བོད་ཡིག

e-texts based on the ACIP/ALL Input

/rgya gar skad du/ pradz+nyA pra dI paM TI kA/ bod skad du/ shes rab sgron ma rgya cher 'grel pa/ bam po dang po/ dkon mchog gsum la phyag 'tshal lo/ /'jam dpal gzhon nur gyur pa la phyag 'tshal lo/ /slob dpon btsun pa spyan ras gzigs brtul zhugs la phyag 'tshal lo/ /gang phyir shes rab sgron ma yis/ /shes rab pha rol phyin rtogs dang / /snyems rgol thams cad tshar bcad pa/ /thob 'gyur de phyir bde gshegs dang / /byang chub sems dpa' rnams la yang / /bsam pa thag pas phyag 'tshal nas/ /bla ma'i mthu yis bdag gis ni/ /de'i don gsal bar rnam bshad bya/ /gang gi phyir 'jig rten ni las sam bstan bcos 'bras bu dang bcas pa la 'jug gi 'bras bu med pa la mi 'jug pa de'i phyir dbu ma'i bstan bcos la chos thams cad kyi de kho na nyid rtogs pa ni kun rdzob tu 'bras bur rnam par gzhag go/ /don dam par ni 'bras bu'i rnam par rtog pa med de/ 'phags pa glang po'i rtsal gyi mdo las/ mya ngan las 'das pa'i dbyings ni 'bras bu thams cad dang bral ba'o zhes ji skad gsungs pa lta bu'o/ /de kho na rtogs pa 'di las shes rab kyi pha rol tu phyin pa rtogs par 'gyur te/ de ltar na stong pa nyid dang / ngo bo nyid med pa nyid dang / skye ba med pa'i sku mya ngan las 'das pa rtogs par 'gyur ro/ /de'i phyir blo gros dang ldan pas bstan bcos 'dis thams cad mkhyen pa nyid bsam gyis mi khyab pa'i 'bras bus 'bras bu dang ldan par rtogs nas gus par gyur pas 'di la mos pa bskyed par bya'o/ /la la la bcom ldan 'das kyis mtshan nyid ji lta bu dang ldan pa'i de kho na thugs su chud nas bstan bcos kyi de kho na ni yi ge med pa yin na ji ltar bstan/ ci'i phyir bstan snyam pa'i blo de lta bu skyes pas de'i phyir 'grel pa byed pas dang po kho nar bstod pa'i sgo nas de nyid la/ gang gis chos kyi de nyid rnam rtog legs bral ba/ /spros pa kun zhi blo ngan rab rib skyon 'joms can/ /tshig gi yul ma yin yang de yi sgro btags nas/ /sa kun 'byor phyir bstan pa de la phyag 'tshal lo/ /zhes bya ba smras so/ /de la gang gis chos kyi de nyid bstan pa de la phyag 'tshal lo zhes bya bar sbyar ro/ /de la chos kyi de nyid ces bya ba ni khyad par gyi gzhi yin la/ rnam rtog legs bral ba zhes bya ba dang / spros pa kun zhi zhes bya ba dang / blo ngan rab rib skyon 'joms can zhes bya ba dang / tshig gi yul ma yin pa zhes bya ba bzhi po de dag ni de'i khyad par yin no/ /de la gang gis zhes bya ba ni sangs rgyas bcom ldan 'das kyis so/ /chos kyi de nyid ces bya ba ni chos thams cad kyi de kho na'o/ /rnam rtog legs bral ba zhes bya ba la rnam rtog ces bya ba ni rnam par rtog pa ste sems kyi spyod pa ni rnam par rtog pa zhes bya'o/ /legs zhes bya ba ni yang dag par te phyin ci ma log par ro/ /bral ba zhes bya ba ni rgyun chad pa ste/ chos kyi de kho na gang thugs su chud na bcom ldan 'das kyis bdag gi ngo bo dang gzhan gyi ngo bo dang yod pa dang med pa la sogs pa'i rnam par rtog pa dag legs par bral bar gyur pa de ni rnam rtog legs bral ba zhes bya'o/ /sogs pa'i sgras ni gzugs dang / sgra dang / dri dang / ro dang / reg bya dang / chos la sogs par rnam par rtog pa dag gzung ngo / /spros pa kun zhi zhes bya ba la/ spros pa zhes bya ba ni ngag gi spyod pa ste/ phung po dang / khams dang / skye mched dang / skye ba dang / 'gags pa la sogs pa'i rnam pa brjod pa ni spros pa'o/ /kun zhi zhes bya ba ni thams cad zhi bar gyur ces bya ba'i tha tshig ste/ dper na bud shing med pas me shi ba la zhi bar gyur ces bya ba lta bu'o/ /de'i phyir chos kyi de kho na gang thugs su chud na bcom ldan 'das kyis spros pa thams cad zhi bar gyur pa de ni spros pa kun zhi zhes bya'o/ /blo ngan rab rib skyon 'joms can/ /zhes bya ba la/ blo ngan ces bya ba ni blo ngan pa ste/ bdag gi ngo bo dang / gzhan gyi ngo bo dang / yod pa dang med pa la sogs par sems pa'i blo ni ngan pa'o/ /rab rib ces bya ba ni blo ngan pa de nyid rab rib ste/ blo ngan rab rib ni mun pa'o/ /skyon zhes bya ba ni blo ngan pa'i rab rib de nyid skyon yin pas blo ngan rab rib skyon no/ /'joms zhes bya ba ni sel ba'o/ /can zhes bya ba ni de ltar chos kyi de kho na gang la blo ngan pa'i rab rib kyi skyon 'joms pa'i ngang tshul yod pa de ni blo ngan rab rib skyon 'joms can zhes bya'o/ /tshig gi yul ma yin pa zhes bya ba ni bstan par bya ba ma yin pa zhes bya ba'i tha tshig go/ /tshig gi yul ma yin yang chos kyi de kho na de ni sgro btags nas bstan to zhes bya bar sbyar ro/ /ci rnyed pa dang bkur sti'i zang zing gi phyir bstan tam zhe na/ ma yin te/ 'o na ci'i phyir zhe na/ de'i phyir/ sa kun 'byor phyir zhes bya ba smras so/ /sa kun 'byor zhes bya ba ni sa kun gyi 'byor pa'o/ /'byor pa zhes bya ba ni dbang phyug ces bya ba'i rnam grangs so/ /sa kun 'byor phyir zhes bya ba ni sa kun gyi 'byor pa'i phyir te/ sa kun gyi 'byor pa'i rgyu dang / sa kun gyi 'byor pa thob par bya ba'i phyir ro/ /bstan pa zhes bya ba ni bstan par gyur pa zhes bya ba'i tha tshig go/ /de ltar na sangs rgyas bcom ldan 'das gang gi chos thams cad kyi de kho na rnam par rtog pa dang legs par bral ba/ spros pa kun zhi ba dang / blo ngan pa'i rab rib kyi skyon 'joms pa can/ tshig gi yul ma yin pa de sgro btags nas sa kun gyi 'byor pa'i phyir bstan pa de la phyag 'tshal lo zhes smras pa yin no/ /yang na chos kyi de nyid ces bya ba ni khyad par gyi gzhi yin la rnam rtog legs bral ba zhes bya ba dang / spros pa kun zhi zhes bya ba dang / blo ngan rab rib skyon 'joms can zhes bya ba tshig gsum po de dag ni de'i khyad par yin zhing / sa kun 'byor phyir zhes bya ba ni dgos pa yin la/ bstan pa zhes bya ba ni las yin no/ /'di la kha cig na re gal te chos kyi de kho na tshig gi yul ma yin zhing brjod par bya ba ma yin la spros pa ma lus pa dang bral ba yin na/ 'o na de ji ltar bstan par bya zhes zer bas de'i phyir la lan gdab pa'i don du/ tshig gi yul ma yin yang de ni sgro btags nas zhes bya ba smras te/ de ni ji ltar bstan par bya zhes rgol ba'i lan yin no/ /de ltar sangs rgyas bcom ldan 'das gang gis mtshan nyid kyi gzhi chos thams cad kyi de kho na mtshan nyid gsum po rnam par rtog pa dang legs par bral ba dang / spros pa kun zhi ba dang / blo ngan pa'i rab rib kyi skyon 'joms pa can zhes bya ba dag gis mtshon pa de/ sa kun gyi 'byor pa'i phyir rgol ba'i lan gyi sgo nas bstan pa de la phyag 'tshal lo zhes smras pa yin no/ /yang na chos kyi de nyid ces bya ba la chos zhes bya ba ni rang gi mtshan nyid 'dzin pa'i phyir chos so/ /kun rdzob pa'i chos rnams kyi rang gi mtshan nyid ni rnam pa gnyis te/ ma dag pa'i ngo bo nyid dang / dag pa'i ngo bo nyid do/ /de la ma dag pa'i ngo bo nyid ni gzugs su rung ba nyid la sogs pa'i rang gi mtshan nyid dang / sa la sogs pa dang / rton pa la sogs pa rang gi ngo bo nyid dag go/ /dag pa'i ngo bo nyid ni chos thams cad kyi ngo bo nyid med pa nyid dang / skye ba med pa'i mtshan nyid do/ /'di la gzhan dag na re gal te ngo bo med pa nyid chos thams cad kyi rang gi mtshan nyid yin na/ de'i phyir de'i chos rnams la spyi'i mtshan nyid yin pa'i phyir de nyid spyi'i mtshan nyid du 'gyur te/ ji skad du/ gcig gi stong nyid gang yin pa/ /de nyid kun gyi stong pa nyid/ /ces gsungs pas de'i phyir rang gi mtshan nyid du yang rnam par mi gnas la/ spyi'i mtshan nyid du yang rnam par mi gnas pa'am/ mtshan nyid gnyi ga med par 'gyur ro zhes zer bas de'i phyir smras pa/ de'i phyir chos thams cad mi gnas pa/ rnam par mi gnas pa zhes gsungs pa gang yin pa de ni theg pa mchog gi tshul gsal bar byed pa yin te/ 'phags pa nyi ma'i snying po'i mdo las/ rgyal po chen po chos thams cad ni mi gnas pa/ rnam par mi gnas pa'o zhes ji skad gsungs pa lta bu'o/ /mtshan nyid med par yang mi 'gyur te/ 'di ltar gang gi tshe chos thams cad ma lus pa ngo bo nyid med pa nyid du brjod pa na chos gcig ngo bo nyid med pa nyid du brjod nas kha rog par 'dug gam/ gtam gzhan dag smra bar byed na de'i tshe rang gi mtshan nyid rnam par gnas so/ /gang gi tshe ji ltar gzugs ngo bo nyid med pa de bzhin du tshor ba la sogs pa yang ngo bo nyid med pa nyid du brjod pa de'i tshe na ni spyi'i mtshan nyid rnam par gnas pas de'i phyir de ni klan kar mi rung ngo / /yang na dngos po rnams ngo bo nyid kyi gcig pa nyid dang tha dad pa nyid dang bral ba'i rang bzhin ni rang gi mtshan nyid yin la/ de'i spros pa ni spyi'i mtshan nyid yin te/ de'i phyir kun rdzob pa'i chos de rnams rang gi mtshan nyid dag pa dang ma dag pa gnyis 'dzin pa'i phyir chos zhes bya'o/ /de nyid ces bya ba ni chos de rnams kyi de kho na ste/ de kho na ni phyin ci ma log pa dang yang dag pa ji lta ba bzhin zhes bya ba'i rnam grangs so/ /rnam rtog legs bral ba zhes bya ba ni don dam par bdag gi ngo bo dang / gzhan gyi ngo bo dang / yod pa dang med pa la sogs pa'i rnam pa gzung ba'i yul rnams ma skyes pa'i phyir dang / bdag gi ngo bo dang gzhan gyi ngo bo dang yod pa dang med pa la sogs pa'i rnam par 'dzin pa'i rnam par rtog pa dang bral ba'i phyir ro/ /spros pa kun zhi zhes bya ba ni lung las ma brtags ma dpyad par tshig mi smra'o zhes gsungs pas/ de'i phyir rtog pa dang dpyod pa'i bdag nyid kyi rnam par rtog pa dang bral ba'i phyir dang / brjod pa'i rnam par spros pa ma lus par zhi ba'i phyir ro/ /tshig gi yul ma yin yang zhes bya ba ni chos kyi de kho na ni tshig gi spyod yul las yang dag par 'das pa yin/ yang sangs rgyas bcom ldan 'das sems can gyi khams ma lus pa la dmigs pa'i thugs rje chen pos bskul bas na chos kyi de kho na nyid tshig gi yul ma yin pa yi ge med pa yang yi ge dag gis bstan pa'o/ /de ni sgro btags nas zhes bya ba ni chos kyi de kho na zhes bya ba der sgro btags nas bstan pa ste/ chos kyi de kho na zhes bya bar de skad bstan pa'o/ /yang na de ni sgro btags nas zhes bya ba ni chos kyi de kho na'i tshig bla dgas/ 'gag pa med pa dang / skye ba med pa dang / chad pa med pa dang / rtag pa med pa dang / don tha dad pa ma yin pa dang / don gcig pa ma yin pa dang / 'ong ba med pa dang / 'gro ba med pa zhes bya ba gang dag yin pa de dag tu yang dag pa phyin ci ma log par sgro btags nas bstan pa'o/ /yang na de ni sgro btags nas zhes bya ba ni chos kyi de kho na nyid de la sgro btags pa ni sgro btags pa ste/ de la ji zhig sgro btags she na/ chos kyi de kho na de la rnam rtog legs bral ba zhes bya ba dang / spros pa kun zhi zhes bya ba dang / blo ngan rab rib skyon 'joms can zhes bya bar brjod pa gsum po de dag sgro btags nas bstan pa'o/ /sa kun 'byor phyir zhes bya ba la/ sa zhes bya ba ni 'dod pa'i khams dang / gzugs dang / gzugs med pa'i khams so/ /kun zhes bya ba ni cha dang bcas pa ste cha zhes bya ba ni cha phra ba nyid de de dang bcas pa'o/ /sa kun 'byor phyir zhes bya ba ni bcom ldan 'das kyis sa cha dang bcas pa gang gis 'byor pa'i phyir chos kyi de kho na ma bstan pa ni cha phra mo'i rnam pa yang med de/ 'phags pa shes rab kyi pha rol tu phyin pa'i mdo las/ shes rab kyi pha rol tu phyin pa la brten nas 'jig rten na rgyal rigs shing sA la chen po lta bu dag yod pa yin/ rgyal chen bzhi'i ris kyi lha rnams kyi bar dag yod pa yin/ 'du shes med 'du shes med min skye mched du nye bar 'gro ba'i lha rnams kyi bar dag yod pa yin/ shes rab kyi pha rol tu phyin pa la brten nas/ 'jig rten na rgyun du zhugs pa'i 'bras bu yod pa yin/ rnam pa thams cad mkhyen pa nyid kyi bar dag yod pa yin zhes ji skad gsungs pa lta bu ste/ de'i phyir sa kun gyi 'byor pa'i phyir sangs rgyas bcom ldan 'das kyis chos kyi de kho na bstan to zhes bya ba de ni legs par smras pa yin no/ /bstan pa zhes bya ba ni gdul dka' ba rnams gdul ba'i phyir dngos po'i de kho na ngo bo nyid med pa nyid bstan par gyur pa 'am/ /mi shes pa'i mun pa ma lus par spang ba'i phyir chos kyi de kho na nyi ma'i 'od zer gyi snang ba lta bu bstan par gyur pa ste/ de la phyag 'tshal lo zhes bya ba smras so/ /yang na gang gis chos kyi de nyid bstan pa de la phyag 'tshal lo zhes bya ba la 'dir gang gis zhes bya ba ni khyad par gyi gzhi yin la/ rnam rtog legs bral ba zhes bya ba dang / spros pa kun zhi zhes bya ba gnyis ni de'i khyad par yin no/ /chos kyi de nyid ces bya ba ni khyad par gyi gzhi yin la/ blo ngan rab rib skyon 'joms can/ /zhes bya ba ni de'i khyad par yin no/ /de la rnam rtog legs bral ba zhes bya ba ni yang dag pa phyin ci ma log pa'i sgo nas gang gi rnam par rtog pa dag ji ltar 'gags nas yang mi skye ba de ltar legs par bral ba de ni rnam rtog legs bral ba'o/ /spros pa kun zhi zhes bya ba ni gang gis spros pa thams cad zhi bar gyur pa de ni spros pa kun zhi ba'o/ /de'i phyir rnam par rtog pa dang legs par bral ba'i mtshan nyid de lta bu dang ldan pa dang / spros pa kun zhi ba'i mtshan de lta bu dang ldan pa'i sangs rgyas bcom ldan 'das gang gis sa kun gyi 'byor pa'i phyir chos kyi de kho na bstan pa de la phyag 'tshal lo zhes bya bar sbyar ro/ /'di la kha cig gal te bcom ldan 'das rnam par rtog pa dang spros pa las 'das shing tshig gi yul yang ma yin na/ 'o na bcom ldan 'das de la ji ltar bstod par bya zhing / bcom ldan 'das de ston par yang ji ltar rigs zhes rgol bas/ de'i phyir de la lan gdab pa'i don du tshig gi yul ma yin yang de ni sgro btags nas zhes smras te/ gang zag gang gis stod par byed pa dang / bcom ldan 'das gang la bstod par bya ba de gnyis ji ltar bstod pa'i tshig 'di dang 'brel ba med par 'gyur te/ 'brel pa yod pa kho na yin no/ /bcom ldan 'das de ston par yang ji ltar rigs zhes smras pa gang yin pa de ni tshig gi yul ma yin yang chos de sgro btags nas ston par mdzad pas/ bcom ldan 'das de ston par yang ji ltar mi rigs par 'gyur te rigs pa kho na yin no/ / yang kha cig 'di snyam du gang gis sa kun gyi 'byor pa'i phyir chos kyi de kho na bstan pa rnam par rtog pa dang legs par bral ba/ spros pa kun zhi ba de gang yin snyam du the tshom za ba de bstsal ba'i phyir sangs rgyas bcom ldan 'das gang gi mtshan nyid kyi gzhi chos kyi de nyid ces bya ba mtshan nyid/ blo ngan rab rib skyon 'joms can/ /zhes bya ba thun mong ma yin pa gcig gis mtshon pa bstan pa de la phyag 'tshal lo zhes smras pa yin no/ /gang gis zhes bya ba dang de la zhes bya bar ji ltar sbyar du rung zhe na/ 'di ltar don gyi dbang gis tshig bsgyur zhing sbyar du rung ste/ dper na lha sbyin gang gi khyim brtsigs pa de bos shig ces bya ba dang 'dra bar 'dir yang sangs rgyas bcom ldan 'das gang gi chos kyi de nyid bstan pa de la phyag 'tshal lo zhes bya bar sbyar ro/ /de ltar na ji skad bstan pa'i rnam pa de dag gis ni sngar la la la bcom ldan 'das kyis mtshan nyid ji lta bu dang ldan pa'i de kho na thugs su chud nas bstan/ chos kyi de kho na ni yi ge med pa yin na ji ltar bstan/ ci'i phyir bstan snyam pa'i blo de lta bu skye bas zhes smos pa gang yin pa de'i lan rnam par bshad pa yin te/ mtshan nyid ji lta bu dang ldan pa'i de kho na thugs su chud nas bstan ce na/ mtshan nyid bzhi 'am mtshan nyid gsum mam/ mtshan nyid gcig dang ldan pa'i de kho na thugs su chud nas bstan to/ /chos kyi de kho na ni yi ge med pa yin na ji ltar bstan ce na/ tshig gi yul ma yin yang de ni sgro btags nas bstan to/ /ci'i phyir bstan ce na/ sa kun gyi 'byor ba'i phyir bstan to zhes rnam par bshad pa yin no/ /de ltar bcom ldan 'das la bdag dang gzhan gyi don bsam gyis mi khyab pa bla na med pa'i 'bras bu dang ldan pa'i chos kyi de kho na ston pa nyid kyi yon tan brjod pas stod par byed pa dang / bstan bcos kyi 'bras bu khyad par dang bcas pa dang / dgos pa dang bcas pa dang / gzhan gyis btsal ba'i klan ka bsal ba'i sgo nas ston par byed pa gang yin pa de ni 'grel pa byed pa'i mkhas pa nyid yin no/ /gzhan dag phal cher slob dpon legs ldan 'byed kyis rnam par bshad pa'i brnag pa mi bzod pa na/ gal te 'dis mdo mdzad pas rang gi 'grel pa ga las 'jigs med du shes rab kyi pha rol tu phyin pa'i tshul gyi mtshan nyid gang kho na bstan pa'i mtshan nyid de kho na ston na ni de'i phyir de dang po nyid du rnam par bshad zin pas btags pa la 'thag pa dang 'dra bas rnam par bshad pa brtsams pa 'di mi dgos so/ /'on te der ma bshad pa 'dir 'chad na ni de ltar na yang mdo las lhag pa rang gi blos rnam par bshad pa mi rigs so zhes phyir zlog par byed pas de'i phyir 'grel pa byed pas dang po kho nar khong nas dbyung ba'i phyogs snga ma de gnyis ka bsal ba'i phyir/ slob dpon gyi zhal snga nas kyis tshig le'ur byas pa dag kho na rjes su dpag pa dang sun dbyung ba'i gsal ba dang de kho na dag bstan pa dang / lta ba ngan pa'i dra ba zhi bar byed pa dang ldan pa shes rab kyi pha rol tu phyin pa'i tshul bka' stsal mod kyi/ tshangs pa mtshungs par spyod pa rnams las kha cig gis mi rtogs pas de'i phyir de dag gis rtogs par bya bar 'dod nas lung ji lta ba bzhin du dbu ma'i bstan bcos bshad par bya'o zhes bya ba smras so/ /de la slob dpon gyi zhal snga nas kyis zhes bya bas ni nga rgyal spangs pa bstan to/ /tshig le'ur byas pa dag ces bya ba ni de dag tshig le'u yang yin la byed pa yang yin te/ 'dod pa'i don byed pa dang / mngon par 'grub par byed pa dang / sgrub par byed pa dag go/ /kho nas zhes bya ba ni de tshig le'ur byed pa de dag kho nas te/ de'i phyir 'di la bdag gi skyes bu'i rtsal med pas so/ /rjes su dpag pa dang sun dbyung ba'i gsal ba dang de kho na dag bstan pa zhes bya ba ni shes rab kyi pha rol tu phyin pa'i tshul gang du rang gi phyogs sgrub pa'i phyir/ rjes su dpag pa'i gsal ba dang de kho na dag bstan pa dang / gzhan gyi phyogs gzhig pa'i phyir sun dbyung ba'i gsal ba dang de kho na dag bstan pa gang yin pa de ni rjes su dpag pa dang / sun dbyung ba'i gsal ba dang / de kho na dag bstan pa yin no/ /de la rjes su dpag pa'i gsal ba dag ces bya ba ni yi ge dang tshig dang ngag shin tu rnam par dag pa dag go/ /de kho na dag ces bya ba ni rjes su dpag pa ltar snang ba ma yin pa dag go/ /yang na gsal ba dag ces bya ba ni tshig gi bdag nyid dag go/ /de kho na dag ces bya ba ni don gyi bdag nyid dag go/ /de bzhin du sun dbyung ba'i gsal ba dag ces bya ba yang yi ge dang tshig dang ngag shin tu rnam par dag pa dag go/ /de kho na dag ces bya ba ni sun dbyung ba ltar snang ba ma yin pa dag go/ /yang na gsal ba dag ces bya ba ni tshig gi bdag nyid do/ /de kho na dag ces bya ba ni don gyi bdag nyid dag go/ /bstan pa zhes bya ba ni gsal bar byas pa'o/ /yang na shes rab kyi pha rol tu phyin pa'i tshul gang du dbu ma pas nye bar sbyar ba'i rjes su dpag pa gsal bar rjod pa dag gis gzhan gyi phyogs sun dbyung ba'i de kho na dag bstan pa gang yin pa de ni rjes su dpag pa dang sun dbyung ba'i gsal ba dang de kho na dag bstan pa yin no/ /yang na shes rab kyi pha rol tu phyin pa'i tshul gang du gzhan gyis nye bar sbyar ba'i rjes su dpag pa gsal ba dag kyang dbu ma pas sun dbyung ba'i de kho na dag bstan pa gang yin pa de ni rjes su dpag pa dang sun dbyung ba'i gsal ba dang de kho na dag bstan pa yin no/ /shes rab kyi pha rol tu phyin pa'i tshul der rjes su dpag pa dang sun dbyung ba'i gsal ba dang de kho na dag bstan pa 'ba' zhig tu yang ma zad de/ shes rab kyi pha rol tu phyin pa'i tshul de ni lta ba ngan pa'i dra ba zhi bar byed pa dang ldan pa yang yin no/ /de la lta ba zhes bya ba ni mthong ba zhes bya ba dang / don tha dad pa ma yin te don gcig go/ /lta ba ngan pa zhes bya ba ni mthong ba ngan pa ste/ bdag gi ngo bo dang / gzhan gyi ngo bo dang / yod pa dang med pa la sogs par mthong ba'i lta ba'o/ /lta ba ngan pa'i dra ba zhes bya ba ni lta ba ngan pa de nyid dra ba ste/ dper na dra bas g.yogs nas rang dgar 'gro mi nus pa dang 'dra bar lta ba ngan pa'i dra bas bsgribs na mya ngan las 'das par 'gro mi nus pas de'i phyir lta ba ngan pa de nyid dra ba dang 'dra bas lta ba ngan pa'i dra ba'o/ /zhi bar byed pa dang ldan pa zhes bya ba ni shes rab kyi pha rol tu phyin pa'i tshul gang la lta ba ngan pa'i dra ba zhi bar byed pa'i ngang tshul yod pa de ni lta ba ngan pa'i dra ba zhi bar byed pa dang ldan pa yin no/ /de yang gang zhe na/ de'i phyir shes rab kyi pha rol tu phyin pa'i tshul zhes bya ba smras so/ /de la shes rab ces bya ba ni rab tu 'byed pa'i mtshan nyid de/ gang gis chos rnams rab tu 'byed par byed pa dang / rnam par 'jog par byed pa de ni shes rab ces bya'o/ /pha rol tu phyin pa zhes bya ba ni mi dmigs pa'i mtshan nyid do/ /pha rol zhes bya ba ni mi dmigs pa ste shes rab gang mi dmigs pa der phyin cing son pa de ni shes rab kyi pha rol tu phyin pa zhes bya ste/ phyin pa med pa yin no/ /tshul zhes bya ba ni shes rab kyi pha rol tu phyin pa'i tshul te/ shes rab kyi pha rol tu phyin pa'i mtshan nyid kyi chos bstan pa gang yin pa'o/ /yang na shes rab kyi pha rol tu phyin pa nyid tshul te/ gang gis chos thams cad dmigs su med par khrid par byed pa 'am/ gang gis gzhan gyi rgyud la don khrid par byed pa'o/ /yang na gang gis bsod nams dang ye shes kyi tshogs gzhal du med pa nye bar bsags pa'i 'jig rten 'khor ba'i btson ra nas bsgral te/ bsam pa thams cad yongs su rdzogs par byed pa'i yid bzhin gyi nor bu rin po che lta bur khrid par byed pa de ni tshul lo/ /bka' stsal mod kyi zhes bya ba ni de ltar rjes su dpag pa dang sun dbyung ba'i gsal ba dang de kho na dag bstan pa dang / lta ba ngan pa'i dra ba zhi bar byed pa dang ldan pa shes rab kyi pha rol tu phyin pa'i tshul de bstan cing bshad kyang ngo / /tshangs pa mtshungs par spyod pa rnams zhes bya ba ni gang dag gi tshangs par spyod pa dang lta ba mthun pa de dag ni tshangs pa mtshungs par spyod pa rnams te/ 'di lta ste/ theg pa mchog gi 'gro ba rnams so/ /de rnams las kha cig gis zhes bya ba ni rnam par spros nas go ba dag gis te/ mgo smos pas go ba dag gis ni ma yin no/ /mi rtog pas zhes bya ba ni gang dag rjes su dpag pa dang / sun dbyung ba dag ma bstan par rang gis nye bar sbyor mi nus pa dag gis so/ / de'i phyir de dag gis rtogs par bya bar 'dod nas zhes bya ba ni rjes su dpag pa'i rigs pa med par lung tsam gyis ni 'dod pa'i dngos po mi 'grub ste/ slob dpon 'phags pa lha'i zhal snga nas kyis/ gal te yod pa'i tshig tsam gyis/ /dngos po yod par 'gyur na ni/ /med ces bya ba'i tshig tsam gyis/ /ci phyir med par 'gyur ba min/ /de'i phyir/ don gang lung dang rigs pa yis/ /legs par mngon par brjod pa dang / /snga phyi 'gal ba med pa de/ /dam pa rnams kyis yongs su gzung / /zhes ji skad gsungs pa lta bu ste/ de'i phyir rnam par spros na go ba rjes su dpag pa dang sun dbyung ba nye bar sbyor mi nus pa de dag gis rtogs par bya ba 'dod nas so/ /yang na de'i phyir de dag gis rtogs par bya bar 'dod nas zhes bya ba ni 'di la bcom ldan 'das kyis 'phags pa sprin chen po'i mdo las/ lits+tsha bI gzhon nu 'jig rten thams cad kyis mthong na dga' ba lung bstan pa las/ nga yongs su mya ngan las 'das nas 'di rgyal po mthar 'gro zhon gyi dus na dge slong klu zhes bya bar gyur nas nga'i bstan pa gsal bar byas te/ rim gyis 'jig rten gyi khams dang ba'i 'od ces bya bar/ de bzhin gshegs pa ye shes 'byung gnas 'od ces bya bar 'gyur ro zhes lung bstan pa dang / de bzhin du 'phags pa lang kar gshegs pa'i mdo las kyang / /bde gshegs mya ngan 'das 'og tu/ /tshul rnams 'dzin par 'gyur ba de/ /dus dag 'das nas byung ba ni/ /blo gros chen po khyod shes byos/ /lho phyogs b+he ta'i yul du ni/ /dge slong dpal ldan cher grags pa/ /de ming klu zhes bod pa ste/ /yod dang med pa'i phyogs 'jig pa/ /nga yi theg pa 'jig rten du/ /bla med theg chen rab bshad nas/ /rab tu dga' ba'i sa bsgrubs te/ /bde ba can du de 'gro'o/ /zhes gsungs te/ de'i phyir des theg pa mchog 'di yod pa dang med pa'i phyogs 'jig pa nyid kyis rnam par bstan nas/ gang dag ma mos shing ma rtogs pa na nges pa'i don ni drang ba'i don du rjod par byed la/ drang ba'i don ni nges pa'i don du rjod par byed de/ de'i phyir ma rtogs pa de dag gis rtogs par bya bar 'dod nas so/ /nges pa'i don dang drang ba'i don gyi mtshan nyid ni/ 'phags pa blo gros mi zad pas bstan pa'i mdo las/ de la nges pa'i don gyi mdo sde ni gang / drang ba'i don gyi mdo sde ni gang zhe na/ mdo sde gang dag bdag dang / sems can dang / srog dang / gso ba dang / skyes bu dang / gang zag dang / shed las skyes dang / shed bu dang / byed pa po dang / tshor ba po dang / shes pa po dang / mthong ba po dang / sgra rnam pa sna tshogs su bshad pa dang / bdag po med pa la bdag po dang bcas par bstan pa de dag ni drang ba'i don ces bya'o/ / mdo sde gang dag stong pa nyid dang / mtshan ma med pa dang / smon pa med pa dang / mngon par 'du mi byed pa dang / ma skyes pa dang / ma byung ba dang / dngos po med pa dang / bdag med pa dang / sems can med pa dang / srog med pa dang / gso ba med pa dang / skyes bu med pa dang / gang zag med pa dang / bdag po med pa dang / rnam par thar pa'i sgo'i bar du bstan pa de dag ni nges pa'i don zhes bya'o zhes gsungs pa dang / 'phags pa zla ba sgron ma'i mdo las kyang / stong pa bde bar gshegs pas bshad pa ltar/ /nges don mdo sde dag gi bye brag shes/ /gang las sems can gang zag skyes bus bstan/ /chos de thams cad drang ba'i don du shes/ /zhes gsungs pa yin te/ de'i phyir ma rtogs pa de dag gis rtogs par bya ba ni de dag gis khong du chud par bya ba zhes bya ba'i tha tshig go/ /de dag gis rtogs par bya bar 'dod pas zhes bya ba ni de dag gis khong du chud par bya bar 'dod nas so/ /lung ji lta ba bzhin du zhes bya ba ni rang gi blos ma yin par ro/ /de ltar na brtsams pa 'di zlos pa dang don med par yang mi 'gyur te/ sems can rjes su dpag pa dang sun dbyung ba la mi mkhas pa rnams kyi blo gros rab tu dbye ba la 'jug pa'i phyir ro/ /yang na lung ji lta ba bzhin du zhes bya ba ni nges pa'i don ji lta ba dang drang ba'i don ji lta ba de dag de kho na bzhin du rnam par bshad pa ste/ de'i phyir nges pa'i don dang drang ba'i don bzlog pa legs pa ma yin pa de spang ba'i phyir yang rnam par bshad pa la nyes pa med do/ /dbu ma'i zhes bya ba la/ dbu ma zhes bya ba ni snying po ste tshig las 'byung ba thams cad kyi nang nas dbu ma'i lam 'di mchog dang snying po yin pa'o/ /gsung rab gzhan dag ni chad pa dang rtag pa'i mtha' ston pa'i phyir snying po ma yin la/ dbu ma ni chad pa dang rtag pa'i mtha' sel bas de'i phyir snying po yin pas dbu ma zhes bya'o/ /yang na dbu ma zhes bya ba ni shes rab kyi pha rol tu phyin pa'i tshul skye ba med pa la sogs pa'i dngos po bsdus pa'i bstan bcos nam mkha' lta bu dag gi nang nas btus pa'i phyir dbu ma'o/ /yang na dbu ma pa zhes bya ba ni dngos po dang / dngos po med pa'i mtha' spangs pas 'dir dbu ma'i lam bstan pa ste/ mtha' gnyis spang ba'i thabs ni bstan bcos 'di mtha' dag tu rnam par 'chad mod kyi/ 'on kyang mtha' gnyis spang ba la ngo mtshar skye ba rnams kyi don du phyogs tsam zhig brjod par bya ste/ don dam par na dngos po thams cad skye ba med pa'i phyir dngos po'i mthar 'dzin pa yang med la/ dngos po med pa'i mthar 'dzin pa yang med do/ /'di ltar zhig nas med pa ltar dngos po zhig pas dngos po med par gdags te/ dper na ring po la ltos te thung ngu dang / pha rol la ltos te tshu rol du gdags pa lta bu yin na don dam par dngos po skye ba med pa'i phyir gang zhig pas dngos po med pa'am/ gang la ltos nas gdags par 'gyur te/ slob dpon nyid kyis/ gal te dngos po ma grub na/ /dngos med grub par mi 'gyur ro/ /dngos po gzhan du 'gyur ba ni/ /dngos med yin par skye bo smra/ /zhes ji skad gsungs pa lta bu'o/ /bstan bcos zhes bya ba ni nyon mongs pa'i dgra rnams 'chos pa'i phyir dang / ngan song ba'i 'jigs pa las skyob pa'i phyir bstan bcos zhes bya'o/ /yang na bstan bcos zhes bya ba ni rnam par rtog pa'i dgra 'chos pa'i phyir dang / bsam gyis mi khyab cing rmad du byung ba'i sku gsum thob par byed pa'i phyir bstan bcos so/ /yang na bstan bcos zhes bya ba ni chos zhi ba nye bar ston pa'i phyir dang / lhag pa'i tshul khrims dang / lhag pa'i sems dang / lhag pa'i shes rab kyi bslab pa gsum nye bar ston pa'i phyir dang / de bzhin gshegs pa shAkya thub pas bstan pa rnam par thar pa gsum ston pa'i phyir bstan bcos so/ /bshad par bya'o zhes bya ba ni de'i phyir rgyu de dag gis na/ 'grel pa phyed pa'i rnam par bshad pa brtsams pa/ 'bras bu med pa ma yin pas lung ji lta ba bzhin du dbu ma'i bstan bcos bshad par bya'o zhes bya ba'i tha tshig go/ /de la bstan bcos kyi 'brel pa smras pa zhes bya ba de la zhes bya ba'i sgra ni bstan bcos kyi 'brel pa'i tshig nye bar dgod par 'dod nas dang por sbyar te/ bstan bcos zhes bya ba'i sgra ni 'das ma thag kho nar rnam par bshad pa yin no/ /'brel pa zhes bya ba ni rnam pa gnyis te/ rigs pa'i 'brel ba dang / don gyi 'brel pa'o/ / de la rigs pa'i 'brel ba ni bla ma brgyud pa ste/ sangs rgyas bcom ldan 'das dang bstan bcos mdzad pa ji ltar 'byung ba'i rgyu bstan pa'o/ /don gyi 'brel pa ni yan lag gi don bstan pa ste/ rigs pa'i 'brel pa bstan pa de nyid kyis gzhung rnams kyi yan lag gi don bstan pa'o/ / de la dang por bla ma dam pa sangs rgyas bcom ldan 'das kyi 'byung ba'i rgyu bstan par bya zhing / phyis bstan bcos mdzad pa'i 'byung ba'i rgyu bstan par bya'o/ /de lta bas na de nyid bstan pa'i phyir/ 'di la bcom ldan 'das thugs rje dam pas spro ba rab tu bskyed pa'i blo gros mnga' ba/ bskal pa bye ba khrag khrig 'bum phrag dpag tu med par bsod nams dang ye shes kyi tshogs gzhal du med pa'i khur bzhes par mdzad pa na/ gzhan la phan pa skye ba dang rjes su 'brel ba'i thugs rang gi srog dang 'bral ba'i sdug bsngal gyis kyang yongs su mi skyo ba mnga' bas 'jig rten skye ba dang / 'gag pa dang / chad pa dang / rtag pa dang / 'ong ba dang / 'gro ba dang / tha dad pa dang / gcig pa la sogs pa spros pa'i dra ba thibs por 'khyams shing snang ba med pa la gzigs nas/ shes rab kyis shes bya'i rgya mtsho mngon par bsrubs te chos thams cad kyi de kho na'i bdud rtsi spros pa'i dra ba mtha' dag dang legs par bral ba/ gzhan gyi dring mi 'jog pa/ rnam par mi rtog pa brnyes nas/ theg pa mchog gis 'gro ba rnams la/ rten cing 'brel bar 'byung ba'i rin po che dam pa/ skye ba dang na tshod dang / rigs dang / yul dang / dus las 'da' ba med pa/ mu stegs byed dang / nyan thos dang / rang sangs rgyas thams cad dang thun mong ma yin pa kun rdzob dang / don dam pa'i bden pa la brten nas skye ba dang / skye ba med pa la sogs pa'i brjod pa dag gis bka' stsal to zhes bya ba smras so/ /tshig 'di'i bsdus pa'i don ni sangs rgyas bcom ldan 'das kyi rgyu bstan pa dang / 'bras bu rang dang gzhan gyi don gyi mtshan nyid rnam pa gnyis bstan pa yin no/ /yan lag gi don du na 'di la bcom ldan 'das sngon byang chub sems dpa'i spyad pa spyod pa na sangs rgyas bcom ldan 'das kyi rgyu ci zhig mngon par bsgrubs te/ 'bras bu rang gi don gyi mtshan nyid bla na med pa yang dag par rdzogs pa'i byang chub mngon par rdzogs par sangs rgyas nas 'bras bu gzhan gyi don gyi mtshan nyid theg pa mchog gis 'gro ba rnams la rten cing 'brel bar 'byung ba'i rin po che dam pa bka' stsal zhe na/ sangs rgyas bcom ldan 'das kyi rgyu ni thugs rje dam pas spro ba rab tu bskyed pa'i blo gros mnga' ba/ bskal pa bye ba khrag khrig 'bum phrag dpag tu med par bsod nams dang ye shes kyi tshogs gzhal du med pa'i khur bzhes par mdzad pa na/ gzhan la phan pa skye ba dang rjes su 'brel pa'i thugs rang gi srog dang 'bral ba'i sdug bsngal gyis kyang yongs su mi skyo ba mnga' bas/ 'jig rten skye ba dang / 'gag pa dang / chad pa dang / rtag pa dang / 'ong ba dang / tha dad pa dang / gcig pa la sogs pa spros pa'i dra ba thibs por 'khyams shing snang ba med pa la gzigs nas shes rab kyis shes bya'i rgya mtsho mngon par bsrubs te zhes bya bas bstan to/ /'bras bu rang gi don gyi mtshan nyid ni chos thams cad kyi de kho na'i bdud rtsi spros pa'i dra ba mtha' dag dang legs par bral ba gzhan gyi dring mi 'jog pa rnam par mi rtog pa brnyes nas zhes bya bas bstan to/ /'bras bu gzhan gyi don gyi mtshan nyid ni theg pa mchog gis 'gro ba rnams la rten cing 'brel bar 'byung ba'i rin po che dam pa/ skye ba dang na tshod dang / rigs dang yul dang / dus las 'da' ba med pa/ mu stegs byed dang / nyan thos dang rang sangs rgyas thams cad dang thun mong ma yin pa/ kun rdzob dang don dam pa'i bden pa la brten nas skye ba dang skye ba med pa la sogs pa'i brjod pa dag gis bka' stsal to zhes bya bas bstan te/ de ni don gyi 'brel pa yin no/ /de la don gyi 'brel pa sbyar ba ni 'di yin te/ bcom ldan 'das sngon byang chub sems dpa'i spyad pa spyod pa na thugs rje dam pas spro ba rab tu bskyed pa'i blo gros mnga' ba/ 'jig rten la thugs brtse zhing theg pa mchog gis 'gro ba rnams la rten cing 'brel bar 'byung ba'i rin po che dam pa bstan par dgongs pa na/ gang gi phyir bdag ma grol bas gzhan dgrol bar bya ba de ni gnas ma yin no snyam nas/ bskal pa bye ba khrag khrig 'bum phrag dpag tu med par bsod nams dang ye shes kyi tshogs gzhal du med pa'i khur bzhes par mdzad pa na/ gzhan la phan pa skye ba dang rjes su 'brel ba'i thugs dka' ba spyod pas rang gi srog dang 'bral ba'i sdug bsngal gyis kyang yongs su mi skyo ba mnga' bas/ 'jig rten skye ba dang 'gag pa la sogs pa spros pa'i dra ba mun nag thibs po dang 'dra bar 'khyams shing 'jig rten las 'das pa'i shes rab kyi snang ba nyi ma lta bu med pa la gzigs nas/ shes rab ri rab kyi srub shing lta bus shes bya 'o ma'i rgya mtsho lta bu mngon par bsrubs pa'i rgyu des 'bras bu rang gi don gyi mtshan nyid thams cad kyi de kho na'i bdud rtsi brnyes shing bla na med pa yang dag par rdzogs pa'i byang chub mngon par rdzogs par sangs rgyas nas/ 'bras bu gzhan gyi don gyi mtshan nyid theg pa mchog gis 'gro ba rnams la rten cing 'brel par 'byung ba'i rin po che dam pa kun rdzob dang don dam pa'i bden pa la brten nas skye ba dang skye ba med pa la sogs pa'i brjod pa dag gis bka' stsal te/ bla ma dam pa sangs rgyas bcom ldan 'das kyi 'byung ba'i rgyu ni de lta bu yin no zhes don gyi 'brel ba sbyar bas rigs pa'i 'brel pa sbyar bar blta'o/ /da ni yi ge'i don bshad par bya ste/ 'di la zhes bya ba ni nye bar bstan pa'o/ /'di la bcom ldan 'das zhes bya ba ni 'jig rten las 'das pa'i lam 'di la bcom ldan 'das gang yod pa de dang sbyar gyi/ 'jig rten pa'i lam la sred med kyi bu la sogs pa legs ldan gang dag yod pa de dag dang mi sbyar te/ 'di nyid bcom ldan 'das dngos po yin pa'i phyir ro/ /bcom ldan 'das zhes bya ba ni gang gi phyir 'jig rten las 'das pa'i lam gyi 'jig rten pa'i 'jig pa dang bral zhing 'das par gyur pa de'i phyir bcom ldan 'das so/ /yang na nyon mongs pa dang / phung po dang lha'i bu dang / 'chi bdag gi bdud thams cad bcom pas bcom ldan 'das so/ /yang na bdud bzhi las de'i 'jigs pa bral zhing mi 'byung bas bcom ldan 'das so/ /yang na de'i bdud bzhi las byung ba'i 'jigs pa dngos po med pa dang brdzun par thugs su chud pas bcom ldan 'das so/ /yang na bsod nams dang mnga' dbang gi skal ba dang ldan pa'i phyir bcom ldan 'das so/ /yang na 'phags pa phyir mi ldog pa'i 'khor lo'i mdo las/ nam mkha' 'dra ba'i chos rnams ni/ /lus can dag la rab ston kyang / /de la brnyes pa mi mnga' bas/ /de'i phyir bcom ldan 'das zhes bya/ /zhes gsungs pa lta bu'o/ /'di la bcom ldan 'das sngon byang chub sems dpa'i spyad pa spyod pa na sangs rgyas bcom ldan 'das kyis rgyu ci zhig mngon par bsgrubs she na/ de'i phyir thugs rje dam pas spro ba rab tu bskyed pa'i blo gros mnga' ba zhes bya ba la sogs pa smras so/ /byang chub sems dpa' gang la thugs rje dam pas spro ba rab tu bskyed pa'i shes rab kyi blo gros yod pa de ni thugs rje dam pas spro ba rab tu bskyed pa'i blo gros mnga' ba'o/ /thugs rje dam pas zhes bya ba ni byang chub sems dpas 'jig rten rtag pa dang chad pa la sogs pa spros pa'i dra ba thibs por 'khyams shing snang ba med par gzigs nas/ e ma 'o kye ma 'jig rten sdug bsngal lo snyam du de ltar dgongs pa na 'jig rten la thugs rje chen po skyes pas so/ /de la thugs rje zhes bya ba ni sdug bsngal las skyob pa'i mtshan nyid do/ /dam pa zhes bya ba ni chen po ste 'jig rten thams cad la dmigs pa'i phyir ro/ /thugs rje dam pa des spro ba rab tu bskyed pa'i blo gros zhes bya ba ni thugs rje chen po skyes pa'i rgyu des 'jig rten la thugs brtse zhing theg pa mchog gis 'gro ba rnams la rten cing 'brel par 'byung ba'i rin po che dam pa bstan par bya'o snyam du dgongs pa'i shes rab bo/ /de la spros pa zhes bya ba ni theg pa mchog gis 'gro ba rnams la rten cing 'brel par 'byung ba'i rin po che dam pa bstan par bya'o snyam du dgongs pa'o/ /rab tu bskyed pa zhes bya ba ni mchog tu bskyed pa 'am/ yang na sems can re re'i phyir bskyed pa'o/ /blo gros zhes bya ba ni shes rab ste/ theg pa mchog gis 'gro ba rnams la rten cing 'brel bar 'byung ba'i rin po che dam pa bstan par bya'o snyam du dgongs pa'i shes rab bo/ /mnga' ba zhes bya ba ni de ltar byang chub sems dpa' gang la thugs rje dam pas spro ba rab tu bskyed pa'i blo gros yod pa de ni thugs rje dam pas spro ba rab tu bskyed pa'i blo gros mnga' ba zhes bya'o/ /byang chub sems dpas 'jig rten rtag pa dang chad pa la sogs pa'i spros pa'i dra ba thibs por 'khyams shing snang ba med pa gzigs nas thugs rje chen po skye ba de ji ltar shes she na/ 'di ltar 'phags pa dkon mchog sprin dang tshangs pa khyad par sems kyis zhus pa dang / gzungs kyi dbang phyug rgyal pos zhus pa la sogs pa'i mdo las/ de la de bzhin gshegs pa'i thugs rje chen po gang zhe na/ rigs kyi bu de bzhin gshegs pa'i thugs rje chen po ni rnam pa sum cu rtsa gnyis dang ldan par phyogs bcu'i 'jig rten gyi khams mtha' yas mu med pa dag tu bsam gyis mi khyab pa'i rang bzhin du 'byung ste/ sum cu rtsa gnyis gang zhe na/ 'di lta ste/ chos thams cad ni bdag med pa yin na sems can rnams ni bdag med par ma mos pas de'i phyir sems can rnams la de bzhin gshegs pa'i thugs rje chen po skye'o/ /chos thams cad ni sems can med pa dang / srog med pa dang / gang zag med pa dang / ngo bo nyid med pa dang / gnas med pa dang / gzhi med pa dang / nga yir bya ba med pa dang / bdag po med pa dang / dngos po med pa dang / ma skyes pa dang / shi 'phos med cing ma skyes pa dang / kun nas nyon mongs pa can ma yin pa dang / 'dod chags dang bral ba dang / zhe sdang dang bral ba dang / gti mug dang bral ba dang / 'ong ba med pa dang / 'gro ba med pa dang / mngon par 'du bya ba med pa dang / spros pa med pa dang / stong pa dang / mtshan ma med pa dang / smon pa med pa yin na/ sems can rnams ni smon lam la spyod do zhes de'i phyir sems can rnams la de bzhin gshegs pa'i thugs rje chen po skye'o/ /kye ma 'jig rten gnas pa 'di ni phan tshun rtsod pas yongs su zin cing gnod sems kyi tha ba dang / zhe sdang la zhugs par gzigs nas de dag la gnod sems kyi tha ba dang zhe sdang spangs pa'i phyir chos bstan par bya'o/ /kye ma 'jig rten gnas pa 'di ni phyin ci log dang ldan zhing lam nyam nga bar zhugs pa lam gol ba la gnas pa yin gyi/ de dag yang dag pa'i lam du gzud par bya'o/ /kye ma 'jig rten gnas pa 'di na brkam zhing 'dod pa'i zil gyis non pa ste/ chog mi shes shing gzhan gyi nor la 'phrog pa yin gyi de dag 'phags pa'i nor dad pa dang / tshul khrims dang / thos pa dang / gtong ba dang / shes rab dang / ngo tsha shes pa dang / khrel yod pa'i nor la dgod do/ /kye ma sems can 'di dag ni bu smad dang / khyim dang / nor dang / 'bru la sred pas 'khol ba ste/ snying po med pa la snying por 'du shes pa yin gyi de dag la shin tu mi rtag pa bstan par bya'o/ /kye ma sems can 'di dag ni mi rigs pas 'tsho ba ste/ gcig la gcig 'drid par gnas pa yin gyi de dag la 'tsho ba yongs su dag par bya ba'i phyir chos bstan to/ /kye ma sems can 'di dag ni cho ga mi shes pa ste/ rnyed pa dang / bkur sti dang / tshigs su bcad pa la spyod pas kyang / bdag cag ni chog shes pa'o snyam du 'dzin gyi de dag la gang 'di sdug bsngal shin tu zhi zhing bde ba'i mya ngan las 'das pas shin tu chog shes par bya'o/ /kye ma sems can 'di dag ni khyim gyi gnas sdug bsngal gyi snod kun nas nyon mongs pa la rtag tu dga' ba yin gyi de dag las yid 'byung zhing khams gsum pa las yang dag par 'das par bya ba'i phyir chos bstan to/ /chos thams cad ni rgyus nye bar 'gro ba ste/ bsgrubs pas nye bar gnas pa'i mtshan nyid yin na de la sems can rnams ni 'phags pa'i rnam par grol ba la le lo byed kyi de dag la rnam par grol ba lhur blangs pa'i phyir brtson 'grus brtsams par chos bstan to/ /sems can rnams ni chags pa med pa'i ye shes dam pa khyad par du 'phags pa yongs su mya ngan las 'das pa 'di btang zhing gang 'di nyan thos kyi theg pa dang / rang sangs rgyas kyi theg pa dman pa tshol ba yin gyi/ de dag la gang 'di sangs rgyas kyi ye shes la dmigs par bya ba'i phyir/ rgya chen po la blo mos par bya'o zhes sems can rnams la de bzhin gshegs pa'i thugs rje chen po skye ste/ rigs kyi bu rnam pa sum cu rtsa gnyis po de dag dang ldan na sems can rnams la de bzhin gshegs pa'i thugs rje chen po skye'o/ /de bas na de bzhin gshegs pa thugs rje chen po la gnas pa zhes bya ste/ rigs kyi bu byang chub sems dpa' gang la la zhig sems can dag la rnam pa sum cu rtsa gnyis po de dag dang ldan pa'i snying rje chen po skye na/ byang chub sems dpa' sems dpa' chen po de ni bsod nams kyi zhing gzi brjid chen pos rgyas pa phyir mi ldog pa sems can gyi don la brtson par rig par bya'o/ /zhes gsungs pa las shes par bya'o/ /de ltar thugs rje dam pas spro ba rab tu bskyed pa'i blo gros mnga' ba 'jig rten la thugs brtse zhing theg pa mchog gis 'gro ba rnams la rten cing 'brel bar 'byung ba'i rin po che dam pa bstan par dgongs pa na/ gang gi phyir bdag ma grol bas gzhan grol bar bya ba de ni gnas ma yin te/ bdag gis sangs rgyas nyid ma thob par 'jig rten skye ba dang 'gag pa la sogs pa'i spros pa'i dra ba thibs por 'khyams shing snang ba med pa de nges par dbyung mi nus kyi/ de'i phyir bdag gis je dang por sangs rgyas kyi rgyu mngon par bsgrub po snyam nas de bskal pa bye ba khrag khrig 'bum phrag dpag tu med par bsod nams dang ye shes kyi tshogs gzhal du med pa'i khur bzhes par mdzad do/ /dus ji srid du sangs rgyas bcom ldan 'das kyis rgyu mngon par sgrub par mdzad ce na/ de'i phyir bskal pa bye ba khrag khrig 'bum phrag dpag tu med par zhes bya ba smras te/ bskal pa grangs med pa gsum du'o/ /dus ji srid du sangs rgyas bcom ldan 'das kyi rgyu ci zhig mngon par sgrub par mdzad ce na/ ci'i phyir bsod nams dang ye shes kyi tshogs gzhal du med pa zhes bya ba smras so/ /de la bsod nams kyi tshogs zhes bya ba ni sbyin pa dang / tshul khrims dang / bzod pa'i pha rol tu phyin pa gsum po dag go/ /ye shes kyi tshogs zhes bya ba ni/ bsam gtan dang / shes rab kyi pha rol tu phyin pa gnyis so/ /brtson 'grus kyi pha rol tu phyin pa ni tshogs gnyi ga'i bdag nyid de tshogs gnyi ga la yang brtson pa yod pa'i phyir ro/ /yang na gang gi tshe pha rol tu phyin pa thams cad gzhan dag la ston par byed pa de'i tshe na ni thams cad kyang chos sbyin pa'i mtshan nyid kyi bsod nams kyi tshogs yin la/ gang gi tshe pha rol tu phyin pa thams cad sbyin par bya ba dang / sbyin pa po dang / len pa po la sogs pa mi dmigs pa'i rnam pas sgom par byed pa/ de'i tshe na ni thams cad kyang 'khor gsum yongs su dag pa'i mtshan nyid kyi ye shes kyi tshogs yin no/ /tshogs zhes bya ba ni tshogs pa ste/ phung po zhes bya ba'i tha tshig go/ / gzhal du med pa zhes bya ba ni gzhal gyis mi lang bas gzhal du med pa ste/ bsod nams kyi tshogs kyang gzhal du med pa dang / ye shes kyi tshogs kyang gzhal du med pa yin no/ /khur zhes bya ba ni bsod nams dang ye shes kyi tshogs gzhal du med pa de nyid khur yin te/ rang gi don lhur len pa rnams kyis bkur bar dka' ba'i phyir ro/ /bzhes par mdzad ces bya ba ni khur de bsnams par mdzad pa ste/ sgrub par mdzad ces bya ba'i tha tshig go/ /pa na zhes bya ba'i sgra ni de ltar khur bzhes par mdzad pa'i tshe na zhes bya ba'i don te/ de'i tshe na thugs rang gi srog dang 'bral ba'i sdug bsngal gyis kyang yongs su skyo ba mi mnga' bas 'jig rten la gzigs nas zhes bya bar sbyar ro/ /ci'i phyir byang chub sems dpa'i thugs bdog pa thams cad dang / sras sdug pa la sogs pa yongs su gtong ba'i sdug bsngal gyis yongs su mi skyo zhe na/ de'i phyir gzhan la phan pa skye ba dang rjes su 'brel ba'i thugs zhes bya ba smras so/ /de la gzhan la phan pa zhes bya ba ni gzhan dag la phan pa ste/ phan pa ni phan 'dogs pa'o/ /gzhan la phan pa skye ba ni zhes bya ba gzhan dag la phan pa skye ba ste/ skye ba ni 'byung ba zhes bya ba'i tha tshig go/ /de dang rjes su 'brel ba'i thugs zhes bya ba ni rang gi srog dang bral ba'i sdug bsngal gyis kyang yongs su mi skyo ba'i thugs gang la gzhan la phan pa skye ba dang rjes su 'brel pa yod pa de ni gzhan la phan pa skye ba dang rjes su 'brel ba'i thugs so/ /gang gi phyir gzhan la phan pa skye ba dang rjes su 'brel ba'i thugs de rang gi srog dang 'bral ba'i sdug bsngal gyis kyang yongs su mi skyo ba de'i phyir byang chub sems dpa'i thugs bdog pa thams cad dang / sras sdug pa la sogs pa yongs su gtong ba'i sdug bsngal gyis yongs su mi skyo'o/ /ji ltar dgongs pa na rang gi srog dang 'bral ba'i sdug bsngal gyis kyang yongs su mi skyo zhe na/ bdag gis 'khor ba na srog dang 'bral ba'i sdug bsngal don med pa du ma dag nyams su myong bar gyur kyang sangs rgyas nyid skyed pa'i gzhan la phan pa ma thob kyi rang gi srog yongs su gtong ba 'dis ni gzhan la phan pas sangs rgyas nyid thob par 'gyur ro snyam du dgongs pa ni rnyed pa bla na med pa'i bde bas mngon par brlan pa'i thugs rje de rang gi srog dang 'bral ba'i sdug bsngal gyis kyang yongs su mi skyo'o/ /mnga' bas zhes bya ba'i sgra ni byang chub sems dpa' gang la thugs de lta bu mnga' ba des 'jig rten skye ba dang 'gag pa la sogs pa'i spros pa'i dra ba thibs por 'khyams shing snang ba med pa la gzigs nas zhes bya bar sbyar ro/ /'jig rten zhes bya ba ni khyad par gyi gzhi yin la/ skye ba dang / 'gag pa dang / chad pa dang / rtag pa dang / 'ong ba dang / 'gro ba dang / tha dad pa dang / gcig pa la sogs pa spros pa'i dra ba thibs por 'khyams shing snang ba med pa zhes bya ba ni de'i khyad par yin no/ /de la 'jig rten zhes bya ba ni 'jig pa'i phyir/ 'jig rten te sems can gyi 'jig rten no/ /skye ba dang / 'gag pa dang / chad pa dang / rtag pa dang / 'ong ba dang / 'gro ba dang / tha dad pa dang / gcig pa la sogs pa spros pa'i dra ba thibs po zhes bya ba ni 'khor ba'i tshig bla dgas so/ /sogs pa zhes bya ba'i sgras ni gzugs dang sgra dang / dri dang ro dang reg bya dang / chos la sogs pa gzung ngo / /spros pa zhes bya ba ni skye ba dang 'gag pa la sogs pa de dag nyid spros pa ste/ spros pa zhes bya ba ni ngag gi spyod pa'o/ /spros pa'i dra ba zhes bya ba ni 'khor ba spros pa de nyid 'ching bar byed pa yin pas spros pa'i dra ba'o/ /thibs po zhes bya ba ni dra ba de nyid mun nag yin pas spros pa'i dra ba thibs po ste/ 'thom zhing rgal bar dka' ba zhes bya ba'i tha tshig go/ /de ltar na skye ba dang 'gag pa la sogs pa spros pa'i dra ba thibs por zhes bya ba des ni 'khor bar zhes bstan pa yin no/ /'khyams shing zhes bya ba ni spros pa'i dra ba thibs po ji skad bstan pa der zhugs pa ste/ des ni 'jig rten skye ba dang 'gag pa la sogs pa 'khor ba spros pa'i dra ba mun nag thibs po dang 'dra bar 'khyams pa bstan to/ /snang ba med pa zhes bya ba ni de ltar 'jig rten de 'khor ba spros pa'i dra ba thibs por 'khyams pa 'ba' zhig tu yang ma zad kyi/ 'di ltar 'jig rten de ni snang ba med pa yang yin te/ des ni 'jig rten las 'das pa'i shes rab kyi snang ba nyi ma lta bu med pa bstan to/ /dper na tsher ma dang / shing ljon pa dang / lcug ma'i dra ba thibs por 'khyams par snang ba med pa de nas 'byung bar mi nus pa dang 'dra bar 'khor ba spros pa'i dra ba thibs por 'khyams pas kyang 'jig rten las 'das pa'i shes rab kyi snang ba med par de las 'byung bar mi nus pas de'i phyir spros pa'i dra ba thibs por 'khyams shing snang ba med pa zhes bya'o/ /de la gzigs nas zhes bya ba ni bcom ldan 'das sngon byang chub sems dpa'i spyad pa spyod pa na 'jig rten de la gzigs nas so/ /de la gzigs nas gang gis ci zhig bsrubs she na/ de'i phyir shes rab kyis shes bya'i rgya mtsho mngon par bsrubs te zhes bya ba smras te/ ji ltar 'di na lha dang lha ma yin dag gis ri rab kyi srub shing gis 'o ma'i rgya mtsho bsrubs pa las bdud rtsi gang byung ba de ni sems can thams cad kyis 'thungs su zin kyang 'chi bar 'gyur gyi/ bcom ldan 'das kyis bsod nams dang ye shes kyi khur bzhes shing bsags pas byang chub kyi snying po la bzhugs nas shes rab ri rab kyi srub shing lta bus shes bya 'o ma'i rgya mtsho lta bu mngon par bsrubs pa las chos thams cad kyi de kho na'i bdud rtsi gang brnyes pa de ni nyag gcig gis bstar kyang bla na med pa yang dag par rdzogs pa'i byang chub mngon par rdzogs par 'tshang rgya ba'i rgyu yin no/ / de la shes rab kyis zhes bya ba ni rdo rje lta bu'i ting nge 'dzin gyis rab tu phye ba'i shes rab chos rab tu 'byed pas so/ /shes bya'i rgya mtsho zhes bya ba ni shes bya nyid rgya mtsho yin pas shes bya'i rgya mtsho ste/ rgya mtsho ltar mtha' yas pa'i phyir ro/ /mngon par bsrubs te zhes bya ba ni de kho na ji lta ba bzhin du rtogs par mdzad de'o/ /de ni sangs rgyas bcom ldan 'das kyi rgyu bstan pa yin no// //bam po gnyis pa/ de ltar bcom ldan 'das sngon byang chub sems dpa'i spyad pa spyod pa na sangs rgyas bcom ldan 'das kyis rgyu de lta bu mngon par bsgrubs pas/ 'bras bu rang gi don gyi mtshan nyid ji zhig brnyes she na/ de'i phyir chos thams cad kyi de kho na'i bdud rtsi spros pa'i dra ba mtha' dag dang legs par bral ba/ gzhan gyi dring mi 'jog pa/ rnam par mi rtog pa brnyes zhes bya ba smras so/ /de la chos thams cad kyi de kho na'i bdud rtsi zhes bya ba ni khyad par gyi gzhi yin la/ spros pa'i dra ba mtha' dag dang legs par bral ba zhes bya ba dang / gzhan gyi dring mi 'jog pa zhes bya ba dang / rnam par mi rtog pa zhes bya ba gsum po de dag ni de'i khyad par yin no/ /de la chos thams cad kyi zhes bya ba ni phyi rol dang nang dang 'jig rten dang 'jig rten las 'das pa'i chos thams cad kyi'o/ /de kho na zhes bya ba ni chos thams cad kyi de kho na ste/ de kho na ni bslu ba med pa'o/ /gang la don dam par gzhan du 'gyur ba med cing ngo bo nyid stong pa nyid de ni bslu ba med pa de kho na zhes bya'o/ /bdud rtsi zhes bya ba ni de kho na gang yin pa de nyid bdud rtsi ste/ sems can rnams kyis de rtogs na skye ba dang / rga ba dang / na ba dang / 'chi ba med par 'gyur bas/ de'i phyir chos thams cad kyi de kho na ni bdud rtsi dang 'dra bas bdud rtsi ste/ ji skad du/ mdor na chos ni mi 'tshe ste/ /mya ngan las 'das stong pa nyid/ /'di la de nyid 'ba' zhig ces/ /de bzhin gshegs pa rnams kyis gsungs/ /zhes gsungs pa lta bu'o/ /spros pa zhes bya ba ni ngag gi spyod pa ste/ phung po dang / khams dang / skye mched dang / skye ba dang / 'gag pa la sogs pa'i rnam par brjod pa ni spros pa'o/ /spros pa'i dra ba zhes bya ba ni spros pa de nyid dra ba ste/ dper na dra bas g.yogs na rang dgar 'gro mi nus pa dang 'dra bar spros pa'i dra bas bsgribs na mya ngan las 'das par 'gro mi nus pas de'i phyir spros pa de nyid dra ba dang 'dra bas spros pa'i dra ba'o/ /mtha' dag dang legs par bral ba zhes bya ba ni thams cad yang dag par bral ba ste/ mtha' dag ces bya ba ni thams cad do/ /legs par zhes bya ba ni yang dag par te phyin ci ma log par ro/ /'bral ba zhes bya ba ni rgyun chad pa ste/ chos thams cad kyi de kho na'i bdud rtsi gang phung po dang / khams dang / skye mched dang / skye ba dang / 'gag pa la sogs pa'i rnam pa brjod pa spros pa'i dra ba mtha' dag dang legs par bral bar gyur pa de ni spros pa'i dra ba mtha' dag dang legs par bral ba'o/ /chos thams cad kyi de kho na'i bdud rtsi de spros pa'i dra ba mtha' dag dang legs par bral ba 'ba' zhig tu yang ma zad de/ 'di ltar de ni gzhan gyi dring mi 'jog pa yang yin te/ gzhan gyi dring mi 'jog pa zhes bya ba ni chos thams cad kyi de kho na'i bdud rtsi 'di ni gzhan gyi rkyen gyis rtogs par bya ba ma yin gyi rang gis rtogs par bya ba ste/ rang gis bskyed par bya ba yin no zhes bya ba'i tha tshig go/ /chos thams cad kyi de kho na'i bdud rtsi de gzhan gyi dring mi 'jog par yang ma zad de/ 'di ltar de ni rnam par mi rtog pa yang yin te/ rnam par mi rtog pa zhes bya ba ni/ sems kyi spyod pa dang bral ba ste/ bdag gi ngo bo dang gzhan gyi ngo bo yod pa dang med pa la sogs pa'i rnam par rtog pa med pa'o/ /brnyes nas zhes bya ba ni thugs su chud nas te 'bras bu rang gi don gyi mtshan nyid bla na med pa yang dag par rdzogs pa'i byang chub mngon par rdzogs par sangs rgyas nas zhes bya ba'i tha tshig go/ / de ni sangs rgyas bcom ldan 'das kyi 'bras bu rang gi don gyi mtshan nyid bstan pa yin no/ /de ltar 'bras bu rang gi don gyi mtshan nyid bla na med pa yang dag par rdzogs pa'i byang chub mngon par rdzogs par sangs rgyas nas/ 'bras bu gzhan gyi don gyi mtshan nyid ci zhig mdzad ce na/ de'i phyir theg pa mchog gis 'gro ba rnams la rten cing 'brel bar 'byung ba'i rin po che dam pa skye ba dang / na tshod dang / rigs dang / yul dang / dus las 'das pa med pa/ mu stegs byed dang / nyan thos dang / rang sangs rgyas thams cad dang thun mong ma yin pa/ kun rdzob dang don dam pa'i bden pa la brten nas/ skye ba dang skye ba med pa la sogs pa'i brjod pa dag gis bka' stsal to zhes bya ba smras so/ /rten cing 'brel par 'byung ba'i rin po che dam pa 'di ni mu stegs byed dang / nyan thos dang / rang sangs rgyas thams cad dang thun mong ma yin te/ de dag la 'di la mos pa med do/ /de dag la 'di la mos pa med na 'o na bcom ldan 'das kyis su dag la bka' stsal zhe na/ de'i phyir theg pa mchog gis 'gro ba rnams la zhes bya ba smras so/ /de la theg pa mchog ces bya ba ni theg pa chen po ste/ thabs dang shes rab dang snying rje chen po la sogs pa chos zab cing rgya che ba'i yon tan dang ldan pa'i phyir dang / rang dang gzhan gyi don bla na med pa ma lus pa bsgrub pa'i phyir ro/ /theg pa zhes bya ba ni byang chub sems dpa'i lam 'bras bu dang bcas pa ste de nas der 'gro ba'i phyir ro/ /mchog ces bya ba ni phul dang rab dang gtso bo zhes bya ba'i rnam grangs so/ /theg pa mchog des 'gro ba rnams zhes bya ba ni gang dag theg pa mchog des 'khor ba'i sdug bsngal gyi gnod pa dag gis gnod pa med par yon tan gzhal du med pa dang ldan pa thams cad mkhyen pa nyid kyi grong khyer sangs rgyas kyis kun tu 'od du bde bas myur ba kho nar 'gro ba rnams so/ /de dag kyang gang zhe na/ byang chub sems dpa' sems dang po bskyed pa yan chad dang / mthar thug pa'i sa la gnas pa 'phags pa byams pa dang 'jam dpal dang spyan ras gzigs dbang phyug la sogs pa ste/ de rnams la bka' stsal to zhes bya bar sbyar ro/ /de rnams la ci zhig bka' stsal zhe na/ de'i phyir rten cing 'brel bar 'byung ba'i rin po che dam pa zhes bya ba la sogs pa smras so/ /'dir yang rten cing 'brel par 'byung ba'i rin po che dam pa zhes bya ba ni khyad par gyi gzhi yin la/ skye ba dang na tshod dang rigs dang / yul dang dus las 'da' ba med pa zhes bya ba dang / mu stegs byed dang / nyan thos dang / rang sangs rgyas thams cad dang thun mong ma yin pa zhes bya ba de gnyis ni de'i khyad par yin no/ /de la rten cing 'brel bar 'byung ba zhes bya ba ni/ chos thams cad kyi de kho na 'gag pa med pa dang / skye ba med pa dang / chad pa med pa dang / rtag pa med pa dang / 'ong ba med pa dang / 'gro ba med pa dang / don tha dad pa ma yin pa dang / don gcig pa ma yin pa spros pa nye bar zhi zhing ngo bo nyid kyis zhi ba'i mtshan nyid gang yin pa'o/ /rin po che zhes bya ba ni rten cing 'brel bar 'byung ba de nyid rin po che ste dkon pa dang / rin che ba dang / dga' bar byed pa dang / phan 'dogs pa dang / mi ma yin pa la sogs pa gnod pa byed pa'i gnyen por gyur pas rin po che dang 'dra ba'i phyir rin po che'o/ /dam pa zhes bya ba ni rin po che thams cad kyi nang na dam par gyur pas na rin po che dam pa ste/ rin po che thams cad de'i rgyu las byung ba'i phyir ro/ /rten cing 'brel par 'byung ba'i rin po che dam pa 'di ni skye ba dang / na tshod dang / rigs dang / yul dang / dus las 'das pa med pa yin no/ /de ni de dag la dbri bkol med pa yin no/ /de la skye ba las 'da' ba med pa zhes bya ba ni 'di ni lha dang mir skyes pa yin gyi 'di la ni bstan par bya'o/ /'di ni sems can dmyal ba dang / dud 'gro dang / yi dags su skyes pa yin gyi 'di la ni bstan par mi bya'o zhes bya ba de ltar skye ba la dbri bkol med pa yin no/ /na tshod las 'da' ba med pa zhes bya ba ni/ 'di ni na tshod dar la bab pa yin gyi 'di la bstan par bya'o/ /'di ni na tshod ha cang gzhon ches pa dang / ha cang rgan ches pa yin gyi 'di la ni bstan par mi bya'o zhes bya ba de ltar na tshod la dbri bkol med pa yin no/ /rigs las 'da' ba med pa zhes bya ba ni/ 'di ni bram ze dang / rgyal rigs yin gyi 'di la ni bstan par bya'o/ /'di ni rje'u rigs dang / dmangs rigs yin gyi 'di la ni bstan par mi bya'o zhes bya ba de ltar rigs la dbri bkol med pa ste/ phyi rol pa rnams kyi gzhung las/ dmangs rigs la ni blo gros dang / /lhag ma bsreg bya sbyin mi bya/ /de la chos bstan mi bya zhing / /de la brtul zhugs bstan mi bya/ /zhes ji skad 'byung ba lta bu'i dbri bkol med pa yin no/ /yul las 'da' ba med pa zhes bya ba ni/ 'di ni yul dbus su skyes pa dang / grong dang gtsug lag khang na 'dug pa yin gyi 'di la ni bstan par bya'o/ /'di ni yul mtha' 'khob tu skyes pa dang / dur khrod dang lam gyi bzhi mdo na 'dug pa yin gyi 'di la ni bstan par mi bya'o zhes bya ba de ltar yul la dbri bkol med pa yin no/ /dus las 'da' ba med pa zhes bya ba ni nang par dang nyin mtshan ni bstan par bya'o/ /dgongs kar ni bstan par mi bya'o zhes bya ba de ltar dus la dbri bkol med pa yin no/ /rten cing 'brel par 'byung ba'i rin po che dam pa de skye ba dang na tshod dang rigs dang yul dang dus las 'da' ba med pa 'ba' zhig tu yang ma zad de/ 'di ltar de ni mu stegs byed dang nyan thos dang rang sangs rgyas thams cad dang thun mong ma yin pa yang yin no/ /de la mu stegs byed thams cad dang thun mong ma yin pa zhes bya ba la/ mu stegs byed ces bya ba ni gang dag chos kyi phyir 'jug ngogs su 'jug par byed pa dag ste/ nor lha dang / lha chen po dang / tshangs pa dang / ser skya dang / gzegs zan dang / rkang mig dang / 'phel ba dang / rgyal dpog gi bu la sogs pa'o/ /de dag thams cad dang / thun mong ma yin pa ni de dag la yang 'di la mos pa med pa'i phyir ro/ /nyan thos thams cad dang thun mong ma yin pa zhes bya ba la/ nyan thos zhes bya ba ni gang dag gzhan las chos thos nas sdug bsngal mthar byed pa dag go/ /de dag thams cad dang thun mong ma yin pa de dag la yang 'di la mos pa med pa'i phyir ro/ /rang sangs rgyas thams cad dang thun mong ma yin pa zhes bya ba la/ rang sangs rgyas zhes bya ba ni gang dag sngon dben pa dang skyo ba la goms pa'i bag chags kyis gzhan la brten pa med par bdag nyid gcig pu kho na'i rkyen la brten nas mngon par rdzogs par sangs rgyas pa dag go/ /de dag thams cad dang thun mong ma yin pa ni de dag la yang 'di la mos pa med pa'i phyir ro/ /rten cing 'brel par 'byung ba'i rin po che dam pa skye ba dang / na tshod dang / rigs dang / yul dang / dus las 'da' ba med pa/ mu stegs byed dang / nyan thos dang / rang sangs rgyas thams cad dang thun mong ma yin pa de ji zhig la brten nas bka' stsal zhe na/ de'i phyir kun rdzob dang don dam pa'i bden pa la brten nas zhes bya ba smras so/ /'di la bcom ldan 'das kyis rten cing 'brel bar 'byung ba'i rin po che dam pa de thabs dang thabs las byung ba'i mtshan nyid dang chos mthun par bden pa gnyis la brten nas bka' stsal to/ /de la kun rdzob kyi bden pa ni thabs kyi mtshan nyid yin la/ don dam pa'i bden pa ni thabs las byung ba'i mtshan nyid yin no/ /de la kun rdzob kyi bden pa ni dmigs pa'i mtshan nyid de/ sems can grol ba dang / ma grol ba dang / brjod pa dang / brjod par bya ba dang / shes pa dang / shes byar 'brel ba'i mtshan nyid dang / las dang 'bras bus 'brel pa rnam par gzhag pa'i mtshan nyid do/ /don dam pa'i bden pa ni thams cad dmigs su med pa'i mtshan nyid de/ 'phags pa tshangs pa khyad par sems kyis zhus pa'i mdo las/ tshangs pa de bzhin gshegs pa rnams kyi byang chub ni dmigs su med pa'o zhes ji skad gsungs pa lta bu'o/ /nges pa'i tshig tu na kun rdzob ces bya ba ni yang dag pa phyin ci ma log pa'i rnam pas sgrib pa kun rdzob po/ /kun zhes bya ba ni yang dag pa phyin ci ma log pa'i rnam pas so/ /rdzob ces bya ba ni sgrib cing g.yogs par byed pa ste/ 'gebs par byed ces bya ba'i tha tshig go/ /gang gis ci zhig bsgribs she na/ dmigs pa'i mtshan nyid kun rdzob kyi bden pas dmigs su med pa'i mtshan nyid don dam pa'i bden pa bsgribs so/ /bden pa zhes bya ba ni kun rdzob de nyid bden pa yin pas kun rdzob kyi bden pa'o/ /'dir kha cig na re/ de ltar bsdu ba byas na kun rdzob 'ba' zhig bden par 'gyur gyi don dam pa ni bden par mi 'gyur te/ de ltar na lung dang yang 'gal bar 'gyur te/ lung las rigs kyi bu gal te don dam pa med par gyur na tshangs par spyod pa don med par 'gyur ro zhes gsungs so zhes zer bas/ 'dir de la smras pa/ lung dang 'gal bar mi 'gyur te/ 'di ltar chos thams cad ma skyes pa'i phyir dmigs pa de nyid shes rab kyis nye bar brtags pa na don dam par dmigs su med pa nyid ni don dam pa'i bden pa yin pas/ de'i phyir don dam pa'i bden pa yang bden pa nyid du 'thad de/ lung las 'jam dpal nga byang chub kyi snying po la 'dug nas ci yang ma dmigs pa kho nar langs so zhes ji skad gsungs pa lta bu'o/ /yang na dmigs pa zhes bya ba kun rdzob kyi bden pa'i mtshan nyid gang yin pa de ni kun rdzob kho nar bden pas kun rdzob kyi bden pa zhes bya bar bsdu'i de don dam par bden pa ni ma yin te/ 'di ltar 'byung ba chen po rnams kyang kun rdzob kho nar sra ba dang gsher ba dang dro ba dang / g.yo ba nyid kyi ngo bo nyid du yod kyi/ don dam par ni med do/ /gal te sra ba nyid la sogs pa don dam par yang yod par gyur na rnal 'byor pa rnams rtsig pa la yang thad kar 'gro ba dang / ra ba la yang thad kar 'gro ba dang / ri la yang mi thogs par 'gro ba yang mi 'gyur la/ kun rdzob las don dam pa khyad par yod par yang mi 'gyur te/ de ltar na de kho na ma mthong ba'i sems can thams cad kyis kyang 'phags pas thugs su chud par bya ba'i de kho na rtogs pas sems can thams cad kyis kyang de kho na mthong ba'i skyon du 'gyur bas/ de'i phyir dmigs pa zhes bya ba kun rdzob kyi bden pa ni kun rdzob kho nar bden pas kun rdzob kyi bden pa zhes bya bar bsdu'o/ / dmigs pa de nyid shes rab kyis nye bar brtags na don dam par dmigs su med pa nyid ni don dam pa'i bden pa yin pas don dam pa'i bden pa yang med pa ma yin no/ /don dam pa zhes bya ba ni de'i don yang yin la dam pa yang yin pas don dam pa'o/ /don zhes bya ba ni rtogs par bya ba'i don te/ 'dir rtogs par bya ba med pa'i tshul gyis dmigs su med pa rtogs par bya ba'i don to/ /dam pa zhes bya ba ni de nyid dam pa ste/ chos thams cad kyi de kho na nyid phyin ci ma log pa yin pa'i phyir ro/ bden pa zhes bya ba ni don dam par de nyid dmigs su med par bden pas don dam pa'i bden pa zhes bya'o/ /bcom ldan 'das kyis rten cing 'brel bar 'byung ba'i rin po che dam pa de kun rdzob dang don dam pa'i bden pa la brten nas bka' stsal pa dang / bden pa gnyis po de yang dmigs pa dang dmigs su med pa'i mtshan nyid yin par ji ltar shes she na/ de ni 'di ltar 'phags pa shes rab kyi pha rol tu phyin pa'i mdo las/ rab 'byor 'di dag thams cad ni 'jig rten gyi tha snyad du bstan pa yin gyi don dam par ni ma yin no zhes gsungs pa dang / 'phags pa dkon mchog sprin gyi mdo las kyang / kun rdzob kyi bden pa la mkhas pa dang / don dam pa'i bden pa la mkhas pa yin zhes bya ba dang / de'i mtshan nyid gzugs su 'dogs par byed cing don dam par gzugs dmigs su med cing mngon par zhen pa med pa dang / byang chub dang byang chub par byed pa'i bar du 'dogs par byed cing / don dam par byang chub dang byang chub par byed pa dmigs su med cing mngon par zhen pa med pa zhes bya ba bka' stsal pa dang / 'phags pa blo gros mi zad pas bstan pa'i mdo las kyang / kun rdzob kyi bden pa gang zhe na/ ji tsam du 'jig rten gyi tha snyad du yi ge dang sgra dang brdas bstan pa'o/ /don dam pa'i bden pa gang zhe na/ gang la sems kyi spyod pa yang med na yi ge rnams kyi lta ci smos pa'o zhes bden pa gnyis mtshan nyid dang bcas par bka' stsal pa dang / 'phags pa lang kar gshegs pa'i mdo las kyang / kun rdzob dang ni don dam ste/ /rgyu las skyes pa gsum pa med/ /kun rdzob rtog pas btags pa ste/ /de chad 'phags pa'i spyod yul lo/ /zhes gsungs te/ tshigs su bcad pa phyed gong mas bden pa gnyis bstan la/ phyed 'og mas de'i mtshan nyid bstan pa dang / yang de nyid las/ ji ltar 'phags pas rnam brtags ltar/ /dngos po rnams kyi dngos nyid med/ /ji ltar byis pas rnam brtags ltar/ /dngos rnams yod pa kho na yin/ /zhes gsungs pa dang / 'phags pa yab sras mjal ba'i mdo las kyang / 'jig rten mkhyen pas gzhan la ma gsan par/ /bden pa gnyis po 'di dag rang gis gzigs/ /kun rdzob gang yin de bzhin don dam ste/ /bden pa gsum pa gzhan ni yod ma yin/ /zhes gsungs pa dang / 'di ltar de bzhin gshegs pa kun rdzob dang don dam pa thugs su chud cing / shes bya yang kun rdzob dang don dam pa ji tsam pa de tsam du zad la/ de yang bcom ldan 'das kyis stong pa nyid du shin tu gzigs shin tu thugs su chud shin tu mngon sum du mdzad pa des na thams cad mkhyen pa zhes bya ba 'di ni ngo mtshar che'o zhes kyang gsungs te/ de la kun rdzob ni de bzhin gshegs pas 'jig rten gyi spyod pa'i sgo nas gzigs pa yin no/ /de la 'jig rten zhes bya ba ni rigs pa dang rigs pa ma yin pa'i tshogs su brjod pa'o/ /'jig rten de'i spyod pa ni lus dang ngag dang yid kyi spyod par dmigs pa ji snyed pa ste/ de ni kun rdzob kyi bden pa'o/ /yang na gang la 'jig rten gyi spyod cing rnam par gnas pa la longs spyod kyi sgo nas las dang 'bras bur 'brel pa de ni kun rdzob bo/ /kun rdzob kun tu las dang las kyi 'bras bur 'brel pa yin gyi don dam par ma yin pa de ni 'thad kyi/ gal te don dam par las dang las kyi 'bras bu la spyod pa yod par gyur na/ 'khor ba las thar pa bye brag med par 'gyur bas de'i phyir don dam par las dang las kyi 'bras bu la spyod pa med de/ 'phags pa dkon mchog brtsegs pa'i mdo las/ gang la las med pa dang las kyi 'bras bu med pa de ni 'phags pa rnams kyi rigs yin la/ 'phags pa rnams kyi rigs gang yin pa'i rigs de la ni lus kyis las mi byed/ ngag gis mi byed/ yid kyis mi byed do/ /zhes ji skad gsungs pa lta bu'o/ /don dam pa gang yin pa de ni brjod du med pa shes par byar med pa/ rnam par shes par byar med pa/ yongs su shes par byar med pa/ ma bstan pa rab tu ma bstan pa/ ma mnyan pa/ nyan du ma bcug pa/ ma shes pa/ rnam par ma shes pa/ ma mthong ba/ mthong bar ma byas pa/ ma btags pa/ 'dzin du ma bcug pa/ ma rtogs pa/ ma thob pa/ ma bor ba/ ma blangs pa/ ma bsdus pa/ ma bsal ba/ mi zad pa/ byed pa med pa/ rab tu ma zhi ba/ ma smad pa/ ma sdod pa/ thob pa ma yin pa/ ma thob pa ma yin pa/ bde ba ma yin pa/ mi bde ba ma yin pa/ snyan pa ma yin pa/ mi snyan pa ma yin pa/ gzugs ma yin pa/ gzugs med pa ma yin pa/ grangs med pa/ bgrang du med pa/ 'jig rten ma yin pa/ 'jig rten med pa ma yin pa/ bral ba ma yin pa/ kun nas nyon mongs pa ma yin pa/ rnam par byang ba ma yin pa/ kun rdzob ma yin pa/ mya ngan las 'das pa ma yin pa/ rnam par ma brtags pa/ rnam par ma bsgrubs pa/ g.yo ba med pa/ rlom sems med pa/ bskyod pa med pa/ mngon par 'dus ma byas pa/ ma spros pa/ spros pa dang bral ba ste/ 'di ltar gzugs dmigs su med pa dang / rnam pa thams cad mkhyen pa nyid kyi bar du dmigs su med pa yin no zhes gsungs pa dang / de dag la sogs pa mdo sde mtha' yas pa gzhan dag las kyang bden pa gnyis bka' stsal to/ /nyan thos kyi theg pa las kyang nga ni yod pa'i chos kyang yod par ston la/ med pa'i chos kyang med par ston to zhes gsungs te/ de ji bstan zhe na/ gang 'jig rten la bden par grags pa de ni nga la yang bden par grags pa yin la/ gang 'jig rten la mi bden par grags pa de ni nga la yang mi bden par grags pa yin no zhes bstan pa yin te/ de la gang byed rgyu dang bcas pa dang / rgyu mtshan dang bcas pa de ni bden par grags pa yin la/ gang byed rgyu med pa dang rgyu mtshan med pa de ni mi bden par grags pa yin no/ /de ltar na kun rdzob dang don dam pa'i bden pa gnyis ni dmigs pa'i mtshan nyid dang / dmigs su med pa'i mtshan nyid yin par theg pa che chung gi phyogs gnyi ga la grags pa yin no/ /rten cing 'brel par 'byung ba'i rin po che dam pa de de ltar kun rdzob dang don dam pa'i bden pa la brten nas brjod pa gang dag gis bka' stsal zhe na/ de'i phyir skye ba dang skye ba med pa la sogs pa'i brjod pa dag gis zhes bya ba smras so/ /de la brjod pa gang dag la skye ba la sogs pa yod pa de dag ni skye ba la sogs pa'i brjod pa dag ste/ sogs pa'i sgras ni 'gag pa dang / chad pa dang / rtag pa dang / 'ong ba dang / 'gro ba dang / don gcig pa dang / don tha dad pa dag bsdu'o/ /brjod pa gang dag la skye ba med pa la sogs pa yod pa de dag ni skye ba med pa la sogs pa'i brjod pa dag ste/ sogs pa'i sgras ni 'gag pa med pa dang / chad pa med pa dang / rtag pa med pa dang / 'ong ba med pa dang / 'gro ba med pa dang / don tha dad pa ma yin pa dang / don gcig pa ma yin pa dag bsdu'o/ /de ltar kun rdzob tu dngos po rnams las skye ba dang / 'gag pa dang / chad pa dang / rtag pa dang / 'ong ba dang / 'gro ba dang / don tha dad pa dang / don gcig pa dag yod pas de'i phyir bcom ldan 'das kyis kun rdzob kyi bden pa la brten nas ni skye ba la sogs pa'i brjod pa dag gis bka' stsal to/ /don dam par dngos po rnams skye ba med pa dang / 'gag pa med pa dang / chad pa med pa dang / rtag pa med pa dang / 'ong ba med pa dang / 'gro ba med pa dang / don tha dad pa ma yin pa dang / don gcig pa ma yin pas/ de'i phyir bcom ldan 'das kyis don dam pa'i bden pa la brten nas ni skye ba med pa la sogs pa'i brjod pa dag gis bka' stsal to/ /bka' stsal to zhes bya ba ni bstan to zhes bya ba'i tha tshig go/ /de ni sangs rgyas bcom ldan 'das kyi 'bras bu gzhan gyi don gyi mtshan nyid bstan pa yin no/ /de ltar don gyi 'brel pa sbyar bas rigs pa'i 'brel par sbyar ba de ni re zhig bla ma dam pa sangs rgyas bcom ldan 'das kyi 'byung ba'i rgyu bstan pa yin no/ /da ni bstan bcos mdzad pa'i 'byung ba'i rgyu bstan par bya ste/ de'i phyir slob dpon gyis kyang de bzhin gshegs pa'i tshul skye ba med pa la sogs pa'i tshig gis rab tu bstan pa/ ma nor ba de bzhin nyid thugs su chud nas dgyes pa'i shugs drag po yang dag par skyes pas ji ltar thugs su chud pa'i tshul gyis bcom ldan 'das la mngon par bstod de/ bstan bcos mdzad par bzhed nas thugs rje nyid kyi chus brlan pa'i thugs mnga' bas skye bo rjes su dpag pa gtsor 'dzin cing khong du chud par 'dod pas rtogs par bzhed nas zhes bya ba smras so/ /tshig 'di'i bsdus pa'i don yang slob dpon gyi zhal snga nas kyis rgyu bstan pa dang / 'bras bu rang dang gzhan gyi don gyi mtshan nyid rnam pa gnyis bstan pa yin no/ /yan lag gi don du slob dpon gyis kyang sngon mos pas spyod pa'i sa la gnas pa na lhag pa'i bsam pa rnam par dag pa'i sa 'thob pa'i rgyu ci zhig thugs su chud nas/ 'bras bu rang gi don gyi mtshan nyid byang chub sems dpa'i sa dang po rab tu dga' ba brnyes te/ 'bras bu gzhan gyi don gyi mtshan nyid skye bo rjes su dpag pa gtsor 'dzin cing khong du chud par 'dod pas rtogs par bzhed nas bstan bcos mdzad ce na/ slob dpon gyi zhal snga nas kyis rgyu ni de bzhin gshegs pa'i tshul skye ba med pa la sogs pa'i tshig gis rab tu bstan pa'o/ /ma nor ba de bzhin nyid thugs su chud nas zhes bya bas bstan to/ /'bras bu rang gi don gyi mtshan nyid ni dgyes pa'i shugs drag po yang dag par skyes pa/ ji ltar thugs su chud pa'i tshul gyis bcom ldan 'das la mngon par bstod do/ /bstan bcos mdzad par bzhed nas zhes bya ba bstan to/ /'bras bu gzhan gyi don gyi mtshan nyid ni thugs rje nyid kyi chus brlan pa'i thugs mnga' bas skye bo rjes su dpag pa gtsor 'dzin cing khong du chud par 'dod pas rtogs par bzhed nas zhes bya bas bstan te/ de ni don gyi 'brel pa yin no/ / de la don gyi 'brel par sbyar ba ni 'di yin te/ slob dpon gyi zhal snga nas kyis kyang / de bzhin gshegs pa'i tshul skye ba med pa la sogs pa'i tshig gis rab tu bstan pa/ ma nor ba de bzhin nyid thugs su chud pa'i rgyu des 'bras bu rang gi don gyi mtshan nyid byang chub sems dpa'i sa rab tu dga' ba brnyes pas ji ltar thugs su chud pa'i tshul gyis bcom ldan 'das la mngon par bstod de/ bstan bcos mdzad par bzhed nas/ 'bras bu gzhan gyi don gyi mtshan nyid thugs rje nyid kyi chus brlan pa'i thugs mnga' bas skye bo rjes su dpag pa gtsor 'dzin cing khong du chud par 'dod pas rtogs par bzhed nas bstan bcos mdzad de/ slob dpon gyi zhal snga nas kyang 'byung ba'i rgyu ni de lta bu yin no zhes don gyi 'brel ba sbyar bas rigs pa'i 'brel ba sbyar bar blta'o/ /da ni yi ge'i don bshad par bya ste/ slob dpon zhes bya ba ni mtho ris dang / thar pa thob par byed pa'i cho ga rtogs shing khong du chud pa'i slob dpon no/ /yang na de thob par byed pa lam gyi cho ga la rnam par gnas pa'i slob dpon no/ /yang na mngon du ldang ba dang phyag 'tshal ba la sogs pa spyod lam gyis chos 'dul ba'i cho ga rtogs shing de la gnas pas slob dpon no/ /yang na 'dod chags la sogs pa nyon mongs pa'i spong ba 'dul ba'i cho ga rtogs shing de thob pas slob dpon no/ /yang na gzhan dag mtho ris dang thar pa thob par byed pa dang / spyod lam las byung ba dang / nyon mongs pa 'dul ba zhes bya ba'i cho ga gsum la sbyor bar byed pas slob dpon no/ /kyang zhes bya ba'i sgra ni bcom ldan 'das nyag gcig thugs rjes sems can gyi don la sbyor bar mdzad pa 'ba' zhig tu ma zad de/ 'di ltar slob dpon gyi zhal snga nas kyis kyang thugs rjes sems can gyi don la sbyor bar mdzad do zhes bya bar sbyar ro/ /slob dpon gyis kyang sngon mos pas spyod pa'i sa la gnas pa na lhag pa'i bsam pa rnam par dag pa'i sa thob pa'i rgyu ci zhig thugs su chud ce na/ de'i phyir de bzhin gshegs pa'i tshul zhes bya ba la sogs pa smras so/ /'dir yang de bzhin gshegs pa'i tshul zhes bya ba ni khyad par gyi gzhi yin la/ skye ba med pa la sogs pa'i tshig gis rab tu bstan pa zhes bya ba dang / ma nor ba de bzhin nyid ces bya ba de gnyis ni de'i khyad par yin no/ / de la lhag pa'i bsam pa rnam par dag pa'i sa 'thob pa'i rgyu 'di sus rab tu bstan gang zhig yin/ ci zhig gis rab tu bstan/ de'i khyad par gang yin zhe na/ de'i phyir de bzhin gshegs pa dang / de'i tshul dang / skye ba med pa la sogs pa'i tshig gis rab tu bstan par/ ma nor ba de bzhin nyid ces bya ba smras te/ go rims bzhin no/ /de sus rab tu bstan zhe na/ de'i phyir de bzhin gshegs pa zhes bya ba smras so/ /ci'i phyir de bzhin gshegs pa zhes bya zhe na/ gang gi phyir des de bzhin thugs su chud pas/ de'i phyir de bzhin gshegs pa ste/ de bzhin zhes bya ba de gang yin zhe na/ mya ngan las 'das pa'o/ /de ni mi bslu ba'i phyir de bzhin zhes bya ste/ bcom ldan 'das kyis dge slong bden pa'i mchog ni 'di yin te/ 'di lta ste mi bslu ba'i chos can mya ngan las 'das pa'o zhes ji skad gsungs pa lta bu'o/ /gshegs pa zhes bya ba ni thugs su chud pa zhes bya ba'i tha tshig ste/ dper na 'jig rten na smra ba po dag mi 'di ni khong du chud pa dang ldan pa yin no zhes zer ba lta bu'o/ /de'i phyir des mya ngan las 'das pa thugs su chud cing shin tu rtogs pa dang / mngon par rdzogs par sangs rgyas pas na de bzhin gshegs pa zhes bya'o/ /yang na de bzhin zhes bya ba ni rnam par thar pa'i sgo gsum po stong pa nyid dang / mtshan ma med pa dang / smon pa med pa dag go/ /gshegs pa zhes bya ba ni des de dag rnam pa thams cad du thugs su chud pa ste de'i phyir de bzhin gshegs pa'o/ /yang na de bzhin zhes bya ba ni 'phags pa'i bden pa bzhi po dag go/ /gshegs pa zhes bya ba ni des de dag rnam pa thams cad du thugs su chud pa ste/ de'i phyir de bzhin gshegs pa'o/ /yang na de bzhin zhes bya ba ni/ byin gyi rlabs bzhi po bden pa dang gtong ba dang / nye bar zhi ba dang / shes rab ces bya ba dag go/ /gshegs pa zhes bya ba ni des de dag rnam pa thams cad du thugs su chud pa ste de'i phyir de bzhin gshegs pa'o/ / yang na de bzhin zhes bya ba ni sangs rgyas kyi chos thams cad do/ /gshegs pa zhes bya ba ni des de dag rnam pa thams cad du thugs su chud pa ste/ de'i phyir de bzhin gshegs pa'o/ /yang na de bzhin zhes bya ba ni pha rol tu phyin pa drug po dag go/ /gshegs pa zhes bya ba ni de dag gis yang dag par rdzogs pa'i sangs rgyas su gshegs pa ste de'i phyir de bzhin gshegs pa'o/ /yang na de bzhin zhes bya ba ni rab tu dga' ba zhes bya ba la sogs pa byang chub sems dpa'i sa bcu po dag go/ /gshegs pa zhes bya ba ni de dag gis/ yang dag par rdzogs pa'i sangs rgyas nyid du gshegs pa ste de'i phyir de bzhin gshegs pa'o/ /yang na de bzhin zhes bya ba ni 'di lta ste/ 'phags pa'i lam yan lag brgyad pa'i de bzhin gyis so/ /gshegs pa zhes bya ba ni des yang dag par rdzogs pa'i sangs rgyas nyid du gshegs pa ste/ de'i phyir de bzhin gshegs pa'o/ /yang na de bzhin zhes bya ba ni bskal pa dpag tu med pa grangs med par bsod nams dang ye shes kyi tshogs mtha' yas pa nye bar bsags pa des so/ /gshegs pa zhes bya ba ni mngon par rdzogs par sangs rgyas pa ste/ de'i phyir de bzhin gshegs pa'o/ /yang na de bzhin zhes bya ba ni byang chub tu thugs bskyed nas mgo dang gos la me 'bar ba lta bu'i brtson 'grus kyis sangs rgyas kyi yon tan ma lus pa nye bar sgrub pa na ji ltar yun ring po nas yang dag par zhugs pa 'phags pa byams pa la sogs pa byang chub sems dpa' dag rgyab tu mdzad pa de ltar mngon par brtson pa'o/ /gshegs pa zhes bya ba ni dang por kho nar mngon par rdzogs par sangs rgyas pa ste/ de'i phyir de bzhin gshegs pa'o/ /yang na de bzhin zhes bya ba ni bskal pa grangs med pa gsum du phyi dang nang gi mgo dang lag pa dang rkang pa dang mig dang yan lag dam pa dang / rus pa dang rkang dang lus yongs su gtong ba'i dka' ba mdzad pa 'bum phrag du ma dag mdzad pas/ ji ltar gzhan mu stegs byed nor lha dang / lha chen po dang / tshangs pa dang / ser skya dang / gzegs zan dang / rkang mig dang / 'phel ba dang / rgyal dpog gi bu la sogs pa mi 'ong ba de ltar ro/ /gshegs pa zhes bya ba ni mngon par rdzogs par sangs rgyas pa ste/ de'i phyir de bzhin gshegs pa'o/ /yang na de bzhin zhes bya ba ni ji ltar 'das pa'i de bzhin gshegs pa thams cad thugs brtse ba dang thugs rje dang byams pa'i thugs kyis 'gro ba mtha' dag la phan pa dang bde ba kho na'i phyir mngon par rdzogs par sangs rgyas pa de bzhin du'o/ / gshegs pa zhes bya ba ni bcom ldan 'das 'di yang mngon par rdzogs par sangs rgyas pa de de'i phyir de bzhin gshegs pa'o/ /yang na de bzhin zhes bya ba ni bsam gtan bzhi pa la brten nas skyes pa rdo rje lta bu'i ting nge 'dzin gyi stobs kyis srid pa'i rtse mo pa'i nyon mongs pa spong ba mdzad nas ji ltar phyi rol pa nyon mongs pa spong ba rab tu mi shes pa dag 'khor bar ldog par 'gyur ba de lta ma yin pa de bzhin du'o/ /gshegs pa zhes bya ba ni mya ngan las 'das pa'i grong khyer du gshegs pa ste/ de'i phyir de bzhin gshegs pa'o/ /yang na de bzhin zhes bya ba ni ji ltar de bzhin gshegs pa mar me mdzad la sogs pas sems can gyi khams skal ba dang ldan pa mtha' yas pa dag mya ngan las bzla bar mdzad nas mya ngan las 'das pa de bzhin du'o/ /gshegs pa zhes bya ba ni bcom ldan 'das 'di yang mya ngan las 'das par gyur pa ste/ de'i phyir de bzhin gshegs pa'o/ /yang na de bzhin zhes bya ba ni las kyi sgrib pa dang / nyon mongs pa'i sgrib pa dang / shes bya'i sgrib pa spong bar mdzad nas/ ji ltar gzhan mu stegs byed dag gis 'gro bar mi nus pa de ltar ro/ /gshegs pa zhes bya ba ni/ mya ngan las 'das par gyur pa ste/ de'i phyir de bzhin gshegs pa'o/ /yang na de bzhin zhes bya ba na las kyi sgrib pa dang / nyon mongs pa'i sgrib pa dang / shes bya'i sgrib pa spong bar mdzad nas/ ji ltar yang las dang nyon mongs pa'i dbang gis mi skye zhing / shes bya la ye shes thogs pa mi mnga' bas de ltar ro/ /gshegs zhes bya ba ni mya ngan las 'das par gyur pa ste/ de'i phyir de bzhin gshegs pa'o/ /yang na de bzhin zhes bya ba ni las dang nyon mongs pa dang shes bya'i sgrib pa spong bar mdzad cing / rnam par rtog pa dang spros pa thams cad kyang spong bar mdzad nas/ ji ltar yang las dang nyon mongs pa dang shes bya'i sgrib pa mi skye zhing rnam par rtog pa dang spros pa mi 'byung ba de ltar ro/ /gshegs pa zhes bya ba ni mya ngan las 'das par gyur pa ste/ de'i phyir de bzhin gshegs pa'o/ /yang na de bzhin zhes bya ba ni de bzhin nyid do/ /gshegs pa zhes bya ba ni thob pa med par thob pa ste/ de'i phyir de bzhin gshegs pa'o/ /yang na de bzhin zhes bya ba ni de bzhin nyid do/ /gshegs pa zhes bya ba ni rtogs pa ste/ de'i phyir de bzhin gshegs pa'o/ /yang na de bzhin zhes bya ba ni de bzhin nyid do/ /gshegs pa zhes bya ba ni gsungs pa ste/ de'i phyir de bzhin gshegs pa ste/ dper na sa'i steng na sgrogs pas sa steng sgrogs zhes bya ba dang 'dra'o/ /yang na de bzhin zhes bya ba ni 'jig rten pa dang 'jig rten las 'das pa'i chos thams cad dang kun rdzob dang don dam pa'i bden pa gnyis thugs su chud pas dmigs pa dang dmigs su med pa'i mtshan nyid ji lta ba bzhin du'o/ /gshegs pa zhes bya ba ni gsungs pa ste/ de'i phyir de bzhin gshegs pa'o/ /yang na de bzhin zhes bya ba ni ngar 'dzin pa dang / bdag gir 'dzin pa dang / sgrib pa dang rnam par rtog pa dang / spros pa thams cad kyi rgyu las byung ba 'khor ba'i sdug bsngal gyi dra ba thams cad drungs dbyung bar mdzad de/ yon tan rin po che mi zad pa'i gter bla na med pa bsam gyis mi khyab pa rmad du byung ba ma lus pa nye bar sgrub pa mdzad nas/ ji ltar bcom ldan 'das de 'khor ba ji srid pa'i bar du 'jig rten gyi khams skal ba dang ldan pa rab 'byam ma lus pa dag tu rnam par rtog pa'i rtsol ba mi mnga' bar sngon gyi smon lam gyi shugs kyis dga' ldan gyi gnas na bzhugs pa dang / 'pho ba dang / 'jug pa dang / lhums na zhugs pa dang / bltams pa dang / gzhon nu rol pa dang / btsun mo'i 'khor nye bar bsten pa dang / mngon par 'byung ba dang / dka' ba spyod pa dang / byang chub kyi snying por gshegs pa dang / bdud btul ba dang / mngon par byang chub pa dang / chos kyi 'khor lo bskor ba dang / yongs su mya ngan las 'das pa chen po la sogs pa'i mdzad pa gzhal du med pa la 'jug pa de ltar ro/ /gshegs pa zhes bya ba ni skye ba dang 'gag pa med pa'i chos kyi sku zhes bya ba'i mya ngan las 'das pa brnyes par gyur pa ste de'i phyir de bzhin gshegs pa'o/ /yang na bcom ldan 'das nyid kyis 'phags pa phyir mi ldog pa'i 'khor lo'i mdo las/ ji ltar byis pas rnam brtags pa/ /de ltar byang chub mi rnyed de/ /chos kun rnyed pa med pas na/ /de phyir de bzhin gshegs zhes bya/ /zhes nges pa'i tshig ji skad bka' stsal pa lta bu'o/ /nyen pa'i skye bo spobs pa bskyed pa'i phyir de bzhin gshegs pa'i sgra bye brag tu rtogs par bya ba byas te rgya cher ni mi dgos so/ /lhag pa'i bsam pa rnam par dag pa'i sa 'thob pa'i rgyu de gang zhig yin zhe na/ de'i phyir de bzhin gshegs pa'i tshul zhes bya ba smras so/ /de la de bzhin gshegs pa'i zhes bya ba ni de bzhin gshegs pas rab tu bstan pa 'am/ de bzhin gshegs pa yin pas na/ de bzhin gshegs pa'i zhes bya'o/ /tshul zhes bya ba ni de bzhin gshegs pas rab tu bstan pa'am/ /de bzhin gshegs pa'i gang yin pa de nyid tshul te/ gang gis chos thams cad dmigs su med par khrid par byed pa 'am/ gang gis gzhan gyi rgyud la don khrid par byed pa'o/ /yang na gang gis bsod nams dang ye shes kyi tshogs gzhal du med pa nye bar bsags pa'i 'jig rten 'khor ba'i btson ra nas bsgral te/ bsam pa thams cad yongs su rdzogs par byed pa'i yid bzhin gyi nor bu rin po che lta bur khrid par byed pa de ni tshul lo/ /de ci zhig gis rab tu bstan zhe na/ de'i phyir skye ba med pa la sogs pa'i tshig gis rab tu bstan pa zhes bya ba smras so/ /de la skye ba med pa la sogs pa'i tshig gis zhes bya ba ni skye ba med pa dang / 'gag pa med pa dang / chad pa med pa dang / rtag pa med pa dang / 'ong ba med pa dang / 'gro ba med pa dang / don tha dad pa ma yin pa dang / don gcig pa ma yin pa zhes ji skad sngar bstan pa'i tshig de dag gis so/ /rab tu bstan pa zhes bya ba la/ rab tu zhes bya ba ni sems can skal ba dang ldan pa'i phyir ram mchog tu'o/ /bstan pa zhes bya ba ni phye ba 'am bzhag pa'o/ /de bzhin gshegs pa'i tshul de skye ba med pa la sogs pa'i tshig gis rab tu bstan pa 'ba' zhig tu yang ma zad de/ 'di ltar de ni ma nor ba de bzhin nyid kyang yin te/ ma nor ba de bzhin nyid ces bya ba ni phyin ci ma log pa'i rnam pa nyid do/ /'di la kha cig 'di skad ces/ gal te de bzhin gshegs pa'i tshul skye ba med pa la sogs pa'i tshig gis rab tu bstan pa de la nor ba yang yod na ni de'i tshe de la 'khrul pa yod pas ma nor ba de bzhin nyid ces bya ba'i khyad par gzhan yang bstan par bya dgos pa zhig na/ khyad par gyi gzhi de bzhin gshegs pa'i tshul zhes bya ba skye ba med pa la sogs pa'i tshig gis rab tu bstan pa zhes bya ba'i khyad par gyis mtshon pa de la nor ba med pa sngon bzhin du ci'i phyir ma nor ba de bzhin nyid ces bya ba'i khyad par gzhan gyis mtshon par byed ces zer na/ de la 'di skad ces brjod par bya'o/ /kha cig gis 'di nor ba'i rnam par rtogs te/ dngos po rnams ji ltar byis pa'i rnam par shes pas gzung ba kun brtags pa'i bdag nyid kyis ni stong la/ 'phags pa'i ye shes kyi spyod yul yongs su grub pa'i bdag nyid kyis ni mi stong ngo zhes zer ba dag gis ni nor ba'i rnam par rtogs pa yin no/ /gal te de ci'i phyir nor ba'i rnam par rtogs pa yin zhe na/ 'di ltar bcom ldan 'das kyis 'phags pa lang kar gshegs pa'i mdo las/ ji ltar 'phags pas rnam brtags ltar/ /dngos po rnams kyi dngos nyid med/ /ji ltar byis pas rnam brtags ltar/ /dngos rnams yod pa kho na yin/ /zhes gsungs pa dang / 'phags pa shes rab kyi pha rol tu phyin pa las kyang / bcom ldan 'das la tshe dang ldan pa rab 'byor gyis zhus pa/ bcom ldan 'das kyis chos gang mngon par rdzogs par sangs rgyas pa'i chos de ci lags/ 'jig rten gyi tha snyad du mngon par rdzogs par sangs rgyas sam/ 'on te don dam par mngon par rdzogs par sangs rgyas/ bcom ldan 'das kyis bka' stsal pa/ rab 'byor de bzhin gshegs pas chos 'di mngon par rdzogs par sangs rgyas so zhes bya ba ni 'jig rten gyi tha snyad du brjod par zad kyi/ de la chos 'dis chos 'di mngon par rdzogs par sangs rgyas pa zhes bya ba 'ga' yang dmigs su med do/ /de ci'i phyir zhe na/ rab 'byor chos 'dis chos 'di mngon par rdzogs par sangs rgyas pa zhes bya ba de ni dmigs pa yin te/ gnyis las 'thob pa dang mngon par rtogs pa 'ga' yang med cing gnyis med pa'i phyir ro zhes gsungs pa dang / yang de nyid las rab 'byor de bzhin gshegs pas don dam par spyan lnga po de dag gis ma dmigs pa gang yin pa de la mi gti mug can sangs rgyas la skur pa 'debs pa dag dngos po dmigs par bya ba de gang yin snyam du sems so zhes gsungs pa'i phyir ro/ /nor ba dang ma nor bar rtogs pa ni 'grel pa byed pa nyid kyis mya ngan las 'das pa brtag pa'i skabs su byas pa ltar blta bar bya'o/ /da ni skabs nyid brjod par bya ste/ de bzhin gshegs pa'i tshul skye ba med pa la sogs pa'i tshig gis rab tu bstan pa ma nor ba de bzhin nyid thugs su chud nas zhes bya ba ni byang chub sems dpa'i sa dang po rab tu dga' ba brnyes nas zhes bya ba'i tha tshig ste/ de ltar yang 'phags pa lang kar gshegs pa'i mdo las/ bde gshegs mya ngan 'das 'og tu/ /tshul rnams 'dzin par 'gyur ba de/ /dus dag 'das nas 'byung ba ni/ /blo gros chen po khyod shes byos/ /lho phyogs b+he ta'i yul du ni/ /dge slong dpal ldan cher grags pa/ /de ming klu zhes bod pa ste/ /yod dang med pa'i phyogs 'jig pa/ /nga yi theg pa 'jig rten du/ /bla med theg pa rab bshad nas/ /rab tu dga' ba'i sa bsgrubs te/ /bde ba can du de 'gro'o/ /zhes ji skad gsungs pa dang / /slob dpon gyis shes rab kyi pha rol tu phyin pa klog pa na byang chub sems dpa'i sa dang po rab tu dga' ba brnyes so zhes grags pa las shes par bya'o/ /de la thugs su chud nas zhes bya ba ni mngon par rtogs nas te/ byang chub sems dpa'i sa dang po rab tu dga' ba la gnas par gyur nas zhes bya ba'i tha tshig go/ /de ltar yang 'phags pa byang chub sems dpa' sa bcu'i mdo las/ gnas gang yod pa dang / gang gi phyir dang / gzhi gang yin pa dang / ji 'dra ba'i sems skye bas sa dang po la gnas par gyur pa de ni gnas pa yin te/ de la re zhig gnas gang yod na sems de skye ba de ni kye rgyal ba'i sras dag /de la sems can dge ba'i rtsa ba shin tu bsags pa/ tshogs shin tu bsags pa/ spyad pa shin tu spyad pa/ sangs rgyas byung ba la shin tu bsnyen bkur byas pa/ chos dkar po shin tu bsdus pa/ dge ba'i bshes gnyen gyis shin tu bzung ba/ bsam pa shin tu rnam par dag pa/ lhag pa'i bsam pa rgya chen po dang ldan pa/ mos pa rgya chen po dang ldan pa/ snying brtse ba dang snying rje mngon du gyur pa zhes gsungs pa yin no/ /gang gi phyir sems de skye ba de ni sangs rgyas kyi ye shes la mngon par 'dod par bya ba'i phyir dang / stobs bcu'i stobs thob par bya ba'i phyir dang / mi 'jigs pa chen po thob par bya ba'i phyir dang / sangs rgyas kyi chos mnyam pa nyid thob par bya ba'i phyir dang / 'gro ba thams cad yongs su bskyab par bya ba'i phyir dang / snying brtse ba dang / snying rje chen po rnam par dag par bya ba'i phyir dang / phyogs bcu ma lus par shes pa thob par bya ba'i phyir dang / sangs rgyas kyi zhing thams cad thogs pa med par yongs su sbyong bar bya ba'i phyir dang / dus gsum skad cig gcig gis khong du chud par bya ba'i phyir dang / chos kyi 'khor lo chen po rab tu bskor ba la 'jigs pa med par bya ba'i phyir byang chub sems dpa' rnams kyi sems de skye bar 'gyur te/ zhes gsungs pa yin no/ /gzhi gang las sems de skye bar 'gyur ba de ni snying rje chen po sngon du 'gro ba shes rab dang / ye shes kyi dbang du gyur pa thabs mkhas pas yongs su bzung ba/ bsam pa dang lhag pa'i bsam pas rab tu bstan pa/ de bzhin gshegs pa'i stobs dpag tu med pa dang ldan pa/ snying stobs kyi stobs dang / blo'i stobs kyis shin tu rnam par phye ba rnam par 'byed pa dang ldan pa/ rang byung gi ye shes dang mthun pa/ sangs rgyas kyi chos thams cad la shes rab dang ye shes kyi gdams ngag yang dag par tshol ba/ chos kyi dbyings kyis klas pa dang ldan pa/ nam mkha'i khams ltar gnas shing phyi ma'i mtha'i mur thug pa las sems de skye bar 'gyur te zhes gsungs pa yin no/ /ji 'dra ba'i sems de skye bar 'gyur ba de ni sems skye ba de skyes ma thag tu byang chub sems dpa' byis pa so so skye bo'i sa las shin tu 'das pa yin/ byang chub sems dpa'i skyon med par zhugs pa yin/ de bzhin gshegs pa'i rigs su skyes pa yin/ man ngag brjod pas kha na ma tho ba med pa yin/ 'jig rten gyi 'gro ba thams cad las phyir log pa yin/ 'jig rten las 'das pa'i 'gro bar zhugs pa yin/ byang chub sems dpa'i chos nyid la gnas pa yin/ byang chub sems dpa'i gnas la rab tu gnas pa yin/ dus gsum mnyam pa nyid du rtogs pa yin/ de bzhin gshegs pa'i rigs su nges shing rdzogs pa'i byang chub la gzhol ba yin te/ kye rgyal ba'i sras dag chos 'di lta bu la gnas pa'i byang chub sems dpa' ni byang chub sems dpa'i sa rab tu dga' ba la mi g.yo ba'i tshul gyis gnas pa yin no zhes gsungs pa yin no/ /slob dpon gyi zhal snga nas chos de lta bu la gnas shing byang chub sems dpa'i sa rab tu dga' ba la mi g.yo ba'i tshul gyis rab tu gnas par gyur pa ni de bzhin gshegs pa'i tshul skye ba med pa la sogs pa'i tshig gis rab tu bstan pa/ ma nor ba de bzhin nyid thugs su chud nas zhes bya bas bstan pa yin no/ /de ni slob dpon gyi zhal snga nas kyis rgyu bstan pa yin no// //bam po gsum pa/ de ltar slob dpon gyi zhal snga nas/ sngon mos pas spyod pa'i sa la gnas pa na/ lhag pa'i bsam pa rnam par dag pa'i sa 'thob pa'i rgyu de lta bu thugs su chud pas/ 'bras bu rang gi don gyi mtshan nyid ci zhig brnyes she na/ de'i phyir dgyes pa'i shugs drag po yang dag par skyes pas ji ltar thugs su chud pa'i tshul gyis bcom ldan 'das la mngon par bstod de/ bstan bcos mdzad par bzhed nas zhes bya ba smras so/ /de la dgyes pa'i shugs drag po yang dag par skyes pas zhes bya ba ni 'bras bu rang gi don gyi mtshan nyid brnyes pa dngos bstan la/ ji ltar thugs su chud pa'i tshul gyis bcom ldan 'das la mngon par bstod de zhes bya bas ni bdag nyid kyi sangs rgyas kyi chos yongs su smin par bya ba'i phyir ji ltar thugs su chud pa'i tshul gyis bcom ldan 'das la mngon par bstod par mdzad nas/ 'bras bu rang gi don gyi mtshan nyid de brnyes pa bye brag tu bstan to/ /bstan bcos mdzad par bzhed nas zhes bya ba ni phyi rol gyi sems can yongs su smin par bya ba'i phyir bstan bcos mdzad par bzhed pas/ 'bras bu rang gi don gyi mtshan nyid de brnyes pa bye brag tu bstan to/ /de la dgyes pa'i shugs drag po yang dag par skyes pas zhes bya ba ni byang chub sems dpa'i sa dang po rab tu dga' ba brnyes pa zhes bya ba'i tha tshig go/ /de la dgyes pa'i shugs zhes bya ba ni mchog tu dga' ba mang bas rab tu dga' ba dang / dmigs pas rab tu dga' ba'i shugs so/ /drag po zhes bya ba ni chen po'o/ /yang dag par skyes pas zhes bya ba ni phyis kyang 'bral bar mi 'gyur ba skyes pa'o/ /de ltar na slob dpon gang la byang chub sems dpa'i sa dang po rab tu dga' ba brnyes pas dgyes pa'i shugs drag po yang dag par brnyes pa mnga' ba de ni dgyes pa'i shugs drag po yang dag par skyes pa ste des so/ /de ltar yang 'phags pa byang chub sems dpa' sa bcu'i mdo las/ mchog tu dga' ba mang bas rab tu dga' ba dang / dmigs pas rab tu dga' ba yin te/ de la re zhig mchog tu dga' ba mang bas rab tu dga' ba ni/ kye rgyal ba'i sras dag de la byang chub sems dpa'i sa rab tu dga' ba la gnas pa'i byang chub sems dpa' ni mchog tu dga' ba mang ba yin te/ dang ba mang ba yin/ dga' ba mang ba yin/ rangs pa mang ba yin/ mgu ba mang ba yin/ dga' rlabs mang ba yin/ spros pa mang ba yin/ mi 'khrug pa mang ba yin/ rnam par 'tshe ba med pa mang ba yin/ khro ba med pa mang ba yin no zhes gsungs pa yin no/ /dmigs pas rab tu dga' ba ni rnam pa gnyis te/ ma 'ongs pa na thob par bya ba dang / da ltar byung ba na thob pa'i dmigs pas rab tu dga' ba'o/ /de la ma 'ongs pa na thob par bya ba'i dmigs pas rab tu dga' ba ni/ kye rgyal ba'i sras dag de ltar byang chub sems dpa'i sa rab tu dga' ba la gnas pa'i byang chub sems dpa' ni sangs rgyas bcom ldan 'das rnams dang / sangs rgyas kyi chos rnams dang / byang chub sems dpa' rnams dang / byang chub sems dpa'i spyod pa rnams dang / pha rol tu phyin pa rnam par dag pa dang / byang chub sems dpa'i sa'i khyad par dang / byang chub sems dpa'i mi 'phrogs pa nyid dang / de bzhin gshegs pa'i gdams ngag dang / rjes su bstan pa dang / sems can gyi don yang dag par thob par byed pa dang / de bzhin gshegs pa'i ye shes la 'jug pa'i sbyor ba rjes su dran zhing rab tu dga' ba yin no zhes gsungs pa yin no/ /da ltar byung ba na thob pa'i dmigs pas rab tu dga' ba ni phyir zhing mchog tu dga' ba dang ldan pa yin te/ bdag ni 'gro ba thams cad kyi yul las phyir log go/ /bdag ni sangs rgyas dang nye ba la zhugs so/ /bdag ni byis pa so so'i skye bo'i sa las ring du gyur to/ /bdag ni ye shes kyi sa dang nye bar gyur to/ /bdag ni ngan song ngan 'gro log par ltung ba thams cad kyi rgyun chad pa'o/ /bdag ni sems can thams cad kyi ston par gyur to/ /bdag ni de bzhin gshegs pa rnams mthong ba dang / nye bar gyur to/ /bdag ni sangs rgyas kyi yul la yang dag par byung ngo / /bdag ni byang chub sems dpa' thams cad kyi mnyam pa nyid dang ldan par gyur to/ /bdag ni 'jigs pa dang / dngang ba dang / bag tsha ba dang bral lo zhes mchog tu dga' ba skyed do zhes gsungs pa yin no/ /ji ltar thugs su chud pa'i tshul gyis bcom ldan 'das la mngon par bstod de zhes bya ba ni de ltar dgyes pa'i shugs drag po yang dag par skyes pas bdag nyid kyi sangs rgyas kyi chos yongs su smin par bya ba'i phyir/ ji ltar thugs su chud pa'i tshul gyis bcom ldan 'das la mngon par bstod par mdzad do zhes bya bar sbyar ro/ /de la ji ltar thugs su chud pa'i tshul gyis zhes bya ba ni de bzhin gshegs pa'i tshul gang kho na thugs su chud pa de kho na dang / ji ltar thugs su chud pa de kho nas te skye ba med pa la sogs pa'i tshig gis rab tu bstan pa/ ma nor ba'i de bzhin nyid thugs su chud pa'i tshul gyis so/ / bcom ldan 'das la mngon par bstod de zhes bya ba ni/ gang gis rten cing 'brel par 'byung / /'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ /spros pa nyer zhi zhi bstan pa/ /rdzogs pa'i sangs rgyas smra rnams kyi/ / dam pa de la phyag 'tshal lo/ /zhes 'og nas 'byung ba'i tshigs su bcad pa gnyis po de dag gis mngon par bstod de'o/ /ci'i phyir bcom ldan 'das la mngon par bstod pa mdzad ce na/ de'i phyir bstan bcos mdzad par bzhed nas zhes bya ba smras te/ 'dis ni phyi rol gyi sems can yongs su smin par bya ba'i phyir bstan bcos mdzad par bzhed do zhes bya bar sbyar ro/ /de la bstan bcos zhes bya ba'i tshig gi don ni snga ma bzhin no/ /mdzad par bzhed nas zhes bya ba ni phrin las su brtsams par bzhed nas so/ /bstan bcos mdzad par bzhed pa ci'i phyir dang por bcom ldan 'das la mngon par bstod par mdzad ce na/ 'di ltar phyi rol gyi sems can yongs su smin par bya ba'i phyir bstan bcos mdzad par bzhed pa na/ bdag nyid kyi sangs rgyas kyi chos yongs su smin par bya ba'i phyir dang por lha yid du 'ong ba la mngon par bstod cing phyag 'tshal na/ bdag nyid kyi sangs rgyas kyi chos yongs su smin pas brtsams pa de 'grub cing phyi rol gyi sems can yongs su smin par 'gyur ba'i phyir ro/ /de ltar slob dpon gyi zhal snga nas kyis byang chub sems dpa'i sa dang po rab tu dga' ba brnyes shing / bdag nyid kyi sangs rgyas kyi chos yongs su smin par bya ba dang / phyi rol gyi sems can yongs su smin par bya ba'i thabs dang ldan par gyur pa ni 'bras bu rang gi don gyi mtshan nyid yin no/ /de ni slob dpon gyi zhal snga nas kyi 'bras bu rang gi don gyi mtshan nyid bstan pa yin no/ /de ltar 'bras bu rang gi don gyi mtshan nyid byang chub sems dpa'i sa dang po rab tu dga' ba brnyes shing / bdag nyid kyi sangs rgyas kyi chos yongs su smin par bya ba dang / phyi rol gyi sems can yongs su smin par bya ba'i thabs dang ldan par gyur nas/ 'bras bu gzhan gyi don gyi mtshan nyid ci zhig mdzad ce na/ de'i phyir thugs rje nyid kyi chus brlan pa'i thugs mnga' bas skye bo rjes su dpag pa gtsor 'dzin cing khong du chud par 'dod pas rtogs par bzhed nas zhes bya ba smras so/ /de la thugs rje nyid kyi chus brlan pa'i thugs mnga' bas zhes bya bas ni 'bras bu gzhan gyi don gyi mtshan nyid bstan bcos mdzad pa'i rgyu bstan la/ skye bo rjes su dpag pa gtsor 'dzin cing khong du chud par 'dod pas zhes bya bas ni 'bras bu gzhan gyi don gyi mtshan nyid bstan bcos mdzad pa de gang la phan gdags pa'i phyir mdzad pa'i yul bstan to/ /rtogs par bzhed nas zhes bya bas ni 'bras bu gzhan gyi don gyi mtshan nyid bstan bcos mdzad pa dngos bstan to/ /de la ci'i phyir bstan bcos mdzad ce na/ de'i phyir thugs rje nyid kyi chus brlan pa'i thugs mnga' bas zhes bya ba smras te/ slob dpon gyi zhal snga nas thugs rje nyid kyi chus brlan pa'i thugs mnga' bas skye bo rjes su dpag pa gtsor 'dzin cing khong du chud par 'dod pas rtogs par bzhed nas bstan bcos mdzad kyi/ zang zing dang bcas pa'i sems kyis rnyed pa dang bkur sti'i phyir ni ma yin no zhes bya bar sbyar ro/ /de la thugs rje nyid ces bya ba la thugs rje'i dngos po ni thugs rje nyid do/ /thugs rje nyid kyi chu zhes bya ba ni thugs rje nyid chu dang 'dra bas thugs rje nyid kyi chu ste des so/ /brlan pa zhes bya ba ni thugs rje nyid kyi chus gsher ba dang bangs pa dang khyad par gyur pa'o/ /thugs mnga' bas zhes bya ba ni slob dpon gang la thugs rje nyid kyi chus brlan pa'i thugs mnga' ba de ni thugs rje nyid kyi chus brlan pa'i thugs mnga' ba ste nges so/ /gang la phan gdags pa'i phyir bstan bcos brtsam pa mdzad ce na/ de'i phyir skye bo rjes su dpag pa gtsor 'dzin cing khong du chud par 'dod pas zhes bya ba smras te/ skye bo rjes su dpag pa gtsor 'dzin cing khong du chud par 'dod pas rtogs par bya zhing de la phan gdags pa'i phyir bstan bcos brtsams so zhes bya bar sbyar ro/ /de la skye bo rjes su dpag pa gtsor 'dzin cing khong du chud par 'dod pas zhes bya ba la skye bo zhes bya ba ni las dang nyon mongs pa dag gis bskyed par bya ba yin pas skye bo'o/ /rjes su dpag pa gtsor 'dzin cing zhes bya ba ni rjes su dpag pa la mos shing zhes bya ba'i tha tshig go/ /khong du chud par 'dod pas zhes bya ba ni dbu ma'i bstan bcos 'di khong du chud pa dang shes par 'dod pas so/ de ltar na skye bo gang la rjes su dpag pa la mos pa dang dbu ma'i bstan bcos 'di khong du chud pa dang shes par 'dod pa yod pa de ni skye bo rjes su dpag pa gtsor 'dzin cing khong du chud par 'dod pas te nges so/ /'di la gang zag bzhi yod de/ mgo smos pas go ba dang / rnam par spros nas go ba dang / bkri dgos pa dang / tshig lhur len pa'o/ /de la mgo smos pas go ba ni mgo smos shing glengs pa tsam gyis don go ba gang yin pa'o/ /rnam par spros nas go ba ni rnam par spros shing rgyas par bshad na don go ba gang yin pa'o/ /bkri dgos pa ni bsdu ba byas pa'i don gsal ba yang mi go zhing mtshon ma pas 'di ltar gyis shig ces byas kyang mi shes pa/ bya bas khrid pa na don go ba long ba dang 'on pa lta bu gang yin pa'o/ /tshig lhur len pa ni rnam pa thams cad du don mi go zhing tshig la 'chel pa gang yin pa ste/ 'phags pa lang kar gshegs pa'i mdo las/ /ji ltar byis pa mdzub mo'i rtser/ / 'dzin cing zla ba mi mthong ba/ /de bzhin yi ger bzhed pa yis/ /nga yi de bzhin nyid mi mthong / /zhes ji skad gsungs pa lta bu'o/ /de la mgo smos pas go ba dang / rnam par spros nas go ba dang / bkri dgos pa gsum ni thar pa'i skal ba yod pa yin no/ /tshig lhur len pa ni tshe de la thar pa'i skal ba med pas bcom ldan 'das kyang de la chos ston par mi mdzad de/ 'di ltar sangs rgyas bcom ldan 'das rnams ni chos ston pa 'bras bu med pa ma yin pa'i phyir ro/ /gang zag bzhi po de dag ni rta bzhi dang 'dra bar shes par bya ste/ 'di lta ste dper na/ rta la la kha lo'i bsam pa shes nas rgyug pa dang / rta la la lcag gi grib ma mthong nas rgyug pa dang / rta la la lcag gis btab nas rgyug pa dang / rta skyon chags pa la lcag gis gzhus kyang rgyug tu mi btub pa dang 'dra bar/ gang zag mgo smos pas go ba ni sangs rgyas bcom ldan 'das skyes bu gdul ba'i kha lo bsgyur ba/ bla na med pa chen pos nges par 'byung ba bstan pa thos nas srid pa gsum gyi btson ra nas nges par 'byung ste/ dper na 'phags pa kun shes kauN+Di n+ya lta bu ste/ 'dod pa'i ro myang ba rig pa'i phyir dang / 'dod pa'i nyes dmigs rig pa'i phyir ro/ /de la 'dod pa'i ro myang ba zhes bya ba ni/ 'dod pa rnams ni ro myang ba'i mnog chung ba ste/ ral gri'i so la sbrang rtsi'i thigs pas bskus pa la lces bldags pa lta bu yin no/ /'dod pa rnams kyi nyes dmigs zhes bya ba ni mdor bsdu na nyes pa mang ba ste/ 'di lta ste/ 'dod pa rnams ni sdug bsngal mang po dang ldan pa dang / 'khrug pa mang po dang ldan pa yin no/ /rgyas par ni 'dod pa rnams ni ro myang ba chung ba'i don gyis rus pa'i keng rus lta bu dang / 'dod pa rnams ni mang po dang thun mong ba'i don gyis sha'i kham tshad lta bu dang / 'dod pa rnams ni yun thung ba'i don gyis rtswa'i sgron ma lta bu dang / 'dod pa rnams ni yongs su gdung ba che ba'i don gyis me mdag gi rlubs lta bu dang / 'dod pa rnams ni yun mi ring bar gnas pa'i don gyis chung ba dang / 'dod pa rnams ni re zhig pa'i don gyis brnyan po lta bu dang / 'dod pa rnams ni bcag nas rtog pa'i don gyis shing ljon pa'i rtse mo'i 'bras bu lta bu dang / 'dod pa rnams ni lhag par gcod pa'i don gyis ral gri'i so lta bu dang / 'dod pa rnams ni nges par 'bigs pa'i don gyis mdung thung gi gsal shing lta bu dang / 'dod pa rnams ni 'jig pa dang bcas pa'i don gyis sbrul gyi mgo lta bu dang / 'dod pa rnams ni bsdu ba dang bsrung dka' ba'i don gyis 'bab chu'i ngogs lta bu dang / 'dod pa rnams ni byis pa 'drid pa'i don gyis sgyu ma lta bu dang / 'dod pa rnams ni mig gis mi rtsol ba'i don gyis mun pa lta bu dang / 'dod pa rnams ni dge ba'i bar chad byed pa'i don gyis lam 'gog pa lta bu dang / 'dod pa rnams ni dran pa nyams par byed pa'i don gyis rmongs par byed pa dang / 'dod pa rnams ni chags pa'i don gyis 'ching ba dang / 'dod pa rnams ni skrod pa'i don gyis slu bar byed pa dang / 'dod pa rnams ni yon tan 'phrog pa'i don gyis chom rkun pa lta bu dang / 'dod pa rnams ni 'thab krol bskyed pa'i don gyis sha khon can lta bu dang / 'dod pa rnams ni nyam thag par byed pa'i don gyis sdug bsngal ba yin no zhes bya ba 'di ni nyes dmigs yin no/ /nges par 'byung ba ni mi rtag pa dang sdug bsngal ba dang / stong pa dang bdag med par bstan pa ste/ de ltar yang kauN+Di n+ya mig mi rtag pa yin nam/ bcom ldan 'das lags so zhes ji skad gsungs pa lta bu'o/ /gang zag rnam par spros nas go ba ni mdor bstan pa dang / rgyas par bshad pa rnam par dbye ba las nyes dmigs mthong bas nges par 'byung ba bstan pa thos nas nges par 'byung ba ste/ ro myang ba chung bar rig pa'i phyir dang / nyes dmigs che bar rig pa'i phyir dang / nges par 'byung ba ma rig pa'i phyir ro/ /gang zag bkri dgos pa ni ro myang ba chung bar bstan pa dang / nyes dmigs che bar bstan pa dang / nges par 'byung ba bstan pa thos nas nges par 'byung ste/ 'dod pa rnams la lhag par chags pa'i phyir dang / ro myang ba chung bar ma rig pa'i phyir dang / nyes dmigs che bar ma rig pa'i phyir dang / nges par 'byung ba ma rig pa'i phyir ro/ /'dir skye bo rjes su dpag pa gtsor 'dzin cing khong du chud par 'dod pas zhes bya ba ni gang zag mgo smos pas go ba yin par shes par bya ste/ 'di ltar chos dang chos can bsdus pa'i phyogs tsam zhig thos pa kho nas rang nyid kyi phyogs kyi chos dang / dpe yang rjes su dpogs shing mngon du rtogs par nus pa dang / phyogs kyi chos thob pa tsam gyis rang nyid kyi phyogs dang dpe yang mngon du rtogs par nus pa dang dpe thos pa tsam gyis rang nyid kyis gtan tshigs dang dam bcas pa yang mngon du rtogs par nus pa'i phyir te/ des ni 'bras bu gzhan gyi don gyi mtshan nyid bstan bcos mdzad pa de gang la phan gdags pa'i phyir mdzad pa'i yul bstan pa yin no/ /rtogs par bzhed nas zhes bya ba ni slob dpon la skye bo rjes su dpag pa gtsor 'dzin cing khong du chud par 'dod pas dbu ma'i bstan bcos 'di 'dzin du gzhug par bzhed pa mnga' bas so/ /de ltar na slob dpon gang la skye bo rjes su dpag pa gtsor 'dzin cing khong du chud par 'dod pas dbu ma'i bstan bcos 'di 'dzin du gzhug par bzhed pa mnga' ba de ni skye bo rjes su dpag pa gtsor 'dzin cing khong du chud par 'dod pas rtogs par bzhed pa ste/ des/ gang gis rten cing 'brel par 'byung / /'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ /spros pa nyer zhi zhi bstan pa/ / rdzogs pa'i sangs rgyas smra rnams kyi/ /dam pa de la phyag 'tshal lo/ /zhes bcom ldan 'das la mngon par bstod de bstan bcos mdzad do/ /de ltar slob dpon gyi zhal snga nas kyis thugs rje nyid kyi chus brlan pa'i thugs mnga' bas skye bo rjes su dpag pa gtsor 'dzin cing khong du chud par 'dod pas rtogs par bzhed nas/ bcom ldan 'das la tshigs su bcad pa gnyis po de dag gis mngon par bstod de/ bdag las ma yin gzhan las min/ /gnyis las ma yin rgyu med min/ /dngos po gang dang gang na yang / /skyes pa nam yang yod ma yin/ /zhes bya ba la sogs pa rab tu byed pa'i skabs nyi shu bdun gyis bstan bcos rdzogs par mdzad pa ni 'bras bu gzhan gyi don gyi mtshan nyid yin no/ /de ni slob dpon gyi zhal snga nas kyis 'bras bu gzhan don gyi mtshan nyid bstan pa yin no/ /de ltar 'brel pa byed pas bstan bcos kyi 'brel pa gnyis po rigs pa'i 'brel pa dang / don gyi 'brel pa smras pa la/ rigs pa'i 'brel pa bla ma brgyud pa dag ji ltar 'byung ba'i rgyu bstan pa de'i don gyi 'brel pa yan lag gi don bstan pas bye brag tu bshad pa de dag ni bstan bcos kyi 'brel pa yin par shes par bya'o/ /gang gis rten cing 'brel bar 'byung / /'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ /spros pa nyer zhi zhi bstan pa/ /rdzogs pa'i sangs rgyas smra rnams kyi/ /dam pa de la phyag 'tshal lo/ /zhes bya ba ni gang gis rten cing 'brel bar 'byung ba bstan pa de la phyag 'tshal lo zhes bya bar sbyar ro/ /de la rten cing 'brel bar 'byung ba zhes bya ba ni khyad par gyi gzhi yin la/ 'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ /spros pa nyer zhi zhi zhes bya ba dag ni de'i khyad par yin te des ni las bstan to/ / gang gis bstan pa zhes bya ba ni khyad par gyi gzhi yin la/ rdzogs pa'i sangs rgyas smra rnams kyi/ /dam pa zhes bya ba dag ni de'i khyad par yin te/ des ni mdzad pa po bstan to/ /de ltar na mdzad pa po gang gis phrin las de lta bu bstan pa mdzad pa de la phyag 'tshal lo zhes bya bar don gyi 'brel pa sbyar bar bya'o/ /'dir su'i ming yang dmigs kyis ma bstan na/ 'og nas de la phyag 'tshal lo zhes 'byung ba de gang la phyag 'tshal lo zhes bya bar sbyar zhes 'dri ba la lan gdab pa'i phyir/ gang gis zhes bya ba'i sgra spyi yin yang / 'dis ni thun mong ma yin pa'i khyad par dang ldan pa'i rten cing 'brel par 'byung ba ston par mdzad pa nyid kyis brjod par bzhed pa'i phyir bcom ldan 'das kho na dang sbyar ro zhes bya ba smras te/ gang gis zhes bya ba'i sgra spyi yin yang skabs 'dir bcom ldan 'das kho na dang sbyar ro zhes bya bar blta'o/ /'dis ni zhes bya ba ni/ 'gag pa med pa skye med pa/ / zhes bya ba la sogs pa'i mtshan nyid ji skad bstan pa'i gzhung 'dis so/ /thun mong ma yin pa'i khyad par dang ldan pa'i rten cing 'brel bar 'byung ba zhes bya ba ni rten cing 'brel bar 'byung ba gang la mu stegs byed dang / nyan thos dang rang sangs rgyas thams cad la med cing de dag dang thun mong ma yin pa'i khyad par 'gag pa med pa dang / skye ba med pa la sogs pa yod pa de ni thun mong ma yin pa'i khyad par dang ldan pa'i rten cing 'brel par 'byung ba zhes bya'o/ /ston par mdzad pa nyid kyis zhes bya ba ni bcom ldan 'das thun mong ma yin pa'i khyad par dang ldan pa'i rten cing 'brel bar 'byung ba ston par mdzad pa'o/ /ston par mdzad pa'i dngos po ni ston par mdzad pa nyid de ston par mdzad pa nyid kyi sgo nas so/ /brjod par bzhed pa'i phyir zhes bya ba ni slob dpon bcom ldan 'das kyi yon tan brjod par bzhed pa'i phyir te/ bcom ldan 'das thun mong ma yin pa'i khyad par dang ldan pa'i rten cing 'brel bar 'byung ba ston par mdzad pa'i phrin las kyi sgo nas/ 'dir slob dpon bcom ldan 'das kyi yon tan brjod par bzhed pa'i phyir ro/ /bcom ldan 'das kho na dang sbyar ro zhes bya ba ni bcom ldan 'das shAkya thub pa kho na dang sbyar bar dgongs so zhes bya ba'i tha tshig go/ /'di skad bstan te/ gang gis zhes bya ba'i sgra dmigs kyis ma bstan par spyi yin du zin kyang / thun mong ma yin pa'i khyad par dang ldan pa'i rten cing 'brel bar 'byung ba ston par mdzad pa nyid kyis phrin las kyi sgo nas bcom ldan 'das nyid yin pas yang mngon la/ slob dpon yang de kho na thugs su chud pa yin pas lha gzhan la phyag mi 'tshal ba'i phyir/ bcom ldan 'das kho na dang sbyar bar nges so zhes bya ba'i tha tshig go/ /'dir gzhan dag na re/ gal te bstan bcos 'di gtso cher don rab tu 'byed pa yin la/ mdo ni don smos pa'i phyir mdo zhes bya ba yin na/ mdo'i gnas su/ gang gis rten cing 'brel bar 'byung ba bstan pa rdzogs pa'i sangs rgyas smra ba rnams kyi dam pa de la phyag 'tshal lo zhes bya ba de tsam zhig brjod pas chog na/ gang gis rten cing 'brel bar 'byung / /'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ /spros pa nyer zhi zhi bstan pa/ /rdzogs pa'i sangs rgyas smra rnams kyi/ /dam pa de la phyag 'tshal lo/ /zhes bya ba'i tshig mang po de snyed smras pas/ de'i phyir mdo byed pas nyes par smras pa nyid yin no zhes zer bas de'i lan du/ rten cing 'brel par 'byung zhes bya bas ni gang gi phyir khyad par bstan kyang khyad par gyi gzhi'i ming ma bstan na de mi rtogs pas de bstan pa yin no zhes bya ba smras so/ /de la gang gi phyir zhes bya ba'i sgra ni 'di ltar zhes bya ba'i don te/ 'di ltar khyad par bstan kyang khyad par gyi gzhi'i ming ma bstan na de mi rtogs pas/ de'i phyir rten cing 'brel bar 'byung ba zhes khyad par gyi gzhi'i ming dngos su bstan to zhes bya bar sbyar ro/ /khyad par bstan kyang zhes bya ba ni khyad par gyi gzhi rten cing 'brel par 'byung ba zhes bya ba gang gi khyad par/ /'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ /spros pa nyer zhi zhi zhes bya ba dag bstan kyang ngo / /khyad par gyi gzhi'i ming ma bstan na zhes bya ba ni 'gag pa med pa skye med pa zhes bya ba la sogs pa khyad par de dag gi gzhi rten cing 'brel bar 'byung zhes bya ba'i ming ma bstan na'o/ /de mi rtogs pas zhes bya ba ni/ 'gag pa med pa skye med pa/ /zhes bya ba la sogs pa khyad par de dag gang gi yin pa de mi rtogs pas so/ /de bstan pa yin no zhes bya ba ni rten cing 'brel bar 'byung zhes bya ba khyad par gyi gzhi de bstan pa yin no/ /ci ste gang gis rten cing 'brel par 'byung ba bstan pa rdzogs pa'i sangs rgyas smra ba rnams kyi/ dam pa de la phyag 'tshal lo/ /zhes bya ba de tsam zhig brjod du zin na yang / rten cing 'brel par 'byung ba de ni mtshan nyid ji lta bu yin pa mi rtogs pas de'i phyir mtshan nyid kyi gzhi dang mtshan nyid gnyi ga smos so/ /mdo dag kyang mtshan nyid kyi gzhi dang mtshan nyid dag smos par byed pas de'i phyir slob dpon gyis legs par gsungs pa yin no/ /rten cing 'brel par 'byung zhes bya ba la zhes bya ba'i skabs 'dir ni slob dpon rnams kyi blo tha dad pa'i bye brag ston to/ /kha cig na re/ rten cing zhes bya ba'i tshig gi phrad ni zlos pa'i don yin pa'i phyir dang / 'brel par zhes bya ba ni phrad pa'i don yin pa'i phyir dang / 'byung zhes bya ba'i sgra ni skye ba'i don yin pa'i phyir rten cing 'brel bar 'byung ba ste/ de dang de la rten cing phrad nas 'byung ba'o zhe'o zhes bya ba la/ kha cig na re zhes bya ba ni dbu ma pa'i grub pa'i mtha' smra ba kha cig na re/ rten cing zhes bya ba'i tshig gi phrad ni zlos pa'i don yin pa'i phyir dang zhes bya ba ni rgyu dang rkyen so sor nges pa de dang de la rten cing zhes bya ba'i tshig gi phrad de ni zlos pa'i don yin pa'i phyir rten cing zhes bya bar sbyar ro/ /zlos pa'i don yin pa'i phyir zhes bya ba ni rgyu dang rkyen so sor nges pa de dang de la rten cing zhes zlos pa'i phyir te/ dper na yul 'di na grong dang grong dag nyams dga'o zhes bya ba lta bu'o/ /'brel par zhes bya ba ni phrad pa'i don yin pa'i phyir dang zhes bya ba ni rgyu dang / rkyen so sor nges pa de dang de dag dang 'bras bu gang yin par phrad cing 'brel pa'i don yin pa'i phyir te/ dper na srang mda'i mthon dman phrad cing 'brel pa zhes bya ba lta bu'o/ /'byung zhes bya ba'i sgra ni skye ba'i don yin pa'i phyir zhes bya ba ni 'bras bu mtshan nyid 'byung zhing skye ba'i don yin pa'i phyir ro/ /rten cing 'brel bar 'byung ba ste zhes bya ba ni de ltar rgyu dang rkyen so sor nges pa de dang de dag la rten cing 'brel par 'byung ba'i phyir rten cing 'brel bar 'byung ba ste zhes bya ba'i tha tshig go/ /de dang de la rten cing phrad nas 'byung ba'o zhes bya ba ni tshig gi don snga ma dag gi mjug bsdu ba bstan te/ rgyu dang rkyen so sor nges pa de dang de la rten cing phrad nas 'bras bu 'byung ba'o zhes bya ba'i tha tshig go zhe'o zhes bya ba ni 'grel pa byed pa rang nyid ma yin pa dbu ma pa'i grub pa'i mtha' smra ba kha cig na re de skad zer ro zhes bya ba'i tha tshig go/ /gzhan dag na re so sor 'jig pa dang ldan pa rnams kyi 'byung ba ni rten cing 'brel par 'byung ba'o zhe'o zhes bya ba la/ gzhan dag na re zhes bya ba ni dbu ma pa'i grub pa'i mtha' smra ba gzhan dag na re'o/ /so sor 'jig pa dang ldan pa rnams kyi 'byung ba zhes bya ba ni rgyu dang rkyen so sor nges pa skad cig so so re re la 'jig pa dang ldan pa'i 'bras bu rnams kyi tshogs shing 'byung ba ste/ phrad nas 'byung ba zhes bya ba'i tha tshig go/ /rten cing 'brel par 'byung ba'o zhes bya bas ni tshig gi don snga ma'i mjug bsdu ba bstan te/ rgyu dang rkyen so sor nges pa skad cig so so re re la 'jig pa dang ldan pa'i 'bras bu rnams kyi tshogs shing 'byung ba gang yin pa de ni rten cing 'brel par 'byung ba'o zhes bya bar ston to zhe'o zhes bya ba ni/ 'grel pa byed pa rang nyid ma yin pa dbu ma pa'i grub pa'i mtha' smra ba gzhan dag de skad zer ro zhes bya ba'i tha tshig go/ /gzhan ma yin pa ni de yang mi rung ste/ mig dang gzugs rnams la brten nas mig gi rnam par shes pa 'byung ngo zhes gsungs pa 'di la don gnyi ga med pa'i phyir ro zhes bya ba la/ gzhan ma yin pa ni zhes bya ba ni gzhan ma yin pas rang nyid yin te/ 'grel pa byed pa nyid yin no/ /de'i phyir 'grel pa byed pa nyid ni dbu ma pa'i grub pa'i mtha' smra ba snga ma dag gnyis kyis smras pa de gnyi ga yang mi rung ste zhes zer bar sbyar ro/ /de yang mi rung ste zhes bya ba ni dbu ma pa'i grub pa'i mtha' smra ba snga ma gnyis kyis rnam par bshad pa de gnyi ga yang mi rung ste'o/ /mig dang gzugs la brten nas mig gi rnam par shes pa 'byung ngo zhes gsungs pa 'di la don gnyi ga med pa'i phyir ro zhes bya ba la ni/ de dang de la rten cing phrad nas 'byung ba'o zhes bya ba dang / so sor 'jig pa dang ldan pa rnams kyi 'byung ba zhes bya ba'i don de gnyi ga med pa'i phyir te/ de dang de la rten cing phrad nas 'byung ba zhes bya ba'i don de ji ltar med ce na/ de'i phyir lung las/ de ni mig dang gzugs la med/ /de gnyis bar na'ang yod ma yin/ /gang du de ni gnas 'gyur ba/ /de yod ma yin de med min/ /zhes gsungs pas/ lung des na mig gi rnam par shes pa ni mig la yang med/ gzugs la yang med/ gnyi ga'i bar na yang med de/ mig gi rnam par shes pa de gang du gnas par 'gyur ba de ni yod pa yang ma yin/ med pa yang ma yin pas de'i phyir mig gi rnam par shes pa 'byung ba ni med pa yin la/ mig gi rnam par shes pa bdag nyid med pa des de 'byung ba'i rgyu dang rkyen mig dang gzugs dang snang ba dang nam mkha' dang de dag 'byung ba'i yid la byed pa la sogs pa de dag de la ji ltar rten cing phrad par rung ste mi rung ngo / /gal te mig gi rnam par shes pa yod na ni de dag dang phrad par yang rung mod kyi/ yod na 'byung bar yang bya mi dgos pas de'i phyir mig gi rnam par shes pa med pa rkyen dang mi phrad pa'i lung des na de dang de la rten cing phrad nas 'byung ba zhes bya ba de med do/ /so sor 'jig pa dang ldan pa rnams kyi 'byung ba zhes bya ba'i don de ji ltar med ce na/ 'di ltar rgyu dang rkyen so sor nges pa skad cig so so re re la 'jig pa gang dag yin pa de dag ni 'byung ba'i tshe yongs su ma grub pa'i gnas skabs kho nar skad cig re re la 'gag cing med par 'gyur bas tshogs shing 'bras bu bskyed par 'gyur ba med pas 'bras bu 'byung ba yang med de/ 'bras bu yang 'byung ba'i tshe nyid na skad cig re re la 'jig par 'gyur ba'i so sor 'jig pa dang ldan pa rnams kyi 'byung ba zhes bya ba de yang med do/ /gal te de ltar don de gnyi ga med pas dbu ma pa'i grub pa'i mtha' smra ba de gnyis kyi gzhung lugs ma rung na/ 'o na 'dir rten cing 'brel par 'byung ba'i don gang yin zhe na/ de'i phyir 'di yod pas 'di 'byung la 'di skyes pa'i phyir 'di skye ba ste zhes bya ba rkyen 'di dang ldan pa nyid kyi don ni rten cing 'brel bar 'byung ba'i don to zhes zer ro zhes bya ba smras te/ 'dir 'grel pa byed pa nyid ni rten cing 'brel bar 'byung ba'i don rnam pa de lta bu yin no zhes zer ro zhes bya bar sbyar ro/ /de la 'di yod pas 'di 'byung la zhes bya ba ni phyi rol gyi sa bon dang / sa dang chu dang me dang rlung dang nam mkha' dang dus kyi khams zhes bya ba dag yod pas myu gu 'byung ba dang / nang gi las dang nyon mongs pa dang / khu chu dang / khrag dang / sa dang / chu dang / me dang / rlung dang / nam mkha' dang / rnam par shes pa zhes bya ba dag yod pas/ mer mer po dang / nur nur po dang / nar nar po dang / mkhrang gyur dang / rkang lag 'gyus pa dag 'byung ba'o/ /'di skyes pa'i phyir 'di skye ba ste zhes bya ba ni phyi rol gyi skye ba dang mi mthun pa'i rkyen med pas myu gu skyes pa'i phyir 'dab ma dang / sbu gu dang / sdong po dang / sbal mig dang / me tog dang / gra ma dang / sbun pa dang / srus dang / 'bras thug po che rnams skye ba dang / nang gi mi mthun pa'i rkyen med pas mer mer po dang / nur nur po dang / nar nar po dang / mkhrang gyur dang / rkang lag 'gyus pa rnams skyes pa'i phyir btsa' ba'i gnas skabs kyi lus skye ba'o/ /yang na 'di yod pas 'di 'byung ba zhes bya ba ni mig dang / rna ba dang / sna dang / lce dang / lus dang / yid kyi dbang po rnams dang / gzugs dang / sgra dang / dri dang / ro dang / reg bya dang / chos rnams yod pas 'bras bu mig dang / rna ba dang / sna dang / lce dang / lus dang / yid kyi rnam par shes pa dag 'byung ba'o/ /'di skye ba'i phyir 'di skye ba ste zhes bya ba ni mig gi rnam par shes pa la sogs pa skyes pa na de dag dang lhan cig 'byung ba/ tshor ba dang / sems pa dang / 'du shes dang / 'dun pa dang / reg pa la sogs pa sa mang po pa dag skye bar 'gyur ba'o/ /de bzhin du bum pa dang / snam bu la sogs pa dag la yang sbyar bar bya'o/ /rkyen 'di dang ldan pa nyid kyi don zhes bya ba la/ rkyen 'di dang ldan pa nyid ces bya ba ni rgyu dang rkyen la rag las pa'i skye ba nyid de/ 'di yod pas 'di 'byung la/ 'di skyes pa'i phyir 'di skye bas te zhes ji skad sngar bstan ma thag pa nyid yin no/ /rten cing 'brel bar 'byung ba'i don to zhes zer ro zhes bya ba ni 'di yod pas 'di 'byung la/ 'di skyes pa'i phyir 'di skye ba ste zhes bya ba rkyen 'di dang ldan pa nyid kyi don ni rten cing 'brel bar 'byung ba'i don to zhes 'grel pa byed pa nyid zer ro zhes pa'i tha tshig go/ /'dir kha cig na re/ gal te 'byung ba'i snga rol du 'bras bu rkyen dang phrad nas phyis 'byung na ni de'i phyir rten cing 'brel par 'byung zhes bya bar 'gyur ba zhig na ni/ 'byung ba'i snga rol du 'bras bu rkyen dang mi phrad de med pa'i phyir ro/ /de lta bas na rten cing 'brel bar 'byung ba'i sgra mi 'grub po/ /gal te rten cing 'brel par zhes bya ba dang / 'byung zhes bya ba gnyis dus gcig tu khas len pas nyes pa med do zhe na yang / rten cing 'brel par 'byung ba'i sgra la bya ba gnyis dus gcig na med do/ bar zhes brjod pa'i phyir dper na khrus byas te bza' zhes bya ba bzhin no/ /byed pa po med par yang gzhi med pa'i bya ba mi rung ste/ med pa'i phyir mo gsham gyi bu 'gro ba bzhin no zhes zer ro zhes bya ba ni 'di brda sprod pa dag sangs rgyas pa la rgol ba'i tshig yin no/ /de la 'dir zhes bya ba ni lung dang rigs pas rten cing 'brel bar 'byung ba'i don bsgrubs pa la phas kyi rgol ba thams cad kyi snying bskam par gyur pa'i skabs 'dir te/ 'di ltar rgyu med par smra ba rnams dang / rgyu mi mthun par smra ba thams cad kyi snying bskam par gyur pa'i phyir ro/ /kha cig na re zhes bya ba ni de dag nyid 'dir skabs med bzhin du brda sprod pa'i tham lag gi rjes su zhugs nas dgras rgol bar byed pa kha cig na re'o/ /gal te 'byung ba'i snga rol du zhes bya ba ni gal te 'bras bu 'byung ba'i dus kyi snga rol du ste/ ji srid du 'bras bu ma byung ba'i dus de'i tshe'o/ /'bras bu zhes bya ba ni myu gu zhes bya ba'am/ mig gi rnam par shes pa zhes bya ba'i 'bras bu'o/ /rkyen dang phrad nas zhes bya ba ni rkyen gyi gan du 'gro zhing rkyen dang phrad pa 'am/ rkyen rnyed nas so/ /phyis 'byung na ni zhes bya ba ni de'i 'og tu 'bras bu myu gu zhes bya ba 'am/ mig gi rnam par shes pa zhes bya ba de 'byung na ni'o/ /de'i phyir rten cing 'brel par 'byung ba zhes bya bar 'gyur ba zhig na zhes bya ba ni sangs rgyas pa rnams kyis rten cing 'brel bar 'byung ba zhes smrar rung ba zhig na'o/ /ci ste sangs rgyas pa rnams rten cing 'brel bar 'byung ba zhes bya bar 'grub par bya ba'i phyir rang gi lung bor te 'byung ba'i snga rol du 'bras bu rkyen dang phrad nas phyis 'byung ngo zhes zer na/ de'i phyir 'byung ba'i snga rol du 'bras bu rkyen dang mi phrad de zhes bya bar smras so/ /ci'i phyir 'byung ba'i snga rol du 'bras bu rkyen dang mi phrad ce na/ de'i phyir med pa'i phyi rol zhes bya ba smras te/ 'byung ba'i snga rol du 'bras bu rkyen dang phrad ces bya bar ni de'i tshe na 'bras bu bdag nyid ma byung zhing med pa'i phyir rkyen dang mi phrad de/ 'di ltar sangs rgyas pa rnams kyi lung las 'dus byas ni ma byung ba las 'byung ngo zhes zer ba'i phyir ro/ /de lta bas na rten cing 'brel par 'byung ba'i sgra mi 'grub po zhes bya ba ni ji skad bstan pa'i gtan tshigs des na/ sangs rgyas rnams kyi rten cing 'brel par 'byung ba zhes bya ba'i sgra de mi 'grub po/ /gal te rten cing 'brel bar zhes bya ba dang 'byung ba zhes bya ba gnyis dus gcig tu khas len pas nyes pa med do zhe na yang zhes bya ba ni brda sprod pa nyid kyis sangs rgyas pa'i bsam pa la brtags nas dogs pa bsu ba yin te/ gal te sangs rgyas pa dag dus gang gi tshe kho na na rten cing 'brel bar 'byung ba'i dus de kho na'i tshe na 'bras bu 'byung bar khas len pas de'i phyir 'bras bu med pa'i phyir rkyen dang mi phrad pa'i nyes pa sngar bstan pa gang yin pa de yang med la/ rten cing 'brel bar 'byung ba zhes bya ba'i sgra yang 'grub par 'gyur ro zhes zer na yang ngo / /gal te sangs rgyas pa dag de skad ces zer na yang / sangs rgyas pa dag nyid la 'bras bu 'byung ba gang yin pa de ji ltar med pa na dus gcig tu rten cing 'brel par 'byung ngam/ 'on te yod pa na rten cing 'brel par 'byung zhes dri bar bya'o/ /de skad dris pa na gal te sangs rgyas pa dag 'bras bu de snga na med pa na rten cing 'brel par 'byung ba de'i phyir rten cing 'brel par 'byung ba zhes bya'o zhes khas len na/ de'i lan du rten cing 'brel bar 'byung ba'i sgra la bya ba gnyis dus gcig na med de/ /par zhes brjod pa'i phyir dper na khrus byas te bza' zhes bya ba bzhin no zhes brjod par bya'o/ /'dir rten cing 'brel par 'byung ba'i sgra la zhes bya ba 'di ni chos can yin la/ bya ba gnyis dus gcig na med de zhes bya ba 'di ni bsgrub par bya ba chos yin/ par zhes brjod pa'i phyir zhes bya ba 'di ni sgrub pa'i chos yin/ dper na khrus byas te bza' zhes bya ba bzhin no zhes bya ba 'di ni dpe yin par sbyar ro/ /de la rten cing 'brel par 'byung ba'i sgra la zhes bya ba ni 'bras bu nus pa'i tshul gyis snga na med pa rten cing 'brel bar 'byung ba zhes bya ba'i sgra la'o/ /bya ba gnyis dus gcig na med de zhes bya ba ni rten cing 'brel pa zhes bya ba'i bya ba dang / 'byung zhes bya ba'i bya ba gnyis dus gcig na med pa ste/ rten cing 'brel par zhes bya ba'i bya ba ni snga la 'byung ba zhes bya ba'i bya ba ni 'phyi bas bya ba de gnyis dus gcig na med do/ /ci'i phyir med ce na/ par zhes brjod pa'i phyir te/ sangs rgyas pa'i gzhung las rten cing 'brel par zhes brjod pa'i phyir/ des na rten cing 'brel par zhes bya ba'i bya ba ni snga la 'byung zhes bya ba'i bya ba ni 'phyi ba'i phyir ro/ /de yang ji lta bu zhe na/ dper na khrus byas te bza' zhes bya ba bzhin te/ dper na khrus byas te zhes bya ba'i bya ba ni snga la bza' zhes bya ba'i bya ba ni 'phyi bas bya ba de gnyis dus gcig na med pa dang 'dra bar 'dir yang / par zhes brjod pa'i phyir rten cing 'brel par 'byung ba'i sgra la rten cing 'brel par zhes bya ba'i bya ba dang / 'byung zhes bya ba'i bya ba gnyis dus gcig na med pas de'i phyir 'bras bu med pa na dus gcig tu rten cing 'brel bar 'byung zhes bya bar mi rung ngo / /'on te yod pa na rten cing 'brel par 'byung ste/ 'bras bu nus pa'i tshul gyis snga na yod pa rgyu dang rkyen la rten cing 'brel par 'byung ngo zhes sangs rgyas pa dag zer na/ de'i lan du byed pa po med par yang gzhi med pa'i bya ba mi rung ste/ med pa'i phyir mo gsham gyi bu 'gro ba bzhin no zhes brjod par bya'o/ /'dir yang byed pa po med par yang zhes bya ba ni chos can yin la/ gzhi med pa'i bya ba mi rung ba ste zhes bya ba 'di ni bsgrub par bya ba'i chos yin/ med pa'i phyir zhes bya ba 'di ni sgrub pa'i chos yin/ mo gsham gyi bu 'gro ba bzhin no zhes bya ba 'di ni dpe yin par sbyar ro/ /de la byed pa po med par yang gzhi med pa'i bya ba mi rung ste zhes bya ba ni byed pa po yod na ni gzhi de la brten pa'i byed pas bya ba yang yod par rung ste/ dper na shing gcod par byed pa'i byed pa po'i mi yod na de la brten pa'i byed pa sta res bya ba shing bcad pa yang 'grub par rung ba bzhin du/ 'dir yang byed pa po'i dngos po nang gi byed pa po'i skyes bu zhig yod na ni de la brten pa byed pa rgyu rkyen gyi bya ba 'bras bu bskyed pa yang 'grub par rung ba zhig na/ sangs rgyas pa rnams kyi gzhung las byed pa po med par 'dod pas gzhi med pa'i byed pas bya ba mi rung ste/ dper na shing gcod par byed pa'i byed pa po med na gzhi med pas byed pa sta re yod kyang des bya ba shing bcad pa mi 'grub pa bzhin du 'dir yang byed pa po'i dngos po nang gi byed pa po'i skyes bu med na gzhi med pas byed pa rgyu rkyen yod kyang des bya ba 'bras bu bskyed par mi rung ngo / /de'i phyir gzhi med pa la 'bras bu 'byung ba'i bya ba mi rung ba 'di ni phyogs yin no/ /med pa'i phyir zhes bya ba ni phyogs kyi chos yin te/ ci'i phyir byed pa po med par yang gzhi med pa'i bya ba mi rung zhe na/ de'i phyir byed pa po'i dngos po nang gi byed pa po'i skyes bu med pa'i phyir de la brten pa'i byed pa rgyu rkyen gyi bya ba 'bras bu skyed pa mi rung ba'i phyir ro/ /de yang ji lta bu zhe na/ dper na mo gsham gyi bu 'gro ba bzhin te/ dper na mo gsham gyi bu gtan med pas de la brten pa'i byed pa rkang pas 'gro ba yang med pa dang 'dra bar 'dir yang byed pa po'i dngos po nang gi byed pa po'i skyes bu med pas gzhi med pa'i phyir byed pa rgyu rkyen gyi bya ba 'bras bu skyed pa mi rung ste/ de'i phyir 'bras bu nus pa'i tshul gyis yod pa na dus gcig tu rten cing 'brel par 'byung zhes bya bar yang mi rung ngo zhes zer ro zhes bya ba'i brda sprod pa pa dag sangs rgyas pa la rgol ba'i tshig de skad ces zer ba yin no/ /de ni bzang po ma yin te/ 'bras bu med pa 'byung ba'i mtshan nyid kyi bya ba khas len na ni lam nges pa'i phyir ro/ /yod pa las 'byung ba'i phyogs la yang gtan tshigs kyi don yod pa ma grub pa'i phyir ro zhes bya ba ni brda sprod pa pas med pa las byung ba dgag pa dang / yod pa las 'byung ba dgag pa'i sgrub pa rnam pa gnyis smras pa gang yin pa'i phyogs snga ma rnam pa gnyis rnam par brtags pa de'i lan du 'grel pa byed pas smras pa yin no/ /de ni bzang po ma yin te zhes bya ba ni brda sprod pa pas med pa las 'byung ba dgag pa dang / yod pa las 'byung ba dgag pa sgrub pa rnam pa gnyis smras pa gang yin pa de ni bzang po ma yin te/ skyon chags pa yin no zhes bya ba'i tha tshig go/ /ji ltar bzang po ma yin zhe na/ de la re zhig med pa las 'byung ba yin pa/ dgag pa'i phyogs la ni 'bras bu med pa 'byung ba'i mtshan nyid kyi bya ba khas len na ni rang la ma nges pa'i phyir ro zhes bya ba smras te/ 'bras bu med pa 'byung ba'i mtshan nyid kyi bya ba khas len na ni zhes bya ba ni 'bras bu de snga na rten cing 'brel par 'byung ba'i mtshan nyid kyi bya ba khas len na ni'o/ /rang la ma nges pa'i phyir ro zhes bya ba ni sngar brda sprod pa pa na re/ rten cing 'brel par 'byung ba'i sgra la bya ba gnyis dus gcig na med de/ par zhes brjod pa'i phyir/ dper na khrus byas te bza' zhes bya ba bzhin no zhes sgrub pa gang yin pa de rang la ma nges pa'i phyir bzang po ma yin te/ 'di ltar khyod kyi grub pa'i mtha' nyid las/ par zhes brjod pa'i phyir te/ des dper na kha gdangs te nyal zhes bya ba dang / lam khyab par byas te 'gro zhes bya ba lta bu'i bya ba gnyis dus gcig na yod par khyod rang gi gzhung las 'byung bas/ de'i phyir khyod na re/ rten cing 'brel par 'byung ba'i sgra la bya ba gnyis dus gcig na med de/ par zhes brjod pa'i phyir/ dper na khrus byas te/ bza' zhes bya ba bzhin no zhes zer ba'i gtan tshigs de khyod rang la ma grub pa'i phyir bzang po ma yin no/ /yod pa las 'byung ba dgag pa'i phyogs la ni yod pa las 'byung ba'i phyogs la yang gtan tshigs kyi don yod pa ma grub pa'i phyir ro zhes bya ba smras te/ yod pa las 'byung ba'i phyogs la yang zhes bya ba ni 'bras bu nus pa'i tshul gyis snga na yod pa las phyis rgyu rkyen gyi byed pas gsal bar bya ste/ 'byung zhes sgrub pa gang yin pa'i phyogs de la yang ngo / /gtan tshigs kyi don yod pa ma grub pa'i phyir ro zhes bya ba ni sngar brda sprod pa pa na re/ byed pa po med par yang gzhi med pa'i bya ba mi rung ste/ med pa'i phyir mo gsham gyi bu 'gro ba bzhin no zhes zer ba'i gtan tshigs de'i don byed pa po yod par sgrub pa de yod par ma grub pa'i phyir bzang po ma yin te/ 'di ltar sangs rgyas pa'i gzhung las kyang byed pa po med par dngos po rnams rgyu rkyen las 'byung bar 'dod la/ grangs can la sogs pa'i gzhung las kyang nang gi bde ba dang sdug bsngal las gzhan pa la byed pa po med par 'dod pas de'i phyir khyod na re/ byed pa po med par yang gzhi med pa'i bya ba mi rung ste/ med pa'i phyir mo gsham gyi bu 'gro ba bzhin no zhes zer ba'i gtan tshigs de'i don ni byed pa po yod par sgrub pa ma yin na gtan tshigs kyi don byed pa po de yod par ma grub pa'i phyir bzang po ma yin no/ / //bam po bzhi pa/ da ni rang la ma nges pa'i phyir ro zhes bya ba dang / gtan tshigs kyi don yod pa ma grub pa'i phyir ro zhes bya ba gnyis kyi skyon brjod pa go rims bzhin du bshad par bya ste/ de la dang por rang la ma nges pa'i phyir ro zhes bya ba'i skyon brjod pa'i phyir/ byed pa po gcig dang ldan pa'i bya ba gnyis dus gcig na yang yod de/ par zhes brjod pa'i phyir dper na kha gdangs te nyal zhes bya ba dang / lam khyab par byas te 'gro zhes bya ba bzhin te/ ma nges pa'i phyir ro zhes bya ba smras te/ des ni sngar brda sprod pa pa na re/ rten cing 'brel par 'byung ba'i sgra la bya ba gnyis dus gcig na med de/ par zhes brjod pa'i phyir dper na khrus byas te bza' zhes bya ba bzhin no zhes zer ba'i dpe de rang la ma nges pa'i phyir dpes mtshon pa'i don yang mi 'grub par ston to/ /'dir yang byed pa po gcig dang ldan pa'i zhes bya ba 'di ni chos can yin la/ bya ba gnyis dus gcig na yang yod de zhes bya ba 'di ni bsgrub par bya ba'i chos yin te/ par zhes brjod pa'i phyir zhes bya ba 'di ni sgrub pa'i chos yin/ dper na kha gdangs te nyal zhes bya ba dang / lam khyab par byas te 'gro zhes bya ba bzhin te zhes bya ba 'di ni dpe yin par sbyar ro/ /ma nges pa'i phyir ro zhes bya bas ni dpe rang la ma nges pa'i gtan tshigs bstan to/ /de la byed pa po gcig dang ldan pa'i bya ba gnyis dus gcig na yang yod de zhes bya ba ni sngar brda sprod pa pa na re bya ba gnyis dus gcig na med de/ par zhes brjod pa'i phyir dper na khrus byas te bza' zhes bya ba bzhin no zhes zer ba'i dam bcas pa dang / gtan tshigs dang dpe de ma nges par ston pa yin te/ byed pa po gcig dang ldan pa'i bya ba gnyis dus gcig na yang yod pas/ de'i phyir rten cing 'brel bar 'byung ba'i sgra la yang bya ba gnyis dus gcig na yod par ston to/ /ci'i phyir yod ce na/ par zhes brjod pa'i phyir te/ sangs rgyas pa'i gzhung las rten cing 'brel par zhes brjod pa'i phyir/ des na rten cing 'brel par zhes bya ba'i bya ba ni snga la 'byung zhes bya ba'i bya ba ni 'phyi ba ma yin te/ par zhes brjod pa'i phyir byed pa po gcig dang ldan pa'i bya ba gnyis dus gcig na yang yod de/ de yang ji lta bu zhe na/ dper na kha gdangs te nyal zhes bya ba dang / lam khyab par byas te 'gro zhes bya ba bzhin te/ dper na lhas byin dus gang gi tshe kho na na kha gdangs pa'i dus de kho na'i tshe na nyal lo zhes bya ba la yang byed pa po lhas byin gcig pu dang ldan pa'i bya ba kha gdangs te zhes bya ba dang nyal zhes bya ba gnyis dus gcig yod pa lta bu dang / shing rtas dus gang gi tshe kho na na lam khyab par byas pa'i dus de kho na'i tshe na 'gro'o zhes bya ba la yang / byed pa po shing rta gcig pu dang ldan pa'i bya ba lam khyab par byas te zhes bya ba dang / 'gro zhes bya ba gnyis dus gcig na yod pa bzhin no/ /ma nges pa'i phyir ro zhes bya ba ni sngar brda sprod pa pa na re zhes bya ba gnyis dus gcig na med de/ par zhes brjod pa'i phyir dper na khrus byas te bza' zhes bya ba bzhin no zhes zer ba'i dpe de ma nges pa'i phyir mi rung ba ste/ khrus byas te zhes bya ba dang bza' zhes bya ba'i bya ba gnyis dus gcig na med du zin kyang / par zhes brjod pa'i phyir kha gdangs te zhes bya ba'i bya ba dang / nyal zhes bya ba'i bya ba gnyis dus gcig na yod la/ lam khyab par byas te zhes bya ba'i bya ba dang / 'gro zhes bya ba'i bya ba gnyis kyang dus gcig na yod pas de'i phyir brda sprod pa pas smras pa'i dpe dang gtan tshigs ma nges pa'i phyir mi rung ngo / /dpe de mi rung bas des mtshon par bya ba'i don kyang mi rung bas rten cing 'brel par zhes bya ba dang / 'byung zhes bya ba gnyis dus gcig tu srang mda'i mthon dman bzhin du yod par khas len pa la nyes pa med do/ /gtan tshigs kyi don yod pa ma grub pa'i phyir ro zhes bya ba'i skyon brjod pa'i phyir/ byed pa po yod pa dang med pa la yang ji skad smos pa'i skyon du 'byung ba'i phyir ro zhes bya ba smras te/ des ni sngar brda sprod pa pa na re/ byed pa po med par yang gzhi med pa'i bya ba mi rung ste med pa'i phyir mo gsham gyi bu 'gro ba bzhin no zhes zer ba'i gtan tshigs kyi don byed pa po yod par sgrub pa de ma grub pas des bsgrubs pa'i phyogs nyams par ston to/ /byed pa po yod pa dang med pa la yang zhes bya ba ni 'di la brda sprod pa po'i lung las rang dbang ni byed pa po'o zhes 'byung bas khyod ni byed pa po yod par 'dod la/ sangs rgyas pa'i gzhung las ni byed pa po med par 'dod pas/ byed pa po yod pa dang med pa'i phyogs de gnyis la yang ngo / /ji skad smos pa'i skyon du 'gyur ba'i phyir ro zhes bya ba ni sngar yod pa las 'byung ba'i phyogs la yang gtan tshigs kyi don yod pa la ma grub pa'i phyir ro zhes ji skad smos pa'i skyon du 'gyur ba'i phyir te/ khyod la byed pa po yod pa yang nged la ma grags la/ nged la byed pa po med pa de yang khyod la ma grags pas na/ gang yang rung ba la gtan tshigs kyi don ma grub pa yin te/ ji skad du phyogs kyi chos ni rgol ba dang / phyir rgol ba la nges pa gang yin pa de gzung ngo zhes zer ba'i phyir ro/ /'on te brda sprod pa pas gtan tshigs kyi don yod pa ma grub pa'i skyon de yang spang ba'i phyir byed pa po med pa nyid du 'dod na ni des na khyod kyis sngar byed pa po yod par grub pa'i mtha' las 'byung ngo zhes smras pas/ rang gis khas blangs pa de la gnod par 'gyur ro/ /'on te ngo tsha bor nas bdag la byed pa po yod par grub kyang gzhan la byed pa po med par grags pas/ bdag gis kyang gzhan gyi gzhung bsgrub dgos pas byed pa po med par smra ste/ des na yod pa'i gtan tshigs kyi don ma grub par mi 'gyur ro zhe na/ de'i phyir gzhan la grags pa'i gtan tshigs brjod na ni ha cang thal bar 'gyur ba'i phyir ro zhes bya ba smras te/ ji skad bstan zhe na/ gal te rang gi grub pa'i mtha' la byed pa po yod pa nyid du grub kyang sangs rgyas pa dag gi gzhung las byed pa po med pa nyid du grags pas de'i phyir bdag kyang byed pa po med pa nyid du khas len to zhe na/ 'o na ni byed pa po dang / byed pa dang / bya ba dang las dang / gang la sbyin pa dang / 'bral ba dang / gzhi zhes bya ba byed pa po thams cad bsal ba gzhan dag kyang lhur blangs te brda sprod pa pa'i grub pa'i mtha' dang mi mthun pa'i chos/ chos bdag med pa la sogs pa yang khas blang bar bya dgos so/ /'on te de dag khas mi len na ni byed pa po med pa nyid du khas len ces bya ba 'di yang brjod par mi bya'o/ /de ltar rten cing 'brel bar 'byung ba'i sgra sun 'byin pa'i grub pa gsal bas rten cing 'brel bar 'byung ba'i sgra yang grub pa nyid du bstan pa yin no/ /'dir gzhan dag na re/ sngar dbu ma'i bstan bcos la chos thams cad kyi de kho na rtogs pa ni kun rdzob tu 'bras bur rnam par gzhag go zhes smra ba la/ 'bras bu de ni rgyur gyur pa'i las gzhan gyis thob par bya ba yin na 'dir ji ltar las nyid 'bras bur brjod par bya zhes zer bas de'i phyir bstan pa ni las yin te zhes bya ba smras so/ /de bstan pa zhes bya ba ni bstan bcos kyi 'bras bu de bstan pa'o/ /las yin te zhes bya ba ni bstan bcos 'bras bu de bstan pa nyid las yin te/ 'di ltar 'bras bu de nyid ston pa na las su 'gyur ba'i phyir ro/ /de yang dper na las kyi rnam pa gsum ste/ lus kyi las dang ngag gi las dang yid kyi las so zhes ji skad brjod pa lta bu'o/ /de bstan pa yang gang zhe na/ de'i phyir/ 'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ /zhes bya ba yin no zhes bya ba smras so/ /tshig gi don brgyad po 'di dag ni/ bcom ldan 'das kyis shes rab kyi pha rol tu phyin pa'i gzhung chen po las bka' stsal te/ shes rab kyi pha rol tu phyin pa'i don kyang 'di nyid yin la/ slob dpon gyis kyang 'di nyid thugs su chud pas de kho na thugs su chud pa yin/ de bzhin gshegs pa'i tshul skye ba med pa la sogs pa'i tshig gis rab tu bstan pa ma nor ba de bzhin nyid kyang 'di nyid yin/ bcom ldan 'das la mngon par bstod par brjod par bya ba yang 'di yin no/ /tshig gi don brgyad po 'di dag shes rab kyi pha rol tu phyin pa las 'byung ba ji ltar nges par shes she na/ de'i phyir smras pa/ 'phags pa shes rab kyi pha rol tu phyin pa'i mdo las/ lha'i bu dag shes rab kyi pha rol tu phyin pa zab mo 'di la ni stong pa nyid kyi mtshan nyid dang / mtshan ma med pa'i mtshan nyid dang / smon pa med pa'i mtshan nyid dang / mngon par 'du byed pa med pa'i mtshan nyid dang / skye ba med pa'i mtshan nyid dang / 'gag pa med pa'i mtshan nyid dang / kun nas nyon mongs pa med pa'i mtshan nyid dang / rnam par byang ba med pa'i mtshan nyid dang / ngo bo nyid med pa'i mtshan nyid dang / rten pa med pa'i mtshan nyid dang / chad pa med pa'i mtshan nyid dang / rtag pa med pa'i mtshan nyid dang / don gcig pa ma yin pa'i mtshan nyid dang / don tha dad pa ma yin pa'i mtshan nyid dang / 'ong ba med pa'i mtshan nyid dang / 'gro ba med pa'i mtshan nyid do/ /lha'i bu dag shes rab kyi pha rol tu phyin pa zab mo 'di ni nam mkha'i mtshan nyid do/ /lha'i bu dag shes rab kyi pha rol tu phyin pa zab mo 'di ni mtshan nyid gcig pa ste/ 'di lta ste mtshan nyid med par mtshan nyid gcig pa'o/ /lha'i bu dag shes rab kyi pha rol tu phyin pa zab mo 'di ni de bzhin gshegs pas 'jig rten du brdas tha snyad du bstan gyi/ don dam par ni ma yin no zhes bya ba la sogs pa gsungs pa las shes par bya'o/ /tshig gi don brgyad po 'di dag shes rab kyi pha rol tu phyin pa las 'byung ba 'ba' zhig tu yang ma zad de/ 'di ltar 'phags pa sdong po bkod pa la sogs pa mdo sde mtha' yas pa gzhan dag las kyang 'byung ste/ 'phags pa byams pas bdag nyid kyi rnam par thar pa las byang chub sems dpa' rnams kyi rtogs pa ni 'ong ba med par rtogs pa dang / 'gro ba med par rtogs pa dang / skye ba med par rtogs pa dang / 'gag pa med par rtogs pa dang / chad pa med par rtogs pa dang / rtag pa med par rtogs pa dang / don tha dad pa ma yin par rtogs pa dang / don gcig pa ma yin par rtogs pa'o zhes ji skad gsungs pa dang / de bzhin du 'phags pa rgya cher rol pa'i mdo las kyang / chos kyi 'khor lo bskor ba'i le'u las/ byams pa de ni skye ba med pa'i 'khor lo dang / 'gag pa med pa'i 'khor lo dang / chad pa med pa'i 'khor lo dang / rtag pa med pa'i 'khor lo dang / don tha dad pa ma yin pa'i 'khor lo dang / don gcig pa ma yin pa'i 'khor lo dang / 'ong ba med pa'i 'khor lo dang / 'gro ba med pa'i 'khor lo yin no zhes gsungs pa dang / de dag la sogs pa mdo sde gzhan dag las kyang tshig gi don brgyad po 'di dag rgya cher 'byung ngo / /'dir gzhan dag na re/ bcom ldan 'das la mngon par bstod de/ bstan bcos mdzad par bzhed nas zhes smra na/ de'i phyir bstan bcos byed par 'dod pas bstan bcos nyid bya ba yin na/ 'dir 'gag pa med pa la sogs pa tshig gi don brgyad po dag tsam kho na zhig dang po kho nar smos pa/ bstan bcos ni ma smos pas de'i phyir slob dpon gyis nyes par smras pa yin no zhes zer ba'i phyogs snga ma khong nas dbyung ba de'i lan ni/ de la tshig gi don rtogs pa med par ngag dang / rab tu byed pa dang / bstan bcos kyi don mi rtogs pas de'i phyir dang po kho nar tshig gi don brjod par bya'o zhes bya ba'i gzhung 'di yin no/ /de la zhes bya ba'i sgra ni lan gyi tshig nye bar dgod pa'i don la'o/ /tshig gi don rtogs pa med par zhes bya ba ni tshig gi don khong du chud pa med par dam tshig gi don khong du chud pa ma gtogs par ro/ /ngag dang rab tu byed pa dang bstan bcos kyi don mi rtogs pas zhes bya ba ni tshig gi don rtogs pa med par ngag dang rab tu byed pa dang bstan bcos kyi don mi rtogs shing khong du mi chud pas so/ /'di la tshig bsdus pa ni ngag yin la/ ngag bsdus pa ni rab tu byed pa yin/ rab tu byed pa bsdus pa ni bstan bcos yin te/ de la go rims de dag ni bstan bcos thams cad kyi go rims yin no/ /de la tshig gi don zhes bya ba ni ming dang bya ba tsam brjod pa ste/ 'dir ni 'gag pa med pa zhes bya ba dang / skye ba med pa zhes bya ba dang / chad pa med pa zhes bya ba dang / rtag pa med pa zhes bya ba dang / 'ong ba med pa zhes bya ba dang / 'gro ba med pa zhes bya ba dang / don tha dad pa ma yin pa zhes bya ba dang / don gcig pa ma yin pa zhes bya ba lta bu dag re re la tshig gi don zhes bya'o/ /ngag gi don zhes bya ba ni tshig gi don bsdus pa ste/ 'dir ni/ gang gis rten cing 'brel par 'byung / /'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ /spros pa nyer zhi zhi bstan pa/ /rdzogs pa'i sangs rgyas smra rnams kyi/ /dam pa de la phyag 'tshal lo/ /zhes bya ba lta bu'i tshig gis don mang po bsdus pas don yongs su rdzogs pa cig bstan pa ni ngag gi don zhes bya'o/ /rab tu byed pa'i don zhes bya ba ni ngag gi don bsdus pas skabs kyi don yongs su rdzogs pa ste/ 'dir ni rkyen brtag pa la sogs pa rab tu byed pa'i skabs nyi shu rtsa bdun bstan pa dag re re la rab tu byed pa'i don zhes bya'o/ /bstan bcos kyi don zhes bya ba ni rab tu byed pa'i gzhung mtha' dag gi don yongs su rdzogs pa ste/ 'di ni dbu ma'i rtsa ba'i tshig le'ur byed pa ji snyed pa thams cad kyi don yongs su rdzogs pa spyi la bstan bcos kyi don zhes bya'o/ /de'i phyir tshig gi don rtogs pa med par ngag dang / rab tu byed pa dang / bstan bcos kyi don mi rtogs so/ /de'i phyir dang po kho nar tshig gi don brjod par bya'o zhes bya ba ni/ gang gi phyir bstan bcos mdzad pa 'ga' la yang lugs mi mthun pa gzhan med de/ tshig gi don rtogs pas ngag gi don ston la/ ngag gi don rtogs pas rab tu byed pa'i don ston na/ rab tu byed pa'i don rtogs pas bstan bcos kyi don ston par mdzad la/ tshig dang ngag dang / rab tu byed pa dang / bstan bcos dag ni dus gcig tu cig car gcig tu bsdus te tshig tu gdon du mi rung ba de'i phyir/ 'dir go rims bzhin du dang po kho nar tshig gi don bstan pa yin te/ de bas na slob dpon gyis nyes par smras pa ma yin no/ /'dir gzhan dag na re/ gal te de lta na yang khyod kyi go rims nyams pa yin te/ 'di ltar tshig gi don la sogs pa'i mdun du yi ge'i don 'gro bas/ tshig gi don la sogs pa ni yi ge'i don gyi rgyu las 'byung ba yin pa'i phyir/ dang po kho nar yi ge'i don bye brag tu rtogs par bya ba'i rigs te/ dper na phra rab rdul dang rdul phran dang / /chu dang lcags dang ri bong dang / /lug dang glang dang nyi zer dang / /sro ma shig dang nas dang sor/ /khru dang mi dang gzhu dang ni/ /rgyang grags dang ni dpag tshad rnams/ /bsgre bas lam gyi rtsom pa dag /ci rigs su ni rnam par gzhag /ces bya bas rdul phra rab bdun la rdul phra mo gcig go/ /rdul phra mo bdun la chu rdul gcig go/ /chu rdul bdun la lcags rdul gcig go/ /lcags rdul bdun la ri bong rdul gcig go/ /ri bong rdul bdun la lug rdul gcig go/ /lug rdul bdun la glang rdul gcig go/ /glang rdul bdun la nyi zer rdul gcig go/ /nyi zer gyi rdul bdun la sro ma gcig go/ /sro ma bdun la shig gcig go/ /shig bdun la nas gcig go/ /nas bdun la sor gcig go/ /sor nyi shu rtsa bzhi la khru gang ngo / /khru phyed dang bzhi la mi'i srid do/ /khru bzhi la gzhu'o/ /gzhu lnga brgya la rgyang grags so/ /rgyang grags brgyad la dpag tshad gcig go zhes bshad de/ rdul phra rab la sogs pa bsgre bas dpag tshad la sogs pa'i lam gyi rtsom pa dag /bdun dang nyi shu rtsa bzhi dang / phyed dang bzhi dang / bzhi dang lnga brgya dang / brgyad 'gyur gyis ci rigs su rnam par gzhag pa thams cad kyi dang po rtsom pa ni rdul phra rab yin pas de dang por brjod par bya dgos pa dang 'dra bar/ 'dir yang bstan bcos dang rab tu 'byed pa dang ngag dang tshig gi don ci rigs su rnam par gzhag pa thams cad kyi dang po rtsom pa ni yi ge yin pas/ de'i phyir dang po kho nar yi ge'i don brjod par bya bar rigs na/ ma brjod pas go rims nyams pa yin no zhes zer ba'i phyogs snga ma khong nas dbyung ba de'i lan du 'dir dbu ma pa'i grub pa'i mtha' smra ba kha cig na re/ tshig la sogs pa'i don rnams ni ngag la sogs pa'i don la phan pa byed pa nyid yin gyi/ tshig gi phyogs gcig ni lam du 'gro ba bzhin no zhe'o/ /de la kha cig na re zhes bya ba ni 'grel pa byed pa nyid ma yin pa dbu ma pa'i grub pa'i mtha' smra ba kha cig na re'o/ /tshig la sogs pa'i don rnams ni zhes bya ba ni tshig gi don dang ngag gi don dang rab tu byed pa'i don rnams so/ /sogs pa'i sgras ni ngag gi don rab tu byed pa'i don gnyis bsdu'o/ /ngag la sogs pa'i don la zhes bya ba ni/ ngag gi don dang rab tu byed pa'i don dang / bstan bcos kyi don la'o/ /sogs pa'i sgras kyang rab tu byed pa'i don dang bstan bcos kyi don gnyis bsdu'o/ / phan pa byed pa nyid yin gyi zhes bya ba ni khyad par skyed par byed pa nyid yin pas te/ tshig gi don gyis ni ngag gi don gsal bar 'gyur ba'i khyad par skyed par byed la/ ngag gi don gyis ni rab tu byed pa'i don gsal bar 'gyur ba'i khyad par skyed par byed/ rab tu byed pa'i don gyis ni bstan bcos kyi don gsal bar 'gyur ba'i khyad par skyed par byed pa nyid yin pa'o/ /de lta bas na 'dir tshig gi don rtogs na ngag dang rab tu byed pa dang / bstan bcos kyi don yang rtogs par 'gyur bas/ 'dir dang po kho nar tshig gi don bstan te/ de ni bya ba'i sgo nas rjes su 'gro ba bstan pa yin no/ /'di la chos mthun pa'i dpe yang yod de/ dper na rkang pa ni lam du 'gro bar byed pa la phan pa nyid yin te/ lam du 'gro ba'i yan lag gi gtso bo nyid yin pa dang 'dra bar tshig gi don kyang ngag la sogs pa'i don rtogs par bya ba la phan par byed pa nyid yin te/ ngag la sogs pa'i don rtogs par bya ba'i yan lag gi gtso bo nyid yin pas 'dir dang por bstan to/ /tshig gi phyogs gcig ni lam du 'gro ba bzhin no zhes bya ba la/ 'dir tshig gi phyogs gcig ni zhes bya ba'i sgra ni rgya gar skad las/ pa dai ka de sha zhes bya ba tshig