bya ste/ bcom ldan 'das kyis ji skad du/ mtshan ma'i 'ching bas skye bo bcings pa dang / /gnas ngan len dag gis kyang gang bcings pa/ /zhi gnas lhag mthong zung du rab bsgoms nas / /gnyis ka las ni rnam par grol bar 'gyur/ /zhes gsungs pa lta bu'o// //bam po bcu drug pa/ de'i tshe bcom ldan 'das kyis rab 'byor la bka' stsal pa/ rab 'byor zhes bya ba 'di man chad ni bzhi pa thams cad rab tu ro gcig pa'i mtshan nyid ces bya ba ston to/ /'di yang rnam pa gnyis su dbye ste/ tshig rkyang pas rgya cher rnam par bshad pa dang / tshigs su bcad pas mdor bstan pa'o/ /tshig rkyang pas rnam par bshad pa yang rnam pa gsum du dbye ste/ de bzhin gshegs pas bka' stsal smos pa dang / 'phags pa rab 'byor gyis lan gsol ba dang / bcom ldan 'das kyis yang dag par bshad pa ste/ 'di ni de bzhin gshegs pas bka' stsal smos pa'o/ /'di yang rnam pa gnyis te/ dus dang sbyar nas bka' stsal smra ba po smos pa dang / bka' smra ba nyid yang dag par bstan pa ste/ 'di ni dang po'o/ /de'i tshe na zhes bya ba ni/ bcom ldan 'das kyis de bzhin nyid ro gcig pa'i mtshan nyid gsungs pa'i tshe'am/ yang na 'phags pa rab 'byor gyis zhu ba gsol ba'i tshe na'o/ /slob dpon yang dag bden pa'i brjed byang las de'i tshe na zhes bya ba ni/ rnam pa bcu gcig yod de sangs rgyas 'jig rten na bzhugs pa'i dus dang / chos kyi 'khor lo bskor ba'i dus dang / yongs su smin par bya ba rgyun mi 'chad cing 'khor 'dus pa'i dus dang / thos pa dang bsam pa dang bsgom pa'i dus dang / sa bon btab nas rnam par grol ba yongs su smin pa'i dus dang / rang gi don yang dag par rnam par gzhag pa'i dus dang / log par 'dzin pa rnam par gzhig pa'i don rnam par gzhag pa'i dus dang / 'khor ba'i btson ra dam po rnam par gzhom pa'i dus dang / yang dag pa'i don bshad pa'i dbang gis dga' bar 'gyur ba'i don phyin ci log gis sems can sgrib pa rnam par 'jig pa'i dus dang / yang dag pa'i rnal 'byor pa dag rin po che'i bgo bsha' nod pa na/ bcom ldan 'das kyi chos yang dag pa 'khor rnams la bgo bsha' byed pa zhes gsungs pas chos rin po che 'khor rnams la bgo bsha' mdzad pa'i dus dang / yang dag par rnal 'byor bsgom pa na yang dag pa'i ting nge 'dzin dang / shes pa skye zhing don dman pa dag zil gyis gnon pa'i phyir de'i tshe na zhes gsungs so zhes 'byung ngo / /de la rab 'byor ces bya ba ni brgyud de bshad pa dag las/ 'di la dang po btsas pa'i tshe khyim ston par gyur pa dang / pha mas ya mtshan du bzung nas mtshan mkhan dag la smras so/ /mtshan mkhan dag gis stong par ston pa 'di ni dge ba kho na yin te bskyed pa med do zhes smras pa'i phyir rab 'byor ces bya'o/ /slob dpon yang dag bden pas 'phags pa rdo rje gcod pa'i brjed byang las 'di ni shar phyogs kyi 'jig rten gyi khams kyi sangs rgyas rlung sngon po zhes bya ba yin te/ 'dir sprul pa'i gzugs brnyan bstan pa yin no zhes bshad de rgya cher ni brjed byang de nyid las 'byung ba bzhin no/ /gzhan yang brgyud de bshad pa dag las 'di skye ba gcig gis thogs pa'i sa la gnas par ston pa yin pa'i gsung rab yod do zhes bshad de/ yid ches su rung ba'i gsung rab nyid ni ma mthong ngo / /kha cig na re 'di ni bram ze'i bu yin te lha rnams la gsol ba btab pas thob pa yin no/ /'di cher skyes pa na pha ma la sangs rgyas spyan drang bar bskul nas de bzhin du mchod pa chen po byas te/ rgyal byed kyi tshal du bcom ldan 'das skyel du song ba las dgra bcom pa'i 'bras bu thob par gyur to zhe'o/ /kha cig na re 'di ni rgyal po yongs su dag pa'i dbyangs zhes bya ba'i sras yin no zhe'o/ /ci'i phyir 'khor 'di 'phags pa rab 'byor 'ba' zhig la bka' stsal la/ 'khor gzhan gsum po dag dang byang chub sems dpa'i 'khor rnams la bka' ma stsal zhe na/ slob dpon yang dag bden pa'i brjed byang las 'khor gzhan dag la bka' ma stsal ba ni don rnam pa gsum yod de / dang po chos kyi 'khor lo thog mar bskor ba'i tshe dge slong dag sngar lam du zhugs nas sangs rgyas kyi zham 'bring byas pa yin la 'khor gzhan dag ni phyis zhugs pa'i phyir ro/ /gnyis pa ni bsnyen par rdzogs nas lo brgya lon pa'i dge slong mas deng bsnyen par rdzogs pa'i dge slong la phyag bya ba yin te/ de ci'i phyir zhe na/ dge slong 'di tshul khrims yongs su rdzogs pa'i phyir ro/ /gzhan yang nam 'tsho'i bar du dge slong la gnas bca' dgos pa'i phyir ro/ /gsum pa ni dbang po'i rang bzhin mchog tu gyur pa ste/ 'di ltar skyes pa ni dbang po rno zhing rtul phod pa yin la/ bud med ni mi gsal zhing zhan pas de'i phyir 'dul ba las bud med la tshig lnga'am drug las lhag par chos bstan na ltung ba'o zhes gsungs pa'o/ /de la tshig lnga ni 'di lta ste/ phung po lnga'o/ /tshig drug ni 'di lta ste/ skye mched drug go/ /bud med la chos 'chad pa na phung po dang skye mched las lhag pa'i don 'chad du mi rung ste/ dbang po mi gsal zhing zhan pas mang du 'dzin mi nus pa'i phyir ro zhe'o/ /'khor gzhan yang byang chub sems dpa' la bka' ma stsal ba yang rgya cher rnam par dbye na/ don rnam pa lnga yod de mangs kyis dogs nas 'dir ma brjod do/ /gzhan yang 'dul ba dum bu lnga pa las tshig lnga zhes bya ba ni gzugs mi rtag ces bya ba nas tshor ba dang 'du shes dang 'du byed dang rnam par shes pa mi rtag pa'i bar du'o/ /tshig drug ces bya ba ni mig bdag med ces bya ba nas/ rna ba dang sna dang / lce dang lus dang yid bdag med pa'i bar du'o zhes gsungs 'dul ba dum bu bzhi pa la sogs pa las ni rnam par bshad pa med do/ /'dir 'phags pa rab 'byor la bka' stsal pa'i rnam par bshad pa yang shes rab kyi pha rol tu phyin pa'i 'grel pa las/ 'phags pa rab 'byor yang rgyu dang rkyen gnyis na bcom ldan 'das kyis bka' stsal nas chos 'chad par mdzad la slob ma gzhan dag la ni bka' ma stsal pa yin te/ nyon mongs pa med pa'i ting nge 'dzin la rab tu zhugs pa'i phyir dang / chos stong pa nyid la shin tu zhugs pa'i phyir ro zhes 'byung ngo / /gal te de ltar na ci'i phyir byang chub sems dpa' rnams la bka' ma stsal/ smras pa shes rab kyi pha rol tu phyin pa'i 'grel pa las/ 'phags pa rab 'byor ni rtag par stong pa nyid kyi ting nge 'dzin la spyod cing zag pa rnams spangs pas sems can rnams yid ches pa rnams bskyed pa'i phyir chos 'chad par bka' stsal pa yin no zhes 'byung ngo / /gzhan yang puN+Da rI ka'i 'grel pa'i mtshan nyid kyi le'u las/ don rnam pa lnga'i phyir bcom ldan 'das kyis nyan thos rnams la bka' stsal pa mdzad kyi byang chub sems dpa' rnams la bka' mi stsal to zhes bshad do/ /gzhan yang shes rab kyi pha rol tu phyin pa'i 'grel pa las byang chub sems dpa' dang / slob ma gzhan dag la bka' ma stsal pa dang / bcom ldan 'das nyid kyis 'chad par mi mdzad pa'i gtan tshigs rgya cher 'byung bas de bzhin du rig par bya'o/ /shes rab kyi pha rol tu phyin pa'i 'grel pa de dang sbyar nas / 'phags pa rab 'byor 'ba' zhig la bka' stsal par ston pas mdo sde 'dir yang de bzhin du rig par bya'o/ /khyod kyis sems can gyi khams na sems can ji snyed cig mngon pa'i nga rgyal can mngon pa'i nga rgyal gyis mngon du zin pa'i phyir shes pa brda 'phrod par byed pa yod par shes/ khyod kyis sems can gyi khams na sems can ji snyed cig mngon pa'i nga rgyal dang bral bas shes pa brda sprod par byed pa yod par shes zhes bya ba ni gnyis pa bkas smras pa nyid yang dag par bstan pa'o/ /de la mngon pa'i nga rgyal can zhes bya ba ni 'phags pa puN+Da rI ka'i mdo las ji skad du ma thob par thob bo snyam pa dang / ma rtogs par rtogs so snyam pa dang mngon pa'i nga rgyal zhes bya'o zhes gsungs so/ /tshig nges par 'grel pa'i mdo las kyang 'di dang mthun par bshad do/ /'dir ni mngon pa'i nga rgyal yod pa dang med pa las brtsams nas rnam pa gnyis kas smras pa yin te/ de'i phyir slob dpon yang dag bden pa'i brjed byang las/ snga ma ni mngon pa'i nga rgyal dang bcas pa las brtsams nas smras pa'o/ /phyi ma ni mngon pa'i nga rgyal med pa las brtsams nas smras pa'o/ /gzhan yang snga ma ni so so'i skye bo las brtsams nas smras pa'o/ /phyi ma ni 'phags pa las brtsams nas smras pa'o/ / gzhan yang snga ma ni gsor mi rung ba las brtsams nas smras pa'o/ /phyi ma ni gang zag gsor rung ba las brtsams nas smras pa'o/ /gzhan yang snga ma ni 'bras bu med pa'i gang zag gi spyod pa smras pa'o/ /phyi ma ni 'bras bu dang bcas pa'i gang zag gi spyod pa smras pa'o/ / gzhan yang snga ma ni gang zag phyin ci log tu gyur pa smras pa'o/ /phyi ma ni gang zag phyin ci log tu ma gyur pa smras pa'o/ /gzhan yang snga ma ni log pa'i phung po nyid du nges pa'i gang zag smras pa'o/ /phyi ma ni yang dag pa'i phung po nyid du nges pa'i gang zag smras pa'o zhes bshad do/ /mdo'i tshig 'di'i bshad pa yang slob dpon yang dag bden pa'i brjed byang las/ nga rgyal dang bcas pa dang nga rgyal med pa re re la yang don rnam pa bzhi bzhi yod pa bshad de/ de la nga rgyal dang bcas pa'i rnam pa bzhi yang mngon pa'i nga rgyal gyi gnas ni 'di lta ste/ nye bar len pa'i phung po lnga dang bcas pa'o/ /nga rgyal gyi rgyu ni 'di lta ste/ nga rgyal gyi bag la nyal lo/ /nga rgyal gyi bdag nyid ni 'di lta ste/ mtho ba'i sems so/ /nga rgyal gyi dngos po'i nus pa ni 'di lta ste/ sems mtho ba'i nga rgyal gyi rgyu las dang rnam par smin pa la sogs pa bskyed pa'o/ /sems can ji snyed cig ces bya ba ni nga rgyal gyi gnas bstan pa'o/ /mngon pa'i nga rgyal can zhes bya ba ni nga rgyal gyi rgyu bstan pa'o/ /mngon pa'i nga rgyal gyis mngon du zin pa'i phyir zhes bya ba ni nga rgyal gyi bdag nyid bstan pa'o/ /shes pa brda sprod par byed pa yod par shes zhes bya ba ni nga rgyal gyi dngos po'i nus pa bstan pa'o/ /nga rgyal med pa'i rnam pa bzhi yang nga rgyal med pa'i gnas ni 'di lta ste/ zag pa med pa'i phung po lnga rgyun mi 'chad pa'o/ /nga rgyal med pa'i rgyu ni mi shes pa kun shes par byed pa'i dbang po'o/ / nga rgyal med pa'i bdag nyid ni kun shes pa'i dbang po'o/ /nga rgyal med pa'i dngos po'i nus pa ni kun shes pa dang ldan pa'i dbang po'o/ /sems can ji snyed cig ces bya ba ni nga rgyal med pa'i gnas bstan pa'o/ /mngon pa'i nga rgyal dang bral ba zhes bya ba ni nga rgyal med pa'i rgyu dang bdag nyid bstan to/ /tshig nges par 'grel pa'i mdo las ni mngon pa'i nga rgyal med pa dang mngon pa'i nga rgyal gyi dbang du ma gyur pa zhes 'byung la/ /dgongs pa zab mo rnam par dgrol ba'i mdo las ni bdag dang bral ba nga rgyal dang bral ba zhes 'byung bas mdo de nyid las ni tshig gnyis tshang bar smos la/ mdo 'di las tshig gcig las mi smos pa ni don gnyis te bsdus pas de'i phyir mngon pa'i nga rgyal dang bral ba zhes bya ba 'ba' zhig gsungs so/ /shes pa brda sprod par byed pa yod pa zhes bya ba ni nga rgyal med pa'i dngos po'i nus pa bstan pa'o/ /de nas tshe dang ldan pa rab 'byor gyis bcom ldan 'das la 'di skad ces gsol to/ /bcom ldan 'das bdag gis ni sems can gyi khams na sems can nyung shas cig mngon pa'i nga rgyal dang bral bas shes pa brda sprod par 'tshal lags kyi zhes bya ba 'di man chad ni gnyis pa 'phags pa rab 'byor gyis lan gsol pa'o/ /'di yang rnam pa gnyis te/ bkas smras pa phyi ma'i lan gsol pa dang / bkas smras pa snga ma'i lan gsol ba'o/ /'di ni dang po ste 'di ltar sa dang po yan chad kyi byang chub sems dpa' dag yang dag pa ji lta ba bzhin du thams cad du ro gcig p a'i mtshan nyid chos stong pa nyid kyi don dam pa khong du chud pa des mngon pa'i nga rgyal rnams mi bskyed kyi theg pa gnyis dang so so'i skye bo la sogs pa ni ma yin pa'i phyir sems can nyung shas cig mngon pa'i nga rgyal dang bral bas shes pa brda sprod par 'tshal lags kyi zhes bya ba gsungs so/ /'o na ji ltar theg pa gnyis kyi de'i mtshan nyid 'chad shes shing byang chub sems dpa' rnams la 'chad par byed ce na/ smras pa sangs rgyas kyis byin gyis brlabs pa'i phyir spyi'i mtshan nyid mdo tsam du shes pa yin gyi re re nas mthar phyin par khong du chud pa ni ma yin te/ de'i phyir des shes rab kyi pha rol tu phyin pa'i le'u chen po'i nang nas ljags kyi mtshan nyid kyi le'u las rab 'byor gyis byang chub sems dpa' rnams la chos 'chad pa sangs rgyas kyi mthu yin no zhes gsungs so/ /'phags pa rab 'byor 'di byin gyis brlabs pa'i dbang gis chos 'chad pa yin no/ /'o na ni chos su 'dzin pa yang spangs pa'i rigs so/ /gal te ma spangs pa na ji ltar 'chad par nus byin gyi rlabs kyis brlabs pa'i phyir mngon par yid ches shing khong du yang chud la stong pa nyid 'chad par yang nus kyi/ gal te de lta ma yin na/ chos su 'dzin pa spangs pa'i skyon dang ldan par 'gyur te/ de'i phyir shes rab kyi pha rol tu phyin pa'i 'grel pa las/ theg pa gnyis chos stong pa nyid kyi tshul du da dung ma rtogs pa'i phyir ro zhes bshad pa yin no/ /'phags pa rab 'byor 'di theg pa 'og ma pa yin na/ ji ltar len gsol cing zhing yongs su dag pa na gnas par gyur ce na/ sangs rgyas kyis byin gyis brlabs pa'i phyir zhing yongs su dag par phyin par gyur pa'am/ yang sangs rgyas kyi sprul pa yin gyi yang dag pa'i lus kyis ni ma yin pa'am/ yang na zhing yongs su ma dag pa dag na bkas smras pa dang lan du gsol pa 'di lta bu dag srid pa yin no/ /bcom ldan 'das bdag gis sems can gyi khams na tshad ma mchis grangs ma mchis brjod du ma mchis pa snyed kyi sems can dag mngon pa'i nga rgyal can mngon pa'i nga rgyal gyis mngon du zin pa'i slad du shes pa brda sprod par bgyid pa dag mchis par 'tshal lags kyi zhes bya ba man chad ni gnyis pa bkas smras pa snga ma'i lan gsol ba zhes bya ba ston to/ /'di yang rnam pa gsum du dbye ste lan mdor gsol pa dang / bdag nyid kyi mthong ba smos pa dang / bdag nyid kyi bsam pa gang yin pa gsol ba'o/ /'di ni dang po ste/ bdag gis sems can gyi khams na tshad ma mchis pa snyed kyi sems can dag mngon pa'i nga rgyal la brten nas shes pa brda sprod par bgyid pa mthong ngo zhes bya ba'i tha tshig go/ /shes pa brda sprod par byed pa'i mtshan nyid ni phyis 'og nas ston to/ /'dir gsungs pa'i mngon pa'i nga rgyal can zhes bya ba yang so so nas bshad pa mi mthun te/ thams cad yod par smra ba'i gzhung dang sbyar na gang zag rnam pa bzhis mngon pa'i nga rgyal skyed par byed de/ 'di lta ste so so'i skye bo dang 'bras bu 'og ma gsum po dag go zhes bshad de bstan bcos bye brag tu bshad pa chen po las ji skad du mngon pa'i nga rgyal bskyed pa yang bshad pa mi mthun pa gsum yod de/ kha cig na re so so'i skye bos ni lnga skyed par byed de 'di lta ste/ dge ba'i rtsa ba bzhi dang 'bras bu bzhi po dag la'o/ /rgyun du zhugs pa ni bzhi skyed par byed de dang po ma gtogs pa'o/ /lan cig phyir 'ong bas ni gsum skyed par byed de dang po gnyis ma gtogs pa'o/ /phyir mi 'ong bas ni gnyis skyed par byed de dang po gsum ma gtogs pa'o/ /dgra bcom pa la ni mngon pa'i nga rgyal med do zhe'o/ /kha cig na re so so'i skye bos ni dgu skyed par byed de 'di lta ste/ zag pa dang bcas pa'i dge ba'i rtsa ba dang zhugs pa bzhi dang 'bras bu la gnas pa bzhi po dag la'o/ /rgyun du zhugs pas bdun skyed par byed de dang po gnyis ma gtogs pa'o/ /lan cig phyir 'ong bar zhugs pas drug skyed par byed de snga ma'i gsum po dag ma gtogs pa'o/ /lan cig phyir 'ong bas lnga skyed par byed de/ snga ma bzhi po dag ma gtogs pa'o/ /phyir mi 'ong bas zhugs pas bzhi skyed par byed de snga ma'i lnga po dag ma gtogs pa'o/ /phyir mi 'ong ba'i 'bras bu la gnas pas gsum skyed par byed de snga ma'i drug ma gtogs pa'o/ /dgra bcom pa la zhugs pas gnyis skyed par byed de snga ma'i bdun po dag ma gtogs pa'o/ /dgra bcom pa nyid las mngon pa'i nga rgyal med do/ /rgyun du zhugs pa la phyogs pa la ni mngon pa'i nga rgyal bskyed pa'i don med do zhe'o/ /spyad pa dag gis bshad pa'i 'phags pa rnams kyang dge ba zag pa dang bcas pa khyad par can dag la mngon pa'i nga rgyal bskyed pas de'i phyir 'phags pa drug po dag la snga ma bzhin du skyed par byed pa yin no zhes 'byung ste/ rgya cher de nyid las bstan pa bzhin no/ /mdo sde pa dag kyang thams cad yod par smra ba 'dod pa dang mthun pas 'gal ba med de sde pa de las brtags pa mang po yod pa'i phyir ro/ /'dir theg pa chen po'i bstan pa dang sbyar na phal cher sde pa gnyis kyi gzhung dang mthun te mngon pa'i nga rgyal ni so so skye bo dang slob pa dang bcas pa'i 'phags pa dag la yod par bshad de de'i phyir rnam par rig pa tsam du grub pa'i bstan bcos las nga rgyal gang zhe na/ bdag nyid khengs shing gzhan dag la rlom sems dang bcas pa'i mtshan nyid de nga rgyal med pa la sgrib cing sdug bsngal skyed par byed pa'i rten byed pa'i las can no/ /nga rgyal 'di'i bye brag dang rnam pa dgu yod de/ 'di lta ste/ phyogs rnam pa gsum dang bdag dang yon tan las skyes pa'o/ /thams cad kyang mthong ba dang bsgom pas spang bar bya bar rtogs pa dag go zhes 'byung ngo / /'phags pa'i gnas skabs su yang nga rgyal mngon du 'byung bas nga rgyal gyi rnam pa yang des 'byung ba la 'gal ba med do/ /nga rgyal rnam pa bdun ni/ bstan bcos phung po lnga'i rab tu 'byed pa las nga rgyal gang zhe na 'di lta ste/ nga rgyal dang che ba'i nga rgyal dang / nga rgyal las kyang nga rgyal dang nga'o snyam pa'i nga rgyal dang mngon pa'i nga rgyal dang cung zad snyam pa'i nga rgyal dang / log pa'i nga rgyal lo/ /nga rgyal ni 'di lta ste/ chung ngu bas bdag che'o snyam pa'am/ mtshungs pa dang mtshungs so snyam du sems khengs pa gang yin pa'o/ /che ba'i nga rgyal ni 'di lta ste/ mtshungs pa bas bdag che ba'am/ bdag che ba dang mtshungs so snyam du bdag sems khengs pa gang yin pa'o/ /nga rgyal las kyang nga rgyal ni 'di lta ste/ che ba bas bdag che'o snyam du sems khengs pa gang yin pa'o/ /nga'o snyam pa'i nga rgyal ni 'di lta ste/ nye bar len pa'i phung po lnga po rnams la bdag gam bdag gir yang dag par lta ba'i sems khengs pa gang yin pa'o/ /mngon pa'i nga rgyal ni 'di lta ste/ gong ma'i khyad par thob par bya ba ma thob par bdag gis thob po snyam du sems khengs pa gang yin pa'o/ /cung zad snyam pa'i nga rgyal ni 'di lta ste/ khyad ches 'phags pas bdag cung zad cig gis chung ngo snyam pa'i sems khengs pa gang yin pa'o/ /log pa'i nga rgyal ni 'di lta ste/ yon tan ma yin pa dang ldan pa las bdag yon tan dang ldan no snyam du sems khengs pa gang yin pa'o zhes 'byung ba'o/ /bstan bcos mngon pa kun las btus pa dang / chos mngon pa sna tshogs kun las btus pa dang / rnal 'byor spyod pa'i sa las kyang 'di dang mthun par bshad do/ /'phags pa shes rab kyi pha rol tu phyin pa'i 'grel pa las/ gang zag mngon pa'i nga rgyal can ni sangs rgyas kyi slob ma bsam gtan dang ting nge 'dzin dang ldan pa thob pa la 'phags pa'i 'bras bu ma thob par bdag gis thob po snyam du sems khengs pa'o zhes bshad do/ /nga rgyal rnam pa dgu zhes bya ba ni bstan bcos shes pa bskyed pa las nga rgyal ni rnam pa dgu yod de/ 'di lta ste bdag mchog tu gyur pa dang / bdag dang mtshungs pa dang bdag pas chung ba dang / bdag pas mchog tu gyur pa yod pa dang / bdag dang mtshungs pa yod pa dang / bdag pas dma' ba yod pa dang / bdag pas mchog tu gyur pa med pa dang / bdag dang mtshungs pa med pa dang bdag pas dma' ba med do snyam pa'o zhes 'byung ba'o/ /bstan bcos rnam par bshad pa las kyang nga rgyal rnam pa gsum gyi rnam pa'i ming kho na smos pa yin te/ de'i phyir de nyid las mdo sde las ji skad du nga rgyal gyi rnam pa gsum zhes gsungs pa ni bdag mchog tu gyur to snyam pa'i nga rgyal gyi rnam pa dang / bdag pas dman no snyam pa'i nga rgyal gyi rnam pa dag yin no zhes bshad de don gyi rnam pa dgu bstan pa yin pas don du 'gal ba med do/ /nga rgyal rnam pa bdun dang dgu zhes bya ba 'di yang rnam par rig pa tsam du grub pa'i bstan bcos dang sbyar na gnas rnam pa lnga las skye bar bshad de/ de'i phyir de nyid las 'di'i [(]phye [,]bye [)]brag kyang rnam pa bdun nam rnam pa dgu yod de phyogs rnam pa gsum dang bdag dang yon tan gyi gnas las skyes pa'o zhes bshad de/ de la re zhig nga rgyal rnam pa bdun las nga rgyal dang che ba'i nga rgyal dang nga rgyal las kyang nga rgyal dang cung zad snyam pa'i nga rgyal ni phyogs rnam pa gsum la brten nas 'byung ngo / /nga'o snyam pa'i nga rgyal ni bdag gnas su gyur pa la brten nas skye'o/ /log pa'i nga rgyal dang mngon pa'i nga rgyal ni yon tan gnas su gyur pa la brten nas skye ste/ 'bring dang chen po'i rnam pa la brten nas ni che ba'i nga rgyal skye'o/ / de'i phyir bstan bcos chos mngon pa sna tshogs kun las btus pa las chung ngu dang 'bring gi rnam pa gnyis las ni nga rgyal skye'o/ /'bring dang chen po'i rnam pa la brten nas ni che ba'i nga rgyal skye'o/ /chen po'i rnam pa la brten nas ni nga rgyal las kyang nga rgyal skye'o/ /chung ngu'i rnam pa la brten nas ni cung zad snyam pa'i nga rgyal skye'o/ /nye bar len pa'i phung po lnga po dag la bdag dang bdag gir 'dzin pa de las ni nga'o snyam pa'i nga rgyal 'byung ngo / /yon tan khyad par can ma thob par bdag gis yon tan khyad par can thob snyam pa las ni mngon pa'i nga rgyal 'byung ngo / /yang dag par yon tan med bzhin du yang bdag ni yon tan dang ldan no snyam pa las ni log pa'i nga rgyal 'byung ngo zhes bshad do/ /nga rgyal rnam pa dgu rnam par 'byed pa yang bshad pa rnam pa gnyis yod de/ bstan bcos shes pa skyed pa dang sbyar na mdzod kyi bstan bcos las ji skad du 'di ltar rnam pa dgu po 'di dag ni snga ma'i nga rgyal bdun gyi rnam pa las 'byung ba yin te 'di lta ste/ sngar bstan pa'i nga rgyal dang che ba'i nga rgyal dang cung zad snyam pa'i nga rgyal las so/ /'di ltar rnam pa gsum po de dag gal te lta ba la brten nas 'du byed skyed par byed na/ de la khyad par can gyi rnam pa gsum gsum mngon par 'grub par 'gyur te/ dang po'i gsum ni go rims bzhin du che ba'i nga rgyal dang / nga rgyal dang cung zad snyam pa'i nga rgyal dag go/ /bar ma gsum ni go rims bzhin du cung zad snyam pa'i nga rgyal dang nga'i nga rgyal dang che ba'i nga rgyal dag go/ /tha ma gsum ni go rims bzhin du nga rgyal dang / che ba'i nga rgyal dang cung zad snyam pa'i nga rgyal de dag go zhes bshad do rgya cher ni bstan bcos bye brag tu bshad pa chen po las 'byung ba bzhin no/ /bstan bcos phyogs kyi rnam pa'i gnas bstan pa las nga rgyal gyi rnam pa bshad pa dang sbyar na de las re zhig bdag mchog go snyam pa'i nga rgyal gyi rnam pa ni nga rgyal rnam pa gsum las 'byung ste/ 'di lta ste/ nga rgyal dang che ba'i nga rgyal dang / nga rgyal las kyang nga rgyal las so/ /gsum po 'di dag ni dman pa dang mtshungs pa dang / khyad par du gyur pa'i yul la rtog pa'i bye brag gi phyir te/ de'i phyir bstan bcos bye brag tu bshad pa chen po las bstan bcos phyogs kyi rnam pa'i gnas bstan pa las bshad pa dang sbyar na bdag mchog go snyam pa'i nga rgyal gyis ni nga rgyal rnam pa gsum ste/ dman pa dag las bdag ni lhag go snyam pa gang yin pa de ni nga rgyal zhes bya'o/ /mtshungs pa dag las ni bdag mchog go snyam pa gang yin pa de ni che'o snyam pa'i nga rgyal zhes bya'o/ /mchog tu gyur pa dag las bdag ni mchog tu gyur pa yin no snyam pa gang yin pa de ni nga rgyal las kyang nga rgyal zhes bya'o/ /nga rgyal gyi rnam pa gzhan brgyad ni ci rigs par bshad par bya'o zhes 'byung ste/ de la nga rgyal gyi rnam pa brgyad ni ci rigs par bshad par bya'o zhes bya ba la/ bdag dang mtshungs so snyam pa'i nga rgyal gyi rnam pa ni 'bring dang chen po'i rnam pa la brten nas nga rgyal rnam pa gnyis sdud par byed de/ mtshungs pa la mtshungs so snyam du 'dzin pa gang yin pa de ni nga rgyal zhes bya'o/ /khyad par du gyur pa la mtshungs so snyam du 'dzin pa gang yin pa de ni che ba'i nga rgyal zhes bya'o/ /bdag chung ngo snyam pa'i nga rgyal ni chen po'i rnam pa la brten nas nga rgyal rnam pa gcig sdud par byed de/ ches khyad par du 'phags pa las bdag cung zad cig gis dman no snyam pa gang yin pa de ni cung zad snyam pa'i nga rgyal zhes bya'o/ /mchog tu gyur pa yod pa dang dman pa med pa yang bdag chung ngo snyam pa dang 'dra bar bshad par bya'o/ /mtshungs pa yod pa dang / mchog tu gyur pa med pa ni bdag dang mtshungs so snyam pa dang 'dra bar bshad par bya'o/ /dman pa yod pa dang mtshungs pa med pa ni bdag mchog tu gyur pa dang 'dra bar bshad do/ /rnam pa dgu po de dag las gsum ni rnam pa gsum la brten to/ /gsum ni 'bring dang chen po'i rnam pa la brten to/ /gsum ni chen po'i rnam pa la brten te snga ma bzhin du rig par bya'o/ /'dir nga rgyal dang bcas zhes bstan pa ni nga rgyal rnam pa bdun dang dgu las mngon pa'i nga rgyal dang sbyar ro/ /'di la yang bshad pa mi mthun pa gsum yod de/ slob dpon yang dag bden pa ni so so skye bo la mngon pa'i nga rgyal yod par bshad de 'di ltar dmigs pa dang bcas pa'i rnal 'byor pa la yang dag pa'i rnal 'byor ro snyam du mngon pa'i nga rgyal skye ba'i phyir ro zhe'o/ /kha cig ni so so skye bo dang theg pa gnyis kyi slob pa dag la mngon pa'i nga rgyal yod par bshad de/ 'di ltar dgra bcom pa dag ni nyon mongs pa'i sgrib pa spangs pa'i phyir ro/ /de'i phyir dam pa'i chos puN+Da rI ka'i mdo las yang dag par dgra bcom pa thob pas gang de skad bshad la yid mi ches na de ni gnas med do zhes gsungs so zhe'o/ /kha cig ni dgra bcom pa yang gtogs so zhes zer te de ci'i phyir zhe na/ nyon mongs pa'i nga rgyal med kyang shes bya'i nga rgyal dang bcas pa'i phyir ro zhe'o/ /gal te de lta na dam pa'i chos puN+Da rI ka las gsungs pa de ji ltar shes par bya zhe na/ smras pa de ni nyon mongs pa'i dbang du mdzad nas gsungs kyi 'di ni shes bya la brten nas bstan pa yin pas yod ces bshad pa dang med ces bshad pa de dag phan tshun 'gal ba med do/ /sa bdun man chad kyi byang chub sems dpa' la sogs pa la mngon pa'i nga rgyal 'byung ngam zhe na/ smras pa 'di la bshad pa gsum yod de kha cig na re sa dang po yan chad mngon pa'i nga rgyal mi skyed de/ don dam pa'i ro gcig pa'i mtshan nyid thob pa'i phyir ro zhe'o/ / kha cig na re sa bdun pa man chad la byung na nyes pa med do/ /mdo sde dag las ji skad du ched du bskyed pa'i phyir ro zhes gsungs pa lta bu'o zhe'o/ /kha cig na re snga ma'i sa bdun po dag la nyon mongs pa'i sgrib pa'i nga rgyal nyi tshe 'byung bar ma zad kyi shes bya'i sgrib pa'i nga rgyal kyang mngon du 'byung ste/ sa re re la phan tshun ltos nas mchog dang dman pa yod pa'i phyir ro zhe'o/ /sangs rgyas kyis sems can thams cad kyi mtha' thugs su chud dam zhe na/ smras pa bstan bcos bye brag tu bshad pa chen po las ji skad du 'dul ba las bcom ldan 'das kyis byang chub kyi shing drung du sems can rnams phung po gsum du rnam par gzhag pa 'di lta ste/ 'di snyed cig ni log pa'i phung po nyid du nges pa zhes bya'o/ /'di snyed cig ni yang dag pa'i phung po nyid du nges pa zhes bya'o/ /'di snyed cig ni ma nges pa'i phung po nyid du nges pa zhes gsungs so zhes 'byung ba lta bu'o/ /sems can gyi tshad kyi dbang du mdzad nas rnam par gzhag pa yin nam chos kyi dbang du mdzad pa zhig yin/ gal te sems can gyi dbang du mdzad pa zhig yin na ni ci'i phyir sems can gyi rgya mtsho'i mtha' ni dpag par bya ba ma yin no zhes gsungs/ gal te chos kyi dbang du mdzad pa zhig yin na ni/ nyan thos rnams kyang rnam par gzhag nus par 'gyur bas sangs rgyas dang nyan thos thun mong du ma gyur pa ci yod ce na/ kha cig na re sems can gyi dbang du mdzad nas rnam par gzhag pa yin no zhes bshad de / gal te de lta na ci'i phyir sems can gyi rgya mtsho'i mtha' ni dpag par bya ba ma yin no zhes gsungs/ smras pa/ sangs rgyas sems can gyi rgya mtsho'i mtha' brnyes par gyur na yang nyes pa med de de yang spyi'i mtshan nyid kyis brnyes pa yin gyi bye brag gi mtshan nyid kyis brnyes pa ni ma yin te/ 'di ltar sems can thams cad ni skye ba rnam pa bzhi las gud na med pas de ltar brnyes par gyur pa'o/ /kha cig na re chos kyi dbang du mdzad nas rnam par gzhag pa yin no zhe'o/ /gal te de lta na nyan thos rnams kyang rnam par gzhag pa yod pas sangs rgyas dang nyan thos thun mong du ma gyur pa ci zhig yod ce na/ smras pa nyan thos ni sangs rgyas kyi rgyus thos pa yin la/ sangs rgyas ni slob dpon mi mnga' bar nyid kyis rnam par gzhag pa mdzad pas 'di ni thun mong du ma gyur pa'o/ /kha cig na re stong gsum gyi 'jig rten gyi khams dang lo stong tshun chad kyi gang yin pa de ni sems can la brten nas rnam par gzhag pa yin no/ /'jig rten gyi khams gzhan gyi 'jig rten gyi khams gzhan dang dus gzhan dag gi gang yin pa de dag ni chos la brten nas rnam par gzhag pa yin te 'phags pa shes rab kyi pha rol tu phyin pa'i 'grel pa dang sbyar na yang de las dris lan dag yod de/ de'i phyir de nyid las sems can thams cad kyi sems ma lus par mkhyen par rung ngam/ gal te mkhyen na ni sems can la mtha' yod par 'gyur ro/ /gal te mi mkhyen na ji ltar sems can thams cad kyi sems kyi mos pa rnams mi mkhyen par 'gyur ro / /ci'i phyir sangs rgyas la thams cad mkhyen pa zhes bya zhe na/ smras pa/ sems can gyi sems dang sems las 'byung ba'i chos ni ma lus par mkhyen par rung ste/ de ci'i phyir zhe na/ mdo dag las ji skad du bden par smra ba rnams kyi nang na sangs rgyas ni mchog go zhes gsungs pa lta bu'o/ /gal te sems can thams cad kyi sems mkhyen cing mtha' brnyes pa ma yin na/ bcom ldan 'das kyis ci'i phyir ma lus par mkhyen zhes gsungs/ thams cad mkhyen pa'i gang zag ces kyang mi bya ste/ 'di ltar bcom ldan 'das kyi gsung ni yang dag pa'i bden pa yin la gdon mi za bar thams cad mkhyen pa'i gang zag kyang yod pa yin no/ /gzhan yang sems can mtha' med pas rnam pa thams cad mkhyen pa'i ye shes kyang mtha' med de/ dper na sgo che ba'i phyi kha gab kyang che ba yin no/ /gal te mkhyen pa la ni mtha' yod la sems can la ni mtha' med na ni klan ka 'di yod par 'gyur gyi 'dir mkhyen pa dang sems can gnyi ga yang mtha' med pa'i phyir khyod kyi 'di klan kar mi rung ngo / /gzhan yang mtha' yod ces bya ba dang / mtha' med ces bya ba gnyi ga yang sangs rgyas kyi chos las ni gzhan pa'i lung bstan pa dag yin par gsungs pa yin te/ dngos po bcu bzhi po de dag ni mi bden zhing phan pa med pa'i phyir klan kar mi rung ngo zhes 'byung ste zhib tu de nyid las bstan pa bzhin no/ /gzhan yang de nyid las gal te byang chub sems dpa' rnams sems can thams cad kyi re ba yongs su rdzogs par byed par gyur na/ 'o na ni sems can la mtha' yod par yang 'gyur la/ bkres pa dang grang ba la sogs pa'i sdug bsngal myong ba rnams kyang med par 'gyur ro/ /de ci'i phyir zhe na/ sems can thams cad re ba yongs su rdzogs shing sdug bsngal dang bral nas bde ba thob pa'i phyir ro zhe na/ smras pa thams cad yongs su rdzogs zhes bya ba yang ming gis thams cad yin gyi yang dag pa'i thams cad ni ma yin te/ 'phags pa chos kyi tshig gi mdo'i tshigs su bcad pa las ji skad du/ thams cad kyang ni 'chi bas skrag gyur pas/ /lcag dbyig na tshas mi 'jigs gang yang med/ /bdag gi nyams ni gang yin dper zhog la/ /gsad par mi bya lcag gis gzhu mi bya/ /zhes gsungs pa lta bu ste/ thams cad lcag dbyig gi na tshas 'jigs so zhes gsungs mod kyi gzugs med pa'i khams kyi sems can gyi lus med pa'i phyir lcag dbyig gi na tsha med do/ /gzugs kyi khams kyi sems can lus yod kyang lcag dbyig gi na tsha med do/ /'dod pa'i khams kyi sems can la yang lcag dbyig gi na tsha med pa yang yod de 'dir thams cad ces gsungs pa yang gang lcag gis gzhu ba'i rigs pa las dgongs nas thams cad ces gsungs pa yin gyi yang dag pa'i thams cad ni ma yin pa lta bu'o/ /bcom ldan 'das bdag dus gcig na dgon pa nags khrod chen po zhig na mchis pa'i tshe zhes bya ba la sogs pas ni gnyis pa bdag nyid kyi mthong ba smos pa zhes bya ba ston to/ /'di yang rnam pa gnyis su dbye ste/ bdag dang gzhan gyi gnas bstan pa dang bdag gis dge slong de dag ces bya ba man chad kyis gzhan gyi shes pa brda sprod par byed pa bstan pa'o/ /'dis ni bdag nyid kyi gnas bstan pa yin te/ shing mang po tshogs shing 'dus pa'i tshe nags khrod ces bya'o/ /dgon pa zhes bya ba ni slob dpon yang dag bden pas don rnam pa gsum du bshad de/ dang po sgra las dben pa ni 'di lta ste grong khyer gyi sgra rnams der mi grag pa'i phyir ro/ /gnyis pa bcad gtubs kyi gnas las dben pa ni 'di lta ste/ shing thun rnams der mi phyin pa'i phyir ro/ /gsum pa 'thab rtsod kyi gnas las dben pa ni 'di lta ste/ nyon mongs pa thams cad dge ba'i chos 'khrug par byed pas 'thab rtsod ces bya ste/ gal te gnas 'di lta bu dag tu gnas par gyur na nyon mongs pa zil gyis gnon pa'i phyir 'thab rtsod las dben pa zhes bya'o/ /rgyang grags gcig phan chad nas dpag tshad brgya stong phan chad kyi bar de ni dgon pa zhes bya'o zhes bshad do/ /thams cad yod par smra ba dag ni rgyang grags gcig la gzhu lnga brgya yod do zhes zer ro/ /yang dag pa'i tshad ma'i sde pa dag ni rgyang grags gcig la gzhu stong yod do zhes zer te/ gzhu gang la ni 'dom phyed dang do yod pa 'dom stong lnga brgya'o/ /bstan bcos chos mngon pa las ni khru bzhi la gzhu gang ngo / /gzhu lnga brgya la ni rgyang grags gcig go/ /rgyang grags phyed dang gnyis phan chad ni dgon pa'i gnas zhes bya'o/ /byang phyogs kyi rgyang grags gcig mngon par 'grub par 'gyur te zhes bshad do/ /bstan bcos bye brag tu bshad pa chen po las khru bzhi la gzhu gang ngo / /gzhu lnga brgya la ni dgon pa'i gnas zhes bya'o/ /de phan chad ni bas mtha' zhes kyang bya'o zhes 'byung bas/ de bas na gzhu lnga brgyas ni yul mnyam ka'i rgyang grags gcig mngon par 'grub par 'gyur te/ de ci'i phyir zhe na/ yul mnyam ka ni sa gzhi mnyam par grong khyer dang thag nye yang sgra thos par mi 'gyur la byang phyogs ni mtho dman che zhing sgra thos pa'i phyir byang phyogs kyi rgyang grags che ba yin no/ /mdzod kyi bstan bcos las 'di'i tshad rgya cher rnam par 'byed de/ /de'i phyir de'i tshig le'ur byas pa las/ phra rab rdul dang rdul phran gser chu dang / /ri bong lug dang glang dang nyi zer rdul/ /sro ma shig dang nas dang sor mo'i tshigs/ /phyi ma phyi ma bdun 'gyur bskyed par bya/ /sor tshigs nyi shu rtsa bzhi dag la khru/ /khru bzhi dag ni gzhu yi tshad yin te/ /de lnga brgya dag la ni rgyang grags so/ /de brgyad la ni dpag tshad ces bya'o/ /zhes 'byung ste/ 'di nyid kyi 'grel pa las/ rdul phra rab ni dang po yin la/ sor mo'i tshigs ni tha ma yin pas phyi ma phyi ma bdun 'gyur gyis bskyed pa yin par rig par bya'o/ /'di lta ste/ rdul phra rab bdun la ni rdul phran gcig go/ /rdul phran bdun la ni gser rdul gcig go/ /gser rdul bdun la ni chu rdul gcig go/ /chu rdul bdun la ni ri bong gi rdul gcig go/ /ri [(]bang [,]bong [)]gi rdul bdun la ni lug rdul gcig go/ /lug rdul bdun la ni glang rdul gcig go/ /glang rdul bdun la ni nyi zer gyi rdul gcig go/ /nyi zer gyi rdul bdun la ni sro ma gcig go/ /sro ma bdun la ni shig gcig go/ /shig bdun la ni nas 'bru gcig go/ /nas 'bru bdun la ni sor mo'i tshigs gcig go/ /sor mo'i tshigs gsum la ni sor gcig go/ /sor nyi shu rtsa bzhi zheng du gzhibs pa las ni khru gang ngo / /khru bzhi chur bsgreng ba la gzhu gang ngo / /gzhu lnga brgya chur bsgreng ba la ni rgyang grags gcig go/ / rgyang grags gcig ni grong nas dgon par 'gro ba'i bar gyi lam gyi tshad do/ /rgyang grags brgyad ni dpag tshad gcig go zhes 'byung ste/ rgya cher rnam par 'byed pa ni bstan bcos bye brag tu bshad pa chen po las bshad pa bzhin no/ /slob dpon ngo bo nyid med kyis theg pa chen po bsdus pa'i 'grel pa byas pa las/ grong khyer yongs su spangs te/ rgyang grags gcig las 'das pa de ni dgon pa zhes bya'o zhes bshad do/ /gnas pa bcu'i bstan bcos las/ 'du 'dzi'i gtam las ring du 'gyur ba ni dgon pa zhes bya'o zhes 'byung ngo / /rnal 'byor spyod pa'i sa las grong dang grong rdal las dben pa'i gnas mal dgon pa dang / nags 'dab dang / bas mtha' gang dag yin pa dag tu gnas par byed pa ni dgon pa pa zhes bya'o zhes bshad do/ /sbyangs pa'i yon tan gyi mdo las kyang / dgon pa'i chos ni 'du 'dzi las dben zhing rab tu dben pa na gnas pa'o/ /de la rab tu dben pa ni mang pos gnod par 'gyur ba dang / bag med pa'i gnas las dben pa'o/ /de ltar nye na yang rgyang grags gcig tsam las mi nye bar yun ring por lus la shin tu phan 'dogs pa'o/ /de ltar dben par gyur nas sems kyang 'dod pa lnga'i sgrib pa lnga po dag las shin tu thag ring bar gyur pa ni dgon pa zhes bya'o zhes gsungs te/ 'phags pa shes rab kyi pha rol tu phyin pa'i 'grel pa las kyang de skad du bshad do/ /de na dge slong rab tu mang po dag cig kyang nags khrod de la brten cing bdag gi nyen kor na gnas lags te zhes bya ba 'dis ni gnyis pa gzhan mang po gnas pa'i gnas bstan to/ /dge slong zhes bya ba ni slob dpon drang srong rdo rjes slong ba dang / sdig pa 'joms pa dang / bdud skrag par byed pa'o zhes bshad do/ /'phags pa shes rab kyi pha rol tu phyin pa'i 'grel pa las ni don rnam pa lnga dang ldan par bshad de dang po ni slong ba ste/ yongs su dag pas 'tsho bar byed pa'i phyir ro/ /de'i phyir de nyid las khas 'tsho ba rnam pa bzhi dang bral ba'i phyir yongs su dag pa zhes bya ste/ khas 'tsho ba rnam pa bzhi ni rab tu byung ba gang gis sman sbyor ba dang / 'bru rnams rmed pa dang / skyed shing la sogs pa bskyed nas yongs su ma dag pas 'tsho ba gang yin pa de ni kha thur du lta bas 'tsho ba zhes bya'o/ /rab tu byung ba gang gis gza' skar dang nyi zla dang rlung dang char pa dang glog 'gyur ba dang / lce 'bab pa las rab tu rtog cing yongs su dag pas 'tsho ba gang yin pa de ni kha gyen du lta bas 'tsho ba zhes bya'o/ /rab tu byung ba gang gis smin gnyer gyis mthu ston pa dang / phyogs bzhir pho nyar 'gro ba dang kha gsag dang / mang du tshol zhing yongs su ma dag pas 'tsho ba gang yin pa de ni kha phyogs su lta bas 'tsho ba zhes bya'o/ /rab tu byung ba gang gis sngags dang mkhyud dpyad rnam pa sna tshogs bslabs nas legs nyes rnams ston cing 'di lta bu la sogs pa yongs su ma dag pas 'tsho ba gang yin pa de ni khas 'tsho ba zhes bya'o/ /gnyis pa ni nyon mongs pa bcom pa'i phyir dge slong zhes bya'o/ /gsum pa ni rab tu byung ba'i gang zag gi ming ngo / /bzhi pa ni tshul khrims yongs su dag pa bsrung ba zhes bya'o/ /lnga pa ni bdud skrag par byed pa'o zhes bshad do/ /rnal 'byor pa'i spyod pa'i sa las/ dge slong ni rnam pa lnga ste/ slong ba'i dge slong dang / bdag nyid khas 'che ba'i dge slong dang / ming gi dge slong dang / nyon mongs pa bcom pa'i dge slong dang / gsol ba dang bzhi'i las kyis bsnyen par rdzogs pa'i dge slong ngo zhes bshad do/ /slob dpon yang dag bden pa'i brjed byang las rgyu la gnas pa'i tshe ni bdud skrag par byed pa dang slong ba dang / sdig pa 'joms pa zhes bya'o/ /'bras bu'i gnas su phyin pa'i tshe bdud skrag par byed pa ni dgra bcom par 'gyur ro/ /slong ba ni mchod 'os su 'gyur ro/ /sdig pa 'joms pa ni mi skye ba zhes brjod do zhes 'byung ngo / / bdag gi dge slong de dag snga dro'i dus kyi tshe phan tshun nas 'dus te/ dmigs pa dang bcas pa'i mngon par rtogs pa la gnas nas so so nas mtshan ma rnam pa sna tshogs can gyi chos ston pas shes pa brda sprod par bgyid pa dag mthong ste zhes bya ba man chad ni gnyis gzhan dag gi shes pa brda sprod par byed pa ston to/ /'di yang rnam pa gnyis te/ brtags pa rnams spyir smos pa dang brtags pa rnam par phye ste bstan pa'o/ /'di ni dang po'o/ /'di ni dang po brtags pa spyir smos pa ste/ 'og nas bstan pa bzhin no/ /phung po lnga la sogs pa la brten te/ shes pa sna tshogs su gyur nas de dag la dmigs pa'i don du 'dod kyi/ thams cad du ro gcig pa'i chos stong pa nyid kyi rig pas don dam pa'i bden pa ston par yang mi byed la/ de bzhin du 'phags pa'i lam yan lag brgyad pa'i bar gyi rang gi ngo bo nyid kyi bye brag dang / gnyen po la sogs pa la don dam par brtags nas mngon pa'i nga rgyal byed pa'i phyir 'dir smos pa yin no/ /de la mngon par rtogs pa zhes bya ba ni bstan bcos rnal 'byor spyod pa'i sa las sbyar na de la nges pa'i don gang yin pa de ni mngon par rtogs pa'i don to zhes bshad do/ /mdzod kyi bstan bcos las ni bden pa rnams kyi yul mngon sum du gsal bar mthong ba gang yin pa de ni mngon par rtogs pa zhes bya'o zhes bshad do/ /mngon par rtogs pa 'di yang bstan pa rnams las so so nas bshad pa mi mthun te/ mdzod kyi bstan bcos las mngon par rtogs pa ni rnam pa gsum yod de 'di lta ste lta ba dang / rkyen dang dngos po'i bye brag gi phyir ro zhes bshad do/ /kha cig las ni rnam pa drug go zhes bshad de rnal 'byor spyod pa'i sa las bshad pa lta bu'o/ /kha cig las ni sa rnam pa bcu'o zhes bshad de/ bstan bcos chos mngon pa kun las btus pa dang / chos mngon pa sna tshogs kun las btus pa las bstan pa lta bu'o/ /'dir dmigs pa dang bcas pa'i mngon par rtogs pa zhes gsungs pa ni 'di lta ste/ dge slong de dag chos kyi 'khor lo dang po la brten nas chos kyi sgo rnam pa bcu gsum bshad de/ sgra ji bzhin du don bzung nas dmigs su med pa ro gcig pa'i chos stong pa nyid kyi don dam pa khong du ma chud pas mngon pa'i nga rgyal bskyed nas mthar phyin pa'i don dam pa rtogs so snyam du sems par gyur pa'o/ /dge slong de dag mngon par rtogs pa gang la brten nas shes pa brda sprod par byed ce na/ smras pa mthong ba dang bsgom pa la gnas pa dang / mi slob pa dang snga ma'i sbyor ba rnams kyang spyir bstan pa yin te/ de'i phyir 'og nas mdo las dran pa nye bar gzhag pa thob pa zhes bya ba nas de bzhin du 'phags pa'i lam yan lag brgyad pa thob pa zhes bya ba la sogs pa gsungs pa yin no/ / //bam po bcu bdun pa/ de na kha cig ni phung po thob pa dang / phung po'i mtshan ma thob pa dang / phung po'i skye ba thob pa dang / phung po'i zad pa thob pa dang / phung po'i 'gog pa thob pa dang / phung po'i 'gog pa mngon du bgyi ba thob pa'i slad du shes pa brda sprod par bgyid ces bya ba 'di man chad ni gnyis pa brtags pa rnam par phye ste bstan pa'o/ /'di yang rnam pa gnyis su dbye ste/ mkhas pas brtag par bya ba'i spyod yul rnam pa drug la brten nas shes pa brda sprod par byed pa bstan pa dang / kha cig ni dran pa nye bar gzhag pa thob pa zhes bya ba man chad kyis byang chub kyi phyogs kyi rnal 'byor gyi sgo rnam pa bdun la brten nas shes pa brda sprod par byed pa bstan pa'o/ /'dir ni dang por mkhas pas brtag par bya ba'i spyod yul rnam pa drug la brten nas shes pa brda sprod par byed pa ston te/ mkhas par bya ba rnam pa drug ni 'di lta ste/ phung po dang skye mched dang / rten cing 'brel bar 'byung ba dang zas rnam pa bzhi dang / bden pa bzhi dang / khams bco brgyad do/ /yang dag pa'i don du na skye mched dang / khams kyi chos rnams ma lus par bsdus mod kyi sems can rnams kyi mos pa tha dad pa'i phyir/ phung po la sogs pa la brten nas sgo rnam pa drug tu phye ba yin no/ /de kho na nyid kyi mngon par rtogs pa gang yin pa de ro gcig pa'i don dam pa'i tshul rtogs pa na gdod mngon par rtogs pa zhes bya ba yin na dge slong de dag mngon pa'i nga rgyal dang bcas pa phung po la sogs pa'i mtshan ma dmigs pa la de kho na nyid kyi mngon par rtogs pa yin no snyam du sems pa'i phyir 'dir brtags pa rnam pa drug smos pa yin no/ /sgo rnam pa drug yod kyang rnam pa lngar bsdu bar bya ste/ phung po lnga bstan pa dang / zlas skye mched dang / rten cing 'brel bar 'byung ba dang / zas rnam pa bzhi dang / bden pa bzhi dang / khams bco brgyad bstan pa'o/ /'di ni dang po phung po lnga'i tshig drug rnam par bshad pa'o/ /tshig drug po 'di dag brtags pa rnam pa gcig gi mtshan nyid dam/ 'on te brtags pa rnam pa drug tu 'gyur ba zhig yin zhe na/ smras pa/ tshig nges par 'grel pa'i mdo dang mtshams rnam par 'grel pa'i mdo las/ dge slong kha cig ni phung po'i mtshan ma dmigs pa la chos rtogs pa zhes ston to/ /dge slong kha cig ni phung po'i skye ba dmigs pa la chos rtogs pa zhes ston to zhes 'byung bas de'i phyir tshig drug po 'di dag ni brtags pa tha dad yin par mngon no/ /'dir mdo 'di nyid las sgo re re la yang kha cig ni zhes gsungs pas de dag dang mthun pa'i phyir brtags pa rnam pa drug tu dbye bar rig par bya'o/ /yang na sgo gcig la brtags pa rnam pa gcig tu byas na yang 'gal ba med do/ /tshig drug po 'di dag rnam par bshad pa yang rnam pa gnyis kyis bstan te/ tshig gi rnam grangs mang nyung bstan pa dang bye brag gi mtshan nyid rnam par 'byed pa'o/ /de la grangs mang nyung bstan pa ni dgongs pa zab mo rnam par dgrol ba'i mdo dang sbyar na de las tshig lnga las mi 'byung bas tshig dang po ma tshang ste/ lnga ni phung po'i mtshan nyid dang / phung po skye ba'i mtshan nyid dang / phung po 'jig pa'i mtshan nyid dang phung po 'gog pa'i chos dang / phung po 'gog pa mngon du bgyi ba'i chos zhes 'byung ngo / /tshig nges par 'grel ba'i mdo las ni tshig drug tshang bar 'byung ste don 'di dang mthun no/ /de la tshig drug ni phung po dang / phung po'i mtshan nyid dang / phung po'i skye ba dang / phung po'i rnam par 'gyur ba dang / phung po 'gog pa mngon du bgyi ba'i lam zhes 'byung ngo / /de la bye brag gi mtshan nyid ces bya ba ni/ slob dpon yang dag bden pas bshad pa las/ phung po lnga la sogs pa chos kyi sgo mo brgyad khri dag la ro gcig pa'i don du rtogs par bya ba yin na/ de'i mtshan nyid ni ji lta bu/ gnas brtan pa'i sde pa dang sbyar na ni chos kyi sgo mo brgyad khri bzhi stong ngo zhes zer/ 'di yang dag pa'i tshad ma'i sde pa dang sbyar na ni brgyad khri kho nar zad do zhe na/ smras pa chos kyi mtshan nyid rnam pa drug la brten nas ro gcig pa'i don bstan pa yin no/ /de la dge slong kha cig ni phung po dmigs pa zhes bya ba ni bdag nyid kyi thob pa gang yin pa brda sprod par byed pa ste/ 'di ni dang po phung po lnga yod pa nyid du 'dzin cing ston pa chen pos gsungs pa khong du chud par mi nus pas sgra ji bzhin du mngon par zhen nas phung po las chos gzhan med do zhes de ltar ro gcig pa'i don khong du ma chud pa'i phyir/ yang dag par phung po lnga ni yod snyam du mngon par zhen pa med do snyam du mngon par zhen pa bskyed do/ /mngon par zhen pa 'di'i dbang gis ni/ phyin ci log skye la phyin ci log gi dbang gis ni mngon pa'i nga rgyal skyes pa'o/ /dge slong kha cig ni phung po'i mtshan nyid rtogs shing dmigs pas zhes bya ba 'di ni gnyis pa phung po lnga'i mtshan nyid bstan pa ste/ brtag pa'i mtshan nyid dam/ yang dag pa'i chos kyi mtshan nyid dam/ yon tan gyi mtshan nyid dam/ nyes dmigs kyi mtshan nyid dam/ rgyu dang rkyen gyi mtshan nyid dam/ dus gsum gyi mtshan nyid dam/ skye ba dang gnas pa dang / 'jig pa'i mtshan nyid dam/ sdug bsngal la sogs pa bden pa bzhi'i mtshan nyid dam / khams gsum pa'i mtshan nyid dam/ zag pa med pa'i dbyings kyi mtshan nyid dam/ mgo gcig tu lung bstan pa'i mtshan nyid dam/ rnam par phye ste lung bstan pa'i mtshan nyid dam/ dris nas lung bstan pa'i mtshan nyid dam/ rnam par gzhag pa'i lung bstan pa'i mtshan nyid dam/ gzugs rnam pa bzhi'i mtshan nyid dam/ rgyun dang bcas pa dang rgyun med pa dang / gzugs dang sems dang / gzugs dang sems ma yin pa'i mtshan nyid la sogs pa phung po la 'di lta bu'i rig pa rnam pa sna tshogs dang ldan pa gang yin pa 'di ni phung po'i mtshan nyid ces bya ste/ 'di ltar ro gcig pa'i rig pa khong du ma chud pa'i phyir 'di ni yang dag pa'i rig pa yin no snyam pa'i 'dzin pa skyed par byed/ 'dzin pa 'di'i rgyu'i phyir ni phyin ci log 'byung ngo / /phyin ci log tu gyur pa'i phyir ni mngon pa'i nga rgyal skyes pa'o/ /dge slong kha cig ni phung po'i skye ba rtogs shing dmigs pas zhes bya ba 'di ni gsum pa skye ba'i mtshan nyid bstan pa ste/ 'di ltar rgyu dang 'bras bu ro gcig pa nyid du ma shes pa'i phyir phung po lnga la yang dag pa nyid du skye ba yod pa nyid pa'o/ / 'dzin pa 'di'i dbang gis phyin ci log 'byung la/ phyin ci log tu gyur pa'i phyir ni mngon pa'i nga rgyal skyes pa'o/ /dge slong kha cig ni phung po'i rnam par 'gyur ba dmigs pas zhes bya ba 'di ni bzhi pa phung po'i rnam par 'gyur ba'i mtshan nyid bstan pa ste/ 'di ltar 'gag pa med pa ro gcig pa nyid du ma shes pa'i phyir yang dag par 'gyur ba yod do snyam pa'i 'dzin pa 'di 'byung ngo / /'dzin pa'i dbang gis ni phyin ci log 'byung la/ phyin ci log tu gyur pa'i phyir ni mngon pa'i nga rgyal skyes pa'o/ /dge slong kha cig ni phung po'i 'gog pa rtogs shing dmigs pas zhes bya ba ni lnga pa phung po'i mtshan nyid bstan pa ste/ 'di ltar rnam par dag pa ro gcig pa nyid du ma shes pa'i phyir rnam par dag pa yang dag par yod do snyam pa'i 'dzin pa 'di 'byung ngo / /'dzin pa 'di'i dbang gis na phyin ci log 'byung la/ phyin ci log tu gyur pa'i phyir ni mngon pa'i nga rgyal skyes par 'gyur ba'o/ /dge slong kha cig ni phung po 'gog pa'i lam rtogs pas zhes bya ba 'di ni drug pa phung po 'gog pa'i lam bstan pa ste/ 'di ltar yul dang shes pa ro gcig pa nyid du ma shes pa'i phyir yang dag par 'gog pa thob pa'i lam yod do snyam pa'i 'dzin pa 'di 'byung ngo / /'dzin pa'i dbang gis ni phyin ci log 'byung la phyin ci log tu gyur pa'i phyir ni mngon pa'i nga rgyal skyes pa'o/ /phung po lnga'i chos kyi sgo mo la don rnam pa drug dang ldan pas ro gcig pa nyid rnam pa drug tu bstan pa bzhin du skye mched bcu gnyis la sogs pa chos kyi sgo mo thams cad la yang de bzhin du sbyar bar bya'o/ /bshad pa'i rnam grangs gzhan du na de las tshig dang pos ni tha snyad kyi phyogs kyi rnam pa bstan pa ste/ 'di ltar phung po lnga po dag ni tha snyad tsam du zad kyi gzhan med pa'i phyir ro/ /tshig gnyis pas ni don dang tshul gyi phyogs kyi rnam pa bstan pa ste/ btags pa dang / yang dag pa'i chos dang / dus gsum la sogs pa'i mtshan nyid rnam pa sna tshogs mi mthun pa sngar bstan pa lta bu yod kyang yang dag pa'i tshul du na bdag med par gcig pa'o/ /tshig gsum pas ni dgag par bya ba phyogs kyi rnam pa bstan pa ste / de ni kun 'byung ba'i bden pa nyon mongs pa dang las yin pa'i phyir ro/ /tshig bzhi pas ni shes par bya ba'i phyogs kyi rnam pa bstan te/ 'di ni sdug bsngal gyi bden pa'o/ /tshig lnga pas ni thob par bya ba'i phyogs kyi rnam pa bstan te/ 'di ni 'gog pa'i bden pa'o/ /tshig drug pas ni bsgrub par bya ba'i phyogs kyi rnam pa bstan te/ 'di ni lam gyi bden pa'o/ /skye mched la sogs pa la yang de bzhin du drug po 'di dag yod par sbyar ro zhes 'byung ngo / /'dir rnam par bshad pa ni de lta ma yin te/ de la phung po thob pa zhes bya ba ni phung po lnga'i chos kyi sgo mo rtogs pa spyir bstan pa ste/ 'di ni mdor bstan pa'i tshig go/ /phung po'i mtshan ma thob pa zhes bya ba ni phung po'i rang gi ngo bo'i mtshan nyid dang / bye brag gi mtshan nyid thob pa ste/ tshig 'di gnyis ni spyi yin pas tshig 'og ma kun dang sbyar bar bya ste/ de'i phyir 'og nas mdo las ming brda tsam du gzugs kyi phung po zhes rang gi ngo bo nyid kyi mtshan nyid dam bye brag gi mtshan nyid du rnam par gzhag pa zhes bya ba nas gzugs kyi phung po gtan du spangs pa dang / yongs su shes pa zhes rang gi ngo bo nyid kyi mtshan nyid dam bye brag gi mtshan nyid ces bya ba'i bar du gsungs pa yin no/ / de la rang gi ngo bo nyid ces bya ba ni chos gang bdag nyid dang bcas pa ni rang gi ngo bo nyid ces bya ste/ ji ltar gzugs dang tshor ba'i phung po zhes bya ba la sogs pa lta bu'o/ /rang gi ngo bo nyid la bye brag gi don rnam par 'byed pa ni bye brag gi mtshan nyid ces bya ste/ ji ltar rtag pa dang / mi rtag pa dang / zag pa dang bcas pa dang / zag pa med pa zhes bya ba la sogs pa lta bu'i phung po'i skye ba thob pa dang / phung po'i zad pa zhes bya ba'i tshig 'di gnyis kyis ni skye zhing 'jig pa'i mi rtag pa'i rnal 'byor bstan te/ de'i phyir 'og nas mod las phung po rnams kyi skye ba'i mtshan nyid dang / 'gog pa'i mtshan nyid ces gsungs pa dang / gzhan yang mdo dag las 'du byed rnams ni mi rtag ste/ byung nas zad pa'i chos can gyi phyir ro zhes gsungs so/ /gzhan yang rnal 'byor spyod pa'i sa las 'du byed rnams ni mi rtag pa ste/ gdon mi za bar byung na zad pa dang mtshungs par ldan pa'i phyir ro zhes 'byung ngo / /phung po 'gog pa thob pa dang / phung po 'gog pa mngon du bgyi ba thob pa'i slad du zhes bya ba'i tha tshig 'di gnyis kyis ni 'gog pa dang / lam gyi bden pa gnyis bstan te/ sdug bsngal dang / kun 'byung ba'i bden pa spangs na [(]'gag [,]'gog [)]pa'i bden pa thob pa'i phyir dang / lam gyi dbang gis phung po spangs nas 'gog pa mngon du byed pa'i phyir ro/ /skye mched bcu gnyis la sogs pa yang 'di dang 'dra bar bshad par bya'o/ /phung po lnga'i don rgya cher rnam par 'byed pa ni mtshan nyid bstan pa dag las 'byung ba bzhin du rig par bya'o/ /ji ltar kha cig phung po thob pa'i slad du/ ji lta ba de bzhin du kha cig skye mched thob pa dang / /kha cig rten cing 'brel bar 'byung ba thob pa yang de bzhin no zhes bya ba ni gnyis pa zlas skye mched dang / rten cing 'brel bar 'byung ba bstan pa yin te re re la yang tshig drug yod pa ni phung po bzhin du rig par bya'o/ /skye mched dang rten cing 'brel bar 'byung ba'i don ni mtshan nyid bstan pa las 'byung ba bzhin no/ /yang kha cig ni zas thob pa dang / zas kyi mtshan ma thob pa dang / zas kyi skye ba thob pa dang / zas kyi zad pa thob pa dang / zas 'gog pa thob pa dang / zas 'gog pa mngon du bgyi ba thob pa'i slad du shes pa brda sprod par bgyid ces bya ba ni gsum pa zas rnam pa bzhi'i sgo la brten nas shes pa brda sprod par byed pa bstan pa ste/ tshig drug sbyar zhing rnam par bshad pa ni gong ma bzhin du rig par bya'o/ /zas rnam pa bzhi'i don rnam par dbye ba ni mtshan nyid bstan pa dag las 'byung ba bzhin du shes par bya'o/ / yang kha cig ni bden pa thob pa dang / bden pa'i mtshan ma thob pa dang / bden pa yongs su shes pa thob pa dang / bden pa gtan du spangs pa thob pa dang / bden pa