བོད་ཡིག

e-texts based on the ACIP/ALL Input

@##/ /rgya gar skad du/ sa kha li ta pra marda na yuk+tA he tu sid+d+hi nA ma/ bod skad du/ 'khrul pa bzlog pa'i rigs pa gtan tshigs grub pa zhes bya ba/ 'jam dpal gzhon nur gyur pa la phyag 'tshal lo/ /ston pa 'jig rten sgron ma dang / /nyon mongs nad sel bdud rtsi'i chos/ /slob dang mi slob la sogs la/ /sgo gsum dang bas phyag 'tshal te/ /snyigs ma lnga yi 'jig rten 'dir/ /'gro la phan phyir lam bshad pa/ /bdud dang bdud la phyogs pa dag /lam la log par lta ba'i phyir/ /rang gi lta bas bden lam nyams/ /nor ba'i lam la lam du 'dod/ /yang dag pa la log rtsod pa/ /de dag bsal phyir bshad par bya/ /sdom ni/ yod la med par 'khrul dang mi rtag nyid la nges par 'khrul/ /med la yod par 'khrul dang rtag pa nyid du nges par 'khrul/ /'khrul las 'khrul pa slu zhing bslus pas 'khrul pa'i 'khrul pa sgrub / /'khrul pa'i dbang gis yang dag don la 'khrul te rgyu la 'khrul/ /de 'khrul rkyen gyis 'bras bu ngan song gsum du rtag tu 'khrul/ /'khrul dang ma 'khrul shes pas 'khrul pa bsal phyir ma 'khrul te/ /'khrul pa dag la bstan phyir 'khrul pa med par bshad par bya/ /'khrul pa'i skyon dang ma 'khrul yon tan shes phyir 'khrul 'di brtag /de la yod pa la med par 'khrul pa ni kha cig na re/ ma shi bar du bde bar 'tsho/ /shi nas de yi spyod yul med/ /lus kyang thal ba bzhin song nas/ /slar 'tsho bar lta ga la 'gyur/ /de phyir snga phyi yod ma yin/ /tshe 'di nyid la bde ba'i phyir/ /lha mchod 'dre srin mnan byas na/ /btsan phyug mthu stobs 'grub par 'gyur/ /de la chos 'di pa na re/ nyi ma nyi ma nyi ma'i grangs/ /sa bon myu gu rgyu 'bras de/ /goms pa'i dbang gis nu zho'o/ /gcig 'gal skye ba dpag tu med/ /dpal dang gzi byin longs spyod phyir/ /lha klu gnod sbyin srin po bgegs/ /de dag mchod mnan phan na lha / /rang nyid 'dod bzhin grub par rigs / /yang gzhan kha cig na re/ phyi nang skye mched chos rnams thams cad ni/ /ngo bo nyid las grub pa gzhan las min/ /sran zlum skyer tsher gzang rings rno ba dang / /rma bya'i mjug ma mgrin pa'i tshogs bkra dang / /nyi shar chu rnams thur du 'bab pa rnams/ /ngo bo nyid las grub ste rgyu yod min/ /de la chos 'di pa na re/ gal te nam mkha' rten med la/ /sran dang cher sogs yod na ni/ /rgyu med ngo bo nyid mthong na/ /de dag sa sogs brten nas skye/ /chu yang gyen du thur 'bab cing / /nyi ma phyogs bzhir 'drar shar na/ /rgyu med ngo bo nyid bden na/ /chu ni sa yi shugs kyis 'bab/ /ri rab ji bzhin nyi ma 'khor/ /yang gzhan kha cig na re/ skye ba po ni shes pa yod min te/ /bdag gi bde sdug len la rang dbang med/ /dbang phyug gis ni yang na g.yang sa 'am/ /yang na mtho ris dag tu skye bar byed/ /'di la chos 'di pa na re/ sa gzhi bzang ngan mtho ris ngan song gi / sa bon dge sdig nas dang gro 'dra ba/ /byed pa dbang phyug 'dra ba'i mis btab na/ /skye bar 'dra yang gro nas so sor smin/ /de 'drar dbang phyug mi dbang dge sdig dbang / yang kha cig na re/ dper na rdza ma be'u bzhin du/ /mtho ris ngan song gar 'gro ba/ /rig pa'i rgyal po rang dbang che/ /rgyu rkyen gzhan la brten mi dgos/ /de la chos 'di pa na re/ bye'u bzhin rang dbang yod