zur gnyis su sbyar ba yin te/ tshig gi phyogs gcig ces kyang bya/ rkang pa'i phyogs gcig ces kyang bya ste/ tshig gi phyogs gcig ni ngag la sogs pa'i don la phan par byed pa nyid ma yin te/ dper na rkang pa'i phyogs gcig lam du 'gro ba la phan par byed pa nyid ma yin pa bzhin no zhes bya bar sbyar ro/ /de la tshig gi phyogs gcig ces bya ba ni tshig gi don gyi phyogs gcig tu gyur pa ste/ tshig gi don rtsom par byed pa'i rgyu yi ge'i don to/ /tshig gi don gyi phyogs gcig tu gyur pa yi ge'i don de ni ngag la sogs pa'i don la phan pa byed pa nyid ma yin te/ 'di ltar yi ge'i sgra ka zhes bya ba la sogs pa brjod pa na yi ge rnams la yan lag med pa'i phyir/ de las lhag pa'i don gzhan rtogs par 'gyur ba med pas ngag la sogs pa'i don rtogs par 'gyur ba'i yan lag gi gtso bo nyid ma yin pa'i phyir ro/ /de lta bas na tshig gi phyogs gcig ni ngag la sogs pa'i don rtogs par bya ba la phan par byed pa nyid ma yin pas 'dir ma bstan te/ de ni dgag pa'i sgo nas ldog pa bstan pa yin no/ /'di la chos mi mthun pa'i dpe gang zhe na/ de'i phyir rkang pa'i phyogs gcig lam du 'gro ba la phan par byed pa nyid ma yin pa bzhin no zhes bya bar sbyar te/ rkang pa'i phyogs gcig ces bya ba ni rkang pa'i yan lag gi phyogs gcig tu gyur pa ste/ rkang pa'i nying lag tu gyur pa'i rting pa dang sor mo la sogs pa'o/ /rkang pa'i phyogs gcig tu gyur pa rting pa dang sor mo la sogs pa de ni lam du 'gro ba la phan par byed pa nyid ma yin te/ lam du 'gro ba'i yan lag gi gtso bo nyid ma yin pa dang 'dra ba'i tshig gi phyogs gcig tu gyur pa yi ge'i don kyang ngag la sogs pa'i don rtogs par bya ba la phan par byed pa nyid ma yin te/ ngag la sogs pa'i don rtogs par bya ba'i yan lag gi gtso bo nyid ma yin pas 'dir ma bstan to/ /rdul phra rab la sogs pa bsgres pas dpag tshad la sogs pa'i lam gyi rtsom pa dag ci rigs su rnam par gzhag pa ni lam gyi tshad kyi rtsom pa rnam par gzhag pa'i skabs su dngos po bsam pa yin pas/ rdul phra rab dang por bye brag tu rtogs par bya ba rigs kyi/ 'dir tshig la sogs pa'i don rtogs par bya ba ni bstan bcos kyi khyad par bskyed pa'i rtsom pa rnam par gzhag pa'i skabs su don rtogs par bya ba bsam pa yin pas/ yi ge'i don dang por bye brag tu rtogs par bya ba mi rigs pas rdul phra rab las dpe blangs te rgol ba de ni dpe yang ma grub pa yin no zhe'o zhes bya ba'i sgra ni 'grel pa byed pa nyid ma yin pa dbu ma'i grub pa'i mtha' smra ba kha cig na re de skad zer ro zhes bya ba'i don to/ /phyogs snga ma khong nas dbyung ba dang / de'i lan du dbu ma pa'i grub pa'i mthar smra ba kha cig tshig la sogs pa'i don rnams ni ngag la sogs pa'i don la phan par byed pa nyid yin gyi/ tshig gi phyogs gcig gi lam du 'gro ba bzhin no zhes smras pa de la 'dir 'gro ba la byed pa nyid kyis phyogs snga ma de'i lan 'di skad btab na rigs kyi/ de'i lan kha cig gis smras pa de ni mi rigs par sgrub pa'i phyir/ gzhan ma yin pa ni tshig la sogs pa ni 'du byed bskyed pas bstan bcos kyi don yan lag ma lus pa khong du chud pa la phan par byed pa nyid du rigs kyi/ sngar brtags pa ni mi rigs so zhes zer ro zhes bya ba smras so/ /de la gzhan ma yin pa ni zhes bya ba ni gzhan ma yin pas rang nyid yin te/ 'grel pa byed pa nyid yin no/ /de'i phyir 'grel pa byed pa nyid ni phyogs snga ma dang / de'i lan kha cig gis smras pa de la 'di skad ces zer ro zhes bya bar sbyar ro/ /tshig la sogs pa ni zhes bya ba ni tshig gi don dang / ngag gi don dang / rab tu byed pa'i don de dag go/ /sogs pa zhes bya ba'i sgras ni ngag gi don dang rab tu byed pa'i don gnyis bsdu'o/ /'du byed skyed pas zhes bya ba ni blo'i 'du byed dang dran pa'i 'du byed sems la skyed pas so/ /bstan bcos kyi don yan lag ma lus pa zhes bya ba ni bstan bcos kyi don yan lag thams cad dang bcas pa ste/ bstan bcos kyi don gsal bar byed pa'i yan lag ni rab tu byed pa'i don yin la/ rab tu byed pa'i don gsal bar byed pa'i yan lag ni ngag gi don yin/ ngag gi don gsal bar byed pa'i yan lag ni tshig gi don yin pas/ bstan bcos kyi don gsal bar byed pa'i yan lag rab tu byed pa dang / ngag dang tshig ma lus pa thams cad ces bya ba'i tha tshig go/ /khong du chud pa la phan par byed pa nyid du zhes bya ba ni rtogs par bya ba la phan par byed pa nyid du ste/ yan lag gi gtso bo nyid yin par ro/ /rigs kyi zhes bya ba ni 'os shing gsha'i zhes bya ba'o/ /de la tshig la sogs pa 'du byed skyed pas bstan bcos kyi don yan lag ma lus pa khong du chud pa la phan par byed pa nyid du ji ltar rigs she na/ dper na gom pa gcig pus yul gzhan du phyin par mi nus kyi/ gom pa snga mas gom pa phyi ma la sbyor ba'i 'du byed bskyed la/ 'du byed skyes pa des gom pa gzhan 'dor zhing de lta bu brgyud pa'i tshul gyis yul gzhan du phyin par nus pa dang 'dra bar/ 'dir yang tshig la sogs pa'i don brjod pa 'ba' zhig gis ngag la sogs pa'i don la phan par byed pa nyid ma yin gyi/ 'di ltar tshig gi don brjod pas ni blo'i 'du byed dang dran pa'i 'du byed bskyed la/ 'du byed skyes pa des tshig gi don snga ma 'dzin cing phyi ma mi brjed pas tshig gi don yan lag ma lus pa khong du chud pa la phan par byed pa nyid du rigs pa dang / de bzhin du tshig gi don khong du chud nas ngag gi don brjod nas kyang blo'i 'du byed dang dran pa'i 'du byed bskyed la/ 'du byed skyes pa des ngag gi don snga ma bzhin 'dzin cing phyi ma mi brjed pas ngag gi don yan lag ma lus pa khong du chud pa la phan par byed pa nyid du rigs pa dang / ngag gi don khong du chud nas rab tu byed pa'i don brjod pas kyang blo'i 'du byed dang dran pa'i 'du byed bskyed la/ 'du byed skyed pa des rab tu byed pa'i don snga ma 'dzin cing phyi ma mi brjed pas rab tu byed pa'i don yan lag ma lus pa khong du chud pa la phan par byed pa nyid du rigs pa dang / rab tu byed pa'i don khong du chud nas bstan bcos kyi don brjod pas kyang blo'i 'du byed dang dran pa'i 'du byed bskyed la/ 'du byed skyed pa des bstan bcos kyi don snga ma 'dzin cing phyi ma mi brjed pas bstan bcos kyi don yan lag ma lus pa khong du chud pa la phan par byed pa nyid du rigs so/ /sngar brtags pa ni mi rigs so zhes bya ba ni sngar dbu ma pa'i grub pa'i mtha' smra ba kha cig gis tshig la sogs pa'i don rnams ni ngag la sogs pa'i don la phan par byed pa nyid yin gyi zhes brtags pa de ni mi rigs pa'o/ /ci'i phyir zhe na/ chos thams cad skad cig ma ma yin pas tshig gi don brjod ma thag tu 'gags pas ngag gi don ma byung ba la phan par byed pa nyid du mi rigs pa dang / de bzhin du ngag gi don brjod ma thag tu 'gags pas kyang rab tu byed pa'i don ma byung ba la phan par byed pa nyid du mi rigs pa dang / rab tu byed pa'i don brjod ma thag tu 'gags pas kyang bstan bcos kyi don ma byung ba la phan par byed pa nyid du mi rigs pa'i phyir ro/ /sngar tshig gi phyogs gcig ni lam du 'gro ba bzhin no zhes brtags pa ni rigs pa kho na yin te/ tshig gi phyogs gcig ni yi ge yin la/ yi ge la ni tha snyad med pas 'du byed bskyed par mi nus pa'i phyir ngag la sogs pa'i don la phan par byed pa nyid ma yin pas/ 'dir yang dang por ma bstan te/ dper na rkang pa'i phyogs gcig ni 'gro ba la phan par byed pa nyid ma yin pa bzhin no zhes bstan pa'i phyir ro/ /de lta bas na slob dpon gyis nyes par smras pa nyid yin no zhes zer ba'i phyogs snga ma khong nas dbyung ba gang yin pa de ni de lta ma yin no/ /phyogs snga ma khong nas dbyung ba de dag de'i lan gyi dbu ma pa'i grub pa'i mtha' smra ba kha cig dang / 'grel pa byed pas ji skad smras pa'i gzhung 'di nyid la shes rab sgron ma rgya cher 'grel bar byed pa'i slob dpon yon tan byin zhes bya ba gzhan zhig ni 'di skad ces kyang zer te/ 'dir gzhan dag na re/ bcom ldan 'das la mngon par bstod de/ bstan bcos mdzad par bzhed nas zhes smras na/ de'i phyir bstan bcos byed par 'dod pas bstan bcos nyid bya ba yin na 'dir 'gag pa med pa la sogs pa'i tshig gi don brgyad po dag tsam kho na zhig dang po kho nar smos la/ bstan bcos ni ma smos pas de'i phyir/ slob dpon gyis nyes par smras pa nyid yin no zhes zer ba'i phyogs snga ma khong nas dbyung ba de'i lan ni/ de la tshig gi don rtogs pa med par ngag dang / rab tu byed pa dang / bstan bcos kyi don mi rtogs pas de'i phyir dang po kho nar tshig gi don brjod par bya'o zhes bya ba'i gzhung 'di yin no/ /kha cig na re tshig la sogs pa'i don rnams ni ngag la sogs pa'i don la phan par byed pa nyid yin gyi/ tshig gi phyogs gcig ni lam du 'gro ba bzhin no zhe'o zhes bya ba ni rgol ba'i tshig yin la/ gzhan ma yin pa ni tshig la sogs pa'i 'du byed bskyed pa la bstan bcos kyi don yan lag ma lus pa khong du chud pa la phan par byed pa nyid du rigs kyi/ sngar bstan pa ni mi rigs so zhes zer ro zhes bya ba ni de'i lan yin te/ de dag gis ji skad bstan zhe na/ sngar gzhan dag na re/ bcom ldan 'das la mngon par bstod de bstan bcos mdzad par bzhed nas zhes smra na/ de'i phyir bstan bcos byed par 'dod pas bstan bcos nyid bya ba yin na/ 'dir 'gag pa med pa la sogs pa tshig gi don brgyad po dag tsam kho na zhig dang po kho nar smos la/ bstan bcos ni ma smos pa de'i phyir slob dpon gyis nyes par smras pa kho na yin no zhes zer ba'i phyogs snga ma khong nas dbyung ba de'i lan du 'grel pa byed pas/ de la tshig gi don rtogs pa med par ngag dang rab tu byed pa dang bstan bcos kyi don mi rtogs pas/ de'i phyir dang po kho nar tshig gi don brjod par bya'o zhes bya ba'i gzhung gis lan btab pa dang / de nyid las rgol ba kha cig na re/ gal te de ltar na yang khyod kyi go rims nyams pa yin te/ 'di ltar tshig la sogs pa'i don rnams ni ngag la sogs pa'i don la phan par byed pa nyid yin pas de'i phyir dang po kho nar tshig gi don brjod par bya'o zhes zer na/ 'o na 'di tshig gi phyogs gcig tu gyur pa'i yi ge'i don dang po kho nar brjod par bya dgos te/ dper na lam du 'gro ba'i dang po rtsom pa/ phra rab rdul dang rdul phran dang / /chu dang lcags dang ri bong dang / /lug dang glang dang nyi zer dang / /sro ma shig dang nas dang sor/ /khru dang mi dang gzhu dang ni/ /rgyang grags dang ni dpag tshad rnams/ /bsgre bas lam gyi rtsom pa dag / ci rigs su ni rnam par gzhag /ces bya bas dpag tshad la sogs pa'i lam du 'gro ba'i dang po rtsom pa ni rdul phra rab yin pas de dang po kho nar brjod par bya dgos pa bzhin du/ 'dir yang bstan bcos dang rab tu byed pa dang ngag dang tshig gi don ci rigs su rnam par gzhag pa thams cad kyi dang po rtsom pa ni yi ge yin pas/ de'i phyir dang po kho nar yi ge'i don brjod par bya ba rigs na/ ma brjod pas go rims nyams pa yin no zhes dngos su rgol ba de'i lan du 'dir 'grel pa byed pa gzhan ma yin pa rang nyid ni 'di skad ces zer te/ tshig la sogs pa ni yan lag dang bcas pa yin pas de dag la ni rang gi ngo bo las gzhan pa'i don kyang yod pa'i phyir/ tshig la sogs pa brjod pas yi ge rnams klog pa'i 'du byed skyed pas na tshig dang / ngag dang rab tu byed pa'i don yi ge'i 'du byed skyed pa brjod na/ bstan bcos kyi don yan lag ma lus pa khong du chud pa la phan par byed pa nyid du 'gyur bas/ de'i phyir dang po kho nar tshig gi don brjod par bya'o zhes smras pa gang yin pa de rigs kyi/ rgol ba dang po kho nar yi ge'i don brjod par bya ba'i rigs so zhes sngar brtags pa ni mi rigs te/ yi ge'i sgra ka zhes bya ba la sogs pa brjod pa na yi ge rnams la yan lag med pa'i phyir/ de las lhag pa'i don gzhan rtogs par 'gyur ba med pas de'i phyir dang po kho nar yi ge'i don brjod par bya ba mi rigs so zhes lan btab pa yin no zhes zer te/ slob dpon phyi mas bshad pa'i lugs 'di la dbu ma pa'i grub pa'i mtha' smra ba dag phal cher ni snying por mi 'dzin to/ /de ltar na phyag 'tshal ba'i tshigs su bcad pas bsdus pa 'di nyid bstan bcos kyi lus yin te/ tshig gi don brgyad po 'di dag ni slob dpon nyid kyis tshig le'ur byed pa dag gi lung dang rigs pa'i sgo nas rab tu byed pa'i skabs nyi shu rtsa bdun gyis rnam par bshad do/ /'di nyid don dam pa pa'i chos mngon pa yin te/ 'di ltar 'dir chos rnams kyi don dam pa pa'i mtshan nyid rnam par 'jog cing yongs su rtogs par byed pa dang / 'di nyid kyis mya ngan las 'das pa mngon sum du byed cing mya ngan las 'das pa thob par byed pa'i phyir ro/ /sde snod gsum las 'byung ba ni kun rdzob pa'i chos mngon pa yin te/ 'di ltar de ni chos rnams kyi tha dad pa'i mtshan nyid sra ba dang gsher ba dang dro ba dang g.yo ba la sogs pa dag bstan cing don rnam pa ma bstan pa'i phyir ro/ /'di ltar de'i phyir lung gzhan dag las kyang / phung po lnga po dngos med de/ /ma byung nyid las byung ba yin/ /gang gis phung po kun bslangs pa/ /de la kun nas slong ba med/ /lnga phung mtshan nyid gang yin pa/ /de ni chos kun mtshan nyid do/ /de dag de yi mtshan nyid du/ /bshad kyang mtshan nyid yod ma yin/ /zhes ji skad gsungs pa lta bu'o/ /gal te sde snod gsum las 'byung ba'i chos mngon pa tha snyad pa yin na/ 'on te mya ngan las 'das pa mngon sum du byed pa ma yin pas/ de ltar na nyan thos dang / rang sangs rgyas rnams la mya ngan las 'das pa med par 'gyur bas khas blangs pa la gnod par 'gyur ro zhe na/ khas blangs pa la gnod par mi 'gyur te 'di ltar de dag gi mya ngan las 'das pa ni bsti gnas yin gyi/ de dag gi mya ngan las 'das pa ste de kho na ni ma yin te/ dam pa'i chos pad ma dkar po'i mdo dang / bden pa po'i le'u dang / rab tu zhi ba rnam par gdon mi za ba'i cho 'phrul bstan pa dang / ting nge 'dzin gyi sgo'i mdo dag las de dag kyang mthar stobs bcu mnga' bar 'gyur ro zhes rigs pas rgya cher ji skad bka' stsal pa lta bu'o/ /'phags pa lang kar gshegs pa'i mdo las kyang / theg pa rnam gzhag yod min te/ /nga ni theg pa gcig tu smra/ /byis pa rnams ni drang ba'i phyir/ /theg pa tha dad ngas bshad do/ /zhes gsungs te/ ji skad bstan zhe na/ theg pa ni gcig kho na ste/ sangs rgyas nyid thob par byed pa'i theg pa chen po'o/ /de yang dus yun ring po nas yang dag par bsgrub par bya ba dang / sdug bsngal grangs med pa'i gzhi'i 'khor bar gnas pas yang dag par bsgrub par bya ba dang / shin tu bya dka' ba 'bum phrag du mas yang dag par bsgrub par bya ba yin pa'i phyir/ snying stobs chung ngu rnams de la mngon par brtson pa bya bar mi spro bas de'i phyir bcom ldan 'das kyis byis pa so so'i skye bo rnams dang / nyan thos dang / rang sangs rgyas dman pa la mos pa rnams drang zhing bsdu ba'i phyir theg pa tha dad par yang bka' stsal te/ 'di ltar mngon par brtson pa rnams kyi dbang du mdzad nas/ thar pa myur ba srid gsum gyi/ /zhes gsungs pas/ de'i phyir de dag gi don du nyan thos dang / rang sangs rgyas kyi theg pa rnam par gzhag par mdzad do zhes bstan pa yin no/ /nyan thos dang rang sangs rgyas de dag gis ci zhig ma rtogs na/ de'i phyir de dag sangs rgyas nyid 'dod ce na/ de'i phyir/ de dag rnam grol rnam pa gsum/ /chos la bdag med nyid dang ni/ /de bzhin mnyam nyid ye shes dang / /nyon mongs rnam par grol bas spangs/ / zhes gsungs so/ /nyan thos dang rang sangs rgyas dang / sangs rgyas kyi chos rnams dang bral ba de dag gi 'gro ba gang yin zhe na/ de'i phyir/ ji ltar rgya mtsho shing zhig ni/ /rlabs rnams kyis ni rab g.yengs ltar/ /de bzhin nyan thos rmongs pa yang / /mtshan nyid kyis ni rab tu g.yengs/ /zhes bya ba gsungs te/ ji ltar bstan zhe na/ gang gi phyir de dag gis chos bdag med pa ma rtogs pa de'i phyir/ chos la tha snyad pa'i rang gi mtshan nyid gang yin pa der mngon par zhen pas/ des na sangs rgyas kyi mya ngan las 'das pa'i mthar ma phyin la/ nyon mongs pa spang ba'i phyir ni 'khor bar mi skye zhing 'khor ba'i skyon dag gis kyang gnod par mi 'gyur te/ dper na shing rgya mtsho'i nang na thams cad du 'khyams yang 'bying bar mi 'gyur ba bzhin te/ ji skad du/ de la mthar thug yod min zhing / /phyir yang ldog par mi 'gyur ro/ /zhes gsungs pa lta bu'o/ /gang gi tshe de dag mya ngan las 'das pa'i ting nge 'dzin la snyoms par 'jug pa de'i tshe na sems dang / yid dang / rnam par shes pa'i rnam par rtog pa thams cad bkag nas/ bskal pa grangs med pa brgya phrag du ma 'da' bar byed de/ de'i phyir/ ting nge 'dzin gyi lus thob nas/ /bskal pa'i bar du de mi zad/ / ces gsungs so/ /de dag ting nge 'dzin de la gnas pa dag gi yon tan ni gang dag yin/ khyad par ni gang dag yin zhe na/ de'i phyir/ nyon mongs bag chags kun tu 'brel/ /kun nas slong ba rnam par spangs/ /ting nge 'dzin gyi myos pas brgyal/ /de dag zag med dbyings na 'khod/ /ces gsungs te/ ji skad bstan zhe na/ nyon mongs pa rnams kyi bag chags ni yod la/ nyon mongs pa rnams kun tu 'byung ba ni med de/ 'du shes med pas brgyal ba bzhin du 'khod do/ /de'i phyir de nyid las/ ji ltar glang chen rdzab song ba/ /phan tshun rgyug par mi byed ltar/ /ting 'dzin myos par bying ba yi/ /nyan thos rnams ni de bzhin gnas/ /zhes gsungs pa lta bu'o/ /de dag gang gi tshe yun ring po 'das nas sad par byed pa de'i tshe na/ de bzhin gshegs pa rnams kyis bskul nas/ nyon mongs pa rnams zad kyang skye ba la dbang thob pa'i phyir yang skye ba kun tu ston cing / bsod nams dang ye shes kyi tshogs bsgrub pa yang byas/ bag chags kyi mtshams sbyor ba spang ba yang byas nas/ rnam pa thams cad mkhyen pa nyid thob par byed de/ de nyid las/ nyan thos dang rang sangs rgyas rnams bag chags rtsad nas 'joms pa'i snyoms par 'jug pa bsgoms pas zag pa med pa'i chos kyi dbyings rtogs te/ yang 'jig rten las 'das pa zag pa med pa chos kyi dbyings su rtogs pa'i tshogs rnams yongs su rdzogs par byas nas/ chos kyi sku bsam gyis mi khyab pa la dbang bsgyur ba nyid 'thob par 'gyur ro zhes gsungs pa dang / ji skad du/ ji ltar skyes bu ra ro ba/ /chang dang bral nas sad pa ltar/ /de ltar de dag nga yi sku/ /sangs rgyas chos zhes bya ba thob/ /ces gsungs pa lta bu ste/ de lta bas na theg pa ni gcig kho na'o zhes bya ba de ni legs par smras pa yin no/ /'phags pa bden pa pos bstan pa'i le'u las kyang / ngas nyan thos dang rang sangs rgyas kyi theg pa rnam par gzhag pa med do/ /de ci'i phyir zhe na/ de bzhin gshegs pa ni 'du shes sna tshogs nyid dang bral ba'i phyir ro/ /gal te de bzhin gshegs pa kha cig la theg pa chen po ston par 'gyur/ kha cig la ni rang sangs rgyas kyi theg pa ston par 'gyur/ kha cig la ni nyan thos kyi theg pa ston par 'gyur na/ de ni de bzhin gshegs pa'i thugs yongs su ma dag pa yin par yang 'gyur/ mngon par zhen pa'i skyon du yang 'gyur/ thugs rje chen po nyi tshe bar yang 'gyur/ 'du shes sna tshogs nyid kyi skyon du yang 'gyur/ ngas chos la slob dpon gyi dpe mkhyud byas par yang 'gyur ba zhig na/ 'di ltar nga ni sems can rnams la chos gang dang gang ston pa de dang de thams cad 'di lta ste/ thams cad mkhyen pa'i ye shes thob par bya ba'i phyir/ byang chub la gzhol ba/ theg pa chen po la 'bab pa/ thams cad mkhyen pa nyid la bab pa/ phyogs gcig yang dag par thob par byed pa yin no zhes ji skad gsungs pa lta bu ste/ de lta bas na theg pa tha dad par rnam par gzhag pa med do/ /sde pa gzhan dag gi gzhung las kyang / gang gis rdzu 'phrul gyi rkang pa bzhi po 'di dag kun du bstan zhing goms par byas lan mang du byas pa de ni 'dod na bskal pa 'am/ bskal pa las lhag par 'jug par 'gyur te/ bskal pa las lhag pa zhes bya ba ni bskal pa grangs med pa du ma dag tu tshe byin gyis brlabs nas sangs rgyas kyi chos bsgrubs te/ bla na med pa yang dag par rdzogs pa'i byang chub mngon par rdzogs par 'tshang rgya bar 'gyur ba'o/ /de lta bas na sangs rgyas bcom ldan 'das rnams ni sangs rgyas kyi rigs can rnams dang / ma nges pa'i rigs can rnams nyan thos dang rang sangs rgyas nyid du sems bskyed pa las bzlog par mdzad de/ 'di ltar ting nge 'dzin de la gnas pa rnams ni sems can gyi don mtha' yas pa las yongs su nyams pa dang / dad pa la sogs pa'i dbang po rnams kyang phyi rol pa srid pa'i rtse mo nas shi 'phos pa dag gi ltar rtul por 'gyur ba'i phyir ro/ /nyan thos dang rang sangs rgyas kyi rigs can rnams ni nges par mya ngan las 'das pa bsti gnas der bstis nas/ phyis rim pa de nyid kyis bla na med pa yang dag par rdzogs pa'i byang chub 'thob par 'gyur ro zhes gsungs so/ / //bam po lnga pa/ zhar la bshad pas chog gi /da ni skabs nyid bsgrub par bya ste/ de la 'gag pa med pa zhes bya ba la sogs pa tshig gi don brgyad po gang dag smras pa de dag gi don dag mthun pa'i ming ni gang dag yin/ 'gag pa med pa zhes bya bas ni ci zhig bstan/ don gcig min zhes bya ba'i bar gyis kyang ci zhig bstan zhe na/ de'i phyir 'gag pa zhes bya ba ni 'jig pa'o zhes bya ba smras te/ 'jig pa dang / med pa dang / nyams pa gang yin pa de ni 'gag pa zhes bya'o/ /skye zhes bya ba ni 'byung ba'o zhes bya ba ste 'byung ba dang srid pa dang 'phel ba gang yin pa de ni skye zhes bya'o/ /chad pa zhes bya ba ni rgyun chad pa'o zhes bya ba la/ rgyun zhes bya ba ni rgyun chags su bar du ma chod par 'brel pa ste/ dper na mar me'i me lce 'bar ba dang / chu'i 'od pa 'bab pa'i rgyun 'bab pa'i rgyun lta bu'o/ /rgyun de chad pa ni bar du chad cing mi 'byung ba ste de ni chad pa zhes bya'o/ /rtag pa zhes bya ba ni dus thams cad du gnas pa'o zhes bya ba ni gang la dus thams cad du gnas pa'i ngang tshul yod pa ste/ rnam pa gang gis sngon nye bar mtshon par gyur pa'i rnam pa de nyid kyis phyis kyang nye bar mtshon par 'gyur zhing mi 'gyur ba de ni rtag pa zhes bya'o/ /'ong ba zhes bya ba ni tshur 'ong ba'o zhes bya ba ni yul thag ring po nas yul thag nye bar tshur 'ong ba ni 'ong ba zhes bya'o/ /'gro zhes bya ba ni phar 'gro ba'o zhes bya ba ni yul thag nye ba nas yul thag ring por phar 'gro ba ni 'gro zhes bya'o/ /tha dad don zhes bya ba ni don tha dad pa'o zhes bya ba ni kha dog dang sgra skad dang / rnam pa dang yon tan dag gis don tha dad pa ste/ dper na chu la me lta bu de ni don tha dad pa zhes bya'o/ /don gcig ces bya ba ni don tha mi dad pa ste gzhan ma yin pa zhes bya ba gang yin pa'o zhes bya ba ni gang la kha dog dang sgra skad dang rnam pa dang yon tan dag gis don tha dad pa med pa ste/ dper na chu la me lta bu ma yin pa de ni don gcig ces bya'o/ /de la 'gag pa med pa zhes bya ba ni 'di la 'gag pa yod pa ma yin pa'o zhes bya bas ji skad bstan zhe na/ 'jig pa dang med pa dang nyams pa zhes bya ba'i sgras bstan pa'i 'gag pa gang yin pa de ni chos kyi de kho na rtogs pa med pa'i tshul gyis rtogs pa 'di la med pa'o/ /'di ltar de la ni rtogs par bya ba cung zad kyang med de/ lung las/ de la chos rdul tsam yang dmigs su med pa des na bla na med pa yang dag par rdzogs pa'i byang chub ces bya'o zhes ji skad gsungs pa lta bu'o/ /de'i phyir phyi rol lam nang ngam 'jig rten pa'am 'jig rten las 'das pa'i chos 'ga' la yang 'gag pa med pa de dmigs su med pas 'gag pa med pa zhes bya'o/ /don gcig min zhes bya ba'i bar du yang 'di la don gcig pa yod pa ma yin pa'o zhes bya bas ni 'di skad bstan te/ ji ltar 'jig pa dang / med pa dang / nyams pa zhes bya ba'i sgras bstan pa'i 'gag pa gang dag yin pa de chos kyi de kho na rtogs pa med pa'i tshul gyis rtogs pa 'di la med pa de bzhin du/ skye ba dang / chad pa dang / rtag pa dang / 'ong ba dang / 'gro ba dang / don tha dad pa dang / don gcig pa zhes bya ba'i sgras bstan pa gang dag yin pa de dag kyang chos kyi de kho na rtogs pa med pa'i tshul gyis rtogs pa 'di la med pa'o/ /de la kha cig na re/ 'gag pa dang / skye ba dang / tha dad pa nyid dang / gcig pa nyid bkag pa ni don dam par ro/ /chad pa dang rtag pa bkag pa ni tha snyad du'o/ /'ong ba dang 'gro ba bkag pa ni gnyi gar ro zhe'o zhes bya ba la/ de la zhes bya ba ni 'gag pa med pa zhes bya bas 'gag pa bkag pa dang / skye ba med pa zhes bya bas skye ba bkag pa dang / chad pa med pa zhes bya bas chad pa bkag pa dang / rtag pa med pa zhes bya bas rtag pa bkag pa dang / 'ong ba med pa zhes bya bas 'ong ba bkag pa dang / 'gro ba med pa zhes bya bas 'gro ba bkag pa dang / tha dad don min zhes bya bas tha dad pa nyid bkag pa dang / don gcig min zhes bya bas don gcig pa nyid bkag pa ji skad bstan pa de la'o/ /kha cig na re zhes bya ba ni dbu ma pa'i grub pa'i mtha' smra ba kha cig na re'o/ /'gag pa dang skye ba dang tha dad pa nyid dang gcig pa nyid bkag pa ni don dam par ro zhes bya ba ni dngos po rnams kyi 'gag pa dang skye ba dang tha dad pa nyid dang mtshan nyid gcig pa nyid ni don dam par bkag go/ /kun rdzob tu ni ma bkag ste/ /'di ltar kun rdzob tu ni 'jig rten gyi tha snyad du dngos po thams cad la 'gag pa yang yod/ skye ba yang yod pa'i phyir dang / bum pa dang snam bu la sogs pa tha dad pa nyid kyang yod pa'i phyir dang / lhas byin ni mchod sbyin la sogs pa gzhan med pas gcig pa nyid do zhes brjod pa'i phyir ro/ /chad pa dang rtag pa bkag pa ni tha snyad du'o zhes bya ba ni dngos po rnams kyi chad pa dang rtag pa bkag pa ni don dam par bkag pa 'ba' zhig tu ma zad kyi/ kun rdzob kyi tha snyad du yang bkag pa ste/ 'di ltar kun rdzob tu yang dngos po rnams la chad pa dang rtag pa med de/ bskal pa'i dang po tshun chad nas rtswa la sogs pa'i rgyun 'brel pa dag da dung yang rgyun chad pa med pa'i phyir dang / 'jig rten na dngos po thams cad mi rtag pas rtag pa 'ga' yang mi snang ba'i phyir ro/ /'ong ba dang 'gro ba bkag pa ni gnyi gar ro zhes bya ba ni dngos po rnams kyi 'ong ba dang 'gro ba bkag pa ni kun rdzob dang don dam pa gnyi gar bkag ste/ 'di ltar kun rdzob tu yang 'dus byas thams cad skad cig gcig la 'jig pa'i ngang can yin pas 'ong ba dang 'gro ba med do zhes grub pa'i mtha' las gsungs pa'i phyir dang / don dam par yang slob dpon nyid kyis 'ong ba dang 'gro ba brtag pa'i skabs nas 'ong ba dang 'gro ba dgag pa mdzad pa'i phyir ro/ /de ltar dngos po kha cig don dam par bkag pa dang / kha cig tha snyad du bkag pa dang / kha cig gnyi gar bkag pa'i tshul du bshad pa 'di ni/ 'jig rten dang 'gal ba spang ba'i phyir dang / lung dang 'gal ba spang ba'i phyir bshad pa yin te/ 'di ltar kha cig dngos po rnams kun rdzob tu bkag par 'dod pa ni 'jig rten dang 'gal ba yin la/ kha cig dngos po rnams don dam par bkag par 'dod pa'i lung dang 'gal ba yin pa'i phyir ro/ /gzhan ma yin pa ni 'dir thams cad don dam par bkag ste nges par gzung ba'i phyir ro/ /gzhan du yang mi 'gal te/ khyad par gyi gzhi'i khyad par ji skad bstan pa la 'gal ba med pa'i phyir dang / mdzad pa pos bstan pa nyid kyis bzhed pa mchog yin pa'i phyir ro zhes zer ro zhes bya ba la/ gzhan ma yin pa ni zhes bya ba ni gzhan ma yin pas rang nyid yin te/ 'grel pa byed pa nyid yin no/ /de'i phyir 'grel pa byed pa nyid ni 'dir 'gag pa dang / skye ba la sogs pa dgag pa ni thams cad don dam par bkag pa pa yin no zhes zer bar sbyar ro/ /'dir zhes bya ba ni 'gag pa dang skye ba la sogs pa dgag pa'i skabs 'dir ro/ /thams cad ces bya ba ni 'gag pa dang skye ba la sogs pa thams cad do/ /don dam par bkag ste zhes bya ba ni don dam par 'gag pa dang skye ba la sogs pa med pa yin te/ ci'i phyir zhe na/ gang gi tshe slob dpon don dam pa'i mtshan nyid rtogs par mdzad pa de'i tshe na shes rab kyi pha rol tu phyin pa'i tshul bstan pa 'dir dngos po rnams kyi 'gag pa dang / skye ba dang / chad pa dang / rtag pa dang / 'ong ba dang / 'gro ba dang / don tha dad pa dang / don gcig pa zhes bya ba dag dgag par bzhed pa'i phyir ro zhes zer ro/ /ci'i phyir de dag thams cad don dam par dgag ce na/ de'i phyir nges par gzung ba'i phyir ro zhes bya ba smras te/ 'di ltar tshig thams cad ni gdon mi za bar nges par gzung bar bya ba yin la/ nges par gzung bar bya ba de yang don dam pa'i yul kho na la yin gyi/ kun rdzob kyi yul la ni ma yin pa'i phyir ro/ /gzhan du yang mi 'gal te zhes bya ba ni dngos po rnams kyi 'gag pa dang / skye ba la sogs pa de dag nges par gzung ba las don dam par dgag pa 'ba' zhig tu yang ma zad de/ 'di ltar rnam pa gzhan du yang 'jig rten dang yang mi 'gal zhing / lung dang yang mi 'gal la/ 'gag pa dang skye ba la sogs pa de dag thams cad don dam par bkag pa yang yin no/ /rnam pa gzhan yang gang zhe na/ de'i phyir khyad par gyi gzhi khyad par ji skad bstan pa la 'gal ba med pa'i phyir dang zhes bya ba smras so/ /gang la 'jig rten dang 'gal ba dang lung dang 'gal ba med ce na/ de'i phyir khyad par gyi gzhi'i khyad par ji skad bstan pa la zhes bya ba smras te/ khyad par gyi gzhi shes rab kyi pha rol tu phyin pa'i tshul rten cing 'brel par 'byung ba gang la khyad par 'gag pa med pa dang / skye ba med pa la sogs pa yod pa sngar ji skad bstan pa de ni khyad par gyi gzhi'i khyad par ji skad bstan pa ste de la'o/ /de la 'gal ba med pa'i phyir zhes bya ba ni/ de la 'jig rten dang 'gal ba dang / lung dang 'gal ba med pa'i phyir te/ gang gi phyir de la don gyis nyes pa med pa de'i phyir/ gzhan gyi 'jig rten dang 'gal ba dang / lung dang 'gal ba yod do zhes rgal bar mi nus so/ /yang na gzhan du yang mi 'gal te zhes bya ba ni/ nges par gzung ba'i phyir mi 'gal ba dang / don gyis nyes pa med pa'i phyir mi 'gal ba 'ba' zhig tu yang ma zad de/ 'di ltar mdzad pa pos bstan pa nyid kyi bzhed pa mchog yin pa'i phyir yang mi 'gal te/ 'gag pa dang skye ba la sogs pa de dag thams cad don dam par bkag pa yin no/ /mdzad pa pos bstan pa nyid kyis zhes bya ba ni sgra'i bstan bcos kyi mtshan nyid las byed pa po'i 'dod pa mchog ni las yin no zhes 'byung bas/ 'dir yang rten cing 'brel bar 'byung ba bden pa gnyis su bstan pa'i phrin las la ston par mdzad pa'i mdzad pa po ni bcom ldan 'das yin la/ bcom ldan 'das kyis kun rdzob kyi bden pa dang / don dam pa'i bden pa gnyi ga bstan pa'i sgo nyid kyis so/ /bzhed pa mchog yin pa'i phyir ro zhes bya ba ni mdzad pa po bcom ldan 'das kyis kun rdzob kyi bden pa yang bstan par bzhed la/ don dam pa'i bden pa yang bstan par bzhed pa las skabs 'dir bcom ldan 'das kyis bstan par bzhed pa mchog ni don dam pa'i bden pa yin pa'i phyir mdzad pa po'i bzhed pa mchog gi phrin las don dam pa yin pas/ 'gag pa dang / skye ba dang chad pa dang / rtag pa dang / 'ong ba dang / 'gro ba dang / don tha dad pa dang / don gcig pa zhes bya ba de dag thams cad don dam par bkag pa kho na yin par shes par bya'o/ /de ltar yang bcom ldan 'das kyis bcom ldan 'das ma shes rab kyi pha rol tu phyin pa las/ rab 'byor 'di dag thams cad ni tha snyad du bstan pa yin gyi don dam par ni ma yin no zhes gsungs pa'i phyir ro/ /spros pa nyer zhi zhes bya ba ni brjod pa'i bdag nyid la mngon par zhen pa zhi ba'i phyir ro zhes bya ba la/ brjod pa zhes bya ba ni brjod par bya ba'i dngos po rnams mngon sum du byas te tshig gi sgrar brjod pa ni brjod pa zhes bya'o/ /bdag nyid la zhes bya ba ni brjod pa de'i ngo bo nyid la'o/ /mngon par zhen pa zhes bya ba ni brjod pa'i bdag nyid gang la mngon par zhen pa dang / chags pa dang / lhag par chags pa yod pa de ni brjod pa'i bdag nyid la mngon par zhen pa'o/ /zhi ba'i phyir ro zhes bya ba ni nye bar zhi ba'i phyir te/ brjod pa'i bdag nyid la mngon par zhen pa de zhi ba'i phyir spros pa nyer zhi zhes bya'o/ /'di ltar gang la brjod par 'dod pa'i mngon par zhen pa yod pa de la brjod pa'i bdag nyid kyi spros pa 'byung gi /gang la brjod par 'dod pa'i mngon par zhen pa med pa de la brjod pa'i bdag nyid kyi spros pa mi 'byung zhing nye bar zhi bar 'gyur ba'i phyir ro/ /zhi zhes bya ba ni gnod pa thams cad dang bral ba'i phyir ram/ ngo bo nyid kyis stong pa'i phyir ro zhes bya ba la/ gnod pa thams cad dang bral ba'i phyir zhes bya ba ni 'di las dbul ba la sogs pa'i sdug bsngal gyis gnod par gyur pa ni gzhan gyi nor dbrog pa la sogs pa la brtson pa'i phyir ma zhi ba yin la/ zhe sdang la sogs pa nyon mongs pa skyes pas kyang gnod pa byed pas ma zhi ba yin gyi/ rten cing 'brel bar 'byung ba 'di ni gnod pa thams cad dang bral ba'i phyir zhi ba yin no/ /ngo bo nyid kyis stong pa'i phyir ro zhes bya ba ni skye ba med pa'i mtshan nyid yin pas ngo bo nyid kyis stong pa ste/ de'i phyir yang zhi ba zhes bya'o/ /bstan pa zhes bya ba ni bka' stsal pa'o zhes bya ba ni/ gang gis rten cing 'brel par 'byung / 'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ / spros pa nyer zhi zhi bstan pa/ /zhes bya ba dang sbyar te/ gang gis bstan cing bka' stsal pa zhes bya ba'i tha tshig go/ /rdzogs pa'i sangs rgyas zhes bya ba ni bcom ldan 'das te/ chos dang gang zag bdag med pa nyid yang dag pa phyin ci ma log par thugs su chud pa'i phyir ro zhes bya ba ni/ theg pa chen po 'di la bdag med pa ni rnam pa gnyis te/ chos bdag med pa dang / gang zag bdag med pa'o/ /de la chos zhes bya ba ni kun rdzob dang don dam pa'i bden pa gnyis kyi mtshan nyid 'dzin pas na chos rnams so/ /gang zag ces bya ba ni 'khor bar yang dang yang du 'gro ba len pa 'am/ yang dang yang du len cing 'gro bas na gang zag go/ /chos de dag dang gang zag de bdag med pa zhes bya ba ni chos de dag dang gang zag de'i ngo bo nyid dang bral ba'o/ /nyid ces bya ba ni chos dang gang zag bdag med pa'i dngos po ni chos dang gang zag bdag med pa nyid do/ /de yang dag pa phyin ci ma log par thugs su chud pa zhes bya ba ni chos dang gang zag bdag med pa nyid yang dag pa ji lta ba bzhin phyin ci ma log par thugs su chud pa'o/ /'di ltar chos de dag dang gang zag de la phyin ci log tu rtogs pa ni ji ltar don dam par chos rnams dang gang zag bdag med pa de bzhin du kun rdzob tu yang gtan med do snyam pa 'am/ ji ltar kun rdzob tu dngos po thams cad yod pa de bzhin du don dam par yang dngos po thams cad yod do snyam pa'o/ /de las zlog pa ni yang dag pa phyin ci ma log par thugs su chud pa'o/ /phyir ro zhes bya ba ni de yang dag pa phyin ci ma log par thugs su chud pa'i phyir bcom ldan 'das ni rdzogs pa'i sangs rgyas zhes bya'o/ /yang na yang dag par sangs rgyas pa dang / thams cad sangs rgyas pa'i phyir yang dag par rdzogs pa'i sangs rgyas zhes kyang bya'o/ /yang na 'phags pa phyir mi ldog pa'i 'khor lo'i mdo las bcom ldan 'das nyid kyis/ des ni chos kun dngos med pa/ /spros med ngo bo nyid med cing / /sprul pa lta bur sangs rgyas pas/ /des na sangs rgyas zhes bya'o/ /zhes ji skad gsungs pa lta bu'o/ /smra rnams kyi zhes bya ba ni smra ba nyan thos dang rang sangs rgyas dang byang chub sems dpa' rnams kyis te/ rten cing 'brel par 'byung ba phyin ci ma log par ston par byed pa nyid kyis mtho ris dang byang grol thob par byed pa'i lam nye bar ston par byed pa'i phyir ro zhes bya ba la/ smra rnams zhes bya ba de rnams ni gang dag yin/ de dag ci zhig smra ba'i phyir ni smra rnams zhes bya zhe na/ de'i phyir smra rnams zhes bya ba ni smra ba nyan thos dang / rang sangs rgyas dang / byang chub sems dpa' rnams te de rnams kyi'o/ /de dag ci zhig smra ba'i phyir ni smra rnams zhes bya zhe na/ de'i phyir rten cing 'brel bar 'byung ba phyin ci ma log par ston par byed pa nyid kyis mtho ris dang byang grol thob par byed pa'i lam nye bar ston par byed pa'i phyir ro zhes bya ba smras te/ smra ba nyan thos dang / rang sangs rgyas dang / byang chub sems dpa' rnams kyang rten cing 'brel par 'byung ba phyin ci ma log par ston par byed pa nyid kyis mtho ris dang / byang grol thob par byed pa'i lam nye bar ston par byed pa'i phyir smra rnams zhes bya'o zhes bya bar sbyar ro/ /de la rten cing 'brel par 'byung ba phyin ci ma log par ston par byed pa zhes bya ba ni ma rig pa'i rkyen gyis 'du byed rnams zhes bya ba la sogs pa rten cing 'brel par 'byung ba'i yan lag bcu gnyis lugs su 'byung ba dang / lugs las bzlog pa'i tshul phyin ci ma log par ston par byed pa'o/ /nyid ces bya ba ni rten cing 'brel par 'byung ba phyin ci ma log par ston par byed pa'i dngos po ni rten cing 'brel par 'byung ba phyin ci ma log par ston par byed pa nyid do/ /de'i phyir rten cing 'brel par 'byung ba phyin ci ma log par ston par byed pa nyid des mtho ris dang / byang grol thob par byed pa'i lam nye bar ston par byed pa'i phyir smra rnams zhes bya'o/ /de la mtho ris zhes bya ba ni 'dod pa'i khams kyi lha dang / mi rnams dang / gzugs kyi khams dang / gzugs med pa'i khams zhes bya ba dag go/ /byang grol zhes bya ba ni phung po'i lhag ma dang bcas pa dang / phung po'i lhag ma med pa zhes bya ba'i mya ngan las 'das pa rnam pa gnyis so/ /thob par byed pa'i lam zhes bya ba ni mi bslu ba'i lam gang yin pa ste/ 'di lta ste mtho ris dang 'dod pa'i khams kyi lha dang / mi rnams thob par byed pa'i lam ni dge ba bcu'i las kyi lam rnams so/ /mtho ris gzugs kyi khams thob par byed pa'i lam ni bsam gtan bzhi po rnams so/ /mtho ris gzugs med pa'i khams thob par byed pa'i lam ni gzugs med pa'i snyoms par 'jug pa bzhi po rnams so/ /byang grol rnam gnyis thob par byed pa'i lam ni yang dag pa'i lta ba la sogs pa'i mtshan nyid kyis bsdus pa 'phags pa'i lam yan lag brgyad po 'khor dang bcas pa'o/ /nye bar ston par byed pa'i phyir ro zhes bya ba ni/ de ltar smra ba nyan thos dang / rang sangs rgyas dang / byang chub sems dpa' rnams kyang rten cing 'brel par 'byung ba phyin ci ma log par ston par byed pa nyid kyis mtho ris dang byang grol thob par byed pa'i lam nye bar ston par byed pa'i phyir smra rnams zhes bya'o/ /dam pa zhes bya ba ni mchog ces bya ste/ gang gis rten cing 'brel par 'byung ba 'gag pa med pa dang / skye ba med pa la sogs pa'i mtshan nyid ji skad smos pa dang ldan pa bstan pa/ rdzogs pa'i sangs rgyas de ni smra ba nyan thos dang / rang sangs rgyas dang / byang chub sems dpa' rnams kyi dam pa mchog yin te/ de la phyag 'tshal lo zhes bya bar sbyar ro/ /'dir gzhan dag na re/ gal te nyan thos dang / rang sangs rgyas dang / byang chub sems dpa' rnams kyang rten cing 'brel par 'byung ba phyin ci ma log par ston par byed pa nyid kyis mtho ris dang byang grol thob par byed pa'i lam nye bar ston par byed pa yin na/ 'o na gang gis rten cing 'brel bar 'byung ba ston pa/ rdzogs pa'i sangs rgyas de nyan thos dang rang sangs rgyas dang / byang chub sems dpa' smra ba rnams kyi dam pa mchog tu ji ltar 'gyur zhes zer ba'i phyogs snga ma khong nas dbyung ba de'i lan du 'dir 'grel pa byed pas/ ji ltar smos pa'i khyad par phyin ci ma log pa dang ldan pa'i rten cing 'brel par 'byung ba gsungs pa'i phyir ro zhes bya ba smras so/ /ji skad smos pa'i khyad par phyin ci ma log pa dang ldan pa'i rten cing 'brel par 'byung ba zhes bya ba ni rten cing 'brel bar 'byung ba gang la sngar ji skad smos pa'i khyad par 'gag pa med pa dang / skye ba med pa dang / chad pa med pa dang / rtag pa med pa dang / 'ong ba med pa dang / 'gro ba med pa dang / don tha dad pa ma yin pa dang / don gcig pa ma yin pa dang / spros pa nye bar zhi ba dang / zhi ba zhes bya ba phyin ci ma log pa dag yod pa de ni ji skad smos pa'i khyad par phyin ci ma log pa dang ldan pa'i rten cing 'brel par 'byung ba yin no/ /gsungs pa'i phyir ro zhes bya ba ni bcom ldan 'das ni de ltar ji skad smos pa'i khyad par phyin ci ma log pa dang ldan pa'i rten cing 'brel bar 'byung ba de lta bu gsungs pa yin la/ nyan thos dang / rang sangs rgyas dang / byang chub sems dpa' rnams ni/ de lta bu smra ba ma yin pas/ de'i phyir bcom ldan 'das ni/ de rnams kyi dam pa mchog ces bya'o/ /de'i phyir de la phyag 'tshal lo zhes bya ba ni/ de la phyag 'tshal ba ni 'dud par bya ba 'di yin no zhes bya ba'i tha tshig go/ /'dir kha cig na re/ gal te rten cing 'brel bar 'byung na ni ji ltar skye ba med pa yin/ ji ltar skye ba med na ni rten cing 'brel bar 'byung zhes byar yang mi rung bas rang gi tshig dang 'gal zhing dam bcas pa'i skyon du 'gyur te/ de nyid kyis de'i don la skur pa btab pa'i phyir/ dper na smras pa thams cad brdzun no zhes bya ba lta bu'o zhes zer ro/ /zhes bya ba ni rgol ba snga ma de dag nyid brda sprod pa pa'i gzhung las grags pa sgra'i mtshan nyid kyis rten cing 'brel bar 'byung ba'i sgra la klan ka'i skabs ma rnyed nas/ 'dir rigs pa can gyi sgyu thabs kyis rigs pa'i bstan bcos gzhan klog cing sgra'i nyes pas skyon 'dogs par byed pa yin no/ /de la 'dir zhes bya ba ni de ltar rten cing 'brel bar 'byung ba'i sgra grub pa'i skabs 'dir ro/ /kha cig na re/ zhes bya ba ni rgol ba snga ma de dag nyid na re'o/ /gal te rten cing 'brel par 'byung na ni ji ltar skye ba med pa yin/ ji ste skye ba med na ni rten cing 'brel bar 'byung zhes byar yang mi rung bas rang gi tshig dang 'gal zhing dam bca' ba'i skyon du 'gyur te zhes bya ba 'di ni phyogs yin no/ /de la gal te/ rten cing 'brel bar 'byung na ni/ /ji ltar skye ba med pa yin/ /zhes bya ba ni/ 'di lta ste/ dbu ma pa khyod kyis rten cing 'brel bar 'byung ba skye ba med pa la sogs pa'i mtshan nyid dang ldan pa bstan pa de la 'dir rten cing 'brel bar 'byung zhes bya ba ni khyad par gyi gzhi yin la/ skye ba med pa la sogs pa ni de'i khyad par yin par bstan pas/ des na 'dir rten cing 'brel par 'byung zhes bya ba'i sgra dang / skye ba med pa zhes bya ba'i sgrar 'gal ba dang / gal te rten cing 'brel par 'byung ba yin na ni ji ltar skye ba med pa yin zhes zer ro/ /ji ste skye ba med na ni rten cing 'brel bar 'byung zhes byar yang mi rung bas zhes bya ba yang de ltar dbu ma pa khyod kyi rten cing 'brel bar 'byung ba skye ba med pa la sogs pa'i mtshan nyid dang ldan pa bstan pa de la/ 'dir skye ba med pa la sogs pa ni khyad par yin la/ rten cing 'brel par 'byung zhes bya ba ni de dag gi khyad par gyi gzhi yin par bstan pas/ des na 'dir skye ba med pa zhes bya ba'i sgra dang / rten cing 'brel par 'byung ba zhes bya ba'i sgrar 'gal bas/ ci ste skye ba med pa yin na ni rten cing 'brel par 'byung zhes byar yang mi rung bas zhes zer ro/ /rang gi tshig dang 'gal zhing dam bcas pa'i skyon du 'gyur te zhes bya ba ni de'i phyir dbu ma pa khyed kyi rang gi dam tshig dang 'gal zhing dam bcas pa'i skyon du 'gyur te/ de la rten cing 'brel par 'byung ba zhes zer zhing skye ba med pa zhes kyang zer ba ni rang gi tshig dang 'gal ba yin la/ skye ba med pa zhes zer zhing rten cing 'brel par 'byung zhes kyang zer ba ni dam bcas pa'i skyon du 'gyur ba yin no zhes zer ro/ /de nyid kyis de'i don la skur pa btab pa'i phyir zhes bya ba 'di ni phyogs kyi chos yin no/ /de la de nyid kyis de'i don la skur pa btab pa'i phyir zhes bya ba ni gang gi tshe rten cing 'brel bar 'byung zhes khas blangs pa de'i tshe na ni de nyid kyis skye ba med pa zhes bya ba de'i don la skur pa btab pa'i phyir dang / gang gi tshe skye ba med pa zhes khas blangs pa de'i tshe na ni/ de nyid kyis rten cing 'brel bar 'byung zhes bya ba de'i don la skur pa btab pa'i phyir ro zhes zer ro/ /dper na smras pa thams cad ni brdzun no zhes bya ba lta bu'o/ /zhes bya ba 'di ni dpe yin no/ /de la dper na smras pa thams cad brdzun no zhes bya ba lta bu'o zhes bya ba ni rigs pa'i bstan bcos dag las grags pa'i dpe nyid bstan pa yin te/ dper na la la na re/ b+ha ra ta la sogs pa'i tshig smras pa thams cad ni brdzun no zhes zer ba lta bu'o/ / de yang dper na la la zhig rang gi tshig bden par sgrub pa'i phyir/ b+ha ra ta la sogs pa'i tshig smras pa thams cad brdzun no zhes zer na/ smras pa zhes bya ba'i sgra dang / thams cad ces bya ba'i sgra de'i nang du de skad zer ba de rang gi tshig kyang 'dus pas/ des na rang gi tshig bden par bsgrub pa'i rang gi tshig dang yang 'gal zhing / b+ha ra ta la sogs pa'i tshig brdzun par dam bcas pa'i skyon du 'gyur te/ tshig smras pa thams cad brdzun no zhes bya ba de nyid kyis de rang gi tshig smras pa de'i don la yang skur pa btab par 'gyur ba yang 'dra bar/ 'dir yang dbu ma pa khyed kyis rang gi tshig dang yang 'gal zhing dam bcas pa'i skyon du 'gyur bar rnam par gzhag ste/ 'di ltar rten cing 'brel par 'byung zhes zer zhing skye ba med pa zhes kyang zer ba ni rang gi tshig dang 'gal ba yin la/ rten cing 'brel bar 'byung zhes zer ba de nyid kyis skye ba med pa zhes bya ba de'i don la skur pa btab pa yin/ skye ba med pa zhes zer zhing rten cing 'brel bar 'byung zhes kyang zer ba ni dam bcas pa'i skyon du 'gyur ba yin la/ skye ba med pa zhes zer ba de nyid kyis rten cing 'brel bar 'byung zhes bya ba de'i don la skur pa btab pa yin no zhes zer ro zhes bya ba ni rgol ba snga ma de dag nyid brda sprod pa pa'i gzhung las grags pa'i sgra'i mtshan nyid kyis rten cing 'brel par 'byung ba'i sgra la klan ka'i skabs ma rnyed nas/ 'dir rigs pa can gyi sgyu thabs kyis rigs pa'i bstan bcos gzhan klog cing / sgra'i nyes pas skyon 'dogs par byed pa dag de skad ces zer ba yin no/ /rgol ba de'i lan du 'dir 'grel pa byed pas/ de la gal te rten cing 'brel bar 'byung ba thams cad skye ba med pa zhes dam 'cha' bar byed na ni skyon der yang 'gyur ba zhig na/ thams cad ces bya ba'i sgras kun rdzob pa'i rten cing 'brel par 'byung ba khas blangs pa bsdus pa'i phyir dang / don dam par yang rten cing 'brel par 'byung ba yod par khas blangs nas/ de la skur pa gdab par ma byas pas de'i phyir gtan tshigs kyi don ma grub pa nyid do zhes bya ba smras so/ /de la zhes bya ba ni rang gi tshig dang 'gal ba spang ba'i tshig nye bar dgod pa'i don de la'o/ /'di la sangs rgyas pa rnams kyi bden pa ni rnam pa gnyis te kun rdzob kyi bden pa dang / don dam pa'i bden pa'o/ / de la ji ltar kun rdzob tu rang gi tshig dang 'gal bar 'gyur ba de bstan pa'i phyir/ gal te rten cing 'brel par 'byung ba thams cad skye ba med pa zhes dam 'cha' bar byed na ni skyon der yang 'gyur ba zhig na zhes bya ba smras te/ dbu ma pa smra ba rnams kyi grub pa'i mtha' ni kun rdzob tu dngos po thams cad rgyu dang rkyen so sor nges pa las skye bar 'dod pas/ 'dir gal te dbu ma pas kun rdzob tu dngos po thams cad rgyu dang rkyen so sor nges pa las skye bar smra na/ de'i 'og tu bye brag med par dngos po thams cad kun rdzob tu skyed med pa zhes dam 'cha' bar byed na ni rang gi tshig dang 'gal ba'i skyon der yang 'gyur ba zhig na/ de ltar dam 'cha' bar mi byed pas de'i phyir rang gi tshig dang 'gal ba'i skyon der yang mi 'gyur ro zhes bya ba'i tha tshig go/ /ji ltar skyon der mi 'gyur zhe na/ de'i phyir thams cad ces bya ba'i sgras kun rdzob pa'i rten cing 'brel bar 'byung ba'i khas blangs pa bsdus pa'i phyir zhes bya ba smras te/ sngar dngos po thams cad rgyu dang rkyen so sor nges pa las skye'o zhes smras pa gang yin pa'i thams cad ces bya ba'i sgra des ni kun rdzob pa'i rten cing 'brel par 'byung ba khas blangs pa bsdus pa'i phyir rten cing 'brel par 'byung ba thams cad skye ba med pa zhes dam 'cha' bar mi byed pas rang gi tshig dang 'gal ba'i skyon der mi 'gyur te/ skye ba med pa zhes bya ba'i tshig gi khongs su ni ma gtogs so zhes bya ba'i tha tshig go/ /don dam par yang rten cing 'brel par 'byung ba yod pa/ khas blangs nas de la skur pa gdab par ma byas pas zhes bya bas ni 'di skad bstan te/ gal te don dam par dngos po thams cad rgyu dang rkyen so sor nges pa las skye bar khas blangs nas/ yang don dam pa nyid du dngos po thams cad skye ba med do zhes de la skur pa gdab par byas sam/ kun rdzob tu dngos po thams cad rgyu dang rkyen so sor nges pa las skye bar khas blangs nas/ yang kun rdzob nyid du dngos po thams cad skye ba med do zhes de la skur pa gdab pa byas na ni rang gi tshig dang 'gal ba'i skyon der yang 'gyur ba zhig na/ kho bos ni bden pa gang la rten cing 'brel par 'byung ba las khas blangs pa'i bden pa nyid la skye ba med pa de nyid khas blangs pa yang ma byas la/ bden pa gang la skye ba med pas khas blangs pa'i bden pa de nyid la rten cing 'brel par 'byung ba khas blangs pa yang ma byas pas rang gi tshig dang 'gal ba'i skyon du mi 'gyur ro/ /de'i phyir gtan tshigs kyi don ma grub pa nyid do zhes bya ba ni thams cad ces bya ba'i sgras kun rdzob pa'i rten cing 'brel bar 'byung ba khas blangs pa bsdus pa'i phyir dang / don dam par yang rten cing 'brel par 'byung ba yod par khas blangs nas de la skur pa gdab pa ma byas pa de'i phyir/ khyod kyis kho bo la rang gi tshig dang 'gal ba'i skyon brjod pa'i gtan tshigs kyi don ma grub pa nyid yin no/ /gnas brtan chos skyong gis kyang / slob dpon 'phags pa lhas mdzad pa dbu ma'i tshig le'ur byed pa brgya pa'i 'grel pa byas pa las/ rang gi tshig dang 'gal ba'i skyon 'di brjod de/ dbu ma dang brgya pa ni lta ba mthun pa yin pas de'i phyir/ gnas brtan chos skyong gis kyang / dbu ma pa'i bstan bcos kyi don mi shes bzhin du skyon btags pa yin par shes par bya'o/ / dam bcas pa'i skyon de'i lan du lung 'thad pa dang bcas par sgrub pa'i phyir/ dper na sbyin pa la sogs pa don dam par dge ba ma yin yang 'khor bsdus pa las dge ba rnams zhes brjod pa dang / rnam par shes pa bdag tu khas blangs nas don dam par rnam par shes pa bdag ma yin no zhes dam bcas pa la dam bcas pa'i skyon du mi 'gyur ba lta bu dang zhes bya ba smras so/ /de la dper na sbyin pa la sogs pa don dam par dge ba ma yin yang 'khor sdud pa las dge ba rnams zhes brjod pa dang zhes bya bas ji skad bstan zhe na 'di la don dam par na dge ba ni thar pa gcig pu kho nar zad kyi gzhan ni cung zad med pas/ de'i phyir sbyin pa la sogs pa don dam par dge ba ma yin te/ bcom ldan 'das kyis dge slong dag nga ni srid pa mngon par 'grub par byed pa chung ngu la yang mngon par dga' bar mi byed de/ de ci'i phyir zhe na/ bshang ba ni chung ngu yang dri nga ba yin pa dang 'dra ba'i phyir ro zhes ji skad gsungs pa lta bu'o/ /de lta bas na sbyin pa dang / tshul khrims dang / bzod pa dang / brtson 'grus dang / bsam gtan dang / shes rab la sogs pa yon tan rnams ni don dam par dge ba ma yin no/ /'on kyang 'khor ba sdud pa la ltos na dge ba rnams zhes kyang brjod de/ bcom ldan 'das kyis dge slong dag gus par byas te bsod nams dag bya'o/ /gus par byas te bsod nams dag byas pa'i rnam par smin pa ni/ 'dod pa dang / sdug pa dang / dga' ba dang / yid du 'ong ba yin no zhes ji skad gsungs pa lta bu'o/ /des na de ltar dam bcas pa la dam bcas pa'i skyon du mi 'gyur ro/ /de la gal te sbyin pa la sogs pa don dam par dge ba ma yin no zhes smras nas/ de dag don dam pa kho nar dge ba yang yin no zhes smras na ni de'i tshe dam bcas pa'i skyon du yang 'gyur la/ sbyin pa la sogs pa kun rdzob tu dge ba khas blangs nas de dag kun rdzob kho nar dge ba ma yin par yang khas blangs na ni de'i tshe yang dam bcas pa'i skyon du yang 'gyur ba zhig na/ sbyin pa la sogs pa don dam par dge ba ma yin yang 'khor ba sdud pa las dge ba rnams zhes brjod pa la dam bcas pa'i skyon du mi 'gyur ba dang 'dra bar 'dir yang dngos po rnams don dam par skye ba med pa yin yang / kun rdzob tu rgyu dang rkyen so sor nges pa las rten cing 'brel par 'byung ba smra ba la dam bcas pa'i skyon du mi 'gyur ro/ /rnam par shes pa bdag tu khas blangs nas don dam par rnam par shes pa bdag ma yin no zhes dam bcas pa la dam bcas pa'i skyon du mi 'gyur ba lta bu dang zhes bya bas ji skad bstan zhe na/ bcom ldan 'das la 'ga' zhig gis/ bcom ldan 'das gal te bdag ma mchis na/ ji ltar dge ba dang mi dge ba'i las dang 'bras bur 'brel par 'gyur zhes zhus pa dang / bcom ldan 'das kyis/ sems dul ba ni dge ba ste/ /dul ba'i sems kyis bde ba bskyed/ /ces bka' stsal pas/ kun rdzob tu rnam par shes pa la bdag dang bdag nyid du khas blangs nas/ sdug bsngal la sogs pa'i bden pa mthong ba'i dus na rnam par shes pa bdag ma yin/ bdag rnam par shes pa dang ldan pa ma yin/ rnam par shes pa la bdag med bdag la rnam par shes pa med do zhes gsungs pas/ de ltar dam bcas pa la dam bcas pa'i skyon du mi 'gyur ba dang 'dra bar/ 'dir yang dngos po rnams don dam par skye ba med pa yin yang / kun rdzob tu rgyu dang rkyen so sor nges pa las rten cing 'brel bar 'byung ba smras pa la dam bcas pa'i skyon du mi 'gyur ro/ /de la dam bcas pa'i skyon du 'gyur bar brjod na ni des na rang gi sde pa dag gis gang gis de skad ces bka' stsal pa'i/ bcom ldan 'das la yang dam bcas pa'i skyon gyis brgal bar bya ba'i rigs so/ /'thad pa gang zhe na/ de'i phyir dper na sprul pa'i skyes bu skye ba la skyes bu'i ngo bo nyid du skye ba med pa de bzhin du/ sgyu ma dang smig rgyu lta bu'i nang gi skye mched kyi bdag nyid skye ba yang kun rdzob tu yin gyi/ don dam par ma yin pas nyes pa med do zhes bya ba smras te/ ji skad bstan zhe na/ dper na de bzhin gshegs pa 'am/ de bzhin gshegs pa'i nyan thos rdzu 'phrul dang ldan pas sprul pa'i skyes bu gang sprul par mdzad pa de la mgo dang / rgyab dang / lto dang / rkang lag la sogs pa dang ldan pa nyid kyis sprul pa'i skyes bu skye ba ni yod la/ de la sems dang sems las byung ba/ tshor ba dang / sems dang / 'du shes dang / yid la byed pa dang / reg pa la sogs pa med pas/ skyes bu'i ngo bo nyid du skye ba med pa de bzhin du/ ji ltar sgyu ma mkhan gyi nor bu dang / gsang sngags dang / sman gyi rgyu las byung ba'i skyes bu bskyed pa la sems dang sems las byung ba la sogs pa med pas sems can du bgrang ba med pa'i phyir skyes bu'i ngo bo nyid du skye ba med pa lta bu dang / ji ltar sa phyogs rlan pa la nyi ma'i 'od zer gyis gdungs pa na nam mkha' la rlangs pa'i smig rgyu chur 'khrul pa 'byung ba la chu'i yon tan med pas chu'i ngo bo nyid du skye ba med pa lta bu'i nang gi skye mched kyi bdag nyid sems can du bgrang ba'i phung po rnams skye ba yang kun rdzob tu skye ba yin gyi/ don dam pa ni skye ba med pa yin pas 'di la dam bcas pa'i skyon du 'gyur ba'i nyes pa med do/ /'dir bstan bcos rnam par bshad par bya ba la rab tu byed pa'i skabs thams cad du gzhan dag gis rang gi tshig dang 'gal ba dang / lung dang 'gal ba dang / 'jig rten dang 'gal ba dang / mngon sum dang 'gal ba dang / rjes su dpag pa dang 'gal ba dag gis rgol bar byed pa de dag thams cad kyi lan ni 'grel pa byed pa nyid kyis bris pa 'di nyid yin par shes par bya ste/ 'og nas yang nas yang du rgya cher bzlas par bya mi dgos so/ /gzhan dag na re skye ba'i 'og tu 'gag pa dgag par rigs te de sngon du 'gro ba can yin pa'i phyir/ chad pa bzhin no zhes zer ro zhes bya ba ni rgol ba gzhan dag 'di la rigs pa'i mtshan nyid kyis kyang nyes pa med par gyur pa dang / de'i 'og tu bud med dang dmangs rigs ya mtshan bskyed pa yang rang bzo'i nyes pa gzhan sgrub pas skyon 'dogs par byed pa yin no/ /gzhan dag na re/ zhes bya ba ni rgol ba gzhan dag na re'o/ /skye ba'i 'og tu 'gag pa dgag par rigs te zhes bya ba ni mdo mdzad pas/ 'gag pa med pa skye med pa/ /chad pa med pa rtag med pa/ /zhes bya ba la sogs pa bstan bcos kyi lus rnam par gzhag pa'i tshig smras pa de la 'dir rgol ba gzhan dag na re/ tshig de ma legs te/ 'dir dngos po skyes nas 'gag par 'gyur gyi/ ma skyes na mi 'gag pas 'dir 'gag pa med pa zhes bya bas/ 'gag pa bkag pa dang / skye ba med pa zhes bya bas skye ba dgag pa de'i go rims mi rigs te/ 'di ltar skye ba med pa 'gag pa med pa zhes bya ba de ltar brjod kyang sngar skye ba bkag pa/ de'i 'og tu 'gag pa bkag par rigs so zhes zer ba ste/ de ni bsgrub par bya ba chos yin no/ /de'i sngon du 'gro ba can yin pa'i phyir zhes bya ba 'di ni phyogs kyi chos yin no/ /de zhes bya ba'i sgras ni skye ba bzung ngo / /sngon du 'gro ba can yin pa'i phyir zhes bya ba ni 'gag pa gang la skye ba de sngon du 'gro ba yod pa de ni skye ba sngon du 'gro ba can yin gyi 'gag pa ste 'gag pa ni skye ba sngon du 'gro ba can yin pa'i phyir ro/ /chad pa bzhin no zhes bya ba 'di ni dpe yin no/ /de la chad pa bzhin no zhes bya ba 'di ni khyed kyi mdo byed pas/ 'gag pa med pa skye med pa/ /chad pa med pa zhes smras pa'i rim gyis skye ba med pa zhes bya ba'i 'og tu chad pa med pa zhes smras pas/ skye ba'i 'og tu chad pa bkag pa bzhin te/ chad pa de yang skye ba sngon du 'gro ba can yin pa'i phyir/ skye ba bkag pa'i 'og tu chad pa bkag pa ni rigs te/ 'di ltar skyes pa'i rgyun 'jig pa'i mtshan nyid ni chad pa yin pas/ de'i phyir skye ba bkag pa'i 'og tu chad pa bkag pa bzhin du 'dir yang skye ba bkag pa'i 'og tu 'gag pa dgag par rigs na/ 'gag pa sngar bkag la skye ba phyis bkag pas/ de'i phyir mdo byed pas nyes par smras pa nyid yin no zhes bya ba'i tha tshig go zhes zer ro zhes bya ba ni rgol ba gzhan dag 'di la rigs pa'i mtshan nyid kyis kyang nyes pa med par gyur pa dang / de'i 'og tu bud med dang dmangs rigs ya mtshan bskyed pa dang rang bzo'i nyes pa gzhan sgrub pas skyon 'dogs par byed pa dag de skad zer ba yin no/ /de skad rgol ba de'i lan du 'dir 'grel pa byed pas 'khor ba la thog ma med pa'i phyir/ 'gag pa sngon du 'gro ba can gyi skye ba yang phyis dgag par khas ma blangs pas gtan tshigs ma nges pa'i skyon yod do zhes bya ba smras so/ /de la 'khor ba la thog ma med pa'i phyir 'gag pa sngon du 'gro ba can gyi skye ba yang phyis/ dgag par khas ma blangs pa zhes bya ba ni 'di skad bstan te/ gal te 'khor ba la thog ma yod na ni dngos po rnams kyi 'gag pa skye ba sngon du 'gro ba can kho nar 'gyur bas/ des na skye ba sngar bstan cing de'i 'og tu 'gag pa bstan la/ de nyid kyi rim gyis skye ba dgag pa'i 'og tu 'gag pa dgag par yang rigs par 'gyur ba zhig na 'khor ba la thog ma med pa'i phyir nang gi dngos po rnams kyi skye ba yang shi ba zhes bya ba 'das ma thag pa'i 'gag pa sngon du 'gro ba can yin la/ phyi rol gyi dngos po rnams kyi skye ba yang rgyu gcig nas gcig tu brgyud pa'i 'gag pa sngon du 'gro ba can yin par mthong ba'i phyir/ skye ba'i 'og tu 'gag pa dgag pa kho nar yang khas ma blangs la/ 'gag pa sngon du 'gro ba can gyi skye ba yang phyis dgag par khas ma blangs pa'o/ /gtan tshigs ma nges pa'i skyon yod do zhes bya ba ni/ khyod kyis skye ba'i 'og tu 'gag pa dgag pa'i rigs so zhes smras pa'i gtan tshigs de la ma nges pa'i skyon yod pa ste/ ji re zhig 'gag pa ni skye ba sngon du 'gro ba can yin pa'i phyir chad pa bzhin pas/ 'gag pa phyis dgag par bya ba zhig gam/ 'on te skye ba ni dgag pa'i rgyu las byung ba'i phyir skye ba phyis dgag par bya ba ma nges pas khyod kyi gtan tshigs de mi rung ngo zhes bya ba'i tha tshig go/ /gtan tshigs de ma nges pa'i skyon yod pa kho na'i phyir slob dpon gyis mdzad pa 'di la tshig gi skyon med pa 'ba' zhig tu yang ma zad de/ 'di ltar gzhan yang dgag pa ni skye ba'i rim pa la mi ltos pa'i phyir dang zhes bya ba smras te/ de'i phyir yang tshig gis nyes pa med do/ /zhes bya bar sbyar ro/ /'di skad bstan te bstan bcos gang la dngos por gyur pa'i tshig don rnam par 'jog par byed pa de la ni tshig gi don 'di ni sngar rnam par gzhag par byas la/ tshig gi don 'di ni phyis rnam par gzhag par bya'o zhes brjod par bya ba yin gyi/ stan bcos 'di la ni 'gag pa dang skye ba zhes bya ba la sogs pa'i tshig gi don de dag thams cad bkag pas bzhed pa 'grub par dgongs pas de'i phyir tshig gi don de dag las gang kho na'i dgag pa smras pa de kho na rnam par mi rtog pa'i ye shes kyi rjes su mthun pa yin no/ /de lta bas na snga phyi dgag pa'i rim pa dang tshig gi go rims nges par bya ba gang yin pa de skabs 'dir mi dgos so/ /de'i phyir don brtag pa yin pa'i phyir dang zhes bya ba smras te/ gang gi phyir 'di ni bstan bcos kyi don dngos po rnams kyi ngo bo nyid brtag cing dpyad pa yin pa de'i ji ltar brda sprod pa la sgra dang sgra'i rang gi mtshan nyid dang / rang bzo'i mtshan nyid brtag cing dpyad pa lta bu mi dgos so/ /tshig gzhan du byas na yang thal ba mtshungs par nye bar gnas pa'i phyir nyes pa med do zhes bya ba ni rgyu de dag khong nas mdo mdzad pa la nyes par smras pa nyid med pa 'ba' zhig tu yang ma zad de/ 'di ltar tshig gzhan du byas na yang brgal zhing brtag pa ha cang thal ba mtshungs par nye bar gnas pa'i phyir te/ gang gi tshe/ 'gag pa med pa skye med pa/ /zhes smras nas yang de'i tshe yang khyod na re/ ci'i phyir skye ba med pa 'gag pa med pa zhes ma brjod ces rgol zhing rtog pa ha cang thal bar byed par 'gyur la/ gang gi tshe skye ba med pa 'gag pa med pa zhes smras na yang de'i tshe khyod na re/ ci'i phyir/ 'gag pa med pa skye med pa/ /zhes ma brjod ces rgol zhes rtog pa ha cang thal ba mtshungs par nye bar gnas pa'i phyir khyod kyi brgal zhing brtag pa'i tshig de ni gyi na'o/ /nyes pa med do zhes bya ba ni 'grel pa byed pas lan gyi lam de dag gis nyes par brtags na/ slob dpon gyis mdzad pa'i skabs 'di la rgol ba gzhan dag gis smras pa'i nyes pa med do// //bam po drug pa/ bstan bcos 'dir 'dus byas kyi chos thams cad kyi dngos po nyid 'gog par byed pas de'i phyir sangs rgyas pa dag gis kyang bstan bcos 'di mi bzod pas de'i phyir/ rang gi sde pa dag las kha cig bstan bcos brtsam pa dgag par 'dod pa dag na re/ rten cing 'brel bar 'byung ba skye ba med pa la sogs pa'i khyad par dang ldan pa ni 'dus ma byas yin pa'i phyir/ kho bo cag gi phyogs la yang grub pas/ rten cing 'brel par 'byung ba ni nyan thos dang thun mong ma yin pa nyid ma yin te/ de'i phyir bstan bcos brtsam pa rigs pa ma yin no zhes zer ro zhes bya ba smras te/ 'dis ni bstan bcos 'dir 'dus byas kyi chos thams cad kyi dngos po nyid 'gog par byed pas de'i phyir sangs rgyas pa dag gis kyang / bstan bcos 'di ni bzod pas 'dir nyan thos bye brag tu smra ba dag de skad zer ro zhes bya bar sbyar ro/ /de la rang gi sde pa dag las zhes bya ba la/ rang gi zhes bya ba ni rang gi phyogs gang la sde pa gang dag yod pa de dag ni rang gi zhes bya'o/ /sde zhes bya ba ni tshoms dang ris dang tshogs zhes bya ba dag dang don gcig go/ /pa dag ces bya ba ni der gtogs pa dag go/ /las zhes bya ba'i sgra ni nges par gzung ba ste/ rang gi sde pa dag kho na las yin gyi/ gzhan gyi sde pa dag las ni ma yin no zhes bya ba'i tha tshig go/ /kha cig ces bya ba ni nyan thos bye brag tu smra ba dag go/ /bstan bcos zhes bya ba ni dbu ma zhes bya ba'i bstan bcos 'di'o/ /brtsam pa zhes bya ba ni dbu ma zhes bya ba ni bstan bcos 'di brtsam pa dang / yid la 'jug pa dang 'di bya ba'o/ /dgag par 'dod pa dag ces bya ba ni gang dag dbu ma zhes bya ba'i bstan bcos 'di mi bya zhing dgag par 'dod pa de dag ni bstan bcos brtsam pa dgag par 'dod pa dag go/ /na re zhes bya ba ni bstan bcos brtsam pa dgag par 'dod pa de dag na re 'di skad ces zer ro zhes bya bar sbyar ro/ /rten cing 'brel par 'byung ba skye ba med pa la sogs pa'i khyad par dang ldan pa ni zhes bya ba ni shes rab kyi pha rol tu phyin pa las 'byung ba/ khyad par gyi gzhi rten cing 'brel bar 'byung ba zhes bya ba/ khyad par skye ba med pa dang / 'gag pa med pa dang / chad pa med pa dang / rtag pa med pa dang / 'ong ba med pa dang / 'gro ba med pa dang / don tha dad pa ma yin pa dang / don gcig pa ma yin pa dang ldan pa/ bstan bcos dbu ma zhes bya ba 'di'i lus su bzhag pa gang yin pa de'o/ /'dus ma byas yin pa'i phyir zhes bya ba ni de ltar shes rab kyi pha rol tu phyin pa las 'byung ba'i rten cing 'brel par 'byung ba skye ba med pa la sogs pa'i khyad par dang ldan pa de khyed dbu ma pa na re/ 'dus byas ma yin pas 'dus ma byas yin pa'i phyir nyan thos la sogs pa dang / thun mong ma yin no zhes zer ba'o/ /kho bo cag gi phyogs la yang ma grub pas zhes bya ba ni gal te de lta na kho bo cag nyan thos bye brag tu smra ba'i phyogs la yang rten cing 'brel par 'byung ba skye ba med pa la sogs pa'i khyad par dang ldan pa ni 'dus ma byas nyid du yod par grub ste/ 'di ltar kho bo cag gi phyogs la yang 'dus ma byas bzhi po dag ni rdzas su yod par 'dod pa'i phyir te/ bzhi gang zhe na/ nam mkha' dang / so sor ma brtags par 'gog pa dang / so sor brtags te 'gog pa dang / de bzhin nyid do/ /kho bo cag gi rten cing 'brel par 'byung ba skye ba med pa la sogs pa'i khyad par dang ldan pa 'dus ma byas de dag gang zhe na/ 'di ltar/ de la 'jug pa mi sdug dang / /rdul dang 'byung ba dran pa dang / /zhes bya ba nas de ma thag tu dro bar gyur pa dang / rtse mo dang / bzod pa dang / 'jig rten pa'i chos kyi mchog dang / zag pa med pa'i chos shes pa'i bzod pa dang / chos shes pa dang / rjes su shes pa'i bzod pa dang / rjes su shes pa zhes bya ba sems kyi skad cig ma bcu drug gi rim gyis/ slob pa thams cad kyi mthar rdo rje lta bu'i ting nge 'dzin gyi nyon mongs pa rnams zad pa dang / mi skye ba shes pa'i shes pa skye ba gang yin pa 'di ni kho bo cag gi rten cing 'brel par 'byung ba skye ba med pa la sogs pa'i khyad par dang ldan pa 'dus ma byas yin no/ /de ci'i phyir rten cing 'brel par 'byung ba zhes bya zhing / ci'i phyir 'dus ma byas zhes kyang bya zhe na/ 'di ltar de ni rgyu gcig nas/ gcig tu brgyud pas bskyed pa yin pa'i phyir ni rten cing 'brel bar 'byung ba zhes bya la/ de la mngon sum gyi rgyu med pa'i phyir ni 'dus ma byas zhes bya ste/ ji skad du/ ji ltar bong ba gnam 'gro la/ /lag pa'i rgyu ni yod pa dang / /de nyid 'bab la rgyu med pas/ /de la 'phen rgyu 'ba' zhig go/ / zhes gsungs pas/ dper na bong ba gnam du 'phangs pa la ni lag pa'i shugs kyi rgyu yod la/ de nyid thur du 'bab pa la ni rgyu med pas/ de la yar 'phen pa la ni mngon sum gyi rgyu yod kyi/ phyir 'bab pa la ni rgyu med de de brgyud pa'i rgyu las 'byung ba dang 'dra bar/ kho bo cag gi zad pa dang mi skye ba shes pa 'di la yang dang po mi sdug pa bsgom pa la sogs pa brgyud pa'i rgyu yod pas rten cing 'brel par 'byung ba zhes kyang bya la/ mngon sum gyi rgyu med pas 'dus ma byas zhes kyang bya ste/ de'i phyir shes rab kyi pha rol tu phyin pa las 'byung ba'i rten cing 'brel bar 'byung ba skye ba med pa la sogs pa'i khyad par dang ldan pa 'dus ma byas gang yin pa de ni kho bo cag gi phyogs la yang grub pas so/ /rten cing 'brel par 'byung ba ni nyan thos dang thun mong ma yin pa nyid ma yin te zhes bya ba ni de ltar shes rab kyi pha rol tu phyin pa las 'byung ba'i rten cing 'brel bar 'byung ba skye ba med pa la sogs pa'i khyad par dang ldan pa 'dus ma byas pa gang yin pa de kho bo cag gi phyogs la yang grub pas de'i phyir/ rten cing 'brel par 'byung ba ni nyan thos dang thun mong ma yin pa nyid ma yin te/ thun mong kho na yin no zhes bya ba'i tha tshig go/ /de'i phyir bstan bcos brtsam pa rigs pa ma yin no zhes bya ba ni/ de la rten cing 'brel bar 'byung ba nyan thos dang thun mong ma yin pa de'i phyir/ 'dir bstan bcos byed pas dbu ma zhes bya ba'i bstan bcos 'di brtsam pa rigs pa ma yin no zhes bstan bcos brtsam pa 'di 'gog par byed pa yin no zhes zer ro zhes bya ba ni/ bstan bcos 'dir 'dus byas kyi chos thams cad kyi dngos po nyid 'gog par byed pas/ de'i phyir sangs rgyas pa dag gis kyang bstan bcos 'di mi bzod pas/ nyan thos bye brag tu smra ba dag de skad zer ba yin no/ /de skad rgol ba de'i lan du 'dir 'grel pa byed pas/ rten cing 'brel par 'byung ba skye ba med pa la sogs pa'i khyad par dang ldan pa ni dgag pa'i tshul gyis ston pa'i phyir dang / rten cing 'brel bar 'byung ba 'dus ma byas yod pa nyid du ston pa la ni rjes su dpag pa med pa'i phyir ro zhes bya ba la sogs pa smras te/ 'dis ni sngar nyan thos bye brag tu smra ba rnams na re/ rten cing 'brel bar 'byung ba skye ba med pa la sogs pa khyad par dang ldan pa ni 'dus ma byas yin pa'i phyir kho bo cag gi phyogs la yang grub pas/ rten cing 'brel par 'byung ba ni nyan thos dang thun mong ma yin pa nyid ma yin te/ zhes zer ba'i lan du/ shes rab kyi pha rol tu phyin pa las 'byung ba'i rten cing 'brel par 'byung ba'i 'dus ma byas dang / nyan thos bye brag tu smra ba'i grub pa'i mtha' las smra ba'i rten cing 'brel par 'byung ba 'dus ma byas ni khyad par shin tu che ba'i phyir rten cing 'brel par 'byung ba ni nyan thos dang thun mong ma yin pas de'i phyir bstan bcos 'di brtsams pa ni mi rigs pa ma yin no zhes bya bar ston to/ /de la rten cing 'brel bar 'byung ba ni skye ba med pa la sogs pa'i khyad par dang ldan pa ni dgag pa'i tshul gyis ston pa'i phyir dang zhes bya ba ni/ kho bo ni shes rab kyi pha rol tu phyin pa las 'byung ba khyad par gyi gzhi rten cing 'brel par 'byung ba zhes bya ba khyad par skye ba med pa dang / 'gag pa med pa dang / chad pa med pa dang / rtag pa med pa dang / 'ong ba med pa dang / 'gro ba med pa dang / don tha dad pa ma yin pa dang / don gcig pa ma yin pa dang ldan pa/ bstan bcos dbu ma zhes bya ba 'di'i lus su bzhag pa gang yin pa ni/ skye ba med pa dang / 'gag pa med pa zhes bya ba la sogs pa dgag pa'i tshul gyis ston la/ khyod kyis skye ba med pa zhes bya ba de dngos po'i tshul du khas len pas khyad par shin tu che ba'i phyir/ rten cing 'brel bar 'byung ba ni nyan thos dang thun mong ma yin pas de'i phyir bstan bcos brtsam pa mi rigs pa ma yin no zhes bya ba'i tha tshig go/ /rten cing 'brel par 'byung ba 'dus ma byas yod pa nyid du ston pa la ni rjes su dpag pa med pa'i phyir ro zhes bya ba ni gal te nyan thos bye brag tu smra ba khyed na re/ rten cing 'brel bar 'byung ba de dngos po'i tshul du ni med mod kyi/ 'on kyang de 'dus ma byas yod pa nyid du ston na mi de'i phyir rten cing 'brel par 'byung ba 'dus ma byas yod pa nyid du ston pa la ni rjes su dpag pa med pa'i phyir te/ rten cing 'brel par 'byung ba 'dus ma byas yod pa nyid du ston pa la ni tshig tsam gyis gzhan la go bar byar mi rung ste/ rjes su dpag pa'i tshad ma dgos na rjes su dpag pa'i gsal ba dang de kho na de yang khyod la med pa/ khyod sun dbyung ba'i gsal ba dang de kho na ni nga la yod pas khyad par shin tu che ba'i phyir/ rten cing 'brel par 'byung ba ni nyan thos dang thun mong ma yin pas de'i phyir bstan bcos brtsam pa mi rigs pa ma yin no zhes bya ba'i tha tshig go/ /rkyen nges pa las skyes pa de 'dus ma byas nyid du rtog na zhes bya ba ni 'grel pa byed pas/ nyan thos bye brag tu smra ba'i dogs pa bsu ba'i tshig yin te/ sngar rten cing 'brel bar 'byung ba 'dus ma byas yod pa nyid du ston pa la ni rjes su dpag pa med pa'i phyir ro zhes sun dbyung ba'i gsal ba dang de kho na bstan pa dang / 'dir gal te nyan thos bye brag tu smra ba dag rten cing 'brel par 'byung ba 'dus ma byas yod pa nyid du ston pa la rjes su dpag pa'i gsal ba dang de kho na bstan pa'i phyir/ rkyen nges pa las skye ba de 'dus ma byas nyid du rtog na de yang mi rung bar ston to/ /de la rkyen nges pa las skye ba de 'dus ma byas nyid du rtog na zhes bya ba la/ rkyen nges pa las zhes bya ba ni 'di ltar de la 'jug pa mi sdug dang / rngub pa dang 'byung ba dran pa dang / zhes bya ba nas/ de ma thag tu/ dro bar gyur pa dang / rtse mo dang / bzod pa dang / 'jig rten pa'i chos kyi mchog dang / zag pa med pa'i chos shes pa'i bzod pa dang / chos shes pa dang / rjes su shes pa'i bzod pa dang / rjes su shes pa zhes bya ba sems kyi skad cig ma bcu drug gis rim gyis slob pa thams cad kyi mtha' rdo rje lta bu'i ting nge 'dzin gyis nyon mongs pa rnams zad pa dang mi skye ba shes pa'i shes pa skye ba gang yin pa de'i rkyen dang po mi sdug pa bsgom pa la sogs pa brgyud pa gang dag yin pa de dag ni rkyen nges pa zhes bya'o/ /de las skye ba de zhes bya ba ni rkyen nges pa de las skye ba zad pa dang mi skye ba shes pa'i shes pa skye ba de'o/ /de 'dus ma byas nyid du rtog na zhes bya ba ni zad pa dang mi skye ba shes pa'i shes pa de rkyen nges pa dang po mi sdug pa bsgom pa la sogs pa brgyud pa'i rgyu las byung bar zad kyi/ /de la mngon sum gyi rgyu bar du ma chod pa nyid med pas des na bral ba'i 'bras bu'i dbang du byas te 'dus ma byas nyid du rtog na'o/ /de ltar rtog na de yang mi rung ste ci'i phyir mi rung zhe na/ de'i phyir skye ba bkag pa nyid kyi phyir de'i chos nyid mi srid pa'i phyir ro zhes bya ba smras te/ skye ba bkag pa nyid kyi phyir zhes bya ba ni khyod kyi rkyen nges pa las skye ba zad pa dang / mi skye ba shes pa'i shes pa skye ba de kho bos don dam par bkag pa nyid kyi phyir ro/ /de'i chos nyid mi srid pa'i phyir ro zhes bya ba ni skye ba de'i chos nyid 'dus ma byas nyid mi srid pa'i phyir te/ 'di ltar khyod kyi rkyen nges pa las skye ba zad pa dang mi skye ba shes pa'i shes pa skye ba de kho bos don dam par bkag pa nyid kyi phyir skye ba de'i chos nyid 'dus ma byas nyid kyang mi srid pas de'i phyir khyod rkyen nges pa las skye ba de 'dus ma byas nyid du rtog na de yang mi rung ngo / /de lta bas na khyod la rten cing 'brel par 'byung ba 'dus ma byas yod pa nyid du ston pa la ni rjes su dpag pa'i gsal ba dang de kho na med la/ kho bo la ni khyod kyis rten cing 'brel bar 'byung ba 'dus ma byas yod pa nyid du ston pa sun dbyung ba'i gsal ba dang / de kho na yod pas de'i phyir rten cing 'brel bar 'byung ba nyan thos dang thun mong ma yin pas bstan bcos brtsam pa mi rigs pa ma yin no/ /gzhan yang nyan thos bye brag tu smra ba'i rkyen nges pa las skye ba de 'dus ma byas nyid du rtog pa sun dbyung ba'i gsal ba dang de kho na bstan pa'i phyir/ skye ba ni 'dus ma byas pa yin te/ rgyu dang ldan pa'i phyir gnas pa bzhin no zhes bya ba smras te/ de la skye ba ni 'dus ma byas ma yin te zhes bya ba ni phyogs yin te/ da ltar dang ma 'ongs pa'i nyon mongs pa rnams zad pa dang / mi skye ba shes pa'i shes pa skye ba gang yin pa de ni 'dus ma byas ma yin no/ /rgyu dang ldan pa'i phyir zhes bya ba 'di ni phyogs kyi chos yin te/ ci'i phyir skye ba ni 'dus ma byas ma yin zhe na/ rgyu dang ldan pa'i phyir te/ 'di ltar bye brag tu smra ba khyed kyis zad pa dang mi skye ba shes pa'i shes pa skye ba de rkyen nges pa las skye'o zhes khas blangs pas de rgyu dang ldan pa'i phyir 'dus ma byas pa ma yin no/ /gal te khyed 'di skad ces rkyen nges pa las skye ba zhes bya ba de ni de brgyud pa'i rgyu las skye bar smras pa yin gyi/ mngon sum gyi rgyu las skye bar ma smras pas de'i phyir dbu ma pa khyed kyi gtan tshigs kyi don ma grub pa nyid yin no zhes kho bo la zer na/ de ltar na yang kho bo ni rgyu brgyud pa'am/ mngon sum du smra bar 'dod pa ma yin gyi/ chos kyi spyi nyid bzung nas rjes su dpag par byed de/ rgyu brgyud pa'am/ mngon sum gang yin pa de'i bye brag mi sems pas de'i phyir kho bo'i gtan tshigs kyi don ma grub pa ma yin no/ /gnas pa bzhin no zhes bya ba 'di ni dpe yin te/ skye ba rgyu dang ldan pa'i phyir 'dus ma byas ma yin par ci mngon zhe na/ gnas pa bzhin te/ dper na 'dus byas kyi chos gnas pa rnams kyang rgyu dang ldan pa'i phyir/ 'dus ma byas ma yin pa bzhin du/ nyon mongs pa rnams zad pa dang / mi skye ba shes pa'i shes pa skye ba de yang rgyu dang ldan pa'i phyir 'dus ma byas ma yin no/ /ci ste skye ba 'dus ma byas ma yin pa nyid spang pa'i phyir skye ba'i rgyu mi 'dod na ni de'i tshe rgyu med par smra ba nyid du 'gyur zhing / lung dang yang 'gal te/ 'di ltar lung las/ sangs rgyas pa rnams kyi dngos po ni rgyu med par mi skye'o zhes gsungs pa'i phyir ro/ /rjes su dpag pa las de med pas mi rigs pa ma yin no zhes bya ba ni mjug bsdu ba yin te/ de ltar rjes su dpag pa'i sgo nas nyan thos bye brag tu smra ba la rten cing 'brel par 'byung ba thun mong ba nyid ces bya ba de med pas/ slob dpon gyis bstan bcos brtsam pa mi rigs pa ma yin no zhes bya ba'i tha tshig go/ / bstan bcos 'dir shes rab kyi pha rol tu phyin pa las 'byung ba khyad par gyi gzhi rten cing 'brel bar 'byung ba zhes bya ba/ khyad par skye ba med pa dang / 'gag pa med pa dang / chad pa med pa dang / rtag pa med pa dang / 'ong ba med pa dang / 'gro ba med pa dang / don tha dad pa ma yin pa dang / don gcig pa ma yin pa dang ldan pa la sangs rgyas pa dag las/ kha cig blo gros ngan pa'i dra bas g.yogs pa dag don la log par rtogs pas de'i phyir/ rang gi sde pa dag las gzhan dag 'di skad ces skye ba med pa ni de las gzhan skye ba med pa'i phyir te dbang phyug ma yin pa bzhin no/ / 'gag pa med pa ni mu stegs byed kyis yongs su brtags pa'i 'gag pa med pa'i phyir te/ bdag med pa bzhin no/ /chad pa med pa dang rtag pa med pa ni rgyu la brten te 'bras bu skye zhing / 'bras bu skye ba na rgyu 'gag pa'i phyir ro/ /'ong ba med pa dang 'gro ba med pa ni skye ba'i yul nyid du 'jig pa'i phyir ro/ /don tha dad pa ma yin pa dang don gcig pa ma yin pa ni de nyid dang gzhan du brjod par bya ba nyid ma yin pa'i phyir te/ /nor bu 'am bud shing ngam nyi ma dang phrad pa las byung ba'i me bzhin no/ /de lta bu'i rten cing 'brel par 'byung ba ni gsung rab kyi tshul yin pa nyan thos dang thun mong ma yin pa nyid ma yin te/ de'i phyir bstan bcos brtsam mi dgos so zhes zer ro zhes bya ba smras te/ 'dir ni bstan bcos 'dir shes rab kyi pha rol tu phyin pa las 'byung ba/ khyad par gyi gzhi rten cing 'brel par 'byung ba zhes bya ba khyad par skye ba med pa dang / 'gag pa med pa dang / chad pa med pa dang / rtag pa med pa dang / 'ong ba med pa dang / 'gro ba med pa dang / don tha dad pa ma yin pa dang / don gcig pa ma yin pa dang ldan pa bstan pa la/ sangs rgyas pa dag las kha cig blo gros ngan pa'i dra bas g.yogs pa dag don la log par rtogs pas 'dir nyan thos mdo sde pa dag las kha cig de skad zer ro zhes bya bar sbyar ro/ /de la rang gi sde pa dag las zhes bya ba ni nyan thos mdo sde pa dag las so/ /gzhan dag zhes bya ba ni nyan thos mdo sde pa de dag las kha cig go/ /'di skad ces bya ba ni nyan thos mdo sde pa dag las kha cig 'di skad ces zer ro zhes bya bar sbyar ro/ /de dag 'di skad ces rten cing 'brel par 'byung ba skye ba med pa la sogs pa'i khyad par rnam pa brgyad dang ldan pa de gsung rab las 'byung ba ni bden na/ 'dir bstan bcos byed pas de'i don ma rtogs so zhes zer te/ de'i phyir de dag nyid na re/ skye ba med pa ni de las gzhan skye ba med pa'i phyir te/ dbang phyug ma yin pa bzhin no zhes zer ro/ /de la skye ba med pa ni zhes bya ba 'di ni phyogs te gsung rab las 'byung ba khyad par gyi gzhi rten cing 'brel par 'byung ba zhes bya ba'i khyad par skye ba med pa zhes bya ba ni'o/ /de las gzhan skye ba med pa'i phyir te zhes bya ba 'di ni phyogs kyi chos te/ 'di ltar mig dang gzugs dang snang ba dang nam mkha' dang yid la byed pa zhes bya ba rkyen gyi tshogs pa yod pa de las gzhan 'bras bu rna ba la sogs pa'i rnam par shes pa dang / bum pa dang snam bu la sogs pa dang / myu gu dang sdong bu la sogs pa skye ba med pa'i phyir skye ba med pa zhes bya ba 'am/ yang na 'bras bu mig gi rnam par shes pa de las gzhan 'bras bu rna ba la sogs pa'i rnam par shes pa dang / bum pa dang snam bu la sogs pa dang / myu gu dang sdong bu la sogs pa'i rigs mi mthun pa dag skye ba med pa'i phyir/ skye ba med pa zhes bya ba'i dngos po rnams la rnam pa thams cad du skye ba med pa ni ma yin te/ de lta bas na ni mig dang gzugs rnams la brten nas mig gi rnam par shes pa skye ba dang / yid dang chos rnams la brten nas yid kyi rnam par shes pa skye ba'i bar dang / sa bon dang sa dang chu dang me dang rlung dang nam mkha' dang dus kyi rgyu dang rkyen tshogs pa las myu gu skye ba dang / 'jim pa dang dbyug gu dang / 'khor lo dang / skud pa dang / chu dang me'i rgyu rkyen tshogs pa las bum pa skye ba dang / rgyu spun dang tshig pa dang / thag bzangs dang / 'ul bu dang / snas khyer dang / thag pa la sogs pa'i rgyu rkyen tshogs pa las snam bu skye ba dang / de bzhin du rgyu rkyen rigs mthun pa las 'bras bu rigs mthun pa skye ba ni yod do/ /dbang phyug ma yin pa bzhin no zhes bya ba 'di ni dpe ste/ dper na dbang phyug las dngos po rnams ni skye'o zhes gsungs pa las na/ dbang phyug ma yin pa las dngos po rnams skye bar shes te/ las dang nyon mongs pa las skye ba skye ba dang / sa bon dang rkyen las myu gu skye ba bzhin no/ /yang na dbang phyug ma yin pa bzhin no zhes bya ba ni/ dbang phyug ces bya ba ni rdzu 'phrul thob pas gcig tu gyur cing mang por 'gyur ba yin gyi/ dbang phyug ma yin pa ni rdzu 'phrul ma thob pa ste/ de la lus gzugs dngos las gzhan pa'i lus gzugs gnyis pa skye ba med kyang de la lus gzugs dngos nyid skye ba med pa ma yin pa bzhin du dngos po rnams kyi skye ba med pa yang de bzhin du blta'o zhes zer ro/ /'gag pa med pa ni zhes bya ba 'di yang phyogs te/ gsung rab las 'byung ba khyad par gyi gzhi rten cing 'brel bar 'byung ba zhes bya ba'i khyad par 'gag pa med pa zhes bya ba ni'o/ /mu stegs byed kyis yongs su brtags pa'i 'gag pa med pa'i phyir te zhes bya ba 'di yang phyogs kyi chos te/ 'di ltar mu stegs byed dag gis 'gag pa la rgyu yod par yongs su brtags pa/ ji skad du/ tshangs pa nyid ni 'jig rten 'byin/ /drag pos skye dgu sdud par byed/ /skyes bu nyid ni btang snyoms te/ /rang byung gnas skabs gsum yin no/ /zhes yongs su brtags pa lta bu'i 'gag pa med pa'i phyir 'gag pa med pa zhes bya ba'am/ mu stegs byed dag gis 'gag pa la rgyu yod par yongs su brtags pa/ ji skad du/ las kyis bskyed pa dag 'jig pa'i bskal pa'i mthar 'gag par 'gyur ro zhes yongs su brtags pa lta bu'i 'gag pa med pa'i phyir 'gag pa med pa zhes bya ba'i dngos po rnams la rnam pa thams cad du 'gag pa med pa ni ma yin te/ de lta bas na dngos po rnams rang gi ngang gis skad cig skad cig la 'gag pa ni yod do/ /bdag med pa bzhin no zhes bya ba 'di yang dpe ste/ dper na mu stegs byed dag gis bdag gi dngos po lus sam/ mthe bo 'am nas 'bru 'am khre rgod dam 'bras thug po che la sogs pa'i bong tshod tsam gyi nang gi byed pa'i skyes bu yod par khas blangs pa'i bdag de med kyang phung po lnga'i bdag nyid med pa ma yin pa bzhin du dngos po rnams kyi 'gag pa med pa yang de bzhin du blta'o zhes zer ro/ /chad pa med pa dang / rtag pa med pa ni zhes bya ba 'di yang phyogs te/ gsung rab las 'byung ba khyad par gyi gzhi rten cing 'brel bar 'byung ba zhes bya ba'i khyad par chad pa med pa dang / rtag pa med pa zhes bya ba ni'o/ /rgyu la brten te 'bras bu skye zhing 'bras bu skye ba na rgyu 'gag pa'i phyir ro zhes bya ba 'di yang phyogs kyi chos te/ 'di ltar chad pa zhes bya ba ni rgyun mi 'jug pa'i mtshan nyid yin na/ gang gi phyir rgyu la brten te rgyu'i stobs kyis 'bras bu skye ba de ni rgyun 'jug pa'i mtshan nyid skye ba yin pa de'i phyir chad pa med pa yin na/ gang gi phyir 'bras bu skye ba skye ba'i dus nyid na mtshan nyid mi mthun pa'i rgyu 'gag pa de'i phyir rtag pa med pa yin no/ /zhes zer ro/ /'ong ba med pa dang / 'gro ba med pa ni zhes bya ba 'di yang phyogs te/ gsung rab las 'byung ba khyad par gyi gzhi rten cing 'brel bar 'byung ba zhes bya ba'i khyad par 'ong ba med pa dang 'gro ba med pa zhes bya ba ni'o/ /skyes pa'i yul nyid du 'jig pa'i phyir ro zhes bya ba 'di yang phyogs kyi chos te/ 'di ltar yul gang nas yul gzhan du 'ong ba dang 'gro ba'i dngos po 'gag pa yang med de/ gang skye ba de ni skyes pa'i yul de nyid du 'jig pas gzhan du 'gro ba med pa'i phyir dang / gang yul gzhan du skye ba de yang skyes pa na skyes pa'i yul gzhan de nyid du 'jig pas 'dir 'ong ba med pa'i phyir 'ong ba med pa dang 'gro ba med pa yin no zhes zer ro/ /don tha dad pa ma yin pa dang / don gcig pa ma yin pa ni zhes bya ba 'di yang phyogs te/ gsung rab las 'byung ba khyad par gyi gzhi rten cing 'brel bar 'byung ba zhes bya ba'i khyad par don tha dad pa ma yin pa dang / don gcig pa ma yin pa zhes bya ba ni'o/ /de nyid dang gzhan du brjod par bya ba nyid ma yin pa'i phyir te zhes bya ba 'di yang phyogs kyi chos te/ 'di ltar dngos po rgyu rkyen gang las byung ba de ni rgyu rkyen de dang gcig pa nyid du brjod par bya ba nyid kyang ma yin la/ de dang tha dad pa nyid du brjod par bya ba nyid kyang ma yin pa'i phyir don tha dad pa ma yin pa dang / don gcig pa ma yin no/ /nor bu'am bud shing ngam nyi ma dang phrad pa las byung ba'i me bzhin no zhes bya ba 'di yang dpe ste/ dper na nor bu me shel dang phrad pa las byung ba'i me 'am/ bud shing dang phrad pa las byung ba'i me 'am/ nyi ma dang phrad pa las byung ba'i me gang yin pa de ni nor bu dang bud shing dang nyi ma dag las so sor btsal na/ nor bu dang bud shing dang nyi ma dag la med pas de'i phyir rgyu dang 'bras bu gnyis gcig pa nyid kyang ma yin la/ gang gi phyir me de ni nor bu dang bud shing dang nyi ma'i rkyen las byung bas de tha dad pa ma yin pa de'i phyir/ rgyu dang 'bras bu'i rigs mthun pa nyid tha dad pa yang ma yin pa bzhin du/ dngos po rnams kyang rgyu rkyen gang las byung ba'i rgyu rkyen de dang / don tha dad pa yang ma yin la/ don gcig pa yang ma yin no zhes zer ro/ /de lta bu'i rten cing 'brel bar 'byung ba ni gsung rab kyi tshul yin pas zhes bya ba ni skye ba med pa dang / 'gag pa med pa zhes bya ba la sogs pa khyad par rnam pa brgyad dang ldan pa de lta bu'i rten cing 'brel bar 'byung ba ni sangs rgyas kyi bkas rten cing 'brel bar 'byung ba skye ba med pa la sogs pa'i khyad par dang ldan pa yin par gsungs pas so/ /nyan thos dang thun mong ma yin pa nyid ma yin pa ste zhes bya ba ni gang gi phyir de lta bu'i rten cing 'brel bar 'byung ba de ni sde snod gsum po dag la yang yod pa de'i phyir nyan thos dang thun mong ma yin pa nyid ma yin te/ thun mong kho na yin no zhes zer ro/ /de'i phyir bstan bcos brtsam mi dgos so zhes bya ba ni de ltar rten cing 'brel bar 'byung ba skye ba med pa la sogs pa'i khyad par dang ldan pa de ni gsung rab kyi tshul yin pas/ nyan thos dang thun mong nyid yin pa de'i phyir/ 'dir dbu ma zhes bya ba'i bstan bcos 'di brtsam mi dgos so zhes zer ba yin no zhes zer ro zhes bya ba ni bstan bcos 'dir shes rab kyi pha rol tu phyin pa las 'byung ba khyad par gyi gzhi rten cing 'brel bar 'byung ba zhes bya ba khyad par skye ba med pa dang / 'gag pa med pa dang / chad pa med pa dang / rtag pa med pa dang / 'ong ba med pa dang / 'gro ba med pa dang / don tha dad pa ma yin pa dang / don gcig pa ma yin pa dang ldan pa bstan pa la/ sangs rgyas pa dag las kha cig blo gros ngan pa'i dra bas g.yogs pa dag don la log par rtogs pas/ nyan thos mdo sde pa dag la kha cig de skad ces zer ba yin no/ /de skad ces rgol ba de'i [(]len [,]lan [)]du/ 'dir 'grel pa byed pas de ni mang po yang yin/ de ni sna tshogs kyang yin mod kyi/ de ni de lta ma yin no zhes bstan pa'i phyir/ skye ba nyid skye ba med pa'i ngo bo nyid kho nar ston pas/ rten cing 'brel bar 'byung ba skye ba med pa la sogs pa'i khyad par dang ldan pa khas len pa'i phyir/ de ni khyad par shin tu che ba de'i phyir bstan bcos brtsam mi dgos pa ma yin no zhes bya ba smras so/ /de la skye ba nyid skye ba med pa'i ngo bo nyid kho nar ston pas zhes bya bas ji skad bstan zhe na/ kho bo ni khyed nyan thos mdo sde pas mig dang gzugs rnams la brten te/ mig gi rnam par shes pa skye ba dang / sa bon dang rkyen la brten nas myu gu skye ba la sogs par khas blangs pa gang yin pa'i skye ba de nyid skye ba med pa'i ngo bo nyid kho nar ston pa dang / de bzhin du khyed kyis rang gi ngang gis 'gags pas 'gag pa yod par khas blangs pa dang / rgyu la brten te 'bras bu skye bas chad pa med par khas blangs pa dang / 'bras bu skye ba na rgyu 'gags pas rtag pa med par khas blangs pa dang / skyes pa'i yul gzhan nyid du 'jig pas 'ong ba med par khas blangs pa dang / skyes pa'i yul 'di nyid du 'jig pas 'gro ba med par khas blangs pa dang / rgyu rkyen dag la 'bras bu med pas don gcig pa ma yin par khas blangs pa dang / rgyu rkyen rigs mthun pa las 'bras bu rigs mthun pa 'byung bas don tha dad pa ma yin par khas blangs pa gang dag yin pa de dag thams cad 'gag pa med pa la sogs pa'i ngo bo nyid kho nar ston pas/ rten cing 'brel bar 'byung ba skye ba med pa la sogs pa'i khyad par dang ldan pa khas len pa'i phyir khyed dang khyad par shin tu che bas de'i phyir bstan bcos brtsam pa shin tu dgos so zhes bya bar ston to/ / rten cing 'brel bar 'byung ba skye ba med pa la sogs pa'i khyad par dang ldan pa khas len pa'i phyir zhes bya ba ni kho bo ni khyed kyis skye ba dang 'gag pa la sogs pa khas blangs pa nyid/ skye ba med pa dang / 'gag pa med pa la sogs pa'i ngo bo nyid kho nar ston pas shes rab kyi pha rol tu phyin pa las 'byung ba khyad par gyi gzhi rten cing 'brel bar 'byung ba zhes bya ba/ khyad par skye ba med pa dang 'gag pa med pa la sogs pa dang ldan pa khas len pa'i phyir ro/ /de ni khyad par shin tu che bas zhes bya ba ni khyed kyi khas blangs pa dang / kho bos khas blangs pa'i rten cing 'brel bar 'byung ba de ni khyad par shin tu che bas/ shes rab kyi pha rol tu phyin pa las 'byung ba'i rten cing 'brel bar 'byung ba skye ba med pa la sogs pa'i khyad par dang ldan pa de ni nyan thos dang thun mong ma yin pas so/ /de'i phyir bstan bcos brtsam mi dgos pa ma yin no zhes bya ba ni de ltar gang gi phyir khyad par shin tu che bas nyan thos dang thun mong ma yin pa de'i phyir 'dir slob dpon gyi zhal snga nas kyis dbu ma zhes bya ba'i bstan bcos 'di brtsam mi dgos pa ma yin te dgos pa kho na yin no zhes bya ba'i tha tshig go/ /de ltar bstan bcos brtsam mi dgos so zhes zer ba'i lan btab pa dang / 'dir gal te dmigs pa can dag 'di skad ces shes rab kyi pha rol tu phyin pa las 'byung ba'i rten cing 'brel bar 'byung ba'i skye ba med pa la sogs pa'i khyad par rnam pa brgyad dang ldan pa 'di ni rten cing 'brel bar 'byung ba'i mtshan nyid dang bral ba'i phyir/ dper na grangs can dag la sogs pa'i bstan bcos dang 'dra bas sangs rgyas kyi bka' ma yin no/ /rten cing 'brel bar 'byung ba'i mtshan nyid gang zhe na/ 'di lta ste/ lugs su 'byung ba nyid dang / lugs las bzlog pa nyid dang / rgyu dang 'bras bu'i dngos po nyid do/ /de la lugs su 'byung ba nyid gang zhe na/ bcom ldan 'das kyis rten cing 'brel bar 'byung ba'i yan lag bcu gnyis ji skad bka' stsal pa/ 'di lta ste/ ma rig pa'i rkyen gyis 'du byed rnams/ 'du byed kyi rkyen gyis rnam par shes pa/ rnam par shes pa'i rkyen gyis ming dang gzugs/ ming dang gzugs kyi rkyen gyis skye mched drug /skye mched drug gi rkyen gyis reg pa/ reg pa'i rkyen gyis tshor ba/ tshor ba'i rkyen gyis sred pa/ sred pa'i rkyen gyis len pa/ len pa'i rkyen gyis srid pa/ srid pa'i rkyen gyis skye ba/ skye ba'i rkyen gyis rga shi dang mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'byung bar 'gyur te/ de ltar na sdug bsngal gyi phung po chen po 'ba' zhig pa 'di 'byung bar 'gyur ro zhes gsungs pa yin no/ /lugs las bzlog pa nyid gang zhe na/ 'di lta ste/ ma rig pa 'gags pas 'du byed 'gag /'du byed 'gags pas rnam par shes pa 'gag / rnam par shes pa 'gags pas ming dang gzugs 'gag /ming dang gzugs 'gags pas skye mched drug 'gag /skye mched drug 'gags pas reg pa 'gag /reg pa 'gags pas tshor ba 'gag /tshor ba 'gags pas sred pa 'gag / sred pa 'gags pas len pa 'gag /len pa 'gags pas srid pa 'gag /srid pa 'gags pas skye ba 'gag /skye ba 'gags pas rga shi dang / mya ngan dang / smre sngags 'don pa dang / sdug bsngal ba dang / yid mi bde ba dang / 'khrug pa rnams 'gag par 'gyur te/ de ltar na sdug bsngal gyi phung po chen po 'ba' zhig pa 'di 'gag par 'gyur ro zhes gsungs pa yin no/ /rgyu dang 'bras bu'i dngos po nyid gang zhe na/ 'di lta ste/ ma rig pa ni rgyu'i dngos po nyid yin la/ 'du byed la sogs pa yan lag lhag ma bcu gcig po dag ni 'bras bu'i dngos po nyid yin no/ /yang na ma rig pa ni 'du byed rnams kyi rgyu'i dngos po nyid yin la/ 'du byed rnams ni ma rig pa'i 'bras bu'i dngos po nyid yin pa dang / 'du byed rnams ni rnam par shes pa'i rgyu'i dngos po nyid yin la rnam par shes pa ni 'du byed rnams kyi 'bras bu'i dngos po nyid yin pa dang / rnam par shes pa ni ming dang gzugs kyi rgyu'i dngos po nyid yin la/ ming dang gzugs ni rnam par shes pa'i 'bras bu'i dngos po nyid yin pa dang / ming dang gzugs ni skye mched drug gi rgyu'i dngos po nyid yin la/ skye mched drug ni ming dang gzugs kyi 'bras bu'i dngos po nyid yin pa dang / skye mched drug ni reg pa'i rgyu'i dngos po nyid yin la/ reg pa ni skye mched drug gi 'bras bu'i dngos po nyid yin pa dang / reg pa ni tshor ba'i rgyu'i dngos po nyid yin la/ tshor ba ni reg pa'i 'bras bu'i dngos po nyid yin pa dang / tshor ba ni sred pa'i rgyu'i dngos po nyid yin la/ sred pa ni tshor ba'i 'bras bu'i dngos po nyid yin pa dang / sred pa ni len pa'i rgyu'i dngos po nyid yin la/ len pa ni sred pa'i 'bras bu'i dngos po nyid yin pa dang / len pa ni srid pa'i rgyu'i dngos po nyid yin la/ srid pa ni len pa'i 'bras bu'i dngos po nyid yin pa dang / srid pa ni skye ba'i rgyu'i dngos po nyid yin la/ skye ba ni srid pa'i 'bras bu'i dngos po nyid yin pa dang / skye ba ni rga shi la sogs pa'i rgyu'i dngos po nyid yin la/ rga shi la sogs pa ni skye ba'i 'bras bu'i dngos po nyid yin pa'o/ /rten cing 'brel bar 'byung ba'i mtshan nyid de dag khyod kyi rten cing 'brel bar 'byung ba skye ba med pa la sogs pa'i khyad par dang ldan pa 'di la med pas/ de'i phyir sangs rgyas kyi bka' ma yin no zhes zer na/ 'dir de'i lan du 'di skad ces brjod par bya ste/ bcom ldan 'das kyis/ sdang bas chos rnams mi shes shing / /sdang bas chos rnams mi mthong ste/ /mi gang zhe sdang brten pa ni/ /de tshe mun pas mun nag 'gyur/ /zhes bka' stsal pa/ de ni legs par gsungs pa yin te/ de'i phyir zhe sdang gi dri ma mang po'i ling tog gis blo gros kyi mig bsgribs pa long ba lta bu khyod kyis kyang / ston ka'i nam mkha'i dkyil nas shar ba'i zla ba ltar gsal ba rten cing 'brel bar 'byung ba'i mtshan nyid lugs su 'byung ba nyid dang / lugs las bzlog pa nyid dang / rgyu dang 'bras bu'i dngos po nyid kyi yon tan dang ldan pa 'di yod bzhin du mi mthong ngo / /'di ltar rten cing 'brel bar 'byung ba 'di la yang mtshan nyid thams cad yod de/ 'di lta ste/ skye ba'i rkyen gyis 'gag pa dang / skye ba'i rkyen gyis chad pa dang / skye ba'i rkyen gyis rtag pa dang / skye ba'i rkyen gyis 'ong ba dang / skye ba'i rkyen gyis 'gro ba dang / skye ba'i rkyen gyis don tha dad pa dang / skye ba'i rkyen gyis don gcig par 'gyur ba gang yin pa de ni kun nas nyon mongs pa'i lugs su 'byung ba nyid yin no/ /'di lta ste/ skye ba med pas 'gag pa med pa dang / skye ba med pas chad pa med pa dang / skye ba med pas rtag pa med pa dang / skye ba med pas 'ong ba med pa dang / skye ba med pas 'gro ba med pa dang / skye ba med pas don tha dad pa med pa dang / skye ba med pas don gcig pa med par 'gyur ba gang yin pa de ni rnam par byang ba'i lugs las bzlog pa nyid yin no/ /'di lta ste/ skye ba med pa yod pas 'gag pa med pa yod pa dang / skye ba med pa yod pas chad pa med pa yod pa dang / skye ba med pa yod pas rtag pa med pa yod pa dang / skye ba med pa yod pas 'ong ba med pa yod pa dang / skye ba med pa yod pas 'gro ba med pa yod pa dang / skye ba med pa yod pas don tha dad pa ma yin pa yod pa dang / skye ba med pa yod pas don gcig pa ma yin pa yod pa gang yin pa de ni rnam par byang ba'i lugs su 'byung ba nyid yin no/ /gzhan yang rten cing 'brel bar 'byung ba skye ba med pa la sogs pa'i khyad par rnam pa brgyad dang ldan pa 'dir lugs su 'byung ba nyid dang / lugs las bzlog pa nyid kyi mtshan nyid ni nang dang phyi rol gyi dngos po thams cad la khyab pa yin gyi/ yan lag bcu gnyis po dag gi lugs su 'byung ba nyid dang / lugs las bzlog pa nyid kyi mtshan nyid ni nang gi dngos po 'ba' zhig la khyab pa yin te/ 'di ltar yan lag bcu gnyis po dag gi lugs su 'byung ba nyid dang / lugs las bzlog pa nyid kyi mtshan nyid ni nang gi dngos po rnams nyi tshe la yod par zad kyi/ phyi rol gyi dngos po rnams la med pa'i phyir dang / 'di'i lugs su 'byung ba'i mtshan nyid ni ji ltar nang gi dngos po rnams skyes pa'i rkyen gyis 'gag pa de bzhin du/ phyi rol gyi dngos po rnams skyes pa'i rkyen gyis kyang 'gag par 'gyur ba'i phyir dang / 'di'i lugs las bzlog pa'i mtshan nyid kyang / ji ltar nang gi dngos po rnams kyi skye ba med pas 'gag pa med pa de bzhin du phyi rol gyi dngos po rnams kyi skye ba med pas kyang 'gag pa med par 'gyur ba'i phyir ro/ /gzhan yang rten cing 'brel bar 'byung ba skye ba med pa la sogs pa'i khyad par rnam pa brgyad dang ldan pa 'di'i lugs su 'byung ba nyid kyi mtshan nyid ni kun nas nyon mongs pa dang / rnam par byang ba'i dngos po thams cad la khyab pa yin gyi/ yan lag bcu gnyis po dag gi lugs su 'byung ba nyid kyi mtshan nyid kyi mtshan nyid ni kun nas nyon mongs pa pa'i dngos po 'ba' zhig la khyab kyi/ rnam par byang ba'i dngos po la khyab pa ma yin te/ 'di ltar yan lag bcu gnyis po dag gi lugs su 'byung ba nyid kyi mtshan nyid ni ma rig pa'i rkyen gyis 'du byed rnams zhes bya ba la sogs pa kun nas nyon mongs pa pa'i dngos po 'ba' zhig la yod par zad kyi/ rnam par byang ba pa'i dngos po la med pa'i phyir dang / 'di'i lugs su 'byung ba nyid kyi mtshan nyid kyis ni skye ba'i rkyen gyis 'gag pa zhes bya ba la sogs pa kun nas nyon mongs pa pa'i dngos po rnams la yang khyab la/ skye ba med pa yod pas 'gag pa med pa yod ces bya ba la sogs pas rnam par byang ba pa'i dngos po rnams la yang khyab pa'i phyir ro/ /gzhan yang rten cing 'brel bar 'byung ba skye ba med pa la sogs pa'i khyad par rnam pa brgyad dang ldan pa 'di'i rgyu'i rtsa ba ni kun nas nyon mongs pa dang rnam par byang ba pa'i dngos po thams cad kyi mngon sum gyi rgyu nyid yin gyi/ yan lag bcu gnyis po dag gi rgyu'i rtsa ba ni kun nas nyon mongs pa pa'i dngos po thams cad kyi mngon sum gyi rgyu nyid ma yin te/ 'di ltar yan lag bcu gnyis pa dag gi rgyu'i rtsa ba ma rig pa ni 'du byed rnams nyi tshe'i mngon sum gyi rgyu yin gyi/ yan lag lhag ma rnams kyi mngon sum gyi rgyu nyid ma yin pa'i phyir dang / 'di'i kun nas nyon mongs pa'i rgyu'i rtsa ba skye ba yang 'gag pa la sogs pa kun nas nyon mongs pa pa'i dngos po thams cad kyi mngon sum gyi rgyu nyid kyang yin la/ rnam par byang ba pa'i rgyu'i rtsa ba skye ba med pa la yang 'gag pa med pa la sogs pa rnam par byang ba pa'i dngos po thams cad kyi mngon sum gyi rgyu nyid yin pa'i phyir ro/ /de ltar na rten cing 'brel par 'byung ba skye ba med pa la sogs pa'i khyad par rnam pa brgyad dang ldan pa 'di ni rten cing 'brel par 'byung ba'i mtshan nyid thams cad dang ldan pas dmigs pa can khyod kyi gtan tshigs kyi don nyid ma grub pa'i phyir/ 'di sangs rgyas kyi bka' ma yin pa ma yin te/ sangs rgyas kyi bka' kho na yin no/ / //bam po bdun pa/ zhar la bshad pas chog gi /da ni skabs nyid bsgrub par bya'o/ /da 'di man chad ni bstan bcos kyi gzhung nyid bshad par bya ste/ de'i phyir slob dpon gyis rten cing 'brel par 'byung ba skye ba med pa la sogs pa thun mong ma yin pa'i khyad par dang ldan pa de kho na ston par mdzad pa nyid kyis bcom ldan 'das la mngon par bstod nas zhes bya ba la sogs pa smras te/ 'di dag gis ni bstan bcos kyi gzhung nyid bshad par rtsom pa'i mgo 'dren pa ston to/ /de yang slob dpon gyis de ltar bcom ldan 'das la mngon par bstod nas/ nyid kyis chos thams cad kyi de kho na ji ltar thugs su chud pa de bzhin du gzhan la bstan par dgongs pa na/ skye ba med pa dang por bstan par bzhed nas/ gzhan gyis yongs su brtags pa'i skye bar rnam par rtog pa mngon sum du mdzad de/ dngos po rnams bdag dang gzhan dang gnyis ka dang rgyu med pa las skye'o zhes zer ba dag / rigs pa dang lung dag gis brtags pa na/ skye ba rnam pa thams cad du 'thad pa mi bzod par rang la nges pa'i dbang gis skye ba med par bstan pa'i sgo nas/ rkyen brtag pa'i rab tu byed pa dang po'i skabs brtsam pa mdzad do zhes bya bar sbyar ro/ /de la slob dpon gyis zhes bya ba ni 'phags pa klu sgrub kyis so/ /rten cing 'brel bar 'byung ba'i skye ba med pa la sogs pa thun mong ma yin pa'i khyad par dang ldan pa de kho na ston par mdzad pa nyid kyis bcom ldan 'das la mngon par bstod nas zhes bya ba ni shes rab kyi pha rol tu phyin pa las 'byung ba khyad par gyi gzhi rten cing 'brel bar 'byung ba/ khyad par skye ba med pa dang / 'gag pa med pa la sogs pa thun mong ma yin pa dang ldan pa sngar ji skad bstan pa'i sgra dang don de kho na ston par mdzad pa nyid kyis/ bcom ldan 'das la/ gang gi rten cing 'brel par 'byung / / 'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ /spros pa nyer zhi zhi bstan pa/ /rdzogs pa'i sangs rgyas smra rnams kyi/ /dam pa de la phyag 'tshal lo/ /zhes mngon par bstod nas so/ / skye ba med pa bstan pas 'gag pa med pa la sogs pa khyad par bstan sla bar dgongs pa na zhes bya ba ni/ slob dpon gyis ngas chos thams cad kyi de kho na ji ltar rtogs pa de kho na bzhin du sems can rnams la yang bstan par bya'o snyam nas/ 'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ /zhes bya ba tshig gi don brgyad po dag gis bstan bcos kyi lus rnam par gzhag par mdzad pa de las 'dir skye ba med pa dang por bstan pas/ 'gag pa med pa la sogs pa khyad par gzhan bstan sla bar dgongs nas so/ /skye ba med pa dang por bstan par bzhed nas zhes bya ba ni 'di skad ces bstan te/ 'di ltar bstan bcos kyi lus rnam par gzhag pa sngar bstan pa'i skabs su 'gag pa med pa zhes bya ba'i tshig gi don dang por rnam par gzhag mod kyi/ 'dir de dag bstan pa'i skabs su skye ba med pa dang por bstan na/ 'gag pa med pa dang / chad pa med pa dang / rtag pa med pa dang / 'ong ba med pa dang / 'gro ba med pa dang / don tha dad pa ma yin pa dang / don gcig pa ma yin pa dag bstan sla bas/ de'i phyir skye ba med pa dang por bstan par bzhed nas so/ /'dir gzhan dag na re/ sngar yang skye ba'i 'og tu 'gag pa dgag par rigs te/ de sngon du 'gro ba can yin pa'i phyir/ chad pa bzhin no zhes glengs pa'i tshe khyed na re/ 'khor ba la thog ma med pa'i phyir skye ba dang 'gag pa la go rims nges pa med pa'i phyir/ 'gag pa med pa skye med pa/ /zhes bstan pa la nyes pa med do zhes zer na/ 'dir yang de'i go rims bzhin du 'gag pa med pa dang por bstan pa'i rigs na/ ci'i phyir skye ba med pa dang por bstan par 'dod ce na/ de'i lan du 'di skad ces brjod par bya ste/ sngar/ 'gag pa med pa skye med pa/ /zhes bstan pa la nyes pa med do zhes bshad pa ni 'khor ba la thog ma med pa'i phyir dang / 'gag pa ni skye ba'i rim pa la mi ltos pa'i phyir dang / don brtag pa yin pa'i phyir de skad bshad pa yin gyi/ 'dir de dag gi don bstan pa la ni skyes na 'gag par 'gyur gyi/ ma skyes na 'gag par mi 'gyur ba dang / skye ba rgyun chad pa'i mtshan nyid ni chad pa yin gyi/ ma skyes na chad par mi 'gyur ba dang / skyes pa ma zhig pas rtag pa yin gyi/ ma skyes na rtag par mi 'gyur ba dang / skyes pa yul gzhan nas 'ong bas 'ong ba yin gyi/ ma skyes pa na 'ong bar mi 'gyur ba dang / skyes pa yul gzhan du 'gro bas 'gro ba yin gyi/ ma skyes na 'gro bar mi 'gyur ba dang / skyes pa mtshan nyid tha dad pas don tha dad pa yin gyi/ ma skyes na don tha dad par mi 'gyur ba dang / skyes pa mtshan nyid gcig pas don gcig pa yin gyi ma skyes na don gcig par mi 'gyur bas de'i phyir 'gag pa la sogs pa thams cad kyi rgyu ni skye ba yin pa'i phyir/ rgyu bkag na de'i 'bras bu rnams kyang mi 'byung ba'i phyir dang / 'jig rten yang phal cher skye ba la shin tu lhag par chags pa dang / skye ba la mngon par zhen pa yin na/ bstan bcos 'di ni lhag par chags pa dang mngon par zhen pa spong ba'i phyir zhugs pa yin pa'i phyir dang / lhag par chags pa dang mngon par zhen pa spangs na mya ngan las 'das pa thob par 'gyur ba'i phyir/ 'dir slob dpon skye ba med pa dang por bstan par bzhed do/ /de'i phyir gzhan gyis yongs su brtags pa'i skye bar rnam par rtog pa mngon sum du mdzad de zhes bya ba smras te/ de la gzhan gyis yongs su brtags pa'i zhes bya ba ni don dam par na nyid kyi blo la skye ba rnam par rtog pa'i dgongs pa nyid mi mnga' bas/ 'di ltar gzhan dag gis don dam par skye ba yod par yongs su brtags pa'i skye bar rnam par rtog pa gang dag yin pa de dag mngon sum du mdzad de zhes bya bar sbyar ro/ /skye bar rnam par rtog pa zhes bya ba ni/ rnam par rtog pa gang dag gis skye bar rnam par brtags shing gzung ba gang dag yin pa de dag ni skye bar rnam par rtog pa zhes bya ste/ skye ba'i rnam pa zhes bya ba'i tha tshig go/ /mngon sum du mdzad de zhes bya ba ni sems kyi mdun du bzhag pa mdzad pa ste dmigs par mdzad de zhes bya ba'i tha tshig go/ /skye bar rnam par rtog pa de dag kyang gang zhe na/ de'i phyir 'di ltar skye bar smra ba dag las/ kha cig ni dngos po rnams bdag las skye'o zhes zer/ gzhan dag ni gzhan las so zhes zer kha cig ni gnyi ga las so zhes zer/ gzhan dag ni rgyu med pa las so zhes zer ba dag ces bya ba smras so/ /skye bar rnam par rtog pa de dag mngon sum du mdzad de'o/ /rigs pa dang lung dag gis brtags pa na zhes bya ba ni skye bar rnam par rtog pa da dag mngon sum du mdzad de rigs pa dang lung dag gis brtags pa na'o/ /de la rigs pa zhes bya ba ni gtan tshigs dang / dpe 'jig rten dang lung la grags pa dag go/ /lung zhes bya ba ni shes rab kyi pha rol tu phyin pa la sogs pa'i mdo sde mtha' dag ste/ de las kyang bcom ldan 'das kyis/ rab 'byor gzugs zhes bya ba de ni chos su btags pa tsam ste/ chos su btags pa de la skye ba yang med/ 'gag pa yang med de/ ming dang brda tsam gyi tha snyad du brjod pa 'ba' zhig tu zad do zhes bya ba la sogs pa ji skad gsungs pa dag yin no/ /lung de yang de bzhin gshegs pa'i yin par brjod par bya'i gzhan dag la ni lung gi mtshan nyid med de/ ji skad du/ lung ni yid ches tshig yin te/ nyes zad lung du shes par bya/ /nyes pa zad pas brdzun gyi tshig /smra bar mi 'gyur rgyu med phyir/ /zhes bshad pa de lta bu ste/ de'i phyir rigs pa dang lung de dag gis brtags pa na'o/ /skye ba rnam pa thams cad du 'thad pa mi bzod par zhes bya ba la/ skye ba zhes bya ba ni gzhan gyis yongs su brtags pa'i skye bar rnam par rtog pa gang yin pa des so/ /rnam pa thams cad du zhes bya ba ni/ bdag las dang / gzhan las dang / gnyi ga las dang / rgyu med pa las zhes bya ba mu bzhi'i rnam pa thams cad du'o/ /'thad pa mi bzod par zhes bya ba ni skye ba 'thad pa'i gtan tshigs yod par mi bzod par ro/ /rang la nges pa zhes bya ba ni/ slob dpon gyis gang gi tshe dngos po rnams kyi skye ba rnam pa de dag gis mi 'thad mi rigs par rtogs pa de'i tshe na/ slob dpon nyid la don dam par chos thams cad skye ba med do zhes de kho na thugs su chud pa'i nges pa skyes par gyur pa'o/ /de'i dbang gis zhes bya ba ni slob dpon rang la nges pa skyes pa de'i dbang gis te/ de'i dbang gis ji ltar bdag gis chos thams cad kyi de kho na rtogs pa de ltar sems can gzhan dag la yang bstan par bya'o snyam du dgongs nas/ /bdag las ma yin gzhan las min/ /gnyis las ma yin rgyu med min/ /dngos po gang dag gang na yang / /skyes pa nam yang yod ma yin/ /zhes bya ba gsungs te zhes bya bar sbyar ro/ /'di skad bstan te/ ji ltar bdag gis rigs pa dang lung dag gis brtags pa na dngos po rnams kyi skye ba yang dag par rjes su mthong zhing de kho na khong du chud par de kho na bzhin no/ /sems can rnams kyis kyang bsgom pa'i rnam pa 'di nyid kyis de kho na khong du chud par byas/ de'i phyir bsgom pa'i rnam pa bstan pa dbu ma'i bstan bcos 'di bstan par bya'o zhes gsungs pa yin no/ /'di ni dam bcas pa'i spyi bkod pa yin no zhes bya ba la/ 'di ni zhes bya ba ni/ bdag las ma yin gzhan las min/ /gnyis las ma yin rgyu med min/ /dngos po gang dag gang na yang / /skyes pa nam yang yod ma yin/ /zhes gsungs pa'i tshig le'ur byas pa 'di ni'o/ /dam bcas pa zhes bya ba ni dngos po rnams bdag las skye ba med do zhes bya ba 'di ni dam bcas pa gcig go/ /gzhan las skye ba med do zhes bya ba 'di ni dam bcas pa gnyis pa'o/ /gnyis las skye ba med do zhes bya ba 'di ni dam bcas pa gsum pa'o/ /rgyu med pa las skye ba med do zhes bya ba 'di ni dam bcas pa bzhi pa'o/ /dam bcas pa de dag gi spyi zhes bya ba ni nye bar sbyar ba 'am bstan pa'o/ /de la ci'i phyir dam bcas pa rnam pa bzhi kho na byas shing mang du ma byas she na/ 'di ltar ya mtshan can dgu bcu rtsa drug po dag gyes pa na rgol bu sum brgya drug cu rtsa gsum du gyur pa de dag thams cad kyang phyogs bzhi po 'di'i khongs su 'dus shing / 'di las gzhan pa'i rnam pa lnga pa med pas de'i phyir dam bcas pa rnam pa bzhi po kho na mdzad do/ /de la re zhig bdag las ma yin zhes bya ba ci zhig ce na zhes bya ba ni bdag las ci zhig ma yin zhe na zhes 'grol bar byed pa nyid kyis dri ba'i tshig yin no/ /de'i lan du 'grel pa byed pa nyid kyis/ skyes pa nam yang yod ma yin/ /zhes bya ba la sogs pa ste zhes bya ba smras te/ bdag las ji zhig ma yin zhe na/ bdag las/ skyes pa nam yang yod ma yin/ /zhes bya bar sbyar ro/ /sogs pa ste zhes bya ba'i sgras ni/ dngos po gang dag gang na yang / /zhes bya ba bsdu ste/ des na bdag las ci zhig ma yin zhe na/ bdag las/ dngos po gang dag gang na yang / /skyes pa nam yang yod ma yin/ /zhes bya ba yin no zhes bstan to/ /re re dang sbyar bar bya'o zhes bya bas ji skad bstan zhe na/ bdag las/ dngos po gang dag gang na yang / /skyes pa nam yang yod ma yin/ /zhes bya ba dang / gzhan las/ dngos po gang dag gang na yang / /skyes pa nam yang yod ma yin/ /zhes bya ba dang / gnyis las/ dngos po gang dag gang na yang / /skyes pa nam yang yod ma yin/ /zhes bya ba dang / rgyu med pa las/ dngos po gang dag gang na yang / /skyes pa nam yang yod ma yin/ /zhes bya ba dang / de ltar re re dang sbyar bar bya'o/ /bdag las zhes bya ba ni bdag nyid las zhes bya ba'i tha tshig go zhes bya ba la/ gal te gang las dogs pa skye na 'dir bdag las zhes bya ba ni bdag nyid las zhes bya ba'i tha tshig go zhes bshad ce na/ 'di ltar bdag ces bya ba'i don rnam pa lnga la sbyor te/ bdag nyid dang / bdag gi dang / shes pa dang / dbang phyug dang / nye du dag la sbyor bas/ de'i phyir bdag gis dang / shes pa dang / dbang phyug dang / nye du dag rnam par gcad pa'i phyir/ 'dir bdag las zhes bya ba ni bdag nyid las zhes bya ba'i tha tshig go zhes bshad de/ dngos po rnams bdag nyid las skye ba med do zhes bya ba'i tha tshig go/ /dam bcas pa tsam gyis bsams pa'i tshig gis don mi 'grub pas zhes bya bas ni 'di skad bstan te/ gal te tshig tsam gyis slob dpon gyis skye ba med par bsams pa'i tshig gis don mi 'grub na ni gzhan dag gis kyang skye bar bsams pa'i tshig gis don 'grub par 'gyur ba zhig na/ mi 'grub pas de'i phyir dam bcas pa tsam gyis bsams pa'i tshig gis don mi 'grub ste/ slob dpon 'phags pa lha'i zhal snga nas kyis/ gal te yod pa'i tshig tsam gyis/ /dngos po yod par 'gyur na ni/ /med ces bya ba'i tshig tsam gyis/ /ci phyir med par 'gyur ba min/ /de'i phyir/ don gang lung dang rigs pa yis/ /legs par mngon par brjod pa dang / /snga phyi 'gal ba med pa de/ /dam pa rnams kyis yongs su bzung / /zhes ji skad gsungs pa lta bu'o/ /mdor bstan pa ji lta ba bzhin du rgyas par bshad dgos pas/ sngar bdag las skye ba med do zhes gsungs pa de'i phyir/ 'dir de nyid dang por bsgrub par bya ste/ de'i phyir 'dir phyogs kyi chos ni yod pa nyid yin par gzung ste zhes bya ba smras te/ tshad ma byed par 'dod pa'i tshad ma nyid ni rigs pa yin pas/ 'dir dngos po rnams bdag las skye ba med do zhes bya ba'i phyogs kyi chos gtan tshigs su gzung ba ni bdag nyid yod pa nyid yin no zhes bya ba'i tha tshig go/ /gal te bdag nyid yod pa nyid ji ltar phyogs kyi chos yin zhe na/ de'i lan du/ 'di ltar bdag las zhes bya ba ni bdag nyid yod pa la snyad gdags pa'i phyir ro zhes bya ba smras te/ 'di ltar zhes bya ba'i sgra ni gang gi phyir zhes bya ba'i don to/ /gang gi phyir dngos po gang la bdag nyid kyi rang gi ngo bo yod pa de la bdag las zhes snyad gdags su rung ba'i phyir/ yod pa la ni yang skye ba med pa'i phyir/ yod pa nyid ni skye ba med pa'i phyogs kyi chos gtan tshigs yin no zhes bya bar ston to/ /bdag las zhes bya ba ni bdag nyid yod pa la snyad gdags pa'i phyir ro zhes bya ba ni/ dngos po gang la bdag nyid yod pa de ni bdag nyid yod pa ste/ de la bdag las zhes snyad gdags su rung ba'i phyir ro/ /dper na 'jig rten dag na yang smra ba po dag na re/ lhas byin bdag nyid yod pa la lhas byin bdag las zhes zer ba dang 'dra bar/ 'dir yang dngos po bdag nyid yod pa nyid yin na bdag las zhes snyad gdags su rung la/ bdag las zhes snyad du gdags su rung ba'i dngos po bdag nyid yod pa nyid yin na/ yod pa nyid la ni yang skye ba med pas de'i phyir yod pa nyid ni skye ba med pa'i phyogs kyi chos gtan tshigs yin par gzung ngo / /dper na bsgrub par bya ba dang sgrub pa'i chos kyi dbang gis te zhes bya bas ni 'di skad bstan te/ chos can nang gi skye mched la sogs pa gang la bsgrub par bya ba chos bdag las skye ba med pa dang / sgrub pa'i chos yod pa nyid dag yod pa de'i dbang gis dpe bstan dgos so zhes bya ba'i tha tshig go/ /de la dpe ni zhes bya ba ni 'og nas don dam par nang gi skye mched rnams bdag las skye ba med par nges te yod pa'i phyir/ dper na shes pa yod pa nyid bzhin no zhes 'byung ba'i dpe de'o/ /bsgrub par bya ba chos zhes bya ba ni bsgrub par bya ba nyid chos yin pas bsgrub par bya ba chos so/ /yang na de ni bsgrub par bya ba yang yin la chos kyang yin pas bsgrub par bya ba chos zhes bsdu bar bya'i/ bsgrub par bya ba'i chos zhes ni bsdu bar mi bya'o/ /bsgrub par bya ba chos de yang gang zhe na/ skabs 'dir ni skye ba med pa zhes bya ba yin par sbyar ro/ /sgrub pa'i chos zhes bya ba ni bdag las skye ba med pa skye ba med pa sgrub pa'i chos te gtan tshigs so/ /sgrub pa'i chos de gang zhe na/ skabs 'dir ni yod pa nyid ces bya ba yin par sbyar ro/ /dbang gis te zhes bya ba ni chos can nang gi skye mched la sogs pa gang la bsgrub par bya ba chos bdag las skye ba med pa yod pa'i dbang dang sgrub pa'i chos yod pa nyid yod pa'i dbang gis chos can de'i dpe shes pa yod pa nyid la sogs pa bstan dgos pa'o/ /de bstan pa'i phyir bsgrub par bya ba dang sgrub pa'i chos grags pa dang ldan pa'i chos can gyi dpe yin pa'i phyir ro zhes bya ba smras te/ chos can nang gi skye mched la sogs pa gang la bsgrub par bya ba chos bdag las skye ba med pa rgol ba dang phyir rgol ba gnyi ga la grags pa dang / sgrub pa'i chos yod pa nyid rgol ba dang / phyir rgol ba gnyi ga la grags pa yod pa de ni bsgrub par bya ba dang sgrub pa'i chos grags pa dang ldan pa'i chos can zhes bya'o/ /chos can de'i dpe yin pa'i phyir dpe ni bsgrub par bya ba dang / sgrub pa'i chos kyi dbang gis bstan dgos so zhes bya bar sbyar ro/ /de la bsgrub par bya ba chos grags pa zhes bya ba ni/ bdag las skye ba med pa zhes bya ba rgol ba dang phyir rgol ba gnyi ga la grags pa'o/ /sgrub pa'i chos grags pa zhes bya ba ni skye ba med pa sgrub pa'i chos yod pa nyid ces bya ba rgol ba dang phyir rgol ba gnyi ga la grags pa'o/ /de gnyis dang ldan pa'i chos can zhes bya ba ni bsgrub par bya ba chos grags pa dang sgrub pa'i chos grags pa de gnyis dang ldan pa'i chos can nang gi skye mched la sogs pa'o/ /chos can de'i dpe zhes bya ba ni shes pa yod pa nyid la sogs pa ste/ dper na shes pa yod pa nyid ces bya ba chos can de la bsgrub par bya ba chos bdag las skye ba med pa zhes bya ba rgol ba dang / phyir rgol ba gnyi ga la grags pa dang / sgrub pa'i chos yod pa nyid ces bya ba rgol ba dang phyir rgol ba gnyi ga la grags pa yod pa de bzhin du/ 'dir yang chos can nang gi skye mched la sogs pa la bsgrub par bya ba chos bdag las skye ba med pa zhes bya ba rgol ba dang phyir rgol ba gnyi ga la grags pa dang / sgrub pa'i chos yod pa nyid ces bya ba dang phyir rgol ba gnyi ga la grags pa yod par ston pas/ de'i phyir dpe ni bsgrub par bya ba dang / sgrub pa'i chos grags pa dang ldan pa'i chos can gyi dpe yin pa'i phyir ro zhes smras te/ ji skad du dpe gang la bsgrub par bya ba dang gtan tshigs kyi rjes su 'gro bas khyab par byed pa yod pa de ni chos mthun pa'i dpe yin no zhes bshad pa lta bu'o/ /bdag las ma yin zhes bya ba'i dgag pa 'di ni dpe med par dgag pa'i don du blta bar bya ste zhes bya ba la/ gal te gang las dogs pa skye na/ 'dir bdag las yin zhes bya ba'i dgag pa 'di ni med par dgag pa'i don du blta bar bya ste zhes bshad ce na/ 'di ltar brda sprod pa las dgag pa ni rnam pa gnyis te/ med par dgag pa dang / ma yin par dgag go zhes 'byung ba'i de'i phyir ma yin par dgag pa rnam par gcad pa'i phyir/ 'dir/ bdag las ma yin zhes bya ba'i dgag pa 'di ni med par dgag pa'i don du blta bar bya ste zhes bshad de/ dngos po rnams bdag las skye ba med par dgag pa'i don du blta bar bya'i/ bdag las ma skyes pa yod do zhes ma yin par dgag pa'i don du ni blta bar mi bya'o zhes bya ba'i tha tshig go/ /de las dgag pa 'di gnyis kyi mtshan nyid ni ji skad du/ dgag pa don gyis bstan pa dang / /tshig gcig sgrub par byed pa dang / /de ldan rang tshig mi ston pa/ /ma yin gzhan pa gzhan yin no/ /zhes bshad pa yin no/ /'di skad bstan te/ dgag pa gang don gyis go ba ston pa dang / tshig gcig gis dngos po sgrub par byed pa dang / don gyis go ba dang / dngos po sgrub pa de dang ldan pa dang / rang gi tshig gis mi ston pa/ dper na rgyal rigs la rgyal rigs zhes bya ba'i tshig gis mi ston par/ bram ze ma yin pa zhes bya ba'i tshig gis ston pa de ni ma yin par dgag pa yin par blta bar bya'o/ /gzhan pa gzhan yin no zhes bya ba ni de las gzhan pa'i dgag pa gang yin par dgag pa las gzhan pa med par dgag pa yin no zhes bya ba'i tha tshig go/ /gzhan pa zhes bya ba ni don gyis go ba bstan pa las gzhan pa dang / tshig gcig gis dngos po sgrub par byed pa las gzhan pa dang / don gyis go ba dang dngos po sgrub pa de dang ldan pa las gzhan pa dang / rang gi tshig gis mi ston pa las gzhan pa gang yin pa'o/ /gzhan yin no zhes bya ba ni de ni ma yin par dgag pa las gzhan pa med par dgag pa yin no zhes bya ba'i tha tshig ste/ de ni don gyis go ba'i mtshan nyid ston pa ma yin pa dang / dgag pa lhur len te dgag pa kho na de'i dgos pa yin zhing gzhan gyis khas blangs pa gang yin pa de dgag pa tsam byed la/ dngos po'i de kho na'am dngos po med pa'i de kho na sgrub par mi byed pa dang / don gyis go ba dang ldan pa yang ma yin/ dngos po dang ldan pa yang ma yin zhing dgag pa dang ldan pa dang / rang gi tshig gis ston te dper na bram ze ma yin pa nyid ces dgag pa tsam nyi tshe byed pa yin no/ /ci'i phyir ma yin par dgag par spangs te med par dgag pa gzung zhe na/ de'i phyir dgag pa gtso che ba'i phyir dang zhes bya ba smras te/ med par dgag pa de ni dgag pa gtso che ba'i phyir 'dir gzung gi /ma yin par dgag pa ni sgrub pa gtso che ba'i phyir 'dir mi gzung ngo zhes bya bar sbyar ro/ /dgag pa gtso che ba zhes bya ba ni med par dgag pa gang las dgag pa gtso che ba dang / bsam pa dang / 'dod pas sgrub par nus pa yod pa de ni dgag pa gtso che ba'o/ /dgag pa gtso che ba'i phyir zhes bya ba ni dgag pa gtso che ba'i rgyu de'i phyir 'dir med par dgag pa la brten par bya'o zhes bya ba'i tha tshig go/ /yang na dgag pa gtso che ba'i phyir dang zhes bya ba ni dbu ma'i bstan bcos ni dgag pa gtso che ba'i phyir 'dir med par dgag pa gzung bar bya'i/ ma yin par dgag pa gzung bar mi bya'o/ /ci'i phyir dbu ma'i bstan bcos la dgag pa tsam kho na byed cing dngos po sgrub par mi byed ce na/ de'i phyir 'di ltar rtogs pa ma lus pa'i dra ba dgag pas rnam par mi rtog pa'i ye shes shes bya yul ma lus pa dang ldan par 'grub par dgongs pa'i phyir ro zhes bya ba smras te/ 'di ltar zhes bya ba'i sgra ni gang gi phyir zhes bya ba'i don te/ gang gi phyir rtog pa'i dra ba ma lus pa dang ldan pa 'grub par dgongs pa de'i phyir/ dbu ma'i bstan bcos la dgag pa tsam kho na byed cing dngos po sgrub par mi byed do zhes bya bar sbyar ro/ /rtog pa ma lus pa zhes bya ba ni dngos po rnams bdag dang gzhan dang gnyis dang rgyu med pa las skye bar rtog pa de dag ni rtog pa ma lus pa zhes bya'o/ /dra ba zhes bya ba ni rtog pa ma lus pa de dag nyid du dra ba ste/ 'di ltar rtog pa ma lus pa'i dra ba 'dis g.yogs na chos thams cad dmigs su med pa'i thar pa zhes bya bar 'gro bar mi nus pas de'i phyir/ rtog pa ma lus pa de dag nyid dra ba dang 'dra bas dra ba'o/ / dgag pas zhes bya ba ni rtog pa ma lus pa'i dra ba de dgag pa ni rtog pa ma lus pa'i dra ba dgag pa ste/ rtog pa ma lus pa'i dra ba dgag pa nges so/ /rnam par mi rtog pa'i ye shes shes bya yul ma lus pa dang ldan pa zhes bya ba ni rnam par mi rtog pa'i ye shes gang la zhes bya ba shes par bya ba dang / rtogs par bya ba dang / yongs su gcad par bya ba ma lus pa dang / yul zhes bya ba spyod yul dang / gzung ba dang / dmigs pa ma lus pa/ yod pa de ni rnam par mi rtog pa'i ye shes shes bya yul ma lus pa dang ldan pa zhes bya'o/ /de 'grub par zhes bya ba ni rnam par mi rtog pa'i ye shes shes bya yul ma lus pa dang ldan pa de 'grub par ro/ dgongs pa'i phyir ro zhes bya ba ni bzhed pa'i phyir ro zhes bya ba'i tha tshig go/ /yang na med par dgag pa 'dis 'di ltar rtog pa ma lus pa'i dra ba dgag pas/ rnam par mi rtog pa'i ye shes shes bya yul ma lus pa dang ldan pa de 'grub par dgongs pa'i phyir te rjes su mthun pa'i phyir ro zhes bya ba'i tha tshig go/ /'dir rnam par mi rtog pa'i ye shes shes bya yul ma lus pa dang ldan pa 'grub pa zhes bya ba ni 'jig rten las 'das pa'i kun rdzob kyi rnam par gzhag pa yin gyi/ gnas gyur pa'i mtshan nyid la ni don dam par ye shes 'grub par mi bzhed de/ bcom ldan 'das ma shes rab kyi pha rol tu phyin pa las/ ye shes kyi skye ba la spyod na shes rab kyi pha rol tu phyin pa la spyod pa ma yin no zhes ji skad gsungs pa lta bu'o/ /ma yin par dgag pa yongs su gzung na ni de sgrub pa gtso che ba'i phyir chos rnams ma skyes so zhes bsgrubs pas skye ba med pa ston pa'i phyir mdzad pa'i mtha' dang bral bar 'gyur te zhes bya bas ni 'di skad bstan te/ gal te ma yin par dgag pa yongs su gzung ba kho na byed cing / med par dgag pa yongs su gzung ba mi byed na ni des na ma yin par dgag pa de sgrub pa gtso che ba'i phyir/ dgag pa kho na tsam 'grub par mi 'gyur te/ 'di ltar ma yin par dgag pa ni chos rnams ma skyes so zhes bsgrubs pas des na skye ba med pa nyid yod par ston pa'i phyir de yang mi bzhed de/ 'di ltar mdzad pa'i mtha' dang bral ba'i phyir ro zhes bya bar ston to/ /de sgrub pa gtso che ba'i phyir zhes bya ba ni ma yin par dgag pa de ni sgrub pa gtso che ba'i phyir te/ 'di ltar dngos po rnams skye ba med do zhes dgag pa'i sgo nas ma skyes pa yod do zhes sgrub pa'i phyir ro/ /de nyid bstan pa'i phyir chos rnams ma skyes so zhes bsgrubs pas skye ba med pa ston pa'i phyir zhes bya ba smras te/ ma yin par dgag pa de ni chos rnams ma skyes so zhes bsgrub pa'i sgo de nas skye ba med pa nyid yod par ston pa'i phyir sgrub pa gtso che ba yin no/ /de ni 'dir mi bzhed de ci'i phyir zhe na/ 'di ltar mdzad pa'i mtha' dang bral bar 'gyur te zhes bya ba smras so/ /de la mdzad pa'i mtha' zhes bya ba ni grub pa'i mtha' ste/ bdag nyid chen po rnams kyis mdzad pa'i don gyi mtha' nges pa yin pa'i phyir ro/ /de dang bral bar 'gyur te zhes bya ba ni de dang 'gal bar 'gyur te zhes bya ba'i tha tshig go/ /mdzad pa'i mtha' dang ji ltar bral bar 'gyur ba de nyid bstan pa'i phyir/ lung las/ gzugs kyi skye ba med pa la spyod na shes rab kyi pha rol tu phyin pa la spyod pa ma yin no zhes 'byung ba'i phyir ro zhes bya ba smras te/ bcom ldan 'das ma shes rab kyi pha rol tu phyin pa las/ bcom ldan 'das la gzhan dag gis byang chub sems dpa' ji ltar shes rab kyi pha rol tu phyin pa la spyod na/ shes rab kyi pha rol tu phyin pa la spyod pa ma lags zhes zhus pa dang / bcom ldan 'das kyis bka' stsal pa/ gzugs kyi skye ba med pa la spyod na shes rab kyi pha rol tu phyin pa la spyod pa ma yin no/ /gzugs kyi skye ba la spyod na shes rab kyi pha rol tu phyin pa la spyod pa ma yin no zhes bya ba la sogs pa gsungs pa'i phyir ro/ /ji skad bstan zhe na/ shes rab kyi pha rol tu phyin pa ni skye ba dang skye ba med pa la sogs pa'i rtog pa ma lus pa dang bral ba yin pas/ gang gi tshe byang chub sems dpa' skye ba med pa'i rnam par rtog pa la yang mi spyod pa de'i tshe na shes rab kyi pha rol tu phyin pa la spyod pa yin par bstan to/ /de lta bas na ma yin par dgag pa yongs su gzung na lung dang 'gal bas 'dir ni med par dgag pa kho na la brten par bya'o/ /'dir dngos po rnams bdag las skye ba med pa kho na'o zhes nges par gzung bar bya'o zhes bya ba la/ nges par gzung ba zhes bya ba'i sgra ni de kho na zhes bya ba'i don la snyegs so/ /'dir nges par gzung ba de yang rnam pa gsum ste/ bdag las skye ba med pa kho na'o zhes bya ba ni nges par gzung ba dang po'o/ /bdag kho na las skye ba med de zhes bya ba ni nges par gzung ba gnyis pa'o/ /bdag kho na las skye ba med de zhes bya ba ni nges par gzung ba gsum pa'o/ /de la 'dir dngos po rnams bdag las skye ba med pa kho na'o zhes nges par gzung bar bya'o zhes bya ba 'di ni nges par gzung ba dang po ste/ don 'dir ni dngos po rnams bdag las skye ba med pa kho na'o zhes nges par gzung bar bya ba yin no/ /gzhan du nges par gzung na zhes bya bas ni nges par gzung ba gnyis pa dang gsum pa 'og nas 'byung ba dag ltar gzung na gnyi ga yang skyon du 'gyur bas mi rung ngo zhes bstan to/ /nges par gzung ba gnyis pa bstan pa'i phyir/ bdag kho na las skye ba med de/ 'o na ci zhe na/ gzhan las skye'o zhes bya bar nges par 'gyur ba dang zhes bya ba smras te/ 'di ni nges par gzung ba gnyis pa ste/ dngos po rnams bdag kho na las skye ba med do zhes nges par gzung na/ 'o na ci zhe na/ gzhan las skye'o zhes bya bar nges par 'gyur ba'i skyon du 'gyur bas 'di ni mi rung ngo / /nges par gzung ba gsum pa bstan pa'i phyir de bzhin du bdag kho na las ni skye ba med de/ 'o na ci zhe na/ bdag dang gzhan las skye'o zhes bya bar nges par 'gyur bas zhes bya ba smras te/ 'di ni nges par gzung ba gsum pa ste/ dngos po rnams bdag kho na las ni skye ba med do zhes nges par gzung na/ 'o na ci zhe na/ bdag dang gzhan las skye'o zhes bya bar nges par 'gyur ba'i skyon du 'gyur bas 'di yang mi rung ngo / /nges par gzung ba gnyis pa dang gsum pa de gnyis ci'i phyir mi rung zhe na/ de'i phyir de yang mi bzhed de zhes bya ba smras te/ nges par gzung ba gnyis pa dang gsum pa de yang slob dpon mi bzhed de/ gnyi ga de yang skye bar khas len pa'i skyon chags pa'i phyir ro/ /ci'i phyir mi bzhed ce na/ de'i phyir mdzad pa'i mtha' dang bral ba'i phyir ro zhes bya ba smras te/ ji ltar mdzad pa'i mtha' dang bral zhe na/ sngar dam bcas pa'i spyi bkod pa'i skabs su dngos po rnams bdag las skye ba med pa dang gzhan las skye ba med pa dang / gnyis las skye ba med pa dang / rgyu med pa las skye ba med par khas blangs la/ 'dir nges par gzung ba gnyis pas gzhan las skye bar bstan pa dang / nges par gzung ba gsum pa dang bdag dang gzhan las skye bar bstan pa 'di gnyis sngar dam bcas pa dang 'gal ba'i phyir ro/ / 'dir sbyor ba'i tshig tu 'gyur ba ni zhes bya ba ni dngos po rnams bdag las skye ba med par bstan pa'i skabs 'dir sbyor ba dang sbyor ba dang bcas pa'i tshig tu 'gyur ba ni/ 'og nas chos can dang / bsgrub par bya ba chos dang / sgrub pa'i chos dang / dpe nye bar sbyar ba rnams yin no zhes bya bar sbyar ro/ /de la sbyor ba'i tshig ces bya ba ni sbyor ba dang bcas pa'i tshig ste/ rjes su dpag pa gtan tshigs dang dpe dang ldan pa zhes bya ba'i tha tshig go/ /don dam par nang gi skye mched rnams bdag las skye ba med par nges te/ yod pa'i phyir dper na shes pa yod pa nyid bzhin no zhes bya ba la/ don dam par zhes bya ba ni sngar gzhan ma yin pa ni 'dir thams cad don dam par bkag ste nges par gzung ba'i phyir ro/ /gzhan du yang mi 'gal te/ khyad par gyi gzhi'i khyad par ji skad bstan pa la 'gal ba med pa'i phyir dang / mdzad pa pos bstan pa nyid kyi bzhed pa mchog yin pa'i phyir ro zhes zer ro zhes smras pas/ 'dir skye ba med par 'gag pa yang don dam par dgag go zhes bya bar sbyar ro/ /de la don dam par zhes bya ba ni don dam par skye ba rdzas dang dngos po dang gzhi'i sgo nas dgag pa ste/ de yang kun rdzob kyi bden pa la gnas nas don dam pa'i yul la dgag par bya ba yin gyi/ don dam pa nyid du ni brjod pa med pa'i phyir dgag pa'i tha snyad kyang med do/ /de la nang gi skye mched rnams zhes bya ba 'di ni rjes su dpag par bya ba phyogs te chos can yin no/ /bdag las skye ba med par nges te zhes bya ba 'di ni rjes su dpag pa phyogs te bsgrub par bya ba chos yin no/ /yod pa'i phyir zhes bya ba 'di ni sgrub pa'i chos gtan tshigs te phyogs kyi chos yin no/ /dper na shes pa yod pa nyid bzhin no zhes bya ba 'di ni dpe ste/ chos mthun pa'i dpe yin no/ /de la nang gi zhes bya ba ni bdag gis byin gyis brlabs shing gnas su byas pa'o/ /bdag ces bya ba ni mtshams la bdag gir byed pa ste/ yo byad gya nom pa dang / rgya chen po dag dang por byas nas/ yo byad ngan pa dang khyon chung ngu'i bar dag la bdag gir byed pas bdag ces bya'o/ /bdag des byin gyis brlabs shing gnas su byas pa ni nang gi zhes bya'o/ /skye mched rnams zhes bya ba ni sems dang sems las 'byung ba rnams skye zhing 'byung ba dang / mched cing rgyas par byed pas skye mched rnams te 'di lta ste/ mig dang rna ba dang sna dang lce dang lus dang yid ces bya ba rnams so/ /nang gi skye mched rnams zhes bya ba 'di ni rjes su dpag par bya ba phyogs te chos can yin no/ /de la rjes su dpag par bya ba zhes bya ba ni gang la mi dmigs pa las dngos po med par rjes su dpag pa dang / ngo bo nyid las mi rtag par rjes su dpag pa dang / 'bras bu las rgyu rjes su dpag pa'i gzhi ste/ skabs 'dir ni gang la bdag las skye ba med pa zhes bya ba de rjes su dpag par bya ba'i gzhi nang gi skye mched rnams so/ /de nyid phyogs zhes bya ste/ phyogs zhes bya ba ni chos dang chos can bsdus pa'i phyogs te/ skabs 'dir ni bsgrub par bya ba chos bdag las skye ba med pa zhes bya ba dang / gang la de bsgrub par bya ba'i gzhi'i chos can nang gi skye mched rnams zhes bya ba de gnyis bsdus pa'i phyogs la phyogs zhes bya'o/ /de nyid chos can zhes bya ba ste/ chos can zhes bya ba ni rjes su dpag par bya ba'i gzhi gang la bsgrub par bya ba dang / sgrub pa'i chos gnyis yod pa de ni chos can te/ skabs 'dir ni nang gi skye mched rnams zhes bya ba gzhi gang las bsgrub par bya ba chos bdag las skye ba med pa zhes bya ba rgol ba dang / phyir rgol ba gnyig la grags pa dang / bdag las skye ba med pa de sgrub pa'i chos yod pa nyid ces bya ba rgol ba dang phyir rgol ba gnyis ka la grags pa de gnyis yod pa de ni chos can zhes bya'o/ /bdag las zhes bya ba ni bdag nyid yod pa nyid las so/ /skye ba med par nges te zhes bya ba ni dngos po rnams bdag nyid yod pa nyid las skye ba med par nges pa'o/ /bdag nyid las skye ba med par nges te/ zhes bya ba 'di ni rjes su dpag pa phyogs te bsgrub par bya ba chos yin no/ /de la rjes su dpag pa zhes bya ba ni mi dmigs pa las dngos po med par rjes su dpag pa dang / ngo bo nyid las mi rtag par rjes su dpag pa dang 'bras bu las rgyu rjes su dpag pa ste/ skabs 'dir ni rjes su dpag par bya ba'i gzhi nang gi skye mched rnams la bdag las skye ba med pa rjes su dpag pa'o/ /de nyid phyogs zhes bya ba ste/ phyogs zhes bya ba ni chos dang chos can bsdus pa'i phyogs te skabs 'dir ni bsgrub par bya ba chos bdag las skye ba med pa zhes bya ba dang gang la de bsgrub par bya ba'i gzhi chos can nang gi skye mched rnams zhes bya ba de gnyis bsdus pa'i phyogs la phyogs zhes bya'o/ /de nyid bsgrub par bya ba chos zhes bya ste/ bsgrub par bya ba chos zhes bya ba ni dngos po med pa dang / mi rtag pa dang / rgyu ste/ skabs 'dir ni chos can nang gi skye mched rnams la bsgrub par bya ba chos bdag las skye ba med pa de bsgrub par bya ba'o/ /yod pa'i phyir zhes bya ba ni bdag nyid yod pa nyid kyi phyir te 'di ltar bdag las zhes bya ba ni bdag nyid yod pa la snyad gdags pa'i phyir ro/ /yod pa'i phyir zhes bya ba 'di ni bsgrub pa'i chos gtan tshigs te/ phyogs kyi chos yin no/ /de la bsgrub pa'i chos zhes bya ba ni dngos po med pa dang mi rtag pa dang rgyu sgrub pa'i chos mi dmigs pa dang / ngo bo nyid dang 'bras bu ste/ skabs 'dir ni bsgrub par bya ba chos pa dag las skye ba med pa zhes bya ba de sgrub pa'i chos yod pa'i phyir zhes bya ba ste/ 'di ltar bdag las zhes bya ba ni bdag nyid yod pa la snyad gdags su rung ba dang / bdag las zhes snyad gdags su rung ba'i nang gi skye mched rnams bdag nyid yod pa nyid yin no/ /yod pa nyid la ni yang skye ba med pas de'i phyir yod pa'i phyir zhes bya ba ni/ bdag las skye ba med pa bsgrub pa'i chos yin no/ /de nyid gtan tshigs zhes bya ba ste/ gtan tshigs zhes bya ba yang dngos po med pa dang / mi rtag pa dang / rgyu sgrub pa'i gtan tshigs mi dmigs pa dang / ngo bo nyid dang 'bras bu ste/ skabs 'dir ni bsgrub par bya ba chos bdag las skye ba med pa zhes bya ba de sgrub pa'i gtan tshigs yod pa'i phyir zhes bya ba ste/ nang gi skye mched rnams ci'i phyir bdag las skye ba med ce na/ yod pa'i phyir te/ nang gi skye mched rnams bdag nyid yod pa nyid yin na yod pa nyid la ni yang skye ba med pas de'i phyir yod pa'i phyir zhes bya ba ni/ bdag las skye ba med par sgrub pa'i gtan tshigs yin no/ /de nyid phyogs kyi chos zhes bya ste/ phyogs kyi chos zhes bya ba yang chos dang chos can bsdus pa'i phyogs kyi chos mi dmigs pa dang ngo bo nyid dang 'bras bu ste/ skabs 'dir ni bsgrub par bya ba chos bdag las skye ba med pa zhes bya ba dang / chos can nang gi skye mched rnams zhes bya ba bsdus pa'i phyogs de'i chos yod pa'i phyir zhes bya ba ste/ nang gi skye mched rnams ci'i phyir bdag las skye ba med ce na/ yod pa'i phyir te/ nang gi skye mched rnams bdag nyid yod pa nyid yin na yod pa nyid la ni yang skye ba med pas de'i phyir yod pa'i phyir zhes bya ba ni chos dang chos can bsdus pa'i phyogs de'i gtan tshigs kyi chos yin pas phyogs kyi chos zhes bya'o/ /dper na shes pa yod pa nyid bzhin no zhes bya ba la/ shes pa yod pa zhes bya ba ni grangs can la sogs pa'i gzhung las skyes bu'i rang bzhin ni shes pa yod pa'o zhes zer ba ste/ bdag tu smra ba'i rnam grangs yin no/ /nyid ces bya ba ni shes pa yod pa'i dngos po ni shes pa yod pa nyid do/ /dper na shes pa yod pa nyid bzhin no zhes bya ba 'di ni dpe ste chos mthun pa'i dpe yin no/ /de la dpe zhes bya ba ni chos can gang la bsgrub par bya ba dang sgrub pa'i chos yod pa'i dpe ste/ 'dir dpe ni rjes su dpag par bya ba phyogs chos can shes pa yod pa nyid ces bya ba gang la rjes su dpag pa phyogs bsgrub par bya ba chos bdag las skye ba med pa zhes bya ba rgol ba dang phyir rgol ba gnyi ga la grags pa dang / sgrub pa'i chos gtan tshigs phyogs kyi chos yod pa nyid ces bya ba rgol ba dang phyir rgol ba gnyi ga la grags pa de gnyis yod pa yin par sbyar ro/ /de nyid chos mthun pa'i dpe zhes bya ste/ chos mthun pa'i dpe zhes bya ba ni dmigs pa las dngos po med par rjes su dpag pa'i chos mthun pa'i dpe phyogs 'di na dngos po med de dmigs pa'i rig byar gyur pa'i bum pa mi dmigs pa'i phyir ro zhes bya ba dang / ngo bo nyid las mi rtag par rjes su dpag pa'i chos mthun pa'i dpe 'di ni shing yin te/ shing sha pa yin pa'i phyir ro zhes bya ba dang / 'bras bu las rgyu rjes su dpag pa'i chos mthun pa'i dpe/ tshang mang 'di na me yod de du ba 'thul ba'i phyir ro zhes bya ba ste/ skabs 'dir ni dper na chos can shes pa yod pa nyid ces bya ba de rgol ba'i phyogs la ni shes pa yod pa nyid ces bya ba yod pa nyid du grags la/ phyir rgol ba'i phyogs la ni kun rdzob tu rnam par shes pa nyid ces bya bar yod pa nyid du grags pa de la bsgrub par bya ba chos bdag las skye ba med pa zhes bya ba rgol ba dang / phyir rgol ba gnyi ga la grags pa dang / bdag las skye ba med pa de sgrub pa'i chos yod pa nyid ces bya ba rgol ba dang phyir rgol ba gnyi ga la grags pa de gnyis yod pas de ni chos can zhes bya ste/ chos can shes pa yod pa nyid de la bdag las skye ba med de yod pa'i phyir ro zhes bya ba de bzhin du/ 'dir yang chos can nang gi skye mched rnams zhes bya ba 'di yang rgol ba'i phyogs la ni bdag gis byin gyis brlabs shing gnas su byas pa nyid ces bya bar yod pa nyid du grags la/ phyir rgol ba'i phyogs la ni kun rdzob tu yul 'dzin nus pa nyid ces bya bar yod pa nyid du grags pa/ dper na sgra la brtsal ma thag tu 'byung ba nyid du yod pa nyid du grags pa dang 'dra ba de la bsgrub par bya ba chos bdag las skye ba med pa zhes bya ba/ rgol ba dang phyir rgol ba gnyi ga la grags pa dang / bdag las skye ba med pa de sgrub pa'i chos yod pa nyid ces bya ba rgol ba dang phyir rgol ba gnyi ga la grags pa de gnyis yod pas de yang chos can zhes bya ste/ chos can nang gi skye mched rnams la yang bdag las skye ba med par nges te yod pa'i phyir/ dper na shes pa yod pa nyid bzhin no zhes bya bar sbyar ro/ /de'i phyir gang dang gang yod pa de la skye ba med de/ dper na shes pa yod pa nyid bzhin no/ /nang gi skye mched nyid rnams kyang yod pa nyid yin pas de'i phyir de dag la yang skye ba med do/ /gal te yod pa nyid du 'dra ba las nang gi skye mched rnams la ni skye ba yod par 'dod la/ shes pa yod pa nyid la ni skye ba med par 'dod na ni de'i tshe rgyu 'dis nang gi skye mched rnams la skye ba yod par 'dod la/ rgyu 'di ni shes pa yod pa nyid la skye ba med par 'dod do zhes khyad par nyid du bya ba'i khyad par gyi gtan tshigs brjod par bya dgos so/ /gang gi phyir bdag las skye bar smra ba dag la shes pa yod pa nyid yod pa'i gnas skabs la skye bar mi 'dod pa de'i phyir/ nang gi skye mched rnams kyang bdag nyid yod pa las skye ba med par 'grub po/ /gzhan yang dngos po rnams kyi skye ba ci'i phyir 'dod ce na/ bdag nyid kyi ngo bo nyid ma thob pa thob par bya ba'i phyir skye bar 'dod pa yin na/ gal te nang gi skye mched de dag la skye ba'i snga rol na bdag nyid kyi ngo bo nyid yod par gyur na de dag las skye bar brtags pas ci zhig bya ste/ skyes pa la yang skye ba med do zhes gsungs pa'i phyir ro/ /gzhan yang dgag pa mi mthun par yang 'gyur te/ gal te yod na ni skye bar mi 'gyur la/ ci ste skye na ni yod pa ma yin no/ /gzhan yang 'jig rten na yod pa nyid skye ba ni 'gal te/ 'di ltar 'jig rten na bum pa sbrang rtsi dang chu dang 'o ma 'dzin pa la sogs pa'i bya ba byed nus pa gsal bar yod pa ni yang skye bar mi mthong ba'i phyir ro/ /don dam par phyi nang gi dngos po thams cad bdag las skye ba med par 'gag pa yin na ci'i phyir 'dir/ nang gi skye mched rnams nyi tshe chos can du gzhag ce na/ de ni/ dngos po gcig la gang mthong ba/ /de ni kun la'ang mthong bar 'dod/ /gcig gi stong nyid gang yin pa/ /de nyid kun gyi stong pa nyid/ /ces gsungs pa'i rigs pas/ nang gi skye mched rnams bdag las skye ba med par grub na phyi rol gyi skye mched la sogs pa chos thams cad kyang bdag las skye ba med pa nyid du 'grub pa'i phyir dang / nang gi skye mched rnams chos can du bzhag na phyi rol gyi skye mched la sogs pa gzhan dag gtan tshigs dang dper gzhag tu rung bas de'i phyir nang gi skye mched rnams nyi tshe chos can du gzhag go// // bam po brgyad pa/ /gal te gtan tshigs yod pa nyid ni mi mthun pa'i phyogs las ldog pa ma bstan pas gtan tshigs nyid ma yin no zhe na zhes bya ba ni/ rtog ge pa dag 'grel pa byed pa la gtan tshigs ma nges pa'i skyon gyis rgol ba'i dogs pa bsu ba yin no/ /de la gal te zhes bya ba'i sgra ni 'grel pa byed pa nyid kyis rtog ge pa dag gi dogs pa bsu ba'i tshig yin no/ /gtan tshigs yod pa ni zhes bya ba ni/ 'grel pa byed pas sngar nang gi skye mched rnams bdag las skye ba med pa'i gtan tshigs su yod pa'i phyir zhes bshad pa gang yin pa de nyid do/ /mi mthun pa'i phyogs las ldog pa ma bstan pas gtan tshigs nyid ma yin no zhes bya ba la/ mi mthun pa'i phyogs zhes bya ba ni chos dang chos can gyi mi 'dra ba'i phyogs kyi tshig gi don mi mthun pa'i phyogs so/ /mi mthun pa'i phyogs de las ldog pa zhes bya ba ni mi mthun pa'i phyogs la bsgrub par bya ba dang sgrub pa'i chos gnyis med pa ni mi mthun pa'i phyogs las ldog pa zhes bya ba'o/ /de ma bstan pas zhes bya ba ni mi mthun pa'i phyogs las ldog pa de ma bstan ma bshad pas so/ /gtan tshigs nyid ma yin no zhes bya ba ni 'grel pa byed pas sngar nang gi skye mched rnams bdag las skye ba med pa'i gtan tshigs su yod pa'i phyir zhes bshad pa gang yin pa de gtan tshigs nyid ma yin te/ ci'i phyir zhe na/ 'di ltar mi mthun pa'i phyogs las ldog pa ma bstan pas yod pa'i phyir zhes bya ba'i gtan tshigs de ma nges pa'i phyir gtan tshigs nyid ma yin no/ /de gtan tshigs nyid ma yin pas de bsgrub par bya ba chos kyang mi 'grub po zhes bya ba'i tha tshig go/ /de yang 'di ltar gtan tshigs kyi mtshan nyid ni 'di yin te/ tshul gsum ldan pa'i rtags bstan pa/ /phyogs kyi chos la gnas pa yin/ /lhag ma tshul gnyis btags pa ni/ /dpe yis rab tu bstan pa yin/ /zhes bya bas tshul gsum dang ldan pa'i rtags bstan pa yin no/ /de la tshul gsum ni rjes su dpag par bya ba la yod pa dang / mthun pa'i phyogs la yod pa dang / /mi mthun pa'i phyogs la med pa nyid du nges pa'o/ /tshul gsum po dag la rtags kyang gsum ste/ mi dmigs pa dang / ngo bo nyid dang / 'bras bu'o/ /des rjes su dpag par bya ba la yod pa nyid du nges pa'i tshul gyi rtags gsum ni/ mi dmigs pa las dngos po med par rjes su dpag par bya ba la ni/ 'di na dngos po med de mi dmigs pa'i phyir ro zhes bya ba dang / ngo bo nyid las mi rtag par rjes su dpag par bya ba la ni sgra mi rtag pa ste byas pa'i phyir ro zhes bya ba dang / 'bras bu las rgyu rjes su dpag par bya ba la ni 'di la rgyu yod de 'bras bu dmigs pa'i phyir ro zhes bya ba yin no/ /mthun pa'i phyogs la yod pa nyid du nges pa'i tshul gyi rtags gsum ni/ mi dmigs pa las dngos po med par rjes su dpag pa'i chos mthun pa'i dpe phyogs 'di na dngos po med de/ dmigs pa'i reg byar gyur pa'i bum pa mi dmigs pa'i phyir ro zhes bya ba dang / ngo bo nyid las mi rtag par rjes su dpag pa'i chos mthun pa'i dpe 'di ni shing yin te/ shing sha pa yin pa'i phyir ro zhes bya ba dang / 'bras bu las rgyu rjes su dpag pa'i chos mthun pa'i dpe tshang mang 'di na me yod de du ba 'thul ba'i phyir ro zhes bya ba 'di yin no/ /mi mthun pa'i phyogs la med pa nyid du nges pa'i tshul gyi rtags gsum ni mi dmigs pa las dngos po med par rjes su dpag pa'i chos mi mthun pa'i dpe/ phyogs 'di na dngos po yod de dmigs pa'i reg byar gyur pa'i bum pa dmigs pa'i phyir ro zhes bya ba dang / ngo bo nyid las mi rtag par rjes su dpag pa'i chos mi mthun pa'i dpe/ nam mkha' rtag ste ma byas pa'i phyir ro zhes bya ba dang / 'bras bu las rgyu rjes su dpag pa'i chos mi mthun pa'i dpe/ khron pa 'di na me med de ba mo yod pa'i phyir ro zhes bya ba yin no/ /de ltar tshul gsum dang ldan pa'i rtags kyis gtan tshigs kyi mtshan nyid bstan dgos na/ 'dir nang gi skye mched rnams bdag las skye ba med par nges te yod pa'i phyir zhes bstan pas/ rjes su dpag par bya ba la yod pa nyid du nges pa'i tshul gyis rtags kyang yod/ dper na shes pa yod pa nyid bzhin no zhes bstan pas mthun pa'i phyogs la yod pa nyid du nges pa'i tshul gyis rtags kyang yod na/ 'di ltar mi mthun pa'i phyogs la med pa nyid du nges pa'i tshul gyis rtags ma bstan pas de'i phyir gtan tshigs kyi mtshan nyid ma tshang nas/ gtan tshigs yod pa nyid ces bya ba de ma nges pa'i phyir gtan tshigs nyid ma yin no zhes na/ de'i lan du 'dir 'grel pa byed pa nyid kyis med pa kho na'i phyir de la ldog pa med pas 'di dang thams cad la nyes pa med do zhes bya ba smras so/ /de la med pa kho na'i phyir zhes bya ba ni mi mthun pa'i phyogs med pa kho na'i phyir te/ 'di ltar kho bo cag dbu ma pa la ni nang gi skye mched rnams bdag las skye ba med pa'i mi mthun pa'i phyogs gzhan las skye ba zhes bya ba med pa kho na'i phyir ro/ /de la ldog pa med pas zhes bya ba ni mi mthun pa'i phyogs med pa de la bsgrub par bya ba dang sgrub pa'i chos gnyis ldog pa med pas te/ gal te bdag las skye ba med pa'i mi mthun pa'i phyogs gzhan las skye ba zhes bya ba yod na ni de la bsgrub par bya ba dang sgrub pa'i chos de gnyis ldog cing med par 'gyur bas mi mthun pa'i phyogs la med pa nyid du nges pa'i tshul gyis rtags kyang bstan du rung ba zhig na/ kho bo cag la bdag las skye ba med pa'i mi mthun pa'i phyogs gzhan las skye ba zhes bya ba de med pa kho na'i phyir/ de la bsgrub par bya ba dang sgrub pa'i chos ldog pa med pas 'dir mi mthun pa'i phyogs la med pa nyid du nges pa'i tshul gyis rtags bstan mi dgos so zhes bya ba'i tha tshig go/ /'di dang thams cad la nyes pa med do zhes bya ba ni sbyor ba'i tshig 'di la yang gtan tshigs ma nges pa'i skyon gyi nyes pa med la/ 'di 'ba' zhig tu yang ma zad de/ 'di ltar bstan bcos 'di la 'og nas 'byung ba'i sgrub pa gzhan thams cad la yang nyes pa 'di med do/ /'di skad bstan te mi mthun pa'i phyogs yod na ni de la bsgrub par bya ba dang sgrub pa'i chos ldog pa yang bstan par bya ste/ dper na sgra mi rtag ste byas pa'i phyir ro zhes bya ba'i mi mthun pa'i phyogs nam mkha' ni rtag ste ma byas pa'i phyir ro zhes bya ba lta bu zhig yod na ni mi mthun pa'i phyogs de la bsgrub par bya ba dang / sgrub pa'i chos mi rtag ste byas pa'i phyir ro zhes bya ba de gnyis ni ldog cing med par 'gyur ba zhig na/ smras pa/ gang la mi mthun pa'i phyogs nyid med pa de la bsgrub par bya ba dang sgrub pa'i chos ldog pa med do/ /de'i phyir kho bo'i phyogs bdag las skye ba med pa zhes bya ba 'di'i mi mthun pa'i phyogs ni gzhan las skye ba zhes bya bar brtag grang na/ kho bos ni rnam pa thams cad kho nas skye ba med par khas blangs pas de'i phyir kho bo la mi mthun pa'i phyogs med pa kho na'i phyir/ de la ldog pa med pas gtan tshigs kyi skyon med do/ /gtan tshigs kyi mtshan nyid ma tshang bar yang mi 'gyur te/ 'di ltar kho bo la mi mthun pa'i phyogs med pa kho na'i phyir/ de la gtan tshigs rang bzhin gyis mi 'jug pa nyid ldog pa yang yin pas mi mthun pa'i phyogs la med pa nyid du nges pa'i tshul gyis rtags kyang yod pa yin no/ /'dir grangs can dag las kha cig phyir zlog par byed do/ dam bcas pa 'di'i don gang yin/ ci bdag las zhes bya ba 'bras bu'i bdag nyid las sam/ 'on te rgyu'i bdag nyid las/ des cir 'gyur/ gal te 'bras bu'i bdag nyid las na ni grub pa la sgrub po/ /'on te rgyu'i bdag nyid las na ni 'gal ba'i don nyid de/ skye ba can thams cad ni rgyu'i bdag nyid du yod pa kho na las skye ba'i phyir ro zhe na zhes bya ba ni/ 'dir de ltar gtan tshigs kyi skyon bsal ba la grangs can dag las 'bras bu dang rgyu dang gnyi ga'i ngo bo nyid smra ba kha cig dngos po rnams kyi skye ba sgrub pa'i phyir/ slob dpon gyi dngos po rnams bdag las skye ba med par sgrub pa la dam bcas pa'i skyon brjod pa'i rnam pas phyir rgol ba nyid du gnas par byed pa yin no/ /de la 'dir zhes bya ba ni de ltar gtan tshigs kyi skyon bsal ba'i skabs 'dir ro/ /grangs can dag las zhes bya ba ni grangs can dag las gyes pa nyi shu rtsa lnga yod do zhes grags pa de dag las so/ /kha cig ces bya ba ni de dag las rgyu dang 'bras bu dang gnyi ga smra ba gang dag yin pa kha cig go/ /phyir zlog par byed de zhes bya ba ni de dag dngos po rnams kyi skye ba sgrub pa'i phyir/ slob dpon gyis dngos po rnams bdag las skye ba med par sgrub pa la dam bcas pa'i skyon brjod pa'i rnam pas phyir rgol ba nyid du gnas par byed pa'o/ /dam bcas pa 'di'i don gang yin zhes bya ba ni dbu ma pas dngos po rnams bdag las skye ba med do zhes dam bcas pa de la bdag las zhes bya ba 'di'i don gang yin zhes klan ka tshol ba'i tshig yin no/ /ci bdag las zhes bya ba zhes bya bas ni 'di skad bstan te/ 'di la dngos po thams cad kyi ngo bo nyid kyi rnam pa gnyis te/ 'bras bu'i ngo bo nyid dang / rgyu'i ngo bo nyid do/ /de la 'bras bu'i ngo bo nyid ni 'bras bu gsal ba'i tshul gyis yod pa'o/ /rgyu'i ngo bo nyid ni 'bras bu'i nus pa dang ldan pa'i rgyu'i bdag nyid yod pa kho na las skye bar mthong ba ste/ gal te 'bras bu'i nus pa med pa'i rgyu las skye na ni 'bras kyi sa bon las kyang nas kyi myu gu skye ba'i rigs na mi skye bas de'i phyir rgyu gang las 'bras bu gang gi ngo bo nyid yod pa de rgyu de las skyes pas/ kho bos dngos po rnams bdag las skye'o zhes brjod pa gang yin pa de ni bdag rgyu'i bdag nyid du yod pas skyes pa yin na/ khyed kyi nang gi skye mched rnams bdag las skye ba med do zhes dam bcas pa'i bdag las zhes bya ba de gang yin zhes gleng ba yin no/ /'bras bu'i bdag nyid las sam zhes bya ba ni 'bras bu gsal ba'i ngo bo nyid du yod pa'i bdag nyid las skye ba med pa yin nam zhes 'dri ba yin no/ /'on te rgyu'i bdag nyid las zhes bya ba ni 'bras bu'i nus pa dang ldan pa'i rgyu'i bdag nyid du yod pa las skye ba med pa yin zhes gal gzung ba yin no/ /des cir 'gyur zhes bya ba ni/ phyogs de gnyi ga yang skyon chags pa yin no zhes bya ba'i tha tshig go/ /de nyid bstan pa'i phyir/ gal te 'bras bu'i bdag nyid las na ni grub pa la sgrub po zhes bya ba smras so/ /gal te 'bras bu'i bdag nyid las na ni zhes bya ba ni 'bras bu gsal ba'i ngo bo nyid du yod pa'i bdag nyid las skye ba med pa zhes bsgrub na ni'o/ /grub pa la sgrub po zhes bya ba ni de ltar na khyod kyi gtan tshigs de grub pa la sgrub pa'i skyon du 'gyur te/ 'di ltar 'di na mig la sogs pa skye mched yul 'dzin na nus pa gsal ba'i ngo bo nyid du yod pa dag la yang skye ba med pa ni 'jig rten thams cad la grub zin pa yin pas de las skye ba med par bsgrub na ni grub pa la sgrub pa yin no/ /de ltar na khyed nang gi skye mched yul 'dzin nus pa 'bras bu gsal ba'i ngo bo nyid du yod pa'i bdag nyid las skye ba med par bsgrub pa'i tshig de ni dper na smyon pa'am gdon gyis zin pa dag bum pa byas zin pa yang bya'o zhes zer ba'i tshig bzhin du grub pa la sgrub pa'i skyon du 'gyur ro/ /'on te rgyu'i bdag nyid las na ni 'gal ba'i don de nyid de zhes bya ba la/ 'on te rgyu'i bdag nyid las na ni zhes bya ba ni 'bras bu'i nus pa dang ldan pa'i rgyu'i bdag nyid yod pa las skye ba med pa zhes bsgrub na ni'o/ /'gal ba'i don nyid de zhes bya ba ni de ltar na khyed kyi gtan tshigs de 'gal ba'i skyon du 'gyur te/ 'di ltar 'jig rten na 'bras bu'i nus pa dang ldan pa'i rgyu mer mer po la sogs pa bdag nyid yod pa las 'bras bu nang gi skye mched rnams gsal ba'i ngo bo nyid du skye bar grags pa las 'bras bu skye ba med par sgrub na ni 'jig rten la grags pa dang 'gal ba'i don nyid du 'gyur ro/ /de nyid bstan pa'i phyir/ skye ba can thams cad ni rgyu'i bdag nyid du yod pa kho na las skye ba'i phyir ro zhes bya ba smras te/ skye ba can thams cad ces bya ba ni dngos po gang la skye ba yod pa de ni skye ba can te nang dang phyi rol gyi skye mched thams cad do/ /rgyu'i bdag nyid du yod pa kho na las skye ba'i phyir ro zhes bya ba ni skye ba can de dag thams cad ni 'bras bu'i nus pa'i rgyu'i bdag nyid du yod pa kho na las skye bar 'jig rten na grags pa'i phyir te/ 'di ltar 'jig rten nang gi skye mched thams cad kyang mer mer po la sogs pa rgyu'i bdag nyid du yod pa kho na las skye bar mthong la/ myu gu yang sa bon gyi bdag nyid du yod pa kho na las skye ba dang / bum pa yang 'jim pa'i bdag nyid du yod pa kho na las skye bar mthong ba'i phyir ro/ /de lta bas na gal te rgyu'i ngo bo nyid du yod pa'i bdag nyid las skye ba med par sgrub na ni 'jig rten na dngos po skye ba can thams cad rgyu'i bdag nyid du yod pa kho na las skye bar grags pa dang 'gal bar 'gyur ro zhe na zhes bya ba ni 'dir de ltar gtan tshigs kyi skyon bsal ba la/ grangs can dag las 'bras bu dang rgyu dang gnyi ga'i ngo bo nyid smra ba kha cig dngos po rnams kyi skye ba sgrub pa'i phyir/ slob dpon gyis dngos po rnams kyi skye ba bdag las skye ba med par bsgrub pa la dam bcas pa'i skyon brjod pa'i rnam pas phyir rgol ba nyid du gnas pa dag de skad