mngon du bgyi ba thob pa dang / bden pa bsgom pa thob pa'i slad du shes pa brda sprod par bgyid ces bya ba ni bzhi pa bden pa bzhi'i sgo la brten nas shes pa brda sprod par byed pa bstan pa ste/ tshig rnam pa drug las dang po gnyis ni spyi yin te snga ma bzhin du rig par bya'o/ /phyi ma bzhi ni go rims bzhin du sdug bsngal yongs su shes par bya ba dang / kun 'byung gtan du spang bar bya ba dang / 'gog pa mngon du bya ba dang / lam bsgom par bya'o/ /bstan bcos rnal 'byor spyod pa'i sa dang sbyar na/ de las ci'i phyir sdug bsngal gyi bden pa yongs su shes par bya ba dang / kun 'byung gi bden pa gtan du spang bar bya ba dang / 'gog pa'i bden pa rig cing mngon du bya ba dang / lam gyi bden pa bsgom par bya bar bshad ce na/ smras pa/ sdug bsngal gyi bden pa de ni phyin ci log bzhi'i gnas yin pas phyin ci log bsal bas phyir yongs su shes par bya ba'o / /kun 'byung gi bden pa ni sdug bsngal gyi bden par gsungs pa'i phyir sdug bsngal gyi bden pa yongs su shes su zin kyang da dung kun 'byung ba'i bden pa dang / rjes su 'brel ba'i phyir kun 'byung gi bden pa ni spang bar bya ba yin par bshad dgos so/ /mngon sum du bya ba ni mngon sum du byas pa'i don yin te/ 'gog pa'i bden pa mngon sum du mthong ba'i phyir mi skrag cing dga' ba yongs su 'dzin pas de'i phyir de'i 'og tu ni 'gog pa'i bden pa ni mngon sum du byas pa yin par bshad do/ /lam goms par byas nas gdod ji skad smos pa'i don gsum po dag mngon par 'grub pas de'i phyir tha mar lam gyi bden pa ni bsgom par bya ba yin par bshad pa yin no zhes 'byung ngo / /bden pa gsum po dag kyang yongs su shes par bya ba yin na/ ci'i phyir sdug bsngal ba 'ba' zhig yongs su shes par bshad ce na/ smras pa/ 'di ni bstan bcos bye brag tu bshad pa chen po las ji skad du mdo sde dag las ni sdug bsngal gyi bden pa kho na yongs su shes par bya bar gsungs na ci'i phyir chos mngon pa las chos thams cad yongs su shes par bstan zhe na/ btsun pa rtsibs na re/ bcom ldan 'das kyis sdug bsngal kho na yongs su shes par bya bar gsungs pa 'am/ yang na sdug bsngal 'ba' zhig yongs su shes par bya ba yin pas/ de'i phyir chos mngon pa las chos thams cad ni yongs su shes par bya ba yin no zhes bstan to / /bcom ldan 'das kyis kun 'byung kho na yongs su [(]sdang [,]spang [)]bar gsungs pa'am/ yang na kun 'byung ba 'ba' zhig yongs su spang bar bya ba yin pas de'i phyir chos mngon pa las zag pa dang bcas pa'i chos rnams ni yongs su spang bar bya ba yin no zhes bstan to/ /bcom ldan 'das kyis 'gog pa kho na mngon sum du bya bar gsungs pa'am/ yang na 'gog pa 'ba' zhig mngon du bya ba yin pas/ de'i phyir chos mngon pa las mngon du bya ba thob pa la brten nas dge ba'i chos rnams ni mngon sum du bya ba yin no zhes bstan to/ /bcom ldan 'das kyis lam kho na bsgom par gsungs pa'am/ yang na lam 'ba' zhig bsgom par bya ba yin pas de'i phyir chos mngon pa las 'dus byas kyi chos dge ba thams cad ni bsgom par bya ba yin no zhes bstan te/ 'dis ni mdo las gsungs pa ni nges pa'i don ma yin la/ chos mngon pa las bshad pa ni nges pa'i don yin par bstan pa yin zhes 'byung ste/ rgya cher ni bstan bcos de nyid las rnam grangs mang pos bstan pa yin no/ /bden pa bzhi'i don rgya cher rnam par 'byed pa ni mtshan nyid bstan pa 'byung ba bzhin du rig par bya'o/ /yang kha cig ni khams thob pa dang / khams kyi mtshan ma thob pa dang / khams sna tshogs pa nyid thob pa nyid dang / khams gcig pa nyid ma yin pa thob pa dang / khams 'gog pa thob pa dang / khams 'gog pa mngon du bgyi ba thob pa'i slad du shes pa brda sprod par bgyid ces bya ba ni lnga pa khams bco brgyad la brten nas shes pa brda sprod par byed pa bstan to/ /tshig drug po de dag las dang po gnyis dang / tha ma gnyis ni snga ma bzhin du rig par bya'o/ /tshig bya ba gnyis ni bye brag rnam par bshad pa'o/ /rnam pa shin tu mang bas sna tshogs zhes bya'o/ /grangs gcig las 'das pa'i phyir gcig pa nyid ma yin pa zhes bya ste/ de'i phyir lung sna tshogs las bcom ldan 'das kyis dge slong rnams la bka' stsal pa/ khams sna tshogs ji lta bu zhe na/ 'di lta ste/ khams bco brgyad po mig gi khams dang / gzugs kyi khams dang / mig gi rnam par shes pa'i khams nas yid kyi khams dang / chos kyi khams dang / yid kyi rnam par shes pa'i khams kyi bar du gang yin pa de ni khams sna tshogs yin no zhes gsungs so/ /bstan bcos rnal 'byor spyod pa'i sa dang sbyar na/ phung po lnga la brten nas sna tshogs dang gcig pa nyid ma yin pa'i don gyi bye brag ston to / /de'i phyir de nyid las de las phung po rnams kyi bdag nyid tha dad pa gang zhe na/ 'di lta ste/ gzugs kyi phung po yang gzhan la de bzhin du rnam par shes pa'i phung po'i bar yang gzhan pa'o/ /de la phung po rnams kyi bdag nyid mang po gang zhe na/ 'di lta ste/ gzugs kyi phung po yang gcig pa ma yin zhing rnam pa sna tshogs mang po 'byung ba dang / 'byung ba las gyur pa'i bye brag gi phyir 'das pa dang / ma 'ongs pa dang / da ltar byung ba la sogs pa'i rnam pa bye brag gi phyir ro zhes 'byung ngo / /gzhan yang de nyid las khams sna tshogs nyid gang zhe na/ 'di lta ste/ khams bco brgyad po dag phan tshun mtshan nyid tha dad pa nyid gang yin pa'o/ /khams gcig pa nyid ma yin pa gang zhe na/ 'di lta ste/ khams de dag nyid sems sna tshogs dpag tu med pa'i rab tu dbye bas gnas pa nyid do/ /khams tshad med pa gang zhe na/ 'di lta ste/ de gnyi ga gcig tu bsdus pa la khams tshad med pa zhes bya'o zhes 'byung ngo / /gzhan yang de nyid las khams bco brgyad khong du chud pa gang yin pa de ni khams du mar shes pa'o/ /de dag gi rnam pa sna tshogs shes pa ni khams sna tshogs shes pa'o/ /de dag gi rab tu dbye ba shes pa ni khams dang / 'gro ba dang / sa dang / gang zag dang / rnam pa'i dbye ba shes pa'o zhes 'byung khams bco brgyad kyi don ni mtshan nyid bstan pa dag las bshad pa bzhin no/ /yang kha cig ni dran pa nye bar gzhag pa thob pa dang / dran pa nye bar gzhag pa'i mtshan ma thob pa dang / dran pa nye bar gzhag pa'i gnyen po dang / mi mthun pa'i phyogs bstan pa dang / dran pa nye bar gzhag pa bsgom pa thob pa dang / dran pa nye bar gzhag pa ma skyes pa skye ba thob pa dang / dran pa nye bar gzhag pa skyes pa gnas pa dang / mi bskyud pa dang / slar zhing 'byung ba dang / 'phel zhing rgyas pa thob pa'i slad du shes pa brda sprod par bgyid ces bya ba 'di man chad ni gnyis pa byang chub kyi phyogs sum cu rtsa bdun la brten nas shes pa brda sprod par byed pa ston to/ /'di la yang bshad pa rnam pa gnyis yod de/ kha cig na re snga ma'i phung po la sogs pa'i chos ni rtogs pa'i yul la brten nas shes pa brda sprod pa yin la/ phyi ma la dran pa nye bar gzhag pa la sogs pa ni rtogs pa'i spyod pa la brten nas shes pa brda sprod par byed pa yin no zhe'o/ /kha cig na re dge slong de dag phung po la sogs pa'i chos kyi mtshan nyid rnam pa drug kho na la don dam pa'i mngon par rtogs pa'i yul lo zhes dmigs pa ma yin gyi/ dran pa nye bar gzhag pa dang / yang dag pa'i spong ba la sogs pa'i chos kyi mtshan nyid rnam pa drug po dag la yang de kho na nyid kyi mngon par rtogs par byed pa'i spyod yul bar brtags pa yin te/ de'i phyir tshig nges par 'grel pa'i mdo las/ dge slong kha cig ni dran pa nye bar gzhag pa dang / dran pa nye bar gzhag pa'i mtshan nyid la sogs pa rtogs shing dmigs pas rang gi thob pa brda sprod par bgyid ces gsungs pa dang / gzhan yang dgongs pa zab mo rnam par dgrol ba'i mdo las 'di ltar dge slong de dag dran pa nye bar gzhag pa'i mtshan ma bzung nas chos rtogs pa'o zhes ston to zhes gsungs te/ zhib tu de nyid las gsungs pa bzhin no zhe'o/ /'di yang rnam pa gsum du phye nas bstan te/ dran pa nye bar gzhag pas shes pa brda sprod pa dang / kha cig ni zhes bya ba man chad kyis zlas yang dag pa'i spong ba dang / rdzu 'phrul gyi rkang pa dang / dbang po dang stobs dang / byang chub kyi yan lag gis shes pa brda sprod pa dang / 'phags pa'i lam yan lag brgyad kyis shes pa brda sprod pa'o/ /'di dang po dran pa nye bar gzhag pa bzhi la brten nas shes pa brda sprod pa nyid do/ /de la dran pa nye bar gzhag pa zhes bya ba ni 'di lta ste/ dran pa nye bar gzhag pa bzhi po lus dang / tshor ba dang / sems dang / chos so/ /bstan bcos yang dag pa'i rigs pa las ci'i phyir shes rab la dmigs pa la dran pa nye bar gzhag pa zhe na/ shes rab ni dran pa'i stobs kyis yongs su bzung nas gnas par byed pa'i phyir ro zhes bshad do/ /mdzod kyi bstan bcos las ni bye brag tu smra ba dag 'di skad du/ shes rab ni dran pa'i stobs kyis yongs su gzung ba'i phyir dbang gis gnas par byed pa'i phyir ro zhes zer te/ yang dag pa'i don du na shes rab kyi dbang gis dran pa yul gnas par byed de/ yang dag pa ji lta ba bzhin du mthong ba dag gsal bar dran pa'i phyir ro zhes bshad do/ /bstan bcos bye brag tu bshad pa chen po las 'di ltar dran pa'i mthu stobs kyis rang gi bdag nyid yongs su sel ba'i phyir dran pa nye bar gzhag pa zhes bya'o/ /de la rang gi bdag nyid ni zag pa dang bcas pa'i phung po lnga po dag yin te/ dran pa nye bar gzhag pa'i dbang gis de rab tu sel ba'i phyir ro zhes 'byung ngo / / 'phags pa shes rab kyi pha rol tu phyin pa'i 'grel pa las shes rab kyi rjes su 'brang zhing dmigs pa la yang dag par gnas pa ni dran pa nye bar gzhag pa zhes bya'o zhes bshad do/ /rnal 'byor spyod pa'i sa las de la dran pa nye bar gzhag pa zhes bya ba'i don gang zhe na/ smras pa/ gang la dran pa nye bar gzhag par byed pa dang / gang gis dran pa nye bar 'jog par byed pa de ni dran pa nye bar gzhag pa zhes bya'o/ /de la gang la dran pa nye bar 'jog par byed ce na/ de ni dmigs pa la dran pa nye bar gzhag pa yin no/ /gang gis dran pa nye bar 'jog par byed ce na/ de la shes rab dang dran pas ting nge 'dzin sdud par byed pa gang yin pa de ni ngo bo nyid kyis dran pa nye bar gzhag pa yin no/ /de las gzhan pa de dag dang mtshungs par ldan pa'i sems dang sems las byung ba'i chos rnams ni 'dres pa'i dran pa nye bar gzhag pa yin no zhes 'byung ngo / /de la ngo bo nyid rnam par 'byed pa ni thams cad yod par smra ba dag 'dod pa dang sbyar na/ shes rab kyi ngo bo nyid do zhes bshad do/ /theg pa chen po'i bstan pa dang sbyar na ni dran pa dang shes rab kyi bdag nyid do zhes bshad de/ de'i phyir chos mngon pa sna tshogs kun las btus pa las dran pa nye bar gzhag pa'i ngo bo nyid ni 'di lta ste/ shes rab dang dran pa'o/ /bcom ldan 'das kyi mdo dag las dman pa la sogs pa'i rjes su rtog pa zhes bya ba yod pa'i phyir dang / dran pa nye bar gzhag pa dang bcas pa zhes gsungs pa'i phyir dang / go rims bzhin no zhes bshad do/ /bstan bcos rnal 'byor spyod pa'i sa las ni shes rab dang / dran pas ting nge 'dzin yang dag par sdud pa ni ngo bo nyid kyi dran pa nye bar gzhag pa'o zhes 'byung ngo / /gzhan yang de nyid las 'di yang rnam pa gsum te/ thos pa las byung ba dang / bsam pa las byung ba dang / bsgom pa las byung ba'o/ /thos pa dang / bsam pa las byung ba ni zag pa dang bcas pa kho na yin no/ /bsgom pa las byung ba ni zag pa dang bcas pa yang yod/ zag pa med pa dang bcas pa yang yod do zhes bshad do/ /de la tshig gi don rnam par bshad pa la mdo tshig rnam pa drug yod do / /dgongs pa zab mo rnam par dgrol ba'i mdo las ni tshig bdun 'byung ste/ tshig drug pa las rnam pa gnyis su phye bas 'di lta ste/ dran pa nye bar gzhag pa skyes pa gnas pa dang bsgom pa'i mtshan nyid mi bskyud pa zhes 'byung ngo / /tshig nges par 'grel ba'i mdo las ni slob dpon yang dag bden pas tshig rnam pa bcur phye nas ston te / de'i phyir slob dpon yang dag bden pa'i brjed byang las/ mdo las dge slong kha cig ni dran pa nye bar gzhag pa dmigs pa zhes bya ba la sogs pa'i tshig bcus ci zhig ston par mdzad ce na/ smras pa/ don rnam pa bcu bstan pa'i phyir tshig bcu po 'di dag gsungs pa yin te/ tshig dang po dran pa nye bar gzhag pa rtogs shing dmigs pas zhes bya ba de ni yul gyi dran pa nye bar gzhag pa'o/ /gnyis pa dran pa nye bar gzhag pa'i mtshan nyid ces bya ba de ni ngo bo nyid kyi dran pa nye bar gzhag pa'o/ /gsum pa dran pa nye bar gzhag pa'i mi mthun pa'i zhes bya bas ni dran pa nye bar gzhag pa'i lam mi mthun pa'i phyogs phyin ci log bzhi bstan to/ /bzhi pa dran pa nye bar gzhag pa'i gnyen po lam zhes bya ba ni gnyen por gyur pa'i lam bstan te/ de ni 'dres pa'i dran pa nye bar gzhag pa phyin ci log bzhi'i gnyen por gyur pa'i phyir ro/ /lnga pa dran pa nye bar gzhag pa'i bsgom pa zhes bya ba de ni dran pa nye bar gzhag pa'i sbyor ba'i lam mo/ /drug pa dran pa nye bar gzhag pa ma skyes pa skye ba rtogs shing dmigs pa zhes bya ba de ni bar chad med pa'i lam yin te/ 'di lta ste/ bzod pa brgyad po dag go/ /bdun pa dran pa nye bar gzhag pa skyes pa gnas pa rtogs shing dmigs pa zhes bya ba de ni rnam par 'grel pa'i lam yin te/ 'di lta ste/ shes pa brgyad po de dag go/ /brgyad pa mi bskyud pa zhes bya ba ni bsgom pa'i lam yin te/ rdo rje lta bu'i sems kyi bar dag go/ /dgu pa 'phel ba zhes bya ba ni/ mi slob pa'i lam yin te/ rdo rje lta bu'i 'og gi sems so/ / bcu pa yongs su rdzogs pa zhes bya ba ni rdzu 'phrul gyi lam yin te/ 'khor lo rnam pa gsum gyis sems can la phan 'dogs pa 'di lta ste/ rdzu 'phrul dang sems lung bstan pa dang yang dag par bstan pa rnams kyis so/ /ji ltar dran pa nye bar gzhag pa bzhi la tshig bcu yod pa de bzhin du/ yang dag pa'i spong ba bzhi nas 'phags pa'i lam yan lag brgyad pa'i bar du sbyar bar bya'o zhes 'byung ste/ zhib tu de nyid las bstan pa bzhin no/ /'dir rnam par bshad pa ni de lta ma yin te chos kyi sgo re re yang tshig drug yod par sbyar te/ dang po'i tshig gnyis ni phung po bzhin du rig par bya'o/ /tshig 'og ma bzhi ni phung po la sogs pa dang mi mthun te/ de la dran pa nye bar gzhag pa'i gnyen po dang mi mthun pa'i phyogs thob par zhes bya ba ni dran pa nye bar gzhag pa bzhi po dag phyin ci log bzhi po dag gi gnyen por gyur par bstan to / /'di lta ste/ lus dran pa nye bar gzhag pas lus la mi gtsang ba nyid du bsgom pas gtsang ba nyid du phyin ci log pa'i gnyen por gyur pa yin no/ /tshor ba dran pa nye bar gzhag pas tshor ba la bde ba med pa nyid du phyin ci log pa'i gnyen por gyur pa yin no/ /sems dran pa nye bar gzhag pas/ sems mi rtag pa nyid bsgom pas rtag pa nyid du phyin ci log pa'i gnyen por gyur pa yin no/ /chos dran pa nye bar gzhag pas chos bdag med pa nyid du bsgom pas phyin ci log pa'i gnyen por gyur pa yin te/ rgya cher ni bstan bcos rnal 'byor spyod pa'i sa las bstan pa bzhin no/ /dran pa nye bar gzhag pa bsgom pa thob pas zhes bya ba la sogs pa'i tshig gsum po de dag ni bsgom pa rnam pa bzhi'i dbang du mdzad nas dran pa nye bar gzhag pa bzhi bshad pa yin te/ bsgom pa bzhi po de yang thams cad yod par smra ba'i gzhung gis dran pa nye bar gzhag pa mngon sum du gyur pa ni mngon par 'du byed pa'i bsgom pa zhes kyang bya/ thob pa'i bsgom pa zhes kyang bya ste/ ma 'ongs pa'i thob pa dang / 'thob par 'gyur ba'i rnam pa skyed par nus pa gang yin pa de ni thob pa'i bsgom pa zhes bya ste/ de'i phyir mdzod kyi bstan bcos las bsgom pa ni rnam pa bzhi ste/ 'thob pa'i bsgom pa dang / bstan pa'i bsgom pa dang / gnyen po'i bsgom pa dang / thag bsring ba'i bsgom pa'o 'di ltar bsgom pa bzhi po de dag kyang chos gang la brten nas rnam par gzhag ce na/ tshig le'ur byas pa las/ rnyed dang bsten pa'i bsgom pa gnyis dag ni/ /dge ba 'dus byas chos rten rnam par gzhag /zag pa dang bcas pa'i chos la brten nas ni/ gnyen po thag bsring bsgom pa gzhag pa yin zhes 'byung ste/ 'di nyid kyi 'grel pa las/ thob pa dang bsten pa'i bsgom pa gnyis ni dge ba 'dus byas la brten pa yin te/ ma 'ongs pa rnams kyis thob pa kho na'o/ /da ltar byung ba rnams kyis ni gnyi ga'o/ /gnyen po dang thag bsring ba'i bsgom pa gnyis ni zag pa dang bcas pa'i chos la brten pa'i phyir/ zag pa dang dge ba ni dge ba bzhi char dang ldan no/ /zag pa med pa'i 'dus byas dang / zag pa dang bcas pa'i chos gzhan dag ni go rims bzhin du so so nas snga ma dang / phyi ma gnyis kyi bsgom pa dag dang ldan no zhes bshad de/ rgya cher rnam par 'byed pa ni bstan bcos yang dag pa'i rigs pa dang / rjes su mthun pa dang / bye brag tu bshad pa chen po las bstan pa bzhin no/ /'dir theg pa chen po bstan pa dag dang sbyar nas so so nas mi mthun te/ bstan bcos mngon pa kun las btus pa dang / chos mngon pa sna tshogs kun las btus pa las bsgom pa rnam pa bzhi la brten nas dran pa nye bar gzhag pa la sogs pa bsgom par bstan pa dang / yang dag pa'i spong ba bzhi las brtsams nas bsgom pa rnam pa bzhi ston te/ de'i phyir bstan bcos de nyid las yang lam bsgom pa rnams kyi khyad par ni mdor bsdu na rnam pa bzhi'o/ /'di lta ste/ 'thob pa'i bsgom pa dang / bsten pa'i bsgom pa dang / gsal ba'i bsgom pa dang / gnyen po'i bsgom pa'o/ /'thob pa'i bsgom pa ni 'di lta ste/ dge ba'i chos ma skyes pa rnams bskyed pa'i phyir bsgom pa'o/ /bsten pa'i bsgom pa ni 'di lta ste/ dge ba'i chos skyes pa rnams gnas pa dang / mi nyams pa dang / phyir 'byung ba dang / 'phel ba dang / spang bar bya ba'i phyir gang bsgom pa'o/ /gsal ba'i bsgom pa ni 'di lta ste/ sdig pa mi dge ba'i chos skyes pa rnams spang ba'i phyir gang bsgom pa'o/ /gnyen po bsgom pa ni 'di lta ste/ sdig pa mi dge ba'i chos ma skyes pa rnams mi skyed pa'i phyir gang bsgom pa'o zhes 'byung ngo / /'di ltar khyad par rnam pa bzhi po 'di dag ni ci rigs par yang dag par spong ba bzhi po dag dang sbyar zhing bshad par bya ste/ bstan bcos rnal 'byor spyod pa'i sa las kyang 'di dang mthun par ston to/ /mdo sde 'di nyid dang sbyar na ni dang po'i bsgom pa gnyis 'ba' zhig dran pa gzhag pa bsgom par ston to/ /de la dran pa nye bar gzhag pa'i sgo thob pa zhes bya ba ni bsgom pa gnyis mdor bstan pa'o/ /ma skyes pa skye ba zhes bya ba ni thob pa'i bsgom pa rnam par phye ste bstan pa'o/ /skyes pa gnas pa zhes bya ba la sogs pa ni bstan pa'i bsgom pa rnam par phye ste bstan pa'o/ /ci'i phyir bsgom pa phyi ma gnyis ma bstan ce na/ smras pa/ 'dir dge ba'i chos rnams bsgom pa kho nar ston par mdzad kyi/ sdig pa mi dge ba'i chos gsal bar mi ston pa'i phyir ro/ /yang na bzhi char dang yang ldan te/ sngar gnyen po bstan pa'i skabs su bsgom pa gnyis kyang bsdus pa'i phyir ro/ /dran pa nye bar gzhag pa ma skyes pa skye ba thob pa zhes bya ba ni bstan bcos rnam par bshad pa dang sbyar na/ de las dge ba'i chos ma bskyed pa bskyed pa'i phyir zhes bya ba ni 'di lta ste/ da dung ma thob pa'o/ /dge ba'i chos zhes bya ba ni 'di lta ste/ thos pa dang bsams pa dang / bsgoms pa las byung ba'i shes rab rnam pa gsum po dag skyon med pa'i don gyi phyir dge ba zhes bya'o zhes bshad do/ /bskyed pa'i phyir zhes bya ba ni 'di lta ste/ de dag thob par bya ba'i phyir ro/ /dran pa nye bar gzhag pa skyes pa gnas pa dang / mi bskyud pa dang / slar zhing 'byung ba dang / 'phel zhing rgyas pa thob pa'i slad du zhes bya ba 'di ni bsten pa'i bsgom pa ston te/ 'di yang bstan pa rnams las so so nas bshad pa mi mthun pas bstan bcos rnam par bshad pa las ni rnam pa bdun du bstan te/ dge ba'i chos skyes pa dang / gnas pa dang / mi brjed pa dang / bsgom pa dang / yongs su rdzogs pa dang / phyir zhing 'byung ba dang / 'phel ba dang rgyas par bya ba'i phyir zhes bshad do/ de'i phyir bstan bcos de nyid las skyes pa zhes bya ba ni 'di lta ste/ thob zin pa'i phyir ro/ /gnas pa zhes bya ba ni 'di lta ste/ thob pa'i shes rab kyis so/ /mi brjed pa zhes bya ba ni 'di lta ste/ bsams pa'i shes rab kyis so/ /bsgom pa yongs su rdzogs pa zhes bya ba ni 'di lta ste/ bsgoms pa'i shes rab kyis so/ /gong ma'i tshig gsum gyis ni shin tu bsrungs pas thob pa'i dge ba rnams bstan to/ /phyir 'byung ba dang / 'phel ba dang rgyas pa zhes bya ba ni go rims bzhin du de dag kho na la chog shes pa mi skye ba'i phyir ro zhes 'byung ngo / /rnal 'byor spyod pa'i sa las 'di bdun gyi ming smos par zad kyi rnam par bshad pa ni med do/ /kha cig ni dran pa nye bar gzhag pa thob pa'i slad du ji lta ba de bzhin du yang kha cig ni yang dag pa'i spong ba thob pa dang / rdzu 'phrul gyi rkang pa thob pa dang / dbang po rnams thob pa dang / stobs rnams thob pa dang / byang chub kyi yan lag rnams thob pa yang de bzhin no zhes bya ba ni gnyis pa zlas sgo lnga rnam par bshad pa yin te/ ji ltar dran pa nye bar gzhag pa la tshig drug yod pa de bzhin du yang dag pa'i spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag rnams la yang tshig drug yod par yang gong ma bzhin du rig par bya'o/ /de la sgo lnga zhes bya ba yang dang po ni yang dag pa'i spong ba bzhi po 'di lta ste/ sdig pa mi dge ba'i chos skyes pa rnams yongs su spangs pa'i phyir dang / sdig pa mi dge ba'i chos ma skyes pa rnams mi skyed pa'i phyir dang / dge ba'i chos ma skyes pa rnams bskyed pa'i phyir dang / dge ba'i chos skyes pa rnam gnas pa dang / mi brjed pa la sogs pa'i phyir ro/ /mdzod kyi bstan bcos las ci'i phyir brtson 'grus la yang dag pa'i spong ba zhes bya zhe na/ yang dag pa'i bsgom pas spong ba'i gnas skabs su/ brtson 'grus 'di'i stobs kyis le lo spong ba'i phyir ro/ /yang na yang dag pa'i mchog ces bya ste/ yang dag pa'i lus dang / ngag dang yid kyi nan tan gyi nang na 'di mchog tu gyur pa'i phyir ro zhes 'byung ste/ bstan bcos yang dag pa'i rigs pa dang bye brag tu bshad pa chen po las kyang 'di dang mthun par bshad do/ /'phags pa shes rab kyi pha rol tu phyin pa'i 'grel pa las log pa'i chos 'dzin cing yang dag pa'i lam du 'gro ba'i phyir yang dag pa'i spong ba zhes bya'o/ /gzhan yang de nyid las brtson 'grus kyi sems rnam pa bzhis nan tan dang / 'bad pa bskyed pa'i phyir yang dag pa'i spong ba zhes bya'o zhes 'byung ngo / /de la ngo bo nyid rnam par 'byed pa ni theg pa che chung gi bstan pa kun las brtson 'grus kyi bdag nyid do zhes bshad do/ /rdzu 'phrul gyi rkang pa ni 'di lta ste/ rdzu 'phrul gyi rkang pa bzhi po 'dun pa dang / brtson 'grus dang / sems dang / dpyod pa'i ting nge 'dzin to/ /mdzod kyi bstan bcos las/ ci'i phyir ting nge 'dzin la rdzu 'phrul gyi rkang pa zhes rnam par gzhag ce na/ yon tan khyad par can rnams kyi gnas su gyur pa'i phyir ro zhes bshad do/ /slob dpon gzhan kha cig na re rdzu 'phrul ni ting nge 'dzin yin la/ rkang pa ni 'di lta ste/ 'dun pa la sogs pa'o/ /byang chub kyi yan lag gi ngo bo ni bcu gsum ste 'dun pa dang sems kyis bskyed pa'i phyir ro zhe'o/ /bye brag tu smra ba dag na re/ byang chub kyi yan lag bcu gcig gi steng du 'dun pa dang / sems kyis bsnan pa'i phyir dngos po bcu gsum du 'gyur ro zhe'o/ /gzhan yang mdo las ji skad du ngas khyed la rdzu 'phrul gyi rkang pa la sogs pa bshad par bya ste/ rdzu 'phrul ni 'di lta ste/ rdzu 'phrul gyi yul rnam pa sna tshogs myong zhing gcig las mang por byed pa la sogs pa/ rgya cher bshad pa'i bar du'o/ /rkang pa ni 'di lta ste/ 'dun pa la sogs pa'i ting nge 'dzin bzhi po dag go zhes gsungs pa lta bu'o/ /de la 'dir bcom ldan 'das kyis ting nge 'dzin gyi 'bras bu la ni rdzu 'phrul zhes gsungs so/ /'dun pa la sogs pa'i ting nge 'dzin la ni rkang pa zhes gsungs te/ bstan bcos yang dag pa'i rigs pa las kyang phal cher 'di dang mthun par 'byung ngo / /gzhan yang bstan bcos bye brag tu bshad pa chen po las/ rdzu 'phrul yon tan khyad par can gyi gnas su gyur pa'i phyir rdzu 'phrul gyi rkang pa zhes bya'o zhes 'byung ngo / /rgya cher ni de nyid las bstan pa bzhin no/ /gzhan yang 'phags pa shes rab kyi pha rol tu phyin pa'i 'grel pa las/ sems rtse gcig tu bsdus nas dmigs pa la bde bar gnas pa'i phyir yid bzhin gyi rkang pa zhes bya'o / /gzhan yang de nyid las yang dag par spong ba bzhi po dag gis dus su sems la sogs pa rnam par g.yeng bas/ 'di ltar ting nge 'dzin gyis sems sdud pa'i phyir yid bzhin gyi rkang pa zhes bya'o/ /gzhan yang de nyid las shes rab dang ting nge 'dzin gyi stobs la sogs pas smon pa rnams thob pa'i phyir yid bzhin gyi rkang pa zhes bya'o zhes 'byung ste/ zhib tu de nyid las bstan pa bzhin no/ /bstan bcos rnal 'byor spyod pa'i sa las/ ci'i phyir rdzu 'phrul gyi rkang pa zhes bya zhe na/ smras pa/ 'di lta ste dper na/ gang la rkang pa yod pa des 'gro ba dang / ldog pa dang / pha rol gnon par nus pa de bzhin du/ gang la chos de dag kyang yod la/ ting nge 'dzin de dag kyang yongs su rdzogs par yod cing / de de ltar sems yongs su dag pa dang / yongs su byang ba dang / nyon mongs pa med pa dang / nye ba'i nyon mongs pa dang bral ba dang / drang por gyur pa dang / las su rung bar gnas pa dang / mi g.yo ba thob par gyur na/ 'jig rten las 'das pa'i chos rnams 'thob par bya ba dang / reg par bya ba'i phyir 'gro ba dang / ldog pa dang / pha rol gnon par nus te/ 'di lta ste/ 'jig rten las 'das pa'i chos de dag rdzu 'phrul dam pa dang / 'byor pa dam pa yin pas na/ de'i phyir rdzu 'phrul gyi rkang pa zhes bya'o zhes 'byung ste/ rgya cher de nyid las 'byung ngo / /de la ngo bo nyid rnam par 'byed pa'i theg pa che chung gi bstan pa kun las/ ting nge 'dzin gyi ngo bo nyid do zhes bstan to/ /de la dbang po rnams dang / stobs rnams zhes bya ba ni/ dbang po lnga dang / stobs lnga ste/ dad pa dang / brtson 'grus dang / dran pa dang / ting nge 'dzin dang / shes rab dag go/ /mdzod kyi bstan bcos dag las/ ci'i phyir dad pa la sogs pa la sngar ni dbang po zhes bstan la/ phyis ni stobs zhes bya zhe na/ chos lnga po 'di dag chung ngu dang / chen po'i rnam pa'i phyogs kyi snga phyi la brten pa'i phyir/ gzhan yang zil gyis gnon par nus pa dang / zil gyis gnon par mi nus pa la brten pa'i phyir ro zhes bshad do/ /bstan bcos yang dag pa'i rigs pa las ci'i phyir dad pa la sogs pa la dbang po dang stobs zhes bya zhe na/ dbang du gyur pa'i phyir dang / zil gyis gnon par dka' ba'i phyir ro/ /ci'i phyir lnga pa 'di dag la sngar ni dbang po zhes bstan la de'i 'og tu ni stobs zhes bstan zhe na/ chos lnga po 'di dag gi chung ngu dang / chen po'i rnam pa la brten nas/ snga phyi rnam par dbye ba'i phyir dang / gzhan yang zil gyis gnon pa dang / zil gyis gnon par mi nus pa la gnas pa'i phyir dang / rnam pa'i chung ngu'i dad pa la sogs pa ni mthu chung ba'i phyir mi mthun pa'i phyogs kyis zil gyis gnon par nus la/ chen po'i rnam pa ni 'di las bzlog pa'i phyir/ stobs kyi ming 'thob pa yin no zhes bshad do/ /gzhan yang bstan bcos bye brag tu bshad pa chen po las/ mthu dang nus pa dbang du gyur pa'i phyir ni dbang po zhes bya'o/ / choms par dka' ba'i phyir ni stobs zhes bya'o zhes 'byung ngo / /'phags pa shes rab kyi pha rol tu phyin pa'i 'grel pa las/ shes pa chung ngu'i sems kyis thob pa'i phyir dbang po zhes bya'o/ /shes pa rnon po'i sems kyis thob pa'i phyir stobs zhes bya'o/ / gzhan yang sems can gyi dbang po shes pa la dbang ba dang / thabs kyis stobs thob pa'i phyir dbang po zhes bya'o/ /stobs lnga 'phel bar gyur nas nyon mongs pa 'joms pa dang / sems can sgrol zhing mi skye ba'i chos la bzod pa thob par byed pa ni stobs zhes bya'o/ / gzhan yang lha'i bu'i bdud dang / mu stegs can dag gis 'jig par mi nus pa'i phyir stobs zhes bya'o zhes 'byung ste/ zhib tu ni de nyid las bstan pa bzhin no/ /bstan bcos rnal 'byor spyod pa'i sa las ni dbang byed pa'i don gyi phyir dbang po zhes bya'o/ /choms par dka' ba'i don gyi phyir ni stobs zhes bya'o zhes 'byung ste/ zhib tu de nyid las bstan pa bzhin no/ /bstan bcos rnam par bshad pa dang / chos mngon pa sna tshogs kun las btus pa la sogs pa las kyang rnal 'byor spyod pa'i sa las bstan pa dang don mthun par ston to/ /de la ngo bo nyid rnam par 'byed pa ni/ theg pa che chung gi bstan bcos kun las dad pa la sogs pa'i chos lnga'i bdag nyid do zhes bshad do/ /de la byang chub kyi yan lag ces bya ba ni 'di lta ste/ byang chub kyi yan lag bdun po dran pa dang / chos rnam par 'byed pa dang / brtson 'grus dang / dga' ba dang / shin tu sbyangs pa dang / ting nge 'dzin dang / btang snyoms byang chub kyi yan lag rnams so/ /bstan bcos bye brag bshad pa chen po las/ de kho na nyid kyi byang chub kyi grogs su gyur pa'i phyir byang chub kyi yan lag ces bya'o/ /byang chub kyi yan lag ces bya ba'i don ci yin zhe na/ rtogs par byed pa'i phyir byang chub kyi yan lag ces bya ba'am/ byang chub kyi yan lag tu gyur pa'i phyir byang chub kyi yan lag ces bya'o/ /kha cig ni 'di skad du rtogs par nus pa'i phyir byang chub kyi yan lag ces bya'o zhe'o/ /gal te de lta na gcig ni yin la drug ni ma yin zhe na smras pa/ drug ni byang chub kyi yan lag yin te/ byang chub kyi rjes su gzhol bas gtso bo'i dbang du mdzad nas/ byang chub kyi yan lag ces bya ba'am/ yang kha cig na re/ byang chub kyi yan lag yin pa'i phyir byang chub kyi yan lag ces bya'o zhe'o/ /gal te de lta na drug ni yin la gcig ni ma yin no zhe na/ smras pa chos rnam par 'byed pa ni byang chub kyang yin la byang chub kyi yan lag kyang yin no/ /gzhan drug po dag ni byang chub kyi yan lag yin gyi byang chub ni ma yin te/ ji ltar yang dag pa'i lta ba lam yang yin la lam gyi yan lag kyang yin pa bzhin no zhes 'byung ste/ zhib tu de nyid las bstan pa bzhin no/ /bstan bcos yang dag pa'i rigs pa las kyang / bye brag tu bshad pa chen po las bstan pa dang don mthun par bshad do/ /'phags pa shes rab kyi pha rol tu phyin pa'i 'grel pa las/ mi slob pa'i de kho na'i byang chub tu dngos po 'di bdun gyis phyin par nus pa'i phyir yan lag ces bya'o/ /gzhan yang de nyid las bsgom pa'i lam gyi nus pa yin pa'i phyir byang chub ces bya'o/ /mthong ba'i lam gyi nus pa yin pa'i phyir yan lag ces bya'o zhes bshad do/ /gzhan yang bstan bcos dbus dang mtha' rnam par 'byed pa las/ yan lag 'di byang chub kyi grogs su gyur pa'i phyir byang chub kyi yan lag ces bya'o zhes bshad de/ des ni byang chub kyi yan lag ni mthong ba'i lam gyi gnas skabs la gnas pa yin no/ /bstan bcos rnal 'byor spyod pa'i sa las kyang / yang dag pa nyid du skyon med par zhugs pa'i gang zag gis yang dag pa ji lta ba bzhin du rtogs pa'i shes rab kyi yan lag 'byed pa'i phyir byang chub kyi yan lag ces bya'o zhes bstan to/ /de la ngo bo nyid rnam par 'byed pa ni theg pa che chung gi bstan pa rnams las/ shes rab dang / brtson 'grus dang / dran pa dang / ting nge 'dzin dang / dga' ba dang / shin tu sbyangs pa dang / btang snyoms kyi bdag nyid do zhes bshad do/ /yang kha cig ni 'phags pa'i lam yan lag brgyad pa thob pa dang / 'phags pa'i lam yan lag brgyad pa'i mtshan ma thob pa dang / 'phags pa'i lam yan lag brgyad pa'i gnyen po dang / mi mthun pa'i phyogs thob pa dang / 'phags pa'i lam yan lag brgyad pa'i bsgom pa thob pa dang / 'phags pa'i lam yan lag brgyad pa'i ma skyes pa skye ba thob pa dang / 'phags pa'i lam yan lag brgyad pa'i skyes pa gnas pa dang / mi bskyud pa dang / slar zhing 'byung ba dang / 'phel zhing rgyas pa thob pa'i slad du/ shes pa brda sprod par bgyid do zhes bya ba 'di ni gsum pa 'phags pa'i lam yan lag brgyad pa la brten nas shes pa brda sprod par byed do/ / de la gnyen po ni yang dag pa'i lam brgyad do/ /mi mthun pa'i phyogs ni log pa brgyad de/ gzhan ni snga ma bzhin du bshad par bya'o/ /'phags pa'i lam yan lag brgyad ces bya ba ni 'di lta ste/ yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / yang dag pa'i rtsol ba dang / yang dag pa'i dran pa dang / yang dag pa'i ting nge 'dzin to/ /bstan bcos bye brag tu bshad pa chen po las lam gyi yan lag ces bya ba'i don ci zhe na/ yongs su tshol zhing gzhol ba'i phyir lam gyi yan lag ces bya'o/ /lam gyi yan lag byed pa'i phyir lam gyi yan lag ces bya'o/ /kha cig 'di skad du 'dis yongs su tshol zhing gzhol ba'i phyir lam gyi yan lag ces bya'o zhes zer te/ /gal te de lta na gcig ni yin la bdun ni ma yin no zhe na/ smras pa bdun ni lam gyi yan lag yin te/ lam gyi rjes su 'brang bas gtso bo'i dbang du mdzad nas/ lam gyi yan lag ces bstan to/ /yang kha cig na re lam gyi yan lag yin pa'i phyir lam gyi yan lag ces bshad do / /gal te de lta na bdun ni yin la gcig ni ma yin no zhe na/ smras pa/ yang dag pa'i lta ba ni lam yang yin la lam gyi yan lag kyang yin no/ /gzhan ni lam gyi yan lag yin gyi lam ni ma yin te/ ji ltar chos rnam par 'byed pa ni byang chub kyang yin/ byang chub kyi yan lag kyang yin la/ gzhan drug ni byang chub kyi yan lag yin gyi/ byang chub ni ma yin pa bzhin no zhe'o/ /'phags pa shes rab kyi pha rol tu phyin pa'i 'grel pa las/ chos 'di ni bde ba dang / phun sum tshogs pa yin pas/ mya ngan las 'das pa 'dus ma byas kyi grong khyer du 'jug par nus pa'i phyir chos 'di gang spyod pa de ni lam zhes bya'o zhes bshad do/ /bstan bcos rnal 'byor spyod pa'i sa las ci'i phyir 'phags pa'i lam yan lag brgyad pa zhes bya zhe na/ smras pa/ 'phags pa slob pa bzhi mthong ba rnams yan lag brgyad kyis yang dag par 'dus pa'i lam gyis nyon mongs pa/ thams cad ma lus par spang bar bya ba dang / rnam par grol ba mthar phyin par mngon du byed pa'i phyir 'phags pa'i lam yan lag brgyad pa zhes bya'o zhes 'byung ngo / /de la ngo bo nyid rnam par 'byed pa ni so so nas bshad pa mi mthun te/ mdzod kyi bstan bcos las ni chos drug gis ngo bo nyid byed de/ yang dag pa'i ngag dang / las kyi mtha' dang / 'tsho ba ni tshul khrims su mtshungs pa'i phyir ro zhes bshad do/ /bye brag tu smra ba dag ni chos bdun gyi bdag nyid de/ lus dang ngag gi las gnyis ni mi 'bral ba'i phyir zhes zer te/ bstan bcos yang dag pa'i rigs pa las kyang de skad du ston to/ /bstan bcos bye brag tu bshad pa chen po las ni bshad pa rnam pa gsum yod de/ kha cig ni drug go zhes zer/ kha cig ni bdun no zhes zer te/ don ni mdzod kyi bstan bcos las 'byung ba dang mthun no/ /kha cig ni brgyad do zhes zer te/ yang dag pa'i 'tsho ba ni yang dag pa'i ngag dang / las kyi mtha' ma yin pa'i phyir ro zhe'o/ /bstan bcos mngon pa sna tshogs kun las btus pa las/ lam gyi yan lag gi ngo bo nyid ni 'di lta ste/ yang dag pa'i lta ba dang / yang dag pa'i rtog pa dang / yang dag pa'i ngag dang / yang dag pa'i las kyi mtha' dang / yang dag pa'i 'tsho ba dang / /yang dag pa'i rtsol ba dang / yang dag pa'i dran pa dang / yang dag pa'i ting nge 'dzin te/ chos brgyad po 'di dag ni las kyi rang gi ngo bo nyid ces bya'o zhes bshad do/ /byang chub kyi yan lag bdun dang / lam gyi yan lag brgyad gnas skabs gang la brten nas bstan zhe na/ smras pa/ bstan bcos bye brag tu bshad pa chen po dang sbyar na/ bshad pa rnam pa gnyis yod de/ kha cig na re mthong ba'i lam gyi gnas skabs la ni yang dag pa'i lam brgyad rnam par gzhag go/ /bsgom pa'i gnas skabs la ni byang chub kyi yan lag rnam par gzhag go zhe'o/ /kha cig na re/ mthong ba'i lam ni byang chub kyi yan lag ces bya'o/ /bsgom pa'i lam ni lam gyi yan lag brgyad pa zhes bya'o zhe'o/ /dpyad pa dag gi yang dag pa'i don ni bshad pa snga ma yang dag pa yin no zhes bshad do/ /mdzod kyi bstan bcos kyang bshad pa rnam pa gnyis yod de/ bshad pa gcig ni bye brag tu bshad pa chen po las bstan pa dang mthun no/ /gcig ni 'di skad du byang chub kyi yan lag bdun ni mthong ba'i lam gyi gnas skabs su yod do/ /'phags pa'i lam yan lag brgyad ni mthong ba dang / bsgom pa'i gnyi ga la yod do zhe'o/ /'dir theg pa chen po'i bstan bcos dang sbyar na/ 'phags pa shes rab kyi rol tu phyin pa'i 'grel pa las bshad pa rnam pa gnyis yod de/ phal cher bstan bcos bye brag tu bshad pa chen po las bstan pa dang mthun no/ /bstan bcos chos mngon pa sna tshogs kun las btus pa dang / dbus mtha' rnam par 'byed pa las/ byang chub kyi yan lag bdun ni mthong ba'i lam la'o/ /'phags pa'i lam yan lag brgyad ni bsgom pa'i lam la'o zhes bshad do/ /bstan bcos rnam par bshad pa las/ byang chub kyi yan lag bdun ni mthong ba'i lam mo/ /'phags pa'i lam yan lag brgyad las/ yang dag pa'i lta ba ni mthong ba dang bsgom pa gnyis kar gtogs so/ /gzhan bdun ni bsgom pa kho na'o zhes bshad do/ /bstan bcos rnal 'byor spyod pa'i sa las/ byang chub kyi yan lag bdun ni mthong ba'i lam la'o/ /'phags pa'i lam yan lag brgyad las/ yang dag pa'i ngag dang las kyi mtha' dang / 'tsho ba ni bsgom pa'i lam kho nar rnam par gzhag go zhes bshad de/ gzhan gyi bshad pa ni med do/ /'phags pa'i lam gyi don rgyar cher rnam par 'byed pa ni mtshan nyid bstan pa dag las 'byung ba bzhin du rig par bya'o/ /bcom ldan 'das bdag gis de dag mthong nas 'di snyam bgyid de/ tshe d ang ldan pa 'di dag ni dmigs pa dang bcas pa'i mngon par rtogs pa la gnas shing so so nas rnam pa sna tshogs kyi mtshan nyid kyis chos ston pas shes pa brda sprod par bgyid pas zhes bya ba 'di man chad ni gsum pa bdag nyid kyi bsam pa gang yin pa nyid smos pa zhes bya ba ston to/ /'di yang rnam pa gsum du dbye ste/ bdag nyid kyi bsam pa mdor bstan pa dang / bdag nyid kyi bsam pa bzlas te gsol pa dang / bcom ldan 'das kyi yon tan bsngags pa brjod pa ste/ 'di ni dang po bdag nyid kyi bsam pa mdor bstan pa'o/ /tshe dang ldan pa 'di dag thams cad ni mngon pa'i nga rgyal can/ mngon pa'i nga rgyal gyis mngon du zin pa'i slad du/ don dam pa'i bden pa thams cad du ro gcig pa'i mtshan nyid ma 'tshal ba sha stag lags so snyam bgyid pas zhes bya ba ni gnyis pa bdag nyid kyi bsam pa bzlas te gsol ba'o/ /de'i slad du bcom ldan 'das ni ngo mtshar rmad du gyur pa de bzhin du bcom ldan 'das ni legs par gsungs pa lags te zhes bya ba la sogs pas ni/ gsum pa bcom ldan 'das kyi yon tan gyi bsngags pa brjod pa yin te/ 'di yang rnam pa gsum mo/ /'di lta ste/ legs par gsungs pa yin par mdo tsam du bsngags pa dang / bsngags par bya ba'i bstan pa smos pa dang / gzhan dag gi spyod yul ma yin par bstan pa ste/ 'di ni dang po'o/ /bcom ldan 'das kyis ji skad du/ don dam pa'i mtshan nyid ni phra ba mchog tu phra ba/ zab pa mchog tu zab pa rtogs par dka' ba mchog tu rtogs par dka' ba/ thams cad ro gcig pa'i mtshan nyid do zhes gsungs pa zhes bya ba ni/ gnyis pa bsngags par bya ba'i bstan pa smos pa ste/ phra ba la sogs pa'i tshig gi don ni sngar gong du bshad pa bzhin no/ /bcom ldan 'das 'phags pa'i bstan pa nyid la zhugs pa'i dge slong gis kyang don dam pa'i bden pa thams cad du ro gcig pa'i mtshan nyid shin tu rtogs par dka' ba lags na/ 'di las slad rol pa'i mu stegs can rnams kyis lta smos kyang ci 'tshal zhes bya ba ni/ gsum pa gzhan dag gi spyod yul ma yin par bstan pa'o/ /'di lta ste/ theg pa gnyis dang / mu stegs rnams kyis ro gcig pa'i mtshan nyid khong du ma chud pa gang yin pa de dag thams cad ni 'dir mngon pa'i nga rgyal bskyed pa zhes bya'o zhes bya ba'i don to/ / //bam po bco brgyad pa/ de nas bcom ldan 'das kyis tshe dang ldan pa rab 'byor la bka' stsal pa/ de de bzhin no de de bzhin te zhes bya ba 'di man chad ni/ gsum pa bcom ldan 'das kyis yang dag par bshad pa zhes bya ba ston to/ /sngar bshad pa rnams bden pa nyid du bstan pa dang / de ci'i phyir zhe na zhes bya ba man chad kyis shin tu phra ba las brtsams nas rgya cher rnam par bshad pa'o/ /dang po yang rnam pa gnyis su dbye ste/ gang bsams pa'i dngos po de dag bden pa nyid du bstan pa dang / gang bsngags par bya ba de bden pa nyid du gyur par bstan pa'o/ /'di ni dang po gang bsams pa'i dngos po de dag bden pa nyid du bstan pa ste/ mngon par rtogs pa gcig kho na ma yin pas de'i phyir tshig zlos bur de de bzhin no/ /de de bzhin te zhes gsungs pa yin no/ /rab 'byor ngas ni phra ba mchog tu phra ba zab pa mchog tu zab pa/ rtogs par dka' ba mchog tu rtogs par dka' ba thams cad du ro gcig pa'i mtshan nyid kyi don dam pa'i bden pa mngon par rdzogs par sangs rgyas te mngon par rdzogs par sangs rgyas nas kyang / gzhan dag la bsnyad cing rab tu bstan/ rnam par bshad/ gdags par byas/ gsal bar byas so zhes bya ba ni gnyis pa gang bsngags par bya ba de bden pa nyid du gyur par bstan pa ste/ khyod kyis ji skad du bsngags pa brjod pa bzhin du/ shin tu phra ba la sogs pa ro gcig pa'i don dam pa'i bdag nyid kyang thugs su chud par gyur pa yin la/ gzhan dag la yang go bar mdzad par gyur to zhes bya ba'i tha tshig go/ /bshad pa'i rnam grangs gzhan du na snga ma ni bdag dang gzhan sad par mdzad pa spyir bsngags pa'o/ /phyi ma ni bdag dang gzhan sad par mdzad pa rnam par phye ste bsngags pa ste/ bdag dang gzhan sad par mdzad pa'i bsngags pa brjod pa'i phyir tshig zlos bur de de bzhin no/ /de de bzhin te zhes gsungs so/ /de ci'i phyir zhe na zhes bya ba la sogs pas ni gnyis pa shin tu phra ba las brtsams nas rgya cher rnam par bshad pa ston to/ /'di yang brtag pa dang / rgya cher rnam par bshad pa dang gnyis bstan te/ 'di ni dang po brtag pa'o/ /rab 'byor ngas ni phung po thams cad la rnam par dag pa'i dmigs pa gang yin pa'i don dam pa'i bden pa yin par yongs su bstan zhes bya ba la sogs pas ni gnyis pa rgya cher rnam par bshad pa bstan to/ /'di yang rnam pa gsum gyis bstan te/ chos dang / dpe dang / dpe dang don du sbyar ba'o/ /chos kyang rnam pa gsum du dbye ste/ rnam par dag pa'i dmigs pa las brtsams nas ro gcig gi mtshan nyid bstan pa dang / rab 'byor dge slong rnal 'byor spyod pa zhes bya ba man chad kyis khyab pa'i don rnam pa gsum las brtsams nas ro gcig pa'i mtshan nyid bstan pa dang / rab 'byor ji ltar phung po de dag gis zhes bya ba man chad kyis skyon rnam pa gsum dang bral bar ro gcig pa'i mtshan nyid rnam par bshad pa'o/ /de la dang po yang rnam pa gnyis te/ rnam par bshad pa dang / mjug bsdu ba'o/ /rnam par bshad pa yang rnam pa gnyis su dbye ste/ rnam par dag pa'i dmigs pa'i dbang du mdzad nas/ don dam pa'i bden pa bstan pa dang / rnam par dag pa'i dmigs pa de yang zhes bya ba man chad rnam par dag pa'i dmigs pas ro gcig pa'i mtshan nyid bstan pa'o/ /rnam par dag pa'i dmigs pa'i dbang du mdzad nas/ don dam pa'i bden pa bstan pa yang rnam pa gnyis su dbye ste/ phung po'i rnam par dag pa'i dmigs pa don dam pa'i bden pa bstan pa dang / zlas skye mched la sogs pa'i rnam par dag pa'i dmigs pas don dam pa'i bden pa bstan pa ste/ 'di ni dang po'o/ /de la phung po thams cad ces bya ba la/ phung po ni lnga ste/ gcig kho na ma yin pa'i phyir thams cad ces gsungs so/ /yang na zag pa dang zag pa med pa la sogs pa gcig kho na ma yin pa'i phyir thams cad ces gsungs so/ /de ni 'di skad du phung po la sogs pa la don dam pa'i bden pa yod de/ de ni rnam par dag pa'i dmigs pa zhes kyang bya ste/ yul 'di la dmigs pa'i dbang gis sems rnam par dag pa yang thob pa'i phyir ro zhes bstan par 'gyur te/ de'i phyir bstan bcos rnam par bshad pa'i tshig le'ur byas pa las/ rnam par dag pa'i dmigs pa ni/ /rtag tu rnam par 'gyur ba med/ /dge dang bde ba'i ngo bo nyid/ /thams cad mngon par 'grub par 'gyur/ /zhes 'byung ste/ 'di nyid kyi 'grel pa las/ don dam pa'i bden pa ni gcig pa dang tha dad pa nyid dang bral ba'i phyir rnam par dag pa'i dmigs pa yin par rig par bya'o/ /de ci'i phyir zhe na/ yul la dmigs pa'i dbang gis sems rnam par dag pa 'thob par 'gyur ba'i phyir ro zhes bstan pa yin te/ zhib tu de nyid las bshad pa bzhin no/ / mdo las sngar gong du tshig 'di lta bu gsungs pa med na/ ci'i phyir yongs su bstan zhes gsungs/ mdo sde shes rab kyi pha rol tu phyin pa rnams dang / mdo sde tshad med pa rnams las de bzhin nyid gsungs so/ /ngas skye mched dang / rten cing 'brel par 'byung ba dang / zas dang / bden pa dang / khams dang / dran pa nye bar gzhag pa dang / yang dag pa'i spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / lam gyi yan lag thams cad la/ rnam par dag pa'i dmigs pa gang yin pa de ni don dam pa'i bden pa yin par yongs su bstan to zhes bya ba ni gnyis pa zlas skye mched la sogs pa'i rnam par dag pa dmigs pa don dam pa'i bden pa yin par rnam par bshad pa ste/ de ci'i phyir zhe na/ don dam pa'i bden pa'i don gyis chos rnams la khyab pa'i phyir ro/ /rnam par dag pa'i dmigs pa de yang / phung po thams cad la ro gcig pa'i mtshan nyid dang tha dad pa med pa'i mtshan nyid yin te zhes bya ba 'di man chad ni gnyis pa rnam par dag pa'i dmigs pa'i dbang du mdzad nas/ ro gcig pa'i mtshan nyid ston to/ /'di yang rnam pa gnyis su dbye ste/ phung po rnams las brtsams nas ro gcig pa'i mtshan nyid bstan pa dang / zlas skye mched la sogs pa'i ro gcig pa'i mtshan nyid rnam par bshad pa'o/ /'di ni dang po phung po rnams kyi rnam par dag pa'i dmigs pa las brtsams nas/ ro gcig pa'i mtshan nyid bstan pa ste/ phung po rnams kyi rnam par dag pa'i dmigs pa tha dad pa med pa'i mtshan nyid dang / tha dad pa med pa'i don gang yin pa de nyid ro gcig pa'i mtshan nyid yin pa'i phyir ro/ /phung po la ji lta ba de bzhin du skye mched thams cad nas/ lam gyi yan lag gi bar thams cad la yang ro gcig pa'i mtshan nyid dang / tha dad pa med pa'i mtshan nyid yin no zhes bya ba ni gnyis pa zlas skye mched la sogs pa'i ro gcig pa'i mtshan nyid rnam par bshad pa'o/ /de'i phyir rab 'byor rigs pa des na don dam pa'i bden pa ni thams cad ro gcig pa'i mtshan nyid yin par rig par bya'o zhes bya ba ni gnyis pa don dam pa'i bden pa ro gcig pa yin par bshad pa'i mjug bsdu ba ste/ 'di ltar sngar gong du phung po la sogs pa'i chos kyi rnam par dag pa'i dmigs pa gang yin pa de dang / don dam pa'i bden pa'i mtshan nyid tha dad pa med pa'i rigs pa des na don dam pa'i bden pa'i mtshan nyid ni thams cad du khyab pa yin no zhes bya ba'i tha tshig go/ /rab 'byor dge slong rnal 'byor pa ni phung po gcig gi de bzhin nyid dang / don dam pa dang / chos bdag med pa nyid rab tu rtogs nas/ yang de nyid las gzhan pa'i phung po dang / skye mched dang / rten cing 'brel bar 'byung ba dang / zas dang bden pa dang / khams dang / dran pa nye bar gzhag pa dang / yang dag pa'i spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / lam gyi yan lag rnams kyis so so la de bzhin nyid dang / don dam pa dang / chos bdag med pa nyid yongs su tshol bar mi byed kyi zhes bya ba 'di man chad ni gsum pa kun du khyab pa'i don rnam pa gsum las brtsams nas/ ro gcig pa'i mtshan nyid bstan pa yin te/ de la kun du khyab pa'i don rnam pa gsum ni 'di lta ste/ de bzhin nyid dang / don dam pa dang / chos bdag med pa nyid do/ / gsum po 'di dag phung po la sogs pa'i chos la khyab pa'i phyir gsum po 'di dag la ro gcig pa zhes bstan to/ /'di yang rnam pa gnyis kyis bstan te/ rnam par bshad pa dang / mjug bsdu ba'o/ /rnam par bshad pa yang rnam pa gnyis te/ mi mthun pa'i rnam par bshad pa dang / mthun pa'i rnam par bshad pa ste/ 'di ni dang po'o/ 'di ltar don dam pa'i bden pa ni don rnam pa sna tshogs dang ldan pas/ 'phags pa shes rab kyi pha rol tu phyin pa'i mdo las ni ming bcu gnyis gsungs te/ 'di lta ste/ de bzhin nyid dang / chos kyi dbyings dang / chos nyid dang / yang dag pa nyid dang / rnam par mi 'gyur ba nyid dang / mnyam pa nyid dang / skyon med pa nyid dang / chos nges pa nyid dang / chos gnas pa nyid dang / yang dag pa'i mtha' dang / nam mkha'i khams dang / bsam gyis mi khyab pa'i dbyings so/ /de bzhin du bstan pa gzhan dag las 'byung ba ni 'dir brjod kyis mi rdzogs so/ /'dir re zhig don rnam pa gsum las brtsams nas ro gcig pa'i mtshan nyid bstan pa yin te/ de la de bzhin nyid ces bya ba ni rnam par rig pa tsam du grub pa'i bstan bcos las ji skad du/ de bzhin zhes bya ba ni yang dag pa nyid de mi bden pa ma yin par bstan to/ /nyid ces bya ba ni rtag pa nyid de/ rnam par 'gyur ba med par rab tu bstan to/ /'di ltar yang dag pa nyid de/ gnas skabs thams cad du rtag par de kho na bzhin pa'i phyir de bzhin nyid ces bya ba ste/ 'di ni rnam par 'gyur ba med pa yang dag pa'i don to zhes bshad pa lta bu'o/ /sngar gong du yang dag pa'i don dam pa'i bden pa ni tha snyad dang bral ba'o zhes ma bstan tam zhe na/ ci'i phyir 'dir de bzhin nyid ces brjod ce na/ rgol ba 'di'i lan ni rnam par rig pa tsam du grub pa'i bstan bcos las ji skad du/ de bzhin nyid kyang btags pa tsam gyi ming yin te/ med par 'dod pa dgag pa'i phyir ni yod do zhes bshad la/ yod pa nyid du 'dzin pa dgag pa'i phyir ni stong pa nyid do zhes bshad do/ /yang dag pa ma yin pa sgyu ma nyid du 'dzin par ma gyur cig snyam pa'i phyir ni yang dag pa zhes bstan pa yin no/ /don phyin ci log ma yin pa'i phyir ni de bzhin nyid ces bya'o zhes bstan pa lta bu'o/ /de la don dam pa zhes bya ba la dam pa ni 'di lta ste/ ye shes dam pa'o/ /don ni yul gyi don to/ /'di ltar de bzhin nyid 'di ye shes dam pa rnam pa gnyis kyis dmigs par bya ba'i yul gyi don du gyur pa'i phyir don dam pa zhes bya ste/ de'i phyir bstan bcos rnam par bshad pa las / don dam pa'i bden pa ni yongs su grub pa'i ngo bo nyid yin par rig par bya'o zhes bshad pa yin no/ /ci'i phyir de bzhin nyid rnam pa bdun la don dam pa'i bden pa zhes bya zhe na/ smras pa/ ye shes dam pa gnyis kyis dmigs par gyur pa'i phyir ro/ /de yang 'di lta ste/ 'jig rten las 'das pa'i ye shes dang / rjes las thob pa'i 'jig rten pa'i ye shes so/ /don dam pa 'di spros pa med pa'i phyir ye shes gzhan gyi yul ma yin no/ /de las gzhan pa'i don rnams ni bden pa gnyis bstan pa dag las 'byung ba bzhin no/ /de la chos bdag med pa nyid ces bya ba ni/ bstan bcos mngon pa kun las btus pa las/ ji skad du bdag med pa'i mtshan nyid gang zhe na/ 'di lta ste/ ji ltar bdag tu smra ba rnams kyis bdag tu brtags pa'i mtshan nyid ltar phung po dang / khams dang / skye mched ni mtshan nyid de ma yin pa des ni phung po dang / khams dang / skye mched la bdag gi mtshan nyid med pa'i phyir/ bdag med pa'i mtshan nyid ces bya'o zhes 'byung ste/ bstan bcos mngon pa sna tshogs kun las btus pa las kyang de skad du ston to/ /stong pa dang bdag med pa la bye brag ci yod ce na/ smras pa/ bstan pa rnams la so so nas bshad pa mi mthun te/ mdzod kyi bstan bcos dang sbyar na/ bshad pa mi mthun pa rnam pa bzhi yod de/ de'i phyir de nyid las bdag gir lta ba dang / mi mthun pa'i phyir stong pa'o/ /bdag tu lta ba dang mi mthun pa'i phyir bdag ma yin pa'o/ /gzhan yang de nyid las nad kyi skyes bu dang bral ba'i phyir stong pa'o/ /rang dbang med pa'i phyir bdag ma yin pa'o/ /gzhan yang de nyid las/ 'di la bdag med pa'i phyir stong pa'o/ /bdag nyid kyis bdag ma yin pa'i phyir bdag ma yin pa'o/ /gzhan yang de nyid las/ bdag gir lta ba'i gnyen po'i phyir stong pa'i rnam pa sgom mo/ /bdag tu lta ba'i gnyen po'i phyir bdag ma yin pa'i rnam pa bsgom mo zhes 'byung ngo / /bstan bcos bye brag tu bshad pa chen po las kyang bshad pa rnam pa gnyis yod de/ mdzod kyi bstan bcos las 'byung ba'i dngos po gnyis dang mthun no/ /bstan bcos yang dag pa'i rigs pa las/ dbang byed pa'i bdag po med pa'i phyir stong pa'o/ /bdag gi mtshan nyid dang mi mthun pa'i phyir bdag ma yin pa'o/ /gzhan yang de nyid las bdag gir lta ba'i gnyen po'i phyir stong pa'i rnam pa bsgom mo/ /bdag tu lta ba'i gnyen po'i phyir bdag ma yin pa'i rnam pa bsgom mo zhes 'byung ngo / /'phags pa shes rab kyi pha rol tu phyin pa'i 'grel pa las rdzas su mi mthong ba ni stong pa zhes bya'o/ /bdag mi mthong ba ni bdag med pa zhes bya'o zhes 'byung ngo / /bstan bcos mngon pa kun las btus pa las/ stong pa'i mtshan nyid gang zhe na/ 'di lta ste/ gang la gang med pa de ni rigs pa des stong par yang dag pa rjes su mthong ba ste/ 'di la lhag ma gang yin pa de ni 'dir yod pa'o zhes rigs pa des yang dag pa ji lta ba bzhin du yod par shes pa ni stong pa nyid la shin tu zhugs pa zhes bya'o/ /gang na ci zhig med ce na/ /phung po dang / khams dang / skye mched rnams la rtag pa dang / brtan pa dang / ther zug dang / mi 'gyur ba'i chos can bdag dang / bdag gi la sogs pa yod pa ma yin pa ste/ rigs pa des de dag kun stong pa'o/ /de la lhag ma yod pa ci zhig ce na/ gang la bdag med pa nyid de/ de ltar bdag ni med kyi bdag med pa nyid yod pa ni stong pa nyid ces bya'o zhes bshad do/ /gzhan yang bstan bcos de kho na nyid grub pa las chos kyi phyag rgya'i mdo las ji skad du/ rnal 'byor pa rnams kyis gzugs mi rtag pa dang / stong pa nyid du bsgom par bya'o/ /de la mi rtag pa ni 'di lta ste/ gzugs ngo bo nyid kyis mi rtag pa'o/ /stong pa ni ji ltar bum pa'i nang na chu med pas/ bum pa stong pa zhes bya ba de bzhin du/ phung po lnga po dag la shes pa'i bdag med pa'i phyir stong pa zhes bya'o zhes gsungs pa lta bu'o zhes bya ba dang / gzhan yang de nyid kyi nang nas 'phags pa'i spyod pa bstan pa'i le'u las/ spyod pa ni rnam pa gnyis yod de/ stong pa'i spyod pa dang / bdag med pa'i spyod pa'o/ /phung po lnga po dag la sems can mi dmigs pa ni stong pa'i spyod pa zhes bya'o/ /phung po lnga po med pa nyid du mthong ba ni bdag med pa'i spyod pa zhes bya ba'o zhes 'byung ngo / /de bzhin nyid dang / don dam pa'i de kho na'i rjes su 'brang zhing gnyis su med pa'i shes pas gnas byas pa'i phyir/ thams cad du ro gcig pa'i mtshan nyid don dam pa'i bden pa la nges par rtogs pas/ mngon par rtogs par byed de zhes bya ba ni gnyis pa mthun pa'i rnam par bshad pas ro gcig pa'i mtshan nyid bstan pa'o/ /mdo'i tshig 'di rnam par bshad pa yang so so nas bshad pa mi mthun te/ kha cig na re/ 'di kho na zhes bya ba ni/ thams cad kyang phung po gcig kho na'o zhes tha dad pa'i dgag pa bstan pa'i phyir gnyis pa kho na zhes gsungs te/ phung po gzhan la sogs pa dgag pa yin no/ /'di zhes bya