pa yang / /yul la thogs pa med na lta/ /mtho ris ngan song bye'u bzhin na/ /de ni yul la thogs pa yod/ /de bzhin dge sdig yul gyis kyang / /rig pa'i rgyal po rang dbang med/ /de phyir mtho ris ngan song gi / gar 'gro dge sdig gnyis kyi dbang / /de la mi rtag pa nyid la nges par 'khrul pa ni kha cig na re/ 'di na rgyan thogs bza' btung ldan pa dang / /'khor dang bzhon pa gnas dang smra tshig dang / /ci bsam ci sgrub de dag pha rol na/ /de bzhin byed de 'di dag thams cad rtag / de la chos 'di pa na re/ 'di la ci byed pha rol na yang de bzhin rtag na ni/ /dper na dbyar dro dgun grang ston smin dpyid skye gcig tu rtag rigs na/ /'di ltar 'di dag mi rtag ci phyir gling bzhi'i nyi ma'i dbang gis 'gyur/ /de bzhin sems can 'di dag pha rol mi rtag las kyis bsgyur/ /yang kha cig na re/ pha bu spun dang chung ma gnyen rnams ni/ /'di na ji bzhin pha rol de bzhin te/ /nye mdza' 'di dag rtag tu 'grogs par nges/ /bram ze smra la mkhas pas de skad zer/ /de la chos 'di pa na re/ dper na sA lu'i snye ma la/ /lhan cig 'bras bu mang smin yang / /la la sa bon la la btsos / /sa bon rnams kyang phyogs mtshams 'thor / /lhan cig smin pa gang yang med/ /de bzhin nye mdza' 'di dag kyang / /pha bu chung ma spun ma nges/ /gzhan yang mtho ris ngan song du/ /nas dang rigs kyang ma nges so/ /de la med pa la yod par 'khrul pa ni/ kha cig na re/ skyes bu kun gyi byed pa po/ /bde sdug myong ba'i shes mthong ba/ /de yod des ni thams cad byed/ /rtag pa gcig pu shes pa'o/ /de la chos 'di pa na re/ dper na thag pa la ni sbrul du 'khrul pa bzhin/ /chos 'di thag pa 'dral ba dag tu mthong / /de la sbrul med de bzhin chos la bdag med de/ /mthong ba ma dag shes bzhin mu stegs bdag tu rmongs/ /yang kha cig na re/ sa chu me rlung 'byung ba'i dngos po 'di/ /rtag tu yod de 'di dag med mi srid/ /rang bzhin mi 'gyur mi tsha chu grang bzhin/ /sa sra rlung g.yo 'di dag rtag par nges/ /'di la chos 'di pa na re/ sa sogs 'byung ba bzhi po 'di dag ni/ / phra rab rdul las grub pas rags pa min/ /phyogs cha drug gis phra rab de yang med/ /'jig pa gsum gyis dngos po 'di mi rtag /yang kha cig na re/ dbang phyug tshangs pa khyab 'jug dang / /phya dang srid pa rnams kyis bskos/ /tshe zad lus gzugs 'dug gnas dag /byed pa pos byas phyir mi drang / /de la chos 'di pa na re/ dbang phyug la sogs byed pa pos/ /thams cad byed pa'i mthu yod na/ /gzhan dag de ltar byas pa bas/ /bdag nyid legs par bya ba'i 'os/ /byed pa po nyid mi rtag la/ /skye shi sdug bsngal dpag med na/ /des byas bden par ga la 'gyur/ /rgya mtsho'i rin chen 'od snang la/ /byed pa'i mthu lta ga la yod/ /de la rtag pa nyid du 'khrul pa ni/ kha cig na re/ 'gro ba rigs lnga'i rgyud la yang / /'khor ba rtag pa bzhin du 'dod/ /lha ni lhar skye mi ni mir skye ste/ /bzhi po gzhan yang de bzhin skye/ /de la chos 'di pa na re/ 'gro ba rigs lnga de ltar so sor nges nas ni/ /mang yang mang zhing nyung yang nyung rtag rigs 'os na/ /mang yang nyung zhing nyung yang mang ste mi rtag pas/ /dge sdig las kyi rkyen gyis so sor skye bar rigs/ /yang kha cig na re/ kha dog dkar po la sogs la/ /kha dog dkar po la