ces zer na'o/ /de skad zer ba de'i lan du/ 'dir 'grel pa byed pa nyid kyis/ de ni bzang po ma yin te bdag las skye ba tsam dgag pa'i phyir ro/ /rgyu'i bdag nyid las na yang bdag dang gzhan du gyur pa las kyang skye ba sel ba'i phyir ro/ /shes pa yod pa nyid ni nus pa'i mtshan nyid dang ldan pa yongs su gzung ba'i phyir yang nyes pa med do zhes bya ba smras so/ /de la de ni bzang po ma yin te zhes bya ba ni sun dbyung ba'i rnam pa gnyi ga yang sun dbyung ba ltar snang ba yin pas bzang po ma yin te/ 'di ltar grub pa la sgrub pa ma yin pa'i phyir dang / 'gal ba'i don nyid ma yin pa'i phyir ro/ /ji ltar na grub pa la sgrub pa ma yin zhe na/ de'i phyir bdag las skye ba tsam 'gag pa'i phyir ro zhes bya ba smras te/ 'di la grub pa la sgrub pa zhes bya ba ni rgol ba dang phyir rgol ba gnyi ga'i blo mthun pa'i don la yang gtan tshigs gzhan gyis sgrub pa yin na/ kho bos ni 'bras bu'i bdag nyid du yod pa la skye ba med do zhes ma smras te/ 'di ltar 'bras bu'i bdag nyid las sam/ rgyu'i bdag nyid las zhes bye brag tu brjod pa ma byas pa kho nar bdag las skyes pa tsam kho nar 'gog par byed la/ khyod kyis ni 'bras bu'i bdag nyid las sam/ 'on te rgyu'i bdag nyid las zhes bye brag tu brjod pa byas pas des na 'u bu cag blo mthun pa ma yin pa'i phyir/ kho bos dngos po rnams bdag las skye ba med par bkag pa 'di grub pa la sgrub pa ma yin no/ /ji ltar na 'gal ba'i don nyid ma yin zhe na/ de'i phyir rgyu'i bdag nyid las na yang zhes bya ba la sogs pa smras te/ dngos po rnams rgyu'i bdag nyid las skye ba med par bsgrub na yang 'jig rten las grags pa dang 'gal ba'i don nyid du mi 'gyur te/ 'di ltar khyod na re/ skye ba can thams cad ni rgyu'i bdag nyid du yod pa kho na las skye ba'i phyir ro zhes zer ba gang yin pa de 'dir brtag gi nyon cig /ci myu gu'i rgyu'i sa bon zhes bya ba de myu gu'i rang gi bdag nyid yin nam/ 'on te bdag nyid gzhan yin/ gang yang rung ba zhig tu brtag grang na/ de la kho bo ni bdag dang gzhan du gyur pa las kyang skye ba sel ba'i phyir 'gal ba'i don nyid du mi 'gyur ro/ /'di skad bstan te/ gal te myu gu'i rgyu'i sa bon de rang gi bdag nyid yin te/ sa bon gang yin pa de nyid myu gu yin na ni de'i phyir bdag las skye ba med pa zhes bya ba de legs par gsungs pa yin no/ /ci ste myu gu'i ngo bo nyid las sa bon bdag nyid gzhan yin na ni de'i phyir 'og kho na nas dngos po rnams gzhan las skye ba med par ston pa'i skabs su brtag gi/ /cung zad sdod cig /de ltar gtan tshigs kyi skyon bsal ba/ 'dir grangs can dag kho na las nus pa smra ba gzhan kha cig dpe la skyon 'dogs par byed pa dag na re/ khyed kyis sngar nang gi skye mched rnams bdag las skye ba med par nges te yod pa'i phyir/ dper na shes pa yod pa nyid bzhin no zhes sbyor ba'i tshig smras pa'i skabs su/ shes pa yod pa nyid la dpe blangs pa de ni mi rung ste/ shes pa yod pa nyid ni skyes bu'i rang gi ngo bo nyid de/ dper na dro ba ni me'i rang gi ngo bo nyid yin pa dang 'dra'o/ /de yang dus thams cad du med de 'di ltar/ blo yis don ni gnas byas pa/ /skyes bus sems par byed pa yin/ /zhes 'byung bas/ gang gi tshe blos sgra la sogs pa'i don rgyud la gnas par byas shing skyes bu la 'bul bar byed pa de'i tshe na shes pa yod pa nyid skye'i/ ji srid du blos sgra la sogs pa don rgyud la gnas par ma byas shing skyes bu la 'bul bar mi byed pa de srid du shes pa yod pa nyid mi skye bas de'i phyir shes pa yod pa nyid ni nus pa'i mtshan nyid kyis rtag tu yod kyang / gsal ba'i mtshan nyid kyis rtag tu med pas gtan tshigs yod pa nyid kyi dpe shes pa yod pa nyid las blangs pa de'i mtshan nyid ma tshang bas sgrub pa'i skyon du 'gyur ro zhes zer ba'i phyogs snga ma khong nas dbyung ba de'i lan du/ shes pa yod pa nyid ni nus pa'i mtshan nyid dang ldan pa yongs su gzung ba'i phyir yang nyes pa med do zhes bya ba smras so/ /'di skad bstan te/ gang gi tshe blo'i rtsol bas ma skyes pa'i shes pa yod pa nyid nus pa'i mtshan nyid kyi gnas skabs na yod pa nyid gang yin pa de kho bos dpe nyid du bstan par byas pas de'i phyir dpe'i skyon med do/ /de la shes pa yod pa nyid ni zhes bya ba ni sngar nang gi skye mched rnams bdag las skye ba med par nges te yod pa'i phyir/ dper na shes pa yod pa nyid bzhin no zhes gtan tshigs yod pa nyid kyi dper bstan pa'i shes pa yod pa nyid do/ /nus pa'i mtshan nyid dang ldan pa zhes bya ba ni shes pa yod pa nyid gang la nus pa'i mtshan nyid yod pa de ni nus pa'i mtshan nyid dang ldan pa ste/ de yang grangs can gyi skyes bu la dus thams cad du yod par khas blangs pas yod pa nyid yin no/ /yongs su gzung ba'i phyir zhes bya ba ni nus pa'i mtshan nyid dang ldan pa de kho bos yod pa nyid kyi dper yongs su gzung ba'i phyir gtan tshigs kyi dpe la skyon med do/ /yang zhes bya ba'i sgra ni nus pa'i mtshan nyid dang ldan pa 'ba' zhig yongs su bzung ba'i phyir gtan tshigs kyi dpe la skyon med par ma zad kyi/ gsal ba'i mtshan nyid dang ldan pa yongs su gzung ba'i phyir yang gtan tshigs kyi dpe la skyon med do zhes bya ba'i don to/ /nyes pa med do zhes bya ba ni de'i phyir gtan tshigs yod pa nyid kyi dper shes pa yod pa nyid bstan pa la dpe'i skyon gyis nyes pa med pa'o/ /'di la gzhan ni dngos po rnams bdag gi bdag nyid las skye ba med de/ de dag gi skye ba don med pa nyid du 'gyur ba'i phyir dang / skye ba thug pa med par 'gyur ba'i phyir ro/ /zhes rnam par bshad par byed do zhes bya ba ni dngos po rnams bdag las skye ba med par sgrub pa'i skabs 'di la 'grel pa byed pa slob dpon bud+d+ha pA li ta ni 'di skad du rnam par bshad par byed do zhes bstan pa yin no/ /de la 'di la zhes bya ba ni dngos po rnams bdag las skye ba med par sgrub pa'i skabs 'di la'o/ /gzhan ni zhes bya ba'i sgra ni bstan bcos 'di'i 'grel pa byed pa mang ste/ 'di lta ste/ slob dpon gyi zhal snga nas dang / gnas brtan bud+d+ha pA li ta dang / tsan+d+ra kIrti dang / de ba sharma dang / gu Na shrI dang / gu Na ma ti dang / s+thi ra ma ti dang / slob dpon legs ldan 'byed nyid la thug pa'i bar dag yod pa las de dag phal las gzhan pas te gnas brtan bud+d+ha pA li ta dang sbyar ro/ /gnas brtan bud+d+ha pA li ta ni dngos po rnams bdag nyid las skye ba med de/ de dag gi skye ba don med pa nyid du 'gyur ba'i phyir dang / skye ba thug pa med pa nyid du 'gyur ba'i phyir ro zhes rnam par bshad par byed do/ /de la dngos po rnams zhes bya ba ni phyi dang nang gi skye mched rnams so/ /bdag gi bdag nyid las zhes bya ba ni bdag nyid las bya ba'i tha tshig ste de las so/ /skye ba med de zhes bya ba ni don dam par ro/ /ci'i phyir dngos po rnams bdag gi bdag nyid las skye ba med ce na/ de dag gi skye ba don med pa nyid du 'gyur ba'i phyir te/ de dag gi skye ba zhes bya ba ni dngos po de dag gi skye ba'o/ /don med pa zhes bya ba ni don dang bral ba ni don med pa ste 'bras bu med pa'o/ /nyid ces bya ba ni de dag gi skye ba don med pa'i dngos po ni de dag gi skye ba don med pa nyid do/ /de dag gi skye ba don med pa nyid du 'gyur ba'i phyir zhes bya bas ni 'di skad bstan te/ gal te dngos po rnams yod pa las skye na de dag gi skye ba don med pa nyid du 'gyur te/ 'di ltar skyes zin pa las khyad par sngon ma byung ba 'ga' yang med pa'i phyir ro/ /gzhan yang skye ba thug pa med par 'gyur ba'i phyir te/ gal te yod kyang skye bar 'gyur na yang skye bar 'gyur bas/ rnam pa des ma shi ba'i bar du skye bar 'gyur te/ des na skye ba yongs su rdzogs pa med pa kho nar 'gyur ro zhes rnam par bshad pa byed do zhes bya ba ni/ gnas brtan bud+d+ha pA li ta ni/ dngos po rnams bdag las skye ba med par bsgrub pa'i skabs 'dir de skad ces rnam par bshad par byed do/ /de ni rigs pa ma yin te/ gtan tshigs dang dpe ma brjod pa'i phyir dang / gzhan gyis smras pa'i nyes pa ma bsal ba'i phyir ro/ /glags yod pa'i tshig yin pa'i yang phyir te/ skabs kyi don las bzlog pas bsgrub par bya ba dang de'i chos bzlog pa'i don mngon pas dngos po rnams gzhan las skye bar 'gyur ba dang / skye ba 'bras bu dang bcas pa nyid du 'gyur ba dang / skye ba thug pa yod par 'gyur ba'i phyir mdzad pa'i mtha' dang 'gal bar 'gyur ro zhes bya ba ni/ 'grel pa byed pa nyid kyis gnas brtan bud+d+ha pA li tas rnam par bshad pa de rigs pa ma yin par sgrub pa'i tshig yin no/ /de la de ni rigs pa ma yin te zhes bya ba ni/ gnas brtan bud+d+ha pA li tas rnam par bshad pa de ni rigs pa ma yin no zhes dam bcas pa yin no/ /ci'i phyir rigs pa ma yin zhe na/ gtan tshigs dang dpe ma brjod pa'i phyir te/ 'di skad bstan te/ rnam par bshad pa de la dngos po rnams bdag las skye ba med do zhes dam bcas pa de tsam kho na zhig grags par zad kyi/ ji ltar bdag las skye ba med pa'i gtan tshigs yod pa'i phyir zhes bya ba lta bu dang / yod pa bdag la skye ba med pa'i dpe/ /dper na shes pa yod pa nyid bzhin no/ /zhes bya ba lta bu ma brjod pa'i phyir de ni rigs pa ma yin no/ / gzhan yang gzhan gyis smras pa'i nyes pa ma bsal ba'i phyir te/ gal te de la gtan tshigs dang dpe dag brjod cing sgrub pa rdzogs par brjod du zin kyang de la skye bar smra ba gzhan gyis smras pa'i nyes pa gdon mi za bar 'byung bar 'gyur na/ de yang khyod kyis ma bsal bas/ de'i phyir gzhan gyis smras pa'i nyes pa ma bsal ba'i phyir de ni rigs pa ma yin no/ /gzhan yang de ji ltar rigs pa ma yin zhe na/ glags yod pa'i tshig yin pa'i yang phyir te/ gnas brtan bud+d+ha pA li tas rnam par bshad pa de ni rgol ba gzhan gyi klan ka'i glags yod pa'i tshig yin pa'i phyir yang rigs pa ma yin no/ /yang zhes bya ba'i sgra ni gtan tshigs dang dpe ma brjod pa'i phyir dang gzhan gyis smras pa'i nyes pa ma bsal ba'i phyir rigs pa ma yin pa 'ba' zhig tu ma zad kyi/ de ni glags yod pa'i tshig yin pa'i phyir yang rigs pa ma yin no zhes bya bar sbyar ro/ /de nyid bstan pa'i phyir/ skabs kyi don la zlog pa zhes bya ba smras te/ skabs kyi don gang zhe na/ gnas brtan bud+d+ha pA li ta nyid kyis dngos po rnams bdag gi bdag nyid las skye ba med de/ de dag gi skye ba don med pa nyid du 'gyur ba'i phyir dang / skye ba thug pa med par 'gyur ba'i phyir ro zhes rnam par bshad pa nyid yin no/ /de las bzlog pas zhes bya bas ni skabs kyi don de las bzlog pa ste/ dngos po rnams bdag gi bdag nyid las skye ba med de zhes bya ba las bzlog pa/ dngos po rnams gzhan las skye bar 'gyur ba dang / de dag gi skye ba don med pa nyid du 'gyur ba'i phyir zhes bya ba las bzlog pa skye ba 'bras bu dang bcas pa nyid du 'gyur ba dang / skye ba thug pa med pa nyid du 'gyur ba'i phyir ro zhes bya ba las bzlog pa skye ba thug pa yod par 'gyur ba'i phyir zhes bya bas/ glags yod pa'i tshig yin pa'i phyir yang rigs pa ma yin no/ /skabs kyi don las bzlog pas ji ltar glags yod pa'i tshig yin par 'gyur zhe na/ de'i phyir bsgrub par bya ba dang / de'i chos bzlog pa'i don mngon pas zhes bya ba smras te/ bsgrub par bya ba zhes bya ba ni dngos po rnams bdag gi bdag nyid las skye ba med de zhes bsgrub par bya'o/ /de bzlog pa'i don mngon pas zhes bya ba ni dngos po rnams bdag gi bdag nyid las skye ba med de zhes bya ba las bzlog pa'i don dngos po rnams gzhan las skye ba zhes bya ba mngon pas so/ /de'i chos zhes bya ba ni bsgrub par bya ba de'i chos te dngos po rnams bdag gi bdag nyid las skye ba med de zhes bsgrub par bya ba de'i phyogs kyi chos de dag gi skye ba don med pa nyid du 'gyur ba'i phyir dang / skye ba thug pa med par 'gyur ba'i phyir ro zhes bya ba'o/ /de bzlog pa'i don mngon pas zhes bya ba ni de dag gi skye ba don med pa nyid du 'gyur ba'i phyir zhes bya ba bzlog pa'i don skye ba 'bras bu dang bcas pa nyid du 'gyur ba zhes bya ba dang / skye ba thug pa med par 'gyur ba'i phyir ro zhes bya ba bzlog pa'i don skye ba thug pa yod par 'gyur ba'i phyir ro zhes bya ba mngon pas so/ /de dag bzlog pa'i don mngon pas glags ji lta bu yod par 'gyur zhe na/ de'i phyir dngos po rnams gzhan las skye bar 'gyur ba dang / skye ba 'bras bu dang bcas pa nyid du 'gyur ba dang / skye ba thug pa yod par 'gyur ba'i phyir zhes bya ba smras te/ bsgrub par bya ba dngos po rnams bdag gi bdag nyid las skye ba med de zhes bya ba bzlog pa'i don mngon pas ni dngos po rnams gzhan las skye ba zhes bya ba'i glags yod par 'gyur ba dang / de'i chos de dag gis skye ba don med pa nyid du 'gyur ba'i phyir zhes bya ba bzlog pa'i don mngon pas ni skye ba 'bras bu dang bcas pa nyid ces bya ba'i glags yod par 'gyur ba dang / de'i chos skye ba thug pa med par 'gyur ba'i phyir ro zhes bya ba bzlog pa'i don mngon pas ni skye ba thug pa yod pa zhes bya ba'i glags yod par 'gyur ba'i phyir ro/ /de ltar gyur na nyes pa ci yod ces 'dri ba'i phyogs snga ma khong nas dbyung ba de'i lan du mdzad pa'i mtha' dang 'gal bar 'gyur ro zhes bya ba smras te/ 'di ltar slob dpon gyi lung las/ dngos po rnams gzhan las skye bar mi bzhed pa dang / skye ba 'bras bu dang bcas par mi bzhed pa dang / skye ba thug pa yod par mi bzhed pa'i grub pa'i mtha' dang 'gal bar 'gyur ro/ /de lta bas na gnas brtan bud+d+ha pA li tas rnam par bshad pa de ni sgrub pa dang lung dang 'gal bas rigs pa ma yin no/ /gzhan dag na re/ dngos po rnams bdag las skye ba med pa zhes bya ba de rigs pa ma yin te/ phyogs snga ma rang dgar sbyar ba la sel ba'i phyir ri b ong gi rwa las 'jig rten gsum skye ba sel ba bzhin no zhes zer ro zhes bya ba ni grangs can dag kho na las nus pa smra ba gzhan dag dbu ma pas dngos po rnams bdag las skye ba med pa zhes smras pa gang yin pa'i sgrub pa 'di la rjes su dpag pas 'gog par byed pa'i tshig yin no/ /de la gzhan dag na re zhes bya ba ni grangs can dag kho na las nus pa smra ba gzhan dag na re'o/ /'dir dngos po rnams bdag las skye ba med pa zhes bya ba ste zhes bya ba 'di ni chos can yin pa/ rigs pa ma yin te zhes bya ba 'di ni bsgrub par bya ba chos yin/ phyogs snga ma rang dgar sbyar ba la sel ba'i phyir zhes bya ba 'di ni sgrub pa'i chos yin/ ri bong gi rwa las 'jig rten gsum skye ba sel ba bzhin no zhes bya ba 'di ni dpe yin par sbyar ro/ /de la dngos po rnams bdag las skye ba med pa zhes bya ba de zhes bya ba ni dbu ma pas nang gi skye mched rnams bdag las skye ba med par nges te yod pa'i phyir/ dper na shes pa yod pa nyid bzhin no zhes dam bcas pa dang / gtan tshigs dang dpe bstan pas sbyor ba'i tshig smras pa gang yin pa de'o/ /rigs pa ma yin te zhes bya ba ni dbu ma pas dngos po rnams bdag las skye ba med pa zhes smras pa gang yin pa'i sgrub pa de rjes su dpag pa'i sgo nas rigs pa ma yin no zhes dam bcas pa yin no/ /phyogs snga ma rang dgar sbyar ba la sel ba'i phyir zhes bya ba la phyogs snga ma zhes bya ba ni dbu ma pas sun dbyung ba'i phyogs snga ma ste/ 'di ltar skye bar smra ba dag las kha cig ni dngos po rnams bdag las skye'o zhes zer zhes dbu ma pa nyid kyis sngar smra ba gang yin pa de'o/ /rang dgar zhes bya ba ni bdag nyid kyi bsam pa ste nges so/ /sbyar ba pa la zhes bya ba ni sgro btags pa la'o/ /sel ba'i phyir zhes bya ba ni sun dbyung ba'i phyir ro/ /'di skad bstan te/ dbu ma pas nang gi skye mched rnams bdag las skye ba med par nges te yod pa'i phyir/ dper na shes pa yod pa nyid bzhin no zhes dam bcas pa dang / gtan tshigs dang dpe bstan pas sbyor ba'i tshig smras pa gang yin pa de rigs pa ma yin te/ ci'i phyir zhe na dbu ma pas sun dbyung ba'i phyogs snga ma 'di ltar skye bar smra bdag las/ kha cig ni dngos po rnams bdag las skye'o zhes zer zhes sngar smras pa gang yin pa de skye bar smras pa dag las su yang de skad mi zer bar dbu ma pa dag nyid kyis rang dgar sbyar ba yin la/ de la dngos po rnams bdag las skye ba med do zhes sel bar byed pa'i phyir/ rjes su dpag pa de'i sgo nas brtag na rigs pa ma yin no/ /de yang ji lta bu zhe na/ ri bong gi rwa las 'jig rten gsum skye ba sel ba bzhin te/ dper na sus kyang ri bong gi rwa las 'jig rten gsum skyes so zhes khas ma blangs par/ 'ga' zhig gis byung rgyal kho nar ri bong gi rwa las 'jig rten gsum skyes so zhes smras shing / de'i 'og tu de rang nyid kyis sel bar byed de/ ri bong gi rwa las 'jig rten gsum skyes so zhes zer ba de ni mi rung ngo zhes sun 'byin par byed pa dang 'dra bar/ 'dir yang sus kyang dngos po rnams bdag las skye'o zhes khas ma blangs par dbu ma pa khyed nyid kyis 'di ltar skye bar smra ba dag las/ kha cig ni dngos po rnams bdag las skye'o zhes zer ro zhes phyogs snga ma rang dgar sbyar zhing / de'i 'og tu khyed rang nyid kyis sel bar byed de/ dngos po rnams bdag las skye ba med do zhes sun 'byin par byed pa 'di yang rigs pa ma yin no/ /'di skad bstan te/ kho bos 'di ltar nang gi skye mched rnams gsal ba'i ngo bo nyid du yod bzhin du bdag las skye'o zhe 'am/ myu gu gsal ba'i ngo bo nyid du yod bzhin du bdag las skye'o zhes ni khas ma blangs kyi/ 'di ltar nang gi skye mched rnams kyi nus pa mer mer po la sogs pa'i gnas skabs na yod pas de'i phyir nus pa las gsal bar skye ba dang / myu gu'i nus pa yang sa bon so sor nges pa rnams la yang yod pas/ de'i phyir nus pa las gsal ba skye bar khas blangs pas/ de'i phyir kho bo cag dngos po rnams bdag las skye zhes mi zer bzhin du/ khyed dngos po rnams bdag las skye ba med do zhes sel bar byed pa de rigs pa ma yin no zhes zer ro zhes bya ba ni grangs can dag kho na las nus pa smra ba gzhan dag dbu ma pas dngos po rnams bdag las skye ba med pa zhes smras pa gang yin pa'i sgrub pa 'di la rjes su dpag pas 'gog par byed pa dag de skad ces zer ba yin no/ /rjes su dpag pa 'gal bas rgol ba de la 'dir 'grel pa byed pas rjes su dpag pa dang 'gal ba nyid kyis lan gdab pa'i phyir/ nus pa dang gsal ba ni bdag nyid tha mi dad pa'i phyir/ bdag gi bdag nyid bzhin te/ de las skye ba ni bdag las skye ba zhes bya ba yin pas phyogs snga ma grub po zhes bya ba smras so/ /'dir yang nus pa'i ngo bo nyid ces bya ba 'di ni chos can yin la/ gsal ba'i ngo bo nyid las nus pa'i ngo bo nyid tha mi dad pa zhes bya ba 'di ni bsgrub par bya ba chos yin no/ /bdag nyid tha mi dad pa'i phyir zhes bya ba 'di ni sgrub pa'i chos yin/ bdag gi bdag nyid bzhin te zhes bya ba 'di ni dpe yin par sbyar ro/ /de las skye ba ni bdag las skye ba zhes bya ba yin pas phyogs snga ma grub po zhes bya ba 'di ni tshad ma'i 'bras bu yin no/ /de la nus pa dang gsal ba ni zhes bya ba la/ 'dir de gnyis tha mi dad par sgrub pa'i tshad ma de gnyis sbyor ba gcig kho nas nus pa dang gsal ba'i phyogs la ston to/ / de la nus pa zhes bya ba ni grangs can gyi 'bras bu'i nus pa rgyu la snga na yod par brtags pa gang yin pa ste/ nus pa'i ngo bo nyid 'di la bsgrub par bya ba chos/ gsal ba'i ngo bo nyid las nus pa'i ngo bo nyid tha mi dad pa dang / sgrub pa'i chos nus pa dang gsal ba gnyis kyi bdag nyid tha mi dad pa gnyis yod pa'i phyir chos can zhes bya'o/ /gsal ba zhes bya ba ni grangs can gyis 'bras bu rkyen gyi byed pas bsgrubs te bdag nyid thob pa ni gsal ba zhes bya'o zhes brtags pa gang yin pa de/ skabs 'dir gsal ba'i ngo bo nyid las nus pa'i ngo bo nyid la tha mi dad par bsgrub par bya ba yin pas/ gsal ba'i ngo bo nyid las nus pa'i ngo bo nyid tha mi dad par ni bsgrub par bya ba chos zhes bya'o/ /'dir ni rigs mthun pa'i rgyu la tha dad pa med pa'i phyir tha mi dad par sgrub po/ /ci'i phyir gsal ba'i ngo bo nyid las nus pa'i ngo bo nyid tha mi dad ce na/ bdag nyid tha mi dad pa'i phyir te nus pa dang gsal ba de gnyis kyi bdag nyid tha mi dad pa'i phyir gsal ba'i ngo bo nyid las nus pa'i ngo bo nyid tha mi dad do/ /ji ltar tha mi dad ce na/ rigs mthun pa'i rgyu la tha dad pa med pa'i phyir tha mi dad pa zhes bya'o/ /de yang ji lta bu zhe na/ bdag gi bdag nyid bzhin te/ dper na gsal ba bdag gi bdag nyid dang tha mi dad pa bzhin du nus pa yang gsal ba tha mi dad pa'i phyir/ gsal ba'i ngo bo nyid las nus pa'i ngo bo nyid tha ma dad do/ /de bzhin du dper na nus pa bdag gi bdag nyid dang tha mi dad pa bzhin du/ gsal ba yang nus pa dang tha mi dad pa'i phyir gsal ba'i ngo bo nyid las nus pa'i ngo bo nyid tha mi dad do/ /de ltar nus pa dang gsal ba gnyis tha mi dad par bstan pa nyid tshad ma'i 'bras bu yin te/ de nyid bstan pa'i phyir/ de las skye ba ni bdag las skye ba zhes bya ba yin pas zhes bya ba smras te/ de las skye ba ni zhes bya ba mi nus pa dang / gsal ba tha mi dad pa de las skye ba ni'o/ /'di skad bstan te/ nus pa dang gsal ba gnyis bdag nyid tha mi dad pa'i phyir bdag gi bdag nyid bzhin pas gsal ba'i ngo bo nyid kho na las gsal ba'i ngo bo nyid kho na skye bar grub po zhes bya ba'i tha tshig go/ /de'i phyir bdag las skye ba zhes bya ba yin pas zhes bya ba smras te/ gsal ba bdag las gsal ba bdag kho na skye ba yin pas so 'di skad bstan te/ de ltar na dngos po rnams bdag las skye ba zhes bya ba 'di ni grangs can khyed nyid kyi grub pa'i mtha' nyid yin pas/ kho bos yang dag pa ma yin pas khyed la sgro btags pa ni ma yin no zhes ston to/ /phyogs snga ma grub po zhes bya ba ni kho bos phyogs snga ma rang dgar sbyar ba ma yin te/ de ltar dam bca' ba dang / gtan tshigs dang / dpe'i 'thad pa ji skad bstan pa de nyid kyis na/ grangs can khyed kyis grub pa'i mtha' las dngos po rnams bdag las skye zhes 'byung bas kho ba'i phyogs snga ma grub pa yin no/ /de lta bas na khyod kyi grub pa'i mtha' las dngos po rnams bdag las skye'o zhes 'byung ba de nyid kho bos phyogs snga mar byas [(]pa 'a [,]po'i [)]kho bo dngos po rnams bdag las skye ba med do zhes sel zhing sun 'byin par byed pa de rigs pa kho na yin no zhes bya ba'i tha tshig go/ /phyogs rnam par brtags su zin kyang mi rigs pa brjod par bya ba'i phyir de yongs su gzung bas nyes pa med do zhes bya ba ni 'grel pa byed pas phyogs snga ma rang dgar sbyar ba la sel bar byed du zin na yang nyes pa med do zhes bstan pa'i tshig yin no/ /de la phyogs rnam par brtags su zin na yang zhes bya ba ni gal te dngos po rnams bdag las skye'o zhes sus kyang khas blangs pa med du zin na yang skye ba 'gag par smra bas 'di la dngos po skye ba 'di dag ci bdag las skye bar 'gyur ram/ 'on te gzhan nam/ gnyis sam rgyu med pa las skye bar 'gyur zhes nges pa kho nar phyogs snga ma rnam par brtag dgos pas/ de'i phyir kho bos phyogs rang gis rnam par brtags su zin na yang nyes pa med do zhes bya bar sbyar ro/ /ji ltar nyes pa med ce na/ mi rigs pa brjod par bya ba'i phyir te/ mi rigs pa zhes bya ba ni skye ba'o/ /brjod par bya ba'i phyir zhes bya ba ni dgag pa'i phyir ro/ /'di skad bstan te/ don dam par dngos po rnams skye ba mi rigs pa dgag pa brjod par bya ba'i phyir/ phyogs rnam par brtags pa yin na yang nyes pa med do/ /de yongs su bzung bar zhes bya ba ni skye ba dgag pa de yongs su gzung bas so/ /nyes pa med do zhes bya ba ni rjes su dpag pa dang 'gal ba'i nyes pa med pa'o/ /de ltar na re zhig dngos po rnams bdag las skye ba med do zhes bya ba ni sngar dam bcas pa'i spyi bkod pa las/ dngos po rnams bdag las skye ba med pa dang / gzhan las skye ba med pa dang / gnyis las skye ba med pa dang / rgyu med pa las skye ba med pa zhes smos pa las dngos po rnams bdag las skye ba med pa bstan pa'i mjug bsdu ba yin no/ /de la de ltar na zhes bya ba ni rjes su dpag pa'i rigs pa kha na ma tho ba med pa ji skad bstan pa de yod pas dngos po rnams bdag las skye ba med par grub pa de ltar na'o/ /re zhig ces bya ba'i sgra ni rim pa la ltos pa ste/ dam bcas pa spyi'i rnam pa bzhi bkod pa las/ ji re zhig dngos po rnams bdag las skye ba med pa ni bdag gis bstan zin te/ bdag gi dngos po rnams bdag 'ba' zhig las skye ba med par bstan par yang ma zad de/ 'di ltar bdag gis rnam pa gzhan gyis kyang dngos po rnams skye ba med par ston to zhes bya ba'i tha tshig go/ /dngos po rnams bdag las skye ba med do zhes bya ba ni don dam par dngos po rnams bdag las skye ba med par grub po zhes bstan pa yin no/ /dam bcas pa'i spyi bkod pa dang po bshad zin to// //bam po dgu pa/ da ni dam bcas pa'i spyi bkod pa gnyis pa bsgrub par bya ste/ de'i phyir gzhan las min zhes bya ba yang ci zhig ce na/ dngos po gang dag gang na yang / /skyes pa nam yang yod ma yin/ /zhes bya ba'i skabs yin no zhes bya ba smras so/ /'di skad bstan te/ kho bos sngar dam bcas pa'i spyi rnam pa bzhi bkod pa las/ dam bcas pa'i spyi dang po dngos po rnams bdag las skye ba med pa zhes bya ba ni bsgrubs zin to/ /de'i 'og tu da ni dam bcas pa'i spyi bkod pa gnyis pa dngos po rnams gzhan las skye ba med pa zhes bya ba de bsgrub par bya'o/ /de la gzhan las min zhes bya ba yang ci zhig ce na zhes bya ba ni gzhan las ci zhig ma yin zhe na zhes 'grel pa byed pa nyid kyi dri ba'i tshig yin no/ /de'i lan du 'grel pa byed pa nyid kyis/ dngos po gang dag gang na yang / /skye ba nam yang yod ma yin/ /zhes bya ba'i skabs yin no zhes bya ba smras te/ gzhan las ci zhig ma yin zhe na/ gzhan las/ dngos po gang dag gang na yang / /skyes pa nam yang yod ma yin/ /zhes bya ba'i skabs yin no zhes bya bar sbyar ro/ /de la dngos po gang dag ces bya ba ni nang dang phyi rol gyi dang cha phra ba dang rags pa dag go/ /gang na yang zhes bya ba ni bdag cag gi phyogs dang gzhan gyi phyogs na yang ngo / /skyes pa nam yang yod ma yin/ /zhes bya ba ni don dam par yang nang dang phyi rol dang cha phra ba dang rags pa'i dngos po gang dag /bdag cag gi phyogs dang gzhan gyi phyogs gang na yang skyes pa dus nam yang yod pa ma yin pa'o/ /nam yang zhes bya ba ni/ 'das pa dang / ma 'ongs pa dang / da ltar byung ba'i dus nam yang ngam/ rang gi sde pa dang gzhan gyi sde pas brtag pa'i gnas skabs nam yang ngo / /yod pa ma yin zhes bya ba ni gzhan las/ dngos po gang dag gang na yang / /skyes pa nam yang yod ma yin/ /zhes med par dgag pa'i don du blta bar bya ba yin gyi/ mi skye ba yod do zhes ma yin par dgag pa'i don du ni blta bar mi bya'o zhes bya bar sbyar ro zhes bya ba'i skabs yin no zhes bya ba ni/ sngar dam bca' ba'i spyi bkod pa dang po sgrub pa'i skabs su de la re zhig bdag las ma yin zhes bya ba ci zhig ce na/ skyes pa nam yang yod ma yin/ /zhes bya ba la sogs pa ste re re dang sbyar bar bya'o zhes ji skad bstan pa'i skabs yin pa ste/ des na gzhan las/ dngos po gang dag gang na yang / /skyes pa nam yang yod ma yin/ /zhes bya ba yin no zhes bstan to/ /gzhan las zhes bya ba ni pha rol las zhes bya ba'i tha tshig go zhes bya ba la gal te gang las dogs pa skye na/ 'dir gzhan las zhes bya ba ni pha rol po las zhes bya ba'i tha tshig go zhes bshad ce na/ 'di ltar gzhan zhes bya ba ni gzhan gyi yul 'khor dang / gzhan gyi phyogs dang phas kyi dgra zhes bya ba la sogs pa don mang po zhig la sbyor bas de'i phyir de dag rnam par gcad pa'i phyir/ 'dir gzhan las zhes bya ba ni pha rol las zhes bya ba'i tha tshig go zhes bshad de/ dngos po rnams bdag nyid dang / rigs mthun pa dang / rigs mi mthun pa'i skyon gzhan las skye ba med do zhes bya ba'i tha tshig go/ /dgag pa'i don rgyas pa dang bcas pa ni snga ma bzhin no zhes bya ba ni 'dir gzhan las min zhes bya ba'i dgag pa'i don rgyas pa dang bcas pa ni sngar bdag las ma yin zhes bya ba'i dgag pa 'di ni med par dgag pa'i don du blta bar bya ste/ ci'i phyir zhe na/ de'i phyir dgag pa gtso che ba'i phyir dang zhes smras pas med par dgag pa dang / dbu ma'i bstan bcos ni dgag pa gtso che ba'i phyir ro zhes bshad pa dang / dgag pa gtso che ba'i 'bras bu gang yin zhe na/ de'i phyir 'di ltar rtog pa ma lus pa'i dra ba dgag pas rnam par mi rtog pa'i ye shes shes bya yul ma lus pa dang ldan pa 'grub par dgongs pa'i phyir ro zhes smras pas/ dgag pa gtso che bas rtog pa ma lus pa'i dra ba dgag pas 'jig rten las 'das pa'i kun rdzob kyi rnam par gzhag pa rnam par mi rtog pa'i ye shes shes bya yul ma lus pa dang ldan pa 'grub par dgongs pa'i phyir ro zhes bshad pa dang / ma yin par dgag pa yongs su bzung na ni de sgrub pa gtso che ba'i phyir chos rnams ma skyes so zhes bsgrubs pas skye ba med par ston pa'i phyir/ mdzad pa'i mtha' dang bral bar 'gyur te/ lung las/ gzugs kyi skye ba med pa la spyod na shes rab kyi pha rol tu phyin pa la spyod pa ma yin no zhes 'byung ba'i phyir ro zhes smras pas/ ma yin par dgag par yongs su gzung ba'i nyes dmigs bstan pa dang / 'dir dngos po rnams bdag las skye ba med pa kho na'o zhes nges par gzung bar bya'o/ /gzhan du nges par gzung na bdag kho na las skye ba med de/ 'o na ci zhe na/ gzhan las skye'o zhes bya bar nges par 'gyur ba dang / de bzhin du bdag kho na las ni skye ba med de/ 'o na ci zhe na/ bdag dang gzhan las skye'o zhes bya bar nges par 'gyur bas de yang mi bzhed de/ mdzad pa'i mtha' dang bral ba'i phyir ro zhes smras pas/ nges par gzung ba rnam pa gsum las dang po ltar gzung bar bya ba yin gyi/ nges par gzung ba gnyis pa dang gsum pa ltar gzung na gzhan las skye ba dang / bdag dang gzhan las skye bar thal bar 'gyur ro zhes bshad pa bzhin du 'dir yang gzhan las min zhes bya ba'i dgag pa 'di ni med par dgag pa'i don du blta bar bya ste/ dgag pa gtso che ba'i phyir dang / 'di ltar rtog pa ma lus pa'i dra ba dgag pas rnam par mi rtog pa'i ye shes shes bya yul ma lus pa dang ldan pa 'grub par dgongs pa'i phyir ro/ /ma yin par dgag pa yongs su gzung na ni de sgrub pa gtso che ba'i phyir chos rnams ma skyes so zhes bsgrubs pas skye ba med par ston pa'i phyir/ mdzad pa'i mtha' dang bral bar gyur te/ lung las/ gzugs kyi skye ba med pa la spyod na shes rab kyi pha rol tu phyin pa la spyod pa ma yin no zhes 'byung ba'i phyir ro/ /'dir dngos po rnams gzhan las skye ba med pa kho na'o zhes nges par gzung bar bya'o/ /gzhan du nges par gzung na gzhan kho na las skye ba med de/ 'o na ci zhe na/ bdag las skye'o zhes bya bar nges par 'gyur ba dang / de bzhin du gzhan kho na las ni skye ba med de/ 'o na ci zhe na/ bdag dang gzhan las skye'o zhes bya bar nges par 'gyur bas/ de yang mi bzhed de/ mdzad pa'i mtha' dang bral ba'i phyir ro zhes snga ma bzhin du sbyar ro zhes bya ba'i tha tshig go/ /de la re zhig dngos po rnams bdag las skye bar ni rigs te/ 'di ltar thams cad kyang bdag gi don kho nar rtsol bar byed kyi/ gzhan gyi don du rtsol bar mi byed pa yin na de la gang gi tshe dngos po rnams bdag las skye bar ma grub pa de'i tshe na gzhan ngo bo nyid dang rnam pa tha dad pa las lta skye bar ga la 'gyur te/ dper na me ni ngo bo nyid dang rnam pa tha dad pa'i chu las skye bar mi 'gyur ba dang 'dra'o/ /ci'i phyir dngos po rnams gzhan las skye ba med ce na/ gtan tshigs bstan pa'i phyir/ 'dir yang gzhan gyi gzhan nyid chos yin pas phyogs kyi chos mngon no zhes bya ba smras te/ ji skad bstan zhe na/ ji ltar nang gi skye mched rnams bdag las skye ba med pa'i phyogs la/ phyogs kyi chos yod pa nyid yin pa de bzhin du 'dir 'bras bu mig la sogs pa nang gi skye mched gzhan du 'gyur ba rnams rkyen mer mer po dang nur nur po la sogs pa gzhan las skye ba med pa'i phyogs la yang rkyen mer mer po dang nur nur po la sogs pa gzhan gyi 'bras bu mig la sogs pa nang gi skye mched gzhan nyid dang / 'bras bu mig la sogs pa nang gi skye mched gzhan nyid kyi rkyen mer mer po dang nur nur po la sogs pa gzhan nyid ni sgrub pa'i chos yin pas phyogs kyi chos mngon pa ste/ 'bras bu mig la sogs pa nang gi skye mched rnams dang / rkyen mer mer po dang nur nur po la sogs pa rnams phan tshun gzhan nyid du yod pa ni phyogs kyi chos yin pas de'i phyir phyogs kyi chos mngon no zhes bstan to/ /de la 'dir yang zhes bya ba ni dngos po rnams gzhan las skye ba med par sgrub pa'i skabs 'dir yang ngo / /gzhan gyis zhes bya ba ni 'bras bu mig la sogs pa nang gi skye mched rnams la ltos na gzhan du gyur pa rkyen mer mer po dang nur nur po la sogs pa gzhan gyi dang / rkyen mer mer po dang nur nur po la sogs pa rnams la ltos na gzhan du gyur pa 'bras bu mig la sogs pa nang gi skye mched gzhan gyi'o/ /gzhan nyid ces bya ba ni rkyen mer mer po dang nur nur po la sogs pa gzhan du gyur pa de dag la ltos pa'i gzhan nyid de/ 'bras bu mig la sogs pa nang gi skye mched rnams rkyen mer mer po dang nur nur po la sogs pa gzhan du 'gyur ba de dag la ltos nas gzhan nyid du yod pa nyid dang / 'bras bu mig la sogs pa nang gi skye mched gzhan du gyur pa de dag la ltos pa'i gzhan nyid de/ rkyen mer mer po dang nur nur po la sogs pa rnams 'bras bu mig la sogs pa nang gi skye mched gzhan du gyur pa de dag la ltos nas gzhan nyid du yod pa nyid do/ /chos ma yin pas zhes bya ba ni sgrub pa'i chos yin pas te/ de ltar rkyen mer mer po dang nur nur po la sogs pa gzhan du gyur pa de dag la ltos nas 'bras bu mig la sogs pa nang gi skye mched rnams gzhan nyid du yod pa nyid dang / 'bras bu mig la sogs pa nang gi skye mched gzhan du gyur pa de dag la ltos nas rkyen mer mer po dang nur nur po la sogs pa rnams gzhan nyid du yod pa gang yin pa de ni 'bras bu mig la sogs pa nang gi skye mched rnams gzhan las skye ba med pa sgrub pa'i chos yin te/ 'bras bu mig la sogs pa nang gi skye mched rnams rkyen mer mer po dang nur nur po la sogs pa gzhan du gyur pa de dag la ltos nas gzhan nyid du yod pa de la ni yang gzhan las skye ba med pas de'i phyir/ 'bras bu mig la sogs pa nang gi skye mched gzhan nyid ces bya ba de yang gzhan las skye ba med pa sgrub pa'i chos yin la/ rkyen mer mer po dang nur nur po la sogs pa rnams gzhan nyid du yod pa de la ni 'bras bu mig la sogs pa nang gi skye mched gzhan nyid du yod pa'i rkyen ma yin pas de'i phyir rkyen mer mer po dang nur nur po la sogs pa rnams gzhan nyid ces bya ba de yang gzhan las skye ba med pa sgrub pa'i chos yin no/ /phyogs kyi chos mngon no zhes bya ba ni 'di skad bstan te/ de ltar gzhan gyi gzhan nyid sgrub pa'i chos yin pas phyogs kyi chos mngon te/ 'bras bu mig la sogs pa nang gi skye mched rnams rkyen mer mer po dang nur nur po la sogs pa gzhan las skye ba m ed par bsgrub par bya ba'i phyogs la yang gtan tshigs gzhan nyid yin la rkyen mer mer po dang nur nur po la sogs pa gzhan 'bras bu mig la sogs pa nang gi skye mched gzhan nyid du yod pa'i rkyen ma yin par sgrub pa'i phyogs la yang gtan tshigs gzhan nyid ces bya ba de kho na yin pa'i phyir ro/ /dpe ni de'i dbang gis so zhes bya ba ni/ dpe ni bsgrub par bya ba dang sgrub pa'i chos kyi dbang gis te/ bsgrub par bya ba dang sgrub pa'i chos grags pa dang ldan pa'i chos can gyi dpe yin pa'i phyir ro/ /de'i zhes bya ba'i sgra ni bsgrub par bya ba dang sgrub pa'i chos dang sbyar te/ dpe gang la phyogs dang mthun par bsgrub par bya ba chos gzhan las skye ba med pa zhes bya ba dang / sgrub pa'i chos gzhan nyid ces bya ba yod pa de ni chos mthun pa'i dpe yin no zhes bya ba'i tha tshig go/ /'dir sbyor ba'i tshig ni zhes bya ba ni dngos po rnams gzhan las skye ba med par bstan pa'i skabs 'dir sbyor ba dang bcas pa'i tshig tu 'gyur ba ni 'og nas chos can dang / bsgrub par bya ba chos dang / sgrub pa'i chos dang dpe nye bar sbyar ba rnams yin no zhes bya bar sbyar ro/ /de la sbyor ba'i tshig ces bya ba ni sbyor ba dang bcas pa'i tshig ste/ rjes su dpag pa gtan tshigs dang dpe dang ldan pa zhes bya ba'i tha tshig go/ /don dam par nang gi skye mched rnams de dag gi rkyen gzhan dag las skye ba med de/ gzhan yin pa'i phyir dper na bum pa bzhin no zhes bya ba la/ don dam par zhes bya ba ni sngar gzhan ma yin pa ni 'dir thams cad don dam par bkag ste nges par gzung ba'i phyir ro/ /gzhan du yang mi 'gal te/ khyad par gyi gzhi'i khyad par ji skad bstan pa la 'gal ba med pa'i phyir dang / mdzad pa pos bstan pa nyid kyis bzhed pa mchog yin pa'i phyir ro zhes zer ro zhes smras pas/ 'dir gzhan las skye ba med par dgag pa yang don dam pas dgag go zhes bya bar sbyar ro/ /de la don dam par zhes bya ba ni don dam par gzhan las skye ba rdzas dang dngos po dang dngos gzhi'i sgo nas dgag pa ste/ de yang kun rdzob kyi bden pa la gnas nas don dam pa'i yul la dgag par bya ba yin gyi/ don dam pa nyid du ni brjod pa med pa'i phyir dgag pa'i tha snyad kyang med do/ /de la nang gi skye mched rnams zhes bya ba 'di ni rjes su dpag par bya ba phyogs te chos can yin no/ /de dag gi rkyen gzhan dag las skye ba med do zhes bya ba 'di ni rjes su dpag pa phyogs te bsgrub par bya ba chos yin no/ /gzhan yin pa'i phyir ro zhes bya ba 'di sgrub pa'i chos gtan tshigs te phyogs kyi chos yin no/ /dper na bum pa bzhin no zhes bya ba 'di ni dpe ste/ chos mthun pa'i dpe yin no/ /de la nang gi zhes bya ba ni bdag gis byin gyis brlabs shing gnas su byas pa'o/ /bdag ces bya ba ni mtshams la bdag gir byed pa ste/ yo byad gya nom pa dang / rgya chen po dag dang por byas nas yo byad ngan pa dang / khyon chung ngu'i bar dag la bdag gir byed pas bdag ces bya'o/ /bdag des byin gyis brlabs shing gnas su byas pa ni nang gi zhes bya'o/ /skye mched rnams zhes bya ba ni sems dang sems las byung ba rnams skye zhing 'byung ba dang / mched cing rgyas par byed pas skye mched rnams te/ 'di lta ste/ mig dang / rna ba dang / sna dang / lce dang / lus dang / yid ces bya ba rnams so/ /nang gi skye mched rnams zhes bya ba 'di ni rjes su dpag par bya ba phyogs te chos can yin no/ /de la rjes su dpag par bya ba zhes bya ba ni gang la mi dmigs pa las dngos po med par rjes su dpag pa dang ngo bo nyid las mi rtag par rjes su dpag pa dang / 'bras bu las rgyu rjes su dpag pa'i gzhi ste/ skabs 'dir ni gang la de dag gi rkyen gzhan dag las skye ba med pa zhes bya ba de rjes su dpag par bya ba'i gzhi nang gi skye mched rnams so/ /de nyid phyogs zhes bya ba ste/ phyogs zhes bya ba ni chos dang chos can bsdus pa'i phyogs te/ skabs 'dir ni bsgrub par bya ba chos de dag gi rkyen gzhan dag las skye ba med pa zhes bya ba dang / gang la de bsgrub par bya ba'i gzhi chos can nang gi skye mched rnams zhes bya ba de gnyis bsdus pa'i phyogs la phyogs zhes bya'o/ /de nyid chos can zhes bya ste rjes su dpag par bya ba'i gzhi gang la bsgrub par bya ba dang / sgrub pa'i chos gnyis yod pa de ni chos can te/ skabs 'dir ni nang gi skye mched rnams zhes bya ba gzhi gang la bsgrub par bya ba chos de dag gi rkyen gzhan dag las skye ba med pa zhes bya ba rgol ba dang phyir rgol ba gnyi ga la grags pa dang / de dag gi rkyen gzhan dag las skye ba med pa de sgrub pa'i chos gzhan nyid ces bya ba rgol ba dang phyir rgol ba gnyi ga la grags pa de gnyis yod pa de ni chos can zhes bya'o/ /de dag gi rkyen zhes bya ba ni nang gi skye mched de dag gi rkyen khyad par can no/ /gzhan dag las zhes bya ba ni rkyen khyad par can mer mer po dang nur nur po la sogs pa 'bras bu las gzhan du gyur pa dag las so/ /skye ba med de zhes bya ba ni nang gi skye mched rnams de dag gi rkyen gzhan dag las skye ba med pa'o/ /ci'i phyir nang gi skye mched rnams gzhan las skye ba med par dam bca' ba 'di la de dag gi rkyen zhes bya ba dang / gzhan dag las zhes bya ba khyad par gnyis smos she na/ 'di ltar gal te nang gi skye mched rnams gzhan dag las skye ba med de zhes bya ba de tsam zhig smos su zin na ni de'i tshe gzhan dag na re/ nang gi skye mched rnams rkyen sa bon dang / sa dang / chu dang / me dang / rlung dang / nam mkha' dang / dus dang / rgyu spun la sogs pa gzhan dag las skye ba med par 'jig rten thams cad la grags zin pa la/ da khyed kyi nang gi skye mched rnams gzhan dag las skye ba med de zhes sgrub pa 'di ni grub pa las sgrub pa yin no zhes zer bas/ de bsal ba'i phyir de dag gi rkyen zhes bya ba smos so/ /gal te nang gi skye mched rnams de dag gi rkyen las skye ba med de zhes bya ba de tsam zhig smos su zin na yang / de'i tshe phyogs la gzhan nyid ces bya ba'i khyad par gyis khyad par can du ma byas pas phyogs kyi chos nyid gtan tshigs su mi rung bar 'gyur bas/ de'i phyir gzhan dag las zhes bya ba smos so/ /de dag gi rkyen gzhan dag las skye ba med de zhes bya ba 'di ni rjes su dpag pa phyogs te bsgrub par bya ba chos yin no/ /de la rjes su dpag pa zhes bya ba ni mi dmigs pa las dngos po med par rjes su dpag pa dang / ngo bo nyid la mi rtag par rjes su dpag pa dang / 'bras bu las rgyu rjes su dpag pa dang / skabs 'dir ni rjes su dpag par bya ba'i gzhi nang gi skye mched rnams la de dag gi rkyen gzhan dag las skye ba med pa rjes su dpag pa'o/ /de nyid phyogs zhes bya ste/ phyogs zhes bya ba ni chos dang chos can bsdus pa'i phyogs te/ skabs 'dir ni bsgrub par bya ba chos de dag gi rkyen gzhan dag las skye ba med pa zhes bya ba dang / gang la de bsgrub par bya ba'i gzhi chos can nang gi skye mched rnams zhes bya ba de gnyis bsdus pa'i phyogs la phyogs zhes bya'o/ /de gnyis bsgrub par bya ba chos zhes bya ste/ bsgrub par bya ba chos zhes bya ba ni dngos po med pa dang / mi rtag pa dang / rgyu ste/ skabs 'dir ni chos can nang gi skye mched rnams la bsgrub par bya ba chos de dag gi rkyen gzhan dag las skye ba med pa de bsgrub par bya'o/ /gzhan yin pa'i phyir zhes bya ba ni 'bras bu mig la sogs pa nang gi skye mched rnams/ rkyen mer mer po dang nur nur po la sogs pa gzhan du gyur pa de dag la ltos na gzhan yin pa'i phyir te/ 'bras bu mig la sogs pa nang gi skye mched rnams rkyen mer mer po dang nur nur po la sogs pa gzhan du gyur pa de dag la ltos na/ gzhan nyid yin pa de la ni yang gzhan las skye ba med pas/ de'i phyir 'bras bu mig la sogs pa nang gi skye mched rnams gzhan yin pa'i phyir/ de dag gi rkyen gzhan dag las skye ba med do/ /gzhan yin pa'i phyir zhes bya ba 'di ni sgrub pa'i chos gtan tshigs te phyogs kyi chos yin no/ /de la sgrub pa'i chos zhes bya ba ni dngos po med pa dang / mi rtag pa dang / rgyu sgrub pa'i chos mi dmigs pa dang / ngo bo nyid dang 'bras bu ste/ skabs 'dir ni bsgrub par bya ba chos de dag gi rkyen gzhan dag las skye ba med pa zhes bya ba de sgrub pa'i chos gzhan yin pa'i phyir zhes bya ba ste/ 'di ltar 'bras bu mig la sogs pa nang gi skye mched rnams rkyen mer mer po dang nur nur po la sogs pa gzhan du gyur pa de dag la ltos na gzhan nyid yin pa de la ni yang gzhan las skye ba med pas de'i phyir 'bras bu mig la sogs pa nang gi skye mched rnams gzhan yin pa'i phyir zhes bya ba ni/ de dag gi rkyen gzhan dag las skye ba med par sgrub pa'i chos yin no/ /de nyid gtan tshigs zhes bya ste/ gtan tshigs zhes bya ba yang dngos po med pa dang / mi rtag pa dang / rgyu sgrub pa'i gtan tshigs mi dmigs pa dang / ngo bo nyid dang 'bras bu ste/ skabs 'dir ni bsgrub par bya ba chos de dag gi rkyen gzhan dag las skye ba med pa zhes bya ba de sgrub pa'i gtan tshigs gzhan yin pa'i phyir zhes bya ba ste/ nang gi skye mched rnams ci'i phyir de dag gi rkyen gzhan dag las skye ba med ce na/ gzhan nyid yin pa'i phyir te/ nang gi skye mched rnams rkyen mer mer po dang nur nur po la sogs pa gzhan du gyur pa de dag la ltos na gzhan nyid yin na gzhan nyid yin pa de la ni yang de dag gi rkyen gzhan dag las skye ba med pas gzhan yin pa'i phyir zhes bya ba ni/ de dag gi rkyen gzhan dag las skye ba med pa sgrub pa'i gtan tshigs yin no/ /de nyid phyogs kyi chos zhes bya ste/ phyogs kyi chos zhes bya ba yang chos dang chos can bsdus pa'i phyogs kyi chos mi dmigs pa dang ngo bo nyid dang 'bras bu ste/ skabs 'dir ni bsgrub par bya ba chos de dag gi rkyen gzhan dag las skye ba med pa zhes bya ba dang / chos can nang gi skye mched rnams zhes bya ba bsdus pa'i phyogs de'i chos gzhan yin pa'i phyir zhes bya ba ste/ nang gi skye mched rnams ci'i phyir de dag gi rkyen gzhan dag las skye ba med ce na/ gzhan yin pa'i phyir te/ nang gi skye mched rnams rkyen mer mer po dang nur nur po la sogs pa gzhan du gyur pa de dag la ltos na gzhan nyid yin na/ gzhan nyid yin pa de la ni yang de dag gi rkyen gzhan dag las skye ba med pas de'i phyir gzhan yin pa'i phyir zhes bya ba ni chos dang chos can bsdus pa'i phyogs de'i gtan tshigs kyi chos yin pas phyogs kyi chos zhes bya'o/ /dper na bum pa bzhin no zhes bya ba ni/ dper na bum pa ni nang gi skye mched rnams kyi rkyen mer mer po dang nur nur po la sogs pa gzhan du gyur pa de dag la ltos na gzhan nyid yin pa'i phyir/ bum pa gzhan nyid yin pa de nang gi skye mched de dag gi rkyen mer mer po dang nur nur po la sogs pa gzhan dag las skye ba med pa de bzhin du/ 'dir yang nang gi skye mched rnams de dag gi rkyen mer mer po dang nur nur po la sogs pa gzhan du gyur pa de dag la ltos na gzhan nyid yin pa'i phyir/ nang gi skye mched gzhan nyid yin pa de rnams de dag gi rkyen mer mer po dang nur nur po la sogs pa gzhan las skye ba med do zhes bya bar sbyar ro/ /dper na bum pa bzhin no zhes bya ba 'di ni dpe ste/ chos mthun pa'i dpe yin no/ /de la dpe zhes bya ba ni chos can gang las bsgrub par bya ba dang sgrub pa'i chos yod pa'i dpe ste/ 'dir dpe ni rjes su dpag par bya ba phyogs chos can bum pa gang la rjes su dpag pa phyogs bsgrub par bya ba chos de dag gi rkyen gzhan dag las skye ba med pa zhes bya ba rgol ba dang phyir rgol ba gnyi ga la grags pa dang / sgrub pa'i chos gtan tshigs phyogs kyi chos gzhan nyid ces bya ba rgol ba dang phyir rgol ba gnyi ga la grags pa de gnyis yod pa yin par sbyar ro/ /de gnyis chos mthun pa'i dpe zhes bya ba ste/ chos mthun pa'i dpe zhes bya ba ni mi dmigs pa las dngos po med par rjes su dpag pa'i chos mthun pa'i dpe phyogs 'di ni dngos po med de/ dmigs pa'i rig byar gyur pa'i bum pa mi dmigs pa'i phyir zhes bya ba dang / ngo bo nyid las mi rtag par rjes su dpag pa'i chos mthun pa'i dpe 'di ni shing yin te shing sha pa yin pa'i phyir ro zhes bya ba dang / 'bras bu las rgyu rjes su dpag pa'i chos mthun pa'i dpe/ tshang mang 'di na me yod de du ba 'thul ba'i phyir ro zhes bya ba ste/ skabs 'dir ni dper na chos can bum pa zhes bya ba rgol ba dang phyir rgol ba gnyi ga'i phyogs la/ nang gi skye mched de dag gi rkyen mer mer po dang nur nur po la sogs pa gzhan du gyur pa de dag la ltos nas gzhan nyid du grags pa de la bsgrub par bya ba chos de dag gi rkyen gzhan dag las skye ba med pa zhes bya ba rgol ba dang / phyir rgol ba gnyi ga la grags pa dang / de dag gi rkyen gzhan dag las skye ba med pa de sgrub pa'i chos gzhan nyid ces bya ba rgol ba dang phyir rgol ba gnyi ga la grags pa de gnyis yod pas de ni chos can zhes bya ste/ chos can bum pa de la de dag gi rkyen gzhan dag las skye ba med de gzhan yin pa'i phyir ro zhes bya ba de bzhin du/ 'dir yang chos can nang gi skye mched rnams zhes bya ba rgol ba dang phyir rgol ba gnyi ga'i phyogs la/ nang gi skye mched de dag gi rkyen mer mer po dang nur nur po la sogs pa gzhan du gyur pa de dag la ltos na gzhan nyid du grags pa de la bsgrub par bya ba chos de dag gi rkyen gzhan dag las skye ba med pa zhes bya ba dang rgol ba dang phyir rgol ba gnyi ga la grags pa dang / de dag gi rkyen gzhan dag las skye ba med pa de sgrub pa'i chos gzhan nyid ces bya ba dang phyir rgol ba gnyi ga la grags pa de gnyis yod pas de la chos can zhes bya ste/ chos can nang gi skye mched rnams la yang de dag gi rkyen gzhan dag las skye ba med de gzhan yin pa'i phyir/ dper na bum pa bzhin no zhes bya bar sbyar ro/ /de'i phyir gang dang gang gzhan nyid yin pa de la de dag gi rkyen gzhan dag las skye ba med de dper na bum pa bzhin no/ /nang gi skye mched rnams kyang gzhan nyid yin pas de'i phyir de dag la yang de dag gi rkyen gzhan dag las skye ba med de/ gal te gzhan nyid du 'dra ba las nang gi skye mched rnams la ni de dag gi rkyen gzhan dag las skye bar 'dod la/ bum pa la ni de dag gi rkyen gzhan dag las skye ba med par 'dod na ni/ de'i tshe rgyu 'dis ni nang gi skye mched rnams la de dag gi rkyen gzhan dag las skye ba yod par 'dod la/ rgyu 'dis ni bum pa la de dag gi rkyen gzhan dag las skye ba med par 'dod do zhes khyad par nyid du bya ba'i khyad par gyi gtan tshigs brjod par bya dgos so/ /gang gi phyir gzhan las skye bar smra ba dag bum pa gzhan nyid yin pa'i gnas skabs la de dag gi rkyen gzhan dag las skye bar mi 'dod pa de'i phyir/ nang gi skye mched rnams kyang gzhan nyid yin pa'i phyir/ de dag gi rkyen dag las skye ba med par grub bo/ /gzhan yang dngos po rnams kyi gzhan las skye bar ci'i phyir 'dod ce na/ gzhan nyid kyi ngo bo nyid ma thob pa thob par bya ba'i phyir/ de dag gi rkyen gzhan dag las skye bar 'dod pa yin na/ gal te nang gi skye mched de dag gi rkyen gzhan dag las skye ba'i snga rol na gzhan nyid yin par gyur na/ de dag la de dag gi rkyen gzhan dag las skye bar brtags pas ci zhig bya ste/ gzhan nyid ni yang gzhan las skye ba med do zhes gsungs pa'i phyir ro/ /gzhan yang dgag pa mi mthun par yang 'gyur te/ gal te gzhan nyid yin na ni gzhan las skye ba med par mi 'gyur la/ ci ste gzhan dag las skye na ni gzhan nyid ma yin no/ /gzhan yang 'jig rten na gzhan nyid gzhan las skye ba ni 'gal te 'di ltar 'jig rten na bum pa sbrang rtsi dang chu dang 'o ma 'dzin pa la sogs pa'i bya ba byed nus pa gsal ba gzhan nyid yin pa ni yang gzhan las skye ba ma mthong ba'i phyir ro/ /don dam par phyi nang gi dngos po thams cad gzhan las skye ba med par dgag pa yin na/ ci'i phyir 'dir nang gi skye mched rnams nyi tshe chos can du bzhag ce na/ de ni/ dngos po gcig la gang mthong ba/ /de ni kun la'ang mthong bar 'dod/ /gcig gi stong nyid gang yin pa/ /de nyid kun gyi stong pa nyid/ /ces gsungs pa'i rigs pas/ nang gi skye mched rnams gzhan las skye ba med par grub na/ phyi rol gyi skye mched la sogs pa chos thams cad kyang gzhan las skye ba med pa nyid du 'grub pa'i phyir dang / nang gi skye mched rnams chos can du bzhag na phyi rol gyi skye mched la sogs pa gzhan dag gtan tshigs dang dper bzhag tu rung bas de'i phyir 'dir nang gi skye mched rnams nyi tshe chos can du gzhag go/ /yang na don dam par gzhan brjod par 'dod pa mig la sogs pa nang gi skye mched 'grub par byed pa dag rkyen ma yin par nges te gzhan yin pa'i phyir/ dper na rgyu spun la sogs pa bzhin no zhes bya ba 'dis ni rkyen rnams rkyen ma yin par 'gog par byed de/ /de la yang na zhes bya ba'i sgra ni sbyor ba'i tshig snga mas 'bras bu mig la sogs pa nang gi skye mched rnams rkyen mer mer po dang nur nur po la sogs pa gzhan du gyur pa de dag la ltos na gzhan nyid yin pas/ de dag gi rkyen gzhan dag las skye ba med do zhes 'bras bu bkag pa yang tshad ma rnam pa gcig yin no/ /'dir rkyen mer mer po dang nur nur po la sogs pa rnams 'bras bu mig la sogs pa nang gi skye mched gzhan du gyur pa de dag la ltos na gzhan nyid yin pas/ de dag 'bras bu mig la sogs pa nang gi skye mched rnams kyi rkyen ma yin no zhes rkyen dgag pa 'dir yang tshad ma rnam pa gcig yin no zhes bya ba'i don to/ /don dam par zhes bya ba ni sngar gzhan ma yin pa ni 'dir thams cad don dam par bkag ste nges par gzung ba'i phyir/ gzhan du yang mi 'gal te/ khyad par gyi gzhi'i khyad par ji skad bstan pa la 'gal ba med pa'i phyir dang / mdzad pa pos bstan pa nyid kyis bzhed pa mchog yin pa'i phyir ro zhes zer ro zhes smras pas/ 'dir rkyen rnams rkyen ma yin par dgag pa yang don dam par dgag go zhes bya bar sbyar ro/ /de la don dam par zhes bya ba ni don dam par rkyen rnams rdzas dang dngos po dang bzhi'i sgo nas dgag pa ste/ de yang kun rdzob kyi bden pa la gnas nas don dam pa'i yul la dgag par bya ba yin gyi/ don dam pa nyid du ni brjod du med pa'i phyir dgag pa'i tha snyad kyang med do/ /de la gzhan brjod par 'dod pa mig la sogs pa nang gi skye mched 'grub par skyed pa dag ces bya ba 'di ni rjes su dpag par bya ba phyogs te chos can yin no/ /rkyen ma yin par nges te zhes bya ba 'di ni rjes su dpag pa phyogs te bsgrub par bya ba chos yin no/ /gzhan yin pa'i phyir zhes bya ba 'di ni sgrub pa'i chos gtan tshigs te phyogs kyi chos yin no/ /dper na rgyu spun la sogs pa bzhin no zhes bya ba 'di ni dpe ste/ chos mthun pa'i dpe yin no/ /de la gzhan brjod par 'dod pa mig la sogs pa nang gi skye mched 'grub par byed pa dag ces bya ba ni 'bras bu mig la sogs pa nang gi skye mched rnams kyi rkyen mer mer po dang nur nur po la sogs pa de dag ni gzhan yang yin/ brjod par 'dod pa yang yin/ mig la sogs pa nang gi skye mched 'grub par byed pa dag kyang yin no zhes bya ba khyad par gyis bsdu bar bya'o/ /de la gzhan zhes bya ba ni rkyen mer mer po dang nur nur po la sogs pa de dag 'bras bu mig la sogs pa nang gi skye mched gzhan du gyur pa de dag la ltos na gzhan nyid yin pa'i phyir gzhan zhes bya'o/ /brjod par 'dod pa zhes bya ba ni rkyen mer mer po dang nur nur po la sogs pa de dag rkyen du smra ba gzhan dag gis rkyen nyid du brjod par 'dod pa'i phyir brjod par 'dod pa zhes bya'o/ /mig la sogs pa nang gi skye mched 'grub par byed pa dag ces bya ba ni rkyen mer mer po dang nur nur po la sogs pa de dag kun rdzob tu mig la sogs pa nang gi skye mched 'grub par byed pa dag yin pa'i phyir/ mig la sogs pa nang gi skye mched mngon par 'grub par byed pa dag ces bya'o/ /de la mig la sogs pa nang gi skye mched ces bya ba ni nang gi skye mched gang las mig dang / rna ba dang / sna dang / lce dang / lus dang / yid ces bya ba dag yod pa de ni mig la sogs pa nang gi skye mched do zhes bya bar bsdu ba bya'o/ /mig la sogs pa nang gi skye mched 'grub par byed pa dag ces bya ba yang / rkyen las dang nyon mongs pa dang / khu chu dang / khrag dang / mer mer po dang / nur nur po la sogs pa gang dag la mig la sogs pa nang gi skye mched 'grub par byed pa yod pa de dag ni mig la sogs pa nang gi skye mched 'grub par byed pa dag go zhes bya bar bsdu ba bya'o/ /gzhan brjod par 'dod pa mig la sogs pa nang gi skye mched 'grub par byed pa dag ces bya ba 'di ni rjes su dpag par bya ba phyogs te chos can yin no/ / de la rjes su dpag par bya ba zhes bya ba ni gang la mi dmigs pa las dngos po med par rjes su dpag pa dang / ngo bo nyid las mi rtag par rjes su dpag pa dang / 'bras bu las rgyu rjes su dpag pa'i gzhi ste/ skabs 'dir ni gang la rkyen ma yin par nges pa zhes bya ba de rjes su dpag par bya ba'i gzhi gzhan brjod par 'dod pa mig la sogs pa nang gi skye mched 'grub par byed pa dag go/ /de nyid phyogs zhes bya ba ste/ phyogs zhes bya ba ni chos dang chos can bsdus pa'i phyogs te/ skabs 'dir ni bsgrub par bya ba chos can ma yin par nges pa zhes bya ba dang / gang la de bsgrub par bya ba'i gzhi chos can gzhan brjod par 'dod pa mig la sogs pa nang gi skye mched 'grub par byed pa dag ces bya ba de gnyis bsdus pa'i phyogs la phyogs zhes bya'o/ /de nyid chos can zhes bya ste/ chos can zhes bya ba ni rjes su dpag par bya ba'i gzhi gang la bsgrub par bya ba dang / sgrub pa'i chos gnyis yod pa de ni chos can te/ skabs 'dir ni gzhan brjod par 'dod pa mig la sogs pa nang gi skye mched 'grub par byed pa dag ces bya ba gzhi gang la bsgrub par bya ba chos rkyen ma yin par nges pa zhes bya ba rgol ba dang phyir rgol ba gnyi ga la grags pa dang / rkyen ma yin par nges pa de sgrub pa'i chos gzhan nyid ces bya ba rgol ba dang phyir rgol ba gnyi ga la grags pa de gnyis yod pa de ni chos can zhes bya'o/ /rkyen ma yin par nges te zhes bya ba ni don dam par rkyen mer mer po dang nur nur po la sogs pa rnams/ 'bras bu mig la sogs pa nang gi skye mched rnams kyi rkyen ma yin par dgag pa yin no/ /rkyen ma yin par nges te zhes bya ba 'di ni rjes su dpag par ston te bsgrub par bya ba chos yin no/ /de la rjes su dpag pa zhes bya ba ni mi dmigs pa las dngos po med par rjes su dpag pa dang / ngo bo nyid las mi rtag par rjes su dpag pa dang / 'bras bu las rgyu rjes su dpag pa ste/ skabs 'dir ni rjes su dpag par bya ba'i gzhi gzhan brjod par 'dod pa mig la sogs pa nang gi skye mched 'grub par byed pa dag la rkyen ma yin par nges pa rjes su dpag pa'o/ /de nyid phyogs zhes bya ste/ phyogs zhes bya ba ni chos dang chos can bsdus pa'i phyogs te/ skabs 'dir ni bsgrub par bya ba chos can ma yin par nges pa zhes bya ba dang / gang la de bsgrub par bya ba'i gzhi chos can gzhan brjod par 'dod pa mig la sogs pa nang gi skye mched 'grub par byed pa dag ces bya ba de gnyis bsdus pa'i phyogs la phyogs zhes bya'o/ /de nyid bsgrub par bya ba chos zhes bya ste/ bsgrub par bya ba chos zhes bya ba ni dngos po med pa dang mi rtag pa dang rgyu ste/ skabs 'dir ni chos can gzhan brjod par 'dod pa mig la sogs pa nang gi skye mched 'grub par byed pa dag la bsgrub par bya ba chos rkyen ma yin par nges pa zhes bya ba de bsgrub par bya'o/ /gzhan yin pa'i phyir zhes bya ba ni rkyen mer mer po dang nur nur po la sogs pa'i 'bras bu mig la sogs pa nang gi skye mched gzhan du gyur pa de dag la ltos na gzhan yin pa'i phyir te/ rkyen mer mer po dang nur nur po la sogs pa 'bras bu mig la sogs pa nang gi skye mched gzhan du gyur pa de dag la ltos nas gzhan nyid yin pa de ni 'bras bu mig la sogs pa nang gi skye mched gzhan du gyur pa de dag gi rkyen ma yin par nges pas de'i phyir rkyen mer mer po dang nur nur po la sogs pa gzhan yin pa'i phyir/ 'bras bu mig la sogs pa nang gi skye mched gzhan du gyur pa rnams kyi rkyen ma yin par nges pa'o/ /gzhan ma yin pa'i phyir zhes bya ba 'di ni sgrub pa'i chos gtan tshigs te phyogs kyi chos yin no/ /de la sgrub pa'i chos zhes bya ba ni dngos po med pa dang / mi rtag pa dang / rgyu sgrub pa'i chos mi dmigs pa dang ngo bo nyid dang 'bras bu ste/ skabs 'dir ni bsgrub par bya ba chos can ma yin par nges pa zhes bya ba de/ sgrub pa'i chos gzhan yin pa'i phyir zhes bya ba ste/ 'di ltar rkyen mer mer po dang nur nur po la sogs pa 'bras bu mig la sogs pa nang gi skye mched gzhan du gyur pa de dag la ltos na gzhan nyid yin pa de ni 'bras bu mig la sogs pa nang gi skye mched gzhan du gyur pa dag gi rkyen ma yin par nges pas/ de'i phyir rkyen mer mer po dang nur nur po la sogs pa gzhan nyid yin pa'i phyir zhes bya ba ni rkyen ma yin par nges pa sgrub pa'i chos yin no/ /de nyid gtan tshigs zhes bya ste/ gtan tshigs zhes bya ba yang dngos po med pa dang / mi rtag pa dang / rgyu sgrub pa'i gtan tshigs mi dmigs pa dang / ngo bo nyid dang 'bras bu ste/ skabs 'dir ni bsgrub par bya ba chos rkyen ma yin par nges pa zhes bya ba de sgrub pa'i gtan tshigs gzhan yin pa'i phyir zhes bya ba ste/ gzhan brjod par 'dod pa mig la sogs pa nang gi skye mched 'grub par byed pa dag /ci'i phyir rkyen ma yin par nges she na/ gzhan yin pa'i phyir te/ rkyen mer mer po dang nur nur po la sogs pa 'bras bu mig la sogs pa nang gi skye mched gzhan du gyur pa de dag la ltos na gzhan nyid yin na/ gzhan nyid yin pa de dag ni rkyen ma yin par nges pas/ de'i phyir gzhan yin pa'i phyir zhes bya ba ni rkyen ma yin par nges pa sgrub pa'i gtan tshigs yin no/ /de nyid phyogs kyi chos zhes bya ste/ phyogs kyi chos zhes bya ba yang chos dang chos can bsdus pa'i phyogs kyi chos mi dmigs pa dang / ngo bo nyid dang 'bras bu ste/ skabs 'dir ni bsgrub par bya ba chos can ma yin par nges pa zhes bya ba dang / chos can gzhan brjod par 'dod pa mig la sogs pa nang gi skye mched 'grub par byed pa dag ces bya ba bsdus pa'i phyogs de'i chos gzhan yin pa'i phyir zhes bya ba ste/ gzhan brjod par 'dod pa mig la sogs pa nang gi skye mched 'grub par byed pa dag /ci'i phyir rkyen ma yin par nges she na/ gzhan yin pa'i phyir te/ rkyen mer mer po dang nur nur po la sogs pa 'bras bu mig la sogs pa nang gi skye mched gzhan du gyur pa de dag la ltos na gzhan nyid yin na/ gzhan nyid yin pa de dag gi rkyen ma yin par nges pas de'i phyir/ gzhan yin pa'i phyir zhes bya ba ni chos dang chos can bsdus pa'i phyogs de'i gtan tshigs kyi chos yin pas phyogs kyi chos zhes bya'o/ /dper na rgyu spun la sogs pa bzhin no zhes bya ba ni dper na rgyu spun dang / tshig pa dang / thag zangs dang / 'ul bu dang / snas khyer la sogs pa thag sha rnams ni mig la sogs pa nang gi skye mched gzhan du gyur pa de dag la ltos na gzhan nyid yin pa'i phyir/ rgyu spun dang / tshig pa dang / thag zangs dang / 'ul bu dang / snas khyer la sogs pa thag sha gzhan nyid yin pa de dag mig la sogs pa nang gi skye mched rnams kyi rkyen ma yin par nges pa de bzhin du/ 'dir yang rkyen mer mer po dang nur nur po la sogs pa 'bras bu mig la sogs pa nang gi skye mched gzhan du gyur pa de dag la ltos na gzhan nyid yin pa'i phyir/ rkyen mer mer po dang nur nur po la sogs pa gzhan nyid yin pa de dag 'bras bu mig la sogs pa nang gi skye mched rnams kyi rkyen ma yin par nges so zhes bya bar sbyar ro/ /dper na rgyu spun la sogs pa bzhin no zhes bya ba 'di ni dpe ste/ chos mthun pa'i dpe yin no/ /de la dpe zhes bya ba ni chos can gang la bsgrub par bya ba chos dang / sgrub pa'i chos yod pa'i dpe ste/ 'dir dpe ni rjes su dpag par bya ba phyogs/ chos can rgyu spun la sogs pa gang la rjes su dpag pa phyogs bsgrub par bya ba chos can ma yin par nges pa zhes bya ba/ rgol ba dang phyir rgol ba gnyi ga la grags pa dang / sgrub pa'i chos gtan tshigs phyogs kyi chos gzhan nyid ces bya ba rgol ba dang phyir rgol ba gnyi ga la grags pa dang / de gnyis yod pa yin par sbyar ro/ /de nyid chos mthun pa'i dpe zhes bya ste/ chos mthun pa'i dpe zhes bya ba ni mi dmigs pa las/ dngos po med par rjes su dpag pa'i chos mthun pa'i dpe phyogs 'di na dngos po med pa de dmigs pa'i rig byar gyur pa'i bum pa mi dmigs pa'i phyir ro zhes bya ba dang / ngo bo nyid las mi rtag par rjes su dpag pa'i chos mthun pa'i dpe 'di ni shing yin te/ shing sha pa yin pa'i phyir ro zhes bya ba dang / 'bras bu las rgyu rjes su dpag pa'i chos mthun pa'i dpe tshang mang 'di na me yod de du ba 'thul ba'i phyir ro zhes bya ba ste/ skabs 'dir ni dper na chos can rgyu spun la sogs pa zhes bya ba rgol ba dang / phyir rgol ba gnyi ga'i phyogs la/ 'bras bu mig la sogs pa nang gi skye mched gzhan du gyur pa de dag la ltos na/ gzhan nyid du grags pa de dag las bsgrub par bya ba chos rkyen ma yin par nges pa zhes bya ba rgol ba dang phyir rgol ba gnyi ga la grags pa dang / rkyen ma yin par nges pa de sgrub pa'i chos gzhan nyid ces bya ba rgol ba dang phyir rgol ba gnyi ga la grags pa de gnyis yod pas de ni chos can zhes bya ste/ chos can rgyu spun la sogs pa de dag r kyen ma yin par nges te gzhan yin pa'i phyir ro zhes bya ba de bzhin du 'dir yang chos can gzhan brjod par 'dod pa mig la sogs pa nang gi skye mched 'grub par byed pa dag ces bya ba rgol ba dang phyir rgol ba gnyi ga'i phyogs la 'bras bu mig la sogs pa nang gi skye mched gzhan du gyur pa de dag la ltos nas gzhan nyid du grags pa de dag la bsgrub par bya ba chos rkyen ma yin par nges pa zhes bya ba rgol ba dang phyir rgol ba gnyi ga la grags pa dang / rkyen ma yin par nges pa de sgrub pa'i chos gzhan nyid ces bya ba rgol ba dang / phyir rgol ba gnyi ga la grags pa de nyid yod pas de yang chos can zhes bya ba ste/ chos can gzhan brjod par 'dod pa mig la sogs pa nang gi skye mched 'grub par byed pa de dag kyang rkyen ma yin par nges te/ gzhan ma yin pa'i phyir/ dper na rgyu spun la sogs pa bzhin no zhes bya bar sbyar ro/ /de'i phyir gang dang gang gzhan nyid yin pa de ni rkyen ma yin par nges te/ dper na rgyu spun la sogs pa bzhin no/ /gzhan brjod par 'dod pa mig la sogs pa nang gi skye mched 'grub par byed pa de dag kyang gzhan nyid yin pas de'i phyir de dag kyang rkyen ma yin par nges so/ /gal te gzhan nyid du 'dra ba las gzhan brjod par 'dod pa mig la sogs pa nang gi skye mched 'grub par byed pa de dag ni rkyen yin par 'dod la/ rgyu spun la sogs pa ni rkyen ma yin par 'dod na ni de'i tshe rgyu 'dis ni gzhan brjod par 'dod pa mig la sogs pa nang gi skye mched grub par byed pa dag ni rkyen yin par 'dod la/ rgyu 'dis ni rgyu spun la sogs pa'i rkyen ma yin par 'dod do zhes khyad par nyid du bya ba'i khyad par gyi gtan tshigs brjod par bya dgos so/ /gang gi phyir rkyen du smra ba dag rgyu spun la sogs pa gzhan nyid yin pa'i gnas skabs dag rkyen yin par mi 'dod pa de'i phyir/ gzhan brjod par 'dod pa mig la sogs pa nang gi skye mched 'grub par byed pa dag kyang gzhan nyid yin pa'i phyir rkyen ma yin par nges par grub bo/ /gzhan yang dngos po rnams kyi rkyen nyid ci'i phyir 'dod ce na/ gzhan nyid kyi ngo bo nyid ma thob pa thob par byed pa'i phyir rkyen du 'dod pa yin na/ gal te gzhan brjod par 'dod pa mig la sogs pa nang gi skye mched 'grub par byed pa de dag rkyen du 'gyur ba'i snga rol na gzhan nyid yin par gyur na/ de dag la rkyen yin par brtag pas ci zhig bya ste/ gzhan nyid ni gzhan gyi rkyen ma yin no zhes gsungs pa'i phyir ro/ /gzhan yang dgag pa mi mthun par yang 'gyur te/ gal te gzhan nyid yin na ni gzhan gyi rkyen ma yin la/ ci ste gzhan gyi rkyen yin na ni gzhan nyid ma yin no/ /gzhan yang 'jig rten na gzhan nyid gzhan gyi rkyen yin pa ni 'gal te/ 'di ltar 'jig rten na bum pa sbrang rtsi dang / chu dang / 'o ma 'dzin pa la sogs pa'i bya ba byed nus pa gsal ba gzhan nyid yin pa ni gzhan gyi rkyen yin par ma mthong ba'i phyir ro/ /don dam par phyi nang gi dngos po thams cad kyi rkyen/ rkyen ma yin par dgag pa yin na/ ci'i phyir 'dir gzhan brjod par 'dod pa mig la sogs pa nang gi skye mched 'grub par byed pa dag nyi tshe chos can du bzhag ce na/ de ni/ dngos po gcig la gang mthong ba/ /de ni kun la'ang mthong bar 'dod/ /gcig gi stong nyid gang yin pa/ /de nyid kun gyi stong pa nyid/ /ces gsungs pa'i rigs pas/ gzhan brjod par 'dod pa mig la sogs pa nang gi skye mched 'grub par byed pa dag rkyen ma yin par grub na phyi rol gyi rkyen la sogs pa rkyen thams cad kyang rkyen ma yin pa nyid du 'grub pa'i phyir dang / gzhan brjod par 'dod pa mig la sogs pa nang gi skye mched 'grub par byed pa dag chos can du bzhag na/ phyi rol gyi rkyen la sogs pa gzhan dag gtan tshigs dang dper gzhag tu rung bas de'i phyir 'dir gzhan brjod par 'dod pa mig la sogs pa nang gi skye mched 'grub par byed pa dag nyi tshe chos can du gzhag go/ //bam po bcu pa/ 'di la gzhan slob dpon blo brtan gyis bdag nyid kyi 'grel pa byed pa'i gtan tshigs kyi mtshan nyid gzhan nyid ces bya ba 'di 'gal te/ 'di ltar dbu ma pas mig la sogs pa nang gi skye mched rnams kyi rkyen mer mer po dang nur nur po la sogs pa kun rdzob tu khas len cing / de ltar khas blangs nas gang gi tshe don dam par gzhan brjod par 'dod pa mig la sogs pa nang gi skye mched 'grub par byed pa mer mer po la sogs pa dag nang gi skye mched rnams kyi rkyen ma yin par nges te/ gzhan yin pa'i phyir/ dper na rgyu spun la sogs pa bzhin no zhes sbyor ba'i tshig de lta bur byed pa de'i tshe/ ji ltar don dam par rgyu spun la sogs pa mig la sogs pa'i rkyen ma yin pa de bzhin du/ kun rdzob tu yang rgyu spun la sogs pa mig la sogs pa'i rkyen ma yin pa dang 'dra bar mer mer po la sogs pa yang rgyu spun la sogs pa bzhin du yang kun rdzob tu yang mig la sogs pa'i rkyen nyid ma yin par 'gyur te/ des na gtan tshigs gzhan nyid ces bya ba de rkyen mer mer po la sogs pa'i rkyen rnams kun rdzob tu mig la sogs pa'i rkyen nyid ma yin par sgrub pa 'gal te/ ji skad du/ chos dang chos can de gnyis kyi/ /khyad par gyi ni ngo bo nyid/ /log par sgrub phyir 'gal ba ni/ /zhes bshad pa'i phyir ro zhes dris pas 'dir de la 'di skad ces brjod par bya ste/ de ltar gyur na kho bo'i gtan tshigs de 'gal yang bden grang na/ gnas brtan blo brtan gyis 'gal ba'i mtshan nyid kyi tshig le'ur byed pa 'di'i rtsa ba bzhi pa ma thos sam ci na/ de'i phyir khyad par med pa kho nar kho bo la gtan tshigs 'gal ba'i skyon 'di lta bu rjod par byed/ 'di ltar 'gal ba'i mtshan nyid kyi tshig le'ur byed pa 'di'i rtsa ba bzhi pa las/ gnod pa med na 'gal ba yin/ /zhes 'byung bas/ gal te gnas brtan blo brtan gyis 'gal bar brjod pa de nyid la lung gi gnod pa dang / 'jig rten gyi gnod pa dang / rang gi tshig gi gnod pa dang / mngon sum gyi gnod pa dang / rjes su dpag pa'i gnod pa med na ni de'i tshe kho bo'i gtan tshigs de 'gal ba yin no/ /ci ste gnas brtan blo brtan gyis 'gal bar brjod pa de nyid la gnod pa lnga po de dag las thams cad 'ga' zhig yod na ni de'i tshe kho bo'i gtan tshigs de 'gal ba ma yin no/ /gnas brtan blo brtan gyis 'gal bar brjod pa de ni dper na ltag chod dag las 'di skad du/ sgra ni mnyam par bya ba ma yin te/ btsal ma thag tu 'byung ba'i phyir dper na bum pa bzhin no zhes zer ba lta bu ste/ de ltar gtan tshigs btsal ma thag tu 'byung ba zhes bya ba de las gnod pa yod pa dang / med pa'i mtshan nyid brjod par bya ste/ gal te mthong ba'i mthus rjes su dpag pa de ldog par mi 'gyur na ni gnod pa med pa zhig na/ 'di la lung dang / mngon sum dang / 'jig rten las sgra ni mnyan par bya ba nyid yin par mthong ba'i mthus rjes su dpag pa de ldog par 'gyur bas gnod pa yod do/ / 'dir gal te gnas brtan blo brtan gyis 'gal bar brjod pa de la ji ltar gnod pa yod ce na/ 'di ltar gnas brtan blo brtan de yang dbu ma pa kho na yin pas de'i phyir/ de yang nang gi skye mched rnams kyi rkyen mer mer po la sogs pa kun rdzob tu khas len la/ 'dir mer mer po la sogs pa kun rdzob tu yang mig la sogs pa'i rkyen ma yin par smra bas/ des na dang po kho nar gnas brtan blo brtan gyis 'gal bar brjod pa de la lung dang 'gal ba'i gnod pa yod do/ /kun rdzob nyid ni 'jig rten gyi tha snyad du brjod pa yin la/ 'jig rten la ni nang gi skye mched rnams kun rdzob tu rkyen mer mer po la sogs pa las skye bar grags la/ 'dir mer mer po la sogs pa kun rdzob tu yang mig la sogs pa'i rkyen ma yin par smra bas/ des na gnas brtan blo brtan gyis 'gal bar brjod pa de la 'jig rten dang 'gal ba'i gnod pa yang yod do/ /mig la sogs pa'i gnas las kun rdzob tu mig gi rnam par shes pa la sogs pa yul la dmigs pa rnam par rtog pa med pa drug po dag dbang po so so'i mngon sum du skye la/ 'dir mer mer po la sogs pa kun rdzob tu yang mig la sogs pa'i rkyen ma yin par smras pas/ des na gnas brtan blo brtan gyis 'gal bar brjod pa de la mngon sum dang 'gal ba'i gnod pa yang yod do/ /gnas brtan blo brtan gyis 'gal bar brjod pa'i tshig gang yin pa de yang kun rdzob tu skye ba kho na yin la/ 'dir gnas brtan blo brtan nyid kyis kun rdzob tu skye ba des mer mer po la sogs pa kun rdzob tu yang mig la sogs pa'i rkyen ma yin par smras pas/ des na gnas brtan blo brtan gyis 'gal bar brjod pa de la rang gi tshig dang 'gal ba'i gnod pa yang yod do/ /mig la sogs pa skye mched rnams kun rdzob tu skye ste/ 'ga' zhig la phan par byed pa'i phyir/ dper na bum pa bzhin te/ bum pa yang kun rdzob tu skye ste/ chu la sogs pa 'dzin pa nyid kyis 'ga' zhig la phan par byed pa yin pa dang 'dra bar nang gi skye mched rnams kyang kun rdzob tu skye ste/ yul 'dzin pa la sogs pa nyid kyis 'ga' zhig la phan par byed pa yin pa las 'dir mer mer po la sogs pa kun rdzob tu yang mig la sogs pa'i rkyen ma yin par smras pas/ des na gnas brtan blo brtan gyis 'gal bar brjod pa de la rjes su dpag pa dang 'gal ba'i gnod pa yang yod do/ /de ltar na gnas brtan blo brtan gyis 'gal bar brjod pa de la lung la sogs pa'i gnod pa yod pas kho bo'i gtan tshigs de 'gal ba ma yin no/ /gal te gnas brtan blo brtan 'di skad ces gzhan dag rnam pa des khyed kyi gtan tshigs de 'gal bar brjod kyi/ kho bo ni de skad mi brjod do zhes zer na/ de lta na yang gal te gzhan dag don dam pa kho nar mig la sogs pa dang / dbang po so so'i shes pa dag skye bar khas len na/ kun rdzob tu skye ba med par khas len na/ gzhan de dag kyang rang gi tshig dang 'gal ba dang / rjes su dpag pa dang 'gal ba dang / 'jig rten dang 'gal ba las thar pa med de/ 'di ltar 'jig rten pa'i don rtogs nas 'jig rten bzhin du bsgrub par bya zhes gsungs pas/ de'i phyir 'jig rten na phyi dang nang gi dngos po rnams kyi skye ba yod par grags bzhin du gal te gzhan dag kun rdzob tu phyi nang gi dngos po rnams kyi skye ba med par sgrub na/ de nyid kyis 'jig rten la grags pa dang 'gal ba'i gnod par 'gyur ro/ /des na gnas brtan blo brtan gyis smras pa'i 'gal ba'i skabs med do/ /yang na kho bos kun rdzob tu yang dngos po rnams gzhan las skye ba med do zhes khas ma blangs te/ gang gi tshe kho bos de skad khas ma blangs pa la 'gal ba ci yang med do/ /'o na khyod kyis ji skad khas blangs she na/ grub pa'i mtha' las/ rten cing 'byung ba gang yin pa/ /de ni re zhig de nyid min/ /de las gzhan pa'ang ma yin te/ /de phyir chad min rtag ma yin/ /zhes gsungs pa bzhin khas blangs pas kho bo'i gtan tshigs de la 'gal ba'i skabs med do/ /de lta bas na gnas brtan blo brtan grub pa'i mtha' la te por zhugs par snang ngo / /ci ste gzhan yin pa'i phyir zhes bya ba de gtan tshigs su mi rung ste/ dam bcas pa'i don gyi phyogs gcig yin pa'i phyir/ dper na sgra rtag ste sgra yin pa'i phyir ro zhes bya ba bzhin no zhe na zhes bya ba 'di ni skye bar smra ba dag rigs pa can gyi sgyu thabs kyis 'grel par byed pa'i gtan tshigs gzhan nyid ces bya ba de ma grub pa nyid du brjod pa yin no/ /de la ci ste zhes bya ba'i sgra ni gal te skye bar smra ba dag rigs pa can gyi sgyu thabs kyis 'grel par byed pa'i gtan tshigs gzhan nyid ces bya ba de ma grub pa nyid du brjod pa'i tshad ma 'di lta bu byed na zhes dogs pa bsu ba'i don yin no/ /'dir gzhan yin pa'i phyir zhes bya ba de zhes bya ba 'di ni chos can te/ dbu ma pas don dam par nang gi skye mched rnams de dag gi rkyen gzhan dag las skye ba med de gzhan yin pa'i phyir zhes smras pa dang / don dam par gzhan brjod par 'dod pa mig la sogs pa nang gi skye mched 'grub par byed pa dag rkyen ma yin par nges te/ gzhan yin pa'i phyir zhes smras pa'i gtan tshigs de'o/ /gtan tshigs su mi rung ste zhes bya ba 'di ni bsgrub par bya ba chos te/ dbu ma pas gzhan yin pa'i phyir zhes smras pa'i gtan tshigs de dag gi rkyen gzhan dag las skye ba med de zhes bya ba dang / gzhan dag rkyen ma yin par nges te zhes bya ba'i gtan tshigs su mi rung ste zhes rjes su dpag pa'o/ /dam bcas pa'i don gyi phyogs gcig yin pa'i phyir zhes bya ba 'di ni phyogs kyi chos te/ dam bcas pa'i don gyi phyogs gcig ces bya ba la/ dam bcas pa zhes bya ba ni dbu ma pas nang gi skye mched rnams de dag gi rkyen gzhan dag las skye ba med de zhes dam bcas pa dang / gzhan brjod par 'dod pa mig la sogs pa nang gi skye mched 'grub par byed pa dag rkyen ma yin par nges te zhes dam bcas pa'o/ /de'i don gyi phyogs gcig ces bya ba ni de dag gi rkyen gzhan dag ces bya ba dang / gzhan dag rkyen ma yin pa zhes bya ba gzhan du gyur pa'i don de'i phyogs gcig ni gzhan yin pa'i phyir zhes bya ba de yin te/ de dag gi rkyen gzhan dag las skye ba med de zhes pa'i don gyi phyogs gcig kyang gzhan yin pa'i phyir zhes bya ba yin la/ gzhan dag rkyen ma yin par nges te zhes bya ba'i don gyi phyogs gcig kyang gzhan yin pa'i phyir ro/ /dper na sgra rtag ste sgra yin pa'i phyir ro zhes bya ba bzhin no zhes bya ba 'di ni dpe ste/ 'di la rigs pa'i bstan bcos la dam bcas pa'i don gyi tshogs gcig gtan tshigs su mi rung ba rnam pa gsum rnam par 'jog ste/ dper na sgra rtag ste sgra yin pa'i phyir ro zhes bya ba de'i chos can gyi dam pa'i don gyi phyogs gcig yin te/ 'di ltar sgra nyid chos can phyogs su byas la sgra nyid de sgrub pa'i chos su yang byas pas de'i phyir de yang gtan tshigs su mi rung ngo / /dper na sgra rtag ste rtag pa'i phyir ro zhes bya ba de ni bsgrub par bya ba'i don gyi phyogs gcig yin te/ 'di ltar rtag pa nyid bsgrub par bya ba phyogs su byas la/ rtag pa nyid de sgrub pa'i chos su yang byas pas de'i phyir de yang gtan tshigs su mi rung ngo / /dper na sgra rtag ste sgra rtag pa'i phyir ro zhes bya ba de ni chos dang chos can bsdus pa'i phyogs kyi don gyi phyogs gcig yin te/ 'di ltar sgra rtag pa zhes bya ba chos dang chos can bsdus pa'i phyogs su byas la/ sgra rtag pa zhes bya ba chos dang chos can bsdus pa'i phyogs de nyid de sgrub pa'i chos su yang byas pas de'i phyir de yang gtan tshigs su mi rung ngo / /dpe de dang 'dra bar 'dir dbu ma pa khyod kyi gtan tshigs de dag gi rkyen gzhan dag las skye ba med de gzhan yin pa'i phyir zhes bya ba dang / gzhan dag rkyen ma yin par nges te gzhan yin pa'i phyir zhes bya ba de yang dam bcas pa'i don gyi phyogs gcig yin pa'i phyir gtan tshigs su mi rung ngo zhe na zhes bya ba ni skye bar smra ba dag rigs pa can gyi sgyu thabs kyis 'grel par byed pa'i gtan tshigs gzhan nyid ces bya ba de ma grub pa nyid du brjod cing de skad ces zer na'o/ /de skad zer ba de'i lan du 'dir 'grel pa byed pas/ de ni bzang po ma yin te/ snyan tshig gi sgra ni mi rtag ste/ sgra yin pa'i phyir/ dper na rnga bo che'i sgra bzhin no zhes bya bas dam bcas pa'i don gyi phyogs gcig gtan tshigs nyid du grub pa mthong bas gtan tshigs ma nges pa nyid do zhes bya ba smras te/ 'dis ni skye bar smra ba dag rigs pa can gyi sgyu thabs kyis 'grel bar byed pa'i gtan tshigs gzhan nyid ces bya ba de ma grub pa nyid du brjod pa de ni de lta ma yin no zhes bya bar ston to/ /de la de ni bzang po ma yin te zhes bya ba ni skye bar smra ba dag rigs pa can gyi sgyu thabs kyis dbu ma pa'i gtan tshigs gzhan nyid ces bya ba de dam bcas pa'i don gyi phyogs gcig yin pa'i phyir ma grub pa nyid do zhes zer ba de ni bzang po ma yin te/ 'di ltar sbyor ba'i tshig 'di la mtshan nyid de lta bu med do zhes bya ba'i tha tshig go/ /de nyid bstan pa'i phyir/ snyan tshig gi sgra mi rtag ste/ sgra yin pa'i phyir ro/ /dper na rnga bo che'i sgra bzhin no zhes bya bas zhes bya ba smras te/ 'dis ni khyad par can phyogs su byas pa la spyi phyogs kyi chos yin pa'i dpe bstan to/ /'dir snyan tshig gi sgra zhes bya ba 'di ni chos can yin la/ mi rtag ste zhes bya ba 'di ni bsgrub par bya ba chos yin/ sgra yin pa'i phyir zhes bya ba 'di ni sgrub pa'i chos yin/ dper na rnga bo che'i sgra bzhin no zhes bya ba 'di ni dpe yin par sbyar ro/ /de la snyan tshig gi sgra zhes bya ba ni mu stegs dpyod pa can gyi rig byed rnam pa bzhi'o/ /nges brjod kyi rig byed dang / mchod sbyin gyi rig byed dang / snyan tshig gi rig byed dang / srid srung gi rig byed ces bya ba dag las snyan tshig gi rig byed ces bya ba'i sgra ste/ yi ge'i bdag nyid do/ /snyan tshig gi sgra zhes bya ba de khyad par can de la bsgrub par bya ba chos mi rtag pa dang / sgrub pa'i chos sgra spyi yin pa'i phyir zhes bya ba de gnyis yod pas chos can no/ /mi rtag ste zhes bya ba ni snyan tshig gi sgra khyad par can de mi rtag par bsgrub par bya ba ste de mi rtag par rjes su dpag pa yin no/ /sgra yin pa'i phyir zhes bya ba ni spyi phyogs kyi chos yin par bstan pa ste/ snyan tshig gi sgra khyad par can de ci'i phyir mi rtag ce na/ sgra spyi yin pa'i phyir de yang mi rtag go zhes bstan pa yin no/ /dper na rnga bo che'i sgra bzhin no zhes bya ba ni dper na rnga bo che'i sgra zhes bya ba khyad par can de ni mi rtag ste/ sgra spyi yin pa'i phyir ro zhes bya ba dang 'dra bar snyan tshig gi sgra khyad par can de yang mi rtag ste/ sgra spyi yin pa'i phyir ro zhes bya bar sbyar te/ dper na 'di ni shing yin te shing sha pa yin pa'i phyir ro zhes bya ba bzhin no/ /'di skad bstan te/ dper na sbyor ba'i tshig 'di la snyan tshig gi sgra khyad par can phyogs su byas pa la/ sgra spyi phyogs kyi chos yin par bstan pas de dam bcas pa'i don gyi phyogs gcig yin yang gtan tshigs su mi rung ngo / /de bzhin du 'dir yang gzhan gyis yongs su brtags pa'i rkyen mer mer po dang nur nur po la sogs pa gzhan khyad par can dag phyogs su byas pa la/ gzhan spyi phyogs kyi chos yin par bstan pas de dam bcas pa'i don gyi phyogs gcig yin yang gtan tshigs su rung ngo zhes bya bar sbyar ro/ /de nyid bstan pa'i phyir/ dam bcas pa'i don gyi phyogs gcig gtan tshigs nyid du grub pa mthong bas zhes bya ba smras te/ 'dis ni khyad par can phyogs su byas pa la spyi phyogs kyi chos yin pa'i don bstan to/ /de la dam bcas pa zhes bya ba'i khyad par can yin te/ dper na snyan tshig gi sgra dang / rnga bo che'i sgra khyad par can mi rtag par dam bcas pa dang 'dra bar 'dir yang nang gi skye mched rnams de dag gi rkyen gzhan khyad par can dag las skye ba med do zhes bya ba dang / gzhan brjod par 'dod pa mig la sogs pa nang gi skye mched 'grub par byed pa khyad par can dag rkyen ma yin par nges te zhes dam bcas pa yin no/ /de'i don gyi phyogs gcig ces bya ba ni spyi yin te/ dper na sgra spyi yin pa'i phyir zhes bya ba dang 'dra bar 'dir yang gzhan spyi yin pa'i phyir zhes bstan pa yin no/ /gtan tshigs nyid du grub pa mthong bas zhes bya ba ni dam bcas pa'i don gyi phyogs gcig ces bya ba khyad par can phyogs su byas pa la/ spyi phyogs kyi chos yin par bstan pa de bsgrub par bya ba dang dpe gnyi ga la gtan tshigs nyid du 'grub pa mthong bas so/ / gtan tshigs ma nges pa nyid do zhes bya ba ni skye bar smra ba dag gi gtan tshigs dam bcas pa'i don gyi phyogs gcig yin pa'i phyir/ dper na sgra rtag ste sgra yin pa'i phyir ro zhes bya ba bzhin no zhes zer ba de ma nges pa nyid de/ 'di ltar dper na sgra rtag ste sgra yin pa'i phyir ro zhes bya ba lta bu khyad par can phyogs su ma byas la/ spyi phyogs kyi chos yin par ma bstan pa ni dam bcas pa'i don gyi phyogs gcig yin yang gtan tshigs su mi rung la/ dper na snyan tshig gi sgra mi rtag ste sgra yin pa'i phyir ro/ /dper na rnga bo che'i sgra yin no zhes bya ba lta bu khyad par can phyogs su byas la/ spyi phyogs kyi chos yin par bstan pa ni dam bcas pa'i don gyi phyogs gcig yin yang gtan tshigs nyid du grub par mthong bas de'i phyir skye bar smra ba khyod kyi gtan tshigs de ma nges pa nyid yin pas mi rung ngo / /'di skad bstan te/ gang gi tshe spyi btang ste khyad par can phyogs su byed pa de'i tshe na chos dang chos can rung bar 'gyur bas de'i phyir/ ci re zhig dam bcas pa'i don gyi phyogs gcig yin pa'i phyir/ dper na sgra rtag ste sgra yin pa'i phyir ro zhes bya ba bzhin no zhes bya ba de gtan tshigs su mi rung bar 'gyur ram/ 'on te snyan tshig gi sgra mi rtag ste sgra yin pa'i phyir/ dper na rnga bo che'i sgra bzhin no zhes bya bas dam bcas pa'i don gyi phyogs gcig gtan tshigs nyid du grub pa mthong ba de gnyis gang yin pa ma nges pas khyod kyi gtan tshigs mi rung ngo / /bye brag pa dag las gzhan rdul phra rab dag kho na las rdul phra mo gnyis la sogs pa'i rim gyis sa dang chu dang me dang rlung gi rnam grangs cha shas can gyi rdzas skye ba 'grub pa mngon par 'dod pa dag phyir zlog par byed de/ gzhan yin pa'i phyir zhes bya ba gtan tshigs kyi don yon tan yin par rtog na ni rang la ma grub pa'i don nyid do/ /de las gzhan pa'i don yin par rtog na ni grags pa'i gnod par 'gyur ro zhes bya bas ni mu stegs bye brag pa dag /'grel pa byed pa'i gtan tshigs gzhan nyid ces bya ba de la/ rang la ma grub pa'i don nyid dang / 'jig rten la grags pa dang 'gal ba'i gnod pa yod do zhes gtan tshigs kyi skyon rjod par byed par ston to/ /'di la gal te dgag pa 'dis dngos po rnams gzhan las skye bar smra ba dag ma lus par bkag pa yin na 'di ci'i phyir bye brag pa dag dgag pa dmigs kyis ston par byed ce na/ gang gi phyir de ltar bskyed par bya ba dang / skyed pa nyid brtag pa bya bas nang gi dngos po rnams de dag gi rten gzhan dag las skye ba med par bkag pa na/ phyi rol gyi dngos po rnams kyang de dag gi rkyen gzhan dag las skye ba med pa kho nar bkag pa yin mod kyi/ 'on kyang mi mkhas pa kha cig 'di snyam du/ nang gi dngos po rnams kyi skye ba bkag gi /phyi rol gyi dngos po rnams kyi skye ba ni ma bkag pas de'i phyir phyi rol gyi dngos po rnams kyi skye ba yod par gyur na/ nang gi dngos po rnams kyi skye ba la yang dngos po med do snyam du sems par 'gyur bas de'i phyir phyi rol gyi dngos po rnams kyi skye ba dgag pa'i phyir dang / skye bo las dang po pa rnams kyi blo la phan gdags pa'i phyir bye brag pa dag dgag pa 'di dmigs kyis bstan par bya'o/ /bye brag pa dag ces bya ba ni mu stegs gzegs zan gyi slob ma mu stegs bye brag pa zhes bya ba dag go/ /las zhes bya ba'i sgra ni nges par gzung ba'i don to/ /bye brag pa dag kho na las yin gyi gzhan las ni ma yin te/ bye brag pa dag ni blun pa nyid kyis de ltar phyi rol gyi dngos po rnams kyi skye ba dgag pa byas kyang khong du mi chud pa'i phyir ro/ /gzhan rdul phra rab dag kho na las gzhan zhes bya ba ni bye brag pa dag rgyu rkyen gzhan rdul phra rab kho na las 'bras bu sa dang chu dang me dang rlung gi rnam grangs kyi cha shas can gyi rdzas skye ba 'grub pa mngon par 'dod pa'o/ /rdul phra rab dag ces bya ba ni rdul shin tu phra rab dag ste/ gang la de'i pha rol na phra rab gzhan med pa de ni rdul phra rab dag ces bya'o/ /kho na las zhes bya ba'i sgra 'di yang nges par gzung ba ste/ gzhan rdul phra rab dag kho na las yin gyi bdag las ni ma yin no zhes bya ba'i tha tshig go/ /de'i phyir rab tu 'jig pa chen po'i dus kyi tshes la sogs pa 'byung ba chen po'i rdul phra rab gzhan so so nas mched pa kho na dag las so/ /rdul phra mo gnyis la sogs pa'i rim gyis sa dang chu dang me dang rlung gi rnam grangs cha shas tsam gyi rdzas skye ba 'grub pa mngon par 'dod pa dag ces bya ba ni bye brag pa dag las gzhan rdul phra rab dag kho na las rdul phra mo gnyis la sogs pa'i rim gyis sa dang chu dang me dang rlung gi rnam grangs cha shas can gyi rdzas skye ba 'grub par mngon par 'dod pa de dag ste/ de la rdul phra mo gnyis la sogs pa'i rim gyis zhes bya ba ni de dag gi gzhung las 'jig rten chags pa'i dus kyi tshe dang dbang phyug gis mngon par 'dod pa dang / sems can de dag gi las yongs su smin pas des na chos dang chos ma yin pa'i dbang gis bdas pas sa la sogs pa'i rdul phra rab de dag las dang po kho nar rdul phra rab gnyis sbyor bar byed de/ de ni rdul phra mo gnyis kyi rdzas zhes bya'o/ /de'i 'og tu rdul phra mo gnyis kyi rdzas de la rdul phra rab gsum pa sbyor bar byed de/ de ni rdul phra mo gnyis kyi rdul phra mo zhes bya'o/ /de'i 'og tu rdul phra mo gnyis kyi rdul phra mo de'i rim gyis se gol gtogs pa tsam gyis sa dang chu dang me dang rlung gi rnam grangs cha shas can gyi rdzas/ skye ba grub pa mngon par 'dod/ ces grags pa'i rim gyis so/ /sa dang chu dang me dang rlung gi rnam grangs cha shas can gyi rdzas zhes bya ba la cha shas can gyi rdzas gang las dang chu dang me dang rlung gi ming gi rnam grangs yod pa de ni sa dang chu dang me dang rlung gi rnam grangs cha shas can gyi rdzas zhes bya'o/ /rnam grangs zhes bya ba ni ming ste/ sa dang chu dang me dang rlung zhes bya ba'i ming gi rnam grangs so/ /cha shas can gyi rdzas zhes bya ba ni rdzas sa dang chu dang me dang rlung gang la cha shas rdul phra rab dag yod pa de ni de'i cha shas can gyi rdzas zhes bya'o/ /rdzas de skye ba zhes bya ba ni sa dang chu dang me dang rlung gi rnam grangs cha shas can gyi rdzas skye ba'o/ /skye ba de 'grub pa zhes bya ba ni sa dang chu dang me dang rlung gi rnam grangs cha shas can gyi rdzas skye ba 'grub pa'o/ /rdzas skye ba'i grub pa de dag mngon par 'dod pa dag ces bya ba ni bye brag pa gang dag sa dang chu dang me dang rlung gi rnam grangs cha shas can gyi rdzas skye ba 'grub pa de dag mngon sum du bya bar 'dod pa de dag ni rdzas skye bar 'grub pa mngon par 'dod pa dag go/ /'di skad bstan te/ mu stegs bye brag pa dag gi gzhung las/ 'jig rten 'jig cing stongs pa'i tshe na sa dang chu dang me dang rlung gi rdul phra rab de dag phyogs cha med pa'i tshul gyis so so na rtag par 'dug go/ /de'i 'og tu 'jig rten 'chags pa'i tshe na dbang phyug chen po la 'jig rten sprul 'dod pa'i 'dod pa skye'o/ /de'i 'og tu sems can de dag gi las yongs su smin pas des na chos dang chos ma yin pa'i dbang gis bdas pas/ sa la sogs pa'i rdul phra rab de dag las dang po kho nar rlung gi rdul phra rab gnyis sbyor bar byed de/ de ni rlung gi rdul phra mo gnyis kyi rdzas zhes bya'o/ /de'i 'og tu rlung gi rdul phra mo gnyis kyi rdzas de la rlung gi rdul phra rab gsum pa sbyor bar byed de de ni rlung gi rdul phra mo gnyis kyi rdul phra mo zhes bya'o/ /de'i 'og tu rlung gi rdul phra mo gnyis kyi rdul phra mo de'i rim gyis se gol gtogs pa tsam gyis rlung gi rdul phra rab dag 'bras bu'i rdzas rtsom par byed de/ des na dang po kho nar rlung gi phung po chen po yang dang yang du shin tu g.yo zhing 'dug go/ /de bzhin du rdul phra rab gnyis sbyor bar byed de/ de ni chu'i rdul phra mo gnyis kyi rdzas zhes bya'o/ /de'i 'og tu chu'i rdul phra mo gnyis kyi rdzas de la chu'i rdul phra rab gsum pa sbyor bar byed de/ de ni chu'i rdul phra mo gnyis kyi rdul phra mo zhes bya'o/ / de'i 'og tu chu'i rdul phra mo gnyis kyi rdul phra mo de'i rim gyis se gol gtogs pa tsam gyis chu'i rdul phra rab dag 'bras bu'i rdzas rtsom par byed do/ /des na de'i 'og tu rlung gi phung po chen po yang dang yang du shin tu g.yo zhing 'dug pa de'i steng du chu'i phung po chen po yang dang yang du shin tu 'khyil zhing 'dug go/ /de bzhin du sa'i rdul phra rab gnyis pa sbyor bar byed de/ de ni sa'i rdul phra mo gnyis kyi rdzas zhes bya'o/ /de'i 'og tu sa'i rdul phra mo gnyis kyi rdzas de la sa'i rdul phra rab gsum sbyor bar byed do/ de ni sa'i rdul phra mo gnyis kyi rdul phra mo zhes bya'o/ /de'i 'og tu sa'i rdul phra mo gnyis kyi rdul phra mo de'i rim gyis se gol gtogs pa tsam gyis sa'i rdul phra rab dag 'bras bu'i rdzas rtsom par byed de/ des na de'i 'og tu chu'i phung po chen po yang dang yang du shin tu 'khyil zhing 'dug pa de'i steng du sa'i dkyil 'khor chen po shin tu mkhregs shing lhun gcig tu gyur pa chags shing 'dug go/ /de bzhin du me'i rdul phra mo gnyis sbyor bar byed de/ de ni me'i rdul phra mo gnyis kyi rdzas zhes bya'o/ /de'i 'og tu me'i rdul phra mo gnyis kyi rdzas de la me'i rdul phra rab gsum pa sbyor bar byed de/ de ni me'i rdul phra mo gnyis kyi rdul phra mo zhes bya'o/ /de'i 'og tu me'i rdul phra mo gnyis kyi rdul phra mo de'i rim gyis se gol gtogs pa tsam gyis me'i rdul phra rab dag 'bras bu'i rdzas rtsom par byed de/ de nas de'i 'og tu sa'i dkyil 'khor chen po shin tu mkhregs shing lhun gcig tu gyur pa de'i steng du me'i phung po chen po 'bar ba rab tu 'bar ba kun du rab tu 'bar ba me lce gcig tu gyur cing sreg par 'dug par 'gyur ro/ /me'i phung po chen po'i nang du dbang phyug gi mngon par 'dod pas tshangs pa'i sgo nga chen po gsal zhing 'bar ba 'dug par 'gyur ro/ / tshangs pa'i sgo nga chen po gsal zhing 'bar ba de smin cing 'phrugs pa'i nang nas/ 'jig rten thams cad kyi mes po tshangs pa zhes bya ba gdong bzhi pa la ral pa can pad+ma'i skye gnas nas byung ba pad+ma'i stan la 'dug pa 'byung bar 'gyur te/ 'jig rten thams cad kyi mes po tshangs pa des skye dgu thams cad byas nas/ 'jig rten 'chags shing gnas par 'gyur ro zhes bya ba de ltar 'dod ces grag go/ /gal te rdul phra rab dag ji skad smos pa'i rim pa des sa la sogs pa cha shas can gyi rdzas kyi rtsom pa nyid yin pa 'di ji ltar nges par shes par bya zhe na/ 'di ltar me gyen du 'bar ba dang / rlung thad kar 'gro ba dang / rdul phra rab dang / yid dag ni ma mthong bas byed du bcug pa na bskal pa dang po'i las byed pa yin pas me gyen du 'bar ba dang / rlung thad kar 'gro ba la sogs pa gang yin pa 'di ni chos dang chos ma yin pa'i mthu yin no/ /phyir zlog par byed de zhes bya ba ni de ltar bye brag pa de dag dbu ma pa la phyir rgol ba nyid du gnas par byed pa ste/ sngar bstan ma thag pa'i sgrub pa de nyid la gnas par byed ces bya ba'i tha tshig go/ /ji ltar phyir zlog par byed ce na/ de'i phyir gzhan yin pa'i phyir zhes bya ba gtan tshigs kyi don yon tan yin par rtog na ni rang la ma grub pa'i don nyid do/ /de las gzhan pa'i don yin par rtog na ni grags pa'i gnod par 'gyur ro zhes bya ba smras te/ gzhan yin pa'i phyir zhes bya ba ni dbu ma pa'i sbyor ba'i tshig las don dam par nang gi skye mched rnams de dag gi rkyen gzhan dag la skye ba med de/ gzhan yin pa'i phyir zhes bya ba dang / don dam par gzhan brjod par 'dod pa mig la sogs pa nang gi skye mched 'grub par byed pa dag rkyen ma yin par nges te/ gzhan ma yin pa'i phyir zhes smras pa gang yin pa ste/ dbu ma pa'i gtan tshigs kyi don gzhan yin pa'i phyir zhes bya ba de'o/ /gtan tshigs kyi don zhes bya ba yang dbu ma pa'i gtan tshigs kyi don te gzhan yin pa'i phyir zhes bya ba de nyid do/ /yon tan yin par rtog na ni zhes bya ba ni dbu ma pa'i gtan tshigs kyi don gzhan yin pa'i phyir zhes bya ba de bye brag pa'i grub pa'i mtha' las tshig gi don drug byung ba las/ yon tan zhes bya ba'i nang nas gzhan zhes bya ba de yin par rtog na ni rang la ma grub pa'i don nyid yin pas mi rung ngo zhes bya bar sbyar ro/ /de la bye brag pa'i grub pa'i mtha' las 'byung ba'i tshig gi don drug gang zhe na/ rdzas dang / yon tan dang / las dang / spyi dang / bye brag dang / 'du ba'o/ /de la rdzas gang zhe na/ rnam pa dgu ste/ sa dang / chu dang / me dang / rlung dang / nam mkha' dang / dus dang / phyogs dang / bdag dang / yid do/ /yon tan gang zhe na/ rnam pa nyi shu rtsa bzhi ste/ gzugs dang / dri dang / ro dang / reg pa dang / grangs dang / bong tshod dang / so so ba dang / phrad pa dang / bye ba dang / gzhan dang / gzhan ma yin pa dang / mig gi blo dang / rna ba'i blo dang / sna'i blo dang / lce'i blo dang / lus kyi blo dang / bde ba dang / sdug bsngal ba dang / 'dod pa dang / sdang ba dang / chos dang / chos ma yin pa dang / byas pa'i shugs dang / 'bad pa'o/ /las gang zhe na/ rnam pa lnga ste/ 'degs pa dang / 'jog pa dang / bskum pa dang / brkyang ba dang / 'gro ba'o/ / spyi gang zhe na/ yod pa ste spyi chen po dang / nyi tshe'i spyi'o/ /bye brag gang zhe na/ de las bye brag tu dbye ba'o/ /'du ba gang zhe na/ 'di dang 'dir 'du ba'o/ /de ltar bye brag pa'i tshig gi don drug po de dag las/ yon tan nyi shu rtsa bzhi'i nang nas/ gzhan zhes bya ba de dang ldan na ni rdul phra rab de dag kyang gzhan zhes brjod pa yin la/ gzhan de dang mi ldan na ni rdul phra rab de dag kyang gzhan ma yin pa zhes brjod pa yin pas/ 'dir dbu ma pa khyod kyi gtan tshigs gzhan yin pa'i phyir zhes bya ba de yang bye brag pa'i tshig gi don drug po de dag las yon tan nyi shu rtsa bzhi'i nang nas gzhan zhes bya ba de dang ldan pas nang gi skye mched rnams de dag gi rkyen gzhan dag las skye ba med pa dang / gzhan brjod par 'dod pa mig la sogs pa'i nang gi skye mched 'grub par byed pa dag rkyen ma yin par nges te zhes bya bar rtog gam zhes zer ro/ /rang la m a grub pa'i don nyid do zhes bya ba ni de ltar khyod kyi gtan tshigs kyi don gzhan yin pa'i phyir zhes bya ba de kho bo cag gi grub pa'i mtha' las byung ba'i tshig gi don drug po de dag las yon tan nyi shu rtsa bzhi'i nang nas gzhan zhes bya ba de dang ldan pas khyod nang gi skye mched rnams de dag gi rkyen gzhan dag las skye ba med pa dang / gzhan brjod par 'dod pa mig la sogs pa nang gi skye mched 'grub par byed pa dag rkyen ma yin par nges par rtog na/ de lta na nged kyi grub pa'i mtha' las 'byung ba'i gzhan des khyod rang la ma grub pa'i don nyid yin pas/ de'i phyir khyod kyi gtan tshigs de gang yang rung ba la ma grub pa nyid yin pas mi rung ngo / /de las gzhan pa'i don yin par rtog na ni zhes bya ba ni/ 'on te dbu ma pa'i gtan tshigs kyi don gzhan yin pa'i phyir zhes bya ba de dag bye brag pa'i grub pa'i mtha' las tshig gi don drug 'byung ba'i nang nas yon tan zhes bya ba de las gzhan pa'i don yin par rtog na ni 'jig rten la grags pa dang 'gal ba'i gnod par 'gyur bas mi rung ngo zhes bya bar sbyar ro/ /de la bye brag pa'i grub pa'i mtha' las gzhan pa'i don yin par rtog na ni 'bras bu nang gi skye mched rnams kyi rkyen gzhan mer mer po dang nur nur po la sogs pa dang / 'bras bu myu gu la sogs pa phyi rol gyi skye mched rnams kyi rkyen gzhan sa bon la sogs pa de dag gzhan yin pa'i phyir 'bras bu yang de dag gi rkyen gzhan dag las skye ba med pa dang / rkyen gzhan dag kyang rkyen ma yin par rtog pa'o/ /grags pa'i gnod par 'gyur ro zhes bya ba ni de ltar khyod kyi gtan tshigs kyi don gzhan yin pa'i phyir zhes bya ba de/ 'bras bu rnams rkyen las gzhan yin pa'i phyir de dag gi rkyen gzhan dag las skye ba med pa dang / rkyen rnams kyang 'bras bu las gzhan yin pa'i phyir rkyen ma yin par rtog na/ de lta na 'jig rten na ba lang rdzi'i chung ma yan chad la yang 'bras bu rnams de dag gi rkyen gzhan dag las skye ba dang / rkyen gzhan dag 'bras bu'i rkyen gzhan yin par grags pa dang 'gal ba'i gnod par 'gyur bas de'i phyir/ khyod kyi gtan tshigs de la 'jig rten la grags pa dang 'gal ba'i gnod pa yod pas mi rung ngo zhe'o zhes bya ba ni bye brag pa dag las gzhan rdul phra rab dag kho na las/ rdul phra mo gnyis la sogs pa'i rim gyis sa dang chu dang me dang rlung gi rnam grangs cha shas can gyi rdzas skye ba 'grub pa mngon par 'dod pa dag de skad ces zer zhing / dbu ma pa la phyir rgol ba nyid du gnas pa zlog par byed na'o/ /de skad ces zer ba de'i lan du 'dir 'grel pa byed pas/ de ni bzang po ma yin te/ gzhan gyi blo'i rgyu spyi'i chos grub pa kho na ste/ gtan tshigs nyid spyir brjod pa'i phyir dang / de yon tan nyid dam gzhan nyid yin par sems pa yang gzhan yin pa'i phyir ro/ /grags pa'i gnod par yang mi 'gyur te/ dam bcas pa khyad par can yin pa'i phyir ro/ /don dam par sa'i rdul phra rab dag sa zhes bya ba'i rdzas rtsom par byed pa ma yin te/ rdul phra rab yin pa'i phyir/ dper na me'i rdul phra rab dag bzhin no/ /de bzhin du me'i rdul phra rab dag kyang me'i rdzas rtsom par byed pa ma yin te zhes bya ba la sogs pa yang brjod par bya'o zhes bya ba smras te/ 'dir ni sngar bye brag pa dag na re/ dbu ma pa'i gtan tshigs kyi don gzhan yin pa'i phyir zhes bya ba de yon tan yin par rtog na ni rang la ma grub pa'i don nyid do/ /de las gzhan pa'i don yin par rtog na ni grags pa'i gnod par 'gyur ro zhes zer ba de bzang po ma yin te/ sun 'byin pa ltar snang ba yin no zhes ston to/ /de la de ni bzang po ma yin te zhes bya ba ni bye brag pa ji skad smras pa de ni sun 'byin pa ma yin te/ sun 'byin pa ltar snang ba yin no zhes bya ba'i tha tshig go/ /sun 'byin pa ltar snang ba nyid yin par bstan pa'i phyir gzhan gyi blo'i rgyu spyi'i chos grub pa kho na ste zhes bya ba la sogs pa smras so/ /de la gzhan gyi blo'i rgyu zhes bya ba ni gzhan nyid yin par shes pa'i blo skye ba'i rgyu dang rgyu mtshan dang byed rgyu ni gzhan gyi blo'i rgyu ste/ 'di lta ste/ skye mched rnams dang de dag gi rkyen rnams so/ /de dag gi spyi zhes bya ba ni chos te/ gzhan gyi blo'i rgyu skye mched rnams dang de dag gi rkyen rnams kyi spyi'o/ /spyi de'i chos zhes bya ba ni spyi'i tshogs de'i chos gang yin pa ste/ 'di lta ste/ skye mched rnams las kyang rkyen rnams gzhan nyid yin la/ rkyen rnams las kyang skye mched rnams gzhan nyid yin pa'o/ /spyi de'i chos grub pa kho na ste zhes bya ba ni skye mched de yang rkyen de dag gi gzhan nyid kho na yin la/ rkyen de dag kyang skye mched de'i gzhan nyid kho na yin pas de'i phyir spyi de'i chos grub pa kho na yin no/ /gzhan gyi blo'i rgyu spyi'i chos grub pa kho na ste zhes bya ba 'di ni phyogs yin no/ /ji ltar na gzhan gyi blo'i rgyu spyi'i chos de grub pa kho na yin zhe na/ de'i phyir gtan tshigs nyid spyir brjod pa'i phyir zhes bya ba smras te/ 'di ni phyogs kyi chos yin no/ /de la gtan tshigs nyid ces bya ba ni dbu ma pa'i gtan tshigs gzhan yin pa'i phyir zhes bya ba'o/ /spyir brjod pa'i phyir zhes bya ba ni bye brag pa'i grub pa'i mtha' las 'byung ba'i yon tan yin no zhe 'am/ de las gzhan pa'i don yin no zhes bya bar bye brag tu khas ma blangs par bdag nyid ces bya ba spyi thun mong gang yin pa de gtan tshigs nyid du brjod pa'i phyir/ gzhan gyi blo'i rgyu spyi'i chos grub pa kho na yin pas gzhan nyid ces bya ba'i don dbu ma pa rang la ma grub pa'i don nyid ma yin pas/ khyed bye brag pa na re/ gtan tshigs kyi don yon tan yin par rtog na ni rang la ma grub pa'i don nyid do zhes zer ba de ni sun 'byin pa ltar snang ba yin no zhes bya bar gnas so/ /de yon tan nyid dam gzhan nyid yin par sems pa yang sems pa gzhan yin pa'i phyir ro zhes bya ba ni sngar bye brag pa khyed na re/ gzhan yin pa'i phyir zhes bya ba'i gtan tshigs kyi don te/ bye brag pa'i grub pa'i mtha' las 'byung ba'i yon tan yin par rtog gam/ de las gzhan pa'i don yin par rtog ces khyed de ltar sems pa de ni bsam pa gzhan yin pa'i phyir gnas skabs 'dir dngos po rnams gzhan las skye ba med pa'i gtan tshigs kyi mtshan nyid bsam pa 'di la mi dgos so zhes bya ba'i tha tshig go/ /grags pa'i gnod par mi 'gyur te/ /zhes bya ba ni/ sngar bye brag pa dag na re gzhan yin pa'i phyir zhes bya ba'i gtan tshigs kyi don yon tan las gzhan pa'i don yin par rtog na ni grags pa'i gnod par 'gyur ro zhes zer ba de grags pa'i gnod par yang mi 'gyur te zhes dam 'cha' zhing de sun 'byin pa ltar snang ba yin no zhes bsgrub pa ste/ de yang phyogs yin no/ /ji ltar na grags pa'i gnod par yang mi 'gyur zhe na/ de'i phyir dam bcas pa khyad par can yin pa'i phyir zhes bya ba smras te/ 'di ni phyogs kyi chos yin no/ /de la dam bcas pa khyad par can yin pa'i phyir zhes bya ba ni gang gi phyir don dam par skye mched rnams gzhan las skye ba med do zhes smras pa gang yin pa des kun rdzob tu yang skye mched rnams gzhan las skye ba med do zhes zlog par mi byed pa de'i phyir grags pa'i gnod par 'gyur ba'i skabs med do/ /da ni sngar gzhan dag 'di snyam du phyi rol gyi dngos po rnams kyi skye ba ma bkag pa des na nang gi dngos po rnams kyi skye ba yang gnod pa med do snyam du sems pa gang yin pa de dag gi phyir/ bye brag pa dag las gzhan rdul phra rab dag kho na las rdul phra mo gnyis la sogs pa'i rim gyis/ sa dang chu dang me dang rlung gi rnam grangs cha shas can gyi rdzas skye ba 'grub par mngon par 'dod pa ji skad smos pa dag dgag par bya ste/ de'i phyir don dam par sa'i rdul phra rab dag sa zhes bya ba'i rdzas rtsom par byed pa ma yin te rdul phra rab yin pa'i phyir/ dper na me'i rdul phra rab dag bzhin no zhes bya ba la sogs pa smras so/ /don dam par zhes bya ba ni sngar gzhan ma yin pa ni 'dir thams cad don dam par bkag ste/ nges par gzung ba'i phyir ro/ /gzhan du yang mi 'gal te/ khyad par gyi gzhi'i khyad par ji skad bstan pa la 'gal ba med pa'i phyir dang / mdzad pa pos bstan pa nyid kyis bzhed pa mchog yin pa'i phyir ro zhes zer ro zhes smras pas/ 'dir rdul phra rab dag pa la sogs pa'i rdzas rtsom par byed pa ma yin par dgag pa yang don dam par dgag go zhes bya bar sbyar ro/ /de la don dam par zhes bya ba ni don dam par rdul phra rab dag sa la sogs pa'i rdzas rtsom par byed pa rdzas dang dngos po dang gzhi'i sgo nas dgag pa ste/ de yang kun rdzob kyi bden pa la gnas nas don dam pa'i yul la dgag par bya ba yin gyi/ don dam pa nyid du ni brjod pa med pa'i phyir dgag pa'i tha snyad kyang med do/ /de la sa'i rdul phra rab dag ces bya ba 'di ni chos can yin te/ 'di dag la bsgrub par bya ba chos zhes bya ba'i rdzas rtsom par byed pa ma yin te zhes bya ba dang / sgrub pa'i chos rdul phra rab yin pa'i phyir zhes bya ba de gnyis yod pa'i phyir chos can zhes bya'o/ /sa zhes bya ba'i rdzas rtsom par byed pa ma yin te zhes bya ba 'di ni bsgrub par bya ba chos yin te/ sa'i rdul phra rab dag sa zhes bya ba'i rdzas rtsom par byed pa'i rgyu ma yin par dam bcas pa yin pa'i phyir bsgrub par bya ba chos zhes bya'o/ /sa zhes bya ba'i rdzas zhes bya ba ni bye brag pa dag gis yongs su brtags pa'i sa'i rdzas gang las zhes bya ba'i ming yod pa de ni sa zhes bya ba'i rdzas yin no/ /rtsom par byed pa ma yin te zhes bya ba ni cha shas sa'i rdul phra rab ces bya ba dag cha shas can gyi rdzas sa zhes bya ba rtsom par byed pa'i rgyu ma yin pa'o/ /rdul phra rab yin pa'i phyir zhes bya ba de ni sgrub pa'i chos yin te/ sa'i rdul phra rab khyad par can dag ci'i phyir sa zhes bya ba'i rdzas rtsom par byed pa ma yin zhe na/ rdul phra rab spyi yin pa'i phyir te/ 'dir yang khyad par can phyogs su byas pa la spyi'i phyogs kyi chos su bstan pas/ dam bcas pa'i don gyi phyogs gcig gtan tshigs nyid du grub bo/ /dper na me'i rdul phra rab dag bzhin no zhes bya ba 'di ni dpe ste/ dper na me'i rdul phra rab dag la rdul phra rab dag ces bya ba spyi yod pa'i phyir/ me'i rdul phra rab dag sa zhes bya ba'i rdzas rtsom par byed pa ma yin pa bzhin du/ sa'i rdul phra rab dag la yang rdul phra rab ces bya ba'i spyi yod pa'i phyir/ sa'i rdul phra rab dag kyang sa zhes bya ba'i rdzas rtsom par byed pa ma yin no/ /'di skad bstan te/ dper na snyan tshig gi sgra mi rtag ste sgra yin pa'i phyir/ dper na rnga bo che'i sgra bzhin no zhes bya bas snyan tshig dang rnga bo che'i sgra khyad par can phyogs su byas pa la/ sgra spyi'i phyogs kyi chos yin par bstan pas de dam bcas pa'i don gyi phyogs gcig yin yang gtan tshigs su rung ba de bzhin du 'dir yang gzhan gyis yongs su brtags pa'i sa'i rdul phra rab khyad par can dag phyogs su byas pa la/ rdul phra rab spyi'i phyogs kyi chos yin par bstan pas/ de dam bcas pa'i don gyi phyogs gcig yin yang gtan tshigs su rung bar bstan to/ /de bzhin du me'i rdul phra rab dag kyang me'i rdzas rtsom par byed pa ma yin te zhes bya ba la sogs pa yang brjod par bya'o zhes bya bas ni 'di skad bstan te/ ji ltar don dam par sa'i rdul phra rab dag sa zhes bya ba'i rdzas rtsom par byed pa ma yin te/ rdul phra rab yin pa'i phyir/ dper na me'i rdul phra rab dag bzhin no zhes bstan pa de bzhin du/ don dam par chu'i rdul phra rab dag kyang chu zhes bya ba'i rdzas rtsom par byed pa ma yin te/ rdul phra rab yin pa'i phyir/ dper na rlung gi rdul phra rab dag bzhin no/ /don dam par me'i rdul phra rab dag kyang me zhes bya ba'i rdzas rtsom par byed pa ma yin te/ rdul phra rab yin pa'i phyir/ dper na chu'i rdul phra rab dag bzhin no/ / don dam par rlung gi rdul phra rab dag kyang rlung zhes bya ba'i rdzas rtsom par byed pa ma yin te/ rdul phra rab yin pa'i phyir/ dper na sa'i rdul phra rab dag bzhin no zhes brjod par bya ste/ 'di la gang la rdul phra rab nyid mthong ba de la rlung gi rdzas rtsom par byed pa nyid ma mthong ste/ dper na sa'i rdul phra rab dag bzhin no zhes khyad par can phyogs su byas pa la/ spyi phyogs kyi chos yin par bstan pas nges par dam bcas pa'i don gyi phyogs gcig yin yang gtan tshigs nyid du rung bas shes par bya'o/ /de bzhin du phyi rol gyi bum pa dang snam bu dang shing rta dang myu gu la sogs pa rgyu rkyen so sor nges pa las skye ba rnams kyi dgag pa yang ci rigs par khong du chud par bya'o/ / //bam po bcu gcig pa/ gzhan las skye ba spyir dgag pa 'dis gzhan gyi sde pa dag 'ba' zhig gis bkag pa kho nar ma zad kyi/ 'di ltar rang gi sde pa dag gi yang bkag pa de'i phyir/ 'dir chos mngon pa pa dag na re/ gzhan nyid ces bya ba gal te 'bras bu'i nus pas stong pa nyid la bya ba ni gtan tshigs kyi don ma grub pa nyid do/ /gal te des mi stong pa nyid la bya na ni dpe sgrub pa'i chos dang mi ldan par 'gyur ro zhes zer ro zhes bya ba smras te/ 'dir ni dbu ma pa'i gtan tshigs gzhan nyid ces bya ba dang / dpe bum pa dang rgyu spun la sogs pa bzhin no zhes bya ba de la nyan thos bye brag tu smra ba dag na re/ gtan tshigs kyi don ma grub pa dang / dpe sgrub pa'i chos dang mi ldan pa yin no zhes zer ba ston to/ /de la chos mngon pa pa dag ces bya ba ni sde pa dag las grub pa'i mtha' chos mngon pa zhes bya ba yod pa de dag ni chos mngon pa pa dag ste/ de dag kyang nyan thos bye brag tu smra ba dag yin no/ /na re zhes bya ba ni nyan thos bye brag tu smra ba de dag na re/ dbu ma pa'i gtan tshigs gzhan nyid ces bya ba dang / dpe bum pa dang rgyu spun la sogs pa bzhin no zhes bya ba de la gtan tshigs kyi don ma grub pa dang / dpe sgrub pa'i chos dang mi ldan pa yin no zhes zer bar sbyar ro/ /gzhan nyid ces bya ba ni sngar dbu ma pas don dam par nang gi skye mched rnams de dag gi rkyen gzhan dag las skye ba med de/ gzhan yin pa'i phyir/ dper na bum pa bzhin no zhes bya ba dang / don dam par gzhan brjod par 'dod pa mig la sogs pa nang gi skye mched 'grub par byed pa dag rkyen ma yin par nges te gzhan yin pa'i phyir/ dper na rgyu spun la sogs pa bzhin no zhes sbyor ba'i tshig rnam pa gnyis byas pas skye mched rnams rkyen gzhan dag las skye ba med pa dang / rkyen gzhan dag skye mched rnams kyi rkyen ma yin pa'i gtan tshigs su gzhan nyid ces bya ba bstan pa gang yin pa de'o/ /nyan thos bye brag tu smra ba de dag rkyen rnams la 'bras bu'i nus pa 'di ltar tshol bar byed de/ de dag /gcig ni 'phen pa'i las yin te/ /gnyis pa yongs su rdzogs par byed/ /ces zer ro zhes grags pas de'i phyir 'phel ba'i las kyis ni mer mer po'i gnas skabs su mig la sogs pa'i nus pa 'phel bar byed do/ /yongs su rdzogs par byed pa'i las kyis ni mig la sogs pa yongs su rdzogs par byed cing dbang po ma tshang bar mi 'gyur bar byed do/ /de ltar na skye mched rnams kyi nus pa mer mer po la gnas pa de dag la ltos na mer mer po la sogs pa gzhan nyid yin la/ mer mer po la sogs pa la ltos na yang skye mched rnams kyi nus pa gzhan nyid yin pas/ de'i phyir de ni 'bras bu'i nus pas mi stong pa'i gzhan nyid ces bya'o/ /de lta bu ma yin pa skye mched rnams kyi nus pas stong pa dper na bum pa dang rgyu spun la sogs pa la skye mched rnams kyi nus pa med pa lta bu ni skye mched rnams la ltos na bum pa dang rgyu spun la sogs pa gzhan nyid yin la/ bum pa dang rgyu spun la sogs pa la ltos na yang skye mched rnams gzhan nyid yin pas de'i phyir de ni 'bras bu'i nus pas stong pa'i gzhan nyid ces bya'o zhes zer bas de'i phyir 'dir nyan thos bye brag tu smra ba dag na re/ dbu ma pa'i gtan tshigs gzhan nyid ces bya ba de 'bras bu'i nus pas stong pa'i gzhan nyid la bya'am/ 'on te des mi stong pa'i gzhan nyid la bya zhes gal gnyis rnam par 'jog par byed do zhes bya bar sbyar ro/ /gal te 'bras bu'i nus pas stong pa nyid la bya na ni zhes bya ba ni/ dbu ma pa'i gtan tshigs gzhan nyid ces bya ba de gal te 'bras bu mig la sogs pa'i skye mched rnams kyi nus pas stong pa'i gzhan nyid ces bya ba dper na gzhan bum pa dang rgyu spun la sogs pa lta bu dbu ma pa khyod kyi gtan tshigs nyid du brjod na ni zhes gal 'dzin pa yin no/ /'bras bu'i nus pas stong pa'i gzhan nyid ces bya ba dper na gzhan bum pa dang rgyu spun la sogs pa lta bu gtan tshigs nyid du brjod na ci nyes she na/ de'i phyir gtan tshigs kyi don ma grub pa nyid do zhes bya ba smras te/ skye mched rnams rkyen 'bras bu'i nus pas stong pa gzhan dag las skye ba med pa dang / rkyen rnams kyang 'bras bu'i nus pas stong pa gzhan dag rkyen ma yin par sgrub pa'i phyogs de nyid la gtan tshigs kyang 'bras bu'i nus pas stong pa gzhan yin pa'i phyir zhes gtan tshigs khyad par can gzhan brjod na ni gtan tshigs kyi don 'grub pa zhig na/ phyogs de gnyis la gtan tshigs gzhan yin pa'i phyir zhes gzhan spyir brjod pas/ 'di ltar des na skye mched rnams rkyen 'bras bu'i nus pas stong pa gzhan dag las skye ba med kyang 'bras bu'i nus pas mi stong pa gzhan dag las skye bar 'gyur ba dang / rkyen rnams kyang 'bras bu'i nus pas stong pa gzhan dag rkyen ma yin yang 'bras bu'i nus pas mi stong pa gzhan dag rkyen yin par 'gyur bas skye ba med pa dang / rkyen ma yin par sgrub pa'i gtan tshigs kyi don 'khrul pa yod pas ma grub pa nyid de/ dper na sgra rtag ste mig gis gzung ba yin pa'i phyir gzugs bzhin no zhes zer ba bzhin no/ /gal te des mi stong pa nyid la bya na ni zhes bya ba ni dbu ma pa'i gtan tshigs gzhan nyid ces bya ba ste/ gal te 'bras bu mig la sogs pa ste skye mched rnams kyi nus pa des mi stong pa'i gzhan nyid ces bya ba mer mer po la sogs pa lta bu dbu ma pa khyod kyi gtan tshigs su brjod na ni zhes gal 'dzin pa yin no/ /'bras bu'i nus pas mi stong pa'i gzhan nyid ces bya ba mer mer po la sogs pa lta bu gtan tshigs nyid du brjod na ni ci nyes she na/ de'i phyir dpe sgrub pa'i chos dang mi ldan par 'gyur ro zhes bya ba smras te/ skye mched rnams rkyen 'bras bu'i nus pas mi stong pa gzhan dag las skye ba med pa dang / rkyen rnams kyang 'bras bu'i nus pas mi stong pas gzhan dag rkyen ma yin par sgrub pa'i phyogs de gnyis la/ dper yang 'bras bu'i nus pas mi stong pa sgrub pa'i chos gzhan nyid dang ldan pa las blangs na ni dpe sgrub pa'i chos dang ldan par 'gyur ba zhig na phyogs de gnyis la dpe bum pa dang rgyu spun la sogs pa bzhin no zhes 'bras bu mig la s ogs pa'i skye mched rnams kyi nus pas stong pa'i bum pa dang rgyu spun la sogs pa las blangs pa 'di ltar des na 'bras bu skye mched nus pas mi stong pa gzhan nyid rkyen mer mer po la sogs pa gzhan las skye ba med pa'i dpe bum pa 'bras bu'i nus pas stong pa gzhan nyid ces bya ba de yang sgrub pa'i chos 'bras bu'i skye mched nus pas mi stong pa de dang mi ldan pa dang / rkyen mer mer po la sogs pa 'bras bu'i nus pas mi stong pa gzhan nyid rkyen ma yin pa'i dpe rgyu spun la sogs pa 'bras bu'i nus pas stong pa gzhan nyid ces bya ba de yang sgrub pa'i chos mer mer po la sogs pa 'bras bu'i nus pas mi stong pa gzhan nyid ces bya ba de dang mi ldan par 'gyur bas/ dpe dang gtan tshigs mi mthun pas dpe sgrub pa'i chos dang mi ldan par 'gyur te/ dper na sgra rtag ste lus med pa'i phyir dper na rdul phra rab bzhin no zhes zer ba bzhin no zhes bya ba ni/ nyan thos bye brag tu smra ba dag de skad ces zer ba yin no/ /de skad ces zer ba'i lan du/ 'dir 'grel pa byed pas gzhi gzhan la ltos pa gzhan nyid kyi blo skyed pa spyi'i chos spyir brjod pa'i phyir/ ltag chod de ni ma grub pa ltar snang ba dang / sgrub pa dang mi ldan pa ltar snang ba yin no zhes bya ba smras te/ 'dis ni dbu ma pas gtan tshigs gzhan nyid ces bya ba de 'bras bu'i nus pas stong pa'i gzhan nyid dam des mi stong pa'i gzhan nyid la bya'o zhes bye brag tu ma phye bar spyir brjod pa'i phyir bye brag tu smra ba'i ltag chod gtan tshigs kyi don ma grub pa nyid do zhes zer ba de yang gsal ba dang de kho na ma yin te/ ma grub pa ltar snang ba yin la/ dpe sgrub pa'i chos dang mi ldan par 'gyur ro zhes zer ba de yang gsal ba dang de kho na ma yin te/ sgrub pa dang mi ldan pa ltar snang ba yin no zhes ston to/ /de la gzhi gzhan la ltos pa gzhan nyid kyi blo skyed pa spyi'i chos spyir brjod pa'i phyir zhes bya bas ni 'di skad bstan te/ kho bo'i gtan tshigs gzhan nyid ces bya ba de ni 'bras bu'i nus pas stong pa'i gzhan nyid dam des mi stong pa'i gzhan nyid la bya'o zhes bye brag tu ma phye bar gzhan nyid ces bya ba spyir brjod pa'i phyir nyes pa de gnyi ga med do zhes ston to/ /de la gzhi zhes bya ba ni 'di la byas pa nyid dang skye ba dang ldan pa nyid ces bya ba la sogs pa chos du ma dag la gnas par bzhi ste/ de yang 'di lta ste/ skye mched rnams dang / rkyen rnams dang / bum pa dang / rgyu spun la sogs pa'o/ / gzhi de nyid gzhan la ltos pa yin te/ 'di ltar gzhi las gzhan pa'i gzhi gang yin pa de ni gzhi gzhan yin la/ gzhi gzhan de la ltos pa'i gzhi gang yin pa de ni gzhi gzhan la ltos pa yin pas gzhi gzhan la ltos pa ste/ de yang 'di lta ste/ skye mched rnams dang / rkyen rnams dang / bum pa dang / rgyu spun la sogs pa'o/ /gzhi gzhan la ltos pa de nyid gzhan nyid kyi blo skyed pa yin te/ 'di ltar skye mched rnams kyang rkyen rnams dang bum pa dang rgyu spun la sogs pa las gzhan nyid yin la/ rkyen rnams kyang skye mched rnams dang bum pa dang rgyu spun la sogs pa las gzhan nyid yin/ bum pa yang skye mched rnams dang / rkyen rnams dang / rgyu spun la sogs pa las gzhan nyid yin/ rgyu spun la sogs pa yang skye mched rnams dang / rkyen rnams dang bum pa las gzhan nyid yin pas de gzhan nyid kyang yin la/ de la 'jig rten na gzhan nyid kyi blo skyed par byed pa yang yin pas/ de'i phyir gzhan nyid kyi blo skyed pa ste/ de yang 'di lta ste/ skye mched rnams dang / rkyen rnams dang / bum pa dang / rgyu spun la sogs pa'o/ /gzhi gzhan la ltos pa gzhan nyid kyi blo skyed pa de nyid spyi yin te/ 'di ltar gzhan nyid ces bya ba gang yin pa ste spyi la yod pa'i phyir te/ de yang 'di lta ste/ skye mched rnams dang / rkyen rnams dang / bum pa dang / rgyu spun la sogs pa'o/ /gzhi gzhan la ltos pa gzhan nyid kyi blo skyed pa spyi de'i chos zhes bya ba ni gzhan nyid ces bya ba ste/ skye mched rnams dang / rkyen rnams dang / bum pa dang / rgyu spun la sogs pa spyi'i chos gzhan nyid ces bya ba kho bo'i gtan tshigs su brjod pa gang yin pa'o/ /spyir brjod pa'i phyir zhes bya ba ni kho bo'i gtan tshigs gzhan nyid ces bya ba spyi'i chos de kho bos 'bras bu'i nus pas stong pa'i gzhan nyid do zhe'am/ des mi stong pa'i gzhan nyid do zhes bye brag tu ma phye bar gzhan nyid ces spyir gtan tshigs su brjod pa'i phyir ro/ /de ltar kho bo'i gtan tshigs gzhan nyid ces bya ba de spyir brjod pa de'i phyir/ khyod kyi ltag chod de ni ma grub pa ltar snang ba dang / sgrub pa dang mi ldan pa snang ba yin no zhes mjug bsdu bar bya'o/ /de la ltag chod de ni zhes bya ba ni log thabs su smra ba de ste/ sngar chos mngon pa dag na re/ gzhan nyid ces bya ba gal te 'bras bu'i nus pas stong pa nyid la bya na ni gtan tshigs kyi don ma grub pa nyid do/ /gal te des mi stong pa nyid la bya na ni dpe sgrub pa'i chos dang mi ldan par 'gyur ro zhes zer ba de'o/ /ma grub pa ltar snang ba zhes bya ba ni khyod la kho bo'i gtan tshigs kyi don ma grub pa nyid kyi gsal ba dang de kho na med pas ma grub pa ltar snang ba yin gyi/ ma grub pa nyid ma yin pa ste/ kho bos gtan tshigs gzhan nyid ces bya ba de 'bras bu'i nus pas stong pa'i gzhan nyid la bya'o zhes bye brag tu ma brjod pas kho bo'i gtan tshigs kyi don gzhan nyid ces bya ba de grub pa nyid yin pa'i phyir ro/ / sgrub pa dang mi ldan pa ltar snang ba yin no zhes bya ba ni khyod la kho bo'i dpe sgrub pa'i chos dang mi ldan pa'i gsal ba dang de kho na med pas sgrub pa dang mi ldan pa ltar snang ba yin gyi/ sgrub pa dang mi ldan pa nyid ma yin pa ste/ kho bos gtan tshigs gzhan nyid ces bya ba de 'bras bu'i nus pas mi stong pa'i gzhan nyid la bya'o zhes bye brag tu ma brjod pas/ kho bo'i dpe bum pa dang rgyu spun la sogs pa sgrub pa'i chos gzhan nyid ces bya ba dang ldan pa kho na yin pa'i phyir ro/ /gzhan dag na re/ don dam pa phyi dang nang gi skye mched rnams khas ma blangs pa'i phyir/ chos can ma grub pas gzhi ma grub pa'i phyir/ khyod kyi ma grub pa'i don nyid kyi skyon du 'gyur ro zhes zer ro zhes bya ba 'dis ni/ mu stegs rigs pa can dag na re/ dbu ma pas don dam par phyi dang nang gi skye mched rnams khas ma blangs pa'i phyir/ dpe dang dngos kyi chos can ma grub pas gtan tshigs kyi gzhi ma grub pa'i phyir/ dbu ma pa'i gtan tshigs gzhan nyid ces bya ba ma grub pa'i don nyid kyi skyon du 'gyur ro zhes zer ba ston to/ /de la gzhan dag ces bya ba ni mu stegs rigs pa can dag go/ /na re zhes bya ba ni mu stegs rigs pa can dag na re/ 'di skad ces zer ro zhes bya bar sbyar ro/ /don dam par phyi dang nang gi skye mched rnams khas ma blangs pa'i phyir zhes bya ba ni dbu ma pas don dam par phyi rol gyi skye mched rnams dang nang gi skye mched rnams khas ma blangs shing yongs su ma bzung ba'i phyir ro/ /de ltar don dam par phyi dang nang gi skye mched rnams khas ma blangs pa de'i phyir/ dbu ma pa khyod kyi chos can ma grub bo zhes bya bar sbyar ro/ /de la chos can ma grub ces bya ba ni don dam par phyi rol gyi skye mched rnams khas ma blangs pa'i phyir/ dpe'i chos can bum pa dang rgyu spun la sogs pa ma grub la/ nang gi skye mched rnams khas ma blangs pa'i phyir/ dngos kyi chos can mig la sogs pa dang / de dag gi rkyen rnams ma grub bo/ /de ltar chos can ma grub pas dbu ma pa khyod kyi gtan tshigs kyi gzhi ma grub bo zhes bya bar sbyar ro/ /de la gzhi ma grub ces bya ba ni gtan tshigs gzhan nyid ces bya ba'i gzhi dpe dang dngos kyi chos can ma grub pa'o/ /de ltar gzhi ma grub pa'i phyir dbu ma pa khyod kyi gtan tshigs gzhan nyid ces bya ba de ma grub pa'i don nyid kyi skyon du 'gyur ro zhes bya bar sbyar ro/ /'di skad bstan te/ dbu ma pas don dam par phyi rol gyi skye mched rnams khas ma blangs pa'i phyir/ dpe'i chos can bum pa dang rgyu spun la sogs pa ma grub la/ nang gi skye mched rnams khas ma blangs pa'i phyir dngos kyi chos can mig la sogs pa dang de dag gi rkyen khyad par can gyi phyogs ma grub bo/ / dpe dang dngos kyi chos can ma grub pas gtan tshigs kyi gzhi ma grub pa'i phyir/ dbu ma pa khyod kyi gtan tshigs gzhan nyid ces bya ba ma grub pa'i don nyid kyi skyon du 'gyur ro zhes zer ro/ /de skad ces zer ba de'i lan du 'dir 'grel pa byed pas/ tha snyad du de'i gzhi bum pa dang / mig la sogs pa skye mched rnams dang / gzhan nyid khas blangs pa'i phyir ji skad smos pa'i skyon mi 'thad pas de ni rigs pa ma yin no zhes bya ba smras te/ 'dis ni dbu ma pas kun rdzob tu dpe dang phyogs dang / gtan tshigs kyi bum pa dang / mig la sogs pa skye mched rnams dang / gzhan nyid ces bya ba dag khas blangs pa'i phyir/ dpe dang khyad par can gyi phyogs grub pas gtan tshigs kyi gzhi grub pa'i phyir/ gtan tshigs ma grub pa'i skyon ji skad smras pa de mi 'thad pas/ rigs pa can dag gi tshig de ni rigs pa ma yin no zhes ston to/ /de la tha snyad du zhes bya ba ni kun rdzob tu'o/ /de'i zhes bya ba ni dpe brjod pa dang phyogs nye bar gzhag pa dang / gtan tshigs nye bar sbyar ba'o/ /gzhi zhes bya ba ni gzhi dang rten dang gnas zhes bya ba'i rnam grangs so/ /de'i gzhi gang zhe na/ de'i phyir bum pa dang mig la sogs pa skye mched rnams dang / gzhan nyid ces bya ba smras te/ bum pa zhes bya ba ni dpe brjod pa'i gzhi yin la/ mig la sogs pa'i skye mched rnams zhes bya ba ni phyogs nye bar gzhag pa'i gzhi yin/ gzhan nyid ces bya ba ni gtan tshigs nye bar sbyar ba'i gzhi yin no/ /khas blangs pa'i phyir zhes bya ba ni tha snyad du dpe brjod pa'i gzhi bum pa dang phyogs nye bar gzhag pa'i gzhi mig la sogs pa'i skye mched rnams dang / gtan tshigs nye bar sbyar ba'i gzhi gzhan nyid ces bya ba dag khas blangs pa'i phyir ro/ /de ltar tha snyad du de'i gzhi bum pa dang / mig la sogs pa'i skye mched rnams dang / gzhan nyid khas blangs pa de'i phyir/ rigs pa can khyed kyis ji skad smras pa'i skyon mi 'thad pas de ni rigs pa ma yin no zhes mjug bsdu bar bya'o/ /'di skad bstan te/ kun rdzob tu kho bo la bum pa la sogs pa yod pas dpe med pa ma yin la/ mig la sogs pa'i skye mched rnams yod pas khyad par can gyi phyogs ma grub pa ma yin pas/ gzhi grub pa'i phyir gtan tshigs grub pa nyid yin pas de'i phyir gtan tshigs ma grub pa'i skyon ji skad smras pa de mi 'thad pas/ rigs pa can dag gi tshig de ni rigs pa ma yin no/ /bstan bcos 'di ni thams cad du dpe la sogs pa med par skyon 'dogs pa dag la thams cad du 'grel pa byed pa rang nyid kyis lan gdab pa'i tshul 'di nyid yin par rig par bya'o/ /'di la gzhan ni dngos po rnams gzhan las kyang skye ba med de/ ci'i phyir zhe na/ thams cad l as thams cad skye bar thal bar 'gyur ba'i phyir ro zhes rnam par bshad pa byed do zhes bya bas ni dngos po rnams gzhan las skye ba med par sgrub pa'i skabs 'di la 'grel pa byed pa slob dpon bud+d+ha pA li ta ni 'di skad ces rnam par bshad pa byed do zhes bstan pa yin no/ /de la 'di la zhes bya ba ni dngos po rnams gzhan las skye ba med par sgrub pa'i phyogs 'di la'o/ /gzhan ni zhes bya ba'i sgra ni bstan bcos 'di'i 'grel pa byed pa mang ste/ 'di lta ste/ slob dpon gyi zhal snga nas dang / gnas brtan bud+d+ha pA li ta dang / tsan+d+ra kIrti dang / de ba sharma dang / gu Na shrI dang / gu Na ma ti dang / s+thi ra ma ti dang / slob dpon legs ldan byed nyid la thug pa'i bar dag yod pa las/ de dag phal las gzhan pa ste/ gnas brtan bud+d+ha pA li ta dang sbyar ro/ /gnas brtan bud+d+ha pA li ta ni dngos po rnams gzhan las kyang skye ba med de/ ci'i phyir zhe na/ thams cad las thams cad skye bar thal bar 'gyur ba'i phyir ro zhes rnam par bshad par byed do/ /de la dngos po rnams zhes bya ba ni phyi dang nang gi skye mched rnams so/ /gzhan las kyang skye ba med de zhes bya ba ni dngos po rnams bdag las skye ba med pa 'ba' zhig tu ma zad de/ 'di ltar gzhan las kyang skye ba med do/ /ci'i phyir zhe na/ gal te gzhan las skye bar gyur na/ thams cad las thams cad skye bar thal bar 'gyur ba'i phyir ro zhes bya ba smras te/ thams cad las skye bar thal bar 'gyur ba'i phyir ro zhes bya ba ni rkyen thams cad las te/ ji ltar mer mer po la sogs pa las mig la sogs pa skye bar 'gyur ba de bzhin du 'bru la sogs pa dang / rgyu spun la sogs pa dang / rtsi rkyang la sogs pa las kyang mig la sogs pa skye bar thal bar 'gyur ba'i phyir ro/ /'di ltar 'bru la sogs pa de dag kyang mig la sogs pa las gzhan yin pa'i phyir ro/ /thams cad skye bar thal bar 'gyur ba'i phyir ro zhes bya ba ni 'bras bu thams cad de/ ji ltar mer mer po la sogs pa las mig la sogs pa skye bar 'gyur ba de bzhin du/ mer mer po la sogs pa las myu gu la sogs pa dang / snam bu la sogs pa dang sab ma la sogs pa skye bar thal bar 'gyur ba'i phyir te/ 'di ltar myu gu la sogs pa de dag kyang mer mer po la sogs pa las gzhan yin pa'i phyir ro/ /de lta bas na dngos po rnams gzhan las skye ba med do zhes gnas brtan bud+d+ha pA li ta ni de skad du rnam par bshad par byed do/ /des na de la glags yod pa'i tshig yin pa'i phyir bsgrub par bya ba dang / sgrub pa bzlog par byas nas dngos po rnams bdag gam gnyi ga'am rgyu med pa las skye bar 'gyur ba dang / 'ga' zhig las 'ga' zhig skye bar 'gyur ba'i phyir phyogs snga ma dang 'gal bar 'gyur ro/ /gzhan du na yang thams cad las thams cad skye bar thal bar 'gyur ba'i phyir ro zhes bya ba de la sgrub pa dang sun dbyung ba nyid med pa'i phyir/ de ni don 'brel pa med pa yin te/ dper na/ gla sgang sle tres skyu ru ra dag rims la phan/ /smad 'tshong rnams la snying du sdug pa 'ga' yang med/ /smyig ma'i smyig mde'u dag ni lci zhing kha bag yod/ /zla ba'i 'od zer dag ni tsha ba'i dus na bsil/ /zhes bya ba lta bur 'gyur ro zhes bya ba ni/ 'grel pa byed pa nyid kyis gnas brtan bud+d+ha pA li tas rnam par bshad pa de rigs pa ma yin par sgrub pa'i tshig yin no/ /de la des na zhes bya ba ni gnas brtan bud+d+ha pA li tas de skad ces rnam par bshad pa des na'o/ /de la zhes bya ba ni gnas brtan bud+d+ha pA li ta'i rnam par bshad pa de la ste de la 'grel pa byed pa 'dis skyon 'di mthong ngo / /glags yod pa'i tshig yin pa'i phyir zhes bya ba ni/ gnas brtan bud+d+ha pA li tas rnam par bshad pa de ni rgol ba gzhan gyi glan ka'i glags yod pa'i phyir rigs pa ma yin no zhes bya ba'i tha tshig go/ /ji ltar glags yod pa'i tshig yin pa de nyid bstan pa'i phyir/ bsgrub par bya ba dang sgrub pa bzlog par byas na zhes bya ba smras te/ bsgrub par bya ba zhes bya ba ni dngos po rnams gzhan las kyang skye ba med de zhes bya ba'o/ /sgrub pa zhes bya ba ni dngos po rnams gzhan las skye ba med de zhes bya ba ni sgrub pa'i chos te/ thams cad las thams cad skye bar thal bar 'gyur ba'i phyir ro zhes bya'o/ /de gnyis bzlog par byas na zhes bya ba ni bsgrub par bya ba dngos po rnams gzhan las kyang skye ba med de zhes bya ba bzlog pa byas na/ dngos po rnams bdag gam gnyi ga'am rgyu med pa las skye bar 'gyur ba dang / sgrub pa thams cad las thams cad skye bar thal bar 'gyur ro zhes bya ba bzlog par byas na 'ga' zhig las 'ga' zhig skye bar 'gyur te/ de'i phyir gnas brtan bud+d+ha pA li ta'i rnam par bshad pa de glags yod pa'i tshig yin pa'i phyir rigs pa ma yin no/ /gal te de ltar dngos po rnams bdag gam gnyi ga'am rgyu med pa las skye bar 'gyur ba dang / 'ga' zhig las 'ga' zhig skye bar 'gyur na nyes pa ci yod ce na/ de'i phyir phyogs snga ma dang 'gal bar 'gyur ro zhes bya ba smras te/ 'di ltar slob dpon gyis phyogs snga ma las/ dngos po gang dag gang na yang / /skyes pa nam yang yod ma yin/ /zhes gsungs pas/ dngos po rnams bdag gam gnyis sam rgyu med pa las skye bar 'gyur ba dang / 'ga' zhig las 'ga' zhig skye bar zhal gyis ma bzhes la/ gnas brtan bud+d+ha pA li ta'i rnam par bshad pa 'dis dngos po rnams bdag gam gnyis sam rgyu med pa las skye bar 'gyur ba dang / 'ga' zhig las 'ga' zhig skye bar 'gyur bar rnam par bshad pas/ slob dpon gyis phyogs snga ma de dang 'gal bar 'gyur ro/ /gal te gnas brtan bud+d+ha pA li ta phyogs snga ma dang 'gal bar 'gyur ba'i nyes pa de spang ba'i phyir/ 'di skad ces kho bo'i bsgrub par bya ba dang / sgrub pa mi bzlog par so na bzhag na nyes pa ci yod ces zer na de'i phyir gzhan du na yang thams cad las thams cad skye bar thal bar 'gyur ba'i phyir ro zhes bya ba de la sgrub pa dang sun dbyung ba nyid med pa'i phyir/ de ni don 'brel pa med pa yin te zhes bya ba smras so/ /de la gzhan du na yang zhes bya ba ni gnas brtan bud+d+ha pA li ta'i rnam par bshad pa de bsgrub par bya ba dang / sgrub pa ma bzlog par sgra ji bzhin du so na bzhag na yang ngo / /'o na thams cad las thams cad skye bar thal bar 'gyur ba'i phyir ro zhes bya ba de la nyes pa ci yod ce na/ de'i phyir de la sgrub pa dang sun dbyung ba nyid med pa'i phyir zhes bya ba smras te/ gang gi phyir 'dir bsgrub par bya ba ni dngos po rnams gzhan las kyang skye ba med de zhes bya ba de yin na/ gnas brtan bud+d+ha pA li tas thams cad las thams cad skye bar thal bar 'gyur ba'i phyir ro zhes rnam par bshad pa des na/ thams cad las thams cad skye bar smras pa de phyogs kyi chos ma yin pa'i phyir/ de la rang gi sgrub pa nyid kyang med pa yin la/ gnas brtan bud+d+ha pA li ta'i rnam par bshad pa de mngon sum la sogs pa dang 'gal ba phyogs kyi skyon rnams las 'ga' yang ma brjod pas/ de la gzhan sun dbyung ba nyid kyang med pa yin pa'i phyir nyes pa yod do/ /sgrub pa dang sun dbyung ba nyid med pa'i nyes pa bstan pa'i phyir/ de ni don 'brel pa med pa yin te zhes bya ba smras te/ 'di ltar sngar dngos po rnams gzhan las skye ba med do zhes smras la/ de'i 'og tu thams cad las thams cad skye bar thal bar 'gyur ba'i phyir ro zhes smras pas/ de ltar gyur na rang gis sngar skye ba med par smras pa dang / de'i 'og tu thams cad las thams cad skye bar smras pa gnyis don 'brel pa med pa nyid yin pas rnam par bshad pa de ni mi rung ngo / /don 'brel pa med pas rnam par bshad pa de mi rung ba'i dpe bstan pa'i phyir/ dper na gla sgang sle tres skyu ru ra dag rims la phan/ / smad 'tshong rnams la snying du sdug pa 'ga' yang med/ /smyig ma'i smyig mde'u dag ni lci zhing kha bag yod/ /zla ba'i 'od zer dag ni tsha ba'i dus na bsil/ /zhes bya ba lta bur 'gyur ro zhes bya ba smras te/ dper na sman dpyad dang / 'dod pa bsten pa dang / g.yos mkhas dang / dus tshigs kyi gnas skabs bstan pa'i tshigs su bcad pa 'di la/ rtsa ba bzhi po dag ltag 'og gi don 'brel pa med pa de bzhin du/ gnas brtan bud+d+ha pA li ta'i rnam par bshad pa de bsgrub par bya ba dang / sgrub pa dag ma bzlog par so na bzhag tu zin na yang sngar dngos po rnams gzhan las kyang skye ba med de zhes smras la/ de'i 'og tu thams cad las thams cad skye bar thal bar 'gyur ro zhes bya ba de la sgrub pa dang sun dbyung ba nyid med pa'i phyir/ de ni don 'brel pa med pas rnam par bshad pa de mi rung ngo / / des na de ltar dngos po rnams gzhan las skye ba med do zhes bya ba ni dngos po rnams gzhan las skye ba med par bstan pa'i mjug bsdu ba yin no/ /de la des na zhes bya ba ni rjes su dpag pa'i mtshan nyid ji skad bstan pa des na'o/ /de ltar dngos po rnams gzhan las skye ba med do zhes bya ba ni don dam par phyi dang nang gi dngos po rnams gzhan las skye ba med par grub bo zhes bstan pa yin no/ /dam bcas pa'i spyi bkod pa gnyis pa bshad zin to/ /da ni dam bcas pa'i spyi bkod pas gsum pa bsgrub par bya ste/ de'i phyir grangs can dag ni byed rgyu rnam par phye ba dang / rnam par ma phye bas la sogs pa dang / sa bon gyi mtshan nyid dag las 'bras bu myu gu zhes bya ba skye'o zhes smra zhing / gnyis las skye bar sems pas de'i phyir de dag la gnyis las ma yin zhes bya ba 'di bka' stsal to/ /bdag dang gzhan gnyis las ma yin zhes bya ba'i tha tshig go zhes bya ba la sogs pa smras so/ /'dis ni mu stegs grangs can dag dngos po rnams bdag dang gzhan gnyis las skye bar sems pa dgag pa'i phyir/ gnyis las ma yin zhes bya ba 'di bstan to zhes bya bar sbyar ro/ /'di skad bstan te/ kho bos sngar dam bcas pa'i spyi rnam pa bzhi bkod pa las dam bcas pa'i spyi dang dngos po rnams bdag las skye ba med pa zhes bya ba dang / dam bcas pa'i spyi gnyis pa dngos po rnams gzhan las skye ba med pa zhes bya ba ni bsgrubs zin to/ /de'i 'og tu da ni dam bcas pa spyi'i bkod pa gsum pa dngos po rnams gnyis las skye ba med pa zhes bya ba de bsgrub par bya'o/ /de la grangs can dag ni zhes bya ba ni mu stegs grangs can dag kho na'o/ /byed rgyu zhes bya ba ni 'bras bu myu gu zhes bya ba'i rgyu dang rkyen te/ rnam par phye ba dang rnam par ma phye ba'o/ /rnam par phye ba zhes bya ba ni cha tha dad par rnam par gnas pa ste/ sa la sogs pa'i rkyen to/ /rnam par ma phye ba zhes bya ba ni cha tha dad par rnam par gnas pa ma yin pa ste/ sa bon rgyu'o/ /byed rgyu rnam par phye ba nyid bstan pa'i phyir/ sa la sogs pa zhes bya ba smras te/ sa dang chu dang me dang rlung zhes bya ba dag go/ /byed rgyu rnam par ma phye ba nyid bstan pa'i phyir sa bon zhes bya ba smras te/ nas la sogs pa 'bru rnams so/ /mtshan nyid ces bya ba ni sa la sogs pa dang sa bon gyi mtshan nyid do/ /de dag las zhes bya ba ni byed rgyu rnam par phye ba dang / rnam par ma phye ba sa la sogs pa dang / sa bon gyi mtshan nyid de dag las so/ /'bras bu myu gu zhes bya ba skye'o zhes smra zhing zhes bya ba ni 'bras bu gang la myu gu zhes bya ba'i ming yod pa de ni 'bras bu myu gu zhes bya ba'o/ /skye'o zhes smra zhing zhes bya ba ni mu stegs grangs can dag byed rgyu rnam par phye ba dang / rnam par ma phye ba sa la sogs pa dang / sa bon gyi mtshan nyid dag las 'bras bu myu gu zhes bya ba skye'o zhes smra zhing ngo / /gnyis las skye bar sems pas zhes bya ba ni dngos po rnams bdag dang gzhan gnyis las skye bar sems pa ste/ gang gi phyir byed r gyu rnam par ma phye ba sa bon gyi mtshan nyid las 'bras bu myu gu zhes bya ba'i mtshan nyid tha mi dad pa de'i phyir dngos po rnams bdag las skye ba dang gang gi phyir byed rgyu rnam par phye ba sa la sogs pa'i mtshan nyid dag 'bras bu myu gu zhes bya ba'i mtshan nyid las tha dad pa de'i phyir dngos po rnams gzhan las skye ba dang / de bzhin du gang gi phyir byed rgyu rnam par ma phye ba 'jim pa dang / rgyu spun dang / rtsi rkyang la sogs pa'i mtshan nyid dag las 'bras bu bum pa dang snam bu dang sab ma la sogs pa'i mtshan nyid tha mi dad pa de'i phyir/ dngos po rnams bdag las skye ba dang / gang gi phyir byed rgyu'i rnam par phye ba myu gu dang / 'khor lo la sogs pa dang / tshig pa dang / thag zangs la sogs pa dang / lag cha dang / sab ma mkhan la sogs pa'i mtshan nyid dag 'bras bu bum pa dang / snam bu dang / sab ma la sogs pa'i mtshan nyid las tha dad pa de'i phyir dngos po rnams gzhan las skye ba dang / de bzhin du gang gi phyir byed rgyu rnam par ma phye ba mer mer po la sogs pa'i mtshan nyid las 'bras bu mig la sogs pa'i mtshan nyid tha mi dad pa de'i phyir/ dngos po rnams bdag las skye ba dang / gang gi phyir byed rgyu rnam par phye ba las dang nyon mongs pa la sogs pa'i mtshan nyid dag 'bras bu mig la sogs pa'i mtshan nyid las tha dad pa de'i phyir dngos po rnams gzhan las skye bar sems pa'i phyir ro/ /de'i phyir de dag la zhes bya ba ni de ltar grangs can dag gnyis las skye bar sems pa de'i phyir/ slob dpon klu sgrub kyi zhal snga nas kyis de dgag pa'i phyir de dag la/ gnyis las ma yin zhes bya ba 'di bka' stsal te zhes bya bar sbyar ro/ /gnyis las ma yin zhes bya ba de ji lta bu zhe na/ de'i phyir bdag dang gzhan gnyis las ma yin zhes bya ba'i tha tshig go zhes bya ba smras so/ /dgag pa'i don ni snga ma bzhin no zhes bya ba ni/ 'dir gnyis las ma yin zhes bya ba'i don ni sngar bdag las ma yin zhes bya ba'i dgag pa 'di ni med par dgag pa'i don du blta bar bya ste/ ci'i phyir zhe na/ de'i phyir dgag pa gtso che ba'i phyir dang zhes smras pas/ med par dgag pa dang dbu ma pa'i bstan bcos ni dgag pa gtso che ba'i phyir ro zhes bshad pa dang / dgag pa gtso che ba'i 'bras bu gang yin zhe na/ de'i phyir 'di ltar rtog pa ma lus pa'i dra ba dgag pas rnam par mi rtog pa'i ye shes shes bya yul ma lus pa dang ldan pa 'grub par dgongs pa'i phyir ro zhes bya ba smras pas/ dgag pa gtso che bas rtog pa ma lus pa'i dra ba dgag pas 'jig rten las 'das pa'i kun rdzob kyis rnam par gzhag pa rnam par mi rtog pa'i ye shes shes bya yul ma lus pa dang ldan pas 'grub par dgongs pa'i phyir ro zhes bshad pa dang / ma yin par dgag pa yongs su gzung na ni de sgrub pa gtso che ba'i phyir/ chos rnams ma skyes so zhes sgrub pas skye ba med par ston pa'i phyir mdzad pa'i mtha' dang bral bar 'gyur te/ lung las gzugs kyi skye ba med pa la spyod na shes rab kyi pha rol tu phyin pa la spyod pa ma yin no zhes 'byung ba'i phyir ro zhes smras pas/ ma yin par dgag pa yongs su gzung ba'i nyes dmigs bstan pa dang / 'dir dngos po rnams bdag las skye ba med pa kho na'o zhes nges par gzung bar bya'o/ /gzhan du nges par gzung na bdag kho na las skye ba med de/ 'o na ci zhe na/ gzhan las skye'o zhes bya bar nges par 'gyur ba dang / de bzhin du bdag kho na las ni skye ba med de/ 'o na ci zhe na/ bdag dang gzhan las skye'o zhes bya bar nges par 'gyur bas de yang mi bzhed de/ mdzad pa'i mtha' dang bral ba'i phyir ro zhes smras pas/ nges par gzung ba rnam pa gsum las dang po ltar gzung bar bya ba yin gyi/ nges par gzung ba gnyis pa dang gsum pa ltar gzung na gzhan las skye ba dang bdag dang gzhan las skye bar thal bar 'gyur ro zhes bshad pa bzhin du/ 'dir yang gzhan las ma yin zhes bya ba'i dgag pa 'di ni med par dgag pa'i don du blta bar bya ste/ dgag pa gtso che ba'i phyir dang / 'di ltar rtog pa ma lus pa'i dra ba dgag pas rnam par mi rtog pa'i ye shes shes bya yul ma lus pa dang ldan pa bsgrub par dgongs pa'i phyir ro/ / ma yin par dgag pa yongs su gzung na ni/ de sgrub pa gtso che ba'i phyir/ chos rnams ma skyes so zhes sgrub pas skye ba med par ston pa'i phyir/ mdzad pa'i mtha' dang bral bar 'gyur te/ lung las gzugs kyi skye ba med pa la spyod na shes rab kyi pha rol tu phyin pa la spyod pa ma yin no zhes 'byung ba'i phyir ro/ /'dir dngos po rnams gnyis las skye ba med pa kho na'o zhes nges par gzung bar bya'o/ /gzhan du nges par gzung na gnyis kho na las skye ba med de/ 'o na ci zhe na/ gcig las skye'o zhes bya bar nges par 'gyur ba dang / de bzhin du gnyis kho na las ni skye ba med de/ 'o na ci zhe na/ rgyu med pa las skye'o zhes bya ba nges par 'gyur bas de yang mi bzhed de/ mdzad pa'i mtha' dang bral ba'i phyir ro zhes snga ma bzhin du ci rigs par sbyar ro zhes bya ba'i tha tshig go/ /ci zhig ce na zhes bya ba ni gnyis las ci zhig ma yin zhe na zhes 'grel pa byed pa nyid kyis dri ba'i tshig yin no/ /de'i lan du 'grel pa byed pa nyid kyis/ dngos po gang dag gang na yang / /skyes pa rnams kyang yod ma yin/ /zhes bya ba'i skabs yin no zhes bya ba smras te/ gnyis las ci zhig ma yin zhe na/ gnyis las dngos po gang dag gang na yang / /skyes pa nam yang yod ma yin/ /zhes bya ba'i skabs yin no zhes bya bar sbyar ro/ /de la dngos po gang dag ces bya ba ni nang dang phyi rol gyi dang cha phra ba dang rags pa dag go/ /gang na yang zhes bya ba ni bdag cag gi phyogs dang gzhan gyi phyogs na yang ngo / /skyes pa nam yang yod ma yin/ /zhes bya ba ni don dam par nang dang phyi rol dang cha phra ba dang rags pa'i dngos po gang dag bdag cag gi phyogs dang / gzhan gyi phyogs gang na yang skyes pa dus nam yang yod pa ma yin pa'o/ /nam yang zhes bya ba ni 'das pa dang / ma 'ongs pa dang / da ltar byung ba'i dus nam yang ngam/ rang gi sde pa dang / gzhan gyi sde pas brtags pa'i gnas skabs nam yang ngo / /yod pa ma yin zhes bya ba ni gnyis las/ dngos po gang dag gang na yang / /skyes pa nam yang yod ma yin/ /zhes med par dgag pa'i don du blta bar bya ba yin gyi/ mi skye ba yod do zhes ma yin par dgag pa'i don du ni blta bar mi bya'o zhes bya bar sbyar ro zhes bya ba'i skabs yin no zhes bya ba ni sngar dam bcas pa spyi'i bkod pa dang po sgrub pa'i skabs su/ de la re zhig bdag las ma yin zhes bya ba ci zhig ce na/ skyes pa nam yang yod ma yin/ /zhes bya ba la sogs pa ste/ re re dang sbyar bar bya'o zhes ji skad bstan pa'i skabs yin pa ste/ de ni gnyis las/ dngos po gang dag gang na yang / /skyes pa nam yang yod ma yin/ /zhes bya ba yin no zhes bstan to/ /ci'i phyir zhe na zhes bya ba ni ci'i phyir gnyis las/ dngos po gang dag gang na yang / /skyes pa nam yang yod ma yin/ /zhes 'grel pa byed pa nyid kyis dri ba'i tshig yin no/ /de'i lan du 'grel pa byed pa nyid kyis phyogs gnyis kar bstan pa'i sgrub pa dag gis gtad khongs su chud par 'gyur ba'i phyir dang / gnyis las skye bar ston pa'i rjes su dpag pa med pa'i phyir yang ngo zhes bya bar dgongs so zhes bya ba smras te/ slob dpon gyi zhal snga nas kyis de ltar dgongs so zhes bya ba'i tha tshig go/ /de la phyogs gnyi gar bstan pa'i sgrub pa dag gis zhes bya ba ni sngar bdag las skye ba dgag pa'i phyogs dang / gzhan las skye ba dgag pa'i phyogs gnyi gar bstan pa'i sgrub pa dag gis te/ 'di la bdag las skye ba dgag pa'i phyogs su bstan pa'i sgrub pa ni don dam par nang gi skye mched rnams bdag las skye ba med par nges te yod pa'i phyir/ dper na shes pa yod pa nyid bzhin no zhes sngar bstan pa yin no/ /gzhan las skye ba dgag pa'i phyogs su bstan pa'i sgrub pa ni don dam par nang gi skye mched rnams de dag gi rkyen gzhan las skye ba med de/ gzhan yin pa'i phyir dper na bum pa bzhin no/ /yang na don dam par gzhan brjod par 'dod pas mig la sogs pa nang gi skye mched 'grub par byed pa dag rkyen ma yin par nges te gzhan yin pa'i phyir/ dper na rgyu spun la sogs pa bzhin no zhes sngar bstan pa yin no/ /sgrub pa de dag gis gtad khongs su chud par 'gyur ba'i phyir zhes bya ba ni sngar nye bar sbyar ba'i sgrub pas de dag gis phyogs 'dir yang nye bar sbyar te/ gtad khongs su chud par 'gyur ba'i phyir ro/ /gtad khongs su chud par 'gyur ba zhes bya ba'i zla 'byor pa 'am khyab par 'gyur ba ste/ phyogs gnyi gar bstan pa'i sgrub pa de dag nyid phyogs 'dir yang sbyor bar 'gyur ba'i phyir zhes bya ba'i tha tshig go/ /des na 'di skad bstan te/ don dam par grangs can dag gi blos yongs su brtags pas 'bras bu myu gu zhes bya ba byed rgyu rnam par ma phye ba sa bon gyi mtshan nyid las skye ba med par nges te yod pa'i phyir/ dper na shes pa yod pa nyid bzhin no/ /don dam par grangs can dag gi blos yongs su brtags pa 'bras bu myu gu zhes bya ba/ de dag gi byed rgyu rnam par phye ba sa la sogs pa gzhan dag las skye ba med de gzhan yin pa'i phyir/ dper na bum pa bzhin no/ /don dam par grangs can dag gi blos yongs su brtags pa gzhan brjod par 'dod pa byed rgyu rnam par phye ba sa la sogs pa dag rkyen ma yin par nges te/ gzhan yin pa'i phyir/ dper na rgyu spun la sogs pa bzhin no zhes bya ba sbyor ba'i tshig rnams dang / gal te gtan tshigs yod pa nyid ni mi mthun pa'i phyogs las bzlog pa ma bstan pas gtan tshigs nyid ma yin no zhe na/ med pa kho na'i phyir/ de la ldog pa med pas 'di dang thams cad la nyes pa med do zhes bya ba la sogs pa rgal ba'i lam rnams dang / ci ste gzhan yin pa'i phyir zhes bya ba de gtan tshigs su mi rung ste/ dam bcas pa'i don gyi phyogs gcig yin pa'i phyir/ dper na sgra rtag ste sgra yin pa'i phyir ro zhes bya ba bzhin no zhe na/ de ni bzang po ma yin te/ snyan tshig gi sgra mi rtag ste sgra yin pa'i phyir/ dper na rnga bo che'i sgra bzhin no zhes bya bas dam bcas pa'i don gyi phyogs gcig gtan tshigs nyid du grub pa mthong bas gtan tshigs ma nges pa nyid do zhes bya ba la sogs pa brgal ba'i lan rnams kyang 'dir snga ma dag bzhin du sbyar bar khong du chud par bya'o/ /gnyis las skye bar ston pa'i rjes su dpag pa med pa'i phyir yang ngo zhes bya bar dgongs so zhes bya ba ni grangs can dag gi dngos po rnams bdag dang gzhan gnyis las skye bar sems pa gang yin pa de ni tshig tsam du zad de/ 'di ltar grangs can dag gi dam bcas pa de la ni dngos po rnams gnyis las skye bar ston pa'i rjes su dpag pa sgrub pa gtan tshigs dang dpe dag med pa'i phyir/ yang dngos po rnam pa gnyis las skye ba med do/ /yang ngo zhes bya ba'i sgra ni tha dad par rtog pa'i don te/ phyogs gnyi gar bstan pa'i sgrub pa dag gis gtad khongs su chud par 'gyur ba'i phyir gnyis las skye ba med pa 'ba' zhig tu yang ma zad de/ 'di ltar gnyis las skye bar ston pa'i rjes su dpag pa med pa'i phyir yang gnyis las skye ba med do zhes bya bar tha dad par rtog pa yin no zhes bya bar dgongs so zhes bya ba ni slob dpon gyi zhal snga nas kyis de ltar dgongs pa'o/ /dgongs zhes bya ba ni thugs la dgongs pa ste/ slob dpon gyi dgongs pa 'di gnyis las/ dngos po gang dag gang na yang / /skye ba nam yang yod ma yin/ /zhes bka' stsal pa yin no// //bam po bcu gnyis pa/ gcer bur rgyu ba'i phyogs dgag pa'i phyir yang gnyis las ma yin zhes bya ba la sogs pa 'di bka' stsal te zhes bya ba 'dis ni gang gi phyir phyogs kyi gos can dag kyang dngos po rnams bdag dang gzhan gnyis las skye bar smras pas de'i phyir/ de dgag pa'i phyir yang slob dpon gyi zhal snga nas kyis/ gnyis las skye ba dgag pa'i phyogs 'di yang 'khor lo bzhin du bskor te bka' stsal to zhes bya bar ston to/ /de la gcer bur rgyu ba pa zhes bya ba ni mu stegs rgyal ba'i grub pa'i mtha' smra ba mu stegs gcer bur rgyu ba phyogs kyi gos can zhes bya ba dag go/ /de dag gi phyogs zhes bya ba ni dngos po rnams bdag dang gzhan gnyis las skye bar smra ba yin no/ /dgag pa'i phyir yang zhes bya ba ni gcer bur rgyu ba'i phyogs de dgag pa'i phyir yang slob dpon gyi zhal snga nas kyis/ gnyis las ma yin zhes bya ba la sogs pa 'di bka' stsal te zhes bya bar sbyar ro/ /sogs pa zhes bya ba'i sgras ni gnyis las/ dngos po gang dag gang na yang / /skyes pa nam yang yod ma yin/ /zhes bya ba dag bka' stsal bar bsdu'o/ /de dag ji ltar rtog par byed ce na/ de'i phyir 'di ltar de dag ni gser gyi sor gdub ni gser dang me la sogs pa las bdag dang gzhan las skye bar smra ba'i phyir ro zhes bya ba smras so/ /'di ltar zhes bya ba'i sgra ni gang gi phyir zhes bya ba'i don to/ /gang gi phyir gcer bur rgyu ba pa de dag ni gser gyi sor gdub ni gser dang me la sogs pa las skye bar mthong ba na de nyid kyis de dag dngos po rnams bdag dang gzhan las skye bar smra ba'i phyir te/ des na gcer bur rgyu ba pa dag gi blos yongs su brtags pa'i phyogs ni/ dngos po rnams bdag dang gzhan gnyis las skye bar smra ba yin par gnas so/ /de'i phyir gcer bur rgyu ba pa'i phyogs de dgag pa'i phyir/ yang slob dpon gyi zhal snga nas kyis gnyis las/ dngos po gang dag gang na yang / /skyes pa nam yang yod ma yin/ /zhes bya ba'i phyogs 'di bka' stsal to/ /'di skad bstan te/ gang gi phyir gcer bur rgyu ba pa de dag gser gyi sor gdub gser dang me la sogs pa las skye ba na/ gser gyi sor gdub kyi rnam pa de'i rgyu rigs mthun pa gser kho na las skye bar mthong ba de'i phyir/ bdag las skye bar smra la/ gang gi phyir gser gyi sor gdub kyi rnam pa de rkyen rigs mi mthun pa me dang gser mgar dang / mgar spyad dang / bsreg pa dang / brdung ba dang / bkru ba la sogs pa gzhan las skye bar mthong ba de'i phyir/ gzhan las skye bar smra'o/ /de bzhin du gang gi phyir mi'i lus kyi gnas skabs kyi srog thog ma dang tha ma med pa'i bdag nyid kyi rdzas kyi dge ba dang mi dge ba'i las byas pa gang yin pa des/ lha la sogs pa'i lus sam sems can dmyal ba la sogs pa'i lus su skye ba na lha la sogs pa'i lus kyi gnas skabs kyi srog dang / sems can dmyal ba la sogs pa'i lus kyi gnas skabs kyi srog gi rnam pa ste rgyu rigs mthun pa mi'i lus kyi gnas skabs kyi srog kho na las skye bar mthong ba de'i phyir bdag las skye bar smra la/ gang gi phyir lha la sogs pa'i lus kyi gnas skabs kyi srog dang sems can dmyal ba la sogs pa'i lus kyi gnas skabs kyi srog gi rnam pa de rkyen rigs mi mthun pa mi'i lus kyi rnam grangs gzhan las skye bar mthong ba de'i phyir gzhan las skye bar smra'o/ /des na de dag sangs rgyas pa dag gis dngos po rnams bdag las skye ba med par sgrub pa gang smras pa de ni grub pa la sgrub pa'i skyon chags pa yin te/ 'di ltar srog ni rkyen rigs mi mthun pa lus kyi rnam grangs gzhan las skye ba'i phyir ro zhes kyang zer/ sangs rgyas pa dag gis dngos po rnams gzhan las kyang skye ba med par sgrub pa gang smras pa de/ yang grub pa la sgrub pa'i skyon chags pa kho na yin te/ 'di ltar srog ni rgyu rigs mthun pa srog gi rdzas dag las skye ba'i phyir ro zhes kyang zer zhing / de'i phyir de dag rnam pa gnyis su smras te/ 'di ltar bdag las kyang skye la gzhan las kyang skye ba dang / rtag pa yang yin la mi rtag pa yang yin pa dang / de nyid kyang yin la gzhan yang yin pa'i phyir zhes rnam pa gnyis su smra bas/ de dag la dbu ma pas 'di skad ces brjod par bya'o/ /shes ldan dag ji re zhig gtam zhig nyon cig / mi gcig cig gis chom rkun pa gcig dang mi bsad pa gcig bzung ste/ rgyal po la phul ba dang / de nas rgyal pos chom rkun pa de la kAR+ShA pa Na lnga brgya'i chad pas bcad/ mi gsod pa ni kAr+ShA pa Na stong gi chad pas bcad do/ /de nas yang mi gzhan zhig gis chom rkun pa yang yin la/ mi gsod pa yang yin pa'i mi gcig bzung ste/ rgyal po la phul ba dang / de nas rgyal pos mi des nyes pa gnyi ga byas so zhes chad pa nyis 'gyur gyis bcad do zhes grags pa de bzhin du/ kho bos khyod kyang chad pa nyis 'gyur gyis gcad par bya'o/ /de la chad pa nyis 'gyur ni 'di yin te/ don dam par phyogs kyi gos can dag gi blos yongs su brtags pa lha la sogs pa'i lus sam/ sems can dmyal ba la sogs pa'i lus kyi srog gi bdag nyid bdag las skye ba med de yod pa'i phyir/ dper na shes pa yod pa nyid bzhin no/ /don dam par phyogs kyi gos can dag gi blos yongs su brtags pa lha la sogs pa'i lus sam/ sems can dmyal ba la sogs pa'i lus kyi srog gi bdag nyid de'i rkyen mi'i lus la sogs pa lus kyi rnam grangs gzhan dag las skye ba med de gzhan yin pa'i phyir/ dper na bum pa bzhin no/ /don dam par gzhan phyogs kyi gos can dag gis brjod par 'dod pa mi'i lus la sogs pa dag lha la sogs pa'i lus sam/ sems can dmyal ba la sogs pa'i lus kyi srog gi bdag nyid kyi rkyen ma yin par nges te gzhan yin pa'i phyir/ dper na rgyu spun la sogs pa bzhin no/ /gzhan yang khyed kyi brtul zhugs ni thar pa thob par byed pa ma yin te/ 'di ltar khyed na re/ gsod sems med par yang gang na srog chags yod pa der bsod nams ma yin pa dang 'brel par 'gyur ro zhes zer bas/ des na khyim pa dag nyin re bzhin kha zas kyi g.yos byed pa gang yin pa de yang bu dang / chung ma dang / lha dang / mgron dang / dge sbyong la sogs pa dang / gtor ma dang / slong ba la sbyin pa la sogs pa dang / thun mong kho nar g.yos byed pa yin la/ 'dir yang 'bru dang / chu dang / shing dang / lo ma dang / yal ga la sogs pa