bas ni phung po 'di gcig kho na'o zhes bstan pa'o zhes zer te de ni 'di skad du phung po 'di gcig kho na'i de bzhin nyid dang / don dam pa dang / yod pa dang / med pa gnyis su med pa'i chos bdag med pa'i yul rnam pa gsum po dag rnam par mi rtog pa'i ye shes kyis gnas byas pa'i phyir/ rjes las thob pa'i ye shes kyis de dag thams cad la ro gcig pa'i mtshan nyid du nges par rtogs pas/ mngon par rtogs par byed pas de'i phyir de bzhin nyid ni ro gcig pa'i mtshan nyid yin par shes par bya'o zhes bstan par 'gyur ro/ /kha cig na re gnyis su med pa'i shes pa zhes bya ba ni gang zag dang / chos gnyis bdag med pa'i shes pa ste/ gzhan ni snga ma bzhin no zhe'o/ /kha cig na re rnal 'byor pa dag 'di ltar rnam par mi rtog pa'i shes pa rnam pa gsum gyis gnas byas pa'i phyir/ shes pa 'di dag gis thams cad du ro gcig pa'i mtshan nyid la nges par rtogs pas mngon par rtogs par byed do/ / gzhan ni dang po bzhin du bshad par bya'o/ /yang na gzhan ni snga ma bzhin no zhe'o/ /gong ma de dag kyang mdor bsdu na/ bshad pa rnam pa gsum du 'gyur te/ kha cig ni chos 'di 'ba' zhig ro gcig pa'i de bzhin nyid yin no zhes zer te/ 'di la bshad pa rnam pa gsum yod pa yang snga ma bzhin du rig par bya'o/ /kha cig ni phung po gcig po 'di 'ba' zhig de bzhin nyid yin no zhes zer te/ 'di la bshad pa rnam pa gsum yod pa yang gong ma bzhin du rig par bya'o/ /'di ltar gong du bstan pa de dag kyang bshad pa rnam pa dgur 'gyur te/ yang na de bzhin nyid tsam gang yin pa de ni phung po gcig yin no zhes zer te/ 'di la bshad pa rnam pa gsum yod pa yang gong ma bzhin du rig par bya'o/ /de ltar bshad pa yod kyang tshig bden pa ma yin pas bshad pa'i don mdor bsdu na/ mdo'i tshig snga ma ni chos gzhan la don dam pa yin par yongs su tshol ba'i phyir mi mthun pa'i rnam par bshad pa zhes bya'o/ /mdo'i tshig 'di ni phung po gcig kho na yongs su tshol bar sgrub pas/ rjes su mthun pa'i rnam par bshad pa zhes bya'o zhes ston to/ /slob dpon yang dag bden pas mdo'i tshig 'di gnyis kyi bshad pa byas pa las/ mdo'i tshig snga ma ni yul rnam pa gsum pa rtogs par bshad pa'o/ /mdo'i tshig phyi ma ni nges par rtogs pas mngon par rtogs par byed par bshad pa yin no zhes 'byung ngo / /'di gsum tha dad pa yang theg pa chung ngu'i bstan pa dang sbyar na/ zag pa med pa'i dbang po gsum la bye brag yod pa'i phyir te/ 'di ni mthong ba dang / bsgom pa dang / mi slob pa'i gnas skabs kyi bye brag gi phyir ro/ /'dir theg pa chen po'i bstan pa dang sbyar na/ sa re re la yang 'jug pa dang / gnas pa dang / 'byung ba'i chos yod pas go rims bzhin du sbyar bar bya'o/ /de'i phyir rab 'byor rigs pa des kyang don dam pa'i bden pa ni thams cad du ro gcig pa'i mtshan nyid yin par rig par bya'o zhes bya ba ni gnyis pa mjug bsdu ba ste/ brda phrad par zad do/ /rab 'byor ji ltar phung po de dag phan tshun tha dad pa'i mtshan nyid du gyur pa dang / ji ltar skye mched dang / rten cing 'brel bar 'byung ba dang / zas dang / bden pa dang / khams dang / dran pa nye bar gzhag pa dang / yang dag pa'i spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag dang / lam gyi yan lag de dag phan tshun tha dad pa'i mtshan nyid du gyur pa de bzhin du zhes bya ba 'di man chad ni gsum pa skyon rnam pa gsum dang bral bas ro gcig pa'i mtshan nyid rnam par bshad pa ston to/ /'di ltar de bzhin nyid la sogs pa rgyu la sogs pa'i skyon rnam pa gsum dang bral ba'i phyir ro gcig pa nyid du 'grub pa yin no/ /'di yang rnam pa gnyis kyis bstan te/ rnam par bshad pa dang /[ (]'jug [,]mjug [)]bsdu ba'o/ /rnam par bshad pa yang rnam pa gnyis su dbye ste/ phung po la sogs pa phan tshun tha dad pa'i mtshan nyid bstan pa dang / de bzhin nyid tha dad pa'i mtshan nyid med par rnam par 'byed pa ste/ 'di ni dang po'o/ /mdo'i tshig 'di yang rnam pa gnyis su phye nas bstan te/ phung po rnams phan tshun tha dad pa'i mtshan nyid bstan pa dang / zlas skye mched la sogs pa phan tshun tha dad pa'i mtshan nyid bstan to/ /'di ltar phung po la sogs pa'i mtshan nyid tha dad pa'i phyir skyon rnam pa gsum yod par gyur pa yin te/ rgyu dang bcas pa las 'byung ba'i phyir dang / 'dus byas kyi mtshan nyid rnam par 'gyur ba can du 'gyur ba'i phyir dang / don dam pa ma yin pa zhig yang btsal ba dang / mthar phyin pa ma yin pa'i phyir ro/ /gal te chos thams cad kyi de bzhin nyid dang / don dam pa dang / chos bdag med pa nyid kyang / tha dad pa'i mtshan nyid yin par gyur na ni/ des na de bzhin nyid dang / don dam pa dang / chos bdag med pa nyid kyang rgyu dang bcas pa yin zhing rgyu las byung ba yin par 'gyur ro/ /gal te rgyu las byung ba nyid yin na ni 'dus byas yin par 'gyur ro/ /'dus byas nyid yin na ni don dam pa ma yin par 'gyur ro/ /don dam pa yin na ni don dam pa'i bden pa gzhan zhig yongs su btsal dgos par 'gyur ro zhes bya ba man chad ni gnyis pa de bzhin nyid la tha dad pa'i mtshan nyid med par rnam par 'byed pa'o/ /'di yang rnam pa gnyis te/ don dam pa la skyon rnam pa gsum yod par bstan pa dang / rab 'byor zhes bya ba man chad kyis mthun pa'i rnam par bshad pas don dam pa skyon rnam pa gsum dang bral bar bstan pa ste/ 'di ni dang po'o/ / mdo'i tshig 'di yang gnyis su dbye ste/ tha dad pa'i mtshan nyid smos pa dang / skyon rnam pa gsum bstan pa'o/ /skyon rnam pa gsum ni gang du bstan pa bzhin no/ /yang na skyon rnam pa lnga ste/ rgyu dang bcas pa dang / rgyu las byung ba dang / 'dus byas su gyur pa dang / don dam pa ma yin pa dang / don dam pa gzhan yongs su tshol ba'o/ /mdo'i tshig 'di dang sbyar na/ me long lta bu'i ye shes la sogs pa ni rgyu las byung ba'i phyir 'dus byas kyis bsdus pas don dam pa'i bden pa ma yin par ston te/ de'i phyir slob dpon nye ba'i 'od la sogs pa'i 'grel pa las longs spyod rdzogs pa'i sku ni mi rtag pa yin te/ ji tsam du skye ba dang bcas pa dag ni nges par 'jig par 'gyur ro zhes mgo gcig tu bstan pa'i phyir ro zhes 'byung ngo / /kha cig ni rtag pa yin no zhes zer ro/ /don gzhan ni 'og nas rgya cher rnam par 'byed do/ /rab 'byor gang gi phyir de bzhin nyid dang / don dam pa dang / chos bdag med pa nyid rgyu dang bcas pa zhes mi bya bas/ rgyu las byung ba ma yin pa dang / 'dus byas kyang ma yin pas don dam pa yin pa dang / don dam pa 'di thob nas/ don dam pa'i bden pa gzhan yongs su btsal mi dgos kyi zhes bya ba la sogs pas ni gnyis pa rjes su mthun pa'i rnam par bshad pas don dam pa skyon rnam pa gsum dang bral bar bstan pa'o/ /'di yang rnam pa gnyis te/ don dam pa skyon rnam pa gsum dang bral bar yang dag par bshad pa dang / rtag pa rtag pa'i 'du shes bya ba man chad kyis yang rigs pas bsgrub pa'o/ /'di ni dang po ste/ 'di ltar tha dad par 'gyur ba la skyon rnam pa gsum yod pa'i phyir don dam pa ni ro gcig pa'i mtshan nyid skyon rnam pa gsum dang bral ba yin par shes par bya'o zhes bya ba'i tha tshig go/ /rtag pa rtag pa'i dus dang / ther zug ther zug gi dus su de bzhin gshegs pa 'jig rten du byung yang rung 'jig rten du ma byung yang rung / chos rnams kyi chos nyid dang / chos kyi dbyings rnam par gzhag pa rnam par gnas pa ni yod pa kho na'o zhes bya ba ni gnyis pa yang rigs pas bsgrub pa yin te/ 'di yang don dam pa ro gcig pa'i de bzhin nyid de rtag pa dang / ther zug gi dus su/ de bzhin gshegs pa 'jig rten du byung yang rung / 'jig rten du ma byung yang rung / chos thams cad kyi chos nyid ni chos kyi dbyings la rnam par gnas shing / yang rnam par 'gyur ba dang / mtshan ma sna tshogs med par gyur pa'o / /tshig nges par 'grel pa'i mdo las ni ther zug dang / rtag pa zhes bya ba nas/ chos kyi dbyings dang / chos gnas pa nyid ces bya ba'i bar du 'byung ste/ slob dpon yang dag bden pa'i 'grel pa las/ lam gyi mdun rol gyi gnas skabs na yang / snga nas rang bzhin gyis yod pa'i phyir ther zug ces bya ste sangs rgyas 'jig rten du byung nas gdod yod pa ma yin pa'i phyir ro/ /lam gyi bar dang / tha ma'i gnas skabs na yang don gyi tshul 'di 'gag pa med pa'i phyir rtag pa zhes brjod de/ sangs rgyas 'jig rten du byung ba'i 'og tu yang don gyi tshul la zad pa med pa'i phyir ro/ /chos nyid ces bya ba ni rang bzhin gyis sangs rgyas kyi ngo bo nyid la gnas pa ste/ lam gyi mdun rol gyi gnas skabs na byang chub kyi sems kyi gzhi byed pas/ sems can rnams 'di'i dbang gis sems bskyed pa thob pa'i phyir ro/ /chos kyi dbyings zhes bya ba ni sangs rgyas kyi ngo bo nyid 'dren cing 'byung bar byed pa ste/ lam gyi gnas skabs bar ma rnams su dbyings ni spyod pa rnams kyi gzhi byed de/ spyod pa tshad med pa rnams 'dren cing 'byung bar byed pa'i phyir ro/ /chos gnas pa nyid ces bya ba ni sangs rgyas kyi sa'i gnas skabs su phyin pa thob pa ste/ lam gyi tha ma'i gnas skabs mya ngan las 'das par phyin nas chos kyi ngo bo nyid rtag par gnas pa'i phyir ro zhes 'byung ngo / /mdo 'di las rtag pa rtag pa'i dus dang / ther zug gi dus su zhes gsungs pa ni ro gcig pa'i de bzhin nyid gzod ma nas sngar yang gcig pa nyid ma yin pas/ rtag pa rtag pa'i dus zhes bya'o/ /phyis kyang gcig pa nyid ma yin pas/ ther zug ther zug gi dus zhes bya ste/ dus 'di lta bu rnams su chos rnams kyi chos nyid chos kyi dbyings la rnam par gnas pa'o/ /chos kyi chos nyid chos kyi dbyings la rnam par gnas pa 'di yang don rnam pa gnyis yod de/ /dpe gzhan gnyis dang sbyar na rnam pa gsum du dbye ste/ chos rnams kyi chos nyid dang / chos kyi dbyings rnam par gzhag pa dang / gnas pa nyid rnam par gzhag pa'o/ /slob dpon ngo bo nyid med kyis byas pa'i theg pa chen po bsdus pa'i 'grel pa las ni gnyis su phye nas bstan te/ chos rnams kyi chos nyid rnam par gzhag pa dang / chos kyi dbyings rnam par gzhag pa zhes 'byung ngo / /de la rnam pa lngar gzhag pa zhes bya ba ni ming gi rnam grangs rnam par gzhag pa'o/ /bstan bcos rnal 'byor spyod pa'i sa las ni rnam pa gsum du phye nas bstan te/ 'di lta ste/ chos nyid dang / chos kyi dbyings dang / chos gnas pa'o/ /de la rnam par gnas pa zhes bya ba ni chos gnas pa yin te/ de'i phyir rnal 'byor spyod pa'i sa las rten cing 'brel bar 'byung ba de dag thog ma med pa'i dus nas grags pa'i rigs pa gang yin pa de ni chos nyid do/ /ji ltar grags pa de phyin ci ma log pa'i rigs pa'i tshig dang yi ge rnams kyi rnam par gzhag pa de ni chos gnas pa'o/ /chos gnas pa de'i rgyu chos nyid de yin pas na/ /de'i phyir de la dbyings zhes bya ba 'byung ste/ bstan bcos rnal 'byor spyod pa'i sa las ni rten [(]cang [,]cing [)]'brel bar 'byung ba de smos pas/ don gyi ngo bo nyid dag bstan to/ /yang na bstan bcos de las rten cing 'brel bar 'byung ba de dag la tshig 'di gsum yod par bstan pa yin gyi / don gyi ngo bo nyid bstan pa ni ma yin te/ 'on kyang tshig gsum bshad pa'i don la bye brag tu gyur pa ni med do/ /de'i phyir rab 'byor rigs pa des kyang / don dam pa'i bden pa ni thams cad du ro gcig pa'i mtshan nyid yin par rig par bya'o zhes bya ba ni gnyis pa mjug bsdu ba ste/ / brda phrad par zad do/ /rab 'byor dper na rnam pa sna tshogs rnam pa gcig ma yin pa tha dad pa'i mtshan nyid kyi gzugs la nam mkha' ni mtshan ma med pa/ rnam par rtog pa med pa 'gyur ba med pa ste/ thams cad du ro gcig pa'i mtshan nyid do zhes bya ba 'di man chad ni gnyis pa dpes bstan pa'o/ /rnam pa sna tshogs rnam pa gcig pa ma yin zhes bya ba ni gzugs kyi phung po zhes bya ba yang rnam pa gsum ste/ dang po ni 'byung ba chen po dang / rgyur byas pa'i mtshan nyid do/ / gnyis pa ni bstan bcos yod pa la thogs pa dang bcas pa dang / bstan du med pa la thogs pa dang bcas pa dang / bstan du yang med la thogs pa dang bcas pa lta ba gsum bye brag tu gyur pa'i mtshan nyid dang / gsum pa ni rnam par 'gyur [(]zhang [,]zhing [)]'jig pa 'di lta ste/ snga ma'i rnam pa gnyis po de dag rnam par 'gyur zhing 'jig pa dang bcas pas rnam par 'gyur zhing 'jig pa'i mtshan nyid ces bya ste/ rnam pa 'di gsum dang ldan pa'i phyir rnam pa sna tshogs rnam pa gcig ma yin pa zhes gsungs so/ /yang na tha dad pa'i mtshan nyid ces kyang bya'o/ /nam mkha' la rgyur byas pa'i mtshan ma gzhan med pa'i phyir mtshan ma med pa zhes bya'o/ /bstan du yod la thogs pa dang bcas pa'i gzugs la sogs pa rnam pa sna tshogs kyi bye brag med pa'i phyir rnam par rtog pa med pa zhes bya ste/ rnam par rtog pa ni bye brag gi ming gi rnam grangs so/ /tshig nges par 'grel pa'i mdo las ni bye brag med pa'i phyir rnam par 'gyur zhing 'jig pa yang med pas 'gyur ba med pa zhes bya ste/ mtshan nyid 'di gsum dang ldan pas ro gcig pa'i mtshan nyid ces bya'o zhes 'byung ngo / / de bzhin du ngo bo nyid tha dad pa dang / mtshan nyid tha dad pa'i chos thams cad la don dam pa'i bden pa thams cad du ro gcig pa'i mtshan nyid du gyur pa yang de bzhin du rig par bya'o zhes bya ba ni gsum pa dpe dang don du sbyar ba'o/ /de la ngo bo nyid dang / mtshan nyid tha dad pa zhes bya ba ni rang gi mtshan nyid bye brag tu gyur pa'i phyir ro/ /dgongs pa zab mo rnam par dgrol ba'i mdo las ni rang gi mtshan nyid dang / bye brag tu gyur pa zhes 'byung ste/ de ni 'di skad du chos thams cad ni mtshan nyid gnyis dang ldan te rang gi ngo bo nyid dang bye brag tu gyur pa'o/ /don dam pa ni chos thams cad kyi rang gi mtshan nyid bye brag tu gyur pa med pa'i phyir ro gcig pa zhes bya'o zhes bstan par 'gyur te/ de'i phyir 'phags pa sangs rgyas kyi sa'i mdo las dper na nam mkha' ni gzugs su gyur pa sna tshogs gi rnam pa thams cad la kun na yod kyang / des brjod par bya ba yang ma yin/ sna tshogs kyang ma yin te/ ro gcig go/ /de bzhin du de bzhin gshegs pa rnams kyi chos kyi dbyings rnam par dag pa yang / shes bya sna tshogs kyi rnam pa thams cad la kun nas yod kyang des brjod par bya ba yang ma yin sna tshogs kyis kyang ma yin te/ /ro gcig go zhes gsungs so/ /sangs rgyas kyi sa'i 'grel pa las/ gzhan gyi dbang gi ngo bo nyid ni de bzhin nyid kyi yongs su grub pa'i ngo bo nyid du 'jug par mtshungs pa'i phyir ro gcig pa zhes bya'o/ /gzhan yang kun tu brtags pas rab tu phye ba'i de bzhin nyid la bye brag tu gyur pa med pa'i phyir ro gcig pa zhes bya'o zhes bshad do/ /de nas bcom ldan 'das kyis don de nyid yang dag par bstan pa'i phyir tshigs su bcad pa 'di gsungs so zhes bya ba 'di man chad ni gnyis pa tshigs su bcad pas mdor bstan pa zhes bya ba ston to/ /'di yang rnam pa gnyis te/ tshigs su bcad pas bstan pa'i gleng bslang ba dang / tshigs su bcad pa gnyis smos nas mdor bstan pa ste/ 'di ni dang po'o/ /thams cad ro gcig mtshan nyid don dam 'di/ /sangs rgyas rnams kyis tha dad med par gsungs/ /gang zhig de la tha dad rnam rtog pa/ /de ni nges rmongs mngon pa'i nga rgyal can/ /zhes bya ba ni gnyis pa tshigs su bcad pa nyid smos nas mdor bstan pa'o/ /'di yang rnam pa gnyis su dbye ste/ tshigs su bcad pa phyed dang pos ni sangs rgyas kyis mtshungs par gsungs pas ro gcig pa'i mtshan nyid kyi bsngags pa brjod pa'o/ /phyi ma'i tshig gnyis kyis ni rmongs pa dag tha dad par 'dzin pa rnam par 'byed cing / don nyid shin tu zab par bstan pa yin no/ / de la tshigs su bcad pa'i phyed dang po'i rkang pa dang po gcig gis ni ro gcig pa'i mtshan nyid phung po la sogs pa kun la khyab par bstan to/ /'og mas ni don dam pa'i mtshan nyid de/ sangs rgyas rnams kyis mtshungs par gsungs pa yin par bstan to/ /yang na don dam 'di/ sangs rgyas rnams kyis tha dad med par gsungs/ /zhes bya ba la/ tha dad med pa nyid ni ro gcig pa'i don yin no zhes bya ba'i tha tshig go/ /tshigs su bcad pa phyed 'og ma'i dang pos ni tha dad par brtags pa rab tu dbye ba bstan to/ /tshig tha mas ni brtags pa'i gnas bstan to/ /tshigs su bcad pa 'di yang tshig nges par 'grel pa'i mdo dang sbyar na/ de las tshigs su bcad pa gcig dang / bcom ldan 'das kyis gsungs pa la mngon par bstod do zhes bya ba'i tshig rkyang pa yang 'byung ste/ de dpe nges pa ma yin pas de'i phyir dgongs pa zab mo nges par 'grel pa'i mdo 'di dang / dgongs pa zab mo rnam par dgrol ba'i mdo las tshigs su bcad pa phyi ma de mi 'byung ngo / /gzhan yang mjug tu mngon par bstod do zhes 'byung ba'i tshig de yang / slob dpon yang dag bden pa'i brjed byang las/ tshig phyi ma 'di dag ni bstan pa gnas par gtogs pa yin no zhes bshad pas le'u 'di nyid kyi nang du gtogs pa yang ma yin la/ mjug gi bstan pa gnas par gtogs pa'i tshig 'dir gzhag pa yin pas de skad bshad pa 'di yang mdo sde 'di dang rjes su mthun pa ma yin te/ mdo sde'i mjug gi tshig mngon par bstod do zhes bya ba ni 'phags pa 'jam dpal tha mar 'byung ba'i phyir ro/ /dgongs pa zab mo rnam par dgrol ba'i mdo las ni/ de bzhin gshegs pas chos gsungs pa/ /thams cad ro gcig mtshan nyid de/ /don dam pa la gud na med/ /tha dad mthong ba'i nga rgyal yin/ /zhes 'byung ngo / /tshig nges par 'grel pa'i mdo las ni tshigs su bcad pa gnyis 'byung ste/ de'i phyir de las/ chos kyi mtshan nyid ro gcig pas/ /sangs rgyas rnams kyis mnyam nyid gsungs/ /gang zhig de la tha dad 'dzin/ /de ni mngon pa'i nga rgyal can/ /'khor ba'i rgyu dang mi mthun pa/ /shin tu phra bas mthong bar dka'/ /'dod chags gti mug bsgribs pa'i phyir/ /lta ba can gyis rtogs mi nus/ /zhes 'byung ngo / / dgongs pa zab mo nges par 'grel pa'i mdo las/ sems dang yid dang / rnam par shes pa'i mtshan nyid kyi le'u ste gsum pa'o// //bam po bcu dgu pa/ le'u 'di gcig rnam par bshad pa yang rnam pa gnyis kyis bstan te/ le'u 'di nyid kyi ming rnam par bshad pa dang / mdo'i tshig 'di yang rnam par bshad pa'o/ /de la sems dang yid dang rnam par shes pa'i mtshan nyid ces bya ba ni sems dang yid dang / rnam par shes pa'i ming la yang spyi dang bye brag yod de/ bstan bcos rnam par rig pa tsam du grub pa las ji skad du 'di lta ste/ bcom ldan 'das kyis mdo sde de dang de dag las sems dang / yid dang / rnam par shes pa don tha dad pa rnam pa gsum gsungs te/ bsags pas na sems so/ /sems pas na yid do/ /rnam par rig pas na rnam par shes pa ste/ /'di ni don tha dad pa rnam pa gsum mo/ /'di ltar don rnam pa gsum po 'di dag rnam par shes pa brgyad cur yang bsdu ba yin mod kyi/ gtso bo'i rjes su bya ste bstan na kun gzhi rnam par shes pa ni sems zhes bya ste/ chos rnams kyi sa bon bsags nas chos rnams 'byung ba byed pa'i phyir ro/ /nyon mongs pa can gyi yid ces bya ste/ rnam par shes pa brgyad la dmigs shing rtag par nges par sems pas bdag la sogs pa'i bdag nyid du gyur pa'i phyir ro/ /gzhan drug ni rnam par shes pa zhes bya ste/ yul tha dad pa drug po dag la rags par g.yo ba dang / bar du chod pa'i rnam par rig pas 'jug pa'i phyir ro/ /de la mtshan nyid ces bya ba ni/ ngo bo nyid kyi mtshan nyid dam yang na dbyibs kyi mtshan nyid do/ /le'u nyid kyi don ni sngar bshad pa bzhin no/ /sgo rnam pa gnyis yod kyang le'u 'di'i gzhung gis spyi'i ming gi don rnam pa gsum ston pas/ 'dir gtso bo'i dbang du mdzad nas de'i phyir brgyad pa bstan pa yin na / /yang na 'dir bye brag gi ming gi don rnam pa gsum bstan par bya ste/ de ltar rnam pa gnyis su bshad pa yod kyang / bshad pa ni snga ma bzang ste/ de'i phyir sems dang / yid dang rnam par shes pa'i mtshan nyid kyi le'u zhes gsungs pa yin no/ /de nas byang chub sems dpa' sems dpa' chen po blo gros yangs pas bcom ldan 'das la 'di skad ces gsol to/ /bcom ldan 'das bcom ldan 'das kyis ji skad du sems dang yid dang rnam par shes pa'i gsang ba la mkhas pa'i byang chub sems dpa' zhes gsungs pa zhes bya ba 'di man chad ni yongs su brtag par bya ba'i yul las don dam pa dang / kun rdzob kyi bden pa rnam pa gnyis so zhes bstan pa las/ de yan chad du don dam pa'i bden pa bshad zin nas/ da 'di man chad ni kun rdzob kyi bden pa ston par mdzad do/ /'di yang rnam pa gnyis kyis bstan te/ tshig rkyang pas rgyal cher rnam par bshad pa dang / tshigs su bcad pas mdor bstan pa'o/ /rgyal cher rnam par bshad pa yang / rnam pa gnyis su dbye ste/ zhu ba gsol pa dang / zhus pa bzhin du lan yang dag par gsungs pa'o/ /zhu ba gsol ba yang rnam pa gnyis te/ /zhu ba gsol ba'i bstan pa nyid smos pa dang / bstan pa las brtsams nas zhu ba gsol te/ 'di ni dang po'o/ /de la byang chub sems dpa' blo gros yangs pa zhes bya ba ni/ blo gros las ming du btags pa yin te/ slob dpon yang dag bden pa'i brjed byang las/ blo gros yangs pas bcom ldan 'das kyi spyan sngar chos bshad pas/ chos bshad pa'i gang zag gi nang na byang chub sems dpa' gzhan dag blo gros yangs pa'i yon tan 'di lta bu dang mi ldan pa'i byang chub sems dpa' 'di blo gros yangs pa'i chos kyi sgo mo las ming du rnam par gzhag pa yin no zhes 'byung ngo / /'phags pa sangs rgyas kyi sa'i 'grel pa las/ zab cing rgya che ba yongs su rdzogs pa dang / shin tu rtogs pa'i phyir blo gros yangs pa zhes bya'o zhes 'byung ngo / /'phags pa shes rab kyi pha rol tu phyin pa'i 'grel pa las/ rab tu byung ba dang / khyim pa rnams kyi gtsug lag dang 'brel pa'i gtam rnam pa sna tshogs mi shes pa gang yang med pas blo gros yangs pa zhes bya'o zhes bshad do/ /bstan bcos rnal 'byor spyod pa'i sa las/ shes rab de nyid tshad med pa dang / mtha' yas pa'i spyod yul yin pa'i phyir/ shes rab yangs pa zhes bya'o zhes 'byung ste/ 'di ltar bcom ldan 'das kyis sems dang / yid dang rnam par shes pa'i gsang ba'i don yang dag pa ji lta ba bzhin du khong du chud pa ni mkhas pa'i byang chub sems dpa' zhes gsungs pas so/ /sems dang yid dang / rnam par shes pa'i gsang ba la mkhas pa'i byang chub sems dpa' zhes bgyi na/ ji tsam gyis na sems dang / yid dang / rnam par shes pa'i gsang ba la mkhas pa'i byang chub sems dpa' zhes bgyi lags de bzhin gshegs pas ji tsam gyis na/ de dag sems dang yid dang rnam par shes pa'i gsang ba la mkhas pa'i byang chub sems dpa' zhes 'dogs lags/ de skad ces gsol pa dang zhes bya ba ni gnyis pa bstan pa las brtsams nas zhu ba gsol ba'o/ /mdo'i tshig 'di yang rnam pa gnyis su dbye ste/ gang zhu ba nyid smos pa dang / ji tsam gyis na zhes bya ba man chad kyis gang zhu ba nyid kyi tshig smos pa'o/ /zhu ba 'di gsol ba yang dgongs pa rnam pa gnyis yod de/ de la dang po ci tsam gyis na sems dang yid dang rnam par shes pa'i gsang ba la mkhas pa'i byang chub sems dpa' zhes bgyi lags zhes bya ba ni byang chub sems dpa'i gnas skabs zhus pa ste/ de ni bstan pa las gsungs pa'i don to/ /gnyis pa de bzhin gshegs pas ji tsam gyis na de dag sems dang yid dang rnam par shes pa'i gsang ba la mkhas pa'i byang chub sems dpa' zhes 'dogs lags zhes bya ba ni/ de bzhin gshegs pas byang chub sems dpa' ji lta bu dag las brtsams nas bstan pa nye bar 'dogs par mdzad ces bya ba'i tha tshig ste/ de la nye bar 'dogs pa zhes bya ba ni/ rnam par bshad pa zhes bya ba'i don to/ /de nas bcom ldan 'das kyis byang chub sems dpa' chen po blo gros yangs pa la 'di skad ces bka' stsal pa'o/ /legs so legs so zhes bya ba 'di man chad ni gnyis pa zhus pa bzhin du lan yang dag par gsungs pa zhes bya ba ston to/ /'di yang rnam pa gnyis kyis bstan te/ zhu ba gsol ba la bsngags shing bshad par snang ba dang / blo gros yangs pa 'di ltar shes par bya ste zhes bya ba man chad kyis zhus pa bzhin du lan yang dag par bstan pa'o/ /dang po yang rnam pa gnyis te/ zhu ba gsol ba la bsngags pa dang / bshad par bkas gnang ba'o/ /zhu ba gsol ba la bsngags pa yang gnyis su dbye ste/ spyi dang bye brag go/ /'di ni dang po spyi bstan pa ste/ gang zhus pa'i don de shin tu zab cing phan pa rgya che bas de'i phyir tshig zlos bur legs so legs so zhes gsungs pa yin no/ /'phags pa sa bcu'i 'grel pa las legs so zhes bya ba ni bshad par bya ba'i chos de dag la dge ba phun sum tshogs pa'i phyir ro zhes 'byung ngo / /bstan bcos rnal 'byor spyod pa'i sa las legs so zhes bya ba ni 'phags pa rnams kyi bsngags pa brjod pa'i phyir ro zhes bshad do/ /'phags pa shes rab kyi pha rol tu phyin pa'i 'grel pa las/ legs so legs so zhes bya ba ni yon tan gyi snyan pa brjod pa'o zhes bshad do/ /gzhan yang de nyid las tshig yid ches su rung bas/ de bzhin gshegs pa la zhu ba gsol pas/ 'khor mang po'i the tshom gcod cing phan yon che ba'i phyir legs so zhes gsungs so zhes bshad do/ /'phags pa bla na med pa'i gnas bstan pa'i mdo las kyang nyon mongs pa yod bzhin du ma gos ma chags pa gang yin pa de ni legs pa zhes bya'o zhes gsungs so/ /blo gros yangs pa khyod kyis 'dir de bzhin gshegs pa la don zab mo 'di lta bu 'dri ba zhes bya ba la sogs pas ni gnyis bye brag tu bsngags pa bstan to/ /'di yang rnam pa gnyis te don zab mo zhus pa la bsngags pa zhu ba gsol ba la phan yon yod par bsngags pa ste 'di ni dang po'o/ /khyod skye bo tshad med pa dag la phan pa dang bde ba dang / 'jig rten la snying brtse ba dang / lha dang mi dang lha ma yin la sogs pa'i don dang / phan pa dang bde ba dang thob par bya ba'i phyir/ 'di nyid 'dri bar sems sam zhes bya bas ni gnyis pa zhu ba gsol ba la phan yon yod par bsngags pa'o/ /'di yang rnam pa gnyis kyis bstan te phan yon gyi spyi bstan pa dang / 'jig rten la snying brtse ba zhes bya ba man chad kyis phan yon gyi bye brag bstan pa'o/ /de dag la phan pa dang / bde ba zhes bya ba ni 'phags pa sangs rgyas kyi sa'i 'grel pa las/ ji skad du da ltar phan 'dogs pa ni bde ba'o/ /ma 'ongs pa na phan 'dogs pa ni phan pa'o/ /'jig rten pa ni bde ba zhes bya'o/ /'jig rten las 'das pa ni phan pa zhes bya'o/ /sdig pa dang bral ba ni bde ba zhes bya'o/ /dge ba sdud pa ni phan pa zhes bya'o/ /bsod nams ni bde ba zhes bya'o/ /ye shes ni phan pa zhes bya'o zhes bshad pa lta bu'o/ /gzhan yang slob dpon ngo bo nyid med kyis byas pa'i theg pa chen po bsdus pa'i 'grel pa las rnam pa lngar bstan pa yin te de'i phyir 'grel pa de nyid las 'di lta ste/ chos kyi dbyings rnam par dag pa dang / ye shes gya nom pa dag gis ni sems can thams cad kyi phan pa dang bde ba rnam par 'jog pa ste/ dge ba'i rgyu bsgrub tu gzhug pa gang yin pa de ni phan pa zhes bya'o/ /bde ba'i 'bras bu thob par byed pa gang yin pa de ni bde ba zhes bya'o/ /gzhan yang sdig pa dang bral bar byed pa ni phan pa zhes bya'o/ /dge ba sdud par byed pa ni bde ba zhes bya'o/ /gzhan yang sdug bsngal las 'dren pa gang yin pa de ni phan pa zhes bya'o/ /dge ba sbyin pa gang yin pa de ni bde ba zhes bya'o/ /tshe 'di dang phyi ma dang / 'jig rten pa dang 'jig rten las 'das pa la sogs pa yang de bzhin du rig par bya'o zhes 'byung ngo / /'jig rten la snying brtse ba zhes bya ba la sogs pas ni phan yon rnam pa gnyis yod par bstan pa'o/ / de la 'jig rten zhes bya ba ni phung po lnga'i 'jig rten de gang gi lus mngon par 'grub par byed pa'i chos so/ /lha dang mi zhes bya ba la sogs pas ni phung po las grub pa'i gang zag ste/ phung po lnga las tha snyad du btags pa'o/ /'phags pa shes rab kyi pha rol tu phyin pa'i 'grel pa las/ 'jig rten ni rnam pa gsum ste/ snod kyi 'jig rten dang / phung po lnga'i 'jig rten dang / sems can gyi 'jig rten no zhes bshad do/ /'dir ni bstan pa'i phan 'dogs pa rnam par 'byed pas de'i phyir phung po lnga'i sems can 'ba' zhig bstan pa'am yang na phan gdags par bya ba'i sems can rnams ni 'jig rten zhes bya ste/ 'khor gyi nang nas go zhing khong du chud pa'i gtso bor gyur pa gang yin pa de ni lha dang mi la sogs pa zhes bya'o/ /tshigs su bcad pa las/ byis pa rnams la ngas ni de ma bstan/ /zhes ma gsungs sam zhe na/ ci'i phyir 'jig rten la snying brtse ba dang lha dang mi zhes bya ba la sogs pa gsungs/ smras pa/ bstan pa gsungs pa'i dgongs pa ni don mang ste/ 'di ltar gal te sdig pa las bral zhing dge ba la gzud par mdzad na ni/ rigs pa yod pa dang / rigs pa med pa yang sdud par mdzad la/ gal te bla na med pa yang dag par rdzogs pa'i byang chub la gzud par mdzad na ni byang chub sems dpa'i rigs can dang / /rigs ma nges pa'i ched kho nar gsungs par mdzad pas so/ /khyod kyis legs par nyon cig dang / ngas khyod la sems dang yid dang rnam par shes pa'i gsang ba'i don bshad par bya'o zhes bya ba ni gnyis pa bshad par bkas gnang ba'o/ /de la legs par nyon cig ces bya ba ni slob dpon yon tan byin gyis 'grel pa las/ legs par nyon cig ces bya ba ni dmigs pa la sems rtse gcig pa'o zhes bshad do/ /bstan bcos rnal 'byor spyod pa'i sa las/ legs par nyon cig ces bya ba ni 'di lta ste/ mtshan nyid kyi chos 'di lta bu nges par nyon cig ces bskul ba'o zhes bshad do/ /blo gros yangs pa 'di ltar shes par bya ste/ 'gro ba drug gi 'khor ba 'di na sems can gang dang gang dag sems can gyi rigs de dang de dag tu gtogs pa yang na sgo nga las skyes pa'i skye gnas sam/ yang na mngal nas skyes pa'am/ yang na drod gsher las skyes pa'am/ yang na rdzus t e skye ba'i skye gnas su lus kyi yan lag skye zhing 'byung ba zhes bya ba 'di man chad ni gnyis pa zhu ba gsol ba bzhin du lan yang dag par gsungs pa ston te sems dang yid dang rnam par shes pa 'di nyid rnam par shes pa brgyad yin pas de'i phyir 'dir sngar rnam par shes pa brgyad kyi bye brag bstan nas/ de'i 'og tu sems dang yid dang rnam par shes pa'i bye brag gi mtshan nyid yang dag par bshad pa yin no/ /de yang mdor bsdu na don rnam pa drug gis bstan te/ grangs kyi rnam pa mang nyung bstan pa dang / nges tshig rnam par bshad pa dang / ngo bo nyid bstan pa dang / gnas dang dbang po bstan pa dang / dmigs pa'i yul bstan pa dang / sems las byung ba du ma dang mtshungs par bstan pa'o/ /de la grangs kyi rnam pa mang nyung bstan pa ni nyan thos kyi sde snod rnams las rnam par shes pa ni drug kho na zhes 'byung gi / bdun dang brgyad ces ni mi ston te/ zhib tu ni de nyid las bstan pa bzhin no/ /'dir theg pa chen po'i bstan pa dang sbyar na bshad pa rnam pa gnyis yod de de la dang po ni slob dpon klu sgrub la sogs pas/ rnam par shes pa ni drug kho na'o zhes bshad de / de'i phyir slob dpon b+ha byas mdzad pa'i bstan bcos dbu ma'i snying po'i nang nas/ de kho na nyid kyi bdud rtsi la 'jug pa'i le'u las/ rnam par shes pa drug las gud na gzhan kun gzhi rnam par shes pa med de/ mig la sogs pa'i rnam par shes pa drug gis ma bsdus pa'i phyir/ nam mkha'i me tog dang mtshungs so zhes bshad pas/ de'i phyir de dag gi gzhung gis rnam par shes pa drug kho na rnam par gzhag par rig par bya'o/ /gnyis pa 'phags pa byams pa'i gzhung gis ni/ 'phags pa gser 'od dam pa'i mdo la sogs pa la brten nas/ rnam par shes pa brgyad tshang bar rnam par 'jog pas gzhung 'di la brten nas rgya gar yul pa'i slob dpon rnams rnam pa gsum du bshad de/ dang po ni slob dpon bo d+he le'u cis bstan bcos rnam par rig pa tsam du grub pa la brten nas/ sems rnam pa gnyis rnam par 'jog go/ /de la dang po ni chos nyid kyi sems te/ de yang de bzhin nyid kyi ngo bo nyid de/ de bzhin nyid kyi sems kyi ngo bo nyid la sems zhes bya yang dmigs pa can ni ma yin no/ /gnyis pa ni mtshungs par ldan pa'i sems te/ dad pa dang 'dod chags la sogs pa'i sems las byung ba rnams dang mtshungs par ldan pa'o zhes bshad de/ de ni 'di skad du/ rnam par rig pa tsam gyi yid kyi ngo bo nyid yin pa'i phyir dang / rnam par rig pa tsam gyi ngo bo nyid yin pa'i phyir/ yid dang rnam par shes pa zhes bshad kyang 'gal ba med do zhes bya ba'i tha tshig go/ /gnyis pa ni slob dpon yang dag bden pas rnam par nges pa'i mdzod ces bya ba'i bstan bcos las brten nas rnam par shes pa rnam pa dgu'i don rnam par 'jog ste/ rnam par shes pa rnam pa dgu'i le'u las bstan pa bzhin no/ /de la rnam par shes pa dgu zhes bya ba yang / mig la sogs pa'i rnam par shes pa drug ni phal cher bstan bcos gzhan dag las bshad pa dang yang mthun no/ /bdun pa ni len pa'i rnam par shes pa ste/ brgyad pa la bdag dang bdag gir 'dzin pas/ nyon mongs pa kho na'i sgrib pa dang ldan gyi / chos kyi 'dzin pa ni med de/ nges par sangs rgyas su mi 'grub bo/ /brgyad pa ni kun gzhi rnam par shes pa ste/ 'di yang rnam pa gsum mo/ /kha cig na re dang po ngo bo nyid kyi kun gzhi ni/ sangs rgyas su 'grub pa'i don dang ldan pa'o/ /gnyis pa rnam par smin pa'i kun gzhi ni/ khams bco brgyad po dag la dmigs pa ste/ de'i phyir bstan bcos dbus dang mtha' rnam par 'byed pa'i tshig le'ur byas pa las/ dbang po don dang bdag rnam rig / snang ba'i rnam par shes pa las/ /de dang 'dra bar skye zhes byung bas bstan bcos 'di dag la sogs pa la brten nas/ brgyad pa khams bco brgyad la dmigs par byed do zhes bshad do/ /gsum pa kun nas nyon mongs pa'i kun gzhi ni de bzhin nyid kyi yul la dmigs nas nga rgyal rnam pa bzhi 'byung ste/ de ni chos su 'dzin gyi/ gang zag tu 'dzin pa ni ma yin no zhes slob dpon blo brten gyi gzhung la brten nas de skad du 'chad do/ /dgu pa ni dri ma med pa'i rnam par shes pa ste/ de bzhin nyid kyi bdag nyid do/ /de bzhin nyid kyi bdag nyid gcig la don gnyis dang ldan pas/ dang po ni dmigs par bya ba'i yul te/ de bzhin nyid dang / yang dag pa'i mtha' zhes bya ba la sogs pa'o/ /gnyis pa ni dmigs par byed pa'i don te/ de ni dri ma med pa'i rnam par shes pa zhes kyang bya/ gzod ma nas rig pa zhes kyang bya ste/ zhib tu rnam par shes pa dgu bstan pa dang / bstan bcos rnam par nges pa'i mdzod kyi nang nas rnam par shes pa dgu bstan pa'i le'u las 'byung ba bzhin no zhe'o/ /gsum pa ni slob dpon h+yan tsang gis/ 'phags pa lang kar gshegs pa'i mdo la sogs pa dang / slob dpon chos skyong gi gzhung la brten nas rnam par shes pa brgyad kho na rnam par 'jog gi /dgu zhes ni mi 'chad de/ slob dpon b+ha bya'i gzhung gzhig pa'i phyir/ 'di skad du tshad ma rnam par gzhag pa de nyid la rang gi lung dang 'gal ba'i skyon yod de/ 'di ltar 'phags pa lang kar gshegs pa la sogs pa'i mdo kun las brgyad pa ni kun gzhi rnam par shes pa'o zhes gsungs pa'i phyir ro/ /gal te de lta na ci'i phyir shes rab kyi pha rol tu phyin pa'i mdo'i le'u chen po la sogs pa las/ rnam par shes pa ni drug kho na'o zhes gsungs/ slob dpon chos skyong gis bstan bcos rnam par rig pa tsam du grub pa las/ brda sprad de bshad pa las ji skad du/ mdo dag las rnam par shes pa ni drug go zhes gsungs pa de ni rjes su 'gyur ba'i don gyi sgo yin no/ /yang na rten du gyur pa'i dbang po drug gi rjes su rnam pa drug go zhes pa yin te/ rnam par shes pa'i rnam pa'i bye brag ni yang dag par na rnam pa brgyad yod do / /ci slob dpon klu sgrub kyis rnam pa drug kho na'o zhes rnam par gzhag gam zhe na/ smras pa/ yang dag par na slob dpon klu sgrub kyis bdun pa dang brgyad pa yang yod par yid ches mod kyi/ rab tu dga' ba'i mya ngan las 'das pa chen po la gnas pa'i phyir bstan bcos de dag las/ rnam par shes pa ni drug go zhes bstan pa ni 'phags pa shes rab kyi pha rol tu phyin pa'i le'u chen po'i mdo la sogs pa'i dgongs pa bstan pa'i phyir 'gal ba med do/ /slob dpon yang dag bden pas rnam par shes pa ni dgu'o zhes bshad pa yang / bar dang ri rab kyi sde snod gsum po de dag la skyon mang du yod de/ de la re zhig rnam par shes pa bdun pa bstan pa la skyon rnam pa gnyis yod de/ dang po len pa zhes bya ba ni rnam par shes pa brgyad pa'i ming gi rnam grangs yin gyi/ bdun pa ma yin pas de'i phyir mdo 'di nyid la sogs pa las/ rnam par shes pa brgyad pa ni len pa'i rnam par shes pa zhes bya'o zhes gsungs so/ /gnyis pa ni don 'gal ba yin te/ nyon mongs pa'i sgrib pa dang ldan no zhes bshad pa nyid mdo sde nyid 'gal te/ sa brgyad pa yan chad la nyon mongs pa can gyi yid yod do zhes bstan pas so/ /sangs rgyas su mi 'grub bo zhes bstan pa yang bstan bcos mdo sde'i rgyan la sogs pa las/ rnam par shes pa brgyad gnas gyur pas/ ye shes bzhi mngon par 'grub bo zhes bshad pa'i don dang 'gal bar gyur pas / kun gzhi rnam par shes pa chos su 'dzin pa skyed par byed pa dang khams bco brgyad la dmigs par byed do zhes bstan pa de dag kyang rigs pa ma yin no/ /gzhan yang dbus dang mtha' rnam par 'byed pa'i tshig le'ur byas pa gsar 'gyur las/ rnam shes don dang sems can dang / /bdag dang rnam rig lta bur snang / /yul 'di nges par yod ma yin/ /yul med phyir ni rnam shes med/ /ces 'byung ste/ 'di nyid kyi 'grel pa las de la don lta bur snang ba 'di lta ste/ gzugs la sogs pa'i yul gyi dngos por snang ba gang yin pa'o/ /sems can lta bur snang ba ni 'di lta ste/ bdag dang gzhan gyi yul lta bur dbang po lnga'i ngo bor snang ba gang yin pa'o/ /bdag lta bur snang ba ni 'di lta ste/ nyon mongs pa can gyi yid bdag tu rmongs pa la sogs pa dang / rtag par mtshungs par ldan pa'i phyir ro/ /rnam par rig pa lta bur snang ba ni 'di lta ste/ rnam par shes pa gzhan drug po dag mtshan nyid rnam par rig pa rags pa'i phyir ro zhes bshad de/ zhib tu de nyid las bstan pa yin no / /de'i phyir brgyad pa ni sems pa la sogs pa la mi dmigs par rig par bya ste/ zhib tu rnam par 'byed pa ni/ rnam par rig pa tsam du grub pa'i bstan bcos las bshad pa bzhin no/ /gzhan yang slob dpon yang dag bden pas dri ma med pa'i rnam par shes pa ni bdag nyid la dmigs par byed do zhes bshad pa yang / lung gi khungs kyang gtan tshigs yid brtan du rung ba yang med la/ gzhan yang bstan bcos de bzhin gshegs pa'i yon tan gyi rgyan las/ bstan pa dag dang yang 'gal bar 'gyur te de nyid las/ de bzhin gshegs pa'i dri med rnam shes ni/ /shin tu dag cing zag med dbyings yin pas/ /sgrib pa thams cad las ni rnam par grol/ /me long lta bu'i ye shes mtshungs par ldan/ /zhes 'byung ba ni mdo sde las gsungs pa bzhin du shes par bya ste/ de la dri ma med pa'i rnam par shes pa zhes bya ba ni/ rnam par byang ba'i phyogs kyi kun gzhi rnam par shes pa'o/ /gzhan yang rnam par nges pa'i mdzod kyi bstan bcos zhes bya ba 'di nyid rnal 'byor spyod pa'i sa yin te/ bstan bcos de nyid las rnam par shes pa dgu'i le'u zhes bya ba med do zhes bshad do/ /de la nges tshig rnam par bshad pa yang rnam pa gnyis te/ spyi dang bye brag go/ /de yang rnam par shes pa brgyad ces bya ba ni spyi'i ming ste/ brgyad ces bya ba ni grangs smos pa'o/ /rnam par shes pa ni rnam par rig pa'o/ /spyi'i ngo bo nyid dang mtshan nyid kyis ni/ rnam par shes pa drug las rnam par 'byed de/ rnam par bshad pa rnam pa drug las 'di ni grangs dang bcas pa'i rnam par bshad pa'o/ /de la bye brag gi ming ni/ ming la sogs pa'i rnam par shes pa drug po rnams te/ thams cad kyang bdag po'i dbang du mdzad nas rnam par bshad pa'o/ /'di lta ste/ mig la brten pa'i rnam par shes pa gang yin pa de ni mig gi rnam par shes pa zhes bya'o/ /de bzhin du yid la brten pa'i rnam par shes pa gang yin pa de ni yid kyi rnam par shes pa zhes bya'o/ /bdun pa nyon mongs pa can gyi yid ni/ rnam par rig pa tsam du grub pa'i bstan bcos las/ rtag tu nges par sems pa rnam par shes pa gzhan dag las kyang khyad par du gyur pa'i phyir ro zhes bshad de/ bshad pa 'di dang sbyar na/ yid nyid rnam par shes pa yin pa'i phyir/ yid kyi rnam par shes pa zhes bya ste/ 'di ni las yongs su 'dzin pa'i rnam par bshad pa'o/ /brgyad pa kun gzhi rnam par shes pa ni sbed par byed pa dang / sba bar bya ba dang sbas pa 'dzin pa'i don dang ldan pa'i phyir/ go rims bzhin du 'bras bu rgyu la sbas pa dang / rgyu 'bras bu la sbas pa dang / yul 'dzin pa la sbas pa ste/ zhib tu bstan bcos rnam par rig pa tsam du grub pa dang / theg pa chen po bsdus pa las bstan pa bzhin no/ /de la ngo bo nyid bstan pa yang re zhig don rnam pa gnyis la brten nas bstan te/ ngo bo nyid rnam pa gsum dang / chos rnam pa gsum la brten nas bstan pa'i phyir ro/ /gal te ngo bo nyid rnam pa gsum la brten nas rnam par shes pa brgyad rnam par dbye na thams cad kyang ngo bo nyid gsum du bsdus pa yin te/ yang dag pa ma yin pa'i rnam par rtog pa rnams gcig tu bsdus nas de kho na la phyags pa ni de bzhin nyid yin pa'i phyir dang / rgyu dang rkyen la ltos nas 'byung bas thams cad kyang gzhan gyi dbang yin pa'i phyir/ ji tsam du brtags pa'i sems kyi rjes su yod pa dag ni/ kun brtags kyi ngo bo nyid yin pa'i phyir ro/ /de'i phyir rnam par rig pa tsam du grub pa'i bstan bcos las/ rnam par shes pa'i ngo bo nyid ni mdor bsdu na rnam pa gnyis te/ yang dag pa ma yin pa ni 'di lta ste/ kun du brtags pa'o/ /yang dag pa ni 'di lta ste/ yongs su grub pa'i ngo bo nyid do/ /gzhan yang ngo bo nyid rnam pa gnyis te/ kun rdzob ni 'di lta ste/ gzhan gyi dbang gi ngo bo nyid do/ /don dam pa ni 'di lta ste/ yongs su grub pa'i ngo bo nyid do zhes bshad do/ /chos rnam pa gsum la brten nas ngo bo nyid bstan pa yang phung po lnga las rnam par shes pa brgyad po dag ni thams cad kyang rnam par shes pa'i phung po'i bdag nyid do/ /skye mched bcu gnyis las ni thams cad kyang yid kyi skye mched kyis bsdus te/ thams cad la yang de ma thag pa'i 'gag pa la brten pa'i don yod pa'i phyir ro/ /khams bco brgyad las snga ma'i rnam par shes pa lnga po dag ni thams cad kyang rang gi rnam par shes pa'i khams dang yid kyi khams kyi phyogs gcig gi bdag nyid byed do/ /drug pa dang bdun pa dang / brgyad po'i rnam par shes pa gsum po dag ni thams cad kyang yid kyi rnam par shes pa dang / yid kyi khams kyi phyogs gcig gi ngo bo nyid byed do/ /de la gnas rnam par dbye ba yang rnam par shes pa brgyad po dag gi gnas ni re re la yang rnam pa gsum gsum yod de de la dang po rgyu'i rkyen gyi gnas ni 'di lta ste/ rnam par shes pa brgyad po dag mngon du bskyed pa'i sa bon rnams te/ de'i phyir rnam par rig pa tsam du grub pa'i bstan bcos las dang po'i rgyu'i rkyen gyi gnas ni 'di lta ste/ rang gi sa bon 'dus byas kyi chos rnams te/ thams cad kyang gnas 'di la ltos nas rang gi rgyu'i rkyen dang bral na/ nges par mi skyed pa'i phyir ro zhes bshad pa yin no/ /gnyis pa go 'byed pa'i gnas ni 'di lta ste/ skad cig ma snga ma rang gi rnam pa 'gags pa'o/ /rnam par shes pa brgyad po dag phan tshun ltos pa'i skad cig ma snga ma ni go 'byed pa'i gnas byed pas/ de'i phyir rnam par rig pa tsam du grub pa'i bstan bcos las/ /mtshungs pa de ma thag pa'i rkyen gyi gnas ni 'di lta ste/ sngar 'gags ma thag pa'i yid de/ sems dang sems las 'byung ba rnams gnas 'di la ltos pas go 'byed pa'i gnas dang bral na nges par mi 'jug pa'i phyir ro zhes bshad do/ /gsum pa ni lhan cig pa'i gnas te/ lhan cig pa'i gnas de yang rnam par shes pa rnams kyis mi mtshungs pas mig la sogs pa'i rnam par shes pa lnga po de dag re re la yang gnas bzhi bzhi yod de/ de la yul mtshungs pa'i dbang po ni 'di lta ste/ mig la sogs pa'i dbang po lnga po dag phan tshun ltos pa'i rang gi rnam par shes pa'o/ /rnam par rtog pa'i dbang po ni 'di lta ste/ shes pa lnga po dag yid kyi rnam par shes pa la ni dmigs par mtshungs pa'o/ /kun nas nyon mongs pa dang rnam par byang ba'i dbang po ni 'di lta ste/ nyon mongs pa can gyi yid do/ /rtsa ba'i gnas ni 'di lta ste/ kun gzhi rnam par shes pa'o/ /de'i phyir rnam par rig pa tsam du grub pa'i bstan bcos las/ des na rnam par shes pa lnga po dag gi lhan cig pa'i gnas ni nges par rnam pa bzhi yod de/ 'di ltar dbang po gzugs can lnga dang / rnam pa drug dang / bdun dang / brgyad po de dag las gang yang rung ba las gcig ma tshang na nges par mi 'jug pa'i phyir dang / yul mtshungs pa'i dang / rnam par rtog pa dang / kun nas nyon mongs pa dang / rnam par byang ba dang / rtsa ba'i gnas tha dad pa'i phyir ro zhes bshad do/ /yid kyi rnam par shes pa'i lhan cig pa'i gnas ni rnam pa gnyis kho na ste/ de'i phyir rnam par rig pa tsam du grub pa'i bstan bcos las/ yid kyi rnam par shes pa'i lhan cig pa'i gnas ni gnyis kho na'o/ /'di lta ste/ rnam par shes pa bdun dang / brgyad pa las gang yang rung ba cig ma tshang na nges par mi 'jug pa'i phyir ro zhes 'byung ngo / /nyon mongs pa can gyi yid kyi lhan cig pa'i gnas ni gcig kho na ste/ de'i phyir rnam par rig pa tsam du grub pa'i bstan bcos las/ nyon mongs pa can gyi yid kyi lhan cig pa'i gnas ni gcig kho na ste/ gal te kun gzhi rnam par shes pa med na nges par mi 'jug pa'i phyir ro zhes bshad do/ /kun gzhi rnam par shes pa'i lhan cig pa'i gnas kyang gcig kho na ste/ de'i phyir rnam par rig pa tsam du grub pa'i bstan bcos las/ kun gzhi rnam par shes pa'i lhan cig pa'i gnas kyang gcig kho na'o/ /de yang 'di lta ste nyon mongs pa can gyi yid do/ /gal te rnam par shes pa de med na/ nges par mi 'jug pa'i phyir ro zhes bshad de bstan bcos dag las kun gzhi rnam par shes pa ni rtag par nyon mongs pa can gyi yid dang lhan cig 'jug go zhes bshad pa'i phyir ro/ /rnam par shes pa brgyad car yang zag pa dang bcas pa dang / zag pa med pa la gnas par ni bye brag tu gyur pa ci yang med do/ /de la dmigs par bya ba'i yul bstan pa ni/ sgo re re la yang rnam pa bzhi bzhi yod de/ rnam par shes pa lnga dag gis dmigs pa dang / yid kyi rnam par shes pa'i dmigs pa dang / nyon mongs pa can gyi yid kyi dmigs pa dang / kun gzhi rnam par shes pa'i dmigs pa bstan pa'o/ /zag pa dang bcas pa'i rnam par shes pa lnga po dag ni/ yul rnam pa lnga las re re kho na la dmigs par byed de/ 'di lta ste/ mig gi rnam par shes pa gzugs la dmigs nas lus kyi rnam par shes pa reg bya la dmigs pa'i bar du ste/ 'di ni mngon sum gyi tshad ma kho na'o/ /zag pa med pa'i gnas skabs gang yin pa de ni bstan bcos rnam par rig pa tsam du grub pa las slob dpon gnyis kyi bshad pa 'byung ste/ de'i phyir de las bya ba grub pa'i ye shes dang mtshungs par ldan pa'i sems kyi rnam pa ni kha cig na re mngon sum gyi tshad ma rnam pa lnga kho na la dmigs par byed de/ bstan bcos mdo sde rgyan las/ de bzhin gshegs pa'i dbang po lnga po dag ni thams cad kyang yul lnga po dag la 'jug pa'i phyir ro zhes bshad pas so zhe'o/ /kha cig na re dus gsum gyi chos rnams la khyad par dmigs par mdzad de / /'phags pa sangs rgyas kyi sa'i mdo las bya ba sgrub pa'i ye shes thugs sprul pa'i phrin las rnam pa gsum bskyed pas sems can rnams sems kyi spyod pa tha dad pa gtan la dbab pa dang / 'das pa dang / ma 'ongs pa dang / da ltar gyi don rnams so sor myong bar mdzad do zhes gsungs pas so zhe'o zhes 'byung ngo / /zag pa dang bcas pa'i yid kyi rnam par shes pa ni khams bco brgyad po kun la dmigs par byed de/ bstan bcos kun las kyang mthun par de skad bshad do/ /gnas gyur pa'i dus su yang chos rnams kun la dmigs par byed de/ de'i phyir rnam par rig pa tsam du grub pa'i bstan bcos las so sor rtog pa'i ye shes dang mtshungs par ldan pa'i sems kyi rnam pa ni chos thams cad kyi rang gi mtshan nyid kyi dang / spyi'i mtshan nyid la thogs pa med par dmigs par mdzad do zhes bshad do/ /zag pa dang bcas pa'i nyon mongs pa can gyi yid ni/ kun gzhi rnam par shes pa'i lte ba'i rnam pa la dmigs shing bdag dang chos su 'dzin par byed de/ bstan bcos kun las kyang de skad du ston to/ /nyon mongs pa can gyi yid ni de yang bstan bcos rnam par rig pa tsam du grub pa dang sbyar na/ bshad pa mi mthun pa gsum yod de/ de'i phyir de nyid las/ mnyam pa nyid kyi ye shes dang mtshungs par ldan pa'i sems kyi rnam pa de yang kha cig na re brgyad pa yongs su dag pa'i rnam par rig pa la dmigs par mdzad de/ ji ltar nyon mongs pa can gyi yid kun gzhi rnam par shes pa la dmigs par byed pa bzhin yin pa'i phyir ro zhe'o/ /kha cig ni de bzhin nyid kyi yul kho na la dmigs par mdzad de/ chos thams cad kyi mnyam pa nyid la dmigs pa'i phyir ro zhe'o/ /kha cig ni don dam pa dang / kun rdzob kyi yul kun la dmigs par mdzad de/ 'phags pa sangs rgyas kyi sa'i mdo las/ mnyam pa nyid kyi ye shes ni mnyam pa nyid rnam pa bcus khong du chud do zhes gsungs pa'i phyir ro/ /gzhan yang bstan bcos mdo sde'i rgyan las/ sems can rnams kyi bdag dang gzhan mnyam pa nyid la dmigs shing gzhan dag gi mos pa bzhin du sangs rgyas kyi gzugs brnyan tshad med par ston par mdzad do zhes bstan pa'i phyir ro zhes 'byung ngo / /zag pa dang bcas pa'i kun gzhi rnam par shes pa'i spyod yul ni bstan bcos rnams las bshad pa mi mthun te/ bstan bcos rnal 'byor spyod pa'i sa las ni rnam pa gnyis so zhes bshad do/ /de'i phyir de las mdor bsdu na kun gzhi rnam par shes pa ni dmigs pa rnam pa gnyis kyis 'jug ste/ nang gi len pa rnam par rig pa'i phyir dang / phyi rol gyi snod kyi rnam pa yongs su ma chad pa rnam par rig pa'i phyir ro zhes 'byung ngo / /rnam par rig pa tsam du grub pa'i bstan bcos las ni yul rnam pa gsum la dmigs so zhes bshad de/ 'di lta ste/ phyi rol gyi snod kyi 'jig rten dang / zag pa dang bcas pa'i sa bon dang / dbang po dang bcas pa'i yul la'o/ /gzhan yang de nyid las yul rnam pa bzhi la dmigs so zhes bshad do/ /snga ma gsum gyi steng du chos kyi skye mched du gtogs pa'i yang dag pa'i gzugs kyis bsnan pa'i phyir ro/ /mdor bsdu na rnam par shes pa 'di'i dmigs pa'i yul ni 'di lta ste/ zag pa dang bcas pa'i sa bon dang gzugs kyi skye mched dang / chos kyi skye mched du gtogs pa'i yang dag pa'i gzugs so/ /ci'i phyir rnam par shes pa 'di sems la sogs pa la dmigs par mi byed ce na/ bstan bcos rnam par rig pa tsam du grub pa las rnam par smin pa'i rnam par shes pa'i dmigs pa la ni gdon mi za bar yang dag pa'i nus pa yod pas/ gal te sems la sogs pa la yang dmigs par byed na ni/ yang dag pa'i nus pa med par 'gyur te/ rgyu mtshan gyi rnam pa'i sems la sogs pas dmigs par mi nus pa'i phyir ro/ /'dus ma byas la sogs pa la dmigs na yang / yang dag pa'i nus pa med par 'gyur bas/ rnam par smin pa'i rnam par shes pa ni/ sems la sogs pa la dmigs par mi byed do zhes bshad do/ /zag pa med pa'i kun gzhi rnam par shes pa yang bstan bcos rnam par rig pa tsam du grub pa las slob dpon gnyis kyis bshad pa 'byung ste/ de'i phyir de las me long lta bu'i ye shes dang mtshungs par ldan pa'i sems kyi rnam pa yang kha cig ni de bzhin nyid kyi yul la dmigs pas/ rnam par mi rtog pa yin gyi/ rjes las thob pa'i ye shes kyi rnam pa'i spyod yul ni ma yin te/ shes par mi nus pa'i phyir ro zhe'o/ /kha cig na re sems kyi rnam pa 'di ni chos thams cad la dmigs par byed de/ bstan bcos mdo sde'i rgyan las me long lta bu'i ye shes ni yul thams cad la dmigs par byed pa'i phyir ro zhes bstan pa dang / 'phags pa sangs rgyas kyi sa'i mdo las/ de bzhin gshegs pa rnams kyi me long lta bu'i ye shes kyi dkyil 'khor la brten nas skye mched dang / de'i yul la rnam par shes pa'i gzugs brnyan dag snang ngo zhes gsungs pa'i phyir ro/ /gzhan yang 'di ni nges par zag pa med pa'i sa bon dang / sku dang zhing la sogs pa'i gzugs brnyan la dmigs pa'i phyir ro zhes zer ro zhes 'byung ngo / /rnam par shes pa brgyad po de dag yul btags pa'am/ rdzas su yod pa'am/ 'dus byas sam/ 'dus ma byas sam dus gsum la sogs pa gang la dmigs par byed ces bya ba'i bye brag ni bstan bcos rnam par rig pa tsam du grub pa la sogs pa las bstan pa bzhin du rig par bya'o/ /de la sems las byung ba du dang mtshungs par ldan pa'i bstan pa yang / bstan bcos rnam par rig pa tsam du grub pa las/ slob dpon chos skyong gis bshad pa de yang dag pa'i don dang sbyar na sems las byung ba'i chos lnga bcu rtsa gcig las zag pa dang bcas pa'i rnam par shes pa lnga po dag ni sems las byung ba'i chos sum bcu rtsa bzhi dang mtshungs par ldan no/ /'di lta ste/ lnga kun du 'gro ba dang / lnga yul so sor nges pa dang / bcu gcig dge ba dang / rtsa ba'i nyon mongs pa las gsum po 'di lta ste/ 'dod chags dang / zhe sdang dang / gti mug dang / nye ba'i nyon mongs pa las bcu po 'di lta ste/ 'bring las gnyis dang / chen po las brgyad do/ /dge ba bcu gcig po de dag la slob dpon gnyis kyis bshad pa'i don yod de/ de'i phyir bstan bcos rnam par rig pa tsam du grub pa las/ kha cig na re rnam par shes pa lnga po dag ni ngo bo nyid kyi rnam par g.yeng ba rnam pa bcu po kho na dang ldan te/ shin tu sbyangs pa med pa'i phyir ro zhe'o/ /kha cig na re rnam par shes pa lnga po dag la yang shin tu sbyangs pa yod de/ ting nge 'dzin gyis bskyed pa'i dge ba la yang zo mdog bde ba yod pa'i phyir dang / bya ba sgrub pa'i ye shes dang lhan cig pa la yang nges par shin tu sbyangs pa yod pa'i phyir ro zhes zer ro zhes 'byung ste sems las byung ba gzhan med par bshad pa ni bstan bcos dag las rgya cher bstan pa bzhin du rig par bya'o/ /zag pa dang bcas pa'i yid kyi rnam par shes pa ni sems las byung ba lnga bcu rtsa gcig dang mtshungs par ldan te/ bstan bcos kun las kyang mthun par ston pas tha dad pa'i don med do/ /zag pa dang bcas pa'i nyon mongs pa can gyi yid ni slob dpon chos skyong gis bshad pa'i yang dag pa'i don las/ sems las byung ba bco brgyad kho na dang mtshungs par ldan no zhes bshad de / de'i phyir bstan bcos rnam par rig pa tsam du grub pa las yid kyi rnam par shes pa 'di dang mtshungs par ldan pa'i sems las byung ba ni bco brgyad de/ 'di lta ste/ snga ma'i chos dgu dang / nye ba'i nyon mongs pa las brgyad dang / yul so sor nges pa las shes rab po zhes 'byung ngo / /de la snga ma'i chos dgu zhes bya ba ni 'di lta ste/ lnga kun du 'gro ba dang nyon mongs pa bzhi po dag go/ /nyon mongs pa bzhi po ni 'di lta ste/ bdag tu rmongs pa dang / bdag tu lta ba dang / bdag tu nga rgyal ba dang / bdag la sred pa'o zhes 'byung ste/ sems las byung ba gzhan med par bshad pa yang bstan bcos dag las 'byung ba bzhin du rig par bya'o/ /zag pa med pa'i rnam par shes pa brgyad pa ni/ sems las byung ba nyi shu rtsa gcig dang mtshungs par ldan te/ 'di lta ste/ kun du 'gro ba lnga dang yul so sor nges pa lnga dang dge ba bcu gcig go/ /de la bye brag ni so sor rtog pa'i ye shes kyang rgyu'i gnas skabs kyi tshe rtog dpyod dang mtshungs par ldan pa ste sman dang nad la sogs pa