sogs skye/ /dran pa gsal dang mi gsal dang / /grum po dag la'ang de bzhin skye/ /de la chos 'di pa na re/ dper na gser dang dngul sogs la/ /seng ge rta dang glang la sogs/ /mi mthun pa dag blugs byas na/ /lugs dpe mthun dang 'dra ba bzhin/ /sems rgyud dri za mi gcig kyang / /'dod pa chags pa'i rkyen gyis ni/ /kha dog lus gzugs dran shes dag /lugs dpe bzhin du de mthun no/ /de la 'khrul pas 'khrul pa bslu ba ni kha cig na re/ tshangs par gyur na gzi brjid che/ /dbang phyug thob na mthu stobs che/ /brgya byin khyab 'jug de bzhin te/ /klu dang de bzhin sman rnams bde/ /de phyir de dag thob pa'i thabs/ /gang dag sna tshogs yod pa dag /bya ba sla ba cis smos te/ /dka' ba dag kyang bya bar 'os/ /de la chos 'di pa na re/ dper na sgyu ma'i sprul pa la / /sgyu ma mi shes bden mthong nas/ /sgyu ma'i sprul pas de bslu zhing / /'khrul pa yod med rtag sogs la/ /sgyu ma bzhin du de 'khrul bas/ /skye bo rnams la thams cad bslus/ /lta ba ngan pa'i dbang song bas/ /yod med rtag chad mtha' la gnas/ /de la 'khrul pas 'khrul pa'i 'khrul pa bsgrub pa ni/ kha cig na re/ me lnga bsten pas tshangs pa 'grub/ /dbyug gu gsum pas dbang phyug che/ /bya yi dka' thub rtogs 'dod rigs/ /khyi yi brtul zhugs smin drug 'khor/ /nang par bsrung ba dus nges pa'o/ /de la chos 'di pa na re/ me dang dbyug gu'i dka' thub ni/ /lta ba 'khrul pa'i dka' thub ste/ /dper na ri dwags kha skom zer/ /chu 'dod smig rgyu snyeg pa 'dra/ /de la 'khrul pa'i dbang gis yang dag pa'i don la 'khrul pa ni/ thams cad rtag par rtog pa bzhi/ /kha cig rtag par rtog pa bzhi/ /rgyu med smra ba rnam pa gnyis/ /mtha' la rtog pa bzhi dang ni/ /lha mi spong bar rtog pa bzhi/ /bco brgyad de dag sngon gyi mtha'/ /'du shes can rtog bcu drug dang / /'du shes med par rtog pa brgyad/ /'du shes yod min med min brgyad/ /chad par lta bdun mthar lta lnga/ /bzhi bcu rtsa bzhi phyi ma'i mtha'/ /drug cu rtsa gnyis bden par lta/ /de dag bden pa'i don la 'khrul/ /de la rgyu la 'khrul pa ni/ kha cig na re/ dus kyis 'byung ba rnam smin byed/ /dus kyis skye dgu rnams 'byin byed/ /dus kyis gnyid log sad par byed/ /dus kyis skye zhing dus kyis 'chi/ /dus las 'da' bar dka' ba'o/ /de la chos 'di pa na re/ dus kyis thams cad byed na go /nam mkha' lta bur rten med la/ /sa bon 'bras bu skye bar rigs/ /'gro ba rigs lnga'i 'khor ba yang / /pha med ma la bu skye zhing / /ma med pha la'ang de bzhin te/ /rgyu rkyen med na dus dbang nyams/ /kha cig na re/ ba ni ba sbra rnams kyi gzhi/ /chu shel chu rnams ji bzhin du/ /blag sha yal ga rnams ji bzhin/ /skyes bu lus can kun gyi rgyu/ /de la chos 'di pa na re/ thag pa sbrul du 'khrul pa ltar/ /skyes bu 'khrul pas ming btags pa/ /rang ma grub pa gzhan gyi rgyu/ /skyes bu de yis ji ltar byed/ /yang kha cig na re/ de tsam nyi shu lnga shes shing / /ral pa'am spyi bo gtsug phud kyis/ /cha lugs gang du gnas pa ni/ / grol 'gyur 'di la the tshom med/ /de la chos 'di pa na re/ de ltar grangs shes mtho ris 'gyur na ni/ /rdo shing bgrangs pas gser sogs snang 'gyur 'os/ /grangs shes rdo shing 'dra la mtho ris gser bzhin te/ /kun rdzob rigs par 'gal na don