la sems can gang dag brten pa de dag gsod par byed pas der slong mo len pa dang / za ba bsod nams ma yin pa dang 'brel pas thar pa med cing ngan song du 'gro bar 'gyur ba'i phyir dang / phyogs kyi gos can dag gi phyir 'dug gnas gang dag byed pa dang / mu stegs byed dag gi phyir lha khang gang dag byed pa der shing dang pha gu dang / 'jim pa dang / chu la sogs pa nye bar stobs pa dag tu yang srog chags mtha' yas mu med pa dag 'chi bar 'gyur bas/ gal te longs spyad na bsod nams ma yin pa skye bas phyogs kyi gos can dag dang / mu stegs byed dag la thar pa med cing ngan song du 'gro bar 'gyur ba lta na/ khyed cag gis der yang 'jug par mi bya ba'i phyir ro/ / gzhan yang rdzing bu dang / lteng ka dang / khron pa dang / chu sbyin pa'i khang pa dag tu yang srog chags dag skye zhing 'chi bas de yang btang dgos la/ des na phyogs kyi gos can dag chu dang kha zas mid par byed pa'i chu de dag tu yang srin bu'i rigs brgya stong phrag du ma dag skye zhing 'chi bar 'gyur bas der yang bsod nams ma yin pa dang 'brel pas khyed la thar pa med cing ngan song du 'gro bar 'gyur ba'i phyir ro/ /gzhan yang khyed na re/ sa dang chu dang / me dang rlung dang / shing la sogs pa ni reg pa'i dbang po dang ldan pa'i phyir/ dbang po gcig pa srog dang ldan pa yin no zhes zer bas de'i phyir khyed kyis bza' ba dang / bca' ba dag zos pa na srog chags kyi yan lag zos par 'gyur bas khyed la thar pa med cing ngan song du 'gro bar 'gyur ba'i phyir ro/ /gzhan yang khyod kyis bstan pa'i chos ma yin pa ni ngan song du 'gro ba'i rgyu yin te/ 'di ltar mi 'dod bzhin du srog chags dag shi ba yang bsod nams ma yin par 'gyur bar khyed cag 'dod pa'i phyir/ skam sa dang chu dang nam mkha' la skye ba po phra mo grangs med pa dag brten pas khyed cag 'gro ba dang 'greng ba dang 'dug pa dang nyal ba'i g.yang la yang skye ba po mtha' yas mu med pa dag 'chi bar 'gyur ba des na khyed cag la thar pa med cing ngan song du 'gro bar 'gyur ba'i phyir ro/ /gzhan yang khyed na re/ rtsi shing la sogs pa shes pa yod pa nyid yin te/ ldum bu any+dza li ka ri ka dang / sa mang ga dag 'dzums pa'i phyir/ dper na srog chags man da la ka ri ka la sogs pa bzhin no zhes zer ba de yang gtan tshigs kyi don ma nges pa nyid yin te/ 'di ltar skra dang ko lpags la sogs pa yang shes pa yod pa nyid ma yin bzhin du mes bsregs na 'dzums par snang ba'i phyir ro/ /gzhan yang khyed na re/ rtsi shing la sogs pa shes pa yod pa nyid yin te/ 'dab ma dang yal ga la sogs pa skye ba'i phyir/ dper na mi la sogs pa bzhin no zhes zer ba de yang gtan tshigs kyi don ma nges pa nyid yin te/ 'di ltar byi ru'i myu gu dang / gser dang bai DUr+ya la sogs pa yang shes pa yod pa nyid ma yin bzhin du skye bar snang ba'i phyir ro/ /gzhan yang khyed na re/ rtsi shing la sogs pa shes pa yod pa nyid yin te/ shing ljon pa nyams pa rnams phyir gsor rung ba'i phyir/ dper na srog chags nyams pa bzhin no zhes zer ba de yang gtan tshigs kyi don ma nges pa nyid yin te/ 'di ltar ri mo la sogs pa yang shes pa yod pa nyid ma yin bzhin du nyams pa gsor rung ba snang ba'i phyir ro/ /gzhan yang khyed na re/ rtsi shing la sogs pa shes pa yod pa nyid yin te/ shing ljon pa dang lcug ma la sogs pa 'gro bar 'gyur ba'i phyir ro/ /srog chags kyi yan lag la sogs pa bzhin no zhes zer ba de yang gtan tshigs kyi don ma nges pa nyid yin te/ 'di ltar khab la sogs pa lcags las byas pa dag kyang shes pa yod pa nyid ma yin bzhin du rdo khab len gyis 'dren pa dang / 'dzin pa dang / 'gro bar snang ba'i phyir ro/ /gzhan yang khyed na re/ rtsi shing la sogs pa shes pa yod pa nyid yin te dus su skye ba'i phyir ro/ /dper na sems can bzhin no zhes zer ba de yang gtan tshigs kyi don ma nges pa nyid yin te/ 'di ltar sems can dmyal ba dag na yang mi dge ba'i las byas pa rnams la sdug bsngal myong ba'i dus su nags tshal ral gri'i lo ma can dang / me 'bar ba la sogs pa yang shes pa yod pa nyid ma yin bzhin du skye bar snang ba'i phyir dang / lha dag la yang dge ba'i las byas pa rnams la bde ba'i longs spyod myong ba'i dus su rin po che'i shing ljon pa shin tu yid 'phrog pa lha'i na bza' dang / dbu rgyan dang / gdu bu rgyan can dang / dpung rgyan dang / do shal dang / se mo do 'phyang ba/ me tog sna tshogs rnam par 'byes pa dang ldan pa la sogs pa yang shes pa yod pa nyid ma yin bzhin du skye ba snang ba'i phyir ro/ /gzhan yang khyed kyi dka' thub yongs su gdung ba dang / skra 'bal ba dang / zas chung ngu rtsub mo za ba la sogs pa'i rnam pa dag ni nyon mongs pa zhi bar 'gyur ba'i rgyu ma yin te/ 'di ltar bong bu rtswa dang phub ma za ba rnams dang / las mi dang gdol pa la sogs pa rlung dang lhags pa dang / nyi ma dang / sha sbrang dang / sbrang bu mchu rings dang / sdig sbrul la sogs pa'i reg pas yongs su gdungs pa rnams la yang 'dod chags shas chen po skye bar snang ba'i phyir ro/ /gzhan yang khyed na re/ lha yid du 'ong ba rjes su dran pa dang / bsam gtan la rtse gcig tu dmigs pa bzhin du shi ba rnams bde 'gror 'gro bar 'gyur ro zhes zer ba de yang khyed la mi 'grub ste/ 'di ltar sdug bsngal gyis bab col du sems g.yengs par gyur pa khyed la/ lha yid du 'ong ba rjes su dran pa dang / bsam gtan la rtse gcig tu dmigs bzhin du 'chi 'pho ba med pas gcer bur rgyu ba dus kyi chos kun du sbyong ba'i gnas skabs su shi ba rnams sems can dmyal ba dang / dud 'gro dang / yi dags rnams su skye ba kho nar 'gyur ba'i phyir ro/ /gzhan yang 'ug pa pa dag gis grangs can la sogs pa'i tshig ni bden te/ smras pa'i phyir sangs rgyas kyi bka' bzhin no zhes smras pa gang yin pa de la/ grangs can la sogs pa'i tshig bden pa nyid du sgrub pa khas blangs pa la gnod par 'gyur te/ 'di ltar 'ug pa pa dag grangs can la sogs pa'i tshig mi ldan par 'dod pa'i phyir te/ 'ug pa pa'i gtan tshigs de yang ma nges pa yin te/ 'di ltar khyed na re/ grangs can la sogs pa'i tshig ni brdzun te/ smras pa'i phyir/ sangs rgyas kyi bka' bzhin no zhes kyang zer ba'i phyir ro/ /gzhan yang khyed na re/ sangs rgyas kyi bka' ni mi bden te smras pa'i phyir/ grangs can la sogs pa'i tshig bzhin no zhes zer ba gang yin pa de yang gtan tshigs ma nges pa nyid yin te/ 'di ltar khyed mu stegs byed kyi tshig la yang smras pa nyid yod pa de la yang don ji lta ba bzhin du 'dod pa'i phyir ro/ / gzhan yang khyed na re/ sangs rgyas pa dag gis don dam par de dag gi thar pa'i tshig gi don du gyur pa med pa kho na'o zhes smras pas/ rang nyid kyis rang nyid sun dbyung ba byas pas/ kho bo cag gis sun dbyung bar bya mi dgos so zhes zer ba gang yin pa de ni khyed kyis sangs rgyas pa'i grub pa'i mtha' ma rtogs pa kho na rang dgar smras pa yin te/ 'di ltar sangs rgyas pa'i grub pa'i mtha' las/ mya ngan 'das pa dngos med min/ /de la dngos po ga la yod/ /dngos dang dngos med yongs shes pa/ /skye ba med pa thar zhes bya/ / zhes gsungs pa'i phyir ro/ /gzhan yang khyed kyis 'jig rten gyi spyi gtsug lta bu'i thar pa yod par brjod pa ni mya ngan las 'das pa brtag pa'i skabs su dpyad par bya'o/ /zhar la bshad pas chog gi skabs nyid bsgrub par bya'o/ /de'i phyir de ltar gnyis las ma yin no zhes bya ba ni dam bcas pa spyi'i bkod pa gsum pa'i mjug bsdu ba yin no/ /de la de phyir zhes bya ba ni ji skad bstan pa'i rjes su dpag pa dag gis bsgrubs pa de'i phyir ro/ /de ltar gnyis las ma yin no zhes bya ba ni don dam par dngos po rnams gnyis las skye ba med par sgrub po zhes bstan pa yin no/ /dam bcas pa'i spyi'i bkod pa gsum pa bshad zin to/ /da ni dam bcas pa'i spyi bkod pa bzhi pa bsgrub par bya ste/ de'i phyir de ni rgyu med min/ /zhes bya ba brjod par bya ste/ rgyu med par zhes bya ba'i tha tshig go zhes bya ba la sogs pa smras so/ /'di skad bstan te/ kho bos sngar dam bcas pa'i spyi rnam pa bzhi bkod pa las/ dam bcas pa'i spyi dang po dang gnyis pa dang gsum pa ni bsgrubs zin to/ /de'i 'og tu da ni dam bcas pa'i spyi bkod pa bzhi pa dngos po rnams rgyu med pa las skye ba med pa zhes bya ba de bsgrub par bya'o/ /de la da ni zhes bya ba ni da'am da ltar te/ da ni dam bcas pa'i spyi bkod pa bzhi pa bsgrub par bya'o zhes bya bar sbyar ro/ /de'i phyir rgyu med min zhes bya ba brjod par bya ste zhes bya ba la sogs pa smras so/ /'dir yang rgyu med min zhes bya ba'i dgag pa 'di ni med par dgag pa'i don du blta bar bya ste/ dgag pa gtso che ba'i phyir dang / 'di ltar rtog pa ma lus pa'i dra ba dgag pas rnam par mi rtog pa'i ye shes shes bya yul ma lus pa dang ldan pa 'grub par dgongs pa'i phyir ro/ /ma yin par dgag pa yongs su gzung na ni de sgrub pa gtso che ba'i phyir chos rnams ma skyes so zhes sgrub pas skye ba med par ston pa'i phyir mdzad pa'i mtha' dang bral bar 'gyur te/ lung las gzugs kyi skye ba med pa la spyod na shes rab kyi pha rol tu phyin pa la spyod pa ma yin no zhes 'byung ba'i phyir ro/ /'dir dngos po rnams rgyu med pa las skye ba med pa kho na'o zhes nges par gzung bar bya'o/ /gzhan du nges par gzung na rgyu med pa kho na las skye ba med de/ 'o na ci zhe na/ rgyu las skye'o zhes bya bar nges par 'gyur ba dang / de bzhin du rgyu med pa kho na las ni skye ba med do/ /'o na ci zhe na/ rgyu yod pa dang med pa las skye'o zhes bya bar nges par 'gyur bas de yang mi bzhed de/ mdzad pa'i mtha' dang bral ba'i phyir ro zhes snga ma bzhin du sbyar bar bya'o/ /rgyu med pa ni rnam pa gnyis te/ dngos por gyur pa ma yin pa dang / dngos por gyur pa'o/ /de la dngos por gyur pa ma yin pa ni rgyu'i dngos por gyur pa gtan med par smra ba ste/ 'jig rten rgyang pan pa'i grub pa'i mtha' las dngos po rnams rgyu med pa las skye bar smra ba yin no/ /dngos por gyur pa ni rgyu'i dngos por gyur pa mi mthun pa gzhan yod par smra ba ste/ ngo bo nyid dang dbang phyug la sogs pa rgyur smra ba'i grub pa'i mtha' las mi mthun pa rgyur smra ba yin no/ /de la dang por rgyu med par dngos por gyur pa ma yin pa las skye ba dgag par bya ste/ de'i phyir rgyu med par zhes bya ba'i tha tshig go zhes bya ba smras te/ rgyu med ces bya ba ni rgyu med par zhes bya ba'i tha tshig go zhes bya bar sbyar ro/ /ci zhig ce na zhes bya ba ni rgyu med pa las ci zhig ma yin zhe na zhes 'grel pa byed pa nyid kyis dri ba'i tshig yin no/ /de'i lan du 'grel pa byed pa nyid kyis/ dngos po gang dag gang na yang / /skyes pa nam yang yod ma yin/ /zhes bya ba'i skabs yin no zhes bya ba smras te/ rgyu med pa las ci zhig ma yin zhe na/ rgyu med pa las/ dngos po gang dag gang na yang / /skyes pa nam yang yod ma yin/ /zhes bya ba'i skabs yin no zhes bya bar sbyar ro/ /de la dngos po gang dag ces bya ba ni nang dang phyi rol gyi cha phra ba dang rags pa dag go/ / gang na yang zhes bya ba ni bdag cag gi phyogs dang / gzhan gyi phyogs na yang ngo / /skyes pa nam yang yod ma yin/ /zhes bya ba ni don dam par nang dang phyi rol dang / cha phra ba dang rags pa'i dngos po gang dag bdag cag gi phyogs dang / gzhan gyi phyogs gang na yang skyes pa dus nam yang yod pa ma yin pa'o/ /nam yang zhes bya ba ni 'das pa dang / ma 'ongs pa dang / da ltar byung ba'i dus nam yang ngam rang gi sde pa dang gzhan gyi sde pas brtags pa'i gnas skabs nam yang ngo / /yod ma yin zhes bya ba ni rgyu med pa las/ dngos po gang dag gang na yang / /skyes pa nam yang yod ma yin/ /zhes med pa dgag pa'i don du blta bar bya ba yin gyi/ mi skye ba yod do zhes ma yin par dgag pa'i don du ni blta bar mi bya'o zhes bya bar sbyar ro zhes bya ba'i skabs yin no zhes bya ba ni sngar dam bcas pa'i spyi bkod pa dang po sgrub pa'i skabs su de la re zhig bdag las ma yin zhes bya ba ci zhig ce na/ skyes pa nam yang yod ma yin/ /zhes bya ba la sogs pa ste/ re re dang sbyar bar bya'o zhes ji skad bstan pa'i skabs yin pa ste/ des na rgyu med pa las/ dngos po gang dag gang na yang / /skyes pa nam yang yod ma yin/ /zhes bya ba yin no zhes bstan to/ /'di la drang srong chen po 'jig rten mig ces bya ba des grangs can dag kho na'i gyes pa gcig la brten nas 'jig rten rgyang pan pa'i grub pa'i mtha' 'bum byas pas de 'di skad ces/ sems can skye ba gzhan du las dge ba dang mi dge ba nye bar bsags pa'i rgyu can dag 'dir skye bar 'gyur ba yang med do/ /'das pa'i 'jig rten yang med do/ /de nas 'dir 'ong ba yang 'ga' yang med do/ /'di nas gang du 'gro bar 'gyur ba'i 'jig rten gzhan yang med de/ 'di ltar rgyu las dang nyon mongs pa med par yang bu ram dang / chu dang / skyu ru ra dang / d+ha ta ki dang / phabs dang / 'bras phye dang / shing shun la sogs pa sman bsdus te mnan pa las bu ram chang gi khyad par rnam pa tha dad pa ro dang mthu dang smin pa tha dad pa dag 'byung bar 'gyur ba de dag kyang 'jig rten pha rol nas 'ongs te 'dir skye ba ma yin gyi/ 'di ltar bu ram dang / chu dang / skyu ru ra dang / d+ha ta ki dang / phabs dang / 'bras phye dang / shing shun la sogs pa sman gyi rdzas de dag nyid bsdus te mnan pa'i mthu las bu ram chang de lta bur 'gyur ba yin no/ /de bzhin du nang gi skye mched rnams kyang las dang nyon mongs pa dag med par khu chu dang / khrag la sogs pa tshogs pa las skye'o/ /gzhan yang gal te sha'i phung po ri rab tsam spungs te/ der zhag bdun gyi bar du char bab par 'gyur na/ der sha'i phung po'i tshad kho na tsam gyi srin bu'i phung po skye bar 'gyur na/ ci de snyed kyi sems can de dag 'jig rten pha rol nas 'ongs sam zhes zer te/ de dag la sogs pa dpe ltar snang ba du ma dag gis rgyu med pa las skye bar sems pas de dag la sogs pa lta ba ngan pa spang ba'i phyir/ slob dpon klu sgrub kyi zhal snga nas kyis rgyu med pa las/ dngos po gang dag gang na yang / /skyes pa nam yang yod ma yin/ /zhes bya ba 'di bka' stsal to/ /ci'i phyir zhe na zhes bya ba ni 'grel ba byed pa nyid kyis/ gal te gzhan dag ci'i phyir rgyu med pa las skye ba med snyam du sems pa'i bsam pa la brtags nas dogs pa bsu ba'i tshul du dri ba yin no/ /de'i phyir de ston pa'i rjes su dpag pa med pa'i phyir dang / rjes su dpag pa dang grags pa'i gnod par 'gyur ba'i skyon yod pa'i phyir yang ngo zhes bya bar dgongs so zhes bya ba smras so/ /'di skad bstan te/ khyod kyi rgyu med pa las skye bar sgrub pa'i don de ston pa'i rjes su dpag pa med pa'i phyir/ 'di ltar de ni tshig tsam du zad pas de'i phyir dngos po rnams rgyu med pa las skye ba med do/ /gzhan yang khyod kyi rgyu med pa las skye bar sgrub pa de la rjes su dpag pa'i gnod par 'gyur ba'i skyon yod pa'i phyir dang / grags pa'i gnod par 'gyur ba'i skyon yod pa'i phyir yang dngos po rnams rgyu med pa las skye ba med do/ /yang ngo zhes bya ba'i sgras ni skyon gnyi ga bsdu ba'i don to zhes bya bar dgongs so zhes bya ba ni de ltar khyod kyi rgyu med pa las skye bar sgrub pa'i don de ston pa'i rjes su dpag pa med pa'i phyir dang / khyod kyi phyogs 'di la rjes su dpag pa'i gnod par 'gyur ba'i skyon dang / grags pa'i gnod par 'gyur ba'i skyon yod pa'i phyir/ yang dngos po rnams rgyu med pa las skye ba med do zhes bya bar mdo mdzad pas dgongs so zhes bya ba'i tha tshig go/ /gal te ji ltar rjes su dpag pa'i gnod par 'gyur ba'i skyon yod ce na/ de bstan pa'i phyir/ de la rjes su dpag pa'i gnod pa ni zhes bya ba la sogs pa smras so/ /de la ji ltar rjes su dpag pa'i gnod par 'gyur ba'i skyon yod pa de bstan pa'i phyir/ kun rdzob tu khas blangs pa nang gi skye mched kyi dngos po rnams rgyu med pa las skye ba med de/ spyi dang khyad par nyid dang ldan pa'i phyir/ dper na myu gu bzhin no zhes bya ba smras so/ /de la kun rdzob tu khas blangs pa nang gi skye mched kyi dngos po rnams zhes bya ba 'di ni chos can yin la/ rgyu med pa las skye ba med de zhes bya ba 'di ni bsgrub par bya ba chos yin/ spyi dang khyad par nyid dang ldan pa'i phyir zhes bya ba 'di ni sgrub pa'i chos yin/ dper na myu gu bzhin no zhes bya ba 'di ni dpe yin par sbyar ro/ /de la kun rdzob tu khas blangs pa nang gi skye mched kyi dngos po rnams zhes bya ba ni dbu ma pas kun rdzob tu khas blangs pa nang gi skye mched kyi dngos po mig la sogs pa gang dag yin pa rnams te/ de rnams 'dir chos can du bya'o/ /rgyu med pa las skye ba med de zhes bya ba ni kun rdzob tu khas blangs pa nang gi skye mched kyi dngos po de rnams rgyu med pa las skye ba med par bsgrub par bya ba ste/ de ni 'dir bsgrub par bya ba chos yin no/ /spyi dang khyad par nyid dang ldan pa'i phyir zhes bya ba la spyi nyid dang ldan pa'i phyir zhes bya ba ni mig la sogs pa skye mched drug po dag la skye mched ces bya ba spyi yod pa'i phyir ro/ /khyad par nyid dang ldan pa'i phyir zhes bya ba ni mig la sogs pa skye mched drug po dag la/ mig dang / rna ba dang / sna dang / lce dang / lus dang / yid ces bya ba so so'i khyad par nyid yod pa'i phyir ro/ /yang na spyi nyid dang ldan pa'i phyir zhes bya ba ni skye mched thams cad la skye mched rnams skye mched rnams zhes bya ba spyi yod pa'i phyir ro/ /khyad par nyid dang ldan pa'i phyir zhes bya ba ni mi'i skye mched rnams zhes bya ba dang / lha'i skye mched rnams zhes bya ba dang / dud 'gro'i skye mched rnams zhes bya ba khyad par nyid yod pa'i phyir/ nyid ces bya ba ni spyi dang khyad par gyi dngos po rnams ni spyi dang khyad par nyid do/ /ldan pa'i phyir zhes bya ba ni spyi dang khyad par nyid dang ldan pa'i phyir te/ de ni 'dir sgrub pa'i chos so/ /dper na myu gu bzhin no zhes bya ba ni 'di ltar myu gu la yang myu gu thams cad la myu gu zhes bya ba'i rigs spyi nyid kyang yod la/ 'bras kyi myu gu dang / nas kyi myu gu zhes bya ba la sogs pa khyad par nyid kyang yod pa ste/ dper na myu gu kun rdzob tu spyi dang khyad par nyid dang ldan pa'i phyir rgyu med pa las skye ba med de/ 'di ltar thog ma med pa'i rgyu brgyud pa las skye bas rgyu med pa las skye ba med pa de bzhin du kun rdzob tu khas blangs pa nang gi skye mched kyi dngos po rnams kyang spyi dang khyad par nyid dang ldan pa'i phyir rgyu med pa las skye ba med do/ /'di ltar thog ma med pa'i rgyu brgyud pa las skye bas rgyu med pa las skye ba med de/ de ni 'dir chos mthun pa'i dpe yin no/ /de ltar re zhig khyod kyi rgyu med pa las skye bar sgrub pa de la rjes su dpag pa'i gnod par 'gyur ba'i skyon yod pa'i phyir dngos po rnams rgyu med pa las skye ba med par dgongs so/ /gal te ji ltar grags pa'i gnod par 'gyur ba'i skyon yod ce na/ de bstan pa'i phyir grags pa'i gnod pa ni zhes bya ba la sogs pa smras so/ /de la ji ltar grags pa'i gnod par 'gyur ba'i skyon yod pas de bstan pa'i phyir/ 'jig rten 'di na yod pa gang yin pa de ni rgyu las skye bar grags pa ste/ dper na rgyu spun dag las snam bu dang rtsi rkyang dag las sab ma skye ba la sogs pa bzhin no zhes bya ba smras so/ /'di skad bstan te/ ba lang rdzi'i chung ma yan chad la snam bu dang sab ma la sogs pa rgyu dang bcas pa las skye bar grags pas/ khyod kyi kun rdzob tu nang gi skye mched kyi dngos po rnams rgyu med pa las skye bar sgrub pa'i don de la ni grags pa dang 'gal ba'i gnod par 'gyur ba'i skyon yod pa'i phyir yang dngos po rnams rgyu med pa las skye ba med par dgongs so/ /de ltar na re zhig rgyu med pa dngos por gyur pa ma yin pa las glo bur du skye ba med do/ /da ni rgyu med pa de dngos por gyur pa las skye ba dgag par bya ste/ de'i phyir yang na rgyu med ces bya ba ni rgyu ngan pa ste/ chung ma med pa zhes bya ba la sogs pa bzhin no zhes bya ba smras te/ yang na rgyu med ces bya ba ni rgyu ngan pa ste/ ngo bo nyid dang dbang phyug la sogs pa rgyur smra ba'i grub pa'i mtha' las mi mthun pa rgyur smra ba yin no zhes bya bar sbyar ro/ /de la yang na zhes bya ba ni rgyu med ces bya ba ni rgyu med pa dngos por gyur pa ma yin pa sngar bstan pa 'ba' zhig tu yang ma zad de/ yang rnam pa gcig tu na rgyu med ces bya ba ni/ rgyu med pa dngos por gyur pa ngan pa la yang bya'o zhes bya ba'i tha tshig go/ /rgyu med ces bya ba ni rgyu ngan pa ste zhes bya ba ni rgyu'i bya ba byed pa nyid ma yin pas rgyu med pa dang 'dra bar rgyu med pa zhes bya ste/ gang ngo bo nyid kyis yod kyang skye bar byed pa ma yin pas ngan pa de ni rgyu med pa zhes bya'o/ /de yang ji lta bu zhe na/ dper na chung ma med pa zhes bya ba la sogs pa bzhin no zhes bya ba smras te/ dper na chung ma ngan pa skyon chags pa dngos por gyur pa yod kyang chung ma'i bya ba ni mi byed pas de la chung ma med pa zhes bya ba dang / bu ngan pa skyon chags pa dngos por gyur pa yod kyang bu'i bya ba mi byed pas de la bu med pa zhes bya ba bzhin du/ ngo bo nyid dang dbang phyug la sogs pa rgyur smra ba'i grub pa'i mtha' las mi mthun pa rgyur smra ba dag kyang rgyu ngan pa skyon chags pa dngos por gyur pa yod kyang rgyu'i bya ba mi byed pas de yang rgyu med pa zhes bya'o/ /rgyu ngan pa gang zhe na zhes bya ba ni rgyu med pa dngos po gyur pa yod kyang rgyu'i bya ba mi byed pas rgyu ngan pa theg pa zhes bya ba de yang gang zhe na zhes 'dir 'grel pa byed pa nyid kyis dri ba'i tshig yin no/ /de'i lan du 'grel pa byed pa nyid kyis/ ngo bo nyid dang / dbang phyug dang / skyes bu dang / gtso bo dang / dus dang / sred med kyi bu la sogs pa ste zhes bya ba smras te/ sogs pa zhes bya ba'i sgras ni tshangs pa dang / skye dgu'i bdag po dang / ma nu dang / gnam gyis bskos pa dang / par sig rnams kyi dru bA na dang / bar bar rnams kyi yu na zhes bya ba'i bar dag bsdu'o/ /ci'i phyir de dag rgyu med pa yin zhe na/ de'i phyir yang dag pa ma yin pa'i phyir ro zhes bya ba smras te/ ngo bo nyid dang / dbang phyug dang / skyes bu dang / gtso bo dang / dus dang / sred med kyi bu dang / tshangs pa dang / skye dgu'i bdag po dang / ma nu dang / gnam gyis bskos pa dang / dru bA na dang / yu na la sogs pa de dag ni ngo bo nyid kyi rgyu yang dag pa ma yin pa'i phyir te/ de dag ni kun rdzob tu dngos por gyur pa yin du zin kyang skyed par byed pa nyid ma yin pa'i phyir/ ngan pas med pa dang 'dra ba'i phyir rgyu nyid ma yin no/ /da ni rgyu med pa dngos por gyur pa de las skye ba dgag par bya ste/ de'i phyir dngos po rnams rgyu med pa de las skye ba med de zhes bya ba la sogs pa smras so/ /gal te dngos po rnams rgyu med pa de las ci'i phyir skye ba med ce na/ de'i phyir de las skye bar ston pa'i rjes su dpag pa med pa'i phyir dang / rjes su dpag pa'i gnod par 'gyur ba'i phyir yang ngo zhes bya bar dgongs so zhes bya ba smras so/ /'di skad bstan te/ khyod kyi ngo bo nyid dang / dbang phyug la sogs pa de las dngos po rnams skye bar ston pa'i rjes su dpag pa med pa'i phyir/ 'di ltar de ni tshig tsam du zad pas de'i phyir dngos po rnams rgyu ngan pa las skye ba med do/ /gzhan yang khyed kyi rgyu ngan pa ngo bo nyid dang / dbang phyug la sogs pa de las dngos po rnams skye bar sgrub pa de dag thams cad kho bos rjes su dpag pa dag gis dgag par nus pa'i gnod pa khyod la 'byung bar 'gyur ba'i phyir yang dngos po rnams rgyu ngan pa las skye ba med do/ /yang ngo zhes bya ba'i sgra ni skyon gnyi ga bsdus pa'i don to zhes bya bar dgongs so zhes bya ba ni/ de ltar khyod kyi rgyu ngan pa ngo bo nyid dang dbang phyug la sogs pa de las dngos po rnams skye bar ston pa'i rjes su dpag pa med pa'i phyir dang / khyod kyi phyogs 'di la rjes su dpag pa'i gnod par 'gyur ba'i phyir yang dngos po rnams rgyu ngan pa las skye ba med do zhes bya bar mdo mdzad pas dgongs so zhes bya ba'i tha tshig go/ /de ni re zhig rgyu med pas dngos por gyur pa las skye ba dgag pa spyir bstan pa yin no/ /da ni rgyu med pa dngos por gyur pa las skye bar smra ba dag rim bzhin du dgag par bya'o/ /de la re zhig rgyu med pa dngos por gyur pa ngo bo nyid du smra ba dag gi grub pa'i mtha' ni gang yin/ ji ltar dngos po rnams ngo bo nyid las skye ba med ce na/ de'i phyir re zhig ngo bo nyid du smra ba dag gi grub pa'i mtha' bstan pa'i phyir/ de la re zhig ngo bo nyid du smra ba dag na re/ nang gi skye mched rnams ngo bo nyid las skye bar dam 'cha' ste/ lus sna tshogs 'grub pa'i phyir/ dper na pad+ma dag gi kha dog dang / dbyibs dang / lo ma dang / chu ba dang / 'dab ma dang / ze ba dang / snying po mdzes pa lta bu dang / rma bya dag gi mgrin pa'i phyogs rin po che mthon ka chen po dang / an+da rnyil ltar mthon mthing du 'dug la/ mjug sgro'i tshogs dag gi mdongs bkra zhing 'tsher bag yod pa bzhin no zhes zer ro zhes bya ba smras te/ 'dis ci bstan zhe na/ sngar dbu ma pas dngos po rnams rgyu med pa de las skye ba med de/ de las skye bar ston pa'i rjes su dpag pa med pa'i phyir dang / rjes su dpag pa'i gnod par 'gyur ba'i phyir yang ngo zhes bya bar dgongs so zhes smras pa gang yin pa de la ngo bo nyid du smra ba dag ngo bo nyid las skye bar ston pa'i rjes su dpag pa'i phyir zhes bya ba de mi bzod pas/ 'dir ngo bo nyid las skye bar ston pa'i rjes su dpag pa dang / rang gi lo rgyus kyang ston par byed pa yin no/ /de la zhes bya ba'i sgra ni dmigs kyis bsal ba'i don de rgyu med pa dngos por gyur pa las skye bar smra ba de la'o/ / re zhig ces bya ba'i sgra ni rim pa la ltos pa'i don te/ rgyu med pa dngos por gyur pa las skye bar smra ba dag las re zhig ngo bo nyid du smra ba dag gi lo rgyus ston pa yin no/ /ngo bo nyid du smra ba dag na re zhes bya ba ni rgyu med pa dngos por gyur pa ngo bo nyid las skye bar smra ba dag na re 'di skad ces zer ro zhes bya bar sbyar ro/ /de la ngo bo nyid ces bya ba ni gang dngos po thams cad la mi ltos par rang gi ngo bo nyid kyis yang dag par 'grub pa lhan cig skyes pa bcos ma ma yin pa de ni ngo bo nyid ces bya'o/ /ngo bo nyid du smra ba zhes bya ba ni dngos po rnams ngo bo nyid las skye bar smra ba ste/ 'jig rten rgyang pan pa'i grub pa'i mtha' byed pa drang srong chen po 'jig rten mig ces bya'o/ /ngo bo nyid du smra ba dag ces bya ba'i sgras ni drang srong chen po 'jig rten mig gi grub pa'i mtha' smra ba dag ces bya ba'i don te/ 'jig rten rgyang pan pa dag ces bya ba'i tha tshig go/ /de la 'dir nang gi skye mched rnams zhes bya ba 'di ni chos can yin la/ ngo bo nyid las skye bar dam 'cha' ste zhes bya ba 'di ni bsgrub par bya ba chos yin/ lus sna tshogs 'grub pa'i phyir zhes bya ba 'di ni sgrub pa'i chos yin/ dper na pad+ma dag gi kha dog dang / dbyibs dang / lo ma dang / chu ba dang / 'dab ma dang / ze ba dang / snying po mdzes pa lta bu dang / rma bya dag gi mgrin pa'i phyogs rin po che mthon ka chen po dang / an+da rnyil ltar mthon mthing du 'dug la/ mjug sgro'i tshogs dag gi mdongs bkra zhing 'tsher bag yod pa bzhin no zhes bya ba 'di ni dpe yin par sbyar ro/ /de la nang gi skye mched rnams zhes bya ba la/ nang gi zhes bya ba ni bdag gis byin gyis brlabs shing gnas su byas pa'o/ /bdag ces bya ba ni 'tsham la bdag gir byed pa ste/ yo byad gya nom pa dang / rgya chen po dag dang por byas nas/ yo byad ngan pa dang khyon chung ngu'i bar dag la bdag gir byed pas bdag ces bya'o/ /bdag des byin gyis brlabs shing gnas su byas pa ni nang gi zhes bya'o/ /skye mched rnams zhes bya ba ni sems dang sems las byung ba rnams skye zhing 'byung ba dang / mched cing rgyas par byed pas skye mched rnams te/ 'di lta ste/ mig dang / rna ba dang / sna dang / lce dang / lus dang / yid ces bya ba rnams so/ /nang gi skye mched de dag la bsgrub par bya ba chos ngo bo nyid las skye bar dam 'cha' ste zhes bya ba dang / sgrub pa'i chos lus sna tshogs 'grub pa'i phyir zhes bya ba de gnyis yod pas de ni 'dir chos can yin no/ /ngo bo nyid las skye bar dam 'cha' ste zhes bya ba ni/ nang gi skye mched de dag dngos po thams cad la mi ltos par rang gi ngo bo nyid kyis yang dag par 'grub pa lhan cig skyes pa bcos ma ma yin par khas len pa ste/ de ni 'dir bsgrub par bya ba chos yin no/ /rjes su dpag pa 'di la bsgrub par bya ba chos ngo bo nyid las skye bar dam 'cha' ste zhes bya ba dang / gang la de bsgrub par bya ba'i chos can nang gi skye mched rnams zhes bya ba de gnyis gcig tu bsdus pa ni phyogs yin par sbyar ro/ /lus sna tshogs grub pa'i phyir zhes bya ba la/ lus zhes bya ba ni rang gi ngo bo nyid do/ /sna tshogs zhes bya ba ni sna tshogs pa dang brgyan pa dang spras pa'o/ /'grub pa'i phyir zhes bya ba ni kha dog dkar po dang / dmar po dang / sngon po dang / ser po la sogs pa dang / dbyibs ring po dang / thung ngu dang / zlum po dang / gru bzhi la sogs pas lus sna tshogs 'grub pa'i phyir te/ de ni 'dir nang gi skye mched rnams ngo bo nyid las skye bar dam 'cha' ba'i sgrub pa'i chos yin no/ /de yang ji lta bu zhe na/ de'i phyir dper na zhes bya ba la sogs pa smras te/ dper na pad+ma dag gi kha dog la sogs pa mdzes pa dang / rma bya dag gi mgrin pa'i phyogs mthon mthing du 'dug pa dag la sogs pa byed pa po gang yang med par ngo bo nyid kyis de ltar skyes pa bzhin du nang gi skye mched kha dog dang dbyibs la sogs pa dag gi lus sna tshogs grub pa rnams kyang byed pa po gang yang med par ngo bo nyid kyis de ltar skye'o zhes dam 'cha' bar sbyar ro/ /de la pad+ma dag ces bya ba ni mtsho las skyes pa dag mtshon pa ste/ des na pad+ma ma dang / ut+pal dang / ku mu da dang / dri mchog dang / pad+ma dkar po la sogs pa dag spyir gzung ngo / /kha dog dang / dbyibs dang / lo ma dang / chu ba dang / 'dab ma dang / ze ba dang / snying po mdzes pa zhes bya ba ni/ kha dog la sogs pa gang la mdog mdzes pa yod pa de ni kha dog la sogs pa mdzes pa'o/ /des na pad+ma la sogs pa mtsho nas skyes pa gang dag la kha dog mdzes pa dang / dbyibs mdzes pa dang / lo ma mdzes pa dang / chu ba mdzes pa dang / 'dab ma mdzes pa dang / ze ba mdzes pa dang / snying po mdzes pa yod pa de dag ni/ kha dog dang / dbyibs dang / lo ma dang / chu ba dang / 'dab ma dang / ze ba dang / snying po mdzes pa zhes bya ba'o/ /lta bu zhes bya ba ni dper na/ pad+ma la sogs pa de dag gi kha dog la sogs pa'i mdzes pa de dag su zhig chur zhugs te/ kha dog dang dbyibs sna tshogs bkra zhing mdzes pa dag tu byed par 'gyur te/ byed pa po mang po zhig yod du zin kyang de dag byed mi nus na byed pa po dang 'byin pa po gcig gis de dag byed nus par lta ga la 'gyur te/ mi nus pa de bzhin du nang gi skye mched kha dog dang dbyibs la sogs pa dag gis lus sna tshogs grub pa rnams kyang byed pa po gang gis kyang ma byas par ngo bo nyid las skye bar dam 'cha'o zhes bya ba la sogs pa'i tha tshig go/ /rma bya dag ces bya ba 'dis ni nang gi sems can du bgrang ba dag gi dpe yin no/ /de la mgrin pa'i phyogs rin po che mthon ka chen po dang / an+da rnyil ltar mthon mthing du 'dug la zhes bya ba ni rma bya gang dag la mgrin pa'i phyogs kyi nor bu rin po che mthon ka chen po dang / an+da rnyil ltar mthon mthing du 'dug pa yod pa de dag ni mgrin pa'i phyogs rin po che mthon ka chen po dang an+da rnyil ltar mthon mthing du 'dug pa zhes bya'o/ /de la rin po che mthon ka chen po zhes bya ba ni kha dog mthon ka'i shas shin tu che bas mthon ka chen po zhes bya'o/ /an+da rnyil zhes bya ba ni rin po che mthon ka chen po de dag nyid kyi bye brag ste/ rin po che in+d+ra nI la zhes bya ba yin no/ /des ni rin po che mthon ka chen po dang / an+da rnyil ltar mthon mthing du 'dug la zhes bya ba ni de 'dra bar mgrin pa'i phyogs mthon mthing du 'dug pa yin no/ /rma bya de dag gi mgrin pa'i phyogs rin po che mthon ka chen po dang / an+da rnyil ltar mthon mthing du 'dug la zhes bya ba 'ba' zhig tu yang ma zad de/ 'di ltar mjug sgro'i tshogs de dag gi mdongs bkra zhing 'tsher bag yod pa yang yin te/ rma bya gang dag la mjug sgro'i tshogs dag gi mdongs bkra zhing 'tsher bag yod pa de dag ni mjug sgro'i tshogs dag gi mdongs bkra zhing 'tsher bag yod pa zhes bya'o/ /bzhin no zhes bya ba ni dper na rma bya de dag gi mgrin pa'i phyogs rin po che mthon ka chen po dang / an+da rnyil ltar mthon mthing du 'dug pa/ mjug sgro'i tshogs dag gi mdongs bkra zhing 'tsher bag yod pa de dag su zhig tshon la sogs pa thogs te/ kha dog dang dbyibs sna tshogs la bkra zhing 'tsher bag tu byed par 'gyur te/ byed pa po mang po zhig yod du zin na yang de dag byed mi nus na/ byed pa po dang 'byin pa po gcig gis de ltar byed nus par ga la 'gyur te/ mi nus pa de bzhin du nang gi skye mched kha dog dang dbyibs la sogs pa dag gi lus sna tshogs grub pa rnams kyang byed pa po gang gis kyang ma byas par ngo bo nyid las skye bar dam 'cha'o zhes bya ba'i tha tshig go/ /de ltar na phyi rol dang nang gi rdzas tshogs pa'i mthu las phyi nang gi dngos po rnams kyi kha dog dang / dbyibs dang / bong tshod dang / sgra skad dang / bsam pa'i dbye ba tha dad par gyur pa yin pas/ dbu ma pa na re/ ngo bo nyid las skye bar ston pa'i rjes su dpag pa med pa'i phyir dngos po rnams ngo bo nyid las skye ba med do zhes zer ba de rigs pa ma yin no zhes zer ro// //bam po bcu gsum pa/ de skad ces zer ba de'i lan du 'dir 'grel pa byed pa nyid kyis des na de la dam pa'i don de gal te kun rdzob tu nang gi skye mched kun rdzob pa'i shes pa spyod yul rnams byed pa po rang dbang can gyi bya ba la mi ltos pa'i phyir dang / sus kyang ma byas pa kho na'i phyir rkyen nges pa las skye ba yin na ni grub pa la sgrub bo/ /ci ste don dam par na ni dpe med de/ don dam par pad+ma la sogs pa skye bar khas ma blangs pa'i phyir ro zhes bya ba smras so/ /de la des na zhes bya ba ni ngo bo nyid du smra ba dag gis ji skad smras pa des na'o/ /de la zhes bya ba ni ngo bo nyid du smra ba dag gis sgrub pa'i sbyor ba byas pa de la'o/ /dam bcas pa'i don de zhes bya ba ni ngo bo nyid du smra ba dag gis bsgrub par byas pa'i dam bcas pa'i don sngar smras pa de'o/ /des na de la re zhig 'di skad ces dri bar bya ste/ ci ngo bo nyid las skye bar dam bcas pa'i don de kun rdzob tu sgrub bam/ 'on te don dam par sgrub pa 'di la khyed kyi bsam pa ni gang / dam bcas pa ni gang zhes dri bar bya'o/ /de skad dris pa na ngo bo nyid du smra ba dag dam bcas pa'i don de kun rdzob tu sgrub po zhes zer na/ de'i phyir de dag la 'di skad ces gal te kun rdzob tu nang gi skye mched kun rdzob shes pa'i spyod yul rnams byed pa po rang dbang can gyi bya ba la mi ltos pa'i phyir dang / sus kyang ma byas pa kho na'i phyir rkyen nges pa las skye ba yin na ni grub pa la sgrub po zhes brjod par bya'o/ /de la gal te kun rdzob tu zhes bya ba ni gal te nang gi skye mched kun rdzob pa'i shes pa'i spyod yul rnams byed pa po rang dbang can gyi bya ba la mi ltos pa'i phyir dang / sus kyang ma byas pa kho na'i phyir kun rdzob tu rkyen nges pa las skye ba sgrub kyi/ don dam par mi sgrub na ni'o/ /nang gi skye mched ces bya ba ni khyad par gyi gzhi yin te/ mig la sogs pa nang gi skye mched drug po rnams so/ /kun rdzob pa'i shes pa'i spyod yul rnams zhes bya ba ni de dag gi khyad par yin te/ nang gi skye mched de dag nyid kun rdzob pa'i shes pa'i spyod yul dang yul yin pa'i phyir ro/ /byed pa po rang dbang can gyi bya ba zhes bya ba ni/ byed pa po'i mtshan nyid ni rang dbang can yin la/ de'i bya ba ni g.yo ba dang rtsol ba yin pas byed pa po rang dbang can gyi bya ba zhes bya ba ste/ gzhan la mi brten par byed pa zhes bya ba'i tha tshig go/ /byed pa po rang dbang can gyi bya ba de la mi ltos pa'i phyir zhes bya ba ni nang gi skye mched kun rdzob pa'i shes pa'i spyod yul gang dag byed pa po rang dbang can gyi bya ba la mi ltos shing rkyen nges pa la ltos pa de dag ni byed pa po rang dbang can gyi bya ba la mi ltos pa zhes bya ste/ de la mi ltos pa'i phyir rkyen nges pa las skye ba yin na ni zhes bya bar sbyar ro/ /sus kyang ma byas pa kho na'i phyir zhes bya ba ni nang gi skye mched kun rdzob pa'i shes pa'i spyod yul gang dag tshangs pa la sogs pa sus kyang ma byas pa kho na yin zhing / rkyen nges pa kho na las skye ba de dag ni sus kyang ma byas pa kho na zhes bya ste/ sus kyang ma byas pa kho na'i phyir nges pa las skye ba yin no zhes bya bar sbyar ro/ /byed pa po rang dbang can gyi bya ba la mi ltos pa dang / tshangs pa la sogs pa sus kyang ma byas pa de dag kyang gang zhe na/ nang gi skye mched kun rdzob pa'i shes pa'i spyod yul rnams zhes bya ba yin te/ de rnams byed pa po rang dbang can gyi bya ba la mi ltos pa'i phyir dang / tshangs pa la sogs pa sus kyang ma byas pa kho na'i phyir rkyen nges pa las skye ba yin na ni/ ngo bo nyid du smra ba dag gi dam bcas pa'i don de grub pa la sgrub pa'i skyon du 'gyur ro zhes bya bar sbyar ro/ /de la rkyen zhes bya ba ni las dang nyon mongs pa dang / khu chu dang / khrag la sogs pa zhes bya ba dang / sa bon dang / sa dang / chu dang / me dang / rlung zhes bya ba dag go/ /nges pa zhes bya ba ni mer mer po la sogs pa dang / mir gyur pa'i las kyi rkyen las mi'i skye mched rnams skye bar 'gyur ba dang / de bzhin du dud 'gro dang / yi dags dang / sems can dmyal bar 'gyur ba'i las kyi rkyen las dud 'gro dang / yi dags dang / sems can dmyal ba pa'i skye mched rnams skye bar 'gyur ba dang / de bzhin du pad+ma dang / ut+pal dang / dri mchog dang / pad+ma dkar po la sogs pa'i sa bon rigs mthun pa las/ pad+ma dang / ut+pa la la sogs pa skye bar 'gyur ba de ni nges pa zhes bya'o/ /de'i phyir rkyen nges pa de las nang gi skye mched kun rdzob pa'i shes pa'i spyod yul rnams skye ba yin na ni des na khyod kyis dam bcas pa'i don de grub pa la sgrub pa yin te/ 'di ltar grub pa'i mtha' gang las sa bon yang 'di snyam du/ bdag gis myu gu mngon par bsgrub par bya'o snyam du mi sems la/ myu gu yang 'di snyam du bdag ni sa bon gyis mngon par bsgrubs so snyam du mi sems so/ /de bzhin du ma rig pa yang 'di snyam du bdag gis 'du byed rnams mngon par sgrub bo snyam du mi sems la/ 'du byed rnams kyang 'di snyam du bdag cag ni ma rig pas mngon par bsgrubs so snyam du mi sems te/ 'di ltar byed pa po yongs su btsal na nang gi byed pa'i skyes bu'am 'byin pa po dmigs su med mod kyi/ 'on kyang rgyu dang rkyen so sor nges pa tshogs pa'i dbang dang sems can rnams kyi las thun mong ba'i dbang gis 'bras bu yo byad so sor nges pa dag kun rdzob tu skye ba gang yin pa de ni chos nyid yin no zhes gsungs pa'i grub pa'i mtha' de nyid khyod kyis bsgrubs pas grub pa la sgrub pa yin no/ /de skad ces smras pa na/ gal te ngo bo nyid du smras pa dag dam bcas pa'i don de don dam par sgrub bo zhes zer na/ de'i phyir de dag la 'di skad ces te/ don dam par na ni dpe med de/ don dam par pad+ma la sogs pa skye bar khas ma blangs pa'i phyir ro zhes brjod par bya'o/ /de la ci ste don dam par na ni zhes bya ba ni ngo bo nyid du smra ba dag gi ngo bo nyid las skye bar dam bcas pa'i don de ji ste don dam par sgrub na ni'o/ /dpe med de zhes bya ba ni don dam par dngos po rnams kyi dpe med pas dngos po rnams ngo bo nyid las skye bar dam bcas pa'i don de ni mi 'grub po zhes bya bar sbyar ro/ /gal te don dam par ji ltar dpe med ce na/ de'i phyir don dam par pad+ma la sogs pa skye bar khas ma blangs pa'i phyir ro zhes bya ba smras te/ ci khyed kyi kho bo'i grub pa'i mtha' las gzugs kyi skye ba med pa la spyod na shes rab kyi pha rol tu phyin pa la spyod pa ma yin no zhes gsungs pa ma thos sam/ de'i phyir don dam par pad+ma la sogs par chos thams cad skye bar khas ma blangs pa'i phyir dpe med do/ /gzhan yang khyed kyis gal te bskal pa du mar rkang pa'i mthe bo ya gcig gis 'greng ste/ lha thams cad mnyes par byed cing / bdag la dbu ma pa'i phyir don dam par gnyi ga la grags pa'i dpe zhig stsol cig ces gsol ba btab du zin kyang / lha de dag gis khyod la dpe de lta bu sbyin par mi nus te/ 'di ltar bcom ldan 'das kyis don dam par dngos po thams cad skye ba med pa kho nar bka' stsal pa'i phyir ro/ /khyed kyi gtan tshigs lus sna tshogs 'grub pa'i phyir zhes bya ba de yang gang yang rung ba la ma grub pa yin te/ byas pa'i phyir zhes bya ba bzhin te/ 'di ltar kho bo'i lung don dam pa'i bden pa gang zhe na/ gang la shes pa yang mi 'jug na/ yi ge rnams lta smos kyang ci dgos zhes gsungs pa des na/ lus sna tshogs 'grub pa zhes bya ba khyod kyi gtan tshigs kyi don de kho bo la ma grub pa nyid yin pas/ des na nang gi skye mched rnams ngo bo nyid las skye bar dam 'cha' ste zhes bya ba de ni dam bcas pa tsam kho nar zad do/ /rgyu med par smra ba dag kho bo'i phyir ni thams cad rgyu med pa las 'grub par 'dod la/ bsgrub par bya ba ni gtan tshigs kyis 'grub par 'dod na ni phyogs snga ma dang 'gal lo zhes bya bas ni 'di skad bstan te/ ngo bo nyid du smra ba khyed kyi lung ni dngos po thams cad rgyu med pa las skye ba 'di yin pas des na khyed kho bo'i phyir dngos po thams cad rgyu med pa las 'grub par 'dod pa'i bsgrub par bya ba dngos po rnams rgyu med pa las skye bar sgrub pa gang yin pa de mi 'grub bo/ /ci'i phyir zhe na/ rgyu med par smra ba khyed dngos po rnams rgyu med pa las skye bar sgrub pa'i gtan tshigs su lus sna tshogs 'grub pa'i phyir zhes bya ba gtan tshigs kyi mtshan nyid du khas len pas/ des na khyed kyi dngos po rnams rgyu kho na las skye bar khas blangs pa yin gyi/ rgyu med pa las skye bar khas ma blangs pa'i phyir/ de ltar na rang gi phyogs snga ma dang 'gal te/ dper na bye brag pas sngar sgra mi rtag pa nyid du khas ma blangs pa 'gyed pa'i dus na rtag pa nyid du sgrub pa de bzhin du/ khyed kyang rang gi grub pa'i mtha' las dngos po thams cad rgyu med pa las skye bar smra la/ 'gyed pa'i dus su kho bo'i phyir ni bsgrub par bya ba gtan tshigs kyi rgyus 'grub par 'dod pas de lta na khyed rang gi grub pa'i mtha' dang 'gal bar 'gyur ro zhes bya bar ston to/ /de la rgyu med par smra ba dag ces bya ba ni ngo bo nyid du smra ba dag go/ /kho bo'i phyir ni zhes bya ba ni dbu ma pa la brgal ba'i phyir na'o/ /thams cad rgyu med pa las 'grub par 'dod pa zhes bya ba ni nang gi skye mched la sogs pa dngos po thams cad ngo bo nyid las skye bar dam 'cha' zhing rgyu med pa las 'grub par 'dod pa'o/ /bsgrub par bya ba ni gtan tshigs kyis 'grub par 'dod na ni zhes bya ba ni ngo bo nyid du smra ba dag gis bsgrub par bya ba nang gi skye mched rnams ngo bo nyid las skye bar dam 'cha' ste zhes smos pa gang yin pa de ni gtan tshigs gang lus sna tshogs 'grub pa'i phyir zhes bya ba des 'grub par 'dod na ni'o/ /phyogs snga ma dang 'gal lo zhes bya ba ni ngo bo nyid du smra ba dag gi grub pa'i mtha' las dngos po thams cad rgyu med pa las 'grub par 'dod pa'i phyogs snga ma de dang / de sgrub pa gtan tshigs kyi rgyus 'grub par 'dod pa 'gal ba'o/ /ci ste rgyu yod par smra ba la gtan tshigs med par bstan par mi nus pas kla klo la kla klo'i skad bzhin te/ des na gtan tshigs sbyar kyang phyogs snga ma'i gnod pa med do zhe na zhes bya ba ni ci ste ngo bo nyid du smra ba dag dbu ma pa la lan 'di skad ces khyed dbu ma pa rgyu yod par smra ba la gtan tshigs kyi rgyu med par don bstan par mi nus pas/ dper na kla klo la kla klo'i skad ma smras par dbus pa'i skad kyis don bstan par mi nus pa bzhin no/ des na kho bo cag rgyu med par smra ba rnams kyis kyang khyed dbu ma pa rgyu yod par smra ba rnams la bstan par bya ba'i phyir/ gtan tshigs sbyar ba byas kyang kho bo cag la phyogs snga ma dang 'gal ba'i gnod pa med do zhes zer ba de'i dogs pa bsu ba yin no/ /de la ci ste zhes bya ba ni dbu ma pas ngo bo nyid du smra ba dag gi dogs pa bsu ba'i tshig yin no/ /rgyu yod par smra ba la zhes bya ba ni dbu ma pa la'o/ /gtan tshigs med par bstan par mi nus pas zhes bya ba ni nang gi skye mched rnams ngo bo nyid las skye bar dam 'cha' ste zhes bya ba'i gtan tshigs lus sna tshogs 'grub pa'i phyir zhes bya ba ma smos par don de bstan par mi nus pas so/ / kla klo la kla klo'i skad bzhin te zhes bya ba ni dper na dbus pas kla klo mtha' 'khob pa la kla klo'i skad ma smras par dbus pa'i skad kyis don bstan par mi nus pas dbus pas kla klo mtha' 'khob pa la kla klo'i skad kyis don bstan kyang / dbus pa de kla klo yin par brjod par mi bya ba bzhin du ngo bo nyid du smra ba dag gis kyang / dbu ma pa la gtan tshigs med par don bstan par mi nus pas ngo bo nyid du smra ba dag gis dbu ma pa gtan tshigs kyi don bstan kyang ngo bo nyid du smra ba rgyu yod par smra ba yin par brjod par mi bya ba'o/ /des na gtan tshigs sbyar kyang zhes bya ba ni rigs pa des na ngo bo nyid du smra ba dag gis nang gi skye mched rnams ngo bo nyid las skye bar dam 'cha' ste zhes bya ba'i gtan tshigs su lus sna tshogs 'grub pa'i phyir zhes bya ba sbyar du zin kyang ngo / /phyogs snga ma'i gnod pa med do zhes bya ba ni ngo bo nyid du smra ba dag gi grub pa'i mtha' las dngos po thams cad rgyu med pa las 'grub par dam bcas pa'i phyogs snga ma dang 'gal ba'i gnod pa med do zhe na'o/ /de skad ces zer ba de'i lan du 'dir 'grel pa byed pa nyid kyis/ skad gzhan du bsgyur kyang ji ltar rtogs pa'i rtags kho nas rtags can gyi don ston pa'i phyir/ dper na kla klo la phyogs 'di na du ba las me yod do zhes ston par byed pa de la rtags rtogs pa skye ba'i thabs tha dad pa bzhin pas de ni lan du mi rung ngo zhes bya ba smras so/ /'di skad bstan te/ kla klo'i skad gzhan yongs su gzung yang bdag nyid kyis ji ltar rtogs pa'i rtags kyi rgyu de kho nas rtags kyis mtshon par bya ba'i rtags can gyi don ston par byed pa la don ston pa'i rgyu yod pa yin te/ dper na dbus pas rang gi du ba'i rtag las me yod par rtogs pa'i rtags kho nas kla klo la kla klo'i skad kyis phyogs 'di na du ba 'thul ba las me yod do zhes r tags kyis rtags can ston par byed pa na de la rtags su du ba rtogs pa skye ba'i thabs skad tha dad pa tsam du zad kyi rtags nyid yod pa dang 'dra bar khyed kyang kho bo la gtan tshigs kyi don ston par byed pa nyid don go bar bya ba'i rgyu gtan tshigs tha dad pa gzhan gyis bsgyur te ston pa yin pas rgyu yod par smra ba yin no zhes bya bar sbyar ro/ /de la skad gzhan du bsgyur kyang zhes bya ni dbus pas kla klo'i skad gzhan du bsgyur kyang ngo / /ji ltar rtogs pa'i zhes bya ba ni ji ltar khong du chud pa'o/ /rtags kho nas zhes bya ba ni du ba sngo ba nyid dang lhun stug pa nyid dang / 'thul ba nyid dang / gyen du 'gro ba nyid kyi mtshan nyid dang ldan pa'i rtags kho nas so/ /rtags can zhes bya ba ni rjes su dpag par bya ba gang la rtags yod pa zhes bya ba de ni rtags can zhes bya ste/ skabs 'dir ni rjes su dpag par bya ba me'i mtshan nyid gang la rtags du ba yod pa de ni rtags can yin no/ /de'i don ston par byed pa'i phyir zhes bya ba ni ji ltar bdag nyid kyis du ba las me yod par rtogs pa'i rtags du ba kho na yid la bzhag ste skad gzhan du bsgyur nas/ du ba'i sgra gzhan gyis me'i don ston pa'i phyir/ de la skad gzhan du bsgyur kyang rtags dang gtan tshigs dang rgyu yod par 'gyur ba'i phyir ro/ /dper na kla klo la phyogs 'di na du ba las me yod do zhes ston par byed pa'i zhes bya ba ni/ dper na dbus pas ji ltar bdag nyid kyis du ba'i rtags las me yod par rtogs pa'i rtags de kho na yid la bzhag nas/ kla klo la kla klo'i skad kyis phyogs 'di na du ba 'thul ba las 'di na me yod do zhes ston par byed pa'i gang zag de'i skad gzhan du bsgyur bas tha dad pa tsam du zad kyi/ me yod par ston pa'i rtags su du ba yin par smras pas de nyid rgyu yod par smra ba yin no zhes bya bar sbyar ro/ /de la zhes bya ba ni kla klo la phyogs 'di na du ba las me yod do zhes ston par byed pa'i gang zag gi tshig de la'o/ /rtags rtogs pa zhes bya ba ni me'i rtags su du ba rtogs pa'o/ /skye ba'i zhes bya ba ni rtags rtogs pa skye ba ste rtags rtogs par 'gyur ba'o/ /thabs zhes bya ba ni rtags rtogs pa skye ba'i thabs te skad kyi mtshan nyid do/ /tha dad pa bzhin pas zhes bya ba ni de la me'i rtags du ba rtogs pa skye ba'i thabs dbus pa'i skad las tha dad pa kla klo'i gzhan zhig brjod pa tsam du zad kyis/ skad gzhan gyis rtags brjod pa de nyid rgyu yod par smra ba gang yin pa dang 'dra bar byed kyang dbu ma pa la gtan tshigs sbyor ba byed pa nyid rgyu yod par smra ba yin pas so/ /de ni lan du mi rung ngo zhes bya ba ni de lta bas na/ khyed na re/ rgyu yod par smra ba la gtan tshigs med par bstan par mi nus pas/ kla klo la kla klo'i skad bzhin te/ des na gtan tshigs sbyar kyang phyogs snga ma'i gnod pa med do zhes zer ba de ni lan du mi rung ngo / /yang na de ni sgrub par mi rung ba ste/ ji skad smras pa'i sgrub pa de ni sgrub par mi rung ngo zhes bya ba'i tha tshig go/ /de ltar na ngo bo nyid las skye bar ston pa'i rjes su dpag pa med pa'i phyir zhes bya ba de de bzhin du gnas pa kho na yin pas/ de'i phyir dngos po thams cad ngo bo nyid las skye ba med do/ /'jug stobs can dag na re/ mer mer po dang myu gu la sogs pa ni rkyen med pa las skye la/ bum pa la sogs pa ni rkyen dang bcas pa las skye bas ngo bo nyid las skye ba ma yin pa'i phyir/ dngos po thams cad ngo bo nyid las skye ba med do zhes bya ba ni grub pa la sgrub bo zhes zer ro zhes bya ba ni/ mu stegs 'jig rten rgyang pan pa 'jug stobs can dag gi gzhung las/ mer mer po dang myu gu la sogs pa dngos po kha cig ni rkyen med par ngo bo nyid las skye la/ bum pa dang snam bu la sogs pa dngos po kha cig ni rkyen dang bcas pa las skye bar 'dod pas de dag na re/ dngos po thams cad ngo bo nyid las skye ba ma yin pa'i phyir/ dbu ma pas dngos po thams cad ngo bo nyid las skye ba med do zhes sgrub par byed pa ni grub pa la sgrub pa yin no zhes zer ba de'i phyogs yin no/ /de la 'jug stobs can dag ces bya ba ni drang srong chen po 'jig rten mig gi slob ma 'jug stobs can zhes bya ba zhig byung ngo zhes bya bar grags te/ des 'jig rten rgyang pan pa'i lta ba gzhan zhig nye bar sbyar ba de la/ 'jig rten rgyang pan pa gang dag zhugs pa de dag ni 'jug stobs can dag ces bya ste/ 'jug stobs can gyi rnam pa dang yan lag yin pa'i phyir 'jug stobs can dag ces bya ste/ de dag na re/ 'di skad ces zer ro zhes bya bar sbyar ro/ /mer mer po dang myu gu la sogs pa ni rkyen med pa las skye la/ zhes bya ba ni mer mer po dang / nur nur po dang / nar nar po dang / 'khrang gyur dang / rkang lag 'gyus pa can dag dang / myu gu dang / 'dab ma dang / sbu gu dang / sdong bu dang / sbal mig dang / me tog dang / gra ma dang / sbun pa dang / srubs dang / 'bras thug po che la sogs pa gang dag yin pa de dag ni rkyen med par ngo bo nyid las skye'o zhes zer ro/ /bum pa la sogs pa'i rkyen dang bcas pa las skye bas zhes bya ba ni/ bum pa la sogs pa yo byad gang dag yin pa de dag ni rkyen dang bcas rgyu dang bcas pa las skye ba yin no zhes zer ro/ / ngo bo nyid las skye ba ma yin pa'i phyir zhes bya ba ni bum pa la sogs pa rkyen dang bcas pa las skye ba de dag ni ngo bo nyid las skye ba ma yin par gnyi ga la grub pa'i phyir ro/ /dngos po thams cad ngo bo nyid las skye ba med do zhes bya ba ni/ dbu ma pas dngos po thams cad ngo bo nyid las skye ba med do zhes smras pa gang yin pa de'o/ /grub pa la sgrub po zhes bya ba ni dbu ma pas dngos po thams cad ngo bo nyid las skye ba med do zhes smras pa gang yin pa de ni grub pa la sgrub pa'i skyon du 'gyur ba yin te/ 'di ltar mer mer po dang myu gu la sogs pa ngo bo nyid las skye ba med par sgrub pa ni rung na/ bum pa la sogs pa rkyen dang bcas pa las skye ba dag ngo bo nyid las skye ba ma yin par gnyi ga la grub bzhin du de dag ngo bo nyid las skye ba med par sgrub pa ni grub pa la sgrub pa'i skyon chags pa yin pa'i phyir ro zhes zer ro/ /de skad ces zer ba de'i lan du/ 'dir 'grel pa byed pa nyid kyis/ thams cad las thams cad skye bar bkag pa'i phyir/ de ni rigs pa ma yin no zhes smras te/ 'dis ni dbu ma pas don dam par rkyen thams cad las 'bras bu thams cad skye ba bkag pa'i phyir/ 'jug stobs can dag na re/ grub pa la sgrub bo zhes zer ba de ni rigs pa ma yin no zhes ston to/ /de la thams cad las zhes bya ba ni rkyen thams cad las te/ mer mer po la sogs pa'i mtshan nyid dang / sa bon la sogs pa'i mtshan nyid dang / 'jim pa dang / dbyu gu dang / 'khor lo la sogs pa'i mtshan nyid dang / rgyu spun la sogs pa'i mtshan nyid dang / rgyu med pa'i mtshan nyid thams cad las so/ /thams cad ces bya ba ni 'bras bu thams cad de skye mched rnams dang / myu gu dang / bum pa dang / snam bu dang / sab ma la sogs pa thams cad do/ /skye ba bkag pa'i phyir zhes bya ba ni dbu ma pas don dam par ro/ /de ni rigs pa ma yin zhes bya ba ni 'jug stobs can dag na re/ grub pa la sgrub bo zhes zer ba de ni rigs pa ma yin no/ /gzhan yang 'jug stobs can dag gis yongs su brtags pa mer mer po dang myu gu la sogs pa rkyen med pa las skye bar smras pa de dag ni kun rdzob tu rgyu dang bcas pa las skye ba kho nar nges te skye ba can yin pa'i phyir/ bde ba dang / sdug bsngal dang / the tshom dang / yang dag pa'i shes pa la sogs pa'i rgyu can yin pa'i phyir/ dper na bum pa dang snam bu la sogs pa bzhin te/ dper na bum pa dang snam bu la sogs pa skye ba can yin pa'i phyir/ kun rdzob tu rgyu dang bcas pa las skye ba de bzhin du mer mer po dang myu gu la sogs pa yang skye ba can yin pa'i phyir/ kun rdzob tu rgyu dang bcas pa las skye ba kho nar 'gyur ro/ /de ltar re zhig ngo bo nyid las skye ba med do zhes bya ba ni rgyu med pa dngos por gyur pa dag las ngo bo nyid las skye ba med par bstan pa'i mjug bsdu ba yin no/ /de la de ltar zhes bya ba ni rigs pas dpyad pas ji ltar bstan pa de ltar ro/ /re zhig ces bya ba'i sgra ni rim pa la ltos pa ste/ rgyu med pa dngos por gyur pa dag las re zhig ngo bo nyid las de ltar skye ba med do zhes bya ba'i tha tshig go/ /ngo bo nyid las skye ba med do zhes bya ba ni rgyu med pa dngos por gyur pa ngo bo nyid las dngos po rnams skye ba med par grub pa yin no/ /da ni rgyu med pa dngos por gyur pa dbang phyug rgyur 'dod pa dag gi 'dod pa bsal bar bya ste/ de la re zhig dbang phyug rgyur 'dod pa dag ni grub pa'i mtha' bstan par bya ba'i phyir/ dbang phyug rgyur 'dod pa dag na re/ gang zhig phrar gyur gcig pu skye gnas 'dug /de yis 'di kun skye zhing 'jig par byed/ /de ni dbang bdag mchog sbyin lha mchod bya/ /yon tan byed pa shin tu zhi ba thob/ /skye ba po 'di shes pa yod min te/ /bdag gi bde sdug bdag la rang dbang med/ /dbang phyug gis bstan yang na g.yang sa'am/ /mtho ris dag tu 'gro ba kho nar 'gyur/ /zhes zer ro zhes bya ba smras te/ 'dis ni dbang phyug rgyur 'dod pa dag gi grub pa'i mtha' bstan to/ /de la dbang phyug rgyur 'dod pa dag na re zhes bya ba ni gzhan mu stegs can gang dag phyi nang gi dngos po thams cad dbang phyug gi rgyu las skye bar 'dod pa de dag na re/ 'di skad ces zer ro zhes bya bar sbyar ro/ /gang zhig ces bya ba ni dbang phyug ste/ des ni khyad par gyi gzhi bstan to/ /phrar gyur zhes bya ba la sogs pa ni dbang phyug gi yon tan de dag gis ni de'i khyad par bstan to/ /de la phrar gyur zhes bya ba ni cha phra mor gyur nas so/ /gcig pu zhes bya ba ni gzhan med pas te/ de la stong pa'i grogs gzhan med de rang dbang can kho na yin pa'o/ /skye gnas su 'dug ces bya ba ni de dngos po thams cad skyed pa'i phyir/ skye gnas zhes bya ba sems can skye ba'i gnas mngal zhes bya bar 'jug cing skye gnas kyi phyogs de na 'dug pa'o/ /de yis 'di kun skye zhing 'jig par byed/ /ces bya ba la de yis zhes bya ba ni/ gang zhig phrar gyur gcig pu skye gnas 'dug /ces bya ba des te/ dbang phyug gis zhes bya bar sbyor ro/ /'di kun zhes bya ba ni 'jig rten gsum po 'di dag thams cad do/ /skye zhes bya ba ni skye ba'i mtshan nyid do/ /'jig ces bya ba ni 'jig pa'i mtshan nyid do/ /byed ces bya ba ni des 'jig rten gsum po 'di thams cad ma lus pa skye bar yang byed cing 'jig par yang byed ces bya ba'i tha tshig go/ /'o na/ gang zhig phrar gyur gcig pu skye gnas 'dug /de yis 'di kun skye zhing 'jig par byed/ /ces bya ba de gang yin zhe na/ de'i phyir/ de ni dbang bdag mchog sbyin lha mchod bya/ /yon tan byed pa shin tu zhi ba thob/ /ces bya ba smras te/ de ni zhes bya ba ni sngar gang zhig ces smos pa dang sbyar te dbang phyug go/ /dbang bdag ces bya ba ni dbang phyug gi bdag po zhes bya ba ste/ dbang phyug gi bdag po des na de la 'jig rten gsum po thams cad 'dug par byed pas de'i phyir de ni dbang bdag yin no/ /mchog sbyin zhes bya ba ni dam pa sbyin par byed pa ste/ des gus shing 'dud pa rnams la yid la bsams pa'i don sbyin par byed pas de'i phyir mchog sbyin yin no/ / lha zhes bya ba ni 'od dang gzi brjid kyis thams cad zil gyis mnan cing gsal bas na lha'o/ /mchod bya zhes bya ba ni yon tan de dag dang ldan pa'i phyir mchod par bya ba yin pas na mchod bya'o/ /yon tan byed pa zhes bya ba ni yon tan sogs par byed pa zhes bya ba'i tha tshig ste/ gang gi phyir yon tan byed pa nyid kyis de la slob dpon med pa'i phyir yon tan byed pa zhes bya'o/ /shin tu zhi ba thob ces bya ba ni shin tu zhi ba'i mtshan nyid kyis thar pa thob pa zhes bya ba'i tha tshig go/ /yang na shin tu zhi ba thob ces bya ba ni gang de sgrub par byed cing thob par byed pa yin no/ /de dag gis ni dbang phyug gi yon tan brgyad bstan te/ brgyad gang zhe na/ phra ba dang / yang ba dang / mchod par bya ba dang / bdag por gyur pa dang / dbang du gyur pa dang / gar yang phyin pa dang / 'dod dgur ldan pa dang / dga' mgur gnas pa'o/ /de dag thams cad kyang tshigs su bcad pa gcig gis bstan te/ de la/ gang zhig phrar gyur gcig pu skye gnas 'dug /ces bya ba 'dis ni yon tan phra ba bstan te/ lag pa dag dang rkang pa dang / /mig dang bzhin dang lus rnams kyi/ /mang po byed cing 'jig byed pas/ / des na phra rab brjod pa yin/ /zhes ji skad smras pa de bzhin te/ des ni sems can gyi 'jig rten skye ba dang 'jig par byed pa bstan to/ /de yis 'di kun skye zhing 'jig par byed/ /ces bya ba 'dis ni yon tan yang bstan te/ mkha' dang rlung dang sa dang ni/ /chu dang me dag gnas byed cing / /sdud pa dang ni rgyas byed pas/ /des na yang bar brjod pa yin/ /zhes ji skad smras pa bzhin te/ des ni snod kyi 'jig rten skye ba dang / 'jig par byed pa bstan to/ /de ni dbang bdag ces bya ba 'dis ni yon tan bdag por gyur pa bstan te/ 'byung po kun la dbang byed cing / /gnas pa dag dang rgyu ba dag /gang dag gang 'dod de byed pas/ /des na bdag por gyur ces bya/ /zhes ji skad smras pa bzhin te/ des ni sems can dang snod kyi 'jig rten gnyi ga skye ba dang 'jig par byed pa bstan to/ /mchog sbyin zhes bya ba 'dis ni yon tan dbang phyug tu gyur pa bstan te/ bdag la rag lus rang dbang can/ /'ga' la'ang 'jigs pa yod min te/ /thams cad dbang du gyur pas na/ /des na dbang du gyur ces bya/ /zhes ji skad smras pa bzhin te/ des ni 'byung po thams cad la phan 'dogs pa dang gnod pa byed pa'i dbang byed pa bstan to/ /lha zhes bya ba 'dis ni yon tan gar yang phyin pa bstan te/ yul dang bza' ba bca' ba dang / /gzhan yang yid kyis gang bsams pa/ yid kyi rjes 'gro mi sdod pas/ /des na gar yang phyin zhes bya/ /zhes ji skad smras pa bzhin te/ des ni lha rnams ni yid kyis thams cad 'grub la/ rgyal po rnams ni tshig gis thams cad 'grub/ rnal 'byor pa rnams ni sems bskyed pa tsam gyis thams cad 'grub pa'i tshul bstan to/ /mchod bya zhes bya ba 'dis ni yon tan mchod par byed pa bstan te/ 'jig rten gsum na mchog gyur cing / / gnas pa dag dang rgyu ba dang / /'byung po kun gyis rjed pas na/ /des na mchod par bya ba yin/ /zhes ji skad smras pa bzhin te/ des ni 'byung po thams cad kyis mchod par bya ba bstan to/ /yon tan byed pa zhes bya ba 'dis ni yon tan 'dod dgur ldan te/ snying stobs rdul dang mun pa gsum/ /de dag gang la gnas gyur pa/ /mig 'byed tsam gyis byed 'gyur bas/ /des na 'dod dgur ldan zhes bya/ /zhes ji skad smras pa bzhin te/ des ni yon tan thams cad 'dod dgur byed pa bstan to/ /shin tu zhi ba thob ces bya ba 'dis ni yon tan dga' mgur gnas pa bstan to/ /thar pa'am yang na lha yi lus/ /gang du bdag nyid 'dod pa dag /thams cad 'dod pas thob 'gyur bas/ /des na dga' mgur gnas zhes bya/ /zhes ji skad smras pa bzhin te/ des ni mtho ris dang thar pa gang 'dod pa thob pa bstan dga' mgur gnas pa bstan te/ skye ba po 'di shes pa yod min te/ /zhes bya bas ni srog chags rnams la dbang phyug med pa bstan to/ /bdag gi bde sdug bdag la rang dbang med/ /ces bya ba ni skye bo de kho nar ma mthong ba de la bdag gi bde ba dang / sdug bsngal bskyed pa dang / dbri ba'i mthu med do zhes bya ba'i tha tshig go/ /'o na gang gi mthus bde ba dang sdug bsngal 'thob par 'gyur zhe na/ de'i phyir/ dbang phyug gis btang yang na g.yang sa'am/ /mtho ris dag tu 'gro ba kho nar 'gyur/ /zhes bya ba smras te/ 'dis ni dbang phyug gis btang bas sems can rnams ngan song dang mtho ris dag tu 'gro bar 'gyur ro zhes zer ba bstan to/ /de la dbang phyug gis btang zhes bya ba ni dbang phyug rgyur 'dod pa yin no/ /g.yang sa zhes bya ba ni ngan song gsum gyi mtshan nyid do/ /mtho ris zhes bya ba ni lha dang mi'o/ / 'gro ba kho nar 'gyur zhes bya ba ni dbang phyug gi rgyus 'gro ba kho nar 'gyur ro zhes zer ba yin no/ /de skad ces zer ba de'i lan du/ 'dir 'grel pa byed pa nyid kyis/ de ni dam bcas pa tsam ste/ dbang phyug ni kun rdzob tu yang 'gro ba mtha' dag skye ba'i rgyu yin par mi rung ste/ la la'i dga' ba dang yongs su gdung ba'i rgyu yin pa'i phyir/ dper na ba lang rdzi bzhin no zhes bya ba la sogs pa smras te/ 'dis ni yon tan brgyad dang ldan pa'i dbang phyug gang yin pa des mtho ris dang thar pa dang / sems can dmyal ba la sogs pa'i rgyu byed par 'gyur ro zhes ji skad smras pa de ni dam bcas pa tsam ste/ de'i phyir de ni de dag gi yid la bsams pa tsam du zad do zhes ston to/ /de la de ni zhes bya ba ni yon tan brgyad dang ldan pa'i dbang phyug gang yin pa des mtho ris dang thar pa dang / sems can dmyal ba la sogs pa'i rgyu byed par 'gyur ro zhes ji skad smras pa de ni'o/ /dam bcas pa tsam ste zhes bya ba ni de dag gi yid la bsams pa tsam du zad de/ de la rjes su dpag pa'i gsal ba dang / de kho na med do zhes bya ba'i tha tshig go/ /'dir yang dbang phyug ni zhes bya ba 'di ni chos can yin la/ kun rdzob tu yang 'gro ba mtha' dag skye ba'i rgyu yin par mi rung ste zhes bya ba 'di ni bsgrub par bya ba chos yin/ la la'i dga' ba dang yongs su gdung ba'i rgyu yin pa'i phyir zhes bya ba 'di ni sgrub pa'i chos yin/ dper na ba lang rdzi bzhin no zhes bya ba dpe yin par sbyar ro/ /de la dbang phyug ni zhes bya ba ni dbang phyug rgyur 'dod pa dag gis yongs su brtags pa dbang phyug ces bya ba yon tan brgyad dang ldan pa ji skad bstan pa gang yin pa de/ de la bsgrub par bya ba chos kun rdzob tu yang 'gro ba mtha' dag skye ba'i rgyu yin par mi rung ste zhes bya ba dang / sgrub pa'i chos la la'i dga' ba dang yongs su gdung ba'i rgyu yin pa'i phyir zhes bya ba de gnyis yod pas de'i phyir chos can zhes bya'o/ /kun rdzob tu yang 'gro ba mtha' dag skye ba'i rgyu yin par mi rung ste zhes bya ba ni/ dbang phyug de kun rdzob tu yang phyi nang gi 'gro ba mtha' dag skye ba'i rgyu yin par mi rung na/ don dam par lta 'gro ba mtha' dag skye ba'i rgyu yin par rung re skan zhes bya ba'i tha tshig go/ /dbang phyug de bden pa gnyi gar 'gro ba mtha' dag skye ba'i rgyu yin par mi rung ba dgag pa 'di ni bsgrub par bya ba chos yin no/ /la la'i dga' ba dang yongs su gdung ba'i rgyu yin pa'i phyir zhes bya ba de ni khyed na re/ dbang phyug gis btang yang na g.yang sa'am/ /mtho ris dag tu 'gro ba kho nar 'gyur/ /zhes zer bas/ de'i phyir dbang phyug ni 'gro ba mtho ris su btang ba la la'i dga' ba'i rgyu yang yin la/ ngan song du btang ba la la'i yongs su gdung ba'i rgyu yang yin pa'i phyir ro/ /'gro ba mtha' dag skye ba'i rgyu yin par mi rung ba ste/ de ni 'gro ba mtha' dag skye ba'i rgyu yin par mi rung ba'i sgrub pa'i chos yin no/ /dper na ba lang rdzi bzhin no zhes bya ba ni dper na ba lang rdzi ni ba lang gang dag la rtswa dang chu dang phrug pa la sogs pas phan 'dogs par byed pa de dag gi dga' ba'i rgyu yin la/ ba lang gang dag la dbyug pa la sogs pas rdeg par byed pa de dag gi yongs su gdung ba'i rgyu yin pa'i phyir/ 'gro ba mtha' dag skye ba'i rgyu yin par mi rung ba de bzhin du dbang phyug kyang sems can gang dag mtho ris su gtong ba de dag gi dga' ba'i rgyu yin la/ sems can gang dag ngan song du gtong ba de dag gi yongs su gdung ba'i rgyu yin pa'i phyir/ 'gro ba mtha' dag skye ba'i rgyu yin par mi rung ngo / /gal te dbang phyug ni mtho ris dang ngan song 'thob par byed nus pas dga' ba dang yongs su gdung ba'i rgyu yin par ma grub pas/ sangs rgyas pa rnams kyi gtan tshigs ma grub bo zhe na/ 'di ltar dbang phyug gi tshig ni nyes par smras pa yin pa'i phyir/ dbang phyug tu smra ba dag gis kho bo cag ma thub na dbang phyug kho bo'i dga' ba'i rgyu yin la/ dbang phyug tu smra ba dag gis gzhan thub pa na dbang phyug gzhan gyi yongs su gdung ba'i rgyu yang yin pas/ kho bo'i gtan tshigs ma grub pa ma yin te/ de ni re zhig rgyu dgag pa yin no/ /da ni 'bras bu dgag par bya ste/ de'i phyir yang na 'gro ba ni rgyu byed pa po dbang phyug ces bya ba gcig pu dang ldan pa ma yin par nges te gzhal bya yin pa'i phyir/ dper na dbang phyug sbyin pas kun rdzob tu yang dngos po rnams de las skye ba med do zhes bya ba smras te/ 'dis ni kun rdzob tu yang 'gro ba mtha' dag rgyu dbang phyug ces bya ba las skye ba med do zhes 'bras bu 'gog pa ston to/ /de la yang na zhes bya ba ni sngar dbang phyug rgyu ma yin par bkag pas dngos po rnams dbang phyug las skye ba med par yang ma zad de/ yang na 'gro ba rnams dbang phyug gi 'bras bu ma yin par dgag pa 'dis kyang dngos po rnams dbang phyug las skye ba med par ston pa yin no/ /'dir yang 'gro ba ni zhes bya ba 'di ni chos can yin la/ rgyu byed pa po dbang phyug ces bya ba gcig pu dang ldan pa ma yin par nges te zhes bya ba 'dis ni bsgrub par bya ba chos yin/ gzhal bya yin pa'i phyir zhes bya ba 'dis ni sgrub pa'i chos yin/ dper na dbang phyug bzhin pas zhes bya ba 'di ni dpe yin/ kun rdzob tu yang dngos po rnams de las skye ba med do zhes bya ba 'dis ni tshad ma'i 'bras bu yin par sbyar ro/ /de la 'gro ba zhes bya ba ni phyi dang nang gi 'gro ba mtha' dag ste de la bsgrub par bya ba chos rgyu byed pa po dbang phyug ces bya ba gcig pu dang ldan pa ma yin par nges te zhes bya ba dang / sgrub pa'i chos gzhal bya yin pa'i phyir zhes bya ba de gnyis yod pas de'i phyir chos can zhes bya'o/ /rgyu byed pa po dbang phyug ces bya ba gcig pu dang ldan pa ma yin par nges te zhes bya ba la/ rgyu zhes bya ba ni 'gro ba byed pa'i rgyu ste/ byed pa po dbang phyug ces bya ba gang yin pa'o/ /rgyu de yang gang zhe na/ de'i phyir byed pa po zhes bya ba smras te/ dbang phyug rgyur 'dod pa dag gis yongs su brtags pa 'gro ba mtha' dag gi byed pa po dbang phyug ces bya ba gang yin pa'o/ /de nyid bstan pa'i phyir dbang phyug ces bya ba smras te/ rgyu byed pa po gang la ming dbang phyug ces bya ba yod pa de ni rgyu byed pa po dbang phyug ces bya ba yin no/ /gcig pu dang ldan pa zhes bya ba ni 'gro ba'i rgyu byed pa po dbang phyug ces bya ba gcig pu dang ldan par brtags pa ste/ gcig pu zhes bya ba gzhan med pa'o/ / ma yin par nges te zhes bya ba ni dbang phyug rgyur 'dod pa dag gis yongs su brtags pa rgyu dbang phyug ces bya ba gcig pu de'i 'bras bu 'gro ba ma yin par nges pa ste/ de ni 'gro ba dbang phyug gi 'bras bu ma yin par bsgrub par bya ba chos yin no/ /gzhal bya yin pa'i phyir zhes bya ba ni 'gro ba rnams ni gzhal bar bya ba dang / yongs su gcad par bya ba dang / rtogs par bya ba yin pa'i phyir/ dbang phyug gi 'bras bu ma yin pa ste/ de ni 'gro ba dbang phyug gi 'bras bu ma yin par sgrub pa'i chos yin no/ /dper na dbang phyug bzhin pas zhes bya ba ni/ dper na khyed kyi gzhung las kyang / dbang phyug ni bsam gtan pa blo mnyam par gzhag pa/ rnal 'byor goms par bya ba rnams kyi gzhal bya yin no zhes zer ba la/ kho bo'i gzhung las kyang kun rdzob tu dbang phyug ces bya ba'i tshig gi don la gzhal bya nyid yod pas/ de'i phyir ji ltar dbang phyug gzhal bya yin pa'i phyir dbang phyug nyid dbang phyug nyid kyi byed pa po ma yin te/ bdag nyid la bdag nyid byed pa 'gal ba'i phyir ro zhes bya ba bzhin du dbang phyug de 'gro ba'i byed pa po yang ma yin pas/ de'i phyir 'gro ba ni rgyu byed pa po dag dbang phyug ces bya ba gcig pu dang ldan pa ma yin par nges so/ /tshad ma'i 'bras bu bstan pa'i phyir/ kun rdzob tu yang dngos po rnams de las skye ba med do zhes bya ba smras te/ re zhig don dam par lta zhog gi kun rdzob tu yang dngos po rnams dbang phyug de las skye ba med do zhes bya ba'i tha tshig go/ /dbang phyug rgyu yin na yang 'bras bu'i bdag gi bdag nyid dam/ gzhan du gyur pa'am/ gnyi gar gyur pa zhig tu 'gyur grang na gang yang rung ba zhig tu rtog na yang dgag pa sngar smras pa'i phyir dang / yod pa dang med pa skye ba yang 'gog par 'gyur ba'i phyir/ don dam par dngos po rnams dbang phyug las skye ba med do zhes bya bas ni 'di skad bstan te/ gal te dbang phyug rgyu nyid yin par 'dod na yang / ci dbang phyug de 'bras bu 'jig rten gsum gyi bdag gi bdag nyid dam de las gzhan du gyur pa'am/ gnyis kar gyur pa zhig tu brtag grang na/ de la 'bras bu'i bdag gi bdag nyid yin na ni bdag las skye ba dgag pa sngar smras pa bkag zin la/ de las gzhan du gyur pa yin na yang gzhan las skye ba dgag pa sngar smras pa bkag zin/ gnyi gar gyur pa zhig yin na yang / gnyis las skye ba dgag pa sngar smras pa bkag zin pa'i phyir/ don dam par dngos po rnams dbang phyug las skye ba med do/ /'gro ba yang yod pa'am med pa zhig dbang phyug las skye bar brtag grang na/ de yang / yod na rkyen gyis ci zhig bya/ /med na gang gi rkyen du 'gyur/ /zhes 'og nas 'gog par 'gyur ba'i phyir don dam par dngos po rnams dbang phyug las skye ba med do zhes ston to/ /de la dbang phyug rgyu yin na'ang / /zhes bya ba la sogs pas ni sngar rgyu dgag pa'i rjes su dpag pa ji skad bstan pa de'i gsal ba dang de kho na ston to/ /de la dbang phyug rgyu yin na'ang / /zhes bya ba ni gal te dbang phyug rgyur 'dod pa dag gi gzhung ltar dbang phyug dngos po rnams kyi rgyu yin du zin na yang ngo / /'bras bu'i bdag gi bdag nyid dam zhes bya ba ni rgyu dbang phyug de 'bras bu 'jig rten gsum gyi bdag gi bdag nyid yin nam zhes gal gzung ba yin no/ /gzhan du gyur pa'am zhes bya ba ni yang na rgyu dbang phyug de 'bras bu 'jig rten gsum las gzhan du gyur pa zhig yin nam zhes gal gzung ba yin no/ /gnyi gar gyur pa zhig tu 'gyur grang na zhes bya bas ni yang na rgyu dbang phyug de 'bras bu 'jig rten gsum gyi bdag gi bdag nyid kyang yin la/ gzhan du gyur pa yang yin pa zhig tu 'gyur grang na zhes gal gzung ba yin no/ /gang yang rung ba zhig tu rtog na yang zhes bya ba ni gal snga ma gsum las gang yang rung ba gcig tu rtog na yang ngo / /de ltar rtog na skyon ci yod ce na/ de'i phyir dgag pa sngar smras pa'i phyir zhes bya ba smras te/ de la 'bras bu'i bdag gi bdag nyid yin na ni bdag las skye ba dgag pa sngar smras pa'i phyir te/ 'bras bu'i bdag gi bdag nyid yin par gyur na rgyu dbang phyug de'i 'bras bu 'jig rten gsum gyi bdag nyid yin pas/ de ltar na dbang phyug las dbang phyug skye ba'am/ 'jig rten gsum las 'jig rten gsum skye bar 'gyur bas de'i dgag pa ni sngar bdag las skye ba med par dgag pa'i skabs su/ don dam par nang gi skye mched rnams bdag las skye ba med par nges te yod pa'i phyir/ dper na shes pa yod pa nyid bzhin no zhes bshad pa'i rigs pas 'dir yang don dam par dbang phyug bdag las skye ba med par nges te yod pa'i phyir/ dper na shes pa yod pa nyid bzhin no zhes bya ba'am/ don dam par 'jig rten gsum bdag las skye ba med par nges te yod pa'i phyir/ dper na shes pa yod pa nyid bzhin no zhes bya bar sbyar ro/ /gzhan du gyur pa yin na yang / gzhan las skye ba dgag pa sngar smras pa'i phyir te/ rgyu las 'bras bu gzhan du gyur pa yin par gyur na rgyu dbang phyug de la 'bras bu 'jig rten gsum las gzhan du gyur pa yin pas/ de ltar na dbang phyug las 'jig rten gsum skye ba'am/ 'jig rten gsum gyi rkyen dbang phyug yin par 'gyur bas de'i dgag pa yang sngar gzhan las skye ba med par dgag pa'i skabs su don dam par nang gi skye mched rnams de dag gi rkyen gzhan las skye ba med de gzhan yin pa'i phyir/ dper na bum pa bzhin no zhes bya ba dang / yang na don dam par gzhan brjod par 'dod par mig la sogs pa nang gi skye mched 'grub par byed pa dag rkyen ma yin par nges te gzhan yin pa'i phyir/ dper na rgyu spun la sogs pa bzhin no zhes bshad pa'i rigs pas 'dir yang don dam par 'jig rten gsum de dag gi rkyen dbang phyug gzhan las skye ba med de gzhan yin pa'i phyir/ dper na bum pa bzhin no zhes bya ba dang / yang na don dam par gzhan brjod par 'dod pa 'jig rten gsum 'grub par byed pa dbang phyug rkyen ma yin par nges te gzhan yin pa'i phyir/ dper na rgyu spun la sogs pa bzhin no zhes bya bar sbyar ro/ /gnyi gar gyur pa yin na yang gnyis las skye ba dgag pa sngar smras pa'i phyir te/ 'jig rten gsum gyi nus pa ni dbang phyug yin pas/ nus pa las skye ba ni bdag las skye ba yin la/ 'jig rten gsum gyi gsal ba ni dbang phyug las gzhan yin pas gsal ba las skye ba ni gzhan las skye ba yin no zhes zer na de'i dgag pa yang sngar gnyis las skye ba med pa dgag pa'i skabs su/ phyogs gnyi gar bstan pa'i sgrub pa dag gis gtad khongs su chud par 'gyur ba'i phyir dang / gnyis las skye ba med par ston pa'i rjes su dpag pa med pa'i phyir yang ngo zhes bya bar dgongs so zhes bshad pa'i rigs pas/ 'dir dbang phyug las 'jig rten gsum gyi nus pa skye ba med de yod pa'i phyir/ dper na shes pa yod pa nyid bzhin no zhes bya ba dang / de bzhin du dbang phyug las 'jig rten gsum gyi gsal ba yang skye ba med de gzhan yin pa'i phyir/ dper na bum pa bzhin no zhes bya ba dang / yang na don dam par gzhan brjod par 'dod pa dbang phyug rkyen ma yin par nges te gzhan yin pa'i phyir/ dper na rgyu spun la sogs pa bzhin no zhes bya bar sbyar ro// //bam po bcu bzhi pa/ yod pa dang med pa skye ba yang 'gog par 'gyur ba'i phyir zhes bya ba la sogs pas ni sngar 'bras bu dgag pa'i rjes su dpag pa ji skad bstan pa de gsal ba dang de kho na ston to/ /'di skad bstan te/ pha rol po la 'di skad ces/ ci 'gro ba yod pa dbang phyug las skye bar 'dod dam/ 'on te med pa dbang phyug las skye bar 'dod ces dri bar bya'o/ /de skad ces dris pa na/ gal te 'gro ba yod pa dbang phyug las skye'o zhes zer na/ de'i phyir yod pa skye ba yang 'gog par 'gyur ba'i phyir zhes bya ba smras te/ 'og nas/ yod na rkyen gyis ci zhig bya/ zhes 'byung bas/ 'gro ba yod pa ni grub pa yin pa'i phyir te/ rkyen dbang phyug gis ci zhig bya zhes ston par 'gyur bas/ 'gro ba yod pa ni rkyen dbang phyug las skye ba med do/ /gal te 'gro ba med pa dbang phyug las skye'o zhes zer na/ de'i phyir med pa skye ba yang 'gog par 'gyur ba'i phyir zhes bya ba smras so/ /'og nas/ med na gang gi rkyen du 'gyur/ /zhes 'byung bas/ 'gro ba med na dbang phyug de gang gi rkyen du 'gyur te/ dper na ri bong gi rwa med pa'i rkyen du gang yang mi 'gyur ba bzhin no zhes ston par 'gyur bas/ 'gro ba med pa yang rkyen dbang phyug las skye ba med do/ /don dam par dngos po rnams dbang phyug las skye ba med do zhes bya ba ni rgyu dgag pa dang 'bras bu dgag pa'i rjes su dpag pa ji skad bstan pa de gnyi ga'i mjug bsdu ba yin no/ /'dir don dam par dngos po rnams dbang phyug las skye ba med do zhes mjug bsdu ba byas pa de'i bsam pa gang yin/ re zhig kun rdzob tu dngos po rnams dbang phyug las skye bar khas len tam zhe na/ de'i phyir 'dir don dam par dngos po rnams dbang phyug las skye ba med do zhes 'gog par byed ce na/ de'i phyir ci ste sems can dang snod du bgrang ba'i 'jig rten sna tshogs kyi rgyu'i las dbang phyug ces bya ste/ gnas pa dang / 'byung ba dang / 'jig pa dang / bde ba dang / sdug bsngal dang / yar skye ba dang / mar dbri ba skyed par byed pa'i phyir ro zhe na yang / tha snyad kyi phyogs la ni grub pa la sgrub pa yin no zhes bya ba smras so/ /'di skad bstan te/ ci ste dbang phyug rgyur 'dod pa dag kun rdzob tu sems can dang snod du bgrang ba'i 'jig rten sna tshogs 'grub pa'i rgyu'i las dge ba dang / mi dge ba dbang phyug ces bya ste/ ci'i phyir zhe na/ 'jig rten gnas pa dang / 'byung ba dang / 'jig pa dang / bde ba dang / sdug bsngal ba dang / yar skye ba dang / mar 'bri ba bskyed pa'i phyir ro zhe na yang / kun rdzob kyi phyogs la las dge ba dang / mi dge ba'i rgyus 'jig rten sna tshogs pa 'grub par sangs rgyas pa'i gzhung la yang grub pas/ de ni grub pa la sgrub pa'i skyon chags pa yin no zhes ston to/ /de la ci ste zhes bya ba'i sgra ni dbang phyug rgyur 'dod pa dag gi dogs pa bsu ba'i tshig yin no/ /sems can du bgrang ba'i 'jig rten gyis ni 'gro ba drug tu skye ba'i 'jig rten gang yin pa gzung ngo / /snod du bgrang ba'i 'jig rten gyis ni rlung dang chu dang gser gyi dkyil 'khor dang / sems can dmyal ba dang / gling dang ri rab la sogs pa ri rnams dang / 'dod pa na spyod pa dang / gzugs na spyod pa'i gzhal med khang gi mtshan nyid snod kyi 'jig rten gang yin pa gzung ngo / /sems can dang snod du bgrang ba'i 'jig rten de'i sna tshogs zhes bya ba ni kha dog dang dbyibs dang tshad kyi mos pas mtshan nyid mi 'dra ba gang yin pa'o/ /sna tshogs de'i rgyu'i las zhes bya ba sna tshogs de mngon par 'grub pa'i rgyu sems can de dag nyid kyi spyi mthun gyi las dge ba dang mi dge ba gang yin pa'o/ /las de nyid dbang phyug ces bya ste/ ci'i phyir zhe na/ gnas pa la sogs pa skyed par byed pa'i phyir ro zhes bya bar sbyar ro zhes de la gnas pa zhes bya ba ni bskal pa bar ma nyi shur 'jig rten gnas pa'i mtshan nyid do/ /'byung ba zhes bya ba ni dang po rlung gi dkyil 'khor 'byung ba nas sems can dmyal ba 'byung ba'i bar du 'jig rten chags pa'i mtshan nyid do/ /'jig pa zhes bya ba 'di lta ste/ 'jig pa'i bskal pa 'byung ba'i tshe/ sems can dmyal ba la sogs pa med pas snod kyi 'jig rten 'jig pa'o/ /bde ba zhes bya ba ni lha dang mi'i bde ba'o/ /sdug bsngal zhes bya ba ni 'khor ba'i sdug bsngal lo/ / yar skye ba zhes bya ba ni skye dgu'i tshe lo bcu pa nas lo brgyad khri la thug pa'i bar du yar skye ba'o/ /mar 'bri ba zhes bya ba ni bskal pa dang po la skye dgu'i tshe lo grangs dpag tu med pa nas lo bcu pa la thug gi bar du mar 'bri ba'o/ /skyed par byed pa'i phyir ro zhes bya ba ni 'jig rten gnas pa la sogs pa ji skad smos pa de dag las kyis skyed par byed pa'i phyir/ sems can dang snod du bgrang ba'i phyir 'jig rten sna tshogs kyi rgyu'i las gang yin pa de nyid dbang phyug yin no zhe na yang ngo / /de skad ces zer na/ de ni tha snyad kyi phyogs la ni grub pa la sgrub pa yin no zhes bya ba smras te/ 'di ltar 'dir byed pa po nyid kyi phyir ni sangs rgyas pa la yang las kyi dbang nyid yin par grub pa'i phyir ro/ /don dam par ni ma yin te zhes bya ba ni bsams te smras pa yin te/ sangs rgyas pa la tha snyad kyi phyogs la ni sems can dang / snod du bgrang ba'i 'jig rten sna tshogs kyi rgyu'i las dbang phyug yin par grub pa yin gyi/ don dam par ni ma yin te/ don dam par ni las kyi skye ba yang khas ma blangs pa'i phyir ro zhes bya bar sbyar ro/ /de ltar yang 'phags pa dkon mchog brtsegs pa'i mdo las/ gang la las med pa dang las kyi 'bras bu med pa de ni 'phags pa rnams kyi rigs yin la/ 'phags pa rnams kyi rigs gang yin pa'i rigs de la ni lus kyi las mi byed/ ngag gi las mi byed/ yid kyi las mi byed do zhes ji skad gsungs pa lta bu'o/ /gzhan gyis kyang kho bos sangs rgyas pa la dga' bas las kyi ming dbang phyug ces bya'o zhes smra bar mi nus te/ 'di ltar gzhan dbang phyug las yin par mi 'dod pa'i phyir ro/ /gzhan yang khyod kyis thog ma med pa'i dus kyi las dang / nyon mongs pa'i mtshan nyid ji skad smras pa'i rgyu yin pa de ltar yongs su ma shes pas/ bskal pa'i dang po nas dbang phyug 'jig rten gsum gyi byed pa po nyid du brtags la/ khyod bdag ces bya ba ni ma byas par 'dod pas de'i phyir dbang phyug thams cad kyi byed pa po nyid ma yin no/ /bdag de la yang blo dang / bde ba dang / sdug bsngal dang / 'dod pa dang / zhe sdang dang / chos dang / chos ma yin pa la sogs pa'i yon tan dag kyang yod la/ dbang phyug lus gang gis bde ba dang sdug bsngal dmigs pa'i lus de yang chos dang chos ma yin pa'i rgyus mngon par grub pa yin pas/ de'i phyir ji ltar dbang phyug dang bdag gi lus chos dang chos ma yin pa'i rgyu las skye ba de bzhin du/ sems can thams cad kyi bskal pa dang po'i lus kyang sngon byas pa'i chos dang chos ma yin pa'i rgyu las 'byung bar 'gyur te/ bde ba dang sdug bsngal 'byung ba'i rgyu yin pa'i phyir/ dper na da ltar sems can rnams kyi lus gang yin pa bzhin no/ /gzhan yang dbang phyug gi yon tan brgyad smras pa gang yin pa de yang ci bsod nams kyis thob bam/ 'on te bsod nams med pas thob/ /gal te bsod nams kyis de thob na ni des na bsod nams la rag lus pa'i phyir/ dbang phyug de 'jig rten gsum skye ba'i rgyu ma yin te/ dper na sems can bsod nams dang ldan pa gzhan bzhin no/ /'on te bsod nams med pas de 'thob par 'dod na ni/ des na dbang phyug rgyu ma yin te/ dper na bsod nams med pa gzhan bzhin no/ /gzhan yang 'di la khyod kyi dbang phyug de ci shes pa yod dam/ 'on te shes pa med pa yin/ /gal te shes pa yod par 'dod na ni/ des na sa dang / ri dang / lung dang / an+da rnyil dang / bong ba dang / shing la sogs pa yo byad rnams kyang shes pa yod pa nyid yin par thal bar 'gyur te/ 'di ltar rgyu'i ngo bo nyid kho na bzhin du 'bras bu 'byung bar 'gyur ba'i phyir te/ dper na a mra sa bon mngar po las a mra'i 'bras bu mngar po kho na skye bar mthong ba dang / sa bon skyur bo las 'bras bu skyur po kho na skye bar mthong ba dang / ku ba'i sa bon kha ba las ku ba'i 'bras bu kha ba kho na skye bar 'gyur ba lta bu yin no/ /sa dang / ri dang / lung dang / an+da rnyil dang / bong ba dang / shing la sogs pa de dag ni shes pa yod pa nyid ma yin pas de'i phyir dbang phyug ni de dag gi rgyu ma yin no/ /ci ste shes pa yod pa nyid ma yin par 'dod na ni/ des na mtshan nyid las rgyu'i yon tan sngon du 'gro ba ni 'bras bu'i yon tan yin par mthong bas/ des na 'gro ba drug tu skyes pa'i sems can rnams kyang shes pa yod pa nyid ma yin par 'gyur bas de'i phyir dbang phyug de dag gi rgyu ma yin no/ /gzhan yang gal te dbang phyug 'jig rten gsum gyi rgyu yin par 'dod na 'jig rten gsum yang dbang phyug gi yon tan brgyad thob par 'gyur ba'i rigs na/ /'jig rten gsum gyis dbang phyug gi yon tan brgyad dang ldan par ma mthong bas de'i phyir dbang phyug 'gro ba'i byed pa po ma yin no/ /gzhan yang 'di na las dge ba dang / mi dge ba gang yin pa de ci dbang phyug gis byed dam/ 'on te 'jig rten gyis byed par 'dod/ gal te dbang phyug gis byed par 'dod na ni de lta na dbang phyug de yang sems can dmyal ba'i sdug bsngal nyams su myong bar 'gyur ro/ /gal te 'jig rten gyis byed par 'dod na ni de lta na yang dbang phyug gis byas pa chud za ba dang 'jig rten ma byas pa dang phrad par 'gyur ro/ /ci ste dbang phyug las kyi byed pa po nyid yin par mi 'dod na/ 'o na ni dbang phyug thams cad kyi byed pa po nyid ma yin pas des na dbang phyug las kyi dngos po'i byed pa po ma yin la/ de bzhin du dbang phyug dngos po gzhan gyi byed pa po yang ma yin par 'gyur ro/ /gal te dbang phyug gi tshig gis 'jig rten las byed na ni/ de ltar na rngon pa la sogs pas byas pa'i las kyis rngon pa la sogs pa ngan song du 'gro ba dang 'dra bar/ dbang phyug kyang ngan song du 'gro bar thal bar 'gyur ro/ / gzhan yang gal te dbang phyug thams cad kyi rgyu yin na dbang phyug de sdug bsngal gyi rgyu yang yin la/ dbang phyug ni rtag par 'dod pas/ rgyu dang 'dra ba'i 'bras bu 'byung ba'i phyir/ des na sdug bsngal yang rtag par 'gyur ba'i phyir/ sdug bsngal gyi mtha' med par 'gyur te/ dper na tsha ba'i rgyu me 'bar na tsha ba'i ngo bo nyid rgyun mi 'chad pa bzhin no/ /gzhan yang 'di la dbang phyug gcig pur 'dod na de sna tshogs su ji ltar 'gyur te/ des na 'jig rten gsum yang gcig pa nyid dang / cha shas med pa nyid dang / cha phra ba nyid du 'gyur ba zhig na/ de lta ma yin pas/ de'i phyir dbang phyug 'gro ba'i byed pa po ma yin no/ /gal te dbang phyug ni gcig pu kho na yin yang de'i 'dod pa sna tshogs yin pas/ 'jig rten gsum sna tshogs nyid du gyur to zhes zer na/ de'i phyir smras pa gang la 'dod pa sna tshogs mthong ba de la gcig pa nyid med de/ dper na skye bo'i tshogs bzhin pas de'i phyir dbang phyug kyang byed pa po nyid du mi 'gyur ro/ /gzhan yang dbang phyug rtag pa dang / cha phra ba dang cha shas med pa nyid du 'dod na rgyu dang 'dra bar 'bras bu 'byung bas des na 'jig rten gsum yang rtag pa dang / cha phra ba dang cha shas med par 'gyur ba'i rigs na/ de lta ma yin pas de'i phyir dbang phyug 'gro ba'i byed pa po ma yin no/ /gzhan yang dbang phyug thams cad du song bar 'dod na 'jig rten gsum mang ba'i phyir dbang phyug kyang mang po nyid du 'gyur bas des na gcig pa nyid med do/ /ci ste gcig pa nyid du 'dod na ni thams cad du song ba nyid med do/ /gzhan yang dbang phyug ni cha phra bar 'dod la/ thams cad du song ba ni rags pa dag yin na ji ltar dbang phyug dbang thams cad du song ba yin/ ci ste thams cad du song ba yin na ni ji ltar cha phra ba yin/ nam mkha' bzhin du gcig yin yang thams cad du song ba nyid du ni mi rung ste/ 'di ltar dngos po rnams nam mkha' dang mnyam pa nyid yin na ma skyes pa'i phyir bong bu'i rwa bzhin no/ /gzhan yang dbang phyug gis rtsed mo'i don du 'jig rten 'byin par byed dam/ rgyu med par 'byin par byed grang na/ gal te rtsed mo'i don du 'jig rten 'byin par byed na ni dga' ba skye bas des na dga' ba la rag lus pa'i phyir dbang phyug ma yin no/ /gzhan yang dbang phyug de'i dga' ba sems can dmyal ba rnams kyi gcad pa dang / gshegs pa dang / bsreg pa dang / btso ba la sogs pa'i sdug bsngal gyis gzir ba dang / dud 'gro'i skye gnas su skyes pa rnams gcig la gcig za ba la sogs pa'i 'jigs pa dag gis bde ba ma thob pa dang / /yi dags rnams kyi bkres pa dang skom pa la sogs pas nyam thag par gyur pa dang / mi rnams kyi skye ba dang / rga ba dang / na ba dang / 'chi ba dang / sdug pa dang bral ba dang / mi sdug pa dang phrad pa dang / mya ngan dang / sdug bsngal gyis nyen pa dag phyung bas skye bar 'gyur na ni de srin po yin pas ji ltar zhi bar 'gyur/ 'on te de'i dga' ba nyid snying rje las skye bar 'gyur na ni snying rje la de lta bu'i sdug bsngal 'byin pa med do/ /gzhan yang phyug po dang / dbul po dang / nad med pa dang / nad mang ba dang / gtong phod pa dang / ser sna can dang / tshe thung ba dang / tshe ring ba dang / blun po dang / mkhas pa dang / chos dang / tshul khrims la sogs pa'i dbye bas 'jig rten 'byin par byed pa la dga' ba dang snying rje med do/ /yang na dbang phyug rnams kyi kun du spyod pa de lta bu yin te/ dper na rgyal po dang / dpon po dag gal te ma legs pa byed pa na de'i g.yog 'khor rnams ma nogs so zhes zer zhing / de sus kyang zlog par mi byed pa bzhin du khyod kyang de dang 'dra ba yin no/ /gzhan yang 'di ni byed pa po dang bcas pa gang yin pa de ni dpag tu yod par snang ste/ dper na rdza mkhan gyis byas pa'i bum pa ni 'di snyed do/ /tha ga pas btags pa'i snam bu ni 'di snyed do zhes bya ba lta bu yin na/ 'jig rten gsum ni dpag tu med pa yin pas/ de'i phyir dbang phyug ni 'jig rten dpag tu med pa'i byed pa po ma yin no/ /sems can mtha' yas pa sna tshogs kyi sems bskyed pa'i las sna tshogs ni sems can dang snod kyi 'jig rten sna tshogs kyi rgyu nyid du rung ngo / /gzhan yang dbang phyug la dad pa rnams sa dang chu dang me dang rlung dang / mchod sbyin bya ba dang / nam mkha' dang / zla ba dang / nyi ma zhes bya ba gzugs gsang ba brgyad du rtog cing de dag la phyag 'tshal bar byed pas/ de lta na chu dag gi nang du bshang ba dang / gci ba dang / ljan ljin 'dor du yang mi rung la/ rkub dang rkang pa bkru ba yang mi rung ba nyid do/ /de bas na gang dag chu lha la phyag 'tshal ba par sig rnams kyang sla'o/ /gzhan yang dbang phyug des ni ma 'ongs pa yongs su mi shes pa yin te/ 'di ltar nyi ma dang zla ba'i gzugs ni rang gi lus yin te/ sgra gcan 'dzin ni nyi ma dang zla ba'i gzugs za bar byed pas de'i phyir sgra gcan zin sprul par mi bya zhing / dbang phyug la dad pa rnams sprul par bya ba dang / sangs rgyas pa rnams kyang sprul par mi bya ba'i rigs na/ de ma shes pas sgra gcan zin pa dang / sangs rgyas pa rnams kyang sprul pa byas pa'i phyir ro/ /gang gi tshe lha ma yin rnams kyis lha rnams zil gyis gnon par byed pa de'i tshe na dbang phyug 'di lha ma yin gyi phyogs byed par 'gyur te/ ji skad du/ khro ba bdun cu pa las/ gal te de'i blos lha min rnams 'jug na/ lha rnams kyi ni dgra bo nyid du 'gyur/ /de bzhin gshegs pa mchod par mi bya na/ /de yis dge bsnyen gyis kyang ci zhig bya/ /zhes smras pa lta bu'o/ /zhar la bshad pas chog gi /de ni rgyu med pa dngos por 'gyur ba skyes bu rgyur 'dod pa dag gi grub pa'i mtha' dang / de las dngos po rnams skye ba med par dgag pa bstan par bya ste/ de'i phyir skyes bu rgyur 'dod pa dag kyang skyes bu nyid 'gro ba mtha' dag skye ba'i rgyu yin no zhes dam bcas nas/ ba ni ba thag rnams kyi bzhin/ /chu shel chu rnams kyi bzhin dang / /blag sha yal ga rnams kyi bzhin/ /de ni lus can kun gyi rgyu/ /de bzhin du skyes bu nyid ni byung ba gang yin pa dang / 'byung ba gang yin pa 'di thams cad kyi'o zhes bya ba la sogs pa dang / de bzhin du de ni g.yo bar byed pa dang / de ni mi g.yo bar byed pa dang / de ni thag ring ba dang / de ni thag nye ba dang / de ni bar ma dang / de ni gnyi ga dang / de ni phyi rol thams cad kyi'o zhes bya ba la sogs pa'o zhe na zhes bya ba smras te/ des ni skyes bu rgyur 'dod pa dag gi grub pa'i mtha' bstan to/ /de la skyes bu zhes bya ba ni 'jig rten gsum gang bas na skyes bu'o/ /yang na lus kyi grong khyer na gnas pas skyes bu'o/ /skyes bu de rgyur 'dod pa dag ces bya ba ni gang dag la skyes bu rgyur 'dod pa yod pa de dag ni skyes bu rgyur 'dod pa dag ste/ 'di lta ste/ rig byed kyi mtha' smra ba dag go/ /de'i phyir de dag kyang skyes bu nyid 'gro ba mtha' dag skye ba'i rgyu yin no zhes dam bcas nas zhes bya ba smras te/ dbang phyug rgyur 'dod pa dag dbang phyug nyid 'gro ba mtha' dag skye ba'i rgyu yin no zhes dam 'cha' ba 'ba' zhig tu ma zad kyi/ skyes bu rgyur 'dod pa dag kyang skyes bu nyid 'gro ba mtha' dag skye ba'i rgyu yin no zhes dam 'cha' bar byed pas/ de'i phyir skyes bu rgyur 'dod pa dag kyang skyes bu nyid 'gro ba mtha' dag skye ba'i rgyu yin no zhes dam bcas nas zhes bya ba smos so/ /skyes bu rgyur 'dod pa de dag kyang rig byed ces bya ba'i lung gis skyes bu de 'gro ba mtha' dag gi byed pa po nyid du sgrub par byed pas/ de'i phyir de dag gi grub pa'i mtha' bstan pa'i phyir/ ba ni ba thag rnams kyi bzhin/ /chu shel chu rnams kyi bzhin dang / /blag sha yal ga rnams kyi bzhin/ /de ni lus can kun gyi rgyu/ /zhes bya ba la sogs pa smras so/ /de la/ ba ni ba thag rnams kyi bzhin/ /zhes bya ba ni skyes bu rgyur 'dod pa'i dpe ste/ ba zhes bya ba ni srog chags kyi rigs pa zhes bya ba lte ba nas ba thag ces bya ba ba spu 'byung ba gang yin pa'o/ /ba thag rnams kyi bzhin zhes bya ba ni dper na srog chags kyi rigs pa zhes bya ba de rang gi lte ba nas 'byung ba ba thag ces bya ba rnams kyi rgyu yin te/ ba thag de dag gis ba rgya byed cing der 'gro ba de bzhin du skyes bu yang 'gro ba gnas pa dang / rgyu ba mtha' dag skye ba'i rgyu yin no zhes zer ro/ /chu shel chu rnams kyi bzhin dang / /zhes bya ba yang dper na nor bu chu shel zhes bya ba zla ba'i 'od zer gyis phog na chu rnams 'byung ba'i rgyu yin pa bzhin du/ skyes bu yang 'gro ba gnas pa dang rgyu ba mtha' dag skye ba'i rgyu yin no zhes zer ro/ / blag sha yal ga rnams kyi bzhin/ /zhes bya ba yang dper na shing blag sha zhes bya ba n+ya gro d+ha zhes bya ba de yal ga thur du skye ba rnams kyi rgyu yin pa de bzhin du/ skyes bu yang 'gro ba gnas pa dang rgyu ba mtha' dag skye ba'i rgyu yin no zhes zer ro/ /de ni lus can kun gyi rgyu/ /zhes bya ba ni dpe gong ma gsum gyis mtshon pa'i don te/ de ni zhes bya ba ni skyes bu de ni'o/ /lus can kun gyi rgyu zhes bya ba ni skyes bu de ni lus can 'gro ba gnas pa dang / rgyu ba byung ba dang / 'byung ba dang / g.yo ba dang / mi g.yo ba dang / thag ring ba dang / thag nye ba dang / bar ma dang / gnyi ga dang / phyi rol thams cad kyi skye ba'i rgyu yin no zhes bya ba'i tha tshig go/ /de bzhin du skyes bu nyid ni byung ba gang yin pa dang / 'byung ba gang yin pa de thams cad kyi'o zhes bya ba la sogs pa dang zhes bya ba ni/ de ni lus can kun gyi rgyu/ /zhes ji skad smras pa de nyid bye brag tu bshad pa yin no/ /de la de bzhin du zhes bya ba ni/ ba ni ba thag rnams kyi bzhin/ /zhes bya ba la sogs pa dpe rnam pa gsum ji skad du smos pa de bzhin du'o/ /skyes bu nyid ni zhes bya ba ni skyes bu rgyur 'dod pa dag gis brtags pa'i skyes bu nyid ni'o/ /byung ba gang yin pa zhes bya ba ni dngos po 'das pa'i dus na byung bar gyur pa gang yin pa'o/ /'byung ba gang yin pa zhes bya ba ni dngos po ma 'ongs pa'i dus na 'byung bar 'gyur ba gang yin pa'o/ /'di thams cad kyi don zhes bya ba ni dngos po byung ba gang yin pa dang / 'byung ba gang yin pa 'di thams cad kyi skye ba'i rgyu ni skyes bu nyid yin no zhes zer ba yin no/ /sogs pa zhes bya ba'i sgras ni rig byed las skyes bu ni 'di thams cad la gnas so zhes 'byung ba la sogs pa dag bsdu'o/ /de bzhin du de ni g.yo bar byed pa dang / de ni mi g.yo bar byed pa dang / de ni thag ring ba dang / de ni thag nye ba dang / de ni bar ma dang / de ni gnyi ga dang / de ni phyi rol thams cad kyi'o zhes bya ba la sogs pa'o zhe na zhes bya ba yang / de ni lus can kun gyi rgyu/ /zhes ji skad smras pa de nyid bye brag tu bshad pa gzhan yin no/ /de la de bzhin du zhes bya ba yang / ba ni ba thag rnams kyi bzhin/ /zhes bya ba la sogs pa dpe rnam pa gsum ji skad smos pa de bzhin du'o/ /de ni zhes bya ba ni skyes bu de ni'o/ /g.yo bar byed pa zhes bya ba ni rgyu bar byed pa'o/ /mi g.yo bar byed pa zhes bya ba ni gnas par byed pa'o/ /thag ring ba zhes bya ba ni sems can dang snod kyi 'jig rten rnams kyi phan tshun thag ring ba'o/ /thag nye ba zhes bya ba ni sems can dang snod kyi 'jig rten de dag gi phan tshun thag nye ba'o/ /bar ma zhes bya ba ni de dag gi dbus na gnas pa'o/ /gnyi ga zhes bya ba ni de dag gi don gnyi ga dang ldan pa'o/ /phyi rol zhes bya ba ni ma zin pa'o/ /thams cad kyi'o zhes bya ba ni dngos po g.yo bar byed pa dang / mi g.yo bar byed pa dang / thag ring ba dang / thag nye ba dang / bar ma dang / gnyi ga dang / phyi rol thams cad kyi skye ba'i rgyu ni skyes bu nyid yin no zhes zer ba yin no/ /sogs pa zhes bya ba'i sgras ni rig byed las/ chen po gnyis mdog mun mdun gnas/ /skyes bu de ni kho bos rig /de rtogs 'chi ba'i 'jigs med de/ /thar phyir de las lam gzhan med/ /ces 'byung ba dang / gzhan yang / rig byed las ni mi smra gang / /rig byed las ni mi snang gang / / thams cad med par brjod bya ste/ /rig byed 'dra ba'i thos pa med/ /ces 'byung ba la sogs pa bsdu ste/ de nas gang gi phyir rig byed las skyes bu ni 'gro ba'i byed pa po yin no zhes 'byung bas de'i phyir/ skyes bu nyid 'gro ba mtha' dag skye ba'i rgyu yin no zhes zer ro/ /de skad ces zer ba de'i lan du 'dir 'grel pa byed pa nyid kyis/ 'dir dgag pa ni dbang phyug rgyur 'dod pa dag gi bzhin du bya'o zhes bya ba smras te/ des ni skyes bu las dngos po rnams skye ba med par dgag pa bstan to/ /de la 'dir zhes bya ba ni skyes bu rgyur 'dod pa dgag pa'i skabs 'dir ro/ / dgag pa ni zhes bya ba ni skyes bu las dngos po rnams skye ba med par dgag pa ni'o/ /dbang phyug rgyur 'dod pa dag gi bzhin du bya'o zhes bya ba ni 'dir skyes bu rgyur 'dod pa dag gi dgag pa yang sngar dbang phyug rgyur 'dod pa dag gi dgag pa ji skad bstan pa bzhin du sbyar bar bya'o/ / des na 'di skad bstan te/ de ni dam bcas pa tsam ste/ /skyes bu ni kun rdzob tu yang 'gro ba mtha' dag skye ba'i rgyu yin par mi rung ste/ la la'i dga' ba dang yongs su gdung ba'i rgyu yin pa'i phyir dper na ba lang rdzi bzhin no/ /yang na 'gro ba ni skyes bu zhes bya ba gcig pu dang ldan pa ma yin par nges te gzhal bya yin pa'i phyir/ dper na skyes bu bzhin pas kun rdzob tu yang dngos po rnams de las skye ba med do/ /skyes bu rgyur yin yang 'bras bu'i bdag gi bdag nyid dam/ gzhan du gyur pa'am/ gnyi gar gyur pa zhig tu 'gyur grang na/ gang yang rung ba zhig tu rtogs na yang dgag pa sngar smras pa'i phyir dang / yod pa dang med pa skye bar yang 'gog par 'gyur ba'i phyir/ don dam par dngos po rnams skyes bu las skye ba med do/ /ci ste sems can dang snod du bgrang ba'i 'jig rten sna tshogs kyi rgyu'i las skyes bu zhes bya ste/ gnas pa dang / 'byung ba dang / 'jig pa dang / bde ba dang / sdug bsngal dang / yar skye ba dang / mar 'bri ba skyed par byed pa'i phyir ro zhe na yang / tha snyad kyi phyogs la ni grub pa la sgrub pa yin no/ /don dam par ni ma yin te/ don dam par ni las kyi skye ba yang khas ma blangs pa'i phyir ro zhes brjod par bya'o/ /lhag pa yang brjod par bya ste zhes bya ba la sogs pas ni/ 'dir skyes bu rgyur 'dod pa dag gi dgag pa dbang phyug rgyur 'dod pa dag gi bzhin du bya ba 'ba' zhig tu yang ma zad de/ tshad ma lhag pa gzhan yang brjod par bya ste zhes bya bar sbyar ro/ /lhas byin gyi bdag ni lhas byin gyi lus dang dbang po'i rgyu ma yin te bdag yin pa'i phyir/ dper na mchod sbyin gyi bdag bzhin no zhes bya ba dang / 'dir lhas byin gyi bdag ni zhes bya ba 'di ni chos can yin la/ lhas byin gyi lus dang dbang po'i rgyu ma yin te zhes bya ba 'di ni bsgrub par bya ba chos yin/ bdag yin pa'i phyir zhes bya ba 'di ni sgrub pa'i chos yin/ dper na mchod sbyin gyi bdag bzhin no zhes bya ba 'di ni dpe yin par sbyar ro/ /de la lhas byin gyi bdag ni zhes bya ba 'di ni/ lhas byin gyis skyes bu'i rang bzhin shes pa yod pa nyid ces bya ba gang yin pa'o/ /lhas byin gyi lus dang dbang po'i rgyu ma yin te zhes bya ba ni/ lhas byin gyi bdag de lhas byin gyi lus kyi rgyu yang ma yin la/ lhas byin gyi dbang po rnams kyi rgyu yang ma yin te zhes bsgrub par bya ba yin no/ /bdag yin pa'i phyir zhes bya ba ni bdag yod du zin kyang de ni lhas byin gyi lus dang dbang po'i rgyu ma yin pa'i phyir ro/ /dper na mchod sbyin gyi bdag bzhin no zhes bya ba ni dper na kun rdzob tu mchod sbyin gyi bdag ni mchod sbyin rang nyid kyi lus dang dbang po'i rgyur 'dod kyi/ lhas byin gyi lus dang dbang po'i rgyur mi 'dod pa de bzhin du/ lhas byin gyi bdag kyang lhas byin gyi lus dang dbang po'i rgyu ma yin no zhes bya ba'i tha tshig go/ /yang na mchod sbyin gyi lus dang dbang po'i tshogs kyi byed pa po ni mchod sbyin gyi bdag ma yin te/ bde ba dang / sdug bsngal dang / shes pa skye ba'i rgyu yin pa'i phyir/ dper na lhas byin gyi lus dang dbang po'i tshogs bzhin no zhes bya ba 'di yang tshad ma rnam pa gcig yin no/ /'dir yang mchod sbyin gyi lus dang dbang po'i tshogs kyi zhes bya ba 'di ni chos can yin la/ byed pa po ni mchod sbyin gyi bdag ma yin te zhes bya ba 'di ni bsgrub par bya ba chos yin/ bde ba dang / sdug bsngal dang / shes pa skye ba'i rgyu yin pa'i phyir zhes bya ba 'di sgrub pa'i chos yin/ dper na lhas byin gyi lus dang dbang po'i tshogs bzhin no zhes bya ba 'di ni dpe yin par sbyar ro/ /de la mchod sbyin gyi lus dang dbang po'i tshogs kyi zhes bya ba ni/ mchod sbyin gyi lus kyi tshogs yan lag dang yan lag can thams cad dang mchod sbyin gyi dbang po'i tshogs mig la sogs pa dbang po gzugs can thams cad kyi'o/ /byed pa po'i mchod sbyin gyi bdag ma yin te zhes bya ba ni/ mchod sbyin gyi lus kyi tshogs dang dbang po'i tshogs kyi skye ba'i rgyu ni mchod sbyin gyi bdag ma yin te zhes bsgrub par bya ba yin no/ /bde ba dang / sdug bsngal dang / shes pa skye ba'i rgyu yin pa'i phyir zhes bya ba ni mchod sbyin gyi lus dang dbang po'i tshogs ni bde ba skye ba'i rgyu yin pa'i phyir dang / sdug bsngal skye ba'i rgyu yin pa'i phyir dang / shes pa skye ba'i rgyu yin pa'i phyir/ de dag gi byed pa po ni mchod sbyin gyi bdag ma yin no/ /de la gang gi tshe mchod sbyin gyi lus dang dbang po'i tshogs kyi bsod nams byed pa de'i tshe na ni de dag bde ba skye ba'i rgyu yin la/ gang gi tshe mchod sbyin gyi lus dang dbang po'i tshogs kyis bsod nams ma yin pa byed pa de'i tshe na ni de dag sdug bsngal skye ba'i rgyu yin/ gang gi tshe mchod sbyin gyi lus dang dbang po'i tshogs kyi bstan bcos dag slob par byed pa de'i tshe na ni de dag shes pa skye ba'i rgyu yin no/ /dper na lhas byin gyi lus dang dbang po'i tshogs bzhin no zhes bya ba ni dper na lhas byin gyi lus dang dbang po'i tshogs ni bde ba dang sdug bsngal dang shes pa skye ba'i rgyu yin pa'i phyir/ de dag gi byed pa po ni mchod sbyin gyi bdag ma yin pa bzhin du/ mchod sbyin gyi lus dang dbang po'i tshogs kyang bde ba dang sdug bsngal dang shes pa skye ba'i rgyu yin pa'i phyir/ de dag gi byed pa po yang mchod sbyin gyi bdag ma yin no zhes bya ba'i tha tshig go/ /yang na bcings pa'i bdag ni sa kun gyi rgyu ma yin te bdag yin pa'i phyir/ grol ba'i bdag bzhin pas chos kyi rang gi ngo bo gsal bas rang gi dam bcas pa'i skyon du 'gyur ro zhes bya ba 'di yang tshad ma rnam pa gcig yin no/ /'dir yang bcings pa'i bdag ni zhes bya ba 'di ni chos can yin la/ sa kun gyi rgyu ma yin te zhes bya ba 'di ni bsgrub par bya ba chos yin/ bdag yin pa'i phyir zhes bya ba 'di ni sgrub pa'i chos yin/ grol ba'i bdag bzhin pas zhes bya ba 'di ni dpe yin/ chos kyi rang gi ngo bo gsal bas rang gi dam bcas pa'i skyon du 'gyur ro zhes bya ba 'di ni tshad ma'i 'bras bu yin par sbyar ro/ /de la bcings pa'i bdag ni zhes bya ba ni las dang nyon mongs pas bcings pa'i bdag 'jig rten gsum po dag gi rgyur 'dod pa gang yin pa'o/ /sa kun gyi rgyu ma yin te zhes bya ba ni bcings pa'i bdag des kun gyi zhes bya ba 'jig rten gsum po cha dang bcas pa'i rgyu ma yin te zhes bsgrub par bya ba yin no/ /bdag yin pa'i phyir zhes bya ba ni bcings pa'i bdag de bdag gi ngo bo nyid yin pa'i phyir sa kun gyi rgyu ma yin no/ /grol ba'i bdag bzhin pas zhes bya ba la grol ba'i bdag ces bya ba ni las dang nyon mongs pa'i 'ching ba las grol ba phung po'i lhag ma dang bcas pa dang / phung po'i lhag ma med pa'i mya ngan las 'das pa'i dbyings na yod pa'i bdag gang yin pa'o/ /'di skad bstan te/ dper na grol ba'i bdag gang yin pa de bdag yin pa'i phyir/ sa kun gyi rgyu ma yin pa de bzhin du/ bcings pa'i bdag kyang bdag yin pa'i phyir sa kun gyi rgyu ma yin no zhes bya ba'i tha tshig go/ /chos kyi rang gi ngo bo gsal bas zhes bya ba ni de ltar bdag rjes su dpag pas grol ba'i bdag sa kun gyi rgyu ma yin pa de bzhin du/ bcings pa'i bdag sa kun gyi rgyu yin par 'dod pa'i chos kyi rang gi ngo bo gsal bas so/ /rang gi dam bcas pa'i skyon du 'gyur ro zhes bya ba ni/ de ltar bcings pa'i bdag sa kun gyi rgyu yin par 'dod pa'i chos kyi rang gi ngo bo gsal bas na/ de'i phyir skyes bu rgyur 'dod pa khyod rang gi grub pa'i mtha' las bcings pa'i bdag sa kun gyi rgyu yin par dam bcas pa de dang 'gal ba'i skyon du 'gyur ro zhes bya ba'i tha tshig go/ /gal te gtan tshigs kyi don bdag yin pa'i phyir zhes bya ba dam bcas pa'i don phyogs gcig yin pa'i phyir ma grub bo zhe na/ lan btab zin pas nyes pa med do zhes bya ba 'dis ni sngar yang na bcings pa'i bdag ni sa kun gyi rgyu ma yin te/ bdag yin pa'i phyir/ grol ba'i bdag bzhin pas chos kyi rang gi ngo bo gsal bas/ rang gi dam bcas pa'i skyon du 'gyur ro zhes ji skad bstan pa de'i gtan tshigs ma grub pa'i skyon sel ba ston to/ /de la gal te zhes bya ba'i sgra ni dbu ma pas skyes bu rgyur 'dod pa dag gi dogs pa bsu ba'i tshig yin no/ /gtan tshigs kyi don bdag yin pa'i phyir zhes bya ba ni/ 'grel pa byed pas bdag rgyu ma yin par bsgrub pa'i gtan tshigs su bcings pa'i bdag ni sa kun gyi rgyu ma yin te/ bdag yin pa'i phyir zhes smras pa gang yin pa de'o/ /dam bcas pa'i don gyi phyogs gcig yin pa'i phyir ma grub bo zhe na zhes bya ba ni gal te skyes bu rgyur 'dod pa dag na re/ bdag yin pa'i phyir zhes bya ba de gtan tshigs su mi rung ste/ dam bcas pa'i don gyi phyogs gcig yin pa'i phyir dper na sgra rtag ste sgra yin pa'i phyir ro zhes bya ba bzhin no/ /lan btab zin pas nyes pa med do zhes bya ba ni sngar dngos po rnams gzhan las skye ba med par sgrub pa'i skabs su ci ste gzhan yin pa'i phyir zhes bya bas de gtan tshigs su mi rung ste/ dam bcas pa'i don gyi phyogs gcig yin pa'i phyir/ dper na sgra rtag ste sgra yin pa'i phyir ro zhes bya ba bzhin no zhe na/ de ni bzang po ma yin te/ snyan tshig gi sgra mi rtag ste sgra yin pa'i phyir/ dper na rnga bo che'i sgra bzhin no zhes bya bas dam bcas pa'i don gyi phyogs gcig gtan tshigs nyid du grub pa mthong bas gtan tshigs ma nges pa nyid yin no zhes lan btab pas khyad par can phyogs su byas pa la/ spyi sgrub pa'i chos su rung ba bstan pa bzhin du/ 'di yang bcings pa'i bdag ces bya ba khyad par can phyogs su byas pa la/ bdag yin pa'i phyir zhes bya ba spyi sgrub pa'i chos su rung bas nyes pa med do zhes bya ba'i tha tshig go/ /gang dag 'di ltar kho bo cag gi bdag ni gcig pu kho na yin te/ de la bum pa la sogs pa'i nam mkha' tha dad pa nye bar gdags pa bzhin du du ma nyid du nye bar btags pas des na dpe med pa'i phyir/ rjes su dpag pa'i gnod pa yang med la dam bcas pa'i skyon du yang mi 'gyur ro zhes zer na zhes bya ba 'dis ni skyes bu rgyur 'dod pa gzhan dag na re/ kho bo cag gi bdag ni gcig pu kho na yin te/ de la dngos po'i rgyu tha dad pa'i dbang gis du ma nyid du nye bar btags pas/ dper na nam mkha' ni gcig pu kho na yin yang bum pa la sogs pa'i rgyu tha dad pa'i dbang gis de dag gi nam mkha' tha dad par nye bar gdags pa bzhin pas/ des na khyed dbu ma pa'i dpe lhas byin gyi bdag ni lhas byin gyi lus dang dbang po'i rgyu ma yin te bdag yin pa'i phyir/ dper na mchod sbyin gyi bdag bzhin no zhes bya ba dang yang na bcings pa'i bdag ni sa kun gyi rgyu ma yin te bdag yin pa'i phyir/ grol ba'i bdag bzhin pas zhes smos pa'i dpe de gnyis med pa'i phyir/ kho bo cag la khyed kyi rjes su dpag pa'i gnod pa yang med la/ rang gi dam bcas pa'i skyon du yang mi 'gyur ro zhes zer ba ston to/ /de la gang dag ces bya ba ni skyes bu rgyur 'dod pa gzhan gang dag skyes bu'i ngo bo nyid ni gcig pu kho na yin la/ de la dngos po'i rgyu tha dad pa'i dbang gis du ma nyid du nye bar gdags so zhes rnam pa gnyis su rtog pa dag go/ /de dag de ltar rnam par rtog pa na 'di skad ces zer te/ 'di ltar kho bo cag gi bdag ni gcig pu kho na yin zhes bya ba ni/ 'di ltar skyes bu rgyur 'dod pa dag la kho bo cag gi skyes bu zhes bya ba'i bdag ni don dam par ngo bo nyid gcig pa kho na yin te zhes ngo bo nyid gcig pu rtog pa yin no/ /de yang ji lta bu yin zhe na/ de la bum pa la sogs pa'i nam mkha' tha dad par nye bar gdags pa bzhin du/ du ma nyid du nye bar btags pas zhes bya ba smras te/ bdag gcig pu de la dngos po'i rgyu tha dad pa'i dbang gis du ma nyid du nye bar gdags so zhes tha snyad kyi sgo nas tha dad par rtog pa yin no/ /de la zhes bya ba ni bdag gcig pu de la'o/ /bum pa la sogs pa'i nam mkha' tha dad pa nye bar gdags pa bzhin du zhes bya ba ni dper na nam mkha' ni gcig pu kho na yin yang / bum pa dang / zangs dang / rdza ma dang / ril ba dang / gzhong ba dang / chu ra dang / phru tog la sogs pa'i rgyu tha dad pa'i dbang gis de dag gi nam mkha' tha dad par nye bar gdags pa bzhin du'o/ /du ma nyid du nye bar btags pas zhes bya ba ni kho bo cag gi bdag kyang gcig pu kho na yin te/ de la dngos po'i rgyu tha dad pa'i dbang gis du ma nyid du nye bar btags pas so/ /des na dpe med pa'i phyir zhes bya ba ni de ltar kho bo cag gi bdag kyang gcig pu kho na yin te de dngos po'i rgyu tha dad pa'i dbang gis du ma nyid du nye bar btags par zad kyi/ bdag de don dam par ngo bo nyid gcig pu kho na yin pa'i gtan tshigs des na khyed dbu ma pa'i dpe lhas byin gyi bdag ni lhas byin gyi lus dang dbang po'i rgyu ma yin te bdag yin pa'i phyir/ dper na mchod sbyin gyi bdag bzhin no zhes bya ba dang / yang na bcings pa'i bdag ni sa kun gyi rgyu ma yin te bdag yin pa'i phyir/ grol ba'i bdag bzhin pas zhes smos pa'i dpe de gnyis med pa'i phyir ro/ /rjes su dpag pa'i gnod pa yang med la zhes bya ba ni kho bo cag la khyed kyi rjes su dpag pa'i gnod pa lhas byin gyi bdag ni lhas byin gyi lus dang dbang po'i rgyu ma yin te/ bdag yin pa'i phyir/ dper na mchod sbyin gyi bdag bzhin no zhes bya ba de yang med de/ 'di ltar bdag de nyid sgrub pa la bdag de nyid dper mi rung ste/ lhas byin gyi bdag dang mchod sbyin gyi bdag ces bya ba de bum pa dang zangs bu'i nam mkha' bzhin du ngo bo nyid gcig pa'i phyir ro/ /dam bcas pa'i skyon du yang mi 'gyur ro zhes zer na zhes bya ba ni kho bo cag la rang gi dam bcas pa bcings pa'i bdag ni sa kun gyi rgyu yin te zhes bya ba de dang 'gal ba'i skyon du yang mi 'gyur te/ 'di ltar grol ba'i bdag rjes su dpag pas sa kun gyi rgyu ma yin par bsal bas bcings pas bdag sa kun gyi rgyu yin par sgrub pa'i chos kyi rang gi ngo bo ma gsal te/ bcings pa'i bdag dang grol ba'i bdag ces bya ba de yang bum pa dang zangs bu'i nam mkha' bzhin du ngo bo nyid gcig pa'i phyir ro zhes zer na'o/ /de skad ces zer ba de'i lan du/ 'dir 'grel pa byed pa nyid kyis/ de ni bzang po ma yin te/ nam mkha' ni ma skyes pas nam mkha'i me tog bzhin du dngos po nyid med pa kho na'i phyir/ gcig pa nyid du grub pa ni tshig tsam du zad pa'i phyir dang / tha snyad du yang spyir khas blangs pa'i bdag la gcig pa nyid du ston pa'i rjes su dpag pa med pa'i phyir ro zhes bya ba smras te/ des ni skyes bu rgyur 'dod pa gzhan dag gis bdag gcig pu kho na yin par sgrub pa'i dpe nam mkha' khas blangs pa de yang mi rung ste/ nam mkha' ni ma skyes pas nam mkha'i me tog bzhin du dngos po nyid med pa kho na'i phyir/ nam mkha' gcig pa nyid du grub bo zhes zer ba ni tshig tsam du zad pa'i phyir ro/ /bdag gcig pu kho na yin te zhes zer ba de yang mi rung ste/ kun rdzob kyi tha snyad du yang bdag ces bya ba sangs rgyas pa dang / phyi rol pas spyir khas blangs pa de la skyes bu rgyur 'dod pa dag gis lhas byin dang / mchod sbyin gyi bdag dang / bcings pa dang grol ba'i bdag gcig pa nyid du ston pa'i rjes su dpag pa med pa'i phyir ro zhes ston to/ /de la de ni bzang po ma yin te zhes bya ba ni skyes bu rgyur 'dod pa gzhan dag gi bdag gcig pu kho na yin par sgrub pa'i dpe/ nam mkha' gcig pa nyid du grub bo zhes zer ba dang dpe des mtshon pa'i don bdag gcig pu kho na yin te zhes zer ba de ni rjes su dpag pa ltar snang ba yin pas bzang po ma yin no zhes bya bar ston to/ /de la ji ltar nam mkha' gcig pa nyid du grub bo zhes zer ba de bzang po ma yin zhe na/ de'i phyir nam mkha' ni ma skyes pas nam mkha'i me tog bzhin du dngos po nyid med pa kho na'i phyir gcig pa nyid du bsgrub pa ni tshig tsam du zad pa'i phyir zhes bya ba smras so/ /'di skad bstan te/ nam mkha' ni ma skyes pas dngos po nyid med de/ dper na nam mkha'i me tog ma skyes pa'i phyir dngos po nyid med pas de la gcig pa nyid du grub pa med pa bzhin du nam mkha' yang ma skyes pa'i phyir dngos po nyid med pas de la gcig pa nyid du grub pa med do/ /de'i phyir nam mkha' gcig pa nyid du grub bo zhes zer ba de ni tshig tsam du zad pa'i phyir bzang po ma yin no/ /nam mkha' gcig pa nyid du grub pa med pas khyed kyi dpe med pa'i phyir/ des mtshon pa lhas byin gyi bdag dang mchod sbyin gyi bdag dang / bcings pa'i bdag dang / grol ba'i bdag kyang gcig pu kho nar ma grub pas/ kho bo lhas byin gyi bdag gi dpe mchod sbyin gyi bdag tha dad du gyur pa khas blangs pa rung bas kho bo'i dpe med pa ma yin pa'i phyir/ khyed la rjes su dpag pa'i gnod pa med pa yang ma yin la/ kho bos bcings pa'i bdag gi dpe grol ba'i bdag tha dad du gyur pa khas blangs pa yang rung bas kho bo'i dpe med pa ma yin pa'i phyir/ khyod la rang gi dam bcas pa'i skyon du mi 'gyur ba yang ma yin no/ /ji ltar na bdag gcig pu kho na yin te zhes zer ba de bzang po ma yin zhe na/ de'i phyir tha snyad du yang spyir khas blangs pa'i bdag la gcig pa nyid du ston pa'i rjes su dpag pa med pa'i phyir ro zhes bya ba smras so/ /'di skad bstan te/ kun rdzob kyi tha snyad du yang bdag ces bya ba sangs rgyas pa dang / phyi rol pas spyir khas blangs pa de la skyes bu rgyur 'dod pa dag gi lhas byin dang / mchod sbyin gyi bdag dang / bcings pa dang grol ba'i bdag gcig pa nyid du ston pa'i rjes su dpag pa med de/ 'di ltar kho bos kun rdzob kyi tha snyad du bdag ces bya ba phung po lnga'i bdag nyid yin par khas blangs pa de la gcig pa nyid du ston pa'i rjes su dpag pa khyod la med pa'i phyir dang / gcig pa nyid du dam 'cha' na grags pa'i gnod par 'gyur ba'i phyir te/ 'di ltar 'jig rten na lhas byin dang mchod sbyin dang / bram ze dang gdol pa la sogs pa gcig pa nyid du ma mthong ba'i phyir ro// //bam po bco lnga pa/ ci ste bcings pa'i bdag ni grol ba'i bdag las gzhan ma yin te/ bdag gi yin pa'i phyir/ grol ba'i bdag bzhin no zhe na zhes bya ba 'dis ni skyes bu rgyur 'dod pa gzhan dag bcings pa'i bdag ni grol ba'i bdag las gzhan ma yin pas dbu ma pa na re/ tha snyad du yang spyir khas blangs pa'i bdag las gcig pa nyid du ston pa'i rjes su dpag pa med pa'i phyir ro zhes zer ba de mi rung ste/ 'di ltar kho bo cag gi bdag ni gcig tu kho nar grub pas dbu ma pa khyed kyi dpe med pa'i phyir/ kho bo cag la rjes su dpag pa'i gnod pa yang med la/ dam bcas pa'i skyon du yang mi 'gyur ro zhes zer ba ston to/ /de la ci ste zhes bya ba'i sgra ni dbu ma pas skyes bu rgyur 'dod pa dag gi dogs pa bsu ba'i tshig yin no/ /de'i phyir ci ste skyes bu rgyur 'dod pa dag tha snyad du yang spyir khas blangs pa'i bdag la gcig pa nyid du ston pa'i rjes su dpag pa'i tshad ma 'di lta bu byed na de yang mi rung ngo zhes bya bar sbyar ro/ /'dir yang bcings pa'i bdag ni zhes bya ba ni chos can yin la/ grol ba'i bdag las gzhan ma yin te zhes bya ba 'di ni bsgrub par bya ba chos yin/ bdag yin pa'i phyir zhes bya ba 'di ni sgrub pa'i chos yin/ grol ba'i bdag bzhin no zhes bya ba 'di ni dpe yin par sbyar ro/ /'di'i bsdus pa'i don ni skyes bu rgyur 'dod par gzhan dag bcings pa'i bdag gi dngos po grol ba'i bdag las tha mi dad par sgrub ste/ dper na grol ba'i bdag ces bya ba bdag yin pa'i phyir/ rang gi ngo bo las tha mi dad pa de gzhan ma yin pa de bzhin du bcings pa'i bdag gi dngos po yang bdag yin pa'i phyir/ grol ba'i bdag las tha mi dad de gzhan ma yin pas/ des na tha snyad du yang spyir khas blangs pa'i bdag gcig pa nyid du grub pas/ dbu ma pa'i dpe med pa'i phyir/ rjes su dpag pa'i gnod pa yang med la/ dam bcas pa'i skyon du yang mi 'gyur ro zhes sngar smras pa'i gnas skabs de kho na bzhin no zhes zer ba yin no/ /de skad ces zer ba de'i lan du/ 'dir 'grel pa byed pa nyid kyis/ phung po'i lhag ma med pa'i mya ngan las 'das pa'i dbyings na grol ba'i bdag nyid yod pa nyid dang gcig pa nyid ma grub pa'i phyir/ ji skad smras pa'i skyon med par mi 'gyur ro zhes bya ba smras te/ des ni phung po'i lhag ma med pa'i mya ngan las 'das pa'i dbyings na grol ba'i bdag yod pa nyid du ma grub pas des na skyes bu rgyur 'dod pa dag na re/ bcings pa'i bdag ni grol ba'i bdag las gzhan ma yin te bdag yin pa'i phyir/ grol ba'i bdag bzhin no zhes zer ba'i dpe de ma grub pas/ bcings pa'i bdag dang grol ba'i bdag gcig pa nyid ma grub pa'i phyir/ rjes su dpag pa'i gnod pa yod pa dang dam bcas pa'i skyon du yang 'gyur ro zhes ji skad smras pa'i skyon de khyod la med par mi 'gyur ro zhes ston to/ / 'di skad bstan te/ kho bo'i phyogs la 'di ltar dpe grol ba'i bdag med pas de'i phyir khyod kyis sgrub pa'i dpe med de/ lung las/ mya ngan 'das la phung po med/ /gang zag srid pa ma yin no/ /zhes ji skad gsungs pa'i phyir ro/ /'on te phung po'i lhag ma dang bcas pa'i gnas skabs kyis grol ba'i bdag gis dpe bstan pa'i phyir/ grol ba'i bdag yod pas sgrub pa'i dpe med pa ma yin no snyam na/ de lta na yang kho bos sngar bcings pa'i bdag ni sa kun gyi rgyu ma yin te bdag yin pa'i phyir/ grol ba'i bdag bzhin pas zhes smras pas ji ltar grol ba'i bdag nyid de bdag yin pa'i phyir/ sa kun gyi rgyu ma yin pa bzhin du bcings pa'i bdag kyang bdag yin pa'i phyir sa kun gyi rgyu ma yin pas/ yang khyod la rang gi dam bcas pa'i skyon du 'gyur ba dang / grol ba'i bdag kyang bdag yin pa'i phyir bcings pa'i bdag bzhin du bcings pa nyid du thal bar 'gyur ro/ /dpyad pa rgyas pa ni bdag brtag pa'i rab tu byed pa mdzad par 'gyur ro zhes bya ba ni smra ba thams cad kyis yongs su brtag pa bdag gi rdzas gzhig pa ni rab tu byed pa bco brgyad pa'i skabs su slob dpon nyid kyis mdzad par 'gyur ro/ /zhar la bshad pas chog go/ /gzhan yang / rig byed 'dra ba'i thos pa med/ /ces gang smras pa des rig byed kyi tshig las skyes bu byed pa po yin par smras pa de la re zhig rig byed brtag par byas te/ ci rig byed skyes pa yin nam/ 'on te ma skyes pa yin/ de la rig byed skyes pa yin na ni/ de lta na ni rig byed mi rtag pa yin te skye ba can yin pa'i phyir/ dper na bum pa bzhin no/ /gzhan yang ci rig byed de bdag las skyes sam/ 'on te gzhan las sam/ 'on te gnyis las sam/ 'on te rgyu med pa las skyes pa yin/ de la re zhig rig byed de bdag las skye ba med par nges te yod pa'i phyir/ dper na shes pa yod pa nyid bzhin no/ /rig byed de dag gi rkyen gzhan dag las skye ba med de gzhan yin pa'i phyir/ dper na bum pa bzhin no/ /yang na gzhan brjod par 'dod pa yi ge la sogs pa'i rig byed 'grub par 'dod pa dag rkyen ma yin par nges te gzhan yin pa'i phyir/ dper na rgyu spun la sogs pa bzhin no/ /rig byed gnyis las skye ba med de phyogs gnyis kar bstan pa'i sgrub pa dag gis gtad khongs su chud par 'gyur ba'i phyir dang / gnyis las skye bar ston pa'i rjes su dpag pa med pa'i phyir ro/ /rig byed rgyu med pa las skye ba med de ston pa'i rjes su dpag pa med pa'i phyir dang / rjes su dpag pa dang grags pa'i gnod par 'gyur ba'i skyon yod par 'gyur ba'i phyir ro/ /gzhan yang rig byed rgyu med pa las skye ba med de/ yi ge'i tshogs yin pa'i phyir dper na b+ha ra ta la sogs pa'i bstan bcos dag bzhin no/ /ci ste rig byed dag ma skyes pa yin na ni de lta na rig byed med pa yin te ma skyes pa'i phyir/ dper na nam mkha'i me tog bzhin no/ /grags pa'i gnod par yang 'gyur te/ 'jig rten 'di na gang skyes pa de ni yod pa zhes brjod pa'i phyir ro/ /gzhan yang / khyod kyi rig byed rtag par 'dod/ /ces grags na ci de rgyu'i sgo nas rtag pa nyid du grub par 'dod dam/ 'on te rgyu med pa'i sgo nas rtag pa nyid du grub par 'dod/ de la gal te rgyu'i sgo nas rtag pa nyid du grub par 'dod na ni/ de lta na rig byed mi rtag pa yin te rgyu dang bcas pa'i phyir/ dper na bsreg bya bzhin no/ /'on te rgyu med pa'i sgo nas rtag par grub par 'dod na ni de lta na rig byed ces bya ba'i tshig gi don med de/ rgyu med pa'i phyir mo gsham gyi bu bzhin te/ ji skad du khro ba bdun cu pa las/ de yi rtag nyid gal te rgyu yod na/ /rtag pa rtag pa nyid du mi 'gyur ro/ /de yi rtag nyid gal te rgyu med na'ang / rtag pa rtag pa nyid du mi 'gyur ro/ /zhes bshad pa lta bu ste/ skyes bu rtag pa nyid la gal te rgyu yod na rgyu dang bcas pa'i phyir rtag par 'dod pa de rtag pa nyid du mi 'gyur ro/ /skyes bu'i rtag pa nyid la gal te rgyu med na yang rgyu med pa'i phyir rtag par 'dod pa de rtag pa nyid du mi 'gyur ro zhes bshad pa bzhin du/ rig byed kyang gal te rgyu yod na yang rgyu dang bcas pa'i phyir rtag pa nyid du mi 'gyur la/ gal te rgyu med na yang ngo bo nyid gtan med pa'i phyir/ rtag pa nyid du mi 'gyur bas de'i phyir rig byed kyi tshig las skyes bu byed pa po nyid du smras pa de mi 'thad do/ /da ni rgyu med pa dngos por gyur pa rang bzhin rgyur 'dod pa dag gi 'dod pa bsal bar bya ste/ de la re zhig rang bzhin rgyur 'dod pa dag gi grub pa'i mtha' bstan pa'i phyir/ rang bzhin rgyur 'dod pa dag ni tshangs pa la sogs pa myu gu'i mthar thug pa can gyi gsal ba rnams skye ba'i rgyu rang bzhin yin par khas blangs nas de dag na re/ nang gi bye brag rnams kyi rgyu ni bde ba dang sdug bsngal dang gti mug yin par nges te/ de dang ldan pa'i phyir/ 'di ltar 'jig rten na yang gang zhig gang dang ldan par gyur pa de ni de'i rgyu can yin par shes te/ dper na tsan+dan gyi zhogs ma dang / gyo mo dang / snod dang / rgyan la sogs pa bzhin no/ /de bzhin du nang gi bye brag rnams kyang bde ba dang sdug bsngal dang / gti mug dang ldan pas de'i phyir ji skad smras pa'i gtan tshigs kyis na nang gi bye brag rnams kyi rgyu ni bde ba dang sdug bsngal dang gti mug yin no/ /gzugs dang / tshor ba dang / 'du shes dang / 'du byed dang / rnam par shes pa'i mtshan nyid kyi phung po rnams kyang bde ba dang sdug bsngal dang / gti mug gi ngo bo nyid yin par gzung bar bya ste/ phung po ma yin pa'i phyir/ tshor ba'i phung po bzhin pas de'i phyir gtan tshigs kyi don ma grub pa yang ma yin no zhes zer ro zhes bya ba smras te/ 'dis ni rang bzhin rgyur 'dod pa dag gi grub pa'i mtha' ston to/ /de la rang bzhin rgyur 'dod pa dag ces bya ba ni/ gzhan mu stegs can gang dag gi grub pa'i mtha' la rang bzhin byed rgyu dang / rgyu mtshan dang / rgyu yin par 'dod pa de dag ni rang bzhin rgyur 'dod pa dag ces bya'o/ /ni zhes bya ba'i sgra ni nges par gzung ba'i don to/ /rang bzhin rgyur 'dod pa de dag kho na de skad zer gyi gzhan ni ma yin no zhes bya ba'i tha tshig go/ /tshangs pa la sogs pa myu gu'i mthar thug pa can gyi gsal ba rnams zhes bya ba ni/ gsal ba gang dag la dang por tshangs pa la sogs pa nas tha ma myu gu'i mthar thug pa'i bar dag yod pa de ni tshangs pa la sogs pa myu gu'i mthar thug pa can gyi gsal ba rnams zhes bya'o/ /gsal ba de rnams skyes pa zhes bya ba ni gsal ba rnams skye ba'o/ /skye ba de'i rgyu rang bzhin yin par khas blangs nas zhes bya ba ni rang bzhin rgyur 'dod pa dag tshangs pa la sogs pa myu gu'i mthar thug pa can gyi gsal ba rnams skye ba'i rgyu rang bzhin zhes bya ba snying stobs dang rdul dang mun pa zhes bya ba yon tan gsum cha mnyam par gyur pa gtso bo zhes bya ba de yin par khas blangs nas/ de dag 'di skad ces zer ro zhes bya bar sbyar ro/ / 'di'i bsdus pa'i don ni 'di yin te/ dang po tshangs pa nas bzung ste/ rtswa dang gel ba'i bar dang ldan pa'i gsal ba de dag thams cad gsal ba'i rgyu ni rang bzhin zhes bya ba snying stobs dang rdul dang mun pa zhes bya ba yon tan gsum cha mnyam par gyur pa gtso bo zhes bya ba de yin par 'dod do/ /'di la grangs can rnams kyi gzhung las snying stobs dang / rdul dang / mun pa zhes bya ba yon tan gsum 'dod de/ de la snying stobs ni yang ba dang / gsal ba'i bdag nyid do/ /rdul ni g.yo ba dang / 'jug par byed pa'i bdag nyid do/ /mun pa ni lci ba dang gnas pa'i mtshan nyid do/ /ji skad du/ rangs dang mgu dang kun dga' dang / /bde dang zhi ba'i sems nyid dag /lan 'ga' yang ni snang gyur pa/ /de dag snying stobs yon tan no/ /mi dga' ba dang yongs gdungs dang / /mya ngan 'dod dang mi bzod dag /gang du snang ba'i gtan tshigs kyis/ /de dag rdul gyi rtags su 'dod/ /rmongs dang de bzhin gti mug dang / /bag med gnyid dang g.yel ba dag /lan 'ga' yang ni snang gyur pa/ /de dag mun pa'i yon tan no/ /zhes bshad pa lta bu ste/ snying stobs dang rdul dang mun pa de dag cha mnyam pa nyid dang mtshungs pa dang gcig tu gyur cing / gang yang rung ba 'ga' zhig shas che bar mi dmigs pa de ni gtso bo zhes bya'o/ /gtso bo de yang bram ze ser skya'i mngon sum yang ma yin te/ de dag gi gzhung las bram ze ser skyas tshangs pa skye ba ni mthong gi des gtso bo de ni mi mthong ngo zhes 'byung ba'i phyir ro/ /gtso bo rtags med pa mi gsal ba de las chen po cung zad tsam dang 'gyur ba tsam du skye'o/ /chen po las nga rgyal shin tu gsal ba skye'o/ /nga rgyal de yang rnam pa gsum ste/ rnam par 'gyur ba las gyur pa dang / rdul las gyur pa dang / 'byung ba las gyur pa'o/ /de la rnam par 'gyur ba las gyur pa'i nga rgyal snying stobs shas che ba las ni dbang po bcu gcig skye ste/ 'di lta ste/ mig dang / rna ba dang / sna dang / lce dang / lus dang / yid dang / ngag dang / rkang pa dang / lag pa dang / rkub dang / mdoms zhes bya ba rnams so/ /de la mig la sogs pa lnga ni blo'i dbang po dag yin no/ /ngag la sogs pa lnga ni las kyi dbang po dag yin no/ /yid kyi dbang po ni gnyi ga'i bdag nyid yin te/ blo'i dbang po dag tu yang gnas par byed la/ las kyi dbang po dag tu yang gnas par byed do/ /'byung ba las gyur pa'i nga rgyal mun pa shas che ba las ni de tsam lnga skye ste/ 'di lta ste/ sgra de tsam dang / reg de tsam dang / ro de tsam dang / gzugs de tsam dang / dri de tsam mo/ /rdul las gyur pa'i nga rgyal g.yo ba shas che ba ni gnyis ka'i bdag nyid yin te/ dper na bram ze 'ga' zhig la chung ma bram ze mo zhig dang dmangs mo zhig gnyis yod la/ bram ze mo la ni bu bcu gcig btsas la/ dmangs mo la ni bu lnga btsas pa lta bu ste/ de la bram ze mo lta bu ni rnam par 'gyur ba las gyur pa'i nga rgyal yin la/ bu bcu gcig lta bu ni dbang po bcu gcig po dag yin no/ /dmangs mo lta bu ni 'byung ba las gyur pa'i nga rgyal yin la/ bu lnga lta bu ni de tsam lnga po dag yin no/ /bram ze lta bu ni rdul las gyur pa'i nga rgyal yin no/ /de la chen po dang nga rgyal dang / de tsam rnams ni rang bzhin yang yin la 'gyur ba yang yin no/ /rtsa ba'i rang bzhin ni rang bzhin kho na yin gyi/ 'gyur ba ni ma yin te/ ci'i phyir zhe na/ gang gi phyir gtso bo las chen po skye ba de'i phyir gtso bo rang bzhin yin la/ gang gi phyir gtso bo gang las kyang mi skye ba de'i phyir gtso bo mi 'gyur ba yang yin no/ /gang gi phyir chen po las nga rgyal skye ba de'i phyir chen po'i rang bzhin yin la/ gang gi phyir chen po gtso bo las skye ba de'i phyir chen por 'gyur ba yang yin no/ /gang gi phyir nga rgyal las dbang po rnams dang de tsam rnams skye ba de'i phyir nga rgyal rang bzhin yin la/ gang gi phyir nga rgyal chen po las skye ba de'i phyir nga rgyal 'gyur ba yang yin no/ /gang gi phyir sgra de tsam las nam mkha' skye ba de'i phyir sgra de tsam rang bzhin yin la/ gang gi phyir sgra de tsam nga rgyal las skye ba de'i phyir sgra de tsam 'gyur ba yang yin no/ /gang gi phyir reg de tsam las rlung skye ba de'i phyir reg de tsam rang bzhin yin la/ gang gi phyir reg de tsam nga rgyal las skye ba de'i phyir reg de tsam 'gyur ba yang yin no/ /gang gi phyir gzugs de tsam las mi skye ba de'i phyir gzugs de tsam rang bzhin yin la/ gang gi phyir gzugs de tsam nga rgyal las skye ba de'i phyir gzugs de tsam 'gyur ba yang yin no/ /gang gi phyir ro de tsam las chu skye ba de'i phyir ro de tsam rang bzhin yin la/ gang gi phyir ro de tsam nga rgyal las skye ba de'i phyir ro de tsam 'gyur ba yang yin no/ /gang gi phyir dri de tsam las sa skye ba de'i phyir dri de tsam rang bzhin yin la/ gang gi phyir dri de tsam nga rgyal las skye ba de'i phyir dri de tsam 'gyur ba yang yin no/ /de'i phyir 'byung ba chen po lnga dang dbang po bcu gcig ste bcu drug po de dag ni 'gyur ba 'ba' zhig yin gyi rang bzhin ni ma yin no/ /gtso bo dang chen po dang nga rgyal dang de tsam lnga ste brgyad po de dag las gtso bo ni rang bzhin kho na yin gyi 'gyur ba ni ma yin no/ /bdun ni rang bzhin dang 'gyur ba gnyi ga yin no/ /nyi shu rtsa bzhi po de dag skyes bu dang bcas pa dang de kho na nyi shu rtsa lnga yin no/ /gang gis skyes bu dang bcas pa de dag shes pa de ni cha lugs gang dag gis gnas su zin kyang grol bar 'gyur te/ de skad du/ de nyid nyi shu lnga shes pas/ /ral pa'am byi bo 'am gtsug phud kyi/ /bsti gnas gang du dga' ba der/ /grol 'gyur 'di la the tshom med/ /ces bshad pa lta bu'o/ /rang bzhin gyi rgyur 'dod pa de lta bu smra ba gzhan gyis mi rtogs pa de'i phyir rang bzhin rgyur 'dod pa de dag na re/ nang gi bye brag rnams kyi rgyu ni bde ba dang sdug bsngal dang gti mug yin par nges te de dang ldan pa'i phyir/ 'di ltar 'jig rten na yang gang zhig gang dang ldan par gyur pa de ni de'i rgyu can yin par shes te/ dper na tsan+dan gyi zhogs ma dang / gyo mo dang snod dang rgyan la sogs pa bzhin no zhes zer ro/ /'dir yang nang gi bye brag rnams zhes bya ba 'di ni chos can yin la/ rgyu ni bde ba dang / sdug bsngal dang / gti mug yin par nges te zhes bya ba 'di ni bsgrub par bya ba chos yin/ de dang ldan pa'i phyir zhes bya ba 'di ni sgrub pa'i chos yin/ 'di ltar 'jig rten na yang gang zhig gang dang ldan par gyur pa de ni de'i rgyu can yin par shes te zhes bya ba 'di ni de'i nye bar sbyar ba'i sbyor ba yin/ dper na tsan+dan gyi zhogs ma dang / gyo mo dang snod dang rgyan la sogs pa bzhin no zhes bya ba 'di ni dpe yin par sbyar ro/ /'di'i bsdus pa'i don ni nang gi skye mched mig la sogs pa mtshan nyid phan tshun tha dad pa'i bye brag rnams kyi rgyu ni bde ba dang / sdug bsngal dang gti mug ces bya ba snying stobs dang rdul dang mun pa yin par nges te/ de dag snying stobs dang rdul dang mun pa'i yon tan gsum po de dang ldan pa'i phyir/ dper na tsan+dan gyi zhogs ma la sogs pa tsan+dan la sogs pa dang ldan pa'i phyir tsan+dan la sogs pa'i rgyu can yin pa dang 'dra'o zhes zer ro/ /de la nang gi bye brag rnams zhes bya ba ni/ nang gi skye mched mig la sogs pa mtshan nyid phan tshun tha dad pa'i bye brag dang ldan pa rnams so/ /bde ba zhes bya ba ni snying stobs te/ ji skad du/ rangs dang mgu dang kun dga' dang / /bde dang zhi ba'i sems nyid dag /lan 'ga' yang ni snang gyur pa/ /de dag snying stobs yon tan no/ /zhes bshad pa'i phyir ro/ /sdug bsngal zhes bya ba ni rdul te/ ji skad du/ mi dga' ba dang yongs gdungs dang / /mya ngan 'dod dang mi bzod dag /gang du snang ba'i gtan tshigs kyis/ /de dag rdul gyi rtags su 'dod/ /ces bshad pa'i phyir ro/ /gti mug ces bya ba ni mun pa ste/ ji skad du/ rmongs dang de bzhin gti mug dang / /bag med gnyid dang g.yel ba dag /lan 'ga' yang mi snang gyur pa/ /de dag mun pa'i yon tan no/ /zhes bshad pa'i phyir ro/ /de dang ldan pa'i phyir zhes bya ba ni/ nang gi skye mched mig la sogs pa'i bye brag rnams snying stobs dang / rdul dang mun pa zhes bya ba'i yon tan de dang ldan pa'i phyir/ nang gi skye mched rnams kyi rgyu rang bzhin yin no zhes bya bar dam 'cha'o/ /de'i nye bar sbyar ba'i sbyor ba bya ba'i phyir/ 'di ltar 'jig rten na yang gang zhig gang dang ldan par gyur pa de ni de'i rgyu can yin par shes te zhes bya ba smras te/ nang gi skye mched mig la sogs pa'i mtshan nyid phan tshun tha dad pa'i bye brag rnams kyi rgyu bde ba dang / sdug bsngal dang / gti mug yin par ci mngon zhe na/ de'i nye bar sbyar ba'i sbyor ba bstan pa'i phyir/ 'di ltar 'jig rten na yang zhes bya ba la sogs pa smras so/ /'di ltar zhes bya ba'i tshig ni gang gi phyir zhes bya ba'i don to/ /'jig rten na yang zhes bya ba ni 'gro ba'i khams na yang ngo / /gang zhig ces bya ba ni dngos po gang zhig go/ /gang dang ldan par 'gyur ba zhes bya ba ni yon tan gang dang ldan par 'gyur ba'o/ /de ni zhes bya ba ni dngos po de ni'o/ /de'i rgyu can yin par shes te zhes bya ba ni yon tan de'i rgyu dang ldan pa yin par grags pa'o/ /de'i dpe bstan pa'i phyir/ dper na tsan+dan gyi zhogs ma dang gyo mo dang snod dang rgyan la sogs pa bzhin no zhes bya ba smras te/ dper na tsan+dan gyi zhogs ma dag kyang tsan+dan gyi rang bzhin dang ldan pa'i phyir de dag tsan+dan gyi rgyu can yin pa dang / kham pa'i gyo mo dag kyang kham pa'i rang bzhin dang ldan pa'i phyir de dag kyang kham pa'i rgyu can yin pa dang / khar ba'i snod la sogs pa yang khar ba'i rang bzhin dang ldan pa'i phyir de dag kyang khar ba'i rgyu can yin pa dang / gdu bu dang dpung rgyan la sogs pa gser gyi rgyan dag kyang gser gyi rang bzhin dang ldan pa'i phyir de dag kyang gser gyi rgyu can yin par shes pa la sogs pa bzhin no/ /de ni dpes mtshon pa'i don gyis mjug sdud par byed de/ de'i phyir de bzhin du nang gi bye brag rnams kyang bde ba dang sdug bsngal ba dang gti mug dang ldan pas de'i phyir ji skad smras pa'i gtan tshigs kyis na/ nang gi bye brag rnams kyi rgyu ni bde ba dang sdug bsngal dang gti mug yin no zhes bya ba smras te/ 'di ni rjes su 'gro ba'i gzhung gzugs pa'o/ /gzhung gzugs pa gzhan bzhi po tshad kyi gzhung gzugs pa dang / rgyu dang 'bras bu'i gzhung gzugs pa dang / nus pa 'jug pa'i gzhung gzugs pa dang / rang bzhin sna tshogs kyi gzhung gzugs pa zhes bya ba dag ni 'dir ma bris te/ gzhung gzugs pa lnga dang / gzhung gzugs pa med pa lnga po rnam par dbye ba de dag gis rtag tu nang gi bye brag rnams la rgyu lnga ni yod par sgrub par byed do/ /gal te sangs rgyas pa dag kho bo la phung po rnams snying stobs dang / rdul dang mun pa'i yon tan dang ldan par ma grub pas khyod kyi gtan tshigs kyi don ma grub po zhes zer na/ de'i phyir grangs can dag rang nyid kyi dogs pa de sgrub par byed do/ /gang gi phyir gang yang rung ba la ma grub pa'am/ the tshom za ba'i tshig ni yang sgrub pa la ltos pa'i mtshan nyid yod pas de'i phyir/ gzugs dang / 'du shes dang / 'du byed dang / rnam par shes pa'i mtshan nyid kyi phung po rnams kyang bde ba dang / sdug bsngal ba dang / gti mug gi ngo bo nyid yin pas gzung bar bya ste/ phung po yin pa'i phyir/ tshor ba'i phung po bzhin pas de'i phyir gtan tshigs kyi don ma grub pa yang ma yin no zhes bya ba smras te/ 'dir yang gzugs dang / 'du shes dang / 'du byed dang / rnam par shes pa'i mtshan nyid kyi phung po rnams kyang zhes bya ba 'di ni chos can yin la/ bde ba dang / sdug bsngal dang / gti mug gi ngo bo nyid yin par gzung bar bya ste zhes bya ba 'di ni bsgrub par bya ba chos yin/ phung po yin pa'i phyir zhes bya ba 'di ni sgrub pa'i chos yin/ tshor ba'i phung po bzhin pas zhes bya ba 'di ni dpe yin/ de'i phyir gtan tshigs kyi don ma grub pa yang ma yin no zhes bya ba 'di ni mjug bsdu ba yin par sbyar ro/ /'di'i bsdus pa'i don ni gzugs la sogs pa'i phung po bzhi po dag kyang / snying stobs dang / rdul dang mun pa'i ngo bo nyid yin par gzung ste de dag phung po yin pa'i phyir tshor ba'i phung po bzhin no/ /dper na tshor ba ni phung po yin pa'i phyir/ tshor ba bde ba dang / sdug bsngal dang / gti mug gi ngo bo nyid yin par gzung bar bya ste/ 'di ltar bde ba'i tshor ba dang / sdug bsngal gyi tshor ba zhes brjod pa dang 'dra bar/ gzugs la sogs pa'i phung po bzhi po dag kyang phung po yin pa'i phyir/ de dag bde ba dang / sdug bsngal dang / gti mug gi ngo bo nyid yin par 'gyur bas/ de'i phyir de dag dang ldan pa'i phyir zhes bya ba gtan tshigs kyi mtshan nyid ji skad smras pa de ma grub pa ma yin no zhes zer ro/ /de skad ces zer ba de'i lan du/ 'dir 'grel pa byed pa nyid kyis/ de la 'dir tsan+dan la sogs don dam par ma grub pas dpe med do zhes bya ba la sogs pa smras te/ de la 'dir zhes bya ba ni sgrub par snga ma de la 'dir 'grel pa byed pas sun dbyung ba smras pa yin no/ /tsan+dan la sogs pa don dam par ma grub pas dpe med do zhes bya ba ni kho bo'i phyogs la tsan+dan dang / gyo mo dang / snod dang / rgyan la sogs pa don dam par ma grub pas khyod kyi dpe med do/ /don dam par dngos po thams cad ma skyes pa'i phyir tsan+dan la sogs pa don dam par ma grub bo/ /de'i phyir khyod kyi gtan tshigs de dang ldan pa'i phyir zhes bya ba de'i dpe med pas/ des na grangs can ngag gi sgrub pa nang gi bye brag rnams kyi rgyu ni bde ba dang / sdug bsngal dang / gti mug yin par nges te de dang ldan pa'i phyir/ 'di ltar 'jig rten na yang gang zhig gang dang ldan par 'gyur ba de ni de'i rgyu can yin par shes te/ dper na tsan+dan gyi zhogs ma dang / gyo mo dang / snod dang / rgyan la sogs pa bzhin no zhes bya ba la sogs pa sgrub pa snga ma de yang dpe med pas gtan tshigs ma grub pa'i phyir dam bcas pa tsam du zad do/ /sgrub pa gnyis pa la yang gang la gzugs dang / 'du shes dang / 'du byed dang / rnam par shes pa'i mtshan nyid kyi phung po rnams kyang bde ba dang / sdug bsngal dang / gti mug gi ngo bo nyid yin par gzung bar bya ste zhes sgrub pa de la yang tha snyad du yang dpe ma grub ste/ de'i phyir tha snyad du yang gti mug ni 'du byed kyi phung por gtogs pas dpe ma grub bo zhes bya ba smras te/ tshor ba la gti mug med pas de'i phyir bsgrub par bya ba cha gcig gi dpes stong ste/ re zhig kun rdzob tu yang skyon de yod do/ /don dam par ni tshor ba'i phung po ma skyes pa'i phyir/ dpe'i chos can ma grub pa'i skyon yang yod do/ /ci ste sbyor ba 'di lta bu byed de/ gzugs dang / tshor ba dang / 'du shes dang / 'du byed dang / rnam par shes pa zhes bya ba'i phung po rnams bde ba dang / sdug bsngal dang / gti mug gi ngo bo nyid yin te/ phung po yin pa'i phyir/ 'du byed kyi phung po bzhin no zhes zer na/ de lta na yang 'du byed kyi phung po dper bzhag pa ni sgrub pa shin tu stong pa yin te/ 'di ltar 'du byed kyi phung po de la gti mug yod du zin kyang / de la bde ba dang / sdug bsngal med pa'i phyir ro/ /ci ste sbyor ba 'di lta bu byed de/ gzugs dang / 'du shes dang / rnam par shes pa'i mtshan nyid kyi phung po gsum po dag bde ba dang / sdug bsngal dang / gti mug gi ngo bo nyid yin te phung po yin pa'i phyir/ tshor ba dang / 'du byed kyi phung po bzhin no zhes zer na/ de lta na yang tshor ba'i phung po la bde ba dang sdug bsngal yod cing / 'du byed rnams la gti mug yod du zin kyang / tshor ba dang / 'du byed gnyis las gang yang rung ba gcig ma nges par 'gyur te/ ci re zhig tshor ba dang 'du byed kyi phung po gnyis bzhin du/ gzugs dang / 'du shes dang / rnam par shes pa'i mtshan nyid kyi phung po gsum po dag kyang bde ba dang / sdug bsngal dang / gti mug dang ldan par 'gyur ba'am/ 'on te gzugs dang / 'du shes dang / rnam par shes pa'i mtshan nyid kyi phung po gsum po dag phung po yin pa'i phyir/ tshor ba'i phung po'am/ 'du byed kyi phung po bzhin du/ bde ba dang sdug bsngal ba 'am gti mug las gang yang rung ba gcig dang ldan par 'gyur ba ma nges so/ /bde ba dang sdug bsngal dag las gzhan pa shes pa yod pa nyid ma yin pa'i chos rnams ni bde ba dang sdug bsngal gyi ngo bo nyid ma yin par nges te gzhal bya yin pa'i phyir/ dper na shes pa bzhin pas de'i phyir/ de ni rjes su dpag pas kyang rigs pa ma yin no zhes bya ba ni/ grangs can gyi bstan bcos las/ gzugs dang / tshor ba dang / 'du shes dang / 'du byed kyi mtshan nyid kyi chos rnams bde ba dang / sdug bsngal dang / gti mug ces bya ba'i yon tan gsum po spyi dang ldan par 'dod cing / grangs can gyi chos de rnams yon tan de dag dang ldan par sgrub pa de'i phyir/ 'dir gzugs dang / tshor ba dang / 'du shes dang / 'du byed ces bya ba'i chos rnam par shes pa ma yin pa rnams phyogs su byas te chos de rnams bde ba dang / sdug bsngal gyi ngo bo nyid ma yin par sgrub pa yin no/ / 'dir yang bde ba dang / sdug bsngal dag las gzhan par shes pa yod pa nyid ma yin pa'i chos rnams ni zhes bya ba 'di ni chos can yin/ bde ba dang sdug bsngal gyi ngo bo nyid ma yin par nges te zhes bya ba 'di ni bsgrub par bya ba chos yin/ gzhal bya yin pa'i phyir zhes bya ba 'di ni sgrub pa'i chos yin/ dper na shes pa bzhin pas zhes bya ba 'di ni dpe yin/ de'i phyir de ni rjes su dpag pas kyang rigs pa ma yin no zhes bya ba 'di ni mjug bsdu ba yin par sbyar ro/ /de la bde ba dang sdug bsngal dag las gzhan pa zhes bya ba ni tshor ba'i phung po las gzhan pa ste/ shes pa de yod pa nyid ces bya bar sbyar ro/ /shes pa yod pa nyid ma yin pa'i chos rnams zhes bya ba ni/ rnam par shes pa'i phung po ma yin pa'i chos te/ gzugs dang / tshor ba dang / 'du shes dang / 'du byed rnams so/ /bde ba dang sdug bsngal gyi ngo bo nyid ma yin par nges pa zhes bya ba ni/ rnam par shes pa'i phung po ma yin pa'i chos/ gzugs dang / tshor ba dang / 'du shes dang / 'du byed kyi chos de rnams bde ba dang / sdug bsngal gyi ngo bo nyid ma yin par nges par sgrub pa'o/ /gzhal bya yin pa'i phyir zhes bya ba ni/ 'di ltar gzugs dang / tshor ba dang / 'du shes dang / 'du byed rnams ni gzhal bya yin pa'i phyir/ bde ba dang / sdug bsngal gyi ngo bo nyid ma yin par nges te/ chos gang dang gang gzhal bya yin pa de dang de dag ni bde ba dang / sdug bsngal gyi ngo bo nyid ma yin par nges pa'i phyir ro/ /dper na shes pa bzhin pas zhes bya ba ni gnyi ga la grags pa'i dpe yin te/ shes pa zhes bya ba ni grangs can gyi gzhung las skyes bu zhes bya ba yin te/ de ni nged sangs rgyas pa'i gzhung las rnam par shes pa zhes bya ba yin no/ /de'i phyir ji ltar dper na grangs can gyi gzhung las/ shes pa zhes bya ba'i skyes bu ni gzhal bya yang yin la/ /de bde ba dang sdug bsngal la sogs pa'i yon tan dang ldan pa yang mi 'dod pa de bzhin du/ gzugs dang / tshor ba dang / 'du shes dang / 'du byed ces bya ba'i chos rnams kyang shes pa bzhin du gzhal bya yin pa'i phyir/ bde ba dang / sdug bsngal gyi ngo bo nyid ma yin par nges so/ /de'i phyir de ni rjes su dpag pas kyang rigs pa ma yin no zhes bya ba ni ji skad smras pa'i gtan tshigs de'i phyir na grangs can dag gis nang gi bye brag rnams kyi rgyu ni bde ba dang / sdug bsngal dang / gti mug gi ngo bo nyid yin par nges te zhes gang smras pa de ni dbu ma pa'i rjes su dpag pa des kyang rigs pa ma yin no zhes mjug bsdu ba yin no/ /gal te grangs can dag 'di skad ces/ dbu ma pas dper na shes pa bzhin pas zhes shes pa las dpe blangs pa de shes pa ni skyes bu yin la/ de ni khyed la ma grub pas de'i phyir dbu ma pas dpe ma grub bo zhes zer na/ phyogs snga ma khong nas dbyung ba de'i lan du/ 'dir 'grel pa byed pa nyid kyis shes pa spyir grub pa kho na las dpe nyid blangs pas dpe med pa yang ma yin no zhes bya ba smras te/ shes pa zhes bya ba ni rnam par shes pa'i bye brag ste/ de ni khyed la yang skyes bu zhes bya bar grags la/ kho bo cag la yang shes pa zhes bya bar grags pas shes pa de ni spyir grub pa yin no/ /de ltar shes pa spyir grub pa kho na las dpe nyid blangs pas kho bo'i dpe ma grub pa ma yin no/ /da ni rang bzhin rgyur 'dod pa dag gi gzhung las gtso bo las chen po la sogs pa de kho na dag 'byung ngo zhes zer ba'i lugs dgag pa'i phyir/ 'dir 'grel pa byed pa nyid kyis gtso bo chen po ni chen po la sogs pa de kho na'i rgyu ma yin te/ mi gsal ba'i phyir/ dper na skyes bu bzhin pas rang bzhin rgyur 'dod pa dag gi rang gi rjes su dpag pa la gnod do zhes bya ba smras te/ 'dir yang gtso bo ni zhes bya ba 'di ni chos can yin la/ chen po la sogs pa'i de kho na'i rgyu ma yin te zhes bya ba 'di ni bsgrub par bya ba chos yin/ mi gsal ba'i phyir zhes bya ba 'di ni sgrub pa'i chos can yin/ dper na skyes bu bzhin pas zhes bya ba 'di ni dpe yin/ rang bzhin rgyur 'dod pa dag gis rang gi rjes su dpag pa la gnod do zhes bya ba 'di ni mjug bsdu ba yin par sbyar ro/ /de la gtso bo zhes bya ba ni rang bzhin zhes bya ba'i snying stobs dang rdul dang mun pa'i phan yon gsum cha mnyam par gyur pa rtags med cing mi gsal ba gang yin pa'o/ /chen po la sogs pa de kho na'i rgyu ma yin te zhes bya ba ni/ gtso bo de chen po dang nga rgyal dang blo dang yid dang las kyi dbang po rnams dang / de tsam dang 'byung ba chen po zhes bya ba de kho na dag gi skyes pa'i rgyu ma yin par sgrub pa'o/ /mi gsal ba'i phyir zhes bya ba 'di ni gtso bo de ni rtags med cing mi gsal ba'i phyir chen po la sogs pa de kho na'i rgyu ma yin pa'o/ /dper na skyes bu bzhin pas zhes bya ba ni dper na skyes bu yang mi gsal ba'i phyir/ chen po la sogs pa de kho na'i rgyu ma yin pa de bzhin du/ gtso bo yang mi gsal ba'i phyir chen po la sogs pa de kho na'i rgyu ma yin no/ /rang bzhin rgyur 'dod pa d ag gis rang gi rjes su dpag pa la gnod do zhes bya ba ni grangs can dag gis gtso bo rtags med cing mi gsal ba chen po la sogs pa de kho na'i rgyu yin par dam bcas pa'i rang gi rjes su dpag pa de la dbu ma pas de mi gsal bas rgyu ma yin par rjes su dpag pa nyid kyis gtso bo rgyur 'dod pa de gsal ba'i phyir ro/ /ci ste mi gsal ba'i phyir zhes bya ba'i gtan tshigs kyi don gal te gsal ba'i sngon rol gyi gnas skabs la bya na ni/ dpe sgrub pa'i chos dang mi ldan pa'i skyon du 'gyur la/ gal te shes pa yod pa nyid la bya na ni gtan tshigs kyi don ni 'grub bo zhe na zhes bya ba 'di ni dbu ma pas grangs can gyi dogs pa bsu ba'i tshig yin te/ grangs can dag na re dbu ma pas sngar bsgrubs pa'i gtan tshigs su mi gsal ba'i phyir zhes bya ba de gal te chen po la sogs pa gsal ba'i sngon rol gyi gnas skabs gtso bo zhes bya ba la bya na ni/ dpe sgrub pa'i chos dang mi ldan pa'i skyon du 'gyur te/ 'di ltar gtso bo mi gsal ba nyid gang yin pa de skyes bu la med pa'i phyir ro/ /gal te shes pa yod pa nyid la bya na ni gtan tshigs kyi don mi 'grub ste/ 'di ltar shes pa yod pa nyid kyi mi gsal ba nyid gang yin pa de gtso bo la med pa'i phyir ro zhes zer ba yin no/ /de la ci ste zhes bya ba'i sgra ni dbu ma pas rang bzhin rgyur 'dod pa dag gi dogs pa bsu ba'i tshig yin no/ /mi gsal ba'i phyir zhes bya ba gtan tshigs kyi don zhes bya ba ni dbu ma pas sngar gtso bo ni chen po la sogs pa de kho na'i rgyu ma yin te/ mi gsal ba'i phyir zhes bya ba'i gtan tshigs kyi don bstan pa gang yin pa'o/ /gal te gsal ba'i sngon rol gyi gnas skabs la bya na ni zhes bya ba la/ 'dir gsal ba zhes bya ba ni chen po ste/ chen po ni cung zad tsam dang 'gyur ba tsam yin pa'i phyir ro/ /de'i sngon rol gyi gnas skabs zhes bya ba ni gtso bo ste/ gtso bo ni rtags med cing mi gsal ba yin pa'i phyir ro/ /de'i phyir gal te gtso bo mi gsal ba nyid gang yin pa de gtan tshigs nyid du brjod na ni/ des na dpe sgrub pa'i chos dang mi ldan pa'i skyon du 'gyur la zhes bya ba smras te/ dpe zhes bya ba ni dbu ma pas sngar dper na skyes bu bzhin pas zhes smras pas te skyes bu yin no/ /sgrub pa'i chos zhes bya ba ni dbu ma pas sngar mi gsal ba'i phyir zhes smras pa ste/ gtan tshigs yin no/ /mi ldan pa'i skyon du 'gyur la zhes bya ba ni 'di ltar gtso bo mi gsal ba nyid gang yin pa de skyes bu la med pa'i phyir ro/ /gal te shes pa yod pa nyid la bya na ni zhes bya ba la shes pa yod pa nyid ces bya ba ni skyes bu'i rang bzhin te de yang rtags med cing mi gsal ba yin pa'i phyir ro/ /de'i phyir gal te shes pa yod pa nyid kyi mi gsal ba nyid gang yin pa gtan tshigs de nyid du brjod na ni/ des na gtan tshigs kyi don mi 'grub bo zhes bya ba smras te/ gtan tshigs kyi don zhes bya ba ni/ dbu ma pas sngar mi gsal ba'i phyir zhes smras pa ste/ gtso bo ni mi gsal ba'i phyir chen po la sogs pa de kho na'i rgyu ma yin pa'i gtan tshigs so/ /de ni ma grub pa zhes bya ba ni 'di ltar shes pa yod pa nyid kyi mi gsal ba nyid gang yin pa de gtso bo la med pa'i phyir ro/ /de ltar na dbu ma pa'i phyogs kyi chos de mi rung ngo zhes zer ro/ /de skad ces zer ba de'i lan du 'dir 'grel pa byed pa nyid kyis/ de ni bzang po ma yin te/ gtan tshigs spyir brjod pa'i phyir ram/ bye brag tu brjod na yang nye bar sbyar bas spyir gcig tu byed pa'i phyir ltag chod de ni ma grub pa ltar snang ba yin no zhes bya ba smras so/ /de la de ni bzang po ma yin te zhes bya ba ni grangs can gyis smras pa/ de ni dbu ma pa'i dpe sgrub pa'i chos dang mi ldan pa yang ma yin la/ gtan tshigs kyi don mi 'grub pa yang ma yin pas bzang po ma yin pa'o/ /gtan tshigs spyir brjod pa'i phyir zhes bya ba ni/ 'di ltar chos spyir bzung nas rjes su dpog par byed kyi/ de'i bye brag bzung nas rjes su dpog par mi byed pa'i phyir te/ dper na sgra dang bum pa'i mi rtag pa spyir brjod pa dang 'dra bar gtso bo dang skyes bu'i mi gsal ba spyir brjod pa'i phyir/ dpe sgrub pa'i chos dang mi ldan pa ma yin no/ /bye brag tu brjod na yang nye bar sbyar bas spyir gcig tu byed pa'i phyir zhes bya ba ni/ gtso bo dang skyes bu mi gsal ba nyid so sor bye brag tu brjod du zin na yang don nye bar sbyar bas spyi gcig tu byed pa'i phyir te/ dper na phyogs kyi chos spyod pa'i dus na/ sgra ni lkog ma dang / rkan dang mchu la sogs pa'i rkyen rnams kyis byed pas/ de ltar sgra la byas pa nyid phyogs kyi chos bye brag tu brjod cing / bum pa ni 'jim pa dang dbyug gu dang 'khor lo la sogs pa'i rkyen rnams kyis byed pas/ de ltar bum pa la byas pa nyid phyogs kyi chos bye brag tu brjod na yang don nye bar sbyar bas sgra dang bum pa'i mi rtag pa nyid spyir gsar du bye brag med par byed nus pa bzhin pas gtan tshigs kyi don mi 'grub pa yang ma yin no/ /de ltar kho bo gtan tshigs mi gsal ba'i phyir zhes bya ba de spyir brjod pa de'i phyir/ khyod kyi ltag chod de ni ma grub pa ltar snang ba yin no zhes mjug bsdu bar bya'o/ /de la ltag chod de ni zhes bya ba ni log thabs su smra ba de ste/ sngar rang bzhin rgyur 'dod pa de dag na re/ mi gsal ba'i phyir zhes bya ba gtan tshigs kyi don gal te gsal ba'i sngon rol gyi gnas skabs la bya na ni/ dpe sgrub pa'i chos dang mi ldan pa'i skyon du 'gyur la/ gal te shes pa yod pa nyid la bya na ni gtan tshigs kyi don mi 'grub bo zhes zer ba de'o/ /ma grub pa ltar snang ba yin no zhes bya ba ni khyod la kho bo'i gtan tshigs kyi don ma grub pa nyid kyis gsal ba dang / de kho na med pas ma grub pa ltar snang ba yin gyi/ ma grub pa nyid ma yin pa ste/ kho bos gtan tshigs mi gsal ba'i phyir zhes bya ba de spyir brjod pa'i phyir ram/ bye brag tu brjod na yang nye bar sbyar bas spyir gcig tu byed pa'i phyir/ kho bos gtan tshigs kyi don ni gsal ba'i phyir zhes bya ba de grub pa nyid yin pa'i phyir ro/ /rang bzhin dang dus dang sred med kyi bu rgyur 'dod pa dag spyir dgag pa yang dbang phyug bzhin du blta bar bya'o zhes bya bas ni 'di skad bstan te/ 'di ltar rgyu'i tshig gi don dgag par bya ba ji snyed pa de dag thams cad la dbang phyug rgyur 'dod pa dgag pa 'thad pa nyid sbyar du rung bas/ de'i phyir rang bzhin dang dus dang sred med kyi bu rgyur 'dod pa dag spyir dgag pa yang dbang phyug bzhin du blta bar bya'o zhes bya ba 'di smras so/ /de yang 'di ltar sbyar bar bya ste/ sngar dbang phyug rgyur 'dod pa dgag pa'i skabs su de ni dam bcas pa tsam ste/ dbang phyug ni kun rdzob tu yang 'gro ba mtha' dag skye ba'i rgyu yin par mi rung ste/ la la'i dga' ba dang yongs su gdung ba'i rgyu yin pa'i phyir/ dper na ba lang rdzi bzhin no/ /yang na 'gro ba ni rgyu byed pa po dbang phyug ces bya ba gcig dang ldan pa ma yin par nges te gzhal bya yin pa'i phyir/ dper na dbang phyug bzhin pas kun rdzob tu yang dngos po rnams de las skye ba med do/ /dbang phyug rgyu yin na yang 'bras bu'i bdag gi bdag nyid dam/ gzhan du gyur pa'am/ gnyi gar gyur pa zhig tu 'gyur grang na/ de la 'bras bu'i bdag gi bdag nyid yin na ni/ rgyu dbang phyug de 'bras bu 'jig rten gsum gyi bdag nyid yin pas dbang phyug las dbang phyug skye ba'am/ 'jig rten gsum las 'jig rten gsum skye bar 'gyur bas de'i dgag pa ni don dam par dbang phyug bdag las skye ba med par nges te yod pa'i phyir/ dper na shes pa yod pa nyid bzhin no/ /don dam par 'jig rten gsum bdag las skye ba med par nges te yod pa'i phyir/ dper na shes pa yod pa nyid bzhin no/ /gzhan du gyur pa yin na yang rgyu dbang phyug de 'bras bu 'jig rten gsum las gzhan du 