dag la dbang du ma gyur pa'i phyir ro/ / sangs rgyas kyi sar byon pa'i tshe ni rtog pa dang dpyod pa mi mnga' ste rtog pa mi mnga' bar yang mdzad pa'i dngos po rnams 'grub pa'i phyir ro/ /rgya cher rnam par 'byed pa ni bstan bcos dag las 'byung ba bzhin no/ /sems dang / yid dang / rnam par shes pa'i don ni rgya cher mtshan nyid bstan pa gzhan dag las 'byung ba bzhin du rig par bya ste/ de'i tshig gi don rnam par bshad pa yang rnam pa gnyis su dbye ste/ sems dang yid dang rnam par shes pa'i gsang ba'i don bstan pa dang blo gros yangs pa de ltar zhes bya ba man chad kyis gsang ba la mkhas pa rnam par 'byed cing sngar zhus pa rnam pa gnyis kyi lan ston par mdzad pa'o/ /dang po yang rnam pa gnyis kyis bstan te/ kun gzhi rnam par shes pa'i ming gi rnam grangs mang po'i bye brag bstan pa dang / blo gros yangs pa len pa'i rnam par shes pa zhes bya ba man chad kyis rnam par shes pa rnams lhan cig 'jug pa'i bye brag bstan pa'o/ /dang po la yang rnam pa bzhis bstan te/ rnam par shes pa'i sa bon bstan pa dang / len pa'i rnam par shes pa rnam par 'byed pa dang / kun gzhi rnam par shes pa bstan pa dang / sems kyi ming bstan pa'o/ /'di ni dang po rnam par shes pa sa bon bshad pa yin te/ de la sa bon thams cad ces bya ba ni bag chags rnam pa gsum nyid de/ de ni 'di skad du 'di ltar kun gzhi rnam par shes pas bag chags rnam pa gsum yongs su bzung ba'i dbang gis nying mtshams sbyor ba rgyun mi 'chad par gyur to zhes ston to / /de'i phyir bstan bcos rnam par rig pa tsam du grub pa las/ gzhan yang 'khor ba'i nying mtshams sbyor ba ni/ bag chags rnams las gyur pa yin te/ bag chags de yang mdor bsdu na rnam pa gsum mo/ /'di lta ste/ mngon par brjod pa'i bag chags dang / bdag tu 'dzin pa'i bag chags dang / srid pa'i yan lag gi bag chags so zhes bstan pa yin no/ /sa bon pa'i rnam par shes pa de yang rnam pa gnyis te/ dang po ni rnam par shes pas yongs su gzung ba'i sa bon la sa bon pa'i rnam par shes pa zhes bya'o/ /gnyis pa ni sa bon yongs su 'dzin pa'i rnam par shes pa la sa bon pa'i rnam par shes pa zhes bya ste/ de ltar rnam pa gnyis yod mod kyi 'dir ni sa bon yongs su 'dzin pa'i rnam par shes pa yang dag par ston te/ lus kyi yan lag 'byung ba la gnas pa dang / sa bon yongs su 'dzin pa'i phyir dang / des yongs su gzung ba'i sa bon ni bag chags rnam pa gsum yin pa'i phyir ro/ /'dir bag chags rnam pa gsum po de 'dir mdo tsam du bshad par bya ste/ bag chags rnam pa gsum po de yang sgo rnam pa bzhis rnam par dbye bar bya ste/ nges tshig rnam par bshad pa dang / ngo bo nyid bstan pa dang / 'bras bu bskyed pa'i bye brag bstan pa dang / rkyen rnam pa bzhis rnam par dbye ba'o/ /de la dang po nges tshig rnam par bshad pa yid spyi dang bye brag gis bstan te/ de la bag chags rnam pa gsum zhes bya ba ni spyi'i ming ngo / /gsum zhes bya ba ni grangs smos pa'o/ /bag chags zhes bya ba ni mngon par brjod pa la bag chags zhes bya'o/ /brgyad pa la yod pa'i sa bon gyi bag chags cha yin pa'i phyir bag chags zhes bya ste/ 'di rnam par bshad pa drug las grangs dang bcas pa'i rnam par bshad pa'o/ /de la bye brag gi ming ni bstan bcos rnam par bshad pa tsam du grub pa las ji skad du/ bag chags rnams kyang mdor bsdu na rnam pa gsum mo/ /de la mngon par brjod pa'i bag chags ni 'di lta ste/ 'dus byas kyi chos so so tha dad pa'i nye ba'i sa bon no/ /mngon par brjod pa yang rnam pa gnyis te/ don mtshon pa'i mngon par brjod pa ni don brjod pa'i sgra'i bye brag go/ /yul mtshon pa'i mngon par brjod pa ni yul khong du chud par byed pa'i sems dang sems las byung ba'i chos rnams so/ /bdag tu 'dzin pa'i bag chags ni 'di lta ste/ yang dag pa ma yin pas bdag dang bdag gir bzung ba'i sa bon no/ /bdag tu 'dzin pa yang rnam pa gnyis te/ lhan cig skyes pa'i bdag tu 'dzin pa ni bsgom pas spang bar bya ba'i bdag dang bdag gir 'dzin pa'o/ /kun du brtags pa'i bdag tu 'dzin pa ni mthong bas spang bar bya ba'i bdag dang bdag gir 'dzin pa ste/ bdag tu 'dzin pa rnam pa gnyis kyis yongs su bsgos pa las mngon par 'grub pa'i sa bon gyis sems can rnams bdag dang gzhan zhes bye brag tu byed pa'o/ /sred pa'i yan lag gi bag chags ni 'di lta ste/ khams gsum pa'i rnam par smin pa 'dren pa'i las kyi sa bon no/ /srid pa'i yan lag kyang rnam pa gnyis te/ zag pa dang bcas pa'i dge ba ni 'bras bu yid du 'ong ba 'dren pa'i las gang yin pa'o/ /mi dge ba ni 'bras bu yid du 'ong ba ma yin pa 'dren pa'i las gang yin pa'o zhes bshad pa lta bu ste/ bag chags rnam pa gsum gyi mtshan nyid bstan bcos dag las 'byung ba bzhin du rig par bya'o/ /bag chags rnam pa gsum char yang bdag po'i dbang du byas nas rnam par bshad pa yin te/ 'di ltar mngon par brjod pa'i bag chags kyi sa bon yin pa'i phyir dang / de bzhin du srid pa'i yan lag gi bag chags kyi sa bon yin pa'i phyir ro/ /de la ngo bo nyid bstan pa yang sngar bshad pa bzhin du mngon par brjod pa rnam pa gnyis kyis yongs su bsgos pa'i sa bon gang yin pa de ni mngon par brjod pa'i bag chags zhes bya'o/ /bdag tu 'dzin pa rnam pa gnyis kyis yongs su bsgos pa'i sa bon gang yin pa de ni bdag tu 'dzin pa'i bag chags zhes bya'o/ /de bzhin du dge ba dang mi dge ba'i las kyis yongs su bsgos pa'i sa bon gang yin pa de ni srid pa'i yan lag gi bag chags zhes bya ste/ sa bon ni de ltar rnam par rtog pa yin pas sa bon kho nar zad kyi mngon du gyur pa ni ma yin no/ /chos rnam pa gsum gyi ngo bo nyid bstan na mngon par brjod pa'i bag chags ni phung po lnga'i sgo nas phyogs gcig gi sa bon ni phung po lnga'i ngo bo nyid de/ zag pa med pa'i sa bon gyis bskyed pa ma gtogs par thams cad kyang phung por bsdus par mtshungs pa'i phyir ro/ /skye mched dang khams kyi sgo nas kyang phyogs gcig ni skye mched bcu gnyis kyi sa bon dang / khams bco brgyad kyi sa bon gyi ngo bo nyid de/ zag pa med pa'i sa bon ma gtogs pa ni phung po bzhin du rig par bya'o/ /bdag tu 'dzin pa'i bag chags kyang / phung po lnga'i sgo nas ni 'du byed kyi phung po'i phyogs gcig bsdus so/ /skye mched dang khams kyi sgo nas kyang / chos kyi skye mched dang / chos kyi khams kyi phyogs gcig gi ngo bo nyid do/ /sred pa'i yan lag gi bag chags ni phung po lnga'i sgo nas gzugs dang 'du byed kyi phung po gnyis kyi ngo bo nyid de/ gzugs kyi phung po yin pa'i phyir dang / yid kyi sems pa'i las kyi sa bon ni 'du byed kyi phung pos bsdus pa'i phyir ro/ /skye mched dang khams kyi sgo nas ni gzugs kyi skye mched dang / sgra'i skye mched dang / chos kyi skye mched dang / gzugs kyi khams dang / sgra'i khams dang / chos kyi khams kyi phyogs gcig gi ngo bo nyid do/ /chos kyi rnam grangs kyi ngo bo nyid bstan nas mngon par brjod pa'i bag chags ni chos brgya'i sgo nas chos brgya'i sa bon gyi ngo bo nyid kyi gzugs brnyan byed de/ chos brgya po de dag thams cad kyang yongs su bsgos pa'i sa bon yin pa'i phyir ro/ /bdag tu 'dzin pa'i bag chags ni yul so sor nges pa las shes rab dang / nyon mongs pa bcu las 'jig tshogs la lta ba'i ngo bo nyid do/ /srid pa'i yan lag gi bag chags ni gzugs rnam pa bcu gcig las gzugs dang sgra'i chos gnyis dang / sems las byung ba'i las sems pa'i ngo bo nyid de/ ngag dang sems pa'i las yin pa'i phyir ro/ /de la 'bras bu bskyed pa'i phyir bye brag bstan pa yang rnam pa gnyis te/ rnam par rig pa tsam du grub pa'i bstan bcos las 'byung ba bzhin du spyir chos rnams las brtsams nas 'bras bu skyed par bstan pa dang / bstan bcos theg pa chen po bsdus pa las bstan pa bzhin du rnam par rig pa rnam pa bcu gcig las brtsams nas/ 'bras bu bskyed pa rnam par 'byed pa'o/ /de la spyir chos rnams las brtsams nas 'bras bu skyed par bstan pa yang mngon par brjod pa'i bag chags ni spyir chos brgyad po dag skyed par byed de/ de la bye brag yod pa yang chos dgu bcu rtsa bzhi po de dag gi ngo bo nyid dang / gzugs brnyan thams cad ni mngon par brjod pas bskyed pa yin no/ /'dus ma byas rnam pa drug gi ngo bo nyid dang / gzugs brnyan ni mi mtshungs pas ngo bo nyid rnam pa drug gi sa bon las byung ba ma yin te/ yongs su grub pa'i 'dus ma byas ni mi skye ba'i don yin pa'i phyir ro/ /gzugs brnyan rnam pa drug ni mngon par brjod pa las byung ba yin te/ gzhan gyi dbang gi 'dus ma byas ni yang dag par na 'dus byas yin te/ rgyu la brten nas skyes pa'i phyir/ rnam par rig pa tsam du grub pa'i bstan bcos las mngon par brjod pa'i bag chags ni 'di lta ste/ 'dus byas kyi chos so so tha dad pa'i nye ba'i sa bon no zhes bstan pa yin no/ /'dus byas kyi chos las rdzas su yod pa'i chos ni bdag nyid yod pas sa bon las skye zhes byar rung na mtshungs par ldan pa ma yin pa las bdag nyid yang dag pa med na/ ji ltar rgyu las byung zhes brjod ce na/ yang dag pa'i don du na btags pa'i chos rnams kyi sa bon las mi skye ste/ de'i phyir bstan bcos rnam par rig pa tsam du grub pa las btags pa'i chos ni med pa dang 'dra ste/ rgyu dang rkyen ma yin pa'i phyir ro zhes 'byung ste/ btags pa'i chos rgyu dang rkyen ma yin pa'i don gyis na btags pa'i chos rnams ni bskyed par bya ba yang ma yin te/ 'on kyang brtags pa ni rdzas su yod pa'i rjes su btags pa'i sa bon zhes bshad de/ rgyu rkyen las skyes pa'i phyir rnam par rig pa tsam du grub pa'i bstan bcos las/ ming dang rgyu mtshan dang rnam par rtog pa'i bag chags rnam pa gsum zhes bstan pa yin no/ /bdag tu lta ba'i bag chags kyis ni bdag dang gzhan gyi lus kyi chos brgya'i bye brag tha dad pa skyed par byed do/ /srid pa'i yan lag gi bag chags kyis ni chos brgya'i bde 'gro dang ngan 'gro'i las skyed par byed de/ sngar bstan pa'i 'dus ma byas dang btags pa'i chos ni snga ma bzhin du rig par bya'o/ /de la rnam par rig pa rnam pa bcu gcig las brtsams nas 'bras bu bskyed pa rnam par 'byed pa ni bstan bcos theg pa chen po bstan pa las ji skad du/ de la lus dang / lus can dang / za ba po'i rnam par rig pa gang yin pa dang / des nye bar spyad par bya ba'i rnam par rig pa gang yin pa dang / de la nye bar spyad par bya ba'i rnam par rig pa gang yin pa dang / dus kyi rnam par rig pa dang / grangs kyi rnam par rig pa dang / yul gyi rnam par rig pa gang yin pa dang / tha snyad kyi rnam par rig pa gang yin pa de ni mngon par brjod pa'i bag chags kyi sa bon las byung ba'i phyir ro/ /bdag dang gzhan gyi rnam par rig pa'i bye brag gang yin pa de ni bdag tu lta ba'i bag chags kyi sa bon las byung ba'i phyir ro/ /bde 'gro dang ngan 'gro dang 'chi 'pho dang skye ba'i rnam par rig pa gang yin pa de ni srid pa'i yan lag gi bag chags kyi sa bon las byung ba'i phyir ro zhes 'byung ste/ rgya cher de nyid las bstan pa bzhin no/ /de la rkyen bzhis rnam par dbye ba yang mngon par brjod pa'i bag chags ni rgyu'i rkyen yang dag pa yin la bag chags gzhan gnyis ni bdag po'i rkyen yin te/ de'i phyir bstan bcos rnam par rig pa gang yin pa dang / dus kyi rnam par rig pa tsam du grub pa las/ mngon par brjod pa gnyis kyis yongs su bsgos pa las grub pa'i sa bon gang yin pa de ni 'dus byas kyi chos rnams kyi so so'i rgyu rkyen byed do zhes bya ba dang / gzhan yang de nyid las/ bdag tu 'dzin pa dang srid pa'i yan lag gi bag chags ni 'bras bu bye brag tha dad pa rnams la bdag po'i rkyen byed par rig par bya'o zhes 'byung ste/ rgya cher rnam par 'byed pa ni rnam par rig pa tsam du grub pa'i bstan bcos bam po brgyad pa'i 'grel pa las bstan pa bzhin no/ /sa bon pa'i rnam par shes pa de nyid bstan pa la rnam pa gnyis su dbye ste/ sems can gyi phung po las brtsams nas lus kyi yan lag 'byung ba bstan pa dang / der zhes bya ba man chad kyis sa bon pa'i rnam par shes pa las brtsams nas skye ba lan pa'i bye brag rgya cher rnam par 'byed pa'o/ /'di ni dang po ste/ de la 'gro ba drug ces bya ba ni 'og nas mdo las ji skad du/ sems can dmyal ba dang / dud 'gro dang / yi dags dang / lha dang / lha ma yin dang / mi zhes gsungs pa lta bu'o/ /'gro ba drug po 'di yang so so'i gzhung gis bshad pa mi mthun pas thams cad yod par smra ba dag ni 'gro ba lnga kho na'o zhes rnam par 'jog ste/ de'i phyir bstan bcos bye brag tu bshad pa chen po las/ mdo sde las ji skad du 'gro ba lnga zhes gsungs pa ni 'di lta ste/ sems can dmyal ba dang / dud 'gro dang / yi dags dang / lha dang mi'o zhes bstan pa bzhin no/ /gzhan yang de nyid las sde pa gzhan kha cig lha ma yin ni 'gro ba drug pa'o zhes rnam par 'jog ste/ de dag de skad du smra bar mi bya ste/ mdo sde las ni 'gro ba ni lnga kho na'o zhes gsungs pa'i phyir ro zhes 'byung ste/ rgya cher de nyid las bstan pa bzhin no/ /gal te de lta na lha ma yin 'gro ba gang gis bsdus she na smras pa/ bstan bcos bye brag tu bshad pa chen po las rnam pa gnyis 'byung ste/ kha cig ni lha'i 'gro bas bsdus so zhes bshad de/ dpyad pa dag gi yang dag pa'i don las ni yi dags kyi 'gro bas bsdus so zhes bshad do/ /bstan bcos yang dag pa'i rigs pa dang mdzod kyi bstan bcos las kyang phal cher bye brag tu bshad pa chen po las bstan pa dang mthun par 'byung ngo / /mdo sde pa dag kyang 'gro ba lnga kho na'o zhes zer te/ de'i phyir bstan bcos de kho na nyid grub pa las las ni rnam pa drug go 'di lta ste/ 'gro ba lnga po dag gi las dang ma nges pa'i las so zhes 'byung ba yin no/ /'dir theg pa chen po'i bstan pa dang sbyar na/ la lar ni lnga kho na'o zhes gsungs te 'phags pa sangs rgyas kyi sa'i mdo dang dri ma med par grags pas bstan pa'i mdo la sogs pa las bstan pa lta bu'o/ /gal te de lta na lha ma yin 'gro ba gang gis bsdus she na smras pa/ 'phags pa sangs rgyas kyi sa'i 'grel pa las lha ma yin rnams kyi ris kyi rnam pa ni nges pa med de/ res 'ga' ni lha dang / res 'ga' ni yi dags dang / res 'ga' ni dud 'gro'i 'gro bas bsdus par gsungs pa'i phyir/ 'dir nges par ma bstan to zhes 'byung ngo / /la lar ni drug go zhes gsungs te/ mdo sde 'di nyid dang sangs rgyas phal po che la sogs pa las/ ji skad bstan pa lta bu'o/ /bstan bcos rnal 'byor spyod pa'i sa dang sbyar na sngar gzhag pa ni yang dag pa'i don yin te/ de'i phyir de las lha ma yin rnams kyang lha'i 'gro bas bsdus pa kho nar blta bar bya'o/ /'on kyang de dag ni sgyu can 'drid pa'i bsam pa dang ldan pa sgyu g.yo'i shas che ba yin te/ de bas na 'di lta ste/ lha rnams bzhin du dkar po'i chos rnams kyi snod du ma gyur pa yin te/ de'i phyir ched 'ga' mdo gzhan dag las 'gro ba tha dad pa'i bstan pas bstan to zhes 'byung bas yang dag par na lha'i 'gro ba yin no/ /gzhan yang de nyid las/ de ltar 'jig rten gnas pa chags na/ 'gro ba lnga po sems can dmyal ba rnams dang / dud 'gro rnams dang / yi dags rnams dang / lha rnams dang / mi rnams 'byung bar 'gyur ro zhes 'byung ngo / /'phags pa shes rab kyi pha rol tu phyin pa'i 'grel pa dang sbyar na ni drug tu gzhag pa yang dag pa'i don yin par ston te/ de'i phyir de nyid las/ theg pa chen po'i mdo sde dam pa'i chos puN+Da rI ka las 'gro ba drug gi sems can yod par gsungs pas don gyis dgongs pa rnams brtags na 'gro ba drug yod do/ /gzhan yang dge ba dang mi dge ba rnam par dbye bas kyang 'gro ba drug yod de/ dge ba la yang rab dang / 'bring dang tha ma yod pa'i phyir/ bde 'gro gsum po lha dang mi dang lha ma yin yod/ mi dge ba yang rab dang 'bring dang tha ma yod par sems can dmyal ba dang / yi dags dang / dud 'gro'i 'gro ba yod do zhes 'byung ste/ rgya cher de nyid las bstan pa bzhin no/ /gzhan yang de nyid las bcom ldan 'das kyis 'gro ba lnga kho na'o zhes gsal bar gsungs pa med de/ 'gro ba lnga yod par bshad pa ni thams cad yod par smra ba dag 'gro ba lnga yod do zhes bstan pa bzhin no/ /gzhan yang 'gro ba ni drug yod pa yin par rigs te/ de ci'i phyir zhe na/ ngan song gsum ni gcig tu sdig pa byas pa'i gnas yin pas gang gis dge ba ni cher byas la/ sdig pa chung ngu byas pa gang yin pa de ni lha ma yin zhes bya bas skye gnas tha dad pa'i rigs te/ de'i phyir 'gro ba drug ces brjod par bya'o zhes 'byung ngo / /gshin rje 'gro ba gang gis bsdus she na/ smras pa bstan bcos bye brag tu bshad pa chen po las/ yi dags kyi 'gro bas bsdus so zhes bshad de/ de'i phyir de nyid las bstan bcos gdags pa byas pa las/ ji ltar da ltar gyi yi dags kyi 'jig rten 'di'i rgyal po'i ming gshin rje zhes bya ba bzhin no zhes bshad do zhes bya ba dang / gzhan yang de nyid las/ 'dzam bu'i gling 'di'i 'og dpag tshad lnga brgya 'das pa na gshin rje'i khams yod de de ni yi dags thams cad kyi gnas kyi rtsa ba yin te/ de las gyes nas gzhan na gnas pa yang yod do zhes 'byung ngo / /bstan bcos rnal 'byor spyod pa'i sa las ni sems can dmyal ba'i 'gro bas bsdus par bshad de/ de'i phyir de las sems can gang yang rung ba zhig bdag por 'gyur ba'i las kun nas nyon mongs pa can gyis sems can dmyal ba rnams na gshin rje'i rgyal por skye bar 'gyur ro zhes 'byung ngo / /de la sgo nga dang / mngal dang drod gsher dang / rdzus te skye ba zhes bya ba ni skye ba rnam pa bzhi ste/ bstan bcos rnal 'byor spyod pa'i sa las/ sgo nga las skye ba'i skye gnas gang zhe na/ 'di lta ste/ sems can gang dag sgo nga'i sbubs mngon par brtol nas 'byung ba rnams yin te/ de dag kyang gang zhe na/ 'di lta ste/ ngang pa dang / khrung khrung dang / rma bya dang / ne tso dang / ri skegs la sogs pa'o/ /mngal las skye ba'i skye gnas gang zhe na/ sems can gang dag sha mos kun nas g.yogs shing sha mo brtol nas 'byung ba rnams te/ de dag kyang gang zhe na 'di lta ste/ glang po che dang / rta dang / ba lang dang / bong bu la sogs pa'o/ /drod gsher las skye ba'i skye gnas gang zhe na/ sems can gang dag drod gsher gang yang rung ba la brten nas skye ba rnams te/ de dag kyang gang zhe na/ 'di lta ste/ srin bu dang / grog spur dang / phye ma leb dang / shing srin la sogs pa'o/ /rdzus te skye ba'i skye gnas gang zhe na/ sems can gang dag las kyi dbang gis skye mched drug tshang bar skye ba'am/ skye mched drug las gang yang rung ba ma tshang ba rnams te/ de dag kyang gang zhe na 'di lta ste/ sems can dmyal ba pa rnams dang / lha rnams dang / dud 'gro dang / yi dags dang / mi rnams las kha cig go zhes 'byung ste/ rgya cher rnam par 'byed pa ni bstan bcos gzhung bstan pa dang / mdzod kyi bstan bcos dang / yang dag pa'i rigs pa dang / bye brag tu bshad pa chen po las 'byung ba bzhin du rig par bya'o/ /sngar 'gro ba drug bshad zin na/ ci'i phyir yang skye ba rnam pa bzhi bstan zhe na/ smras pa/ mdzod kyi bstan bcos las/ bstan bcos gdags pa byas pa las 'di skad du/ skye ba rnam pa bzhis ni 'di skad du 'gro ba lnga bsdus kyi / 'gro ba lngas ni skye ba rnam pa bzhi bsdus pa ma yin no/ /gang dag ma bsdus she na/ 'di lta ste/ srid pa bar ma dag go zhes bstan to zhes 'byung bas rigs pa des na lha la sogs pa'i 'gro ba drug gi skye ba ril ma bsdus pas de'i phyir sgo nga la sogs pa'i skye ba bzhi po dag yang dag par bstan pa yin no/ /gal te de lta na ci'i phyir yang 'gro ba drug bstan zhe na/ smras pa/ dge ba dang sdig pa skyes pa len pa'i bye brag rab tu bstan pa'i phyir 'gro ba drug tu bstan pa'o / /gal te de lta na ni ci'i phyir khams ma bstan zhe na smras pa/ khams ni sems can ma yin par yang gtogs pas de'i phyir 'dir ma bstan to/ / slob dpon yang dag bden pa'i brjed byang las kyang don 'di dang mthun par bshad de/ 'gro ba drug dang / skye ba rnam pa bzhi'i don ni mtshan nyid bstan pa gzhan dag las bshad pa bzhin du rig par bya'o/ /mdo'i tshig 'di rnam par bshad pa yang rnam pa gnyis yod de/ kha cig na re/ 'gro ba drug gi 'khor ba 'di nas sems can gang dang gang dag ces bya bas ni lus spangs pa rnams bstan to/ /sems can gyi ris de dang de dag tu gtogs pa zhes bya bas ni lus len pa rnam par 'byed pa yin no/ /lus len pa de yang ris rnam pa gnyis te/ 'gro ba drug gi lus dang / skye ba rnam pa bzhi'i lus so zhes zer te/ bshad pa 'di dang sbyar na lus kyi yan lag skye zhing 'byung bar ni bshad ma thag pa'i ris rnam pa gnyis kyang gtogs par bstan to/ /kha cig na re lus len pa gang yin pa de dag thams cad ni skye ba rnam pa bzhi yin no/ /sems can gyi ris de dang de dag tu gtogs pa zhes bya ba ni mdor bstan pa'o/ /sgo nga las skyes pa'i skye gnas zhes bya ba la sogs pas ni skye ba rnam pa bzhi rnam par phye nas bstan pa ste/ de'i phyir slob dpon rdo rje drang srong gi 'grel pa las/ sgo nga'i skye ba'i skye gnas la sogs pa ni skye ba len pa'i bye brag go/ /gzugs can zhes bya ba la sogs pa ni rags pa dang phra ba'i bye brag go zhes 'byung ngo zhes zer te/ bshad pa 'di dang sbyar na lus kyi yan lag skye zhing 'byung ba zhes gsungs pa ni/ skye ba rnam pa bzhi las brtsams nas bstan pa yin no// //bam po nyi shu pa/ der dang po kho na sa bon thams cad pa'i sems dang / rnam par shes pa rnam par smin cing phan tshun 'dus pa rgyas shing 'phel ba dang / yangs par gyur nas zhes bya ba 'di man chad ni/ gnyis pa sa bon rnam par shes pa las brtsams nas skye ba len pa'i bye brag rgya cher rnam par 'byed do / /'di yang rnam pa gnyis te/ skye ba len pa'i gnas skabs kyi bye brag bstan pa dang / sa bon rnam par shes pa len pa gnyis la brten par bstan pa'o/ /'di ni dang po ste/ 'di yang rnam pa gsum du bstan to/ /'di lta ste/ sa bon pa'i rnam par shes pa'i yongs su smin pa bstan pa dang / phan tshun 'dus pa bstan pa dang / rgyas shing 'phel ba dang / yangs par gyur pa bstan pa'o/ /der dang po kho nar sa bon thams cad pa'i sems dang / rnam par shes pa rnam par smin zhes bya bas ni sa bon pa'i rnam par shes pa'i yongs su smin pa bstan te/ 'gro ba de dag tu skye ba len pa'i gnas skabs su dang po kho nar skyes pa'i nying mtshams sbyor ba na/ sa bon thams cad pa'i rnam par shes pa'i sems yongs su smin par 'gyur ba'o/ /dang po nying mtshams sbyor ba na sa bon pa'i rnam par shes pa yongs su smin pa las mer mer po mngon par 'grub pa ni nying mtshams sbyor ba zhes bya ste/ de'i phyir bstan bcos rnal 'byor spyod pa'i sa las/ de la pha ma gnyis chags par gyur te/ 'dod chags drag po'i skabs su bab pa na mjug kho nar khu ba'i skabs 'byung bar 'gyur ro/ /de'i rjes la gnyi ga las khu ba dang khrag gi thigs pa gnyis gdon mi za bar 'byung bar 'gyur te/ de gnyi ga'i khu ba dang / khrag gi thigs pa de gnyis ma'i skye gnas su 'dres par 'gyur nas/ dper na 'o ma bskol ba grangs pa'i spris ma bzhin du spris ma lta bur chags nas 'dus shing 'dug par 'gyur te/ der sa bon thams cad rnam par smin par bsdus pa lus lan par byed pa kun gzhi rnam par shes pa 'jug par 'gyur ro/ /ji ltar 'jug ce na/ khu ba dang / khrag 'dus nas spris ma lta bur gyur pa de dang lhan cig tu ste/ phyin ci log tu dmigs pa bar ma do'i srid pa de 'gags par 'gyur la/ de 'gags pa de dang dus gcig tu rnam par shes pa sa bon thams cad pa de'i mthus de las gzhan pa dbang po'i 'byung ba chen po cha phra ba dang / 'dres pa de dang mthun pa'i khu ba dang khrag 'dus pa dbang po dang bcas pa gzhan 'byung bar 'gyur te/ de'i dus skabs su rnam par shes pa gnas gyur pa ni nying mtshams sbyor ba zhes bya ste/ de ni mer mer po'i dus yin no/ /mer mer po de'i dbang po'i 'byung ba chen po de dag kyang lus kyi dbang po dang lhan cig 'byung ngo / /dbang po'i rten gyi 'byung ba chen po rnams dang / dbang po 'byung ba chen po de dag nyid dang / lus kyi dbang po yang lhan cig tu 'byung bar 'gyur ro/ /de nas dbang po'i 'byung ba chen po de dag rgyur byas nas mig gi dbang po la sogs pa rim gyis 'grub par 'gyur ro/ / dbang po'i rten gyi 'byung ba chen po de dag rgyur byas nas rim gyis dbang po'i rten rnams kyang 'grub par 'gyur ro/ /dbang po rnams dang de dag gi rten rnams 'byung ba las lus thams cad 'grub cing thob par 'gyur ro zhes bya ba dang / gzhan yang de nyid las/ mer mer po'i phyogs gang du rnam par shes pa zhugs par gyur pa de ni de'i tshe de'i snying gi phyogs yin no/ /de ltar rnam par shes pa de ni phyogs gang nas 'chi 'pho ba'i phyogs de nyid du thog ma kho nar 'jug go zhes bstan pa bzhin no/ /mdzod kyi bstan bcos las kha cig na re/ khu ba dang khrag nyid dbang po'i rten du mngon par 'grub par 'gyur te 'di ltar sngar dbang po med de bar ma do'i srid pa dang lhan cig 'gags nas yang srid pa phyi ma'i dbang po bar chad med par nying mtshams sbyor bas so zhe'o/ /slob dpon gzhan kha cig ni 'byung ba chen po gzhan 'byung bar 'gyur te/ ji ltar las dang / lus la brten nas srog chags gzhan skye ba bzhin no zhes zer ro zhes 'byung ngo / /bstan bcos rnal 'byor spyod pa'i sa las ni/ slob dpon snga ma'i 'dod pa ltar ston to/ /bstan bcos yang dag pa'i rigs pa dang rjes su mthun pa'i las ni bshad pa phyi ma yang dag pa'i don yin par ston te/ rgya cher de nyid las bstan pa bzhin no/ /de la phan tshun 'dus pa zhes bya ba ni 'di la bshad pa gnyis yod de/ kha cig na re dang po skye ba len pa'i tshe/ rnam par shes pa nyid dbang po'i 'byung ba chen po la sogs pa'i phan tshun 'dus par gyur pa yin te/ de'i phyir rnal 'byor spyod pa'i sa las/ rnam par shes pa sa bon thams cad de'i mthus/ de las gzhan pa dbang po'i 'byung ba cha phra ba dang / de dang mthun pa'i khu ba dang khrag 'dus pa dbang po dang bcas pa gzhan 'byung bar 'gyur te zhes bya ba la sogs pa bstan pa yin no zhe'o/ /kha cig na re rnam par shes pa dang / mer mer po phan tshun 'dus pa yin te/ de'i phyir bstan bcos theg pa chen po bsdus pa las/ ma'i mngal du rnam par shes pa dang / mer mer po phan tshun 'dus par gyur nas zhes bya ba yin no zhe'o/ /slob dpon ngo bo nyid med kyis 'grel pa las/ rnam par smin pa'i rnam par shes pa dmar po dang / dkar po de dag dang / grub pa dang bde ba gcig tu gyur ces bshad de/ slob dpon dbyig gnyen gyis mdzad pa'i 'grel pa las kyang don 'di dang mthun par 'byung ngo / /de la rgyas shing 'phel ba dang yangs par gyur nas zhes bya ba ni 'di la yang bshad pa rnam pa gnyis yod de/ kha cig ni snga ma'i phan tshun 'dus pa'i mthus mer mer po la sogs pa rim gyis 'phel bar gyur pa na/ dbang po'i 'byung ba la sogs pa sa bon rgyas shing 'phel ba dang yangs par gyur pa'o zhe'o/ /kha cig ni 'dus pa'i dbang gis ming dang / gzugs rim gyis rgyas shing 'phel ba dang / yangs par gyur pa ste/ de'i phyir bstan bcos rnal 'byor spyod pa'i sa las/ mer mer po de yang yar skye ba'i tshe ni ming dang gzugs gnyis kyang de gnyi ga ches rgya cher 'gyur bas mtshungs snyam du skye bar 'gyur te/ skye ba de yang lus yongs su rdzogs par 'gyur gyi bar du skye bar bya'o/ /de la sa'i khams rgyur byas pa'i gzugs skye zhing ches rgya che bar 'gyur ro/ /chu'i khams ni de nyid sdud par byed do/ /me'i khams ni de nyid smin par byed de/ 'dzag par mi 'gyur ba'i tshul bstan par byed do/ /rlung gi khams ni yan lag rnam par 'byed cing gnas par byed do zhes 'byung ngo zhe'o/ /de dag gi gnas skabs rnam par gzhag pa de yang gnas skabs rnam pa gnyis su 'gyur te/ mngal na gnas pa'i dus brgyad dang / spyi'i mtshan nyid kyi dus brgyad do/ /de la mngal na gnas pa'i dus brgyad ni 'di lta ste mer mer po la sogs pa'o/ /de'i phyir bstan bcos mngon pa sna tshogs kun las btus pa las/ de'i 'og tu dbang po rnams rim gyis skye bar 'gyur te/ rten cing 'brel par 'byung ba las ji skad du/ thog ma nyid du mer mer 'gyur/ /de yi 'og tu nur nur 'gyur/ /nur nur po las nar nar 'gyur/ /nar nar po las gor gor 'gyur/ /gor gor po las rkang lag 'gyu / /skra spu sen mo la sogs 'byung / /dbang po gzugs can rnams dang ni/ /mtshan rnams mthar gyis 'byung bar 'gyur/ /zhes gsungs pa lta bu'o zhes 'byung ngo / /gzhan yang bstan bcos rnal 'byor spyod pa'i sa las mngal na gnas pa de la yang dus rnam pa brgyad yod de/ dus rnam pa brgyad gang zhe na/ mer mer po'i dus dang / nur nur po'i dus dang / ltar ltar po'i dus dang / mkhrang gyur pa'i dus dang / rkang lag 'gyu ba'i dus dang / skra dang / ba spu dang / sen mo 'byung ba'i dus dang / dbang po dod pa'i dus dang / mtshan dod pa'i dus so/ /de la spris ma lta bus g.yogs la/ nang rlan te mer mer 'dug pa ni mer mer po zhes bya'o/ / phyi nang bcas par spris ma lta bur gyur te/ zho lta bur 'dug la shar ma gyur pa ni nur nur po zhes bya'o/ /shar ni gyur la sla ba ni ltar ltar po zhes bya'o/ /ska bar gyur te mnam du bzod pa ni mkhrang gyur zhes bya'o/ /de nyid las sha lhag lta bur gyur te/ yan lag dang nying lag gi mtshan ma byung ba ni rkang lag 'gyus pa zhes bya'o/ /de skra dang ba spu dang / sen mo byung ba ni de nyid kyi dus yin no/ /de nas mig la sogs pa'i dbang po rnams mngon par 'grub pa ni dbang po dod pa'i dus zhes bya'o/ /de nas de'i gnas gsal bar gyur pa ni mtshan dod pa'i dus zhes bya'o zhes 'byung ngo / /mer mer po la sogs pa dus de dag ji srid kyis yongs su rdzogs par 'gyur zhe na/ smras pa/ bstan bcos rnal 'byor spyod pa'i sa las mngal na gnas pa de yang / zhag bdun phrag sum cu rtsa brgyad kyis mngal du yan lag dang / nying lag thams cad dang ldan par 'gyur ro/ /de nas zhag bzhi lon na btsa' bar 'gyur te/ bcom ldan 'das kyis mngal du 'jug pa'i mdo las/ de ni zla ba dgu 'am/ de las 'das na shin tu rdzogs par 'gyur ro/ /zla ba brgyad kyis ni rdzogs pa yin mod kyi shin tu rdzogs pa ni ma yin no/ /zla ba drug gam bdun gyis ni rdzogs par mi 'gyur te/ yan lag ma tshang bar yang 'gyur ro zhes ji skad gsungs pa lta bu'o zhes 'byung ste/ rgya cher rnam par 'byed pa ni bstan bcos rnam par dgrol ba'i lam bstan pa dang / mngal du 'jug pa'i mdo las bstan pa bzhin du rig par bya'o/ /de la spyi'i mtshan nyid kyi dus brgyad ni rnal 'byor spyod pa'i sa'i bstan bcos las/ ji skad du/ dus brgyad gang zhe na/ 'di lta ste/ mngal na gnas pa'i dus dang / btsas pa'i dus dang / byis pa'i dus dang / gzhon nu'i dus dang / lang tsho'i dus dang / dar la bab pa'i dus dang / rgas pa'i dus dang / 'khogs pa'i dus so/ /de la mngal na gnas pa'i dus ni 'di lta ste/ mer mer po la sogs pa'o/ /btsas pa'i dus ni 'di lta ste/ de yan chad ni 'gogs pa'i dus man chad do/ /byis pa'i dus ni 'di lta ste/ 'gro ba dang / rtse mi nus pa man chad do/ /gzhon nu'i dus ni 'di lta ste/ de nus pa yin no/ /lang tsho'i dus ni 'di lta ste/ 'dod pa spyod pa nus nas lo sum cu man chad do/ /dar la bab pa'i dus ni 'di lta ste/ lo lnga bcu man chad do/ /rgas pa'i dus ni 'di lta ste/ lo bdun cu man chad do/ /de yan chad ni 'khogs pa'i dus so zhes 'byung ngo / /len pa rnam pa gnyis so zhes bya ba la sogs pas ni gnyis pa sa bon pa'i rnam par shes pa len pa rnam pa gnyis la brten par ston to/ /'di yang rnam pa gsum du dbye ste/ grangs smos pa dang / grangs bzhin du ming bkod pa dang / khams la brten nas rnam par dbye ba'o/ /'di ni dang po ste/ de yan chad du dbang po la sogs pa rnam par shes pa la brten nas skye zhing 'phel bar bstan nas/ 'di man chad rnam par shes pa dbang po gzugs can la sogs pa la brten pa ston par mdzad do/ /dbang po gzugs can rten dang bcas pa len pa dang / mtshan ma dang / ming dang rnam par rtog pa la tha snyad du 'dogs pa'i spros pa'i bag chags len pa la brten to zhes bya ba ni gnyis pa grangs bzhin du ming bkod pa'o/ /'di lta ste/ skye ba len pa'i gnas skabs su rnam par smin pa'i rnam par shes pas len pa rnam pa gnyis la/ yul du dmigs par byed de/ dang po ni dbang po lnga dang / de dag gi gnas su gzugs dang sgra dang dri dang ro dang reg bya la yang dag par brten pa len pa dang / gnyis pa ni mtshan ma dang / ming dang rnam par rtog pa'i chos gsum gyi bag chags la yul du dmigs pa len par byed do/ /zag pa med pa'i sa bon ni ma gtogs te/ dmigs par bya ba ma yin pa'i phyir ro/ /len pa 'di dag kyang dmigs par bya ba yin te/ de'i phyir bstan bcos rnal 'byor spyod pa'i sa las mdor bsdu na kun gzhi rnam par shes pa ni dmigs pa rnam pa gnyis kyis 'jug ste/ nang gi len pa rnam par rig pa'i phyir dang / phyi rol gyi snod kyi rnam pa yongs su ma chad pa rnam par rig pa'i mtshan nyid kyi phyir ro/ /de la nang gi len pa rnam par rig pa ni 'di lta ste/ kun brtags pa'i ngo bo nyid la mngon par zhen pa'i bag chags dang / rten dang dbang po'i gzugs so/ /de yang gzugs can gyi khams na'o/ /gzugs can ma yin pa ni bag chags len pa kho nar zad do/ /de la phyi rol gyi snod kyi rnam pa yongs su ma chad pa rnam par rig pa'i mtshan nyid ni 'di lta ste/ brten pa'i dmigs pa rnam par rig pa'i phyir dang kun gzhi rnam par shes pa nang gi len pa rnam par rig pa'i phyir/ dus thams cad du rgyun mi 'chad pa snod kyi 'jig rten gyi mtshan nyid rnam par rig pa ste/ dper na mar me 'bar ba na/ snying po dang snum gyi rgyus ni nang 'jug par 'gyur la/ phyi rol du ni 'od 'byung bar byed pa bzhin du kun gzhi rnam par shes pa nang gi len pa dmigs pa dang / phyi rol gyi snod kyi mtshan nyid la dmigs nas 'byung ba'i tshul yang de dang 'dra bar blta bar bya'o zhes 'byung ngo / /gzhan yang bstan bcos rnam par rig pa tsam du grub pa las/ kun gzhi rnam par shes pa'i dmigs pa ni rnam pa gsum ste/ snod kyi 'jig rten dang zag pa dang bcas pa sa bon dang dbang po dang bcas pa'i lus so/ /kun gzhi rnam par shes pa'i rgyu dang rkyen gyi mthu'i phyir rang gi bdag nyid skye ba na nang gi gyur pa ni sa bon dang dbang po dang bcas pa'i lus lta bur snang la/ phyi rol gyi gyur pa ni snod lta bur rung ste/ gyur par snang ba de nyid rang gi dmigs pa'i rnam par byed de/ phan tshun ltos nas skye ba'i phyir ro zhes 'byung ste/ rgya cher de nyid las bstan pa bzhin no/ /'dir len pa zhes gsungs pa'i don ni yongs su 'dzin pa la bya ste/ dbang po lnga dang de dag gi rten yongs su bzungs nas mi 'jig cing rang gi rten du byed pas yongs su 'dzin pa'i sa bon ni bdag nyid la yod pa dang rten zhes bya'o/ /len pa zhes bya ba yang 'di yang bstan pa rnams las so so nas bshad pa mi mthun te mdzod kyi bstan bcos las ni/ khams bco brgyad las dgu ni ma zin pa'o/ /gzhan ni rnam pa gnyis so zhes 'byung ste/ de ni don gcig la brten nas zin pa'i don bshad pa'i phyir/ de'i phyir de nyid las zin pa dang bcas pa zhes bya ba'i don ci zhe na/ sems dang sems las byung ba'i chos kyis yongs su bzung nas gnas su gyur pa ni zin pa zhes bya ste/ phan pa dang gnod pa phan tshun rjes su 'brel pa'i phyir ro zhes bya ba nas rgya cher bshad pa'i bar du bstan pa yin no/ /bstan bcos yang dag pa'i rigs pa las slob dpon gsum gyis bshad pa 'byung ste/ dang po ni mdzod kyi bstan bcos las bshad pa dang mthun pas bstan bcos yang dag pa'i rigs pa'i 'grel pa las/ gal te de lta na gzugs la sogs pa ni gcig tu ma zin pa zhes bya ste/ sems dang sems las byung ba'i chos rnams de dag la dmigs pa'i phyir dang / dbang po'i ngo bo nyid ma yin pa'i phyir ro/ /de lta ma yin na gzugs la sogs pa ni dbang po dang bral bar mi 'gyur la/ bral na ni ma yin par 'gyur te/ sems la sogs pas brten par bya ba yin pa'i phyir 'gal ba med do zhe'o/ /gnyis pa ni bye brag tu smra ba dag na re/ gal te gzugs kyi chos rnams la gnod cing zhig par gyur na ni sdug bsngal skyed par byed la de las bzlog pa las ni bde ba skyed par byed de/ rang gi lus kyis bsdus pa gang yin pa de ni zin pa zhes bya'o/ /gsum pa ni slob dpon gzhan kha cig na re/ sems can rnams rang gi bdag nyid yod par 'dzin cing / dus thams cad du thabs kyis yongs su bsrung ba gang yin pa de ni zhes bya ba nas rgya cher bshad pa'i bar du bstan pa yin no/ /gal te de lta na mdo las gsungs pa dang 'gal bar 'gyur te/ mdo las ni gnas 'dir rnam par shes pas sbas pa dang / rnam par shes pas rjes su bsdus pa gang yin pa de ni len pa zhes bya'o zhes gsungs so zhe na/ de ltar gsungs pa yod kyang 'gal ba med de/ len pa dang bcas pa'i chos ni mdor bsdu na ni rnam pa gnyis yod pas so/ /de la dang po ni len pa dang bcas shing 'jig tshogs la lta ba dang bcas pa'i bdag nyid yod pa nyid du 'dzin pa la yang len pa dang bcas pa zhes bya ste/ gal te yongs su dag pa'i shes pa skyes na ni de yongs su spong bar 'gyur ro/ /gnyis pa ni sdug bsngal dang bde ba skyed pa'i rgyur gyur nas mya ngan las 'das kyi bar du rjes su 'jug cing mi spong ba ste/ 'di ni mdo dang bstan bcos dag las so so nas don re re la brten te bstan pa'o/ /de la mdo las ni len pa dang / 'jig tshogs la lta ba dang bcas pas bdag nyid yod pa nyid du 'dzin pa la dgongs nas len pa dang bcas pa zhes gsungs so/ /bstan bcos las ni rnam pa gsum du bshad de/ slob dpon dang po ni gnas su 'dzin pa la dgongs nas so/ /slob dpon bar ma ni sdug bsngal dang bde ba bskyed pa la dgongs nas so/ /slob dpon tha ma ni bdag nyid du 'dzin pa la dgongs nas bstan pa yin te/ thams cad kyang bstan bcos dang rjes su mthun no/ /de yang rang gi lus kyi bsdus pa gang yin pa ni len pa zhes bya ste/ 'di ni sdug bsngal dang / bde ba bskyed pa'i rgyur gyur pa zhes bya ba'i don nyid de/ slob dpon gnyis pa de ni sdug bsngal ba dang / bde ba bskyed pa kho na la der 'dod do/ /slob dpon dang po dang tha ma gnyis ni don gzhan yang blangs nas bstan pa yin no/ /mdo sde dang bstan bcos de dag gi bshad pa yang mdor bsdu na bshad pa rnam pa bzhir 'gyur te/ zhib tu de nyid las bstan pa bzhin no/ /'dir theg pa chen po'i bstan pa dang sbyar na/ bshad pa mi mthun pa rnam pa gsum yod do/ /kha cig ni sdug bsngal dang bde ba bskyed pa kho na las brtsams nas len pa zhes ston te / de'i phyir bstan bcos mngon pa kun las btus pa las khams gzugs can lnga dang / bzhi'i phyogs gcig ni zin pa zhes bya'o zhes 'byung ste/ sgra ma bstan pas sdug bsngal dang bde ba bskyed pa las brtsams nas len pa zhes bstan par rig par bya'o zhes zer ro/ /kha cig ni rang gi ngo bor gzung ba la len pa zhes bya'o zhes ston te/ de'i phyir bstan bcos rnal 'byor spyod pa'i sa las/ gal te kun gzhi med na gnas len pa mi dmigs par 'gyur ba'i phyir ro zhes bya ba dang / gzhan yang de nyid las lnga ni len pa'o/ /lnga ni len pa dang len pa ma yin pa'o/ /gzhan ni gcig tu len pa ma yin pa'o zhes bshad pas so zhes zer te 'di la sogs pa'i bstan pa la brten nas rang gi ngo bor gzung ba la len pa zhes ston te/ kha cig ni don gnyi ga la brten nas len pa ston te/ bstan bcos rnal 'byor spyod pa'i sa las ji skad du de la rnam par shes pa gnas pa dang / mi gnas pas zin pa'i gzugs gang yin pa de ni rnam par shes pa gnas pa de yang gang zhe na/ 'di lta ste/ de yang rnam par shes pa dang 'dres pa grub pa dang / bde ba gcig pa'i don gyis 'jug pa gang yin pa dang / gzhan yang 'dis rten byas nas tshor ba skye ba gang yin pa'o/ / de las bzlog pa ni zin pa ma yin par rig par bya'o zhes bya ba dang gzhan yang de nyid las zin pa'i chos ni 'di lta ste/ gzugs can gyi chos rnams dang / sems dang sems las byung ba rnams kyis yongs su bzung bas de dag la brten nas/ sems dang sems las byung ba 'jug cing 'grub pa dang / bde ba'i dngos po gcig tu gyur pa'o/ /de la grub pa dang bde ba gcig pa ni sems dang sems las byung bas yongs su gzung ba'i dbang gis gzugs de dag rgyun mi 'chad cing 'jig pa dang / 'dul bar mi 'gyur ba ste/ des na zin pa'i gzugs rnams la/ res 'ga' ni gnod par 'gyur la/ res 'ga' ni phan 'dogs par 'gyur ro/ /sems dang sems las byung ba de dag kyang de dag gi rjes su phan gnod du 'gyur ro/ /de las bzlog pa ni zin pa ma yin pa zhes bya'o zhes bstan pa lta bu'o zhe'o/ /mdo 'di las len pa zhes gsungs pa ni don rnam pa gnyis dang ldan te kun gzhi rnam par shes pa dbang po'i gnas la bdag nyid kyi gnas su 'dzin pa dang / sa bon yongs su 'dzin pa'i bdag nyid de/ zhib tu ni bstan bcos rnams las bshad pa bzhin no/ /de la gzugs can gyi khams na ni len pa gnyi ga dang ldan la/ gzugs med pa'i khams na ni rnam pa gnyi ga dang mi ldan no zhes bya ba ni gsum pa khams la brten nas rnam par 'byed pa'o/ /mdo'i tshig 'di dang sbyar na theg pa chen po'i gzhung gi gzugs med pa'i khams na mig dang rna ba la sogs pa gzugs can gyi khams bcu med par bzhed kyi dge 'dun phal chen pa'i sde pa dag ltar na gzugs can bcu dang / rnam par shes pa'i tshogs lnga tshang bar yod par 'dod pa lta bu ni ma yin te/ sngon gyi las bstan pa'i mdo las/ gzugs med pa'i khams kyi lha rnams 'khor 'dus par 'ongs so zhes gsungs pa dang / dam pa'i chos pad+ma dkar po'i mdo las/ srid pa'i rtse mo'i dri snom mo zhes gsungs pa'i phyir te/ 'di skad gsungs pa 'di dag ni thams cad kyang chos kyi skye mched kyis bsdus pa yin no/ /blo gros yangs pa rnam par shes pa de ni len pa'i rnam par shes pa zhes kyang bya ste/ de ci'i phyir zhe na/ rnam par shes pa 'di lus kyi rjes su 'brang zhing yongs su 'dzin pa'i phyir ro zhes bya ba ni gnyis pa len pa'i rnam par shes pa rnam par bshad pa'o/ /'di ltar rnam par shes pa 'di'i dbang gis lus kyi rjes su 'brang zhing / dbang po gzugs can blangs nas 'jig par mi byed pa'i phyir rnam par shes pa 'di la len pa gsungs so/ /bstan bcos theg pa chen po bsdus pa las ni don rnam pa gnyis kyis len pa rnam par bshad de/ dbang po gzugs can dag ma zhig par nye bar bzung ba'i phyir dang / rang gi bdag nyid nye bar bzung nas skye ba len pa'i phyir ro zhes rgya cher de nyid las bstan pa bzhin no/ /bstan bcos rnam par rig pa tsam du grub pa las ni don rnam pa gsum gyis bstan te/ de'i phyir de nyid las chos rnams kyi sa bon yongs su 'dzin pa dang / dbang po gzugs can gyi gnas yongs su 'dzin pa dang / nying mtshams sbyor bar yongs su 'dzin pa'i phyir/ rnam par shes pa 'di len pa zhes bya'o zhes 'byung ste/ 'di ni bstan bcos rnam pa gnyis las bstan pa'i len pa nyid do/ /kun gzhi rnam par shes pa zhes kyang bya ste/ de ci'i phyir zhe na/ rnam par shes pa ni lus sdud cing len pa dang / sbed par byed pa grub pa dang / bde ba'i don gcig pa'i phyir ro zhes bya ba ni gsum pa kun gzhi rnam par shes pa rnam par bshad pa'o/ /kun gzhi zhes bya ba la don rnam pa gsum yod de/ sbed par byed pa dang / sba bar bya ba dang / sbas pa 'dzin pa'o/ /de'i phyir bstan bcos rnam par rig pa tsam du grub pa las/ rnam par shes pa 'di sbed pa dang / sba bar bya ba dang / sbas pa 'dzin pa'i don dang ldan pa'i phyir dang / kun nas nyon mongs pa dag dang / phan tshun rkyen byed pa'i phyir dang / sems can rnams nang gi bdag tu 'dzin pa'i phyir ro zhes 'byung ngo / /bstan bcos theg pa chen po bsdus pa las kyang don rnam pa gsum gyis ston te/ de'i phyir de nyid las ci'i phyir rnam par shes pa 'di kun gzhi rnam par shes pa zhes bya zhe na/ skye ba'i nyon mongs pa'i phyogs kyi chos thams cad 'dir 'bras bu'i dngos por sbed pa'i phyir dang / gzhan yang rnam par shes pa 'di dag la rgyu'i dngos po'i sbyor ba'i phyir dang / yang na sems can rnams rnam par shes pa 'di la rang gi bdag nyid du sbyor ba'i phyir kun gzhi rnam par shes pa zhes bya'o zhes 'byung ste/ sbed pa'i don rnam pa gsum tha dad par 'gyur ba yang dang po sbed par byed pa ni 'bras bu rgyu la sbas pas rnam par shes pa la yod pa'i sa bon gyis snang ba'i rnam par shes pa bdun bskyed pa ste/ kun nas nyon mongs pa'i 'bras bu bskyed pa'i rgyu las gud na med pa'i phyir ro/ /gnyis pa sba bar bya ba ni rgyu sa bon 'bras bu la sbas pas yongs su bsgos pa'i sa bon snang ba'i rnam par shes pa sgo bar byed pa la sbas pa ste/ rgyu'i ngo bor mngon par grub pa'i phyir ro/ /gsum pa bdag tu 'dzin pas sbed pa'i don ni yul yongs su 'dzin cing sbed pa'i phyir ro/ /mdo 'di ni bstan bcos rnams dang mi mthun te/ rnam par shes pa 'di dbang po dang bcas pa'i lus de dag gnas su sdud pas/ sbed pa de dag dang / rten gyi lus su grub pa dang / bde ba gcig pa'i phyir te/ 'di ni snang ba'i rnam par shes pa 'di rten las sbas pas de'i phyir sbed pa zhes bya'o/ /'di yang sbed pa'i nang na don gyi phyogs gcig yin te/ de'i phyir dgongs pa zab mo rnam par dgrol ba'i mdo las lus de dag las mngon par zhen pa'i phyir dang / bdag nyid gcig tu mthun pa'i phyir zhes gsungs te/ de la mngon par zhen pa zhes bya ba ni sdud pa dang sbed pa yin la/ bdag nyid gcig tu mthun pa zhes bya ba ni grub pa dang bde ba gcig pa'i don to/ /sems zhes kyang bya ste/ de ci'i phyir zhe na/ rnam par shes pa 'di'i dbang gis/ gzugs dang / sgra dang / dri dang / ro dang / reg bya la sogs pa kun du bsags pa dang / 'phel bar 'gyur ba'i phyir ro zhes bya ba 'di ni bzhi pa sems kyi don rnam par bshad pa'o/ /'di yang don rnam pa mang po dang ldan te/ dang po ni bsags pa brtsams pa zhes bya ste/ chos rnams kyi sa bon bsags nas chos rnams 'byung bar byed pa'i phyir te/ bstan bcos rnam par rig pa tsam du grub pa las ji skad du/ gnyis pa bsags pa la don rnam pa gnyis yod de/ chos rnams kyis sa bon rab tu bsags pa'i phyir ro zhes bya ba dang / bstan bcos theg pa chen po bsdus pa las/ chos rnam pa sna tshogs kyis yongs su bsgos pa'i sa bon rnams kun du bsags pa'i phyir ro zhes bstan pa lta bu'o/ /gnyis pa ni phyi rol gyi yul drug po dag kun du bsags pa dang / 'phel bar byed pa'i phyir ro/ /gsum pa ni sdud pa zhes bya ste/ dmigs par bya ba'i yul rnam pa sna tshogs sdud pa'i phyir te/ dgongs pa zab mo rnam par dgrol ba'i mdo dang / phung po lnga'i rab tu byed pa las bstan pa bzhin no/ /'dir mdo sde 'di dang sbyar na/ don gnyis pa las brtsams nas/ de'i phyir sems zhes gsungs pa yin no/ /'di yang don rnam pa gnyis dang ldan te/ kun du bsags pa dang 'phel bar byed pa'o/ /'di ltar gzugs la sogs pa'i dbang gis yul yongs su tshol bas kun du bsags pa dang 'phel bar 'gyur ba'i phyir ro/ /rnam par rig pa tsam du grub pa'i bstan bcos las ni ming rnam pa bdun 'byung ste/ mdo 'di las bstan pa'i ming bzhi la yang gsum gyis bsnan na'o/ /ming gsum po de yang gang zhe na bstan bcos de nyid las ji skad du shes bya'i gnas zhes kyang bya ste/ kun nas nyon mongs pa dang / rnam par byang ba'i chos rnams kyi gnas byed pa'i phyir ro zhes 'byung ste/ 'di ni bstan bcos theg pa chen po bsdus pa las ji skad du/ khyad par du 'phags pa'i gsung rab rnam pa bcu bstan pa las/ dang po zhes bya'o/ / gnas kyi khyad par gyi khyad par du 'phags pa'i gsung zhes bstan pa lta bu'o/ /slob dpon dbyig gnyen gyis mdzad pa'i 'grel pa las/ shes par bya ba yin pa'i phyir shes bya zhes bya'o/ /de yang 'di lta ste/ kun nas nyon mongs pa dang / rnam par byang ba'i chos rnams te ngo bo nyid rnam pa gsum mo/ /gnas zhes bya ba ni rgyu'i don to zhes 'byung ngo / /slob dpon ngo bo nyid med kyis 'grel pa las kyang / shes par bya ba yin pa'i phyir shes bya zhes bya'o/ /gnas ni 'di lta ste/ brten pa'i gnas te/ sgras ni rten par byed pa nyon mongs pa dang / rnam par byang ba 'dus byas kyi chos rnams gzung gi /'dus ma byas ni ma yin te/ de la gnas pa don med pa'i phyir ro/ /gnas ni kun gzhi rnam par shes pa nyid yin te/ de dag gi rgyu yin pa'i phyir dang de dag 'dren par byed pa'i phyir ci rigs par bya'o zhes 'byung ste/ de la slob dpon dbyig gnyen gyis kun gzhi rnam par shes pa ste/ ngo bo nyid rnam pa gsum char kun gyi gnas byed par ston to/ /slob dpon ngo bo nyid med ni gzhan gyi dbang kho na'i ngo bo nyid dang gnas byed kyi/ kun brtags dang / yongs su grub pa'i ngo bo nyid kyi gnas ni mi byed do zhes ston to/ /de la de dag gi rgyu yin pa'i phyir zhes bya ba ni kun nas nyon mongs pa'i char gtogs pa'i gzhan gyi dbang gi gnas byed pas so/ /de dag 'dren pa'i phyir ro zhes bya ba ni rnam par byang ba'i char gtogs pa'i gzhan gyi dbang gi gnas byed pas so/ /ni'i phyir bstan bcos 'di gnyis mi mthun par gyur ce na/ smras pa/ slob dpon dbyig gnyen gyis spyi'i gnas las brtsams pa'i phyir ngo bo nyid rnam pa gsum spyir bstan to/ /ngo bo nyid med na ni nye bar gyur pa'i gnas las brtsams pa'i phyir/ gzhan gyi dbang gi ngo bo kho na dang sbyar nas bstan te/ so so nas don re re smos pas 'gal ba med do/ /yang na rnam par smin pa'i rnam par shes pa zhes kyang bya ste/ 'khor na dge ba dang mi dge ba'i las kyi rnam par smin pa'i 'bras bu rab tu 'dren pa'i phyir ro zhes 'byung ste/ de la rnam par smin pa zhes bya ba yang don rnam pa gsum gyi phyir te/ dang po ni rnam par gyur nas rnam par smin par 'gyur ba'i phyir rnam par smin pa zhes bya'o/ /gnyis pa ni dus tha dad pa na rnam par smin par 'gyur ba'i phyir rnam par smin pa zhes bya'o/ /gsum pa ni ris tha dad pa rnam par smin par 'gyur ba'i phyir rnam par smin pa zhes bya ste/ de yang rgyu ni dge ba dang mi dge ba yin la 'bras bu ni lung du mi ston pa yin pa'i phyir rnam par smin pa zhes brjod do/ /rnam pa gsum las 'dir ni gsum pa ris tha dad pa bzung ste/ snga ma gnyis ni spyi'i ming yin pas rnam par smin pa gzhan du yang gtogs pa'i phyir ro/ /yang na dri ma med pa'i rnam par shes pa zhes kyang bya ste/ shin tu rnam par dag pa'i zag pa med pa'i chos rnams kyi gnas su gyur pa'i phyir ro zhes 'byung ste/ 'di ni gya nom par mngon par rdzogs par sangs rgyas pa'i gnas skabs su me long lta bu'i ye shes dang mtshungs par ldan pa'i sems kyi bdag nyid la dri ma med pa'i rnam par shes pa zhes bya ste/ shin tu rnam par dag pa'i ye shes dang / ting nge 'dzin la sogs pa zag pa med pa'i lam gyi chos kyi gnas su gyur pa'i phyir dang / de bzhin gshegs pa'i yon tan bkod pa'i mdo las ji skad du/ de bzhin gshegs pa'i dri med rnam shes ni/ /shin tu dag cing zag med dbyings yin pas/ /sgrib pa thams cad las ni rnam par dgrol / /me long lta bu'i ye shes mtshungs par ldan/ /zhes gsungs pa lta bu'o/ /rgya cher rnam par bshad pa ni bstan bcos rnam par rig pa tsam du grub pa'i 'grel pa las bstan pa bzhin du rig par bya'o// //bam po nyi shu gcig pa/ blo gros yangs pa len pa'i rnam par shes pas gnas dang / rnam par gzhag pa byas pa'i phyir rnam par shes pa tshogs drug po dag 'jug pa 'di lta ste/ mig gi rnam par shes pa dang / rna ba dang / sna dang / lce dang / lus dang / yid kyi rnam par shes pa'o zhes bya ba 'di man chad ni gnyis pa rnam par shes pa rnams lhan cig 'jug pa'i bye brag ston par mdzad do/ /'di yang rnam pa gsum gyis bstan te/ don dang dpe dang / dpe dang don du sbyar ba'o/ /dang po yang rnam pa gnyis su dbye ste/ len pa'i rnam par shes pa rnam par shes pa'i tshogs drug po dag dang lhan cig 'jug pa bstan pa dang / blo gros yangs pa gal te zhes bya ba man chad kyis yid kyi rnam par shes pa lnga po dag dang / lhan cig 'jug pa'i mang nyung bstan pa'o/ /de yang dang po ni rtsa ba yan lag la ltos nas lhan cig 'jug pa rnam par 'byed pa yin la/ phyi ma ni yid kyi rnam par shes pa lnga po dag la ltos nas lan cig 'jug pa bstan pa yin no/ /bstan bcos rnal 'byor spyod pa'i sa la sogs pa las ni don dang po las brtsams nas lhan cig 'jug pa ston to/ / 'dir nyon mongs pa can gyi yid kyi lhan cig 'jug pa bstan pa'i rigs pa las ma bstan pa ni/ dang po dang tha ma smos pas yid kyi shes par 'gyur ba'i phyir mdor bsdus nas ma bstan te/ de'i phyir rnal 'byor spyod pa'i sa la sogs pa las/ nyon mongs pa can gyi yid kyang bsdus nas cig car lhan cig 'jug pa ston pa yin no/ /dang po yang rnam pa gnyis kyis bstan te/ lhan cig 'jug pa mdor bstan pa dang / gal gyi dbang du mdzad nas bzlas te bshad pa'o/ /'di ni dang po mdor bstan pa ste/ 'di ltar len pa'i rnam par shes pas gnas byas pa'i phyir rnam par shes pa'i tshogs drug po mig la sogs pa'i rnam par shes pa gong nas gong du 'phel bar 'gyur ba'o/ /de la rnam par shes pa dang bcas pa'i mig dang / gzugs kyis rkyen byas nas mig gi rnam par shes pa skye ste/ mig gi rnam par [(]shas [,]shes [)]pa dang lhan cig rjes su 'jug pa dus mtshungs pa spyod yul mtshungs pa/ rnam par rtog pa'i yid kyi rnam par shes pa yang 'gag go zhes bya ba la sogs pa ni gnyis pa gal gyi rjes su bzlas te bshad pa'o/ /'di rnam pa gnyis su dbye ste/ mig gi rnam par shes pa gdon mi za bar yid kyi rnam par shes pa dang lhan cig 'jug par bstan pa dang / gzhan rnam par shes pa bzhi po dag yid kyi rnam par shes pa dang lhan cig par bstan pa'o/ /'di ni dang po ste de la zhes bya ba ni bstan bcos rigs pa'i sgo dang sbyar na don rnam pa gnyis yod de/ brjod pa gleng bslang ba'i don dang / rnam par bsal nas yongs su bzung ba'i don to/ /gong du rnam par shes pa lhan cig 'jug pa zhes mdor gsungs mod kyi/ da dung lnga po dag ni gdon mi za bar yid kyi rnam par shes pa la brten pa yin la/ yid ni lnga po dag la brten pa ma yin par rnam par ma phye bas 'dir don de lta bu dag gis gleng bslang ba'i ched du de la zhes bya ba gsungs so/ /gzhan yang lhan cig 'jug pa bshad na don mang du yod pa las cig car rdzogs par ma bshad de/ don gzhan rnam par bsal nas don 'di yongs su gsung ba'i phyir yang de la zhes bya ba gsungs so/ /rnam par shes pa dang bcas pa'i mig ces bya ba ni mig rnam pa gnyis te/ rnam par shes pa dang bcas pa'i mig ni bstan pa mtshungs pa'i mig ces bya'o/ /rnam par shes pa med pa'i mig ni de dang mtshungs pa zhes bya ste/ de dang mtshungs pa las rnam par phye ba gang yin pa de ni rnam par shes pa dang bcas pa'i mig ces bya'o/ /bsten pa mtshungs pa dang / de dang mtshungs pa de yang bstan pa rnams las so so nas bshad pa mi mthun te/ thams cad yod par smra ba dag ni khams bco brgyad las brtsams nas bsten pa mtshungs pa dang / de'i bsten pa mtshungs pa'i don ston pas 'di lta ste/ khams bco brgyad las las kyi nus pa dang bcas pa ni bsten pa mtshungs pa zhes bya'o/ /las kyi nus pa med pa ni de dang mtshungs pa zhes bya'o zhes zer te/ de'i phyir mdzod kyi bstan bcos las du ni bsten pa mtshungs pa yin te/ du ni de'i bsten pa mtshungs pa yin zhe na/ tshig le'ur byas pa las/ chos ni rten bcas gzhan rnam gnyis/ /rang gi las ni mi byed de/ /zhes 'byung ste/ 'di nyid kyi 'grel pa las chos kyi khams gcig ni bsten pa mtshungs