du smos ci dgos/ /de ni bkres pas nga bgrangs zer ba 'dra/ /yang kha cig na re/ lus can 'di dag skyes pa ni/ /rgyu las ma byung rang skyes te/ /dper na spang kha'i sha mo la/ /sa bon rgyu ni med bzhin no/ /de la chos 'di pa na re/ de nyid dpe las bdag gis bzung / /sa la brten nas rlan gyis bskyed/ /rgyu med ma yin yod pa bzhin/ / rgyu rkyen las kyis bskyed par rigs/ /de la 'khrul pa'i rkyen gyis 'bras bu ngan song gsum du 'khrul pa ni/ 'khrul pa'i dbang gis dben ma mthong / /rgyu 'bras mi bslu las ma shes/ /nyon mongs lnga la mngon zhen nas/ /skye gnas bzhi po'i gnas su skye/ /byol song mngal dang sgo nga dang / / drod gsher las skyes yi dwags ni/ /mngal skyes dmyal ba rdzus te skye/ /kha dog rigs gzugs grangs med kyang / /gnyis dang bzhi pa mang ba dang / /rkang med rigs dang rnam bzhir bsdu/ /gcig la gcig gis 'tshe gyur pas/ /bsrung phyir gab dang snyog pa'i phyir/ /'bros dang bkol spyad brdeg btsog dang / /bsad dang gsod dang gsod 'gyur phyir/ /sdug bsngal dpag med myong ba yin/ /khab mig kha dang rta rnga'i mgrin/ /lto ba ri yi gtos tsam nyid/ /rkang lag thur ma bzhin du phra/ /shing rta 'khol 'dra dud pa 'thul/ /yid du 'ong ba'i zas dang skom/ /bkod pa bltas nas lag bsnyabs pas/ /rab 'jigs skyes bu go cha can/ /mtshon rnon dbyig pa thogs pa yis/ /rgyab nas rdul bzhin 'gyur mthong nas/ /len pa'i dbang med bkres gdungs 'gyur/ /la las bza' btung khar bcug na/ /me lcer 'bar zhing 'tshig 'gyur te/ /la lar rnag khrag dri nga yang / /mi rnyed lus las btsags las 'don/ /la las bza' btung mi mthong zhing / /mi thos phyogs bcur rgyug par 'gyur/ /mnar med rab tsha tsha ba dang / /ngu 'bod che dang ngu 'bod nyid/ /bsdus 'joms thig nag yang sos brgyad/ /chu bur can dang chu bur rdol/ /so thams a chu kyi hud zer/ /ut+pal lta bu pad+ma gnyis/ /lus dang sgra 'gyur ming btags brgyad/ /nyi tshe nye 'khor gcig bcu drug /nyes spyad rnam smin ma zad par/ /de dag 'chi bar mi 'gyur te/ /bris mthong bshad thos klags dran yang / /'jigs skye nyams myong ci zhig smos/ /'jig rten khams rnams sdug bsngal gang / /mthong ba'i chos la yod do cog /gcig tu bsdus pas dmyal ba yi/ /sdug bsngal gang chung 'bum gyi char / /mi phod cung zad de mi mtshungs/ /de kun ma rig lta las byung / /de phyir ngan song gsum du 'khrul/ /de la 'khrul pa med par bshad par bya ba ni/ rgyu rkyen yan lag bcu gnyis po/ /tshe gsum rigs gsum yan lag lnga/ /nyi ma ji bzhin 'gro bzhin te/ /shing rta'i 'phang lo bzhin du 'khor/ /nyes pa bcu gnyis srid rtsa rnams/ /dang po bkag pas kun bkag cing / /rgyu 'bras yang dag bden shes bya/ /yang dag gyur pa bcu gnyis rnyed/ /thar pa'i lam la de gnas phyir/ /yon tan dpag med thob pa yin/ /'di la dge ba gang yod des/ /lam lngar 'khor ba'i sems can rnams / /chos nyid shes nas nyes spangs te/ /bde ba'i lam lngar bgrod par shog /'khrul pa bzlog pa'i rigs pa gtan tshigs grub pa zhes bya ba/ slob dpon 'phags pa lhas mdzad pa rdzogs so// //rgya gar gyi mkhan po sarba dz+nyA de ba dang / zhu chen gyi lo tsA ba ban+de dpal brtsegs kyis bsgyur cing zhus te gtan la phab pa'o// //[# ]@##/ /rgya gar skad du/

CLOSE WINDOW