'gyur ba yin pas/ dbang phyug las 'jig rten gsum skye ba'am/ dbang phyug 'jig rten gsum gyi rkyen yin par 'gyur bas de'i dgag pa ni don dam par 'jig rten gsum de dag gi rkyen dbang phyug gzhan las skye ba med de/ gzhan yin pa'i phyir dper na bum pa bzhin no/ /don dam par gzhan brjod par 'dod pa 'jig rten gsum 'grub par byed pa dbang phyug ma yin par nges te/ gzhan yin pa'i phyir/ dper na rgyu spun la sogs pa bzhin no/ / gnyi gar gyur pa yin na yang 'jig rten gsum gyi nus pa ni dbang phyug yin pas nus pa las skye ba ni bdag las skye ba yin pa/ 'jig rten gsum gyi gsal ba ni dbang phyug las gzhan yin pas gsal ba las skye ba ni gzhan las skye ba yin pas de'i dgag pa ni dbang phyug las 'jig rten gsum gyi nus pa skye ba med de yod pa'i phyir/ dper na shes pa yod pa nyid bzhin no/ /dbang phyug las 'jig rten gsum gyi gsal ba yang skye ba med de/ gzhan yin pa'i phyir dper na bum pa bzhin no/ /don dam par gzhan brjod par 'dod pa dbang phyug rkyen ma yin par nges te gzhan yin pa'i phyir/ dper na rgyu spun la sogs pa bzhin no zhes bshad pa bzhin du 'dir yang gtso bo ni kun rdzob tu yang 'gro ba mtha' dag skye ba'i rgyu yin par mi rung ste/ la la'i dga' ba dang / yongs su gdung ba'i rgyu yin pa'i phyir/ dper na ba lang rdzi bzhin no/ /yang na 'gro ba ni rgyu byed pa po gtso bo zhes bya ba gcig dang ldan pa ma yin par nges te/ gzhal bya yin pa'i phyir/ dper na gtso bo bzhin pas kun rdzob tu yang dngos po rnams de las skye ba med do/ /gtso bo rgyu yin na yang 'bras bu'i bdag gi bdag nyid dam/ gzhan du gyur pa 'am/ gnyi gar gyur pa zhig tu 'gyur grang na/ de la 'bras bu'i bdag gi bdag nyid yin na ni/ rgyu gtso bo de 'bras bu 'jig rten gsum gyi bdag nyid yin pas gtso bo las gtso bo skye ba'am/ 'jig rten gsum las 'jig rten gsum skye bar 'gyur bas de'i dgag pa ni don dam par gtso bo bdag las skye ba med par nges te yod pa'i phyir/ dper na shes pa yod pa nyid bzhin no/ /don dam par 'jig rten gsum bdag las skye ba med par nges te yod pa'i phyir/ dper na shes pa yod pa nyid yin no/ /gzhan du gyur pa yin na yang gtso bo de 'bras bu 'jig rten gsum las gzhan du 'gyur ba yin pas/ gtso bo las 'jig rten gsum skye ba'am/ gtso bo 'jig rten gyi rkyen yin par 'gyur bas de'i dgag pa ni don dam par 'jig rten gsum de dag gi rkyen gtso bo gzhan las skye ba med de/ gzhan yin pa'i phyir dper na bum pa bzhin no/ /don dam par gzhan brjod par 'dod pas 'jig rten gsum 'grub par byed pa gtso bo ma yin par nges te gzhan yin pa'i phyir dper na rgyu spun la sogs pa bzhin no/ /gnyi gar gyur pa yin na yang 'jig rten gsum gyi nus pa ni gtso bo yin pas nus pa las skye ba ni bdag las skye ba yin la/ 'jig rten gsum gyi gsal ba ni gtso bo las gzhan yin pas gsal ba las skye ba ni gzhan las skye ba yin pas de'i dgag pa ni gtso bo las 'jig rten gsum gyi nus pa skye ba med de yod pa'i phyir/ dper na shes pa yod pa nyid bzhin no/ /gtso bo las 'jig rten gsum gyi gsal ba yang skye ba med de gzhan yin pa'i phyir dper na bum pa bzhin no/ /don dam par gzhan brjod par 'dod pa gtso bo rkyen ma yin par nges te gzhan yin pa'i phyir/ dper na rgyu spun la sogs pa bzhin no/ /gzhan yang gtso bo skyes pa'am/ ma skyes pa zhig gis skyed par byed grang na/ gal te skyes pa yod na ni/ de ltar na gtso bo mi rtag pa yin te/ skye ba can yin pa'i phyir dper na bum pa bzhin no/ /rjes su dpag pa la phyir gnod par gyur pa'i yang phyir ro/ /'on te gtso bo ma skyes pa yin na ni de ltar na gtso bo med pa yin te/ dper na nam mkha'i me tog bzhin no zhes bya bar sbyar ro/ /de bzhin du dus rgyur 'dod pa dag kyang 'gro ba skye ba'i rgyu ni dus yin par rtog par byed do/ /de dag na re/ dus kyis 'byung ba rnams 'byin cing / /dus kyis skye dgu rnams sdud byed/ /dus kyis gnyid log sad byed pas/ /dus ni 'da' bar dka' ba yin/ /de bzhin du/ srung ba sum brtsegs 'obs ni rgya mtsho dang / /dmag mi srin po nor ni nor sbyin sbyor/ /gang gis bstan bcos pa sangs tshad mnyam pa/ /sgra sgrogs bu de'ang dus kyi dbang gis nyams/ /de bzhin nor lha gang gi zhang yin zhing / /nor rgyal gang gi pha yin pa/ /'jigs med khro bo'ang bsad gyur pas/ /dus ni 'da' bar dka' ba yin/ /de bzhin du mig la sogs pa dang / shing ljon pa la sogs pa'i rgyu khu chu dang khrag dang sa bon dang sa la sogs pa de dag yod kyang / 'di la dus med par dngos po rnams mi skye'o zhes zer ro/ /de bas na de dgag pa'i phyir dus rgyur 'dod pa dag spyir dgag pa yang dbang phyug bzhin du blta bar bya'o zhes bya ba smras te/ 'dir yang dus ni kun rdzob tu yang 'gro ba mtha' dag skye ba'i rgyu yin par mi rung ste/ la la'i dga' ba dang yongs su gdung ba'i rgyu yin pa'i phyir dper na ba lang rdzi bzhin no/ /yang na 'gro ba ni rgyu byed pa po dus zhes bya ba gcig dang ldan pa ma yin par nges te gzhal bya yin pa'i phyir/ dper na bum pa bzhin pas kun rdzob tu yang dngos po rnams de las skye ba med do/ /dus rgyu yin na yang 'bras bu'i bdag gi bdag nyid dam/ gzhan du gyur pa'am/ gnyi gar gyur pa zhig tu 'gyur grang na/ de la 'bras bu'i bdag gi bdag nyid yin na ni/ rgyu dus de 'bras bu 'jig rten gsum gyi bdag nyid yin pas dus las dus skye ba'am/ 'jig rten gsum las 'jig rten gsum skye bar 'gyur bas/ de'i dgag pa ni don dam par dus bdag las skye ba med par nges te yod pa'i phyir/ dper na shes pa yod pa nyid bzhin no/ /don dam par 'jig rten gsum dus las skye ba med par nges te yod pa'i phyir/ dper na shes pa yod pa nyid bzhin no/ /gzhan du gyur pa yin na yang rgyu dus de 'bras bu 'jig rten gsum las gzhan du gyur pa yin pas dus las 'jig rten gsum skye ba'am/ dus 'jig rten gsum gyi rkyen yin par 'gyur bas de'i dgag pa ni don dam par 'jig rten gsum de dag gi rkyen dus gzhan las skye ba med de gzhan yin pa'i phyir dper na bum pa bzhin no/ /don dam par gzhan brjod par 'dod pa 'jig rten gsum 'grub par byed pa dus ma yin par nges te/ gzhan yin pa'i phyir/ dper na rgyu spun la sogs pa bzhin no/ /gnyi gar gyur pa yin na yang 'jig rten gsum gyi nus pa ni dus yin pas nus pa las skye ba ni/ bdag las skye ba yin la/ 'jig rten gsum gyi gsal ba ni dus las gzhan yin pas gsal ba las skye ba ni gzhan las skye ba yin pas/ de'i dgag pa ni dus las 'jig rten gsum gyi nus pa skye ba med de yod pa'i phyir/ dper na shes pa yod pa nyid bzhin no/ /dus las 'jig rten gsum gyi gsal ba yang skye ba med de gzhan yin pa'i phyir/ dper na bum pa bzhin no/ /don dam par gzhan brjod par 'dod pa dus rkyen ma yin par nges te gzhan yin pa'i phyir/ dper na rgyu spun la sogs pa bzhin no/ /gzhan yang dus skyes pa'am ma skyes pa zhig gis skyed par byed grang na/ gal te skyes pa yin na ni de lta na dus mi rtag pa yin te skye ba can yin pa'i phyir dper na bum pa bzhin no/ /rjes su dpag pa la phyir gnod par gyur pa'i yang phyir ro/ /'on te dus ma skyes pa yin na ni de lta na dus med pa yin te/ dper na nam mkha'i me tog bzhin no zhes bya bar sbyar ro/ /de bzhin du sred med kyi bu rgyur 'dod pa dag kyang 'gro ba skye ba'i rgyu ni sred med kyi bu yin par rtog par byed de/ de dag na re/ de nyid kyis ji skad du/ nga ni sbyin byed za ba po/ /nga ni zas dang skye dgu'i bdag /nga ni bram ze'i lus gnas na/ /za bar byed cing sbyin par byed/ /de bzhin du/ gang dag lha dag dang byed cing / /dad ldan brtson par byed pa dag /de dag nga la kun ti'i bu/ /byas pa sngon du 'gro bas brten/ /zhes smras pa lta bu dang / gang gi phyir phyi rol gyi 'byung ba 'jig pa'i tshe drang srong mar kan de yang khyab 'jug gi ltor zhugs pas/ 'gro ba gnas pa dang / rgyu ba 'di dag mthong ba de'i phyir sred med kyi bu de nyid 'gro ba skye ba'i rgyu yin no/ /de bzhin du ba ra ta'i gtam rgyud chen po'i lung las kyang / khyab 'jug gzugs sna tshogs ston pa dag gi tshe na/ srid sgrub la sogs pas 'jig rten ma lus pa 'di khyab 'jug gi lus kyi khongs su gtogs par mthong ngo zhes 'byung bas de'i phyir sred med kyi bu de nyid 'gro ba skye ba'i rgyu yin no zhes zer ro/ /de bas na de dgag pa'i phyir/ sred med kyi bu rgyur 'dod pa dag spyir dgag pa yang dbang phyug bzhin du blta bar bya'o zhes bya ba smras te/ 'dir yang sred med kyi bu ni kun rdzob tu yang 'gro ba mtha' dag skye ba'i rgyu yin par mi rung ste/ la la'i dga' ba dang yongs su gdung ba'i phyir/ dper na ba lang rdzi bzhin no/ /yang na 'gro ba ni rgyu byed pa po sred med kyi bu zhes bya ba gcig dang ldan pa ma yin par nges te gzhal bya yin pa'i phyir/ dper na sred med kyi bu bzhin pas/ kun rdzob tu yang dngos po rnams de las skye ba med do/ /sred med kyi bu rgyu yin na yang 'bras bu'i bdag gi bdag nyid dang gzhan du gyur pa'am/ gnyi gar gyur pa zhig tu 'gyur grang na/ de la 'bras bu'i bdag gi bdag nyid yin na ni/ rgyu sred med kyi bu de 'bras bu 'jig rten gsum gyi bdag nyid yin par sred med kyi bu las sred med kyi bu skye ba'am/ 'jig rten gsum las 'jig rten gsum skye bar 'gyur bas de'i dgag pa ni don dam par sred med kyi bu bdag las skye ba med par nges te yod pa'i phyir/ dper na shes pa yod pa nyid bzhin no/ /don dam par 'jig rten gsum bdag las skye ba med par nges te yod pa'i phyir/ dper na shes pa yod pa nyid bzhin no/ /gzhan du gyur pa yin na yang rgyu sred med kyi bu de 'bras bu 'jig rten gsum las/ gzhan du gyur pa yin pas/ sred med kyi bu las 'jig rten gsum skye ba'am/ sred med kyi bu 'jig rten gsum gyi rkyen yin par 'gyur bas de'i dgag pa ni don dam par 'jig rten gsum de dag gi rkyen sred med kyi bu gzhan las skye ba med de gzhan yin pa'i phyir/ dper na bum pa bzhin no/ /don dam par gzhan brjod par 'dod pa 'jig rten gsum 'grub par byed pa sred med kyi bu ma yin par nges te gzhan yin pa'i phyir/ dper na rgyu spun la sogs pa bzhin no/ /gnyi gar gyur pa yin na yang 'jig rten gsum gyi nus pa ni sred med kyi bu yin pas nus pa las skye ba ni bdag las skye ba yin la/ 'jig rten gsum gyi gsal ba ni sred med kyi bu las gzhan yin pas/ gsal ba las skye ba ni gzhan las skye ba yin pas de'i dgag pa ni/ sred med kyi bu las 'jig rten gsum gyi nus pa skye ba med de yod pa'i phyir/ dper na shes pa yod pa nyid yin no/ /sred med kyi bu las 'jig rten gsum gyi gsal ba yang skye ba med de gzhan yin pa'i phyir/ dper na bum pa bzhin no/ /don dam par gzhan brjod par 'dod pa sred med kyi bu rkyen ma yin par nges te gzhan yin pa'i phyir/ dper na rgyu spun la sogs pa bzhin no/ /gzhan yang sred med kyi bu skyes pa'am ma skyes pa zhig gis skyed par byed grang na/ gal te skyes pa yin na ni de ltar na sred med kyi bu mi rtag pa yin te skye ba can yin pa'i phyir dper na bum pa bzhin no/ /rjes su dpag pa la phyir gnod par 'gyur ba'i yang phyir ro/ /'on te sred med kyi bu ma skyes pa yin na ni de ltar na sred med kyi bu med pa yin te/ dper na nam mkha'i me tog bzhin no/ /gzhan yang 'gro ba yod pa'am med pa zhig sred med kyi bu las skye bar 'gyur grang na/ de yang / med na gang gi rkyen zhes bya/ /yod na rkyen gyis ci zhig bya/ /zhes 'og nas 'gog par 'gyur ba'i phyir ro/ /gzhan yang 'gro ba bskyed pa'i rgyu ni bdag nyid chen po zhig yin grang na/ de'i phyir de gal te bdag nyid chen po yin na ji ltar na/ des snying rje med par/ na ra ka dang / skra ldan dang / stobs mchog la sogs pa srog dang nor bdag dang bral bar byas/ 'on te des skye dgu bsrung ba'i don dang / chos bsrung ba'i don du lha dang bram ze'i tsher mar gyur pa sdig pa can chos 'jig par byed pa'i lha ma yin dag la rjes su ston pa yin no zhe na/ de ltar na yang des bdag rang dang lha ma yin rnams kyi sgyu dang / g.yo ba dang / khro ba dang / 'dod pa dang / gti mug la sogs pa'i nyon mongs pa chos ma yin pa skyed par byed pa rnam pa sna tshogs dag gzhig par bya ba'i rigs so/ /gzhan yang de 'jig rten gsum skyong bar byed pa yin na/ ci sred pas byed dam/ 'on te snying rjes byed/ gal te sred pas byed na ni/ de sred pas 'khol ba yin pa'i phyir mi phal pa dang 'dra bas ji ltar 'byin pa por rung / 'on te snying rjes byed na ni/ ci'i phyir lha ma yin skye ba dang / rga ba dang / na ba dang / 'chi ba la sogs pa'i sdug bsngal ma bcom pa dag la snying rje mi skye/ gzhan yang bdag nyid chen po ni/ dgra bo dang mdza' bshes dag la byams sdang gi 'du shes dang bral ba yin na de'i phyir de lha ma yin dag la dgrar 'du shes pa yang mi rung ngo / /de gzhan gyi nor dang gzhan gyi chung ma 'phrog pa la sogs pa la 'jug pa dag kyang dmigs pas de'i phyir/ de'i g.yos 'gro ba 'di rmongs par gyur te 'khor bar bying zhing 'dug pa des na/ de skyes bu dam pa ma yin pa'i spyod pa dang ldan par brjod par bya'i/ de skyes bu dam pa zhes ni brjod par mi bya'o/ /'on te phyogs 'dzin pa la mngon par zhen pa'i dug gis sun phyung ba'i yid dang ldan pa dag gis rang gi grub pa'i mtha'i skyon bcab pa'i phyir/ khyab 'jug gi lus de ni rtag pa dang zhi ba dang zhi bar gyur pa gzhan kho na zhig yin par rtog cing lus de yang yod par gyur pa yang ma yin/ med par gyur pa yang ma yin/ yod med du gyur pa yang ma yin la/ rnam pa thams cad kyis brjod par bya ba ma yin te/ rnal 'byor pas de mthong na/ yang srid pa med par 'gro'o zhe na/ de lta na yang de gal te nya dang rus sbal dang phag rgod la sogs pa'i lus dag las gzhan pa zhig yin na ni/ de lta na rtag pa dang zhi ba dang zhi bar gyur pa ma yin te de las gzhan pa'i phyir/ dper na skye bo phal pa dag gi lus bzhin no/ /'on te nya dang rus sbal dang phag rgod la sogs pa'i lus dag las gzhan ma yin na ni/ de lta na yang rtag pa dang zhi ba dang zhi bar gyur pa ma yin te/ dper na nya dang rus sbal dang phag rgod la sogs pa'i lus de dag kho na bzhin no/ /'on te yang de la lus gsum yod de/ zhi ba dang ma zhi ba dang gnyi ga'o zhes rjod par byed na/ de lta na yang de bud med 'phyon ma bzhin du phyi rol gyi rnam pas ni zhi ba nyid yin la/ don dam par ni ma zhi ba nyid yin par 'gyur ro/ /gzhan yang de'i lus rtag par yongs su brtag pa gang yin pa de gal te dngos po'i mtshan nyid yin na ni/ de'i phyir mi rtag pa yin te/ dngos po yin pa'i phyir bum pa bzhin no/ /'on te dngos po med pa'i mtshan nyid yin na ni de'i phyir med pa kho na yin te/ dngos po med pa'i phyir nam mkha'i me tog bzhin no/ /dngos po dang dngos po med pa'i mtshan nyid yin par yang mi rung ste/ dgag pa mi mthun pa'i skyon du 'gyur ba'i phyir te/ 'di ltar dngos po yod pa dang med pa ni nang mi mthun pa'i phyir ro/ /brjod du med pa nyid ces bya ba yang mi rung ste/ rtag pa dang zhi ba zhes brjod pa'i phyir ro/ /dbang po nye bar bsdus nas oM zhes bya ba brjod cing sred med kyi bu rjes su dran pa la brtson par byed na/ grol bas 'gyur zhes zer ba gang yin pa de yang rigs pa ma yin te/ rtog pa dang bcas pa'i phyir/ dper na bu dang chung ma rjes su dran pa la brtson par byed pa dag grol bar mi 'gyur ba de bzhin du/ sred med kyi bu rjes su dran pa la brtson par byed pa yang grol bar mi 'gyur ro/ /gzhan yang tshangs pa dang / khyab 'jug dang / dbang phyug chen po dang / gtso bo dang / dus la sogs pa 'byin pa po yin par so so nas yongs su rtog par byed pa de la yang gang gi tshig bden zhing gang gi tshig mi bden par gzung bar bya/ de dag gcig pa nyid du rtog par byed na ni tshangs pas kyang bdag nyid bsad pa dang / nor lha yang tshangs pa gsod pa yin par 'gyur ro/ /gzhan yang tshangs pa dang / khyab 'jug dang / dbang phyug chen po rnams kyi lus zhi ba dam pa yin par yongs su brtag pa gang yin pa de yang ci ste skyes pa zhig yin nam/ 'on te ma skyes pa zhig yin/ gal te skyes pa zhig yin na ni mi rtag par 'gyur te/ skye ba can yin pa'i phyir dper na bum pa bzhin no/ /'on te ma skyes pa zhig yin na ni med pa kho na yin te/ ma skyes pa'i phyir dper na nam mkha'i me tog bzhin no/ /zhar la bshad pas chog go/ /des na de ltar dngos po rnams rgyu med pa las kyang skye ba med do zhes bya ba ni de ltar dngos po'i ngo bo dang / dngos po med pa'i ngo bo las kyang skye ba bkag pa des na de ltar/ dngos po rnams rgyu med pa las kyang skye ba med do// //bam po bcu drug pa/ grangs can dag las kha cig na re/ bdag las ma yin gzhan las min/ /gnyis las ma yin rgyu med min/ /dngos po gang dag gang na yang / /skyes pa nam yang yod ma yin/ /zhes bya ba la sogs pa smras pa gang yin pa de ma skyes pa ni bden mod kyi/ 'on kyang gsal bar byed do zhes zer ro zhes bya ba 'di'i bsdus pa'i don ni grangs can dag las gsal bar smra ba dag dbu ma pa la tshig brgyud pas grub pa la sgrub pa'i skyon gyis sgro 'dogs par byed de/ 'di la khyod kyis med pa gang yin pa de ni rnam pa de dag gis skye ba med kyi yod pa nyid gsal bar byed do zhes smras pa yin pas/ de ni nged kyi gzhung las kyang grub pa yin pas khyod grub pa la sgrub pa yin no zhes tshig brgyud pas skyon 'dogs pa yin no/ /de la grangs can dag las kha cig dag na re zhes bya ba ni grangs can dag la grub pa'i mtha' smra ba mang du yod pa las gsal bar smra ba dag na re/ 'di skad ces zer ro zhes bya bar sbyar ro/ /smras pa gang yin pa de zhes bya ba ni dbu ma pas sngar smras pa gang yin pa'o/ /ma skyes pa ni bden mod kyi zhes bya ba ni snga na med pa gang yin pa de ni bdag dang gzhan dang gnyis dang rgyu med pa'i rnam pa de dag gis skye ba med pa ni/ kho bo cag gi grub pa'i mtha' las kyang smras pas bden no zhes tshig brgyud pas smra ba yin no/ /'on kyang gsal bar byed do zhes bya ba ni snga na yod pa nyid rkyen gyis gsal bar byed pa ste/ des na dbu ma pa khyod kyis med pa gang yin pa de ni rnam pa de dag gis skye ba med kyi/ yod pa nyid gsal bar byed do zhes smras pa yin pas/ de ni nged kyi gzhung la yang grub pa yin pas khyed grub pa la sgrub pa yin no zhes tshig brgyud pas skyon 'dogs pa yin no/ /de skad ces zer ba de'i lan du/ 'dir 'grel pa byed pa nyid kyis de dag la 'di skad ces dri bar bya ste zhes bya ba la sogs pa smras te grangs can gsal bar smra ba de dag la 'di skad ces dri bar bya ste zhes bya bar sbyar ro/ /de la gang dag gcig gsal bar byed ces bya ba ni dngos po gang dag gcig gsal bar byed ces bya ba'i tha tshig go/ /ji ltar gsal bar byed ces bya ba ni rnam pa gang gis gsal bar byed ces bya ba'i tha tshig go/ /gal te dper na mar mes bum pa la sogs pa bzhin no zhe na zhes bya ba ni gal te de dag na re/ dper na mar mes mun pa'i gnas skabs kyi bum pa la sogs pa gsal bar byed pa de bzhin du/ rkyen rnams kyis kyang chen po la sogs pa'i bye brag snga nas dus thams cad du yod pa dag gsal bar byed do zhes zer na'o/ /de skad ces zer na/ de dag la 'di skad ces dri bar bya ste/ bum pa la sogs pa ma skyes pa dag mar me ma skyes pas ji ltar gsal bar byed ces bya ba smras te/ 'di skad bstan te/ khyod kyis ji ltar gsal bar bya ba dang gsal bar byed pas gsal ba sgrub pa'i dpe bum pa la sogs pa dang mar me las blangs pa gang yin pa de kho bo'i phyogs la don dam par ma skyes pa yin pas bum pa la sogs pa ma skyes pa dag mar me ma skyes pas ji ltar gsal bar byed de mi byed do/ /de'i phyir rta'i rwa ma skyes pa ni nam yang gsal bar byar mi rung ngo zhes bya ba smras te/ dper na rta'i rwa ma skyes pa ni nam yang gsal bar byar mi rung ba de bzhin du/ bum pa la sogs pa ma skyes pa yang nam yang gsal bar byar mi rung ste/ de ltar re zhig don dam par gsal ba med do/ /tha snyad kyi bden pa'i lugs rnam par gzhag pa'i phyir de dag yod par khas blangs na yang smra bar bya ste zhes bya bas ni/ kun rdzob kyi bden pa'i lugs rnam par gzhag pa'i phyir bum pa la sogs pa dang mar me de dag yod par khas blangs na yang / kun rdzob tu yang mar mes bum pa la sogs pa snga na yod pa gsal bar byed pa ma yin pas gsal bar bya ba dang / gsal bar byed pas gsal ba sgrub pa'i dpe mi 'grub pas gsal ba med par ston to/ /de la tha snyad kyi bden pa'i lugs rnam par gzhag pa'i phyir zhes bya ba ni kun rdzob kyi bden pa'i lugs bum pa dang mar me la sogs pa'i chos gnas pa nyid rnam par gzhag pa'i phyir ro/ /de dag yod par khas blangs na yang zhes bya ba ni/ bum pa dang mar me la sogs pa de dag yod par khas blangs na yang ste/ 'di ltar kun rdzob tu bum pa la sogs pa dang mar me la sogs pa de dag yod pa'i phyir ro/ /smra bar bya ste zhes bya ba ni de ltar kun rdzob tu gsal bar bya ba dang / gsal bar byed pas gsal bar sgrub pa'i dpe bum pa la sogs pa khas blangs pa yang ji ltar kun rdzob tu dngos po snga na yod pa rkyen gyis gsal bar byed pa med pa de ltar smra bar bya ste zhes bya bar sbyar ro/ /mar mes bum pa la ci zhig byed ces bya ba ni/ pha rol la dri ba'i tshig yin te/ mar mes bum pa la sogs pa snga na yod pa gsal bar mi byed kyi/ sngon med pa 'byung bar byed pas gsal bar byed pa ma yin par ston pa yin no/ /gal te gzung bar byed na ni zhes bya ba ni/ de skad ces dris pa ni gal te de dag na re/ mar mes bum pa gzung ba nyid du byed pas de'i phyir/ bum pa snga na yod pa gsal bar byed pa yin no zhes zer na'o/ /de'i lan du de sngon med pas de nyid byed pa yin no zhes bya ba smras te/ de sngon med pa zhes bya ba ni gzung ba de mar me'i snga rol na med pas so/ /de nyid byed pa yin no zhes bya ba ni/ da ltar gzung ba de mar me'i snga rol na med la/ mar me byung bas gzung bar byed na 'o na ni mar mes gzung ba snga na med pa nyid byed pa yin pas/ de lta na mar mes gzung ba snga na med pa 'byung bar byed pa yin gyi/ snga na yod pa gsal bar byed pa ma yin no/ /'on te mig gi rnam par shes pa'i gzung ba nyid du byed na ni zhes bya ba ni/ gal te de dag na re/ mar mes bum pa mig gi rnam par shes pa'i gzung ba'i yul nyid du byed pas/ de'i phyir snga na yod pa gsal bar byed pa yin no zhes zer na'o/ /de'i lan du mun pa dang bcas pa na sngon med pas de nyid byed pa yin no zhes bya ba smras te/ mun pa dang bcas pa na sngon med pa zhes bya ba ni/ mig gi rnam par shes pa'i gzung ba nyid gang yin pa de mun pa dang bcas pa'i gnas skabs na sngon med pas so/ /de nyid byed pa yin zhes bya ba ni/ de ltar mig gi rnam par shes pa'i gzung ba nyid gang yin pa de mun pa dang bcas pa'i gnas skabs na sngon med la/ mar me byung bas mig gi rnam par shes pa'i gzung ba nyid du byed na/ 'o na ni mar mes mig gi rnam par shes pa'i gzung ba nyid snga na med pa de nyid byed pa yin pas/ de ltar na yang mar mes mig gi rnam par shes pa'i gzung ba nyid snga na med pa 'byung bar byed pa yin gyi/ snga na yod pa gsal bar byed pa ma yin no/ /ci ste bum pa gzung ba la bar chad byed pa'i mun pa sel bar byed pa na yang zhes bya ba ni/ gal te de dag na re/ mar mes bum pa gzung ba la bar chad byed pa'i mun pa sel bar byed pas de'i phyir snga na yod pa gsal bar byed pa yin no zhes zer na yang ngo / /de'i lan du/ de nyid byed pa yin no zhes bya ba smras te/ de nyid byed pa yin no zhes bya ba ni mar me med pa na bum pa gzung ba la bar chad byed pa'i mun pa sel ba gang yin pa de yang sngon med la/ mar me byung bas bum pa gzung ba la bar chad byed pa'i mun pa sel bar byed na/ 'o na ni mar mes bum pa gzung ba la bar chad byed pa'i mun pa sel ba snga na med pa de nyid byed pa yin pas de lta na yang mar mes bum pa gzung ba la bar chad byed pa'i mun pa sel ba snga na med pa 'byung bar byed pa yin gyi/ snga na yod pa gsal bar byed pa ma yin no/ /'on te pha rol po 'di skad ces blta bar bya ba dang / reg par byed pa'i rdzas la reg par bya ba ni mun pa dang bcas pa'i gnas skabs na yang yod pas de'i phyir de'i 'og tu snang bar gyur pa ni gsal ba yin no zhes zer na/ de'i lan du 'on te gzung ba yin na ni/ de nyid snang ba yin pas yang mar mes ci zhig bya zhes bya ba smras so/ / de la 'on te gzung ba yin no zhes bya ba ni/ reg par yang bya ba'i rdzas de mun pa dang bcas pa'i gnas skabs na gzung ba nyid du yod pa yin na ni'o/ /de nyid snang ba yin pas zhes bya ba ni/ de ltar reg par bya ba'i rdzas mun pa dang bcas pa'i gnas skabs na gzung ba nyid du yod pa de nyid snang ba yin pas so/ /yang mar mes ci zhig bya zhes bya ba ni snga na snang ba yin na de la yang mar mes gsal bar bya mi dgos pas/ de lta na yang mar me gsal bar byed pa ma yin no/ /'di skad bstan te/ 'di la sngon ma gsung ba phyis 'dzin par byed pa gang yin pa de la gsal ba zhes bya ba na/ reg par bya ba'i rdzas de mun pa dang bcas pa'i gnas skabs na gzung ba nyid du yod pa yin na/ de nyid blta bar bya ba'i rdzas su snang ba yin pas de la yang mar mes snang bar bya mi dgos pas de lta na yang mar mes gsal bar byed pa ma yin no/ /'on te reg par bya ba'i rdzas de mun pa dang bcas pa'i gnas skabs na gzung ba nyid du med pa las phyis mar mes snang bar byed na ni/ de lta na yang mar mes snga na med pa skyed par byed pa yin gyi/ snga na yod pa gsal bar byed pa ma yin no/ /kho bo cag gi phyogs la bum pa zhes bya ba yang 'byung ba dang 'byung ba las gyur pa'i tshogs yin te/ mar me phyung bar na snang ba dang lhan cig tu skye bas de'i phyir tha snyad du yang dngos po rang gi rgyu las rgyun gyis 'byung ba'i byed pa'i rgyu nyid yin te/ snang ba dang lhan cig tu 'byung ba'i rgyu yin pa'i phyir/ gsal bar byed pa nyid yin par bsams so zhes bya bas ni dbu ma pas phyogs la bum pa zhes bya ba yang 'byung ba dang 'byung ba las gyur pa'i tshogs skad cig pa yin te/ de mun pa'i gnas skabs na 'dug pa mar mes snang bar byed pa na bum pa'i skad cig ma snga ma dang / mun pa'i skad cig ni mnyam du 'gag la/ bum pa'i skad cig phyi ma dang snang ba'i skad cig kyang lhan cig tu skye bas de'i phyir mar me ni kun rdzob tu yang bum pa'i dngos po rang gi rgyu las rgyun gyis 'byung ba'i byed pa'i rgyu yin pa'i sgo nas gsal bar byed pa nyid yin par bsams kyi/ bum pa'i skad cig mun pa'i gnas skabs su sngar 'gags pa phyis snang bar mi byed pas gsal bar byed pa zhes ni mi bya ste/ bum pa'i skad cig snga ma 'gags pa mar mes snang bar ma byas pa'i phyir ro zhes bya bar ston to/ /de la kho bo cag gi phyogs la zhes bya ba ni/ kho bo cag sangs rgyas pa'i grub pa'i mtha' la'o/ /bum pa zhes bya ba yang zhes bya ba ni bum pa zhes bya ba'i ming can nam/ bum pa zhes bya ba'i sgrar brjod pa'i dngos po'o/ /'byung ba zhes bya ba ni sa la sogs pa 'byung ba chen po bzhi po dag go/ /'byung ba las byung ba zhes bya ba ni rgyur byas pa'i gzugs rnams te/ 'byung ba chen po bzhi po dag las gyur pa'o/ /tshogs yin te zhes bya ba ni de dag gi rdul phra rab 'dus pa'i tshogs yin pa ste/ de dag kyang skad cig ma'i tshogs yin no/ /mar me byung ba na snang ba dang lhan cig tu skye bas zhes bya ba ni/ skad cig ma nyid yin pas mar mes bum pa snga na yod pa gsal bar byed pa ma yin par ston to/ /'byung ba dang 'byung ba las gyur pa'i tshogs kyis bum pa ni skad cig ma nyid yin pas bum pa'i skad cig mi mthun pa snga ma 'gags pa'i 'og tu skad cig ma mi mthun pa phyi ma gzhan 'byung ngo / /de'i phyir gal te 'byung ba dang 'byung ba las gyur pa'i skad cig mun pa'i gnas skabs na snga na yod pa gang yin pa de nyid mar me'i gnas skabs kyi dus su yang 'byung bar 'gyur na ni/ des na mar mes dngos po snga na yod pa gsal bar byed do zhes byar yang rung grang na/ 'byung ba dang 'byung ba las gyur pa'i tshogs kyi bum pa ni skad cig gi rgyun gyis 'byung ba yin pa'i phyir/ bum pa'i skad cig snga ma gzhan ni mun pa dang lhan cig tu 'gag la/ bum pa'i skad cig ma phyi ma gzhan ni mar me byung ba na snang ba dang lhan cig tu skye bas de'i phyir mar mes dngos po snga na yod pa gsal bar byed pa ma yin no/ /de'i phyir tha snyad du yang dngos po rang gi rgyu las rgyun gyis 'byung ba'i byed pa'i rgyu nyid yin te zhes bya ba ni/ 'di skad bstan te/ de'i phyir kun rdzob kyi tha snyad du yang mar me ni bum pa'i dngos po rang gi rgyu 'jim pa la sogs pa las skad cig ma'i rgyun gyis 'byung ba la bar du gcod par mi byed pas rgyu yin pa'i sgo nas gsal bar byed pa nyid yin par brjod kyi/ bum pa'i skad cig mun pa'i gnas skabs su sngar 'gags pa phyis snang bar mi byed pas gsal bar byed pa'i rgyu ma yin pa'i phyir gsal bar byed pa zhes ni mi bya'o zhes ston to/ /'di la rgyu rnam pa gnyis te/ byed pa'i rgyu dang gsal bar byed pa'i rgyu'o/ /de la byed pa'i rgyu ni 'byung ba dang 'byung ba las gyur pa'i tshogs kyi mtshan nyid skye bar 'dod pa'i skad cig ma snga ma ste/ byed pa'i rgyu de las dngos po rang gi rgyu las rgyun 'dra ba'i rgyun gyis 'byung ba thams cad gang du snang bar gyur pa na/ snang ba de skye ba la bgegs mi byed pas de'i phyir snang ba yang bum pa la sogs pa'i byed pa'i rgyu nyid yin no/ / gsal bar byed pa'i rgyu ni grangs can dag gis dngos po snga na yod pa'i sgrub pa'i gtan tshigs su brtags pa tsam du zad de/ de ni kun rdzob tu yang med par shes par bya'o/ /ji ltar na mar me de tha snyad du yang dngos po rang gi rgyu las rgyun gyis 'byung ba'i byed pa'i rgyu nyid yin zhe na/ de'i phyir snang ba dang lhan cig tu 'byung ba'i rgyu yin pa'i phyir zhes bya ba smras te/ kun rdzob tu bum pa de snang ba dang lhan cig tu 'byung ba'i rgyu mar me yin pa'i phyir ro/ /gsal bar byed pa nyid yin par bsams so zhes bya ba ni mjug bsdu ba yin te/ de ltar bum pa snang ba dang lhan cig 'byung ba'i rgyu mar me yin pa'i phyir mar me ni kun rdzob tu yang bum pa'i dngos po rang gi rgyu las rgyun gyis 'byung ba'i byed pa'i rgyu yin pa'i sgo nas gsal bar byed pa nyid yin par bsams kyi/ bum pa'i skad cig mun pa'i gnas skabs su sngar 'gags pa phyis snang bar mi byed pas gsal bar byed pa zhes ni mi bya ste/ bum pa'i skad cig ma snga ma 'gags pa mar mes snang bar ma byas pa'i phyir ro zhes bstan pa yin no/ /don dam par ni skye ba dgag pa bzhin du gsal ba dgag pa yang mtshungs te zhes bya bas ni 'di skad bstan te/ dngos po rnams bdag gis gsal bar byed dam/ gzhan gyis gsal bar byed dam/ gnyis kyis gsal bar byed dam/ rgyu med pa las gsal bar byed grang na/ don dam par ni skye ba dgag pa bzhin du gsal ba dgag pa yang mtshungs te/ ji ltar don dam par nang gi skye mched rnams bdag las skye ba med par nges te/ yod pa'i phyir dper na shes pa yod pa nyid bzhin no/ /don dam par nang gi skye mched rnams de dag gi rkyen gzhan dag las skye ba med do/ /gzhan yin pa'i phyir dper na bum pa bzhin no/ /yang na don dam par gzhan brjod par 'dod pa mig la sogs pa nang gi skye mched 'grub par byed pa dag rkyen ma yin par nges te gzhan yin pa'i phyir/ dper na rgyu spun la sogs pa bzhin no/ /don dam par nang gi skye mched rnams bdag dang gzhan gnyi ga las skye ba med de/ phyogs gnyi gar bstan pa'i sgrub pa dag gis gtad khongs su chud par 'gyur ba'i phyir dang / gnyis las skye bar ston pa'i rjes su dpag pa med pa'i phyir yang ngo zhes bya bar dgongs so/ /don dam par nang gi skye mched rnams rgyu med pa las skye ba med de/ de ston pa'i rjes su dpag pa med pa'i phyir dang / rjes su dpag pa dang grags pa'i gnod par 'gyur ba'i skyon yod pa'i phyir yang ngo zhes bya bar dgongs so zhes bstan pa bzhin du/ 'dir yang don dam par dngos po rnams bdag gis gsal bar mi byed par nges te gsal ba'i phyir/ dper na gsal ba gzhan bzhin no/ /don dam par dngos po rnams de dag gi rkyen gzhan dag gis gsal bar mi byed de/ /gzhan yin pa'i phyir/ dper na bum pa bzhin no/ /yang na don dam par gzhan brjod par 'dod pa bum pa la sogs pa dngos po gsal bar byed pa dag rkyen ma yin par nges te gzhan yin pa'i phyir/ dper na rgyu spun la sogs pa bzhin no/ /don dam par dngos po rnams gnyi gas gsal bar mi byed de/ phyogs gnyi gar bstan pa'i sgrub pa dag gis gtad khongs su chud par 'gyur ba'i phyir dang / gnyi ga gsal bar ston pa'i rjes su dpag pa med pa'i phyir yang ngo zhes bya bar dgongs so/ /don dam par dngos po rnams rgyu med pas gsal bar mi byed de/ de ston pa'i rjes su dpag pa med pa'i phyir dang / rjes su dpag pa dang grags pa'i gnod par 'gyur ba'i skyon yod pa'i phyir yang ngo zhes bya bar dgongs so/ /gzhan yang mun pa yang gsal bar thal bar 'gyur ro zhes bya bar sbyar ro/ /pha rol po dag na re mi gsal ba gsal bar byed do zhes gdon mi za bar zer bar 'gyur bas/ de'i phyir mi gsal ba ni gsal bar mi byed de zhes bya ba smras so/ /ci'i phyir zhe na/ chen po la sogs pa mi gsal ba'i phyir zhes bya ba smras te/ chen po dang nga rgyal dang / 'byung ba dang / dbang po dang / de tsam zhes bya ba de kho na'i tshogs rnams mi gsal ba'i phyir ro/ /dper na nam mkha'i me tog bzhin no zhes bya bas ni de'i dpe bstan pa yin no/ /des na de ltar gsal ba yang bzang po ma yin no zhes bya ba ni mjug bsdu ba yin te/ sngar grangs can dag na re/ ma skyes pa ni bden mod kyi/ 'on kyang gsal bar byed do zhes zer zhing / dngos po rnams yod par sgrub pa gsal ba zhes bya ba yin par dam bcas pa de ni bzang po ma yin te/ 'di ltar ji skad bshad pa'i rnam pa des na gsal ba de dngos po yod par sgrub pa ma yin pa'i phyir ro/ /'di la gzhan ni dngos po rnams rgyu med pa las kyang skye ba med de/ dus thams cad du thams cad las thams cad skye bar thal ba la sogs par 'gyur ba'i phyir ro zhes rnam par bshad pa byed do zhes bya ba ni dngos po rnams rgyu med pa las skye ba med par sgrub pa'i skabs 'di la 'grel pa byed pa/ slob dpon bud+d+ha pA li ta ni 'di skad du rnam par bshad pa byed do zhes bstan pa yin no/ /de la 'di la zhes bya ba ni dngos po rnams rgyu med pa las skye ba med par sgrub pa'i skabs 'di la'o/ /gzhan ni zhes bya ba'i sgra ni bstan bcos 'di'i 'grel pa byed pa mang ste/ 'di lta ste/ slob dpon gyi zhal snga nas dang / gnas brtan bud+d+ha pA li ta dang / tsan+d+ra kI rti dang / de ba shar ma dang / gu Na shrI dang / gu Na ma ti dang / s+thi ra ma ti dang / slob dpon legs ldan byed nyid la thug pa'i bar dag yod pa las de dag phal las gzhan pa ste/ gnas brtan bud+d+ha pA li ta dang sbyar ro/ /gnas brtan bud+d+ha pA li ta ni dngos po rnams rgyu med pa las kyang skye ba med do/ dus thams cad du thams cad las thams cad skye bar thal ba la sogs par 'gyur ba'i phyir ro zhes rnam par bshad pa byed do/ /de la dngos po rnams zhes bya ba ni phyi dang nang gi skye mched rnams so/ /rgyu med pa las kyang zhes bya ba ni rgyu med pa dang rgyu mi mthun pa las kyang ngo / /skye ba med do zhes bya ba ni don dam pa'o/ /ci'i phyir dngos po rnams rgyu med pa las kyang skye ba med ce na/ gal te rgyu med pa las skye bar gyur na dus thams cad du skye bar thal bar 'gyur ba'i phyir te/ gal te dngos po rnams rgyu med pa las skye bar gyur na dus tshigs dang dus med par yang dus thams cad du skye ba kho nar thal bar 'gyur ro/ /gzhan yang thams cad las skye bar thal bar 'gyur ba'i phyir te/ gal te dngos po rnams rgyu med pa las kyang skye bar 'gyur na/ rgyu rigs mi mthun pa thams cad las kyang skye ba kho nar thal bar 'gyur ro/ / gzhan yang thams cad skye bar thal bar 'gyur ba'i phyir te/ gal te dngos po rnams rgyu med pa las kyang skye bar 'gyur na/ 'bras bu rigs mi mthun pa thams cad kyang skye ba kho nar thal bar 'gyur ro/ /sogs pa zhes bya bas ni rtsom pa thams cad don med pa'i nyes par 'gyur ro zhes rnam par bshad pa dag bsdu'o/ /de ltar dus thams cad du skye ba dang / thams cad las skye ba dang / thams cad skye ba dang / rtsom pa thams cad don med pa'i nyes par 'gyur ba de lta bu yang med pas de'i phyir dngos po rnams rgyu med pa las kyang skye ba med do zhes 'gog par byed do zhes rnam par bshad pa byed do zhes bya ba ni/ gnas brtan bud+d+ha pA li ta ni dngos po rnams rgyu med pa las skye ba med par sgrub pa'i gnas skabs 'dir de skad ces rnam par bshad pa byed do/ /de la yang glags yod pa'i tshig yin pa'i phyir/ gal te bsgrub par bya ba dang / sgrub pa bzlog pa'i tshig gi don mngon par 'dod na des 'di skad bstan par 'gyur te/ dngos po rnams rgyu las skye bar 'gyur ba dang / lan 'ga' kha cig skye bar 'gyur ba dang / rtsom pa 'bras bu dang bcas pa nyid du gyur pa'i phyir/ de ni mi rigs te/ sngar smras pa'i skyon du 'gyur ba'i phyir ro/ /ci ste gzhan du na yang don 'brel pa med pa yin te/ snga ma bzhin no zhes bya ba ni 'grel pa byed pa nyid kyis/ gnas brtan bud+d+ha pA li tas rnam par bshad pa de rigs pa ma yin par sgrub pa'i tshig yin no/ /de la de la yang zhes bya ba ni gnas brtan bud+d+ha pA li tas rnam par bshad pa de la yang ste/ de la yang 'grel pa byed pa 'dis skyon 'di mthong ngo / /glags yod pa'i tshig yin pa'i phyir zhes bya ba ni gnas brtan bud+d+ha pA li tas rnam par bshad pa de ni rgol ba gzhan gyi klan ka'i glags yod pa'i tshig yin pa'i phyir rigs pa ma yin no zhes bya ba'i tha tshig go/ /ji ltar glags yod pa'i tshig yin pa de nyid bstan pa'i phyir/ gal te bsgrub par bya ba dang / sgrub pa bzlog pa'i tshig gi don mngon par 'dod na zhes bya ba smras te/ bsgrub par bya ba zhes bya ba ni dngos po rnams rgyu med pa las kyang skye ba med de zhes bya ba'o/ /sgrub pa zhes bya ba ni dngos po rnams rgyu med pa las skye ba med de zhes bya ba de sgrub pa'i chos yin te/ dus thams cad du thams cad las skye bar thal bar 'gyur ba'i phyir dang / rtsom pa thams cad 'bras bu med par 'gyur ba'i phyir ro zhes bya ba'o/ /de gnyis bzlog pa'i tshig gi don mngon par 'dod na zhes bya ba ni bsgrub par bya ba dngos po rnams rgyu med pa las kyang skye ba med de zhes bya ba bzlog pa'i tshig gi don dngos po rnams rgyu las skye bar 'gyur ba mngon par 'dod pa dang / sgrub pa dus thams cad du thams cad las thams cad skye bar thal bar 'gyur ba'i phyir dang / rtsom pa thams cad 'bras bu med par 'gyur ba'i phyir ro zhes bya ba bzlog pa'i tshig gi don lan 'ga' kha cig las kha cig skye bar 'gyur ba dang / rtsom pa 'bras bu dang bcas pa nyid du 'gyur ba mngon par 'dod na'o/ /de dag bzlog pa'i tshig gi don mngon par 'dod na glags ji lta bu yod par 'gyur zhe na/ de'i phyir des 'di skad bstan par 'gyur te/ dngos po rnams rgyu las skye bar 'dod pa dang / lan 'ga' kha cig las kha cig skye bar 'gyur ba dang / rtsom pa 'bras bu dang bcas pa nyid du 'gyur ba'i phyir zhes bya ba smras te/ bsgrub par bya ba dngos po rnams rgyu med pa las kyang skye ba med do zhes bya ba bzlog pa'i tshig gi don mngon par 'dod na ni dngos po rnams rgyu las skye bar zhes bya ba'i glags yod par 'gyur ba dang / sgrub pa dus thams cad du skye bar thal bar 'gyur ba'i phyir ro zhes bya ba bzlog pa'i tshig gi don mngon par 'dod na ni lan 'ga' skye ba zhes bya ba'i glags yod par 'gyur ba dang / sgrub pa thams cad las skye bar thal bar 'gyur ba'i phyir ro zhes bya ba bzlog pa'i tshig gi don mngon par 'dod na ni kha cig las skye ba zhes bya ba'i glags yod par 'gyur ba dang / sgrub pa thams cad skye bar thal bar 'gyur ba'i phyir ro zhes bya ba bzlog pa'i tshig gi don mngon par 'dod na ni kha cig skye ba zhes bya ba'i glags yod par 'gyur ba dang / sgrub pa rtsom pa thams cad 'bras bu med par 'gyur ba'i phyir ro zhes bya ba bzlog pa'i tshig gi don mngon par 'dod na ni rtsom pa thams cad 'bras bu dang bcas pa nyid ces bya ba'i glags yod par 'gyur ba'i phyir ro/ /gal te de ltar gyur na nyes pa ci yod ces 'dri ba'i phyogs snga ma khong nas dbyung ba de'i lan du de ni mi rigs te/ sngar smras pa'i skyon du 'gyur ba'i phyir ro zhes bya ba smras te/ 'di ltar slob dpon gyi lung las/ dngos po gang dag gang na yang / /skyes pa nam yang yod ma yin/ / zhes gsungs pas/ dngos po rnams bdag gam gzhan nam gnyis sam rgyu med pa las skye bar 'gyur ba bkag pa de nyid sgrub par sngar gnas brtan bud+d+ha pA li ta nyid kyis khas blangs te/ dngos po rnams rgyu med pa las kyang skye ba med de zhes smras la/ da 'dir dngos po rnams rgyu las skye bar 'gyur ba dang / lan 'ga' kha cig las kha cig skye bar 'gyur ba la sogs par sgrub na sngar smras pa dang 'gal ba'i skyon du 'gyur ba'i phyir ro/ /gal te gnas brtan bud+d+ha pA li ta sngar smras pa'i skyon du 'gyur ba'i nyes pa de spang ba'i phyir/ 'di skad ces kho bo'i bsgrub par bya ba dang / sgrub pa mi bzlog par so na bzhag na nyes pa ci yod ces zer na de'i phyir/ ci ste gzhan du na yang don 'brel pa med pa yin te snga ma bzhin no zhes bya ba smras so/ /de la ci ste gzhan du na yang zhes bya ba ni/ ci ste gnas brtan bud+d+ha pA li ta'i rnam par bshad pa de bsgrub par bya ba dang / sgrub pa ma bzlog par sgra ji bzhin du so na bzhag na yang ngo / /'o na de la nyes pa ci yod ce na/ de'i phyir don 'brel pa med pa yin te zhes bya ba smras te/ de ltar dngos po rnams rgyu med pa las kyang skye ba med do zhes smras pa/ de'i 'og tu dus thams cad du thams cad las thams cad skye bar thal ba la sogs par 'gyur ba'i phyir ro zhes smras so/ /de ltar gyur na rang gis sngar skye ba med par smras pa dang / de'i 'og tu dus thams cad du thams cad las thams cad skye bar smras pa gnyis don 'brel pa med pa nyid yin pas rnam par bshad pa de mi rung ngo / /don 'brel pa med pas rnam par bshad pa de mi rung ba'i dpe bstan pa'i phyir/ snga ma bzhin no zhes bya ba smras te/ sngar gnas brtan bud+d+ha pA li tas dngos po rnams gzhan las skye ba med par rnam par bshad pa'i don 'brel pa med pa'i dpe bstan pa'i skabs su/ dper na/ gla sgang sle tres skyu ru ra dag rims la phan/ /smad 'tshong rnams la snying du sdug pa 'ga' yang med/ /smyig ma'i smyig mde'u dag ni lci zhing kha bag yod/ /zla ba'i 'od zer dag ni tsha ba'i dus na bsil/ /zhes bya ba lta bur 'gyur ro zhes bstan pa bzhin du 'dir yang / gnas brtan bud+d+ha pA li ta'i rnam par bshad pa de bsgrub par bya ba dang / sgrub pa ma bzlog par so na bzhag tu zin na yang / sngar dngos po rnams rgyu med pa las kyang skye ba med de zhes smras la/ de'i 'og tu dus thams cad du thams cad las thams cad skye bar thal ba la sogs par 'gyur ba'i phyir ro zhes smras pa de la don 'brel pa med pas rnam par bshad pa de mi rung ngo / /des na de ltar rgyu med pa las kyang ma yin no zhes bya ba ni/ dngos po rnams rgyu med pa las skye ba med par bstan pa'i mjug bsdu ba yin no/ /de la des na zhes bya ba ni rjes su dpag pa'i mtshan nyid ji skad bstan pa des na'o/ /de ltar rgyu med pa las kyang ma yin no zhes bya ba ni don dam par phyi dang nang gi dngos po rnams rgyu med pa dang / rgyu mi mthun pa las skye ba med par 'grub bo zhes bstan pa yin no/ /dam bcas pa'i spyi bkod pa bzhi pa bshad zin to/ /da ni dam bcas pa'i spyi bkod pa bzhi po ji skad bstan pa de dag gi don dngos bstan par bya ste/ de'i phyir/ dngos po gang dag gang na yang / /skyes pa nam yang yod ma yin/ /zhes bya ba ni so sor sbyar bar bya'o zhes bya ba smras te/ dam bcas pa'i spyi bkod pa las/ bdag las ma yin gzhan las min/ /gnyis las ma yin rgyu med min/ /zhes gsungs pa la/ bdag dang / gzhan dang / gnyis dang / rgyu med pa las ci zhig ma yin zhe na/ bdag las/ dngos po gang dag gang na yang / /skyes pa nam yang yod ma yin/ /zhes bya ba dang / gzhan las/ dngos po gang dag gang na yang / /skyes pa nam yang yod ma yin/ /zhes bya ba dang / gnyis las/ dngos po gang dag gang na yang / /skyes pa nam yang yod ma yin/ /zhes bya ba dang / rgyu med pa las/ dngos po gang dag gang na yang / /skyes pa nam yang yod ma yin/ /zhes bya ba de ltar so sor sbyar bar bya'o/ /gang dag ces bya ba ni kun nas nyon mongs pa dang rnam par byang ba'i dngos po dag go zhes bya ba ni/ nang dang phyi rol gyi dang / cha phra ba dang rags pa dag go/ /gang na yang zhes bya ba ni rang gi mdzad pa'i mtha' dang / so so'i rgyud grub pa dag la yang ngo zhes bya ba ni bdag gi phyogs dang / gzhan gyi phyogs na yang ngo / /nam yang zhes bya ba ni lan 'ga' yang ngo zhes bya ba ni 'das pa dang ma 'ongs pa dang / da ltar byung ba'i dus nam yang ngam/ rang gi sde pa dang gzhan gyi sde pa dag brtag pa'i gnas skabs nam yang ngo / /de'i phyir rten cing 'brel par 'byung ba skye ba med pa la sogs pa mu stegs byed la sogs pa dang / thun mong ma yin pa'i khyad par dang ldan pa grub bo zhes bya ba ni/ gang gi phyir de ltar rigs pas rnam par dpyad pa na dngos po rnams bdag dang gzhan dang gnyis dang rgyu med pa las skye bar mi 'thad pa de'i phyir/ shes rab kyi pha rol tu phyin pa las 'byung ba khyad par gyi gzhi rten cing 'brel par 'byung ba khyad par skye ba med pa dang / 'gag pa med pa dang / chad pa med pa dang / rtag pa med pa dang / 'ong ba med pa dang / 'gro ba med pa dang / don tha dad pa ma yin pa dang / don gcig pa ma yin pa dang / mu stegs byed dang / nyan thos dang / rang sangs rgyas thams cad dang thun mong ma yin pa dang ldan par grub po/ /da ni rang gi sde pa dag gis smras pa/ rkyen rnam bzhi ste rgyu dang ni/ /dmigs pa dang ni de ma thag /bdag po yang ni de bzhin te/ /ston pas mdo sde dang chos mngon pa'i bstan bcos las/ rang dang gzhan gyi gzhung lugs dang lha yul dang sa'i steng dag tu bka' stsal to zhes bya ba 'dis ni 'di skad ston te/ kho bos mu stegs byed kyis ji ltar yongs su brtags pa'i skye ba ni bkag zin to/ /da ni nyan thos kyis yongs su brtags pa'i skye ba dgag par bya ste/ de ltar rigs pas skye ba bkag tu zin kyang / rang gi sde pa dag mdo mdzad pa la lung dang 'gal bar rtog pa na/ ston pas mdo sde dang / chos mngon pa'i bstan bcos las/ rang dang gzhan gyi gzhung lugs dang / /lha yul dang sa stengs dag na/ /rkyen rnam bzhi ste rgyu dang ni/ /dmigs pa dang ni de ma thag / bdag po yang ni de bzhin te/ /zhes rkyen bzhi po de dag yod par bka' stsal to zhes zer ro/ /de la da ni zhes bya ba'i sgra ni kho bos mu stegs byed kyis ji ltar yongs su brtags pa'i skye ba ni bkag zin pas/ da ni nyan thos kyis yongs su brtags pa'i skye ba dgag par bya ste zhes bya ba'i tshig yin no/ /rang gi sde pa dag gis zhes bya ba la/ rang gi zhes bya ba ni rang gi phyogs la sde gang dag yod pa de dag ni rang gi zhes bya'o/ /sde zhes bya ba ni tshoms dang ris dang tshogs zhes bya ba dag dang don gcig go/ /pa dag ces bya ba ni der gtogs pa dag ste/ nyan thos mdo sde pa dang bye brag tu smra ba la sogs pa thams cad do/ /de dag gis smras pa zhes bya ba ni de ltar rigs pas skye ba bkag tu zin kyang rang gi sde pa dag mdo mdzad pa la lung dang 'gal bar rtog pa na 'di skad ces zer ro zhes phyogs snga ma rnam par gzhag pa yin no/ /rkyen rnam bzhi ste rgyu dang ni/ /dmigs pa dag ni de ma thag /bdag po yang ni de bzhin te/ /zhes bya ba ni/ bcom ldan 'das kyis rkyen ni bzhi ste/ rgyu'i rkyen dang dmigs pa'i rkyen dang de ma thag pa'i rkyen dang bdag po'i rkyen to zhes bka' stsal to zhes bya bar sbyar ro/ /rkyen bzhi po de dag sus bstan zhe na/ ston pas bka' stsal to zhes bya bar sbyar te/ bcom ldan 'das kyis bka' stsal to/ /gzhung gang las bka' stsal zhe na/ mdo sde dang chos mngon pa'i bstan bcos las bka' stsal to zhes bya bar sbyar te/ mdo sde dang chos mngon pa'i sde snod las bka' stsal to/ /sde snod las rang gi gzhung lugs dang sa'i steng 'ba' zhig na rkyen bzhi po dag yod par bka' stsal tam zhe na ma yin te/ de'i phyir rang dang gzhan gyi gzhung lugs dang lha yul dang sa'i steng dag tu bka' stsal to zhes bya ba smras te/ rang gi gzhung lugs dang / gzhan gyi gzhung lugs dang / mtho ris dang sa bla thams cad na yang rkyen bzhi po dag yod do zhes bka' stsal to zhes bya bar sbyar ro/ /de la mdo sde las rkyen nyid bzhi bka' stsal te/ 'di lta ste rgyu'i rkyen nyid dang / dmigs pa'i rkyen nyid dang / de ma thag pa'i rkyen nyid dang / bdag po'i rkyen nyid dang / rkyen gyi rigs ni rkyen nyid ces bya'o/ /ji ltar zhe na/ chos mngon pa'i bstan bcos las/ /bzhi yis sems dang sems byung rnams/ /gsum gyis snyoms par 'jug pa gnyis/ /gzhan ni gnyis po dag las skye/ /dbang phyug sogs min rigs sogs kyis/ / zhes bshad pa'i phyir ro/ /gang gi phyir rkyen bzhi po kho na bka' stsal pa de'i phyir/ rkyen lnga pa ni yod ma yin/ /zhes bya ba smras so/ /ci'i phyir rkyen lnga pa med ce na/ de'i phyir sde pa gzhan gyis yongs su brtags pa'i rkyen mdun du skyes pa dang yod pa dang med pa rnams kyang 'di dag nyid du 'dus pa'i phyir ro zhes bya ba smras te/ sde pa gzhan gyis zhes bya ba ni/ 'phags pa gnas brtan pa dag gis so/ /de dag gis yongs su brtags pa'i rkyen ni mdun du skyes pa dang / yod pa dang / med pa rnams so/ /de rnams kyang rkyen bzhi po 'di dag nyid du 'dus pa'i phyir te/ 'di ltar mdun du skyes pa'i rkyen zhes bya ba ni dbang po rnams kyi mngon sum gyi mdun du skyes pa ste/ de yang dmigs pa'i rkyen nyid yin pa'i phyir ro/ /yod pa'i rkyen zhes bya ba ni rgyu'i rkyen dang bdag po'i rkyen yin pa'i phyir ro/ /med pa'i rkyen zhes bya ba ni de ma thag pa'i rkyen yin pa'i phyir ro/ /de ltar sde pa gzhan gyis yongs su brtags pa'i rkyen de dag kyang rkyen bzhi po 'di dag nyid du 'dus pa'i phyir/ rkyen lnga pa ni yod ma yin/ /zhes smras pa de ni legs par smras pa yin no/ /de la rgyu'i rkyen ni lhan cig 'byung ba dang / skal ba mnyam pa dang / mtshungs pa dang ldan pa dang / kun du 'gro ba dang / rnam par smin pa zhes bya ba rgyu lnga po dag go zhes bya ba ni rgyu lnga po de dag thams cad kyang rgyu'i rkyen zhes bya ste/ chos mngon pa'i bstan bcos las/ byed dang lhan cig 'byung ba dang / /skal mnyam mtshungs par ldan pa dang / /kun du 'gro dang rnam smin dang / /rgyu ni rnam pa drug tu 'dod/ /ces 'byung ba de dag las/ byed pa'i rgyu ni bdag po'i rkyen yin pa'i phyir/ rgyu lhag ma lnga po dag 'dir rgyu'i rkyen zhes rnam par gzhag go/ /de la lhan cig 'byung ba'i rgyu zhes bya ba ni chos mngon pa'i bstan bcos las/ lhan cig 'byung gang phan tshun 'bras/ /zhes bshad pa ste/ phan tshun zhes bya ba ni gcig la gcig ste/ chos gang dag phan tshun 'bras bu dang phan 'dogs par byed pa de dag ni phan tshun lhan cig 'byung ba'i rgyu'o/ /de yang ji lta bu zhe na/ dper na chos mngon pa'i bstan bcos las/ 'byung zhing sems kyi rjes 'jug dang / /sems dang mtshan nyid mtshan gzhi bzhin/ /zhes bshad pa lta bu ste/ 'byung ba chen po bzhi dag ni phan tshun lhan cig 'byung ba'i rgyu yin pa lta bu dang / sems kyang sems kyi rjes su 'jug pa'i chos rnams kyi lhan cig 'byung ba'i rgyu yin la/ de dag kyang sems kyi lhan cig 'byung ba'i rgyu yin pa lta bu dang / 'dus byas kyi mtshan nyid skye ba dang / gnas pa dang / 'gag pa zhes bya ba gsum po dag kyang mtshan nyid kyi gzhi'i lhan cig 'byung ba'i rgyu yin la/ mtshan nyid kyi gzhi yang mtshan nyid dag gi lhan cig 'byung ba'i rgyu yin pa lta bu'o/ /skal ba mnyam pa'i rgyu zhes bya ba ni chos mngon pa'i bstan bcos las/ skal mnyam rgyu ni 'dra ba'o/ /zhes bshad pa ste/ chos 'dra ba rnams ni 'dra ba rnams kyi skal ba mnyam pa'i rgyu yin te/ 'di lta ste/ dge ba'i phung po lnga po dag ni phan tshun du dge ba rnams kyi skal ba mnyam pa'i rgyu yin la/ nyon mongs pa can rnams kyang nyon mongs pa rnams kyi skal ba mnyam pa'i rgyu yin pa dang / lung du ma bstan pa rnams kyang lung du ma bstan pa rnams kyi skal ba mnyam pa'i rgyu yin pa lta bu'o/ /ci 'dra ba thams cad 'dra ba rnams kyi skal ba mnyam pa'i rgyu yin nam zhe na/ ma yin te/ 'o na ji lta bu zhe na/ chos mngon pa'i bstan bcos las/ rang ris sa pa'o zhes bshad pa ste/ rang gi ris dang / rang gi sa pa'i chos 'dra ba rnams kyi ste/ ris ni lnga ste/ sdug bsngal mthong bas spang bar bya ba nas/ bsgom pas spang bar bya ba'i bar ro/ /sa ni dgu ste 'dod pa'i khams dang / bsam gtan dang / gzugs med pa brgyad do/ /de la sdug bsngal mthong bas spang bar bya ba rnams ni sdug bsngal mthong bas spang bar bya ba rnams kyi skal ba mnyam pa'i rgyu yin gyi gzhan dag gi ni ma yin no/ /de bzhin du bsgom pas spang bar bya ba'i bar du yang bsgom pas spang bar bya ba rnams kyi skal ba mnyam pa'i rgyu yin gyi gzhan dag gi ni ma yin no/ /de dag kyang 'dod pa na spyod pa rnams ni 'dod pa na spyod pa rnams kyi skal ba mnyam pa'i rgyu yin gyi/ gzhan dag gi ni ma yin la/ bsam gtan dang po'i sa pa rnams kyang bsam gtan dang po'i sa pa rnams kyi skal ba mnyam pa'i rgyu yin gyi gzhan dag gi ni ma yin pas na/ srid pa'i rtse mo'i sa pa'i bar dag kyang de'i sa pa rnams kho na'i skal ba mnyam pa'i rgyu yin gyi gzhan dag gi ni ma yin no/ /de dag kyang thams cad ni rgyu ma yin te/ 'o na ji lta bu zhe na/ chos mngon pa'i bstan bcos las/ sngar skyes pa rnams zhes bshad pa ste/ sngar skyes pa rnams ni phyi ma bskyed pa dang ma skyes pa rnams kyi skal ba mnyam pa'i rgyu yin gyi/ ma 'ongs pa rnams ni skal ba mnyam pa'i rgyu ma yin no/ /mtshungs par ldan pa'i rgyu zhes bya ba ni chos mngon pa'i bstan bcos las/ mtshungs ldan rgyu ni sems dag dang / /sems las byung ba'o zhes bshad pa ste/ mtshungs par ldan pa'i rgyu ni sems dang sems las byung ba rnams so/ /de lta na dus tha dad pa dang / rgyu tha dad pa dang / dmigs pa tha dad pa las skyes pa rnams kyang phan tshun mtshungs par ldan pa'i rgyu nyid du thal bar 'gyur ro zhe na/ de rnam par gcad pa'i phyir/ chos mngon pa'i bstan bcos las/ rten mnyam rnams zhes bshad pa ste/ gang dag rten mnyam pa'i sems dang sems las byung ba de dag ni phan tshun mtshungs par ldan pa'i rgyu yin no/ /mtshungs pa zhes bya ba ni tha mi dad pa ste/ 'di lta ste/ mig gi rnam par shes pa'i rten mig gi dbang po'i skad cig ma gang yin pa de nyid de dang mtshungs par ldan pa'i tshor ba la sogs pa rnams kyi yang yin pa lta bu dang / yid kyi rnam par shes pa'i rten yid kyi dbang po'i skad cig gang yin pa de nyid kyang de dang mtshungs par ldan pa'i tshor ba la sogs pa rnams kyi mtshungs par ldan pa rnams rgyu yin pa'i bar du yang de bzhin du rig par bya'o/ /mtshungs par ldan pa'i rgyu gang yin pa de ni lhan cig 'byung ba'i rgyu yang yin te/ rten dang / dmigs pa dang / rnam pa dang / dus dang / rdzas mtshungs pa'i phyir ro/ /kun du 'gro ba'i rgyu zhes bya ba ni chos mngon pa'i bstan bcos las/ /kun 'gro zhes bya rang gi sar/ /nyon mongs can gyi sngar kun 'gro/ /zhes bshad pa ste/ rang gi sa pa'i kun du 'gro ba'i chos sngar byung ba rnams ni nyon mongs pa can chos phyi ma rnams kyi kun du 'gro ba'i rgyu yin te/ de dag kyang sdug bsngal mthong bas spang bar bya ba'i lta ba lnga dang / kun 'byung ba mthong bas spang bar bya ba'i lta ba gnyis dang / sdug bsngal dang kun 'byung ba mthong bas spang bar bya ba'i the tshom gnyis dang / ma rig pa ma 'dres pa gcig dang / ma rig pa mtshungs par ldan pa gcig ste/ phra rgyas bcu gcig po de dag ni kun du 'gro ba'i rgyu zhes bya ste/ rang gi khams la dmigs pa'i phyir ro/ /rnam par smin pa'i rgyu zhes bya ba ni/ chos mngon pa'i bstan bcos las/ rnam smin rgyu ni mi dge dang / /dge ba zag bcas rnams kho na/ /zhes bshad pa ste/ rnam par smin pa'i rgyu ni mi dge ba rnams dang / dge ba'i chos zag pa dang bcas pa rnams te/ rnam par smin pa'i chos can yin pa'i phyir ro/ /ci'i phyir lung du ma bstan pa'i chos rnams rnam par smin pa 'grub par mi byed ce na/ stobs chung ba'i phyir te/ sa bon rul pa bzhin no/ /ci'i phyir zag pa med pa rnams ma yin zhe na/ sred pas mngon par ma brlan pa de'i phyir te/ mngon par ma brlan pa'i sa bon drungs po bzhin no/ /ldan pa ma yin pa rnams kyang ma yin te/ de dag ni khams gang dang ldan pa'i rnam par smin pa yang mngon par sgrub par mi byed pa'i phyir ro/ /dmigs pa'i rkyen ni chos thams cad do zhes bya ba ni ci rigs par sbyar te/ 'di lta ste/ mig gi rnam par shes pa mtshungs par ldan pa dang bcas pa'i dmigs pa'i rkyen ni gzugs yin la/ rna ba'i rnam par shes pa mtshungs par ldan pa dang bcas pa'i dmigs pa'i rkyen ni sgra yin/ sna'i rnam par shes pa mtshungs pa dang ldan pa dang bcas pa'i dmigs pa'i rkyen ni dri yin/ lce'i rnam par shes pa mtshungs par ldan pa dang bcas pa'i dmigs pa'i rkyen ni ro yin/ lus kyi rnam par shes pa mtshungs par ldan pa dang bcas pa'i dmigs pa'i rkyen ni reg bya yin/ yid kyi rnam par shes pa mtshungs par ldan pa dang bcas pa'i dmigs pa'i rkyen ni chos thams cad yin te/ chos gang chos gang gi dmigs pa yin pa de ni nam yang de'i dmigs pa ma yin par mi 'gyur te/ lan 'ga' dmigs par mi byed du zin kyang dmigs pa'i mtshan nyid yin pa'i phyir dmigs pa zhes bya ste/ dper na sreg par mi byed kyang bud shing zhes bya ba bzhin no/ /de ma thag pa'i rkyen ni sems dang sems las byung ba skyes pa rnams las tha ma ma gtogs pa'o zhes bya bas ni 'di skad bstan te/ sems dang sems las byung ba 'gag pa la phyogs pa gang dag yin pa de dag ni ma 'ongs pa skye bar 'dod pa'i phyogs kyi de ma thag pa'i rkyen zhes bya'o/ /tha ma ma gtogs pa'o zhes bya ba ni dgra bcom pa'i sems dang sems las byung ba'i skad cig tha ma ni ma gtogs te/ dgra bcom pa sems kyi skad cig gang la gnas nas mya ngan las 'da' bar byed pa'i tshogs ni de ma thag pa'i rkyen ma yin te yang 'byung ba med pa'i phyir ro/ /de ma thag pa'i rkyen 'di ni mtshungs pa de ma thag pa yang yin la/ rkyen kyang yin pas mtshungs pa de ma thag pa'i rkyen zhes bya'o/ /des na gzugs ni mtshungs pa de ma thag pa'i rkyen ma yin te mi 'dra bar skye ba'i phyir ro/ /'di ltar 'dod pa na spyod pa'i gzugs kyi mjug thogs su lan 'ga' ni 'dod pa na spyod pa'i rnam par rig byed kyi gzugs skye bar 'gyur la/ lan 'ga' ni 'dod pa na spyod pa'i rnam par rig byed ma yin pa'i gzugs skye bar 'gyur/ lan 'ga' ni 'dod pa na spyod pa'i gzugs zag pa dang bcas pa skye bar 'gyur ba'i phyir te/ gzugs mngon sum du 'gyur ba ni 'dren ma yin la/ mtshungs pa de ma thag pa'i rkyen ni 'dren ma ma yin no/ /bdag po'i rkyen ni byed pa'i rgyu ste zhes bya ba ni bdag po'i rkyen ni rgyu drug po dag gi nang nas byed pa'i rgyu zhes bya ba yin no/ /de la byed pa'i rgyu zhes bya ba ni chos mngon pa'i bstan bcos las/ rang las gzhan pa byed pa'i rgyu/ /zhes bshad pa ste/ byed pa'i rgyu'i rang gi ngo bo ma gtogs pa chos thams cad ni 'dus byas kyi chos skye ba'i byed pa'i rgyu yin te/ skye ba la bgegs mi byed pa'i ngo bor gnas pa'i phyir ro/ /bzhi po gzhan du gyur pa de dag kho na las skye bar 'dod do zhes bya ba ni rang gi sde pa dag gi grub pa'i mtha' bstan pa ste/ rang gi sde pa dang mdo mdzad pa la lung dang 'gal bar rtog pa na/ ston pas mdo sde dang chos mngon pa'i bstan bcos las/ rang dang gzhan gyi gzhung lugs dang / lha yul dang sa'i steng dag na rkyen bzhi po rgyu'i rkyen dang dmigs pa'i rkyen dang / de ma thag pa'i rkyen dang / bdag po'i rkyen zhes bya ba dag yod par bka' stsal pa/ sde pa gzhan gyis yongs su brtags pa'i rkyen lnga pa ni med pas/ rkyen bzhi po 'bras bu las gzhan du gyur pa de dag kho na las 'bras bu skye bar 'dod do zhes dam bca' ba yin no/ /de la bstan bcos byed pas dngos po rnams gzhan las skye ba med de zhes dam bcas par gyur pa gang yin pa de ni khas blangs pa las gnod par 'gyur ro zhes bya ba ni rang gi sde pa dag mdo mdzad pa la lung dang 'gal bar rtog pa na/ mdo mdzad pas/ bdag las ma yin gzhan las min/ /gnyis las ma yin rgyu med min/ /dngos po gang dag gang na mang / /skyes pa nam yang yod ma yin/ /zhes dam bcas pa'i spyi bkod pa las/ bdag dang gnyis dang rgyu med pa las skye ba med par dam bcas pa dag ni rung na/ gzhan las skye ba med par dam bcas par gyur pa gang yin pa de ni/ sangs rgyas par khas blangs pa la gnod par 'gyur bas mi rung ngo zhes phyogs snga ma rnam par 'jog pa yin no/ /de la zhes bya ba ni rkyen bzhi po dag gzhan du gyur pa de dag kho na las skye bar 'dod pa de la'o/ /bstan bcos byed pas zhes bya ba ni 'phags pa klu sgrub kyis so/ /dngos po rnams gzhan las skye ba med de zhes bya ba ni gzhan las min zhes bya bas gzhan las/ dngos po gang dag gang na yang / /skyes pa nam yang yod ma yin/ /zhes dam bcas par gyur pa'o/ /dam bcas par gyur pa gang yin pa zhes bya ba ni dam bcas pa byas par gyur pa'am/ dam bcas pa dang ldan par gyur pa gang yin pa'o/ /de ni rigs pa ma yin te/ ci'i phyir zhe na/ de'i phyir khas blangs pa la gnod par gyur pa'o zhes bya ba smras te/ ji lta zhe na/ gang gi phyir slob dpon yang sangs rgyas pa yin la/ sde pa thams cad kyi sde snod las/ bcom ldan 'das kyis rkyen bzhi po gzhan du gyur pa dag las dngos po rnams skye bar gsungs pa bzhin du de 'gog par byed pas/ dper na bye brag tu smra ba dag sgra rtag par sgrub pa'am/ bye brag pa dag sgra mi rtag par sgrub pa lta bur gyur pa'i phyir ro// // bam po bcu bdun pa/ de skad ces zer ba de'i lan du 'dir 'grel pa byed pa nyid kyis/ de'i phyir bshad pa/ dngos po rnams kyi rang bzhin ni/ /rkyen la sogs pa yod ma yin/ /zhes bya ba la sogs pa smras te/ 'dir ni sngar rang gi sde pa dag gis/ rkyen rnams bzhi ste rgyu dang ni/ /dmigs pa dang ni de ma thag / bdag po yang ni de bzhin te/ /rkyen lnga pa ni yod ma yin/ /zhes smras pa'i phyogs snga ma de'i lan yin par sbyar ro/ /de la dngos po rnams kyi zhes bya ba ni mig la sogs pa rnams kyi'o zhes bya ba ni/ mig dang / rna ba dang / sna dang / lce dang / lus dang / yid la sogs pa rnams kyi'o/ /rang bzhin ni zhes bya ba ni rang gi ngo bo nyid do/ /rkyen la sogs pa la zhes bya ba ni/ khu chu dang / khrag la sogs pa la'o zhes bya ba ni rkyen rnams ni dang por mdun rol du snga ba yin pas khu chu dang khrag la sogs pa la'o zhes smras so/ /sogs pa la zhes bya ba'i sgra'i sbyor bas ni tshogs pa dang dbang phyug la sogs pa gzhan yang bsdu'o zhes bya ba la sogs pa zhes bya ba ni rgyu dang rkyen tshogs pa'o/ /dbang phyug ces bya ba ni dbang phyug rgyur 'dod pa dag gis brtags pa'o/ /sogs pa zhes bya ba'i sgras ni phyogs dang dus dang nam mkha' la sogs pa dag bsdu'o/ / yod ma yin zhes bya ba ni dgag pa'o zhes bya ba ni dngos po rnams rgyu la sogs pa'i rkyen rnams las skye'o zhes bya ba'i phyogs de dgag pa'o/ /de med pa'i phyir rkyen de dag su'i gzhan du 'gyur zhes bya bas ni 'di skad bstan te/ gal te mig la sogs pa'i dngos po rnams kyi rang bzhin mer mer po la sogs pa rkyen rnams kyi sngon rol nyid na yod na ni des na de la ltos nas rkyen rnams gzhan zhes bya bar yang 'gyur ba zhig na/ mig la sogs pa'i dngos po rnams kyi rang bzhin ni mer mer po la sogs pa rkyen rnams kyi sngon rol nyid na med pas de med pa'i phyir rkyen de dag su'i gzhan du 'gyur te mi 'gyur ro/ /re zhig skye ba lta phar zhog ste/ rkyen rnams gzhan nyid yin par je sgrubs shig /de yod du zin na yang de las skye ba med de zhes bya bas ni 'di skad bstan te/ rkyen rnams las gzhan zhes bya ba de yod du zin na yang de dag las mig la sogs pa skye ba med de/ ci'i phyir de yod du zin na yang de las skye ba med ce na/ de'i phyir rjes su dpag pa'i gnod pa smras zin pa'i phyir zhes bya ba smras te/ khyed kyis mig la sogs pa'i dngos po rnams rgyu la sogs pa'i rkyen gzhan dag las skye bar dam bcas su zin kyang / dam bcas pa de la gnod pa'i rjes su dpag pa kho bos sngar smras zin pa'i phyir/ 'dir yang lan de nyid 'byung bar 'gyur te/ mig la sogs pa'i dngos po rnams rgyu la sogs pa'i rkyen gzhan las skye ba med de gzhan yin pa'i phyir/ dper na rgyu spun la sogs pa bzhin no/ /de'i phyir de la gnod par mi 'gyur ro zhes bya ba smras te/ rang gi sde pa dag gis sngar bcom ldan 'das kyis rkyen bzhi bka' stsal pa'i lung dper bstan pa de la gnod par mi 'gyur ro/ /gang dag sgrub pa'i don yang dag pa ma yin par tshod dpags su brtags nas/ kho bo cag ni dngos po rnams gzhan las skye ba kho na yin no zhes ni nges par mi 'dzin gyi/ gang dag skye ba de dag ni/ /gzhan dag kho na las yin gyi/ /bdag las ma yin par nges par 'dzin pas des na rkyen ma yin pa dag las gzhan nyid yod du zin kyang skye ba med do zhes zer na zhes bya ba 'di'i bsdus pa'i don ni sngar dbu ma pas mig la sogs pa'i dngos po rnams rgyu la sogs pa'i rkyen gzhan las skye ba med do/ /gzhan yin pa'i phyir dper na rgyu spun la sogs pa bzhin no zhes smras pa'i sgrub pa de'i don yang dag pa ma yin zhing don med par rgol bar rang gi tshod dpags su brtags nas/ rkyen rigs mi mthun pa gzhan las dngos po rnams skye ba med pa yin gyi/ rkyen rigs mthun pa gzhan las dngos po rnams skye'o zhes zer ba yin no/ /de la gang dag ces bya ba ni rang gi sde pa dag go/ /sgrub pa'i don yang dag pa ma yin par tshod dpags su brtags nas zhes bya ba ni sngar dbu ma pas mig la sogs pa dngos po rnams rgyu la sogs pa'i rkyen gzhan las skye ba med de gzhan yin pa'i phyir/ dper na rgyu spun la sogs pa bzhin no/ /zhes smras pa'i sgrub pa de'i don yang dag pa ma yin zhing don med par rgol ba rang gi tshod dpags su brtags nas so/ /kho bo cag ni dngos po rnams gzhan dag las skye ba kho na yin no zhes ni nges par mi 'dzin gyi zhes bya ba ni/ kho bo cag ni mig la sogs pa'i dngos po rnams rkyen mer mer po la sogs pa dang / rgyu spun la sogs pa dang / sa bon la sogs pa ji snyed gzhan du gyur pa thams cad las skye ba kho na yin no zhes ni nges par mi 'dzin gyi zhes zer ba yin no/ /gang dag skye ba de dag ni gzhan kho na las yin gyi bdag las ma yin par nges par 'dzin pas zhes bya ba ni mig la sogs pa skye ba can gang dag yin pa de dag ni rkyen mer mer po la sogs pa rigs mthun pa gzhan kho na las skye ba yin gyi/ bdag las skye ba ma yin pa nges par 'dzin pas so/ /des na rkyen ma yin pa dag las gzhan nyid yod du zin kyang skye ba med do zhes zer na zhes bya ba ni de ltar nges par 'dzin pa des na rkyen ma yin pa rgyu spun la sogs pa dang sa bon la sogs pa rigs mi mthun pa gzhan dag las mig la sogs pa'i dngos po dag la ltos na gzhan nyid yod du zin kyang de dag las mig la sogs pa'i dngos po rigs mi mthun pa gzhan dag skye ba med do zhes zer na'o/ /de skad ces zer ba de'i lan du 'dir 'grel pa byed pa nyid kyis/ de la gal te tshig de bdag las skye ba dgag pa lhur len pa yin na ni 'dod pa bsgrub pa yin no/ /'on te ma skyes pa rnams gzhan las skye bar ston pa lhur len pa yin na ni de lta na yang brgal zhing brtag pa mtshungs pa'i skyon du 'gyur ba'i phyir de yang mi rung ngo zhes bya ba smras te/ de la tshig de zhes bya ba ni gang dag skye ba de dag ni gzhan kho na las yin gyi/ bdag las ma yin par nges par 'dzin pas zhes zer ba'i tshig de'o/ /bdag las skye ba dgag pa lhur len pa yin na ni zhes bya ba ni gal te tshig de'i skabs kyis bdag las skye ba dgag pa lhur len cing gzhan las skye ba'i phyogs yongs su gzung ba de'i 'bras bu dag las skye ba dgag pa lhur len pa yin na ni'o/ /des cir 'gyur zhe na 'dod pa sgrub pa yin no zhes bya ba smras te/ gal te de ltar na kho bo'i 'dod pa gang yin pa de nyid khyod sgrub par byed pa yin no/ /'on te ma skyes pa rnams gzhan las skye bar ston pa lhur len pa yin na ni zhes bya ba ni gal te tshig de'i skabs kyi 'dus byas kyi chos ma skyes pa skye ba rnams don dam par gzhan las skye bar ston cing / bdag las skye ba dgag pa'i phyogs yongs su gzung ba de'i 'bras bu don dam par 'dus byas kyi chos ma skyes pa rnams gzhan las skye bar ston pa lhur len pa yin na ni'o/ /des cir 'gyur zhe na/ de lta na yang brgal zhing brtag pa mtshungs pa'i skyon du 'gyur ba'i phyir de yang mi rung ngo zhes bya ba smras te/ sngar kho bos don dam par nang gi skye mched rnams de dag gi rkyen gzhan dag las skye ba med de/ gzhan yin pa'i phyir/ dper na bum pa bzhin no/ /yang don dam par gzhan brjod par 'dod pa mig la sogs pa nang gi skye mched 'grub par byed pa dag rkyen ma yin par nges te gzhan yin pa'i phyir/ dper na rgyu spun la sogs pa bzhin no zhes brgal zhing brtag pa byas pa gang yin pa de nyid khyod la 'dir yang 'ong ba'i skyon du 'gyur ba'i phyir de yang mi rung ngo / /ci ste gzhan las skye ba med pa kho na'o zhes bya ba de las gzhan pa skye ba dgag pa yin na ni dpe sgrub pa yin no zhes bya ba ni/ ci ste khyod na re/ gzhan las skye ba med pa kho na'o zhes zer ba de/ 'bras bu mig la sogs pa'i skye mched de las gzhan pa bum pa dang snam bu la sogs pa rigs mi mthun pa dag rkyen mer mer po la sogs pa rigs mi mthun pa gzhan las skye ba dgag pa yin na ni de lta na khyod kho bo'i dpe sgrub pa yin te/ sngar kho bos dper na bum pa bzhin no zhes bya ba dang / dper na rgyu spun la sogs pa bzhin no zhes bstan pas/ gzhan yin pa'i phyir dper na mer mer po la sogs pa las bum pa skye ba med pa dang gzhan yin pa'i phyir/ dper na rgyu spun la sogs pa mig la sogs pa'i rkyen ma yin no zhes smras pa de nyid khyod sgrub par byed pa yin no/ /de ltar na des ni mig la sogs pa khu chu dang / khrag la sogs pa rkyen rnams la med pa nyid dang mig la sogs pa'i rkyen rnams kyang de dag gis stong pa nyid kyi chos smras pa yin no zhes bya bas 'di skad bstan te/ dngos po rnams kyi rang bzhin ni/ /rkyen la sogs pa yod ma yin/ /zhes bya ba tshig le'ur byas pa'i phyed dang po des na slob dpon gyi 'bras bu mig dang / rna ba dang / sna dang / lce dang / lus dang / yid kyi skye mched rnams rkyen khu chu dang khrag la sogs pa'i gnas skabs rnams la med pa nyid kyi phyogs kyi chos dang / 'bras bu mig la sogs pa'i rkyen khu chu dang khrag la sogs pa rnams kyang 'bras bu de dag gis stong pa nyid kyi phyogs kyi chos smras pa yin no/ /bdag gi dngos po yod min na/ /gzhan gyi dngos po yod ma yin/ /rkyen la sogs pa la bdag gi dngos po yod ma yin na'o/ /gzhan gyi dngos po ni gzhan dag las 'byung ba'o/ / 'byung ba ni skye ba ste rkyen rnams la med do/ /des ni bsgrub par bya ba'i don bstan to zhes bya ba'i tshig le 'ur byas pa'i phyed 'og ma 'dis ni 'di skad bstan te/ gal te mig la sogs pa'i bdag gi dngos po rkyen mer mer po la sogs pa'i gnas skabs na med na rkyen rnams la gzhan gyi dngos po zhes bya ba'i tha snyad yod pa ma yin te/ 'di ltar 'bras bu mig la sogs pa'i bdag gi dngos po la ltos nas rkyen mer mer po la sogs pa gzhan gyi dngos po zhes gdags pa yin na 'bras bu mig la sogs pa'i bdag gi dngos po rkyen mer mer po la sogs pa'i gnas skabs na yod pa ma yin no/ /rkyen mer mer po la sogs pa gang la ltos nas gzhan gyi dngos por 'gyur te mi 'gyur ro/ /rkyen rnams la gzhan gyi dngos po med pas gzhan las skye ba yang med do zhes bsgrub par bya ba'i don bstan pa yin no/ /gzhan gyi dngos po ni gzhan dag las 'byung ba'o zhes bya ba ni gzhan gyi dngos po zhes bya bar tha snyad gdags pa ni gzhan dag la ltos nas 'byung ba ste/ dper na nag pa la ltos nas gu p+ta gzhan du 'gyur ba lta bu'o/ /'byung ba ni skye ba ste zhes bya ba ni 'byung ba zhes bya ba'i sgra ni skye ba'i don yin te/ gzhan dag la ltos nas 'byung ba ni gzhan dag la ltos nas skye ba yin no zhes bya ba'i tha tshig go/ /rkyen rnams la med do zhes bya ba ni gzhan gyi dngos po ni gzhan dag las 'byung ba'o zhes bya ba de rkyen rnams la med pa ste/ rkyen rnams kyi gnas skabs na 'bras bu'i bdag gi dngos po yod pa ma yin pas ltos pa med pa'i phyir rkyen rnams la gzhan gyi dngos po zhes bya ba'i tha snyad med do/ /des ni bsgrub par bya ba'i don bstan to zhes bya ba ni rkyen rnams la gzhan gyi dngos po zhes bya ba'i tha snyad med pas gzhan las skye ba med do zhes bsgrub par bya ba'i don bstan pa yin no/ /de ltar na 'di yang snga ma bzhin du dpe mngon pas 'bras bu dang / rkyen phyogs su byas pa las sbyor ba'i tshig gnyis su 'gyur te zhes bya ba ni sngar gzhan las skye ba dgag pa'i skabs su don dam par nang gi skye mched rnams de dag gi rkyen gzhan dag las skye ba med de gzhan yin pa'i phyir/ dper na bum pa bzhin no zhes bya ba dang / yang don dam par gzhan brjod par 'dod pa mig la sogs pa nang gi skye mched 'grub par byed pa dag rkyen ma yin par nges te gzhan yin pa'i phyir/ dper na rgyu spun la sogs pa bzhin no zhes 'bras bu dang rkyen phyogs su byas pa las sbyor ba'i tshig gnyis bstan pa bzhin du/ 'dir yang skye mched rnams de dag gi rkyen gzhan dag las skye ba med pa'i dpe ni bum pa yin la/ rkyen rnams rkyen ma yin pa'i dpe ni rgyu spun la sogs pa yin par mngon pas 'bras bu skye mched dang rkyen mer mer po la sogs pa phyogs su byas pa las sbyor ba'i tshig gnyis su 'gyur ro/ /don dam par mig la sogs pa skye mched rnams khu chu dang khrag la sogs pa rkyen rnams las skye ba med de/ de dag la med pa'i phyir dper na bum pa bzhin no zhes bya ba 'di ni 'bras bu phyogs su byas pa la sbyor ba'i tshig gcig yin no/ /'dir yang / mig la sogs pa skye mched rnams/ /zhes bya ba 'di ni chos can yin la/ khu chu dang khrag la sogs pa rkyen rnams las skye ba med de zhes bya ba 'di ni bsgrub par bya ba chos yin/ de dag la med pa'i phyir zhes bya ba 'di ni sgrub pa'i chos yin/ / dper na bum pa bzhin no zhes bya ba 'di ni dpe yin par sbyar te/ dper na bum pa ni mer mer po la sogs pa la med pa'i phyir/ mer mer po la sogs pa las skye ba med pa de bzhin du mig la sogs pa'i skye mched rnams kyang rkyen mer mer po la sogs pa la med pa'i phyir/ de dag kyang don dam par rkyen mer mer po la sogs pa las skye ba med do/ /de bzhin du don dam par khu chu dang khrag la sogs pa rkyen rnams mig la sogs pa'i skye mched rnams skyed par byed pa ma yin te de dag gis stong pa'i phyir/ dper na thag zangs la sogs pa bzhin no zhes bya ba 'di ni rkyen phyogs su byas pa las sbyor ba'i tshig gnyis pa yin no/ /'dir yang khu chu dang khrag la sogs pa rkyen rnams zhes bya ba 'di ni chos can yin la/ /mig la sogs pa'i skye mched rnams skyed par byed pa ma yin te zhes bya ba 'di ni bsgrub par bya ba chos yin/ de dag gis stong pa'i phyir zhes bya ba 'di ni sgrub pa'i chos yin/ dper na thag zangs la sogs pa yin no zhes bya ba 'di ni dpe yin par sbyar te/ dper na thag zangs la sogs pa ni mig la sogs pa'i skye mched de dag gis stong pa'i phyir/ mig la sogs pa'i skye mched rnams skyed par byed pa ma yin pa de bzhin du mer mer po la sogs pa rkyen rnams kyang mig la sogs pa skye mched de dag gis stong pa'i phyir/ de dag kyang don dam par mig la sogs pa'i skye mched rnams skyed par byed pa ma yin no/ /de bas na bcom ldan 'das kyis don dam par dngos po rnams rgyu la sogs pa'i rkyen bzhi po dag las skye ba med par bka' stsal par shes par bya'o zhes bya bas ni 'di skad bstan te/ sbyor ba'i tshig de gnyis kyis brtags pa des na/ bcom ldan 'das kyis don dam par dngos po rnams rgyu la sogs pa'i rkyen bzhi po dag las skye ba med par bka' stsal par shes par bya'o zhes mjug bsdu ba bstan to/ /'o na bcom ldan 'das kyis rkyen bzhi po dag ci'i phyir bka' stsal ce na/ de'i phyir rgyu med pa dang rgyu mi mthun par smra bas blo gros dkrugs pa'i skye bo la rjes su thugs brtse bas tha snyad kyi bden pa ji ltar gnas pa bstan pa'i phyir/ rgyu dang dmigs pa dang de ma thag pa dang bdag po'i rkyen rnams bka' stsal par shes par bya ste/ zhes bya ba smras te/ rgyu med par smra bas zhes bya ba ni 'jig rten rgyang pan pa'i grub pa'i mtha' smra bas so/ /rgyu mi mthun par smra bas zhes bya ba ni sred med kyi bu dang dbang phyug la sogs pa'i grub pa'i mtha' smra bas so/ /blo gros dkrugs pa'i skye bo zhes bya ba ni skye bo gang gi blo gros zhes bya ba shes rab rgyu med pa dang rgyu mi mthun par smra bas dkrugs shing rmongs par byas pa gang yin pa de ni rgyu med pa dang rgyu mi mthun par smra bas blo gros dkrugs pa'i skye bo zhes bya'o/ /rjes su thugs brtse bas zhes bya ba ni skye bo de la bcom ldan 'das shAkya thub pa rjes su thugs brtse zhing ngan song du 'gro ba las 'dren pa mdzad pa ni rgyu med pa dang rgyu mi mthun par smra bas blo gros dkrugs pa'i skye bo la rjes su thugs brtse ba zhes bya'o/ /tha snyad kyi bden pa ji ltar gnas pa bstan pa'i phyir zhes bya ba ni thog ma med pa'i dus nas kun rdzob kyi bden pa phyi rol dang / nang gi rkyen sa bon dang mer mer po la sogs pa dag las myu gu dang mig la sogs pa skye bar grags pa'i tha snyad ji ltar gnas pa de bstan cing gsal bar bya ba'i phyir ro/ /rgyu dang dmigs pa dang de ma thag pa dang bdag po'i rkyen rnams bka' stsal par shes par bya ste zhes bya ba ni chos mngon pa'i bstan bcos las/ bzhi yis sems dang sems byung rnams/ /gsum gyis snyoms par 'jug pa gnyis/ /gzhan ni gnyis po dag las skye/ /dbang phyug sogs min rim sogs phyir/ /zhes bshad pa lta bur shes par bya ste/ / sems dang sems las byung ba rnams ni rgyu'i rkyen dang dmigs pa'i rkyen dang de ma thag pa'i rkyen dang bdag po'i rkyen bzhis skyed par byed do/ /de la 'di dag gi rgyu'i rkyen ni rgyu lnga po thams cad do/ /dmigs pa'i rkyen ni ci rigs par yul lnga po dag dang chos thams cad do/ /de ma thag pa'i rkyen ni sems dang sems las byung ba snga ma gzhan dag gis bar du ma chod pa rnams so/ /bdag po'i rkyen ni rang gi ngo bo ma gtogs pa chos thams cad do/ /'gog pa'i snyoms par 'jug pa dang 'du shes med pa'i snyoms par 'jug pa gnyis ni rgyu'i rkyen dang de ma thag pa'i rkyen dang bdag po'i rkyen gsum gyis skyed par byed do/ /'di gnyis la dmigs pa'i rkyen ni med de de gnyis ni dmigs par byed pa ma yin pa'i phyir ro/ /de gnyis kyi rgyu'i rkyen ni rgyu rnam pa gnyis te lhan cig 'byung ba'i rgyu ni skye ba la sogs pa'o/ /skal ba mnyam pa'i rgyu ni sa mtshungs pa'i dge ba'i chos sngar byung ba rnams so/ /de ma thag pa'i rkyen ni snyoms par 'jug pa'i sems mtshungs par ldan pa dang bcas pa'o/ /bdag po'i rkyen ni rang gi ngo bo ma gtogs pa chos thams cad do/ /snyoms par 'jug pa 'di dag ni sems kyi mngon par 'du bya ba las skye ba'i phyir sems kyi de ma thag pa dag ni yin gyi/ sems skye ba la bgegs byed pa'i phyir mtshungs pa de ma thag pa'i rkyen ni ma yin no/ /gzhan ldan pa ma yin pa rnams dang gzugs can rnams ni rgyu'i rkyen dang bdag po'i rkyen gnyis las skye'o/ /dngos po rnams ni ji skad bshad pa'i rgyu dang rkyen rnams kho na las skye ba'i 'gro ba thams cad ni rgyu gcig po dbang phyug dang skyes bu dang gtso bo la sogs pa ni med de/ gal te dbang phyug gam gzhan yang rung ste/ rgyu gcig pu kho na zhig yin na 'gro ba thams cad cig car du 'byung bar 'gyur ba zhig na dngos po rnams ni rim gyis 'byung ba la sogs par snang ba'i phyir/ rgyu dbang phyug la sogs pa gcig pu ni med do zhes bka' stsal par shes par bya'o/ /de'i phyir khas blangs pa la gnod par mi 'gyur ro zhes bya ba ni sngar bshad pa gang yin pa de nyid 'dir yang sbyar bar bya ste/ gal te kun rdzob tu rkyen rnams bka' stsal par khas blangs nas kun rdzob nyid du 'gog par byed na ni des na khas blangs pa la gnod par yang 'gyur la/ de bzhin du don dam par skye bar khas blangs nas don dam pa nyid du skye ba med par sgrub par byed na/ de lta na yang khas blangs pa la gnod par 'gyur ba zhig na/ kho bos ni kun rdzob tu rkyen rnams bka' stsal pa la don dam par dgag pa dang kun rdzob tu skye ba yod la/ don dam par skye ba med par khas blangs pas de'i phyir khas blangs pa'i gnod pa dang / grags pa'i gnod pa dang / mngon sum gyi gnod pa dang / rjes su dpag pa'i gnod pa dang / rang gi tshig gi gnod par yang mi 'gyur ro/ /yang na gzhan du rnam par brtag ste zhes bya ba ni/ dngos po rnams kyi rang bzhin ni/ /rkyen la sogs pa yod ma yin/ /bdag gi dngos po yod min na/ /gzhan gyi dngos po yod ma yin/ /zhes bya ba'i tshig le'ur byas pa de'i rnam par bshad pa'i rnam pa gzhan zhes bya ba'o/ /gang dag dngos po rnams gzhan las skye'o zhes ston par byed pa de dag gi phyir yang 'di dpyad par bya'o zhes bya ba ni rang gi sde pa bye brag tu smra ba dang / mdo sde pa gang dag dngos po rnams gzhan las skye'o zhes ston par byed pa de dag gi phyir yang tshig le'ur byas pa 'di rnam pa gzhan du yang dpyad par bya ste/ de dag dang lhan cig tu yang dngos po rnams gzhan las skye bar rigs sam mi rigs par 'gro bar bya ste/ rigs pas dpyad par bya'o zhes bya ba'i tha tshig go/ /'di la/ rkyen rnams bzhi ste rgyu dang ni/ /dmigs pa dang ni de ma thag /bdag po yang ni de bzhin te/ /zhes bya ba de dag dngos po skyed par byed pa yin par 'dod pa zhes bya ba ni khyed cag go/ /sde pa gzhan dag gis yongs su brtags pa dang / bye brag pa la sogs pas yongs su brtags pa ming tha dad pas tha dad pa gang dag yin pa de dag kyang mtshan nyid kyis de dag nyid du 'dus pas de'i phyir/ rkyen lnga pa ni yod ma yin/ /zhes nges par bya ste brjod do zhes bya bas ni 'di skad bstan te/ sangs rgyas pa kha cig gis yongs su brtags pa mdun du skyes pa dang / yod pa dang med pa la sogs pa gang dag yin pa dang bye brag pa dag gis yongs su brtags pa rdul phra rab gnyis dang gsum dang bzhi sbyor bar byed pa zhes bya ba la sogs pa dang / yul dang dbang po dang blo dang rtsol ba zhes bya bar yongs su brtags pa gang dag yin pa de dag kyang ming tha dad par bstan pa'i sgo nas tha dad par zad kyi/ mtshan nyid kyi sgo nas ni de dag la tha dad pa med pas de'i phyir de dag kyang rkyen bzhi po de dag nyid du 'dus so/ /gang gi phyir de lta yin pa de'i phyir/ rkyen lnga pa ni yod ma yin/ /zhes nges par bya ste brjod do/ /don dam par de dag gzhan nyid yin pa kho nar mi rigs so zhes bya ba ni yang na gzhan du rnam par brtag ste zhes bya ba'i skabs nyid ston pa yin te/ rang gi sde pa dag gis yongs su brtags pa rgyu la sogs pa'i rkyen bzhi po de dag dpyad na/ don dam par gzhan nyid yin pa kho nar mi rigs shing mi 'thad do/ /gal te pha rol po na re/ ji ltar zhes 'dri na de'i phyir/ /dngos po rnams kyi rang bzhin ni/ /rkyen la sogs la yod ma yin/ /zhes bya ba gsungs te/ zhes bya ba la sogs pa smras so/ /dngos po rnams kyi zhes bya ba ni nang gi dang cha phra ba dang rags pa rnams kyi'o zhes bya ba la/ nang gi zhes bya ba ni mig dang / rna ba dang sna dang / lce dang / lus dang / yid rnams kyi'o/ /cha phra ba dang rags pa rnams kyi'o zhes bya ba ni/ rdul phra rab rnams dang / gzugs la sogs pa yul ltar nus pa rnams kyi'o zhes bya ba'i tha tshig go/ /rang bzhin ni zhes bya ba ni rang gi bdag nyid do zhes bya ba ni rang gi ngo bo nyid do/ /rkyen la sogs pa zhes bya ba ni re zhig rkyen so so dang 'dus pa dag la'o zhes bya ba la/ rkyen so so la zhes bya ba ni las sam/ nyon mongs pa rnams sam/ khu chu 'am khrag so so la'o/ /'dus pa dag la'o zhes bya ba ni spyi dag la'o/ /sogs pa zhes bya ba'i sgras ni rgyu dang byed rgyu thun mong dang thun mong ma yin pa tshogs pa dang gzhan dag la yang ngo zhes bya ba la/ rgyu dang byed rgyu thun mong dang thun mong ma yin pa tshogs pa la zhes bya ba ni rgyu dang rkyen thun mong ma yin pa dang thun mong ba tshogs pa la'o/ /gzhan dag la yod do zhes bya ba ni sred med kyi bu dang dbang phyug dang gtso bo la sogs pa dag la yang ngo / /yod ma yin zhes bya ba ni yod pa ma yin no zhes bya ba'i tha tshig go zhes bya ba ni rkyen so so dang 'dus pa dag dang / rgyu dang byed rgyu thun mong ba tshogs pa dang gzhan dag la yang / mig la sogs pa'i skye mched rnams kyi ngo bo nyid cha phra ba dang rags pa yongs su btsal na mi rigs so zhes bya ba'i tha tshig go/ /gang gi tshe ji ltar zhe na zhes bya ba ni pha rol po na re/ gang gi tshe yod pa ma yin zhing ji ltar yod pa ma yin zhes rnam pa gnyis 'dri ba yin no/ /gang gi tshe yod pa ma yin zhe na/ de'i phyir skye ba'i snga rol na zhes bya ba smras te/ mig la sogs pa ma skyes pa'i gnas skabs na zhes bya ba'i tha tshig go/ /ji ltar yod pa ma yin zhe na/ de'i phyir tha snyad dang don dam par ro zhes bya ba smras te/ 'di ltar kun rdzob tu yang skye mched rnams kyi ngo bo nyid mer mer po la sogs pa'i gnas skabs na skyes pa cha phra ba'am rags pa yang yod pa ma yin la/ don dam par yang ma skyes pa'i phyir yod pa ma yin no/ /bdag gi dngos po yod min na/ /gzhan gyi dngos po yod ma yin/ /zhes bya ba ni bdag gi dngos po skye bar 'dod pa de nyid yod pa ma yin na/ rkyen rnams la gzhan gyi dngos po gzhan nyid yod par ji ltar 'gyur bas zhes bya ba ni 'di skad bstan te rkyen so so dang 'dus pa dag la skye mched kyi ngo bo nyid cha phra ba yang skyes pa yod pa ma yin pa de'i tshe rkyen mer mer po la sogs pa dag ji ltar gzhan nyid ces brjod par 'gyur te mi 'gyur bas so/ /ji ltar rkyen rnams la gzhan gyi dngos po gzhan nyid yod pa ma yin zhe na/ de'i phyir gzhan nyid yod pa ma yin pa kho na ste/ gzhan gyi rgyu mtshan med pa'i phyir zhes bya bar dgongs so zhes bya ba smras te/ de ltar mig la sogs pa'i ngo bo nyid ni rkyen rnams kyi gzhan nyid kyi rgyu mtshan dang byed rgyu dang rgyu yin te/ de la ltos nas rkyen rnams gzhan du brjod pa'i phyir/ dper na ring po dag yod na de la ltos nas thung ngu zhes brjod pa lta bu yin na/ rkyen rnams gzhan zhes brjod pa'i rgyu mtshan skye mched kyi ngo bo nyid med pa'i phyir rkyen rnams gzhan zhes bya bar mi 'gyur te/ dper na ring po med pas thung ngu zhes bya bar mi 'gyur ba bzhin no zhes dgongs so zhes bya ba ni/ ji ltar rkyen rnams la gzhan gyi dngos po yod pa ma yin pa de ltar slob dpon gyis dgongs so zhes bya ba'i tha tshig go/ /'di ltar chos mngon pa pa dag na re/ skye mched rnams kyi ngo bo nyid cha phra ba 'am rags pa yang med pas/ rkyen rnams la gzhan gyi dngos po nyid med pa gang yin pa de ni bden na/ 'on kyang mig la sogs pa mer mer po la sogs pa dag las phyis skye bar 'dod pa gang dag yin pa de dag snying la bzhag ste/ de la ltos nas rkyen rnams gzhan du 'gyur ro zhes zer ba dang / bye brag pa dag kyang 'di skad ces mig la sogs pa med kyang gzhan nyid ces bya ba'i yon tan dang ldan pas rkyen rnams kyang gzhan nyid du 'gyur ro zhes zer ba'i phyogs snga ma khong nas dbyung ba de gnyis kyi lan du 'dir 'grel pa byed pa nyid kyis/ ci ste dngos po skye bar 'dod pa blo la rnam par bzhag nas rkyen de dag gzhan du gyur pa yin te/ ltos pa'i dbang gis so zhe'am/ gzhan nyid dang ldan pas so zhes snyad 'dogs na zhes bya ba la sogs pa smras so/ /de la ci ste dngos po skye bar 'dod pa blo la rnam par bzhag nas/ rkyen de dag gzhan du gyur pa yin te/ ltos pa'i dbang gis so zhe 'am zhes bya ba ni/ ci ste chos mngon pa pa dag na re/ skye mched rnams kyi ngo bo nyid cha phra ba 'am rags pa yang med pas rkyen rnams la gzhan gyi dngos po gnyis med pa gang yin pa de ni bden na/ 'on kyang mig la sogs pa mer mer po la sogs pa dag las phyis skye bar 'dod pa gang dag yin pa de dag snying la bzhag ste de la ltos nas rkyen rnams gzhan du 'gyur ro zhes zer na'o/ /gzhan nyid dang ldan pas so zhes snyad 'dogs na zhes bya ba ni bye brag pa dag kyang 'di skad ces mig la sogs pa med kyang / gzhan nyid ces bya ba'i yon tan dang ldan pas rkyen rnams kyang gzhan du 'gyur ro zhes snyad 'dogs na'o/ /de la gzhan nyid ces bya ba'i yon tan dang ldan pas zhes bya ba ni bye brag pa'i grub pa'i mtha' las tshig gi don drug 'byung ba las yon tan zhes bya ba'i nang nas gzhan zhes bya ba'i yon tan dang ldan pas so/ /de la bye brag pa'i grub pa'i mtha' las 'byung ba'i tshig gi don drug gang zhe na/ rdzas dang / yon tan dang / las dang / spyi dang / bye brag dang / 'du ba'o/ /de la rdzas gang zhe na/ rnam pa dgu ste/ sa dang / chu dang / me dang / rlung dang / nam mkha' dang / dus dang / phyogs dang / bdag dang / yid do/ /yon tan gang zhe na/ rnam pa nyi shu rtsa bzhi ste/ gzugs dang / sgra dang / dri dang / ro dang / reg bya dang / grangs dang / bong tshod dang / so so ba dang / phrad pa dang / bye ba dang / gzhan dang gzhan ma yin pa dang / mig gi blo dang / rna ba'i blo dang / sna'i blo dang / lce'i blo dang / lus kyi blo dang / bde ba dang / sdug bsngal ba dang / 'dod pa dang / sdang ba dang / chos dang / chos ma yin pa dang / byas pa'i shugs dang / 'bad pa'o/ /las gang zhe na/ rnam pa lnga ste/ 'degs pa dang / 'jog pa dang / bskum pa dang / brkyang ba dang / 'gro ba'o/ /spyi gang zhe na/ yod pa ste/ spyi chen po dang / nyi tshe'i spyi'o/ /bye brag gang zhe na/ de las bye brag tu dbye ba'o/ /'du ba gang zhe na/ 'di dang 'dir 'du ba'o/ /de ltar bye brag pa'i tshig gi don drug po de dag las/ yon tan nyi shu rtsa bzhi'i nang nas gzhan zhes bya ba de dang ldan pas rkyen rnams kyang gzhan nyid du 'gyur ro zhes snyad 'dogs na'o/ /de ni tha snyad tsam du zad de/ de dag la gzhan gyi ngo bo nyid med pas zhes bya ba ni 'di skad bstan te/ 'di ltar skye mched kyi ngo bo nyid rkyen rnams las phyis skye bar 'dod pa snying la gzhag ste/ gal te de la ltos nas rkyen rnams gzhan du 'dod pa dang / bdag nyid ces bya ba'i yon tan dang ldan pas rkyen rnams gzhan du 'dod na/ de lta na de dag gi gzhan nyid ni ltos pas byas pa yin gyi ngo bo nyid kyis yod pa ma yin pas de ni tha snyad tsam du zad do/ /ngo bo nyid ces bya ba ni gang ci la yang mi ltos pa ste/ dper na me'i tsha ba nyid lta bu yin pas de'i phyir gal te skye mched phyis skye bar 'dod pa rnams dang gzhan nyid ces bya ba'i yon tan la ma ltos par rkyen rnams la gzhan zhes bya ba yod par gyur na ni des na rkyen de dag ngo bo nyid kyis gzhan yin no zhes bya bar gzung du yang rung ba zhig na/ rkyen de dag ngo bo nyid kyis gzhan gyi dngos po nyid med pas des na rkyen rnams la gzhan gyi dngos po yod par gzung du mi rung ngo / /'di la mngon par zhen par mi bya'o zhes bya ba ni de'i phyir rkyen rnams la gzhan gyi dngos po yod par 'dod pa'i phyogs 'di la mngon par zhen par mi bya'o/ /ci ste 'dir pha rol po na re/ khyod kyis tha snyad du rkyen rnams gzhan nyid du khas blangs pas de'i phyir rkyen rnams gzhan nyid du grub pas gzhan las skye ba yang grub po zhes zer ba'i phyogs snga ma khong nas dbyung ba de'i lan du 'dir 'grel pa byed pa nyid kyis/ tha snyad du gzhan nyid yod du zin kyang don dam par de las skye ba med par sngar bstan to zhes bya ba smras so/ /'di skad bstan te/ 'di ltar kho bo la kun rdzob tu skye mched rnams dang / rkyen rnams phan tshun gzhan nyid yod du zin kyang don dam par rkyen de dag las mig la sogs pa skye mched rnams skye ba med par sngar gzhan las skye ba med par sgrub pa'i skabs su bstan zin te/ don dam par nang gi skye mched rnams de dag gi rkyen gzhan dag las skye ba med de/ gzhan yin pa'i phyir dper na bum pa bzhin no/ /yang na don dam par gzhan brjod pa 'dod pa mig la sogs pa nang gi skye mched 'grub par byed pa dag rkyen ma yin par nges te gzhan yin pa'i phyir/ dper na rgyu spun la sogs pa bzhin no zhes bstan pa yin no/ /grangs can dag phyir zlog par byed de/ dngos po'i ngo bo nyid ni rkyen rnams la cha phra ba'i bdag nyid du yod pa kho na yin na de yang phyis gsal bar byed par khas blangs pas/ 'bras bu gsal bar ma gyur kyang rkyen rnams gzhan nyid du grub pa'i phyir/ de ni mi gnod do zhe na/ zhes bya ba 'di'i bsdus pa'i don ni sngar dbu ma pas rkyen rnams la mig la sogs pa'i ngo bo nyid cha phra mo yang med pas/ des na gzhan nyid med pa'i phyir/ gzhan las skye ba yang med do/ /zhes smras pa nye bar thos nas/ 'dir grangs can dag las/ gsal bar smra ba dag phyir rgol ba nyid du gnas par byed de/ gang dag gi phyogs la ngo bo nyid cha phra ba yang med pa de dag gi phyogs la ni sun dbyung ba 'di rigs kyi/ kho bo ni dngos po'i ngo bo nyid rkyen mer mer po la sogs pa la cha phra ba'i bdag nyid du yod pa kho nar khas len te/ dper na shing n+ya gro d+ha'i sa bon gyi nang na yang rtsa ba dang / sdong po dang / yal ga dang / yal ga phra mo skye ba la sogs pa dang ldan pa yod pa lta bu yin la/ de yang phyis gsal bar byed par kho bos khas blangs pas/ de'i phyir mig la sogs pa 'bras bu re zhig gsal bar ma gyur du zin kyang de dag gi ngo bo nyid cha phra ba'i bdag nyid du snga na yod pa de la ltos nas rkyen rnams la gzhan nyid yod pas de'i phyir kho bo cag gsal bar smra ba rnams la ni gzhan las skye bar rigs pas/ khyed kyis gzhan las skye ba med par bshad pa de mi gnod kyi/ 'bras bu med par smra ba gzhan dag la ni gnod do zhes zer ba yin no/ /de skad ces zer ba de'i lan du/ 'dir 'grel pa byed pa nyid kyis/ de ni bzang po ma yin te zhes bya ba la sogs pa smras te/ 'di ni 'grel pa byed pas gsal bar smra ba dag sun 'byin par byed do/ /'jig rten na grags pa bum pa la sogs pa dag gi bdag nyid cha phra ba bstan par dka' ba'i phyir dang zhes bya ba ni 'di skad bstan te/ khyod ji ltar 'jim pa dang rgyu spun dang rtsi rkyang la sogs pa'i gnas skabs na/ bum pa dang / snam bu dang sab ma la sogs pa dag gi bdag nyid cha phra ba yod pa ni 'jig rten gyi tha snyad du yang bstan par mi nus na don dam par lta smos kyang ci dgos na/ de'i phyir dngos po'i ngo bo nyid ni rkyen rnams la cha phra ba'i bdag nyid du yang med pa kho na yin no/ /gsal ba'i lan yang btab zin pa'i phyir ro zhes bya ba ni gang gi phyir khyod kyi gsal ba ni lan du ma bkag zin na/ yang ci'i phyir gleng bar byed de/ de'i phyir phyis gsal bar byed par khas blangs pa de yang mi rung ngo / /grangs can dag las gzhan dag na re zhes bya ba ni nus pa smra ba dang / ther zug tu gnas par smra ba dag na re 'di skad ces zer ro zhes bya bar sbyar ro/ /gal te 'bras bu'i nus pas stong pa'i rkyen gzhan dag las 'bras bu skye ba med par sgrub na ni grub pa la sgrub po zhes bya ba ni nus pa smra ba dag na re/ gal te dbu ma pa khyed 'bras bu mig la sogs pa'i skye mched dang myu gu'i nus pas stong pa'i rkyen rgyu spun la sogs pa gzhan dag las 'bras bu mig la sogs pa'i skye mched dang / myu gu skye ba med par sgrub na ni de lta na khyod kyi dam bcas pa de ni grub pa la sgrub pa'i skyon du 'gyur te/ 'di ltar 'bras bu mig la sogs pa'i skye mched dang myu gu'i nus pas stong pa'i rkyen rgyu spun la sogs pa gzhan dag las 'bras bu mig la sogs pa'i skye mched dang myu gu skye ba med par ni 'jig rten thams cad la yang grub pa'i phyir ro zhes zer ba yin no/ /'on te skye ba med pa kho na'o zhe na ni/ ther zug tu gnas par smra ba khas blangs pa'i phyir phyogs snga ma la gnod do zhes zer na zhes bya ba ni ther zug tu gnas par smra ba dag na re/ 'on te dbu ma pa khyod kyi dngos po rnams skye ba med pa'o zhes zer na ni yod bzhin du skye ba med pa kho na zhes bya ba ni ther zug tu gnas pa yin la/ de yang khyod kyi grub pa'i mtha' la med pas de khyed kyi khas blangs pa'i phyir/ des na khyed kyi lung gi phyogs snga ma la gnod do zhes zer ba yin no/ /de skad ces zer ba de'i lan du 'dir 'grel pa byed pa nyid kyis de ni bzang po ma yin te zhes bya ba la sogs pa smras te/ 'dis ni 'grel pa byed pas lan btab pa ston to/ /rnam pa thams cad du skye ba 'gog pa'i phyir ro zhes bya bas ni 'di skad bstan te/ kho bos don dam par 'bras bu'i nus pas stong pa dag kyang rung / 'bras bu'i nus pas mi stong pa dag kyang rung ste/ rnam pa thams cad du dngos po skye ba 'gog pa'i phyir/ grub pa la sgrub pa'i skyon du mi 'gyur ro zhes bstan to/ /ther zug tu gnas pa yang ma yin te/ dngos po ma skyes pa'i tha snyad du yang yod pa nyid du khas ma blangs pa'i phyir ro zhes bya bas ni 'di skad bstan te/ gal te kho bos dngos po ma skyes pa cung zhig yod par khas blangs na ni des na ther zug tu gnas pa'i skyon du yang 'gyur ba zhig na/ gang gi phyir kho bos dngos po rnams gtso bo dang dus dang gzhan gang las kyang skye ba med par khas blangs pas dngos po ma skyes pa ni kun rdzob kyi tha snyad du yang yod pa nyid ma yin pas/ de'i phyir ma skyes pa la ni ther zug tu gnas pa med pas des na de yang bzang po ma yin no/ /gzhan dag na re zhes bya ba ni bye brag tu smra ba dang / mdo sde pa dag nyid lung tsam gyis skye ba ma grub pas de'i phyir brda sprod pa'i tham lag gi rjes su zhugs nas rnam pa gzhan gyis skye ba sgrub par byed pa yin no/ /rkyen rnams kho na 'bras bu skyed par byed pa ma yin te zhes bya ba 'di la mig gi rnam par shes pa ni mig gi gnas las skye'o/ /gnas yod du zin kyang yul med na mi skye'o/ /yul yod du zin kyang mun khrod du mi skye'o/ /snang ba yod du zin kyang rtsig pa la sogs pas bsgribs pa'i gzugs la mi skye'o/ /nam mkha' yod du zin kyang lta 'dod pa med na mi skye bas de'i phyir mig gi rnam par shes pa skye ba'i rkyen ni mig dang / gzugs dang / snang ba dang / nam mkha' dang / yid la byed pa rnams yin mod kyi/ 'on kyang rkyen de rnams kho nas 'bras bu mig gi rnam par shes pa skyed par byed pa ma yin no/ /'di ltar rnam par shes pa bskyed pa'i bya ba mig dang / gzugs dang / snang ba dang / nam mkha' dang / yid la byed pa'i rkyen rnams kyi rkyen dang ldan pas de bskyed par 'dod do zhes bya ba 'di la brda sprod pa las ldan pa'i don gyi rkyen rjod par byed de/ dper na bud med 'di gzugs dang ldan pas de'i phyir gzugs can ma zhes bya ba dang 'dra bar rnam par shes pa bskyed pa'i bya ba yang mig dang gzugs dang / snang ba dang / nam mkha' dang / yid la byed pa'i rkyen rnams kyi rkyen dang ldan pa yin te/ bya ba rkyen dang ldan pa des 'bras bu mig gi rnam par shes pa de skyed par 'dod do/ /kho bo cag gis de yang yod par smra bar nus te zhes bya ba ni bya ba rkyen dang ldan pa de yang yod par smra bar nus te zhes dam 'cha' ba yin no/ /don dam par rnam par shes pa bskyed pa'i bya ba rang gi 'bras bu skyed par byed pa yin te/ rkyen dang ldan pa'i phyir/ dper na 'bras chan 'tshed pa'i bya ba phru ba dang / chu dang 'bras thug po che dang / me dang bud shing gi rkyen rnams kyi rkyen dang ldan pa bzhin no zhes bya ba la/ 'dir yang rnam par shes pa bskyed pa'i bya ba zhes bya ba 'di ni chos can yin la/ rang gi 'bras bu skyed par byed pa yin zhes bya ba 'di ni bsgrub par bya ba chos yin/ rkyen dang ldan pa'i phyir zhes bya ba 'di ni sgrub pa'i chos yin/ dper na 'bras chan 'tshed pa'i bya ba phru ba dang chu dang 'bras thug po che dang me dang bud shing gi rkyen rnams kyi rkyen dang ldan pa bzhin no zhes bya ba 'di ni dpe yin par sbyar te/ dper na 'bras chan 'tshed pa'i bya ba phru ba dang / chu dang / 'bras thug po che dang / me dang / bud shing gi rkyen rnams kyi rkyen dang ldan pa'i phyir/ rang gi 'bras bu 'bras can skyed par byed pa bzhin du rnam par shes pa bskyed pa'i bya ba yang mig dang / gzugs dang / snang ba dang / nam mkha' dang / yid la byed pa'i rkyen rnams kyi rkyen dang ldan pa'i phyir don dam par rang gi 'bras bu rnam par shes pa skyed par byed pa yin no/ /des na rjes su dpag pa sngar smras pa rnams rtog ge phyi mas gnod par 'gyur ro zhes zer ro zhes bya ba ni mjug bsdu ba yin te/ ji skad smras pa'i tshad ma des na dbu ma pas rjes su dpag pa sngar smras pa 'di lta ste/ don dam par nang gi skye mched rnams de dag gi rkyen gzhan dag las skye ba med de/ gzhan yin pa'i phyir dper na bum pa bzhin no/ /yang na don dam par gzhan brjod par 'dod pa mig la sogs pa nang gi skye mched 'grub par byed pa dag rkyen ma yin par nges te gzhan yin pa'i phyir/ dper na rgyu spun la sogs pa bzhin no zhes bya ba gang dag yin pa de dag la kho bo cag gi rtog ge phyi ma 'dis gnod par 'gyur ro zhes zer ba yin no/ /de skad ces zer ba de'i lan du slob dpon nyid kyis 'dir bshad pa/ bya ba rkyen dang ldan ma yin/ /zhes bya ba la sogs pa'o/ /gang gi phyir ji skad smras pa'i dpe'i rtog ge phyi ma de la gnod par 'gyur ba 'bras chan 'tshed pa'i bya ba kho bo cag don dam par khas mi len pas/ pha rol po'i sgrub pa dpe ma tshang ba'i skyon du 'gyur ro zhes bya ba ni dpe sun 'byin pa yin te/ gang gi phyir rtog ge pa dag gis ji skad smras pa'i dpe'i rtog ge phyi mas dbu ma'i rjes su dpag pa sngar smras pa de la gnod par 'gyur ro zhes khyed zer ba 'bras chan 'tshed pa'i bya ba gang yin pa de kho bo cag dbu ma pa don dam par khas mi len pas de'i phyir pha rol po'i sgrub pa dpe ma tshang ba'i skyon du 'gyur ro zhes bya ba smras so/ /yang na/ bya ba rkyen dang ldan ma yin/ / zhes bya ba ni don dam par rnam par shes pa bskyed pa'i bya ba rkyen dang ldan pa ma yin te/ 'bras bu yod pa dang med pa skye ba phyis 'gog par 'gyur ba'i phyir ro zhes bya ba ni rnam par shes pa bskyed pa'i bya ba dngos po sun 'byin pa yin no/ /yang na zhes bya ba'i sgra ni rnam pa gzhan du brtag pa'i don te/ bya ba rkyen dang ldan ma yin/ /zhes bya ba tshig le'ur byas pa'i rtsa ba gcig po 'dis sngar ni 'tshed pa'i bya ba zhes bya ba dpe sun phyung ngo / /da ni/ bya ba rkyen dang ldan ma yin/ /zhes bya ba'i tshig le'ur byas pa'i rtsa ba gcig po 'dis rnam par shes pa bskyed pa'i bya ba zhes bya ba dngos po sun 'byin par byed do/ /de'i phyir/ don dam par rnam par shes pa bskyed pa'i bya ba rkyen dang ldan pa ma yin te zhes bya ba smras so/ /ji lta zhe na/ de'i phyir 'bras bu yod pa dang med pa skye ba phyis 'gog par 'gyur ba'i phyir ro zhes bya ba smras so/ /'di skad bstan te/ 'di ltar bya ba yod pa nyid du 'bras bu rnam par shes pa zhes bya ba skye bas bsgrub par bya ba yin na 'bras bu rnam par shes pa de yod pa 'am med pa zhig bya ba rkyen dang ldan pas skyed par byed grang na de yang / med dam yod pa'i don la yang / /rkyen ni rung ba ma yin te/ /med na gang gi rkyen zhes bya/ /yod na rkyen gyis ci zhig bya/ /zhes phyis 'gog par 'gyur ba'i phyir te/ 'bras bu rnam par shes pa yod na ni/ bya bas yang bskyed mi dgos la/ 'bras bu rnam par shes pa med pa nam mkha'i me tog lta bu yin na ni gzhi med pa'i phyir bya ba nyid kyang med pas bya ba rnam par shes pa skyed pa'i rkyen ma yin no/ /don dam par de skad brjod na ni bya ba ma skyes pa'i phyir gtan tshigs kyi don ma grub pa nyid do zhes bya bas ni 'di skad bstan te/ gal te don dam par rnam par shes pa bskyed pa'i bya ba mig dang / gzugs dang / snang ba dang / nam mkha' dang / yid la byed pa'i rkyen rnams kyi rkyen dang ldan pa'i phyir/ rang gi 'bras bu skyed par byed pa yin no zhes de skad brjod na ni de lta na bya ba ma skyes pa'i phyir/ khyod kyi gtan tshigs kyi don ma grub pa nyid do/ / 'di ltar don dam par rnam par shes pa nyid ma skyes pa'i phyir bya ba'i gzhi med pas bya ba yang ma skyes pa'i phyir te/ dper na bdag ni khyab bdag yin te thams cad du bde ba'i phyir ro zhes zer ba de'i bdag ma grub pas/ gzhi med pa'i khyab bdag kyang med pas thams cad du bde ba'i phyir zhes bya ba'i gtan tshigs kyi don ma grub pa nyid yin pa bzhin du/ 'dir yang don dam par rnam par shes pa med pa'i phyir/ gzhi ma grub pas bya ba yang med pa'i phyir/ bya ba rkyen dang ldan pas rang gi 'bras bu bskyed de zhes bya ba gtan tshigs kyi don ma grub pa nyid yin no/ /spyir de skad brjod na yang 'gal ba'i don de nyid de/ rnam par shes pa'i bdag nyid bskyed pa'i bya ba rkyen dang ldan pa nyid ni kun rdzob kyi shes pa'i yul yin te/ med na mi 'byung ba'i phyir ro zhes bya bas ni 'di skad bstan te/ gal te pha rol po 'di skad ces dbu ma pa ni rnam par shes pa bskyed pa'i bya ba rkyen dang ldan pa kun rdzob tu khas len la/ kho bo cag ni don dam par khas len pas de'i phyir gnyi ga la gtan tshigs kyi don grub par 'gyur bas/ de'i phyir don dam par rnam par shes pa bskyed pa'i bya ba mig dang / gzugs dang / snang ba dang / nam mkha' dang / yid la byed pa'i rkyen rnams kyi rkyen dang ldan pa'i phyir rang gi 'bras bu skyed par byed pa yin no zhes spyir de skad brjod na yang de lta na khyod kyi gtan tshigs kyi don rkyen dang ldan pa'i phyir zhes bya ba de 'gal ba'i don nyid yin te/ 'di ltar khyed kho bo cag dbu ma pa la grags pa'i gtan tshigs kun rdzob par 'dod pas des na rnam par shes pa'i bdag nyid bskyed pa'i bya ba rkyen dang ldan pa nyid ni kun rdzob kyi shes pa'i gzung ba'i yul yin te/ des don dam par rnam par shes pa bskyed pa'i bya ba rkyen dang ldan pas rang gi 'bras bu bskyed par sgrub pa ni 'gal ba'i don nyid yin no/ /ci'i phyir zhe na/ med na mi 'byung ba'i phyir te/ 'di ltar rnam par shes pa'i bdag nyid bskyed pa'i bya ba rkyen dang ldan pa nyid ces bya ba dang / kun rdzob kyi shes pa'i yul yin te zhes bya ba de gnyis ni med na mi 'byung ba'i mtshan nyid kyis 'brel ba'i phyir te/ rnam par shes pa'i bdag nyid bskyed pa'i bya ba rkyen dang ldan pa nyid ces bya ba med na yang kun rdzob kyi shes pa'i yul yin te zhes bya ba mi 'byung la/ kun rdzob kyi shes pa'i yul yin te zhes bya ba med na yang rnam par shes pa'i bdag nyid bskyed pa'i bya ba rkyen dang ldan pa nyid ces bya ba mi 'byung ste/ dper na me med na yang du ba mi 'byung la/ du ba med na yang me mi 'byung ba'i mtshan nyid lta bus 'brel pa yin pas/ 'dir yang rnam par shes pa'i bdag nyid bskyed pa'i bya ba rkyen dang ldan pa nyid ni kun rdzob kyi shes pa'i yul nyid du sgrub pa yin gyi/ don dam pa'i shes pa'i yul nyid du sgrub pa ma yin pas des na khyod don dam par rnam par shes pa bskyed pa'i bya ba rkyen dang ldan pa'i phyir rang gi 'bras bu skyed par byed pa yin no zhes zer ba'i 'dod pa nyams pa'i phyir/ 'gal ba'i don nyid yin no/ /'di la gzhan ni gzhan gyi dngos po rnams bdag dang gzhan la sogs pa las skye'o zhes bya ba 'dis kho bo cag la ci bya ste/ 'di ltar mig la sogs pa ni mig gi rnam par shes pa bskyed pa'i rkyen yin te/ dper na phru ba la sogs pa 'tshed pa'i bya ba yin pa bzhin no zhes dngos po skye bar bstan pa de dgag pa'i phyir/ bya ba rkyen dang ldan ma yin/ /zhes bya ba 'di gsungs te/ rnam par shes pa skyes pa dang / ma skyes pa dang / skye ba'i tshe la rnam par shes pa bskyed pa'i bya ba mi 'thad pa'i phyir ro zhes rnam par bshad pa byed do zhes bya ba ni/ bya ba rkyen dang ldan ma yin/ /zhes bya ba tshig le'ur byas pa'i rtsa ba dang po 'di rnam par bshad pa'i skabs 'di la 'grel pa byed pa slob dpon bud+d+ha pA li ta ni 'di skad du rnam par bshad pa byed do zhes bstan pa yin no/ /de la 'di la zhes bya ba ni/ bya ba rkyen dang ldan ma yin/ /zhes bya ba tshig le'ur byas pa'i rtsa ba dang po 'di rnam par bshad pa'i skabs 'di la'o/ /gzhan ni zhes bya ba'i sgra ni bstan bcos 'di'i 'grel pa byed pa phal las gzhan pa ste/ gnas brtan bud+d+ha pA li ta dang sbyar ro/ /gnas brtan bud+d+ha pA li ta tshig le'ur byas pa'i rtsa ba dang po 'di'i rnam par bshad pa byed 'dod pas dang por phyogs snga ma smras pa ni 'di yin te/ gzhan gyi dngos po rnams bdag dang gzhan la sogs pa las skye'o zhes bya ba 'dis kho bo cag la ci bya ste/ 'di ltar mig la sogs pa ni mig gi rnam par shes pa skyed pa'i rkyen yin te/ dper na phru ba la sogs pa 'tshed pa'i bya ba yin pa bzhin no zhes dngos po skye bar bstan par bya ba zhes bya'o/ /de la gzhan gyis zhes bya ba ni skye bar smra ba gzhan gyis gnas brtan bud+d+ha pA li ta la dngos po skye bar bstan pa'i phyogs snga ma smras pa zhes bya bar sbyar ro/ / dngos po rnams bdag dang gzhan la sogs pa las skye'o/ /bya ba 'dis kho bo cag la ci bya ste zhes bya ba ni skye bar smra ba dag gnas brtan bud+d+ha pA li tas 'di skad ces zer ba yin te/ skye bar smra ba gzhan dag gis phyi dang nang gi skye mched kyi dngos po rnams bdag dang gzhan dang gnyis dang rgyu med pa las skye'o zhes bya ba'i dpyad pa 'dis kho bo cag la ci bya ste/ dgos pa med do zhes bya ba'i tha tshig go/ /kho bo cag ni 'di ltar 'dod de/ 'di ltar mig la sogs pa ni mig gi rnam par shes pa skyed pa'i rkyen yin te zhes bya ba ni/ rkyen mig dang / gzugs dang / snang ba dang / nam mkha' dang / yid la byed pa rnams ni 'bras bu mig gi rnam par shes pa bskyed pa'i bya ba'i rkyen yin par 'dod do/ de yang ji lta bu zhe na/ dper na phru ba sogs pa 'tshed pa'i bya ba yin pa bzhin no zhes bya ba ni/ dper na phru ba dang chu dang 'bras thug po che dang me dang bud shing dag ni 'bras chan 'tshed pa'i bya ba'i rkyen yin pa de bzhin du/ mig la sogs pa'i rkyen rnams kyang don dam par mig gi rnam par shes pa bskyed par bya ba'i rkyen yin no/ /dngos po skye bar bstan pa zhes bya ba ni skye bar smra ba gzhan gyis de ltar dngos po skye bar bstan cing sgrub pa'o/ /de dgag pa'i phyir/ bya ba rkyen dang ldan ma yin/ /zhes bya ba 'di gsungs te/ rnam par shes pa skyes pa dang / ma skyes pa dang / skye ba'i tshe la rnam par shes pa bskyed pa'i bya ba mi 'thad pa'i phyir ro zhes rnam par bshad par byed do zhes bya ba ni gnas brtan bud+d+ha pA li ta nyid kyi phyogs phyi ma yin te/ de la de dgag pa'i phyir zhes bya ba ni skye bar smra ba gzhan gyis dngos po skye bar bstan pa'i phyogs snga ma de dgag pa'i phyir ro/ /bya ba rkyen dang ldan ma yin/ /zhes bya ba 'di gsungs te/ zhes bya ba ni slob dpon gyis gsungs te zhes bya bar sbyar ro/ /rnam par shes pa skyes pa dang / ma skyes pa dang / skye ba'i tshe la rnam par shes pa bskyed pa'i bya ba mi 'thad pa'i phyir ro zhes bya bas ni 'di skad bstan te/ rnam par shes pa skyes pa la ni bya ba med de 'bras bu skyes zin pa'i phyir ro/ /rnam par shes pa ma skyes pa la yang bya ba med de rkyen med pa'i phyir ro/ /skye ba'i tshe zhes bya ba ni skye ba la mngon par phyogs pa ste/ de la yang bya ba med de ma skyes pa'i phyir ro/ /de ni rigs pa ma yin te/ phyogs snga ma dang phyi ma dang gnyis dam bcas pa tsam du zad pa'i phyir ro zhes bya ba ni 'grel pa byed pa nyid kyis/ gnas brtan bud+d+ha pA li tas rnam par bshad pa de rigs pa ma yin par sgrub pa'i tshig yin no/ /de la de ni rigs pa ma yin te zhes bya ba ni/ gnas brtan bud+d+ha pA li tas rnam par bshad pa de ni rigs pa ma yin no zhes dam bcas pa yin no/ /ci'i phyir rigs pa ma yin zhe na phyogs snga ma dang phyi ma gnyis dam bcas pa tsam du zad pa'i phyir ro/ /'di skad bstan te/ skye bar smra ba gzhan gyis dngos po rnams bdag dang gzhan la sogs pa las skye'o zhes bya ba 'dis kho bo cag la ci bya ste/ 'di ltar mig la sogs pa'i rkyen rnams ni mig gi rnam par shes pa skyed pa yin te/ dper na phru ba la sogs pa ni 'tshed pa'i bya ba yin pa bzhin no zhes dngos po skye bar bstan pa'i phyogs snga ma de dang / gnas brtan bud+d+ha pA li ta nyid kyis de dgag pa'i phyir/ rnam par shes pa skyes pa dang ma skyes pa dang skye ba'i tshe la rnam par shes pa bskyed pa'i bya ba mi 'thad pa'i phyir ro zhes rnam par bshad pa'i phyogs phyi ma de gnyis ga yang dam bcas pa'i tshig tsam du zad de 'thad pa'i rigs pa gzhan med pas/ gzhan gyi phyogs kyang sun mi phyin la/ rang gi phyogs kyang gzhung mi tshugs pa'i phyir ro/ /'dir sun phyung ba'i don sgro btags nas smras pa zhes bya ba ni/ skye bar smra ba dag gi yang skabs 'dir smras pa ste/ sun phyung ba'i don sgro btags nas zhes bya ba ni sngar skye bar smra ba gzhan dag na re/ rkyen rnams kho nas 'bras bu skyed par byed pa ma yin te/ 'di ltar rnam par shes pa bskyed pa'i bya ba mig dang / gzugs dang / snang ba dang / nam mkha' dang / yid la byed pa'i rkyen rnams kyi rkyen dang ldan pas de skyed par 'dod do/ /kho bo cag gis de yod par smra bar nus te/ don dam par rnam par shes pa bskyed pa'i bya ba rang gi 'bras bu skyed par byed pa yin te/ rkyen dang ldan pa'i phyir dper na 'bras chan 'tshed pa'i bya ba phru ba dang chu dang / 'bras thug po che dang me dang bud shing gi rkyen rnams kyi rkyen dang ldan pa bzhin no/ /des na rjes su dpag pa sngar smras pa rnams la rtog ge phyi mas gnod par 'gyur ro zhes zer ba'i sgrub pa gang yin pa de dbu ma pas sun phyung ba'i don rang gi yid la bzhag nas/ kho bos sgrub pa smras pa gang yin pa de khyod kyis sun phyung ba ni bden te khas len to zhes sgro btags nas so/ /de ltar sun phyung ba'i don sgro btags nas 'dir rnam pa gzhan gyis skye ba sgrub par byed de/ de'i phyir gal te bya ba ma skyes pa'i phyir bya ba rkyen dang ldan pa med pas dpe med du zin kyang / re zhig bya ba ni yod pas de'i phyir ji ltar rjes su 'gro ba yod pa de ltar rjes su dpag pa smra bar bya ste zhes bya ba smras so/ /'di skad bstan te/ gal te 'bras chan 'tshed pa'i bya ba don dam par ma skyes pa'i phyir/ 'bras chan 'tshed pa'i bya ba phru ba dang chu dang 'bras thug po che dang / me dang bud shing gi rkyen rnams kyi rkyen dang ldan pa med pas kho bo'i dpe med du zin kyang / re zhig 'tshed pa'i bya ba yod pas de la rkyen dang ldan pas ci zhig bya ste/ rkyen dang mi ldan yang bya ba yod pa des rang gi 'bras bu skyed par byed de/ dper na bud med gzugs dang ldan pa ma yin du zin kyang / bud med kyi dngos po nyid yod pas rang gi bya ba byed pa de bzhin du bya ba rkyen dang ldan pa ma yin du zin kyang bya ba nyid yod pas des rang gi 'bras bu skyed par byed de/ de'i phyir ji ltar rjes su dpag pa gtan tshigs dang dpe rjes su 'gro ba yod pa de ltar rjes su dpag pa smra bar bya ste zhes zer ba yin no/ /rnam par shes pa bskyed pa'i bya ba ni rang gi 'bras bu skyed par byed pa yin te/ bya ba yin pa'i phyir/ dper na 'bras chan 'tshed pa'i bya ba bzhin no zhes bya ba la/ 'dir yang / rnam par shes pa bskyed pa'i bya ba ni zhes bya ba 'di ni chos can yin la/ rang gi 'bras bu skyed par byed pa yin te zhes bya ba 'di ni bsgrub par bya ba chos yin zhes bya ba yin pa'i phyir zhes bya ba 'di ni sgrub pa'i chos yin/ dper na 'bras chan 'tshed pa'i bya ba bzhin no zhes bya ba 'di ni dpe yin par sbyar te/ 'di la gang bya ba nyid yod pa de la rang gi 'bras bu skyed par byed pa nyid yod de/ dper na 'bras chan 'tshed pa'i bya ba la bya ba nyid yod pa'i phyir/ de yang rang gis 'bras chan tshos par byed pa nyid bzhin du rnam par shes pa bskyed pa'i bya ba la yang bya ba nyid yod pa'i phyir/ de yang rang gi 'bras bu rnam par shes pa skyed par byed do zhes zer ro/ /de skad ces zer ba de'i lan du/ slob dpon nyid kyis 'dir bshad pa/ /rkyen dang mi ldan bya ba med/ /ces bya ba gsungs te/ rkyen dang ldan pa nyid kyis khyad par can du ma byas pa'i bya ba 'ba' zhig kyang med de/ snga ma bzhin pas smras ma thag pa'i skyon de nyid du 'gyur ro zhes bya bas ni 'di skad bstan te/ skye bar smra ba dag gis sgrub pa de 'dir tshig le'ur byas pa'i rtsa ba gnyis pa 'dis sun 'byin par byed do/ /'di la rkyen rnams kyis bya bas de'i phyir bya ba zhes bya ba yin na phru ba la sogs pa'i rkyen rnams med cing rgyu med na ji ltar 'tshed pa'i bya bar 'gyur/ de bas na rkyen dang ldan pa nyid kyis khyad par can du ma byas pa'i bya ba 'ba' zhig kyang med do/ /ci'i phyir zhe na/ snga ma bzhin pas smras ma thag pa'i skyon de nyid du 'gyur ba'i phyir te/ sgrub pa snga ma dag gis 'bras chan 'tshed pa'i bya ba kho bo cag don dam par khas mi len pas pha rol po'i sgrub pa dpe ma tshang ba'i skyon du 'gyur ro zhes sngar ji skad smras pa'i skyon de nyid du 'gyur ba'i phyir ro// //bam po bco brgyad pa/ gzhan dag ni tshigs su bcad pa'i don gzhan du smras te zhes bya ba ni/ /bya ba rkyen dang ldan ma yin/ /rkyen dang mi ldan bya ba med/ /ces bya ba'i tshig le'ur byas pa'i tshigs su bcad pa de gnyis kyi don bshad pa de la/ 'grel pa byed pa slob dpon gu Na ma ti ni 'di skad ces gzhan du smra ste zhes bya bar sbyar ro/ /gang gi phyogs la bskyed pa'i bya ba rnam par shes pa'i bdag nyid du gyur pa yin pa de'i phyir/ /bya ba rkyen dang ldan ma yin/ /zhes bya ba 'di gsungs te zhes bya ba ni 'di la slob dpon gu Na ma tis 'di skad du rnam par bshad pa byed de/ skye bar smras pa gang gi phyogs la rnam par shes pa skyed pa'i bya ba gang yin pa de'i rnam par shes pa'i bdag nyid du gyur pa yin te/ bskyed pa'i bya ba rnam par shes pa'i bdag nyid du gyur pa de mig dang gzugs dang snang ba dang nam mkha' dang yid la byed pa'i rkyen rnams kyi rkyen dang ldan pa na skye bar 'gyur bas de'i phyir dngos po skye ba yod do zhes gang gis khas blangs pa de'i phyogs dgag pa'i phyir/ slob dpon gyis/ bya ba rkyen dang ldan ma yin/ /zhes bya ba 'di gsungs so/ /ci'i phyir bya ba rkyen dang ldan pa ma yin zhe na/ de'i phyir rnam par shes pa bskyed pa'i bya ba ni rnam par shes pa bzhin du med pa'i phyir/ med pa la ldan pa'i don gyi rkyen kyang mi rigs pa'i phyir ro zhes bya ba smras so/ /'di skad bstan te/ gang gi phyogs la rnam par shes pa bskyed pa'i bya ba rnam par shes pa'i bdag nyid du gyur pa yin pa de'i phyogs la ni rnam par shes pa bskyed pa'i bya ba nyid rnam par shes pa yin pas/ ji srid du rnam par shes pa ma skyes shing med pa de srid du rnam par shes pa bskyed pa'i bya ba yang ma skyes shing med pa'i phyir/ bya ba med pa la ldan pa'i don gyi rkyen kyang mi rigs pa'i phyir bya ba rkyen dang ldan pa ma yin no/ /gal te bya ba yod na ni ldan pa'i don gyi rkyen kyang rung ste/ dper na lha sbyin yod na nor dang ldan no zhes brjod pa lta bu yin na/ bya ba med pas ldan pa'i don gyi rkyen kyang mi rigs pas rkyen dang ldan pa'i phyir zhes bya ba gtan tshigs kyi don de ma grub ste/ de ni re zhig rtsa ba dang po'i bshad pa yin no/ /gang gi phyogs la bdag nyid du gyur pa ma yin pa ngo bo nyid kyis grub pa de'i phyir na/ rkyen dang mi ldan bya ba med/ /ces bya ba gsungs te zhes bya ba ni/ 'di la slob dpon gu Na ma ti ni 'di skad du rnam par bshad pa byed de/ skye bar smra ba gang gi phyogs la rnam par shes pa bskyed pa'i bya ba gang yin pa de rnam par shes pa'i bdag nyid du gyur pa ma yin te/ bskyed pa'i bya ba rnam par shes pa las gzhan du gyur pa ngo bo nyid kyis grub pa rkyen dang mi ldan pa des rnam par shes pa skyed par byed pas de'i phyir dngos po skye ba yod do zhes gang gis khas blangs pa de'i phyogs dgag pa'i phyir ni/ slob dpon gyis/ rkyen dang mi ldan bya ba med/ /ces bya ba 'di gsungs so/ /ci'i phyir rkyen dang mi ldan pa'i bya ba med ce na/ de'i phyir rkyen dang mi ldan pas rang nyid med pa'i phyir ro zhes bya ba smras so/ /'di skad bstan te/ gang gi phyogs la rnam par shes pa bskyed pa'i bya ba rnam par shes pa'i bdag nyid du gyur pa ma yin pa ngo bo nyid kyis grub pa rkyen dang ldan pa de'i phyogs la ni rnam par shes pa bskyed pa'i bya ba rkyen dang mi ldan pas rang nyid med pa'i phyir/ rkyen dang mi ldan pa'i bya ba med de 'di la bya ba'i bdag nyid ni rkyen rnams kyis bya bar 'gyur bas des na bya ba'i bdag nyid rkyen dang ldan pa zhes bya ba yin na/ /gang rkyen dang mi ldan pa de ni rang nyid med pa'i phyir rkyen dang mi ldan pa'i bya ba med do/ /'di ltar khyod nyid kyis bya ba 'di'i yod pa nyid bcal te bya ba rkyen dang mi ldan par khas blangs pa'i phyir ro/ /kha cig na re zhes bya ba ni 'grel pa byed pa nyid kyis slob dpon gu Na ma ti'i rnam par bshad pa de sun 'byin par byed pa yin no/ /slob dpon gu Na ma tis rnam par shes pa bskyed pa'i bya ba ni rnam par shes pa bzhin du med pa'i phyir zhes rnam par bshad pa de ni mi rigs te/ ci'i phyir zhe na/ 'di ltar rkyen rnams gcig la gcig phan 'dogs pas de ma thag pa'i skad cig la 'bras bu skyed nus pa'i bya ba bdag nyid thob pa'i skad cig gis dngos po skye bar 'dod pa skyed pa tha snyad du ma btang bas med pa nyid ma yin la zhes bya ba smras te/ ci'i phyir rnam par shes pa bskyed pa'i bya ba rnam par shes pa bzhin du med pa'i phyir zhes rnam par bshad pa de mi rung zhe na/ dbu ma pas rnam par shes pa bskyed pa'i bya bas dngos po skyed par 'dod pas skyed par 'dod pa kun rdzob tu khas blangs shing ma btang bas med pa nyid ma yin la/ slob dpon gu Na ma tis bya ba de kun rdzob tu yod pa don dam par med do zhes bye brag tu ma phye bar spyir med do zhes rnam par bshad pa'i phyir mi rung ngo / /'di skad bstan te/ /'di ltar slob dpon gu Na ma tis don dam par bya ba bskyed par bya ba ma yin no zhes ma smras par/ 'di ltar bye brag med pa kho nar bya ba 'gog par byed pa'i phyir mi rung ngo / /'o na ji lta bu zhe na/ kun rdzob kyi tha snyad du ni rkyen tshogs pa'i bya ba bdag nyid thob pa'i skad cig gis dngos po skye bar 'dod pa skyed pa med pa nyid ma yin te de'i phyir rkyen rnams gcig la gcig phan 'dogs pas de ma thag pa'i skad cig la 'bras bu bskyed nus pa'i bya ba bdag nyid thob pa'i skad cig gis dngos po skyed par 'dod pa skyed pa tha snyad du ma btang bas med pa nyid ma yin la zhes bya ba smras te/ gang gi tshe rkyen mig dang gzugs dang snang ba dang nam mkha' dang yid la byed pa la sogs pa yul dang yul can gyi dngos po rnam par gnas par gyur pa de'i tshe na mig gis gzugs mthong bas mig gis gzugs la phan 'dogs par byed la/ gzugs kyang mig gi mdun na 'dug pas gzugs kyang mig la phan 'dogs par byed do/ /de bzhin du snang ba yang mig dang gzugs la sogs pa la phan 'dogs par byed la/ nam mkha' yang de dag la phan 'dogs par byed cing yid la byed pa yang de dag la phan 'dogs par byed pas/ de ltar phan 'dogs pa de'i de ma thag pa'i skad cig la 'bras bu bskyed nus pa gang yin pa de ni bya ba bdag nyid thob pa'i skad cig yin no/ /bya ba des rnam par shes pa'i dngos po skye bar 'dod pa gang gi tshe skyed pa de kun rdzob kyi tha snyad du khas blangs shing ma btang bas/ de'i phyir bya ba de kun rdzob kyi tha snyad du med pa nyid ma yin pa la ci'i phyir rnam par shes pa bskyed pa'i bya ba rnam par shes pa bzhin du med pa'i phyir zhes rnam par bshad pa byed de de ni mi rung ngo / /slob dpon gu Na ma tis med pa la ldan pa'i don gyi rkyen kyang mi rigs pa'i phyir ro zhes rnam par bshad pa de yang mi rigs te/ ci'i phyir zhe na 'di ltar ldan pa'i don gyi rkyen kyang mi rigs pa ma yin pa dang zhes bya ba smras te/ kun rdzob tu 'tshed pa'i bya ba dang bskyed pa'i bya ba yod pa nyid yin na/ de la ldan pa'i don gyi rkyen kyang mi rigs pa ma yin te/ dper na kun rdzob tu bud med yod na de gzugs dang ldan pa la gzugs can ma zhes brjod du rung ba dang / lha sbyin yod na de nor dang ldan pa la nor can zhes brjod du rung ba bzhin du kun rdzob tu bya ba yod pa la yang rkyen dang ldan pa'i don gyi rkyen kyang mi rigs pa ma yin te/ de ni re zhig gnas brtan gu Na ma ti'i rnam par bshad pa'i phyogs dang po shos sun dbyung ba yin no/ /da ni slob dpon gu Na ma ti'i rnam par bshad pa'i phyogs gnyis pa las gzhan gyi rnam par shes pa bskyed pa'i bya ba rnam par shes pa'i bdag nyid du gyur pa ma yin pa ngo bo nyid kyis grub pa rkyen dang mi ldan pas rang gi 'bras bu skyed par byed do zhes gang smras pa de dang slob dpon gu Na ma tis rkyen dang mi ldan pas rang nyid med pa'i phyir ro zhes rnam par bshad pa de yang mi rigs te/ ci'i phyir zhe na/ 'di ltar dam bcas pa tsam gyis gzhan gyi phyogs dam bcas pa tsam sun 'byin par byed pas zhes bya ba smras te/ phyogs snga ma dang phyi ma gnyis ka yang gtan tshigs dang dpe brjod pa med pa'i phyir gnyi ga yang dam bcas pa'i tshig tsam du zad pas tshig tsam gyis 'dir ni 'dod pa'i don mi 'grub pa'i phyir ro/ /de ni de na mo ma yin no zhes bya ba ni dam bcas pa tsam gyis gzhan sun mi phyin to zhes bya ba'i tha tshig go/ /skye bar smra ba gzhan dag gzhan gyis phyir zlog par byed de zhes bya ba ni skye bar smra ba gzhan dag bya ba rkyen dang ldan pa yang ma yin pas des kyang dngos po bskyed par ma grub la/ rkyen dang mi ldan pa'i bya ba yang med pas des kyang dngos po skyed par ma grub pa dang / 'dir rkyen gyi dngos po bskyed par sgrub pa yin no/ /de la skye bar smra ba gzhan dag ces bya ba ni gang dag la skye bar smra ba'i grub pa'i mtha' yod pa de dag ni skye bar smra ba gzhan dag go/ /yang na gang dag skye bar smra zhing sgrub par byed pa de dag ni skye bar smra ba gzhan dag ces bya'o/ /gzhan gyis phyir zlog par byed de zhes bya ba ni rnam pa gzhan gyis skye ba sgrub par byed cing phyir rgol ba nyid du gnas par byed de zhes bya ba'i tha tshig go/ /de'i phyir mig la sogs pa ni mig gi rnam par shes pa skyed par byed pa kho na yin te/ bya ba dang ldan pa'i phyir/ dper na sa bon dang sa dang chu dang me dang rlung la sogs pa myu gu skyed par byed pa bzhin no zhes zer te/ 'dir yang mig la sogs pa ni zhes bya ba 'di ni chos can yin te/ mig dang / gzugs dang / snang ba dang / nam mkha' dang yid la byed pa la sogs pa rkyen rnams so/ /mig gi rnam par shes pa skyed par byed pa kho na yin te zhes bya ba 'di ni bsgrub par bya ba chos yin/ bya ba dang ldan pa'i phyir zhes bya ba 'di ni sgrub pa'i chos yin/ dper na sa bon dang sa dang chu dang me dang rlung la sogs pa myu gu skyed par byed pa bzhin no zhes bya ba 'di ni dpe yin par sbyar te/ gang bya ba dang ldan pa de rang gi 'bras bu skyed par byed pa yin te/ dper na sa bon dang sa dang chu dang me dang rlung la sogs pa rkyen gang dag bya ba dang ldan pa de dag rang gi 'bras bu myu gu skyed par byed pa nyid yin par 'dod kyi/ rkyen gang dag bya ba dang mi ldan pa de dag myu gu skyed par byed pa nyid yin par mi 'dod pa de bzhin du/ mig dang / gzugs dang / snang ba dang / nam mkha' dang / yid la byed pa la sogs pa rkyen gang dag bya ba dang ldan pa de dag kyang rang gi 'bras bu mig gi rnam par shes pa skyed par byed pa kho na yin no/ /des na rjes su dpag pa sngar smras pa rnams la rtog ge phyi mas gnod par 'gyur ro zhes zer ro/ /zhes bya ba ni mjug bsdu ba yin te/ kho bo cag gi sbyor ba'i tshig des na khyed dbu ma pas skye ba med par sgrub pa'i rjes su dpag pa sngar smras pa rnams la kho bo cag gi rtog ge phyi mas gnod par 'gyur te/ de dag la 'gal ba 'khrul pa med pa'i gnod par 'gyur ro zhes zer ro/ /de skad ces zer ba de'i lan du 'grel pa byed pa nyid kyis 'dir bshad pa/ bya dang mi ldan rkyen ma yin/ /zhes bya ba la sogs pa ste/ de la 'dir bshad pa bya ba ni sgrub pa 'di la 'grel pa byed pas/ slob dpon gyis gsungs pa'i tshig le'ur byas pa'i rtsa ba gsum po 'dis pha rol po'i dpe med par ston te/ 'di la don dam par skye ba bkag pa kho na'i phyir bya ba med pas sa bon la sogs pa rkyen rnams de dang ldan pa ma yin la zhes bya bas ni 'di skad bstan te/ mig la sogs pa'i rkyen gang dag yin pa de dag ni mig gi rnam par shes pa skyed par byed pa'i rkyen ma yin no/ /ci'i phyir zhe na/ 'di ltar de dag bya ba dang mi ldan pa'i phyir ro/ /ji ltar zhe na/ de'i phyir smras pa/ dbu ma'i bstan bcos la 'di la don dam par rnam pa thams cad du skye ba bkag pa kho na'i phyir des na bya ba med do/ /bya ba med pas sa bon la sogs pa rkyen rnams bya ba de dang ldan pa ma yin no/ /de zhes bya ba'i sgra ni bya ba dang sbyar te/ des na sa bon la sogs pa rkyen rnams bya ba de dang ldan pa ma yin no/ /bya ba dang mi ldan pa rnams ni rkyen du mi rung bas zhes bya ba ni sa bon la sogs pa rkyen bya ba dang mi ldan pa rnams ni myu gu skyed pa'i rkyen du mi rung zhing mi rigs pas so/ /de dag gi rkyen nyid du ma grub pa'i phyir/ dpe ma tshang bas zhes bya ba ni de ltar bya ba dang mi ldan pa'i sa bon la sogs pa rkyen de dag myu gu'i rkyen nyid du ma grub pa'i phyir/ sa bon la sogs pa la bya ba dang ldan pa nyid med pas dpe sgrub pa'i chos dang mi ldan pa nyid kyi skyon chags pa yin no zhes bya ba'i tha tshig go/ /des na rtog ge phyi mas gnod par 'gyur ro zhes bya ba ni/ gang gi phyir de ltar khyod kyi sgrub pa ma tshang ba des kho bo la gnod par mi 'gyur ro zhes mjug bsdu ba yin no/ /'dir smras pa zhes bya ba ni de ltar dpe sgrub pa'i chos dang ldan par bstan pas lan btab pas 'gal ba 'khrul pa med pa'i gnod pa yod pa 'di la/ skye bar smra ba dag dpe sgrub par byed pa yin no/ /de ltar gang yang rung ba la ma grub pa dang the tshom za ba'i tshig ni yang sgrub pa la ltos pa'i phyir ro zhes bya ba'i mtshan nyid yod pas de'i phyir/ 'bru la sogs pa la don dam par bya ba dang ldan pa nyid yod pa kho na yin te/ /kun rdzob tu de ltar khas blangs pa'i phyir/ gang kun rdzob tu ji ltar khas len pa de ni don dam par yang de bzhin te/ dper na ri bong gi rwa med pa bzhin no zhes zer te/ 'dir yang 'bru la sogs pa la zhes bya ba 'di ni chos can yin la/ don dam par bya ba dang ldan pa nyid yod pa kho na yin te zhes bya ba 'di ni bsgrub par bya ba chos yin/ kun rdzob tu de ltar khas blangs pa'i phyir zhes bya ba 'di ni sgrub pa'i chos yin/ gang kun rdzob tu ji ltar khas len pa de ni don dam par yang de bzhin te zhes bya ba 'di ni nye bar sbyar ba'i sbyor ba yin/ dper na ri bong gi rwa med pa bzhin no zhes bya ba 'di ni dpe yin par sbyar te/ dper na khyed dbu ma pa yang ri bong gi rwa med pa ni kun rdzob tu yang med par khas len la/ don dam par yang med par khas len pa de bzhin du khyed dbu ma pa 'bru la sogs pa la kun rdzob tu bya ba dang ldan pa nyid yod par khas len pas/ gang kun rdzob tu ji ltar khas len pa de ni don dam par yang de bzhin pas 'bru la sogs pa la don dam par bya ba dang ldan pa nyid yod pa kho na yin no/ /khyed kyang kun rdzob tu 'bru la sogs pa la bya ba dang ldan pa nyid khas len pa de'i phyir dpe grub pas 'dod pa grub po zhes bya bas ni 'di skad bstan te/ ci ltar 'bru la sogs pa la kun rdzob tu bya ba dang ldan pa nyid yod pa de bzhin du don dam par yang yod pas des na 'bru la sogs pa bya ba dang ldan pa'i dpe grub pas/ mig la sogs pa la yang don dam par mig gi rnam par shes pa la sogs pa bskyed pa'i bya ba dang ldan par 'gyur ro zhes zer ro/ /de skad ces zer ba de'i lan du 'grel pa byed pa nyid kyis/ 'dir bshad pa/ bya ldan yod dam 'on te na/ /zhes bya ba la sogs pa ste/ de la 'dir bshad pa zhes bya ba ni 'bru la sogs pa bya ba dang ldan pa nyid du sgrub pa 'di la slob dpon gyis gsungs pa'i tshig le'ur byas pa'i rtsa ba tha ma shos 'dis sun 'byin par byed do zhes bya ba'i tha tshig go/ /bya ldan yod dam 'on te na/ /zhes bya ba ni ci 'bru la sogs pa de dag la bya ba dang ldan pa yod pa yin nam 'on te ma yin zhes 'dri bar bya ba yin no/ /ma yin zhes bya ba'i skabs yin no zhes bya ba ni de skad phar dris pa'i rjes la tshur len gdab pa'i tshig yin te/ sngar/ bya dang mi ldan rkyen ma yin/ /zhes gsungs pa'i mjug na ma yin zhes bya ba'i dgag pa smos pa'i skabs yin te/ bya ba dang ldan pa yod pa yin nam 'on te ma yin zhe na/ ma yin zhes bya ba'i rjes su sbyar te/ 'dir yang rkyen rnams bya ba dang ldan pa ma yin no zhes bya bar sgrub pa'o/ de lta na yang rkyen rnams bya ba dang ldan par mi 'grub ste zhes bya ba ni rjes su dpag pa 'dis kyang 'bru la sogs pa la dpe la bsgrub par bya ba chos dang ldan pa nyid mi 'grub po/ /ci'i phyir zhe na/ 'di ltar tha snyad du yang ri bong gi rwa la bya ba dang ldan pa nyid mi 'grub pa'i phyir ro zhes bya ba ni 'di skad bstan te/ gang gi phyir 'bru la sogs pa la bya ba dang ldan pa nyid du sgrub pa gang yin pa de tha snyad du yang ri bong gi rwa la med de/ /ri bong gi rwa la bya ba dang ldan pa nyid med pa de'i phyir dpe bsgrub par bya bas stong pa yin no/ /don dam par ri bong gi rwa yang med pa nyid du ma grub pa'i phyir zhes bya bas ni 'di skad bstan te/ bsgrub par bya bas stong pa 'ba' zhig tu yang ma zad kyi/ 'di ltar sgrub pas kyang stong pa yin te/ gang gi phyir kho bo kun rdzob tu ri bong gi rwa med par 'dod pa de bzhin du don dam par ri bong gi rwa med pa nyid du mi 'dod de/ de ltar don dam par yod pa dang med pa la sogs par rnam par rtog pa dang bral ba'i phyir/ 'phags pa dkon mchog brtsegs pa'i mdo las/ 'od srungs yod ces bya ba ni mtha' gcig go/ /med ces bya ba yang mtha' gnyis so zhes ji skad gsungs pa lta bu'o/ /'di la skye ba yod na med par rtog pa rnam pa bzhi 'byung ste/ skyes pa la ltos nas 'jim pa'i gong bu'i gnas skabs la snga na med pa ston to/ /de la ltos nas gyo mor gyur pa la zhig nas med pa zhes bya'o/ /de la ltos nas bum pa la snam bu med pa dang snam bu la bum pa med pa la gcig la gcig med pa zhes bya'o/ /bum pa skye bar snang la ri bong gi rwa la sogs pa skye bar mi snang ba ni gtan med pa zhes bya ste/ de yang skye ba yod pa la ltos na de ltar 'gyur ro/ /gang la don dam par dngos po thams cad ma skyes pa de la ni snga na med pa dang zhig nas med pa dang / gcig la gcig med pa dang / gtan med pa zhes bya ba ni rnam par rtog pa dag mi rigs so/ /ji skad smras pa'i skyon med pa ma yin no zhes bya ba ni ri bong gi rwa'i dpe la bsgrub par bya ba dang sgrub pa gnyis kyis stong pa'i phyir/ 'bru la sogs pa bya ba dang ldan pa nyid du ma grub pa yin no/ /ci ste yang grangs can dag phyir zlog par byed de zhes bya ba ni sngar skye bar smra ba dag gi dpe ri bong gi rwa med pa bzhin no zhes zer ba de dbu ma pas don dam par ri bong gi rwa yang med pa nyid du ma grub pa'i phyir zhes sun phyung ba dang / 'dir grangs can dag don dam par ri bong gi rwa med pa ni dngos po yod pa kho na yin no zhes dpe sgrub par byed pa yin te/ de dag gi grub pa'i mtha' ni 'di yin te/ snying stobs dang rdul dang mun pa zhes bya ba yon tan gsum po gang dag sgra la sogs pa la brten pa de dag dus dang yul gyis bskal pas mi dmigs par zad kyi/ gang gi tshe de dag ma he'i rnam par yongs su bsgyur ba de'i tshe na rwa nyid dmigs par 'gyur bas de'i phyir ri bong gi rwa'i med pa ni dngos po yod pa kho na yin pas dpe de 'grub po zhes zer ro/ /de'i phyir ri bong gi rwa'i med pa ni dngos po yod pa kho na yin te'i zhes bstan pa'i phyir dang / khyad par gyi gzhi yin pa'i phyir/ gzugs dang ut+pal sngon po bzhin no zhes bya ba smras te/ 'dir yang ri bong gi rwa med pa ni zhes bya ba 'di ni chos can yin la/ dngos po yod pa kho na yin te zhes bya ba 'di ni bsgrub par bya ba chos yin/ 'i zhes bstan pa'i phyir zhes bya ba 'di ni sgrub pa'i chos yin/ gzugs bzhin no zhes bya ba 'di ni dpe yin/ khyad par gyi gzhi yin pa'i phyir zhes bya ba 'di yang sgrub pa'i chos yan/ ut+pal sngon po bzhin du zhes bya ba 'di yang dpe yin par sbyar te/ dper na gzugs kyi zhes bstan pa'i phyir dngos po yod pa kho na yin te/ dper na gzugs kyi dkar ba nyid ces sam/ gzugs kyi sbom pa nyid ces bstan pa'i phyir/ gzugs kyi dkar ba nyid dang gzugs kyi sbom pa nyid ces bya ba dngos po yod pa kho na yin pa de bzhin du ri bong gi rwa'i med pa la yang / 'i zhes bstan pa'i phyir dngos po yod pa kho na yin te/ ri bong gi rwa'i med pa ni zhes bstan pa'i phyir ri bong gi rwa'i med pa yang dngos po yod pa kho nar 'gyur ro/ /gzhan yang dper na ut+pal sngon po ni khyad par gyi gzhi yin la/ yon tan sngon po la sogs pa ni de'i khyad par yin pa'i phyir khyad par gyi gzhi'i rdzas ut+pa la sngon po zhes bya ba dngos po yod pa kho na yin pa de bzhin du/ ri bong gi rwa yang khyad par gyi gzhi yin la/ yon tan rno ba nyid la sogs pa ni de'i khyad par yin pas khyad par gyi gzhi'i rdzas ri bong gi rwa zhes bya ba yang dngos po yod pa kho na yin no/ /de ltar ri bong gi rwa don dam par dngos po yod pa kho na yin pas/ des na dpe ri bong gi rwa grub pas 'bru la sogs pa don dam par bya ba dang ldan pa nyid yod pa kho na'i dpe grub po/ /de grub pas mig la sogs pa mig gi rnam par shes pa skyed par byed pa kho na yin par grub po zhes zer ro/ /de skad ces zer ba de'i lan du 'dir 'grel pa byed pa nyid kyis/ de ni bzang po ma yin te zhes bya ba la sogs pa smras te/ de ni bzang po ma yin te zhes bya ba ni khyed kyi sgrub pa de gnyis ni ri bong gi rwa yod pa nyid du sgrub pa ma yin no zhes bya ba'i tha tshig go/ /ci'i phyir zhe na/ de'i phyir don dam par gzugs dang / ut+pa la sngon po gnyis kyi yod pa nyid dang khyad par gyi gzhi nyid dang ma grub pas dpe ma tshang ba'i phyir ro zhes bya ba smras te/ 'di skad bstan te/ kho bo la don dam par gzugs sam/ ut+pa la sngon po gnyis kyi bsgrub par bya ba yod pa nyid kyang ma grub la/ sgrub pa khyad par gyi gzhi nyid kyang ma grub pas de'i phyir khyed la dpe'i chos can ma grub pa'i skyon du 'gyur ba'i phyir de ni bzang po ma yin no/ / ci ste kho bo cag gis khyed la gzugs la sogs pa yod par ston mi nus pa de bzhin du/ khyed kyis kyang kho bo cag la gzugs la sogs pa med par ston mi nus par 'dra bas skyon mtshungs so zhe na zhes bya ba ni 'di skad bstan te/ ci ste grangs can dag 'di skad ces kho bo cag grangs c an gyis khyed dbu ma pa la gzugs dang tshor ba dang 'du shes dang 'du byed dang rnam par shes pa dag don dam par rdzas dang dngos po dang gzhi'i sgo nas yod par ston mi nus pa de bzhin du khyed dbu ma pas kyang kho bo cag grangs can la gzugs la sogs pa don dam par med par ston mi nus par 'dra bas skyon mtshungs so zhes zer na'o/ /de skad ces zer ba de'i lan du 'dir 'grel pa byed pa nyid kyis/ de lta ma yin te zhes bya ba la sogs pa smras te/ de lta ma yin te zhes bya ba ni skyon mtshungs pa ma yin te zhes bya ba'i tha tshig go/ /ci'i phyir zhe na/ de'i phyir skye ba bkag pa kho nas skye ba med pa dang ldan pas dngos po nyid bkag pa'i phyir dang zhes bya ba smras te/ 'dis ni gang gi phyir kho bos skye ba bkag pa kho nas skye ba med pa dang ldan pas dngos po nyid bkag pa de'i phyir/ khyed kyis kho bo cag la gzugs la sogs pa yod par ston mi nus pa bzhin du kho bos khyed la gzugs la sogs pa med par ston mi nus pa ma yin pas dngos po'i mthar ma lhung ba'i phyir skyon mtshungs pa ma yin no zhes bstan to/ /de la skye ba bkag pa kho nas zhes bya ba ni kho bo cag dbu ma pas don dam par gzugs la sogs pa skye ba bkag cing bsal ba kho nas so/ / skye ba med pa dang ldan pas zhes bya ba ni de ltar skye ba bkag pa kho nas skye ba med par grub la/ gang la skye ba med par grub pa yod pa de ni skye ba med pa dang ldan pa yin no/ /dngos po nyid bkag pa'i phyir zhes bya ba ni skye ba med pa dang ldan pa des gzhan gyis yongs su brtags pa'i dngos po nyid tsam kho bo 'gog par byed kyi/ dngos po med pa nyid ni sgrub par mi byed do/ /ci'i phyir zhe na/ 'di ltar gang 'dod pa de bsgrub par bya ba yin pas kho bo ni dngos po med par lta ba mi 'dod pas de sgrub par mi byed kyi/ dngos por lta ba 'gog par 'dod pas kho bos skye ba 'gag pa kho nas skye ba med par grub pa/ skye ba med pa dang ldan pas dngos po nyid bkag pa'i phyir/ kho bos khyed cag la gzugs la sogs pa med par ston mi nus pa ma yin pas dngos po'i mthar ma lhung ba'i phyir skyon mtshungs pa ma yin no/ /khyed cag gzugs la sogs pa yod par ston pa de bzhin du kho bo cag dngos po med pa nyid du yang ston par mi byed de/ ci'i phyir zhe na/ de'i phyir dngos po med par lta ba spang bar 'dod pa yang ston par mi byed pa'i phyir zhes bya ba smras te/ 'dis ni dbu ma pa ni dngos po med par lta ba spang bar 'dod pa'i phyir/ dngos po med par lta ba de ston par mi byed pas dngos po med pa'i mthar yang ma lhung ba'i phyir skyon mtshungs pa ma yin par ston to/ /gang gi phyir grangs can dag 'jig rten gsum rab tu 'jig par lta ba de'i phyir ni med par lta ba yin la/ gang gi phyir 'jig rten gsum 'chags par lta ba de'i phyir ni yod par lta ba yin gyi/ dbu ma pas ni skye ba bkag pa kho nas skye ba med pa dang ldan pas dngos po nyid bkag pa de'i phyir ni dngos por lta ba med la/ dngos po med par lta ba spang bar 'dod pa yang ston par mi byed pa de'i phyir dngos po med par lta ba yang med do/ /'di ltar dngos po med par sgrub pa grub pa na dngos po med pa de la mngon par zhen pa ni dngos po med par lta ba zhes bya na/ gang gi phyir kho bos dngos po med par lta ba spang bar 'dod pa de'i phyir ni dngos po med pa mi sgrub par dngos po med do/ /gang gi phyir dngos po med pa med pa de'i phyir ni kho bo la dngos po med par lta ba yang med do/ /de'i phyir dngos po dang dngos po med par lta ba'i mtha' gnyis su ma lhung ba rnams dngos po dang dngos po med par lta ba'i mtha' gnyis su lhung ba rnams dang mi 'dra bar skyon mtshungs par thal bar ga la 'gyur zhes bya ba smras te/ nged dbu ma pa skye ba bkag pa kho nas skye ba med pa dang ldan pas dngos po nyid bkag pa'i phyir/ dngos por lta ba'i mthar ma lhung la dngos po med par lta ba spang bar 'dod pa yang ston par mi byed pa'i phyir dngos po med par lta ba'i mthar yang ma lhung ba rnams khyed grangs can dngos po dang dngos po med par lta ba'i mtha' gnyis su lhung ba rnams dang mi 'dra bas skyon mtshungs par thal bar ga la 'gyur te mi 'gyur zhes bstan to/ /de la dngos po dang dngos po med par lta ba zhes bya ba ni dngos po med par 'dzin cing rnam par rtog pa'o/ /mtha' gnyis su zhes bya ba ni dngos po dang dngos po med pa'i lta ba nyid kyi mtha' gnyis ni dngos po dang dngos po med par lta ba'i mtha' gnyis so/ /der ma lhung ba rnams zhes bya ba ni/ gang dag dngos po dang dngos po med par lta ba'i mtha' gnyis la ma chags pa de dag ni dngos po dang dngos po med par lta ba'i mtha' gnyis su ma lhung ba rnams te/ dbu ma pa dngos po dang dngos po med par lta ba'i mtha' gnyis su ma lhung ba rnams so/ /dngos po dang dngos po med par lta ba'i mtha' gnyis su lhung ba rnams dang mi 'dra bas zhes bya ba ni/ grangs can dngos po dang dngos po med par lta ba'i mtha' gnyis su lhung ba rnams dang dbu ma pa mi 'dra bas so/ /skyon mtshungs par thal bar ga la 'gyur zhes bya ba ni dbu ma pa rnams grangs can rnams dang mi 'dra bas skyon mtshungs par thal bar ga la 'gyur te mi 'gyur ro zhes bya ba'i tha tshig go/ /gzhan yang dngos po med par ston pa'i rjes su dpag pa med pa kho na'i phyir/ de sgrub par mi 'dod pas kho bo cag gi 'dod pa kho na 'grub par 'gyur gyi rang gi phyogs sgrub pa ni ma yin no zhes bya bas brnan te/ dngos po dang dngos po med par ston pa'i rjes su dpag pa med pa kho na'i phyir zhes bya ba ni gal te khyed la dngos po ston pa'i rjes su dpag pa yod na ni des na dngos po 'grub par 'gyur la/ gal te kho bo la yang dngos po med par ston pa'i rjes su dpag pa yod par gyur na des kyang dngos po med pa 'grub par 'gyur ba zhig na gang gi phyir khyod la yang dngos po ston pa'i rjes su dpag pa med la/ kho bo la yang dngos po med par ston pa'i rjes su dpag pa med pa de'i phyir/ dngos po dang dngos po med par ston pa'i rjes su dpag pa med pa kho na'i phyir zhes bshad do de sgrub par mi 'dod pas zhes bya ba ni de ltar dngos po dang dngos po med par ston pa'i rjes su dpag pa med pa kho na'i phyir/ kho bo cag dbu ma pa ci dngos po dang dngos po med par lta ba'i mtha' gnyis po de sgrub par mi 'dod pas so/ /kho bo cag gi 'dod pa kho na 'grub par 'gyur gyi zhes bya ba ni de ltar kho bo cag dngos po dang dngos po med par lta ba'i mtha' gnyis po de sgrub par mi 'dod pas/ khyed gal te dngos po med par lta ba 'gog par byed na de ni kho bo cag dbu ma pa'i 'dod pa kho na grub par 'gyur ba yin gyi zhes bya ba'i tha tshig go/ /rang gi phyogs sgrub pa ni ma yin no zhes bya ba ni khyed grangs can dag dngos po med pa lta ba 'gog par byed pa de ni kho bo cag dbu ma pa'i 'dod pa kho na 'grub par 'gyur ba yin gyi/ khyed grangs can pa dag gi rang gi phyogs sgrub pa ni ma yin no zhes bstan pa yin no/ /'di skad bstan te/ kho bo cag dbu ma pas dngos po dang dngos po med par lta ba'i mtha' gnyis ka dgag par bya dgos pa las/ de ltar grangs can khyed kyis dngos po med par lta ba'i mtha' 'gog par byed pas de'i phyir/ grangs can gyis kho bo cag gi 'dod pa'i don kho na sgrub pa yin gyi/ grangs can dag khyed rang gi phyogs sgrub pa ni ma yin no zhes bya ba'i tha tshig go/ /yang na skye bar smra ba dag la dri bar bya ste zhes bya ba la/ yang na zhes bya ba'i sgra ni rnam par brtag pa'i don te/ bya dang mi ldan rkyen ma yin/ /bya ldan yod dam 'on te na/ /zhes bya ba'i tshig le'ur byas pa'i rtsa ba phyed 'og ma gnyis po 'di'i don rnam pa gzhan du yang rnam par bshad par bya'o zhes bya ba'i tha tshig go/ /skye bar smra ba dag ces bya ba ni mdo sde pa dang bye brag tu smra ba dag ste/ de dag la brtag pa'i gal 'di gnyis dri bar bya ste zhes bya bar sbyar ro/ /'bras bu skye ba'i sngon rol na rkyen rnams bya ba dang mi ldan pa nyid ma yin nam zhes bya ba ni 'bras bu mig gi rnam par shes pa skye ba'i sngon rol zhes bya ba ma skyes pa'i gnas skabs na rkyen mig dang gzugs la sogs pa rnams bya ba dang mi ldan pa nyid yin par khyed cag khas len tam zhes dri ba yin no/ /bya ba dang ldan pa nyid yin zhes bya ba ni 'on te 'bras bu skye ba'i sngon rol na rkyen rnams bya ba dang ldan pa nyid yin par khyed cag khas len ces dri ba yin no/ /de la gal te brtag pa snga ma ltar 'dod na zhes bya ba ni skye bar smra ba dag la brtag pa'i gal gnyis dri ba de la gal te brtag pa snga ma ltar 'dod na ste/ 'bras bu skye ba'i sngon rol na rkyen rnams bya ba dang mi ldan pa nyid yin par 'dod na'o/ /gal te de ltar 'dod na slob dpon gyi zhal snga nas kyis de dgag pa'i phyir/ 'dir bshad pa/ bya dang mi ldan rkyen ma yin/ /zhes bya ba'o/ /'bras bu skyed par byed pa'i zhes bya ba'i tshig gi lhag ma'o zhes bya ba la/ tshig ces bya ba ni gang gi don yongs su rdzogs par 'gyur ba yin pas/ bya dang mi ldan rkyen ma yin/ /zhes bya ba brjod du zin kyang / ji srid du 'bras bu skyed par byed pa zhes bya ba'i tshig ma brjod pa de srid kyi bar du skye ba 'gog pa'i don yongs su rdzogs par mi 'gyur bas de'i phyir/ bya dang mi ldan rkyen ma yin/ /zhes brjod pa'i 'og tu 'bras bu skyed par byed pa'i zhes bya ba'i tshig gi lhag ma'o zhes bya ba smras te/ bya ba dang mi ldan pa gang gi rkyen ma yin zhe na 'bras bu skyed par byed pa'i rkyen ma yin no zhes bya ba'i tha tshig go/ /ci'i phyir bya ba dang mi ldan pa 'bras bu skyed par byed pa rkyen ma yin zhe na/ de'i phyir bya ba dang mi ldan zhes bya ba ni brjod par 'dod pa'i 'bras bu bskyed pa'i bya bas stong pa'o zhes bya ba smras te/ 'di skad bstan te/ rkyen bya ba dang mi ldan pa rnams ni brjod par 'dod pa dang bsam par 'dod pa'i 'bras bu so sor nges pa bskyed pa'i bya bas stong zhing 'bral ba'i phyir te/ 'dir mtshan nyid ni de yin no/ /gang dag ji skad bstan pa de dag ni de skyed par byed pa ma yin te des stong pa'i phyir/ dper na de las gzhan pa bzhin no zhes de skad bstan zin to zhes bya ba la/ 'dir yang gang dag ci skad bstan pa de dag ni zhes bya ba 'di ni chos can yin la/ de skyed par byed pa ma yin te zhes bya ba 'di ni bsgrub par bya ba'i chos yin/ des stong pa'i phyir zhes bya ba 'di ni sgrub pa'i chos yin/ dper na de las gzhan pa bzhin no zhes bya ba 'di dpe yin par sbyar ro/ /'di skad bstan te/ gzugs la sogs pa rkyen gang dag 'bras bu mig gi rnam par shes pa skyed pa'i bya bas stong pa ji skad bstan pa de dag ni 'bras bu mig gi rnam par shes pa skyed par byed pa ma yin te skye ba'i bya ba des stong pa'i phyir ro dper na de las gzhan pa'i rkyen rgyu spun la sogs pa bzhin no/ /de bstan zin to zhes bya ba ni sngar don dam par nang gi skye mched rnams de dag gi rkyen gzhan dag las skye ba med de gzhan yin pa'i phyir dper na bum pa bzhin no/ /yang na don dam par gzhan brjod par 'dod pa mig la sogs pa nang gi skye mched 'grub par byed pa dag rkyen ma yin par nges te gzhan yin pa'i phyir/ dper na rgyu spun la sogs pa bzhin no zhes de dag dgag pa'i rigs pas de bstan zin to/ /'on te bya ba dang ldan pa nyid yin no zhe na/ zhes bya ba ni skye bar smra ba dag la brtag pa'i gal gnyis bris pa de la 'on te brtag pa phyi ma ltar 'dod do zhe na ste/ 'bras bu skye ba'i sngon rol na rkyen rnams bya ba dang ldan pa nyid yin no zhe na'o/ /gal te de ltar 'dod na slob dpon gyi zhal snga nas kyis de dgag pa'i phyir/ 'dir bshad pa/ bya ba ldan nam 'on te na/ /zhes bya ba'o/ /ma yin zhes bya ba'i skabs yin no zhes bya ba ni snga ma bzhin du sbyar ro/ /'on te na zhes bya ba'i sgra ni rnam par brtag pa'i don to zhes bya ba ni rkyen bya ba dang ldan pa rnams la yang 'bras bu skyed pa'i nus pa med la/ rkyen bya ba dang mi ldan pa rnams la yang 'bras bu skyed pa'i nus pa med do zhes rnam pa gnyi gar yang skye ba dgag pa brtag pa'i don to/ /de'i phyir 'di la rkyen rnams bya ba dang ldan pa nyid du ni 'bras bu skyed pas bstan pa yin no/ /de yang 'bras bu skye ba la mngon du phyogs par ma gyur pa la ni mi 'dod pas de'i phyir gtan tshigs kyi don ma grub pa nyid do zhes bya ba smras te/ 'di la zhes bya ba ni nye bar bstan pa'o/ /rkyen rnams bya ba dang ldan pa nyid du ni zhes bya ba ni mig la sogs pa rkyen rnams bya ba dang ldan pa nyid du sgrub pa ni'o/ /'bras bu bskyed pas zhes bya ba ni kun rdzob tu 'bras bu mig gi rnam par shes pa zhes bya ba skyed pa ni 'bras bu skyed pa ste des so/ /bstan pa yin na zhes bya ba ni 'bras bu skyed pa des bstan cing sgrub pa yin pa ste/ 'di ltar 'bras bu skyed pa mthong nas rkyen rnams la bya ba dang ldan pa nyid du rjes su dpog par byed pa'i phyir ro/ /de yang 'bras bu bskyed pa la mngon du phyogs par ma gyur pa la ni mi 'dod pa zhes bya bas ni 'di skad bstan te/ rkyen rnams bya ba dang ldan pa nyid du sgrub pa 'bras bu skyed pas bstan cing sgrub pa de yang ji srid du 'bras bu skye ba la mngon du phyogs par ma gyur pa de srid du mig la sogs pa'i rkyen rnams la bya ba dang ldan pa nyid med pa'i phyir/ rkyen rnams bya ba dang ldan pa nyid du mi 'dod pas so/ /de'i phyir gtan tshigs kyi don ma grub pa nyid do zhes bya ba ni ji skad bshad pa'i rigs pa des na skye bar smra ba dag gi sngar mig la sogs pa ni mig gi rnam par shes pa skyed par byed pa kho na yin te/ bya ba dang ldan pa'i phyir dper na sa bon dang sa dang chu dang me dang rlung la sogs pas myu gu skyed par byed pa bzhin no/ /des na rjes su dpag pa sngar smras pa rnams la rtog ge phyi mas gnod par 'gyur ro zhes gang smras pa'i gtan tshigs kyi don bya ba dang ldan pa'i phyir zhes bya ba de ma grub pa nyid yin te/ dper na sgra la ming gis bzung ba nyid med pa de bzhin du rkyen rnams la yang bya ba dang ldan pa nyid med pas de'i phyir khyod kyi gtan tshigs kyi don kyang grub pa yang ma yin la/ kho bo'i rjes su dpag pa sngar smras pa rnams la yang khyod kyi rtog ge phyi mas gnod par 'gyur ba med do/ /mdo sde pa dag na re/ 'bras bu bskyed pa'i dus kho na na rkyen bya ba dang ldan pa rnams gcig la gcig phan 'dogs pas rkyen nyid du khas blangs pa'i phyir/ gtan tshigs kyi don ma grub pa yang ma yin la/ rtog ge phyi ma med pa yang ma yin no zhes zer ro zhes bya ba ni 'dir mdo sde pa dag na re/ khyed dbu ma pas bsams pa/ gang gis 'bras bu skye ba la mngon du phyogs par ma gyur pa'i rkyen rnams la bya ba dang ldan pa nyid med pas de'i phyir gtan tshigs kyi don ma grub pa nyid yin no zhes smras pa de ni/ gang gis de skad khas blangs pa de la skyon der 'gyur gyi/ kho bos ni 'bras bu skye ba'i dus kho na na rkyen bya ba dang ldan pa yul dang yul can gyi dngos por gnas pa rnams gcig la gcig phan 'dogs pas/ des na 'bras bu de skye ba'i gnas skabs kho na na rkyen mig la sogs pa rnams bya ba dang ldan pa nyid yin pas rkyen nyid du khas blangs pa'i phyir kho bo cag mdo sde pa dag gi gtan tshigs kyi don bya ba dang ldan pa'i phyir zhes bya ba'i mtshan nyid de yang ma grub pa ma yin te/ 'di ltar de'i tshe na rkyen rnams la bya ba dang ldan pa nyid yod pa'i phyir ro/ /des na khyed kyi rjes su dpag pa sngar smras pa rnams la kho bo'i rtog ge phyi mas gnod par 'gyur ba med pa yang ma yin te/ 'di ltar kho bo'i sgrub pa mig la sogs pa ni mig gi rnam par shes pa skyed par byed pa kho na yin te/ bya ba dang ldan pa'i phyir dper na sa bon dang / sa dang / chu dang / me dang / rlung la sogs pa myu gu skyed par byed pa bzhin no zhes bya ba de la gnod pa med pas de'i phyir skye ba grub bo zhes zer ro/ /de skad ces zer ba de'i lan du slob dpon gyi zhal snga nas kyis 'dir bshad pa/ 'di dag la brten skye bas na/ /de'i phyir 'di dag rkyen ces grag /ces bya ba la sogs pa ste/ tshig le'ur byas pa 'dis ni mdo sde pa'i phyogs snga ma de sun 'byin par byed do/ /'bru la sogs pa 'di dag la brten nas zhes bya ba ni sa bon dang sa dang chu dang me dang rlung la sogs pa'i rkyen 'di dag la 'di brten cing gnas nas so/ /'bras bu skye bas na zhes bya ba ni 'bras bu myu gu zhes bya ba skye zhing 'byung bas na'o/ /de'i phyir 'bru la sogs pa 'di dag khyed don dam par rkyen yin par 'dod ces par grag go zhes bya ba ni gang gi phyir 'bru la sogs pa 'di dag la brten nas 'bras bu skye ba de'i phyir 'bru la sogs pa 'di dag khyed mdo sde pa dag don dam par rkyen yin par 'dod ces grag go zhes mdo sde pa dag nyid kyi gzhung bstan pa yin no/ /grag ces bya ba'i sgra'i sbyor ba ni 'dir slob dpon mi bzhed par ston pa yin no zhes bya ba ni/ slob dpon klu sgrub kyi zhal snga nas nyid de ltar mi bzhed par ston pa'i sgra yin te/ grag ces bya ba dang / lo zhes bya ba dang / ce'o zhes bya ba'i sgra ni gzhan gyi 'dod pa rnyed pa'i don yin pa'i phyir ro/ /de'i phyir/ ji srid mi skye de srid du/ /'di dag rkyen min ji ltar min/ /zhes bya ba gsungs so/ /'bras bu ji srid du mi skye ba de srid du 'bru la sogs pa 'di dag rkyen ma yin par yang ji ltar mi 'gyur te zhes bya ba ni/ gang gi phyir rkyen 'bru la sogs pa 'di dag la brten nas 'bras bu skye bas 'bru la sogs pa 'di dag khyed don dam par rkyen yin par 'dod ces grags pa de'i phyir ji srid du rkyen 'bru la sogs pa 'di dag las 'bras