pa kho na yin te/ 'di lta ste/ 'phags pa rnams kyi 'dres pa'i sems so zhes 'byung ngo / / chos kyi khams thams cad ni yid kyi rnam par shes pa'i yul yin pa'i phyir bstan bcos bye brag tu bshad pa chen po las kyang chos gang yang dus gsum gyis ma bsdus pa med de/ yid kyi rnam par shes pa'i yul yin pa'i phyir ro zhes bshad de/ zhib tu de nyid las bstan pa bzhin no/ /khams bcu bdun po dag yid kyi rnam par shes pas dmigs pa thams cad kyang bsten pa mtshungs pa yin la/ de'i bsten pa mtshungs pa ni med do zhe na/ smras pa/ khams bcu bdun po dag yid kyi rnam par shes pa la brten nas bsten pa mi mtshungs par rnam par gzhag pa ma yin gyi so so'i dbang po dang / yul tha dad pa phun tshun ltos pa la brten nas bstan pa yin no / /'di lta ste/ mig ni gzugs la ltos la/ gzugs ni mig la ltos pa nas lus ni reg bya la ltos la/ reg bya ni lus la ltos pa'i bar du'o/ /gal te de lta na yid kyi khams ni chos kyi khams 'ba' zhig la ltos nas bsten pa mtshungs pa dang / de'i bsten pa mtshungs pa rnam par gzhag pa'i 'gyur bas don ni gzhan khams bcu bdun po dag la dmigs pa dag ni bsten pa mtshungs pa ma yin pa nyid du 'gyur ro zhe na/ don de lta yin mod kyi/ 'on kyang yid kyi khams yid kyi rnam par shes pa'i khams ni chos thams cad khong du chud cing togs par 'gyur ba'i phyir/ rang gi byed pa la brten nas bsten pa mtshungs par rnam par gzhag ste/ ji ltar mig la sogs pa'i dbang po dag la mthong ba la sogs pa'i nus pa yod pa nges par de'i bsten pa mtshungs pa mi gzhag pa yin no/ /slob dpon gzhan kha cig ni chos kyi khams kyis chos thams cad bsdus pas khams bcu bdun po dag kyang chos zhes bya'o zhes zer te/ des de skad du smra bar mi bya'o/ /chos kyi ming du spyir 'dra yang chos kyi khams tha dad pa'i phyir/ des na sngar bstan pa nyid shin tu rigs pa dang mthun pa yin no/ /'di ltar khams bcu bdun po gzhan dag la yang bsten pa mtshungs pa dang / de'i bsten pa mtshungs pa yod de/ bsten pa mtshungs pa dang de'i bsten pa mtshungs pa yang ji lta bu zhe na/ 'di lta ste/ rang gi las la gnas shing rang gi las byed pa ni bsten pa mtshungs pa zhes bya'o/ /rang gi las mi byed pa ni de'i bsten pa mtshungs pa zhes bya'o/ /de la mig gi khams kyis mthong ba'am/ lta ba'am/ lta bar 'gyur ba ni bsten pa mtshungs pa'i mig ces bya'o/ /de bzhin du yid kyi khams kyi bar du re re la yang rang gi khams la rang gi las rgya cher rnam par bshad par bya'o/ /kha che'i bye brag tu smra ba dag ni de'i bsten pa mtshungs pa'i mig ni rnam pa bzhi kho na ste/ gzugs rnams ma mthong bar 'gags pa'am/ 'gag par 'gyur ba'am/ mi skye ba'i chos can no zhes ston to/ /nub phyogs pa'i slob dpon kha cig ni rnam pa lnga'o zhes 'chad de/ mi skye ba'i chos can la rnam pa gnyis su phye na/ rnam par shes pa dang bcas pa dang rtogs pa dang / rnam par shes pa med par rtogs par 'gyur te/ lus kyi khams kyi bar du yang rig par bya'o/ / de'i bsten pa mtshungs pa zhes bya ba ni mi skye ba'i chos can kho na'o zhe'o/ /gzugs kyi khams kyang mig gis mthong ba'am lta bar 'gyur ba gang yin pa de ni bsten pa mtshungs pa'i gzugs zhes bya'o/ /de'i bsten pa mtshungs pa'i gzugs ni rnam pa bzhi ste/ yid kyi khams kyi bar du yang so so'i dbang po la ltos nas rang gi las byed mi byed pa la bsten pa mtshungs pa dang / de'i bsten pa mtshungs pa bstan par shes par bya'o/ /gal te mig gi dngos po gcig la dmigs na yang bsten pa mtshungs pa zhes bya la/ gzhan thams cad la dmigs na yang bsten pa mtshungs pa zhes bya ste/ de'i bsten pa mtshungs pa yang de bzhin no/ /de bzhin du yid kyi khams kyi bar du rgya cher bshad pa yang de bzhin du rig par bya ste/ bstan bcos sems sna tshogs bstan pa las kyang de skad du ston to/ /bstan bcos bye brag tu bshad pa chen po las na rnam pa gsum yod de/ slob dpon dang po'i bshad pa ni mdzod kyi bstan bcos las 'byung ba dang mthun no/ /kha cig ni 'di skad du gzugs rnams lta ba'i mig kyang sems can bdag nyid la ni bsten pa mtshungs pa'i mig ces bya la/ sems can gzhan dag la ni de'i bsten pa mtshungs pa'i mig ces bya'o/ /gzugs rnams mi lta ba'i mig kyang sems can bdag nyid la ni de'i bsten pa mtshungs pa'i mig ces bya la/ sems can gzhan dag la yang de'i bsten pa mtshungs pa'i mig ces bya'o zhe'o/ /yang kha cig ni 'di skad du gzugs rnams lta ba'i mig kyang sems can bdag nyid la ni bsten pa mtshungs pa'i mig ces bya la/ sems can gzhan dag la ni bsten pa mtshungs pa yang ma yin la/ de'i bsten pa mtshungs pa yang ma yin no/ /gzugs rnams la mi lta ba'i mig kyang sems can bdag nyid la de'i bsten pa mtshungs pa'i mig ces bya la/ sems can gzhan dag la ni bsten pa mtshungs pa'i mig kyang ma yin la/ de'i bsten pa mtshungs pa yang ma yin no zhe'o/ /de de skad du smra bar mi bya ste/ ji ltar mig dang bcas pa bzhin du bsten pa mtshungs pa yang ma yin la/ de'i bsten pa mtshungs pa yang ma yin par 'gyur la / de 'di skad du brjod par bya ste/ bshad pa rnam pa gsum las bshad pa dang po ni rigs pa dang mthun pa yin no zhes 'byung ste/ zhib tu de nyid las bstan pa bzhin no/ /gzhan yang mdzod kyi bstan bcos las mig ni thun mong ma yin pa'i phyir/ rgyun gcig la brten nas bsten pa mtshungs pa dang / de'i bsten pa mtshungs pa rnam par gzhag pa yin la/ gzugs ni thun mong ma yin pa'i phyir rgyun mang po la brten nas bsten pa mtshungs pa dang de'i bsten pa mtshungs pa rnam par gzhag pa yin te/ gzugs kyi khams la ji lta ba bzhin du sgra dang dri dang / ro dang / reg bya'i khams la yang de bzhin no/ /sgra ni gzugs ji lta ba bzhin du rung na dri dang ro dang reg bya gsum ni dbang po dang phrad par gyur pa na gdod len pas thun mong ma yin pa'i phyir gcig len gyi gzhan ni ma yin pas mig la sogs pa bzhin du bshad pa ni rigs kyi gzugs ji lta ba bzhin no zhes bshad pa ni mi rigs so zhe na/ de lta bu'i rigs pa yod kyang thun mong ba'i don yang yod de/ de ci'i phyir zhe na/ dri la sogs pa'i khams gsum ni gcig dang / gzhan dag la yang sna la sogs pa rnam par shes pa bskyed par rung gi mig la sogs pa ni de lta ma yin pas de'i phyir gzugs bzhin du bshad dgos so zhes 'byung ngo / /bstan bcos sems sna tshogs bstan pa las kyang 'di lta ste/ mig gis gzugs la lta ba ni cha dang bcas pa yin la/ gzugs la mi lta ba ni gzhan gyi cha dang bcas pa yin te/ 'di ltar gzugs la mig gis lta ba ni cha dang bcas pa yin la/ mi lta ba ni gzhan gyi cha dang bcas pa yin pas so/ /de la bye brag ni gal te mig gcig gi cha dang bcas pa yin na gzhan thams cad kyang cha dang bcas pa yin la/ gal te gcig gzhan gyi cha dang bcas pa yin na gzhan thams cad kyang gzhan gyi cha dang bcas pa gzugs la lta ba yin no/ /lta ba cha dang bcas pa gang yin pa de ni gzhan rna ba dang / sna dang / lce dang / lus kyi ma yin te/ sgra dang / dri dang / ro dang / reg bya'i rnams kyang de bzhin no/ /don dam par ni mig bzhin du bshad par bya'o/ /kun rdzob kyi grangs ni gzugs bzhin du bshad par bya'o zhes 'byung ngo / /bstan bcos bye brag tu bshad pa chen po las ni 'di ltar sgra dang / dri dang / ro dang / reg bya'i khams kyang de bzhin te/ bsten pa mtshungs pa dang / de'i bsten pa mtshungs pa'i rnam pa tha dad pa 'dra ba'i phyir ro/ /don 'di yang na kha cig so so rang gi lus la yod pa'i dri dang ro dang reg bya bsnam pa dang myang ba dang bye brag phyed par bya ba'i phyir de dag de skad du bshad de/ dri dang ro dang / reg bya'i khams kyang kun rdzob kyi dbang du na ni gzugs kyi khams bzhin du bshad par bya ste/ 'di ltar 'jig rten pa rnams 'di skad du/ ji ltar khyod kyis dri gang bsnams pa de ni bdag cag gis kyang bsnams so/ /khyod kyis ro gang myangs pa de ni bdag cag gis kyang myangs so/ /khyod kyis reg bya gang bye brag phyed pa de ni bdag cag gis kyang bye brag phyed do zhes zer bas so/ /don dam pa'i dbang du byas na dri dang ro dang / reg bya'i khams ni mig gi khams bzhin du bshad par bya ste/ 'di ltar sems can gcig gis gang bsnams pa'i dri'i khams gzhan gyis bsnam par mi nus pa dang / sems can gcig gis gang myangs pa'i ro'i khams gzhan gyis myang bar mi nus pa dang / sems can gcig gis bye brag phyed pa'i reg bya'i khams gzhan gyis bye brag phyed par mi nus pas so/ /reg bya'i khams gcig la sems can gnyis kyi lus phyogs so so nas 'dug pas thun mong du reg par gyur pa de don dam par gzugs kyi khams bzhin du bshad pa ma yin nam zhe na smras pa/ 'di ltar reg bya'i khams rdul phra rab tsam mang po gcig tu bsdus pa la lus gnyis reg par gyur pa so so nas phyogs gcig thob pa yin gyi / thun mong du thob pa med pa'i phyir don dam par mig gi khams bzhin du bshad par bya ste/ dri dang ro'i khams gnyis kyang de bzhin du rig par bya'o/ /gzhan kha cig ni pha rol dang sems can ma yin pa rnams kyi dri dang reg bya bsnam pa dang / myang ba dang / bye brag phyed pa spyad zin pa dang / yongs su spyad pa'i dus gang yin pa de ni kun rdzob kyi dbang du byas nas gzugs kyi khams bzhin du bshad par bya'o/ /'di ltar 'jig rten pa rnams thun mong du thob pa yin no zhes zer ba'i phyir ni don dam pa'i dbang du byas nas mig gi khams bzhin du bshad par bya ste/ gcig gis yongs su spyad pa gzhan gyis mi mthong ba'i phyir ro/ / yongs su spyad zin pa'i dri dang / ro dang reg bya'i khams gang yin pa de ni don dam pa la brten nas gzugs kyi khams bzhin du bshad na mi rung ba med de/ don de ni 'di lta ste/ ma 'ongs pa na yod pa dang / da ltar gyi dus su 'jug cing mang po la sogs pas thun mong du thob pa'i don gyi phyir ro zhe'o/ /de la don snga ma dang sbyar na ni 'di skad du dri dang ro dang reg bya'i khams ni kun rdzob kyi don la brten nas ni gzugs kyi khams bzhin du bshad par bya'o/ /don dam pa'i don la brten nas ni mig gi khams bzhin du bshad par bya'o zhes brjod par bya'o/ /don phyi ma dang sbyar na ni 'di skad du/ dri dang ro dang / reg bya'i khams yongs su spyad zin pa gang yin pa dang / yongs su spyad pa'i dus gang yin pa de ni kun rdzob kyi don la brten nas gzugs kyi khams bzhin du bshad par bya'o/ /don dam pa'i don la brten nas ni mig gi khams bzhin du bshad par bya'o/ /yongs su ma spyad pa gang yin pa de ni don dam pa'i don la brten nas gzugs kyi khams bzhin du bshad par bya'o zhes bshad na yang 'di mi rung ba med do zhes brjod par bya ste/ de'i phyir bstan bcos kun las kyang de skad bstan to/ /gzugs kyi khams ji lta ba bzhin du sgra dang dri dang ro dang reg bya'i khams kyang de bzhin no/ /'di ltar dri dang ro dang reg bya ni thun mong du dmigs pa'i phyir dang / mig la sogs pa'i rnam par shes pa drug gi bsten pa mtshungs pa dang / de'i bsten pa mtshungs pa ni skye ba dang / mi skye ba'i chos can gyi phyir yid kyi khams bzhin du bshad par bya'o/ /da ni bsten pa mtshungs pa dang / de'i bsten pa mtshungs pa'i nges pa'i tshig bshad par bya ste/ mdzod kyi bstan bcos ni don rnam pa gsum mo zhes bshad de/ de'i phyir de nyid las bsten pa mtshungs pa dang / de'i bsten pa mtshungs pa'i don gang zhe na/ smras pa/ dbang po dang yul dang rnam par shes pa gsum phan tshun 'dus shing 'dres par gyur pa'i phyir cha zhes bya'o/ /yang na cha zhes bya ba ni las byed pa'o/ /gzhan yang cha zhes bya ba ni reg bya mtshungs par skyes pa la/ cha 'di yod pa'i phyir bsten pa mtshungs pa zhes bya'o/ /'di las bzlog pa ni de'i bsten pa mtshungs pa zhes bya ste/ bsten pa mtshungs pa ma yin pa de'i bsten pa mtshungs pa dang / rnam pa mi mtshungs pas de'i bsten pa mtshungs pa zhes bya'o zhes 'byung ste/ yang dag pa'i rigs pa las kyang 'di dang mthun par bshad do/ /bstan bcos sems sna tshogs bstan pa las cha dang bcas pa las gzhan gyi cha dang bcas pa la don ci yod ce na/ smras pa/ cha dang bcas pa'i dus rdzogs pa ni cha dang bcas pa zhes bya'o/ /mig gi khams rnam pa gnyis po las dang bcas pa dang / las med pa de dag las kyi cha dang bcas pa zhig gam/ 'on te las kyi med pa'i cha dang bcas pa zhig ce na/ cha dang bcas pa de las med pa yang yod/ las kyi cha dang bcas pa yang yod/ cha dang bcas pa cha gnyi ga dang ldan zhing / cha dang bcas par phan tshun bsten pa yod par 'chad pa yang yod do zhes 'byung ngo / /mdo sde pa dag ji ltar 'dod pa ni da dung gzhung yang dag pa nyid mthong ste/ theg pa chen po pa dag dang mthun par 'dod par bshad pa dang 'gal ba med do/ /'dir theg pa chen po'i bstan pa dang sbyar na bstan bcos rnams so so nas bshad pa mi mthun te/ slob dpon dbyig gnyen gyis mdzad pa'i phung po lnga'i rab tu byed pa las ni nang gi skye mched lnga la brten nas bsten pa mtshungs pa'i don ston te/ de'i phyir de nyid las bsten pa mtshungs pa du zhe na/ nang gi gzugs can lnga ste rang gi rnam par shes pa dag yul thun mong ba nyid kyi phyir ro/ /de dang mtshungs pa du zhe na/ de dag nyid rang gi rnam par shes pas stong pa ste/ rang gi rigs pa dang mthun pa'i phyir ro zhes 'byung ste/ de la bsten pa mtshungs pa ni yul mtshungs pa nyid kyi don gyi phyir bsten pa mtshungs pa'o/ /bstan bcos chos mngon pa kun las btus pa dang / chos mngon pa sna tshogs kun las btus pa las kyang phung po lnga'i rab tu byed pa las bstan pa dang don mthun par 'byung ste/ de'i phyir chos mngon pa kun las btus pa las ji ltar na bsten pa mtshungs pa dang / de dang mtshungs pa yin te/ bsten pa mtshungs pa dang / de dang mtshungs pa ni du zhig /ci'i phyir bsten pa mtshungs pa dang / de dang mtshungs par rtag ce na/ rnam par shes pa dang ma bral zhing de dang 'dra ba'i dbang po yul la rgyun du 'byung ba'i phyir dang / rnam par shes pa dang bral zhing rang dang 'dra ba rgyun du 'byung ba'i phyir yang bsten pa mtshungs pa dang / de dang mtshungs par blta'o zhes 'byung ste/ de la dang po bstan pa mtshungs pa yin te/ dbang po dang rnam par shes pa gnyi ga 'dra zhing yul rnams la/ rgyun du skye ba'i phyir dbang po dang rnam par shes pa 'dra bar 'jug pa'i don la bsten pa mtshungs pa'i zhes bshad do/ /gnyis pa ni de dang mtshungs pa yin te/ dbang po rnams rnam par shes pa dang bral zhing rang 'dra ba'i rnam pa rgyun du skye ba'i phyir dbang po rnam par shes pa dang phrad par ma gyur kyang rang gi bdag nyid dbang po dang 'dra ba'i rnam pa rgyun du skye zhing dbang po dang 'dra ba'i don la de dang mtshungs pa zhes bshad de/ de yang gzugs kyi phung po'i phyogs gcig dang / gzugs can gyi khams dang / skye mched lnga'i phyogs gcig ni bsten pa mtshungs pa dang / de dang mtshungs pa yin no/ /bstan bcos rnal 'byor spyod pa'i sa las kyang nang gi skye mched lnga la brten nas ston to/ /de'i phyir de nyid las khams bco brgyad po de dag las du ni mtshungs pa yin/ du ni de dang mtshungs pa yin zhe na/ smras pa/ mig gi khams rnam par shes pa dang bcas pa ni mtshungs pa yin no/ de las gzhan pa ni de dag dang mtshungs pa yin no/ /mig gi khams la ji lta ba bzhin du lus kyi khams kyi bar du yang de bzhin no/ /mtshungs pa dang / de dang mtshungs pa gang yin pa de ni dbang pos zin pa'i nang gi khams rnams las bsam pa yin gyi gzugs la sogs pa'i phyi rol gyi dag la ni ma yin no/ /chos kyi khams dmigs pa dang bcas pa gang yin pa de ni sems kyi khams dang 'dra bar blta bar bya'o/ /dmigs pa med pa gang yin pa de ni gzugs la sogs pa dang 'dra'o zhes 'byung ste/ rnam par shes pa dang bcas pa'i rna ba la sogs pa la yang de bzhin du rig par bya'o/ /mig gi rnam rnam par shes pa dang lhan cig rjes su 'jug pa zhes bya ba la sogs pas ni mig gi rnam par shes pa 'byung ba na gdon mi za bar rnam par rtog pa'i yid kyi rnam par shes pa dus gcig tu rjes su 'jug cing yul gcig la dmigs par bstan pa'o/ /rnam par shes pa dang bcas pa'i rna ba dang / sna dang / lce dang / lus dang / sgra dang dri dang / ro dang reg bya dag gis rkyen byas nas/ rna ba dang / sna dang / lce dang / lus kyi rnam par shes pa skye ste/ rna ba dang / sna dang / lce dang / lus kyi rnam par shes pa dang lhan cig rjes su 'jug pa dus mtshungs pa/ spyod yul mtshungs pa rnam par rtog pa'i yid kyi rnam par shes pa la yang 'jug go zhes bya ba ni gnyis pa gzhan rnam par shes pa bzhi po dag yid kyi rnam par shes pa dang lhan cig par bshad pa ste/ gong ma bzhin du rig par bya'o/ /blo gros yangs pa gal te de'i tshe mig gi rnam par shes pa gcig kho na 'jug na ni/ de'i dus su rnam par rtog pa'i yid kyi rnam par shes pa yang gcig kho na mig gi rnam par shes pa dang lhan cig rjes su 'jug ces bya ba 'di man chad ni gnyis pa yid kyi rnam par shes pa rnam pa lnga po dag lhan cig 'jug pa'i mang nyung rnam par phye ste bshad pa'o/ /'di yang rnam pa gnyis kyis bsten te/ yid kyi rnam par shes pa mig gi rnam par shes pa dang lhan cig 'jug pa bstan pa dang / yid kyi rnam par shes pa mig la sogs pa'i rnam par shes pa gnyis sam gsum mam bzhi 'am lnga dang lhan cig 'jug pa bstan pa'o/ /'di ni dang po yid kyi rnam par shes pa mig gi rnam par shes pa dang lhan cig 'jug pa bstan pa ste/ dmigs pa gcig la mthun par gyur pa'i phyir ro/ /gal te de'i tshe rnam par shes pa'i tshogs gnyis sam gsum mam bzhi 'am lnga char 'jug pa na yang de'i dus su rnam par rtog pa'i yid kyi rnam par shes pa gcig kho na rnam par shes pa'i tshogs lnga po dag dang lhan cig rjes su 'jug pa'o zhes bya ba ni/ gnyis pa yid kyi rnam par shes pa dang mig la sogs pa'i rnam par shes pa dag lhan cig 'jug pa bstan pa'o/ /dmigs par bya ba'i yul mang nyung gi rjes su yid kyi rnam par shes pa yang mig la sogs pa'i rnam par shes pa dang / lhan cig 'jug pas grangs kyi mang nyung ni nges pa med do/ /dgongs pa zab mo rnam par dgrol ba'i mdo las ni rnam par mi rtog pa'i yid kyi rnam par shes pa zhes 'byung / tshig nges par 'grel pa'i mdo las ni rnam par rtog pa'i yid kyi rnam par shes pa zhes 'byung ste/ dpe 'di dang mthun pa'i phyir rnam par rtog pa zhes 'byung ba ni ma nor ba yin par shes par bya'o/ /blo gros yangs pa dper na chu'i klung chen po 'bab pa la gal te rlabs gcig 'byung ba'i rkyen nye bar gnas par gyur na rlabs kyang gcig kho na 'byung zhes bya ba 'di man chad ni gnyis pa dpe smos nas rnam par bshad pa'o/ /'di yang rnam pa gnyis su dbye ste/ /chu'i rlabs mang nyung gi dpe dang / me long gi gzugs brnyan mang nyung gi dpe'o/ /dpe snga phyi gnyis bye brag tu gyur pa yang so so nas bshad pa mi mthun te/ kha cig na re dpe rnam pa gnyis gsungs pa'i dgongs pa ni so so nas tha dad de/ slob dpon yang dag bden pa'i brjed byang las/ ji skad du chu rlabs 'byung ba ni rnam par shes pa drug po dag rtsa ba'i rnam par shes pa dang / skye 'gag mtshungs pa'i don gyi dpe bstan pa'o/ /me long gi dkyil 'khor las gzugs brnyan snang ba ni rnam par shes pa rnams 'byung ba rtsa ba'i rnam par shes pa'i bdag nyid rnam par shes pa drug po dag tu gyur pa ma yin pa'i dper bstan pa'o zhes 'byung ba lta bu'o zhe'o/ /kha cig na re dpe rnam pa gnyis gsungs pa'i dgongs pa ni tha dad pa med de/ gnyi ga yang rnam par shes pa rnams lhan cig tu 'jug pa'i dper bsten pa yin pas bstan bcos rnal 'byor spyod pa'i sa dang rnam par bshad pa las ji skad du bstan pa bzhin no zhe'o/ /'dir dpe rnam pa gnyis bshad pa yang bstan pa rnams las mi mthun te/ la lar ni gnas dang gnas pa rnam pa gnyis kyi bye brag rab tu bstan pa'i phyir/ dpe rnam pa gnyis gsungs pa yin bstan bcos rnal 'byor spyod pa'i sa las ji skad du don dam pa'i tshul rnam par gzhag pas 'jug pa gang zhe na/ mdor bsdu na rnam par shes pa ni rnam pa gnyis te/ kun gzhi rnam par shes pa dang 'jug pa'i rnam par shes pa'o/ /de la kun gzhi rnam par shes pa ni gnas yin no/ /'jug pa'i rnam par shes pa ni gnas pa yin te/ de yang rnam pa bdun te/ 'di lta ste/ mig gi rnam par shes pa nas yid kyi rnam par shes pa'i bar ro/ /dper na chu'i chu bo dang rlabs lta bu 'am me long dang gzugs brnyan lta bu yin te/ de ltar na 'di ni don dam pa'i tshul gyis gnas dang gnas pa'i bye brag rnam par gzhag pa yin no zhes bstan pa lta bu'o/ /la lar ni brgyad pa dang bdun po dag lhan cig 'jug par rab tu bstan pa'i phyir gsungs pa yin te/ bstan bcos rnal 'byor spyod pa'i sa dang / rnam par bshad pa las ji skad du bstan pa lta bu'o/ /la la las ni brgyad pa dang bdun po dag tha dad pa med pa'i don rab tu bstan pa'i phyir gsungs pa yin te/ bstan bcos rnam par rig pa tsam du grub pa las ji skad du rnam par shes pa brgyad po dag gi rang gi ngo bo nyid rnam pa gcig gi mtshan nyid ces nges par brjod du yang mi rung ste/ gnas dang rkyen dang mtshungs par ldan pa tha dad pa'i phyir dang gzhan yang gcig 'gag pa'i tshe/ gzhan mi 'gag pa'i phyir dang / bsgo ba dang / bsgo bar bya ba'i mtshan nyid so so tha dad pa'i phyir ro/ /nges par tha dad pa yang ma yin te/ mdo las rnam par shes pa brgyad po dag ni chu dang chu bo'i rlabs lta bur tha dad pa med par gsungs pa'i phyir dang / nges par tha dad par gyur na rgyu dang 'bras bu'i ngo bo nyid ma yin par 'gyur ba'i phyir dang / sgyu ma la sogs pa ltar nges pa'i dngos po med pa'i phyir ro zhes bstan pa lta bu'o/ /sngar gong du bshad pa ltar rnam par shes pa'i bye brag tu gyur pa'i mtshan nyid kyang kun rdzob la brten nas yid kyi de kho na'i don dam pa la ni ma yin te/ de kho na nyid kyi don dam pa la ni sems dang tha snyad chad pa'i phyir/ 'phags pa sangs rgyas kyi sa'i 'grel pa las/ sems dang yid dang rnam par shes pa brgyad po dag kyang kun rdzob kyi mtshan nyid kyis ni tha dad la/ don dam pa'i mtshan nyid kyis tha dad pa med de/ mtshan nyid dang mtshan nyid kyi gzhi med pa'i phyir ro zhes bstan pa yin te/ 'dir mdo sde'i dgongs pa la yang gong du bstan pa lta bu'i don yod par 'os so/ /yang na mdo sde las dpe rnam pa gnyis gsungs pa'i dgongs pa tha dad pas dpe snga ma ni lhan cig 'byung ba dang / rgyu dang 'bras bu rgyun mi 'chad pa'i don gyi dper bstan pa yin te/ bstan bcos rnam par rig pa tsam du grub pa las ji skad du/ de la rgyun zhes bya bas ni chad pa dgag cing 'jug pa rtag pa ma yin par bstan pa ste/ chu bo'i rgyun bzhin du rgyu dang 'bras bu'i chos nyid de yin pas so zhes bstan pa lta bu ste/ zhib tu de nyid las 'byung ba bzhin no/ /dpe phyi ma ni lhan cig 'byung ba dang / bdun pa mngon par 'grub pa dang / nye bar spyod pa zad mi shes pa'i don gyi dper bstan pa yin no/ /snga ma la yang rnam pa gsum gyis bstan te/ rkyen gcig las rlabs gcig 'byung ba'i dpe dang rkyen mang po las rlabs mang po 'byung ba'i dpe dang / 'on kyang zhes bya ba man chad kyis rang gi rgyud rgyun mi 'chad par mi 'gyur ba'i dpe ste/ 'di ni dang po rkyen gcig las rlabs gcig 'byung ba'i dpe'o/ /gal te rlabs gnyis sam/ gal te rlabs rab tu mang po dag 'byung ba'i rkyen nye bar gnas par gyur na rlabs mang po dag 'byung ste zhes bya ba ni gnyis pa rkyen mang po las rlabs mang po 'byung ba'i dpe'o/ /'on kyang chu'i klung de rang gi rgyun gyis rgyun chad par yang mi 'gyur la/ yongs su zad par mi 'gyur ro zhes bya ba ni gsum pa rang gi rgyun chad par mi 'gyur ba'i dpe'o/ /'phags pa lang kar gshegs pa las kyang 'di dang mthun par 'byung ste/ de'i phyir tshigs su bcad pa las/ ji ltar rgya mtshor rgyu rkyen gyis/ /dba' rlabs sna tshogs byung nas ni/ / mngon du bya bar rab 'jug kyang / /rgyun ni chad par 'gyur med ltar/ /kun gzhi rgya mtsho de bzhin te/ /yul gyi rlung ni rab bskyod pas/ /rnam shes dba' rlabs rtag tu 'byung / /bya ba dag ni nye bar 'jug /ces gsungs pa yin no/ /gzhan yang dper na me long gi dkyil 'khor shin tu yongs su dag pa la / gal te gzugs brnyan gcig 'byung ba'i rkyen nye bar gnas par gyur na gzugs brnyan yang gcig kho na 'byung ngo zhes bya ba 'di man chad ni gnyis pa me long gi dkyil 'khor gyi gzugs brnyan mang nyung gi dpe zhes bya ba ston to/ /'di yang rnam pa gsum du dbye ste/ rkyen gcig las gzugs brnyan gcig 'byung ba'i dpe dang / rkyen mang po las gzugs brnyan mang po 'byung ba'i dpe dang / nye bar spyod pa zad mi shes pa'i dpe ste 'di ni dang po rkyen gcig las gzugs brnyan gcig 'byung ba'i dpe bstan pa'o/ /gal te gzugs brnyan gnyis sam/ gal te rab tu mang po dag 'byung ba'i rkyen nye bar gnas par gyur na gzugs brnyan mang po dag 'byung zhes bya ba ni/ gnyis pa rkyen mang po las gzugs brnyan mang po 'byung ba'i dpes bstan pa'o/ /me long gi dkyil 'khor de dag gzugs brnyan gyi dngos pos yongs su 'gyur ba yang ma yin la/ nye bar spyod pa zad par mngon par yang med do zhes bya ba ni/ gsum pa nye bar spyod pa zad mi shes pa'i dpes bstan pa'o/ /me long g i dkyil 'khor de gzugs brnyan gyi dngos por yongs su 'gyur ba yang ma yin zhes bya ba la sogs pas ni slob dpon yang dag bden pa'i brjed byang las me long las gzugs brnyan 'byung ba ni rkyen la ltos pas me long nyid gzugs brnyan gyi dngos por 'gyur ba ni ma yin no/ /rnam par shes pa drug po yul gyi rkyen la ltos nas skye ba yang rnam par shes pa drug po snga ma'i sa bon las rnam par shes pa drug po'i phyi ma'i skye ba'i rtsa ba'i rnam par shes pa'i bdag nyid rnam par shes pa drug po dag gi dngos por gyur pa ni ma yin no zhes bshad do/ /'dir yongs su 'gyur ba rnam par shes pa yang don rnam pa gnyis dang ldan te/ dang po ni rgyur gyur pa ste/ sa bon kun gzhi rnam par shes pa gyur nas rnam par shes pa bdun po dag mngon par 'grub pa'o/ /gnyis pa ni 'bras bur gyur pa ste/ mngon du spyod pa kun gzhi rnam par shes pa rang gi rgyu mtshan gyi rnam par ni snang la mig la sogs pa'i rnam par shes pa bdun po dag tu ni ma gyur pa'o/ /mdo 'di las ni 'bras bur gyur pa la ma dgongs nas de'i phyir me long gi dkyil 'khor de gzugs brnyan gyi dngos po yongs su gyur pa yang ma yin zhes bya ba gsungs so/ /gzhan yang me long gi dkyil 'khor de gzugs brnyan ston pa la zad pa med par gsungs pa'i dgongs pa ni/ kun gzhi rnam par shes pa 'bras bu bskyed pa la zad pa med par ston to/ / ci'i phyir nyan thos kyi lung las chu bo'i rlabs nyi tshe'i dpe smos she na/ smras pa/ don de ni brda phrad par zad de/ mdor bsdus pa'i phyir ma bstan to/ /gal te de lta na ci'i phyir dgongs pa zab mo rnam par dgrol ba'i mdo dang tshig nges par 'grel ba'i mdo las dpe rnam pa gnyis tshang bar smos she na/ rgya gar gyi dpe nyid las bye brag 'di yod pas so/ /de bzhin du blo gros yangs pa chu klung lta bu'i len pa'i rnam par shes pas gnas pa dang / rnam par gzhag pa byas pa'i phyir/ gal te de'i tshe mig gi rnam par shes pa gcig 'byung ba'i rkyen nye bar gnas par gyur na de'i dus su mig gi rnam par shes pa yang gcig kho na 'jug ces bya ba 'di man chad ni gsum pa dpe dang don du sbyar ba'o/ /'di yang rnam pa gnyis su dbye ste/ rkyen gcig las rnam par shes pa gcig 'jug pa dang / rkyen mang po las rnam par shes pa mang po 'jug par bstan pa ste/ 'di ni dang po rkyen gcig las rnam par shes pa yang gcig kho na 'jug par bstan pa'o/ /gal te de'i tshe rnam par shes pa'i tshogs lnga char gyi bar dag 'byung ba'i rkyen nye bar gnas par gyur na/ de'i dus su rnam par shes pa'i tshogs kyang lnga char 'jug go zhes bya ba ni gnyis pa rkyen mang po las rnam par shes pa yang mang por 'jug par bstan pa ste/ gong ma bzhin du rig par bya'o/ /blo gros yangs pa de ltar byang chub sems dpa' chos gnas pa shes pas/ gnas dang rnam par gzhag pa byas pa'i phyir sems dang yid dang / rnam par shes pa'i gsang ba la mkhas pa yin mod kyi/ 'on kyang de bzhin gshegs pa rnams ni de tsam gyis de dag la sems dang yid dang rnam par shes pa thams cad kyi gsang ba la mkhas pa'i byang chub sems dpa' zhes mi 'dogs so zhes bya ba 'di man chad ni gnyis pa gsang ba la mkhas pa rnam par 'byed cing sngar zhus pa rnam pa gnyis kyis lan ston par mdzad do/ /'di yang rnam pa gnyis su dbye ste/ zhus pa bzhin du yang dag par rnam par bshad pa dang blo gros yangs pa de tsam gyis zhes bya ba man chad kyis sngar zhus pa'i lan spyir gsungs pa'o/ /dang po yang rnam pa gnyis kyis bstan te/ sa'i mdun rol pa rnams de bzhin gshegs pas lung bstan pa ma yin par bstan pa dang sa la gnas pa rnams de bzhin gshegs pas lung bstan pa yin par bstan pa ste / 'di ni dang po'o/ /de la chos gnas pa zhes bya ba ni thams cad yod par smra ba'i gzhung gis 'bras bu'i chos rgyu la gnas par shes pa'i phyir chos gnas pa zhes bya ste/ de'i phyir bstan bcos bye brag tu bshad pa chen po las/ ci'i phyir chos gnas pa shes pa zhes bya zhe na/ smras pa/ chos zhes bya ba ni 'bras bu yin la/ gnas par zhes bya ba ni rgyu yin no/ /'bras bu'i chos gnas pa'i rgyu shes pa ni chos gnas pa shes pa zhes bya ste/ 'di ltar khams gsum pa'i 'bras bu rab dang 'bring dang tha ma gnas pa'i rgyu shes pa ni chos gnas pa shes pa zhes bya'o/ /rgya cher bshad pa ni de nyid las bstan pa bzhin no/ /mdo sde pa dag ni chos rtag tu gnas par shes pa'i phyir/ chos gnas pa shes pa zhes bya'o zhes zer te/ de'i phyir bstan bcos de kho na nyid grub pa las chos rnams kyi 'byung gnas shes pa ni chos gnas pa shes pa zhes bya ste/ ji ltar skye ba'i rkyen gyis rga shi zhes bya ba dang / de bzhin du ma rig pa'i rkyen gyis 'du byed ces bya ba lta bu ste/ de bzhin gshegs pa bzhugs kyang rung de bzhin gshegs pa mi bzhugs kyang rung ste/ ngo bo nyid 'di ni rtag tu gnas pa'i phyir chos gnas pa shes pa zhes bya'o zhes 'byung ngo / /'dir theg pa chen po'i bstan pa dang sbyar na bstan bcos rnam par bshad pa las chos gnas pa shes pa zhes bya ba ni 'di lta ste/ mdo sde las brtsams nas chos kyi sgo mo rnam par gzhag pa'o zhes 'byung ngo / /bstan bcos rnal 'byor spyod pa'i sa las kyang 'di dang don mthun par 'byung ste/ de'i phyir de nyid las chos gnas pa shes pa ji ltar shes par bya zhe na/ bcom ldan 'das kyis ji ltar gzhag pa dang / bstan pa bzhin du phyin ci ma log par shes par bya'o zhes 'byung ngo / /gzhan yang de nyid las/ chos gnas pa shes pa gang zhe na/ 'di lta ste/ ji ltar 'di na kha cig rkyen 'di pa nyid kyi rten cing 'brel bar 'byung ba dang mthun pa'i gtam phyin ci ma log pa thos nas/ rten cing 'brel par 'byung ba'i 'du byed rnams kyi rgyu dang / 'bras bu'i gnas skabs de so so'i skye bo'i sa la gnas bzhin du thos pa dang bsam pa dang / bsgom pa las byung ba'i tshul bzhin yid la byed pas yang dag pa ji lta ba bzhin du sdug bsngal la yang dag par sdug bsngal bar kun 'byung ba dang / 'gog pa dang / lam la yang dag par lam yin par shes rab kyis 'jug cing mos par byed de/ de ltar rgyu dang 'bras bu ji lta ba bzhin du gnas pa'i chos rnams kyi shes pa gang yin pa 'di ni chos gnas pa shes pa zhes bya'o zhes 'byung ba yin te 'dir gsungs pa yang don gyis bstan bcos rnam par bshad pa dang / rnal 'byor spyod pa'i sa las bstan pa dang mthun no/ /de ni 'di skad du sa'i mdun rol gyi byang chub sems dpa' dag chos gnas pa shes pa'i stobs kyis/ sems dang yid dang rnam par shes pa'i kun rdzob kyi bye brag khong du chud mod kyi/ 'on kyang da dung sems dang yid dang rnam par shes pa'i gsang ba'i don dam pa ma rtogs pas/ de'i phyir bcom ldan 'das kyis de tsam gyis de dag la mkhas pa'i byang chub sems dpa' zhes mi 'dogs so zhes bstan par 'gyur ro/ /blo gros yangs pa byang chub sems dpa' gang gis nang gi so so yang dag pa ji lta ba bzhin du len pa mi mthong / len pa'i rnam par shes pa mi mthong la/ kun gzhi yang mi mthong / kun gzhi rnam par shes pa yang mi mthong bsags pa yang mi mthong sems kyang mi mthong zhes bya ba 'di man chad ni/ gnyis pa sa la gnas pa yan chad de bzhin gshegs pas lung bstan pa yin par bstan pa'o/ /'di yang rnam pa gnyis te/ zhus pa rnam pa gnyis kyi lan spyir gsungs pa dang / de ni zhes bya ba man chad kyis zhus pa rnam pa gnyis kyi lan so sor phye ste gsungs pa'o/ /lan spyir gsungs pa yang don rnam pa gnyis su 'gyur te/ dang po bstan pas brjod par bya ba'i don ni zhus pa snga ma'i lan du gsungs pa'o/ /gnyis pa don la brten nas bstan pa gzhag pa ni zhus pa phyi ma'i lan du gsungs pa'o/ /'di yang rnam pa gnyis kyis bstan te/ kun gzhi rnam par shes pa la brten nas yang dag pa ji lta ba bzhin du shes pa rnam par 'byed pa dang / khams bco brgyad la brten nas yang dag pa ji lta ba bzhin du shes pa rab tu bstan pa ste/ 'di ni dang po'o/ /mdo'i tshig 'di bshad pa yang so so nas bshad pa mi mthun te/ slob dpon yang dag bden pa'i brjed byang las/ byang chub sems dpa' gal te gong du gsungs pa ltar rnam par shes pa dang / gzugs la sogs par mthong nas/ de ni kun rdzob tu shes pa yin pas bcom ldan 'das kyis gang zag 'di sems dang yid dang / rnam par shes pa'i gsang ba'i don shes pa zhes lung ston par mi mdzad la/ yang dag pa ji lta ba bzhin du sngar gsungs pa ltar rnam par shes pa'i don mi mthong na ni/ gdod bcom ldan 'das kyis gang zag 'di sems dang / yid dang / rnam par shes pa'i gsang ba'i don shes pa zhes lung ston par mdzad de/ 'dis ni yang dag pa ma yin pa rnam par rtog pa yod pa ma yin par shes na ni yang dag pa yin no zhes bstan te/ 'di ltar rtsa ba'i gsang ba khong du chud na yang yang dag pa ma yin pa rnam par rtog pa'i yan lag kyang gdod gsal bar khong du chud par 'gyur ba'i phyir ro zhes 'byung ngo / /gzhan yang de nyid las de la nang so so zhes bya ba la nang ni 'di lta ste/ de bzhin nyid chos rnams kyi ngo bo nyid de/ de'i phyir nang zhes bya'o/ /so so zhes bya ba ni brjod pa ni rjes su yang dag pa nyid rab tu ston pa ni so so zhes bya'o zhes 'byung ste/ de ni 'di skad du/ sa la gnas pa'i byang chub sems dpa' rnams don dam pa'i bden pa rtsa ba'i ye shes la brten cing nang gi so so la de bzhin nyid du rtogs pa'i dbang gis yul rnams la yang dag pa ji lta ba bzhin du len pa'i las kyang mi mthong la/ len pa'i ngo bo nyid kyang yang dag pa ji lta ba bzhin du mi mthong ngo zhes bstan par 'gyur te/ kun gzhi dang sems kyi las dang ngo bo nyid kyi bye brag kyang de bzhin du rig par bya'o/ /gzhan yang nang gi so so zhes bya ba ni/ len pa la sogs pa chos rnams kyi bdag nyid la rang gi mtshan nyid dang / spyi'i mtshan nyid kyi rigs pa yod de/ de la rang gi mtshan nyid ni mngon sum gyi tshad ma'i yul yin pa'i phyir ni nang zhes bya la/ chos rnams kyi rang gi mtshan nyid so so nas rang gi bdag nyid dang ldan pa'i phyir ni so so zhes bya ste/ de'i phyir bstan bcos chos mngon pa sna tshogs kun las btus pa las bdag nyid kyis nang gi myong ba gang yin pa de ni don shes pa zhes bya zhes 'byung ste/ 'di ni mngon sum gyi tshad mas rang gi mtshan nyid shes pa'o/ /gzhan yang bstan bcos rnal 'byor spyod pa'i sa las/ rnam par shes pa la brten pa'i tha snyad ni 'di lta ste/ gang des nang so so rang gis rig pa dang / rtogs pa dang / reg pa mngon sum du byas nas de la brten te gzhan dag la tha snyad du brjod pa gang yin pa de ni rnam par shes pa'i tha snyad ces bya'o zhes 'byung ste/ 'di dang sbyar te bshad na yang dag pa dang / rjes las thob pa gnyi ga mngon sum gyi tshad ma bzhin no/ /yang dag pa ji lta ba bzhin du len pa'i rang gi mtshan nyid khong du chud cing rnam par rtog pa dang bral ba'i phyir mi mthong ba zhes bya'i rnam par rtog pa med pa la mi mthong ba zhes bya ba ni ma yin no/ /mig dang gzugs dang mig gi rnam par shes pa yang mi mthong / rna ba dang / sgra dang rna ba'i rnam par shes pa yang mi mthong / sna dang / dri dang / sna'i rnam par shes pa yang mi mthong / lce dang / ro dang / lce'i rnam par shes pa yang mi mthong / lus dang / reg bya dang / lus kyi rnam par shes pa yang mi mthong / yid dang / chos dang / yid kyi rnam par shes pa yang mi mthong zhes bya ba ni gnyis pa khams bco brgyad la brten nas yang dag pa ji lta ba bzhin du shes pa bstan te/ khams bco brgyad mi dmigs pa'i phyir byang chub sems dpa' mkhas pa zhes bya'o zhes bya ba'i tha tshig go/ /de ni don dam pa la mkhas pa'i byang chub sems dpa' zhes bya ste/ de bzhin gshegs pa yang de dag la don dam pa la mkhas pa'i byang chub sems dpa' zhes 'dogs so zhes bya ba ni gnyis pa sngar zhus pa rnam pa gnyis kyi lan so sor phye ste gsungs pa'o/ /mdo'i tshig 'di yang rnam pa gnyis su dbye ste/ dang po de ni don dam pa la mkhas pa'i byang chub sems dpa' zhes bya ste zhes bya ba ni gong du sngar bstan pa'i bstan pas brjod par bya ba'i don smos nas zhus pa snga ma'i lan du gsungs pa'o/ /gnyis pa de bzhin gshegs pa yang de dag la don dam pa la mkhas pa'i byang chub sems dpa' zhes 'dogs so zhes bya ba ni gong du sngar bstan pa'i bstan pa gzhag pa smos nas zhus pa phyi ma'i lan du gsungs pa'o/ /blo gros yangs pa de tsam gyis na sems dang yid dang rnam p ar shes pa'i gsang ba thams cad la mkhas pa'i byang chub sems dpa' zhes bya bas na de bzhin gshegs pa de tsam gyis de dag la sems dang yid dang rnam par shes pa'i gsang ba thams cad la mkhas pa'i byang chub sems dpa' zhes 'dogs so zhes bya ba ni gnyis pa mjug bsdu zhing sngar zhus pa rnam pa gnyis kyi lan gsungs pa ste/ mdo nyid kyis brda phrad par zad do/ /de nas bcom ldan 'das kyis don de nyid yang dag par bstan pa'i phyir tshigs su bcad pa gsungs so zhes bya ba 'di man chad ni gnyis pa tshigs su bcad pas mdor bstan pa'o/ /'di yang rnam pa gnyis kyis bstan te/ tshigs su bcad pas ston par mdzad pa'i gleng bslang ba dang / tshigs su bcad pas mdor bstan pa nyid de/ 'di ni dang po tshigs su bcad pas ston par mdzad pa'i gleng bslang ba'o/ /len pa'i rnam par shes pa zab cing phra/ /sa bon thams cad chu bo'i klung ltar 'bab/ /bdag tu rtog par gyur na mi rung zhes/ /byis pa rnams la ngas ni de ma bstan/ /zhes bya ba ni gnyis pa tshigs su bcad pas mdor bstan pa nyid do/ /tshigs su bcad pa 'di'i rnam par bshad pa yang bstan bcos rnams las so so nas mi mthun te/ theg pa chen po bsdus pa'i 'grel pa slob dpon ngo bo nyid med kyis byas pa las/ zab pa ni 'jig rten gyi mkhas pa'i blos kyang gting dpag par dka' ba'i phyir ro/ /phra ba ni nyan thos rnams kyis kyang shes par dka' ba'i phyir ro/ /de'i phyir nyan thos la sogs pa la rnam par shes pa 'di ma bstan te/ shin tu phra ba'i thams cad mkhyen pa yongs su mi tshol ba'i phyir ro/ /sa bon thams cad chu bo'i klung lta 'bab/ ces bya ba ni skad cig gcig nas gcig tu brgyud pas rgyun mi 'chad par chu bo'i klung ltar 'bab pa'o/ /byis pa rnams la ngas ni de ma bstan/ /zhes bya ba ni bdag tu lta ba dang bcas pa rnams la rnam par ma phye ba ste/ bdag tu rnam par rtog pa de dag gis de la 'khor ba'i mtha' ji srid pa de srid du rnam pa gcig pa 'gyur ba med pa'i bdag tu 'dzin pa'i phyir ro zhes 'byung ngo / /slob dpon dbyig gnyen gyis mdzad pa'i 'grel pa las/ len pa'i rnam par shes pa zhes bya ba ni ming gi rnam grangs bstan pa'o/ /zab cing phra ba zhes bya ba ni rtogs par dka' ba'i phyir ro/ /sa bon thams cad chu bo'i klung ltar 'bab/ /ces bya ba ni go rims bzhin du 'jug pa'i phyir dang / sa bon thams cad skad cig gcig nas gcig tu chu bo'i klung ltar rgyun mi 'chad par 'jug pa'i phyir ro/ /bdag tu rtog par gyur na mi rung zhes/ / zhes bya ba ni rnam pa gcig tu rgyun mi 'chad pa'i phyir rnam par rtog pas 'dzin par 'gyur ba'o zhes 'byung ngo / /bstan bcos rnam par rig pa tsam du grub pa'i nang nas slob dpon chos skyong gis bshad pa las ni chos rnams kyi sa bon yongs su 'dzin pa dang / dbang po gzugs can len cing gnas byed pa dang / nying mtshams sbyor ba dang / yongs su 'dzin pa'i phyir rnam par shes pa 'di len pa zhes bya ba'o/ /rigs med pa'i sems can dag gi gting dpag par mi nus pa'i phyir zab pa zhes gsungs so/ /zhi ba la phyogs pa'i [(]rags [,]rigs [)]can dag gis khong du chud par mi nus pa'i phyir shin tu phra ba zhes bya ste/ chos thams cad kyi yang dag pa'i sa bon yin pas rkyen gyis bskyod na rnam par shes pa'i rlabs rnams 'byung ste/ rtag par rgyun du chu bo'i klung bzhin du 'bab pa'o/ /byis pa dag ni zhi ba la phyogs pa ste/ de dag gi 'di la rnam par rtog pas bdag tu 'dzin par gyur na ngan 'gro rnams su lhung zhing 'phags pa'i lam la sgrib par 'gyur bar dgongs pa'i phyir bcom ldan 'das kyis rnam par phye ste ma bstan to zhes 'byung ngo / / dgongs pa zab mo nges par 'grel pa'i mdo las chos thams cad kyi mtshan nyid kyi le'u ste bzhi pa'o/ / //bam po nyi shu gnyis pa/ le'u 'di rnam par bshad pa yang rnam pa gnyis su dbye ste/ le'u nyid kyi ming rnam par bshad pa dang / mdo nyid kyi tshig gi don rnam par bshad pa'o/ /chos thams cad kyi mtshan nyid kyi le'u zhes bya ba la yang bshad pa rnam pa gnyis yod de/ kha cig na re ngo bo nyid ni rnam pa gsum ste/ gcig kho na ma yin pa'i phyir thams cad ces bya ba gsungs so/ /thams cad kyang rang gi ngo bo mtshan nyid 'dzin cing dpe lugs kyis sems can gyi shes pa bskyed pa'i chos zhes bya'o/ /mtshan nyid ni 'di lta ste/ ngo bo nyid kyi mtshan nyid dam/ yang na mtshan nyid ni dbyibs kyi mtshan nyid de/ 'di lta ste/ kun brtags la sogs pa ni chos thams cad kyi dbyibs kyi mtshan nyid yin pas mdor bsdu na ngo bo nyid rnam pa gsum la thams cad ces bya ste/ 'di ni bdag po'i dbang du mdzad nas rnam par bshad pa yin te/ 'di ltar ngo bo nyid re rer gyur cing / thams cad ma yin pa'i phyir ro zhe'o/ /yang na kha cig na re de la chos thams cad ces bya ba ni mdor bsdu na rnam pa gnyis te/ 'dus byas dang 'dus ma byas la sogs pa'o/ /bsdus pa dang rgyas pa yang ma yin par ni lnga ste/ sems dang sems las 'byung ba'i chos la sogs pa'o/ /rgyas par bya na chos brgyad de/ /rnam par shes pa brgyad la sogs pa'o/ /ngo bo nyid gsum po 'di chos thams cad kyi ngo bo nyid kyi mtshan nyid yin pa'i phyir/ chos thams cad kyi mtshan nyid ces bya'o zhe'o/ /bshad pa 'di dang sbyar na ngo bo nyid rnam pa gsum las ngo bo nyid rnam pa snga ma gnyis ni thams cad kyi mtshan nyid ces bya ba las yongs su 'dzin pa'i rnam par bshad pa yin te/ ngo bo nyid gnyi ga yang chos thams cad dang ldan pa'i phyir ro/ /phyi ma yongs su grub pa'i ngo bo nyid ni chos thams cad kyi mtshan nyid ces bya bas bdag po'i dbang du mdzad nas bshad pa yin te/ 'di ltar chos thams cad kyi mtshan nyid yin pa'i phyir ro/ /de ltar bshad pa rnam pa gnyis yod mod kyi/ bshad pa ni phyi ma bzang ste/ 'og nas mdo las gsungs pa dag dang rjes su mthun zhing 'gal ba med pa'i phyir/ 'og nas mdo las kyang kun brtags dang / gzhan gyi dbang la thams cad ces gsungs shing yongs su grub pa'i ngo bo nyid la ni chos thams cad kyi mnyam pa nyid kyi de bzhin nyid ces gsungs pa yin no/ /le'u 'di las chos thams cad kyi mtshan nyid kyi rigs pa rgya cher ston par mdzad pa'i phyir chos thams cad kyi mtshan nyid kyi le'u zhes bya'o/ /dgongs pa zab mo rnam par dgrol ba'i mdo las ni 'phags pa byang chub sems dpa' yon tan gyi tshal gyis zhus pa'i le'u zhes 'byung ste/ rgya gar gyi dpe las tha dad pa 'di lta bu dag yod pa'i phyir ro/ /de nas byang chub sems dpa' yon tan 'byung gnas kyis/ bcom ldan 'das la 'di skad ces gsol to/ /bcom ldan 'das kyis ji skad du chos rnams kyi mtshan nyid la mkhas pa'i byang chub sems dpa' zhes gsungs na zhes bya ba 'di man chad ni gnyis pa mdo'i tshig gi don yang dag par bshad pa yin no/ /yongs su brtag par bya ba'i yul la rnam pa gnyis te/ don dam pa dang kun rdzob kyi bden pa'i yul dang / yod pa dang med pa'i ngo bo nyid kyi yul zhes bstan pa la/ de yan chad du don dam pa dang / kun rdzob kyi yul rnam pa gnyis bstan nas/ 'di man chad ni yod pa dang med pa'i ngo bo nyid kyi yul ston par mdzad de/ de yang sngar ni yod pa ni ngo bo nyid ston par mdzad de/ de ni ngo bo nyid rnam pa gsum po nyid do/ /de'i 'og tu ni med pa'i ngo bo nyid ston par mdzad de/ de ni ngo bo nyid med pa rnam pa gsum po dag nyid do/ /le'u gnyis po dag las kyang yod pa la brten nas med pa 'jog par mdzad de/ de yang yod pa'i ngo bo nyid rtsa ba yin pas sngar ston par mdzad la/ med pa'i ngo bo nyid ni yan lag yin pa'i phyir phyis ston par mdzad de/ rigs pa de'i phyir slob dpon dbyig gnyen gyis mdzad pa'i tshig le 'ur byas pa sum cu pa las/ ngo bo nyid ni rnam gsum gyis/ /ngo bo nyid med rnam gsum la/ dgongs nas chos rnams thams cad ni/ /ngo bo nyid med bstan pa yin/ /zhes 'byung ba yin no/ /le'u 'di gcig kyang rnam pa gnyis su dbye ste/ byang chub sems dpas zhu ba gsol ba dang / de bzhin gshegs pas lan yang dag par gsungs pa'o/ / zhu ba gsol ba la yang rnam pa gnyis su dbye ste/ gang zhu ba bstan pa nyid smos pa dang / bstan pa ji lta ba bzhin du zhu ba gsol ba ste/ 'di ni dang po'o/ /mdo'i tshig 'di yang rnam pa gnyis kyis bstan te/ dus la brten nas zhu ba po dang lan gsungs pa'i rnam par 'byed pa'o/ /dgongs pa zab mo rnam par dgrol ba bstan pa'i mdo las yon tan gyi tshal zhes bya ba ni 'di ltar yon tan gyis gang zag yongs su smin par byed pa ji ltar shing mang po las tshal du gyur pa bzhin pas na dpe dang don gnyi ga smos pa'i phyir yon tan gyi tshal zhes bya'o zhes 'byung ngo / /'dir yon tan 'byung gnas zhes bya ba ni bskal pa dpag tu med pa nas yon tan gyi rgyu bsags pas 'di ni rgyu las ming du btags pa ste/ bsod nams dang ye shes kyi tshogs yon tan rnams kyi gzhi rnam pa gnyis bsags pa'i phyir yon tan 'byung gnas zhes bya'o/ /chos rnams kyi mtshan nyid la mkhas pa'i byang chub sems dpa' zhes bya ba ni gang zhus pa'i bstan pa nyid smos pa ste/ chos rnams kyi mtshan nyid ces bya ba ni brtag par bya ba'i chos bstan pa'o/ /mkhas pa'i byang chub sems dpa' zhes bya ba ni brtags pa'i gang zag bstan pa'o/ /chos rnams kyi mtshan nyid la mkhas pa'i byang chub sems dpa' zhes bgyi ba ji tsam gyis na chos rnams kyi mtshan nyid la mkhas pa'i byang chub sems dpa' zhes bgyi lags/ de bzhin gshegs pa yang ji tsam gyis na de dag la chos rnams kyi mtshan nyid la mkhas pa'i byang chub sems dpa' zhes 'dogs lags/ de skad ces gsol pa dang zhes bya ba ni gnyis pa bstan pa ji lta ba bzhin du zhu ba la gsol ba'o/ /mdo'i tshig 'di yang rnam pa gnyis su dbye ste / gang zhu ba bstan pa nyid smos pa dang / ci tsam gyis na zhes bya ba la sogs pas ni zhu ba nyid kyi tshig yang dag par bstan pa'o/ /zhu ba gsol ba yang rnam pa gnyis yod de/ byang chub sems dpa'i gnas skabs gang gdags pa zhu ba dang / gang la mkhas pa'i ming 'dogs pa zhu ba'o/ /yang na snga ma ni rjod par byed pa'i don zhus pa'o / /phyi ma ni rjod par byed pa'i bstan pa zhus pa'o/ /de nas bcom ldan 'das kyis byang chub sems dpa' yon tan 'byung gnas la 'di skad ces bka' stsal to zhes bya ba 'di man chad ni/ gnyis pa de bzhin gshegs pas lan yang dag par gsungs pa'o/ /'di yang rnam pa gnyis kyis bstan te/ zhus pa las bsngags pa brjod nas bshad par gnas pa dang 'di lta ste/ chos rnams kyi mtshan nyid ni zhes bya ba man chad kyis zhus pa bzhin du lan yang dag par gsungs pa bstan pa'o/ /dang po la yang rnam pa gsum du dbye ste/ zhu ba gsol pa dang / lan gsungs pa smos pa dang / zhu ba gsol ba'i phan yon gyi bsngags pa brjod pa dang / mnyan par bskul zhing bshad par snang ba ste/ 'di ni dang po'o/ /yon tan 'byung gnas khyod de ltar skye bo tshad med pa la phan pa dang / bde ba dang / 'jig rten la snying brtse ba dang / lha dang mi dang / lha ma yin la sogs pa'i don dang / phan pa dang bde ba'i phyir/ de bzhin gshegs pa la 'di ltar don zab mo 'dri ba ni legs so zhes bya ba ni/ gnyis pa zhu ba gsol pa'i phan yon gyi bsngags pa brjod pa'o/ /mdo'i tshig 'di yang rnam pa gnyis su dbye ste/ zhu ba gsol ba la phan yon che bar bsngags pa dang / don zab mo zhus pa'i legs pa'i bsngags pa ste/ gong ma bzhin du rig par bya'o/ /khyod legs par nyon cig dang / ngas khyod la chos rnams kyi mtshan nyid bshad par bya'o zhes bya ba ni gsum pa mnyan par bskul zhing bshad par gnang ba'o/ /'di lta ste/ chos rnams kyi mtshan nyid ni mdor bsdu na rnam pa gsum mo zhes bya ba 'di man chad ni gnyis pa bzhin du lan yang dag par gsungs pa'o/ /'di yang rnam pa gnyis su dbye ste/ brtag par bya ba las brtsams nas/ chos rnams kyi mtshan nyid rnam par 'byed pa dang / gzhan yang yon tan 'byung gnas zhes bya ba man chad kyis brtags pa'i gang zag las brtsams nas mkhas pa'i byang chub sems dpa' rab tu bstan pa'o/ /dang po la yang rnam pa gnyis su dbye ste/ don bstan pa dang / dpes bstan pa'o/ /don bstan pa la yang rnam pa gsum ste/ sgo bstan nas bstan pa smos pa dang / grangs zhu zhing ming bkod pa dang / go rims bzhin du rnam par phye ste bshad pa'o/ /'di ni dang po ste/ mdor bsdus te gsungs pa'i bshad pa yang rnam pa gnyis te dang po ni/ rgyas pa bsdus pa ste/ bsdus pa ni chos thams cad ces bya ba'o / /rgyas pa ni chos yod mod kyi de yang mdor bsdu na ngo bo nyid rnam pa gsum mo/ /'dir chos brgya la ltos nas/ de'i phyir mdor bsdu na zhes bya ba gsungs so/ /gnyis pa ni / dgongs pa bsdus pas sdud pa zhes bya ste/ de'i phyir/ bstan bcos theg pa chen po bsdus pa las/ 'di lta ste/ shes bya'i mtshan nyid ni mdor bsdu na rnam pa gsum ste zhes 'byung ba yin te/ slob dpon ngo bo nyid med kyis 'grel pa las/ mdor bsdu na rnam pa gsum mo zhes bya ba ni/ 'di lta ste/ chos thams cad ni mdor bsdu na yongs su shes par bya ba dang / yongs su spang bar bya ba dang / mngon sum du bya ba'i bye brag gi phyir ro zhes bshad do/ /gsum gang zhe na zhes bya ba ni gnyis pa grangs zhu zhing ming bkod pa ste/ 'di yang sngar ni grangs zhus pa de'i 'og tu ming bkod pa ste/ 'di ni grangs zhus pa'o/ /kun brtags pa'i mtshan nyid dang / gzhan gyi dbang gi mtshan nyid dang / yongs su grub pa'i mtshan nyid do zhes bya ba ni gnyis pa ming bkod pa'o/ /mtshan nyid gsum po de dag gi ming yang spyi dang bye brag yod de/ de la mtshan nyid rnam pa gsum zhes bya ba ni spyi'i ming ste/ gsum pa ni grangs smos pa'o/ /mtshan nyid ni bdag nyid kyi ngo bo nyid do/ /yang mtshan nyid ni dbyings kyi mtshan nyid do/ /rnam par bshad pa rnam pa drug las grangs dang bcas pa'i dbang du mdzad nas rnam par bshad pa'o/ /zhib tu ni gzhan nas mtshan nyid bstan pa dag las 'byung ba bzhin du rig par bya'o/ /de la bye brag gi ming zhes bya ba yang dang po ni kun brtags pa'i mtshan nyid de/ bstan bcos theg pa chen po bsdus pa las/ ji ltar na kun brtags pa yin la/ ci'i phyir na kun brtags pa zhes bya zhe na/ yid kyi rnam par shes pa kun du rtog pa dpag tu med pa'i rnam pa can gyis phyin ci log 'byung ba nyid yin pa'i phyir kun du brtags pa zhes bya'o/ / rang gi mtshan nyid yang dag par med pa la kun du rtog pa tsam du dmigs pas de'i phyir kun du brtags pa zhes bya'o zhes bshad pa lta bu ste/ 'dis ni dris pa rnam pa gnyis kyi lan cig car smos pa yin no/ /yang na go rims bzhin du dris tshig gnyis kyi lan btab pa yin no/ /slob dpon dbyig gnyen gyis 'grel pa las/ dpag tu med pa'i rnam pa can zhes bya ba ni/ 'di lta ste/ spyod yul thams cad kyi rnam pa'i mtshan nyid do/ /yid kyi rnam par shes pa nyid la kun du rtog pa zhes bya ba ni 'di lta ste/ yid kyi rnam par shes pa nyid la kun du rtog pa zhes bya bar bstan pa'o/ /phyin ci log 'byung ba'i mtshan nyid ces bya ba ni 'di lta ste/ yang dag pa ma yin pa phyin ci log gi dmigs par bya ba'i yul gyi mtshan nyid do/ /rang gi mtshan nyid yang dag par med pa zhes bya ba ni/ de'i bdag nyid yang dag par med pa'o/ /kun du rtog pa tsam du dmigs pa zhes bya ba ni nor ba'i rnam par shes pas brtags pa nyi tshe yod par 'gyur ba'o zhes 'byung ngo / /slob dpon ngo bo nyid med kyis 'grel pa las ni/ dpag tu med pa'i rnam pa can zhes bya ba ni bdag dang / chos rnam pa sna tshogs mtha' yas pa yul du snang ba ste / kha cig na re gzhan gyi dbang gi rgyu dang / rkyen gyi bdag dang / chos so zhes zer ba kha cig ni/ kun brtags pa'i bdag dang chos so zhes zer ro/ /yid kyi rnam par shes pa kun du rtog pa zhes bya ba ni 'di lta ste/ yid kyi rnam par shes pa nyid la kun du rtog pa zhes bshad pa'o/ /phyin ci log 'byung ba'i mtshan nyid ces bya ba ni/ 'di lta ste/ nor pa'i rnam par shes pa gzung ba dang / 'dzin pa'i don gyi rnam par 'byung ba'i rgyu ste/ kha cig na re/ kun du brtags pa'i yul gyi don gyi rnam pa las/ phyin ci log nor pa'i rnam par shes pa 'byung ba'i rgyu'o zhe'o/ /kha cig ni kun du brtags pa dpag tu med pa'i rnam pa can dang / gzhan gyi dbang gi mtshan nyid kyi lta ba dang / rgyu mtshan skyed pa'i rgyu'o zhe'o/ /kun du brtags pa zhes bya'o zhes bya ba ni 'di lta ste/ kun du rtog pa'i don gyi rnam pa nyid kun du brtags pa'i ngo bo nyid ces bya ste/ rang gi mtshan nyid ni yang dag par med kyi/ kun du brtags pa'i gzugs brnyan snang ba'i mtshan nyid kho na dmigs pa'i phyir kun du brtags pa zhes bya'o zhes 'byung ngo / /bstan bcos rnam par rig pa tsam du grub pa las ni/ kun du rtog pa'i phyir don gyi rnam pa nyid kun brtags zhes bya ste/ yang dag pa ma yin pa kun du rtog pa la brtags pas phung po dang khams dang skye mched la sogs pa de dag thams cad la chos sam/ bdag gi ngo bo nyid du brtags pa'i bye brag la spyir kun brtags pa'i ngo bo nyid ces bya'o zhes 'byung ngo / /kun du brtags pa de la yang / /bshad pa rnam pa gnyis yod de/ /kha cig na re rnam par shes pa brgyad dang sems las byung ba zag pa dang bcas pas bsdus pa ni yang dag pa ma yin pa kun du rtog pa dag la rang gi ngo bo nyid du brtags pa'i phyir dang / gzung ba dang 'dzin pa lta bur snang ba'i phyir dang / kun gzhi la kun du brtags pa'i ngo bo nyid yang dag pa ma yin pa brtags pa sa bon yod la dmigs par gyur pa zhes bshad pa'i phyir ro zhes zer te/ 'di ni slob dpon blo brtan gyis bshad pa'i don to/ /yang kha cig ni rnam par shes pa drug pa dang bdun pa'i sems kyi rnam pas bdag dang chos su 'dzin pa ni kun brtags pa yin pas yid kyi rnam par shes pa 'ba' zhig la kun du brtags pa zhes bshad pa'i phyir ro zhes zer te/ 'di ni slob dpon chos skyong gis bshad pa'i gzhung ngo / /dgongs pa zab mo rnam par dgrol ba'i mdo las ni yang dag pa ma yin pa kun du rtog pa'i mtshan nyid dang / rgyu dang rkyen gyi mtshan nyid dang / don dam pa'i mtshan nyid ces 'byung ngo / /slob dpon yang dag bden pas bsgyur ba'i bstan bcos rnams las ni rnam par rtog pa'i ngo bo nyid dang / gzhan gyi dbang gi ngo bo nyid dang / de kho na'i ngo bo nyid ces 'byung ngo / /'phags pa lang kar gshegs pa'i mdo las/ yang dag pa ma yin pa'i ngo bo nyid dang rten cing 'brel par 'byung ba'i ngo bo nyid dang / grub pa'i ngo bo nyid ces 'byung ba ni lo tsA ba dag gi bsam pa tha dad pa'i phyir ro/ /'dir kun brtags zhes bya ba yang brtags pa'i don dang sbyar na ni yongs su 'dzin pa gzung ngo / kun brtags zhes brjod na ni bdag po'i dbang du byas te bshad pa'o/ /gal te brtags pa ngo bo nyid la ltos na ni las yongs su 'dzin pa'i rnam par bshad pa yin te/ brtags pa nyid ngo bo nyid yin pa'i phyir ro/ /gnyis pa gzhan gyi dbang zhes bya ba yang / bstan bcos theg pa chen po bsdus pa las gal te rnam par rig pa tsam don snang ba'i gnas gzhan gyi dbang gi ngo bo nyid yin na de ji ltar yin ci'i phyir na gzhan gyi dbang zhes bya zhe na/ rang gi bag chags kyi sa bon las skye ba yin pas de lta bas na rkyen gzhan gyi dbang byed do/ /skyes nas kyang skad cig las lhag par bdag nyid gnas par mi nus pa'i phyir gzhan gyi dbang zhes 'byung ste/ slob dpon dbyig gnyen gyis mdzad pa'i 'grel pa las/ rang gi rgyu dang rkyen las skyes la skyes nas kyang thang cig tsam du yang gnas par mi nus pas gzhan gyi dbang zhes bya'o zhes bshad do/ /slob dpon ngo bo nyid med kyis 'grel pa las ni 'di lta ste/ kun du brtags pa mngon par brjod pas yongs su bsgos pa'i sa bon las skye ba dang / rang gi sa bon la brten nas gzhan dag skye ba'i phyir gzhan gyi dbang zhes bya ste/ /'dis ni de'i bdag nyid gzhan la brten nas skye bar bstan to/ /skyes nas kyang skad cig las lhag par bdag nyid gnas par mi nus zhes bya ba 'dis de'i bdag nyid gzhan la brten nas gnas par bstan te/ rgyu 'di nyid kyi phyir gzhan gyi dbang zhes bya'o zhes 'byung ngo / /de la gnas pa zhes bya ba yang slob dpon mchog gi sdes bshad pa'i don dang sbyar na skyes nas skad cig phan chad logs shig tu gnas pa'i dus rnam pa gzhan la brten nas gnas pa zhes bya'o zhes bshad do/ /slob dpon chos skyong gis bstan pa'i gzhung las ni skyes pa nyid ni skad cig tsam du yang bya ba dang ldan pa'i phyir don gyi gnas pa zhes bshad do zhes ston te/ 'dus byas kyi chos rnams ni rgyu la brten rkyen la ltos nas skye zhing 'phel zhing 'byung bas gzhan gyi dbang zhes bya ste/ de'i phyir rab tu byed pa sum cu pa las/ gzhan gyi dbang gi ngo bo nyid/ /rnam rtog yin te rkyen las byung / /zhes 'byung ste/ slob dpon chos skyong gis 'grel pa las/ gzhan gyi dbang zhes bya ba ni rkyen las 'byung ba'i phyir gzhan gyi dbang zhes bya'o zhes 'byung ngo / / gsum pa yongs su grub pa'i ngo bo nyid ces bya ba yang bstan bcos theg pa chen po bsdus pa las/ gzhan du mi 'gyur ba'i phyir dang / rnam par dag pa'i dmigs pa yin pa'i phyir dang / dge ba'i chos thams cad kyi mchog yin pa'i phyir mchog gi don gyis yongs su grub pa'i ngo bo nyid ces bya'o zhes 'byung ste/ slob dpon dbyig gnyen gyis mdzad pa'i 'grel pa las/ gzhan du mi 'gyur ba'i phyir zhes bya ba ni brdzun pa'i dngos po med pa ste/ brdzun pa med pa'i blon po bzhin no/ /mchog gi don gyi yongs su grub pa zhes bya'o zhes bya ba ni 'di lta ste/ rnam par dag pa'i dmigs pa yin pa'i phyir dang / mchog gi ngo bo nyid yin pa'i phyir yongs su grub pa zhes bya'o zhes 'byung ngo / /slob dpon ngo bo nyid med kyis 'grel pa las ni yongs su rdzogs par grub cing de kho na nyid kyi ngo bo nyid do zhes 'byung ste/ mdor bsdus pas dpe ni ma bstan te/ gzhan ni slob dpon dbyig gnyen gyis bshad pa dang mthun no/ /bstan bcos rnam par rig pa tsam du grub pa las ni stong pa nyid kyi bar du phye ba chos rnams kyi de kho na nyid yongs su rdzogs pa dang yongs su grub pa ni yongs su grub pa zhes bya'o/ /'dis ni thams cad du brtags pa dang / bdag nyid brdzun pa ma yin par bstan cing rang dang spyi'i mtshan nyid dang / nam mkha' dang bdag la sogs pa las rnam par 'byed pa yin no zhes 'byung ste/ de la stong pa nyid gnyis kyis rab tu phye ba zhes bya ba ni ngo bo nyid mdor bstan pa ste/ don rnam pa gsum dang ldan pa'i phyir yongs su grub pa zhes bya'o/ /dang po ni yongs su rdzogs pa'o/ /'dis ni kun du khyab pa'i don bstan te/ gzugs kyi thogs pa dang bcas pa la sogs pa'i rang gi mtshan nyid las rnam par 'byed do/ /gnyis pa ni yongs su grub pa'o/ /'dis ni rtag pa'i don bstan te spyi'i mtshan nyid mi rtag pa la sogs pa las rnam par 'byed do/ /de dag spyi'i mtshan nyid yin mod kyi rtag pa med pa'i phyir ro/ /gsum pa ni chos rnams kyi de kho na nyid do/ /'dis ni brdzun pa ma yin par bstan te/ nam mkha' dang mu stegs can gyi bdag la sogs pa las rnam par 'byed do/ /de dag rtag tu khyab pa dang rtag par ston pa byed kyang brdzun pa yin pa'i phyir ro/ /gzhan yang bstan bcos rnam par rig pa tsam du grub pa las/ zag pa med pa'i 'dus pa'i phyin ci log dang gtan du bral ba nus pa khyad par can kun du khyab pa yang ming 'di thob pa yin no zhes 'byung ste/ mdo 'di las ni dang por bstan pa yin gyi phyi ma ni ma yin no/ /de la ming thob par rnam par bshad pa ni thams cad kyang las yongs su 'dzin pa'i rnam par bshad pa dang ldan pa yin te/ kun brtags nas yongs su grub pa'i bar du kun kyang ngo bo nyid yin pa'i phyir ro/ /chos rnams kyi kun brtags pa'i mtshan nyid gang zhe na zhes bya ba 'di man chad ni/ gnyis pa go rims bzhin du mtshan nyid gsum rnam par phye nas bshad pa ste/ mtshan nyid gsum rnam par phye ste bshad pa nyid kyis rnam pa gsum du dbye'o/ /mtshan nyid dang po yang zhus pa dang lan gyis bstan te/ 'di ni dang po zhus pa'o/ /'di lta ste chos thams cad la ming dang brdar rnam par gzhag pas rang gi ngo bo nyid dang bye brag tu ji tsam du rjes su tha snyad 'dogs pa gang yin pa'o zhes bya ba ni gnyis pa lan du gsungs pa'o/ /'di ltar chos thams cad la yang dag par rang gi ngo bo nyid med kyang / yang dag pa ma yin gyi sems kyi rjes su ming dang brdas bdag dang / chos kyi rang gi ngo bo nyid rnam par 'jog ste/ ji ltar kha cig bdag go zhes smra ba'am/ yang na gzugs la sogs pa la bdag dang chos kyi rang bzhin ngo bo nyid ces 'dogs pa dang / kha cig brtags pa'i bdag go yang dag pa'i bdag go/ /gzugs bstan du yod pa'o/ /bstan du med pa'o zhes bya ba la sogs pas bdag dang chos kyi bye brag tu brjod pa lta bu ste/ de ltar brdas rang gi ngo bo nyid dang / bye brag tu rnam par gzhag pas 'jig rten na sems can rnams rjes su tha snyad 'dogs pa yin no/ /bstan bcos rnam par rig pa tsam du grub pa las/ yang dag pa ma yin pas phung po dang skye mched dang khams la sogs pa la bdag dang chos kyi rang gi ngo bo nyid dang bye brag tu brtags pas na yang dag pa ma yin pa des na rang gi ngo bo nyid dam bye brag tu brtags pa gang yin pa de ni mdor bsdu na kun brtags pa'i ngo bo nyid ces bya'o zhes 'byung ste/ rang gi ngo bo nyid dang bye brag gi don rgya cher bshad pa ni theg pa chen po bsdus pa'i 'grel pa slob dpon dbyig gnyen dang / slob dpon ngo bo nyid med kyis mdzad pa dang / rnal 'byor spyod pa'i sa las bstan pa bzhin du rig par bya'o/ /chos rnams kyi gzhan gyi dbang gi mtshan nyid gang zhe na zhes bya ba la sogs pas ni gnyis pa gzhan gyi dbang bstan to/ /'di yang zhus pa dang lan gyis bstan te 'di ni zhu ba gsol ba'o/ /'di lta ste chos thams cad kyi rten cing 'brel par 'byung ba nyid de/ 'di yod pa'i phyir 'di yod la/ 'di skyes pa'i phyir 'di skye ba 'di lta ste/ ma rig pa'i rkyen gyis 'du byed rnams zhes bya ba nas/ sdug bsngal gyi phung po chen po 'ba' zhig pa 'di 'byung bar 'gyur ro zhes bya ba'i bar gang yin pa'o zhes bya ba ni gnyis pa lan du gsungs pa'o/ /mdo'i tshig 'di yang rnam pa gnyis su dbye bas dang po ni spyi'i mtshan nyid kyi bdag nyid bstan pa ste/ 'di ltar rten cing 'brel bar 'byung ba las nyon mongs pa dang las dang skye ba'i kun nas nyon mongs pa thams cad 'byung ste/ rkyen las skye ba'i phyir thams cad kyang gzhan gyi dbang zhes bya'o/ /gzhan gyi dbang de yang brjod na rnam pa gnyis yod de/ kun nas nyon mongs pa dang rnam par byang ba'o/ /de'i phyir bstan bcos rnam par rig pa tsam du grub pa las/ zag pa dang bcas pa dang zag pa med pa la kun kyang gzhan gyi dbang yin te/ rkyen mang po gzhan la brten nas 'byung ba'i phyir ro/ /tshig le'ur byas pa las rnam rtog yin te/ rkyen las byung zhes bya bas ni re zhig kun nas nyon mongs pa'i phyogs kyi gzhan gyi dbang bstan par rig par bya ste/ mdo 'di las kyang de bzhin du kun nas nyon mongs pa bstan pa yin gyi rnam par byang ba ni ma yin no/ /de la 'di yod pa'i phyir zhes bya ba la sogs pas ni dngos po bstan nas/ rnam par phye ste bshad pa'o/ /de la tshig snga ma gnyis bye brag yod pa yang thams cad yod par smra ba'i gzhung mdzod kyi bstan bcos las ji skad du/ ci'i phyir bcom ldan 'das kyis tshig snga ma gnyis gsungs she na/ smras pa/ 'di yod pa'i phyir 'di yod la 'di skyes pa'i phyir 'di skye ba rab tu bstan pa ste/ rten cing 'brel par 'byung bar nges pa nyid du shes pa'i phyir ma rig pa la brten nas ni 'du byed rnams yod par 'gyur ba yin gyi / ma rig pa las gud na 'du byed rnams yod pa ma yin pas so/ /gzhan yang yan lag rnams brgyud cing 'byung ba rab tu bstan pa yin te/ 'di ltar yan lag 'di yod pas yan lag de yod par 'gyur la yan lag de skyes pa'i dbang gis yan lag gzhan rnams kyang skye bar rab tu bstan pas so/ /gzhan yang mtha' gsum po dag tu skye ba rab tu bstan pa yin te/ sngon gyi mtha' la brten nas/ da ltar mtha' yod par 'gyur ba yin pas / da ltar gyi mtha' skyes pa'i dbang gis ni phyi ma'i mtha' skye bar rab tu bstan pas so/ /gzhan yang nye bar brgyud pa'i rkyen gnyis rab tu bstan pa yin te/ 'di ltar ma rig pa'i de ma thag pa las 'du byed skye ba'am/ yang na phan tshun gyi stobs kyis 'du byed rnams skye bas so/ / kha cig na re ma rig pa'i yan lag gi mjug thogs su 'du byed kyi yan lag 'byung ba ni de ma thag pa las skye ba zhes bya'o/ /'du byed kyis ma rig pa skyes pa las lung du mi ston pa'i sems kyi 'og tu 'du byed kyi yan lag 'byung ba ni phan tshun stobs kyis 'du byed yan lag 'byung ba zhes bya'o zhe'o/ /kha cig na re ma rig pa 'du byed la ltos pa ni de ma thag pa las skye ba zhes bya'o zhe'o/ /ma rig pa rnam par shes pa la sogs pa la ltos pa ni phan tshun gyi stobs kyis skye ba zhes bya'o zhe'o/ /slob dpon gzhan kha cig na re/ 'di ltar tshig gnyis po 'di ni rgyu med pa dang / rgyu rtag par smra ba gzhig pa'i ched du gsungs pa yin no zhes zer ro zhes 'byung ste/ so so nas rnam par gzhag pa dang gzhig pa yod pa dag ni bstan bcos de nyid las 'byung ba bzhin no/ /slob dpon rnams kyis tshig 'di gnyis bshad pa las 'byung ba tshig 'di gnyis ni rgyu dang 'bras bu rgyun mi 'chad pa dang / skye ba rab tu bstan pa yin te/ 'di ltar ma rig pa la brten nas 'du byed rnams rgyun mi 'chad de de ltar rgyun mi 'chad pa yang / ma rig pa'i dbang gis skye ba'i phyir 'du byed rnams skye ba yin no/ /de bzhin du gcig gis gcig bskyed pa yang rgya cher bshad par bya ste/ rgya cher rnam par 'byed pa ni bstan bcos yang dag pa'i rigs pa dang mthun pa las bstan pa bzhin du rig par bya'o/ /bstan bcos rnal 'byor spyod pa'i sa las kyang ci'i phyir 'di yod pa las 'di 'byung zhes bya zhe na/ smras pa/ rkyen ma spangs pa las de las gzhan pa skye ba'i don gyi phyir ro/ /ci'i phyir 'di skyes pa'i phyir 'di skye zhes bya zhe na/ smras pa/ rkyen mi rtag pa las de las gzhan pa skye ba'i don gyi phyir ro zhes 'byung ngo / /bstan bcos mngon pa sna tshogs kun las btus pa las mtshan nyid ji lta bu zhe na/ 'di lta ste/ g.yo ba med pa las byung ba'i phyir dang / mi rtag pa'i rkyen las byung ba'i phyir dang / nus pa'i rkyen las byung ba'i phyir rkyen las byung ba'i mtshan nyid yin te/ mtshan nyid de'i phyir bcom ldan 'das kyis 'di yod pas 'di 'byung 'di skyes pa'i phyir 'di skye ba ste/ 'di ltar ma rig pa'i rkyen gyis 'du byed rnams zhes bya ba nas rgya cher bshad pa'i bar du'o/ / 'di yod pas 'di 'byung zhes bya bas ni g.yo ba med pa'i rkyen las 'byung ba'i don bstan pa yin te/ rkyen nyi tshe yod pa'i phyir 'bras bu'i chos yod par zad kyi 'bras bu 'byung bar bya ba'i rkyen g.yo ba ni ci yang med do zhes bya ba'i tha tshig go/ /'di skyes pa'i phyir 'di skye ba zhes pa ni mi rtag pa'i rkyen las byung ba'i don bstan pa yin te/ chos gang yang ma byung ba'i rgyu las 'bras bu 'byung ba ma grub pa'i phyir ro/ /ma rig pa'i rkyen gyis 'du byed rnams zhes bya ba la sogs pa ni nus pa'i rkyen las byung ba'i don bstan te/ chos rnams g.yo ba med cing mi rtag pa yin du zin kyang rkyen gang yang rung ba las 'bras bu thams cad mi 'byung ste/ de ci'i phyir zhe na/ chos rnams kyi nus pa'i bye brag tha dad pas ji skad du/ ma rig pa'i mthu'i phyir 'du byed rnams 'byung ba nas skye ba'i mthu'i phyir rga shi 'byung ba'i bar du gsungs pa lta bu'o zhes 'byung ste/ rgya cher rnam par 'byed pa ni 'phags pa byang chub sems dpa' byams pas zhus pa'i bstan bcos las 'byung ba bzhin du rig par bya'o/ /de la sdug bsngal gyi phung po chen po 'ba' zhig pa 'byung bar 'gyur ro zhes bya ba ni mdzod kyi bstan bcos las/ de ltar 'ba' zhig pa zhes bya bas ni 'du byed tsam du zad kyi bdag dang bdag gi ni ci yang med do zhes bstan pa'o/ /sdug bsngal gyi phung po chen po zhes bya bas ni sdug bsngal bsags pa la thog ma dang tha ma med par bstan pa'o/ /'byung bar 'gyur ro zhes bya bas ni sdug bsngal gyi phung po rnams skye bar bstan pa'o zhes 'byung ngo / /bstan bcos bye brag tu bshad pa chen po las ni gzhan yang rten cing 'brel bar 'byung ba yan lag bcu gnyis pa'i chos 'di dag la ni rtsa ba yang yod/ sdong bu yang yod/ yal ga yang yod/ lo ma yang yod/ me tog kyang yod/ 'bras bu yang yod pas shing ljon pa chen po ji lta ba bzhin no/ /de la rtsa ba ni 'di lta ste/ ma rig pa dang 'du byed do/ /sdong bu ni 'di lta ste/ ming dang gzugs so/ /yal ga ni 'di lta ste/ skye mched drug go/ /lo ma ni 'di lta ste/ reg pa dang tshor ba'o/ /me tog ni 'di lta ste/ srid pa dang len pa dang srid pa'o/ /'bras bu ni 'di lta ste/ skye ba dang rga shi'o/ /rten cing 'brel bar 'byung ba yan lag bcu gnyis po'i chos kyi shing de yang kha cig la ni me tog dang 'bras bu chags pa yang yod/ kha cig la ni me tog dang 'bras bu med pa yang yod/ me tog dang 'bras bu yod pa ni 'di lta ste/ so so'i skye bo dang slob pa rnams so/ /me tog kyang med 'bras bu yang med pa ni 'di lta ste/ dgra bcom pa rnams so zhes 'byung ngo / /bstan bcos rnal 'byor spyod pa'i sa las kyang / rten cing 'brel bar 'byung ba las gang ni sdug bsngal gyi myu gu lta bu yin/ gang ni sdug bsngal gyi myu gu yongs su bsrung ba lta bu yin/ gang ni sdug bsngal gyi shing lta bu yin/ smras pa/ ma rig pa dang 'du byed kyi rkyen gyis rnam par shes pa la sogs pa tshor ba la thug pa rnams ni sdug bsngal gyi myu gu lta bu yin no/ /srid pa la sogs pa tshor ba'i rkyen las byung ba / srid pa las thug pa rnams ni sdug bsngal gyi myu gu yongs su bsrung ba lta bur blta bar bya'o/ /skye ba dang rga shi ni sdug bsngal gyi shing lta bur blta bar bya'o zhes 'byung ngo / /bstan bcos theg pa chen po bsdus pa las ni rnam pa bcu gcig la brten nas gzhan gyi dbang ston te/ de'i phyir de nyid las de la gzhan gyi dbang gi mtshan nyid ni 'di lta ste/ gang kun gzhi rnam par shes pa sa bon gyur pa/ yang dag pa ma yin pa kun du rtog pas bsdus pa'i rnam par rig pa'o/ /de yang gang zhe na 'di lta ste/ lus dang lus can dang za ba po'i rnam par rig pa dang / des nye bar spyad pa'i rnam par rig pa dang / dus kyi rnam par rig pa dang / grangs kyi rnam par rig pa dang / yul gyi rnam par rig pa dang / tha snyad kyi rnam par rig pa dang / bdag dang gzhan gyi bye brag gi rnam par rig pa dang / bde 'gro dang ngan 'gro dang 'chi 'pho dang / skye ba'i rnam par rig pa'o/ /de la lus dang lus can dang / za ba po'i rnam par rig pa gang yin pa dang / des nye bar spyad pa'i rnam par rig pa gang yin pa dang / de'i nye bar spyad pa'i rnam par rig pa gang yin pa dang / dus dang grangs dang yul dang / tha snyad kyis rnam par rig pa gang yin pa de dag ni mngon par brjod pa'i bag chags kyi sa bon las byung ba'o/ /bdag dang gzhan gyi bye brag gi rnam par rig pa gang yin pa de ni bdag tu lta ba'i bag chags kyi sa bon las byung ba'o/ /bde 'gro dang / ngan 'gro dang / 'chi 'pho dang skye ba'i rnam par rig pa gang yin pa de dag ni srid pa'i yan lag gi bag chags kyi sa bon las byung ba'o zhes bya ba nas/ 'di ni gzhan gyi dbang gi mtshan nyid do zhes bya ba'i bar du 'byung ngo / /slob dpon dbyig gnyen gyis mdzad pa'i 'grel pa las/ lus zhes bya ba ni 'di lta ste/ mig la sogs pa'i khams lnga po dag go/ /lus can zhes bya ba ni 'di lta ste/ nyon mongs pa can gyi yid do zhes 'byung ngo / /slob dpon ngo bo nyid med kyis 'grel pa las/ mig la sogs pa'i rnam par shes pa lnga po dag gi gnas yid kyi khams gang yin pa de ni lus can gyi rnam par rig pa zhes bya'o zhes bshad do/ /za ba po ni 'di lta ste/ yid kyi khams so zhes bshad de/ slob dpon ngo bo nyid med kyis 'grel pa las ni yid kyi rnam par shes pa'i gnas yid kyi khams gang yin pa de ni za ba po'i rnam par rig pa zhes bya'o zhes bshad do/ /slob dpon dbyig gnyen gyis des nye bar spyad par bya ba'i rnam par rig pa ni 'di lta ste/ gzugs la sogs pa'i phyi rol gyi skye mched drug go/ /de'i nye bar spyod pa'i rnam par rig pa ni 'di lta ste/ rnam par shes pa'i khams drug go/ /dus kyi rnam par rig pa ni 'di lta ste/ 'khor ba'i rgyun ma chad pa'i ngo bo nyid do zhes bshad de/ slob dpon ngo bo nyid med kyis 'grel pa las/ dus kyi rnam par rig pa ni 'di lta ste/ dus gsum snang ba'o zhes 'byung ngo / /slob dpon dbyig gnyen gyis grangs ni rnam par rig pa ni 'di lta ste/ bgrang ba'i ngo bo nyid do zhes 'byung ste/ slob dpon ngo bo nyid med kyis 'grel pa las ni 'di lta ste/ gcig la sogs pa bgrang ba ltar snang ba'o zhes bshad do/ /slob dpon dbyig gnyen gyis yul gyi rnam par rig pa ni/ 'di lta ste/ snod kyi 'jig rten no zhes bshad do/ /slob dpon ngo bo nyid med kyis 'grel pa las ni grong dang kun dga' ra ba la sogs pa lta bur snang ba'o zhes 'byung ngo / /slob dpon dbyig gnyen gyis tha snyad kyi rnam par rig pa ni 'di lta ste/ mthong ba dang thos pa dang bye brag phyed pa dang / rnam par shes pa'i tha snyad bzhi po dag go/ /'di ltar rnam par rig pa de dag thams cad ni shes bya'i gnas las mngon par brjod pa'i bag chags kyi bye brag gi rgyu byed do/ /bdag dang gzhan gyi bye brag gi rnam par rig pa ni 'di lta ste/ bye brag 'di nyid la brten pas sngar bshad pa'i bdag tu lta ba'i bag chags kyi bye brag gi rgyu byed do zhes bshad de/ slob dpon ngo bo nyid med kyis 'grel pa las ni lus la sogs pa rnam par rig pa la bdag dang bdag gir 'dzin pa'i rgyun ma chad pas bdag dang bdag gi dang / gzhan dang gzhan gyi zhes 'dzin pa'i bye brag yod pa'i phyir ro zhes bshad do/ /dbyig gnyen gyis bde 'gro dang ngan 'gro dang / 'chi 'pho dang skye ba'i rnam par rig pa ni/ 'khor ba na 'gro ba rnam pa sna tshogs kyi bye brag gang yin pa ste/ 'di yang sngar bshad pa'i srid pa'i yan lag gis yongs su bsgos pa'i sa bon gyi bye brag go zhes bshad do/ /slob dpon ngo bo nyid med kyis 'grel pa las ni/ lha dang / mi dang / sems can dmyal ba dang / dud 'gro dang / yi dags kyi 'chi 'pho dang / skye ba lta bur snang ba'o zhes bshad de/ rgya cher ni slob dpon dbyig gnyen dang ngo bo nyid med kyis mdzad pa'i 'grel pa las bshad pa bzhin du rig par bya'o/ /rnam par rig pa 'di dag la bye brag yod pas/ yang slob dpon ngo bo nyid med kyis 'grel pa las/ mig la sogs pa'i rnam par shes pa lnga po dag gnas pa'i yid kyi khams ni lus can gyi rnam par rig pa zhes bya'o/ /yid kyi rnam par shes pa gnas pa'i yid kyi khams gang yin pa de ni zab pa'i rnam par rig pa zhes bya'o zhes 'byung ste/ slob dpon ngo bo nyid med kyis 'grel pa las/ mig la sogs pa'i rnam par shes pa lnga po dag gnas pa'i yid kyi khams zhes bya ba ni kun gzhi rnam par shes pa yin te/ de nyid la lus can gyi rnam par rig pa zhes bya bar dgongs pa'o/ /yid kyi rnam par shes pa gnas pa'i yid kyi khams zhes bya ba ni nyon mongs pa can gyi yid de/ de nyid la za ba po'i rnam par rig pa zhes bya bar dgongs pa'o/ /slob dpon dbyig gnyen gyis bshad pa ni 'di dang mi mthun pas nyon mongs pa can gyi yid ni lus can gyi rnam par rig pa'o zhes bya'o/ / kun gzhi rnam par shes pa ni za ba po'i rnam par rig pa zhes bya'o zhes bshad do/ /ci'i phyir de'i 'grel pa las/ lus can ni 'di lta ste/ nyon mongs pa can gyi yid do/ /za ba po ni 'di lta ste/ yid kyi khams so zhes 'byung ngo / /gzhan yang rnam par rig pa 'di dag gi grangs la bye brag yod de / theg pa chen po bsdus pa'i 'grel pa mi mthun pa rnam pa gcig dang / bstan bcos rnam par rig pa tsam du grub pa las ni bcu gcig go zhes 'byung / bstan bcos theg pa chen po bsdus pa nyid dang sbyar na ni nges pa med do/ /gong du ni bcu gcig ces 'byung la 'og nas ni bcu gnyis zhes 'byung ste/ 'di ltar bde 'gro dang ngan 'gro dang 'chi 'pho dang skye ba'i rnam par rig pa la gnyis su phye ba'i phyir te/ 'di lta ste bde 'gro dang ngan 'gro'i rnam par rig pa dang / 'chi 'pho dang skye ba'i rnam par rig pa'o/ /de'i phyir de nyid las las kyi 'bras bu rnam par smin pa la grangs tshad med pa'i phyir dang / 'chi 'pho dang skye ba myong ba la grangs tshad med pa'i phyir ro zhes bshad do/ /slob dpon ngo bo nyid med kyis 'grel pa las ni/ bde 'gro dang ngan 'gro dang 'chi 'pho dang / skye ba zhes 'byung ste/ phyir dang zhes bya ba bstan pa nyid kyis bcu gnyis su gyur par rig par bya'o/ /slob dpon dbyig gnyen gyis ni/ 'di'i 'grel pa ma mdzad pa'i phyir/ bcu gcig tu bshad kyang 'gal ba med do/ /chos rnams kyi yongs su grub pa'i mtshan nyid gang zhe na zhes bya ba 'di man chad ni gsum pa yongs su grub pa'i mtshan nyid rnam par bshad pa'o/ /'di yang rnam pa gnyis te/ zhus pa dang lan gsungs pa ste/ 'di ni zhu ba gsol ba'o/ /'di lta ste/ chos thams cad mnyam pa nyid kyi de bzhin nyid de zhes bya ba la sogs pas ni gnyis pa lan du gsungs pa'o/ /'di yang rnam pa gnyis su dbye ste/ ngo bo nyid yang dag par bstan pa dang / nus pa khyad par can bstan pa'o/ /'di ni dang po ste/ 'di ltar gong du thams cad du ro gcig pa'i de bzhin nyid kyi ngo bo nyid do zhes gsungs pas so/ /bstan bcos dbus dang mtha' rnam par 'byed pa dang sbyar na yongs su grub pa'i ngo bo nyid ni rnam pa gnyis so zhes bshad de de'i phyir de nyid las yongs su grub pa 'di yang / mdor bsdu na rnam pa gnyis te/ 'dus ma byas dang 'dus byas kyi bye brag yod pa'i phyir ro/ /'dus ma byas kyis ni de bzhin nyid dang mya ngan las 'das pa bsdus te / 'gyur ba med pa'i phyir yongs su grub pa zhes bya'o/ /'dus byas kyis ni 'phags pa'i lam bsdus te/ yul la phyin ci log med pa'i phyir yongs su grub pa zhes bya'o zhes 'byung ba yin no/ /bstan bcos theg pa chen po bsdus pa las yongs su grub pa ni rnam pa bzhi'o zhes bshad de/ de'i phyir de nyid las yongs su grub pa'i ngo bo nyid ji ltar rig par bya zhe na/ rnam par byang ba'i chos rnam pa bzhis bstan par rig par bya ste/ rnam par byang ba'i chos rnam pa bzhi yang rang bzhin gyis rnam par byang ba ni 'di lta ste/ de bzhin nyid dang stong pa nyid dang / yang dag pa'i mtha' dang / mtshan ma med pa dang / don dam pa dang / chos kyi dbyings so/ /dri ma dang bral bas rnam par byang ba ni 'di lta ste/ de nyid sgrib pa'i dri ma thams cad dang bral ba'o de 'thob pa'i lam gyi rnam par byang ba ni 'di lta ste/ byang chub kyi phyogs kyi chos thams cad dang / pha rol tu phyin pa la sogs pa'o/ /de skyed pa'i phyir dmigs pa rnam par byang ba ni 'di lta ste/ theg pa chen po gya nom pa yang dag pa'i chos kyis bstan pa rnams te/ 'di ltar de ni rnam par byang ba'i rgyu yin pa'i phyir kun brtags pa'i ngo bo nyid ma yin no/ /chos kyi dbyings shin tu rnam par dag pa'i rgyu mthun pa yin pa'i phyir gzhan gyi dbang gi ngo bo nyid kyang ma yin no/ /rnam pa bzhi po 'di dag gis rnam par byang ba'i chos thams cad ma lus par bsdus pa yin no/ /'di la tshigs su bcad pa gnyis yod de/ byung brten sgyu ma la sogs bstan/ /brtags la brten nas med pa bstan/ /rnam par dag pa bzhir brten nas/ /yongs su grub pa bstan pa yin/ /rang bzhin dang ni dri ma bral/ /rnam dag lam dang dmigs pa ste/ /rnam dag chos ni thams cad kyang / /mtshan nyid bzhi po dag gis bsdus/ / zhes 'byung ste/ rgya cher ni slob dpon dbyig gnyen dang / ngo bo nyid med kyis mdzad pa'i 'grel pa las 'byung ba bzhin du rig par bya'o/ /mdo 'di nyid las ni chos rnam pa gsum las brtsams nas ngo bo nyid gsum gyi don bstan to/ /bstan bcos dbus dang mtha' rnam par 'byed pa dang / rnam par rig pa tsam du grub pa las ni bden pa bzhi la brten nas ngo bo nyid gsum spyir ston to/ /bstan bcos mngon pa kun las btus pa las ni phung po dang khams dang skye mched kyi chos rnam pa gsum la brten nas ngo bo nyid gsum spyir ston to/ /'phags pa shes rab kyi pha rol tu phyin pa'i mdo las ni/ chos thams cad las brtsams nas ngo bo nyid rnam pa gsum spyir ston par mdzad de/ de'i phyir slob dpon ngo bo nyid med kyis 'grel pa las/ shes rab kyi pha rol tu phyin pa'i mdo las ji skad du bcom ldan 'das kyis byang chub sems dpa' byams pa la bka' stsal pa/ gang gis rnam pa'i mtshan nyid kyi dngos po de dang de dag la kun du brtags pas gzugs so/ /tshor ba'o/ /'du shes so/ /'du byed do/ /rnam par shes pa'o zhes bya ba nas/ sangs rgyas kyi chos thams cad ces bya ba'i bar du sems dang ming dang 'du shes la brten nas tha snyad 'dogs shing kun du brtags pas gzugs rnams kyi rang gi ngo bo nyid ces bya ba nas/ sangs rgyas kyi chos thams cad kyi rang gi ngo bo nyid ces bya ba'i bar du btags pa gang yin pa 'di ni kun brtags pa'i gzugs zhes bya ba nas kun brtags pa'i sangs rgyas kyi chos thams cad ces bya ba'i bar dag yin no/ /gang gis rnam pa'i mtshan nyid kyi dngos po de dang de dag la rnam par rtog pa'i chos tsam mo zhes rnam par rtog pa la brten te/ rten cing 'brel bar 'byung ba nyid du rnam par gzhag nas spros pa bskyed de / btags pa'i ming dang 'du shes kyi tha snyad btags nas 'di ni gzugs so zhes bya ba nas sangs rgyas kyi chos thams cad ces bya ba'i bar gang yin pa 'di ni rnam par rtog pa'i gzugs zhes bya ba nas/ rnam par rtog pa'i sangs rgyas kyi chos zhes bya ba'i bar dag yin no/ /de bzhin gshegs pa rnams 'jig rten du byung yang rung ste/ chos nyid rnam par gzhag chos kyi dbyings rnam par gzhag nas kun du brtags pa des gzugs su btags pa'i phyir rnam par rtog pa'i gzugs 'di dag ni/ /rtag pa rtag pa'i dus dang / ther zug ther zug gi dus su 'di ni de bzhin nyid do/ /rang bzhin med pa nyid do/ /yang dag pa'i mtha' nyid do zhes zer ba gang yin pa 'di ni chos nyid kyi gzugs zhes bya'o/ /kun brtags pa des sangs rgyas kyi chos thams cad ces btags pa'i phyir/ rnam par rtog pa'i sangs rgyas kyi chos thams cad ces bya ba 'di dag ni rtag pa rtag pa'i dus dang / ther zug ther zug gi dus su zhes bya ba nas/ 'di ni chos nyid kyi sangs rgyas kyi chos thams cad ces bya'o zhes bya ba'i bar du ste/ rgya cher mdo las gsungs pa bzhin no zhes 'byung ba yin no/ /de bzhin nyid 'di la byang chub sems dpa' rnams brtun pa'i brtson 'grus kyis rgyu dang rkyen byas pa'i phyir dang / tshul bzhin yid la byed cing legs par bsams pas rgyu dang rkyen byas pa'i phyir gdod de rtogs so/ /de rtogs nas gong nas gong du goms par byas pas bla na med pa yang dag par rdzogs pa'i byang chub kyi bar du yongs su rdzogs par gyur pa gang yin pa'o zhes bya ba 'dis ni gnyis pa nus pa khyad par can rab tu bstan pa'o/ /'di ltar de bzhin nyid de la byang chub sems dpa' rnams tshogs kyi lam gyi gnas skabs na nan tan brtson 'grus bskyed pa dang / sbyor ba'i gnas skabs su phyin ci ma log par bsams pa'i rgyu dang rkyen gyis mthong ba'i lam gyi tshe gdod de rtogs la/ bsgom pa'i lam la brten nas gong nas gong du goms par byas pas mthar phyin pa'i gnas skabs su gdod yongs su rdzogs par gyur pa'o/ /bstan bcos rnal 'byor spyod pa'i sa las ni nus pa rnam pa gsum ston te/ rnam par dag pa mngon du byed pa'i nus pa dang / 'ching ba gnyis rnam par dgrol ba'i nus pa dang / yon tan rab tu 'dren cing bskyed pa'i nus pa ste/ de'i phyir bstan bcos de nyid las 'di lta ste/ rnam par dag par bya ba'i phyir dang / mtshan ma dang gnas ngan len gyi 'ching ba thams cad las rnam par thar bar bya ba'i phyir dang / yon tan thams cad mngon par bsgrub par bya ba'i phyir zhes 'byung ste/ 'di dag go rims bzhin du mthong ba la sogs pa'i lam gsum dang sbyar ro/ /mtshan nyid gsum po 'di dag ngo bo nyid kyi yangs dog kyang so so nas bshad pa mi mthun te/ re zhig slob dpon yang dag bden pa'i bshad pa dang sbyar na de la kun gzhi rnam par shes pa ni gzhan gyi dbang gi ngo bo nyid ces bya'o/ /mig la sogs pa'i rnam par shes pa bdun po dag ni kun du rtog pa'i ngo bo nyid ces bya ste/ gzhan gyi dbang skye ba med pa dang / kun du rtog pa mtshan nyid med pa gang yin pa de ni yongs su grub pa'i ngo bo nyid do/ /gzhan yang mig la sogs pa'i rnam par shes pa brgyad po dag ni gzhan gyi dbang gi ngo bo nyid ces bya'o/ /de dag la rgyu mtshan gyi rnam pa lta bur snang ba gang yin pa de ni kun du rtog pa'i ngo bo nyid ces bya ste/ gzhan gyi dbang gi ngo bo nyid skye ba med pa dang / kun du rtog pa mtshan nyid med pa gang yin pa de ni yongs su grub pa'i ngo bo nyid do/ /gzhan yang mig la sogs pa'i rnam par shes pa brgyad po dag gis lta ba'i rnam pa dang / rgyu mtshan gyi rnam pa gang yin pa de ni gzhan gyi dbang gi ngo bo nyid ces bya'o/ /yang dag pa ma yin pas yul du 'dzin pa gang yin pa de ni kun du rtog pa'i ngo bo nyid ces bya ste/ gzhan gyi dbang gi ngo bo nyid skye ba med pa dang / kun du rtog pa'i mtshan nyid med pa gang yin pa de ni yongs su grub pa'i ngo bo nyid do zhes bshad de/ gong du bshad pa de las don rnam pa gnyis ni rigs pa dang sbyar na de lta ma yin te/ mig la sogs pa'i rnam par shes pa brgyad dang / rgyu mtshan gyi rnam pa rnams ni rkyen las skye bar mtshungs na ci'i phyir/ kun gzhi rnam par shes pa 'ba' zhig la gzhan gyi dbang zhes bshad la / mig la sogs pa'i rnam par shes pa bdun la ni kun du rtog pa'i ngo bo nyid ces bshad/ kun du rtog pa'i mtshan nyid med pa dang / gzhan gyi dbang skye ba med pa yang ngo bo nyid gnyis dang tha mi dad na ci'i phyir de dag la yongs su grub pa'i ngo bo nyid ces bshad/ 'di la sogs pa'i skyon mang du yod de bshad kyis mi rdzogs so/ /de las gzhan pa'i bshad pa rnams ni mangs kyis dogs te 'dir ma brjod do/ / 'dir bstan pa rnams las ngo bo nyid rnam pa gsum bstan pa de yang mdor bsdu na sgo rnam pa gnyis yod de / dang po ni/ kun nas nyon mongs pa la phyin ci ma log par yongs su 'dzin pa'i sgo ste/ 'di ltar yang dag pa ma yin pas bdag dang chos yang dag par yod pa nyid du 'dzin pa de dag yod pa ma yin yang / yang dag pa ma yin pa'i sems kyis rnam par gzhag pa yin pa'i phyir yod pa zhes bshad de/ de dag thams cad ni kun du brtags pa zhes bya'o/ /kun nas nyon mongs pa zag pa dang bcas pa'i chos rkyen las skye ba thams cad ni gzhan gyi dbang zhes bya ste/ rgyu la brten cing rkyen la ltos nas skye ba'i phyir ro/ /'dus byas zag pa med pa la lam gyi bden pa dang / 'dus ma byas thams cad ni yongs su grub pa zhes bya ste/ rnam pa gnyis ka yang phyin ci ma log pa yin pa'i phyir ro/ /gnyis pa ni/ rkyen las skye ba mi 'gyur bar yongs su 'dzin pa'i sgo ste/ 'di ltar yang dag pa ma yin pas bdag dang chos la sogs par 'dzin pa de dag ni sems kyi rjes su yod pa ma yin pa'i phyir/ /kun du brtags pa ngo bo nyid ces bya'o/ /zag pa dang bcas pa'i 'dus byas thams cad ni gzhan gyi dbang gi ngo bo nyid ces bya'o/ /chos thams cad mnyam pa nyid kyi de bzhin nyid ni 'gyur ba'i phyir yongs su grub pa'i ngo bo nyid ces bya'o/ /sgo gong ma gnyis po 'di yang bstan pa rnams las so so nas bshad pa mi mthun pas 'phags pa'i gsung rab kha cig las snga ma bstan la/ phyi ma ma yin pa yang yod de/ 'phags pa lang kar gshegs pa'i mdo las/ ji skad du/ blo gros chen po yang dag pa'i ye shes dang / de bzhin nyid ni mi 'jig pa'i phyir yongs su grub pa'i ngo bo nyid ces bya'o zhes gsungs pa lta bu ste/ bstan bcos dbus dang mtha' rnam par 'byed pa las kyang / 'di dang mthun par ston to/ /'phags pa'i gsung rab kha cig las ni phyi ma bstan la/ snga ma ma yin pa yang yod de bstan bcos rnal 'byor spyod pa'i sa las/ ji skad du/ ngo bo nyid gnyis pa du dag gis bsdus she na/ smras pa/ bzhis bsdus so/ /ngo bo nyid gsum pa du dag gis bsdus she na/ smras pa/ gcig gis bsdus so zhes bstan pa lta bu'o/ /bstan pa kha cig las gnyis ka dang ldan pa yang yod de/ bstan bcos rnam par rig pa tsam du grub pa las/ ji skad du/ rnam rtog yin te rkyen las byung / /zhes bshad pa lta bu ste/ re zhig kun nas nyon mongs pa'i phyogs kyi gzhan gyi dbang bstan pa yin par bya'o / /rnam par byang ba'i phyogs kyi gzhan gyi dbang ni yongs su grub pa yin pa'i phyir ro/ /yang na kun nas nyon mongs pa dang / rnam par byang ba'i sems dang sems las byung ba'i chos rnams ni/ kun kyang kun du rtog pa zhes bya ste/ dmigs pa la sems gtod pa'i phyir ro/ /de nas kun nas nyon mongs pa dang rnam par byang ba'i gzhan gyi dbang thams cad ni 'dir bstan pa'i gzhan gyi dbang gis bsdus pa yin te/ de'i phyir bstan bcos theg pa chen po bsdus pa las gzhan gyi dbang med na/ kun nas nyon mongs pa dang / rnam par byang ba nyid 'grub par mi 'gyur ba'i phyir ro zhes bshad de/ slob dpon dbyig gnyen gyis 'grel pa las/ 'di ltar gzhan gyi dbang gi ngo bo nyid kun brtags su gyur pa'i tshe ni kun nas nyon mongs par 'gyur la/ rnam par rtog pa med pa'i tshe ni rnam par byang bar 'gyur te/ cha gnyis dang ldan pa'i phyir ngo bo nyid gcig tu mi 'grub bo zhes 'byung ste/ slob dpon ngo bo nyid med kyis 'grel pa las kyang 'di dang mthun par ston to/ /mdo 'di las ni/ phyi ma bstan gyi snga ma ni ma yin te/ de bzhin nyid kho na la yongs su grub pa'i ngo bo nyid du gsungs pa'i phyir ro/ /yang na snga ma bstan pa yin gyi/ phyi ma ni ma yin te/ kun nas nyon mongs pa'i chos kho na la rten cing 'brel bar 'byung ba zhes gsungs pa'i phyir ro/ /yang na don gnyi ga dang yang ldan te bshad pa snga ma gnyis kyi phyir ro/ /rgya cher rnam par 'byed pa ni/ ngo bo nyid gsum bstan pa dag las 'byung ba bzhin du rig par bya'o// //bam po nyi shu gsum pa/ rigs kyi bu dper na skyes bu gang zag rab rib can gyi mig la rab rib kyi skyon yod pa lta bur kun brtags pa'i mtshan nyid kyang de bzhin du rig par bya'o zhes bya ba 'di man chad ni/ gnyis pa dpe smos nas bzlas te bshad pa ston to/ /'di yang rnam pa gnyis su dbye ste/ rab rib dang mig yongs su dag pa'i spyod yul mtshan nyid gsum gyis dper bstan pa dang / rigs kyi bu zhes bya ba man chad kyis shel kha dog rnam par bzhir snang ba'i dper bstan pa'o/ /dpe dang po gsum yang rnam pa gsum du dbye ste/ rab rib kyi skyon dang bcas pa'i dpe dang rab rib kyi mtshan ma sna tshogs kyi dpe dang / mig yongs su dag par rang bzhin gyi spyod yul la spyod pa'i dpe'o/ /re re la yang rnam pa gnyis kyis bstan te/ dpe smos pa dang / dpe dang / don du sbyar ba'o/ /'di ni dang po rab rib kyi skyon dang bcas pa'i dpe bstan pa ste/ dpe 'di'i don ni 'di skad du/ 'di ltar mig la rab rib yod pa'i dbang gis ni/ mig gi rnam par shes pa dang / dus mtshungs pa'i yid kyi rnam par shes pa bskyed la/ rnam par shes pa 'di gnyis kyi dbang gis ni skad cig ma gnyis la rnam par rtog pa'i yid kyi rnam par shes pas spu'i 'khor lo la sogs par shes so zhes bstan par 'gyur ro/ /spu'i 'khor lo de yang rnam pa gnyis te/ dang po ni/ rnam par rtog pa'i yid kyi rnam par shes pas brtags pa yin gyi/ yang dag par na spu'i 'khor lor med pa ste/ 'di nyid la/ rab rib kyi skyon zhes bshad pas skyon 'dis kun du brtags pa'i ngo bo nyid kyi dper bstan pa'o/ /gnyis pa ni/ rnam par rtog pa'i yid kyi rnam par shes pa'i gnas dang ltos pa nyid/ spu'i 'khor lo'i mtshan nyid lta bur gyur pas/ rab rib kyi mtshan ma sna tshogs la gzhan gyi dbang gi dper bstan te/ phyis 'og nas bstan pa bzhin du rig par bya'o/ /'dir ni/ skyon la kun brtags pa'i ngo bo nyid kyi dper bstan pa'i phyir/ kun brtags pa'i mtshan nyid kyang de bzhin no zhes gsungs pa yin no/ /yang na rab rib kyi skyon zhes bya ba ni/ rab rib nyid la skyon zhes bya ste/ de ni 'di skad du/ 'di ltar brtags pa'i dbang gis gzhan gyi dbang bskyed pas/ ji ltar rab rib kyi dbang gis/ spu'i 'khor lo la sogs pa snang ba bzhin no zhes bstan te/ de'i phyir bstan bcos rnal 'byor spyod pa'i sa las/ dper na/ mig la rab rib la sogs pa'i skyon yod pa la ni/ skra shad 'dzings pa la sogs pa rab rib kyi mtshan ma mngon sum du dmigs kyi/ gal te de'i skyon med na ni mi dmigs pa bzhin te/ rang gi ngo bo nyid tsam du zad kyi phyin ci log gis 'dzin pa ni med do zhes bshad do/ /ci'i phyir/ gzhan gyi dbang mngon par zhen pa'i ngo bo nyid kyi dpe bstan ce na smras pa/ nor ba med pa yongs su grub pa'i dper bstan pa'i phyir nyes pa med do/ /rab rib dang bcas pa'i mig gi rnam par shes pas/ spu'i 'khor lo mthong ngam zhe na smras pa/ rgya gar yul pa'i slob dpon dag gis bshad pa rnam pa gnyis yod de/ dang po slob dpon blo brtan gyi gzhung gis mig la sogs pa'i rnam par shes pa lnga po dag kyang spu'i 'khor lo dang / zla ba gnyis pa la dmigs so zhes bshad de/ de'i phyir chos mngon pa sna tshogs kun las btus pa las/ mig ser gyi nad kyis btab pa'i mig gi dbang po nyams pas sngon po la ser por mthong ba lta bu'o zhes bshad pa bzhin no zhe'o/ /gnyis pa ni slob dpon chos skyong gis mig la sogs pa'i rnam par shes pa yul yang dag pa las 'byung ste/ mngon sum gyi tshad ma'i phyir ro zhes bshad de/ de'i phyir slob dpon gu Na b+hA bas bstan bcos rnam par rig pa tsam du bstan pa nyi shu pa'i brjed byang mdzad pa las/ bshad pa rnam pa gnyis 'byung ste/ de la kha cig na re rnam par shes pa lnga po dag ni yul yang dag pa kho na la dmigs te/ de lta bas na chos mngon pa'i mdo las/ mig la sogs pa'i rnam par shes pa gang yang yul yang dag pa la mi dmigs par 'byung ba ni med do/ /yid kyi rnam par shes pa la ni dmigs pa rnam pa gnyis yod de/ yang dag pa dang yang dag pa ma yin pa'i yul lo zhes gsungs pa'i phyir rnam par shes pa lnga po dag ni yul yang dag pa kho na la dmigs par rig par bya'o zhe'o/ /kha cig na re rnam par shes pa lnga po dag ni yang dag pa ma yin pa yang dmigs te/ de'i phyir mdo dag las nor ba'i mig gi dbang po dang / mig gi rnam par shes pas kyang / nor ba'i yid kyi rnam par shes pa 'dren cing skyed par byed do/ /nor pa med pa'i mig gi dbang po dang / mig gi rnam par shes pa las kyang / nor pa med pa'i yid kyi rnam par shes pa 'dren par byed do zhes gsungs pas/ de'i phyir rnam par shes pa lnga po dag zla ba gnyis pa dang / nam mkha' la me tog la sogs pa mthong ba yin no zhes 'byung ste/ 'dir skyon la sogs pa bstan pa'i tshig 'di dag ni rnam pa gsum sngar bstan pa bzhin du rig par bya'o/ /dper na rab rib can gyi gang zag de nyid la rab rib mang po'i mtshan ma skra'i 'khor lo 'am sbrang ma'am/ til gyi 'bru 'am/ yang na sngon po dang / ser po dang / dmar po dang / dkar po la sogs pa mtshan ma bye brag tu gyur pa snang ba lta bur ni gzhan gyi dbang gi mtshan nyid kyang de bzhin du rig par bya'o zhes bya ba gnyis pa rab rib kyi mtshan ma sna tshogs kyi dpe bstan pa'o/ /gzhan gyi dbang gi mtshan nyid kyi dpe bstan pa yin pas de bzhin du rig par bya ste/ 'di ltar rab rib can gyi gang zag la skra'i 'khor lo lta bu'i mtshan ma yang dag par yod pa ma yin yang / yang dag pa lta bur snang ba'i phyir/ gzhan gyi dbang gi dpe bstan te/ yod pa ma yin yang yod pa 'dra bar snang ba yang de bzhin du shes par bya'o zhes bya ba'i tha tshig go/ /dper na mig yongs su dag pa'i gang zag mig gi rab rib kyi skyon dang bral bar gyur pas mig yongs su dag pa de rang bzhin gyi spyod yul nor pa med pa la spyod pa lta bur ni yongs su grub pa'i mtshan nyid kyang de bzhin du rig par bya'o zhes bya ba ni gsum pa mig yongs su dag pas rang bzhin gyi spyod yul la spyod pa'i dpe bstan pa ste/ ji ltar mig yongs su dag pa des rang bzhin gyi spyod yul/ sngon po dang ser po la sogs pa'i gzugs rang bzhin gyis rnam par dag pa la spyod cing / spu'i 'khor lo la sogs pa rab rib kyi skyon med pa de bzhin du yongs su grub pa'i ngo bo nyid kyang de bzhin te/ rang bzhin gyis rnam par dag cing gzhan gyi dbang la 'dzin pa med pa'i ngo bo nyid do zhes bya ba'i tha tshig go/ /rigs kyi bu dper na shel yongs su dag pa la ni/ gal te tshon sngon po dang phrad par gyur na/ nor bu rin po che an+da rnyil dang mthon ka chen po lta bur snang bar 'gyur zhing / nor bu rin po che an+da rnyil dang mthon ka chen por log par 'dzin pas kyang sems can rnams rnam par rmongs par byed ces bya ba 'di man chad ni gnyis pa shel kha dog rnam pa bzhir snang ba'i dpes bstan pa'o/ /'di yang rnam pa gnyis kyis bstan te/ dpes bstan pa dang de bzhin du yon tan 'byung gnas zhes bya ba man chad kyis dpe dang don du sbyar ba bstan pa'o/ /dpes bstan pa yang dpe rnam pa bzhi yod pa nyid kyis rnam pa bzhir dbye ste/ 'di ni dang po an+da rnyil dang mthon ka chen po dang mthun par gyur pa'i dpes bstan pa'o/ /mdo'i tshig 'di yang rnam pa lngar dbye zhing / don rnam pa bzhi dang ldan pas don gyi ngo bo nyid gsum gyi dpe bstan pa yin te/ de la rnam pa lngar dbye ba yang dang po yongs su dag pa zhes bya ba ni gzhan gyi dbang gi dper bstan pa'o/ /gnyis pa tshon sngon po dang phrad par gyur na zhes bya ba ni mngon par brjod pa'i bag chags kyi dper bstan pa ste/ 'dis ni gzhan gyi dbang mngon par brjod pa'i bag chags dang mthun par 'gyur bar bstan to/ /gsum pa nor bu rin po che an+da rnyil dang / mthon ka chen po zhes bya ba la sogs pa ni gzhan gyi dbang gi dper bstan pa yin te/ 'di ltar bdag dang chos su rnam par rtog pa dang mngon par brjod pa'i sa bon gyi stobs kyis nang gi rnam par shes pa la yod kyang phyi rol lta bur snang bar gyur pa'o/ /bzhi pa nor bu rin po che an+da rnyil la sogs par 'dzin pas zhes bya bas ni log par 'dzin pa'i dbang gis yang dag pa nyid du yod par 'dzin par gyur pa'i dper bstan pa'o/ /lnga pa sems can rnams rnam par rmongs par byed ces bya ba ni log par ston pa rnams bdag nyid kyis 'dzin pa gang yin pa des sems can rnams rmongs par byas nas yang dag pa'i shes pa bskyed pa'i dper bstan pa'o/ /de la don rnam pa bzhi dang ldan par bstan pa ni 'og nas dpe dang don du sbyar ba'i skabs nas bshad pa dang sbyar na/ dpe la rnam pa bzhi yod de dang po shel zhes bya ba ni gzhan gyi dbang gi dper bstan pa'o/ /gnyis pa tshon sngon po dang phrad par gyur na zhes bya ba ni sngon por brjod pa'i bag chags gzhan gyi dbang dang mthun par gyur pa'i dper bstan pa'o/ /gsum pa log par 'dzin pas kyang zhes bya ba la sogs pa ni 'dzin pa po'i dper bstan pa'o/ /bzhi pa ni des yongs su gzung ba gang yin pa de nyid sems kyi rjes su yod pa yin gyi don gyi tshul gyis yod pa ma yin pas yongs su grub pa'i dper bstan pa yin no/ /de la don gyi rnam pa gsum gyi dper bstan pa ni 'di lta ste/ tshon sngon po dang phrad par gyur pa na/ sems can rnams rmongs par byed ces bya ba'i bar gang yin pa des ni brtags pa'i ngo bo nyid kyi dper bstan to/ /shel ni gzhan gyi dbang gi dper bstan to/ /yang dag par an+da rnyil med pa ni yongs su grub pa'i dper bstan te/ kha dog 'og ma gsum po dag kyang don 'di dang ldan pas de bzhin du rig par bya'o/ /de la shel yongs su dag pa zhes bya ba ni/ rin po che'i ngo bo nyid bstan pa ste/ dgongs pa zab mo rnam par dgrol ba'i mdo las/ bai DUr+ya shin tu gsal ba zhes 'byung ba ni lo tsA ba dag gis nor ba'i phyir ro/ /mdzod kyi bstan bcos las ri rab ri'i rgyal po ni rin po che sna bzhi las mngon par grub pas 'di lta ste/ gser dang dngul dang bai DUr+ya dang shel lo zhes bstan pa dang sbyar na/ shel ni kha dog dmar po yin no/ /gzhan yang de nyid las nyi ma'i dkyil 'khor gyi 'og gi ngos ni rin po che me shel las mngon par grub pa'o/ /zla ba'i dkyil 'khor gyi ngos ni rin po che chu shel gyi kha dog sna tshogs dang ldan no/ /'dir mdo 'di'i don ni re zhig kha dog dkar po dang sbyar nas kha dog bzhi zlas bstan te/ 'og nas mdo las dkar po zhes mi 'byung bas so/ /gal te tshon sngon po dang zhes bya bas ni gzugs kyi 'ching ba'i 'gyur ba bstan pa ste/ 'di ltar shel de tshon sngon po dang phrad par gyur na nor bu rin po che an+da rnyil dang mthon ka sngon po ltar snang bar 'gyur bas so/ /an+da rnyil ni lha'i dbang po'i kha dog sngon po'o/ /rin po che mthon ka chen po zhes bya ba ni yid bzhin gyi nor bu ste/ shel nyid la yid bzhin gyi nor bu zhes ston to/ /yang na an+da rnyil la sogs pa dang 'dra ba nyid nor bu yin no/ /log par 'dzin pas zhes bya ba la sogs pa ni 'jig rten pa rnams kyis btags pas yang dag par yod par 'dra bar snang zhing / gzhan dag la bsnyad de sems can rmongs par byed pa'i dper bstan pa'o/ /de ni 'di skad du kun gzhi rnam par shes pa bdag dang chos su 'dzin pa'i bag chags kyi stobs kyi dbang gis bdag dang chos lta bur gyur na/ sems can rnams bdag dang chos yang dag pa nyid bzung bas sems can rnams rmongs par byed de ji ltar shel la yang dag par sngon po la sogs pa med pa bzhin du kun gzhi rnam par shes pa la btags pa'i ngo bo nyid med pa yang de bzhin du rig par bya'o zhes bstan par 'gyur te/ phyis 'og nas rnam par 'byed do/ /gal te tshon dmar p o dang phrad par gyur na nor bu rin po che pad+ma rA ga lta bur snang bar 'gyur zhing nor bu rin po che pad+ma rA ga lta bur log par 'dzin pas kyang sems can rnams rnam par rmongs par byed do zhes bya ba ni gnyis pa tshon dmar po dang mthun par gyur pa'i dpes bstan pa ste snga ma bzhin du rig par bya'o/ /gal te tshon ljang gu dang phrad par gyur na ni nor bu rin po che margad lta bur snang bar gyur zhing / nor bu rin po che margad du log par 'dzin pas kyang sems can rnams rnam par rmongs par byed do zhes bya ba ni gsum pa tshon ljang gu dang mthun par gyur pa'i dpes bstan pa ste/ de la margad ces bya ba ni yul 'di ni ming med pa'i phyir/ /ma bsgyur bar so na bzhag pa yin no/ /kha cig na re 'di'i kha dog gsod pa'i rin po che zhes bya ste/ rin po che 'di'i dbang gis kha dog thams cad gsod cing nyams par 'gyur ba'i phyir ro zhe'o/ /dgongs pa zab mo rnam par dgrol ba'i mdo las ni ljang gu 'byung ngo / /gal te mtshon bya ser po dang phrad par gyur na ni gser lta bur snang bar 'gyur zhing gser yang dag pa nyid du log par 'dzin pas kyang sems can rnams rnam par rmongs par byed do zhes bya ba ni/ bzhi pa tshon ser po dang mthun par gyur pa'i dpes bstan pa'o/ /dgongs pa zab mo rnam par dgrol ba'i mdo dang / bye brag yod pa yang 'di las ni gser zhes 'byung la/ de las ni nor bu rin po che gser gyi kha dog tu gyur pa zhes 'byung ngo / /dpe phyi ma rnam pa gsum yang snga ma bzhin du rig par bya'o/ /de bzhin du yon tan 'byung gnas ji ltar shel yongs su dag pa de la tshon dang 'brel ba yod pa lta bur gzhan gyi dbang gi mtshan nyid la kun brtags pa'i mtshan nyid kyi tha snyad kyi bag chags kyang de bzhin du rig par bya'o zhes bya ba 'di man chad ni gnyis pa dpe dang don du sbyar ba ston to/ /'di yang gong ma'i don rnam pa bzhi dang sbyar ba yin pas rnam pa bzhir dbye ste/ sa bon dang sbyar ba dang mtshan nyid kyi brtags pa dang sbyar ba dang / gzhan gyi dbang dang sbyar ba dang / yongs su grub pa dang sbyar ba dang / don rnam pa bzhi po 'di yang sngar gong du bstan pa'i dpe rnam pa lnga yod kyang don rnam pa bzhi dang ldan pa'i phyir don rnam pa bzhis gong ma'i dpe dang sbyar bar bya ste/ 'di ni dang po'o/ /don rnam pa bzhi po de la yang bshad pa rnam pa gnyis yod de/ kha cig na re dang po gcig ni dmigs par 'dzin pa'o/ /de'i 'og ma gsum ni go rims bzhin du ngo bo nyid gsum dang sbyar ro zhe'o/ /kha cig na re dang po gnyis ni kun brtags pa'i ngo bo nyid kyi dper bstan pa yin te/ 'di ltar sa bon gyi dbang gis btags pa snang bar gyur nas/ btags pa nyid du mngon par grub pa'i phyir te/ 'di ni dang po'o/ /'di lta ste/ shel la tshon dang 'brel ba yod pa'i don gyi phyir/ shel la sngon po lta bur gzugs brnyan snang ba ltar de bzhin du gzhan gyi dbang la yang dag pa ma yin pas btags pa'i sa bon gyi rgyu dang rkyen byas pa'i phyir/ kun gzhi rnam par shes pa la gzugs dang sgra la sogs pa lta bu'i gzhan gyi dbang gi mtshan nyid snang ngo zhe'o/ /ji ltar shel yongs su dag pa de la an+da rnyil dang / mthon ka chen po dang / pad+ma rA ga dang / margad dang / gser la sogs pa'i log par 'dzin pa yod pa lta bur gzhan gyi dbang gi mtshan nyid la kun brtags pa'i mtshan nyid kyang de bzhin du rig par bya'o zhes bya ba ni gnyis pa mtshungs pa'i mtshan nyid de/ btags pa rnam par gyur pa'i phyir/ de dag la yang dag pa nyid du 'dzin te/ don de'i phyir gong ma gnyis ni don gyi rnam pa gsum las kun brtags pa dper bstan pa yin no/ /ji ltar yongs su dag pa'i shel rin po che de lta bur ni gzhan gyi dbang gi mtshan nyid kyang de bzhin du rig par bya'o zhes bya ba ni gsum pa gzhan gyi dbang dang sbyar ba ste/ ji ltar shel yongs su dag pa sngon po la sogs pa lta bur snang ba de bzhin du gzhan gyi dbang yang sa bon gyi dbang gis gzugs dang sgra la sogs pa'i mtshan nyid kyang de bzhin du snang bar gyur pa'o/ /ji ltar shel yongs su dag pa de nyid la yod pa'i an+da rnyil dang / mthon ka chen po dang / pad+ma rA ga dang / margad dang gser yang dag pa la sogs pa'i mtshan nyid rtag pa rtag pa'i dus dang / ther zug ther zug gi dus su yongs su ma grub cing yang dag par rang gi ngo bo nyid med pa lta bur zhes bya ba la sogs pa ni bzhi pa yongs su grub pa dang sbyar ba'o/ /'di yang rnam pa gnyis te/ dpe snga ma bzlas te bstan pa dang / dpe dang don du sbyar ba nyid de 'di ni dang po'o/ /shel la sngon po la sogs pa yang dag par med pa gang yin pa de ni yongs su grub pa zhes kyang bya/ yang dag par rang gi ngo bo nyid med pa zhes kyang bya'o/ /yang na yongs su ma grub pa zhes bya ba ni/ sngon po la sogs pa dgag pa'o/ /yang dag par rang gi ngo bo nyid med ces bya ba ni sngon po la sogs pa med kyang / yang dag par shel gyi ngo bo nyid med pa ma yin zhes bstan pa'o/ /gzhan gyi dbang gi mtshan nyid la kun brtags pa'i mtshan nyid rtag pa rtag pa'i dus dang / ther zug ther zug gi dus su ma grub cing yang dag par rang gi ngo bo nyid kyis yongs su grub pa'i mtshan nyid du rig par bya'o zhes bya ba ni gnyis pa dpe don dang sbyar ba ste/ gzhan gyi dbang la btags pa'i bdag la sogs pa'i ngo bo nyid med pa gang yin pa de ni rang gi ngo bo nyid med pa zhes bya'o/ /yang na gzhan gyi dbang la btags pa med kyang yang dag par rang gi ngo bo nyid med pa ni ma yin no zhes bstan pa'o/ /rtag pa rtag pa'i dus dang / ther zug ther zug gi dus zhes bya ba ni/ 'di la bshad pa rnam pa gnyis yod de/ kha cig na re snga ma'i med pa la brten nas ni rtag pa rtag pa zhes gsungs so/ /phyi ma phyi ma'i med pa la brten nas ni ther zug ther zug ces bya ba gsungs so zhe'o/ /kha cig na re yang dag par yod pa ma yin par bstan pa'i phyir ni rtag pa rtag pa zhes bya ba gsungs so/ /rang gi ngo bo nyid med par bstan pa'i phyir ni ther zug ther zug ces bya ba gsungs so zhe'o/ /ngo bo nyid gsum po 'di dag dang de bzhin nyid rnam pa bdun phan tshun ji ltar sdud ce na/ smras pa/ bstan bcos rnam par rig pa tsam du grub pa las ji skad du ngo bo nyid gsum po 'di dag dang de bzhin nyid bdun po dag phan tshun ji ltar sdud ce na/ de bzhin nyid bdun yang dang po 'jug pa'i de bzhin nyid ni 'di lta ste/ 'dus byas kyi chos 'jug pa'i chos de kho na nyid do zhes 'byung ste/ de la 'dus byas kyang rnam pa gnyis te/ dang po ni mtshan nyid bzhi po dag gis 'dus byas pa'i phyir 'dus byas zhes bya'o/ /gnyis pa ni nyon mongs pas byas pa'i phyir 'dus byas zhes bya ste/ 'di ni nyon mongs pas byas pa'o/ /gzhan yang de las de kho na'i mtshan nyid kyi de bzhin nyid ni 'di lta ste/ bdag med pa nyid kyis rab tu phye ba'i de kho na nyid do/ /rnam par rig pa tsam gyi de bzhin nyid ni 'di lta ste/ kun nas nyon mongs pa dang rnam par byang ba'i chos kyi rnam par rig pa'i de kho na nyid do zhes 'byung ste/ 'dir kun nas nyon mongs pa dang / rnam par byang ba'i rtog pa rnam par rig pa tsam du bsgom pa'i shes pa la de nyid du bzung ngo / /gzhan yang de la gnas pa'i de bzhin nyid ni 'di lta ste/ sdug bsngal gyi de kho na nyid do/ /log par bsgrub pa'i de bzhin nyid ni 'di lta ste/ kun 'byung ba'i de kho na nyid do/ /rnam par dag pa'i de bzhin nyid ni 'di lta ste/ 'gog pa'i de kho na nyid do/ /yang dag par bsgrub pa'i de bzhin nyid ni 'di lta ste/ lam gyi de kho na nyid do/ /de kho na nyid bdun po 'di dag ni yongs su grub pas bsdus te/ rtsa ba dang rjes las thob pa'i ye shes gnyis kyi yul yin pa'i phyir ro/ / mtshan nyid kyi rjes su bsdu na 'jug pa dang sdug bsngal