bu myu gu zhes bya ba mi skye ba de srid du/ 'bru la sogs pa 'di dag rkyen ma yin par yang ji ltar mi 'gyur te/ rkyen ma yin pa kho nar 'gyur bas/ don dam par de dag las skye ba med do zhes bya bar dgongs so/ /de'i phyir 'di dag la rkyen nyid med do zhes bya ba'i tshig gi don to zhes bya ba smras te/ ji srid du 'bras bu mi skye ba de srid du 'bru la sogs pa 'di dag la rkyen nyid med do zhes bya ba'i tha tshig go/ /don de gsal bar bya ba'i phyir/ 'jig rten la grags pa'i khungs dper bstan pa'i phyir/ dper na ji srid du mi klog pa de srid du mkhas pa ma yin par ji ltar mi 'gyur zhes bya ba bzhin no zhes bya ba smras te/ dper na ji srid du khyod nyid klog pa la sogs pa shes pa'i shugs kyis 'du byed skyed par mi byed pa de srid du mkhas pa ma yin pa blun po kho nar 'gyur ba de bzhin du/ 'dir yang 'bru la sogs pa rkyen rnams ji srid du 'bras bu myu gu skyed par mi byed pa de srid du rkyen ma yin pa kho nar 'gyur bas de dag la skye ba med do/ /ci ste 'di skad ces kho bo cag 'bras bu skye ba'i sngon rol na rkyen rnams rkyen nyid du khas mi len pas de'i phyir mi gnod do zhe na zhes bya ba ni/ ji ste mdo sde pa dag 'di skad ces dbu ma pas ji skad du/ ji srid mi skye de srid du/ /'di dag rkyen min ji ltar min/ /zhes bya bas 'bras bu ji srid du mi skye ba de srid du 'bru la sogs pa 'di dag rkyen ma yin par yang ji ltar mi 'gyur te/ 'di dag la rkyen nyid med do zhes bya ba'i tshig gi don to zhes gang smras pa des ni kho bo cag la sun phyung ba ci yang med de/ kho bo cag ni 'bras bu myu gu skye ba'i sngon rol na 'bru la sogs pa'i rkyen rnams rkyen nyid yin par khas mi len gyi/ gang gi tshe 'bras bu skye ba'i dus na de dag rkyen nyid yin par 'dod pas de'i phyir khyod kyi sun 'byin pa de kho bo cag la mi gnod do zhes zer ba yin no/ /de skad ces zer ba de'i lan du 'dir 'grel pa byed pa nyid kyis mi gnod pa ma yin te zhes bya ba la sogs pa smras te/ mdo sde pa na re sun 'byin pa de kho bo'i phyogs la mi gnod ces zer ba de mi gnod pa ma yin te/ dgag pa gnyis yod na skabs kyi don go bar 'gyur bas 'di ltar de ni khyod kyi phyogs la gnod pa kho na yin no zhes bya ba'i tha tshig go/ /ji lta zhe na/ gang gi phyir 'dir rkyen rnams 'bras bu skye ba'i sngon rol du rkyen ma yin pa nyid du bstan pas 'bras bu skye ba'i dus na yang rkyen ma yin pa nyid du bstan bcos mdzad pas ston par bzhed do zhes bya ba smras te/ gang gi phyir khyod kyis 'dir 'bru la sogs pa rkyen rnams 'bras bu myu gu skye ba'i sngon rol du rkyen ma yin pa nyid du bstan par byas pas de'i yon tan ni 'di yin te/ 'bras bu skye ba'i dus na yang de dag rkyen ma yin pa nyid du ston par 'dod pa yin no/ /bstan bcos mdzad pas ston par bzhed do zhes bya bas ni 'di skad bstan te/ rkyen gang dag la 'bras bu skye ba'i sngon rol na rkyen nyid med pa de dag la ni 'bras bu skye ba'i dus na yang rkyen med par bstan bcos mdzad pa slob dpon klu sgrub kyi zhal snga nas de ltar ston par bzhed cing de ltar sgrub par dgongs so/ /de'i phyir ji lta zhe na/ don dam par 'bru la sogs pa ni myu gu skye ba'i dus na rkyen gyi ngo bo nyid ma yin te de nyid du brjod par bya ba ma yin pa'i phyir/ dper na skad cig snga ma la de dag nyid bzhin no zhes bya ba smras te 'dir yang 'bru la sogs pa ni zhes bya ba 'di ni chos can yin la/ /myu gu skye ba'i dus na rkyen gyi ngo bo nyid ma yin te zhes bya ba 'di ni bsgrub par bya ba chos yin/ de nyid dang gzhan nyid du brjod par bya ba ma yin pa'i phyir zhes bya ba 'di ni sgrub pa'i chos yin/ dper na skad cig snga ma la de dag nyid bzhin no zhes bya ba 'di ni dpe yin par sbyar ro/ /'di skad bstan te/ mdo sde pas bsams pa'i 'bru la sogs pa ni myu gu skye ba'i dus na don dam par rkyen gyi ngo bo nyid ma yin te/ 'di ltar 'bru la sogs pa dag la dpyad na myu gu mi snang bas de nyid dang gzhan nyid du brjod par bya ba ma yin pa'i phyir te myu gu gang yin pa de nyid 'bru la sogs pa yin no zhes bya ba lta bur de nyid du yang brjod par bya ba ma yin la/ 'bru la sogs pa las myu gu skye bas 'bru la sogs pa las myu gu gzhan ma yin pas gzhan nyid du brjod par bya ba yang ma yin pa'i phyir/ de nyid dang gzhan nyid brjod par bya ba ma yin pa'i phyir zhes bya ba 'di ni gtan tshigs yin no/ /dper na skad cig snga ma la de dag nyid bzhin no zhes bya ba ni 'bras bu ma skyes pa'i skad cig snga ma la 'bru la sogs pa de dag nyid bzhin te/ dper na 'bras bu ma skyes pa'i skad cig snga ma la 'bru la sogs pa de dag nyid rkyen gyi ngo bo nyid ma yin pa de bzhin du 'bras bu skye ba'i dus na yang 'bru la sogs pa de dag rkyen gyi ngo bo nyid ma yin no zhes bya ba'i tha tshig go / 'dis ni dngos po rnams bdag dang gzhan dang gnyis las skye ba med do zhes bya ba de la/ gang dag 'di skad ces de ni grub pa la sgrub pa yin te/ 'bras bu dang rgyu gnyis kyang de nyid dang gzhan nyid du brjod par bya ba ma yin pa'i phyir te/ brjod par bya ba ma yin du zin kyang de dag 'bras bu skyed par byed pa kho na yin no zhes zer ba de dag kyang de bzhin du dgag par bya'o zhes bya ba la/ 'dis ni zhes bya ba ni 'bras bu dang rgyu gnyis de nyid dang gzhan nyid du brjod par bya ba ma yin pa'i mtshan nyid kyi gtan tshigs sngar bstan pa 'dis ni'o/ /'dis ci zhig dgag par bya zhe na/ dbu ma pas sngar bsgrubs pa de dag la gang dag skye ba sgrub pa'i phyir dbu ma pa'i sgrub pa de ni grub pa la sgrub pa yin no zhes zer ba de dag kyang de bzhin du dgag par bya'o zhes bya bar sbyar ro/ /dbu ma pas sngar bsgrubs pa de yang ma yin pa de'i phyir dngos po rnams bdag dang gzhan dang gnyis las skye ba med do zhes bya ba de la zhes bya ba smras te/ dbu ma pas sngar dngos po rnams skye ba med par dam bcas pa'i spyi bkod pa'i skabs su dngos po rnams bdag las skye ba med pa dang gzhan las skye ba med pa dang / gnyis las skye ba med do zhes bsgrubs pa de la'o/ /de la gang dag skye ba sgrub pa dag ji skad zer zhe na/ de'i phyir gang dag 'di skad ces de ni grub pa la sgrub pa yin te/ 'bras bu dang rgyu gnyis kyang de nyid dang gzhan nyid du brjod par bya ba ma yin pa'i phyir te/ brjod par bya ba ma yin du zin kyang de dag 'bras bu skyed par byed pa kho na yin no zhes zer ba zhes bya ba smras so/ /'di skad bstan te/ gang dag skye ba sgrub pa'i phyir dbu ma pa la 'di skad ces/ gal te 'bras bu mig la sogs pa 'am myu gu la sogs pa dang / rgyu mer mer po la sogs pa'am sa bon la sogs pa dag gcig pa nyid yin par 'gyur na ni des na bdag las skye bar 'gyur la/ 'on te gzhan yin par gyur na ni des na gzhan las skye bar 'gyur ro/ /'on te 'bras bu dang rgyu gnyis gcig pa nyid dang tha dad pa nyid yin par gyur na ni nges na gnyis las skye bar 'gyur bas de'i phyir dngos po rnams bdag las skye ba med pa dang gzhan las skye ba med pa dang / gnyis las skye ba med do zhes bya ba de ni grub pa la sgrub pa yin te/ ci'i phyir zhe na/ 'bras bu dang rgyu gnyis kyang de nyid dang gzhan nyid gnyi gar brjod par bya ba ma yin pa'i phyir ro/ /gang gi phyir de nyid dang gzhan nyid dang gnyi gar brjod par bya ba ma yin du zin kyang rkyen mer mer po la sogs pa dang sa bon la sogs pa de dag gi 'bras bu mig la sogs pa dang / myu gu la sogs pa skyed par byed pa kho na yin no zhes zer ro/ /de dag kyang de bzhin du dgag par bya'o zhes bya ba ni 'di skad bstan te/ mdo sde pa dag rkyen mer mer po dang 'bru la sogs pa dag 'bras bu skye ba'i gnas skabs na rkyen de dag khas len pa de ni don dam par mer mer po la sogs pa dang 'bru la sogs pa ni mig la sogs pa dang / myu gu skye ba'i dus na rkyen gyi ngo bo nyid ma yin te/ de nyid dang gzhan nyid du brjod par bya ba ma yin pa'i phyir/ dper na skad cig snga ma la de dag nyid bzhin no zhes bya ba 'dis de dag kyang de bzhin du dgag par bya'o/ /skye bar smra ba dag la yang phyir zlog par byed de zhes bya ba ni de ltar bkag kyang skye bar smra ba dag kyang skye bar sgrub pa'i phyir rkyen rnams 'bras bu skyed pa kho na yin no zhes phyir rgol ba nyid du gnas par byed pa yin no/ /don dam par de dag gi skye ba rnams ni nang gi skye mched rnams skyed par byed pa kho na yin te rkyen yin pa'i phyir/ dper na 'bru la sogs pas myu gu skyed par byed pa bzhin no zhes bya ba 'di la bsam pa gang yin zhe na/ rkyen de dag la bya ba dang ldan pa nyid ma grub pas bya ba dang ldan pa las skye ba med du zin kyang / rkyen nyid yod pas rkyen las skye ba kho nar 'gyur ro snyam nas 'dir yang rnam pa gzhan gyis skye ba sgrub par byed do/ /'dir yang de dag gi rkyen rnams ni zhes bya ba 'di ni chos can yin te/ mig la sogs pa de dag gi rkyen las dang nyon mongs pa dang mer mer po la sogs pa rnams so/ /nang gi skye mched rnams skyed par byed pa kho na yin te zhes bya ba 'di ni bsgrub par bya ba chos yin te/ de dag gi rkyen chos can rnams 'bras bu mig la sogs pa nang gi skye mched rnams skyed par byed pa kho na yin pa'i chos khyad par can bsgrub par bya ba'o/ /rkyen yin pa'i phyir zhes bya ba 'di ni sgrub pa'i chos yin te/ de dag la bya ba dang ldan pa nyid ma grub kyang rkyen nyid yin pa'i phyir rkyen las skye ba kho nar 'gyur ro snyam du bsams so/ /dper na 'bru la sogs pas myu gu skyed par byed pa bzhin no zhes bya ba 'di ni dpe yin par sbyar te/ dper na 'bru la sogs pa yang rkyen yin pa'i phyir myu gu skyed par byed pa de bzhin du las dang nyon mongs pa dang mer mer po la sogs pa yang rkyen yin pa'i phyir mig la sogs pa nang gi skye mched rnams skyed par byed pa kho na yin no/ /de ltar re zhig rjes su 'gro ba bstan nas/ da ni ldog pa bstan pa'i phyir gang skyed par byed pa ma yin pa de la ni rkyen nyid med de/ dper na ri bong gi rwa bzhin no zhes zer ro zhes bya ba smras so/ /'di skad bstan te/ ri bong gi rwa ni med pa'i phyir de la rkyen nyid med do/ /rkyen nyid med pa'i phyir skyed par byed pa yang ma yin no/ /mer mer po la sogs pa la ni rkyen nyid med pa ma yin te yod pas de'i phyir de dag nang gi skye mched rnams skyed par byed pa kho na yin no zhes zer ro/ /de skad ces zer ba de'i lan du 'dir 'grel pa byed pa nyid kyis rkyen nyid kyi gtan tshigs de sun dbyung ba'i phyir/ 'dir bshad pa zhes bya ba la sogs pa smras te/ 'dis ni tshig le'ur byas pa 'og ma dag sbyor bar byed do/ /'di la zhes bya ba ni nye bar bstan pa'o/ /gal te don dam par rkyen zhig yin par gyur na zhes bya ba ni gal te don dam par las dang nyon mongs pa dang mer mer po la sogs pa dag nang gi skye mched rnams kyi rkyen zhig yin par gyur na'o/ /yod pa'am med pa zhig gi yin grang na zhes bya ba ni 'bras bu yod pa'am med pa zhig gi rkyen yin grang na zhes gal gnyis su brtag pa yin no/ /de dag gnyi ga'i yin par yang rigs pas mi rung ste zhes bya bas ni 'di skad bstan te/ 'bras bu yod pa la ni rkyen mi dgos la/ 'bras bu med na ni gang gi rkyen du yang mi 'gyur bas rigs pa de nyid kyis brtags na rkyen nyid du brtags pa'i gtan tshigs mi rung bas rkyen las skye ba med do zhes ston to/ /de'i phyir/ med dam yod pa'i don la yang / /rkyen ni rung ba ma yin te/ /zhes bya ba gsungs te zhes bya ba ni de gnyi ga'i yin par yang rigs pas mi rung ba ni bstan pa'i phyir/ slob dpon klu sgrub kyi zhal snga nas kyis tshig le'ur byas pa 'di gsungs te zhes bya bar sbyar ro/ /'dir ni dam bcas pa gnyis bstan pa yin no zhes bya ba la/ 'bras bu med pa'i rkyen nyid du mi rung ba ni dam bcas pa gcig yin no/ /'bras bu yod pa'i rkyen du mi rung ba ni dam bcas pa gnyis pa yin te/ tshig le'ur byas pa'i phyed gong ma 'dis dam bcas pa de gnyis bstan pa/ tshig le'ur byas pa phyed 'og mas sgrub par byed pa yin no/ /de la med pa'i rkyen du ji ltar mi rung ba de ston pa ni/ med pa gang gi rkyen ces bya/ /zhes bya ba yin te zhes bya ba ni dam bca' ba gnyis bstan pa de la 'bras bu med pa'i rkyen du mer mer po la sogs pa ji ltar mi rung ba de ston pa ni tshig le'ur byas pa'i rtsa ba gsum pa 'di yin no/ /'di na nam mkha'i me tog la sogs pa med pa gang gi rkyen ma lu ta'i lcug ma dag yin par shes par bya ste zhes bya ba ni/ 'jig rten 'di na nam mkha'i me tog dang ri bong gi rwa med pa gang gi rkyen shing ma lu ta'i lcug ma dag yin par shes par bya ste/ gang gi rkyen kyang ma yin no/ /'di skad bstan te/ 'di ltar 'bras bu'i rang gi ngo bo nyid mthong nas de skye ba la rkyen ces bya na/ gang gi tshe rkyen rnams la 'bras bu rang gi ngo bo nyid med pa de'i tshe na mer mer po la sogs pa dang 'bru la sogs pa dag ji ltar rkyen gyi tha snyad du 'gyur te mi 'gyur ro/ /de'i phyir de dag ni nam mkha'i me tog dang ri bong gi rwa gang gi rkyen kyang ma yin no zhes bya ba'i tshig gi don to zhes bya ba smras te/ ma lu ta'i lcug ma de dag ni nam mkha'i me tog dang ri bong gi rwa med pa gang gi rkyen kyang ma yin no zhes bya ba'i tha tshig go /de ni chos mthun pa'i dpes bstan pa yin no zhes bya ba ni/ med na gang gi rkyen zhes bya/ /zhes bya ba tshig le'ur byas pa'i rtsa ba des/ dper na 'jig rten 'di na nam mkha'i me tog dang ri bong gi rwa med pa gang gi rkyen ma lu ta'i lcug ma dag yin par shes par bya ste/ de dag ni nam mkha'i me tog dang ri bong gi rwa med pa gang gi yin par shes par bya ste/ de dag ni nam mkha'i me tog dang ri bong gi rwa gang gi rkyen kyang ma yin no zhes bya ba'i tshig gi don to zhes dpe bstan pa de ni 'bras bu mig la sogs pa dang / myu gu med pa gang gi rkyen mer mer po la sogs pa dang 'bru la sogs pa dag yin par shes par bya ste/ de dag ni mig la sogs pa dang myu gu med pa gang gi rkyen kyang ma yin no zhes bya bar dgongs pa'i don de'i chos mthun pa'i dpe bstan pa yin no/ /'bras bu med na rkyen gyi chos ni 'bras bu med pa nyid yin la/ 'bras bu'i chos kyang med pa nyid yin no zhes bya ba ni chos mthun pa'i dpes mtshon pa'i don bstan pa ma yin no/ /'di skad bstan te/ de ltar na gang gi tshe 'bras bu med pa de'i tshe na rkyen rnams la ni 'bras bu med pa nyid ces bya ba'i chos yod la/ 'bras bu la yang rang gi ngo bo nyid med pa nyid ces bya ba'i chos yod pa yin pas de'i phyir 'bras bu med na rgyur yang gang yang mi 'gyur la/ 'bras bu yang gang yang mi 'gyur bar go rims bzhin no/ /de'i phyir rjes su dpag pa ni zhes bya ba ni 'di skad bstan te/ slob dpon nyid kyis/ /med dam yod pa'i don la yang / /rkyen ni rung ba ma yin te/ /zhes bya ba phyogs kyi chos dang ldan pa'i dam bcas pa gnyis bstan pa de la sgrub pa dang dpe yang go rims bzhin du/ med na gang gi rkyen ces bya/ /yod na rkyen gyis ci zhig bya/ /zhes bya ba'i rtsa ba gnyis kyis ston pa las/ 'dir je dang por med na gang gi rkyen ces bya zhes bya ba'i sgrub pa snga ma shos la rgyu dgag pa dang 'bras bu dgag pa'i rjes su dpag pa gnyis go rims bzhin du bstan par bya'o zhes bya bar sbyar ro/ /don dam par 'bru la sogs pa la rkyen gyi ngo bo nyid med de de dag gi 'bras bu med pa'i phyir/ dper na nam mkha'i me tog med pa'i phyir nam mkha' bzhin no zhes bya ba la/ 'dir yang 'bru la sogs pa la zhes bya ba 'di ni chos can yin la/ rkyen gyi ngo bo nyid med de zhes bya ba 'di ni bsgrub par bya ba chos yin/ de dag gi 'bras bu med pa'i phyir zhes bya ba 'di ni sgrub pa'i chos yin/ dper na nam mkha'i me tog med pa'i phyir nam mkha' bzhin no zhes bya ba 'di ni dpe yin par sbyar te/ dper na don dam par 'bras bu nam mkha'i me tog med pa'i phyir nam mkha' la rkyen gyi ngo bo nyid med pa de bzhin du don dam par 'bras bu myu gu med pa'i phyir/ 'bru la sogs pa la yang rkyen gyi ngo bo nyid med de de ni re zhig rgyu dgag pa yin no/ /ji ltar rgyu dgag pa de bzhin du 'bras bu yang dgag pa'i phyir/ de bzhin du don dam par 'bru la sogs pa yang myu gu'i rkyen ma yin te med pa'i phyir/ dper na nam mkha'i me tog bzhin no zhes bya ba smras te/ 'dir yang 'bru la sogs pa yang zhes bya ba 'di ni chos can yin la/ myu gu'i rkyen ma yin te zhes bya ba 'di ni bsgrub par bya ba chos yin/ med pa'i phyir zhes bya ba 'di ni sgrub pa'i chos yin/ dper na nam mkha'i me tog bzhin no zhes bya ba 'di ni dpe yin par sbyar te/ dper na don dam par 'bras bu nam mkha'i me tog med pa'i phyir nam mkha' yang / nam mkha'i me tog gi rkyen ma yin pa de bzhin du don dam par 'bras bu myu gu med pa'i phyir 'bru la sogs pa yang myu gu'i rkyen ma yin te de ni 'bras bu dgag pa yin no// //bam po bcu dgu pa/ yang na gang dag 'di skad ces med par skye bar mi 'dod kyi/ skye ba can ni skye bar 'dod de snga na med pa'i phyir ro zhes zer ba de dag gi phyir/ med na gang gi rkyen zhes bya/ /zhes gsungs te zhes bya ba ni/ med na gang gi rkyen ces bya/ /zhes bya ba'i tshig le'ur byas pa'i rtsa ba 'di ni yang na skye bar smra ba gang dag 'di skad ces nam mkha'i me tog lta bur gtan med pa ni skye bar mi 'dod kyi/ myu gu lta bu skye ba can snga na med pa ni skye bar 'dod pas de'i phyir khyed kyi myu gu mi skye ba'i dpe nam mkha'i me tog la sogs pa de dpe sgrub pa'i chos dang mi ldan pa'i skyon chags pa yin pas mi rung ngo zhes zer ba de dag gi phyir gsungs pa yin par sbyar ro/ /'di skad bstan te med pa spyi yin pa'i phyir nam mkha'i me tog bzhin du myu gu yang skye ba med do zhes gang smras pa de mi rung ste/ 'di ltar nam mkha'i me tog ni skye ba med pa can yin pa'i phyir dus thams cad du med pa kho na yin gyi/ myu gu ni skye ba can yin pa'i phyir sngon gyi gnas skabs na med pa kho nar zad kyi skyes nas yang yod par gyur pa yin no zhes zer ro/ /de dag gi phyir/ med na gang gi rkyen ces bya/ /zhes bya ba 'di gsungs te/ de ltar na khyed kyi sgrub pa de ni khyed nyid kyis byas pa nyid spyi yin pa'i phyir bum pa bzhin du sgra mi rtag pa yin par mi rigs te/ ci'i phyir zhe na/ bum pa ni so ma btang ba nyid dang gzugs can nyid la sogs pa'i bye brag dang ldan pas mi rtag pa nyid yin gyi/ sgra ni de lta bu ma yin pas de'i phyir bum pa 'ba' zhig mi rtag par 'gyur gyi/ sgra ni mi 'gyur ro zhes smras pa nyid kyis sun phyung ba yin no/ /'dir rnam par brtag pa'i spyi mthun pas gang gi phyir 'dir med pa spyi gtan tshigs su bstan pa'i phyir de ni sun 'byin pa ma yin te/ de ltar yang de dag gang kho na med par 'dod pa de nyid kyis 'dir skye ba med par sgrub par byed do/ /de'i phyir 'grel pa byed pas/ med na gang gi rkyen ces bya/ /zhes bya ba tshig le'ur byas pa'i rtsa ba 'dis sun 'byin pa de gsal dang / de kho na ma yin gyi sun 'byin pa ltar snang ba yin par ston to/ /skye ba'i sngon rol na med pa'i mtshan nyid kyis bum pa dang snam bu dang sab ma la sogs pa med pa nyid ma yin na yang med pa gang gi rkyen du 'bru la sogs pa 'dod de gang gir yang mi 'gyur ro zhes bya ba'i tshig gi don to zhes bya ba la/ skye ba'i sngon rol na med pa zhes bya ba ni skye ba'i snga rol dang skye ba'i mdun rol na med pa'o/ /skye ba'i sngon rol na med pa'i mtshan nyid ces bya ba ni med pa gang gi mtshan nyid skye ba'i mdun rol na med pa de ni skye ba'i sngon rol na med pa'i mtshan nyid do/ /skye ba'i sngon rol na med pa'i mtshan nyid des bum pa dang sab ma la sogs pa da dung ma skyes pas med pa nyid yin na yang bum pa dang snam bu dang sab ma la sogs pa med pa gang gi rkyen du 'bru la sogs pa dang mer mer po la sogs pa 'dod de med pa gang gi rkyen du yang 'bru la sogs pa mi 'gyur ro zhes bya ba'i tshig gi don to/ /'di skad bstan te/ khyod nam mkha'i me tog ni skye ba med pa can yin pa'i phyir gtan med pa yin pas dpe'i gtan tshigs su mi 'dod la/ bum pa dang snam bu dang sab ma la s ogs pa ni skye ba can yin pa'i phyir snga na med pa yin pas dpe'i gtan tshigs su 'dod na de lta na yang snga na med pa'i mtshan nyid kyi bum pa dang snam bu dang sab ma la sogs pa med pa nyid yin na bum pa dang snam bu dang sab ma la sogs pa snga na med pa'i mtshan nyid kyis med pa gang gi rkyen du 'jim pa dang rgyu spun dang rtsi rkyang la sogs pa 'dod de/ bum pa dang snam bu dang sab ma la sogs pa med pa gang gi rkyen du yang 'jim pa dang rgyu spun dang rtsi rkyang la sogs pa mi 'gyur ba de bzhin du/ mig la sogs pa dang myu gu yang snga na med pa'i mtshan nyid yin na mig la sogs pa dang myu gu snga na med pa'i mtshan nyid kyi med pa gang gi rkyen du mer mer po la sogs pa dang 'bru la sogs par 'dod de/ mig la sogs pa dang myu gu med pa gang gi rkyen du yang mer mer po la sogs pa dang 'bru la sogs pa mi 'gyur ro/ /de ltar na ji ltar mig la sogs pa dang myu gu snga na med pa'i mtshan nyid kyis med pa gang gi rkyen du yang mer mer po la sogs pa dang 'bru la sogs pa mi 'gyur ba de bzhin du nam mkha'i me tog la sogs pa gtan med pa'i mtshan nyid kyis med pa gang gi rkyen du yang nam mkha' la sogs pa mi 'gyur bar 'dra bas de'i phyir khyod kyi gtan tshigs kyi don ma grub pa nyid do zhes bstan to/ /de'i phyir yang khong du chud pa kho nar byed nus te zhes bya ba ni de'i phyir yang gtan tshigs dang dpe 'di dag gis skye ba dgag pa khong du chud pa kho nar byed nus pa zhes bya ba'i tha tshig go/ /don dam par 'bru la sogs pa ni myu gu'i rkyen ma yin te skye ba'i sngon rol na med pa'i phyir dper na bum pa la sogs pa bzhin no zhes bya ba la/ 'dir yang 'bru la sogs pa ni zhes bya ba 'di ni chos can yin la/ myu gu'i rkyen ma yin te zhes bya ba 'di ni bsgrub par bya ba chos yin/ skye ba'i sngon rol na med pa'i phyir zhes bya ba 'di ni sgrub pa'i chos yin/ dper na bum pa la sogs pa bzhin no zhes bya ba 'di ni dpe yin par sbyar te/ dper na don dam par bum pa la sogs pa skye ba'i sngon rol na med pa'i phyir myu gu'i rkyen ma yin pa de bzhin du don dam par 'bru la sogs pa yang skye ba'i sngon rol na med pa'i phyir myu gu'i rkyen ma yin no/ /ji ltar skye ba'i sngon rol na med pa myu gu'i yang yod la/ de bzhin du bum pa la sogs pa la yang yod par 'dra ba las myu gu ni 'bru la sogs pa las skye bar 'dod la/ bum pa la sogs pa las skye bar mi 'dod pa 'di la rigs pa ci yod/ de ltar re zhig med na gang gi rkyen ces bya/ /zhes dam bcas pa de bsgrubs zin to/ /da ni dam bcas pa gnyis pa bsgrub pa'i phyir phyogs gnyis pa la yang zhes bya ba smras so/ /de la yod pa'i rkyen du ji ltar mi rung ba de ston pa ni/ yod na rkyen gyis ci zhig bya/ /zhes bya ba yin te/ de la yod na yang myu gu rang gi bdag nyid kyi yod pa la ni tha snyad du yang 'bru la sogs pa rkyen yin par mi 'dod de bskyed pa'i bya ba la mi ltos pa'i phyir/ dper na skyes pa de nyid dam bum pa la sogs pa gzhan bzhin no zhes bya ba la/ 'dir yang myu gu bdag nyid kyis yod pa la ni zhes bya ba 'di ni chos can yin la/ tha snyad du yang 'bru la sogs pa'i rkyen yin par mi 'dod de zhes bya ba 'di ni bsgrub par bya ba chos yin la/ bskyed pa'i bya ba la mi ltos pa'i phyir zhes bya ba 'di ni sgrub pa'i chos yin/ dper na skyes pa de nyid dam bum pa la sogs pa gzhan bzhin no zhes bya ba 'di ni dpe yin par sbyar te/ dper na myu gu skyes pa nyid dam bum pa la sogs pa skyes pa gzhan dag rang gi bdag nyid kyis yod pa ni bskyed pa'i bya ba la mi ltos pa'i phyir/ kun rdzob kyi tha snyad du yang 'bru la sogs pa de'i rkyen yin par mi 'dod pa de bzhin du myu gu rang gi bdag nyid kyis yod pa yang bskyed pa'i bya ba la mi ltos pa'i phyir/ kun rdzob kyi tha snyad du yang 'bru la sogs pa de'i rkyen yin par mi 'dod do zhes bya bar dgongs so zhes bya ba ni/ mdo mdzad pa'i dgongs pa ni de lta bu yin no zhes bya ba'i tha tshig go /de'i phyir gtan tshigs kyi don ma grub pa nyid do zhes bya ba ni/ med dam yod pa'i don la yang / /rkyen ni rung ba ma yin te/ /med na gang gi rkyen ces bya/ /zhes gang gsungs pa des gang gi phyir myu gu yod pa dang med pa'i rkyen du 'bru la sogs pa mi rung ba de'i phyir/ skye bar smra ba dag gi gtan tshigs kyi don dam par de dag gi rkyen rnams ni/ nang gi skye mched rnams skyed par byed pa kho na yin te/ rkyen yin pa'i phyir/ dper na 'bru la sogs pa myu gu skyed par byed pa bzhin no/ /gang skyed par byed pa ma yin pa de ni rkyen nyid med de/ dper na ri bong gi rwa bzhin no zhes zer ba de ma grub pa nyid yin no/ /grangs can dag las gang dag yod pa de ni rkyen rnams kyis gsal bar byed pa'i phyir dang / rags pa nyid du byed pa'i phyir/ yod na rkyen gyis ci zhig bya/ /zhes bya ba de mi rigs so zhes zer na zhes bya ba 'di'i bsdus pa'i don ni grangs can dag las gang dag nus pa smra ba dang gsal ba smra ba dag na re/ mdo byed pas/ yod na rkyen gyis ci zhig bya/ /zhes bya ba smras pa de ni mi rigs par smras pa yin te/ ci'i phyir zhe na/ 'di ltar mun pa'i nang na bum pa la sogs pa yod pa mi gsal ba rnams la gsal bar byed pa'i rkyen mar me la sogs pa dag mi dgos sam ci/ rgyu las 'bras bu nus pa'i ngo bo nyid du yod pa la yang rags pa nyid du byed pa'i rkyen sa dang chu la sogs pa dag mi dgos sam ci/ de'i phyir mdo de ni nyes par smras pa yin no zhes zer ba yin no/ /de skad ces zer ba de'i lan du 'dir 'grel pa byed pa nyid kyis de dag gi gsal ba yang bsal zin pa'i phyir dang / rags pa nyid kyang yod pa dang med pa nyid la ji skad bstan pa'i skyon du 'gyur ba'i phyir/ de ni gyi na'o zhes bya ba smras te/ de la de dag gi gsal ba yang bstsal zin pa'i phyir zhes bya ba ni sngar gsal ba bstsal ba'i skabs su grangs can gyis brtags pa'i mi gsal ba ni gsal bar mi byed de chen po la sogs pa mi gsal ba'i phyir/ dper na nam mkha'i me tog bzhin no zhes bya ba la sogs pas lan du mi gsal ba bstsal zin pa'i phyir ro/ /rags pa nyid kyang yod pa dang med pa nyid la sngar ji skad bstan pa'i skyon du 'gyur ba'i phyir zhes bya bas ni 'di skad bstan te/ re zhig grangs can dag la 'di skad ces dri bar bya ste/ ci rags pa nyid yod pa zhig rkyen gyis byed dam 'on te med pa zhig rkyen gyis byed/ de la gal te rags pa nyid med pa zhig rkyen gyis byed do zhe na/ de'i phyir slob dpon gyis/ med na gang gi rkyen ces bya/ /zhes gsungs pas gsal ba nyid med pa nam mkha'i me tog dang 'dra ba'i rkyen du mi rigs so zhes bstan pa'i skyon du 'gyur ba'i phyir ro/ /gal te rags pa nyid yod pa zhig rkyen gyis byed do zhe na/ de'i phyir slob dpon gyis/ yod na rkyen gyis ci zhig bya/ /zhes gsungs pas gsal ba nyid yod pa la ni tha snyad du yang rkyen yod par mi 'dod de bskyed pa'i bya ba la mi ltos pa'i phyir/ dper na skyes pa de nyid dam bum pa la sogs pa gzhan bzhin no zhes bstan pa'i skyon du 'gyur ba'i phyir ro/ /de ni gyi na'o zhes bya ba ni de ni mdo mdzad pa la sun 'byin pa ci yang ma yin no zhes bya ba'i tha tshig go/ /mdo sde pa dag na re/ med dam yod pa'i don la yang / /rkyen ni rung ba ma yin te/ /zhes bya ba ni bden na zhes bya bas ni 'di skad bstan te/ mdo sde pa dag na re/ 'bras bu med pa'i phyogs dang 'bras bu yod pa'i phyogs la ni 'bru la sogs pa rkyen med pas rkyen dang ldan pa med pa'i phyir/ skyed par byed pa ma yin pa de'i phyir/ med dam yod pa'i don la yang / /rkyen ni rung ba ma yin te/ /zhes bya bas phyogs de gnyis sun phyung ba ni bden na/ kho bo cag gi phyogs ni yod pa dang med pa nyid gnyi gar yang brjod par bya ba ma yin pa'i mtshan nyid yin pas bye brag pa'i phyogs ltar 'bras bu med par smra ba yang ma yin la/ grangs can dang bye brag tu smra ba dag gi phyogs ltar 'bras bu yod par smra ba yang ma yin pas de'i phyir/ kho bo cag gi phyogs la khyed kyis ji skad smras pa'i sgrub pa'i gnod pa med do zhes zer ba yin no/ /'on kyang 'bras bu skye ba la mngon du phyogs pa'i tshe na rkyen rnams gcig la gcig phan 'dogs pa la brten nas 'bras bu skyed nus pa'i bdag nyid thob pa dag don dam par rkyen nyid du khas len pas de'i tshe na 'bras bu skye bzhin pa'i phyir ni med pa ma yin la/ ma skyes pa'i phyir ni yod pa ma yin pas zhes bya ba ni mdo sde pa nyid kyi gzhung las 'bras bu ni yod pa dang med pa nyid gnyi gar yang brjod par bya ba ma yin pas de la skyon yod pa'i phyir rkyen rnams 'bras bu skyed par byed pa kho na yin no zhes zer ba nyid bstan pa yin no/ /de la 'on kyang 'bras bu skye ba la mngon du phyogs pa'i tshe na zhes bya ba ni/ 'bras bu mig gi rnam par shes pa la sogs pa dang myu gu la sogs pa da dung ma skyes pa skye bar 'dod pa dag skye ba la mngon du phyogs pa'i tshe na'o/ /rkyen rnams gcig la gcig phan 'dogs pa la zhes bya ba ni mig dang gzugs dang snang ba dang nam mkha' dang yid la byed pa rnams yul dang yul can gyi dngos por gnas shing gcig la gcig phan 'dogs pa dang / sa bon dang chu dang me dang rlung la sogs pa grogs byed pa'i dngos por gnas shing gcig la gcig bstod par byed pa la'o/ /de la brten nas zhes bya ba ni gnas nas so/ /'bras bu skyed ces bya ba ni 'bras bu mig gi rnam par shes pa la sogs pa dang myu gu la sogs pa skyes pa'o/ /nus pa zhes bya ba ni 'bras bu de dag skyed nus pa nyid kyi'o/ /bdag nyid thob pa dag ces bya ba ni 'bras bu skyed nus pa nyid des rkyen gyi bdag nyid thob pa dag ste/ rkyen gang dag gi rang gi ngo bo nyid grub pa de dag ni 'bras bu skyed nus pa'i bdag nyid thob pa dag go/ /don dam par rkyen nyid du khas len pas zhes bya ba ni de ltar 'bras bu skyed nus pa'i bdag nyid thob pa'i rkyen de dag don dam par kho bo cag mdo sde pa dag rkyen nyid du khas len pas so/ /de'i tshe na 'bras bu skye bzhin pa'i phyir ni med pa ma yin la zhes bya ba ni gang gi phyir de'i tshe na 'bras bu mig gi rnam par shes pa la sogs pa dang myu gu la sogs pa dag skye ba la mngon du phyogs pa de'i phyir ni med pa zhes mi brjod do/ /ma skyes pa'i phyir ni yod pa ma yin pas zhes bya ba ni de'i tshe na skad cig gcig gis chod pas dngos su ma skyes pa'i phyir ni yod pa ma yin pas so/ /de'i phyir kho bo cag gi phyogs la ji skad smras pa'i sgrub pa'i gnod pa med do zhes zer ro zhes bya bas ni 'di skad bstan te/ gang gi phyir kho bo cag gi phyogs la 'bras bu yod pa dang med pa nyid gnyi gar yang brjod par bya ba ma yin pas/ de'i phyir khyed kyi 'bras bu yod pa dang med pa'i phyogs gnyis la ji skad smras pa'i bsgrub pas skyon brtag pa'i gnod pa de dag kho bo cag gi phyogs la med do zhes zer ba yin no/ /de skad ces zer ba de'i lan du 'grel pa byed pa nyid kyis/ 'dir bshad pa/ brtag pa de la yang zhes bya ba ni mdo sde pa dag gis smras pa'i 'bras bu yod pa dang med pa nyid gnyi gar yang brjod par bya ba ma yin no zhes bya ba'i brtag pa de la yang 'grel pa byed pas/ med dam yod pa'i don la yang / /rkyen ni rung ba ma yin te/ /zhes bya ba tshig le'ur byas pa 'dis sun dbyung ba smras pa yin no/ /'di skad bstan te/ mdo sde pas brtags pa'i 'bras bu yod pa dang med pa nyid gnyi gar yang brjod par bya ba ma yin pas de la yang rkyen rung ba ma yin no/ /ci'i phyir zhe na/ de'i phyir yod pa dang med pa nyid du brjod par bya ba ma yin pa ni rnam pa gnyi ga ma yin pa'i phyir de las gzhan pa bzhin no zhes bya bar dgongs so zhes bya ba smras te/ brtag pa 'di la yang 'bras bu yod pa dang med pa nyid du brjod par bya ba ma yin pa ni rnam pa gnyi ga ma yin pa'i phyir/ des na rnam pa gnyi ga ma yin pa'i phyir zhes bya ba 'di ni gtan tshigs yin no/ /de ltar 'bras bu phyogs su bya ba la de las gzhan pa gang yin pa de ni dpe 'gyur bas de'i phyir de las gzhan pa bzhin no zhes bya bar slob dpon gyis dgongs so zhes bya ba smras so/ /'di la yod pa dang med pa nyid du brjod par bya ba ma yin par 'dod pa gang yin pa de ni med pa yang ma yin yod pa yang ma yin pas/ don dam par mig la sogs pa de dag mig gi rnam par shes pa dang myu gu de dag gi rkyen ma yin par shes par bya ste/ de dag gi 'bras bu yod pa dang med pa nyid du brjod par bya ba ma yin pa'i phyir/ dper na de las gzhan pa bzhin pas zhes bya ba la/ 'dir yang 'di la yod pa dang med pa nyid du brjod par bya ba ma yin par 'dod pa gang yin pa de ni med pa yang ma yin/ yod pa yang ma yin pas zhes bya ba 'di nyid ni chos can yin te/ mdo sde pas brtags pa'i 'bras bu yod pa dang med pa nyid du brjod par bya ba ma yin par 'dod pa rnam pa gnyi ga ma yin pa de 'dir chos can du bya'o/ /don dam par mig la sogs pa de dag mig gi rnam par shes pa dang myu gu de dag gi rkyen ma yin par shes par bya ste zhes bya ba 'di ni bsgrub par bya ba chos yin te/ don dam par rkyen mig dang gzugs dang snang ba dang nam mkha' dang yid la byed pa de dag la 'bras bu mig gi rnam par shes pa dang / myu gu yod pa dang med pa nyid du brjod par bya ba ma yin pa de dag gi rkyen gyi ngo bo nyid med la/ de bzhin du rkyen 'bru la sogs pa la yang 'bras bu mig gi rnam par shes pa dang myu gu yod pa dang med pa nyid du brjod par bya ba ma yin pa de dag gi rkyen gyi ngo bo nyid med par shes par bya ste zhes rgyu dgag pa dang / don dam par rkyen mig dang gzugs dang snang ba dang nam mkha' dang yid la byed pa de dag 'bras bu mig gi rnam par shes pa dang myu gu yod pa dang med pa nyid du brjod par bya ba ma yin pa de dag gi rkyen ma yin la/ de bzhin du de dag gi rkyen 'bru la sogs pa yang 'bras bu mig gi rnam par shes pa dang myu gu yod pa dang med pa nyid du brjod par bya ba ma yin pa de dag gi rkyen ma yin par shes par bya ste zhes 'bras bu dgag pa bsgrub par bya'o/ /de dag gi 'bras bu yod pa dang med pa nyid du brjod par bya ba ma yin pa'i phyir zhes bya ba 'di ni sgrub pa'i chos yin te/ ci'i phyir rkyen mig la sogs pa de dag la 'bras bu mig gi rnam par shes pa dang myu gu de dag gi rkyen gyi ngo bo nyid med la/ rkyen mig la sogs pa de dag kyang 'bras bu mig gi rnam par shes pa dang myu gu de dag gi rkyen ma yin par shes par bya zhe na/ rkyen de dag gi 'bras bu mig gi rnam par shes pa dang myu gu de dag yod pa dang med pa nyid du brjod par bya ba ma yin pa'i phyir ro zhes gtan tshigs bstan pa yin no/ /dper na de las gzhan pa bzhin pas zhes bya ba 'di ni dpe yin te/ dper na 'bras bu mig gi rnam par shes pa dang myu gu de las gzhan pa'i bum pa yang skye bzhin pa'i phyir ni med pa ma yin la ma skyes pa'i phyir ni yod pa ma yin pas/ yod pa dang med pa nyid du brjod par bya ba ma yin pa'i phyir/ rkyen mig la sogs pa de dag la 'bras bu bum pa'i rkyen gyi ngo bo nyid kyang med la/ rkyen mig la sogs pa de dag 'bras bu bum pa'i rkyen yang ma yin pa de bzhin du rkyen mig la sogs pa de dag la 'bras bu mig gi rnam par shes pa dang myu gu de dag gi rkyen gyi ngo bo nyid kyang med la rkyen mig la sogs pa de dag 'bras bu mig gi rnam par shes pa dang / myu gu de dag gi rkyen kyang ma yin par shes par bya'o/ /de bzhin du dper na rkyen 'bru la sogs pa de dag la 'bras bu bum pa'i rkyen gyi ngo bo nyid kyang med la/ rkyen 'bru la sogs pa de dag 'bras bu bum pa'i rkyen kyang ma yin pa de bzhin du rkyen 'bru la sogs pa de dag la 'bras bu mig gi rnam par shes pa dang myu gu de dag gi rkyen gyi ngo bo nyid kyang med la rkyen 'bru la sogs pa de dag 'bras bu mig gi rnam par shes pa dang myu gu de dag gi rkyen kyang ma yin par shes par bya'o/ /de bzhin du 'bras bu snam bu dang sab ma dang rkyen rgyu spun dang rtsi rkyang la sogs pa la yang ci rigs par sbyar bar bya'o/ /'di'i bsdus pa'i don ni don dam par mig dang gzugs dang snang ba dang nam mkha' dang yid la byed pa dag mig gi rnam par shes pa'i rkyen ma yin te/ mig gi rnam par shes pa yod pa dang med pa nyid du brjod par bya ba ma yin pa'i phyir dper na bum pa bzhin te/ ji ltar bum pa skye bzhin pa'i phyir ni med pa ma yin la/ ma skyes pa'i phyir ni yod pa ma yin pas yod pa dang med pa nyid du brjod par bya ba ma yin pa'i phyir/ mig la sogs pa dag bum pa'i rkyen ma yin pa de bzhin du mig gi rnam par shes pa yang yod pa dang med pa nyid du brjod par bya ba ma yin pa'i phyir/ mig gi rnam par shes pa'i rkyen du mi 'gyur ro/ /de bzhin du don dam par 'bru la sogs pa dag kyang myu gu'i rkyen ma yin te/ myu gu yod pa dang med pa nyid du brjod par bya ba ma yin pa'i phyir/ dper na de las gzhan pa'i bum pa dang snam bu dang sab ma bzhin te/ ji ltar bum pa dang snam bu dang sab ma dag skye bzhin pa'i phyir ni med pa ma yin la/ ma skyes pa'i phyir ni yod pa ma yin pas yod pa dang med pa nyid du brjod par bya ba ma yin pa'i phyir/ 'bru la sogs pa dag bum pa dang snam bu dang sab ma dag gi rkyen ma yin pa de bzhin du myu gu yang yod pa dang med pa nyid du brjod par bya ba ma yin pa'i phyir/ 'bru la sogs pa dag myu gu'i rkyen du mi 'gyur ro/ /de ni lan ma yin no zhes bya ba ni mdo sde pa dag na re/ 'bras bu yod pa 'am med par smra ba dag gi phyogs la ni/ med dam yod pa'i don la yang / / rkyen ni rung ba ma yin te/ /zhes bya ba de bden na kho bo cag 'bras bu yod pa dang med pa nyid du brjod par bya ba ma yin par 'dod pa'i phyogs la ni de mi rung ngo zhes zer ba de ni lan ma yin te de ni bden pa ma yin no zhes bya ba'i tha tshig go/ /ci ste gzhan dag dbu ma pa la grub pa'i mtha' dang 'gal bar rgol te khyed kyi lung las/ de ni mig dang gzugs la med/ /de gnyis bar na'ang yod ma yin/ /gang du de ni gnas 'gyur ba/ /de yod ma yin de med min/ /zhes bya bas mig gi rnam par shes pa skye ba yod par bstan la/ khyed kyis mig gi rnam par shes pa skye ba med par bshad pa 'di grub pa'i mtha' dang 'gal lo zhes zer ba'i phyogs snga ma khong nas dbyung ba de'i lan du 'dir 'grel pa byed pa nyid kyis tha snyad du yod pa la sogs pa'i ngo bo nyid dang bral ba'i dngos po skye ba yang grub po zhes bya ba smras so/ /'di skad bstan te/ kun rdzob tu rgyu dang rkyen la sogs pa las yod pa dang med pa nyid du brjod par bya ba ma yin pa'i dngos po thams cad skye ba yang 'grub kyi/ don dam par ni mi 'grub pas de'i phyir grub pa'i mtha' dang 'gal ba med de/ ci ste yang rnam pa gnyis su smra ba dag 'bras bu yod pa dang med pa'i rkyen nyid du khas len pa'i phyir/ ji skad smras pa'i skyon med do zhes zer na zhes bya ba ni/ gcer bur rgyu ba dag las rnam pa gnyis su smra ba dag na re/ kho bo cag gi gzhung las 'bras bu ni yod pa yang ma yin la/ med pa yang ma yin pas rnam pa gnyi gar smra bas/ de'i phyir/ med dam yod pa'i don la yang / /rkyen ni rung ba ma yin te/ /zhes bya ba de 'bras bu yod par smra ba'i phyogs dang med par smra ba'i phyogs dang / gnyi ga ma yin par smra ba'i phyogs dag la ni rung gi /kho bo cag gnyi gar smra ba'i phyogs la ni mi rung ste/ kho bo cag 'bras bu yod pa dang med pa gnyi gar smra ba la rkyen rnams rung bas rkyen las 'bras bu skye bar 'gyur ro zhes zer ba yin no/ /de la ci ste yang zhes bya ba'i sgra ni gal te yang 'di skad ces zer na zhes bya bar sbyar ro/ /rnam pa gnyis su smra ba dag /ces bya bas ni gcer bur rgyu ba dag ste/ gang dag gcig tu 'bras bu med par smra ba yang ma yin la/ gcig tu 'bras bu yod par smra ba yang ma yin pa de dag ni/ rnam pa gnyis su smra ba dag /ces bya'o/ /'bras bu yod pa dang med pa'i rkyen nyid du khas len pa'i phyir zhes bya bas ni 'di skad bstan te/ gang gi phyir gser la sor gdub mi dmigs pa de'i phyir 'bras bu yod pa yang ma yin la/ gang gi phyir sor gdub la gser yod pa de'i phyir 'bras bu med pa yang ma yin pas/ 'bras bu yod pa dang med pa gnyi ga la rkyen nyid khas len pa'i phyir ro/ /ji skad smras pa'i skyon med do zhes zer na zhes bya ba ni de'i phyir dbu ma pas/ med dam yod pa'i don la yang / /rkyen ni rung ba ma yin te/ /zhes ji skad smras pa'i skyon de kho bo cag gi phyogs la med do zhes zer ba yin no/ /de skad ces zer ba de'i lan du 'dir 'grel pa byed pa nyid kyis/ de dag kyang phyogs gnyi gar bstan pa'i sgrub pas rnam pa gnyis su smra ba bsal ba'i phyir dbugs mi phyin to zhes bya ba smras te/ rnam pa gnyis su smra ba de dag kyang bdag dang gzhan gnyis las skye ba med pa'i phyogs gnyi gar bstan pa'i sgrub pas rnam pa gnyis su smra ba bsal zin pa'i phyir/ phyogs gnyi gar bstan pa'i sgrub pa dag gis gtad khongs su chud par 'gyur ba'i phyir dang / gnyis las skye bar ston pa'i rjes su dpag pa med pa'i phyir 'jigs pa dang bcas pa yin no zhes bya ba'i tha tshig go/ /'di skad bstan te/ 'di ltar gcer bur rgyu ba dag gis yongs su brtags pa'i 'bras bu gser gyi rdzas bdag nyid kyi skad cig yod pa la ni rkyen me dang sol ba la sogs pa mi dgos te skyed pa'i byed pa la mi ltos pa'i phyir/ dper na bum pa bdag nyid yod pa la rkyen me dang sol ba la sogs pa mi dgos pa bzhin no/ /yang na snam bu bdag nyid med pa'i rkyen ni me dang sol ba la sogs pa ma yin pa bzhin du/ 'bras bu gser gyi rdzas bdag nyid kyi skad cig med pa'i rkyen kyang me dang sol ba la sogs pa ma yin te bdag nyid med pa'i phyir/ dper na nam mkha'i me tog med pa'i rkyen nam mkha'i ma yin pa bzhin no/ /de bzhin du gcer bur rgyu ba dag gis yongs su brtags pa'i 'bras bu sor gdub kyi rdzas bdag nyid kyi skad cig yod pa la yang rkyen me dang sol ba la sogs pa mi dgos te bskyed pa'i bya ba la mi ltos pa'i phyir/ dper na snam bu bdag nyid yod pa la rkyen me dang sol ba la sogs pa mi dgos pa bzhin no/ /yang na sna bu bdag nyid med pa'i rkyen ni me dang sol ba la sogs pa ma yin pa bzhin du/ 'bras bu sor gdub kyi rdzas bdag nyid kyi skad cig med pa'i rkyen kyang me dang sol ba la sogs pa ma yin te/ bdag nyid med pa'i phyir/ dper na nam mkha'i me tog med pa'i rkyen nam mkha' ma yin pa bzhin no/ /dbugs mi phyin to zhes bya ba ni dbugs phyin pa'i gnas ma yin pa'o/ /'di skad bstan te/ ji ltar rnam gnyis su smra ba dag gis brtags pa de 'jigs pa dang bcas pa yin pa de'i phyir dbugs phyin pa'i gnas ma yin te/ 'di ltar 'bras bu gnyi ga'i bdag nyid du 'dod pa la gnyi ga'i bdag nyid dgag pas gnod par 'gyur ba'i phyir ro/ /de ltar na re zhig rkyen rnams spyir dgag pa bstan nas zhes bya bas ni 'di skad bstan te/ dngos po rnams kyi rang bzhin ni/ /rkyen la sogs pa yod ma yin/ /bdag gi dngos po yod min na/ /gzhan gyi dngos po yod ma yin/ /bya ba rkyen dang ldan ma yin/ /rkyen dang mi ldan bya ba med/ /bya dang mi ldan rkyen ma yin/ /bya ldan yod dam 'on te na/ /'di dag las rten skye bas na/ /de phyir 'di dag rkyen ces grag /ji srid mi skye de srid du/ /'di dag rkyen min ji ltar min/ /med dam yod pa'i don la yang / /rkyen ni rung ba ma yin te/ /med na gang gi rkyen ces bya/ /yod na rkyen gyis ci zhig bya/ /zhes bya ba'i tshig le'ur byas pa bzhi po de dag gis rgyu'i rkyen dang / dmigs pa'i rkyen dang / de ma thag pa'i rkyen dang / bdag po'i rkyen bzhi po bsdus pa thams cad spyir dgag pa bstan pas na de'i phyir de ltar re zhig rkyen rnams spyir dgag pa bstan nas zhes bya ba smos so/ /da ni de dag khyad par du dgag pa'i rnam pa 'dod pas 'di bshad do zhes bya ba la/ de dag ces bya ba ni rkyen bzhi po de dag go/ /khyad par du dgag pa'i zhes bya ba ni rkyen bzhi po de dag re re nas khyad par du dgag pa'o/ /rnam pa zhes bya ba ni rnam pa tha dad pa'o/ /'dod pas zhes bya ba ni rnam pa de bya bar 'dod pas so/ /'di bshad do zhes bya ba ni de dag khyad par du dgag pa 'dod pa des rkyen bzhi po de dag re re nas khyad par du dgag pa'i rnam pa 'og nas 'byung ba'i gzhung de dag bshad par bya'o/ /re zhig rgyu'i rkyen gyi dbang du byas nas zhes bya ba ni gang gi phyir rgyu'i rkyen dang po yin la/ gzhan dag phyi ma yin pa de'i phyir/ dang por de nyid dgag pa'i dbang du byas nas so/ /'di la rkyen rnams spyi yin yang bskyed par bya ba skyed pa'i rkyen gang yin pa de rkyen du 'dod do zhes bya bas ni 'di skad bstan te/ 'di ltar sa bon dang sa dang chu dang me dang rlung la sogs pa rkyen rnams myu gu skyed pa'i rkyen spyi yin par gzhan dag sems mod kyi/ 'on kyang sa bon kho na las myu gu skye'i sa bon la sogs pa las mi skye bas de'i phyir bskyed par bya ba myu gu skyed pa'i rkyen sa bon gang yin pa de rgyu'i rkyen yin par bstan bcos mdzad pa bzhed do/ /'o na bskyed par bya ba skye ba ni tshogs pa la rag las pa'i phyir bskyed pa nyid ni gcig pu ma yin no zhe na zhes bya ba ni 'dir gzhan dag na re/ 'o na bskyed par bya ba myu gu ni sa bon dang chu dang me dang rlung zhes bya ba rgyu rkyen tshogs pa spyi la rag las pa'i phyir myu gu skyed pa ni sa bon gcig pu ma yin pas rgyu'i rkyen 'ba' zhig las skye ba ma yin no zhes rgyu'i rkyen nyid 'gog par byed pa yin no/ /skye ba bkag pa'i phyir de mi 'thad pa ni bden mod kyi zhes bya ba 'di ni 'grel pa byed pas sngar gzhan dag na re bskyed pa nyid ni gcig pu ma yin no zhes bya bas rgyu'i rkyen 'gog par byed pa de khas blangs pa yin te/ don dam par rkyen thams cad las skye ba bkag pa'i phyir sa bon gcig pu las kyang myu gu mi skye bas skyed pa nyid ni gcig pu ma yin no zhes bya bas rgyu'i rkyen de mi 'thad pa ni 'dod do zhes zur gyis khas blangs pa yin no/ /'di skad bstan te/ ji skad du/ bdag las ma yin gzhan las min/ /gnyis las ma yin rgyu med min/ /dngos po gang dag gang na yang / /skyed pa nam yang yod ma yin/ /zhes gsungs pas/ don dam par rkyen thams cad las skye ba bkag pa'i phyir rgyu nyid med pas skyed pa nyid med pa ni bden no zhes bya ba'i tha tshig go/ /'on kyang tha snyad pa'i rgyu rnam par gzhag pa khas blangs nas don dam pa'i rgyu'i rgyu nyid ji ltar mi 'thad pa de ltar bshad par bya'o zhes bya ba ni de ltar don dam par skye ba bkag pa'i phyir de mi 'thad pa ni 'dod mod kyi/ 'on kyang gzhan dag na re/ dbu ma pa 'di dag la ni skye ba 'gog pa'i rnam pa tsam zhig yod du zad kyi/ rnam pa gzhan ni ci yang med do zhes zer na mi rung bas de'i phyir tha snyad kyi rgyu rnam par gzhag pa khas blangs nas/ don dam pa'i rgyu'i rgyu nyid ji ltar mi 'thad par de ltar bshad par bya ste/ gal te kun rdzob tu yang rgyu'i rkyen rnam par gzhag pa med du zin na ni des na don dam par de dgag tu yang med par 'gyur bas/ de'i phyir kun rdzob pa'i rgyu'i rkyen rnam par gzhag pa khas blangs nas so/ /don dam pa'i yul la rgyu'i rkyen de nyid du ji ltar mi 'thad pa de ltar bshad par bya'o/ /de la tha snyad pa'i zhes bya ba ni kun rdzob pa'o/ / rgyu zhes bya ba ni rgyu'i rkyen to/ /rnam par gzhag pa zhes bya ba ni nges pa'o/ /khas blangs nas zhes bya ba ni rgyu nyid du khas blangs nas so/ /don dam pa'i zhes bya ba ni don dam pa'i yul gyi'o/ /rgyu'i rgyu nyid ces bya ba ni rgyu'i rkyen ces tha snyad gdags pa'i rgyu nyid do/ /ji ltar mi 'thad pa de ltar bshad par bya'o zhes bya ba ni don dam par rgyu'i rkyen ni ji ltar mi 'thad pas de las dngos po rnams skye ba med pa de ltar bsgrub par bya'o/ /'di la rgyu ni 'di yin te zhes bya ba ni tha snyad pa'i rgyu rnam par gzhag pa 'di la sa bon gyi mtshan nyid rgyu'i rkyen ces bya bar khas blangs pa ni 'di lta bu yin te zhes bya bar sbyar ro/ /yod pa 'am med pa 'am yod med cing bsgrub pa yin par 'dod grang na zhes bya ba la/ yod pa zhes bya ba ni myu gu yod pa'o/ /med pa zhes bya ba yang myu gu med pa'o/ /yod med ces bya ba yang myu gu yod med gnyi ga'i bdag nyid do/ /sgrub pa zhes bya ba ni skyed pa'o/ /yin par 'dod grang na zhes bya ba ni kun rdzob tu khas blangs pa yin no/ /de yang zhes bya ba la sogs pas ni don dam pa'i rgyu'i rgyu nyid ji ltar mi 'thad pa de ltar bstan to/ /gang tshe chos ni yod pa dang / /med dang yod med mi bsgrub pa/ /de yi tshe na don dam par/ /ji ltar sgrub byed rgyu zhes bya/ /de ni sgrub par byed pa ma yin pa kho na ste zhes bya ba ni phyogs yin te don dam par 'bras bu myu gu'i mtshan nyid kyi chos yod pa dang med pa dang yod med gnyi ga mi bsgrub pa de'i tshe na rgyu'i rkyen de 'bras bu sgrub par byed pa ma yin pa kho na yin pas rgyu ma yin no zhes dgag pa yin no/ /yod pa'i phyir dang med pa'i phyir bdag dang gzhan bzhin du rjes su dpag pa'i gnod par 'gyur ba'i phyir dang / phyogs gnyi ga'i skyon du 'gyur ba'i phyir ro zhes bya bar dgongs so zhes bya ba ni bsgrub pa'i chos yin no/ /'di skad bstan te/ rkyen ni 'bras bu'i chos yod par skyed par byed pa ma yin te yod pa'i phyir dper na bdag bzhin te/ ji ltar rgyus rgyu bdag nyid skyed par mi byed par rjes su dpag pa'i gnod par 'gyur ba'i phyir ro/ /'bras bu'i chos med par skyed par byed pa yang ma yin te/ med pa'i phyir dper na gzhan bzhin te/ ji ltar rgyu sa bon gyis bum pa la sogs pa gzhan skyed par mi byed pa'i rjes su dpag pa'i gnod par 'gyur ba'i phyir ro/ /'bras bu'i chos yod med gnyis ka yang skyed par byed pa ma yin te/ phyogs gnyis ka'i skyon du 'gyur ba'i phyir bdag dang gzhan bzhin te/ ji ltar rgyus bdag dang gzhan gnyi ga skyed par byed pa ma yin par rjes su dpag pa'i gnod par 'gyur ba'i phyir ro zhes bya bar slob dpon gyis dgongs so/ /de ltar rgyu'i rgyu nyid mi 'thad pa'i phyir de yang mi 'thad do zhes bya ba ni de ltar don dam par rgyu'i rkyen ces tha snyad gdags pa'i rgyu nyid mi 'thad par bstan pa'i phyir/ 'bras bu skye ba de yang mi 'thad do zhes bya ba'i tha tshig go/ /re zhig de nyid tha snyad pa'i rgyu rnam par gzhag pa khas blangs nas don dam pa'i rgyu'i rgyu nyid ji ltar mi 'thad pa de ltar bshad pa yin no/ /da ni bskyed par bya ba 'bras bu dang skyed pa'i rkyen gang yin pa de gnyis ka tha snyad pa yin par bsgrub par bya ste/ de'i phyir rgyu'i rgyu nyid ni bskyed par bya ba mngon par bsgrubs pas bstan pa yin no zhes bya ba la sogs pa smras so/ /rgyu'i rgyu nyid ni zhes bya ba ni rgyu'i rkyen ces tha snyad gdags pa'i rgyu nyid do/ /bskyed par bya ba zhes bya ba ni 'bras bu de ste/ rgyu las skye zhing rgyus bskyed par bya ba dang 'byung bar bya ba yin pas bskyed par bya ba ste/ 'bras bu'i mtshan nyid myu gu zhes bya ba yin no/ /mngon par bsgrubs pas zhes bya ba ni bskyed par bya ba de mngon par bsgrub pa ste/ 'bras bu bskyed pas zhes bya ba'i tha tshig go/ /bstan pa yin na zhes bya ba ni bskyed par bya ba mngon par bsgrub pa ste bstan pa dang rjes su dpag pa dang bsgrub par bya ba yin na'o/ /yod pa la sogs pa'i mtshan nyid kyi bdag nyid kyis mngon par sgrub par mi byed pa'i phyir rgyu can rgyu las skye ba ni tha snyad pa yin la zhes bya bas ni 'di skad bstan te/ gal te 'bras bu yod pa 'am med pa 'am yod med gnyi ga'i bdag nyid cig skyed cing mngon par sgrub par byed na ni des na sa bon la rgyu zhes tha snyad gdags su yang rung ba zhig na de la yang gang gi phyir don dam par yod pa dang yod med gnyi ga'i mtshan nyid kyi bdag nyid kyis skyed cing mngon par sgrub par mi byed pa de'i phyir 'bras bu rgyu can rgyu las skye ba ni tha snyad pa yin no/ /de la yod pa la sogs pa'i mtshan nyid kyi bdag nyid kyis zhes bya ba ni 'bras bu'i chos yod pa dang med pa dang yod med gnyis ka'i mtshan nyid kyi bdag nyid ji skad sngar bstan pas so/ /mngon par sgrub pa mi byed pa'i phyir zhes bya ba ni rgyus bskyed cing mngon par sgrub par mi byed pa'i phyir ro/ /rgyu can zhes bya ba ni 'bras bu ste/ rgyu las skye ba'i phyir ro/ /rgyu las skye ba ni zhes bya ba ni rgyu'i rkyen las bskyed pa ni'o/ /tha snyad pa yin pa zhes bya ba ni kun rdzob kyi tha snyad du brjod pa yin la zhes bya ba'i tha tshig go/ /rgyu yang de dang 'dra ba kho nar 'gyur bas grub po zhes bya ba ni/ ji ltar 'bras bu myu gu tha snyad pa yin pa de bzhin du rgyu yang tha snyad pa yin pa kho nar 'gyur bas bskyed par bya ba 'bras bu dang / skyed pa'i rkyen gang yin pa de gnyi ga tha snyad pa yin par grub po zhes bya ba'i tha tshig go/ /yang na rang gi sde pa dag kyang phyir zlog par byed de zhes bya ba la/ yang na zhes bya ba'i sgra ni rnam par brtag pa'i don te/ tshig le'ur byas pa des rnam pa gzhan du yang rnam par bshad par bya'o zhes bya ba'i tha tshig go/ /rang gi sde pa dag ces bya ba ni mdo sde pa dang bye brag tu smra ba dag go/ /yang phyir zlog par byed de zhes bya ba ni yang skye ba bsgrub pa'i phyir/ phyir rgol ba nyid du gnas par byed pa yin no/ /nang gi skye mched rnams skyed par byed pa rgyu la sogs pa ni yod pa kho na yin te/ de ltar de bzhin gshegs pas gsungs pa'i phyir/ gang de bzhin gshegs pas ji skad gsungs pa de ni de bzhin te/ dper na mya ngan las 'das pa ni zhi ba'o zhes bya ba bzhin no zhes bya ba la/ 'dir yang nang gi skye mched rnams skyed par byed pa rgyu la sogs pa ni zhes bya ba 'di ni chos can yin te/ nang gi skye mched mig la sogs pa rnams skyed par byed pa rgyu'i rkyen dang / dmigs pa'i rkyen dang / de ma thag pa'i rkyen dang / bdag po'i rkyen chos can dag don dam par yod pa kho na yin te zhes bya ba'i chos khyad par can bsgrub par bya ba'i gzhi yin pa'i phyir ro/ /yod pa kho na yin te zhes bya ba 'di ni bsgrub par bya ba chos yin te/ 'dir rkyen chos can rnams la don dam par yod pa kho na yin te zhes bya ba'i chos khyad par can bsgrub par bya ba yin no/ /de ltar de bzhin gshegs pas gsungs pa'i phyir zhes bya ba 'di ni sgrub pa'i chos yin te/ nang gi skye mched rnams skyed par byed pa rgyu la sogs pa rkyen bzhi po dag don dam par yod pa kho na yin te zhes bya ba de ltar de bzhin gshegs pas gsungs pa'i phyir ro/ /de dag don dam par yod pa kho na yin no zhes gtan tshigs kyi don bstan pa yin no/ /gang de bzhin gshegs pas ji skad gsungs pa de ni de bzhin te zhes bya ba 'di ni nye bar sbyar ba'i sbyor ba yin te/ de ltar de bzhin gshegs pas gsungs pa'i phyir rkyen bzhi po dag don dam par yod pa kho na yin par cis mngon zhe na/ gang de bzhin gshegs pas ji skad gsungs pa de ni de bzhin te gzhan du 'gyur ba ma yin no zhes bsgrub par bya ba dang sgrub pa'i chos nye bar sbyar ba'i sbyor ba yin no/ /dper na mya ngan las 'das pa ni zhi ba'o zhes bya ba bzhin no zhes bya ba 'di ni dpe yin par sbyar te/ 'di la dper na de bzhin yang brgal zhing brtag par bya ste zhes bya ba ni 'grel pa byed pas yang tshig le'ur byas pa de nyid kyi rang gi bdag nyid kyis rang gi sde pa dag la brgal zhing brtag par bya ste zhes bya bar sbyar ro/ /'dir khyod kyi gtan tshigs kyi don du 'dod pa gang yin/ de bzhin gshegs pas kun rdzob tu de skad du gsungs pa'i phyir ram/ 'on te don dam par gsungs pa'i phyir zhes bya ba gal gnyis bzung ste/ smra ba 'di nyid brgal zhing brtag pa yin te/ khyed kyi gtan tshigs kyi don du 'dod pa de ltar de bzhin gshegs pas gsungs pa'i phyir zhes bya ba de de bzhin gshegs pas kun rdzob tu de skad gsungs pa'i phyir ram/ 'o na don dam par de skad gsungs pa'i phyir ram/ gang yin zhes brgal zhing brtag pa yin no/ /gal te kun rdzob tu na ni rang la ma grub pa'i don nyid do zhes bya ba ni gal te de bzhin gshegs pas kun rdzob tu de skad gsungs pa'i phyir ro zhe na/ des na khyed rang la ma grub pa'i don nyid yin te/ 'di ltar khyed kyi sgrub pa ni de bzhin gshegs pas don dam par rkyen bzhi po dag yod par gsungs pa'i phyir/ don dam par de dag las dngos po rnams skye bar 'dod pa yin la/ 'dir gtan tshigs kyi don ni de bzhin gshegs pas kun rdzob tu de skad gsungs pa'i phyir zhes zer na/ de ni kho bo 'dod pa yin pas khyed rang la ma grub pa'i don nyid yin no/ /'on te don dam par na ni zhes bya ba ni 'on te rang la ma grub pa'i don nyid mi 'dod pas/ gtan tshigs kyi don de de bzhin gshegs pas don dam par de skad gsungs pa'i phyir ro zhes zer na ni'o/ /de ltar na/ gang tshe chos ni yod pa dang / /med dang yod med mi bsgrub pa/ /zhes bya ba brjod do/ /don dam pa'i gnas skabs na rkyen rnams kyi 'bras bu dang / nang gi chos yod pa dang med pa dang yod med gnyi ga'i bdag nyid gang yang mi bsgrub mi bskyed pa de la de bzhin gshegs pas don dam par de skad gsungs pa'i phyir zhes ji ltar brjod du rung ste mi rung ngo / /ci'i phyir zhe na/ de'i tshe 'bras bu yod pa dang med pa gnyi ga'i bdag nyid kyi rkyen nyid bsal ba'i phyir ro/ /de'i tshe/ ji ltar sgrub byed rgyu zhes bya/ /de lta yin na mi rigs so/ /de ni sgrub par byed pa'i rgyu ma yin pa kho na'o zhes bya ba'i tshig gi don to zhes bya bas ni 'di skad bstan te/ don dam par 'bras bu'i chos yod pa dang med pa dang gnyi ga'i bdag nyid skye ba bstsal zhing rkyen rnams kyis kyang 'bras bu mi skyed pa nyid du bstsal ba de'i tshe ji ltar rgyu rkyen ces bya ste/ de lta yin na don dam par rgyu'i rkyen mi rigs so zhes bya ba'i tha tshig go/ / de'i phyir don dam par bsgrub par bya ba 'bras bu'i dngos po dang sgrub par byed pa rgyu'i dngos po nyid ma grub pa'i phyir/ gtan tshigs kyi don de ltar de bzhin gshegs pas gsungs pa'i phyir zhes bya ba de ma grub pa nyid do/ /gtan tshigs kyi don 'gal ba nyid do zhes bya ba ni ci ste de bzhin gshegs pas kun rdzob du rkyen rnams yod par gsungs pa de nus pa'i ngo bo nyid kyis med na mi 'byung ba'i tshul gyis gtan tshigs su 'dod na 'di la yang khyed kun rdzob tu ngo bo nyid yod par sgrub pa ni don dam par ngo bo nyid med par sgrub pa yin pas/ de ltar na khyod don dam par ngo bo nyid yod par 'dod pa dang 'gal ba'i don nyid yin no/ / gzhan dag na re zhes bya ba ni/ slob dpon de ba shar mas rang gi dbu ma'i 'grel pa dkar po 'char ba zhes bya ba byas pa las tshig le'ur byas pa 'di'i don 'di ltar rnam par bshad pa byed do zhes bya bar sbyar ro/ /ci'i phyir de 'dir smos she na/ slob dpon legs ldan byed kyis 'di snyam du bsams te/ gang gi phyir bdag gis de bzhin gshegs pas mya ngan las 'das pa'i mtshan nyid ni zhi ba'o zhes gsungs la/ de yang don par yod pa kho na yin pa de bzhin du de bzhin gshegs pas rkyen bzhi po de dag kyang yod par gsungs pas/ de dag kyang don dam par yod pa kho na yin no zhes bya bar sbyar ro/ /de bzhin gshegs pas rkyen bzhi po dag yod par ji skad gsungs she na/ de'i phyir de ltar yang bcom ldan 'das kyis rgyu ni sgrub par byed pa'o/ /dmigs pa ni sems dang sems las byung ba rnams kyi dmigs pa'o/ /de ma thag pa ni sems dang sems las byung ba 'gags ma thag pa rnams las te/ tha ma ma gtogs pa'o/ /bdag po ni gang yod na gang 'byung ba de yin no zhes gsungs pas zhes bya ba smras te/ de ni de bzhin gshegs pas rkyen bzhi po dag yod par gsungs pa'i khungs bstan pa yin te/ ji skad smras pa'i tshig bzhi po de dag kyang rkyen bzhi po dag go rims bzhin du sbyar ro/ /de ltar rgyu la sogs pa rkyen rnams rkyen gyi ngo bo nyid du yod pa'i phyir/ gtan tshigs grub pas 'dod pa'i don nyams par mi 'gyur ro zhes zer ro zhes bya ba ni/ gang de bzhin gshegs pas ji skad gsungs pa de ni de bzhin te zhes bya bas nye bar sbyar ba'i spyod pa bstan pa de'i mjug bsdu ba yin te/ gang de bzhin gshegs pas ji skad gsungs pa de nyid de bzhin te gzhan du 'gyur ba ma yin la/ de bzhin gshegs pas rkyen bzhi po dag kyang yod par gsungs pas de ltar rgyu la sogs pa rkyen bzhi po rnams ngo bo nyid du yod par grub pa'i phyir/ kho bo cag gi gtan tshigs de ltar de bzhin gshegs pas gsungs pa'i phyir zhes bya ba de grub pas/ kho bo cag gi 'dod pa'i don dngos po rnams rkyen las skye'o zhes bya ba de nyams par mi 'gyur te grub po zhes zer ba yin no/ /de skad ces zer ba de'i lan du/ 'grel pa byed pa nyid kyis 'dir bshad pa/ kun rdzob tu de ltar khas blangs pa'i phyir dang de'i skyon brjod pas/ lan btab zin pa'i phyir de ni rigs pa ma yin no zhes bya ba smras te/ 'dir bshad pa zhes bya ba ni phyogs snga ma de la 'grel pa byed pas tshig le'ur byas pa 'dis sun dbyung bar bshad pa yin no/ /kun rdzob tu de ltar khas blangs pa'i phyir zhes bya ba ni de bzhin gshegs pas rkyen bzhi po dag yod par gsungs pa ni/ kho bos kyang rgyu can rgyu las skye ba ni tha snyad pa yin la/ rgyu yang de dang 'dra ba kho nar 'gyur bas grub po zhes kun rdzob tu de ltar khas blangs pa'i phyir khyod kyi gtan tshigs de ni rigs pa ma yin pa'i phyir/ dpe'i skyon brjod pas lan btab zin pa'i phyir zhes bya bas ni 'di skad bstan te/ ji ltar sngar khyed kyis 'bru la sogs pa la don dam par byed pa dang ldan pa nyid yod pa kho na yin te/ kun rdzob tu de ltar khas blangs pa'i phyir/ gang kun rdzob tu ji ltar khas len pa de ni don dam par yang de bzhin te/ dper na ri bong gi rwa med pa bzhin no zhes dpe bstan pa de la kho bos don dam par ri bong gi rwa yang med pa nyid du ma grub pa'i phyir ji skad smras pa'i skyon med pa yin no zhes dpe'i skyon brjod pas ri bong gi rwa'i dpe yang kun rdzob tu med pa nyid du 'dod kyi/ don dam par med pa nyid du ni mi 'dod pas khyod kyi dpe ma grub po zhes lan btab pa de bzhin du/ khyod kyis 'dir dper na mya ngan las 'das pa ni zhi ba'o zhes bya ba bzhin no zhes dpe bstan pa de yang kho bos kun rdzob tu zhi ba nyid du 'dod kyi/ don dam par zhi ba nyid du mi 'dod pas de'i phyir khyod kyi mya ngan las 'das pa'i dpe de ni kho bos ri bong gi rwa'i dpe'i skyon brjod pas lan btab cing sun phyung zin pa'i phyir/ khyod kyi dpe de ni rigs pa ma yin no zhes bya ba'i tshig phrag dog gis slob dpon bud+d+ha pA li ta'i rnam par bshad pa sun dbyung ba byas pa ni ma yin gyi/ 'di ltar mi rigs pa'i phyir sun phyung ngo / /slob dpon de ba shar ma la rjes su chags pa yang ma yin mod kyi/ de'i rnam par bshad pa 'di la skyon med pas de'i phyir bdag 'di la rjes su yi rang bas de'i gzhung yang 'dir smos so/ /de'i phyir slob dpon de ba shar ma ni dbu ma'i bstan bcos la gzhung mi gzugs pa'i rnam pa yongs su bzung bas ngo bo nyid med pa nyid bstan par bya ba yin pas zhes bya ba la sogs pa bstan to/ /dbu ma'i bstan bcos la zhes bya ba dbu ma pa rnams kyi grub pa'i mtha' la'o/ /gzhung mi gzugs pa zhes bya bas ni 'di skad bstan te/ ji tsam du gzhan gyi grub pa'i mtha' sun dbyung ba la mi ltos par rang gi grub pa'i mtha' sgrub par byed pa de ni gzhung gzugs pa zhes bya'o/ /gang gzhan gyi grub pa'i mtha' sun 'byin pa tsam 'ba' zhig byed cing rang gi grub pa'i mtha' la cung zad kyang sgrub par mi byed pas 'di ltar gzhan gyis yongs su brtags pa'i dngos po 'gog pa tsam 'ba' zhig byed pa de ni gzhung mi gzugs pa zhes bya'o/ /de'i rnam pa yongs su bzung bas gzhung mi gzugs pa de'i tshul yongs su bzung bas so/ /ngo bo nyid med pa nyid bstan par bya ba yin pas zhes bya ba ni dbu ma pa rnams kyi grub pa'i mtha' de la gzhan gyis yongs su brtags pa'i dngos po thams cad kyi ngo bo nyid dgag pa tsam bstan par bya ba yin gyi/ dbu ma pa rnams don dam par chos 'ga' yang khas mi len par bstan pa yin no/ /de la dgag par bya ba ni gnyis te zhes bya ba ni dbu ma pa rnams la gzhan gyis yongs su brtags pa'i dngos po dgag par bya ba ni rnam pa gnyis yod pa'o/ /brjod pa la mngon par zhen pa zhes bya ba ni sgra la lhag par chags pa'o/ /brjod par bya ba la mngon par zhen pa zhes bya ba ni sgra'i don la lhag par chags pa zhes bya ba'i tha tshig go/ /de la skye ba bkag pas ni brjod par bya ba la mngon par zhen pa bkag pa'o zhes bya ba ni/ gang gi phyir gzugs sam/ tshor ba 'am/ 'du shes sam/ 'du byed rnams sam/ rnam par shes pa skyes nas brjod par bya ba de dag la mngon par zhen cing lhag par chags pa dang 'dzin par 'gyur gyi ma skyes na mi 'gyur ro/ /skye ba de yang / bdag las ma yin gzhan las min/ /gnyis las ma yin rgyu med min/ /dngos po gang dag gang na yang / /skyes pa nam yang yod ma yin/ /zhes bya ba la sogs pa gzhung gi tshogs kyis bkag pas de'i phyir brjod par bya ba la mngon par zhen pa ni med do/ /'on kyang gzugs la sogs pa chos rnams zhes brjod pa'i sgra tsam zhig phyi na lus pas de'i phyir brjod pa la mngon par zhen pa dgag pa'i rnam pa 'dod pas zhes bya ba smras te/ brjod pa la mngon par zhen pa dgag pa zhes bya ba ni de bstsal ba'o/ /rnam pa zhes bya ba ni brjod pa la mngon par zhen pa dgag pa'i rnam pa tha dad pa'o/ /'dod pas zhes bya ba ni brjod pa la mngon par zhen pa dgag pa'i rnam pa de bya bar 'dod pas so/ /dbu ma pa dag brjod pa la mngon par zhen pa dgag pa'i rnam pa 'dod pa des slob dpon gyis/ gang tshe chos ni yod pa dang / /med dang yod med mi sgrub pa/ /ji ltar sgrub byed rgyu zhes bya/ /de lta yin na mi rigs so/ /zhes bya ba 'di gsungs so/ /tshig le'ur byas pa 'dis ni brjod pa la mngon par zhen pa dgag pa bstan to/ /'di la bsdus pa'i don ni zhes bya ba ni tshig le'ur byas pa 'di la bsdus pa'i don ni 'di yin no zhes bya bar sbyar ro/ /sgrub par byed pa'i phyir rgyur 'dod na zhes bya ba ni 'bras bu skyed par byed pa'i phyir sa bon la rgyu zhes brjod par bya ba yin na zhes bya ba'i tha tshig go/ /de yang 'bras bu yod pa dang med pa dang gnyi ga'i bdag nyid la yang mi srid pas zhes bya bas ni 'di skad bstan te/ 'di ltar 'bras bu yod pa la ni rgyus bya ba med de 'bras bu skyes zin pa'i phyir/ dper na bum pa bzhin no/ /de bzhin du 'bras bu med pa la yang rgyus bya ba med de 'bras bu med pa'i phyir/ dper na nam mkha'i me tog bzhin no/ /'bras bu gnyi ga'i bdag nyid la yang rgyus bya ba med de gnyi ga'i rkyen du 'gyur ba'i phyir ro/ /des na rgyur brjod pa la 'jug pa'i byed rgyu med pa'i phyir/ rgyu'i rgyu nyid mi rigs pas zhes bya ba smras te/ rgyur brjod pa la 'jug pa'i byed rgyu zhes bya ba ni rgyu zhes tha snyad gdags pa la 'jug pa'i byed rgyu ste 'bras bu skyes pa gang yin pa'o/ /de med pa'i phyir rgyu zhes tha snyad gdags pa'i phyir rgyu nyid gzhan dag gis yod par brtags par mi rigs pas sgrub par byed pa'i phyir rgyur 'dod pa de mi grub po/ /de'i phyir dngos po rnams skyes pa kho na yin te rgyu yod pa'i phyir ro zhes smras pa gang yin pa de ma grub po zhes zer ro zhes bya ba ni/ slob dpon de ba shar mas rang gi 'grel pa dkar po 'char ba nyid kyi skabs su skye bar smra ba gzhan gyi phyogs snga mar bzhag pa'i tshig de ma grub po zhes slob dpon de ba shar ma nyid kyis sun dbyung ba yin no/ /der skye ba smra ba gzhan gyi phyogs snga mar bzhag pa'i tshig gang yin zhe na/ dngos po rnams skye ba kho na yin te/ rgyu yod pa'i phyir ro zhes smras pa gang yin pa'o/ /slob dpon de ba shar ma nyid kyis de ma grub po zhes sun dbyung ba'i gtan tshigs ni sgrub par byed pa'i phyir rgyur 'dod na/ de yang 'bras bu yod pa dang med pa dang gnyi ga'i bdag nyid la yang mi srid pa'i rgyur brjod pa la 'jug pa'i byed rgyu med pa'i phyir/ rgyu'i rgyu nyid mi rigs pas zhes gong du bstan pa nyid yin te/ slob dpon de ba shar ma'i rnam par bshad pa de ni 'grel pa byed pa nyid kyang 'dod do/ /gzhan dag na re zhes bya ba ni/ slob dpon bud+d+ha pA li tas rang gi dbu ma'i 'grel pa bud+d+ha pA li ta zhes bya ba byas pa las tshig le'ur byas pa 'di'i don 'di ltar rnam par bshad pa byed do zhes bya bar sbyar ro/ /don dam par dngos po rnams skye ba kho na yin te/ rgyu yod pa'i phyir zhes smras pa ni zhes bya ba ni/ slob dpon bud+d+ha pA li tas rang gi 'grel pa bud+d+ha pA li ta nyid kyi skabs su skye bar smra ba gzhan gyi phyogs snga mar bzhag pa'i tshig yin te/ de la don dam par dngos po skye ba kho na yin te zhes bya ba ni phyogs yin la/ rgyu yod pa'i phyir ro zhes bya ba ni gtan tshigs yin par sbyar ro/ /dngos po yod pa dang med pa dang gnyi ga'i bdag nyid mngon par sgrub par mi byed pa'i phyir ro/ /rgyu'i mtshan nyid mi 'thad pas gtan tshigs kyi don ma grub pa nyid do zhes zer ro zhes bya ba ni slob dpon bud+d+ha pA li ta nyid kyi phyogs snga mar de'i gtan tshigs kyi don ma grub pa nyid do zhes sun dbyung ba'i phyogs phyi ma yin te/ de la gtan tshigs kyi don ma grub pa nyid do zhes bya ba ni skye bar smra ba'i phyogs snga ma'i gtan tshigs kyi don rgyu yod pa'i phyir ro zhes smras pa de ma grub pa nyid do zhes zer ba yin no/ /ci'i phyir zhe na/ dngos po yod pa dang med pa dang gnyi ga'i bdag nyid mngon par sgrub par mi byed pa'i phyir/ rgyu mtshan nyid mi 'thad pas zhes bya bas rang gi gtan tshigs bstan to/ /de ni bzang po ma yin te zhes bya ba ni 'grel pa byed pa nyid kyis slob dpon bud+d+ha pA li ta'i rnam par bshad pa de sun dbyung ba'i tshig yin no/ /de ci'i phyir bzang po ma yin zhe na/ de'i phyir lan btab zin pa'i phyir ro zhes bya ba smras te 'bras bu bdag nyid yod pa skye bar mi byed pa zhes bya ba yang dam bcas pa tsam du zad de/ gtan tshigs kyang med/ dpe yang med/ 'bras bu bdag nyid med pa skyed par mi byed pa zhes bya ba yang dam bcas pa tsam du zad de/ gtan tshigs kyang med/ dpe yang med pa yin/ 'bras bu gnyi ga'i bdag nyid skyed par mi byed pa zhes bya ba yang dam bcas pa tsam du zad de/ gtan tshigs kyang med/ dpe yang med pas rig tsam gyis ni gzhan gyi phyogs sun 'byin par mi 'gyur ro zhes sngar lan btab zin pa'i phyir/ de ni bzang po ma yin no/ /de ltar re zhig rgyu'i rkyen gyis rkyen nyid mi rigs so zhes bya ba ni de ltar rigs pas dpyad na re zhig rgyu'i rkyen ces tha snyad gdags pa'i rkyen nyid don dam par skyed par byed pa nyid yin par mi rigs so/ / //bam po nyi shu pa/ da ni dmigs pa'i rkyen gyi rkyen nyid kyang ji ltar mi rigs pa de ltar dpyad par bya ste zhes bya ba ni/ ji ltar rgyu'i rkyen ces tha snyad gdags pa'i rkyen nyid rigs pas dpyad na don dam par rkyen nyid du mi rigs pa de ltar/ da ni dmigs pa'i rkyen ces tha snyad gdags pa'i rkyen nyid kyang rigs pas dpyad na don dam par rkyen nyid du mi rigs pa de ltar dpyad par bya ste shes bya bar sbyar ro/ /de'i phyir/ yin pa'i chos 'di dmigs pa ni/ /med pa kho nar nye bar bstan/ /zhes bya ba la zhes bya bas ni 'di skad bstan te/ tshig le'ur byas pa 'dis dmigs pa'i rkyen 'gog par byed do/ /de la yin pa'i chos 'di zhes bya ba ni khyad par gyi gzhi yin la/ dmigs pa ni/ med pa kho nar nye bar bstan/ /zhes bya ba ni de'i khyad par yin te/ dmigs pa med pa yin pa'i chos mig gi rnam par shes pa la sogs pa blo la bzhag pa 'di ni don dam par dmigs pa med pa kho nar bcom ldan 'das kyis nye bar bstan to zhes bya bar sbyar ro/ /yin pa'i zhes bya ba ni gyur pa'i gzhi zhes bya ba'i tha tshig go zhes bya ba ni/ dmigs pa med pa ma yin pa'i zhes bya ba ni dmigs pa med par gyur pa'i zhes bya ba'i tha tshig go/ /chos zhes bya ba ni rang gi mtshan nyid 'dzin pa'i phyir ro zhes bya ba ni mig gi rnam par shes pa la sogs pa nyid chos zhes bya'o/ /de dag gi rang gi mtshan nyid gang zhe na/ rnam par shes par byed pa nyid dang byed pa med pa nyid de/ rang gi mtshan nyid de dag 'dzin pa'i phyir chos zhes bya'o/ /'di zhes bya ba ni mig gi rnam par shes pa la sogs pa blo la bzhag pa bstan pa'o zhes bya ba ni/ mig gi rnam par shes pa dang rna ba dang sna dang lce dang lus dang yid kyi rnam par shes pa dag blo la bzhag cing blo la bkod pa mngon sum du snang ba dang 'dra ba 'di bstan cing bshad pa'o/ /dmigs pa zhes bya ba ni de dag dmigs par bya ba yin pa ste/ dmigs pa ni gzung ba zhes bya ba'i don gang yin pa'o zhes bya ba ni gzugs dang / sgra dang / dri dang / ro dang / reg dang chos zhes bya ba'i dngos po de dag ni dmigs par bya ba dang gzung bar bya ba yin pas dmigs pa zhes bya'o/ /dmigs pa ni gzung ba zhes bya ba'i don gang yin pa'o zhes bya ba ni yul zhes bya ba'i tha tshig go/ /dmigs pa med pa kho nar zhes bya ba ni dmigs pa med pa nyid du'o zhes bya ba ni dmigs pa med pa yin pa'i chos mig gi rnam par shes pa la sogs pa blo la bzhag pa 'di ni don dam par dmigs pa med pa kho nar zhes bya ba dmigs pa nyid du bcom ldan 'das kyis nye bar bstan to zhes bya bar sbyar ro/ /ji ltar dmigs pa med ce na/ don dam par de dag skye ba bkag pa'i phyir ro zhes bya ba ni dmigs pa med pa yin pa'i chos mig gi rnam par shes pa la sogs pa blo la bzhag pa 'di ji ltar dmigs pa med ce na/ don dam par bcom ldan 'das kyis mig gi rnam par shes pa la sogs pa dmigs par byed pa de dag skye ba bkag pa'i phyir/ gzugs la sogs pa dmigs pa yang med pa'i phyir ro/ /ci ste gzhan dag 'di skad ces ma skyes pa ni dmigs par mi byed de med pa'i phyir ro zhes bya ba dang / skyes pa yang dmigs par mi byed de grub zin pa'i phyir ro zhes bya ba ni bden na/ 'on kyang rnam par shes pa skye bzhin pa ni yul la dmigs par byed do zhes zer ba'i phyogs snga ma khong nas dbyung ba de'i lan du 'dir 'grel pa byed pa nyid kyis/ skye bzhin pa la yang dmigs pa med de skye bzhin pa'i phyir gzugs bzhin no zhes bya ba smras te/ 'dir yang skye bzhin pa la yang zhes bya ba 'di ni chos can yin te/ rnam par shes pa skye bzhin pa la yang zhes bya ba chos can la/ dmigs pa med de zhes bya ba'i chos khyad par can sgrub pa yod pa'i phyir ro/ /dmigs pa med de zhes bya ba 'di ni bsgrub par bya ba chos yin te/ rnam par shes pa skye bzhin pa la yang zhes bya ba chos can de la don dam par dmigs pa med de zhes bya ba chos khyad par can de bsgrub par bya ba yin pa'i phyir ro/ /skye bzhin pa'i phyir ro zhes bya ba 'di ni sgrub pa'i chos yin te/ gang dang gang skye bzhin pa de dang de la dmigs pa med do zhes bsgrub par bya ba'i phyir ro/ /gzugs bzhin no zhes bya ba 'di ni dpe yin par sbyar te/ dper na bum pa dang snam bu la sogs pa skye bzhin pa'i phyir de dag la dmigs pa med pa de bzhin du/ rnam par shes pa skye bzhin pa la yang gzugs la sogs pa dmigs pa med do/ /gang gi dmigs pa'i rkyen gzugs dang chos thams cad kyi bar dag yin par mdo sde'i mtha' las rnam par gzhag pa de'i dgag pa yang de ltar bya'o/ /ci'i phyir dgag par bya zhe na/ rnam par shes pa dmigs par byed pa yin pa'i byed rgyu ni dmigs pa nyid yin pas dmigs par byed pa bkag na dmigs pa yang bkag pa kho nar 'gyur ba de'i phyir/ de lta yin pa'i chos 'di dmigs pa med pa kho nar bcom ldan 'das kyis don dam par nye bar bstan cing bka' stsal to/ /'o na chos mngon pa la dmigs pa dang bcas pa dag tu zhe na/ rnam par shes pa'i tshogs drug go zhes ma gsungs sam zhe na/ de'i lan du/ dmigs pa dang bcas pa zhes bya ba ni tha snyad kyi bden pa'i lugs rnam par gzhag pa'i phyir te zhes bya ba la sogs pa smras te/ chos mngon pa las rnam par shes pa'i tshogs drug po dag dmigs pa dang bcas par gsungs pa ni bden mod kyi/ de ni tha snyad kyi bden pa'i lugs nges par rnam par gzhag cing yongs su bstan pa'i phyir gsungs pa yin gyi/ don dam par dmigs pa dang bcas pa nyid du gsungs pa ni ma yin no/ /tha snyad kyi bden pa'i lugs rnam par gzhag pa'i phyir dmigs pa dang bcas pa zhes gsungs pa de yang ji lta bu zhe na/ de'i phyir dmigs pa gang gis skye ba ni der snang ba skye ba'i phyir dmigs pa dang bcas pa zhes bya'i nor can bzhin du dus gcig kho nar 'brel pa'i phyir ni ma yin no zhes bya ba smras so/ /'di skad bstan te/ dmigs pa ser po dang sngon po la sogs pa gang gi rnam par shes pa skye ba na gang gi phyir yul sngon po dang ser po la sogs pa dag la rnam par shes pa de yang de'i rnam pa sngon po dang ser po la sogs par snang ba skye ba de'i phyir dmigs pa dang bcas pa zhes bya'i/ ji ltar lha sbyin nor dang ldan pa bzhin du nor dang nor can gnyi ga dus gcig kho nar 'brel pa lta bu'i phyir dmigs pa dang bcas pa zhes bya ba ni ma yin no/ /de'i phyir dmigs pa dang bcas pa zhes bya ba ni tha snyad du yang dag pa ma yin pa las sgro btags pa yin te dus gcig na med pa'i phyir ro/ /de'i lan ni 'ga' zhig gis de'i phyir/ de ltar chos ni dmigs med na/ /zhes bya ba ni don dam par dmigs par byed pa med pa'i phyir ro zhes bya ba ni don dam par dmigs par byed pa rnam par shes pa med pa'i phyir ro zhes bya ba'i tha tshig go/ /gal te rnam par shes pa ma skyes na de la dmigs par byed pa nyid dgag par mi rigs so zhes zer na/ de'i lan ni 'ga' zhig gis dmigs par byed pa ma yin pa'i dmigs pa nyid yongs su brtags pa gang mi 'thad pa'i phyir zhes bya ba 'di yin te/ skye bar smra ba 'ga' zhig gis rnam par shes pa dmigs par byed pa ma yin pa'i dmigs pa gzugs la sogs pa nyid yod par yongs su brtags pa yang mi 'thad pa'i phyir te/ log par brtags pa de 'gog par byed do/ /de ltar de dmigs pa nyid mi 'thad pa'i phyir/ dmigs pa yod par ga la 'gyur/ /'di la gzugs la sogs pa dmigs pa med pa kho na yin no zhes bya ba'i tha tshig gi don te/ tshig le'ur byas pa'i don ni de yin no zhes bya ba'i tha tshig go/ /don de gsal bar bya ba'i phyir/ dper na mtshams med pa byed pa la mngon par rtogs pa yod pa ga la 'gyur zhes bya ba bzhin no zhes khungs bstan pa yin te/ 'dis ci bstan zhe na/ mtshams med pa byed pa la bden pa mngon par rtogs pa yod par ga la 'gyur te mi 'gyur ba bzhin du/ 'dir yang dmigs pa yod par ga la 'gyur te mi 'gyur ro zhes bstan to/ /de lta na yang gtan tshigs de nyid kyi don ma grub pa nyid dang don 'gal ba nyid do zhes bya ba ni gal te don dam par rkyen bstan pa'i phyir zhes gtan tshigs sbyor bar 'dod na ni de gang yang rung ba la ma grub pa'i don de nyid do/ /'on te gnyi ga la grub par bya ba'i phyir kun rdzob tu rkyen bstan pa'i phyir zhes gtan tshigs sbyor bar 'dod na ni des na kun rdzob tu rkyen bstan pa de ni don dam par ngo bo nyid med pa nyid dang / med na mi 'byung ba'i 'brel pa yod pas 'dir yang khyod ngo bo nyid med par sgrub pas khyod nyid ngo bo nyid yod par 'dod pa dang 'gal ba'i don nyid do/ /gzhan dag la yang rnam par brtags pa mtshungs par ltag chod sbyor bar byed de zhes bya ba ni chos mngon pa pa gzhan dag dbu ma pas sngar skye bzhin pa la yang dmigs pa med de skye bzhin pa'i phyir/ gzugs bzhin no zhes sgrub pa bstan pa gang yin pa de la mi rigs par brgal zhing brtag pa mtshungs so zhes rigs pa can gyi sgyu thabs kyis ltag chod sbyor bar byed pa yin no/ /gzugs ni dmigs pa med pa yin te/ gzugs kyi phung por gtogs pa'i phyir ro zhes bya ba gang yin pa de ni bstan bcos las kyang dmigs pa med pa'i chos rnams gang zhe na/ gzugs dang mya ngan las 'das pa'o zhes 'byung bas rigs ni zhes bya ba ni/ chos mngon pa pa dag gis dbu ma pa'i dpe gzugs bzhin no zhes bya ba der rung bar sgrub pa'i tshig yin te/ dbu ma pa khyed na re/ gzugs ni dmigs pa med pa yin te/ gzugs kyi phung por gtogs pa'i phyir ro zhes zer ba gang yin pa de ni rigs so/ /ci'i phyir rigs she na/ chos mngon pa'i bstan bcos las kyang / dmigs pa med pa'i chos rnams gang zhe na/ gzugs dang mya ngan las 'das pa'o zhes 'byung bas de'i phyir gzugs la dmigs pa nyid med do zhes bya ba de ni bden no/ /sems dang sems las byung ba rnams la dmigs pa med pa nyid du khas len pa gang yin pa ni dmigs pa dang bcas pa'i chos rnams gang zhe na/ 'di lta ste/ sems dang sems las byung ba rnams so zhes byung ba de khas len pas mi rigs so zhe na zhes bya ba ni chos mngon pa pa dag gis dbu ma pa'i sgrub pa sems dang sems las byung ba rnams la dmigs pa med do zhes bya ba de mi rung bar sgrub pa'i tshig yin te/ dbu ma pa khyed sems dang sems las byung ba rnams la dmigs pa med pa nyid du khas len pa gang yin pa de ni mi rigs so/ /ci'i phyir mi rigs she na/ chos mngon pa'i bstan bcos las kyang / dmigs pa dang bcas pa'i chos rnams gang zhe na/ 'di lta ste/ sems dang sems las byung ba rnams so zhes 'byung la/ khyed kyang sangs rgyas pa yin pas khyed kyis kyang lung de snga nas khas blangs pas de'i phyir 'dis dmigs pa med pa nyid du khas len pa la gnod par 'gyur bas/ de'i phyir sems dang sems las byung ba rnams la dmigs pa med pa nyid du sgrub pa de ni mi rigs so zhes zer ro/ /de skad ces zer ba de'i lan du 'dir 'grel pa byed pa nyid kyis/ de ni rigs pa ma yin te/ /dpe sgrub pa'i phyir ro zhes bya ba smras so/ /'di skad bstan te/ khyod kyi gzugs ni dmigs pa med pa yin te/ gzugs kyi phung por gtogs pa'i phyir ro zhes bya ba gang yin pa de ni bstan bcos las kyang dmigs pa med pa'i chos rnams gang zhe na/ gzugs dang mya ngan las 'das pa'o zhes 'byung bas rigs na zhes bya ba'i lung smras pa gang yin pa des kho bos skye bzhin pa la yang dmigs pa med de/ skye bzhin pa'i phyir gzugs bzhin no zhes bya bas rnam par shes pa skye bzhin pa la dmigs pa med pa nyid du bsgrub par bya ba gang yin pa de'i dpe gzugs las blangs pa de la bsgrub pa'i phyir kho bo dpe grub pas khyod kyi sgrub pa de ni rigs pa ma yin no zhes bstan to/ /ci ste 'di skad ces 'byung ba las gyur pa'i gzugs nyid ni gzugs yin pa'i phyir de la dmigs pa med pa bden mod kyi/ 'byung ba las gyur pa ma yin pa rnam par shes pa skye bzhin pa ni skye bzhin pa nyid yin pa'i phyir de la dmigs pa yod de/ dper na 'byung ba las gyur pa ma yin pa sems dang sems las byung ba'i chos rnams skye bzhin pa'i phyir de dag gzung ba'i yul 'dzin par b yed pa de bzhin du 'byung ba las gyur pa ma yin pas shes pa yang skye bzhin pa'i phyir de gzung ba'i yul 'dzin par gyur pa de la dmigs pa yod do zhes zer ba'i phyogs snga ma khong nas dbyung ba de'i lan du 'dir 'grel pa byed pa nyid kyis 'byung ba las gyur pa ma yin pa nyid gtan tshigs su brjod na yang dpe med pa'i phyir ro zhes bya ba smras so/ /'di skad bstan te/ 'byung ba las gyur pa ma yin pa rnam par shes pa skye bzhin pa nyid dmigs pa yod pa'i gtan tshigs su brjod na yang khyed la dpe med pa'i phyir de yang rigs pa ma yin te/ ji ltar sems kyi dmigs pa nyid 'gog par byed pa de bzhin du sems las byung ba rnams kyi dmigs pa yang 'gog par 'gyur bas de'i phyir sems la dmigs pa yod pa'i dpe sems las byung ba rnams la khas blangs pa de med pa'i phyir ro/ /gal te sems dang sems las byung ba rnams la dmigs pa med pa nyid du khas len na lung las dmigs pa dang bcas pa'i chos rnams gang zhe na/ 'di lta ste/ sems dang sems las byung ba rnams so zhes 'byung ba de khas blangs pa la gnod par 'gyur bas mi rigs so zhes zer ba'i phyogs snga ma khong nas dbyung ba/ de'i lan du 'dir 'grel pa byed pa nyid kyis gal te gzung ba ni dmigs pa'o zhes de dag gi don la rtog na yang sems dang sems las byung ba'i gzung ba nyid 'gog par 'gyur ba'i phyir te zhes bya ba la sogs pa smras te/ gal te gzung ba ni dmigs pa'o zhes de dag gi don la rtog na yang zhes bya ba ni/ gal te chos mngon pa pa dag 'di skad ces lung las sems dang sems las byung ba rnams las gzung ba yod par gsungs pa nyid dmigs pa yin no zhes sems dang sems las byung ba de dag gi gzung ba'i don la rtog na yang ngo / /de ltar rtog na de yang rigs pa ma yin te/ ci'i phyir zhe na/ sems dang sems las byung ba'i gzung ba nyid 'og nas 'gog par 'gyur ba'i phyir ro/ /de nyid bstan pa'i phyir/ ji skad gsungs pa'i tshul nyid kyis don dam par rnam par shes pa dmigs par byed pa nyid du khas ma blangs pa'i phyir ro zhes bya ba smras so/ /'di skad bstan te/ shes rab kyi pha rol tu phyin pa'i tshul ji skad gsungs pa nyid kyis/ de la sems dang sems las byung ba rnams kyi dmigs pa nyid yod par ma gsungs pa'i phyir ro/ /shes rab kyi pha rol tu phyin pa'i tshul de nyid bstan pa'i phyir/ bcom ldan 'das kyis kyang 'phags pa shes rab kyi pha rol tu phyin pa nyis stong lnga brgya pa las/ gang gi tshe gzugs stong pa'am mi stong par rnam par rtog par mi byed pa de'i tshe na byang chub sems dpa' shes rab kyi pha rol tu phyin pa la spyod pa yin no/ /de skad ces bka' stsal pa dang / bcom ldan 'das la byang chub sems dpa' rab kyi rtsal gyis rnam par gnon pas zhus pa/ bcom ldan 'das byang chub sems dpa' de ltar spyod na ci la dmigs/ bcom ldan 'das kyis bka' stsal pa/ rab kyi stsal gyis rnam par gnon pa/ gzhan yang byang chub sems dpa' de ltar spyod na gzugs la mi dmigs so/ /byang chub dang ldan pa'i bar la mi dmigs so zhes bya bas 'di skad bstan te/ gang shes rab kyi pha rol tu phyin pa la spyod pa de ni gzugs la sogs pa rnam pa thams cad mkhyen pa nyid kyi bar gyi yul ci la yang mi dmigs so/ /de ci'i phyir zhe na/ rab kyi rtsal gyis rnam par gnon pa chos thams cad ni dmigs pa med de/ gang la rnam par shes pa 'di dag gi dmigs par 'gyur ba'i gzung ba ni chos rnams la cung zad kyang med pa'i phyir ro/ /rab kyi rtsal gyis rnam par gnon pa 'di ltar gzugs ni gzugs kyi spyod yul ma yin pa rnam par shes pa'i bar yang rnam par shes pa'i spyod yul ma yin no zhes bya bas ni 'di skad bstan te/ ji ltar 'jig rten pa dang 'jig rten las 'das pa thams cad ni phung po lnga yin la/ de la yul can yang phung po lnga pa'i mtshan nyid yul yang phung po lnga pa'i mtshan nyid yin pas de dag ni ma skyes pa'i phyir/ gzugs kyang gzugs la mi dmigs la/ rnam par shes pa'i bar yang rnam par shes pa la mi dmigs pas de'i phyir chos 'ga' yang gang gi spyod yul ma yin no/ /rab kyi rtsal gyis rnam par gnon pa spyod yul ma yin pa'i phyir/ gzugs kyis gzugs mi shes mi mthong ngo / /rnam par shes pa'i bar gyis kyang rnam par shes pa mi shes mi mthong ngo / /'dir bcom ldan 'das la zhus pa/ gang zag gzugs kyis gzugs ma 'tshal mi mthong ba dang / rnam par shes pa'i bar gyis kyang rnam par shes pa ma 'tshal mi mthong ba de ci zhes bgyi/ bcom ldan 'das kyis bka' stsal pa/ gzugs dang tshor ba dang 'du shes dang 'du byed dang rnam par shes pa rnams mi shes mi mthong ba gang yin pa de ni shes rab kyi pha rol tu phyin pa zhes bya ste/ 'di la skrag par mi bya'o zhes gsungs so/ /de ltar dmigs pa'i rkyen kyang brtags zin to zhes bya ba na dmigs pa'i rkyen ces tha snyad gdags pa'i rkyen nyid kyang ji ltar don dam par rkyen nyid du mi rigs pa de ltar dpyad zin to/ /da ni de ma thag pa'i rkyen gyi skabs su bab pas de brtag par bya'o zhes bya bas ni/ de ltar dmigs pa'i rkyen kyang brtags zin pas de'i 'og tu de ma thag pa'i rkyen bstan pa brtag pa'i skabs su bab pas de'i phyir de dpyad cing brtag par bya'o zhes bya ba'i tha tshig go/ /'di la don dam par chos thams cad rnam pa thams cad du bkag pa'i phyir zhes bya ba la 'di la zhes bya ba ni dbu ma'i bstan bcos la'o/ /don dam par zhes bya ba ni don dam pa'i yul la'o/ /chos thams cad ces bya ba ni phyi rol dang nang dang 'jig rten pa dang 'jig rten las 'das pa'i chos thams cad do/ /rnam pa thams cad du bkag pa'i phyir zhes bya ba ni bdag dang gzhan dang gnyis dang rgyu med pa rnam pa thams cad las skye ba bkag pa'i phyir ro/ /chos rnams ma skyes so zhes de bstan zin pas zhes bya ba ni de'i phyir chos rnams ma skyes so zhes de rigs pas dpyad pa chen pos bstan zin pas so/ /de'i phyir chos rnams ma skyes pa ma yin na 'gag pa 'thad par mi 'gyur ro/ /ma skyes pa'i phyir mgo gnyis pa dgag pa bzhin no zhes bya ba ni de'i phyir chos rnams ma skyes pa yin na/ 'gag pa 'thad par mi 'gyur te/ dper na lam po cher zhugs pa'i mi'i mgo bo gnyis pa ma skyes shing med pa'i phyir/ chom rkun pa la sogs pas dgag cing gcad du med pa de bzhin du sems dang sems las byung ba'i chos rnams kyang ma skyes pa'i phyir dgag par mi 'gyur ro/ /des cir 'gyur zhe na zhes bya ba ni pha rol po dbu ma pa la 'dri ba ste/ gal te sems dang sems las byung ba'i chos rnams la 'gag pa med na ci nyes zhes 'dri ba yin no/ /de'i phyir slob dpon gyis/ de'i phyir de ma thag mi rigs/ /zhes bya ba gsungs te/ gang gi phyir 'gag pa med pa de'i phyir de ma thag pa'i rkyen nyid brtag par mi rigs so/ /don dam par ni zhes bya ba ni don dam par de ma thag par rkyen nyid mi rigs so zhes bya bar sbyar ro/ /de'i phyir de nyid don ma grub pa nyid dang don 'gal ba nyid do zhes bya ba ni gal te don dam par de ma thag pa'i dngos po rkyen nyid yin par 'dod na ni don ma grub pa nyid do/ /'on te kun rdzob tu de ma thag pa'i dngos po'i rkyen nyid yin par 'dod na ni khyod don dam par de ma thag pa'i rkyen nyid du sgrub pa dang 'gal ba'i don nyid yin no/ /yang na spyir skye ba khas blangs pa na yang bshad par bya ste zhes bya ba ni yang na kho bo cag dbu ma pa don dam par skye ba khas mi len mod kyi/ 'jig rten gyi tha snyad du spyir sems dang sems las byung ba'i chos rnams skye bar khas blangs na yang don dam par de ma thag pa'i rkyen nyid ji ltar mi rigs pa de ltar bshad par bya ste zhes bya bar sbyar ro/ /'di la de ma thag pa ni 'di yin te/ sems dang sems las byung ba'i tshogs 'gags pa de de ma thag pa'i rkyen yin par 'dod na zhes bya ba ni 'di la kun rdzob tu de ma thag pa'i rkyen ni 'di lta bu yin par 'dod do/ /sems dang sems las byung ba'i tshogs 'gags ma thag pa gang yin pa de ltar byung ba'i tshogs rigs mthun pa skyed par byed pas de ma thag pa'i rkyen yin par 'dod na'o/ /de yang tshogs skye bar 'dod pa'i rkyen nyid du mi rigs te/ 'gags pa'i phyir rnam par shes pa 'gags nas yun ring du lon pa bzhin nam gzugs bzhin no zhes bya ba la/ 'dir yang de yang zhes bya ba 'di ni chos can yin te/ sems dang sems las byung ba'i tshogs 'gags pa gang yin pa de yang ngo / /tshogs skye bar 'dod pa'i rkyen nyid du mi rigs te zhes bya ba 'di ni bsgrub par bya ba chos yin te/ sems dang sems las byung ba'i tshogs phyis skye bar 'dod pa skye ba la mngon par phyogs pa'i rkyen nyid du mi rigs par bsgrub pa'o/ /'gags pa'i phyir zhes bya ba 'di ni sgrub pa'i chos yin te/ sems dang sems las byung ba'i tshogs 'gags pa gang yin pa de ni 'gags pa'i phyir med pa yin pas tshogs skye bar 'dod pa'i rkyen nyid du mi rigs so/ /rnam par shes pa 'gags nas yun ring du lon pa bzhin nam gzugs bzhin no zhes bya ba 'di ni dpe yin te/ dper na rnam par shes pa 'gags nas yun ring du lon pa ni sems kyi skad cig du mas bar du chod pa'i phyir tshogs skye bar 'dod pa'i rkyen nyid du mi rigs pa dang / dper na gzugs 'gags pa yang sems dang sems las byung ba'i tshogs da ltar skye ba'i de ma thag pa'i rkyen nyid du mi rigs pa de bzhin du sems dang sems las byung ba'i tshogs 'gags pa gang yin pa de yang tshogs skye bar 'dod pa'i rkyen nyid du mi rigs so/ /de ci'i phyir 'gags pa rkyen nyid du mi rigs she na/ de'i phyir de la ni 'gags na rkyen kyang gang zhig yin zhes bya ba gsungs te/ de ni rkyen nyid du mi srid pa kho na yin te/ 'gags pas ni dngos po skye bar 'dod pa la phan 'dogs par mi nus pa'i phyir ro zhes bya bar dgongs so zhes bya ba ni 'di skad bstan te/ 'gag pa med pas ni sems dang sems las byung ba'i tshogs skye bar 'dod pa la cung zad kyang phan 'dogs par mi byed de med pa'i phyir ro/ / gang phan 'dogs par mi nus pa de rkyen nyid yin par mi rigs so zhes bya bar dgongs so/ /kyang zhes bya ba'i sgra ni de ma thag pa'i rkyen nyid ma yin pa dang / spyi'i rkyen kyang ma yin no zhes dgag pa bsdu ba'i phyir ro zhes bya ba ni/ 'gags na rkyen kyang gang zhig yin/ /zhes bya ba'i kyang zhes bya ba'i sgra ni de ma thag pa'i rkyen nyid 'ba' zhig kyang ma yin la/ gzhan dag bcas su zin kyang rkyen nyid ma yin no zhes dgag pa bsdu ba'i phyir ro/ /ci ste rgyu dang rkyen so sor nges pa'i dbang gis dngos po skye bzhin pa na/ 'gags bzhin pas go skabs 'byed pas phan 'dogs pa'i phyir dang / gal te de las gzhan pa 'das pa'i skad cig dag gis bar du ma chod pa'i phyir de ma thag pa'i rkyen nyid grub pas nyes pa med do zhe na zhes bya ba ni pha rol po'i bsam pa bstan pa ste/ de la rgyu dang rkyen so sor nges pa'i dbang gis dngos po skye bzhin pa na zhes bya ba la/ rgyu so sor nges pa zhes bya ba ni mig dang rna ba dang sna dang lce dang lus zhes bya ba rnams so/ /rkyen so sor nges pa zhes bya ba ni gzugs dang sgra dang dri dang ro dang reg bya zhes bya ba rnams so/ /dbang gis zhes bya ba ni nus pa ste rgyu dang rkyen so sor nges pa'i nus pa dbang des so/ /dngos po skye bzhin pa na zhes bya ba ni mig gi rnam par shes pa la sogs pa'i dngos po skye bzhin pa na'o/ /'gags bzhin pas go skabs 'byed pas phan 'dogs pa'i phyir zhes bya ba ni gang gi phyir skad cig snga ma ma 'gags na ma 'ongs pa mi skye ba de'i phyir/ rgyu dang rkyen so sor nges pa'i dbang gis dngos po skye bzhin pa na 'gags bzhin pas go skabs 'byed pas phan 'dogs pa'i phyir/ de ma thag pa'i rkyen nyid grub pas nyes pa med do zhes zer ba yin no/ /gal te de las gzhan pa 'das pa'i skad cig dag gis bar du ma chod pa'i phyir de ma thag pa'i r kyen nyid 'grub pas nyes pa med do zhe na zhes bya ba ni 'gags ma thag pa'i skad cig de las gzhan pa 'das pa'i skad cig gang dag yin pa de dag gis bar du ma chod pa'i phyir des na 'gags pa spyi yin pas sems kyi skad cig bzhin du bar du ma chod pa'i sems kyi skad cig rkyen ma yin par 'gog pa de mi rigs pa'i phyir ro/ /de ma thag pa'i rkyen nyid 'grub pas nyes pa med do zhe na zhes bya ba ni/ 'gags pa'i phyir rnam par shes pa 'gags nas yun ring du lon pa bzhin nam gzugs bzhin no zhes bya ba lta bur rjes su dpag pa'i gnod par mi 'gyur ro zhes bya ba'i tha tshig go/ /de'i lan ni gzugs can ma yin pa rnams yul na mi gnas pa'i phyir dang zhes bya ba 'di yin te/ 'di la gang dag gzugs can gzugs dang ldan pa de dag la ni go skabs 'byed par rigs te/ dper na bum pa bsal ba der phru ba'i go skabs yod par 'gyur ba lta bu yin gyi/ gang dag gzugs can ma yin pa gzugs dang mi ldan pa sems dang sems las byung ba de dag la ni go skabs 'byed pa mi rigs pa'i phyir/ rgyu dang rkyen so sor nges pa'i dbang gis dngos po skye bzhin pa na 'gags bzhin pas go skabs 'byed pas phan 'dogs pa'i phyir/ /de ma thag pa'i rkyen nyid grub pas nyes pa med do zhes bya ba de lan du mi rung ngo / /gzhan yang / drug po 'das ma thag pa yi/ /rnam shes gang yin de yid de/ /zhes bya bas 'gags ma thag pa'i yid rkyen nyid yin pa'i phyir de lan du mi rung ngo zhes bya ba ni grub pa'i mtha' las mig dang rna ba dang sna dang lce dang lus dang yid ces bya ba'i rnam par shes pa drug po dag 'das ma thag pa'i rnam par shes pa gang yin pa de yid yin par 'dod pas de'i phyir 'gags ma thag pa'i yid rkyen nyid yin pa'i phyir/ de las gzhan pa 'das pa'i skad cig dag gis bar du ma chod pa'i phyir de ma thag pa'i rkyen nyid grub pas nyes pa med do zhes bya ba de yang lan du mi rung ngo / /'gags bzhin pa rkyen nyid du rtog na yang kha cig na re/ dus mnyam pa'i phyir de ma thag pa'i rkyen nyid du mi rung ngo zhe'o zhes bya ba ni/ gang dag 'gags bzhin pas go skabs 'byed pas rkyen nyid du rtog na yang de dag la 'grel pa byed pa nyid la sogs pa dbu ma pa kha cig na re/ de dag gi 'gags bzhin pa zhes bya ba ni da ltar byung ba la bya ste/ des na rgyu dang 'bras bu gnyis dus gcig pa nyid du thal bar 'gyur ba'i phyir de yang de ma thag pa'i rkyen du mi rung ngo zhes zer ro/ /gzhan dag ni tshigs su bcad pa'i phyed 'og ma/ de'i phyir de ma thag mi rigs/ /'gags na rkyen kyang gang zhig yin/ /zhes bya bas ni ma skyes pa la yang bya ste/ kyang zhes bya ba'i sgra ni 'dir ma skyes pa la ltos par blta bar bya'o/ /sa bon dang myu gu zhig pa dang ma skyes pa gnyis ni med pa'i phyir sa bon dang myu gu 'gag pa dang skye ba gnyis rgyu med par thal bar 'gyur ro zhes rnam par bshad pa byed do zhes bya ba ni/ slob dpon bud+d+ha pA li ta la sogs pa dag tshigs su bcad pa'i phyed 'og ma de'i phyir de ma thag mi rigs/ 'gags na rkyen kyang gang zhig yin/ /zhes bya ba la 'di skad ces rnam par bshad pa byed do zhes bya bar sbyar ro/ /tshigs su bcad pa'i phyed 'og ma/ /de phyir de ma thag mi rigs/ /'gags na rkyen kyang gang zhig yin/ /zhes bya ba ni ma skyes pa la yang bya ste/ kyang zhes bya ba'i sgra ni 'dir ma skyes pa la ltos par blta bar bya'o zhes bya ba ni sa bon 'gags pa yang rkyen nyid ma yin la/ myu gu ma skyes pa med pa nam mkha'i me tog lta bu la yang rkyen gyis phan gdags par mi nus so zhes bya ba'i tha tshig go/ /de bstan pa'i phyir sa bon dang myu gu zhig pa dang ma skyes pa gnyis ni med pa'i phyir zhes bya ba la sogs pa smras te/ sa bon zhig pa dang myu gu ma skyes pa gnyis ni med pa yin pas sa bon dang myu gu zhig pa dang ma skyes pa gnyis ni med pa'i phyir ro/ /de ltar sa bon dang myu gu zhig pa dang ma skyes pa gnyis med pa'i phyir cir 'gyur zhe na/ de'i phyir sa bon dang myu gu 'gag pa dang skye ba gnyis rgyu med par thal bar 'gyur ro zhes bya ba smras te/ 'di la sa bon ni myu gu la nus pa phul nas 'gag par rigs na de yang 'gags pa la med pas de'i phyir sa bon 'gag pa la rgyu med par thal bar 'gyur ro/ /myu gu yang nus pa yongs su bzung nas skye bar rigs na nus pa yongs su bzung ba de yang ma skyes pas byed par mi nus pas de'i phyir myu gu skye ba la yang rgyu med par thal bar 'gyur ro zhes rnam par bshad pa byed do/ /de ni bzang po ma yin te zhes bya ba la sogs pa ni 'grel pa byed pa nyid kyis/ gnas brtan bud+d+ha pA li tas rnam par bshad pa de rigs pa ma yin par sgrub pa'i tshig yin no/ /gal te don de 'dod na zhes bya ba ni/ gnas brtan bud+d+ha pA li ta'i rnam par bshad pa'i don de 'dod na de la skyon 'di lta bu yod do zhes bya bar sbyar ro/ /'gags pa'i 'gag pa la rgyu med pas zhes bya ba ni sa bon 'gags pa'i 'gag pa la rgyu med pa'i phyir te/ 'gags pas nus pa 'bul ba zhes bya ba'i rgyu nyid byed par mi nus pa'i phyir ro/ / rnam par mi gnas pa de las skye bar 'dod pa skye bar rtog na zhes bya ba ni sa bon 'gags pa skad cig phyi mar rnam par mi gnas pa de las myu gu phyis skye bar 'dod pa skye bar rtog na'o/ /de ltar rtog na ci nyes she na/ de'i phyir 'gag pa dang skye ba gnyis la rgyu med pa nyid du 'gyur la zhes bya ba smras te/ gal te de lta na sa bon 'gag pa dang myu gu skye ba gnyis ka la rgyu med pa nyid kyi skyon du 'gyur ro/ /bzlog pa las ni ji skad smras pa'i skyon med do zhes bya ba ni sa bon 'gags par rnam par mi gnas pa de las bzlog pa sa bon ma 'gags pa las skye bar 'dod pa skye bar rtog na ni 'gag pa dang skye ba gnyis las rgyu med pa nyid du 'gyur ba'i skyon ji skad smras pa de med do/ /ji skad smras pa'i skyon de med na cir 'gyur zhe na/ de'i phyir de'i tshe glags yod pa'i tshig yin pa'i phyir bsgrub par bya ba dang sgrub pa bzlog pa'i tshig gi don mngon pas zhes bya ba smras te/ de'i tshe zhes bya ba ni bzlog pa las ji skad smras pa'i skyon med pa de'i tshe na ste/ de'i tshe na 'grel pa byed pa 'dis skyon 'di mthong ngo zhes bya bar sbyar ro/ /glags yod pa'i tshig yin pa'i phyir zhes bya ba ni gnas brtan bud+d+ha pA li ta'i rnam par bshad pa de ni rgol ba gzhan gyis klan ka'i glags yod pa'i tshig yin pa'i phyir/ rigs pa ma yin no zhes bya ba'i tha tshig go/ /ji ltar glags yod pa'i tshig yin pa de nyid bstan pa'i phyir/ bsgrub par bya ba dang sgrub pa bzlog pa'i tshig gi don mngon pas zhes bya ba smras te/ bsgrub par bya ba zhes bya ba ni sa bon dang myu gu zhig pa dang ma skyes pa gnyis ni med pa'i phyir rkyen ma yin par bsgrub par bya'o/ /sgrub pa zhes bya ba ni 'gag pa rkyen ma yin zhes bya ba de ni sgrub pa'i chos yin te/ sa bon dang myu gu 'gag pa dang skye ba gnyis rgyu med par thal bar 'gyur ro zhes bya ba'o/ /de gnyis bzlog pa'i tshig gi don mngon pas zhes bya bas ni bsgrub par bya ba 'gag pa rkyen ma yin pa zhes bya ba bzlog pa'i tshig gi don ma 'gags pa rkyen yin pa zhes bya ba dang / sgrub pa sa bon dang myu gu 'gag pa dang skye ba gnyis rgyu med par thal bar 'gyur ro zhes bya ba bzlog pa'i tshig gi don sa bon dang myu gu 'gag pa dang skye ba gnyis rgyu can yin no zhes bya ba mngon pas so/ /de gnyis bzlog pa'i tshig gi don mngon pas glags yod pa'i tshig cir 'gyur zhe na/ bsgrub par bya ba 'gag pa rkyen ma yin pa zhes bya ba bzlog pa'i tshig gi don mngon pas ni ma 'gags pa rkyen yin zhes bya ba'i glags yod par 'gyur la/ sgrub pa sa bon dang myu gu 'gag pa dang skye ba gnyis rgyu med par thal bar 'gyur ro zhes bya ba bzlog pa'i tshig gi don mngon pas ni sa bon dang myu gu 'gag pa dang skye ba gnyis rgyu can yin no zhes bya bar sbyar ro/ /des cir 'gyur zhe na/ 'gag pa ni rkyen ma yin te/ rgyu can yin pa'i phyir zhes bya ba dang / skye ba yang sems dang sems las byung ba'i tshogs ma zhig pa'i rgyu dang ldan pa yin te/ rgyu can yin pa'i phyir ro zhes bya bar 'gyur te/ des na rkyen sems dang sems las byung ba'i tshogs ma 'gags pa las 'bras bu sems dang sems las byung ba'i tshogs dag skye bar 'gyur ba dang / 'bras bu skye ba yang rkyen sems dang sems las byung ba'i tshogs ma 'gags pa dang ldan par 'gyur te/ rkyen dang 'bras bu gnyi ga yang rgyu can yin pa'i phyir ro zhes bya bar 'gyur ro/ /de yang rigs pa ma yin te zhes bya ba ni sbyor ba'i tshig de gnyis ka yang rigs pa ma yin te/ 'di ltar ma skyes pa'i phyir ro zhes sun dbyung ba yin no/ /snga ma la ni gtan tshigs mi 'grub pa'i phyir ro zhes bya ba ni ma 'gags pa rkyen yin te zhes bya ba'i gtan tshigs mi 'grub ste/ 'di ltar sa bon ma 'gags na myu gu mi skye ba'i phyir ro/ /phyi ma la ni phyogs snga ma dang 'gal ba'i phyir te/ thams cad las skye ba bkag pa'i phyir ro zhes bya ba ni skye ba yang sems dang sems las byung ba'i tshogs ma zhig pa'i rgyu dang ldan pa yin te zhes bya ba ni phyogs snga ma dang 'gal te sngar dngos po thams cad bdag dang gzhan dang gnyis dang rgyu med pa rnam pa thams cad las skye ba med par khas blangs la/ rnam par bshad pa 'dir ni rgyu ma 'gags pa las skye bar sgrub pa'i phyir ro/ /de ltar na tshigs su bcad pa des kyang de ma thag pa'i rkyen bstsal ba'i phyir zhes bya ba ni/ chos rnams skyes pa ma yin na/ /'gags pa 'thad par mi 'gyur ro/ /de phyir de ma thag mi rigs/ /'gags na rkyen kyang gang zhig yin/ /zhes bya ba'i tshigs su bcad pa des kyang de ma thag pa'i rkyen nyid bstsal la/ /gang tshe chos ni yod pa dang / /med dang yod med mi sgrub pa/ /ji ltar sgrub byed rgyu zhes bya/ /de ltar yin na mi rigs so/ /yin pa'i chos ni dmigs pa ni/ /med na 'khor bar nye bar bstan/ /de ltar chos 'di dmigs med na/ /dmigs pa yod par ga la 'gyur/ /zhes bya ba la sogs pa tshigs su bcad pa snga ma dag gis kyang rkyen gzhan dag bstsal ba des kyang de ma thag pa'i don bsal ba'i phyir ro/ /gtan tshigs de nyid kyi don ma grub pa nyid kyi skyon nam zhes bya ba ni sngar chos mngon pa pa dag gis rkyen yod pa'i mtshan nyid kyi gtan tshigs/ rkyen rnam bzhi ste rgyu dang ni/ /dmigs pa dang ni de ma thag /bdag po yang ni de bzhin te/ /rkyen lnga pa ni yod ma yin/ /zhes smos pa de nyid ma grub pa'i don nyid kyi skyon du 'gyur te kho bo cag la don dam par rkyen rnams ma grub pa'i phyir ro/ /don 'gal ba nyid kyi skyon du 'gyur ro zhes bya ba ni kun rdzob tu gnyi ga la grub pa'i rkyen rnams bstan pa gang yin pa de ni sgyu ma'i skyes bu la sogs pa nor bu dang gsang sngags dang sman gyi rkyen las byung ba ngo bo nyid med pa rnams la snang ba de la yang khyod ngo bo nyid du bsgrubs pas khyod la 'gal ba'i don nyid kyi skyon du 'gyur ro/ /de ltar de ma thag pa'i rkyen kyang dpyad zin to zhes bya ba ni ji skad smras pa'i rnam pa de ltar de ma thag pa'i rkyen kyang dpyad zin te/ bkag zin to zhes bya ba'i tha tshig go/ /da ni bdag po'i rkyen gyi skabs su bab pas de dpyad par bya'o zhes bya ba ni/ gang gi phyir thams cad kyi tha mar bdag po'i rkyen bstan pa de'i phyir/ da ni de'i skabs su bab pas de dpyad par bya ste/ tha mar dgag par bya'o zhes bya ba'i tha tshig go/ /de'i mtshan nyid ji lta bu zhe na/ de'i phyir khyed ni gang yod na gang 'byung ba de bdag por 'dod do zhes bya ba smras te/ khyed mdo sde pa dang bye brag tu smra ba dag ni rgyu gang yod na 'bras bu gang 'byung ba de bdag po'i rkyen yin par 'dod do/ /'dir kho bo cag gi phyogs la ni don dam par skye ba med par bstan pas dngos po rnams rang gi bdag nyid ma thob cing / sgyu ma bzhin du ngo bo nyid kyis stong pa de'i phyir/ 'di ltar/ dngos po rang bzhin med rnams kyi/ /yod pa gang phyir yod min na/ /yod pa nyid ma yin na'o/ / zhes bya ba la/ 'dir zhes bya ba ni dbu ma pa'i bstan bcos 'dir ro/ /kho bo cag gi phyogs la ni/ /zhes bya ba ni dbu ma pa'i bsam pa la'o/ /don dam par skye ba med par bstan pas zhes bya ba ni don dam par rjes su dpag pa rgya chen pos skye ba med par bstan cing bsgrubs pas so/ /dngos po rnams rang gi bdag nyid ma thob cing zhes bya ba ni skye ba med pa de bstan pas dngos po gang dag gis rang gi ngo bo nyid grub pa'i bdag nyid ma thob pa de dag ni dngos po rnams rang gi bdag nyid ma thob pa yin no/ /sgyu ma bzhin du ngo bo nyid kyis stong pa zhes bya ba ni dper na sgyu ma mkhan gyis sprul pa'i bud med kyi gzugs snang yang de la bud med kyi ngo bo nyid med pa de bzhin du/ nang gi dngos po rnam pa thams cad du ngo bo nyid kyis stong pa yin no/ /de'i phyir 'di ltar/ dngos po rang bzhin med rnams kyi/ /zhes bya ba ni dngos po ngo bo nyid kyis stong pa rnams kyi'o/ /yod pa gang phyir yod min na/ /yod pa nyid ma yin na'o/ /zhes bya ba ni ngo bo nyid yod pa nyid ma yin na'o/ /don dam pa 'ba' zhig tu yang ma zad kyi 'di ltar 'jig rten gyi tha snyad du yang ste/ rgyu nyi tshe yod du zin kyang 'bras bu skye bar khas ma blangs pa'i phyir/ 'di yod pas na 'di 'byung zhes/ / bya ba de ni 'thad ma yin/ /de'i phyir khyed la gtan tshigs kyi/ /skyon de nyid rjes su 'brang ngo / /zhes bya ba la/ don dam pa 'ba' zhig tu yang ma zad kyi zhes bya ba 'di ni don dam pa 'ba' zhig tu skye ba med par yang ma zad kyi zhes bya ba'i tha tshig go/ /ji ltar 'jig rten gyi tha snyad du yang ste zhes bya ba ni 'di ltar 'jig rten gyi tha snyad du yang skye ba med pa yin te zhes bya bar sbyar ro/ /ci'i phyir 'jig rten gyi tha snyad du yang skye ba med ce na/ rgyu nyi tshe yod du zin kyang 'bras bu skye bar khas ma blangs pa'i phyir te/ rgyu sa bon dang mig la sogs pa nyi tshe yod du zin kyang rkyen gzhan med na de las 'bras bu myu gu dang rnam par shes pa zhes bya ba dag skye bar khas ma blangs pa'i phyir te/ 'di ltar zhing pa la sogs pa'i mi dag sa bon 'ba' zhig kho na las myu gu skye bar mi 'dod pa'i phyir ro/ /de'i phyir/ 'di yod pas na 'di 'byung zhes/ /bya ba de ni 'thad ma yin/ /zhes bya ba gsungs te/ 'di yod pas 'di 'byung la/ 'di skyes pa'i phyir 'di skye ba ste zhes brjod par mi nus so zhes bya ba'i tha tshig go/ /de'i phyir khyod la gtan tshigs kyi skyon de nyid rjes su 'brang ngo zhes bya ba ni bdag po'i rkyen kyang ma grub pa de'i phyir/ khyed la rkyen bstan pa'i gtan tshigs/ rkyen rnams bzhi ste rgyu dang ni/ / dmigs pa dang ni de ma thag/ /bdag po yang ni de bzhin te/ /rkyen lnga pa ni yod ma yin/ /zhes bya ba de ma grub pa'i skyon de nyid rjes su 'brang ngo / /gang dag de dag yod par ston pa na kun rdzob tu de ltar khas blangs pa'i phyir/ dper na mya ngan las 'das pa ni zhi ba'o zhes bya ba lta bu'o zhe na zhes bya ba ni rang gi sde pa dag rkyen de dag yod par ston pa na dbu ma pa la 'di skad ces rgol ba yin te/ dbu ma pas kun rdzob tu rkyen bzhi po dag yod pa de ltar khas blangs pa'i phyir don dam par yang rkyen bzhi po de dag yod par 'gyur te/ dper na kun rdzob tu mya ngan las 'das pa ni zhi ba'o zhes khas blangs pa de don dam par yang de bzhin du yod par 'gyur ba lta bu'o zhes zer ba yin no/ /de la gang dag ces bya ba ni rang gi sde pa dag go/ /de dag yod par zhes bya ba ni rkyen de dag yod par ro/ /ston pa na zhes bya ba ni don dam par rgyu la sogs pa rkyen bzhi po de dag yod pa kho nar ston pa na'o/ /de dag don dam par rgyu la sogs pa rkyen bzhi po de dag yod par ston pa na dbu ma pa la 'di skad ces rgol te/ dbu ma pa la kun rdzob tu de ltar khas blangs pa'i phyir/ don dam par rkyen bzhi po de dag yod par 'gyur ro/ /dper na mya ngan las 'das pa ni zhi ba'o zhes bya ba lta bu'o zhes bya ba 'di ni dpe yin te/ dper na dbu ma pas kun rdzob tu mya ngan las 'das pa ni zhi ba'o zhes khas blangs pa de don dam par yang zhi ba nyid du yod par 'gyur ba de bzhin du/ dbu ma pas kun rdzob tu rkyen rnams de ltar yod par khas blangs pa'i phyir/ don dam par yang rkyen de dag de bzhin du yod par 'gyur ro zhes zer ba yin no/ /de skad ces zer ba de'i lan du 'dir 'grel pa byed pa nyid kyis/ de dag gi dpe'i skyon snga ma bzhin no zhes bya ba smras te/ rang gi sde pa phyir zlog par byed pa de dag gi dpe mya ngan las 'das pa las blangs pa de'i skyon ni snga ma bzhin te/ sngar ri bong gi rwa'i dpe dang mya ngan las 'das pa'i dpe don dam par mi 'grub po zhes bstan pa de dang 'dra bas na dpe'i skyon snga ma bzhin no/ 'di skad bstan te/ don dam par mya ngan las 'das par yang mi 'grub ste/ 'phags pa shes rab kyi pha rol tu phyin pa'i mdo rab 'byor gyi le'u las/ lha'i bu gal te mya ngan las 'das pa bas ches khyad par du 'phags pa'i chos 'ga' zhig yod par gyur na de yang sgyu ma lta bu'o zhes smras so zhes ji skad gsungs pa lta bu'o/ /de'i phyir sgrub pa dpe med pa'i skyon du 'gyur bas de yang mi rung ngo / /'dir gzhan dag 'di skad ces gal te don dam par mya ngan las 'das pa med na/ 'o na ji ltar zhi ba dang zhi bar gyur pa dang / 'chi ba med pa dang / rga ba med pa dang / nyams pa med pa zhes bya ba la sogs pa'i yon tan dag gis mya ngan las 'das pa de yang dag par bsngags pa mdzad ces zer ba'i phyogs snga ma khang nas dbyung ba de'i lan du 'dir 'grel pa byed pa nyid kyis 'dus byas mi rtag pa la sogs pa'i nyes pas skyon chags pa las 'dun pa bzlog nas/ de la nye bar 'dun par bya ba'i phyir mya ngan las 'das pa zhi bar bstan pa yang tha snyad kyi bden par gtogs pa yin gyi/ don dam par de yod pa ni ma yin no zhes bya ba smras so/ /'dir 'dus byas zhes bya ba ni khyad par gyi gzhi yin la/ mi rtag pa la sogs pa'i nyes pas skyon chags pa zhes bya ba ni de'i khyad par yin no/ /de la 'dus byas zhes bya ba ni las dang nyon mongs pa dang skye ba'i kun nas nyon mongs pas bsdus pa'i chos thams cad do/ / mi rtag pa zhes bya ba ni srog la sogs pa dang bral ba'o/ /sogs pa zhes bya ba'i sgras ni sdug bsngal ba dang mi gtsang ba dang / sdug pa dang bral ba dang / mi sdug pa dang phrad pa dang / 'dod pas phongs pa zhes bya ba la sogs pa 'khor ba'i nyes pa gzhan dag kyang bsdu'o/ /nyes pas skyon chags pa zhes bya ba ni mi rtag pa la sogs pa 'khor ba'i nyes pas skyon chags pa'o/ /'dus byas mi rtag pa la sogs pa'i nyes pas skyon chags pa de las 'dun pa bzlog nas zhes bya ba ni de la lhag par chags pa rnams la 'khor ba'i skyon bstan pas de las yid dbyung bar byas nas so/ / de la nye bar 'dun par bya ba'i phyir zhes bya ba ni 'khor ba pas yongs su mya ngan las 'das pa ches yon tan khyad par du 'phags pa dang ldan pa'i phyir/ mya ngan las 'das pa 'dod par 'gyur ba de'i phyir mya ngan las 'das pa de la nye bar 'dun par bya ba'i phyir ro/ /mya ngan las 'das pa zhi bar bstan pa yang tha snyad kyi bden par gtogs pa yin gyi/ don dam par de yod pa ni ma yin no zhes bya ba ni mya ngan las 'das pa zhi ba dang / zhi bar gyur pa dang / 'chi ba med pa dang / rga ba med pa dang / nyams pa med pa zhes bya ba la sogs pa'i yon tan dag gis yang dag par bsags shing mya ngan las 'das pa yod pa nyid du bstan pa yang kun rdzob kyi bden par gtogs pa yin gyi/ don dam par mya ngan las 'das pa de yod pa ni ma yin no/ /'dir gzhan dag 'di skad ces gal te don dam par mya ngan las 'das pa sgyu ma lta bu ste med pa yin na/ /'o na ji ltar zhi ba la sogs pa'i yon tan dag gis bstan par bya ste/ dper na mo gsham gyi bu med pa la dkar po dang sngo bsangs la sogs pa'i yon tan dag gis bstan par mi nus pa bzhin no zhes zer ba'i phyogs snga ma khong nas dbyung ba de'i lan du 'dir 'grel pa byed pa nyid kyis/ bcom ldan 'das kyis rnam par rtog pas sgro btags nas/ gdul ba'i skye bo chos zab mo la ma mos pa rnams yang dag par dbugs dbyung ba'i phyir zhi ba la sogs pa'i yon tan dag gis mya ngan las 'das pa yang dag par bsngags par mdzad pa yang tha snyad kyi bden par khas blangs pa'i phyir ro zhes bya ba la sogs pa smras so/ /de la bcom ldan 'das kyis zhes bya bas ni yid ches pa'i lung gi khungs bstan to/ /rnam par rtog pas sgro btags nas zhes bya ba ni tha snyad pa'i rnam par rtog pa'i shes pas kun nas bslang ba'i tshig tu sgro btags nas so/ /gdul ba'i skye bo chos zab mo la ma mos pa rnams zhes bya ba ni gdul bar bya ba'i skye bo gang dag chos zab mo la ma mos pa ma skyes pa dag la mos pa med pa de dag ni gdul ba'i skye bo chos zab mo la ma mos pa rnams so/ /yang dag par dbugs dbyung ba'i phyir zhes bya ba ni bde ba la reg par bya ba'i phyir ro/ /zhi ba la sogs pa'i yon tan dag gis zhes bya ba ni zhi ba dang / zhi bar gyur pa dang / 'chi ba med pa dang / rga ba med pa dang / nyams pa med pa la sogs pa'i yon tan dag gis so/ /mya ngan las 'das pa zhes bya ba ni nyon mongs pa thams cad zad pa dang / mi skye ba shes pa zhes bya ba sdug bsngal thams cad spangs pa'i mtshan nyid do/ /yang dag par bsngags pa mdzad pa zhes bya ba ni yang dag par son par mdzad pa ste/ 'di ltar gdul ba'i skye bo de dag ni dmigs pa dang bcas pa bstan pas gdul bar bya ba yin pa'i phyir ro/ /zhi ba la sogs pa'i yon tan dag gis mya ngan las 'das pa yang dag par bsngags par mdzad pa de yang tha snyad kyi bden par bstan par khas blangs pa yin gyi/ don dam par ni ma yin pa'i phyir ro/ /don dam par mya ngan las 'das pa yang yod pa nyid la sogs pa'i ngo bo nyid kyis stong pa'i phyir dpe med pas gtan tshigs ma grub ste zhes bya bas ni 'di skad bstan te/ de ltar don dam par mya ngan las 'das pa la yod pa nyid kyang med la/ zhi ba la sogs pa'i yon tan dag kyang med pa'i phyir/ des na mya ngan las 'das pa'i dpe med pas rkyen rnams yod pa'i gtan tshigs ma grub po/ /de med pas 'dod pa'i don mi 'grub po zhes bya ba ni rkyen rnams med pas khyed kyi 'dod pa'i don rkyen gzhan las skye ba mi 'grub po zhes bya ba'i tha tshig go/ /de ltar rkyen nyid bkag tu zin kyang yang gzhan dag phyir zlog par byed de zhes bya ba ni de ltar rgyu la sogs pa rkyen bzhi po dag bsdus pa dang so so ba rkyen nyid ma yin pa dang 'bras bu bskyed pa nyid ma yin par bkag tu zin kyang yang rang gi sde pa gzhan dag skye ba sgrub pa'i phyir skye ba med pa la phyir rgol ba nyid du gnas par byed pa yin no/ /de'i phyir de dag 'di skad ces don dam par mig la sogs pa nang gi skye mched dag sgrub par byed pa'i rkyen rnams yod pa kho na yin te/ de rnams kyi 'bras bu skye ba'i phyir dper na myu gu sgrub par byed pa'i rkyen 'bru la sogs pa bzhin no/ / gang med pa de la ni rkyen kyang med de dper na rus sbal gyi spu'i gos bzhin no zhe na zhes bya ba smras so/ /'dir yang don dam par mig la sogs pa nang gi skye mched dag sgrub par byed pa'i rkyen rnams zhes bya ba 'di ni chos can yin te/ de la don dam par zhes bya ba ni don dam par rdzas su'o/ /mig la sogs pa nang gi skye mched dag ces bya ba ni rna ba dang / sna dang / lce dang / lus dang yid ces bya ba nang gi skye mched gang dag gi dang por mig smos pa de ni mig la sogs pa nang gi skye mched dag go/ /sgrub par byed pa'i rkyen rnams zhes bya ba ni de dag skyed par byed pa'i rkyen las dang / nyon mongs pa dang / khu chu dang / khrag dang / mer mer po la sogs pa rnams so/ /yod pa kho na yin te zhes bya ba 'di ni bsgrub par bya ba chos yin te/ mig la sogs pa nang gi skye mched dag sgrub par byed pa'i rkyen de rnams don dam par rdzas su yod pa kho na yin te zhes bya ba bsgrub par bya ba yin no/ /de rnams kyi 'bras bu skye ba'i phyir zhes bya ba 'di ni sgrub pa'i chos yin te/ mig la sogs pa nang gi skye mched dag sgrub par byed pa'i rkyen de rnams kyi 'bras bu mig la sogs pa nang gi skye mched dag skye ba'i phyir te/ de ltar de rnams kyi 'bras bu skye ba'i mtshan nyid kyi gtan tshigs de'i phyir/ mig la sogs pa nang gi skye mched dag sgrub par byed pa'i rkyen rnams yod pa kho na yin no/ /dper na myu gu sgrub par byed pa'i rkyen 'bru la sogs pa bzhin no zhes bya ba 'di ni chos mthun pa'i dpe yin te/ dper na myu gu sgrub par byed pa'i rkyen 'bru la sogs pa de rnams kyi 'bras bu myu gu skye ba'i phyir/ myu gu sgrub par byed pa'i rkyen 'bru la sogs pa yod pa kho na yin pa de bzhin du mig la sogs pa nang gi skye mched dag sgrub par byed pa'i rkyen de rnams kyi 'bras bu mig la sogs pa nang gi skye mched dag skye ba'i phyir mig la sogs pa nang gi skye mched dag sgrub par byed pa'i rkyen rnams kyang yod pa kho na yin no/ / gang med pa de la ni rkyen kyang med de/ dper na rus sbal gyi spu'i gos bzhin no zhes bya ba 'di ni chos mi mthun pa'i dpe yin te/ dper na rus sbal gyi spu ni med pa'i phyir/ de'i 'bras bu gos 'byung ba yang med pas rus sbal gyi spu'i gos med pa de la ni de'i rkyen rus sbal gyi spu yang med pa yin gyi/ rgyu la sogs pa rkyen rnams la ni de ltar 'bras bu skye ba med pa ma yin te/ de yod pa kho na yin pas de'i phyir rkyen rnams yod pa kho na yin no zhes zer ro/ /de skad ces zer ba de'i lan du 'dir 'grel pa byed pa nyid kyis/ de dag la 'di skad ces dri bar bya ste zhes bya ba la sogs pa smras so/ /ci khyed kyi rkyen so so ba dang 'dus pa dag la 'bras bu 'bras bu'i bdag nyid kyis yod dam 'on te med ces bya ba la/ ci zhes bya ba ni dri ba'i tshig yin no/ /khyed kyi zhes bya ba ni skye bar smra ba rnams kyi'o/ /rkyen so so ba dag la zhes bya ba ni rkyen re re dag la'o/ /'dus pa dag la zhes bya ba ni spyi dag la'o/ /'bras bu zhes bya ba ni mig la sogs pa'o/ /'bras bu'i bdag nyid kyis zhes bya ba ni gzugs la sogs pa yul 'dzin nus pa nyid kyis so/ /yod dam 'on te med ces bya ba ni snga na yod pa nyid yin nam 'on te med pa nyid yin zhes dri ba'o/ /des cir 'gyur zhes bya ba ni pha rol pos dbu ma pa la 'dri ba'i tshig yin te/ gal te 'bras bu mig la sogs pa dag rkyen mer mer po la sogs pa so so ba dang 'dus pa dag la yod na yang des cir 'gyur/ gal te med na yang des cir 'gyur zhes dri ba yin no/ /de'i phyir 'grel pa byed pa nyid kyis/ gal te yod na phyogs de'i lan ni/ yod na rkyen gyis ci zhig bya/ /zhes lan btab zin to/ /ci ste med na de'i lan kyang / /med na gang gi rkyen ces bya/ /zhes bstan zin to zhes bya ba smras te/ yod na dang med na zhes bya ba ni 'bras bu zhes bya bar sbyar ro// //bam po nyi shu gcig pa/ 'on kyang yang bshad par bya ste zhes bya ba ni/ tshig le'ur byas pa 'og ma'i mgo 'dren par byed do/ /de la 'on kyang zhes bya ba'i sgra ni khas blangs pa'i don te/ 'bras bu skye ba yod du zin kyang zhes bya ba'i tha tshig go/ /yang bshad par bya ste zhes bya ba ni rkyen rnams las skye ba dgag par bya ste zhes bya bar sbyar ro/ /gang gi tshe/ rkyen rnams so so 'dus pa las/ / 'bras bu de ni med pa nyid/ /de'i tshe/ rkyen rnams la ni gang med pa/ /de ni rkyen las ji ltar skye/ /zhes bya ba ni/ gang gi tshe rkyen so so ba dang 'dus pa dag la 'bras bu mig la sogs pa de dag bstsal na med pa nyid yin pa de'i tshe rkyen mer mer po la sogs pa dag las 'bras bu mig la sogs pa de dag ji ltar skye bar 'gyur te mi 'gyur ro/ /de'i phyir don dam par 'bras bu skye ba med pa kho na ste/ rkyen rnams la med do zhes bya ba'i tshig gi don to zhes bya ba smras te/ don dam par 'bras bu mig la sogs pa dang myu gu la sogs pa skye ba med pa kho na ste/ rkyen mer mer po la sogs pa dang sa bon la sogs pa rnams la 'bras bu mig la sogs pa dang myu gu la sogs pa dag med do zhes bya ba'i tshig gi don te/ tshig le'ur byas pa de'i don ni de yin no zhes bya ba'i tha tshig go/ /don de gsal bar bya ba'i shes par byed pa bstan pa'i phyir rgyu spun dag las zho ji ltar 'byung ste/ de dag la zho med pa'i phyir ro zhes bya ba smras te/ 'ga' zhig gis rgyu spun dag las zho 'byung ngo zhes smras pa na gzhan zhig na re/ rgyu spun dag las zho ji ltar 'byung ste mi 'byung ngo / /ci'i phyir zhe na/ rgyu spun de dag la zho med pa'i phyir te/ gang gi phyir rgyu spun dag la zho med pa de'i phyir/ rgyu spun de dag las zho mi 'byung ba zhes zer ba de bzhin du 'dir yang rkyen rnams las 'bras bu mi skye ste/ ci'i phyir zhe na/ rkyen de dag las 'bras bu med pa'i phyir ro zhes bya bar sbyar ro/ /ci ste 'bras bu la sogs pa la myu gu la sogs pa med bzhin du yang skye ba tha snyad kyi yan lag tu gyur pa/ byis pa'i blo can spyi'i spyod y ul du gyur pa mthong nas don dam par yang mig la sogs pa nang gi skye mched rnams skye bar 'dod do zhe na zhes bya ba ni ci ste skye bar smra ba gzhan dag 'di skad ces rgyu 'bru la sogs pa la 'bras bu myu gu la sogs pa snga na med bzhin du yang skye ba kun rdzob tu gtogs pa tha na ba lang rdzi'i chung ma yan chad kyi blo'i gzung bar gyur pa snang ba las don dam par yang rgyu 'bru la sogs pa dang mer mer po la sogs pa las 'bras bu myu gu la sogs pa dang / mig la sogs pa nang gi skye mched rnams skye bar 'dod do zhes zer ba'i phyogs snga ma yin no/ /de la ci ste zhes pa'i sgra ni ci ste skye bar smra ba gzhan dag la blo 'di lta bu skye na zhes dogs pa bsu ba'i tshig yin no/ /'bru la sogs pa las zhes bya ba ni rgyu 'jim pa dang rgyu spun dang rtsi rkyang dang / mer mer po la sogs pa gang dag gi dang por 'bru smos pa de ni 'bru la sogs pa ste 'bru la sogs pa de dag las so/ /myu gu la sogs pa zhes bya ba ni 'bras bu bum pa dang snam bu dang sab ma dang mig la sogs pa gang dag gi dang por myu gu smos pa de ni myu gu la sogs pa ste myu gu la sogs pa de dag go/ /med bzhin du yang zhes bya ba ni rgyu 'bru la sogs pa de dag la 'bras bu myu gu la sogs pa de dag snga na med bzhin du yang ngo / /skye ba zhes bya ba ni khyad par gyi gzhi yin te/ 'bras bu myu gu la sogs pa skye ba'o/ /tha snyad kyi yan lag tu gyur pa zhes bya ba ni skye ba'i khyad par yin te/ kun rdzob tu gtogs pa zhes bya ba'i tha tshig go/ /byis pa'i blo can spyi'i spyod yul du gyur pa zhes bya ba yang skye ba'i khyad par yin te/ tha na ba lang rdzi'i chung ma yan chad kyi blo'i gzung bar gyur pa zhes bya ba'i tha tshig go/ /mthong nas zhes bya ba ni de ltar rgyu 'bru la sogs pa las 'bras bu myu gu la sogs pa snga na med bzhin du yang skye ba snang ba las na'o/ /don dam par mig la sogs pa nang gi skye mched rnams skye bar 'dod do zhe na zhes bya ba ni ji ltar kun rdzob tu skye ba de bzhin du don dam par yang skye bar 'dod do zhes zer ba yin no/ /de skad ces zer ba de'i lan du 'dir 'grel pa byed pa nyid kyis de'i phyir bshad pa/ ci ste de ni med par yang / /rkyen de dag las skye 'gyur na/ /'o na lta/ rkyen min las kyang 'bras bu ni/ /ci yi phyir na skye mi 'gyur/ /zhes bya ba smras te/ ci ste de ni med par yang / /zhes bya ba ni ci ste 'bras bu myu gu la sogs pa de snga na med par yang ngo / /rkyen de dag las skye 'gyur na/ /zhes bya ba ni rkyen 'bru la sogs pa de dag las phyis skye bar 'gyur na'o/ /'o na lta/ rkyen min las kyang 'bras bu ni/ /ci yi phyir na skye mi 'gyur/ /zhes bya ba ni/ 'o na lta rkyen ma yin pa/ /zhes bya ba ni rkyen rigs mi mthun pa dag las kyang 'bras bu myu gu la sogs pa ci'i phyir skye bar mi 'gyur des de la glags yod pa'i tshig tu 'gyur ro/ /des na 'di la glags yod pa'i tshig yin pa'i phyir zhes bya bas ni 'di skad bstan te/ ci ste 'bras bu la sogs pa de dag snga na med par yang rkyen 'bru la sogs pa de dag las phyis skye bar 'gyur na/ 'o na rkyen ma yin pa dag la yang 'bras bu de dag snga na med par 'dra bas rkyen ma yin pa las kyang 'bras bu ci'i phyir skye bar mi 'gyur zhes 'di la rgol ba gzhan gyi klan ka'i glags yod pa'i tshig tu 'gyur ba'i phyir de ni mi rung ngo / /de ltar glags yod pa'i tshig yin pa'i phyir de mi rung na/ 'dir don ji lta bur nges pa yin zhe na/ de'i phyir rkyen ma yin pa las 'bras bu med pa mi skye ba bzhin du rkyen rnams las kyang mi skye bar nges te zhes bya ba smras so/ /'di skad bstan te/ ji ltar rkyen ma yin pa rgyu spun la sogs pa dag las 'bras bu myu gu la sogs pa snga na med pa dag mi skye ba bzhin du don dam par rkyen 'bru la sogs pa dag las kyang 'bras bu myu gu la sogs pa snga na med pa dag mi skye bar nges so/ /glags yod pa'i tshig gi don de gsal bar bya ba'i shes par byed pa bstan pa'i phyir/ dper na gal te sgra byas pa rtag na bum pa yang ci'i phyir mi rtag ces bya ba lta bu'o zhes bya ba smras te/ grangs can gyis sgra byas pa rtag go zhes smras pa na bye brag pa na re/ gal te sgra byas pa yin pas rtag na/ bum pa byas pa yang ci'i phyir mi rtag ces 'di la rgol ba gzhan gyi klan ka'i glags yod pa'i tshig tu 'gyur ba'i phyir de ni mi rung ngo zhes zer ba lta bur 'gyur ro/ /de skad smras na don ji lta bu rtogs par 'gyur zhe na/ de'i phyir sgra mi rtag ste byas pa'i phyir bum pa bzhin no zhes bya ba'i don de rtogs par 'gyur ro zhes bya ba smras te/ grangs can gyis sgra byas pa rtag go zhes smras pa de glags yod pa'i tshig yin pa'i phyir/ de la bye brag pas sgra byas pa yin pas rtag na bum pa byas pa yang ci'i phyir mi rtag ces de skad smras na des don ji lta bu rtogs par 'gyur zhe na/ sgra ni mi rtag ste byas pa'i phyir bum pa bzhin no zhes bya ba'i don de rtogs par 'gyur ro/ /de bzhin du 'dir yang / ci ste de ni med par yang / /rkyen de dag las skye 'gyur na/ /rkyen min las kyang 'bras bu ni/ /ci yi phyir na skye mi 'gyur/ /zhes bya ba de glags yod pa'i tshig yin pa'i phyir mi rung na/ de las bzlog pas don ji lta bur rtogs par 'gyur zhe na/ ji ltar rkyen ma yin pa rgyu spun la sogs pa dag las 'bras bu myu gu la sogs pa snga na med pa dag mi skye ba de bzhin du don dam par rkyen 'bru la sogs pa dag las kyang 'bras bu myu gu la sogs pa snga na med pa dag mi skye'o zhes bya ba 'di'i don de rtogs par 'gyur ro/ /don de nyid bstan pa'i phyir/ des na 'dir sbyor ba'i tshig ni don dam par myu gus stong pa'i 'bru la sogs pa las de skye bar mi 'thad pa de 'bras bu yin pa'i phyir/ dper na zho bzhin no zhes bya ba smras te/ 'dir yang don dam par myu gus stong pa'i 'bru la sogs pa las zhes bya ba 'di ni chos can yin la/ /de skye bar mi 'thad de zhes bya ba 'di ni bsgrub par bya ba chos yin/ 'bras bu yin pa'i phyir de zhes bya ba 'di ni sgrub pa'i chos yin te/ dper na zho bzhin no zhes bya ba 'di ni dpe yin par sbyar te/ dper na zho ni 'bras bu yin pa'i phyir des stong pa'i rkyen 'bru la sogs pa las skye bar mi 'thad pa de bzhin du/ myu gu yang 'bras bu yin pa'i phyir des stong pa'i rkyen 'bru la sogs pa las skye bar mi 'thad do/ /de'i phyir ji skad smras pa'i skyon med pa ma yin no zhes bya ba ni/ ji skad bstan pa'i rigs pa des na skye bar smra ba khyed kyi rkyen yod par sgrub pa'i gtan tshigs/ rkyen rnams bzhi ste rgyu dang ni/ /dmigs pa dang ni de ma thag /bdag po yang ni de bzhin te/ /rkyen lnga pa ni yod ma yin/ /zhes smos pa de la kho bos don dam par ni don ma grub pa nyid yin la/ kun rdzob tu ni don 'gal ba nyid yin no zhes ji skad smras pa'i skyon de med pa ma yin no/ /'dir smras pa zhes bya ba ni/ /de ltar rkyen rnams bkag tu zin kyang / yang skye bar smra ba dag gis rkyen rnams yod pa nyid du sgrub pa'i phyir 'dir smras pa yin no/ / de'i phyir de dag na re/ nang gi dngos po rnams kyi rkyen rnams don dam par yod pa kho nar gzung ste de dag las byung ba'i phyir dper na bum pa bzhin no zhes zer ro/ /'dir yang nang gi dngos po rnams kyi zhes bya ba 'di ni chos can yin te/ nang gi dngos po mig la sogs pa rnams kyi'o/ /rkyen rnams don dam par yod pa kho nar gzung ste zhes bya ba 'di ni bsgrub par bya ba chos yin te/ rkyen mer mer po la sogs pa rnams don dam par yod pa kho nar gzung ste/ chos can nang gi dngos po mig la sogs pa rnams la bsgrub par bya ba chos rkyen mer mer po la sogs pa khyad par can rnams don dam par yod pa kho nar bsgrub par bya ba yin no/ /de dag las byung ba'i phyir zhes bya ba 'di ni sgrub pa'i chos yin te/ de dag las zhes bya ba'i sgras ni rkyen khu chu dang khrag la sogs pa dag las zhes bya bar gzung ste/ 'di ltar mig dang / rna ba dang / sna dang / lce dang / lus dang zhes bya ba nang gi skye mched kyi dngos po rnams ni rkyen khu chu dang khrag la sogs pa de dag las byung ba'i phyir ro/ /dper na bum pa bzhin no zhes bya ba 'di ni dpe yin par sbyar te/ dper na bum pa ni rkyen 'jim pa la sogs pa de dag las byung ba'i phyir bum pa'i rkyen 'jim pa la sogs pa don dam par yod pa kho na yin pa de bzhin du/ nang gi dngos po mig la sogs pa rnams kyang rkyen khu chu dang khrag la sogs pa de dag las byung ba'i phyir/ nang gi dngos po mig la sogs pa rkyen khu chu dang khrag la sogs pa rnams kyang don dam par yod pa kho na yin no/ /de dag las byung ba'i phyir zhes bya ba ni de dag las gyur pa'i phyir zhes bya ba'i tha tshig go/ /rkyen de dag las byung ba'i phyir zhes bya ba ni rkyen de dag las gyur pa'i phyir zhes bya ba'i don to/ /ci'i phyir byung ba las gyur pa zhes bya zhe na/ de'i phyir gyur pa las byung ba zhes brjod pa'i phyir/ dper na bum pa ni 'jim pa las byung ba'o zhes bya ba bzhin no zhes bya ba smras te/ brda sprod pa las gyur pa las byung ba zhes brjod pa'i phyir te/ dper na bum pa 'jim pa las gyur pa la 'jim pa las byung ba'o zhes bya ba de bzhin du mig la sogs pa nang gi dngos po rnams rkyen khu chu dang khrag la sogs pa de dag las gyur pa la yang de dag las byung ba zhes bya'o zhes zer ro/ /de skad ces zer ba de'i lan du/ 'dir 'grel pa byed pa nyid kyis 'dir bshad pa zhes bya ba smras te/ 'grel pa byed pas phyogs snga ma de tshig le'ur byas pa 'dis sun dbyung ba nyid bshad pa yin no/ /'bras bu rkyen las byung ba yin na rkyen las gyur pa yin na'o zhes bya ba ni 'bras bu mig la sogs pa dag rkyen khu chu dang khrag la sogs pa las byung ba yin te/ rkyen khu chu dang khrag la sogs pa las gyur pa yin na zhes bya ba'i tha tshig go/ /rkyen rnams rang las byung ba ma yin/ rkyen gyi ngo bo nyid ma yin no zhes bya ba'i tha tshig go zhes bya ba ni/ rkyen khu chu dang khrag la sogs pa rnams rang las byung ba ma yin te/ rang las zhes bya ba'i sgras ni rkyen rang las zhes bya ba gzung ste/ rkyen rnams rang las byung ba ma yin no/ /de nyid bstan pa'i phyir/ rkyen gyi ngo bo nyid ma yin no zhes bya ba'i tha tshig go zhes bya ba smras te/ rkyen rnams rkyen gyi ngo bo nyid ma yin no zhes bya ba'i tha tshig go/ /ci'i phyir byung ba la ngo bo nyid ces bya zhe na/ de'i phyir ngo bo nyid las byung ba zhes brjod pa'i phyir/ dper na bram ze'i snying na mar las byung ba bzhin no zhes bya ba lta bu'o zhes bya ba smras te/ sngar ni byung ba zhes bya ba gyur pa'i don du bshad do/ /'dir ni byung ba zhes bya ba ni ngo bo nyid kyi don du blta bar bya ste/ brda sprod pa las ngo bo nyid la yang byung ba zhes brjod pa'i phyir te/ dper na bram ze'i snying mar gyi ngo bo nyid dang 'dra ba la mar las byung ba bzhin no zhes bya ba lta bu ste/ de yang de'i snying mar gong gi dbyibs lta bu ni ma yin gyi/ 'di ltar myur du 'ju ba nyid kyis mar gyi ngo bo nyid dang chos mthun pa'i phyir bram ze'i snying ni mar las byung ba bzhin no zhes bya ba de bzhin du/ rkyen khu chu dang khrag la sogs pa rnams kyang rang las byung ba ma yin te/ rkyen rnams rkyen gyi ngo bo nyid ma yin no zhes bya ba'i tha tshig go/ /rkyen rnams ji ltar rkyen gyi ngo bo nyid ma yin pa de ltar ni sngar bstan zin pas zhes bya ba ni rgyu la sogs pa rkyen rnams ji ltar rkyen gyi ngo bo nyid ma yin pa de ltar ni sngar dang po kho nar rjes su dpag pa rgya chen pos rkyen so so ba dang 'dus pa dag gi ngo bo nyid dgag par byas zin pas zhes bya ba'i tha tshig go/ /de'i phyir/ rang byung min las 'bras bu gang / /de ni ji ltar rkyen las byung / /zhes bya ba gsungs te/ rkyen khu chu dang khrag la sogs pa rang las byung ba ma yin pa rnams las 'bras bu mig la sogs pa gang byung ba de dag ji ltar rkyen las byung ba yin par khyed kyis brjod par nus te mi nus so zhes bya ba'i tha tshig go/ /don de nyid bstan pa'i phyir/ don dam par 'bras bu rkyen las byung ba ma yin no zhes bya ba'i tshig gi don to zhes bya ba smras te/ don dam par 'bras bu mig la sogs pa pa dag rkyen khu chu dang khrag la sogs pa las gyur pa ma yin no zhes bya ba'i tshig gi don te/ tshig le'ur byas pa de'i don de yin no zhes bya ba'i tha tshig go/ /don de gsal bar bya ba'i shes par byed pa bstan pa'i phyir/ dper na gal te de b+ha ra ta gzhon nu nas tshangs par spyod pa yin no/ /b+ha ra ta ji ltar de'i bu yin zhes zer ba lta bu ste zhes bya ba smras te/ 'ga' zhig gis de b+har ta gzhon nu nas tshangs par spyod pa de'i bu ni b+ha ra ta yin no zhes bya ba smras pa na gzhan zhig na re/ gal te de b+ha ra ta gzhon nu nas tshangs par spyod pa yin na/ b+ha ra ta ji ltar de'i bu yin zhes zer ba lta bur 'gyur ro/ /'di skad bstan te/ dper na de b+ha ra ta gzhon nu nas tshangs par spyod pa nyid kyis b+ha ra ta de'i bu yin pa de nyid bstsal ba de bzhin du rkyen rnams rkyen nyid kyi ngo bo nyid ma yin pa'i nyid kyis kyang de dag gis bskyed pa'i 'bras bu rkyen de dag las byung ba nyid dang / rkyen de dag las gyur pa nyid bstsal bar shes par bya'o/ /sgyu ma mkhan gyis sprul pa'i 'jim pa'i gong bu 'jim pa de'i ngo bo nyid kyis stong pa las skyes pa'i bum pa ni mkhas pa rnams kyis tha snyad du yang 'jim pa de las gyur pa yin no zhes rtogs par mi bzod pas zhes bya bas ni 'di skad bstan te/ ji ltar kho bo'i phyogs la 'jim pa la sogs pa rgyu'i dngos po thams cad dang / bum pa la sogs pa 'bras bu'i dngos po thams cad rgyu dang rkyen las byung ba'i phyir/ ngo bo nyid kyis stong pas de'i phyir khyed kyis nang gi dngos po rnams kyi rkyen rnams don dam par yod pa kho nar gzung ste/ de dag las byung ba'i phyir dper na bum pa bzhin no zhes gang smras pas dper na bum pa ni rkyen 'jim pa la sogs pa de dag las b yung ba'i phyir bum pa'i rkyen 'jim pa la sogs pa dag don dam par yod pa kho na yin pa de bzhin du mig la sogs pa nang gi dngos po rnams kyang rkyen khu chu dang khrag la sogs pa de dag las byung ba'i phyir nang gi dngos po mig la sogs pa rnams kyi rkyen khu chu dang khrag la sogs pa rnams kyang don dam par yod pa kho na yin no zhes zer ba ni bum pa'i dpe sgyu ma lta bu de la rkyen rnams ngo bo nyid yod pa nyid du bsgrub par bya ba yang med la/ de dag las byung ba'i phyir zhes bya ba sgrub pa yang med do/ /gang gi phyir de lta yin pa de'i phyir/ de'i phyir rkyen las byung ba ma yin/ de'i phyir 'bras bu rkyen las byung ba ma yin no zhes bya ba smras so/ /des na dpe med de bsgrub par bya ba dang sgrub pa'i chos ma tshang ba'i phyir zhes bya ba ni ji skad bshad pa'i gtan tshigs des na dper na bum pa bzhin no zhes bum pa las dpe blangs pa de med de/ de ci'i phyir zhe na/ bum pa la bsgrub par bya ba chos rkyen rnams don dam par yod pa kho nar gzung ste zhes bya ba dang / sgrub pa'i chos de dag las byung ba'i phyir zhes bya ba gnyis ma tshang ba'i phyir ro/ /de'i phyir snga ma bzhin du gtan tshigs kyi don ma grub pa nyid dam don 'gal ba nyid du 'gyur ro zhes bya ba smras te/ de dag las byung ba'i phyir zhes bya ba'i gtan tshigs de gal te don dam par brjod na ni/ don ma grub pa nyid du 'gyur te/ dbu ma pa rnams la don dam par de dag las byung ba'i phyir zhes bya ba de ma grub pa'i phyir ro/ /gal te kun rdzob tu brjod na ni don 'gal ba nyid du 'gyur te/ de dag las byung ba'i phyir zhes bya ba dang / kun rdzob kyi ngo bo nyid ni med na mi 'byung ba nyid yin pas des don dam par ngo bo nyid med pa nyid du sgrub par byed pa'i phyir 'gal ba'i don nyid du 'gyur ro/ /'dir gzhan gyis sun phyung ba'i don sgro btag pa nas smras pa zhes bya ba ni skabs 'dir skye bar smra ba gzhan gyis sngar dbu ma pas skye bar smra ba dag gi dpe med de zhes sun phyung ba'i don de khas blangs nas yang skye ba sgrub pa'i phyir smras pa yin no/ /gal te 'bras bu rkyen las byung ba med pas rjes su dpag pa med par bstan du zin kyang / 'bras bu ni 'bras bu'i ngo bo nyid mi 'dod pas de ma bkag pa'i phyir/ gzhan gyis kyang brjod par nus te zhes bya bas ni 'di skad bstan te/ gal te 'bras bu bum pa dang mig la sogs pa de dag rkyen 'jim pa dang mer mer po la sogs pa las byung ba med pas dpe med pa'i phyir/ khyed dbu ma pas kho bo cag gi rjes su dpag pa med par bstan du zin kyang / bum pa dang mig la sogs pa 'bras bu ni 'bras bu'i ngo bo nyid mi 'dor bar yod pas 'bras bu de ma bkag pa'i phyir/ kho bo cag la 'bras bu'i ngo bo nyid yod pas de'i phyir kho bo cag gis rnam pa gzhan gyis kyang 'bras bu'i rkyen rnams yod pa nyid du sgrub par nus te zhes zer ba yin no/ /de'i phyir don dam par nang gi skye mched rnams kyi rkyen rnams yod pa kho na yin te/ 'bras bu yin pa'i phyir/ dper na myu gu la sogs pa bzhin no zhes bya ba smras te 'dir yang nang gi skye mched rnams kyi zhes bya ba 'di ni chos can yin te/ mig la sogs pa nang gi skye mched rnams kyi'o/ /rkyen rnams yod pa kho na yin te zhes bya ba 'di ni bsgrub par bya ba chos yin te/ chos can nang gi skye mched rnams la bsgrub par bya ba chos de dag gi rkyen mer mer po la sogs pa khyad par can dag don dam par yod pa kho nar bsgrub par bya ba yin no/ /'bras bu yin pa'i phyir zhes bya ba 'di ni sgrub pa'i chos yin te/ gang dang gang 'bras bu yin pa de dang de la rkyen yod pa'i phyir ro zhes sgrub pa'i phyir ro/ /dper na myu gu la sogs pa bzhin no zhes bya ba 'di ni dpe yin par sbyar te/ dper na myu gu la sogs pa ni 'bras bu yin pa'i phyir de dag gi rkyen rnams don dam par yod pa kho na yin pa de bzhin du/ nang gi skye mched rnams kyang 'bras bu yin pa'i phyir de dag gi rkyen rnams kyang don dam par yod pa kho na yin no zhes zer ro/ /de skad ces zer ba de'i lan du 'grel pa byed pa nyid kyis/ 'dir bshad pa/ rkyen min las byung 'bras bu ni/ /yod min zhes bya ba la sogs pa smras so/ /'dir bshad pa zhes bya ba ni/ skye bar smra ba dag gi rjes su dpag pa de la 'grel pa byed pas tshig le'ur byas pa'i rtsa ba gnyis pas sun dbyung ba bshad pa zhes bya ba'i tha tshig go/ /rkyen min las byung 'bras bu ni/ /yod min zhes bya ba ni rkyen ma yin pa las byung ba dang / rkyen min pa las gyur pa dang rkyen ma yin pa'i ngo bo nyid kyi 'bras bu ni rgyu med pa las byung ba'i 'bras bu yin pas/ de lta bu ni kun rdzob kyi tha snyad du yang yod pa ma yin na don dam par lta smos kyang ci dgos te med pas de'i phyir/ khyed kyi gtan tshigs 'bras bu yin pa'i phyir zhes bya ba ma grub po zhes bstan pa yin no/ /don de nyid bstan pa'i phyir/ rkyen ma yin pa las gyur pa'i 'bras bu ni tha snyad du yang rtogs par mi nus na don dam par lta smos kyang ci dgos zhes bya ba smras te/ rkyen 'bru la sogs pa dang mer mer po la sogs pa ma yin pa las gyur pa'i 'bras bu myu gu la sogs pa dang mig la sogs pa ni rgyu med pa las byung ba yin pas de ni kun rdzob kyi tha snyad du yang yod pa nyid du rtogs pa dang gzung bar mi nus na don dam par 'bras bu rgyu med pa las byung ba yod pa nyid du rtogs pa dang / gzung bar nus pa lta smos kyang ci dgos te/ mi nus pas de'i phyir/ khyed kyi gtan tshigs 'bras bu yin pa'i phyir zhes bya ba de ma grub pas nang gi skye mched rnams kyi rkyen rnams don dam par yod pa ma yin no/ /'dir smras pa zhes bya ba ni 'dir skye bar smra ba dag gis yang ngo bo nyid yod par sgrub pa'i phyir smras pa yin no/ /gal te don dam par rkyen rnams rkyen gyi ngo bo nyid kyis stong na/ 'o na ni rkyen rnams rkyen ma yin pa'i ngo bo nyid kyis mi stong par khas blangs pa yin pas des na rkyen ma yin pa grub pas 'dod pa grub po zhes bya ba ni skye bar smra ba dag na re/ de ltar gal te don dam par rkyen mer mer po la sogs pa dang 'bru la sogs pa rnams rang las byung ba ma yin pas rkyen gyi ngo bo nyid kyis stong na/ 'o na ni khyed dbu ma pas rkyen mer mer po la sogs pa dang / 'bru la sogs pa rnams rkyen ma yin pa'i ngo bo nyid kyis mi stong par khas blangs pa yin pas des na rkyen ma yin pa'i ngo bo nyid kyis grub pas kho bo cag gi 'dod pa 'grub ste/ kho bo cag sde snod gsum gyi rjes su 'brang ba rnams kyis bsgrub par bya ba gang yin zhe na/ ngo bo nyid yod pa nyid yin te/ de yang rkyen ma yin pa'i ngo bo nyid yin la/ khyod nyid kyis don dam par rkyen rnams rkyen gyi ngo bo nyid kyis stong par bsgrubs pas rkyen rnams rkyen ma yin pa'i ngo bo nyid kyis mi stong par khas blangs pa yin te/ des na rkyen ma yin pa'i ngo bo nyid grub pas kho bo cag gi 'dod pa ngo bo nyid yod par 'grub po zhes zer ba yin no/ /de skad ces zer ba de'i lan du 'dir 'grel pa byed pa nyid kyis/ de ni bzang po ma yin te zhes bya ba la sogs pa smras te/ de ni bzang po ma yin te zhes bya ba ni khyed kyi sgrub pa des ngo bo nyid yod pa nyid mi 'grub po zhes bya ba'i tha tshig go/ /de ci'i phyir zhe na/ de'i phyir kho bo cag gis rkyen ma yin pa zhes smras pa gang yin pa ni rkyen gyi ngo bo nyid dgag pa tsam bstan pa yin te/ med par dgag pa'i don gyi dgag pa yongs su gzung ba'i phyir/ rkyen ma yin pa'i ngo bo nyid ni mi ston to zhes bya ba smras te/ des ni 'di la kho bo cag dbu ma pas rkyen ma yin pa zhes smras pa gang yin pa de ni rkyen gyi ngo bo nyid dgag pa tsam bstan pa yin gyi rkyen ma yin pa'i ngo bo nyid bstan pa ni ma yin te/ de ci'i phyir zhe na/ med par dgag pa'i don gyi dgag pa yongs su gzung ba'i phyir ro/ /dbu ma'i bstan bcos 'di la gnas skabs thams cad du ma yin zhes bya ba'i dgag pa ni med par dgag pa'i don du blta bar bya ste/ dgag pa gtso che ba'i phyir dang / 'di ltar rtog pa ma lus pa'i dra ba dgag pas rnam par mi rtog pa'i ye shes shes bya yul ma lus pa dang ldan pa 'grub par dgongs pa'i phyir ro/ /ma yin par dgag pa yongs su gzung na ni de sgrub pa gtso che ba'i phyir/ chos rnams ma skyes so zhes sgrub pas skye ba med pa ston pa'i phyir mdzad pa'i mtha' dang bral bar 'gyur te/ lung las gzugs kyi skye ba med pa la spyod na shes rab kyi pha rol tu phyin pa la spyod pa ma yin no zhes 'byung ba'i phyir ro/ /de'i phyir kho bo cag gis rkyen ma yin zhes smras pa gang yin pa des ni rkyen ma yin pa'i ngo bo nyid yod par mi ston pas khyed kyi 'dod pa mi 'grub po zhes bstan to/ sbyor ba rnam par dbye ba byas nas zhes bya bas ni ji skad smos pa'i phyogs snga ma dang phyogs phyi ma de gnyis kyi don gsal bar bya ba'i shes par byed pa ston te/ 'dir tshig le'ur byas pa'i rtsa ba tha ma'i sbyor ba la phyogs snga ma dang phyogs phyi ma rnam pa gnyis su rnam par dbye ba byas nas ji skad sngar smos pa'i phyogs snga ma dang phyogs phyi ma gnyis bshad do zhes bya bar sbyar ro/ /de la sbyor ba zhes bya ba ni mdo 'dir ni tshig le'ur byas pa'i rtsa ba bzhi pa dang sbyar ro/ /de rnam par dbye ba byas nas zhes bya ba ni rnam pa gnyis su dbye ba byas nas te/ tshig le'ur byas pa'i rtsa ba bzhi pa 'di la phyogs snga ma dang phyogs phyi ma gnyis su rnam par dbye ba byas nas zhes bya ba'i tha tshig go/ /de la sbyor ba rnam par dbye ba dang pos phyogs snga ma rnam par gzhag pa'i dbang du byas nas/ rkyen min zhes bshad de/ sbyor ba rnam par dbye ba dang po 'dis ni sngar skye bar smra ba dag na re/ gal te don dam par rkyen rnams rkyen gyi ngo bo nyid kyis stong na/ 'o na ni rkyen rnams rkyen ma yin pa'i ngo bo nyid kyis mi stong par khas blangs pa yin pas des na rkyen ma yin par grub pas 'dod pa 'grub po zhes zer ba'i phyogs snga ma rnam par gzhag pa'i sgo nas/ pha rol po'i bsam pa'i rang dbang ston te/ de'i sbyor bas ni pha rol po dag na re/ rkyen ma yin par grub pas mig la sogs pa'i rkyen mer mer po la sogs pa dag rkyen ma yin pa'i ngo bo nyid du yod par 'gyur bas 'dod pa 'grub po zhes zer ba'i don ston to/ /sbyor ba rnam par dbye ba gnyis pas phyogs phyi ma rnam par gzhag pa'i dbang du byas nas/ rkyen du ga la 'gyur zhes bya ba bshad de sbyor ba rnam par dbye ba gnyis pa 'dis ni sngar dbu ma pas de ni bzang po ma yin te/ kho bo cag gis rkyen ma yin pa zhes bya ba ni rkyen gyi ngo bo nyid dgag pa tsam bstan pa yin te/ med par dgag pa'i don gyi dgag pa yongs su gzung ba'i phyir/ rkyen ma yin pa'i ngo bo nyid mi ston to zhes lan btab pa'i phyogs phyi ma rnam par gzhag pa'i sgo nas rkyen dgag pa ston te/ de'i sbyor bas ni rkyen ma yin par grub pas mig la sogs pa'i rkyen mer mer po la sogs pa dag rkyen ma yin pa nyid du 'gyur bas 'bras bu skyed pa'i rkyen du ga la 'gyur zhes med par dgag pa'i don du bstan to/ /phyogs phyi ma rnam par gzhag pa de nyid brnan pa'i phyir rkyen ma yin pa rnams rkyen gyi ngo bo nyid du mi 'gyur ro zhes bya ba'i tshig gi don to zhes bya ba smras te/ rkyen ma yin pa grub pas mig la sogs pa'i rkyen mer mer po la sogs pa dag rkyen ma yin pa nyid du 'gyur bas rkyen ma yin pa de rnams 'bras bu skyed pa'i rkyen gyi ngo bo nyid du mi 'gyur ro zhes bya ba'i tshig gi don te/ sbyor ba rnam par dbye ba gnyis pa 'di'i don ni de yin no zhes bya ba'i tha tshig go/ /yang na ji skad bstan pa'i tshul gyi 'bras bu yod pa dang med pa skye ba bstsal bas de'i phyir 'bras bu med pas na/ rkyen min rkyen du ga la 'gyur/ /zhes bya bas ni 'di skad bstan te/ yang na/ rkyen min rkyen du ga la 'gyur/ /zhes bya ba tshig le'ur byas pa 'di'i don rnam pa 'di ltar bshad de/ de kho bos sngar don dam par 'bras bu yod pa dang med pa skye ba rnam pa du mar bstsal ba'i tshul gyis don dam par 'bras bu med pas na rkyen rnams kyang rkyen gyi bdag nyid ma yin pa'i phyir/ don dam par 'bras bu skyed pa'i rkyen du ga la 'gyur te mi 'gyur ro/ /'di la rkyen rnams ni 'bras bu skye ba'i sgo nas rkyen gyi ngo bo nyid du 'grub pa yin na/ sngar ji skad bstan pa'i tshul gyis 'bras bu yod pa dang med pa skyed pa bstsal bas/ de'i phyir 'bras bu med pas na rkyen mer mer po la sogs pa rkyen gyi bdag nyid ma yin pa rnams don dam par 'bras bu bskyed pa'i rkyen du ga la 'gyur te mi 'gyur ro/ /don de nyid bstan pa'i phyir de bdag nyid ma yin pa'i rkyen 'thad pa med pa rnams rkyen du ga la 'gyur te mi 'gyur ba kho na yin no zhes bya ba'i tshig gi ton to zhes bya ba smras te/ sngar sbyor ba rnam par dbye ba byas nas zhes bya ba'i skabs su ni pha rol pos rkyen ma yin pa'i ngo bo nyid yod par khas blangs pa rnams dgag pa'i phyir/ rkyen min rkyen du ga la 'gyur/ /zhes bshad do/ /da 'dir ni 'bras bu yod pa dang med pa skye ba bstsal bas 'bras bu med pas na rkyen rnams rkyen ma yin la/ rkyen ma yin na 'bras bu bskyed pa'i rkyen du ga la 'gyur te mi 'gyur ro zhes bstan pa'i phyir/ 'bras bu med pas na/ rkyen min rkyen du ga la 'gyur/ /zhes bshad do/ /de'i bdag nyid ma yin pa'i rkyen ces bya ba ni rkyen gyi bdag nyid ma yin pa'i rkyen mer mer po la sogs pa rnams so/ /'thad pa med pa rnams zhes bya ba ni 'bras bu skyed pa'i 'thad pa med pa'i rkyen rnams te rkyen ma yin pa rnams zhes bya ba'i tha tshig go/ /rkyen du ga la 'gyur te zhes bya ba ni de'i bdag nyid ma yin pa'i rkyen 'thad pa med pa de rnams rkyen du ga la 'gyur te zhes dgag pa yin no/ /mi 'gyur ba kho na yin no zhes bya ba'i tshig gi don to zhes bya ba ni de'i bdag nyid ma yin pa'i rkyen 'thad pa med pa rnams rkyen du mi 'gyur ba kho na yin no zhes bstan pa'i tshig gi don to/ /tshig le'ur byas pa de'i don ni de yin no zhes bya ba'i tha tshig go/ /de'i blo dang sgra 'jug pa'i rgyu can de dag g i 'bras bu med pa kho na'i phyir ro zhes bya bar dgongs so zhes bya ba ni rkyen gyi blo 'jug pa'i rgyu can dang rkyen gyi sgra 'jug pa'i rgyu can de dag gi 'bras bu med pa kho na'i phyir rkyen gyi bdag nyid ma yin pa'i rkyen 'bras bu skyed pa'i 'thad pa med pa rnams rkyen du ga la 'gyur zhes bya bar slob dpon gyi zhal snga nas kyi dgongs pa yin no/ /de la de'i blo zhes bya ba ni rkyen gyi blo ste 'di dag rkyen yin no snyam pa'i blo'o/ /de'i sgra zhes bya ba yang rkyen gyi sgra ste 'di dag rkyen yin no zhes brjod pa'i sgra'o/ /de'i blo dang sgra 'jug pa zhes bya ba ni rkyen gyi blo dang sgra skye ba'o/ /rgyu can zhes bya ba ni rkyen gyi blo dang sgra 'jug pa'i rgyu ni 'bras bu skye ba ste/ 'bras bu skye ba'i sgo nas 'di dag rkyen yin no snyam pa'i blo dang 'di dag rkyen yin no zhes brjod pa'i sgra 'jug pa'i phyir ro/ /rkyen gang dag la rgyu de yod pa de dag ni rgyu can zhes bya ste/ rkyen rnams yin no/ /de dag gi 'bras bu med pa kho na'i phyir ro zhes bya bar dgongs so zhes bya ba ni rkyen de dag gi 'bras bu skye ba med pa kho na'i phyir/ rkyen gyi bdag nyid ma yin pa'i rkyen 'bras bu skyed pa'i 'thad pa med pa rnams rkyen du ga la 'gyur zhes bya bar slob dpon klu sgrub kyi zhal snga nas kyi dgongs pa yin te/ gang gi phyir 'bras bu skye ba med pa de'i phyir rgyu la sogs pa'i rkyen gyi blo dang rkyen gyi sgra 'jug pa'i yul med pas/ de'i phyir rkyen rnams med do/ /'dir/ rkyen rnams bzhi ste rgyu dang ni/ /dmigs pa dang ni de ma thag /bdag po yang ni de bzhin te/ /zhes bya ba man chad gzhan gyis smras pa'i rkyen rnams kyi ngo bo nyid dang bye brag bstsal ba'i dbang gis de mjug bsdu ste zhes bya ba 'di ni rkyen brtag pa'i rab tu byed pa dang po'i skabs 'dir dpyad pa sngar bstan pa rnams kyis rkyen brtag pa'i rab tu byed pa dang po de mjug bsdu ba ston to/ /de la 'dir zhes bya ba ni rkyen brtag pa'i rab tu byed pa dang po'i skabs 'dir ro/ /dpyad pa sngar bstan pa de dag kyang gang zhe na/ de'i phyir/ rkyen rnams bzhi ste rgyu dang ni/ /dmigs pa dang ni de ma thag /bdag po yang ni de bzhin te/ /zhes bya ba man chad ces bya ba smras te/ de man chad nas brtsams te/ de'i phyir rkyen las byung ma yin/ /rkyen min las byung 'bras bu ni/ /yod min 'bras bu med pas na/ /rkyen min rkyen du ga la 'gyur/ /zhes bya ba yan chad kyi bar dag go/ /gzhan gyis smras pa'i rkyen rnams kyi zhes bya ba ni/ skye bar smra ba gzhan gyi rgyu la sogs pa rkyen bzhi po de dag yod par bstan pas skye ba 'grub po zhes smras pa'i rkyen gang yin pa de rnams kyi'o/ /rkyen de rnams kyi ngo bo nyid dang bye brag bstsal ba'i dbang gis zhes bya ba la/ ngo bo bstsal ba zhes bya ba ni rgyu dang dmigs pa dang de ma thag pa dang bdag po'i rkyen bzhi po de dag gi ngo bo nyid bkag pa'o/ /bye brag bstsal ba zhes bya ba ni rkyen bzhi po rnams kyi bye brag sde pa gzhan dag gis yongs su brtags pa dang / bye brag pa la sogs pas yongs su brtags pa ming tha dad pas tha dad pa gang dag yin pa de dag bkag pa'o/ /de'i dbang gis zhes bya ba ni de'i skabs kyis so/ /de'i mjug bsdus te zhes bya ba ni rkyen brtag pa'i rab tu byed pa dang po'i skabs de mjug bsdus pa ste/ de ltar rkyen rnams kyi ngo bo nyid dang bye brag bstsal ba'i dbang gis rkyen brtag pa'i rab tu byed pa dang po'i skabs de yongs su rdzogs par bya ste zhes bya ba'i tha tshig go/ /de ltar rkyen brtag pa'i rab tu byed pa dang po rigs pas dpyad pa la sogs pa de'i 'bras bu gang yin zhe na/ de'i phyir 'dir rab tu byed pa'i don ni skye ba med par ston pa yin no zhes bya ba smras so/ /skye ba med par bstan pas yon tan ci zhig 'thob ce na/ de'i phyir rten cing 'brel par 'byung ba skye ba med pa'i lung zhes bya ba smras te/ de'i phyir zhes bya ba ni skye ba med pa bstan pa de'i phyir ro/ /rten cing 'brel par 'byung ba skye ba med pa'i lung zhes bya ba ni shes rab kyi pha rol tu phyin pa chen po las rten cing 'brel par 'byung ba skye ba med pa zhes bya ba gsungs pa'i lung ste/ 'og nas lung gi tshig 'byung ba rnams dang sbyar ro/ /'di skad bstan te/ bcom ldan 'das ma shes rab kyi pha rol tu phyin pa'i mdo las/ khyad par gyi gzhi rten cing 'brel par 'byung ba'i khyad par/ 'gag pa med pa skye med pa/ /chad pa med pa rtag med pa/ /'ong ba med pa 'gro med pa/ /tha dad don min don gcig min/ /zhes bya ba rnam pa brgyad gsungs pa las/ skye ba med pa zhes bya ba'i lung de grub pa yin te/ phyi dang nang gi dngos po rten cing 'brel par 'byung ba gang yin pa de ni kun rdzob tu yang sgyu ma'i skyes bu bzhin du skye bar snang ba tsam du zad kyi/ ngo bo nyid kyis skye ba med par gsungs pa'i lung yang grub pa yin la/ don dam par yang bdag gi dngos po dang gzhan gyi dngos po dang gnyis kyi dngos po dang / rgyu med pa rnam pa thams cad las skye ba med par gsungs pa'i lung yang ma grub pa yin no/ /rkyen 'gag pa dang skye ba med par bsgrub pa 'di la gzhan dag na re/ rtog ge skam po'i bstan bcos tsam nyi tshes bsgrubs so zhes zer na mi rung bas de'i phyir 'dir yid ches pa'i lung gi khungs kyis kyang bsgrub par bya ste/ de la re zhig 'phags pa klu'i rgyal po ma dros pas zhus pa'i mdo las/ 'di skad ces/ gang zhig rkyen las skye ba de ma skyes/ /de la ngo bo nyid kyis skye ba med/ /gang zhig rkyen la ltos pa de stong gsungs/ /gang gis stong nyid shes de bag yod yin/ /zhes bya ba gsungs te/ de la gang zhig rkyen las skye ba de ma skyes zhes bya ba ni/ dngos po gang rkyen las skye ba de ni don dam par ma skyes pa yin no/ /'dir gzhan dag na re/ gal te de lta na nam mkha'i me tog dang 'dra bar 'gyur ro zhes rgol ba de'i lan ni de la/ ngo bo nyid kyis skye ba med/ /ces bya ba 'di yin te/ de la ngo bo nyid kyis skye ba med pa la kun rdzob tu dngos po rnams las ngo bo nyid med pa'i bdag nyid kyis skye ba 'grub pa'i phyir nam mkha'i me tog dang 'dra bar mi 'gyur ro/ /'dir gzhan dag na re/ gal te khyed rkyen rnams las skye bar khas len na des khyed kyi khas blangs pa la gnod par 'gyur la/ kho bo'i 'dod pa 'grub par 'gyur ro zhes zer ba de'i lan ni/ gang zhig rkyen la ltos pa de stong gsungs/ /zhes bya ba 'di yin te/ dngos po gang rkyen la ltos shing rkyen la rag las pa de ni stong pa yin par gsungs te/ sgyu ma mkhan gyi nor bu dang gsang sngags dang sman gyi sbyor bas sprul pa'i bud med kyi lus bzhin no/ /gang gis stong nyid shes de bag yod yin/ /zhes bya bas ni 'di skad bstan te/ gang gis sgyu ma mkhan gyis sprul pa'i bud med kyi lus bzhin du bud med 'di dag gi lus kyang de dang 'dra bar mthong zhing / yul lnga po dag kyang sgyu ma lta bur mthong ba de la ni 'dod chags la sogs pa nyon mongs pa dag 'byung bar mi 'gyur ro zhes bya ba'i tha tshig go/ /de bzhin du 'phags pa lang kar gshegs pa'i mdo las kyang / 'di skad ces/ gang la cung zad skye med cing / /'gag pa'ang cung zad yod min pa/ /'gro ba dben mthong de la ni/ /yod pa nyid dang med nyid med/ /ces gsungs so/ /'di skad bstan te/ gal te dngos po skyes pa ma zhig par gyur na yod pa nyid yin la/ gal te zhig par gyur na med pa nyid yin no/ /gang gi phyir cung zad kyang skye ba med pa de'i phyir ni yod pa nyid med la/ gang gi phyir cung zad kyang 'gag pa med pa de'i phyir ni med pa nyid med do/ / de bzhin du 'phags pa sangs rgyas pa thams cad kyi yul la 'jug pa ye shes snang ba'i rgyan gyi mdo las kyang 'di skad ces/ de bzhin gshegs pa rtag tu skye med chos/ /chos rnams thams cad bde bar gshegs dang 'dra/ /zhes gsungs te/ de bzhin gshegs pa rtag tu skye med chos/ /zhes bya ba ni de bzhin gshegs pa gang la rtag tu skye ba med pa'i chos mnga' ba de ni de bzhin gshegs pa rtag tu skye med chos zhes bya ste/ de bzhin gshegs pa ni rtag tu skye ba med pa'i ngo bo nyid do zhes bya ba'i tha tshig go/ /chos rnams thams cad bde bar gshegs dang 'dra/ /zhes bya ba ni/ chos thams cad kyang de bzhin gshegs pa dang 'dra bar skye ba med pa'i ngo bo nyid yin no zhes bya ba'i tha tshig go/ /de bzhin du 'phags pa sangs rgyas thams cad kyi yul la 'jug pa ye shes snang ba'i rgyan gyi mdo de nyid las kyang 'di skad ces/ 'jam dpal de'i phyir khyod kyis rnam grangs des kyang 'di ltar rig par bya ste/ skye ba med pa dang 'gag pa med pa zhes bya ba de ni de bzhin gshegs pa'i tshig bla dgas yin no zhes gsungs te/ bcom ldan 'das la 'jam dpal gyis zhus pa/ bcom ldan 'das skye ba ma mchis pa dang / 'gag pa ma mchis pa zhes bgyi ba'i chos de ci lags/ bcom ldan 'das kyis bka' stsal pa/ 'jam dpal skye ba med pa dang / /'gag pa med pa zhes bya ba de ni de bzhin gshegs pa'i tshig bla dgas yin no zhes gsungs so/ /'di skad bstan te/ skye ba med pa dang 'gag pa med pa zhes bya ba'i sgra ni chos kyi sku nyid bstan to/ / de bzhin du 'phags pa tshangs pas zhus pa'i mdo las kyang / 'di skad ces gang du sred pa thams cad 'gag pa de ni skye ba med pa'o/ /gang skye ba med pa de ni byang chub po/ /'jig rten ni skye ba la mngon par zhen te 'di la sangs rgyas 'byung ba yang med la/ mya ngan las 'da' ba yang med do zhes bya ba gsungs te bcom ldan 'das la tshangs pa khyad par sems kyis zhus pa/ bcom ldan 'das skye ba ma mchis pa'i mtshan nyid gang lags/ bcom ldan 'das kyis bka' stsal pa/ gang du sred pa thams cad 'gag pa de ni skye ba med pa'o zhes gsungs so/ /'di skad bstan te/ nyon mongs pa thams cad spongs pa ni skye ba med par rtogs pas thob po zhes bya ba'i tha tshig go/ /gang skye ba med pa de ni byang chub po zhes bya bas ni 'di skad bstan te/ skye ba med pa la skrag par mi bya ste/ 'di ltar skye ba med pa nyid byang chub yin pa'i phyir ro zhes bstan to/ /'jig rten ni skye ba la mngon par zhen te/ 'di la sangs rgyas 'byung ba yang med la mya ngan las 'da' ba yang med do zhes bya bas ni 'di skad bstan te/ gang gi phyir 'jig rten ni skye ba la mngon par zhen pa de'i phyir mngon par rdzogs par 'tshang mi rgya'o/ /mngon par rdzogs par sangs rgyas pa la ni sangs rgyas 'byung ba rnam par rtog pa yang med la/ yongs su mya ngan las 'da' bar rnam par rtog pa yang med do/ /de bzhin du mdo sde gzhan dag las kyang 'di skad ces/ gang gi phung po skye med cing / /'byung ba med pa yongs shes pas/ /de dag 'jig rten spyod 'gyur ba/ /'jig rten 'di ni gnas pa min/ / zhes gsungs so/ /'di skad bstan te/ gang dag gi phung po rnams skye ba med pa dang / 'byung ba med pa yongs su shes pas de dag ni 'jig rten 'di na spyad par 'gyur yang / 'khor ba'i sdug bsngal dag gis mi gos shing 'khor ba ji srid par sems can gyi don byed par 'gyur ro zhes bya ba la sogs pa gsungs pa de dag grub pa yin no zhes bya ba ni/ skye ba med par ston pa mdo sde'i mtha' de dag la sogs pa gzhan yang mtha' yas pa dag las rten cing 'brel par 'byung ba skye ba med pa'i don 'di nyid gsungs pa de dag grub pa'i phyir/ rtog ge skam po'i bstan bcos tsam nyi tshes bsgrubs pa ma yin no zhes bya ba'i tha tshig go/ /de lta bas na skye ba med pa ston pa'i mdo sde'i mtha' gang dag yin pa de dag skye ba med pa'i phyir rab tu byed pa'i skabs 'dis rnam par bshad par bya ba yin par ston pa ni slob dpon gyi zhal snga nas kyi mkhas pa'i mkhyen rgya nyid yin no/ /slob dpon legs ldan byed kyis nye bar sbyar ba/ dbu ma rtsa ba'i rnam par 'grel pa shes rab sgron ma rgya cher 'grel pa/ slob dpon spyan ras gzigs brtul zhugs kyis nye bar sbyar ba las/ rkyen brtag pa zhes bya ba ste rab tu byed pa dang po'i rgya cher 'grel pa rdzogs so/ / //bam po nyi shu gnyis pa/ da ni rten cing 'brel par 'byung ba 'ong ba med pa dang 'gro ba med pa'i khyad par dang ldan pa bstan par bzhed pa'i dbang gis rab tu byed pa gnyis pa brtsam mo zhes bya ba dang / rab tu byed pa dang por dngos po thams cad skye ba med pa bstan pa'i mi mthun pa'i phyogs bstsal bar bzhed pa'i dbang gis rab tu byed pa gnyis pa brtsam mo zhes bya ba la/ dbang gis zhes bya ba'i sgra'i sbyor ba ni dper na gzegs zan dag gi gzhung las/ de nas de'i don du chos rnam par bshad par bya'o zhes bya ba dang / dpyod pa can dag gi gzhung las de nas de'i 'og tu chos rnams shes par bya bar 'dod do zhes bya ba lta bu la yang bya mod kyi/ 'dir ni dbang gis zhes bya ba'i sgra gzhung 'og nas 'byung ba dang sbyar ba'i don dang / dam bcas pa la 'jug pa'i rgyu'i don te/ de la gzhung 'og nas byung ba dang sbyar ba'i don gyi dbang du byas nas/ da ni rten cing 'brel par 'byung ba 'ong ba med pa dang 'gro ba med pa'i khyad par dang ldan pa bstan par bzhed pa'i dbang gis rab tu byed pa gnyis pa brtsam mo zhes bya ba smras te/ 'grel pa byed pas ci'i phyir/ da ni rten cing 'brel par 'byung ba 'ong ba med pa dang 'gro ba med pa'i khyad par dang ldan pa bstan par bzhed pa'i dbang gis rab tu byed pa gnyis pa brtsam mo zhes bya ba smras she na/ gang gi phyir shes rab kyi pha rol tu phyin pa la sogs pa theg pa chen po mdo sde dag las/ chos thams cad ni 'ong ba med pa dang 'gro ba med pa'o zhes gsungs pas/ khyad par gyi gzhi rten cing 'brel par 'byung ba khyad par 'ong ba med pa dang 'gro ba med pa bstan kyang / gzhan dag gis lung de tsam gyis rten cing 'brel par 'byung ba 'ong ba med pa dang 'gro ba med pa'i khyad par dang ldan pa mi rtogs pas/ de'i phyir 'dir rigs pas de bstan par bzhed pa'i dbang gis rab tu byed pa gnyis pa brtsam mo zhes bya bar sbyar ro/ /dam bcas pa la 'jug pa'i rgyu'i don gyi dbang du byas nas/ rab tu byed pa dang por dngos po thams cad skye ba med pa bstan pa'i mi mthun pa'i phyogs bsal bar bzhed pa'i dbang gis rab tu byed pa gnyis pa brtsam mo zhes bya ba smras te/ ci'i phyir/ dbang gis zhes bya ba'i sgra dam bcas pa la 'jug pa'i rgyu'i don yin zhe na/ gang gi phyir bstan bcos mdzad pas rab tu byed pa dang por dngos po thams cad skye ba med par bstan pa'i mi mthun pa'i phyogs su gyur pa thams cad dgag par bya'o zhes dam bcas shing zhal gyis bzhes la/ de yang gang gi phyir skye ba dgag par mdzad nas/ 'gro ba dang 'ong ba dgag par mdzad pas bsgrub dgos pa de'i phyir/ rab tu byed pa dang por dngos po thams cad skye ba med par bstan pa'i mi mthun pa'i phyogs su gyur pa de dag gi nang du gtogs pa 'gag pa dang / rtag pa dang / chad pa dang / 'ong ba dang / 'gro ba dang / tha dad pa dang / don tha dad pa dang / don gcig pa zhes bya ba de dag thams cad bstsal bar bzhed pa'i dbang gis rab tu byed pa gnyis pa rtsom par khong du chud par bya'o/ /de'i phyir 'grel pa byed pas kyang bstan bcos mdzad pas gzhung gong du bstan ma thag par dam bcas shing zhal gyis bzhes pa de nyid kyi sgrub pa bstan pa'i phyir/ rab tu byed pa dang por dngos po thams cad skye ba med pa bstan pa'i mi mthun pa'i phyogs bstsal bar bzhed pa'i dbang gis rab tu byed pa gnyis pa brtsam mo zhes bya ba smras so/ /'di skad bstan te/ rab tu byed pa dang por thams cad skye ba med par bstan pa'i mi mthun pa'i phyogs 'di lta ste/ skye ba dang / 'gag pa dang / chad pa dang / rtag pa dang / 'ong ba dang / 'gro ba dang / don tha dad pa dang / don gcig pa gang dag rnam par gzhag pa de dag bstsal bar bzhed pa'i dbang gis rab tu byed pa gnyis pa brtsams te/ des na dbang gis zhes bya ba'i sgra dam bcas pa la 'jug pa'i rgyu'i don yin par nges so/ /yang na rab tu byed pa dang por dngos po thams cad skye ba med par bstan pa'i mi mthun pa'i phyogs zhes bya ba ni/ bdag dang gzhan dang gnyis dang rgyu med pa las skye bar smra ba dag gis rang rang gi phyogs snga ma ji skad smras pa dag ste/ de dag bstsal ba ni rab tu byed pa dang po 'ba' zhig gis byas par yang ma zad kyi/ rab tu byed pa gzhan dag gis kyang sel bar byed pas de'i phyir rab tu byed pa dang por dngos po thams cad skye ba med par bstan pa'i mi mthun pa'i phyogs bstsal bar bzhed pa'i dbang gis rab tu byed pa gnyis pa brtsam mo zhes bya ba smras so/ /rab tu byed pa zhes bya ba ni gang du tshig gi don nges pa rnams kyi ngo bo nyid rnam par bshad pa byed pa de ni rab tu byed pa zhes bya'o/ /gzhan dag ni slob ma skye ba med pa'i rigs pa thos pas dad pa skyes pa/ 'jig rten la grags pa'i 'gro ba dang 'ong ba dgag pa nyan 'dod pa'i don du rab tu byed pa gnyis pa brtsom mo zhes rjod par byed do zhes bya ba ni/ rab tu byed pa gnyis pa brtsam pa'i skabs 'dir 'grel pa byed pa slob dpon bud+d+ha pA li ta ni 'di skad ces rjod par byed do zhes bya bar sbyar ro/ /de ltar yang dbu ma rtsa ba'i 'grel pa bud+d+ha pA li ta nyid kyis smras pa/ khyod kyi skye ba med pa'i rigs pa 'dis rjes su rab tu bstan par byas pas kho bo'i yid stong pa nyid nyan pa las ngo mtshar snying po can du byas kyi/ ji ltar 'jig rten gyi mngon sum 'gro ba dang 'ong ba mi 'thad pa de je smros shig ces 'byung ba'i phyir ro/ /gzhan ma yin pa na re/ de ni rigs pa ma yin te zhes bya ba la sogs pas na 'grel pa byed pa nyid kyis gnas brtan bud+d+ha pA li ta'i rnam par bshad pa de mi rung bar sgrub pa ston to/ /gzhan ma yin pa zhes bya ba ni gzhan ma yin par rang nyid yin te/ 'grel pa byed pa nyid yin no/ /de'i phyir 'grel pa byed pa nyid na re/ gnas brtan bud+d+ha pA li ta'i rnam par bshad pa de ni rigs pa ma yin te zhes zer bar sbyar ro/ /ci'i phyir de ni rigs pa ma yin zhe na/ 'di ltar slob ma ni rnam pa gsum ste/ sems phyin ci log tu gyur pa dang / the tshom can dang / ma rtogs pa yin grang na/ de dag gsum char yang gnas brtan bud+d+ha pA li tas ji skad rnam par bshad pa de skad 'dri bar mi rigs pa'i phyir ro/ /de la re zhig slob ma sems phyin ci log tu gyur pa de skad 'dri bar mi rigs pa bstan pa'i phyir/ tshad ma ltar snang bas sems phyin ci log tu gyur pa ni de skad 'dri bar mi rigs pa'i phyir te/ de ni 'gro ba yod par bstan pa'i phyir dang skye ba yod par bstan pa'i phyir rjes su dpag pa smra bar 'gyur ba'i rigs so zhes bya ba smras te/ de la tshad ma ltar snang bas zhes bya ba ni rjes su dpag pa gsal ba ma yin pa dang de kho na ma yin pas te/ yi ge dang tshig dang ngag shin tu rnam par ma dag pa dang / rjes su dpag pa ltar snang ba 'am/ yang na tshig gi bdag nyid ma yin pa dang don gyi bdag nyid ma yin pa ste/ dngos su na skye ba dang / 'ong ba dang / 'gro ba la sogs pa yod par ston pa ste des so/ /sems phyin ci log tu gyur pa ni zhes bya ba ni tshad ma ltar snang ba des slob ma sems phyin ci log tu gyur pa ste/ skye ba dang / 'ong ba dang / 'gro ba la sogs pa yod pa nyid du lhag par chags pa'o/ /de skad ces 'dri ba mi rigs pa'i phyir te zhes bya ba ni tshad ma ltar snang bas sems phyin ci log tu gyur pa'i slob ma de ni gnas brtan bud+d+ha pA li tas ji skad rnam par bshad pa de skad 'dri ba mi rigs pa'i phyir de ni rigs pa ma yin no/ /ci'i phyir de de skad 'dri ba mi rigs she na/ de'i phyir de ni 'gro ba yod par bstan pa'i phyir dang / skye ba yod par bstan pa'i phyir rjes su dpag pa smra bar 'gyur ba'i rigs so zhes bya ba smras te/ sems phyin ci log tu gyur pa de ni skye ba med pa dang / 'gro ba med pa bstan pa na skye ba yod par ston pa dang 'gro ba yod par ston pa'i rjes su dpag pa dag gis phyir rgol ba nyid du gnas par 'gyur ba'i rigs pas de skad dri bar rigs so/ /'di skad bstan te/ tshad ma ltar snang bas sems phyin ci log tu gyur pa de ni dbu ma pa la khyod kyis skye ba med pa'i rigs pa 'di rjes su bstan par byas pas/ kho bo'i yid stong pa nyid nyan pa la ngo mtshar snying po can du byas kyi/ ji ltar 'jig rten mngon sum gyi/ /'gro ba dang / 'ong ba mi 'thad pa de je smros shig ces de skad 'dri ba mi rigs pa'i phyir/ gnas brtan bud+d+ha pA li ta'i rnam par bshad pa de rigs pa ma yin no/ /slob ma the tshom can de skad 'dri ba mi rigs pa bstan pa'i phyir/ tshad ma ltar snang bas sems rmongs par gyur pa la yang don dam par 'gro ba med pa zhes bya ba de ji ltar rigs te 'dri ba tshul dang mthun pa ma yin pa'i phyir ro zhes bya ba smras te/ tshad ma ltar snang bas sems rmongs shing the tshom can du gyur pa'i slob ma la yang / don dam par 'gro ba med pa zhes bya ba de mi rigs pas/ de yang ji ltar 'jig rten gyi mngon sum gyi 'gro ba dang 'ong ba mi 'thad pa de je smros shig ces de skad 'dri ba tshul dang mthun pa ma yin pa'i phyir te/ gang gi phyir 'gro ba yod dam med snyam du the tshom za ba de ni de la dad pa skye bar mi 'gyur ba de'i phyir/ de skad 'dri ba tshul dang mthun pa ma yin no/ /gal te the tshom bsal ba'i phyir de skad 'dri'o zhe na/ de lta na yang 'jig rten la grags pa'i 'gro ba dang 'ong ba dgag pa nyan 'dod pa'i don du rab tu byed pa gnyis pa brtsam mo zhes mtshams sbyar ba de ma legs pa yin te/ mtshams sbyar ba de la khas blang ba de gnod pa dang grags pa'i gnod pa yod de/ 'di ltar 'gro ba dang 'ong ba ni don dam par dgag pa yin gyi/ tha snyad du ma yin pa'i phyir ro/ /de lta bas na slob ma the tshom can gyi phyir rab tu byed pa gnyis pa brtsams pa yang ma yin pas/ gnas brtan bud+d+ha pA li ta'i rnam par bshad pa de rigs pa ma yin no/ /slob ma ma rtogs pas de skad 'dri bar mi rigs pa bstan pa'i phyir/ mi shes pa'i dri ba yin par brtag na ni bstan bcos kyi phal pa'i spyod yul yin par 'gyur ba'i phyir ro zhe'o zhes bya ba smras te/ mi shes pa zhes bya ba ni slob ma ma rtogs pa blo zhan pa'o/ / de'i dri ba yin pa rtag tu yang mi rung ste/ de'i don du bstan bcos rtsom pa mi rigs pa'i phyir ro/ /gal te de'i don du bstan bcos rtsom na ni/ /bstan bcos 'di mi phal pa blun po'i spyod yul yin par 'gyur ba'i phyir mi rung ngo / /ci'i phyir mi rung zhe na/ 'di ltar dbu ma'i bstan bcos kyi byang chub sems dpa' bsod nams dang ye shes kyi tshogs mtha' yas pa bsags pa shes rab kyi pha rol tu phyin pa'i tshul zab cing rgya che ba'i rjes su zhugs pa rnams kyi yul yin pa'i phyir bstan bcos 'di phal pa'i spyod yul yin par mi rung ngo / /'di ltar dbu ma'i bstan bcos la zhugs pa rnams ni/ bcom ldan 'das de bzhin gshegs pa dgra bcom pa yang dag par rdzogs pa'i sangs rgyas kun du bzang po'i dge 'dun yin no zhes ji skad gsungs pa yin no/ /de lta bas na dbu ma'i bstan bcos ni byang chub sems dpa' chen po rnams kyi dbang du mdzad de bstan pa yin gyi/ phal pa'i spyod yul ma yin pa de'i phyir/ mi shes pa 'dri ba yin par rtag tu yang mi rung bas gnas brtan bud+d+ha pA li ta'i rnam par bshad pa de rigs pa ma yin no/ /'dir kha cig na re/ khyed kyi sngar/ 'gag pa med pa skye med pa/ /zhes bstan bcos kyi lus rnam par bzhag pa de la/ kho bo cag gi tshig de ni bzang po ma yin te/ 'di ltar skye ba'i 'og tu 'gag pa 'gags par rigs te/ de sngon du 'gro ba can yin pa'i phyir chad pa bzhin no zhes bya ba smras pa na/ khyed na re/ 'khor ba la thog ma med pa'i phyir 'gag pa sngon du 'gro ba can gyi skye ba yang phyis dgag par khas ma blangs par gtan tshigs ma nges pa'i skyon yod do/ /'gag pa ni skye ba'i rim pa la mi ltos pa'i phyir dang / don brtag pa yin pa'i phyir dang / tshig gzhan du byas na yang thal ba mtshungs par nye bar gnas pa'i phyir nyes pa med do zhes zer te/ skye ba sngar 'gag pa'i tshig bzhag par bsgrubs nas/ de'i 'og tu skye ba med pa sgrub pa'i skabs su/ bdag las ma yin gzhan las min/ /gnyis las ma yin rgyu med min/ /dngos po gang dag gang na yang / /skyes pa nam yang yod ma yin/ /zhes bya bas 'gag pa bas skye ba 'gag pa sngar bsgrubs pas/ nga yang skye ba med par bstan pa'i 'og tu 'gag pa 'am chad pa med pa bstan pa'i rigs na de mi ston par/ 'ong ba med pa dang 'gro ba med pa'i tshig gi don ston par byed pas de'i phyir khyed dbu ma pa'i bstan bcos la lan 'ga' yang ltag 'og nges pa med do zhes zer ba'i phyogs snga ma khong nas dbyung ba de'i lan du/ 'dir 'grel pa byed pa nyid kyis/ 'jig rten ni phal cher bya ba mang po'i tha snyad kyi dbang gis bya ba'i dngos po la mngon par zhen pas mngon par zhen pa'i zug rngu de bsal ba'i phyir 'gro ba'i mtshan nyid kyi bya ba gcig bsal na bya ba lhag ma bsal ba yang sla bas de'i phyir phyogs snga ma nye bar gzhag go zhes bya ba smras so/ /'di skad bstan te/ 'jig rten thams cad ni skye ba la mngon par zhen pa yin pas de'i phyir 'gag pa bas skye ba dgag par sngar bstan pa mdzad pa bzhin du/ 'dir yang 'jig rten ni phal cher bya ba mang po'i tha snyad kyi dbang gis bya ba'i dngos po la mngon par zhen pas mngon par zhen pa'i zug rngu de bsal ba'i phyir/ slob dpon gyis go rims bsnor te skye ba bkag pa'i 'og tu 'ong ba dang / 'gro ba dgag pa'i tshig gi don bstan par mdzad do/ /de la 'jig rten ni phal cher zhes bya ba ni mi dag las phal cher zhes bya ba'o/ /bya ba mang po'i tha snyad kyi dbang gis zhes bya ba la/ bya ba mang po zhes bya ba ni 'jig rten gyi bya ba mang po'i phyir te bya ba mtha' yas pa zhes bya ba'i tha tshig go/ /tha snyad ces bya ba ni g.yo zhing spyod pa'i tha snyad de/ 'jig rten thams cad la 'gro ba dang 'ong ba dang 'dug pa zhes bya ba la sogs pa'i bya ba mang po'i tha snyad yod pa'o/ /dbang gis zhes bya ba ni bya ba mang po'i tha snyad de'i dbang gis te de'i mthus zhes bya ba'i tha tshig go/ /bya ba'i dngos po la mngon par zhen pas zhes bya ba ni 'jig rten ni phal cher bya ba mang po'i tha snyad kyi dbang des 'ong ba dang 'gro ba la sogs pa'i bya ba'i dngos po la mngon par zhen pa yin te/ 'jig rten tha na ba lang rdzi'i chung ma'i mthar thug pa thams cad 'khor ba thog ma med pa'i dus tshun chad nas bya ba'i dngos po la mngon par zhen pas so/ /mngon par zhen pa'i zug rngu de bsal ba'i phyir zhes bya ba ni bya ba'i dngos po la mngon par zhen pa de nyid mda' dug ma dang 'dra bas na zug rngu zhes bya ste de dag dgag pa'i phyir ro/ /'gro ba'i mtshan nyid kyi bya ba gcig bsal na zhes bya ba ni 'gro ba dang 'ong ba la sogs pa'i bya ba mang po dag la 'gro ba'i mtshan nyid kyi bya ba gcig je bkag na'o/ /bya ba lhag ma dag bsal ba yang bslabs zhes bya bas ni skye ba'i bya ba dang 'chad pa'i bya ba la sogs pa lhag ma gzhan dag dgag pa yang bslabs pas so/ /de'i phyir phyogs snga ma nye bar gzhag go zhes bya ba ni gang gi phyir dgag pa byed 'dod pas phyogs snga ma med pa dgag pa brjod par mi nus pa de'i phyir/ 'dir dang por bya ba'i dngos po med pa dang mi mthun pa'i phyogs snga ma nye bar gzhag go/ /phyogs snga ma nye bar gzhag pa de nyid bstan pa'i phyir/ 'di la skabs kyi don gyi mi mthun pa'i phyogs su gyur pa snang ste zhes bya ba smras te/ 'di la zhes bya ba ni dbu ma'i bstan bcos la'o/ /skabs kyi don zhes bya ba ni sngar dam bcas shing sgrub pa dang bsgrub par bya ba'i don te/ dngos po rnams skye ba med pa zhes bya ba yin no/ /don de'i mi mthun pa'i phyogs su gyur pa snang ste zhes bya ba ni skye ba med pa'i don de'i dgra bo phyogs su gyur pa yod pa ste/ dngos po rnams skye ba yod par smra ba dag snang ba'o/ /mi mthun pa'i phyogs su gyur pa de yang gang zhe na/ de'i phyir nang gi dngos po rnams skyes pa kho na yin te de dag gi yul dang ldan pa'i tha snyad byed pa'i phyir ro zhes bya ba la sogs pa smras so/ /'di skad bstan te de ltar lung dang rigs pas skye ba med pa bsgrubs su zin kyang / yang skye bar smra ba dag dngos po rnams skye ba kho na yin te zhes phyir zlog par byed pa ni skabs kyi don gyi mi mthun pa'i phyogs su gyur pa yin no/ /'dir yang nang gi dngos po rnams zhes bya ba 'di ni chos can yin te/ mig la sogs pa nang gi skye mched rnams so/ /skyes pa kho na yin te zhes bya ba 'di ni bsgrub par bya ba chos yin te/ nang gi dngos po rnams don dam par ma skyes pa kho na yin te zhes bya ba bsgrub par bya ba yin no/ /de dag gi yul dang ldan pa'i tha snyad byed pa'i phyir ro zhes bya ba 'di ni sgrub pa'i chos yin te/ de dag gi yul zhes bya ba ni mig la sogs pa nang gi skye mched de dag gi yul yin te/ gzugs la sogs pa gzung ba dang dmigs pa dag go/ /yul de dag dang ldan pa zhes bya ba ni de dag gis khyad par can du byas pa ste/ de dag dang 'brel zhing ldan pa lus dang mgo dang lkog ma dang mchu dang lag pa dang rkang pa la sogs pa'i tshogs 'gro ba'i byed pa dang ldan pa'o/ /de'i tha snyad byed pa'i phyir zhes bya ba ni lus la sogs pa'i tshogs de'i tha snyad/ dper na lha sbyin 'gro'o 'ong ngo 'dug go za'o zhes bya ba la sogs pa lta bu byed pa'i phyir/ nang gi dngos po rnams skyes pa kho na yin no zhes bya bar sbyar ro/ /'di la gang mi skye ba ni de dag gi yul dang ldan pa'i tha snyad mi byed de zhes bya ba 'di ni chos mi mthun pa'i phyogs yin no/ /dper na mo gsham gyi bu 'gro bar mi byed pa bzhin no zhes bya ba 'di ni chos mi mthun pa'i dpe yin no/ /lhas byin dang khyab 'jug bshes gnyen ni de lta bu 'gro bar mi byed pa ma yin pas zhes bya ba 'di ni chos mthun pa'i dpe yin te/ dper na lhas byin dang khyab 'jug bshes gnyen ni lus dang / mgo dang / lkog ma dang / mchu dang / lag pa dang / rkang pa la sogs pa'i tshogs kyis 'gro ba la sogs pa'i tha snyad byed pa'i phyir de dag skyes pa kho na yin pa de bzhin du/ mig la sogs pa nang gi dngos po rnams kyang de dag gi yul dang ldan pa'i lus dang / mgo dang lkog ma dang mchu dang lag pa dang rkang pa la sogs pa'i tshogs kyis 'gro ba la sogs pa'i tha snyad byed pa'i phyir/ de dag kyang skyes pa kho na yin no zhes bya bar sbyar ro/ /de'i phyir nang gi dngos po rnams skye ba kho na yin no zhes bya ba ni tshad ma'i 'bras bu dang mjug bsdu ba yin no/ /phyogs snga ma nye bar gzhag pa de dgag pa'i phyir/ 'dir 'grel pa byed pa nyid kyis/ phyogs snga ma nye bar gzhag pa bsal ba'i phyir 'di bshad de zhes bya ba la sogs pa smras te/ phyogs snga ma nye bar gzhag pa zhes bya ba ni phyogs snga ma legs par sbyar cing nye bar gzhag pa gang yin pa de yang gang zhe na/ nang gi dngos po rnams skye ba kho na yin te/ de dag gi yul dang ldan pa'i tha snyad byed pa'i phyir ro/ /'di la gang mi skye ba ni de dag gi yul dang ldan pa'i tha snyad mi byed de/ dper na mo gsham gyi bu 'gro bar mi byed pa bzhin no/ /lha sbyin dang khyab 'jug bshes gnyen ni de ltar 'gro bar mi byed pa yin pas de'i phyir nang gi dngos po rnams skye ba kho na yin no zhes smos pa yin no/ /phyogs snga ma nye bar gzhag pa de bsal ba'i phyir zhes bya ba ni de dgag pa'i phyir ro/ /'di bshad de zhes bya ba ni 'grel pa byed pa nyid kyis rigs pa 'og ma dag bshad de zhes bya bar sbyar ro/ /gal te sbyin pa dang tshul khrims dang bsam gtan la sogs pa'i sgrub par gyur pa skye ba dang / 'gro ba dang 'ong ba 'jig rten la grags pa dag sgrub pa ni grub pa la sgrub pa yin no zhes bya ba la sbyin pa dang tshul khrims dang bsam gtan la sogs pa zhes bya bas ni 'di skad bstan te/ bzod pa dang brtson 'grus dang shes rab gang dag gi /dang por sbyin pa dang tshul khrims dang bsam gtan smos pa de dag ni sbyin pa dang tshul khrims dang bsam gtan la sogs pa zhes bya ba ste/ sbyin pa dang tshul khrims dang bzod pa gsum ni bsod nams kyi tshogs yin la/ bsam gtan dang shes rab gnyis ni ye shes kyi tshogs yin/ brtson 'grus ni gnyi gar 'gro ba yin te/ de ni bsod nams dang ye shes kyi tshogs gnyis po dag bstan to/ /de dag gis bsgrub par gyur pa zhes bya ba ni tshogs pa'i rgyur gyur pa'o/ /de dag kyang gang zhe na/ de'i phyir skye ba dang 'gro ba dang 'ong ba dag ces bya ba smras te/ ci'i phyir de dag bsod nams dang ye shes kyi tshogs bsgrub par gyur pa yin zhe na/ 'di ltar skye ba dang 'gro ba dang 'ong ba med pa nam mkha'i ut+pa la la sogs pa dag ni bsod nams dang ye shes kyi tshogs sogs pa'i sgrub par mi 'gyur gyi/ sbyin pa po dang rdzas dang len pa po la sogs pa skye ba dang / 'gro ba dang 'ong ba yod pa gzhan gyis ni sbyin pa la sogs pa pha rol tu phyin pa dag la legs par sbyar bar nus pa'i phyir ro/ /skye ba dang 'gro ba dang 'ong ba 'jig rten la grags pa dag la sgrub na ni grub pa la sgrub pa yin no zhes bya ba ni/ skye ba la sogs pa 'jig rten ba lang rdzi'i chung ma yan chad la grags pa dag / gal te khyed kun rdzob tu sgrub na ni de lta na grub pa la sgrub pa'i skyon chags pa yin pas mi rung ngo / /'on te don dam par rnal 'byor pa mnyam par gzhag pa shes rab kyi mig gis dngos po rnams kyi yang dag pa ji lta ba bzhin de nyid mthong ba'i dbang du byas te/ skye ba dang 'gro ba dang 'ong ba dag yod par sgrub na ni de dag gi yul dang ldan pa'i tha snyad byed pa'i phyir ro zhes bya ba'i gtan tshigs kyi don ma grub pa nyid de zhes bya ba la/ rnal 'byor pa mnyam par gzhag pa zhes bya ba ni rnal 'byor pa don dam pa'i bden pa la nges par gnas pa zhes bya ba'i tha tshig go/ /shes rab kyi mig gis dngos po rnams kyi yang dag pa ji lta ba bzhin nyid mthong ba zhes bya ba ni dmigs pa med pa zhes bya ba'i tha tshig ste/ 'di ltar yang dag pa ji lta ba nyid mthong ba ni dmigs pa med pa'i tshul nyid kyis mthong ba'i phyir ro/ /rnal 'byor p a de'i dbang du byas te khyed cag don dam par skye ba dang 'gro ba dang 'ong ba dag yod par sgrub na ni de dag gi yul dang ldan pa'i tha snyad byed pa'i phyir ro zhes bya ba'i gtan tshigs kyi don ma grub pa nyid de zhes bya ba ni gal te de ltar sgrub na don dam par skye ba la sogs pa ma grub pa'i phyir khyed kyi gtan tshigs kyi don de dag gi yul dang ldan pa'i tha snyad byed pa'i phyir ro zhes bya ba de gzhi ma grub pa'i skyon chags pa yin pas mi rung ngo / /gzhi ma grub pa 'ba' zhig tu'ang ma zad kyi gang yang rung ba la ma grub pa'i skyon chags pa yang yin te/ ji ltar zhe na de'i phyir/ 'gro ba yang skye ba dgag pa kho na bzhin du dgag pas 'gro ba bkag pa'i phyir ro zhes bya ba smras te/ gang la dngos po thams cad skye ba med pa de la 'gro ba la sogs pa yang skye ba med pa'i phyir ro/ /spyi'i rnam pas gnyis ka'i phyogs la grags pa gtan tshigs su rtog na yang zhes bya bas ni 'di skad bstan te/ gal te skye bar smra ba dag 'di skad ces khyed dbu ma pa la yang kun rdzob tu skye ba dang 'ong ba dag yod par grub la/ kho bo cag la yang don dam par skye ba dang 'gro ba dang 'ong ba dag yod par grub pas de'i phyir spyi'i rnam pas gnyis ka'i phyogs la grags pa'i gtan tshigs yod pas/ kho bo cag gi gtan tshigs de dag gi yul dang ldan pa'i tha snyad byed pa'i phyir ro zhes bya ba de gtan tshigs yin par rtog go zhes zer na/ de yang mi rung bar ston to/ /gal te de ltar rtog na ci'i phyir mi rung zhe na/ de'i phyir rjes su 'gro ba med pa'i phyir zhes bya ba smras te/ gal te de ltar rtog na de la yang khyod la don dam par skye ba dang 'gro ba dang 'ong ba dag yod par sgrub pa'i gtan tshigs dang sgrub pa'i rjes su 'gro ba'i dpe med pa'i phyir/ khyed kyi gtan tshigs kyi don 'gal ba nyid kyis skyon chags pa yin pas mi rung ngo / /gal te de lta na gtan tshigs kyi don de dpe ma tshang ba nyid yin no zhes brjod par bya ba yin gyi/ 'gal ba nyid ces brjod par mi bya'o zhe na/ de'i phyir mi mthun pa'i phyogs 'ba' zhig la de rjes su 'gro ba'i phyir gtan tshigs kyi don 'gal ba nyid do zhes bya ba smras so/ /'di skad bstan te/ kun rdzob kyi gtan tshigs kyi sbyor ba gang yin pa de ni don dam pa'i mi mthun pa'i phyogs kun rdzob 'ba' zhig la rjes su 'gro ba'i phyir/ des na kun rdzob kho nar skye ba la sogs pa dag yod par sgrub pa yin pas de'i phyir khyed don dam par 'gro ba la sogs pa yod par 'dod pa nyams pas gtan tshigs kyi don 'gal ba nyid yin no/ /de ltar na pha rol po'i sgrub pa de ni grub pa la sgrub pa dang / gzhi ma grub pa dang gang yang rung ba la ma grub pa dang dpe ma tshang ba dang / 'gal ba nyid kyi skyon chags pa yin pas de ni dam bcas pa tsam du zad de/ ma grub po yang bshad pa zhes bya bas ni bstan bcos mdzad pas 'gro ba dgag pa'i rigs pa gzhan dag gsungs pa ston to/ /'di la gal te don dam par 'gro ba yod par gyur na de song ba'am ma song ba'am bgom pa la yod par gyur grang na zhes bya bas ni/ 'gro ba dgag par dam bcas pa spyi bkod pa bstan to/ /de la yang zhes bya ba la de la zhes bya ba'i sgras ni spyir bstan pa ste/ song ba dang ma song ba dang bgom pa zhes bya ba'i lam gsum po dag gis go rims sngar bkod pa de la'o/ /yang zhes bya ba'i sgra smos pa ni lam gyi rdzas las gzhan pa'i 'gro ba mtha' dag kyang dgag pa'i phyir te/ kun rdzob tu yang lam gyi rdzas las gzhan pa'i dngos po snga ma snga ma stong zhing yul phyi ma phyi mar son par byed pa'i 'gro ba dag med par ston to/ /re zhig song la 'gro med de/ /zhes bya ba la/ re zhig ces bya ba'i sgra ni dmigs kyis bstsal ba de song ba dang ma song ba dang bgom pa zhes bya ba'i lam gsum po dag las re zhig je song ba la 'gro ba med par ston pa yin no/ /song la 'gro med de zhes bya ba ni song ba'i lam la 'gro ba med pa ste/ ci'i phyir zhe na/ de la 'gro ba'i bya ba 'dis zin pa'i phyir ro zhes bya ba smras so/ /don de ni gzhan dag la yang grags pas bsgrub par mi bya'o zhes bya ba ni song ba'i lam la 'gro ba med pa'i don de ni gzhan pha rol po dag la yang grags pas 'dir bsgrub par bya mi dgos so zhes bya ba'i tha tshig go/ /'o na de 'dir smos ci dgos she na/ de phyir de smos pa ni gzhan 'dod pa'i dpe nyid du bzhed pa'i phyir ro zhes bya ba smras te/ song ba'i lam la 'gro ba med pa de smos pa ni 'gro bar smra ba gzhan ma song ba'i lam la 'gro ba yod par 'dod pa dgag pa'i dpe nyid du slob dpon bzhed pa'i phyir te/ ji ltar song ba'i lam la 'gro ba med par gzhan dag la yang grags pa de bzhin du ma song ba'i lam la yang 'gro ba med do zhes bstan pa'i phyir ro/ /ji ltar na song ba'i lam la 'gro ba med pa de ma song ba'i lam la 'gro ba med pa'i dpe nyid du bzhed ce na/ de'i phyir/ de'i chos ni lam nyid yin la/ ma song ba yang de dang 'dra bas zhes bya ba smras te/ de'i zhes bya ba ni song ba'i lam de'i 'o/ /chos ni zhes bya ba ni song ba'i lam de la 'gro ba med par sgrub pa'i chos te gtan tshigs so/ /lam nyid yin la zhes bya ba ni song ba'i lam la 'gro ba med par sgrub pa'i chos ni lam nyid yin pa ste/ de la 'dir sbyor ba'i tshig tu 'gyur ba ni song ba'i lam la 'gro ba med de lam yin pa'i phyir/ dper na de las gzhan pa'i song ba'i lam bzhin no zhes bya bar sbyar ro/ /ma song ba'i yang de dang 'dra bas zhes bya ba ni/ ma song ba'i lam gyi chos kyang lam nyid yin par 'dra ba ste/ des na 'dir yang sbyor ba'i tshig ni ma song ba'i lam la 'gro ba med de lam yin pa'i phyir/ dper na song ba'i lam bzhin no zhes bya bar sbyar ro/ /de'i phyir/ ma song ba la'ang 'gro ba med de/ lam yin pa'i phyir song ba'i lam bzhin no zhes bya bar dgongs so zhes bya ba smras te/ 'dir yang ma song ba la'ang zhes bya ba 'di ni chos can yin te ma song ba'i lam la'o/ /'gro ba med ces bya ba 'di ni bsgrub par bya ba chos yin te chos can ma song ba'i lam de la don dam par 'gro ba med pa zhes bya ba chos khyad par can de bsgrub par bya ba yin no/ /lam yin pa'i phyir zhes bya ba de ni sgrub pa'i chos yin te/ ma song ba'i lam yin pa'i phyir de la 'gro ba med do zhes sgrub par byed do/ /song ba'i lam bzhin no zhes bya ba 'di ni dpe yin par sbyar te/ dper na song ba'i lam ni lam yin pa'i phyir/ de la 'gro ba med pa de bzhin du ma song ba'i lam yang lam yin pa'i phyir de la 'gro ba med do zhes bya bar dgongs so/ /yang na ma song ba zhes bya ba ni 'gro ba'i bya ba ma brtsams pa ste zhes bya ba ni yang na ma song ba'i lam zhes bya ba ni da dung 'gro ba'i bya ba ma brtsams pa yin te/ des ni chos can bstan to/ /de'i chos ni ma song ba nyid yin no zhes bya ba ni tshad ma byed par 'dod pa'i tshad ma nyid ni rigs pa yin pas/ 'dir ma song ba'i lam la 'gro ba med do zhes bya ba'i phyogs la/ phyogs kyi chos gtan tshigs su bzung ba ni ma song ba nyid yin no zhes bya ba'i tha tshig go/ /dpe ni bsgrub par bya ba dang sgrub pa'i chos kyi dbang gis te/ gnyi ga la grags pa'i chos dang ldan pa'i chos can 'gro bar mi 'dod pa'i lam yin na ni zhes bya bas ni chos mthun pa'i dpe ston to/ /de la dpe ni zhes bya ba ni ma song ba'i lam la 'gro ba med pa'i dpe'o/ /de ni bsgrub par bya ba dang sgrub pa'i chos kyi dbang gis bstan dgos te/ ji skad du dpe gang la bsgrub par bya ba dang gtan tshigs kyi rjes su 'gro bas khyab par byed pa yod pa de ni chos mthun pa'i dpe yin no zhes bshad pa'i phyir ro/ /de la bsgrub par bya ba chos zhes bya ba ni bsgrub par bya ba nyid chos yin pas bsgrub par bya ba chos te/ de yang gang zhe na/ skabs 'dir ni 'gro ba med pa zhes bya ba yin par sbyar ro/ /sgrub pa'i chos zhes bya ba ni 'gro ba med pa sgrub pa'i chos gtan tshigs te de yang gang zhe na/ skabs 'dir ni ma song ba nyid ces bya ba yin par sbyar ro/ /de gnyis kyi dbang gis te zhes bya ba ni chos can ma song ba'i lam gang la bsgrub par bya ba chos 'gro ba med pa yod pa'i dbang dang sgrub pa'i chos ma song ba nyid yod pa'i dbang gis chos can de'i dpe 'gro bar mi 'dod pa'i lam gzhan bstan dgos te zhes bya ba'i tha tshig go/ /de nyid bstan pa'i phyir gnyi ga la grags pa'i chos dang ldan pa'i chos can zhes bya ba smras te/ chos can ma song ba'i lam gang la rgol ba dang phyir rgol ba gnyi ga la grags pa'i bsgrub par bya ba chos 'gro ba med pa zhes bya ba dang / rgol ba dang phyir rgol ba gnyi ga la grags pa'i bsgrub pa'i chos ma song ba nyid dang ldan pa dper bstan dgos pa'o/ /de lta bu'i chos can dper bstan du rung ba de yang gang zhe na/ de'i phyir 'gro bar mi 'dod pa'i lam bzhin no zhes bya ba smras te/ ma song ba'i lam de las gzhan pa 'gro bar mi 'dod pa'i lam yin no/ /lam de la yang gnyi ga la grags pa'i bsgrub par bya ba chos 'gro ba med pa zhes bya ba dang / sgrub pa'i chos ma song ba nyid ces bya ba yod pas de'i phyir dpe ni bsgrub par bya ba dang sgrub pa'i chos kyi dbang gis te/ gnyi ga la grags pa'i chos dang ldan pa'i chos can 'gro bar mi 'dod pa'i lam yin no zhes bya ba smos te/ 'dir rjes su dpag pa ni zhes bya ba ni ma song ba la 'gro ba med par bstan pa'i skabs 'dir rjes su dpag pa gtan tshigs dang dpe dang ldan pa sbyor ba'i tshig tu 'gyur ba ni 'og nas chos can dang / bsgrub par bya ba chos dang / sgrub pa'i chos dang / dpe nye bar sbyar ba rnams yin zhes bya bar sbyar ro/ /ma song ba la 'gro ba med de ma song ba yin pa'i phyir/ dper na de las gzhan pa 'gro bar mi 'dod pa'i lam bzhin no zhes pa la/ 'dir yang ma song ba la zhes bya ba 'di ni chos can yin la/ 'gro ba med de zhes bya ba 'di ni bsgrub par bya ba chos yin/ ma song ba yin pa'i phyir zhes bya ba 'di ni sgrub pa'i chos yin/ dper na de las gzhan pa 'gro bar mi 'dod pa'i lam bzhin no zhes bya ba 'di ni dpe yin par sbyar te/ dper na ma song ba'i lam de las gzhan pa'i 'gro bar mi 'dod pa'i lam ni ma song ba yin pa'i phyir/ de la 'gro ba med pa de bzhin du ma song ba'i lam nyid kyang ma song ba yin pa'i phyir de la yang 'gro ba med do/ /'di la 'ug pa pa dag na re/ ci ma song ba de la lhas byin 'gro ba'i bya ba ma skyes pas 'gro ba med par ston tam/ 'on te 'gro ba'i bya ba med pas 'gro ba med par ston zhes bya ba ni bstan bcos mdzad pa'i sgrub pa ji skad bstan pa'i skabs 'di la mu stegs bye brag pa'i nang nas 'ug pa pa zhes bya ba rdzas su 'dod pa dag gis bstan bcos mdzad pas dam bcas pa'i don de rnam par brtags nas skyon 'dogs par byed pa yin no/ /de'i phyir ci ma song ba de la zhes bya ba la sogs pas gal gnyis dris so/ /des cir 'gyur zhes bya ba ni/ phyir brtag pa yin no/ /gal te brtag pa snga ma ltar 'dod na ni grub pa la sgrub pa yin no zhes bya ba ni ma song ba'i lam de la 'gro ba'i bya ba ma skyes pas 'gro ba med pa ni 'jig rten thams cad la grub pa yin pa'i phyir ro/ /'on te brtag pa phyi ma ltar 'dod na ni gtan tshigs kyi don 'gal ba nyid yin pas zhes bya ba ni gang gi phyir ma song ba gang yin pa de 'gro ba'i bya ba phyis skye bas 'gro bar 'jig rten na mthong ba de'i phyir khyod kyis de 'gro ba'i bya ba phyis skye bas kyang 'gro ba med pa phyogs su byas pas de bsal ba'i phyir ro/ /des na gtan tshigs snga ma'i don ma grub pa nyid ma yin no zhes bya ba ni de ltar ma song ba'i lam la 'gro ba med pa ma yin te/ 'gro ba yod pa des na kho bo cag gi gtan tshigs snga ma de dag gi yul dang ldan pa'i tha snyad byed pa'i phyir ro zhes bya ba de'i don ma grub pa nyid ma yin zhes zer ba yin no/ /gal te rdzas las gzhan pa'i 'gro ba ma grub pas de rigs pa ma yin pa'i phyir zhes bya ba ni 'ug pa pa dag gi dbu ma pa'i dogs pa bsu ba'i tshig yin no/ /'di skad bstan te/ gal te sangs rgyas pa dag 'di skad ces/ kho bo cag ni gang gi gtan tshigs kyi don 'gal ba nyid du 'gyur ba 'jig rten la grags pa'i 'gro ba lus las gzhan dang gzhan ma yin par brtag pa dang bral bar 'gog par mi byed kyi/ 'di ltar kho bo cag don dam par 'gro ba 'gog par byed pas des na khyed kyis bye brag gi tshig gis don drug po rdzas dang / yon tan dang / las dang / spyi dang / bye brag dang / 'du ba zhes bya ba'i mtshan nyid gang dag brtags pa lcags kyi thur ma ltar ngo bo nyid tha dad pa de dag gis rdzas kyi tshig gi don 'degs pa dang / 'jog pa dang / bskum pa dang / brkyang pa dang / 'gro ba zhes bya ba las kyi tshig gi don dang 'brel pa'i 'gro ba gang yin pa de ma grub pas 'ug pa pa dag na re/ 'on te brtag pa phyi ma ltar 'dod na ni gtan tshigs kyi don 'gal ba nyid yin pas des na gtan tshigs snga ma'i don ma grub pa nyid ma yin no zer ba 'di ni rigs pa ma yin no zhe na zhes 'ug pa pa dag gis dbu ma pa'i dogs pa bsu ba yin no/ /gal te khyed dbu ma pa dag de skad ces zer na/ de'i lan du kho bo cag 'ug pa pa dag gis rdzas las gzhan pa'i 'gro ba sgrub pa'i phyir tshad ma 'di lta bu sbyar bar bya'o zhes bstan pa'i phyir/ lhas byin 'gro ba dang ldan pa yin no snyam pa'i blo gros kyi yul ni lhas byin gyi bdag nyid las gzhan pa'i tshig gi don dang ldan pa yin te/ nges pa skye ba'i phyir dper na lhas byin dbyug pa dang ldan pa yin no snyam pa'i blo gros kyi yul bzhin no zhes zer ro zhes bya ba smras te/ 'di yang lhas byin 'gro ba dang ldan pa yin no snyam pa'i blo gros kyi yul ni zhes bya ba 'di ni chos can yin te/ khyab 'jug bshes gnyen la sogs pa gang la lhas byin 'gro ba dang ldan pa yin no snyam pa'i blo gros yod pa'i blo gros de'i yul lo/ /lhas byin gyi bdag nyid las gzhan pa'i tshig gi don dang ldan pa yin te zhes bya ba 'di ni bsgrub par bya ba chos yin te/ chos can lhas byin 'gro ba dang ldan pa yin no snyam pa'i blo gros kyi yul te/ lhas byin gyi bdag nyid las gzhan pa'i tshig gi don 'gro ba zhes bya ba dang ldan pa yin par bsgrub par bya ba yin no/ /'di skad bstan te/ gang la lhas byin 'gro ba dang ldan pa yin no snyam pa'i blo gros yod pa'i blo gros de'i yul ni lhas byin gyi bdag nyid las gzhan pa'i 'gro ba dang ldan pa yin te/ des na lhas byin gyi bdag nyid las 'gro ba zhes bya ba'i tshig gi don te gzhan yin pas 'gro ba rdzas su grub pa yin no zhes bsgrub po/ /nges pa skye ba'i phyir zhes bya ba 'di ni sgrub pa'i chos yin te/ yul de ni lhas byin gyi bdag nyid las gzhan pa'i 'gro ba dang ldan pa yin pas de la lhas byin 'gro ba dang ldan pa yin no snyam pa'i sems kyi nges pa rnam par rtog pa skye ba'i phyir rdzas las gzhan pa'i 'gro ba yod par sgrub par byed do/ /dper na lhas byin dbyug pa dang ldan pa yin no snyam pa'i blo gros kyi yul bzhin no zhes bya ba 'di ni dpe yin par sbyar te/ dper na gang la lhas byin dbyug pa dang ldan pa yin no snyam pa'i blo gros yod pa ni yul de la lhas byin gyi bdag nyid las dbyug pa gzhan yin no snyam pa'i nges pa skye ba'i phyir ro/ /blo gros de lhas byin las gzhan pa'i 'gro ba rdzas su yod pa'i yul can yin pa de bzhin du/ gang la lhas byin 'gro ba dang ldan pa yin no snyam pa'i blo gros yod pa yang yul de la lhas byin gyi bdag nyid las 'gro ba gzhan yin no snyam pa'i nges pa skye ba'i phyir blo gros de lhas byin las gzhan pa'i 'gro ba rdzas su yod pa'i yul can yin no/ /des na rdzas las gzhan pa'i 'gro ba grub pas kho bo cag 'ug pa pa dag gis 'on te brtag pa phyi ma ltar 'dod na ni gtan tshigs kyi don 'gal ba nyid yin pas des na gtan tshigs snga ma'i don ma grub pa nyid ma yin no zhes smras pas de mi rigs pa ma yin no zhes zer ro/ /de skad ces zer ba de'i lan du 'dir 'grel pa byed pa nyid kyis/ de la 'dir gal te lhas byin khyad par gang yang rung ba dang ldan pa la zhes bya ba la sogs pa smras so/ /de la 'dir zhes bya bas ni 'ug pa pa dag gis 'gro ba'i tshig gi don gzhan du gyur pa yod par sngar smras pa de la 'dir 'grel pa byed pas sun dbyung ba ston to/ /gal te lhas byin khyad par gang yang rung ba dang ldan pa la zhes bya ba ni/ gal te lhas byin 'gro ba ma yin pa'i khyad par gzhan gang yang rung ba dang ldan pa'o/ /blo gros kyi yul nyid lhas byin gyi bdag nyid las gzhan pa'i tshig gi don dang ldan pa yin par ston na ni zhes bya ba ni 'ug pa pa dag lhas byin 'gro ba dang ldan pa yin no snyam pa'i blo gros kyi yul nyid lhas byin gyi bdag nyid las gzhan pa'i tshig gi don dang ldan pa yin par ston na'o/ /de lta na tha snyad du grub pa la sgrub pa yin no/ /gal te pha rol po dag 'di skad ces de ltar blo gros kyi yul nyid lhas byin gyi bdag nyid las gzhan pa'i tshig gi don dang ldan pa yin par ston na ji ltar grub pa la sgrub pa yin zhe na/ de bstan pa'i phyir 'di ltar lhas byin zhes bya ba 'du byed kyi tshogs yul gzhan du skye ba'i mtshan nyid kyi khyad par dang ldan pa la 'dir 'gro ba dang ldan no snyam pa'i blo gros 'di khas blangs pa'i phyir ro zhes bya ba smras te/ 'di ltar zhes bya ba'i sgra ni gang gi phyir zhes bya ba'i don to/ /lhas byin zhes bya ba ni gang la lhas byin zhes bya ba'i ming yod pa'o/ /'du byed kyi tshogs zhes bya ba ni rkang lag la sogs pa 'dus pa'i tshogs so/ /yul gzhan du zhes bya ba ni yul nas yul gzhan gang yin par ro/ / yul gzhan der skye ba zhes bya ba ni yul gzhan der 'byung ba'o/ /skye ba de'i mtshan nyid kyi khyad par dang ldan pa la zhes bya ba ni lhas byin zhes bya ba 'du byed kyi tshogs gang la yul gzhan du skye ba'i mtshan nyid kyi khyad par yod pa la'o/ /'dir 'gro ba dang ldan no snyam pa'i blo gros 'di khas blangs pa'i phyir ro zhes bya ba ni lhas byin 'di 'gro ba dang ldan no snyam pa'i blo gros 'di kho bo cag gis kyang tha snyad du khas blangs pa'i phyir khyed de sgrub par byed pa ni grub pa la sgrub pa yin no/ /ci ste lhas byin 'gro ba zhes bya ba'i tshig gi don dang ldan pa yin na ni zhes bya bas ni 'di skad bstan te/ blo gros kyi yul lhas byin de khyad par gzhan gang yang rung ba dang ldan pa ma yin gyi/ 'gro ba'i mtshan nyid kyi tshig gi don dang ldan pa yin no zhe na zhes bya ba'i tha tshig go/ /de ltar na dpe med par 'gyur ro zhes bya ba ni dpe bsgrub par bya bas stong par 'gyur bas te/ 'di ltar khyed kyi dpe lhas byin dbyug pa dang ldan pa yin no snyam pa'i blo gros kyi yul bzhin no zhes bya ba'i yul de la 'gro ba dang ldan pa nyid med de/ 'di ltar dbyug pa dang ldan pa nyid yin pa'i phyir ro/ /ci ste gzhan du na yang zhes bya ba ni ji ste khyed na re/ khyad par gang yang rung ba spyi dang ldan par gyur na yang des 'gro ba 'grub par 'gyur ro zhe na yang ngo / /de lta na dpe bsgrub par bya bas stong pa'i skyon chags par 'gyur ba 'ba' zhig tu yang ma zad kyi/ gtan tshigs kyi don 'gal ba nyid du yang 'gyur ro/ /ji lta zhe na/ de'i phyir tha snyad du yang don 'gal ba nyid yin na don dam par lta smos kyang ci dgos te zhes bya ba smras te/ 'di ltar lhas byin dbyug pa dang ldan pa yin no snyam pa'i nges pa skye ba gang yin pa de la 'gro ba med pa'i mtshan nyid kyi tshig gi don dang 'brel pas khyab pa yin pas 'di ltar khyed kyang de la 'gro ba med pa dang ldan pa nyid du sgrub par byed pa'i phyir/ des na khyed kyi gtan tshigs kyi don de tha snyad du yang 'gal ba nyid yin na don dam par lta smos kyang ci dgos te/ de ltar mi 'thad pa'i phyir/ gtan tshigs kyang med pa la dpe yang med de/ de'i phyir ji skad smras pa'i skyon ldog pa med do zhes bya ba smras so/ / 'di skad bstan te/ khyed kyi gtan tshigs snga ma de dag gi yul dang ldan pa'i tha snyad byed pa'i phyir ro zhes bya ba'i don ma grub pas nang gi dngos po rnams skyes pa kho na yin te zhes bya ba'i phyogs snga ma sngar bzhag pa ma grub po zhes bya ba'i tha tshig go/ /rang gi sde pa dag las kha cig na re zhes bya ba ni mdo sde pa dag na re/ dbu ma pas 'gro ba med par 'gog pa ni grub pa la sgrub pa'i skyon chags pa yin pas mi rung ngo zhes zer ba yin no/ /rang gi sde pa dag las kha cig ces bya ba ni mdo sde pa dag go 'dun pa'i rgyu las byung ba'i rtsol bas bskyed pa'i rlung gi khams las 'byung ba dang 'byung ba las gyur pa'i tshogs lus zhes bya ba yul gzhan du bar chad med par skye ba 'byung ba la 'gro ba zhes bya'o zhes bya bas 'di skad bstan te/ 'dun pa las rtsol ba 'byung zhing rtsol bas rlung gi khams bskyed la/ rlung gi khams las 'byung ba dang 'byung ba las gyur pa'i tshogs lus zhes bya ba yul gzhan du bar chad med par skye bar 'byung ba la 'gro ba zhes bya ste/ de'i phyir kun rdzob tu yang 'gro ba zhes bya ba don gzhan du gyur pa med la/ don dam par yang 'gro ba med pas dbu ma pa 'gro ba don gzhan du gyur pa 'gog par byed pa ni grub pa la sgrub pa'i skyon chags pa yin pas mi rung ngo zhes zer ro/ /'dun pa'i rgyu zhes bya ba la 'dun pa zhes bya ba ni byed 'dod pa nyid do/ /'dun pa de nyid rgyu yin pas 'dun pa'i rgyu'o/ /gang gi rgyu yin zhe na/ rtsol ba'i ste de'i phyir 'dun pa'i rgyu las byung ba'i rtsol ba zhes bya ba smras te/ rtsol ba ni g.yo ba'i mtshan nyid do/ /rtsol ba de rlung gi khams bskyed pas na rtsol bas bskyed pa'i rlung gi khams zhes bya ba smras so/ /rlung gi khams de las 'byung ba dang 'byung ba las gyur pa'i tshogs lus zhes bya ba yul gzhan du bar chad med par skye ba 'byung ba la 'gro ba zhes bya'o zhes bya ba la/ 'byung ba'i tshogs zhes bya ba ni 'byung ba chen po bzhi'i tshogs so/ /'byung ba las gyur pa'i tshogs zhes bya ba ni rgyur byas pa'i gzugs rnams kyi tshogs so/ /de yang gang zhe na/ de'i phyir lus zhes bya bas zhes smras te/ 'byung ba dang 'byung ba las gyur pa'i tshogs de ni lus zhes bya'o/ /rlung gi khams las lus de yul nas yul gzhan du skye ba dang bar chad med par rgyun chags su skye ba 'byung ba la 'gro ba zhes bya bar sbyar ro/ /de'i phyir 'gro ba don gzhan du gyur pa med do zhes bya ba ni ji ltar bye brag pa rnams kyis brtags pa ltar med de/ ci'i phyir zhe na/ skye ba'i yul nyid du skye bar byed pa 'jig pa'i phyir zhes bya ba smras te/ 'gro ba zhes bya ba ni lus yul gzhan du bar chad med par skye ba tsam la bya na/ lus ni gang du skye ba'i yul de nyid du 'jig pa'i phyir 'gro ba don gzhan du gyur pa med do/ /de yang ji lta bu zhe na/ de'i phyir me lce la sogs pa bzhin du 'gro ba 'khrul pa yin pas 'gro ba don gzhan du khas mi len to zhes bya ba smras te/ me lce dang chu rgyun la sogs pa yang gang du skyes pa'i yul de nyid du 'jug pas yul gzhan du 'gro ba med bzhin du 'jig rten dag gis 'gro bar mthong ba ni 'khrul pa yin pas 'gro ba don gzhan du gyur pa yod par kho bo cag khas mi len to/ /don dam par yang 'gro ba med pas don dam par 'gro ba 'gog pa ni grub pa la sgrub pa yin no zhes zer ro zhes bya bas ni 'di skad bstan to/ /ji ltar dbu ma pas don dam par 'gro ba dgag pa dang / lus las gzhan pa'i 'gro ba dgag pa smras pa gang yin pa de ni kho bo cag mdo sde pa'i grub pa'i mtha'i rjes su smra ba kho na yin pas de'i phyir grub pa la sgrub pa'i skyon chags pa yin no zhes zer ro/ /de skad ces zer ba de'i lan du/ 'dir 'grel pa byed pa nyid kyis skye ba bkag pas ji skad smras pa'i sgrub pa mi 'grub pa'i phyir dang zhes bya ba la sogs pa smras te/ skye ba bkag pas ni ji skad smras pa'i sgrub pa mi 'grub pa'i phyir zhes bya ba ni nged dbu ma pas/ bdag las ma yin gzhan las min/ /gnyis las ma yin rgyu med min/ /dngos po gang dag gang na yang / /skyes pa nam yang yod ma yin/ /zhes bya bas don dam par dngos po thams cad skye ba bkag pas/ des na khyed kyi 'dun pa'i rgyu las byung ba'i rtsol bas bskyed pa'i rlung gi khams las 'byung ba dang 'byung ba las gyur pa'i tshogs lus zhes bya ba yul gzhan du bar chad med par skye ba 'byung ba la 'gro ba zhes bya'o zhes 'di skad smras pa'i sgrub pa mi 'grub pa'i phyir/ de yang skye bo mkhas pa'i yid mgu bar byed pa ma yin no/ /me lce la sogs pa bzhin du 'gro ba 'khrul pa yin no zhes bya ba'i shes pa de yang 'khrul pa nyid yin pa'i phyir zhes bya bas ni 'di skad bstan te/ ji ltar me lce la sogs pa skye ba'i yul nyid du 'jig pa'i phyir/ yul gzhan du 'gro ba med pa de bzhin du 'jig rten dag gis 'gro ba mthong ba ni 'khrul pa yin la/ me lce la sogs pa yul gzhan du bar chad med par skye bar shes pa gang yin pa de ni yang dag pa'i shes pa yin no zhes khyed mdo sde pa dag 'dod pa'i shes pa de yang 'khrul pa'i shes pa kho na yin te/ gang gi phyir 'gro ba med pa de'i phyir skye bar 'dod pa de yang 'khrul pa yin pa'i phyir/ de yang skye bo mkhas pa'i yid mgu bar byed pa ma yin no/ /'gro ba po dang 'gro ba gnyis gzhan nyid ma yin pa yang 'gog par 'gyur ba'i phyir zhes bya ba ni khyed na re/ de'i phyir 'gro ba don gzhan du gyur pa med de zhes bya ba la sogs pas 'gro ba po dang 'gro ba gnyis gzhan nyid ma yin te/ gcig pa nyid yin par 'dod pa de yang 'og nas 'gog par 'gyur ba'i phyir/ 'gro ba don gzhan du gyur pa ma yin pa yod par rtog pa'i dri ba de yang 'gog par 'gyur bas da yang skye bo mkhas pa'i yid mgu bar byed pa ma yin no zhes bya bas ni 'di skad bstan te/ ji ltar bye brag pa rnams kyis 'gro ba po dang 'gro ba gnyis gzhan nyid du brtags pa de nyes par smras pa yin pas de bzhin du khyed kyis gzhan nyid ma yin par brtags pa de yang nyes par smras pa kho na yin pas/ kho bos de don dam par 'gog par byed pa ni grub pa la sgrub pa ma yin no zhes bya ba'i tha tshig go/ /grangs can dag na re/ ma song ba la rdul shas che zhing bya ba byed pa la 'jug par gsal bar gyur pa na/ 'gro'o zhes zer ro zhes bya ba ni grangs can dag ma song ba'i lam la 'gro ba yod par sgrub pa yin te/ de dag na re/ las kyang dbang po lnga po dag dang / lag pa dang / rkang pa dang / rkub dang / mdoms zhes bya ba dag la snying stobs dang / rdul dang / mun pa zhes bya ba rang bzhin gyi yon tan gsum yod pa las/ gang gi tshe las kyi dbang po rkang pa ma song ba'i lam la rdul gyi rang bzhin shas chung ba'i tshe na ni 'gro ba'i mtshan nyid kyi bya ba byed pa la 'jug par mi gsal bas 'gro bar mi byed do/ /gang gi tshe las kyi dbang po rkang pas ma song ba'i lam la rdul gyi rang bzhin shas che zhing 'gro ba'i mtshan nyid kyi bya ba byed pa la 'jug pa gsal bar gyur pa na/ ma song ba'i lam la 'gro ba yod de rdul ni g.yo ba dang 'jug par byed pa'i bdag nyid yin pa'i phyir ro zhes zer ro/ /de skad ces zer ba de'i lan du 'dir 'grel pa byed pa nyid kyis/ de dag gi yang gsal ba bkag pa'i phyir 'gro ba mi 'grub pas rtog pa tsam du zad do zhes bya ba smras so/ /'di skad bstan te/ ji ltar 'gro ba'i bya ba snga nas mi gsal ba ni ma 'ongs pa'i dus na yang gsal bar mi byed de/ mi gsal ba'i phyir nam mkha'i me tog bzhin pas de'i phyir ma song ba la yang 'gro ba med par grub pas/ 'gro ba yod par brtags pa ni rtog pa tsam du zad do// //bam po nyi shu gsum pa/ ci ste yang 'gro ba smra ba dag ji skad bshad pa'i skyon gyi 'jigs pas bgom pa la 'gro ba yod par dam bcas na ji skad bshad pa'i skyon med do snyam na/ slob dpon gyis don de nges par mdzad nas/ song ba dang ma song ba ma gtogs par bgom pa med pa nyid kyis bshad pa/ song dang ma song ma gtogs par/ /bgom pa shes par mi 'gyur ro/ /zhes bya ba la sogs pas ni bgom pa zhes bya ba nyid med par ston to/ /gzung du med do zhes bya ba'i tha tshig go zhes bya ba ni bgom pa zhes bya ba dmigs su med do zhes bya ba'i don to/ /de la bgom pa zhes bya ba de gang yin zhe na/ song ba'i lam la yang ma yin/ ma song ba'i lam la yang ma yin pa da ltar gom pas mnan pa'i lam gang yin pa de ni bgom pa zhes bya ste/ de ni song ba dang ma song ba'i lam ma gtogs par de gnyis kyi bar na med do/ /ji ltar de med ce na/ 'di la bgom pa de ni song ba'am/ /ma song ba'am/ gang cung zad ni song cung zad ni ma song ba gnyi ga zhig yin grang na/ phyogs gnyi gar bstan pa'i rjes su dpag pa'i gnod par 'gyur ba'i phyir ro zhes bya ba ni bgom pa med par sgrub pa yin no/ /'dir smras pa zhes bya ba ni skye bar smra ba dag gis bgom pa yod par sgrub pa'i phyir smras pa yin no/ /bgom pa med pa ma yin te/ /zhes bya ba ni mi snang ba ma yin te/ yod pa yin no zhes bya ba'i tha tshig go/ /'di ltar/ gang na g.yo ba de na 'gro/ /de yang gang gi bgom pa la/ /g.yo ba song min ma song min/ /de phyir bgom la 'gro ba yod/ /ces bya ba 'di ni phyogs snga ma'i tshig le'ur byas pa yin no/ /de la phyogs gang na rkang pa 'degs pa dang 'jog pa'i mtshan nyid kyi g.yo ba snang ba de na 'gro ba yod de zhes bya ba ni bgom pas phyogs gang na rkang pa 'degs pa dang 'jog pa'i mtshan nyid kyi g.yo ba snang ba'i phyogs de na 'gro ba yod pa ste/ g.yo ba dang 'gro ba zhes bya ba ni don gcig go/ /g.yo ba de yang gang gi phyir bgom pa la snang gi /g.yo ba de song ba la yang mi snang ma song ba la yang mi snang ba de'i phyir bgom pa la 'gro ba yod do zhes bya ba la/ bgom pa zhes bya ba ni da ltar gom pas mnan pa'i lam ste/ de la rkang pa 'degs pa dang 'jog pa'i mtshan nyid kyi g.yo ba dang 'gro ba snang bas des na 'gro ba yod do/ /'di skad bstan te/ g.yo ba de yang gang gi phyir bgom pa la snang gi g.yo ba de song ba la yang mi snang ba de'i phyir bgom pa zhes bya ba'i lam la g.yo ba de snang bas de'i phyir bgom pa la 'gro ba yod pa nyid yin no zhes bya ba'i tha tshig go/ /de ltar slob dpon nyid kyis kyang / /'di la gang na g.yo ba snang ba de la 'gro ba yod de/ g.yo ba de yang gang gi phyir bgom pa la snang gi /g.yo ba de song ba la yang mi snang ma song ba la yang mi snang ba de'i phyir/ bgom pa la 'gro ba yod pa nyid ma yin no zhes bshad do/ /des na de ltar bgom pa yod pas 'gro ba 'grub pa'i phyir 'dod pa grub bo zhes bya ba ni de ltar bgom pa yod pas de la 'gro ba yod pa 'grub pa'i phyir/ kho bo cag gi 'dod pa don gyi dngos po rnams skyes pa kho na yin te/ de dag gi yul dang ldan pa'i tha snyad byed pa'i phyir ro zhes bya ba de grub po zhes zer ba yin no/ /de'i phyir de ltar/ ji skad smras pa'i tshul gyis na/ /bgom pa shes par mi 'gyur ro/ /zhes bya ba bshad pa gang yin pa de rigs pa ma yin zhing phyogs gnyi gar bstan pa'i rjes su dpag pa'i gnod par yang mi 'gyur ro zhe'o zhes bya bas ni 'di skad bstan te/ bgom pa zhes bya ba de ltar song ba dang ma song ba'i lam gyi khongs su gtogs pa ma yin pas de'i phyir bgom pa med pa yang ma yin la/ song ba dang ma song ba'i phyogs gnyi gar bstan pa'i rjes su dpag pa'i gnod par yang mi 'gyur ro zhes zer ro/ /gzhan dag ni gang gi zhes bya bas 'gro ba po'i zhes zer ro zhes bya ba ni phyogs snga ma'i tshig le'ur byas pa/ gang na g.yo ba de na 'gro/ /de yang gang gi bgom pa la/ /g.yo ba song min ma song min/ /de phyir bgom la 'gro ba yod/ /ces bya ba de'i skabs nas gang gi zhes bya ba'i sgra smos pa de la gnas brtan bud+d+ha pA li ta ni 'di skad du rnam par bshad pa byed do zhes bya bar sbyar ro/ /gang gi zhes bya ba'i sgra de la sbyar ba'i lugs mi mthun pa ci yod ce na/ de la sngar 'grel pa byed pa nyid kyis ni bgom pa'i sa phyogs gang na rkang pa 'degs pa dang 'jog pa'i mtshan nyid kyi g.yo ba snang ba de na 'gro ba yod do/ /g.yo ba de yang gang gi phyir bgom pa la snang gi /g.yo ba de song ba la yang mi snang ma song ba la yang mi snang bas de'i phyir bgom pa la 'gro ba yod do zhes bshad de/ des ni gang gi zhes bya ba'i sgra gang gi phyir zhes bya bar sbyar te/ des na gang na zhes bya ba dang / de na zhes bya ba dang / bgom pa la zhes bya ba de dag don gcig ste/ da ltar gom pas mnan pa'i lam gang yin pa la bya'o/ /g.yo ba zhes bya ba dang / 'gro ba zhes bya ba de nyid kyang don gcig ste 'gro ba'i bya ba yin no/ /de'i phyir bgom pa'i lam gang na g.yo ba yod pa de na 'gro ba yod la/ gang gi phyir bgom pa'i lam la g.yo ba yod pa de'i phyir bgom pa'i lam la 'gro ba yod do zhes bshad do/ /gnas brtan bud+d+ha pA li ta ni 'gro ba po'i bgom pa'i lam gyi phyogs gang na rkang pa 'degs pa dang 'jog pa'i mtshan nyid kyi g.yo ba snang ba de na 'gro ba yod de g.yo ba de yang 'gro ba po gang gi bgom pa'i lam la yod pa de la snang gi / g.yo ba de song ba la yang mi snang ma song ba la yang mi snang ba de'i phyir bgom pa la 'gro ba yod do zhes 'chad de/ des na gang gi zhes bya ba'i sgra/ 'gro ba po gang gi zhes bya bar sbyar te/ des na 'dir yang gang na zhes bya ba dang / de na zhes bya ba dang / bgom pa la zhes bya ba de dag don gcig ste/ da ltar gom pas mnan pa'i lam gang yin pa de la bya'o/ /g.yo ba zhes bya ba dang 'gro ba zhes bya ba de gnyis kyang don gcig ste/ 'gro ba'i bya ba yin no/ /de'i phyir 'gro ba po gang gi bgom pa'i lam gang na g.yo ba yod pa de na 'gro ba yod pa de'i phyir bgom pa'i lam la 'gro ba yod do zhes bshad do/ /de'i phyir gnas brtan bud+d+ha pA li ta ni gang gi zhes bya ba 'gro ba po'i zhes zer ro/ /kha cig na re/ de ni rigs pa ma yin te zhes bya ba ni 'grel pa byed pa nyid kyis gnas brtan bud+d+ha pA li ta'i rnam par bshad pa de rigs pa ma yin par sgrub pa'i tshig yin no/ /ci'i phyir de rigs pa ma yin zhe na/ de'i phyir zhes bya ba'i sgra'i zla med pa'i phyir dang zhes bya ba smras te/ gang gi zhes bya ba'i sgra 'gro ba po gang gi zhes bya bar sbyar na/ de phyir bgom la 'gro ba yod/ /ces bya ba de phyir zhes bya ba'i sgra de'i zla med pa'i phyir rigs pa ma yin te/ gang dag de gnyis ni rtag tu sbyar ro zhes 'byung bas 'dir yang gang zhes bya ba'i sgra'i zla ni don zhes bya ba yin pa bzhin du/ gang gi phyir zhes bya ba'i sgra'i zla yang de'i phyir zhes bya ba yin par mngon pas/ gang gi zhes bya ba'i sgra 'gro ba po zhes bya bar mi rigs kyi/ gang gi phyir zhes bya bar rigs so/ /des na tshig le'ur byas pa de la/ de las gang zhes bya ba dang / de na zhes bya ba dang / bgom pa la zhes bya ba de dag ni don gcig ste/ da ltar gom pa mnan pa'i lam gang yin pa la bya'o/ /gal te gang na zhes bya ba dang / de na zhes bya ba dang / bgom pa zhes bya ba de dag 'gro ba po la sbyar na bdag nyid la bdag nyid 'gro ba'i skyon du 'gyur bas de ni rigs pa ma yin no/ /bya ba'i gzhi 'khrul pa med pa'i phyir dang zhes bya ba ni/ gang gi zhes bya ba 'gro ba po zhes zer ba de de'i phyir zhes bya ba'i sgra'i zla med pa 'ba' zhig gi phyir rigs pa ma yin par yang ma zad kyi/ bya ba'i gzhi 'khrul pa med pa'i phyir yang rigs pa ma yin te/ 'di ltar g.yo ba dang 'gro ba'i mtshan nyid kyi bya ba'i gzhi ni bgom pa'i lam yin par nges shing 'khrul pa med de/ rtag tu de nyid yin pa'i phyir/ gang gi zhes bya ba 'gro ba po'i zhes bya bar sbyar bar mi rigs so/ /song ba dang ma song ba'i 'gro ba po'i 'gro ba dgag pa bstan pa'i phyir ro zhes bya bas ni 'di skad bstan te/ gang gi zhes bya ba 'gro ba po'i zhes zer ba de de'i phyir zhes bya ba'i sgra'i zla med pa'i phyir dang / bya ba'i gzhi 'khrul pa med pa'i phyir rigs pa ma yin par yang ma zad kyi/ rnam grangs 'dis kyang rigs pa ma yin te/ 'di ltar song ba dang ma song ba'i lam gyi 'gro ba po gang yin pa de'i 'gro ba bkag pas de'i phyir 'gro ba'i zla 'gro ba po yang med la/ 'gro ba'i bya ba'i bgom pa yang lam yin par 'khrul pa med pa'i phyir dang / song ba dang ma song ba'i lam la 'gro ba po med par dgag pa yang bstan zin pa'i phyir/ gang gi zhes bya ba 'gro ba po'i zhes rnam par bshad pa de rigs pa ma yin no zhes 'grel pa byed pa 'di nyid zer ro/ /'dir bshad pa zhes bya ba ni 'gro ba smra ba dag gi bgom pa yod pa nyid du sgro btags pa de la/ mdo mdzad pa nyid kyis tshig le'ur byas pa 'og ma 'di bshad do zhes bya bar sbyar ro/ /bgom la 'gro ba yod par ni/ /ji lta bur na 'thad par 'gyur/ /zhes bya ba ni bgom pa'i lam la g.yo ba'i mtshan nyid kyi 'gro ba yod par ji ltar 'thad par 'gyur te mi 'gyur ro zhes bya ba'i tha tshig go/ /gang gi tshe dmigs kyis bsal ba dang ma bsal ba'i ngo bo nyid khas blangs su zin kyang de la 'gro ba yod par mi 'thad de lam yin pa'i phyir/ dper na song ba'i lam bzhin no zhes bya bar dgongs so zhes bya ba la 'dir yang gang gi tshe dmigs kyis bsal ba dang ma bsal ba'i ngo bo nyid khas blangs su zin kyang zhes bya ba 'di ni chos can yin te/ gang gi tshe dmigs pas bsal ba'i ngo bo nyid khas blangs su zin kyang zhes bya ba ni sngar/ song dang ma song ma gtogs par/ /bgom pa shes par mi 'gyur ro/ /zhes bshad pa'i tshe bgom pa dmigs kyis bsal zhing bkag pa'i ngo bo nyid gang yin pa de da 'dir 'gro ba smra ba dag gis yod par khas blangs su zin kyang de la g.yo ba'i mtshan nyid kyi 'gro ba yod par mi 'thad pa'i chos khyad par can yod pa'i phyir chos can yin no/ /yang na gang gi tshe dmigs kyis ma bsal ba'i ngo bo nyid khas blangs su zin kyang zhes bya ba ni/ sngar/ song dang ma song ma gtogs par/ /bgom pa shes par mi 'gyur ro/ /zhes b shad pa'i tshe bgom pa zhes bya ba ni song ba dang ma song ba'i lam gyi khongs su gtogs pa'i phyir logs shig na med pas dmigs kyis bsal zhing dgag par mi nus pas dmigs kyis ma bsal ba'i ngo bo nyid gang yin pa de da 'dir 'gro ba smra ba dag gis yod par khas blangs su zin kyang de la g.yo ba'i mtshan nyid kyi 'gro ba yod par mi 'thad pa'i chos khyad par can yod pa'i phyir de yang chos can yin no/ /de la/ 'gro ba yod par mi 'thad de/ /zhes bya ba 'di ni bsgrub par bya ba chos yin/ lam yin pa'i phyir zhes bya ba 'di ni sgrub pa'i chos yin/ dper na song ba'i lam bzhin no zhes bya ba 'di ni dpe yin par sbyar te/ dper na song ba'i lam ni yin pa'i phyir de la 'gro ba yod par mi 'thad pa de bzhin du/ bgom pa zhes bya ba dmigs kyis bsal ba dang ma bsal ba'i ngo bo nyid de yang lam yin pa'i phyir/ de la/ 'gro ba yod par mi 'thad do/ /zhes bya bar mdo mdzad pas dgongs so/ /yang na/ bgom la 'gro ba yod par ni/ /ji lta bur na 'thad par 'gyur/ /zhes bya ba ni brgal zhing brtag pa mtshungs pa'i phyir ro zhes bya bar dgongs te zhes bya ba ni/ bgom pa de lam yin pa'i phyir de la 'gro ba yod par mi 'thad pa 'ba' zhig tu yang ma zad kyi/ de la brgal zhing brtag pa mtshungs pa'i skyon yod pa'i phyir/ yang / 'gro ba yod par mi 'thad do/ /zhes bya bar mdo mdzad pas dgongs so/ /de bstan pa'i phyir bgom pa la 'gro ba yod par brtag na brgal zhing brtag pa mtshungs pa 'dir yang 'gyur te zhes bya ba smras te/ brgal zhing brtag pa mtshungs la zhes bya ba ni dgag pa mtshungs pa'o/ /de yang gang zhe na/ g.yo ba song ba'am ma song ba'am de gnyis dang mi 'dra ba'i chos gang la yod ce na zhes bya ba smras te/ ji ltar sngar 'gro ba zhes bya ba ni gang na yod cing song ba'am ma song ba'i lam la yod ces bya bar ni de la 'gro ba'i bya ba 'das zin pa'i phyir dang / 'gro ba'i bya ba ma brtsams pa'i phyir 'gro ba med do/ /song ba dang ma song ba ma gtogs pa'i bgom pa zhes bya ba ni med pa'i phyir/ de la yang 'gro ba med do zhes bshad pa bzhin du 'dir yang 'gro ba'i mtshan nyid kyi g.yo ba zhes bya ba gang na yod/ /ci song ba dang ma song ba'i lam la yod dam/ de gnyis dang mi 'dra ba'i chos song ba yang ma yin ma song ba yang ma yin pa bgom pa'i lam zhes bya ba la yod ces bya ba gzhan gyis dris pa na brgal zhing brtag pa mtshungs par 'gyur ro/ /ji lta zhe na/ de la yang skyon bshad zin to zhes bya ba smras te/ de la yang song ba dang ma song ba'i lam la 'gro ba yod ces bya bar ni de la 'gro ba'i bya ba 'das zin pa'i phyir dang / 'gro ba'i bya ba ma brtsams pa'i phyir de la 'gro ba med do/ /song ba dang ma song ba ma gtogs pa'i bgom pa zhes bya ba ni med pa'i phyir de la yang 'gro ba med do zhes bya ba'i dgag pa de dag nyid sbyar bar bya'o/ /yang na/ bgom la 'gro ba yod par ni/ /ji lta bur na 'thad par 'gyur/ /zhes bya ba ni don dam pa pa'i 'gro ba yod par ston pa'i rjes su dpag pa med pa'i phyir zhes bya ba ni/ bgom pa de lam ma yin pa'i phyir dang / de la brgal zhing brtag pa mtshungs pa'i skyon yod pa'i phyir 'gro ba yod par mi 'thad par yang ma zad kyi/ de la don dam pa pa'i 'gro ba yod par ston pa'i rjes su dpag pa med pa'i phyir yang 'gro ba yod par mi 'thad par bstan to/ / 'di skad bstan te/ gal te khyed kyi rjes su dpag pa dag gis kho bo la don dam pa pa'i 'gro ba yod par bstan cing bsgrubs par gyur na ni des na bgom pa yang yod par rigs par 'gyur zhing / bgom pa de grub na de la g.yo ba'i mtshan nyid kyi 'gro ba yod par smra ba yang rigs pa zhig na/ gang gi phyir khyed la don dam pa pa'i 'gro ba yod par ston pa'i rjes su dpag pa med pa de'i phyir 'gro ba med pas 'gro ba med cing 'gro ba dang bral ba'i bgom pa yang mi 'thad pas/ des na bgom pa la 'gro ba yod par mi 'thad do zhes ston to/ /de'i phyir/ gang tshe 'gro ba med pa yi/ /bgom pa 'thad pa med phyir ro/ /zhes bya ba gsungs te/ gang gi phyir khyed la don dam pa pa'i 'gro ba yod par ston pa'i rjes su dpag pa med pa'i phyir 'gro ba ni med do/ /gang gi tshe 'gro ba med pa'i bgom pa 'thad par mi 'gyur ba de'i tshe/ bgom la 'gro ba yod par ni/ / ji lta bur na 'thad par 'gyur/ /zhes bya bar sbyar ro/ /rta bcing ba dang mthun pa'i phyir ro zhes bya bar yang dgongs te zhes bya ba ni/ bgom pa de'i lam yin pa'i phyir dang / de la brgal zhing brtag pa mtshungs pa'i skyon yod pa'i phyir dang / don dam pa pa'i 'gro ba yod par ston pa'i rjes su dpag pa med pa'i phyir de la 'gro ba yod par mi 'thad par yang ma zad kyi/ de la rta bcing ba dang mthun pa'i phyir yang 'gro ba mi 'thad do zhes slob dpon gyis dgongs te zhes bya bar ston to/ /'di skad bstan te/ dper na 'ba' zhig gis la la zhig la rta bcing ba 'di gang gi zhes dris pa na rta 'di gang gi yin pa'o zhes zer ba dang / rta 'di gang gi zhes dris pa na rta bcing ba 'di gang gi yin pa'i 'o zhes zer ba des/ rta'i ngo bo nyid kyang dmigs kyis ma bsal la/ rta bdag gi ngo bo nyid kyang dmigs kyis ma bsal ba'i phyir/ rta de de'i yin par nges pa med par 'gyur ba bzhin du/ 'dir yang de dang mthun pa'i phyir bgom pa la 'gro ba yod par mi 'thad do/ /'di la ji ltar rta bcing ba dang mthun pa nyid yin zhe na/ bgom pa gang yin/ g.yo ba gang na'o/ /g.yo ba gang na/ bgom pa na'o zhes bya ba gang yang rung ba dmigs kyis ma bsal ba'i phyir ro zhes bya bas ni 'di skad bstan te/ kho bos khyed la bgom pa gang yin zhes dris pa na/ khyed na re/ g.yo ba gang na yod pa yin no zhes zer la kho bos g.yo ba gang na yod ces dris pa na khyed na re/ bgom pa na yod do zhes zer bas bgom pa'i ngo bo nyid kyang dmigs kyis ma bstsal la/ 'gro ba'i ngo bo nyid kyang dmigs kyis ma bsal ba'i phyir bgom pa yang med la/ 'gro ba yang med pas de'i phyir/ bgom la 'gro ba yod par ni/ /ji lta bur na 'thad par 'gyur/ /gang tshe 'gro ba med pa yi/ /bgom pa 'thad pa med phyir ro/ /zhes bya bar sbyar ro/ / ci ste thog ma med pa nas tha snyad du grags pa'i bgom pa khas blangs nas de la don dam pa pa'i 'gro ba yod par 'dod na zhes bya ba ni/ ci ste pha rol po dag 'di skad ces/ thog ma med pa'i dus yun ring po nas kun rdzob kyi tha snyad du tha na ba lang rdzi la sogs pa'i chung ma yan chad la grags pa'i bgom pa brtag mi bzod pa ma bsal ba yod pa nyid du khas blangs nas/ de la don dam pa pa'i 'gro ba yod par 'dod pas/ des na rta bcing ba dang mthun pa nyid du mi 'gyur ro zhes zer na'o/ /de skad ces zer ba de'i lan ni de lta na yang de la 'gro ba'i bya ba gcig pu zhig yod pa de ni bgom pa zhes bya ba de la nye bar sbyar ba'i mthu can yin pas bgom pa la 'gro ba yod do zhes bya ba'i 'gro ba gzhan de gang zhig yod ces bya ba 'di yin te/ 'dis ni 'jig rten la grags pa'i bgom pa gang yin pa de yang rigs pa ma yin pas de la don dam pa pa'i 'gro ba med par ston to/ /'di skad bstan te/ 'gro ba'i bya ba zhes bya ba ni/ 'gro ba po dang 'gro ba dang / bgom pa la sogs pa la spyir gcig pu zhig yod la/ de ni bgom pa zhes bya ba de la nye bar sbyar zhing der mthu yongs su gtugs shing zad par byas pas de las gzhan pa'i 'gro ba'i bya ba gzhan ni med pas 'gro ba med pa'i phyir/ bgom pa la 'gro ba yod do zhes bya ba'i 'gro ba gzhan de gang zhig yod de med do/ /de la pha rol pos nang gi dngos po rnams skyes pa kho na yin te/ de dag gi yul dang ldan pa'i tha snyad byed pa'i phyir ro zhes smras pa gang yin pa de ma grub ste gtan tshigs kyi don ma grub pa'i phyir ro/ /dpe yang ma grub pa ste/ don dam par lhas byin ma grub pa'i phyir ro zhes bya ba ni mjug bsdu ba dang tshad ma'i 'bras bu yin te/ /dbu ma pas/ re zhig song la 'gro med de/ /ma song ba la'ang 'gro ba med/ /song dang ma song ma gtogs par/ /bgom pa shes par mi 'gyur ro/ /bgom la 'gro ba yod par ni/ /ji lta bur na 'thad par 'gyur/ /gang tshe 'gro ba med pa yi/ /'gro ba 'thad pa med phyir ro/ /zhes ji skad bsgrub pa'i rigs pa des na de la pha rol pos phyogs snga ma nye bar gzhag pa'i skabs su nang gi dngos po rnams skyes pa kho na yin te/ de dag gi yul dang ldan pa'i tha snyad byed pa'i phyir ro/ /'di la gang mi skye ba de ni de dag gi yul dang ldan pa'i tha snyad mi byed de/ dper na mo gsham gyi bu 'gro bar mi byed pa bzhin no/ /lhas byin dang khyab 'jug bshes gnyen ni de ltar 'gro bar mi byed pa ma yin te/ de'i phyir nang gi dngos po rnams skye ba kho na yin no zhes smras pa gang yin pa de'i phyogs dang phyogs kyi chos dang dpe thams cad ma grub po zhes bstan to/ /ci ste 'gro ba'i bya ba ni bgom pa zhes bya ba de la yongs su rdzogs pa nyid ma yin la 'di ltar de ni kho bo cag 'gro ba'i sgrar brjod pas des na de yod pa'i phyir gtan tshigs kyi don ma grub pa nyid ma yin no zhe na zhes bya bas ni 'di skad bstan te/ ji ste 'gro ba smra ba dag 'di skad ces kho bo cag gis thog ma med pa nas tha snyad du grags pa'i 'gro ba zhes smras pa gang yin pa de ni bgom pa zhes bya'o/ /der 'gro ba zhes bya ba de ni 'gro ba'i bya ba yin pas de'i phyir 'gro ba'i bya ba ni bgom pa zhes bya bar de la nye bar ma sbyar zhing / der yongs su rdzogs pa nyid ma yin la/ 'di ltar 'gro ba'i bya ba de ni kho bo cag 'gro ba'i sgrar brjod pas des na 'gro ba'i bya ba de yod pa'i phyir/ kho bo cag gi gtan tshigs kyi don de dag gi yul dang ldan pa'i tha snyad byed pa'i phyir ro zhes bya ba de ma grub pa nyid ma yin no zhes zer ba yin no/ /de skad ces zer ba de'i lan du/ slob dpon gyi zhal snga nas kyis 'dir bshad pa/ gang gi bgom la 'gro yod pa/ /de yi bgom la 'gro med par/ /thal bar 'gyur te gang gi phyir/ /bgom pa khong du chud phyir ro/ /zhes bya ba gsungs te/ smra ba gang gi bgom pa la 'gro ba yod pa de'i phyogs la zhes bya ba ni smra ba gang gi thog ma med pa nas tha snyad du grags pa'i bgom pa la 'gro ba'i bya ba zhes bya ba yod par khas len par de'i phyogs la'o/ /'gro ba la 'gro ba yod du zin kyang zhes bya ba ni 'gro ba'i bya ba gang yin pa de 'gro ba'i sgrar brjod pas de nyid 'gro ba yin pas 'gro ba yod du zin kyang ngo / /bgom pa la 'gro ba med par thal bar 'gyur te zhes bya ba ni/ bgom pa'i lam la 'gro ba med par thal ba'i skyon du 'gyur ba'o/ /ci'i phyir zhe na/ gang gi phyir bgom pa zhes bya ba de la 'gro ba'i bya ba yongs su ma rdzogs shing ma zhugs par khong du chud cing shes par 'gyur ba'i phyir ro zhes bya bas ni bgom pa la 'gro ba med par thal bar 'gyur ba'i gtan tshigs bstan te/ gang gi phyir 'gro ba smra ba dag na re/ 'gro ba'i bya ba ni bgom pa zhes bya ba de la yongs su rdzogs pa nyid ma yin la zhes zer ba de'i phyir bgom pa la 'gro ba med par thal bar 'gyur te/ 'gro ba'i bya ba de bgom pa zhes bya ba'i lam la nye bar ma sbyar zhing der yongs su ma rdzogs ma zhugs par khong du chud cing shes pa dang yongs su bcad par 'gyur ba'i phyir bgom pa la 'gro ba med do zhes bya ba'i tha tshig go/ /de ni mi 'dod de zhes bya ba ni bgom pa la 'gro ba med par thal bar 'gyur ba de ni pha rol po dag mi 'dod de zhes bya bar sbyar ro/ /'o na pha rol po dag ji ltar 'dod ce na/ bgom pa zhes bya ba de 'gro ba dang bcas par 'dod pas zhes bya ba smras te/ gang gi phyir 'gro ba'i bya ba med na bgom pa zhes bya bar mi 'gyur ba de'i phyir/ pha rol po dag bgom pa zhes bya ba de 'gro ba'i bya ba dang bcas par 'dod do/ /de ltar pha rol po dag bgom pa zhes bya ba de 'gro ba dang bcas par 'dod pas 'di cir 'gyur zhe na/ des na 'gro ba'i bya bas de la don byas zin pa'i phyir zhes bya ba smras te/ bgom pa zhes bya ba de ni 'gro ba dang bcas par 'dod pa des na 'gro ba'i bya ba gcig pu zhig yod pa des bgom pa zhes bya ba de la nye bar sbyar zhing don byas zin pa'i phyir 'gro ba la bya ba med par 'gyur ro/ /de ltar 'gro ba'i bya bas de la don byas zin pa'i phyir/ /ji ltar 'gro ba la bya ba med par 'gyur zhe na/ de'i phyir 'gro ba med pa'i 'gro ba gzhan ni mi 'thad pas zhes bya ba smras te/ 'gro ba'i bya ba gcig pu zhig yod pa de ni bgom pa zhes bya ba de la nye bar sbyar zhing des de la byon zin pa'i phyir/ 'gro ba'i bya ba gnyis pa gzhan med pas khyed na re/ 'gro ba'i bya ba de ni kho bo cag 'gro ba'i sgrar brjod pas 'gro ba yod do zhes zer ba de ni mi 'thad do/ /des ni ji skad bshad pa'i skyon ldog pa med do zhes bya ba ni de ltar 'gro ba med pa'i 'gro ba gzhan mi 'thad pas/ khyed na re/ 'di ltar 'gro ba'i bya ba de ni kho bo cag 'gro ba'i sgrar brjod pas des na de yod pa'i phyir gtan tshigs kyi don ma grub pa nyid ma yin no zhes zer ba de mi rung ste/ 'gro ba med pa nyid de bzhin du gnas so zhes bya ba'i tha tshig go/ /ci ste ji skad bshad pa'i skyon gyi nyen yongs su spang bar 'dod pas bgom pa 'gro ba dang ldan par 'dod cing 'gro ba nyid 'gro ba yin no zhe na zhes bya ba ni ci ste 'gro ba smra ba dag sngar dbu ma pas ji skad bshad pa'i 'gro ba med pa'i skyon gyis nyen nas/ 'gro ba la 'gro ba yod kyang bgom pa la 'gro ba med par thal bar 'gyur bas de ni mi 'dod na/ 'gro ba'i bya bas bgom pa la don byas zin pa'i phyir/ 'gro ba med pa'i 'gro ba gzhan mi 'thad pas ji skad bshad pa'i skyon ldog pa med do zhes bstan pa de yongs su spang bar 'dod pas bgom pa ni don dam pa pa'i 'gro ba gang yin pa de dang ldan pas bgom pa zhes bya'o/ /de ltar don dam pa pa'i 'gro ba de'i rang gi ngo bo ni 'gro ba'i bya ba yin pas de dang ldan pa'i phyir bgom pa'i rang gi ngo bo grub nas phyis bgom pa la 'gro ba yod pa nyid de ni tha snyad pa'i 'gro ba yin no zhes zer ba yin no/ /de skad ces zer ba de'i lan du/ 'dir slob dpon nyid kyis de ltar yang / bgom la 'gro ba yod na ni/ /'gro ba gnyis su thal 'gyur te/ /gang gis bgom pa de dang ni/ /de la 'gro ba gang yin pa'o/ /zhes bya ba gsungs te/ /don dam pa pa'i 'gro ba dang ldan pa'i bgom pa 'gro ba yod par rtog na ni bgom pa gnyis su thal bar 'gyur te zhes bya ba ni/ de ltar rtog na 'gro ba gnyis su thal ba'i skyon du 'gyur ro/ /gnyis gang zhe na/ 'gro ba gang gis bgom pa de bgom pa zhes bya bar 'gyur ba dang zhes bya ba ni gcig ste/ don dam pa'i 'gro ba gang dang ldan pas bgom pa'i lam de bgom zhes bya bar 'gyur ba'o/ /'gro ba gang gis bgom pa de la tha snyad pa'i 'gro ba yod par 'gyur ba gang yin pa'o zhes bya ba ni gnyis pa ste/ tha snyad pa'i 'gro ba gang dang ldan pas bgom pa'i lam de la tha snyad pa'i 'gro ba yod par 'gyur ba gang yin pa'o/ /de lta na skyon gzhan 'dir yang 'gyur te/ 'gro ba gnyis su thal 'gyur na/ / 'gro ba po yang gnyis su 'gyur/ /zhes bya ba'o/ /ci'i phyir zhe na/ zhes bya ba ni pha rol po na re/ 'gro ba gnyis su thal bar 'gyur na/ ci'i phyir 'gro ba po yang gnyis su thal bar 'gyur zhes 'dri ba'o/ /de'i phyir/ gang phyir 'gro po med par ni/ /'gro ba 'thad par mi 'gyur phyir/ / zhes bya ba gsungs te/ gang gi phyir khyed kyis don dam pa pa dang tha snyad pa'i 'gro ba gnyis brjod la/ 'gro ba po gcig la 'gro ba gnyis mi srid pa de'i phyir/ don dam pa pa'i 'gro ba po gcig dang / tha snyad pa'i 'gro ba'i 'gro ba po gcig dang gnyis su thal ba'i skyon du 'gyur ro zhes bya ba'i tshig gi lhag ma'o zhes bya ba ni/ gang phyir 'gro po med par ni/ /'gro ba 'thad par mi 'gyur phyir/ /zhes bya ba'i tshig de'i lhag ma ni/ 'gro ba gnyis su thal 'gyur na/ /'gro ba po yang gnyis su 'gyur/ /zhes bya ba de yin par go rims bzlog ste sbyar bar bya ba'i tha tshig go/ /de yang mi 'dod pas zhes bya ba ni 'gro ba po med par 'gro ba yod pa de yang pha rol pos mi 'dod pas so/ /de mi 'dod pas pha rol po ji ltar 'dod pa khas len cing / de'i phyir ji skad bshad pa'i skyon gyi dri ma nges par bsal bar 'dod pas tha snyad pa'i 'gro ba gcig kho na khas len cing zhes bya ba smras te/ pha rol po dag 'gro ba po med par 'gro ba yod pa de yang mi 'dod pas de'i phyir/ sngar dbu ma pas ji skad bshad pa'i skyon gyi dri ma 'gro ba gnyis su thal bar 'gyur ba dang / 'gro ba po yang gnyis su thal bar 'gyur ba de nges par bsal bar 'dod cing 'gag par 'dod pas tha snyad pa'i 'gro ba gcig kho na khas len cing zhes bya ba 'di lta ste/ ma brtags na 'grub pa'i tha snyad pa'i 'gro ba gcig khas len cing ngo / /de la ltos pas 'gro ba po dang bgom pa 'grub tu zin kyang zhes bya ba ni tha snyad pa'i 'gro ba gcig kho na khas len pa de la ltos pas tha snyad pa'i 'gro ba po dang tha snyad pa'i bgom pa kun rdzob tu grub tu zin kyang ngo / /don dam pa pa'i 'gro ba yang mi 'thad pas zhes bya ba la/ yang zhes bya ba'i sgra ni don dam pa pa'i 'gro ba 'ba' zhig mi 'thad par yang mi zad kyi/ don dam pa pa'i 'gro ba po yang mi 'thad pas zhes bya ba bsdu ba'i phyir ro/ /de dag gi yul dang ldan pa'i tha snyad byed pa'i phyir ro zhes bya ba gtan tshigs kyi don nyid ma grub pa'i phyir dang dpe med pa'i phyir/ nang gi dngos po rnams skyes pa kho na yin te zhes bya ba mi 'grub cing zhes bya ba ni/ de ltar don dam pa pa'i 'gro ba dang 'gro ba po yang mi 'thad pa de'i phyir/ khyed kyi sngar 'gro ba bsgrub pa'i phyogs snga ma nye bar gzhag pa'i skabs su nang gi dngos po rnams skyes pa kho na yin te/ de dag gi yul dang ldan pa'i tha snyad byed pa'i phyir ro/ /'di la gang mi skye ba de la ni de dag gi yul dang ldan pa'i tha snyad byed pa med de/ dper na mo gsham gyi bu 'gro bar mi byed pa bzhin no/ /lhas byin dang khyab 'jug bshes gnyen ni de ltar 'gro bar mi byed pa ma yin te/ de'i phyir nang gi dngos po rnams skye ba kho na yin no zhes smras pa gang yin pa de'i gtan tshigs kyi don dang dpe ma grub pa'i phyir nang gi dngos po rnams skye ba kho na yin te zhes bya ba bsgrub par bya ba de mi 'grub po/ /rten cing 'brel par 'byung ba 'ong ba med pa dang 'gro ba med pa'i khyad par dang ldan pa grub po zhes bya ba ni/ de ltar pha rol po'i phyogs snga ma ma grub pas/ bstan bcos mdzad pa'i bsgrub par bya ba shes rab kyi pha rol tu phyin pa'i don khyad par gyi gzhi rten cing 'brel par 'byung ba zhes bya ba khyad par 'ong ba med pa dang 'gro ba med pa dang ldan par grub po/ /sgra pa dag na re 'gro ba ni gcig tu zad de/ de nyid kho bo cag rang gi ngo bo nyid kyis 'gro bar brjod cing / de gzhi gang na yod pa de ni bgom pa yin la/ 'gro ba po gang yin pa de ni byed pa po yin pas de'i phyir 'gro ba po dang 'gro ba gnyis su thal bar mi 'gyur ro/ /zhes zer ro zhes bya ba ni/ gang dag la sgra'i grub pa'i mtha' yod pa de dag ni sgra pa dag ces bya ba ste brda sprod pa pa dag go/ /de'i phyir sgra pa dag na re/ dper na gcod pa'i bya ba ni gcig tu zad de/ de nyid kho bo cag rang gi ngo bo nyid kyis gcod par brjod cing / gcod pa'i bya ba des gcad par bya ba'i gzhi shing la sogs pa gang la yod pa de ni gcad pa yin la/ de byed pa'i mi la sogs pa gang yin pa de ni gcod pa po yin pas de'i phyir kho bo cag la gcod pa po yang gnyis su mi 'gyur la/ gcod pa'i bya ba yang gnyis su mi 'gyur ba de bzhin du/ 'dir yang 'gro ba'i bya ba ni gcig tu zad de/ de nyid kho bo cag rang gi ngo bo nyid kyis 'gro bar brjod cing 'gro ba'i bya ba de bgom par bya ba'i gzhi lam la sogs pa gang yod pa de ni bgom pa ma yin la/ der 'gro ba'i mi la sogs pa gang yin pa de ni 'gro ba po yin pas de'i phyir kho bo cag la 'gro ba po yang gnyis su mi 'gyur la/ 'gro ba'i bya ba'ang gnyis su mi 'gyur ro zhes zer ro/ /de skad ces zer ba de'i lan du 'dir 'grel pa byed pa nyid kyis/ de ni rigs pa ma yin te zhes bya ba la sogs pa smras te/ sgra pa dag gis 'gro ba dang bgom pa dang 'gro ba po yod par brtags pa de ni rigs pa ma yin te zhes bya bar sbyar ro/ /ci'i phyir rigs pa ma yin zhe na/ don dam par 'gro ba'i skye ba bkag pa'i phyir dang zhes bya ba smras te/ dbu ma pas don dam par 'gro ba'i skye ba bkag pa'i phyir/ sgra pa dag gis brtag pa'i 'gro ba'i bya ba med pas de rigs pa ma yin no zhes bya ba ni/ song dang ma song ma gtogs par/ /bgom pa shes par mi 'gyur ro/ /zhes gsungs pas/ bgom pa med pa'i phyir 'gro ba'i gzhi med pas/ 'gro ba med pa'i phyir yang de rigs pa ma yin no/ /'du byed kyi tshogs yul gzhan du skyes pa la 'gro ba po nyid du tha snyad 'dogs pa'i phyir dang zhes bya ba ni/ ded dbu ma pa ni 'du byed kyi tshogs yul gzhan du skye ba la 'gro ba po nyid du tha snyad 'dogs la/ khyed ni de ltar mi 'dod de/ /byed pa po ni rang dbang yin pas 'ga' zhig yul snga ma snga ma mi gtong zhing yul phyi ma phyi mar phyin par 'gro ba yod par 'dod pa de mi 'thad pa'i phyir/ 'gro ba po med pas kyang de rigs pa ma yin no/ /bgom pa yang brtags zin pa'i phyir ro zhes bya ba ni bgom pa ma grub pa yang sngar brtags zin pa'i phyir sgra pa dag gis smras pa de rigs pa ma yin no gzhan dag na re/ 'gro ba yod pa kho nar shes par bya ste/ de'i gzhi yod pa'i phyir ro zhes bya ba la sogs pas ni sngar de dag gi yul dang ldan pa'i tha snyad byed pa'i phyir ro zhes smras pa'i gtan tshigs de yod pa nyid du yang sgrub par byed do/ /de'i gzhi yod pa'i phyir ro zhes bya ba ni gtan tshigs te/ 'gro ba'i gzhi 'gro ba po yod pa'i phyir 'gro ba yod pa kho nar shes par bya ste zhes sgrub par byed do/ /'di na gang la gzhi med pa de ni yod pa ma yin te/ dper na mo gsham gyi bu'i 'gyel ba dang 'gro ba la sogs pa bzhin no zhes bya ba ni chos mi mthun pa'i dpe yin no/ /'gro ba'i gzhi 'gro ba po de ba shar ma yod pas de ltar gzhi yod pa'i phyir/ 'gro ba yod pas gtan tshigs grub pa'i phyir zhes bya ba ni/ 'gro ba'i gzhi 'gro ba po yod pa'i phyir 'gro ba yang yod pas de dag gi yul dang ldan pa'i tha snyad byed pa'i phyir ro zhes bya ba'i gtan tshigs de grub pa'i phyir ro/ /nang gi skye mched rnams skye ba kho na yin zhing 'gro ba dang 'ong ba la sogs pa yang 'grub po zhes zer ro zhes bya ba ni mjug bsdu ba dang tshad ma'i 'bras bu yin te/ sngar phyogs snga ma nye bar gzhag pa'i skabs su nang gi dngos po rnams skyes pa kho na yin te/ de dag gi yul dang ldan pa'i tha snyad byed pa'i phyir ro/ 'di la gang mi skye ba ni de dag gi yul dang ldan pa'i tha snyad mi byed de/ dper na mo gsham gyi bu 'gro bar mi byed pa bzhin no/ /lhas byin dang khyab 'jug bshes gnyen ni de ltar 'gro bar mi byed pa ma yin pas de'i phyir nang gi dngos po rnams skye ba kho na yin no zhes dam bcas pa de yang 'grub cing / des na kho bo cag gis khas blangs pa'i 'ong ba dang / 'gro ba dang / 'gag pa dang / rtag pa dang / chad pa dang / gcig pa nyid dang / tha dad pa nyid ces bya bas skabs kyi don gyi mi mthun pa'i phyogs su gyur pa de dag kyang grub po zhes zer ba yin no/ /de skad ces zer ba de'i lan du slob dpon gyis 'dir bshad pa/ gal te 'gro po med gyur na/ /'gro ba 'thad par mi 'gyur te/ /'gro ba med na 'gro ba po/ /yod pa nyid du ga la 'gyur/ /zhes bya ba gsungs so/ /gtan tshigs brjod pa med na 'gro ba mi 'grub pas ji skad bshad pa'i skyon med par mi 'gyur ro snyam nas/ 'gro ba po med na 'gro ba yod pa ma yin pas 'gro ba'i gzhi 'gro ba po la brten nas gzhi yod pa'i phyir ro zhes gtan tshigs brjod par gyur na zhes bya ba la 'grel pa byed pas/ pha rol po'i bsam pa bzlas pa yin te/ gtan tshigs brjod pa med na 'gro ba mi 'grub pas zhes bya ba ni de'i gzhi yod pa'i phyir ro zhes bya ba'i gtan tshigs brjod pa med na 'gro ba mi 'grub pas so/ /ji skad bshad pa'i skyon med par mi 'gyur ro snyam nas zhes bya ba ni/ 'gro ba ma grub na gtan tshigs med pa'i skyon dbu ma pas ji skad bshad pa de med par mi 'gyur ro snyam nas so/ /'gro ba po med na 'gro ba yod pa ma yin pas 'gro ba'i gzhi 'gro ba po la brten nas gzhi yod pa'i phyir ro zhes gtan tshigs brjod par gyur na zhes bya ba ni 'gro ba po med na gzhi med pa'i phyir 'gro ba yod pa ma yin pas 'gro ba'i gzhi 'gro ba po la brten nas khyod kyi de'i gzhi yod pa'i phyir ro zhes gtan tshigs brjod par gyur na'o/ /de ltar na/ gal te 'gro po med gyur na/ /'gro ba 'thad par mi 'gyur te/ /zhes bya ba ma yin nam zhes bya ba ni 'gro ba yod pa'i gtan tshigs su 'gro ba po yod pa'i phyir ro zhes brjod par gyur na de lta na gal te 'gro ba po med par gyur na/ 'gro ba 'thad par mi 'gyur ba ma yin nam zhes 'dri ba yin no/ /'gro ba de yang mi 'thad do zhes dpyad zin pas zhes bya ba ni/ 'gro ba yod na 'gro ba po zhes bya bar tha snyad gdags pa yin na 'gro ba de yang sngar/ re zhig song la 'gro med de/ /ma song ba la 'ong 'gro ba med/ /song dang ma song ma gtogs par/ /bgom pa shes par mi 'gyur ro/ /zhes bya ba la sogs pa'i skabs dang skye ba dgag pa'i rab tu byed pas mi 'thad par dpyad zin pas so/ /de'i phyir de ltar/ 'gro ba med par grub pa po/ /yod pa nyid du ga la 'gyur/ /zhes bya ba ni de ltar 'gro ba med par sngar dpyad pa des 'gro ba med na 'gro ba po yod pa nyid du ga la 'gyur te mi 'gyur ro zhes bya ba'i tha tshig go/ /'gro ba po nyid kyi rgyu med pa'i phyir ro zhes bya bar dgongs so zhes bya ba ni 'gro ba po nyid du 'gyur ba'i rgyu ni 'gro ba yin na 'gro ba med pa'i phyir/ 'gro ba po yod pa nyid du ga la 'gyur zhes bya bar slob dpon gyis dgongs so/ /ga la zhes bya ba'i sgra ni yid mi ches pa ste/ 'gro ba po med do zhes bya ba'i tshig gi don to zhes bya ba ni yod pa nyid du ga la zhig 'gyur te/ 'gro ba po ye med do zhes bya ba'i tha tshig go/ /rgyas par ni snga ma bzhin no zhes bya ba ni 'gro ba'i gzhi 'gro ba po med par brtag par rgyas pa ni sngar/ re zhig song la 'gro med de/ /ma song ba la'ang 'gro ba med/ /song dang ma song ma gtogs par/ /bgom pa shes par mi 'gyur ro/ /zhes bya bas 'di la don dam par 'gro ba yod par gyur na de song ba 'am ma song ba'am bgom pa la yod par 'gyur grang na/ de la re zhig song ba la ni 'gro ba med de 'gro ba'i bya ba 'das zin pa'i phyir ro/ /ma song ba la yang 'gro ba med de 'gro ba'i bya ba ma brtsams pa'i phyir ro/ /song ba dang ma song ba gnyis ma gtogs par bgom pa ni med de phyogs gnyi gar bstan pa'i rjes su dpag pa'i gnod par 'gyur ba'i phyir ro zhes bstan pa bzhin du 'dir yang de la don dam par 'gro ba po yod par gyur na der song ba 'am ma song ba 'am bgom pa la yod par 'gyur grang na/ de la re zhig song ba la ni 'gro ba po med de 'gro ba po'i bya ba 'das zin pa'i phyir ro/ /ma song ba la yang 'gro ba po med de 'gro ba po'i bya ba ma brtsams pa'i phyir ro/ /song ba dang ma song ba/ ma gtogs par bgom pa ni med de phyogs gnyi gar bstan pa'i rjes su dpag pa'i gnod par 'gyur ba'i phyir ro zhes bya bar sbyar ro/ /'gro ba po ma grub pas gzhi yod pa'i phyir ro zhes bya ba'i gtan tshigs kyi don ma grub pa nyid dam don 'gal ba nyid do zhes bya ba ni don dam par sgrub na ni gtan tshigs kyi don ma grub pa nyid yin la/ kun rdzob tu sgrub na ni gtan tshigs kyi don 'gal ba nyid yin te/ des na gtan tshigs [(]gyi [,]kyi [)]rtsa ba de dag gi yul dang ldan pa'i tha snyad byed pa'i phyir ro zhes bya ba'i don ma grub pa nyid yin no/ /'dir smras pa/ 'o na 'gro ba grub par bya ba'i rjes su dpag pa gzhan 'di nyon cig ces bya ba la sogs pa ni skye bar smra ba dag gtan tshigs kyi rtsa ba sgrub pa'i phyir 'gro ba dang ldan pa'i 'gro ba po'i tha snyad yod pa'i sgo nas 'gro ba yod par bsgrub pa yin no/ /'gro ba po zhes bya ba ni chos can yin no/ /yod pa kho nar nges te zhes bya ba ni bsgrub par bya ba chos yin no/ /des de dang ldan pa'i tha snyad yod pa'i phyir ro zhes bya ba ni sgrub pa'i chos yin te/ 'gro ba des 'gro ba de dang ldan pa'i 'gro ba po'i tha snyad du lhas byin 'gro'o zhes bya ba la sogs pa yod pa'i phyir 'gro ba yod pa kho nar nges te zhes sgrub par byed do/ /'di na gang med pa la ni des de dang ldan par mi ston te zhes bya ba ni chos mi mthun pa'i phyogs yin no/ /dper na ri bong gi rwa can zhes mi ston pa bzhin no zhes bya ba ni chos mi mthun pa'i dpe yin no/ /lhas byin 'gro'o zhes 'gro bas de dang ldan pa'i tha snyad 'di yod pas zhes bya ba ni chos mthun pa'i dpe yin no/ /des na 'gro ba yod pa'i phyir bsams pa'i don 'grub po zhes bya ba ni mjug bsdu ba dang tshad ma'i 'bras bu yin te/ 'gro ba dang ldan pa'i 'gro ba po'i tha snyad lhas byin 'gro'o zhes bya ba la sogs pa yod pas 'gro ba yod pa'i phyir/ bsams pa'i don de dag gi yul dang ldan pa'i tha snyad byed pa'i phyir ro zhes bya ba'i gtan tshigs kyi don 'grub po zhes zer ro/ /de skad ces zer ba de'i lan du 'grel pa byed pa nyid kyis 'dir bshad pa/ 'di la lhas byin 'gro'o zhes bya ba'i tha snyad don dam par 'gro ba po'i yin par 'dod dam/ 'gro ba po ma yin pa'i yin par 'dod ces bya ba la sogs pa smras so/ /de la brtag pa snga ma ltar mi 'thad par ji skad bstan pa'i phyir/ re zhig 'gro po mi 'gro ste/ /re zhig ces bya ba'i sgra ni rim pa la ltos pa'o/ /'gro po mi 'gro ste zhes bya ba ni dam bcas pa nye bar gzhag pa'o zhes bya ba la sogs pa smras so/ /re zhig 'gro po mi 'gro ste/ /zhes bya ba 'di gzhan gyi tshig tu 'gyur ba yin na ci'i phyir bdag gi tshig tu bstan ces zer ba'i phyogs snga ma khong nas dbyung ba de'i lan du/ 'dir 'grel pa byed pa nyid kyis bdag gi tshig tu bstan pa ni 'di ltar gang dag sgra tsam gyi rjes su 'brang ba chos rab tu 'byed pa la mi mkhas pa lta ba ngan pas blo gros nyams par gyur pa tshul khrims dang / bsam gtan dang / shes pa la rgyab kyis phyogs la/ rang yang lam gol bar zhugs shing gzhan dag kyang der 'dzud par byed pa dag /de la mngon par zhen pa spang ba'i phyir ro zhes bya ba smras te/ slob dpon gyi zhal snga nas sa'i dbang phyug gi mnga' brnyes pa bstan bcos thams cad mkhyen pas 'dir bdag gi tshig tu gsungs pa ni 'di ltar brda sprod pa pa gang dag sgra tsam gyi rjes su 'brang ba chos rab tu 'byed pa la mi mkhas pa lta ba ngan pas blo gros nyams par gyur pa/ tshul khrims dang / bsam gtan dang / shes pa la rgyab kyis phyogs pas rang yang lam gol bar zhugs shing gzhan dag kyang der 'dzud par byed pa dag sgra de la mngon par zhen pa'i zug rngu spang ba'i phyir mdzad pa yin gyi/ skad kyi byings dag dang / byed pa dag dang / rnam par dbye ba dag dang / rtags dag dang / tshig dag gi nges pa'i rang bzhin ngo bo nyid kyis grub pa dag mi mkhyen pa ni ma yin no zhes bya bar sbyar ro/ /gang dag sgra tsam gyi rjes su 'brang ba de dag ji ltar rang yang lam gol bar zhugs shing gzhan dag kyang der 'dzud par byed ce na/ gzhan dag lam gol ba der 'dzud par byed pa'i rgyu bstan pa'i phyir/ gsang tshig sgra dang yig 'brus nyams gyur na/ /log par sbyar bas de yi don mi ston/ /rdo rje'i tshig des mchod sbyin byed brlag ste/ /dbang po'i dgra bo sgra yis brlag pa bzhin/ /zhes bya ba la sogs pa smras te/ gsang tshig ces bya ba ni gsang tshig tu smra bas gsang tshig ste/ sgra zhes bya ba'i tha tshig go/ /gsang tshig de nyams par gyur pa ni ma rdzogs pa ste/ gang gis nyams par gyur zhe na/ de phyir sgra dang yig 'brus nyams gyur na/ /zhes bya ba smras te/ gsang tshig de'i sgra'i sgo nas nyams pa dang yig 'bru'i sgo nas nyams par gyur na ma rdzogs pa yin no/ /gal te gsang tshig de sgra dang yig 'bru'i sgo nas nyams par gyur na sgra de log par sbyar ba yin pas des na de'i don mi ston te/ sgra de'i don go bar mi byed do/ /de la nyes pa ci yod ce na/ de'i phyir rdo rje'i tshig des zhes bya ba smras te/ tshig zur chag pa nyid rdo rje dang 'dra bas rdo rje'i tshig ste sgra de nyid rdo rje can yin no zhes bya ba'i tha tshig go/ /des ci byed ce na/ de'i phyir mchod sbyin byed brlag ste zhes bya ba smras te/ skye dgu'i bdag po twa sta zhes bya bas lha'i dbang po brgya byin gsad pa'i phyir mchod sbyin byed pa na/ rang nyid kyis tshig zur chag smras pas rang nyid brlag par 'gyur bas tshig zur chag rdo rje lta bu des ni smra ba po rang nyid rlag par byed do/ /gal te ji ltar rlag par byed ce na/ de'i phyir/ dbang po'i dgra bo sgra yis brlag pa bzhin/ /zhes bya ba smras te/ 'di na skye dgu'i bdag po twa sta zhes bya ba zhig byung bar gyur pa de'i bu sna tshogs gzugs zhes bya ba dpung che ba pha rol gnon pa zhig yod pa de/ lha'i dbang po brgya byin gyis phrag dog gi dbang gis bsad par gyur nas/ de'i 'og tu skye dgu'i bdag po twa stas lha'i dbang po brgya byin gsad pa'i phyir gshed byed kyi sbyor ba sgrub par brtsams te dbang po dgra bo shi bar gyur cig ces brjod par bya ba'i rigs pa las dbang po'i dgra bo shi bar gyur cig ces brjod pas des na gsang tshig sgra'i sgo nas nyams par gyur pas gshed byed des skye dgu'i bdag po twa sta rang nyid bsad par gyur te/ de'i gsang tshig sgra'i sgo nas nyams par gyur na log par sbyar ba yin pas de'i don mi ston cing / tshig zur chag rdo rje lta bu des smra ba po rang nyid rlag par byed pa'i dpe yin no/ /gsang tshig yig 'bru'i sgo nas nyams par gyur na/ log par sbyar ba yin pas de'i don mi ston cing tshig zur chag rdo rje lta bu des smra ba po rang nyid rlag par byed pa'i dpe ni/ lha ma yin de dag gis ha la yo he la ya zhes smras pa ni zil gyis non par gyur pa dang zhes bya ba yin te/ lha ma yin gyi g.yul sprad pa'i tshe na lha ma yin rnams kyis lha rnams bros par mthong nas dga' bar gyur pa dag gis he a ra yo he a ra ya zhes bya bas/ kye dgra bo dag kye dgra bo dag ces brjod par bya ba'i rigs pa las/ he la yo he la ya zhes bya bas kye'i dgra bo dag kye'i dgra bo dag ces brjod pas/ des na lha ma yin rnams kyis gsang tshig yig 'bru'i sgo nas nyams par brjod pas/ bsod nams zad pas lha rnams phyir log ste/ lha ma yin rnams zil gyis mnan cing pham par byas so zhes grags pa lta bu'o/ /rig byed las kyang tshig zur chag brjod na don med par 'gyur ba snang ste/ de ni me bsgrub pa tshig zur chag smras nas tshig ldan ma'i sgrub mchod sbyong sil can spyod par byed pa la sogs pa dang zhes bya ba yin te/ me sgrub pa zhes bya ba ni sgrub pa po gang gis kun sbyin pa'i 'os su gyur pa zhes bya ba'i me dang khyim bdag gis bya bar 'os pa zhes bya ba'i me dang / mchod par 'os pa zhes bya ba'i me de gsum las gang yang rung ba bsgrubs shing skyes pa de ni me bsgrub pa zhes bya ste/ gang zag sgrub pa po'i khyad par yin no/ /'di skad bstan te/ gang zag me bsgrub pa des zla ba phyed phyed cing mchod sbyin zla ba nya mthong zhes bya ba byed pa na/ gal te rig byed kyi nang na gnas pa'i tshe tshig zur chag smras par gyur na des de'i sdig pa sbyang ba'i phyir lha mo tshig ldan mo'i sgrub mchod sbyang sel can zhes bya ba'i bzlas brjod bya dgos so zhes zer ba yin no/ /sogs pa zhes bya ba'i sgras ni de dag la sogs pa lung gzhan dag las kyang tshig zur chag gi sbyor bas don med par 'gyur ba mang po gzhan dag smos pa rnams dag kyang bsdu'o/ /gsang tshig gi sgra dang yig 'bru'i sgo nas nyams par ma gyur na legs par sbyar ba yin pas de'i don ston cing / legs par sbyar ba'i tshig des smra ba po rang nyid mtho ris kyi 'jig rten du 'gro bar byed pa'i phan yon yang yod de/ de ni sgra gcig legs par sbyar na yang legs par byed pa rnams kyi 'jig rten du 'gro bar byed do zhes bya ba dang zhes bya bas bstan te/ gang gi phyir sgra legs par brjod pa ma gtogs par mtho ris 'thob pa'i rgyu gzhan med do zhes zer ba yin no/ /'di skad ces gzhan gyi tshig can dang / bdag gi tshig can dang / gnyi ga'i tshig can gyi skad kyi byings nges par gnas pa'i rang gi ngo bo rnams ni rjes su smra ba kho nar zad pas bdag gi tshig can nyid kyi brdar gdags su mi rung ngo zhes zer bas der 'dzud par byed pa dag de la mngon par zhen pa spang ba'i phyir ro zhes bya ba ni/ de dag na re gzhan gyi tshig can dang bdag gi tshig can dang gnyi ga'i tshig can gyi skad kyi byings dang byed pa po dang / rnam par dbye ba dang rtags dang tshig dang nges par gnas pa'i rang gi ngo bo rnams ngo bo nyid kyis grub pa dag ni/ gang phyir bstan bcos byed pa dag gis kyang rjes su smra bar bya ba kho na tsam yin pa de'i phyir/ skad kyi byings gzhan dag skad kyi byings gzhan gyi rang gi ngo bor brjod na skad zur chag tu 'gyur la/ byed pa po dang rnam par dbye ba dang / rtags dang tshig gzhan dag kyang byed pa la sogs pa gzhan gyi rang gi ngo bor brjod na skad zur chag tu 'gyur ro/ /pA Ni na'i mdo dag kyang rjes su smra ba'i mdo dag yin gyi byas pa'i mdo dag ni ma yin no/ /gal te skad kyi byings la sogs pa dag ngo bo nyid kyis grub pa ma yin zhing byar rung ba yin par gyur na ni/ des na kha cig 'dus pa dag gis skad zur chag gang dag yin pa de dag kyang skad bzang por brdar 'dogs par 'gyur zhing de dag kyang skad bzang po kho nar 'gyur bas/ de lta na sgra'i mtshan nyid kyi tha snyad kyang nges pa med pa kho nar 'gyur ba zhig na de lta ma yin pas de'i phyir gzhan gyi tshig can gyi skad kyi byings ni bdag gi tshig can nyid du brdar gdags su mi rung ngo zhes zer ba'i sgo de nas gzhan dag kyang lam gol ba der 'dzud par byed pa dag sgra de la mngon par zhen pa'i zug rngu spang ba'i phyir/ slob dpon gyi zhal snga nas kyis/ re zhig 'gro po mi 'gro ste/ /zhes bya ba'i sgra gzhan gyi tshig can de bdag gi tshig can du bstan par mdzad do// // bam po nyi shu bzhi pa/ de dag la 'di skad ces brjod par bya ste zhes bya ba ni brda sprod pa pa gang dag sgra tsam gyi rjes su 'brang ba de dag gis brda sprod pa las byung ba skad kyi byings la sogs pa nges par gnas pa'i rang gi ngo bo gang dag brtags pa de dag gi ngo bo nyid dgag pa'i phyir de dag la 'di skad ces brjod par bya ste zhes bya ba'i tha tshig go/ /de'i phyir gzhan gyi tshig can gyi skad kyi byings dag ni/ gzhan gyi tshig can gyi ngo bo nyid dag ma yin te/ gnyi ga'i tshig can nyid ma yin pa dang skad kyi byings yin pa'i phyir bdag gi tshig can bzhin no zhes bya ba smras te/ 'dir yang gzhan gyi tshig can gyi skad kyi byings dag ni zhes bya ba 'di ni chos can yin te 'tshed par byed do zhes bya ba dang / klog par byed do zhes bya ba la sogs pa dag go/ /gzhan gyi tshig can gyi ngo bo nyid dag ma yin te zhes bya ba 'di ni bsgrub par bya ba chos yin no/ /gnyi ga'i tshig can nyid ma yin pa dang skad kyi byings yin pa'i phyir zhes bya ba 'di ni sgrub pa'i chos yin te/ gang gi phyir gzhan gyi tshig can gyi skad kyi byings dag la gnyi ga'i tshig can nyid ma yin pa yang yod la/ skad kyi byings kyang yod pa de'i phyir/ gzhan gyi tshig can gyi skad kyi byings dag ni gzhan gyi tshig can gyi ngo bo nyid dag ma yin par sgrub par byed do/ /bdag gi tshig can bzhin no zhes bya ba 'di ni dpe yin par sbyar te/ dper na bdag gi tshig can gyi skad kyi byings ni gnyi ga'i tshig can nyid ma yin pa dang skad kyi byings yin pa'i phyir/ gzhan gyi tshig can gyi ngo bo nyid dag ma yin pa de bzhin du/ gzhan gyi tshig can gyi skad kyi byings dag kyang gnyi ga'i tshig can nyid ma yin pa dang skad kyi byings yin pa'i phyir/ gzhan gyi tshig can gyi ngo bo nyid dag ma yin no/ /ci'i phyir sgrub pa'i chos de la gnyi ga'i tshig can nyid ma yin pa'i phyir zhes bya ba dang / skad kyi byings yin pa'i phyir zhes bya ba gnyis smos she na/ gang gi phyir skad kyi byings yin pa'i phyir zhes bya ba 'ba' zhig smos par gyur na des na ci ste re zhig skad kyi byings yin pa'i phyir bdag gi tshig can dang gzhan gyi tshig gi ngo bo nyid ma yin par 'gyur ram/ 'on te skad kyi byings yin pa'i phyir gnyi ga'i tshig can dag la gzhan gyi tshig can gyi ngo bo nyid yod par 'gyur zhes gtan tshigs ma nges pa'i skyon du 'gyur ro/ /ji ste gnyi ga'i tshig can nyid ma yin pa'i phyir zhes bya ba 'ba' zhig smos na yang / des na gcig gi tshig can yang gnyi ga'i tshig can nyid ma yin la gnyi ga'i tshig med pa yang gnyi ga'i tshig can nyid ma yin pas/ de lta na ji ste re zhig gnyi ga'i tshig can nyid ma yin pa'i phyir/ bdag gi tshig can bzhin du gzhan gyi tshig can gyi ngo bo nyid ma yin par 'gyur ba'am 'on te gnyi ga'i tshig can nyid ma yin pa'i phyir/ gnyi ga'i tshig med pa bzhin du phyogs kyi chos nyid ma yin par 'gyur bas de'i phyir tshig gnyi ga smos so/ /bdag gi tshig can gyi skad kyi byings dag la yang de skad brjod par bya'o zhes bya ba ni de dag la yang sbyor ba snga ma bzhin du brjod par bya'o zhes bya ba'i tha tshig go/ /'di skad bstan te/ bdag gi tshig can gyi skad kyi byings dag ni bdag gi tshig can gyi ngo bo nyid dag ma yin te/ gnyi ga'i tshig can nyid yin pa dang skad kyi byings yin pa'i phyir/ gzhan gyi tshig can bzhin no zhes bya bar sbyar ro/ /de la yang bdag gi tshig can gyi skad kyi byings dag ni zhes bya ba ni chos can yin te 'phel lo zhes bya ba dang 'gran to zhes bya ba la sogs pa dag go/ /bdag gi tshig can gyi ngo bo nyid dag ma yin te zhes bya ba ni bsgrub par bya ba'i chos yin no/ /gnyi ga'i tshig can nyid ma yin pa dang skad kyi byings yin pa'i phyir zhes bya ba ni sgrub pa'i chos yin no/ /gzhan gyi tshig can bzhin no zhes bya ba ni dpe yin par sbyar te/ dper na gzhan gyi tshig can gyi skad kyi byings dag ni gnyi ga'i tshig can nyid ma yin pa dang skad kyi byings yin pa'i phyir/ bdag gi tshig can gyi ngo bo nyid dag ma yin no/ /de bzhin du gnyi ga'i tshig can gyi skad kyi byings dag kyang gnyi ga'i tshig can gyi ngo bo nyid dag ma yin te/ skad kyi byings yin pa'i phyir de las gzhan bzhin no zhes bya ba la/ 'dir yang gnyi ga'i tshig can gyi skad kyi byings dag kyang zhes bya ba 'di ni chos can yin te/ byed ces bya ba dang byed do zhes bya ba la sogs pa dag go/ /gnyi ga'i tshig can gyi ngo bo nyid dag kyang ma yin te zhes bya ba 'di ni bsgrub par bya ba chos yin te/ skad kyi byings yin pa'i phyir zhes bya ba 'di ni sgrub pa'i chos yin/ de las gzhan pa bzhin no zhes bya ba 'di ni dpe yin par sbyar te/ dper na gnyi ga'i tshig can las gzhan pa bdag gi tshig can nam/ gzhan gyi tshig can ni skad kyi byings yin pa'i phyir gnyi ga'i tshig can gyi ngo bo nyid dag ma yin pa de bzhin du gnyi ga'i tshig can gyi ngo bo nyid dag kyang skad kyi byings yin pa'i phyir gnyi ga'i tshig can gyi ngo bo nyid dag ma yin no/ /de bzhin du byed pa po dag la yang sbyar bar bya ste/ rang dbang ni byed pa po'i zhes bya ba ni de'i ngo bo nyid ma yin te byed pa po yin pa'i phyir dper na las bzhin no/ /las la yang byed pa po'i 'dod pa mchog ni las so zhes bya bar ni de'i ngo bo nyid ma yin te/ byed pa po yin pa'i phyir dper na byed pa bzhin no/ /byed pa la yang sgrub pa mchog ni byed pa po'i zhes bya ba ni de'i ngo bo nyid ma yin te/ byed pa po yin pa'i phyir dper na yang dag par sbyin pa bzhin no/ /yang dag par sbyin pa la yang las kyis mngon par 'dod pa gang yin pa de ni yang dag par sbyin pa'o zhes bya ba ni de'i ngo bo nyid ma yin te/ byed pa po yin pa'i phyir dper na 'bral ba bzhin no/ /'bral ba la yang gnas pa las dgar ba de ni 'bral ba'o zhes bya ba ni de'i ngo bo nyid ma yin te/ byed pa po yin pa'i phyir dper na gzhi bzhin no/ /gzhi la yang kun 'dzin pa ni gzhi'o zhes bya ba ni de'i ngo bo nyid ma yin te byed pa po yin pa'i phyir/ dper na byed pa po bzhin no/ /de bzhin du rnam par dbye ba dag la yang sbyar bar bya ste/ rnam par dbye ba dang po shing zhes bya ba ni de'i ngo bo nyid ma yin te/ rnam par dbye ba yin pa'i phyir/ dper na rnam par dbye ba gnyis pa bzhin no/ /rnam par dbye ba gnyis pa la yang shing la zhes bya ba ni de'i ngo bo nyid ma yin te/ rnam par dbye ba yin pa'i phyir dper na rnam par dbye ba gsum pa bzhin no/ /rnam par dbye ba gsum pa la yang shing gis zhes bya ba ni de'i ngo bo nyid ma yin te/ rnam par dbye ba yin pa'i phyir/ dper na rnam par dbye ba bzhi pa bzhin no/ /rnam par dbye ba bzhi pa la yang shing gi phyir zhes bya ba ni de'i ngo bo nyid ma yin te rnam par dbye ba yin pa'i phyir/ dper na rnam par dbye ba lnga pa bzhin no/ /rnam par dbye ba lnga pa la yang shing las zhes bya ba ni de'i ngo bo nyid ma yin te/ rnam par dbye ba yin pa'i phyir/ dper na rnam par dbye ba drug pa bzhin no/ /rnam par dbye ba drug pa la yang shing gi zhes bya ba ni de'i ngo bo nyid ma yin te/ rnam par dbye ba yin pa'i phyir/ dper na rnam par dbye ba bdun pa bzhin no/ /rnam par dbye ba bdun pa la yang shing la zhes bya ba ni de'i ngo bo nyid ma yin te/ rnam par dbye ba yin pa'i phyir/ dper na rnam par dbye ba dang po bzhin no/ /de bzhin du rtags dag la yang sbyar bar bya ste/ pho'i rtags la yang pho zhes bya ba ni de'i ngo bo nyid ma yin te rtags yin pa'i phyir/ dper na mo'i rtags bzhin no/ /mo'i rtags la yang mo zhes bya ba ni de'i ngo bo nyid ma yin te de'i rtags yin pa'i phyir/ dper na ma ning gi rtags bzhin no/ /ma ning gi rtags la yang ma ning zhes bya ba ni de'i ngo bo nyid ma yin te/ rtags yin pa'i phyir/ dper na pho'am mo'i rtags bzhin no/ /de bzhin du tshig dag la sbyar bar bya ste/ gcig gi tshig la yang gcig gi tshig ces bya ba ni de'i ngo bo nyid ma yin te tshig yin pa'i phyir/ dper na gnyis kyi tshig bzhin no/ /gnyis kyi tshig la yang gnyis kyi tshig ces bya ba ni de'i ngo bo nyid ma yin te tshig yin pa'i phyir/ dper na mang po'i tshig bzhin no/ /mang po'i tshig la yang mang po'i tshig ces bya ba ni de'i ngo bo nyid ma yin te/ tshig yin pa'i phyir/ dper na gcig gam gnyis kyi tshig bzhin no/ /'dir gal te brda sprod pa pas sgra nges par smra ba dag na re/ 'gro ba'i skad kyi byings ni gzhan gyi tshig can yin na/ 'dir bstan bcos byed pas de bdag gi tshig can nyid du byas pas/ kun rdzob tu bstan bcos byed pa'i tshig zur chag gi nyes par 'gyur ro zhes zer ba'i phyogs snga ma khong nas dbyung ba de'i lan du 'dir 'grel pa byed pa nyid kyis/ nges par smra ba dag la ni khyad par can gyis sbyar ba'i sgra'i rjes su smra ba'i phyir dang / sbyor ba rnam par dbye ba la sogs pa'i rim gyis 'gro ba dag bdag gi tshig can nyid du grub pas kun rdzob tu gnod pa med do zhes brjod par bya'o zhes bya ba smras te/ nges par smra ba dag la zhes bya ba ni brda sprod pa pa sgra nges par smra ba dag ste/ de dag la 'di skad ces brjod par bya'o zhes bya bar sbyar ro/ /khyad par can gyis sbyar ba'i sgra'i rjes su smra ba'i phyir zhes bya ba ni 'di ltar brda sprod pa pa dag la yang de'i tshe mtshan nyid yod de/ drang srong rgyas pa la sogs pa khyad par can yid ches pa dag gis sgra ma [(]lags [,]legs [)]pa dag sbyar ba dper na/ gzhu 'dzin phag na 'dug pa ni/ /gcig gis brgya dag srung du 'jug /brgya yis khri po dag dang ni/ /stong gis 'bum dag srung du 'jug /ces bya ba ni srung bar byed ces brjod pa'i rigs pa las/ srung du 'jug ces brjod pa dang / de bzhin du/ 'jigs byed sdes ni bred 'khams shing / /sa bu'i mda' yis skrag 'gyur ba'i/ /dmag kun 'dar bar byed pa ni/ /dregs pas myos pa'i mo rnams bzhin/ /zhes bya ba yang mo bzhin zhes brjod pa'i rigs pa las mo rnams bzhin zhes brjod pa dang / de lta bu la sogs pa gzhan dag yod pa yang des na gus pas ji ltar grags pa de bzhin du brjod par bya ste/ de ltar de dag gi tshig de ci nas kyang sgra bzang por 'gyur ba de ltar rnam par bshad par bya'o zhes zer ba'i phyir/ 'dir yang slob dpon gyi zhal snga nas khyad par rnyed pa yid ches pas gsungs pa'i tshig la skyon med par sgrub tu rung bar blta bar bya'o/ / sbyor ba rnam par dbye ba la sogs pa'i rim gyis zhes bya ba ni mdo'i tshig le'ur byas pa'i phyed gong ma dang phyed 'og ma ltag 'og bsnor bas rnam par dbye ba la sogs pa'i rim gyis sgra ma legs pa dag kyang legs par sbyar du rung ba ste/ gal te mdo'i phyed gong ma'am phyed 'og ma gnyis las gang yang rung ba brjod na des sgra nges par gyur par lta na/ de de bzhin du mi klag par ltag 'og bsnor te bklag par bya ba dang / rtsa ba gang dang gang lhan cig sbyar te bklags na des sgra ngan par gyur par lta na de de dang lhan cig sbyar te mi klag par rtsa ba gang dang gang lhan cig sbyar te bklags na sgra legs par 'byor par gyur pa de dang der lhan cig sbyar te bklag par bya ba la sogs pa'i rim gyis so/ /'di ni sbyor ba rnam par dbye ba 'di ltar bya ste/ 'gro po mi 'gro ste zhes bya ba 'di la 'gro zhes bya ba'i skad kyi byings kyi don ni khong du chud pa'i don la yang snyegs pas kho bo la 'gro ba po med pa de ltar khyod kyis khong du chud par gyis shig ces bya bar sbyar ro/ /des na 'gro ba bdag gi tshig can nyid du 'grub pas kun rdzob tu gnod pa med do zhes brjod par bya'o zhes bya bas ni 'di skad bstan te/ rim pa des na bstan bcos dag ni 'jig rten las grags pa'i sgra ngan pa gang yin pa de dang bral bar grub pas/ kun rdzob tu 'gro ba bdag gi tshig can nyid du brjod kyang don gzhan du drang du rung bas gnod pa med do/ /'gro po mi 'gro ste zhes bya ba 'di la 'gro ba po ni bya ba dang ldan pa'i phyir de'i chos ni bya ba dang ldan pa nyid yin no zhes bya ba la sogs pa ni 'gro po mi 'gro ste zhes bya ba'i skabs kyi don nyid ston te/ gang gi phyir 'gro ba po ni 'gro ba'i bya ba dang ldan pa de'i phyir 'gro ba po mi 'gro ba de'i sgrub pa'i chos ni bya ba dang ldan pa nyid yin no/ /dpe ni bsgrub par bya ba dang sgrub pa'i chos kyi dbang gis te/ de las gzhan pa bzhin no zhes bya bas ni chos mthun pa'i dpe ston te/ de la dpe ni zhes bya ba ni 'gro ba po mi 'gro ba'i dpe'o/ /de ni bsgrub par bya ba dang sgrub pa'i chos kyi dbang gis bstan dgos te/ ji skad du dpe gang la bsgrub par bya ba dang gtan tshigs kyi rjes su 'gro bas khyab par byed pa yod pa de ni chos mthun pa'i dpe yin no zhes bshad pa'i phyir ro/ /de la bsgrub par bya ba chos zhes bya ba ni bsgrub par bya ba nyid chos yin pas bsgrub par bya ba chos te/ de yang gang zhe na/ skabs 'dir ni mi 'gro ste zhes bya ba yin par sbyar ro/ /sgrub pa'i chos zhes bya ba ni mi 'gro ste zhes bya ba sgrub pa'i chos gtan tshigs te/ de yang gang zhe na/ skabs 'dir ni bya ba dang ldan pa nyid ces bya ba yin par sbyar ro/ /de gnyis kyi dbang gis te zhes bya ba ni chos can 'gro ba po gang la bsgrub par bya ba chos mi 'gro ste zhes bya ba yod pa'i dbang dang / sgrub pa'i chos bya ba dang ldan pa nyid yod pa'i dbang gis chos can de'i dpe'i bya ba dang ldan pa gzhan bstan dgos te zhes bya ba'i tha tshig go/ /de lta bu'i chos can dper bstan du rung ba de yang gang zhe na/ de'i phyir de las gzhan pa bzhin no zhes bya ba smras te/ 'gro ba po de las gzhan pa sdod pa po yin no/ /sdod pa po de la yang gnyi ga la grags pa'i bsgrub par bya ba chos mi 'gro ste zhes bya ba dang / sgrub pa'i chos bya ba dang ldan pa nyid ces bya ba yod pas de'i phyir dpe ni bsgrub par bya ba dang sgrub pa'i chos kyi dbang gis te/ gnyi ga la grags pa'i chos dang ldan pa'i chos can 'gro ba po de las gzhan sdod pa po yin par sbyar ro/ /'dir sbyor ba'i tshig ni zhes bya ba ni 'gro ba po mi 'gro ste zhes sgrub pa'i skabs 'dir rjes su dpag pa gtan tshigs dang dpe dang ldan pas sbyor ba'i tshig tu 'gyur ba ni/ 'og nas chos can dang bsgrub par bya ba chos dang sgrub pa'i chos dang dpe nye bar sbyar ba rnams yin no zhes bya bar sbyar ro/ /don dam par 'gro ba po mi 'gro ste bya ba dang ldan pa'i phyir sdod pa po bzhin te zhes bya ba la/ 'dir yang 'gro ba po zhes bya ba 'di ni chos can yin la/ mi 'gro ste zhes bya ba 'di ni bsgrub par bya ba chos yin/ bya ba dang ldan pa'i phyir zhes bya ba 'di ni sgrub pa'i chos yin/ sdod pa po bzhin te zhes bya ba 'di ni dpe yin par sbyar te/ dper na sdod pa po ni bya ba dang ldan pa'i phyir mi 'gro ba de bzhin du 'gro ba po yang bya ba dang ldan pa'i phyir mi 'gro'o/ /de ltar re zhig 'gro ba po mi 'gro'o zhes bya ba ni de ltar re zhig brtag pa snga ma bsgrubs pa yin no/ /da ni brtag pa phyi ma shos bsgrub pa'i phyir gzhan dag na re/ 'gro ba po ma yin pa 'gro bas kho bo cag la sgrub pa des mi gnod do zhes zer ro zhes phyogs snga ma nye bar gzhag pa smras te/ 'dir 'gro ba smra ba gzhan dag na re/ gang gi phyogs la 'gro ba po bya ba dang ldan pa de'i phyogs la bya ba dang ldan pa nyid ces bya ba'i gtan tshigs des 'gro ba po mi 'gro bar bkag tu zin kyang kho bo cag gi phyogs la 'gro ba'i bya ba med pas 'gro ba po ma yin pa 'gro bas khyed kyi sgrub pa des mi gnod do zhes zer ro/ /de skad ces zer ba de'i lan du 'grel pa byed pa nyid kyis 'dir bshad pa/ 'gro ba po min 'gro ba min/ /zhes bya ba la sogs pa smras te/ 'gro ba po ma yin pa'i phyogs 'di la yang 'gro ba med par 'gog par byed do/ /de'i phyir gang gi tshe tha snyad du 'gro ba dang ldan par grags pa'i 'gro ba po yang 'gro bar mi 'thad pa de'i tshe 'gro ba po ma yin pa 'gro bas stong pa ni mi 'gro ba kho na yin te/ 'gro ba dang bral ba'i phyir ro zhes bya bar dgongs so zhes bya ba smras te/ sngar re zhig 'gro po mi 'gro ste zhes bshad pas kun rdzob kyi tha snyad du 'gro ba dang ldan par grags pa'i 'gro ba po yang sdod pa po bzhin du 'gro bar mi 'thad pa de'i tshe/ 'di 'gro ba po ma yin pa 'gro ba'i bya bas stong pa don dam par 'gro ba gal 'gyur te mi 'gyur ro zhes bya bar slob dpon gyis dgongs so/ /'di la dgag pa mi mthun pa yang yod de de bstan pa'i phyir/ gal te 'gro ba po ma yin na ni ji ltar 'gro/ 'on te 'gro na ni 'gro ba po ma yin pa zhes byar mi rung ngo zhes bya ba smras so/ /yang na/ 'gro ba po min 'gro ba min/ /zhes bya ba ni chos mthun pa'i dpe nye bar gzhag pa yin no zhes bya ba ni/ 'gro ba po min 'gro ba min/ /zhes yang bzlas pa 'di ni 'gro ba po ma yin pa mi 'gro bar sgrub pa'i phyogs kyi chos sngar dam bcas pa de'i chos mthun pa'i dpe nye bar gzhag pa yin par sbyar ro/ /gal te de chos mthun pa'i dpe nye bar gzhag pa yin na ni 'o na dam bcas pa'i phyogs nye bar gzhag pa gang yin zhe na/ de'i phyir 'di la 'gro ba dang mi ldan pa nyid kyi 'gro ba po ma yin pa ni bsgrub par bya ba yin par shes par bya ste/ 'gro ba po min 'gro ba min/ /zhes bya ba'i dbang du byas pa'i phyir ro zhes bya ba smras te/ sngar/ 'gro ba po min 'gro ba min/ /zhes bshad pa ni dam bcas pa'i phyogs nye bar gzhag pa yin la/ 'dir/ 'gro ba po min 'gro ba min/ /zhes kyang bzlas te/ bshad pa 'di ni sngar dam bcas pa'i phyogs nye bar gzhag pa de'i chos mthun pa'i dpe nye bar gzhag pa yin par sbyar te/ 'di la 'gro ba dang mi ldan pa nyid kyi 'gro ba po ma yin pa ni bsgrub par bya ba yin par shes par bya ste/ sngar/ 'gro ba po min 'gro ba min/ /zhes dam bcas pa de'i dbang du byas pa'i phyir ro/ /'gro ba po ma yin pa mi 'gro bar sgrub pa'i phyogs 'di la sgrub pa'i chos gang zhe na/ de'i phyir 'gro ba po ma yin pa'i chos ni 'gro ba dang bral ba nyid yin pas sgrub pa'i chos mngon no zhes bya ba smras te/ 'dir 'gro ba po ma yin par mi 'gro bar sgrub pa'i chos ni 'gro ba dang bral ba nyid yin pas 'gro ba po ma yin pa yang mi 'gro bar sgrub pa'i chos mngon no/ / 'dir dpe yang bsgrub par bya ba dang sgrub pa'i chos kyi dbang gis te/ gnyi ga la grags pa'i chos dang ldan pa'i chos can de las gzhan pa yin no/ /de'i phyir sbyor ba'i tshig ni don dam par 'gro ba po ma yin pa yang mi 'gro ste/ 'gro ba dang bral ba'i phyir/ de las gzhan pa bzhin no zhes bya ba la 'dir yang 'gro ba po ma yin pa yang zhes bya ba 'di ni chos can yin te/ grangs can la sogs pas brtags pa'i 'gro ba po ma yin pa lhas byin 'gro ba dang bral ba gang yin pa'o/ /yang zhes bya ba'i sgra ni grangs can la sogs pas brtags pa'i 'gro ba po ma yin pa lhas byin 'gro ba dang bral ba'i phyir mi 'gro ba 'ba' zhig tu yang ma zad kyi/ lhas byin las gzhan dag ri la sogs pa 'gro ba po ma yin pa gzhan 'gro ba dang bral ba'i phyir mi 'gro ba dag kyang bsdu ba'i phyir ro/ /mi 'gro ste zhes bya ba 'di ni bsgrub par bya ba chos yin no/ /'gro ba dang bral ba'i phyir zhes bya ba 'di ni sgrub pa'i chos yin no/ /de las gzhan pa bzhin no zhes bya ba 'di ni dpe yin par sbyar te/ dper na lhas byin 'gro ba po ma yin pa de las gzhan pa ri la sogs pa 'gro ba po ma yin pa ni 'gro ba dang bral ba'i phyir mi 'gro ba de bzhin du/ lhas byin 'gro ba po ma yin pa yang 'gro ba dang bral ba'i phyir mi 'gro ste/ des na/ 'gro ba po min 'gro ba min/ /zhes bya ba sngar smos pa lhas byin la nye bar gzhag pa ni dam bcas pa'i phyogs kyi chos yin la/ 'gro ba po min 'gro ba min/ /zhes bya ba phyis bzlas pa ri la sogs pa la nye bar gzhag pa ni dam bcas pa'i phyogs nye bar gzhag pa de'i chos mthun pa'i dpe nye bar gzhag pa yin par sbyar ro/ /gzegs zan pa'i phyogs dag dang rang gi sde pa dag la yang de bzhin du brjod par bya'o zhes bya ba ni gzegs zan pa dag dang / rang gi sde pa dag ni dngos po rnams ma byung ba las 'byung bar 'dod pas de dag na re/ sngon 'gro ba'i bya ba ma skyes pa'i dus na 'gro ba po ma yin pa mi 'gro ba de phyis 'gro ba'i bya ba skyes pa'i dus na 'gro ba po yin pas 'gro'o zhes zer ba de dag la yang sbyor ba'i tshig de bzhin du brjod par bya ste/ sngar 'gro ba po ma yin pa ni phyis kyang mi 'gro ste 'gro ba dang bral ba'i phyir de las gzhan pa bzhin no zhes ci rigs par sbyar ro/ /grangs can dag grub pa la sgrub pa'i skyon nye bar 'dogs pa dag la brgal zhing brtag par bya ste zhes bya ba ni dbu ma pas/ 'gro ba po min 'gro ba min/ /zhes bshad pa de la grangs can dag na re/ de ni grub pa la sgrub pa'i skyon chags pa yin no zhes zer ba dag la/ dbu ma pas brgal zhing brtag par bya ba bstan to/ /grangs can dag dbu ma pa la ji ltar grub pa la sgrub pa'i skyon nye bar 'dogs par byed ce na/ dbu ma pas/ 'gro ba po min 'gro ba min/ /zhes bshad pa gang yin pa de ni grub pa la sgrub pa yin te/ kho bo cag grangs can dag kyang 'gro ba po ma yin pa mi 'gro bar 'dod pa'i phyir ro zhes zer ro/ /de dag la dbu ma pas ji skad du brgal zhing brtag par bya zhe na/ de'i phyir 'gro ba po ma yin pa de gang yin zhes bya ba smras te/ dbu ma pas grangs can dag la khyed 'gro ba po ma yin pa mi 'gro'o zhes zer ba'i 'gro ba po ma yin pa de gang yin zhes dri bar bya'o/ /de skad ces dris pa na grangs can dag 'di skad ces gal te 'gro ba mi gsal ba'o zhe na ni zhes bya ba ni de skad ces dris pa na/ gal te grangs can dag 'di skad ces 'gro ba po ma yin pa zhes bya ba de ni 'gro ba'i bya ba mi gsal ba yin pas de mi 'gro ba de ni nged kyi gzhung la yang grub pas/ dbu ma pas de mi 'gro bar sgrub pa ni grub pa la sgrub pa'i skyon chags pa yin no/ /nged grangs can dag ni 'gro ba po gang la 'gro ba'i bya ba snga na mi gsal ba phyis gsal bar gyur pa na 'gro bar 'dod do zhes zer na'o/ / de skad ces zer na de dag la dbu ma pas 'di skad ces brgal zhing brtag par bya ste/ rjes su dpag pa'i gnod pa ji skad bshad pa nyid brjod par bya'o zhes bya ba smras te/ gsal ba dgag pa'i rjes su dpag pa'i gnod pa ji skad bshad pa nyid brjod pas de dgag par bya'o/ /de yang gang zhe na/ 'gro ba mi gsal ba ni gsal bar mi byed de dper na mi gsal ba'i phyir/ dper na nam mkha'i me tog bzhin no zhes gsal ba dgag pa sngar ji skad bshad pa nyid brjod par bya'o/ /gal te 'gro ba po'i sngon rol gyi gnas skabs so zhe na ni zhes bya ba'i grangs can dag rjes su dpag pa'i gnod pa ji skad bshad pa de mi 'dod pas gal te 'di skad ces 'gro ba po ma yin pa zhes bya ba de ni 'gro ba po'i sngon rol gyi gnas skabs yin pas de mi 'gro ba ni nged kyi gzhung la yang grub pas/ dbu ma pas de mi 'gro bar sgrub pa ni grub pa la sgrub pa'i skyon chags pa yin no/ /nged grangs can pa dag ni 'gro ba po'i sngon rol gyi gnas skabs na 'gro ba po ma yin pa phyis 'gro ba po yin par gyur pa ni 'gro bar 'dod do zhes zer na'o/ /de skad ces zer na de dag la dbu ma pas 'di skad ces brgal zhing brtag par bya ste/ rang gi rjes su dpag pa la gnod do zhes bya ba smras te/ grangs can dag gis 'gro ba po'i sngon rol gyi gnas skabs na 'gro ba po ma yin pa phyis 'gro ba po yin par gyur na/ 'gro bar 'dod do zhes smras pa de ni rang gi rjes su dpag pa la gnod pa'i skyon chags pa yin pas mi rung ngo / /ji ltar rang gi rjes su dpag pa la gnod pa'i skyon chags pa yin zhe na/ de'i phyir 'gro ba po'i sngon rol gyi gnas skabs na sdod pa po la sogs pa'i gzugs 'chang ba rnams kyang 'gro ba po ma yin pa'i phyir ro zhes bya ba smras te/ 'gro ba po'i sngon rol gyi gnas skabs kyi 'gro ba po ma yin pa sdod pa po dang 'dug pa po dang nyal ba po la sogs pa'i gzugs 'chang ba rnams kyang 'gro ba po ma yin pa'i phyir/ gal te 'gro ba po'i sngon rol gyi gnas skabs na 'gro ba po ma yin pa'i phyis 'gro ba po yin par gyur pa na 'gro bar 'dod do zhes zer na/ de ltar na 'gro ba po'i sngon rol gyi gnas skabs na 'gro ba po ma yin pa sdod pa po dang 'dug pa po dang nyal ba po la sogs pa'i gzugs 'chang ba rnams dang phyis 'gro ba po yin zhing 'gro bar 'gyur ba'i skyon du 'gyur bas des na khyed rang gi rjes su dpag pa la gnod pa'i skyon chags pa yin pas mi rung ngo / /gal te 'gro ba po med pa'o zhe na ni zhes bya ba ni grangs can dag rang gi rjes su dpag pa la gnod pa de mi 'dod pas/ gal te 'di skad ces 'gro ba po ma yin pa zhes bya ba de ni 'gro ba po med pa yin pas de mi 'gro ba ni nged kyi gzhung la yang grub pas zhes bya ba de ni dbu ma pas de mi 'gro bar sgrub pa ni grub pa la sgrub pa'i skyon chags pa yin no/ /nged grangs can pa dag ni 'gro ba po med pa ma yin zhing 'gro bar 'dod do zhes zer na'o/ /de skad ces zer na de dag la dbu ma pas 'di skad ces brgal zhing brtag par bya ste/ phyogs snga ma la gnod de zhes bya ba smras te/ grangs can dag gis 'gro ba po ma yin pa ni 'gro ba po med pa'o zhes smras pa de ni rang gi phyogs snga ma la gnod pa'i skyon chags pa yin pas mi rung ngo / /ji ltar rang gi phyogs snga ma la gnod pa'i skyon chags pa yin zhe na/ de'i phyir 'gro ba po ma yin pa'i sgras 'gro ba po med par khas ma blangs pa'i phyir ro zhes bya ba smras te/ grangs can dag gi 'gro ba po ma yin pa zhes bya ba'i sgras 'gro ba po gtan med par khas ma blangs te/ 'gro ba'i bya ba ma skyes pa'i sngon rol na yang 'gro ba po rdul gyi rang bzhin dang rtag tu ldan pas 'gro ba po rtag tu yod par khas blangs la/ da ni 'gro ba po ma yin pa zhes bya ba de 'gro ba po med pa'o zhes zer na de nyid rang gi phyogs snga ma la gnod pa'i skyon chags pa yin pas de mi rung ngo / /gzhan dag na re/ rnam grangs las 'gro ba po dang 'gro ba po ma yin pa'i 'gro ba khas blangs pas ji skad bshad pa'i skyon ldog go zhes zer ro zhes bya ba la 'os pa pa dag na re/ kho bo cag gi srog gi rnam grangs las ni 'gro ba po'i 'gro ba khas blangs la lus kyi rnam grangs las ni 'gro ba po ma yin pa'i 'gro ba khas blangs pas de'i phyir khyed dbu ma pas/ re zhig 'gro po mi 'gro ste/ /'gro ba po min 'gro ba min/ /zhes ji skad bshad pa'i skyon de dag kho bo cag gi phyogs la ldog go zhes zer ba yin no/ /'di skad bstan te 'os pa pa dag na re/ gang gi phyir kho bo cag srog gi bdag nyid g.yo ba dang 'gro ba can gyi rnam grangs de 'gro ba po nyid du khas len pa de'i phyir/ khyed dbu ma pas 'gro ba po ma yin pa mi 'gro'o zhes ji skad bshad pa'i skyon de kho bo cag gi phyogs la med la/ gang gi phyir kho bo cag lus kyi bdag nyid g.yo ba dang 'gro ba med pa'i rnam grangs des 'gro ba po ma yin pa nyid du khas len pa de'i phyir khyed dbu ma pas 'gro ba po mi 'gro'o zhes ji skad bshad pa'i skyon de kho bo cag gi phyogs la med do zhes zer ro/ /de skad ces zer ba de'i lan du 'grel pa byed pa nyid kyis 'dir bshad pa/ slob dpon gyis 'gro ba po dang 'gro ba po ma yin pa 'chol ba'i rang bzhin gzhan ni 'gro ba'i bya ba dang mi ldan zhing med pa nyid kyis bshad pa/ 'gro po 'gro po min las gzhan/ /gsum pa gang zhig 'gro bar 'gyur/ /zhes bya ba smras te/ slob dpon gyis de lta bu med pa nyid kyis tshig le'ur byas pa'i phyed 'og ma 'di bshad do zhes bya bar sbyar ro/ /'gro ba po dang 'gro ba po ma yin pa 'chol ba'i rang bzhin zhes bya ba ni gang la 'gro ba po nyid dang 'gro ba po ma yin pa nyid 'chol zhing 'dres par gyur pa'i rang bzhin yod pa de ni 'gro ba po dang 'gro ba po ma yin pa 'chol ba'i rang bzhin zhes bya'o/ / yang na 'gro ba po nyid dang 'gro ba po ma yin pa nyid las 'chol zhing tha dad par gyur pa'i rang bzhin yod pa de ni 'gro ba po dang 'gro ba po ma yin pa 'chol ba'i rang bzhin zhes bya'o/ /gzhan ni 'gro ba'i bya ba dang mi ldan zhing zhes bya ba ni 'gro ba po dang 'gro ba po ma yin pa 'chol ba'i rang bzhin gzhan de lta bu ni 'gro ba'i bya ba dang mi ldan pa nyid yin pas/ gzhan ni 'gro ba'i bya ba dang mi ldan zhing zhes bshad do/ /med pa nyid kyis zhes bya ba ni de lta bu de yod pa yang ma yin pa nyid kyis so/ /bshad pa zhes bya ba ni slob dpon gyis 'gro ba po dang 'gro ba po ma yin pa 'chol ba'i rang bzhin gzhan de lta bu na 'gro ba'i bya ba dang mi ldan zhing gtan med pa nyid kyis tshig le'ur byas pa'i phyed 'og ma 'dis bshad pa yin no zhes sbyar ro/ /'gro po 'gro po min las gzhan/ /gsum pa gang zhig 'gro bar 'gyur/ /zhes bya ba ni 'gro ba po dang 'gro ba po ma yin pa las gzhan pa de gnyi ga 'chol zhing 'dres par gyur pa'i rang bzhin gsum pa gzhan ni 'ga' yang med pas de lta bu gang zhig 'gro bar 'gyur te mi 'gyur ro/ /yang na 'gro ba po dang 'gro ba po ma yin pa las gzhan pa de gnyi ga las 'chol zhing tha dad par gyur pa'i rang bzhin gsum pa gzhan ni 'ga' yang med pas de lta bu gang zhig 'gro bar 'gyur te mi 'gyur ro zhes bya ba'i tha tshig go/ /don de nyid bstan pa'i phyir/ de lta bu de ni med pa kho na yin no zhes bya bar dgongs te zhes bya ba smras te/ gnyi ga 'chol zhing 'dres par gyur pa'i rang bzhin dang gnyi ga las 'chol zhing tha dad par gyur pa'i rang bzhin gsum pa gzhan de lta bu de ni med pa kho na yin no zhes bya bar mdo mdzad pas dgongs so/ /ci'i phyir de ltar dgongs she na/ de'i phyir 'gro ba po yin par yang 'gyur la/ 'gro ba po ma yin par yang 'gyur ba de ni bstan par dka' ba'i phyir ro zhes bya ba smras te/ 'os pa pa dag gi rnam grangs kyi tshul tham lag de ni bsgrub par dka' ba'i phyir ro/ /de bsgrub par dka' bas 'os pa bdag gis rnam pa gnyis su smra ba dag gi tshul yongs su gzung bar bya dgos par bstan pa'i phyir/ 'di la rnam grangs kyi tshul gyi tham lag dag gis dgag pa mi mthun pa'i skyon du 'gyur bas gdon mi za bar 'ga' zhig la ltos nas 'gro ba por 'gyur la/ 'ga' zhig la ltos nas 'gro ba po ma yin par 'gyur ro zhes rnam pa gnyis su smra ba yongs su gzung bar bya ba yin no zhes bya ba smras so/ /de ltar rnam pa gnyis su smra ba yongs su bzung na de'i tshe des cir 'gyur zhe na/ de'i phyir de'i tshe yang 'gro ba po dang 'gro ba po ma yin pa'i phyogs su bstan pa'i rjes su dpag pa'i gnod par 'gyur bas 'dod pa'i don mi 'grub po zhes bya ba smras so/ /'di skad bstan te srog gi rnam grangs kyi gnas skabs kyi 'gro ba po mi 'gro ste bya ba dang ldan pa'i phyir sdod pa po bzhin no/ /lus kyi rnam grangs kyi gnas skabs kyi 'gro ba po ma yin pa yang mi 'gro ste/ 'gro ba dang bral ba'i phyir de las gzhan pa bzhin no/ /des na 'os pa pa dag gis 'dod pa'i don rnam grangs las 'gro ba po dang 'gro ba po ma yin pa'i 'gro ba khas blangs pas/ ji skad bshad pa'i skyon ldog go zhes zer ba de ni mi 'grub po/ /ci ste bya ba dang ldan pa nyid ces bya ba ni mthun pa'i phyogs la khyab pa ma yin pa'i phyir gtan tshigs kyi don ma grub pa nyid do zhe na zhes bya ba ni dbu ma pas 'gro ba smra ba dag gi dogs pa bsu ba'i tshig yin te/ ci ste 'gro ba smra ba 'di skad ces dbu ma pas sngar/ re zhig 'gro po mi 'gro ste/ /zhes bya ba de sgrub pa'i skabs su don dam par 'gro ba po mi 'gro ste bya ba dang ldan pa'i phyir sdod pa po bzhin te zhes sbyor ba'i tshig smras pa de'i gtan tshigs bya ba dang ldan pa nyid ces bya ba ni mthun pa'i phyogs la khyab pa ma yin pa'i phyir gtan tshigs kyi don ma grub pa nyid de/ 'di ltar gtan tshigs ni mthun pa'i phyogs thams cad la khyab na gtan tshigs kyi don grub pa yin pas/ khyed dbu ma pas/ re zhig 'gro po mi 'gro ste/ /zhes bya ba sgrub pa'i mthun pa'i phyogs ni sdod pa po dang mo gsham gyi bu la sogs pa mi 'gro ba dag yin na/ khyed kyi gtan tshigs bya ba dang ldan pa nyid ces bya ba de mthun pa'i phyogs sdod pa po la yod du zin kyang / mo gsham gyi bu la sogs pa dag la med pas mthun pa'i phyogs la khyab pa ma yin pa'i phyir gtan tshigs kyi don ma grub pa nyid do zhes zer na'o/ /de skad ces zer ba de'i lan du/ 'dir 'grel pa byed pa nyid kyis/ de ni bzang po ma yin te zhes bya ba la sogs pa smras te/ 'gro ba smra ba dag na re/ bya ba dang ldan pa nyid ces bya ba ni mthun pa'i phyogs la khyab pa ma yin pa'i phyir/ gtan tshigs kyi don ma grub pa nyid do zhes zer ba de ni bzang po ma yin no/ /ci'i phyir bzang po ma yin zhe na/ de'i phyir bya ba dang ldan pa nyid ni mi 'gro ba kho na'o zhes nges par gzung ba'i phyir te zhes bya ba smras te/ gal te blun po 'ga' zhig gis gang dang gang 'gro ba med pa de dang de thams cad bya ba dang ldan pa nyid do zhes nges par gzung ba byas na ni de'i tshe 'gro ba po bya ba dang ldan pa nyid m i 'gro ste zhes sgrub pa'i mthun pa'i phyogs sdod pa po dang mo gsham gyi bu la sogs pa mi 'gro ba thams cad la bya ba dang ldan pa nyid ces bya bas khyab par bya dgos pa las sdod pa po la bya ba dang ldan pa nyid yod kyang mo gsham gyi bu la sogs pa la bya ba dang ldan pa nyid med pas mthun pa'i phyogs thams cad la ma khyab pa'i phyir gtan tshigs kyi don ma grub pa nyid du yang 'gyur ba zhig na/ kho bos ni gang dang gang bya ba dang ldan pa nyid yin pa de dang de thams cad mi 'gro ba kho na'o zhes nges par gzung ba bya bas/ des na 'gro ba po bya ba dang ldan pa nyid mi 'gro bar sgrub pa'i mthun pa'i phyogs sdod pa po yang bya ba dang ldan pa nyid yin pas de yang mi 'gro'o zhes bsgrubs pa'i tshe mthun pa'i phyogs mo gsham gyi bu la sogs pa bya ba dang ldan pa nyid kyis khyab pa ma yin du zin kyang / bya ba dang ldan pa nyid ces bya ba phyogs kyi chos de gtan tshigs nyid du rung ba'i phyir klan ka de ni bzang po ma yin no/ /don de nyid dpes bstan pa'i phyir dper na brtsal ma thag tu 'byung ba nyid ni mi rtag pa kho na zhes nges par gzung bas khyab pa ma yin yang phyogs kyi chos gtan tshigs nyid du 'dod pa'i phyir ro zhes bya ba smras te/ dper na gal te blun po 'ga' zhig gis gang dang gang mi rtag pa de dang de thams cad brtsal ma thag tu 'byung ba nyid do zhes nges par gzung ba byas na ni/ de'i tshe sgra brtsal ma thag tu 'byung ba nyid mi rtag par sgrub pa'i mthun pa'i phyogs bum pa dang glog dang nags kyi me tog la sogs pa mi rtag pa thams cad la brtsal ma thag tu 'byung ba nyid ces bya bas khyab par bya dgos pa la bum pa la brtsal ma thag tu 'byung ba nyid yod kyang / glog dang nags kyi me tog la sogs pa la brtsal ma thag tu 'byung ba nyid med pas mthun pa'i phyogs thams cad la ma khyab pa'i phyir/ gtan tshigs kyi don ma grub pa nyid du'ang 'gyur ba zhig na/ rtog ge pa mkhas pas ni gang dang gang brtsal ma thag tu 'byung ba nyid yin pa de dang de thams cad ni mi rtag pa kho na'o zhes nges par gzung ba bya bas/ des na sgra brtsal ma thag tu 'byung ba nyid mi rtag par sgrub pa'i mthun pa'i phyogs bum pa yang brtsal ma thag tu 'byung ba nyid yin pas de yang mi rtag go zhes sgrub pa'i tshe/ mthun pa'i p hyogs nam mkha' dang nags kyi me tog la sogs pa la brtsal ma thag tu 'byung ba nyid kyis khyab pa ma yin du zin kyang brtsal ma thag tu 'byung ba nyid ces bya ba phyogs kyi chos de gtan tshigs nyid du 'dod pa dang 'dra bas kho bo'i gtan tshigs bya ba dang ldan pa nyid kyang de dang 'dra bas khyed kyi klan ka de bzang po ma yin no/ /mjug bsdu ba dang tshad ma'i 'bras bu bstan pa'i phyir/ bya ba dang ldan pa nyid la yang 'gro ba dgag pa'i phyir/ gtan tshigs kyi don ma grub pa nyid ma yin no zhes bya ba smras te/ dper na brtsal ma thag tu 'byung ba nyid ni mi rtag pa kho na'o zhes nges par gzung bas khyab pa ma yin yang phyogs kyi chos gtan tshigs nyid du 'dod pa dang 'dra bar 'dir yang bya ba dang ldan pa nyid mi 'gro ba kho na'o zhes nges par gzung bas khyab pa ma yin yang phyogs kyi chos gtan tshigs nyid du rung ba'i phyir/ kho bo'i gtan tshigs kyi don bya ba dang ldan pa nyid ces bya ba de ma grub pa nyid ma yin no/ /'dis 'gro ba dang bral ba nyid gtan tshigs yin par yang lan btab pa yin no zhes bya ba ni dbu ma pas 'gro ba smra ba dag la go bar bya ba'i tshig yin te/ ci ste 'gro ba smra ba dag 'di skad ces dbu ma pas sngar/ 'gro ba po min 'gro ba min/ /zhes bya ba de sgrub pa'i skabs su don dam par 'gro ba po ma yin pa yang mi 'gro ste/ 'gro ba dang bral ba'i phyir de las gzhan pa bzhin no zhes sbyor ba'i tshig smras pa de'i gtan tshigs 'gro ba dang bral ba nyid ces bya ba ni mthun pa'i phyogs la khyab pa ma yin pa'i phyir gtan tshigs kyi don ma grub pa nyid de/ 'di ltar gtan tshigs ni mthun pa'i phyogs thams cad la khyab na gtan tshigs kyi don grub pa yin pas/ khyed dbu ma pas/ 'gro ba po min 'gro ba min/ /zhes sgrub pa'i mthun pa'i phyogs ni ri dang mo gsham gyi bu la sogs pa mi 'gro ba dag yin na/ khyed kyi gtan tshigs 'gro ba dang bral ba nyid ces bya ba de mthun pa'i phyogs ri la yod du zin kyang / mo gsham gyi bu la sogs pa dag la med pas mthun pa'i phyogs la khyab pa ma yin pa'i phyir gtan tshigs kyi don ma grub pa nyid do zhes zer na/ de la 'dir 'grel pa byed pa nyid kyis 'dis 'gro ba dang bral ba n yid gtan tshigs yin par yang lan btab pa yin no zhes go bar byas te bya ba dang ldan pa nyid ces bya ba'i gtan tshigs kyi don ma grub pa nyid ma yin no zhes bshad pa'i rigs pa sngar bstan pa 'dis 'gro ba dang bral ba nyid ces bya ba'i gtan tshigs kyi don ma grub pa nyid do zhes zer ba de'i lan kyang btab pa yin no zhes bya ba'i tha tshig go/ /'di skad bstan te/ 'gro ba dang bral ba nyid ni mi 'gro ba kho na'o zhes nges par gzung ba de'i phyir te dper na brtsal ma thag tu 'byung ba nyid ni mi rtag pa kho na'o zhes nges par gzung bas khyab pa ma yin yang phyogs kyi chos gtan tshigs nyid du 'dod pa'i phyir ro/ /'gro ba dang bral ba nyid la yang 'gro ba dgag pa'i phyir gtan tshigs kyi don ma grub pa nyid ma yin no zhes bya bar sbyar ro/ /ci ste sdod pa po ni 'gro ba po ma yin par yang 'gyur la/ 'gro ba por yang 'gyur bas sdod pa po khas blangs pas dpe med de/ bsgrub par bya ba chos kyi phyogs gcig dang mi ldan pa'i phyir ro zhes bya ba ni dbu ma pas 'gro ba smra ba dag gi dogs pa bsu ba'i tshig yin te/ ci ste 'gro ba smra ba dag 'di skad ces dbu ma pas sngar/ re zhig 'gro po mi 'gro ste/ /zhes bya ba de sgrub pa'i skabs su don dam par 'gro ba po ni mi 'gro ste/ bya ba dang ldan pa'i phyir sdod pa po bzhin te zhes sbyor ba'i tshig smras pa/ de'i dpe sdod pa po las blangs pa ni dpe ma grub pa nyid de 'di ltar sdod pa po ni dus thams cad sdod pa po nyid du nges pa ma yin te/ gang gi tshe ji srid du sdod pa po'i gnas skabs las langs te 'gro bar mi 'gyur ba de srid du ni 'gro ba po ma yin zhing sdod pa por 'gyur la/ gang gi tshe sdod pa po'i gnas skabs las langs te/ 'gro bar 'gyur ba de'i tshe na ni sdod pa po ma yin zhing 'gro ba por yang 'gyur bas/ sdod pa po de lta bu de khyed kyi dpe nyid du khas blangs pas dpe med de/ de la sdod cing mi 'gro ba yod kyang ldan zhing 'gro ba yang yod pas bsgrub par bya ba chos mi 'gro ba zhes bya ba'i phyogs gcig dang mi ldan pa'i phyir ro zhes zer na'o/ /de skad ces zer ba de'i lan du/ 'dir 'grel pa byed pa nyid kyis bsgrub par bya ba'i cha gnyi ga la grags pas sdod pa po dpe rung ba'i phyir skyon med do zhes bya ba smras te/ kho bo'i bsgrub par bya ba ni mi 'gro ba yin la/ sdod pa po de ji srid du langs te mi 'gro ba de srid du de la mi 'gro ba'i cha rgol ba dang phyir rgol ba gnyi ga la grags pa yod pas/ des na sdod pa po de srid du langs te mi 'gro ba de srid du dpe rung ba'i phyir kho bo'i dpe mi 'grub pa'i skyon med do/ /'di skad bstan te gal te khyed na re/ sdod pa po de nam zhig na langs te 'gro bar 'gyur bas mi 'gro ba'i dpe mi rung ngo zhes zer na/ 'o na lta kho bos kyang khyed la sdod pa po de srid du langs te 'gro bar mi 'gyur ba de srid du de la 'gro ba po med do zhes brgal zhing brtag par yang byar rung bas des na kho bos sdod pa po de gang gi tshe langs te 'gro ba'i dper ma byas kyi/ des ji srid du sdod cing mi 'gro ba de nyid dper byas pas kho bo'i dpe ma grub pa'i skyon med do zhes bya ba'i tha tshig go/ /mjug bsdu ba dang tshad ma'i 'bras bu bstan pa'i phyir/ de'i phyir gal te de lta na 'di la 'gro zhes bya ba'i tha snyad 'ga' yang mi 'thad pas zhes bya ba la sogs pa smras so/ /des na des de dang ldan pa'i tha snyad yod pa'i phyir ro zhes bya ba'i gtan tshigs kyi don ma grub pa nyid do/ /dpe yang med de bsgrub par bya ba chos dang mi ldan pa'i phyir ro zhes bya ba ni/ ji skad bshad pa'i rigs pa des na sngar 'gro ba smra ba dag gis smras pa/ 'o na 'gro ba grub par bya ba'i rjes su dpag pa gzhan 'di nyon cig /'gro ba yod pa kho nar nges te des de dang ldan pa'i tha snyad yod pa'i phyir ro/ /'di na gang yang med pa la ni des de dang ldan pa mi ston te/ dper na ri bong gi rwa can zhes mi ston pa bzhin no/ /lhas byin 'gro'o zhes 'gro bas de dang ldan pa'i tha snyad 'di yod pas des na 'gro ba yod pa'i phyir bsams pa'i don 'grub po zhes zer ba'i gtan tshigs dang dpe ma grub pas bsams pa'i don mi 'grub po/ /gtan tshigs kyi don 'gal ba nyid kyang yin no zhes bya ba ni gal te kun rdzob tu 'gro ba po sdod pa po la 'gro ba med pas khyab pa de la khyod mi 'gro bar sgrub na ni/ des na khyod nyid 'gro ba yod par sgrub pa dang 'gal ba nyid yin no/ /'dir smras pa/ 'gro ba po 'gro'o zhes brjod pa ma mthong ste/ mthong ba las ches lhag pa gzhan med pas gtan tshigs la sogs pa ma grub pa ma yin no zhes bya ba ni 'gro ba smra ba dag na re/ 'jig rten na 'gro ba po 'gro'o zhes brjod pa mthong ste/ mthong ba ni mngon sum gyi tshad ma yin pas de las ches lhag pa'i tshad ma gzhan med pas de'i phyir kho bo cag gi gtan tshigs dang dpe ma grub pa ma yin no zhes zer ba yin no/ /de skad ces zer ba de'i lan du 'grel pa byed pa nyid kyis/ 'dir bshad pa bden mod kyi de ni tha snyad du gtogs pa'i blo gros kyis mthong ba yin no zhes bya ba la sogs pa smras so/ /de nyid don dam par brtag par bya ste zhes bya ba ni tha snyad du gtogs pa'i blo gros kyis mthong ba 'di nyid don dam par brtag par bya ste zhes bya ba'i tha tshig go/ /ji ltar brtag par bya zhe na/ ci mthong ba de ji ltar mthong ba de bzhin nam/ 'on te gzhan zhig yin zhes gal gnyis su brtag par bya'o/ /de la re zhig de bzhin no zhe na ni shes par byar mi nus te zhes bya bas ni brtag pa dang po ltar mi 'thad par ston to/ /ji lta zhe na/ re zhig 'gro po 'gro'o zhes/ /ji ltar 'thad pa nyid du 'gyur/ /mi 'thad pa nyid do zhes bya ba'i tshig gi don te zhes bya ba ni/ tha snyad du gtogs pa'i blo gros kyis 'gro ba po 'gro'o zhes brjod pa mthong ba de ni ji ltar mthong ba de bzhin ma yin pas 'gro ba po 'gro'o zhes bya ba mi 'thad pa nyid do zhes bya ba'i don to/ /dper na g.yul ngor 'bros pa la gzhol pa ji ltar dpa' bo yin zhes bya ba bzhin no zhes bya ba ni mi 'thad pa'i dpe ste/ dper na g.yul ngor zhugs pa na sngar ma bros pa la skyabs 'tshol ba ji ltar dpa' bo nyid du 'thad par 'gyur te mi 'thad pa nyid do zhes bya ba de bzhin du 'dir yang / 'gro ba med na 'gro ba po 'gro'o zhes bya bar ji ltar 'thad pa nyid du 'gyur te mi 'thad pa nyid do zhes bya ba'i tshig gi don to/ /ji ltar mi 'thad ce na zhes bya ba ni pha rol po na re/ 'gro ba po ji ltar mi 'thad ces dri ba yin no/ /de'i lan du de ston par byed pa'i/ 'gro ba med na 'gro ba po/ /nam yang 'thad par mi 'gyur ro/ /zhes bya ba smras te/ 'gro ba po de ston par byed pa ni 'gro ba po yin la/ 'gro ba po de ston par byed pa'i 'gro ba med na 'gro ba po nam yang 'thad par mi 'gyur ro/ /'gro ba ji ltar med pa de ltar ni dang po kho nar/ re zhig song la 'gro med de/ /zhes bya ba la sogs pa dang / 'gro ba dang skye ba dgag pa de ltar bstan zin to zhes bya ba ni 'gro ba ji ltar med pa de ltar ni sngar/ re zhig song la 'gro med de/ /ma song ba la 'ang 'gro ba med/ /song dang ma song ma gtogs par/ / bgom pa shes par mi 'gyur ro/ /zhes bya ba la sogs pas 'gro ba dgag pa'i skabs dang / bdag las ma yin gzhan las min/ /gnyis las ma yin rgyu med min/ /dngos po gang dag gang na yang / /skyes pa nam yang yod ma yin/ /zhes bya ba la sogs pas 'gro ba skye ba bkag pa'i skabs der bstan zin to/ /yang na/ re zhig 'gro po mi 'gro ste/ /zhes bya ba ni dam bcas pa nye bar gzhag pa yin la/ re zhig 'gro po 'gro'o zhes/ /ji ltar 'thad pa nyid du 'gyur/ /zhes bya ba la sogs pa ni de ston par bya ba yin te/ ji skad bshad pa bzhin du rnam par bshad par bya'o zhes bya bas ni 'di skad bstan te/ sngar/ re zhig 'gro po mi 'gro ste/ /'gro ba po min 'gro ba min/ /zhes dam bcas pa nyid bshad pa gang yin pa de las/ re zhig 'gro po mi 'gro ste/ /zhes bya ba dam bcas pa dang po shos te/ re zhig 'gro po 'gro'o zhes/ /ji ltar 'thad pa nyid du 'gyur/ /'gro ba med na 'gro ba po/ /nam yang 'thad par mi 'gyur ro/ /zhes bya ba tshig le'ur byas pa rtsa ba bzhi po 'dis ston par byed pa yin te/ gang gi tshe song ba dang ma song ba dang bgom pa dag la 'gro ba med pa dang bdag dang gzhan dang gnyis dang rgyu med pa dag las 'gro ba skye ba med pa de'i tshe/ 'gro ba med na 'gro ba po/ /nam yang 'thad par mi 'gyur ro/ /zhes bshad pa na/ re zhig 'gro po 'gro'o zhes/ /ji ltar 'thad pa nyid du 'gyur/ /de 'gro ba med pas 'gro ba po nyid du mi 'grub po zhes rnam par bshad par bya'o/ /de'i phyir de ltar don dam par 'gro ba med bzhin du 'gro ba po yang dag pa ma yin yang sgro btags nas 'gro ba po 'gro'o zhe na zhes bya ba ni rigs pa snga mas 'gro ba med par bstan pa de'i phyir/ de ltar don dam par 'gro ba med pa bzhin du/ 'dir gal te 'gro ba smra ba dag gis ngo tsha bor nas/ 'gro ba po lhas byin la 'gro ba med cing yang dag pa ma yin pas 'gro ba yod par sgro btags nas 'gro ba po 'gro zhes zer na'o/ /de skad ces zer na de'i lan du 'dir bstan bcos mdzad pa nyid kyis/ gang gi phyogs la 'gro ba po/ /'gro ba de la 'gro med pa'i/ /'gro ba yin par thal 'gyur te/ /'gro po 'gro bar 'dod phyir ro/ /zhes bya ba gsungs so zhes bya ba ni smra ba gang gis grub pa'i mtha'i phyogs la 'gro ba po 'gro bar 'dod pa de'i phyogs la ni 'gro ba dang g.yo ba med pa'i 'gro ba po yin par thal bar 'gyur ro/ /ci'i phyir zhe na/ 'di ltar 'gro ba po 'gro bar 'dod pa'i phyir te zhes bya ba ni de dag 'gro ba med pa'i 'gro ba po 'gro bar 'dod pa'i phyir/ 'gro ba med pa'i 'gro ba po yin par thal bar 'gyur ro/ /don de nyid bstan pa'i phyir 'di ltar/ 'gro ba med na 'gro ba po la 'gro ba de dang ldan pa med pa'i phyir ro zhes bya bar dgongs so zhes bya ba smras te/ de ltar don dam par 'gro ba med bzhin du ngo tsha bor nas 'gro ba po la 'gro ba yang dag pa ma yin yang sgro btags nas 'gro ba po 'gro'o zhes zer bas/ de ltar 'gro ba med na 'gro ba po la 'gro ba de dang ldan pa med pa'i phyir/ 'gro ba med pa'i 'gro ba po yin par thal bar 'gyur ro zhes bya ba slob dpon gyis dgongs so/ /yang na 'gro ba gcig pu zhig yod pa de ni 'gro'o zhes bya ba de la yongs su rdzogs par byas pa'i phyir ro zhes bya ba ni yang na/ gang gi phyogs la 'gro ba po/ /'gro ba de la 'gro med pa'i/ /'gro po yin par thal 'gyur te/ /'gro po 'gro bar 'dod phyir ro/ /zhes bya ba'i tshig le'ur byas pa des smra ba gang gi phyogs la 'gro ba po 'gro bar 'dod pa de la 'gro ba med pa ni 'gro ba po yin par thal bar 'gyur te zhes bya ba de ni rnam pa gzhan du 'di ltar yang bshad par bya ste/ 'gro ba'i bya ba gcig pu zhig yod pa de ni 'gro'o zhes bya ba de la nye bar sbyar zhing der yongs su rdzogs par bya ba'i phyir/ 'gro ba po la 'gro ba'i bya ba med pas 'gro ba med pa'i phyir/ 'gro ba med pa'i 'gro ba po yin par thal bar 'gyur ro zhes bya bar yang sbyar ro// //bam po nyi shu lnga pa/ ji ste skyon de yongs su spang bar 'dod pas 'gro ba po don dam pa pa'i 'gro ba dang ldan par 'dod na zhes bya ba ni ci ste 'gro ba mtha' dag dbu ma pas/ 'gro ba med na 'gro ba po nyid du mi rung ba dang / 'gro ba po nyid ma yin na/ /'gro'o zhes tha snyad gdags su mi rung ngo zhes skyon brjod pa de yongs su spang bar 'dod pas/ 'di skad ces 'gro ba po ni don dam pa pa'i 'gro ba g.yo ba'i mtshan nyid gang yin pa de dang ldan pas 'gro ba po nyid du 'gyur bas des na 'gro ba po nyid kyang 'grub la/ /de grub na 'gro ba po 'gro'o zhes bya ba'i tha snyad de yang 'grub par 'gyur ro zhes zer na'o/ /de skad ces zer na de'i lan du/ 'dir bstan bcos mdzad pa nyid kyis de lta na yang / gal te 'gro po 'gro gyur na/ /'gro ba gnyis su thal 'gyur te/ /gang gis 'gro por mngon pa dang / /'gro por gyur nas 'gro ba'o/ /zhes bya ba gsungs so/ /gal te 'gro ba po 'gro ba dang ldan par gyur na/ 'gro ba gnyis su thal par 'gyur te zhes bya ba ni/ gal te 'gro ba po don dam pa pa'i 'gro ba dang ldan par gyur na/ 'gro ba gnyis su thal ba'i skyon du 'gyur ba'o/ /ji lta zhe na zhes bya ba ni pha rol po na re/ ji ltar/ 'gro ba gnyis su thal bar 'gyur/ /zhes dri ba yin no/ /gnyis gang zhe na/ 'gro ba gang gi 'gro ba po/ /zhes bya bar mngon pa dang zhes bya ba ni gcig yin te/ don dam pa pa'i 'gro ba gang dang ldan pas 'gro ba po de 'gro ba po zhes bya bar mngon zhing gsal bar 'gyur ba'o/ /'gro ba por 'gyur nas/ 'gro ba'i 'gro ba gang yin pa'o zhes bya ba ni gnyis pa ste/ 'gro ba po nyid du grub nas 'gro ba gzhan gyis 'gro ba'i 'gro ba gang yin pa'o/ /'dir pha rol po na re/ sngar khyed dbu ma pa na re kho bo cag 'gro ba smra ba dag la 'gro ba med pa'i 'gro ba po yin par thal bar 'gyur ro zhes zer la/ da ni khyed nyid kyis 'gro ba gnyis yod par bsgrubs pas/ des na 'gro ba po yang 'grub pas 'dod pa'i don grub po zhes zer ba'i phyogs snga ma khong nas dbyung ba de'i lan du/ 'dir 'grel pa byed pa nyid kyis khyed la 'gro ba gnyis yod par 'grub pa ma yin gyi/ gal te 'gro ba po don dam pa pa'i 'gro ba dang ldan par rtog na de la 'gro ba gnyis su thal bar 'gyur ba'i skyon 'dir 'gyur ba yin no/ /gal te bsgrub pa'i tshul gyis khyed 'gro ba gnyis su 'dod na/ de lta na/ 'gro ba gnyis su thal 'gyur na/ /'gro ba po yang gnyis su 'gyur/ /gang phyir 'gro po med par ni/ /'gro ba 'thad par mi 'gyur phyir/ /zhes bya ba'i skyon 'di yang yod de zhes skyon gzhan 'di yang brjod par bya'o/ /ci'i phyir 'gro ba gnyis su thal bar 'gyur na 'gro ba po yang gnyis su thal bar 'gyur zhe na/ de'i phyir bya ba ni gzhi la rag las pa'i phyir ro zhes bya bar dgongs so zhes bya ba smras te/ 'gro ba'i bya ba ni gzhi 'gro ba po la rag las pa'i phyir/ khyod la 'gro ba po gnyis su thal bar gyur na/ 'gro ba po gcig la 'gro ba gnyis mi srid pa de'i phyir/ /'gro ba po yang gnyis su thal bar 'gyur ro zhes bya bar slob dpon gyis dgongs so/ /'gro ba po med pa'i 'gro ba po nyid dang / 'gro ba gnyis dang 'gro ba po gnyis su gyur pa de yang mi 'dod de zhes bya ba ni 'gro ba smra ba dag /gang gi phyogs la 'gro ba po/ /'gro ba de la 'gro med pa'i/ /'gro bo yin par thal 'gyur te/ /'gro po 'gro bar 'dod phyir ro/ /zhes bya ba dang / gal te 'gro po 'gro gyur na/ /'gro ba gnyis su thal 'gyur te/ /gang gis 'gro por mngon pa dang / /'gro por gyur nas gang 'gro ba'o/ /zhes bya ba dang / 'gro ba gnyis su thal 'gyur na/ /'gro ba po yang gnyis su 'gyur/ /gang phyir 'gro po med par ni/ /'gro ba 'thad par mi 'gyur phyir/ /zhes bya ba de yang mi 'dod pa'i phyir ro/ /de mi 'dod na 'gro ba smra ba dag ci ltar 'dod ce na/ 'gro ba po la 'gro ba yod pa dang / 'gro ba yang gcig kho na dang / 'gro ba po yang gcig kho nar 'dod de zhes bya ba smras te/ 'gro ba med pa'i 'gro ba po nyid mi 'dod pa las bzlog pas ni 'gro ba po la 'gro ba yod par 'dod la/ 'gro ba gnyis su gyur par mi 'dod pa las bzlog pas ni/ 'gro ba gcig kho nar 'dod cing / 'gro ba po gnyis su 'gyur bar mi 'dod pa las bzlog pas ni/ 'gro ba po yang gcig kho nar 'dod do/ /'dir gal te 'gro ba smra ba dag na re de de bzhin te/ kho bo cag 'gro ba po la 'gro ba yod pa dang / 'gro ba yang gcig kho na dang / 'gro ba po yang gcig kho nar 'dod pa grub pas nang gi dngos po rnams skyes pa kho na yin te/ de dag gi yul dang ldan pa'i tha snyad byed pa'i phyir ro zhes bya ba dang ldan pa grub po zhes zer ba'i phyogs snga ma khong nas dbyung ba de'i lan du/ 'dir 'grel pa byed pa nyid kyis de yang kun rdzob tu 'grub kyi don dam par mi 'grub pas zhes bya ba la sogs pa smras te/ 'gro ba po la 'gro ba yod pa dang / 'gro ba dang 'gro ba po gcig kho nar 'dod pa de yang kun rdzob kyi tha snyad du 'grub kyi don dam par mi 'grub pas so/ /dpe med pa'i phyir pha rol pos smras pa'i sgrub pa mi 'grub po zhes bya ba ni mjug bsdu ba dang tshad ma'i 'bras bu yin te/ de ltar de dag don dam par mi 'grub pas/ sngar 'gro ba smra ba dag na re/ 'gro ba yod pa kho nar shes par bya ste/ de'i gzhi yod pa'i phyir ro/ /'di na gang la gzhi med pa de ni yod pa ma yin te/ dper na mo gsham gyi bu'i 'gyil ba dang / 'gro ba la sogs pa bzhin no/ / 'gro ba'i gzhi 'gro ba po de ba shar ma yod pas de ltar gzhi yod pa'i phyir 'gro ba po yod pas gtan tshigs grub pa'i phyir/ nang gi skye mched rnams skye ba kho na yin zhing / 'gro ba dang 'ong ba la sogs pa yang 'grub po zhes zer ba'i phyogs dang / phyogs kyi chos dang dpe med pa'i phyir/ pha rol pos smras pa'i sgrub pa de'i gzhi yod pa'i phyir ro zhes bya ba mi 'grub po/ /des na nang gi dngos po rnams skye ba kho na yin te/ de dag gi yul dang ldan pa'i tha snyad byed pa'i phyir ro/ /'di la gang mi skye