dang / kun 'byung ba gsum ni ngo bo nyid snga ma gnyis kyis bsdus te/ yang dag pa ma yin pa kun nas nyon mongs par btags pa'i phyir ro/ /gzhan bzhi ni yongs su grub pas bsdus so zhes 'byung ngo / / bstan bcos dbus dang mtha' rnam par 'byed pa las kyang bye brag gi de kho na nyid mdor bsdu na rnam pa bdun no/ /'di lta ste/ 'jug pa'i de kho na dang / yang dag pa'i mtshan nyid kyi de kho na dang / rnam par rig pa'i de kho na dang / gnas pa'i de kho na dang / log par sgrub pa'i de kho na dang / rnam par dag pa'i de kho na dang / yang dag par sgrub pa'i de kho na'o/ /de kho na nyid bdun po 'di dag rtsa ba'i de kho na nyid gsum po dag tu ji ltar bsdu bar shes par bya zhe na/ tshig le'ur byas pa las/ 'jug pa dang ni gnas pa dang / /log bsgrub dang po gnyis la brten/ /mtshan nyid rnam par rig pa dang / /yang dag sgrub phyi ma la brten/ /ces 'byung ste/ bstan bcos rnam par bshad pa dang / rnal 'byor spyod pa'i sa las kyang 'di las 'byung ba bzhin du bsdu bar bshad pas 'gal ba med do/ /ngo bo nyid gsum dang dngos po lnga po dag phan tshun bsdu ba ji lta bu zhe na/ 'phags pa'i gsung rab dag las phan tshun bsdu bar bshad pa yang nges pa med de bstan bcos rnal 'byor spyod pa'i sa dang sbyar na ni de las gzhan gyi dbang gi ngo bo nyid kyis ni rgyu mtshan dang / ming dang rnam par rtog pa dang / yang dag pa'i ye shes de dag bsdus so/ /yongs su grub pa'i ngo bo nyid kyis ni de bzhin nyid bsdus so/ /kun brtags pas ni dngos po lnga po gang yang ma bsdus so zhes bshad de/ de las zag pa dang bcas pa'i sems dang sems las byung ba'i chos brjod par bya ba lta bur snang ba gang yin pa de ni rgyu mtshan zhes bya'o/ /brjod pa 'dra bar snang ba gang yin pa de ni ming zhes gdags so/ /snang bar byed pa'i sems la sogs pa la ni rnam par rtog pa zhes rnam par 'jog go/ /zag pa med pa'i sems la sogs pa spros pa dang bral ba'i phyir thams cad kyang yang dag pa'i ye shes zhes bya'o zhes bshad pas/ gzung 'dzin du mi ston cing bzhi po dag rkyen las skye bar ston pas thams cad kyang gzhan gyi dbang gis bsdus pa yin no/ /bstan bcos dbus dang mtha' rnam par 'byed pa las gzhan gyi dbang gi ngo bo nyid kyis ni rgyu mtshan dang rnam par rtog pa bsdus so/ /kun du brtags pas ni ming kho na bsdus so/ /yang dag pa'i ye shes dang / de bzhin nyid ni yongs su grub pas bsdu bar bshad de/ de las zag pa dang bcas pa'i sems dang sems las byung ba'i rgyu mtshan gyi rnam pa gang yin pa de ni rgyu mtshan zhes bya'o/ /gzhan ni rnam par rtog pa zhes bya'o/ /kun du brtags pa ni bdag nyid ci yang med pa'i phyir yod pa ma yin pa rab tu bstan pa'i ched du btags pa tsam du ming zhes bya'o/ /gnyis ni phyin ci ma log pa'i phyir yongs su grub pas bsdus so zhes ston pas so/ /'phags pa lang kar gshegs pa'i mdo las/ gzhan gyi dbang gi ngo bo nyid kyis ni / rnam par rtog pa kho na bsdus so/ /kun du brtags pas ni rgyu mtshan dang ming bsdus so/ /yang dag pa'i ye shes dang / de bzhin nyid ni yongs su grub pas bsdus par bshad de/ de las sems dang sems las byung ba'i rgyu mtshan dang / lta ba'i rnam pa la sogs pa thams cad ni rnam par rtog pa zhes bya'o/ /yang dag pa ma yin pa kun du rtogs pa'i ngo bo nyid du gyur pa'i phyir kun du brtags pas brjod pa dang / brjod par bya ba sems kyi rjes su rnam par gzhag pa gang yin pa de la ming dang / rgyu mtshan gyi dngos po gnyis zhes ston pas so/ /theg pa chen po bsdus pa'i 'grel pa slob dpon dbyigs gnyen gyis mdzad pa las ming ni gzhan gyi dbang gi ngo bo nyid du rtogs so/ /don ni kun du brtags pa'i ngo bo nyid du rtogs so zhes bshad de/ de las zag pa dang bcas pa'i sems dang sems las byung ba'i rgyu mtshan dang / lta ba'i rnam pa la sogs pa ming gi mthu'i dbang gis kun brtags mngon par 'grub pas na/ de'i phyir ming zhes bshad la/ kun brtags kyi ming gi rjes su nan gyis brtags pa tsam du zad kyi / ngo bo nyid yang dag par yod pa ma yin pas bsags pa tsam du don zhes bya'o zhes bstan pas so / /gong du bshad ma thag pa'i bstan pa bzhi po dag las dngos po lnga dang / ngo bo nyid rnam pa gsum phan tshun bsdus pa bshad pa la tshig mi mthun pa 'dra yang don la ni 'gal ba med de/ slob dpon chos skyong gis ni bshad pa dang po mchog tu bzang ngo zhes bshad de/ 'dres pa med pa'i phyir ro zhe'o/ /gzhan bstan bcos rnam par rig pa tsam du grub pa las/ 'phags pa'i gsung rab rnams las mtshan nyid rnam pa lnga'o zhes gsungs na/ de dag dang ngo bo nyid rnam pa gsum dang / phan tshun ji ltar bsdu zhe na brjod par bya ba dang / rjod par byed pa so so nas rang gi ngo bo nyid gsum dang ldan pas 'di lta ste/ yang dag pa ma yin pas brtags pa ni/ ngo bo nyid dang pos bsdus te/ rgyu mtshan dang ming dang rnam par rtog pa ni ci rigs su sbyar ro/ /brjod par bya ba dang / rjod par byed pa ni gzhan gyi dbang du gtogs te/ de bzhin nyid dang yang dag pa'i ye shes ni ci rigs su sbyar ro/ /brjod par bya ba dang / rjod par byed pa ni yongs su grub par gtogs te/ rjes las thob pa rjod par byed pa'i mtshan nyid lta bur gyur pa'i phyir ro/ /mtshan nyid gnyis ni rgyu mtshan du gtogs pas ngo bo nyid dang po kho nas bsdus te/ yang dag pa ma yin pa brtags pa'i don dang / ming ni nges par phan tshun 'brel pa'i phyir ro/ /des mngon par zhen pa'i mtshan nyid gang yin pa de ni gzhan dbang kho na yin te/ yang dag pa ma yin pa'i rnam par rtog pa rang gi ngo bo nyid byed pa'i phyir ro/ /mngon par zhen pa med pa'i mtshan nyid gang yin pa de ni yongs su grub pa kho na yin te/ zag pa med pa'i shes pa la sogs pas rang gi ngo bo nyid byed pa'i phyir ro zhes 'byung ngo / /bstan bcos rnal 'byor spyod pa'i sa las kyang ngo bo nyid gnyis ni brjod par bya ba yin no/ /kun brtags pa'i ngo bo nyid ni rjod par byed pa yin no zhes bshad do/ /bstan bcos rnam par bshad pa las ni rjod par byed pa dang brjod par bya ba gnyi ga yang ngo bo nyid gsum du gtogs so zhes bshad do/ /zhib tu rnam par dbye ba ni bstan bcos rnam par rig pa tsam du grub pa'i 'grel pa las byung bas de bzhin du rig par bya'o// // gzhan yang yon tan 'byung gnas mtshan ma dang ming 'brel pas rkyen byas pa'i phyir ni kun brtags pa'i mtshan nyid rab tu shes so zhes bya ba 'di man chad ni gnyis pa brtags pa'i sgo las brtsams nas mkhas pa'i byang chub sems dpa' rab tu bstan pa'o/ /'di yang rnam pa gnyis su dbye ste/ tshig rkyang pas rgya cher rnam par bshad pa dang / tshigs su bcad pas mdor bstan pa'o/ /dang po yang rnam pa gnyis te/ mtshan nyid mdor rnam par phye nas gzhan dag la khong du chud par bya bar bskul ba dang / mtshan nyid gsum po snga ma nyid las brtsams nas rnal 'byor bsgom pa'i sgo yang dag par bstan pa'o/ /bshad pa'i rnam grangs gzhan du ni rnam pa gnyis su phye nas bstan te/ rnal 'byor bsgom pa'i sgo nas bstan pa dang / 'di ltar yon tan 'byung gnas zhes bya ba man chad kyis snga ma'i rnal 'byor bzlas nas zhus pa snga ma'i lan gsungs pa'o/ /dang po yang rnam pa gsum du dbye ste/ byang chub sems dpa' rnams kyi ngo bo nyid gsum khong du chud pa'i mtshan nyid bstan pa dang / rigs kyi bu zhes bya ba man chad kyis ngo bo nyid gsum shes pa'i dbang gis mtshan nyid gsum khong du chud par 'gyur ba bstan pa dang / rigs kyi bu zhes bya ba man chad kyis mtshan nyid shes pa'i dbang gis kun nas nyon mongs pa spangs nas/ rnam par byang ba mngon du byed par bstan pa'o/ /de ltar rnam pa gnyis su bshad pa yod mod kyi/ 'dir ni re zhig bshad pa phyi ma la brten nas bshad pa yin no/ /'di ni dang po ngo bo nyid gsum shes par bstan pa ste/ ngo bo nyid gsum tha dad pa nyid kyi phyir/ de las rnam pa gsum du dbye'o/ /'di ni dang po ste/ 'di ltar brjod par bya ba'i mtshan ma dang / rjod par byed pa'i ming phan tshun 'brel pas rkyen byas pa'i phyir/ yang dag pa ma yin pas brtags pa'i mtshan nyid de kun brtags pa yin par rab tu shes par 'gyur ba'i phyir bstan bcos rnal 'byor spyod pa'i sa las/ kun brtags pa'i ngo bo nyid ci zhig la dmigs par blta bar bya zhe na/ smras pa/ mtshan ma dang ming 'brel pa la dmigs par rig par bya'o zhes 'byung ngo / /rgya cher rnam par 'byed pa ni ngo bo nyid med pa gsum bstan pa'i bstan bcos las 'byung ba bzhin du rig par bya ste/ de nyid las kun du rtog pa'i ngo bo nyid ni bdag nyid kyi mtshan nyid med pas ming la sogs pa'i chos lnga po dag gis ma bsdus so/ /bdag nyid med na ji ltar rtog par byed ce na/ smras pa/ ming kho nar zad kyi don med pa'i phyir ro/ /de ci'i phyir zhe na/ dper na 'jig rten pa rnams don las ming btags pas skye bo rnams ming la mngon par zhen nas/ don gyi ngo bo nyid du rtogs pas ming ni don gyi ngo bo nyid do zhes zer ba lta bu dag ni phyin ci log yin pas ming du rnam par rtog pa tsam du zad de yang dag pa'i bdag nyid med pa'i phyir ro/ /de ci'i phyir zhe na/ ming dang don de dag gi phan tshun gcig la gcig glo bur yin pa'i phyir ro/ /de ltar ci mngon zhe na/ don rnam pa gsum gyi phyir don 'di shes par 'gyur te ming gi blo mi skye ba dang / bdag nyid mang po 'gal ba'i skyon dang / bdag nyid sna [(]tshog [,]tshogs [) 'gal ba'i skyon no zhes 'byung ste/ zhib tu de nyid las 'byung ba bzhin no/ /bstan bcos theg pa chen po bsdus pa las kyang 'di dang mthun par ston to/ /gzhan gyi dbang gi mtshan nyid la kun brtags pa'i mtshan nyid du mngon par zhen pas rkyen byas pa'i phyir ni gzhan gyi dbang gi mtshan nyid rab tu shes so zhes bya ba ni gnyis pa gzhan gyi dbang gi mtshan nyid rnam par bshad pa ste/ 'di ltar kun du brtags pa'i mtshan nyid la rnam par rtog pa nyid du mngon par zhen pa nyid du rkyen byas pa'i phyir gzhan gyi dbang gi ngo bo nyid skyes par gyur pa ste/ de'i phyir bstan bcos rnam par bshad pa las/ gzhan gyi dbang gi ngo bo nyid la ngo bo nyid dang po nyid du mngon par zhen pa'i phyir/ yongs su bsgo ba bskyed nas kun nas nyon mongs pa mngon par 'grub po zhes 'byung ba yin no/ /gzhan yang de nyid las kun brtags pa'i mtshan nyid mngon par zhen pa bskyed pa'i phyir gzhan gyi dbang yin par rab tu shes so zhes bshad do/ /de ltar mngon par zhen pa gang yin pa de ni rkyen las skyes pa'i phyir ro / /sangs rgyas kyi ngo bo nyid bstan pa'i bstan bcos las gzhan gyi ngo bo nyid rgyu dang rkyen gang yin pa mngon par 'grub par 'gyur zhe na/ smras pa/ kun du rtog pa'i ngo bo nyid la mngon par zhen pa'i phyir rab tu snang bar gyur pa yin no zhes 'byung ba yin no/ /gzhan gyi dbang ni kun nas nyon mongs pa dang / rnam par byang ba gnyi gar gtogs pa yin na/ ci'i phyir mngon par zhen pas rkyen byas pa'i phyir/ gzhan gyi dbang gi ngo bo nyid rab tu shes so/ /rgol ba 'di'i lan brda sprod pa ni bstan bcos rnal 'byor spyod pa'i sa las ji skad du bstan pa dag nyid yin te/ de'i phyir de nyid las gal te gzhan gyi dbang gi ngo bo nyid yang dag pa'i shes pas kyang bsdus pa yin na ni / des na gzhan gyi dbang gi ngo bo nyid ni kun brtags pa'i ngo bo nyid la mngon par zhen pa la brten nas shes par 'gyur ro zhes smras pa/ de ji lta bu zhe na/ smras pa / de ni kun nas nyon mongs par gyur pa'i phyogs kyi gzhan gyi dbang gi ngo bo nyid las bsams pa yin gyi/ rnam par byang bar gyur pa'i phyogs las ni ma yin te/ rnam par byang bar 'gyur ba'i phyogs ni mngon par zhen pa med pa la brten nas shes par 'gyur ba yin par rig par bya'o zhes 'byung ba yin no/ /gzhan gyi dbang gi mtshan nyid la kun brtags pa'i mtshan nyid du mngon par zhen pa med pas rkyen byas pa'i phyir ni yongs su grub pa'i mtshan nyid rab tu shes so zhes bya ba ni gsum pa yongs su grub pa'i mtshan nyid rnam par bshad pa ste/ 'di ltar gzhan gyi dbang la mngon par zhen pa med pa'i mtshan nyid kyis rab tu phye ba las yongs su grub pa skye ba'i phyir mngon par zhen pa med pa zhes gsungs te/ de'i phyir rnal 'byor spyod pa'i sa las kun brtags pa'i ngo bo nyid la dmigs pa gang yin pa de ni gzhan gyi dbang gi ngo bo nyid la gtan du ma grub par shes par bya'o zhes 'byung ba nyid do / /yang na mngon par zhen pa med pa ni 'phags pa'i lam yin te/ mngon par zhen pa med pa zhes bya'o/ /de ni 'di skad du lam la rgyu nyid du mngon par zhen pa med pa'i phyir yongs su grub pa'i ngo bo nyid 'thob par 'gyur ro zhes bstan par 'gyur te/ de'i phyir bstan bcos rnal 'byor spyod pa'i sa las bcom ldan 'das kyis mdo gzhan las kun brtags pa'i ngo bo nyid la mngon par zhen pa med pa las shes par bya'o zhes gsungs te/ ngo bo nyid 'di ni yongs su dag pa thob pa la brten nas bshad pa yin gyi / mtshan nyid la brten nas bshad pa ni ma yin no zhes 'byung ste/ de la mdo gzhan las zhes bya ba ni mdo 'di nyid la bya'o/ /yongs su dag pa thob pa las zhes bya ba ni nang gi de bzhin nyid kyi 'phags pa'i lam thob pa la brten nas mngon du byas pa'i don rab tu bstan pa'am/ yang na 'phags pa'i lam gyi stobs kyis kun nas nyon mongs pa spangs nas rnam par byang ba de bzhin nyid thob pa ste/ 'thob par byed pa'i lam la brten nas mngon du byas pa'i don rab tu bstan pa'o/ /mtshan nyid la brten nas bshad pa ni ma yin zhes bya ba 'di ni btags pa'i mtshan nyid spangs pa la brten nas yongs su grub pa bstan pa ma yin pa'o/ /bshad pa snga ma dang sbyar na mdo zhes bya ba ni mdo gzhan dag las khungs bstan pa'o/ /kha cig na re mngon par zhen pa med pa zhes bya ba ni/ mngon par zhen pa po gzhan gyi dbang dang mngon par zhen par bya ba kun du rtog pa med pa'i phyir mngon par zhen pa med pa zhes gsungs so zhe'o/ /bstan bcos sangs rgyas kyi ngo bo nyid bstan pa las yongs su grub pa'i ngo bo nyid ci'i phyir rgyus mngon par grub par 'gyur zhe na/ smras pa/ kun du rtog pa dang / gzhan gyi dbang shin tu mi dmigs pas rab tu phye bas so zhes 'byung ba ni lo tsA ba dag gis nor te/ gzhan gyi dbang rnam par 'jog pas bdag nyid kyis yod par 'dod pa'i gzhung bstan bcos rnal 'byor spyod pa'i sa la sogs pa dang 'gal bar 'gyur ba'i phyir ro/ /rigs kyi bu gal te byang chub sems dpa' rnams kyi chos rnams kyi gzhan gyi dbang gi mtshan nyid la kun brtags pa'i mtshan nyid yang dag pa ji lta ba bzhin du rab tu shes na mtshan nyid med pa'i chos thams cad yang dag pa ji lta ba bzhin du rab tu shes so zhes bya ba 'di man chad gnyis pa ngo bo nyid shes pa'i dbang gis mtshan nyid gsum khong du chud par 'gyur ba zhes bya ba ston to/ /mtshan nyid gsum mi mthun pa nyid kyis de las gsum du dbye ste/ 'di ni dang po kun brtags khong du chud pa nyid kyi phyir/ mtshan nyid med pa khong du chud par 'gyur bar bstan pa'o/ /'dir gong du bshad pa ltar mtshan ma dang mi 'brel bas rkyen byas pa'i phyir/ yang dag pa ji lta ba bzhin du kun brtags ming dang / rgyu mtshan btags pa tsam du rnam par gzhag pa yin gyi/ yang dag pa rang gi ngo bo ni med do zhes shes pa des na brtags pa thams cad mtshan nyid med pa chos su yang dag pa ji lta ba bzhin du rab tu shes so zhes bya ba'i tha tshig go/ /gal te byang chub sems dpa' rnams kyi gzhan gyi dbang gi mtshan nyid yang dag pa ji lta ba bzhin du rab tu shes so/ /kun nas nyon mongs pa'i mtshan nyid kyi chos thams cad yang dag pa ji lta ba bzhin du rab tu shes so zhes bya ba ni gnyis pa gzhan gyi dbang shes pa'i phyir kun nas nyon mongs pa'i mtshan nyid kyang shes par bstan pa ste/ 'di ltar rgyu mtshan la brtags pa 'byung ba dag ni gzhan gyi dbang yin no zhes shes pa nyid kyis kun nas nyon mongs pa thams cad ni/ gzhan gyi dbang yin par rab tu shes par 'gyur bas so/ /de la snga ma ni spyir brtag pa'o/ /de la phyi ma ni rnam par phye ste rnam par brtags pa yin pas/ snga phyi'i mtshan nyid gnyi ga yang de bzhin du shes par bya'o/ /gzhan yang snga ma ni rang gi ngo bo nyid las brtsams nas/ gzhan gyi dbang brtag pa rnam par 'byed pa'o/ /phyi ma ni bye brag las brtsams nas/ gzhan gyi dbang brtag pa rnam par 'byed pa'o/ /gzhan yang snga ma ni ji snyed pa yod pa nyid las brtsams pa'o/ /phyi ma ni ji lta ba bzhin du yod pa nyid las brtsams pa'o/ /gal te byang chub sems dpa' rnams kyis yongs su grub pa'i mtshan nyid yang dag pa ji lta ba bzhin du rab tu shes na/ rnam par byang ba'i mtshan nyid kyis chos thams cad yang dag pa ji lta ba bzhin du rab tu shes so zhes bya ba ni gsum pa yongs su grub pa'i shes pa nyid kyis rnam par byang ba'i mtshan nyid rab tu shes par 'gyur bar bstan pa ste/ 'di ltar kun brtags la mngon par zhen pa med pas rkyen byas pa'i phyir rnam par byang ba'i chos yongs su grub pa yang rab tu shes par 'gyur ba'o/ /rigs kyi bu gal te byang chub sems dpa' rnams kyi gzhan gyi dbang gi mtshan nyid la mtshan nyid med pa'i chos yang dag pa ji lta ba bzhin du rab tu shes na/ kun nas nyon mongs pa'i mtshan nyid kyi chos rab tu spong ngo zhes bya ba 'di man chad ni gsum pa shes pa'i dbang gis kun nas nyon mongs pa spangs nas rnam par byang ba mngon du byed par bstan pa'o/ /'di yang rnam pa gnyis te mtshan nyid med pa shes pa nyid kyis kun nas nyon mongs pa'i chos spong bar bstan pa dang / kun nas nyon mongs pa spangs pa nyid kyi phyir rnam par byang ba 'thob par bstan pa'o/ / 'di ni dang po ste/ mtshan nyid med pa'i chos de la yang bshad pa rnam pa gsum yod de/ kha cig na re btags pa'i ngo bo nyid sems kyis su yod ces bshad par zad kyi yang dag par yod pa ma yin te mtshan nyid thams cad du med pa'i phyir mtshan nyid med pa zhes bya ste/ de'i phyir bstan bcos dbus dang mtha' rnam par 'byed pa las/ kun brtags pa'i ngo bo nyid rang bzhin gyis med pa'i phyir mtshan nyid med pa zhes bya'o zhes bstan pa yin no zhe'o/ /bshad pa 'di dang sbyar na mtshan nyid med pa'i chos khong du chud pa'i phyir gzhan gyi dbang gi ngo bo nyid kun nas nyon mongs pa'i mtshan nyid kyi chos skye bar mi 'gyur ba'i phyir kun nas nyon mongs pa'i mtshan nyid kyi chos rab tu spong bar gsungs pa yin te/ gal te btags pa med na kun nas nyon mongs pa'i mtshan nyid kyi chos skye bar mi 'gyur ba'i phyir ro/ /de'i phyir bstan bcos rnal 'byor spyod pa'i sa las kun brtags pa'i ngo bo nyid las du dag byed ce na/ smras pa/ lnga ste gzhan gyi dbang gi ngo bo nyid skyed par byed pa dang / de la tha snyad 'jug par byed pa dang / gang zag la mngon par zhen pa skyed pa par byed pa dang / chos la mngon par zhen pa skyed par byed pa dang / de gnyi ga la mngon par zhen pa'i bag chags gnas ngan len yongs su 'dzin par byed pa'o zhes 'byung ba yin no/ /kha cig na re gzhan gyi dbang la btags pa'i ngo bo nyid med pas rab tu phye ba'i de bzhin nyid mtshan ma rnams dang bral ba'i phyir mtshan nyid med pa zhes bya ste/ de'i phyir bstan bcos theg pa chen po bsdus pa las/ de bzhin nyid gzugs la sogs pa'i mtshan ma thams cad dang gtan du bral ba'i phyir mtshan nyid med pa zhes bya'o zhes bstan to/ /gzhan yang bstan bcos shin tu rgyas pa brgya pa las/ de bzhin nyid stong pa nyid kyi don ni yod pa dang / med pa la sogs pa chos thams cad kyi mtshan ma dang bral ba'i phyir mtshan nyid med pa zhes bya'o zhes 'byung ba yin no zhe'o/ / bshad pa 'di dang sbyar na ni 'di ltar mtshan nyid med pa'i chos rab tu shes par 'gyur ba nyid kyi phyir gzhan gyi dbang gi ngo bo nyid kun nas nyon mongs pa'i mtshan nyid kyi chos rab tu spong bar ston to/ /kha cig na re yongs su grub pa nyid du 'dzin pa ni kun kyang mtshan nyid med pa zhes bya ste/ snga ma'i don rnam pa gnyis kyi phyir ro zhe'o/ /bshad pa 'di dang sbyar na 'di ltar kun brtags pa'i mtshan nyid med pa'i chos su rtogs pa'i phyir yongs su grub pa'i ngo bo nyid mtshan nyid med pa'i chos khong du chud cing de la 'jug par 'gyur te/ yongs su grub pa'i ngo bo nyid khong du chud cing 'jug par 'gyur ba des na gzhan gyi dbang gi ngo bo nyid kun nas nyon mongs pa'i mtshan nyid chos rab tu spong ngo zhes ston te/ de'i phyir bstan bcos rnal 'byor spyod pa'i sa las/ rnal 'byor pas kun brtags pa'i ngo bo nyid la yang dag par zhugs pa na ngo bo nyid gang gi rjes su 'jug ce na/ smras pa/ yongs su grub pa'i ngo bo nyid kyi rjes su 'jug go/ /rnal 'byor pas yongs su grub pa'i ngo bo nyid kyi rjes su zhugs pa na ngo bo nyid gang rnam par 'jig par byed ce na/ smras pa/ gzhan gyi dbang gi ngo bo nyid rnam par 'jig par byed do zhes bstan pa yin no/ /gal te kun nas nyon mongs pa'i mtshan nyid kyis chos rab tu spangs na rnam par byang ba'i mtshan nyid kyi chos 'thob par 'gyur zhes bya ba ni gnyis pa kun nas nyon mongs pa spangs pa nyid kyi phyir rnam par byang ba mya ngan las 'das pa thob par bstan pa ste/ 'di ltar kun nas nyon mongs pa'i chos spangs pa nyid kyi phyir rnam par byang ba mya ngan las 'das pa thob par 'gyur ba'o/ /mtshan nyid gsum po'i rnal 'byor 'di'i gnas skabs gang la brten nas bstan/ gal te sa'i mdun rol la'o zhe na/ 'o na ni kun nas nyon mongs pa'i mtshan nyid kyi chos ji ltar spong bar 'gyur te/ 'di ltar gang zag med pa'i las kyis gdod spong ba'i phyir ro/ /gal te sa la gnas pa la'o zhe na/ sa dang po la zhugs pa'i tshe stong pa nyid rnam pa gnyis mngon du gyur pas/ ji ltar sngar ngo bo nyid gnyis kyi rnal 'byor skyed ce na/ smras pa/ mtshan nyid gsum gyi rnal 'byor 'di yang gnas skabs rnam pa gnyis gnyis su dbye bar 'gyur te/ ngo bo nyid dang po gnyis kyi rnal 'byor 'di sbyin pa'i gnas skabs la brten nas yongs su tshol ba bzhi dang / yang dag pa ji lta ba bzhin du yongs su shes pa bzhi yid la byed do/ /gsum yongs su grub pa ni sa bcu pa'o/ /gnas skabs la yod de de'i phyir slob dpon thogs med kyis theg pa chen po bsdus pa'i bstan bcos mdzad pa las/ ngo bo nyid rnam pa gsum gyi rnal 'byor rnam par gzhag nas/ mdo 'di'i don rnam par bshad pa yin te/ de'i phyir de nyid las/ de ltar byang chub sems dpa' 'di yid kyi brjod par snang ba'i don gyi mtshan nyid la 'jug pa'i phyir/ kun brtags pa'i ngo bo nyid la zhugs pa yin no/ /rnam par rig pa tsam du 'jug pa'i phyir gzhan gyi dbang gi ngo bo nyid la zhugs pa yin no/ /yongs su grub pa'i ngo bo nyid la ji ltar 'jug ce na/ rnam par rig pa tsam gyis 'du shes kyang bzlog nas 'jug go/ /de'i tshe don gyi 'du shes rnam par bshig pa de la yid kyi brjod pa thos pa'i chos kyi bag chags kyi rjes su 'gro ba de dag don du snang ba thams cad 'byung ba'i skabs med pa'i phyir/ 'di ltar rnam par rig pa tsam du snang ba yang mi 'byung ste/ rgyu dang rkyen des na don thams cad la rnam par mi rtog pa'i ming la gnas so zhes 'byung ste/ de la rnam par mi rtog pa'i ming zhes bya ba ni de kho na nyid kyi bden pa mnyam pa nyid kyi chos brjod pa'i ming ngo / /'di ltar brjod par bya ba'i de bzhin nyid gang yin pa de ni don thams cad ces bya ste/ rnam par mi rtog pa'i don to/ /'dir rjod par byed pa'i ming brjod par bya ba las/ ming du btags pa rnam par rtog pa'i ming zhes bya'o/ /des brjod par bya ba'i de bzhin nyid rjod par byed pa las/ ming du btags pas de'i phyir yang rnam par mi rtog pa'i ming zhes bya'o/ /gzhan yang de nyid las chos kyi dbyings la mngon sum gyi tshul gyis gnas so/ /de'i tshe byang chub sems dpa' de dmigs par bya ba dang dmigs par byed pa mnyam pas mnyam pa'i rnam par mi rtog pa'i ye shes 'byung ste/ de'i phyir byang chub sems dpa' 'di yongs su grub pa'i ngo bo nyid la zhugs pa yin no zhes 'byung ste/ bshad pa 'di dang sbyar na yongs su grub pa'i bsgom pa ni sa la gnas pa dag la yod de/ de'i phyir bstan bcos rnam par rig pa tsam du grub pa'i tshig le'ur byas pa las/ nam zhig dmigs pa dag la ni/ /shes pas mi dmigs de yi tshe/ /rnam par rig pa tsam la gnas/ /'dzin gnyis mtshan nyid bral phyir ro/ /zhes bstan pa yin no/ /'di ltar yon tan 'byung gnas byang chub sems dpa' rnams kun brtags pa'i mtshan nyid dang / gzhan gyi dbang gi mtshan nyid dang / yongs su grub pa'i mtshan nyid yang dag pa ji lta ba bzhin du rab tu shes pa'i phyir mtshan nyid med pa'i chos dang / kun nas nyon mongs pa'i mtshan nyid kyi chos dang / rnam par byang ba'i mtshan nyid kyi chos rnams yang dag pa ji lta ba bzhin du rab tu shes la zhes bya ba 'di man chad ni gnyis pa snga ma'i rnal 'byor bsgom pa'i sgo bzlas nas/ zhus pa snga ma gnyis kyi lan du gsungs pa ston par mdzad do/ /'di yang rnam pa gnyis te rnal 'byor gyi sgo bzlas te bstan pa dang de tsam gyis na zhes bya ba man chad kyis zhus pa gnyis kyi lan yang dag par bstan pa'o/ /dang po yang rnam pa gnyis te/ ngo bo nyid gsum shes pa'i dbang gis mtshan nyid gsum shes par 'gyur ba bzlas te bstan pa dang / mtshan nyid gsum shes pa'i dbang gis kun nas nyon mongs pa spangs nas/ rnam par byang ba 'thob par 'gyur ba bzlas te bshad pa'o/ / 'di ni dang po ngo bo nyid gsum shes pa'i dbang gis mtshan nyid gsum shes par 'gyur ba bzlas pa ste/ gong ma bzhin du rig par bya'o/ /mtshan nyid med pa'i chos yang dag pa ji lta ba bzhin du rab tu shes pa'i phyir ni kun nas nyon mongs pa'i mtshan nyid kyi chos thams cad rab tu spangs par 'gyur ro/ /kun nas nyon mongs pa'i mtshan nyid kyi chos thams cad rab tu spangs pa'i phyir ni rnam par byang ba'i mtshan nyid kyi chos thams cad thob par 'gyur bas zhes bya ba ni gnyis pa mtshan nyid gsum shes pa'i dbang gis kun nas nyon mongs pa spangs nas/ rnam par byang ba thob par 'gyur ba bzlas nas bshad pa ste/ 'di ltar kun brtags mtshan nyid med pa'i don du shes pa'i phyir/ gong nas gong du rim gyis yongs su grub pa'i ngo bo nyid rtogs pa des rnam par byang ba mya ngan las 'das pa thob par 'gyur ba'o/ /yang na kun brtags mtshan nyid med pa'i de bzhin nyid khong du chud pa'i phyir kun nas nyon mongs pa ma spangs na/ mya ngan las 'das pa'i 'bras bu thob par mi 'gyur ba'o/ /de tsam gyis na chos kyi mtshan nyid la mkhas pa'i byang chub sems dpa' zhes bya ste/ de bzhin gshegs pa yang de tsam gyis na de dag la chos rnams kyi mtshan nyid la mkhas pa'i byang chub sems dpa' zhes 'dogs so zhes bya ba ni gnyis pa rnal 'byor gyi sgo la brten nas zhus pa snga ma gnyis kyis lan yang dag par bstan pa ste/ 'di ltar bcom ldan 'das kyis gong du bstan pa lta bu'i ngo bo nyid rnam pa gsum rab tu shes pa'i byang chub sems dpa' rnams las brtsams nas mkhas pa'i byang chub sems dpa' zhes ston par mdzad pas de bzhin gshegs pa rnams mkhas pa'i byang chub sems dpa' 'di las brtsams nas 'phags pa'i gsung rab las mkhas pa'i byang chub sems dpa' zhes 'dogs so/ /byang chub sems dpa' de dag gi mkhas pa'i tshad kyang / so so nas bshad pa mi mthun te/ kha cig na re dad pa bcu la gnas pa yan chad kun kyang mkhas pa zhes bya'o zhe'o/ /kha cig na re yongs su bsngo ba rnam pa bcu pa las yongs su bsngo ba bcu ni sbyor ba'i lam zhes bya ste/ gnas pa de nyid la brten te/ yongs su tshol ba bzhi bskyed nas yang dag pa ji lta ba bzhin du rab tu shes pa'i phyir ro zhe'o/ /kha cig na re sa dang po yan chad rnam par dag pa'i de bzhin nyid du kun rdzob kyi mtshan nyid 'thob pa'i phyir ro zhe'o/ /de nas bcom ldan 'das kyis don de nyid yang dag par bstan pa'i phyir/ tshigs su bcad pa 'di dag gsungs so zhes bya ba 'di man chad ni gnyis pa tshigs su bcad pas mdor bstan pa zhes bya ba ston to/ /'di yang rnam pa gnyis te tshigs su bcad pas bstan pas gleng bslang ba dang / tshigs su bcad pa smos nas mdor bstan pa ste/ 'di ni dang po'o/ /mtshan nyid med pa'i chos ni ma shes na/ /kun nas nyon mongs mtshan nyid chos mi spong / /kun nas nyon mongs mtshan nyid ma spangs phyir/ /shin tu rnam dag mtshan nyid chos nyams 'gyur/ /'du byed skyon las rtog par mi byed pa/ /bag med nyes pas skye bo rab tu 'joms/ /le los chos gnas g.yo ba'i chos rnams la/ /med yod nyams pas snying brtser bya ba yin/ /zhes bya ba ni gnyis pa tshigs su bcad pa smos nas mdor bstan pa nyid do/ /de yan chad du tshig rkyang par rjes su mthun pa'i rnam par bshad pas ngo bo nyid rnam pa gsum rab tu shes pa'i yon tan bstan nas/ da ni tshigs su bcad pa 'dis mi mthun pa'i bshad pas mtshan nyid med pa'i bshad pa khong du ma chud pa'i nyes dmigs rab tu ston par mdzad do/ /ci'i phyir 'di dag la rjes su mthun pa dang / mi mthun pa'i rnam par shes pa zhes bya zhe na/ yang dag pa'i don du ni tshig rkyang pa dang tshigs su bcad pa gnyi ga la yang rjes su mthun pa dang mi mthun pa'i rnam par bshad pa yod mod kyis mdor bstan pa gzhag pa'i phyir/ phyogs re re smos nas phan tshun gcig gis gcig bstan pa yin no/ /dgongs pa zab mo rnam par dgrol ba'i mdo las/ tshigs su bcad pa dang tshig rkyang pa gnyi ga las rjes su mthun pa'i bshad pas bstan pa ni / lo tsA ba dag gi bsam pa tha dad pa'i phyir ro/ / 'dir tshigs su bcad pa gnyis yod pa nyid kyis rnam pa gnyis su dbye ste/ tshigs su bcad pa dang pos ni mtshan nyid med pa khong du ma chud pa'i nyes dmigs yang dag par bstan to/ /tshigs su bcad pa phyi mas ni 'du byed rnams kyi skyon la mi rtog pa'i nyes dmigs rab tu bstan to/ /dang po yang rnam pa gnyis te/ de la tshigs su bcad pa phyed dang pos ni khong du ma chud pa smos nas kun nas nyon mongs pa mi spong ba'i nyes dmigs bstan to/ /tshigs su bcad pa phyed 'og mas ni kun nas nyon mongs pa ma spangs pa las brtsams nas yongs su ma grub pa mngon du mi byed pa'i nyes dmigs rab tu ston to/ /de la nyams par 'gyur zhes bya bas ni stor bar 'gyur ba ste/ 'di ltar kun nas nyon mongs pa ma spangs pa'i phyir shin tu gya nom pa'i de bzhin nyid rnam par dag pa'i mtshan nyid kyi chos stor cing nyams par 'gyur bas so/ /de la stor cing nyams par 'gyur ba ni mngon du mi byed pa'i don to/ /tshigs su bcad pa phyi ma bshad pa yang rnam pa gnyis te/ dang po'i tshig gnyis kyis ni bag med pa'i nyes dmigs bstan to/ /tshig phyi ma gnyis kyis ni le lo'i nyes dmigs bstan to/ /de la 'du byed skyon la rtog par mi byed pa zhes bya ba la sogs pas ni 'di ltar rmongs pa'i dbang gis 'du byed rnams kyi skyon la mi rtog pas na/ des bag med pa bskyed nas sems can rnams la gnod par 'gyur ba'o/ /le los chos gnas g.yo ba'i chos rnams la/ /zhes bya ba la sogs pa ni le lo'i nyes dmigs bstan pa ste/ 'di ltar le lo can gang yin pa de dag ni skyon rnams kyi rgyu dang yon tan rnams kyi sgrib pa yin pas so/ /chos gnas pa zhes bya ba ni mya ngan las 'das pa rtag tu gnas shing mi 'jig pa'i phyir gnas pa zhes bya'o/ /g.yo ba'i chos zhes bya ba ni 'khor ba'i chos de snga ma byung bas phyis 'gag cing / srid pa gsum na 'khor ba'i phyir g.yo ba'i chos zhes bya'o/ /yang na chos gnas pa zhes bya ba ni ting nge 'dzin to/ /g.yo ba'i chos zhes bya ba ni rnam par g.yeng ba'o/ /med yod nyams pas snying brtser bya ba yin/ /zhes bya ba ni 'di lta ste/ le lor gyur pa'i phyir chos rnams la med pa dang / g.yo ba'i chos la yod pa nyid du 'dzin pas med pa dang yod pa de'i dbang gis nyes dmigs su gyur pa'o/ /nyams par gyur pa de'i phyir ni shin tu thugs brtse ba'i gnas su gyur pa ste/ nyams par 'gyur ba rgya cher bshad pa ni bstan bcos rnal 'byor spyod pa'i sa las 'byung ba bzhin du rig par bya'o/ /dgongs pa zab mo rnam par dgrol ba'i mdo las ni chos yang dag pa ji lta ba bzhin shes pas na/ kun nas nyon mongs chos kyi mtshan nyid spong / /kun nas nyon mongs mtshan nyid spangs nas ni/ /rnam par dag pa'i chos ni thob par 'gyur/ /'dus byas skyon la rtog par mi byed pa/ /le lo dang ni bag med rab tu bcom/ /chos rnams dag ni rtag tu mi g.yo bas/ /mtshan nyid bral ba mya ngan 'das zhes bya/ /zhes 'byung ngo / /[# dgongs pa zab mo nges par 'grel ba'i mdo las/ rang gi ngo bo nyid med pa'i mtshan nyid kyi le'u ste lnga pa'o/ / //bam po nyi shu bzhi pa/ le'u 'di'i rnam par bshad pa yang rnam pa gnyis te/ le'u nyid kyi ming rnam par bshad pa dang / mdo'i tshig don rnam par bshad pa'o/ /de la rang gi ngo bo nyid med pa'i mtshan nyid kyi le'u zhes bya ba la/ ngo bo nyid med pa ni mdor bsdu na rnam pa gsum ste/ mtshan nyid rang gi ngo bo nyid med pa'i ngo bo nyid dang skye ba rang gi ngo bo nyid med pa'i ngo bo nyid dang / don dam pa rang gi ngo bo nyid med pa'i ngo bo nyid de/ de la rang gi ngo bo nyid med pa zhes bya bas ni ngo bo nyid med pa rnam pa gsum rab tu bstan pa'i phyir rang gi ngo bo nyid med pa zhes bya ba gsungs so/ de la mtshan nyid ces bya ba ni ngo bo nyid kyi mtshan nyid dam/ yang na mtshan nyid kyi dbyibs so/ /ngo bo nyid med pa gsum po de dag kyang go rims bzhin du ngo bo nyid rnam pa gsum gyi bdag nyid kyi mtshan nyid do/ /le'u 'di las ngo bo nyid med pa rnam pa gsum gyi bdag nyid kyi mtshan nyid rgya cher ston pas de'i phyir rang gi ngo bo nyid med pa'i mtshan nyid kyi le'u zhes gsungs so/ /dgongs pa zab mo rnam par dgrol ba'i mdo las/ byang chub sems dpa' don dam pa mngon par grub pas zhus pa'i le'u zhes 'byung ba ni gang zag las ming du btags pa yin te/ lo tsA ba dag gi bsam pa tha dad pa'i phyir ro/ /de nas byang chub sems dpa' sems dpa' chen po don dam yang dag 'phags kyis bcom ldan 'das la 'di skad ces gsol to zhes bya ba 'di man chad ni mdo'i tshig gi don rnam par bshad pa ston te/ /ngo bo nyid yod pa dang / ngo bo nyid med pa'i yul bstan pa las/ de yan chad du ngo bo nyid rnam pa gsum gyi yul bshad zin nas/ 'di man chad ni gnyis pa ngo bo nyid med pa rnam pa gsum ston par mdzad do/ /le'u 'di la phyogs rnam pa lnga yod de dang po ni byang chub sems dpa' zhu ba gsol ba'i phyogs so/ /gnyis pa de nas bcom ldan 'das zhes bya ba man chad ni de bzhin gshegs pa yang dag par bshad pa'i phyogs so/ /gsum pa de nas byang chub sems dpa' don dam yang dag 'phags zhes bya ba man chad ni khong du chud par gyur nas bka' yang dag par blangs pa'i phyogs so/ /bzhi pa de nas byang chub sems dpa' don dam yang dag 'phags zhes bya ba man chad ni khyad par gyi bsngags pa brjod cing bskrun pa'i phyogs so/ /lnga pa de nas byang chub sems dpa' don dam yang dag 'phags zhes bya ba man chad ni bka' bzhin du spyod pa spyad pa'i phyogs so/ /zhu ba gsol ba'i phyogs la yang rnam pa gsum du dbye ste/ zhu ba gsol ba dang lan gsung pa po smos pa dang / bdag sngon zhes bya ba man chad gang zhu ba'i dngos po nyid bstan pa dang / bcom ldan 'das kyis ci las dgongs nas zhes bya ba man chad kyis bstan pa ji lta ba bzhin du zhu ba gsol ba'o/ /'di ni dang po zhu ba gsol ba dang lan gsung pa po smos pa ste/ de la don dam zhes bya ba ni thob par bya ba'i yul te/ ye shes dam pa'i yul yin pa'i phyir don dam zhes bya'o/ /yang dag 'phags zhes bya ba ni thob par byed pa'i ye shes don dam pa dmigs pa las skyes pa'i phyir yang dag 'phags zhes bya'o/ /bstan bcos theg pa chen po bsdus pa las/ 'di rtogs shing khong du chud pa'i phyir yang dag 'phags zhes bya'o zhes bshad de/ dmigs pa 'di las ye shes dam pa skyes pa'i phyir/ rtogs pa dang rtogs par bya ba'i dbang du mdzad nas don dam yang dag 'phags zhes btags pa yin no/ /bdag sngon gcig pu gnas dben pa zhig na mchis pa'i tshe/ /sems kyi rtog pa 'di lta bu skyes lags te zhes bya ba la sogs pas ni gnyis pa gang zhu ba'i dngos po nyid ston to/ /'di yang rnam pa gnyis te/ bdag nyid the tshom skyes pa'i rtog pa bstan pa dang zhu ba'i bstan pa nyid smos pa'o/ 'di ni dang po ste/ 'di ltar bdag sngon gcig pu ri dang nags tshal dben pa na gnas pa'i tshe/ rtog pa 'di lta bu skyes bcom ldan 'das kyis ci'i phyir sngar ni ngo bo nyid yod pa gsungs la phyis ni ngo bo nyid med par gsungs snyam du gyur to zhes bya ba'i tha tshig go/ /dgongs pa zab mo rnam par dgrol ba'i mdo las/ dben pa'i gnas na rnam par rtog pa'i sems skyes zhes 'byung ba ni snga ma bzhin du dbye bar bya ste/ lo tsA ba dag gi bsam pa tha dad pa'i phyir ro/ /rtog pa de yang bshad na rnam pa bzhi yod de/ dang po ni khams gsum pa'i zag pa dang bcas pa'i sems dang sems las byung ba'i chos rnam par rtog pa dang bcas pa gang yin pa'o/ /gnyis pa ni rnam par rtog pa ste/ de'i phyir dgongs pa zab mo rnam par dgrol ba'i mdo las/ dben pa'i gnas na rnam par rtog pa'i sems skyes zhes gsungs pa yin no/ /gsum pa ni rtog pa kho na ste/ de'i phyir bstan bcos chos mngon pa sna tshogs kun las btus pa las rnam par rtog pa la spyod pa ni dbugs rngub pa dang / 'byung ba dran pa'i yul la dmigs so zhes bshad pa yin no/ /mdzod kyi bstan bcos las kyang rtog pa ni phal cher sems rnam par g.yeng bar byed pas rnam par rtog pa la spyod pa zhes bya'o zhes 'byung ste/ de dbugs dran pa la brten bsgom pa la yang dag par 'jug pa'am/ yang na rtog pa dang dpyod pa la spyir rnam par rtog pa la spyod pa zhes bya'o zhes bstan pa'o/ /bzhi pa ni shes rab kyi grangs su song ba yongs su tshol ba ji lta bu ste/ la la nas de skad du bshad pa'i phyir ro/ /'dir ni zhi ba mchog tu bzang ngo / /bcom ldan 'das kyis rnam grangs du mar phung po rnams kyi rang gi mtshan nyid dang / skye ba'i mtshan nyid dang / 'jig pa'i mtshan nyid dang / gtan du spangs pa dang yongs su shes pa yang bka' stsal zhes bya ba la sogs pas ni gnyis pa zhu ba'i bstan pa nyid smos pa ston to/ /'di yang rnam pa gnyis te ngo bo nyid yod par gsungs pa'i bstan pa smos pa dang / bcom ldan 'das kyis gzhan yang zhes bya ba man chad kyis ngo bo nyid med par gsungs pa'i bstan pa smos pa'o/ / dang po la sgo rnam pa bcu gsum yod pa de dag kyang rnam pa lngar bsdus nas bstan te/ phung po la sogs pa'i bstan pa smos pa dang / dben pa'i bstan pa smos pa dang khams rnams bstan pa dang / dran pa nye bar gzhag pa la sogs pa bstan pa dang / 'phags pa'i lam yan lag brgyad pa bstan pa ste/ 'di ni dang po phung po'i bstan pa'i sgo'o/ /'di yang rnam pa gnyis te/ phung po'i bstan pa smos pa dang / zlas bstan pa gsum smos te/ 'di ni dang po mtshan nyid rnam pa lngas phung po'i bstan pa rnam par 'byed pa'o/ /rnam grangs du ma zhes bya ba la bshad pa rnam pa gnyis yod de/ kha cig na re phung po la yod pa'i rang dang spyi'i mtshan nyid la sogs pa'i rnam grangs gcig kho na ma yin pa'i phyir du ma zhes bya'o zhe'o/ /kha cig na re bstan du yod pa dang / bstan du med pa dang / gzugs yod pa dang / gzugs med pa la sogs pa'i rnam grangs gcig kho na ma yin pa'i phyir du ma [(]zhas [,]zhes [)]bya'o zhe'o/ /de la rang gi mtshan nyid ces bya ba ni bye brag gi mtshan nyid yin te/ ji skad du gzugs ni thogs pa dang bcas pa'o zhes bya ba nas/ rnam par shes pa ni rnam par rig pa'o zhes bya ba'i bar du bshad pa lta bu'o/ /skye ba'i mtshan nyid dang / 'jig pa'i mtshan nyid ces bya ba ni spyi'i mtshan nyid yin te/ gzugs la sogs pa la skye ba dang / 'jig pa'i mtshan nyid yod pa'i mtshan nyid yin pa'i phyir ro/ /gtan du spangs pa dang / yongs su shes pa zhes bya ba ni sdug bsngal kun 'byung ba'i mtshan nyid de/ kun 'byung gi bden pa las dang nyon mongs pa ni gtan du spang bar bya ba yin pa'i phyir dang / sdug bsngal gyi bden pa 'khor ba'i 'bras bu ni yongs su shes par bya ba yin pa'i phyir ro/ /yang na rang gi mtshan nyid ces bya ba ni rang gi ngo bo dang bye brag gi mtshan nyid de/ mtshan nyid 'di gnyis kyi skye ba dang / 'jig pa kun la khyab par 'gyur ba'o/ /gtan du spang ba dang yongs su shes pa ni 'og nas khong du chud par 'gyur ba skabs nas bstan pa bzhin du rig par bya'o/ /phung po rnams kyi ji lta ba de bzhin du skye mched rnams dang / rten cing 'brel par 'byung ba dang / zas rnams kyi yang bka' stsal ces bya ba ni gnyis pa zlas bstan pa gsum smos pa'o/ /ji ltar phung po la mtshan nyid lnga yod par gsungs pa de bzhin du skye mched bcu gnyis dang / rten cing 'brel par 'byung ba dang zas rnams la yang de bzhin du rig par bya'o zhes bya ba'i tha tshig go/ /'di lta ste skye mched rnams kyi rang gi mtshan nyid ni gzugs mthong bar nus pa'i phyir mig ces bya'o/ /mig gis blta bar bya ba yin pa'i phyir gzugs so zhes bya ba nas/ chos shes par nus pa'i phyir chos zhes bya'o zhes bya ba'i bar dag go/ /rten cing 'brel par 'byung ba'i rang gi mtshan nyid ni/ bstan bcos rnal 'byor spyod pa'i sa las/ shes pa mthun pa'i phyogs sems las byung ba'i chos sgrib par byed pa'i bdag nyid yin pas ma rig pa zhes bya'o zhes bya ba nas/ khad kyis nyams shing cig car 'jig pas rga shi zhes bya'o zhes bshad pa'i bar dag go/ /zas rnams kyi rang gi mtshan nyid ni kham gyis bcad cing mid pas kham gyi zas zhes bya'o zhes bya ba nas/ rnam par rig pas 'dzin par byed pas rnam par shes pa'i zas zhes bya'o zhes bya ba'i bar dag go/ /skye ba dang 'jig pa'i mtshan nyid rnam pa gnyis dang / gtan du spang ba dang / yongs su shes pa ni gong ma bzhin du rig par bya'o/ /ci'i phyir don dam pa'i bden pa'i mtshan nyid kyi le'u las ni mtshan nyid rnam pa drug gis phung po la sogs pa rnam par phye zhing bden pa bzhi yang yongs su rdzogs par gsungs la le'u 'di las ni sdug bsngal dang / kun 'byung nyi tshe gsungs shing 'gog pa dang lam ni ma bstan ce na/ smras pa/ le'u snga ma las mngon par rtogs pa'i bye brag rab tu dbye bar bzhed pa'i phyir ni bden pa bzhi tshang bar gsungs la le'u 'di las ni ngo bo nyid yod pa dang ngo bo nyid med pa'i bstan pa rnam pa gnyis kyi bye brag ston par mdzad pas de'i phyir 'dir ni mdor bsdus nas ma gsungs te/ phung po thob pa'i phyir 'gog pa mngon sum du byed pas so/ /rnam grangs du mar bden pa rnams kyi rang gi mtshan nyid dang / yongs su shes pa dang / gtan du spang ba dang / mngon du bgyi ba dang / bsgom pa yang bka' stsal zhes bya bas ni gnyis pa bden pa'i bstan pa smos pa'o/ /'di la tshig lnga yod pa yang rang gi mtshan nyid la bshad pa gnyis yod pa yang gong ma bzhin du rig par bya ste/ gnod cing nyam nga bas na sdug bsngal lo/ /rgyu 'dus pas na kun 'byung ba'o/ /'gags nas zad pas na 'gog pa'o/ /phyin par byed pas na lam mo/ /yongs su shes pa la sogs pa bzhi po dag gis ni bden pa bzhi logs shig tu phye nas bstan pa yin te/ sdug bsngal gyi bden pa yongs su shes pa dang / kun 'byung gi bden pa gtan du spang ba dang / 'gog pa'i bden pa mngon sum du bya ba dang / lam gyi bden pa bsgom pa'o/ /rnam [(]gangs [,]grangs [)]du mar khams rnams kyi rang gi mtshan nyid dang khams sna tshogs pa nyid dang / khams du ma pa nyid dang / gtan du spang ba dang / yongs su shes pa yang bka' stsal zhes bya ba ni gsum pa khams rnams kyi sgo bstan pa ste/ rang gi mtshan nyid kyi bshad pa ni gong ma bzhin du rig par bya'o/ /bar ma'i tshig gnyis ni 'di lta ste/ khams bco brgyad po dag gcig las gcig tha dad pa'i mtshan nyid gang yin pa de ni khams sna tshogs pa nyid ces bya'o/ /khams bco brgyad po de dag nyid sems can tshad med pa rnams kyi rten gyi bye brag tu gyur pa ni khams du ma nyid ces bya ste/ bstan bcos rnal 'byor spyod pa'i sa las bstan pa bzhin du rig par bya'o/ /gtan du spang ba dang / yongs su shes pa yang gong ma bzhin du sbyar ro/ /rnam grangs du mar dran pa nye bar gzhag pa'i rang gi mtshan nyid dang / gnyen po dang / mi mthun pa'i phyogs dang / bsgom pa dang ma skyes pa bskyed pa dang / skyes pa gnas pa dang / mi bskyud pa dang / slar zhing 'byung ba dang / 'phel zhing yangs pa nyid kyang bka' stsal zhes bya ba la sogs pas ni bzhi pa dran pa nye bar gzhag pa la sogs pa bstan pa rnam par 'byed pa'o/ /'di yang rnam pa gnyis te/ dran pa nye bar gzhag pa bstan pa dang / zlas sgo gzhan lnga po dag bstan pa'o/ /dang po la tshig lnga yod pa dang / rang gi mtshan nyid la bshad pa gnyis yod pa ni phung po bzhin du rig par bya'o/ /dran pa nye bar gzhag pa bzhi po 'di dag ni shes rab kyi ngo bo nyid de/ lus la sogs pa'i yul la gnas pas shes rab nye bar gnas pa zhes bya ba'i rigs pa las dran pa nye bar gzhag pa zhes gsungs pa ni dran pa dang mthun par gyur nas lus la sogs pa'i yul la gnas pa'i phyir dran pa nye bar gzhag pa zhes gsungs te/ 'di ni rnam par bshad pa drug las nye bar gyur pa'i rnam par bshad pa'o/ /tshig phyi ma bzhi ni phyin ci log bzhi'i gnyen por gyur pa dang / ma skyes pa bskyed pa dang / skyes pa rnams gnas pa dang / mi bskyud pa dang slar zhing 'byung ba dang / /'phel zhing yangs pa ste gong du bshad pa bzhin no/ /dran pa nye bar gzhag pa rnams kyi ji lta ba bzhin du yang dag par spong ba dang / rdzu 'phrul gyi rkang pa dang / dbang po dang / stobs dang / byang chub kyi yan lag rnams kyi yang de bzhin du bka' stsal zhes bya ba ni gnyis pa zlas sgo gzhan lnga po dag bstan pa'o/ /dran pa nye bar gzhag pa la tshig lnga yod pa bzhin du yang dag par spong ba bzhi dang / rdzu 'phrul gyi rkang pa bzhi dang / dbang po lnga dang / stobs lnga dang / byang chub kyi yan lag bdun rnams la yang tshig lnga yod par gong ma bzhin du rig par bya'o zhes bya ba'i tha tshig go/ /rnam grangs du mar 'phags pa'i lam yan lag brgyad pa'i rang gi mtshan nyid dang / gnyen po dang / mi mthun pa'i phyogs dang / bsgom pa dang / ma skyes pa bskyed pa dang / skyes pa rnams gnas pa dang / mi bskyud pa dang / slar zhing 'byung ba dang / 'phel zhing yangs pa nyid kyang bka' stsal zhes bya ba ni lnga pa 'phags pa'i lam yan lag brgyad pa bstan pa ste/ tshig lnga yod pa ni gong ma bzhin du rig par bya'o/ /sgo phyi ma bdun po 'di dag ni byang chub kyi phyogs sum cu rtsa bdun bsgom pa'i rnal 'byor bstan pa yin te/ 'di dag gi don ni mtshan nyid bstan pa dag las 'byung ba bzhin no/ /bcom ldan 'das kyis gzhan yang chos rnams thams cad ni ngo bo nyid ma mchis pa/ skye ba ma mchis pa/ 'gag pa ma mchis pa/ gzod ma nas zhi ba/ rang bzhin gyis yongs su mya ngan las 'das pa zhes kyang bka' stsal lags na zhes bya ba ni ngo bo nyid med par gsungs pa'i bstan pa smos pa'o/ /'di ni 'og nas mdo las dus gsum po dag tu chos kyi 'khor lo bskor bar gsungs pa las brtsams pa yin te/ dus dang po'i tshe ni bden pa bzhi bstan pa gsungs so/ /dus gnyis pa'i tshe ni mtshan nyid med pa'i bstan pa gsungs so/ /dus gsum pa'i tshe ni nges pa'i don gsungs te/ 'di ltar chos thams cad ni ngo bo nyid med pa/ skye ba med pa/ 'gag pa med pa/ gzod ma nas zhi ba/ rang bzhin gyis yongs su mya ngan las 'das pa zhes gsungs pas ngo bo nyid med pa yin no/ /'dir ni dus gnyis pa dus gsum pa dang po la ltos pa las brtsams nas zhu ba gsol ba yin te/ sngar ni mtshan nyid yod par gsungs la phyis ni mtshan nyid med par gsungs pa dang sbyar na/ mtshan nyid med par gsungs pa 'di ni/ sngar mtshan nyid yod par gsungs pa dang 'gal ba'i phyir ro zhes mtshan nyid med pas zhu ba'i gleng bslang ba yin no/ /mdo 'di nyid dang sbyar na sngar ni yod pa nyid du gsungs la phyis ni med pa nyid du ston to/ /don tshad med par bstan pa'i mdo las ni snga phyi'i dus gnyi gar yang stong pa dang yod pa nyid du ston te / de'i phyir mdo de nyid las/ rigs kyi bu ngas shing gi rgyal po'i drung nas langs te/ yul bA rA Na sI'i ri dgas rgyu ba'i tshal du song ba nas/ kun shes kauN+Di n+ya la sogs pa gang zag lnga po dag la bden pa bzhi'i chos kyi 'khor lo bskor ba na yang chos rnams gzod ma nas zhi ba zhes bshad do/ /bar du 'di dang gzhan dag nas kyang / dge slong rnams dang / byang chub sems dpa' mang po rnams kyi ched du rten cing 'brel par 'byung ba'i yan lag bcu gnyis dang / pha rol tu phyin pa drug po dag rnam par phye rab tu bstan chos rnams gzod ma nas stong zhing zhi ba'o zhes kyang bshad do zhes gsungs pa yin te/ zhib tu de nyid las bstan pa bzhin no/ /mdo 'di gnyis ji ltar gong du bshad par bya zhe na/ smras pa/ 'phags pa shes rab kyi pha rol tu phyin pa'i 'grel pa las ji skad du/ sangs rgyas rnams kyi chos ston par mdzad pa la dngos po rnam pa gnyis yod de/ shin tu gsang ba dang rab tu bstan pa'o zhes 'byung ba lta bu ste/ don tshad med par bstan pa'i mdo ni shin tu gsang ba'i sgo yin la/ mdo 'di ni rab tu bstan pa'i sgo yin te/ so so nas phyogs re re smos pa yin pas phan tshun 'gal ba med do/ /bcom ldan 'das kyis ci las dgongs nas chos thams cad ngo bo nyid ma mchis pa/ skye ba ma mchis pa/ 'gag pa ma mchis pa/ gzod ma nas zhi ba/ rang bzhin gyis mya ngan las 'das pa zhes bka' stsal lags zhes bya ba la sogs pas ni/ gsum pa bstan pa ji lta ba bzhin du zhu ba gsol ba ston to/ /'di yang rnam pa gsum ste/ bdag nyid kyi the tshom gang yin pa nyid gsol ba dang / bshad par gsol ba btab pa dang / gang bshad par gsol ba'i mdo 'di nyid smos pa'o/ /'di ni dang po ste/ 'di ltar bcom ldan 'das kyis sngar ni phung po dang / skye mched dang khams la sogs pa'i chos kyi sgo mo rnam pa bcu gsum po dag ngo bo nyid yod par gsungs pa phyis ni yang chos rnams thams cad ni ngo bo nyid med pa skye ba med pa 'gag pa med pa la sogs par gsungs pas ngo bo nyid yod par gsungs pa dang phyis ngo bo nyid med par gsungs pa'i bstan pa gnyis phan tshun 'gal bas na/ bcom ldan 'das kyis ci las dgongs nas ngo bo nyid med pa la sogs par gsungs pa ma rtogs na zhes bya ba'i don to/ /dgongs pa zab mo rnam par dgrol ba'i mdo las ni tshig lnga 'byung ste/ chos thams cad gzod ma nas ngo bo nyid med pa dang / chos thams cad gzod ma nas ma skyes pa dang / chos thams cad gzod ma nas ma 'gags pa dang / chos thams cad gzod ma nas zhi ba dang / chos thams cad gzod ma nas rang bzhin gyis yongs su mya ngan las 'das pa zhes 'byung ngo / /bdag deng 'dir de bzhin gshegs pa la don 'di nyid zhu ba lags na/ de bzhin gshegs pas thugs brtse bar dgongs te zhes bya ba ni gnyis pa bshad par gsol ba gdab pa'o/ /chos rnams thams cad ngo bo nyid ma mchis pa dang / skye ba ma mchis pa dang / 'gag pa ma mchis pa dang / gzod ma nas zhi ba dang / rang bzhin gyis yongs su mya ngan las 'das pa'i dgongs pa gang lags pa bshad du gsol zhes bya ba ni gsum pa gang bshad par gsol ba'i mdo nyid smos pa'o/ /de nas bcom ldan 'das kyis byang chub sems dpa' don dam yang dag 'phags la 'di skad ces bka' stsal to zhes bya ba 'di man chad ni gnyis pa de bzhin gshegs pas yang dag par bshad pa'i phyogs zhes bya ba ston to/ /'di yang rnam pa gnyis te/ zhu ba gsol ba la bsngags shing bshad par gnang ba bstan pa dang / don dam yang dag 'phags 'di ltar shes par bya ste zhes bya ba man chad kyis zhu ba bzhin du lan yang dag par bstan pa'o/ /dang po la yang rnam pa gnyis su dbye ste/ zhu ba gsol ba la phan yon yod par bsngags pa dang / mnyan par bskul zhing bshad par gnang ba'o/ /zhu ba gsol ba la phan yon yod par bsngags pa yang rnam pa bzhir dbye ste/ 'chad pa po rnam par 'byed pa dang / zhu ba gsol ba'i rigs pa dang mthun par bsngags pa dang / don zab mo zhus pa'i bsngags pa brjod pa dang / zhu ba gsol ba'i phan yon bsngags pa ste/ 'di ni dang po'o/ /don dam yang dag 'phags khyod sems kyi rtog pa dge ba tshul bzhin skyes pa legs so legs so zhes bya ba ni gnyis pa zhu ba gsol ba rigs pa dang mthun par gyur par bsngags pa'o/ /rigs kyi bu khyod kyis deng 'dir de bzhin gshegs pa la don zab mo 'dri ba legs so legs so zhes bya ba ni gsum pa don zab mo zhus pa'i bsngags pa brjod pa ste/ gong du bstan pa'i tshig 'bru dang / don gnyi ga dge ba'i phyir tshig zlos bus legs so legs so zhes bya ba gsungs so/ /khyod skye bo mang po la phan pa dang bde ba dang 'jig rten la snying brtse ba dang / lha dang / mi dang / lha ma yin la sogs pa'i don dang / phan pa dang / bde ba'i phyir dris pa yin pas zhes bya ba ni/ bzhi pa gsol ba'i phan yon gyi bsngags pa brjod pa ste/ gong ma bzhin du rig par bya'o/ /khyod legs par nyon cig dang ngas khyod la chos rnams thams cad ngo bo nyid med pa/ skye ba med pa 'gag pa med pa/ gzod ma nas zhi ba/ rang bzhin gyis yongs su mya ngan las 'das pa zhes bya ba gsungs pa'i dgongs pa bshad par bya'o zhes bya ba ni gnyis pa gnyen por bskul zhing bshad par gnang ba bstan pa'o/ /don dam yang dag 'phags 'di ltar shes par bya ste/ ngas ngo bo nyid med pa rnam pa gsum la dgongs nas/ chos rnams thams cad ngo bo nyid med pa zhes bstan to zhes bya ba 'di man chad gnyis pa zhus pa bzhin du lan yang dag par bstan pa ston to/ /'di yang rnam pa gnyis te/ tshig rkyang pas rgya cher bshad pa dang / tshigs su bcad pas smos nas bzlas te bshad pa'o/ /dang po yang rnam pa lngar bstan te/ ngo bo nyid med pa rnam pa gsum las brtsams nas/ mdo sde'i tshig rnams rnam par bshad pa dang / gzhan yang don dam yang dag 'phags zhes bya ba man chad kyis ngo bo nyid gsum gyi rnal 'byor las brtsams nas ngo bo nyid med pa rnam pa gsum rnam par bzhag pa'i dgongs pa bstan pa dang / gzhan yang don dam yang dag 'phags zhes bya ba man chad kyis gnas skabs las brtsams nas ngo bo nyid med pa rnam pa gsum rnam par gzhag pa'i dgongs pa bstan pa dang / gzhan yang don dam yang dag 'phags zhes bya ba man chad kyis ngo bo nyid med pa rnam pa gsum gyi rnal 'byor las brtsams nas theg pa gcig gi don rnam par 'byed pa dang / gzhan yang don dam yang dag 'phags zhes bya ba man chad kyis ngo bo nyid med par ston pa po'i bstan pa las brtsams nas mos pa mi mthun par gyur pa rnam par 'byed pa'o/ /'di ni dang po'i ngo bo nyid med pa rnam pa gsum las brtsams nas mdo sde'i tshig rnams rnam par bshad pa ste/ 'di yang rnam pa gnyis su dbye'o/ /ngo bo nyid med pa rnam pa gsum las brtsams nas mdo sde dag las/ chos thams cad ngo bo nyid med par gsungs pa rnam par bshad pa dang / don dam yang dag 'phags 'di ltar shes par bya ste zhes bya ba man chad kyis ngo bo nyid med par dang po dang tha ma las brtsams nas chos thams cad skye ba med pa dang / 'gag pa med pa la sogs pa'i tshig gis bshad pa bstan pa'o/ /dang po yang rnam pa gsum ste/ sgo bstan nas mdor bshad pa dang / rigs kyi bu zhes bya ba man chad kyis zhus pa dang lan dag gis rgya cher rnam par bshad pa dang / rigs kyi bu zhes bya ba man chad kyis bshad zin nas spyi'i mjug bsdu ba'o/ /sgo bstan nas mdor bshad pa yang rnam pa gnyis kyis bstan te/ ngo bo nyid med pa rnam pa gsum las brtsams nas mdo sde'i