ba de ni de dag gi yul dang ldan pa'i tha snyad mi byed de/ dper na mo gsham gyi bu 'gro bar mi byed pa bzhin no/ /lhas byin dang khyab mjug bshes gnyen ni de ltar 'gro ba ni byed pa ma yin pas/ de'i phyir nang gi dngos po rnams skye ba kho na yin no zhes gang smras pa de ma grub bo/ /phyir rgol ba dag 'gro ba ni yod pa kho na yin te/ de'i rtsom pa yod pa'i phyir ro/ /'di la gang med pa de la ni rtsom pa med de/ dper na nam mkha'i me tog gi phreng ba rtsom pa bzhin no/ /sdod par gyur pa la ni rab tu g.yo ba'i mtshan nyid kyi 'gro ba rtsom pa yod pas de'i phyir/ 'gro ba yod pa kho na'o/ /zhes bya ba ni de ltar rigs pas 'gro ba med par bsgrubs su zin kyang / yang 'gro ba smra ba dag 'gro ba'i rtsom pa yod pa'i sgro nas 'gro ba yod pa kho na yin te zhes phyir ldog par byed pa yin no/ /'dir yang 'gro ba ni zhes bya ba 'di ni chos can yin la yod pa kho na yin te zhes bya ba 'di ni bsgrub par bya ba chos yin/ de'i rtsom pa yod pa'i phyir ro zhes bya ba 'di ni sgrub pa'i chos yin/ 'di na yang med pa de la ni rtsom pa med de zhes bya ba 'di ni chos mi mthun pa'i phyogs yin/ dper na nam mkha'i me tog gi phreng ba rtsom pa med pa bzhin no zhes bya ba 'di ni chos mi mthun pa'i dpe yin/ sdod par 'gyur ba la ni rab tu g.yo ba'i mtshan nyid kyi 'gro ba rtsom pa yod pas zhes bya ba 'di ni chos mthun pa'i dpe yin/ de'i phyir 'gro ba yod pa kho na'o zhe na zhes bya ba 'di ni mjug bsdu ba dang tshad ma'i 'bras bu yin par sbyar te/ dper na lhas byin sdod par 'gyur ba la ni rab tu g.yo ba'i mtshan nyid kyi 'gro ba rtsom pa yod pa'i phyir de la 'gro ba yod pa kho na yin pa de bzhin du/ 'gro ba la yang rab tu g.yo ba'i mtshan nyid kyi 'gro ba rtsom pa yod pa'i phyir/ de la yang 'gro ba yod pa kho na yin no zhes zer ro/ /de skad ces zer ba de'i lan du/ 'grel pa byed pa nyid kyis 'dir bya gag tshon sna tshogs dang ldan pa nyid kha dog dang gzhan du sgyur te nye bar 'jog pa bzhin du/ sngar lan btab zin pa nyid tshig gzhan gyis nye bar bzhag pas zhes bya ba la sogs pa smras te/ dper na 'ga' zhig gis bya gag tshon sna tshogs dang ldan pa nyid sngar khyer te 'ongs pa phyir btang ba yang kha dog gzhan du sgyur te nye bar 'jog pa bzhin du khyod kyi tshig song ba dang ma song ba dang bgom pa la 'gro ba yod do zhes zer ba de ni mang po yang yin/ de ni sna tshogs pa yang yin te/ de de lta na ni ma yin no zhes sngar bzhin lan btab zin pa nyid 'dir yang rtsom pa zhes bya ba'i tshig gzhan gyis nye bar bzhag pas/ rigs pa snga ma nyid kyis sun dbyung bar bya'o zhes ston to/ /de nyid bstan pa'i phyir/ 'di ltar slob dpon gyis 'dir 'gro ba'i rtsom pa de nyid ci song ba 'am ma song ba 'am/ 'on te bgom pa la yod ces khyod la brgal zhing brtag na snga ma bzhin du rnam pa thams cad mi 'thad par bstan par zhes pas bshad pa zhes bya ba la sogs pa smras so/ /song la rtsom pa'i 'gro med de/ de la 'gro ba'i bya ba 'das zin pa'i phyir ro zhes bya ba ni song ba'i lam la 'gro ba'i rtsom pa med de/ de la 'gro ba rtsom pa'i bya ba 'das zin pa'i phyir ro/ /ma song ba la'ang 'gro rtsom med/ /ma song ba 'gro bas stong pa la 'gro ba med pa'i phyir ro zhes bya ba ni ma song ba'i lam la yang 'gro ba'i rtsom pa med de/ de la 'gro ba'i brtsam pa'i bya ba ma brtsams pa'i phyir ro/ /bgom la rtsom pa yod ma yin/ /song dang ma song ma gtogs par/ /bgom pa rtag tu med pa'i phyir ro zhes bya ba ni/ song dang ma song ma gtogs par/ /bgom pa shes par mi 'gyur ro/ /zhes bya ba'i rigs pas bgom pa rtag tu med pa'i phyir ro/ /gang du 'gro ba rtsom par byed/ /'o na gang gis ci skad smras pa'i gtan tshigs bsgrubs pas 'dod pa'i don 'grub par 'gyur ba de de smros shig ces bya ba de nyid bstan pa'i phyir des na 'dir song ba dang ma song ba dang bgom pa dag la rtsom pa med pa bstan to zhes bya ba'i tshig gi don to zhes smras so/ /de ltar na 'dir sbyor ba'i tshig dag tu 'gyur ba ni zhes bya bas ni song ba dang ma song ba dang bgom pa la 'gro ba'i rtsom pa med pa'i sbyor ba dag ston to/ /song ba la 'gro ba'i rtsom pa med de/ lam yin pa'i phyir/ dper na ma song ba'i lam bzhin no zhes bya ba ni chos can dang bsgrub par bya ba chos dang sgrub pa'i chos dang / dpe yin par go rims bzhin du sbyar te/ dper na ma song ba'i lam ni lam yin pa'i phyir de la 'gro ba'i rtsom pa med pa de bzhin du/ song ba'i lam yang lam yin pa'i phyir de la yang 'gro ba'i rtsom pa med do/ /yang na ma song ba'i lam la 'gro ba'i rtsom pa med de/ ma song ba'i phyir dper na 'gro bar 'dod pa las gzhan pa'i ma song ba bzhin no zhes bya ba yang chos can dang bsgrub par bya ba chos dang / sgrub pa'i chos dang dpe yin par go rims bzhin du sbyar te/ dper na 'gro bar 'dod pa las gzhan pa'i ma song ba ni ma song ba'i phyir de la 'gro ba'i rtsom pa med pa de bzhin du/ ma song ba'i lam yang ma song ba'i phyir de la yang 'gro ba'i rtsom pa med de/ de bzhin du bgom pa la yang 'gro ba'i rtsom pa mi 'thad de/ lam yin pa'i phyir dper na de las gzhan pa bzhin no zhes bya ba yang chos can dang bsgrub par bya ba chos dang sgrub pa'i chos dang dpe yin par go rims bzhin du sbyar te/ dper na bgom pa las gzhan pa'i lam ni lam yin pa'i phyir de la 'gro ba'i rtsom pa mi 'thad pa de bzhin du/ bgom pa yang lam yin pa'i phyir/ de la yang 'gro ba'i rtsom pa mi 'thad do/ /de'i phyir de ltar rtsom pa med pas rtsom pa'i gtan tshigs kyi don ma grub pa nyid dang thun mong ma yin pa nyid do zhes bya ba ni mjug bsdu ba dang tshad ma'i 'bras bu yin te/ de ltar song ba dang ma song ba dang bgom pa la rtsom pa med pas/ sngar 'gro ba smra ba dag na re/ 'gro ba ni yod pa kho na yin te/ de'i rtsom pa yod pa'i phyir ro zhes zer ba'i gtan tshigs kyi don de ma grub pa nyid do/ /thun mong ma yin pa nyid do zhes bya ba ni gang gi phyir song ba dang ma song ba dang bgom pa gang la yang 'gro ba'i rtsom pa med pa de'i phyir 'gro ba'i rtsom pa ni song ba la sogs pa de dag gang dang yang thun mong ma yin pa nyid do zhes bya ba'i tha tshig go/ /rgyas par ni snga ma bzhin no zhes bya ba ni gal te 'gro ba smra ba dag na re/ 'gro ba'i rtsom pa med pa ma yin te/ 'di ltar/ gang na g.yo ba de na rtsom/ /de yang gang gi bgom pa la/ /g.yo ba song min ma song min/ /de'i phyir bgom la rtsom pa yod/ /ces zer na de la/ bgom la rtsom pa yod par ni/ /ji lta bur na 'thad par 'gyur/ /gang tshe rtsom pa med pa yi/ /bgom pa 'thad pa med phyir ro/ /zhes lan gdab par bya ba la sogs pa snga ma bzhin du ci rigs par rgyas par sbyar bar bya ba yin no/ /'dir smras pa/ 'o na 'gro ba rnam pa gzhan gyis yod par shes par bya ste zhes bya ba la sogs pa ni/ 'dir 'gro ba smra ba dag na re/ gal te kho bo cag gi 'gro ba'i rtsom pa yod pa'i gtan tshigs kyis 'gro ba mi 'grub na/ 'o na 'gro ba la brjod pa khyad par can 'jug pa'i rgyu yod pa'i sgo nas 'gro ba yod par shes par bya ste zhes dam bcas pa yin no/ /'dir yang 'gro ba zhes bya ba 'di ni chos can yin la rnam pa gzhan gyis yod par shes par bya ste zhes bya ba 'di ni bsgrub par bya ba chos yin te/ sngar 'gro ba'i rtsom pa yod pa'i phyir ro zhes bya ba'i gtan tshigs de las gzhan pa'i gtan tshigs rnam pa gzhan gyis 'gro ba yod par shes par bya ste zhes bsgrub par bya ba yin te/ 'dir rang gi gnas skabs las gzhan du gyur pa dang ldan pa'i dngos po la brjod pa khyad par can 'jug pa'i rgyu yod pa'i phyir ro zhes bya ba'i gtan tshigs rnam pa gzhan gyis 'gro ba yod par shes par bya ste zhes bsgrub par bya ba yin no/ /rang gi gnas skabs las gzhan du gyur pa dang ldan pa'i dngos po la brjod pa khyad par can 'jug pa'i rgyu yod pa'i phyir ro zhes bya ba 'di sgrub pa'i chos yin te/ 'gro ba gang la rang gi gnas skabs las gzhan du tha dad par gyur pa dus gsum gyi lam yod pa de ni rang gi gnas skabs las gzhan du gyur pa dang ldan pa zhes bya'o/ /de'i dngos po la brjod pa khyad par can 'jug pa'i rgyu yod pa'i phyir ro zhes bya ba ni 'gro ba rang gi gnas skabs las gzhan du gyur pa dus gsum gyi lam dang ldan pa'i dngos po la song ngo 'gro'o 'gro bar 'gyur ro zhes brjod pa khyad par can 'jug pa'i rgyu de dag yod pa'i phyir ro/ /'di skad bstan te/ 'gro ba rang gi gnas skabs las gzhan du gyur pa'i chos song ba dang bgom pa dang ma song ba'i lam dang ldan pa'i dngos po la song ngo 'gro'o 'gro bar 'gyur ro zhes brjod pa'i sgra khyad par can 'jug pa'i rgyu de dag yod par shes par bya ste zhes sgrub par byed do/ /'di na gang med pa de la ni rang gi gnas skabs las gzhan du gyur pa dang ldan pa'i dngos po la brjod pa khyad par can 'jug pa'i rgyu med pa de zhes bya ba 'di ni chos mi mthun pa'i phyogs yin no/ /dper na dmus long mig gi rnam par shes pa dang bral ba la dmus long gis mthong ngo / /dmus long lta'o blta bar 'gyur ro zhes brjod pa khyad par can 'jug pa'i rgyu med pa bzhin no zhes bya ba 'di ni chos mi mthun pa'i dpe yin te/ dper na dmus long mig gi rnam par shes pa dang bral ba la ni rang gi gnas skabs las gzhan du gyur pa'i chos mig gi rnam par shes pa med pas mig gi rnam par shes pa dang mi ldan pa'i dngos po de dmus long la dmus long gis 'das pa'i dus na mthong ngo / /dmus long da ltar lta'o/ /ma 'ongs pa'i dus na blta bar 'gyur ro zhes brjod pa khyad par can 'jug pa'i rgyu de dag med do/ /'gro ba ni de lta ma yin te/ 'gro ba rang gi gnas skabs las gzhan du gyur pa'i chos song ba dang bgom pa dang ma song ba'i lam dang ldan pa'i dngos po la song ngo 'gro'o 'gro bar 'gyur ro zhes brjod pa dus gsum gyi khyad par can 'jug pa'i rgyu de dag yod pa'i phyir 'gro ba ni yod par shes par bya'o zhes bya bar sbyar ro/ /'gro ba rang gi gnas skabs las gzhan du gyur pa'i chos song ba dang bgom pa dang ldan pa'i dngos po la ni brjod pa khyad par can 'jug pa'i rgyu nyid yod de zhes bya ba 'di ni nye bar sbyar ba'i sbyor ba yin no/ /brjod pa khyad par can 'jug pa'i rgyu de dag kyang gang zhe na/ de'i phyir gang du de zhugs zin pa de ni song ba yin pa gang du de 'jug pa de ni bgom pa yin/ gang du de ma zhugs pa de ni ma song ba yin pas zhes bya ba smras te/ phyogs gang du 'gro ba de zhugs zin pa de ni song ba'i lam yin pas phyogs de ni 'gro ba grub pa dang ldan pas 'das pa'i dus zhes bya'o/ /phyogs gang du 'gro ba de 'jug pa de ni bgom pa'i lam yin pas phyogs de ni 'gro ba 'jug pa dang ldan pa da ltar gyi dus zhes bya'o/ /phyogs gang du 'gro ba de da dung ma zhugs pa de ni ma song ba'i lam yin pas/ phyogs de ni 'gro ba da dung ma brtsams pas ma 'ongs pa'i dus zhes bya'o/ /'gro ba rang gi gnas skabs las gzhan du gyur pa'i chos de dag dang ldan pa'i dngos po la song ngo 'gro'o 'gro bar 'gyur ro zhes brjod pa khyad par can du 'jug pa'i rgyu de dag yod pas de'i phyir ji skad smras pa'i gtan tshigs kyi mthu nyid kyis 'gro ba yod pa kho na yin pas/ des na skabs kyi don 'grub po zhes bya ba smras te/ sngar 'gro ba smra ba dag gi phyogs snga ma nye bar gzhag pa/ nang gi dngos po rnams skyes pa kho na yod de de dag gi yul dang ldan pa'i tha snyad byed pa'i phyir ro zhes bya ba de grub po zhes zer ba yin no/ /de skad ces zer ba de'i lan du 'grel pa byed pa nyid kyis 'dir bshad pa/ gang gi phyir 'gro ba'i skye ba yod par gyur na ni gang du zhugs zin pa de ni song ba yin la/ gang du 'jug pa de ni bgom pa yin/ gang du ma zhugs pa de ni ma song ba yin no zhes bya bar yang 'gyur ba zhig na/ 'gro ba de yang med do zhes bstan zin to zhes bya ba la sogs pa smras te/ 'dis ni dngos po thams cad skye ba bkag pa'i phyir dang / 'gro ba mi 'thad par sngar bstan zin pas 'gro ba med pa'i phyir/ 'gro ba rang gi gnas skabs las gzhan du gyur pa dang ldan pa'i dngos po la brjod pa khyad par can 'jug pa'i rgyu nyid yod pa zhes bya ba'i gtan tshigs kyi don ma grub pa nyid du bstan to/ /'gro ba yod par gyur na yang / /zhes bya ba ni/ 'dir khyed zer ba ltar gal te 'gro ba yod par gyur na yang de dgag pa brjod par bya'o zhes bya bar sbyar ro/ /'di la khyod kyis 'das pa dang da ltar dang ma 'ongs pa'i dus gsum gyi sgrar brjod pa 'gro ba'i gzhi song ba dang bgom pa dang ma song ba zhes bya ba lam gsum po dag yod pas des 'gro ba yod pa nyid du sgrub par byed pas de'i phyir lam de dag nyid brtag par bya'o/ /de'i phyir 'dir bstan bcos mdzad pa nyid kyis/ 'gro ba rtsom pa'i snga rol na/ /gang du 'gro ba rtsom 'gyur ba/ /bgom pa med cing song ba med/ /ma song 'gro ba ga la yod/ /ces bya ba gsungs so/ /'gro ba rtsom pa'i snga rol na/ gang du 'gro ba rtsom par 'gyur ba'i bgom pa med cing 'gro bas stong ngo zhes bya ba ni/ 'gro ba rtsom pa'i snga rol na/ /ji srid du 'gro ba rtsom par mi byed pa de srid du gang du 'gro ba rtsom par 'gyur ba da ltar gyi dus kyi sgrar brjod pa bgom pa zhes bya ba med cing 'gro bas stong pas te/ des ni 'gro ba rtsom pa'i snga rol na gong du 'gro ba de 'jug pa da ltar gyi dus kyi sgrar brjod pa bgom pa'i lam med pas 'gro ba med par bstan to/ /song ba yang med de 'gro ba dang mi ldan pa la mi 'thad do zhes bya bar dgongs so zhes bya ba ni/ bgom pa la 'gro ba med na song ba yang med de/ gang du 'gro ba byung nas/ 'gag pa de ni song ba zhes bya na/ /de yang 'gro bas stong pa med pa'i phyir ro/ /des ni 'gro ba med na gang du 'gro ba de zhugs zin pa 'das pa'i dus kyi sgrar brjod pa song ba'i lam la 'gro ba ma zhugs par bstan to/ /de ltar 'gro bas stong na 'gro ba mi 'thad par ston pa'i rjes su dpag pa sngar bstan pa dag yod pas dam bcas pa la rjes su dpag pas gnod pa'i phyir ma song ba la 'gro ba ga la yod de 'gro ba med do zhes bya ba'i tha tshig go zhes bya bas ni de ltar 'gro ba rtsom pa'i snga rol na gang du 'gro ba rtsom par 'gyur ba bgom pa med cing 'gro bas stong na 'gro ba mi 'thad pas ma song ba de la yang 'gro ba rtsom pa med par stong ste/ re zhig song la 'gro med de/ /ma song ba la'ang 'gro ba med/ /ces bya ba la sogs pa rjes su dpag pa sngar bstan pa dag yod pas 'gro ba smra ba dag gis 'gro ba yod par dam bcas pa la gnod pa'i phyir ma song ba la 'gro ba rtsom pa ga la yod de 'gro ba med do zhes bya ba'i tha tshig go/ /des ni de ltar 'gro ba med na gang du 'gro ba de 'jug par 'gyur ba ma song ba'i dus kyi sgrar brjod pa ma song ba'i lam la 'gro ba rtsom pa med par ston to/ /de ltar 'gro ba rtsom pa'i snga rol na gang du 'gro ba rtsom par 'gyur ba'i bgom pa med cing 'gro bas stong pa dang / bgom pa la 'gro ba med pas 'gro ba mthar phyin pa'i song ba med pa dang / ma song ba la yang 'gro ba rtsom pa med pa'i phyir/ 'gro ba rang gi gnas skabs las gzhan du gyur pa dang ldan pa'i dngos po la brjod pa khyad par can 'jug pa'i rgyu yod pa nyid ces bya ba'i gtan tshigs de'i don ma grub pa 'gro ba med par grub po zhes bya bar sbyar ro/ /de'i phyir de ltar gang gi tshe don dam par 'gro ba'i rnam par rtog pa ji ltar yang mi srid pa de'i tshe/ 'gro rtsom rnam pa thams cad du/ /snang ba med pa nyid yin na/ /song ba ci zhig bgom pa ci/ /ma song ci zhes rnam par brtag /ces bya ba ni don snga ma'i mjug bsdu ba yin par sbyar ro/ /nyid yin na zhes bya ba'i sgra ni nges par gzung ba'i don te/ 'dir snang ba med pa nyid yin na zhes bya ba blta bar bya'o zhes bya ba ni/ 'gro rtsom rnam pa thams cad du/ /snang ba med pa nyid yin na/ /zhes bya ba'i skabs so/ /gzhan du na 'gro ba nyid kyi yin gyi gzhan gyi ma yin par shes par 'gyur ro zhes bya ba ni nyid yin na zhes bya ba'i sgra snang ba med pa nyid yin zhes bya ba las gzhan pa 'gro ba nyid kyi zhes bya bar sbyar na/ 'gro ba 'ba' zhig gi rtsom pa med pa yin gyi dngos po gzhan dag gi rtsom pa ni med pa ma yin no zhes bya bar shes par 'gyur ba'i skyon du 'gyur bas mi rung ste/ 'dir bya ba'i tshig gi don thams cad kyi rtsom pa snang ba med pa nyid du dgag par dgongs pa'i phyir ro/ /rab rib can skra dang sbrang bu dang / sbrang bu mchu rings la sogs pa yang dag pa ma yin pa la rnam par rtog pa dang 'dra'o zhes bya ba ni/ de ltar 'gro ba'i rtsom pa rnam pa thams cad du snang ba med pa nyid yin na/ khyed kyi song ba dang bgom pa dang ma song ba yang ci zhig yin par rnam par brtag ste/ dper na rab rib can skra shad la sogs pa yang dag pa ma yin pa la rnam par rtog pa dang 'dra bar med pa la rang gi blo 'khrul pas log par rnam par rtog pa yin no zhes bya ba'i tha tshig go/ /'gro ba med pa'i phyir bum skra 'greng gi mdung thung bzhin du khyod la skyon de nyid rjes su 'brang ngo zhes bya ba ni mjug bsdu ba dang tshad ma'i 'bras bu yin te/ bum skra 'greng gi mdung thung zhes bya ba ni/ rgyal po 'jigs byed sde'i bu srin tsha bum skra 'greng zhes bya ba lus gzugs bum pa'i dbyibs 'dra la skra gyen du 'greng ba zhig byung ba'i tshe/ nyi ma'i bu kar+Na zhes bya ba mi phyed pa'i go cha can dang / dbang po'i bu sring sgrub ces bya ba g.yul 'gyed pa na/ khyab 'jug gi dbang pos bu srid sgrub kyi phyogs bya ba'i phyir bdag nyid bram zer sprul te kar+Na sbyin pa chen po byed pa'i mdun du song ste/ mi phyed pa'i go cha bslangs pa dang / kar+Na stong pa'i rlabs chen po dang ldan pas mi phyed pa'i go cha phud de khyab 'jug la byin no/ /de nas khyab 'jug de'i stong rlabs kyi bdag nyid chen pos sems mgu nas kar+Na la khyab 'jug gi mdung thung dam pa byin no/ /de'i 'og tu khyab 'jug gis bsams pa la/ da srid sgrub kar+Na'i g.yul ngor btang na mdung thung gis bsad na mi rung ngo snyam nas/ bum skra 'greng btang ste bum skra 'greng dang kar+Na g.yul sprad pa'i tshe kar+Nas mdung thung de 'phangs pa na/ bum skra 'greng sa'i 'og dang sa bla dang mtho ris kyi sa gsum po thams cad du bros kyang mdung thung des gar bros gar ma btang ngo zhes grags pa yin te/ 'dir yang 'gro ba smra ba khyed la 'gro ba ma grub pa'i phyir/ dper na bum skra 'greng gi mdung thung bzhin du khyed la rang gi gtan tshigs ma grub pa'i skyon de nyid rtag tu rjes su 'brang ngo zhes bya ba'i tha tshig go/ /gzhan dag na re/ don dam par 'gro ba yod pa kho na yin te mi mthun pa yod pa'i phyir ro zhes bya ba la sogs pa ni 'dir 'gro ba smra ba dag 'gro ba'i mi mthun pa sdod pa yod pa'i sgo nas don dam par 'gro ba yod pa kho nar bsgrub pa yin no/ /'dir yang 'gro ba zhes bya ba 'di ni chos can yin la yod pa kho na yin te zhes bya ba 'di ni bsgrub par bya ba chos yin/ mi mthun pa yod pa'i phyir ro zhes bya ba 'di ni sgrub pa'i chos yin te/ 'gro ba'i mi mthun pa sdod pa yod pa'i phyir 'gro ba yod do zhes sgrub par byed do/ /'di na gang dang gang la mi mthun pa yod pa de dang de yod par snang ste zhes bya ba 'di ni chos mthun pa'i phyogs yin te/ dper na snang ba'i mi mthun pa mun pa yod pa bzhin no zhes bya ba 'di ni chos mthun pa'i dpe yin te 'gro ba la yang mi mthun pa sdod pa yod pas zhes bya ba 'di ni nye bar sbyar ba'i sbyor ba yin/ de'i phyir 'gro ba yod pa kho na'o zhes zer ro zhes bya ba 'di ni mjug bsdu ba dang tshad ma'i 'bras bu yin par sbyar te/ dper na snang ba la mi mthun pa mun pa yod pas snang ba yang yod pa de bzhin du 'gro ba la yang mi mthun pa sdod pa yod pa'i phyir 'gro ba yod pa kho na'o zhes zer ro/ /de skad ces zer ba de'i lan du 'grel pa byed pa nyid kyis 'dir bshad pa/ de yang khyod la brgal zhing brtag pa yod de khyod sdod pa su'i yin par sems/ ci 'gro ba po'i yin nam/ 'on te 'gro ba po ma yin pa'i yin zhes bya ba la sogs pa smras so/ /de la gal te 'gro ba po'i yin no snyam na/ re zhig 'gro po mi sdod de/ /re zhig ces bya ba'i sgra ni rim pa la ltos pa'o/ /'gro ba po mi sdod de zhes bya ba ni dam bca' ba nye bar gzhag pa'o zhes bya bas ni 'gro ba po la sdod pa med par ston te/ 'gro ba po'i chos ni bya ba dang ldan pa nyid yin pas phyogs kyi chos mngon no zhes bya ba ni/ gang gi phyir 'gro ba po ni 'gro ba'i bya ba byed pa nyid yin pas de'i phyir phyogs kyi chos mngon te/ 'gro ba po sdod par mi 'thad pa'i phyogs kyi chos gtan tshigs ni 'gro ba'i bya ba dang ldan pa nyid yin no zhes bya ba'i tha tshig go/ /dpe ni de'i dbang gis te 'gro ba po 'gro ba ma nyams pa yin no zhes bya ba ni 'gro ba po sdod par mi 'thad pa'i dpe ni bsgrub par bya ba chos sdod par mi 'thad pa dang / sgrub pa'i chos 'gro ba'i bya ba dang ldan pa de'i dbang gis bstan dgos te/ de yang gang zhe na 'gro ba po 'gro ba ma nyams pa yin te/ lhas byin 'gro ba ma nyams par bsgrub par bya ba chos sdod par mi 'thad pa dang grub pa'i chos 'gro ba'i bya ba dang ldan pa 'di gnyi ga yod pas de ni chos mthun pa'i dpe yin no/ /'dir rjes su dpag pa ni don dam par 'gro ba po sdod par mi 'thad de 'gro ba'i bya ba dang ldan pa'i phyir/ lhas byin 'gro ba ma nyams pa bzhin no zhes bya ba yang chos can dang / bsgrub par bya ba chos dang / sgrub pa'i chos dang dpe yin par go rims bzhin du sbyar te/ dper na lhas byin 'gro ba ma nyams pa ni 'gro ba'i bya ba dang ldan pa'i phyir sdod par mi 'thad pa de bzhin du 'gro ba po yang 'gro ba'i bya ba dang ldan pa'i phyir sdod par mi 'thad do/ /ci ste 'gro ba po ma yin pa yin no snyam na/ 'gro bo po min sdod pa min/ /'gro ba dang bral ba la ni tha snyad du yang 'gro ba ldog pa mi 'thad pas de mi srid pa'i phyir ro zhes bya bar dgongs so zhes bya ba ni/ ci ste pha rol po dag 'di snyam du sdod pa zhes bya ba de 'gro ba po ma yin pa yin no snyam na/ 'gro ba po ma yin pa la ni sdod pa med de de'i phyir 'gro ba po ma yin pa 'gro ba dang bral ba la ni/ kun rdzob kyi tha snyad du yang 'gro ba ldog pa'i sdod pa mi 'thad pas 'gro ba po ma yin pa la sdod pa de mi srid pa'i phyir/ 'gro ba po ma yin pa la sdod pa med do zhes bya ba slob dpon gyis dgongs so/ /ci ste legs par ma zin pa'i gdon gyis brlams pa'i dbang gis gzhan zhig sdod par sems na grogs po/ 'gro po 'gro po min las gzhan/ /gsum pa gang zhig sdod par 'gyur/ /de da smros shig /'ga' yang sdod par mi 'thad do/ /zhes bya ba'i tshig gi don to zhes bya ba ni/ ci ste pha rol po dag logs par ma zin pa bzang po ma yin par zin pa'am/ brdzun par zin pa gdon dang 'dra ba des brlams shing byin gyis brlabs pa'i dbang gis 'gro ba po dang 'gro ba po ma yin pa las gzhan pa 'gro ba po yin pa dang / 'gro ba po ma yin pa 'chol ba 'ga' zhig gis sdod par sems na de dag la 'di skad ces/ kye grogs po/ 'gro po 'gro po min las gzhan/ /gsum pa gang zhig sdod par 'gyur ba de da smros shig ces brjod par bya ste/ gang gi phyir 'gro ba po yin pa dang / 'gro ba po ma yin pa gnyi ga'i bdag nyid dam gnyi ga'i bdag nyid ma yin pa gsum pa gzhan ni ci yang med pa de'i phyir gzhan 'ga' yang sdod par mi 'thad do zhes bya ba'i tshig gi don to/ /yang na/ re zhig 'gro po sdod do zhes/ /ji ltar 'thad pa nyid du 'gyur/ /'gro ba med na 'gro ba po/ /nam yang 'thad par mi 'gyur ro/ /bya ba gnyis dus gcig tu 'gal bas mi srid pa'i phyir ro zhes bya bar dgongs so zhes bya ba ni yang 'gro ba po sdod par mi 'thad pa nyid du 'gog par byed do zhes bya ba'i tha tshig ste/ ci'i phyir 'gro ba po sdod par mi 'thad ce na de'i phyir/ 'gro ba med na 'gro ba po/ /nam yang 'thad par mi 'gyur ro/ /zhes bya ba smras te/ 'gro ba med pa'i phyir 'gro ba po nyid med la/ 'gro ba po nyid med na 'gro ba po sdod do zhes bya ba de yang mi 'thad do/ /yang na/ re zhig 'gro po sdod do zhes/ /ji ltar 'thad pa nyid du 'gyur/ /de'i bya ba gnyis dus gcig tu 'gal bas 'gro ba po'i bya ba dang sdod pa po'i bya ba gnyis dus gcig na mi srid pa'i phyir ro zhes bya bar slob dpon gyis dgongs te/ 'gal ba'i phyir ro zhes bya ba'i tha tshig go/ /de ltar na tshig des ni sdod pa po 'gro ba dang bral ba nyid du bstan pas 'gro ba po sdod do zhes bya ba'i tha snyad mi srid par ston to zhes bya ba ni/ mjug bsdu ba dang tshad ma'i 'bras bu yin te/ de ltar na tshig le'ur byas pa des ni sdod pa po 'gro ba dang bral ba nyid du bstan pa des na sdod pa med la/ sdod pa med pas na 'gro ba po sdod do zhes bya ba'i tha snyad de yang med par bstan to/ /gal te rdza mkhan bzhin du dus gsum gyi nus pa'i gnas skabs yod pa'i phyir 'gro ba dang bral ba yang 'gro ba po nyid du 'grub pas skyon med do zhe na zhes bya bas 'di skad bstan te/ 'dir pha rol po na re/ dbu ma pas sdod pa po la 'gro'o zhes bya ba'i tha snyad med pa'i phyir ro zhes bya ba gang smras pa de de lta ma yin te/ ci'i phyir zhe na/ gang gi phyir rdza mkhan zhes brjod pa de ni dus thams cad du sdod pa po nyid du shes te/ 'di ltar rdza ma ni 'gro bzhin du mi byed pa'i phyir ro/ /'on kyang rdza mkhan sdod pa po nyid de la lan 'ga' rtswa dang sa 'jim pa la sogs pa'i don du langs te/ 'gro ba la sogs pa dus gsum gyi nus pa'i gnas skabs yod pa'i phyir des na sdod pa po la yang 'gro'o zhes bya ba'i tha snyad yod pa kho na yin pas sdod pa po yang 'gro ba po nyid du 'grub pas skyon med do zhes bya ba yin no/ /de skad ces zer ba de'i lan du 'dir 'grel pa byed pa nyid kyis nye bar gdags pa khas blangs pa'i phyir/ khas blangs pa nyams pas des na snga ma bzhin du gtan tshigs dang dpe'i skyon yod pas thal bar 'gyur ro zhes bya ba smras te/ rdza mkhan ni dngos su na sdod pa po nyid yin te/ 'di ltar sdod pas rdza ma byed pa'i phyir ro/ /'gro ba po nyid ni de la nye bar gdags pa'i tshul gyis khas blangs pa'i phyir 'gro ba po dngos btang bas khas blangs pa nyams pas/ des na snga ma bzhin du gtan tshigs dang dpe'i skyon yod par thal bar 'gyur te/ 'gro ba yod do zhes bya ba ni dam bcas pa tsam kho nar zad do zhes bya ba'i tha tshig go/ /yang na sun dbyung ba'i lam gzhan yang yod de zhes bya ba la sogs pas ni 'gro ba log pa ni sdod pa zhes bya bas na/ ldog pa de yang bgom pa las sam/ song ba las sam ma song ba las ldog par 'gyur grang na/ rnam pa de dag gang las kyang sdod par mi 'thad do zhes bya ba ston to/ /de'i phyir 'di la sdod pa de song ba las sam/ ma song ba las sam bgom pa las ldog pa la brtag grang na/ de la/ bgom las sdod par mi 'gyur te/ /song dang ma song las kyang min/ /zhes bya ba la sogs pa smras so/ /bgom pa las sdod par mi 'gyur te/ rjes su dpag pa sngar bstan pas 'gro ba dang ldan pa la sdod pa mi 'thad pa'i phyir ro zhes bya ba ni/ bgom pa la sdod pa med de 'gro ba la zhugs pa'i phyir/ dper na bgom pa ma nyams pa gzhan bzhin no zhes rjes su dpag pa sngar bstan pas bgom pa 'gro ba dang ldan pa sdod pa mi 'thad pa'i phyir ro/ /gal te song ba las de 'grub po zhe na/ song ba po las kyang de 'grub par mi rigs te/ song ba 'gro ba med pa la/ /'gro ba ldog pa med pa'i phyir/ /zhes bya ba ni gal te song ba las sdod pa de 'grub po zhe na/ song ba las kyang sdod pa de 'grub par mi rigs te/ song ba la 'gro ba med pa'i phyir ro/ /'di ltar 'gro ba ldog pa ni sdod pa yin na 'gro ba ni song ba la med de/ 'gro ba med na 'gro ba ldog pa yang med la/ 'gro ba ldog pa med na sdod pa yang med pa'i phyir ro/ /'o na ma song ba las sdod pa 'grub par 'gyur ro snyam nas/ de yang mi 'thad de 'gro ba med pa la ldog pa mi srid pa'i phyir ro/ /de lta bas na ma song ba las kyang sdod par mi 'gyur ro zhes bya ba ni 'di ltar 'gro ba ldog pa ni sdod pa yin na/ 'gro ba ni ma song ba la med de/ 'gro ba med na 'gro ba ldog pa yang med la/ 'gro ba ldog pa med na sdod pa yang med pa'i phyir/ ma song ba las kyang sdod par mi 'gyur ro zhes bya ba'i tha tshig go/ /de ltar na gtan tshigs kyi don ma grub pa nyid dang zhes bya ba la sogs pa ni mjug bsdu ba dang tshad ma'i 'bras bu yin te/ de ltar na 'gro ba smra ba dag gi gtan tshigs kyis don mi mthun pa yod pa'i phyir zhes bya ba de ma grub pa nyid de/ 'di ltar sdod pa med pa'i phyir 'gro ba de mi mthun pa nyid ma yin pa'i phyir ro/ /rjes su 'gro ba yang med de/ don dam par snang ba dang mun pa gnyis mi mthun pa nyid yin par khas ma blangs pa'i phyir ro zhes bya ba ni 'gro ba smra ba dag la chos mthun pa'i dpes rjes su 'gro ba yang med de/ dbu ma pas don dam par snang ba dang mun pa gnyis mi mthun pa nyid yin par khas ma blangs pa'i phyir ro/ /yang na don 'gal ba nyid kyang yin no zhes bya ba ni ci ste 'gro ba smra ba dag kun rdzob tu 'gro ba mi mthun pa sdod pa yod pa'i gtan tshigs kyis 'gro ba yod par sgrub pa ni don dam par 'gro ba yod par sgrub pa dang 'gal ba nyid kyang yin no/ /gang dag yod pa ni sdod pa kho na yin te/ mi mthun pa yod pa'i phyir dang / rtsom pa yod pa'i phyir dang / de las ldog pa dngos po skye ba'i phyir ro zhes zer ba de dag la/ 'gro ba dang ni 'jug pa dang / /ldog pa yang ni 'gro dang mtshungs/ /zhes brjod par bya ste zhes bya ba la sogs pa ni 'gro ba smra ba gang dag sdod pa ni yod pa kho na yin te/ sdod pa'i mi mthun pa 'gro ba yod pa'i phyir ro zhes zer ba dang / gang dag sdod pa ni yod pa kho na yin te/ sdod pa'i rtsom pa khri stan la sogs pa shom pa la 'jug pa yod pa'i phyir ro zhes zer ba dang / gang dag sdod pa ni yod pa kho na yin te/ sdod pa de las ldog pas 'gro ba zhes bya ba'i dngos po skye ba'i phyir ro zhes zer ba de dag la/ 'gro ba dang ni 'jug pa dang / /ldog pa yang ni 'gro dang mtshungs/ /zhes brjod par bya ste/ sdod pa'i mi mthun pa 'gro ba yang 'gro ba'i mi mthun pa sdod pa dang mtshungs la/ sdod pa'i 'jug pa rtsom pa yang 'gro ba'i rtsom pa 'jug pa dang mtshungs pa dang / sdod pa'i ldog pa 'gro ba yang 'gro ba'i ldog pa sdod pa dang mtshungs so zhes brjod par bya'o/ /de nyid bstan pa'i phyir ji ltar 'gro ba'i mi mthun pa 'gro ba po dang 'gro ba po ma yin pa dang / de las gzhan pa la mi 'thad pa dang / 'gro ba'i rtsom pa yang song ba dang ma song ba dang bgom pa la mi 'thad pa dang / 'gro ba'i ldog pa yang song ba dang ma song ba dang bgom pa la mi 'thad pa de bzhin du/ sdod pa'i mi mthun pa yang sdod pa po dang sdod pa po ma yin pa dang de las gzhan pa la mi 'thad pa dang / sdod pa'i 'jug pa yang bsdad pa dang ma bsdad pa dang / sdod pa la mi 'thad pa dang sdod pa'i ldog pa yang bsdad pa dang ma bsdad pa dang / sdod pa la mi 'thad pa de ltar rjes su dpag pa rgyas par bya'o zhes bya ba smras so/ /'di skad bstan te/ re zhig 'gro po mi sdod de/ /'gro ba po min sdod pa min/ /'gro po 'gro po min las gzhan/ /gsum pa gang zhig sdod par 'gyur/ /zhes bya ba ji ltar 'gro ba po mi sdod de sdod pa dang / 'gro ba gnyis mi mthun pa'i phyir ro zhes bshad pa de bzhin du sdod pa po yang mi 'gro ste/ sdod pa dang 'gro ba gnyis mi mthun pa'i phyir ro/ /ci ltar 'gro ba po ma yin pa mi sdod de/ sdod pa gnyis su thal bar 'gyur ba'i phyir ro zhes bshad pa de bzhin du sdod pa po ma yin pa yang mi 'gro ste/ 'gro ba gnyis su thal bar 'gyur ba'i phyir ro/ /ji ltar 'gro ba po yin pa dang 'gro ba po ma yin pa mi sdod de mi srid pa'i phyir ro zhes bshad pa de bzhin du/ sdod pa po yin pa dang sdod pa po ma yin pa yang mi 'gro ste mi srid pa'i phyir ro/ /de ltar na re zhig 'gro ba'i mi mthun pa sdod pa dang sdod pa'i mi mthun pa 'gro ba mtshungs pa yin no/ /song la 'gro ba'i rtsom med de/ /ma song ba la'ang 'gro rtsom med/ /bgom la rtsom pa yod ma yin/ /gang du 'gro ba rtsom par byed/ /ces bya bas ji ltar 'gro ba'i rtsom pa song ba dang ma song ba dang bgom pa la mi 'thad do zhes bshad pa de bzhin du sdod pa'i 'jug pa yang bsdad pa dang ma bsdad pa dang sdod pa la mi [(]'theng [,]'thad [)]de/ de ltar na 'gro ba'i rtsom pa dang sdod pa'i 'jug pa mtshungs pa yin no/ /bgom las sdod par mi 'gyur te/ /song dang ma song las kyang min/ /zhes bya ba ji ltar 'gro ba'i ldog pa song ba dang ma song ba dang bgom pa las ldog par mi 'gyur ro zhes bshad pa de bzhin du/ sdod pa'i ldog pa yang gang du bsdad pa de nas mi 'gro ste 'gro ba med pa'i phyir ro/ /gang du ma bsdad pa de nas kyang mi 'gro ste 'gro ba med pa'i phyir ro/ /gang du sdod pa de nas kyang mi 'gro ste sdod pa dang 'gro ba gnyis mi mthun pa'i phyir ro/ /de ltar na 'gro ba'i ldog pa dang sdod pa'i ldog pa mtshungs pa yin no zhes de ltar rjes su dpag pa rgyas par bya'o/ /tshig mangs kyis dogs pa'i phyir dang / don bshad zin pa'i phyir spros pa'i sgo nas ma bshad de zhes bya ba ni sdod pa'i mi mthun pa yang sdod pa po dang / sdod pa po yang ma yin pa dang / de las gzhan pa la mi 'thad pa dang / sdod pa'i 'jug pa yang bsdad pa dang / ma bsdad pa dang / sdod pa la mi 'thad pa dang / sdod pa'i ldog pa yang bsdad pa dang ma bsdad pa dang / sdod pa la mi 'thad pa de ltar rjes su dpag pa rgyas par bya ba dag gi sbyor ba spros pa'i sgo nas ma bshad pa'o/ /'on kyang phyogs tsam zhig bshad par bya'o zhes bya ba ni/ de dag la rjes su dpag pa rgyas pa sum phrugs re re yod pa las re zhig bshad par bya'o zhes bya ba'i tha tshig go/ /'dir sbyor ba'i tshig tu 'gyur ba ni/ sdod pa po mi 'gro ste 'gro ba dang bral ba'i phyir sdod pa ma nyams pa'i sdod pa po gzhan bzhin no/ / bsdad pa la sdod pa'i 'jug pa med de bsdad zin pa'i phyir/ dper na bsdad nas yun ring du lon pa bzhin no/ /bsdad pa las sdod pa mi ldog ste 'gro ba med pa'i phyir dper na sdod pa ma nyams pa gzhan bzhin no zhes bya ba dag yin te/ de dag kyang chos can dang / bsgrub par bya ba chos dang / sgrub pa'i chos dang / dpe yin par go rims bzhin du sbyar te/ dper na sdod pa ma nyams pa'i sdod pa po gzhan ni 'gro ba dang bral ba'i phyir mi 'gro ba de bzhin du sdod pa po yang 'gro ba dang bral ba'i phyir mi 'gro ste zhes bya ba dang / dper na bsdad nas yun ring du lon pa'i lam ni bsdad zin pa'i phyir de la sdod pa'i 'jug pa med pa de bzhin du bsdad pa'i lam yang bsdad zin pa'i phyir de la sdod pa'i 'jug pa med do zhes bya ba dang / dper na sdod pa ma nyams pa'i lam gzhan ni 'gro ba med pa'i phyir de las sdod pa mi ldog pa de bzhin du/ bsdad pa'i lam yang 'gro ba med pa'i phyir de las kyang sdod pa mi ldog go zhes bya bar sbyar ro/ /de bzhin du lhag ma rnams la yang rjes su dpag pa'i sbyor ba ci rigs par bya'o zhes bya ba ni/ sdod pa po ma yin pa ni mi 'gro ste/ sdod pa dang bral ba'i phyir 'gro ba nyams pa'i sdod pa po ma yin pa gzhan bzhin no/ /sdod pa po yin pa dang sdod pa po ma yin pa yang mi 'gro ste mi srid pa'i phyir mo gsham gyi bu bzhin no/ /ma bsdad pa la sdod pa'i 'jug pa med de bsdad pa ma brtsams pa'i phyir/ dper na bsdad pa ma brtsams pa'i lam gzhan bzhin no/ /sdod pa po la yang sdod pa'i 'jug pa med de bsdad pa dang ma bsdad pa ma gtogs par sdod pa med pa'i phyir/ dper na nam mkha'i me tog bzhin no/ /ma bsdad pa la sdod pa mi ldog ste sdod pa med pa'i phyir/ dper na sdod pa nyams pa gzhan bzhin no/ /sdod pa las sdod pa mi ldog ste med pa'i phyir/ dper na dri za'i grong khyer nas sdod pa mi ldog pa bzhin no zhes bya bar rjes su dpag pa'i sbyor ba ci rigs par bya ba ba yin no/ /de'i phyir de ltar sdod pa ma grub pa nyid ji skad bshad pa'i skyon las nges par thar pa med do zhes bya ba ni mjug bsdu ba dang tshad ma'i 'bras bu yin te/ 'gro ba'i mi mthun pa sdod pa yod pa'i phyir ro zhes bya ba ma grub pa'i phyir/ gtan tshigs kyi don ma grub pa nyid kyi skyon sngar ji skad bshad pa las nges par thar pa med de/ 'gro ba yod par ma grub po zhes bya ba'i tha tshig go/ /'dir smras pa khyed na re/ 'gro ba po yang med la 'gro ba yang med do zhes zer bas tsai tra 'gro'o mai tra 'gro'o zhes 'jig rten la grags pa sel bar byed pa'i phyir grags pa'i gnod par 'gyur te/ dper na 'jig rten na ri bong can zla ba nyid du grags pa bzhin du/ zla ba nyid ma yin par sel bar byed pa bzhin no zhes bya ba ni/ 'dir 'gro ba smra ba dag /dbu ma pa ni 'jig rten la grags pa sel bar byed pa'i phyir grags pa'i gnod par 'gyur ro zhes bya ba rjes su 'gro ba'i dpe dang bcas pas rgol ba yin no/ /de skad ces zer ba de'i lan du/ 'dir 'grel pa byed pa nyid kyis bshad pa 'dir/ gtan tshigs kyi don gang yin/ ci 'jig rten la grags pa sel bar byed pa'i phyir ram/ 'on te bstan bcos la grags pa sel bar byed pa'i phyir ro zhes bya ba la sogs pa smras so/ /des cir 'gyur zhes bya ba ni/ pha rol pos 'dri ba'i tshig yin no/ /'jig rten la grags pa sel bar byed pa'i phyir ro zhe na ni zhes bya ba ni/ gal te pha rol po na re/ dbu ma pa 'jig rten la grags pa sel bar byed pa'i phyir/ grags pa'i gnod par 'gyur ro zhes zer na'o/ /'jig rten la grags pa sel bar byed pa'i phyir ro zhes bya ba la/ 'jig rten ni rnam pa gnyis te/ ba lang rdzi'i chung ma yan chad la grags pa'i mtshan nyid mu stegs byed dag gis ma blangs pa dang / mu stegs byed dag gis blangs pa'o/ /de la gal te 'jig rten ba lang rdzi'i chung ma yan chad la grags pa'i mtshan nyid mu stegs byed dag gis ma blangs par sel bar byed pa'i phyir grags pa'i gnod par 'gyur ro zhe na ni/ des na 'gro ba smra ba dag gi gtan tshigs kyi don ma grub pa nyid de/ ci'i phyir zhe na/ dbu ma pas don dam par ro zhes dam bcas pa'i khyad par nye bar blangs pa kho na'i phyir 'jig rten la grags pa'i 'gro ba'i tha snyad ma spangs pa'i phyir ro zhes bya ba smras te/ dbu ma pas don dam par 'gro ba po dang 'gro ba po med do zhes dam bcas pa khyad par can khas blangs pa'i phyir/ 'jig rten ba lang rdzi'i chung ma yan chad la grags pa'i mtshan nyid mu stegs byed dag gis ma blangs pa'i tha snyad ma spangs pa'i phyir/ 'gro ba smra ba dag gi gtan tshigs kyi don ma grub pa nyid do/ /'on te 'jig rten mu stegs byed dag gis blangs pa sel bar byed pa'i phyir grags pa'i gnod par 'gyur ro zhes zer na ni/ des sel bar byed pas 'jig rten la grags pa'i gnod pa med de/ gal te mu stegs byed dag gi bstan bcos la grags pa sel ba'i phyogs la skyon der gyur na ni/ des na sangs rgyas pa dag gis grangs can la sogs pa'i gtso bo dang dngos po rnams kyi byed pa po nyid dang / skyes bu yod pa nyid la sogs pa dag kyang dgag par mi bya zhing / grangs can la sogs pa bdag tu smra ba rnams kyis kyang / sangs rgyas pa la bdag med pa nyid la sogs pa dag dgag par mi bya ste/ des na tshad ma dang gzhal bya'i tha snyad kyang chad par 'gyur bas de'i phyir/ 'jig rten mu stegs byed dag gis blangs pa sel bar byed pa ni grags pa'i gnod par mi 'gyur ro/ /gal te rang gi bstan bcos la grags pa sel bar byed pa'i phyir de grags pa'i gnod par 'gyur ro zhe na ni zhes bya ba ni/ gal te pha rol po dag 'di skad ces gal te gzhan gyi bstan bcos la grags pa sel bar byed pa'i phyir grags pa'i gnod par mi 'gyur du zin kyang / dbu ma pas rang gi bstan bcos la grags pa sel bar byed pa'i phyir/ de grags pa'i gnod par 'gyur ro zhes zer na'o/ /de skad ces zer na de dag la 'di skad ces de la ni grags pa'i gnod par 'gyur ro zhes brjod par mi bya'i de la ni khas blangs pa la gnod par 'gyur ro zhes brjod par bya ba'i rigs te zhes brjod par bya'o/ /gal te pha rol po na re/ ci'i phyir de khyed rang gi khas blangs pa la gnod par 'gyur ro zhes brjod par bya zhes zer na/ de yang kho bo cag la gnas mi rnyed de zhes bya ba smras te/ rang gi bstan bcos la grags pa sel bar byed pa ni khas blangs pa la gnod par 'gyur ba yin no zhes brjod par bya ba'i rigs pa las/ khyed kyi de grags pa'i gnod par 'gyur ro zhes brjod pas khyed la tha snyad la mi mkhas pa'i skyon brjod pa yin gyi/ kho bo cag dbu ma pa la khas blangs pa la gnod par 'gyur ba'i gnas med do zhes bya ba'i tha tshig go/ /gal te ji ltar gnas mi rnyed ce na/ de'i phyir don dam par 'gro ba po dang / 'gro ba gnyis yod par khas ma blangs pa'i phyir dang / de dag mi 'thad par yang sngar bstan zin pa'i phyir ro zhes bya ba smras te/ 'di la don dam par 'gro ba po dang 'gro ba gnyis yod par khas blangs nas don dam pa nyid du de dag sel bar byed na ni khas blangs pa la gnod par yang 'gyur ba zhig na/ don dam par de nyid yod par khas ma blangs pa'i phyir don dam par 'gro ba po dang 'gro ba de dag mi 'thad par yang sngar bstan zin pa'i phyir khas blangs pa la gnod par mi 'gyur ro/ /yang bshad pa/ don dam par 'gro ba po dang 'gro ba grub par gyur na nges par gcig pa nyid dam/ gzhan pa nyid du 'gyur grang na de yang mi 'thad do zhes bya ba la sogs pas ni sngar 'gro ba smra ba dag /khyed na re 'gro ba po yang med la 'gro ba yang med do zhes zer bas tsai tra 'gro'o mai tra 'gro'o zhes 'jig rten la grags pa sel bar byed pa'i phyir grags pa'i gnod par 'gyur te/ dper na 'jig rten la ri bong can zla ba nyid du grags bzhin du/ zla ba nyid ma yin par sel bar byed pa bzhin no zhes zer bas 'gro ba po dang 'gro ba yod par bsgrub pa mi 'thad par slob dpon nyid kyis gsungs pa'i tshig le'ur byas pa'i don gyis 'dir yang bshad do zhes bya bar sbyar ro/ /'di skad bstan te/ don dam par 'gro ba po dang 'gro ba grub par gyur na de nyid nges par gcig pa nyid dam gzhan pa nyid du 'gyur grang na/ de gnyi gar yang mi 'thad do zhes ston to/ /ji ltar zhe na zhes bya ba ni pha rol pos 'dri ba'i tshig yin no/ /de nyid brtag par bya ste zhes bya ba ni gcig pa nyid dam/ gzhan pa nyid yin nam/ de gnyi gar mi 'thad pa nyid brtag par bya ste zhes bya bar sbyar ro/ /de'i phyir/ 'gro ba de dang 'gro ba po/ /de nyid ces kyang byar mi rung / /'gro ba dang ni 'gro ba po/ /gzhan nyid ces kyang byar mi rung / /de ni dam bca' ba gnyis nye bar gzhag pa'o zhes bya ba smras te/ tshig le'ur byas pa de ni 'gro ba dang 'gro ba po gcig pa nyid kyang ma yin la gzhan pa nyid kyang ma yin par dam bca' ba gnyis nye bar gzhag pa yin no/ /ji ltar mi rung zhe na zhes bya ba ni ji ltar gcig pa nyid du mi rung zhes dri ba yin no/ /de'i phyir/ de nyid 'gro po yin gyur na/ /byed pa po dang las nyid kyang / /gcig pa nyid du thal bar 'gyur/ /zhes bya ba gsungs te/ gal te 'gro ba gang yin pa de nyid 'gro ba po yin par gyur na/ byed pa po dang las nyid kyang gcig pa nyid du thal bar 'gyur bas de mi rung ste/ 'di ltar 'gro ba ni las kyi ngo bo nyid yin la/ 'gro ba po ni byed pa po'i ngo bo nyid yin pa'i phyir ro/ /de ltar na 'dir glags yod pa'i tshig yin pa'i phyir skabs kyi don dgag par nus shing bzlog pa'i don gsal ba'i tshig gi don to zhes bya ba ni gal te 'gro ba gang yin pa de nyid 'gro ba po yin par gyur na byed pa po dang las nyid gcig pa nyid du thal bar 'gyur ba de ltar na/ 'dir 'gro ba po dang 'gro ba gcig tu gyur na byed pa po dang l as nyid kyang gcig pa nyid du 'gyur ba'i glags yod pa'i tshig yin pa'i phyir de ni mi rung bas tshig le'ur byas pa 'di'i skabs kyi don 'gro ba dang 'gro ba po gcig pa nyid ces bya ba de dgag par nus shing skabs kyi don de las bzlog pa'i don 'gro ba dang 'gro ba po gcig nyid ma yin no zhes bya ba de dag gsal ba'i tshig gi don yin te/ tshig le'ur byas pa 'di'i don ni de yin no zhes bya ba'i tha tshig go/ /don de nyid dpes bstan pa'i phyir/ dper na gal te sgra rtag na bum pa yang rtag pa nyid du thal bar 'gyur te/ bum pa byas pa mi rtag pa ni rtag pa nyid du mi 'dod de/ de'i phyir sgra ni mi rtag ste byas pa'i phyir/ dper na bum pa bzhin no zhes bya ba lta bu'o zhes bya ba smras te/ 'dis ni glags yod pa'i tshig yin pa'i phyir skabs kyi don dgag par nus shing bzlog pa'i don gsal ba'i tshig gi don to zhes bshad pa de nyid dpe bstan te/ dper na 'ga' zhig gis sgra rtag go zhes smras pa ni glags yod pa'i tshig yin te/ ji ltar zhe na gzhan dag na re/ gal te sgra rtag na bum pa yang rtag pa nyid du thal bar 'gyur te zhes bya ba'i glags yod pa'i tshig yin pa'i phyir de ni mi rung bas sgra rtag go zhes zer ba de'i skabs kyi don ni bum pa byas pa mi rtag pa nyid du mi 'dod do zhes bya ba 'dis dgag par nus shing skabs kyi don de las bzlog pa'i don sgra ni mi rtag ste byas pa'i phyir/ dper na bum pa bzhin no zhes bya ba de gsal ba'i tshig gi don yin pa lta bu'o/ /de'i phyir 'dir tshig gi don gyi dbang gis sbyor ba'i tshig ni zhes bya ba ni bzlog pa'i don gsal ba'i tshig gi don te zhes bya ba'i tshig gi don de'i dbang gis 'gro ba po dang 'gro ba gcig pa nyid ma yin par rjes su dpag pa'i sbyor ba'i tshig ni 'di ltar bya'o zhes bya bar sbyar ro/ /don dam par 'gro ba po dang 'gro ba gcig pa nyid ma yin te/ byed pa po dang las yin pa'i phyir/ dper na gcod pa po dang gcad pa bzhin no zhes bya ba ni chos can dang bsgrub par bya ba chos dang / sgrub pa'i chos dang dpe yin par go rims bzhin du sbyar te/ dper na gcod pa po dang gcad pa ni byed pa po dang las yin pa'i phyir gcig pa nyid ma yin pa de bzhin du/ 'gro ba po dang 'gro ba yang byed pa po dang las yin pa'i phyir gcig pa nyid ma yin no/ /'dir gzhan dag na re/ dbu ma pas 'gro ba po dang 'gro ba gcig pa nyid ma yin par bshad pa ni don gyis go bas de gnyis gzhan pa nyid du bsgrubs pa yin pas des na khas blangs pa la gnod par 'gyur te/ 'di ltar dbu ma pa'i sgrub pa'i mtha' las de gnyis gzhan pa nyid du yang mi 'dod pa'i phyir ro zhes zer ba'i phyogs snga ma khong nas dbyung ba de'i lan du/ 'dir 'grel pa byed pa nyid kyis 'gro ba dang 'gro ba gcig pa nyid ma yin no zhes bshad kyang de gnyis gzhan pa nyid du bstan pa ma yin no zhes bya ba smras te/ ma yin par dgag pa yongs su gzung ba'i tshul gyis gcig pa nyid ma yin par dgag pas gzhan pa nyid du sgrub par byed pa lta bu ma yin gyi kho bos med pa dgag pa nyid yongs su bzung bas 'gro ba po dang 'gro ba gcig pa nyid ma yin no zhes bshad kyang de gnyis gzhan pa nyid bstan pa ma yin pas khas blangs pa la gnod par mi 'gyur ro zhes bstan to/ / //bam po nyi shu drug pa/ gzhan dag ni dam bcas pa'i don rnam par brtags nas/ gcig la gcig nus pas stong pa nyid kyi mtshan nyid kyis gzhan pa nyid gcod pa po dang gcad pa la med pa'i phyir dpe med do zhes zer ro zhes bya ba ni grangs can nus pa smra ba dag gis/ dbu ma pas sngar 'gro ba po dang 'gro ba gcig pa nyid ma yin par dam bcas pa'i don rnam par brtags nas/ dbu ma pa'i dpe gcod pa po dang bcad pa bzhin no zhes bya ba de ma grub par rgol ba yin no/ /'di skad bstan te/ gcig pa nyid ma yin pa zhes bya ba ni gzhan pa nyid yin la/ de yang gcig la gcig nus pas stong pa nyid kyi mtshan nyid kyis gzhan pa nyid yin te/ 'gro ba'i nus pas kyang 'gro ba po stong la/ 'gro ba po'i nus pas kyang 'gro ba stong ste/ gcig gi nus pa gcig la med pa'i mtshan nyid kyis gzhan pa nyid yin no/ /gal te de ltar sgrub na gcig la gcig nus pas stong pa nyid kyi mtshan nyid kyis gzhan pa nyid ces bya ba de gcod pa po dang gcad pa la med pa'i phyir de dper mi rung ngo / /ci'i phyir zhe na/ kho bo cag gi grub pa'i mtha' las/ snying stobs dang rdul dang mun pa'i rang bzhin ni rtag pa dang thams cad du song ba'i phyir dngos po thams cad ni thams cad kyi bdag nyid yin par 'dod pas de nas gcod pa po dang gcad pa gnyis gcig la gcig nus pas stong pa nyid kyi mtshan nyid kyis gzhan pa nyid ma yin te/ gcod po pa'i nus pa yang gcad pa la yod la/ gcad pa'i nus pa yang gcod pa po la yod de de gnyis bdag nyid gcig pa'i phyir gzhan pa nyid kyi dper mi rung ngo zhes zer ro/ /de skad ces zer ba de'i lan du 'dir 'grel pa byed pa nyid kyis/ de ni bzang po ma yin te/ /gcig pa nyid tsam dgag pa'i phyir/ /dang zhes bya ba la sogs pa smras te/ 'dir kho bo'i bsgrub par bya ba ni gcig pa nyid tsam dgag pa kho na yin gyi/ gcig la gcig nus pas stong pa nyid kyi mtshan nyid kyis gzhan pa nyid ma yin pa'i phyir klan ka de ni bzang po ma yin no/ /de yang gcod pa po dang gcad pa'i gsal ba tha dad pa'i phyir grags pa kho na'o zhes bya ba ni gzhan pa nyid de yang 'jig rten la grags pa nyid kho na yin te/ 'di ltar gcod pa po dang gcad pa'i gsal ba'i ngo bo nyid tha dad pa'i phyir de gnyis gzhan pa nyid yin par 'jig rten la grags pa kho na yin pas kho bo'i dpe med pa ma yin no/ /gcig la gcig nus pas stong pa nyid kyi mtshan nyid kyang dam bcas pa'i don khas blangs nas rtogs par bya ba dang rtogs par byed pa kun rdzob tu gcig la gcig nus pas stong pa spyir grub pa dag kho na dpe nyid du 'dod pa'i phyir dpe med pa ma yin no zhes bya bas ni 'di skad bstan te/ yang na gcig la gcig nus pas stong pa nyid kyi mtshan nyid kyis gzhan pa nyid khas blangs na yang kho bo'i dpe gcod pa po dang gcad pa gcig pa nyid ma yin pa kun rdzob tu 'gyur te/ gang gi tshe 'gro ba po dang 'gro ba gcig la gcig nus pas stong pa nyid kyi mtshan nyid kyis gzhan pa nyid yin par sgrub pa de'i tshe dam bcas pa'i don de khas blangs nas/ dper na rtogs par bya ba gtso bo dang rtogs par byed pa skyes bu nyid byed pa po dang las kyi mtshan nyid kyis kun rdzob tu gcig la gcig nus pas stong pas gzhan pa nyid du 'grub pa de bzhin du 'gro ba po dang 'gro ba yang byed pa po dang las kyi mtshan nyid kyis kun rdzob tu gcig la gcig nus pas stong pas gzhan pa nyid du 'grub par 'gyur bas kho bo'i dpe med pa ma yin no/ /grangs can dag gis skyes bu byed pa po nyid ma yin te rang bzhin ni byed pa po yin la skyes bu ni za ba po yin pa'i phyir/ byed pa po dang las nyid kyi gtan tshigs mi 'grub po zhes kyang smra bar mi nus te/ 'di ltar blos yon tan rnams kyang bdag las gzhan la bdag kyang yon tan rnams las gzhan no snyam du nges par 'dzin pa na rtogs par bya ba rtogs par byed pa po nyid yin pa'i phyir ro/ /ci ste yang don dam par gcod pa po dang gcad pa gzhan pa nyid ma yin te/ dpag tu yod pa'i phyir gcad pa'i rang gi bdag nyid bzhin pas de'i phyir 'gal ba 'khrul pa med pa'i gnod par 'gyur zhe na zhes bya ba ni grangs can dag gcod pa po dang gcad pa gzhan pa nyid ma yin par bsgrub pa'i tshig yin te/ 'dir yang gcod pa po dang gcad pa zhes bya ba 'di ni chos can yin te/ gcod pa po lhas byin dang gcad pa shing dag go/ /gzhan pa nyid ma yin te zhes bya ba 'di ni bsgrub par bya ba chos yin te/ gcod pa po'i bdag nyid las gcad pa'i bdag nyid gzhan pa nyid ma yin par sgrub pa yin no/ /dpag tu yod pa'i phyir zhes bya ba ni sgrub pa'i chos yin te tshad yod pa'i phyir ro/ /gcad pa'i rang gi bdag nyid bzhin pas zhes bya ba 'di ni dpe yin te/ dper na gcad pa'i rang gi bdag nyid ni dpag tu yod pa'i phyir rang gi bdag nyid las gzhan pa nyid ma yin pa de bzhin du gcod pa'i rang gi bdag nyid kyang dpag tu yod pa'i phyir gcad pa'i rang gi bdag nyid las gzhan pa nyid ma yin no/ /de'i phyir ji re zhig byed pa po dang las yin pa'i phyir gcod pa po dang gcad pa bzhin du gzhan pa nyid du 'gyur ram/ 'on te dpag tu yod pa'i phyir gcad pa'i rang gi bdag nyid bzhin du gcod pa po las gzhan pa nyid ma yin par 'gyur te/ de'i phyir 'gal ba 'khrul pa med pa'i gnod par 'gyur ro zhes zer ro/ /de skad ces zer ba de'i len du 'dir 'grel pa byed pa nyid kyis de yang rigs pa ma yin te/ gcad pa'i rang gi bdag nyid gzhan pa nyid ma yin par grub pa'i phyir/ 'gal ba 'khrul pa med pa'i gnod par mi 'gyur ba'i phyir ro zhes bya ba smras te/ don dam par gcad pa'i rang gi bdag nyid gzhan pa nyid ma yin par ma grub pa'i phyir/ ci re zhig byed pa po dang las yin pa'i phyir gcod pa po dang gcad pa bzhin du gzhan pa nyid du 'gyur ram 'on te dpag tu yod pa'i phyir gcod pa'i rang gi bdag nyid bzhin du gzhan pa nyid ma yin par 'gyur zhes 'gal ba 'khrul pa med pa'i gnod par mi 'gyur ba'i phyir de yang rigs pa ma yin no/ /'gal ba 'khrul pa med pa'i gnod pa yod du zin na yang / gcig pa nyid dang tha dad pa nyid kyi mtha' gnyis la mi 'chel bas/ don dam par mi sgrub par ston par 'dod pa'i phyir 'dod pa 'grub po zhes bya ba ni/ gal te khyed zer ba ltar gcod pa po dang gcad pa gzhan nyid ma yin te dpag tu yod pa'i phyir gcad pa'i rang gi bdag nyid bzhin pas 'gal ba 'khrul pa med pa'i gnod pa yod du zin na yang / nged dbu ma pa ni gcig pa nyid dang tha dad pa nyid kyi mtha' gnyis la mi 'chel bas/ don dam par gcig pa nyid dang tha dad pa nyid mi sgrub pa yin pa la/ khyod kyis don dam par gcod pa po dang gcad pa gzhan pa nyid ma yin par smra ba ni tha dad pa nyid kyi mtha' mi sgrub par ston par 'dod pa'i phyir dbu ma pa'i 'dod pa 'grub po zhes bya ba'i tha tshig go/ /tha snyad du gcig pa nyid sgrub na ni grags pa'i gnod par 'gyur ro zhes bya ba ni ci ste grangs can dag kun rdzob kyi tha snyad du gcod pa po dang gcad pa gcig pa nyid du sgrub na ni 'jig rten la de gnyis tha dad par grags pa'i gnod pa khyod la 'byung bar 'gyur ro/ /ci ste yang dam bcas pa'i don sgro btags nas 'gro ba po dang 'gro ba gcig pa nyid ma yin no zhes bshad pas 'gro ba po dang 'gro ba gzhan pa nyid du bstan pa yin pas khas blangs pa la gnod par 'gyur ro zhes rgol na zhes bya ba ni/ ci ste yang grangs can dag gis dbu ma pas dam bcas pa'i don log par sgro btags nas/ 'di skad ces dbu ma pas 'gro ba po dang 'gro ba gcig pa nyid ma yin par bshad pas des na 'gro ba po dang 'gro ba gzhan pa nyid du bstan pa yin pas/ de lta na dbu ma pa nyid kyis 'gro ba po dang 'gro ba gzhan pa nyid ma yin par khas blangs pa la gnod par 'gyur ro zhes rgol na'o/ /de yang de nyid kyi lan btab zin to z hes bya ba ni de skad ces rgol ba de yang sngar 'gro ba po dang 'gro ba gcig pa nyid ma yin no zhes bshad kyang de gnyis gzhan pa nyid du bstan pa ma yin no zhes bstan pa de nyid kyi dbu ma pa de med par dgag pa'i don yongs su 'dzin gyi ma yin par dgag pa'i don ni mi 'dzin to zhes bshad pas lan btab zin to/ /gang dag ji skad bshad pa'i skyon yongs su spang bar 'dod pas na gzhan pa nyid kyi phyogs la brten pa de dgag pa'i phyir dam bca' ba nye bar gzhag pa gnyis pa rab tu sgrub pa bstan par bya ste zhes bya ba ni sngar don dam par 'gro ba po dang 'gro ba 'grub par gyur na nges par gcig pa nyid dam gzhan pa nyid du 'gyur grang na de yang mi 'thad do zhes dam bca' ba gnyis nye bar gzhag pa las/ dang po shos ni rab tu bsgrubs zin to/ /da ni gnyis pa rab tu bsgrub pa bstan par bya ste zhes bya bar sbyar ro/ /'du byed kyi tshogs rgyu dang rkyen so sor nges pa yod na 'byung ba ngo bo nyid tha dad pa bya ba'i gzhir gyur pa thog ma med pa'i dus nas 'jug pa'i spros pa'i bag chags dang sa bon dang rgyu las byung ba yang dag pa ma yin pas kun du rtog pa'i dbang gis yul gzhan du bar chad med par skye ba la zhes bya bas ni/ kun rdzob kyi tha snyad du 'gro ba po dang 'gro ba zhes bya ba'i tshig gi don ston te/ de la 'du byed kyi tshogs zhes bya ba ni 'gro ba po ste phung po lnga'i bdag nyid kyi tshogs so/ /de ni khyad par gyi gzhi yin la/ rgyu dang rkyen so sor nges pa yod na 'byung ba ngo bo nyid tha dad par bya ba'i gzhir gyur pa thog ma med pa'i dus nas 'jug pa'i spros pa'i bag chags dang sa bon dang rgyu las byung ba zhes bya ba dag gis ni de'i khyad par yin par sbyar ro/ /de la rgyu dang rkyen so sor nges pa yod na 'byung ba zhes bya ba ni 'du byed kyi tshogs de ni mer mer po la sogs pa rgyu dang nyon mongs pa la sogs pa rkyen gyi mtshan nyid so sor nges pa lhas byin gyi rgyu dang rkyen gang dag yin pa de dag mchod sbyin gyi ma yin pa lta bu dag yod na 'byung ba yin no/ /ngo bo nyid tha dad pa zhes bya ba ni 'du byed kyi tshogs de ni phung po lnga'i bdag nyid kyi ngo bo nyid tha dad pa yang yin no zhes bya ba'i gzhir gyur pa zhes bya ba ni 'du byed kyi tshogs de ni 'gro ba'i bya ba'i gzhir gyur pa yang yin no/ /thog ma med pa'i dus nas 'jug pa'i spros pa'i bag chags dang sa bon dang rgyu las byung ba zhes bya ba ni 'du byed kyi tshogs de ni 'khor ba thog ma med pa'i dus nas 'jug pa'i spros pa dag gi spyod pa phung po dang khams dang skye mched dang / skye ba dang 'gag pa la sogs pa'i rnam pa brjod pa'i bag chags can dang rgyu zhes bya ba kun gzhi rnam par shes pa las byung ba yin te/ re zhig de dag gis ni kun rdzob kyi tha snyad du 'gro ba po zhes bya ba'i tshig gi don bstan to/ /yang dag pa ma yin pa kun du rtog pa'i dbang gis yul gzhan du bar chad med par skye ba la zhes bya bas ni kun rdzob kyi tha snyad du 'gro ba zhes bya ba'i tshig gi don bstan to/ 'gro ba po 'du byed kyi tshogs de kun brtags pa'i dbang gis 'gro ba lnga pa'i 'khor ba'i yul gzhan nas gzhan du bar chad med par skye ba ni 'gro ba zhes bya'o/ /de ltar na 'gro ba po'i mtshan nyid 'du byed kyi tshogs de ni bya ba'i gzhi yin te/ gzhan gyi dbang gi ngo bo nyid yin no/ /'gro ba'i mtshan nyid yang dag pa ma yin pa kun du rtog pa'i dbang gis yul gzhan du bar chad med par skye ba de ni bya ba yin te kun brtags pa'i ngo bo nyid do/ /de'i phyir de lta bu'i 'gro ba po dang 'gro ba zhes bya ba'i tshig gi don de la/ gal te 'gro dang 'gro ba po/ /gzhan pa nyid du rnam brtags na/ /glags yod pa'i skyon 'di lta bur 'gyur ro zhes bya bar sbyar ro/ /rnam par rtog par byed pa ni 'ga' yang bzlog par bya ba ma yin te/ mi 'dod pa thob pa nyid kyis gnod par 'gyur ro zhes bya ba ni 'jig rten na ka ba la glang po cher rtog par byed pa la sogs pa'i gang zag ni 'ga' yang bzlog par bya ba ma yin te/ rang dgar rtog par byed la rag mod kyi/ ka ba glang po che yin par mi 'grub pas mi 'dod pa thob pa nyid kyis rtog ge pa rang la gnod par 'gyur ba yin pas 'dir yang 'gro ba smra ba dag / gal te 'gro ba dang 'gro ba po gzhan pa nyid du rnam par rtog na de yang rang dgar rtog la ni rag mod kyi de gnyis gzhan pa nyid du mi 'grub pas mi 'dod pa thob pa nyid kyis rtog ge pa rang la gnod par 'gyur ro/ /ji lta zhe na zhes bya ba ni pha rol pos 'dri ba'i tshig yin no de bstan pa'i phyir/ 'di la 'gro ba dang 'gro ba po gzhan pa nyid du khas len na/ 'gro po med pa'i 'gro ba dang / /'gro ba med pa'i 'gro bor 'gyur/ /zhes bya ba smras te/ gal te 'gro ba dang 'gro ba po gzhan pa nyid du rnam par brtags na de lta na gzhi 'gro ba po med pa'i bya ba 'gro ba rang las rab tu grub par 'gyur ba dang bya ba 'gro ba med pa'i gzhi 'gro ba po mi ltos pas rang las rab tu grub par 'gyur bas de gnyi ga yang mi 'thad do/ /gzhan yin pa'i phyir dper na bum pa dang snam bu gnyis rten dang brten pa'i dngos pos ltos pa med pa lta bur 'gyur bar dgongs so zhes bya ba ni/ gal te 'gro ba dang 'gro ba po gzhan pa nyid du rnam par brtags na 'gro ba po med pa'i 'gro ba dang / 'gro ba med pa'i 'gro ba por 'gyur ro zhes bya ba ni dper na bum pa dang snam bu gnyis rten dang brten pa'i dngos po gzhi dang bya ba'i tshul gyis ltos pa med de/ bum pa med par yang snam bu dmigs pa dang / snam bu med par yang bum pa dmigs par 'gyur ba de bzhin du/ 'gro ba dang 'gro ba po gnyis kyang rten dang brten pa'i dngos pos gzhi dang bya ba'i tshul gyis ltos pa med de 'gro ba po med par 'gro ba dmigs pa dang / 'gro ba med par yang 'gro ba po dmigs pa'i skyon du 'gyur bar slob dpon gyis dgongs pa yin no/ /gzhan pa nyid du smra ba yang 'gro ba po med pa'i 'gro ba dang 'gro ba med pa'i 'gro ba po mi 'dod do zhes bya ba ni/ gang dag gzhan pa nyid du smra ba de dag kyang 'gro ba po dang 'gro ba gnyis gcig la gcig mi ltos par so so nas grub pa yod pa nyid du mi 'dod do zhes bya ba'i tha tshig go/ /glags yod pa'i sgo des phyogs kyi chos ni 'gro ba po dang 'gro ba ltos pa dang bcas pa nyid yin la zhes bya ba ni/ gal te 'gro dang 'gro ba po/ /gzhan pa nyid du rnam brtags na/ /'gro po med pa'i 'gro ba dang / /'gro ba med pa'i 'gro bor 'gyur/ /zhes bya b as gal te 'gro ba dang 'gro ba po gzhan pa nyid du rnam par rtog na 'gro ba po dang 'gro ba ltos pa med par 'gyur ba'i sgo ji skad bstan pa de la 'dir 'gro ba po dang 'gro ba gzhan pa nyid ma yin par bsgrub pa'i phyogs la phyogs kyi chos gtan tshigs su bzung ba ni 'gro ba po dang 'gro ba ltos pa dang bcas pa nyid yin par ston to zhes bya ba'i tha tshig go/ /bsgrub par bya ba chos ni gzhan ma yin pa nyid yin zhes bya ba ni/ 'gro ba po dang 'gro ba gzhan pa nyid ma yin par bsgrub pa'i phyogs 'di la bsgrub par bya ba chos ni gzhan pa nyid ma yin par bstan te/ chos can 'gro ba po dang 'gro ba de la don dam par gzhan pa nyid ma yin pa zhes bya ba chos khyad par can de bsgrub par bya ba yin no/ /dpe ni de'i dbang gis bsgrub par bya ba dang sgrub pa'i chos grags pa dang ldan pa'i chos can yin par bstan to zhes bya bas ni chos mthun pa'i dpe bstan te/ de la dpe ni zhes bya ba ni 'gro ba po dang 'gro ba gzhan pa nyid ma yin pa'i dpe'o/ /de'i dbang gis zhes bya ba ni bsgrub par bya ba dang sgrub pa'i chos kyi dbang gis dpe bstan dgos te zhes bya ba'i tha tshig go/ /dpe de yang gang zhe na/ de'i phyir bsgrub par bya ba dang sgrub pa'i chos grags pa dang ldan pa'i chos can yin par ston to zhes bya ba smras te/ bsgrub par bya ba chos grags pa zhes bya ba ni bsgrub par bya ba nyid chos yin pas bsgrub par bya ba chos te/ de yang gang zhe na/ skabs 'dir ni gzhan pa nyid ma yin pa zhes bya ba yin par sbyar ro/ /de yang rgol ba dang phyir rgol ba gnyi ga la grags pa yin pas bsgrub par bya ba chos grags pa zhes bya'o/ /sgrub pa'i chos grags pa zhes bya ba ni 'gro ba po dang 'gro ba gzhan pa nyid ma yin par bsgrub pa'i gtan tshigs te/ de yang gang zhe na/ skabs 'dir ni brjod pa khyad par can 'jug pa'i ltos pa dang bcas pa zhes bya ba yin par sbyar ro/ /de yang rgol ba dang phyir rgol ba gnyis ka la grags pa yin pas sgrub pa'i chos grags pa zhes bya'o/ /de ltar bsgrub par bya ba dang sgrub pa'i chos grags pa dang ldan pa'i chos can dper bstan du rung ba de yang gang zhe na/ 'gro ba'i rang gi bdag nyid dam 'gro ba po'i rang gi bdag nyid yin te/ de la yang bsgrub par bya ba chos gnyi ga la grags pa gzhan pa nyid ma yin pa zhes bya ba dang / sgrub pa'i chos gnyi ga la grags pa brjod pa khyad par can 'jug pa'i ltos pa dang bcas pa zhes bya ba yod pas de'i phyir/ dpe ni de'i dbang gis bsgrub par bya ba dang sgrub pa'i chos grags pa dang ldan pa'i chos can yin par bstan to zhes bya ba smos so/ /'dir sbyor ba'i tshig ni zhes bya ba ni 'gro ba po dang 'gro ba gzhan pa nyid ma yin par bstan pa sgrub pa'i skabs 'dir rjes su dpag pa gtan tshigs dang dpe dang ldan pas sbyor ba'i tshig tu 'gyur ba ni 'og nas chos can dang / bsgrub par bya ba chos dang sgrub pa'i chos dang dpe nye bar sbyor ba rnams yin par sbyar ro/ /don dam par 'gro ba po las 'gro ba gzhan pa nyid ma yin par shes par bya ste/ brjod pa khyad par can 'jug pa'i ltos pa dang bcas pa'i phyir/ dper na 'gro ba'i rang gi bdag nyid bzhin no zhes bya ba ni chos can dang / bsgrub par bya ba chos dang / sgrub pa'i chos dang / dpe yin par go rims bzhin du sbyar te/ dper na 'gro ba'i rang gi bdag nyid ni 'gro'o zhes brjod pa khyad par can 'jug pa'i ltos pa dang bcas pa'i phyir/ rang gi bdag nyid las gzhan pa nyid ma yin pa de bzhin du/ 'gro ba po yang bgom pa'i lam du 'gro'o zhes bya ba'i brjod pa khyad par can 'jug pa'i ltos pa dang bcas pa'i phyir 'gro ba po las 'gro ba gzhan pa nyid ma yin par shes par bya'o/ /de bzhin du don dam par 'gro ba las kyang 'gro ba po gzhan pa nyid ma yin par nges par gzung bar bya ste/ brjod pa khyad par can 'jug pa'i ltos pa dang bcas pa'i phyir/ dper na 'gro ba po'i rang gi bdag nyid bzhin no zhes bya ba yang chos can dang / bsgrub par bya ba chos dang / sgrub pa'i chos dang / dpe yin par go rims bzhin du sbyar te/ dper na 'gro ba po'i rang gi bdag nyid ni bgom pa'i lam du 'gro'o zhes bya ba'i brjod pa khyad par can 'jug pa'i ltos pa dang bcas pa'i phyir rang gi bdag nyid las gzhan pa nyid ma yin pa de bzhin du 'gro ba yang 'gro'o zhes brjod pa khyad par can 'jug pa'i ltos pa dang bcas pa'i phyir/ 'gro ba las kyang 'gro ba po gzhan pa nyid ma yin par nges par gzung bar bya'o/ /'dir yang rtog ge pa gzhan dag na re/ gtan tshigs kyi mtshan nyid ni tshul gsum dang ldan pa'i rtags kyis rjes su dpag par bya ba la yod pa dang / mthun pa'i phyogs la yod pa dang / mi mthun pa'i phyogs las ldog pa nyid du nges pa yin na/ 'dir 'gro ba po dang 'gro ba gzhan pa nyid ma yin par bsgrub pa'i gtan tshigs brjod pa khyad par can 'jug pa'i ltos pa dang bcas pa'i phyir zhes bya ba de rjes su dpag par bya ba la yod pa nyid dang / mthun pa'i phyogs la yod pa nyid yin du zin kyang / mi mthun pa'i phyogs las ldog pa nyid ma bstan pas gtan tshigs su mi rung ngo zhes zer ba'i phyogs snga ma khong nas dbyung ba de'i lan du/ 'dir 'grel pa byed pa nyid kyis mi mthun pa'i phyogs las ldog pa ma bstan pa ni de med pa'i phyir de las ldog par grub pa'i phyir ro zhes bya ba smras te/ gang dang gang brjod pa khyad par can 'jug pa'i ltos pa dang bcas pa de dang de thams cad gzhan pa nyid ma yin no zhes bstan pa'i mi mthun pa'i phyogs gang dang gang brjod pa khyad par can 'jug pa'i ltos pa med pa de dang de thams cad gzhan pa nyid yin no zhes ma bstan pa ni mi mthun pa'i phyogs de med pa'i phyir ma bstan te/ de ma bstan kyang mi mthun pa'i phyogs med pa de la gtan tshigs rang bzhin gyis mi 'jug pa nyid ldog pa yang yin pas mi mthun pa'i phyogs las ldog pa nyid du nges pa'i tshul gyis btags kyang 'grub pa'i phyir nyes pa med do/ /gal te rten dang brten par 'brel pa rab tu ma grub pa dag la ltos pa dang bcas pa nyid ma grub pa'i phyir phyogs kyi chos gcig la ma khyab pa nyid yin no zhes bya ba ni gzhan pa nyid du smra ba dag na re/ khyed dbu ma pas rdza mkhan la sogs pa dngos po ji snyed pa thams cad phyogs su byas pas/ de dag la gzhan pa nyid med pas rten dang brten par 'brel pa rab tu ma grub pa'i phyir rdza mkhan la sogs pa rdza ma la sogs pa la mi ltos par gzhan du 'gro ba'i tshe na de dag la ltos pa dang bcas pa nyid ma grub pa'i phyir khyed kyi gtan tshigs brjod pa khyad par can 'jug pa'i ltos pa dang bcas pa zhes bya ba de phyogs kyi phyogs gcig la ma khyab pa nyid yin pas ma grub po zhes zer ba yin no/ /de skad ces zer ba de'i lan du 'dir 'grel pa byed pa nyid kyis/ de dag la yang tha na 'di ni gzhan no/ /'di yang gzhan no zhes brjod pa khyad par can 'jug pa gdon mi za bar yod pas ltos pa dang bcas pa nyid yin pa'i phyir skyon med do zhes bya ba smras te/ rdza mkhan rdza ma mi byed cing rdza ma la mi ltos pa'i tshe na rdza mkhan zhes bya ba'i tha snyad kyang med kyi rdza mkhan la ltos nas rdza ma zhes brjod pa dang / rdza ma la ltos nas rdza mkhan zhes brjod pa yod pa'i sgo nas tha na 'di ni gzhan no/ /'di yang gzhan no zhes brjod pa khyad par can 'jug pa gdon mi za bar yod pas ltos pa dang bcas pa nyid yin pa'i phyir/ gtan tshigs ma grub pa'i skyon med do zhes bstan to/ /'dir bye brag pa dag na re/ khyed dbu ma pas rdza mkhan la ltos nas tha ga pa gzhan la/ tha ga pa la ltos nas rdza mkhan gzhan du gyur pas de gnyis ltos pa dang bcas pa nyid yin no zhes gang smras pa de mi rung ste/ 'di ltar kho bo cag ni gzhan ma yin pa rnam par bcad pas gzhan nyid yin pa dang / gzhan nyid ces bya ba'i yon tan dang ldan pa nyid yin par 'dod pas khyed dbu ma pa'i gtan tshigs kyi don ma grub pa nyid yin no zhes zer ba'i phyogs snga ma khong nas dbyung ba de'i lan du/ 'dir 'grel pa byed pa nyid kyis gang dag la gzhan pa ma yin pa rnam par bcad pas sam/ gzhan nyid dang ldan pa'i phyir gzhan nyid yin pa de dag la yang de la ltos nas 'di ni gzhan no/ /'di yang gzhan no zhes brjod pa khyad par can 'jug pa gdon mi za bar ltos pa dang bcas pa nyid yin pa'i phyir/ gtan tshigs kyi don ma grub pa nyid med do zhes bya ba smras te/ gzhan ma yin pa rnam par gcad pas gzhan nyid yin par 'dod pa de la yang bum pa ma yin pa rnam par gcad pa de la ltos nas snam bu gzhan nyid yin no zhes brjod pa khyad par can 'jug pa gdon mi za bar yod par ltos pa dang bcas pa nyid yin la gzhan nyid ces bya ba'i yon tan dang ldan pa'i phyir gzhan nyid yin par 'dod pa de la yang gzhan nyid ces bya ba'i yon tan de la ltos nas rta 'di ni gzhan no/ /ba lang 'di yang gzhan no zhes brjod pa khyad par can 'jug pa gdon mi za bar yod pas ltos pa dang bcas pa nyid yin pa'i phyir/ kho bo gtan tshigs kyi don ma grub pa nyid med do zhes bstan to/ /'dir rtog ge pa gzhan dag na re/ 'o na dbu ma pa'i gtan tshigs kyi don brjod pa khyad par can 'jug pa'i ltos pa dang bcas pa zhes bya ba de ci re zhig ltos pa dang bcas pa'i phyir 'gro ba po las 'gro ba dper na 'gro ba'i rang gi bdag nyid bzhin du gzhan pa nyid ma yin par 'gyur ram/ 'on te ltos pa dang bcas pa'i phyir rdza mkhan las tha ga pa gzhan nyid yin pa lta bur 'gyur te/ de'i phyir dbu ma pa'i gtan tshigs ma nges pa nyid yin no zhes zer ba'i phyogs snga ma khong nas dbyung ba de'i lan du/ 'dir 'grel pa byed pa nyid kyis rjes su dpag pa ji skad bstan pa nyid kyis gzhan nyid ma grub pa'i phyir mi mthun pa'i phyogs med pas ma nges pa nyid kyang ma yin no zhes bya ba smras te/ 'gro ba po dang 'gro ba gzhan pa nyid dgag pa'i mtshan nyid kyis rjes su dpag pa ji skad bstan pa nyid kyis rdza mkhan dang tha ga pa la sogs pa gzhan nyid du ma grub pa'i phyir/ gzhan pa nyid ma yin pa'i mi mthun pa'i phyogs gzhan nyid med pas kho bo'i gtan tshigs ma nges pa nyid kyang ma yin no/ /'dir rgol ba gzhan dag na re/ 'o na khyed dbu ma pa na re/ 'gro ba po dang 'gro ba yang gzhan pa nyid ma yin la/ rdza mkhan dang tha ga pa la sogs pa yang gzhan pa nyid ma yin no zhes zer ba ni 'jig rten pa de dag gzhan pa nyid du grags pa dang 'gal bas grags pa'i gnod pa yod par 'gyur ro zhes zer ba'i phyogs snga ma khong nas dbyung ba de'i lan du/ 'dir 'grel pa byed pa nyid kyis grags pa'i gnod pa yang med de/ de kho na dpyad pa ni shing rta mkhan la sogs pa blo ma sbyangs pa dag gi dbang du ma byas pa'i phyir dang / sngar bstan zin pa'i phyir zhes bya ba smras te/ don dam par chos thams cad gzhan pa nyid ma yin pa'i de kho na dpyad pa ni 'jig rten shing rta mkhan dang ba lang rdzi'i chung ma la sogs pa blo ma sbyangs pa dag gi dbang du ma byas pa'i phyir dang / sngar kun rdzob tu skye ba yod la don dam par skye ba med do zhes bstan pa bzhin du 'dir yang kun rdzob tu gzhan pa nyid yin la/ don dam par gzhan pa nyid ma yin par bstan pas grags pa'i gnod par 'gyur ba'i skyon med do/ /ci ste yang 'gro ba las 'gro ba po gzhan pa nyid yin te/ tha snyad yod pa'i phyir/ dper na lhas byin gyi rta zhes bya ba bzhin no snyam na zhes bya ba ni gzhan pa nyid du smra ba dag 'gro ba po'i 'gro ba zhes bya ba'i tha snyad yod pa'i sgo nas/ 'gro ba las 'gro ba po gzhan pa nyid du bsgrub pa yin te/ 'dir yang chos can dang bsgrub par bya ba chos dang / dpe yin par go rims bzhin du sbyar te/ dper na lhas byin gyi rta zhes bya ba la lhas byin gyi zhes bya ba dang rta zhes bya ba'i tha snyad yod pa'i phyir/ rta las lhas byin gzhan pa nyid yin pa de bzhin du/ 'gro ba po'i 'gro ba zhes bya ba la yang 'gro ba po'i zhes bya ba dang / 'gro ba zhes bya ba'i tha snyad yod pa'i phyir 'gro ba las 'gro ba po gzhan pa nyid yin no zhes zer ba yin no/ /de skad ces zer ba de'i lan du/ 'dir 'grel pa byed pa nyid kyis de yang bzang po ma yin te/ 'gro ba po'i rang gi bdag nyid ces bya ba 'gro ba po la grub pas phyogs kyi phyogs gcig la ma grub pa'i phyir dang zhes bya ba la sogs pa smras te/ 'gro ba po'i rang gi bdag nyid ces bya ba'i tha snyad gang yin pa de 'gro ba po la grub pas 'gro ba po la 'gro ba po'i rang gi bdag nyid ces bya ba'i tha snyad yod du zin kyang de las gzhan nyid med do/ /lhas byin gyi rta zhes bya ba la ni lhas byin gyi rta zhes bya ba'i tha snyad kyang yod la gzhan pa nyid kyang yod pas/ de'i phyir gzhan pa nyid ces bya ba'i tha snyad de lhas byin gyi rta zhes bya ba phyogs kyi phyogs gcig la grub tu zin kyang / 'gro ba po'i rang gi bdag nyid ces bya ba phyogs kyi phyogs gcig la ma grub pa'i phyir 'gro ba las 'gro ba po gzhan pa nyid ma yin pas rtog pa de yang bzang po ma yin no/ /phyogs kyi phyogs gcig la ma grub pa'i phyir bzang po ma yin pa 'ba' zhig tu yang ma zad kyi rgol ba rang la ma nges pa nyid yin pa'i phyir yang bzang po ma yin te/ de'i phyir 'gro ba po rang gi bdag nyid kyis rang la yang ma nges pa nyid yin pa'i phyir ro zhes bya ba smras te/ ci re zhig tha snyad yod pa'i phyir dper na lhas byin gyi rta zhes bya ba bzhin du/ 'gro ba las 'gro ba po gzhan pa nyid yin par 'gyur ram/ 'on te tha snyad yod pa'i phyir dper na 'gro ba po'i rang gi bdag nyid ces bya ba bzhin du 'gro ba las 'gro ba po gzhan pa nyid ma yin par 'gyur te/ de'i phyir tha snyad yod pa'i phyir zhes bya ba'i gtan tshigs de ni 'gro ba po rang gi bdag nyid gzhan pa nyid ma yin pa la yang yod la/ lhas byin dang rta gzhan pa nyid la yang yod pas rgol ba rang la yang ma nges pa nyid yin pa'i phyir bzang po ma yin no/ /phyogs kyi phyogs gcig la ma grub pa dang rang la ma nges pa'i phyir bzang po ma yin pa 'ba' zhig tu yang ma zad kyi/ de ni dpe med pa'i phyir yang bzang po ma yin te/ de'i phyir lhas byin dang rta yang gzhan pa nyid du ma grub pa'i phyir/ dpe yang med pa'i phyir ro zhes bya ba smras te/ don dam par lhas byin dang rta yang gzhan pa nyid du ma grub pa'i phyir khyod kyi dpe lhas byin gyi rta zhes bya ba bzhin no zhes bya ba de yang med pa'i phyir bzang po ma yin no/ /des blo tha dad pa'i phyir zhes bya ba la sogs pa'i gtan tshigs dag gi lan kyang btab pa yin no zhes bya ba ni tha snyad yod pa'i phyir zhes bya ba'i gtan tshigs de phyogs kyi phyogs gcig la ma grub pa dang / rang la ma nges pa nyid dang dpe med pa'i phyir bzang po ma yin no zhes ji skad bshad pa des blo tha dad pa'i phyir zhes bya ba dang / mtshan nyid tha dad pa'i phyir zhes bya ba dang / rigs tha dad pa'i phyir zhes bya ba dang / dbyibs tha dad pa'i phyir zhes bya ba dang / skye gnas tha dad pa'i phyir zhes bya ba la sogs pa'i gtan tshigs dag gi lan kyang btab pa yin no/ /'di skad bstan te ci ste yang gzhan pa nyid du smra ba dag /'gro ba las 'gro ba po gzhan pa nyid yin te/ blo tha dad pa'i phyir/ dper na lhas byin gyi blo dang rta'i blo tha dad pa bzhin no zhe 'am/ 'gro ba las 'gro ba po gzhan pa nyid yin te mtshan nyid tha dad pa'i phyir/ dper na lhas byin dang rta'i mtshan nyid tha dad pa bzhin no zhe 'am/ 'gro ba las 'gro ba po gzhan pa nyid yin te/ rigs tha dad pa'i phyir/ dper na lhas byin dang rta'i rigs tha dad pa bzhin no zhe'am/ 'gro ba las 'gro ba po gzhan pa nyid yin te/ dbyibs tha dad pa'i phyir/ dper na lhas byin dang rta'i dbyibs tha dad pa bzhin no zhe 'am/ 'gro ba las 'gro ba po gzhan pa nyid yin te/ skye gnas tha dad pa'i phyir/ dper na lhas byin dang rta'i skye gnas tha dad pa bzhin no zhes bya ba la sogs pa'i gtan tshigs brjod na de dag la yang phyogs kyi phyogs gcig la ma grub pa dang / rang la ma nges pa nyid dang / don dam par dpe med pa'i phyir bzang po ma yin te zhes lan snga ma bzhin du gdab par bya ba yin no/ /ci ste yang blo rnon po'i blo la 'gro ba po lhas byin zhes bya ba'i sgra gang yin pa de ni rang gi bdag nyid las gzhan pa'i tshig gi don dang 'brel pa'i yul yin te/ 'jug pa dang ldog pa yod pa'i phyir dper na la ba sngon po zhes bya ba'i sgra bzhin no/ /sgra gang la ji skad smos pa'i rnam pa med pa de la ni 'jug pa dang ldog pa med de/ dper na yod pa nyid kyi sgra bzhin no snyam du sems na zhes bya ba ni/ dbu ma pas gzhan pa nyid du smra ba dag la ci ste yang blo rnon po yang mdzangs pa khyed kyi blo la 'di snyam du sems na zhes bsting ba'i tshul gyis pha rol po'i dogs pa bsu ba'i tshig yin no/ /'dir yang 'gro ba po lhas byin zhes bya ba'i sgra gang yin pa de ni zhes bya ba 'di ni chos can yin te/ 'gro ba po lhas byin zhes bya ba'i sgra gang yin pa de'o/ /rang gi bdag nyid las gzhan pa'i tshig gi don dang 'brel pa'i yul yin te zhes bya ba 'di ni bsgrub par bya ba chos yin te/ 'gro ba po lhas byin rang gi bdag nyid las gzhan pa'i tshig gi don 'gro ba zhes bya ba dang / 'brel pa'i yul yin par bsgrub par bya ba yin te/ 'gro ba po lhas byin zhes bya ba'i sgra gang yin pa de ni 'gro ba po rang gi bdag nyid las gzhan pa'i tshig gi don 'gro ba zhes bya ba dang 'brel pa'i yul yin pas/ 'gro ba po las kyang 'gro ba gzhan pa nyid yin la/ 'gro ba las kyang 'gro ba po gzhan pa nyid yin no zhes dam bcas pa nyid yin no/ /'jug pa dang ldog pa yod pa'i phyir zhes bya ba 'di ni sgrub pa'i chos yin te/ 'gro ba po lhas byin zhes bya ba'i sgra gang yin pa de rang gi bdag nyid las gzhan pa'i tshig gi don 'gro ba zhes bya ba dang 'brel pa'i yul la ni 'jug pa yod la/ rang gi bdag nyid las gzhan pa'i tshig gi don 'gro ba zhes bya ba dang ma 'brel pa'i yul la ni ldog pa yod pa'i phyir 'gro ba po lhas byin zhes bya ba'i sgra gang yin pa de rang gi bdag nyid las gzhan pa'i tshig gi don 'gro ba zhes bya ba dang 'brel ba'i yul yin par sgrub par byed do/ /dper na la ba sngon po zhes bya ba'i sgra bzhin no zhes bya ba 'di ni dpe yin par sbyar te/ dper na la ba sngon po zhes bya ba'i sgra ni la ba rang gi bdag nyid las gzhan gyi tshig gi don sngon po zhes bya ba dang 'brel pa'i yul la ni 'jug pa yod la/ la ba rang gi bdag nyid las gzhan pa'i tshig gi don sngon po zhes bya ba dang ma 'brel pa'i yul la ni ldog pa yod pa'i phyir/ la ba sngon po zhes bya ba'i sgra de la ba rang gi bdag nyid las gzhan pa'i tshig gi don sngon po zhes bya ba dang 'brel pa'i yul yin pa gsal ba las kyang sngon po gzhan pa nyid yin la/ sngon po las kyang la ba gzhan pa nyid yin pa de bzhin du/ 'gro ba po lhas byin zhes bya ba'i sgra gang yin pa de yang 'gro ba po'i rang gi bdag nyid las gzhan pa'i tshig gi don 'gro ba zhes bya ba dang 'brel pa'i yul la ni 'jug pa yod la/ 'gro ba po rang gi bdag nyid las gzhan pa'i tshig gi don 'gro ba zhes bya ba dang ma 'brel pa'i yul la ni ldog pa yod pa'i phyir/ 'gro ba po lhas byin zhes bya ba'i sgra gang yin pa de yang 'gro ba po rang gi bdag nyid las gzhan pa'i tshig gi don 'gro ba zhes bya ba dang 'brel ba'i yul yin pas/ 'gro ba po las kyang 'gro ba gzhan pa nyid yin la/ 'gro ba las kyang 'gro ba po gzhan pa nyid yin no/ /sgra gang la ji skad smos pa'i rnam pa med pa de la ni 'jug pa dang ldog pa med de zhes bya ba 'di ni chos mi mthun pa'i phyogs yin no/ /dper na yod pa nyid kyi sgra bzhin no snyam du sems na zhes bya ba 'di ni chos mi mthun pa'i dpe yin te/ yod pa nyid ces bya ba ni bye brag pa'i gzhung las spyi chen po zhes bya ba yin no/ /de dag gi gzhung las nyi tshe ba'i spyi rang gi bdag nyid las gzhan pa'i tshig gi don dang 'brel pa'i yul yin la/ spyi chen po ni rang gi bdag nyid las gzhan pa'i tshig gi don dang 'brel pa'i yul ma yin par 'dod pas/ dper na yod pa nyid kyi sgra zhes bya ba'i spyi chen po de rang gi bdag nyid las gzhan pa'i tshig gi don dang 'brel pa'i yul ma yin pa de la 'jug pa dang ldog pa med pa'i phyir de las kyang dngos po rnams gzhan pa nyid ma yin la/ dngos po rnams las kyang de gzhan pa nyid ma yin pas de ni chos mi mthun pa'i dpe yin no/ /'dir 'gro ba po lhas byin zhes bya ba'i sgra dang la ba sngon po zhes bya ba'i sgra dag ni de lta ma yin pas de'i phyir/ 'gro ba po dang 'gro ba gzhan pa nyid yin no zhes zer ro/ /de skad ces zer ba de'i lan du/ 'dir 'grel pa byed pa nyid kyis de las gzhan pa nyid yin pas rjes su dpog na rten dang brten par 'brel pa med pas/ 'gro ba po dang 'gro ba'i 'brel pa bsal ba'i phyir rjes su dpag pa la gnod do zhes smras so/ /'di skad bstan te/ 'gro ba po dang 'gro ba ni rten dang brten par 'brel pa'i dngos po gzhan pa nyid ma yin pa yin na de la khyed gzhan pa nyid yin par rjes su dpog pa na gal te 'gro ba po dang 'gro ba gzhan pa nyid yin par gyur na de nyid rten dang brten par 'brel pa med pas/ dper na bya rog dang 'ug pa bzhin du 'gro ba dang 'gro ba po'i 'brel pa bsal ba'i phyir/ des na 'gro ba po dang 'gro ba'i khyad par rten nyid dang brten pa nyid ces bya ba gang yin pa de bsal ba'i phyir/ chos can gyi khyad par bsal bas khyod kyi rjes su dpag pa la gnod pa'i skyon du 'gyur ro/ /yang na khyod kyi dpe la ba sngon po zhes bya ba'i sgra gang yin pa de la 'jug pa dang ldog pa yod du zin kyang / de la 'gro ba po dang 'gro ba med pas khyod kyi dpe des kyang 'gro ba po dang 'gro ba'i 'brel pa bsal ba'i phyir/ chos can gyi ngo bo nyid bsal bas khyod kyi rjes su dpag pa la gnod pa'i skyon du 'gyur ro/ /de la rjes su dpag pa la gnod pa'i skyon yod pa 'ba' zhig tu yang ma zad kyi/ de la gtan tshigs ma nges pa nyid kyi skyon yang yod de/ de'i phyir mi mthun pa'i rang gi bdag nyid las gzhan pa'i tshig gi don dang ma 'brel pa gzhan dag la yang lhas byin lhas byin zhes bya ba'i sgra 'jug pa dang ldog pa yod pas gtan tshigs ma nges pa nyid yin no zhes bya ba smras te/ lhas byin zhes bya bar mi mthun pa yang mang po rang gi bdag nyid las gzhan pa'i tshig gi don lhas byin zhes bya ba 'ga' dang yang phan tshun nang ma 'brel pa de dag la yang lhas byin zhes bya ba'i sgra 'jug pa yang yod la/ lhas byin ma yin pa dag las ldog pa yang yod pas des na ci re zhig 'jug pa dang ldog pa yod pa'i phyir/ dper na la ba sngon po zhes bya ba'i sgra bzhin du rang gi bdag nyid las gzhan pa'i tshig gi don dang 'brel ba'i yul nyid yin par 'gyur ram/ 'on te 'jug pa dang ldog pa yod pa'i phyir ming mthun pa rang gi bdag nyid las gzhan pa'i tshig gi don dang ma 'brel pa dag bdag bzhin du rang gi bdag nyid las gzhan pa'i tshig gi don dang ma 'brel pa'i yul nyid du 'gyur te/ des na khyod kyi gtan tshigs 'jug pa dang ldog pa yod pa'i phyir zhes bya ba de ma nges pa nyid kyi skyon chags pa yin no/ /khyad par du smos na yang gtan tshigs kyi don ma grub pa nyid yin no zhes bya ba ni gal te gzhan pa nyid du smra ba dag gtan tshigs ma nges pa nyid kyi skyon de yongs su spang ba'i phyir/ 'dir 'gro ba po lhas byin zhes bya ba'i sgra gang yin pa de ni rang gi bdag nyid las gzhan pa'i tshig gi don dang 'brel pa'i yul yin te/ 'jug pa dang ldog pa yod pa'i phyir zhes gtan tshigs khyad par du smos na yang gal te de lta na de la 'jug pa dang ldog pa yod du zin kyang / gtan tshigs de dam bcas pa'i don gyi phyogs gcig yin pa'i phyir/ gtan tshigs kyi don ma grub pa nyid yin te/ dper na sgra rtag ste sgra yin pa'i phyir ro zhes bya ba de dam bcas pa'i don gyi phyogs gcig pa yin pa'i phyir ma grub pa dang 'dra bar 'dir yang 'gro ba po lhas byin zhes bya ba'i sgra gang yin pa de ni rang gi bdag nyid las gzhan pa'i tshig gi don dang 'brel pa'i yul yin te zhes bya ba ni bsgrub par bya ba chos yin la/ de nyid gtan tshigs kyi khyad par du smos pa ni dam bcas pa'i don gyi phyogs gcig yin pa'i phyir ma grub pa nyid yin no/ /la ba sngon po zhes bya ba'i sgra ji skad smos p a'i yul yin pa yang don dam pa ma grub pa'i phyir ro zhes bya ba ni gzhan pa nyid du smra ba dag gi dpe la ba sngon po zhes bya ba'i sgra bzhin no zhes bya ba de rang gi la dag nyid las gzhan pa'i tshig gi don dang 'brel pa'i yul yin te zhes bya ba yang don dam par ma grub pas khyed kyi dpe yang med pa nyid yin te/ don dam par dngos po thams cad ma skyes pas rang gi bdag nyid las gzhan pa'i tshig gi don dang 'brel pa'i yul ma grub pa'i phyir ro/ /des 'gro ba las 'gro ba po gzhan pa nyid yin no snyam pa'i blo'i phyogs la yang gtan tshigs dang dpe'i skyon gyi lan btab pa yin zhes bya ba ni rjes su dpag pa la gnod pa dang / gtan tshigs ma nges pa nyid dang / gtan tshigs kyi don ma grub pa nyid dang / dpe ma grub pa nyid kyi skyon ji skad bshad pa des 'gro ba las 'gro ba po gzhan pa nyid yin no snyam pa'i blo'i phyogs la yang lan btab pa yin no/ /'di skad bstan te/ ci ste yang blo rnon po'i blo la 'gro ba po lhas byin zhes bya ba'i blo gang yin pa de ni rang gi bdag nyid las gzhan pa'i tshig gi don dang 'brel pa'i yul yin te 'jug pa dang ldog pa yod pa'i phyir dper na la ba sngon po zhes bya ba'i blo bzhin no/ /blo gang la ji skad smos pa'i rnam pa med pa de la ni 'jug pa dang ldog pa med de/ dper na yod pa nyid kyi blo bzhin no snyam su sems na/ blo'i phyogs de la yang chos can gyi khyad par bsal ba dang / chos can gyi ngo bo nyid bsal bas rjes su dpag pa la gnod pa dang / gtan tshigs ma nges pa nyid dang / gtan tshigs kyi don dam pa ma grub pa nyid dang don dam par dpe med pa nyid kyi skyon ji skad bshad pa de dag nyid kyi lan btab par bya ba yin no/ /ci ste gcig pa nyid dgag pa'i phyir rjes su dpag pa bstan pas gzhan nyid dgag pa'i rjes su dpag pa bstan pa rnams bsal ba'i phyir gzhan pa nyid dgag pa yang mi 'grub po snyam na zhes bya ba ni ci ste gzhan pa nyid du smra ba dag 'di snyam du khyed dbu ma pas/ gal te 'gro ba gang yin pa/ /de nyid 'gro po yin gyur na/ /byed pa po dang las nyid kyang / /gcig pa nyid du thal bar 'gyur/ /zhes bya ba la sogs pa dper na grangs can gyis brtags pa'i gcig pa nyid dgag pa'i phyir rjes su dpag pa bstan pa des/ gal te 'gro dang 'gro ba po/ /gzhan pa nyid du rnam brtags na/ /'gro po med pa'i 'gro ba dang / /'gro ba med pa'i 'gro por 'gyur/ /zhes bya ba la sogs pa dper na bye brag pas brtags pa'i gzhan pa nyid dgag pa'i phyir rjes su dpag pa bstan pa rnams bsal ba'i phyir/ des na khyed dbu ma pas gzhan pa nyid dgag pa'i rjes su dpag pa ji skad bstan pa dag mi 'grub po snyam nas/ 'dir dbu ma pas gzhan pa nyid dgag pa mi 'grub po zhes zer ba yin no/ /de skad ces zer ba de'i lan du 'dir 'grel pa byed pa nyid kyis/ gnyis ka dgag pa'i rjes su dpag pa bstan pa'i mthus gcig pa nyid dang gzhan pa nyid dgag pa de'i yul can gyi blo skye ba med pa bstan par 'dod pa'i phyir skyon med do zhes bya ba smras te/ gal te 'gro ba gang yin pa/ /de nyid 'gro po yin gyur na/ /byed pa po dang las nyid kyang / /gcig pa nyid du thal bar 'gyur/ /zhes bya ba dang / gal te 'gro dang 'gro ba po/ /gzhan pa nyid du rnam brtags na/ /'gro po med pa'i 'gro ba dang / /'gro ba med pa'i 'gro por 'gyur/ /zhes bya bas gnyis ka dgag pa'i rjes su dpag pa bstan pa'i mthus/ grangs can gyis brtags pa'i gcig pa nyid dang / bye brag pas brtags pa'i gzhan pa nyid dgag pas gcig pa nyid dang / gzhan pa nyid ces bya ba de'i yul can gyi blo skye ba med pa rten cing 'brel par 'byung bas don gcig pa ma yin pa/ don tha dad pa ma yin par bstan par 'dod pa'i phyir gtan tshigs kyi skyon med do/ /de'i phyir de ltar 'gro ba las 'gro ba po gzhan pa nyid ma yin par bstan pa la pha rol pos gzhan ma yin pa nyid yin no zhes dam bcas pa'i don log par brtags nas khas blangs pa la gnod pa nye bar brtags pa'i gnod pa med do zhes bya ba ni mjug bsdu ba yin te/ dbu ma pas 'gro ba las 'gro ba po gzhan pa nyid ma yin par bstan pa la/ pha rol po gcig pa nyid du smra ba dag na re/ de lta na dbu ma pas gcig pa nyid yin par dam bcas pa yin no zhes dbu ma pas dam bcas pa'i don log par brtags pa'i dbu ma pas gcig pa nyid ma yin pa khas blangs pa la gnod pa nye bar brtags pa'i gnod pa de ni nged dbu ma pa la med do zhes bya ba'i tha tshig go/ /ci ste yang 'ga' zhig rtog pa zhib mos 'gro ba po'i rang gi bdag nyid rang las gzhan pa nyid ma yin par ma grub pa'i phyir dpe med par ston par byed na zhes bya ba ni ci ste yang bye brag pa 'ga' zhig mkhas su re ba'i rtog pa zhib mos 'di skad ces/ khyed dbu ma pas don dam par 'gro ba las kyang 'gro ba po gzhan nyid ma yin par nges par gzung bar bya ste/ brjod pa khyad par can 'jug pa'i ltos pa dang bcas pa'i phyir/ dper na 'gro ba po rang gi bdag nyid bzhin no zhes rjes su dpag pa'i tshad ma bstan pa de ni/ kho bo cag bye brag pa'i gzhung las/ 'gro ba po'i rang gi bdag nyid ni rang las gzhan pa nyid ma yin par ma grub ste/ 'di ltar dngos po thams cad ni gzhan pa nyid ces bya ba'i yon tan dang ldan pa'i phyir 'gro ba po'i rang gi bdag nyid kyang gzhan pa nyid ces bya ba'i yon tan dang ldan pa'i phyir/ rang las gzhan pa nyid ma yin par ma grub pa'i phyir khyed dbu ma pa'i dpe med do zhes ston par byed cing de skad ces zer ba yin no/ /de skad ces zer ba de'i lan du 'dir 'grel pa byed pa nyid kyis de ni bzang po ma yin te/ 'gro ba po rang gi bdag nyid gzhan pa nyid kyi ngo bo nyid kyis stong par rab tu grub pa nyid dpe nyid du brjod pas skyon med do zhes bya ba smras te/ kho bo'i dpe med pa ma yin pas khyod kyi klan ka de yang bzang po ma yin no zhes bya ba'i tha tshig go/ /'di ltar khyed bye brag pa'i grub pa'i mtha' las 'gro ba po la sogs pa dngos po thams cad gzhan nyid ces bya ba'i yon tan dang ldan pa'i phyir gzhan pa nyid ces bya'o zhes zer bas/ des na dngos po de dag ngo bo nyid kyis ni gcig pa nyid kyang ma yin la/ gzhan pa nyid kyang ma yin pas de'i phyir kho bos 'gro ba po'i rang gi bdag nyid gang gi tshe gzhan nyid ces bya ba yon tan gyi ngo bo nyid kyis stong par rab tu grub pa'i tshe gzhan pa nyid ma yin pa de dpe nyin du brjod pas dpe ma grub pa'i skyon med do/ /de'i phyir de ltar gzegs zen pa dag gis rang gi grub pa'i mtha'i skyon sba bar 'dod pas bsgrub pa sbyar ba ni/ kho bo cag la gnod pa med do zhes bya ba ni mjug bsdu ba dang tshad ma'i 'bras bu yin te/ bye brag pa dag gis rang gi grub pa'i mtha' las dngos po rnams gzhan pa nyid yin par sngar khas blangs pa de dbu ma pas gzhan pa nyid ma yin par sun phyung ba'i skyon sba bar 'dod pas 'dir dngos po rnams ngo bo nyid kyis gzhan pa nyid ma yin gyi gzhan pa nyid ces bya ba'i yon tan dang ldan pa'i phyir gzhan pa nyid ces sgrub par sbyar ba de ni kho bo cag la mi gnod de/ gzhan pa nyid yin par ma grub pa'i phyir ro/ /'dir gzhan pa dag na re 'gro ba med do zhes bya ba'i skabs bor nas 'gro ba po dang 'gro ba gcig pa nyid dang gzhan pa nyid ma yin no zhes dam 'cha' bar byed pa de ni skabs bor ba dang ltag chod yin no zhes zer ro zhes bya ba ni/ 'dir 'gro ba smra ba gzhan dag dbu ma pa 'gro ba po dang 'gro ba med par ston pa la/ rkang mig gis smras pa'i chad pa'i gnas dang ltag chod kyi skyon 'dogs par byed pa yin no/ / 'di skad bstan te/ rigs pa can dag gi gzhung las smra ba gzhan du spo ba ni chad pa'i gnas yin no zhes 'byung bas/ 'dir 'gro ba smra ba gzhan dag na re/ khyed dbu ma pas 'gro ba med do zhes dam bcas pa'i skabs bor nas 'gro ba po dang 'gro ba gcig pa nyid dang gzhan pa nyid ma yin no zhes dam 'cha' bar byed pa de ni skabs bor ba yin par chad pa'i gnas yin te/ 'di skad rigs pa can dag gis smra ba gzhan du spo ba ni chad pa'i gnas yin no zhes smras pa'i phyir ro/ /yang na khyed dbu ma pa dag gang gi tshe 'gro ba po dang 'gro ba med par ma grub pa de'i tshe 'gro ba po dang 'gro ba gcig pa nyid dam gzhan pa nyid yin zhes rnam par rtog pa brjod pa ltag chod yin te/ dper na ltag chod smra ba dag la sgra ni mi rtag ste/ brtsal ma thag tu 'byung ba'i phyir/ dper na bum pa bzhin no zhes sgra mi rtag pa nyid du bsgrubs pa na de dag pham par gyur pa de'i tshe/ 'di skad ces ji mi rtag pa dang / sgra gcig pa nyid dam gzhan pa nyid yin zhes zer ba de'i ltag chod yin pa de bzhin du 'dir khyed dbu ma pa yang 'gro ba po dang 'gro ba med pa nyid du ma grub pas pham par gyur pa'i tshe 'gro ba po dang 'gro ba gcig pa nyid dam/ gzhan pa nyid ces rtog par byed pa de ni ltag chod yin no zhes zer ba yin no/ /de skad ces zer ba de'i lan du/ 'grel pa byed pa nyid kyis 'dir bshad pa/ /gang dag dngos po gcig pa dang / /dngos po gzhan pa nyid du ni/ /'gro ba po dang 'gro ba gcig pa nyid dang / gzhan pa nyid du grub par gyur na/ de gnyis yod pa nyid du shes par 'gyur ba zhig na/ gang gi tshe ji skad bshad pa'i rnam pas/ gcig pa nyid dang gzhan nyid du/ /grub par gyur pa yod min pa/ /de gnyis grub pa ji ltar yod/ /de'i phyir de ltar de'i dngos po nyid dgag par 'dod pa'i phyir skabs bor ba yang ma yin la/ gcig pa nyid la sogs pa yongs su rtog pa nyid bkag pa'i phyir ltag chod kyang ma yin no zhes bya ba smras te/ 'jig rten 'di ni dngos po gang dag yod pa nyid du 'dod pa de dag ni yang na dngos po gcig pa nyid dam/ yang na dngos po gzhan pa nyid du yod pa nyid yin pas/ 'gro ba po dang 'gro ba'i dngos po yang gcig pa nyid dam/ gzhan nyid du me dang tsha ba nyid lta bu 'am/ bum pa dang snam bu lta bur grub par gyur na/ de gnyis yod pa nyid du shes par 'gyur ba zhig na gang gi tshe/ gal te 'gro ba gang yin pa/ /de nyid 'gro po yin gyur na/ /byed pa po dang las nyid kyang / / gcig pa nyid du thal bar 'gyur/ /zhes bya ba dang / gal te 'gro dang 'gro ba po/ /gzhan pa nyid du rnam brtags na/ /'gro po med pa'i 'gro ba dang / /'gro ba med pa'i 'gro por 'gyur/ /zhes ji skad bshad pa'i rnam pas gcig pa nyid dang gzhan pa nyid du grub par gyur pa yod pa ma yin pa de nyid 'grub pa ji ltar yod de/ de'i phyir de ltar 'gro ba po dang / 'gro ba gcig pa nyid dang gzhan pa nyid ma yin no zhes dam 'cha' bar byed pa de ni 'gro ba de'i dngos po nyid dgag par 'dod pa nyid yin pa'i phyir skabs bor ba yang ma yin pas chad pa'i gnas su yang mi 'gyur la/ grangs can dag gis gcig pa nyid la sogs par yongs su brtags pa nyid bkag pa'i phyir ltag chod kyang ma yin no zhes bstan to/ /gzhan dag na re/ gcig pa nyid dang gzhan pa nyid du nges par gzung bar mi nus su zin kyang / 'gro ba po dang 'gro ba 'grub pas ji skad bshad pa'i skyon med do zhes zer ro zhes bya ba ni mdo sde pa dag na re 'gro ba po dang 'gro ba gcig pa nyid dang gzhan pa nyid du nges par gzung bar mi nus su zin kyang / 'gro ba po dang 'gro ba'i rgyu dang 'bras bu'i tshul gyis gcig pa nyid dang gzhan pa nyid du brjod par bya ba ma yin pa'i tshul du 'grub pas/ des na gcig pa nyid dang gzhan pa nyid kyi skyon ji skad bshad pa de dag kho bo cag gi phyogs la med do zhes zer ba yin no/ /de skad ces zer ba de'i lan du/ 'dir 'grel pa byed pa nyid kyis/ de la yang lan de nyid yin te/ gang dag dngos po gcig pa dang / /dngos po gzhan pa nyid du ni/ /de gnyis tha snyad du ni yod pa nyid du shes par nus kyi khyed ni don dam par 'dod pas gal te/ gcig pa nyid dang gzhan nyid du/ /grub par 'gyur ba yod min pa/ /de gnyis grub pa ji ltar yod/ /med pa nyid de gcig pa nyid dang gzhan pa nyid du med pa la ni yod pa nyid du ston pa'i rjes su dpag pa med pa'i phyir ro zhes bya bar dgongs so zhes bya ba smras te/ mdo sde pa dag de skad ces zer ba de la yang lan tshig le'ur byas pa snga ma de nyid yin te/ gang dag dngos po gcig pa nyid dang dngos po gzhan pa nyid ces bya ba de gnyis kun rdzob kyi tha snyad du ni yod pa nyid du shes par nus te/ 'di ltar kun rdzob kyi tha snyad du dngos po kha cig ni gcig pa nyid yin la/ kha cig ni gzhan pa nyid yin pa'i phyir ro/ /khyed mdo sde pa dag ni don dam par 'gro ba po dang 'gro ba rgyu dang 'bras bu'i tshul gyis gcig pa nyid dang gzhan pa nyid du brjod par bya ba ma yin par yod par 'dod pas/ de na gal te gcig pa nyid dang gzhan pa nyid du grub par gyur pa yin pa gnyis rgyu dang 'bras bu'i tshul gyis gcig pa nyid dang gzhan pa nyid du brjod par bya ba ma yin par grub pa ci ltar yod de med pa nyid yin no/ /gcig pa nyid dang gzhan pa nyid du med pa la ni rgyu dang 'bras bu'i tshul gyis gcig pa nyid dang gzhan pa nyid du brjod par bya ba ma yin par yod pa nyid du ston pa'i rjes su dpag pa med pa'i phyir/ de yang mi 'thad do zhes bya bar slob dpon gyis dgongs so/ /sngar ni tshig le 'ur byas pa 'di chad pa'i gnas dang ltag chod yongs su spang ba'i phyir nye bar sbyar ba byas so/ /'dir ni mdo sde pa dag gis gcig pa nyid dang gzhan pa nyid du brjod par bya ba ma yin par yod par brtags pa yongs su spang ba'i phyir nye bar sbyar bar bya ste khyad par ni de yin no// //bam po nyi shu bdun pa/ mkhas par rlom pa gzhan dag ni don dam par 'gro ba po mi 'gro ste bya ba dang ldan pa'i phyir sdod pa po bzhin te zhes bya ba dang / de bzhin du don dam par 'gro ba po sdod par mi 'thad de 'gro ba'i bya ba dang ldan pa'i phyir/ lhas byin 'gro ba ma nyams pa bzhin no zhes rjes su dpag pa sngar bstan pa dag la skyon 'dogs par byed de zhes bya ba ni/ 'gro ba smra ba mkhas par rlom pa gzhan dag sngar dbu ma pas 'gro ba med pa dang sdod pa med par bstan pa'i skabs su don dam par 'gro ba po mi 'gro ste bya ba dang ldan pa'i phyir/ sdod pa po bzhin te zhes bya ba dang / de bzhin du don dam par 'gro ba po sdod par mi 'thad de 'gro ba'i bya ba dang ldan pa'i phyir/ lhas byin 'gro ba ma nyams pa bzhin no zhes rjes su dpag pa rnam pa gnyis bstan pa dag la gtan tshigs kyi skyon 'dogs par byed pa yin no/ /skyon 'dogs par byed pa'i tshig nyid bstan pa'i phyir/ spyi'i don gang yin/ bya ba dang ldan pas bya ba gzhan mi byed dam/ 'on te bya ba gang dang ldan pa de mi byed pa yin zhes brtag pa gnyis dri ba smras te/ khyed dbu ma pa na re/ don dam par 'gro ba po mi 'gro ste bya ba dang ldan pa'i phyir ro zhes zer ba dang / de bzhin du don dam par 'gro ba po sdod par mi 'thad de/ 'gro ba'i bya ba dang ldan pa'i phyir ro zhes zer ba'i gtan tshigs bya ba dang ldan pa zhes bya ba de'i spyi'i don gang yin/ ci bya ba dang ldan pas bya ba gzhan thams cad mi byed pa yin nam/ 'on te bya ba gang dang ldan pa de nyid yin zhes brtag pa gnyis dris pa yin no/ /de la gal te brtag pa snga ma ltar 'dod na ni dpe med de de las gzhan pa'i bya ba byed pa'i phyir ro zhes bya ba ni gal te bya ba dang ldan pas bya ba gzhan mi byed par 'dod na ni des na khyed dbu ma pa'i dpe sdod pa po bzhin te zhes bya ba dang / lhas byin 'gro ba ma nyams pa bzhin no zhes bya ba de mi rung ste/ sdod pa po yang 'gro ba las gzhan pa sdod pa'i bya ba byed pa'i phyir dang / lhas byin 'gro ba ma nyams pa yang sdod pa las gzhan pa 'gro ba'i bya ba byed pa'i phyir bya ba dang ldan pas bya ba gzhan mi byed pa nyid ces bya ba de mi rung ngo / /'on te brtag pa phyi ma ltar 'dod na ni/ de lta na yang don 'gal ba nyid yin te zhes bya ba ni 'on te bya ba gang dang ldan pa de ni mi byed par 'dod na ni/ de lta na yang khyed dbu ma pa'i gtan tshigs bya ba dang ldan pa'i phyir zhes bya ba de'i don mngon sum dang 'gal ba dang / 'jig rten dang 'gal ba nyid yin pas mi rung ngo / /ji ltar mngon sum dang 'gal ba nyid yin zhe na/ de'i phyir smra ba po tshig smra bar byed cing gcod pa po shing gcod par byed pa dang zhes bya ba smras te/ smra ba po smra ba'i bya ba dang ldan pa yang smra ba'i bya ba de byed par mngon sum du snang la/ gcod pa po gcad pa'i bya ba dang ldan pa yang shing gcad pa'i bya ba de byed par mngon sum du snang ba'i phyir/ bya ba gang dang ldan pa de mi byed par 'dod pa ni mngon sum dang 'gal ba nyid yin pas mi rung ngo / /ji ltar 'jig rten dang 'gal ba nyid yin zhe na/ de'i phyir de dang ldan pa nyid kyis de byed pa'i phyir ro zhe na zhes bya ba smras te/ bya ba de dang ldan pa nyid kyis bya ba de byed par 'jig rten la grags pa'i phyir/ bya ba gang dang ldan pa de mi byed par 'dod pas ni 'jig rten dang 'gal ba nyid kyang yin pas de mi rung ngo zhes zer ba yin no/ /de skad ces zer ba de la 'dir 'grel pa byed pa nyid kyis/ re zhig de la gal te brtag pa snga ma ltar 'dod na ni dpe med de/ de las gzhan pa'i bya ba byed pa'i phyir ro zhes zer ba de'i lan du/ de la 'dir dpe med pa ma yin te/ de las gzhan pa'i bya ba byed pa po nyid du ma grub pa sdod pa po la sogs pa dpe nyid du 'dod pa'i phyir ji skad bshad pa'i skyon 'dogs pa med do zhes bya ba smras te/ 'gro ba smra ba dag na re/ de la gal te brtag pa snga ma ltar 'dod na ni dpe med de/ de las gzhan pa'i bya ba byed pa'i phyir ro zhes zer ba ni/ nged dbu ma pas bya ba dang ldan pas bya ba gzhan mi byed par 'dod pa de la 'dir dpe med pa ma yin te/ 'gro ba'i bya ba de las gzhan pa'i byed pa po 'gro ba'i byed pa po nyid du ma grub pa sdod pa dang nyal ba la sogs pa'i byed pa po dang 'dug pa po dang nyal ba po la sogs pa 'gro ba po 'gro ba'i dpe nyid du mi 'dod pa'i phyir nged dbu ma pa'i dpe med pa ma yin no/ /des na sngar khyed kyis 'gro ba po 'gro bar ma grub pa dang 'gro ba po sdod par ma grub pa'i skyon ji skad bshad pa de ldog pa med de so na gnas so zhes bya ba'i tha tshig go/ /'gro ba smra ba dag na re/ 'on te brtag pa phyi ma ltar 'dod na ni de lta na yang don 'gal ba nyid yin te smra ba po tshig smra bar byed cing / gcod pa po shing gcod par byed pa dang de dang ldan pa nyid kyis de byed pa'i phyir ro zhes zer ba de'i lan du/ 'dir 'grel pa byed pa nyid kyis/ don 'gal ba nyid kyang ma yin te 'di ltar/ 'gro ba gang gis 'gro por mngon/ /'gro ba de ni de 'gro min/ /'gro ba gang gis 'gro ba po/ /zhes bya bar mngon pa'i 'gro ba de ni 'gro ba po de 'gro bar byed pa ma yin no zhes bya ba'i tha tshig go zhes bya ba la sogs pa smras te/ 'gro ba smra ba dag na re/ 'on te brtag pa phyi ma ltar 'dod na ni de ltar yang don 'gal ba nyid yin te/ smra ba po tshig smra bar byed cing gcod pa po shing gcod par byed pa dang de dang ldan pa nyid kyis de byed pa'i phyir ro zhes zer ba ni/ nged dbu ma pa bya ba gang dang ldan pa de mi byed par 'dod pa de la 'dir gtan tshigs kyi don 'gal ba nyid kyang ma yin te/ 'gro ba'i bya ba gang gis 'gro ba po zhes bya bar mngon pa'i 'gro ba'i bya ba de 'gro ba po de 'gro bar byed pa ma yin pa'i phyir/ nged dbu ma pa'i gtan tshigs kyi don 'gal ba nyid kyang ma yin no/ /don dam par gzhan pa nyid ma yin pa'i phyir rang gi bdag nyid bzhin pas rang gi rjes su dpag pa la gnod do zhes bya ba ni pha rol po gang dag dbu ma pa bya ba gang dang ldan pa de mi byed par 'dod pa la don 'gal ba nyid yin par skyon 'dogs par byed pa de dag gi rjes su dpag pa la gnod par 'gyur ba'i skyon gdags pa yin te/ don dam par 'gro ba gang gis 'gro ba po zhes bya bar mngon pa'i 'gro ba de dang 'gro ba po de ni gzhan pa nyid ma yin pa'i phyir/ dper na 'gro ba po rang gi bdag nyid las rang gi bdag nyid gzhan pa nyid ma yin pa'i phyir 'gro ba po nyid kyis 'gro ba po nyid 'gro bar mi byed pa de bzhin du/ 'gro ba gang gis 'gro ba po zhes bya bar mngon pa'i 'gro ba de dang 'gro ba po de yang gzhan pa nyid ma yin pa'i phyir 'gro ba po gang gis 'gro ba po zhes bya ba mngon pa'i 'gro ba des kyang 'gro ba po de 'gro bar byed pa ma yin no/ /des na khyed gzhan pa nyid ma yin par smra ba dag na re/ smra ba po tshig smra bar byed cing / gcod pa po shing gcod par byed do zhes zer ba de rang gi rjes su dpag pa la gnod par 'gyur te/ mngon sum du bdag nyid la bdag nyid byed pa 'gal te/ ral gri rang gi so la rang nyid gcod pa dang / mdzub mo rang gi rtse la rang nyid reg pa dang / skyes bu rang gi phrag pas rang nyid mchod pa 'gal ba'i phyir ro/ /gzhan pa nyid du ma yin par smra ba rnams rang gi rjes su dpag pa la gnod par 'gyur ba 'ba' zhig tu yang ma zad kyi/ 'jig rten la grags pa'i gnod par 'gyur ba bstan pa'i phyir/ gzhan pa nyid ma yin par smra ba rnams la grags pa'i gnod par yang 'gyur te/ rang gi bdag nyid las tha dad par gyur pa'o zhes 'jig rten la grags pa'i phyir ro zhes bya ba smras te/ gzhan pa nyid ma yin par smra ba rnams la 'jig rten la grags pa'i gnod par yang 'gyur te ji lta zhe na/ 'jig rten la 'gro ba po skyes pa 'am bud med gang zhig bgrod par bya ba grong dang grong khyer gang du 'gro bar 'gyur ba de ni 'gro ba po'i rang gi bdag nyid las bgrod par bya ba tha dad par 'gyur ba yin no des grags pa khyed kyis ni bya ba gang dang ldan pa 'di nyid de byed par smras pas des na bdag nyid byed pa ni 'jig rten la grags pa dang 'gal ba'i phyir ro/ /yang na/ 'gro ba gang gis 'gro por mngon/ /'gro ba de ni de 'gro min/ /zhes bya ba 'di ni mdor bstan pa yin te/ 'gro ba gang gis 'gro ba po/ /zhes bya bar mngon pa'i 'gro ba de ni 'gro ba po de 'gro bar byed pa ma yin no zhes bya ba'i tha tshig go/ /ji lta zhe na/ gang phyir 'gro ba'i snga rol med/ /ces bya ba 'dis ni rgyas par bshad pa yin te/ gang gi phyir 'gro ba'i snga rol na 'gro ba po med pa de'i phyir/ 'gro ba gang gis 'gro ba po/ /zhes bya bar mngon pa'i 'gro ba de ni 'gro ba po de 'gro bar byed pa ma yin no/ /'gro ba'i snga rol zhes bya ba gang zhe na/ de'i phyir 'gro ba'i snga rol ni 'gro ba'i snga rol na ste/ 'gro ba skye ba'i snga rol na zhes bya ba'i tha tshig go zhes bya ba smras te/ 'gro ba'i bya ba ma skyes pa'i dus na zhes bya ba'i tha tshig go/ /'gro ba'i snga rol na ci zhig med ce na/ de'i phyir 'gro ba po gang rang gi bdag nyid kyis gnas pa 'gro ba'i rgyur gyur pa'am/ 'gro bar byed cing 'gro'o zhes tha snyad gdags pa la brten par 'gyur ba 'ga' yang med do zhes bya ba smras te/ 'gro ba'i snga rol na 'gro ba po de lta bu 'ga' yang med pas de'i phyir nged dbu ma pa bya ba dang ldan pas bya ba gang dang ldan pa de mi byed par 'dod pa'i gtan tshigs kyi don mngon sum dang 'gal ba de nyid kyang ma yin la/ 'jig rten dang 'gal ba nyid kyang ma yin no/ / 'dir rang gi sde pa dag na re/ khyed dbu ma pas byed pa po med do zhes smras pa ni rigs na/ rgyu gang la byed pa por tha snyad gdags pa mi 'dod pa ni khas blangs pa la gnod de 'di ltar sa bon ni myu gu'i rgyu yin pas sa bon ni myu gu'i byed pa po yin no zhes lung las gsungs pa'i phyir ro zhes zer ba'i phyogs snga ma khong nas dbyung ba de'i lan du/ 'dir 'grel pa byed pa nyid kyis/ 'di ltar tha snyad du ni 'dun pa'i rgyu las byung ba'i rtsol bas bskyed pa'i rlung gi khams kyi dbang gis 'du byed kyi tshogs yul gzhan du dus tha dad pa med par skye ba byung ba ni 'gro ba po yin la/ de'i skad cig snga ma las mtshan nyid mi 'dra ba byung ba gang yin pa de ni 'gro ba yin no/ /yang dag par ni rgyu las byed pa por tha snyad 'dogs pa las ni byed pa po nyid du yang mi 'dod de zhes bya ba la sogs pa smras te/ mdo sde pa dag gis 'gro ba'i rgyu 'gro ba po la 'gro ba'i byed pa por tha snyad gdags pa de kun rdzob kyi tha snyad du ni rung gi don dam par ni mi rung ngo zhes ston to/ /mdo sde pa dag gis don dam par ni mi 'gro ba'i rgyu 'gro ba po 'gro ba'i byed pa por tha snyad gdags pa de kun rdzob kyi tha snyad du rung ba dang / 'gro ba po dang 'gro ba'i mtshan nyid bstan pa'i phyir/ 'di ltar tha snyad du ni zhes bya ba la sogs pa smras so/ /'dun pa'i rgyu zhes bya ba la 'dun pa zhes bya ba ni byed 'dod pa nyid do/ /'dun pa de nyid rgyu yin pas 'dun pa'i rgyu'o/ /gang gi rgyu yin zhe na/ rtsol ba'i ste de'i phyir 'dun pa'i rgyu las byung ba'i rtsol ba zhes bya ba smras te/ rtsol ba'i g.yo ni mtshan nyid do/ /rtsol ba des rlung gi khams bskyed pas na rtsol bas bskyed pa'i rlung gi khams zhes bya ba smras so/ /rlung gi khams de'i dbang gis zhes bya ba ni de'i mthus so/ /de'i mthus 'du byed kyi tshogs yul gzhan du dus tha dad pa med par skye ba byung ba ni 'gro ba po yin la zhes bya bar sbyar te/ 'du byed kyi tshogs zhes bya ba ni 'byung ba dang 'byung ba las gyur pa'i tshogs lus zhes bya'o/ /lus de yul nas yul gzhan du skye ba dang dus tha dad pa med par rgyun chags su skye ba byung ba ni 'gro ba po yin no/ /'gro ba po de'i skad cig snga ma zhes bya ba ni g.yo ba med pa'i mtshan nyid do/ /de las mtshan nyid mi 'dra ba zhes bya ba ni g.yo ba'i mtshan nyid do/ /de 'byung ba gang yin pa de ni 'gro ba yin no zhes bya bar sbyar te 'gro ba'i rgyu ni 'gro ba po de yin te/ lhas byin 'gro ba med pa'i phyir ro/ /de ltar 'gro ba'i rgyur 'gro ba po la 'gro ba'i byed pa por tha snyad gdags pa de kun rdzob kyi tha snyad du ni rung gi/ /de don dam par mi rung bar bstan pa'i phyir/ yang dag par ni rgyu la byed pa por tha snyad 'dogs pa las de byed pa po nyid du yang mi 'dod de zhes bya ba smras te/ don dam par ni 'gro ba po 'gro bar byed do zhes bya bar mi 'dod de/ 'gro ba pos rang gi bdag nyid mi byed do zhes bya ba'i tha tshig go/ /ci'i phyir 'gro ba'i rgyu 'gro ba po de'i 'gro ba'i byed pa po nyid du mi 'dod ce na/ 'di ltar/ gang zhig gang du 'gro bar 'gyur/ /zhes bya ba smras te/ 'gro ba po lhas byin lta bu gang zhig bgrod par bya ba grong dang grong khyer lta bu gang du 'gro bar 'gyur ba ni 'gro ba po'i rang gi bdag nyid las gzhan pa nyid yin par 'jig rten la grags pa'i phyir 'dir 'gro ba dang rgyu 'gro ba po grang yin pa de ni 'gro ba'i rang gi bdag nyid las gzhan pa nyid ma yin pas/ 'gro ba'i rgyu 'gro ba po de 'gro ba'i byed pa po nyid du mi 'dod do/ /de nyid bstan pa'i phyir/ rang gi bdag nyid la ma yin te/ rang gi bdag nyid la byed pa nyid mi 'thad pa'i phyir ro zhes bya ba smras te/ 'gro ba'i rgyu 'gro ba po de ni 'gro ba'i rang gi bdag nyid yin pas de'i 'gro ba'i byed pa po nyid ma yin te/ ral gri rang gi so la rang nyid gcod pa dang / mdzub mo rang gi rtse la rang nyid reg pa dang / skyes bu rang gi phrag par rang nyid mchong ba la sogs pa rang gi bdag nyid la byed pa nyid mi 'thad pa'i phyir ro/ /de ltar re zhig rang gi sde pa dag las/ 'gro ba gang gis 'gro por mngon/ /'gro ba de ni der 'gro min/ /zhes bya ba yin no zhes bya ba ni mjug bsdu ba yin te/ mdo sde pa dag la yang dbu ma pa'i gtan tshigs kyi don bya ba dang ldan pas bya ba gang dang ldan pa de mi byed pa zhes bya ba de 'gal ba nyid ma yin no zhes bya ba'i tha tshig go/ /grangs can gyi phyogs la yang sa la sogs pa'i lus kyi rnam par gnas pa'i khyad par can dag la rdul shas che bar gyur pa ni 'gro ba yin la/ de dang ldan zhing de'i bdag nyid du gyur pa bya ba byed pa'i gnas kyi tshogs ni 'gro ba po yin no zhe na zhes bya ba ni grangs can dag gi phyogs la yang 'byung ba chen po lnga po sa dang / chu dang / me dang / rlung dang / nam mkha' zhes bya ba 'byung ba las gyur pa'i gzugs kyi lus kyi rnam par gnas pa'i khyad par can dag la/ snying stobs dang / rdul dang / mun pa zhes bya ba yon tan gsum po dag tu dus thams cad du khyab par yod pa las/ gang gi tshe rdul zhes bya ba g.yo ba dang 'jug pa'i bdag nyid can de shas che bar gyur pa ni 'gro ba yin la/ rdul de dang ldan zhing rdul dang ldan pa de'i bdag nyid du gyur pa 'gro ba'i bya ba byed pa'i gnas kyi tshogs lus zhes bya ba ni 'gro ba po yin pas de dag na re/ 'gro ba dang 'gro ba po zhes bya ba ni bdag nyid gcig pa nyid yin yang 'gro ba po de 'gro ba'i bya ba byed pa yin pas/ des na dbu ma pa na re/ bya ba dang ldan pas bya ba gang dang ldan pa de mi byed do zhes zer ba'i gtan tshigs kyi don de mngon sum dang 'gal ba nyid dang / 'jig rten dang 'gal ba nyid yin no zhes zer ba yin no/ /de skad ces zer ba de'i lan du/ 'dir 'grel pa byed pa nyid kyis/ de yang / gang phyir 'gro ba'i snga rol med/ /'gro ba'i snga rol na de'i bdag nyid med pa yin te/ sdod pa na yang 'gro'o zhes bya bar thal bar gyur na mi rung ba'i phyir ro zhes bya ba smras te/ grangs can dag gi gzhung de yang 'gro ba'i snga rol na de dang ldan zhing de'i bdag nyid du gyur pa bya ba byed pa'i gnas kyi tshogs 'gro ba po zhes bya ba de med pa'i phyir 'gro bar mi 'thad do/ /de ci'i phyir zhe na/ sdod pa na yang 'gro'o zhes bya bar thal bar gyur na mi rung ba'i phyir te/ gal te sa la sogs pa lus kyi rnam par gnas pa'i khyad par can dag la rdul shas che bar gyur pa'i 'gro ba ma skyes pa'i snga rol na 'gro ba po med par yang 'gro bar 'dod na/ de lta na sdod pa'i dus na 'gro ba po med pa yang 'gro ba po zhes bya bar thal bar 'gyur bas mi rung ngo zhes bya ba'i tha tshig go/ /gal te 'dir gzhan dag na re 'gro ba'i snga rol na 'gro ba po de nyid yod par ni mi 'dod de/ sdod na yang 'gro'o zhes bya bar thal bar gyur na mi rung ba'i phyir ro zhes bya ba de bden mod kyi/ 'on kyang gang gi tshe rkang pa 'degs pa'i tshul gyis 'gro ba snang bar gyur pa de'i tshe na 'gro ba de'i rgyu 'gro ba po yin pas des na 'gro ba'i rgyu 'gro ba po de 'gro ba'i byed pa po nyid yin no zhes zer ba'i phyogs snga ma khong nas dbyung ba de'i lan du/ 'dir 'grel pa byed pa nyid kyis/ gang gi tshe 'gro ba snang bar gyur pa de'i tshe na de'i rgyu yin par mi rung ste zhes bya ba smras so/ /ci'i phyir mi rung zhe na/ gang zhig gang du 'gro bar 'gyur/ /zhes bya ba smras te/ 'gro ba po lhas byin lta bu gang zhig bgrod par bya ba grong dang grong khyer lta bu gang du 'gro bar 'gyur ba ni 'gro ba po rang gi bdag nyid las bgrod par bya ba tha dad par gyur pa'o zhes 'jig rten la grags pa yin na/ 'dir gang gi tshe rkang pa 'degs pa dang 'jog pa'i tshul gyis 'gro ba snang bar gyur pa de'i tshe na 'gro ba gang yin pa de nyid 'gro ba po'i rang gi bdag nyid yin pas des na 'gro ba'i rgyu 'gro ba po de 'gro ba'i byed pa po nyid yin par mi rung ste/ rang gi bdag nyid la byed pa nyid mi 'thad pa'i phyir ro/ /de nyid bstan pa'i phyir/ de nyid kyis de mi byed do/ /zhes bya bar dgongs so zhes bya ba smras te/ rang gi bdag nyid la byed pa nyid mi 'thad do zhes bya bar mdo mdzad pas dgongs pa ste/ des na dbu ma pa'i gtan tshigs kyi don bya ba dang ldan pas bya ba gang dang ldan pa de mi byed pa zhes bya ba de mngon sum dang 'gal ba nyid dang 'jig rten dang 'gal ba nyid ma yin no zhes bstan to/ /'dir gzhan dag na re rang gi bdag nyid la byed pa nyid mi 'thad pa ma yin te/ dper na 'jig rten na skye ba'i khyad par skyes pa la myu gu skye'o/ /bdag nyid mkhas par byed do zhes brjod pa snang ba'i phyir ro zhes zer ba'i phyogs snga ma khong nas dbyung ba de'i lan du/ 'dir 'grel pa byed pa nyid kyis/ gang la skye ba'i khyad par byed pa la myu gu skye'o/ /bdag nyid mkhas par byed do zhes brjod pa de yang rtog pas sgro btags pa ste/ ma skyes pa la bya ba mi srid pa'i phyir ro zhes bya ba smras te/ dngos po gang las skye ba'i khyad par bya ba byed cing skye ba'i khyad par yongs su 'dzin par byed pa de las myu gu skye'o/ /bdag nyid mkhas par byed do zhes rang gi bdag nyid la byed pa nyid du brjod pa de yang 'jig rten pa dag gi rtog pas sgro btags pa ste bstan pa tsam du zad kyi/ dngos su na rang gi bdag nyid la byed pa ma yin te/ ci'i phyir zhe na/ ma skyes pa la bya ba mi srid pa'i phyir te/ dper na 'jig rten pa dag na re/ 'bras chan btso bar bya'o zhes brjod pa de yang gal te 'bras chan yin na ni btso bar bya mi dgos la/ btso bar bya dgos na ni 'bras chan ma yin pas de yang rtog pas sgro btags te bstan pa yin pa de bzhin du/ 'dir yang gal te myu gu yin na ni skye ba ma yin la/ skye na ni myu gu ma yin pa dang / gal te bdag nyid mkhas pa yin na ni mkhas par bya mi dgos la/ mkhas par bya dgos na ni bdag nyid mkhas pa ma yin te/ des na myu gu dang bdag nyid ma skyes pa la skye ba dang mkhas pa'i bya ba mi srid pa'i phyir rang gi bdag nyid med pa la ni bya ba mi srid la/ rang gi bdag nyid yod pa'i bdag nyid la byed pa nyid mi 'thad pas de'i phyir bya ba dang ldan pas bya ba gang dang ldan pa de mi byed do/ /ji ltar 'gro ba po'i bdag nyid du gyur pa 'gro bar mi 'thad pa de bzhin du smra ba po tshig smra bar byed cing gcod pa po shing gcod par byed pa zhes bya ba de la yang rang gi bdag nyid la bya ba byed par mi 'thad de zhes bya ba ni/ ji ltar 'gro ba gang gis 'gro ba po zhes bya bar mngon pa'i 'gro ba po de 'gro bar byed pa yin no zhes bshad pa de bzhin du smra ba gang gis smra ba po zhes bya bar mngon pa'i smra ba de yang smra ba po de smra bar byed pa ma yin la/ gcad pa gang gis gcod pa po zhes bya bar mngon pa'i gcad pa de yang gcod pa po de gcad par bya ba ma yin no zhes 'gro ba'i bya ba dang ldan pas 'gro ba'i bya ba de mi byed par dngos la ji lta ba bzhin du smra ba'i bya ba dang ldan pas smra ba'i bya ba de mi byed pa dang / gcad pa'i bya ba dang ldan pas gcad pa'i bya ba de mi byed par dpe la yang de bzhin du sbyar ro zhes bya bar ston to/ /de la re zhig tha snyad du smra ba po tshig smra bar byed pa dang don dam par de mi 'thad par bstan par bya ste/ de'i phyir gang gi phyir 'dir yang 'dun pa'i rgyu las byung ba'i rtsol bas bskyed pa'i gnas dang / byed pa'i rgyu las ngag gi 'du byed kyi tshogs yi ge dang ngag dang tshig ces bya ba smra ba po las rang bzhin tha mi dad par skad cig snga ma las mtshan nyid mi 'dra ba khyad par gang gis smra ba po zhes brjod pa 'byung zhing de'i rgyu ni smra ba po yin pas smra ba po tshig smra bar byed do zhe na de yang mi rung ste/ gang phyir smra ba'i snga rol med/ /gang zhig ci zhig smra bar 'gyur/ /zhes bya ba smras te/ ji ltar na smra ba po tshig smra bar byed cing zhes bya ba de la rang gi bdag nyid la bya ba byed pa mi 'thad ce na/ 'dir mdo sde pa dag smra ba po tshig smra bar byed pas bya ba gang dang ldan pa de byed par 'dod pa'i gzhung bstan pa'i phyir/ gang gi phyir 'di yang zhes bya ba la sogs pa smras so/ /'dir yang 'dun pa'i rgyu zhes bya ba la 'dun pa zhes bya ba ni byed 'dod pa nyid do/ /'dun pa de nyid rgyu yin pas 'dun pa'i rgyu'o/ /gang gi rgyu yin zhe na/ rtsol bas te de'i phyir 'dun pa'i rgyu las byung ba'i rtsol ba zhes bya ba smras te/ rtsol ba ni g.yo ba'i mtshan nyid do/ /rtsol ba des gnas dang byed pa skyed pas na rtsol bas skyed pa'i gnas dang byed pa zhes bya ba smras so/ /gnas dang byed pa dag gi rgyu las ngag gi 'du byed kyi tshogs yi ge dang ngag dang tshig ces bya ba 'byung ba ni tshig smra ba yin no zhes bya bar sbyar ro/ /de la ngag gi 'du byed kyi tshogs zhes bya ba ni yi ge dang ngag dang tshig ces bya ba'i tshogs te tshig smra bar byed pa zhes bya ba yin no/ /yi ge zhes bya ba ni a la sogs pa'o/ /ngag ces bya ba ni yi ge dag bsdus pa ste/ lhas byin zhes brjod pa la sogs pa'o/ /tshig ces bya ba ni ngag dag bsdus pa ste/ lhas byin bum pa byed do zhes brjod pa la sogs pa'o/ /ji ltar na gnas kyi rgyu las ngag gi 'du byed kyi tshogs yi ge dang ngag dang tshig ces bya ba dag 'byung zhe na/ yi ge rnams kyi gnas brgyad de/ /brang dang lkog ma mgo dang ni/ /lce yi drung dang so dang sna/ /rkan dang de bzhin mchu gnyis so/ /zhes bya ba bshad pa lta bu'o/ /ji ltar na byed pa'i rgyu las ngag gi 'du byed kyi tshogs yi ge dang ngag dang tshig ces bya ba 'byung zhe na/ reg dang cung zad reg pa dang / /dog pa dang ni yangs pa dag /rtsol bas rab tu bskyed pa yi/ /rkan la sogs pa'i byed pa yin/ /zhes bshad pa lta bu'o/ /ngag gi 'du byed kyi tshogs de ni smra ba po las rang bzhin tha mi dad pa yin te/ smra ba'i rgyu smra ba po de smra ba'i byed pa po nyid yin par 'dod pa'i phyir ro/ /ngag gi 'du byed kyi tshogs de ni skad cig snga ma las mtshan nyid mi 'dra ba yang yin te/ smra ba po nyid ma yin pa'i skad cig snga ma las smra ba po nyid yin pa'i skad cig phyi ma shos mtshan nyid mi 'dra ba'i phyir ro/ / ngag gi 'du byed kyi tshogs de ni khyad par gang gis smra ba po zhes brjod pa yang yin te/ ngag gi 'du byed kyi tshogs smra bar byed pa'i khyad par des na gang zag de smra ba po yin no zhes tha snyad du brjod pa'i phyir ro/ /'byung zhing zhes bya ba ni 'dun pa'i rgyu las byung ba'i rtsol bas bskyed pa'i gnas dang byed pa'i rgyu las ngag gi 'du byed kyi tshogs de 'byung zhing ngo / /de'i rgyu ni smra ba po yin pas smra ba po tshig smra bar byed do zhe na zhes bya ba ni mdo sde pa dag na re/ 'dun pa'i rgyu las byung ba'i rtsol bas bskyed pa'i gnas dang byed pa'i rgyu las ngag gi 'du byed kyi tshogs de 'byung zhing / ngag gi 'du byed de'i rgyu ni smra ba po yin pas smra ba'i rgyu smra ba po de smra ba'i byed pa po nyid yin te/ nged dbu ma pa'i gtan tshigs kyi don bya ba dang ldan pas bya ba gang dang ldan pa de mi byed pa zhes bya ba de 'gal ba nyid yin no zhe na'o/ /mdo sde pa dag de skad ces zer ba de yang mi rung ste/ ci'i phyir zhe na/ gang phyir smra ba'i snga rol med/ /gang zhig ci zhig smra bar 'gyur/ /zhes bya ba smras te/ sngar/ gang phyir 'gro ba'i snga rol med/ /gang zhig gang du 'gro bar 'gyur/ / zhes bya bas 'gro ba'i snga rol na 'gro ba po med pa dang 'gro ba po rang gi bdag nyid las 'gro ba tha dad par gyur pa'o zhes 'jig rten la grags pa'i phyir/ 'gro ba gang gis 'gro por mngon/ /'gro ba de ni de 'gro min/ /zhes dngos kyi skabs su ji skad bshad pa de bzhin du 'dir yang / gang phyir smra ba'i snga rol med/ /gang zhig ji zhig smra bar 'gyur/ /zhes bya bas smra ba'i snga rol na smra ba po med pa dang / smra ba po'i rang gi bdag nyid las smra ba tha dad par gyur pa'o zhes 'jig rten la grags pa'i phyir/ smra ba gang gis smra por mngon/ /smra po des ni de smra min/ /zhes dpe'i skabs su yang sbyar bar bya'o/ /des ni gcod pa po shing gcod par byed pa po zhes bya ba'i lan kyang btab pa yin no zhes bya ba ni smra ba po'i tshogs smra bar byed pa mi 'thad par bstan pa'i rigs pa des gcod pa po shing gcod par byed pa yang mi 'thad par lan btab pa yin no/ /'di skad bstan te/ gang gi phyir mdo sde pa dag 'di skad ces 'dir yang 'dun pa'i rgyu las byung ba'i rtsol bas bskyed pa'i rlung gi khams las shing gcad pa la sogs pa'i 'du byed kyi tshogs gcad pa'i bya ba zhes bya ba gcod pa po las rang bzhin tha mi dad pa skad cig ma snga ma las mtshan nyid mi 'dra ba/ khyad par gang gis gcod pa po zhes brjod pa 'byung zhing / de'i rgyu ni gcod pa po yin pas gcod pa pos shing gcod par byed do zhe na/ de yang mi rung ste/ gang phyir gcad pa'i snga rol med/ /gang zhig ci zhig gcod par 'gyur te/ gcad pa'i snga rol na gcod pa po med pa dang / gcod pa po'i rang gi bdag nyid las gcad pa tha dad par gyur pa'o zhes 'jig rten la grags pa'i phyir/ gcad pa gang gis gcod par mngon/ /gcad pa de ni de gcod min/ /zhes snga ma bzhin du ci rigs par lan gdab par bya ba yin no/ /de'i phyir de ltar dpe yang dngos bzhin du ma grub pas don 'gal ba nyid kyi skyon gyi gnas med par mi 'gyur bar rigs so zhes bya ba ni mjug bsdu ba yin te/ de'i phyir de ltar ji skad bshad pa'i 'thad pas brtags na/ 'gro ba smra ba dag gis dpe smra ba'i tshig smra bar byed cing gcod pa po shing gcod par byed pa zhes bya ba de yang 'gro ba po 'gro bar mi 'thad par dngos po bzhin du ma grub pas/ 'gro ba smra ba dag gis dpe smra ba po tshig smra bar byed cing / gcod pa po shing gcod par byed pa zhes bya ba dang / dngos 'gro ba po 'gro bar byed do zhes bya ba de dag la rang gi bdag nyid la byed pa nyid mi 'thad pa'i don 'gal ba nyid kyi skyon gyi gnas med par mi 'gyur bar rigs te/ de dag la don 'gal ba nyid kyi skyon gyi gnas yod par 'gyur ba kho na rigs so zhes bya ba'i tha tshig go/ /gzhan dag ni/ gang phyir 'gro ba'i snga rol med/ /ces bya ba de la 'gro ba skye ba'i snga rol na 'gro ba po 'gro ba dang bral ba ni 'gro ba po nyid du mi 'thad pa'i phyir/ 'gro ba po 'gro'o zhes bya ba'i tha snyad mi srid par 'gro ba po 'gro'o zhes bya bar mi rigs so zhes zer ro zhes bya ba ni/ 'grel pa byed pa gnas brtan bud+d+ha pA li ta ni tshig le'ur byas pa'i rtsa ba de la de skad ces rnam par bshad par byed do zhes bya bar sbyar ro/ /de ltar yang dbu ma'i rtsa ba'i 'grel pa bud+d+ha pA li ta nyid las/ gang gi phyir/ 'gro ba gang gis 'gro ba po/ /zhes bya bar mngon pa'i 'gro ba de'i snga rol na 'gro ba'i snga rol te de'i snga rol na 'gro ba po med do zhes rnam par bshad pa'i phyir ro/ /de ni rigs pa ma yin te/ 'gro ba po mi 'gro'o zhes bya ba des don bstan zin pa'i phyir ro zhes bya ba ni 'grel pa byed pa nyid kyis gnas brtan bud+d+ha pA li ta'i rnam par bshad pa de rigs pa ma yin par sgrub pa yin no/ /ci'i phyir de rigs pa ma yin zhe na/ gnas brtan bud+d+ha pA li ta'i rnam par bshad pa de ni sngar/ re zhig 'gro po mi 'gro ste/ /zhes dam bcas pa nye bar gzhag pa de sgrub pa'i skabs su/ re zhig 'gro po 'gro'o zhes/ /ji ltar 'thad pa nyid du 'gyur/ /'gro ba med na 'gro ba po/ /nam yang 'thad par mi 'gyur ro/ /zhes bya ba des don bstan zin pa'i phyir/ de las khyad par gzhan bstan dgos pa ma bstan pa'i phyir ro/ /bye brag pa dag gis smras pa/ 'gro ba gang gis 'gro por mngon/ /'gro ba de ni de 'gro min/ /zhes bya ba ni bden mod kyi 'on kyang de las gzhan pa nyid yin pas/ kho bo cag la ji skad bshad pa'i rnam pa'i gnod pas gnod par mi 'gyur ro zhes bya ba ni 'dir bye brag pa dag na re/ dbu ma pa khyed kyi/ 'gro ba gang gis 'gro por mngon/ /'gro ba de ni de 'gro min/ /zhes bshad pa ni rang gi bdag nyid la byed pa nyid mi 'thad pa'i phyir/ 'gro ba gang gis 'gro ba po/ /zhes bya bar mngon pa'i 'gro ba'i 'gro ba de ni 'gro ba po de 'gro bar byed pa ma yin pa bden mod kyi 'on kyang kho bo cag bye brag pa'i gzhung las/ 'gro ba po zhes bya ba'i sgrar brjod pa ni rdzas kyi tshig gi don yin la/ 'gro ba zhes bya ba'i sgrar brjod pa ni las kyi tshig gi don du 'dod pas 'gro ba po de las 'gro ba gzhan pa nyid yin pas/ de la rang gi bdag nyid las byed pa mi 'thad pa'i skyon med pa'i phyir/ 'gro ba gang gis 'gro ba po/ /zhes bya bar mngon pa'i 'gro ba de las gzhan pa'i 'gro ba de ni 'gro ba po de 'gro bar byed pa yin pas kho bo cag la khyed kyis/ gang phyir 'gro ba'i snga rol med/ /gang zhig gang du 'gro bar 'gyur/ /zhes ji skad bshad pa'i rnam pa'i gnod pas gnod par mi 'gyur ro zhes zer ba yin no/ /gal te 'gro ba po de las 'gro ba de gzhan nyid yin par mi 'grub po zhe na/ mi 'grub pa ma yin te/ de'i phyir kho bo cag ni rdzas kyi blo dang las kyi blo gzhan pa nyid du sgrub ste/ yul tha dad pa'i phyir dper na ba lang gi blo dang ba men gyi blo gzhan pa nyid bzhin no zhes bya ba smras te/ 'dir yang rdzas kyi blo dang las kyi blo zhes bya ba 'di ni chos can yin te/ rdzas kyi blo zhes bya ba ni rdzas dgu po sa dang / chu dang / me dang / rlung dang / nam mkha' dang / dus dang phyogs dang bdag dang yid ces bya ba'i tshig gi don gyi yul can yin te/ de ni 'gro ba po'i blo yin no/ /las kyi blo zhes bya ba ni las lnga po 'degs pa dang / 'jog pa dang / bskum pa dang / brkyang ba dang / 'gro ba zhes bya ba'i tshig gi don gyi yul can yin te de ni 'gro ba'i blo yin no/ /gzhan pa nyid grub ste zhes bya ba 'di ni bsgrub par bya ba chos yin te/ rdzas kyi blo dang las kyi blo'i khongs su gtogs pa 'gro ba po dang / 'gro ba gzhan pa nyid du bsgrub par bya ba yin no/ /yul tha dad pa'i phyir zhes bya ba 'di ni sgrub pa'i chos yin te/ rdzas kyi blo'i yul dgu po de dag dang las kyi blo'i yul lnga po de dag tha dad pa'i phyir/ de'i khongs su gtogs pa 'gro ba po dang 'gro ba gzhan pa nyid du sgrub par byed do/ /dper na ba lang gi blo dang ba men gyi blo gzhan pa nyid bzhin no zhes bya ba 'di ni dpe yin par sbyar te/ dper na ba lang gi blo dang ba men gyi blo ni yul tha dad pa'i phyir gzhan pa nyid yin pa de bzhin du/ rdzas kyi blo dang las kyi blo yang yul tha dad pa'i phyir gzhan pa nyid yin no/ /gang gzhan pa nyid ma yin pa de la ni yul tha dad pa med de zhes bya ba 'di ni chos mi mthun pa'i phyogs yin no/ /dper na ba lang gi blo rang las gzhan pa nyid ma yin pa bzhin no zhes bya ba 'di ni chos mi mthun pa'i dpe yin te/ dper na ba lang gi blo la ni yul tha dad pa med pa'i phyir rang las gzhan pa nyid ma yin no/ /rdzas kyi blo ni de lta ma yin te/ yul tha dad pa'i phyir gzhan pa nyid yin no/ /des na 'gro ba po de las 'gro ba de gzhan pa nyid yin pas kho bo cag la ji skad bshad pa'i rnam pa'i gnod pas gnod par mi 'gyur ro zhes zer ro/ /de skad ces zer ba de'i lan du/ 'dir 'grel pa byed pa nyid kyis 'dir bshad pa/ ji ltar/ 'gro ba gang gis 'gro bor mngon/ /'gro ba de ni de 'gro min/ /de mi rigs pa'i phyir ro zhes bya ba de bzhin du/ 'gro ba gang gis 'gro por mngon/ /de las gzhan pa de 'gro min/ /zhes bya ba smras te/ mi rigs pa'i phyir ro zhes bya bar sbyar ro/ /ji ltar sngar/ 'gro ba gang gis 'gro por mngon/ /'gro ba de ni de 'gro min/ /zhes bya bas rang gi bdag nyid la byed pa nyid mi 'thad pa'i phyir ro/ /'gro ba gang gis 'gro ba po/ /zhes bya bar mngon pa'i 'gro ba de ni 'gro ba po de 'gro bar byed pa ma yin pas/ de ltar gang gi tshe/ 'gro ba gang gis 'gro ba po/ /zhes bya bar mngon pa'i 'gro ba 'gro ba po rang gi bdag nyid kyi khongs su gtogs shing phan 'dogs par byed pa de yang 'gro ba po de 'gro bar byed pa ma yin pa de'i tshe/ 'gro ba gang gis 'gro ba po/ /zhes bya bar mngon pa'i 'gro ba de las gzhan pa'i 'gro ba 'gro ba po rang gi bdag nyid kyi khongs su ma gtogs shing phan 'dogs par byed pa ma yin pa de 'gro ba po de 'gro bar byed pa de ni mi 'thad do/ /ci'i phyir mi 'thad ce na/ de las gzhan pa nyid dgag pa'i phyir dang / de ston pa'i rjes su dpag pa med pa'i phyir dang / gang yang gang dang lhan cig gzhan pa nyid du mi 'thad par khas blangs pa'i phyir dang / dpe yang ma grub pa'i phyir ro zhes bya bar dgongs so zhes bya ba smras te/ de las gzhan pa nyid bkag pa'i phyir zhes bya ba ni 'gro ba po de las 'gro ba gzhan pa nyid bkag pa'i phyir te/ kho bo sngar don dam par 'gro ba po las 'gro ba gzhan pa nyid ma yin par bshad par bya ste/ brjod pa khyad par can 'jug pa'i ltos pa dang bcas pa'i phyir/ dper na 'gro ba'i rang gi bdag nyid bzhin no zhes bya ba dang / de bzhin du don dam par 'gro ba las kyang 'gro ba po gzhan nyid ma yin par nges par gzung bar bya ste/ brjod pa khyad par can 'jug pa'i ltos pa dang bcas pa'i phyir/ dper na 'gro ba po'i rang gi bdag nyid bzhin no zhes bya ba'i rjes su dpag pa dag gis bkag pa'i phyir ro/ /de ston pa'i rjes su dpag pa bstan pa'i phyir zhes bya ba ni 'gro ba po dang 'gro ba gzhan pa nyid ces bya ba de ston pa'i rjes su dpag pa khyed la med pa'i phyir ro/ /gang yang gang dang lhan cig gzhan pa nyid du mi 'thad par khas blangs pa'i phyir zhes bya bas ni de ston pa'i rjes su dpag pa med pa'i phyir/ rang las gzhan pa'i 'gro ba 'gro ba po de 'gro bar byed pa ma yin pa 'ba' zhig tu yang ma zad kyi/ phrad pa brtag pa'i rab tu byed pa 'og nas 'byung ba'i skabs su bstan bcos mdzad pas/ phyi dang nang gi dngos po gang yang phyi dang nang gi dngos po gang dang lhan cig gzhan pa nyid du mi 'thad par khas blangs pa'i phyir yang rang las gzhan pa'i 'gro ba 'gro ba po de 'gro bar byed pa ma yin no/ /dpe yang ma grub pa'i phyir ro zhes bya bar dgongs so zhes bya ba ni/ khyed kyis rang las gzhan pa'i 'gro ba 'gro ba po de 'gro bar byed pa'i dpe yang ma grub pa'i phyir/ rang las gzhan pa'i 'gro ba 'gro ba po de 'gro bar byed pa ma yin no zhes bya bar slob dpon gyis dgongs so/ /ji ltar dpe ma grub ce na/ khyed kyi rang las gzhan pa'i 'gro ba 'gro ba po de 'gro bar byed pa yin te/ 'gro ba po yin pa'i phyir zhes thams cad 'gro ba po'i phyogs su byas pa'i phyir de las gzhan pa'i dpe'i chos can gzhan med pa'i phyir ro/ /gang yang / 'gro ba gang gis 'gro por mngon/ /de las gzhan pa de 'gro min/ /zhes bya ba ni dam bcas pa nye bar gzhag pa yin no zhes bya ba ni mdor bstan pa ste phyogs yin no/ /gal te ci'i phyir zhe na zhes bya ba ni/ gal te pha rol po dag ci'i phyir zhes 'dri na'o/ /de skad ces 'dri ba de'i lan du/ gang phyir 'gro po gcig pu la/ /'gro ba gnyis su mi 'thad do/ /zhes bya ba gsungs so/ /de ni rgyas par bshad pa ste phyogs kyi chos yin no/ /des ni 'gro ba po'i chos 'gro ba gnyis dang mi ldan pa nyid bstan to zhes bya ba ni tshig le'ur byas pa'i phyed 'og ma des ni rang las gzhan pa'i 'gro ba 'gro ba po 'gro bar byed pa ma yin pa'i sgrub pa'i chos 'gro ba gnyis dang mi ldan pa'i phyir zhes bya ba bstan to/ /'dir rjes su dpag pa ni zhes bya ba ni rang las gzhan pa'i 'gro ba 'gro ba po de 'gro bar byed pa ma yin par bsgrub pa'i skabs 'dir rjes su dpag pa gtan tshigs dang dpe dang ldan pa'i sbyor ba'i tshig tu 'gyur ba ni 'og nas chos can dang bsgrub par bya ba chos dang / sgrub pa'i chos dang / dpe nye bar sbyar ba rnams yin par sbyar ro/ /don dam par rang las gzhan pa'i 'gro ba ni 'gro ba po 'gro bar byed pa ma yin te/ 'gro ba gnyis dang mi ldan pa'i phyir/ dper na sdod pa po bzhin no zhes bya ba ni chos can dang / bsgrub par bya ba chos dang sgrub pa'i chos dang / dpe yin par go rims bzhin du sbyar te/ dper na sdod pa po 'gro ba gnyis dang mi ldan pa'i phyir 'gro ba po 'gro bar byed pa ma yin pa de bzhin du/ rang las gzhan pa'i 'gro ba yang 'gro ba gnyis dang mi ldan pa'i phyir 'gro ba po 'gro bar byed pa ma yin no/ /gzhan dag na re/ gang phyir 'gro po gcig pu la/ /'gro ba gnyis su mi 'thad do/ /gang gi phyir 'gro ba po gcig pu la gang gis 'gro ba po zhes bya bar mngon pa dang 'gro ba por gyur nas/ gang 'gro bar 'gyur ba'i 'gro ba gnyis mi 'thad pa de'i phyir de las gzhan pa'i 'gro ba yang 'gro ba po 'gro bar byed pa ma yin no zhes zer ro zhes bya ba ni tshig le'ur byas pa'i phyed 'og ma 'di la/ 'grel pa byed pa gnas brtan bud+d+ha pA li ta ni 'di skad ces rnam par bshad par byed do zhes bya bar sbyar ro/ /kha cig na re/ de ni rigs pa ma yin te zhes bya ba ni 'grel pa byed pa nyid kyis rang gi ming kha cig ces bya bar snyad btags nas gnas brtan bud+d+ha pA li ta'i rnam par bshad pa de rigs pa ma yin par sgrub pa'i tshig yin no/ /ci'i phyir de rigs pa ma yin zhe na/ 'gro ba'i rgyu gcig kho na yod par khas blangs pas de dang ldan pa'i phyir 'gro ba po 'gro'o zhes bya bar bsgrub pa'i phyir dang zhes bya ba smras te/ gang phyir 'gro po gcig pu la/ /'gro ba gnyis su mi 'thad do/ /zhes smras pas don ci zhig go bar 'gyur zhe na/ 'gro ba po gcig pu la 'gro ba'i rgyu gnyis yod par mi 'thad do zhes bshad na 'gro ba'i rgyu gcig kho na yod par khas blangs pa yin pas 'gro ba'i rgyu gcig po dang ldan pa'i phyir 'gro ba po 'gro'o zhes bya bar bsgrub pa'i phyir de ni rigs pa ma yin no/ /gzhan yang gzhan pa nyid ma bkag pa'i phyir yang de ni rigs pa ma yin te/ pha rol po dag 'dod pa'i 'gro ba po de las 'gro ba gzhan pa nyid ma bkag pa'i phyir ro/ /gzhan yang / re zhig 'gro po 'gro'o zhes/ /ji ltar 'thad pa nyid du 'gyur/ /zhes bya ba de dang khyad par med pa'i phyir ro zhe'o zhes bya ba ni/ gnas brtan bud+d+ha pA li ta'i rnam par bshad pa de ni sngar/ /re zhig 'gro po 'gro'o zhes/ /ji ltar 'thad pa nyid du 'gyur/ /'gro ba med na 'gro ba po/ /nam yang 'thad par mi 'gyur ro/ /zhes bshad pa de dang khyad par med pa'i phyir rigs pa ma yin no zhes 'grel pa byed pa nyid zer ba yin no/ /gzegs zan pa dag gis smras pa/ 'gro ba gcig ni kho na ste/ de ni 'gro ba po gzhan pa nyid yin la/ de dang ldan pa'i phyir 'gro ba po la 'gro ba po zhes tha snyad gdags su rung ngo / /'gro ba'i rgyu yin pa'i phyir/ de byed pa na 'gro'o zhes bya ste/ dper na mar me snang ba'i rgyu yin pas snang bar byed do zhes bya ba bzhin pas/ gang phyir 'gro po gcig pu la/ /'gro ba gnyis su mi 'thad do/ / zhes bya ba ni rigs pa ma yin te zhes bya ba ni/ bye brag pa dag na re/ 'gro ba ni las kyi tshig gi don yin pas de ni gcig kho nar zad de las kyi tshig gi don 'gro ba zhes bya ba de ni rdzas kyi tshig gi don 'gro ba po zhes bya ba las gzhan pa nyid yin la/ / 'gro ba de dang ldan pa'i phyir 'gro ba po la 'gro ba po zhes tha snyad gdags su rung ngo / /ci'i phyir 'gro ba de dang ldan pa'i phyir 'gro ba po la 'gro ba po zhes tha snyad gdags su rung zhe na/ 'gro ba'i rgyu ni 'gro ba po yin pa'i phyir 'gro ba de byed pas na 'gro ba po 'gro'o zhes bya ste/ dper na snang ba'i rgyu mar me yin pa'i phyir mar mes snang ba de byed pa na mar mes snang bar byed do zhes bya ba bzhin pas de'i phyir dbu ma pa na re/ gang phyir 'gro po gcig pu la/ /'gro ba gnyis su mi 'thad do/ /zhes zer ba de ni rigs pa ma yin no zhes zer ba yin no/ /de skad ces zer ba de'i lan du/ 'dir 'grel pa byed pa nyid kyis de ni bzang po ma yin te zhes bya ba la sogs pa smras so/ /ci'i phyir bzang po ma yin zhe na/ gtan tshigs ji skad smos pa bsgrubs pa'i phyir dang zhes bya ba smras te/ nged dbu ma pas 'gro ba po 'gro ba'i bya ba dang ldan pa de 'gro bar mi byed de bya ba dang ldan pa'i phyir ro zhes gtan tshigs ji skad smras pa de khyod 'gro ba smra ba dag gis bsgrubs pa'i phyir te/ khyed kyi gzhung las rang dbang ni byed pa po zhes 'byung ba'i gzhung bor la/ 'gro ba po ni 'gro ba'i rgyu yin te/ dper na mar me snang ba'i rgyu yin pa bzhin no zhes zer bas/ 'gro ba po ni kun rdzob tu 'gro ba'i rgyu khas blangs pa ni dngos kyi rgyu ma yin pas/ nged dbu ma pa'i gtan tshigs ji skad smos pa khyed kyis bsgrub pa'i phyir ro/ /gzhan yang nged dbu ma pas don dam par 'gro ba bkag pa'i phyir/ yang khyed zer ba de bzang po ma yin no/ /don dam par 'gro ba ma skyes pas 'gro ba bkag pa'i phyir/ 'gro ba med pa de dang 'gro ba po dang ldan pas 'gro ba po zhes tha snyad gdags su mi rung ba'i phyir ro/ / gzhan yang med pa las skye ba bkag pa'i phyir/ yang khyed zer ba de bzang po ma yin te/ khyed ni med pa las skye ba smra ba yin la/ khyed kyi gzhung de nged kyis don dam par bkag pa'i phyir yang 'gro ba po 'gro ba dang ldan pa ma yin no/ /yang na zhes bya ba la sogs pas ni rjes su dpag pa'i sgo nas 'gro ba po 'gro ba dang ldan pa ma yin par 'gog par byed do/ /de la 'dir yang 'gro ba po ni zhes bya ba 'di ni chos can yin la/ 'gro ba dang ldan pa'i rgyu ma yin par shes te zhes bya ba 'di ni bsgrub par bya ba chos yin te/ dper na ba lang gi lus rwa dang ldan pa'i rgyu yin par shes pa de ltar 'gro ba po ni 'gro ba dang ldan pa'i rgyu ma yin par shes te zhes bsgrub par bya ba yin no/ /blo dang sgra khyad par can 'jug pa'i rgyu yin pa'i phyir zhes bya ba 'di ni sgrub pa'i chos yin te/ 'gro ba po ni 'gro ba po'i blo khyad par can 'jug pa'i rgyu yin pa'i phyir dang / 'gro ba po'i sgra khyad par can 'jug pa'i rgyu yin pa'i phyir/ 'gro ba dang ldan pa'i rgyu ma yin par shes te zhes sgrub par byed do/ /dper na las bzhin pas zhes bya ba 'di ni dpe yin par sbyar te/ dper na las ni las kyi blo khyad par can 'jug pa'i rgyu yin pa'i phyir dang / las kyi sgra khyad par can 'jug pa'i rgyu yin pa'i phyir/ las dang ldan pa'i rgyu ma yin par shes pa de bzhin du/ 'gro ba po yang 'gro ba po'i blo khyad par can 'jug pa'i rgyu yin pa'i phyir dang / 'gro ba po'i sgra khyad par can 'jug pa'i rgyu yin pa'i phyir 'gro ba dang ldan pa'i rgyu ma yin par shes so/ /rjes su dpag pa'i gnod pas gnod par 'gyur ba'i phyir ro zhes bya ba ni mjug bsdu ba dang tshad ma'i 'bras bu yin par sbyar ro/ /gzhan yang 'gro ba po'i ngo bo nyid kyi 'gro ba po 'gro ba dang ldan par 'gyur ram 'on te 'gro ba po'i ngo bo nyid ma yin pa'i 'gro ba po 'gro ba dang ldan par 'gyur grang na/ de la 'gro ba po'i ngo bo nyid kyi 'gro ba po 'gro ba dang ldan par 'gyur ba ni mi 'thad de/ ci'i phyir zhe na/ 'gro ba po ni de dang ldan pa don med pa'i phyir ro zhes bya ba smras te/ 'gro ba po'i ngo bo nyid kyi 'gro ba po yin na de rang gi ngo bo nyid kyi 'gro ba po yin par grub zin pa la yang 'gro ba de dag dang ldan pa don med pa'i phyir ro/ /'gro ba po ngo bo nyid ma yin pa'i 'gro ba po ma yin pa yang 'gro ba dang ldan par 'gyur bar mi 'thad de/ ci'i phyir zhe na/ 'gro ba po ma yin pa yang 'gro ba po ma yin pa nyid kyi phyir/ sdod pa po bzhin du de dang mi ldan pa'i phyir ro zhes bya ba smras te/ 'gro ba po'i ngo bo nyid ma yin pa'i 'gro ba po ma yin pa ni 'gro ba po ma yin pa nyid kyi phyir/ dper na sdod pa po bzhin du 'gro ba de dang mi ldan pa'i phyir 'gro ba dang ldan par 'gyur ba mi 'thad do/ /'dir rjes su dpag pa'i dri ba'am smra bar rigs te zhes bya ba ni/ 'gro ba smra ba dag 'gro ba yod par bsgrub pa dang / dbu ma pa dag 'gro ba med par bsgrub pa'i skabs 'dir 'gro ba smra ba dag gis dbu ma pa la rjes su dpag pa dri bar rigs te/ khyed dbu ma pa dag 'gro ba 'gog par byed na rjes su dpag pa gang gis 'gog par byed ces dri bar rigs pa ste/ de skad ces 'dri na nged dbu ma pas kyang rjes su dpag pa ji skad bstan pa gang dag gis 'gro ba bkag pa'i rjes su dpag pa de dag khyed la bstan par bya bar rigs so/ /yang na khyed 'gro ba smra ba dag nyid kyis 'gro ba sgrub pa'i phyir/ rang gi rjes su dpag pa smra bar rigs te/ nged 'gro ba smra ba dag 'gro ba yod par sgrub pa ni rjes su dpag pa 'di dag sgrub par byed do zhes smra bar rigs pa ste/ de skad ces smra na/ nged dbu ma pas kyang rjes su dpag pa ji skad bstan pa gang dag gis 'gro ba bkag pa'i rjes su dpag pa dag gis khyed kyi gzhung sun dbyung bar rigs na khyed 'gro ba smra ba dag gis nged la rjes su dpag pa yang ma dris la/ rang gis rjes su dpag pa yang ma smras pas tshig tsam gyis ni rang gi gzhung gzugs pa dang / gzhan gyi gzhung sun dbyung ba mi 'grub pas khyod la skyon de lta bu yang yod do/ /ci'i phyir tshig tsam gyis rang gi gzhung gzugs pa dang / gzhan gyi gzhung sun dbyung ba mi 'grub ce na/ de'i phyir smra ba thams cad ni rang gi gzhung smra ba la dpa' ba yin pas tshig la ni zad pa med do zhes bya ba smras te/ gal te rjes su dpag pa med par khyod kyi rang gi grub pa'i mtha' las 'gro ba yod par gyur na/ kho bo'i yang rang gi grub pa'i mtha' las 'gro ba med par ci'i phyir 'grub par mi 'gyur te/ 'di ltar khyod ni 'gro ba yod par smra la kho bo ni 'gro ba med par smra bas smra ba thams cad ni rang gi gzhung smra ba la dpa' ba yin pas tshig la ni zad pa med pa de'i phyir/ khyed 'gro ba smra ba dag gis nged la rjes su dpag pa yang ma dris la/ rang gis rjes su dpag pa yang ma smras pas khyed kyi tshig tsam gyis ni rang gi gzhung gzugs pa dang / gzhan gyi gzhung sun dbyung ba mi 'grub pas khyed kyis 'gro ba yod par smra ba'i gzhung yang mi tshugs la/ dbu ma pa'i 'gro ba med par bsgrub pa'i gtan tshigs kyi don yang sun mi phyin pas de'i phyir de ltar/ rigs pas dpyad na don dam par 'gro ba dang 'gro ba po dang bgrod par bya ba yang yod pa ma yin no zhes bstan to/ /da ni rab tu byed pa 'di'i mjug bsdu ba dang tshad ma'i 'bras bu bstan pa'i phyir/ de'i phyir de ltar rigs pas dpyad na/ 'gro po yin par gyur na ni/ / 'gro rnams gsum du 'gro mi byed/ /de ma yin par gyur pa yang / /'gro rnams gsum du 'gro mi byed/ /yin dang ma yin gyur pa yang / /'gro rnams gsum du 'gro mi byed/ /'gro po yin par gyur zhes bya ba ni/ 'gro ba po gang 'gro ba dang ldan pa ste/ 'gro ba yod pa zhes bya ba'i tha tshig go/ /'gro zhes bya ba ni bgrod par bya'o/ /rnam gsum du zhes bya ba ni song ba dang / ma song ba dang / bgom par ro/ /de ma yin par gyur pa yang zhes bya ba ni 'gro ba po gang 'gro ba dang bral ba'o/ /yin pa dang ma yin par gyur pa yang zhes bya ba ni/ 'gro ba po gang 'gro ba dang ldan pa yang yin la 'gro ba dang bral ba yang yin pa'o zhes bya ba la sogs pa smras so/ /da ni 'gro ba po yin par gyur pa la sogs pa rnam pa gsum po de dag 'gro ba rnam pa gsum du 'gro bar mi byed pa nyid rjes su dpag pa'i tshad mas bsgrub par bya'o/ /de la re zhig 'gro ba po yin par gyur pa ni 'gro ba rnam pa gsum du 'gro bar mi byed de bya ba dang ldan pa'i phyir de las gzhan pa bzhin no zhes bya ba ni chos can dang / bsgrub par bya ba chos dang / sgrub pa'i chos dang / dpe yin par go rims bzhin du sbyar te/ dper na 'gro ba po yin par gyur pa de las gzhan pa lhas byin 'gro ba po yin par gyur pa ni 'gro ba'i bya ba dang ldan pa'i phyir/ bgrod par bya ba rnam pa gsum song ba dang / ma song ba dang / bgom pa dag tu 'gro bar mi byed pa de bzhin du/ 'gro ba po yin par gyur pa yang 'gro ba'i bya ba dang ldan pa'i phyir/ bgrod par bya ba rnam pa gsum po song ba dang / ma song ba dang / bgom pa dag tu 'gro bar mi byed do/ /de ma yin par gyur pa yang 'gro ba rnam pa gsum du 'gro bar mi byed de 'gro ba dang bral ba'i phyir sdod pa po bzhin no zhes bya ba yang / chos can dang / bsgrub par bya ba chos dang / sgrub pa'i chos dang / dpe yin par go rims bzhin du sbyar te/ dper na sdod pa po ni 'gro ba dang bral ba'i phyir ro/ /bgrod par bya ba rnam pa gsum po song ba dang / ma song ba dang / bgom pa dag tu 'gro bar mi byed pa de bzhin du/ 'gro ba po ma yin par gyur pa yang 'gro ba dang bral ba'i phyir/ bgrod par bya ba rnam pa gsum po song ba dang / ma song ba dang / bgom pa dag tu 'gro bar mi byed do/ /yin pa dang / ma yin par gyur pa yang 'gro ba rnam pa gsum du 'gro bar mi byed de/ phyogs gnyi gar bstan pa'i rjes su dpag pa dag gis gnod par 'gyur ba'i phyir ro zhes bya ba yang chos can dang / bsgrub par bya ba chos dang / sgrub pa'i chos dang / dpe yin par go rims bzhin du sbyar te/ 'gro ba po yin par gyur pa'i phyogs su dper na 'gro ba po yin par gyur pa de las gzhan pa lhas byin 'gro ba po yin par gyur pa ni 'gro ba'i bya ba dang ldan pa'i phyir/ bgrod par bya ba rnam pa gsum po song ba dang / ma song ba dang / bgom pa dag tu 'gro bar mi byed do zhes bstan pa dang / 'gro ba po ma yin par gyur pa'i phyogs su/ dper na sdod pa po ni 'gro ba dang bral ba'i phyir/ bgrod par bya ba rnam pa gsum po song ba dang / ma song ba dang / bgom pa dag tu 'gro bar mi byed do zhes bstan pa de bzhin du/ 'gro ba po yin pa dang ma yin par gyur pa yang 'gro ba'i bya ba dang ldan pa'i phyir dang / 'gro ba dang bral ba'i phyir/ bgrod par bya ba rnam pa gsum po song ba dang / ma song ba dang / bgom pa dag tu 'gro bar mi byed do/ /de bzhin du 'gro ba phyogs su byas pa dang / yang gtan tshigs dang dpe'i sbyor ba ci rigs par bya'o zhes zer ba ni/ 'di ltar sbyar bar bya ste/ 'gro ba rnam pa gsum po song ba dang / ma song ba dang / bgom pa dag las re zhig song ba ni 'gro ba po yin par gyur pa dang / de ma yin par gyur pa dang / yin pa dang ma yin par gyur pa gsum 'gro bar mi byed de/ 'gro ba'i bya ba 'das zin pa'i phyir/ de las gzhan pa'i las bzhin no/ /ma song bar yang 'gro ba po yin par gyur pa dang / de ma yin par gyur pa dang / yin pa dang ma yin par gyur pa gsum 'gro bar mi byed de ma song ba'i phyir/ dper na de las gzhan pa 'gro bar mi 'dod pa'i lam bzhin no/ /bgom par yang 'gro ba po yin par gyur pa dang / de ma yin par gyur pa dang / yin pa dang ma yin par gyur pa gsum 'gro bar mi byed de/ song ba dang / ma song ba ma gtogs par bgom pa shes par mi 'gyur ba'i phyir/ dper na nam mkha'i bya rjes bzhin no/ /de'i phyir de ltar rigs pa dang lung dag gis rnam pa thams cad du yongs su brtags na 'gro ba la sogs pa rnam pa gsum po dag ji ltar yang mi srid pa/ de phyir 'gro dang 'gro po dang / /bgrod par bya ba 'ang yod ma yin/ /zhes bya ba ni 'bad pa'i 'bras bu ji skad bstan pa'i dbang gis mjug bsdu ba'o zhes bya ba ni rab tu byed pa 'di'i mjug bsdu ba yin no/ /slob dpon gyi bya ba dang byed pa po lhag ma dgag pa yang phyogs 'dis bstan to zhes bya ba ni sngar 'jig rten ni phal cher bya ba mang po'i tha snyad kyi dbang gis bya ba'i dngos po la mngon par zhen pas mngon par zhen pa'i zug rngu de bsal ba'i phyir 'gro ba'i mtshan nyid kyi bya ba gcig bsal na bya ba lhag ma dag bsal ba yang sla bas de'i phyogs snga ma nye bar gzhag go zhes smos pa de'i mjug bsdu ba yin no/ /slob dpon gyi zhal snga nas kyis 'gro ba'i bya ba dang byed pa po dgag pa'i phyogs ji skad bshad pa 'dis bya ba dang byed pa po lhag ma rnams dgag pa yang de bzhin du bstan pa yin no/ /de la 'dir rab tu byed pa'i don ni 'gro ba ngo bo nyid med pa nyid bstan pas/ rten cing 'brel par 'byung ba 'ong ba med pa dang / 'gro ba med pa'i khyad par dang ldan pa bstan pa yin no zhes bya ba ni tshad ma'i 'bras bu yin no/ /'gro ba dgag pa 'dis lung gi don ci zhig grub pa bstan pa'i phyir dang / 'gro ba dgag pa bsgrubs pa 'di la gzhan dag na re/ rtog ge skam po'i bstan bcos tsam nyi tshes bsgrubs so zhes zer ba bsal ba'i phyir/ 'dir yid ches pa'i lung gi khungs des kyang bsgrub par bya ste/ de'i phyir 'phags pa blo gros mi zad pas bstan pa'i mdo las/ gang la 'gro ba med pa dang 'ong ba med pa de ni 'phags pa rnams kyi 'gro ba'o zhes gsungs pa'i lung gi don de grub cing yid ches pa'i lung gi khungs des 'gro ba dgag pa grub pa yin no/ /'di skad bstan te/ 'phags pa blo gros mi zad pas bstan pa'i mdo las/ 'phags pa sha ra dwa ti'i bus/ 'phags pa blo gros mi zad pa la dris pa/ rigs kyi bu khyod ga las 'ongs/ /des smras pa/ btsun pa sha ra dwa ti'i bu khyod la da dung yang 'ong ba'i 'du shes 'byung ngam/ gnas brtan gyis smras pa/ kho bos 'du shes yongs su shes so/ /'phags pa blo gros mi zad pas smras pa/ 'du shes yongs su shes pa dang ldan pa la ni gnyis kyi blo mi 'byung ste/ 'di ltar 'du shes yongs su shes pa dang ldan pa ni gnyis su mi dmigs pa'i phyir rnam par mi rtog pa yin no/ / gzhan yang 'ong ba med pa zhes bya ba de ni kun du sbyor ba'i tshig yin la/ 'gro ba zhes bya ba de ni bral ba'i tshig yin no/ /gang la don dam par kun du sbyor ba'i tshig med pa dang 'bral ba'i tshig med pa de la ni 'ong ba yang med/ 'gro ba yang med de 'ong ba med pa dang / 'gro ba med pa de ni 'phags pa rnams kyi 'gro ba'o/ /gnas brtan gyis 'ong ba med pa dang 'gro ba med pa'i de kho na rtogs pa de ji ltar rtogs na/ de kho na rtogs pa dang mi mthun par 'gro ba dang 'ong ba'i rnam par rtog pa 'byung bar 'gyur zhes gsungs pa de grub pa yin no/ /rigs kyi bu de bzhin gshegs pa la ni 'ong ba'am 'gro ba med do zhes gsungs pa ni/ byang chub sems dpa' rtag tu ngu shes rab kyi pha rol tu phyin pa mnyan pa'i lhag pa'i bsam pa la zhugs pas de bzhin gshegs pa mtha' yas pa mthong nas/ ting nge 'dzin de las langs pa dang / de bzhin gshegs pa de dag mi snang nas/ de nas des mthar gyis grong khyer spos ngad can du song ste/ 'phags pa chos 'phags la dris pa/ rigs kyi bu bdag gis de bzhin gshegs pa mtha' yas pa dag mthong nas mi snang bar gyur pa de dag gang nas byon gang du bzhud/ chos 'phags kyis smras pa/ rigs kyi bu de bzhin gshegs pa rnams la ni 'ong ba'am 'gro ba med de/ de bzhin nyid gang yin pa de ni de bzhin gshegs pa'o/ /rigs kyi bu yang dag pa'i mtha' la ni 'ong ba'am 'gro ba med de/ yang dag pa'i mtha' gang yin pa de ni de bzhin gshegs pa'o/ /de bzhin du stong pa nyid dang / mtshan ma med pa dang / skye ba med pa dang / 'gag pa med pa rnams la ni 'ong ba'am 'gro ba med de/ stong pa nyid la sogs pa gang yin pa de ni de bzhin gshegs pa'o/ /de bzhin du sgyu ma dang / smig rgyu dang / rmi lam dang / dri za'i grong khyer la sogs pa la ni 'ong ba dang 'gro ba med de/ sgyu ma la sogs pa gang yin pa de ni de bzhin gshegs pa'o/ /rigs kyi bu don dam par ni dmigs su med la/ tha snyad du ni dper na/ rgyud dang / shing bu dang / lag ca dang / mi'i rtsol ba la brten nas pi wang gi sgra 'byung yang / sgra de ni rgyud la sogs pa rkyen rnams la yang dmigs su med la/ rgyud la sogs pa las gzhan na yang dmigs su med do/ /rigs kyi bu de bzhin du dge ba'i rtsa ba rnams dang / don du gnyer ba rnams kyi sems bstod pa la brten nas/ de bzhin gshegs pa mthong ba 'byung yang / de bzhin gshegs pa ni rkyen de dag re re la dmigs su med do zhes gsungs pa ste/ de yang grub pa yin no/ /'di la 'ong dang 'gro ba gang yang med/ /chos rnams thams cad nam mkha' ji bzhin no/ /zhes bya ba ni/ 'phags pa tshangs pa khyad par sems kyis zhus pa'i mdo las gsungs te/ ma skyes pa zhes bya ba'i don de yang ma grub pa yin no/ /de bzhin du gang la 'gro bar bya ba'am/ 'ong bar bya ba rdul phran tsam yang med pa de ni/ byang chub sems dpa'i shes rab kyi pha rol tu phyin pa ste/ de la 'ong ba dang 'gro ba mi snang ngo / /rab kyi rtsal gyis rnam par gnon pa/ gzugs la 'ong ba dang 'gro ba mi snang ngo / /tshor ba dang / 'du shes dang / 'du byed rnams dang / rnam par shes pa la 'ong ba dang 'gro ba mi snang ngo / /gang la gzugs dang / tshor ba dang / 'du shes dang / 'du byed rnams dang / rnam par shes pa'i 'ong ba dang / 'gro ba mi snang ba de ni shes rab kyi pha rol tu phyin pa'o zhes bya ba la sogs pa gsungs pa de dag grub pa yin no zhes bya ba ni/ bcom ldan 'das ma shes rab kyi pha rol tu phyin pa rab kyi rtsal gyis rnam par gnon pa'i mdo las/ chos thams cad la 'ong ba dang / 'gro ba med par bstan pa ste/ de dag la sogs pa mdo sde mtha' yas pa dag las/ rten cing 'brel par 'byung ba 'ong ba med pa dang / 'gro ba med pa'i don 'di nyid gsungs pa'i lung gi don de grub cing / yid ches pa'i lung gi khungs de dag gis/ 'ong ba dang 'gro ba dgag pa bsgrub pa'i phyir/ rtog ge skam po'i bstan bcos tsam nyi tshes bsgrubs pa ma yin no zhes bya ba'i tha tshig go/ /de ltar 'gro ba dang 'ong ba med pa ston pa'i mdo sde'i mtha' gang dag yin pa de dag 'gro ba med pa dang / 'ong ba med pa'i rab tu byed pa'i skabs 'dis/ rnam par bshad par bya ba yin par ston pa yang / slob dpon gyi zhal snga nas kyi mkhas pa'i mkhyen rgya nyid yin no/ /slob dpon legs ldan byed kyis nye bar sbyar ba dbu ma rtsa ba'i 'grel pa shes rab sgron ma las/ song ba dang / ma song ba dang /

CLOSE WINDOW