dgongs pa bstan pa dang / grangs bzhin du ngo bo nyid med pa rnam pa gsum gyis ming bkod pa ste/ 'di ni dang po'o/ /'di ltar bcom ldan 'das kyis chos thams cad ngo bo nyid med pa zhes gsungs pa ni ngas ngo bo nyid med pa rnam pa gsum la brten nas chos thams cad ngo bo nyid med pa'o zhes gsungs so zhes bya ba'i tha tshig go/ /de la chos thams cad ces bya ba ni ngo bo nyid rnam pa gsum yin te/ ngo bo nyid rnam pa gsum la brten nas ngo bo nyid med pa rnam pa gsum rnam par gzhag pas de'i phyir mdo sde rnams las chos thams cad ni ngo bo nyid med pa'o zhes gsungs te/ de'i phyir rnam par rig pa tsam du grub pa'i tshig le'ur byas pa las/ ngo bo nyid ni rnam gsum gyi/ /ngo bo nyid med rnam gsum la/ /dgongs nas chos rnams thams cad ni/ /ngo bo nyid med bstan pa yin/ /zhes 'byung ba yin no/ /'di lta ste mtshan nyid ngo bo nyid med pa nyid dang / skye ba ngo bo nyid med pa nyid dang / don dam pa ngo bo nyid med pa nyid do zhes bya ba ni gnyis pa grangs bzhin du ming bkod pa ste/ mtshan nyid ngo bo nyid med pa la sogs pa rnam pa gsum mo/ / rigs kyi bu chos rnams kyi mtshan nyid ngo bo nyid med pa gang zhe na zhes bya ba la sogs pas ni gnyis pa zhus pa dang lan dag gis rgya cher rnam par bshad pa bstan te/ 'di yang rnam pa gnyis te/ chos bzhin du yang dag par bshad pa dang / dpe smos nas bzlas te bshad pa'o/ /chos bzhin du yang dag par bshad pa yang ngo bo nyid med pa rnam pa gsum yod pa nyid kyis rnam pa gsum du dbye ste/ 'di ni dang po'o/ /dang po 'di yang rnam pa lngas bstan te/ dris pa dang / lan dang / brtag pa dang / rnam par bshad pa dang / mjug bsdu ba ste 'di ni dang po dris pa'o/ /'di lta ste/ chos rnams kyi kun brtags pa'i mtshan nyid gang yin pa'o zhes bya ba ni gnyis pa lan yang dag par bstan pa ste/ ngo bo nyid rnam pa gsum las kun brtags pa'i rang gi ngo bo nyid do zhes bya ba'i tha tshig go/ /de ci'i phyir zhe na/ zhes bya ba ni gsum pa brtag pa ste/ don gang gi phyir kun brtags pa'i mtshan nyid la ngo bo nyid med pa nyid ces bya ba'i tha tshig go/ /'di ni ming dang brdas mtshan nyid du rnam par gzhag gi /rang gi mtshan nyid kyi mtshan nyid du rnam par gzhag pa ni ma yin pas zhes bya ba ni bzhi pa brtag pa bzhin tu rnam par phye ste bshad pa'o/ /'di ni ming dang brdas mtshan nyid du rnam par gzhag ces bya ba ni mtshan nyid kyi don bstan pa ste/ 'di ltar tha snyad la brten nas mtshan nyid du rnam par gzhag pa'i phyir ro/ /gang rang gi mtshan nyid kyis mtshan nyid du rnam par gzhag pa ni ma yin pas zhes bya ba ni mtshan nyid med pa nyid kyi don bstan pa ste/ de ni mdor bsdu na 'di skad du kun brtags pa ni sems kyi rjes su yod kyi / don dam par med pa'i phyir ngo bo nyid med pa'o zhes bshad de/ des na kun brtags pa'i mtshan nyid de la ngo bo nyid med pa'o zhes bya'o zhes bstan par 'gyur te/ de phyir bstan bcos rnam par bshad pa las 'di lta ste/ kun du brtags pa'i ngo bo nyid la bdag nyid kyi mtshan nyid med pa'i phyir ngo bo nyid med pa nyid ces bya'o zhes bstan to/ /gzhan yang bstan bcos ngo bo nyid med pa gsum bstan pa las/ ji ltar snang ba bzhin du mtshan nyid de yang dag par med pa'i phyir kun du rtog pa'i ngo bo nyid ni mtshan nyid med pa'i ngo bo nyid do zhes bshad do/ /bstan bcos rnal 'byor spyod pa'i sa las kyang / mtshan nyid ngo bo nyid med pa gang zhe na/ 'di lta ste/ chos rnams kyi tha snyad las byung ba'i ngo bo nyid do zhes 'byung ngo / /de'i phyir mtshan nyid ngo bo nyid med ces bya'o zhes bya ba ni lnga pa mjug bsdu ba ste/ brda phrad par zad do/ /chos rnams kyi skye ba ngo bo nyid med pa gang yin zhes bya ba la sogs pas ni gnyis pa skye ba ngo bo nyid med pa nyid ston to/ /'di yang rnam pa lngar dbye ba ni gong ma bzhin du rig par bya ste 'di ni dang po dris pa'o/ /'di lta ste/ chos rnams kyi gzhan gyi dbang gi mtshan nyid yin pa'o zhes bya ba ni gnyis pa lan yang dag par bstan pa ste/ 'di ltar ngo bo nyid rnam pa gsum las gzhan gyi dbang gi ngo bo nyid kyi bdag nyid do zhes bya ba'i tha tshig go/ /de ci'i phyir zhe na/ zhes bya ba ni gsum pa brtag pa ste/ don gang gi phyir gzhan gyi dbang gi ngo bo nyid skye ba ngo bo nyid med pa nyid ces bya zhes bya ba'i don to/ /'di ni 'di ltar gzhan gyi stobs kyis yod pa yin gyi/ bdag nyid kyis yod pa ni ma yin pas zhes bya ba ni bzhi pa rnam par phye ste bshad pa'o/ /'di ni 'di ltar rkyen gzhan gyi stobs kyis yod pa yin gyi zhes bya ba 'dis ni skye ba'i don bstan pa ste/ 'di ltar rkyen gzhan gyi stobs kyis yod pa'i phyir skye ba zhes bya'o zhes bya ba'o/ /bdag nyid kyis yod pa ma yin zhes bya bas ni ngo bo nyid med pa nyid bstan pa'o/ /de ni 'di skad du chos gzhan rnams la brten pa'i rgyu dang rkyen gyi phyir skye ba zhes bshad kyi dbang phyug la sogs pa las byung ba ma yin pas skye ba med pa zhes bya'o zhes bstan par 'gyur te/ de'i phyir bstan bcos rnam par bshad pa las/ gzhan gyi dbang gi ngo bo nyid ni rkyen gyi stobs las byung ba yin gyi/ bdag nyid kyis skyes pa ma yin pas de'i phyir skye ba med pa zhes bya'o zhes bstan to/ /gzhan yang bstan bcos ngo bo nyid med pa gsum bstan pa las/ gzhan gyi dbang gi ngo bo nyid rkyen gyi stobs las skyes pa yin gyi/ bdag nyid kyis skyes pa ma yin pas de'i phyir gzhan gyi dbang ni skye ba med pa'i bdag nyid do zhes 'byung ngo / /bstan bcos rnal 'byor spyod pa'i sa las ni skye ba ngo bo nyid med pa nyid gang zhe na zhes 'byung ngo / /de'i phyir skye ba ngo bo nyid med pa nyid ces bya ba ni lnga pa mjug bsdu ba ste/ brda phrad par zad do/ /chos kyi don dam pa ngo bo nyid med pa nyid gang zhe na zhes bya ba la sogs pas ni gsum pa don dam pa ngo bo nyid ston to/ /'di yang rnam pa gnyis te/ gzhan gyi dbang las brtsams nas don dam pa ngo bo nyid bstan pa dang / gzhan yang zhes bya ba man chad kyis yongs su grub pa las brtsams nas don dam pa ngo bo nyid med pa nyid bstan pa'o/ /dang po la yang rnam pa lngar phye nas bstan pa ni gong ma bzhin du rig par bya ste 'di ni dang po dris pa'o/ /'di lta ste/ chos rnams kyi skye ba ngo bo nyid med pa nyid kyi phyir ngo bo nyid med pa nyid ces bya ste/ rten cing 'brel bar 'byung ba'i chos la don dam pa ngo bo nyid med pa nyid ces kyang bya'o zhes bya ba ni gnyis pa lan yang dag par bstan pa'o/ /mdo'i tshig 'di yang rnam pa gnyis kyis bstan te/ dang po ni gsum pa bshad pa nyid kyis gnyis smos pa ste de ni snga ma bzhin no/ /gnyis pa rten cing 'brel par 'byung ba zhes bya ba la sogs pas ni ngo bo nyid gnyis la brten nas ngo bo nyid med pa gsum pa rnam par gzhag pa ste/ 'di ltar gzhan gyi dbang la yongs su grub pa med pas de'i phyir rten cing 'brel bar 'byung ba'i chos skye ba ngo bo nyid med pa nyid ces bya bar ma zad kyi/ don dam pa ngo bo nyid med pa nyid ces kyang bya ste/ de'i phyir bstan bcos rnam par bshad pa las/ gzhan gyi dbang gi ngo bo nyid mtshan nyid tha dad pa'i phyir/ don dam pa ngo bo nyid med pa nyid du yang rnam par gzhag ste/ de ci'i phyir zhe na/ don dam pa'i ngo bo nyid med pa'i phyir ro zhes bstan to/ /de ci'i phyir zhe na/ zhes bya ba ni gsum pa brtag pa ste/ ci'i phyir rten cing 'brel bar 'byung ba la yang don dam pa ngo bo nyid med pa nyid ces bya zhes bya ba'i tha tshig go/ /chos rnams la rnam par dag pa'i dmigs pa gang yin pa de ni/ ngas don dam pa ngo bo nyid med pa nyid yin par yongs su bstan la/ gzhan gyi dbang gi mtshan nyid ni rnam par dag pa'i dmigs pa ma yin pas zhes bya ba ni bzhi pa rnam par phye ste bshad pa'o/ /mdo'i tshig 'di yang rnam pa gnyis su dbye ste/ yul la don dam pa rnam par dag pa med par bstan pa dang / gzhan gyi dbang la rnam par dag pa'i don dam pa de med par bstan pa'o/ /'dis ni de bzhin nyid ye shes yongs su dag pa'i dmigs par gyur pa la rnam par dag pa'i don dam zhes bstan te/ de'i phyir bstan bcos rnam par bshad pa las/ 'di ltar don dam pa ni rnam par dag pa'i dmigs pa'i ngo bo nyid yin par rig par bya ste/ de ci'i phyir zhe na/ yul 'di la dmigs pa'i dbang gis sems rnam par dag pa thob pa'i phyir ro zhes bstan pa yin no/ /de'i phyir don dam pa ngo bo nyid med pa nyid ces bya'o zhes bya ba lnga pa mjug bsdu ba ste brda phrad par zad do/ /gzhan yang chos rnams kyi yongs su grub pa'i mtshan nyid gang yin pa de ni yang don dam par ngo bo nyid ces bya'o zhes bya ba la sogs pas gnyis pa yongs su grub pa las brtsams nas don dam pa ngo bo nyid [(]mad [,]med [)]pa nyid bstan pa'o/ /'di yang rnam pa bzhis bstan te/ mdor bstan pa dang / brtag pa dang / rnam par bshad pa dang / mjug bsdu ba'o/ /'di ni dang po mdor bstan pa ste/ 'di ltar ngo bo nyid rnam pa gsum las yongs su grub pa'i ngo bo nyid kyi bdag nyid ces bya ba'i tha tshig go/ /de ci'i phyir zhe na zhes bya ba ni gnyis pa gtan tshigs brtag pa ste/ ci'i phyir yongs su grub pa'i ngo bo nyid la don dam pa zhes kyang bya/ ngo bo nyid med pa zhes kyang bya zhes bya ba'i don to/ /chos rnams kyi bdag med pa nyid ni don dam pa zhes kyang bya/ ngo bo nyid med pa zhes kyang bya ste/ chos thams cad kyi don dam pa'i bden pa yin pa'i phyir dang / ngo bo nyid med pa nyid kyis rab tu phye ba'i phyir zhes bya ba ni gsum pa yang dag par bshad pa'o/ /'di yang rnam pa gnyis te/ mdor bstan pa dang / rnam par bshad pa'o/ /'di ltar chos bdag med pa yang don dam pa gnyis kyi phyir te don dam pa zhes bya ba dang / ngo bo nyid med pa nyid ces bya ba ste/ chos rnams kyi don dam pa yin pa'i phyir dang / chos rnams kyi ngo bo nyid med pa nyid kyis rab tu phye ba'i phyir ro/ /de'i phyir bstan bcos rnam par bshad pa las kyang 'di lta ste/ yongs su grub pa ni don dam pa dang / ngo bo nyid med pa yin te/ ngo bo nyid des na don dam pa'i bdag nyid yin no/ /gzhan yang chos rnams kyi ngo bo nyid med pa nyid yin pa'i phyir ro zhes bya ba dang / gzhan yang de nyid las/ rang bzhin des na don dam pa yang yin/ ngo bo nyid med pa yang yin te/ spros pa dang bdag dang chos kyi ngo bo nyid med pa'i phyir ro zhes 'byung ngo / /ngo bo nyid med pa rnam pa gsum bstan pa'i bstan bcos las ni 'di dang mi mthun te de'i phyir de nyid las/ de kho na nyid kyi dbang du byas nas de kho na nyid med pa'i phyir ngo bo nyid med pa zhes bshad pa ni de kho na nyid 'di la ngo bo nyid gzhan med kyi/ snga ma'i ngo bo nyid yin te/ de kho na nyid mtshan nyid med pa dang / skye ba med pa'i phyir 'dus byas kyi chos thams cad ni kun du rtog pa dang gzhan gyi dbang gnyis kyi ngo bo nyid las gud na med do/ /ngo bo nyid 'dis de kho na nyid mtshan nyid med pa dang skye ba med pa'i rigs pa de'i phyir chos thams cad ni ngo bo nyid med pa nyid du mtshungs so/ /ngo bo nyid med pa 'di gcig kho na nyid du med pa yang yin la/ de kho na nyid du yod pa yang yin du zin kyang de kho na nyid la ni kun du rtog pa dang / gzhan gyi dbang 'di gnyis yod ces bya ba dang de kho na nyid la kun du rtog pa dang / gzhan gyi dbang 'di gnyis med ces bya ba med pa'i phyir yod ces byar yang mi rung la/ med ces byar yang mi rung ngo zhes bya ba nas rgya cher bshad pa'i bar du 'byung ste/ gzhan gyi dbang yang bsdus pa'i phyir 'di dang mi mthun no/ /rgyu dang rkyen des na don dam pa ngo bo nyid med pa nyid ces bya ba ni bzhi pa mjug bsdu ba ste/ brda phrad par zad do/ /mdo 'di nyid dang sbyar na don dam pa dang ngo bo nyid med pa yang gnyis su 'gyur te/ gzhan gyi dbang dang yongs su grub pa yin na ci'i phyir bstan bcos tshig le'ur byas pa sum cu pa las/ phyi ma ma yin la snga ma yin par bstan zhe na/ smras pa/ yang dag par don gnyis dang ldan pa'i phyir/ mdo 'di dang bstan bcos rnam par bshad pa las/ gzhan gyi dbang gi ngo bo nyid la don dam pa med pa'i phyir yang don dam pa ngo bo nyid med pa zhes bshad la/ bstan bcos rnams snga ma ma bstan pa ni/ bstan bcos rnam par rig pa tsam du grub pa'i nang nas slob dpon chos skyong gis bshad pa las/ ji skad du gnyis pa yang bsdus par 'gyur bas de'i phyir 'dir ma bshad do zhes bstan pa lta bu'o/ /mdo 'di las ngo bo nyid gsum po nyid las ngo bo nyid med pa gsum nyid du rnam par gzhag pas bdag nyid ngo bo nyid gsum du gyur pa yin na ci'i phyir bstan bcos ngo bo nyid med pa gsum bstan pa las de bzhin nyid gcig las ngo bo nyid med pa gsum rnam par gzhag pa de'i phyir de nyid las ngo bo nyid gsum po 'di nyid la brten nas ngo bo nyid med pa gsum po dag bshad pa yin te/ ngo bo nyid med pa gsum gyi dbang gis na skye ba med pa'i don du gcig pa nyid du rig par bya'o/ /kun du rtog pa ni mtshan nyid ngo bo nyid med pa des ngo bo nyid med pa zhes bshad do/ /gzhan gyi dbang ni skye ba ngo bo nyid med pa des ngo bo nyid med pa zhes bshad do/ /yongs su grub pa'i ngo bo nyid ni don dam par ngo bo nyid med pa'i phyir ngo bo nyid med pa zhes bshad do zhes zhib tu de nyid las bstan pa bzhin no zhe na/ smras pa/ 'di la bshad pa rnam pa gnyis yod de/ dang po ni slob dpon yang dag bden pa na re/ de bzhin nyid gcig la ngo bo nyid yongs su bsags pa'i phyir ngo bo nyid rnam pa gsum gsungs te/ de la yongs su grub pa'i ngo bo nyid ni rnam par gzhag pa'i bden pas bsdus pa yin la/ ngo bo nyid med pa rnam pa gsum ni rnam par gzhag pa ma yin pas bstan bcos ngo bo nyid med pa gsum bstan pa las 'byung ba bzhin no zhe'o/ / gnyis pa ni slob dpon h+yan tsang na re/ bstan bcos rnam par bshad pa las ni ngo bo nyid rnam pa gsum la brten nas/ ngo bo nyid med pa gsum rnam par gzhag nas de nyid la yang dag pa nyid du 'dzin te/ de ci'i phyir zhe na/ slob dpon dbyig gnyen gyis mdzad pa'i tshig le'ur byas pa sum cu pa las/ ngo bo nyid ni rnam gsum gyi/ /ngo bo nyid med rnam gsum la/ /dgongs nas chos rnams thams cad ni/ /ngo bo nyid med bstan pa yin/ /zhes bstan pa'i phyir te/ slob dpon chos skyong gis bshad pa'i 'grel pa las/ yod pa dang med pa gnyi ga ngo bo nyid med par gsungs pa'i phyir dgongs pa zhes bya'o zhes 'byung ngo / /gzhan yang bstan bcos rnam par bshad pa ni/ slob dpon thogs med kyis mdzad pa yin pas/ bstan bcos theg pa chen po bsdus pa dang 'dra bar don gcig ston pa yin la/ gzhan yang bstan bcos rnal 'byor spyod pa'i sa las/ mdo 'di nyid rgya cher khongs su ston cing ngo bo nyid gsum gyis yod pa dang med pa nyid du yang ston pas de'i phyir ngo bo nyid med pa gsum bstan pa'i bstan bcos de ni lo tsA ba dag gis nor bar bsgyur bar shes par bya ste/ de ci'i phyir zhe na/ rnam par rig pa tsam du grub pa'i tshig le'ur byas pa sum cu pa dang / ngo bo nyid med pa gsum bstan pa gnyi ga yang slob dpon dbyig gnyen gyis mdzad pa yin na/ ci'i phyir bstan bcos 'di gnyis la bye brag de lta bu dag yod par gyur/ gzhan yang slob dpon dbyig gnyen ni 'phags pa byams pa dang / slob dpon thogs med kyi gzhung la brten pas de'i phyir ngo bo nyid med pa gcig tu mtshungs so zhes bshad pa ni/ yang dag bden pas nor bar bsgyur bar mngon no zhe'o/ /'dir yang dag bden pas ngo bo nyid med pa gsum bstan pa bsgyur ba dang gtugs na / bstan bcos slob dpon thogs med kyis mdzad par 'byung bas bstan bcos rnam par bshad pa'i nang nas ngo bo nyid med par bstan pa'i le'u gcig slob dpon yang dag bden pas logs shig tu phyung ste bsgyur nas dper spel ba yang 'dra'o/ /rigs kyi bu dper na nam mkha'i me tog lta bur ni/ mtshan nyid ngo bo nyid med pa nyid kyang de bzhin du rig par bya'o zhes bya ba 'di man chad ni gnyis pa dpe smos nas bzlas te bshad pa ston to/ /'di yang ngo bo nyid med pa gsum bstan pa nyid kyis rnam pa gsum du dbye ste/ 'di ni dang po mtshan nyid ngo bo nyid med pa'i dpe bstan pa'o/ /dper na nam mkha'i me tog rab rib kyi dbang gis nam mkha' la me tog gi mtshan ma lta bur snang yang / /yang dag par nam mkha' la me tog gzod ma nas med pa ltar kun du brtags pa yang de bzhin te/ brtag pa nyid dang po nas ngo bo nyid med pa'i phyir/ mtshan nyid ngo bo nyid med pa nyid kyang de bzhin du rig par bya'o zhes gsungs so/ /dper na sgyu ma byas pa ji lta bu de lta bur ni skye ba ngo bo nyid kyang de bzhin du rig par bya/ don dam pa ngo bo nyid med pa nyid kyi phyogs gcig kyang de bzhin du rig par bya'o zhes bya ba ni gnyis pa skye ba ngo bo nyid med pa nyid dang / don dam pa ngo bo nyid med pa nyid kyi phyogs gcig gi dpe bstan pa ste/ chos mngon pa'i mdo las ji skad du/ sgyu ma la sogs pa'i dpe brgyad kyis ni gzhan gyi dbang rab tu bstan pa yin no zhes gsungs pa lta bu'o/ /'dir gnyis pa skye ba ngo bo nyid med pa nyid dang / don dam pa ngo bo nyid med pa nyid kyi phyogs gcig gi gzhan gyi dbang gi bdag nyid yin pas de'i phyir sgyu ma'i gzugs bzhin du rig par bya'o/ /'phags pa shes rab kyi pha rol tu phyin pa'i mdo la sogs pa las ni/ sgyu ma la sogs pa stong pa nyid kyi don gyi dper bstan na/ ci'i phyir mdo 'di las gzhan gyi dbang gi dper bstan zhe na/ smras pa/ sgyu ma la sogs pa la yang don rnam pa gnyis yod de/ dang po ni yod pa ma yin yang yod pa 'dra bar snang ba dang / gnyis pa ni yang dag pa'i gzugs la sogs pa med pa ste/ de'i phyir mdo nyid las so so nas don re re smos pa'i phyir 'gal ba med do/ /dper na nam mkha' ni gzugs sna tshogs kyi ngo bo nyid med pa tsam rab tu phye ba dang / thams cad du song ba lta bur ni don dam pa ngo bo nyid med pa nyid kyi phyogs gcig kyang de bzhin du rig par bya ste/ chos bdag med pa nyid kyis rab tu phye ba'i phyir dang / thams cad du song ba'i phyir ro zhes bya ba ni gsum pa don dam pa ngo bo nyid med pa nyid kyi phyogs gcig gi dpe bstan pa'o/ /dper na nam mkha' zhes bya ba la don rnam pa gnyis yod de/ gzugs med pas rab tu phye ba dang thams cad kun du khyab pa'o/ /de bzhin nyid kyi don dam pa ngo bo nyid med pa nyid kyang de bzhin du rig par bya ste/ dang po ni chos bdag med pa nyid kyis rab tu phye ba'i phyir dang / gnyis pa ni thams cad du khyab pa'i phyir 'phags pa sangs rgyas kyi mdo las/ nam mkha'i dpe rnam pa bcus chos kyi dbyings rnam par dag pa'i dper bstan pa yin te / 'dir yang de bzhin no/ /chos mngon pa'i mdo dang / bstan bcos rnal 'byor spyod pa'i sa las ni gzugs med pa tsam dang / gnas med pa tsam la nam mkha' zhes bstan la sangs rgyas kyi sa'i 'grel pa dang / bstan bcos rnam par rig par tsam du grub pa las ni phung po gnas med pa la nam mkha' zhes bstan pa ste ji ltar shes par bya zhe na/ smras pa/ rnal 'byor spyod pa'i sa dang / chos mngon pa la sogs pa ni bkri ba'i don gyi sgo nas bstan pas chos thams cad yod par smra ba dag dang mthun la/ rnam par rig pa tsam du grub pa'i bstan bcos la sogs pa ni de kho na nyid kyi sgo nas bstan pas so so nas don re re smos pa'i phyir 'gal ba med do/ /rigs kyi bu ngas ngo bo nyid med pa nyid rnam pa gsum po de de dag las dgongs nas chos thams cad ngo bo nyid med pa'o zhes bstan to zhes bya ba ni gsum pa bshad zin nas spyi'i mjug bsdu ba'o/ / //bam po nyi shu lnga pa/ don dam yang dag 'phags 'di ltar shes par bya ste/ ngas mtshan nyid ngo bo nyid med pa nyid las dgongs nas chos rnams thams cad ni skye ba med pa/ 'gag pa med pa/ gzod ma nas zhi ba rang bzhin gyis yongs su mya ngan las 'das pa zhes bstan to zhes bya ba 'di man chad ni gnyis pa ngo bo nyid med pa dang po dang tha ma las brtsams nas chos thams cad skye ba med pa dang / 'gag pa med pa la sogs pa'i tshig gi bshad pa ston to/ /'di yang rnam pa gnyis te/ mtshan nyid ngo bo nyid med pa las brtsams nas skye ba med pa la sogs pa'i tshig bshad pa dang / rigs kyi bu zhes bya ba man chad kyis don dam pa ngo bo nyid med pa las brtsams nas skye ba med pa la sogs pa'i tshig rnam par bshad pa'o/ /dang po yang rnam pa bzhir dbye ste/ mdor bkod pa dang / brtag pa dang / rnam par bshad pa dang / mjug bsdu ba'o/ /'di ni dang po rigs pas gzhung nyid mdor bkod pa ste/ 'di ltar mdo sde rnams las skye ba med pa zhes bya ba la sogs pa gsungs pa ni mtshan nyid ngo bo nyid med pa'i dbang du mdzad nas skye ba med pa la sogs pa yin no zhes bya ba'i tha tshig go/ /de ci'i phyir zhe na zhes bya ba ni gnyis pa phyi rol pa dag gis phyir brtag pa'o/ /chos gang rang gi mtshan nyid kyis med pa gang yin pa de ni skye ba med pa yin la/ skye ba med pa gang yin pa de ni 'gag pa med pa yin no/ /skye ba med pa dang 'gag pa med pa gang yin pa de ni gzod ma nas zhi ba yin/ gzod ma nas zhi ba gang yin pa de ni rang bzhin gyis yongs su mya ngan las 'das pa yin te/ de la yang yongs su mya ngan las 'da' bar bya ba cung zad kyang med pa'i phyir zhes bya ba ni gsum pa rnam par bshad pa'o/ /mdo'i tshig 'di yang rnam pa bzhir dbye ste/ skye ba med pa rnam par bshad pa dang / 'gag pa med pa rnam par bshad pa dang / gzod ma nas zhi ba rnam par bshad pa dang / rang bzhin gyis yongs su mya ngan las 'das pa rnam par bshad pa ste/ mdo sde 'di nyid las brda phrad pa'i phyir bshad pa ma byas so/ /de lta bas na ngas mtshan nyid ngo bo nyid med pa nyid las dgongs nas chos rnams thams cad ni skye ba med pa/ 'gag pa med pa/ gzod ma nas zhi ba/ rang bzhin gyis yongs su mya ngan las 'das pa'o zhes bstan to zhes bya ba ni bzhi pa mjug bsdu ba ste brda phrad par zad do/ /rigs kyi bu chos thams cad bdag med pa nyid kyis rab tu phye ba'i don dam pa ngo bo nyid med pa nyid las dgongs nas kyang chos rnams thams cad skye ba med pa/ 'gag pa med pa/ gzod ma nas zhi ba/ rang bzhin gyis yongs su mya ngan las 'das pa'o zhes bstan to zhes bya ba 'di man chad ni gnyis pa don dam pa ngo bo nyid med pa nyid las brtsams nas skye ba med pa la sogs pa'i tshig rnam par bshad pa ston to/ /'di yang rnam pa bzhis bstan te/ mdor bkod pa dang / brtag pa dang / rnam par bshad pa dang / mjug bsdu ba'o/ /'di ni dang po ste/ 'di ltar yongs su grub pa don dam pa'i bden pa la don rnam pa bzhi yod de/ skye ba med pa dang / 'gag pa med pa dang / gzod ma nas zhi ba dang / rang bzhin gyis yongs su mya ngan las 'das pa ste/ de'i phyir mdo sde rnams las yongs su grub pa don dam pa ngo bo nyid med pa las brtsams nas skye ba med pa la sogs pa gsungs so zhes bya ba'i tha tshig go/ /de ci'i phyir zhe na zhes bya ba ni gnyis pa phyi rol pas brtag pa ste/ phyi rol pa dag 'di skad du/ don dam pa bzhis bstan kyang da dung / de'i rgyu gang lags ma 'tshal na/ ci'i slad du skye ba ma mchis pa la sogs pa zhes bgyi lags zhes brtag pa'o/ /chos bdag med pa nyid kyis rab tu phye ba'i don dam pa ngo bo nyid med pa nyid ni rtag pa rtag pa'i dus dang / ther zug ther zug gi dus su chos rnams kyi chos nyid du rnam par gnas shing 'dus ma byas pa yin te/ kun nas nyon mongs pa thams cad dang mtshungs par mi ldan pa'i phyir ro zhes bya ba la sogs pa ni gsum pa yang dag par bshad pa ste/ 'di yang rnam pa gnyis su phye nas bstan to/ /rgyu rnam pa gsum mdor bstan nas brtag pa'i lan gsungs pa dang rgyu rnam pa gsum bzlas nas skye ba med pa la sogs pa rnam par bshad pa ste/ 'di ni dang po'o/ /mdo'i tshig 'di yang rnam pa gnyis su phye nas bstan to/ /dang po ni don dam pa ngo bo nyid med pa'i bdag nyid bstan pa ste/ 'di yang rnam pa gnyis po gzhan gyi dbang dang yongs su grub pa'o/ /'di ni phyi ma gzung gi/ dang po ni ma yin no/ /gnyis pa rtag pa rtag pa'i dus zhes bya ba la sogs pas ni rgyu rnam pa gsum yang dag par bstan te/ dang po ni rtag pa rtag pa'i dus dang / ther zug ther zug gi dus su chos rnams kyi chos nyid du rnam par gnas pa'i phyir 'dus ma byas pa'o/ /gnyis pa ni 'dus ma byas pa'i phyir/ skye ba med pa dang / 'gag pa med pa ste/ 'di ni rnam par gnas pa'i phyir dang / 'dus ma byas pa'i phyir rgyu rnam pa gnyis las skye ba dang / 'gag pa med pa'i don gnyis mngon par grub par bstan pa'o/ /kun nas nyon mongs pa thams cad dang mtshungs par mi ldan pa'i phyir zhes bya bas ni rgyu gsum pa las brtsams nas mdo sde rnams las gsungs pa'i gzod ma nas zhi ba dang / rang bzhin gyis yongs su mya ngan las 'das pa'i don gnyis rnam par gzhag pa yin par bstan to/ /rtag pa rtag pa'i dus dang / ther zug ther zug gi dus su chos rnams kyi chos nyid du rnam par gnas pa'i phyir 'dus ma byas pa'o/ /'dus ma byas pa'i phyir skye ba med pa 'gag pa med pa'o zhes bya ba la sogs pas ni gnyis pa rgyu rnam pa gsum bzlas nas skye ba med pa la sogs pa rnam par bshad pa bstan to/ /'di yang rnam pa gnyis kyi ba bstan te rgyu rnam pa gnyis kyis skye ba med pa la sogs pa bshad pa dang / kun nas nyon mongs pa thams cad dang mtshungs par mi ldan pa'i rgyus gzod ma nas zhi ba dang / rang bzhin gyis yongs su mya ngan las 'das pa bshad pa'o/ /'di ni dang po ste/ 'di ltar chos bdag med pa don dam pa'i bden pa'i tshul ni rtag pa rtag pa'i dus dang ther zug ther zug gi dus su chos rnams kyi chos nyid du rnam par gnas pa'i phyir ni 'dus ma byas nyid du mngon par grub la/ 'dus ma byas pa'i phyir ni skye ba med pa dang 'gag pa med pa'i don gnyis mngon par 'grub pa yin no zhes bya ba'i tha tshig go/ /kun nas nyon mongs pa thams cad dang mtshungs par mi ldan pa'i phyir/ gzod ma nas zhi ba/ rang bzhin gyis yongs su mya ngan las 'das pa yin te zhes bya ba ni gnyis pa kun nas nyon mongs pa thams cad dang mtshungs par mi ldan pa'i rgyu las gzod ma nas zhi ba dang / rang bzhin gyis yongs su mya ngan las 'das pa'i don gnyis mngon par 'grub pa yin par bstan pa'o/ /mdo dag las ni ma skyes pa zhes bya ba la sogs pa gsungs na/ 'dir ci'i phyir ngo bo nyid med pa dang po dang tha ma kho na las brtsams she na/ smras pa/ ngo bo nyid med pa de yang / brjod na rnam pa gnyis yod de/ theg pa che chung gi sde snod gnyis las thun mong du bstan pa'i ngo bo nyid med pa dang / byang chub sems dpa' kho na'i sde snod las bstan pa'i ngo bo nyid med pa'o/ /de la thun mong du bstan pa zhes bya ba ni slob dpon dbyig gnyen gyis mdzad pa theg pa chen po bsdus pa'i 'grel pa las ji skad du/ chos thams cad ngo bo nyid med par bstan pa'i dgongs pa 'dir bstan par bya ste/ rang 'khrungs nyid du med pa ni chos rnams gang yang rkyen mang po las gud na rang gi ngo bor yod pa ma yin pa gang yin pa ste/ 'di ni ngo bo nyid med par bstan pa'i dgongs pa gcig ces bya'o/ /rang gi bdag nyid kyis med pa ni chos gang 'gags nas yang mi skye ba'i phyir ngo bo nyid med pa gang yin pa ste/ 'di yang ngo bo nyid med par bstan pa'i dgongs pa gcig go/ /rang gi ngo bo nyid kyis brtan por mi gnas pa ni chos gang byung ma thag tu skad cig gcig phan chad gnas pa'i mthu med pa'i phyir ngo bo nyid med pa gang yin pa ste/ chos rnams kyi ngo bo nyid med pa'i rigs pa de dag ni nyan thos dang thun mong ma yin no zhes bstan pa lta bu'o/ /de la thun mong ma yin pa yang 'grel pa de nyid las ji ltar mngon par zhen pa ltar yod pa ma yin pa'i phyir ngo bo nyid med pa zhes bstan pa'i ngo bo nyid med pa gang yin pa de ni nyan thos dang thun mong ma yin pa'o zhes 'byung ste/ ji ltar so so'i skye bo dag kun brtags pa'i ngo bo nyid la mngon par zhen pa de ni de ltar yod pa ma yin pas dgongs pa de'i phyir/ theg pa chen po'i rigs pa dang sbyar nas chos thams cad ngo bo nyid med pa'o zhes bstan pa'o zhes bstan to zhes bya ba'i tha tshig go/ /bstan bcos chos mngon pa sna tshogs kun las btus pa dang / ngo bo nyid med par bstan pa las kyang de skad du ston to/ /de ltar rnam pa gnyis su bstan pa yang yod mod kyi/ mdo 'di nyid ni thun mong ma yin pa'i sgo'i dbang du mdzad nas ngo bo nyid med pa zhes bya ba la sogs pa gsungs so/ /thun mong ma yin pa'i sgo nas ngo bo nyid med pa la sogs pa bstan pa de yang bstan pa rnams las ngo bo nyid med par ston pa so so nas mi mthun pas 'phags pa'i gsung rab kha cig ni ngo bo nyid med pa dang po las brtsams nas chos thams cad ngo bo nyid med pa dang / skye ba med pa dang / 'gag pa med pa la sogs par ston pa yang yod de/ bstan bcos shin tu rgyas pa brgya pa las ji skad du/ bcom ldan 'das nyid kyis ngas kun brtags pa'i ngo bo nyid las dgongs nas mdo gzhan dag la chos thams cad ngo bo nyid med pa dang / skye ba med pa dang 'gag pa med pa dang / gzod ma nas zhi ba dang / rang bzhin gyis yongs su mya ngan las 'das pa'o zhes ston to zhes gsungs so zhes 'byung ba lta bu'o/ /gzhan yang bstan bcos rnal 'byor spyod pa'i sa dang / mdo sde'i rgyan dang / slob dpon dbyig gnyen dang / ngo bo nyid med kyis mdzad pa'i theg pa chen po bsdus pa'i 'grel pa las kyang 'di dang mthun par 'byung ngo / /bstan bcos theg pa chen po bsdus pa'i 'grel pa mi mthun pa rnam pa gcig las ni spyir ngo bo nyid med pa rnam pa gsum la brten nas ngo bo nyid med pa zhes bya ba la sogs par ston pas 'di dang mi mthun no/ /gsung rab kha cig las ngo bo nyid med pa rnam pa gsum las brtsams nas chos thams cad ngo bo nyid med pa nyid du ston la/ ngo bo nyid med pa dang po las brtsams nas ni skye ba med pa la sogs pa nyid du ston pa yang yod de/ bstan bcos rnal 'byor spyod pa'i sa las ji skad du/ bcom ldan 'das kyis ci las dgongs nas chos thams cad ngo bo nyid med pa zhes gsungs she na smras pa/ gdul ba'i dbang gis de dang der ngo bo nyid med pa rnam pa gsum las dgongs nas gsungs so/ /gzhan yang de nyid las bcom ldan 'das kyis ci las dgongs nas chos thams cad skye ba med pa dang / 'gag pa med pa dang / gzod ma nas zhi ba dang / rang bzhin gyis yongs su mya ngan las 'das pa zhes gsungs smras pa/ mtshan nyid ngo bo nyid med pa las dgongs nas gsungs so zhes bstan pa lta bu'o/ /gsung rab kha cig las ni ngo bo nyid med pa rnam pa gsum la brten nas ni/ chos thams cad ngo bo nyid med par ston la dang po dang tha ma gnyis la brten nas ni skye ba med pa la sogs par ston pa yang yod de/ mdo 'di nyid dang dgongs pa zab mo rnam par dgrol ba'i mdo las bstan pa lta bu'o/ /gsung rab kha cig las ni ngo bo nyid med pa rnam pa gsum las brtsams nas chos thams cad ngo bo nyid med pa dang / skye ba med pa la sogs par ston pa yang yod de/ bstan bcos chos mngon pa sna tshogs kun las btus pa las ji skad du de la chos thams cad ces bya ba ni ngo bo nyid rnam pa gsum po 'di lta ste/ kun brtags pa'i ngo bo nyid dang / gzhan gyi dbang gi ngo bo nyid dang / yongs su grub pa'i ngo bo nyid do/ /kun brtags pa'i ngo bo nyid ni nges par rang gi mtshan nyid de rang gi mtshan nyid med pa'i phyir mtshan nyid ngo bo nyid med pa zhes bya la/ mtshan nyid ngo bo nyid med pa nyid kyi phyir ngo bo nyid med pa zhes bya'o/ /gzhan gyi dbang gi ngo bo nyid ni rkyen mang po la ltos pa'i phyir bdag nyid skye ba ma yin la/ bdag nyid skye ba'i ngo bo nyid med pa'i phyir skye ba ngo bo nyid med pa zhes bya ste/ skye ba ngo bo nyid med pa'i phyir ngo bo nyid med pa zhes bya'o/ /yongs su grub pa'i ngo bo nyid ni rnam par dag pa'i dmigs pa yin pa'i phyir dang / gzhan gyi dbang la kun brtags pa'i mtshan nyid med pas rab tu phye ba'i bdag nyid yin pa'i phyir don dam pa'i ngo bo nyid do/ /gzhan yang ngo bo nyid med pas rab tu phye ba'i phyir don dam pa ngo bo nyid med pa zhes bya la/ don dam pa ngo bo nyid med pa'i phyir ngo bo nyid med pa zhes bya ste/ rigs pa des na de'i phyir de bzhin gshegs pas chos thams cad ngo bo nyid med pa zhes gsungs kyi/ rigs can thams cad kyi mtshan gyi rnam pa gtan med pa la ngo bo nyid med pa zhes gsungs pa ni ma yin no zhes bstan pa lta bu'o/ /gzhan yang de nyid las chos thams cad skye ba med pa dang 'gag pa med pa dang / gzod ma nas zhi ba dang / rang bzhin gyis yongs su mya ngan las 'das pa'o zhes gsungs pa ci las dgongs te gsungs/ ngo bo nyid med pa ji lta ba de bzhin du skye ba med pa yang de bzhin no/ / skye ba med pa ji lta ba de bzhin du 'gag pa med pa yang de bzhin no/ / skye ba med pa dang 'gag pa med pa ji lta ba de bzhin du gzod ma nas zhi ba yang de bzhin no/ /gzod nas zhi ba ji lta ba de bzhin du rang bzhin gyis yongs su mya ngan las 'das pa yang de bzhin no zhes 'byung ngo / /gzhan yang de nyid las dgongs pa ni 'di lta ste/ ngo bo nyid rnam pa gsum las chos thams cad kyi byed pa nyid ngo bo nyid med pa dang / skye ba med pa dang / 'gag pa med pa la sogs par bstan pa gang yin pa'o zhes 'byung ste/ theg pa chen po bsdus pa'i 'grel pa mi mthun pa rnam pa gcig las kyang de skad du ston to/ /bstan pa rnam pa de ltar tha dad par gyur pa yang byed pa nyid ces bya ba 'di ni kun brtags pa'i ngo bo nyid de'i phyir bstan bcos shin tu rgyas pa brgya pa la sogs pa las/ kun brtags pa'i ngo bo nyid la brten nas chos thams cad ngo bo nyid med pa dang skye ba med pa dang / 'gag pa med pa zhes bya ba la sogs par bstan pa ni rten cing 'brel bar 'byung ba'i don dam pa ma yin par rab tu bstan pa yin te/ de'i phyir mdo 'di yang spyir ngo bo nyid med pa gsum las dgongs nas ni chos thams cad ngo bo nyid med pa zhes bstan la/ ngo bo nyid med pa dang po dang tha ma la dgongs nas skye ba med pa la sogs par bstan pa yin no/ /gzhan gyi dbang gi bdag nyid ni gzhan la brten nas skye ba yang bdag nyid kyis skye ba dang / rgyu med pa las skye ba'i don med pas de'i phyir bstan bcos chos mngon pa kun las btus pa la sogs pa las ngo bo nyid rnam pa gsum las brtsams nas chos thams cad ngo bo nyid med pa dang / skye ba med pa dang / 'gag pa med pa la sogs pa zhes bstan pa yin te/ ngo bo nyid med pa rnam pa gsum gyi don zhib tu ni mtshan nyid brtan pa dag las 'byung ba bzhin du rig par bya'o/ /de'i phyir ngas chos bdag med pa nyid kyis rab tu phye ba'i don dam pa ngo bo nyid med pa nyid las dgongs nas chos rnams thams cad ni skye ba med pa dang / 'gag pa med pa gzod ma nas zhi ba/ rang bzhin gyis yongs su mya ngan las 'das pa'o zhes bstan to zhes bya ba bzhi pa mjug bsdu ba ste/ brda phrad par zad do/ /gong du bstan pa'i dgongs pa de dag ldem por dgongs pa rnam pa bzhi po gang las dgongs she na smras pa/ bstan bcos chos mngon par sna tshogs kun las btus pa dang sbyar na ldem por dgongs pa rnam pa bzhi yod de/ de'i phyir bstan bcos de nyid las gzhug pa la ldem por dgongs pa dang / mtshan nyid la ldem por dgongs pa dang / [ (]gnyan [,]gnyen[)] po la ldem por dgongs pa ste / bsgyur ba la ldem por dgongs pa dang / rnam pa bzhi po 'di dag gis theg pa chen po las de bzhin gshegs pas ldem por gsungs pa'i rigs pa thams cad mdor bsdus pa yin no/ /de la gzhug pa la ldem por dgongs pa ni 'di lta ste/ nyan thos kyi theg pa las gzugs la sogs pa'i chos rnams rang gi ngo bo nyid yod pa skad du bshad pa ste/ skrag pa med par 'phags pa'i gsung rab la gzhug pa'i phyir ro/ /mtshan nyid la ldem por dgongs pa ni 'di lta ste/ ngo bo nyid rnam pa gsum las dgongs nas chos thams cad ngo bo nyid med pa dang / skye ba med pa dang / 'gag pa med pa la sogs par bstan pa gang yin pa'o/ /gnyen po la ldem por dgongs pa ni 'di lta ste/ nyes pa'i skyon rnams 'dul ba'i ched du de bzhin gshegs pas ldem por dgongs pa rnam pa sna tshogs kyis sgrib pa rnam pa brgyad kyi gnyen po'i phyir theg pa mchog yang dag par gsungs pa lta bu'o/ /brgyad po dag kyang gang zhe na/ sangs rgyas la brnyas pa dang / chos la brnyas pa dang / le lo dang dge ba chung ngu tsam gyis chog par 'dzin pa dang / 'dod chags la spyod pa dang / nga rgyal la spyod pa dang / 'gyod pa dang / ma nges pa'i rigs can te/ sangs rgyas la brnyas pa'i gnyen por sngon gyi sangs rgyas rnam par gzigs kyang nga nyid yin no zhes gsungs pa dang / chos la brnyas pa'i gnyen por de bzhin gshegs pa gang gA'i klung gi bye ma snyed bsnyen bkur byas na theg pa chen po'i shes pa skye bar 'gyur ro zhes gsungs pa dang / le lo'i sgrib pa'i gnyen por sems can gang bde ba can du smon lam 'debs pa gang yin pa de dag ni der skye bar 'gyur ba dang / sangs rgyas dri ma med pa zla ba'i 'od kyi mtshan dran cing brjod pa tsam gyis bla na med pa yang dag par rdzogs pa'i byang chub tu nges par 'gyur ro zhes gsungs pa dang / dge ba chung ngu tsam gyis chog par 'dzin pa'i gnyen por sbyin pa la sogs pa'i spyod pa la res 'ga' ni bsngags la res 'ga' ni dman par mdzad pa dang / 'dod chags la spyod pa'i bar du gcod pa'i gnyen por sangs rgyas kyi zhing gi bde ba dang bkod pa'i bsngags pa brjod pa dang / nga rgyal la spyod pa'i bar du gcod pa'i gnyen por sangs rgyas rnams kyi phun sum tshogs pa la lhag par bsngags pa brjod pa dang / 'gyod pa la spyod pa'i bar du gcod pa'i gnyen por gang gis sangs rgyas dang byang chub sems dpa' rnams la gnod pa byas pa'i sems can de dag brnyas pa byas mod kyi/ 'on kyang mtho ris su skye bar 'gyur ro zhes gsungs pa dang / ma nges pa'i rigs can gyi gnyen por nyan thos kyi mos pa dman pa spang ba'i ched du nyan thos chen po rnams kyang sangs rgyas su 'gyur ro zhes lung bstan pa dang / gzhan yang theg pa ni gcig kho nar zad de de'i gong ni khyad par du 'phags pa gzhan med do zhes gsungs pa lta bu'o/ /bsgyur ba la ldem por dgongs pa ni 'di ltar mdo dag las le'u lta bu'i tshul du gsungs pa ste/ ji skad du/ snying po med la snying por shes/ /phyin ci log la shin tu gnas/ /nyon mongs kun las rab nyon mongs/ /byang chub sems dpa' thob par 'gyur/ /zhes gsungs pa lta bu ste/ 'di'i dgongs pa ni rnam par g.yeng ba la gang dag snying po dang / mchog gi blo 'byung ba ste/ de ci'i phyir zhe na/ snying po zhes bya ba la don rnam pa gnyis yod de/ phra ba dang rnam par g.yeng zhing g.yo ba'o/ /'di ltar rnam par g.yeng zhing g.yo ba'i dbang gis sems sra zhing bag med par 'gyur ba'i phyir yang snying po zhes bya'o/ /phyin ci log la shin tu gnas zhes bya ba ni 'di lta ste/ rtag pa dang / bde ba dang / gtsang ba dang / bdag tu 'dzin pa'i phyin ci log bzhi bzlog nas mi rtag pa la sogs pa nyid du 'gyur ba'i phyir phyin ci log ces bya la/ de las nyams par ma gyur pa'i phyir ni shin tu gnas pa zhes bya'o/ /nyon mongs kun nas rab nyon mongs/ /zhes bya ba ni 'di lta ste/ yun ring por dka' ba byas pa'i rtsol bas shin tu ngal zhing nyon mongs par 'gyur ba'i phyir ro/ /byang chub dam pa thob par 'gyur/ /zhes bya ba ni gong du bstan pa lta bu'i dngos po gsum dang ldan pa gang yin pa de ni nges par bla na med pa'i byang chub myur du thob par 'gyur ba'o zhes 'byung ngo / /mdo 'di las gsungs pa'i ldem por dgongs pa bstan pa ni bcom ldan 'das kyis rnam grangs du mar phung po la sogs pa'i chos kyi sgo rnam pa bcu gsum po dag la rang gi mtshan nyid yod par gsungs pa lta bu ste/ 'di ni rnam pa bzhi las gzhug pa la ldem por dgongs pa'o/ /bcom ldan 'das kyis gzhan yang chos rnams thams cad ni ngo bo nyid med pa dang / skye ba med pa dang / 'gag pa med pa la sogs par gsungs pa gang yin pa de ni rnam pa bzhi las mtshan nyid la ldem por dgongs pa'o/ /slob dpon dbyig gnyen dang ngo bo nyid med kyis mdzad pa'i theg pa chen po bsdus pa'i 'grel pa las ni/ ngo bo nyid rnam pa gsum la brten nas mtshan nyid la ldem por dgongs pa ston to/ /bstan bcos mngon pa sna tshogs kun las btus pa dang / mdo sde'i rgyan las ni/ ngo bo nyid med pa rnam pa gsum la brten nas skye ba med pa la sogs pa bstan pa gang yin pa de la mtshan nyid la ldem por dgongs pa zhes ston pas/ bstan bcos mngon pa sna tshogs kun las btus pa dang / mdo sde'i rgyan de nyid mdo'i tshig dang mthun no/ /gzhan yang don dam yang dag 'phags sems can gyi khams na sems can rnams kyi kun brtags pa'i ngo bo nyid la ngo bo nyid tha dad par mthong ba'i phyir dang gzhan gyi dbang gi ngo bo nyid dang / yongs su grub pa'i ngo bo nyid la ngo bo nyid tha dad par mthong ba'i phyir/ ngas ngo bo nyid med pa nyid rnam pa gsum du rnam par gzhag pa ma yin zhes bya ba 'di man chad ni gnyis pa ngo bo nyid rnam pa gsum gyi rnal 'byor las brtsams nas ngo bo nyid med pa rnam pa gsum rnam par gzhag pa'i dgongs pa ston pa mdzad do/ /'di yang rnam pa gnyis te/ mi mthun pa'i rnam par bshad pas bstan pa dang / 'on kyang zhes bya ba man chad rjes su mthun pa'i rnam par bshad pa'o/ /'di ni dang po ste/ de la mthong ba zhes bya ba ni ltos pa'am yang na so sor brtag pa'i don to/ /de ni 'di skad du/ 'di ltar sems can rnams ngo bo nyid rnam pa gsum po dag la go rims bzhin du ngo bo nyid rnam pa gsum yongs su bsal ba'i phyir ngo bo nyid rnam pa gsum du rnam par gzhag pa ma yin te/ de ci'i phyir zhe na/ mtshan nyid ngo bo nyid med pa kho nas kun brtags pa yongs su bsal bar bya ba ma yin gyi/ gzhan gnyis kyang mngon par zhen pa sel bar byed pa'i phyir ro/ /gzhan gyi dbang dang yongs su grub pa bsal nas ngo bo nyid med pa nyid phyi ma gnyis rnam par gzhag pa ma yin te/ gzhan gyi dbang dang yongs su grub pa ni yongs su bsal mi nus pa'i phyir ro zhes bstan par 'gyur ro/ /gzhan yang kha cig na re 'dir dgongs pa rnam pa gsum gzhag pa ni sems can rnams kyi mngon par zhen pa'i skyon rab tu bsal ba'i ched du ngo bo nyid med pa rnam pa gsum rnam par gzhag pa yin gyi/ sems can de dag ngo bo nyid gsum po re re la logs shig tu ngo bo nyid rnam pa gsum yod pa nyid du mngon par zhen pas de dag rab tu bsal ba'i phyir ngo bo nyid med pa rnam pa gsum rnam par gzhag pa ni ma yin yang sems can rnams gzhan gyi dbang dang yongs su grub pa khong du ma chud pas ngo bo nyid rnam pa gnyis la sgro 'dogs pa'i mngon par zhen pa bskyed pa des na ngo bo nyid rnam pa gsum [(]rnas [,]rnam [)]par gzhag pa yin no zhes zer te/ bshad pa rnam pa gnyis las bshad pa ni phyi ma bzang ste/ mdo sde'i tshig dang rjes su mthun pa'i phyir ro/ /dgongs pa zab mo rnam par dgrol ba'i mdo las kyang 'di dang mthun par 'byung ngo / /'on kyang sems can rnams ni gzhan gyi dbang gi ngo bo nyid dang / yongs su grub pa'i ngo bo nyid la kun brtags pa'i ngo bo nyid du sgro 'dogs pa'i phyir ngas ngo bo nyid rnam pa gsum rnam par gzhag pa yin te zhes bya ba la sogs pa ni gnyis pa rjes su mthun pa'i rnam par bshad pas bstan to/ /'di yang rnam pa gnyis te/ mdor bstan pa dang rnam par bshad pa'o/ de ni 'di skad du/ ngo b o nyid rnam pa gnyis la kun brtags pa'i mtshan nyid rang gi mtshan nyid du rnam par gzhag pas mtshan nyid du gyur pa ma yin pa'i phyir mtshan nyid ngo bo nyid med pa nyid rnam par gzhag pa dang gzhan gyi dbang la rang gi bdag nyid kyi skye ba med cing sgro btags pa yin pa'i phyir skye ba ngo bo nyid med pa nyid du rnam par gzhag pa dang / yongs su grub pa la kun brtags pa'i ngo bo nyid med pa'i phyir don dam pa ngo bo nyid med pa nyid du rnam par gzhag go/ /ngo bo nyid med pa rnam pa gsum tha dad par mthong ba la ngo bo nyid ces bya ba ma yin pas de'i phyir ngo bo nyid med pa nyid rnam pa gsum zhes bshad pa yin no zhes bstan par 'gyur ro/ /kun brtags pa'i ngo bo nyid kyi mtshan nyid des na de'i phyir sems can de dag gzhan gyi dbang gi ngo bo nyid dang / yongs su grub pa'i ngo bo nyid la rjes su tha snyad 'dogs so zhes bya ba la sogs pa ni gnyis pa rnam par bshad pa ste/ de ni 'di skad du 'di ltar brtags pa'i mtshan nyid kyis ni tha snyad slong bar 'gyur/ tha snyad kyi dbang gi phyir ni rgyu rnam pa gsum mngon par grub par 'gyur/ rgyu rnam pa gsum gyi dbang gi phyir ni mngon par zhen pa bskyed par 'gyur/ mngon par zhen pa'i phyir ni gzhan gyi dbang dang / kun nas nyon mongs pa rnam pa gsum byung nas 'gro ba drug po dag tu 'khor ba'i nyes dmigs su 'gyur bas de'i phyir 'dir kun brtags pa'i mtshan nyid kyi dbang du mdzad nas ngo bo nyid med pa rnam pa gsum du rnam par gzhag pa yin no zhes bstan par 'gyur ro/ /'di yang rnam pa gnyis su dbye ste/ kun brtags pa'i dbang gis mngon par zhen pa skyed par bstan pa dang / ji lta ji ltar zhes bya ba man chad kyis mngon par zhen pa'i dbang gis 'khor ba'i chos can du 'gyur bar bstan pa'o/ /dang po yang rnam pa gnyis kyis bstan te/ kun brtags pa'i mtshan nyid kyi dbang gis tha snyad 'byung bar bstan pa dang / ji lta ji ltar zhes bya ba man chad kyis tha snyad kyi dbang gis mngon par zhen pa skye bar bstan pa'o/ /'di ni dang po ste/ yang dag pa'i don du na ngo bo nyid gnyi ga yang tha snyad dang bral ba yin mod kyi kun brtags pa'i mtshan nyid kyi dbang gis ngo bo nyid rnam pa gnyis su tha snyad 'dogs par gyur to zhes bya ba'i tha tshig go/ /ji lta ji ltar rjes su tha snyad 'dogs pa de lta de ltar tha snyad btags pa'i sems yongs su bsgos pa'i phyir dang / tha snyad blo dang 'brel pa'i phyir dang / tha snyad bag la nyal gyi phyir zhes bya ba la sogs pas ni gnyis pa tha snyad kyi dbang gis mngon par zhen pa skye bar bstan to/ /'di yang rnam pa gnyis te tha snyad kyi dbang gis rgyu rnam pa gsum mngon par 'grub par bstan pa dang / rgyu rnam pa gsum gyi dbang gis mngon par zhen pa skye bar bstan pa ste/ 'di ni dang po'o/ /ji lta ji ltar zhes bya ba ni bshad par bya ba'i chos bstan pa ste/ bshad par bya ba'i chos kyang gcig kho na ma yin pa'i phyir ji lta ji ltar zhes bya ba gsungs so/ /ji lta ji ltar gyur pa de dag gi rjes su tha snyad 'dogs pas na/ de'i phyir tshig zlos bur de lta de ltar zhes gsungs so/ /tha snyad rnams kyi dbang gis rgyu rnam pa gsum mngon par 'grub par 'gyur te/ dang po tha snyad btags pas sems yongs su bsgos pa'i phyir zhes bya ba 'dis ni yongs su bsgos pa rnam pa gsum las tha snyad kyis yongs su bsgos pa bstan to/ /gnyis pa tha snyad du blo dang 'brel pa'i phyir zhes bya ba 'dis ni ming dang tha snyad shes pa blo'i rjes su rnam par rtog par gyur pa ste/ lha dang mi la sogs pa tha snyad shes pa gang yin pa rnams so/ /gsum pa tha snyad bag la nyal gyi phyir zhes bya ba 'di ni ming dang tha snyad mi shes pa bag la nyal gyi rjes su rnam par rtog par gyur pa ste/ ba lang dang lug la sogs pa tha snyad mi shes kyang bag la nyal gyi dbang gis rnam par rtog par gyur pa lta bu ste/ des na tha snyad kyi dbang gis rgyu rnam pa gsum mngon par grub par bstan to/ /gzhan gyi dbang gi ngo bo nyid dang / yongs su grub pa'i ngo bo nyid la kun brtags pa'i ngo bo nyid kyi mtshan nyid du mngon par zhen te zhes bya ba ni gnyis pa rgyu rnam pa gsum gyi dbang gis mngon par zhen pa skye bar bstan pa ste/ rgyu rnam pa gsum las dang po'i rgyu gcig gis ni mngon par zhen pa'i rgyu'i rkyen rab tu bstan to/ /rgyu phyi ma gnyis kyis ni bdag po'i rkyen rab tu bstan te/ rgyu rnam pa 'di gsum gyi dbang gis ngo bo nyid gnyis po dag la kun brtags pa'i ngo bo nyid du mngon par zhen par gyur to zhes bya ba'i tha tshig go/ /ji lta ji ltar mngon par zhen pa de lta de ltar gzhan gyi dbang gi ngo bo nyid dang yongs su grub pa'i ngo bo nyid la kun brtags pa'i ngo bo nyid du mngon par zhen pa zhes bya ba 'di man chad ni gnyis pa mngon par zhen pa'i dbang gis 'khor ba'i chos can du gyur par bstan to / /'di yang rnam pa gnyis te snga ma'i mngon par zhen pa bzlog nas 'khor ba'i rgyu rab tu bstan pa dang / mngon par zhen pas 'khor ba'i 'bras bu bskyed pa rab tu bstan pa ste 'di ni dang po'o/ /ji lta ji ltar zhes bya ba ni mngon par zhen pa'i yul bstan pa ste/ mngon par zhen pa zhes bya ba yang gcig kho na ma yin pa'i phyir ji lta ji ltar zhes bya ba gsungs so/ /ji lta ji ltar gyur pa de dag gi rjes su mngon par zhen pa rnams skye bas de'i phyir tshig zlos bur de lta de ltar zhes bya ba gsungs te/ mngon par [(]zhan [,]zhen [)]pa des na ngo bo nyid rnam pa gnyis la kun brtags pa'i ngo bo nyid du mngon par zhen par gyur la/ mngon par zhen pa des ni 'khor bar gyur to zhes bya ba'i tha tshig go/ /rgyu dang rkyen des na phyi ma la gzhan gyi dbang gi ngo bo nyid du kun du bskyed de zhes bya ba la sogs pa ni gnyis pa 'khor ba'i 'bras bu bskyed pa rab tu ston to/ /'di yang rnam pa gnyis te gzhan gyi dbang bskyed pa bstan pa dang / kun nas nyon mongs pa rnam pa gsum bskyed pa yongs su bstan pa ste 'di ni dang po'o/ /gzhan gyi dbang dang / kun nas nyon mongs pa la bye brag ci yod ce na/ smras pa/ spyi dang khyad par gyi bye brag yod do/ /yang na rgya che chung mi mthun pas gzhan gyi dbang ni rgya che ba yin te/ rkyen las skyes pa rnams ni thams cad kyang gzhan gyi dbang yin pa'i phyir ro/ /kun nas nyon mongs pa rnam pa gsum po dag tu ni dbang po lnga la sogs pa yongs su gso ba ma bsdus pa'i phyir ro/ /gzhi des na nyon mongs pa'i kun nas nyon mongs pas kyang nyon mongs par 'gyur/ las kyi kun nas nyon mongs pas kyang nyon mongs par 'gyur la/ skye ba'i kun nas nyon mongs pas kyang kun nas nyon mongs par 'gyur bas 'khor ba na yun ring por rgyug cing / yun ring por 'khor ba la rgyun chad pa med ces bya ba la sogs pa ni gnyis pa kun nas nyon mongs pa rnam pa gsum bskyed pa yongs su ston to/ /'di yang rnam pa gnyis te kun nas nyon mongs pa rnam pa gsum gyi dbang gis 'khor ba na 'khor bar bstan pa dang / kun nas nyon mongs pa rnam pa gsum gyi dbang gis 'gro ba drug po dag tu 'khor bar bstan pa ste/ 'di ni dang po'o/ /'di ltar mngon par zhen pa des rgyu dang rkyen byas pa'i phyir kun nas nyon mongs pa rnam pa gsum skye bar 'gyur ro/ /kun nas nyon mongs pa rnam pa gsum ni 'di lta ste/ nyon mongs pa dang las dang skye ba'o/ /dmigs pa dang mtshungs par ldan pa dang / 'ching ba rnam pa gnyis kyis bcings pa'i phyir kun nas nyon mongs pa zhes bya ste/ kun nas nyon mongs pa de dag gi dbang gis ni dngos po dang rnam par gyur pa'i 'chi 'pho rnam pa gnyis su rgyug cing 'khor ba la rgyun chad med par gyur to zhes bya ba'i don to/ /'chi 'pho rnam pa gnyis kyi don ni mtshan nyid bstan pa dag las 'byung ba bzhin du rig par bya'o/ /yang na sems can dmyal ba rnams sam/ yang na dud 'gro rnams sam/ yang na yi dags rnams sam/ yang na lha rnams sam/ yang na lha ma yin rnams sam/ yang na mi rnams kyi nang du sdug bsngal sna tshogs myong bar 'gyur ro zhes bya ba ni gnyis pa kun nas nyon mongs pa rnam pa gsum gyi dbang gis 'gro ba drug po dag tu 'khor bar gyur pa bstan pa'o/ de la sems can dmyal ba zhes bya ba ni bstan bcos yang dag pa'i rig pa dang rjes su mthun pa las/ ka ni bde ba'i ming yin/ na ni med pa la bya/ rag ni sbyin pa'i don yin te/ bde ba phan tshun sbyin pa med pas na sems can dmyal ba zhes bya'o/ /gzhan yang ra ka ni skyabs byed pa'i don la/ na rag ni na ni bskyab tu mi rung ba'i ming yin pas sems can dmyal ba zhes bya'o zhes bstan to/ /bstan bcos bye brag tu bshad pa chen po las/ na rag ni ming zhes bya'o/ /ka ni mi ngan pa zhes bya ste/ gnas ngan par skyes pas na/ sems can dmyal ba zhes bya'o zhes bshad do/ /bstan bcos chos mngon pa las ni bde ba med pa'i phyir sems can dmyal ba zhes bya'o zhes 'byung ngo / /dud 'gro zhes bya ba ni/ lus btud de 'gro ba'i phyir/ dud 'gro zhes bya ste/ bstan bcos yang dag pa'i rigs pa dang rjes su mthun pa las kyang / 'gro ba de phal cher lus btud de 'gro ba'i phyir dang / yang na 'gro ba der dud de 'gro ba kha cig kyang yod pa'i phyir ro zhes 'byung ngo / / bstan bcos bye brag tu bshad pa chen po las/ de dag gi dbyibs btud pa'i phyir 'gro ba yang btud [(]nga [,]pa [)]yin la/ 'gro ba btud pa'i phyir dbyibs kyang btud pas na de'i phyir dud 'gro zhes bya'o zhes bshad do/ /kha cig na re/ kun du gnas kun du khyab par 'gro ba'i phyir dud 'gro zhes bya ste/ 'di ltar de dag 'gro ba lnga po'i srid pa kun du khyab pa'i phyir ro zhe 'o/ /yi dags zhes bya ba ni bstan bcos chos mngon pa las/ gzhan dag las/ re zhig tshol ba'i phyir yi dags zhes bya'o zhes bshad do/ /bstan bcos yang dag pa'i rigs pa dang rjes su mthun pa las/ 'jigs shing skrag pa dang / mang du ldan pa dang / mdog shin tu ngan pa dang / sems mi brtan pa'i phyir yi dags zhes bya'o zhes 'byung ngo / /bye brag tu bshad pa chen po las ni/ bkres pa dang / skom pas yongs su gdungs pa'i phyir yi dags zhes bya'o zhes bshad do/ /kha cig na re gzhan dag gis bkol shing spyad pa'i phyir yi dags zhes bya ste/ rtag par yi dags lha rnams kyis de dang de dag tu mngag gzhug byed du 'jug pas rgyug dgos pa'i phyir ro zhe'o/ / de la lha zhes bya ba ni/ bstan bcos chos mngon pa las/ 'od dang ldan pa'i phyir lha zhes bya'o zhes bstan to/ /bstan bcos yang dag pa'i rigs pa dang rjes su mthun pa las/ lha ni 'di lta ste/ kun gyis bkur zhing rdzu 'phrul gyi bya ba la dbang thob pa dang / mang po kun gyis gsol ba 'debs pa'i phyir/ lha zhes bya'o zhes 'byung ngo / /bstan bcos bye brag tu bshad pa chen po las 'od shin tu rgyas pa'i phyir lha zhes bya ste/ 'di ltar de dag rang gi lus kyi 'od kyis nyin mtshan rgyun du snang bar byed pa'i phyir ro zhes bshad do/ /lha ma yin zhes bya ba ni/ bstan bcos yang dag pa'i rigs pa dang rjes su mthun pa las su ra zhes bya ba ni/ lha zhes bya ste rang dbang thob pa'i don to / /a ni ma yin pa'i don to/ /de lha ma yin pa dang / rang dbang nyams pa'i lha yin pa yid du ston pas lha ma yin zhes bya'o zhes 'byung ngo / /bye brag tu bshad pa chen po las/ su ra zhes bya ba ni/ lha yin la de dag ni lha ma yin pa'i phyir lha ma yin pa'o zhes bya'o/ /gzhan yang su ra zhes bya ba ni/ sdug pa zhes bya ba yin la/ de dag ni sdug pa ma yin pas/ lha ma yin zhes bya'o zhes bshad do/ /de la mi zhes bya ba ni bstan bcos chos mngon pa las yid rab tu dben zhing zhi ba'i phyir/ mi zhes bya'o zhes bshad do/ /bstan bcos chos yang dag pa'i rigs pa dang rjes su mthun pa las ni/ bsam pa mang ba'i phyir mi zhes bya'o zhes bshad do/ /bstan bcos bye brag tu bshad pa chen po las ni/ 'di yang rab tu dben zhing zhi bar nus pa'i phyir mi zhes bya'o/ /'di ltar 'gro ba lnga po dag gi nang na yid rab tu dben zhing zhi bar nus pa ni mi lta bu med pa'i phyir ro zhes 'byung ste/ rgya cher bshad pa ni bstan bcos yang dag pa'i rigs pa dang rjes su mthun pa bye brag tu bshad pa chen po dang / mtshan nyid bstan pa dag las 'byung ba bzhin du rig par bya'o// //

CLOSE WINDOW